༄#། །རྒྱ་གར་སྐད་དུ། ་་ཤྲཱི་ཛྙཱ་ན་གུ་ཧྱ་ཏནྟྲ་རཱ་ཛཱ། ་་བོད་སྐད་དུ། ་་དཔལ་ཡེ་ཤེས་གསང་བའི་རྒྱུད་ཀྱི་རྒྱལ་པོ། ་དཔལ་བདེ་བ་ཆེན་པོ་ལ་ཕྱག་འཚལ་ལོ། །བྱང་ཆུབ་ཕྱོགས་ཆོས་སུམ་བཅུ་རྩ་བདུན་གྱི། །རང་ལུས་རྩ་ཡི་འཁོར་ལོ་བཞིའི་གཙོ་བོ། །སྙིང་པོ་དེ་ལ་ཡང་དག་ཕྱག་འཚལ་ལོ། །དབང་བཞིའི་དེ་ཉིད་བདག་ལ་གསུངས། །ཉོན་ཅིག་རྡོ་རྗེ་སྙིང་པོའི་བདག་།བསྐྱེད་པའི་རིམ་པའི་ལྷ་རྣམས་ཀྱི། །དེ་ཉིད་དང་པོར་བཤད་བྱ་སྟེ། །དྲུག་བཅུ་རྩ་བཞི་དཔེ་བྱད་ཡིན། །སུམ་བཅུ་རྩ་བདུན་བྱང་ཆུབ་ཕྱོགས། །ལྔ་ནི་ཡེ་ཤེས་ལྔ་ཡིན་ཏེ། །དཔའ་བོ་གཅིག་པ་ཆོས་ཀྱི་དབྱིངས། །ཕྱག་མཚན་སྐུ་མདོག་གཞན་ནས་གསུངས། །གུ་ཧྱའི་རྡོ་རྗེ་དྲིལ་བུའི་ཚད། །ནས་དང་སོར་ཚིགས་ཡིན་པར་འདོད། །དེ་ཉིད་ཐབས་དང་ཤེས་རབ་ཡིན། །དོན་དམ་ཉིད་ལ་དབྱེར་མེད་དེ། །བསྒོམ་བྱ་མེད་དེ་སྒོམ་པ་མེད། །བསྒོམས་པས་ཐོབ་པ་ཅི་ཡང་མེད། །རྒྱུ་དང་རྐྱེན་གྱིས་བསྐྱེད་དུ་མེད། །སེམས་ཀྱི་གཞི་ལ་སྐུ་ལྔ་དང ། །སྟོན་པ་མེད་ཅིང་བསྟན་པ་མེད། །འཇིགས་དང་རྣམ་རྟོག་ཀུན་དང་བྲལ། །དེ་ཉིད་བཞི་པའི་དེ་ཉིད་དོ། །དང་པོ་རླུང་གི་དེ་ཉིད་དེ། །སྲོག་རྩོལ་གཉིས་ནི་ཨ་དང་ཧཾ། ། ནི་ཆོས་རྣམས་ཐོག་མ་ནས། །མ་སྐྱེས་པ་ཡི་དོན་ཡིན་ནོ། །ཧཾ་ནི་གཟུང་འཛིན་གཉིས་ཀྱིས་སྟོང ། །ལྡང་འཇུག་གསུམ་ནི་སྐུ་གསུང་ཐུགས། །སེམས་ཀྱི་གཞི་དང་སྐུ་ལྔ་དང ། །རྣམ་པར་ཐར་དང་སྟོང་པ་དང ། །དེ་བཞིན་མཚན་དང་དཔེ་བྱད་སོགས། །དེ་དག་རླུང་གི་དེ་ཉིད་དེ། །དེ་ནས་ཐིག་ལེའི་དེ་ཉིད་ཀྱང ། །ཉི་ཟླ་ཐབས་དང་ཤེས་རབ་སྟེ། །སྔགས་ཀྱི་ཕྲེང་བ་མཚན་དཔེ་ཡིན། །ཐིག་ལེ་ཡེ་ཤེས་ལྔ་རང་བཞིན། །གཉིས་སུ་མེད་པའི་དེ་ཉིད་ཡིན། །ཕྲ་མོ་ལ་སོགས་གཞན་ནས་ཤེས། །དེ་ནས་འོག་གི་སྒོ་དག་ནི། །དེ་ཉིད་ཡང་དག་བཤད་བྱ་སྟེ། །རྩ་གསུམ་སྐུ་གསུང་ཐུགས་ཀྱི་སྟེ། ་་།རྩ་ལྔ་ཡེ་ཤེས་ལྔ་ཡིན་ནོ། །ཙཎྜཱ་ལི་ནི་ཉི་ཤུ་བཞི། །དེ་ཉིད་ཡེ་ཤེས་ཉི་ཤུ་བཞི། ། 87.37a