༄#། །རྒྱ་གར་སྐད་དུ། ཤ་ཀ་པྲ་ཀྲི་ཡ། བོད་སྐད་དུ། དབང་གི་རབ་ཏུ་བྱེད་པ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ལ་ཕྱག་འཚལ་ལོ། ། ཕབ་པ་བཏང་བའི་ཕྱི་ནས་མགོ་བོ་དང་ནི་སྙིང་ག་སྤྱི་གཙུག་རྣམས་དང་ལྟེ་བ་མགྲིན་པ་དང ། །གསང་བ་རྣམས་སུ་བསྲུང་བ་རྒྱལ་བ་རྣམས་ཀྱིས་རང་གི་རིགས་གྱུར་རྣམས་ལ་རང་གི་རྡོར་གསུམ་གྱིས། །སློབ་མ་རྣམས་ཀྱི་ལུས་ལ་གོས་སེར་སྐོན་ཞིང་མིག་རྣམས་བཀབ་ནས་དཀྱིལ་འཁོར་འདིར་ནི་གཞུག་པར་བྱ། །ཀུན་རྫོབ་དོན་དུ་རབ་མཆོག་ལམ་ནས་གཤེགས་ཉིད་རྣམས་ལ་བརྟུལ་ཞུགས་རྣམས་ནི་སྦྱིན་བྱ་རྟག་པ་རུ། །བསད་དང་མི་བདེན་པ་དང་གཞན་གྱི་བུད་མེད་རྣམས་སྤངས་དེ་བཞིན་གཞན་ནོར་ཆང་འཐུང་དག་ཀྱང་སྟེ། །འཁོར་བའི་རྡོ་རྗེ་ཞགས་པ་རང་གི་དགེ་བ་འཇོམས་པར་བྱེད་པ་སྡིག་པ་ལྔ་པོ་འདི་ཉིད་རྣམས། །གང་ཞིག་གང་གི་དུས་སུ་བྱུང་བའི་ལྷ་དང་མི་ཡི་བླ་མ་དེ་ཡི་མིང་གིས་རབ་ཏུ་སྦྱིན་བྱས་པའི། །སྣ་ཚོགས་གཙོ་བོའི་བཀའ་སྩལ་འདི་ཡིས་སྲིད་པའི་འཇིགས་པ་འཇོམས་པས་ཁྱེད་རྣམས་ཀྱིས་ཀྱང་སྐྱང་བར་གྱིས། །རྒྱན་འགྱེད་ཁ་ན་མ་ཐོ་བཅས་པའི་ཟས་དང་ཚིག་ངན་ཀློག་དང་འབྱུང་པོ་ལྷ་མིན་ཆོས་རྣམས་དང ། །བ་ལང་བྱིས་པ་བུད་མེད་སྐྱེས་པ་རྣམས་དང་ལྷ་དང་མི་རྣམས་བླ་མ་ལྔ་ནི་གསད་མི་བྱ། །གྲོགས་དང་རྗེ་བོ་དང་ནི་ལྷ་དང་མི་ཡི་བླ་མ་དགེ་འདུན་དབུགས་འབྱིན་རྣམས་ལ་འཁུ་བ་དང ། །དབང་པོ་རྣམས་ཀྱིས་ཡོངས་སུ་ཆགས་རྣམས་མིན་ཏེ་སྲིད་པའི་བདག་པོའི་བརྟུལ་ཞུགས་ཉི་ཤུ་རྩ་ལྔའོ། །དཔལ་ལྡན་སྔགས་ཀྱི་མངོན་པར་བསྔགས་པ་ལག་པའི་པདྨ་ཁ་སྦྱར་དུ་ནི་མེ་ཏོག་གཅིག་བྱིན་ཏེ། །དང་པོར་ལན་གསུམ་བསྐོར་ཏེ་ལག་པའི་པདྨ་ཁ་སྦྱར་གནས་པའི་མེ་ཏོག་དཀྱིལ་འཁོར་དུ་ནི་དོར། །གནས་གྱུར་གང་དུ་མེ་ཏོག་བཟང་པོ་ལྷུང་བ་དེ་ཉིད་དེ་ཡི་རིགས་སུ་ངེས་སོ་མི་བདག་ཀྱེ། །ཕྱི་ནས་དབང་བདུན་རྣམས་དང་རྣམ་གསུམ་འདིར་ནི་ཇི་ལྟ 84.164b