།རྒྱ་གར་སྐད་དུ། ་་ཤྲཱི་མ་ཧཱ་བཱ་ལ་ཏནྟྲ་རཱ་ཛ་ན་མ། ་་་བོད་སྐད་དུ། ་་དཔལ་སྟོབས་པོ་ཆེའི་རྒྱུད་ཀྱི་རྒྱལ་པོ་ཞེས་བྱ་བ། ་་་དཔལ་སྡོམ་པའི་སྙྀང་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་བྱང་ཆུབ་སེམས་དཔའ་རྡོ་རྗེ་སྙིང་པོ་ལ་སོགས་པ་དཔའ་བོའྀ་ཚོགས་དང ། ལཱ་མ་ལ་སོགས་པ་མཁའ་འགྲོ་མའི་ཚོགས་དང ། རྣལ་འབྱོར་མ་དང ། མ་མོའི་ཚོགས་ཀྱིས་བསྐོར་ནས་བཙུན་མོའྀ་བྷ་ག་ལ་སྙོམས་པར་བཞུགས་སོ། །འཇིག་རྟེན་ན་ནི་ཆེར་གྲགས་པ། །དགྲ་ནི་ཆེན་པོ་དྲུག་ཡིན་ཏེ། །ཇི་ལྟར་ཉི་མ་ནུབ་པའི་ཚེ། །གྲོང་ཁྱེར་གྱི་ནི་མི་རྣམས་ཀྱི། ། 87.33b རྟ་དང་གླང་པོ་ལ་སོགས་པ། །རྫས་རྣམས་ཡོངས་སུ་འཕྲོག་པར་བྱེད། །ཐམས་ཅད་དབུལ་པོར་སྐྱེ་བར་འགྱུར། །དེ་བཞིན་ཡུལ་དྲུག་གི་ནི་དགྲས། །ཤེས་རབ་ཉི་མ་ནུབ་པའི་ཚེ། །མ་རིག་པ་ཡི་མུན་པ་ལ། །སོ་སོ་སྐྱེ་བོ་ཐམས་ཅད་ཀྱི། །ཡེ་ཤེས་ལྔ་ལ་སོགས་པ་ཡི། །རྫས་རྣམས་ཡོངས་སུ་འཕྲོག་པར་བྱེད། །བདེ་བ་མེད་པའི་གནས་སུ་སྐྱེ། །དགྲ་དེ་ཡོངས་སུ་གཞོམ་པའི་ཕྱིན། །མཆོད་པ་མེད་ཅིང་བཟླས་པ་མེད། །གཏོར་མ་སྦྱིན་སྲེག་དཀྱིལ་འཁོར་མེད། །ཀློག་དང་སྒོམ་པ་བསམ་གཏན་མེད། །གཡེང་བའི་ཚེས་དང་སྐར་མའི་ཚོགས། །ཐམས་ཅད་སྤངས་ཏེ་བདེ་བ་ཡི། །བསྟན་ལ་བདག་ཉིད་ལེགས་འདུག་སྟེ། །ཤེས་རབ་ཡེ་ཤེས་བསྲུབ་པར་བྱ། །ཤྀང་རྟ་ཡི་ནི་འཁོར་ལོ་ལྟར། །ཡུལ་ལ་ཡང་དག་རྒྱུག་པའི་སེམས། །དེ་དག་ལས་ནི་བཟློག་ནསུ། །ལས་ཀྱི་རླུང་ནི་ཆེན་པོ་གཡོས། །ཡེ་ཤེས་མེ་ནི་ཆེན་པོ་འབར། །རྣམ་རྟོག་སྲེག་སྟེ་བདུད་རྩིའི་རོས། །ཏིལ་གྱི་འབྲུ་བཞིན་གང་བ་སྟེ། །སྐྱེ་བ་མེད་པའི་གནས་སུ་གཟུང ། །དེ་ནས་སེམས་ནི་བརྟན་གྱུར་ནས། །མཚན་མར་སྣང་བ་འགག་པར་འགྱུར། །དེ་ཉིད་ལས་ནི་བཟློག་ནས་སུ། །རང་སེམས་སྟོང་པར་བསྒོམ་པར་བྱ། །ཆོས་ལ་བདག་མེད་རྟོགས་པ་ན། །དེ་ཚེ་སེམས་ནི་རྟོགས་པར་འགྱུར། །ཐམས་ཅད་སྟོང་པར་རོས་གང་སྟེ། །བདེ་བ་ཆེན་པོའི་སྐུ་ཞེས་བརྗོད་དོ། །ཤེས་རབ་ཕ་རོལ་ཕྱིན་པ་སྟེ། །འདི་ལ་བསལ་བ་ཅི་ཡང་མེད། །བསྟན་པར་བྱ་བ་ཅི་ཡང་མེད། །དེ་ཉིད་མཐོང་བས་རྣམ་པར་གྲོལ། །རིགས་གཅིག་དང་ནི་རྀགས་གསུམ་དང ། །རིགས་ལྔ་རིགས་ནྀ་བརྒྱ་ལ་སོགས། །དེ་ཉིད་འདི་ལ་ཐ་དད་མེད། །ཇི་ལྟར་གླང་པོ་རྙེད་གྱུར་ནས། །གླང་པོའི་རྗེས་ནི་མི་བཙལ་ལྟར། །སེམས་ཀྱི་དེ་ཉིད་རྙེད་གྱུར་ན། །རྣམ་རྟོག་གང་ཡང་མི་བཙལ་ལོ། །ཇི་ལྟར་དུག་ནི་འདོད་པ་ལ། །སྨན་ཉིད་དུག་ཏུ་སྦྱར་ཏེ་བྱིན། །སྨན་ལས་དུག་འབྱུང་སྦྱོར་བ་ཡང ། །སྨན་པ་མཁས་པས 87.34a སྦྱོར་བ་ཤེས། །གཞན་ཡང་མར་དང་ཁ་ར་དང ། །མར་གྱི་སྙིང་པོ་ལ་སོགས་པ། །འཐུངས་ཏེ་ཞུ་ན་སྨན་དུ་འགྱུར། །དེ་བཞིན་ང་ཡིས་གསུངས་པ་ཡང ། །དྲང་བའི་དོན་དང་ངེས་པའི་དོན། །སྒྲ་ནི་ཇི་བཞིན་ཇི་བཞིན་མིན། །དགོངས་པ་དང་ནི་དགོངས་པ་མིན། །བསྲེགས་བཅད་བདར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡིས་བཀའ། །བླང་བར་བྱ་ཡི་མོས་པ་འམ། །གཞན་གྱིས་མཁས་པ་འཇུག་མི་བྱ། །ཇི་ལྟར་སྐྱེ་བོ་བླུན་པོ་སྟེ། །དགྲ་རུ་གྱུར་པའི་སྐྱེ་བོ་ཡིས། །སྨན་ཡིན་བྱས་ཏེ་དུག་བྱིན་ན། །སྨན་དུ་དམིགས་ཏེ་དུག་ཟོས་ན། །ཟོས་པའི་རྗེས་ལ་འཆི་བར་འགྱུར། །ཐབས་རྣམས་ཐམས་ཅད་སྒྱུ་མ་ཤེས། །ཤེས་རབ་བརྗོད་དུ་མེད་པར་གསུངས། །ཇི་ལྟར་རིག་པ་མཁས་པ་ཡིས། །དུག་ནི་དུག་གིས་འབྱིན་པར་བྱེད། །ཇི་ལྟར་མེ་ཡི་ཚིག་པ་ལ། །དེ་བཞིན་མེ་ཡིས་གདུང་བར་བྱ། །ཇི་ལྟར་འདོད་ཆགས་ཆེ་བ་ལ། །འདོད་ཆགས་ཉིད་ཀྱིས་སྤང་བར་བྱ། །ཇི་ལྟར་ཞེ་སྡང་ཆེ་བ་ལ། །ཞེ་སྡང་ཉིད་ཀྱིས་སྤང་བར་བྱ། །དེ་བཞིན་གཏི་མུག་ཆེ་བ་ལ། །གཏི་མུག་ཉིད་ཀྱིས་སྤང་བར་བྱ། །དཔེར་ན་རླུང་ནི་མར་མེ་འཇིག་པའི་རྒྱུ། །དེ་ཉིད་ནགས་སྲེག་མེ་ཡི་གྲོགསུ་འགྱུར། །དེ་བཞིན་འདོད་ལ་བརྟེན་པ་བདེ་བའི་ཡུལ། །དུག་གིས་དགྲ་རྣམས་བཅོམ་ནས་གཉིས་མེད་ཐོབ། །རི་ལུ་མིག་སྨན་ལ་སོགས་འདི་ལས་བྱུང ། །ལས་ཐམས་ཇི་ལྟར་ཕ་རོལ་ཐབས་ལྡན་པས། །གཟིངས་ལ་བརྟེན་ནས་ཕ་རོལ་འགྲོ། །ཕ་རོལ་ཕྱིན་ནས་འདོར་བར་བྱེད། །དེ་བཞིན་རང་རིག་ཚོལ་བས་ཀྱང ། །བུད་མེད་སྒྱུ་མ་ལ་བརྟེན་ཏེ། །རང་རིག་ཡེ་ཤེས་ཐོབ་པར་བྱ། །རང་རིག་ཡེ་ཤེས་ཐོབ་པ་དང ། །བུད་མེད་སྒྱུ་མ་དོར་བར་བྱ། །ཟབ་མོའི་དགོངས་པ་མ་རྟོགས་པར། །ཟབ་མོའི་སྤྱོད་པ་སྤྱོད་པར་བྱེད། །སེམས་ཅན་དམྱལ་བ་ཆེན་པོར་ལྟུང ། །ཇི་ལྟར་རི་ཡི་རྩེ་མོ་ནས། །སྐྱེས་བུ་འགའ་ཞིག་ལྷུང་འགྱུར་ན། །དེ་ནི་ལྷུང་བ་ཆེན་པོར་འགྱུར། །གཞན་ཡང་དར་གྱི་སྲིན་བུ་ཡིས། ། 87.34b རང་ལ་རང་གིས་འཆིང་བར་བྱེད། །མཚན་མོ་མེ་ཡི་སྲིན་བུ་ཡང ། །རང་གིས་རང་ནི་སྲེག་པར་བྱེད། །སྒྱུ་མ་ཙམ་གྱི་ཚུལ་གནས་ཤིང ། །མཐའ་བཞི་ལས་ནི་རྣམ་པར་གྲོལ། །སྤྲོས་པ་ཐམས་ཅད་ཉེ་བར་ཞི། །མཚོན་བྱ་མཚོན་བྱེད་མ་ཡིན་ཏེ། །ལྟ་བའི་དབུས་ན་གནས་པ་ཡི། །ཤེས་རབ་ཕ་རོལ་ཕྱིན་པའོ། །དཔལ་སྟོབས་པོ་ཆེའི་རྒྱུད་ལས་མངོན་པར་རྟོགས་པའི་ལེའུ་སྟེ་དང་པོའོ།། །། ་གང་ཞིག་བརྟག་པར་བྱེད་པ་ཡང ། །གནས་ནི་ཤིན་དུ་བསྔགས་པ་རུ། །ཁྲུ་དོ་པ་ཡི་མཎྜལ་ལ། །དང་པོ་བ་ཡི་རྣམ་ལྔ་ཡིས། །སོར་གཅིག་ཙམ་དུ་བྱུག་པར་བྱ། །དེ་ནས་དྲི་ཆེན་དྲི་ཆུ་ཡིས། །བྱུགས་ཏེ་མེ་ཏོག་སྔོན་པོ་དགྲམ། །རྒྱན་ལ་སོགས་པས་མཛེས་པར་བརྒྱན། །བུམ་པ་ལྔ་ནི་ཕྱོགས་དང་དབུས། །དེ་ནས་བཟླས་པ་ཁྲི་འམ་འབུམ། །བདུད་རྩི་ཆུ་རུ་བྱིན་བརླབས་ཏེ། །གང་ཞིག་བརྟག་པའི་མི་དེ་ལ། །དང་པོ་མཚམས་གཅད་ཁྲུས་བྱས་ཏེ། །རློག་པ་ནག་པོ་ཕྱིར་བཟློག་གོན། །སྐྲ་ནི་གྱེན་བཅིངས་ཤ་བཅིངས་དང ། །བེར་ཀ་ཐོགས་ཏེ་ཤར་སྒོར་གཞག་།ཚིལ་ཆེན་མེ་མར་ཤར་དུ་གཏམ། །ནུབ་ཏུ་མེ་ལོང་དངུལ་ལ་སོགས། །དག་པ་དེ་ལ་སྨན་ལྔ་དང ། །དྲི་ལྔས་བྱུག་སྟེ་བཀྲུ་བར་བྱ། །དེ་ནས་མེ་ལོང་ནང་དུ་ཡང ། །གདོན་གྱི་མཚན་མ་བརྟག་བྱ་སྟེ། །གཙོ་བོའྀ་སྔགས་ཀྱི་མཐའ་རུ་ནི། །གདོན་གྱི་མིང་དང་སྔགས་བཏགས་ན། །ལྷ་ཡི་གདོན་ལ་སོགས་པ་ཀུན། །མཚན་མར་འབྱུང་བ་ཐེ་ཙོམ་མེད། །མི་དེ་རྒྱན་ནི་ཐ་དད་དེ། །ལྷ་ལ་སོགས་མཐོང་བྱེ་བྲག་གོ། །དུས་ནི་འབྱུང་པོའི་ཉི་མ་སོགས། །མཚན་མ་སྣ་ཚོགས་བྱུང་བའི་ཚེ། །དེ་ཚེ་གདོན་ནི་དབང་དུ་བསྡུ། །ཚེ་དང་བསོད་ནམས་ལོངས་སྤྱོད་དང ། །མཛའ་བཤེས་ཟུག་རྔུ་ལ་སོགས་པ། །གདོན་ལ་སོགས་པ་བསལ་བའི་ཕྱིར། །དཔལ་ལྡན་མཁའ་འགྲོ་མ་ལ་སོགས། །བརྟག་པའི་རྫས་ཀྱི་བྱེ་བྲག་ཀྱང ། །མཆོད་དང་ཚོགས་ཀྱི་འཁོར་ལོ་སོགས། །བསྐོར་ལ་མཚན་མ་བརྟག་པར་བྱ། །དབང་བསྐུར་དུས་སུ་ཡེ་ཤེས་ཀྱང ། །དབབ་པ་དེ་བཞིན་སྡིག་ལ 87.35a སོགས། །མཚན་མ་མེ་ལོང་དག་ལ་ནི། །བརྟགས་ཏེ་གཞན་ཡང་ཅི་འདོད་པའི། །མཚན་མ་བརྟག་ལ་བླ་མ་ཡི། །ཞལ་ནས་ཡང་དག་ཤེས་པར་བྱ། །ནད་ཀྱི་ཟུག་རྔུ་དབྱུང་བའི་ཕྱིར། །གསོ་བའི་རིག་པ་ལས་གསུངས་པའི། །རླུང་དང་བད་ཀན་མཁྲིས་པ་དང ། །འདུས་པ་དང་ནི་ཡན་ལག་བཅས། །གནས་བཞིར་འཁོར་ལོར་གནས་པ་སྟེ། །ལུས་ཀུན་ཁྲུས་བྱས་གནས་བཞི་རུ། །སྔགས་པས་ལག་པས་མཉེ་བྱ་སྟེ། །མེ་ལོང་དཀྱིལ་དུ་བརྟག་བྱས་ན། །རླུང་ལ་སོགས་པ་ཤེས་པར་ངེས། །དེ་རྗེས་འཁོར་ལོ་དེ་ཉིད་ལ། །གསོ་བའི་སྦྱོར་བ་ཤེས་པར་བྱ། །དུག་ནི་བརྟག་པའི་རིམ་པ་ཡང ། །ནད་གྲོལ་ཡན་ལག་ཐམས་ཅད་ལ། །གང་དུ་དུག་ཞུགས་མཚན་མ་བརྟག་།དེ་ནས་གསོ་བའི་སྦྱོར་བ་ཡང ། །སྨན་དང་སྔགས་དང་ཆུ་སྦྱར་ཏེ། །མཁས་པས་བརྟགས་ནས་གསོ་བར་བྱ། །དཔལ་སྟོབས་པོ་ཆེའི་རྒྱུད་ལས་མཚན་མ་ཐམས་ཅད་བརྟག་པའི་ལེའུ་སྟེ་གཉིས་པའོ།། །། གང་ཞིག་བསྲུང་བའི་རྟེན་དེ་ཡང ། །གང་དང་ལྡན་པའི་རིམ་པ་ཡིས། །བསྲུང་བའི་འཁོར་ལོ་བརྩམ་པར་བྱ། །གཙོ་བོའི་བཟླས་པ་ཁྲི་འམ་འབུམ། །བསྙེན་པ་བྱས་ཏེ་དེ་ནས་ཡང ། །གསེར་རམ་དངུལ་ལས་བཟོ་བྱས་ཏེ། །ནང་དུ་དཀྱིལ་འཁོར་རྫོགས་པ་འམ། །ཡང་ན་འདབ་བརྒྱད་ལྟེ་བར་བཅས། །རྡོ་རྗེ་ར་བ་ལ་སོགས་བྱ། །ཡུངས་ཀར་ལ་སོགས་འབྲུ་ལྔ་དང ། །རིན་ཆེན་ལྔ་དང་སྨན་ལྔ་དང ། །དེ་ནང་གཞག་སྟེ་རབ་གནས་བྱ། །ཡོངས་སུ་རྫོགས་ནས་བཅིང་བར་བྱ། །གཞན་ཡང་གྲོ་གའམ་ཤིང་ཤུན་ནམ། །དུར་ཁྲོད་དག་གི་རོ་རས་ལ། །བསང་དང་བགེགས་བསྐྲད་ཚུལ་བཞིན་བྱ། །བཟླས་པ་གོང་དང་འདྲ་བ་སྟེ། །དཀྱིལ་འཁོར་ཡོངས་སུ་རྫོགས་གྱུར་ན། །སྔགས་ཀྱང་ཡོངས་སུ་རྫོགས་པར་བྲི། །སྐུ་གསུང་ཐུགས་ཀྱི་འཁོར་ལོ་ཡིས། །ལུས་ངག་ཡིད་ལ་བསྲུང་བར་བྱ། །ཡོངས་སུ་མ་རྫོགས་ཟུར་དྲུག་ལ། །དཔའ་བོ་དྲུག་གི་སྔགས་བྲིས་ཏེ། །བསྲུང་བའི 87.35b ལུས་ལ་མཚན་པར་བསྒོམ། །རྩིབས་མཚན་དྲུག་ལ་གཡུང་དྲུང་གི། །ཡི་གེ་དྲུག་ནི་བྲིས་པ་སྟེ། །བསྲུང་བྱའི་ལུས་ལ་མཚན་པར་བསྒོམ། །དབུས་སུ་ཡི་གེ་ཀྵ་བྲིས་ཏེ། །བར་ཆད་ཐམས་ཅད་བསལ་བར་བསམ། །ཆོ་ག་ཡོངས་སུ་རྫོགས་བྱ་སྟེ། །བཟོ་བྱས་སྣོད་ནི་ཁ་དོག་སྒྱུར། །ལེགས་པར་སྦས་ཏེ་སྤྱི་བོ་འམ། །མགྲིན་པ་དེ་བཞིན་དཔུང་པ་ཡི། །ཚངས་པའི་བུ་ག་ལོངས་སྤྱོད་མཉམ། །སོར་བཞི་དག་ཏུ་བཅིང་བར་བྱ། །གཞན་ཡང་ནད་པའམ་རྣལ་འབྱོར་པ། །ངག་ལ་སྲུང་ན་དང་པོར་ཡང ། །གདོན་བསལ་བསངས་ཏེ་གནས་གསུམ་དུ། །ཐིག་ལེ་གསུམ་བྱས་སྔགས་གསུམ་དགོད། །གཞན་ཡང་གནས་ནི་སུམ་བཅུ་བདུན། །ཐིག་ལེ་བྱས་ཏེ་སྔགས་རྣམས་དགོད། །དེ་ནས་གོ་ཆ་མཚན་མ་ཡང ། །ཚུལ་བཞིན་མཐུན་པར་ཤེས་པར་བྱ། །དེ་ནས་སྟན་ནམ་མལ་ཆ་ལ། །ོཾ་ཨཱཿ བཛྲ་རཀྵ་རཀྵ་ཧཱུཾ་ཕཊ། །སྒོ་འམ་གཞན་ལའང་བྲི་བར་བྱ། །གཞན་ཡང་ལག་པ་གཡས་པ་ཡིས། །མཐིལ་དུ་གུར་ཀུམ་དག་སྦྱར་ཏེ། །གཡོན་གྱི་སྦོམ་མོ་ཁྲོ་མོ་ཡིས། །སྤྱི་བོ་དཔྲལ་བ་རྣ་བ་མིག་།སྣ་དང་ཁ་དང་མགྲིན་པ་དང ། །དཔུང་པ་སྙིང་ག་ལྟེ་བ་དང ། །འོག་གི་སྣོད་གཉིས་ཡན་ལག་ལ། །སྔགས་དང་བཅས་མས་ལེགས་པར་འཚོ། །གཞན་ཡང་སྐུད་པ་སྣ་ལྔ་ལ། །སྔགས་དང་བཅས་ན་བསྲུང་བར་འགྱུར། །དཔལ་སྟོབས་པོ་ཆེའི་རྒྱུད་ལས་བསྲུང་བའི་འཁོར་ལོའི་ལེའུ་སྟེ་གསུམ་པའོ།། །། མགོན་པོ་ཐུགས་རྗེ་ཆེ་ལྡན་པ། །དེ་ཉིད་ལ་ནི་ཕྱག་འཚལ་ཏེ། །རྡོ་རྗེ་སྙིང་པོས་ཡང་ཞུས་པ། །བསྲུང་བའི་འཁོར་ལོ་དེ་ལྟར་ན། །ཡེ་ཤེས་བྱེ་བྲག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཡེ་ཤེས་ཀྱིས་ནི་དེ་ཉིད་ཀྱི། །རྟོག་པ་རབ་ཏུ་བཤད་པར་བྱ། །དེ་ལ་ཡེ་ཤེས་ཀྱི་ནི་གནས། །རྣམ་པ་ལྔ་རུ་ཤེས་བྱ་སྟེ། །ཕྱི་དང་ནང་དང་བསང་བ་དང ། །རབ་ཏུ་གསང་དང་གསང་བ་ཆེ། །ང་ཡིས་བཤད་ཀྱིས་ལེགས་པར་ཉོན། །དེ་ལ་ཕྱི་ཡི་ཡེ་ཤེས་ནི། །སྐུ་མདོག 87.36a