rKTs


J3

(e-text produced by ADARSHA)

see text in transliteration
5.21b
།།༄##། ་ ། རྒྱ་གར་སྐད་དུ། ་བི་ན་ཡ་བི་བྷང་ག ། ་བོད་སྐད་དུ། ་འདུལ་བ་རྣམ་པར་འབྱེད་པ། བམ་པོ་དང་པོ། དཀོན་མཆོག་གསུམ་ལ་ཕྱག་འཚལ་ལོ། །དུལ་བ་རྒྱལ་པོ་རྗེ་ཡི་རིགས་སུ་འཁྲུངས། །སློབ་མ་འདུལ་མཛད་ཉེས་པ་རབ་ཐུལ་བ། །སངས་རྒྱས་འདུལ་བའི་གཙོ་ལ་ཕྱག་འཚལ་ཏེ། །འདུལ་བའི་བསྔགས་པ་ཅུང་ཟད་བརྗོད་པར་བྱ། །ཕ་རོལ་མ་མཐོང་གཏིང་རྟོགས་མ་གྱུར་ཅིང ། །གླགས་པའི་མུན་གནག་སློབ་དཔོན་ཚོགས་རྣམས་ཀྱི། །དབྱེ་བས་ཐ་དད་འདུལ་བ་རྒྱ་མཚོ་ལ། །ཡོན་ཏན་ཀུན་བསྟོད་རྩོལ་བློ་བདག་ལ་མེད། །ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་ཚོགས་རྣམས་ཀུན་གྱི་ཡང ། །རྒྱུ་དང་རྩ་བ་འདུལ་བ་ཡིན་པར་གསུངས། །ཇི་ལྟར་ས་ནི་སྐྱེ་རྒུ་རྣམས་ཀྱི་གཞི། །དེ་ལས་འབྲུ་རྣམས་སྐྱེ་བར་འགྱུར་བ་ལྟར། །དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་བསོད་ནམས་རྣམས་ཀྱང་སྐྱེ། །ཚུལ་ཁྲིམས་ཡོན་ཏན་རྣམས་ཀྱི་གནས་སུ་དགོངས། །དེ་ཡི་གནས་ནི་འདུལ་བ་ཡིན་པར་གསུངས། །འདི་ལ་གནས་པར་གྱུར་ན་མཐར་ཕྱིན་འགྱུར། །འདི་ལ་མི་གནས་མཐར་ཕྱིན་ག་ལས་འགྱུར། །ཇི་ལྟར་ཆུ་ལོན་མི་ཕྱེད་སྲ་བ་ཡིས། །ཆུ་ཀླུང་ཆེ་ཡང་ཟློག་པར་འགྱུར་བ་ལྟར། །དེ་བཞིན་འདུལ་བ་འཕགས་པ
5.22a
ཆུ་ལོན་འདིས། །ཚུལ་ཁྲིམས་འཆལ་བའི་ཆུ་ཀླུང་ཟློག་པར་འགྱུར། །སངས་རྒྱས་རྣམས་དང་རང་རྒྱལ་རྣམས་ཀྱིས་ཀྱང ། །བྱང་ཆུབ་གང་བརྙེས་ཐུབ་སློབ་རྣམ་དག་པའི། །སེམས་ཅན་དགྲ་བཅོམ་ཡོན་ཏན་ལྡན་པ་རྣམས། །དེ་ལ་འང་རྒྱུ་ནི་འདུལ་བ་ཡིན་པར་གསུངས། །ཇི་སྲིད་འགྲོ་འདིར་རྒྱལ་བ་ཐམས་ཅད་ཀྱི། མཛོད་མཆོག་འདུལ་བ་རྫོགས་པ་འདི་གནས་པ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང ། །བཟློག་པར་གྱུར་ན་ཞི་བ་ཐོབ་པར་འགྱུར། །སངས་རྒྱས་མི་བཞུགས་འཇིག་རྟེན་ཚིགས་བཅད་དང ། །མདོ་སྡེའི་ཡན་ལག་དེ་དང་དེ་དག་སྤྱོད། །བསླབ་འཇུག་མེད་ན་འདུལ་བ་འང་མེད་འགྱུར་བས། །དེ་ཕྱིར་རྒྱལ་བ་དག་པས་ཆོས་འདི་དཀོན། །འཇོག་བྲལ་སེམས་གླང་ལྕགས་ཀྱོ་འདི་ཡིན་ཏེ། །གདུལ་བྱ་མ་དུལ་བ་ཡི་སྲབ་འདི་ཡིན། །ར་བའི་མཚམས་ཀྱི་འོབས་དང་འདྲ་བ་སྟེ། །ཟག་པ་ཀུན་གྱི་ཆུ་ལོན་འདུལ་བ་ཡིན། །རྒྱལ་བ་སྟོན་པ་དེ་ཡི་བསྟན་བཅོས་གང ། །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་འགྱུར་ཕྱག་བྱ་སངས་རྒྱས་ཆོས་གཅིག་གཞན། །གང་ལ་བརྟེན་ཏེ་གནས་པའི་སངས་རྒྱས་རྣམས། །དེ་ལ་གུས་བཅས་རྗེ་སར་བཅས་གྱུར་ཅིང ། །དེ་ནི་མགོན་པས་མགོན་ཡིན་སྐྱབས་གནས་ཡིན། །དེ་ཕྱིར་རབ་བསྒྲིམས་འདུལ་ལ་ཕྱག་ཚོལ་ཅིག་།གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨིག་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལས་རྒྱལ་པོའི་ཚིག་ཆེན་ཡང ། །བཟླས་ན་ལན་འགའ་ཆད་པ་འཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་བཟླ་བྱས་ན། །དུད་འགྲོར་འགྲོ་འགྱུར་ཨེ་ལའི་འདབ་ཀླུ་བཞིན། །སོ་སོར་ཐར་བྱ་གང་ཡིན་པ། །སངས་རྒྱས་འདུལ་བ་གང་ཆེན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ཡིན། །འདི་ནི་དམ་ཆོས་རྒྱལ་པོ་ཡི། །ཆོས་རྣམས་ཀུན་གྱི་འདྲེན་པ་མཆོག་།འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཚུལ་ཁྲིམས་འཆལ་བས་ཟིན་རྣམས་ཀྱི། །གདུག་པ་རྣམས་སེལ
5.22b
སྨན་འདི་ཡིན། །འདི་ནི་ལང་ཚོ་རྣམ་འཁྲུལ་བའི། །རྐང་གཉིས་གཞོན་ནུའི་ལྕགས་ཀྱོ་ཡིན། །མཚོ་བས་ཟབ་པའི་འཁོར་བ་ལས། །སྒྲོལ་བའི་རྒལ་ཐབས་འདི་ཡིན་ཏེ། །འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །འདི་ནི་ཉོན་མོངས་ཕམ་བྱེད་ལམ། །རྒྱལ་པོ་ཡི་ནི་འདྲེན་པ་མཆོག་།འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ང་ནི་མྱ་ངན་འདས་གྱུར་ན། འདི་ནི་ཁྱེད་ཀྱི་སྟོན་པའོ་ཞེས། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་མདུན་བསྟོད། །འདུལ་འདི་སོ་སོར་ཐར་པ་དེའི། །རྣམ་འབྱེད་ཡིན་པར་དགོངས་པས་ན། །ཐར་འདོད་རྣམས་ཀྱིས་གུས་བྱས་ཏེ། །འདི་ནི་ནན་ཏན་མཉན་པར་བྱ། །འདུལ་བ་ལ་བསྟོད་པ། རྫོགས་སྷོ།། ་་་་་་་་་།། བསྐལ་པ་བྱེ་བ་རྣམས་སུ་ཡང ། །འདུལ་བ་ཐོས་པར་འགྱུར་བ་དང ། །གཟུང་དང་འཛིན་པ་རྙེད་དཀའ་སྟེ། །བསྒྲུབ་པ་འང་ཤིན་ཏུ་རྙེད་པར་དཀའ། །སངས་རྒྱས་རྣམས་ནི་འབྱུང་བ་དང ། །ཆོས་བསྟན་པ་ཡང་བདེ་བ་ཡིན། །དགེ་འདུན་འཐུན་པ་བདེ་བ་སྟེ། །འཐུན་པ་རྣམས་ཀྱི་དཀའ་ཐུབ་བདེ། །འཕགས་པ་རྣམས་ནི་མཐོང་བ་བདེ། །དམ་པ་དག་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །ཚུལ་ཁྲིམས་ལྡན་པ་མཐོང་བ་བདེ། །མང་དུ་ཐོས་པ་མཐོང་བ་བདེ། །ཡང་སྲིད་རྣམ་པར་གྲོལ་བ་ཡི། །དགྲ་བཅོམ་པ་དག་མཐོང་བ་བདེ། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ང་འོ་ང་རྒྱལ་ཟད་པ་བདེ། །དེས་པར་བྱས་ཤིང་དབང་པོ་ཐུལ་བ་དག་།དགོན་པ་ཞི་བ་རྣམས་སུ་རྒས་གྱུར་དང ། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱིས་གནས་པ་བདེ། །ཤཱཀྱ་སེང་གེ་དེ་ལ་ནི། །སོར་མོ་བཅུ་ཡི་ཐལ་སྦྱར་ཏེ། །འདུལ་བ་རབ་ཏུ་གདོན་པར་བྱས། །གདུལ་བའི་དོན་དུ་ང་ལ་ཉོན། །ཐོས་ནས་དྲང་སྲོང་ཆེན་པོ་ཡིས། །ཇི་སྐད་གསུངས་བཞིན་བསྒྲུབ་བྱ་ཞིང ། །ཁ་ན་མ་ཐོ་ཕྲ་རྣམས་ལ། །རྟུལ་ཅིང་བྱེད་པ་ཉིད་དུ་གྱིས། །རྟག་ཏུ་འབད་པས་འདའ་བ་ཡི། །སེམས་རྟ་ཁ་གླན་དཀའ་བ་ལ། །འཐུན་པ་གཟེར་རྣོན་བརྒྱ་པ་ཡི། །སྲབ་ནི་འདུལ་བ་འདི་ཡིན་ནོ། །
5.23a
ཆེ་བ་གང་དག་ངག་ཙམ་གྱིས། །ལྡོག་ཅིང་མཚམས་ལས་མི་འདའ་བ། །དེ་དག་མི་རྟ་བཟང་པོ་སྟེ། །ཉོན་མོངས་གཡུལ་ལས་ངེས་རྒལ་འགྱུར། །སུ་ལ་སྲབ་འདི་མེད་པ་དང ། །ནམ་དུའང་འདོད་པར་མི་འགྱུར་བ། །དེ་དག་ཉོན་མོངས་གཡུལ་གྱིས་དཀྲུགས། །འཇོག་བྲལ་རྣམ་པར་འཁྱམ་པར་འགྱུར། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལོ་བཅུ་གཉིས་སུ་སྐྱོན་མེད་ཅིང་ཆུ་བུར་མེད་ལ། བཅོམ་ལྡན་འདས་ཀྱིས་ཉན་ཐོས་རྣམས་ཀྱི་སོ་སོར་ཐར་པའི་མདོ་གདོན་པ་ཡང་མདོར་བསྡུས་ཏེ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་འང་ལེགས་པ་ཡིན། །ཡིད་ཀྱི་སྡོམ་པ་འང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱི་མི་དགེ་བ་དག་མི་བྱེད་ཅིང ། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར་ཞེས་སྟོན་པར་གྱུར་ཏོ། །ལོ་བཅུ་གསུམ་ལ་བབ་པ་ན་སངས་རྒྱས་བཅོམ་ལྡན་འདས་ཡུལ་སྤོང་བྱེད་དག་ན་ཀ་ལན་ད་ཀའི་གྲོང་ན་བཞུགས་སོ། །དེའི་ཚེ་ན་ཀ་ལན་ད་ཀའི་གྲོང་ན་ཀ་ལན་ད་ཀའི་བུ་བཟང་བྱིན་ཞེས་བྱ་བ་ཕྱུག་པ། ནོར་མང་བ་ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིང ། དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག་།མ་བྱིན་པར་ལེན་པ་དང ། འདོད་པ་ལ་ལོག་པར་གཡེམ་པ་དང ། བརྫུན་དུ་སྨྲ་བ་དང ། འབྲུའི་ཆང་དང །
5.23b
བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང ། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལོག་གོ། །དེ་དད་པ་སྔ་མ་དེ་ཉིད་རྗེས་སུ་སྤེལ་ཞིང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་འདི་ལྟ་སྟེ། སྔོན་ཁྱིམ་པ་བཞིན་དུ་ཉེ་དུ་རྣམས་དང་ལྷན་ཅིག་འདྲེ་ཞིང་གནས་སོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འདི་སྙམ་དུ་སེམས་ཏེ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འདི་ལྟ་སྟེ། སྔོན་ཁྱིམ་པ་བཞིན་དུ་ཉེ་དུ་རྣམས་དང་ལྷན་ཅིག་འདྲེ་ཞིང་གནས་པ་ནི་བདག་གིས་མ་རྙེད་དེ་རྙེད་པ་མ་ཡིན་ཞིང་ཉེས་པ་རྙེད་དེ་ལེགས་པར་རྙེད་པ་མ་ཡིན་གྱིས། བདག་ཉེ་དུ་རྣམས་དང་འབྲལ་བའི་ཕྱིར་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུར་འགྲོའོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཉེ་དུ་རྣམས་དང་འབྲལ་བའི་ཕྱིར་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུར་སོང་ངོ ། །དེའི་ཚེ་ན་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ངོ ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འདི་སྙམ་དུ་སེམས་ཏེ། ད་ལྟར་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ལ། བདག་ལ་ཉེ་དུ་ལོངས་སྤྱོད་ཆེན་པོ་དང་ལྡན་པ་དག་ཡོད་པས་བདག་ཀ་ལན་ད་ཀའི་གྲོང་དུ་སོང་སྟེ། ཉེ་དུ་རྣམས་ཀྱི་གན་དུ་སོང་ལ་དགེ་འདུན་ལ་ཟས་དག་སྦྱོར་དུ་གཞུག་ཅིང་དགེ་འདུན་ལ་སྐྱོ་མ་དག་དང ། ཐུག་པའི་བཏུང་བ་དག་དང ། རྟག་རེས་འཁོར་དག་དང ། འགྲོན་དུ་བོས་པ་དག་དང ། བརྒྱད་སྟོན་དང ། བཅུ་བཞི་སྟོན་དང ། ཉ་སྟོན་དང ། སྤྱན་གཟིགས་ཕྲན་ཚེགས་ཕྲན་ཚེགས་སྦྱོར་དུ་གཞུག་གོ་སྙམ་མོ། །དེ་ནས་ཀ་ལན་ད་ཀའི་བུ
5.24a
ཚེ་དང་ལྡན་པ་བཟང་བྱིན་ལྗོངས་སུ་ཅི་དགར་འདུག་ནས་ལྷུང་བཟེད་དང་ཆོས་གོས་ཐོགས་ཏེ། ཀ་ལན་ད་ཀའི་གྲོང་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་བའི་ཚེ་ཀ་ལན་ད་ཀའི་གྲོང་དུ་ཕྱིན་ནས་ཀ་ལན་ད་ཀའི་གྲོང་ན་དགོན་པའི་སྤྱིལ་བུ་ན་གནས་སོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཉེ་དུ་རྣམས་ཀྱི་གན་དུ་སོང་སྟེ་ཕྱིན་ནས་དེ་དག་གི་མདུན་དུ་སངས་རྒྱས་དང ། ཆོས་དང་དགེ་འདུན་གྱི་བསྔགས་པ་བརྗོད་དེ། དགེ་འདུན་ལ་ཟས་དག་སྦྱོར་དུ་འཇུག་ཅིང ། དགེ་འདུན་ལ་སྐྱོ་མ་དག་དང ། ཐུག་པའི་བཏུང་བ་དག་དང ། རྟག་རེས་འཁོར་དག་དང ། འགྲོན་དུ་བོས་པ་དག་དང ། བརྒྱད་སྟོན་དང ། བཅུ་བཞི་སྟོན་དང ། ཉ་སྟོན་དང ། སྤྱན་གཟིགས་ཕྲན་ཚེགས་ཕྲན་ཚེགས་སྦྱོར་དུ་འཛུད་དོ། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་དགོན་པ་པ། ཆོས་གོས་གསུམ་པ། ཕྱག་དར་ཁྲོད་པ། བསོད་སྙོམས་པ་མཐར་ཆགས་ཀྱིས་རྒྱུ་བར་གྱུར་ཏོ། །དེ་དུས་གཞན་ཞིག་ན་དང་པོ་ཁོ་ནར་དགེ་སློང་གི་དགེ་འདུན་ཐུག་པ་བསོད་པས་ཚིམ་པར་བྱས་ནས་སྔ་དྲོ་ཤམ་ཐབས་བགོས་ཏེ། ལྷུང་བཟེད་དང་ཆོས་གོས་ཐོགས་ནས་ཀ་ལན་ད་ཀའི་གྲོང་དུ་བསོད་སྙོམས་ལ་ཞུགས་པ་ན་མཐར་གྱིས་ཀ་ལན་ད་ཀའི་གྲོང་དུ་བསོད་སྙོམས་ལ་རྒྱུ་བའི་ཚེ་རང་གི་ཁྱིམ་དུ་ཕྱིན་ཏོ། །དེ་རང་གི་ཁྱིམ་ནས་སྦྱིན་པ་མ་ཐོབ། ཕྱིར་གཏོང་བ་མ་ཐོབ་པར་མྱུར་བ་མྱུར་བར་ཕྱིར་སོང་ངོ ། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་བྱ་བ་འགའ་ཞིག་ལ་ཕྱི་རོལ་ཏུ་སོང་བར་གྱུར་ཏོ། །བྲན་མོ་རྙིང་པ་རྒན་མོ་ཞིག་གིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་རང་གི་ཁྱིམ་ནས་སྦྱིན་པ་མ་ཐོབ། ཕྱིར་གཏོང་བ་མ་ཐོབ་པར་མྱུར་བ་མྱུར་བར་ཕྱིར་སོང་བ་མཐོང་ངོ ། །མཐོང་ནས་ཀྱང་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཇོ་མོ་མཁྱེན་པར་མཛོད་ཅིག་།ཇོ་ཅོ་བཟང་བྱིན་འཕྱི་བ་འཕྱི་བར་རང་གི་ཁབ་ཏུ་བྱོན་ནས། དེ་རང་གི་ཁབ་ནས་སྦྱིན་པ་མ་བརྙེས། སླར་གཏོང་བ་མ་བརྙེས་པར་མྱུར་བ་མྱུར་བར་སླར་སོང་ངོ ། །དེ་ནས་ཀ་ལན་ད་ཀའི
5.24b
བུ་ཚེ་དང་ལྡན་པ་བཟང་བྱིན་གྱི་མ་འདི་སྙམ་དུ་སེམས་ཏེ། ཀྱེ་མ་མ་ལ་ཀ་ལན་ད་ཀའི་བུ་བཟང་བྱིན་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་པར་གྱུར་ཅིང་དགེ་སྦྱོང་གི་ཚུལ་དོན་དུ་མི་གཉེར་བ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་འམ། སྨོད་པ་འམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་འམ། ཅིག་ཏུ་མ་གྱུར་གྲང་སྙམ་དུ་སེམས་ཤིང་རིག་ནས་ཀ་ལན་ད་ཀའི་གྲོང་ནས་བྱུང་སྟེ། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཀ་ལན་དཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །བུ་བཟང་བྱིན་གལ་ཏེ་ཁྱོད་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་དོན་དུ་མི་གཉེར་བ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་འམ། ཁྱོད་དགེ་སྦྱོང་གི་ཚུལ་ཡོངས་སུ་གཏོང་འདོད་པ་ལྟ་ན། བུ་བཟང་བྱིན་བུད་མེད་རྣམས་ཀྱི་བུད་མེད་ནོར་ཞེས་བྱ་བ་འམ། བུད་མེད་ཀྱི་བག་རྫངས་ཞེས་བྱ་བ་འམ། བུད་མེད་དབང་བའི་རྫས་ཤེས་བྱ་བ་གང་ཡིན་པ་དེ་ནི་ཁྱོད་ཀྱི་མའི་དབྱིག་དང ། གསེར་གྱི་ཕུང་པོ་ཆེན་པོ་གང་ལ་མཐའ་གཅིག་ན་འགྲེང་བའི་མིས་མཐའ་གཅིག་ན་འདུག་པའི་མི་མི་མཐོང་ལ། མཐའ་ཅིག་ན་འདུག་པའི་མིས་མཐའ་གཅིག་ན་འགྲེང་བའི་མི་མི་མཐོང་བ་ཡིན་ཏེ། འདི་ནི་ཁྱོད་ཀྱི་མའི་ཡིན་ནོ། །གཞན་ཡང་ཁྱེད་ཀྱི་ཕའི་དབྱིག་དང ། གསེར་མཚན་མ་བཏབ་པ་ཡང་བརྒྱ་ཕྲག་དུ་མ་དང ། སྟོང་ཕྲག་དུ་མ་དང ། བརྒྱ་སྟོང་ཕྲག་དུ་མ་དག་ཡོད་ན་གཞན་དང་ཕལ་ལྟ་སྨོས་ཀྱང་ཅི་དགོས། བུ་བཟང་བྱིན་ཚུར་ཤོག་།ཁྱོད་འདུག་ལ་འདོད་པ་ལ་ཡང་ལོངས་སྤྱོད་ཅིག་།སྦྱིན་པ་དག་ཀྱང་བྱིན་ཅིག་།བསོད་ནམས་དག་ཀྱང་གྱིས་ཤིག་།དེ་སྐད་ཅེས་སྨྲས་པ་དང ། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་མ་ལ་འདི་སྐད་ཅེས་སྨྲས་སོ། །ཡུམ་བདག་ནི་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འཚལ་ཞིང་དགེ་སྦྱོང་གི་ཚུལ་དོན་དུ་མི་གཉེར་བ་འམ། དགེ་སྦྱོང་གི་ཚུལ་གྱིས་སྒྱིད
5.25a
ལུག་པ་འམ། མུས་བྱུང་བ་འམ། ཐེ་ཚོམ་འཚལ་བ་འམ། སྨོད་པ་འམ། བདག་དགེ་སྦྱོང་གི་ཚུལ་ཡོངས་སུ་གཏོང་བ་མི་བགྱིད་དོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་འདི་སྙམ་དུ་སེམས་ཏེ། བདག་གིས་དེ་སྐད་བྱས་ཀྱང་བུ་བཟང་བྱིན་ཕྱིར་བཟློག་པར་མ་ནུས་ཀྱིས་བདག་ཁྱིམ་དུ་སོང་ལ་འདིའི་བག་སར་སྦད་པར་བྱའོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ཁྱིམ་དུ་སོང་སྟེ་མནའ་མ་ལ་འདི་སྐད་ཅེས་སྨྲས་སོ། །ཀྱེ་སྲུ་ཁྱོད་གང་གི་ཚེ་དུས་ལ་བབ་ཅིང་ཟླ་མཚན་དང་ལྡན་པ་དེའི་ཚེ་ཁོ་མོ་ལ་སྦྲོན་ཅིག་།ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མས་ཡུམ་བཀའ་བཞིན་འཚལ་ཞེས་སྒྱུག་མོ་ལས་མཉན་ཏོ། །དེ་ནས་དུས་གཞན་ཞིག་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མ་དུས་ལ་བབ་ཅིང་ཟླ་མཚན་དང་ལྡན་པར་གྱུར་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཡུམ་ངན་བུ་དུས་ལ་བབ་ཅིང་ཟླ་མཚན་དང་ལྡན་པར་གྱུར་ན་བདག་གིས་ཅི་བགྱི་བ་དེ་མཁྱེན་པར་མཛོད་ཅིག་།སྲུ་དེའི་ཕྱིར་ཁྱོད་ཀྱིས་སྐུ་མཉེ་ཇི་ལྟ་བུས་བསྐུ་མཉེ་བྱས་པ་དང ། ཁྲུས་ཇི་ལྟ་བུས་ཁྲུས་བྱས་པ་དང ། དྲི་དང ། ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། གོས་དང ། རྒྱན་ཇི་ལྟ་བུ་དག་གིས་བརྒྱན་ན་བུ་བཟང་བྱིན་སྔོན་ཁྱིམ་པ་ཉིད་ན་དགའ་བ་དང ། ཡིད་དང་བར་གྱུར་པ་དེ་ལྟ་བུའི་བསྐུ་མཉེས་བསྐུ་མཉེ་གྱིས་ཤིག་།དེ་ལྟ་བུའི་ཁྲུས་ཀྱིས་ཁྲུས་གྱིས་ཤིག་།དེ་ལྟ་བུའི་དྲི་དང ། ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། གོས་དང ། རྒྱན་དག་གིས་བརྒྱན་པར་གྱིས་ཤིག་།དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མས་སྒྱུག་མོ་ལས་མཉན་ཏེ་སྐུ་མཉེ་ཇི་ལྟ་བུས་སྐུ་མཉེ་བྱས་པ་དང ། ཁྲུས་ཇི་ལྟ་བུས་ཁྲུས་བྱས་པ་དང ། དྲི་དང་ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། གོས་དང ། རྒྱན་ཇི་ལྟ་བུ་དག་གིས་བརྒྱན་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་སྔོན་ཁྱིམ་པ
5.25b
ཉིད་ན་དགའ་བ་དང ། ཡིད་དུ་འོང་བར་གྱུར་པ་དེ་ལྟ་བུའི་བསྐུ་མཉེས་བསྐུ་མཉེ་བྱས། དེ་ལྟ་བུའི་ཁྲུས་ཀྱིས་ཁྲུས་བྱས། དེ་ལྟ་བུའི་དྲི་དང ། ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། གོས་དང ། རྒྱན་དག་གིས་བརྒྱན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཡུམ་ངན་བུ་འདི་འདྲ་ན་བདག་གིས་ཅི་ཞིག་བགྱི། དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་མནའ་མ་དང་ཤིང་རྟ་གཅིག་ཏུ་ཞུགས་ཏེ་ཀ་ལན་ད་ཀའི་གྲོང་ནས་བྱུང་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་གནས་ག་ལ་བ་དེར་སོང་སྟེ་ཕྱིན་ནས་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས། རྐང་པ་དག་ཁོ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་དྲུང་དུ་སོང་ངོ ། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གནས་ཀྱི་ཕྱི་རོལ་བླ་གབ་མེད་པའི་འཆག་ས་ན་འཆགས་སོ། །ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །བུ་བཟང་བྱིན་གལ་ཏེ་ཁྱོད་མི་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་པར་མི་འགྱུར་ཞིང ། དགེ་སྦྱོང་གི་ཚུལ་དོན་དུ་མི་གཉེར་བ་མ་ཡིན་པ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་མ་ཡིན་པ་འམ། མུས་བྱུང་བ་མ་ཡིན་པ་འམ། ཐེ་ཚོམ་ཟ་བ་མ་ཡིན་པ་འམ། སྨོད་པ་མ་ཡིན་པ་འམ། ཁྱོད་དགེ་སྦྱོང་གི་ཚུལ་ཡོངས་སུ་གཏོང་འདོད་པ་མ་ཡིན་པ་ལྟ་ན། བུ་ཁྱོད་ཀྱི་བག་སར་འདི་དུས་ལ་བབ་ཅིང་ཟླ་མཚན་དང་ལྡན་པར་གྱུར་གྱིས་འདི་ལ་ས་བོན་གྱི་ཆོས་ཅུང་ཞིག་རྗེས་སུ་བྱིན་ཅིག་།ཁྱོད་ལ་བུ་མེད་པའི་ཕྱིར་དབང་བའི་རྫས་ཐམས་ཅད་དེ་བཞིན་དུ་འམ། ཇི་ལྟར་ཡང་རུང་བས་རྒྱལ་པོས་དབང་དུ་བྱས་པར་གྱུར་ན་མི་རུང་ངོ ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་སྔར་བསླབ་པའི