བ་བཞིན་བླ་མེད་ཡང་དག་རབ་ཏུ་སྦྱིན། །ཀླུ་རྣམས་ཀྱིས་སམ་བཞིས་ཏེ་རྒྱལ་བ་རྣམ་རྒྱལ་བཅས་པའི་བུམ་པ་ནོར་བུ་གསེར་གྱི་བུམ་པའམ། །ས་ལས་བྱུང་བ་རྣམས་སུ་རིན་ཆེན་སྨན་ལྡན་དང་ནི་དྲི་ལྡན་རྣམས་ཀྱིས་ལྷ་མོ་རྣམས་ཀྱིས་ཁྲུས་བྱའོ། །སངས་རྒྱས་རབ་དབྱེ་རྣམས་ཀྱིས་དབུ་རྒྱན་སྤྱན་ཏེ་མཆོག་གི་བླ་མས་ནུས་མ་རྣམས་ཀྱིས་དར་དཔྱངས་ཉིད། །རྡོ་རྗེ་དྲིལ་བུས་ཉི་མ་ཟླ་བ་ཉིད་དེ་བརྟུལ་ཞུགས་ཀྱིས་ཀྱང་ཡུལ་དང་དབང་པོ་སྤྱད་པར་བྱ། །མིང་གིས་ཁྲོ་བོ་རྣམས་དང་བྱམས་སོགས་དང་ནི་རྒྱལ་བའི་བདག་པོའི་རྗེས་གནང་ཕྱི་མོར་བཅས་པ་སྦྱིན། །རྡོ་རྗེ་དང་ནི་དྲིལ་བུ་རབ་ཏུ་བྱིན་ནས་མཆོག་གི་སྙིང་རྗེས་དག་པའི་ཆོས་རྣམས་བསྟན་པར་བྱ། །རྡོ་རྗེའི་རིགས་སུ་ངེས་པ་སྲོག་གཅོད་པ་དང་རལ་གྲི་ལ་མི་བདེན་པ་ཡི་ངག་བརྗོད་པར་བྱ་བ་དང ། །རིན་ཆེན་དུ་ནི་གཞན་ནོར་འཕྲོག་དང་མཆོག་གི་པདྨའི་རིགས་ཉིད་དུ་ཡང་གཞན་གྱི་བུད་མེད་འཕྲོག་།འཁོར་ལོར་ཆང་དང་མར་མེ་སངས་རྒྱས་རྣམས་དང་ཡུལ་རྣམས་མཐའ་དག་ཤིན་ཏུ་བསྟན་པར་བྱའོ། །གྲི་གུག་ཏུ་ནི་གདོལ་པ་མོ་ལ་སོགས་པ་བུད་མེད་མཐའ་དག་མཁའ་ཡི་པདྨ་སྨད་མི་བྱ། །སེམས་ཅན་རྣམས་ཀྱི་དོན་དུ་ནོར་དང་ལུས་བཅས་སྦྱིན་བྱ་འདི་ནི་ཁྱོད་ཀྱིས་བསྲུང་བར་བྱ་བ་མིན། །རིགས་ཀྱི་བུ་རྣམས་གཞན་དུ་བསྐལ་པ་གྲངས་མེད་པས་ཀྱང་སངས་རྒྱས་མིན་པར་རྒྱལ་བས་གསུངས་པར་ངེས། །ཆུ་ཡིས་སྒྲོལ་མ་ལ་སོགས་ལྷ་མོ་རྣམས་དང་དབུ་རྒྱན་རྒྱལ་བ་རྣམས་ཏེ་དར་དཔྱངས་ནུས་མ་རྣམས། །རྡོ་རྗེ་དྲིལ་བུས་ཉི་ཟླ་དག་དང་བརྟུལ་ཞུགས་ཡུལ་སོགས་རྣམས་དང་མིང་གིས་བྱམས་པ་སོགས་སུ་སྦྱོར། །རྗེས་གནང་རྫོགས་པའི་བྱང་ཆུབ་དཔལ་ལྡན་སྲིད་པའི་འཇིགས་པ་འཇོམས་པ་དུས་ཀྱི་འཁོར་ལོ་རྗེས་ཁྱབ་པ། །དེ་ལྟར་དབང་བདུན་རྣམས་ཀྱིས་སྡིག་པའི་དྲི་མ་འཇོམས་པས་དཀྱིལ་འཁོར་ཉིད་དུ་ཡང་དག་རབ་ཏུ་སྦྱིན། །དབང་བདུན་རྣམས་ཀྱིས་དབང་རྣམས་བསྐུར་ན་དགེ 84.165a བའི་དབང་གིས་ས་བདུན་དབང་ཕྱུག་ཉིད་དུ་འགྱུར་བའོ། །ཕྱིས་ནི་ཕྱིར་མི་ལྡོག་ལ་སོགས་པ་ངེས་པར་རབ་ཏུ་འཇུག་པ་བུམ་པ་དང་ནི་གསང་བའི་དབང ། །ཤེས་རབ་ཡེ་ཤེས་དབང་རྣམས་བསྐུར་བས་སྲིད་པའི་འཇིགས་པ་འཇོམས་པའི་འཇམ་དབྱངས་ཉིད་དུ་འགྱུར་བའོ། །འགྲོ་བ་གཡོ་སྒྱུའི་དབང་གིས་རྩ་བའི་ལྟུང་བ་བྱུང་ན་འདི་ཉིད་ལ་ཡང་དམྱལ་བའི་སྡུག་བསྔལ་འགྱུར། །རྩ་བའི་ལྟུང་བ་བྱུང་ན་དབང་བདུན་ལ་གནས་ཡོན་ཏན་ཅན་གྱིས་བཟླས་པས་རྣམ་པར་དག་པར་འགྱུར། །གལ་ཏེ་བུམ་པ་དང་ནི་གསང་བར་བརྟུལ་ཞུགས་ངེས་པའི་དབང་སྟེ་གོང་མར་དག་པ་ཡོད་མ་ཡིན། །གང་ཞིག་ལ་ནི་རྩ་བའི་ལྟུང་བ་བྱུང་ན་དག་པར་བྱ་བའི་དོན་དུ་དཀྱིལ་འཁོར་འདིར་འཇུག་བྱ། །རྗེས་གནང་ཐོབ་ནས་ཚོགས་ཀྱི་རིགས་སུ་འགྲོ་ན་རྒན་པ་ཞེས་པ་ལས་ནི་གཞོན་པའོ། །རྩ་བའི་ལྟུང་བ་བུ་རྣམས་ཀྱིས་ཏེ་དཔལ་ལྡན་བླ་མའི་ཐུགས་སུན་ཕྱུང་བ་རི་བོང་འཛིན་པར་འགྱུར། །དེ་ཡི་བཀའ་ལས་འདས་པ་གཞན་ཏེ་དེ་བཞིན་དུ་ནི་སྤུན་ལ་ཁྲོ་བ་གསུམ་པར་ངེས་པར་འགྱུར། །བྱམས་པ་སྤངས་པས་བཞི་པར་འགྱུར་ཏེ་གཞན་ཡང་བྱང་ཆུབ་སེམས་ཉིད་རབ་ཏུ་སྤངས་པ་ལས་ནི་མདའ། །གྲུབ་མཐའ་སྨོད་པ་དྲུག་པ་ཉིད་དེ་གཞན་ཡང་མ་ཡིན་སྐྱེ་བོ་རྣམས་ལ་གསང་བ་བྱིན་པ་རི། །ཕུང་པོ་ཉོན་མོངས་པ་ལས་ཀླུ་རུ་འགྱུར་ཏེ་གཞན་ཡང་དག་པའི་ཆོས་ལ་མ་དད་དགུ་པའོ། །སྒྱུ་ཡི་བྱམས་པ་ཕྱོགས་ཏེ་མིང་སོགས་བྲལ་བ་བདེ་བ་སྟེར་ལ་རྟོག་པ་གང་ཡིན་དྲག་པོའོ། །དག་པའི་སེམས་ཅན་རྣམས་ལ་རབ་ཏུ་སྐྱོན་བརྗོད་ཉི་མར་འགྱུར་ཏེ་དམ་ཚིག་རྙེད་པ་སྤངས་ན་གཞན། །བུད་མེད་ཐམས་ཅད་ལ་སྨོད་ངེས་པར་མ་ནུར་འགྱུར་ཏེ་རྡོ་རྗེ་ཐེག་པ་ལ་གནས་རྣམས་ཀྱིའོ། །ཕྱོགས་ནི་ལོ་ནི་གཅིག་ནས་རྣམ་པ་བཅུ་ཡི་བར་དུ་ལྟ་དང་རིག་པར་བྱ་བ་ཡིན་པ་སྟེ། །དེ་ནས་འཁྱུད་བྱ་རྣམས་ནི་རྒྱ་མཚོ་རྣམས་དང་རོ་བཅས་བསྟན་པར་བྱ་བ་གཡོ་བ་ལ་སོགས་པ། ། 84.165b ཉི་ཤུའི་ལོ་ཡི་འོག་མའི་ཕྱག་རྒྱ་རྣམས་ནི་མཆོག་ཏུ་འཇིགས་བྱེད་ཁྲོ་བོ་འབྱུང་པོ་ལྷ་མིན་རིགས། །དབང་གི་དོན་དུ་དྲུག་དང་གསུམ་གྱིས་བདེ་མཉམ་འབྲས་སྟེར་བ་དང་གཞན་ནི་བསྒོམ་པའི་དོན་དུའོ། །གང་ཞིག་དང་པོར་ཡང་ཡང་ནི་དཔལ་ལྡན་ཤེས་རབ་ནུ་མར་རེག་པ་དེ་ཉིད་བུམ་པའི་དབང་དུ་བརྗོད། །རི་བོང་འཛིན་པ་མྱངས་དང་གསང་བ་མཐོང་བར་བྱས་པས་གསང་བའི་དབང་དུ་རབ་ཏུ་འགྱུར་བའོ། །མཐའ་དག་རྒྱལ་བའི་རིགས་ཀྱིས་ཡན་ལག་ཁ་རྣམས་སྦྱང་བར་བྱ་སྟེ་ཤེས་རབ་ཡེ་ཤེས་དབང་སྦྱིན་བྱ། །རྒྱལ་བ་དཔང་པོར་བྱས་ཏེ་སློབ་མའི་དོན་དུ་ཕྱག་རྒྱ་སྦྱིན་དང་གཞན་ཡང་བླ་མ་ལ་ཡང་