ཕྱག་མཚན་དང་འབྲེལ་བའོ། །དེ་ལྟར་རྟོགས་པ་ཕྱིའི་ཡེ་ཤེས། །ནང་གི་ཕུང་སོགས་ལྷ་རུ་རྟོགས། །དེ་ཉིད་དང་བྲལ་ཡེ་ཤེས་སོ། །དེ་ནས་གསང་བའི་ཡེ་ཤེས་ནི། །རྩ་དང་རླུང་དང་ཐིག་ལེར་རྟོགས། །རྟོག་པ་དེ་དང་བྲལ་བ་ནི། །གསང་བའི་ཡེ་ཤེས་ཡིན་པར་བཤད། །དགའ་བ་མཆོག་དང་བྲལ་བའི་དགའ། །ལྷན་ཅིག་སྐྱེས་དགའ་གང་ཡིན་པ། །བདེ་བར་རྟོག་པ་རྣམ་རྟོག་སྟེ། །དེ་སྤོང་རབ་གསང་ཡེ་ཤེས་སོ། །དེ་ནས་ཡེ་ཤེས་ཆེན་པོ་བཞི། །དང་པོ་རོ་མཉམ་མཐའ་སྤངས་པའི། །ཡེ་ཤེས་དེ་ཉིད་ཡོད་པ་ལ། །རྣམ་རྟོག་སྤོང་སྟེ་དེ་བཞིན་འཇོག་།དེ་ཉིད་རང་རིག་ཆེན་པོ་སྟེ། །དེ་ཉིད་ཡེ་ཤེས་ཆེན་པོའོ། །དེ་ལྟར་ཤེས་ན་རྡོར་འཛིན་གྱི། །ས་ནི་ངེས་པར་ཐོབ་པའོ། །དཔལ་སྟོབས་པོ་ཆེའི་རྒྱུད་ལས་ཡེ་ཤེས་བརྟག་པའི་ལེའུ་སྟེ་བཞི་པའོ།། །། དེ་ནས་ཡེ་ཤེས་ཆེན་པོའི། །རྟག་པ་དེ་ཉིད་བཤད་པར་བྱ། །དང་པོར་རོ་མཉམ་གྱུར་པའོ། །སྟོང་པ་ཉིད་ཀྱི་རོ་མཉམ་ལ། །སྐུ་མདོག་ཕྱག་མཚན་ལ་སོགས་པ། །ཕུང་པོ་ཁམས་དང་སྐྱེ་མཆེད་སོགས། །རྩ་དང་རླུང་དང་ཐིག་ལེ་དང ། །དགའ་དང་མཆོག་དགའ་བྲལ་བ་དང ། །དེ་ལ་སོགས་པ་ཐམས་ཅད་ཀུན། །སྒྱུ་མ་ཙམ་དུ་ཤེས་པར་བྱ། །དེ་ཉིད་གཞན་རིག་ཅེས་བྱ་སྟེ། །རང་རིག་སེམས་ཀྱི་དེ་ཉིད་ལ། །གཉིས་སུ་མེད་པར་བསྒོམ་པ་ནི། །དེ་ཉིད་ཡེ་ཤེས་ཆེན་པོ་སྟེ། །མཐར་ཕྱིན་བརྟག་པ་རྫོགས་པའོ། །དཔལ་སྟོབས་པོ་ཆེའི་རྒྱུད་ལས་ཡེ་ཤེས་ཆེན་པོའི་ལེའུ་སྟེ་ལྔ་པའོ།། །།དེ་ལྟར་བཅོམ་ལྡན་འདས་ཀྱིས་བཀའ་སྩལ་པ་དང ། རྡོ་རྗེ་སྙིང་པོ་ལ་སོགས་པ་དཔའ་བོ་དང ། མཁའ་འགྲོ་མ་དང ། རྣལ་འབྱོར་མ་དང ། མ་མོའི་ཚོགས་ཐམས་ཅད་རྗེས་སུ་ཡི་རང་ནས་ཕྱི་ནང་གསང་བའི་མཆོད་པས་མཆོད་ནས། གཡོན་ཕྱོགས་ནས་ལན་གསུམ་བསྐོར་བ་བྱས་ནས་མི་སྣང་བར་གྱུར་ཏོ། །དཔལ་སྟོབས་པོ་ཆེའི་རྒྱུད་ཀྱི་རྒྱལ་པོ་རྫོགས་སོ།། །། པཎ་ཌི་ཏ་གཱ་ཡ་དྷ་ར་དང ། ལོཙྪ་བ་དགེ་སློང་ཤཱཀྱ 87.36b ཡེ་ཤེས་ཀྱིས་བསྒྱུར་བའོ། ། |