rKTs


J359

(e-text produced by ADARSHA)

see text in transliteration
85.7b
༄#། །རྒྱ་གར་སྐད་དུ། ཤྲཱི་ཛྙཱ་ན་ཏི་ལ་ཀ་ཡོ་གི་ནཱི་ཏནྟྲ་རཱ་ཛ་པ་ར་མ་མ་ཧཱ་ཨདྦྷུ་ཏཾ་ནཱ་མ། བོད་སྐད་དུ། དཔལ་ཡེ་ཤེས་ཐིག་ལེ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་མཆོག་ཏུ་རྨད་དུ་བྱུང་བ་ཞེས་བྱ་བ། དཔལ་ཡེ་ཤེས་ཐིག་ལེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་སྙིང་པོ་དཔའ་བོ་ཆེན་པོ་དང ། དཔའ་མོའི་དབང་ཕྱུག་མས་རྣམ་པར་བསྐོར་ནས་རྡོ་རྗེ་བཙུན་མོའི་བྷ་ག་ལ་བཞུགས་སོ། །དེར་དཔལ་ནམ་མཁའ་དྲི་མེད་དང ། ཤིན་ཏུ་སྟོབས་ཆེན་པོ་དང ། ལྷའི་དབང་ཕྱུག་དང ། གསང་བའི་བདག་པོ་དང ། འོད་དྲག་དང་ཉི་དགྲ་དང ། མཆོག་དགའ་དང ། ཐམས་ཅད་ཀྱི་བྱེད་པ་པོ་དང ། ུཏྤ་ལའི་སྙིང་པོ་དང ། ཞི་བ་ཆེན་པོའི་བདག་པོ་དང ། ནག་པོ་འདུལ་བ་དང ། རྨད་དུ་བྱུང་བའི་དཔའ་བོ་དང ། དྲེགས་ཆེན་དང ། ནག་པོ་ཆེན་པོ་དྲེགས་འཇོམས་དང ། རི་རབ་བརྟན་པ་དང ། ནམ་མཁའི་ཞལ་ལོ། །ཡང་དཔའ་མོའི་དབང་མོའི་དབང་ཕྱུག་མ་རྣམས་ལ་འདི་ལྟ་སྟེ། ཟླ་བ་མོ་དང ། གཡོན་པ་མ་དང ། ཉི་མཉམ་པ་དང ། རླུང་ཟ་བ་མ་དང ། བསིལ་སྦྱིན་མ་དང ། སྙིང་པོའི་འདབ་མ་དང ། བག་ཡོད་ཐོར་ཅོག་མ་དང ། ཉི་མ་འདུལ་མ་དང ། ཞི་བ་འཆི་བའི་ཕོ་ཉ་མ་དང ། ལྗང་བརྩོན་མ་དང ། འོད་འདུན་མ་དང ། ཚངས་པའི་མ་དང ། ཁྱབ་འཇུག་གི་མ་དང ། ཐོག་ཁ་མ་དང ། ཐམས་ཅད་བསྐྱེད་མ་དང ། དཔའ་བོའི་ཡུམ་མོ། །ཡང་མ་མོའི་བཙུན་མོ་རྣམས་ལ་འདི་ལྟ་སྟེ། སྐམ་མ་དང ། འཇིགས་མ་དང ། འོད་མ་དང ། མཆུ་འཕྱང་མ་དང ། རི་རབ་སོ་མ་དང ། དུས་ཀྱི་བདེ་བྱེད་མ་དང ། ཉི་མིག་མ་དང ། མེ་ཞལ་མ་དང ། འདོད་པའི་མ་དང ། ལྕེ་རིངས་མ་དང ། ཆོས་དགའ་མ་དང ། འདོད་བདེན་མ་དང ། མིག་སྟོང་མ་དང ། སྟག་མ་དང ། གཏུམ་མོ་དང་།
85.8a
འདོད་གཟུགས་མའོ། །དེ་ལྟ་བུའི་རབ་ཞལ་ལ་སོགས་པ་དཔའ་བོ་ཆེན་པོ་དང ། དཔའ་མོའི་དབང་ཕྱུག་མ་དང ། མ་མོའི་བཙུན་མོ་བྱེ་བ་ཕྲག་བདུན་བཅུ་རྩ་གཉིས་ཀྱི་གྲངས་ཀྱི་འཁོར་གྱི་དབུས་སུ་ལེགས་དགྱེས་ཆེན་པོའི་སྦྱོར་བ་ལ་བཞུགས་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ལ་བོས་ཏེ། ཀྱཻ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་དེ་ཁོ་ན་ཉིད་གསུམ་གྱི་བདག་ཉིད་ཀྱི་དང ། ཟླ་བའི་བདེ་བ་མཆོག་དང ། ཕྱག་རྒྱ་ཆེན་པོའི་མཐའ་དང ། དེ་ལ་རང་གི་ངོ་བོ་དང ། རྣམ་པ་དང ། ཚད་དག་དཔལ་ཡེ་ཤེས་ཐིག་ལེར་གྲགས་པ་ཉོན་ཅིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་འཁོར་ཐམས་ཅད་དང་ལྷན་ཅིག་དུ་ལན་གསུམ་དུ་བསྐོར་བ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ས་ལ་བལྟ་ཞིང་ཅང་མི་སྨྲ་བར་འདུག་གོ། །དེའི་ཚེ་ནམ་མཁའ་ལ་མེ་ཏོག་མཱནྡཱ་ར་བ་དང ། མཱནྡཱ་ར་བ་ཆེན་པོ་དང ། ུཏྤལ་དང ། ཉི་མའི་འོད་མཉམ་པ་དང ། ཆུ་སྐྱེས་དང ། པུན་ད་རཱི་ཀ་དང ། ་ཤོ་ཀ་དང ། ཙམ་པ་ཀ་དང ། ར་ཛུན་དང ། ན་ག་གེ་སར་ལ་སོགས་པ་དྲི་ཞིམ་པའི་མེ་ཏོག་རྣམ་པ་སྣ་ཚོགས་པ་དང ། རིན་པོ་ཆེའི་ཆར་དུ་མ་བཅོམ་ལྡན་འདས་ཀྱི་ཞབས་ཀྱི་དྲུང་དུ་བབས་སོ། །ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ལ་བོས་ཏེ། ཁྱོད་ཅི་ཞིག་ལ་ཡ་མཚན་དུ་འགྱུར། ལྷའི་དབང་ཕྱུག་གིས་གསོལ་པ། བཅོམ་ལྡན་འདས་དེ་ཁོ་ན་ཉིད་གསུམ་གྱི་བདག་ཉིད་ཀྱི་དང ། ཟླ་བ་བདེ་བ་མཆོག་དང ། ཕྱག་རྒྱ་ཆེན་པོའི་མཐའ་དང ། དེ་ལ་རང་གི་ངོ་བོ་དང་ཚད་དང ། རྣམ་པ་ཡོད་དམ་ཅི་ལགས་ཞེས་བདག་ཡ་མཚན་དུ་གྱུར་ལགས་སོ། །དཔའ་བོ་ཆེན་པོ་ལྷའི་དབང་ཕྱུག་ལ་རྡོ་རྗེ་འཛིན་པའི་མཆོག་གིས་འདི་སྐད་ཅེས་བཀའ་སྩལ་ཏོ། །ེ་མ་ཧོ། དེ་ཁོ་ན་ཉིད་གསུམ་གྱི་བདག་ཉིད་ཀྱི་དང ། ཟླ་བའི་བདེ་བ་མཆོག་དང ། ཕྱག་རྒྱ་ཆེན་པོའི་མཐའ་ལ་དེའི་རང་གི་ངོ་བོ་དང ། རྣམ་པ་དང ། ཚད་མེད་དམ་ཅི། དེ་ལྟར་མ་ཡིན་ན་ཆོས
85.8b
ཐམས་ཅད་ཀྱི་ངོ་བོ་སྟོང་པ་ཉིད་འདི་ག་ལ་ཤེས། མིག་ཡོར་ཙམ་གྱི་རྒྱུའི་རྟེན་ནི་ཆོས་ཐམས་ཅད་དོ། །དེ་ལྟར་གླ་རྩི་ལ་བརྟེན་ནས་དྲི་འབྱུང་བ་གླ་རྩིའི་དངོས་པོ་མེད་ན་དྲི་ཇི་ལྟར་རྙེད་པར་འགྱུར། དེ་བཞིན་དུ་རང་གི་ངོ་བོ་དང ། ཆོས་ཀྱི་ཚད་དང ། རྣམ་པ་དག་མེད་པར་གྱུར་ན། དེ་ཁོ་ན་ཉིད་གསུམ་གྱི་བདག་ཉིད་དང ། ཟླ་བའི་བདེ་བ་མཆོག་དང ། ཕྱག་རྒྱ་ཆེན་པོའི་སྐུའི་རྙེད་པ་མེད་དོ། །དེ་བས་ན་ཁྱབ་དང་ཁྱབ་བྱེད་བྱེ་བྲག་ཏུ། །གཉིས་སུ་མེད་པའི་བདེ་བ་ཆེ། །བདེ་བ་སྐུ་ལ་བརྟེན་པའི་ཕྱིར། །བདེ་བ་བསྟེན་ན་དེ་ཉིད་འགྱུར། །བདེ་སྐུ་རྣམ་པར་ཤེས་ཡིན་ན། །ཐམས་ཅད་གཉིས་སུ་མེད་པའི་དངོས། །དྲུག་གི་བདེ་བ་ཡེ་ཤེས་མཆོག་།བདེ་དང་སྐུ་ནི་གཉིས་ལས་འབྱུང ། །འཁོར་ལོ་དྲུག་གི་དབུས་ན་བཞུགས། །དེ་ཉིད་གསུམ་གྱི་བདག་ཉིད་མཆོག་།ཟླ་བ་ལ་སོགས་བྲལ་བདག་ཉིད། །དེ་ཉིད་གསུམ་བདག་རྒྱུ་རུ་གྲགས། །ལུས་བརྟེན་སྲོག་གི་དབྱུག་པ་ལ། །སྦྱོར་བ་དྲུག་གི་ཡེ་ཤེས་བཞུགས། །འཁོར་ལོ་དྲུག་གི་ལྟེ་བའི་དབུས། །ཕྲ་མོའི་ལུས་ལྡན་རྩ་ནི་དྲུག་།ཐིག་ལེ་དང་བཅས་དེ་རྣམས་སྦྱོར། །སྲོག་གི་དབྱུག་པའི་ནང་དུའོ། །བདེ་ཆེན་འཁོར་ལོའི་ལྟེ་བ་ཡི། །ཟླ་མོ་ཚེ་དང་ལྡན་པ་སྟེ། །དེ་ནི་སྲོག་དབྱུག་རྩ་བ་ཡིན། །ཟུར་གསུམ་གྱི་ནི་རྣམ་པའི་ཚུལ། །ལོངས་སྤྱོད་རྫོགས་པའི་ལྟེ་བ་ཡི། །ལྕེ་མ་བདེ་བ་ལྡན་པ་ནི། །དེ་ནི་སྲོག་གི་དབྱུག་པའི་སྐེ། །རིགས་ཀྱི་མེ་ཏོག་དང་འདྲ་བ། །ཆོས་ཀྱི་འཁོར་ལོའི་ལྟེ་བ་ལ། །ནམ་མཁའ་མ་ནི་ཡེ་ཤེས་ལྡན། །དེ་ནི་སྲོག་གི་དབྱུག་པའི་སྙིང ། །བ་ཡི་མིག་གི་རྣམ་པའི་གཟུགས། །ལྟེ་བ་སྤྲུལ་པའི་འཁོར་ལོའི་ནང ། །འོད་མ་དང་ནི་དུས་ལྡན་མ། །དེ་ནི་སྲོག་གི་དབྱུག་པའི་སྟེ། །པད་མ་རྒྱས་པའི་རྣམ་པ་བཞིན། །མེ་ཡི་འཁོར་ལོའི་སྙིང་ག་ཡི། །འདོད་པ་དང་ལྡན་རབ་འོད་མ། །དེ་ནི་སྲོག་གི་དབྱུག་པའི་མདོམས། །རྡོ་རྗེའི་རྣམ་པ་བཞིན་དུ་གསལ། །རླུང་གི་འཁོར་ལོའི་ལྟེ་བ་ལ། །སྟོབས་ནི་བརྩོན་འགྲུས་མ་དང་ལྡན། །སྲོག་གི་དབྱུག་པ་དེ་ཡི་མཐའ། །ཏིལ་གྱིས་མེ་ཏོག་རྒྱས་པ་བཞིན། །དེ་ནི་སྦྱོར་དྲུག་གི་རྣམ་ཤེས། །རྩ་དང་ཐིག་ལེ་དང་ལྡན་ནོ། །རྟོག་མེད་མས་ནི་འཁྱུད་ཡིན་ཕྱིར། །དེ་ཚེ་ཚངས་པའི་དབྱུག་པ་ཡིན། །དེ་ཡི་དུས་ནི་བདག་གིས
85.9a
བཤད། །ཤར་དང་ནུབ་པ་རྣམ་གཉིས་སོ། །གང་གི་ཚེ་ཚངས་པའི་དབྱུག་པ་ལ་མདུད་པ་སུམ་བཅུ་རྩ་གཉིས་ཡོད་དེ། དེ་ལ་ལྟེ་བའི་འོག་ཏུ་འཕོ་བ་བཅུ་དྲུག་།སྟེང་དུ་འཕོ་བ་བཅུ་དྲུག་།བྱང་ཆུབ་ཀྱི་སེམས་དང་རླུང་གཉིས་ཕྲད་པའི་ཕྱིར་འཕོ་བ་སྟེ། སྟེང་འོག་གཅིག་པུའི་དངོས་པོ་སྦྱོར་བའི་རྩ་སུམ་བཅུ་རྩ་གཉིས་སོ། །བྱང་ཆུབ་ཀྱི་སེམས་དགའ་བ་དང་ལྡན་པའི་གདུབ་བུའི་རྣམ་པ་སྐུ་དང་གསུང་དང་ཐུགས་ཀྱི་ངོ་བོ་གཅིག་པུའི་རྟོག་མེད་བདེ་ལེགས་ཡིད་མས་ཚངས་པའི་དབྱུག་པ་ལ་འཁྱུད་ནས། བདེ་བ་ཆེན་པོའི་གཙུག་ཏོར་ནས་གསང་བ་བདེ་བ་ཆེན་པོའི་ནོར་བུའི་ཁ་རླུང་གི་འཁོར་ལོ་ཡན་ཆད། ཇི་ལྟར་ཙནྡན་གོ་ཤིཪྵའི་ཤིང་ལ་སྦྲུལ་ཆེན་པོ་ཡོད་པ་ལྟ་བུའོ། །ལྷའི་དབང་ཕྱུག་དེ་ལ་ཇི་ལྟར་རང་གི་ངོ་བོ་བཤད་པར་བྱ་སྟེ། ཚངས་པའི་རུས་པའི་དབྱུག་པའི་སྙིང་པོའི་དང་པོ་ཟུར་གསུམ་གྱི་རྣམ་པ་མདུད་པ་ལྟེ་བའི་སྲོག་གི་རླུང་དང་ལྡན་པའི་བྱང་ཆུབ་ཀྱི་སེམས་འོད་ཀྱི་ཐིག་ལེ་ཤེས་རབ་མའི་ལྟེ་བས་ཟླ་བ་ཡར་ངོའི་ཚེས་དང་པོའི་ཆུ་ཚོད་གཅིག་གི་བར་དུ་འདོད་པའི་དགའ་བ་ཤར་བའོ། །པད་མའི་འབྲས་བུའི་འདོད་པ་ལས་འདར་བ་ཉེ་བ་དང་ལྡན་པ་ཚེས་གཉིས་ཀྱི་ཆུ་ཚོད་གཉིས་ཀྱི་བར་དུ་སྟོབས་ནུབ་པའོ། །དྲག་པོའི་མིག་གི་འདུས་པ་ལས་འགྲོ་བ་མཉམ་པ་དང་ལྡན་པ་ཚེས་གསུམ་གྱི་ཆུ་ཚོད་གསུམ་གྱི་བར་དུ་སྤྲིན་གྱི་ཐིག་ལེ་ཤར་བའི་དུས་སུའོ། །རིགས་ཀྱི་མེ་ཏོག་གི་ནུ་མ་རེག་པ་ལས་དགའ་བ་གྱེན་དུ་འགྲོ་བ་དང་ལྡན་པའི་ཚེས་བཞིའི་ཆུ་ཚོད་བཞིའི་བར་དུ་ནུབ་པའོ། །ཚངས་པའི་མིག་མ་མཆུའི་བདུད་རྩི་བཏུང་བ་སྦྱིན་པ་ལས་རྒྱས་པ་ཐུར་དུ་བྱུང་བ་དང་ལྡན་པ་ཚེས་ལྔའི་ཆུ་ཚོད་ལྔའི་བར་དུ་དབུགས་ཤར་བའི་དུས་སོ། །དུང་གི་མིག་གིས་སེན་མོ་བཏབ་པ་ལས་དྲག་པོ་འཇིགས་པའི་ཚུལ་དང་ལྡན་པའི་ཚེས་དྲུག་གི་ཆུ་ཚོད་དྲུག་གི་བར་དུ་ཨུཏྤ་ལའི་ནུབ་པའི་དུས་སོ། །རྣ་བའི་མིག་གི་སྦྱོར་བ་ལས་བྱུང་བའི་ཁྱབ་བྱེད་དང་ལྡན་པའི་ཚེས་བདུན་གྱི་ཆུ་ཚོད་བདུན་གྱི་བར་དུ་མགོ་ཀ་ལ་ཤར་བའི་དུས་སོ། །བའི་མིག་གིས་འབྲས་བུའི་བསྐྱོད་པ་ལས་མཆོག་གི་དགའ་བ་བཞི་དང་ལྡན་པ་ཚེས་བརྒྱད་ཀྱི་ཆུ་ཚོད་བརྒྱད་ཀྱི་བར་དུ་ཡིད་ནུབ་པའི་དུས་སོ། །དུང་གི་ལྟེ་བའི་ནུ་མ་དམ་པོར་འཁྱུད་པ་ལས་འབར་བ་ལྷོད་པ་དང་ལྡན་པའི་ཚེས་དགུའི་ཆུ་ཚོད་དགུའི
85.9b
བར་དུ་སྙིང་པོ་ཤར་བའི་དུས་སོ། །གླང་པོ་ཆེའི་ལྟེ་བའི་སྐེའི་སྒྲ་ལས་ཐིག་ལེ་མཐའ་དང་ལྡན་པའི་ཚེས་བཅུའི་ཆུ་ཚོད་བཅུའི་བར་དུ་ཟླ་བ་ནུབ་པའི་དུས་སོ། །ུཏྤ་ལའི་ལྟེ་བའི་མིག་གི་འོ་ལས་མྱོས་པ་ཁྲུང་ཁྲུང་དང་ལྡན་པའི་ཚེས་བཅུ་གཅིག་གི་ཆུ་ཚོད་བཅུ་གཅིག་གི་བར་དུ་ཉི་མ་ཤར་བའི་དུས་སོ། །པད་མའི་ལྟེ་བའི་སྤྲུག་ཅིང་བསིགས་པ་ལས་དགའ་བྲལ་གྱི་དགའ་བ་ཀྲོ་དྷ་དང་ལྡན་པའི་ཚེས་བཅུ་གཉིས་ཀྱི་ཆུ་ཚོད་བཅུ་གཉིས་ཀྱི་བར་དུ་དྲག་པོ་ནུབ་པའི་དུས་སོ། །བུང་བའི་ཁའི་གྲོང་ཁྱེར་ལས་ཨུ་ད་མི་རིམ་པ་དང་ལྡན་པའི་ཚེས་བཅུ་གསུམ་གྱི་ཆུ་ཚོད་བཅུ་གསུམ་གྱི་བར་དུ་མཆོག་གི་ཤར་བའི་དུས་སོ། །རྨ་བྱའི་ཁའི་བསྐུམ་པ་ལས་ཚུལ་འབྱེད་པ་དང་ལྡན་པའི་ཚེས་བཅུ་བཞིའི་ཆུ་ཚོད་བཅུ་བཞིའི་བར་དུ་སྒྲ་ནུབ་པའི་དུས་སོ། །རྡོ་རྗེའི་ཁ་རུ་མཉམ་པར་སྦྱོར་བ་ལས་གཉིད་འོན་པ་དང་ལྡན་པའི་ཉའི་ཆུ་ཚོད་བཅཝ་ལྔའི་བར་དུ་རོའི་ཤར་བའི་དུས་སོ། །རྣམ་པར་རྒྱས་པའི་ཏིལ་གྱི་མེ་ཏོག་ཧ་བརྗོད་པ་ལས་ཚེས་བཅུ་དྲུག་གི་ཆུ་ཚོད་བཅུ་དྲུག་གི་བར་དུ་ལྷན་ཅིག་སྐྱེས་པའི་དགའ་བ་གསལ་བ་དང་ལྡན་པའི་ཐོག་གི་ནུབ་པའི་དུས་སོ། །ཐོག་ནི་སྔགས་འཇིགས་བྱེད་པ་སྟེ། །དེ་ལ་ནུབ་པ་བཅུ་དྲུག་ཡིན། །ཤར་དང་ནུབ་པ་གང་ལ་ལར། །ལྷན་ཅིག་སྐྱེས་ལ་དེ་ཡོད་མིན། །ཡོན་པོའི་གདུབ་བུའི་རྣམ་པ་ཡི། །རྩ་ཡི་ལྟེ་དབུས་ཐིག་ལེ་དང ། །དགའ་བ་ལ་སོགས་ཤར་བ་དང ། །དེ་ནི་ནུབ་པའི་དུས་སུའོ། །དེ་ལྟའི་བདེ་ཆེན་རྣམ་པ་ནི། །འཕོ་བ་རུ་ནི་བདག་གིས་བཤད། །དངོས་དང་རྟེན་དང་རྣམ་པར་འབྱེད། །ཡེ་ཤེས་དགའ་བྲལ་ལྷན་རྟག་བཞུགས། །དངོས་པོ་རོ་མཉམ་ལྟ་བ་ཡིན། །འདོད་པ་ཆགས་པའི་རྣམ་དག་བྱེད། །འདུས་པ་རེག་བྱ་བྱེད་པ་ཡི། །དངོས་ནི་སྲིད་པ་མྱེད་པར་བྱེད། །འོ་དང་མཁྱུད་པའི་ལོངས་སྤྱོད་རྣམས། །དངོས་ནི་དངོས་པོ་རབ་གཅོད་བྱེད། །པུཎྜ་རི་ཀའི་འབྱུང་ས་ཡིས། །ཟུར་གསུམ་ལ་སོགས་བརྟེན་པ་ཡིས། །རྟེན་ནི་བསམ་དུ་མེད་པ་སྟེ། །ཆོས་དབྱིངས་རང་གི་ངོ་བོ་ཡིན། །སྟེང་དང་འོག་ནི་མཉམ་པའི་རྟེན། །མྱ་ངན་འདས་པ་རྟོག་མེད་བྱེད། །བདེ་བ་ཆེན་པོའི་བདུད་རྩིའི་རྟེན། །རིགས་ལྔ་ཡི་ནི་མཆོག་གི་གཞི། །ཡེ་ཤེས་འདོད་པ་ལྷུན་གྱིས་གྲུབ། །འདར་བ་དགའ་བ་མཆོག་གི་དགའ། །ཡེ་ཤེས་ཤེས་པ་ལྷུན
85.10a
གྱིས་གྲུབ། །གཞི་མེད་པ་ཡི་ལྷན་ཅིག་སྐྱེས། །གཞི་དང་བཅས་པ་དགའ་བྲལ་དགའ། །ཡེ་ཤེས་ང་རྒྱལ་མེད་པར་བྱེད། །ཆོས་ཀུན་རྣམ་པར་ཤེས་པ་སྟེ། །ཡེ་ཤེས་ཤེས་བྱ་དོན་གྲུབ་བྱེད། །རྣམ་པར་འབྱེད་པ་འོད་གཟུགས་གྲགས། །ཚུལ་དང་སྤྲིན་དང་སྟོབས་བདག་ཉིད། །རྣམ་པར་འབྱེད་པ་དངོས་ཀུན་དུ། །རྣམ་པའི་གཞི་དང་བཅས་པ་ཐིམ། །སྐྱེ་དང་གནས་པ་སྒྱུ་འཕྲུལ་གྱི། །རྣམ་པར་འབྱེད་པ་གཏི་མུག་གསོད། །འཁོར་ལོ་སྔགས་དང་བྱ་བ་ལ། །འཇོམས་བྱེད་དེ་ནི་རྣམ་པར་འབྱེད། །རྩ་ཡི་སྙིང་པོ་ཐམས་ཅད་ནི། །བཅོམ་པའི་ཕྱིར་ན་རྣམ་པར་འབྱེད། །ཡེ་ཤེས་ཀྱི་ནི་སྙིང་པོའི་མཐའ། །རྣམ་པར་འབྱེད་པ་གསོལ་བ་ཡིན། །ཡེ་ཤེས་ཤིན་དུ་བདེ་བྱེད་ཕྱིར། །རྣམ་པར་འབྱེད་པར་དེ་ཕྱིར་བརྗོད། །གཉིས་སུ་མེད་པ་མཆོག་ཞི་བ། །ཆགས་པ་དང་ནི་ཆགས་བྲལ་མིན། །དྲི་མ་མེད་པ་བཅོས་མེད་པ། །རྒྱུད་དང་སྔགས་དང་རིམ་པ་བྲལ། །རང་རིག་པ་དང་བརྗོད་དུ་མེད། །ཐམས་ཅད་ཁྱབ་ཅིང་དཔེ་བྱད་མེད། །དེ་ལྟ་བུ་ནི་དོན་དམ་པ། །ལྷ་ཡི་དབང་ཕྱུག་རྣམ་པར་འབྱེད། །སངས་རྒྱས་བྱང་ཆུབ་སེམས་ཀུན་གྱི། །ཐུགས་ཀར་རྟག་ཏུ་བཞུགས་པའོ། །རྣམ་པར་འབྱེད་ལ་སྒོམ་པ་མེད། །ཕུང་པོ་ཁམས་ལ་སོགས་དང་བྲལ། །སྒྲ་ལ་སོགས་པའི་ཆོས་ཀྱིས་སྟོང ། །སྟོང་དང་སྙིང་རྗེའི་བདག་ཉིད་ཡིན། །ཚངས་པ་ཁྱབ་འཇུག་དྲག་པོ་དང ། །དབང་ཕྱུག་རྟག་ཏུ་ཞི་བ་དང ། །དེ་རྣམས་ཀུན་གྱི་ཡབ་ཡིན་ནོ། །འབྱེད་པ་དང་ནི་མཆོག་རྨད་འབྱུང ། །དེ་ཉིད་ཡེ་ཤེས་ཐིག་ལེ་འདིར། །མཆོག་རྣམས་གྲུབ་པའི་མངའ་བདག་གོ། །འབྱུང་བ་ཀུན་གྱི་ནང་ཡོད་པ། །སྐུ་ལྔའི་བདག་ཉིད་རབ་མཆོག་ཡིན། །མཁའ་འགྲོ་དབང་ཕྱུག་ལྔ་བདག་པོ། །ནམ་མཁའ་བདག་ཉིད་སྐྱེད་མེད་དོ། །ནམ་མཁའ་ལྔ་ཡི་ནང་དུ་ཐིམ། །སངས་རྒྱས་ཀུན་གྱིས་ཕྱག་བྱས་པ། །དེ་ལྟའི་གསང་ཆེན་ཡེ་ཤེས་ནི། །ཡེ་ཤེས་དབང་པོ་རྙེད་དཀའ་བ། །ཇི་ལྟར་ནོར་ནི་རྐུན་མ་ཡིས། །མ་རྙེད་བྱེད་ལྟར་འབད་པས་སྨྲ། །དཔལ་ཡེ་ཤེས་ཐིག་ལེ་ལས་འཕོ་བའི་དུས་ཤར་བ་དང་ནུབ་པ་ཞེས་བྱ་བའི་ལེའུ་སྟེ་དང་པོའོ།། །། ལྷའི་དབང་ཕྱུག་གིས་གསོལ་པ། ཀྱཻ་བཅོམ་ལྡན་འདས། དེ་ཉིད་གསུམ་བདག་ང་རོ་ཅི། །དེ་བཞིན
85.10b
ཟླ་བ་བདེ་བ་མཆོག་།ཕྱག་རྒྱ་ཆེན་པོའི་རྣམ་པ་ཅི། །དེ་ཡི་མཐའ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དེ་ཉིད་གསུམ་ནི་སྐུ་གསུང་ཐུགས། །རྡོ་རྗེ་གསུམ་ནི་ཡེ་ཤེས་མཆོག་།ཟླ་བ་བདེ་བ་མཆོག་ཅེས་པ། །དེ་ཡི་ཕུང་པོ་དབང་པོ་ཁམས། །ཕྱག་རྒྱ་ཆེན་པོ་རྡོར་སྙིང་པོ། །དེ་ཡི་མཐའ་ནི་བྷ་གར་དྲན། །མཐའ་དང་སྣང་བ་རྣམ་པར་ཤེས། །ཆུ་ཡི་ཟླ་བ་བཞིན་དུ་མཐོང ། །ཆོས་ཀུན་རང་བཞིན་དྲི་མ་མེད། །སྣང་བ་ལས་ནི་ཐམས་ཅད་འབྱུང ། །སྐྱེ་བ་དང་ནི་འགག་པ་མེད། །ཡང་དག་འོད་ལས་ཐམས་ཅད་འབྱུང ། །དེ་ཡི་ཕྱི་རོལ་ཆོས་ཐམས་ཅད་ཀྱི་བདག་ཉིད་ནི་བཅོམ་ལྡན་འདས་དཔལ་ཡེ་ཤེས་ཐིག་ལེའོ། །དེ་ལ་དང་པོ་རྣམ་པ་དང་བཅས་པའི་དཀྱིལ་འཁོར་གྱི་འཁོར་ལོའི་བསྐྱེད་པ་བསྒོམ་པ་དང ། སྔགས་དང་བཟླས་པ་དང ། སྦྱིན་སྲེག་དང་མཆོད་སྦྱིན་དང ། གཏོར་མ་དང་མཆོད་པ་དང ། གནས་ཀྱི་བརྗོད་པ་དང ། དབང་བསྐུར་གྱི་རིམ་པ་དེ་དག་བཤད་དོ། །དཔལ་ཡེ་ཤེས་ཐིག་ལེ་ལས་དེ་ཁོ་ན་ཉིད་གསུམ་གྱི་བདག་ཉིད་དང་ཟླ་བ་མཆོག་གི་བདེ་བ་དང་ཕྱག་རྒྱ་ཆེན་པོའི་མཐའ་ལ་སོགས་པའི་ཕྱོགས་ཙམ་བསྟན་པའི་ལེའུ་སྟེ་གཉིས་པའོ།། །། ལྷའི་དབང་ཕྱུག་གིས་གསོལ་པ། ཚངས་པའི་རུས་པ་སྲོག་གི་དབྱུག་པའི་སྟེང་དང་འོག་གི་འཕོ་བ་ཆ་གཉིས་སུ་རྩ་སུམ་བཅུ་རྩ་གཉིས་ཀྱི་རང་བཞིན་ལས་ལེའུ་དང་པོར་གང་གསུངས་པ་ནི་དེ་རྣམས་ཀྱི་ནང་ནས་གཅིག་ཏུ་རྟོག་མེད་བདེ་ལེགས་ཡིད་མ་གཅིག་པུ་ངེས་པར་བསྟན་པར་མཛད་ཀྱི། བཅོམ་ལྡན་འདས་རྩ་གཞན་རྣམས་ཅིའི་དོན་གྱི་ཕྱིར་འདིར་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། གཅིག་པུ་རྟོག་མེད་བདེ་ལེགས་ཡིད་མ་དེ་ནི་བྱེ་བ་ཕྲག་བདུན་ཅུ་རྩ་གཉིས་ཀྱི་རྩ་ཕྲ་མོའི་དྲ་བ་རྣམས་རོལ་མོའི་དོན་དུ་བྱས་པ། སྣ་ཚོགས་ཀྱི་བདུད་རྩི་བསམ་གྱིས་མི་ཁྱབ་པ་ཆོས་ཀྱི་འབྱུང་གནས་ཆེན་པོའི་ས་སྟེངས་སུ་འབྱུང་ཞིང་སྐྱེའི་ཆར་འབབ་པའི་དོན་དུ་བསྟན་པའོ། །ལྷའི་དབང་ཕྱུག་གིས་གསོལ་པ། དེ་ལྟར་ལགས་མོད་ཀྱིས་ཀྱང ། རྩ་སུམ་བཅུ་རྩ་གཅིག་པོ་རྣམས་ཀྱི་མཚན་དང་གྲངས་འདིར་མཆོག་གི་དབང་ཕྱུག་ལ་བཀའ་དྲིན་ཞུའོ། །བཅོམ་ལྡན་འདས
85.11a
ཀྱིས་བཀའ་སྩལ་པ། ལྷའི་དབང་ཕྱུག་སུམ་བཅུ་རྩ་གཅིག་གི་མིང་རྣམས་ཉོན་ཅིག་།གསང་བ་དང་ཟབ་པ་དང་སྲེད་པ་དང་ཕྲ་མོ་དང་བདུད་རྩི་མ་དང་བདུད་རྩི་ཁྲི་མ་དང་དག་པ་མ་དང་བདེ་བ་མ་དང་སྟོབས་མ་དང་ཐབས་མ་དང ། ཧྲུད་ཧྲུད་མ་དང་སེར་མ་དང ། འོ་རྒྱུན་མ་དང་དགའ་མ་དང་སྣུམ་མ་དང་ཁྲོ་མ་དང་མངར་མ་དང་སྐྱུར་མ་དང་ཁ་བ་མ་དང་བསྐ་མ་དང་ཚ་མ་དང་ལན་ཚཝ་མ་དང་རྩུབ་མ་དང ། དད་མ་དང་སྟོབས་མ་དང་དགའ་བྱེད་མ་དང་དགའ་སྦྱིན་མ་དང་གཉིད་མ་དང་བཅད་སྐྱེད་མ་དང་ཁོང་ཆུད་མ་དང་ཚེ་མ་སྟེ། དེ་དག་ནི་རྩ་སུམ་ཅུ་གཅིག་ཏེ། སྟེང་དང་འོག་ཏུ་འཕོ་བ་གཉིས་ཀྱི་ཟླ་བ་དང་ཉི་མ་གཟས་ཟིན་པའི་དུས་སུ་ཚིགས་རྒྱས་པའོ། །དེ་ནས་དབང་གི་རིམ་པ་བཤད་དེ། ཇི་ལྟ་ཡི་ནི་གོ་རིམས་སུ། །དབང་བསྐུར་མཆོག་ནི་རྙེད་པ་གང ། །ཐམས་ཅད་དུ་ནི་ནུས་པར་འགྱུར། །ཡོན་ཏན་ཚུལ་ཁྲིམས་ལྡན་པའི་བུ། །བླ་མས་དང་པོར་དབང་བསྐུར་བྱ། །ཁྲུས་བྱས་མིག་དག་རས་ཀྱིས་དགབ། །སྙིམ་པ་མེ་ཏོག་གིས་བཀང་ལྡན། །ཡོན་ཕུལ་ནས་ནི་དགའ་དང་བཅས། །ལྷ་ཡི་དབང་ཕྱུག་དབང་བསྐུར་བྱ། །དབང་བསྐུར་ལས་ནི་སངས་རྒྱས་ས། །ཐེ་ཚོམ་མེད་པར་རྙེད་པར་འགྱུར། །དེ་བས་ཀུན་ཏུ་རབ་འབད་དེ། །དཔལ་ལྡན་དབང་རྒྱལ་བླང་བར་བྱ། །དབང་བསྐུར་བཞི་རུ་ཕྱེ་བ་ནི། །སློབ་དཔོན་ལ་སོགས་དབྱེ་བ་ཡིན། །དང་པོར་སློབ་དཔོན་གྱི་ནི་དབང ། །གཉིས་པ་དེ་ནི་གསང་བའི་དབང ། །གསུམ་པ་ཤེས་རབ་ཡེ་ཤེས་དབང ། །དེ་ལྟར་དེ་བཞིན་བཞི་པའོ། །བཞི་གཉིས་རབ་དུ་དབྱེ་བ་ནི། །སློབ་དཔོན་དབང་ལ་སོགས་པར་བསྐུར། །རྡོ་རྗེ་སློབ་དཔོན་དབང་གསུམ་དུ། །ནམ་མཁའ་མཉམ་དུ་བདག་གིས་བཤད། །དེ་གཉིས་ལ་ནི་བཅུ་གཅིག་ཕྱེ། །རྡོ་རྗེ་སློབ་དཔོན་དབང་རྒྱལ་ལོ། །དབང་བསྐུར་དེ་ནི་རིན་པོ་ཆེ། །ཁམས་གསུམ་གྱིས་ནི་ཕྱག་བྱས་པ། །ཐར་པར་འགྲོ་བ་འགྲུབ་དོན་དུ། །འདི་རུ་རིམ་པས་བདག་གིས་བཤད། །ཆུ་དང་དབུ་རྒྱན་རྡོ་རྗེ་དང ། །དྲིལ་བུ་མིང་དང་བརྟུལ་ཞུགས་དང ། །ལུང་བསྟན་པ་དང་སྐྱབས་སྦྱིན་དང ། །ཕྱག་རྒྱ་སྔགས་དང་ཡེ་ཤེས་སོ། །རྣལ་འབྱོར་རྒྱུད་ལ
85.11b
མོས་པ་ལ། །དབང་བརྒྱད་ཕྱེ་ལ་སྦྱིན་པར་བྱ། །རྣལ་འབྱོར་བླ་མ་ལ་མོས་ལ། །བཅུ་གཅིག་བདག་ཉིད་སྦྱིན་པར་བྱ། །རྣལ་འབྱོར་མ་ལ་མོས་པ་རྣམས། །གསང་བའི་དབང་ནི་སྦྱིན་པའོ། །གསང་བ་གཉིས་སུ་དབྱེ་བར་གསུང ། །དེ་ནི་ཕྱི་དང་ནང་གིས་སོ། །རྣལ་འབྱོར་རྣལ་འབྱོར་བླ་མའི་ཕྱིར། །དབང་བསྐུར་ཤེས་པས་སྦྱིན་པར་བྱ། །ནང་གི་རྣལ་འབྱོར་མ་ཡི་རྒྱུད། །གསང་བའི་དབང་ནི་རབ་ཏུ་སྦྱིན། །དེ་ནི་གསང་བ་གསུམ་དུ་དབྱེ། །སྐྱེ་དང་མདུད་དང་དེ་བཞིན་སད། །ཤེས་རབ་རྣམ་པ་གཉིས་སུ་དབྱེ། །བསྐྱེད་དང་རྫོགས་པའི་བྱེ་བྲག་གོ། །ཤེས་རབ་བརྒྱད་གཉིས་ལོ་དང་ལྡན། །སྤྱན་རིངས་ཆ་ལ་མཁས་པ་དང ། །ཡན་ལག་ཙན་དན་སར་པའི་དྲི། །ཤིན་ཏུ་འཇམ་པའི་ཁུ་བས་ཚིམ། །གཟུགས་བཟང་སྔོ་ལ་སྐལ་ལྡན་མ། །འོ་འཛིན་མཁྲང་ཞིང་འཇམ་ལ་མཐོ། །བསམ་གཏན་སྔགས་ལ་དད་ཅིང་ཞི། །དབང་བསྐུར་དང་ལྡན་ཐུགས་རྗེ་གྲུབ། །དེ་ལྟའི་རབ་གྲགས་འབད་དེ་བཙལ། །དབང་གི་དོན་དུ་བླ་མ་ཞུ། །དེ་ཀུན་མཚན་ཉིད་དང་ལྡན་པ། །ཆུང་མ་ཡང་ན་སྲིང་མོ་འམ། །བུ་མོ་ཡང་ན་མནའ་མ་འམ། །མཁས་པས་འབད་དེ་བླང་བར་བྱ། །རང་གི་རིགས་ནི་ཇི་བཞིན་རྙེད། །ཁུ་བ་དང་བཅས་གཞོན་ནུ་མ། །སྣ་ཚོགས་རྒྱན་གྱིས་ལེགས་པར་བརྒྱན། །མཁས་པས་བླ་མ་ལ་ནི་འབུལ། །དབང་གི་མན་ངག་གསུམ་དུ་བཞུགས། །ནང་གི་ཡིས་ནི་བརྡ་བྱེད་པ། །བཞི་པ་འབྲས་བུའི་ངོ་བོར་གྲགས། །གསུམ་དང་བྲལ་བའི་གསུམ་བདག་ཉིད། །དགའ་བ་ལ་སོགས་བྱེ་བྲག་ཏུ། །རྡོ་རྗེ་གཞོན་ནུ་མས་གསལ་དབྱེ། །དབང་བསྐུར་གྱིས་ནི་འཁོར་ལོས་བསྒྱུར། །ཐེ་ཚོམ་མེད་པར་ཡིན་པར་འགྱུར། །དབང་གིས་དྲི་མ་མེད་པར་བྱེད། །ཆུ་ལ་སོགས་པས་རས་བཀྲུས་བཞིན། །ཆོ་ག་ཐམས་ཅད་རྫོགས་པའི་དབང ། །ཡན་ལག་དེ་ཉིད་དང་ནི་བཅས། །གཅིག་ནས་གཅིག་ཏུ་རིམ་པས་བརྒྱུད། །བླ་མ་རབ་ཀྱི་ཞལ་ནས་བླང ། །གཞན་དུ་རྟོག་གེའི་ཚོགས་ལ་མཁས། །སྒྲ་ཡི་བསྟན་བཅོས་རྟག་མོས་ལ། །དབང་གི་མཆོག་ནི་རྣམ་པ་གསུམ། །བླང་བར་མི་བྱ་སྦྱིན་མི་བྱ། །ཡང་དག་འབྲས་བུ་འདོད་པ་ན། །དེ་ནི་རིང་དུ་སྤང
85.12a
བར་བྱ། །དེ་ལྟར་ཡང་བྱེ་མ་དུ་མ་བསྡུས་པའི་ཕུང་པོ་ལ་འབད་དེ་རྣམ་པར་བཙིར་བས་མར་ཁུའི་ཐིགས་པ་ཕྱེད་ཀྱང་མི་འབྱུང་ངོ ། །དེ་བཞིན་དུ་རྟོག་གེ་མང་པོ་དང ། ངག་གི་དྲ་བ་དང་ལྡན་པ་ལ་བསྟན་པའམ། ཉན་པ་ལས་ནི་དེ་ལ་ཉོན་མོངས་པ་འབའ་ཞིག་ལས་གཞན་འབྲས་བུ་ནི་རྙེད་པ་མེད་དོ། །དེ་བས་ན་གཅིག་ནས་གཅིག་ཏུ་རིམ་པས་བརྒྱུད་དེ་རྙེད་པའི་དབང་ཤེས་པ་དེ་ནི་རྡོ་རྗེ་སློབ་དཔོན་བླ་མ་ཆེན་པོའོ། །མི་གསལ་མཆོག་གི་བཀྲ་ཤིས་ཅན། །སངས་རྒྱས་འབྲས་བུ་སྦྱིན་པའི་སྦྱིན། །བླ་མའི་གཟུགས་སོ་གཞན་མ་ཡིན། །བསོད་ནམས་ཐམས་ཅད་ཀྱི་ནི་གནས། །སངས་རྒྱས་བྱང་ཆུབ་སེམས་དཔའ་དང ། །ཚངས་པ་བརྒྱ་བྱིན་ཁྱབ་འཇུག་ལྷ། །དེ་ཀུན་གྱིས་ནི་བདག་མཆོད་འོས། །མ་གྲགས་ཀྱང་ནི་གྲགས་གཟུགས་ཡིན། །དེ་ལྟར་ཤེས་ནས་སྒྲུབ་པ་པོས། །འབད་པ་ཡིས་ནི་མཆོད་པར་བྱ། །བླ་མའི་ཞལ་སྔ་མཆོད་བྱས་ན། །ཅི་འདོད་པ་ཡི་འབྲས་བུ་རྙེད། །རྒྱུད་ཀྱི་དོན་ནམ་དབང་གི་དོན། །ཤེས་ནས་བླ་མ་མི་མཆོད་པ། །ས་སྟེངས་ཉི་ཟླ་ཡོད་བར་དུ། །དེ་ནི་མནར་མེད་པ་རུ་འགྲོ། །དེ་བས་ཀུན་ཏུ་འབད་པ་ཡིས། །གུས་པས་བླ་མ་མཆོད་པར་བྱ། །རིན་ཆེན་སྣ་ཚོགས་བཟོར་བྱས་ལེགས། །གསེར་གྱི་པད་མ་དྲི་མ་མེད། །མུ་ཏིག་དོ་ཤལ་རིན་ཐང་མེད། །སྣ་ཚོགས་དུ་མ་ཡི་ནི་གོས། །གཅེས་པའི་བཙུན་མོ་བུ་དང་བཅས། །གླང་ཆེན་རྟ་དང་བྲན་ལ་སོགས། །དཔལ་ལྡན་བླ་མའི་སྤྱན་སྔ་རུ། །དད་གུས་བརྟན་པས་དབུལ་བར་བྱ། །དཔལ་ཡེ་ཤེས་ཐིག་ལེ་ལས་ཡོན་དབུལ་བ་དང་བཅས་པའི་དབང་གི་རིམ་པ་ཞེས་བྱ་བའི་ལེའུ་སྟེ་གསུམ་པའོ།། །། དེ་ནས་གཞན་ཡང་རབ་བཤད་ཉོན། །གནས་ཀྱི་རྙེད་པ་ཇི་བཞིན་དོན། །ཀ་བ་གཅིག་དང་སྒོ་དགུར་ལྡན། །རྡོ་རྗེ་བརྩིག་པའི་རྒྱན་དང་ལྡན། །རྡོ་རྗེའི་ཐིག་དང་བླ་རེས་ནི། །ཀུན་དུ་ཡོངས་སུ་བསྐོར་བ་ཡིན། །རླུང་ལ་སོགས་པའི་རིམ་པས་དབྱེ། །འབྱུང་བ་བཞི་དང་ལྡན་པ་ཡིན། །ཇི་སྙེད་ནམ་མཁའི་མཐའ་ཀུན་དུ། །ཐམས་ཅད་བདག་ཉིད་རྟག་ཏུ་བཞུགས། །རྡོ་རྗེ་གུར་གྱི་དབུས་སུ་ནི། །བསྲུང་བའི་འཁོར་ལོ་འཁོར་བཞིན་པ། །རྩིབས་བཅུ་པ་ལ་གསེར་གྱི་མདོག་།ཁྲོ་བོ