འདིར། །རྒྱན་རྣམས་ཐམས་ཅད་ལྡན་པའི་གསེར་ཞུན་དང་ནི་མཚུངས་པའི་ལོ་ཉིད་བཅུ་གཉིས་མ་སྟེ་བུ་མོ་མཛེས། །ཐབས་དང་ཤེས་རབ་བདག་ཉིད་ལྡན་པས་རང་གི་རྡོ་རྗེ་ནོར་བུས་སྤྱད་བྱ་ཉིད་ནི་ཆགས་བཅས་ལ། །སློབ་མ་དག་པ་ཤེས་ནས་རྡོ་རྗེ་ས་བོན་བཅས་པ་ཁར་ནི་ཡང་དག་གཞུགས་པར་བྱ་བ་ཉིད། །ཕྱིས་ནི་རང་གི་ཕྱག་རྒྱ་བུ་ལ་བྱིན་ནས་དེ་ནས་གཞན་ཡང་དུ་བའི་ལམ་ལ་སོགས་ལྡན་ཡང ། །སྐྲག་དང་འཁྲུལ་པའི་སེམས་དང་གཡོ་དང་གཞན་གྱི་དབང་དུ་འགྲོ་བ་དང་ནི་ནང་ལྡན་བུ་བཙས་དང ། །ཁྲོ་ལྡན་ཁེངས་ཤིང་འདོད་ལ་ཆགས་དང་བརྫུན་དང་རྩོད་པ་ལ་དགའ་ཡན་ལག་ཉམས་དང་མ་དག་པ། །དེ་ལྟ་བུ་རྣམས་ཤེས་རབ་ཡེ་ཤེས་དབང་དུ་ཤིན་ཏུ་འབད་དེ་བླ་མས་སྤང་བྱ་མི་དབང་པོ། །སླར་གསུངས་སངས་རྒྱས་བླ་མ་དག་ལ་གུས་ལྡན་དམ་ཚིག་འཛིན་ལ་ཕྱག་འཚལ་བ་དང་མཆོད་པར་བྱ། །འགྲོ་བ་རྣམས་ཀྱི་རང་གི་ཡིད་ཉིད་འདོད་ཆགས་ཀྱིས་ནི་འཁྲུགས་པར་བྱེད་དང་གང་བར་འགྱུར་བ་ཉིད། །ཡན་ལག་མཆོག་ལ་གང་བ་ལས་ནི་འབར་བས་རི་བོང་འཛིན་པ་ཞུ་ནས་ཡང་དག་འཛག་པ་ཉིད། །ོཌྜ་དགུག་པར་རབ་ཏུ་བྱས་པས་མཆོག་གི་བདེ་བ་སྟེར་བ་ཐིག་ལེ་ཐར་པ་གསུམ་གྱི་ཐར། །སྣང་རེག་འདུས་དང་འགྱུར་དང་བདེ་བ་རྣམས་ཏེ་དགའ་བའི་དབྱེ་བ་ལ་སོགས་པ་ཡིས་དེ་ལྟར་རོ། །དང་པོར་ཡང་ནི་མི་རྣམས 84.166a ཀུན་གྱིས་མིག་གིས་བལྟས་པ་འདི་ཡིས་འདོད་ཆགས་འཁྲུགས་པ་དགའ་བ་སྟེ། །ཕྱི་ནས་གང་བ་རང་གིས་ལུས་ལ་རབ་ཏུ་འདུས་པ་མཆོག་ཏུ་དགའ་བ་ཉིད་དུ་འགྱུར་བའོ། །འབར་བ་ཡང་དག་རོལ་པས་རྡོ་རྗེ་ལས་ནི་པད་མར་ཐིག་ལེ་འཛག་པ་ཁྱད་པར་དགའ་བའོ། །ོཌྜ་རྡོ་རྗེ་ལས་ནི་ཐིག་ལེ་གསུམ་གྱི་མཐའ་རུ་བདེ་བ་འགྱུར་བྱེད་ལྷན་ཅིག་སྐྱེས་དགའོ། །འདོད་དང་དགའ་དང་གཡོ་བ་དང་ནི་མི་འགྱུར་བ་སྟེ་བཞི་རྣམས་ཀྱིས་ནི་དེ་ཡི་སྦྱོར་བ་གཅིག་།གང་བ་ནུས་པ་དང་ནི་སྐྱེ་བ་ངེས་པར་ཡིན་ཏེ་མཆོག་ཏུ་དགའ་བ་ཉིད་རྣམས་གཉིས་པའོ། །འབར་བ་དང་ནི་ཐིག་ལེ་དག་དང་ཡུར་བ་དང་སྟེ་ཁྱད་པར་དགའ་བ་ཉིད་རྣམས་གསུམ་པའོ། །ོཌྜ་དང་ནི་སྒྲ་ཙམ་ཉིད་དེ་གཉིད་དང་ལྷན་ཅིག་སྐྱེས་པའི་དགའ་བ་ཉིད་རྣམས་བཞི་པའོ། །སེམས་ཀྱིས་བསམ་པར་བྱ་བ་མ་སྟེ་རེག་པར