5.26a
གཞི་མ་བཅས་ཤིང ། ཉེས་པ་མ་མཐོང་ལ་བུད་མེད་ཀྱི་ཡུལ་གཞོན་ནུ་ཁ་དོག་བཟང་བ་ཆགས་པར་གྱུར་པ་མཐོང་ནས་འདོད་ཆགས་ཀྱིས་སེམས་ཟིལ་གྱིས་ནོན་ཅིང་དེ་འདོད་ཆགས་ཀྱིས་སེམས་ཟིལ་གྱིས་ནོན་པས་ཡོངས་སུ་གདུང་བའི་ལུས་དང ། ཡོངས་སུ་གདུང་བའི་སེམས་དང་ལྡན་ཞིང ། དེ་ཡོངས་སུ་གདུང་བཞིན་པའི་ལུས་དང་ཡོངས་སུ་གདུང་བཞིན་པའི་སེམས་ཀྱིས་མ་ལ་འདི་སྐད་ཅེས་སྨྲས་སོ། །ཡུམ་བདག་གིས་དེ་ལྟར་བགྱིར་རུང་ངམ། བུ་བཟང་བྱིན་འདི་ལྟ་སྟེ། ས་བོན་གྱིས་ཆོས་ལ་བརྟེན་ནས་ཤིན་ཏུ་རུང་ངོ ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་མ་ལས་མཉན་ཏེ་སྔོན་གྱི་ཆུང་མའི་ལག་པ་གཉིས་ནས་བཟུང་སྟེ་ཕྱོགས་གཅིག་ཏུ་སོང་ནས་ཆོས་གོས་དག་བཞག་སྟེ། དེ་དང་ལྷན་ཅིག་ཏུ་མི་ཚངས་པར་སྤྱོད་པ་འཁྲིག་པའི་ཆོས་ལན་གཉིས་ལན་གསུམ་དུ་བསྟེན་ཏེ། །སེམས་ཅན་སྲིད་པ་ཐ་མ་པ། སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང་སྐྱེ་བ་དོན་དུ་མི་གཉེར་བ་ལུས་ཐ་མ་འཛིན་པ་ཞིག་ཀྱང་ལྷའི་རིས་བཟང་པོ་ཞིག་ནས་ཤི་འཕོས་ཏེ། དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པས་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ། ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་སྒྱུག་མོ་ལ་སྨྲས་པ། ཡུམ་མཁྱེན་པར་མཛོད་ཅིག་།བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང
5.26b
མཆིས་པས་ངེས་པར་ཁྱེའུར་འགྱུར་རོ། །དེ་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས། ཁོ་མོ་ཡུན་རིང་པོ་ནས་མངོན་པར་དད་པའི་ཚ་བོ་ངོ་མཐོང་བ་དང ། ཁོ་མོ་དང་འཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་མོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་ལ་སྤྱོད་པ་དང ། ཁོ་མོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང ། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུ་འམ། མང་པོ་ཡང་རུང་བའི་སྦྱིན་པ་དག་སྦྱིན་ཞིང་བསོད་ནམས་ཀྱང་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟང་གི་གཞིར་གཏོགས་པར་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚ་བ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་དང ། མངར་བ་དང ། ཚ་བ་དང ། བསྐ་བ་རྣམ་པར་སྤངས་པའི་ཟས་དག་དང ། དོ་ཤལ་དང ། སེ་མོ་དོ་དང ། རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུ་དང ། ཤོད་ཀྱི་ས་གཞིར་མི་འབབ་པ་དང ། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུག་གོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ
5.27a
ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་འི་མིང་ཅིར་གདགས་ཤེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་ས་བོན་གྱི་ཆོས་ལ་བརྟེན་ཏེ་རྙེད་པ་དེའི་ཕྱིར་ཁྱེའུ་འི་མིང་ས་བོན་པ་ཞེས་བྱའོ་ཞེས་དེའི་མིང་ས་བོན་པ་ཞེས་བྱ་བར་བཏགས་སོ། །ཁྱེའུ་ས་བོན་པ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་བསྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་ཉིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང ། གྲངས་དང ། རྩིས་དང ། ལག་རྩིས་དང ། དབྱུང་བ་དང ། གཞུག་པ་དང ། གཞག་པ་ལ་ཉེ་བར་ཞུགས་ནས་དེ་ཡི་གེའི་མཐར་ཕྱིན་ཅིང་འབྱེད་པ་དང ། ཀློག་པ་དང ། མཁས་པ་དང ། སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང ། དགེ་འདུན་ལ་སྐྱབས་སུ་སོང་ཞིང་དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག་།མ་བྱིན་པར་ལེན་པ་དང ། འདོད་པ་ལ་ལོག་པར་གཡེམ་པ་དང ། བརྫུན་དུ་སྨྲ་བ་དང ། འབྲུའི་ཆང་དང ། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང ། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལོག་གོ། །དེ་ཕ་ལས་བྱུང་བའི་དད་པ་སྔ་མ་དེ་ཉིད
5.27b
རྗེས་སུ་སྤེལ་ཞིང་ལེགས་པར་གསུངས་པའི་ཆོས་འདུལ་བ་ལ་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས། ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་གཏང་བར་གནས་སོ། །གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་པ་ན། རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ས་བོན་པས་དགྲ་བཅོམ་པ་ཐོབ་ཅིང་རྣམ་པར་གྲོལ་བའི་དགའ་བ་དང་བདེ་བ་སོ་སོར་ཡང་དག་པར་རིག་པ་ན། དེའི་ཚེ་ཚིགས་སུ་བཅད་པ་སྨྲས་པ། ཆོས་རྣམས་ལས་ནི་སྐལ་བ་ཐོབ། །ཡབ་ཀྱི་དཀོར་གྱིས་བདག་མི་གཏོང ། །བདག་གིས་ཧ་ཅང་འཕྱི་ནས་ཤེས། །བདག་ནི་ཆུང་ངུས་ཤིན་ཏུ་འདས། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཉན་ཐོས་རྣམས་ལ། འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང །
5.28a
ཤེས་རབ་རྣམ་པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འཁོར་དེ་ཉིད་དུ་འདུག་ཅིང་འཐུན་པར་གྱུར་ཏོ། །བཅོམ་ལྡན་འདས་ཇི་ལྟ་ཇི་ལྟར་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དེ་ལྟ་དེ་ལྟར་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱོད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ་ཅིང ། ཅང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་ཀློད། གདོང་སྨད། སྤོབས་པ་མེད། སེམས་ཁོངས་སུ་ཆུད་ཅིང་འདུག་གོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་དག་གནས་ཉུལ་ཞིང་རྒྱུ་བ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་གནས་ག་ལ་བ་དེར་དོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང ། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་དགེ་སློང་རབ་ཏུ་མང་པོ་དག་གིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བཟང་བྱིན་ཁྱོད་སྔོན་ཆད་དགེ་སློང་གློ་བུར་དུ་ལྷགས་པ་དག་མཐོང་ན་བཤེས་པ་དང་བཅས་པ་ཉིད་ཀྱི་ཚིག་གིས་བསུ་ནས་ལྷུང་བཟེད་དང ། ཆོས་གོས་དང ། ཁར་བ་དང ། གཏུར་བུ་དང ། རིལ་བ་སྤྱི་བླུགས་དང ། འབྲུ་མར་སྣོད་དང ། ཞཝ་དང ། ལྷམ་སྒྲོག་གུ་ཅན་དང ། མཆིལ་ལྷམ་དག་ལེན་པར་བྱེད་ན། ཁྱོད་ད་ལྟར་དགེ་སློང་གློ་བུར་དུ་ལྷགས་པ་དག་མཐོང་ན་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར།
5.28b
རབ་ཏུ་འགྱོད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ་ཅིང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་ཀློད། གདོང་སྨད། སྤོབས་པ་མེད། སེམས་ཁོངས་སུ་ཆུད་ཅིང་འདུག་ན། ཚེ་དང་ལྡན་པ་བཟང་བྱིན་ད་ལྟར་ཁྱོད་ལ་ལུས་ཀྱི་གནོད་པ་འམ། སེམས་ཀྱི་ཡོངས་སུ་གདུང་བ་འགའ་ཞིག་མེད་གྲང ། ཚེ་དང་ལྡན་པ་དག་བདག་ལ་ད་ལྟར་ལུས་ཀྱི་གནོད་པ་ནི་འགའ་ཡང་མེད་མོད་ཀྱི། འོན་ཀྱང་བདག་ལ་སེམས་ཀྱི་ཡོངས་སུ་གདུང་བ་ཡོད་དོ། །ཚེ་དང་ལྡན་པ་ཁྱོད་ཀྱི་སེམས་ཀྱི་ཡོངས་སུ་གདུང་བ་གང་ཡིན། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་པ་དང ། དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པ་ཡང་མ་བྱས། ཕྱིར་ཟློག་པར་ཡང་མ་བྱས་པར་སྟན་དག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་དགེ་སློང་རབ་ཏུ་མང་པོ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཟག་པའི་གནས་ལྟ་བུའི་ཆོས་མང་པོ་རྣམས་ཀྱི་དང་པོ་ནི་ཀ་ལན་ད་ཀའི་བུ་བཟང་བྱིན་གྱིས་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི
5.29a
རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པར་མི་རྨེད་པས། སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་རྨས་པ། བཟང་བྱིན་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས། དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །བཟང་བྱིན་ངས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་ལ་ཁྱོད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར་མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ། དུག་དྲག་པ། དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི། དེ་ལྟར་གྱུར་པས་བུད་མེད་ཀྱི་ཡུལ་ལ་ནི་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམས་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས
5.29b
མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམས་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་བྱ་བའི་ཕྱིར་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་དགེ་སློང་ཞིག་རྒྱལ་པོའི་ཁབ་ན་དགོན་པའི་སྤྱིལ་བུ་ན་འདུག་གོ། །དེ་ནས་དགེ་སློང་དེས་དགོན་པའི་སྤྲ་མོ་ཞིག་ཟས་ཀྱིས་བརྔོད་བརྔོད་ནས་དེ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏོ། །དེ་ནས་དགེ་སློང་རབ་ཏུ་མང་པོ་དག་གནས་ཉུལ་ཞིང་རྒྱུ་བ་ན་དགེ་སློང་དེའི་སྤྱིལ་བུ་ག་ལ་བ་དེར་དོང་སྟེ། ཕྱིན་ནས་དགེ་སློང་དེ་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང ། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ། མཐའ་གཅིག་ཏུ་འཁོད་དོ། །དེ་ནས་སྤྲ་མོ་དེ་སྔོན་གྱི་སྡིག་པ་ཅན་དམ་པ་མ་ཡིན་པའི་ཆོས་དེ་ཉིད་རྗེས་སུ་དྲན་ནས་དགེ་སློང་དེ་ག་ལ་བ་དེར་སོང་སྟེ་ཕྱིན་ནས། དགེ་སློང་དེའི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་དགེ་སློང་དེ་འདི་ལྟ་སྟེ། དགེ་སློང་དེ་དག་ལ་ངོ་ཚ་བས་དེ་ཟློག་པར་བྱེད་དོ། །སྤྲ་མོ་དེ་ལན་གཉིས་ལན་གསུམ་དུ་དགེ་སློང་དེའི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས། དགེ་སློང་དེ་འདི་ལྟ་སྟེ་དགེ་སློང་དེ་དག་ལ་ངོ་ཚ་བ། ལན་གཉིས་ལན་གསུམ་དུ་དེ་ཟློག་པར་བྱེད་དོ་དེ་ནས་སྤྲ
5.30a
མོ་དེ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས། དགེ་སློང་དེའི་གདོང་དང ། སྣ་དང་ཆོས་གོས་རྐང་པའི་སེན་མོ་དག་གིས་མངོན་པར་བྲད་དེ་མཐའ་གཅིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག་གོ། །དེ་ནས་དགེ་སློང་དེ་དག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅིའི་ཕྱིར་དགོན་པའི་སྤྲ་མོ་འདི་ཁྱོད་ཀྱི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་ཁྱོད་འདི་ལྟ་སྟེ། ཁོ་བོ་ཅག་ལ་ངོ་ཚ་བས་དེ་ཟློག་པར་བྱེད། ཅིའི་ཕྱིར་དགོན་པའི་སྤྲ་མོ་འདི་ལན་གཉིས་ལན་གསུམ་དུ་ཁྱོད་ཀྱི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་ཁྱོད་འདི་ལྟ་སྟེ། ཁོ་བོ་ཅག་ལ་ངོ་ཚ་བས་དེ་ཟློག་པར་བྱེད། འོན་ཀྱང་དགོན་པའི་སྤྲ་མོ་འདི་ཁྱོད་ལ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས་ཁྱོད་ཀྱི་གདོང་དང ། སྣ་དང་ཆོས་གོས་རྐང་པའི་སེན་མོ་དག་གིས་མངོན་པར་བྲད་དེ་མཐའ་གཅིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག་།དེས་སྐབས་དེ་དགེ་སློང་དེ་དག་ལ་རྒྱས་པར་བརྗོད་དོ། །དེ་སྐད་ཅེས་སྨྲས་པ་དང ། དགེ་སློང་དེ་དག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ། དེ་ཡང་མི་ཉིད་ལ་ཡིན་གྱི་དུད་འགྲོར་སྐྱེས་པ་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པ་ཡང་མ་བྱས་པར་སྟན་དག་ལས་ལངས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཤིག་མི་ལ་ཡང་བཀག་ན་དུད་འགྲོར་སྐྱེས་པ་ལྟ་ལ་ཅི་སྨོས་ཏེ། དགེ་སློང་དག་མི་གཏི་མུག་ཅན་དེ་ནི་ཕམ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་ཤེས་བྱ་བ་ནས་སངས་རྒྱས
5.30b
བཅོམ་ལྡན་འདས་ཀྱིས་དགེ་སློང་དེ་ལ་རྨས་པ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་ཞེས་བྱ་བ་ནས། མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ། དུག་དྲག་པ། དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི། དེ་ལྟར་གྱུར་པས་དུད་འགྲོའི་སྐྱེ་གནས་སུ་སྐྱེས་པ་ལ་ནི་མ་ཡིན་ནོ་ཞེས་བྱ་བའི་བར་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པའོ། །འདི་ནི་རྗེས་སུ་བཅས་པའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ་དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་རྣམ་པ་བཞི་པོ་མིང་གི་དགེ་སློང་དང ། ཁས་འཆེ་བའི་དགེ་སློང་དང ། སློང་བའི་ཕྱིར་དགེ་སློང་དང ། ཉོན་མོངས་པ་བཅོམ་པའི་ཕྱིར་དགེ་སློང་ལས་མིང་གི་དགེ་སློང་གང་ཞེ་ན། གང་གི་མིང་དང ། མིང་དུ་བརྗོད་པ་དང ། ཚིག་གཉིས་པ་དང ། ཚིག་བླ་དགས་དང ། འདུ་ཤེས་དང ། བོད་པ་དང ། གདགས་པ་དང ། ཐ་སྙད་དགེ་སློང་ཞེ་འམ། དགེ་སློང་གི་རིགས་ཤེ་འམ། དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང ། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་དེ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་དགེ་སློང་གང་ཞེ་ན། གང་ཆོས་དང་ལྡན་པས་སློངས་མོ་སྤྱོད་པས་འཚོ་བར་བྱེད་པ་ནི་སློང་བའི་ཕྱིར་དགེ
5.31a
སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན། གང་གི་ཟག་པ་ཀུན་ནས་ཉོན་མོངས་པར་བྱེད་པ། ཡང་སྲིད་པར་བྱེད་པ། རིམས་ནད་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང་རྒ་བ་དང ། འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང ། ཡོངས་སུ་ཤེས་པ་དང ། རྩ་བ་ནས་བཅད་པ་དང ། ཤིང་ཏ་ལའི་མགོ་བཞིན་དུ་གཞི་མི་སྣང་བ་དང ། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང ། བཞིའི་ལས་མི་གཡོ་བ་གཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །དགེ་སློང་རྣམས་དང་ལྷན་ཅིག་ཅེས་བྱ་བ་ནི་དེ་ལས་གཞན་པ་ཆོས་འཐུན་པ་ཚངས་པ་མཚུངས་པར་སྤྱོད་པ་རྣམས་དང་ངོ ། །བསླབ་པ་མཚུངས་པར་གྱུར་པས་ཤེས་བྱ་བ་ནི་བསླབ་པ་གང་ལ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པར་བྱ་བ་དེ་ལ་དེང་བསྙེན་པར་རྫོགས་པས་ཀྱང ། དེང་བསྙེན་པར་རྫོགས་པས་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་ངོ་ཞེས་འདི་ལ་ཚུལ་ཁྲིམས་ཉིད་ཀྱིས་མཉམ་པ་དང ། བསླབ་པ་ཉིད་ཀྱིས་མཉམ་པ་དང ། སོ་སོར་ཐར་པའི་མདོ་གདོན་པ་ཉིད་ཀྱིས་མཉམ་པ་གང་ཡིན་པ་དེ་ནི་བསླབ་པ་མཚུངས་པར་གྱུར་པས་ཤེས་བྱ་སྟེ། དེ་ན་བསླབ་པ་མཚུངས་པར་གྱུར་པས་ཤེས་གསུངས་སོ། །བསླབ་པ་མ་ཕུལ་ཞེས་བྱ་བ་ལ། ཇི་ཙམ་གྱིས་ན་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་ཁྲོས་ཤིང་ཁྲོ་བའི་ཟིལ་གྱིས་ནོན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སྨྱོན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གླེན་པ་དང ། ལྐུག་པ་དང ། འོན་པ་ལ་བསླབ་པ་འབུལ་ན
5.31b
བསླབ་པ་མ་ཕུལ་བར་བརྗོད་པར་བྱའོ། །དབེན་པར་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབེན་པར་མི་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །མི་དབེན་པར་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ། དབུས་པས་གལ་ཏེ་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་ལ། མཐའ་འཁོབ་པས་གལ་ཏེ་དབུས་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ། དབུས་པས་གལ་ཏེ་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་ལ། མཐའ་འཁོབ་པས་གལ་ཏེ། དབུས་པའི་ཚིག་སྨྲས་པ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མི་གཉིད་ལོག་པ་དང ། སྙོམས་པར་ཞུགས་པ་དང ། ལྷ་དང ། སྤྲུལ་པ་དང ། དུད་འགྲོ་དང ། གཟུགས་བརྙན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །ཀླག་ཅོར་ཅན་གྱིས་ཀླག་ཅོར་ཅན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གཏོང་བའི་སེམས་མེད་པ་དང ། དགེ་སྦྱོང་གི་ཚུལ་འདོད་པ་དང ། ཁྱིམ་ན་གནས་པར་མི་འདོད་པ་དང ། མི་རང་བཞིན་དུ་གནས་པ་ཤེས་པས་འགའ་ལ་ཡང་རྣམ་པར་རིག་པར་མི་བྱེད་ན་བསླབ་པ་མ་ཕུལ་བར་བརྗོད་པར་བྱ་སྟེ། དེས་ན་བསླབ་པ་མ་ཕུལ་བ་ཞེས་གསུངས་སོ། །བསླབ་པ་ཉམས་པར་མ་བྱས་པར་ཞེས་བྱ་བ་ལ་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཡང་ཡོད། བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡང་ཡོད། བསླབ་པ་ཉམས་པར་ཡང་བྱས་ལ
5.32a