ཆོས་སྐུའི་ཕྲིན་ལས་ཉི་ཤུ་བཞི། །ཁ་སྦྱར་ཐབས་དང་ཤེས་རབ་སྟེ། །འཛག་དང་འབར་བ་གཉིས་མེད་ཡིན། །འཁོར་ལོ་བཞི་ནི་སྐུ་བཞི་སྟེ། །དྲུག་ནི་དེ་ཉིད་དྲུག་ཡིན་ཏེ། །སྒྲོལ་མ་རླུང་གི་དེ་ཉིད་དེ། །མེ་ནི་གོས་དཀར་ངོ་བོ་ཉིད། །བཅུ་དྲུག་སྟོང་པ་བཅུ་དྲུག་ཡིན། །བཞི་ནི་ཡེ་ཤེས་བཞི་ཡིན་ནོ། །རྣམ་པར་ཐར་དང་སྟོང་པ་དང ། །དེ་བཞིན་མཚན་དང་དཔེ་བྱད་དང ། །རིག་སྔགས་སྙོམས་འཇུག་ཕྲ་བ་དགུ། །ཡེ་ཤེས་ལྔ་བཅུ་ལ་སོགས་པ། །རྩ་འདབ་དེ་ཉིད་ཡིན་པར་ངེས། །རྩ་དེ་གནས་པའི་རིམ་པ་ཡང ། །འཁོར་ལོ་བ་ཐག་ཁུག་པ་ལས། །གཡས་གཡོན་སྦྲུལ་ལྟར་འཁྲིལ་བ་སྟེ། །ཕྱི་ཡི་གཡས་གཡོན་གཞུ་ལྟ་བུ། །གསུམ་པའི་དབང་གི་དེ་ཉིད་ཀྱང ། །སིཧལ་ཤེས་རབ་ཆོས་དབྱིངས་ཏེ། །ག་པུར་ཐབས་ཀྱི་ཡེ་ཤེས་བཞི། །རྩ་ནི་འོག་མིན་གནས་ཡིན་ཏེ། །དགའ་བ་མཆོག་དགའ་བྱང་ཆུབ་ཕྱོགས། །རང་བཞིན་དགའ་བ་ཆོས་སྐུ་སྟེ། །བྲལ་བའི་དགའ་བ་གཟུགས་སྐུ་གཉིས། །བཅུ་དྲུག་སྟོང་པ་བཅུ་དྲུག་གོ། །རྒྱུད་ཀྱི་ཚུལ་དུ་སྒྱུ་མ་ཙམ། །གང་ཞིག་རང་རིག་འདོད་པས་ཀྱང ། །དང་པོར་ངོ་བོ་ཤེས་བྱ་སྟེ། །དེ་ནས་དེ་ཉིད་ཤེས་པར་བྱ། །གལ་ཏེ་དེ་ཉིད་མི་ཤེས་ན། །ཟབ་མོའྀ་ལམ་ཉིད་སྒོམ་བྱེད་ན། །འབྲས་བུ་མེད་ཅྀང་བརླག་པར་ངེས། །ལྷ་ཡི་དེ་ཉིད་མ་ཤེས་ན། །དུར་ཁྲོད་གནས་པའི་སྲིན་པོ་འདྲ། །དེ་བཞིན་དུར་ཁྲོད་སྲིན་མོ་འདྲ། །སྤྱོད་པའི་དེ་ཉིད་མ་ཤེས་ན། །གྲོང་ཁྱེར་གནས་པའི་སྨྱོན་པ་འདྲ། །ཁྱི་ཕག་སྲིན་པོ་རཀྵ་འདྲ། །ཕྱག་མཚན་དེ་ཉིད་མ་ཤེས་ན། །བརྒྱ་བྱིན་ལག་ན་མཚོན་ཐོགས་འདྲ། །ཕྱག་རྒྱའི་དེ་ཉིད་མ་ཤེས་ན། །རྒྱལ་པོ་པང་གི་བཙུན་མོ་འདྲ། །རླུང་གི་དེ་ཉིད་མ་ཤེས་ན། །བརྒྱ་བྱིན་སྤྱི་བོའི་དུ་བ་འདྲ། །རྩ་ཡི་དེ་ཉིད་མ་ཤེས་ན། །ཙན་དན་ཤིང་གི་སྦྲུལ་སོགས་འདྲ། །ལུས་ཀྱི་གཉེར་མ་དག་དང་འདྲ། །ལུས་ཀྱི་དྲི་མ་ཆུ་དང་འདྲ། །ཐིག་ལེའི་དེ་ཉིད་མ་ཤེས་ན། །ཙན་དན་ཤིང་གི་འཛེར་པ་འདྲ། །འཁོར་ལོའི 87.37b