་བྱ་ཞིང་འཁྱུད་པ་ཡིས་ནི་སྲིང་མོར་འགྱུར་བའོ། །རྡོ་རྗེ་རབ་ཏུ་ཞུགས་པ་བུ་མོར་བརྗོད་དེ་བྱེད་བཅས་ཤིན་ཏུ་བདེ་བ་དེ་བཞིན་ཚ་མོའོ། །ཐིག་ལེ་ལྟུང་བ་ཆུང་མར་འགྱུར་ཏེ་ཆགས་བྲལ་གཞན་གྱི་རིགས་སུ་གྱུར་པའི་རྣལ་འབྱོར་མ་ཉིད་དོ། །དེ་ལྟར་རྣལ་འབྱོར་ཕྱག་རྒྱ་དྲུག་ནི་ས་དང་ཆུ་དང་མེ་དང་རླུང་དང་ནམ་མཁའ་ཆད་པའི་དངོས། །ཆུ་སྐྱེས་སུ་ནི་རྡོ་རྗེ་རབ་ཞུགས་པ་དང་མེར་ནི་རླུང་དང་ཐིག་ལེ་མ་ལྷུང་རིམ་པ་སྟེ། །དེ་ལྟར་རྣལ་འབྱོར་གསུམ་གྱི་རབ་ཏུ་གསལ་བར་ངེས་པར་སྐུ་དང་གསུང་དང་ཐུགས་ཀྱི་ཕྱག་རྒྱའོ། །ཆགས་དང་ཆགས་བྲལ་མཐའ་དང་སྔོན་དུ་བདེ་བ་དམ་པའི་གཏེར་ནི་སྦྱོར་བས་གོ་ཆ་བཞི་པའོ། །ཕྱག་རྒྱ་རྣམས་ལ་ཡུམ་གྱི་མཆོག་གྱུར་རྣམ་པ་བཅུ་པོ་དེ་ནི་དཔལ་ལྡན་བླ་མའི་ཞལ་འདིའོ། །རྣམ་པ་བདུན་དང་རྣམ་པ་གསུམ་སྟེ་བཅུ་པོ་འདི་ནི་འཇིག་རྟེན་ཀུན་རྫོབ་ཀྱི་དབང་སྟེ། །དེ་ལྟར་དེ་བཞིན་ཡང་བཞི་པ་ཞེས་གསུངས་པས་སོ། །བཞི་པ་ནི་གསུམ་པ་ཤེས་རབ་ཡེ་ཤེས་མ་ཡིན་ཏེ། འཇིག་རྟེན་ལས་འདས་པའི་དབང་བཞི་པ་ཞེས་སྨོས་པའི་ཕྱིར་དང ། དེ་བཞིན་ཡང་ཞེས་གསུངས་པས་སོ། །འདིར་བཅོམ་ལྡན་འདས་ཀྱིས་བཀའ་སྩལ་པ། གང་ཞིག་ཤེས་རབ་ཀྱི་ནི་ནུ་མར་རེག 84.166b པ་ཉིད་དང་གཞན་ཡང་བདུད་རྩི་མྱོང་དང་འཁྱུད་པའོ། །ཤེས་རབ་དང་ནི་འདུས་པས་བྱང་ཆུབ་སེམས་ཉིད་ཞུ་བ་སྐད་ཅིག་མ་བཞིར་བདུད་རྩིར་གྱུར་པ་གང ། །དེ་རྣམས་ཐམས་ཅད་འཇིག་རྟེན་པ་ཡི་ལམ་གྱི་རྒྱུ་རུ་སྙིང་རྗེ་མཆོག་གིས་ངེས་པར་བསྟན་པའོ། །གང་ཞིག་འཇིག་རྟེན་ལས་འདས་དབང་ནི་རྒྱལ་བའི་བདག་པོ་དམ་པའི་ཕྱག་རྒྱ་བཟང་དང་རྗེས་འདུས་པ། །ལས་ཀྱི་ཕྱག་རྒྱ་དྲི་མ་དང་བཅས་སེམས་གཡེང་བྱེད་དེ་ཡེ་ཤེས་ཕྱག་རྒྱ་རྣམ་པར་རྟོག་ཡིན་པས། །ཡང་དག་སྤངས་ཏེ་རྫོགས་པའི་བྱང་ཆུབ་རྒྱུར་ནི་རྒྱལ་མཆོག་སྐྱེད་བྱེད་ཕྱག་རྒྱ་བཟང་པོ་བསྒོམ་པ་ནི། །གོས་པ་མེད་ཅིང་མི་འགྱུར་མུན་འཇོམས་ཀུན་ལ་ཁྱབ་པ་མཁའ་མཚུངས་རྣལ་འབྱོར་པ་ཡི་གོ་བྱ་བ། །ལུས་ལ་གནས་པའི་ཡེ་ཤེས་གཟི་བརྗིད་སྲིད་པའི་དྲི་མ་འཇོམས་པ་དུས་ཀྱི་འཁོར་ལོས་རྗེས་ཁྱབ་པས། །སེམས་ཀྱི་སྣང་བ་ཙམ་སྟེ་རང་གི་ཡིད་ལས་སྐྱེས་པ་མེ་ལོང་གི་ནི་གཟུགས་བརྙན་ལྟ་བུར་ངེས། །མ་ལུས་རྒྱལ་སྲས་རྣམས་དང་སངས་རྒྱས་རྣམས་ཀྱིས་བསྟེན་པ་རྣལ་འབྱོར་དབང་པོ་རྣམས་ཀྱིས་བསྟན་བྱས་ན། །ཡེ་ཤེས་སྣང་བ་དེ་ཉིད་རབ་ཏུ་ཤར་བས་བདུད་དཔུང་ཡུལ་དང་བཅས་པ་མཐའ་དག་བསྲེགས་པ་དང ། །ཆགས་པ་ལ་སོགས་རྣམས་ཀྱིས་རྣལ་འབྱོར་པ་རྣམས་ལུས་ལ་ལོ་གཅིག་སྦྱོར་བས་བདེ་མཉམ་སྟེར་བར་བྱེད། །ཤེས་རབ་ཡེ་ཤེས་ཞེས་པ་སེམས་ཀྱི་སྣང་བ་ཉིད་དེ་དེ་ཡང་རྣམ་པ་བཅུ་རུ་འགྱུར་བའོ། །དབང་འདིར་ཞུགས་པ་གང་ཞིག་དྲི་མ་མེད་པའི་རི་བོང་ཅན་མཚུངས་མེ་ལོང་གཟུགས་བརྙན་ལྟ་བུར་ངེས། །དེ་ནས་བདེ་བ་འཛག་པ་མེད་པ་ལྷན་ཅིག་སྐྱེས་པ་འགྱུར་མེད་བཞི་པ་མྱ་ངན་འདས་པར་རེག་།དེས་ན་སངས་རྒྱས་ཞལ་ནི་གང་གི་ཐུགས་དང་ཞལ་ལ་གནས་པ་དེ་ཉིད་དཔལ་ལྡན་བླ་མའོ། །ནམ་མཁར་ཆགས་པའི་སེམས་ཀྱི་མིག་མི་འཛུམས་པ་དང་ནི་རྡོ་རྗེའི་ལམ་དུ་ཞུགས་རྣམས་ཀྱིས། །སྟོང་པ་ལས་ནི་དུ་བ་སྨིག་རྒྱུ་རབ་ཏུ་གསལ་བ་དྲི་མེད་སྲིན་བུ་མེ་ཁྱེར་མར་མེ་དང ། །འབར་དང་ཉི་མ་ཟླ་བ་རྡོ་རྗེ་རྣམས་ཀྱང་གཞན་ཡང་མཆོག་གི་ཆ་དང་ཐིག་ལེ་ཉིད་རྣམས་སོ། །དེ་ཡི་དབུས 84.167a སུ་སངས་རྒྱས་སྐུ་ནི་ཡུལ་དང་རྣམ་པར་བྲལ་བ་ལོངས་སྤྱོད་རྫོགས་སྐུ་དུ་མའོ། །ཆུ་འཛིན་བྲལ་བའི་མཁའ་ལ་སྣང་བ་རྣལ་འབྱོར་རྩེ་གཅིག་གནས་པའི་ལྟ་བས་ལྟ་བར་བྱ་བ་ནི། །ཇི་སྲིད་ངེས་པར་རི་མོ་ནག་པོ་དྲི་མེད་འོད་ཟེར་འཕྲོ་བ་མཐོང་བ་དུས་ཀྱི་རྩ་ཡིས་སོ། །དེར་ནི་ཐམས་ཅད་མཁྱེན་པའི་སྐུ་ནི་ཆུ་ནང་ཉི་མ་བཞིན་དུ་རྙོག་པ་མེད་པ་སྣ་ཚོགས་མདོག་།ཡུལ་དང་རྣམ་པར་བྲལ་བའི་རྣམ་པ་མ་ལུས་རང་གི་སེམས་ཏེ་གཞན་གྱི་སེམས་ཉིད་མ་ཡིན་ནོ། །སྐུ་མཐོང་གྱུར་ནས་ཉིན་ཞག་སོ་སོའི་དུས་སུ་སྲོག་གི་རླུང་ཉིད་རབ་ཏུ་དགག་པར་བྱས་པ་དང ། །བརྟུལ་ཞུགས་ཅན་རྣམས་ལམ་གྱི་སེམས་ནི་ཟླ་བ་དྲུག་གིས་རེག་བྱ་བྲལ་ནས་བདེ་མཉམ་འགྱུར་བའོ། །ཇི་སྲིད་ངེས་པར་རང་གི་ལུས་ལ་འོད་ཟེར་འཁོར་ལོས་ཡོངས་སུ་འཁོར་བར་བྱེད་པ་མཐོང་བའི་བར། །ཆགས་དང་ཆགས་བྲལ་མཐའ་དང་དང་པོར་སོང་བའི་སྐད་ཅིག་མ་ནས་ཁྱབ་བདག་དབུགས་ཀྱི་གྲངས་འཕེལ་ལོ། །མཐའ་དང་འབར་བའི་དབུས་ཀྱང་ཁྱད་པར་དང་ནི་ལྷན་ཅིག་སྐྱེས་དང་ཡེ་ཤེས་དང་ནི་རྣམ་ཤེས་དང ། །གཉིད་དང་བརྒྱལ་བའི་དབུས་སུ་གནས་པའི་རྡོ་རྗེ་པདྨ་དག་གིས་གཉིས་སྦྱོར་བདེ་བ་གང་ཡིན་པ། །དེ་ཡིས་འཕལ་བར་རབ་ཏུ་བྱ་བ་བླ་མའི་ངེས་པའི་སྟོབས་ཀྱིས་འདི་ཉིད་འཕེལ་བར་ཐེ་ཚོམ་མེད། །བདུད་དང་ཉོན་མོངས་འཇོམས་ཤིང་རྒྱལ་བའི་བདག་པོ་ལ་གནས་རྣལ་འབྱོར་པ་ཡིས་ལོ་གཅིག་སྦྱོར་བ་ཡིས། །ས་ཡི་རྣམ་པར་སྣང་ཡང་སྲ་བ་མིན་དང་ཆུ་ཡི་གཟུགས་སུ་སྣང་ཡང་ཆུ་མིན་གཤེར་བ་མེད་པའི་ཕྱིར། །མེ་ཡི་རྣམ་པར་སྣང་ཡང་མེ་མིན་རླུང་གི་གཟུགས་སུ་སྣང་ཡང་གཡོ་བ་མེད་པས་རླུང་མ་ཡིན། །སྟོང་པའི་རྣམ་པ་ཡིན་ཡང་མཐོང་སྟེ་དཀར་དང་སྔོ་བ་ལ་སོགས་མཐོང་ཡང་སྣ་ཚོགས་ཁ་དོག་མིན། །རྣམ་པ་ཀུན་ལྡན་ཡིན་ཡང་མི་མཐོང་རང་སེམས་དྲི་མ་ཉོན་མོངས་དང་ནི་བདུད་ཀྱི་མཐུ་སྟོབས་ཀྱིས། །སྒྲ་ཙམ་ཐིག་ལེ་ཆ་དང་ཡེ་ཤེས་རྣམས་ནི་བདུད་རྩི་གནས་སུ་འགྲོ་དང་ལྕགས་སྒྲོག་བཅིངས་པའི་རྩ། །སྲོག་དང་ཐུར་སེལ་ལམ་གསུམ་རྣམས་ནས་རྡོ་རྗེ་པད་མར་དང་ནི་པདྨ་རྡོ་རྗེ་ལྡན་པ་ཡིས། ། 84.167b དབུས་སུ་རླུང་དག་འགྲོ་བ་འཇུག་པ་ཡང་དག་འདུས་པ་ཡུལ་དང་ཡུལ་ཅན་མེད་པར་འགྱུར་བ་དང ། །དུ་བ་ལ་སོགས་མཚན་མ་རྣམས་ནི་གང་ཞིག་གཟུང་དང་འདི་རྣམས་འཛིན་པ་ཐམས་ཅད་གསང་བ་ཆེན་པོའོ། །དབུས་སུ་སྲོག་གཞུག་པ་ནི་ཉི་མ་དང་བཅས་ཟླ་བར་གྱུར་པ་གཡས་དང་གཡོན་པ་བཅིང་བ་དང ། །ཕྱག་རྒྱ་དང་ནི་སྦྱོར་བའི་སེམས་ཀྱིས་མཆོག་ཏུ་བདེ་གྱུར་པ་དང་རྡོ་རྗེ་ཡང་དག་སད་པ་དང ། །བདེ་བ་དམ་པའི་དོན་དུ་པད་མར་རྡོ་རྗེ་བསྐྱོད་དམ་རང་གི་ལག་པའི་པད་མས་གསོར་བ་ཡིས། །ས་བོན་མ་བཏང་བདེ་བ་དེ་ནི་འཆི་བའི་འཇིགས་པ་འཇོམས་པ་དཔལ་ལྡན་བླ་མའི་ཞལ་ཉིད་དོ། །ས་ནི་ཆུ་ལ་འཇུག་འགྱུར་ཆུ་ཡང་མེ་ལ་དེ་བཞིན་མེ་ནི་རླུང་ལ་འཇུག་པར་འགྱུར་བའོ། །རླུང་ནི་སྟོང་པ་ལ་སྟེ་སྟོང་པ་མཚན་མ་རྣམ་པ་བཅུར་འགྱུར་མཚན་མ་རྣམ་པ་ཀུན་ལྡན་དུ། །རྣམ་པ་ཀུན་ལྡན་མི་འགྱུར་བདེ་བ་དམ་པ་གཞོམ་དུ་མེད་པ་ཡེ་ཤེས་སྐུ་རུ་འགྱུར་བའོ། །མི་ཡི་བདག་པོ་ཡེ་ཤེས་ལས་ནི་རྫུ་འཕྲུལ་དངོས་གྲུབ་འགྱུར་རོ་སྐྱེས་བུ་རྣམས་ཀྱི་སྐྱེ་བ་འདིར། །འདོད་པས་སྤྲུལ་པའི་སྐུ་རུ་ངེས་པར་འགྱུར་ཏེ་གང་བ་རྫོགས་པ་གསུང་དུ་རབ་ཏུ་འགྱུར་བའོ། །འབར་བ་སྤྲུལ་པའི་ཐུགས་ཏེ་ཨོཌྜ་ལས་ནི་མཆོག་ཏུ་བདེ་བར་མཛད་པའི་ཡེ་ཤེས་ཤེས་སུ་བརྗོད། །དགའ་བ་ལོངས་སྤྱོད་རྫོགས་པའི་སྐུ་སྟེ་མཆོག་དགའ་ཁྱད་པར་དགའ་དང་བཅས་པ་དག་གི་རིམ་པ་ཡིས། །གསུང་དང་ཐུགས་ཏེ་ལྷན་ཅིག་སྐྱེས་པའི་དགའ་བ་སོགས་ལས་ཡེ་ཤེས་རྡོ་རྗེ་ལ་སོགས་འབྱུང་བར་བྱེད། །གཡོ་བ་ངེས་པར་ཆོས་ཀྱི་སྐུ་སྟེ་སྲིད་གསུམ་ཕྱག་བྱས་པ་དང་འབྱུང་བར་འགྱུར་བ་དེ་ཡི་གསུང ། །ཉིད་ནི་ངེས་པར་ཆོས་ཀྱི་ཐུགས་ཏ་དུརྱ་དེ་ཡི་ཡེ་ཤེས་ཉིད་ཡིན་སྲིད་པའི་འཇིགས་པ་འཇོམས། །ཡི་གེ་ངེས་པར་དག་པའི་སྐུ་སྟེ་དབྱངས་དང་བྲལ་བའི་ཆ་དང་ཐིག་ལེ་སྒྲ་ཙམ་རིམ་པ་ཡིས། །གསུང་དང་ཐུགས་དང་ཡེ་ཤེས་རྡོ་རྗེ་སྲིད་པ་རྣམ་གསུམ་ལ་གནས་དག་པའི་སྐུ་རུ་སྐྱེད་པར་བྱེད། །སད་དང་རྨི་ལམ་རང་བཞིན་དག་དང་གཞན་ཡང་དེ་བཞིན་གཉིད་ལོག་པ་དང་ཏུརྱའི་རང་བཞིན་རྣམས། །ལུས་གནས་པ་དང 84.168a དབུགས་ཉིད་ཐིམ་པ་རྣམ་པར་རྒྱུ་དང་ཡུལ་ལས་བསྐྱོད་པ་མེད་པའི་སེམས་ཐིམ་པ། །ཡེ་ཤེས་གནས་ཀྱང་བུད་མེད་དང་ནི་རབ་འདུས་པ་ལས་བྱང་ཆུབ་སེམས་ཞུ་གྱུར་པའི་སྐད་ཅིག་ནི། །སྤྲུལ་པ་ལ་སོགས་རིམ་པས་ཐུགས་ཀྱི་རྡོ་རྗེ་རྣམ་པ་བཞི་རུ་ངེས་པར་རབ་ཏུ་འགྱུར་བ་ཡི། །དེ་ལྟར་སེམས་ནི་རྣམ་པ་བཞི་རྣམས་སྲིད་པ་རྣམ་གསུམ་གྱུར་པའི་སྲོག་ཆགས་རྣམས་ཀྱི་ཐིག་ལེའི་དབུས། །ཁྱབ་བྱེད་བདེ་མཉམ་འབྲས་སྟེར་ཐར་པའི་རྒྱུ་རུ་རྣལ་འབྱོར་དབང་པོ་རྣམས་ཀྱིས་བསྲུང་བར་བྱ་བ་ནི། །རྣལ་འབྱོར་རྣམས་ལ་མཆོག་གི་བདེ་བ་བསྐྱེད་པར་ས་བོན་ཐིག་ལེ་བཏང་ན་ཐར་པར་ག་ལ་འགྱུར། །དེ་ཕྱིར་འཁོར་བའི་བདེ་བ་སྐད་ཅིག་མ་འདི་བརྟུལ་ཞུགས་ཅན་རྣམས་ཀྱིས་ནི་རྒྱུན་དུ་སྤོང་བར་བྱ། །དཔལ་དུས་ཀྱི་འཁོར་ལོའི་ཚིགས་སུ་བཅད་པ་སུམ་བཅུ་ལྷག་པའི་སྟོང་ཕྲག་གཅིག་པ་ལས་མདོར་བསྡུས་པ་དབང་རབ་ཏུ་བྱེད་པ་རྫོགས་སྷོ།། །།རྒྱ་གར་གྱི་པཎ་ཊིཏ་མཁས་པ་ཆེན་པོ་ས་མན་ཏ་ཤྲཱི་དང ། ལོཙྪ་བ་དགེ་སློང་ཆོས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། ། |