85.12b
བཅུ་དང་བཅས་པའོ། །ཁྲོ་བོ་ཐམས་ཅད་ཞལ་གསུམ་པ། །སྤྱན་གསུམ་པ་ལ་ཕྱག་དྲུག་པ། །གཡས་བརྐྱང་བས་ནི་བཞུགས་པ་དང ། །གསུས་པ་རློ་བ། སྦྲུལ་གྱི་རྒྱན་གྱིས་བརྒྱན་པ། ལྗགས་འདྲིལ་བ། མཆེ་བ་འཇིགས་པ་གཙིགས་པ། དབུ་སྐྲ་སེར་པོ་གྱེན་དུ་འགྲེང་བ། ཨག་ཚོམས་དང་སྨིན་མ་ཆེ་ཞིང་རིང་བ་སྟེ། ཤར་གྱི་འཁོར་ལོའི་རྩིབས་ལ་གཤིན་རྗེའི་གཤེད་སྐུ་མདོག་ནག་པོ་གཡས་དང་གཡོན་པའི་ཞལ་གཉིས་ནི་སེར་བ་དང་དམར་པོ། ཕྱག་གཡས་གཉིས་ན་རལ་གྲི་དང་རྩེ་གསུམ་པ། ཕྱག་གཡོན་གཉིས་ན་ཐོད་པ་དང་དབྱུག་པའོ། །ལྷོ་ཕྱོགས་ཀྱི་རྩིབས་ལ་ཤེས་རབ་མཐར་བྱེད་དཀར་པོ་གཡས་ཀྱི་ཞལ་དམར་བ། གཡོན་སྔོ་བ། ཕྱག་གཡས་པ་གཉིས་ཀྱིས་དབྱུག་པ་དང་རལ་གྲི། །ཕྱག་གཡོན་པ་གཉིས་ན་མཚོན་རྩེ་གཅིག་པ་དང་མགོ་བོའོ། །ནུབ་ཏུ་པད་མ་མཐར་བྱེད་དམར་པོ་ཞལ་གཡས་དཀར་ཞིང་གཡོན་སྔོན་པོ། གཡས་དང་གཡོན་གྱི་ཕྱག་བཞི་ན་རལ་གྲི་དང ། འཁོར་ལོ་དང ། ཟླ་བ་ཕྱེད་པ་དང ། རི་རབ་ཟུར་བརྒྱད་པའོ། །བྱང་དུ་བགེགས་མཐར་བྱེད་སྔོན་པོ་གཡས་དང་གཡོན་གྱི་ཞལ་གཉིས་ནི་དཀར་པོ་དང་དམར་པོའོ། །གཡས་དང་གཡོན་གྱི་ཕྱག་བཞི་ན་རྡོ་རྗེ་རྒྱ་གྲམ་དང ། རལ་གྲི་དང ། མདུང་ཐུང་མེའི་མཚམས་སུ་འདོད་པའི་རྒྱལ་པོའི་གཟུགས་ཅན་གཡས་དང་གཡོན་གྱི་ཞལ་གཉིས་ནི་དཀར་བ་དང་དམར་བ། གཡས་ཀྱི་ཕྱག་གཉིས་ན་རལ་གྲི་དང་རིན་པོ་ཆེ། ཕྱག་གཡོན་ན་སྟ་རེ་དང་མདུང་ཐུང་ངོ ། །སྲིན་པོའི་མཚམས་སུ་དབྱུག་པ་སྔོན་པོ་ཆུ་སྲིན་འཛིན་སེར་པོའི་གཟུགས། གཡས་དང་གཡོན་གྱི་ཞལ་ལྗང་བ་དང་དམར་བ། ཕྱག་གཡས་གཉིས་ན་རྒྱ་གྲམ་རྩེ་གསུམ་དང་རལ་གྲི། ཕྱག་གཡོན་གཉིས་ན་སཱ་ལའི་ཤིང་ཆེན་པོ་དང ། དེ་བཞིན་དུ་མེའོ། །རླུང་མཚམས་སུ་སྟོབས་པོ་ཆེ་དུ་བའི་མདོག་།གཡས་པ་དང ། གཡོན་པའི་ཞལ་གཉིས་ནི་སེར་བ་དང་དམར་པོ། ཕྱག་བཞི་ལ་རལ་གྲི་དང་དུང་དང་དགྲ་སྟ་དང་རྔ་མའོ། །དབང་ལྡན་གྱི་མཚམས་སུ་མི་གཡོ་མགོན་དཀར་ནག་ཞལ་གཡོན་དམར་པོ་དང ། གཡས་སྔོན་པོ། གཡས་གཡོན་གྱི་ཕྱག་བཞི་ན་རལ་གྲི་དང་ལྕགས་ཀྱུ་དང་པི་ཝང་དང་རྔེའུ་ཆུང་ངོ ། །སྟེང་དུ
85.13a
གཙུག་ཏོར་འཁོར་ལོས་སྒྱུར་བ་སྐུ་མདོག་སེར་པོ་གཡས་དང་གཡོན་པའི་ཞལ་གཉིས་ནི་སྔོ་བ་དང་དཀར་བ། ཕྱག་བཞི་ན་འཁོར་ལོ་དང ། རལ་གྲི་དང ། ཀ་པཱ་ལ་དང ། ཁཊྭཱཾ་གའོ། །འོག་ཏུ་སུམ་བྷའི་རྒྱལ་པོ་སྐུ་མདོག་ནམ་མཁའ་ལྟར་སྔོ་བ། གཡས་ཀྱི་ཞལ་མཐོན་མཐིང་ཆེན་པོའི་འོད་ཅན། གཡོན་པ་ནི་ཉི་མ་གཞོན་ནུའི་འོད་ཅན། གཡས་ཀྱི་ཕྱག་གཉིས་ན་རལ་གྲི་དང་ལྕགས་ཀྱུ། གཡོན་གཉིས་ན་གྲི་གུག་དང་ཐོད་པའོ། །ཐམས་ཅད་ཀྱི་རྩ་བའི་ཕྱག་གཉིས་ཀྱིས་རྡོ་རྗེ་དང་པད་མ་བསྣམས་པ། རང་གི་འོད་ཀྱི་ཤེས་རབ་མ་ལ་འཁྱུད་པའོ། །འདོད་པའི་རྒྱལ་པོ་ལ་སོགས་པ་ནི་འཇིག་རྟེན་སྐྱོང་བ་བརྒྱད་ཀྱི་སྟེང་དུའོ། །གཙུག་ཏོར་འཁོར་ལོས་བསྒྱུར་བ་དང་སུམ་བྷའི་རྒྱལ་པོ་ནི་ཟླ་བ་དང་ཉི་མའི་སྟེང་དུ་ཤེས་པར་བྱའོ། །འདིའི་འཁོར་ལོའི་ལྟེ་བ་གྲུ་གསུམ་གྱི་གཟུགས་ཏེ་རི་བོང་ཅན་དཀར་པོའི་འོད་ཆོས་ཀྱི་འབྱུང་གནས་སོ། །དེའི་དབུས་སུ་སྔར་བསྟན་པའི་འབྱུང་བ་བཞི་ཇི་ལྟ་བུའི་རིམ་པས། རྣམ་པར་སྣང་མཛད་ཡོངསུ་གྱུར་པ་ལས་དུར་ཁྲོད་བརྒྱད་དང་ལྡན་པའི་གཞལ་ཡས་ཁང་ཡངས་པ་ཆེན་པོའི་འཕར་མ་གཉིས་ཉི་མའི་གདན་དུ་སྣ་ཚོགས་པད་མ་འདབ་མ་བརྒྱད་ཀྱི་ལྟེ་བར་འཇིགས་བྱེད་དང་དུས་མཚམས་ཀྱི་བདེ་བྱེད་མའི་སྟེང་དུ་ཚུལ་དང་ཐིགས་པའི་རང་གི་ངོ་བོ་ཨཱ་ལི་དང་ཀཱ་ལི་གཉིས་ལས་བྱུང་བ། མཾ་ཧཱུཾ་ལས་དཔལ་ཡེ་ཤེས་ཐིག་ལེ་ཕྱག་རྒྱ་ཆེན་པོས་འཁྱུད་ཅིང་ཞལ་བརྒྱད་པ། ཕྱག་བརྒྱད་གཡས་བརྐྱང་བ། ཞལ་བཞི་ནི་ནག་པ་དང་སེར་བ། དམར་བ་དང་ལྗང་གུའོ། །གཞན་བཞི་ནི་ཨུཏྤ་ལ་སྔོན་པོའི་འདབ་མ་ལྟ་བུའོ། །རྡོ་རྗེ་དང ། དྲིལ་བུ་དང ། རྔེའུ་ཆུང་དང ། ཀ་པཱ་ལ་དང ། ཁཊྭཱཾ་ག་དང ། རལ་གྲི་དང ། མདའ་གཞུའོ། །སྣ་ཚོགས་རྡོ་རྗེ་དང་ཟླ་བ་ཚེས་པས་རལ་པའི་དབུ་རྒྱན་དང་དཔྲལ་བར་ཐོད་པའི་སྟེང་དུ་མི་བསྐྱོད་པའི་ཅོད་པན་ཅན་ནོ། །ཕྱག་རྒྱ་དྲུག་གིས་སྐུ་བཅིངས་པ། རྒྱུ་མས་བརྒྱུས་པའི་མགོ་བོ་ཆེན་པོའི་དོ་ཤལ་གྱིས་སྐུ་བརྒྱན་པ། ཚངས་པའི་པགས་པས་རྐེད་པའི་ཤམ་ཐབས་ཅན་གྱི་སྐུར་བཞེངས་ཤིང་ཧ་ཧའི་གད་རྒྱངས་དང་བྷྲཱི་ཀ་རའི་ཆོལ་བའི་སྒྲ་ཆེན་པོའི་ང་རོ་བསྒྲགས་ཤིང་བརྗོད
85.13b
པ་ཙམ་གྱིས་ཚངས་པའི་གཡུལ་ས་བྱེ་བའི་གྲངས་ཀྱིས་ཐོད་པའི་ལྟོ་བ་རླག་པར་མཛད་པ། མི་བཟད་པ་དང ། མི་སྡུག་པ་དང ། ལྕེ་སྤྱང་གི་ཚོགས་འཇིགས་སུ་རུང་བ་དང ། ཤ་ཟའི་ཚོགས་ཧ་ཧར་རྒོད་པ་དང ། ནག་པོའི་མེ་ཅན་གྱི་དུར་ཁྲོད་ཆེན་པོ་བརྒྱད་ན་འཇིགས་བྱེད་ཀྱི་ཉམས་དགུ་དང་ལྡན་པའི་གར་བྱེད་པའོ། །དཔལ་ཡེ་ཤེས་ཐིག་ལེ་ལས་དཀྱིལ་འཁོར་གྱི་འཁོར་ལོ་བསྐྱེད་པ་ཞེས་བྱ་བའི་ལེའུ་སྟེ་བཞི་པའོ།། །། ད་ནི་སྔགས་མཆོག་བཤད་བྱ་བ། །སྒྲུབ་པ་པོ་ནི་འགྲུབ་འགྱུར་བ། །ས་ཡི་ཆ་ནི་མཉམ་པའི་མཆོག་།སྦྲང་རྩི་ག་བུར་གྱིས་ནི་བྱུག་།དྲི་ཞིམ་པ་ཡི་མེ་ཏོག་བཀྲམ། །མེ་ཏོག་གིས་ནི་ཆལ་པར་དགྲམ། །ཆུ་ངོགས་ཡང་ན་ཐང་སྟོང་དུ། །རྡོ་རྗེ་སྐུད་པ་ཡིས་ནི་བསྐོར། །མིག་མཛེས་རྡོ་རྗེ་གཞོན་ནུ་མ། །ཟླ་བ་ཉི་མས་པད་མ་ཁེངས། །ལང་ཚོ་གསར་ལ་རེག་བྱ་འཇམ། །དང་པོ་མཁས་པས་འཇུག་པར་བྱ། །སྔགས་ཀྱི་གནས་སུ་ལུགས་ཇི་བཞིན། །ལེགས་དགྱེས་ཤིན་ཏུ་སྦྱོར་བར་བྱ། །དེ་ཡི་སྦྱོར་བས་གང་ཞིག་འབྱུང ། །ཁ་དང་ས་སོགས་མཆོད་པར་བྱ། །པད་མ་འདབ་མ་བརྒྱད་པ་བྱ། །རྡོ་རྗེ་ཡི་ནི་ཕུར་བུ་བཅུ། །མཁས་པས་ཁྲོ་བོའི་སྔགས་ཀྱིས་གདབ། །ཱ་ལི་ཀཱ་ལི་མཉམ་བྱས་ནས། །འདབ་མ་ཀུན་ལ་རིམ་པས་དགོད། །ཱ་ལི་ཡེ་ཤེས་འདབ་མར་གཅིག་།ཀཱ་ལི་འདབ་མ་བདུན་དུ་དྲན། །འདབ་མ་རེ་རེ་ཡི་གེ་ལྔ། །ལྔ་པ་ལྔ་ནི་ལྔ་ལའོ། །འདབ་མ་གཉིས་སུ་བཞི་གཉིས་ཏེ། །ཀྵཿ ཡི་ཡིག་འབྲུ་ལྟེ་ནང་ངོ ། །དབྱངས་ཡིག་གསལ་ཡིག་བྱེ་བྲག་ཏུ། །ཱ་ལི་ཀཱ་ལི་འདུ་ཤེས་ཡིན། །གཉིས་ཀྱི་ཡི་གེ་འདབ་མ་ཡིས། །སྔགས་ཀྱི་རྒྱལ་པོ་དེ་ཉིད་དྲན། །དང་པོའི་གཟུགས་ཀྱིས་རྒྱལ་པོའི་དབང ། །དེ་ནས་འདབ་གཉིས་ཀྱི་དང་པོར། །བཞི་པའི་དབྱངས་ཡིག་དང་བཅས་པ། །འོག་ཏུ་རེ་ཕ་ཡིས་ནི་བརྒྱན། །དེ་ནས་ཉི་ཤུ་རྩ་ལྔ་ནི། །འདབ་མ་གཉིས་པའི་བཞི་པའོ། །དབྱངས་ཡིག་གཉིས་པ་དང་ལྡན་པ། །ཁྲོ་བའི་ངན་འགྲོ་དག་བྱེད་པ། །འདབ་གཉིས་དང་པོ་བཞི་པ་ཡིན། །དེ་ནས་གསལ་བྱེད་པ་ཡིས་རྒྱན། །
85.14a
འདབ་གཉིས་དང་པོའི་གཉིས་པ་ཡིན། །ལྡན་པ་ཐམས་ཅད་རིམས་འཕྲོག་བྱེད། །གསལ་བྱེད་པ་ལ་གསུམ་པ་སྟེ། །བཅུ་པས་ཡང་དག་ལྡན་པའོ། །དབྱངས་ཀྱི་ཡི་གེ་གཉིས་པ་ཡིས། །ལྷ་ཡི་དབང་ཕྱུག་བརྒྱན་པའོ། །བཞི་པའི་ལྔ་པ་གང་ཡིན་དང ། །དེ་ནས་དེ་ཡི་དང་པོའོ། །བཅུ་དྲུག་པ་ལ་གསུམ་པས་ལྡན། །ཐམས་ཅད་སྔགས་ཀྱི་ཚིག་གི་གཞི། །དེ་ནས་ས་ནི་དག་པ་དང ། །དེ་བཞིན་གསལ་བྱེད་དང་པོའོ། །ཡན་ལག་གསལ་བྱེད་སུམ་བཅུ་གསུམ། །དབྱངས་ཡིག་དྲུག་པ་ཡང་དག་ལྡན། །ཐམས་ཅད་ཀྱི་ནི་འབྱུང་བའི་གཞི། །ཟླ་ཚེས་ཐིག་ལེས་རྣམ་པར་བརྒྱན། །དེ་ནི་དེ་དང་ཉེ་བར་གནས། །སེམས་ཀྱི་དབང་ཕྱུག་ཡི་གེ་མཆོག་།གང་ཞིག་ལྔ་པའི་གཉིས་པ་དང ། །གསུམ་པའི་དང་པོ་དང་ལྡན་པ། །མཐར་ནི་སྲཱ་ཧཱ་ལྡན་པ་སྟེ། །སྙིང་པོའི་སྔགས་ནི་རྨད་བྱུང་མཆོག་།དང་པོ་རུ་ནི་གཟུགས་ཀྱི་མཆོག་།འདབ་མ་གཉིས་པའི་བཞི་པའོ། །འོག་ཏུ་རེ་ཕ་ཡང་དག་ལྡན། །དབྱངས་ཀྱི་ཡི་གེ་བཞི་པས་སྦྱར། །རིག་པའི་རྒྱལ་པོའི་ཡི་གེ་མཆོག་།ཐིག་ལེ་ཡིས་ནི་མགོ་བོ་མནན། །དེ་རང་དུ་ནི་ཉེ་བར་གནས། །ཐམས་ཅད་ཞི་བ་ཞི་བའི་མཆོག་།ཐིགས་པས་མནན་པས་སུམ་ཅུ་གསུམ། །བཅུ་དྲུག་པ་ནི་གཉིས་པར་ལྡན། །ཡང་ནི་དེ་ཉིད་ཡི་གེ་མཆོག་།ཁམས་གསུམ་མུན་པ་སེལ་བར་བྱེད། །ཧཱུཾ་ཕཊ་དེ་ནི་གཉིས་ཀ་སྦྱར། །ཐ་མར་སཝཱ་ཧཱ་ཡིས་ནི་ལྡན། །ཉེ་བའི་སྙིང་པོའི་སྔགས་ཞེས་བྱ། །བཅོམ་ལྡན་ཡེ་ཤེས་ཐིག་ལེས་སོ། །དང་པོར་རྣམ་པར་སྣང་མཛད་དག་།ཉི་ཤུ་རྩ་དགུ་དེ་ནས་སོ། །གསལ་བྱེད་པ་ནི་བཞི་གཉིས་པ། །ཉི་ཤུ་རྩ་བདུན་པས་ནི་ལྡན། །ཉི་ཤུ་རྩ་གཉིས་པ་ཡི་གཞན། །དབྱངས་ཀྱི་ཡི་གེ་བདུན་པས་ལྡན། །བཞི་པ་ལས་ནི་གསུམ་པའོ། །དེ་དང་ཉེ་བར་རླུང་ཡིན་ནོ། །དབྱངས་ཡིག་བཅུ་གཅིག་པ་དང་ལྡན། །འབྲས་བུ་ཐམས་ཅད་དོན་སྦྱིན་ནོ། །ལྔ་པ་ཡིས་ནི་ལྔ་པ་དང ། །ཧ་ཡི་ཡིག་འབྲུ་དེ་དང་ཉེ། །ལྔ་པ་ཡིས་ནི་གསུམ་པ་དང ། །ཉི་ཤུ་རྩ་བརྒྱད་དེ་ནས་སོ། །ལྔ་པ་ཡི་ནི་དང་པོ་དང ། །ཉི་ཤུ་རྩ་བདུན་དེ་ནས་སོ། །དབྱངས་ཡིག་གི་ནི་གཉིས་པས་ལྡན། །
85.14b
ཁམས་གསུམ་དགུག་པར་ནུས་པའོ། །གསལ་བྱེད་ཀྱི་ནི་དང་པོ་དང ། །ཉི་ཤུ་རྩ་བདུན་པ་ནི་ལྡན། །ཉི་ཤུ་རྩ་ལྔ་པ་དག་དང ། །དབྱངས་ཀྱི་ཡི་གེ་གཉིས་པས་ལྡན། །ཉི་ཤུ་རྩ་དྲུག་ཡི་གེ་མཆོག་།དབྱངས་ཀྱི་ཡི་གེ་བཅུ་གཅིག་ལྡན། །སཝཱ་ཧཱ་མཐའ་རུ་ལྡན་པ་ནི། །ཧཱུཾ་ཧཱུཾ་ཕཊ་ཀྱིས་སྤེལ་བར་བྱ། །དེ་ནི་ཕྱག་རྒྱ་ཆེ་སྙིང་པོ། །ཡིད་བཞིན་རིན་ཆེན་མཉམ་པའི་འོད། །དང་པོ་ཡི་ནི་པྲ་ཎ་པ། །དེ་ནས་འདབ་གཉིས་པ་ཡི་གསུམ། །ཡ་ཡི་སྡེ་ཚན་གཉིས་པ་དང ། །ཉི་ཤུ་རྩ་དགུ་དེ་ནས་སོ། །དབྱངས་ཀྱི་ཡི་གེ་གསུམ་པ་ཡིས། །སྙིང་ལ་ཁོང་དུ་ཆུད་པར་བྱ། །དྲུག་བཅུ་རྩ་བཞི་ཕྱེད་དག་པ། །ར་ཡི་ཡིག་འབྲུ་དེ་དང་མཉམ། །ཐ་མར་སཝཱ་ཧཱ་དང་ལྡན་པ། །ཧཱུཾ་ཧཱུཾ་ཕཊ་ནི་སྤེལ་བ་ཡིན། །ཉེ་བའི་སྙིང་པོ་སྔགས་ཆེན་པོ། །ཐམས་ཅད་སྔགས་ཀྱི་བདག་པོ་མཆོག་།ོཾ་ཤྲཱི་མ་ཧཱ་ཀཱ་རུ་ཎ་ཀྲུ་ཏ། མ་ཧཱ་བེ་བེ་ད། སྥཱ་ར་ཎ་མ་ཧཱ་ཀ་སམ་པྲ་བྷ་ཛ་ཡ་བི་ཛེ་ཡ། ཨཊྚཱཊྚ་ཧཱ་ས། མ་ཧཱ་གྷོ་ར་གྷོ་རེ་ཤཝ་ར་མ་ཧཱ་རུ་དྲེཾ་རཱཾ་ཏྲ་མཱ་ལེ་ཌ་ར། སུ་མ་སཱུརྱ་ཨགྣི་ལོ་ཙ་ན། ཨཱ་ཀཱ་ཤོ་ད་ར། མ་ཧཱ་སཱ་གར་ཀོགྒེ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། མ་ཐཱ་མ་ཐཱ། བི་དྷྭཾ་ས་ཡ་བི་དྷྭཾ་ས་ཡ། ཨཱ་ཀཪྵ་ཡ་ཨཱ་ཀཪྵ་ཡ། བྷཱཉྫ་ཡ་བྷཱཉྫ་ཡ། ཙཱུརྞྞ་ཡ་ཙཱུརྞྞ་ཡ། ཧ་ཧ་ཧ་ཧ། ཧི་ཧི་ཧི་ཧི། མ་ཧཱ་རུ་དྷི་ར། པཱ་ཎི་མརྡ་ཡ། ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་སཝཱ་ཧཱ། ཨོཾ་མ་ཧཱ་ཀྲོ་དྷེ་ཤཝ་རཱ་ཡ་ཧཱུཾ་ཕཊ་སཝཱ་ཧཱ། ཨོཾ་མ་ཧཱ་བཻ་བེ་ཌེ་སྥཱ་ར་ཎཱ་ཡ་ཧཱུཾ་ཕཊ་སཝཱ་ཧཱ། ཨོཾ་མ་ཧཱ་ཀལྤནྟ་ཨགྣི་ས་མ་པྲ་བྷཱ་ཡ་ཧཱུཾ་ཕཊ་སཝཱ་ཧཱ། ཨོཾ་ཛ་ཡ་བི་ཛ་ཡ་ཨཊྚཱ་ཊ་ཧཱ་སཱ་ཡ་ཧཱུཾ་ཕཊ་སཝཱ་ཧཱ། ཨོཾ་མ་ཧཱ་གྷོ་ར་གྷོ་རེ་ཤཝ་རཱ་ཡ་ཧཱུཾ་ཕཊ་སཝཱ་ཧཱ། ཨོཾ་མ་ཧཱ་བཱི་ར་བཱི་རེ་ཤཝ་རཱ་ཡ་ཧཱུཾ་ཕཊ་སཝཱ་ཧཱ། ཨོཾ་མ་ཧཱ་རུ་དྷི་རཱནྟྲ་མཱ་ལ་དྷ་རཱ་ཡ་ཧཱུཾ་ཕཊ་སཝཱ་ཧཱ། ཨོཾ་སཽ་མ་སཱུརྱ་ཨགྣི་ལོ་ཙ་ནཱ་ཡ་ཧཱུཾ་ཕཊ་སཝཱ་ཧཱ། ཨོཾ་ཨཱ་ཀཱ་ཤོ་ད་རཱ་ཡ་ཧཱུཾ་ཕཊ་སཝཱ་ཧཱ། ཨོཾ་མ་ཧཱ་སཱ་ག་ར་ཀོཀྐེ་ནི་ཧཱུཾ་ཕཊ་སཝཱ་ཧཱ། ཨོཾ་ཧ་ན་ཧ་ན་ཧཱུཾ་ཕཊ་སཝཱ་ཧཱ། ཨོཾ་ད་ཧ་ད་ཧ་ཧཱུཾ་ཕཊ་སཝཱ་ཧཱ། ཨོཾ་པ་ཙ་པ་ཙ་ཧཱུཾ་ཕཊ་སཝཱ་ཧཱ། ཨོཾ་མ་ཐ་མ་ཐ་ཧཱུཾ་ཕཊ་སཝཱ་ཧཱ། ཨོཾ་བི་དྷྭཾ་ས་ཡ་བི་དྷྭཾ་ས་ཡ་ཧཱུཾ་ཕཊ་སཝཱ་ཧཱ། ཨོཾ་ཨཱ་ཀཪྵ་ཡ་ཨཱ་ཀཪྵ་ཡ་ཧཱུཾ་ཕཊ་སཝཱ་ཧཱ། ཨོཾ་བྷཱཉྫ་ཡ་བྷཱཉྫ་ཡ་ཧཱུཾ་ཕཊ་སཝཱ་ཧཱ། ཨོཾ་ཙཱུརྞྞ་ཡ་ཙཱུརྞྞ་ཡ་ཧཱུཾ་ཕཊ་སཝཱ་ཧཱ། ཨོཾ་ཧ་ཧ་ཧ་ཧ་ཧཱུཾ་ཕཊ་སཝཱ་ཧཱ། ཨོཾ་ཧི་ཧི་ཧི་ཧི
85.15a
ཧཱུཾ་ཕཊ་སཝཱ་ཧཱ། ཨོཾ་མ་ཧཱ་རུ་དྷི་ར་པཱ་ཎི་མ་ཡ་ཧཱུཾ་ཕཊ་སཝཱ་ཧཱ། ཨོཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཕཊ་སཝཱ་ཧཱ། ཨོཾ་ཕཊ་ཕཊ་ཕཊ་ཕཊ་ཧཱུཾ་ཕཊ་སཝཱ་ཧཱ། །ཕྲེང་བའི་སྔགས་ནི་མཆོག་གི་ལྷ། །ལས་ཐམས་ཅད་ནི་རབ་གྲུབ་བྱེད། །ོཾ་མ་ཧཱ་ཀཱ་མ་རུ་པི་ཎཱི་ཡེ་ས་ར་ས་ར། བི་སར་བི་སར། །ཱ་གཙྪ་ཨཱ་གཙྪ། སརྦྦཱརྠཾ་སཱ་དྷ་ཡ་སཱ་དྷ་ཡ། སརྦྦཱ་མཱ་རཾ། ནིརྨྨ་ཐ་ནིརྨྨ་ཐ། མ་ཧཱ་བཱི་རེ་རེ་ཤཝ་ར་སཔྟ་པཱ་ཏཱ་ལ། བ་ད་རེ་ཎེ། སཔྟ་སཱ་ག་ར། ཤུ་ཥ་ཎེ་རུ་ཥ་ཎེ་མུ་ཧ་ཎེ། ཛམ་བྷ་ནེ། སྟམ་བྷ་ནེ། ཏྲཻ་ལོཀྱ་བྷ་ཡཾ་ཀ་རེ། ཧཾ་ཧཾ་ཧིཾ་ཧིཾ་ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། ཌི་ལི་ཌི་ལི། མ་ཧཱ་ཀལྤགྣེ་ས་མ་པྲ་བྷཱ་ཡ་ཧཱུཾ་ཧཱུཾ་ཕཊ་སཝཱ་ཧཱ། ཕྲེང་བའི་སྔགས་ནི་མཆོག་གི་ལྷ། །བཅོམ་ལྡན་མོ་ཡི་བདག་གིས་བསྟན། །ཧ་ངྷཱུཾ་ངྷཱུཾ ། །ཀྲུཾ་ཀྲུཾ། གྷྲོཾ་གྷྲོཾ། མྲོཾ་མྲོཾ། ཇྲོཾ་ཇྲོཾ། ཊཱཾ་ཊཱཾ། པྲཾ་པྲཾ། སྲོཾ་སྲོཾ། ཧྲོཾ་ཧྲོཾ། ཊུཾ་ཊུཾ། ཕྲོཾ་ཕྲོཾ། པྲཾ་པྲཾ། ཡོཾ་ཡོཾ། ཧྲོཾ་ཧྲོཾ། ཤྲོཾ་ཤྲོཾ། ཀུཾ་ཀུཾ། འཁོར་ལོའི་སྔགས་ནི་སྔགས་ཆེན་པོ། །དཔའ་བོ་རྣམས་ཀྱི་སྙིང་པོ་མཆོག་། ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ ་དཔའ་བོའི་ཡན་ལག་མ་སྙིང་སྔགས། །ལྷ་ཡི་དབང་ཕྱུག་བདག་གིས་བཤད། །དང་པོར་ཨོཾ་དང་མཐར་ཧཱུཾ་ཕཊ། །བར་དུ་མིང་ནི་སྤེལ་བའོ། །གསང་བའི་སྔགས་ཀྱི་དགོད་པ་ནི། །མཆོད་པའི་དུས་སུ་མཆོད་པར་བྱ། །ོཾ་ན་ད་ནིརྨཱ་ལཱ་ཡ་ཧཱུཾ་ཧཱུཾ་ཕཊ། ཨོཾ་བིནྡུརྠ་ག་མེ་ཧཱུཾ་ཧཱུཾ་ཕཊ། ཨོཾ་མ་ཧཱ་ཀཱ་ལཱ་གྲཱ་ཡ་ཧཱུཾ་ཧཱུཾ་ཕཊ། ཨོཾ་ནཱ་ད་མ་ཏྲ་སཝ་རཱུ་པཱ་ཡ་ཧཱུཾ་ཧཱུཾ་ཕཊ། ཨོཾ་པ་ར་ཤུ་རཱུ་པཱ་ཡཱ་ཧཱུཾ་ཧཱུཾ་ཕཊ། ཨོཾ་ཨ་པ་རཱ་མ་ན་བུཾ་ཀཱ་ཡ་ཧཱུཾ་ཧཱུཾ་ཕཊ། ཡེ་ཤེས་དྲུག་གི་མཆོག་སྔགས་དབང ། །འཁོར་ལོ་དྲུག་པའི་ནང་ན་བཞུགས། །གསང་བའི་དཀྱིལ་འཁོར་རྒྱལ་དབང་པོ། འདི་ཡི་སྔགས་ཀྱིས་མཆོད་པར་བྱ། ། ཀ་ཙ་ཊ་ཏ་པ་ཡ་ཤ་སྒྲ་ནི་གྲགས། །སྡེ་ཚན་བརྒྱད་ཀྱི་གཙོ་བོ་ཡིན། །རྩ་བའི་སྡེ་ཚན་གཏོར་མ་གཏང ། །བརྟག་པ་གཉིས་ཀྱི་ཇི་བཞིན་ནོ། །རྡོ་རྗེའི་ཕྱག་རྒྱའམ་སྙིང་པོ་ཡིས། །མིག་མི་འཛུམ་པའི་ལྟ་བས་སྦྱིན། །བསྲུང་འཁོར་ཡོད་པའི་ཁྲོ་བོ་ཡི། །དེ་ཡི་སྔགས་ནི་བདག་གིས་བཤད། །ཛྲེམྦྷ་ཛྲེམྦྷ། གྷུ་གྷུ་རོ་གྷུ་གྷུ་རོ། །དྷ་ར་དྷ་ར། བི་དྷ་ར་བི་དྷ་ར། ཊ་གྷེ་ཊ་གྷེ་ཊ། སྥོ་ལིཾ་གི་སྥོ་ལིཾ་གི། ཨ་ཏ་ཨ་ཏ་ཧཱ་ས། ཨཊྚ་ཨཊྚ་ཧཱ་སཿ ་ཧཱུ་ལུ་ཧཱུ་ལུ། བི་ཀྲ་མ་བི་ཀྲ་མ། ཧཱུཾ་ཕཊ་ཀྱིས་ནི
85.15b
མཐའ་མར་ལྡན། །བར་དུ་མིང་ནི་སྤེལ་བའོ། །རྡོ་རྗེ་གསུམ་པ་ཡེ་ཤེས་རྒྱལ། །ཱཿ ཧཱུཾ་ནི་སྔགས་ཀྱི་མཆོག་།དཔལ་ཡེ་ཤེས་ཐིག་ལེ་ལས་སྔགས་བཏུ་བ་ཞེས་བྱ་བའི་ལེའུ་སྟེ་ལྔ་པའོ།། །། དེ་ནས་མཆོད་སྦྱིན་རབ་བདག་བཤད། །གནས་ལ་སོགས་པའི་རིམ་པས་སྦྱོར། །བསྐྱེད་པའི་བྱེ་བྲག་ཐིགས་པ་གསུམ། །རྫོགས་པའི་རིམ་གསུམ་དེ་ལྟར་རོ། །རྣམ་ཤེས་ལ་སོགས་བྱེ་བྲག་ཏུ། །མཆོད་སྦྱིན་ཚངས་པའི་གཡུལ་ས་ཆེ། །རྣམ་པར་ཤེས་པ་ལོངས་སྤྱོད་དང ། །སྣང་དང་ནམ་མཁའ་ཡེ་ཤེས་བཞིན། །སྐུ་བརྒྱད་ཀྱི་ནི་བྱེ་བྲག་ཏུ། །དངོས་པོ་རྟེན་དང་རྣམ་པར་འབྱེད། །ཇི་བཞིན་འདོད་པ་སྡུག་པ་ནི། །མཆོད་སྦྱིན་རྣལ་འབྱོར་མ་དཀྱིལ་འཁོར། །ཽཌྱན་ལ་སོགས་གནས་སུ་ནི། །ལེགས་དགྱེས་མ་སོགས་ལྷ་མོ་ཀུན། །ཀཱ་ལི་ཡེ་ཤེས་ཡིག་མཆོག་སྦྱིན། །ཕྱི་དང་ནང་དུ་བྱ་བའོ། །མཆོད་སྦྱིན་བྱས་ན་སྦྱིན་པ་ཆེ། །འབྲས་བུ་བཀྲ་ཤིས་ལྡན་པ་སྐྱེ། །སེམས་ཅན་རྣམས་ཀྱིས་བྱེ་བྲག་ཏུ། །སྣ་ཚོགས་ཐབས་ནི་རབ་ཏུ་བཤད། །ཁ་ཅིག་རྣམས་ལ་འདུལ་བའི་ཐབས། །ཁ་ཅིག་རྣམས་ལ་མདོ་སྡེའོ། །ལ་ལ་ཕ་རོལ་ཕྱིན་པའི་ལམ། །ཁ་ཅིག་ལ་ནི་སྔགས་ཀྱི་མཆོག་།རབ་འབྲིང་ཐ་མའི་བྱེ་བྲག་ཏུ། །ཐར་པར་འགྲོ་བའི་ཐབས་ཡིན་ནོ། །བློ་གྲོས་ཆེ་འང་ཐེག་གཞན་གྱིས། །གྲངས་མེད་གསུམ་གྱིས་སངས་རྒྱས་ཡིན། །སྔགས་ཀྱི་ཐེག་པ་ལ་མོས་ན། །ཚེ་འདི་ལ་ནི་སངས་རྒྱས་སོ། །ཡང་ནི་རྡོ་རྗེ་འཛིན་པ་ཉིད། །རྣལ་འབྱོར་མ་ཁྱོད་སྨོས་ཅི་དགོས། །ཡང་ན་ལུས་ནི་སྤངས་མ་ཐག་།བླ་ན་མེད་པའི་ཡེ་ཤེས་དག་།བརྩོན་པར་མི་ལྡན་པས་ཀྱང་རྙེད། །བརྩོན་འགྲུས་ལྡན་པས་སྨོས་ཅི་དགོས། །བརྟན་པའི་བརྩོན་པས་དོན་ཐམས་ཅད། །འབད་པ་མེད་ཀྱང་འགྲུབ་པ་ཡིན། །དོན་ཀུན་གྲུབ་པའི་བསོད་ནམས་ཅན། །རྟོག་མེད་ཉོན་མོངས་མེད་པའོ། །གང་ཞིག་ལས་ནི་ཅི་བྱེད་པ། །དེ་ནི་བསོད་ནམས་འཕེལ་བ་ཡིན། །འདོད་པའི་ལོངས་སྤྱོད་གང་གང་སྤྱོད། །དེ་ཀུན་མཆོད་པ་ལ་སོགས་ཡིན། །དེ་ནི་མཆོད་སྦྱིན་འཕེལ་བ་ཡིན། །མཆོད་ལས་ཡེ་ཤེས་འབྲས་བུ་རྙེད། །དེ་ནི་མཆོད་སྦྱིན་ཡང་དག་པ། །རྒྱུད་ཀུན་དུ་ནི་རྙེད་དཀའ་བ། །འབྲས་བུ་ཆེན་པོ་ཐམས་ཅད་སྦྱིན། །རྣལ་འབྱོར་མ་ཡི་གཞི་ཡི་མཆོག་།
85.16a
དཔལ་ཡེ་ཤེས་ཐིག་ལེ་ལས་མཆོད་སྦྱིན་གྱི་ཆོ་ག་ཞེས་བྱ་བའི་ལེའུ་སྟེ་དྲུག་པའོ།། །། དེ་ནས་མཆོད་པའི་ཆོ་ག་ནི། །སྡིག་པ་ཐམས་ཅད་འཇིག་བྱེད་པ། །ཡིད་འཕྲོག་ལྷ་ཡི་མེ་ཏོག་གིས། །ཟླ་བ་ཉི་མའི་འོད་དང་ལྡན། །མེ་དང་སྒྲོན་མ་རྨད་དུ་བྱུང ། །མཆོད་སྦྱིན་དཀྱིལ་འཁོར་ལ་མཆོད་བྱ། །དབང་ནི་མར་ངོའི་དང་པོ་ཡི། །བཅུ་དྲུག་པ་ཡི་དང་པོ་ཡིས། །གཉིས་པ་ཡི་ནི་རབ་ཐིམ་གསུམ། །བཅུ་དྲུག་དང་པོའི་འོག་མ་ཡིས། །གསུམ་པ་ཡི་ནི་ལོངས་སྤྱོད་ཡིན། །བཅུ་དྲུག་པ་ཡི་གསུམ་པས་སོ། །བཞི་པ་ཡི་ནི་ཐིམ་པ་འབྱུང ། །གསུམ་པ་ཡི་ནི་འོག་མས་སོ། །ལྔ་པ་ཡི་ནི་ལོངས་སྤྱོད་ཡིན། །བཅུ་དྲུག་པ་ཡི་ལྔ་པས་སོ། །དྲུག་པ་ཡི་ནི་ཐིམ་པ་འབྱུང ། །བཅུ་དྲུག་པ་ཡི་དྲུག་པས་སོ། །བདུན་པ་ཡི་ནི་རབ་མཆོད་དབང ། །མར་ངོ་ཡི་ནི་བརྒྱད་པ་དག་།དབྱངས་ཡིག་བརྒྱད་པོས་མཆོད་པར་བྱ། །དགུ་པ་ཡི་ནི་ལོངས་སྤྱོད་འབྱུང ། །བཅུ་དྲུག་པ་ཡི་དགུ་པས་སོ། །བཅུ་པ་ཡི་ནི་ཐིམ་པ་འབྱུང ། །དབྱངས་ཡིག་གི་ནི་བཅུ་པས་སོ། །བཅུ་གཅིག་པ་ཡི་དབང་ཡིན་ཏེ། །བཅུ་གཅིག་པ་ཡིས་མཆོད་པར་བྱ། །བཅུ་གཉིས་ཀྱི་ནི་ཐིམ་པ་འབྱུང ། །དབྱངས་ཡིག་བཅུ་གཉིས་པོ་ཡིས་སོ། །བཅུ་གསུམ་པ་ཡི་ལོངས་སྤྱོད་ནི། །དེ་གཉིས་ཀྱི་ནི་མཆོད་པར་བྱ། །བཅུ་བཞི་ཡིས་ནི་ཐིམ་པར་འགྱུར། །དབྱངས་ཡིག་བདུན་པ་གཉིས་ཀྱིས་མཆོད། །ཉ་གང་བ་ལ་དབང་ཡིན་ཏེ། །དབྱངས་ཡིག་བཅཝ་ལྔ་པ་ཡིས་སོ། །བྱང་ཆུབ་སེམས་འབྱུང་མཆོད་པ་ཡིན། །ཡར་ངོ་མར་ངོ་བྱེ་བྲག་ཏུ། །ཤེས་རབ་ཐབས་ནི་རབ་ཏུ་སྦྱོར། །སྐུ་གསུམ་ཡེ་ཤེས་དཀྱིལ་འཁོར་ནི། །ཆེ་དང་ཡི་གེ་སྔགས་ཀྱིས་སུ། །རི་བོང་ཅན་ནི་འཕེལ་བར་འགྱུར། །ཐིག་ལེ་ནམ་མཁའ་འགོག་པ་ཡིས། །རང་བཞིན་དེ་ནི་འབྱུང་བར་འགྱུར། །ཐིག་ལེའི་རང་བཞིན་ཡེ་ཤེས་ནི། །སངས་རྒྱས་ཀུན་གྱིས་ཀྱང་རྙེད་དཀའ། །བདག་གིས་བཀའ་དྲིན་རང་བཞིན་མྱུར། །ཐེ་ཚོམ་མེད་པར་རྙེད་པ་ཡིན། །བླུན་པོ་གང་གིས་བདག་མི་ཤེས། །བསམ
85.16b
གཏན་རགས་ལ་རྟག་མོས་པ། །དེ་རྣམས་ཀུན་ནི་གྲུབ་པ་མེད། །ལྷ་ཡི་དབང་ཕྱུག་བདེན་པའོ། །ས་ཀུན་དབང་ཕྱུག་གིས་བདག་པོ། །ས་ཀུན་དབང་ཕྱུག་མངའ་བདག་པོ། །ས་ཀུན་དབང་ཕྱུག་གི་རྒྱལ་པོ། །ཐམས་ཅད་བདག་ཉིད་ཀུན་ནང་བདག་།ཐམས་ཅད་ཁྱབ་པ་རྟག་ཏུ་སྟོང ། །སངས་རྒྱས་ཀུན་གྱིས་ཕྱག་མཛད་པ། །ཤེས་རབ་ཐབས་ཀྱི་རང་བཞིན་གྲགས། །འགྲོ་མེད་འགྲོ་ལ་བདག་ཉིད་རོལ། །མཆོག་གི་ནམ་མཁའ་མཐའ་མེད་པ། །མཚན་ཉིད་དང་བྲལ་གཞི་དང་བྲལ། །ལྷ་ཡི་དབང་རྣམས་ཐུབ་དབང་རྣམས། །རྡོ་རྗེ་ཅན་ཡང་རྙེད་དཀའ་བ། །ཆོས་དང་ལོངས་སྤྱོད་བདག་གིས་མཐའ། །ཡེ་ཤེས་རྣམ་ཤེས་ངོ་བོ་དག་།རྡོ་རྗེ་ཅན་དང་སངས་རྒྱས་ཀུན། །ལྷ་ཡི་དབང་ཕྱུག་རྙེད་པར་སླ། །རྣམ་པ་མཆོག་གི་ཡེ་ཤེས་སྐུ། །སུས་ཀྱང་སླ་བ་མ་ཡིན་ནོ། །དཔལ་ཡེ་ཤེས་ཐིག་ལེ་ལས་མཆོད་པའི་ཆོ་ག་ཞེས་བྱ་བའི་ལེའུ་སྟེ་བདུན་པའོ།། །། དེ་ནས་ཡང་ནི་བཤད་བྱ་བ། །སྦྱིན་སྲེག་སྡིག་པ་འཇིག་བྱེད་པ། །ཞི་བ་དང་ནི་རྒྱས་པ་དང ། །དེ་བཞིན་དབང་དང་དྲག་པོའོ། །ཞི་བའི་ཧོམ་ཁུང་ཟླུམ་པོ་སྟེ། །རྒྱས་པ་ཡི་ནི་གྲུ་བཞིའོ། །དབང་ནི་གཞུ་ཡི་རྣམ་པ་བཞིན། །དྲག་པོ་ཡི་ནི་གྲུ་གསུམ་མོ། །དཀར་པོ་སེར་དང་དེ་བཞིན་དམར། །ནག་པོ་འདི་ནི་རིམ་པས་སོ། །རྒྱ་མཚོ་མེ་དང་མིག་ཟླ་བ། །ལྷ་ཡི་དབང་ཕྱུག་ཚད་ཡིན་ནོ། །གཞན་ཀུན་གྱི་ནི་རིམ་པས་གཅིག་།སྔར་གྲུབ་ཀྱིས་ནི་གཞན་མ་འགྲུབ། །ཧོམ་ཁུང་རེ་རེར་སྙིང་གར་པད། །རིགས་ཀྱི་ལས་ཀྱི་གོ་རིམས་སོ། །དེ་སྟེང་སྣ་ཚོགས་རྡོ་རྗེ་སྟེ། །འོད་ཟེར་ལྔ་དང་ལྡན་པའོ། །ལྟེ་བའི་ནང་དུ་མེ་ལྷ་ནི། །ཞལ་གསུམ་པ་དང་ཕྱག་བཞི་པ། །སྐུ་མདོག་སེར་པོ་སྤྱན་ཟླུམ་པ། །རལ་པའི་ཅོད་པན་གྱིས་ནི་བརྒྱན། །འབར་བའི་མཆེ་བ་འཇིགས་པ་ཆེ། །རྡོ་རྗེ་སྐྱིལ་ཀྲུང་དུ་ནི་བཞུགས། །བ་དན་གསུམ་དང་བགྲང་ཕྲེང་གཡས། །གཡོན་ན་དབྱིག་གུ་སྤྱི་བླུགས་སོ། །སྙིང་ག་རུ་ནི་མེ་ཡི་ལྷ། །ལྕེ་བདུན་འོད་ལྡན་གསལ་བར་འབྱུང ། །ཅོད་པན་རིན་ཆེན་འབྱུང་ལྡན་མགོན། །ཐིག་ལེའི་དབུས་སུ་མེ་ཡིན་ནོ། །ཚུར་གཤེགས་འོད་ཟེར་ཆེར་ལྡན་པ། །འདོད་པའི་དོན་ཀུན་སྒྲུབ་དབང
85.17a