བསླབ་པ་ཕུལ་བ་ཡང་ཡོད། བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཡང་ཡོད་དོ། །དེ་ལ་རེ་ཤིག་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ནི་འདི་ལྟ་སྟེ། དགེ་སློང་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་ཅིང ། དགེ་སློང་གི་ཚུལ་དོན་དུ་མི་གཉེར་བ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་འམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །སངས་རྒྱས་དང ། ཆོས་དང ། དགེ་འདུན་འབུལ་ལོ། །ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །མདོ་སྡེ་དང ། འདུལ་བ་དང ། མ་མོ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །མཁན་པོ་དང ། སློབ་དཔོན་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །བདག་ཁྱིམ་པ་འམ། དགེ་ཚུལ་ལམ། ཟ་མ་འམ། མ་ནིང་ངམ། དགེ་སློང་མ་སུན་ཕྱུང་བ་འམ། མ་བསད་པ་འམ། ཕ་བསད་པ་འམ། དགྲ་བཅོམ་པ་བསད་པ་འམ། དགེ་འདུན་གྱི་དབྱེན་བྱས་པ་འམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་འམ། མུ་སྟེགས་ཅན་ནམ། མུ་སྟེགས་ཅན་ཞུགས་པ་འམ། རྐུ་ཐབས་སུ་གནས་པ་འམ། ཐ་དད་པར་གནས་པ་འམ། གནས་པར་མི་བྱ་བར་གཟུང་དུ་གསོལ་ཞེ་འམ། ཐ་ན་འདི་སྐད་ཅེས་བདག་ཁྱེད་ལྟ་བུ་ཆོས་འཐུན་པ་ཚངས་པ་མཚུངས་པ་སྤྱོད་པ་དག་གིས། ཆོག་གོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱ་སྟེ། དེ་ལྟར་ན་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཡིན་ནོ། །ཇི་ལྟར་ན་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་འམ།
5.32b
དགེ་སྦྱོང་གི་ཚུལ་ཡོངས་སུ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་མཁྱེན་པར་མཛོད་ཅིག་།ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བ་དཀའོ། །གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང ། ཕུ་ནུ་དང ། བུ་སྲིང་དྲན་ནོ། །བདག་བཟོ་དག་སློབ་ཏུ་ཆུག་ཤིག་བདག་གིས་ལས་ཀྱི་མཐའ་དག་ཚོལ་ཅིག་།བདག་ཁྱིམ་བཟང་པོ་དག་ཏུ་གཏོད་ཅིག་ཅེས་དེ་ལྟར་དེ་ལ་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་འམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའི་ངག་དང ། ཚིག་དང ། ཐ་སྙད་དང ། སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པ་དག་ནི་རྗོད་པར་བྱེད་ལ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ། །ཞེ་འམ་སངས་རྒྱས་དང ། ཆོས་དང ། དགེ་འདུན་འབུལ་ལོ་ཞེ་འམ། མདོ་སྡེ་དང ། འདུལ་བ་དང ། མ་མོ་འབུལ་ལོ་ཞེ་འམ། མཁན་པོ་དང ། སློབ་དཔོན་འབུལ་ལོ་ཞེ་འམ། བདག་ཁྱིམ་པ་འམ། དགེ་ཚུལ་ལམ། ཟ་མ་འམ། མ་ནིང་ངམ། དགེ་སློང་མ་སུན་ཕྱུང་བ་འམ། མ་བསད་པ་འམ། ཕ་བསད་པ་འམ། དགྲ་བཅོམ་པ་བསད་པ་འམ། དགེ་འདུན་གྱི་དབྱེན་བྱས་པ་འམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་འམ། མུ་སྟེགས་ཅན་ནམ། མུ་སྟེགས་ཅན་ཞུགས་པ་འམ། རྐུ་ཐབས་སུ་གནས་པ་འམ། ཐ་དད་པར་གནས་པ་འམ། གནས་པར་མི་བྱ་བར་གཟུང་དུ་གསོལ་ཞེ་འམ། ཐ་ན་འདི་སྐད་ཅེས་བདག་ཁྱོད་ལྟ་བུ་ཆོས་འཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ནི་མི་ཟེར་བ་སྟེ། དེ་ལྟར་ན་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡིན་ནོ། །
5.33a
ཇི་ལྟར་ན་བསླབ་པ་ཉམས་པར་ཡང་བྱས་ལ་བསླབ་པ་ཕུལ་བ་ཡང་ཡིན་ཞེ་ན། འདི་ལྟ་སྟེ། དགེ་སློང་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་འམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་དང་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་མཁྱེན་པར་མཛོད་ཅིག་།ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང ། ཕུ་ནུ་དང ། བུ་སྲིང་དག་དྲན་ནོ། །བདག་བཟོ་དག་སློབ་ཏུ་ཆུག་ཤིག་།བདག་གིས་ལས་ཀྱི་མཐའ་དག་ཚོལ་ཅིག་།བདག་ཁྱིམ་བཟང་པོ་དག་ཏུ་གཏོད་ཅིག་ཅེས་དེ་ལྟར་དེ་ལ་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་པར་གྱུར་ཅིང་དགེ་སྦྱོང་གི་ཚུལ་མི་འདོད་པ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་འམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའི་ངག་དང ། ཚིག་དང ། ཐ་སྙད་དང ། སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པ་དག་ཀྱང་རྗོད་པར་བྱེད་ལ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེ་འམ། སངས་རྒྱས་དང ། ཆོས་དང ། དགེ་འདུན་འབུལ་ལོ་ཞེ་འམ། མདོ་སྡེ་དང ། འདུལ་བ་དང ། མ་མོ་འབུལ་ལོ་ཞེ་འམ། མཁན་པོ་དང ། སློབ་དཔོན་འབུལ་ལོ་ཞེ་འམ། བདག་ཁྱིམ་པ་འམ། དགེ་ཚུལ་ལམ་ཟ་མ་འམ། མ་ནིང་ངམ་དགེ་སློང་མ་སུན་ཕྱུང་བ་འམ། མ་བསད་པ་འམ། ཕ་བསད་པ་འམ་དགྲ་བཅོམ་པ་བསད་པ་འམ་དགེ་འདུན་གྱི་དབྱེན་བྱས་པ་འམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་འམ། མུ་སྟེགས་ཅན་ནམ། མུ་སྟེགས་ཅན་ཞུགས་པ་འམ།
5.33b
རྐུ་ཐབས་སུ་གནས་པ་འམ། ཐ་དད་པར་གནས་པ་འམ། གནས་པར་མི་བྱ་བར་གཟུང་དུ་གསོལ་ཞེ་འམ། ཐ་ན་འདི་སྐད་ཅེས་བདག་ཁྱེད་ཅག་ལྟ་བུ་ཆོས་འཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ཀྱང་ཟེར་ན་བསླབ་པ་ཕུལ་བར་བརྗོད་པར་བྱ་སྟེ། དེ་ལྟར་ན་བསླབ་པ་ཉམས་པར་ཡང་བྱས་ལ་བསླབ་པ་ཕུལ་པ་ཡང་ཡིན་ནོ། །ཇི་ལྟར་ན་བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཡང་ཡིན་ཞེ་ན། རྣམ་པ་དེ་དག་མ་གཏོགས་པ་སྟེ། དེས་ན་བསླབ་པ་ཉམས་པར་མ་བྱས་པར་ཞེས་གསུངས་སོ། །མི་ཚངས་པར་སྤྱོད་པ་ཞེས་བྱ་བ་ནི་གཉིས་ཀྱིས་གཉིས་སྤྲོད་པའོ། །འཁྲིག་པ་ཞེས་བྱ་བ་ནི་མི་ཚངས་པར་སྤྱོད་པ་གང་ཡིན་པ་དེ་འཁྲིག་པ་ཡང་ཡིན་ནོ། །ཆོས་ཤེས་བྱ་བ་ནི་ཆོས་མ་ཡིན་པ་དེ་ཆོས་ཀྱི་སྒྲར་གསུངས་པའོ། །བརྟེན་ན་ཞེས་བྱ་བ་ནི་ལྷག་པར་སྤྱད་ནའོ། །ཐ་ན་དུད་འགྲོའི་སྐྱེ་གནས་སུ་སྐྱེས་པ་དང ། ལྷན་ཅིག་ཀྱང་རུང་སྟེ་ཞེས་བྱ་བ་ནི་སྤྲ་མོ་འམ། སྤྲ་མོ་དང་འདྲ་བར་གཏོགས་པ་དང་ངོ ། །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་ཕྱིན་པར་བྱེད་པ་ཉིད་གང་ཡིན་པ་དང ། གང་ཟག་དེའི་ཁས་ལེན་པ་དང ། མངོན་པར་ཁས་ལེན་པ་དང ། ཕྱིར་མི་ཟློག་པ་དང ། ཕྱིར་མི་འགོག་པ་ཉིད་དང་ངག་དང ། ཚིག་དང ། ཐ་སྙད་དང ། སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པའོ། །དེ་ཞེས་བྱ་བ་ནི་ཉེ་བར་བསྟན་པ་དང ། ཀུན་ཏུ་བསྟན་པའི་ཚིག་བླ་དགས་དེའོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི་དེ་མཐར་གྱུར་པ་དང ། ལྟུང་བ་དང ། དམན་པ་དང ། མཇུག་ན་འདུག་པ་དང ། ཐ་ཆད་དང ། ཡིད་དང་མི་མཐུན་པ་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར།
5.34a
དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སྦྱོང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང ། ཡངས་པར་འགྱུར་དུ་མི་རུང་བ་དེ་བཞིན་དུ་དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་བས། དེ་ན་ཕམ་པར་གྱུར་པ་ཡིན་གྱིས་ཤེས་གསུངས་སོ། །གནས་པར་མི་བྱའོ་ཞེས་བྱ་བ་ནི་དགེ་སློང་རྣམས་ཀྱིས་དེ་དང་གསོ་སྦྱོང་དང ། དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ལ་གནས་པར་མི་བྱའོ། །གང་ཟག་བཅུ་གཉིས་པོ་དག་ཏུ་བསྐོ་བས་བསྐོ་བར་མི་བྱ་བ་སྟེ། དེ་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། སྡོམ་ལ། འབའ་ཞིག་དང་ནི་གནས་གསུམ་དང ། །བུད་མེད་སྐྱེས་པ་མ་ནིང་དང ། །སྟེན་ལ་གཞོལ་དང་རྩོལ་པ་དང ། །མྱོས་པར་བྱས་དང་མཐུས་འཛིན་པའོ། །དགེ་སློང་གིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །དགེ་སློང་གིས་གནས་གསུམ་གྱིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །ཟག་བྱེད་ཟག་བྱེད་དམ། ཁ་འམ། བཤང་བའི་ལམ་དུ་འཇུད་ན་བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གིས་བུད་མེད་དང ། སྐྱེས་པ་དང ། མ་ནིང་གསུམ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་སྟེན་ན། ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ
5.34b
ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་གསོན་པོ་མ་ཉམས་པ་ལ་ཟག་བྱེད་བར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ་ཟག་བྱེད་དམ། ཁ་འམ། བཤང་བའི་ལམ་དུ་འཇུད་ན་བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས། མིའི་བུད་མེད་གསོན་པོ་ཉམས་པ་ལ་ཟག་བྱེད་བར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ་ཟག་བྱེད་དམ། ཁ་འམ། བཤང་བའི་ལམ་དུ་འཇུད་ན་བཅུག་མ་ཐག་ཏུ་ཉེས་པ་སྦོམ་པོར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་ཤི་བ་མ་ཉམས་པ་ལ་ཟག་བྱེད་པར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ་ཟག་བྱེད་དམ། ཁ་འམ། བཤང་བའི་ལམ་དུ་འཇུད་ན་བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་ཤི་བ་ཉམས་པ་ལ་ཟག་བྱེད་བར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ་ཟག་བྱེད་དམ། ཁ་འམ། བཤང་བའི་ལམ་དུ་འཇུད་ན་བཅུག་མ་ཐག་ཏུ་ཉེས་པ་སྦོམ་པོར་འགྱུར་རོ། །མིའི་བུད་མེད་གསོན་པོ་དང་ཤི་བ་ལ་ཇི་ལྟ་བ་དེ་བཞིན་དུ
5.35a
མི་མ་ཡིན་པ་མོ་གསོན་པོ་དང ། ཤི་བ་དང ། དུད་འགྲོའི་སྐྱེས་གནས་སུ་སྐྱེས་པ་མོ་གསོན་པོ་དང ། ཤི་བ་ལ་ཡང་དེ་བཞིན་ནོ། །སྐྱེས་པ་གསོན་པོ་དང ། ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །སྐྱེས་པ་གསོན་པོ་དང ། ཤི་བ་ལ་རྨའི་སྒོ་གཉིས་སུ་ཇི་ལྟ་བ་དེ་བཞིན་དུ་མི་མ་ཡིན་པ་ཕོ་གསོན་པོ་དང ། ཤི་བ་ལ་རྨའི་སྒོ་གཉིས་སུ་དང ། དུད་འགྲོའི་སྐྱེ་གནས་སུ་སྐྱེས་པ་ཕོ་གསོན་པོ་དང ། ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །སྐྱེས་པ་ལ་ཇི་ལྟ་བ་དེ་བཞིན་དུ་མིའི་མ་ནིང་ཕོ་གསོན་པོ་དང ། ཤི་བ་ལ་རྨའི་སྒོ་གཉིས་སུ་དང ། མི་མ་ཡིན་པའི་མ་ནིང་ཕོ་གསོན་པོ་དང ། ཤི་བ་ལ་རྨའི་སྒོ་གཉིས་སུ་དང ། དུད་འགྲོའི་སྐྱེ་གནས་སུ་སྐྱེས་པའི་མ་ནིང་ཕོ་གསོན་པོ་དང ། ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་མ་ཤེས་བར་དུ་ཡང་མ་ཤེས། ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཤེས་ཤིང ། བར་དུ་ཡང་མ་ཤེས། ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས། བར་དུ་ཡང་ཤེས་ཤིང་ཐ་མར་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས། བར་དུ་ཡང་ཤེས། ཐ་མར་ཡང་ཤེས་ལ་ཤེས་ནས་ཀྱང་བདག་གིར་མི་བྱེད་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བ་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས། བར་དུ་ཡང་ཤེས་ཐ་མར་ཡང་ཤེས་ལ་ཤེས་ནས་ཀྱང་བདག་གིར་བྱེད་ན་གཉིས་ཀ་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་དང ། དགེ་སློབ་མ་དང ། དགེ་ཚུལ་དང །
5.35b
དགེ་ཚུལ་མ་དང ། དགེ་སློང་མས་དགེ་སློང་དང ། དགེ་ཚུལ་ལ་དང ། དགེ་ཚུལ་མས་དགེ་སློང་དང ། དགེ་ཚུལ་ལ་དང ། དགེ་ཚུལ་གྱིས་དགེ་སློང་དང ། དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་ལ་ཡང་དེ་བཞིན་ནོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་མ་ཤེས། བར་དུ་ཡང་མ་ཤེས། ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཤེས་ཤིང་བར་དུ་ཡང་མ་ཤེས། ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས། བར་དུ་ཡང་ཤེས། ཐ་མར་ཡང་ཤེས་ལ་ཤེས་ནས་ཀྱང་བདག་གིར་མི་བྱེད་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས། བར་དུ་ཡང་ཤེས། ཐ་མར་ཡང་ཤེས་ལ་ཤེས་ནས་ཀྱང་བདག་གིར་བྱེད་ན་གཉི་ག་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་དང ། དགེ་སློང་མས་དགེ་སློང་དང ། དགེ་ཚུལ་དང ། དགེ་སློབ་མས་དགེ་སློང་དང ། དགེ་ཚུལ་དང ། དགེ་ཚུལ་མས་དགེ་སློང་དང ། དགེ་ཚུལ་དང ། དགེ་ཚུལ་མ་ལ་ཡང་དེ་བཞིན་ནོ། །འབྲུའི་ཆང་གིས་ཇི་ལྟ་བ་དེ་བཞིན་དུ་བཅོས་པའི་ཆང་དང ། སྦྱར་བའི་ཆང་དང ། རྩ་བའི་བཏུང་བ་དང ། སྡོང་བུའི་བཏུང་བ་དང ། འདབ་མའི་བཏུང་བ་དང ། མེ་ཏོག་གི་བཏུང་བ་དང ། འབྲས་བུའི་བཏུང་བས་སམ། གསང་སྔགས་དག་དང ། རིག་སྔགས་དག་དང ། སྨན་གྱིས་སེམས་འཁྲུགས་པར་བྱས་པ་འམ། གཉིད་ལོག་པར་བྱས་ཏེ
5.36a
ཡང་དེ་བཞིན་ནོ། །དགེ་སློང་གིས་དགེ་སློང་གྱ་ཚོམ་དུ་མཐུས་བཟུང་སྟེ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་འཇུད་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཇུད་པ་ན་མི་བྱེད་ཀྱང་བཅུག་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཇུད་པ་ན་ཡང་མི་བྱེད། བཅུག་པ་ན་ཡང་མི་བྱེད་མོད་ཀྱི་འབྱིན་པ་ན་བདག་གིར་བྱེད་ན། གཉི་ག་བསྙིལ་བར་བྱའོ། །འཇུད་པ་ན་ཡང་བདག་གིར་མི་བྱེད། བཅུག་པ་ན་ཡང་མི་བྱེད། འབྱིན་པ་ན་ཡང་མི་བྱེད་ན་གང་རྩོལ་བ་དེ་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་དང ། དགེ་སློང་མས་དགེ་སློང་དང ། དགེ་ཚུལ་དང ། དགེ་སློབ་མས་དགེ་སློང་དང ། དགེ་ཚུལ་གྱིས་དགེ་སློང་དང ། དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་ཡང་དེ་བཞིན་ནོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་གཉིས་པ། སྡོམ་ལ། རྒྱབ་གཉེན་དང་ནི་འཕྱང་བ་ཅན། །མཛེས་དགའ་ཚོགས་ཅན་རྒན་མོ་དང ། །དགེ་སློང་གཉིད་ཀྱིས་ལོག་པ་ལ། །ལྕི་ཐུན་མས་བཙལ་ཉེས་མེད་པའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་ཞིག་བྱུང་བ་དེའི་རྒྱབ་འདི་ལྟ་སྟེ། དཔེར་ན་རི་བོང་ངམ། བྱི་ལའི་ལྟར་མཉེན་པ་དང ། ཤིན་དུ་མཉེན་པར་གྱུར་ཏོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་འི་མིང་ཅིར་གདགས་ཤེས་མིང་འདོགས་པར་བྱེད་དོ། །དེ་དག་འདི་སྙམ
5.36b
དུ་སེམས་ཏེ། གང་གི་ཕྱིར་ཁྱེའུ་འདིའི་རྒྱབ་འདི་ལྟ་སྟེ། དཔེར་ན་རི་བོང་ངམ། བྱི་ལའི་ལྟར་མཉེན་པ་དང ། ཤིན་ཏུ་མཉེན་པ་དེའི་ཕྱིར། ཁྱེའུ་འི་མིང་རྒྱབ་མཉེན་ཞེས་བྱའོ། །ཞེས་དེའི་མིང་རྒྱབ་མཉེན་ཞེས་བྱ་བར་བཏགས་སོ། །དེ་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་དེ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ། གྲོང་ངམ། གྲོང་རྡལ་གང་ན་ཉེ་བར་རྟེན་ཅིང་གནས་པའི་གྲོང་ངམ། གྲོང་རྡལ་དེ་ཉིད་དུ་ལུས་མ་སྲུངས། དབང་པོ་དག་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་ཞུགས་སོ། །དེས་གྲོང་ངམ། གྲོང་རྡལ་དེ་ཉིད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་ཁོས་སུ་ཕབ་ནས་རྐང་པ་གཉིས་བཀྲུས་ཏེ། ནང་དུ་ཡང་དག་འཇོག་གི་ཕྱིར་གནས་སུ་ཞུགས་སོ། །དེའི་སེམས་གང་གི་ཚེ་འདོད་པ་ལ་འདོད་ཆགས་ཀྱིས་ཀུན་ནས་བཀྲིས་པར་གྱུར་པ་དེའི་ཚེ་དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། རང་གི་ཁར་བཅུག་ནས་རྩོལ་བ་བྱེད་དོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་གནས་ཉུལ་ཞིང་རྒྱུ་བ་དག་དགེ་སློང་དེའི་གནས་ག་ལ་བ་དེར་ཕྱིན་པ་དང ། དགེ་སློང་དེ་དག་གིས་དགེ་སློང་དེ་དེ་ལྟར་བྱེད་པ་མཐོང་ངོ ། །མཐོང་ནས་ཀྱང་ཡིད་མི་དགའ་ཞིང་མངོན་པར་མ་མགུ་ནས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅི་བྱེད། རེག་པ་བདག་གིར་བྱེད་དོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ། དེ་ནི་གཞན་གྱི་ལ་ཡིན་གྱི་རང་གི་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར
5.37a
ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང ། མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་དོང་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཤིག་གཞན་གྱི་ལ་ཡང་བཀག་ན་རང་གི་ལ་ལྟ་སྨོས་ཀྱང་ཅི་དགོས་ཏེ་མི་གཏི་མུག་ཅན་དེ་ནི་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་འབབ་པ་དང ། སྟེན་པ་ལ་བབ་པས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ་རང་གི་འམ། གཞན་གྱི་ཁར་བཅུག་ནས་རྩོལ་བར་བྱེད་ན་བཅུག་མ་ཐག་ཏུ་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་ཡན་ལག་གི་རྣམ་པ་ཚད་ལས་ཤིན་ཏུ་འདས་པ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཤེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདིའི་ཡན་ལག་གི་རྣམ་པ་ཚད་ལས་ཤིན་དུ་འདས་པ་དེའི་ཕྱིར་ཁྱེའུ་འདི་འཕྱང་བ་ཅན་ཞེས་བྱའོ་ཞེས་དེའི་མིང་འཕྱང་བ་ཅན་ཞེས་བྱ་བར་བཏགས་སོ། །དེ་འོ་མ་དང ། ཞོ་དང ། མར་དང ། ཞུན
5.37b
མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་གྲོང་ངམ། གྲོང་རྡལ་གང་ན་ཉེ་བར་རྟེན་ཅིང་གནས་པའི་གྲོང་ངམ། གྲོང་རྡལ་དེ་ཉིད་དུ་ལུས་མ་བསྲུངས། དབང་པོ་དག་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་ཞུགས་སོ། །དེས་གྲོང་ངམ། གྲོང་རྡལ་དེ་ཉིད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་ནང་དུ་ཡང་དག་འཇོག་གི་ཕྱིར་གནས་སུ་ཞུགས་སོ། །དེའི་སེམས་གང་གི་ཚེ་འདོད་པ་ལ་འདོད་ཆགས་ཀྱི་ཀུན་ནས་དཀྲིས་པར་གྱུར་པ་དེའི་ཚེ་དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ་རང་གི་བཤང་བའི་ལམ་དུ་བཅུག་ནས་རྩོལ་བར་བྱེད་དོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་གནས་ཉུལ་ཞིང་རྒྱུ་བ་དག་དགེ་སློང་དེའི་གནས་ག་ལ་བ་དེར་ཕྱིན་པ་དང ། དགེ་སློང་དེ་དག་གིས་དགེ་སློང་དེ་དེ་ལྟར་བྱེད་པ་མཐོང་ངོ ། །མཐོང་ནས་ཀྱང་ཡིད་མི་དགའ་ཞིང་མངོན་པར་མ་མགུ་ནས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅི་བྱེད། རེག་པ་བདག་གིར་བྱེད་དོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ་དེ་ནི་གཞན་གྱི་ལ་ཡིན་གྱི་རང་གི་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང ། མངོན་པར་བསྟོད་པར་ཡང་མ་བྱས་ཕྱིར་བཟློག་པ་ཡང་མ་བྱས་པར་དོང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ
5.38a
འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཤིག་གཞན་གྱི་ལ་ཡང་བཀག་ན་རང་གི་ལ་ལྟ་སྨོས་ཀྱང་ཅི་དགོས་ཏེ། མི་གཏི་མུག་ཅན་དེ་ནི་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། རང་གི་འམ། གཞན་གྱི་བཤང་བའི་ལམ་དུ་བཅུག་ནས་རྩོལ་བར་བྱེད་ན་བཅུག་མ་ཐག་ཏུ་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། དེའི་ཚེ་ན་འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུངས་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་ཡང་མེད་བུ་མོ་ཡང་མེད་ནས། དེ་བུ་མེད་ཅིང་བུ་མངོན་པར་འདོད་པས་ཞི་བ་དང ། ཆུ་ལྷ་དང ། ལུས་ངན་དང་བརྒྱ་བྱིན་དང ། ཚངས་པ་ལ་སོགས་པ་དག་ལ་གསོལ་བ་འདེབས་ཤིང ། ལྷའི་བྱེ་བྲག་གཞན་འདི་ལྟ་སྟེ། ཀུན་དགའ་ར་བའི་ལྷ་དག་དང ། ཚལ་གྱི་ལྷ་དག་དང ། བཞི་མདོའི་ལྷ་དག་དང ། གཏོར་མ་ལེན་པའི་ལྷ་དག་དང ། ལྷན་ཅིག་སྐྱེས་པ་དག་དང ། ཆོས་འཐུན་པ་དག་དང ། རྟག་ཏུ་རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་རྟེན་ན་གང་གསོལ་བ་འདེབས་པའི་རྒྱུ་ལས་བུ་དག་དང ། བུ་མོ་དག་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་མ
5.38b
ཡིན་ཏེ། གལ་ཏེ་དེ་ལྟར་འགྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་མངོན་དུ་གྱུར་པ་ལས་བུ་དང ། བུ་མོ་དག་སྐྱེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕ་དང་མ་གཉིས་ཆགས་པར་གྱུར་ཅིང་འདུས་པ་དང ། མ་དུས་ལ་བབ་ཅིང་ཟླ་མཚན་དང་ལྡན་པ་དང ། དྲི་ཟ་ཉེ་བར་གནས་ཤིང་འཇུག་འདོད་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ན་སེམས་ཅན་ཞིག་ཀྱང་ལྷའི་རིས་ནས་ཤི་འཕོས་ཏེ་དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ་ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་དེ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་ནི་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་ཁྱིམ་ཐབ་ལ་སྨྲས་པ། རྗེའི་སྲས་བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་གྱིས་དགྱེས་པ་བསྐྱེད་དུ་གསོལ། དེ་ཡང་ཡིད་དགའ་ཞིང་ཡིད་དགའ་ནས་རོ་སྟོད་བསྲང་སྟེ། ལག་པ་གཡས་པ་བརྐྱངས་ནས་འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང ། ཁོ་བོ་དང་འཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་ལ་སྤྱོད་པ་དང ། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང ། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུ་འམ་མང་པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ
5.39a
འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གཏོགས་པ་ན་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚ་བ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་དང ། མངར་བ་དང ། ཚ་བ་དང ། བསྐ་བ་རྣམ་པར་སྤངས་པའི་ཟས་དག་དང ། དོ་ཤལ་དང ། སེ་མོ་དོ་དང ། རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུར་རྒྱུ་ཞིང་ཤོད་ཀྱི་ས་གཞིར་མི་འབབ་པ་དང ། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཛུད་དོ། །དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་འི་མིང་ཅིར་གདགས་ཤེས་མིང་འདོགས་པར་བྱེད་དོ། །ཡུལ་དབུས་ན་གང་གཟུགས་བཟང་བ། ལྟ་ན་སྡུག་པ། མཛེས་པ་དེ་ལ་མཛེས་པ་ཞེས་བྱའོ། །ཞེས་ཀུན་དུ་སྤྱོད་པས་དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་གཟུགས་བཟང་བ། ལྟ་ན་སྡུག་པ། མཛེས་པ་ཡིན་ལ། དེ་དེད་དཔོན་དགའ་བོའི་བུ་ཡིན་པ་དེའི་ཕྱིར་ཁྱེའུ་འི་མིང་མཛེས་དགའ་ཞེས་བྱའོ། །ཞེས་དེའི་མིང་མཛེས་དགའ་ཞེས་བྱ་བར་བཏགས་སོ། །ཁྱེའུ་མཛེས་དགའ་མ་མ་བརྒྱད་པོ། པང་ན་འཚོ་བའི་མ་མ་གཉིས་དང ། ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང །
5.39b
རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དེ་དག་གིས་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང ། གྲངས་དང ། རྩིས་དང ། དབྱུང་བ་དང ། གཞུག་པ་དང ། གཞག་པ་ལ་ཉེ་བར་ཞུགས་ནས། དེ་ཡི་གེའི་མཐར་ཕྱིན་ཅིང་འབྱེད་པ་དང ། ཀློག་པ་དང ། མཁས་པ་དང ། སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །ཕས་དེའི་ཆུང་མའི་འཁོར་གསུམ་པོ་རབ་དང ། འབྲིང་དང ། ཐ་མ་དག་རྣམ་པར་བཞག་གོ། །འདུག་པའི་གནས་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ། །བསྐྱེད་མོས་ཚལ་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ། །དེ་སྟེང་གི་ཁང་བཟངས་ཀྱི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེད་དཔོན་དགའ་བོ་རྟག་ཏུ་རྩིས་ལ་ཆགས་ཤིང་འདུ་བ་དང ། འགོད་པ་དག་ཀྱང་སྦྱོང་བར་བྱེད་ནས་མཛེས་དགས་སྨྲས་པ། ཡབ་ཁྱོད་ཅིའི་སླད་དུ་རྟག་ཏུ་རྩིས་ལ་ཆགས་ཤིང་བཞུགས། དེས་སྨྲས་པ། བུ་ཅི་སྟེང་གི་ཁང་བཟངས་ཀྱི་གཞིར་གཏོགས་པ་ན་རྩེ་བ་ཉིད་ཀྱིས་ནོར་བསྒྲུབ་པར་བྱར་ནུས་སམ། ང་ཁྱིམ་གྱི་བྱ་བ་ལོས་ཀྱང་བསམ་དགོས་སོ། །མཛེས་དགས་དོན་གྱིས་འདིས་བདག་ལ་བསྐུལ་ཏོ་སྙམ་དུ་རིག་ནས། དེས་དེའི་རྐང་པ་གཉིས་ལ་གཏུགས་ཏེ་སྨྲས་པ། ཡབ་གལ་ཏེ་དེ་ལྟར་རྗེས་སུ་གནང་ན་ཡུལ་གཞན་དུ་མཆིས་ལ་ནོར་བསྒྲུབ་པར་བགྱིའོ། །དེས་སྨྲས་པ། བུ་ནོར་གྱི་རྣམ་པ་མང་པོ་ཡོད་ན་ཅིའི་ཕྱིར་ཡུལ་གཞན་དུ་འགྲོ། འདུག་ཤིག་།
5.40a
དེས་སྨྲས་པ། ཡབ་ངན་བུ་གོར་མ་བཀུམ་པར་མཆིའོ། །དེད་དཔོན་དགའ་བོས་འདི་འདོད་པ་ལ་བབ་པར་བྱའོ་སྙམ་དུ་བསམས་ནས། དེས་ལྡེ་མིག་ཀྱོག་པོ་ལ་སོགས་པ་བླངས་ཏེ། དབྱིག་དང ། གསེར་བྱས་པ་དང་མ་བྱས་པ་དེའི་མཛོད་གང་བ་བདུན་ཕྱེ་སྟེ་བསྟན་ནས་སྨྲས་པ། བུ་མཛེས་དགའ་ནོར་གྱི་རྣམ་པ་འདི་སྙེད་ཡོད་ཀྱིས་ཁྱོད་འདི་ཉིད་དུ་འདུག་ལ་འདོད་པ་ལ་ཡང་ལོངས་སྤྱོད་ཅིག་།སྦྱིན་པ་དག་ཀྱང་བྱིན་ཅིག་།བསོད་ནམས་དག་ཀྱང་གྱིས་ཤིག་།ཡུལ་གཞན་དུ་འགྲོ་མི་དགོས་སོ། །དེས་སྨྲས་པ། ཡབ་ཁྱོད་ངན་བུ་ལ་སྟོན་པར་མཛད་ན། ངན་བུས་བུ་རྣམས་ལ་ཅི་ཞིག་བསྟན་པར་བགྱི། དེད་དཔོན་དགའ་བོས་དེ་ཟེར་བ་བཟང་སྟེ། བདག་འདས་ནས་འདིས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་བདག་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་འདི་ལ་ཕའི་གྲོགས་དག་ཀྱང་མངོན་དུ་གྱུར་པས་དེ་ལྟ་ན་བདག་འདས་ནས་འདིའི་འགྲོ་བའི་ཕྱོགས་མུན་པ་མེད་པར་འགྱུར་རོ་སྙམ་དུ་ཤེས་ཤིང་རིག་ནས་ཆུང་མ་ལ་སྨྲས་པ། བཟང་མོ་ཁོ་བོ་འདས་ནས་མཛེས་དགས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་ཁོ་བོ་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་འདི་ལ་ཕའི་གྲོགས་ཀྱང་མངོན་དུ་གྱུར་པས་དེ་ལྟར་ན་ཁོ་བོ་འདས་ནས་འདིའི་འགྲོ་བའི་ཕྱོགས་མུན་པ་མེད་པར་འགྱུར་རོ། །དེས་སྨྲས་པ། རྗེའི་སྲས་མ་ནོངས་ཏེ་དེ་བཞིན་མཆི་ལ་རག་གོ། །དེ་ནས་དེད་དཔོན་དགའ་བོས་མཛེས་དགའ་བོས་ཏེ་སྨྲས་པ། བུ་ཁྱོད་ཀྱིས་ཟོང་མནོས་ཏེ་ཡུལ་གཞན་དུ་འགྲོའོ་སྙམ་དུ་སེམས་བསྐྱེད་པ་མ་ཉེས་ཏེ། ཁོ་བོ་འདས་ནས་ཁྱོད་ཀྱིས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་ཁོ་བོ་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་ཁྱོད་ལ་ཕའི་གྲོགས་དག་ཀྱང་མངོན་དུ་གྱུར་པས་དེ་ལྟ་ན་ཁོ་བོ་འདས་ནས་ཁྱོད་ཀྱིས་འགྲོ་བའི་ཕྱོགས་མུན་པ་མེད་པར་འགྱུར་རོ། །མཛེས་དགས་སྨྲས་པ། ཡབ་བཀའ་བཞིན་འཚལ་མཆིའོ། །དེ་ནས་དེད་དཔོན་དགའ་བོས་འཕགས་རྒྱལ
5.40b
དུ་དྲིལ་བསྒྲག་པ་བྱེད་དུ་བཅུག་སྟེ། འཕགས་རྒྱལ་ན་གནས་པ་དང ། ཕྱོགས་ཐ་དད་པ་ནས་ལྷགས་པའི་ཚོང་པ་རྣམས་ལ་ཤེས་ལྡན་དག་ཉོན་ཅིག་།དེད་དཔོན་མཛེས་དགས་ཟོང་མནོས་ཤིང་ཡུལ་གཞན་དུ་འགྲོས། ཁྱེད་ཅག་ལས་དེད་དཔོན་མཛེས་དགའ་དང་ལྷན་ཅིག་ཏུ་ཤོ་གམ་མེད་པ་དང ། ལ་གཅན་མེད་པ་དང ། གྲུ་བཙས་མེད་པར་ཡུལ་གཞན་དུ་འགྲོ་བར་སྤྲོ་བ་གང་ཡིན་པ་དེས་ཡུལ་གཞན་དུ་འགྲོ་བ་དང་འཐུན་པའི་ཟོང་བསྡོགས་ཤིག་།ཚོང་པ་ལྔ་བརྒྱས་ཡུལ་གཞན་དུ་འགྲོ་བ་དང་འཐུན་པའི་ཟོང་བསྡོགས་སོ། །དེད་དཔོན་དགའ་བོས་ཚོང་པ་དེ་དག་འགྲོན་དུ་བོས་ཏེ་ཟན་བྱིན་ནས་སྨྲས་པ། ཤེས་ལྡན་དག་ཇི་ལྟར་མཛེས་དགའ་འདི་ཁོ་བོའི་བུ་ཡིན་པ་དེ་ཁོ་ན་བཞིན་དུ་ཁྱེད་ཅག་གི་ཡང་ཡིན་གྱིས། ཚོང་པ་ཡུལ་གཞན་དུ་དོང་བ་རྣམས་ཀྱི་བར་ཆད་ནི་གསུམ་ཡོད་དེ། རྒྱན་པོ་དང ། འཇུད་འཐུན་མ་དང ། ཆང་གི་གནས་སོ། །ཁྱེད་ཅག་གི་འདི་གནོད་པ་ལས་ངེས་པར་བཟློག་པར་བྱ་ཞིང་ཕན་པ་ལ་ཡང་དག་པར་སྦྱར་བར་བྱའོ། གལ་ཏེ་གནོད་པ་ལས་ངེས་པར་བཟློག་ཅིང་ཕན་པ་ལ་ཡང་དག་པར་སྦྱོར་བར་བྱེད་པ་ན་རབ་ཏུ་གནས་པར་གྱུར་ན་དེ་ལྟ་ན་ལེགས། གལ་ཏེ་རབ་ཏུ་མི་གནས་པར་གྱུར་ན་ཁྱེད་ཀྱིས་ཟོང་རྣམ་པར་སྤོངས་ཤིང་རིན་མནོས་ཏེ་འགྲོ་བར་བྱའོ། །མཛེས་དགའ་ལ་ཡང་སྨྲས་པ། བུ་མཛེས་དགའ་ཇི་ལྟར་ཁྱོད་ཁོ་བོའི་བུ་ཡིན་པ་དེ་ཁོ་ན་བཞིན་དུ་ཚོང་པ་འདི་དག་གི་ཡང་ཡིན་གྱིས། ཁྱོད་ཀྱིས་འདི་དག་གི་ཚིག་དད་པས་མཉན་ཅིང་བྱ་བར་སེམས་ཤིག་།དེད་དཔོན་མཛེས་དགའ་ཡབ་བཀའ་བཞིན་འཚལ་ཞེས་དེད་དཔོན་དགའ་བོ་ལས་མཉན་ནས་དགེ་མཚན་དང ། བཀྲ་ཤིས་དང ། བདེ་ལེགས་སུ་འགྱུར་བ་བྱས་ཏེ། ཤིང་རྟ་དག་དང ། ཁུར་དག་དང ། སྤྱང་དག་དང ། གླེ་བ་དག་དང ། རྔ་མོ་དག་དང ། བ་ལང་དག་དང ། བོང་བུ་དག་གིས་ཟོང་མང་པོ་བླངས་ཏེ། ཚོང་པ་ལྔ་བརྒྱ་དང་ལྷན་ཅིག་ཡུལ་གཞན་དུ་འཕགས་སོ། །དེ་མཐར་གྱིས་གྲོང་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་གི་གནས་དག་ཏུ་ཁད་ཀྱིས་རྒྱུ་བ་ན་མཉན་ཡོད་དུ་ཕྱིན་ནས་མཉན་ཡོད་དུ་མཛོད་ཅིག་ཏུ་ཟོང
5.41a
བཙུད་དེ་འདུག་གོ། །དེའི་ཚེ་ན་མཉན་ཡོད་ན་གཟུགས་འཚོང་མ་བཟང་མོ་ཞེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་དགའ་བ་ཞིག་འདུག་སྟེ། དེ་ཀར་ཥ་པཱ་ཎ་ལྔ་བརྒྱས་སྐྱེས་པ་དང་ལྷན་ཅིག་དགའ་མགུར་སྤྱོད་པར་བྱེད་དོ། །དེས་འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་འདུག་པ་དེའི་བུ་མཛེས་དགའ་ཞེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ་དེ་ཚོང་པ་ལྔ་བརྒྱ་དང་ལྷན་ཅིག་ཏུ་འདིར་ཕྱིན་ནས་མཛོད་ཆེ་གེ་མོ་ཞིག་ཏུ་ཟོང་མཁོས་སུ་ཕབ་སྟེ་འདུག་གོ་ཞེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། གལ་ཏེ་བདག་གིས་དེའི་ཟོང་ཐམས་ཅད་མ་ཕྲོགས་ན་བཟང་མོ་ཞེས་བྱ་བའི་མིང་མི་བཟུང་ངོ་སྙམ་མོ། །དེས་བུ་མོ་མངག་ཞུག་མ་ལ་སྨྲས་པ། བུ་མོ་དེད་དཔོན་མཛེས་དགའ་ཞེས་བྱ་བ་འབྱོར་པ་རྒྱ་ཆེན་པོ་དང་ལྡན་པས། ཟོང་ཁྱེར་ཏེ་འོངས་ནས་མཛོད་ཆེ་གེ་མོ་ཞིག་ཏུ་བཙུད་ཀྱིས་དྲི་དང ། ཕྲེང་བ་རྒྱུ་ཐོགས་ཏེ་དེའི་དྲུང་དུ་སོང་ལ་འདི་སྐད་ཅེས་ཇོ་མོ་བཟང་མོ་ཁྱོད་ཀྱི་ཞབས་ལ་ཕྱགས་འཚལ་ཞིང ། རྗེའི་སྲས་ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ་མི་ཕལ་པ་བཞིན་དུ་མཛོད་ན་བཞུགས། འདི་ནི་ཁྱོད་ཉིད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ་ཞེས་གྱིས་ཤིག་།ཇོ་མོ་བཀའ་བཞིན་འཚལ་ཞེས་བུ་མོ་མངག་གཞུག་མ་དེས་གཟུགས་འཚོང་མ་བཟང་མོ་ལས་མཉན་ཏེ། དྲི་དང ། ཕྲེང་བ་རྒྱུ་ཐོགས་ནས་དེད་དཔོན་མཛེས་དགའ་ག་ལ་བ་དེར་སོང་སྟེ་ཕྱིན་ནས་དེད་དཔོན་མཛེས་དགའ་ལ་འདི་སྐད་ཅེས་སྨྲས་སོ། །ཇོ་མོ་བཟང་མོ་ཁྱོད་ཀྱི་ཞབས་ལ་ཕྱག་འཚལ་ཞིང་དྲི་དང ། ཕྲེང་བ་རྒྱུ་འདི་ཡང་བསྐུར། རྗེའི་སྲས་ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ་མི་ཕལ་པ་བཞིན་དུ་མཛོད་ན་བཞུགས། འདི་ནི་ཁྱོད་ཉིད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ། །མཛེས་དགའས་སྨྲས་པ། བུ་མོ་སོང་ཤིག་དང ། ཁོ་བོ་དྲི་དང ། ཕྲེང་བ་རྒྱུ་འདི་བཏགས་ཏེ་འོང་ངོ ། །དེ་ནས་བུ་མོ་མངག་གཞུག་མ་དེ་གཟུགས་འཚོ་མ་བཟང་མོ་ག་ལ་བ་དེར་སོང་སྟེ་ཕྱིན་ནས། དེས་དེད་དཔོན་མཛེས
5.41b
དགའ་དང་ལྷན་ཅིག་སྐབས་ཀྱི་གཏམ་ཇི་སྙེད་བྱས་པར་གྱུར་པ་དེ་དག་ཐམས་ཅད་གཟུགས་འཚོང་མ་བཟང་མོ་ལ་བསྙད་དོ། །དེ་ནས་གཟུགས་འཚོང་མ་བཟང་མོས་བུ་མོ་མངག་གཞུག་མ་ལས་ཐོས་ནས་དགའ་བ་དང་ཡིད་བདེ་བ་སྐྱེས་ཏེ། ཁྱིམ་བྱུག་པས་བསྐུས་ཤིང་བྱི་དོར་བྱེད་དུ་བཅུག་ནས་མེ་ཏོག་སྣ་ཚོགས་བཀྲམ་ཞིང་འདུག་སྤོས་ཞིམ་པོས་བདུགས་ཏེ། བླ་རེ་བྲེས་པ་དང་བཅས་པའི་མལ་བཤམས་ནས་གཙོ་ཆེར་དེད་དཔོན་མཛེས་དགའ་ལ་སྡོད་ཅིང་འདུག་གོ། །དེད་དཔོན་མཛེས་དགའ་ཡང་དྲི་དང ། ཕྲེང་བ་རྒྱུ་དང ། རྒྱན་གྱིས་ཀླུབས་ཏེ་བཞོན་པ་ལ་ཞོན་ནས་ཁྱེའུ་མངག་གཞུག་པས་ཡོངས་སུ་བསྐོར་ཅིང་ལང་ཚོའི་གཟུགས་མཆོག་ཏུ་སྡུག་པས་རྣམ་པར་མཛེས་ཤིང་གཟུགས་འཚོང་མ་བཟང་མོའི་གནས་ག་ལ་བ་དེར་སོང་ངོ ། །གཟུགས་འཚོང་མ་བཟང་མོ་དེད་དཔོན་མཛེས་དགའ་ལང་ཚོའི་གཟུགས་མཆོག་ཏུ་སྡུག་པས་རྣམ་པར་མཛེས་པ་མཐོང་ངོ ། །མཐོང་ནས་ཀྱང་བྲན་མོ་མངག་གཞུག་མ་ལ་དྲིས་པ། བུ་མོ་འདི་དེད་དཔོན་མཛེས་དགའ་ཡིན་ནམ། དེས་སྨྲས་པ། ཇོ་མོ་དེད་དཔོན་མཛེས་དགའ་ནི་འདི་ཁོ་ན་ལགས་སོ། །དེ་ནས་གཟུགས་འཚོང་མ་བཟང་མོ་དགའ་བ་དང ། ཡིད་བདེ་བ་སྐྱེས་ནས་ཚིགས་སུ་བཅད་པ་སྨྲས་པ། རིགས་སྐྱེས་རིགས་མིན་སྐྱེས་པ་འམ། ནོར་ཉམས་ནོར་ཀྱིས་འབྱོར་བ་འང་རུང ། །གཟུགས་ཀྱིས་ཕྱུག་པ་མཐོང་བས་ནི། །བུད་མེད་རྣམས་ཀྱི་ཡིད་འཕྲོག་བྱེད། །དེ་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་དག་ཁོ་ནས་གཟུགས་འཚོང་མ་བཟང་མོའི་ཁྱིམ་དུ་འཇུག་པར་བརྩམས་པ་དང ། དེས་མྱུར་བ་མྱུར་བར་ཁང་ཐོག་ནས་བབས་ཏེ་དེ་བསུ་ནས་ཡན་ལག་ཐམས་ཅད་ཀྱིས་འཁྱུད་དེ། ཁྱིམ་གྱི་ནང་དུ་ཁྲིད་ནས་བུད་མེད་ཀྱི་ཁྲི་ལ་བཞག་སྟེ་སྨྲས་པ། རྗེའི་སྲས་ཀྱི་མཚན་ཅི། དེས་སྨྲས་པ། མཛེས་དགའོ། །དེས་སྨྲས་པ། ཨེ་མའོ་ཁྱོད་ཀྱི་མཚན་ནི་གཟུགས་དང་འདྲ་ལ། གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་དག་གིས་ཁྱོད་ཀྱི་མཚན་མཛེས་དགའ་ཞེས་བགྱི་བར་མ
5.42a
གསོལ་བར་གྱུར་ན། དེང་བདག་གིས་ཁྱོད་ཀྱི་མཚན་མཛེས་དགའ་ཞེས་བགྱི་བར་གསོལ་བར་འགྱུར་རོ། །དེས་སྨྲས་པ། ཁྱོད་ཀྱི་མཚན་ཅི། དེས་སྨྲས་པ། བཟང་མོའོ། །དེས་སྨྲས་པ། ཨེ་མའོ། །ཁྱོད་ཀྱི་མཚན་ནི་གཟུགས་དང་འདྲ་ལ། གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་དག་གིས་ཁྱོད་ཀྱི་མཚན་བཟང་མོ་ཞེས་བགྱི་བར་མ་གསོལ་བར་གྱུར་ན་དེང་བདག་གིས་ཁྱོད་ཀྱི་མཚན་བཟང་མོ་ཞེས་བགྱི་བར་གསོལ་བར་འགྱུར་རོ། །མཛེས་དགའས་སྨྲས་པ། བཟང་མོ་དགུང་གཅིག་གི་གླ་ཅི་ཙམ། དེས་སྨྲས་པ། རྗེའི་སྲས་ཀྱིས་མི་ཕལ་པ་བཞིན་དུ་མི་གཤའ་བ་ཞིག་བཀའ་སྩལ་ཏོ། །དེའི་བུ་མོ་མངག་གཞུག་མས་སྨྲས་པ། དགུང་རེད་ཞིག་ཀར་ཥ་པཱ་ཎ་ལྔ་བརྒྱ་ལྔ་བརྒྱའོ། །དེས་མི་ལ་ཁྱོད་ཀྱིས་ཉིན་རེ་ཞིང་ཀར་ཥ་པཱ་ཎ་ལྔ་བརྒྱ་ལྔ་བརྒྱ་བསྐུར་བར་བྱའོ་ཞེས་བསྒོ་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །འདོད་པ་དག་ནི་བསྟེན་པ་ན་ལྡོག་པ་འམ་ངོམས་པ་འམ། མཐར་ཐུག་པ་མེད་པས་དེ་ཉི་མ་མང་པོ་འདས་ཀྱང་ངོམས་པར་མ་གྱུར་ཅིང ། མིས་ཀྱང་ཉི་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱ་འབུལ་བ་ཁོ་ནར་བྱེད་དོ། །ཚོང་པ་དག་གིས་སྨྲས་པ། ཤེས་ལྡན་དག་དེད་དཔོན་མཛེས་དགའ་མི་སྣང་ན། དེ་བདག་ཅག་ལ་གྲོགས་པོས་གཏད་པས་ཀུན་དུ་བཙལ་བར་བྱའོ། །ཚོང་པ་དག་གིས་དེའི་གཡོག་དག་ལ་དྲིས་པ། དེད་དཔོན་གར་བཞུད། དེ་དག་གིས་སྨྲས་པ། དེད་དཔོན་ཉི་མ་གང་ཁོ་ན་ལ་མཉན་ཡོད་དུ་ཕྱིན་པའི་ཉི་མ་དེ་ཉིད་ལ་འཇུད་འཐུན་མའི་ཁྱིམ་དུ་ཞུགས་ཏེ་འདུག་ན་ཁྱེད་ཅག་གིས་དེང་གཟོད་དྲན་ནམ། ཚོང་པ་དག་གིས་སྨྲས་པ། ཤེས་ལྡན་དག་ཡུ་བུ་ཅག་གིས་དེད་དཔོན་མཛེས་དགའ་ཡལ་བར་བོར་བ་ནི་མ་ལེགས་པ་བྱས་ཏེ། འདིའི་ཕས་ཡུ་བུ་ཅག་ལ་གླན་ཀར་འགྱུར་རོ། །ཚོང་པ་དག་གིས་མཛེས་དགའ་ལ་དོན་འཐུན་རྣམས་ཀྱི་མཆིད་ནས་ཚུར་སྤྱོན་ཅིག་ཅེས་མཆིའོ་ཞེས་བང་ཆེན་བཏང་ངོ ། །བང་ཆེན་དེས་མཛེས་དགའ་ལ་བསྒོ་ནས་མཛེས་དགའ
5.42b
