།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་པ་སྟེ། བུ་མོ་རྣམ་དག་དད་པས་ཞུས་པ། བམ་པོ་གཅིག་པ། རྒྱ་གར་སྐད་དུ། ཨཱརྱ་དཱ་རི་ཀཱ་བི་མ་ལ་ཤྲད་དྷཱ་པ་རི་པྲི་ཙྪཱ་ནཱ་མ 83.103a མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བུ་མོ་རྣམ་དག་དད་པས་ཞུས་པ། ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་ལྔ་བརྒྱ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་སྟོང་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་ཤེས་པར་བྱ་བ་རྣམས་རབ་ཏུ་ཤེས་པ། གཟུངས་དང་ཐོགས་པ་མེད་པའི་སྤོབས་པ་ཐོབ་པ། བཟོད་པ་རྣམས་ཕུན་སུམ་ཚོགས་པ། བདུད་ཀྱི་དཔུང་རབ་ཏུ་བཅོམ་པ། དེ་བཞིན་གཤེགས་པ་རྣམས་ཀྱིས་བརྙེས་པའི་ཆོས་རྣམས་རབ་ཏུ་ཐོབ་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་འཇིག་རྟེན་འཛིན་དང ། བྱང་ཆུབ་སེམས་དཔའ་ལམ་འཛིན་དང ། བྱང་ཆུབ་སེམས་དཔའ་ས་འཛིན་དང ། བྱང་ཆུབ་སེམས་དཔའ་ས་འཛིན་ཆེན་པོ་དང ། བྱང་ཆུབ་སེམས་དཔའ་མོས་པའི་བློ་གྲོས་དང ། བྱང་ཆུབ་སེམས་དཔའ་མོས་བྱེད་དང ། བྱང་ཆུབ་སེམས་དཔའ་གཟུགས་མཛེས་བཀོད་པ་དང ། བྱང་ཆུབ་སེམས་དཔའ་རིན་པོ་ཆེའི་ཏོག་དང ། བྱང་ཆུབ་སེམས་དཔའ་རིན་པོ་ཆེའི་རྒྱལ་མཚན་དང ། བྱང་ཆུབ་སེམས་དཔའ་རིན་ཆེན་སེམས་པ་དང ། བྱང་ཆུབ་སེམས་དཔའ་རིན་ཆེན་འབྱུང་གནས་དང ། བྱང་ཆུབ་སེམས་དཔའ་རིན་ཆེན་བློ་གྲོས་དང ། བྱང་ཆུབ་སེམས་དཔའ་རིན་ཆེན་ཡོན་ཏན་དང ། བྱང་ཆུབ་སེམས་དཔའ་རིན་ཆེན་འོད་དང ། གཞན་ཡང་བསྐལ་པ་བཟང་པོའི་བྱང་ཆུབ་སེམས་དཔའ་བྱམས་པ་ལ་སོགས་པ་གཙོ་བོར་གྱུར་པ་དང་ཐབས་གཅིག་གོ་།གཞན་ཡང་སེམས་པ་དཔེ་ཟླ་མེད་པའི་བྱང་ཆུབ་སེམས་དཔའ་འཇམ་དཔལ་ལ་སོགས་པ་གཙོ་བོར་གྱུར་པ་དྲུག་བཅུ་པོ་དག་དང་ཡང་ཐབས་གཅིག་གོ་།གཞན་ཡང་སྐྱེས་བུ་ཆེན་པོ་བྱང་ཆུབ་སེམས་དཔའ 83.103b བཟང་སྐྱོང་ལ་སོགས་པ་གཙོ་བོར་གྱུར་པ་བཅུ་དྲུག་དང་ཡང་ཐབས་གཅིག་གོ་།གཞན་ཡང་དགའ་ལྡན་གྱི་རིས་ཀྱི་ལྷའི་བུ་ཉི་ཁྲི་འཁོར་དེ་ཉིད་དུ་འདུས་པར་གྱུར་པ་དག་དང་ཡང་ཐབས་གཅིག་གོ་།དེའི་ཚེ་བཅོམ་ལྡན་འདས་བཀོད་པ་ཆེན་པོའི་མཛོད་ཅེས་བྱ་བའི་སེང་གེའི་གདན་ལ་འཁོར་བརྒྱ་སྟོང་ཚད་མེད་པ་དག་གིས་ཡོངས་སུ་བསྐོར་ནས་བཞུགས་པས་ཉི་ཟླ་ལྟ་བུའི་འོད་ཟེར་གྱིས་ནི་ཀུན་དུ་སྣང་བར་མཛད། བརྒྱ་བྱིན་དང་ཚངས་པའི་རྒྱལ་པོ་ལྟར་གཟི་བྱིན་ནི་ཁྱད་པར་དུ་འཕགས། རིའི་རྒྱལ་པོ་རི་རབ་ལྟ་བུར་ཤིན་དུ་མཐོ་ཞིང་ཕལ་ལས་ནི་མངོན་པར་འཕགས་པར་གྱུར། སྒྲོན་མ་ཆེན་པོ་ལྟ་བུར་འོད་ཟེར་དག་ནི་རབ་ཏུ་འབར། གླང་པོ་ཆེའི་རྒྱལ་པོ་ལྟར་ཕན་ཚུན་དུ་ནི་གཟིགས་པར་མཛད། སེང་གེའི་སྒྲ་སྒྲོགས་པ་ལྟར་བསྙེངས་པ་མི་མངའ་བར་ནི་ཆོས་སྟོན་པར་མཛད། ལྷ་མ་ཡིན་གྱི་རྒྱལ་པོ་སྒྲ་གཅན་ཟིན་ལྟར་འཁོར་མང་པོ་རྣམས་ནི་ཟིལ་གྱིས་མནན། མཚན་དང་དཔེ་བྱད་བཟང་པོ་དག་གིས་ནི་སྐུ་རབ་ཏུ་བརྒྱན། གཟི་བྱིན་དང་མཐུ་སྟོབས་དག་ནི་རབ་ཏུ་འབར་བར་གྱུར་ཏེ། སེམས་ཅན་ཐམས་ཅད་ངེས་པའི་དོན་མཆོག་ལ་འགོད་ཅིང་ཁོང་དུ་ཆུད་པར་མཛད་པའི་ཕྱིར་ཚངས་པའི་སྒྲ་དབྱངས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་དུ་བསྒྲགས་ནས་འཁོར་མང་པོའི་དབུས་སུ་ཆོས་སྟོན་པར་མཛད་དོ། །དེ་ནས་རྒྱལ་པོ་གསལ་རྒྱལ་གྱི་བུ་མོ་རྣམ་དག་དད་པ་ཞེས་བྱ་བ་གཞོན་ནུ་མ་བྱད་བཞིན་སྡུག་ཅིང་མཛེས་པ། སེམས་ཅན་རྣམས་ཀྱིས་མཐོང་བར་མོས་པ། སྔོན་དགེ་བའི་རྩ་བ་བསྐྱེད་པ། ཐེག་པ་ཆེན་པོ་བསྒོམས་པ་ཞིག་ཡོད་པ་དེ་བུ་མོ་གཞོན་ནུ་མ་ལྔ་བརྒྱས་ཡོངས་སུ་བསྐོར་ཏེ། སོ་སོ་ནས་གསེར་གྱི་ཕྲེང་བ་ཐོགས་ནས་གྲོང་ཁྱེར་མཉན་ཡོད་ནས་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་དུ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་ཕྱག་བྱས་ནས། ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་ནས་ཚིགས་སུ་བཅད་དེ་མངོན 83.104a པར་བསྟོད་པ། ཡུན་རིང་བསོད་ནམས་རྣམ་དག་ཕྲིན་ལས་བསགས། །ཡོན་ཏན་རྒྱ་མཚོ་མཐའ་ཡས་ཡོངས་རྫོགས་ཤིང ། །མང་པོ་དད་མོས་དགའ་བར་མཛད་པས་ན། །དེ་སླད་ཐུབ་མཆོག་ཁྱོད་ལ་བདག་ཕྱག་འཚལ། །གཟི་བྱིན་ལྷམ་མེ་ཡ་མཚན་རབ་སྟོན་ཅིང ། །རིན་ཆེན་འབྱུང་གནས་ཆོས་སྒོ་སྟོན་པར་མཛད། །སྐུ་ཡི་འོད་ཟེར་མདོམ་གང་རྟག་གསལ་བ། །བློ་ཆེན་བསིལ་བའི་རྫིང་ལ་བདག་ཕྱག་འཚལ། །ཡོན་ཏན་ལྗོན་ཤིང་བསོད་ནམས་པས་མ་འཚལ། །མི་མཆོག་ཁྱོད་ལ་འཇིག་རྟེན་ཀུན་གྱིས་བསྔགས། །སྨོན་ལམ་ཆེན་པོ་ཚུལ་ཁྲིམས་ཡོངས་རྫོགས་པས། །དེ་སླད་མཆོད་འོས་གཙོ་ལ་བདག་ཕྱག་འཚལ། །ཆོས་མཆོག་རབ་གནས་རྟག་པར་ཞི་ཞིང་དབེན། །འཇིག་རྟེན་ཀུན་ལ་ཐུགས་སྙོམས་བུ་གཅིག་བཞིན། མཁྱེན་པ་དག་གིས་སྤྱོད་རྣམས་རབ་མཁྱེན་པས། །འདྲེན་མཁན་བཞིན་དུ་མཉམ་པའི་ཤུལ་ཡང་སྟོན། །རབ་བརྟན་བརྩོན་འགྲུས་ལྡན་པ་མཆིས་གྱུར་ན། །བྱམས་དང་ཐུགས་རྗེས་སེམས་ཅན་སྨན་མཛད་པས། །བྱང་ཆུབ་སེམས་དཔའི་སྤྱོད་པ་གང་ལགས་པ། །དེ་བཞིན་གཤེགས་པས་བཀས་ནི་བཤད་དུ་གསོལ། །ཇི་ལྟར་རབ་བརྟན་སྟོབས་ནི་ཐོབ་གྱུར་ནས། །འཁོར་བར་གནས་ཀྱང་བདུད་དཔུང་ཕམ་བགྱིད་ལགས། །ཇི་ལྟར་མཉམ་པའི་ཆོས་ནི་ཐོབ་འགྱུར་ཞིང ། །ཇི་ལྟར་སེམས་ཅན་ཡོངས་སུ་སྨིན་བགྱིད་ལགས། །ཇི་ལྟར་བགྱིས་ན་ས་གཞི་ནམ་མཁའ་དང ། །རླུང་དང་ཆུ་མེ་ཇི་ལྟ་བཞིན་དུ་འགྱུར། །ཇི་ལྟར་ཡིད་ཆེས་ཐོབ་ནས་ཆོས་གནས་ཤིང ། །རི་རབ་སེང་གེའི་རྒྱལ་པོ་བཞིན་དུ་འགྱུར། །ཇི་ལྟར་བྱམས་སྡང་སེམས་ནི་ཡོངས་སྤངས་ནས། །སེམས་གཙང་དྲང་ལ་གཡོ་སྒྱུ་མ་མཆིས་འགྱུར། །ཇི་ལྟར་སྦྱིན་དང་ཚུལ་ཁྲིམས་བཟོད་པ་དང ། །བརྩོན་འགྲུས་བསམ་གཏན་རྣམ་གྲོལ་སྐྱེ་འགྱུར་ཞིང ། །ཤེས་རབ་ཉོན་མོངས་མུན་པ་རབ་བཅོམ་ནས། །རྟག་པར་ཐབས་ཆེན་ལ་ནི་གནས་པ་དང ། །ཏིང་འཛིན 83.104b གཟུངས་ལ་ཐོགས་པ་མ་མཆིས་ཤིང ། །ཚད་མེད་བཞི་དང་མངོན་ཤེས་ལྔ་ལ་གནས། །ཇི་ལྟར་སངས་རྒྱས་སྤྱན་སྔར་གནས་གྱུར་ནས། །རྟག་པར་བརྫུས་ཏེ་སྐྱེ་ཞིང་ཚེ་རབས་དྲན། །སྦྱངས་པས་རྩོད་པ་མ་མཆིས་དགོན་གནས་ནས། །སེམས་ནི་རབ་བཏུལ་ཉོན་མོངས་ཞི་བགྱིད་དང ། །ཚུལ་ཁྲིམས་ལྡན་ཞིང་བྱང་ཆུབ་ལམ་བསྒོམས་དང ། །བདུད་རྩི་འགོག་ཐོབ་བདུད་དཔུང་འཇོམས་པ་དང ། །བདེ་སྩོལ་ཆོས་ཀྱི་འཁོར་ལོ་སྐོར་འགྱུར་བ། །དེ་འདྲའི་ཡང་དག་ལམ་ནི་བཀས་བཤད་གསོལ། །དེ་ནས་བཅོམ་ལྡན་འདས་ཀྱིས་བུ་མོ་རྣམ་དག་དད་པ་ལ་བཀའ་སྩལ་པ། བུ་མོ་བྱང་ཆུབ་སེམས་དཔའ་གང་སྟོབས་རྣམ་པ་བརྒྱད་དང་ལྡན་པར་འགྱུར་ན་འཁོར་བ་ན་གནས་ཀྱང་རབ་ཏུ་བརྟན་པའི་དཔའ་བོར་འགྱུར་ཞིང་ཡོངས་སུ་ངལ་བ་མེད་པར་འགྱུར་རོ། །བརྒྱད་གང་ཞེ་ན། དང་པོ་ནི་སེམས་ཀྱིས་འདུན་པའི་སྟོབས་ཏེ་གཡོ་སྒྱུ་མེད་པའི་ཕྱིར་རོ། །གཉིས་པ་ནི་མོས་པའི་སྟོབས་ཏེ། སྡིག་པ་རྣམས་སྤོང་བར་བྱེད་པའི་ཕྱིར་རོ། །གསུམ་པ་ནི་སྦྱོར་བའི་སྟོབས་ཏེ། རྟག་ཏུ་དགེ་བ་བསྒྲུབ་པའི་ཕྱིར་རོ། །བཞི་པ་ནི་མངོན་པར་ཡིད་ཆེས་པའི་སྟོབས་ཏེ། ལས་ཀྱི་རྣམ་པར་སྨིན་པ་དག་ལ་ཤིན་དུ་མངོན་པར་ཡིད་ཆེས་པའི་ཕྱིར་རོ། །ལྔ་པ་ནི་བྱང་ཆུབ་ཀྱི་སེམས་ཀྱི་སྟོབས་ཏེ། ཐེག་པ་དམན་པ་ཡོངས་སུ་མི་ཚོལ་བའི་ཕྱིར་རོ། །དྲུག་པ་ནི་བྱམས་པ་ཆེན་པོའི་སྟོབས་ཏེ། སེམས་ཅན་ལ་གནོད་པ་མེད་པའི་ཕྱིར་རོ། །བདུན་པ་ནི་སྙིང་རྗེ་ཆེན་པོའི་སྟོབས་ཏེ་གནོད་པ་བྱས་པ་རྣམས་དང་དུ་ལེན་པར་བྱེད་པའི་ཕྱིར་རོ། །བརྒྱད་པ་ནི་དགེ་བའི་བཤེས་གཉེན་གྱི་སྟོབས་ཏེ། དུས་དུས་སུ་སད་པར་བྱེད་པའི་ཕྱིར་རོ། །བུ་མོ་འདི་ནི་སྟོབས་རྣམ་པ་བརྒྱད་ཅེས་བྱ་སྟེ། བྱང་ཆུབ་སེམས་དཔའ་གང་སྟོབས་བརྒྱད་པོ་འདི་དག་དང་ལྡན་པར་གྱུར་ན་རབ་ཏུ་བསྟན་པའི་དཔའ་བོར་འགྱུར་བས་འཁོར་བ་ན་གནས་ཀྱང་མངོན་པར་ཞེན་ཅིང་ཆགས་པ་མེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང 83.105a ཚིགས་སུ་བཅད་དེ་བཀའ་སྩལ་པ། །སེམས་འདུན་དཔའ་བོ་གང་ཡིན་པ། །གཡོ་སྒྱུ་དག་ནི་སྤོང་བྱེད་ཅིང ། །རྟག་པར་དྲང་པོར་སྤྱོད་པས་ན། །ཡང་དག་བྱང་ཆུབ་གཞོལ་བར་འགྱུར། །མོས་པའི་སྟོབས་ནི་གང་ཡིན་པ། །ཉེས་པ་མང་པོ་སྤོང་བྱེད་ཅིང ། །དགེ་བ་འབའ་ཤིག་སྤྱོད་པས་ན། །ཡང་དག་བརྩོན་ལ་གནས་པར་འགྱུར། །སྦྱོར་བ་ཕུན་སུམ་ཚོགས་གྱུར་པ། །རྟག་ཏུ་ལེགས་པར་རབ་བསྟན་ནས། །བརྩོན་འགྲུས་བརྟན་པར་འགྱུར་བས་ན། །སེམས་ཅན་རྣམས་ནི་བདེ་བར་བྱེད། །མངོན་པར་ཡིད་ཆེས་སྟོབས་དབང་གིས། །ལས་ཀྱི་རྣམ་སྨིན་རིག་པས་ན། །སངས་རྒྱས་ཡེ་ཤེས་ཡིད་ཆེས་ཤིང ། །འཇིག་རྟེན་ཡོངས་སུ་སྡུད་པར་འགྱུར། །བྱང་ཆུབ་སེམས་སྟོབས་གང་ཡིན་དེས། །ཐེག་པ་དམན་པ་སྤོང་བྱེད་ཅིང ། །སངས་རྒྱས་གདུང་ནི་མི་གཅོད་པས། །ཆོས་ཉིད་ལ་ནི་གནས་པར་འགྱུར། །བྱམས་ཆེན་སྟོབས་ཀྱི་དབང་གིས་ནི། །སེམས་ཅན་སྙོམས་པར་ལྟ་བྱེད་ཅིང ། །བྱམས་སྡང་དག་ནི་མེད་པས་ན། །ཞེ་སྡང་གནོད་སེམས་སྐྱེད་མི་འགྱུར། །སྙིང་རྗེ་ཆེན་པོའི་སྟོབས་ཀྱིས་ནི། །སེམས་ཅན་དང་དུ་ལེན་བྱེད་ཅིང ། །འཁོར་བ་དག་ལ་ཞེན་མེད་པས། །ཡོངས་སུ་སྐྱོ་ཞིང་ངལ་བ་མེད། །དགེ་བའི་བཤེས་གཉེན་སྟོབས་ཀྱིས་ནི། །རྟག་པར་ཕན་ཚུན་སད་བྱེད་ཅིང ། །སེམས་ནི་བྱིང་བར་མི་འགྱུར་བས། །བྱང་ཆུབ་ལ་ནི་གནས་པར་འགྱུར། །དཔའ་བོ་གང་ཡིན་དེ་དག་གིས། །སྟོབས་བརྒྱད་འདི་དག་ཐོབ་གྱུར་ན། །བྱང་ཆུབ་སྙིང་པོར་འདུག་ནས་ནི། །བདུད་དཔུང་མང་པོ་བཅོམ་པར་འགྱུར། །གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་པར་གྱུར་ན་མཉམ་པ་ཉིད་ལ་རབ་ཏུ་གནས་པར་འགྱུར་རོ། །བརྒྱད་གང་ཞེ་ན་དང་པོ་ནི་སེམས་ཅན་ཐམས་ཅད་མཉམ་པར་གྱུར་པ་སྟེ་རང་བཞིན་གྱིས་བདག་མེད་པའི་ཕྱིར་རོ། །གཉིས་པ་ནི་ཆོས་ཐམས་ཅད་མཉམ་པར་གྱུར་པ་སྟེ་ཆོས་རྣམས་རབ་ཏུ་དབེན་པའི་ཕྱིར་རོ། །གསུམ་པ་ནི་ཞིང་ཐམས་ཅད་མཉམ་པར་གྱུར་པ་སྟེ། །སྟོང་པ་ཉིད་ཀྱི་ཁམས 83.105b སུ་འཇུག་པར་འགྱུར་བའི་ཕྱིར་རོ། །བཞི་པ་ནི་དེ་བཞིན་གཤེགས་པ་ཐམས་ཅད་མཉམ་པར་གྱུར་པ་སྟེ། སྙོམས་པ་ཉིད་དུ་སྟོན་པའི་ཕྱིར་རོ། །ལྔ་པ་ནི་སྤྱོད་པ་ཐམས་ཅད་མཉམ་པར་གྱུར་པ་སྟེ། རྒྱུ་དང་རྐྱེན་ལ་རང་བཞིན་མེད་པའི་ཕྱིར་རོ། །དྲུག་པ་ནི་ཐེག་པ་ཐམས་ཅད་མཉམ་པར་གྱུར་པ་སྟེ། འདུས་མ་བྱས་སུ་མཚུངས་པའི་ཕྱིར་རོ། །བདུན་པ་ནི་སེམས་མཉམ་པར་གྱུར་པ་སྟེ། སེམས་སྒྱུ་མ་དང་མཚུངས་པའི་ཕྱིར་རོ། །བརྒྱད་པ་ནི་བདུད་རྣམས་མཉམ་པར་གྱུར་པ་སྟེ། ཉོན་མོངས་པའི་ཐོག་མ་མི་དམིགས་པའི་ཕྱིར་རོ། །འདི་ནི་ཆོས་རྣམ་པ་བརྒྱད་ཀྱིས་མཉམ་པ་ཉིད་ལ་རབ་ཏུ་གནས་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སེམས་ཅན་རང་བཞིན་བདག་མེད་པས། །སྐད་ཅིག་ཙམ་ཡང་དམིགས་མི་འགྱུར། །མཉམ་པ་ཉིད་ལ་གང་གནས་པ། །དེ་ལྟ་བུ་ནི་བལྟ་བར་བྱ། །ཆོས་རྣམས་ཐམས་ཅད་མཉམ་པས་ན། །རང་བཞིན་རྟག་པར་སྟོང་ཞིང་དབེན། །ཡི་གེས་ཐ་དད་ཕྱེ་བར་ཟད། ཆོས་རྣམས་རང་བཞིན་བྱེ་བྲག་མེད། །ཕྱོགས་བཅུའི་ཞིང་རྣམས་ཐམས་ཅད་ཀུན། །མུ་མཐའ་དག་ནི་མི་དམིགས་པས། །དེའི་རང་བཞིན་ནམ་མཁའ་འདྲ། །སངས་རྒྱས་ཞིང་ནི་རྟག་ཏུ་མཉམ། །དུས་གསུམ་དེ་བཞིན་གཤེགས་པ་ཀུན། །ཆོས་དབྱིངས་གནས་པར་མཉམ་པས་ན། །ཡེ་ཤེས་མཐའ་ཡས་རྣམ་པར་གྲོལ། །སངས་རྒྱས་ཀུན་ཀྱང་དེ་བཞིན་ནོ། །སེམས་ཅན་རང་བཞིན་རྒྱུ་རྐྱེན་རྣམས། །ཐམས་ཅད་ཀུན་ཀྱང་མཉམ་པ་དང ། །དེའི་སྤྱོད་པ་རབ་ཤེས་པས། །ཅི་རིགས་པར་ནི་གོ་བར་བྱེད། །སེམས་ཅན་ཇི་སྙེད་ཐ་དད་པ། །སྒྱུ་སྤྲུལ་ལྟ་བུར་རབ་ཏུ་རྟོགས། །ཕྱི་ནང་གཉིས་ཀ་ལེན་མེད་པས། །རང་བཞིན་རྟག་ཏུ་རྣམ་པར་དག་།ཐེག་པ་སྣ་ཚོགས་རབ་བཤད་ཀྱང ། །འདུས་མ་བྱས་སུ་རབ་ཏུ་མཉམ། །འདྲེན་པས་ཐབས་ནི་རབ་མཁྱེན་པས། །རྣམ་པར་ཕྱེ་སྟེ་ཐེག་གསུམ་བཤད། །ཉོན་མོངས་བདུད་ལ་རབ་གནས་ཀྱང ། །ཉོན་མོངས་དངོས་པོ་ཅི་ཡང་མེད། །ལྷ་དང 83.106a ཕུང་པོ་འཆི་བདག་བདུད། །སྤྱོད་ཡུལ་ཐམས་ཅད་སྟོང་པ་ཡིན། །གཞན་ཡང་བུ་མོ་བྱང་ཆུབ་སེམས་དཔའ་ཆོས་བརྒྱད་དང་ལྡན་ན་བྱམས་སྡང་རྣམས་ཡོངས་སུ་སྤོང་བར་བྱེད་དོ། །བརྒྱད་གང་ཞེ་ན་བྱམས་པ་དང་ལྡན་པ་དང ། སྙིང་རྗེ་དང་ལྡན་པ་དང ། རྟག་པར་ཕན་འདོགས་པར་བྱེད་པ་དང ། འཇིག་རྟེན་པའི་ཆོས་ལ་མ་ཆགས་པ་དང ། རང་གིས་ལུས་ལ་ཆགས་པ་མེད་པ་དང ། རྟག་ཏུ་ཏིང་ངེ་འཛིན་གྱི་སེམས་སྒོམས་པ་དང ། ལུས་དང་སྲོག་ཡོངས་སུ་གཏོང་བ་དང ། ཉོན་མོངས་པ་རྣམས་ལ་སོ་སོར་རྟོག་པ་སྟེ། ཆོས་བརྒྱད་པོ་འདི་དག་མངོན་པར་སྒྲུབ་པར་ནུས་ན་བྱམས་སྡང་ཡོངས་སུ་སྤོང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། བྱམས་སེམས་གོ་ཆ་རབ་བགོས་ནས། །ཐམས་ཅད་ཀུན་ལ་སྙིང་བརྩེ་ཞིང ། །མཉམ་པའི་སེམས་ལ་གང་གནས་པ། །བྱམས་སྡང་སེམས་ལ་སྐྱེ་མི་འགྱུར། །བློ་ལྡན་ཕན་འདོགས་སྤྱོད་པས་ན། །རྟག་པར་གཞན་ལ་བདེ་བ་གཏོང ། །རྙེད་པ་ཐོབ་ཀྱང་རང་མི་མཐོང ། །བརྙས་ཤིང་སྨད་ཀྱང་འཁོན་འཛིན་མེད། །རླུང་བརྒྱད་ཀྱིས་ནི་མི་སྦྱོང་པས། །བྱམས་སྡང་དག་ནི་མི་སྐྱེ་ཞིང ། །བདག་གམ་གལ་ཏེ་གཞན་ཡང་རུང ། །བྱམས་སྡང་འདྲ་ཤེས་ཡོངས་མི་སྐྱེད། །འདུ་ཤེས་རྣམས་ནི་རབ་སྤངས་ནས། །སྤྱོད་ཡུལ་དག་ལ་ཞེན་པ་མེད། །རྟག་པར་རང་གི་ལུས་རྟོགས་པས། །ལུས་སྲོག་དག་ལ་ཕངས་པ་མེད། །མཁས་རྣམས་སྡུག་བསྔལ་བདེ་བ་ཡིས། །གཡོས་པར་མི་འགྱུར་ནམ་མཁའ་བཞིན། །ཉོན་མོངས་ལེགས་པར་རྟོགས་བྱེད་ན། །བདག་དང་བདག་གི་གཉིས་ག་སྤོང ། །སྤོང་འཛིན་རྟག་པར་ས་འདྲ་བས། །བྱམས་སྡང་དག་ནི་ཡོངས་མི་སྐྱེད། །གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་ན་འཁོར་བས་ཡོངས་སུ་ངལ་བར་མི་འགྱུར་རོ། །བརྒྱད་གང་ཞེ་ན། དགེ་བའི་རྩ་བ་ཡང་ཤིང་རྒྱ་ཆེ་བའི་ཕྱིར་དང ། སེམས་ཅན་ལ་སོ་སོར་རྟོག་པར་བྱེད 83.106b པའི་ཕྱིར་དང ། རྟག་པར་དེ་བཞིན་གཤེགས་པ་རྣམས་མཐོང་ཞིང་མཆོད་པའི་ཕྱིར་དང ། སངས་རྒྱས་ཀྱི་ཞིང་ཚད་མེད་པ་རྣམས་མཐོང་བའི་ཕྱིར་དང ། རྟག་པར་སངས་རྒྱས་ཀྱི་མཁྱེན་པ་ཡོངས་སུ་གཉེར་བའི་ཕྱིར་དང ། འཁོར་བ་རྨི་ལམ་ལྟ་བུ་རབ་ཏུ་རྟོགས་པའི་ཕྱིར་དང ། ཆོས་ཁྱད་པར་ཅན་དག་ལ་ཞུམ་པ་མེད་པའི་ཕྱིར་དང ། སྔོན་གྱི་མཐའ་དང་ཕྱི་མའི་མཐའ་དང་ཡང་དག་པའི་མཐའ་ལ་སོ་སོར་རྟོག་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྣལ་འབྱོར་ལམ་ནི་གང་སྒོམ་པ། །དགེ་སྦྱོང་སྐྱོན་འཕན་དྲི་མ་མེད། །བར་སྣང་ཟླ་བ་རྣམ་དག་བཞིན། །སྡུག་བསྔལ་སེམས་ཅན་སྒྲོལ་བར་བྱེད། །ཡོན་ཏན་རྣམས་ནི་བསྡུ་བའི་ཕྱིར། །འཁོར་བས་ཡོངས་སུ་ངལ་མི་འགྱུར། །སེམས་ཅན་རང་བཞིན་རྟོག་བྱེད་ཅིང ། །རབ་བསྟན་བརྩོན་འགྲུས་སྤྱོད་པར་བྱེད། །སངས་རྒྱས་ཞིང་ནི་ཚད་མེད་དུ། །སངས་རྒྱས་རྣམས་ནི་གུས་མཆོད་པས། །དེ་ཕྱིར་སྟོབས་བཅུ་གང་ལྡན་པ། །འཁོར་བས་ཡོངས་སུ་ངལ་མི་འགྱུར། །འཇིག་རྟེན་ཚད་མེད་དཔག་མེད་དུ། །བསམ་གྱིས་མི་ཁྱབ་ཆོས་སྟོན་ཅིང ། །དཀོན་མཆོག་གསུམ་གྱི་གདུང་མི་གཅོད། །ཆོས་རྒྱལ་ཉིད་དུ་མངོན་འཚང་རྒྱ། །ཚུལ་ཁྲིམས་དམ་པ་གང་སྲུང་བ། །འཁོར་བས་ངལ་བར་མི་འགྱུར་ཞིང ། །འཁོར་བའི་རང་བཞིན་གང་ཡིན་པ། །རྨི་ལམ་སྤྲིན་དང་གློག་ལྟར་ཤེས། །ཆོས་ལས་གང་ཞིག་རྣམ་གྲོལ་བ། །འཁོར་བས་ཡོངས་སུ་ངལ་མི་འགྱུར། །བྱང་ཆུབ་ལ་ནི་རབ་གནས་ཤིང ། །དགའ་བའི་སེམས་ཀྱི་རྟག་ཏུ་བདེ། །ཐབས་ཀྱིས་ཕ་རོལ་གང་ཕྱིན་པ། །འཁོར་བས་ཡོངས་སུ་ངལ་མི་འགྱུར། །རྟག་པར་དམ་ཆོས་སྒྲུབ་པ་ཡང ། །བར་སྣང་ཟླ་བཞིན་འཕེལ་བར་འགྱུར། །སངས་རྒྱས་ཡོན་ཏན་གང་མོས་པ། །འཁོར་བར་ཡོངས་སུ་ངལ་མི་འགྱུར། །འཁོར་བ་མུ་མཐའ་མེད་གྱུར་ཀྱང ། ། 83.107a རྟག་པར་ཡང་དག་མཐའ་ལ་གནས། །ཡུད་ཙམ་ཤེས་རབ་རྗེས་འཐུན་པ། །འཁོར་བ་དག་གིས་ངལ་མི་འགྱུར། །གཞན་ཡང་བུ་མོ་ཆོས་བརྒྱད་དང་ལྡན་ན་སེམས་ཀྱི་ཁམས་མཉམ་པར་འགྱུར་རོ། །བརྒྱད་གང་ཞེ་ན། སེམས་དང་མཚུངས་པར་གྱུར་པའི་ཕྱིར་དང ། སེམས་ཆུ་དང་མཚུངས་པར་གྱུར་པའི་ཕྱིར་དང ། སེམས་མེ་དང་མཚུངས་པར་གྱུར་པའི་ཕྱིར་དང ། སེམས་རླུང་དང་མཚུངས་པར་གྱུར་པའི་ཕྱིར་དང ། སེམས་ནམ་མཁའ་དང་མཚུངས་པར་གྱུར་པའི་ཕྱིར་དང ། སེམས་ཆོས་ཀྱི་དབྱིངས་དང་མཚུངས་པར་གྱུར་པའི་ཕྱིར་དང ། སེམས་རྣམ་པར་གྲོལ་བ་དང་མཚུངས་པར་གྱུར་པའི་ཕྱིར་དང ། སེམས་མྱ་ངན་ལས་འདས་པ་དང་མཚུངས་པར་གྱུར་པའི་ཕྱིར་ཏེ། འདི་ནི་སེམས་ཀྱི་ཁམས་མཉམ་པ་ཉིད་རྣམ་པ་བརྒྱད་ཅེས་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། །སེམས་ནི་ས་དང་མཚུངས་པས་ན། །ཐམས་ཅད་ཁུར་དུ་ཁྱེར་བར་བྱེད། །དགེ་བ་དང་ནི་སྡིག་པའང་རུང ། །འཕེལ་བ་མེད་ཅིང་འགྲིབ་པ་མེད། །སེམས་ནི་ཆུ་དང་མཚུངས་པས་ན། །དྲི་མ་མི་གཙང་འཁྲུ་བྱེད་ཅིང ། །འཇིག་རྟེན་རྣམས་ནི་གསོ་བ་དང ། །ཉོན་མོངས་གདུང་བ་སེལ་བར་བྱེད། །སེམས་ནི་མེ་དང་མཚུངས་པས་ན། །ཉོན་མོངས་དག་ནི་སྲེག་བྱེད་ཅིང ། །སྒྲོན་མ་ཆེན་པོ་སྣང་བ་ཡིས། །གསལ་བར་མི་བྱེད་གང་ཡང་མེད། །སེམས་ནི་རླུང་དང་མཚུངས་པས་ན། །གནས་པ་མེད་ཅིང་རྟེན་མེད་པར། །ཚུལ་ཁྲིམས་ཐོས་པའི་དྲི་ཡིས་ནི། །དུས་གསུམ་ཀུན་ཏུ་ཁྱབ་པར་བྱེད། །སེམས་ནི་ནམ་མཁའ་མཚུངས་པས་ན། །ལྟ་བ་སྤོང་ཞིང་རྣམ་པར་དག་།ཐམས་ཅད་ཀུན་དུ་འཇུག་བྱེད་ཀྱང ། །བདུད་ཀྱི་རྗེས་སུ་འབྲང་མི་བྱེད། །སེམས་ནི་ཆོས་དབྱིངས་མཚུངས་པས་ན། །བདེ་བ་ཉིད་དུ་རབ་གནས་ཤིང ། །འཕེལ་བ་མེད་ཅིང་འགྲིབ་མེད་པར། །རྟག་པར་མཉམ 83.107b པ་ཉིད་ལ་གནས། །ཉན་ཐོས་དང་ནི་རང་རྒྱལ་གྱི། །རྣམ་པར་གྲོལ་བ་ཐོབ་གྱུར་ཀྱང ། །འཆིང་བ་དག་ཀྱང་ཡོད་མིན་ལ། །གྲོལ་བ་དག་ཀྱང་ཡོད་པ་མིན། །འཁོར་བ་དང་ནི་མྱ་ངན་འདས། །འོང་བ་མེད་ཅིང་འགྲོ་མེད་ཅེས། །རབ་དབེན་ཉེར་ཞིར་གནས་ནས་ནི། །དུས་གསུམ་ཀུན་དུ་འགྲོ་བར་བྱེད། །གཞན་ཡང་བུ་མོ་ཆོས་རྣམ་པ་བརྒྱད་དང་ལྡན་པའི་བྱང་ཆུབ་སེམས་དཔའ་ནི་བྱང་ཆུབ་ཀྱི་འབྱུང་གནས་སུ་འགྱུར་རོ། །བརྒྱད་གང་ཞེ་ན། དང་པོ་ནི་སྦྱིན་པ་འབྱུང་གནས་སུ་གྱུར་པ་ཡིན་ཏེ། ཅི་བདོག་པ་རྣམས་ཡོངས་སུ་གཏོང་བའི་ཕྱིར་རོ། །གཉིས་པ་ནི་ཚུལ་ཁྲིམས་འབྱུང་གནས་སུ་གྱུར་པ་ཡིན་ཏེ། ཉམས་པ་མེད་པའི་ཕྱིར་རོ། །གསུམ་པ་ནི་བཟོད་པ་འབྱུང་གནས་སུ་གྱུར་པ་ཡིན་ཏེ། ཞེས་སྡང་མེད་པའི་ཕྱིར་རོ། །བཞི་པ་ནི་བརྩོན་འགྲུས་འབྱུང་གནས་སུ་གྱུར་པ་ཡིན་ཏེ། ལེ་ལོ་མེད་ཅིང་ནུར་བ་མེད་པའི་ཕྱིར་རོ། །ལྔ་པ་ནི་བསམ་གཏན་འབྱུང་གནས་སུ་གྱུར་པ་ཡིན་ཏེ། ཐབས་ལ་མཁས་པའི་ཕྱིར་རོ། །དྲུག་པ་ནི་ཤེས་རབ་འབྱུང་གནས་སུ་གྱུར་པ་ཡིན་ཏེ། ཚུལ་ཁྲིམས་སྲུང་ཞིང་མང་དུ་ཐོས་པ་དང་ལྡན་པའི་ཕྱིར་རོ། །བདུན་པ་ནི་ཚངས་པའི་གནས་པ་འབྱུང་གནས་སུ་གྱུར་པ་ཡིན་ཏེ། རྣམ་པར་གྲོལ་བས་ཉེ་བར་ཞི་བར་འགྱུར་བའི་ཕྱིར། བརྒྱད་པ་ནི་མངོན་པར་ཤེས་པ་འབྱུང་གནས་སུ་གྱུར་པ་ཡིན་ཏེ། རྟག་པར་མཉམ་པར་བཞག་པ་ལ་རབ་ཏུ་གནས་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྟག་པར་སྦྱིན་པ་གང་གཏོང་བ། །འདོད་ཆགས་གདུང་བ་སྤོང་བས་ན། །འབྲས་བུ་རྣམ་སྨིན་མི་རེ་བར། །སངས་རྒྱས་བྱང་ཆུབ་བསྔོ་བར་བྱེད། །ཁྲིམས་ལྡན་ཐེག་པ་ཆེ་བའི་ཕྱིར། །བཅད་ཅིང་གཏུབས་ཀྱང་ཁོང་ཁྲོ་མེད། །རྩེ་གཅིག་བདེ་ཆེན་གཉེར་བྱེད་ཅིང ། །བག་ཆགས་སྤངས་ནས་འགོག་མངོན་མེད། །བྱང་ཆུབ་སེམས་དཔའ་བརྩོན་འགྲུས་ཅན། །བསྐལ་མང་སེམས་ཅན་ཆེད་དུ་ནི། །སྡུག་བསྔལ་བཟོད་ཅིང་འཇིག་རྟེན་རྒྱུ། །བརྩོན་འགྲུས་སྟོབས་ནི་འཕེལ་བར་བྱེད། །བསམ་གཏན་དག་ནི་གང་སྒོམ་པ། །སྤྲོས་པ་རྣམས་ནི་སྤོང་བྱེད 83.108a ཅིང ། །བསམ་གཏན་ཕ་རོལ་ཕྱིན་གྱུར་ཀྱང ། །བསམ་གཏན་རྗེས་སུ་ཡོང་མི་སྐྱེ། །ཤེས་རབ་ཆེན་པོ་མཚུངས་མེད་པས། །མཐར་ལྟ་རྣམས་ནི་སྤོང་བྱེད་ཅིང ། །འཇིག་རྟེན་སྟོང་དབེན་རིག་པ་ནས། །གཏི་མུག་མུན་པ་མ་ལུས་སེལ། །ཉེར་ཞི་ཚངས་གནས་གང་སྒོམ་པ། །ངན་སོང་རྣམས་ནི་སྤངས་པས་ན། །རྟག་པར་བརྒྱ་བྱིན་ཚངས་པར་འགྱུར། །དོན་གྱི་ཕན་པ་ཡོན་ཏན་སྒོམ། །མངོན་ཤེས་སངས་རྒྱས་ཞིང་རྒྱུ་བ། །སངས་རྒྱས་བསྙེན་བཀུར་ཆོས་ཀྱང་ཉན། །རང་བཞིན་མོས་པ་རབ་ཤེས་པས། །ཆོས་བཤད་སེམས་ཅན་ཟློས་པར་བྱེད། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་བརྒྱད་དང་ལྡན་པའི་ཕྱིར་གཟུངས་དང ། ཐོགས་པ་མེད་པའི་སྤོབས་པ་འཐོབ་པར་འགྱུར་རོ། །བརྒྱད་གང་ཞེ་ན། ཆོས་ལ་བླ་མར་བྱེད་པའི་ཕྱིར་དང ། མཁན་པོ་དང ། སློབ་དཔོན་ལ་རིམ་གྲོ་བྱེད་པའི་ཕྱིར་དང ། ཆོས་ཡོངས་སུ་གཉེར་བ་ལ་སྐྱོ་བ་མེད་པའི་ཕྱིར་དང ། ཇི་སྐད་ཐོས་པ་བཞིན་དུ་ཡང་དག་པར་སྟོན་པར་བྱེད་པའི་ཕྱིར་དང ། ཆོས་ལ་སེར་སྣ་མི་བྱེད་པའི་ཕྱིར་དང ། གཞན་གྱི་ཉེས་པ་སྒྲོགས་པར་མི་བྱེད་པའི་ཕྱིར་དང ། ཆོས་སྨྲ་བ་དག་ལ་མཁན་པོ་བཞིན་དུ་གུས་པས་སྲི་ཞུ་བྱེད་པའི་ཕྱིར་དང ། གཞན་གྱི་ཉེས་པ་མི་མཐོང་ཞིང་ཉེས་པ་སྤང་བར་སྐུལ་བར་བྱེད་པའི་ཕྱིར་ཏེ། འདི་ནི་བྱང་ཆུབ་སེམས་དཔའ་ཆོས་བརྒྱད་དང་ལྡན་ན་གཟུངས་དང ། ཐོགས་པ་མེད་པའི་སྤོབས་པ་ཕུན་སུམ་ཚོགས་པ་འཐོབ་པར་འགྱུར་བ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྩེ་གཅིག་རྟག་ཏུ་ཆོས་གཉེར་བ། །མཁན་པོ་དགེ་བཤེས་རིམ་གྲོ་བྱེད། །སྡིག་པའི་གྲོགས་པོ་སྤོང་བས་ན། །མི་ཟད་གཏེར་འཛིན་ཐོབ་པར་འགྱུར། །མང་ཐོས་ཡོངས་སུ་སྐྱོ་མེད་པར། །རབ་བརྩོན་ཆོས་ནི་གཉེར་བར་བྱེད། །ཇི་སྐད་ཐོས་བཞིན་སྟོན་བྱེད་པས། །རྙེད་པ་དག་ལ་རེ་ཚོལ་མེད། །སྤོབས་པ་རྣམ་དག་གང་ཐོབ་པ། །འཁོར་མང་དགའ་བར་བྱེད་པས་ན། །ཆོས་སྦྱིན་པ་ལ་རབ་མོས་ཤིང ། །སེར་སྣ་ཕྲག་དོག་སྤོང་བར་བྱེད། །ཆོས་སྤྱོད་མངོན་པར་ཞན 83.108b མེད་ཅིང ། །གཟུངས་ནི་གང་ཞིག་ཐོབ་འགྱུར་བ། །ཁྲིམས་སྲུང་རང་ལུས་ལྟ་བས་ན། །གཞན་གྱི་ཉེས་སྐྱོན་ཡོད་མི་ཚོལ། །བྱམས་དང་སྙིང་རྗེ་གནས་གྱུར་ཅིང ། །དུས་མིན་ཚིག་ནི་མི་སྨྲ་བས། །ཐོགས་མེད་སྤོབས་པ་ཐོབ་གྱུར་ནས། །སྤྲོ་ཚིག་ཕ་རོལ་ཕྱིན་པ་སྟོན། །ཆོས་ནི་ལེགས་པར་སྨྲ་བ་ལ། །མཁན་པོ་བཞིན་དུ་གུས་པར་བྱེད། །སྐྱོན་འཚབ་ཉེས་པ་སྤོང་སྐུལ་བས། །མི་ཟད་ཀུན་འཛིན་རྒྱ་མཚོ་འཐོབ། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར་སངས་རྒྱས་རྣམས་ཀྱི་སྤྱན་སྔར་པད་མ་ལས་བརྫུས་ཏེ་སྐྱེ་བར་འགྱུར་རོ། །བརྒྱད་གང་ཞེ་ན། སྲོག་ལ་བབ་པར་གྱུར་ཀྱང་གཞན་གྱི་ཉེས་པ་མི་བརྗོད་པ་དང ། སེམས་ཅན་རྣམས་དཀོན་མཆོག་གསུམ་ལ་སྐྱབས་སུ་འགྲོ་བར་སྐུལ་བ་དང ། ཐམས་ཅད་བྱང་ཆུབ་ཀྱི་སེམས་ལ་འགོད་པ་དང ། ཚངས་པར་སྤྱོད་པ་ལ་གོས་པ་མེད་པ་དང ། དེ་བཞིན་གཤེགས་པའི་སྐུ་གཟུགས་དག་བྱས་ནས་པད་མོའི་གདན་ལ་འཇོག་པ་དང ། སེམས་ཅན་མྱ་ངན་བྱེད་པ་དག་གི་མྱ་ངན་སེལ་བར་བྱེད་པ་དང ། ཁེངས་ཤིང་ང་རྒྱལ་བྱེད་པ་དག་གི་མདུན་དུ་རྟག་པར་བདག་ཉིད་དམན་པར་བྱེད་དང ། གཞན་ལ་འཚེ་བ་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་པ་དེ་བཀའ་སྩལ་པ། །གལ་ཏེ་སྡུག་བསྔལ་གཟིར་གྱུར་ཀྱང ། །ནམ་ཡང་གཞན་གྱི་སྐྱོན་མི་སྨྲ། །རྟག་པར་དཀོན་མཆོག་གང་བསྔགས་པ། །སངས་རྒྱས་སྤྱན་སྔར་རྫུས་ཏེ་སྐྱེ། །བྱང་ཆུབ་སེམས་ནི་བསྐྱེད་པ་དང ། །ཐམས་ཅད་མཁྱེན་པ་གཉེར་བསྐུལ་ནས། །རྟག་པར་ཚངས་པར་གང་སྤྱོད་པ། །སངས་རྒྱས་སྤྱན་སྔར་རྫུས་ཏེ་སྐྱེ། །གསེར་གྱི་སངས་རྒྱས་གཟུགས་བརྒྱན་ཏེ། །རིན་ཆེན་པད་མའི་གདན་ལ་བཞག་།སེམས་ཅན་མྱ་ངན་གང་སེལ་བ། །སངས་རྒྱས་སྤྱན་སྔར་རྫུས་ཏེ་སྐྱེ། །ང་རྒྱལ་བྱེད་པ་དེ་དག་ལ། །སློབ་མ་བཞིན་དུ་བདག་དམན་ཞིང ། །གཞན་ལ་གང་ཞིག་མི་འཚེ་བ། །སངས་རྒྱས་སྤྱན་སྔར 83.109a རྫུས་ཏེ་སྐྱེ། །གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་པར་གྱུར་ན་སྦྱངས་པའི་ཡོན་ཏན་ཕུན་སུམ་ཚོགས་པར་འགྱུར་ཞིང་རྟག་པར་དགོན་པ་ན་གནས་པ་ལ་མོས་པར་འགྱུར་རོ། །བརྒྱད་གང་ཞེ་ན། འདོད་པ་ཆུང་བ་དང ། ཆོག་ཤེས་པ་དང ། །དགེ་བའི་ཆོས་ཡོངས་སུ་རྫོགས་པར་གྱུར་པ་དང ། དགེ་བས་བདག་ཉིད་གསོ་བར་བྱེད་པ་དང ། རྟག་པར་འཕགས་པའི་རིགས་ཡོངས་སུ་འཛིན་པ་དང ། འཁོར་བའི་ཉེས་དམིགས་མཐོང་བས་སེམས་ལ་རྟག་པར་སྐྱོ་བ་དང ། རྟག་པར་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པར་ལྟ་བ་དང ། དད་པ་ཤིན་ཏུ་བརྟན་ཞིང་གཞན་གྱི་དྲིང་ལ་མི་འཇོག་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། །འདོད་པ་ཆུང་ཞིང་ཆོག་ཤེས་པས། །ཆོས་དགའ་དགེ་མང་བདག་ཉིད་གསོ། །རྟག་པར་འཕགས་རིགས་སྒྲུབ་ལ་མོས། །འཁོར་བའི་སྐྱོན་མཐོང་སེམས་ལ་སྐྲག་།སྦྱངས་པ་དག་ལ་རྟག་མོས་པས། །བསེ་རུ་གཅིག་ལྟར་གྲོགས་ཀྱང་མེད། །འདུས་བྱས་སྡུག་བསྔལ་བདག་མེད་ཅེས། །བློ་ཡིས་རབ་དང་བརྩོན་འགྲུས་གནས། །ཆོས་མཐོང་གཞན་གྱི་རྗེས་མི་འབྲང ། །རྟག་པར་དབེན་གནས་སངས་རྒྱས་བསྔགས། །སྦྱངས་པས་ཐག་བསྲིངས་གདུང་བ་མེད། །རྩོད་པ་ཉེས་དམིགས་མང་པོ་མེད། །གཉེན་བཤེས་ཡོངས་སྤངས་བསྔགས་པ་རྗོད། །དེས་ན་དགོན་པར་གནས་ལ་མོས། །གཞན་ཡང་བུ་མོ་བྱང་ཆུབ་སེམས་དཔའི་ཆོས་རྣམ་པ་བརྒྱད་དང་ལྡན་པའི་ཕྱིར་བདུད་ཀྱི་དཔུང་རབ་ཏུ་ཕམ་པར་བྱེད་དོ། །བརྒྱད་གང་ཞེ་ན། ངོ་བོ་ཉིད་སྟོང་པ་ཉིད་ལ་ཞུགས་པ་དང ། མཚན་མ་མེད་པ་ལ་མངོན་པར་ཡིད་ཆེས་པ་དང ། སྨོན་པ་མེད་པ་ལ་མངོན་པར་ཡིད་ཆེས་པ་དང ། མངོན་པར་འདུ་བྱ་བ་མེད་པར་རབ་ཏུ་ཤེས་པ་དང ། དེ་ལ་ཐེ་ཚོམ་དང་སོམ་ཉི་མེད་པ་དང ། སྐྱེ་བ་མེད་པར་རབ་ཏུ་བཟོད་པ་དང ། ངོ་བོ་ཉིད་མེད་པར་རབ་ཏུ་རྟོགས་པ་དང ། ཐབས 83.109b ལ་མཁས་པས་ཆོས་ཐམས་ཅད་ལ་སོ་སོར་རྟོག་ཅིང་དེ་བཞིན་ཉིད་འཇིག་པར་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། །སྟོང་དང་མཚན་མ་མེད་དང་སྨོན་མེད་པ། །རྣམ་ཐར་གསུམ་ཐོབ་བདུད་དཔུང་རབ་ཏུ་འཇོམ། །འདུས་བྱས་འདུས་མིན་མཚན་ཉིད་གཉིས་སུ་མེད། །སྐྱེ་མེད་ཐོབ་པས་རྣམ་པར་གྲོལ་བར་འགྱུར། །ཆོས་རྣམས་སྐྱེ་མེད་དེ་ལྟར་གང་བཟོད་པ། །དེ་དག་བདུད་དཔུང་རབ་ཏུ་ཕམ་པར་བྱེད། །སྐྱེ་བ་མེད་དང་འགག་མེད་འདི་དག་དང ། །ཕུང་པོ་ཁམས་ལ་བདག་མེད་སྒྱུ་མ་འདྲ། །ཆོས་ལ་ངོ་བོ་ཉིད་མེད་རབ་ཏུ་རྟོགས། །དེ་བཞིན་ཉིད་ནི་མི་འཇིག་ཐབས་མཁས་པས། །ཆོས་རྣམས་བདུད་ཀྱི་ལས་ཤེས་གང་འབྱེད་པ། །རྣམ་རྟོག་སྤངས་ནས་བདུད་ནི་ཕམ་པར་བྱེད། །ཐབས་དང་ཤེས་རབ་གཉིས་ཀ་རབ་སྤྱོད་ཅིང ། །ཡོད་དང་སྟོང་ལ་གནས་པ་མེད་པར་ནི། །དེ་ལྟར་ཆོས་མཆོག་གང་ཞིག་སྒོམ་བྱེད་པ། །ཐབས་མཁས་གཟུགས་ལུས་མཛེས་པ་འཐོབ་པར་འགྱུར། །གཞན་ཡང་བུ་མོ་བྱང་ཆུབ་སེམས་དཔའ་ནི། ཆོས་རྣམ་པ་བརྒྱད་དང་ལྡན་པའི་ཕྱིར་བྱང་ཆུབ་དང ། ནམ་ཡང་འབྲལ་བར་མི་འགྱུར་རོ། །བརྒྱད་གང་ཞེ་ན། ཡང་དག་པའི་ལྟ་བས་ལོག་པར་ལྟ་བའི་སེམས་ཅན། ཡོངས་སུ་སྨིན་པར་བྱེད་པ་དང ། ཡང་དག་པའི་དྲན་པས་ལོག་པར་སེམས་པའི་སེམས་ཅན་ལ་སྙིང་བརྩེ་བར་བྱེད་པ་དང ། ཡང་དག་པའི་ངག་གིས་ལོག་པར་སྨྲ་བ་རྣམས་ལ། སྙིང་བརྩེ་བར་བྱེད་པ་དང ། ཡང་དག་པའི་ལས་ཀྱི་མཐས་ལོག་པའི་ལས་ཅན་རྣམས་ཡོངས་སུ་སྡུད་པ་དང ། ཡང་དག་པའི་རྩོལ་བས་ལོག་པར་རྩོལ་བ་རྣམས་ཡོངས་སུ་ཟློག་པ་དང ། ཡང་དག་པའི་འཚོ་བས་ལོག་པར་འཚོ་བའི་སེམས་ཅན་རྣམས་སྤོང་བར་མི་བྱེད་པ་དང ། ཡང་དག་པའི་རྟོགས་པས་ལོག་པར་ཡིད་ལ་བྱེད་པ་སྤོང་བར་བྱེད་པ་དང ། 83.110a ཡང་དག་པའི་ཏིང་ངེ་འཛིན་གྱིས་ལོག་པའི་ཏིང་ངེ་འཛིན་ལ་གནས་པ་དག་།བསླད་ནས་གོང་དུ་རྩོལ་དུ་གཞུག་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། ཡང་དག་ལྟ་དང་གང་ལྡན་པ། །ལོག་ལྟ་དེ་དག་སྨིན་པར་བྱེད། །རྟག་པར་ཡང་དག་དྲན་སྒོམ་པ། །ལོག་སེམས་དག་ལ་བརྩེ་བར་བྱེད། །རྣམ་དག་ཡང་དག་ངག་གིས་ནི། །ལོག་སྨྲ་རྣམས་ལ་བརྩེ་བར་བྱེད། །ཡང་དག་ལས་མཐའ་གནས་པ་ཡིས། །ལོག་པའི་ལས་ཅན་སྡུད་པར་བྱེད། །རྟག་པར་ཡང་དག་རྩོལ་བསྒོམས་ནས། །ལོག་བརྩོན་དག་ནི་སྤོང་བར་བྱེད། །ཡང་དག་འཚོ་བས་རྗེས་འཐུན་པས། །ལོག་འཚོ་གང་ཡིན་སྡུད་པར་བྱེད། །བློ་ལྡན་ཡང་དག་རྟོག་པ་ཡིས། །ལོག་པར་ཡིད་བྱེད་བརྩེ་བར་སེམས། །ཡང་དག་ཏིང་འཛིན་རྟག་གནས་ནས། །ལོག་པའི་ཏིང་འཛིན་སྡུད་པར་བྱེད། །བླ་མེད་ཡང་དག་ལམ་བརྒྱད་ཀྱིས། །ཆུ་བོ་དག་ལ་སྒྲོལ་བར་བྱེད། །རྒྱུན་ཕྱོགས་དེད་པ་ཟློག་བྱེད་པས། །དེ་ནི་བྱང་ཆུབ་ལམ་ཆེན་ཡིན། །ཉན་ཐོས་དང་ནི་རང་རྒྱལ་རྣམས། །རྩཝ་ཡི་གཟིངས་བཞིན་བདག་ཉིད་ཟློག་།བྱང་ཆུབ་སེམས་དཔའ་ཀུན་ཟློག་པས། །དཔེར་ན་གྲུ་ཆེན་འདྲེན་མཁན་འདྲ། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར། བདུད་རྩིའི་ལམ་མངོན་སུམ་དུ་བྱེད་པར་འགྱུར་རོ། །བརྒྱད་གང་ཞེ་ན། རྩོད་པ་མེད་པའི་ཆོས་ལ་གནས་པ་དང ། ཐོགས་པའི་སེམས་ལེགས་པར་རབ་ཏུ་སྲུང་བར་བྱེད་པ་དང ། རྟག་པར་དེ་ཁོ་ན་ཉིད་ཀྱི་དོན་ལ་ལྟ་བར་བྱེད་པ་དང ། བྱང་ཆུབ་ཀྱི་སེམས་ལ་རབ་ཏུ་གནས་ནས། རྗེས་སུ་དྲན་པ་དྲུག་སྒོམ་པར་བྱེད་པ་དང ། ནན་ཏན་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་སྒོམ་པར་བྱེད་པ་དང ། དགེ་བའི་རྩ་བ་བསགས་ནས་སེམས་ཅན་ཡོངས་སུ་སྨིན་པར་བྱེད་པ་དང ། སྙིང་རྗེ་ཆེན་པོ་ལ་གནས་ནས་ཡང་དག་པའི 83.110b ཆོས་ཡོངས་སུ་སྡུད་པར་བྱེད་པ་དང ། མི་སྐྱེ་བའི་ཆོས་ལ་བཟོད་པ་ཐོབ་ནས། ཕྱིར་མི་ལྡོག་པ་ལ་རབ་ཏུ་གནས་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། །རྟག་པར་རྩོད་མེད་སྤྱོད་བསྒྲུབས་ན། །དགེ་སྦྱོང་ཆེན་པོའི་ཆོས་ལ་གནས། །ཞེ་སྡང་ཉེས་པ་ཡོངས་སྤངས་ནས། །དགེ་བའི་རྩ་བ་སོགས་པར་བྱེད། །ཡང་དག་དོན་ལ་རབ་ལྟ་བས། །མི་ཟད་སྤོབས་རྣམས་འཐོབ་པར་བྱེད། །བྱང་ཆུབ་སེམས་ལ་རབ་གནས་ནས། །རྟག་པར་དྲན་མེད་རྗེས་སུ་དྲན། །ཕ་རོལ་ཕྱིན་པ་ཐམས་ཅད་ལ། །རབ་བརྩོན་བསྒྲུབས་པས་ལོག་པ་མེད། །ཐབས་མཁས་སྟོབས་རྣམས་ཐོབ་པས་ན། །དེས་ནི་སེམས་ཅན་སྒྲོལ་བར་བྱེད། །ཆོས་ཀྱི་མངའ་བདག་ནོར་གྱིས་ནི། །བརྩེ་སེམས་ཐམས་ཅད་ཀུན་སྡུད་པས། །མྱུར་དུ་མི་སྐྱེ་བཟོད་ཐོབ་ནས། །བྱང་ཆུབ་ལས་ནི་ལྡོག་མི་འགྱུར། །གལ་ཏེ་དེ་ལྟར་སྤྱོད་ནུས་ནས། །སངས་རྒྱས་ཆོས་ནི་ཐོབ་མི་དཀའ། །རིང་པོར་མི་ཐོགས་བདུད་བཏུལ་ནས། །བྱང་ཆུབ་མཆོག་ནི་ཐོབ་པར་འགྱུར། །དེ་ནས་བུ་མོ་དེས་ཆོས་དེ་ལྟ་བུ་ཐོས་ནས་དགའ་མགུ་རངས་པར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་དང་ལྡན་པར་གྱུར་ན་བུད་མེད་ཀྱི་དངོས་པོ་ལས་ལྡོག་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། བུ་མོ་ཆོས་བརྒྱད་དང་ལྡན་པར་གྱུར་ན་བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །བརྒྱད་གང་ཞེ་ན། ཕྲག་དོག་མི་བྱེད་པ་དང ། སེར་སྣ་མི་བྱེད་པ་དང ། གཡོ་སྒྱུ་མེད་པ་དང ། ཁོང་ཁྲོ་བ་མེད་པ་དང ། བདེན་པར་སྨྲ་བ་དང ། ངག་རྩུབ་པོ་མི་སྨྲ་བ་དང ། འདོད་ཆགས་སྤངས་པ་དང ། ལོག་པར་ལྟ་བ་རྣམས་སྤངས་པ་གང་ཡིན་པ་སྟེ། བུ་མོ་ཆོས་བརྒྱད་པོ་འདི་དག་མངོན་པར་བསྒྲུབས་ན། མྱུར་དུ་བུད་མེད་ཀྱི་དངོས་པོ་ལས་ལྡོག་པར 83.111a འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གཞན་ལ་ཕྲག་དོག་མི་བྱེད་ཅིང ། །སེར་སྣ་སྤངས་ནས་ཆོས་མོས་དང ། །གཡོ་སྒྱུ་དག་ནི་མི་སྤྱོད་ཅིང ། །བུད་མེད་ལུས་ལ་སྐྱོ་བ་དང ། །བྱམས་སེམས་ཞེ་སྡང་རབ་སྤངས་ནས། །རྟག་པར་བདེན་ཚིག་སྨྲ་བ་དང ། །འདོད་བསལ་ངག་རྩུབ་སྤངས་ནས་ནི། །ཡང་དག་ལྟ་ལ་གནས་པར་བྱ། །གང་གི་བུད་མེད་ལུས་སྐྱོ་ནས། །འདི་འདྲའི་ཆོས་ནི་སྒྲུབ་བྱེད་ན། མྱུར་དུ་བུད་མེད་དངོས་སྤངས་ནས། །སྐྱེས་པའི་ལུས་བཟང་ལེན་པར་འགྱུར། གཞན་ཡང་བུ་མོ་ཆོས་བརྒྱད་དང་ལྡན་པར་གྱུར་ན། །བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །བརྒྱད་གང་ཞེ་ན། སངས་རྒྱས་ལ་བླ་མར་བྱེད་ཅིང ། ཆོས་ལ་ཤིན་དུ་མོས་པ་དང ། ཚུལ་ཁྲིམས་དང ། བཟོད་པ་དང ། མང་དུ་ཐོས་པ་དང་ལྡན་པའི་དགེ་སྦྱོང་དང་བྲམ་ཟེ་དག་ལ་བསྙེན་བཀུར་དང་རིམ་གྲོར་བྱེད་པ་དང ། སྐྱེས་པ་དང ། བུད་མེད་དང ། ཁྱིམ་གྱི་དངོས་པོ་དག་ལ་མངོན་པར་ཞེན་ཅིང ། ཆགས་པ་མེད་པ་དང ། བསླབ་པའི་དངོས་པོ་ཡང་དག་པར་བླངས་པ་རྣམས་འཇིག་པར་མི་བྱེད་པ་དང ། སྲོག་ཆགས་རྣམས་ལ་ལྡོག་པའི་བསམ་པ་མི་སྐྱེད་པ་དང ། ལྷག་པའི་བསམ་པས་བུད་མེད་ཀྱི། དངོས་པོ་ལ་ཡོངས་སུ་སྐྱོ་བར་འགྱུར་བ་དང ། བྱང་ཆུབ་ཀྱི་སེམས་ཀྱིས་སྐྱེས་བུ་ཆེན་པོའི་ཆོས་ལ་གནས་པ་དང ། འཇིག་རྟེན་པའི་ཁྱིམ་གྱི་འཚོ་ཆོས་རྣམས་ལ་སྒྱུ་མ་ལྟ་བུ་དང་རྨི་ལམ་ལྟ་བུར་ལྟ་བ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། །སངས་རྒྱས་རབ་གུས་ཆོས་ལ་མོས། །ཚུལ་ཁྲིམས་མང་ཐོས་བླ་མར་བྱེད། །འདོད་ཆགས་སྲེད་སེམས་མི་སྐྱེད་ན། །བུད་མེད་དངོས་པོ་མྱུར་དུ་སྤོང ། །ཁྲིམས་སྲུང་ངོ་ཚ་ཁྲེལ་ཡོད་ལྡན། །གཞན་ལ་མི་བདེན་བསམ་མི 83.111b བྱེད། །བྱང་ཆུབ་སེམས་ལ་རབ་གནས་ནས། །ཐེག་པ་གཞན་ལ་མོས་མེད་ན། །དེས་ནི་མྱུར་བ་ཁོ་ནར་ཡང ། །མི་གཙང་བུད་མེད་དངོས་པོ་སྤོང ། །བསམ་པ་མཆོག་གིས་སེམས་སྐྱོ་ནས། །ཐམས་ཅད་སྒྱུ་མ་ལྟ་བུ་དང ། །ཆོས་རྣམས་རང་བཞིན་གཡོ་མེད་དང ། རྒྱུ་རྐྱེན་རང་བཞིན་སྟོང་དབེན་ཞེས། །ནན་ཏན་ཡང་དག་ཆོས་བསྒོམས་ན། །མྱུར་དུ་སྐྱེས་པའི་ལུས་འཐོབ་འགྱུར། །དེ་ནས་བུ་མོ་རྣམ་དག་དད་པས་གསེར་གྱི་ཕྲེང་བ་ཐོགས་པ་དེ་དག་བཅོམ་ལྡན་འདས་ལ་མངོན་པར་གཏོར་བ་དང ། །སྟེང་གི་བར་སྣང་ལ་གསེར་ཡང་དག་པའི་གཞལ་མེད་ཁང ། ཁང་པ་བརྩེགས་པ་དག་ཏུ་གྱུར་ནས་གཞལ་མེད་ཁང་དེ་དག་གིས་ནང་ན་སྤྲུལ་པའི་དེ་བཞིན་གཤེགས་པ་གསེར་གྱི་གདན་ལ་བཞུགས་པ། ཤ་སྟག་མངོན་དུ་བྱུང་བར་གྱུར་ཏོ། །དེ་ནས་བུ་མོ་ལྔ་བརྒྱ་པོ་དེ་དག་ཀྱང་སོ་སོ་ནས། ལུས་ཀྱི་རྒྱན་རྣམས་བཀྲོལ་ནས་བཅོམ་ལྡན་འདས་ལ་མངོན་པར་གཏོར་བ་དང ། སྟེང་གི་བར་སྣང་ལ་གསེར་གྱི་གཞལ་མེད་ཁང་དང ། རིན་པོ་ཆེའི་གུར་དང ། རིན་པོ་ཆེའི་གདུགས་དང ། བཀོད་པ་རྣམ་པ་སྣ་ཚོགས་སུ་གྱུར་ཏོ། །དེ་ནས་བུ་མོ་ལྔ་བརྒྱ་པོ་དེ་དག་གིས་དེ་ལྟ་བུའི་ཆོས་འཕྲུལ་ཆེན་པོ་མཐོང་བ་དང ། སྐད་འཐུན་པར་ཚིགས་སུ་བཅད་དེ་སྨྲས་པ། །བཅོམ་ལྡན་མི་མཆོག་ཁྱད་པར་འཕགས་པས་ན། །ཐུགས་རྗེས་སེམས་ཅན་རྣམས་ལ་སྨན་པར་མཛད། །བདག་ཅག་དེང་ནི་བྱང་ཆུབ་སེམས་བསྐྱེད་ནས། །མོས་པ་རྗེས་འཐུན་རབ་ཏུ་དུལ་ལ་གནས། །བཅོམ་ལྡན་འདྲེན་པ་བདེ་བ་རབ་སྩོལ་པ། །བདག་ཅག་མི་མཆོག་ལ་ནི་མཆོད་པར་བགྱི། །ཆོས་ཐོས་དབང་གིས་རྡུལ་རྣམས་རབ་སྤངས་ནས། །བདག་ཅག་ཐེ་ཚོམ་ནེམ་ནུར་ཡོངས་མ་མཆིས། །དེས་ན་བུད་མེད་ཉོན་མོངས་མང་སྤངས་ནས། །ཉོན་མོངས་གཏན་བཅོམ་བདུད་ནི་ཕམ་པར་བགྱི། །ཕྱོགས་བཅུའི་སངས་རྒྱས་བྱེ་བ 83.112a ཚད་མེད་རྣམས། །བདག་ཅག་དགའ་བས་རྟག་ཏུ་མཆོད་པར་འཚལ། །སྦྱིན་དང་ཚུལ་ཁྲིམས་བརྩོན་འགྲུས་རབ་གནས་ནས། །བཟོད་དང་བསམ་གཏན་སེམས་ནི་རབ་ཏུ་བགྱི། །ཐབས་དང་ཤེས་རབ་སེམས་ཅན་ཡོངས་བསྡུས་ནས། །བྱང་ཆུབ་མཆོག་ལམ་གང་ལགས་མངོན་དུ་བགྱི། །ལྷ་མིའི་འཁོར་ནི་ཚད་མེད་སྨན་བཏགས་ནས། །ཐམས་ཅད་ཐེག་ཆེན་སེམས་ནི་བསྐྱེད་པར་བསྐུལ། །བདག་ཅག་སེང་གེའི་སྒྲ་ནི་སྒྲོགས་པར་འགྱུར། །བདག་ཅག་ལྷ་མིའི་སྟོན་པ་བགྱིད་པར་མཆི། །དེ་ནས་བཅོམ་ལྡན་འདས་འཛུམ་པ་མཛད་དོ། །སངས་རྒྱས་རྣམས་ཀྱི་ཆོས་ཉིད་ནི་ནམ་འཛུམ་པ་མཛད་པ་ན་འོད་ཟེར་ཁ་དོག་རྣམ་པ་སྣ་ཚོགས་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་དང ། དངུལ་དང ། ཤེལ་གྱི་ཁ་དོག་ལྟ་བུ་དག་དེ་བཞིན་གཤེགས་པའི་ཞལ་གྱི་སྒོ་ནས་བྱུང་སྟེ། འཇིག་རྟེན་གྱི་ཁམས་ཚད་མེད་དཔག་ཏུ་མེད་པ་དག་ནས། ཚངས་པའི་འཇིག་རྟེན་གྱི་བར་དུ་ཁྱབ་པར་སྣང་བར་བྱས་ནས། དེ་བཞིན་གཤེགས་པ་ལ་ལན་གསུམ་བསྐོར་བ་བྱས་ཏེ། དེ་བཞིན་གཤེགས་པའི་གཙུག་ཏུ་ཐིམ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་རྐྱེན་གང་གི་སླད་དུ་འཛུམ་པ་འདི་ལྟ་བུ་བསྟན་པར་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་བུ་མོ་རྣམ་དག་དད་པ་འདི་མཐོང་ངམ། ཀུན་དགའ་བོས་གསོལ་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བུ་མོ་རྣམ་དག་དད་པ་ལ་སོགས་པ་བུ་མོ་ལྔ་བརྒྱ་པོ་འདི་དག་ནི། འདི་ནས་ཚེ་ཟད་པ་དང ། བུད་མེད་ཀྱི་ལུས་སྤངས་ནས་དགའ་ལྡན་གྱི་ལྷའི་རིས་སུ་སྐྱེ་སྟེ། 83.112b བཅོམ་ལྡན་འདས་བྱམས་པ་དང ། བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་བཀུར་སྟི་དང ། རིམ་གྲོ་དང ། མཆོད་པ་བྱེད་པར་འགྱུར་བས་བུ་མོ་རྣམ་དག་དད་པས་བསྐལ་པ་བྱེ་བ་ཁྲག་ཁྲིག་བརྒྱད་ཁྲི་བཞི་སྟོང་འདས་པའི་འོག་ཏུ་འཇིག་རྟེན་གྱི་ཁམས་གློག་གི་འོད་ཅེས་བྱ་བར་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་འོད་ཟེར་གྱི་བཀོད་པ་ཞེས་བྱ་བར་འགྱུར་རོ། །བསྐལ་པའི་མིང་ནི་རྟག་པར་སྣང་བ་ཞེས་བྱའོ། །དེ་བཞིན་གཤེགས་པ་དེའི་སྐུ་ཚེའི་ཚད་ནི་དགའ་ལྡན་གྱི་ལྷ་བཞིན་དུ། ཚེ་ལོ་སྟོང་ཕྲག་བཅུ་གཉིས་ཐུབ་པར་འགྱུར་རོ། །འཇིག་རྟེན་གྱི་ཁམས་དེ་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གི་འཁོར་ཚད་མེད་དཔག་ཏུ་མེད་པ་དག་གིས་འཁོར་བྱེད་པར་འགྱུར་རོ། །བུ་མོ་ལྔ་བརྒྱ་པོ་འདི་དག་ཀྱང་འཁོར་དེ་དག་གི་ནང་ན་གཙོ་བོ་མཆོག་བྱེད་པར་འགྱུར་ཏེ། ཇི་ལྟར་ད་ལྟར་ངའི་ཚེ་བྱང་ཆུབ་སེམས་དཔའ་འཇམ་དཔལ་ལ་སོགས་པ་དྲུག་བཅུ་པོ་དག་གཙོ་བོར་གྱུར་པ་བཞིན་ནོ། །ཀུན་དགའ་བོ་བུད་མེད་གང་ལ་ལ་ཞིག་ཆོས་ཀྱི་རྣམ་གྲངས་འདི་ཐོས་ནས་ཡོངས་སུ་འཛིན་པར་བྱེད། ཀློག་པར་བྱེད། ཁ་ཏོན་དུ་འདོན་པར་བྱེད་ན་བུད་མེད་ཀྱི་ལུས་འདི་དག་གཏུགས་ནས་ཕྱིས་ཡང་ལེན་པར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བུ་མོ་རྣམ་དག་དད་པ་ལ་སོགས་པ་བུ་མོ་ལྔ་བརྒྱ་པོ། དེ་དག་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་རབ་ཏུ་དགའ་ནས་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བུ་མོ་རྣམ་དག་དད་པས 83.113a ཞུས་པའི་ལེའུ་སྟེ་བཞི་བཅུ་པ། །རྫོགས་སོ།། |