༄#། །རྒྱ་གར་སྐད་དུ། ཨཱརྱ་ཌཱ་ཀཱི་ནཱི་བཛྲ་པཉྫར་མ་ཧཱ་ཏནྟྲ་རཱ་ཛཱ་ཀལྤ་ནཱ་མ། བོད་སྐད་དུ། འཕགས་པ་མཁའ་འགྲོ་མ་རྡོ་རྗེ་གུར་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོའི་བརྟགས་པ། ཀྱེ་རྡོ་རྗེ་ལ་ཕྱག་འཚལ་ལོ། །ནམ་མཁའ་བེམས་བཅས་དང་བ་དང ། །གོ་སྐབས་མེད་དང་འབྱེད་པ་དང ། །སྣ་ཚོགས་རྡོ་རྗེའི་གཞི་གནས་ཁང ། །སེམས་ཅན་ཁམས་དང་ཡིད་འོང་དང ། །སེམས་ཅན་སྣོད་དང་འཇིག་རྟེན་དང ། །ས་དང་ས་འོག་བར་སྣང་དང ། །ཡིད་དང་ལུས་དང་ངག་དང་ནི། །གཅིག་ལ་གཉིས་དང་མཁའ་བདེ་དང ། །དྲུག་དང་ལྔ་དང་དྲུག་གཉིས་དང ། །སྐྱེ་འགྲོ་རྣམས་ནི་བཞི་པོ་དང ། །གཅིག་གིས་ཉི་ཤུར་འཚང་བ་དང ། །ཁམས་གསུམ་མ་ལུས་པ་དང་ནི། །ཕ་དང་བུ་དང་མ་མོ་དང ། །ཕྱི་རོལ་དང་ནི་ནང་དང་ངམ། །བཙུན་མོ་ཀུན་དང་ཆོས་དང་ནི། །ཐམས་ཅད་ལས་དང་བདག་མེད་དང ། །འབྲས་བུ་རྒྱུ་དང་བྱ་བ་ཞེས། །བསྒྲུབ་བྱ་སྒྲུབ་ཐབས་རྡོ་རྗེ་དང ། །དེ་བཞིན་ཀུན་གཞི་རྣམ་ཤེས་དང ། །ཆོས་ཀྱི་དབྱིངས་དང་མ་བྱུང་དང ། །མཁའ་ཡི་ཁམས་དང་རང་དབྱིངས་དང ། །བདག་མེད་པ་དང་བདག་ཅེས་དང ། །དངོས་པོ་མེད་དང་དངོས་མེད་མིན། །བདེ་བ་ཅན་དང་གྲུ་གསུམ་དང ། ། སྐྱེས་དང་ནི་སྐྱོན་བྲལ་དང ། །རྡུལ་བྲལ་དང་ནི་སྡིག་བཅོམ་དང ། །དབའ་རླབས་མེད་པའི་རང་བཞིན་དང ། ། 84.266b མཐར་ནི་ཞི་བའི་བདེ་རིག་དང ། །གསང་བ་མཆོག་དང་དགྱེས་པ་ལ། །སངས་རྒྱས་ཀུན་ཁྱབ་སེམས་དཔའ་ནི། །མཁའ་འགྲོ་མ་ཡི་རྡོ་རྗེ་གུར། །འདི་ནི་རང་བྱུང་བཅོམ་ལྡན་འདས། །ལྷའི་བདག་པོ་གཅིག་པུ་ཉིད། །ཐམས་ཅད་བདག་ཉིད་རྟག་ཏུ་བཞུགས། །འབུམ་ཕྲག་ལྔ་བདག་ཀྱེའི་རྡོ་རྗེ། །ལས་ནི་དཀྱིལ་འཁོར་ལྔར་གསུངས་པ། །རྡོ་རྗེ་ཅན་དང་ཕན་པ་དང ། །དེ་བཞིན་རྡོ་རྗེ་གཟི་བརྗིད་ཉིད། །པདྨ་གར་གྱི་དབང་ཕྱུག་དང ། །རྟ་བདུན་རྒྱལ་པོ་ལྔ་པའོ། །རྡོ་རྗེ་མཁའ་འགྲོའི་དཀྱིལ་འཁོར་དུ། །དཀར་མོ་རྐུན་མ་རོ་ལངས་མ། །གྷསྨ་རཱི་དང་པུཀྐ་སཱི། །རི་ཁྲོད་གདོལ་པ་གཡུང་མོའོ། །རྡོ་རྗེ་ཕན་པའི་དཀྱིལ་འཁོར་དུ། །སྐམ་པ་ཞགས་པ་མ་ཉིད་དང ། །དོལ་ཟླུམ་མ་དང་ལྕགས་ཀྱུ་འཛིན། །མེ་ཏོག་མ་སོགས་མཚམས་ཀྱི་ཆར། །རྡོ་རྗེ་ཉི་མའི་དཀྱིལ་འཁོར་དུ། །ཉི་ལག་མ་དང་མར་མེ་མ། །རིན་ཆེན་སྒྲོན་མ་གྲོག་ལག་མ། །ལཱ་སྱཻ་ལ་སོགས་མཚམས་ཆར་རོ། །པདྨ་ཆོས་འབྱུང་ལྕགས་སྒྲོགས་དང ། །འཁྱུད་མ་གར་གྱི་དཀྱིལ་འཁོར་དུ། །གླིང་བུ་མ་སོགས་མཚམས་ཀྱི་ཆར། །བདག་ཉིད་ཆ་བྱད་སྦྱོར་བས་སོ། །རྟ་ཡི་རྒྱལ་པོའི་དཀྱིལ་འཁོར་དུ། །རྡོ་རྗེ་སྒོ་ལྕགས་ལྡེ་ཀྱོག་མ། །སྒོ་མ་དང་ནི་གོས་འཛིན་མ། །དེ་བཞིན་མཚམས་སུ་སྤྱན་ལ་སོགས། །རྡོ་རྗེ་མཁའ་འགྲོ་དེ་རྣམས་ཀུན། །རྐང་པ་གཡོན་པ་རྐྱང་བས་གནས། །སྙིང་གར་གཡོན་བཅངས་སྡིགས་འཛུབ་སྟེ། །ཁ་དོག་སྣ་ཚོགས་ཆེར་འབར་བའོ། །ཤིན་ཏུ་ཞེ་སྡང་ཞེ་སྡང་ཆེ། །གཽ་རཱི་ལ་སོགས་རབ་ཏུ་གྲགས། །ཤིན་དུ་གཏི་མུག་རྨོངས་ཆེན་ལས། །སྐམ་པ་མ་སོགས་ཆེར་བཟུང་ངོ ། །ཤིན་ཏུ་གཟི་བརྗིད་ཆེར་གསལ་བ། །ཉི་ལགས་མ་སོགས་རབ་ཏུ་གྲགས། །ཤིན་ཏུ་འདོད་ཆགས་ཆགས་ཆེན་ལས། །པད་སོགས་ཆོས་ཀྱི་དཀྱིལ་འཁོར་དུའོ། །ཕྲག་དོག་ཆེན་པོ་སྒྲིབ་ཆེན་ལས། །སྒོ་ལྕགས་མ་སོགས་མྱུར་འགྲོ་བདག་།རྒྱལ་བ་མགོན་པོ་ཕན་པ་ནི། །གཏི་མུག་ཐམས་ཅད་ཟད་པར་མཛད། ། 84.267a རྡོ་རྗེ་ཉི་མ་རྒྱལ་པོ་ཆེ། །རྣམ་པར་རྟོག་པའི་རབ་རིབ་འཕྲོག་།རྟ་མགྲིན་འདོད་པ་ཆེན་པོ་ནི། །འདོད་ཆགས་ཅན་གྱི་བྱང་ཆུབ་སྟེར། །རྡོ་རྗེ་འགྱོགས་འགྲོ་ཕྲག་དོག་ཆེ། །ཐེག་པ་གཞན་ནི་རྣམ་པར་སྤངས། །རྡོ་རྗེ་སེམས་དཔའ་རྒྱལ་པོ་ཆེ། །མི་སྐྱོད་ཡེ་ཤེས་འབྱུང་བའི་གནས། །སྐྱེ་འགྲོ་མི་བཟད་མགྲོན་གཉེར་ཕྱིར། །སྒྲིབ་པ་ལྔ་ནི་འཇོམས་པ་པོ། །དེ་བཞིན་གཤེགས་པའི་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཞེ་སྡང་གཏི་མུག་ང་རྒྱལ་དང ། །འདོད་ཆགས་སེར་སྣ་སྐྱེ་བོ་རྣམས། །བསྡུ་ཕྱིར་རང་གི་འཁོར་ལོ་ལ། །རྡོ་རྗེ་གཟུགས་ནི་དུ་མ་འཛིན། །ཤིན་ཏུ་སྡུག་པ་དྲག་པོ་ལ། །ཞི་བ་ཉེ་བར་མི་སྦྱར་ཏེ། །འདི་མཁྱེན་རྡོ་རྗེ་ཅན་ཆེན་ནི། །རང་གིས་ཀྱེའི་རྡོ་རྗེར་འགྱུར། །ཤིན་ཏུ་སྟོང་པར་ཞེན་རྣམས་ཀྱི། །ཡོད་མིན་བརྟུལ་ཞུགས་འཛིན་རྣམས་ཀྱི། །སངས་རྒྱས་གཏི་མུག་སྤྱོད་དོན་དུ། །རྡོ་རྗེ་རྫོགས་པའི་སངས་རྒྱས་འགྱུར། །ཤིན་ཏུ་ང་རྒྱལ་གདུག་རྣམས་ཀྱི། །སྐྱེ་འགྲོའི་ང་རྒྱལ་ཟད་པར་མཛད། །རྡོ་རྗེ་ཉི་མ་བདག་ཉིད་རྒྱལ། །ང་རྒྱལ་ཆེན་པོའི་མུན་པ་འཇོམས། །བྱང་ཆུབ་ཆགས་བྲལ་ལས་སྐྱེས་སྤངས། །སེམས་ཅན་གང་ཞིག་བདེ་བྱེད་པ། །ཆགས་པས་བྱང་ཆུབ་རབ་གྲུབ་ཕྱིར། །པདྨ་གར་གྱི་དབང་ཕྱུག་གྱུར། །ཐམས་ཅད་མཁྱེན་པའི་ལམ་གནས་ཤིང ། །གང་ཞིག་ལམ་གཞན་ནས་འགྲོ་བ། །དེ་རྣམས་བྱང་ཆུབ་རབ་སྦྱིན་ཕྱིར། །རྡོ་རྗེ་མགྱོགས་འགྲོ་རང་གཙོ་བོ། །དབང་པོ་གང་དང་གང་ལམ་ཉིད། །དེ་དང་དེ་ཡི་ངོ་བོར་འགྲོ། །མཆོག་ཏུ་ཕན་པའི་རྣལ་འབྱོར་གྱིས། །སངས་རྒྱས་ཀུན་གྱི་བདག་ཉིད་འགྱུར། །གང་དང་གང་གི་དངོས་པོ་ཡིས། །སྐྱེས་པ་རྣམས་ཀྱིས་ཡིད་སྦྱོར་ལ། །དེས་ན་དེ་ཡི་རང་བཞིན་འགྱུར། །སྣ་ཚོགས་གཟུགས་ནོར་ཇི་བཞིན་ནོ། །གང་དང་གང་གིས་འདུལ་བ་ཡི། །སེམས་ཅན་འདུལ་བར་འགྱུར་བ་སྟེ། །དེ་དང་དེ་ཡི་རྣམ་པ་ཡིས། །ཆོས་ཀྱི་བཤད་པ་བྱ་བའོ། །སེམས་ཀྱི་རྡོ་རྗེ་ལས་བྱུང་བའི། །སེམས 84.267b ཅན་སྣ་ཚོགས་རང་བཞིན་ཅན། །སེམས་ནི་རང་གི་རྣམ་རྟོག་གིས། །སྐྱེ་བོའི་དྲི་མས་ནག་པོར་བྱས། །དེ་བས་ཀུན་ཏུ་རབ་འབད་པས། །སེམས་ཀྱི་རྡོ་རྗེ་རྣམ་པར་སྦྱང ། །སེམས་དག་པ་ནི་བདེ་བ་ཡིན། །ཉོན་མོངས་དུག་ནི་ཐམས་ཅད་འཕྲོག་།གལ་ཏེ་སྟོང་པ་ཐབས་ཡིན་ན། །དེ་ཚེ་སངས་རྒྱས་ཉིད་མི་འགྱུར། །འབྲས་བུ་རྒྱུ་ལས་གཞན་མིན་ཕྱིར། །ཐབས་ནི་སྟོང་པ་ཉིད་མ་ཡིན། །ལྟ་བ་རྣམས་ལ་ལོག་རྣམས་དང ། །བདག་ཏུ་ལྟ་བ་ཚོལ་རྣམས་ཀྱིས། །བདག་ཞེན་བསམ་པ་བཟློག་པའི་ཕྱིར། །སྟོང་པར་རྒྱལ་བ་རྣམས་ཀྱིས་གསུངས། །དེ་ཕྱིར་དཀྱིལ་འཁོར་འཁོར་ལོ་ཞེས། །ཐབས་ནི་བདེ་བའི་སྡོམ་པ་སྟེ། །སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་མྱུར་བར་འགྱུར། །སྟོན་པ་སུམ་བཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ལྡན། །དེ་ཕྱིར་ཐབས་ཀྱིས་བསྒྲུབ་བྱ་དང ། །དེ་ནི་ཐབས་ཀྱི་གཟུགས་ཅན་ནོ། །ཐམས་ཅད་ཀྱི་རྣམ་པ་མཆོག་ཏུ་ཞི་བ་སེམས་ཅན་འཇུག་པའི་ལེའུ་སྟེ་དང་པོའོ།། །། དེ་ནས་རྡོ་རྗེ་ཁམས་གསུམ་ཐོབ། །རྣལ་འབྱོར་མ་ཡི་རྡོ་རྗེ་གུར། །དམ་ཚིག་མཆོད་པ་ཡིད་འོང་བ། །འཁོར་ལ་རབ་ཏུ་བཀའ་སྩལ་པ། །གླུ་ནི་རྡོ་རྗེ་ཅན་ལ་འབུལ། །གར་ནི་སངས་རྒྱས་རྣམས་ལ་འབུལ། །ཧི་ར་མཆོག་ལ་དེ་བཞིན་དྲི། །འཇིག་རྟེན་རྗེ་ལ་བཟའ་དང་བཏུང ། །གོས་ཀྱིས་མཆོད་པ་རྟ་མཆོག་ལ། །འདི་རྣམས་དམ་ཚིག་དམ་པ་སྟེ། །རྡོ་རྗེ་མཆོད་པ་བྱས་པ་ཡི། །རྡོ་རྗེ་ཅན་ཀུན་མཉེས་པར་བྱེད། ། ཀ་རུ་ནག་ཀྱེ་རྡོ་རྗེ། །ཕན་པ་ལ་ནི་ཙན་དན་དཀར། །དམར་པོ་འཇིག་རྟེན་རྗེ་ལ་དབུལ། །ཁ་ཆེ་རྡོ་རྗེ་སྣང་བ་ལ། །བདུན་གྱི་རྒྱལ་པོ་ཐམས་ཅད་དེ། །ཧཱུཾ་རྡོ་རྗེ་ལས་བྱུང་བའི་དྲི། །འདི་རྣམས་དྲི་ཡི་རབ་སྦྱོར་བས། །དམ་པའི་སངས་རྒྱས་ཉིད་ཐོབ་བོ། །ཚ་བ་ཁ་བ་རྡོ་རྗེར་འབུལ། །མངར་བ་རྡོ་རྗེ་རྟག་པ་ལ། །སྐྱུར་བ་རྡོ་རྗེ་ཉི་མ་ལ། །དེ་བཞིན་ལན་ཚཝ་འཇིག་རྟེན་རྗེར། །རྟའི་རྒྱལ་པོ་ཐམས་ཅད་དམ། །བསྐ་བ་རབ་ཏུ་བརྟག་པར་བྱ། །ཀྱེའི་རྡོ་རྗེ་རྡོར་ཅན་གྱིས། །མེ་ཏོག་མདོག་གནག་རྐང་འཐུང་བྱུང ། །མལླི་ཀཱ་དང་མཱ་ལ་ཏི། །ཀུན་ད་རྟག་ཏུ་སངས་རྒྱས་འབུལ། །ཤིང་གི་དབང་མཆོག་དྲི 84.268a མེད་མདོག་།སྣང་བྱེད་ལ་ནི་སྦྱར་བར་བྱ། །དབང་མཆོག་དམར་པོ་ཆུ་སྐྱེས་དང ། །བན་དྷུ་དམར་པོ་པ་ཏ་ལར། །པདྨ་གར་གྱི་དབང་ལ་འབུལ། །རྟ་མཆོག་རྡོ་རྗེ་ཅན་ལ་ཀུན། །རྡོ་རྗེ་ཅན་གྱི་ཁྲུ་གསུམ་སྟེ། །སངས་རྒྱས་དཀྱིལ་འཁོར་ཁྲུ་བཞི་པ། །སྣང་བྱེད་ལ་ནི་ཁྲུ་ལྔ་ཉིད། །པདྨ་གར་དབང་དྲུག་པ་སྟེ། །ལྕགས་ཀྱི་རྒྱལ་པོ་དེ་བཞིན་བདུན། །བཟའ་ལ་རྡོ་རྗེ་ཉི་མ་ཡི། །ལམ་དུ་ལྕགས་ཀྱུ་མཆོག་གི་དང ། །གཉིད་ལ་སངས་རྒྱས་མགོན་པོ་ཡི། །ཤིན་དུ་བདེ་ལ་གར་དབང་གི། །གླུ་གར་དེ་བཞིན་རོལ་མོའི་སྒྲ། །ས་གཞི་ཡོངས་གཟུང་དུས་སུ་ནི། །རྡོ་རྗེའི་གཟུགས་སུ་བཞག་ནས་ནི། །བདག་གིས་རྣལ་འབྱོར་རབ་ཏུ་བསྒྲུབ། །རྡོ་རྗེའི་དབང་པོ་སྔོན་པོ་སྟེ། །ཟླ་བ་ཆུ་ཤེལ་ཐུབ་ཆེན་གྱི། །མཁར་ཕྱིན་སྐྱེས་པའི་མེ་ཏོག་དམར། །ནོར་བུ་དམར་རྒྱལ་མཁའ་མཛོད་ཀྱི། །པདྨ་རཱ་ག་སྤྱན་རས་གཟིགས། །རྟ་ཡིའང་མ་ར་ཀ་ཏ་སྟེ། །རིན་ཆེན་ལྔ་ཡི་རྡུལ་མཚོན་མཆོག་།དེ་ནས་བཅོམ་ལྡན་འདས་རྡོ་རྗེ་ཅན་ཆེན་པོ་མཁའ་འགྲོ་མའི་རྡོ་རྗེ་གུར་འབྱུང་པོ་འདུལ་བའི་ཏིང་ངེ་འཛིན་ལ་བཞུགས་སོ། །དམ་ཚིག་ཡང་དག་རབ་ཕྱེ་བ། །ཀུན་ཏུ་བཟང་པོའི་ས་བོན་བདག་།དབང་པོ་སྔོན་པོ་ལྟ་བུའི་འོད། །ཕྱག་བཞི་འཇིགས་བྱེད་ཆེན་པོ་སྟེ། །མཛེས་པའི་ཁྲོ་བོ་ཡི་ནི་ལུས། །དབང་ལྡན་འབྱུང་པོ་མནན་པ་སྟེ། །གཡས་པས་རིགས་ཀྱི་བདག་པོ་ཉིད། །ལག་པ་གཡོན་པས་ཁྱི་ལྤགས་ཉིད། །གཉིས་པོ་དག་གིས་ཕྱག་རྒྱར་སྦྱོར། །ཞབས་གཡོན་རྐྱང་བས་ཡང་དག་གནས། །ཅུང་ཟད་མཆེ་བས་འཇིགས་པར་བྱེད། །མགོ་བོའི་ཕྲེང་བའི་རྒྱན་མཆོག་སྟེ། །མགོ་འཛིངས་ཕྱེད་དུ་བཅིངས་པར་ནི། །རི་ཡི་རྩེ་མོར་བསྒོམ་པར་བྱ། །འབྱུང་པོ་འདུལ་བར་འགྲུབ་པར་འགྱུར། །གནོད་སྦྱིན་དུ་མ་འབྱུང་པོ་དང ། །གནོད་སྦྱིན་མོ་དང་ཀླུ་མོ་དང ། །མི་མོ་ལྷ་ཡི་མཛེས་མ་ནི། །སྒྲུབ་པ་པོ་ཡིས་ངེས་པར་འགྲུབ། །སྔགས་ནི། ཨོཾ་བྷཱུ་ཏ་ཌཱ་མ་ར་བྷཱུ་ཏཱ་དྷི་བ་ཏི་ཨཀྵོ་བྷྱ་ཀི་རཱི་ཊི་ན་སརྦྦ་བྷཱུ་ཏ་པྲེ་ཏ་པི་ཤཱ་ཙཱ་ན་སཱ་དྷ་ཡ་ཧཱུཾ་ཕཊ། དེ་ནས་རྡོ་རྗེ་ཆེན་པོ་རྡོ་རྗེ་ཅན་མཁའ་འགྲོ་མའི་རྡོ་རྗེ་གུར་སྟོབས་པོ་ཆེའི་ཏིང་ངེ་འཛིན་ལ་བཞུགས་སོ། །ཆར་ཆེན་རབ་ཏུ་དབབ་བྱ་སྟེ། ། 84.268b པདྨ་འདབ་མ་བརྒྱད་པ་བསམ། །དེར་ནི་ཀླུ་བརྒྱད་དགོད་པར་བྱ། །སྟོབས་པོ་ཆེ་ནི་རབ་སྦྱོར་བས། །དེ་རྣམས་རྔ་མ་ཡང་དག་མནན། །ཆར་མེད་སྟོབས་པོ་ཆེ་ལས་ནི། །ཆུ་ཡི་ཚོགས་ནི་དབབ་པར་བྱ། །ཁ་དོག་ནག་ཅིང་ཆེར་གསལ་བ། །འཇིགས་པ་འང་ནི་འཇིགས་པར་མཛད། །ཕྱག་བརྒྱད་ཞལ་ནི་བཞི་པ་སྟེ། །སྐར་ཉི་རྡོ་རྗེ་གདན་མཛད་པ། །ཕྱག་རྣམས་ཀྱིས་ནི་ཀླུ་བདག་རྣམས། །ཕུཿ ཞེས་བྱ་བའི་སྔགས་ཟློས་ཞིང ། །ཧཱུཾ་དག་ནང་དུ་ཆུད་བྱས་ཏེ། །ཕཊ་ནི་མཐའ་རུ་སྦྱར་བར་བྱ། །དང་པོའི་ཞལ་ནི་ནག་པོ་སྟེ། །གཉིས་པ་ཟླ་འོད་བཟང་པོ་ཉིད། །གསུམ་པ་སེར་པོའི་མདོག་ལྟ་བུ། །བཞི་པ་དམར་པོ་ཉིད་དུ་བརྗོད། །སྦྲུལ་གྱི་རྒྱན་གྱིས་ཡན་ལག་ཡང་དག་བརྒྱན། །རྡོ་རྗེ་སེམས་དཔས་རྣམ་པར་བརྒྱན། །ཀླུ་རྣམས་ཀྱིས་ནི་ཆར་དབབ་ཕྱིར། །སྟོབས་པོ་ཆེ་ནི་རབ་བསྒྲུབ་བྱ། །དེ་ནས་རྡོ་རྗེ་འཛིན་པའི་རྒྱལ་པོ་སངས་རྒྱས་ཐམས་ཅད་ཀྱི་རང་བཞིན་འཛིན་པ་རྡོ་རྗེ་གུར་སྨྲ་བ་པོས་སངས་རྒྱས་ཀྱི་དེ་ཁོ་ན་དབྱེ་བར་བྱའོ། །རྡོ་རྗེ་པདྨ་འོ་བྱས་དང ། །རི་དགས་བརྒྱན་པ་ཟོས་པ་དང ། །རྡོ་རྗེ་ཆུ་འཐུང་ནོར་ལྡན་པ། །སངས་རྒྱས་དེ་ཉིད་འདི་རིག་ང ། །དག་པའི་གནས་ནི་གནས་ཆེན་པོ། །སངས་རྒྱས་ཀུན་གྱིས་རབ་གང་བ། །རྡོ་རྗེ་རིན་ཆེན་ཀུན་ཁྱབ་པ། །གང་གྱུར་ང་ཡིས་བཤད་པར་བྱ། །ཕན་པའི་གྲོང་ཁྱེར་ཡིད་འོང་བར། །མཁའ་འགྲོ་རྡོ་རྗེ་ལུ་གུ་རྒྱུད། །ཞེན་པ་ཆེན་པོ་སངས་རྒྱས་ཀུན། །ལྕགས་སྒྲོག་རྡོ་རྗེས་བཅིང་བར་བྱ། །དགའ་ལྡན་དུ་ནི་ལྡེག་པར་འགྱུར། །སངས་རྒྱས་རྣམས་ཀྱི་འདོད་པ་ཐོབ། །རྒྱལ་བ་མགོན་པོ་བྱམས་པ་ནི། །ཡེ་ཤེས་སྤྱན་གྱིས་རྣམ་པར་གཟིགས། །རྡོ་རྗེ་ལུ་གུ་རྒྱུད་བཅིངས་པས། །རྒྱལ་བའི་ཚོགས་རྣམས་བཅིང་བར་བྱ། །གང་ཞིག་དངོས་གྲུབ་མི་སྟེར་ན། །སྒྲོག་གིས་བཅིངས་ནས་དགུག་པར་བྱ། །རྡོ་རྗེ་ཀྱོ་བ་དཀར་མོ་ཆེ། །རྡོ་རྗེ་ཞགས་མ་ཆོམ་རྐུན་མ། །རྡོ་རྗེ་ལྕགས་སྒྲོག་རོ་ལངས་མ། །རྡོ་རྗེ་དྲིལ་བུ་གྷསྨ་རི། །སངས་རྒྱས་རྣམས་ནི་དབང་དུ་བྱེད། །བཟླས་དང་བསྒོམ་པ་མངོན་དགའ་བའི། །དངོས་གྲུབ་གལ་ཏེ་མི་སྟེར་ན། །དེ་ཚེ་མཁའ་འགྲོ་མ་བཞི་ཡིས། །སངས་རྒྱས་རྣམས 84.269a ནི་དྲག་ཤུལ་བསྒྲུབ། །དེ་ནས་རྡོ་རྗེ་འཛིན་གྱི་རྒྱལ་པོ་མཁའ་འགྲོ་མའི་རྡོ་རྗེ་གུར་གྱི་རྒྱུད་ཀྱི་ནང་དུ་འབུམ་ཕྲག་ལྔ་བྲིས་པ་ཡང་དག་པར་བཤད་པར་བྱའོ། །སངས་རྒྱས་ཀྱི་ནི་དཀྱིལ་འཁོར་འབུམ། །རྡོ་རྗེ་ཅན་གྱི་དེ་བཞིན་འབུམ། །འབུམ་གྱིས་རྡོ་རྗེ་ཉི་མ་ཡི། །འབུམ་གྱིས་རྡོ་རྗེ་ས་ཀྱིའོ། །འབུམ་ཕྲག་ཕྱེད་ཀྱིས་རྡོ་རྗེ་སྟེ། །འབྱུང་པོ་འདུལ་བ་སྟོང་ཕྲག་ལྔས། །ལྔ་ཡིས་ལས་ནི་རབ་རྒྱས་པ། །ལྔ་ཡིས་སངས་རྒྱས་གར་མཁན་ཉིད། །སྟོང་ཕྲག་སུམ་བཅུ་དག་གིས་ནི། །ཀུ་རུ་ཀུལླེ་བརྟག་པའོ། །ལྷག་མ་སྟོང་ཕྲག་ལྔ་ཡིས་ནི། ཆོ་གའི་རིམ་བརྒྱུད་ཀུན་གྱིའོ། །རྡོ་རྗེ་མཁའ་འགྲོ་ཀྱེའི་རྡོ་རྗེ ། །འབུམ་ཕྲག་ལྔ་ནི་བྲིས་པའོ། །དེ་ནས་རྡོ་རྗེ་འཛིན་པ་བློ་དང་ལྡན་པ་མཁའ་འགྲོ་མ་རྡོ་རྗེ་གུར་སངས་རྒྱས་ཀྱི་གར་གྱི་ཏིང་ངེ་འཛིན་ལ་ཞུགས་སོ། །གར་དང་གླུ་ལ་རབ་ཞེན་པའི། །སེམས་ཅན་རྣམས་ནི་བསྡུ་བའི་ཕྱིར། །སངས་རྒྱས་གར་མཁན་རོལ་པ་མཛད། །སངས་རྒྱས་གར་མཁན་རྡོ་རྗེ་ཡིས། །འདོད་ཆགས་ཅན་གྱི་བྱང་ཆུབ་བསྒྲུབ། །དེ་ནས་རྡོ་རྗེ་ཅན་འབྱུང་སྟེ། །མེ་ཏོག་སྙིམ་པས་རབ་སྦྱོར་བས། །སེམས་ཅན་ཀུན་ལ་ཕན་ལྡན་པའི། །དམ་ཚིག་དེར་ནི་བཤད་པར་བྱ། །སེམས་ཅན་ཇི་སྙེད་པ་རྣམས་སེམས་ཅན་དུ་བསྡུ་བས་བསྡུས་པ་སྒོ་ང་ལས་སྐྱེས་པའམ། མངལ་ལས་སྐྱེས་པའམ། དྲོད་གཤེར་ལས་སྐྱེས་པའམ། རྫུས་ཏེ་སྐྱེས་པའམ། གཟུགས་ཅན་རྣམས་སམ། གཟུགས་མེད་རྣམས་སམ། འདུ་ཤེས་ཅན་རྣམས་སམ། འདུ་ཤེས་མེད་པ་ཅན་ཉིད་རྣམས་སམ། འདུ་ཤེས་མེད་པ་པ་རྣམས་སམ། སེམས་ཅན་དེ་རྣམས་ཐམས་ཅད་བདག་གིས་ཀྱང་ཕྱག་རྒྱ་ཆེན་པོའི་གོ་འཕང་ལ་དགོད་པར་བྱའོ། །དམ་ཚིག་ཆེ་བཤད་དེ་ནས་ནི། །ཟུར་མིག་མི་གཡོ་མངོན་བྱུང་སྟེ། །མི་བསྐྱོད་ཡེ་ཤེས་བརྙེས་ལྡན་པའི། །སྟོན་པ་ལ་ནི་རྣམ་པར་སྨོད། །ཅི་ཁྱོད་དམ་ཚིག་ཧཱུཾ་ཞེས་བྱ། །ཐུབ་པ་ཆེན་པོ་གཞུ་ཅན་ཡིན། །ང་མིན་སྙིང་རྗེའི་སྟོབས་དཔལ་ལྡན། །བདག་སྟོབས་བཅོམ་པ་མིན་ནམ་ཅི། །ཅི་ཁྱོད 84.269b དམ་ཚིག་ཞེས་བྱ། །ཁྱོད་ནི་ཚངས་པ་ཐུབ་པ་རྣམས། །ང་མིན་རྣམ་པར་སྣང་མཛད་དཔལ། །ཁྱོད་ནི་མེ་བཅོམ་འདོད་པ་བྲལ། །ཅི་ཁྱོད་དམ་ཚིག་ཨཱཿ ཞེས་བྱ། །མངའ་བདག་མཁའ་ལྡིང་མཁྱེན་ནམ་ཅི། །ང་མིན་པདྨ་གར་དབང་དཔལ། །ཁྱོད་ནི་གར་མཁན་ཉེར་བཞད་མཁན། །ཅི་ཁྱོད་དམ་ཚིག་ཏྲཱཾ་ཞེས་བྱ། །ཁྱོད་ནི་གདུགས་ཏེ་ཚ་བ་འཕྲོག་།ང་མིན་རྡོ་རྗེ་ཉི་མ་དཔལ། །གདུགས་ཀྱི་རྣམ་ཁྱོད་ཇི་ལྟར་མིན། །ཅི་ཁྱོད་དམ་ཚིག་ཁཾ་ཞེས་བྱ། །ཁྱོད་ནི་མཁའ་སྟོང་རང་བཞིན་ནོ། །ང་མིན་རྡོ་རྗེ་མགྱོགས་འགྲོ་ཡིན། །ཁྱོད་ནི་རྟ་སྟེ་ཕ་རོལ་འགྲོ། །ཅི་ཁྱོད་དམ་ཚིག་སྙིང་རྗེ་འཆང ། །ེ་མ་ཆང་འཚོང་མཛེས་མའོ། །མི་གཡོ་བདག་མིང་མཱ་མ་ཀཱི། །ཞང་པོའི་གྲོང་ཁྱེར་འཛིན་ནམ་ཅི། །ཁྱོད་ནི་དམ་ཚིག་ཞི་བ་ཉིད། །བུད་མེད་གཡོ་སྒྱུ་འཛིན་ནམ་ཅི། །བདག་ནི་མ་ཡིན་ལྷ་མོ་སྤྱན། །སྤྱན་ཡིན་ན་ནི་གཡོ་དང་བཅས། །ཅི་ཁྱོད་དམ་ཚིག་འདོད་ཆགས་ཆེ། །སྨད་འཚོང་མ་ལ་སྨྲར་ཅི་ཡོད། །བདག་མིང་ལྷ་མོ་དཀར་བ་ཡིན། ཇི་ལྟར་དྲི་མ་དཀར་བ་ཡིན། །ཅི་ཁྱོད་དམ་ཚིག་དབང་བྱེད་ཚེ། །བཙུན་མོའི་ཕོ་ཉ་མིན་ནམ་ཅི། །བདག་མིང་ཟུར་མིག་སྒྲོལ་མའོ། །སྒྲོལ་མ་མིག་ནི་བཅོམ་པ་ཡིན། །མིག་གཡོན་བདག་ནི་ནོར་ལྡན་དཔལ། །དེ་ལྟར་ངོ་ཚ་མེད་པས་ལེགས། །ངོ་ཚ་མེད་པས་སངས་རྒྱས་མིན། །མཐོང་དང་མི་མཐུན་མྱུར་དུ་སྨྲོས། །དེ་ནས་རྡོ་རྗེ་མིག་ཡོན་པོ། །སྨོད་པ་པོས་ནི་རབ་གསུངས་པ། །རྡོ་རྗེ་སེམས་དཔའ་ཞེ་སྡང་ཆེ། །ཐུབ་པ་རྣམ་པར་སྣང་མཛད་རྨོངས། འདོད་ལ་ཞེན་པ་འཇིག་རྟེན་བདག་།སེར་སྣ་རྡོ་རྗེ་སྣང་བྱེད་དེ། །དོན་ཡོད་སྐྱོན་ནི་ཐམས་ཅད་བྱེད། །འདྲེན་པ་ལྔ་ནི་སྐྱོན་ལྡན་ནོ། །སྒོང་སྐྱེས་མངལ་ནས་སྐྱེས་པ་འམ། །དྲོད་གཤེར་སྐྱེས་དང་མཐའ་འཁོབ་བཞིན། །གཟུགས་ཅན་རྣམས་སམ་གཟུགས་མེད་དམ། །རྫུས་ནས་སྐྱེས་པ་ཉིད་དང་ནི། །ཐམས་ཅད་སངས་རྒྱས་བྱའོ་ཞེས། །ཁྱོད་ཀྱིས་དང་པོ་གསུངས་པ་ལ། །ཁྱོད་ཉིད་སངས་རྒྱས་གྱུར་ནས་ནི། །དེ་རྣམས་ཇི་ལྟར་རྒྱལ་མ་མཛད། །དེ་ཉིད 84.270a ཕྱིར་ན་བརྫུན་གསུངས་ངམ། །མངའ་བདག་ཇི་ལྟར་འདི་མ་གསུངས། །སེམས་ཅན་བསླུས་ན་ཁྱོད་ཀྱི་གང ། །སངས་རྒྱས་ཉིད་དེ་ངོ་མཚར་རྨད། །འཆི་བདུན་ཚེ་འམ་མུ་གེ་འམ། །ཕས་ཀྱིས་འཁོར་ལོའི་གནོད་པ་དང ། །རབ་གནས་དཀྱིལ་འཁོར་སྦྱིན་སྲེག་དང ། །ཆར་མེད་པ་དང་ཞི་བ་ལ། །སྔགས་དང་བསྒོམ་པར་ལྡན་པར་ནི། །གང་ཞིག་བདག་ནི་རྟག་རོལ་པ། །དེ་ཡི་མདུན་དུ་བདག་འདུག་སྟེ། །དེར་ནི་བརྫུན་དུ་མི་འགྱུར་རོ། །སློབ་དཔོན་ལྔ་དང་ལྷ་མོ་བཞི། །མི་གཡོ་བདག་ཉིད་སྨོད་པའོ། །དཀྱིལ་འཁོར་ཁང་པའི་གནས་ཉིད་དུ། །སངས་རྒྱས་གར་མཁན་རོལ་པ་མཛད། །ཁམས་གསུམ་དེ་བཞིན་རྩ་བ་འམ། །མ་དག་པའི་ཡང་རྒྱན་རྣམས་ཀྱིས། །སངས་རྒྱས་རྣམས་ཀྱི་གར་མཁན་གར། །བདེ་བ་དགའ་བར་བྱེད་དང་བཅས། །ཆོས་འབྱུང་གྲོང་ཁྱེར་ཉམས་དགའ་བར། །རྡོ་རྗེ་དམ་ཚིག་ཀླུ་ཡིས་དང ། །རྡོ་རྗེ་རྐང་པའི་གོམ་པས་གར། །མཐར་ནི་རྫ་རྔ་ལཱ་སྱེ་སོགས། །ཕྱག་རྒྱ་ཆེན་པོ་རབ་སྟེར་བའི། །འདི་ཉིད་འདིར་ནི་ཆེར་གསང་ངོ ། །རྡོ་རྗེ་སེམས་དཔའི་བཀའ་ཇི་བཞིན། །རབ་ཏུ་འབད་པས་བསྲུང་བར་བྱ། །གླུ་སྣ་ཚོགས་དང་རོལ་མོའི་སྒྲ་དང་གར་དང་འདུལ་བར་འཇུག་པ་དང་ཆར་དབབ་པ་དང་མི་གཡོ་བའི་བདག་ཉིད་ཆེ་བའི་ལེའུ་སྟེ་གཉིས་པའོ།། །། དེ་ནས་རྡོ་རྗེ་འཛིན་པའི་རྒྱལ་པོ་མཁའ་འགྲོ་མ་རྡོ་རྗེ་གུར་གྱི་ཏིང་ངེ་འཛིན་ལ་བཞུགས་ཏེ། འབྱུང་པོའི་གཏོར་མ་གསུངས་པ། ནམ་མཁའི་ཁམས་ཀྱི་དབུས་གནས་པར། །པདྨ་འདབ་བརྒྱད་བསྒོམ་པར་བྱ། །དབང་པོ་ཤར་གྱི་འདབ་མར་བསམ། །མཐར་བྱེད་ལྷོར་ནི་དགོད་པར་བྱ། །ཆུར་གདག་ནུབ་ཀྱི་འདབ་མ་ལ། །བྱང་དུ་ནོར་སྦྱིན་དགོད་པར་བྱ། །མེར་ནི་བྱིན་ཟ་ཆེན་པོ་ཉིད། །བདེན་བྲལ་མཚམས་སྐྱོང་དེ་བཞིན་ནོ། །རླུང་དུ་གནས་མེད་བསམ་པར་བྱ། །དབང་ལྡན་དུ་ནི་འབྱུང་པོའི་གཙོ། །ཟླ་ཉི་ཚངས་པ་ལ་སོགས་དང ། །ཚངས་པའི་རིས་ནི་དམ་པ་དང ། །ཚངས་པའི་འདུན་ན་འདོན་ཉིད་དང ། །དགའ་ལྡན་འཐབ 84.270b བྲལ་གནས་པ་དང ། །རྒྱལ་པོ་ཆེན་པོར་གྱུར་པ་དང ། །གཞན་འཕྲུལ་དབང་སྒྱུར་ཉིད་དང་ནི། །གང་ཞིག་འཕྲུལ་དགའི་གནས་རྣམས་དང ། །གཙང་མའི་གནས་སུ་གང་གནས་དང ། །བདེ་བ་ཅན་དུ་འདུག་པ་དང ། །འོག་མིན་དུ་ནི་གནས་པ་དང ། །འོད་ཟེར་ཅན་གྱི་འཇིག་རྟེན་ཁམས། །སུམ་བཅུ་རྩ་གསུམ་གནས་པ་དང ། །དེ་ཀུན་སྟེང་དུ་གནས་པར་བྱ། །ཆོས་འབྱུང་ནང་དུ་སོན་པ་ནི། །སྟོབས་ཀྱི་རྒྱུ་དང་དུང་སྐྱོང་དང ། །དེ་བཞིན་མཐའ་ཡས་ནོར་རྒྱས་བུ། །འཇོག་པོ་དང་ནི་རིགས་ལྡན་ཉིད། །པད་ཆེན་པདྨ་བཟང་པོ་ཅན། །ལྷ་མིན་དམྱལ་བ་སེམས་ཅན་རྣམས། །ཆོས་ཀྱི་འབྱུང་གནས་འོག་ཏུའོ། །ོཾ་ལས་ཚངས་པ་ལ་སོགས་ལྷ། །ཧཱུཾ་ལས་མ་ཆགས་པ་ལ་སོགས། །ཿ ལས་སྟོབས་ཀྱིས་རྒྱུ་ལ་སོགས། །ལག་གཉིས་གདོང་གཅིག་ལྡན་པ་སྟེ། །སྟེང་གི་ལྷ་རྣམས་དཀར་པོ་ཆེ། །དབང་པོ་ལ་སོགས་ནག་པོར་མཚུངས། །སྟོབས་ཀྱི་རྒྱུ་སོགས་དམར་པོ་ཆེ། །རང་མཚུངས་རིག་མ་ལུས་སྤྲད་ལྡན། །རྡོ་རྗེ་དྲིལ་བུས་ལག་པ་བྲེལ། །གཡས་བརྐྱང་བས་ནི་སྟན་ལ་གནས། །ཚངས་སོགས་རྟག་པས་ཕྱག་རྒྱས་གདབ། །མཆོད་སྦྱིན་བརྒྱ་སོགས་རྡོ་རྗེ་ཡིས། །སྟོབས་ཀྱིས་རྒྱུ་སོགས་གར་དབང་གིས། །ཐམས་ཅད་རིགས་གསུམ་ལས་སྐྱེས་པའོ། །དཀར་མོས་དགུག་པར་བྱས་ནས་ནི། །ཆོམ་རྐུན་མས་ནི་ཞགས་པས་བཅིངས། །རོ་ལངས་མས་ནི་སྒྲོག་བཅིངས་ལ། །གྷསྨ་རཱིས་ནི་དྲིལ་བུས་དབང ། །དེ་ནས་མཆོད་ཡོན་ཞབས་བསིལ་དབུལ། །སྔགས་ནི་འདི་ཡིས་བསང་གཏོར་བྱ། །ོཾ་ཨཱཿ ཧཱུཾ། ཕྱི་ནས་འཐོར་འཐུང་དབུལ་བར་བྱ། །སྔགས་ནི་འདི་ཡིས་གཤེགས་སུ་གསོལ། །ོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་ཝ། སུ་པོ་ཥྱོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཤཱ་ཤཝ་ཏོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སིདྷཱ་བཛྲ་ས་མཡ་ཏིཥྛ། སརྦ་སིདྷི་མིཾ་མེ་པྲ་ཡཙྪ། སརྦྦ་ཀཱརྱེ་ཥུ་མེ་ཙིཏྟཾ་ཤྲེ་ཡཿ ་ཀུ་རུ་ཧཱུཾ་ཧ་ཧ་ཧ་ཧ་ཧོཿ ་བྷ་ག་ཝཾ་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྫ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཿ མུཿ ་དེ་ནས 84.271a རྡོ་རྗེ་འཛིན་པའི་རྒྱལ་པོ་མཁའ་འགྲོ་མའི་རྡོ་རྗེ་མིང་གི་ཏིང་ངེ་འཛིན་ལ་བཞུགས་ཏེ་རྡོ་རྗེ་མིང་ཕྱེ་བའོ། །མིང་གི་དབང་གི་དུས་སུ་ནི། །སློབ་མ་བདག་ཉིད་དབང་བསྐུར་བྱ། །རྡོ་རྗེ་མིང་གིས་དབང་བསྐུར་བ། །སྐྱེས་པ་འདིར་ནི་སངས་རྒྱས་ཉིད། །བཞད་པའི་རྡོ་རྗེ་དང ། སྒེག་པའི་རྡོ་རྗེ་དང ། མཛེས་པའི་རྡོ་རྗེ་དང ། རོལ་པའི་རྡོ་རྗེ་དང ། ཤིན་དུ་དགའ་བའི་རྡོ་རྗེ་དང ། ཤིན་དུ་དགའ་བའི་མྱུ་གུའི་རྡོ་རྗེ་དང ། པདྨོ་རྡོ་རྗེ་དང ། པདྨ་མྱུ་གུ་རྡོ་རྗེ་དང ། ་ལ་ལ་རྡོ་རྗེ་དང ། པདྨ་ལྕགས་ཀྱུ་རྡོ་རྗེ་དང ། ཡེ་ཤེས་རྡོ་རྗེ་དང ། ཡིད་བཞིན་ནོར་བུ་རྡོ་རྗེ་དང ། ཡན་ལག་མེད་པའི་རྡོ་རྗེ་དང་ཤེས་རབ་མྱུ་གུའི་རྡོ་རྗེ་དང ། སྙིང་རྗེ་མྱུ་གུའི་རྡོ་རྗེ་དང ། དམ་པར་དགའ་བའི་རྡོ་རྗེ་དང ། ཤིན་དུ་བདེ་བར་དགའ་བའི་རྡོ་རྗེ་དང ། སྤྱན་རས་གཟིགས་ཀྱི་རྡོ་རྗེ་དང ། འབེབས་པའི་རྡོ་རྗེ་དང ། ནམ་མཁའི་རྡོ་རྗེ་དང ། ཤེས་རབ་རྡོ་རྗེ་དང ། ཕ་རོལ་ཕྱིན་པའི་རྡོ་རྗེ་དང ། འདོད་ཆགས་རྡོ་རྗེ་ནི་དག་པའི་གནས་སུ་ཕྱག་རྒྱ་ཆེན་པོ་གྲུབ་པ་རྣམས་ཀྱི་རྡོ་རྗེའི་མིང་འདི་རྣམས་ཡིན་ནོ། །བུད་མེད་རྣམས་ཀྱི་འབྱུང་སྟེ། རྡོ་རྗེ་སྙེམས་མ་དང ། རྡོ་རྗེ་མཚོན་ཆ་མ་དང ། རྡོ་རྗེ་ཨེ་མའོ་བདེ་མ་དང ། རྡོ་རྗེ་བདག་མེད་མ་དང ། རྡོ་རྗེ་སྤྱན་མ་དང ། རྡོ་རྗེ་མཁའ་འགྲོ་མ་དང ། རྡོ་རྗེ་དཀར་མོ་དང ། རྡོ་རྗེ་སྒྱུ་མ་དང ། རྡོ་རྗེ་འབར་མ་དང ། རྡོ་རྗེ་འཁྲིས་ཤིང་དང ། རྡོ་རྗེ་མགྱོགས་མ་དང ། རྡོ་རྗེ་རོ་ལངས་མ་དང ། རྡོ་རྗེ་ལྕགས་ཀྱུ་མ་དང ། རྡོ་རྗེ་བསྐོར་མ་དང ། རྡོ་རྗེ་འཕྲེང་བ་མ་དང ། རྡོ་རྗེ་ལཱ་སྱཻ་མ་དང ། རྡོ་རྗེ་བཞད་མ་དང ། རྡོ་རྗེ་མཁྱུད་མ་དང ། རྡོ་རྗེ་ཕྱེ་མ་དང ། རྡོ་རྗེ་པདྨ་དང ། རྡོ་རྗེ་འབྱུང་མ་དང ། རྡོ་རྗེ་ཆེན་མོ་དང ། རྡོ་རྗེ་འདོད་ཆགས་མ་དང ། རྡོ་རྗེ་སྒྲོལ་མ་དང ། རྡོ་རྗེ་དོ་ཤལ་མ་དང ། རྡོ་རྗེ་སྒེགས་མོ་དང ། རྡོ་རྗེ་ཀོར་ཀ་ཎ་དང ། རྡོ་རྗེ་ལཱ་ལཱ་མ་དང ། རྡོ་རྗེ་དབུགས་དབྱུང་མ་དང ། རྡོ་རྗེ་རྣམ་པ་མ་ནི་མཁའ་འགྲོ་མ་རྣམས་ཀྱིའོ། །དེ་ནས་དེ་བཞིན་གཤེགས་པ་རྣམས་ཀྱི་མཚན་དུ་གྱུར་པ། ཀྱེའི་ཡི་རྡོ་རྗེ་རྡོ་རྗེ་སེམས་དཔའ་དང ། །རྣམ་སྣང་ཆེན་པོ་དང་ནི་རང་བྱུང་དང ། །རྡོ་རྗེ་ཨརླི་སྐེམས་པའི་ཁྲོ་བོ་དང ། ། 84.271b དེ་བཞིན་དུ་ཡང་རྡོ་རྗེའི་ཁྲོ་བོ་ཉིད། །རྡོ་རྗེ་བདུད་རྩི་བདུད་རྩི་ཐབས་སྦྱོར་དང ། །ཧེ་རུ་ཀ་དང་སྙིང་རྗེའི་སྟོབས་ཉིད་དོ། །རྟག་པ་དང་ནི་གཏི་མུག་རྡོ་རྗེ་དང ། །རྣམ་པར་སྣང་མཛད་དང་ནི་ཐམས་ཅད་སྐྱོབ། །སྒྱུ་འཕྲུལ་དང་ནི་དེ་ནས་ཨོཾ་མཛད་དང ། །སྐུའི་རྡོ་རྗེ་རབ་ཏུ་གྲགས་པ་དང ། །ས་སྙིང་དང་ནི་གཏི་མུག་ཆེན་པོ་དང ། །གཤེན་རྗེ་གཤེད་དང་ཐོ་བའི་དབང་ཕྱུག་དང ། །དེ་བཞིན་གཤེགས་དང་ཤཱཀྱ་ཐུབ་པ་དང ། །སངས་རྒྱས་ཞེས་བྱར་རབ་ཏུ་གྲགས་པའོ། །རྡོ་རྗེ་ཉི་མ་དེ་ནས་རིན་ཆེན་བདག་།དེ་བཞིན་དུ་ཡང་རིན་ཆེན་རྒྱལ་པོ་ཉིད། །རྡོ་རྗེ་གཟི་བརྗིད་དང་ནི་རྒྱལ་པོ་ཆེ། །རྡོ་རྗེ་བདུད་ཟིལ་གནོན་དང་སྣང་བྱེད་དོ། །རྟ་འགྲིན་དང་ནི་འཇིག་རྟེན་བདག་པོ་དང ། །རྡོ་རྗེ་ཆོས་དང་སྤྱན་རས་གཟིགས་དང་ནི། །པདྨ་གར་དབང་དང་ནི་འདོད་ཆགས་དང ། །འཇིག་རྟེན་མགོན་པོར་རབ་ཏུ་གྲགས་པའོ། །དམ་པའི་རྟ་དང་རྟ་ཡི་རྒྱལ་པོ་དང ། །བདུན་ཀྱི་རྒྱལ་པོ་དེ་ནས་ལྕགས་རྒྱལ་དང ། །དམ་ཚིག་རྡོ་རྗེ་དང་ནི་རྟ་མཆོག་དང ། །དེ་བཞིན་དུ་ཡང་ལས་ཀྱི་རྡོ་རྗེ་ཉིད། །དོན་ཡོད་དང་ནི་དོན་ཡོད་གྲུབ་པ་དང ། །རྡོ་རྗེ་མགྱོགས་འགྲོར་རབ་ཏུ་གྲགས་པའོ། །རྡོ་རྗེ་སེམས་དཔའ་དེ་ནས་རྡོ་རྗེ་ཅན། །རྣམ་པར་རྒྱལ་བ་ཕྱག་ན་རྡོ་རྗེ་དང ། །དཔེ་མེད་རོ་མཉམ་ཤིན་དུ་དགའ་བ་དང ། །དམ་པ་དང་པོ་བདེ་བ་ཆེན་པོའོ། །འདོད་ཆགས་ཞེ་སྡང་གཏི་མུག་དང ། །དམ་ཚིག་སེམས་དཔའ་ནོར་བུ་ནི། །འདི་རྣམས་རིགས་ནི་དྲུག་ཏུ་བརྗོད། །འདོད་པའི་ཐར་པ་རབ་བསྒྲུབ་པའོ། །དེ་བཞིན་གཤེགས་པ་ཐམས་ཅད་ཀྱི་མཚན་གྱི་ལེའུ་སྟེ་གསུམ་པའོ།། །། རྡོ་རྗེ་སྙིང་པོ་མངོན་བྱང་ཆུབ། །བརྟག་པའི་རྒྱལ་པོ་དང་པོ་ཉིད། །སྒྱུ་མའི་བརྟག་པ་གཉིས་པ་སྟེ། །རྡོ་རྗེ་གར་ནི་གསུམ་པའོ། །བཞི་པ་སྣ་ཚོགས་བརྟག་པ་སྟེ། །རྡོ་རྗེ་བརྟག་པ་ལྔ་པ་ཡི། །བརྟག་པ་དྲུག་པ་སྟོབས་པོ་ཆེ། །བརྟག་པ་བདུན་པ་མི་གཡོ་མགོན། །བརྒྱད་པ་གཟུངས་ཀྱི་བརྟག་པ་སྟེ། །མཁའ་འགྲོ་ཀུ་རུ་ཀུལླེ་དགུ། །བཅུ་པ་འདུལ་བའི་བརྟག་པ་སྟེ། །རྣམ་པར་སྣང་མཛད་བཅུ་གཅིག་ལ། །དངོས་གྲུབ་བརྟག་པ་བཅུ་གཉིས་པ། ། 84.272a སྒྲོལ་མའི་བརྟག་པ་བཅུ་གསུམ་པ། །རྡོ་རྗེ་ཕག་མོ་བཅུ་བཞི་པ། །བཅུ་ལྔ་པ་ནི་གཟི་བརྗིད་ཆེ། །བདག་མེད་བརྟག་པ་བཅུ་དྲུག་པ། །གཤེན་རྗེ་གཤེད་ཀྱི་བཅུ་བདུན་པ། །ཧཱུཾ་མཛད་ཀྱི་ནི་བཅཝ་བརྒྱད་པ། །དབྱངས་མཛད་ཅན་གྱི་ནི་བཅུ་དགུ་པ། །སྦྱིན་བསྲེག་བརྟག་པ་ཉི་ཤུ་པ། །རབ་གནས་ཉི་ཤུ་རྩ་གཅིག་པ། །དཀྱིལ་འཁོར་ཆེན་པོའི་བརྟག་པ་ནི། །ཉི་ཤུ་རྩ་ནི་གཉིས་སུ་འདོད། །གཏོར་མའི་བརྟག་པ་ཉི་ཤུ་གསུམ། །ཉི་ཤུ་བཞི་པ་སྟ་གོན་གནས། །མངོན་པར་རྟོགས་པ་ཉི་ཤུ་ལྔ། །དེ་བཞིན་ཕྱག་རྒྱ་ཉི་ཤུ་དྲུག་།བྱེད་པ་ཉི་ཤུ་རྩ་བདུན་པ། །གླུ་ནི་ཉི་ཤུ་རྩ་བརྒྱད་པ། །གར་གྱི་དབང་ཕྱུག་བརྟག་པ་ནི། །སུམ་བཅུར་གཅིག་མེད་སུམ་བཅུ་པ། །བརྟག་པ་སུམ་བཅུ་པར་ནི་བཤད། །སྟོང་ཕྲག་གསུམ་བཅུའི་གྲངས་ཀྱིས་ནི། །མཁའ་འགྲོ་མཁའ་འགྲོ་མ་རྣམས་ཀྱི། །འབུམ་ཕྲག་ལྔ་ཡི་རྒྱ་མཚོ་ཆེ། །ཀྱེ་ཡི་རྡོ་རྗེ་འཆང་གི་ནི། །རྒྱུད་ནི་ཨེ་མ་རྒྱས་བསྟན་པ། །འབུམ་ཕྲག་ལྔ་བདག་ཀྱེ་རྡོ་རྗེ། །དག་པའི་སྙིང་པོ་ཡོངས་སུ་བཟུང ། །རྡོ་རྗེ་མཁའ་འགྲོས་གསུངས་པ་སྟེ། །འདི་ནི་རྒྱུད་ཀྱིས་ངེས་པའོ། །ཀྱེ་ཡི་རྡོ་རྗེ་རྣལ་འབྱོར་རྒྱུད། །དང་པོར་རྒྱལ་བ་རྣམས་ཀྱིས་བཤད། །ཕྱི་ནས་རྣལ་འབྱོར་མ་རྒྱུད་ནི། །དེ་ཉིད་བུད་མེད་བཟུང་ཕྱིར་རོ། །བཅོམ་ལྡན་འདས་ཇི་ལྟར་ན་སྤྲོས་པ་ལས་བསྡུས་པ་ལགས། བསྐལ་པ་བཟང་པོ་ལ་བྱང་ཆུབ་སེམས་དཔའ་རྣམས་དང་སོ་སོའི་སྐྱེ་བོ་རྣམས་ཚེ་ཐུང་བར་འགྱུར་ན། ཇི་ལྟར་ན་དེ་རྣམས་འཛིན་པར་འགྱུར། ཇི་ལྟར་ན་དེ་རྣམས་ཐོས་པར་འགྱུར། ཇི་ལྟར་ན་སེམས་པར་འགྱུར། བཅོམ་ལྡན་འདས་ཇི་ལྟར་ན་སྐྱེ་བོ་ཕལ་པ་ཚེ་ཐུང་བར་འགྱུར། རྡོ་རྗེ་འཛིན་པས་བཀའ་སྩལ་པ། རེ་ཤིག་གང་དག་སློབ་དཔོན་རྣམས་སུ་འགྱུར་བ་དེ་རྣམས་རྩ་བའི་ལྟུང་བ་འབྱུང་བར་འགྱུར་བ་དང ། གང་དག་སྤྱོད་པ་པོ་དེ་རྣམས་མི་དགེ་བ་བཅུའི་ལས་ཀྱི་ལམ་ལ་སྤྱོད་པར་འགྱུར་བ་དང ། གང་དག་སོ་སོའི་སྐྱེ་བོ་དེ་རྣམས་སྲོག་ཆགས་གསོད་པར་འགྱུར་བ་དང ། གང་དག་བུད་མེད་ཀྱི་ཚོགས་རྣམས་གཅིག་ཏུ་འདོད་པ་ལ་ཞེན་པར 84.272b འགྱུར་བ་སྟེ། དེའི་ཕྱིར་རྒྱུད་རྣམས་ཐམས་ཅད་རྒྱས་པར་བསྟན་པ་མ་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྡོ་རྗེ་འཛིན་པའི་རྡོ་རྗེ་གསུང་རྡོ་རྗེ་ཐོས་ནས་མཉེས་པར་འགྱུར་ཅིང་དགྱེས་པ་བརྙེས་ནས་ཚིག་འདི་གསུངས་པ། སྙིང་རྗེ་ཆེན་པོ་ཀྱེའི་རྡོ་རྗེ། །ང་ནི་དུར་ཁྲོད་ཆུ་འགྲམ་དང ། །ནགས་ཚལ་སྐྱེ་བོ་མེད་གྲོང་དུ། །བསྙེན་བཀུར་ཅན་ལ་དངོས་གྲུབ་སྟེར། །མཚོ་སྐྱེས་རྣམ་པའི་འགྲམ་ཡིད་འོང ། །སྐུ་གདུང་ཟབ་མོའི་མཆོད་རྟེན་དང ། །རྐང་འཐུང་རློན་པའི་འོག་ཏུ་ནི། །ང་ནི་སངས་རྒྱས་དངོས་གྲུབ་སྟེར། །ཚོང་དུས་ཚོང་རྡལ་ཉིད་དང་ནི། །ཚོང་དུས་རྣམ་པའི་ཁྱིམ་དུ་ནི། །རྡོ་རྗེ་ཉི་མ་བསྟན་པ་ང ། །བསྙེན་བཀུར་ཅན་ལ་དངོས་གྲུབ་སྟེར། །གླུ་གར་རབ་ཏུ་འཆིང་བ་དང ། །ཆང་འཚོང་མ་ཡི་ཁྱིམ་དུ་ནི། །འདི་ལྟར་པདྨ་གར་མཁན་ང ། །བསྙེན་བཀུར་ཅན་ལ་དངོས་གྲུབ་སྟེར། །རྟག་ཏུ་འགྲོ་མགྱོགས་ཞོན་འགྱུར་དང ། །རེས་འགའ་ལམ་དུ་འགྲོ་བ་ན། །རྟ་ནི་དོན་ཡོད་བསྟན་པ་ང ། །དངོས་གྲུབ་རྡོ་རྗེ་རྣམ་སྟེར་རོ། །དེ་ནས་བཅོམ་ལྡན་འདས་རྡོ་རྗེ་ཅན་ཆེན་པོ་མཁའ་འགྲོ་མ་རྡོ་རྗེ་གུར་ཕྱག་རྒྱ་རྣམ་པར་རྒྱལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཕྱག་རྒྱ་དང་ཕྱག་མཚན་ཡང་དག་པར་བཤད་པ། སྐུ་གསུང་ཐུགས་ཀྱི་བརྟག་པ་ལས། །ཕྱག་རྒྱ་རྣམ་གསུམ་ཤེས་པར་བྱ། །སྐུ་ལ་ལག་པའི་ཕྱག་རྒྱ་ཡིན། །སྔགས་བཟླས་པ་ལས་ངག་ཕྱག་རྒྱ། །སེམས་ལ་མཚན་མའི་ཕྱག་རྒྱ་ཡིས། །དེ་ཉིད་བསམ་གཏན་དཀྱིལ་འཁོར་ལའོ། །ལག་པ་གནས་ན་བསྐམ་པ་སྟེ། །གཡོན་ན་སྡིགས་མཛུབ་དེ་བཞིན་ནོ། །མཁའ་འགྲོ་སྐམ་པ་འཇིགས་མ། །གདུག་པ་རྣམས་ཀྱི་འཁོར་བ་འདོན། །གཡས་པའི་ལག་ན་ཞགས་པ་སྟེ། །གདུགས་པ་རྣམས་བཅིངས་རྣམ་པར་དགག་།ད་འདི་ཞགས་པ་མ་ཞེས་བྱ། །གཡོན་པས་གདུག་པ་སྡིགས་འཛུབ་མ། །གཡས་ན་ཉ་རྒྱ་ཟླུམ་པོ་སྟེ། །གདུག་པ་རྣམས་ནི་དཀྲི་བར་འདོད། །འདི་ནི་རྟག་ཏུ་དོལ་ཟླུམ་བཤད། །གཡོན་པས་སྡུག་པ་སྡིགས་མཛུབ་མཛད། །ལག་པ་གཡས་པར་ལྕགས་ཀྱུ་སྟེ། །གདུག་པ་རྣམས་ནི་དགུག་པར་འདོད། །འདི་དེ་རྡོ་རྗེ་ཀྱོ་མར་བཤད། །གཡོན 84.273a པས་བདུད་ལ་སྡིག་མཛུབ་མ། །ལག་པ་གཡས་པས་ཉི་མ་སྟེ། །གཏི་མུག་མུན་པ་རྣམ་པར་དྲལ། །གཡོན་པས་སྡིག་འཛུབ་མར་ནི་བཤད། །དེ་ནི་རྡོ་རྗེ་ཉི་མར་བརྗོད། །ལག་གཡས་མར་མའི་སྡོང་སྣོད་དེ། །དེ་བཞིན་གཡོན་པར་སྡིགས་འཛུབ་བོ། །འདི་དེ་རྡོ་རྗེ་མར་མེར་བཤད། །རྣམ་པར་རྟོག་པའི་རབ་རིབ་འཇོམས། །ལག་པ་གཡས་ན་རིན་པོ་ཆེ། །སེམས་ཅན་རྣམས་ལ་སྦྱིན་པ་སྟེར། །གཡོན་ན་སྡིག་འཛུབ་འཛིན་པ་མོ། །རིན་ཆེན་སྒྲོན་མ་འདི་རབ་བརྗོད། །གློག་ནི་ལག་པ་གཡས་པ་སྟེ། །རྣམ་པར་རྟོག་པའི་ཆུ་འཛིན་འཇོམས། །དེ་འདི་གློག་ལག་མར་ཤེས་བྱ། །དེ་བཞིན་གཡོན་པས་སྡིགས་འཛུབ་མ། །ལག་པ་གཡས་པར་པདྨ་སྟེ། །པདྨའི་འདོད་ཆགས་བརྗོད་པར་བྱ། །གཡོན་པས་སྡིག་འཛུབ་མ་ཉིད་དེ། །འདི་ནི་མཁའ་འགྲོའི་པདྨ་མར་བརྗོད། །གཡས་པར་བྷ་གའི་པདྨ་སྟེ། །བདེ་བ་ཆེན་པོ་རྣམ་པར་འཕེལ། །གཡོན་ན་སྡིག་འཛུབ་མཛད་མ་སྟེ། །འདི་ནི་ཆོས་འབྱུང་མར་ནི་བརྗོད། །གཡས་པའི་ལག་ན་ལྕགས་སྒྲོག་སྟེ། །བྱང་ཆུབ་ཞེན་པས་ཀུན་འཆང་བ། །གཡོན་ན་སྡིག་འཛུབ་འཛིན་མ་སྟེ། །འདི་ནི་རྡོ་རྗེ་སྒྲོག་མེར་བརྗོད། །སངས་རྒྱས་རྗེས་ཆགས་འཆིང་བ་ཡིས། །བདག་ཉིད་འཁྱུད་པར་འདོད་པ་སྟེ། །བྱང་ཆུབ་ཆགས་པས་རབ་བསྒྲུབ་མ། །དེ་འདི་རྡོ་རྗེ་འདུད་མར་བཤད། །གཡས་པའི་ལག་ན་སྒོ་ལྕགས་ཏེ། །ཡེ་ཤེས་ཀུན་གྱི་བསྲུང་བ་མོ། །གཡོན་ན་སྡིགས་འཛུབ་འཛིན་པ་མོ། །འདི་དེ་རྡོ་རྗེ་སྒོ་ལྕགས་བརྗོད། །གཡས་པའི་ལག་ཏུ་ལྡེ་ཀྱོག་སྟེ། །ཡེ་ཤེས་བླངས་ནས་གཅོད་པ་མོ། །གཡོན་ན་སྡིགས་འཛུབ་འཛིན་པ་མོ། །འདི་དེ་རྡོ་རྗེ་ལྡེ་ཀྱོག་བརྗོད། །གཡས་པའི་ལག་ཏུ་སྒོ་མོ་ནི། །ཡེ་ཤེས་སྐྱེས་པ་མ་སྤངས་པ། །གཡོན་ན་སྡིག་འཛུབ་འཛིན་པ་མོ། །འདི་ནི་རྡོ་རྗེ་སྒོ་མར་བརྗོད། །ལག་པ་གཡས་པར་ཡོལ་བ་ནི། །རང་མཚུངས་བཙུན་མོ་བསྲུང་བ་ཉིད། །གཡོན་ན་སྡིགས་འཛུབ་འཛིན་པ་མོ། །རྡོ་རྗེ་ཡོལ་བ་མར་ནི་བརྗོད། །དེ་འདི་སངས་རྒྱས་ཐམས་ཅད་ཀྱི། །མཁའ་འགྲོ་མ་ནི་དམ་པའི་ཚོགས། །མཁའ་འགྲོ་ལྔ་ནི་རབ་བསྒྲུབ་ཕྱིར། །མཁའ་འགྲོ་མའི་རྒྱུད་གསུངས་སོ། །དེ་ནས་བྱང་ཆུབ 84.273b སེམས་དཔའ་དེ་རྣམས་ཐམས་ཅད་མཁའ་འགྲོ་མའི་རྡོ་རྗེའི་གསུང་ཐོས་ནས་ངོ་མཚར་སྐྱེས་པར་གྱུར་ཏེ། བཅོམ་ལྡན་འདས་ཕྱག་རྒྱ་འཕྲོག་པ་འདི་ཅི་ཉི་ཚེ་བའི་དམ་ཚིག་ཕྱག་རྒྱ་གསུངས་པ་ལགས་སམ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ལ་འདི་སྐད་ཅེས་བཀའ་སྩལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས། འོད་ཟེར་ཅན་གྱི་འཇིག་རྟེན་གྱི་ཁམས་ན་རྡོ་རྗེ་ངེས་པར་བརྗོད་པ་ཞེས་བྱ་བའི་ལུང་བསྟན་པ་ཡོད་དེ་འདི་ནི་དེའི་ཡིན་ཏེ། ཌཻ་བཻ་ཧ་ཡ་ས་ག་མ་ནེའི་སྐད་ཀྱི་དབྱིངས་འདིར་རྣམ་པར་བརྟགས་པ་སྟེ། ཐམས་ཅད་ཀུན་དུ་ནམ་མཁའ་སྤྱོད་པར་གྲུབ་པས་འདི་ནི་མཁའི་འགྲོ་མར་རབ་ཏུ་གྲགས་སོ། །དེ་ནས་བྱང་ཆུབ་སེམས་དཔའ་དེ་རྣམས་ཐམས་ཅད་ཚིག་འདི་ཐོས་ནས་དགའ་དང་མགུ་བ་ཉེ་བར་སྐྱེས་པར་འགྱུར་བ་དང་ཚིག་འདི་གསོལ་པ། ཨེ་མ་མཁའ་འགྲོ་མའི་རྒྱུད། །རྒྱུད་ཀུན་ལས་ནི་ཕྱི་མ་དང ། །རྟོགས་སླ་རྟོགས་པར་དཀའ་བ་དང ། །རིག་དང་མི་རིག་པ་ཉིད་པའོ། །དེ་ནས་དེ་བཞིན་གཤེགས་པ་མི་བསྐྱོད་པ་ལ་སོགས་པ་རྡོ་རྗེ་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་རྣམས་ཀྱི་སེམས་བསྐུལ་བའི་ཕྱིར་འདི་སྐད་ཅེས་གསུངས་སོ། །བཅོམ་ལྡན་འདས་བྱང་ཆུབ་སེམས་དཔའ་ཐམས་ཅད་འདི་ལ་རྡོ་རྗེ་གུར་རྒྱུད་ཀྱི་རྒྱལ་པོ་ཆེན་པོ་འདིར་ཇི་ལྟར་རྣལ་འབྱོར་མ་རྣམས་དང ། ་་མཁའ་འགྲོ་མ་རྣམས་ཀྱིས་བསྡུ་བ་ཡིན། བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་ཀྱིས་གསོལ་པ། སྒོ་ང་ལས་སྐྱེས་པ་ལ་སོགས་པ་མཐའ་ཡས་པ་ངས་སྲིད་པ་ལས་བསྒྲལ་བར་བྱའོ་ཞེས་སྨོན་ལམ་སྔོན་དུ་འགྲོ་བའི་བྱང་ཆུབ་གོང་དུ་རྡོ་རྗེ་འཛིན་པས་གསུངས་ན། ཅིའི་ཕྱིར་ན་སྲོག་ཆགས་རྣམས་གསད་པ་དང ། གཅིག་ཏུ་འདོད་པའི་བཙུན་མོ་རྣམས་སྤངས་ལགས། ལྟ་བ་རྣམས་ལས་ལོག་རྣམས་དང ། །བཙུན་མོ་རྣམས་ནི་བསྡུ་བའི་ཕྱིར། །མཁའ་འགྲོ་མའི་རྒྱུད་བཤད་དོ། །བདེ་བའི་ཐབས་ནི་མདོར་བསྡུས་པ། །གཞུང་ཉུང་དོན་ནི་རྒྱས་པ་སྟེ། །བློ་དམན་རབ་ཏུ་སད་བྱེད་པ། །རྒྱུད་ཀུན་གྱི་ནི་སྙིང་པོར་ངེས། །སྔགས་རྣམས་ཀྱི་ནི་ཁྱད་པར་དུའོ། །རྡོ་རྗེ་ངེས་པར་བརྗོད་པ་ཞེས་བྱ་བའི་ཏིང་ངེ་འཛིན་ཏོ། །འདི་ནི་བཤད་པ་ཙམ་གྱིས་ནི། །བདག་མེད་རྣལ་འབྱོར་མ 84.274a ཉིད་ཀྱིས། །སྔོན་དུ་གར་གྱིས་མཆོད་བྱས་ནས། །རང་གི་འཁོར་ལོ་འདི་གསུངས་པ། །སངས་རྒྱས་རྡོ་རྗེ་སེམས་དཔའ་དང ། །གལ་ཏེ་རྡོ་རྗེ་ཆོས་དང་ནི། །རྟ་མཆོག་རྡོ་རྗེ་ཉི་མ་ཡང ། །བདག་གིས་སྤངས་ན་མི་འགྲུབ་སྟེ། །ང་ཉིད་སངས་རྒྱས་ཐམས་ཅད་ཀྱི། །ཡུམ་གྱི་གཟུགས་ཀྱིས་བསྐྱེད་པར་བྱེད། །དེ་རྣམས་ཀྱི་ནི་མཛེས་མ་ང ། །དེ་ལ་ང་ནི་དངོས་གྲུབ་སྟེར། །མིག་སྨན་དང་ནི་རྐང་བྱུག་དང ། །རལ་གྲི་ས་འོག་བསྒྲུབ་པ་དང ། །རི་ལུ་མཁའ་ལ་སྤྱོད་པ་དང ། །མི་སྣང་བ་དང་བཅུད་ཀྱིས་ལེན། །རིག་འཛིན་འཁོར་ལོས་བསྒྱུར་ཉིད་དང ། །བུ་མོ་དམ་པ་དགུག་པ་ནི། །བདག་མཉེས་པས་ནི་བསྒྲུབ་པ་པོས། །དངོས་གྲུབ་རྡོ་རྗེ་རྣམས་འཐོབ་བོ། །སྤྲོས་པ་རྣམ་པ་མང་པོར་ནི། །སྨྲས་པས་འདིར་ནི་ཅི་ཞིག་བྱ། །བདག་སྤངས་ངེས་པར་མི་འགྲུབ་ཅིང ། །བྱང་ཆུབ་མེད་ཅིང་བསྒོམ་པ་མེད། །གང་ཞིག་རྟག་ཏུ་བདག་དྲན་ཞིང ། །རྟག་ཏུ་ཀློག་ཅིང་སེམས་པ་དང ། །སྔགས་ཀྱི་ཕྲེང་བ་བཟླས་པ་དང ། །ང་ཡི་སྐུ་ནི་བསྒོམ་བྱེད་པ། །གལ་ཏེ་སྒྱུ་མའི་ཚུལ་གྱིས་སམ། །གལ་ཏེ་རྨི་ལམ་འདྲ་བར་བལྟ། །ཤིན་དུ་བསྒོམ་པའི་རིམ་པ་ལས། །མངོན་གསུམ་དུ་ནི་མཐོང་བར་འགྱུར། །གཟུགས་བརྙན་རབ་ཏུ་སྦྱོར་བ་ལས། །དེ་ཡི་དངོས་གྲུབ་སྦྱིན་པར་བྱ། །རྡོ་རྗེ་པདྨ་རབ་སྦྱོར་བས། །ཤིན་དུ་བདེ་ཆེན་སྦྱོར་བ་ལས། །གང་ཞིག་བདག་ལ་འདོད་སྟེར་བ། །ལུས་ཅན་དེ་ལ་སྨོས་ཅི་དགོས། །གང་ཞིག་ཉི་མ་གཅིག་བསྒོམ་པ། །རྡོ་རྗེ་མཆོད་པའི་སྦྱོར་བ་ལས། །ཤེས་རབ་ཕ་རོལ་ཕྱིན་དངོས་གྲུབ། །སྟེར་དེ་འདི་ལ་ཐེ་ཚོམ་མེད། །བདག་ཉིད་ཧེ་རུ་ཀར་བྱས་ཤིང ། །རང་གི་བཙུན་མོ་རང་བསྒོམས་ནས། །གང་ཞིག་རྣལ་འབྱོར་ཆེར་འདོད་པ། །དེ་རྣམས་ལ་ནི་ང་མཉེས་འགྱུར། །འདོད་པའི་ཡོན་ཏན་ལྔ་ལྡན་ཞིང ། །སྤྲོ་བ་དགའ་བར་ལྡན་པ་དང ། །གླུ་དང་རོལ་སྒྲའི་རྣམ་པ་དང ། །འདོད་ཀུན་བདེ་བ་སྤྲོ་བ་དང ། །སྣ་ཚོགས་སྒེག་པར་ལྡན་པ་དང ། །སྣ་ཚོགས་རོ་ཡི་བཏུང་བ་དང ། །སྣ་ཚོགས་གོས་ནི་རི་མོ་ཅན། །སྣ་ཚོགས་དྲི་ཡི་བྱུག་པ་ཡིས། །གང་ཞིག་བདག་དང་རྟག་ཉལ་བ། །དེ་ཡི་དངོས་གྲུབ་སྟེར་བ་ང ། །ཕྱག་རྒྱ་ཆེན་པོའི་གནས་ན་འདུག་།དེ་ཡི་འདོད་པ་མར་གྱུར་ཏོ། །ོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ 84.274b ོ་ཨཽ་སཝཱ་ཧཱ། གང་ཞིག་འདིས་ང་བསྐུལ་བར་བྱེད་པའི་རྒྱལ་བའི་སྲས་དེ་རྣམས་ཀྱི་ལག་ཏུ་བུད་མེད་ཀྱི་སྒྱུ་མའི་བདེ་བ་ཡང་དག་པར་གནས་ཀྱིས་འདུག་གོ། །རྡོ་རྗེ་མ་ནི་ཤར་དུ་སྦྱིན་པར་བྱའོ། །ལྷོ་ཕྱོགས་སུ་ནི་དཀར་མོའི་གཟུགས་ཅན་མའོ། །ནུབ་ཕྱོགས་སུ་ནི་ཆུའི་མཁའ་འགྲོ་མའོ། །བྱང་དུ་ནི་རྡོ་རྗེ་མཁའ་འགྲོ་མའོ། །ང་དབུས་སུ་བཞག་སྟེ་སྙིང་པོ་དང་བཅས་པའི་དཀྱིལ་འཁོར་དུ་གང་ཞིག་བསམ་པར་བྱེད་པ་དེའི་བདག་མཛེས་མ་སྟེ། ཕྱག་གཉིས་མ་ཞལ་གཅིག་མའོ། །གྲི་གུག་དང་སྐྱེས་པའི་ཐོད་པས་བྲེལ་བ། སྟག་གི་ལྤགས་པ་བགོས་པ། སྤྱན་གསུམ་པ། སྐྲ་གྱེན་དུ་བརྫེས་པ། ཕྱག་རྒྱ་ལྔས་རྣམ་པར་བརྒྱན་པ། ཤར་གྱི་སྒོར་ནི་དཀར་མོ་ཆེན་མོའོ། །ལྷོར་ནི་ཆོམ་རྐུན་མའོ། །ནུབ་ཕྱོགས་ཀྱི་སྒོར་ནི་ཆུ་མའོ། །དེ་བཞིན་དུ་བྱང་དུ་ནི་གྷསྨ་རཱིའོ། །དབང་ལྡན་དུ་ནི་པུཀྐ་སཱིའོ། །འཚེད་མའི་མཚམས་སུ་ནི་རི་ཁྲོད་མའོ། །སྲིན་པོའི་ཕྱོགས་སུ་ནི་གདོལ་པ་མོའོ། །རྟག་ཏུ་འགྲོ་བར་ནི་གཡུང་མོའོ། །འདི་རྣམས་ནི་མཚམས་དང་མཚམས་བྲལ་དུ་སྦྱིན་ནོ། །གང་ཞིག་བདག་རབ་ཏུ་བསྒོམ་པར་བྱེད་པ་དེའི་ལག་མཐིལ་དུ་ཕྱིན་པའི་དཔལ་སུས་ཀྱང་དབྲོག་པར་མི་ནུས་སོ། །ཐམས་ཅད་ཀྱང་ཁ་དོག་ནག་པོར་མཚུངས་པ་རབ་ཏུ་སོན་པའི་སྟེང་དུ་གར་དང་བཅས་པ་ཁྲོ་མོ་ཆེན་མོ་དཔའ་མོ། གཡོན་ཁཊྭཱཾ་ག་འཛིན་པའོ། །དེ་ནས་བཅོམ་ལྡན་འདས་རྡོ་རྗེ་ཅན་མཁའ་འགྲོ་མའི་རྡོ་རྗེ་གུར་མཆོག་ཏུ་དགའ་བའི་ཏིང་ངེ་འཛིན་ལ་བཞུགས་ཏེ། རིག་མའི་དབང་ཡང་དག་པར་བཤད་པ། རང་གི་རིག་མ་སྐྱེས་བུའི་ཆུས། །བུམ་པ་བརྒྱད་པོ་ཐམས་ཅད་ཀྱིས། །རྡོ་རྗེ་ཐུགས་ནི་རབ་བསྒོམས་པས། །རྡོ་རྗེ་ཅན་བསམ་དབང་བསྐུར་བྱ། །རྡོ་རྗེ་ཉི་མ་རབ་བསྒོམས་པ། །དེར་ནི་ཨུ་རྒྱན་སྦྱིན་པར་བྱ། །ཐམས་ཅད་སྔོན་སྦྱིན་དེས་བསམས་རྣམས། །རྡོ་རྗེའི་ཚིགས་བཅད་སྦྱོར་བ་ལས། །རྡོ་རྗེ་ཆེན་པོ་རྩེ་དགུ་པ། །སྙིང་གར་རང་གི་ལག་པས་བྱ། །སློབ་མ་འཇིག་རྟེན་དབང་ཕྱུག་བྱས། །རྡོ་རྗེ་སེམས་དཔས་དབང་བསྐུར་བྱ། །སངས་རྒྱས་རྡོ་རྗེའི་དབང་གིས་ནི། །དེ་རིང་ཁྱོད་ནི་དབང་བསྐུར་འགྱུར། །འདི་དེ་སངས་རྒྱས 84.275a ཐམས་ཅད་ཉིད། །བཟང་བསྒྲུབ་ཕྱིར་ནི་རྡོ་རྗེ་བཟུང ། །སློབ་མ་ལྕགས་མཆོག་ལྷ་མོ་ནི། །སྒྲོལ་མས་འཁྱུད་པར་བསམ་པར་བྱ། །ལག་པས་རྡོ་རྗེ་དྲིལ་འཁྲོལ་ཞིང ། །རྡོ་རྗེ་བདག་པོས་དབང་བསྐུར་བྱ། །ོཾ་བཛྲཱ་དྷི་པ་ཏི་ཏྭ་མ་བྷི་ཥཉྩཱ་མི་ཏིཥྛ་བཛྲ་ས་མ་ཡ་སྟྭཾ། སློབ་མ་རྣམ་སྣང་བྱས་ནས་ནི། །མིང་གིས་ཀྱང་ནི་དབང་བསྐུར་བྱ། །ོཾ་བཛྲ་སཏྭ་ཏྭམ་བྷི་ཥིཉྩཱ་མི་བཛྲ་ནཱ་མཱ་བྷི་ཥེ་ཀ་ཏ། ཀྱེ་ཆེ་གེ་མོ་རྡོ་རྗེ། གང་གང་ཀུན་གྱི་རང་གཙོར་གྱུར། །དེ་དེ་བདག་ཉིད་ཧེ་རུ་ཀ་།སངས་རྒྱས་ཡེ་ཤེས་འབྱུང་བའི་ཕྱིར། །ཆོས་ཀྱི་རང་བཞིན་དག་པའོ། །འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །རྡོ་རྗེ་སྙིང་པོ་བརྟུལ་ཞུགས་བརྟན། །ཁྱོད་ཀྱིས་ཀྱང་ནི་རྟག་ཏུ་ཟུང ། །ོཾ་སརྦ་ཏ་ཐཱ་ག་ཐ་ཏ་སིད་བཛྲ་ས་མ་ཡ་ཏིཥྛ་ཨེ་ཥོ་སྟྭཾ་དྷ་ར་ཡཱ་མི་ཧཱ་ཧི་ཧི་ཧི་ཧི་ཧི་ཧཱུཾ། ཀུན་ཀྱང་ཆོ་ག་གཅིག་པ་ཡིས། །རྟག་ཏུ་བླ་མེད་མཆོད་པས་ནི། །སློབ་མ་རྡོ་རྗེ་བརྟུལ་ཞུགས་སྦྱིན། །ཕྱིས་ནི་རྡོ་རྗེ་ལག་ནས་ལག་།སེམས་དཔའ་ཐོག་མ་ཐ་མ་མེད། །རྡོ་རྗེ་སེམས་དཔའ་དགའ་ཆེན་པོ། །ཀུན་དུ་བཟང་པོ་ཀུན་གྱི་བདག་ཡང་ན་དེ་རིང་དྲིལ་བུ་སྦྱིན། །ཤེས་རབ་ཕ་རོལ་ཕྱིན་སྐྱེས་པའི། །རྡོ་རྗེ་དྲིལ་བུ་ཞེས་བྱ་བ། །སེམས་ཅན་ཀུན་གྱི་དོན་གྱི་ཕྱིར། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བརྗོད། །རྒྱལ་བས་བྱང་ཆུབ་མཆོག་བརྗོད་པ། །ཁྱོད་ཀྱིས་ཀྱང་ནི་རྟག་ཏུ་བཟུང ། །དབུགས་འབྱིན་ཐམས་ཅད་བྱིན་ནས་ནི། །ཤཱཀྱ་ཐུབ་པར་རང་གྱུར་པས། །སློབ་མ་ཆེན་པོ་ལུང་བསྟན་ཏོ། །སངས་རྒྱས་ཉིད་དུ་ཐེ་ཚོམ་མེད། །ཁྱོད་ནི་འཆི་འཇིགས་མྱ་ངན་མེད། །དེ་བཞིན་ནད་དང་ཚ་བ་མེད། །བདེ་ཆེན་ཐེག་པ་ཆེན་པོ་ནི། །འདི་ལས་ང་ཡིས་ལུང་བསྟན་བུ། །ོཾ་ཨེ་ཥ། ་ཧཾ་བྱཱ་ཀ་རོ་མི་ཏཱཾ་བཛྲ་སཏྭ་སྟ་ཐཱ་ག་ཏཱ། སྲིད་པའི་ངན་འགྲོ་ལས་བསྒྲལ་ཏེ། །ཤིན་ཏུ་སྲིད་པའི་དངོས་གྲུབ་ཕྱིར། །ཀྱེ་འགྲུབ་འགྱུར་དེ་བཞིན་གཤེགས་པ་ཡི། །མིང་ནི་རྡོ་རྗེ་ཞེས་བྱར་འགྱུར། །དེ་ལྟར་བཅོམ་ལྡན་འདས་ཀྱིས་རིག་མ་ཆེན་མོའི་དབང་གི་དམ་ཚིག་བཀའ་སྩལ་ཏོ། །དེ་ནས་བཅོམ་ལྡན་འདས་རྡོ་རྗེ་ཆེན་པོ་ཏིང་ངེ་འཛིན 84.275b རྡོ་རྗེ་སྟོན་པ་པོས། དམ་ཚིག་རྡོ་རྗེ་ཞེས་བྱ་བ་གཏོན་ཏེ། ཚིག་འདི་སྐད་བཀའ་སྩལ་པ། བླ་མ་རྡོ་རྗེ་དམ་མཆོད་ཅིང ། །བདུན་པ་རྣམ་པར་དག་པར་བྱ། །བྱང་ཆུབ་སེམས་ནི་བསྐྱེད་ནསུ། །ཆོས་ཀྱི་འབྱུང་གནས་རྣམ་པར་བསྒོམ། །དེ་ལ་སངས་རྒྱས་གནས་བསམས་ནས། །རྣམ་པ་ལྔ་ནི་བསྒོམ་པར་བྱ། །དང་པོ་སྐྱེས་བུ་བསམ་དེ་ནས། །མཁའ་འགྲོ་མ་ཡི་འཁོར་ལོ་སྤྲོ། །དྲི་ཟ་མཉམ་པར་ཞུགས་པ་ནི། །ཁུ་བར་རྗེས་སུ་དྲན་པར་བྱ། །འཚམས་ཀྱི་ལྷ་མོས་བསྐུལ་བར་བྱ། །འཁོར་ལོའི་འདྲོན་པ་བསྐུལ་ནས་ནི། །མིག་ལ་སོགས་པ་གཏི་མུག་སོགས། །རྡོ་རྗེ་གསུམ་ནི་གནས་གསུམ་དགོད། །ཕྱི་ནས་རྗེས་ཆགས་རྡོ་རྗེ་སྟེ། །ཡེ་ཤེས་རྣམ་པར་གཞུག་པ་དང ། །དབང་ནི་རིག་མ་བརྒྱད་རྣམས་ཀྱི། །ཡང་ནི་བདུད་རྩི་མྱང་བ་དང ། །ལྷ་མོ་བརྒྱད་ཀྱིས་མཆོད་པ་ཉིད། །འཁོར་ལོའི་འདྲེན་པ་བསྟོད་པའོ། །རང་བྱིན་བརླབ་པས་བྱིན་བརླབས་ཏེ། །དེ་ལ་ཡན་ལག་དྲུག་བསྒོམ་བྱ། །ཕྱི་ནས་ཡང་ནི་དམ་ཚིག་གི། །ཆོ་གའི་གོ་རིམ་རིམ་པ་ཡིས། །མཚན་མ་ཡང་དག་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ། །གཉིས་པ་དུ་བ་འདྲ་བ་ཡིན། །གསུམ་པ་མེ་ཁྱེར་རྣམ་པ་ཡིན། །བཞི་པ་མིར་མེ་ཉེར་འབར་བ། །ལྔ་པ་རྟག་ཏུ་སྣང་བ་སྟེ། །སྤྲིན་མེད་ནམ་མཁའ་འདྲ་བ་ཉིད། །དེ་ནི་ཐམས་ཅད་མཁྱེན་པའི་རྒྱུད། །དངོས་གྲུབ་ཉ་བར་འགྱུར་བ་ཡིན། །ཕྱི་ནས་སྒྱུ་མའི་རྣམ་པ་ལྟར། །རྨི་ལམ་རྣམ་པར་སྐད་ཅིག་འགྱུར། །ཁམས་གསུམ་རྒྱུ་དང་མི་རྒྱུ་བའི། །མ་ལུས་ལུས་པ་མེད་པ་འགྲུབ། །འཇིག་རྟེན་ཁམས་ནི་ཐམས་ཅད་དུ། །ཇི་སྲིད་རྡོ་རྗེའི་ལུས་ཅན་རྣམས། །ཡེ་ཤེས་ཕུང་པོའི་བློ་ལྡན་པ། །དེ་ཡི་རྗེས་སུ་ཐམས་ཅད་འབྲང ། །ཇི་སྲིད་སྐྱེ་གནས་ལས་བྱུང་བ། །ཁམས་གསུམ་ལ་ནི་ཉམས་དགའ་བར། །ཕྱག་རྒྱ་ཆེན་པོ་རབ་སྦྱར་བས། །དེ་རྣམས་ཐམས་ཅད་བཟའ་བར་བྱ། །བྱང་ཆུབ་སེམས་དཔའ་དེ་བཞིན་གཤེགས། །ཚིག་གི་རྡོ་རྗེ་རྣམ་ཐོས་ནས། །དགའ་ཞིང་རངས་པར་གྱུར་ནས་ནི། །སྨྲ་བའི་རྡོ་རྗེ་མཛད་པར་ལྡན། །རིག་མ་ཆེན་མོ་བདག་མེད་དང ། །རྡོ་རྗེ་རྣམ་སྣང་མངའ་བདག་དང ། །རྡོ་རྗེ་སེམས་དཔའ་རྒྱལ་ཆེན་དང ། །རྟ་མཆོག་ཐུབ 84.276a པ་ཆེན་པོ་དང ། །རྡོ་རྗེ་ཉི་མ་གཟི་བརྗིད་ཆེ། །རྟ་འགྲིན་མངའ་བདག་ཆེན་པོ་ནི། །སྐུ་གསུང་ཐུགས་ནི་ཉིད་དང་ཡང ། །ལུས་ཀྱི་གོང་བུ་འགུལ་བར་འགྱུར། །ལན་ཅིག་རྒྱལ་པོ་སྟོན་པ་ཡིས། །འཕྲལ་དུ་མངོན་སུམ་བྱེད་པ་པོ། །དེ་ནས་རྡོ་རྗེ་འཛིན་པའི་རྒྱལ་པོ་སྐུ་གསུམ་མཆོག་གི་རྡོ་རྗེ་འཛིན་པ་ཆེན་པོ་མཉམ་པ་ཉིད་ཀྱི་རྡོ་རྗེའི་ཏིང་ངེ་འཛིན་ལ་བཞུགས་ཏེ་ཚིག་འདི་གསུངས་སོ། །མ་མོའི་དཀྱིལ་འཁོར་ལ་བཞུགས་པ། །ཞལ་བརྒྱད་པ་ལ་སྟོབས་པོ་ཆེ། །ཕྱག་ནི་བཅུ་དྲུག་རྣམས་དང་ལྡན། །དབང་པོ་སྔོན་པོ་མཚུངས་པའི་འོད། །གཟི་བརྗིད་ཆེན་པོ་ཞབས་བཞི་པ། །སྒེག་ཅིང་ཁྲོ་བའི་གཟུགས་ཅན་ཏེ། །དཀྱིལ་དཀྲུང་ཕྱེད་པའི་གར་གྱིས་གནས། །རུས་པའི་རྒྱན་གྱིས་རྣམ་པར་བརྒྱན། །དང་པོའི་ཞལ་ནི་ནག་པོ་སྟེ། །དཀར་པོ་དམར་པོས་རྣམ་པར་བརྒྱན། །ལྷག་མའི་ཞལ་ནི་བུང་བ་བཞིན། །བདུད་བཞི་མཉམ་པར་མནན་པ་སྟེ། །སྤྱི་བོར་རྡོ་རྗེ་འཛིན་པ་མཆོག་།དེར་ནི་རྡོ་རྗེ་མདོག་ནག་པོ། །འོད་ཟེར་ཆེན་པོའང་བསྒོམ་པར་བྱ། །དབང་བསྐུར་བའི་གནས་ཉིད་དུ། །སངས་རྒྱས་ལྔས་ནི་རྣམ་པར་བརྒྱན། །གླང་པོ་རྟ་བོང་གླང་ང་མོ། །མི་དང་ས་ར་བྷ་བྱི་ལ། །གཡས་པའི་ཐོད་པ་བརྒྱད་དུ་ནི། །གཉིས་འཐུང་ལ་སོགས་རིམ་ཤེས་བྱ། །ས་དང་ཆུ་དང་རླུང་དང་ནི། །དྲོད་དང་ཟླ་བ་ཉི་མ་ཉིད། །མཐར་བྱེད་དང་ནི་ནོར་སྦྱིན་ཉིད། །གཡོན་པའི་ཐོད་པ་བརྒྱད་ནའོ། །སྐྱེས་བུ་ཆེན་པོ་བཞེངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །གཏི་མུག་རྡོ་རྗེ་མིག་ལ་དགོད། །ཞེ་སྡང་རྡོ་རྗེ་རྣ་བ་ལ། །སེར་སྣ་འདོད་ཆགས་དེ་བཞིན་དུ། །རེག་དང་བདག་མེད་བསྒོམ་པར་བྱ། །ཕྱག་གཉིས་ཞལ་ནི་གཅིག་པ་ཡིན། །སྣ་ཚོགས་གཟུགས་མ་བཙུན་མོ་ཉིད། །ལག་པ་གྲི་གུག་ཐོད་པས་བྲེལ། །སྲོག་སོང་དུ་ནི་ཡང་དག་གནས། །ས་སྤྱོད་མཁའ་སྤྱོད་མ་ཉིད་དང ། །དེ་བཞིན་རྐང་འོག་གནས་པ་མོ། །འདི་ཉིད་ཀྱི་ནི་ཆོ་ག་ཡིས། །གནས་གསུམ་དུ་ནི་གནས་པར་བསྒོམ། །ོཾ་མཛད་རྒྱལ་པོ་ཆེན་པོ་ནི། །སྐུ་ཡི་རྡོ་རྗེ་རྣམ་པར་བརྒྱན། །ཐུགས་ཀྱི་རྡོ་རྗེ་རྒྱལ་པོ་ཆེ། །རྡོ་རྗེ་སེམས་དཔའི་གནས་ན་བཞུགས། ། ནི་མཆོག་གི་དེ་ཉིད་དེ། །ངག་གི་ལམ་ནི་གསལ་བྱེད་བརྗོད། །སྐུ་གསུང་ཐུགས 84.276b ཀྱི་རྡོ་རྗེ་ཡིན། །ཆོས་ཅན་ལས་ནི་རིགས་གསུམ་འབྱུང ། །ཉི་མའི་དཀྱིལ་འཁོར་དབུས་གནས་པར། །དཀར་མོ་གཟུགས་ཅན་བསྒོམ་པར་བྱ། །ལྕགས་ཀྱུ་སྡིགས་འཛུབ་འཛིན་པ་མོ། །ཁ་དོག་དཀར་མོ་འོད་ཆེན་མོ། །དཀར་མོ་རྡོ་རྗེ་ཅན་ཞེས་བྱ་བའི་ཏིང་ངེ་འཛིན་ཏོ། །དམར་པོའི་དཀྱིལ་འཁོར་དབུས་གནས་པར། །ཆོམ་རྐུན་མ་ཡི་གཟུགས་ཅན་བསྒོམ། །བཙོ་མ་གསེར་གྱི་མདོག་འདྲ་བ། །རྡོ་རྗེ་ཞག་པ་མཚོན་ཆེན་མོ། །རྡོ་རྗེ་དཀྱིལ་འཁོར་དབུས་གནས་པར། །རོ་ལངས་མ་ནི་ཁྲག་དང་མཚུངས། །རྡོ་རྗེ་ལྕགས་སྒྲོགས་ང་རྒྱལ་བྱེད། །བྱང་ཆུབ་འཆིང་བར་མཛད་པ་མོ། །འོད་ཀྱི་དཀྱིལ་འཁོར་དབུས་གནས་པར། །དེ་ནས་གྷསྨ་རི་བསྒོམ་བྱ། །རྡོ་རྗེ་བྲི་བུས་ལག་པ་བྲེལ། །མར་གད་ཨུད་པལ་འདྲ་བའོ། །རྡོ་རྗེ་སྒོ་སྐྱོང་མ་རྡོ་རྗེ་བརྩོན་མ་ཞེས་བྱ་བའི་ཏིང་ངེ་འཛིན་ཏོ། །མཚམས་སུ་ལྷ་མོ་བཞི་རྣམས་ནི། །ཆོ་གའི་སྦྱོར་བས་བསྒོམ་པར་བྱ། །བྱང་སེམས་བུམ་པ་རི་རབ་དང ། །མ་ཡི་ཐབ་ཁུང་རྒྱལ་མཚན་ཆེ། །ཕྱི་བཅས་གཉིས་མེད་རྣལ་འབྱོར་པས། །མགོན་པོ་དེ་ལྟར་བསྒོམ་པར་བྱ། །འདོད་ཆགས་ཆེན་པོ་རྗེས་ཆགས་པས། །དབའ་རླབས་མེད་པའི་བདེ་བ་འཐོབ། །འབྱུང་བ་བཞིའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་རྡོ་རྗེ་འཛིན་པའི་རྒྱལ་པོ་ཐེག་པ་གསུམ་གྱི་དམ་པ་སྟོན་པ་པོ། ཐམས་ཅད་ཀྱི་རྣམ་པའི་ཏིང་ངེ་འཛིན་ལ་བཞུགས་ཏེ། དབྱངས་འདི་གསུངས་པ། ཧཱུཾ་ལས་བྱུང་བའི་ཁྲོ་བོ་ནི། །རྟག་ཏུ་ཞེ་སྡང་ལྡན་པའོ། །ནང་དུ་མ་རུངས་སེམས་ཀྱིས་ནི། །རབ་ཏུ་འབད་པས་བསྒྲུབ་པར་བྱ། །ན་མཿ ས་མནྟ་བྷྱོ། ན་མོ་བཛྲ་མུངྒ་ར་ཧསྟ་ཡ་ཙཎྜ་ལཱ་ཀྵེ་པ་ཀ་རཱ་ཡ་ཧཱུཾ་ཕཊ། དེ་ནས་འདིར་ཁྲོ་བོ་ཆེན་པོ་བཤད་པ་ཙམ་གྱིས་སངས་རྒྱས་ཐམས་ཅད་དང ། བྱང་ཆུབ་སེམས་དཔའ་རྣམས་འཇིགས་ཤིང་འདར་བར་གྱུར་ནས་མངའ་བདག་རྡོ་རྗེ་འཛིན་པ་དྲན་པར་བྱེད་དོ། །སྐྱེས་པའི་པདྨ་གས་ཆགས་མེད། །སྲུབས་གཅིག་པ་དང་སྲུབས་གཉིས་པ། །རིག་མ་བཞི་ཡི་རབ་སྦྱོར་བས། །སངས་རྒྱས་ཀུན་གྱིས་རབ་ཏུ་དགང ། །རྐང་རྗེས་རྡུལ་གྱི་སྦྱོར་བ་ཡིས། །རྐང་པས་གནན་ཅིང་བསྡིགས 84.277a པར་བྱ། །སྐུ་གསུམ་བསྐྱེད་པའི་བསྒོམ་པ་ཡིས། །བུ་མོ་ཆེན་མོ་དགུག་པར་བྱ། །གཤེན་རྗེ་གཤེད་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ན་མཿ ས་མནྟཱ་བུད་དྷེ་བྷྱོ། མ་ཧཱ་དཎྜ་དྷ་ར་བི་བི་དྷ་སུ་རཱ་མརྡྷ་ན་བྷཱུནྣིརྨྨ་ཐ་ཧཱུཾ་ཕཊ། དེ་ནས་ཁྲོ་བོ་ཆེན་པོ་གཞན་གྱིས་མི་ཐུབ་པའི་སྟོབས་པོ་ཆེ་བཤད་པ་ལས་བྱང་ཆུབ་སེམས་དཔའ་རྣམས་དང ། དེ་བཞིན་དུ་གཞན་རྣམས་ཀྱང་འདར་བར་གྱུར་ཅིང་དེ་དྲན་པར་བྱེད་དོ། །འབྱུང་པོ་ཡི་དགས་ཤ་ཟ་ཉིད། །མཁའ་འགྲོ་གྲུལ་བུམ་ཟིན་པ་ལ། །ཧཱུཾ་གིས་དྲེགས་བྱས་ཕྱག་རྒྱས་གདབ། །རྡོ་རྗེ་བཙིར་བས་བདེ་བ་ཉིད། །གཞན་གྱིས་མི་ཐུབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ན་མཿ ས་མནྟ་བུད་དྷེ་བྷྱོ། ཧུ་ལུ་ཧུ་ལུ། མ་ཧཱ་པདྨ་ཨ་མྲི་ཏཱི་ཀུ་རུ་མ་ཧཱ་བི་ཥཱ་ན་ཨཱཿ ་བཙན་དུག་ཆེན་པོ་དགུག་པར་བྱའོ། །བརྒྱལ་བ་བསླང་བ་དེ་བཞིན་ནོ། །པདྨའི་དྲགཔོའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ན་མཿ ་ས་མནྟ་བུད་དྷེ་བྷྱོ། ན་མོ་བཛྲ་ཀྲོ་དྷཱ་ཡ་མ་ཧཱ་དཾཥྲཱ་ཏྐ་ཊ་བྷཻ་ར་ཝཱ་ཡ། བཛྲ་སནྡོ་ཧ་དརྤཱ་ཡ་ཨོཾ་ཨ་མྲྀ་ཏ་ཀུཎྜ་ལཱི་ཧཱུཾ་ཕཊ། དེ་ནས་ཁྲོ་བོ་ཆེན་པོ་བགེགས་འཇོམས་རྡོ་རྗེ་བཤད་པས་སངས་རྒྱས་ཐམས་ཅད་དང ། བྱང་ཆུབ་སེམས་དཔའ་རྣམས་ཡིད་མི་དགའ་བར་གྱུར་ཏོ། །རླུང་གིས་བཏེག་པ་པོ་དང ། རྐང་རྗེས་ཀྱི་རྡུལ་བླངས་ནས་བསྒྲུབ་བྱ་དེའི་མིང་བྱང་བཟུང་སྟེ། ཚོགས་ཀྱི་བདག་པོའི་རྐང་པའི་འོག་ཏུ་དགོད་ཅིང་ཧཱུཾ་ཕཊ་ཅེས་བྱ་སྟེ། ཧཱུཾ་གི་ང་རྒྱལ་བྱས་ནས་རྡོ་རྗེ་བདུད་རྩིའི་ཏིང་ངེ་འཛིན་ལས་སྐྱེས་པ། ཁྲོ་བོའི་སྔགས་ཀྱིས་རབ་ཏུ་སྦྱོར་བས་སངས་རྒྱས་རྣམས་ཀྱང་སྐྲོད་པར་བྱེད་དོ། །རྡོ་རྗེ་བདུད་རྩི་ཞེས་བྱ་བའི་ཏིང་ངེ་འཛིན་ཏོ། །ཤིན་ཏུ་ལེགས་པར་གསང་བར་ནི། །བྱ་བ་འདི་ནི་རབ་བསྐུལ་བར། །ཡེ་ཤེས་རྡོ་རྗེས་བྱ་བ་སྟེ། །ཉི་མ་བདུན་གྱིས་འགྲུབ་པར་འགྱུར། །ན་མཿ ས་མནྟ་བྷྱོ། ཨོཾ་ཡ་མ་དཎྜཱ་ཡ་ནཱི་ལཱ་ཡ། ནཱི་ལ་དཎྜཱ་ཡ་ཏུ་རུ་ཏུ་རུ་མུ་རུ་མུ་རུ་སརྦྦ་དུཥྚཱ་ན་མཱ་ར་ཡ་མཱ་ར་ཡ་ཧཱུཾ་ཕཊ། དེ་ནས་ཁྲོ་བོ་ཆེན་པོ་དབྱུག་པ་སྔོན་པོ་སྐྱེས་བུ་ཆེན་པོ་བཤད་པས་སེམས་ཅན་ཐམས་ཅད་དང ། སངས་རྒྱས་རྣམས་སྲོག་ལ་ཐེ་ཐེམ་དུ་གྱུར་ཏོ། །བརྒྱ་ཕྲག་བརྒྱད་བཟླས་པ་ཙམ་གྱིས་ཀྱང་ཤིན་དུ་བསྒོམ་པས་སྦྱོར 84.277b བའི་ཆོ་གས་བསྐུལ་བ་ལས་གདུག་པ་ཐམས་ཅད་འཆིང་བར་འགྱུར་རོ། །དབྱིག་པས་གནན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ན་མཿ ས་མནྟ་བུད་དྷེ་བྷྱོ། ན་མོ་མ་ཧཱ་བ་ལ་ཡ། ཨུ་ཙྪུཤྨ་ཀྲོ་དྷ་རཱ་ཛཱ་ཡ་སརྦཱ་ན་གཱ་ནཾ་ཧྲཱི་ད་ཡཾ་ཏཱ་ཌ་ཡ་ཧཱུཾ་ཕཊ། དེ་ནས་གཏུམ་པོ་ཆེན་པོ་བཤད་པས་དུག་གིས་གདོང་འཇིགས་ཤིང་སྟོབས་དང་བྲལ་བ་དང ། སྐྲག་ཅིང་འདར་བར་གྱུར་ཏེ། སྟོབས་པོ་ཆེ་དྲན་པར་འགྱུར་རོ། །རྡོ་རྗེ་སྟོབས་ཀྱི་སྤྱན་རས་གཟིགས་ཞེས་བྱ་བའི་ཏིང་ངེ་འཛིན་ཏོ། །ན་མཿ ་ས་མནྟ་བུད་བུད་ངྷ་བྷྱོ། ན་མོ་ཨ་ཙ་ལ་ཀ་ཎ་ཙེཊྚ་ཏུ་མོཊྚ་མོཊྚ་ཏུཊྚ། གྷ་གྷ་གྷཱ་ཏ་ཡ་གྷཱ་ཏ་ཡ་ཧཱུཾ་ཕཊ། དེ་ནས་ཁྲོ་བོ་ཆེན་མོ་མི་གཡོ་བ་སྐྱེས་བུ་ཆེན་པོ་བཤད་པས་ལྷ་དང་ཀླུ་དང་གནོད་སྦྱིན་ཆེན་པོ་བརྒྱལ་ཏེ་ས་ལ་འགྱེལ་ཏོ། །འདིས་ནི་ཁྲོ་བོའི་རྒྱལ་པོ་ཡིས། །སེང་གེ་ཞོན་པའི་ཆོ་ག་ཡིས། །རྡོ་རྗེ་དཀྱིལ་འཁོར་རྣལ་འབྱེར་ལས། །སྐྱེས་པ་དང་ནི་ལྷ་རྣམས་ཁུག་།ོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲཱྀཧྞ་ཧཱུཾ། གྲིཧྣཱ་པ་ཡ་གྲིཧྣཱ་པ་ཡ་ཧཱུཾཾ། ཨ་ན་ཡ་ཧོ་བྷ་ག་ཝན་བིདྱཱ་རཱ་ཛ་ཧཱུཾ་ཕཊ། རྡོ་རྗེ་ས་འོག་གནས་པ་ཡིས། །ཁྲོ་བོ་ཆེན་པོ་བཤད་པ་ཡིས། །ལྷ་མིན་བུ་མོ་ཀླུ་མོར་བཅས། །ནུ་མ་འདར་ཞིང་ནར་བ་འམ། །རྡོ་རྗེ་ཞགས་པས་ངེས་བཅིངས་ཏེ། །ལྕགས་ཀྱུ་ཡིས་ནི་དྲིལ་ནས་ནི། །སྐུ་གསུང་ཐུགས་ནི་བསྒོམས་པ་ཡིས། །བུ་མོ་ཐམས་ཅད་དགུག་པར་བྱའོ། །འཇིག་རྟེན་གསུམ་དགུག་པ་ཞེས་བྱ་བའི་ཏིང་ངེ་འཛིན་ཏོ། །རྡོ་རྗེ་ཆོས་ནི་ཆར་སྤྲིན་ཆེ། །རྡོ་རྗེ་སེམས་དཔའ་ཆར་མཆོག་སྟེ། །རྡོ་རྗེ་ཉི་མ་དགེ་འདུན་ཆེ། །རྟ་མཆོག་ཚོགས་ནི་ཆེན་པོ་དང ། །ཕན་པའི་ཡང་ནི་ཆར་སྤྲིན་གྱི། །ཞགས་པ་ལྕགས་ཀྱུའི་བསྒོམ་པ་ཡིས། །སངས་རྒྱས་རྣམས་ཀྱང་དགུགས་བརྗོད་ན། །སོ་སོ་སྐྱེ་བོ་སྨོས་ཅི་དགོས། །རང་གི་རིག་མ་སྐྱེས་བུ་བསམས། །སྐུ་གསུམ་རྡོ་རྗེས་རྣམ་པར་བརྒྱན། །ལྕགས་ཀྱུ་ལ་སོགས་སྦྱོར་བ་ཡིས། །བུ་མོ་བཀུག་ལ་བཟའ་བར་བྱ། །དེ་ནས་བཅོམ་ལྡན་འདས་ཀྱིས་རྡོ་རྗེ་ཆེན་པོས་དགུག་པའི་དམ་ཚིག་བཀའ་སྩལ་ཏོ། །ནམཿ ས་མནྟཱ་བུད་དྷེབྷྱོ། ཨོཾ་ཊཀྐི་ཧཱུཾ་ཛཿ ་ཁ་ཏ་དང་ནི་བཙག་ལ་ཡང ། །རྡོ་རྗེ་ལྕགས་ཀྱུའི་སྦྱོར་བ་ལས། །ཟླ་བ་ཉེ་བར་ཆགས་དུས་སུ། །ཁར་བཅུག་ནས་ནི 84.278a བསྒྲུབ་པར་བྱ། །མིང་ནི་བྲིས་པ་ཙམ་གྱིས་ཀྱང ། །བརྒྱ་ནི་གསལ་བར་བཟླས་པ་ཡིས། །སྒྲ་ལྡན་གནས་མེད་དབང་པོ་དྲག་།ཆུང་མར་བཅས་པ་དགུག་པར་བྱ། །དམ་ཚིག་ལྕགས་ཀྱུའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བསམ་གཏན་སྔགས་དང་ཏིང་འཛིན་གནས། །རང་གི་རིག་མ་སྐྱེས་བུ་བདག་།དགུག་པའི་གནས་སུ་བཟུང་བར་བྱ། །ཐུབ་པ་གཞན་དུ་མི་འགྱུར་རོ། །ན་མཿ ས་མནྟཱ་བུད་དྷཱ་ནཱཾ། ན་མ་ས་མནྟ་དྷརྨྨཱ་ཎཱཾ། ན་མཿ ས་མནྟཱ་སཾ་གྷཱ་ནཱཾ། ཨོཾ་སི་ཏཱ་ཏ་པ་ཏྲ། ཨོཾ་བི་མ་ལ། ཨོཾ་ཤཾ་ཀ་ར། ཨོཾ་བྲ་ཏྱཾ་གི་ར། ཨོཾ་བཛྲ་ཨུཥྞཱི་ཥ་ཙཀྲ་ཝ་སརྦྦ་ཡནྟྲཱ་མནྟྲ་མཱུ་ལ་ཀརྨྨ་མནྡྷ་ན་ཏཱ་ཌ་ན་ཀཱི་ལ་ནཾ་བཱ་མ་མ་ཀྲྀ་ཏེ་ཡེ་ན་ཀེ་ན་ཙི་ད་ཀྲྀ་ཏི་ཏ་ཏྟ་སརྦྦ་ན་ཙྪིནྡ་ཙྪིནྡ་བྷིནྡ་བྷིནྡ། ཙི་རི་ཙི་རི། གི་ར་གི་ར། མ་ར་མ་ར། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། བདག་ཉིད་བསྲུང་བའི་སྦྱོར་བ་ལ། །སྦྱོར་བ་རྒྱུད་སོགས་བཞིག་པ་ལ། །དཔང་བར་རིག་པ་གདགས་བྱས་ན། །འཇིག་རྟེན་གསུམ་གྱིས་འདའ་མི་ནུས། །ཁྲོ་བོ་ཆེན་པོ་འཁོར་ལོ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དབེན་པའི་ནགས་ཚལ་ཉིད་དུ་ཡང ། །ཡིད་གཉིས་ཐམས་ཅད་རྣམ་སྤངས་ལ། །རྣལ་འབྱོར་མཆོག་ནི་འདི་བསྒྲུབས་ན། །ཐུབ་པ་གཞན་དུ་མི་འགྱུར་རོ། །ཁྲོ་བོ་ཆེན་པོ་འཁོར་ལོའི་སྙིང་པོའི་སྔགས་ལ་འཇུག་པ་རྡོ་རྗེ་ཞེས་བྱ་བའི་ལེའུ་སྟེ་བཞི་པའོ།། །། དེ་ནས་བཅོམ་ལྡན་རྡོ་རྗེ་ཅན། །སེམས་ཅན་ཀུན་གྱི་སྙིང་ལ་ཞུགས། །ཀུན་མཁྱེན་ཡེ་ཤེས་ལས་བྱུང་བ། །ཡང་དག་ངེས་པར་རབ་ཏུ་དབྱེ། །སངས་རྒྱས་གཟུགས་བརྙན་རབ་བསྒོམས་ཏེ། །རྡོ་རྗེ་སེམས་དཔའ་རབ་བསྒོམ་བྱ། །སངས་རྒྱས་གཟུགས་བརྙན་རབ་བསྒོམ་བྱ། །སངས་རྒྱས་གཟུགས་བརྙན་རབ་བསྒོམས་ནས། །རྡོ་རྗེ་རྣམ་སྣང་དྲན་པར་བྱ། །སངས་རྒྱས་གཟུགས་བརྙན་རབ་བསྒོམས་ཏེ། །རྡོ་རྗེ་ཉི་མ་རབ་བསྒོམ་བྱ། །སངས་རྒྱས་གཟུགས་པར་བསྒོམས་ནས། །འདོད་ཆགས་རྡོ་རྗེ་རྣམ་པར་བསྒོམ། །སེམས་ཅན་གཟུགས་བརྙན་རྣམ་བསྒོམས་ཏེ། །རྟ་ཡི་དོན 84.278b ཡོད་རབ་བསྒོམ་བྱ། །སངས་རྒྱས་གཟུགས་བརྙན་ལས་བྱུང་བའི། །དཀྱིལ་འཁོར་རྣམས་ནི་རྟག་བསྒོམ་བྱ། །ཐམས་ཅད་རྣམས་ཀྱི་སྔགས་འདི་ཡིས། །སྙིང་ཀར་ཡེ་ཤེས་གནས་སུ་དགོད། །ཡེ་ཤེས་སེམས་དཔར་རབ་སྦྱོར་བས། །སངས་རྒྱས་བྱང་ཆུབ་ཐོབ་པར་འགྱུར། །རང་སྔགས་ཡི་གེ་རྫོགས་པ་དང ། །ཕྱག་རྒྱ་དང་ནི་ཕྱག་མཚན་བརྟག་།སྤྲོ་དང་བསྡུ་བ་བྱས་པ་ནི། །དཀྱིལ་འཁོར་རྣམས་ཀྱི་འབྱུང་གནས་ཉིད། །སྒྲ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་རྡོ་རྗེ་ཅན། །རྡོ་རྗེ་སེམས་དཔའ་གྲགས་ཆེན་པོ། །གཟུགས་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ཡང་དབུལ་བར་བྱ། །དེ་ཉིད་བཅོམ་ལྡན་རྒྱལ་པོ་ནི། །རྡོ་རྗེ་རྣམ་སྣང་མངའ་བདག་ཉིད། །དྲི་ལ་རྣམ་གསུམ་རྣམ་ཤེས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་སངས་རྒྱས་ནི། །རིན་ཆེན་ཕུང་པོ་རབ་ཏུ་གྲགས། །རོ་ལ་རྣམ་གསུམ་རྣམ་ཤེས་ནས། །ལྷ་རྣམས་ལ་ཡང་དབུལ་བར་བྱ། །དེ་ཉིད་བཅོམ་ལྡན་འདོད་ཆགས་ཉིད། །རྡོ་རྗེ་ཆོས་ནི་དེ་བཞིན་གཤེགས། །རེག་ལ་རྣམ་གསུམ་རྣམ་ཤེས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །དོན་ཡོད་འབྲས་བུ་སྟེར་བ་པོ། །བསྲུང་བའི་དམ་ཚིག་དབུས་གནས་པའི། །དཀྱིལ་འཁོར་ལྔ་ནི་བསྒོམ་པར་བྱ། །ལྔ་ལྔའི་བདག་ཉིད་རྫོགས་སངས་རྒྱས། །ཡེ་ཤེས་ལྔ་ནི་རྣམ་པར་བསྒོམ། །འདོད་པའི་ཡོན་ཏན་ལྔ་དང་ལྡན། །འོད་ཟེར་སྣ་ཚོགས་ཀུན་ཏུ་ཁྱབ། །སྣ་ཚོགས་ལས་ནི་བྱེད་པར་བརྗོད། །ཐམས་ཅད་བསྡུས་པའི་དཀྱིལ་འཁོར་ནི། །ཉི་ཤུ་རྩ་ལྔའི་དབྱེ་བ་ཡིས། །རྡུལ་ཚོན་གྱིས་ཀྱང་བྲི་བར་བྱ། །སངས་རྒྱས་ལྔ་ཡི་རང་བཞིན་གྱིས། །ཕུང་པོ་ལྔར་ནི་རབ་ཏུ་གྲགས། །སངས་རྒྱས་མགོན་པོའི་དཀྱིལ་འཁོར་ནི། །ཤར་གྱི་ཆར་ནི་རབ་ཏུ་གྲགས། །གཡས་སུ་རྡོ་རྗེ་ཉི་མ་ཡི། །ནུབ་ཏུ་འདོད་ཆགས་རྡོ་རྗེ་ཡི། །བྱང་དུ་རྟ་ཡི་རྒྱལ་པོ་ཡི། །དབུས་སུ་རྡོ་རྗེ་སེམས་དཔའ་ཡི། །ཤར་དུ་དཀར་པོ་ཆེན་པོ་སྟེ། །ལྷོར་ནི་སེར་པོ་ཡང་དག་ལྡན། །དམར་པོ་ནུབ་ཀྱི་ཆ་ཉིད་དུ། ། 84.279a བཙོད་ནི་བྱང་དུ་ཡང་དག་ལྡན། །མཚམས་ཀྱི་ཆར་ནི་ཐམས་ཅད་དང ། །སྒོ་ཡི་ལོགས་དང་ཡ་ཕུབས་སུ། །རྡོ་རྗེ་ཆེན་པོ་རྣམས་ཀྱིས་བརྒྱན། །སྣ་ཚོགས་སྣང་བ་རྣམས་ཀྱིས་མཛེས། །སངས་རྒྱས་མགོན་པོ་གང་ཉིད་ཀྱི། །དཀྱིལ་འཁོར་དབུས་སུ་འགྱུར་བ་ནི། །དེ་ཉིད་ཀྱི་ནི་དཀྱིལ་འཁོར་བརྗོད། །སྙིང་པོ་ཡོངས་བཟུང་དཀྱིལ་འཁོར་ཏེ། །དཀྱིལ་འཁོར་རེ་རེ་བསྒོམ་པ་འམ། །ཡང་ན་བསྡུས་པའི་དཀྱིལ་འཁོར་རོ། །བརྒྱད་བརྒྱད་དབུས་སུ་གནས་པ་འམ། །ཡང་ན་ཉི་ཤུ་རྩ་ལྔ་རུ། །གང་ཚེ་དཀྱིལ་འཁོར་བསྡུས་པ་ཡི། །སྒོར་ནི་ལྕགས་ཀྱུ་ཞགས་པ་དང ། །ལྕགས་སྒྲོགས་དེ་བཞིན་རྡོ་རྗེ་ཉིད། །འཇུག་པའི་སྒོ་སྲུངས་དགོད་པར་བྱ། །བཅོམ་ལྡན་འདས་ཀྱིས་བསྡུས་པ་ཆེན་པོའི་དམ་ཚིག་འདི་སྐད་ཅེས་བཀའ་སྩལ་ཏོ། །དོན་དང་བྱ་རྒོད་དེ་བཞིན་བསེ། །སྙུག་གླང་བ་མེན་དང་ནི་སྟག་ཉིད་དང ། །སྤྲེའུ་དང་སྣ་འཐུང་བ་བླང་འཚེ། །རྡོ་རྗེ་ཆོས་ཀྱི་གཡས་ནའོ། །ཁཝ་འུག་ཆུ་སྐྱར་སེང་གེ་དང ། །མཚོར་གནས་དེ་བཞིན་ར་དང་ནི། །རི་དགས་ཕག་དང་ཡང་དག་ལྡན། །གཡས་མིན་པར་ནི་རྟག་ཏུ་གནས། །རྨ་བྱ་མ་ཧེ་ཆུ་སྲིན་དང ། །ཉ་ཡི་རྒྱལ་པོ་རུས་སྦལ་དང ། །འོག་གི་རླུང་དང་ངང་སྐྱ་དང ། །རི་བོང་ཕན་པའི་གཡས་པ་ནའོ། །སྦལ་བ་ཐུ་བོ་སྤྲིན་ཤུགས་ཀྱི། །ཁ་ཆུ་མིག་སྨན་མཚུངས་བྱི་བ། །གཡག་དང་དྲི་ལྡན་དེ་བཞིན་བཤད། །གཡོན་པའི་ཐོད་པ་བརྒྱད་ནའོ། །ཀ་རཎྜ་དང་འཁོར་ལོ་དག་།ལུག་དང་ཙ་ཀོ་ར་དང་ནི། །བྱེ་ཁྲ་ཧོར་ཁྲ་འོལ་བ་དང ། །ཀུ་རར་ཉི་མའི་གཡས་ནའོ། །སྟོབས་ཀྱི་རྒྱུ་དང་དུང་སྐྱོང་དང ། །རིགས་ལྡན་པདྨ་པད་བཟང་དང ། །འཇོག་པོ་ནོར་རྒྱས་མཐའ་ཡས་ནི། །རིན་ཆེན་རྒྱལ་པོའི་གཡོན་ནའོ། །གཟའ་ལག་ཕུར་བུ་མཇུག་རིངས་དང ། །སྒྲ་གཅན་མིག་དམར་པ་བ་སངས། །སྤེན་པ་ཁྱབ་འཇུག་རྟ་རྒྱལ་ཉིད། །གཡས་པ་ཉིད་དུ་རབ་ཏུ་གྲགས། །དབང་པོ་ཚངས་པ་དེ་བཞིན་དྲག་།འདོད་ལྷ་དེ་བཞིན་ཐོད་པ་ཅན། །གཅེར་བུ་དང་ནི་ཐགས་བཟངས་རིས། །སྟོབས་ལྡན་ཞེས་བྱ་གཡོན་ནའོ། །གློ་དང་དབུགས་དང་དེ་བཞིན་འབོག་།ཁོང་སྐམ་མཛེ་དང་རྐང་ཤུ་དང ། །མཆིན་པ་མཆེར་པའི་རང་བཞིན་ཡང ། །གླང་པོ་ལ་སོགས་རབ་ཏུ་གྲགས། །ལྕགས་སྟེགས་དང་ནི་རྗེད་བྱེད་དང ། །ཁྲག་རྡོ 84.279b གཅོང་ནད་རྒྱལ་པོ་དང ། །གཞང་འབྲུམ་སྐྲན་དང་བཀྲེས་ནད་དང ། །མིག་སེར་དོམ་ལ་སོགས་པའོ། །རྫེ་མ་བྱི་དང་སོ་ནད་དང ། །མཁྲིས་པ་ཁྲག་དང་དེ་བཞིན་རླུང ། །བད་ཀན་འཛག་དང་ལུས་སྐམ་དང ། །སྐྱ་རྦབ་འབྲས་ནི་རྨ་བྱ་སོགས། །རྐང་འབབ་ཚིལ་ནད་རླིག་སྐྲངས་དང ། །རྒྱུ་མ་འཕེལ་དང་གསུང་བ་དང ། །ཚད་པ་རིམས་དང་རབ་གས་ནི། ཀ་རཎ་ཌ་སོགས་རབ་ཏུ་གྲགས། །རླུང་མཁྲིས་དེ་བཞིན་མ་ཞུ་བ། །སྒྲིབ་གཡོགས་རབ་རིབ་གཅན་སྲི་བ། །གཞོག་ཕྱེད་ན་དང་སྐོག་འབྲས་དང ། །རླུང་རྒྱས་གཟའ་ལག་ལ་སོགས་པའོ། །མི་ཡི་འགྲོ་བ་དམ་པ་ནི། །རབ་མཆོག་དེ་ལྟ་བུ་འགྲོ་བ། །ཐམས་ཅད་ནད་ཀྱིས་ཁྱབ་མཐོང་ནས། །སངས་རྒྱས་ལྔར་ནི་ཆེར་གྲགས་པ། །བདག་གི་ལུས་ལ་གཞུག་པར་བྱ། །སེམས་ཅན་རྣམས་ལ་གདུངས་མ་གྱུར། །ནད་རྣམས་ཞི་ཕྱིར་སངས་རྒྱས་ནི། །གླང་པོ་ལ་སོགས་ནད་འཛིན་ཏོ། །དེ་ལྟར་བསྒོམ་པར་གྱུར་པ་ལ། །ནད་མེད་རུ་ཛ་ཏྲང་གྲུམ་མེད། །འཆི་མེད་ངེས་པར་བྱི་ཏ་མེད། །ང་རྒྱལ་མེད་ཅིང་གཏི་མུག་མེད། །བཀྲེས་པ་མེད་ཅིང་སྐོམ་པ་མེད། །སྡུག་བསྔལ་ངན་འགྲོ་དེ་བཞིན་མེད། །ལྷ་དང་ལྷ་མིན་མི་རྣམས་སམ། །གང་གིས་ཀྱང་ནི་ནད་བྱེད་མིན། །ནད་ཐམས་ཅད་རབ་ཏུ་ཞི་བ་དབུགས་དབྱུང་བ་རྡོ་རྗེ་ཞེས་བྱ་བའི་ལེའུ་སྟེ་ལྔ་པའོ།། །། དེ་ནས་རྡོ་རྗེ་འཛིན་པའི་རྒྱལ་པོ་ལུས་ཐམས་ཅད་འཛིན་པ་པོ་མཁའ་འགྲོ་མའི་ཡིད་འཕྲོག་པས་ཚིག་འདི་བཀའ་སྩལ་པ། སེམས་ཀྱི་རྗེས་དྲན་དམིགས་ནས་ནི། །སངས་རྒྱས་རྗེས་སུ་དྲན་པ་བསྒོམ། །སེམས་ཀྱི་རིན་ཆེན་བསམས་ནས་ནི། །ཆོས་ནི་རྗེས་སུ་དྲན་པ་བསྒོམ། །ལས་རྗེས་དྲན་པའི་རྣལ་འབྱོར་པས། །འཁོར་ལོ་ཆེན་པོ་རབ་བསྒོམ་བྱ། །རྣལ་འབྱོར་འདི་ནི་མཆོག་རབ་སྟེ། །མ་བྱུང་འབྱུང་བར་མི་འགྱུར་རོ། །རྡོ་རྗེ་སེམས་དཔའ་རྣམ་བསྒོམས་ནས། །ཕྱག་རྒྱ་བཞི་ཡིས་ཕྱག་རྒྱས་གདབ། །རྡོ་རྗེ་རྣམ་སྣང་བསམས་ནས་ནི། །ཕྱག་རྒྱ་བསྒོམས་པས་ཕྱག་རྒྱས་གདབ། །རྡོ་རྗེའི་ཕྱག་རྒྱའི་སྦྱོར་བ་ཡིས། །རིན་ཆེན་ཕུང་པོ་རབ་བསྒོམ་བྱ། །ཆོས་ཀྱི་ཕྱག་རྒྱ་རབ་སྦྱོར་བས། །ལས་ཀྱི་རྡོ་རྗེ་ཕྱག་རྒྱས་གདབ། །ཞེ་སྡང་རྒྱལ་པོ་རྒྱལ་པོ་ཆེ། །སྐྱོན 84.280a རྣམས་ཐམས་ཅད་ཟད་པར་མཛད། །སྤྲོ་ཞིང་བསྡུ་བར་བསྒོམ་པར་བྱ། །བསྡུ་བ་ཡང་ནི་ཡང་དག་བཤད། །སངས་རྒྱས་མགོན་པོ་རབ་བསྒོམས་ན། །སངས་རྒྱས་སྤྲིན་གྱིས་ཀུན་ཏུ་ཁྱབ། །སྤྲོ་དང་བསྡུ་བའི་རྣལ་འབྱོར་གྱིས། །སངས་རྒྱས་བྱང་ཆུབ་རབ་བསྒོམ་བྱ། །སེམས་ནི་རིན་ཆེན་རིན་པོ་ཆེས། །བདུད་ཀྱི་སྐྱོན་རྣམས་ཟད་པར་མཛད། །སེམས་ཀྱི་ཆར་སྤྲིན་སྦྱོར་བ་ཡིས། །ཡང་ནི་བསྡུ་བ་བསྟན་པར་བྱ། །ཆོས་ཀྱི་རྒྱལ་པོ་གཏི་མུག་ཆེ། །སྤྲོ་དང་བསྡུ་བའི་གཟུགས་ཅན་དེ། །ཐུན་ཚོད་བཞིར་ནི་བྱིན་བརླབས་པ། །བསྒོམས་ན་མྱུར་དུ་འགྲུབ་པར་འགྱུར། །སེམས་ནི་འགྲོ་མགྱོགས་ལྟར་བསམས་ནས། །གཞལ་མེད་འབྲས་བུ་སྩོལ་བའོ། །རྟ་མཆོག་ཆར་སྤྲིན་ཆེན་པོ་ཡིས། །བསྡུ་བ་ཡང་ནི་བསྒོམ་པར་བྱ། །བཅོམ་ལྡན་འདས་ཀྱིས་སྤྲོ་བ་དང་བསྡུ་བའི་དམ་ཚིག་ཆེན་པོ་དེ་སྐད་ཅེས་བཀའ་སྩལ་ཏོ། །ཉི་མའི་དཀྱིལ་འཁོར་དབུས་གནས་པར། །སེམས་ཀྱིས་རྣམ་པར་བསྒོམ་པར་བྱ། །རྙོག་མེད་དཀྱིལ་འཁོར་དབུས་གནས་པར། །སྐུ་ཡི་ཡི་གེ་རྣམ་པར་བསྒོམ། །ཁྲག་གི་དཀྱིལ་འཁོར་དབུས་གནས་པར། །སེམས་ཀྱི་རིན་ཆེན་ཡི་གེ་དགོད། །ཆོས་ཀྱི་འཁོར་ལོ་དབུས་གནས་པར། །གསུང་གི་ཡི་གེ་རྣམ་པར་སྒོམ། །ལས་ཀྱི་དཀྱིལ་འཁོར་དབུས་གནས་པར། །དོན་ཡོད་ཡི་གེའི་གཟུགས་ཅན་ཏེ། །སྐུ་གསུམ་མི་ཕྱེད་བསྒོམ་པ་ཡིས། །ཡེ་ཤེས་རྡོ་རྗེ་བསྒོམ་པར་བྱ། །རྡོ་རྗེ་སེམས་དཔའ་མི་ཕྱེད་པའི། །ཆོས་ཀྱི་འཁོར་ལོ་རྣམ་སྣང་ལ། །རིན་ཆེན་སེམས་ཀྱི་རིན་པོ་ཆེ། །པད་མ་བཟང་པོ་འདབ་མ་དམར། །ཤེས་རབ་རལ་གྲི་དོན་ཡོད་ཀྱི། །ཤེས་རབ་རྣོན་པོའི་རང་བཞིན་གྱི། །རྣམ་རྟོག་རི་བོ་བཅད་ནས་ནི། །ཕྱག་རྒྱ་ཆེན་པོ་ལྡན་པར་འགྱུར། །དཔག་ཚད་བྱེ་བ་རྒྱས་པར་ནི། །རྡོ་རྗེའི་དཀྱིལ་འཁོར་བསྒོམ་པར་བྱ། །ཕན་པའི་དཀྱིལ་འཁོར་ཉིད་དང་ཡང ། །རིན་ཆེན་ཕུང་པོ་འོད་ཆེན་དང ། །ཆོས་ཀྱི་ཕུང་པོ་མགོན་ཆེན་དང ། །དེ་བཞིན་གཤེགས་པ་རྡོ་རྗེ་ལས། །སྣ་ཚོགས་འོད་ཟེར་ཆེར་འབར་བ། །སངས་རྒྱས་སྤྲིན་གྱིས་རྣམ་པར་བརྒྱན། །ནམ་མཁའི་ཁམས་ཀྱི་དབུས་གནས་པར། ། 84.280b ཡེ་ཤེས་དཀྱིལ་འཁོར་བསྒོམ་པར་བྱ། །འདོད་པའི་ཡོན་ཏན་ལྔ་ཡིས་གང ། །ཐམས་ཅད་དུ་ནི་སྣ་ཚོགས་གཟུགས། །མཆོད་པ་ཀུན་གྱིས་མཆོད་པར་བྱ། །མཚམས་ཀྱི་ལྷ་མོའི་སྦྱོར་བ་ཡིས། །ཡེ་ཤེས་རྒྱ་མཚོ་རབ་བསྒྲུབ་བྱ། །དམ་ཚིག་འཁོར་ལོ་བཅུག་པ་ཡི། །ཡེ་ཤེས་རྡོ་རྗེ་ཆེན་པོ་འབར། །སངས་རྒྱས་ཀུན་མཉམ་རྣལ་འབྱོར་པས། །སྐད་ཅིག་ལ་ནི་གཉིས་མེད་འགྱུར། །རུ་དྲཱ་ཀྴ་དང་དུང་བསེ་རུ། །བུ་ཡི་འཚོ་བ་པད་འབྲས་དང ། །མུ་ཏིག་ལ་སོགས་བྱི་རུ་སོགས། །བསམ་གཏན་ལྡན་པས་སྔགས་བཟླས་བྱ། །སངས་རྒྱས་བྱང་ཆུབ་སེམས་དཔའ་དང ། །མཁའ་འགྲོ་མ་དང་རང་བཙུན་མོ། །མངོན་སུམ་དུ་ནི་བྱ་བའི་ཕྱིར། །སྔགས་ནི་སྙན་གསན་འབེབས་པར་བརྗོད། །དཔེར་ན་སྐྱེས་ཆེན་ལ་ལ་ཞིག་།སྐད་ཀྱི་ང་རོས་བོས་པ་ན། །ཐོས་པ་ཙམ་གྱིས་འོངས་འགྱུར་བ། །དེ་ལྟར་སྐད་ཅིག་སངས་རྒྱས་གཤེགས། །འཇིག་རྟེན་ཁམས་ནི་སྟོང་ཕྲག་དང ། །ནམ་མཁའི་ཁམས་ཀྱི་མཁའ་གྲོང་དུ། །ཕྱག་རྒྱ་ཆེན་པོའི་བདེ་གནས་ཀྱི། །མཁའ་དང་མཉམ་པའི་སངས་རྒྱས་བཞུགས། །དེ་རྣམས་སྔགས་རིག་དྲུང་ན་གཤེགས། །རྡོ་རྗེ་ཅན་གྱིས་རྣམ་པར་གཟིགས། །གང་གིས་སྔགས་ཀྱི་རིམ་ཐོབ་པ། །ེ་མ་དེ་ཡིས་བྱང་ཆུབ་འཐོབ། །སངས་རྒྱས་བྱང་ཆུབ་སེམས་དཔའ་ཡང ། །སྔགས་ཀྱི་སྤྱོད་པ་དང་པོར་འཛིན། །རྡོ་རྗེ་སྔགས་ནི་རབ་སྦྱོར་བས། །མཚུངས་པ་མེད་པའི་ཡེ་ཤེས་འཐོབ། །དེ་ལྟར་ཤེས་པའི་སངས་རྒྱས་ཏེ། །སྔགས་ཀྱི་སྤྱོད་པའི་རིམ་གནས་པ། །འབྲས་བུ་ཉིད་ལ་མི་གཟིགས་ཏེ། །དེ་ནི་སངས་རྒྱས་མཉམ་པར་བརྗོད། །སངས་རྒྱས་ང་རྒྱལ་དམིགས་ནས་ནི། །ཆོས་ཀྱི་དབྱིངས་ནི་འོད་གསལ་བ། །གང་ཞིག་བསྒོམ་པ་དེ་བས་ན། །སེམས་ཅན་སངས་རྒྱས་མཉམ་པར་གྱུར། །འཇིག་རྟེན་ཇི་ལྟར་སངས་རྒྱས་ཏེ། །ཇི་ལྟར་ཆོས་ནི་རྙོག་མེད་པ། །སེམས་ཅན་ཁམས་ནི་དེ་ལྟར་བཤད། །ནམ་མཁའ་ལྟ་བུར་དྲི་མ་མེད། །ངན་པར་བརྟགས་པའི་རྣམ་རྟོག་གིས། །རིན་ཆེན་སེམས་ནི་དྲི་ཅན་བྱས། །སེམས་དག་པས་ནི་དག་པར་འགྱུར། །ཇི་ལྟར་ནམ 84.281a མཁའ་མི་འཇིག་པ། །ནམ་མཁའ་ཇི་བཞིན་དེ་བཞིན་སེམས། །སེམས་ཀྱི་རིན་ཆེན་བསྐུལ་བ་ལས། །སེམས་ཉིད་བསྒོམ་པ་སངས་རྒྱས་ཏེ། །སྐྱེ་བར་སངས་རྒྱས་དམ་པ་ཉིད། །རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནས། །ཕྱི་རོལ་གྱུར་པ་ཅུང་ཟད་མེད། །ཡིད་ཀྱིས་སངས་རྒྱས་ཐམས་ཅད་ཉིད། །ཁམས་གསུམ་དབང་ཕྱུག་ཆེན་པོ་སྟེ། །འཇིག་རྟེན་གསུམ་གྱི་རྒྱལ་པོ་ཆེ། །སེམས་གཅིག་གིས་ནི་ཐོབ་པར་འགྱུར། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱའི་རང་བཞིན་ཏེ། །ཆོས་ཀྱི་དབྱིངས་ནི་མཆོག་ཏུ་ཞི། །འདི་ནི་རིན་ཆེན་སེམས་སུ་བརྗོད། །གཟུགས་དང་ཚོར་བ་འདུ་ཤེས་དང ། །འདུ་བྱེད་དང་ནི་རྣམ་ཤེས་ཉིད། །འདི་དག་ཐམས་ཅད་སེམས་ལས་སྐྱེས། །ཐུབ་པ་འདི་ནི་གཞན་མི་འགྱུར། །ཡིད་བཞིན་ནོར་བུ་རིན་པོ་ཆེ། །འདོད་ཡོན་འབྲས་བུ་རབ་སྟེར་བ། །སེམས་ཀྱི་དེ་ཉིད་རང་བཞིན་དག་།སངས་རྒྱས་བྱང་ཆུབ་འབྲས་བུ་སྟེར། །དེ་ཉིད་ཕྱིར་ན་སྔགས་རྒྱལ་གྱིས། །སེམས་ཀྱི་རྡོ་རྗེ་བསྐུལ་བ་ཡི། །ཟབ་མོའི་རྣམ་པ་ངེས་ལྡན་པའི། །ཕྱེད་པར་དགའ་བའི་དངོས་གྲུབ་སྟེར། །རྡོ་རྗེ་སེམས་དཔའི་སྙིང་པོ་སྣང་བའི་ལེའུ་སྟེ་དྲུག་པའོ།། །། དེ་ནས་རྡོ་རྗེ་ཆེན་པོ་རྡོ་རྗེ་ཅན་མཁའ་འགྲོ་མའི་གུར་བསྐྱེད་པའི་རྣལ་འབྱོར་གྱི་ཏིང་ངེ་འཛིན་ལ་ཞུགས་ཏེ། བདག་ཉིད་ཀྱི་རྣལ་འབྱོར་གསུངས་པ། སངས་རྒྱས་གནས་ནི་རབ་རྫོགས་དང ། །རྣམ་པ་ལྔ་པོ་བསྒོམ་པ་དང ། །ཀུན་ཏུ་བཟང་པོའི་རང་བཞིན་དང ། །རང་གི་ལྷག་པའི་ལྷར་བསྒྲུབ་དང ། །དཀྱིལ་འཁོར་རྣམས་ཀྱི་དགོད་པ་དང ། །མཆོད་བསྟོད་བདུད་རྩི་ལ་སོགས་པ། །རིམ་པས་རྗེས་སུ་བསྒོམས་པར་བྱ། །རྣལ་འབྱོར་ཡན་ལག་དྲུག་ཏུ་འདོད། །ོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། བཅོམ་ལྡན་འདས་དེ་བཞིན་གཤེགས་པ་མི་བསྐྱོད་པས་དེ་སྐད་ཅེས་བཀའ་སྩལ་ཏོ། །ོཾ་སརྦ་ཏ་ཐཱ་ག་ཏ་ཨ་མྲྀ་ཏ་སཝཱ་ད་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། བཅོམ་ལྡན་འདས་དེ་བཞིན་གཤེགས་པ་ཚེ་དཔག་ཏུ་མེད་པས་དེ་སྐད་ཅེས་བཀའ་སྩལ་ཏོ། ། 84.281b ོཾ་སརྦྦ་ཏ་ཐཱ་ག་ཏ་སྟུ་ཏེ་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་གིས་དེ་སྐད་ཅེས་བཀའ་སྕལ་ཏོ། །ོཾ་སརྦྦ་ཏ་ཐཱ་ག་ཏ་པུ་ཛཱ་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། བཅོམ་ལྡན་འདས་དེ་བཞིན་གཤེགས་པ་བ་རྡོ་རྗེ་རྟ་མཆོག་གིས་དེ་སྐད་ཅེས་བཀའ་སྩལ་ཏོ། །ོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། ་བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པས་དེ་སྐད་ཅེས་བཀའ་སྩལ་ཏོ། །སྤྲོས་པ་དང་ནི་བསྡུས་པའི་སྐུ། །རྒྱལ་ཆེན་རྣམ་པར་སྣང་མཛད་ཆེ། །ཆོས་དབྱིངས་ཡི་གེ་ལས་བསྐྱེད་པ། །དེ་ནི་སངས་རྒྱས་གནས་བཀོད་བྱ། །ོཾ་སརྦྦ་ཏ་ཐཱ་ག་ཏ་ཨ་ནི་ལ་ཡ་བཛྲ་སཝ་བྷཱ་ཝ་ཨཱཏྨ་ཀོ\ུ0f85ཧཾ། རྣམ་པར་སྣང་མཛད་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་ཁམས་ཀྱི་དབུས་གནས་པར། །འབྱུང་བཞིའི་བདག་ཉིད་དཀྱིལ་འཁོར་ཉིད། །དེ་ཡི་སྟེང་དུ་སངས་རྒྱས་བསམ། །སྤྲོས་ནས་གཞལ་ཡས་གནས་དགོད་བྱ། །རྡོ་རྗེ་ལྟ་བུ་མི་ཕྱེད་ཕྱིར། །དེས་ན་མི་བསྐྱོད་བསྒོམ་པར་བྱ། །མ་སྐྱེས་རྗེས་སུ་དྲན་པ་ལས། །རྣམ་པར་སྣང་མཛད་ཕན་པ་ཉིད། །རིན་ཆེན་རྣམས་ཀྱི་མཆོག་གི་མཆོག་།འདི་ནི་རིན་ཆེན་སེམས་སུ་བཤད། །རྡོ་རྗེ་ཆོས་ནི་རྒྱལ་པོ་ཆེ། །འདོད་ཆགས་མཚན་ཉིད་འཛིན་པ་ལས། །རྡོ་རྗེ་སེམས་དཔའི་གནས་འདུག་པའི། །སེམས་ནི་འདོད་ཆགས་ཞེས་བྱར་བཤད། །གང་ཕྱིར་འབྲས་བྲལ་མི་འགྲུབ་སྟེ། །དེ་ཕྱིར་དོན་ཡོད་རབ་ཏུ་གྲགས། །རིག་མ་མཛེས་མ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བུམ་པའི་དབང་ནི་དང་པོ་སྟེ། །གཉིས་པ་ལ་ནི་གསང་བའི་དབང ། །གསུམ་པ་ཤེས་རབ་ཡེ་ཤེས་ཏེ། །ཇི་ལྟར་ལུས་ནི་དེ་བཞིན་གཤེགས། །དཀྱིལ་འཁོར་དམ་པ་བྲིས་ནས་ནི། །དམ་ཚིག་ཁུ་བའི་ཆོ་ག་ཡིས། །ཧཾ་དང་བསམ་གཏན་བསྐྱེད་བྱས་ནས། །དེ་ཚེ་དབུགས་དབྱུང་སྦྱིན་པར་བྱ། །མཁའ་འགྲོ་ལྔ་དང་ལྡན་པ་དང ། །དམ་ཚིག་ལྔ་ཡིས་བཀང་བ་དང ། །མཁའ་འགྲོ་མ་ཡི་ཚོགས་ལྡན་པས། །སློབ་མ་རྡོ་རྗེ་ཅན་ལ་སྐུར། །རྡོ་རྗེ་ས་བོན་རབ་སྦྱོར་བས། །རང་གི་ལྷག་པའི་ལྷར་བྱས་ནས། །སློབ་མ་རྟག་པར་ངེས་བསམས་ཏེ། །རྒྱུན 84.282a གྱི་རིགས་ཀྱི་མིང་གིས་ནི། །སློབ་མ་རྡོ་རྗེ་ཅན་དབང་བསྐུར། །སྦྱིན་དང་བདག་མ་སྒྲོལ་མ་དང ། །དཀར་མོ་ལ་སོགས་བདག་གཟུགས་ཀྱི། །རྡོ་རྗེ་བཙུན་མོ་རབ་སྦྱོར་བས། །རྡོ་རྗེ་བླ་མེད་བཤད་པར་བྱ། །བླ་ན་མེད་པའི་དེ་ཉིད་འདི། །གཉིས་སུ་མེད་ཅིང་ཡི་གེ་མེད། །ཆོས་ཀྱི་དབྱིངས་ནི་འོད་གསལ་བྱེད། །བདེ་བ་བཟང་པོའི་རོ་མྱང་གིས། །སྒྲིབ་པ་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ག་དང་ཧ་ཞེས་བྱ་བ་དང ། །དང་པོ་མཐར་ཡང་ཤཝ་ལྡན་པའི། །རབ་ཏུ་གསལ་བ་དམ་པ་ཉིད། །དངོས་གྲུབ་ཐམས་ཅད་རབ་སྟེར་བ། །ཆོ་གས་རྡོ་རྗེ་བདུད་རྩི་མྱང ། །འདི་དག་ཟོས་པ་ཙམ་གྱིས་ནི། །སངས་རྒྱས་ཀུན་མཉམ་རྣལ་འབྱོར་པ། །རྡོ་རྗེ་དང་ནི་མཉམ་པར་འགྱུར། །ནད་རྣམས་ཐམས་ཅད་རབ་ཏུ་ཞི། །དེ་ནི་གཟི་བརྗིད་ལུས་ཆེན་པོ། །འཇིག་རྟེན་ཀུན་གྱི་ཡིད་འཕྲོག་པ། །ཕས་ཀྱི་རྒོལ་བ་ཀུན་ལས་རྒྱལ། །འཇིག་རྟེན་ཀུན་གྱི་བདག་པོས་བརྒྱན། །ལྷ་རྣམས་ཀྱིས་ནི་འདྲེན་པར་བརྗོད། །མཁའ་འགྲོ་ལྔ་ཡི་བདག་ཉིད་འགྱུར། །ཆོས་ཀྱི་ཟས་ནི་ཟ་བ་པོ། །དམ་ཚིག་ཆེན་པོའི་བསམ་གཏུན་ཟོས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །མི་བསྐྱོད་བརྟེན་པའི་རྣལ་འབྱོར་པ། །ནད་རྣམས་ཐམས་ཅད་རྣམ་པར་སྤངས། །རྟག་པས་མདངས་ནི་ཆེན་པོར་ལྡན། །རྡོ་རྗེ་ཉི་མས་རྒས་པ་མེད། །རྡོ་རྗེ་ཆོས་ནི་བསྟེན་པ་ཡིས། །བུད་མེད་ཀུན་ལ་ལོངས་སྤྱོད་དོ། །དོན་ཡོད་རྒྱལ་པོ་ཆེན་པོ་ནི། །རྡོ་རྗེ་སྲོག་གི་ཡན་ལག་འབྱུང ། །དོན་ཀུན་སྒྲུབ་ཅིང་དཔལ་དང་ལྡན། །དེས་ནི་རྣལ་འབྱོར་པར་ནི་བརྗོད། །མི་བསྐྱོད་བཏུང་བའི་སྦྱོར་བ་ལས། །སྟོང་ཕྲག་ལྦས་ནི་འཚོ་བར་འགྱུར། །ཕན་པ་ཡིས་ནི་ཁྲི་རུ་བརྗོད། །རྡོ་རྗེ་ཉི་མས་རྡོ་རྗེའི་འབུམ། །ཚེ་དཔག་མེད་ཀྱིས་དཔག་མེད་དང ། །བདུན་གྱིས་ནམ་མཁའ་ཇི་སྲིད་བཤད། །རྡོ་རྗེ་ཉི་མ་དཔག་མེད་དག་།འཁོར་བའི་སྒྲུབ་ཐབས་རྩ་བ་ཉིད། །འདི་དག་བསྟེན་པས་རྣལ་འབྱོར་པ། །ཀུན་དུ་བཟང་པོ་འདྲ་བར་འགྱུར། །ཤེས་རབ་ཕ་རོལ་ཕྱིན་ཡེ་ཤེས། །འདི་ནི་རྡོ་རྗེ་ཉི་མར་བརྗོད། །ཆོས་རྣམས་ཐམས་ཅད་ཀྱི་ནི་གནས། །དེ་བཞིན་གཤེགས་པ་ཚེ་དཔག་མེད། །སངས་རྒྱས་རྡོ་རྗེ་ཅན་ཉིད་སྟེ། །ཐབས་དང་ཤེས་རབ་འཕེལ་མཛད་པ། །ཁམས་གསུམ་དག་ནི་ཐམས་ཅད་དུ། ། 84.282b ས་དང་ས་འོག་བར་སྣང་ལ། །ཁྲག་དང་ཁུ་བས་ཁྱབ་པའི་ལུས། །རིགས་ཀྱི་དབང་ཕྱུག་གིས་འདི་གསུངས། །སེན་མོ་བ་སྤུ་དེ་བཞིན་གཤེགས། །ཁམས་དང་ཁུ་བ་སྣང་མཐའ་ཡས། །ལྤགས་དང་ཁྲག་ལ་གཟི་བརྗིད་ཆེ། །ཚིལ་དང་རྐང་ལ་རྡོ་རྗེ་འཛིན། །ཐམས་ཅད་མགོན་པོ་རྣམ་སྣང་མཛད། །རྩ་དང་ཤ་ལ་བདུན་རྒྱལ་པོ། །འདི་རྣམས་ལ་ནི་སངས་རྒྱས་ལྔར། །རྡོ་རྗེ་མཁའ་འགྲོས་རྣམ་པར་བཤད། །ས་ཡི་ཁམས་ནི་རྣམ་དག་པ། །སྤྱིན་ནི་འཁོར་ལོ་མཛེས་མ་ཉིད། །རྡོ་རྗེ་བཙུན་མོ་དང་བ་སྟེ། །པད་མའི་བུ་མོ་ཚ་བ་ཉིད། །སྒྲོལ་མ་རླུང་ནི་རྣམ་དག་པ། །རྡོ་རྗེ་བཙུན་མོ་བཞི་རྣམས་ནི། །རྡོ་རྗེ་མཁའ་འགྲོ་ཞེས་བྱའོ། །གུར་གྱིས་དེ་རྣམས་བཀའ་སྩལ་ཏོ། །སྔགས་ཐམས་ཅད་རྣམ་པར་དག་པར་བདུད་རྩི་ལྔ་མཆོག་ཏུ་བྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏེ་ལེའུ་བདུན་པའོ།། །། ཁྱོད་ནི་ཞེ་སྡང་རྡོ་རྗེ་ཡོངས་སྐྱོང་བ། །ཐུགས་དང་ཆོས་ནི་ཤིན་ཏུ་རྣམ་དག་པས། །ལྷ་ཡི་ལུས་ནི་ཡང་དག་བརྒྱན་མཛད་པ། །པུཀྐ་སཱི་ནི་བདག་ལ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་དོན་གྱི་ཕྱིར། །སྟོང་པ་ཉིད་སྤངས་སྐྱེ་བ་བཞེས་པར་མཛོད། །ཁྱོད་ནི་གཏི་མུག་རྡོ་རྗེ་ཡོངས་སྐྱོང་བ། །སྐུ་ཡི་བདག་པོ་ཆོས་ཀྱི་གཟུགས་བརྙན་གྱིས། །ལྷ་ཡི་ལུས་ནི་ཡང་དག་བརྒྱན་མཛད་པ། །མགོན་པོ་རི་ཁྲོད་མ་ལ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་སྨན་སླད་དུ། །སྟོང་པ་ཉིད་སྤངས་སྐྱེ་བ་བཞེས་པར་མཛོད། །ཁྱོད་ནི་འདོད་ཆགས་རྡོ་རྗེ་ཡོངས་སྐྱོང་བ། །གསུང་དག་ལེགས་པར་སོ་སོར་རྟོགས་པ་ཡིས། །ལྷ་ཡི་ལུས་ནི་ཡང་དག་བརྒྱན་མཛད་པ། །གཏུམ་པར་ལྡན་པ་བདག་ལ་གཟིགས་པར་མཛོད། །རྣམ་པར་འདྲེན་པ་འཇིག་རྟེན་སྨན་སླད་དུ། །སྟོང་པ་ཉིད་སྤངས་སྐྱེ་བ་བཞེས་པར་མཛོད། །ཁྱོད་ནི་སངས་རྒྱས་ཐམས་ཅད་ཡོངས་སྐྱོང་བ། །གཟུགས་ཀུན་ནན་ཏན་ཐམས་ཅད་མཉམ་ཉིད་ཀྱིས། །ལྷ་ཡི་ལུས་ནི་ཡང་དག་བརྒྱན་མཛད་པ། །ཌོམ་བི་བདག་ལ་མགོན་པོ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་སྨན་སླད་དུ། །སྟོང་པ་ཉིད་སྤངས་སྐྱེ་བ་བཞེས་པར་མཛོད། །ཐམས་ཅད་བཞེངས་པར་མཛད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །འཁོར་ལོ་ཅན་རྣམས་ཐམས་ཅད་ཀྱི། །འདིས་ནི་བསྐྱེད་པར་འགྱུར་བར་ན། །ཡེ་ཤེས་རྡོ་རྗེ་ཅན་གྱིས་བྱ། །དཀྱིལ་འཁོར་བདག་པོ་འདི 84.283a སྐད་གསུངས། །ོཾ་སརྦྦ་ཏ་ཐཱ་ག་ཏ་ཁེ་ཙ་རཱ་བཛྲ་སཝ་བྷཱ་ཝ་ཨཱཏྨ་ཀོ\ུ0f85ཧཾ། ཨོཾ་སརྦ་ཏ་ཐཱ་ག་ཏ་བྷུ་ཙ་ར་སཝ་བྷཱ་ཝ་ཨཱཏྨ་ཀོ\ུ0f85ཧཾ། ཨོཾ་སརྦ་ཏ་ཐཱ་ག་ཏ་པཱ་ཏཱ་ལ་ཝཱ་སི་ནཱི་བཛྲ་སཝ་བྷཱ་ཝ་ཨཱཏྨ་ཀོ\ུ0f85ཧཾ། སྐུ་གསུང་ཐུགས་ཀྱི་ཆོས་རྣམས་ཀྱི། །བྱིན་བརླབས་གནས་སུ་བརྟག་པར་ནི། །ཡེ་ཤེས་རྡོ་རྗེ་ཅན་གྱིས་བྱ། །འདི་ནི་བྱང་ཆུབ་རིམ་བསྟན་པའོ། །བཅོམ་ལྡན་འདས་སྐུ་དང་གསུང་དང་ཐུགས་ཀྱི་བདག་པོས་དེ་སྐད་ཅེས་བཀའ་སྩལ་ཏོ། །ཕྱག་རྒྱ་ཆེན་པོར་རབ་སྦྱོར་བས། །སྐུ་ཡི་རིན་ཆེན་སྦྱང་བར་བྱ། །བསམ་གཏན་རྡོ་རྗེ་བསམས་ནས་ནི། །སེམས་ཀྱི་རིན་ཆེན་རབ་སྒྲུབ་བྱེད། །རྡོ་རྗེ་བཟླས་པའི་ཁྱད་པར་གྱིས། །ངག་གི་རྡོ་རྗེ་དྲི་མ་མེད། །གཏི་མུག་རྡོ་རྗེ་རབ་སྦྱོར་བས། །མིག་གི་རྣམ་པར་ཤེས་པ་སྦྱང ། །ཞེ་སྡང་རྡོ་རྗེ་བསམ་པ་ཡིས། །སྒྲ་ཡི་སྒོར་ནི་བསམ་པའོ། །སྣ་ནི་སེར་སྣ་རྡོ་རྗེ་ཡིས། །རོ་དྲུག་འདོད་ཆགས་རྡོ་རྗེ་ཡིས། །ལུས་ནི་ཕྲག་དོག་རྡོ་རྗེ་ཡིས། །ཡིད་ནི་ཀུན་དུ་བཟང་པོ་ཡིས། །དེ་ཉིད་མཁའ་འགྲོ་བདག་མེད་མ། །འདི་རྣམས་ཀྱིས་ནི་རྣམ་པར་སྦྱང ། །གལ་ཏེ་འགལ་བ་ཡོད་པ་མ་ཡིན་ཡང ། །དེ་ཚེ་རྒྱལ་བའི་དངོས་པོ་སྦྱང་བ་ཡོད། །ཀུན་རྫོབ་བདེན་པར་ཡང་དག་གནས་ནས་ནི། །འཁོར་ལོ་གཟུགས་ཀྱི་ཆོས་ཙམ་རྣམ་པར་བསྒོམ། །ཆོས་ཀྱི་དངོས་པོ་མ་བྱུང་སྤྱད་པ་ལས། །གང་ཟག་ཐམས་ཅད་རྣམ་སྤངས་འཇིག་རྟེན་པ། །འཇིག་རྟེན་འགྲོ་བར་བསམ་པར་མི་ནུས་ཏེ། །ཆོས་ཀྱི་ཚུལ་གྱིས་ཐམས་ཅད་རྣམ་པར་དག་།ཚིག་པ་རྣམས་ཀྱི་གདུང་དང་དུག་ཁྱབ་པའི། །ལུས་ཀྱི་སྨན་ནི་བཞིན་གྱི་དུག་ཉིད་དེ། །ཇི་ལྟར་ཆུ་ནི་རྣ་བར་ཞུགས་པ་ལ། །ཡང་ནི་ཆུ་ནི་ཐབས་སུ་འགྱུར་བ་ཉིད། །ཇི་ལྟར་རླུང་གིས་དཀྲུགས་པའི་སེམས་རྣམས་ཀྱི། །དེ་བཞིན་མཁས་པས་མོན་སྲན་གྲེའུ་བཞིན། །འདོད་ཆགས་ཀྱིས་ཀྱང་རྨོངས་པ་ཡི། །སྐྱེ་བོ་འདོད་ཆགས་མེ་ཡིས་གདུང ། །འདོད་ཆགས་ཀྱིས་བསྐྱེད་འཇིག་རྟེན་པ། །འདོད་ཆགས་མེད་པས་ཟད་པར་འགྱུར། །འདོད་ཆགས་རྡོ་རྗེ་ཡོངས་ཤེས་པས། །ཡིད་ནི་རྡོ་རྗེ་སེམས་དཔར་འགྱུར། །འདོད་ཆགས་ཞགས་པས་འཆིང་བ་ཡིས། །འཇིག་རྟེན་ཆགས་པས་ཁྱབ་པར་བརྗོད། །འདོད་ཆགས་བྲལ་བའི་མངོན་བྱང་ཆུབ། ། 84.283b འདོད་ཆགས་མཐར་ཕྱིན་རྣམས་མི་འདོད། །དེ་ནས་རྡོ་རྗེ་སྒྲོལ་མ་ཡི། །སྒྲུབ་ཐབས་སྦྱིན་སྲེགས་ལས་ཀྱི་ནི། །ཆོ་གས་འདོད་དོན་ཐམས་ཅད་ནི། །སྒྲུབ་ཐབས་ཡང་དག་རབ་བཤད་བྱ། །དེ་ལ་འདི་རྣམས་ནི་སྔགས་ཀྱི་རྐང་པ་ཡིན་ཏེ། ན་མོ་རཏྣ་ཏྲ་ཡཱ་ཡ། ཨོཾ་ན་མ་ཨཱརྱཱ་བ་ལོ་ཀི་ཏེ་ཤཝ་རཱ་ཡ། བོ་དྷི་ས་ཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་སརྦ་དུཥྚནྨ་མ་ཀྲྀ་ཏེ་ཛཾ་བྷ་ཡ་སྟམྦྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། སརྦ་དུཥྚ་སྟམྦྷ་ནི་ཏཱ་རཱ་ཡ་སཝཱ་ཧཱ། མ་མོ་དཀྱིལ་འཁོར་དབུས་གནས་པར། །ལྷ་མོ་སྒྲོལ་མ་བསྒོམ་པར་བྱ། །ཕྱག་བརྒྱད་ཞལ་ནི་བཞི་པ་སྟེ། །རྒྱན་རྣམས་ཀུན་གྱིས་རྣམ་པར་བརྒྱན། །གསེར་གྱི་ཁ་དོག་འདྲ་བར་བསྒོམ། །གཞོན་ནུ་མ་ཡི་མཚན་ཉིད་འབར། །རྡོ་རྗེ་ཉི་མས་དབང་བསྐུར་མ། །སངས་རྒྱས་བཞི་ཡི་དབུ་རྒྱན་ཅན། །ལང་ཚོ་ལ་ནི་བབ་པའི་ལུས། །གཡོ་བ་གསེར་གྱི་རྣ་ཆ་མ། །སྣ་ཚོགས་པདྨའི་གདན་ལ་བཞུགས། །འོད་ཟེར་དམར་པོས་རྣམ་པར་བརྒྱན། །རྡོ་རྗེ་ཞགས་པ་དེ་བཞིན་དུང ། །གཡས་པས་མདའ་ནི་འགེངས་པའོ། །རྡོ་རྗེ་ལྕགས་ཀྱུ་ཨུཏ་པ་ལ། །སྡིགས་འཛུབ་གཡོན་པས་འཛིན་པ་མོ། །རྡོ་རྗེ་དཀྱིལ་དཀྲུང་སྦྱོར་བ་ཡིས། །གནས་གསུམ་པ་ནི་བསྒྲུབ་པར་བྱ། །ཤར་དུ་མེ་ཏོག་སྒྲོལ་མ་སྟེ། །ཁ་དོག་དཀར་ཞིང་ཡིད་འོང་མ། །ཡི་གེ་ཨོཾ་ལས་སྐྱེས་པའོ། །མེ་ཏོག་ཕྲེང་བས་ལག་པ་ཁྱབ། །ཕྱག་གཉིས་ཞལ་ནི་གཅིག་མ་ཉིད། །རྒྱན་རྣམས་ཀུན་གྱིས་རྣམ་པར་བརྒྱན། །གཡས་སུ་བདུག་སྤོས་སྒྲོལ་མ་སྟེ། །མདོག་གནག་མཛེས་པའི་གཟུགས་ཅན་མ། །སྤོས་དང་དུང་གིས་ལག་པ་བྲེལ། །རྒྱན་རྣམས་ཀུན་གྱིས་རྣམ་པར་བརྒྱན། །ནུབ་ཏུ་མར་མེ་སྒྲོལ་མ་སྟེ། །དམར་མོ་སྡོང་བུས་ལག་པ་ཁྱབ། །མདོག་སེར་རྣམ་པར་རྒྱན་ཆེན་པོ། །གཡོ་བ་གསེར་གྱི་རྣ་ཆ་མ། །བྱང་དུ་དྲི་ཡི་སྒྲོལ་མ་སྟེ། །དྲི་ཡི་དུང་གིས་ལག་ཁྱབ་པ། །ཁྲག་གི་མདོག་ལྟར་ལྷ་མོ་ནི། །དཀྱིལ་འཁོར་སྙིང་པོ་བསྒོམ་པར་བྱ། །ལྕགས་ཀྱུ་ལ་སོགས་རབ་དབྱེ་བས། །དེར་ནི་སྒོ་ཡི་སྲུངས་མ་བསམ། །སྟེང་དུ་གཙུག་ཏོར་རྣམ་རྒྱལ་མ། ། 84.284a འོག་ཏུ་གནོད་མཛེས་མ་རབ་བསྒོམ། །འཁོར་ལོ་ཀླུ་ཞགས་བསྣམས་ནས་ནི། །སྤྲོ་ཞིང་སྔགས་ནི་བཟླ་བར་བྱ། །ོཾ་ཏཱ་རེ་ཏུཏྟཱ་རེ་ཏུ་རེ་སཝཱ་ཧཱ། ཡི་གེ་བཅུ་ཡིས་ལྷ་མོ་བཅུ། །ཕ་རོལ་ཕྱིན་བཅུ་ལ་གནས་མ། །འབྲས་བུ་ཐམས་ཅད་རབ་བསྒྲུབ་ཕྱིར། །རབ་ཏུ་འབད་པས་བསྒོམ་པར་བྱ། །སྔགས་ནི་མཆོག་དང་ཕུལ་དུ་ཕྱིན། །སངས་རྒྱས་ཀུན་གྱིས་ཕྱག་མཛད་མ། །ཀླགས་པས་འགྱུར་བྱེད་དྲག་པོ་སྟེ། །རྡོ་རྗེ་གུར་གྱིས་བཤད་པའོ། །སྔགས་འདིས་གོས་ཀྱི་ཐུ་བར་བདུན། །མངོན་པར་བསྔགས་པ་བྱ་བ་སྟེ། །མདུད་པས་བཅིངས་ཏེ་ནགས་ཚལ་དུ། །འགྲོ་ནའང་སུས་ཀྱང་མི་འཁྱེར་ཏེ། །སྟག་དང་ཆོམ་རྐུན་དང་ཆུ་སྲིན་སྣང་འཐུངས་དང་སེང་གེ་དང་སྦྲུལ་དང་མཆེ་བ་ཅན་དང་མ་ཧེ་དང ། དོམ་དང་སྙུག་གླང་ལ་སོགས་དྲན་པ་ཙམ་གྱིས་ཉམས་ཤིང་ཡིབ་བོ། །སྔགས་འདིས་ཨུད་པ་ལ་ལ་སྦྱིན་སྲེག་ཇི་སྲིད་དུ། ལན་བརྒྱ་རྩ་བརྒྱད་ཇི་ཙམ་གྱིས་བསྐུ་བར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་མེ་ཝ་ཤ་མ་མ་ན་ཡ་སཝཱ་ཧཱ། ཡང་སྔགས་དེ་ཉིད་ཀྱིས་ཁཝའི་སྒྲོ་ལ་ལན་སུམ་བཅུ་རྩ་གཉིས་ཡོངས་སུ་བཟླས་ཏེ། དགྲའི་ཁྱིམ་དུ་སྦས་ན། ཉི་མ་བདུན་གྱིས་སྐྲོད་པར་བྱེད། ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་ཝ་དཏྟཾ་ཨུཙྪ་ཊཱ་ཡ་ཧཱུཾ་ཕཊ། དེ་ནས་གཞན་ཡང་སྦྱོར་བར་འགྱུར་བ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་ཀ་མཱ་རི་མ་ཧྱ་མུདྦཱ་ཧེ་ནེ་ཏ་སྱཱཿ ་པི་ཏཱ་པྲ་ཡཙྪ་ཏུ་མེ་སཝཱ་ཧཱ། སྤྲ་ཚིལ་དང་གཏུམ་པའི་ས་བོན་དང ། མྱོས་བྱེད་དང་ཨ་ཤོ་ཀའི་ལོ་མ་དང ། མེ་ཏོག་བསྲེག་བླུགས་བྱ་ཞིང ། མར་དང་སྦྲང་རྩི་བུ་རམ་དུ་བཅས་པ་སྟོང་ཕྲག་ལྔའི་སྦྱིན་སྲེག་ནི་བུ་མོའི་དངོས་གྲུབ་ལ་རབ་ཏུ་བསྔགས་ཏེ། ཉི་མ་བདུན་གྱིས་དེའི་ཚེ་རྣལ་འབྱོར་པས་རང་འདོད་པའི་བུ་མོ་ཐོབ་བོ། །དེ་ནས་གཞན་ཡང་རབ་ཏུ་སྦྱོར་བར་འགྱུར་བ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷ་ནི་སཝསྠཱ་ན་ཏ་ཨཱ་ཀར་ཥ་ཡ་མནྟི་ཀེ་ཛཿ ་སྔགས་འདིས་པ་ད་རའི་ཚེར་མ་སྟོང་ཕྲག་ལྔ་རང་བྱུང་གི་མེ་ཏོག་དང་སྦྲགས་ཏེ་བསྲེག་བླུགས་བྱ་བར་བརྗོད་པ་འདི་བྱས་པས་སྐྱེས་བུ་སྐྱོང་བ་རྣམས་ཀྱི་བུ་མོ་ཡང་འགུགས་པར་བྱེད་དོ། །དེ་ནས 84.284b གཞན་ཡང་སྦྱོར་བར་འགྱུར་བ་ཟླ་མཚན་འཛག་པའི་རས་ལ་བཅོམ་ལྡན་འདས་མ་ཕྱག་གཉིས་མ། ཞལ་གཅིག་ལག་པ་ལྕགས་ཀྱུ་དང ། ུཏྤ་ལ་དང་ཞགས་པར་བཅས་པ་རྣམ་པར་བྲིས་ཏེ། དེའི་མདུན་དུ་མཆོད་པ་བྱས་ཏེ། མེ་ཏོག་འདི་རྣམས་བཟང་ཞིང་དགེ་་་་།ཞེས་བྱ་བ་ལ་སོགས་པས་མཆོད་ནས་ཕྱི་ནས་བསྒོམ་པ་དང་ལྡན་པར་སྔགས་བཟླས་སོ། །ོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱི་མ་མེ་པ་སི་ཏཾ་སཝ་པཾ་ན་ཀ་ཐ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་རོ། །ཞགས་པས་མགྲིན་པར་བཅིངས་ཏེ། ལྕགས་ཀྱུར་དྲངས་ནས་བསྒྲུབ་བྱ་རྐང་པའི་འོག་ཏུ་བསམས་ཏེ། ཁོལ་མོའི་ཚུལ་གྱིས་སྤྱད་པར་བྱའོ། །དེ་ནས་གཞན་ཡང་སྦྱོར་བར་འགྱུར་བ་སྒྲོལ་མའི་གཟུངས་བདུན་མངོན་པར་བསྔགས་པར་བྱ་སྟེ། བདག་གི་མིག་གཉིས་མིག་སྨན་གྱིས་བསྐུ་བར་བྱ་ཞིང་རྒྱལ་པོའི་རིགས་ཀྱི་དྲུང་དུ་འཇུག་པར་བྱའོ། །དེ་ནས་རྒྱལ་པོ་སློབ་མ་དང་འདྲ་བར་གུས་པར་བྱེད་ཅིང་འགལ་བར་མི་བྱེད་པ་དང ། བཀའ་དྲིན་སྩོལ་ཞིང་སྙན་པར་བརྗོད་པར་བྱེད་པ་དང ། བྲན་དུ་ཡང་དག་པར་འགྲོ་ཞིང་ཁྲོས་པ་ཡང་དབང་དུ་འགྱུར་བ་སྟེ། འདི་ནི་མངོན་སུམ་དུ་མཐོང་བ་དང་ངོ་མཚར་དང་བཅས་པའོ། །དེ་ནས་གཞན་ཡང་སྦྱོར་བར་འགྱུར་བ་སྒྲོལ་མའི་གཟུངས་ལན་བརྒྱ་རྩ་བརྒྱད་བཟླས་ཏེ། ཁ་གཉིས་པའི་སོ་དུག་ཐལ་བར་བྱས་ལ། བ་ཁ་དོག་དམར་མོའི་མར་དང ། རྐའི་ཤིང་བལ་ལས་སྡོང་བུ་རབ་ཏུ་སྦར་མིག་སྨན་བསྡུ་བར་བྱའོ། །མིག་སྨན་རྡོ་རྗེ་ཉི་མ་དང ། རྡོ་རྗེ་ཆོས་དག་མཉེས་ལ་རྡོ་རྗེ་རྟ་མཆོག་གིས་བདུག་པར་བྱའོ། །ཐལ་བ་དང་ལྷན་ཅིག་མིག་ལ་བསྐུ་བར་བྱ་སྟེ། རྡོ་རྗེ་མིག་གིས་གང་བལྟས་པ་དེ། གལ་ཏེ་པད་མ་གར་གྱི་དབང་ཕྱུག་མི་འབབ་ན་དེའི་ཚེ་བདག་སྒྲོལ་མ་ལགས་ཏེ། བདག་གིས་སངས་རྒྱས་བཅོམ་ལྡན་འདས་རྣམས་དཀྲོངས་པ་ལགསོ། །དེ་ནས་གཞན་ཡང་རབ་ཏུ་སྦྱོར་བར་འགྱུར་བ་བྱིས་པ་སོ་མེད་པའི་ལྕེ་བླངས་ལ། སྒྲོལ་མའི་གཟུངས་བདུན་མངོན་པར་བསྔགས་པ་བྱས་ནས་བུང་བའི་རྒྱལ་པོའི་རྩ་བ་དང ། 84.285a བ་ལང་གི་གི་ཝང་ལྷན་ཅིག་བྱས་པས་དཔྲལ་བར་ཐིག་ལེ་ཡོངས་སུ་བཟུང་སྟེ། གང་བལྟས་པ་དེ་དབང་དུ་བྱེད་དོ། །དེ་ནས་གཞན་ཡང་སྦྱོར་བར་འགྱུར་བ་ལྟོ་བའི་སྲིན་བུ་ལ་གཟུངས་བདུན་མངོན་པར་བསྔགས་པ་བྱ་སྟེ། རྡོ་རྗེ་དང་ལྷན་ཅིག་སོ་རྩིས་བྱས་ལ་བྱིན་ཏེ། སྦྱོར་བ་མཆོག་ཟོས་པ་ན་མི་སྤོང་བ་དང ། གཞན་དུ་མི་དགའ་བ་དང ། གཞན་དུ་མི་འགྲོ་བ་དང ། རང་གི་བདག་པོ་ཡང་སྤོང་ངོ ། །དེ་ནས་གཞན་ཡང་སྦྱོར་བར་འགྱུར། ་་།བ་མར་ཁུ་བ་ཆེན་པོས་ཉེ་བར་བྱུགས་ལ། སྒྲོལ་མའི་གཟུངས་བཟླས་ལ་དེ་བསྒོམ་པར་བྱའོ། །བཟླས་པའི་མཐར་སཱ་ལུ་བཏགས་པས་འདག་གུའི་དྲི་མ་ལ་ཁུ་བ་བྱས་ཏེ། གང་ལ་བྱིན་པ་དེ་ལྔ་བོར་ཡང་མི་སྤོང་ངོ ། །དེ་ནས་གཞན་ཡང་སྦྱོར་བར་འགྱུར་བ་ཟླ་བ་ལ་ཉེ་བར་ཆགས་པའི་དུས་སུ་སྒྲོལ་མའི་གཟུངས་ཟློས་ཤིང་བསྙེན་པ་བྱས་ལ་དེ་ལས་བྱུང་བའི་འཇིག་རྟེན་དབང་ཕྱུག་བླངས་ཏེ། དུང་གི་ཐལ་བ་དང་མཉེ་བར་བྱ་ཞིང་རབ་ཏུ་གྲགས་མ་ཉིད་ལ་སྦྱར་ཏེ། ཇི་སྲིད་དུ་ལྔ་བོར་ཡང་རྗེས་སུ་འབྲང་ངོ ། །དེ་ནས་གཞན་ཡང་སྦྱོར་བར་འགྱུར་བ་སྒྲོལ་མའི་གཟུངས་ཀྱིས་མ་ད་ན་ཕ་ལ་ལན་བརྒྱ་རྩ་བརྒྱད་ཡོངསུ་བཟླས་ཏེ། འདོད་པའི་འབྲས་བུ་དེས་རྟ་མགྲིན་དང ། ་་ལྷན་ཅིག་པས་བསྐུས་ན་དབང་དུ་འགྱུར་རོ། །ོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་སྱ་བནྡྷ་ན་ཀྟ་མ་ཀུ་ནུ་མུཿ སཝཱ་ཧཱ། ཞེས་བྱ་བའི་སྔགས་འདི་ཨརྐའི་ལོ་མ་ལ་བསྒྲུབ་བྱའི་མིང་ནང་དུ་བཅུག་པར་བྲིས་ལ་ནེའུ་ལེའི་ཁུང་བུར་སྦས་ན་བཅིངས་པ་ལས་གྲོལ་བར་འགྱུར་རོ། །དེ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་འབྱུང་གནས་ཡང་དག་པར་རབ་ཏུ་བཤད་པར་བྱའོ། །གང་གིས་བསྒོམ་པ་ཙམ་གྱིས་ཕས་ཀྱི་རྒོལ་བ་ཐམས་ཅད་ཚར་གཅོད་པར་འགྱུར་རོ། །ལྷ་མོ་ཕྱག་གཉིས་མ། ཞལ་གཅིག་མ། སྐུ་མདོག་དཀར་བ་ཡིད་འཕྲོག་མ། སྐྲ་ཕྱེད་དུ་ལི་བ། ཆུ་སྐྱེས་ཤིན་དུ་དཀར་བ་ལ་ཡང་དག་པར་གནས་མ། ལག་པ་གཡས་པར་པད་མ་མདོག་དཀར་བ་ཡང་དག་པར་བསྒོམས་ཤིང ། གཡོན་ན་ཤེས་རབ་ཀྱི་ཕ་རོལ་ཏུ་ཕྱིན་པ། རྡོ་རྗེ་སྐྱིལ་དཀྲུངས་སུ་གནས་པ། 84.285b རྒྱན་ཐམས་ཅད་ཀྱིས་རྣམ་པར་བརྒྱན་པ། ལྟེ་བའི་དཀྱིལ་འཁོར་དུ་བསྒོམ་པར་བྱའོ། །ོཾ་ལས་སྐྱེས་མ། མཆོག་ཏུ་དགའ་བར་བྱེད་མ། དམ་ཚིག་སེམས་དཔའ་བསྐྱེད་ནས་ཡེ་ཤེས་སེམས་དཔའ་བསྒོམ་པར་བྱ་ཞིང་རྣལ་འབྱོར་ཟླ་བ་དྲུག་དུ་གོམས་པས་ཤེས་རབ་ཀྱི་ཕ་རོལ་ཏུ་ཕྱིན་པར་འགྱུར་རོ། །མཚན་མོ་བདུན་དུ་སྦྱོར་བས་བསྟན་བཅོས་ཐམས་ཅད་ཤེས་པར་བྱེད་དོ། །འབུམ་བཟླས་པའི་སྦྱོར་བས་ཉི་མ་རེ་རེ་ལ་ཚིགས་བཅད་བརྒྱ་བརྒྱ་བྱེད་པར་འགྱུར་རོ། །རབ་ཏུ་འབད་པ་མེད་པར་གཞུང་བརྒྱ་ཡང་འཛིན་པར་བྱེད་དོ། །དེ་ལ་སྔགས་ཀྱི་རྐང་པར་གྱུར་པ། ཨོཾ་པི་ཙུ་པི་ཙུ་པྲཛྙཱ་བརྡྷ་ནི། ཛྭ་ལ་ཛྭ་ལ་མེ་དྷཱ་བརྡྷ་ནི། དྷི་རི་དྷི་རི་བུདྡྷ་བརྡྷ་ནི་སཝཱ་ཧཱ། ཁཝ་མི་ཟེར་བ་ན། སྔགས་འདིས་བདུན་དུ་མངོན་པར་བསྔགས་པར་བྱས་ཏེ། མ་བསླངས་པའི་སིངས་པོ་སྐྱུར་པོ་ཇི་སྲིད་ཟླ་བ་དྲུག་དུ་གང་འཐུང་བ་དེ་ཤེས་རབ་ཆེན་པོར་འགྱུར་རོ། །དེ་ནས་རྡོ་རྗེ་སློབ་དཔོན་གྱི། །མཚན་ཉིད་ཡང་དག་རབ་བཤད་བྱ། །དེ་ཡིས་ཉེ་བར་བསྟེན་པའི་སྔགས། །སྒྲུབ་པ་པོ་ཡིས་ངེས་པར་འགྲུབ། །དལ་ཞིང་ཟབ་མོའི་ཆོས་དང་ལྡན། །རིག་པ་ཀུན་ལ་མཁས་དང་བཅས། །སྦྱིན་བསྲེག་དཀྱིལ་འཁོར་སྔགས་ཤེས་ཤིང ། །རབ་གནས་གཏོར་མའི་ཕ་རོལ་སོན། །དེ་ཉིད་བཅུ་ནི་རྣམ་པར་རིག་།ཉན་ཐོས་སྤྱོད་པ་བསྲུང་བ་པོ། །སྔགས་སྤྱོད་རིམ་པ་གུས་པ་དང ། །གཟུགས་ལྡན་མཐོང་ན་དགའ་བ་དང ། །དཀྱིལ་འཁོར་འདྲི་ཞིང་བཟླས་པར་ལྡན། །རྩ་བའི་ལྟུང་བ་འཇོམས་པ་པོ། །སྔགས་དང་ལུས་སྐྱོབ་སྦྱོར་བ་ཡིས། །འཇིག་རྟེན་རྣམས་ནི་བདེ་བར་བྱེད། །དེ་ལྡན་བླ་མས་བཅས་ནས་ནི། །གང་གིས་ཀྱང་ནི་སྨད་མི་བྱ། །སྐྱེ་བོ་བླ་མ་སྨོད་པ་དང ། །དམྱལ་བ་ཆེན་པོར་འཚེད་པར་འགྱུར། །ཇི་ལྟར་རྡོ་རྗེ་འཛིན་རྒྱལ་ནི། །སངས་རྒྱས་ཀུན་གྱིས་དང་པོར་མཆོད། །རྡོ་རྗེ་གུར་གྱིས་འགྲོ་བ་ཡིས། །དེ་ལྟར་བླ་མའི་ནན་ཏན་བྱ། །བླ་མའི་གྲིབ་མ་བུད་མེད་དང ། །ལྷམ་དང་སྟན་དང་མལ་སྟན་རྣམས། །རྨོངས་ཆེན་གང་ཞིག་འགོང་བྱེད་ན། །སྐྱེས་པ་དེ་ནི་སྤུ་གྲིར་ལྟུང ། ། 84.286a ལེགས་པར་དབང་བསྐུར་སློབ་མ་གང ། །བླ་མའི་བཀའ་ལས་འདའ་བྱེད་པ། །འཇིག་རྟེན་འདིར་ནི་འོན་པར་འགྱུར། །འཇིག་རྟེན་ཕ་རོལ་དམྱལ་བར་གནས། །གཡོ་དང་སྒྱུ་ཡི་སྦྱོར་བ་ཡིས། །བརྫུན་གྱིས་མི་ནུས་སྨྲ་བ་ལས། །ཁོང་སྐམ་མཛེ་ནད་ཆེན་པོ་ཅན། །དམྱལ་བ་ལ་སོགས་སྐྱེ་བར་འགྱུར། །དེ་ལྟར་ཤེས་པའི་སློབ་མ་ཡིས། །བླ་མའི་བསྙེན་བཀུར་ཕ་རོལ་ཕྱིན། །བླ་མའི་བཀའ་ནི་རབ་བསྲུངས་ན། །དངོས་གྲུབ་རྒྱས་པ་འགྲུབ་པར་འགྱུར། །ཚོགས་ཀྱི་ཟས་ནི་རྟག་ཏུ་བྱ། །ཞི་བ་ལ་སོགས་རབ་ཏུ་བསྐུལ། །སྔ་བར་དགེ་འདུན་ཆོས་སྟོན་བྱ། །བླ་མ་སངས་རྒྱས་ཡང་མཉེས་བྱ། །བླ་མ་ལ་ནི་ཡོན་དབུལ་ཞིང ། །དེ་ཡི་རྗེས་སུ་ཚོགས་ཀུན་ལའོ། །བདག་གི་ལས་ནི་བརྩམས་ནས་ནི། །ཆོ་ག་འདིས་ནི་བསྒྲུབ་པར་བྱ། །ཡན་ལག་རྒྱན་རྣམས་ཀུན་གྱིས་བརྒྱན། །རྡོ་རྗེ་རྒྱན་གྱིས་རྣམ་པར་བརྒྱན། །རྡོ་རྗེ་དྲིལ་བུ་བླངས་ནས་ནི། །ལམ་གྱི་བཞི་མདོར་གཏོར་མ་དང ། །མེ་ཏོག་བདུག་སྤོས་མར་མེ་དང ། །དེ་བཞིན་དྲི་ཡི་དུང་སོགས་གཡས། །གཡོན་དུ་སྔགས་ཀྱི་མཆོད་ཡོན་སྣོད། །མདུན་དུ་བཟེད་སྣོད་བཞག་པར་བྱ། །ཞབས་བསིལ་གོང་མའི་ཆོ་ག་ཡིས། །མེ་ཏོག་སྤོས་སོགས་རིམ་པ་བཞིན། །ལཱ་སྱཻ་ལ་སོགས་མཆོད་པ་ཡིས། །མཆོད་པར་བྱས་ན་བཟང་པོར་སྦྱིན། །མེ་ཏོག་སྒྱུར་བའི་ཚུལ་གྱིས་དང ། །དྲི་ནི་འཐོར་བའི་ཚུལ་ལས་དང ། །སྡོང་པས་མར་མེའི་མཆོད་པ་དང ། །བྱུག་པའི་ལུས་ཀྱིས་རྗེས་སུ་དྲིས། །ལཱ་སྱཻའི་ལག་པ་ལཱ་སྱཻ་སྟེ། །ཕྲེང་བས་ཕྲེང་བའི་མཁའ་འགྲོ་མ། །གླུ་ཡིས་ཧཱུཾ་གི་དམ་ཚིག་གླུ། །བརླ་བསྐུམས་པས་ནི་གར་ཉིད་དེ། །མཆོད་པ་འདི་རྣམས་བླ་ན་མེད། །སངས་རྒྱས་ཐམས་ཅད་མཉེས་པར་བྱེད། །སངས་རྒྱས་རྣམས་ནི་མཆོད་པས་མཆོད། །འདོད་པའི་དངོས་གྲུབ་བྱེད་པར་འགྱུར། །བཟླས་དང་བསྒོམ་པ་མངོན་དགའ་ཞིང ། །རྟག་ཏུ་འཁོར་བའི་ཕ་རོལ་འགྲོ། །རྡོ་རྗེ་མཁའ་འགྲོའི་བཀའ་ཇི་བཞིན། །འདི་རྣམས་བླ་མེད་མཆོད་པའོ། །མེ་ཏོག་སྤོས་སོགས་མངོན་སུམ་དུ། །འཇིག་རྟེན་སྤྱོད་པར་གནས་པ་ཡིས། ། 84.286b སྣ་ཚོགས་མཆོད་པ་མཆོག་ཉིད་མིན། །དེ་ཉིད་བྱང་ཆུབ་ཡན་ལག་མིན། །དཀར་པོ་ཞི་བར་བྱེད་པར་བརྗོད། །སེར་པོ་རྒྱས་པའི་སྒྲུབ་ཐབས་ལ། །དབང་དང་དགུག་པར་དམར་པོ་སྟེ། །ཐ་མའི་ལས་ལ་ནག་པོའོ། །ཞི་བ་ལ་ནི་མེ་ཏོག་དཀར། །སེར་པོ་རྒྱས་པའི་རྡོ་རྗེ་ལ། །མེ་ཏོག་ནག་པོ་ཐ་མ་ལ། །དབང་དང་དགུག་ལ་དམར་པོ་བཟང ། །རྣལ་འབྱོར་པ་གང་དབང་བསྐུར་མེད། །དཀྱིལ་འཁོར་དུ་ནི་མ་ཞུགས་དང ། །གང་ཞིག་རབ་གནས་མ་མཐོང་དང ། །གང་ཞིག་སྦྱིན་སྲེག་མ་བྱས་པ། །འཇིག་རྟེན་འདི་དང་ཕ་རོལ་དུ། །དེའི་དངོས་གྲུབ་མཆོག་ཉིད་མེད། །གང་གིས་སློབ་དཔོན་གསོལ་མ་བཏབ། །འདིར་ནི་རིགསུ་སྐྱེ་བ་མེད། །སངས་རྒྱས་ཐམས་ཅད་བསྒོམ་པར་བྱ། །གང་གིས་བྱང་ཆུབ་མ་ཐོབ་ནའང ། །འཁོར་ལོས་བསྒྱུར་བའི་གནས་སུ་དེའི། །སྐྱེ་ཞིང་སྐྱེ་བར་སྐྱེ་བར་འགྱུར། །ཡང་ན་ས་ཡི་བདག་པོ་ཉིད། །དག་པའི་གནས་སུ་མངོན་པར་འགྲོ། །བདེ་བ་ཅན་དང་མཁའ་འགྲོ་དང ། །དགའ་ལྡན་དུ་ནི་བློ་ལྡན་སྐྱེ། །འཇིག་རྟེན་འདིར་ནི་གར་འགྲུབ་པ། །སངས་རྒྱས་དེ་ནི་ཅི་ཞིག་སྨོས། །ཁམས་གསུམ་བདག་པོ་ཆེན་པོ་ཉིད། །འཆི་མེད་རྒས་པས་ཁྱབ་པ་མེད། །ཚངས་པ་བརྒྱ་བྱིན་དེ་བཞིན་དྲག་།སྒྲ་ཅན་མེ་དང་རླུང་དང་ནི། །འདོད་པའི་ལྷ་དང་ཐོང་ལྡན་ཉིད། །འདི་རྣམས་དེ་ཡི་འཁོར་དུ་འགྱུར། །ལྷ་ཀླུ་དེ་བཞིན་གནོད་སྦྱིན་དང ། །དྲི་ཟ་ལྷ་མ་ཡིན་དང་མི། །མི་འམ་ཅི་དང་མཁའ་སྤྱོད་གང ། །དེ་རྣམས་འཁོར་འགྱུར་ཐེ་ཙོམ་མེད། །འདི་ནི་རང་བྱུང་བཅོམ་ལྡན་འདས། །ཆོས་ཀྱི་འཁོར་ལོ་བསྐོར་བ་དང ། །འཁྲུངས་དང་བྱང་ཆུབ་བྱེད་པ་དང ། །དེ་བཞིན་དུ་ནི་ལྷར་གཤེགས་དང ། །ཁྱིམ་ནས་འབྱུང་བར་བྱེད་པ་དང ། །རབ་ཏུ་བྱུང་བ་འཛིན་པ་དང ། །སྐྱེ་བ་ཡོངས་སུ་ལེན་པ་དང ། །ཡོངསུ་མྱ་ངན་འདས་པ་སྟོན། །འདུལ་བའི་འཇིག་རྟེན་མཐོང་ནས་ནི། །འདི་ནི་གཟུགས་ནི་དུ་མ་བྱེད། །སངས་རྒྱས་སེམས་ཅན་སྐྱབས་བཞེད་པས། །སངས་རྒྱས་གར་ནི་རོལ་པ་མཛད། །རི་བོང་སྟག་དང་སེང་གེ་དང ། །གླང་པོ་རྣམས་ཀྱི་རིགས 84.287a སུ་ཡང ། །སྙིང་རྗེས་ཕན་པའི་སེམས་ཀྱི་ནི། །ཕྱག་རྒྱས་གྲུབ་པ་སྐྱེ་བར་འགྱུར། །བུད་མེད་སྒྱུ་མའི་སྤྲོས་པ་ཡིས། །འདོད་ཆགས་ཅན་ལ་ཆོས་གསུང་ངོ ། །བུད་མེད་སྒྱུ་མ་སངས་རྒྱས་ཉིད། །སྒྱུ་མ་ཐམས་ཅད་སེལ་བར་བྱེད། །ཤེས་རབ་ཕ་རོལ་ཕྱིན་གཟུགས་སུ། །བུད་མེད་རྟག་ཏུ་ཡང་དག་གནས། །སྒྱུ་མ་ཆེན་མོ་གནས་འདུག་ནས། །སངས་རྒྱས་བྱང་ཆུབ་རབ་ཏུ་སྟེར། །གཡོ་ཞིང་དད་ཆེན་ངོ་ཚ་མེད། །རྟག་ཏུ་འདོད་ཆགས་ཕ་རོལ་འགྲོ། །དངོས་གྲུབ་ཀྱང་ནི་རབ་ཏུ་སྟེར། །གཟུགས་དང་ཡོན་ཏན་ནོར་ལ་ཡང ། །འདོད་པ་གང་ཡང་བཙུན་མོ་མེད། །རྡོ་རྗེ་འདོད་ཆགས་ཡིད་འདོད་པས། །རང་གི་བདེ་བ་མྱང་བར་ལྡན། །སྐྱེས་བུ་ཚུལ་ཁྲིམས་ལྡན་པ་དང ། །བདེ་གཤེགས་བཀའ་མི་འདའ་ཞིང ། །བླ་མ་བསྙེན་བཀུར་སྙིང་རྗེ་ཅན། །ཀྱེ་ཡི་རྡོ་རྗེ་རབ་ཕྱེ་བའོ། །དེ་ནས་རྣལ་འབྱོར་མ་བདག་མེད་མ་གཙོ་མོ་དང ། མཁའ་འགྲོ་མ་རྣམས་ཀྱིས་བསྟོད་པའི་རྒྱལ་པོ་འདིས་གསོལ་བ་བཏབ་པ། ཞེ་སྡང་རྡོ་རྗེ་ཕྱག་འཚལ་བསྟོད། །གཏི་མུག་རྡོ་རྗེ་ཕྱག་འཚལ་བསྟོད། །སེར་སྣ་རྡོ་རྗེས་བདག་ལ་སྐྱོབས། །འདོད་ཆགས་རྡོ་རྗེས་བདག་ལ་སྩོལ། །ཡིད་དང་ཕྲག་དོག་ཆེན་པོ་དང ། །རྡོ་རྗེ་ཀུན་གྱིས་དམ་ཚིག་མགོན། །ལས་རྣམས་ཐམས་ཅད་སྒྲུབ་པ་པོ། །རྡོ་རྗེ་ཅན་ཀུན་དགྱེས་པར་མཛོད། །དེ་ནས་བཅོམ་ལྡན་འདས་མཁའ་འགྲོ་མ་ཐམས་ཅད་ཀྱི་དམ་ཚིག་ལ་གནས་ཏེ། དབྱངས་འདི་གསུངས་པ། ཐིག་སྐུད་སར་པ་མཛེས་པར་ལྡན། །ཤིན་དུ་ཚད་མ་གཙང་མ་ཡིས། །ཧེ་ཞེས་བྱ་བའི་དཀྱིལ་འཁོར་གྱི། །ཤེས་རབ་ཅན་གྱིས་ཐིག་གདབ་བྱ། །དེ་ལ་འདི་ནི་སློབ་མ་ཆེན་པོའི་གསོལ་བ་གདབ་པའི་དམ་ཚིག་གོ། །དེ་བཞིན་གཤེགས་པ་ཐམས་ཅད་ཞི། །དེ་བཞིན་གཤེགས་པ་ཀུན་གྱི་གནས། །རྡོ་རྗེ་སེམས་དཔའ་ལས་བྱུང་བའི། །དཀྱིལ་འཁོར་འདྲེན་པས་བཤད་དུ་གསོལ། །དཀྱིལ་འཁོར་གྱི་རྡོ་རྗེ་ལ་གསོལ་བ་གདབ་པ་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ང་ནི་སྙིང་རྗེ་སྟོབས་དཔལ་ལྡན། །བསྲུང་བའི་འཁོར་ལོ་སྦྱར་བ་པོ། །རྡོ་རྗེ་ཡིས་ནི 84.287b གསལ་བའི་ལུས། །སྐུ་གསུམ་ལས་ནི་སྐྱེས་པ་སྤྲོ། །གལ་ཏེ་ལ་ལ་འདའ་བྱེད་ན། །འཇིག་པར་འདི་ལ་ཐེ་ཙོམ་མེད། །ལུས་སྤྲལ་པོ་དང་ཁ་ཅིག་གང ། །བདེ་ཆེན་ཡེ་ཤེས་འབྱུང་བ་དང ། །རྡོ་རྗེ་སེམས་དཔའི་རང་བཞིན་སྐྱེས། །ཟུར་གཅིག་བགེགས་ནི་ཆེན་པོ་རྣམས། །འཁོར་ལོ་ཡི་ནི་བརྒྱད་ཉིད་ཀྱི། །ཆ་ཡིས་སྒོ་ནི་རབ་ཏུ་གྲགས། །སྒོ་ཁང་ལྷ་ཡི་སྣམ་བུ་ནི། །སྒོ་ཡི་ཚད་ཀྱི་ཚད་དུ་བྱ། །སྒོ་ཡི་ཕྱེད་ཀྱི་ཆ་རུ་ནི། །ཡ་ཕུབས་དང་ནི་འགྲམ་ཉིད་དོ། །རིག་བྱེད་ཉིད་ཀྱང་དེ་བཞིན་བྱ། །དྲ་བའི་སྣམ་བུ་རིག་བྱེད་ཕྱེད། །དང་པོར་ཚངས་པའི་ཐིག་དང་ནི། །གཉིས་པར་མཚམས་ཀྱི་ཐིག་དང་ཡང ། །གསུམ་པར་ངོས་བཞི་ཡི་ནི་བཞི། །ཐིག་ནི་རབ་ཏུ་གདབ་པར་བྱ། །ཚངས་ཐིག་ཆ་གཉིས་བོར་ནས་ནི། །ཆ་དྲུག་དུ་ནི་གདབ་པར་བྱ། །དེ་ནས་སྒོ་ཡི་ཚད་བོར་ནས། །དགུ་ཡི་ཆར་ནི་རབ་ཏུ་གདབ། །དེ་ལ་འདི་ནི་ས་སྦྱང་བའི་དམ་ཚིག་གོ། །ཾ་ཁཾ་ཧཱུཾ་བུཾ། དེ་ལ་འདི་ནི་ཡེ་ཤེས་སྤྱན་དྲང་བ་སྟེ། ཨོཾ་མེ་དི་ནི་བཛྲི་བྷ་བ་བཛྲ་བནྡྷ་ཧཱུཾ། ་་།དེ་ལ་འདི་ནི་ཐིག་གདབ་པའི་དམ་ཚིག་སྟེ། ཨོཾ་ས་མ་ཡ་སུ་ཏྲ་མཱ་ཏི་ཀྲ་མ་ཧཱུཾ། དེ་ལ་འདི་ནི་རྡུལ་ཚོན་བྲི་བའི་དམ་ཚིག་སྟེ། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་ཐར་བར་བྱེད། །ཀྱེ་ཡིས་རྡོ་རྗེ་རྒྱལ་པོ་ཆེས། །དཀྱིལ་འཁོར་དམ་པ་བཞེངས་པར་བྱ། །དབང་ལྡན་དུ་ནི་ཤ་རཾ་བྷ། །མི་ཡི་མཚམས་སུ་དགེ་སློང་བྲིས། །ཆོས་ཀྱི་འཁོར་ལོ་བདེན་བྲལ་དུ། །རླུང་དུ་རྡོ་རྗེ་བྲི་བར་བྱ། །ལྕགས་ཀྱུ་ཤར་དུ་བྲི་བར་བྱ། །ལྷོ་ཡི་སྒོར་ནི་ཞགས་པ་ཉིད། །ནུབ་སྒོར་དེ་བཞིན་ལྕགས་སྒྲོག་སྟེ། །བྱང་དུ་རྡོ་རྗེ་དྲིལ་བུའོ། །དབུས་སུ་ཐོད་པ་དཀར་པོ་ནི། །སྣ་ཚོགས་རྡོ་རྗེས་མཚན་པ་བྲིས། །དེ་ནས་རྡོ་རྗེ་འཛིན་པའི་རྒྱལ་པོས་སྦྱིན་བསྲེག་གི་གྲོང་ཁྱེར་རབ་ཏུ་ཕྱེ་བ། རྡོ་རྗེ་ཐབ་ཁུང་སྦྱོར་བ་ཡིས། །རྡོ་རྗེའི་བསྲེག་རྫས་སྦྱོར་བ་ལས། །ཟླུམ་པོ་ཞི་བར་བྱེད་པར་བརྗོད། །རྒྱས་པར་བའི་རྫིང་བུའི་གཟུགས། །དབང་ནི་ཟླ་བ་ཕྱེད་པ་འདྲ། །དགུག་པ་ལ་ནི་ལྕགས་ཀྱུའི་དབྱིབས། །གསད་དང་ཞེ་སྡང་ལས་ལ་ནི། །ནམཁའི་ཁམས་དང་མཚུངས་པའོ། །དེ་བཞིན་སྐྲོད་བྱེད་སྐལ་ངན་དང ། །ཡན་ལག་ཉམས 84.288a པའི་སྦྱོར་བ་ཡིས། །ཙན་དན་ཨ་ཀ་རུ་ཤིང་དང ། །གཞན་ཡང་དྲི་ཡི་རྐང་འཐུང་གིས། །སྦྱིན་བསྲེག་ཡན་ལག་མེ་སྦྱར་ནས། །ཕྱིས་ནི་ཡང་ནི་དགུག་པར་བྱ། ། ོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་དྭི་ཛ་སཏྟ་མ་གྲྀ་ཧཱི་ཏྭཱ་ཨ་ཧུ་ཏི་མ་ཧཱ་སྨི་ནས་ནྣི་ཧི་ཏོ་བྷ་ཝ། ལྕགས་སྐྱུ་ཉིད་ཀྱིས་དགུག་པར་བྱ། །ཞགས་པ་ཉིད་ཀྱིས་གཞུག་བྱ་ཞིང ། །ལྕགས་སྒྲོག་གིས་ནི་ཞབས་དག་བཅིང ། །དྲིལ་བུ་འཁྲོལ་བས་དབང་དུ་བྱ། །ལཱ་སྱཻ་ལ་སོགས་མཆོད་པ་བརྒྱད། །མཆོད་ཡོན་ཆོ་ག་བྱས་ནས་ནི། །མར་ལ་སོགས་པའི་སྦྱོར་བ་ལས། །ཡང་ནི་མེ་ནི་མཉེས་པར་བྱ། །དེ་ལ་འདི་ནི་རྡོ་རྗེ་མཆོད་ཡོན་གྱི་དམ་ཚིག་སྟེ། ཨོཾ་པྲ་ཝ་ར་སཏྐཱ་ར་པྲ་ཏཱིཙྪ་སཝཱ་ཧཱ། དེ་ལ་འདི་ནི་ཞབས་བསིལ་གྱི་དམ་ཚིག་སྟེ། ཨོཾ་སརྦཱ་པཱ་པ་ད་ཧ་ན་བཛྲ་ཡ་བཛྲ་སཏྭ་སྱ་སརྦ་པཱ་པཾ་ད་ཧ་སཝཱ་ཧཱ། དེ་ལ་འདི་ནི་བསྲེག་རྫས་ཐམས་ཅད་འཆུ་བའི་དམ་ཚིག་གི་སྔགས་ཏེ། ཨོཾ་བཛྲཱ་ན་ལ་མ་ཧཱ་བྷཱུ་ཏ་ཛྭ་ལ་ཡ། སརྦྦ་བྷ་ཀུ་རུ་སརྦ་དུཥྚཱ་ན་ཧཱུཾ་ཕཊ། དྲཾ་ཤྱ་ཛཿ ཧཱུཾ་བཾ་ཧོཿ ་ས་མ་ཡ་སྟྭ་མ་ཧཾ། ཕྱི་ནས་རང་འདོད་པའི་ལྷ་སྤྱན་དྲང་བ་སྟེ། ཨོཾ་ཨེ་ཧྱེ་ཧི་བྷ་ག་ཝཱནྣ་ཧི་བྷཀྟྱ་ནུས་མ་ཡེ་ན་ཙ་ཨ་གྷནྟུ་སཾ་པྲ་ཏཱིཙྪེ་དཾ་པཱུ་ཛཱཾ་ཙཱ་དྱ་པྲ་སཱི་དྷ་མེ། དེ་ལ་འདི་ནི་དགྱེས་པའི་དམ་ཚིག་སྟེ། ་་ཨོཾ་ཀྲྀ་ཏོ་པཿ ་་་སརྦྦ་ས་ཏྭཱཪྠཿ ་་་སིདྡྷིཪྡིཏ་ཏཱ་ཡ་ཐཱ་ནུ་གཱ་གཙྪ་དྷཱཾ་བུདྷ་བ་ཤི་ཡཾ་པུ་ན་རཱ་ག་མ་ནཱ་ཡ་མུཿ ་བཞེངས་པ་དང་ལས་སྣ་ཚོགས་ཀྱི་སྦྱོར་བ་དང་སྦྱིན་བསྲེག་གི་ལེའུ་སྟེ་བརྒྱད་པའོ།། །། དེ་ནས་རྡོ་རྗེ་འཛིན་རྒྱལ་གྱིས། །རྡོ་རྗེ་སེམས་དཔའི་རབ་གནས་ནི། །འཇིག་རྟེན་ཐ་སྙད་ལ་གནས་ཏེ། །མདོར་བསྡུས་ནས་ནི་བསྟན་པར་བྱ། །དང་པོར་རེ་ཞིག་རིག་མ་འཛིན། །དྲིལ་བུ་འཁྲོལ་བར་འདོད་པ་དང ། །རྐང་གཡས་བརྐྱང་བའི་སྦྱོར་བ་ལས། །གཡས་པར་རྡོ་རྗེ་གསོར་བ་དང ། །སྲོད་ཐུན་སྐད་ནི་ཆག་པ་ན། །གོས་ཀྱིས་མགྲིན་པ་བཅིངས་པ་དང ། །རིན་ཆེན་སྨན་གྱིས་ཡོངས་གང་བའི། །བུམ་པ་སྟ་གོན་གནས་པར་བྱ། །ོཾ་དེ་ཝ་པི་ཙུ་བཛྲ་ཨ་དྷི་ཏིཥྛ། ཨོཾ་མོ་ཧ་ར་ཏི་ཨ་དྷི་ཏིཥྛ། ཨོཾ་དྭེ་ཥ་ར་ཏི་ཨ་དྷི་ཏིཥྛ། ཨོཾ་བཛྲ་ར་ཨ་དྷི་ཏིཥྛ། ཨོཾ་བཛྲ་གཽ་རཱི་ཨཱ་ཀཪྵ་ཡ་ཛཿ ་ཨོཾ་བཛྲ་ཙཽ་རཱི་པྲ་བེ 84.288b ཤ་ཡ་ཧཱུཾ། ཨོཾ་བཛྲ་བེཏྟྭ་ལཱི་བནྡྷ་ཡ་བཾ། ཨོཾ་བཛྲ་གྷསྨ་རཱི་ཝ་ཤི་ཀུ་རུ་ཧོཿ ། ་འདི་ནི་ཡེ་ཤེས་དགུག་པའི་ཆོ་གའོ། ་་།ཤུན་པ་ལྔ་དང་བ་བྱུང་ལྔ། །ཁྱད་པར་དུ་ཡང་དྲི་ལྔ་དང ། །ལུས་བཤལ་ཆེད་དུ་བླུགས་པར་བྱ། །མཆོད་ཡོན་ལ་སོགས་སྔར་བཞིན་བྱ། །ཡང་ན་དེ་ཉིད་སྦྱོར་བར་བྱ། །སྔ་བར་བླུགས་ཤིང་བྱིན་གྱིས་བརླབ། །མིག་ལ་སོགས་པར་གཏི་མུག་སོགས། །རྡོ་རྗེ་གསུམ་ནི་གནས་གསུམ་དགོད། །དབང་ནི་རང་གི་རིགས་ཉིད་ཀྱིས། །མཆོད་པ་ལ་སོགས་རིམ་པས་བརྩམ། །རང་གི་སྙིང་ནས་ཡེ་ཤེས་བསམ། །སངས་རྒྱས་བཞུགས་པར་བསང་གཏོར་བྱ། །ཡེ་ཤེས་བདུད་རྩིའི་སྦྱོར་བ་ཡིས། །རིམ་པས་མཆོད་པའི་ལྷ་མོ་སྤྲོ། །བྱང་ཆུབ་སེམས་མཆོག་བསམས་ནས་ནི། །སངས་རྒྱས་བསྟོད་པ་ཡང་དག་བརྩམ། །དངོས་པོ་ཀུན་གྱི་རང་བཞིན་གྱིས། །སྟོང་པ་སྙིང་རྗེ་ཐ་དད་མེད། །ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱིས་མཆོག་བརྙེས་པ། །ཁྱོད་ཀྱིས་རྒྱུ་དང་མི་རྒྱུའི་འགྲོ་བ་ཀུན་བསྒྲུབས་ཤིང ། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མའི་སྤྲོས་པས་རྡོ་རྗེ་འཕེན་མཛད་པ། །ཧེ་རུ་ཀ་དཔལ་རྡོ་རྗེ་ཡིད་ཀྱིས་དགྱེས། །རྡོ་རྗེ་སེ་གོལ་སྦྱོར་བ་ཡིས། །རྡོ་རྗེ་བསྒོམ་པས་བསྒོམ་པར་བྱ། །རྡོ་རྗེ་ཡི་གེ་བླངས་ནས་ནི། །རྡོ་རྗེ་དཀྱིལ་འཁོར་བསྒོམ་པར་བྱ། །རྡོ་རྗེ་དཀྱིལ་འཁོར་དབུས་གནས་པར། །རྡོ་རྗེ་ཕུང་པོ་རྣམ་པར་བསྒོམ། །དེ་ནས་རྡོ་རྗེ་འཚེད་པ་བསམ། །རྡོ་རྗེ་ལྕེ་ཡི་སྦྱོར་བ་ལས། །སངས་རྒྱས་རྡོ་རྗེའི་རྗེས་བཅུག་ཉིད། །རྡོ་རྗེའི་སྔགས་ཀྱིས་བསང་གཏོར་བྱ། །བཅོམ་ལྡན་འདས་ཀྱིས་རྡོ་རྗེའི་བདུད་རྩིའི་རོ་མྱང་བའི་རྡོ་རྗེ་དེ་སྐད་ཅེས་བཀའ་སྩལ་ཏོ། །ནམ་མཁའི་ཁམས་ཀྱི་དབུས་སོན་པར། །རྩེ་མོ་ལྔ་པ་བྲིས་པ་ཡིས། །སངས་རྒྱས་དངོས་གྲུབ་འདོད་པ་ཡིས། །སྟོབས་ཀྱིས་སངས་རྒྱས་ཕུར་བུས་གདབ། །ཆོས་འབྱུང་གྲོང་ཁྱེར་ཡིད་འོང་བར། །རྡོ་རྗེ་འཛུབ་མོའི་སྦྱོར་བ་ལས། །གལ་ཏེ་དངོས་གྲུབ་མི་སྟེར་ན། །རྡོ་རྗེ་སེམས་དཔའ་གསད་པར་བྱ། ། 84.289a ོཾ་དུ་རུ་དུ་རུ། ཙྪིནྡ་ཙྪིནྡ། ཧཱུཾ་ཧཱུཾ། བཅོམ་ལྡན་འདས་ཀྱིས་ཕུར་བུས་གདབ་པ་ཆེན་པོ་རྡོ་རྗེ་དེ་སྐད་ཅེས་བཀའ་སྩལ་ཏོ། །མ་མོའི་དཀྱིལ་འཁོར་དབུས་གནས་པར། །རྟ་མགྲིན་རྣམ་པར་བསྒོམ་པར་བྱ། །དབུ་རྒྱན་ལ་ནི་རྡོ་རྗེ་ཆོས། །ཕྱག་རྒྱ་ཆེན་པོར་སྦྱོར་བ་ལས། །པད་མ་དམར་པོ་སྤྱི་བོར་འཛིན། །སྐུ་མདོག་དམར་པོ་སྟོབས་པོ་ཆེ། །གོས་དཀར་གཉིས་མེད་སྦྱོར་བ་ལས། །བཅུ་དྲུག་ཕྱག་གིས་རྣམ་པར་བརྒྱན། །གཡས་པའི་ཞལ་ནི་ནག་པོ་སྟེ། །གཡོན་པ་ཟླ་མཛེས་དྲི་མ་མེད། །དང་པོ་དམར་པོ་ཤེས་པར་བྱ། །ལྷག་མའི་ཞལ་ནི་བུང་བ་མཚུངས། །ཞལ་བརྒྱད་པ་ལ་ཞབས་བཞི་པ། །རྡོ་རྗེ་ཆོས་ནི་གཟི་བརྗིད་ཆེ། །འདོད་ཆགས་ཆེན་པོའི་རྗེས་ཆགས་པས། །བདུད་བཞི་མཉམ་པར་མནན་པའོ། །མ་མོའི་དཀྱིལ་འཁོར་དབུས་གནས་པར། །རྡོ་རྗེ་རྣམ་སྣང་དྲན་པར་བྱ། །དབུ་རྒྱན་རྡོ་རྗེ་འཛིན་པ་བསམ། །སྐུ་མདོག་དཀར་པོ་གཟི་བརྗིད་ཆེ། །ཕྱག་ནི་བཅུ་དྲུག་ཞལ་བརྒྱད་པ། །ཞབས་བཞི་པ་སྟེ་འཇིགས་པ་པོ། །ཆོས་ཀྱི་འཁོར་ལོ་སྤྱི་བོར་འཛིན། །འདོད་ཆགས་ཆེན་པོའི་རྗེས་ཆགས་པ། །སྤྱན་དང་གཉིས་མེད་སྦྱོར་བ་ཡིས། །འཇིགས་པ་ཡང་ནི་འཇིགས་པར་མཛད། །དང་པོའི་ཞལ་ནི་དཀར་པོ་སྟེ། །ནག་པོ་དམར་པོས་རྣམ་པར་བརྒྱན། །ལྷག་མའི་ཞལ་ནི་བུང་བ་མཚུངས། །མ་མོའི་དཀྱིལ་འཁོར་དབུས་གནས་པར། །རྡོ་རྗེ་ཉི་མ་རྣམ་པར་བསྒོམ། །ཅོད་པན་རིན་ཆེན་འཛིན་པར་བསམ། །རྡོ་རྗེ་གཟི་བརྗིད་འོད་པོ་ཆེ། །ཕྱག་ནི་བཅུ་དྲུག་ཞལ་བརྒྱད་པ། །ཞབས་བཞི་པ་སྟེ་འཇིགས་པ་པོ། །སེམས་ཀྱི་རིན་ཆེན་སྤྱི་བོར་འཛིན། །བཙོ་མ་གསེར་ལྟར་གཟི་བརྗིད་ཆེ། །དང་པོའི་ཞལ་ནི་སེར་པོ་སྟེ། །གཡས་པ་སྔོན་པོ་འདྲ་བའོ། །གཡོན་པ་ཟླ་འོད་བཟང་པོ་སྟེ། །ལྷག་མའི་ཞལ་ནི་བུང་བ་མཚུངས། །མ་མོའི་དཀྱིལ་འཁོར་དབུས་གནས་པར། །རྟ་མཆོག་རྣམ་པར་བསྒོམ་པར་བྱ། །དབུ་རྒྱན་རལ་གྲི་འཛིན་པར་བསམ། །མར་ཀད་ཨུཏྤལ་མཚུངས་པའོ། ། 84.289b ཞལ་བརྒྱད་པ་ལ་ཞབས་བཞི་པ། །བཅུ་དྲུག་ཕྱག་གིས་རྣམ་པར་བརྒྱན། །དང་པོའི་ཞལ་ནི་སྔོ་བསངས་ཏེ། །རྟ་ཡི་གཟུགས་ཏེ་འཇིགས་པ་པོ། །གཡས་པ་ཁ་དོག་ནག་པོ་སྟེ། །གཡོན་པ་ཟླ་མཛེས་དྲི་མ་མེད། །རལ་གྲི་དངོས་གྲུབ་སྤྱི་བོར་འཛིན། །ལྷག་མའི་ཞལ་ནི་བུང་བ་མཚུངས། །རྡོ་རྗེ་ཉི་མ་རྟ་ཉིད་ཀྱི། །ཕྱག་རྒྱ་འདི་ནི་སྒྲོལ་མའི་གཟུགས། །ལྷ་མོ་རྣམས་ཀྱི་ཕྱག་གཉིས་བརྗོད། །གྲི་གུག་དང་ནི་ཐོད་པ་འཛིན། །ཀྱེ་རྡོ་རྗེ་ལ་དཀྱིལ་འཁོར་མཆོག་།ཕན་པར་མེ་ལོང་དེ་བཞིན་ནོ། །རྟ་མགྲིན་ལ་ནི་གོས་བཟང་སྟེ། །རྡོ་རྗེ་ཉི་མ་ལ་ནི་གསེར། །རྟ་མཆོག་ལ་ནི་འགྲོ་མགྱོགས་ཏེ། །མཆོག་ཏུ་ཕན་པ་ཉིད་ཀྱི་ཡོན། །སངས་རྒྱས་འབྲས་བུ་འདོད་པ་ཡིས། །བླ་མ་ལ་རྟག་རྒྱུན་དུ་འབུལ། །སྐལ་བཟང་རྡོ་རྗེ་སེམས་དཔའ་བདག་།སྐལ་བཟང་ཐུབ་པ་རྣམ་སྣང་མཛད། །སྐལ་བཟང་དཔལ་ལྡན་འཇིག་རྟེན་དབང ། །སྐལ་བཟང་ཉི་མ་བདུན་རྒྱལ་པོ། །དེ་ནས་རྡོ་རྗེ་འཛིན་པའི་རྒྱལ་པོ་སྐུ་གསུམ་མཆོག་གི་རྡོ་རྗེ་འཛིན་པ་པོས་མངའ་བདག་རྡོ་རྗེ་འཛིན་པའི་དམ་ཚིག་མཆོག་གསུངས་པ། ། ོཾ་དྷ་ར་དྷ་ར། དྷཱ་ར་ཡ་དྷཱ་ར་ཡ། མརྡ་མརྡ། ་བཛྲ་དྷྲཱིཀ་ཕཊ་སཝཱ་ཧཱ། དེ་ནས་སྔགས་ཆེན་བཤད་པ་ན། །རྡོ་རྗེ་སྐྱེ་བ་སྙིང་རྗེ་ཆེ། །འཇིགས་ཤིང་སྐྲག་པར་གྱུར་ནས་ནི། །རྡོ་རྗེའི་དངོས་གྲུབ་རབ་ཏུ་སྩོལ། །དེ་ནས་བཅོམ་ལྡན་འདས་རྡོ་རྗེ་ཆོས་ཀྱི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། རྟ་མགྲིན་གྱི་སྔགས་འདི་གསུངས་པ། ཨོཾ་བཛྲ་དྷརྨྨ་ས་མ་ཡ་སྟྭཾ། ཧུ་ལུ་ཧུ་ལུ། ཨོཾ་ཨཱ་རོ་ལིག་ཕཊ ། ། ་་དེ་ནས་འདི་ནི་བཤད་ཙམ་ན། །རྡོ་རྗེ་ཆོས་ནི་གྲགས་ཆེན་པོ། །འཇིགས་ཤིང་སྐྲག་པར་གྱུར་ནས་ནི། །ཆོས་ཀྱི་དངོས་གྲུབ་རབ་ཏུ་སྩོལ། །དེ་ནས་བཅོམ་ལྡན་འདས་རྣམ་པར་སྣང་མཛད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཕན་པའི་སྔགས་འདི་གསུངས་པ། ཨོཾ་ཤཱ་ཤཱ་ཏཾ་པ་ར་མ་ཤཱ་ཤཝ་ཏྲ་ཨེ་ཧྱི་ཧི་ཛི་ན་ཛིཀ་ཕཊ་སཝཱ་ཧཱ། དེ་ནས་འདི་ནི་བཤད་ཙམ་གྱིས། །སངས་རྒྱས་ཀུན་དང་དེ་བཞིན་གཤེགས། །བརྒྱལ་ཞིང་འཇིགས་པར་གྱུར་ནས་ནི། །དེ་རྣམས་སངས་རྒྱས་དངོས་གྲུབ་སྩོལ། ། 84.290a དེ་ནས་བཅོམ་ལྡན་འདས་རིན་ཆེན་ཉི་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་གཟི་བརྗིད་ཀྱི་སྔགས་འདི་གསུངས་པ། ཨོཾ་བཛྲ་སཱུརྱ་ཏ་མོ་བི་དྷ་མ་ན་ས་མ་ཡང་སྟྭ་མ་ཧཾ་རཏྣ་དྷྀཀ་ཕཊ་སཝཱ་ཧཱ། དེ་ནས་འདི་ནི་བཤད་ཙམ་གྱིས། །རྡོ་རྗེ་གཟི་བརྗིད་འོད་པོ་ཆེ། །འཇིགས་ཤིང་བརྒྱལ་བར་གྱུར་ནས་ནི། །ཉི་མའི་དངོས་གྲུབ་རབ་ཏུ་སྩོལ། །དེ་ནས་བཅོམ་ལྡན་འདས་དོན་ཡོད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་ཞུགས་ཏེ། རྟ་མཆོག་རྡོ་རྗེའི་སྔགས་འདི་གསུངས་སོ། །ཕུཿ ཕུཿ ཕུཿ ཧི་ཧི་ཧི་པྲཛྙཱ་དྷྲྀཀ་ཕཊ་སཝཱ་ཧཱ། དེ་ནས་འདི་ནི་བཤད་ཙམ་གྱིས། །རྡོ་རྗེ་དོན་ཡོད་རིགས་བྱུང་བ། །འཇིགས་ཤིང་བརྒྱལ་བར་གྱུར་ནས་ནི། །དེ་རྣམས་དོན་ཡོད་དངོས་གྲུབ་སྩོལ། །སངས་རྒྱས་དཀྱིལ་འཁོར་ཟླུམ་པོ་སྟེ། །རྡོ་རྗེ་ཅན་གྱི་ཟླ་ཕྱེད་མཚུངས། །རྡོ་རྗེ་ཆོས་ཀྱི་པདྨ་འདྲ། །ཉི་མའི་ཡིད་བཞིན་ནོར་བུ་བཞིན། །རྟ་མཆོག་ཅེས་བྱ་དེ་ཡི་ནི། །ཐམས་ཅད་དུ་ནི་གྲུ་གསུམ་མོ། །རྡོ་རྗེ་སེམས་དཔའི་ཕྱག་རྒྱ་ཆེ། །ཕན་པའི་ཕྱག་རྒྱ་ཉིད་དང་ནི། །རྡོ་རྗེ་ཆོས་ཀྱི་ཕྱག་རྒྱ་ཆེ། །རིན་ཆེན་ཏོག་གི་འོད་བྱེད་མ། །དོན་ཡོད་གྲུབ་པའི་ཕྱག་རྒྱ་ཆེ། །རུས་པའི་རྒྱན་གྱིས་བརྒྱན་པར་ལྡན། །སྟག་གི་ལྤགས་པ་མནབས་པ་དང ། །དབུ་སྐྲ་ཐོད་པ་ཕྱེད་པ་སྟེ། །མཆོད་པར་བརྩོན་པའི་སེམས་དཔའ་ཡིས། །ཆགས་པས་མིག་དམར་འཐང་ནས་ནི། །ཕྱག་རྒྱ་ཆེན་པོའི་སྦྱོར་བ་ལས། །ཆགས་པའི་སྦྱོར་བས་བསྒོམ་པར་བྱ། །ལས་སྣ་ཚོགས་བསྒྲུབ་པའི་ལེའུ་སྟེ་དགུ་པའོ།། །། དེ་ནས་རྡོ་རྗེ་འཛིན་རྒྱལ་གྱིས། །སྤྱོད་པའི་མཚན་ཉིད་བཤད་པར་བྱ། །རྡོ་རྗེ་སྤྱོད་པའི་སྦྱོར་བ་ཡིས། །རྡོ་རྗེ་ཕྱག་རྒྱ་ཡང་དག་བརྩམ། །མེ་ཏོག་འབྲས་སོགས་ཀྱིས་བརྒྱན་པ། །ནགས་ཆེན་པོ་ཡི་མཐའ་ཉིད་དུ། །སེམས་དཔའ་ཆེན་པོ་འགྲོ་བར་བྱ། །ནགས་ཚལ་དུ་ནི་སློངས་མོས་རྒྱུ། །ཟས་ནི་བཟང་པོས་བརྒྱན་པ་ཉིད། །དེ་རྣམས་འཇིགས་ཤིང་སྐྲགས་ནས་སྟེར། །ནགས་ཚལ་བདག་པོའི་རིགས་ཀུན་ནི། །རྡོ་རྗེ་ཅན་ཏེ་འཁོར་དུ་འགྱུར། །སྐྱེས་པ་དང་ནི་སྐྱེ་བ་ཀུན། །སྐྱེ་བོ་གང་ཞིག 84.290b སྐྱེ་འགྱུར་བ། །གཏི་མུག་རྡོ་རྗེའི་སྦྱོར་བ་ལས། །རྡོ་རྗེའི་མིག་གིས་མཐོང་བར་འགྱུར། །ཁམས་གསུམ་ལ་ནི་ཉམས་དགའ་བར། །སྒྲ་ནི་གང་ཞིག་རབ་གྲགས་པ། །རྣ་བའི་དྲུང་དུ་གནས་པ་བཞིན། །ཞེ་སྡང་རྡོ་རྗེའི་སྦྱོར་བ་ལས། །དྲང་སྲོང་མངོན་པར་ཤེས་པས་ཐོས། །སེམས་ཅན་ཀུན་གྱི་སེམས་ཆེན་པོ། །མཚོན་དཀའ་ལྟ་བུའི་མཚན་ཉིད་ནི། །ལག་མཐིལ་སྐྱུ་རུ་ར་བཞག་བཞིན། །རྡོ་རྗེའི་སེམས་ཀྱིས་ཤེས་པར་འགྱུར། །སྐྱེ་བ་བྱེ་བ་སྟོང་ཕྲག་ཏུ། །རང་གི་རིགས་ནི་སྟོང་ཕྲག་གཅིག་།རྡོ་རྗེ་སྦྱོར་བས་དྲན་འགྱུར་ཏེ། །ཉི་གསུམ་ལོན་བཞིན་དྲན་པར་འགྱུར། །སྒྱུ་འཕྲུལ་དྲ་བ་དུ་མ་ཡིས། །འདིས་ནི་སྣང་བར་བྱེད་པར་འགྱུར། །མངོན་ཤེས་ལྔ་ཡི་སྦྱོར་བ་ཡིས། །སངས་རྒྱས་མངོན་ཤེས་ཐོབ་པར་འགྱུར། །རྡོ་རྗེ་སྐྱེ་མཆེད་རྣམ་པར་དག་པའི་ལེའུ་སྟེ་བཅུ་པའོ།། །། ཕན་པ་ཉིད་ཀྱིས་ཞི་བ་སྟེ། །རྡོ་རྗེ་ཉི་མས་རྒྱས་པའོ། །རྡོ་རྗེ་ཆོས་ཀྱིས་དབང་ཞེས་བྱ། །རྡོ་རྗེ་སེམས་དཔས་གསད་པར་བྱ། །ཞི་བའི་སེམས་ཀྱིས་ཞི་བ་སྟེ། །དབང་ནི་ཡང་དག་བརྩམ་པར་བྱ། །རྒྱས་པའི་སེམས་ཀྱིས་རྒྱས་པ་སྟེ། །རིན་ཆེན་ཆར་སྤྲིན་རབ་བསྒོམ་བྱ། །རྗེས་སུ་ཆགས་པའི་སེམས་ཀྱིས་ནི། །བུ་མོ་བཀུག་ནས་སྤྱད་པར་བྱ། །མེ་ཡི་ཆར་སྤྲིན་འབབ་པ་དང ། །གདུག་པའི་སེམས་ཀྱིས་གསད་པར་བྱ། །འཕྲོག་པ་ལས་ནི་དཀར་མོ་སྟེ། །སྐྱེ་གཉིས་པ་ལས་ཚངས་མ་ཉིད། །དཔལ་མོ་སྲེད་མེད་བུ་ལས་ཀྱང ། །མ་བཅག་པ་ལས་རམྦྷ་ཉིད། །དགའ་མ་ཆུ་སྲིན་རྒྱལ་མཚན་ལས། །ཕྱག་རྒྱ་ཆེན་པོའི་སྦྱོར་བ་ཡིས། །དེ་རྣམས་ཐམས་ཅད་ཉ་བར་སྤྱད། །ཤིན་དུ་དགའ་བའི་སེམས་ཀྱིས་རྩེ། །འདོད་པས་གོས་པར་མི་འགྱུར་རོ། །མཐར་ནི་སཝཱ་ཧཱས་ཞི་བ་སྟེ། །རྒྱས་པའི་དུས་སུ་བཽ་ཥ་ཊ། །མཐར་ནི་ཧཱུཾ་ཕཊ་བསད་པ་ལ། །དབང་དང་དགུག་ལ་ཛཿ དང་ཧྲཱིཿ ་་་་་་་་ལས་ཐམས་ཅད་པའི་ལེའུ་སྟེ་བཅུ་གཅིག་པའོ།། །། དེ་ནས་རྡོ་རྗེ་འཛིན་རྒྱལ་ནི། །མཁའ་འགྲོ་མ་ཡི་རྡོ་རྗེ་གུར། །རྡོ་རྗེ་མཁའ་འགྲོ་རབ་བསྒྲུབ་ཕྱིར། །ཐུབ་པས་ཚིག་འདི་བཀའ་སྩལ་ཏོ། །མེ་ཏོག་འབྲས་བུས་བརྒྱན་བྱས་པའི། ། 84.291a རི་ཁྲོད་དང་ནི་སྨན་ལྗོངས་སུ། །རྡོ་རྗེ་དཀྱིལ་དཀྲུངས་བཅས་ནས་ནི། །བླ་མ་སངས་རྒྱས་མཆོད་པར་བྱ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང ། །སངས་རྒྱས་བྱང་ཆུབ་ཡིད་ཀྱིས་བཟུང ། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བགྱིས་ནས། །སེམས་ཅན་ཐམས་ཅད་བདག་གི་མགོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག་།ཚངས་པའི་གནས་ནི་བཞི་པོ་ཡིས། །སེམས་ཀྱི་ངལ་ནི་བསོ་བར་བྱ། །ཕྱིན་ནས་བྱང་ཆུབ་སེམས་གནས་ཏེ། །རྡོ་རྗེ་བསྲུང་བའི་དམ་ཚིག་གོ། །བདེན་དང་བརྫུན་པར་སྤྱད་པ་ཡི། །རྟག་པས་ཉེ་བར་མི་གོས་ཏེ། །མ་སྐྱེས་པ་ཡི་སྦྱོར་བ་ཡིས། །སྐྱེ་བ་འདིར་ནི་རབ་ཏུ་བརྗོད། །ོཾ་ཤཱུ་ནྱ་ཏཱ་ཛྙཱ་ན་བཛྲ་སཝ་བྷཱ་བ་ཨཱཏྨ་ཀོ་ཧཾ། ནམ་མཁའི་ཁམས་ཀྱི་དབུས་གནས་པར། །སྣ་ཚོགས་རྡོ་རྗེ་བསྒོམ་པར་བྱ། །ཧཱུཾ་ནི་བཅུ་ཡི་སྦྱོར་བ་ཡིས། །ཁྲོ་བོ་བཅུ་ནི་རིམ་པས་དགོད། །གཤེན་རྗེ་མཐར་བྱེད་ཤེས་རབ་མཐར། །པདྨ་མཐར་བྱེད་བགེགས་མཐར་བྱེད། །ཊཀྐི་ཁྲོ་བོ་དབྱུག་པ་སྔོན། །མི་གཡོ་བ་དང་སྟོབས་ཆེན་དང ། །གཙུག་ཏོར་གདུགས་ནི་དཀར་པོ་དང ། །རྡོ་རྗེ་ཞབས་འོག་གནས་པ་ནི། །བདུད་རྩི་སྦྱོར་བས་ཐམས་ཅད་དུ། །ཁྲོ་བོའི་བསྒོམ་པས་བསྒོམ་པར་བྱ། །དཔག་ཚད་བརྒྱར་ནི་ཁྱབ་པ་རུ། །བསམས་ནས་བགེགས་ནི་བསྐྲད་པར་བྱ། །ནམ་མཁའི་ཁམས་ཀྱི་དབུས་གནས་པར། །རྡོ་རྗེ་དཀྱིལ་འཁོར་བསྒོམ་པར་བྱ། །རྡོ་རྗེ་དཀྱིལ་འཁོར་དབུས་གནས་པར། །འོད་ཀྱི་དཀྱིལ་འཁོར་བསྒོམ་པར་བྱ། །མེ་ཡི་དཀྱིལ་འཁོར་དབུས་གནས་པར། །ཡང་ནི་ཆུ་ནི་བསྒོམ་པར་བྱ། །ཆུ་ཡི་དཀྱིལ་འཁོར་དབུས་གནས་པར། །བརྟུལ་ཞུགས་ཅན་གྱིས་དབང་ཆེན་བསྒོམ། །དབང་ཆེན་དཀྱིལ་འཁོར་སྟེང་དུ་ནི། ། 84.291b བདག་ཉིད་ཀྱང་ནི་བསྒོམ་པར་བྱ། །བྷྲུཾ་ལས་གནས་ནི་བསམས་ནས་སུ། །རྡོ་རྗེ་དཀྱིལ་འཁོར་དེ་བརྟག་བྱ། །རྣམ་པ་ལྔ་ནི་རབ་བརྟག་བྱ། །ཡེ་ཤེས་ལྔ་ལས་བྱུང་བ་ཡི། །སེམས་དཔའི་གཟུག་བརྙན་བསྒོམ་པར་བྱ། །རྡོ་རྗེ་སེམས་དཔའ་ལས་བྱུང་བའི། །རིག་མའི་སྐྱེས་བུ་བསྒོམ་པར་བྱ། །ོཾ་དྷརྨྨ་དྷཱ་ཏུ་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། རྡོ་རྗེ་བཞེངས་པ་ཞེས་བྱ་བའི་ཏིང་ངེ་འཛིན་ཏོ། །མིག་ལ་སོགས་པར་གཏི་མུག་སོགས། །རྡོ་རྗེ་གསུམ་ནི་གནས་གསུམ་དགོད། །ཐུགས་ཀྱི་རྡོ་རྗེ་མཁའ་སྤྱོད་མ། །གསུང་གི་རྡོ་རྗེ་ས་སྤྱོད་མ། །སྐུ་ལ་ཞབས་འོག་གནས་མ་སྟེ། །ཧཱུཾ་ཨཱཿ ོཾ་ལས་བྱུང་བའོ། །བཅོམ་ལྡན་འདས་ཀྱི་སྙིང་པོར་བྱ། །རྡོ་རྗེ་དཀར་མོ་ཆུ་བདག་མ། །རྡོ་རྗེ་མཁའ་འགྲོ་བདག་མེད་མ། །ཞེ་སྡང་རྡོ་རྗེའི་གནས་མནན་ཅིང ། །དཀྱིལ་འཁོར་སྙིང་པོར་བསྒོམ་པར་བྱ། །དཀར་མོ་ཆོམ་རྐུན་རོ་ལངས་མ། །གྷསྨ་རཱི་ནི་སྒོ་བསྲུངས་མ། །པུཀྐ་སཱི་དང་རི་ཁྲོད་མ། །གདོལ་པ་གཡུང་མོ་མཚམས་སུ་དགོད། །སྟེང་དུ་མཁའ་སྤྱོད་མ་ཞེས་བཤད། །འོག་ཏུ་དེ་བཞིན་ས་སྤྱོད་མ། །དབུས་སུ་བདག་མེད་མཁའ་འགྲོ་མ། །མཁའ་འགྲོ་དཀྱིལ་འཁོར་ཉིད་དུ་བསྒོམ། །བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་པ་ཆེ་སྩལ་བ། །བདག་ཀྱང་རབ་ཏུ་བསྐྱབ་པའི་ཕྱིར། །ནམཁའི་རྡོ་རྗེ་བདག་ལ་སྩོལ། །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་གྱིས་ནི་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྩོལ་བར་མཛད། །ཡེ་ཤེས་ཀྱི་དབང་ལ་གསོལ་བ་གདབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །རིག་པའི་སྐྱེས་བུ་དབང་ཆེན་ལ། །ཅོད་པན་རང་གི་ལྷག་པའི་ལྷ། །དེས་ནི་དཀྱིལ་འཁོར་དབང་དང་ནི། །བསྟོད་དང་མཆོད་པ་ལ་སོགས་བྱ། །ཡེ་ཤེས་གཞུག་པ་དེ་བཞིན་ཡང ། །ལྕེ་ཡིས་རྡོ་རྗེ་བདུད་རྩི་མྱང ། །ནང་དུ་བརྗོད་པའི་སྦྱོར་བ་ལས། །བརྟུལ་ཞུགས་ཅན་གྱིས་སྔགས་བཟླས་བྱ། །རྣལ་འབྱོར་མ་འབྱུང་བ་ཞེས་བྱ་བའི་ལེའུ་སྟེ་བཅུ་གཉིས་པའོ།། །། དེ་ནས་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས 84.292a ཀྱིས་རང་རང་གི་རྣམ་པར་རྟོག་པ་སྐྱེས་པར་གྱུར་ཏེ། བཅོམ་ལྡན་འདས་ཇི་ལྟར་རྣལ་འབྱོར་མའི་རྒྱུད་ཅེས་སྤྱད་པར་བགྱི། རྡོ་རྗེ་འཛིན་པས་བཀའ་སྩལ་པ། །ཤེས་རབ་ཕ་རོལ་ཕྱིན་པའི་ཐབས། །རྣལ་འབྱོར་མ་ཞེས་མངོན་པར་བརྗོད། །ཕྱག་རྒྱ་ཆེན་པོའི་སྦྱོར་བ་ལས། །གང་ཕྱིར་དེ་ཉིད་བསྟེན་པ་ཡི། །རྣལ་འབྱོར་མ་ཡི་རྡོ་རྗེ་གུར། །རྣལ་འབྱོར་མ་ཡི་རྒྱུད་ཅེས་བཤད། །ཕ་རོལ་ཕྱིན་པ་ཀུན་གྱི་ཐབས། །བསམ་གཏན་ཙམ་གྱིས་འགྲུབ་པར་འགྱུར། །དགའ་མཛེས་མཁའ་འགྲོ་བདེ་བའི་མཚོ། །མཁའ་དང་གསེར་གྱི་ཆར་པ་དང ། །དགའ་ཆེན་མ་དང་གྷསྨ་རཱི། །ཤིན་དུ་དགྱེས་རོལ་གསང་ཡིད་འཕྲོག་།རྡོ་རྗེ་མཁའ་འགྲོ་ཕན་རྒྱུད་བརྒྱད། །ཀྱེའི་རྡོ་རྗེ་དཀྱིལ་འཁོར་སངས་རྒྱས་ཀུན། །གསང་མཛོད་རྡོ་རྗེ་བདུད་རྩི་འབྱུང་བ་དང ། །འཁོར་ལོ་སྡོམ་པ་གུར་དང་འབྱུང་གནས་ནི། །རྣལ་འབྱོར་མ་རྒྱུད་དྲུག་ཏུ་རབ་ཏུ་གྲགས། །སྐྱེས་བུ་རྣམས་ནི་གདུལ་བའི་ཕྱིར། །རྣལ་འབྱོར་རྒྱུད་ནི་ཡང་དག་བཤད། །བཙུན་མོ་རྣམས་ནི་བསྡུ་བའི་ཕྱིར། །རྣལ་འབྱོར་མའི་རྒྱུད་བཤད་དོ། །དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག་།རྣལ་འབྱོར་གོང་མེད་དེ་ལྷག་ལ། །དེ་ནས་བྱང་ཆུབ་སེམས་དཔའ་རྣམས་ཀྱིས་བཅོམ་ལྡན་འདས་ལ་གསོལ་པ། རེ་ཞིག་བདག་ཅག་གིས་སྤྱོད་ཡུལ་རྣམས་ནི་འཚལ་ནའང ། སེམས་ཅན་གཞན་རྣམས་ཀྱིས་ཇི་ལྟར་སངས་རྒྱས་ཀྱིས་གསུངས་པ་འཚལ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། སྟོང་པ་སྙིང་རྗེ་ཐ་དད་མེད། །གང་དུ་སེམས་ནི་རབ་བསྒོམས་པ། །འདི་ནི་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །མུ་སྟེགས་ཅན་དབྱུང་བ་དང ། རྒོལ་བ་ཚར་གཅོད་པ་དང ། རང་གི་སྡེའི་གཞུང་བརྗོད་པ་ཞེས་བྱ་བའི་ཏིང་ངེ་འཛིན་ཏོ། །བདག་གི་བྱང་ཆུབ་ཐོབ་ཕྱིར་དང ། །གང་ཕྱིར་གཞན་བསྒྲལ་བའི་ཕྱིར། །དེས་ན་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །བདག་འཛིན་ཞེན 84.292b པ་བཟློག་པའི་ཕྱིར། །ཆོས་དབྱིངས་བདག་ཉིད་སྒྲུབ་ཐབས་ནི། །ཐབས་དང་ཤེས་རབ་འདུས་པ་ཡིས། །དེས་ནི་སངས་རྒྱས་བསྟན་པའོ། །དེ་ནས་བཅོམ་ལྡན་འདས་རྣམས་དང ། རྒྱལ་བའི་སྲས་པོ་རྣམས་བཅོམ་ལྡན་འདས་ཀྱི་གསུང་འདི་ཐོས་ནས་དགའ་བར་གྱུར་ཏེ། ཚིག་འདི་སྐད་སྨྲས་པ། ཨེ་མ་ཀུན་དུ་བཟང་པོ་ཡི། །བསྟན་པ་ནམ་མཁའ་ལས་བྱུང་བ། །ནམ་མཁའི་དབུས་སུ་སྦྱོར་བ་ཡིས། །ཡེ་ཤེས་རྒྱ་མཚོ་ཉན་པར་འགྱུར། །དེ་ནས་རྡོ་རྗེ་འཛིན་རྒྱལ་ནི། །བདེ་བ་ཆེན་པོ་རྣམ་འཕེལ་བས། །དམ་ཚིག་ཐམས་ཅད་བཤད་པར་བྱ། །སངས་རྒྱས་འབྲས་བུ་འདོད་པ་ཡིས། །བདེ་དང་རངས་ཤིང་གར་དང་ནི། །གླུ་དང་རོལ་མོའི་སྒྲ་བྱེད་པས། །དྲི་དང་ཕྲེང་བ་བྱུག་པ་ཡིས། །རིག་པའི་རྒྱལ་པོ་རབ་ཏུ་འགྲུབ། །ཇི་ལྟར་བདེ་བར་བདེ་བཟུང་ནས། །ཇི་ལྟར་འདོད་པར་སྤྱད་པར་བྱ། །ཇི་ལྟར་གནས་སུ་གནས་ནས་ཀྱང ། །ཡི་གེ་དམ་པ་འགྲུབ་པར་འགྱུར། །བཟའ་དང་བཏུང་བའི་སྦྱོར་བ་དང ། །བཟང་པོའི་རྒྱན་གྱིས་བརྒྱན་པ་ཡིས། །ཉི་མ་གཅིག་ཏུ་བསྐུལ་བ་ཡིས། །དམ་པའི་དེ་ཉིད་འགྲུབ་པར་འགྱུར། །རྟག་ཏུ་རང་གི་དམ་ཚིག་མྱང ། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །བླ་མ་སངས་རྒྱས་ཀུན་དང་མཉམ། །ཇི་ལྟར་མགོན་པོ་རྣམ་སྣང་མཛད། །རྡོ་རྗེ་འཛིན་བཞིན་བླ་མ་ཉིད། །ཇི་ལྟར་ནམ་མཁའ་མཛོད་ཆེན་པོ། །ཇི་ལྟར་ཐུབ་པ་རྡོ་རྗེ་ཆོས། །ཇི་ལྟར་མགོན་པོ་བདུན་རྒྱལ་པོ། །དེ་ལྟར་རྡོ་རྗེ་སློབ་དཔོན་བརྗོད། །དེ་བས་འབད་པ་ཐམས་ཅད་ཀྱིས། །རྡོ་རྗེ་སློབ་དཔོན་བླ་མ་ཆེ། །དགེ་བ་མཆོག་ཏུ་གསལ་བ་པོ། །ནམ་ཡང་སྨད་པར་མི་བྱའོ། །རྡོ་རྗེ་སྡོམ་པ་ཞེས་བྱ་བའི་ལེའུ་སྟེ་བཅུ་གསུམ་པའོ།། །། དེ་ནས་བཅོམ་ལྡན་འདས་རྡོ་རྗེ་ཆེན་པོ་རྡོ་རྗེ་གསོར་བར་བཞེད་པ་ལ། །མཁའ་འགྲོ་མ་བདག་མེད་མས་འཁྱུད་པས་བཟང་པོ་སྤྱོད་པ་དབྱེ་བར་བྱའོ། །རྡོ་རྗེའི་གཟུགས 84.293a སུ་བཞག་ནས་ནི། །ཇི་ལྟར་འདོད་པར་འདོད་པ་ཡིས། །རིག་འཛིན་འཁོར་ལོས་བསྒྱུར་བ་ཉིད། །དོགས་པ་མེད་པར་འགྲུབ་པར་འགྱུར། །དྲི་ལྔ་ཡང་དག་བླངས་ནས་སུ། །རྫས་ལྔ་དང་ནི་བསྲེ་བར་བྱ། །ལྕགས་གསུམ་གྱིས་ནི་དཀྲིས་ནས་ནི། །མགོན་པོའི་རིག་པ་འཛིན་པར་འགྱུར། །གུར་གུམ་ཨ་ཀ་རུ་ལྡན་པ། །ཉི་མ་འཆར་ཀའི་མདོག་འདྲ་བའི། །རི་ལུ་ཁ་རུ་བཅུག་བྱས་ནས། །ཉི་མའི་རིག་པ་འཛིན་པར་འགྱུར། །ཤ་ལྔ་དང་ནི་ལྡན་པར་རུ། །ལྕགས་གསུམ་གྱིས་ནི་དཀྲིས་ནས་ནི། །རྡོ་རྗེ་ཉི་མ་རབ་སྦྱོར་བས། །ཉི་མ་གཅིག་གིས་འགྲུབ་པར་འགྱུར། །ཙནྡན་དམར་པོ་ཁ་ཆེ་དང ། །དགའ་བ་སྦས་པར་སྦྱར་བ་ནི། །ལྕགས་གསུམ་གྱིས་ནི་དཀྲི་བྱས་པ། །རྟ་ཡི་རིག་པ་འཛིན་པར་འགྱུར། །འཇིག་རྟེན་མགོན་པོ་རྣམས་བསྒོམས་ནས། །ཙ་ནའི་རུས་པའི་ཚད་ཙམ་ལས། །གུ་གུལ་ལྕགས་ཀྱིས་དཀྲིས་པ་ནི། །མགོན་པོའི་རིག་པ་འཛིན་པར་འགྱུར། །རི་ལུ་སྒྲུབ་ཐབས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཀླུ་ཡི་རྒྱལ་པོའི་མགོ་བསྲེགས་ནས། །རང་བྱུང་ཁྲག་གིས་བསྒོ་བར་བྱ། །རྡོ་རྗེ་ཕན་པའི་རྣལ་འབྱོར་གྱིས། །མིག་སྨན་རིག་པ་འཛིན་པར་འགྱུར། །བླ་མའི་ས་བོན་ལྡན་པ་དང ། །སྟག་གི་ལྤགས་པའི་ཚིལ་བུས་མཉེ། །སྐུ་ཡི་རྡོ་རྗེའི་རྣལ་འབྱོར་གྱིས། །རྐང་པའི་བྱུག་པ་འགྲུབ་པར་འགྱུར། །ཡན་ལག་མེད་པའི་དཀྱིལ་འཁོར་དབུས། །དབང་པོའི་བྲག་ཕུག་འགྲམ་དུ་ནི། །རྡོ་རྗེ་རྐང་འོག་རྣལ་འབྱོར་གྱིས། །ལྷ་ཡི་བུ་མོར་རབ་བསྒྲུབ་བྱ། །ོ་ཌྱན་ཡུལ་དུ་ཉེ་བ་ན། ། མྲ་འབྲས་ཆེན་པོ་ཡི་ནི། །རྡོ་རྗེ་གནོད་མཛེས་སྦྱོར་བ་ཡིས། །རྐང་འོག་རིག་པ་འཛིན་པར་འགྱུར། །རྡོ་རྗེ་སེམས་དཔའ་རྒྱལ་པོ་ཆེ། །ཡང་ནས་ཡང་དུ་བསྐུལ་བར་བྱ། །དེ་ཉིད་དངོས་གྲུབ་ཐམས་ཅད་ཀྱི། །ཡིད་བཞིན་ནོར་བུ་ལྟ་བུར་མཚུངས། །རྡོ་རྗེ་གནོད་མཛེས་སྐུ་ཆེན་པོ། །ཕྱག་གཉིས་ཞལ་ནི་གཅིག་པ་ཅན། །སྡིགས་འཛུབ་ཀླུ་ཡི་ཞགས་པ་དང ། །ཁ་དོག་ནག་པོར་བསྒོམ་པར་བྱ། །རྡོ་རྗེ་ཧཱུཾ 84.293b མཛད་བླངས་ནས་ནི། །རྣམ་པ་ཐམས་ཅད་བསྒོམ་པར་བྱ། །མི་བསྐྱོད་པ་ཡི་ཡང་དག་མནན། །ཕུཿ ཞེས་བྱ་བའི་སྔགས་བརྗོད་དོ། །རབ་ཏུ་བྱུག་པ་དང་མིག་སྨན་རྡོ་རྗེ་ས་ཞེས་བྱ་བའི་ཏིང་ངེ་འཛིན་ཏོ། །དེ་ནས་དེ་བཞིན་གཤེགས་པ་ཐམས་ཅད་བཅོམ་ལྡན་འདས་ཀྱི་གསུང་ཐོས་ནས། དགའ་ཞིང་མགུ་བ་སྐྱེས་པར་གྱུར་ཏེ་ཚིག་འདི་སྐད་སྨྲས་སོ། །ེ་མའོ་རྡོ་རྗེ་ཨེ་རྡོ་རྗེ། །ེ་མ་རྡོ་རྗེའི་བསྟེན་པ་ནི། །ཆོས་རྣམས་ཐམས་ཅད་སྟོང་པ་ལ། །གང་ཕྱིར་དངོས་གྲུབ་རབ་གནས་པ། །སྙིང་པོ་མེད་པའི་ཆུ་ཤིང་ལ། །ཇི་ལྟར་སྙིང་པོའི་འབྲས་ཞིམ་པ། །དེ་ལྟར་སྙིང་པོ་མེད་ལུས་ལ། །དངོས་གྲུབ་འབྲས་ཞིམ་དེ་བཞིན་ནོ། །ནམ་མཁའ་འབྱུང་པོ་ཐམས་ཅད་དང ། །ཆོས་རྣམས་ཀུན་གྱི་གནས་ཡིན་ཏེ། །སེམས་ནི་ནམ་མཁའ་ལྟ་བུར་དག་།དག་པའི་སེམས་ནི་མཆོག་ཏུ་བདེ། །དོན་དམ་དབང་པོའི་རང་བཞིན་གྱིས། །སེམས་ལས་ཕྱི་རོལ་གྱུར་པ་མེད། །གཟུགས་སོགས་སོ་སོར་འདོད་པ་ཡིས། །སེམས་ཉིད་དུ་ནི་འདོད་པར་བྱ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཇི་ལྟར་སེམས་སྟོང་ལ། སེམས་ལས་ཕྱི་རོལ་གྱི་དོན་སེམས་མི་སྟོང་པ་རབ་ཏུ་འབྱུང་ཞེས་བགྱི། དེ་བཞིན་གཤེགས་པས་བཀའ་སྩལ་པ། །ཐོག་མེད་སྲིད་པའི་བག་ཆགས་ཀྱིས། །ཕྱི་རོལ་དོན་ནི་རྣམ་པར་བརྟགས། །སེམས་ཀྱིས་ཐམས་ཅད་རྣམ་པར་བརྟགས། །སེམས་ནི་ཀུན་ཏུ་འགྲོ་བར་བརྗོད། །བྱང་ཆུབ་སེམས་རབ་ཏུ་འབྱུང་བ་བསྟན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཤིན་ཏུ་བཞིན་མཛེས་མིག་ཡངས་མ། །སི་ཧལ་ག་བུར་འབྱུང་བའི་གནས། །པང་དུ་བཞག་པར་བྱས་ནས་ནི། །སྐྲ་ནས་བཟུང་བར་ཡང་དག་བརྩམ། །རྡོ་རྗེ་འོ་ཡིས་འོ་བྱས་ཤིང ། །རྡོ་རྗེ་ཉེད་པས་མཉེ་བར་བྱ། །རྡོ་རྗེ་འཁྱུད་པས་ཡང་དག་བླང ། །རྡོ་རྗེ་མ་མཆུ་རབ་བཙིར་བྱ། །རྡོ་རྗེ་འཛུབ་མོའི་སྦྱོར་བ་ཡིས། ། 84.294a རྡོ་རྗེ་གནས་ནི་རབ་བསྐུལ་བྱ། །རྡོ་རྗེ་སེམས་ནི་ཕྱུང་བ་ཡིས། །རྡོ་རྗེ་ལྕེའི་ཡང་དག་བཟའ། །ཕྱིན་ནས་དེའི་བདེ་ཅན་དུ། །རྡོ་རྗེ་སེམས་དཔའ་གཞུག་པར་བྱ། །རྡོ་རྗེ་འཆི་བའི་སྦྱོར་བ་ཡིས། །རྡོ་རྗེ་མཆོད་པ་ཡང་དག་བརྩམ། །རྡོ་རྗེ་སེམས་དཔའ་འབྱུང་བ་ལ། །སེམས་ནི་བརྟུལ་ཞུགས་ཅན་གྱི་དབྲོག་།པདྨ་མེ་ཏོག་ལྡན་པ་ཡི། །པདྨ་དམར་པོས་མཆོད་པར་བྱ། །པདྨས་མཉེས་པའི་རྡོ་རྗེ་ཅན། །པདྨ་དམར་པོས་ཁྱད་པར་དུའོ། །དྲི་ལྔའི་རབ་ཏུ་སྦྱོར་བ་ཡིས། །རྒྱལ་མཚན་ག་བུར་མཆོད་པ་ནི། །འདི་ནི་བརྩོན་འགྲུས་བདེ་ཆེན་དང ། །སྟོབས་དང་རྒྱས་པར་འགྱུར་བ་དང ། །མཐོང་བ་ཉིད་ཀྱིས་བསྐུལ་བ་ཡིས། །འཇིག་རྟེན་འདི་ནི་དབང་དུ་བྱེད། །གང་གིས་དཀོན་མཆོག་གསུམ་བསད་དང ། །གང་གིས་སེམས་ཅན་བསད་བྱས་དང ། །གང་གིས་སློབ་དཔོན་སྨོད་པ་དང ། །སངས་རྒྱས་ལམ་ལ་འཕྱ་བ་རྣམས། །ལྕགས་ཀྱུ་ཡིས་ནི་ཡང་དག་དགུག་།ལྕགས་སྒྲོག་གིས་ནི་རྐང་པ་བཅིང ། །ཞགས་པས་མགྲིན་པ་དམ་པར་བཅིང ། །རྡོ་རྗེ་བདག་གིས་དགུག་པར་བྱ། །མཁའ་འགྲོ་སངས་རྒྱས་བསམས་ནས་ནི། །དེ་རྣམས་དབང་པོར་གསོལ་བར་བྱ། །འདིས་ནི་སངས་རྒྱས་དཔའ་བོ་དང ། །རྡོ་རྗེ་སེམས་དཔའ་བཀྲོངས་པ་སྟེ། །འདི་དེ་སྡིག་པ་ཆེན་པོ་ཅན། །མནར་མེད་འགྲོ་བའི་བདག་ཉིད་དེ། །འདི་ནི་དམྱལ་བ་ཆེན་པོར་ལྟུང ། །དེ་ལྟར་བསམས་ནས་གསད་པར་བྱ། །རྡོ་རྗེའི་གཟུགས་ནི་བསམས་ནས་སུ། །ནམ་མཁའི་དབྱིངས་ནི་བསྒོམ་པར་བྱ། །རྡོ་རྗེ་དབྱུག་པས་བརྡུངས་བྱས་ནས། །རྡོ་རྗེ་ཅན་གྱི་གནས་སུ་སྐྱེ། །ལྕགས་ཀྱུ་ལ་སོགས་མི་ནུས་ན། །ཟན་གྱིས་ཀྱང་ནི་འདུ་བྱ་ཞིང ། །དེ་ཉིད་ཀྱིས་ནི་གཟུགས་བསམས་ནས། །རྡོ་རྗེ་དཀྱིལ་འཁོར་ཉིད་དུ་གཞག་།ཊཀྐིའི་རྒྱལ་པོ་ལྕགས་ཀྱུ་སྟེ། །དབྱུག་སྔོན་ཅན་ལ་རང་གི་མིང ། །སྟོབས་ཀྱི་རྒྱལ་པོ་རྩེ་གསུམ་པ། རྣམ་པར་རྟོག་པ་ཆེན་པོ་གསོད་པ་ཞེས་བྱ་བའི་ཏིང་ངེ་འཛིན་ཏོ། །དེ་ནས་རྡོ་རྗེ 84.294b འཛིན་རྒྱལ་ན། །ཐམས་ཅད་དབུགས་དབྱུང་རབ་གསོལ་བས། །དམ་ཚིག་རྡོ་རྗེ་སྲུང་དོན་དུ། །སྦས་པའི་སྤྱོད་ཡུལ་འདི་གསུངས་པ། །རྡོ་རྗེ་ཁྲོ་བོའི་སྐྱེས་བུ་ཆེ། །ཐམས་ཅད་ཞལ་གཅིག་ཕྱག་གཉིས་པ། །སྙིང་གར་གཡོན་པའི་ཁུ་ཚུར་འཛུག་།གཡས་ན་རང་གི་མཚོན་ཆ་འཕྱར། །གཤེན་རྗེ་གསོད་པའི་དབྱུག་ཏོ་ཅན། །གཞན་གྱིས་མི་ཐུབ་རྡོ་རྗེ་དབྱུག་།རྟ་མགྲིན་ལ་ནི་དབང་མཆོག་དམར། །མི་ཕྱེད་བདུད་རྩིའི་ཐབས་སྦྱོར་ལས། །ཊཀྐིའི་རྒྱལ་པོ་ལྕགས་ཀྱུ་སྟེ། །དབྱུག་སྔོན་ཅན་ལ་རང་གི་མིང ། །སྟོབས་ཀྱི་རྒྱལ་པོ་རྩེ་གསུམ་པ། །མི་གཡོ་ཡི་གེའི་དཀྱིལ་འཁོར་རྩེ། །ཚ་སྐྱབས་དཀར་པོ་རྒྱལ་པོ་ལ། །ཆོས་ཀྱི་འཁོར་ལོ་རྣམ་པར་བསྒོམ། །གཏུན་ཤིང་རྡོ་རྗེ་རྐང་འོག་ལ། །ཞབས་གཡོན་བརྐྱང་བས་གནས་པའོ། །དབང་པོ་སྔོན་པོའི་རྣམ་པ་ལྟར། །མཐར་བྱེད་རྣམ་པར་བསྒོམ་པར་བྱ། །གཞན་གྱིས་མི་ཐུབ་རྡོ་རྗེ་ནི། །འཇིགས་བྱེད་ཟླ་བའི་ནོར་བུ་འདྲ། །པདྨའི་ཁྲོ་བོ་དམར་པོ་ཆེ། །རྡོ་རྗེ་བདུད་རྩིའི་བདག་ཉིད་ནག་།མཚམས་ཀྱི་ཁྲོ་བོ་ཆེར་ནག་ཅིང ། །སྤྱི་བོར་རྡོ་རྗེ་འཛིན་པ་མཚན། །གཤེན་རྗེ་རྣམ་སྣང་ཉིད་ཀྱིས་ཏེ། །རྡོ་རྗེ་སེམས་དཔའ་དབྱུག་པ་ཅན། །པདྨའི་ཁྲོ་བོ་རྣམ་གཟིགས་རྗེས། །རྡོ་རྗེ་སེམས་དཔའ་ཐབས་སྦྱོར་ལ། །རྡོ་རྗེའི་དཀྱིལ་འཁོར་དབུས་གནས་པར། །རྡོ་རྗེ་ཉི་མ་བསྒོམ་པར་བྱ། །འོག་ཏུ་པདྨའི་གདན་བསམས་ནས། །ཁྲོ་བོ་བཅུ་རྣམས་རབ་བསྒོམ་བྱ། །ཡེ་ཤེས་རྡོ་རྗེ་རང་དངོས་སུ། །བཅུ་ཕྱེད་དཀྱིལ་འཁོར་བདག་ཉིད་དེ། །བདུད་རྣམས་ཞབས་ཀྱི་འོག་བསམས་ནས། །དཀྱིལ་འཁོར་ལྔ་པོ་བསྒོམ་པར་བྱ། །བསྲུང་བའི་འཁོར་ལོ་གཟི་བརྗིད་ཆེ། །བསྐལ་པའི་མེ་ལྟར་འབར་བ་སྟེ། །འཁོར་ཞིང་རབ་ཏུ་མི་གཡོ་བར། །དཔག་ཚད་ལྔ་བརྒྱའི་ཚད་ཙམ་མོ། །བསྲུང་བའི་དམ་ཚིག་སྟོབས་ཀྱིས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་ཆེན་པོ། །རང་གིས་བྱིན་བརླབས་རིམ་གནས་ཏེ། །རང་གིས 84.295a བྱིན་བརླབས་རྣལ་འབྱོར་གྱིས། །དེ་ཉིད་ལས་ནི་བཤད་པར་བྱ། །སྙིང་གི་དབུས་སུ་ཟླ་བར་འགྱུར། །གཟུགས་བརྙན་ཟླ་བར་མ་བཅོས་པ། །སྣ་ཚོགས་འོད་ཀྱིས་ཡང་དག་ཁྱབ། །དེ་ལས་རྡོ་རྗེ་བསྒོམ་པར་བྱ། །རྡོ་རྗེ་བདག་མེད་མཁའ་འགྲོ་མ། །ཆོ་གས་བསྐུལ་བས་བསྒོམ་པར་བྱ། །མཁའ་འགྲོ་སྣ་ཡི་མཐར་གནས་པ། །ཡུངས་ཀར་ཙམ་དུ་རྣམ་པར་བསྒོམ། །ཡུངས་ཀར་ལ་ནི་འགྲོ་བ་ཀུན། །ཁམས་གསུམ་རྒྱུ་དང་མི་རྒྱུ་བ། །དེ་ལྟར་སྒོམ་པར་བྱེད་པ་ཡི། །རང་གི་བྱིན་བརླབས་རབ་ཏུ་འགྲུབ། །གཟུགས་སྒྲ་དེ་བཞིན་དྲི་དང་ནི། །རོ་དང་རེག་བྱ་མངོན་འདོད་པ། །དེར་ནི་རྣལ་འབྱོར་ཉིད་ཀྱིས་ནི། །མི་འཛིན་དེ་ཕྱིར་བདག་གཞན་མེད། །ཇི་ལྟར་རྡོར་པད་ལས་བྱུང་བ། །ཞི་བའི་བདེ་བའི་རྣམ་པར་འདོད། །དབའ་རླབས་མེད་ཅིང་སྣང་བ་མེད། །རྣམ་རྟོག་མེད་ཅིང་ཡི་གེར་མེད། །མྱོས་བྱེད་ཅུང་ཟད་རབ་འཐུངས་པའི། །བདག་གིས་བདག་ཉིད་མི་རིག་གོ། །དགའ་བྲལ་དགའ་བ་དག་གི་མཐར། །རྟོག་པའི་དྲ་བ་རྣམ་པར་སྤངས། །འགྱུར་མེད་འཁྲུལ་པ་ལ་འདས་ཤིང ། །ཀྱེ་ཡི་རྡོ་རྗེ་རྣམ་པར་གསལ། །བེམས་མིན་རྣམ་པ་ཧེ་རུ་ཀ ། རྣམ་པ་རྣམས་ཀྱིས་ཡོངས་སུ་བསྐོར། །རང་ཉིད་མགོན་པོ་ཧེ་རུ་ཀ ། དེ་ཡིས་བདག་ཉིད་མི་རིག་ཅིང ། །དེ་ཡི་དུས་ན་ཐམས་ཅད་རིག་།འབྱུང་པོ་འགྲོ་དང་འོང་བ་ནི། །རང་གིས་ཀུན་མཁྱེན་ལྟ་བུར་གཟིགས། །སངས་རྒྱས་སངས་རྒྱས་སྲས་པོ་དང ། །ཡན་ལག་ཀུན་དང་བུ་ག་ཀུན། །མགོ་བོ་དྲ་བའི་སྐུད་པར་བཅས། །ལུས་ནི་ཡོད་མིན་ལྟར་གཟིགས་ཤིང ། །སྐད་ཅིག་ཀྱེའི་རྡོ་རྗེའི་གཟུགས་འཛིན། །ཇི་ལྟར་ནམ་མཁའ་མི་དམིགས་ཤིང ། །མཚན་མ་མེད་ཅིང་མ་བྱུང་དང ། །གོས་པ་མེད་ཅིང་འཁྲུལ་པ་མེད། །སྒྲིབ་པ་ལྔ་ནི་རྣམ་པར་སྤངས། །ཇི་ལྟར་མེ་ལོང་གཟུགས་བརྙན་ནི། །རྟོགས་ནས་བདེ་བ་རྣམ་སྤངས་པ། །དེ་བཞིན་བདག་ཉིད་ཧེ་རུ་ཀའི། །རྣམ་པ་ལྟ་བུར་གསལ་བར་མཐོང ། །དེ་ཉིད་དོན་དང་དབང་པོ་དང ། །ཕུང་པོ་ནམཁའ་ལྟ་བུར་ཡོད། །ལུས་ནི 84.295b བདེ་བ་ཉིད་བརྗོད་ཅིང ། །འདུ་བྱེད་རྣམས་ཀྱིས་ཟིལ་མི་གནོན། །གཟུགས་ནི་མིག་གིས་མི་འཛིན་ཏེ། །སྒྲ་ནི་ཐོས་པ་པོ་ཡིས་མིན། །ལྕེ་ཡིས་རོ་ནི་མི་ཚོར་ཏེ། །དྲི་ནི་སྣ་ཡིས་ཀྱང་མ་ཡིན། །རེག་བྱ་ལུས་ཀྱི་གོང་བུས་མིན། །འོན་ཀྱང་བདེ་ཆེན་ཚུལ་ལས་ནི། །བུད་མེད་བཟང་མོ་མཐོང་བས་བདེ། །རྣ་བས་གླུ་ཡི་བདེ་བས་བཟང ། །སྣོམ་པས་དྲིའི་བདེ་བ་ཆེ། །སྐྱེ་གནས་རེག་པའི་བདེ་ཆེན་དང ། །རོ་ཡི་བཏུང་བའི་སྦྱོར་བ་ལས། །གང་གིས་བདེ་བ་འགོག་པར་བྱེད། །བདེ་བ་ཆེན་པོས་འགྲོ་བ་ཁྱབ། །བདེ་བ་མ་གཏོགས་མི་ཤེས་སོ། །སངས་རྒྱས་བྱང་ཆུབ་སེམས་དཔའ་ལ། །མཁའ་འགྲོ་མ་དང་བཙུན་མོ་བཟང ། །སངས་རྒྱས་ལྔ་དང་དུ་མ་ནི། །བདེ་བར་ཕྱིན་ཅིང་རྣམ་པར་སད། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་བདེ་བ་ཆེན་པོའི་ཚིག་ཐོས་ནས་ཚིག་འདི་སྐད་སྨྲས་པ། ཕལ་པའི་རྣམ་པར་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །ཕལ་པའི་གནས་སྐབས་གཞོམ་པའི་ཕྱིར། །བསྒོམ་པ་ཡང་ནི་སྒོམ་པ་མིན། །བྱང་ཆུབ་སེམས་དཔའ་རྣམས་ཀྱིས་རྟོགས་པ་དེ་བཞིན་ཏེ། འོན་ཀྱང་མི་གཙང་བའི་ཚད་མཉམ་པར་སྦྱང་བའི་དེ་བཞིན་གཤེགས་པའི་སྐུ་གཟུགས་བསྒོམ་པར་བྱའོ། །ཕྱག་ན་རྡོ་རྗེས་གསོལ་པ། བཅོམ་ལྡན་འདས་ལུས་ཅན་བསྒོམ་པའི་ཐབས་ཀྱི་དགོས་པ་ཉིད་དེ་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། གསང་བའི་བདག་པོ་དགོས་པ་ཡོད་དོ། །བཅོམ་ལྡན་འདས་མིང་ཅི་ལགས། རྡོ་རྗེ་འཛིན་པས་བཀའ་སྩལ་པ། སངས་རྒྱས་ཉིད་དོ། །སངས་རྒྱས་ཉིད་ཅི་ལགས། རྣམ་པ་ཐམས་ཅད་མཁྱེན་པ་ཉིད་དོ། །དེ་ཅི་ལགས། ལུས་ཅན་འདི་ནི་བདེན་པའོ། །དེ་ཅིའི་སླད་དུ་ཞེ་ན། རྡོ་རྗེ་འཛིན་པས་བཀའ་སྩལ་པ། འདི་ལྟར་ང་ནི་མཚན་སུམ་བཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་བཅུས་བརྒྱན་པའོ། །དེ་ཅིའི་སླད་དུ་ཞེ་ན། མི་འདྲ་བའི་ཕྱིར་བསྒྲུབ་པ་ཡིན་ནོ། །ཕྱག་ན་རྡོ་རྗེས་གསོལ་པ། ཅི་བཅོམ་ལྡན་འདས 84.296a བེམས་པོ་ལགས་སམ། རྡོ་རྗེ་འཛིན་པས་བཀའ་སྩལ་པ། ང་ཉིད་མེ་ལོང་ལྟ་བུའི་ཡེ་ཤེས་སོ། །མེ་ལོང་ལྟ་བུའི་ཡེ་ཤེས་དེ་ཅི་ལགས། རྡོ་རྗེ་འཛིན་པས་བཀའ་སྩལ་པ། བདེན་པ་མ་ཡིན་པ་དང ། བརྫུན་པ་མ་ཡིན་པ་དང ། རྒྱུ་མ་ཡིན་པ་དང ། སྐྱེ་བ་མ་ཡིན་པ་སྟེ། དེ་ལྟར་ང་ཉིད་མཉམ་པ་ཉིད་ཀྱི་ཡེ་ཤེས་དང ། ང་ཉིད་སོ་སོར་རྟོག་པའི་ཡེ་ཤེས་དང ། ང་ཉིད་བྱ་བ་ནན་ཏན་གྱི་ཡེ་ཤེས་དང ། དེ་ལྟར་ཆོས་ཀྱི་དབྱིངས་ཤིན་ཏུ་རྣམ་པར་དག་པའོ། །དེའི་ཕྱིར་བྱང་ཆུབ་སེམས་དཔའ་ཆེན་པོ་རྣམ་པ་དང་བྲལ་བའི་བྱང་ཆུབ་དེ་སྐད་མ་སྨྲ་ཤིག་།ང་ཉིད་དངོས་དང་དངོས་མེད་དང ། །དང་པོའི་དེ་བཞིན་གཤེགས་པར་བརྗོད། །གཟུགས་དང་གཟུགས་མེད་ལྡན་པའི་མཆོག་།ཟབ་མོ་ཞི་བའི་ཆོས་དང་ལྡན། །སེམས་དཔའ་ཆེན་པོ་ཧེ་རུ་ཀ་།བདག་མེད་ལྷན་ཅིག་མཉམ་སྦྱོར་ང ། །བདེ་ཆེན་ལས་ནི་བེམས་མིན་ང ། །འཇིག་རྟེན་ཀུན་རྫོབ་བེམས་པོ་ང ། །སྐྱེས་པ་བུད་མེད་མ་ནིང་དང ། །འགྲོ་བ་ང་ཡིས་ཡང་དག་ཁྱབ། །དེ་ཕྱིར་འདུས་པ་ཞེས་བྱ་ཉིད། །རྒྱལ་བ་རྒྱ་མཚོ་བདག་གིས་བཤད། །རྡོ་རྗེ་ཅན་དང་བྱང་སེམས་རྣམས། །མ་ནིང་གནས་སུ་ཡང་དག་འགྲུབ། །གང་ཞིག་ལྷ་མོ་བདག་མེད་དེ། །རང་བཞིན་གྱི་ནི་བཙུན་མོ་མིན། །སངས་རྒྱས་ཧེ་རུ་ཀ་ང་ཡིན། །དེ་ཉིད་ཕྱིར་ན་མ་ནིང་སྟེ། །འགྲོ་བའི་དངོས་པོ་གཉིས་མཐོང་ནས། །ཐབས་དང་ཤེས་རབ་བདག་ཉིད་དང ། །ཤིན་དུ་མཉམ་སྦྱོར་རྣལ་འབྱོར་གྱིས། །མི་སྐྱོད་མེད་ཅིང་བདག་མངའ་མེད། །དམ་པའི་རང་བཞིན་བདེ་བ་ཆེན་པོའི་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་དཔའ་བོ་ཆེན་པོ་རྡོ་རྗེ་འདོད་པ་བདེ་བ་ཆེན་པོ་རྡོ་རྗེ་ཡན་ལག་མེད་པ་ཤིན་དུ་དགའ་བ་ཆེན་པོས་ཚིག་འདི་དག་བཀའ་སྩལ་པ། ཕྱག་དྲུག་པ་དང་སྒེག་པར་བཅས། །ཞལ་གཅིག་རལ་པ་འཛིན་པ་དང ། །བརྒྱད་གཉིས་ལོ་ལོན་སོར་མོ་ནི། །རྡོ་རྗེ་ཡན་ལག་མེད་པ་འགྲུབ། །དཔའ་བོའི་གཡས་པར་མདའ་ཉིད་དེ། །ལག་པ་གཉིས་པར་རལ་གྲི་ཉིད། །གསུམ་པར་མེ་ལོང་རིག་པར་བྱ། །ལག་པ་གཡོན 84.296b པར་གཞུ་ཉིད་དེ། །གཉིས་པ་ལ་ནི་དབང་མཆོག་ཉིད། །ཀཾ་ཀེ་ལླ་ཡི་ཡལ་ག་སྟེ། །ཕྱག་དྲུག་ཉིད་དུ་བསྒོམ་པར་བྱ། །ཞབས་གཡོན་བརྐྱང་པས་གནས་པར་ནི། །བུ་མོའི་སྙིང་གར་བསམས་ནས་ནི། །རྡོ་རྗེ་བཙུབ་མོ་འགྲུབ་པར་འགྱུར། །མདའི་ཡིས་འོ་མ་འཛིན་པ་འབིགས། ། ཤོ་ཀ་ཡིས་སྙིང་གར་བྲབ། །རལ་གྲིས་སྐྱེས་མ་བསྡིག་པར་བྱ། །དེ་ནས་མེ་ལོང་བསྟན་པར་བྱ། །གཞུ་ཡིས་རྐང་པ་བཅིངས་ནས་ནི། །ུཏྤལ་ཞགས་པས་དགུག་པར་བྱ། །སྐྲ་གྲོལ་འོང་བར་འདོད་པ་དང ། །སྙན་པའི་སྐད་ནི་རབ་ཏུ་སྨྲ། །ཧ་དང་སི་ནི་བྱེད་པ་མོ། །དངས་ཤིང་ཡན་ལག་ཚེས་མས་བརྒྱན། །ཁ་ནི་སོ་རྩིས་གང་བ་དང ། །འདོད་པ་སྟོབས་དང་བྲལ་བ་བསམ། །རྡོ་རྗེ་མཆོད་པའི་སྦྱོར་བ་ཡིས། །མི་འགྱུར་སེམས་ཀྱིས་རྗེས་ཆགས་བྱ། །འདོད་པའི་སྔགས་ནི་མ་བཅོས་པས། །དེ་ཡི་སྙིང་ནི་བསྐུལ་བར་བྱ། །ོཾ་ཨ་མུ་ཀཱ་མཱ་ཀར་ཥ་ཡ་མཉྫུ་གྷོ་ཥ་ཧྲཱིཿ ཛཿ ་དེ་ལྟར་བསྒོམ་པར་བྱས་པ་ཡིས། །འཇམ་པའི་མགོན་པོའི་བཙུན་མོ་ནི། །བསྒྲུབ་པ་པོ་ལ་འདོད་པ་དང ། །དབང་དུ་བྱེད་ཅིང་འོང་བར་འགྱུར། །ཟླ་བ་ཕྱེད་ཀྱི་སྦྱོར་བ་ཡིས། །བཟླས་པ་ཁྲིའི་སྦྱོར་བ་ལས། །གཡོ་བ་གསེར་གྱི་རྣ་ཆ་མ། །ཤིན་ཏུ་དགའ་བའི་སེམས་ཀྱིས་བསྒྲུབ། །ཧཾ་གི་ས་བོན་ལས་སྐྱེས་པ། །ཐམས་ཅད་རྒྱན་གྱིས་རྣམ་པར་བརྒྱན། །ཆང་གི་བཏུང་བའི་རབ་སྦྱོར་བས། །རྡོ་རྗེ་ཡན་ལག་མེད་པ་བསྒྲུབ། །མ་བཅོས་མཆོག་གི་ས་བོན་ནི། །བདེ་དང་སྡུག་བསྔལ་རང་བཞིན་ཅན། །བདེ་བ་ཆེན་པོ་མཆོག་ཏུ་ཞི། །སེམས་ཅན་ཐམས་ཅད་དགའ་བར་བྱེད། །འདི་ནི་སྲོག་ནི་ཆེན་པོ་སྟེ། །མཆོག་ཏུ་དགའ་བ་མཛེས་མ་ཉིད། །བདེ་དང་སྡུག་བསྔལ་རྟག་ཏུ་དེའི། །དྲན་པ་དེ་ལྟར་རབ་ཏུ་གྲགས། །མྱ་ངན་འདོད་ཆགས་དེ་བཞིན་གདུངས། །དགའ་དང་དགའ་བྲལ་དེ་བཞིན་ནོ། །རྡོ་རྗེ་སེམས་དཔའ་རྒྱལ་པོ་ཆེ། །དེ་ཉིད་དབྱངས་ཡིག་དྲུག་པར་བརྗོད། །ཟླ་བ་ཕྱེད་པས་ཡང་དག་ལྡན། །ཐིག་ལེས་མེགོ་བོ་ཉིད་དུ་མཆོད། །སེམས་ཅན་གྱི་ནི་ཀུན་གཞི་སྟེ། །རྒྱུད་རྣམས་ཀྱི་ནི་ཁྱད་པར་དུའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད 84.297a ཀྱིས་བཅོམ་ལྡན་འདས་ཀྱིས་བྱང་ཆུབ་ཀྱི་སེམས་ཆེན་པོའི་རྡོ་རྗེ་ས་བོན་གྱི་ཡི་གེ་ཐོས་ནས་སེམས་བསྒྲུབ་པ་གསལ་བ་ཉེ་བར་གྱུར་ནས་ཚིག་འདི་དག་གསུངས་པ། སེམས་དཔའ་མེད་ཅིང་སྒོམ་པ་མེད། །སྔགས་མེད་ལྷ་ཡང་མེད་པ་སྟེ། །སེམས་ཀྱི་རྡོ་རྗེ་ལས་བྱུང་བ། །འདི་ནི་བྱང་ཆུབ་རིམ་བསྟན་པའོ། །བཅོམ་ལྡན་འདས་རྡོ་རྗེ་དམ་ཚྀག་གིས་དེ་སྐད་ཅེས་བཀའ་སྩལ་ཏོ། །བསོད་ནམས་མེད་ཅིང་སྡིག་པའང་མེད། །བྱང་ཆུབ་མེད་ཅིང་སངས་རྒྱས་མེད། །ཡེ་ཤེས་ལྔ་ནི་སྦྱོར་བ་ཡིས། །བྱང་ཆུབ་སེམས་ནི་བརྟན་པའོ། །བཅོམ་ལྡན་འདས་འཁོར་ལོའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །སྔགས་མེད་བཟླས་པའང་ཡོད་མ་ཡིན། །འགྲོ་བ་གསུམ་པོ་ཐམས་ཅད་མེད། །ཆོས་ཀྱི་དབྱིངས་ཀྱི་རང་བཞིན་གྱིས། །བསྒོམ་པ་དང་ནི་བསྒོམ་པ་མེད། །བཅོམ་ལྡན་འདས་རིན་པོ་ཆེའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །ཀུན་རྫོབ་འཇིག་རྟེན་པ་ཡང་ཡོད། །དཔྱད་ན་གང་དུ་འཇིག་རྟེན་པ། །རྟག་ཏུ་འཇིག་རྟེན་པ་ཉིད་འཁོར། །འདི་ནི་བྱང་ཆུབ་རིམ་བརྟན་པའོ། །བཅོམ་ལྡན་འདས་པདྨའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །མ་སྐྱེས་པ་དང་མི་དམིགས་པ། །མི་ཕྱེད་ནམ་མཁའ་ལྟ་བུ་སྟེ། །ཟབ་ཅིང་ཞི་བའི་རང་བཞིན་ནི། །འདི་ནི་བྱང་ཆུབ་རིམ་བསྟན་པའོ། །བཅོམ་ལྡན་འདས་རལ་གྲིའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །སྒྱུ་མ་ཇི་ལྟར་མེ་ལོང་ལྟར། །ནམ་མཁའ་ཇི་ལྟར་བདེ་ཇི་ལྟར། །ཇི་ལྟར་དངོས་པོ་ཡོངས་ཤེས་པ། །འདི་ནི་བྱང་ཆུབ་རིམ་བསྟན་པའོ། །བཅོམ་ལྡན་འདས་མཁའ་འགྲོ་མ་བདག་མེད་མས་དེ་སྐད་ཅེས་བཀའ་སྩལ་ཏོ། །སྟོང་ཉིད་དྲི་མེད་དམ་པའི་གནས། །རྨི་ལམ་སྒྱུ་མའི་རང་བཞིན་ཉིད། །ཇི་སྲིད་མ་ཞིག་བར་དུ་ནི། །སེམས་ཀྱི་རང་བཞིན་བསྒོམ་པར་གྱིས། །མཱ་མ་ཀཱིའོ། །སྲིད་མེད་མྱ་ངན་འདས་པ་མེད། །འདི་དེ་བདེ་ཆེན་རྡོ་རྗེ་སྟེ། །གང་ཞིག་ཡིད་ཀྱི་བསྒོམ་པས་བསྒོམ། །དེ་ནི་མཆོག་གི་བསྒོམ་པས་བསྒོམ། །སྤྱན་གྱིའོ། །སྔགས་དང་ཡི་གེ་རྣམ་པར་སྤངས། །འདི་ནི 84.297b སེམས་མེད་ཐིག་ལེ་མེད། །འདི་དེ་དམ་པའི་བདེ་ཆེན་ཏེ། །བྲི་བ་མེད་ཅིང་གང་བ་མེད། །གོས་དཀར་མོའིའོ། །གཟུགས་བརྙན་རང་བཞིན་ཇི་ལྟ་བར། །དེ་ལྟར་དངོས་པོ་བསྒོམ་པར་བྱ། །སྟོང་ཉིད་དྲི་མེད་མཆོག་གི་གནས། །དེ་ནི་བསོད་ནམས་སྡིགས་པ་མེད། །སྒྲོལ་མའིའོ། །ཇི་ལྟར་ཆུ་ནང་ཟླ་བ་དེ། །བདེན་མིན་བརྫུན་པ་མིན་པ་ལྟར། །དེ་ལྟར་དཀྱིལ་འཁོར་འཁོར་ལོ་ཡི། །ལུས་ཀྱི་རང་བཞིན་རྙོག་པ་མེད། །འཁོར་ཐམས་ཅད་ཀྱིས་དེ་སྐད་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་སྣ་ཚོགས་བྱེད་པ་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། མདའ་གཞུ་ཆར་འདི་ཉིད་ཀྱིས་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ ། །མུཿ ཙྪ་ཌི་དང་སེར་རྣ་ཡིས། །ཆང་གཟུངས་ཁུ་ཚུར་བཟུང་བ་ཡིས། །གཡོན་ནི་འདོད་པའི་ཁུ་ཚུར་གྱིས། །བསྡམས་པས་དགྲ་རྣམས་བསྡིགས་པར་བྱ། །ཡན་ལག་ཀོས་ཀོར་བཟུང་ནས་ནི། །མཚོན་པའི་ཁུ་ཚུར་བཟུང་ནས་ནི། །ཧཱུཾ་གིས་མདའ་ནི་གཏང་བྱ་ཞིང ། །བདུད་ཀྱི་དཀྱིལ་འཁོར་བསྡིགས་པར་བྱ། །བརླ་ནི་བསྐུམ་པར་བྱས་ན་ནི། །ལུས་ནི་དབུགས་ཀྱིས་དགང་བར་བྱ། །ལུས་ལ་ཁུ་ཚུར་བཟུང་ནས་ནི། །བྲང་ནི་རྒྱས་པ་ཉིད་དུ་བྱ། །སེམས་དང་དམིགས་ནི་འབེན་ལ་བྱ། །ཧཱུཾ་གིས་ཁ་ནི་དགང་བ་དང ། །གཡས་བརྐྱང་ལ་སོགས་སྦྱོར་བ་ཡིས། །གཤེན་རྗེ་སྲིན་པོ་གསད་པར་བྱ། །འདིར་མང་བརྗོད་པས་ཅི་ཞིག་བྱ། །ཀུན་རྫོབ་ཏུ་ནི་བསྡུས་པ་ཙམ། །གཞུ་ཡི་རིག་བྱེད་རྩ་བ་གང ། །དེ་ནི་རྡོ་རྗེ་འཛིན་སྤྱོད་དོ། །དེ་ནས་བཅོམ་ལྡན་འདས་རྡོ་རྗེ་རོལ་མོའི་སྒྲ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རོལ་མོའི་སྒྲའི་སྒེག་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་བྱུང་ངོ ། །ཐ་ཧིཾ་ཐཾ་ཧིཾ། ཐ་ཀ་ཐ་ཀ ། ཐུ་ཀ་ཐུ་ཀ ། ཐོ་ཧོ་ཐོ་ཧོ། བ་ཧི་བ་ཧི། དི་ཌྷཾ་དི་ཌྷཾ། ཀྲ་ཀ་ཀྲ་ཀ ། ཐ་ཀ་ཐ་ཀ ། ཌི་ཧི་ཌི་ཧི། ཏ་ཌ་ཝ་ཏ་ཌ་ཝ། ཆ་ལང་དང་ནི་རྔ་དང་ཡང ། །རྫ་རྔ་ཁ་ཅིག་པི་ཝང་རྒྱས། །མངར་བ་ཅན་དང་གླིང་བུ་དང ། །རྒྱུད་གསུམ་ཀ་ར་ཏ་ཀ་ནི། །རྣམ་གསུམ་བརྡུང་བས་བརྡུང་བར་བྱ། །ཆུང་ངུར་བརྡུངས་པས་རྒྱལ་བ 84.298a སྟེ། །དཀྱིལ་འཁོར་གསོལ་གདབ་ལ་སོགས་པ། །མཆོད་པ་འདི་ནི་བླ་ན་མེད། །རང་གི་ཚིགས་བཅད་མང་པོ་ནི། །བསྟན་པ་འདིས་ནི་ཅི་ཞིག་བྱ། །ཇི་སྙེད་རོལ་མོའི་བསྟན་བཅོས་སུ། །དེ་ནི་རྡོ་རྗེ་རོལ་མོའི་སྒྲ། །དེ་ནས་བཅོམ་ལྡན་འདས་དྲི་བཟང་པོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བདུག་སྤོས་ཀྱི་མཆོད་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ ། །ཙན་དན་ཉིད་དང་གུར་གུམ་དང ། །བྲག་ཞུན་དེ་བཞིན་འདོད་མ་ནི། །འདི་རྣམས་རྫས་ནི་བདུག་སྤོས་ཆེ། །ཧེ་རུ་ཀ་ལ་རབ་ཏུ་དབུལ། །ཀ་ཙོ་ར་དང་རྐུན་མ་ཉིད། །དེ་བཞིན་དུ་ཡང་སྐྲ་སྒྲ་ཉིད། །གདུག་བྱེད་སྙིང་པོ་འདི་རྣམས་ནི། །ཕན་པ་ལ་ནི་སྦྱར་བར་བྱ། །ཀུན་ཏུ་རུ་དང་བོ་ལ་ཀ་།རི་དགས་ལྟེ་བ་སེན་མོ་ནི། །རིན་ཆེན་རྒྱལ་པོའི་བདུག་པ་འདི། །ཀུན་ལ་མི་འཇིགས་གུར་གུམ་དང ། །ཤི་ཏྲཱ་ཡི་ནི་ཤ་ཐཱི་དང ། །ཤ་ལི་ཛི་དང་ཤི་ལ་ཀ ། འཇིག་རྟེན་མགོན་གྱི་བདུག་པ་འདི། །རྟག་ཏུ་རྡོ་རྗེ་འཛིན་པས་གསུངས། །སྣ་ཚོགས་དྲི་ནི་ཁྱད་པར་དུ། །སྣ་ཚོགས་རྡོ་རྗེ་མཆོད་པ་ལས། །བདུན་གྱི་རྒྱལ་པོ་མཆོད་པ་འདི། །ཀུན་ཏུ་སྟོབས་ཀྱིས་བསྒྲུབས་པ་སྟེ། །ཇི་སྙེད་དྲི་ཡི་བསྟན་བཅོས་སུ། །གོང་བུའི་དུམ་བུའི་བདུག་པ་མཆོག་།དེ་ཀུན་ཕྱག་ན་རྡོ་རྗེ་ཡི། །རྡོ་རྗེའི་མཆོད་པར་རབ་ཏུ་གྲགས། །དེ་ནས་བཅོམ་ལྡན་འདས་རྡོ་རྗེ་གོམ་པ་རྣམ་པར་དགོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་གར་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ ། །གུས་བཅས་དང་པོར་སྒེག་པར་ལྡན། །དང་པོ་བརྩེ་བཅས་རྗེས་རྒྱུ་བས། །རྐང་སྟབས་བརྒྱད་དུ་ཆོ་ག་ཡིས། །རྡོ་རྗེ་གོམ་པས་རོལ་པ་བྱ། །མེ་ཏོག་སྙིམ་པའི་སྦྱོར་བ་དང ། །སྤོས་ཀྱི་ཡལ་གའི་སྦྱོར་བ་དང ། །མར་མེ་སྡོང་བུའི་ལག་ཚུལ་དང ། །ཡང་ནི་བྱུག་པའི་ལུས་དང་ནི། །མིག་ལག་དེ་བཞིན་བརླ་ནང་དང ། །རྐང་པའི་ངོས་སུ་བསྐོར་བ་ནི། །བརྡུང་བའི་སྦྱོར་བས་རོལ་པ་བྱ། །དེ་བཞིན་དུ་ཡང་གཡོན་པས་སོ། །དེ་ནས་རྒྱུན་གྱི་གར་བྱས་ནས། །གཡོན་པས་ཡང་ནི་གར 84.298b བྱ་ཞིང ། །མྱུར་དུ་བརྡུངས་པས་དེ་བཞིན་གང ། །བྱས་ནས་འཁོར་ལོ་ལྟ་བུར་བསྐོར། །ཕྱི་ནས་གྲུ་བཞི་གང་བར་བྱ། །ཕྱི་ནས་འདོད་པའི་ལག་པས་བསྐོར། །ས་ལ་པུས་ནི་གཉིས་བཙུགས་ནས། །ལག་པས་མཆོད་རྟེན་ལེགས་པར་བྱ། །ཇི་སྙེད་གར་གྱི་བསྟན་བཅོས་སུ། །བྱེད་པའི་ཆ་ལུགས་བརྗོད་པ་ནི། །དེ་སྙེད་རྡོ་རྗེ་སེམས་དཔའ་ཡི། །སྒེག་པས་བྱང་ཆུབ་སྒྲུབ་པའི་ཐབས། །དེ་ནས་བཅོམ་ལྡན་འདས་དམ་ཚིག་རྡོ་རྗེ་མཉེས་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཚོགས་ཀྱི་འཁོར་ལོ་འདི་ཉིད་ཀྱི་སྐུ་དང་གསུངས་དང་ཐུགས་རྡོ་རྗེ་ལས་ཕྱུང་ངོ ། །རང་གི་ལྷག་པའི་ལྷར་དམིགས་ནས། །བཟང་པོའི་རྒྱན་གྱིས་རྣམ་པར་བརྒྱན། །ཐམས་ཅད་འབྱོར་པའམ་དམིགས་ནས་ནི། །བེམས་པོའི་གནས་སུ་བསྲེགས་པར་བྱ། །ཤར་ལྷོ་བྱང་དང་ནུབ་ཕྱོགས་སུ། །ཕྱོགས་གནས་རྣམས་ནི་དགའ་བར་བྱ། །ཕྱོགས་བྲལ་རྣམས་སུ་ལྷ་མོ་རྣམས། །དམ་པའི་ཚེ་ཡིས་མཆོད་པར་བྱ། །ཡིད་ཀྱིས་མར་ཁུ་བསམས་པ་དང ། །འབྲས་སོ་ཆགས་མེད་འབྲས་དང་ནི། །འབྲུ་དང་ཞོ་ཡི་ཟན་དང་ནི། །ཏིལ་དང་དེ་བཞིན་མཉམ་པའི་ཤིང ། །དཱུར་བ་རབ་ཏུ་གཞོན་པ་ཉིད། །བསམ་གཏན་རྡོ་རྗེ་སྦྱིན་བསྲེག་བྱ། །དེ་ལ་འདི་ནི་སྔགས་ཀྱི་རྐང་པ་ཡིན་ཏེ། ཨོཾ་ཨག་ན་ཡེ་སཝཱ་ཧཱ། མར་གྱིའོ། །ོཾ་སརྦྦ་པཱ་པ་པ་ད་ཧ་ན་བཛྲཱ་ཡ་བཛྲ་ས་ཏྭ་སྱ་སརྦྦ་པཱ་པཾ་ད་ཧ་ནཱ་ཡ་སཝཱ་ཧཱ། ཏིལ་ནག་པོའིའོ། །ོཾ་བཛྲ་པུཥྚ་ཡེ་སཝཱ་ཧཱ། འབྲས་མ་ཆགས་པའིའོ། །ོཾ་སརྦྦ་སཾ་པ་དེ་སཝཱ་ཧཱ། ཞོ་དང་ཟན་དམ་པའིའོ། །ོཾ་བཛྲ་བི་ཛཱ་ཡ་སཝཱ་ཧཱ། འབྲས་སོ་བའིའོ། །ོཾ་མ་ཧཱ་བེ་གཱ་ཡ་སཝཱ་ཧཱ། ནས་ཀྱིའོ། །ོཾ་མ་ཧཱ་བ་ལཱ་ཡ་སཝཱ་ཧཱ། མོ་སྲན་གྲེའུའིའོ། །ོཾ་བཛྲ་གྷསྨ་རཱི་སཝཱ་ཧཱ། གྲོའིའོ། །ོཾ་བཛྲ་ཨཱ་ཡུ་ཥེ་སཝཱ་ཧཱ། དུར་བ་གཞོན་ནུའིའོ། །ོཾ་བཛྲཱ་པྲ་ཏི་ཧ་ཏ་བཛྲཱ་ཡ་སཝཱ་ཧཱ། ཀུ་ཤའི་འོ། །ོཾ་བཛྲ་ཡ་ཛྙཱ་ཡ་སཝཱ་ཧཱ། ཨུ་དུམ་བཱ་རའིའོ། །ོཾ་བོ་དྷི་བྲྀ་ཀྵཱ་ཡ་སཝཱ་ཧཱ། བྱང་ཆུབ་ཀྱི་ཤིང་གིའོ། །ོཾ་བཛྲ་ལ་ཏཱ་ཡ་སཝཱ་ཧཱ། 84.299a པཱ་མ་ཀྴའིའོ། །ོཾ་བཛྲ་ཀུ་བེ་རཱ་སཝཱ་ཧཱ། ནྱ་གྲོ་དྷའིའོ། །ོཾ་ཧ་ས་ཀཱ་ར་ཡ་སཝཱ་ཧཱ། ཨ་མྲའིའོ། །ཙམ་པ་ཨ་ཤོ་ཀ་ཡ་ཀླུ། །ཀ་དམ་པ་དང་སྲིད་སྒྲུབ་ཉིད། །ཇི་ལྟར་རྙེད་པ་བཟླས་བྱས་ནས། །མེ་ཏོག་འདིས་ནི་སྦྱིན་བསྲེག་བྱ། །རྒུན་འབྲུམ་ཨ་མྲ་སྦྲུལ་འཇིག་དང ། །ཁ་འཛག་སྐྱེས་མ་བརྩེ་མ་ནི། །འཁོར་ལོ་ལྔ་ཡི་མཆོག་རིམ་པས། །འབྲས་བུ་རྣམས་ཀྱི་སྦྱིན་བསྲེག་བྱ། །ཤ་ལྔ་དང་ནི་བདུད་རྩི་ཉིད། །དཀྱིལ་འཁོར་ལྔ་ཡི་བསྒོམས་པ་ཡིས། །འདིས་ནི་རྡོ་རྗེ་མཉེས་པར་འགྱུར། །ཡེ་ཤེས་མེ་ནི་རབ་དགྱེས་བྱ། །རྒྱལ་བ་ཕན་པ་མཉེས་པ་དང ། །གསེར་གྱི་མངའ་བདག་མཉེས་པ་དང ། །པད་མ་གར་དབང་མཉེས་པ་དང ། །ལྕགས་སྒྲོག་བདག་པོ་མཉེས་པ་དང ། །ཚངས་པ་བརྒྱ་བྱིན་དབང་ཆེན་དང ། །ཁྱབ་འཇུག་རླུང་དང་མེ་ཆེན་དང ། །ཐོང་ལྡན་ཉིད་དང་འདོད་ལྷ་དང ། །ཟླ་བ་ཉི་མ་གདོན་གཞན་དང ། །ས་ནི་ཞགས་པ་འཛིན་པ་དང ། །ལུས་ངན་དེ་བཞིན་མཚམས་སྐྱོང་དང ། །ཆོས་རྒྱལ་དང་ནི་ཀླུ་དང་ནི། །དྲི་ཟ་ལྷ་མིན་མི་འམ་ཅི། །སུམ་བཅུ་རྩ་གསུམ་གནས་པའི་ལྷ། །འོག་མིན་དུ་ནི་གནས་པ་དང ། །གང་ཞིག་རྒྱལ་ཆེན་གནས་པ་དང ། །གཞན་འཕྲུལ་དབང་བསྒྱུར་ཉིད་དང་ནི། །འཕྲུལ་དགའ་ཡི་ནི་ལྷ་རྣམས་དང ། །གང་ཞིག་དག་པའི་གནས་སོན་དང ། །འོད་ཟེར་འཇིག་རྟེན་ཁམས་གནས་དང ། །མི་མཇེད་ཁམས་སུ་གནས་པ་དང ། །གླིང་བཞིར་གནས་པའི་སེམས་ཅན་དང ། །གང་ཞིག་ཁམས་གསུམ་གནས་པ་དང ། །སྣོད་སྔན་སེམས་ཅན་འཇིག་རྟེན་དང ། །ལྕུག་མའི་ཚོགས་དང་རྩཝ་སོགས་དང ། །གང་ཞིག་རབ་དགའི་སར་གནས་དང ། །ཕ་རོལ་དྲི་མེད་གང་ཕྱིན་དང ། །འོད་འཕྲོ་ཅན་དུ་གནས་པ་དང ། །མི་གཡོའི་གནས་སུ་བྱས་པ་དང ། །གང་ཞིག་ཆོས་སྤྲིན་རྗེས་སོང་དང ། །གང་ཞིག་སྦྱང་དཀའ་སོན་པ་དང ། །གང་ཞིག་རིང་སོང་ཐོབ་བ་དང ། །འོད་བྱེད་དུ་ནི་གནས་པ་སྟེ། །ས་བཅུའི་དབང་ཕྱུག་མགོན་པོ་དང ། །འཕགས་པའི་གང་ཟག་བརྒྱད་པོ་དང ། །རྫོགས་སངས་རྒྱས 84.299b དང་ཉན་ཐོས་ཉན། །རཝ་ནི་རལ་གྲིའི་གཟུགས་ཅན་དང ། །རང་གི་ལྷག་པའི་ལྷར་སྦྱོར་བདག་།ཤཱཀྱ་སེང་གེ་མཉེས་བྱས་ནས། །དམྱལ་བ་ཡི་དགས་བྱོལ་སོང་དང ། །ལྷ་དང་ལྷ་མིན་མི་རྣམས་ནི། །སྦྱིན་བསྲེག་ཆོགས་ནི་དགྱིས་པ་ཉིད། །དེ་ཉིད་ཚོགས་ཀྱི་དཀྱིལ་འཁོར་རོ། །བསོད་ནམས་དང ། ཡེ་ཤེས་ཀྱི་ཚོགས་ཆེན་པོ་རྒྱ་མཚོར་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དམ་ཚིག་ལ་གསོལ་བ་གདབ་པ་གསུངས་སོ། །རྡོ་རྗེ་སེམས་དཔའ་བསྐྱེད་པ་ནི། །རྡོ་རྗེ་པདྨའི་བསྒོམ་པ་སྟེ། །དེ་ཡི་མགོ་བོའི་སྣ་རྩེ་ལ། །ཕྱག་འཚལ་ཡིད་བཞིན་ནོར་བུ་སྟེ། །སྦུ་གུའི་ནང་དུ་ཕཊ་ཀྱིས་ནི། །ཡེ་ཤེས་མ་ལྷུང་ཡང་དག་གནས། །རྫོགས་སངས་རྒྱས་ཀྱིས་དགྱེས་པར་མཛོད། །འདི་ནི་ཕྱག་རྒྱའི་ཆོ་ག་ལས། །རང་གི་ལྷག་པའི་ལྷར་སྦྱོར་བས། །རྡོ་རྗེ་སེམས་དཔའ་སྙེམས་བྱས་ནས། །གནས་ནི་ཐམས་ཅད་བསྒྲུབ་པར་བྱ། །ཕྱག་རྒྱ་ཆེན་པོའི་གནས་འདུག་ནས། །རང་གི་ལྷག་པའི་ལྷར་སྦྱོར་བདག་།ཤཱཀྱ་སེང་གེ་སྙེམས་བྱས་ནས། །རྒྱལ་པོ་ཐམས་ཅད་ཐོབ་པར་འགྱུར། །ལས་ཀྱི་ཕྱག་རྒྱའི་གནས་འདུག་ནས། །རང་གི་ལྷག་པའི་ལྷར་སྦྱོར་བདག་།ཀུན་གྱི་རྒྱལ་པོ་ཐོབ་པར་འགྱུར། །རྡོ་རྗེ་གཟི་བརྗིད་ལྡན་ཏིང་འཛིན་ལྡན། །དམ་ཚིག་ཕྱག་རྒྱ་སྦྱོར་བ་ཡིས། །གནས་གསུམ་པོ་ཡང་བསྒྲུབ་པར་བྱ། །རང་གི་ལྷག་པའི་ལྷར་སྦྱོར་བས། །པད་མ་གར་གྱི་དབང་ཕྱུག་བདག་།ཆོས་ཀྱི་ཕྱག་རྒྱའི་ཏིང་འཛིན་གནས། །རྡོ་རྗེ་ཆོས་ནི་བསྒོམ་པར་བྱ། །རང་གི་ལྷག་པའི་ལྷར་སྦྱོར་བས། །རྟ་མཆོག་རིམ་པས་གནས་ནས་ནི། །དམ་ཚིག་ཕྱག་རྒྱར་སྦྱོར་བ་ཡིས། །སྒྲོལ་མའི་དངོས་གྲུབ་རབ་བསྒྲུབ་བྱ། །དེ་ནས་བཅོམ་ལྡན་འདས་རྡོ་རྗེ་གར་འདོད་པ་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ 84.300a གར་མཛད་པ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ ། །གཡོན་པ་བརྐྱང་བ་དང ། ་་་གཡས་པ་བརྐྱང་བ་དང ། མཉམ་པའི་རྐང་སྟབས་དང ། རྡོ་རྗེའི་རྐང་སྟབས་དང ། དཀྱིལ་འཁོར་དང ། སྣ་ཚོགས་ཐམས་ཅད་དང ། རུས་སྦལ་གྱི་རྐང་སྟབས་དང ། བུང་བའི་དྲ་བ་དང ། རྒྱ་མཚོའི་བསྐྱོད་པ་དང ། རི་བོའི་མཆོག་དང་མཛེས་པའི་གོམ་པ་དང་ཁྲོ་བོའི་གོམ་པ་སྟེ། རྐང་སྟབས་ཀྱི་དགོད་པའོ། །རལ་གྲིའི་ལུགས་དང ། འཁོར་ལོའི་ཚུལ་དང ། རིན་པོ་ཆེའི་ཚུལ་དང ། པད་མའི་ལག་པ་དང ། རལ་གྲིའི་ཚུལ་དང ། མདུང་གི་ཚུལ་དང་གཞུའི་ཚུལ་དང ། དབྱུག་པའི་ཚུལ་དང ། དབྱུག་ཏོའི་ཚུལ་དང ། གཏུན་ཤིང་གི་ཚུལ་དང ། རྡོ་རྗེ་རྩེ་གཅིག་པའི་སེམས་དང་ཁ་བཅུ་པའི་ཚུལ་དང་རལ་གྲི་བུ་མོའྀ་ཚུལ་དང ། སྣ་ཚོགས་དབྱུག་པའི་ཚུལ་དང ། མདུང་ཐུང་གི་ཚུལ་དང་གོང་བུ་སྐྱོང་བའི་ཚུལ་དང་འཕན་གཉིས་པ་དང ། འཕན་ལྕེ་གསུམ་པ་དང ། མེ་ཏོག་གི་ཚུལ་དང་བདུག་སྤོས་ཀྱི་ཚུལ་དང ། མར་མེའི་ཚུལ་དང ། དྲིའི་ཚུལ་དང ། ལཱ་སྱཻའི་ལགས་པ་དང་ཕྲེང་བའི་ལག་པ་དང་གླུའི་ལག་པ་དང ། གར་གྱི་ལག་པ་དང་གླིང་བུའི་ལག་པ་དང་པི་ཝང་གི་ལག་པ་དང ། རྫ་རྔའི་ལག་པ་དང ། ཀུ་མུ་ཎ་ཌའི་ལག་པ་སྟེ། ལག་པའི་དགོད་པའོ། །རྡོ་རྗེ་སྐྱིལ་ངཀྲུང་དང ། པདྨའི་སྐྱིལ་དཀྲུང་དང་པདྨའི་འདུག་སྟངས་དང་བཟང་པོའི་འདུག་སྟངས་དང ། སྐྱིལ་དཀྲུང་ཕྱེད་པ་དང ། བཀྲ་ཤིས་ཀྱི་འདུག་སྟངས་ཀྱི་དགོད་པའོ། །སྒེག་པའི་ང་རོ་དང་དཔའ་བོའི་ང་རོ་དང ། མི་སྡུག་པའི་ང་རོ་དང ། དགོད་པའི་ང་རོ་དང་དྲག་པོའི་ང་རོ་དང་འཇིགས་སུ་རུང་བའི་ང་རོ་དང ། ཞི་བའི་ང་རོ་དང་རྔམ་པའི་ང་རོ་དང་སྙིང་རྗེའི་ང་རོ་དང ། དྲུག་གི་རྗེས་སུ་སྐྱེས་པའི་གླུ་དང་དྲང་སྲོང་གི་རྗེས་ཀྱི་གླུ་དང ། དྲི་ཟའི་རྗེས་ཀྱི་གླུ་དང་བར་མའི་རྗེས་ཀྱི་གླུ་དང ། ལྔ་པའི་རྗེས་ཀྱི་གླུ་དང ། བློ་གསལ་གྱི་རྗེས་ཀྱི་གླུ་དང ། འཁོར་ཉན་པའི་གླུའོ། །ཉུང་ངུའི་དབྱེ་བ་དང་སྒྲོལ་མའི་དབྱེ་བ་དང ། འཇིགས་པའི་དབྱེ་བ་དང་གང་བ་དང ། ཕྱེད 84.300b ཕྱི་བ་དང ། རྣམ་པར་འདྲེ་བ་དང ། འདོད་ཆགས་གཉིས་མཚུངས་པར་བྱེད་པ་དང ། འདོད་ཆགས་གསུམ་མཚུངས་པར་བྱེད་པ་དང ། ལྐོག་མ་ཉེད་པ་དང ། རྐན་ཉེད་པ་དང་ལྕེ་ཉེད་པ་དང་སོ་ཉེད་པ་སྟེ་གླུ་དགོད་པའོ། །ས་གཞི་ཡོངསུ་བཟུང་དུས་སུ་ནི། །དམ་ཚིག་འདི་ནི་རབ་བསྐུལ་བ། །ཡེ་ཤེས་རྡོ་རྗེ་ཅན་གྱིས་བྱ། །འདི་ནི་དམ་ཚིག་རིམ་པའི་མཆོག་།མེ་ཏོག་འདི་རྣམས་བཟང་ཞིང་དགེ། །དག་པའི་སྐྱེ་གནས་ལས་དག་པ། །བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཚལ་དག་རོ་ཡི་ཕན་པ་དང ། །གང་ཞིག་དྲི་དང་བདུག་སྤོས་མཆོག་།བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །སྲིན་པོ་འཇོམས་ཤིང་དག་བྱེད་པ། །དགེ་ཞིང་མུན་པ་རྣམ་སེལ་བ། །བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །འདི་ནི་དྲི་བཟང་དགེ་བ་སྟེ། །དག་པའི་སྐྱེ་གནས་ལས་དག་པ། །བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ོཾ་བཛྲ་གྷཎྜེ་ཨཿ ་དྲིལ་བུ་བླང་བའི་སྔགས་སོ། །ོཾ་མ་ཧཱ་བཛྲེ་ཧཱུཾ། རྡོ་རྗེ་བཟུང་བའི་སྔགས་སོ། །དངོས་པོ་སྣ་ཚོགས་རྣམ་པར་ཕྱེ་བའི་ལེའུ་སྟེ་བཅུ་བཞི་པའོ།། །། དེ་ནས་རྡོ་རྗེ་འཛིན་རྒྱལ་པོ། །རྣལ་འབྱོར་མ་ཡི་རྡོ་རྗེ་གུར། །སངས་རྒྱས་ཀུན་དང་སངས་རྒྱས་ལ། །ཚིག་ནི་འདི་དག་བཀའ་སྩལ་པ། །ཕྱག་གཉིས་པ་ལ་ཞལ་གཅིག་པ། །རྡོ་རྗེ་ལས་སྐྱེས་རང་བཞིན་ཅན། །ལག་པར་ཐོད་པ་ཁཊྭཱཾ་གཿ ་།བསམ་ནས་སྤྲོ་ཞིང་བཟླས་པའོ། །ཕྱག་བཞི་པ་ནི་ཉིད་དང་ཡང ། །ཞལ་གསུམ་རྡོ་རྗེ་ལས་བྱུང་བ། །དཀར་པོ་དམར་པོ་དེ་བཞིན་སྔོ། །ཕག་མོ་ལྷན་ཅིག་མཉམ་སྦྱོར་བའོ། །ཕྱག་དྲུག་པ་ལ་ཁ་དོག་གནག་།ལྕགས་སྒྲོགས་མ་དང་ལྷན་ཅིག་སྦྱོར། །སངས་རྒྱས་ལྔ་ཡི་ཐོད་པ་ཅན། །ཞལ་གསུམ་ཉིད 84.301a དུ་སྦྱོར་བར་བྱ། །མདོག་དམར་ཕྱག་ནི་བཞི་པ་དང ། །ཞལ་གཅིག་མ་དང་དབང་བྱེད་མ། །རྡོ་རྗེ་ཆོས་ཀྱི་གནས་མནན་མ། །འདི་ནི་ཀུ་རུ་ཀུལླེར་བརྗོད། །འདི་ནི་སྔགས་བརྗོད་པའོ། །བཙུན་མོ་ཆོས་ལ་གནས་པ་ནི། །ཁྱོད་ཀྱི་སྤྱན་སྔར་བདག་གིས་ནི། །དུས་གཅིག་པའི་དུས་སུ་ནི། །བདག་ཉིད་ཀྱིས་ནི་འདི་ཐོས་ནས། །རྒྱས་པ་ཉིད་དུ་རབ་ཏུ་དབྱེ། །འདི་སྐད་བདག་གིས་ཐོས་པ་སྟེ། །དུས་གཅིག་དུས་ནི་གཅིག་ནའོ། །བདག་གིས་བཅོམ་ལྡན་སྤྱན་སྔར་ཏེ། །བཙུན་མོའི་ཆོས་སུ་རྣམ་རྒྱས་པས། །ལྟ་སྟངས་དགུག་དང་བརྡ་ཆེན་དང ། །དོན་བྱེད་དུས་དང་ཆར་སོགས་དང ། །ལམ་གྱི་དེ་ཉིད་ལས་སྐྱེས་པ། །ཐུབ་པ་ཆེན་པོ་འཇིག་རྟེན་མགོན། །ཕྱག་གཉིས་པ་ལ་ཞལ་གཅིག་པ། །མཆོག་སྦྱིན་དང་ནི་པད་མས་བརྒྱན། །པད་མའི་གདན་ལ་ཡང་དག་གནས། །དབུ་རྒྱན་རྡོ་རྗེ་ཆོས་དང་ལྡན། །མཾ་གྱི་དེ་ཉིད་ལས་སྐྱེས་པ། །འཇམ་པའི་དབྱངས་ནི་སེར་པོ་སྟེ། །ཡན་ལག་མཆོག་སྦྱིན་ཨུད་པལ་བརྒྱན། །མི་བསྐྱོད་རྡོ་རྗེ་སྤྱི་བོར་འཛིན། །ཧཱུཾ་གི་ཡེ་ཤེས་ལས་བྱུང་བ། །ལག་པ་རལ་གྲི་སྡིགས་འཛུབ་ཉིད། །མ་ཧེ་ཆེན་པོའི་རྒྱབ་ཏུ་ནི། །དཔའ་བོ་གཡོན་བརྐྱང་བ་ཡིས་གནས། །ཁྲོ་བོའི་གཟུགས་ཅན་འཇིགས་བྱེད་པ། །ཁ་སྦྱར་མདུན་དུ་མི་བསྐྱོད་འཛིན། །ཧཱུཾ་གི་ཡེ་ཤེས་ལས་བྱུང་བ། །རྡོ་རྗེ་ཧཱུཾ་མཛད་རྡོ་རྗེ་ཅན། །རྡོ་རྗེ་དྲིལ་བུའི་སྦྱོར་བ་ཡིས། །ལག་པ་གཉིས་ཀྱིས་ཕྱག་རྒྱ་བཅིང ། །རྐང་པ་གཡོན་ཉིད་བརྐྱང་བ་ཡིས། །འཇིགས་བྱེད་མནན་པ་ཡི་ནི་ལུས། །སྤྱི་བོར་རྡོ་རྗེའི་རིགས་བསམས་ནས། །འཇིག་རྟེན་གསུམ་རྒྱལ་དྲན་པར་བྱ། །ཏཱཾ་གི་ཡི་གེ་ལས་བྱུང་བ། །མཆོག་སྦྱིན་དབང་མཆོག་མཚོན་ཆ་སྟེ། །ལྷ་མོ་ལྗང་གུ་ལྟ་བུ་ཉིད། །རྟག་ཏུ་བཟང་པོའི་འདུག་སྟངས་གནས། །སྣ་ཚོགས་པདྨར་ཡང་དག་བཞུགས། །སྤྱི་བོར་དོན་ཡོད་འཛིན་པ་པོ། །སྒེག་མོ་ཆེན་མོ་སྐལ་བཟང་མ། །སྒྲོལ་མའི་གཟུགས་ཅན་བསྒོམ་པར་བྱ། ། 84.301b མཾ་གྱི་ཡི་གེ་ལས་བྱུང་བ། །མཆོག་སྦྱིན་ཨ་ཤེ་ཀ་འཛིན་མ། །ཉི་མ་ཤར་བ་ལྟ་བུ་སྟེ། །རྣམ་སྣང་དཔལ་ནི་སྤྱི་བོར་སྐྱེས། །གཡོན་བརྐྱང་བ་ཡི་སྦྱོར་བ་ཡིས། །འགྲོ་མགྱོགས་བདུན་གྱི་ཤིང་རྟ་མནན། །ཡན་ལག་སྒེག་པའི་རོ་ཡྀས་བརྒྱན། །འོད་ཟེར་ཅན་ནི་བསྒོམ་པར་བྱ། །ཙུཾ་གི་ཡི་གེ་ལས་བྱུང་བའི། །སྟོན་ཀའི་ཟླ་བ་ལྟ་བུའི་འོད། །སྙིང་གར་རིན་ཆེན་སྙིམ་པར་གནས། །མཛེས་པའི་ཚུལ་གྱིས་ཡང་དག་བཞུགས། །ལྷ་མོ་སྣ་ཚོགས་པད་གདན་ཅན། །ཕན་པས་མགོ་བོ་མནན་པ་སྟེ། །བྱང་ཆུབ་སེམས་ནི་འཛག་འབབ་པའི། །ལྷ་མོ་སྟོབས་དང་བྲལ་བ་བསྒོམ། །བཾ་གྱི་ཡི་གེ་ལས་བྱུང་བ། །ནོར་འཛིན་ཤིན་དུ་ཁ་དོག་སེར། །ལག་པ་མཆོག་སྦྱིན་འབྲས་སྙེ་མ། །རྡོ་རྗེ་སྐྱིལ་དཀྲུང་སྦྱོར་བ་ལས། །ཡན་ལག་རིན་ཆེན་འབྱུང་གནས་བརྒྱན། །སྤྱན་ནི་ཤིན་ཏུ་སྒག་པར་ནི། །གནོད་སྦྱིན་རྒྱལ་མོ་བསྒོམ་པར་བྱ། །ནོར་གྱི་བདག་པོ་མཚུངས་པར་འགྱུར། །ཛཾ་གི་ཡི་གེ་ལས་བྱུང་བ། །ནམཁའ་མཛོད་ཅེས་བྱ་བ་བསྒོམ། །ཁ་དོག་སེར་ཞིང་གཡས་པ་ན། །མཆོག་སྦྱིན་རིན་ཆེན་ནེའུ་ལེ་སྟེ། །རིན་ཆེན་འབྱུང་གནས་རྡོ་རྗེ་ཡིས། །སྤྱི་བོར་དཀྱིལ་འཁོར་རྣམ་པར་བརྒྱན། །རིན་ཆེན་ཆར་ནི་བསམ་པར་བྱ། །སྐྱོར་གང་རྡོ་རྗེ་ཆུར་གཞུག་བྱ། །པྲཾ་གྱི་ཡི་གེ་ལས་སྐྱེས་པ། །ལུས་ནི་དཀར་ཞིང་ཡིད་འོང་མ། །ལྷ་མོ་རལ་གྲིའི་འཁོར་ལོ་འཛིན། །སྤྱི་བོར་ཕན་པས་མནན་པའོ། །རང་གི་མིང་པོའི་དུས་ལྟ་བུར། །དཀྱིལ་འཁོར་གནས་སུ་ཡང་དག་འདུག་།ནམཁའི་གནས་ནས་འཇམ་པའི་དབྱངས། །འབྱུང་བར་རྣམ་པར་བསམ་པར་བྱ། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་སྔགས་སྣ་ཚོགས་ནང་དུ་ཆུད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྔགས་ཀྱི་ཚིག་འདི་དག་གསལ་བར་མཛད་པ།་ཨོཾ་མ་ཎི་པདྨེ་ཧཱུཾ་ཕཊཿ སཝཱ་ཧཱ། ཨོཾ་མཉྫུ་བཛྲཱ་ཡ་མུཿ སཝཱ་ཧཱ། ཨོཾ་ཧཱུཾཿ ཥྚཱིཿ ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སཝཱ་ཧཱ། ཨོཾ་ཧཱུཾ་ཕཊ་སཝཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སཝཱ་ཧཱ། ཨོཾ་མཱ་རི་ཙྱཻ་མཾ་སཝཱ་ཧཱ། ཨོཾ་ཙ་ལེ་ཙུ་ལེ་ཙུན་དེ་སཝཱ་ཧཱ། ཨོཾ་བཱ་སུ་དྷཱ་རེ་མ་ཧཱ 84.302a བཱ་སུ་བྲཱིཥྚི་ལཱ་ཧ་ནི་བཱ་སུ་སཝཱ་ཧཱ། ཨོཾ་ཛཾ་བྷ་ལ་ཛ་ལེན་དྲཱ་ཡ་སཝཱ་ཧཱ། ཨོཾ་མ་ཎི་དྷ་རི་བཛྲི་ནི་མ་ཧཱ་པྲ་ཏི་ས་རེ་ཧཱུཾ་ཧཱུཾ་ཕཊ་ཕཊ་སཝཱ་ཧཱ། འཇིག་རྟེན་མགོན་གྱིས་ནད་རྣམས་ཞི། །འཇམ་པའི་དབྱངས་ཀྱིས་བློ་གྲོས་བཟང ། །གཤེན་རྗེ་གཤེད་ཀྱིས་ཡི་དགས་བསྲུང ། །ལྷ་དང་ལྷ་མིན་ཧཱུཾ་མཛད་ཀྱིས། །སྒྲོལ་མས་འཇིག་རྟེན་དབང་དུ་བྱེད། །འོད་ཟེར་ཅན་གྱིས་ཆོམ་རྐུན་འཇིག་།ཙུན་དེ་སེམས་ཅན་ཐམས་ཅད་ནི། །དགུག་པ་ཡི་ནི་ཆོ་གར་བརྗོད། །ཛམྦྷ་ལ་དང་ནོར་སྦྱིན་བདག་།ནོར་གྱི་སྒྲུབ་པའི་ཐབས་སུ་འདོད། །བུད་མེད་གང་ཞིག་བུ་ཤི་བས། །སོ་སོར་འབྲང་མ་རྟག་དྲན་བྱ། །རྡོ་རྗེ་མཁའ་འགྲོས་གསུངས་པའོ། །སྔགས་ཀྱི་རྐང་པས་ཐམས་ཅད་འགྲུབ། །བཟླས་པ་འབུམ་གྱི་སྦྱོར་བ་ཡིས། །ལས་རྣམས་ཐམས་ཅད་རབ་ཏུ་འགྲུབ། །སྙིང་གི་བདེ་བ་བསྐུལ་བ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་ཀྱིས་རྡོ་རྗེ་ནག་པོ་ཆེན་པོའི་ཐབས་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ ། །ཧཱུཾ་གི་ཡི་གེ་ལས་སྐྱེས་པ། །ཕྱག་གཉིས་པ་དང་ཞལ་གཅིག་ལྡན། །ཁ་དོག་ནག་ཅིང་ཆེར་འབར་བ། །གྲི་གུག་ཐོད་པ་འཛིན་པའོ། །མགོ་བོའི་ཕྲེང་བས་དོ་ཤལ་བྱས། །མཆེ་བ་ཆེན་པོས་འཇིགས་པར་བྱེད། །གཟུགས་ཐུང་གཟི་བརྗིད་ཆེན་པོ་ཉིད། །ཁ་ནས་ཁྲག་ནི་འཇིག་པ་སྟེ། །སློབ་དཔོན་ལ་རྟག་གང་སྡང་དང ། །གང་ཞིག་དཀོན་མཆོག་གསུམ་ཁྲོ་དང ། །སེམས་ཅན་དུ་མ་གསོད་བྱེད་པ། །ནག་པོ་ཆེན་པོས་ཟ་བར་བྱེད། །རང་གི་ལག་གཡས་ཤ་གཅོད་བྱེད། །ཁྲག་གི་རྒྱུན་ནི་མཐུང་བར་བྱེད། །དེ་ནས་སྤྱི་བོར་འདི་འདུག་ནས། །དེ་ནི་ཏིལ་ཙམ་གཅོད་པར་བྱེད། །མོན་སྲན་གྲེ་དང་ཛཾ་བུ་ཊི། །མེ་ཏོག་བདུག་པ་བྱུག་པ་ཆང ། །ཤ་ལྔ་ཉིད་དང་བདུད་རྩི་ཡིས། །ནག་པོ་ཆེ་ལ་གཏོར་མ་སྦྱིན། །སྔགས་ནི། ཨོཾ་མ་ཧཱ་ཀཱ་ལ་ཡ་ཤཱ་ས་ནོ་པ་ཀཱ་རི་ཎི་ཨ་པ་ཤྩི་མ་ཀཱ་ལོ་ཡ་མི་དཾ་ཏད་རཏྣ་ཏྲ་ཡཱ་པ་ཀ་རི་ཎ་ཡ་དི་པྲ་ཏི་ཛྙཱཾ་སྨ་ར་སི་ཏ་དཱ་ཨི་དཾ་དུ་ཥྚ་ཁ་ཁ་ཁཱ་ཧི་ཁཱ་ཧི་མཱ་ར་མཱ་ར་གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན་ད་ཧ་ད་ཧ་པ་ཙ་པ་ཙ་དི་ན་མེ་མེ་ཀེ་ན་ཧཱུཾ་ཕཊ། ཚ་བ 84.302b གསུམ་གྱིས་གཟུགས་བརྙན་ནི། །བྱས་ནས་ལུས་ལ་ཚེར་མས་དགང ། །དུག་དང་སྐེ་ཚེ་ཡིས་བྲིས་ནས། །དེ་ནི་གང་གི་མིང་གིས་ནི། །དེ་ནས་མེ་ལ་གདུང་བར་བྱ། །དེ་ཡི་དུས་ན་མི་སྣང་འགྱུར། །དེ་ནས་གཞན་ཡང་རབ་བཤད་པ། །ཕྱག་རྒྱའི་དངོས་གྲུབ་བསྒོམ་པ་ཉིད། །ཕྱག་རྒྱའི་དངོས་གྲུབ་དངོས་གྲུབ་ཆེ། །དངོས་གྲུབ་ཀུན་གྱི་སྤྱོད་ཡུལ་མིན། །དེ་དུས་དེ་ཡི་ལུས་འཐོབ་ཅིང ། །སྐད་ཅིག་ན་ནི་དེ་འཁོར་ལྡན། །བསྒོམ་པ་དང་ནི་སྔགས་ཉིད་དང ། །སྐད་ཅིག་སངས་རྒྱས་རྣམ་སྣང་མཛད། །སྤྱན་གྱིས་འཕྲག་ནས་འཁྱུད་པའོ། །སྐད་ཅིག་ལ་ནི་གཉིས་མེད་ལྡན། །དགའ་བ་ཆེན་པོ་མཆོག་ཏུ་དགའ། །རྡོ་རྗེ་འཛིན་རྒྱལ་སྐད་ཅིག་གིས། །མཱ་མ་ཀཱི་དང་བདེ་བ་སྡོམ། །རྡོ་རྗེ་པདྨའི་རྩེ་མཆོད་པས། །སྐད་ཅིག་གིས་ནི་གཉིས་མེད་ལྡན། །རྡོ་རྗེ་པདྨ་རབ་སྦྱར་བས། །རྡོ་རྗེ་གུས་པའི་ཕ་རོལ་སོན། །རྡོ་རྗེ་པདྨ་མཆོད་བྱ་ཞིང ། །པདྨའི་འདོད་པ་སྤང་བར་བྱ། །བདག་ཉིད་རང་བདག་བསམས་ནས་ནི། །རྡོ་རྗེ་པདྨ་རབ་སྦྱོར་བས། །རྡོ་རྗེ་བུ་མོ་ཆེར་གྲགས་པ། །རྡོ་རྗེ་ནག་པོ་ལྟ་བུ་མཆོད། །རང་རིག་སྐྱེས་བུ་བསམས་ནས་ནི། །རྡོ་རྗེ་པདྨའི་རྩེ་མཆོད་པས། །བུ་མོ་དེ་བཞིན་གཤེགས་མ་མཆོག་།ཕྱག་རྒྱའི་དངོས་གྲུབ་དོན་དུ་མཆོད། །རང་གི་རིག་མ་སྐྱེས་བུ་བསམ། །རྡོ་རྗེ་པདྨའི་རྩེ་མཆོད་པས། །གདོལ་པ་ཆེན་པོ་ལས་བྱུང་བ། །ཕྱག་རྒྱའི་དངོས་གྲུབ་དོན་དུ་མཆོད། །ཕྱག་རྒྱ་ཆེན་པོ་རབ་བསྒྲུབ་པ། །རྣམ་པར་རྒྱལ་བའི་སྟོབས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཉི་མ་གཅིག་གིས་འགྲུབ་པར་འགྱུར། །ཉི་མ་གཉིས་ཀྱི་ཆོ་ག་དང ། །ཉི་མ་གསུམ་གྱི་སྦྱོར་བ་དང ། །དེ་བཞིན་དུ་ནི་ཉི་མ་བཞི། །ཉི་མ་ལྔ་པའི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །མེ་ཏོག་ལ་སོགས་མཆོད་བྱས་ནས། །བསམ་གཏན་གནས་སུ་འདུག་པ་དང ། །ཕྱག་རྒྱ་ལྷན་ཅིག་ཞུགས་ནས་ནི། །རྡོ་རྗེ་སྦྱོར་བ་ཡང་དག་བརྩམ། །རྡོ་རྗེ་ཉི་མ་ནུབ་པ་ན། །སྦྱོར་བ་འདི་ནི་ཡང་དག་བརྩམ། །ཉི་མ་ཤར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །འདོད་ཆགས་ཆེན་པོས་རྗེས 84.303a ཆགས་པས། །འདོད་ཆགས་ཆེན་པོའི་རང་བཞིན་ལས། །ཆགས་ཆེན་ཏིང་འཛིན་གནས་ནས་ནི། །ཕྱག་རྒྱ་ཆེན་པོ་རབ་བསྒྲུབ་བྱ། །ཤིན་ཏུ་དགའ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །པདྨར་རྡོ་རྗེ་ཅན་བཅུག་ནས་རང་གི་རིག་མ་བདག་མར་བྱས། །དེ་དང་ལྷན་ཅིག་འགྲུབ་པར་འགྱུར། །འདི་ནི་ཕྱག་རྒྱ་ཆེན་པོར་བརྗོད། །མི་ཡི་ཕྱག་རྒྱ་བླངས་ནས་ནི། །དེ་ལ་འཁོར་རབ་ཏུ་དབྱེ། །དྲི་དང་མེ་ཏོག་འཐུན་བྱས་ནས། །འཁོར་ལོ་གོམས་པར་ཡང་དག་བརྩམ། །སྤྱན་དང་བདག་མ་སྒྲོལ་མ་དང ། །དཀར་མོ་ཤིན་དུ་ཡིད་འཕྲོག་མ། །མེ་ཏོག་དྲི་ཡིས་འཐུན་བྱས་ནས། །རྡོ་རྗེ་མཆོད་པ་ཡང་དག་བརྩམ། །སྔགས་པས་ཕན་པ་འགྲུབ་འགྱུར་ཞིང ། །ཕྱག་ན་རྡོ་རྗེ་འགྲུབ་པ་དང ། །རྡོ་རྗེ་ཉི་མ་འགྲུབ་པ་དང ། །དམ་པའི་ཡི་གེ་འགྲུབ་པ་དང ། །བདུན་པའི་རྒྱལ་པོ་འགྲུབ་པ་དང ། །ཐམས་ཅད་འདྲེན་པ་འགྲུབ་པར་འགྱུར། །ཆུ་ཡི་དབང་ནི་དང་པོ་སྟེ། །ཅོད་པན་དབང་ལ་གཉིས་པའོ། །རྡོ་རྗེ་དབང་གིས་གསུམ་པ་སྟེ། །རང་གི་བདག་པོ་བཞི་པ་ཉིད། །མིང་གི་དབང་བསྐུར་ལྔ་པ་སྟེ། །དྲུག་པ་རྫོགས་པའི་སངས་རྒྱས་ཉིད། །བདུན་པ་བུམ་པ་དབང་གིས་ཏེ། །གསང་བའི་དབང་གིས་བརྒྱད་པའོ། །ཤེས་རབ་དབང་ལས་དགུ་པ་སྟེ། །དེ་ཉིད་རྡོ་རྗེའི་སྦྱོར་བ་ཡིས། །ཀུན་གྱི་དེ་ཉིད་བརྟུལ་ཞུགས་བརྗོད། །སྟོན་པ་རང་གིས་ལུང་བསྟན་ཏེ། །དེ་འདིར་དབང་གི་ཆོ་གའོ། །སློབ་དཔོན་སྨད་པར་མི་བྱ་སྟེ། །བདེ་གཤེགས་བཀའ་ལས་འདའ་མི་བྱ། །སྤུན་ལ་སྨད་པ་ཉིད་མི་བྱ། །སེམས་ཅན་རྣམས་ལ་གདུག་བྱམས་དང ། །བྱང་ཆུབ་སེམས་ནི་སྤང་མི་བྱ། །བདག་གཞན་ཆོས་ལ་སྨད་མི་བྱ། །སྐལ་མེད་དེ་ཉིད་གཏམ་མི་བྱ། །སྐལ་ལྡན་སེམས་ཅན་སྨད་མི་བྱ། །བདག་གི་ལུས་ལའང་སྨད་མི་བྱ། །ཆོས་ལ་ཡིད་གཉིས་མི་བྱ་ཞིང ། །གདུག་ལ་བྱམས་པ་ཉིད་མི་བྱ། །ཆོས་ཉིད་ཚད་ནི་བཟུང་མི་བྱ། །དམ་ཚིག་རྟག་ཏུ་སྐྱང་བ་དང ། །གཞན་གྱི་ཆོས་ལ་སྨད་མི་བྱ། །བུད་མེད་ཉིད་ལའང་སྨད་མི་བྱ། །རྩ་བའི་ལྟུང་བ་རབ་ཏུ་སྤང 84.303b བ་མདོར་བསྟན་པ་ཞེས་བྱ་བའི་ཏིང་ངེ་འཛིན་ཏོ། །ཇི་སྲིད་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་སྤང་མི་བྱ། །རྟག་ཏུ་དམ་ཚིག་བསྲུང་བར་བྱ། །རྡོ་རྗེ་དྲིལ་བུའང་གཟུང་བར་བྱ། །གཙུག་ཏོར་རྟག་ཏུ་གཟུང་བར་བྱ། །རྟག་ཏུ་སྦྱིན་བསྲེག་དགང་བར་བྱ། །རྟག་ཏུ་དཀྱིལ་འཁོར་བཞེངས་པར་བྱ། །རྟག་ཏུ་བདེ་གཤེགས་རབ་གནས་བྱ། །འབྱུང་པོ་ཆེ་ལ་གཏོར་མ་སྦྱིན། །ཕྱག་རྒྱ་བཅིང་བ་རྣམ་སྤང་ཞིང ། །མཆོད་རྟེན་ལས་ནི་མི་བྱ་སྟེ། །རྡོ་རྗེ་གསུམ་མཆོག་ཕྱག་མི་བྱ། །དཀྱིལ་འཁོར་ལ་སོགས་ལུས་ཀྱི་ལས། །རྨི་ལམ་དུ་ཡང་མི་བྱ་ཞིང ། །སློབ་དཔོན་གཞན་ལ་ཕྱག་མི་བྱ། །བླ་མའི་རྒན་རབས་ཕྱག་འཚལ་ལོ། །རྟག་པར་རྒྱུན་དུ་སྔགས་བཟླ་ཞིང ། །བསམ་གཏན་ཉིད་ཀྱང་འབྲལ་མི་བྱ། །རྟག་ཏུ་སློབ་མ་བསྡུ་བྱ་ཞིང ། །རྟག་པ་རུ་ནི་བཤད་པར་གྱིས། །རྟག་ཏུ་སེམས་ཅན་བསྐྱང་བར་བྱ། །རྟག་ཏུ་སངས་རྒྱས་ཆེར་མཉེས་བྱ། །ཛམ་བྷ་ལ་ལ་ཆུ་སྦྱིན་ཞིང ། །ལས་རྣམས་ཐམས་ཅད་ཡང་དག་སྤྱད། །བྱེ་མའི་མཆོད་རྟེན་ལས་ལ་ཡང ། །མཁས་པས་ཆོ་ག་བཞིན་དུ་བྱ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཐམས་ཅད་དང་ཕོ་ཉ་པོ་ཐམས་ཅད་དང་དེ་བཞིན་གཤེགས་པ་ཐམས་ཅད་རྡོ་རྗེ་ངེས་པར་བརྗོད་པ་འདི་ཐོས་ནས་ཚིག་འདི་དག་གསུངས་པ། སེམས་ཅན་ཀུན་གྱི་ཐམས་ཅད་ཁྱོད། །སྡིག་པ་ཐམས་ཅད་རྣམ་སྦྱོང་བ། །ཆོས་རྣམས་ཐམས་ཅད་ཡོངསུ་རྟོགས། །རྡོ་རྗེ་མཁའ་འགྲོ་ཕྱག་འཚལ་བསྟོད། །སྡང་བས་མནན་པའི་འགྲོ་གཟིགས་ནས། །གཏི་མུག་ཐམས་ཅད་ཟད་བྱའི་ཕྱིར། །རྒྱལ་བ་མགོན་པོ་རྣམ་སྣང་མཛད། །གཏི་མུག་རྡོ་རྗེ་ཕྱག་འཚལ་བསྟོད། །འགྲོ་བ་བུད་མེད་འདུལ་གཟིགས་ནས། །བདག་མེད་རྣལ་འབྱོར་མར་གྱུར་གང ། །ཕྱག་འཚལ་ཕ་རོལ་ཕྱིན་ཐུབ་པ། །སྒྱུ་མའི་ཕྱག་རྒྱ་ཕྱག་འཚལ་བསྟོད། །གཏི་མུག་མནན་པའི་འགྲོ་གཟིགས་ནས། །གཏི་མུག་ཐམས་ཅད་ཟད་མཛད་པ། །རྡོ་རྗེ་སེམས་དཔའ་རྒྱལ་པོ 84.304a ཆེ། །ཞེ་སྡང་རྡོ་རྗེ་ཕྱག་འཚལ་བསྟོད། །ང་རྒྱལ་མནན་པའི་འགྲོ་གཟིགས་ནས། །ང་རྒྱལ་ཐམས་ཅད་ཟད་མཛད་པའི། །རྡོ་རྗེ་ཉི་མ་རྒྱལ་པོ་ཆེ། །འདོད་ཆགས་རྡོ་རྗེ་ཕྱག་འཚལ་བསྟོད། །ཆགས་པས་མནན་པའི་འགྲོ་གཟིགས་ནས། །འདོད་ཆགས་ཐམས་ཅད་ཟད་མཛད་པ། །རྟ་མགྲིན་རྒྱལ་པོ་ཆེན་པོ་སྟེ། །སེར་སྣ་རྡོ་རྗེ་ཕྱག་འཚལ་བསྟོད། །འགྲོ་བ་ཕྲག་དོག་མནན་གཟིགས་ནས། །ཕྲག་དོག་ཐམས་ཅད་ཟད་མཛད་པ། །བདུན་གྱི་རྒྱལ་པོ་རྒྱལ་པོ་ཆེ། །ཐམས་ཅད་གཟུགས་ལ་ཕྱག་འཚལ་བསྟོད། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཐམས་ཅད་ཀྱིས་དེ་བཞིན་གཤེགས་པ་ཐམས་ཅད་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་དཔལ་ཀྱེའི་རྡོ་རྗེའི་དབང་བསྐུར་བའི་སློབ་དཔོན་ཇི་ལྟར་བལྟ་བར་བགྱི། དེ་བཞིན་གཤེགས་པས་བཀའ་སྩལ་པ། །སློབ་དཔོན་སྟོན་པར་འགྱུར་བ་ནི། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་རྣམས་ཀྱི་ཕ་དང་མ། །འདི་ཉིད་ཡིད་ལ་བསམ་པར་བྱ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་བཀའ་སྩལ་པ། །རྡོ་རྗེ་སེམས་དཔའ་སངས་རྒྱས་དང ། །རྡོ་རྗེ་ཆོས་དང་གཟི་བརྗིད་དང ། །བདུན་གྱི་རྒྱལ་པོའི་དངོས་གྲུབ་རྣམས། །གང་ཕྱིར་དེ་ཡིས་དཀའ་བ་མེད། །མིག་སྨན་དང་ནི་རྐང་བྱུག་དང ། །རལ་གྲི་རྐང་འོག་བསྒྲུབ་པ་དང ། །རིལ་བུ་དང་ནི་མཁའ་སྤྱོད་པ་དང ། །མི་སྣང་བ་དང་བཅུད་ཀྱིས་ལེན། །གང་ཕྱིར་ཡེ་ཤེས་རྡོ་རྗེ་ནི། །མཉེས་པས་མྱུར་དུ་ཐོབ་པར་འགྱུར། །དེ་ཕྱིར་སློབ་དཔོན་དྲུང་གཤེགས་ཏེ། །དེ་བཞིན་གཤེགས་རྣམས་ཕྱག་མཛད་དོ། །རྡོ་རྗེ་སེམས་དཔའ་ཇི་ལྟ་བ། །དེ་ལྟར་སློབ་དཔོན་གཟུགས་འཛིན་ཏོ། །སེམས་ཅན་རྗེས་སུ་གཟུང་དམིགས་ནས། །ཕལ་པའི་གཟུགས་སུ་གནས་པའོ། །སློབ་དཔོན་གྱིས་ནི་མཐར་དུས་སུ། །ཤི་བ་འཇིག་རྟེན་མི་གནས་པ། །སྐྱེས་པ་གླེན་ཞིང་རྨོངས་པ་གང ། །དེ་འདི་ཤི་ཞེས་སྨྲ་བར་བྱེད། །འཆི་བ་ཞེས་བྱ་བའི་རྣམ་རྟོག་གིས། །དག་པའི་གནས་སུ་ཁྱེར་བར་བྱེད། ། 84.304b ཡང་ན་བདེ་བ་ཅན་དུ་ངེས། །འདོད་པའི་རིགསུ་སྐྱེ་བར་འགྱུར། །མེ་ཏོག་སྣ་ཚོགས་ལག་ཐོགས་ཤིང ། །སྣ་ཚོགས་རྒྱལ་མཚན་བྱུག་པ་དང ། །གླུ་ཡི་མཆོད་པ་སྣ་ཚོགས་ཀྱིས། །སངས་རྒྱས་སྲ་དང་རྡོ་རྗེར་བཅས། །སྣ་ཚོགས་སྒྲ་དང་སིལ་སྙན་ཆེ། །བཀྲ་ཤིས་ཚིགས་བཅད་སྣ་ཚོགས་དང ། །དབང་གི་གནས་རྣམས་ཉིད་ཀྱིས་ནི། །ལུས་ལས་ལུས་གཞན་འགྲོ་བར་འགྱུར། །རྡོ་རྗེ་དྲིལ་བུ་ལག་བྱིན་ཏེ། །མགོ་བོའི་གཙུག་ཏོར་མནན་ནས་ནི། །རྡོ་རྗེའི་སྡོམ་པ་བྱིན་ནས་སུ། །བུམ་པའི་དབང་ནི་བསྐུར་ནས་ནི། །མིག་ལ་སོགས་པར་གཏི་མུག་སོགས། །རྡོ་རྗེ་གསུམ་ནི་གནས་གསུམ་དགོད། །རྡོ་རྗེ་ཐབ་ཁུང་རབ་སྦྱོར་བས། །སྦྱང་བར་ཡང་དག་བསྟན་པའོ། །ཉི་མ་དག་ནི་གསུམ་ལ་ནི། །རུས་པའི་ཕྲེང་བ་བསྡུ་བར་བྱ། །འོ་མ་དྲི་བཟང་བསང་གཏོར་ནས། །དེ་ཡི་མཆོད་རྟེན་ཡང་དག་བརྩམ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཐམས་ཅད་དང་ལྡན་པའི་འཁོར་དེ་དག་དང་ལྷ་དང་མི་དང་ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །འཕགས་པ་མཁའ་འགྲོ་མ་དྲ་བའི་རྡོ་རྗེ་གུར་རྒྱུད་ཀྱི་རྒྱལ་པོའི་བརྟག་པའོ། །རྫོགས་སྷོ།། །།རྒྱ་གར་གྱི་མཁན་པོ་ག་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱི་བསྒྱུར་བའོ། ། |