འབྱུང་བར་བརྩམས་པ་དང ། བཟང་མོས་གོས་ཀྱི་མཐའ་ནས་བཟུང་སྟེ་སྨྲས་པ། རྗེའི་སྲས་འདོད་པ་དག་ནི་རྒྱུ་གཉིས་ཀྱིས་བསྟེན་པར་བགྱི་སྟེ། གཟུགས་བཟང་བ་ཉིད་དང ། ལང་ཚོ་ཉིད་ཀྱིས་སོ། །ཁྱོད་ནི་གཟུགས་བཟང་བ་དང ། ལང་ཚོ་ལ་བབ་པ་ལགས་ན་གཞོན་པའི་གནས་སྐབས་སུ་རེ་ཤིག་རྩེ་བ་དང ། དགའ་བ་དང ། དགའ་མགུར་སྤྱོད་པ་མཛོད་ལ་བགྲེས་པའི་གནས་སྐབས་སུ་ནོར་བསྒྲུབ་པ་མཛོད་ཅིག་།མཛེས་དགའས་བང་ཆེན་དེ་ལ་སྨྲས་པ། ཀྱེ་ཁྱོད་སོང་ཤིག་དང་འོང་ངོ ། །བང་ཆེན་དེ་སོང་སྟེ་ཚོང་པ་རྣམས་ལ་སྨྲས་པ། དེད་དཔོན་གྱི་ཞལ་ནས་སོང་ཤིག་དང་འོང་ངོ་ཞེས་གསུང་ངོ ། །ཚོང་པ་དེ་དག་འདུས་དེ། སྡོད་པ་ན་མཛེས་དགའ་ཐོགས་ནས། ཚོང་པ་དེ་དག་ཐམས་ཅད་འདུས་ཏེ་འཇུད་འཐུན་མའི་ཁྱིམ་དུ་དོང་ནས་ཚོང་པ་དེ་དག་གིས་བསྒོར་སྡད་དེ། མི་ལ་སྨྲས་པ། ཀྱེ་ཁྱོ་ག་སོང་ལ་དེད་དཔོན་ལ་ཚོང་པའི་ཚོགས་རྣམས་སྒོ་ན་སྡོད་ཅིང་དེད་དཔོན་བལྟ་བར་འཚལ་ལོ། །ཞེས་གྱིས་ཤིག་།མི་དེས་སོང་སྟེ་མཛེས་དགའ་ལ་བརྗོད་ནས་མཛེས་དགའས་འབྱུང་བར་བརྩམས་པ་དང ། ཡང་གཟུགས་འཚོང་མ་བཟང་མོས་གོས་ཀྱི་མཐའ་ནས་བཟུང་སྟེ་སྨྲས་པ། རྗེའི་སྲས་ཚོང་པ་དེ་དག་ཀྱང་བདག་དང་ལྷན་ཅིག་དགའ་མགུར་སྤྱོད་འཚལ་ཏེ། དེ་དག་དང་ལྷན་ཅིག་དགའ་མགུར་སྤྱད་དུ་ག་ལ་རུང་བཞུགས་ཤིག་།འདོད་པ་དག་ནི་བསྟེན་པ་ན་ཀུན་དུ་སྦྱོར་བ་དག་འཕེལ་བར་བྱེད་པ་ཡིན་པས་མཛེས་དགས་སྨྲས་པ། གང་གི་ཚེ་ཁོ་བོ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་འབྱུང་བར་འགྱུར་རོ། །མི་དེས་སོང་སྟེ་ཚོང་པའི་ཚོགས་རྣམས་ལ་སྨྲས་པ། དེད་དཔོན་གྱི་ཞལ་ནས་གང་གི་ཚེ་ཁོ་བོ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་འབྱུང་ངོ་ཞེས་གསུང་ངོ ། །ཚོང་པ་དག་གིས་སྨྲས་པ། ཀྱེ་མ་མཛེས་དགའ་འདི་བྱ་བ་མ་ཡིན་པ་ལ་ཞུགས་ཀྱིས་འདོང་ངོ་ཞེས་དེ་དག་གིས་ཟོང་རྣམ་པར་སྤངས་ནས་རིན་བླངས་ཏེ་འཕགས་སོ། །དེ་ནས་མི་གང་གིས་ཉི་མ་རེ་རེ་ཞིང་བཟང་མོ་ལ་ཀར་ཥ་པཱ་ཎ་ལྔ་བརྒྱ
5.43a
ལྔ་བརྒྱ་ཕུལ་བར་གྱུར་པ་དེས་ཕྱིན་ཆད་འབུལ་བར་མི་བྱེད་དོ། །དེ་ནས་དུས་གཞན་ཞིག་ན་བཟང་མོས་མི་དེ་ལ་དྲིས་ཤིང་སྨྲས་པ། ཀྱེ་ཁྱོ་ག་ཅིའི་ཕྱིར་ཕྱིན་ཆད་ཀར་ཤ་པ་ཎ་དག་འབུལ་བར་མི་བྱེད། དེས་སྨྲས་པ། དོན་འཐུན་དག་དོང་བས་བདག་གིས་ག་ལས་དབུལ། ཅི་དོན་འཐུན་དག་གིས་མཛེས་དགའི་ཟོང་ཡང་ཁྱེར་རམ། ཁྱེར་རོ། །བཟང་མོས་མཛེས་དགའ་དང་ལྷན་ཅིག་ཉི་མ་གཉིས་སམ། གསུམ་དགའ་མགུར་སྤྱད་ནས་སྨྲས་པ། རྗེའི་སྲས་བདག་ལ་ཞིང་ཡང་མ་མཆིས། ལས་ཀྱི་མཐའ་བགྱིད་པ་དག་ཀྱང་མ་མཆིས། གྲོང་མི་ཟོང་མནོས་ཏེ་ཡུལ་གཞན་དུ་མཆི་བ་དག་ཀྱང་མ་མཆིས་ཏེ། ཁྱོད་ལྟ་བུ་དག་གི་དྲུང་ནས་གང་ཐོབ་པ་དེས་བདག་འཚོ་བར་འགྱུར་བ་ཁོ་ནར་བས་ན་ཡང་ན་ནི་ཀར་ཤ་པ་ཎ་དག་སྩོལ་ཅིག་།ཡང་ན་ནི་སྐྱེས་པ་གཞན་གྱི་སྐབས་དབྱེ་བ་མཛོད་ཅིག་།མཛེས་དགའས་སྨྲས་པ། བཟང་མོ་ཁྱོད་ལ་སྡུག་པ་འགའ་ཡང་མེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ཚོགས་ཅན་རྣམས་ལ་སྡུག་པ་མེད། །དེ་དག་རང་བཞིན་རིང་མི་གནས། །བྱ་རྣམས་འབྲས་མེད་ལྗོན་པ་བཞིན། །དེ་དག་རྙིང་པ་རྣམ་པར་སྤོང་ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་ལ་ཇི་སྲིད་དུ་ནོར་སྦྱིན་པར་བྱེད་པ་དེ་སྲིད་དུ་ཁྱོད་སྐྱེས་པའི་དབང་དུ་འགྱུར་རམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ཇི་སྲིད་བརྒྱ་བྱིན་ཆར་འབེབས་པ། །དེ་སྲིད་རི་ཀླུང་ཆུ་འབེབས་ལྟར། །ཇི་སྲིད་ནོར་ནི་སྦྱིན་བྱེད་པ། །དེ་སྲིད་འཇུད་འཐུན་སྐྱེས་བུ་དབང ། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་སུ་ལ་ཡང་ཡིད་འབེབས་པར་མི་བྱེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། འཇུད་འཐུན་དགོངས་ཀར་རང་ལུས་བཞིན། །གཅུགས་དང་གཏམ་གྱིས་དགའ་བར་བྱེད། །དེ་ནས་ནམ་ཕྱེད་དབུས་གནས་ཤིང ། །ནམ་ནངས་ཕན་ཆད་རྩཝ་བཞིན་སྤོང ། །ཞེས་བགྱི་བ་མ་གསན་ཏམ། མཛེས་དགའས་སྨྲས་པ། བཟང་མོ་ཁྱོད་ནོར་དང་བཅས་པའི་མི་དག་ལ་སྤྱོད་པར་བྱེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ནོར་དང་བཅས་པའི
5.43b
མི་དག་དང ། །ནོར་མ་སྤྱད་པ་རྣམས་ལ་ཡང ། །སར་པའི་རྩཝ་ལ་བ་ལང་བཞིན། །བདག་ཅག་རྣམས་ཀྱིས་སྤྱད་པར་བྱ། །ཞེས་བགྱི་བ་མ་གསན་ཏམ། མཛེས་དགས་འབྱུང་བར་བརྩམས་པ་དང ། བཟང་མོས་བསམས་པ། མཛེས་དགའ་འདི་ནི་གཟུགས་བཟང་བ། བལྟ་ན་སྡུག་པ། མཛེས་པ་ཡིན་པས་ཤིན་དུ་ཐག་རིང་བར་སོང་ཡང་སྐྱེས་བུ་འདི་ལྟ་བུ་དང་ལྷན་ཅིག་རྩེ་བར་བྱ། དགའ་བར་བྱ། དགའ་མགུར་སྤྱོད་པར་བྱ་བ་ཡིན་པས་དེའི་ཕྱིར་ཇི་སྲིད་དུ་གཞན་ཀར་ཤ་པ་ཎ་དག་ཐོགས་ཏེ་མི་འོང་བ་དེ་སྲིད་དུ་འདི་དང་ལྷན་ཅིག་རྩེ་བར་བྱ། དགའ་བར་བྱ། དགའ་མགུར་སྤྱད་པར་བྱའོ་སྙམ་དུ་རིག་ནས། བཟང་མོས་མཛེས་དགའི་གོས་ཀྱི་མཐའ་ནས་བཟུང་སྟེ་འཛིན་ཅིང་སྨྲས་པ། རྗེའི་སྲས་ཁྱོད་ལ་ཁབ་ན་བཞད་གད་མི་བགྱི་དམ། དེ་ནི་བདག་གིས་བཞད་གད་བགྱིས་པ་ལགས་གྱིས་བཞེས་ཤིག་།མ་བཞུད་ཅིག་།མཛེས་དགའ་འདོད་ཆགས་ཤས་ཆེན་པོས་འདུག་པ་དང ། སྐྱེས་པ་གཞན་ཞིག་ཀར་ཥ་པཱ་ན་ལྔ་བརྒྱ་ཐོགས་ཏེ་དེར་ཞུགས་ནས། དེས་བཟང་མོ་དགའ་མགུར་སྤྱད་ཀྱིས་བཞུད་ཅེས་སྨྲས་པ་དང ། བཟང་མོ་མཛེས་དགའ་ཉིད་ཀྱི་མདུན་དུ་ཡོལ་བས་བཅད་དེ་དགའ་མགུར་སྤྱད་པར་བརྩམས་ནས། མཛེས་དགས་འདི་བདག་ཁོ་ནའི་མདུན་དུ་སྐྱེས་པ་འདི་དང་ལྷན་ཅིག་དགའ་མགུར་སྤྱོད་པར་བྱེད་དོ་སྙམ་དུ་ཤེས་ཤིང་རིག་ནས་སོང་ངོ ། །མཛེས་དགའ་ལམ་པོ་ཆེ་ལ་མི་མཁས་པས་གང་དུ་འགྲོ་བར་བྱ་བ་མི་ཤེས་ནས། ཇི་ཙམ་ན་དགེ་སློང་ཞིག་མཉན་ཡོད་དུ་བསོད་སྙོམས་ལ་བརྒྱུས་ནས་ཕྱིར་བྱུང་བ་དེ་མཛེས་དགས་མཐོང་ནས་དགེ་སློང་དེའི་ཕྱིར་ཐོག་ཐག་རྗེས་སུ་སོང་ངོ ། །དེ་ནས་དགེ་སློང་དེ་གཙུག་ལག་ཁང་དུ་སོང་སྟེ། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་ནས་སྣམ་སྦྱར་སྤྲུགས་ཏེ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ། ཆུ་བཙགས་ནས་ལོ་མ་ལྷགས་པ་དག་བླངས་ཏེ། འདུག་ནས་ཟས་ཀྱི་བྱ་བ་བྱ་བར་བརྩམས་པ་དང ། མཛེས་དགའ་དེའི་མདུན་ན་འགྲེང་ངོ ། །དགེ་སློང་དེས་མཛེས་དགའ་ལ
5.44a
སྨྲས་པ། བཞིན་བཟངས་ལྷུང་བཟེད་ཀྱི་ལྷག་མ་འདོད་དམ། མཛེས་དགས་གལ་ཏེ་མ་ཟོས་ན་བཀྲེས་པས་འཆི་བར་འགྱུར་བར་ཤེས་ཤིང་རིག་ནས་སྨྲས་པ། འཕགས་པ་འཚལ་ལོ། །དགེ་སློང་དེས་མཛེས་དགའ་ལ་ལྷུང་བཟེད་ཀྱི་ལྷག་མ་བྱིན་པ་དང ། མཛེས་དགས་ཟོས་སོ། །ཟོས་ནས་དྲིས་པ། བཞིན་བཟངས་ཁྱོད་ག་ལས་འོང ། མཛེས་དགས་སྨྲས་པ། འཕགས་པ་བདག་ནི་ཡུལ་སྲུང་བྱེད་དག་ན་གྲོང་ཁྱེར་འཕགས་རྒྱལ་ཞེས་བགྱི་བ་དེ་ན་དེད་དཔོན་དགའ་བོ་ཞེས་བགྱི་བ་མཆིས་པ་དེའི་བུ་མཛེས་དགའ་ཞེས་བགྱི་བ་ལགས་ཏེ། བདག་ཟོང་མང་པོ་འཚལ་ཏེ་མཆིས་པ་ལས་འཇུད་འཐུན་མས་ཚུལ་མ་ལགས་པས་གནོད་པ་བསྒྲུབས་པར་གྱུར་ཏོ། །དགེ་སློང་དེས་སྨྲས་པ། བཞིན་བཟངས་ཅིའི་ཕྱིར་རབ་ཏུ་མི་འབྱུང ། མཛེས་དགས་གལ་ཏེ་བདག་འཕགས་རྒྱལ་དུ་སོང་བར་གྱུར་ན་སུ་ཞིག་མཆིལ་མ་དག་ས་ལ་འདོར་བར་འགྱུར་ཏེ། བདག་ཁོ་ནའི་སྟེང་འབའ་ཞིག་ཏུའོ་སྙམ་དུ་ཤེས་ཤིང་རིག་ནས་སྨྲས་པ། འཕགས་པ་བདག་རབ་ཏུ་འབྱུང་ངོ ། །དགེ་སློང་དེས་མཛེས་དགའ་རབ་ཏུ་ཕྱུང་བསྙེན་པར་རྫོགས་པར་བྱས་ནས་དེའི་འོག་ཏུ་ཉི་མ་གཉིས་སམ། གསུམ་དུ་ཀུན་དུ་སྤྱད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟངས་རི་དགས་ཀྱིས་རི་དགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང ། ཡབ་ཀྱི་ཡུལ་ཡིན་གྱིས་བསོད་སྙོམས་བསྒྲུབས་ལ་འཚོ་བར་གྱིས་ཤིག་།མཛེས་དགའ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །གཟུགས་འཚོང་མ་བཟང་མོ་ཡང་འགྱོད་པ་སྐྱེས་ཏེ། བདག་གིས་ཀར་ཥ་པ་ཎ་འདོད་པའི་རྒྱུས་དེད་དཔོན་མཛེས་དགའ་དེ་ཙམ་དུ་མཛེས་ཤིང་ལང་ཚོ་ལ་བབ་པ་དེ་བསྐྲད་པ་ནི་མ་ལེགས་པ་བྱས་ཏེ། ཤིན་དུ་ཐག་རིང་བར་སོང་ཡང་སྐྱེས་བུ་དེ་ལྟ་བུ་ལྷན་ཅིག་དགའ་མགུར་སྤྱད་པར་བྱ་བ་ཡིན་པར་ཤེས་ཤིང་རིག་ནས། བུ་མོ་མངག་གཞུག་མ་ལ་བུ་མོ་གལ་ཏེ་དེད་དཔོན་མཛེས་དགའ་མཐོང་ན་ཡང་འཇུག་ཏུ་ཆུག་ཤིག་ཅེས
5.44b
བསྒོའོ། །མཛེས་དགའ་སྤྱོད་ཡུལ་ལ་མི་མཁས་པས་བསོད་སྙོམས་སྒྲུབ་པ་ན་འཇུད་འཐུན་མའི་ཁྱིམ་དེ་ཉིད་དུ་ཕྱིན་པ་དང ། བུ་མོ་མངག་གཞུག་མ་དེས་མཐོང་ནས་ཡོངས་སུ་དགའ་བས་བཟང་མོ་ལ་ཇོ་མོ་མཛེས་དགའ་ཁབ་སྒོར་མཆིས་སོ། །ཞེས་སྦྲན་ཏོ། །བཟང་མོས་སྨྲས་པ། འཇུག་ཏུ་ཆུག་ཤིག་།བུ་མོས་སྨྲས་པ། རབ་ཏུ་བྱུང་ངོ ། །བཟང་མོས་སྨྲས་པ། རབ་ཏུ་བྱུང་ཡང་འཇུག་ཏུ་ཆུག་ཤིག་།མངག་གཞུག་མ་དེས་མཛེས་དགའ་འཇུག་ཏུ་བཅུག་ནས་གཟུགས་འཚོང་མ་བཟང་མོས་མཐོང་བ་དང ། བཟང་མོས་བྲང་བརྡུངས་ཏེ་སྨྲས་པ། མཛེས་དགའ་ཁྱོད་ཀྱིས་ཅིའི་སླད་དུ་ངན་བུ་སྤངས་ཏེ་རབ་ཏུ་བྱུང ། མཛེས་དགས་སྨྲས་པ། སྐལ་ཆད་མ་ཁྱོད་ཁོ་བོ་ཁོ་ནའི་མདུན་དུ་སྐྱེས་པ་གཞན་དང་ལྷན་ཅིག་དགའ་མགུར་སྤྱོད་པར་བྱེད་ན་ཁོ་བོ་ཇི་ལྟར་རབ་ཏུ་མི་འབྱུང ། བཟང་མོས་སྨྲས་པ། རྗེའི་སྲས་བུད་མེད་ཀྱི་ཡུལ་ནི་རྟག་ཏུ་ནོངས་པ་མཆིས་པས་བདག་ནོངས་པ་མཆིས་པ་དེ་བཟོད་པར་མཛོད་ཅིག་།ད་ནི་བདག་དང་རྫས་ཀྱང་ཁྱོད་ཀྱི་ལགས་ཀྱིས་ཚུར་སྤྱོན་བདག་དང་ལྷན་ཅིག་དགའ་མགུར་སྤྱད་དུ་གསོལ། མཛེས་དགས་སྨྲས་པ། དེའི་ཚེ་ཡང་ཁྱོད་ཀྱིས་ཁོ་བོ་རེ་ཤིག་ནོར་དང་དོན་འཐུན་དག་ལས་ཡོངས་སུ་ཉམས་པ་བྱས་ན། ཅི་ད་ཚུལ་ཁྲིམས་ལས་ཀྱང་ཡོངས་སུ་ཉམས་པར་བྱེད་འདོད་དམ། བཟང་མོས་སྨྲས་པ། འཕགས་པ་སླད་རོལ་དུ་དྲུད་ཅིང་ནང་དུ་ཕོ་ལ། ནང་དུ་དྲུད་ཅིང་སླད་རོལ་ཏུ་ཕོ་ཤིག་དང་འདིས་ཚུལ་ཁྲིམས་འཆལ་བ་ཅི་མཆིས། མཛེས་དགས་དགེ་སློང་གནས་བརྟན་ནོ་ཅོག་འདིར་བསོད་སྙོམས་ལ་འཇུག་པ་དེ་དག་ཀྱང་གོར་མ་ཆག་པར་འདི་ལྟར་བྱེད་པས་དེས་ན་འདི་སྐད་ཅེས་ཟེར་རོ་སྙམ་དུ་ཤེས་ཤིང་རིག་ནས། མཛེས་དགས་ལྷུང་བཟེད་དང་ཆོས་གོས་མཐའ་གཅིག་ཏུ་གཞག་སྟེ། ཕྱི་རོལ་དུ་དྲུད་ཅིང་ནང་དུ་ཕོ། ནང་དུ་དྲུད་ཅིང་ཕྱི་རོལ་དུ་ཕོ་ནས་ཡ་མཚན་དང་བྲལ་བར་གྱུར་ཏོ། །དེ་ནས་བཟང་མོས་བཅའ་བ་དང་བཟའ་བ་གཙང་མ་བསོད་པས་ལྷུང་བཟེད་འགེངས་སུ་བཅུག་སྟེ་ཕྱིན་ནས། འཕགས་པ་གལ་ཏེ་ཡང་བཞེད་པར་གྱུར་ན་སྤྱོན་ཅིག་ཅེས་ཀྱང་སྨྲས་སོ། །མཛེས་དགས
5.45a
བསོད་སྙོམས་བླངས་ཏེ་སོང་ངོ ། །ཇི་ཙམ་ན་བཅོམ་ལྡན་འདས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བའི་ཕྱིར་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །བཅོམ་ལྡན་འདས་ཇི་ལྟ་ཇི་ལྟར་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དང ། ཞེ་སྡང་འདོད་ཆགས་དང་བྲལ་བར་བྱ་བའི་ཕྱིར་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དེ་ལྟ་དེ་ལྟར་ཚེ་དང་ལྡན་པ་མཛེས་དགའ་ཅུང་ཟད་འགྱོད་པར་གྱུར་རྣམ་པར་འགྱོད་པར་གྱུར། རབ་ཏུ་འགྱོད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ་ཅིང་ཅང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་ཀློད། གདོང་སྨད། སྤོབ་པ་མེད། སེམས་ཁོངས་སུ་ཆུད་ཅིང་འདམ་བུ་སྔོན་པོར་བརྔས་པ་རྙིངས་པར་འགྱུར། སྐམ་པར་འགྱུར་བ་ལྟར་འདུག་གོ། །དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མཛེས་དགའ་ཁྱོད་ལ་ལུས་ཀྱི་གནོད་པ་འམ། སེམས་ཀྱི་ཡོངས་སུ་གདུང་བ་འགའ་ཞིག་མེད་དམ། དེ་ངོ་ཚ་བས་སྨྲ་བར་མི་བྱེད་ཅིང་འགའ་ཡང་མེད་དོ་ཞེས་ཟེར་རོ། །སྨན་པ་ཞིག་ཕྱོགས་དེར་འོངས་པ་དེ་ལ་དགེ་སློང་རྣམས་ཀྱིས་སྨྲས་པ། བཞིན་བཟངས་གཞོན་ནུ་འདི་ནད་ཅི་ཡིན་པ་དེ་ལྟོས་ཤིག་།སྨན་པ་དེས་དེ་བརྟག་པར་བརྩམས་པ་དང ། དབང་པོ་གསལ་བ་མཐོང་ནས་སྨྲས་པ། འཕགས་པ་དག་འདིའི་དབང་པོ་དག་གསལ་བས་འདི་ལ་ལུས་ཀྱི་ནད་ནི་འགའ་ཡང་མ་མཆིས་ཀྱི། འདི་ལ་སེམས་ཀྱི་ཡོངས་སུ་གདུང་བ་ནི་གོར་མ་བཀུམ་པར་མཆིས་སོ། །དགེ་སློང་རྣམས་ཀྱིས་སྨྲས་པ། བཞིན་བཟངས་འདིའི་སེམས་ཀྱི་ཡོངས་སུ་གདུང་བ་ཇི་ལྟ་བུ་ཡིན། སྨན་པས
5.45b
སྨྲས་པ། འཕགས་པ་དག་བདག་ཅག་སྨན་པ་དག་ནི་ལུས་གསོ་བར་བགྱིད་པ་ལགས་ཀྱི་སེམས་གསོ་བར་བགྱིད་པ་མ་ལགས་ཏེ། འདི་ལྟར་འཕགས་པ་དག་ཉིད་སེམས་གསོ་བར་མཛད་པ་ལགས་པས་འཕགས་པ་དག་ཉིད་ཀྱིས་མཁྱེན་པར་འགྱུར་རོ་ཞེས་སྨྲས་ཏེ་སོང་ངོ ། །དགེ་སློང་རྣམས་ཀྱིས་མཛེས་དགའ་ལ་སྨྲས་པ། ཚེ་དང་ལྡན་པ་འདི་ན་ཁྱོད་ཀྱི་ཕ་ཡང་མེད། མ་ཡང་མེད། རྩ་ལག་གཞན་ཡང་མེད་དེ། ཚངས་པ་མཚུངས་པར་སྤྱོད་པ་ངེད་ཅག་ཁོ་ནར་ཟད་པས་ངེད་ཀྱིས་ཁྱོད་ཀྱི་བསྙེན་བཀུར་བྱས་ཇི་ལྟར་གྱུར་པ་སྨྲོས་ཤིག་།མཛེས་དགས་དགེ་སློང་དེ་དག་ལ་སྐབས་དེ་རྒྱས་པར་བརྗོད་དོ། །དགེ་སློང་དེ་དག་གིས་སྨྲས་པ། ཚེ་དང་ལྡན་པ་ནི་འབྲས་བུ་ཁོ་ནས་ཚ་བར་གྱུར་ཏེ། ཚེ་དང་ལྡན་པས་རབ་ཏུ་བྱུང་བ་ཙམ་ཉིད་ཀྱིས་བསྟན་པ་ལ་ཆུ་བུར་ཕྱུང་བར་གྱུར་ཏོ་ཞེས་དགེ་སློང་དེ་དག་མཛེས་དགས་སྨྲས་པ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པ་མ་བྱས། ཕྱིར་བཟློག་པ་ཡང་མ་བྱས་པར་དོང་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་དེ་དག་གིས་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེས་ཀྱང་མི་གཏི་མུག་ཅན་དེ་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་ཟག་བྱེད་ཟག་བྱེད་ཀྱི་ཕྱི་རོལ་ཏུ་དྲུད་ཅིང་ནང་དུ་འབོ་བ་དང ། ནང་དུ་དྲུད་ཅིང་ཕྱི་རོལ་ཏུ་འབོ་བར་བྱེད་ན་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་པ་དང ། ཆུང་མ་དེ་རང
5.46a
གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་ཆུང་མ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །ཁྱིམ་བདག་དེ་ཡང་སྐུར་པ་གདབ་པར་འགྱུར་བའི་ལས་དག་གིས་ཆུང་མ་གསོད་པ་ཆུང་མ་གསོད་པ་ཞེས་བྱ་བའི་མིང་དུ་གྱུར་ཏོ། །ཁྱིམ་བདག་དེས་ཡང་བུ་མོ་བསླངས་པ་དང ། མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང་མི་སྦྱིན་ནོ་ཞེས་ཀྱང་ཟེར་རོ། །ཁྱིམ་བདག་དེས་ཡུགས་ས་མོ་དག་བསླངས་པ་དང ། ཡུགས་ས་མོ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེ་རྣམ་པ་ཐམས་ཅད་དུ་ཡི་ཆད་ནས་རང་ཉིད་ཀྱིས་ཁྱིམ་གྱི་སོ་ཚིས་དག་བྱ་བར་བརྩམ་པ་དང ། དུས་གཞན་ཞིག་ན་ཁྱིམ་བདག་དེའི་ཆུང་པོ་གྲོགས་ཤིག་འོངས་ནས་དེས་ཁྱིམ་བདག་དེ་མཐོང་ནས་དྲིས་པ་དང ། ཁྱོད་ཅི་བྱེད། ཁྱིམ་གྱི་སོ་ཚིས་དག་བྱེད་དོ། །དེས་སྨྲས་པ། ཁྱོད་ཅིའི་ཕྱིར་རང་ཉིད་ཀྱིས་ཁྱིམ་གྱི་སོ་ཚིས་བྱེད། ཁྱིམ་བདག་གིས་སྨྲས་པ། ཁོ་བོས་ཆུང་མ་གཅིག་བླངས་པ་དང་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་ཆུང་མ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །དེས་སྨྲས་པ། གཞན་དག་ཅིའི་ཕྱིར་མི་སློང ། ཁྱིམ་བདག་གིས་སྨྲས་པ། བསླངས་ན་མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང་མི་སྦྱིན་ནོ་ཞེས་ཟེར་རོ། །དེས་སྨྲས་པ། ཡུགས་ས་མོ་དག་ཅིའི་ཕྱིར་མི་སློང ། ཁྱིམ་བདག་གིས་སྨྲས་པ། བསླངས་ཏེ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེའི་ཁྱིམ་གྱི་ཧ་ཅང་ཡང་མི་རིང་བ་ན་ཚོགས་ཅན་མ་རྒན་མོ་ཞིག་འདུག་ནས་ཆུང་པོ་གྲོགས་དེས་ཁྱིམ་བདག་ལ་སྨྲས་པ། ཚོགས་ཅན་མ་རྒན་མོ་དེ་ཅིའི་ཕྱིར་འཇུག་ཏུ་མི་གཞུག་།ཁྱིམ་བདག་གིས་སྨྲས་པ། ཅི་ཁོ་བོས་འཇུད་འཐུན་མའི་ཁྱིམ་བྱ་འམ། དེས་སྨྲས་པ། ཚོགས་ཅན་མ་དེ་སྡིག་པ་ཅན་དམ་པ་མ་ཡིན་
5.46b
པའི་ཆོས་དེ་ལས་ཕྱིར་ལོག་གིས་འཇུག་ཏུ་ཆུག་ཤིག་།ཁྱིམ་བདག་དེ་ཆུང་པོ་གྲོགས་དེས་ནན་གྱིས་མནན་པ་ན་ཚོགས་ཅན་མ་དེའི་གན་དུ་སོང་སྟེ་བདེ་ལེགས་བདེ་ལེགས་ཤེས་སྨྲས་པ་དང ། རྒན་མོས་སྨྲས་པ། བྱོན་པ་ལེགས་སོ་ཅི་བཞེད། ཁྱིམ་བདག་གིས་སྨྲས་པ། ཁྱོད་འཚལ་ན་ཁྱོད་སུའི། རྒན་མོས་སྨྲས་པ། བདག་ལ་ཟས་དང་གོས་སྦྱིན་པ་གང་ལགས་པའི་འོ། །ཁྱིམ་བདག་གིས་སྨྲས་པ། ཁྱོད་སྔོན་གྱི་ཉོན་མོངས་པ་དག་ཀུན་དུ་མི་སྤྱོད་དམ། རྒན་མོས་སྨྲས་པ། ཅི་བདག་གིས་སྐྱེས་པ་མ་མཐོང་ངམ། བདག་སྡིག་པ་ཅན་དམ་པ་མ་ལགས་པའི་ཆོས་དེ་ལས་ནི་ཕྱིར་ལོག་གོ། །ཁྱིམ་བདག་གིས་སྨྲས་པ། ཚུར་སྤྱོན་བཞུད་བདག་གིས་ཁྱོད་ཀྱི་ན་བཟའ་དང་བཤོས་གསོལ་གྱིས། ཁྱོད་ཀྱིས་བདག་གི་ཁྱིམ་གྱི་སོ་ཚིས་དག་མཛོད་ཅིག་།ཁྱིམ་བདག་དེས་ཚོགས་ཅན་མ་རྒན་མོ་དེ་ཁྱིམ་དུ་བཅུག་སྟེ། ལྡེ་མིག་དང་ལྡེ་མིག་ཁྱོག་པོ་དག་གཏད་ནས་སྨྲས་པ། འདི་ཁྱོད་ཀྱི་ཁྱིམ་ཡིན་གྱིས་ཁྱོད་ཀྱིས་བྱིན་པས་ཁོ་བོ་བྱ་བ་བྱེད་དོ། །ཚོགས་ཅན་མ་རྒན་མོ་དེས་ཁྱིམ་བདག་དེའི་ཁྱིམ་གྱི་སོ་ཚིས་དག་བྱ་བར་བརྩམས་ནས། དེའི་འོག་ཏུ་གོས་དང་ཟས་བཟང་པོས་དུས་ཡུན་མི་རིང་བ་ཞིག་གིས་ལྤགས་པ་དང ། ཤ་དང ། ཁྲག་དག་བརྟས་པར་གྱུར་ཏོ། །དེའི་སྒོའི་ཉེན་ཀོར་ནས་བུ་མོ་རབ་ཏུ་མང་པོ་དག་ཅིག་རྒྱལ་བྱེད་ཀྱི་ཚལ་དུ་འདོང་བ་ཚོགས་ཅན་མ་རྒན་མོས་མཐོང་ནས་གར་འདོང་ཞེས་དྲིས་པ་དང ། བུ་མོ་དག་གིས་སྨྲས་པ། རྒྱལ་བྱེད་ཀྱི་ཚལ་དུ་འདོང་ངོ ། །རྒན་མོས་སྨྲས་པ། ཁོ་མོ་གོས་དང་རྒྱན་ཐོགས་ཀྱི་བར་དུ་རེ་ཤིག་སྡོད་ཅིག་།རྒན་མོ་གོས་དང་རྒྱན་ཐོགས་པ་དེའི་བར་དུ་བུ་མོ་དག་ཐལ་ཏེ་དོང་ངོ ། །རྒན་མོ་ཡང་གོས་དང་རྒྱན་ཐོགས་ནས་ཕྱི་བཞིན་མྱུར་བ་མྱུར་བར་འཕགས་སོ། །ཇི་ཙམ་ན་བུ་མོ་དེ་དག་གཙུག་ལག་ཁང་དུ་ཞུགས་པ་ན། གཙུག་ལག་ཁང་དེ་ན་དགེ་སློང་ཞིག་གནས་ཁང་སྒོ་མ་བཅད་པ་ན་གཉིད་ལོག་པར་གྱུར་པ་དེའི་གོས་རྣམ་པར་འཐོར་བར་གྱུར་ཅིང ། དེའི་ཡན་ལག་གི་རྣམ་པ་ཡང་ལས་སུ་རུང་བར་གྱུར་པ་བུ་མོ་དེ་དག་གིས་མཐོང་ནས་བུ་མོ་དེ་དག་རྒོད་ཅིང་གཙུག་ལག་ཁང་ནས་ཕྱིར