པོ། །ོཾ་བྷཱུར་བྷུ་བ་སཝཱ་ཧཱ། རང་བྱུང་ཆེན་པོ་བཅོམ་ལྡན་འདས། །འདོད་པའི་དབང་ཕྱུག་འདོད་པ་སྟེར། །མེ་ལྷ་ལས་ཀུན་སྒྲུབ་བྱེད་པ། །འདིར་ནི་བདག་ལ་ཉེ་བར་བཞུགས། །མེ་ལྷ་སྤྱན་དྲང་བའི་སྔགས་སོ། །དེ་ནས་མཆོད་ཡོན་དང་ཉེ་རེག་དང ། འཐོར་འཐུང་ངོ ། །ོཾ་ཧྲིཾ་ཧྲིཾ། མཆོད་ཡོན་གྱི་སྔགས་སོ། །ོཾ་བྷཱི་བྷཱི་ཉེ་རེག་གི་སྔགས་སོ། ། བྷོ་ཀྵ་ཨ་བྷོ་ཀྵ་འཐོར་འཐུང་གི་སྔགས་སོ། །དེ་ནས་གདན་དབུལ་བ་ནི། མཛུབ་མོ་ལུ་གུ་བརྒྱུད་བྱས་ནས། །བར་མ་སྦྱར་བྱད་ཀྱི་ནི་གཟུགས། །སྲིན་ལག་མིག་གི་བྱེ་བྲག་དུ། །མཐེ་ཆུང་མཐེ་བོང་ཟླུམ་པོ་སྟེ། །གདན་དབུལ་བ་ཡི་ཕྱག་རྒྱའོ། །མཁས་པ་ཡི་ནི་ཡོ་བྱད་ཀུན། །དང་པོ་ཉེ་བ་ཉིད་དུ་བྱ། །དཀའ་བ་མེད་པར་ཇི་ལྟར་རྙེད། །དེ་ནི་དེ་ཉིད་རབ་གྲུབ་བྱ། །སྒྲུབ་པའི་དབང་པོ་ཡོན་ཏན་ལྡན། །སྔགས་དང་རྒྱུད་ཀྱི་ཐོས་པ་ཆེ། །སྔགས་ཀྱི་བཟླས་ལ་གཅིག་ཏུ་མོས། །ཡིད་མི་འཕྲོགས་པ་གསལ་བའོ། །ཐིག་ལེ་ཚུལ་ནི་ཡེ་ཤེས་ཆེ། །བྱེ་བྲག་ཤེས་པ་རིན་ཆེན་རིགས། །རིགས་ལྔའི་གཞོན་ནུ་མ་ཡི་ལྔ། །ཡི་དགའི་ཁུ་བ་ཡིས་ནི་ཚིམ། །སྤྱན་རིངས་མ་དང་དག་པ་མ། །འོ་འཛིན་སྲ་ཞིང་འཇམ་ལ་མཐོ། །སྦྱིན་སྲེག་གནས་སུ་གར་དང་ལྡན། །གཅེར་བུ་དང་ནི་སྐྲ་གྲོལ་བ། །སྦྱིན་སྲེག་ལས་སུ་དོན་བསྒྲུབ་ཕྱིར། །རིགས་ལྔའི་བུ་མོ་གཞུག་པར་བྱ། །ཤེས་རབ་ཐབས་ཀྱི་ཆོ་ག་ཡིས། །བླ་མ་ཉིད་ཀྱིས་དང་པོར་མཆོད། །བརྟགས་པ་དང་ནི་མ་བརྟགས་པའི། །འཛིན་པ་འདིར་ནི་མི་བྱའོ། །རྟོག་པའི་འབྱུང་པོས་ཟིན་པ་ལ། །སྣ་ཚོགས་ཐབས་ནི་བདག་གིས་བསྟན། །དོན་དམ་དུ་ནི་ཕྱི་དོན་མེད། །ནང་གི་མ་ཡིན་བར་མ་མིན། །རྡུལ་མེད་རྣམ་པར་རྡུལ་མེད་དག་།སྟོང་པ་དང་ནི་སྟོང་མིན་བྲལ། །རང་རིག་ངོ་བོ་རང་རིག་བྲལ། །ངག་གི་ལམ་གྱིས་མི་རྙེད་དོ། །ཕུང་པོ་ཁམས་ནི་རྣམ་པར་རྟོག་།ལྷ་ཡི་དབང་ཕྱུག་གང་ཞིག་སྲེག་།དེ་ནི་མེ་ཡི་དོན་དམ་པར། །ལུས་གནས་ལུས་ལས་མ་སྐྱེས་པའོ། །ཐམས་ཅད་རྣམ་པ་མཆོག་གིས་རྫོགས། །ཆོས་ཀུན་གྱི་ནི་ནང་ན་བཞུགས། །ཀུན་རྫོབ་རྣམ་པས་གཟུགས་སུ་ནི། །ལྷ་ཡི་དབང་ཕྱུག་ཀུན་བརྟགས་ཡིན། །ཀུན་བརྟགས་ཡེ་ཤེས་སྦྱོར་བ་ཡིས། །རིམ་པས་གནས
85.17b
ནི་རྙེད་པར་འགྱུར། །དེ་བས་ཀུན་ནས་འབད་པ་ཡིས། །རྣམ་པ་ཐམས་ཅད་མཆོག་གི་རྒྱུར། །རང་དང་གཞན་གྱི་གྲུབ་དོན་དུ། །མཆོད་སྦྱིན་སྦྱིན་སྲེག་གཏོར་མ་བྱ། །བསོད་ནམས་ཚོགས་ནི་འཕེལ་ཕྱིར་དང ། །སེམས་ཅན་ཕན་དོན་དེ་དག་བྱ། །ནས་དང ། ཏིལ་དང ། འབྲས་སོ་བ་དང ། གྲོ་དང ། འབྲས་དང ། བོ་ཀ་ལིངྒ་དང ། ཡུངས་ཀར་དང ། སྨན་ཐམས་ཅད་དང ། ཛཱ་ཏི་ཕ་ལ་དང ། གོ་ཡུའི་འབྲས་བུ་དང ། དཔལ་འབྲས་དང ། ནཱ་ག་གེ་སར་དང ། གུར་ཀུམ་དང ། ཙན་དན་དང ། ག་བུར་དང ། འོ་མ་དང ། ཞོ་དང ། ཐུག་པ་དང ། བསྐ་བ་དང ། ལ་དུ་དང ། འཁུར་བ་ལ་སོགས་པ་དང ། གུ་གུལ་དང ། སིཧལ་དང ། གུ་གུལ་དཀར་པོ་དང ། ཡན་ལག་བཅུ་པ་ལ་སོགས་པ་དང ། མེ་ཏོག་དང ། སྤོས་དང ། མར་མེ་དང ། དྲི་དང ། ལྷ་བཤོས་དང ། མདའ་དང་དར་ལ་སོགས་པ་དང་ལྡན་པ་དང ། མེ་ཐབ་ཀྱི་དཀྱིལ་འཁོར་གྱི་ཕྱོགས་མཚམས་ཀྱི་བྱེ་བྲག་ཏུ་བུམ་པ་ཀུན་ལ་སྨན་སྣ་ཚོགས་དང ། ཁ་རྒྱན་གྱིས་བརྒྱན་ཅིང་དྲི་ཞིམ་པའི་ཆུས་ལྟོ་བ་བཀང་ལ། དར་སྣ་ཚོགས་ཀྱིས་མགྲིན་པ་བརྒྱན་པའོ། །ཞི་བ་ལ་སོགས་པའི་ལས་ཐམས་ཅད་ལ་བྱའོ། །རྒྱས་པ་ལ་ནི་གསེར་གྱི་འོད། །ཐམས་ཅད་ཀུན་གྱིས་རབ་ཏུ་བརྟག་།དབང་ལ་ཐམས་ཅད་འོད་དམར་པོ། །ཞོ་དང་འོ་མ་གཉིས་སྤངས་པ། །ཡུངས་ནག་དང་ནི་སྦྲུལ་ནག་པོའི། །ལྤགས་པ་བྱ་རོག་གི་ནི་མཆུ། །བྱ་རོག་ནག་པོ་ཡི་ནི་སྙིང ། །ཀླད་པ་རྒྱུ་མ་རྐང་མར་མགོ། །ཐམས་ཅད་ནག་པོ་ཡི་ནི་མདོག་།ཁྱི་དག་གི་ནི་མཇུག་མའོ། །ཡུངས་ནག་མར་ཁུ་མར་ཁུ་ཆེ། །ཡི་དགས་གཞི་དང་མར་ཁུ་དང ། །ཕྱེད་ཚིག་ཡི་དགས་ཀྱི་ནི་རས། །རུས་ཚིག་བུད་ཤིང་ཚིག་པ་དང ། །ཚེར་མ་རྣོ་ལ་བཟང་བ་དང ། །ཚེར་མའི་མེ་ཏོག་བ་རུ་ར། །ཐུག་པ་ནག་པོ་མ་བསྲེས་པ། །དྲག་པོ་ལ་ནི་རབ་ཏུ་བརྟག་།གཞན་མིན་དཔའ་བོའི་དབང་ཕྱུག་བསམ། །དྲག་པོ་ལ་སོགས་སུ་ནི་བྱ། །རང་གི་དེ་ཉིད་ཞི་ལ་སོགས། །ཕྱག་རྒྱ་ལ་སོགས་རྒྱན་དང་ལྡན། །མར་སར་དྲི་མ་མེད་པ་དང ། །སྐྱོན་དང་བྲལ་བའི་མེ་ཏོག་ཤིང ། །གསར་པ་སྐམ་ཞིང་དྲི་ཞིམ་པ། །དུ་བ་མེད་ཅིང་སྐྱོན་དང་བྲལ། །ཐམས་ཅད་ལ་ནི་ཁྲུ་རེའི་ཚད། །ལས་ལ
85.18a
མཁས་པས་དེ་ལྟར་བྱ། །ཡང་ནི་ཡམ་ཤིང་རབ་ཏུ་བསྟན། །ཇི་ལྟར་རྙེད་པ་འབད་པས་སོ། །ཤ་མི་ཤ་དང ། ཤ་མོ་ཀ་དང ། ཤ་མ་བ་ཤ་ཀ་དང ། ་ཤཝཏྠ་དང ། པལཀྵ་དང ། །ནྱ་གྲོ་དྷ་དང ། དཱུར་བ་དང ། ་པ་མརྐ་དང ། པི་པ་ལ་དང ། ཁ་ཏི་ར་དང ། ཙམ་པ་ཀ་དང ། ་ཤོ་ཀ་དེ་རྣམས་སོར་བརྒྱད་པའི་ཚད་དོ། །དགང་གཟར་བླུགས་གཟར་མར་གྱི་སྣོད། །རིན་པོ་ཆེ་རུ་ཇི་ལྟར་བསྟན། །ལག་པ་ཡི་ནི་དབྱུག་པ་ཚད། །འབད་པ་ཡིས་ནི་དགང་གཟར་བྱ། །དགང་གཟར་ཇི་བཞིན་བླུགས་གཟར་ཏེ། །མར་ཁུའི་སྣོད་ནི་དེ་དང་མཉམ། །གྲུ་གསུམ་ཟླུམ་པོའི་རྣམ་པ་དང ། །རྡོ་རྗེ་ཡིས་ནི་རྣམ་པར་བརྒྱན། །དགང་གཟར་གྱི་ནི་ཁ་ཞེས་བྱ། །སོར་དྲུག་པ་ཡི་ཚད་དུ་ནི། །མགོ་བོ་ཡང་ནི་དེ་བཞིན་བྱ། །ཐམས་ཅད་ཀུན་དུ་གྲུ་བཞི་བྱ། །སྣ་ཚོགས་རྡོ་རྗེ་སྙིང་ག་རུ། །ལྟེ་བ་པད་མ་ཡིས་ནི་བརྒྱན། །ཆུ་སྲིན་ཁ་ནས་བྱུང་བ་ཡི། །རྩེ་དགུ་པ་ཡི་རྡོ་རྗེ་ཡིས། །དགང་གཟར་གྱི་ནི་མཐའ་རུ་ལྡན། །བླུགས་གཟར་བ་ཡི་མིག་དང་འདྲ། །ཡང་ན་དེ་ནི་པད་མས་སོ། །ནང་གི་གཏིང་རིང་གསལ་བ་དང ། །ཧ་ཅང་རིང་དང་ཐུང་མ་ཡིན། །རྡོ་རྗེ་ཕྲ་མོས་ནང་དུ་བརྒྱན། །མར་ཞུའི་སྣོད་ནི་ཟླུམ་པོར་གྲགས། །ལྟེ་བ་རིང་ཞིང་དྲི་མ་མེད། །རྡོ་རྗེ་ལ་སོགས་རྒྱན་དང་ལྡན། །ལྕི་བ་དང་ནི་ཡང་བ་སྤང ། །ཞི་བ་ལ་སོགས་བྱེ་བྲག་ཏུ། །བཞི་རུ་དབྱེ་བ་བདག་གིས་བསྟན། །དྲག་པོ་དེ་ནི་དུར་ཁྲོད་དུ། །དབང་ནི་ཆུའི་ངོགས་སུ་བྱ། །རྒྱས་པ་ཞིང་གི་དབུས་སུ་སྟེ། །ཡང་ན་དགོན་པ་ཆེན་པོ་རུ། །ཞི་བ་དེ་ནི་གྲོང་ཁྱེར་དུ། །ཡང་ན་རྒྱལ་པོ་ཡི་ནི་ཁབ། །རྟ་དང་གླང་པོ་ཆེན་པོ་དང ། །གཞོན་ནུ་མ་དང་བ་ལ་སོགས། །སྦྱིན་སྲེག་དུས་སུ་འབད་པ་ཡིས། །སྔགས་པས་སློབ་དཔོན་ལ་དབུལ་བྱ། །ཞ་འོ་འོན་པ་དམན་པ་ལའང ། །ཅི་ནུས་ཀྱིས་ནི་སྦྱིན་པར་བྱ། །དཔལ་ཡེ་ཤེས་ཐིག་ལེ་ལས་སྦྱིན་སྲེག་གི་ཆོ་ག་ཞེས་བྱ་བའི་ལེའུ་སྟེ་བརྒྱད་པའོ།། །། དེ་ནས་ཡང་ནི་བཤད་བྱ་བ། །ཚོགས་ཀྱི་འཁོར་ལོའི་གཏོར་མ་ཆེ། །ཁྱིམ་ནི
85.18b
སུམ་ཐོག་གི་ནི་གནས། །ཆོམ་རྐུན་ཀུན་དང་བྲལ་བ་ཡི། །ཕྱི་རོལ་ཡུལ་མིན་ནང་གི་མིན། །སློབ་དཔོན་འདུས་ལས་བརྒྱན་པ་དང ། །རྡོ་རྗེ་མདའ་ནི་རྣམ་པར་གཟུགས། །རྡོ་རྗེ་སྐུད་ལ་སོགས་པས་བསྐོར། །དེ་ལྟ་བུ་ཡི་ཁང་མཆོག་ནི། །སྣ་ཚོགས་མེ་ཏོག་ལ་སོགས་ཀྱིས། །དཀྱིལ་འཁོར་ཐམས་ཅད་རྫོགས་པར་བྱ། །སིཧལ་ག་པུར་གྱིས་ནི་མཛེས། །དེ་རུ་མཆོད་སྦྱིན་དོན་དུ་ནི། །བྱོལ་སོང་གཟུགས་ནི་རབ་ཏུ་བླང ། །སྐྱེ་བ་གཅིག་གམ་གཉིས་པ་འམ། །ཡང་ན་གསུམ་པ་ལང་ཚོ་སར། །ནད་ཀུན་མེད་པ་བདེ་གྲུབ་པོ། །དྲི་ཞིམ་རྡུལ་ནི་འབྱུང་བ་ཅན། །གང་ཞིག་མིག་ནི་ཡུན་རིངས་འཛུམས། །མཁས་པས་འབད་དེ་བླང་བར་བྱ། །སྣ་ཚོགས་པ་ཡི་མཆོད་སྦྱིན་གྱིས། །གྲི་གུག་རུང་བས་བརྟག་པར་བྱ། །ཡན་ལག་རབ་ཀྱི་པད་མའི་སྣོད། །བཏུང་བའི་དོན་དུ་བླ་མའི་མདུན། །ཕྱེད་ནི་འཁོར་ལོ་ལ་བྲིམ་སྟེ། །ཕྱེད་ནི་གཏོར་མར་གཏང་བར་བྱ། །ཁྲག་ཆེན་དང་ནི་ཤ་ཆེན་པོ། །ཅི་རྙེད་པ་ནི་བརྟག་པ་ཡིན། །གཞན་ནི་སྣ་ཚོགས་མཆོག་བྱེ་བྲག་།ཉ་དང་ཤ་ལ་སོགས་པར་ལྡན། །མི་འཚེ་བ་དང་སྐྱོན་ཀུན་བྲལ། །སྡིག་པ་མེད་དང་མ་བསླངས་པའོ། །ཆང་ནི་ཆེན་པོ་དང་ལྡན་པ། །གླུ་དང་རོལ་མོས་རབ་ཏུ་མཛེས། །སྒྲོན་མ་ལྔ་དང་བསྲེས་པ་ནི། །དེ་བཞིན་གཤེགས་པ་ལྔ་དང་ལྡན། །སྣ་ཚོགས་དབུས་སུ་ཡན་ལག་མཆོག་།གང་བས་དཀྱིལ་འཁོར་མདུན་དུ་བཞག་།ཇི་ལྟར་བླ་མ་མཆོད་དུས་སུ། །ཇི་བཞིན་པ་ཡི་ཕྱག་རྒྱ་བཅིང ། །དེ་བཞིན་དུ་ནི་ཚོགས་ཀྱིས་ཀྱང ། །རྩེ་གཅིག་གིས་ནི་བཅིང་བར་བྱ། །ལྡང་བ་འམ་ནི་འདུག་པའི་ཚེ། །ཚོགས་ཀྱི་གཙོ་ལ་ཕྱག་འཚལ་ལོ། །ཤིན་ཏུ་དབྱངས་ནི་སྙན་པ་ཡིས། །ཡིད་འཕྲོག་པ་ཡི་གླུ་བླང་བྱ། །ཐེ་ཚོམ་དང་ནི་ཚིགས་བཅད་མིན། །མ་གནང་རྡོ་རྗེ་གར་མི་བྱ། །རྐང་པ་རྐྱོང་དང་གཉིད་ལོག་པ། །ཚོགས་ཀྱི་འཁོར་ལོར་མི་བྱའོ། །དཔལ་ལྡན་རྡོ་རྗེ་སེམས་ཇི་བཞིན། །དཔལ་ལྡན་ལས་ཀྱི་རྡོ་རྗེའོ། །ཅི་མཛད་པ་དང་ཅི་གསུང་བ། །དེ་ནི་མཁས་པས་འབད་དེ་བསྒྲུབ། །དེ་ལྟར་མིན་ན་ཆད་པ་འབབ། །
85.19a
ཇི་ཙམ་ནུས་པ་ཡོད་པ་ཡིས། །དེ་རུ་དམ་ཚིག་དག་པ་ནི། །རྟག་ཏུ་བདག་ཉིད་བཞིན་བསྲུང་བྱ། །དམ་ཚིག་བསྲུངས་ན་འགྲུབ་པ་ནི། །ལྷ་ཡི་དབང་ཕྱུག་རྙེད་པའོ། །དམ་ཚིག་མཆོག་གི་ཡེ་ཤེས་ཏེ། །དད་པ་ཡིས་ནི་རྟག་ཏུ་བཟའ། །དགྱེས་པའི་དམ་ཚིག་ཟིན་ནས་སུ། །འཁོར་ལོ་དང་བཅས་རིགས་རབ་ཚིམ། །རབ་ཚིམ་བྱས་ནས་གཏོར་མ་དབུལ། །ནམ་ཕྱེད་ལམ་གྱི་བཞི་མདོར་རོ། །ཡང་ན་སུམ་མདོ་གྱེས་པ་རུ། །དུར་ཁྲོད་དམ་ནི་ཆུ་ངོགས་སུ། །ལྷག་མ་འམ་ནི་ཡང་ན་ཕུད། །དེ་ཀུན་བསྲེས་ཏེ་ཆུ་ཡིས་སྦྱང ། །གཞན་རྣམས་ཀུན་ནི་སོ་སོར་བཞག་།རྩ་བ་ཇི་བཞིན་རིམ་པས་གཞག་།རང་གནས་ཕྱིན་པ་ཙམ་གྱིས་ནི། །འཁོར་ལོ་ལ་ནི་སྣོད་གཅིག་བརྟག་།སློབ་དཔོན་ལ་ནི་དུམ་བུ་གཅིག་།འབད་པ་ཡིས་ནི་བསྲུང་བར་བྱ། །རང་གི་ཚོགས་ལའང་སྦྱིན་མི་བྱ། །རང་དབང་བསྐུར་བའང་དེ་བཞིན་ནོ། །གཡོན་གྱི་ཡན་ལག་ཕྱག་རྒྱས་གར། །གཡོན་གྱི་ལག་པས་མཆོད་པའོ། །གཡོན་གྱི་རྐང་པས་སྣུན་བྱས་ནས། །གཡོན་མིག་གིས་ནི་བལྟ་བྱའོ། །གལ་ཏེ་རེ་ཞིག་དེའི་དུས་སུ་རྣལ་འབྱོར་མས་བརྟག་པའི་དོན་གྱི་ཕྱིར་འོང་ན་འཇིགས་པར་མི་བྱ་སྟེ། །སེང་གེ་ལྟ་བུའི་ཚུལ་གྱིས་ཡོངས་སུ་བརྟག་གོ། །དེ་ལྟར་ཡང་རྣལ་འབྱོར་མ་ཀུན་གཟུགས་སྣ་ཚོགས་པ་དང ། ཕྱག་རྒྱ་སྣ་ཚོགས་པ་དང ། སྐད་སྣ་ཚོགས་པ་རབ་ཏུ་བྱེད་དོ། །གང་གི་ཚེ་དང་པོར་རྒྱང་རིང་པོ་ནས་ཧ་ཧར་རྒོད་པ་དེའི་ཚེ་ཁམས་གསུམ་རྣམ་པར་རྒྱལ་བའི་ཕྱག་རྒྱ་སྦྱིན་ནོ། །དེའི་དུས་སུ་ཧའི་ཡིག་འབྲུ་ལྔ་སྒྲ་ཆེན་པོས་བརྗོད་པར་བྱའོ། །ཅུང་ཟད་ཉེ་བར་འོངས་ན་ཨ་ལ་ལ་ཞེས་སྨྲ་བར་བྱའོ། །གང་གི་ཚེ་ཕྲད་ཙམ་ན་ལག་པ་བསྐོར་ན་དེའི་ཚེ་གྱེན་དུ་ལག་པའི་དབྱུག་པ་བསྒྲེང་བའི་མཛུབ་མོ་སྦྱིན་ནོ། །གང་གི་ཚེ་སྨིན་མ་འབྱེད་པར་བྱེད་ན་དེའི་ཚེ་འཇིགས་པར་ལྕེ་བསྒྲིལ་བར་བྱའོ། །གང་གི་ཚེ་སྟེང་དུ་བལྟ་བ་དེའི་ཚེ་གཡོན་བརྐྱང་བས་ས་མནན་པར་བྱའོ། །གང་གི་ཚེ་རྒྱབ་ནས་བལྟ་བ་དེའི་ཚེ་གཡས་བརྐྱང་བས་མནན་པར་བྱའོ། །གང་གི་ཚེ་རྣམ་པར་རྒོད་པ་དེའི་ཚེ་ཕེཾ་ཀ་ར་ཞེས་བརྗོད་པར་བྱའོ། །གང་གི་ཚེ་ངུ་བ་དེའི་ཚེ་རྒོད་པར་བྱའོ། །གང་གི་ཚེ་གར་བྱེད་པ་དེའི་ཚེ་སྟོང་ཁེངས་བྱའོ། །གང་གི་ཚེ་སྐྲ
85.19b
བཀྲོལ་བ་དེའི་ཚེ་གཙུག་པུད་དགྲོལ་ལོ། །གང་གི་ཚེ་གོས་བོར་བར་བྱེད་པ་དེའི་ཚེ་ལངས་ཏེ་གཅི་བ་གཏང་བར་བྱའོ། །གང་གི་ཚེ་གཅི་བ་མཐུང་བ་དེའི་ཚེ་རྐང་པ་གཡོན་པའི་མཐེ་བོང་གིས་རྩ་བརྟོག་པར་བྱའོ། །གང་གི་ཚེ་གཏམ་འདྲི་བ་དེའི་ཚེ་སྨྲ་བར་མི་བྱའོ། །གང་གི་ཚེ་འཕྲུག་པ་དེའི་ཚེ་རལ་པ་མདུད་པར་བྱའོ། །གང་གི་ཚེ་དཔྲལ་བར་རེག་པ་དེའི་ཚེ་སྟེང་གི་མཚམས་ཀྱི་མཐར་རེག་གོ། །གང་གི་ཚེ་རྣ་བར་རེག་པ་དེའི་ཚེ་མགྲིན་པ་ལ་རེག་པར་བྱའོ། །གང་གི་ཚེ་སྣ་ལ་རེག་པ་དེའི་ཚེ་ལྕེ་ཕྱིར་དབྱུང་ངོ ། །གང་གི་ཚེ་མགྲིན་པ་སྟོན་པ་དེའི་ཚེ་ལག་པ་བརྐྱང་བར་བྱའོ། །གང་གི་ཚེ་ནུ་མ་སྟོན་པ་དེའི་ཚེ་མིག་སྲུབས་བསྐྱོད་པར་བྱའོ། །གང་གི་ཚེ་ལྟེ་བ་སྟོན་པ་དེའི་ཚེ་སེ་གོལ་སྦྱིན་པར་བྱའོ། །གང་གི་ཚེ་རྐེད་པ་བསྐུལ་བ་དེའི་ཚེ་མཚན་བསྟན་པར་བྱའོ། །གང་གི་ཚེ་རྐང་པ་རྐྱོང་བ་དེའི་ཚེ་མཐེའུ་ཆུང་གཉིས་ཁ་གདང་བར་བྱ་བ་དང ། མཛུབ་མོས་མིག་ཀྱང་དེ་བཞིན་ནོ། །སྣའི་ཕུར་མ་བར་མའི་ལྕེ་ཕྱིར་དབྱུང་བར་བྱ་ཞིང་གཡས་བརྐྱང་དང་གཡོན་བརྐྱང་སྦྱིན་ནོ། །གང་གི་ཚེ་སྣ་ཚོགས་པའི་གཟུགས་བསྟན་པ་དེའི་ཚེ་འཁོར་ལོ་བཅུའི་སྔགས་བརྗོད་པར་བྱའོ། །གང་གི་ཚེ་ཡི་གེའི་དོན་རྗོད་པ་དེའི་ཚེ་ཡི་གེས་ལན་བརྗོད་པར་བྱའོ། །གང་གི་ཚེ་ཕྱིར་བརྗོད་པ་དེའི་ཚེ་ཤའི་ལན་སྨྲ་བར་བྱའོ། །གང་གི་ཚེ་རྒྱལ་མཚན་ཞེས་སྨྲ་བ་དེའི་ཚེ་མཚན་ཞེས་སླར་བརྗོད་པར་བྱའོ། །གང་གི་ཚེ་པད་མ་བརྗོད་པ་དེའི་ཚེ་མངལ་ཞེས་བརྗོད་པར་བྱའོ། །གང་གི་ཚེ་གཤོལ་ཞེས་སྨྲ་བ་དེའི་ཚེ་ལག་པ་ཞེས་བརྗོད་པར་བྱའོ། །གང་གི་ཚེ་འདོད་པའི་ལེན་པ་དེའི་ཚེ་ཤི་ལ་ཞེས་སྨྲ་བར་བྱའོ། །གང་གི་ཚེ་ཚོན་རྩི་ཞེས་རྗོད་པ་དེའི་ཚེ་ཟན་ཞེས་བརྗོད་པར་བྱའོ། །གང་གི་ཚེ་སྲོག་ཅེས་རྗོད་པ་དེའི་ཚེ་ཆུ་ཟླ་ཞེས་སྨྲ་བར་བྱའོ། །གང་གི་ཚེ་རྙེད་པ་ཞེས་བརྗོད་པ་དེའི་ཚེ་ཡིད་ཅེས་བསྟན་ཏོ། །གང་གི་ཚེ་མི་དགའ་བ་བརྗོད་པ་དེའི་ཚེ་ལམ་བསྟན་ནོ། །གང་གི་ཚེ་ཁྲོ་བ་ཞེས་བརྗོད་པ་དེའི་ཚེ་ཆང་བཏུང་ཞིང་སླར་བརྗོད་དོ། །གང་གི་ཚེ་སྨོད་པ་ཞེས་བརྗོད་པ་དེའི་ཚེ་ངལ་སོ་ཞེས་སྨྲའོ། །གང་གི་ཚེ་བརྟན་པ་ཞེས་བརྗོད་པ་དེའི་ཚེ་གཉིད་ཅེས་སྨྲའོ། །གང་གི་ཚེ་དུས
85.20a
བརྗོད་པ་དེའི་ཚེ་དགའ་བ་ཞེས་སྨྲའོ། །གང་གི་ཚེ་ཟླ་བ་ཞེས་བརྗོད་པ་དེའི་ཚེ་གོས་ཞེས་སྨྲའོ། །གང་གི་ཚེ་ཉི་མ་དྲན་ནོ་ཞེས་བརྗོད་པ་དེའི་ཚེ་སྐོམ་ཞེས་སྨྲའོ། །གང་གི་ཚེ་མེ་ཞེས་བརྗོད་པ་དེའི་ཚེ་གྲིབ་མ་ཞེས་སྨྲའོ། །གང་གི་ཚེ་ཉ་ཞེས་བརྗོད་པ་དེའི་ཚེ་འོང་ཞེས་སྨྲའོ། །གང་གི་ཚེ་གླུའི་སྒྲ་བརྗོད་པ་དེའི་ཚེ་གསེར་ཞེས་སྨྲའོ། །གང་གི་ཚེ་ས་ལེ་སྦྲམ་ཞེས་སྨྲ་བ་དེའི་ཚེ་ཁྱེར་ཞེས་སྨྲའོ། །གང་གི་ཚེ་རོ་ཞེས་བརྗོད་པ་དེའི་ཚེ་ས་ཞེས་སྨྲའོ། །གང་གི་ཚེ་ང་རྒྱལ་ཞེས་བརྗོད་པ་དེའི་ཚེ་རླུང་ཞེས་སྨྲའོ། །གང་གི་ཚེ་མཚོ་ཞེས་སྨྲ་བ་དེའི་ཚེ་ལེགས་ཞེས་བརྗོད་དོ། །གང་གི་ཚེ་མདའ་ཞེས་བརྗོད་པ་དེའི་ཚེ་ཁྲིམས་འཆལ་ཞེས་སྨྲའོ། །གང་གི་ཚེ་ཆགས་པའི་སྒྲ་བྱེད་པ་དེའི་ཚེ་འོང་ཞེས་སྨྲའོ། །གང་གི་ཚེ་འོ་མ་ས་ཞེས་བརྗོད་པ་དེའི་ཚེ་སོང་ཞེས་སྨྲའོ། །གང་གི་ཚེ་སེར་སྣ་ཞེས་བརྗོད་པ་དེའི་ཚེ་གྲུབ་ཅེས་སྨྲའོ། །གང་གི་ཚེ་ཉལ་ཞེས་བརྗོད་པ་དེའི་ཚེ་མེད་ཅེས་བརྗོད་དོ། །གང་གི་ཚེ་འབྲུ་ཞེས་བརྗོད་པ་དེའི་ཚེ་ཡང་དག་ཅེས་སྨྲའོ། །གང་གི་ཚེ་རྒྱས་པ་ཞེས་བརྗོད་པ་དེའི་ཚེ་དྲི་ཆུ་ཞེས་བརྗོད་དོ། །གང་གི་ཚེ་རི་བོང་ཞེས་བརྗོད་པ་དེའི་ཚེ་དྲི་ཆེན་ཞེས་བརྗོད་དོ། །གང་གི་ཚེ་བཤོལ་ཞེས་བརྗོད་པ་དེའི་ཚེ་ཁྲག་ཅེས་སྨྲའོ། །གང་གི་ཚེ་གྲང་ཞེས་སྨྲ་བ་དེའི་ཚེ་ཁུ་བ་ཞེས་བརྗོད་དོ། །གང་གི་ཚེ་ཟླ་བ་ཞེས་བརྗོད་པ་དེའི་ཚེ་དགའ་བ་ཕྲད་ཅེས་སྨྲའོ། །གང་གི་ཚེ་པ་ལ་ཤ་ཞེས་བརྗོད་པ་དེའི་ཚེ་དལ་ཞེས་སྨྲའོ། །གང་གི་ཚེ་སིནྡྷུ་བརྗོད་པ་དེའི་ཚེ་མི་ཁོམ་ཞེས་སྨྲའོ། །གཞན་ནི་རང་གི་ཡི་གེའི་རྩ་བའི་དོན་ཤེས་པར་བྱའོ། །བུད་མེད་གང་ཞིག་རྐང་ལག་ཆེན་པོ་དེ་ནི་གཡོན་དུ་གཏང་ངོ ། །བུད་མེད་གང་ཞིག་མིག་སེར་ཞིང་སྣ་ཉམས་པ་དེ་དག་གཡས་ཀྱི་ཆར་བཏང ། བུད་མེད་གང་ཞིག་སྣ་རིང་ལ་ལག་པ་དང་སོར་མོ་རིང་བ། སྤུ་མང་བ་དེ་དག་གི་མདུན་དུ་སེ་གོལ་གསུམ་སྦྱིན་པར་བྱའོ། །བུད་མེད་གང་ཞིག་ཁ་དོག་གནག་ཅིང་གསུས་ཁྱིམ་སྨད་དུ་འཕྱང་ལ་ནུ་མ་འཇོལ་ཞིང་སོ་ཆེ་བ་དེ་དག་གི་མདུན་དུ་གཅི་བ་བཏང་ངོ ། །བུད་མེད་གང་ཞིག་སྐྲ་སེར་ཞིང་མིག་ཟླུམ་ལ། སེན་མོ་རིང་བ་མགྲིན་པ་རིང་བ་དེ་དག་གི་མདུན་དུ་བརྒད་རྒྱངས་ཆེན་པོ་བྱའོ། །བུད་མེད་གང་ཞིག་ཙམ་པའི་མེ་ཏོག
85.20b
ལྟར་དཀར་ཞིང་སྐད་འཇམ་ལ་མིག་རིང་བ་སོ་རི་ལྟ་བུ་དྲི་ཞིམ་པོ་ལ་དགའ་ཞིང་བཞིན་ཅུང་ཟད་འཛུམ་པ། ཟུར་མིག་ལྟ་བ་མཉམ་པར་མ་བཞག་པར་དེ་ལྟ་བུ་བྱེད་པ་དེའི་མདུན་དུ་ཅང་མི་སྨྲ་བར་ས་ལ་བལྟ་ཞིང་མྱུར་བ་མྱུར་བར་གཡོན་ངོས་སུ་འགྲོ་བར་བྱའོ། །དེ་ལྟ་བུའི་དུས་སུ་སྙིང་པོའི་སྔགས་ཟློས་ཤིང་ཕྲེང་བ་བགྲང་བར་བྱའོ། །བུད་མེད་གང་ཞིག་སོར་མོ་གཅིག་ནི་མཛུབ་མོ་བརྐྱང་སྟེ། གཟུགས་སྔོན་པོ་དགའ་བར་ལྟ་བ་གོས་དཔུང་པའི་ངོས་སུ་འཕྱང་བ། སྨིན་མའི་དབུས་ན་དངོས་སུ་ཕྱག་རྒྱ་པད་མའི་དབྱིབས་སམ་འཁྲིལ་ཤིང་ངམ། ཡང་ན་ཨ་ཤོ་ཀ་མཉེན་པོའི་རྩེ་མོ་དང་འདྲ་བ་མཇུག་མ་དེ་དང་ལྷན་ཅིག་འབད་པས་འདུས་པ་བྱའོ། །དེས་ནི་ཐམས་ཅད་འགྲུབ་པར་བྱེད་པ་དང ། འབྲས་བུ་ཐམས་ཅད་བྱེད་པ་དགའ་བ་ཆེན་པོ་སྐྱེད་པར་བྱེད་པས། དེ་དང་ལྷན་ཅིག་གཏོར་མ་ཆེན་པོ་སེམས་ཅན་ཐམས་ཅད་ལ་ཕན་པའི་དོན་དུ་རྒྱ་ཆེན་པོའི་སེམས་ཀྱིས་རྟོག་པ་མེད་པར་སྦྱིན་པར་བྱའོ། །ཤིན་དུ་རྒྱ་ཆེའི་སྣོད་དག་ཏུ། །ཆོ་ག་ཡིས་ནི་དགོད་པར་བྱ། །དབུས་སུ་དཔལ་ལྡན་འཇིགས་པའི་གཟུགས། །སྣ་ཚོགས་རུས་པའི་རྒྱན་དང་བཅས། །ཁྲག་ཆེན་པོས་ནི་ཡང་དག་བཀང ། །ཀ་པཱ་ལ་ནི་ཕྱག་གཡས་སུའོ། །ལྷ་ཆེན་སྣ་ཚོགས་གཟུགས་དང་ལྡན། །ལངས་པ་ཕྱག་ནི་གཡོན་པས་སོ། །ནག་པོ་མེ་ཡི་དྲག་པོ་ཤར། །ནག་པོ་ཆེན་པོ་ལྷོ་ཕྱོགས་སུ། །ནུབ་ཀྱི་ཕྱོགས་སུ་འཇིགས་བྱེད་དང ། །དྲག་པོ་ཆེན་པོ་བྱང་གི་ཕྱོགས། །མེ་ཡི་མཚམས་དྲག་རལ་པ་ཅན། །ཆུ་བདག་མཚམས་སུ་དབྱུག་ནག་པོ། །རླུང་གི་མཚམས་སུ་རོ་ལངས་དྲག་།དབང་ལྡན་ཧེ་རུ་ཀ་ནི་གནག་།པགས་མགོ་མ་དང ། སྒྲ་མ་དང ། དྲག་མ་དང ། ཐོད་པ་མ་དང ། ནག་མོ་དང ། ཤ་ལི་དང ། གཏུམ་མོ་དང ། རིགས་མ་དང ། སྐོམ་མ་དང ། ཕག་མོ་དང ། ཤ་བ་རཱི་དང ། བྲམ་ཟེ་མོ་དང ། རལ་པ་གསུམ་མ་དང ། རལ་དྲག་མ་དང ། དྲག་མིག་མ་དང ། སྡུག་མ་དང ། གཡས་སྐོར་གཡོན་སྐོར་སྡུད་པ་ཡིས། སྣོད་རློན་པར་རིམ་པས་གཞག་གོ། །དེའི་ཕྱི་རོལ་དུ་འཇིག་རྟེན་སྐྱོང་བ་བརྒྱད་ཀྱི་ཚོགས་མང་པོ་དང་བཅས་པས་བསྐོར་བའོ། །
85.21a
ཀླུ་ཆེན་པོ་བརྒྱད། ཕོ་ཉ་དང ། ཕོ་ཉ་མོ་དང ། ཙི་ཏ་དང ། ཙི་ཏི་འཁོར་དང་བཅས་པའོ། །མཁའ་འགྲོ་དང ། མཁའ་འགྲོ་མ་དུ་མ་དང ། མ་མོ་མང་པོ་དང ། འབྱུང་པོ་དང ། ཡི་དགས་དང ། ཤ་ཟ་དང ། ུ་ད་དང ། རྗེད་བྱེད་དང ། གཏུག་ངན་ཅན་གྲངས་མེད་པ་ཛཿ ཧཱུཾ་བཾ་ཧོཿ ་གསོལ་ཅིག་གསོལ་ཅིག་།དམ་ཚིག་བསྐྱང་བར་མཛོད་ཅིག་།འཐུང་ཤིག་།བདག་གིས་ལས་ཐམས་ཅད་གྲུབ་པར་མཛོད་ཅིག་།དམ་ཚིག་ཟུང་ཤིག་།ཧཱུཾ་ཧཱུཾ་ཕཊ་ཕཊ་སཝཱ་ཧཱ། དཔལ་ཡེ་ཤེས་ཐིག་ལེ་ལས་ཚོགས་ཀྱི་འཁོར་ལོའི་ཆོ་ག་དང ། གཏོར་མ་ཆེན་པོ་དང ། རྣལ་འབྱོར་མའི་མཚན་ཉིད་དང ། གསང་བའི་ཚིག་དང ། ཕྱག་རྒྱའི་བརྡ་ཞེས་བྱ་བའི་ལེའུ་སྟེ་དགུ་པའོ།། །། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། བཅོམ་ལྡན་འདས་ལ་བསྐོར་བ་ལན་གསུམ་བྱས་ནས་ཞབས་ལ་མགོ་བོས་གཏུགས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་ཡེ་ཤེས་རྒྱལ་དབང་པོ། །དཀྱིལ་འཁོར་མདོར་ནི་བསྟན་པ་གསུངས། །འདི་རུ་ངེས་བསྟན་ཇི་ལྟར་ལགས། །མངའ་བདག་ཆེན་པོ་ཉིད་བཀའ་སྩོལ། །བཅོམ་ལྡན་འདས་ཀྱིས་བཀའ་སྩལ་པ། །དཀྱིལ་འཁོར་གྱིས་ནི་ངེས་བསྟན་པ། །ཇི་བཞིན་དེ་ཉིད་དཔའ་བོ་ཉོན། །སྔར་གསུངས་པ་ཡི་རྒྱུད་དོན་ལས། །ཱ་ལི་ཀཱ་ལི་བདེ་བ་ཆེ། །མཾ་ཧཱུཾ་གཉིས་ལས་ཐིག་ལེའི་ཚུལ། །དེ་གཉིས་ལས་ནི་གྲི་གུག་པད། །ཡེ་ཤེས་མེ་འོད་ལས་ཡེ་ཤེས། །སྙིང་པོའི་བདག་ཉིད་ཞུ་ལས་བྱུང ། །ཆར་སྤྲིན་དང་ནི་མཉམ་པའི་མདོག་།ཕྱག་ནི་བརྒྱད་གཉིས་པ་ཡིས་བརྒྱན། །བཅུ་དྲུག་ཕྱེད་ཀྱི་ཞལ་འཇིགས་པ། །ཞབས་བཞི་ཡིས་ནི་རབ་ཏུ་མཛེས། །ཉི་ཤུ་རྩ་བཞི་སྤྱན་གྱིས་ཕྱུག་།གཏི་མུག་གསུམ་གྱི་མུན་ནག་འཇོམས། །དཀར་པོ་སེར་པོ་དམར་པོའི་ཞལ། །སྟེང་ཞལ་བུང་བའི་བྱད་གཟུགས་ཅན། །གཡོན་བརྐྱང་གཡས་བརྐྱང་ཞབས་ཀྱིས་ནི། །འཇིགས་བྱེད་ཟླ་ཉི་ཤིན་དུ་མནན། །འཇིགས་བྱེད་མ་ལྡན་ཀ་པཱ་ལ། །
85.21b
ཁྲག་གིས་བཀང་བ་ཕྱག་ན་བསྣམས། །ཞི་བའི་ལྤགས་པ་ན་བཟའ་མཆོག་།ཕྱག་གཉིས་ཀྱིས་ནི་གྱེན་དུ་བརྒྱངས། །ཚངས་པའི་ལྤགས་པས་ཤམ་ཐབས་བྱས། །ཕྱག་རྒྱ་དྲུག་གིས་སྐུ་ལ་བཅིངས། །ཕྱག་རྒྱ་ཆེ་དང་གཉིས་མེད་སྦྱོར། །གར་དང་ལྡན་པའི་ཚངས་སྤྱོད་བཞུགས། །ཚངས་པའི་ཡུལ་ས་བྱེ་བ་གསོལ། །ཚངས་པའི་གཡུལ་སའི་ཞལ་གྱིས་བརྒྱན། །ཕྱག་རྒྱ་ཆེན་པོ་ནམ་མཁའ་སྔོ། །ཕྱག་གཉིས་པ་ནི་ན་བཟའ་གྲོལ། །གྲི་གུག་སྣོད་བསྣམས་ཞི་བའི་ཞལ། །སྤྱན་གསུམ་པ་དང་སྐྲ་བཀྲོལ་བ། །མགྲིན་པར་འཁྱུད་པ་གསང་བ་མཆོག་།དཔའ་བོ་ལ་ནི་རང་བཞིན་བཞུགས། །དཔའ་བོ་མཆོག་གི་རྣམ་པ་དགྱེས། །སྣ་ཚོགས་རྡོ་རྗེའི་རལ་པས་བརྒྱན། །མགོན་པོ་སྣ་ཚོགས་ཟླ་ཅོད་པན། །སྣ་ཚོགས་ཚངས་པའི་ཆང་དང་ལྡན། །སྣ་ཚོགས་པད་མའི་གདན་ལ་བཞུགས། །སྣ་ཚོགས་བདག་ཉིད་སྣ་ཚོགས་འབྱུང ། །སྣ་ཚོགས་རུས་པའི་རྒྱན་དང་ལྡན། །སྣ་ཚོགས་མགོ་བོའི་ཕྲེང་བས་མཛེས། །སྣ་ཚོགས་གར་གྱི་རོ་དང་ལྡན། །སྣ་ཚོགས་གཏི་མུག་གཅོད་པར་མཛད། །སྣ་ཚོགས་སྒྱུ་འཕྲུལ་བདག་ཉིད་མགོན། །སྣ་ཚོགས་སྒྱུ་འཕྲུལ་འཇོམས་པར་མཛད། །དུར་ཁྲོད་བརྒྱད་ཀྱི་དབུས་སུ་ནི། །དཔའ་བོ་རྣལ་འབྱོར་མ་ཡིས་བསྐོར། །འཇིག་རྟེན་སྐྱོང་བ་བརྒྱད་དང་ལྡན། །ཤིང་གི་རྒྱལ་པོ་བརྒྱད་ཀྱིས་བསྐོར། །དཀྱིལ་འཁོར་དགྱེས་པ་འཕར་མ་གཉིས། །ལྷ་ཡི་དབང་ཕྱུག་འདིར་བདག་རོལ། །དཔའ་བོ་རྣལ་འབྱོར་མ་དཀྱིལ་འཁོར། །ཇི་ལྟར་བདག་གིས་རོལ་པ་འདིར། །དེ་རུ་རེ་ཤིག་རིམ་པར་དགྱེས། །རྩེ་གཅིག་སེམས་ཀྱིས་ཁྱོད་ཉོན་ཅིག་།དང་པོར་རེ་ཞིག་འཕར་མ་གཅིག་།སྒོ་ལ་སོགས་པ་ཀ་བས་བརྒྱན། །གནས་དང་ཉེ་བའི་གནས་ཀྱི་རིམ། །ལྷ་ཡི་དབང་ཕྱུག་བདག་གིས་བཤད། །སྣ་ཚོགས་པད་མའི་འདབ་མའི་ཤར་གྱི་ཨཽ་ཌྱན་གྱི་གནས་སུ་ནམ་མཁའ་དྲི་མེད་དང ། ཟླ་བ་ཁ་དོག་ནག་པོའོ། །བྱང་དུ་ཛ་ལན་དྷར་ཤིན་དུ་སྟོབས་ཆེན་དང་གཡོན་པ་མ་དཀར་པོའོ། །ནུབ་ཏུ་པུ་ལི་རར་ལྷའི་དབང་ཕྱུག་དང་ཉི་མཉམ་མ
85.22a