དེ་ཉིད་མ་ཤེས་ན། །བརྒྱ་བྱིན་ལག་ན་འཁོར་ལོ་འདྲ། །དེ་བཞིན་སྲིད་པའི་འཁོར་ལོ་འདྲ། །པད་མའི་དེ་ཉིད་མ་ཤེས་ན། །འདམ་བུ་ཚལ་གྱི་པདྨ་འདྲ། །སྟུག་པོའི་དེ་ཉིད་མ་ཤེས་ན། །མཆོད་རྟེན་གྱི་ནི་འཁོར་ལོ་འདྲ། །ཁ་སྦྱོར་དེ་ཉིད་མ་ཤེས་ན། །ཐལ་མོ་གཡས་གཡོན་སྦྱར་བ་འདྲ། །གནས་ཀྱི་དེ་ཉིད་མ་ཤེས་ན། །འཁོར་ལོ་སྒྱུར་རྒྱལ་ཕོ་བྲང་འདྲ། །བྱང་སེམས་དེ་ཉིད་མ་ཤེས་ན། །མི་གཙང་སྒོ་ཡི་ལུད་པ་འདྲ། །སིཧལའི་དེ་ཉིད་མ་ཤེས་ན། །མཚོན་སོགས་ལས་བྱུང་ཁྲག་དང་འདྲ། །དགའ་བ་དེ་ཉིད་མ་ཤེས་ན། །སྨད་འཚོང་མ་ཡི་འདོད་ཆགས་འདྲ། །སྤང་བྱའི་དེ་ཉིད་མ་ཤེས་ན། །གྲོང་ཁྱེར་མེད་པའི་རྒྱལ་པོ་འདྲ། །གཉེན་པོའི་དེ་ཉིད་མ་ཤེས་ན། །རྒྱལ་པོ་མེད་པའི་གྲོང་ཁྱེར་འདྲ། །རང་རིག་དེ་ཉིད་མ་ཤེས་ན། །འདུས་བྱས་ནམ་མཁའ་སྟོང་པ་འདྲ། །གཞན་ཡང་དེ་ཉིད་བཅཝ་བརྒྱད་ནི། །བླ་མའི་ཞལ་ནས་ཤེས་པར་བྱ། །ཐམས་ཅད་སྒྱུ་མའི་ཚུལ་དང་ནི། །རྨི་ལམ་གློག་དང་སྤྲིན་ལྟ་བུ། །དེ་ཉིད་ཤེས་ན་གྲོལ་བར་འགྱུར། །ཀྱེ་ཧོ་མགོན་པོ་ཐུགས་རྗེ་ཆེ། །རང་རིག་ཡེ་ཤེས་ཚོལ་བ་ལ། །རང་དང་གཞན་གྱི་སྡེ་པ་ལ། །འདི་ལ་ཁྱད་པར་མེད་དམ་ཅི། །བཅོམ་ལྡན་འདས་ཀྱིས་བཀའ་སྩལ་པ། །ཁྱད་པར་ཆེན་པོ་དེ་ཉིད་དེ། །གཞན་ནི་ཁྱད་པར་དབང་བཞི་དང ། །དེ་ཡི་ལམ་གྱི་དེ་ཉིད་བརྟགས། །ཆང་བ་བདག་དང་དབང་ཕྱུག་དང ། །ཕྱབ་དང་བྱེད་པ་པོ་ཉིད་ལས། །རྒྱུ་སོགས་རྒྱུད་ལས་ཁྱད་པར་འཕགས། །གང་ཟག་བདག་དང་བྲལ་བའི་ཕྱིར། །ཉན་ཐོས་རང་རྒྱལ་ཐེག་ཆེན་དང ། །རླུང་སོགས་ཆོས་ཀྱི་བདག་གིས་བཅིངས། །དམན་པ་རྣམས་ཀྱི་སྣང་བས་ཁྱད། །ཐེག་ཆེན་རང་བཞིན་ལྷ་ཡིས་ཁྱད། །རྣལ་འབྱོར་རྣལ་འབྱོར་ཆེན་པོ་སོགས། །དེ་ཉིད་ཀྱི་ནི་ཁྱད་པར་ཆེ། །ལེགས་པར་བསྟན་གྱིས་ལེགས་པར་བཟུང ། །དེ་ནས་འཁོར་ཐམས་ཅད་དགའ་ཞིང་ཡིད་རངས་པར་གྱུར་ཏོ། །དཔལ་རྡོ་རྗེ་སེམས་དཔའ་ཡེ་ཤེས་གསང་བའི་དེ་ཁོ་ན་ཉིད་ཀྱི་རྒྱུད་ཀྱི་རྒྱལ་པོ་རྫོགས་སྷོ།། །། 87.38a རྣལ་འབྱོར་མ་ཙན་དྲ་མཱ་ལེ་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། ་ |