5.47a
བྱུང་ངོ ། །ཚོགས་ཅན་མ་རྒན་མོ་ཡང་འཇུག་ཅིང་རྒན་མོས་བུ་མོ་དེ་དག་མཐོང་ནས་སྨྲས་པ། ཁྱེད་ཅག་ཅི་ལ་རྒོད་གང་བསྟི་གནས་སུ་རྒོད་པ་དེ་སོ་སྟོ་མར་འགྱུར་རོ་ཞེས་བྱ་བ་ཁྱེད་ཀྱིས་མ་ཐོས་སམ། བུ་མོ་དེ་དག་ཅང་མི་སྨྲ་བ་ཉིད་དུ་བྱུང་སྟེ་དོང་ངོ ། །ཚོགས་ཅན་མ་རྒན་མོས་བུ་མོ་དེ་དག་གིས་འདིར་བྱ་གག་འམ། སྤྲེའུ་ཞིག་མཐོང་བར་གྱུར་གོར་མ་ཆག་སྙམ་དུ་ཤེས་ཤིང་རིག་ནས་སེམས་གཏོད་ཅིང་ངེས་པར་རྟོག་བཞིན་དུ་ཞུགས་པ་དང ། ཇི་ཙམ་ན་དགེ་སློང་དེ་དེ་ལྟར་རྣམ་པར་གྱུར་པ་མཐོང་ངོ ། །མཐོང་ནས་ཀྱང་དེ་ལ་འདོད་པའི་ཆོས་སྐྱེས་ནས་ཚོགས་ཅན་མ་རྒན་མོ་དེས་དགེ་སློང་དེའི་སྟེང་དུ་བགྲད་དེ་བརྩལ་བར་བརྩམས་པ་དང ། དགེ་སློང་དེ་གཉིད་སྟུག་པོས་ནོན་པས་ཕྱིར་མ་སད་དོ། །ཚོགས་ཅན་མ་རྒན་མོས་བདག་ཅག་ཚོགས་ཅན་མ་དག་གིས་ནི་སྒྱུ་རྩལ་དྲུག་ཅུ་རྩ་བཞི་མངོན་པར་ཤེས་ན་རབ་ཏུ་བྱུང་བ་འདིས་ཀོ་སྒྱུ་རྩལ་དྲུག་ཅུ་རྩ་ལྔ་ཤེས་ཏེ་འདི་ལྟར་རེག་པ་ནི་བདག་གིར་བྱེད་ལ་ཚིག་ནི་མི་སྟེར་ཏོ་སྙམ་དུ་ཤེས་ཤིང་རིག་ནས། གང་གི་ཚེ་ཚོགས་ཅན་མ་རྒན་མོ་དེས་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་དགེ་སློང་དེ་སད་པར་བྱས་ཏེ་སྨྲས་པ། འཕགས་པ་བདག་གི་སྡུམ་པ་ཕྱོགས་ག་གེ་མོ་ཞིག་ན་མཆིས་ཀྱིས། གལ་ཏེ་ཡང་བཞེད་པར་གྱུར་ན་སྤྱོན་ཅིག་།དགེ་སློང་དེས་སྨྲས་པ། སྐལ་ཆད་མ་བསྟི་གནས་སུན་པར་བྱེད་པ་དེ་ཡང་རེ་ཤིག་ཁོ་བོ་བདག་གིར་མི་བྱེད་ན། ཁྱོད་ཀྱི་ཁྱིམ་དུ་འོང་བར་འགྱུར་རེ་སྐན། དགེ་སློང་དེ་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེས་དགེ་སློང་རྣམས་ལ་སྐབས་དེ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ། དེས་གསོལ་པ། བཙུན་པ་བདག་གིས་རེག་པ་བདག་གིར་མ་བགྱིས་ཏེ། བདག་དང་པོ་ཉིད་ནས་གཉིད་སྟུག་པོས་ནོན་པས་རེག་པ་བདག་གིར་བགྱིད་པར་ག་ལ་འགྱུར། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་རེག་པ་བདག་གིར་མ་བྱས་པ་འདི་ལ་ནི་ལྟུང་བ་མེད་མོད་ཀྱི། འོན་ཀྱང་ངས་དགེ་སློང་གྲོང
5.47b
མཐའ་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་གྲོང་མཐའ་པ་ཉིན་པར་གློས་ཕབ་སྟེ་གཉིད་ལོག་པས་སྒོ་སྒོ་གཏན་གྱིས་གཅད་པར་བྱ་བ་འམ། སྲུངས་མ་དགེ་སློང་གཞག་པར་བྱ་བ་འམ། གོས་བཅིང་བར་བྱའོ། །སྒོ་སྒོ་གཏན་གྱིས་གཅོད་པར་མི་བྱེད་དམ། སྲུངས་མ་དགེ་སློང་འཇོག་པར་མི་བྱེད་དམ་གོས་འཆིང་བར་མི་བྱེད་པར་ཉིན་པར་དེ་བཞིན་དུ་གློས་ཕབ་སྟེ་གཉིད་ལོག་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་དགོན་པ་པ་བསམ་གཏན་བཞི་པ་ཐོབ་པ་ཞིག་འདུག་པ་དེ་ཡང་དང་ཡང་དུ་བཅོམ་ལྡན་འདས་དང ། དགེ་སློང་གནས་བརྟན་རྣམས་ཀྱི་ཞབས་ལ་ཕྱག་བྱ་བའི་ཕྱིར་ཉེ་བར་འགྲོ་བས་དེ་དགེ་སློང་གསར་བུ་གསར་བུ་དག་གིས་ངོ་ཤེས་པར་བྱས་སོ། །དེ་ལ་དུས་གཞན་ཞིག་ན་གཡན་པའི་ནད་བྱུང་ནས་དེ་ལ་དགེ་སློང་གསར་བུ་གསར་བུ་དེ་དག་གིས་སྨྲས་པ། གནས་བརྟན་ཁྱོད་ལ་གཡན་པའི་སྙུན་བྱུང་ངམ། དེས་སྨྲས་པ། བཞིན་བཟང་དག་དེ་དེ་བཞིན་ནོ། །དེ་དག་གིས་སྨྲས་པ། གནས་བརྟན་ཅིའི་སླད་དུ་སྨན་པ་ལ་རྨས་ཏེ་བྱ་བ་མི་མཛད། དེས་སྨྲས་པ། བཞིན་བཟངས་དག་སྐྱེ་བོ་མང་པོ་མི་འདོད་པ་དང ། སྐྱེ་བོ་མང་པོ་མི་དགའ་བ་དང ། སྐྱེ་བོ་མང་པོ་ལ་མི་སྡུག་པ་དང ། སྐྱེ་བོ་མང་པོའི་ཡིད་དུ་མི་འོང་བ་འཇིག་རྟེན་ཐམས་ཅད་དང་ཐུན་མོང་བ་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོང་བར་འགྱུར་ཞིང་དེས་ནད་འདི་དང་ཁོ་བོ་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་ཁྲིད་པར་འགྱུར་བས་བྱ་བ་བྱར་ཅི་ཡོད། དེ་དག་གིས་སྨྲས་པ། གནས་བརྟན་འོ་ན་བཅོམ་ལྡན་འདས་ཀྱིས་སྐྱེས་བུ་གང་ཟག་ཚུལ་ཁྲིམས་དང་ལྡན་པ་ཡུན་རིང་པོ་ཇི་སྲིད་དུ་འཚོ་བ་དེ་སྲིད་དུ་བསོད་ནམས་མང་པོ་འཕེལ་ཞིང་ཇི་སྲིད་དུ་བསོད་ནམས་མང་པོ་འཕེལ་བ་དེ་སྲིད་དུ་ཡུན་རིང་པོར་མཐོ་རིས་དག་ཏུ་དགའ་བར་འགྱུར་རོ་ཞེས་མ་གསུངས་སམ། བཞུད་ལ་བྱ་བ་མཛོད་ཅིག་།དེ་དེ་དག་གིས་ནན་གྱིས་མནན་པ་ན་སྨན་པའི་གན་དུ་སོང་བ་དང ། སྨན་པས་དེ་མཐོང་ནས་སྨྲས་པ། འཕགས་པ་ཁྱོད་ལ་གཡན་པའི་སྙུན་བྱུང་ངམ། དེས་སྨྲས་པ། བཞིན་བཟངས་དེ་བཞིན་ཏེ། དེའི་དོན་ཁོ་ནར་ཁོ་བོ་འོངས་ཀྱིས་བདག་ལ་སྨན་སྟོན་ཅིག་།
5.48a
འཕགས་པ་བཤོས་བསོད་པ་གསོལ་ལ་ཡུང་མར་གྱི་སྐུ་དག་བསྐུས་ཏེ་གདུགས་ལ་བཞུགས་ཤིག་དང་ཁྱོད་སོས་པར་འགྱུར་རོ། །བཞིན་བཟངས་ཁོ་བོ་ལ་ཡུངས་མར་སྩོལ་ཅིག་།འཕགས་པ་བདག་ཅག་སྨན་པ་དག་ནི་སྨན་སྟོན་པ་ལགས་ཀྱི་འབུལ་བ་ནི་མ་ལགས་ཏེ། གལ་ཏེ་རེ་རེ་ལ་ཡང་འབུལ་ན་བདག་ཅག་ལ་འཚལ་མ་ཡང་མ་མཆིས། རད་པ་ཡང་མ་མཆིས་པར་འགྱུར་རོ། །འདི་ལྟར་ཁྱིམ་བདག་ཆེ་གེ་མོ་ཞིག་ལ་བྲོ་ནད་འདི་ལྟ་བུ་བྱུང་བར་གྱུར་ནས། བདག་གིས་དེའི་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་བསྐོལ་གྱིས་དེའི་གན་དུ་བཞུད་ལ་སློངས་ཤིག་།བཞིན་བཟངས་མི་སྟེར་བར་འགྱུར་རོ། །འཕགས་པ་བཞུད་ཅིག་དང་དེ་དད་པ་ཅན་ལགས་པས་འབུལ་བར་འགྱུར་རོ། །བཞིན་བཟངས་ཨ་རོག་ཁྱ་དོན་གྱིས་ན་ཁྱོད་ཉིད་ཀྱིས་བྱིན་ནོ་ཞེས་སྨྲས་ཏེ་སོང་ནས་ཁྱིམ་བདག་དེའི་ཁྱིམ་ག་ལ་བ་དེར་སོང་བ་དང ། ཁྱིམ་བདག་དེས་ཐག་རིང་པོ་ནས་མཐོང་ནས་སྨྲས་པ། འཕགས་པ་ཁྱོད་ལ་གཡན་པའི་སྙུན་བྱུང་ངམ། བཞིན་བཟངས་དེ་དེ་བཞིན་ནོ། །འཕགས་པ་ཡུངས་མར་གྱིས་སྐུ་དག་བསྐུས་ཏེ་གདུགས་ལ་བཞུགས་ཤིག་དང་ཁྱོད་སོས་པར་འགྱུར་རོ། །བཞིན་བཟངས་དེའི་དོན་ཁོ་ནར་ཁོ་བོ་འོངས་ཏེ་ཁོ་བོས་ཁྱོད་ལ་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་ཡོད་པར་ཤེས་ཀྱིས་དེ་བྱིན་ཅིག་དང ། ཁྱོད་ལ་བསོད་ནམས་སུ་འགྱུར་རོ། །འཕགས་པ་དམ་ཚིག་ལ་དབུལ་བར་བགྱིད་སྟེ། གལ་ཏེ་བདག་ལས་བསོད་སྙོམས་གསོལ་བར་འགྱུར་ནའོ། །བཞིན་བཟངས་བཟའ་བར་བྱའོ། །ཁྱིམ་བདག་དེས་དེ་ཟས་བསོད་པས་ཚིམ་པར་བྱས་ནས་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་གྱིས་ལྷུང་བཟེད་ཆུང་ངུ་འགེངས་སུ་བཅུག་སྟེ་བྱིན་ནོ། །དགེ་སློང་དེས་ཨ་རོག་ཁྱ་ཞེས་བརྗོད་དེ་སོང་ནས་དགོན་པའི་གནས་སུ་སོང་སྟེ་དམ་དུམ་དག་གྱོན་ནས་ཡུངས་མར་དེས་ལུས་དག་བསྐུས་ཏེ་ཉི་མ་ལ་འདུག་པ་དང་དེ་ལ་བདེ་བའི་འདུ་ཤེས་སྐྱེས་པར་གྱུར་ནས་གཉིད་ལོག་པ་དང་དེའི་ཡན་ལག་གི་རྣམ་པ་སྲོག་ཆགས་ཨུད་ཙ་ཏིང་གས་ཟིན་ཅིང་ལས་སུ་རུང་བར་གྱུར་ནས་དེའི་གོས
5.48b
ཀྱང་འཐོར་བར་གྱུར་པ་དང ། ཇི་ཙམ་ན་གཞོན་ནུ་མ་ཆེན་མོ་ཞིག་ལྕི་བ་ཐུ་བ་ན་ཕྱོགས་དེར་སོན་པ་དང ། དགེ་སློང་དེ་དེ་ལྟར་རྣམ་པར་གྱུར་པ་མཐོང་ངོ ། །མཐོང་ནས་དེ་ལ་འདོད་པ་ལ་འདོད་ཆགས་ཀྱི་ཀུན་ནས་དཀྲིས་པ་སྐྱེས་ནས་དེས་དགེ་སློང་དེའི་སྟེང་དུ་བརྩལ་བར་བརྩམ་པ་དང ། དགེ་སློང་དེ་སད་ན་ཉམ་ཆུང་བས་ཕྱིར་བཟློག་པར་མ་ནུས་སོ། །གང་གིས་ཚེ་དེ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་སྨྲས་པ། འཕགས་པ་བདག་གི་སྡུམ་པ་ཕྱོགས་ག་གེ་མོ་ཞིག་ན་མཆིས་ཀྱིས་གལ་ཏེ་ཡང་བཞེད་པར་གྱུར་ན་སྤྱོན་ཅིག་།དགེ་སློང་དེས་སྨྲས་པ། སྐལ་ཆད་མ་བསྟི་གནས་སུན་པར་བྱེད་པ་ཁོ་བོ་རེ་ཤིག་དེ་ཡང་བདག་གིར་མི་བྱེད་ན། ཁྱོད་ཀྱི་ཁྱིམ་དུ་འོང་བར་འགྱུར་རེ་སྐན། དགེ་སློང་དེ་བདག་ལ་ཕམ་པར་གྱུར་པའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེས་དགེ་སློང་རྣམས་ལ་སྐབས་དེ་རྒྱས་པར་བརྗོད་པ་དང ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ། དེས་གསོལ་པ། བཙུན་པ་བདག་གིས་རེག་པ་བདག་གིར་མ་བགྱིས་ཏེ། བདག་དང་པོ་ཉིད་ནས་འདོད་པ་ལས་འདོད་ཆགས་དང་བྲལ་བས་བདག་རེག་པ་བདག་གིར་ག་ལ་བགྱིད། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་རེག་པ་བདག་གིར་མི་བྱེད་པ་འདི་ལ་ནི་ལྟུང་བ་མེད་མོད་ཀྱིས་འོན་ཀྱང་ངས་དགེ་སློང་དགོན་པ་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་དགོན་པ་པ་ཉིན་པར་གློས་ཕབ་སྟེ། གཉིད་ལོག་པས་ཕྱོགས་དེ་ཡལ་ག་དག་གམ། སེག་དག་གམ། རེ་ལྡེ་དག་གིས་བསྐོར་བར་བྱ་བ་འམ། སྲུང་མ་དགེ་སློང་གཞག་པར་བྱ་བ་འམ། གོས་བཅིང་པར་བྱའོ། །ཕྱོགས་དེ་ཡལ་ག་དག་གམ། སེག་དག་གམ། རེ་ལྡེ་དག་གིས་བསྐོར་བར་མི་བྱེད་དམ། སྲུངས་མ་དགེ་སློང་འཇོག་པར་མི་བྱེད་དམ། གོས་འཆིང་བར་མི་བྱེད་པ་དེ་བཞིན་དུ་གློས་ཕབ་སྟེ་གཉིད་ལོག་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ
5.49a
ལྡན་འདས་ལ་ཞུས་པ། བཙུན་པ་གལ་ཏེ་དགེ་སློང་འདི་རེ་ཤིག་འདོད་པ་ལས་འདོད་ཆགས་དང་བྲལ་བ་ལགས་ན་ཅིའི་སླད་དུ་དེའི་ཡན་ལག་གི་རྣམ་པ་ལས་སུ་རུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདོད་ཆགས་དང་མ་བྲལ་བའི་ཡན་ལག་གི་རྣམ་པ་ནི་རྒྱུ་ལྔས་ལས་སུ་རུང་བར་འགྱུར་ལ། འདོད་ཆགས་དང་བྲལ་བའི་ནི་རྒྱུ་བཞིས་སོ། །འདོད་ཆགས་དང་མ་བྲལ་བའི་རྒྱུ་ལྔ་གང་ཞེ་ན། བཤང་བས་ཉེ་བར་ནོན་པ་དང ། གཅི་བས་ཉེ་བར་ནོན་པ་དང ། རླུང་གིས་ཉེ་བར་ནོན་པ་དང ། སྲོག་ཆགས་ཨུད་ཙ་ཏིང་གས་ཟིན་པ་དང ། འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པ་ཉིད་ནི་ལྔ་པ་སྟེ། འདོད་ཆགས་དང་མ་བྲལ་བ་ནི་རྒྱུ་ལྔ་པོ་དེ་དག་གིས་སོ། །འདོད་ཆགས་དང་བྲལ་བའི་རྒྱུ་བཞི་པོ་གང་ཞེ་ན། བཤང་བས་ཉེ་བར་ནོན་པ་དང ། གཅི་བས་ཉེ་བར་ནོན་པ་དང ། རླུང་གིས་ཉེ་བར་ནོན་པ་དང ། སྲོག་ཆགས་ཨུད་ཙ་ཏིང་གས་ཟིན་པ་སྟེ། འདོད་ཆགས་དང་བྲལ་བའི་རྒྱུ་ནི་བཞི་པོ་དེ་དག་གིས་སོ། །དགེ་སློང་འདིའི་ཡན་ལག་གི་རྣམ་པ་ནི་དེའི་ཚེ་ན་སྲོགས་ཆགས་ཨུད་ཙ་ཏིང་གས་ཟིན་པས་དེས་ན་འདིའི་ལས་སུ་རུང་བར་གྱུར་ཏོ།། ་་་་་་་།།འདུལ་བ་རྣམ་པར་འབྱེད་པ། བམ་པོ་གསུམ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་དགེ་སློང་གི་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཀྱི་འདི་ལྟར་འདས་པའི་དུས་ན་ཡང་འདིས་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་བ་སྟེ་དེ་ཉོན་ཅིག་།དགེ་སློང་དག་འཇིག
5.49b
རྟེན་འདི་འཇིག་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཇིག་པ་ན་སེམས་ཅན་དག་ཕལ་ཆེར་འོད་གསལ་གྱི་ལྷའི་རིས་སུ་སྐྱེའོ། །དེ་དག་དེ་ནི་གཟུགས་ཅན་ཡིད་ལས་བྱུང་བ། མ་ཚང་བ་མེད་པ། དབང་པོ་མ་ཉམས་པ། ཡན་ལག་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་ས་ཆེན་པོ་འདི་ཆུ་འབའ་ཞིག་ཏུ་གྱུར་ཏེ། ས་ཆེན་པོ་ཆུ་འབའ་ཞིག་དང ། རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་རླུང་གིས་པྲིས་མ་ཀུན་དུ་འཆགས་པར་བྱེད། ཀུན་དུ་འཐས་པར་བྱེད། ཀུན་དུ་ཁྱབ་པར་བྱེད་དེ་འདི་ལྟ་སྟེ། དཔེར་ན་འོ་མ་བསྐོལ་བ་གྲངས་པར་གྱུར་པའི་སྟེང་དུ་ཡང་རླུང་གིས་པྲིས་མ་ཀུན་དུ་འཆགས་པར་བྱེད། ཀུན་དུ་འཐས་པར་བྱེད། ཀུན་དུ་ཁྱབ་པར་བྱེད་པ་དེ་བཞིན་དུ་ས་ཆེན་པོ་ཆུ་འབའ་ཞིག་དང ། རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་ཡང་རླུང་གིས་པྲིས་མ་ཀུན་དུ་འཆགས་པར་བྱེད། ཀུན་དུ་འཐས་པར་བྱེད། ཀུན་དུ་ཁྱབ་པར་བྱེད་དོ། །དེ་ནི་སའི་བཅུད་ཁ་དོག་ཕུན་སུམ་ཚོགས་པ་ཡིན་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་མར་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དགེ་སློང་དག་འཇིག་རྟེན་འདི་འཆགས་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཆགས་པ་ན་འོད་གསལ་གྱི་ལྷའི་རིས་དེ་ནས་སེམས་ཅན་ཅིག་ཚེ་ཟད་ལས་ཟད་བསོད་ནམས་ཟད་པས་ཤི་འཕོས་ཏེ། འདི་ལྟ་བུ་ཉིད་དུ་མི་རྣམས་དང་སྐལ་བ་འཐུན་པ་ཉིད་དུ་འོང་ཞིང་འདིར་ཡང་གཟུགས་ཅན་ཡིད་ལས་བྱུང་བ། མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང
5.50a
བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་འཇིག་རྟེན་དུ་ཉི་མ་དང ། ཟླ་བ་དག་ཀྱང་མ་བྱུང་ངོ ། །འཇིག་རྟེན་དུ་རྒྱུ་སྐར་དག་ཀྱང་མ་བྱུང ། མཚན་མོ་དང ། ཉིན་མོ་དག་ཀྱང་མ་བྱུང ། སྐད་ཅིག་དང ། ཐང་ཅིག་དང ། ཡུད་ཙམ་དག་ཀྱང་མ་བྱུང ། ཟླ་བ་དང ། ཟླ་བ་ཕྱེད་དང ། དུས་ཚིགས་དང ། ལོ་དག་ཀྱང་མ་བྱུང་ངོ ། །བུད་མེད་ཀྱང་མེད། སྐྱེས་པ་ཡང་མེད་དེ། སེམས་ཅན་སེམས་ཅན་ཞེས་བྱ་བ་འབའ་ཞིག་གི་གྲངས་སུ་འགྲོའོ། །དེ་ནས་སེམས་ཅན་བརྐམ་པའི་རང་བཞིན་ཅན་ཞིག་གི་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །སེམས་ཅན་གཞན་དག་གིས་ཀྱང་སེམས་ཅན་དེ་སོར་མོའི་རྩེ་མོས་སའི་བཅུད་མྱང་བར་བྱེད་པ་ན། ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་པ་དང ། ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་ཀྱི་ཟས་ཀྱི་རྩོམ་པས་ཟོས་པར་གྱུར་པ་མཐོང་ངོ ། །མཐོང་ནས་སེམས་ཅན་དེ་དག་ཀྱང་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་གི་ལུས་ལ་སྲ་བ་ཉིད་དང་ལྕི་བ་ཉིད་བྱུང་ཞིང་དེ་དག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །དགེ་སློང་དག་ཆོས་ཉིད
5.50b
ཀྱིས་ན་འཇིག་རྟེན་དུ་མུན་པ་བྱུང་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་འབྱུང་བར་འགྱུར་རོ། །འཇིག་རྟེན་དུ་རྒྱུ་སྐར་དག་དང ། མཚན་མོ་དང ། ཉིན་མོ་དག་དང ། སྐད་ཅིག་དང ། ཐང་ཅིག་དང ། ཡུད་ཙམ་དག་དང ། ཟླ་བ་དང ། ཟླ་བ་ཕྱེད་དང ། དུས་ཚིགས་དང ། ལོ་དག་ཀྱང་འབྱུང་བར་འགྱུར་རོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་སའི་བཅུད་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་མི་དག་ཟས་ཞིམ་པ་བཟང་པོ་ཅུང་ཞིག་རྙེད་ནས་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ་བཅུད། ཀྱེ་མ་འོ་བཅུད་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་སའི་བཅུད་མེད་པར་གྱུར་པ་ན་འདུས་ཤིང་ལྷག་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་བཅུད། ཀྱེ་མ་འོ་བཅུད་ཅེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གི་སའི
5.51a
བཅུད་མེད་པར་གྱུར་པ་ན་ས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ་འདི་ལྟ་སྟེ། དཔེར་ན་དོང་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ་འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ། །ཀྱེ་མའོ་ཞེས་ཀྱང་ཟེར་རོ། །འདི་ལྟ་སྟེ། དཔེར་ན་དེང་སང་མི་དག་སྡུག་བསྔལ་དང ། ཡིད་མི་བདེ་བ་འགའ་ཞིག་རེག་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ། །ཀྱེ་མའོ་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ། །ཀྱེ་མའོ་ཞེས་ཟེར་ཡང ། སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ་འདི་ལྟ་སྟེ། དཔེར་ན་ཀ་དམ་བུ་ཀའི
5.51b
མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ་འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་པ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀཝའི་སེམས་ཅན། ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་མི་དག་སྨད་པ་རྣོན་པོ་འགའ་ཞིག་གིས་སྨད་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང ། འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཕར་སོང་ཕར་སོང་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གི་མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་ས་ལུའི་འབྲུ་སོ་བ་མེད་པ། སྦུན་པ་མེད་པ། དག་པ་གཙང་བ། སོར་བཞི་པ་ཀུན་ནས་མ་དཀྲིས་པ་ནུབ་བརྔས་ན་ནང་རྒྱལ་ཞིང་ཕྱིར་སྐྱེ་ལ་ནང་བརྔས་ན་ནུབ་རྒྱལ་ཞིང་ཕྱིར་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་བྱུང་བར་གྱུར་ཏེ། དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་ས་ལུའི་འབྲུ་ཁམ་གྱི་ཟས་ཀྱི་རྩོལ་བས་ཟོས་པར་གྱུར་པ་དེའི་ཕྱིར་དེ
5.52a
དག་ལ་དབང་པོ་ཐ་དད་པ་བྱུང་བར་གྱུར་ཏེ། ཁ་ཅིག་ནི་ཕོའི་དབང་པོ་དང་ལྡན། ཁ་ཅིག་ནི་མོའི་དབང་པོ་དང་ལྡན་ནོ། །དེ་ན་གང་དག་ཕོའི་དབང་པོ་དང་ལྡན་པ་དང ། གང་དག་མོའི་དབང་པོ་དང་ལྡན་པ་དེ་དག་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་དོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ངོ ། །མཐོང་ནས་སས་ཀྱང་འཐོར་བར་བྱེད། བོང་བ་དང ། གསེག་མ་དང ། གྱོ་མོ་དང ། གྱོ་དུམ་དག་ཀྱང་འཕེན་པར་བྱེད་ཅིང ། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་སེམས་ཅན་དག་བག་སར་བག་མར་ལེན་པ་ན་ཕྱེ་མས་ཀྱང་འཐོར་བར་བྱེད་དྲི་དང་མེ་ཏོག་དང ། འབྲས་ཡོས་དག་གིས་ཀྱང་འཐོར་བར་བྱེད་ཅིང ། འདི་སྐད་ཅེས་སྲུ་བདེ་བར་གྱུར་ཅིག་ཅེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ནས་སས་ཀྱང་འཐོར་བར་བྱེད། བོང་བ་དང ། གསེག་མ་དང ། གྱོ་མོ་དང ། གྱོ་དུམ་དག་ཀྱང་འཕེན་པར་བྱེད་ཅིང་འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའི་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་རོ། །དགེ་སློང་དག་དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་དེང་སང་ཆོས་སུ་གྲགས་ལ། སྔོན་འདུལ་བ་མ་ཡིན་པར་གྲགས་པ་གང་ཡིན་པ་དེ་ནི་དེང་སང་འདུལ་བར་གྲགས། སྔོན་སྨད་པར་བྱ་བ་གང་ཡིན་པ་དེ་ནི་དེང་སང་བསྟོད་པར་བྱ་བ་ཡིན་ནོ། །དེ་ཉི་མ་གཅིག་ཙམ་སྤོང་བར་བྱེད། ཉི་མ་གཉིས་སམ། གསུམ