སྐུ་མདོག་དམར་མོའོ། །ལྷོར་ཀཱ་མ་རཱུ་པར་གསང་བའི་བདག་པོ་དང ། རླུང་ཟ་མ་ཨུཏྤ་ལ་སྔོན་པོའི་མདོག་གོ། །མེ་མཚམས་སུ་མཱ་ལ་ཝར་ཉེ་བའི་གནས་སུ་འོད་དྲག་དང་བསིལ་སྦྱིན་མ་ལྗང་ཁུའོ། །གནོད་སྦྱིན་གྱི་མཚམས་སུ་སིནྡྷུའི་ཡུལ་དུ་ཉི་དགྲ་དང ། སྙིང་པོའི་འདབ་མ་སྐུ་མདོག་པད་མ་སྔོན་པོ་དང་འདྲ་བའོ། །རླུང་གི་མཚམས་སུ་ན་ག་རར་མཆོག་དང ། བག་ཡོད་ཐོར་ཅོག་མ་ཟླ་བ་ལྟར་དཀར་མོའོ། །དབང་ལྡན་གྱི་མཚམས་སུ་ཐམས་ཅད་ཀྱི་བྱེད་པ་པོ་དང་ཉི་འདུལ་མ་ཉི་མའི་འོད་ལྟ་བུའོ། །ཤར་སྒོར་མུམྨུ་ནིའི་ཞིང་དུ་ཨུཏྤ་ལའི་སྙིང་པོ་དང ། ཞི་བ་འཆི་བའི་ཕོ་ཉ་མོ་སྔོན་མོ་ཆེན་མོའོ། །བྱང་སྒོར་དེ་བ་ཀོ་ཊར་ཞི་བ་ཆེན་པོའི་བདག་པོ་དང་ལྗང་བརྩོན་མ་གུར་གུམ་གྱི་མདོག་གོ། །ནུབ་སྒོར་ཉེ་ཞིང་ཀུ་ལུ་ཏར་ནག་པོ་འདུལ་མ་དང་འོད་བདུན་མདུད་པ་ནག་པོའི་མདོག་གོ། །ལྷོ་སྒོར་ཨར་བུ་དར་རྨད་དུ་བྱུང་བ་དཔའ་མོ་དང་ཚངས་པའི་མ་དུ་བའི་མདོག་གོ། །ཤར་ལྷོའི་མཚམས་སུ་ཚནྡོ་ཧ་ཧ་རི་ཀི་ལ་བར་དྲག་ཆེན་དང་ཁྱབ་འཇུག་མ་སྤྲིན་གྱི་མདོག་གོ། །བྱང་མཚམས་སུ་ཀུ་ཏ་བར་དྲེགས་འཇོམས་དང་ཁ་མ་གསེར་གྱི་མདོག་གོ། །ནུབ་མཚམས་སུ་ཉེ་བའི་ཚནྡོ་ཧ་ལམ་པ་ཀར་རི་རབ་བརྟན་མ་དང་ཐམས་ཅད་སྐྱེད་བྱེད་མ་དམར་ནག་གོ། །ལྷོ་མཚམས་སུ་ཀན་ཙི་ཀར་ནམ་མཁའི་ཞལ་དང་དཔའ་བོའི་ཡུམ་གསེར་གྱི་མདོག་གོ། །ཐབས་དང་ཤེས་རབ་གཉིས་སུ་མེད་པའི་སྦྱོར་བའི་འཁྱུད་པ་དང ། སྐུ་མདོག་དང་བཞུགས་སྟབས་འདྲ་བའོ། །དཔའ་བོ་རྣམས་ནི་ཞལ་བཞི་དང་ཕྱག་བཞི་ན་ཁཊྭཱཾ་ག་དང ། ཀ་པཱ་ལ་དང ། དྲིལ་བུ་དང ། རྔེའུ་ཆུང་བསྣམས་པའོ། །སྣ་ཚོགས་རྡོ་རྗེའི་གདན་པད་མའི་སྟེང་དུ་འཇིགས་བྱེད་ཀྱི་གདན་ལ་རྒྱལ་པོའི་བཞུགས་ཐབས་ཀྱིས་ཟླ་བ་དང་ཉི་མ་ཞབས་ཀྱིས་མནན་པ། མེའི་དཀྱིལ་འཁོར་གྱི་ནང་ན་ཉི་མ་བྱེ་བའི་འོད་པས་གསལ་བ་སྣང་བར་སྤྲོ་བའོ། །འཕར་མ་གཉིས་པར་སྣ་ཚོགས་པད་མ་འདབ་མ་བརྒྱད་པ་དང ། སྒོ་དང་རྟ་བབས་ལ་སོགས་པ་དང ། དུར་ཁྲོད་བརྒྱད་དང་ལྡན་པའོ། །དེའི་ཤར་གྱི་འདབ་མར་འདུས་པའི་གནས
85.22b
ལས་ཀྱི་ཡུལ་དུ་སྐམ་པ་མ་སྤྲིན་མདོག་གོ། །བྱང་དུ་གསེར་གྱི་གླིང་དུ་འཇིགས་པ་ཁ་དོག་དམར་མོ་ཆེན་མོའོ། །ནུབ་ཏུ་ཉེ་བའི་འདུས་པ་ཀུ་ལུ་ཏར་འོད་མ་དམར་མོའོ། །ལྷོར་བིན་དུར་མཆུ་འཕྱངས་མ་པལ་ཀྴའི་མདོག་གོ། །མེའི་མཚམས་སུ་དུར་ཁྲོད་དུ་ཡི་དགས་འདུས་པར་རི་རབ་སོ་མ་ཟླ་བའི་མདོག་གོ། །གནོད་སྦྱིན་གྱི་མཚམས་ཆུ་ངོགས་སུ་དུས་ཀྱི་བདེ་བ་མར་མེའི་འོད་ཀྱི་མདོག་གོ། །རླུང་མཚམས་ཉེ་བའི་དུར་ཁྲོད་དུ་ཙ་རི་ཊར་ཉི་མིག་མ་གསེར་མདོག་གོ། །དབང་ལྡན་གྱི་མཚམས་གཞོན་ནུའི་གྲོང་ཁྱེར་དུ་མེའི་ཞལ་མ་གསེར་བཙོ་མའི་མདོག་གོ། །ཤར་སྒོར་བི་ལ་བ་ཀཱ་མེ་རར་འདོད་པའི་མ་སེར་མོའོ། །བྱང་སྒོར་ཀེ་ར་ཏར་ལྕེ་རིངས་མ་དཀར་མོའོ། །ནུབ་སྒོར་ཉེ་བའི་བི་ལ་ནེ་བ་ལེར་ཆོས་དཀར་མ་ཟླ་བ་ལྟར་དཀར་མོའོ། །ལྷོ་སྒོར་ཀ་ནུ་འཛར་བདེན་མདོག་མ་མར་ཀ་ཏའི་མདོག་གོ། །ཤར་མཚམས་ལམ་གནས་ཤར་གྱིས་ལུས་འཕགས་སུ་མིག་སྟོང་པ་རྡོ་རྗེ་ས་ལའི་མདོག་གོ། །བྱང་མཚམས་སུ་བྱང་གི་སྒྲ་མི་སྙན་དུ་སྟག་མོ་བཻ་ཌཱུརྱའི་མདོག་གོ། །ནུབ་མཚམས་བ་ལང་སྤྱོད་དུ་གཏུམ་མོ་མུ་ས་ར་བའི་མདོག་གོ། །ལྷོ་མཚམས་སུ་ཉེ་བའི་ལམ་འཛམ་བུའི་གླིང་དུ་འདོད་པའི་གཟུགས་མ་སྣ་ཚོགས་མདོག་གོ། །རྣལ་འབྱོར་མ་ཐམས་ཅད་ཞལ་བཞི་མ། སྤྱན་གསུམ་གསུམ་ཕྱག་བཞི་མ། སྐྲ་དང་ན་བཟའ་གྲོལ་བ། །རལ་གྲི་དང་ཀ་པཱ་ལ་དང ། ཁཊྭཱཾ་ག་དང ། རྔེའུ་ཆུང་བསྣམས་པའོ། །རོའི་སྟེང་དུ་གཡོན་བརྐྱང་བས་བཞུགས་པའོ། །ཡང་ན་རྒྱལ་པོའི་བཞུགས་སྟབས་སུ་རང་འོད་ཀྱང་ཐབས་ལ་འཁྱུད་པ། རུས་པའི་རྒྱན་གྱིས་བརྒྱན་པ་བསྒོམ་པར་བྱའོ། །དེ་ལྟའི་དཀྱིལ་འཁོར་རྒྱལ་དབང་པོ། །རྒྱུད་ཀུན་དུ་ནི་རྙེད་པ་དཀའ། །ལུས་དང་བྷ་ག་བྱང་ཆུབ་སེམས། །དཀྱིལ་འཁོར་གསུམ་ནི་རབ་མཆོག་གོ། །ཡང་ན་སྙིང་པོ་དཀྱིལ་འཁོར་བསྟན། །མ་ཡི་ཡིག་འབྲུ་འདབ་མར་བརྗོད། །ཎ་ཡི་ཡིག་འབྲུ་ལྟེ་བར་དྲན། །ཌ་ཡི་ཡིག་འབྲུ་གེ་སར་དག་།ལ་ཡི་ཡིག་འབྲུ་དེ་བདེ་འདྲ། །མ་ཡི་ཡིག་འབྲུ་རིན་ཆེན་གྲགས། །ཎ་ཡི་ཡིག་འབྲུ་མདུད་པར་བརྗོད། །ཌ་ཡི་ཡིག་འབྲུ
85.23a
རིང་པོའི་དངོས། །ལ་ཡི་ཡིག་འབྲུ་ཁར་བརྗོད་དོ། །མ་ཡི་ཡིག་འབྲུ་ཤུ་ཀྲའི་གཟུགས། །ཎ་ཡི་ཡིག་འབྲུ་ཞུ་བའི་དངོས། །ཌ་ཡི་ཡིག་འབྲུ་འོད་དང་ལྡན། །ལ་ཡི་ཡིག་འབྲུ་བདེ་བའི་གཟུགས། །མ་ནི་སྣང་བའི་འདུ་ཤེས་གྲགས། །ཎ་ནི་ཡིག་འབྲུ་སྣང་བ་མཆེད། །ཌ་ནི་སྣང་བ་སྣང་བ་ཐོབ། །ལ་ནི་ཡང་དག་དྲི་མེད་མཆོག་།མ་ཡི་ཡིག་འབྲུ་དགའ་བར་གྲགས། །ཎ་ཡི་ཡིག་འབྲུ་མཆོག་ཏུ་དྲན། །ཌ་ཡི་ཡིག་འབྲུ་དགའ་བྲལ་དགའ། །ལ་ནི་ལྷན་ཅིག་སྐྱེས་པར་དྲན། །མ་ཡི་ཡིག་འབྲུ་ས་ཞེས་བྱ། །ཎ་ཡི་ཡིག་འབྲུ་ཆུ་རུ་བསྟན། །ཌ་ཡི་ཡིག་འབྲུ་དེ་ནི་མེ། །ལ་ཡི་ཡིག་འབྲུ་རླུང་གི་གཟུགས། །གཡོ་བའི་ཕྱིར་ནི་རླུང་དུ་བརྗོད། །ཡང་ན་ཁྱབ་པའི་ཕྱིར་ནི་དྲན། །ཡེ་ཤེས་རྙེད་པ་ཡི་ནི་ཕྱིར། །བདེ་བ་ཡི་ནི་ཆེན་པོ་ལེན། །ཡེ་ཤེས་ངོ་བོ་བདེ་བ་ཆེ། །དཀྱིལ་འཁོར་དུ་ནི་ཡང་དག་བཞུགས། །དཀྱིལ་འཁོར་སངས་རྒྱས་རིན་ཆེན་གཙོ། །ཐིག་ལེའི་ངོ་བོ་ཡི་གེ་བྲལ། །རྣམ་པ་ཐམས་ཅད་རྣམ་པ་མེད། །ཕྱག་རྒྱ་དང་ནི་སྔགས་དང་བྲལ། །སྔགས་ཆེན་ཀུན་དགའ་ར་བའི་ལམ། །དབྱངས་དང་གསལ་བྱེད་དང་བྲལ་བ། །དྲི་མ་མེད་པ་བཅོས་མ་མེད། །རྒྱུ་མཚན་དང་ནི་གཞི་མེད་པ། །ཡང་དག་དྲི་མེད་གནས་དག་པ། །རང་བཞིན་གྲགས་པ་སྐྱེ་མེད་མཁའ། །དཔའ་བོའི་ངོ་བོར་གྲགས་པ་བདག་།རྣམ་པ་ཀུན་ཏུ་ཡང་དག་བཞུགས། །དཀྱིལ་འཁོར་དཀྱིལ་འཁོར་པ་དང་བདག་།དཀྱིལ་འཁོར་གྱི་ནི་བདག་པོ་བདག་།དཔའ་བོ་འཆང་དང་ཉན་པ་བདག་།བྱེད་དང་འཕྲོག་དང་མངའ་བདག་བདག་།ཆོས་ཀུན་གྱི་ནི་རང་ངོ་བདག་།སྟོང་དང་སྙིང་རྗེ་གཉིས་སུ་མེད། །སྟོང་པ་ཆེན་པོ་རང་ངོ་གྲགས། །གང་དུ་མི་དམིགས་པ་ནི་བདག་།དངོས་པོ་མ་ཡིན་བསམ་མི་བྱ། །དངོས་བདག་དེ་ཡང་དེ་ཉིད་མིན། །དངོས་དང་དངོས་མིན་རྣམ་པར་གྲོལ། །དངོས་དང་དངོས་མེད་བདག་ཉིད་བདག་།དངོས་དང་དངོས་མེད་གཉིས་ལས་འབྱུང ། །དངོས་དང་དངོས་མེད་ནང་ཡོད་དོ། །བུར་ཤིང་གི་ནི་རོ་ཇི་བཞིན། །ཇི་ལྟར་ཏིལ་གྱི་ནང་གི་མར། །ཇི་ལྟར་ཤིང་གི་ནང་གི་མེ། །དེ་བཞིན་ཐམས་ཅད་བདག
85.23b
ཉིད་བཞུགས། །འོན་ཀྱང་ཡེ་ཤེས་སེམས་དཔའ་ཡིས། །བདག་ཏུ་འཛིན་པར་མི་བྱའོ། །བདག་འཛིན་པ་ནི་ཉོན་མོངས་ཆེ། །སེམས་ཅན་དོན་ལས་ཉེ་བར་ཉམས། །སེམས་ཅན་དོན་ལས་བསོད་ནམས་གཞན། །ཆེ་བ་གང་ན་ཡང་ནི་མེད། །རང་དོན་སྒྲུབ་ལ་བསོད་ནམས་མིན། །སྐྱེས་བུ་ཆེན་པོས་འདི་ལྟ་བུ། །རང་དོན་མ་རུངས་པ་ནི་དོར། །གཞན་ལ་སྡང་ཉམས་ཉན་ཐོས་སེམས། །རང་དོན་གཏི་མུག་འཛིན་པས་ནོན། །སེམས་ཅན་དོན་ལ་རྒྱབ་ཀྱིས་ཕྱོགས། །གྲུབ་པ་ཆེན་པོ་འདོད་པ་ཡིས། །དེ་དང་ལྷན་ཅིག་གནས་མི་བྱ། །དེ་ལ་གཏམ་ཡང་མི་བྱ་སྟེ། །ཐབས་དང་མི་ལྡན་འཇིགས་པ་ཡིས། །མགོ་ལ་ནོར་བུས་བརྒྱན་ཀྱང་ནི། །སྦྲུལ་ནག་བཞིན་དུ་དོར་བར་བྱ། །ཉན་ཐོས་དེ་དང་ནམ་ཡང་མིན། །དེ་བས་མུ་སྟེགས་འདུས་པ་མཆོག་།ཇི་ལྟར་འཐིང་ཤིང་སྣོད་ཆག་པ། །དེ་ནི་གང་དུའང་དགོས་པ་མེད། །དེ་བཞིན་ཉན་ཐོས་ཚུལ་ཁྲིམས་ཉམས། །གང་ཚེ་རང་གི་ཆོས་ཀྱི་ནི། །ལྟ་བ་བསྟན་ཀྱང་དྲི་མ་ཅན། །དེ་ཚེ་དེ་ལ་དགོས་པ་མེད། །བྱང་ཆུབ་སེམས་དཔའ་ཁྲིམས་ཉམས་ཀྱང ། །དེ་ལ་ལྟུང་བ་འབྱུང་བ་མིན། །ཡང་དག་ལྟ་དང་གཞན་དོན་ཅན། །དེ་འདྲའི་ཐབས་དང་ལྡན་པས་ན། །ཉེས་པས་གོས་པར་མི་འགྱུར་ཏེ། །ཆུ་ཡིས་པད་མ་ཇི་བཞིན་ནོ། །མུ་སྟེགས་པ་འམ་ཉན་ཐོས་ལ། །དམན་ཡང་དེ་ལ་སྨད་མི་བྱ། །ཡེ་ཤེས་དཀྱིལ་འཁོར་མཐར་ཕྱིན་པས། །དད་པས་དེ་དག་མཆོད་མི་བྱ། །ཕྱི་ཡི་འཕར་མ་གཅིག་གནས་སུ། །དཀྱིལ་འཁོར་འདིར་བཞུགས་རྣལ་འབྱོར་མ། །རྟག་ཏུ་མེ་ཏོག་སྤོས་ལ་སོགས། །སྔགས་འདི་ཡིས་ནི་མཆོད་པར་བྱ། །ནི་དང་པོར་ཧཱུཾ་ཕཊ་མཐར། །བར་དུ་མིང་ནི་སྤེལ་བར་བྱ། །སྣ་ཚོགས་ལྔ་ཡི་མཆོད་སྦྱིན་གྱིས། །དཀྱིལ་འཁོར་ས་ལ་རབ་ཏུ་མཆོད། །མཆོད་ན་ཐེ་ཚོམ་མེད་པར་ནི། །གྲུབ་པ་ཆེན་པོ་རྙེད་པར་འགྱུར། །དཔལ་ཡེ་ཤེས་ཐིག་ལེ་ལས་རྣམ་པ་དང་བཅས་པའི་དཀྱིལ་འཁོར་བསྒོམ་པ་ཞེས་བྱ་བའི་ལེའུ་སྟེ་བཅུ་པའོ།། །། དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གིས་བཅོམ་ལྡན་འདས་ཀྱི་ཞབས་ལ་མགོ་བོས
85.24a
ཕྱག་འཚལ་ཏེ་འདི་སྐད་ཅེས་གསོལ་ཏོ། །ཡེ་ཤེས་ཉི་མ་བཅོམ་ལྡན་འདས། །སྙིང་ཀའི་པད་མ་ཁ་འབྱེད་པ། །གང་ཞིག་བདག་ནི་ཅི་ཞུ་བ། །བདག་ལ་ཐུགས་རྗེ་ཆེན་པོས་གསུངས། །སྔགས་ཀྱི་བཟླས་པ་དང ། མཆོད་སྦྱིན་དང ། མཆོད་པ་དང ། དབང་བསྐུར་བ་དང ། གནས་ཀྱི་མདོར་བསྟན་པ་དང ། སྦྱིན་བསྲེག་དང ། གཏོར་མ་ཆེན་པོའི་རིམ་པས་འདིར་བཅོམ་ལྡན་འདས་ཀྱིས་བདག་ལ་ངེས་པའི་དོན་བསྟན་པ་བཀའ་སྩལ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། སྔགས་ཀྱི་བཟླས་པའི་ངེས་པའི་དོན། །ཉོན་ཅིག་ཡང་དག་བདག་གིས་བཤད། །དགའ་བ་ལ་སོགས་པ་ལས་འབྱུང ། །ཡིད་ནི་སྔགས་ཞེས་རྗོད་པ་ཡིན། །ཡང་ནི་བསྲུབ་དང་བསྲུབ་པའི་སྔགས། །སྔགས་ནི་བདུད་རྩིར་བསྟན་པའོ། །ལམ་གྱི་ཐར་པ་དེ་ནི་སྔགས། །ཚིགས་རྒྱས་པ་ནི་དེ་བཞིན་ནོ། །ཕྲད་པ་གཉིས་ཀྱི་དབུས་ན་གནས། །དེ་ནི་དོན་དམ་པ་ཡི་སྔགས། །སྔགས་ནི་ཨཱ་ལི་ཀཱ་ལི་ཡིན། །བརྗོད་པ་དེ་ནི་བཟླས་པའོ། །བསྐྱེད་དང་རྫོགས་དང་བྱེ་བྲག་ཏུ། །སྔགས་ཀྱི་བཟླས་པ་རབ་ཏུ་གྲགས། །གང་དུ་རྐེ་དང་རྐན་ནི་གཉིས། །བསྐྱོད་པ་གང་དུ་མི་འབྱུང་བ། །སྲོག་གི་རྩ་བའི་ནང་ཡོད་པ། །ལུགས་དང་ལུགས་མིན་རྒྱུན་མི་འཆད། །ཐིག་ལེ་གསུམ་དང་ཡིག་གསུམ་དག་།རང་འོད་མ་བཅོས་བརྗོད་པར་བྱ། །རྐན་གྱི་ནང་དུ་ལྕེ་འཇུག་པ། །རོ་མ་ཡིས་ནི་མནན་པར་བྱ། །ཡང་ནི་རྩེ་མོའི་ཆ་ཡིས་རེག་།མཉམ་སྦྱོར་རྣམ་པའི་བསམ་གཏན་གྱིས། །གྲགས་པ་ཡོད་པའི་བདུད་རྩི་བཞིན། །དེ་ནས་ཚུལ་ནི་འབྱུང་བར་འགྱུར། །སྤྲུལ་པའི་རིམ་པའི་བྱེ་བྲག་ཏུ། །ཐིག་ལེ་དྲངས་པ་བདེ་བའི་སྐུ། །མཆོད་སྦྱིན་དཀྱིལ་འཁོར་གྱིས་ནི་བརྒྱན། །དེ་ཡི་སྐྱེད་རིམ་བདག་གིས་བཤད། །དཔལ་ལྡན་རྡོ་རྗེ་འཛིན་པ་ཡིས། །དགྱེས་པའི་གནས་བསྟེན་མཆོད་སྦྱིན་ནོ། །མཆོག་དགའ་འབྱུང་བའི་མཆོད་སྦྱིན་ནི། །རབ་ཀྱི་དཀྱིལ་འཁོར་དེ་རུ་བྱ། །མཆོག་གི་དགའ་བ་འཁོར་བར་བསྟན། །ཀཱ་ལི་ཡེ་ཤེས་མཚན་ཉིད་དོ། །སྐུ་བརྒྱད་བདག་ཉིད་མཆོད་སྦྱིན་ནི། །གནས་བརྒྱད་པར་ནི་མཆོད་པར་བྱ། །ཇི་བཞིན
85.24b
རྣལ་འབྱོར་མ་ཡི་འབྱུང ། །དེ་ཡི་དོན་ནི་བདག་གིས་བཤད། །སུམ་བཅུ་རྩ་གཉིས་ཡིག་གཟུགས་ཀྱིས། །ཀཱ་ལིའི་ཐིག་ལེས་གཙོ་བོའི་ཕྱིར། །བསྒོམ་པའི་དབང་པོས་གནས་ལ་སོགས། །ལྷ་མོ་བཅས་པས་མཆོད་པར་བྱ། །ལྷ་མོ་ཀུན་དང་གནས་ལ་སོགས། །ལྷ་ཡི་དབང་ཕྱུག་སྐྱབས་ཡིན་ནོ། །ལྷ་མོ་འདི་རུ་རྩ་ཡིན་ཏེ། །འབྱུང་བ་དང་ནི་གནས་ས་བྱེད། །སྐྱབས་ལས་རྣམ་པར་རྫོགས་པ་ཡིན། །མཚན་དང་དཔེ་བྱད་ལྡན་པའོ། །གྲུ་གསུམ་དབུས་སུ་བཅོམ་ལྡན་འདས། །ུཏྤལ་སྔོན་པོའི་མདོག་དང་འདྲ། །སྣ་ཚོགས་པད་མའི་གདན་དབུས་སུ། །བདུད་བཞི་ཡི་ནི་སྟེང་ན་བཞུགས། །ཞལ་ནི་བཅུ་དྲུག་ཕྱག་བཅུ་དྲུག་།ཞལ་ནི་སོ་སོར་སྤྱན་གསུམ་མོ། །སེར་པོ་དམར་པོ་ལྗང་ཁུའི་ཞལ། །རི་བོང་ཅན་ནི་གཡོན་སྐོར་ཞིང ། །ཞལ་གཞན་ཀུན་ནི་བུང་བ་བཞིན། །སྟེང་གི་ཞལ་ནི་འཇིགས་པའོ། །གཤིན་རྗེའི་ལྤགས་པས་རྣམ་དཀྲིས་བྱས། །དམ་བཅས་དོན་ཕྱིར་བརྟུལ་ཞུགས་དོན། །སངས་རྒྱས་ཕྲེང་བའི་དོ་ཤལ་བྱས། །མགོ་བོ་ཡི་ནི་ཆུན་འཕྱང་བརྒྱན། །གར་དགུ་ཡི་ནི་རོ་དང་ལྡན། །སྐུ་ནི་ཕྱག་རྒྱ་དྲུག་གིས་མཛེས། །སྣ་ཚོགས་རུས་པའི་རྒྱན་དང་ལྡན། །སྣ་ཚོགས་འོད་ཀྱི་སྣང་བས་འབར། ཡེ་ཤེས་མཁའ་འགྲོ་བདེ་བ་ཆེ། །ལེགས་དགྱེས་དབང་པོ་གཉིས་མེད་སྦྱོར། །དུར་ཁྲོད་ཀྱི་ནི་ཐལ་བས་བྱུགས། །སྟེང་དུ་བགྲད་པས་བདེ་བར་བཞུགས། །གཡས་བརྐྱང་བ་ཡི་གར་དང་ལྡན། །གསང་བའི་དོན་གནས་བརྡ་བྱེད་པ། །མཁའ་འགྲོ་མ་ཡི་ཚོགས་ཀྱིས་བསྐོར། །དུར་ཁྲོད་བརྒྱད་ཀྱིས་དབུས་ན་བཞུགས། །རྡོ་རྗེ་དྲིལ་བུ་གཉིས་མེད་སྦྱོར། །ཚངས་པ་ཡི་ནི་ལྤགས་པས་ཁེབས། །མདའ་གཞུ་འཁོར་ལོ་རིན་པོ་ཆེ། །རལ་གྲི་རྩེ་གསུམ་རྔེའུ་ཆུང་དང ། །ཟླ་བ་ཉི་མ་སྟ་རེ་སྣོད། །ཁཊྭཱཾ་ག་དང་ཐོད་པའོ། །བཅོམ་ལྡན་འདས་མ་དེ་དང་འདྲ། །ཡང་ན་ཕྱག་ནི་གཉིས་མའོ། །རྡོ་རྗེ་གྲི་གུག་འཛིན་པར་འཁྱུད། །ཞི་བ་སྤྱན་ནི་གསུམ་པའོ། །ནང་གི་འཕར་མ་དགྱེས་པ་ནི། །ཟླ་བ་གང་བ་བཞིན་དུ་དག་།སྣ་ཚོགས་པད་མ་ཡི་ནི་གཞི། །འདབ་མ་བརྒྱད་ཀྱིས་རྣམ་པར་མཛེས། །ཕྱི་མ་གྲུ
85.25a
བཞི་རུ་ནི་གྲགས། །སྣ་ཚོགས་རྡོ་རྗེའི་སྟེང་དུའོ། །ཡི་དགས་ཆེན་པོའི་ཕྲེང་བས་ལྡན། །སྣ་ཚོགས་དཔའ་བོས་ཉེ་བར་མཛེས། །སྣ་ཚོགས་པ་ཡི་ཤིང་གིས་བསྐོར། །སྣ་ཚོགས་རྣལ་འབྱོར་མ་དང་ལྡན། །དེའི་ནང་དུ་གྲུ་གསུམ་གྱི་ཕྱག་རྒྱའི་གྲཝ་ནི་དཔལ་ཨཽ་ཌྱན་དང་ཛ་ལན་དྷ་ར་དང ། པུ་ལི་ར་སྟེ། མགོ་བོ་དང ། ཙུག་པུད་དང ། སྤྱི་བོར་ལེགས་དགྱེས་རྡོ་རྗེ་མ་དང ། རྡོ་རྗེ་འཚེད་མ་དང ། རྡོ་རྗེ་གླང་ཆེན་མ་བཅོམ་ལྡན་འདས་ལ་བསྐུལ་བར་བྱེད་ཅིང་ཕྱག་གི་འཕར་མ་འབར་བར་རོ་མཆོག་ཆེན་པོའི་སྣོད་ཀྱིས་མཆོད་སྦྱིན་འབུལ་བར་བྱེད་ཅིང་ཚངས་པའི་བུ་གར་རྩེ་སྦྱར་གྱི་ཕྱག་རྒྱ་བྱེད་པ་སྟེ་མཐེའུ་ཆུང་ལུ་གུ་རྒྱུད་དུ་སྦྲེལ་ཏེ་ལྷག་མས་མཐེ་བོང་མནན་ནས། མཛུབ་མོ་སྦྱར་བ་འོག་ཏུ་བཅིངས་པའི་སྐུ་ཡི་དགས་ཆེན་པོའི་སྟེང་ན་གཡོན་བརྐྱང་བས་གནས་པ། སྤྱན་གསུམ་པ། སྐྲ་གྲོལ་ཞིང་ན་བཟའ་གྲོལ་བ། ཆུ་སྐྱེས་རྒྱས་པ། བཅོམ་ལྡན་འདས་ལ་བལྟ་ཞིང་བཞུགས་པའོ། །ཤར་གྱི་ཕྱོགས་སུ་སྣ་ཚོགས་པད་མ་འདབ་མ་བརྒྱད་པའི་ལྟེ་བར་ཀཱ་མ་རུ་པ་སྟེ། སྨིན་མའི་དབུས་སུ་འཇིགས་མའོ། །དེའི་ཤར་གྱི་འདབ་མར་མ་ལ་ཝ་སྟེ་སྣའི་རྩེ་མོར་དཔའ་མོའོ། །བྱང་གི་འདབ་མར་སིན་དྷུ་སྟེ་མིག་གཉིས་སུ་ཆང་འཐུང་མའོ། །ནུབ་ཀྱི་འདབ་མར་ནཱ་ག་ར་སྟེ་རྣ་བ་གཉིས་སུ་འཇིགས་བྱེད་མའོ། །ལྷོ་ཡི་འདབ་མར་སིང་ག་ལ་སྟེ་ཁའི་པད་མར་ཕོ་ཉ་མའོ། །བྱང་མཚམས་སུ་སྣ་ཚོགས་པད་མ་འདབ་མ་བརྒྱད་པའི་ལྟེ་བར་མུ་མུ་ནི་སྟེ། ཀོས་སྐོར་སྟོབས་ཆེན་མའོ། །དེའི་ཤར་གྱི་འདབ་མར་དེ་བི་ཀོ་ཊ་སྟེ། སྐེའི་གླིང་བུར་རྟ་མགྲིན་མའོ། །བྱང་གི་འདབ་མར་ཀུ་ལུ་ཏ་སྟེ། རྒྱབ་ཀྱི་གླིང་བུར་རྟ་རྣ་མའོ། །ནུབ་ཀྱི་འདབ་མའི་ཨར་བུ་ཏར་ནུ་མ་གཉིས་སུ་གླང་ཆེན་སྣ་མའོ། །ལྷོའི་འདབ་མར་ཏ་ལི་ཀི་ལི་བ་སྟེ། སྙིང་གར་གླང་ཆེན་ལྟོ་བ་མའོ། །ནུབ་ཕྱོགས་ཀྱི་སྣ་ཚོགས་པད་མ་འདབ་མ་བརྒྱད་པའི་ལྟེ་བར་གོ་ཏ་བ་རི་སྟེ། ལྟེ་བའི་གནས་སུ་མེ་མའོ། །དེའི་ཤར་གྱི་འདབ་མར་ལམ་པ་ཀ་སྟེ། གསང་བའི་པད་མར་ཆུ་རྒྱུན་མའོ། །བྱང་གི་འདབ་མར་ཀན་ཙི་ཀ་སྟེ། མཚན་གྱི་དབུས་སུ་རི་བོང་ཅན་མའོ། །ནུབ་ཀྱི་འདབ་མར་ལས་ཀྱི
85.25b
ཡུལ་ཏེ། མཚན་རྩེར་ཉི་མའི་འོད་མའོ། །ལྷོ་ཡི་འདབ་མར་གསེར་གླིང་སྟེ། བཤང་ཁའི་གནས་སུ་དུང་སྣ་མའོ། །ལྷོ་ཕྱོགས་ཀྱི་པད་མ་འདབ་མ་བརྒྱད་པའི་ལྟེ་བའི་ཀོང་ཀན་སྟེ། བརླ་གཉིས་སུ་དུང་གཙུག་མའོ། །ཤར་གྱི་འདབ་མར་བིན་དྷུ་སྟེ། པུས་མོ་གཉིས་སུ་དུང་ལྟེ་མའོ། །བྱང་གི་འདབ་མར་ཡི་དགས་འདུས་པ་སྟེ། རྗེ་ངར་གཉིས་སུ་སྟོབས་ཆེན་མའོ། །ནུབ་ཀྱི་འདབ་མར་རྒྱ་མཚོའི་ངོགས་ཏེ། རྐང་པ་གཉིས་སུ་བྱ་རྒོད་མའོ། །ལྷོའི་འདབ་མར་རྩ་རི་ཊ་སྟེ། སོར་མོ་ལ་རྒོད་ཁ་མའོ། །དེའི་སྣ་ཚོགས་པད་མ་འདབ་མ་བརྒྱད་པ་བཞིའི་འདབ་མ་བཞི་ལ་དགོད་དོ། །འདབ་མ་ལྷག་མ་ཀུན་ལ་ཁྲག་ཆེན་པོས་ཤིན་ཏུ་གང་བའི་ཀ་པཱ་ལ་དང་ལྡན་པའི་སྣ་ཚོགས་ཆེན་པོའི་བུམ་པ་ཁ་རྒྱན་བཙུགས་པ། བདུད་རྩི་ཆེན་པོས་ལྟོ་བ་གང་བ། དར་སྣ་ཚོགས་ཀྱིས་མགྲིན་པ་མཐོ་བར་བསྐོར་བའོ། །ཤར་མཚམས་སུ་ཀུ་མཱ་ར་པུ་རི་དང ། གསྨི་ར་སྟེ་མཐེ་བོང་དང་ལུས་ཐམས་ཅད་ལ་ཧོར་པ་མ་དང་ཧོར་མིག་མའོ། །བྱང་མཚམས་སུ་ཀེ་ར་ཏ་དང ། ནེ་པ་ལ་སྟེ་རྐང་པ་གཉིས་ལ་ལྷག་པར་ཧོར་མགོ་མ་དང་དེ་བཞིན་དུ་དམར་མོའོ། །ནུབ་མཚམས་སུ་ཀར་བུ་ཛ་དང ། ཤར་གྱི་ལུས་འཕགས་ཏེ་རྐེད་པ་དང ། སྙིང་གར་མིག་དམར་དང་སྲོག་མའོ། །ལྷོ་མཚམས་སུ་བྱང་གི་སྒྲ་མི་སྙན་དང་བན་ལང་སྤྱོད་དེ་ལྟེ་བའི་ལྟེ་བ་དང ། སྤྲུལ་པའི་སྙིང་པོར་འཛིན་མ་དང་རོ་མའོ། །འཛམ་བུའི་གླིང་དུ་གདགས་པའི་པད་མའི་སྣར་བཅོམ་ལྡན་འདས་དང་ཨ་བ་དྷཱུ་ཏཱིའོ། །དེ་ལྟ་བུ་ནི་ནང་གི་འཕར་མས་བདེ་བ་ཆེན་པོའི་འཁོར་ལོ་ན་ཡོད་པའི་རྩ་སུམ་བཅུ་རྩ་གཉིས་རྣམ་པར་དག་པས་ཕྱི་མའི་ཕྱི་མ་རྒྱུད་ཀྱི་གོ་རིམ་རྣལ་འབྱོར་མ་རྣམས་ཀྱི་ནང་གི་དག་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ཕྱི་རོལ་ཏུ་མཚན་དང་དཔེ་བྱད་དང་ལྡན་པ་རྣམ་པ་དང་བཅས་པ་བརྒྱད་གཉིས་ཀྱི་ལོའོ། །བྱད་གཟུགས་མཛེས་པ་ཆེན་པོའི་ཤ་རྒྱས་པས་དྲེགས་པ། སྒེག་པའི་ང་རྒྱལ་ཅན་ཕྱག་བཞི་པ
85.26a
སྤྱན་གསུམ་པ། སྲ་ཞིང་མཐོ་བའི་ནུ་མ་དང ། རུས་པ་སྣ་ཚོགས་ཀྱི་རྒྱན་གྱིས་བརྒྱན་པ། ཕྱག་རྒྱ་ལྔ་འཛིན་པ། གཡོན་བརྐྱང་བས་རོའི་སྟེང་ན་གནས་པ། ཀ་པཱ་ལ་དང ། ཁཊྭཱཾ་ག་དང ། མདའ་གཞུ་ཁེངས་པར་འགེངས་པ། བདུད་གྲངས་མེད་པ་འཇོམས་པ་ཁོ་ན། སྐུ་མདོག་སྣ་ཚོགས་པ་མཛེས་པའི་གཟུགས་འཛིན་པ། ཐུགས་རྗེ་ཆེན་པོས་སེམས་ཅན་འགུགས་མ། སེམས་ཅན་གྱི་དོན་མཛད་པ་ལ་བརྩོན་པ། བྲེལ་བ་དང་མི་མཁྱེན་པ་མེད་པའི་སེམས་དང་ལྡན་པའོ། །ཕྱིའི་འཕར་མ་ཤར་དང་བྱང་དང་ནུབ་དང་ལྷོ་མཚམས་རེ་རེར་ནང་གི་ལྷ་མོ་བཞིན་དུ་ལྷ་མོ་གཉིས་གཉིས་ཏེ། སྐྲ་དམར་མ་དང ། རིན་ཆེན་མ་དང ། ཕུག་རོན་མ་དང ། སེར་མོ་དང ། ནག་མོ་དང ། རི་བོང་མ་དང ། རི་དགས་མོ་དང ། ར་མ་མོའོ། ཤར་དང ། བྱང་དང ། ནུབ་དང ། ལྷོའི་སྒོ་རེ་རེར་སྒོ་སྐྱོང་མ་གཉིས་གཉིས་ཏེ། དེ་དག་ཀྱང་དྲེགས་པ་ཆེན་པོ་འཇིགས་པ་ཆེན་མོ་མཆོག་གི་ལེགས་དགྱེས་ཀྱིས་རིངས་པ། སྣ་ཚོགས་ཀྱི་ཉམས་ཀྱིས་སྐུ་ཁྱབ་པའོ། །ཤར་སྒོར་རྡོ་རྗེ་རོ་ལངས་མ་དང ། རྡོ་རྗེ་དྲ་བ་མ་སྐུ་མདོག་ནག་པོ། ཕྱག་བཞི་མ་མདའ་གཞུ་འགེངས་ཤིང་ཆུ་སྲིན་དང་ཉ་བསྣམས་པ། ཀ་པཱ་ལ་དང་ཁཊྭཱཾ་ག་འཛིན་པ། སྤྱན་གསུམ་པ། ཕྱག་རྒྱ་ལྔས་བརྒྱན་པ། གཅེར་བུ་སྐྲ་གྲོལ་བ། མིའི་རུས་པ་སྣ་ཚོགས་ཀྱི་རྒྱན་གྱིས་བརྒྱན་པ། གཡོན་བརྐྱང་བ། མགོ་བོའི་ཆུན་འཕྱང་རྒྱུ་མ་ལས་བརྒྱུས་པ་འཆང་བའོ། །བྱང་སྒོར་རྡོ་རྗེ་རྩེ་མོ་མ་དང ། དེ་བཞིན་དུ་རྡོ་རྗེ་ཟླུམ་པ་མ་སྐུ་མདོག་སེར་པོ། སེང་གེ་དང ། བྱ་ཁྱུང་བསྣམས་པའོ། །ནུབ་སྒོར་རྡོ་རྗེ་སྐེ་རགས་མ་དང ། རྡོ་རྗེ་སེར་མོ་མ་སྐུ་མདོག་དམར་མོ། གླིང་བུ་དང ། རྫ་རྔ་ཆེན་པོའི་སྒྲ་ཁོ་ནའོ། །ལྷོ་སྒོར་རྡོ་རྗེ་དགོད་མ་དང ། རྡོ་རྗེ་ཉི་མ་མོ་སྐུ་མདོག་ལྗང་གུ། རྫ་རྔ་དང་པི་ཝང་གི་རོལ་མོའི་སྒྲ་ཁོ་ན་སྟེ། ཇི་ལྟར་ཤར་སྒོར་བཞུགས་པའི་རྣལ་འབྱོར་མ་དེ་ལྟར་ཐམས་ཅད་ཀྱང་རུས་པ་ལ་སོགས་པའི་རྒྱན་དང ། བཞུགས་སྟབས་དང ། ཕྱག་མཚན་དང་ལྡན་པའོ། །ལོངས་སྤྱོད་ཀྱི་འཁོར་ལོའི་ནང་ན་ཡོད་པའི་རྩ་བརྒྱད་གཉིས
85.26b
ཀྱི་གྲངས་ནི་དེ་དག་ཀུན་གྱི་རྣམ་པར་དག་པའོ། །སྐུ་བརྒྱད་བདག་ཉིད་ཀྱི་ནི་མགོན། །མཆོད་སྦྱིན་སྒྲ་ཡིས་ཀུན་ཏུ་བརྟགས། །མཆོད་པ་དེ་ནི་མཆོད་སྦྱིན་བརྗོད། །རྩ་ནི་ཀུན་གྱི་གནས་རབ་མཆོག་།གནས་ནི་གདན་ལ་སོགས་པའི་དགྱེས། །གནས་ཀུན་གྱི་ནི་བླ་ན་མེད། །གསང་ཆེན་དག་པ་པད་མ་ཡིས། །འདབ་མ་བརྒྱད་པ་ལྟེ་བར་བཅས། །བདེ་བ་ཡི་ནི་ཡངས་པའི་སར། །རྩ་ཡི་དཀྱིལ་འཁོར་གྱིས་བརྒྱན་ནོ། །གནས་ནི་གདན་ལ་བྱ་བར་གྲགས། །གནས་ནི་རྟེན་དུ་བརྗོད་པའོ། །བདེ་བ་འབྱུང་བའི་ངལ་སོས་ནི། །དེ་ཡི་ཞིང་ནི་དོན་དམ་པར། །བདེ་བའི་ཡེ་ཤེས་འབྱུང་བ་སྟེ། །ཚན་དོ་ཧར་ནི་འདི་རུ་བཤད། །ཐིག་ལེ་གསུམ་གྱི་ཡེ་ཤེས་བདེ། །གཅིག་བྱེད་པ་ཡི་གཏན་ཚིགས་ཀྱིས། །དེ་ཡི་འདུས་སར་བསྟན་པ་ཡིན། །རྣལ་འབྱོར་རྒྱུད་དུ་རྙེད་དཀའ་བ། །གང་དུ་ཚོར་བ་ཡོད་པ་སྟེ། །བདེ་བ་འབྱུང་བའི་ཐིམ་དེ་བཞིན། །དེ་ནི་འདི་རུ་དུར་ཁྲོད་བརྗོད། །ཡང་ན་བདེ་བའི་རྣམ་ཤེས་སོ། །གང་དུ་བདེ་བ་ཡང་དག་རྙེད། །དེ་ནི་པི་ལ་པ་རུ་གྲགས། །སྐྱེ་དང་ཐིམ་པའི་ཡེ་ཤེས་ཏེ། །གང་དུ་བདེ་བའི་ཟླ་བ་སྐྱེ། །དེ་ནི་ལམ་རབ་ཏུ་ནི་བསྟན། །འགྲོ་བའི་བདག་ཉིད་ལམ་ཡིན་ནོ། །བདེ་བའི་རྒྱལ་པོ་གང་ཞིག་འགོག་།དེ་ནི་སྦྱོར་བའི་ཡེ་ཤེས་རབ། །དེ་ནི་གནས་བརྒྱད་དགེས་པ་ཡིན། །སྐུ་བརྒྱད་རང་གི་ངོ་བོ་ཅན། །ཡེ་ཤེས་བརྒྱད་ཀྱི་བདག་ཉིད་དག་།སངས་རྒྱས་ཀུན་གྱིས་རྙེད་དཀའ་བ། །རྩ་ཀུན་གྱི་ནི་དག་པའི་གཞི། །དེ་ལ་ཡང་ནི་རྩ་ཀུན་གནས། །ཉེ་བའི་གནས་ནི་ཐམས་ཅད་ཀུན། །ལྷ་ཡི་དབང་ཕྱུག་རྣམ་པར་སྨིན། །བསྐྱེད་དང་རྫོགས་པའི་སྦྱོར་བ་ཡིས། །ཐིག་ལེ་དྲུག་ནི་རབ་ཏུ་གྲགས། །ཐིག་ལེའི་དབུས་ན་ཡེ་ཤེས་ཡོད། །ངག་གི་ལམ་གྱིས་རྙེད་པར་དཀའ། །བསྐྱེད་པ་དང་ནི་རྫོགས་པ་མེད། །དྲུག་མིན་དེ་བཞིན་གསུམ་པ་མིན། །གསུམ་དང་བྲལ་བ་གསུམ་པར་གྲགས། །ཡེ་ཤེས་རང་བཞིན་དེ་སྐྱེ་མེད། །ཉི་མའི་ཐིག་ལེའི་ཡེ་ཤེས་ཤར། །འབད་པ་ཡིས་ནི་མཆོད་སྦྱིན་བྱ། །གང་ཚེ་མཆོག་བྱུང་མ་ཤར་བར། །
85.27a
དེ་ཚེ་ཉི་མ་འབྱུང་མི་འགྱུར། །ཟླ་བ་དེ་ནི་དགའ་བྲལ་དགའ། །ཆགས་པ་འདི་རུ་ཐིམ་པར་བྱེད། །ཉི་མའི་དབུས་ནས་ཟླ་བ་འབྱུང ། །ཟླ་བའི་དབུས་ནས་ཉི་མ་འཆར། །དྲི་མ་མེད་ཕྱིར་ཡངས་པར་འགྲོ། །ཤེས་རབ་བདག་ཉིད་གཟུགས་ཀྱི་ཕྱིར། །ཐམས་ཅད་ལ་ནི་ཚིམ་པར་བྱེད། །ཐམས་ཅད་ཀྱི་ནི་སྐྱེ་བའི་རྒྱུ། །འབྲས་བུ་བྱེད་པའི་བདག་ཉིད་ཟླ། །རྒྱུ་བྱེད་བདག་ཉིད་ཟླ་བ་སྟེ། །འབྲས་བུ་བྱེད་བདག་ཉི་མའོ། །རྒྱུ་དང་འབྲས་བུ་གཉིས་མེད་པའི། །བདེ་བ་ཆགས་ཆེན་བདག་ཉིད་དོ། །ཆགས་པ་ཆེན་པོ་དངོས་མེད་ན། །ཇི་ལྟར་བདེ་བ་འབྱུང་བར་འགྱུར། །བདེ་བ་ཡེ་ཤེས་དྲི་མེད་གྲགས། །ཐ་མལ་བདེ་ཉིད་བདེ་བ་མིན། །བྱོལ་སོང་བག་ཆགས་རབ་རྨོངས་པ། །དབང་པོ་གཉིས་ཀྱི་བདེ་བར་འདོད། །བདེ་བ་མཆོག་གི་རང་རིག་པ། །ཆགས་པ་དང་ནི་ཆགས་བྲལ་མེད། །བདེ་བ་ཐིག་ལེའི་ནང་དུ་ནི། །ཆར་ཡང་ནང་དུ་བདེ་བ་ཆེ། །དེ་གཉིས་ཡེ་ཤེས་ཚུལ་གྱི་ནང ། །རྣམ་པར་ཤེས་པའི་ཚུལ་ཅན་དང ། །རྣམ་པར་ཤེས་དང་ཡེ་ཤེས་བྲལ། །གཞན་དང་གཞན་མིན་ནང་ཡོད་པའོ། །སྦྱོར་དྲུག་གྱེས་པ་རྣམ་པར་ཤེས། །ཆར་ཡང་རྩ་བ་ཀུན་བརྟགས་བྲལ། །རྟོག་པ་སྤངས་པ་དེ་ཉིད་ནི། །བསམ་གཏན་འཛིན་པ་མེད་པའོ། །ཚོར་བྱ་ཚོར་བྱེད་གཉིས་ལས་གྲོལ། །སྲིད་དང་མྱ་ངན་འདས་དག་པའི། །དེ་ནི་གསང་ཆེན་དེ་ཉིད་དོ། །གང་དུ་ཡང་ནི་གསལ་མ་བྱས། །འབད་པ་ཡིས་ནི་སྦ་བར་བྱ། །སྨྲ་བར་མི་བྱ་གང་ལ་ལར། །རྣལ་འབྱོར་རྒྱུད་དུ་མོས་གྱུར་པ། །ལྷ་ཡི་དབང་ཕྱུག་གསལ་མི་བྱ། །དཔལ་ཡེ་ཤེས་ཐིག་ལེ་ལས་སྔགས་ཀྱི་བཟླས་པའི་རིམ་པ་དང ། མཆོད་སྦྱིན་གྱི་ཆོ་ག་དང ། དཀྱིལ་འཁོར་སྐྱེད་པའི་རིམ་པ་དང ། གནས་ཀྱི་དོན་དང ། རྩའི་འཁོར་ལོ་འབྱུང་བ་དང ། དེ་ཁོ་ན་ཉིད་ཀྱི་དོན་བསྟན་པའི་ལེའུ་སྟེ་བཅུ་གཅིག་པའོ།། །། དེ་ནས་མཆོད་པའི་ཆོ་ག་འདིའི། །ངེས་པར་བསྟན་པ་བདག་གིས་བཤད། །ཐིམ་དང་ལོངས་སྤྱོད་དག་གིས་ནི། །ཡིད་འཕྲོག་ཡང
85.27b
དག་མཆོད་པའོ། །ཟླ་བ་ཉི་མ་མེ་ཏོག་གིས། །སྐུ་ཡི་རྒྱལ་པོ་ཉིད་ལ་མཆོད། །འདོད་པ་འདི་ནི་དཔྲལ་བ་རུ། །མར་ངོ་ཚེས་ཀྱི་དང་པོ་དབང ། །ཡིད་ལས་དེ་རུ་འདོད་པར་འགྱུར། །ངེས་པར་ཨ་ཡི་ཐིག་ལེ་ལས། །ཐིམ་པ་འདི་ནི་སྨིན་ཕྲག་ཏུ། །དགའ་བས་དེ་ལས་འདའ་བར་འགྱུར། །ཱ་ལྀའི་ཐིག་ལེ་གཉིས་པས་སོ། །བདེ་བའི་མཁུར་ཚོས་གཉིས་ནས་སུ། །ཚེས་གསུམ་པ་ལ་ལོངས་སྤྱོད་འགྱུར། །དེ་ལ་རྣམ་པར་སྨིན་པས་འགྲོ། །ཱ་ལྀའི་ཐིགས་པ་གསུམ་པས་སོ། །བདུད་རྩི་ཀོས་སྐོའི་གནས་སུ་ནི། །ཚེས་བཞི་པ་ལ་ཐིམ་པ་འབྱུང ། །དེ་ལ་མགུ་བ་ལས་དགའ་བ། །བཞི་པའི་ཡེ་ཤེས་ཐིག་ལེས་སོ། །བདེ་བ་ཡི་ནི་མགྲིན་གནས་སུ། །ཚེས་ལྔ་པ་ལ་ལོངས་སྤྱོད་འབྱུང ། །དེ་ལ་དགྱེས་པས་རྒྱས་པར་འགྱུར། །ཐིག་ལེ་ལྔ་པའི་ཁེངས་པས་སོ། །འདོད་པ་བྲང་གི་གནས་སུ་ནི། །ཚེས་དྲུག་པ་ལ་ཐིམ་པ་འབྱུང ། །དེ་ནི་བསམ་གཏན་ལས་དྲག་པོ། །ཐིག་ལེ་དྲུག་ལ་གང་བས་སོ། །བདེ་བའི་ནུ་མའི་གནས་སུ་ནི། །ཚེས་བདུན་པ་ལ་དབང་མི་འབྱུང ། །དེ་ལ་བདུན་པས་འབྱུང་བ་ཡིན། །ཐིགས་པ་བདུན་པས་ཁེངས་པས་སོ། །འདོད་པའི་རྩིབ་ལོགས་གནས་སུ་ནི། །ཚེས་བརྒྱད་པ་ལ་ཐིམ་པ་འབྱུང ། །དེ་ལ་ཆགས་པས་མཆོག་གི་དགའ། །ཐིག་ལེ་བརྒྱད་པ་གང་བས་སོ། །བདེ་བའི་ལྟེ་བའི་གནས་སུ་ནི། །ཚེས་དགུ་པ་ལ་ལོངས་སྤྱོད་འབྱུང ། །དེ་ལ་རྣམ་སྨིན་ལས་འབར་འབྱུང ། །ཐིག་ལེ་དགུ་བ་ཁེངས་པས་སོ། །འདོད་པའི་མདོམས་ཀྱི་གནས་སུ་ནི། །ཚེས་བཅུ་པ་ལ་ཐིམ་པ་འབྱུང ། །དེ་ལ་བསྟན་ལས་ཐིག་ལེར་འགྱུར། །ཐིག་ལེ་བཅུ་པ་གང་བས་སོ། །བདེ་བའི་སྤྱི་བོའི་གནས་སུ་ནི། །བཅུ་གཅིག་པ་ལ་དབང་ནི་འབྱུང ། །དེ་ཡི་སྟོབས་ལས་མྱོས་པར་འགྱུར། །བཅུ་གཅིག་ཐིག་ལེས་ཁེངས་པས་སོ། །བདེ་བའི་རྡོ་རྗེའི་རྩེ་གནས་སུ། །བཅུ་གཉིས་ཚེས་ལ་ཐིམ་པ་འབྱུང ། །དེ་ལ་འོད་ལས་དགའ་བྲལ་དགའ། །བཅུ་གཉིས་ཐིག་ལེ་གང་བས་སོ། །རྒྱས་པའི་རྡོ་རྗེའི་དབུས་གནས་སུ། །བཅུ་གསུམ་ཚེས་ལ་ལོངས་སྤྱོད་འབྱུང ། །དེ་ལས་སྣང་བས་ཨུར་ཏར་འགྱུར། །
85.28a
ཱ་ལྀའི་བཅུ་གསུམ་ཐིག་ལེས་སོ། །བདེ་བའི་མདུད་པའི་གནས་སུ་ནི། །བཅུ་བཞི་པ་ལ་ཐིམ་པ་ཤར། །དེ་ལ་རེག་བྱ་ལས་ཚུར་འགྱུར། །བཅུ་བཞིའི་ཟླ་བའི་ཐིག་ལེས་སོ། །བདེ་བའི་ནོར་བུའི་དབུས་སུ་ནི། །ཉ་གང་བ་ལས་དབང་ནི་ཤར། །དེ་ལས་ཕྲང་ལས་གཉིད་དུ་འགྱུར། །བཅཝ་ལྔ་པ་ཡི་ཐིག་ལེས་སོ། །དབང་པོ་བཅུ་དྲུག་པ་ཡི་ཆ། །གཞན་ནི་གང་དུའང་མི་དམིགས་སོ། །དེ་བཞིན་དུ་ནི་སོ་སོར་གཟུགས། །རང་བཞིན་དེ་ནི་ཡོད་པ་མིན། །དགའ་བའི་བྱེ་བྲག་ལྷན་སྐྱེས་དགའ། །བཅུ་དྲུག་པ་ཡི་དོན་དུ་ཡོད། །ཆར་ཡང་བཅུ་དྲུག་འདི་རུ་ནི། །ཡོད་པ་མ་ཡིན་མེད་པ་མིན། །དེ་བཞིན་དུ་ནི་ཡེ་ཤེས་ཆེ། །ལྷ་ཡི་དབང་ཕྱུག་རང་བཞིན་ནོ། །གཡས་གཡོན་ཡན་ལག་གཉིས་སུ་ནི། །ཁུ་བ་ཡི་ནི་འབྱུང་བར་དྲན། །མར་ངོ་དེ་བཞིན་ཡར་ངོ་ཡི། །འདོད་པ་ཡིས་ནི་འབྱུང་བའི་ཚེ། །བཅུ་དང་ལྔ་ཡིས་གཉིས་མེད་སྦྱོར། །བདེ་བ་འདི་ཡི་འབྱུང་བ་མིན། །དེ་ཉིད་གསུམ་ཤེས་བཅུ་དང་ལྔ། །ཤེས་རབ་དང་བྲལ་བདེ་བ་ཆེ། །བླ་མའི་ཞལ་སྔའི་བཀའ་དྲིན་གྱིས། །གཉིས་སུ་མེད་པའི་བདེ་བ་ཤེས། །རྟག་ཏུ་མོས་པ་ཡིས་ནི་ཤར། །བསམ་གཏན་གྱིས་ནི་ཤེས་པའོ། །བཅུ་དྲུག་གི་ནི་ཡི་གེའི་གཟུགས། །ཱ་ལྀའི་ཐིག་ལེ་རང་ངོ་བོ། ། སོགས་ཡིག་འབྲུའི་ཆར་ཡང་འབྱུང ། །ཱ་ལྀའི་ཡེ་ཤེས་བདེ་བདག་ཉིད། །ཀཱ་སོགས་ཡིག་འབྲུའི་ཆར་ཡང་འབྱུང ། །ཀཱ་ལྀའི་ཡེ་ཤེས་བདེ་བ་ཆེ། །ཱ་ལི་ཀཱ་ལི་གཉིས་སྦྱོར་ལས། །མཆོད་སྦྱིན་གྱིས་ནི་རབ་མཆོད་བྱ། །མཆོད་པ་ཡང་ནི་དེ་བཞིན་ཏེ། །གསང་བའི་པད་མའི་སྙིང་གར་རོ། །གསང་བ་དེ་ཉིད་གསུམ་ཞེས་བྱ། །ལ་ལ་འདའ་ལ་གཉིས་སྦྱོར་ལས། །མཆོད་སྦྱིན་གྱིས་ནི་རབ་མཆོག་བྱ། །མཆོད་པ་ཡང་ནི་དེ་བཞིན་ཏེ། །གསང་བའི་པད་མའི་སྙིང་གར་རོ། །གསང་བ་དེ་ཉིད་གསུམ་ཞེས་བྱ། །ཐིམ་དང་ལོངས་སྤྱོད་སོགས་བྱེ་བྲག་།ཐིམ་པ་དང་ནི་ལོངས་སྤྱོད་དབང ། །དགའ་བ་གསུམ་དུ་བསྟན་པའོ། །དེ་ཡི་ཐིག་ལེ་གསུམ་ཞེས་བྱ། །སྐུ་གསུམ་ཡིག་གསུམ་བདག་ཉིད་དོ། །ཚངས་པའི་བུ་ག་དེ་བཞིན་མགྲིན། །སྙིང་ཀ་རུ་ནི་ཐིག་ལེ་གསུམ། །དེ་ཡིས་བསྐྱེད
85.28b
པའི་རིམ་ཤེས་བྱ། །མདུད་པའི་ནང་ནི་མན་ཆད་དོ། །བཟློག་པ་ཡི་ནི་ཐིག་ལེ་གསུམ། །གྱེན་དུ་རྫོགས་པའི་རིམ་པ་ཡིན། །རྒྱུ་འབྲས་རྣམ་དག་བྱེ་བྲག་ཏུ། །ཐིག་ལེ་དྲུག་ནི་རབ་ཏུ་གྲགས། །དྲི་མེད་ཡེ་ཤེས་ཆར་ཡང་དྲུག་།དེ་ནི་རྣམ་ཤེས་སྦྱོར་དྲུག་བཤད། །དེ་ཡི་དབུས་སུ་དེ་ཉིད་བཞུགས། །ལྷན་སྐྱེས་དགའ་བའི་བདེ་བ་ཆེ། །མཆོད་པའི་ལས་སྦྱོར་ཆེ་བ་ཡིས། །ཐེ་ཚོམ་མེད་པར་རྙེད་པར་འགྱུར། །མཆོད་པའི་དམ་ཚིག་དུས་སུ་ནི། །གསང་བའི་སྒྲ་ནི་འབད་པ་ཡིས། །གང་ཞིག་འདོད་པ་གྲུབ་པ་ཆེ། །དམ་ཚིག་སེམས་དཔས་བརྗོད་པར་བྱ། །ལ་ལ་རྡོ་རྗེ་ལ་ལ་པད། །ཱ་ལི་ཟླ་བ་ཀཱ་ལི་ཉི། །རི་བོང་ཅན་ནི་ཁུ་བའོ། །ཉི་མ་ཁྲག་ཏུ་རབ་ཏུ་གྲགས། །ཁུ་བ་ག་པུར་ཤེས་བྱ་སྟེ། །ཁྲག་ནི་སིཧལ་ཞེས་སུ་དྲན། །སྦྲུལ་ནི་ནག་པོ་གཉིས་ཀ་ཡིན། །འདུས་པ་ཕུང་པོར་བརྗོད་པའོ། །ནཱ་ར་ཀ་པཱ་ལ་རུ་བརྗོད། །ཆགས་པ་ཆང་དུ་རབ་ཏུ་གྲགས། །ཞེ་སྡང་དེ་ནི་ཤ་ཡིན་ཏེ། །གཏི་མུག་ཚོད་མ་རུ་ནི་དྲན། །ང་རྒྱལ་འདི་རུ་ཤ་ཆེན་པོ། །ཟན་ནི་ཕྲག་དོག་ཉིད་དུ་དྲན། །གཅི་འཁོར་བཤང་བ་མྱ་ངན་འདས། །མཐོ་རིས་གཟུགས་ཞེས་དྲན་པའོ། །མི་ཡི་ཡུལ་ནི་སྒྲ་ཞེས་བསྟན། །ས་འོག་རོ་རུ་བཤད་པའོ། །དྲི་ནི་རི་རབ་རྩེ་མོའོ། །གླིང་བཞི་པོ་ནི་རེག་བྱའོ། །ས་ནི་ཕ་རུ་རབ་ཏུ་གྲགས། །ཆུ་ནི་སྲིང་མོ་ཡིན་པར་དྲན། །མེ་ནི་ཡུམ་སྟེ་བུ་མོ་ནི། །རླུང་དུ་རབ་ཏུ་གྲགས་པའོ། །ནམ་མཁའ་སྒྱུག་མོར་ཤེས་པར་བྱ། །བཅིངས་པ་མེད་པ་ནམ་མཁའ་ཡིན། །སྐལ་ལྡན་ངང་པ་འོན་པ་མཚོ། །འོན་པ་མིན་པ་རྒྱ་མཚོར་བརྗོད། །དབང་བསྐུར་གྲོང་ཁྱེར་བ་རུ་དྲན། །དབང་བསྐུར་མིན་པ་གྲོང་པ་བཞིན། །གསང་བ་སྙིང་ག་ཡིན་པར་བརྗོད། །ཁྱེར་ཤོག་དྲི་མ་མེད་པར་བརྗོད། །གསལ་བྱེད་ནམ་མཁའ་ཡིན་པར་དྲན། །གཞན་ཁ་དགྱེས་པ་ཌཾ་ཌི་འབྲས། །མ་རུངས་ལྕགས་སུ་ཀུན་ཏུ་གྲགས། །སྟན་ནི་པད་མ་ཡིན་པར་བརྗོད། །སྦྱིན་པ་གེ་སར་དྲན་པའོ། །གཞོན་ནུ་མ་ནི་འཚེ་འུར་གྲགས། །རྒན་མོ་གཙང་པོར་དྲན་པའོ། །གནས་པ་རྣ་བ་ཞེས་སུ་བརྗོད། །
85.29a
འགྲོ་བ་འདི་ནི་ཨར་བུ་ཏ། །དུས་ནི་དབྱུག་པ་བདེ་བ་ཉིད། །ཐལ་བ་མིན་དགའ་དགའ་སྟོབས་སོ། །དེ་དག་ཚོགས་ཀྱི་མཆོད་སྦྱིན་གྱི། །དུས་སུ་འབད་པས་བརྗོད་པར་བྱ། །ཁྲུང་ཁྲུང་ལ་སོགས་འཇུག་མིན་ཕྱིར། །གསང་བའི་ཚིག་ནི་སྨྲ་བར་བྱ། །རྣལ་འབྱོར་མ་འམ་རྣལ་འབྱོར་པ། །ཤིན་ཏུ་དགྱེས་པས་གསང་སྐད་སྨྲ། །དཔལ་ཡེ་ཤེས་ཐིག་ལེ་ལས་མཆོད་པའི་རིམ་པ་དང་གསང་བའི་སྐད་ཅེས་བྱ་བའི་ལེའུ་སྟེ་བཅུ་གཉིས་པའོ།། །། དབང་བསྐུར་ལ་སོགས་ངེས་བསྟན་ནི། །ལྷ་ཡི་དབང་ཕྱུག་ངས་འདིར་བཤད། །རྒྱུད་གསུམ་གྱི་ནི་རིམ་པ་ཡིས། །དབང་དྲུག་དབྱེ་བ་བསྟན་པའོ། །ཆུ་ཡི་དབང་བསྐུར་དབུ་རྒྱན་དག་།བྱ་བའི་རྒྱུད་ལས་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང ། །སྤྱོད་པའི་རྒྱུད་ལས་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང ། །རྣལ་འབྱོར་རྒྱུད་དུ་གསལ་བར་བྱས། །དེ་ནི་དྲུག་གི་བྱེ་བྲག་དབང ། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ལྟར་དེ་བཞིན་ནོ། །དགུ་ཡི་བྱེ་བྲག་དབང་ལ་སོགས། །འབྲས་བུའི་ཕྱིར་ན་བརྒྱད་དབྱེར་འགྱུར། །བཞི་པ་དེ་ལྟར་དེ་བཞིན་བརྗོད། །ཤེས་རབ་ཡེ་ཤེས་དེ་ཡི་འབྲས། །དངོས་པོ་སོ་སོར་ཤེས་མི་བྱ། །དེ་ལྟར་ཞེས་ནི་ཚད་མེད་དོ། །དེ་བས་འབྲས་བུའི་ཚིག་དོན་ནི། །རིགས་པ་མ་ཡིན་པ་ཡི་སེམས། །དེ་བཞིན་རེ་ཤིག་དགའ་བའི་སེམས། །དེ་བཞིན་རེ་ཤིག་དགའ་བའི་རིམ། །ཇི་ལྟ་བུར་ནི་ཡོད་པར་འགྱུར། །དགའ་བ་ལུས་སུ་གྲགས་པ་སྟེ། །མཆོག་དུ་དགའ་བ་འདི་རུ་གང ། །ཡིད་ནི་དགའ་བྲལ་ཤེས་པར་བྱ། །ལྷན་སྐྱེས་དེ་ནི་གང་ནི་ཡོད། །ཀུན་ན་ཡོད་པའི་ཡེ་ཤེས་སེམས། །སེམས་ལས་གཞན་ནི་ཡོད་པ་མིན། །གང་ཞིག་ཅི་ཞིག་འདི་ཐམས་ཅད། །དེ་ནི་ཐམས་ཅད་སེམས་ཡིན་ནོ། །སེམས་ལས་ཐམས་ཅད་འབྱུང་བ་སྟེ། །སེམས་ཀྱིས་ཡོངས་སུ་འདས་པའོ། །ལུས་ཀྱི་མགོ་བོ་དགའ་བའི་གནས། །ངག་ནི་མགྲིན་པ་མཆོག
85.29b
ཏུ་དགའ། །སེམས་ནི་སྙིང་གར་ཤེས་བྱ་བ། །ཆགས་པའི་དགའ་བ་རྟག་ཏུ་ཤར། །ལུས་རྒྱུ་འབྲས་བུ་དེ་ནི་ངག་།ངག་ནི་རྒྱུ་སྟེ་འབྲས་བུ་ཡིད། །ཡིད་ཉིད་ཡོངས་སུ་ཤེས་པ་ནི། །འབྲས་བུ་དེ་ནི་དོན་དམ་པར། །དེ་ཉིད་གསུམ་བདག་ཡེ་ཤེས་གང ། །རྩ་གསུམ་ནང་གི་དབུས་ན་བཞུགས། །གནས་གསུམ་ཁྱབ་པ་སྐྱེ་བ་མེད། །འོད་གསུམ་སྲིད་པ་གསུམ་དང་བྲལ། །འོད་རབ་གནས་ནི་རབ་ཀྱི་མཆོག་།དེ་ནི་བཞི་པ་མཆོག་གི་དབང ། །བདུན་གཉིས་བྱེ་བྲག་ཏུ་ནི་ཡོད། །ཡན་ལག་རབ་ཀྱི་མདོར་བསྡུས་ལ། །ཆུ་ཡི་དབང་བསྐུར་དགའ་བའོ། །གསང་བའི་དབང་བསྐུར་མགྲིན་པ་རུ། །མཆོག་ཏུ་དགའ་བའི་བདག་ཉིད་མཆོག་།ཤེས་རབ་ཡེ་ཤེས་ཀྱི་ནི་དབང ། །སྙིང་ག་རུ་ནི་དགའ་བྲལ་དགའ། །གསང་བ་པད་མའི་ལྟེ་བ་རུ། །བཞི་པའི་རང་བཞིན་བདག་ཉིད་དོ། །དེ་ལྟར་དབང་ནི་བཞི་རུ་དབྱེ། །བསྐྱེད་པའི་རིམ་པའི་ཕྱོགས་ཡིན་ནོ། །ཆུ་ཡི་དབང་ནི་མདོམས་སུ་སྟེ། །སྣ་ཚོགས་འབྲས་བུ་སྦྱིན་པའོ། །གསང་བའི་དབང་ནི་གཉིས་པ་སྟེ། །རྣམ་པར་སྨིན་པའི་འབྲས་བུ་སྟེར། །རྡོ་རྗེ་ཡི་ནི་རྩ་བའི་གནས། །རྩ་བ་དང་ནི་མདོམས་ཀྱི་འོག་།ཤེས་རབ་ཡེ་ཤེས་ཀྱི་ནི་དབང ། །མདུད་པའི་གནས་སུ་རྟག་ཏུ་དྲན། །དབང་རྣམས་ཀུན་གྱི་བླ་མའི་བླ། །རྣམ་པར་འཇོམས་པའི་འབྲས་བུ་སྟེར། །ཤེས་རབ་ཡེ་ཤེས་ནོར་བུའི་ཁར། །ཤེས་རབ་པད་མའི་ཡིད་འགྲོའི་ཕྱིར། །རླུང་མ་དང་ནི་གཉིད་སྐྱེའི་རྩ། །གཉིས་ཀ་རྒྱས་པ་ཡིས་ནི་བདེ། །གྱེན་གྱི་ལམ་གྱིས་བཟློག་པར་བྱ། །མདུད་པའི་ནང་གི་གནས་སུ་འགྲོ། །དེ་ལྟར་བཞི་པ་རབ་ཏུ་བསྟན། །མཚན་ཉིད་དང་བྲལ་འབྲས་བུར་གྲགས། །མདུད་པའི་གནས་སུ་རིམ་པ་ཡིས། །ཚངས་པའི་སྤྲུལ་པ་སྙིང་མན་ཆད། །དེ་ཙམ་དུ་ནི་ལྷན་སྐྱེས་དགའ། །རླབས་དང་བྲལ་བ་དཔེ་མེད་དོ། །དེ་ནི་དེ་ཀུན་དོན་དམ་པར། །དབང་གི་ཡེ་ཤེས་ངེས་བསྟན་ཏོ། །རྡོ་རྗེ་ཀ་བ་དེ་བཞིན་གསང ། །སྡོམ་དང་སྡོམ་པའི་རྒྱ་མཚོ་དང ། །རིགས་ཆེན་ཡེ་ཤེས་སྙིང
85.30a
པོ་དང ། །ཀྱཻ་རྡོར་འཇིགས་བྱེད་རྡོ་རྗེ་དང ། །མཚན་དང་གསང་བ་འདུས་པ་རུ། །ལྷ་ཡི་དབང་ཕྱུག་བདག་གིས་སྦས། །ཁྱོད་ཀྱི་ངོར་མཛད་དབང་གི་དོན། །རྒྱུད་འདི་རུ་ནི་རབ་ཏུ་གསལ། །རྟོག་གེ་བ་དང་རྒན་པོ་དང ། །དགེ་སློང་མོས་པར་གནས་པ་ལ། །ཡང་དག་ལམ་ཤེས་སློབ་དཔོན་གྱིས། །དེ་རྣམས་དེ་ཉིད་བཤད་མི་བྱ། ། ཡི་ཡིག་འབྲུ་དགའ་བ་ཡིན། །བྷི་ཡི་ཡིག་འབྲུ་མཆོག་ཏུ་དགའ། །ཥེ་ཡི་ཡིག་འབྲུ་དགའ་བྲལ་དགའ། །ཀ་ཡི་ཡིག་འབྲུ་ལྷན་སྐྱེས་སོ། །གང་དུ་ཡང་ནི་མི་དམིགས་ཤིང ། ། ནི་སྐྱེ་མེད་རང་བཞིན་ཏེ། །ཀུན་གྱི་རྒྱུ་ནི་ཡིན་ཕྱིར་རོ། །ཥེ་ཡི་ཡིག་འབྲུར་ཡང་དག་བརྗོད། །གཙུག་ཏོར་གསང་བའི་པད་མར་བྷི། །བསྐུར་དང་ཁྲུས་ནི་བྱེད་པའི་ཕྱིར། །ཀ་ནི་རྣམ་རྟོག་དངོས་པོར་གྲགས། །འགྲོ་བ་ཆད་པའི་བདག་ཉིད་དོ། །གསང་བའི་པད་མའི་སྙིང་ག་ཨ། །རྩ་ཀུན་གྱི་ནི་འབིགས་པ་གང ། །དེ་ཕྱིར་མངོན་པར་དགའ་བ་མཆོག་།བྷི་ཡི་ཡིག་འབྲུ་ཐིག་ལེ་འབིགས། །ཥེ་བདེ་ཡེ་ཤེས་ཀུན་བརྟགས་བྲལ། །ཡང་དག་དོན་གྱིས་གསལ་བར་བྱེད། །དང་པོའི་དགའ་བ་རྒྱུ་ཡི་དངོས། ། ཡི་ཡིག་འབྲུ་མཆོག་གི་གནས། །མཆོག་དགའ་དགའ་བྲལ་དགའ་བར་གྲགས། །དབང་བསྐུར་རབ་ཏུ་གྲགས་པའོ། །དེ་གཉིས་དབུས་སུ་དེ་ཉིད་བཞུགས། །རང་བཞིན་དགའ་བ་བཞི་དང་བྲལ། །མངོན་པར་དགའ་དང་དགའ་བྲལ་དགའི། །གང་ཞིག་རང་བཞིན་མི་ཤེས་ན། །དཔལ་ལྡན་རྡོ་རྗེ་སེམས་དཔའ་ཡིས། །སངས་རྒྱས་ཡིན་ཡང་མི་བསྟོད་དོ། །རྡོ་རྗེ་འཛིན་པ་ཐམས་ཅད་ཀྱི། །ཐམས་ཅད་ཁྱབ་པར་མངའ་བདག་བདག་།སངས་རྒྱས་ཐམས་ཅད་རྒྱལ་ཆེན་པོ། །སངས་རྒྱས་ཐམས་ཅད་ཡིད་ལྟར་མགྱོགས། །ཐམས་ཅད་ཀུན་གྱི་དབང་ཕྱུག་བདག་།འབྱུང་བ་ཀུན་གྱི་བདག་ཉིད་དོ། །དཔལ་ཡེ་ཤེས་ཐིག་ལེ་ལས་དབང་བསྐུར་བའི་ངེས་པ་བསྟན་པའི་ལེའུ་ཞེས་བྱ་བ་སྟེ་བཅུ་གསུམ་པའོ།། །། དེ་ནས་ཡང་ནི་བཤད་བྱ་བ། །ནང་གི་མཚན་ཉིད་སྦྱིན་སྲེག་གོ། །ཁ་ནི་ཧོམ་ཁུང་དགང་གཟར་ལག་།ཚུལ་ནི་རང་བྱུང་མེ་ཡིན་ནོ། །ང་རྒྱལ་ཕྲག་དོག་བསྲེག་རྫས་ཡིན། །བཟླས་པ་དེ་ནི་ཁམ་དུ
85.30b
རྗོད། །ས་འོག་དང་ནི་སྲིང་མོ་མར། །དེ་ཡི་སྲེག་རྫས་རབ་ཏུ་དབུལ། །ཡེ་ཤེས་བདུད་རྩི་རྣམ་དག་པས། །ཕྲག་དོག་ལ་སོགས་བསང་གཏོར་བྱ། །དུམ་བུ་གསུམ་པའི་སྣོད་མདུན་དུ། །ཕྲག་དོག་བདུད་རྩིས་རབ་ཏུ་ཚིམ། །རྡོར་གསུམ་ཡེ་ཤེས་ས་བོན་གྱིས། །དག་བྱས་དཀར་བྱས་རིམ་གྱིས་སོ། །རླུང་མས་བསྐུལ་བྱས་འབར་བས་བྱས། །བདུད་རྩི་མཆོག་ནི་ཞུ་བར་བྱེད། །ཧ་ཡི་མ་མོའི་སྔགས་ཀྱིས་ནི། །འཁོར་ལོ་དྲུག་ནི་རབ་ཚིམ་བྱ། །རི་བོའི་མ་མོ་དང་བྲལ་བས། །ཕྱི་ནང་རྟག་ཏུ་རབ་ཚིམ་བྱ། །དེ་ལྟའི་སྦྱིན་སྲེག་ལས་ཀྱིས་ནི། །ལྷ་ཡི་སྐུ་རུ་ངེས་པར་འགྱུར། །ལྷ་ཡི་སྐུ་ནི་བདེ་ཆེན་པོ། །དོན་དམ་པར་ནི་ཤེས་པའོ། །ལྷ་ཡི་ཡིག་འབྲུ་ཡིས་འབྱུང་གང ། །དེ་ནི་དོན་དམ་སྦྱིན་སྲེག་གོ། །དཔའ་བོ་གཉིས་ཀྱི་མཉམ་སྦྱོར་བ། །དུས་ཀྱི་གང་དུ་བདེ་དབང་པོ། །ལྟེ་སྙིང་བདེ་བའི་པད་མ་ཡིས། །རྟག་པར་ཤེས་རབ་མས་ནི་བརྗོད། །དེ་ནི་སྦྱིན་སྲེག་སྲེག་རྫས་ལྡན། །མངོན་པར་དགའ་ལས་འབྱུང་བའོ། །ཀུན་རྫོབ་རྣམ་པའི་གཟུགས་སུ་ནི། །ཤེས་རབ་ཐབས་ནི་ཕྲད་པ་ལས། །སྦྱིན་སྲེག་ལས་ཀྱི་འབྲས་བུ་མཆོག་།མྱུར་བ་རུ་ནི་རྙེད་པའོ། །ཧོམ་ཁུང་དྷེ་ལ་དགྱེས་པ་ཆེ། །ལ་ལ་འདི་རུ་དགང་གཟར་དྲན། །བླུགས་གཟར་གསང་པད་སྣ་ཡི་རྩེ། །མར་ནི་ཁུ་བ་ཟླ་འོད་མཉམ། །གསང་པད་ཟླུམ་པོའི་རྣམ་པ་བཞིན། །མར་གྱི་སྣོད་དུ་རྣམ་པར་གྲགས། །བླུགས་གཟར་དགང་གཟར་མར་གྱི་སྣོད། །རྩ་གསུམ་དུ་ནི་བརྗོད་པའོ། །བསྲུབ་དང་བསྲུབས་པའི་སྦྱོར་བ་ཡིས། །རླུང་མ་དང་ནི་གཉིད་མ་གཉིས། །གཅིག་པུའི་དངོས་པོ་ཡང་དག་པས། །ཡེ་ཤེས་མེ་ནི་མཆོག་ཏུ་འབར། །པད་མའི་འཁོར་ལོ་དྲུག་རིམ་པས། །གཞན་མིན་བདེ་ཆེན་མན་ཆད་དོ། །མཆོག་གི་བདུད་རྩི་རྒྱུན་ནི་འཛག་།ཇི་ལྟར་མཁའ་ལས་ཆུ་འབབ་པ། །རྩ་ཡི་དྲ་བ་དུ་མ་ཡིས། །འཁོར་ལོ་དྲུག་སྙིང་ཁྱབ་པའོ། །སྐུ་གསུམ་ཡེ་ཤེས་རྡོ་རྗེ་མཆོག་།རྟག་ཏུ་སྲེག་རྫས་མཆོད་པར་བྱ། །མེ་ཡི་ཁ་རུ་དགང་གཟར་ནི། །མར་གྱིས་བཀང་བ་དབུལ་བར་བྱ། །མེ་ནི་མཆོག་ཏུ
85.31a
དགའ་བ་སྟེ། །རྣམ་རྟོག་ཧོམ་ཤིང་ཚིག་པར་བྱེད། །མདུད་པའི་ཧོམ་ཁུང་གི་ནི་མེ། །དེ་ནི་མཆོག་ཏུ་དགའ་རང་བཞིན། །ཞི་བའི་ཟླུམ་པོ་རྣམ་པ་བཞིན། །ལོངས་སྤྱོད་དང་ནི་གྲོལ་བ་བཞིན། །སྐུ་ཡི་རྡོ་རྗེ་རིན་ཆེན་ཁར། །གསུང་གི་རྡོ་རྗེ་དབུས་ཀྱི་དཀྱིལ། །ཐུགས་ཀྱི་རྡོ་རྗེ་མདུད་སྙིང་པོ། །དགའ་བ་ཡིས་ནི་མཆོད་པར་བྱ། །གསུང་གི་རྡོ་རྗེ་བླུགས་གཟར་མཆོག་།དགའ་བྲལ་དགའ་བ་སྐུ་རྡོ་རྗེ། །ལྷན་སྐྱེས་དགའ་བའི་ཡེ་ཤེས་ཀྱི། །དགང་བླུགས་ཀྱིས་ནི་མཆོད་པ་བྱ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པས། བྱེ་བ་ཕྲག་བདུན་བཅུ་རྩ་གཉིས་ཀྱི་གྲངས་ཀུན་བརྒྱལ་བ་དང་ས་ལ་འགྱེལ་བར་གྱུར་ཏོ། །དེ་ནས་ཡུན་རིང་པོ་ཞིག་ནས་འདི་སྐད་ཅེས་གསོལ་ཏོ། །ལྷན་ཅིག་སྐྱེས་པའི་དགའ་བ་ལ་འདིར་ཡེ་ཤེས་ཡོད་དམ་ཅི་ཞེས་ཡང་ཡ་མཚན་དུ་གྱུར་ཏོ། །ཡང་དེའི་དུས་སུ་བཅོམ་ལྡན་འདས་མས་ཕྱག་རྒྱ་ཆེན་པོས་དམ་པོར་འཁྱུད་ནས་མ་མཆུ་བཏུང་བའི་བདུད་རྩིའི་མཆོད་སྦྱིན་ཕུལ་ཏེ། གསང་བའི་པད་མའི་བསྐོར་བ་དམ་པོའི་སྙིམ་པ་མཉམ་པར་སྦྱོར་བ་བཅིངས་ནས་གུས་པས་ཞུས་པ། སངས་རྒྱས་ཀུན་གྱི་བླ་མ་མགོན། །ཡེ་ཤེས་ཟབ་མོའི་དྲི་མ་མེད། །ཅི་ཡི་དོན་ཕྱིར་དེ་ལྟའི་ཚིགས། །འཁོར་ཀུན་གྱིས་ནི་ནང་དུ་གསུངས། །ལྷན་ཅིག་སྐྱེས་དགའི་ཡེ་ཤེས་གང ། །དགང་བླུགས་ཀྱི་ནི་མཆོད་པ་ལ། །བདག་ཀྱང་འདིར་ནི་བཅོམ་ལྡན་འདས། །ཐེ་ཙོམ་ཆེན་པོ་སྐྱེས་པར་འགྱུར། །གསང་བ་ཡི་ནི་གསང་བ་མཆོག་།རྣལ་འབྱོར་མ་རྒྱུད་དུ་མ་རུ། །མགོན་པོས་གང་དུའང་མ་གསུངས་སོ། །དེ་ཙམ་ཡང་ནི་བརྡར་མ་མཛད། །ལྷན་ཅིག་ལ་ནི་ཡེ་ཤེས་ཡོད། །མ་གསུངས་བདག་གིས་ཐོས་མ་ལགས། །དེ་རིང་དེ་ལྟར་ཐེ་ཚོམ་དག་།མངའ་བདག་ཆེན་པོས་གཅད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ། ལ་ལ་རབ་ཏུ་ངོ་མཚར་ཏོ། །ལྷན་ཅིག་སྐྱེས་པའི་དགའ་བ་ལ་ཅིའི་ཕྱིར་ཡེ་ཤེས་མེད། དད་པ་ཆེན་པོ་དང་བརྩོན་འགྲུས་ཅན་དང་ཡེ་ཤེས་དང་ལྡན་པ་ཡང་རྨོངས་པར་འགྱུར་ན། ཡེ་ཤེས་མེད་པས་ལྷན་ཅིག་སྐྱེས་པའི
85.31b
དགའ་བ་ཇི་ལྟར་རྙེད། དེ་བཞིན་དུ་ཡང་འདིར་གཞན་པ་དེ་མ་ཡིན་པའི་དཔེར་ཉོན་ཅིག་།ཇི་ལྟ་བུར་དུ་བ་ལས་ནི་མེར་ཤེས་ཏེ། །ཆུ་སྐྱར་ལས་ནི་ཆུ་ཡིན་ནོ། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་རྣམས་ལས་ཤེས། །དེ་བཞིན་དུ་ལྷན་ཅིག་སྐྱེས་པའི་དགའ་བ་རྙེད་པའི་དོན་གྱི་ཕྱིར་སྐྱབས་སྦྱིན་གྱི་ངོ་བོ་ཡེ་ཤེས་སོ། །ཡེ་ཤེས་ནི་ཚོར་བར་ཡོངས་སུ་ཤེས་པས་དཔྱོད་པའི་བདག་ཉིད་ཀྱི་ཐབས་དེ་ནི་ཡེ་ཤེས་སུ་བདག་གིས་བཤད་དོ། །དེ་བཞིན་དུ་ཇི་ལྟར་མུན་ནག་ཏུ་རིན་པོ་ཆེ་ཕྲ་མོའི་ཕྲ་མོ་ཡོད་པ་དེ་ནི་རིན་པོ་ཆེ་མར་མེ་མ་ཡིན་པས་རྙེད་པར་མི་འགྱུར་བ་དེ་བས་ན་བློ་གྲོས་ཅན་གྱིས་རིན་པོ་ཆེ་མར་མེ་ཁྱེར་ནས་ཚོལ་བར་བྱེད་ལ། གལ་ཏེ་དེ་རྙེད་ན་དེ་ཅི་མར་མེ་ལས་རིན་པོ་ཆེ་སྐྱེའམ། འོན་ཀྱང་མར་མེའི་ཐབས་ཀྱིས་མཐོང་བ་དང་རྙེད་པ་དེ་བཞིན་དུ་ཡེ་ཤེས་ཀྱི་མར་མེས་ལྷན་ཅིག་སྐྱེས་པའི་དགའ་བའི་རིན་པོ་ཆེའི་རྒྱལ་པོ་མཐོང་ཞིང་རྙེད་ཀྱི་ཡེ་ཤེས་ལས་སྐྱེ་བ་ནི་མ་ཡིན་ནོ། །དེ་བས་ན་ཡེ་ཤེས་ཀྱི་སྒྲ་འདི་ནི་དོན་མི་ཤེས་པའི་ཕྱིར་མཁས་པས་འདིར་ཐེ་ཚོམ་མི་བྱའོ། །དཔལ་ཡེ་ཤེས་ཐིག་ལེ་ལས་མཆོད་པ་སྣ་ཚོགས་ངེས་པར་བསྟན་པ་དང་ནང་གི་སྦྱིན་སྲེག་ཅེས་བྱ་བའི་ལེའུ་སྟེ་བཅུ་བཞི་པའོ།། །། དེ་ནས་གཏོར་མ་ཆེན་པོའི་ལས་ངེས་པར་བསྟན་པའི་དོན་བཤད་དོ། །སེམས་ཅན་ཐམས་ཅད་བསྲུང་དོན་དུ། །འབད་པ་ཡིས་ནི་གཏོར་མ་སྦྱིན། །བྷ་ཡི་ཡིག་འབྲུ་བྷ་གར་བརྗོད། །ལིཾ་གི་ཡིག་འབྲུ་ལིཾ་གར་བསྟན། ལིང་ག་བྷ་གར་མཉམ་སྦྱོར་བས། །སེམས་ཅན་ཐམས་ཅད་ཀྱི་ནི་ཚོགས། །དེ་ལས་འབྱུང་བར་འགྱུར་བ་སྟེ། །ལྷ་མོ་དེ་ཉིད་ཤེས་བྱ་སྟེ། །ཐམས་ཅད་སྒྲ་ནི་དགའ་བ་ཡིན། །སེམས་ཅན་དོན་ནི་མཆོག་ཏུ་འགྱུར། །ཚོགས་པ་དེ་ནི་དགའ་བྲལ་དགའ། །གཏོར་མ་དེ་ཡིས་བསྲུང་བའི་དོན། །དུར་ཁྲོད་ཡང་ནི་ཆུ་ཡི་ངོགས། །ཡེ་ཤེས་ལྡན་པས་སྦྱིན་པར་བྱ། །དུར་ཁྲོད་དབུགས་བྱུང་གི་ནི་གནས། །གསང་བའི་པད་མའི་བྱ་གདོང་ངོ ། །ཤའ་ཡི་ཡིག་འབྲུ་པད་མ་དག་།
85.32a
ཝ་ཡི་ཡིག་འབྲུ་ལྟེ་བར་ཡིན། །ས་ཡི་ཡིག་འབྲུ་བདེ་ངོ་བོ། །ན་ཡི་ཡིག་འབྲུ་བཅས་པ་མེད། །དྲི་མེད་མ་ཡི་ཞུ་བའི་དགའ། །ཐིག་ལེའི་ངོ་བོ་ཡི་གེ་བྲལ། །དུར་ཁྲོད་དབུགས་འབྱུང་དུ་ནི་གྲགས། །ཞལ་བཟང་བདག་གིས་བཤད་པ་ཡིན། །ཆུ་ཡི་ངོགས་ནི་རིན་ཆེན་ཁ། །ཡང་ན་དེ་ནི་རྟོག་མེད་མ། །འབྱུང་བ་རྣམས་ནི་བསྲུང་བའི་ཕྱིར། དེ་ལ་གཏོར་མ་སྦྱིན་པར་བྱ། །འབྱུང་བ་ཁུ་བ་རུ་ནི་གྲགས། །ཁུ་བ་སེམས་ཅན་འདི་རུ་བསྟན། །སེམས་ཅན་སྙིང་པོ་ཡེ་ཤེས་བདེ། །བྷ་ག་ལིང་ག་གཉིས་ལས་འབྱུང ། །དེ་ལ་བསྲུང་བའི་དོན་དུ་ནི། །གཏོར་མ་ཀུན་ཏུ་འབད་དེ་སྦྱིན། །དཔལ་ཡེ་ཤེས་ཐིག་ལེ་ལས་འབྱུང་བ་བསྲུང་བའི་དོན་དུ་གཏོར་མ་ཆེན་པོ་ངེས་པར་བསྟན་པ་ཞེས་བྱ་བའི་ལེའུ་སྟེ་བཅཝ་ལྔ་པའོ།། །། དེ་ནས་བཅོམ་ལྡན་འདས་མ་ཕྱག་རྒྱ་ཆེན་པོས་བྱང་ཆུབ་སེམས་དཔའ་སེམས་དཔའ་ཆེན་པོས་ལྷའི་དབང་ཕྱུག་ལ་བོས་ཏེ། ཀྱཻ་དཔའ་བོ་ཆེན་པོ་ལྷའི་དབང་ཕྱུག་འདིར་དེ་ཁོ་ན་ཉིད་གསུམ་གྱི་བདག་ཉིད་ཀྱི་དང ། ཟླ་བའི་བདེ་བ་མཆོག་དང ། ཕྱག་རྒྱ་ཆེན་པོའི་མཐའི་རྒྱས་པ་ངེས་པར་བསྟན་པའི་དོན་དུ་རང་གི་ངོ་བོ་ཉིད་དང ། ཚད་དང ། རྣམ་པ་དེ་དག་བཅོམ་ལྡན་འདས་ཀྱི་ཐད་དུ་ལེགས་པར་ཞུས་ཤིག་།བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གིས་གསོལ་པ། མཆོག་གི་དབང་ཕྱུག་མ་མཆོག་གི་བདེ་བ་ཆེན་པོའི་འོད་ཀྱི་རང་གི་ངོ་བོ་སངས་རྒྱས་ཐམས་ཅད་ཀྱི་ཡུམ། སྡིག་པ་ཐམས་ཅད་ཟད་པར་བྱེད་མ། བདུད་ཐམས་ཅད་འཇོམས་པར་བྱེད་མ། དགའ་བ་ཐམས་ཅད་དང ། སྐད་ཅིག་དང ། རོ་དང ། ཡེ་ཤེས་ཀྱི་མཐར་ཁྱབ་པ་ལྟེ་བའི་པད་མའི་དབུས་ནས་བཞེངས་ནས་བདེ་བ་ཆེན་པོ་རབ་ཏུ་ཚིམ་པར་མཛད་མ། བཅོམ་ལྡན་འདས་མ་བཟང་མོ་མཆོག་དྲི་མ་མེད་པའི་སྐུ་ནམ་མཁའི་ངོ་བོ་ལེགས་སོ་ལེགས་སོ། །ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གིས་བཅོམ་ལྡན་འདས་མས་གསུངས་པ་དེ་ཁོང་དུ་ཆུད་པས་མཆོག་ཏུ་དགའ་བ་ཆེན་པོའི་སེམས་ཀྱིས
85.32b
རྫུ་འཕྲུལ་དང་ཆོ་འཕྲུལ་རྨད་དུ་བྱུང་བ་ཆེན་པོ་སྤྲུལ་ཏེ། རྣམ་པ་དུ་མ་སྣ་ཚོགས་པའི་མཆོད་པས་པོས་མཆོད་པ་བྱས་ནས་སྔར་གྱི་དྲི་བ་དེ་དག་ཞུས་སོ། །བཅོམ་ལྡན་འདས་དེ་ཁོ་ན་ཉིད་གསུམ་གྱི་བདག་ཉིད་དང ། ཟླ་བའི་བདེ་བ་མཆོག་དང ། ཕྱག་རྒྱ་ཆེན་པོའི་མཐའ་རྒྱས་པ་ངེས་པར་བསྟན་པའི་དོན་དུ་རང་གི་ངོ་བོ་ཉིད་དང ། ཚད་དང ། རྣམ་པ་དེ་དག་བདག་ལ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དྲི་བ་ཤིན་ཏུ་ཟབ་ལས་ཟབ། །ཐམས་ཅད་མཁྱེན་པས་རྙེད་དཀའ་བ། །ཇི་ལྟར་དེ་ཉིད་མཚན་ཉིད་ནི། །ཉོན་ཅིག་ང་ཡིས་བཤད་པར་བྱ། །མཚན་ཉིད་ལས་སྐྱེས་དེ་ཉིད་ནི། །དེ་ལྟ་མིན་ན་མི་མཐུན་ནོ། །རང་རིག་པ་ནི་བདག་ཉིད་ཕྱིར། །དེ་བས་བརྗོད་པར་མི་ནུས་སོ། །དེ་ཉིད་གསུམ་བདག་དེ་སྣང་བ། །མཚན་མའི་འདུ་ཤེས་རང་ངོ་བོ། །ཟླ་བའི་བདེ་མཆོག་སྣང་བ་མཆེད། །ཉིན་མོའི་འདུ་ཤེས་རང་ངོ་བོ། །ཕྱག་རྒྱ་ཆེན་པོ་སྣང་བ་ཐོབ། །མཚམས་ཀྱི་འདུ་ཤེས་རང་ངོ་བོ། །མཐའ་ཡི་དེ་ནི་འོད་ཀྱི་རབ། །ཉིན་མོ་མཚན་མོ་སོགས་དང་བྲལ། །དེ་ནི་གནས་མཆོག་ཡེ་ཤེས་ཏེ། །བལྟ་བར་དཀའ་བའི་མཚན་ཉིད་དོ། །ཆར་ཡང་དང་ནི་ཐིག་ལེའི་ཚུལ། །དེ་ཉིད་གསུམ་བདག་རྗོད་པའོ། །འཁོར་ལོ་གསུམ་ཡོད་མེ་རླུང་ཆུ། །དངོས་པོའི་འདུ་ཤེས་རང་ངོ་བོ། །ཚུལ་ཙམ་ཟླ་བ་ཡི་ནི་བདེ། །ས་ཡི་འཁོར་ལོར་བདེ་ནི་མཆོག་།དེ་ནི་རྟེན་གྱི་འདུ་ཤེས་ཅན། །ལྷ་ཡི་དབང་ཕྱུག་ཤེས་པར་བྱ། །ཕྱག་རྒྱ་ཆེན་པོ་འདི་ནི་མཆོག་།ནམ་མཁར་ཡེ་ཤེས་འདུ་ཤེས་སོ། །དེ་ཡི་མཐའ་ཡི་གཞན་གྱི་མཆོག་།བདེ་ཆེན་མཆོག་གི་ནམ་མཁར་རོ། །དེ་ནི་རྣམ་འབྱེད་ངོ་བོར་གྲགས། །གཉིས་སུ་མེད་པའི་ཡེ་ཤེས་རབ། །དེ་ནི་འཁོར་ལོ་དྲུག་དབུས་གནས། །རྣམ་ཤེས་དྲུག་གི་རང་ངོ་བོ། །དངོས་པོ་རྟེན་ལ་སོགས་བྱེ་བྲག་།བཞིར་ནི་དབྱེ་བར་ཡོད་པའོ། །དེ་ཉིད་གསུམ་བདག་བྱེ་བྲག་གིས། །དེ་ནི་རྣམ་པ་གསུམ་དུ་དབྱེ། །མཚན་མོ་ཉིན་མོ་མཚམས་བྲལ་ཕྱིར། །གཅིག་པུ་ཡི་ནི་བདེ་བ་ཆེ། །རང་བཞིན་བསྟན
85.33a
པ་གང་ལ་ལར། །མཆོག་གི་ནམ་མཁའ་གང་ལ་ལར། །ལ་ལར་འོད་རབ་ཀྱིས་ནི་གནས། །ལ་ལར་དགའ་བར་དྲན་པའོ། །ལ་ལར་མཆོག་གི་དགའ་བ་སྟེ། །ལ་ལར་དགའ་བྲལ་དགའ་བའོ། །སྣ་ཚོགས་དུ་མ་ལ་སོགས་དབྱེ། །ལྷན་སྐྱེས་གཅིག་པུ་རྟག་ཏུ་ཤར། །དུ་མར་སྨྲ་བས་ཅི་ཞིག་བྱ། །འདི་ཀུན་བདག་ཉིད་ལྷན་ཅིག་སྐྱེས། །ཀུན་རྫོབ་རྣམ་པའི་གཟུགས་ཀྱིས་ནི། །ཆུ་ཡི་ཟླ་བ་བཞིན་དུ་མཐོང ། །དོན་དམ་པ་ཡི་རང་བཞིན་ནི། །ཡང་དག་རྟོག་པའི་གནས་མེད་དོ། །ཐབས་ལ་སོགས་པའི་རིམ་པ་ཡིས། །བླ་མའི་ཞལ་ནས་རྙེད་པར་འགྱུར། །བླ་མ་མཐོ་རིས་ཐར་པའི་བླ། །བླ་མ་ཡེ་ཤེས་བླ་མ་བདེ། །བླ་མ་སྟོན་པ་བླ་མ་མགོན། །བླ་མ་རྡོ་རྗེ་འཛིན་པ་ཉིད། །བླ་མའི་ཞལ་སྔའི་བཀའ་དྲིན་ལས། །མཆོག་གི་གནས་ནི་རྙེད་པར་འགྱུར། །ཚེ་འདི་ཡིས་ནི་ཕྱག་རྒྱ་ཆེ། །དངོས་གྲུབ་རྙེད་པར་ཐེ་ཚོམ་མེད། །ས་བཅུ་ཡི་ནི་དབང་ཕྱུག་བདག་།དེ་ཡི་བཀའ་དྲིན་གྱིས་ནི་སླ། །དེ་བས་བླ་མ་ལས་ལྷག་གཞན། །སྟོན་པ་ཆེན་པོ་ག་ལ་ཡོད། །གང་ཞིག་བླ་མས་བསྟན་བཅོས་ནི། །མཛད་དམ་བཤད་པ་གང་ཡིན་ཡང ། །དེ་ནི་བསྟན་བཅོས་དེ་ཚད་མ། །དེ་ནི་དེ་ཉིད་འཁྲུལ་པ་མེད། །སློབ་དཔོན་གསུང་དང་བདག་གིས་སྨྲས། །དེ་ལ་བྱེ་བྲག་མི་དབྱེའོ། །རྣལ་འབྱོར་རྣལ་འབྱོར་མ་རྒྱུད་ཤེས། །བླ་མས་མཛད་པའི་བསྟན་བཅོས་གང ། །དེ་ལ་སྒྲ་དང་སྒྲ་ངན་དུ། །ལྷ་ཡི་དབང་ཕྱུག་བརྟག་མི་བྱ། །བསྙན་དངགས་ཟློས་གར་བསྟན་བཅོས་ལས། །སྒྲ་དང་སྒྲ་ངན་བརྟག་བྱ་ཡི། །སྔགས་ཀྱི་བསྟན་བཅོས་གཏན་ལ་ཕབ། །ཅི་ཡི་ཕྱིར་ན་བརྟག་པར་བྱ། །བརྟག་པར་བྱེད་པས་གཏི་མུག་བྱེད། །རྩ་བའི་དོན་ནི་ཟད་པར་འོང ། །དེ་ཕྱིར་སྒྲ་དང་རྟོག་གེ་ཤེས། །དེ་ལ་དེ་ཉིད་བཤད་མི་བྱ། །དེ་ཀུན་ལ་ནི་དབང་མི་བསྐུར། །ཕྱི་ཡི་དོན་ལ་མོས་པའི་ཕྱིར། །ཐབས་དང་ཐབས་ལས་བྱུང་མཚན་ཉིད། །འབྲས་བུ་སྦྱིན་པ་གང་ཞིག་ཕྱིར། །དེ་ནི་ཐམས་ཅད་དངོས་རིག་པ། །མཆོག་གི་དོན་ནི་སྟེར་ཕྱིར་རོ། །དེ་ལྟར་ཡང་དེ་ཁོ་ན་ཉིད
85.33b
གསུམ་གྱི་བདག་ཉིད་དང ། ཟླ་བ་དང་བདེ་བ་མཆོག་དང ། ཕྱག་རྒྱ་ཆེན་པོའི་མཐའ་རྙེད་པའི་དོན་དུ། རྣམ་པ་དང ། ཚད་དང ། རང་གི་ངོ་བོ་ངས་སྨྲས་སོ། །ཡང་འདིར་དེ་ཁོ་ན་ཉིད་ཀྱི་བདག་ཉིད་ནི་ཀུན་གཞིའི་རྣམ་པར་ཤེས་པ་སྟེ་རྣམ་པའོ། །ཟླ་བ་བདེ་བ་མཆོག་ནི་ཚོགས་ཀྱི་རྣམ་པར་ཤེས་པ་སྟེ་མཐའི་ཚད་དོ། །ཕྱག་རྒྱ་ཆེན་པོ་ནི་ཡིད་ཀྱི་རྣམ་པར་ཤེས་པ་སྣང་བ་སྟེ། དེ་ནི་རང་གི་ངོ་བོའི་དེའི་མཐའ་ལ་རྣམ་པ་མེད་པའི་རྣམ་པར་ཤེས་པ་ནམ་མཁའོ། །ཡང་ན་སྤྲུལ་པ་དང ། ཆོས་དང ། ལོངས་སྤྱོད་དང ། བདེ་བ་ཆེན་པོའི་རྣམ་པའི་དོན་ཁོང་དུ་ཆུད་པར་བྱའོ། །ཡང་ན་རྩ་བཞིའི་དོན་དུ་རྣམ་པ་ལ་སོགས་པར་ཤེས་པར་བྱའོ། །དཔལ་ཡེ་ཤེས་ཐིག་ལེ་ལས་དེ་ཁོ་ན་ཉིད་གསུམ་ལ་སོགས་པའི་རྒྱས་པ་ངེས་པར་བསྟན་པའི་རང་བཞིན་གྱི་དོན་ཞེས་བྱ་བའི་ལེའུ་སྟེ་བཅུ་དྲུག་པའོ།། །། དེ་ནས་ལྷ་མོ་རབ་དགྱེས་ནས། །རང་བཞིན་དོན་ནི་གསལ་བའི་ཕྱིར། །དམ་པོ་རུ་ནི་འཁྱུད་བྱས་ནས། །པད་མ་དམར་པོར་རབ་ཏུ་བསྐོར། །དུར་ཁྲོད་ལ་སོགས་པ་ཡི་དོན། །རྡོ་རྗེ་རྒྱལ་པོ་ལ་ནི་ཞུས། །བསྲུབ་དང་བསྲུབ་པའི་སྦྱོར་བ་ལས། །དཔལ་བདག་དགྱེས་ནས་བཀའ་སྩལ་ཏོ། །དུར་ཁྲོད་ལ་སོགས་པ་ཡི་དོན། །སྐལ་ལྡན་ལྷ་མོ་ཁྱོད་ཉོན་ཅིག་།མི་བཟད་འདི་རུ་རྣམ་ཁྱབ་པ། །ལྷ་མོ་ཁ་ལ་རབ་ཏུ་གྲགས། །གཡས་པའི་སྣ་ཡི་བུ་ག་ནི། །མི་སྡུག་པ་ནི་ཤིན་ཏུ་ཚིག་།ལྕེ་སྤྱང་ཚོགས་ནི་ཕྱེད་ཚིག་པ། །སྣ་བུག་གཡོན་པ་རུ་ནི་དྲན། །རྣ་བ་གཡས་པ་འཇིགས་སུ་རུང ། །སཝ་སཝ་དང་ནི་ཙེག་ཙེག་གོ། །ཤ་ཟའི་ཁ་ནི་རྣ་བ་གཡོན། །དུམ་བུ་མགོ་བོ་ལ་སོགས་རྒྱན། །ལྷ་མོ་གཡས་པ་ཡི་ནི་མིག་།ཧ་ཧར་བརྒོད་པར་རབ་ཏུ་གྲགས། །རྣམ་པ་དང་བཅས་ཡི་དགས་ལྡན། །འཇིགས་པ་ཤིན་ཏུ་འཇིགས་པར་བྱེད། །གཡོན་པ་ཕོ་ཉ་ནག་པོ་མེ། །མེ་ལྕེ་འབར་བའི་ཕྲེང་བས་ཁྱབ། །རྡོ་རྗེའི་ཁ་རུ་འཇིགས་པར་བྱེད། །རུས་པ་དཀར་པོས་རབ་ཁྱབ་པ། །ཁུ་བ་གཞན་མིན་རུས་དཀར་འདི། །ངེས་པར་ལྷ་མོ་ཤེས་པར་བྱ། །དེ་ནི་ཤིན་ཏུ་ཚ་བ་སྐྱེ། །
85.34a
དེ་ཚེ་འབར་ཕྲེང་ཁྱེད་པར་ཆེ། །བྱང་ཆུབ་སེམས་ནི་བདེ་བ་ཆེ། །མི་བརྟན་མ་ཡིན་པ་རུ་བཞུགས། །དེ་ཚེ་རྣམ་བཅས་ཡི་དགས་ཀྱིས། །ལྡན་པར་རབ་ཏུ་གྲགས་པའོ། །གསུམ་དབྱེ་བཞིར་དབྱེ་དྲུག་དབྱེ་འམ། །མཆོག་གི་བདུད་རྩི་གང་དུ་གཤེགས། །དེ་ནི་དུམ་མགོ་ལ་སོགས་བསྟན། །གང་ཚེ་ཐིམ་ལ་ལོངས་སྤྱོད་འགྲོ། །དེས་ཚེ་སཝ་སཝ་ཙེག་ཙེག་གོ། །གང་གི་ཚེ་ནི་དབང་མ་འགྲུབ། །དེ་ཕྱེད་ཚིག་ལྡན་དྲན་པའོ། །སྲོག་གི་རླུང་ནི་ནུབ་པའི་ཕྱིར། །ཤིན་ཏུ་ཚིག་པར་བརྟག་པའོ། །ཁུ་བ་ཉེ་བའི་ཤར་མ་ཐག་།བཀྲམ་པར་བདག་གིས་བཤད་པའོ། །ལྷ་མོ་ཤིན་ཏུ་གསང་བ་ཆེ། །དུར་ཁྲོད་བརྒྱད་ནི་རབ་མཆོག་གོ། །དེ་ནི་ཤིང་བརྒྱད་དང་ལྡན་པ། །ནང་གི་བདག་སྦྱོར་མཚན་ཉིད་དོ། །དཔལ་གྱི་མེ་ཏོག་མིག་རྩི་དང ། །ནཱ་ག་གེ་སར་ཝརྟ་དང ། །པ་ལ་ཤིང་དང་ཤ་ར་ཤིང ། །ཁར་བ་དང་ནི་ཤ་མི་ཡོ། །ཡལ་ག་དུ་མ་ལ་སོགས་དང་ལྡན་བརྒྱད། །འབྲས་བུས་དུད་པའི་གཟུགས་ཀྱིས་ཤིན་ཏུ་བརྒྱན། །འདོད་མ་རྒྱས་མ་གླུ་སྟོབས་མ་དང་ས། །མཚོ་སྐྱེས་སྙིང་པོ་འཛིན་མ་བྱ་གདོང་མ། །མགྱོགས་དང་བྲལ་མོ་ཞི་གཉིས་ཀུན་དུ་བརྟགས། །ཤིང་མཆོག་ཆེན་པོ་རྩ་བརྒྱད་ཀྱི་ནི་གཟུགས། །ཡང་ནི་དུར་ཁྲོད་ཆེན་པོ་ནི་སྤྲུལ་པའི་འཁོར་ལོའི་ཆུ་སྐྱེས་ཆོས་ཀྱི་འབྱུང་གནས་ཀྱི་ནང་གསང་བ་ཆེན་པོ་འདུས་པའི་གནས་དང་ཉེ་བའི་གནས་ལ་སོགས་པའི་གནས་ནས་རྣལ་འབྱོར་མ་རེ་རེས་ཤིང་རེ་ཁྱེར་ནས་སོང་ངོ ། །ལྷ་མོས་གསོལ་པ། བཅོམ་ལྡན་འདས་འདིར་ནི་རྣལ་འབྱོར་མ་ནི་གང་ལགས། ཤིང་རྣམས་ཀྱི་མིང་ནི་ཅི་ལགས། ཇི་ལྟར་ན་སྤྲུལ་པའི་འཁོར་ལོའི་ཆུ་སྐྱེས་དེ་ཀུན་གྱི་འདུས་པ་ལགས་པ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཡན་ལག་ཆ་མ་དང ། དྲག་མིག་མ་དང ། འཇིགས་མ་དང ། ཁྲོ་གདོང་མ་དང ། ཟླུམ་མིག་མ་དང ། སྣ་ཉམས་མ་དང ། ལྕེ་བསྐྱོད་མ་དང ། སྦྲུལ་གདོང་མ་དང ། བྱ་རྒོད་གདོང་མ་དང ། གསེར་མིག་མ་དང ། མཆེ་བཙིགས་མ་དང ། སོ
85.34b
རིངས་མ་དང ། ཉ་གདོང་མ་དང ། མགྲིན་རིངས་མ་དང ། རྣ་འཕྱང་མ་དང ། སྒུར་མོ་དང ། བྱིན་ཆེན་མ་དང ། སྤུ་ལྡན་མ་དང ། སེན་རིངས་མ་དང ། ཡན་ལག་གནག་མ་དང ། སྔོ་མ་དང ། ཡན་ལག་དམར་མོ་དང ། གུར་གུམ་འོད་མཉམ་མ་དང ། རྟ་གདོང་མ་དང ། གདོང་ཆེན་མ་དང ། རལ་གཅིག་མ་དང ། རལ་རིངས་མ་དང ། བོང་རྣ་མ་དང ། གླང་ཆེན་ལྟེ་བ་མ་དང ། བུང་མིག་མ་དང ། མེ་ཏོག་དགའ་མ་དང ། སྣ་རིངས་མ་དང ། རྨ་བྱའི་མགྲིན་མ་དང ། སྦྲུལ་ལྕེ་མ་དང ། ནེའུ་ལེའི་གདོང་མ་དང ། ནུ་འཕྱངས་མ་དང་གསུས་འཕྱངས་མ་དང ། སྨད་ཆེ་མ་དང ། གདོང་སྐམ་མ་དང ། རླུང་འགྱོགས་མ་དང ། དལ་འགྲོ་མ་དང ། སྤྱན་རིངས་མ་དང ། དགོད་གདོང་མ་དང ། ངུ་མ་དང ། འཐབ་དགའ་མ་དང ། གར་མ་དང ། དགའ་འགྲོ་མ་དང ། ཆོག་མེད་མ་དང ། མང་ཟ་མ་དང ། ཆང་དགའ་མ་དང ། ཤ་དགའ་མ་དང ། ཕར་འགྲོ་ཚུར་འགྲོ་མ་དང ། བྲམ་ཟེ་མོ་དང ། རྒྱལ་པོའི་སྲས་མོ་དང ། ཆང་འཚོང་མ་དང ། ཐོད་པ་མ་དང ། ལྟོ་བི་དང ། གཏུམ་མོ་དང ། ཁྲུས་མཁན་མོ་དང ། ཚོས་མ་དང ། ཤ་བ་རཱི་དང ། ལེགས་མ་དང ། ཁྲག་དགའ་མ་དང ། སྐྱབས་སྦྱིན་མའོ། །དེ་ཀུན་ལྷ་མོ་རྣལ་འབྱོར་མ། །ཤིན་ཏུ་དྲག་ལ་ཡང་དག་འཇིགས། །དེ་ཀུན་ལག་ན་གང་ཞིག་ཤིང ། །ཁྱེར་ནས་འོང་བ་ཁྱོད་ཉོན་ཅིག་།ཙམ་པ་ཀ་དང ། པ་ཏྲ་ལི་དང ། ཀ་འུན་ཙ་དང ། པ་ཏ་དང ། པད་མ་དང ། ཤ་ར་དང ། ཤི་མྱ་དང ། པ་ལ་ཤ་དང ། ནཱ་ག་གེ་སར་དང ། ས་ལ་དང ། ་རོ་དྷ་ཀ་དང ། གྷ་ན་དང ། པི་ས་ལ་དང ། བུང་བའི་དྲ་བ་དང ། ་ཤཝད་ཐ་དང ། ་ཏ་པུ་ཏ་དང ། ཧ་ཡ་དང ། ས་ཧ་ཀ་ར་དང ། འོ་མའི་ཤིང་དང ། ཆུ་ཤིང་དང ། ན་ལི་གི་ར་དང ། ུ་དུམ་བཱ་ར་དང ། ེ་རན་ད་དང ། ཀ་པ་ཏྟ་དང ། ་མྲ་དང ། ཛམ་ར་དང ། ཁ་དི་ར་དང ། ཙན་དན་དམར་པོ་དང ། པདྡ་ཀ་དང ། ཙན་དན་དང ། ལི་ཤི་དང ། ཛཱ་ཏི་ཤིང་དང ། གོཪྴར་ཤ་དང ། བིལ་བ་དང ། སྐྱུ་རུ་ར་དང ། བ་རུ་ར་དང ། རྒུན་འབྲུམ་དང ། ཁར་ཛུ་ར་དང ། ད་ག་ར་དང་།
85.35a
ཀམྤི་ལ་དང ། བེནྟི་ད་ཀར་དང ། གོ་ཡུའི་ཤིང་དང ། འདོད་པའི་མདའ་གཞུ་དང ། ཕྲ་མོའི་ལོ་མ་དང ། གུ་གུལ་དང ། སརྫ་ས་དང ། བ་ལྷ་ཀ་དང ། མ་ད་ནའི་ཤིང་དང ། ཀརྨྨ་རི་དང ། པུཎྜ་རཱི་ཀ་དང ། འབྲས་བུ་ཆེ་བ་དང ། ཚེར་འབྲས་དང ། ཀླུའི་མགོ་ཤིང་དང ། སུ་དར་ཤ་ན་དང ། ཏ་ལའི་ཤིང་དང ། ཆོས་ཀྱི་རྒྱལ་མཚན་དང ། གཤིན་རྗེའི་གདུགས་དང ། ་ཤོ་ཀ་དང ། ར་ཀ་དང ། ཀ་ར་བི་ར་དང ། རུ་རག་ཤ་དང ། རྫུ་ན་དང ། རྡོ་རྗེའི་མིག་སྟེ། ཤིང་དེ་དག་ཀུན་ནི་ཆུ་ཞེང་གབ་པ། མེ་ཏོག་དང་འབྲས་བུ་དང་ལྡན་པ་སྟེ། འདུས་པ་ཆེན་པོའི་གནས་སུ་རྣལ་འབྱོར་མ་རྣམས་ཀྱིས་ཁྱེར་ཏེ་འོངས་ནས། དམ་ཚིག་གི་སྤྱོད་པ་ཆེན་པོ་བྱེད་དོ། །འདུས་པ་ཆེན་པོའི་གནས་བརྒྱད་པ། །བརྒྱད་ཀྱི་འདབ་མ་དང་ལྡན་ནོ། །འདབ་མ་རེ་རེ་ལ་རྣལ་འབྱོར་མ་དེ་དག་དང་གཉིས་པ་ནི་ཤིང་སྟེ། དེ་གཉིས་གཅིག་ལ་གཅིག་མཉམ་པར་གནས་སོ། །དེ་ལྟར་ཤིང་གི་རྣམ་པ་ཉིད་ཀྱི་རྩ་ལ་བཞུགས་པའི་ཕྱིར་རོ། །རྣལ་འབྱོར་མ་དང་ཤིང་གི་སྒྲས་རྩ་དྲུག་བཅུ་རྩ་བཞི་ཁོང་དུ་ཆུད་པའོ། །འདི་ལ་རྩའི་འཁོར་ལོའི་ལྟེ་བར་སྲོག་གི་རྩ་བའི་ནང་དང་ལྷན་ཅིག་རྩ་གསུམ་དང་ལྡན་པའི་འདབ་མ་གསུམ་གྱི་པད་མའི་གཡས་ངོས་སུ་པིང་ག་ལའོ། །གཡོན་ངོས་སུ་ཨི་དའོ། །དབུས་སུ་བདེ་ལེགས་ཡིད་འོང་མ་དང ། འཇུག་པ་དང ། གནས་པ་དང ། འགྲོ་བ་འགྲུབ་པར་བྱེད་དོ། །དེ་དག་གི་དངོས་པོ་དང ། རྟེན་དང ། ཡེ་ཤེས་དང ། རྣམ་པར་འབྱེད་པ་ལས་ཞལ་བཟང་མོ་དེ་རུ་ཤེས་པར་བྱ། ཤར་བ་དང་ནུབ་པའི་དུས་སུ་རྩའི་འཁོར་ལོའི་འབྱུང་བ་ཐམས་ཅད་འབད་པས་བཙལ་བར་བྱའོ། །གང་གི་ཕྱིར་རྩའི་འབྱུང་བ་མེད་པར་གྱུར་ན། བྱང་ཆུབ་ཀྱི་སེམས་ཀྱི་བདུད་རྩི་བདེ་བའི་ཡེ་ཤེས་འདི་འཇུག་པ་དང ། གནས་པ་དང ། འགྲོ་བའི་སྐྱེ་བ་ཤེས་པ་མ་ཡིན་ནོ། །མ་ཤེས་ན་ཇི་ལྟར་ཕྱག་རྒྱ་ཆེན་པོའི་གྲུབ་པ་རྙེད་པར་འགྱུར་ཏེ། དེ་བས་ན་ཕྱག་རྒྱ་ཆེན་པོའི་གྲུབ་པའི་དོན་འདོད་པའི་རྣལ་འབྱོར་གྱི་དབང་ཕྱུག་གིས་བསམ་གཏན་ལ་མི་གཡེང་བས་བརྩོན་པར་བྱའོ། །ལྷ་མོས་གསོལ་པ། བཅོམ་ལྡན་རྣལ་འབྱོར་དབང་ཕྱུག་གིས། །བསམ་གཏན་འདིར་ནི་ཇི་ལྟ་བུ། །བཅོམ་ལྡན་འདས
85.35b
ཀྱིས་བཀའ་སྩལ་པ། །རྣལ་འབྱོར་དབང་ཕྱུག་བསམ་གཏན་ནི། །ཉོན་ཅིག་ལྷ་མོ་ངས་རབ་བཤད། །ཀུན་རྫོབ་ཡེ་ཤེས་རྟེན་པ་ལས། །གཉིས་སུ་མེད་པའི་གནས་རབ་རྙེད། །ཉེར་འགྲོ་བསམ་གཏན་མཆོག་གིས་ནི། །གྲུབ་པ་ཆེན་པོ་རྙེད་པར་འགྱུར། །སྐྱོན་ནི་ཐམས་ཅད་བྲལ་བའི། །ཡིད་དང་འཐུན་པའི་རང་གནས་སུ། །ལུས་ནི་མ་བསྒྲིམས་པ་ཡིས་ནི། །སྤྲོས་པ་མེད་པར་སྟན་བདེར་བསྡད། །ལྟེ་བའི་དབུས་ན་ཡོད་པའི་ཚུལ། །ཧཱུཾ་གི་ཡིག་འབྲུ་གྲགས་ཆེན་གྲགས། །རྣམ་པར་རྟོག་པ་དང་བྲལ་བ། །བསྐལ་པའི་མེ་ཡི་འོད་དང་མཉམ། །ལངས་ནས་ཆོས་ཀྱི་འཁོར་ལོ་ཡི། །མཁའ་འགྲོ་བསྲེགས་ནས་སྨིན་མཚམས་ཀྱི། །དབུས་ན་གང་ཞིག་འཁོར་ལོ་ཡོད། །རང་གི་ངོ་བོ་སྲོག་གི་རླུང ། །སྙིང་གར་འོངས་ནས་དེ་གནས་སུ། །རྟག་ཏུ་དེ་ནི་བཞུགས་པའོ། །དེ་ནི་ཨོཾ་ཡིག་ངོ་བོར་གྲགས། །སྐུ་ཡི་རྒྱལ་པོ་རྣམ་པར་ཤེས། །སྲོག་དང་རྔུབ་པ་འགོག་པ་ཡིས། །སྲོག་དང་རྔུབ་པའི་བཟའ་བ་གསོལ། །སྲོག་དང་རྔུབ་པ་གཉིས་ཟོས་ནས། །དེས་ནི་རྫོགས་པར་འགྱུར་བ་ཡིན། །དེ་ནས་དེ་ལ་རྟགས་ནི་ཀུན། །མཚན་མ་འདི་ལྟ་བུ་དག་འབྱུང ། །འདར་དང་རྡུལ་དང་བ་སྤུ་ལངས། །དབྱངས་ཀྱི་བྱེ་བྲག་དེ་ནས་མདངས། །ཁ་དོག་འགྱུར་དང་མཆི་མ་དང ། །ལྷ་མོ་དེ་ལས་དེ་ཉིད་སྐྱེའོ། །དེ་ནས་རྣལ་འབྱོར་དབང་ཤེས་ནས། །རྣམ་པར་ཤེས་པའི་ཡི་གེ་མཆོག་།ནང་དུ་ལྟ་བ་བྱས་པས་ན། །སྟེང་མཚམས་རྩེ་མོ་ཟབ་པ་རུ། །མཆོག་གི་ནམ་མཁའ་བདེ་ཆེན་དུ། །ཡི་གེ་མཆོག་ནི་ཤེས་བྱས་ནས། །ཚངས་པའི་པད་མར་བྱོན་ཏེ་རྒྱས། །ཆགས་པ་དང་བྲལ་གནས་སུ་འགྲོ། །དཔལ་ལྡན་རྡོ་རྗེ་འཛིན་པ་ཡིས། །ལྷ་མོ་གནས་དེར་ཤེས་པར་བྱ། །འདི་ལྟ་བུའི་འདུས་པ་ཡིས། །ས་ཡི་དུར་ཁྲོད་ཆེན་པོ་ནི། །ཆོས་ཀྱི་འབྱུང་གནས་ཀྱི་ནི་གཞིར། །གྲངས་མེད་པ་ཡི་རྣལ་འབྱོར་པ། །ཕྱག་རྒྱ་ཆེན་པོའི་དངོས་གྲུབ་ཐོབ། །ཉེ་བར་འགྲོ་བའི་བསམ་གཏན་ལས། །ངེས་པར་འགྲུབ་པའི་དབང་པོ་མཆོག་།སྤྲོས་མེད
85.36a
འོད་ཀྱི་གནས་རྙེད་དོ། །དཔལ་ཡེ་ཤེས་ཐིག་ལེ་ལས་དུར་ཁྲོད་ཀྱི་ངེས་པར་བསྟན་པའི་དོན་དང ། ནང་གི་བསམ་གཏན་གྱི་ཉེ་བར་འགྲོ་བ་བསྟན་པའི་ལེའུ་སྟེ་བཅུ་བདུན་པའོ།། །། བཅོམ་ལྡན་འདས་མ་ཕྱག་རྒྱ་ཆེན་པོ་པད་མའི་མཆོག་བསྐྱེད་ཅིང་ཤིན་ཏུ་དགའ་བས་ཡང་ཞུས་པ། ཀྱཻ་བཅོམ་ལྡན་འདས་དཔལ་ཡེ་ཤེས་ཐིག་ལེའི་རྒྱུད་འདིའི་ཚད་ནི་ཅི་ལགས། གནས་ནི་གང་ལགས། མཆོག་གི་དབང་ཕྱུག་བདག་ལ་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་དྲི་བ་མཆོག་བྱས་པ། །སྤྱན་བཟང་མ་ནི་ཁྱོད་ཉོན་ཅིག་།དཔལ་ལྡན་ཡེ་ཤེས་ཐིག་ལེ་ཡིན། །དེ་ཡི་ཚད་ནི་དོན་དམ་པར། །སུས་ཀྱང་སྨྲ་བར་ནུས་མ་ཡིན། །ཞལ་བཟང་དེ་ནི་བདེན་མ་ཡིན། །འོན་ཀྱང་ཅུང་ཟད་སྐལ་ལྡན་མོ། །གསང་བའི་ཡེ་ཤེས་རབ་མཆོག་ནི། །གང་ཞིག་རྒྱལ་བས་ཡང་མི་ཤེས། །ཁྱོད་ཀྱི་ངོར་བྱས་བདག་གིས་བཤད། །སྲོག་གི་དབྱུག་པའི་གང་ཞིག་སྟེ། །སོར་བཅུ་གཉིས་ནི་མདུད་པ་མེད། །འོག་གི་ཆ་ནི་བཅུ་གཉིས་ཕྱེད། །དེ་བཞིན་སྤྲུལ་པའི་པད་མར་ནི། །དྲུག་ཕྱེད་པད་མ་མིག་དང་འདྲ། །རྩ་བ་དང་བཅས་ལྟེ་ནང་དུ། །རྩ་བ་རྩ་བའི་ནང་འོངས་ནས། །འདབ་མའི་སྐེ་རུ་བཅར་ཏེ་གནས། །དབྱུག་པའི་རྣམ་པའི་ངོ་བོར་གྲགས། །བུ་ག་ཕྲ་མོས་ནང་ན་ལྡན། །དེ་ནི་སྲོག་པ་རྩ་ཉིད་ཡིན། །ཁམས་གསུམ་གྱི་ནི་རྟེན་ཡིན་ནོ། །རྒྱུ་དང་འབྲས་བུ་གཉིས་མེད་ཀྱིས། །རྩ་དང་འབྲས་བུ་རྒྱ་ཡིས་བཏབ། །དྲུག་ཕྱེད་རྩ་བ་དང་ལྡན་ནི། །རྩ་བའི་སྐུད་པ་བྱད་གཟུགས་གསལ། །བཅུ་དྲུག་ཕྱེད་ཕྱེད་བྱེ་བྲག་ཏུ། །རྩ་བའི་སྐུད་པ་གཅིག་པུའོ། །རྩ་བ་གསུམ་དབྱེ་སྐལ་ལྡན་མོ། །འབྲས་བུ་ཡང་ནི་དེ་བཞིན་ནོ། །རྩ་བ་འབྲས་བུ་གཉིས་ཀྱི་གནས། །བཅུ་གཉིས་ཕྱེད་ཀྱི་གཅིག་པའོ། །དེ་ནི་ཤིན་ཏུ་ཕྲ་མོ་འཇམ། །རིན་ཆེན་ཁ་ནང་མན་ཆོད་དོ། །དེ་ཙམ་ཡེ་ཤེས་ཐིག་སྐུད་ཡོད། །རྣམ་ཤེས་དྲུག་པོའི་རྟེན་མཆོག་གོ། །ཆར་ཡང་དང་ནི་ཐིག་ལེ་ཚུལ། །ཚུལ་ཙམ་མཆོག་དང་གཞན་མཆོག་གོ། །ཤྲཱི་ནི་གཞན་མིན་འདི་རུ་ཆར། །ཐིག་ལེ
85.36b
ཛྙཱ་ཞེས་སུ་ནི་དྲན། །ཚུལ་ནི་ན་ཡི་ཡིག་འབྲུ་ཡིན། །ཏི་ཡི་ཡི་གེ་ཚུལ་ཙམ་མོ། །མཆོག་ནི་ལ་ཡི་ཡིག་འབྲུར་བསྟན། །གཞན་མཆོག་ཀ་རུ་དྲན་པའོ། །གུག་མའི་རྣམ་པའི་ཁ་རུ་ནི། །ཡུངས་ཀར་ཆེ་བའི་སྦོམ་པོ་ཙམ། །གཉིས་སུ་མེད་པའི་ཡེ་ཤེས་དཔལ། །ཆར་ཡང་དུ་གྲགས་མཆོག་དབང་ཕྱུག་།དེ་ཡི་སྙིང་ཀའི་དབུས་སུ་ནི། །ཡེ་ཤེས་ཐིག་ལེ་གྲུབ་པ་བཞུགས། །ཚུལ་ནི་མདུད་པའི་མགྲིན་པར་གནས། །ན་ཡི་ཡི་གེ་མཚན་ཞེས་མཆོག་།གཡོན་གློ་ཡི་ནི་འདབ་མའི་ནང ། །ཏི་ནི་ཐིག་ལེའི་ཚུལ་ཙམ་གནས། །གཡས་སུ་ལ་ཡི་ཡིག་འབྲུར་གྲགས། །ལྷ་མོ་མཆོག་ནི་རྟག་ཏུ་བཞུགས། །སྟེང་དུ་གཞན་མིན་ཀུན་གྱི་མཆོག་།ཁ་ཡི་གནས་སུ་རྩེ་མོའི་ཆ། །དེ་ཚད་ཡུངས་ཀར་རུས་པ་ཙམ། །ག་ཡི་རྣམ་པའི་ཡི་གེ་མཆོག་།བདེ་བ་ཆེན་པོའི་རང་ངོར་གྲགས། །རང་གི་ངོ་བོའི་མཚན་ཉིད་ཅན། །དཔལ་ལྡན་ཡེ་ཤེས་ཐིག་ལེ་འདི། །མཁའ་འགྲོ་མ་ཡི་འཁོར་ལོས་བསྒྱུར། །ནམ་མཁར་འགྲོ་བ་ཡི་ནི་ཕྱིར། །མཁའ་འགྲོ་མ་ནི་རྩ་ཀུན་དྲན། །འཇུག་པའི་གནས་ས་ལོངས་སྤྱོད་ཡིན། །ཐིམ་པའི་འགྲོ་བའི་གནས་སུ་ཡོད། །འབྱུང་བ་དབང་གི་གནས་སུ་སྟེ། །རང་བཞིན་དེ་ནི་མཆོག་གཞན་མཆོག་།གཡོན་གྱི་གློ་རུ་ཨི་ཌའི་རྩ། །པི་ག་ལ་ནི་གཡས་སུ་གནས། །རྟོག་མེད་མ་ནི་སྟེང་དུ་གནས། །ཕྱག་རྒྱ་ཆེན་པོའི་རང་བཞིན་ནོ། །སྟེང་དང་འོག་གནས་ཡོད་པའི་རྩ། །སྲིད་དང་མྱ་ངན་འདས་དག་བྱེད། །གཡོན་གློ་རུ་ནི་ཡོད་པས་ཡང ། །དེ་བཞིན་འདི་ནི་དྲན་པའོ། །དེ་རྣམས་ལྟེ་བའི་དབུས་སུ་ནི། །སྐྲ་རྩེ་བྱེ་བ་བརྒྱ་ཡི་ཆ། །དེ་ཡི་ཚད་ནི་དེ་བཞིན་གནས། །ཞལ་བཟང་ཡེ་ཤེས་ཐིག་ལེའོ། །རྣལ་འབྱོར་མ་ཡི་ཡེ་ཤེས་རབ། །གསང་བ་མཆོག་ནི་བདག་གིས་བཤད། །ཐོས་པ་ཡིས་ནི་སྡིག་པ་ཟད། །དེ་ནས་དེ་ལ་དགའ་བ་སྐྱེ། །དྲན་པ་ཡིས་ནི་བསོད་ནམས་སྐྱེ། །དེ་ནས་དེ་ལ་མཆོག་དགའ་སྐྱེ། །ལྟ་བ་ཡིས་ནི་འགྲུབ་པར་འགྱུར། །དགའ་བྲལ་དགའ་བ་རབ་ཏུ་སྐྱེ། །རེག་པ་ཡིས་ནི
85.37a
ལྷན་སྐྱེས་དགའ། །དེ་ནས་ཡང་དག་རབ་འོད་གནས། །འོད་རབ་གནས་ལས་ཐམས་ཅད་འདི། །གནས་ལ་སོགས་པའི་དག་ཀུན་ནོ། །ལྷ་མོས་གསོལ་པ། གནས་ལ་གྲངས་ནི་ཇི་ཙམ་དུ། །མཆོག་གི་དབང་ཕྱུག་ཁྱོད་དབང་མཛད། །བཅོམ་ལྡན་འདས་ཀྱིས་བཀའ་སྩལ་པ། །རྟག་ཏུ་སྤྲུལ་པ་ཡི་ནི་སྐུས། །ས་ནི་བཅུ་གཅིག་པ་རུ་དྲན། །ལོངས་སྤྱོད་རྫོགས་སྐུ་བཅུ་གཉིས་པ། །ཆོས་ཀྱི་སྐུས་ནི་བཅུ་གསུམ་མོ། །བདེ་བ་ཆེན་པོས་བཅུ་བཞི་པ། །གང་ཞིག་བཅཝ་ལྔ་ཡྀ་ནི་ས། །དེ་ནི་ཡེ་ཤེས་ས་ཞེས་བྱ། །བཅུ་དྲུག་པ་ནི་བཏགས་པ་མིན། །ཁྱོད་དང་ལྷན་ཅིག་ཞལ་བཟང་མོ། །དེ་ཀུན་ས་ཡི་དབང་ཕྱུག་བདག་།གནས་ལ་སོགས་པ་དགའ་བའི་གནས། །ས་ཡི་སྒྲ་ཡིས་བརྗོད་པ་ཡིན། །ས་དང་པོ་མོས་པས་སྤྱོད་པ། གཉིས་པ་རབ་ཏུ་དགའ་བ། གསུམ་པ་དྲི་མ་མེད་པ། བཞི་པ་འོད་བྱེད་པ། ལྔ་པ་འོད་འཕྲོ་བ། དྲུག་པ་སྦྱང་དཀའ་བ། བདུན་པ་མངོན་དུ་གྱུར་པ། བརྒྱད་པ་རིང་དུ་སོང་བ། དགུ་པ་མི་གཡོ་བ། བཅུ་པ་ལེགས་པའི་བློ་གྲོས། དེ་རྣམས་ནི་བྱང་ཆུབ་སེམས་དཔའི་སའོ། །ཆོས་ཀྱི་སྤྲིན་ནི་སངས་རྒྱས་ཀྱི་ས། ཀུན་ཏུ་འོད་ནི་ཡང་དག་པར་རྫོགས་པའི་སངས་རྒྱས་ཀྱི་ས། ཀུན་དུ་སྣང་བ་མཆེད་པའི་འོད་ནི་དཔལ་རྡོ་རྗེ་སེམས་དཔའ་བཅོམ་ལྡན་འདས་ཀྱི་སྤྲུལ་པའི་སྐུའི་ས། ཀུན་དུ་སྣང་བ་ཐོབ་པའི་འོད་ནི་ལོངས་སྤྱོད་རྫོགས་པའི་སྐུའི་ས། །བརྗོད་དུ་མེད་པ་ཚད་མེད་པ་ནི་བདེ་བ་ཆེན་པོའི་ས་སྟེ། དེ་ཀུན་དགའ་བའི་བྱེ་བྲག་ལ། །སར་ནི་ཀུན་ཏུ་བཏགས་པའོ། །ལྷ་མོས་གསོལ་པ། རྡོ་རྗེ་སེམས་དཔའ་མངའ་བདག་ཆེ། །སྐུ་ནི་འདི་རུ་ཅི་རུ་གྲགས། །བཅོམ་ལྡན་འདས་ཀྱིས་བཀའ་སྩལ་པ། །སྐུ་ནི་དེ་བཞིན་གཤེགས་སྐྱབས་སྦྱིན། །སེམས་ནི་རྡོ་རྗེ་འཛིན་པར་དྲན། །ཕུང་པོ་ལྔ་ལས་གྲུབ་པའི་སྐུ། །རིགས་ལྔ་ཡི་ནི་བདག་ཉིད་མཆོག་།རིགས་ནི་དྲུག་པ་ཐུགས་རྡོ་རྗེ། །གྲངས་མེད་རིགས་ཀྱི་གཙོ་བོའོ། །འཁོར་ལོ་རིན་ཆེན་དེ་བཞིན་པད། །རལ་གྲི་རྡོ་རྗེ་ལྔ་པའོ། །གཟུགས་དང་ཚོར་བ་འདུ་ཤེས
85.37b
དང ། །འདུ་བྱེད་རྣམ་ཤེས་དེ་བཞིན་ནོ། །གཟུགས་ནི་རྣམ་པར་སྣང་མཛད་གྲགས། །གཏི་མུག་རྡོ་རྗེའི་ངོ་བོ་ཉིད། །ཚོར་བ་རིན་ཆེན་རྒྱལ་པོ་ནི། །ང་རྒྱལ་རྡོ་རྗེའི་ངོ་བོ་ཉིད། །འདུ་ཤེས་དེ་ནི་སྣང་མཐའ་ཡས། །ཆགས་པ་རྡོ་རྗེར་རབ་ཏུ་གྲགས། །འདུ་བྱེད་དོན་ཡོད་གྲུབ་པ་སྟེ། །ཕྲག་དོག་རྡོ་རྗེ་རུ་ནི་གྲགས། །རྣམ་པར་ཤེས་འདིར་མི་བསྐྱོད་པ། །ཞེ་སྡང་རྡོ་རྗེ་རབ་ཏུ་བསྒོམ། །ནམ་མཁའ་རྡོ་རྗེ་སེམས་དཔར་གྲགས། །རྣམ་པ་དང་བྲལ་གྲུབ་མངའ་བདག་།གཏི་མུག་མེ་ལོང་ཡི་ཤེས་ལྟེ། །ང་རྒྱལ་མཉམ་པ་ཉིད་དུ་དྲན། །སོ་སོར་རྟོག་པ་འདོད་ཆགས་ཡིན། །བྱ་བ་གྲུབ་པ་ཕྲག་དོག་ཆེ། །ཞེ་སྡང་ཆོས་དབྱིངས་རྣམ་པར་དག་།བདེ་ཆེན་གཅིག་པུ་ལས་ནི་འདིར། །བྱེ་བྲག་ལྔ་རུ་གྱུར་པར་གྲགས། །བདེ་བ་དཀར་པོ་བསྲུབས་པ་ལས། །ཞལ་བཟངས་མོ་ནི་སྲ་བ་གང ། །དེ་ནི་རྣམ་པར་སྣང་མཛད་ཅེས། །གཏི་མུག་ཆོས་ཀྱི་མཚན་ཉིད་ཅན། །བདེ་བ་ནག་པོ་ཞུ་བའི་གཟུགས། །དེ་ནི་མི་སྐྱོད་པ་རུ་དྲན། །བདེ་བ་དམར་པོའི་འོད་ཀྱི་ཕྱིར། །འོད་དཔག་མེད་པ་དེ་བཞིན་གཤེགས། །རླུང་གིས་ཁྱབ་ཕྱིར་བདེ་བ་སྔོན། །དོན་ཡོད་གྲུབ་པ་དེ་རབ་བསྟན། །ང་རྒྱལ་ལས་ནི་འདིར་བདེ་སེར། །དེ་ནི་རིན་ཆེན་འབྱུང་ལྡན་ཡིན། །ནམ་མཁའ་དང་བྲལ་གྲུབ་མགོན་པོ། །རྡོར་སེམས་རྒྱལ་བ་ཀུན་མངའ་བདག་།སྤྱན་རིངས་བཟང་མོ་དེ་ཕྱིར་སྐུ། །ལྷ་ཡི་རྣམ་པ་རབ་ཏུ་མཆོག་།འབད་པ་ཡིས་ནི་དེ་མཆོད་བྱ། །ནམ་ཡང་སྨད་པར་མི་བྱའོ། །ཤ་དང་ཁྲག་དང་བཤང་བ་དང་གཅི་བ་དང ། མིག་རྡུ་དང་སྣབས་དང ། སེན་མོ་དང་སོ་དང་སྐྲ་དང་སྤུ་དང་རུས་པ་དང་རྒྱུས་པ་དང་མཁལ་མ་དང་སྙིང་དང་མཁྲིས་པ་དང་གློ་བ་དང་རྒྱུ་མ་དང་དྲི་མ་དང ། ཆིལ་དང་རྣག་དང་ཨང་ཁྲི་ནི་དང་གཉེ་མ་དང་ལྟོ་བ་དང་ཁ་ལྦུ་དང ། བད་ཀན་དང་རྔུལ་དང་མཆི་མ་དང ། ཀླད་པ་དང ། རྐང་མར་དང་ཁུ་བ་དང ། ཁྲག་དང་ཤ་མ་འདི་ཡང་ལྷའི་གཟུགས་ཀྱིས་གནས་པ་སྟེ། གཞན་མ་ཡིན་ནོ། །དེ་བས་ན་ཤིང་དང་།
85.38a
རྡོ་བ་དང ། ས་ལས་གྲུབ་པ་དང ། དངུལ་དང་ཟངས་དང་འཁར་བ་ལས་གྲུབ་པའི་ལྷ་དང་མཆོད་རྟེན་དང་བྲིས་སྐུ་དང་པོ་ཏི་ལ་སོགས་པ་རྣམས་ལ་ཕྱག་མི་བྱའོ། །གང་གི་ཕྱིར་ཡེ་ཤེས་ཀྱི་སྐུ་སྤངས་ནས་ཕྱིའི་དོན་གྱིས་ཅིའི་ཕྱིར་གནས། །ཕྱིའི་ཐམས་ཅད་སྐད་ཅིག་མ། །དགའ་མོ་སེམས་ཀྱི་རྫུ་འཕྲུལ་ཡིན། །དེ་ལྟར་སེམས་ལས་གཞན་པ་ཡིན། །སེམས་ཉིད་ནམ་མཁའ་ལྟ་བུའོ། །གཟུགས་སོགས་ཁ་དོག་གནས་པའི་ཕྱིར། །ཐ་མལ་པའི་ལུས་སུ་སྣང ། །རྣམ་པར་དག་པས་ལྷ་ཉིད་དུ། །བླ་མའི་ཞལ་སྔའི་བཀའ་དྲིན་ནོ། །ལྷ་མོས་གསོལ་པ། མགོན་པོ་བླ་མ་ཇི་ལྟ་བུ། །སློབ་མ་ཡང་ནི་ཅི་འདྲ་བ། །རྒྱུད་ཀྱི་རིམ་པ་ཇི་ལྟར་ལགས། །རེ་ཤིག་རྒྱུད་ནི་ཇི་ལྟར་གསུངས། །དཔལ་ཡེ་ཤེས་ཐིག་ལེ་ལས། དཔལ་ཡེ་ཤེས་ཐིག་ལེའི་ཚད་དང ། གནས་དང ། ས་བསྟན་པའི་དོན་དང ། ཕུང་པོ་རྣམ་པར་དག་པ་ཞེས་བྱ་བའི་ལེའུ་སྟེ་བཅཝ་བརྒྱད་པའོ།། །། དེ་ནས་ཡང་ནི་བཤད་བྱ་བ། །བླ་མ་སློབ་མའི་མཚན་ཉིད་ནི། །བླ་མ་ཐ་མལ་དངོས་བྲལ་ཡོན་ཏན་ལྡན། །གཞན་མིན་མཆོག་གི་དབང་གིས་དབང་བསྐུར་སྐུ། །ཐུགས་རྗེ་དང་ལྡན་ཤིན་དུ་རླབས་ཆེའི་སེམས། །དེ་ཉིད་ཤེས་པ་ལོག་པའི་ང་རྒྱལ་མེད། །བླ་མ་ཡུལ་གྱིས་མ་གོས་རྨུ་རྒོད་མ་ཡིན་པ། །རྒྱུད་ལུང་བསྟན་བཅོས་དུ་མའི་ཕ་རོལ་ཕྱིན། །ཡན་ལག་མཚན་མཆོག་ཀུན་གྱིས་ཤིན་དུ་བརྒྱན། །དཀྱིལ་འཁོར་འདྲི་དང་དབང་གི་རིམ་ལ་མཁས། །བླ་མ་ཡིད་ཐུབ་སྲིད་པའི་འཇིགས་བྲལ་ཞིང ། །མྱ་ངན་འདས་ལ་འདོད་པའི་ཡིད་དང་བྲལ། །དངོས་པོ་ཆུ་ཟླ་ལྟ་བུར་ཉིད་ཀྱིས་མཐོང ། །དྲུག་ལྷག་བཅུ་ཡིས་སྟོང་ལ་གཅིག་ཏུ་སེམས། །བླ་མཆོག་ཉོན་མོངས་མེད་ཅིང་སྐྱེ་བ་མེད། །ཕུང་པོ་ལ་སོགས་སྐྱེ་མཆེད་ཁམས་དང་བྲལ། །མཆོག་དང་དགའ་བྲལ་གཉིས་ཀའི་དབུས་ན་བཞུགས། །དེ་ལྟའི་དཔལ་བླ་རྡོ་རྗེ་རྒྱལ་པོ་ཉིད། །སློབ་མ་ཁྲིམས་ལྡན་དུལ་ཞིང་དད་པ་ཅན། །རླབས་ཆེན་ཟབ་མོའི་ཐེག་པ་བསྙེན་པར་བྱེད། །རྣམ་རྟོག
85.38b
འདམ་གྱིས་རྟག་ཏུ་མ་གོས་ཤིང ། །མཁས་ཤིང་བློ་རྣོ་ཐུགས་རྗེའི་བདག་ཉིད་ཅན། །སྤྱན་རིང་བཟང་མོ་འདི་ལྟ་བུ་དག་གི་།བླ་མ་དང་ནི་སློབ་མ་རྣམ་གཉིས་ཀྱི། །མཚན་ཉིད་དང་ནི་ལེགས་པར་བརྟག་པ་ནི། །ཇི་ལྟའི་དོན་གྱིས་རབ་ཏུ་གསལ་བའོ། །དཔལ་ཡེ་ཤེས་ཐིག་ལེ་ལས་བླ་མ་དང་སློབ་མའི་མཚན་ཉིད་བརྟག་པ་ཞེས་བྱ་བའི་ལེའུ་སྟེ་བཅུ་དགུ་པའོ།། །། དེ་ནས་གཞན་ཉོན་བདག་གིས་བཤད། །ཇི་ལྟར་རྒྱུད་ཀྱི་རིམ་པ་བཞུགས། །དཔལ་དང་ལྡན་པའི་རིགས་ཆེན་རྒྱུད། །འབུམ་བདུན་གྱི་ནི་མཚན་ཞེས་བྱ། །དེ་ནི་གཙོ་བོ་རྩ་བའི་རྒྱུད། །སྐུ་བརྒྱད་བདག་ཉིད་རབ་ཀྱི་མཆོག་།དེ་བརྟག་ཀྱེ་ཡི་རྡོ་རྗེ་ནི། །འབུམ་ལྔ་ཡི་ནི་མཚན་ཞེས་བྱ། །དཔལ་ལྡན་ཕྱག་རྒྱ་ཆེན་ཐིག་ལེ། །དེ་ཡི་ཕྱི་མའི་རྒྱུད་དུ་དྲན། །ཡེ་ཤེས་སྙིང་པོར་གྲགས་པའི་རྒྱུད། །དེ་ཡི་ཕྱི་མའི་ཕྱི་མའོ། །དགའ་མོ་ཡེ་ཤེས་ཐིག་ལེའི་སྒྲ། །བཤད་པའི་རྒྱུད་ནི་གསང་བ་ཆེ། །གྲུབ་པའི་ངེས་བསྟན་ཐིག་ལེ་ནི། །ཞལ་བཟང་མོ་དེ་སྙིང་པོ་དང ། །དེ་ཁོ་ན་ཉིད་སྒྲོན་མའི་མཚན། །འབྲས་བུའི་རྒྱུད་གྲགས་འཆད་པར་འགྱུར། །དེ་བདུན་དུ་ནི་བདག་གིས་བཤད། །ཤིན་ཏུ་རྨད་ཏུ་བྱུང་བའི་རྒྱུད། །ལྷ་མོ་བརྒྱད་པ་སྐུ་དང་བྲལ། །དེ་ཕྱིར་སྨྲ་བར་མི་བཏུབ་པོ། །དེ་ལྟར་རིམ་པ་ཐམས་ཅད་ནི། །ལྷ་མོ་དེ་ཉིད་ཤེས་པར་བྱ། །ས་བོན་ལས་ནི་མྱུ་གུ་བཞིན། །རྒྱུད་ཀུན་རིམ་ཤེས་རིམ་པས་སོ། །རྒྱུད་ནི་རིམ་པས་འདི་རུ་གྲགས། །ཡང་ན་ཡེ་ཤེས་འཁོར་ལོ་རྒྱུད། །ཡང་ན་དོན་ནི་རྒྱུད་ཡིན་ཏེ། །ཡང་ན་རིམ་པ་གཉིས་ནི་རྒྱུད། །ལྷ་མོ་གང་དུ་སྐལ་ལྡན་མོ། །ཤེས་རབ་ཐབས་གཉིས་ཕྲད་པའི་ས། །དེ་ནི་རྒྱུད་དུ་བཤད་པ་ཡིན། །ཡང་ན་ཡེ་ཤེས་ལས་བྱུང་བ། །ཏ་ཡི་ཡིག་འབྲུ་སྐུ་རུ་གྲགས། །ན་ནི་དེ་ཉིད་དྲི་མ་མེད། །ཏ་ཡི་ཡིག་འབྲུ་ཁུ་བ་ཡབ། །ར་ནི་ཡུམ་སྟེ་ཁྲག་ཡིན་ནོ། །དེ་གཉིས་འདྲེས་པ་ཐིག་ལེ་ཡིན། །གཞན་མིན་རྣམ་ཤེས་ངོ་བོའོ། །དེ་ཡི་ཐིག་ལེ་ཨའི་རྣམ་པ། །ཟླ་བའི་དཀྱིལ་འཁོར་ཉ་གང་ངོ ། །ཏ་ཡིག་དང་ནི་ར་ཡིག
85.39a
འབྲུ། །ཚུལ་ཙམ་གྱིས་ནི་གཉིས་ཀ་ལྡན། །དེ་ནི་རབ་མཆོག་ཨ་ཡིག་འབྲུ། །རྩ་དང་དགའ་བདག་ཉིད་སྐྱེ་མེད། །ལྷ་མོ་འདི་ལྟར་རྒྱུད་ཀྱི་རིམ། །རྒྱུད་ཀྱི་དོན་ཡང་ཤིན་དུ་བཤད། །དཔལ་ཡེ་ཤེས་ཐིག་ལེ་ལས་རྩ་བའི་རྒྱུད་ལ་སོགས་པའི་རིམ་པ་དང ། དོན་ཞེས་བྱ་བའི་ལེའུ་སྟེ་ཉི་ཤུ་པའོ།། །། བཅོམ་ལྡན་ཡེ་ཤེས་ཐིག་ལེ་ལགས། །ཉི་མ་བྱེ་བའི་འོད་དང་མཉམ། །བདག་གི་ཞུ་བ་གང་ཞིག་ཅི། །རྒྱལ་བའི་མངའ་བདག་དེ་བདག་གསུངས། །མངའ་བདག་རང་གི་ངོ་བོ་ཉིད། །གང་ལས་སྐྱེས་ཤིང་ཅི་ལས་འོངས། །དེ་ནི་མདོར་བསྡུས་པ་ཡི་ཚིག་།ཐུབ་པ་ཆེན་པོས་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །དྲི་བ་འདི་ནི་ཤིན་ཏུ་ཟབ། །ཡེ་ཤེས་ཀྱིས་རྙེད་གསང་བའོ། །ལྷ་མོ་ཁྱོད་ནི་འབྱུང་བ་མིན། །སྐྱེ་བ་དང་ནི་འཕོ་མེད་རབ། །མཆོག་གི་རྣམ་རྟོག་རླབས་དང་བྲལ། །རང་གི་ངོ་བོ་ཡེ་ཤེས་འོད། །བདག་རང་གི་ནི་ཡེ་ཤེས་སྐུའི། །མཆོག་གི་དབང་ཕྱུག་མ་ཁྱོད་འོང ། །གཞན་མིན་བདག་དང་ཁྱོད་མེད་ན། །སངས་རྒྱས་ཀུན་གྱིས་རྙེད་དཀའ་བ། །ཁྱོད་མེད་ན་ནི་ཁམས་གསུམ་ཀུན། །མགོ་བོ་ཆད་པའི་མི་བཞིན་དུ། །གྲངས་མེད་འཇིག་རྟེན་གྱི་ནི་ཁམས། །ཁྱོད་ནི་ཡེ་ཤེས་འོད་བྱེད་པ། །ཁྱོད་ནི་ཐམས་ཅད་དངོས་ཀུན་གྱིས། །ཐམས་ཅད་བདག་ཉིད་འབྱུང་བ་ཀུན། །ཆོས་ཀུན་ཡོངས་སུ་ཤེས་ནས་ནི། །དེ་ནི་ཐམས་ཅད་མཁྱེན་པར་གྲགས། །དེ་ཡང་ལྷ་མོ་ཁྱོད་ཀྱི་དྲིན། །བརྗོད་པར་མི་ནུས་ཡང་དག་དོན། །ཁྱོད་ཀྱི་དྲིན་གྱིས་གྲངས་མེད་པས། །དེ་བཞིན་གཤེགས་པའི་གནས་རྙེད་འགྱུར། །མཆོག་གི་ནམ་མཁའི་གནས་ནས་བྱོན། །མཆོག་གི་ནམ་མཁའི་གནས་སུ་གཤེགས། །མཆོག་གི་ངོ་མཆོག་གི་ནམ་མཁའི་ངལ་བསོ་གནས། །མཆོག་གི་ནམ་མཁར་རྟག་ཏུ་བཞུགས། །ཀུན་རྫོབ་རྣམ་པའི་མཆོག་ཏུ་ནི། །པད་མའི་སྐུད་པ་ཇི་བཞིན་དུ། །གསང་བའི་སྣ་རྩེ་སྙིང་པོར་གནས། །ལངས་ནས་བདེ་བའི་པད་མར་ནི། །ཐིག་ལེ
85.39b
ཁོང་དུ་ཆུད་པའི་ཕྱིར། །གཤེགས་ནས་བརྟེན་པ་ཐམས་ཅད་བསྲེག་།རྒྱས་པས་ཐིག་ལེ་ཁྱེར་ནས་སུ། །ཡང་ནི་ཁྱོད་འདིར་བྱོན་པའི་དོན། །ལྟེ་བ་སྤྲུལ་པའི་པད་མ་ཡི། །ལྷ་མོ་གང་ཚེ་ཁྱོད་ཀྱི་གནས། །དེ་ཚེ་ཁྱོད་ནི་ཤེས་རབ་གྲགས། །ལེགས་དགྱེས་རབ་མཆོག་རྨད་དུ་བྱུང ། །བདག་དང་ལྷན་ཅིག་གཉིས་མེད་སྦྱོར། །ལེགས་དགྱེས་དབང་མོ་ཁྱོད་ནི་བཞུགས། །ཚངས་པའི་ཡུལ་ས་བྱེ་བ་མཐར། །ལེགས་དགྱེས་ཁྱོད་ཀྱི་རྒྱ་ཡིས་བཏབ། །གྲངས་མེད་པ་ལ་རྒྱས་བཏབ་སྟེ། །དེ་ཕྱིར་ཕྱག་རྒྱ་ཆེ་ཁྱོད་གྲགས། །དཔལ་ཡེ་ཤེས་ཐིག་ལེ་ལས། དཔལ་ཕྱག་རྒྱ་ཆེན་པོ་བཅོམ་ལྡན་འདས་མའི་རང་གི་ངོ་བོ་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་གཅིག་པའོ།། །། གསང་བའི་པད་སྙིང་རྒྱས་འབྱེད་པ། །རྡོ་རྗེ་ཉི་མ་གཞན་ཡང་ཞུ། །རེ་ཤིག་ཅི་ཡི་གསང་བ་གསུངས། །གནས་ནི་གང་ན་ཡོད་པ་ལགས། །བཅོམ་ལྡན་འདས་ཀྱིས་བཀའ་སྩལ་པ། །བྱང་ཆུབ་སེམས་ནི་གསང་བ་ཡིན། །ཁུ་བའི་ངོ་བོ་ཆང་དང་བྲལ། །དེ་ཡི་གནས་ནི་མངལ་ཡིན་ཏེ། །ཕྱག་རྒྱ་དགའ་བ་སྦྱིན་པ་མོ། །བཅོམ་ལྡན་འདས་མས་གསོལ་པ། བྱང་ཆུབ་སེམས་ནི་ཁུ་བའི་གཟུགས། །དེ་ནི་ཇི་ལྟར་གསང་བར་བརྗོད། །གསང་བའི་གནས་ནི་མངལ་ཡིན་ཏེ། །གཞུང་དེ་བདག་ལ་འཐད་མ་ལགས། །དེ་ལྟ་ན་ནི་གང་ཟག་ཀུན། །ངེས་པར་གསང་བ་ཤེས་པར་འགྱུར། །དེ་ཡང་དབང་བསྐུར་ལ་སོགས་ནི། །སུ་ལ་ཡང་ནི་མི་དགོས་ལགས། །བཅོམ་ལྡན་འདས་ཀྱིས་བཀའ་སྩལ་པ། །སངས་རྒྱས་ཀུན་གྱི་ཡུམ་ཁྱོད་དེ་ནི་བདེན། །གང་ཞིག་ཁྱོད་ཀྱིས་ངེས་པར་བཟུང་བའི་དོན། །འོན་ཀྱང་དྲང་བའི་དོན་གྱི་ཚིག་གིས་ལྡན། །རྟེན་གྱི་དོན་ཕྱིར་ཡང་ན་ངེས་པའི་དོན། །རྟེན་མེད་ན་ནི་འབྲས་བུ་རྙེད་མི་འགྱུར། །ལུས་ཀྱི་དངོས་མེད་ཇི་ལྟར་འདི་རུ་སེམས། །ཇི་ལྟར་དོན་འཐུན་གསང་ཚིག་དེ་ནི་གསང ། །དྲང་བའི་དོན་མིན་ངེས་པའི་དོན་ཡང་མིན། །དངོས་མེད་ཡང་མིན་དངོས་པོའི་གཟུགས་མ་ཡིན། །བདེན་རིམ་འབྱུང་བ་ཐིམ་རྣམས་ཀྱི་ནི་གཞན། །སྐུ་གཟུགས
85.40a
གང་དུ་དེ་ནི་ཡོད་མ་ཡིན། །ཁྲག་ཀྱང་ཡིན་པར་ཇི་ལྟར་ཡང་ནི་མིན། །མཆོག་དགའ་དགའ་བྲལ་ལྷན་སྐྱེས་དགའ་བ་མིན། །གནས་མངལ་དེ་ལ་ནམ་ཡང་ཡོད་མ་ཡིན། །རྡོ་རྗེ་རྩ་བ་བདེ་ཆེན་ལ་སོགས་མིན། །དྲུག་ཕྱེད་རྩ་དང་མཚོ་སྐྱེས་སྙིང་པོ་མིན། །རིག་མིན་ཡང་མིན་རིག་པ་ནམ་ཡང་མིན། །བརྗོད་མེད་ནམ་མཁའི་རང་གི་ངོ་བོ་ཡི། །འདི་ལྟ་བུ་ནི་དོན་དམ་པར། །ལྷ་མོ་གསང་བར་རབ་ཏུ་གསལ། །ཡང་ནི་འབྲིང་གི་དོན་གྱིས་སུ། །བདག་གིས་གསང་བཤད་ཁྱོད་ཉོན་ཅིག་།འབྲིང་དོན་དེ་ནི་དོན་གྱི་མཆོག་།མཆོག་གི་དགའ་བ་སྦྱིན་པའོ། །འབད་པས་དགའ་བྲལ་སྲུང་བར་བྱེད། །དགའ་བྲལ་དགའ་བས་ལྷན་སྐྱེས་འགྱུར། །ནོར་མདུད་སྙིང་ག་ཡི་ནི་གསང ། །བྱང་ཆུབ་ཀྱི་ནི་སེམས་དང་ལྡན། །དེ་ནི་ཐབས་ཀྱི་གསང་བའི་དོན། །ཤེས་རབ་མ་ཡི་དེ་བཞིན་ནོ། །གསང་བ་ཤེས་རབ་དབང་གཉིས་ལས། །དགའ་མོ་གསང་བའི་དོན་ཤེས་སོ། །དཔལ་ཡེ་ཤེས་ཐིག་ལེ་ལས་གསང་བའི་དོན་ཞེས་བྱ་བའི་ལེའུ་སྟེ་ཉི་ཤུ་རྩ་གཉིས་པའོ།། །། དེ་ནས་བཅོམ་ལྡན་འདས་མ་ཕྱག་རྒྱ་ཆེན་པོས་འཇམ་པའི་དབྱངས་ལ་ཡང་ཞུ་བ་ཞུས་པས། ་མགོན་པོ་ཐམས་ཅད་གཏན་ཕབ་པ། །རང་བཞིན་ཇི་ལྟར་ལགས་པ་གསུངས། །བཅོམ་ལྡན་འདས་ཀྱིས་དེ་ལྟ་བུའི་ཚིག་གསན་པ་དང་ཅང་མི་གསུང་བའི་དངོས་པོས་སྐད་ཅིག་ཙམ་བཞུགས་ཏེ། དེ་ནས་མི་སྣང་བའི་རང་གི་ངོ་བོར་བཞུགས་སོ། །དེ་ནས་བཅོམ་ལྡན་འདས་མ་ཕྱག་རྒྱ་ཆེན་པོས་བདག་རང་རྟེན་མེད་པར་མཐོང་ནས་ཞུས་པས་ཤིན་ཏུ་འགྱོད་ནས་ཅང་མི་སྨྲ་བར་བཞུགས་སོ། །དེའི་དུས་སུ་སྣ་ཚོགས་པད་མ་ལ་བཞུགས་པར་འཁོར་བྱེ་བ་ཕྲག་བདུན་བཅུ་རྩ་གཉིས་ཀྱི་གྲངས་རྣམས་ཀྱིས་ཆོས་ཀྱི་འབྱུང་གནས་སྟོང་པར་མཐོང་ནས་ཤིན་ཏུ་ཡ་མཚན་དུ་གྱུར་པས་ཀུན་སྨྲ་ཞིང་བརྒྱལ་བར་གྱུར་ཏོ། །ཀྱཻ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་བཅོམ་ལྡན་འདས་དཔལ་རྡོ་རྗེ་སེམས་དཔའ་གང་ན་བཞུགས། གར་གཤེགས། ཀུན་དུ་སྟོང་པར་བདག་ཅག་གིས་མཐོང་ལགས་སོ། །ལྷའི་དབང་ཕྱུག་གིས་གསོལ་པ།
85.40b
འཁོར་ཆེན་པོ་རྣམས་ཉོན་ཅིག་།བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་བཅོམ་ལྡན་འདས་དཔལ་ཕྱག་རྒྱ་ཆེན་པོས་འདི་ལྟར་ཞུས་ཏེ། མགོན་པོ་ཐམས་ཅད་གཏན་ལ་ཕབ། །རང་བཞིན་ཇི་ལྟར་ལགས་པ་གསུངས། །དེ་ལྟ་བུའི་ཚིག་གསན་པ་དང་བཅོམ་ལྡན་འདས་ཅང་མི་གསུང་བར་མི་སྣང་བར་གྱུར་ཏོ། །དེ་ཅིའི་ཕྱིར་ཞེ་ན། རང་བཞིན་དེ་ནི་བརྗོད་དུ་མེད་པ་དང ། རྟོག་གེ་མེད་པ་དང ། བཙལ་དུ་མེད་པ་དང ། གྲངས་མེད་པ་དང ། སྐྱེ་བ་མེད་པ་དང ། གཟུགས་མེད་པ་དང ། རིག་པ་མེད་པ་ལ་དེ་དྲིས་པས། དེ་ཉིད་སྨྲར་མི་བཏུབ་པའི་ཕྱིར། བཅོམ་ལྡན་འདས་སྣང་བ་མེད་པར་གྱུར་ཏོ། །ཡང་འཁོར་ཐམས་ཅད་ཀྱིས་གསོལ་པ། ཀྱཻ་བློ་གྲོས་ཆེན་པོ་ཆོས་ཀྱི་མཛོད། སྣང་བ་མེད་ཅིང་དངོས་པོ་མེད་པ་ཆད་པར་མི་འགྱུར་རམ། དེའི་དོན་ལ་ཤིན་དུ་འཇིགས་ཤིང་ཡང་དག་པར་ཡིད་ཞུམ་པར་གྱུར་ཏོ། །ལྷའི་དབང་ཕྱུག་གིས་བཀའ་སྩལ་པ། སྣང་བ་མེད་པར་འདུ་ཤེས་གང ། །དེ་ནི་དངོས་མེད་ཤེས་མི་བྱ། །ནང་གི་རང་ངོར་འགྲོ་བའི་ཕྱིར། །སྣང་བ་མེད་པར་འདི་རུ་བརྗོད། །དེ་བས་འཁོར་ཆེན་མ་འཇིགས་ཤིག་།ཡིད་སྐྱོ་བ་ནི་ཡོངས་སུ་སྤོངས། །དེ་ལ་ཐབས་ནི་གཅིག་ཡོད་དེ། །གང་གི་རྡོ་རྗེ་འཛིན་པ་ཉིད། །སྔར་ནི་ཁྱོད་ཀྱིས་མཐོང་བ་བཞིན། །པད་མའི་དབུས་བཞུགས་མཐོང་བར་འགྱུར། །དེའི་ཚེ་འཁོར་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་མཐོང་བར་བྱ་བའི་ཕྱིར་ཐབས་ཞུས་པ། ཀྱཻ་བློ་གྲོས་ཆེན་པོ་དཔའ་བོ་ཆེན་པོ་ཐབས་ཅི་ཡོད་པ་བདག་ལ་བསྟན་དུ་གསོལ། །དཔའ་བོ་ཆེན་པོས་བཀའ་སྩལ་པ། དུས་གཅིག་ཏུ་མགྲིན་གཅིག་གིས་སྙན་པའི་གླུས་མཆོད་པ་གྱིས་ཤིག་།དེ་ལྟ་བུའི་ཐབས་ཀྱི་ཚིག་ཐོས་ནས་ཐམས་ཅད་དགའ་ཞིང་མགུ་ལ་ཡི་རངས་པས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གི་ཞབས་ལ་མགོ་བོས་ཕྱག་འཚལ་ཏེ། དེ་ནས་དྲུག་ལྡན་ལ་སོགས་པའི་གླུ་ཐམས་ཅད་ལེན་ནོ། །ཀྱཻ་སྐུ་རབ་མཆོག་གི་ངོ་བོའི་མཚན
85.41a
ཉིད་ནི། །གང་ན་བཞུགས་པ་མྱ་ངན་འདས་མཚན་ཉིད། །དེ་ཉིད་དང་བྲལ་ཆད་པའི་སྟོང་དེ་ནི། །གཉིས་མེད་བདེ་བས་མཁྱེན་པར་མི་འགྱུར་རམ། །རྡོ་རྗེ་མཚོ་སྐྱེས་མཆོག་སྦྱོར་ཡོངས་སུ་གཟིགས། །གང་ཞིག་དངོས་མེད་དངོས་དེ་དཔྱད་པར་མཛོད། །དེ་ནས་རང་བཞིན་ལས་བཅོམ་ལྡན། །ཆུ་ལས་ཉ་ནི་བཞིན་དུ་བཞེངས། །མཆོག་གི་དགའ་བའི་གཟུགས་བདག་ཉིད། །མཆོག་གི་དགའ་བའི་སྦྱིན་པའི་བདག་།དངོས་དང་དངོས་མིན་གཉིས་ཀྱི་སྟེང ། །གྱེན་བལྟས་པད་མའི་ལྟེ་བར་ནི། །ཞལ་བཞི་དང་ནི་ཕྱག་བཞི་པ། །ཤིན་དུ་ངོ་མཚར་སྐུ་དང་ལྡན། །རྒྱལ་པོ་ཡི་ནི་བཞུགས་སྟབས་བཞུགས། །བརྒྱད་གཉིས་བློ་ལྡན་བྱད་གཟུགས་ཅན། །སྤྱན་གསུམ་མཆོག་གི་རྣམ་པ་ཅན། །ཟླ་བ་ཉི་མ་ཞབས་ཀྱིས་མནན། །རྔེ་ཆུང་ཐོད་པ་ཁ་ཊྭཱཾ་ག་།རྡོ་རྗེ་འབར་བ་ཕྱག་ན་བསྣམས། །དེ་ལྟ་བུའི་རྨད་དུ་བྱུང་བའི་གཟུགས་མཐོང་ནས་འཁོར་ཐམས་ཅད་དང་ལྷན་ཅིག་བཅོམ་ལྡན་འདས་མ་ཕྱག་རྒྱ་ཆེན་མོ་ལངས་ནས་ལན་གསུམ་དུ་བསྐོར་བ་བྱས་ཏེ། དམ་པོར་འཁྱུད་ནས་བསྟོད་པས་བསྟོད་པ། མཆོག་ཏུ་རྨད་བྱུང་ཆེན་པོའི་སྐུ་ནི་རྒྱལ་གྱུར་ཅིག་།ཡེ་ཤེས་ཟབ་མོ་རྒྱ་མཚོའི་སྙིང་པོ་རྒྱལ་གྱུར་ཅིག་།བརྗོད་བྲལ་བལྟར་མེད་སྔོན་མེད་སྐུ་མི་མངའ། །གཏི་མུག་ཆེན་པོ་འཇོམས་དེ་རྒྱལ་གྱུར་ཅིག་།མཆོག་དང་གཞན་མཆོག་དེ་ནི་མཆོག་གཞན་མཆོག་།མཁའ་མཆོག་འོད་མཆོག་མཆོག་གི་ཡེ་ཤེས་སྣང ། །མཆོག་གི་བདུད་རྩིའི་སྙིང་པོ་གང་གཱའི་རྒྱུན། །མི་འཆད་རྒྱུན་འབབ་བྱེད་པ་རྒྱལ་གྱུར་ཅིག་།ཤིན་ཏུ་ལྐོག་གྱུར་དབང་པོས་བལྟར་མེད་པ། །སྐྱེ་འགག་འདུ་བྱེད་མཚན་མེད་རྒྱལ་གྱུར་ཅིག་།དེ་ལྟ་བུའི་བསྟོད་པའི་རྒྱལ་པོ་བྱས་ནས་ཡང་ཕྱག་རྒྱ་ཆེན་པོ་ལྷ་མོ་ཆེན་མོས་བཅོམ་ལྡན་འདས་ལ་དད་པས་ཞུ་བ་ཞུས་པ། ཀྱཻ་བཅོམ་ལྡན་འདས་དཀྱིལ་འཁོར་གྱི་ལྷ་རྣམས་ཅིའི་ཕྱིར་མ་གསུངས་ལགས། བཅོམ་ལྡན་འདས་ཀྱིས་བཀའ་སྩལ་པ། །བསྲུབ་དང་བསྲུབ
85.41b
པའི་སྦྱོར་བ་ལས། །ལྷ་རྣམས་འབྱུང་བའི་རིམ་པའོ། །དང་པོ་རྩོམ་པ་ཤིན་དུ་འདར། །རྣམ་པར་ཤེས་པས་ལྷ་མོ་སྐྱེ། །དེ་ནི་གྲོང་ལས་ཁ་དོག་དཀར། །འདོད་པའི་གཏི་མུག་རྣམ་པར་ཐོས། །གྲོང་ཁྱེར་ལས་ནི་ལོངས་སྤྱོད་ཡིན། །སྤྱོད་ལམ་ལྷ་མོ་རྒྱལ་བའི་འོད། །བསྐུམ་པ་ལས་ནི་སྣང་བ་མཆེད། །སྣང་བ་མཆེད་ལས་ཡེ་ཤེས་འོད། །བགྲད་པ་ལས་ནི་སྐྱེ་བ་སྦྱོར། །སྦྱོར་ལས་དགའ་བའི་སྐྱེ་མ་སྟེ། །མཉམ་སྦྱོར་ལས་ནི་ཡེ་ཤེས་སྐྱེ། །ཡེ་ཤེས་ལས་ནི་དངོས་ཟད་མ། །ཁྱོད་ལས་འདི་རུ་དངོས་པོ་སྟེ། །དངོས་ལས་ལོངས་སྤྱོད་ཟླ་བ་མ། །དཀར་པོ་ལས་ནི་རྟེན་ཤེས་བྱ། །རྟེན་ལས་པད་མའི་ལྟེ་བ་མ། བྲང་བརྡབས་ལས་ནི་རྣམ་པར་འབྱེད། །རྣམ་པར་འབྱེད་ལས་པད་མིག་མ། །ནག་དང་ལྗོང་དང་གུར་ཀུམ་མདོག་།དམར་དང་སྔོན་པོ་ཡི་ནི་གཟུགས། །ཟླ་བ་དཀར་དང་དམར་གྱི་སྔོན། །སྒོ་ལ་སོགས་དང་མཚམས་ན་བཞུགས། །ཞལ་གཅིག་པ་ལ་སྤྱན་གསུམ་པ། །ཕྱག་རྒྱ་ལྔ་ཡིས་རྣམ་པར་བརྒྱན། །སྣོད་དང་གྲི་གུག་གིས་ཕྱག་བྲེལ། །ན་བཟའ་གྲོལ་བ་ཕྱག་གཉིས་པ། །དེ་ནི་ཉི་ཟླའི་གདན་ལ་བཞུགས། །རུས་པ་སྣ་ཚོགས་རྒྱན་དང་ལྡན། །ཁྱོད་ཀྱི་བཞུགས་སྟབས་ཇི་ལྟ་བར། །ལྷ་མོ་རྣམས་ཀྱང་དེ་བཞིན་ནོ། །དེ་རྣམས་ཐབས་ནི་བཞི་གཉིས་ཀྱི་ནི་གྲངས། །མཉམ་པའི་བཞུགས་སྟབས་ཕྱག་དང་ཞབས་ལ་སོགས། །རབ་ཏུ་དགའ་བའི་ཡིད་ལྡན་ཞི་བའི་གཟུགས། །རྟག་ཏུ་སེམས་ཅན་དོན་བྱེད་ཁོ་ན་བརྩོན། །ལྷ་མོས་གསོལ་པ། དཔའ་བོ་རྣམས་ཀྱི་མིང་གི་བརྡ། །དེ་བཞིན་ཉིད་ཀྱི་རྡོ་རྗེས་གསུངས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་ང་ལ་གང་ཞུས་པ། །སྐལ་ལྡན་ལྷ་མོ་དེ་ནི་ཉོན། །འདི་ཡི་རྒྱུད་ལ་བདག་ལ་གཞན། །མཚན་ནི་ཡོད་པ་གང་ལ་ལར། །ན་ནི་ལྟེ་བ་གསང་བའི་པད། །དགའ་བྲལ་དགའ་བ་སྦྱིན་པའོ། །མ་ཞེས་ནོར་བུ་བསྲུབས་པ་ནི། །མཆོག་གི་དགའ་བ་སྦྱིན་པའོ། །གང་ཞིག་དེ་ཡི་དབུས་ནས་ལངས། །དེ་ནི་བདག་གི་རང་བཞིན་མཚན། །དཔའ་བོ་རྣམས་ནི
85.42a
བདག་གིས་བཤད། །ཤེས་རབ་ཕ་རོལ་ཕྱིན་མ་ཉོན། །ལྷ་ཆེན་པོ་དང་ཁྱབ་འཇུག་དང ། །པད་མའི་ལྟེ་བ་ཤིན་ཏུ་བལྟ། །ལྷ་ཡི་དབང་དང་འདོད་པའི་ལྷ། །པད་མའི་མིག་དང་གཞོན་ནུ་མ། །རེ་ཤིག་དེ་ནི་དཀྱིལ་འཁོར་པ། །རང་གི་ཕྱག་རྒྱ་མཚོན་ཆ་འཛིན། །དཔལ་ཡེ་ཤེས་ཐིག་ལེ་ལས་བསྐུལ་བ་ཞེས་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །། བཅོམ་ལྡན་འདས་མས་གསོལ་པ། ཀྱེ་བཅོམ་ལྡན་འདས་དབང་བསྐུར་བའི་དུས་སུ་དཀྱིལ་འཁོར་རྣམས་ཇི་ལྟ་བུ་ལགས། ཆོ་ག་གང་གིས་དབང་བསྐུར་སྦྱིན་ཞིང་བླང ། །བཅོམ་ལྡན་འདས་ཀྱིས་བཀའ་སྩལ་པ། །ཆུ་ལ་སོགས་པའི་དབང་དུས་སུ། །རྡུལ་ཚོན་ལ་སོགས་དཀྱིལ་འཁོར་མཛེས། །གསང་བའི་དབང་བསྐུར་དུས་སུ་ནི། །མེ་ཏོག་སྣ་ཚོགས་མཆོག་གིས་སོ། །ཤེས་རབ་ཡེ་ཤེས་དབང་བསྐུར་དུས། །སྣ་ཚོགས་དྲི་ཞིམ་པོ་ཡིས་བརྒྱན། །ལས་དང་པོ་ཡི་དང་པོ་ལ། །ངེས་པའི་དོན་གྱི་ཆུ་ལ་སོགས། །དབང་བསྐུར་ཤེས་པས་སྦྱིན་བྱ་སྟེ། །དེ་ལྟར་མིན་ན་སྐྱོན་དུ་འགྱུར། །ཤེས་རབ་ཅན་གྱིས་དྲང་དོན་དེར། །སྦྱིན་ནོ་དེ་ནས་དམ་ཚིག་སྦྱིན། །ནོར་བུ་མགྲིན་པར་བྱང་ཆུབ་སེམས། །བླ་མ་ཉིད་ཀྱིས་རང་རིག་བྱེད། །ཤེས་རབ་ལྷན་ཅིག་གནས་ལས་ལངས། །སློབ་མའི་ཁ་ཡི་པད་མ་རུ། །ཉིད་ཀྱི་རྡོ་རྗེ་རབ་ཏུ་སྦྱིན། །དེ་ནས་བདེ་བའི་བདུད་རྩིས་དཀྲོལ། །མགྲིན་པའི་དབུས་སུ་རྩ་གཉིས་ནི། །གཡས་དང་གཡོན་ན་ཡོད་པའོ། །སྦོམ་མ་ཡངས་མར་འདི་རུ་གྲགས། །སྲོག་དང་ཉེ་བའི་རང་ངོ་བོ། །གཡོན་ནི་སྲོག་ཏུ་ཤེས་པར་བྱ། །ཉེ་བའི་སྲོག་ནི་གཡས་ནའོ། །དེ་རུ་བདེ་བར་འཇུག་པར་བྱ། །མཐེ་བོང་སྲིན་ལག་གཉིས་ཀྱིས་མནན། །དེ་ནས་ཡེ་ཤེས་འབྱུང་བར་འགྱུར། །བུ་མོས་རྙེད་པའི་བདེ་ཇི་བཞིན། །རེག་བྱ་ཆེན་པོས་དགའ་བ་ཆེ། །དགའ་བ་ཆེན་པོས་བདེ་བ་ཆེ། །བདེ་བ་ཆེན་པོས་བྱང་ཆུབ་སེམས། །ཤེས་རབ་བྱ་གདོང་མ་ཡི་ཁར། །ནོར་བུའི་ཁ་ལས་ཐིགས་པ་གཅིག་།ཤེས་རབ་ཡེ་ཤེས་ཞལ་བཟང་མོ། །ཤེས་རབ་བྱ་གདོང་ལས་བདེ་བ། །རྡོ་རྗེ་རིན་ཆེན
85.42b
ཁ་རུ་འགྲོ། །དེ་ནི་དབང་གི་མཆོག་རབ་ཡིན། །སངས་རྒྱས་གྲུབ་པའི་འབྲས་སྦྱིན་བདག་།ཤེས་རབ་གཟུགས་བཟང་བྷ་ག་རབ། །ཤིན་ཏུ་ལང་ཚོ་དབང་བསྐུར་ལྡན། །དགའ་སོགས་བྱེ་བྲག་མགུ་བར་བྱས། །དེ་ནས་སློབ་མ་ལ་སྦྱིན་བྱ། །སེམས་དཔའ་ཆེན་པོ་ཤེས་རབ་འདི། །ཡང་དག་ཡེ་ཤེས་རབ་ཏུ་སྟེར། །གང་ཞིག་བཀའ་ལུང་སྐྱབས་སྦྱིན་ཏེ། །དེ་ནི་བུ་ཁྱོད་དད་པར་བྱ། །དེ་ཡི་མངལ་གྱི་གཡོན་ལོགས་ན། ། དི་བྱ་གདོང་མ་ནི་བཞུགས། །དེ་རྙེད་ཙམ་གྱིས་རང་བཞིན་ནི། །ཤེས་རབ་བསྙེན་པས་རྙེད་པར་འགྱུར། །དེ་ནི་གཞན་མིན་ཡོངས་སུ་ཤེས། །བཞི་པའི་འབྲས་བུའི་ངོ་བོ་ཡིན། །རང་རིག་པ་དང་མཆོག་ཡེ་ཤེས། །ངག་གི་ལམ་གྱིས་རྙེད་དང་བྲལ། །དེ་ན་ལྷ་མོ་སྐལ་ལྡན་མོ། །གསང་བ་ལས་ནི་ཤིན་དུ་གསང ། །རྒྱུད་ཀུན་དུ་ནི་བདག་གིས་སྦས། །མཐའ་ཡི་མཐའ་རུ་རབ་ཏུ་གསལ། །བཅོམ་ལྡན་འདས་མས་གསོལ་པ། མཐའ་དང་མཐའ་ཡི་དོན་ནི་ཅི། །མཆོག་གི་དབང་ཕྱུག་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །མཐའ་ནི་རྣམ་པར་འབྱེད་པར་ཤེས། །རྣམ་པར་འབྱེད་པ་བཅོམ་པའི་ཕྱིར། །རྣམ་པར་འབྱེད་པ་བཅོམ་པའི་མཐར། །རྣམ་པར་འབྱེད་པ་མཐར་གསལ་འགྱུར། །རྣམ་པར་འབྱེད་མཐར་ཡེ་ཤེས་ཆེ། །དེ་རང་ངོ་བོའི་རང་བཞིན་ནོ། །ལྷ་མོས་གསོལ་པ། དགྱེས་པ་རྡུལ་ཚོན་དཀྱིལ་འཁོར་ནི། །མངའ་བདག་ཇི་ལྟའི་རྣམ་པས་བྲི། །བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་ཁྱོད་ཀྱིས་ཡོངས་སུ་ཞུས། །ཉོན་ཅིག་ལྷ་མོ་བདག་གིས་བཤད། །ཕྱག་རྒྱའི་དཀྱིལ་འཁོར་འདི་རུ་ནི། །ལས་ལ་མཁས་པས་བྲི་བར་བྱ། །པད་མ་འདབ་མ་བརྒྱད་པར་བྱ། །པད་མའི་ནང་དུ་ཆར་ཡང་བྱ། །ཆར་ཡང་དང་ལྡན་སྣ་ཚོགས་འདབ། །ཆར་ཡང་གི་ནང་ཐིག་ལེ་སྟེ། །དེ་ཡི་སྟེང་དུ་རྡོ་རྗེ་བྲི། །སྣ་ཚོགས་པད་མའི་ཟེ་འབྲུ་ལྡན། །རྡོ་རྗེ་གྲི་གུག་གིས་ནི་བསྐོར། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །སྣ་ཚོགས་བུམ་པ་དང་ལྡན་པ། །དཀྱིལ་འཁོར་རབ་ཀྱི་མཆོག
85.43a
ནི་བྱ། །ཤར་གྱི་འདབ་མར་འཁོར་ལོ་བྲི། །བྱང་དུ་དེ་བཞིན་པད་མའོ། །ནུབ་ཀྱི་འདབ་མར་རིན་པོ་ཆེ། །ལྷོ་རུ་རལ་གྲི་བསྒྲེང་བའོ། །པད་མ་གཞན་རྣམས་ཐོད་པ་ནི། །བདུད་རྩི་ལྔ་ཡིས་རབ་ཏུ་གང ། །དུང་གཞུ་དེ་བཞིན་རི་རབ་དང ། །རབ་ཏུ་འབར་བ་ཡི་ནི་མེ། །མེ་མཚམས་ལ་སོགས་རིམ་བཞིན་བྱ། །འབད་པ་ཡིས་ནི་ཡོངས་སུ་བསྐོར། །ཤར་གྱི་སྒོར་ནི་དཔག་བསམ་ཤིང ། །བྱང་ཏུ་འབྲས་བུ་ས་བོན་དང ། །ནུབ་ཏུ་རིན་ཆེན་སྡོང་བུ་དང ། །ལྷོ་རུ་སྣ་ཚོགས་རྡོ་རྗེའོ། །སྒོ་ཡི་ཕྱི་རོལ་རྡོ་རྗེའི་ཕྲེང ། །འོད་དང་ལྡན་པས་བསྐོར་བར་བྱ། །ལྷ་མོ་ཆེན་མོ་དེ་ལྟ་བུའི། །དཀྱིལ་འཁོར་ཡེ་ཤེས་སྦྱིན་བདག་པོ། །དམ་ཚིག་ཆེན་པོ་དང་ལྡན་པས། །རབ་ཏུ་འབད་པ་ཡིས་ནི་བྱ། །དཀྱིལ་འཁོར་གྱི་ནི་བདག་པོའི་ཕྱིར། །དེས་ན་བདག་ནི་རབ་མཚིམ་བྱ། །དཔལ་ཡེ་ཤེས་ཐིག་ལེ་ལས་དབང་བསྐུར་བ་བླང་བ་དང ། ཕྱག་རྒྱའི་དཀྱིལ་འཁོར་ཞེས་བྱ་བའི་ལེའུ་སྟེ་ཉི་ཤུ་རྩ་བཞི་པའོ།། །། བཅོམ་ལྡན་འདས་མས་གསོལ་པ། ཀྱཻ་བཅོམ་ལྡན་འདས་དགའ་བ་བཞི་པའི་ངོ་བོ་དང ། །བསྐྱེད་པའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དགའ་བ་ལས་ནི་མཆོག་དགའ་བ། །མཆོག་དགའ་བ་ལས་དགའ་བྲལ་དགའ། །དགའ་བྲལ་ལས་ནི་ལྷན་ཅིག་སྐྱེས། །དགའ་བ་ཀུན་གྱི་དེ་ཉིད་དོ། །བཅོམ་ལྡན་འདས་མས་གསོལ་པ། དེ་ལྟའི་རིག་པ་མགོན་ཆེན་པོ། །རིག་པ་སྔར་གྱི་གཞུང་མང་ཅི། །མངོན་སུམ་དང་ནི་རྗེས་སུ་དཔག་།ས་བོན་དང་འདྲ་འབྲས་བུ་ཡིན། །ཀོ་ཊ་བ་ལས་སཱ་ལུ་ནི། །གང་དུ་ཡང་ནི་མཐོང་མི་འགྱུར། །དགའ་བྲལ་ལས་ནི་ལྷན་ཅིག་སྐྱེས། །བདེ་མིན་དགའ་བྲལ་སྡུག་བསྔལ་དེས། །དགའ་བ་ཀུན་ནི་འཇོམས་པར་བྱེད། །མཆོག་གི་དབང་ཕྱུག་དགའ་བྲལ་འདི། །དགའ་བ་ཀུན་དང་མི་མཐུན་ནོ། །དགའ་བ་ལས་ནི་མཆོག་དགའ་བ། །མཆོག་དགའ་བ་ལས་ཤིན་ཏུ་བགྱེས། །བཅོམ་ལྡན་མཁའ་འགྲོ་དེ་རིགས་ལགས། །ཡང་ན་མཆོག་ལས་ལྷན་སྐྱེས་སོ། །བཅོམ་ལྡན་འདས་ཀྱིས་བཀའ
85.43b
སྩལ་པ། །རྡོ་རྗེ་མཁའ་འགྲོ་མ་དེ་བདེན། །དགའ་བྲལ་ལས་ནི་ལྷན་སྐྱེས་མིན། །འོན་ཀྱང་དེ་བསྲུངས་པ་ལས་ཡོད། །དེ་མིན་ལྷན་སྐྱེས་གང་དུ་གནས། །དགའ་བ་ཀུན་དང་མི་མཉམ་སྟེ། །དགའ་བ་ཀུན་ནི་འཇོམས་བྱེད་པ། །འདི་སྐད་སྨྲ་བ་ཤིན་དུ་མཆོག་།དོན་དམ་པ་ཡི་ཚིག་ཡིན་ནོ། །དགའ་ཀུན་འགྲོ་བ་ཡང་གཅིག་པུ། །ཡིད་འཕྲོག་ལྷན་ཅིག་སྐྱེས་པའོ། །སྤྲིན་མེད་སྙིང་གའི་ནམ་མཁའ་རུ། །ཡེ་ཤེས་ཉི་མ་རབ་མཛེས་ཤིང ། །དཔལ་ལྡན་ཡེ་ཤེས་ཐིག་ལེའི་རྒྱུད། །ནམ་ཡང་དེ་ནི་ཐོས་མ་ཡིན། །དེ་གཤེགས་པ་ཡི་གནས་ནི་མཆོག་།ལྷ་མོ་དེ་ནི་གང་ལས་རྙེད། །རྣལ་འབྱོར་མ་དང་ལྷན་ཅིག་ཏུ། །དུ་མའི་རྒྱུད་དུ་བཤད་ན་ཡང ། །དེ་ལྟ་མོད་ཀྱི་རྒྱུད་འདི་ཡི། །བཅུ་དྲུག་ཆར་ཡང་མི་ཕོད་དོ། །དེ་སྐད་སྨྲ་ཡི་རྒྱུད་གཞན་ཀུན། །དགེ་བའི་ཡིད་དང་ལྡན་ཡང་ཡིན། །འདི་རུ་དད་པ་མེད་གྱུར་ན། །དམྱལ་བ་ལ་སོགས་འགྲོ་བར་འགྱུར། །མདོ་སྡེ་ལ་སོགས་གསུང་རབ་ཀུན། །དད་ཅིང་གུས་པས་ཁོ་ན་ཡིན། །གང་ཕྱིར་རྒྱུད་ཀུན་གྱི་སྙིང་པོ། །དེ་ཕྱིར་རྒྱུད་འདི་རབ་ཀྱི་མཆོག་།བཅོམ་ལྡན་འདས་མས་གསོལ་པ། སྦས་པའི་ཡི་གེ་དྲང་བ་གང ། །སྙིང་པོ་ཡེ་ཤེས་འབྲས་བུ་སྟེར། །ཉེ་བའི་སྙིང་པོ་དེ་ནི་མགོན། །དེ་ནི་དེ་རིང་གསལ་བར་མཛོད། །བཅོམ་ལྡན་འདས་ཀྱིས་བཀའ་སྩལ་པ། །སྔགས་ནི་ཤིན་ཏུ་གསལ་བ་མཆོག་།དེ་ལྟ་ན་ཡང་གསལ་བར་བྱས། །སྔགས་ཀྱི་བཟླས་ལས་འགྲུབ་པར་འགྱུར། །གྲུབ་པ་རྙེད་པས་སངས་རྒྱས་སྲས། །ཧཱ་སཝཱ་ཊཕ་ཧཱུཾ་ཧཱུཾ་ཀ་ལ་ཏི་ན་ཛྙཱ་ཛྲབ་ཧཱ་མ་ཤྲཱི ། སཝཱ་ཧཾ་ཧཱ་སཝཱ་ཊཕ་ཧཱུཾ་ཧཱུཾ་ཡེ་མྦ་ཀྵ་རཱ་ལ་བ་ཧཱ་མ་ཡེ་ད་མ་ཛྲེབ ། ཧཱ་སཝཱ་ཊཕ་ཧཱུཾ་ཧཱུཾ་རས་ཝི་རས ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། འཇིག་རྟེན་གྱི་ཁམས་གྲངས་མེད་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་གྲངས་མེད་པ་དང ། དེ་བཞིན་གཤེགས་པ་གྲངས་མེད་པ་རྣམས་ཀྱི་རྫུ་འཕྲུལ་གྱིས་མེ་ཏོག་རྣམ་པ་སྣ་ཚོགས་པ་མན་དཱ་ར་བ་དང ། མན་དཱ་ར་བ་ཆེན་པོ
85.44a
དང ། སྔོན་མེད་པའི་མེ་ཏོག་རྣམ་པ་སྣ་ཚོགས་རྣམས་ཀྱི་ཆུན་པོ་འཕྱང་བ་དང ། རོལ་མོ་སྣ་ཚོགས་དང ། གར་དང ། གླུ་དང ། མཆོད་པ་དང ། རིག་པ་འཛིན་པས་བྱས་པ་རྨད་དུ་བྱུང་བའི་ཆོས་གོས་དང ། རིན་པོ་ཆེ་རྣམ་པ་སྣ་ཚོགས་དང ། གསེར་དང ། ནམ་མཁའ་ལས་ནོར་བུའི་ཆར་བཅོམ་ལྡན་འདས་ཀྱིས་ཞབས་ཀྱི་རྩར་བབས་པར་གྱུར་ཏོ། །དེ་ནས་ནམ་མཁའ་ལས་དེ་བཞིན་གཤེགས་པ་དང ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྟོད་པས་བསྟོད་པ། །སངས་རྒྱས་ཀུན་གྱི་སྐུ་གཅིག་པུ། །ལེགས་སོ་ལེགས་སོ་བཅོམ་ལྡན་འདས། །ཤིན་ཏུ་རྨད་བྱུང་ཡེ་ཤེས་ཆེ། །མཆོག་གི་དབང་ཕྱུག་གཏན་ལ་ཕབ། །འདི་ཡི་འཁོར་ནི་དག་བྱེད་དགེས། །སྡིག་པ་ཐམས་ཅད་འཇིག་པར་བྱེད། །ཡང་དག་མཆོག་གི་གསང་བ་འདི། །རྙེད་པར་དཀའ་བ་དོན་དམ་པ། །དཔལ་ལྡན་ཡེ་ཤེས་ཐིག་ལེའྀ་རྒྱུད། །ཡེ་ཤེས་རྒྱ་མཚོ་གཏན་ལ་ཕབ། །དེ་ལྟ་བུའི་ཚོགས་ཀྱི་མཆོད་པ་བྱས་ནས། ནམ་མཁའ་ལ་གནས་པའི་དེ་བཞིན་གཤེགས་པ་ལ་སོགས་པ་རྣམས་དེ་ཁོ་ན་ཉིད་ཀྱི་བསམ་གཏན་ལ་བཞུགས་སོ། །བཅོམ་ལྡན་འདས་མས་གསོལ་པ། ཀྱེ་བཅོམ་ལྡན་འདས། བདེ་བ་ཆེན་པོ་གཅིག་པུའི་སྐུ། །ཚིག་རྒྱས་པ་ཡི་སྙིང་པོའི་དོན། །མཆོག་གི་དབང་ཕྱུག་བདག་ལ་གསུངས། །མཆོག་གི་དབང་ཕྱུག་གིས་བཀའ་སྩལ་པ། ཉོན་ཅིག་ལྷ་མོ་གསང་བའི་མཆོག་།རྒྱུད་ཀུན་དུ་ནི་རྙེད་དཀའ་བ། །གསང་སྣ་པད་མའི་སྙིང་པོ་ནི། །ཚོགས་ཀྱི་གནས་སུ་འདི་རུ་བརྗོད། །རྡོ་རྗེའི་རྩེ་མོ་ཁ་ཕྱེའི་ཕྱིར། །དེ་ནི་རྒྱས་པར་བརྗོད་པའོ། །ཡང་ན་ཐམས་ཅད་ཀྱི་ནི་ཚོགས། །སྙིང་པོ་བྱ་ཡི་གདོང་མར་དྲན། །དེ་ལ་རྡོ་རྗེ་རྩེ་མོ་ཡིས། །ཕྱེ་བ་དེ་ནི་རྒྱས་པར་བརྗོད། །ི་ཏ་པིང་གལ་གཉིས་ཀྱི་དབུས། །རྟོག་མེད་ཡེ་ཤེས་ངོ་བོ་ཉིད། །བསྲུབ་དང་བསྲུབ་པའི་སྦྱོར་བ་ཡིས། །རྡོ་རྗེའི་མཐེ་ཆུང་རྩེ་མོ་ལས། །རེག་བྱས་གང་གིས་བདེ་བར་འཛག་།ཞལ་བཟང་དེ་ནི་ཚིག་རྒྱས་པོ། །ལྟེ་བའི་གནས་ནས་སྨིན་འཁོར་ལོ། །དེ་ནས་གནས་པ་ཡི་རྣའོ། །
85.44b
སྤྱི་རྩི་ཚངས་པའི་བུ་ག་ནི། །ཚིག་རྒྱས་པ་ནི་གསུམ་དུ་དྲན། །མ་ནི་བསྲུབ་དང་བསྲུབ་པ་སྟེ། །ར་ནི་དགའ་བ་ཡིན་པར་བརྗོད། །མུ་ནི་ལྷ་མོ་སྒྲོལ་མ་ཡིན། །ད་ཡི་ཡིག་འབྲུ་ཞུ་བའི་གཟུགས། །གྷ་ཡི་ཡིག་འབྲུ་སྒྲ་རུ་གྲགས། །ཏ་ཡི་ཡིག་འབྲུ་གསལ་བར་བྱེད། །ན་ནི་ལྟེ་བའི་གསང་བའི་མཐར། །དེ་ཡི་དབུས་སུ་རྟག་ཏུ་ཤར། །ཟླ་བའི་སྐུ་དང་འདྲ་བ་གསལ། །ཉི་མ་བྱེ་བ་མཉམ་པའི་འོད། །རྡོ་རྗེ་སེམས་དཔའ་བདེ་བ་ཆེ། །བྱང་ཆུབ་ཀྱི་ནི་ལམ་རབ་སྟེར། །དེ་ནི་གསང་བ་ཡེ་ཤེས་ཆེ། །རང་བཞིན་ཚིག་གིས་རབ་གསལ་བྱས། །འབད་པ་ཡིས་ནི་སྦ་བར་བྱ། །སུ་ལའང་སྦྱིན་པར་མི་བྱའོ། །དཔལ་ཡེ་ཤེས་ཐིག་ལེ་ལས་ཚིག་རྒྱས་པར་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་ལྔ་པའོ།། །། དེ་ནས་གཞན་ཉོན་བདག་གིས་བཤད། །ཡེ་ཤེས་རབ་མཆོག་གང་གིས་སྨྲས། །དེ་ཁོ་ན་ཉིད་བདག་དོན་ཟབ། །ངེས་བསྟན་ལ་སོགས་བྱེ་བྲག་ཏུ། །སྲོག་གི་དབྱུག་པ་བཞུགས་ཐབས་ནས། །རྩ་དང་ལྡན་པའི་སྦྱོར་བ་དྲུག་།ཐིག་ལེའི་ཤར་བ་ནུབ་པ་དང ། །འཕོ་བ་སྦྱོར་བའི་མཚན་ཉིད་དང ། །རྩ་ཡི་འཁོར་ལོ་འབྱུང་བར་དགྱེས། །དབང་གི་རིམ་པ་དེ་བཞིན་ནོ། །བསྲུང་བའི་འཁོར་ལོ་ལྷ་མོ་ཆེ། །སྙིང་པོ་སྔགས་ཀྱི་རྒྱལ་པོ་ཉིད། །སྐུ་བརྒྱད་བདག་ཉིད་མཆོད་སྦྱིན་དང ། །ཐིམ་དང་ལོངས་སྤྱོད་དང་ནི་དབང ། །རྡོ་རྗེ་ལྷ་མོ་ཡེ་ཤེས་སྐུ། །གསང་བའི་སྒྲ་ཡང་དེ་བཞིན་ནོ། །བསྲུང་བའི་དམ་ཚིག་ལ་སོགས་དང ། །དཔལ་ལྡན་སྦྱིན་སྲེག་དོན་དམ་པར། །བསྲུབ་དང་བསྲུབ་པའི་དགྱེས་པ་དང ། །སྔགས་ཀྱི་བཟླས་པ་མཆོད་སྦྱིན་དང ། །གནས་བརྒྱད་སྐུ་ཡི་ངོ་བོ་དང ། །དགའ་བ་ལ་སོགས་པ་ཡི་མཆོག་།དུར་ཁྲོད་རྣམ་རྟོག་མེད་པར་གྲགས། །ཆུ་ངོགས་རྟོག་པ་མེད་པ་དང ། །སྣང་བ་ལ་སོགས་མཆོག་ཡེ་ཤེས། །དངོས་པོ་ལ་སོགས་བདེ་བ་ཆེ། །ཐོག་མ་ཐ་མ་དུར་ཁྲོད་བརྒྱད། །ཞིང་ལ་སོགས་པ་བསྟན་པ་དང ། །རླུང་གི་དེ་ཉིད་སྙིང་པོའི་དོན། །འཇུག་པ་གནས་པ་འགྲོ་བ་དང ། །ཉེར་འགྲོ་སྦྱོར་བ་རབ་མཆོག་དང ། །ཉིད་ནི་ཡེ་ཤེས་ཐིག་ལེ་དང ། །རང་གི་ངོ་བོ་རྣམ་པ་མཆོག་།ས་ལ་སོགས་པའི་བདག་པོ་དང ། །དེ་བཞིན
85.45a
གཤེགས་པའི་སྐུ་སྐྱབས་དང ། །རྒྱུད་ཀྱི་རིམ་པ་བསྟན་པ་དང ། །ཕྱག་རྒྱ་ཆེན་པོའི་རང་བཞིན་ནོ། །གསང་བའི་དོན་ནི་དོན་དམ་པར། །དེ་ཉིད་མཆོད་པས་བསྐུལ་བ་དང ། །ཤེས་རབ་ཡེ་ཤེས་ཇི་བཞིན་ནོ། །གསང་བའི་དཀྱིལ་འཁོར་འཁོར་ལོ་སོགས། །ཞལ་བཟང་ཚིག་རྒྱས་བསྟན་པའོ། །གཏོར་མ་འབྱུང་ལ་ཕན་དོན་དུ། །སྡིག་པ་ཐམས་ཅད་འཇིག་པར་བྱེད། །དེ་ནི་བདེ་བ་ཆེན་པོའི་མཐའ། །དེ་ཉིད་བསྡུས་པའི་སྙིང་པོའི་དོན། །བཞི་བཅུའི་བདག་ཉིད་དེ་ཉིད་དོན། །གསང་ཆེན་བདག་གིས་རབ་ཏུ་བཤད། །དེ་ཉིད་སུམ་ཅུ་དྲུག་བདག་པོ། །ཆར་ཡང་ཡེ་ཤེས་ཚོར་བྱེད་དོ། །ཐིག་ལེ་ཡེ་ཤེས་བདག་ཉིད་ཚོར། །དེ་ནི་སུམ་ཅུ་བདུན་དབང་ཕྱུག་།ཚུལ་གྱིས་ཡེ་ཤེས་བདག་ཉིད་ཚོར། །དེ་ནི་སུམ་བཅུ་བརྒྱད་དབང་ཕྱུག་།ཚུལ་ཙམ་ཡེ་ཤེས་ཚོར་བྱེད་པ། །དགུ་ལྷག་སུམ་ཅུ་དེ་ཉིད་དོ། །མཆོག་ཤེས་པ་ཡི་རྣལ་འབྱོར་གང ། །བཞི་བཅུའི་མངའ་བདག་ཆེན་པོའོ། །གཞན་མཆོག་གསུང་ལམ་བརྗོད་དུ་མེད། །རྣམ་པར་དག་པ་དེ་ཉིད་མཆོག་།ཐམས་ཅད་དེ་ཁོའི་བདག་ཉིད་ཕྱིར། །དེ་བས་བྱེ་བྲག་མི་བྱའོ། །དཔལ་ཡེ་ཤེས་ཐིག་ལེ་ལས་དེ་ཁོ་ན་ཉིད་ཀྱི་སྙིང་པོ་བསྡུས་པ་ཞེས་བྱ་བའི་ལེའུ་སྟེ་ཉི་ཤུ་རྩ་དྲུག་པའོ།། །། ལྷ་མོས་གསོལ་པ། བཅོམ་ལྡན་འདས་ནི་མཆོག་དགའ་བ། །ཀུན་དགའ་བ་ཡི་རྣམ་པ་སྐུ། །དེ་ཁོ་ན་ཉིད་ཞལ་བརྒྱད་པའི། །རྣམ་པར་དག་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དེ་ཉིད་བསྒོམ་པ་རྣམ་པར་དག་།སྐལ་ལྡན་ལྷ་མོ་ཁྱོད་ཉོན་ཅིག་།ཞལ་བརྒྱད་རྣམ་པར་ཐར་པ་བརྒྱད། །ནང་གི་སྟོང་པ་དེ་ཉིད་དོ། །སྤྱན་ནི་ཉི་ཤུ་རྩ་བཞི་ནི། །ས་དང་སྟོབས་དང་ཡེ་ཤེས་སོ། །ཕྱག་རྣམས་སྟོང་ཉིད་རྣམ་པར་དག་།བརྒྱད་གཉིས་ཕྱག་ནི་སྟོང་པ་ཉིད། །སྦྱངས་པའི་ཡོན་ཏན་སྡེ་དང་ལྡན། །ཐོད་པ་རྣམས་ཀྱི་ངོ་བོ་ཉིད། །སངས་རྒྱས་ཆོས་ནི་མ་འདྲེས་པ། །འཇིགས་བྱེད་མ་ནི་བརྒྱད་གཉིས་དབྱེ། །བསྡུ་བའི་དངོས་པོ་བཞི་པོ་ནི། །ཞབས་བཞི་རུ་ནི་དྲན་པའོ། །ཆགས་སྡང་དེ་བཞིན་གཏི་མུག་ནི། །
85.45b
ལེགས་དགྱེས་ཟླ་ཉི་འཇིགས་བྱེད་དོ། །གང་ཞིག་སྲིད་པའི་གནས་སུ་བཞུགས། །ཞལ་བཟང་དེ་ཕྱིར་གཡས་བརྐྱང་བ། །ལྷ་མོ་གཡོན་བརྐྱང་མྱ་ངན་འདས། །ཡེ་ཤེས་སྐུ་ཉིད་བཞུགས་པའོ། །སྲིད་དང་མྱ་ངན་འདས་མིན་ཕྱིར། །ལྷ་མོ་དེ་ཕྱིར་བཞེངས་པའོ། །གཟུགས་བརྒྱད་རྣམ་པར་དག་པ་ཡིས། །སྣ་ཚོགས་པད་མ་འདབ་མ་བརྒྱད། །གཟུགས་མེད་གཉིས་ཀྱིས་འདུ་ཤེས་ཕྱིར། །ཤེས་རབ་ཐབས་གཉིས་བདག་ཉིད་དོ། །གར་དགུའི་རོ་དང་ལྡན་པའི་ཕྱིར། །ཞལ་བཟང་མོ་ནི་སྣ་ཚོགས་གཟུགས། །ལྷ་མོས་གསོལ་པ། ཐམས་ཅད་མཁྱེན་པ་མཆོག་དབང་ཕྱུག་།བཅོམ་ལྡན་བདག་གིས་རྣམ་དག་ཤེས། །གསང་བའི་དོན་གྱིས་འདི་ལྟར་མགོན། །རྡོ་རྗེ་འཛིན་པ་བཀའ་དྲིན་གསོལ། །བཅོམ་ལྡན་འདས་ཀྱིས་བཀའ་སྩལ་པ། །གསང་བའི་སྒོམ་པ་རྣམ་པར་དག་།ལྷ་མོ་ཤེས་རབ་ཆེན་མོ་ཉོན། །ཞལ་དང་ལྷན་ཅིག་པ་ཡི་སྤྱན། །ཞལ་བཟང་གནས་ལ་སོགས་པའོ། །ལོངས་སྤྱོད་རྫོགས་པར་ཡོད་པའི་རྩ། །བཅུ་དྲུག་ཕྱག་ནི་བཅུ་དྲུག་པའོ། །ཱ་ལི་ཐིག་ལེ་རྣམ་དག་པའི། །ཐོད་པ་ཡིན་པར་འདི་རུ་བསྟན། །འཇིགས་བྱེད་རྣམ་པར་འཇིགས་བྱེད་མ། །ལེགས་དགྱེས་དགའ་བ་བཅུ་དྲུག་གོ། །སྐད་ཅིག་བཞི་ཡི་སྦྱོར་བ་ཡིས། །ཞབས་ནི་བཞི་རུ་དྲན་པའོ། །གཡས་བརྐྱང་བ་ནི་མཆོག་གི་དགའ། །གཡོན་བརྐྱང་དགའ་བ་དགའ་བ་ཡིན། །བཞེངས་པའི་ལྷན་སྐྱེས་དགའ་བའོ། །ཕྱག་རྒྱ་ཕ་རོལ་ཕྱིན་པར་དྲན། །དབང་གི་རང་གི་ངོ་བོའོ། །ཐིམ་པ་སྨད་ཀྱི་ཚངས་པའི་རས། །ལོངས་སྤྱོད་ཞི་བའི་ལྤགས་པའི་གོས། །ལེགས་དགྱེས་དབང་ཕྱུག་ཡང་ན་གནས། །བསྐྱེད་པ་ཚངས་པའི་ལྤགས་པར་གྲགས། །བོང་བུའི་ཞལ་ནི་འཇིགས་པའི་སྒྲ། །ཕྱག་རྒྱ་ཤེས་རབ་ཐབས་ནི་ཆེ། །ཐབས་དང་ཤེས་རབ་གཉིས་མེད་དྲན། །བྱང་ཆུབ་སེམས་ཀྱི་རྣམ་དག་པས། །རུས་པ་སྣ་ཚོགས་རྒྱན་ལ་སོགས། །ནམ་མཁའ་རུ་ནི་འགྲོ་བའི་ཕྱིར། །གྱེན་དུ་འབར་བའི་དབུ་སྐྱེས་སོ། །རང་གི་ངོ་བོ་བདེ་ཆེན་ཕྱིར། །སྐུ་མདོག་ནག་པོ་མཁའ་དང་མཚུངས། །དགའ་བྲལ་གྱི་ནི་བདུད་ཆེན་པོ། །འཇིགས་པར་བྱེད་ཕྱིར
85.46a
འཇིགས་པ་ཆེ། །དཔལ་ཡེ་ཤེས་ཐིག་ལེ་ལས་རྣམ་པར་དག་པ་ཞེས་བྱ་བའི་ལེའུ་སྟེ་ཉི་ཤུ་རྩ་བདུན་པའོ།། །། དེ་ནས་བཅོམ་ལྡན་འདས་མས་མ་མཆུའི་བདུད་རྩིའི་རོ་ཕུལ་ཏེ། ཉི་མ་དང་ཟླ་བའི་མེ་ཏོག་གིས་མཆོད་ནས། བཅོམ་ལྡན་འདས་རབ་ཏུ་ཚིམ་པར་མཛད་ནས་འདི་སྐད་ཅེས་གསོལ་ཏོ། །ཀྱཻ་བཅོམ་ལྡན་འདས་མ་འོངས་པའི་དུས་སུ་ཡང་དག་པར་གསང་བའི་རྒྱུད་འདི་སྐལ་བ་དང་ལྡན་པའི་སེམས་ཅན་རྣམས་ལ་སུས་འཆད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དཔལ་ཕྱག་ན་རྡོ་རྗེ་མགོན་པོས་བཤད་པར་བྱེད་དོ། །བཅོམ་ལྡན་འདས་མས་གསོལ་པ། ཡེ་ཤེས་བདུད་རྩི་ཆར་པ་ཆེ། །མགོན་པོ་ཁྱོད་ཀྱིས་རྨད་བྱུང་སྦྱིན། །ཕྱག་ན་རྡོ་རྗེ་མགོན་པོ་ཆེ། །དེ་ཡི་བསྐྱེད་པ་ཇི་ལྟར་ལགས། །རྒྱལ་བའི་མངའ་བདག་ཡེ་ཤེས་རྒྱལ། །དེ་ནི་ཚིག་གཅིག་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་ཁྱོད་ཀྱིས་ཡོངས་ཞུས་པ། །བཅོམ་ལྡན་མ་དེ་ཡང་དག་ཉོན། །ཕྱག་ན་རྡོ་རྗེ་མགོན་ཆེན་པོ། །རྡོ་རྗེ་འཛིན་པ་ཀུན་གྱི་བདག་།མཐའ་ཡས་པ་ཡི་འཇིག་རྟེན་ཁམས། །སྐྱེ་དང་འཇིག་པའི་རྒྱུ་ཡིན་ནོ། །དེ་ལས་སྐྱེ་བ་གང་ཡང་མེད། །རང་བྱུང་མཆོག་གི་དབང་ཕྱུག་གོ། །དེ་ཡི་ཕྱག་གི་རྡོ་རྗེ་ནི། །ཡེ་ཤེས་བཅུ་གཉིས་སྐྱེ་བ་མེད། །ཐོག་མ་ཡི་ནི་རཝ་ལྔ་ལས། །དེ་བཞིན་གཤེགས་པ་ལྔ་འབྱུང་ངོ ། །མཐའ་ནས་འབྱུང་བ་ཆེན་པོ་ལྔ། །དབུས་ནས་འགྲོ་བའི་རིས་དྲུག་འབྱུང ། །ལྟ་བ་ཀུན་ནི་བསྲུང་དོན་ཕྱིར། །སྣ་ཚོགས་པ་ཡི་གཟུགས་སུ་སྤྱོད། །ལ་ལར་རྡོ་རྗེ་འཛིན་པ་དང ། །ལ་ལར་སངས་རྒྱས་ཀྱི་ནི་གཟུགས། །ལ་ལར་ཧེ་རུ་ཀ་ཡི་གཟུགས། །ལ་ལར་དེ་བཞིན་གཤེགས་པ་དང ། །ལ་ལར་བྱང་ཆུབ་སེམས་དཔའི་གཟུགས། །ལ་ལར་ཉན་པ་ལྟ་བུར་བཞུགས། །ལ་ལར་འཆད་དོ་དགྱེས་པད་མ། །ལ་ལར་ཀློག་པའི་ཚུལ་དུ་བཞུགས། །ལ་ལར་རྒྱུད་དང་བསྟན་བཅོས་ནི། །མཛད་པ་དང་ནི་ལ་ལར་འཛིན། །མང་དུ་བརྗོད་ལྟ་ཅི་ཞིག་དགོས། །དེ་སྟོན་ཕྱག་ན་རྡོ་རྗེ་རྒྱལ། །ལྷ་མོས་གསོལ་པ།
85.46b
དཀྱིལ་འཁོར་དང་ནི་འཁོར་ལ་སོགས། །དེ་ལ་མདོར་བསྡུས་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཀྱིལ་འཁོར་རྡོ་རྗེ་འཛིན་པ་ཡིས། །མཁའ་འགྲོ་དབང་ཕྱུག་མ་དགྱེས་མཛོད། །གྲུ་བཞི་ལ་སོགས་དང་ལྡན་པ། །དུར་ཁྲོད་ཀྱི་ནི་རྒྱན་གྱིས་བརྒྱན། །ཤིང་བརྒྱད་ཀྱིས་ནི་ཆལ་པར་བཀྲམ། །རྫིང་བརྒྱད་ཀྱིས་ནི་བརྒྱན་པའོ། །དེ་དབུས་སྣ་ཚོགས་ཆུ་སྐྱེས་ནི། །འདབ་མ་དང་ནི་གེ་སར་བཅས། །དེ་ཡི་དབུས་སུ་ལྷ་ཐོད་པ། །དུམ་བུ་གསུམ་པ་ཀུན་དང་བཞི། །རང་གི་ངོ་བོ་ཆོས་ཀྱི་དབྱིངས། །བདུད་རྩི་ལྔས་ནི་ཤིན་ཏུ་གང ། །ཧཱུཾ་གི་ཡིག་འབྲུ་དེ་དབུས་གནས། །ཡེ་ཤེས་མེ་ཡི་འོད་དང་མཉམ། །ཟླ་བ་ཉི་མའི་གདན་ལ་བཞུགས། །སྡིག་པ་ཐམས་ཅད་འཇིག་པར་བྱེད། །ཧཱུཾ་ལ་སོགས་པ་ཡོངས་གྱུར་ལས། །སྐད་ཅིག་གཅིག་གིས་རྨད་དུ་བྱུང ། །ལྷ་མོ་བཅུ་གཉིས་དང་ལྡན་པ། །ཕྱག་ན་རྡོ་རྗེ་རྒྱལ་པོ་བཞེངས། །ཞལ་གཅིག་པ་ལ་སྤྱན་གསུམ་པ། །ཆར་སྤྲིན་གྱི་ནི་མདོག་དང་མཉམ། །ཕྱག་བཞི་པ་ནི་རྟ་ལ་ཆིབས། །ཉི་མའི་འོད་དང་མཉམ་པའི་སྤྱན། །བསྐལ་པ་ཆེན་པོའི་མེ་དང་འདྲ། །ཉི་མ་བྱེ་བའི་འོད་དང་མཉམ། །གདུལ་དཀའ་ཆེན་པོ་འདུལ་བར་མཛད། །སྙིང་རྗེའི་རླན་གྱིས་བརླན་པར་མཛད། །ཕྱག་རྒྱ་ལྔ་འཛིན་དཔའ་བོ་ཆེ། །རལ་པའི་དབུ་རྒྱན་གྱིས་ནི་བརྒྱན། །རལ་པ་སྣ་ཚོགས་རྒྱན་དང་ལྡན། །སྣ་ཚོགས་རྡོ་རྗེ་ཟླ་ཅོད་པན། །ཕྱག་གཡས་པས་ནི་རྡོ་རྗེ་འཛིན། །སྣ་ཚོགས་ཀྱི་ནི་འོད་ཟེར་འཕྲོ། །གཡོན་ནི་ཐོད་པ་ཁ་ཊྭཱཾ་ག་།གཞན་པས་རྡོ་རྗེའི་མདའ་དང་གཞུ། །རྟ་ནི་འདི་རུ་སྔོན་པོའི་གཟུགས། །སྤྱན་གསུམ་པ་ལ་དྲག་པོའི་འོད། །ཞི་བའི་པགས་པས་སྒ་ཆ་བྱས། །དགོད་པའི་ང་རོ་གཤོག་པ་ཅན། །སྣ་ཚོགས་པད་མའི་འདབ་མ་ལ། །ཤར་དང་ལྷོ་དང་ནུབ་དང་བྱང་དུ་རྡོ་རྗེ་འཇིགས་བྱེད་མ་དང ། རྡོ་རྗེ་དྲག་མོ་དང ། རྡོ་རྗེ་གཏུམ་མོ་དང ། རྡོ་རྗེ་ནག་མོ་སྟེ། གནག་པ་དང ། དམར་བ་དང ། ལྗང་བ་དང ། དཀར་པོ་སྟེ་ངང་པ་ལ་ཆིབས་པའོ། །ཕྱག་ན་མཚོན་ཆ་ལ་སོགས་པ་ནི་གཙོ་བོ་བཞིན་ནོ། །མཚམས་ཀྱི་འདབ་མ་བཞིར་བདུད་རྩི་སྣ་ཚོགས་པས་གང་བའི
85.47a
བུམ་པའི་སྟེང་ན་ཐོད་པའོ། །མཚམས་སུ་རྡོ་རྗེ་འདོད་མ་དང ། རྡོ་རྗེ་རྩགས་བུ་མ་དང ། རྡོ་རྗེ་ཕྲེང་བ་མ་དང ། རྡོ་རྗེ་བརྩོན་མ་རྣམས་ནི་གཟུགས་གཉིས་པའི་སྐུ། ནམ་མཁའ་ལྡིང་ལ་ཆིབས་པ་གཙོ་བོ་ལྟ་བུའོ། །ཤར་སྒོ་ལ་སོགས་པར་རྡོ་རྗེ་ཤ་བ་རི་དང ། རྡོ་རྗེ་རོ་ལངས་མ་དང ། རྡོ་རྗེ་རབ་ཏུ་གཏུམ་མ་དང ། རྡོ་རྗེ་ཌོམ་བི་ནི་སྟེ། ནམ་མཁའ་སྔོན་པོ་དང ། ཉི་མའི་འོད་དང ། མེའི་ཁ་དོག་དང ། དུ་བའི་མདོག་བྱ་རྒོད་ལ་ཆིབས་པ་མཚམས་ཀྱི་བཞིན་ནོ། །དཀྱིལ་འཁོར་གྱི་ཕྱོགས་བཞིའི་སྣམ་བུ་ལ་ཚངས་པ་དང ། བརྒྱ་བྱིན་དང ། དྲག་པོ་དང ། མི་མཆོག་ལ་སོགས་པ་འདྲེའི་རྒྱལ་པོ་རང་རང་གི་མཚོན་ཆ་ཕྱག་ན་བསྣམས་པ་དུ་མ་བྱའོ། །ལྷ་མོས་གསོལ་པ། ཕྱག་ན་རྡོ་རྗེ་གཙོ་བོའི་གསང་སྔགས་ནི་གང ། སེམས་ཅན་རྣམས་ཀྱིས་ཇི་ལྟར་བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་སྔགས་ནི་ཡི་གེ་དྲུག་།ཐམས་ཅད་འདོད་པའི་དོན་གྲུབ་བྱེད། །གདུག་པ་ཐམས་ཅད་འཇིགས་བྱེད་ཅིང ། །ནད་རྣམས་ཀུན་ནི་ཟད་པར་བྱེད། །དངོས་གྲུབ་ཐམས་ཅད་རབ་ཏུ་སྦྱིན། །ཐམས་ཅད་མཁྱེན་པས་མི་ཐུབ་བོ། །བཛྲ་པཱ་ཎི་ཧཱུཾ། རྣལ་འབྱོར་ཁྲོ་བོའི་ལྟ་བས་བཟླས། །སྐད་ཅིག་གཅིག་གིས་ཁམས་གསུམ་གསོད། །ཡང་ན་ཞི་བའི་ལྟ་བས་བཟླས། །མཐའ་ཡས་པ་ཡི་ནད་ཞི་བྱེད། །མཆོད་སྦྱིན་ཡང་དག་ཆེར་བྱས་ན། །སྔོན་དུ་བསྙེན་པ་བྱེ་བ་བྱ། །ཞི་བ་ལ་སོགས་སྦྱིན་སྲེག་བྱ། །ཇི་ལྟར་སྔར་ནི་བདག་གིས་སྨྲས། །དུར་ཁྲོད་ཡང་ན་ཆུ་ངོགས་སུ། །ཕྱག་ན་རྡོ་རྗེ་བསྒྲུབ་པར་བྱ། །དུང་ཆེན་གྱི་ནི་ཕྲེང་བ་ཡིས། །འགྲུབ་པའི་དོན་ཕྱིར་བྱེ་བ་བཟླས། །ཞི་བ་ཞི་བའི་སེམས་ཀྱིས་ནི། །དྲག་པོ་དྲག་པོ་བསྒྲུབ་པར་དཀའ། །དབང་བསྐུར་མེད་པའི་སེམས་ཅན་ལ། །སྔགས་འདི་སྦྱིན་པར་མི་བྱ་སྟེ། །མཁས་པས་བྲིས་སྐུ་གླེགས་བམ་ནི། །ནམ་ཡང་དེ་ལས་བསྟན་མི་བྱ། །དེ་ལྟ་མིན་ན་གྲུབ་མི་འགྱུར། །ཀུན་ནས་ཀུན་དུ་རབ་ཏུ་བལྟ། །གསང་བ་ཡིས་ནི་འགྲུབ་པར་འགྱུར། །ཀུན་ནས་ཀུན་དུ་ཞལ་བཟང་མོ། །པད་མ་འདབ་མ་བརྒྱད་གྱེས་པ། །འདབ་མ་སྣ་ཚོགས་པ་ཡིས
85.47b
མཛེས། །ཉི་མའི་དཀྱིལ་འཁོར་དབུས་སུ་ནི། །མངའ་བདག་ཕྱག་ན་རྡོ་རྗེ་རྒྱལ། །རྒྱལ་པོའི་བཞུགས་སྟབས་ཀྱིས་ནི་བཞུགས། །ནམ་མཁའི་མདོག་ལྟར་སྔོ་བ་སྟེ། །ཕྱག་བཞི་པ་ལ་ཞལ་གཅིག་པ། །སྤྱན་གསུམ་པ་ལ་ཞི་བའི་གཟུགས། །གཡས་དང་གཡོན་པའི་ཕྱག་གཉིས་ནི། །རྡོ་རྗེ་ཐོད་པ་ཁ་ཊྭཱཾ་ག་།ཆོས་ཀྱི་དོན་ནི་འཆད་པའི་ཕྱིར། །ཕྱག་གཉིས་ཆོས་ཀྱི་ཕྱག་རྒྱའོ། །འདབ་མ་བདུན་ལ་སངས་རྒྱས་བདུན། །བརྒྱད་པ་ལ་ནི་བྱམས་པའོ། །པ་ཏི་ལ་སོགས་ཤིང་ལ་བརྟེན། །ཐམས་ཅད་ཟླ་བའི་གདན་དུ་དྲན། །གཤིན་རྗེའི་གཤེད་ལ་སོགས་པ་བཞི། །གཞན་མིན་སྒོ་ལ་སོགས་པར་དགོད། །རྡོ་རྗེ་ལྕགས་ཀྱུ་ལ་སོགས་བཞི། །སྒོ་ཡི་མཚམས་སུ་གནས་པའོ། །སྒོ་ཡི་ཕྱི་རོལ་སྣམ་བུའི་གནས། །ཡང་དག་ལྷ་ཆེན་ལ་སོགས་པའོ། །རྡོ་རྗེ་ཕྲེང་བས་ཀུན་དུ་མཆོག་།མཁས་པས་ཡོངསུ་བསྐོར་བྱའོ། །དཔལ་ཡེ་ཤེས་ཐིག་ལེ་ལས་དཔལ་ཕྱག་ན་རྡོ་རྗེའི་དཀྱིལ་འཁོར་བསྐྱེད་པའི་བསྒོམ་པ་ཞེས་བྱ་བའི་ལེའུ་སྟེ་ཉི་ཤུ་རྩ་བརྒྱད་པའོ།། །། དེ་ནས་དེའི་དུས་སུ་འཁོར་ཐམས་ཅད་སྟན་ལས་ལངས་ཏེ། ལན་གསུམ་དུ་སྐོར་བ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཚིགས་སུ་བཅད་པ་འདི་དག་བརྗོད་དོ། །མགོན་ཁྱོད་བཀའ་དྲིན་གྱིས་ནི་བདག་ཅག་དག་།གཞན་དང་མི་མཉམ་རྒྱལ་བས་རྙེད་དཀའ་བ། །བལྟ་བར་དཀའ་བ་ཤེས་དཀའ་གཟུང་བར་དཀའ། །གསང་བའི་གསང་བ་མཆོག་གི་མཆོག་རབ་ཉིད། །དཔའ་བོ་དབང་ཕྱུག་ཆོས་དབྱིངས་ཕྱག་འཚལ་བསྟོད། །ལོག་ཤེས་མུན་ནག་འཇོམས་ལ་ཕྱག་འཚལ་ལོ། །དང་པོའི་སངས་རྒྱས་མཆོག་ཆར་གྲགས་ལ་འདུད། །ཡིག་བྲལ་ཐིག་ལེ་སྐྱེ་མེད་ལ་ཕྱག་འཚལ། །ནམ་མཁའི་རང་བཞིན་ཚུལ་གྲགས་ལ་ཕྱག་འཚལ། །གཉིས་སུ་མེད་པའི་ཚུལ་ཙམ་ལ་ཕྱག་འཚལ། །མཆོག་གི་རང་བཞིན་ཕྱག་འཚལ་ཕྱག་འཚལ་འདུད། །གཞན་མིན་གཞན་མཆོག་རང་བཞིན་ཕྱག་འཚལ་ལོ། །
85.48a
དཔལ་ཡེ་ཤེས་ཐིག་ལེ་ལས་བསྟོད་པའི་རྒྱལ་པོ་ཞེས་བྱ་བའི་ལེའུ་སྟེ་ཉི་ཤུ་རྩ་དགུ་པའོ།། !་།། ཡང་བཅོམ་ལྡན་འདས་ཀྱིས་འཁོར་ཐམས་ཅད་དང་བཅས་པའི་བཅོམ་ལྡན་འདས་མ་ལ་བོས་ཏེ། ཀྱཻ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྦྱོར་དྲུག་གི་གྲགས་པ་བཅུ་དང་བྲལ་བ་བཅུ་གསུམ་གྱི་བདག་ཉིད། དཔལ་མཆོག་གི་བླ་མའི་ཞལ་སྔ་ནས་པད་མ་བཙལ་ཏེ། བསམ་གཏན་ལ་སོགས་པ་ཡིས་ཡང་དག་པར་མཐོང་བ་ཞེས་གཏན་ལ་ཕབ་པའོ། །དཔལ་ཡེ་ཤེས་ཐིག་ལེ་ལས་མཆོག་ཏུ་གསང་ཞིང་ཤིན་ཏུ་གསང་བ་ཐམས་ཅད་མཁྱེན་པ་རྣམས་ཀྱི་ཀྱང་རྙེད་པར་དཀའ་བ། རྣལ་འབྱོར་མའི་རྒྱུད་ཀྱི་རྨད་དུ་བྱུང་བ། མཆོག་ཆེན་པོ་ནང་གི་རྣམ་པར་ཤེས་པ་དྲུག་གི་བསྟོད་པའི་རྒྱལ་པོ་ཞེས་བྱ་བའི་ལེའུ་སྟེ་སུམ་ཅུ་པའོ།། !་།།དཔལ་ཡེ་ཤེས་ཐིག་ལེ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། !་།། རྒྱ་གར་གྱི་མཁན་པོ་ཆེན་པོ་ཤྲཱི་པྲཛྙཱ་གུ་པ་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ། །སླད་ཀྱིས་དཔལ་ས་སྐྱའི་དབེན་གནས་སུ་ཞུ་ཐིག་གཡར་ཁྲལ་བགྱིས་སོ།།