5.52b
འམ། བདུན་ཙམ་སྤོང་བར་བྱེད་དོ། །གང་གི་ཕྱིར་སེམས་ཅན་དེ་དག་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ཤིན་དུ་སྡང་བར་བྱེད་པས་བརྟུལ་ཞུགས་ལ་ཞུགས་པ་དེའི་ཕྱིར་དེ་དག་ཁྱིམ་རྩིག་པ་ལ་ཞུགས་ཏེ། བདག་ཅག་གིས་འདིར་བྱ་བ་མ་ཡིན་པ་བྱའོ། །བདག་ཅག་གིས་འདིར་བྱ་བ་མ་ཡིན་པ་བྱའོ། །ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ ། །དགེ་སློང་དག་འདི་ནི་ཁྱིམ་གྱི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ་རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་དེ་ལ་དེའི་ཚེ་དེའི་དུས་ན་གང་གིས་དེའི་དང་པོར་སེམས་ཅན་སུན་ཕྱུང་བར་གྱུར་པའི་སེམས་ཅན་གང་ཡིན་པ་དེ་ནི་ཀ་ལན་ད་ཀའི་བུ་བཟང་བྱིན་ཡིན་ཏེ། འདིས་དེའི་ཚེ་ཡང་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་ངོ ། །འདིས་ད་ལྟར་ཡང་དགེ་སློང་གི་དགེ་འདུན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་ངོ ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤང་བའི་ཕྱིར་འབད་པར་བྱའོ། །ཞེ་སྡང་སྤང་བའི་ཕྱིར་དང ། གཏི་མུག་སྤང་བའི་ཕྱིར་འབད་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་དང་པོ་རྫོགས་སྷོ།། ་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་སྔོན་རྫ་མཁན་དགེ་སློང་ནོར་ཅན་རྒྱལ་པོའི་ཁབ་ན་དགོན་པའི་སྤྱིལ་བུ་ན་གནས་སོ། །དེ་ནས་སྔོན་རྫ་མཁན་དགེ་སློང་ནོར་ཅན་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང ། རྒྱལ་པོའི་ཁབ་ཀྱི་མི་བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག
5.53a
དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང ། ཤིང་ཐམས་ཅད་ཀྱང་ཁྱེར་རོ། །དེའི་འོག་ཏུ་སྔོན་རྫ་མཁན་དགེ་སློང་ནོར་ཅན་འོངས་པ་དང ། སྔོན་རྫ་མཁན་དགེ་སློང་ནོར་ཅན་གྱིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང ། ཤིང་ཐམས་ཅད་ཀྱང་ཁྱེར་བ་མཐོང་ངོ ། །མཐོང་ནས་ཡང་རྩཝ་དང ། ཤིང་བླངས་ཏེ་སྤྱིལ་བུ་གཞན་བྱེད་དོ། །སྔོན་རྫ་མཁན་དགེ་སློང་ནོར་ཅན་ལན་གཉིས་ལན་གསུམ་དུ་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང ། རྒྱལ་པོའི་ཁབ་ཀྱི་མི་བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང ། ཤིང་ཐམས་ཅད་ཀྱང་ཁྱེར་རོ། །དེའི་འོག་ཏུ་སྔོན་རྫ་མཁན་དགེ་སློང་ནོར་ཅན་འོངས་པ་དང ། སྔོན་རྫ་མཁན་དགེ་སློང་ནོར་ཅན་གྱིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང ། ཤིང་ཐམས་ཅད་ཀྱང་ཁྱེར་བ་མཐོང་ངོ ། །དེ་ནས་སྔོན་རྫ་མཁན་དགེ་སློང་ནོར་ཅན་འདི་སྙམ་དུ་སེམས་ཏེ། འདི་ལྟར་བདག་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང་རྒྱལ་པོའི་ཁབ་ཀྱི་མི་བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་ལན་གསུམ་གྱི་བར་དུ་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང ། ཤིང་ཐམས་ཅད་ཀྱང་ཁྱེར་བ་ནི་ཀྱེ་མའོ་སྡུག་བསྔལ། ཀྱེ་མའོ་མི་བཟད་དེ། བདག་ཕའི་བཟོའི་གནས་དང ། ལས་ཀྱི་གནས་ལ་མཁས་ཀྱིས་བདག་གི་གནས་ཁང་ཐམས་ཅད་ས་ལས་བྱས་པ་ཞིག་བྱའོ་སྙམ་མོ། །དེ་ནས་སྔོན་རྫ་མཁན་དགེ་སློང་ནོར་ཅན་གྱིས་ལུས་ཀྱིས་ས་དག་བསྐྱས་ཤིང་བསྐྱས་ཤིང་སྲོག་ཆགས་མེད་པའི་ཆུས་སྦངས་ཏེ། གནས་ཁང་གི་གཞིའི་རྨང་དང ། ཐོག་དང ། ཀ་བ་དང ། སྟེང་རིམ་རྩིག་པར་བྱེད་ཅིང ། ཆོས་གོས་ཀྱི་རྡང་ཁུང་དང ། ཆོས་གོས་ཀྱི་རྡང་དང ། སྟེགས་དང ། ཁྲི་དང ། ཁྲིའུ་དང ། ན་ཁྲིའུ་དང ། སྒོ་སྐྱེས་དག་ཀྱང་བྱེད་དོ་དེ
5.53b
སྐམས་པར་རིག་ནས་ཁ་དོག་ཅན་གྱིས་སྐུད་པར་བྱེད་ཅིང་ཁ་དོག་ཅན་གྱིས་བསྐུས་ནས་ཤིང་དང ། ལྕི་བ་དང ། རྩཝ་སྐམ་པོ་དག་བཅེར་ཏེ་སོ་གཏོང་བར་བྱེད་དོ། །དེའི་གནས་ཁང་དེ་ཚོས་པ་ཤིན་དུ་ཚོས་པ། གྲུབ་པ་མཆོག་ཏུ་གྲུབ་པ། དམར་བ། མདོག་དམར་བ། འོད་དམར་བ་འདི་ལྟ་སྟེ། དཔེར་ན་མེ་ཏོག་བན་དྷུ་ཛི་བ་ཀ་འདྲའོ། །དེ་ནས་སྔོན་རྫ་མཁན་དགེ་སློང་ནོར་ཅན་འདི་སྙམ་དུ་སེམས་ཏེ། བདག་གི་གནས་ཁང་ཚོས་པ་ཤིན་དུ་ཚོས་པ། གྲུབ་པ་མཆོག་ཏུ་གྲུབ་པ། དམར་བ། མདོག་དམར་བ། འོད་དམར་བ། འདི་ལྟ་སྟེ། དཔེར་ན་མེ་ཏོག་བན་དྷུ་ཛི་བ་ཀ་འདྲས། བདག་གིས་ད་ནི་གནས་ཁང་གི་དུས་སྟོན་བྱའོ་སྙམ་མོ། །དེ་ནས་སྔོན་རྫ་མཁན་དགེ་སློང་ནོར་ཅན་གྱིས་དགེ་སློང་ཉེན་ཀོར་བ་དག་ལ་གནས་ཁང་ལྟར་བཅུག་སྟེ། ལྷུང་བཟེད་དང་ཆོས་གོས་ཐོགས་ནས་ལྗོངས་རྒྱུར་སོང་ངོ ། །ཆོས་ཉིད་ཀྱིས་ན་སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་དག་ནི་འདུལ་བར་གྱུར་པའི་དབང་གིས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང ། དུད་འགྲོ་རྒྱུ་བ་དང ། ཡི་དྭགས་རྒྱུ་བ་དང ། ལྷ་རྒྱུ་བ་དང ། ལྗོངས་རྒྱུ་བ་དང ། ཆུ་ཀླུང་རྒྱུ་བ་དང ། དགོན་པར་རྒྱུ་བ་དང ། དུར་ཁྲོད་རྒྱུ་བ་དང ། རི་རྒྱུ་བ་དང ། གཙུག་ལག་ཁང་རྒྱུར་གཤེགས་སོ། །དོན་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་རྒྱུར་གཤེགས་པར་བཞེད་ནས། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ད་གཙུག་ལག་ཁང་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང ། ཐབས་ཅིག་གཙུག་ལག་ཁང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། ལྡེ་མིག་ཀྱོག་པོ་ཐོགས་ཏེ་ཀུན་དགའི་ར་བ་ནས་ཀུན་དགའི་ར་བར་གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ་འཆགས་ནས་འཆག
5.54a
སར་གོལ་བར་འགྲོ་ཞིང་དྲང་པོར་འགྲོ་བ་ན་དགེ་སློང་དེ་དག་མཐོང་ནས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་བཅོམ་ལྡན་འདས་ད་གཙུག་ལག་ཁང་རྒྱུར་གཤེགས་ཀྱིས་ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་གཙུག་ལག་ཁང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་།དགེ་སློང་དེ་དག་གིས་ཚེ་དང་ལྡན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལས་མཉན་ནས་ཆོས་གོས་དག་བླངས་ཏེ། བཅོམ་ལྡན་འདས་ག་ལ་བ་དེར་དོང་ངོ ། །དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་དག་དང་ཐབས་གཅིག་གཙུག་ལག་ཁང་རྒྱུར་གཤེགས་ཏེ། མཐར་གྱིས་གཙུག་ལག་ཁང་རྒྱུ་ཞིང་གཤེགས་པ་ན་སྔོན་རྫ་མཁན་དགེ་སློང་ནོར་ཅན་གྱི་གཙུག་ལག་ཁང་ག་ལ་བ་དེར་གཤེགས་པ་དང ། བཅོམ་ལྡན་འདས་ཀྱིས་སྔོན་རྫ་མཁན་དགེ་སློང་ནོར་ཅན་གྱི་གནས་ཁང་ཚོས་པ་ཤིན་དུ་ཚོས་པ། གྲུབ་པ་མཆོག་ཏུ་གྲུབ་པ། དམར་བ། མདོག་དམར་བ། འོད་དམར་བ་འདི་ལྟ་སྟེ་དཔེར་ན་མེ་ཏོག་བན་དྷུ་ཛི་བ་ཀ་འདྲ་བ་གཟིགས་སོ། །གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་གནས་ཁང་འདི་སུའི་ཡིན། བཙུན་པ་སྔོན་རྫ་མཁན་དགེ་སློང་ནོར་ཅན་གྱི་ལགས་སོ། །དགེ་སློང་དག་ང་ལ་གཞི་འདིས་མུ་སྟེགས་ཅན་དག་དགེ་སྦྱོང་གཽ་ཏ་མ་འདུག་བཞིན་དུ་ཉན་ཐོས་རྣམས་ལ་ཟག་པའི་གནས་ལྟ་བུའི་ཆོས་ཁ་ཅིག་བྱུང་བར་གྱུར་ཏོ། །ཞེས་ཁ་ཟེར་བར་འགྱུར་གྱིས་གནས་ཁང་ཤིག་ཅིག་རྣམ་པར་དཀྲུགས་ཤིག་།དགེ་སློང་དེ་དག་གིས་འདི་ལྟ་སྟེ། སྟོན་པའི་བཀའ་ལུང་གིས་གནས་ཁང་བཤིག་ཅིང་རྣམ་པར་དཀྲུགས་སོ། །བཅོམ་ལྡན་འདས་ཀྱང་གནས་ཁང་བཤིག་ཅིང་རྣམ་པར་དཀྲུགས་ནས་གཤེགས་སོ། །སྔོན་རྫ་མཁན་དགེ་སློང་ནོར་ཅན་འོངས་པ་དང ། སྔོན་རྫ་མཁན་དགེ་སློང་ནོར་ཅན་གྱི་གནས་ཁང་བཤིག་ཅིང་རྣམ་པར་དཀྲུགས་པ་མཐོང་ངོ ། །མཐོང་ནས་དགེ་སློང་ཉེན་ཀོར་བ་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་གནས་ཁང་སུས་བཤིག་ཅིང་རྣམ་པར
5.54b
དཀྲུགས། ཚེ་དང་ལྡན་པ་འདི་ལྟ་སྟེ། སྟོན་པའི་བཀའ་ལུང་གིས་དགེ་སློང་དག་གིས་སོ། །གལ་ཏེ་བཅོམ་ལྡན་འདས་ཆོས་ཀྱི་རྗེ་བདེ་བར་གཤེགས་པ་ཆོས་ཀྱི་རྗེས་བཤིག་ན་བཤིག་པ་ལེགས་སོ། །དེའི་ཚེ་ན་གྲོང་ཁྱེར་རྒྱལ་པོའི་ཁབ་ན། ཤིང་སྲུང་བའི་མི་སྣ་ཆེན་པོ་ལ་གཏོགས་པ་སྔོན་རྫ་མཁན་དགེ་སློང་ནོར་ཅན་གྱི་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཤིག་འདུག་གོ། །དེ་ནས་སྔོན་རྫ་མཁན་དགེ་སློང་ནོར་ཅན་འདི་སྙམ་དུ་སེམས་ཏེ་གྲོང་ཁྱེར། རྒྱལ་པོའི་ཁབ་ན་ཤིང་སྲུང་བའི་མི་སྣ་ཆེན་པོ་ལ་གཏོགས་པ་བདག་གི་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཤིག་ཡོད་ཀྱིས་བདག་གིས་གནས་ཁང་ཐམས་ཅད་ཤིང་ལས་བྱས་པ་ཞིག་བྱའོ་སྙམ་དུ་ཤེས་ཤིང་རིག་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་སྟེ་ཕྱིན་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས་སྨྲས་སོ། །ཀྱེ་ནང་པོ་ཤེས་པར་གྱིས་ཤིག་།ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་དག་འདྲེན་པར་འདོད་ཀྱིས་བདག་ལ་བྱིན་ཅིག་།འཕགས་པ་གལ་ཏེ་ལྷས་ཁྱོད་ལ་ཞུགས་ཤིང་དག་གསོལ་ན་གསོལ་བ་ལེགས་ཀྱིས་ཁྱོད་ཅི་བདེར་སྣོམས་ཤིག་།དེ་ནས་སྔོན་རྫ་མཁན་དགེ་སློང་ནོར་ཅན་གྱིས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་དུ་སྦས་པ། བསྲུངས་པ་ཤིན་དུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང་གཤེགས་ནས་འདྲེན་པར་བྱེད་དོ། །གྲོང་ཁྱེར་སྲུང་བའི་མི་སྣ་ཆེན་པོ་ལ་གཏོགས་པ་ཞིག་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན
5.55a
དུ་སྦས་པ། བསྲུངས་པ་ཤིན་དུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང་གཤེགས་ནས་དྲངས་པ་མཐོང་ངོ ། །མཐོང་ནས་དེ་འདི་ལྟར་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ། ཤིན་དུ་སྦས་པ་བསྲུངས་པ་ཤིན་དུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང་གཤེགས་ནས་དྲངས་པ་ལས་ན། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གྲོང་ཁྱེར་རྒྱལ་པོའི་ཁབ་ཏུ་ཐོང་མི་པ་འམ། ཆོམ་རྐུན་པ་འམ་དགྲ་བོ་འགའ་ཞིག་ཞུགས་པར་མ་གྱུར་ཏམ་སྙམ་དུ་འཇིགས་པར་གྱུར། སྔངས་པར་གྱུར། སྤུ་ཟིང་ཞེས་བྱེད་པར་གྱུར་ཏོ། །དེ་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་སྟེ་ཕྱིན་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དེ་ལ་འདི་སྐད་ཅེས་སྨྲས་སོ། །ཀྱེ་ནང་པོ་ཤེས་པར་གྱིས་ཤིག་།བདག་འདི་ན་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་དུ་སྦས་པ། བསྲུངས་པ་ཤིན་དུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ། བཅད་ཅིང་གཤེགས་ནས་དྲངས་པ་མཐོང་ངོ ། །མཐོང་ནས་བདག་འདི་ལྟར་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་དུ་སྦས་པ། བསྲུངས་པ་ཤིན་དུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང་གཤེགས་ནས་དྲངས་པ་ལས་ན།
5.55b
ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གྲོང་ཁྱེར་རྒྱལ་པོའི་ཁབ་ཏུ་ཐོང་མི་པ་འམ། ཆོམ་རྐུན་པ་འམ། དགྲ་བོ་འགའ་ཞིག་ཞུགས་པར་མ་གྱུར་ཏམ་སྙམ་དུ་འཇིགས་པར་གྱུར། དངངས་པར་གྱུར། སྤུ་ཟིང་ཞེས་བྱེད་པར་གྱུར་ན། ཀྱེ་ནང་པོ་ཁྱོད་ཀྱིས་ཤིང་དག་སུ་ལ་ཡང་མ་བྱིན་ནམ། ཀྱེ་ནང་པོ་སུ་ལ་ཡང་མ་བྱིན་ཏེ་འོན་ཀྱང་སྔོན་རྫ་མཁན་དགེ་སློང་ནོར་ཅན་འོངས་ནས་དེ་འདི་སྐད་ཅེས་ཀྱེ་ནང་པོ་ཤེས་པར་གྱིས་ཤིག་།ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་དག་འདྲེན་པར་འདོད་ཀྱིས་བདག་ལ་བྱིན་ཅིག་ཅེས་ཟེར་ནས། བདག་གིས་དེ་ལ་འདི་སྐད་ཅེས་འཕགས་པ་གལ་ཏེ་ལྷས་ཁྱོད་ལ་ཞུགས་ཤིང་དག་གསོལ་ན། གསོལ་བ་ལེགས་ཀྱིས་ཁྱོད་ཅི་བདེར་སྣོམས་ཤིག་ཅེས་བརྗོད་པས་དེས་དྲངས་པ་འམ་གཅིག་ཏུ་མ་གྱུར་ཏམ། དེ་ནས་གྲོང་ཁྱེར་སྲུང་བའི་མི་སྣ་ཆེན་པོ་ལ་གཏོགས་པ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ག་ལ་བ་དེར་སོང་སྟེ་ཕྱིན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག་།བདག་འདི་ན་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ཤུལ་ཉུལ་བ་ན་ལྷའི་ཞུགས་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་སླད་དུ་ཐུགས་བྲེལ་བའི་དོན་དུ་བཞག་པ། སྦས་པ་ཤིན་དུ་སྦས་པ། བསྲུངས་པ་ཤིན་དུ་བསྲུངས་པ་གང་ལགས་པ་སུ་ལ་ཡང་སྩལ་བར་སླ་བ་མ་ལགས་པ་དེ་དག་ལས་ཞུགས་ཤིང་ཁ་ཅིག་ཕྱུང་སྟེ་བཅད་ཅིང་གཤེགས་ནས་དྲངས་པ་མཐོང་ངོ ། །མཐོང་ནས་བདག་འདི་ལྟར་ལྷའི་ཞུགས་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་སླད་དུ་ཐུགས་བྲེལ་བའི་དོན་དུ་བཞག་པ། སྦས་པ་ཤིན་དུ་སྦས་པ། བསྲུངས་པ་ཤིན་དུ་བསྲུངས་པ། གང་ལགས་པ་སུ་ལ་ཡང་སྩལ་བར་སླ་བ་མ་ལགས་པ་དེ་དག་ལས་ཞུགས་ཤིང་ཁ་ཅིག་ཕྱུང་སྟེ་བཅད་ཅིང་གཤེགས་ནས
5.56a
དྲངས་པ་ལས་ན། ལྷའི་གྲོང་ཁྱེར་རྒྱལ་པོའི་ཁབ་ཏུ་ཐོང་མི་པ་འམ། ཆོམ་རྐུན་པ་འམ། དགྲ་བོ་འགའ་ཞིག་ཞུགས་པར་མ་གྱུར་ཏམ་སྙམ་དུ་འཇིགས་པར་གྱུར། དངངས་པར་གྱུར་སྤུ་ཟིང་ཞེས་བགྱིད་པར་གྱུར་ནས། ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་མཆིས་ཏེ་མཆིས་ནས་ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས་ཀྱེ་ནང་པོ་ཤེས་པར་གྱིས་ཤིག་།བདག་འདི་ན་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ལྷའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་དུ་སྦས་པ། བསྲུངས་པ་ཤིན་དུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང་གཤགས་ནས་དྲངས་པ་མཐོང་ན། ཀྱེ་ནང་པོ་ཁྱོད་ཀྱིས་ཤིང་དག་སུ་ལ་ཡང་མ་བྱིན་ནམ་ཞེས་བགྱིས་ན། དེ་འདི་སྐད་ཅེས་ཀྱེ་ནང་པོ་སུ་ལ་ཡང་མ་བྱིན་ཏེ། འོན་ཀྱང་སྔོན་རྫ་མཁན་དགེ་སློང་ནོར་ཅན་འོངས་ནས། དེ་འདི་སྐད་ཅེས་ཀྱེ་ནང་པོ་ཤེས་པར་གྱིས་ཤིག་།ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་དག་འདྲེན་པར་འདོད་ཀྱིས་བདག་ལ་བྱིན་ཅིག་ཅེས་ཟེར་ནས། བདག་གིས་དེ་ལ་འདི་སྐད་ཅེས་འཕགས་པ་གལ་ཏེ་ལྷས་ཁྱོད་ལ་ཞུགས་ཤིང་དག་གསོལ་ན། གསོལ་བ་ལེགས་ཀྱིས་ཁྱོད་ཅི་བདེར་སྣོམས་ཤིག་།ཅེས་བརྗོད་པས་དེས་དྲངས་པ་འམ་ཅིག་ཏུ་མ་གྱུར་ཏམ་ཞེས་མཆི་ན། ལྷས་ཞུགས་ཤིང་དག་སུ་ལ་ཡང་སྩལ་ཏམ། ཀཝའེ་ནང་རྗེ་སུ་ལ་ཡང་མ་བྱིན་ནོ། །ལྷ་ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དེ་སྐད་མཆིའོ། །དེ་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་མི་ཞིག་ལ་སྨྲས་པ། ཀཝའེ་ནང་རྗེ་ཚུར་ཤོག་།ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་ལ་ཕྱིན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས། ཀཝའེ་ནང་རྗེ་ཁྱོད་ལ་ལུས་འཕགས་མའི
5.56b
བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གསུང་ངོ ། །ཞེས་གྱིས་ཤིག་།མི་དེས་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལས་མཉན་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་སྟེ་ཕྱིན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས་སྨྲས་སོ། །ཀྱེ་ནང་པོ་ཤེས་པར་གྱིས་ཤིག་།ཁྱོད་ལ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གསུང་ངོ ། །ཤིང་སྲུང་བའི་མི་སྣ་ཆེན་པོ་ལ་གཏོགས་པས་ཀྱེ་ནང་པོ་བཀའ་བཞིན་འཚལ་ཞེས་མི་དེ་ལས་མཉན་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་དྲུང་དུ་འཕགས་སོ། །དེའི་ཚེ་ན་སྔོན་རྫ་མཁན་དགེ་སློང་ནོར་ཅན་བྱ་བ་འགའ་ཞིག་ལ་རྒྱལ་པོའི་ཁབ་ཏུ་འཕགས་པར་གྱུར་པ་དང ། ཤིང་སྲུང་བའི་མི་སྣ་ཆེན་པོ་ལ་གཏོགས་པས། སྔོན་རྫ་མཁན་དགེ་སློང་ནོར་ཅན་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་སྔོན་རྫ་མཁན་དགེ་སློང་ནོར་ཅན་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།བདག་ནི་ཞུགས་ཤིང་དེ་དག་གི་སླད་དུ་བཀུག་གོ། །ཀྱེ་ནང་པོ་ཁྱོད་སོང་ཤིག་དང་བདག་ཀྱང་འོང་ངོ ། །དེ་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དང ། སྔོན་རྫ་མཁན་དགེ་སློང་ནོར་ཅན་དང ། མི་དེ་ཡང་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གནས་ག་ལ་བ་དེར་དོང་སྟེ། ཕྱིན་ནས་རྒྱལ་པོའི་སྒོར་བསྡད་དོ། །དེ་ནས་མི་དེ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ག་ལ་བ་དེར་སོང་སྟེ་ཕྱིན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དེ་ཆབ་སྒོ་ན་སྡོད་དོ། །རབ་ཏུ་བྱུང་བ་དེ་ཡང་མ་སྦྲན་པ་ཉིད་དུ་མཆིས་སོ། །ཀཝའེ་ནང་རྗེ་ཤིང་སྲུང་བའི་མི་སྣ་ཆེན་པོ་ལ་གཏོགས་པ་རེ་ཤིག་ཞོག་ལ་རབ་ཏུ་བྱུང་བ་དེ་འཇུག་ཏུ་ཆུག་ཤིག་།མི་དེས་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལས
5.57a
མཉན་ནས་སྔོན་རྫ་མཁན་དགེ་སློང་ནོར་ཅན་ག་ལ་བ་དེར་སོང་སྟེ་ཕྱིན་ནས། སྔོན་རྫ་མཁན་དགེ་སློང་ནོར་ཅན་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱོད་ལ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གསུང་ངོ ། །སྔོན་རྫ་མཁན་དགེ་སློང་ནོར་ཅན་གྱི་ཀྱེ་ནང་པོ་བཀའ་བཞིན་འཚལ་ཞེས་མི་དེ་ལས་མཉན་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ག་ལ་བ་དེར་སོང་སྟེ་ཕྱིན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལ་ཨ་རོག་ཁྱ་ཞེས་བྱས་ཏེ་མཐའ་གཅིག་ཏུ་འདུག་གོ། །སྔོན་རྫ་མཁན་དགེ་སློང་ནོར་ཅན་མཐའ་གཅིག་ཏུ་འདུག་པ་ལ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་འདི་སྐད་ཅེས་སྨྲས་སོ། །འཕགས་པས་ཤིང་མ་བྱིན་པ་དག་བླང་དུ་རུང་ངམ། ལྷ་མི་རུང་ངོ ། །འོ་ན་ཁྱོད་ཀྱིས་ཅིའི་ཕྱིར་བླངས། ལྷས་སྩལ་པ་དག་གོ། །འཕགས་པ་མི་དྲན་ནོ། །བདག་གིས་ལྷས་དགོངས་པར་བགྱིའོ། །ལྷས་ཡབ་ཀྱི་རྒྱལ་སྲིད་ཀྱི་དབང་ཕྱུག་མངའ་བདག་ཏུ་མངའ་བཞེས་པར་གྱུར་ནས་རིང་པོ་མ་ལགས་པར་ངའི་མངའ་རིས་ན་དགེ་སྦྱོང་དང ། བྲམ་ཟེར་རང་བཞིན་བཟང་བར་གྲགས་པ་རྩཝ་དང ། ཤིང་དང་ཆུ་མ་བྱིན་པ་ཡོངས་སུ་མི་སྤྱོད་པ་གང་དག་འཁོད་པ་དེ་དག་དེང་ཕྱིན་ཆད་ཅི་བདེར་སྤྱོད་ཅིག་ཅེས་དེ་ལྟ་བུའི་ཁྱུ་མཆོག་གི་བཀའ་རྒྱ་ཆེན་པོ་བཏགས་ཏེ། གཅིག་ཏུ་དང་དུ་བཞེས་ཤིང་འཁོར་གྱི་ནང་དུ་ཡང་དག་པར་སེང་གེའི་སྒྲ་བསྒྲགས་པ་ལྷས་དགོངས་ཤིག་།འཕགས་པ་དེ་ནི་ཁོ་བོས་ཡོངས་སུ་མ་བཟུང་བ་ལ་བསམས་ཏེ་སྨྲས་ཀྱི། འདི་ནི་ཡོངས་སུ་བཟུང་བ་དང་བཅས་པ་ཡིན་ནོ། །ལྷ་རེ་ཤིག་ཡོངས་སུ་མ་བཟུང་བ་གང་ལགས་པ་དེ་ལ་ལྷས་ཅི་བགྱིར་མཆིས། དེ་སྐད་ཅེས་སྨྲས་པ་དང ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས་འཕྲལ་བར་འཕྲལ་རྩ་གསུམ་བསྒྲེང་ཞིང་ཁྲོ་གཉེར་བསྡུས། བཞིན་བསྒྱུར།
5.57b
མིག་བགྲད་དེ་ལག་མཐིལ་གཉིས་འདྲིལ་ཞིང་འདི་སྐད་ཅེས་སྨྲས་སོ། །དགེ་སྦྱོང་བསད་པའི་རིགས་པ་ཁྱོད་སོང་ལ་ཕྱིན་ཆད་དེ་ལྟ་མ་བྱེད་ཅིག་།དེ་ནས་འཁོར་དེས་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་འདི་ཙམ་དུ་གཏུམ་པ་འདི་ཙམ་དུ་རྟུན་ངས་པ། འདི་ཙམ་དུ་དྲག་ཤུལ་ཆེ་བ། འདི་ཙམ་དུ་ཚམ་ཚོམ་མེད་པ་དེས་དགེ་སྦྱོང་གསད་པའི་རིགས་པ་ཁྱོད་ཅེས་བྱ་བའི་ཚིག་སྙིང་པོ་མེད་པས་སྤྱོས་ཏེ་བཏང་བ་ནི་ངོ་མཚར་ཏོ་ཞེས་སྐད་ཕྱུང་ཞིང་སྒྲ་མཐོན་པོ་དང ། སྒྲ་ཆེན་པོ་ཕྱུང་བར་གྱུར་ཏོ། །དེ་ནས་སྔོན་རྫ་མཁན་དགེ་སློང་ནོར་ཅན་གཙུག་ལག་ཁང་དུ་སོང་སྟེ་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཁོ་བོ་གྱོད་ལ་བསྐྲིན་ཅིང་སྲོག་དང་བྲལ་བར་དེའུ་བྱས་སོ། །དགེ་སློང་དག་གིས་ཅིའི་ཕྱིར་ཞེས་དྲིས་པ་དང ། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྣམ་སྦྱར་གྱོན་ཏེ་དགེ་སློང་ཕྱི་བཞིན་འབྲང་བའི་དགེ་སྦྱོང་ཞིག་དང་སོང་ལ་རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་དང ། བཀའ་འདོགས་པའི་གནས་དག་ཏུ་འདུག་ལ། དད་པ་ཅན་དག་དང ། མ་དད་པ་དག་དང ། བྲམ་ཟེ་དང ། ཁྱིམ་བདག་དག་དང ། གྲོང་རྡལ་པ་དག་དང ། ཡུལ་མི་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས། གྱོད་ལ་སྐྲིན་ཅིང་སྲོག་དང་འབྲལ་བར་བྱེད་ཅེས་དྲིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་དང ། བཀའ་འདོགས་པའི་གནས་དག་ཏུ་འདུག་ནས་དད་པ་ཅན
5.58a
དག་དང ། མ་དད་པ་དག་དང ། བྲམ་ཟེ་དང ། ཁྱིམ་བདག་དང ། གྲོང་རྡལ་པ་དག་དང ། ཡུལ་མི་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་ལ་སྨྲས་པ། ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བྱེད། དེ་དག་གིས་སྨྲས་པ། བཙུན་པ་ཀུན་དགའ་བོ་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །དེ་ནས་ཚེ་དང་ལྡན་པ་ཀུན་དགའ་བོ་རྒྱལ་པོའི་ཁབ་ནས་བྱུང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བདག་གཟོད་སྣམ་སྦྱར་འཚལ་ཏེ་དགེ་སློང་སླད་བཞིན་འབྲང་བའི་དགེ་སྦྱོང་ཞིག་དང ། རྒྱལ་པོའི་ཁབ་ཏུ་ཞུགས་ནས་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་དང ། བཀའ་འདོགས་པའི་གནས་དག་ཏུ་མཆིས་ཏེ། དད་པ་ཅན་དག་དང ། མ་དད་པ་དག་དང ། བྲམ་ཟེ་དང ། ཁྱིམ་བདག་དང ། གྲོང་རྡལ་པ་དག་དང ། ཡུལ་མི་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བགྱིད་ཅེས་སྨྲས་ན། དེ་དག་གི་མཆིད་ནས་བཙུན་པ་ཀུན་དགའ་བོ་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན། དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ
5.58b
ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས། སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་སྔོན་རྫ་མཁན་དགེ་སློང་ནོར་ཅན་ལ་རྨས་པ། ནོར་ཅན་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ནོར་ཅན་ངས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་ལ་ཁྱོད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར་ཅེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན། ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི
5.59a
ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གཞན་དག་གི་གྲོང་ན་འདུག་པ་འམ། དགོན་པ་ན་འདུག་པ་མ་བྱིན་པ་རྐུ་བའི་གྲངས་སུ་གཏོགས་པ། བླངས་ན་ཇི་ཙམ་མ་བྱིན་པར་བླངས་པས། དེ་རྒྱལ་པོ་འམ། བློན་པོ་ཆེན་པོས་བཟུང་ནས། དེ་ལ་འདི་སྐད་ཅེས་ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ། །ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ། དགེ་སློང་དེ་ལྟར་མ་བྱིན་པར་ལེན་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་བཞི་པོ་མིང་གི་དགེ་སློང་དང ། ཁས་འཆེ་བའི་དགེ་སློང་དང ། སློང་བའི་ཕྱིར་དགེ་སློང་དང ། ཉོན་མོངས་པ་བཅོམ་པའི་ཕྱིར་དགེ་སློང་ལས་ཤེས་བྱ་བ་ནས། དེ་ན་འདིར་ནི་གསོལ་བ་དང ། བཞིའི་ལས་མི་གཡོ་བ་གཞག་པར་མི་འོས་པས་བསྙེན་པར་རྫོགས་པ་གང་ཡིན་པར་དེ་དགེ་སློང་དུ་དགོངས་ཏེ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་ཡང་དགེ་སློང་གང་ཞེས་གསུངས་སོ། །གཞན་དག་གི་ཞེས་བྱ་བ་ནི་སྐྱེས་པ་དང ། བུད་མེད་དང ། མ་ནིང་དག་གིའོ། །གྲོང་ན་འདུག་པ་འམ་ཞེས་བྱ་བ་ནི་ར་བའི་ནང་ན་འདུག་པའོ། །དགོན་པ་ན་འདུག་པ་ཞེས་བྱ་བ་ནི་ར་བའི་ཕྱི་རོལ་ན་འདུག་པའོ། །མ་བྱིན་པ་ཞེས་བྱ་བ་ནི་དེ་ལ་སྐྱེས་པ་འམ། བུད་མེད་དམ། མ་ནིང་གང་གིས་ཀྱང་མ་བྱིན་པའོ། །རྐུ་བའི་གྲངས་སུ་གཏོགས་པ་ཞེས་བྱ་བ་ནི་མ་བྱིན་པ་དེ་རྐུ་བའི་གྲངས་སུ་གཏོགས་པ་ཡང་ཡིན་ནོ། །བླངས་ན་ཞེས་བྱ་བ་ནི་ལེན་ནའོ། །ཇི་ཙམ་མ་བྱིན་པར་བླངས་པས་ཞེས་བྱ་བ་ནི་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །དེ་རྒྱལ
5.59b
པོ་འམ་ཞེས་བྱ་བ་ནི་འདི་ལྟ་སྟེ། བུད་མེད་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ལ། རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ནོ། །བློན་པོ་ཆེན་པོས་ཤེས་བྱ་བ་ནི་དེ་ལས་གཞན་པ་བློན་པོ་དང ། རྩིས་མཁན་དང ། སྣ་ཆེན་པོ་ལ་གཏོགས་པ་རྒྱལ་སྲིད་བྱེད་པ་གསང་ཚིག་འཐུན་པས་འཚོ་བ་གང་དག་དེ་ལ་བརྟེན་ནས་འཚོ་བར་བྱེད་པ་དག་གིས་སོ། །བཟུང་ནས་ཤེས་བྱ་བ་ནི་བླངས་ནས་སོ། །དེ་ལ་འདི་སྐད་ཅེས་ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་བྱ་བ་དེ་དག་ནི་སྤྱོ་བའི་ཚིག་གོ། །ཟེར་ཞིང་ཞེས་བྱ་བ་ནི་རྗོད་ཅིང་ངོ ། །གསོད་དམ་ཞེས་བྱ་བ་ནི་སྲོག་དང་བྲལ་བར་བྱེད་པའོ། །འཆིང་ངམ་ཞེས་བྱ་བ་ནི་ཆིངས་མ་གསུམ་པོ་ལྕགས་ལས་བྱས་པ་དང ། ཤིང་ལས་བྱས་པ་དང ། རྩཝ་ལས་བྱས་པ་དག་གིས་སོ། །སྤྱུག་ཀྱང་རུང་སྟེ་ཞེས་བྱ་བ་ནི་ཡུལ་མེད་པར་བྱེད་ཀྱང་རུང་སྟེ་འོ། །དགེ་སློང་ཞེས་བྱ་བ་ནི་གང་ལ་དགེ་སློང་གིས་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་ཕྱིན་པར་བྱེད་པ་གང་ཡིན་པ་དང ། གང་ཟག་དེའི་ཁས་ལེན་པ་དང ། མངོན་པར་ཁས་ལེན་པ་དང ། ཕྱིར་མི་ཟློག་པ་དང ། ཕྱིར་མི་ཟློག་པ་ཉིད་དང ། ངག་དང ། ཚིག་དང ། ཐ་སྙད་དང ། སྐད་དང ། རྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པའོ། །དེ་ཡང་ཞེས་བྱ་བ་ནི་ཉེ་བར་བསྟན་པ་དང ། ཀུན་དུ་བསྟན་པའི་ཚིག་བླ་དགས་དེ་ཡང་ངོ ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི། དེ་མཐར་གྱུར་པ་དང ། ལྟུང་བ་དང ། དམན་པ་དང ། མཇུག
5.60a
ན་འདུག་པ་དང ། ཐ་ཆད་དང ། ཡིད་དང་མི་མཐུན་པ་གང་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ་བཅོམ་པ། ལྟུང་བ། ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་དེ་བཞིན་དུ། དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་བས་དེས་ན་ཕམ་པར་གྱུར་པ་ཡིན་གྱིས་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི་དགེ་སློང་རྣམས་ཀྱིས་དེ་དང་གསོ་སྦྱོང་དང ། དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ལ་གནས་པར་མི་བྱའོ། །ཡང་གང་ཟག་བཅུ་གཉིས་པོ་དག་ཏུ་སྐོ་བས་བསྐོ་བར་མི་བྱ་སྟེ། དེ་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། ་་་་་་།སྤྱི་སྡོམ་ལ། བདག་ཉིད་ས་དང་ནམ་མཁའ་དང ། །ས་ཡི་གཅལ་དང་བཞོན་དང་གྲུ། །སྟོན་ཀ་འབྱུང་དང་ཆུ་དང་ནི། །རྐུ་དང་ས་གཞི་འཆོལ་བ་དང ། །རྐང་མེད་དང་ནི་གདོལ་པ་དང ། །འཕྱང་བར་གྱུར་པ་ཐ་མ་ཡིན། །སྡོམ་ལ། བདག་ཉིད་དང་ནི་མ་བྱིན་དང ། །སེམས་དང་ཡོངས་སུ་བཟུང་བ་དང ། །འདུ་ཤེས་དང་ནི་བཞི་པ་བཞི། །ལྔ་པ་གཉིས་སུ་བྱས་པ་ཡིན། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། བདག་ཉིད་ཀྱིས་དང ། ཞལ་ཏ་བྱས་ཏེ་དང ། མངགས་པས་སོ། །ཇི་ལྟར་བདག་ཉིད་ཀྱིས་ཤེས་ན། བདག་ཉིད་ཀྱིས་རྐུ་བ་དང ། བདག་ཉིད་ཀྱིས་རྐུར་འཇུག་པ་དང །
5.60b
བདག་ཉིད་ཀྱིས་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་བདག་ཉིད་ཀྱིས་སོ། །ཇི་ལྟར་ཞལ་ཏ་བྱས་ཏེ་ཞེ་ན། ཞལ་ཏ་བྱས་ཏེ་རྐུ་བ་དང ། ཞལ་ཏ་བྱས་ཏེ་རྐུར་འཛུད་པ་དང ། ཞལ་ཏ་བྱས་ཏེ་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་ཞལ་ཏ་བྱས་ཏེའོ། །ཇི་ལྟར་མངགས་པས་ཤེ་ན། མངགས་པས་རྐུ་བ་དང ། མངགས་པས་རྐུར་འཛུད་པ་དང ། མངགས་པས་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་མངགས་པས་སོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། མ་བྱིན་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་མ་བྱིན་པ་ཡིན་ཞེ་ན། དེ་ལ་སྐྱེས་པ་འམ། བུད་མེད་དམ། མ་ནིང་གང་གིས་ཀྱང་མ་བྱིན་པ་སྟེ། དེ་ལྟར་མ་བྱིན་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། སེམས་པར་བྱེད་པ་དང ། རྩོལ་བར་བྱེད་པ་དང ། གནས་ནས་གནས་སུ་སྦེད་པའོ། །ཇི་ལྟར་སེམས་པར་བྱེད་ཅེ་ན། དེ་ལ་རྐུ་སེམས་ཉེ་བར་གནས་པར་གྱུར་པ་སྟེ། དེ་ལྟར་སེམས་པར་བྱེད་དོ། །ཇི་ལྟར་རྩོལ་བར་བྱེད་ཅེ་ན། ལག་པ་དག་དང ། རྐང་པ་དག་གིས་རྩོལ་བར་བྱེད་པ་སྟེ། དེ་ལྟར་རྩོལ་བར་བྱེད་དོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས
5.61a
དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། གཞན་གྱིས་ཡོངས་སུ་བཟུང་བ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་གཞན་གྱིས་ཡོངས་སུ་བཟུང་བ་ཡིན་ཞེ་ན། འདི་ལྟ་སྟེ། ཡོ་བྱད་ལྕི་བ་དག་གཞན་སྐྱེས་པ་འམ། བུད་མེད་དམ། མ་ནིང་དག་གིས་ཡོངས་སུ་བཟུང་བར་གྱུར་པ་སྟེ། དེ་ལྟར་གཞན་གྱིས་ཡོངས་སུ་བཟུང་བ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། གཞན་གྱིས་ཡོངས་སུ་བཟུང་བར་འདུ་ཤེས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ཞེ་ན། འདི་ལྟ་སྟེ། དགེ་སློང་གིས་འདི་ལྟར་ཡོ་བྱད་ལྕི་བ་འདི་དག་གཞན་སྐྱེས་པ་འམ། བུད་མེད་དམ། མ་ནིང་དག་གིས་ཡོངས་སུ་བཟུང་བར་འདུ་ཤེས་པ་སྟེ། དེ་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས
5.61b
ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། གཞན་གྱིས་ཡོངས་སུ་བཟུང་བ་དང ། གཞན་གྱིས་ཡོངས་སུ་བཟུང་བར་འདུ་ཤེས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་གཞན་གྱིས་ཡོངས་སུ་བཟུང་བ་ཡིན་ཞེ་ན། འདི་ལྟ་སྟེ། ཡོ་བྱད་ལྕི་བ་དག་གཞན་སྐྱེས་པ་འམ། བུད་མེད་དམ། མ་ནིང་དག་གིས་ཡོངས་སུ་བཟུང་བར་གྱུར་པ་སྟེ། དེ་ལྟར་གཞན་གྱིས་ཡོངས་སུ་བཟུང་བ་ཡིན་ནོ། །ཇི་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ཞེ་ན། འདི་ལྟ་སྟེ། དགེ་སློང་གིས་འདི་ལྟར་ཡོ་བྱད་ལྕི་བ་འདི་དག་གཞན་སྐྱེས་པ་འམ། བུད་མེད་དམ། མ་ནིང་དག་གིས་ཡོངས་སུ་བཟུང་བར་འདུ་ཤེས་པ་སྟེ། དེ་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། སེམས་པར་བྱེད་པ་དང ། རྩོལ་བར་བྱེད་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་སེམས་པར་བྱེད་ཅེ་ན། དེ་ལ་རྐུ་སེམས་ཉེ་བར་གནས་པར་གྱུར་པ་སྟེ། དེ་ལྟར་སེམས་པར་བྱེད་དོ། །ཇི་ལྟར་རྩོལ་བར་བྱེད་ཅེ་ན། ལག་པ་དག་དང ། རྐང་པ་དག་གིས་རྩོལ་བར་བྱེད་པ་སྟེ། དེ་ལྟར་རྩོལ་བར
5.62a
བྱེད་དོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། བསྲུངས་པ་དང ། བདག་གིར་བྱས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་བསྲུངས་པ་ཡིན་ཞེ་ན། འདི་ལྟ་སྟེ། མི་རྣམས་ཀྱི་ཡོ་བྱད་ལྕི་བ་དག་སྣོད་འདི་ལྟ་སྟེ། ཟངས་པོ་ཆེ་དང ། ཟངས་དང ། རྫ་བོ་དང ། སྒྲོམ་དང ། ཀོ་ལྤགས་སུ་བཅུག་པར་གྱུར་ཅིང ། དེར་ཡང་སྲུང་མ་འདི་ལྟ་བུ་འདི་ལྟ་སྟེ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་དག་བཀོད་པར་གྱུར་ཅིང ། དེ་དག་དེ་ན་སྲུང་བར་བྱེད་པ་སྟེ། དེ་ལྟར་བསྲུངས་པ་ཡིན་ནོ། །ཇི་ལྟར་བདག་གིར་བྱས་པ་ཡིན་ཞེ་ན། འདི་ལྟ་སྟེ། མི་རྣམས་ཀྱི་ཡོ་བྱད་ལྕི་བ་དག་སྔོན་འདི་ལྟ་སྟེ། ཟངས་པོ་ཆེ་དང ། ཟངས་དང ། རྫ་བོ་དང ། སྒྲོམ་དང ། ཀོ་ལྤགས་སུ་བཅུག་པར་གྱུར་ཅིང ། དེ་དག་གིས་འདི་དག་བདག་ཅག་གི་ཡིན་ནོ་ཞེས་དེ་དག་བདག་གིར་བྱེད་པ་སྟེ། དེ་ལྟར་བདག་གིར་བྱས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་ལྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །གཞན
5.62b
ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། བསྲུངས་ཤིང་བདག་གིར་མ་བྱས་པ་དང ། བདག་གིར་བྱས་ཤིང་མ་བསྲུངས་པ་དང ། ལྕི་བ་དང ། གནས་ནས་གནས་སུ་སྦེད་དོ། །ཇི་ལྟར་བསྲུངས་ཤིང་བདག་གིར་མ་བྱས་པ་ཡིན་ཞེ་ན། འདི་ལྟ་སྟེ། ཆོམ་རྐུན་པ་དག་གིས་གྲོང་གཞོམ་པ་དང ། གྲོང་ཁྱེར་གཞོམ་པ་དང ། ཡུལ་གཞོམ་པར་བྱས་ཏེ་དགོན་པར་ཀུན་ནས་འདུ་བར་བྱེད་ཅིང་དེར་མི་ཁ་ལུངས་པ་ལ་གཅན་པ་དག་གིས་དེ་དག་ལས་རྐུན་རྫས་ཕྲོགས་ཏེ་སྤུངས་ནས་སྲུང་བར་བྱེད་ཅིང་བདག་གིར་མི་བྱེད་པ་སྟེ། དེ་ལྟར་བསྲུངས་ཤིང་བདག་གིར་མ་བྱས་པ་ཡིན་ནོ། །ཇི་ལྟར་བདག་གིར་བྱས་ཤིང་མ་བསྲུངས་པ་ཡིན་ཞེ་ན། འདི་ལྟ་སྟེ། མི་རྣམས་ཀྱི་ཡོ་བྱད་ལྕི་བ་དག་སྔོན་འདི་ལྟ་སྟེ། ཟངས་པོ་ཆེ་དང ། ཟངས་དང ། རྫ་བོ་དང ། སྒྲོམ་དང ། ཀོ་ལྤགས་སུ་བཅུག་པར་གྱུར་ཅིང ། དེ་དག་གིས་འདི་དག་བདག་ཅག་གི་ཡིན་ནོ་ཞེས་དེ་དག་བདག་གིར་བྱེད་ཅིང ། སྲུངས་མ་འདི་ལྟ་བུ་འདི་ལྟ་སྟེ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་དག་བཀོད་པར་ནི་མ་གྱུར་པ་སྟེ། དེ་ལྟར་བདག་གིར་བྱས་ཤིང་མ་བསྲུངས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དག་ཏུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་ལྔས་མ་བྱིན་པར་ལེན་ན་ཕམ་པར་འགྱུར་རོ། །ལྔ་གང་ཞེ་ན། རང་གི་འདུ་ཤེས་ཀྱིས་ལེན་པར་མི་བྱེད་པ་དང ། ཡིད་གཅུགས་པའི་འདུ་ཤེས་ཀྱིས་ལེན་པར་མི་བྱེད་པ་དང ། རེ་ཤིག་གི་འདུ་ཤེས་ཀྱིས་ལེན་པར་མི་བྱེད་པ་དང །
5.63a
ལེན་པ་ན་གཞན་ལ་གོ་བར་མི་བྱེད་པ་དང ། དེ་ལ་རྐུ་སེམས་ཉེ་བར་གནས་པར་གྱུར་པ་སྟེ། དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་ལྔས་མ་བྱིན་པར་ལེན་ན་ཕམ་པར་འགྱུར་རོ། །རྒྱུ་ལྔས་ནི་ལྟུང་བ་མེད་དེ། ལྔ་གང་ཞེ་ན། རང་གི་འདུ་ཤེས་ཀྱིས་ལེན་པར་བྱེད་པ་དང ། ཡིད་བཅུག་པའི་འདུ་ཤེས་ཀྱིས་ལེན་པར་བྱེད་པ་དང ། རེ་ཤིག་གི་འདུ་ཤེས་ཀྱིས་ལེན་པར་བྱེད་པ་དང ། ལེན་པ་ན་གཞན་ལ་གོ་བར་བྱེད་པ་དང ། དེ་ལ་རྐུ་སེམས་ཉེ་བར་གནས་པར་མ་གྱུར་པ་སྟེ། རྒྱུ་དེ་ལྔས་ལྟུང་བ་མེད་དོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་བཞི་པ། སྡོམ་ལ། ས་ལ་འདུག་དང་སྣོད་འདུག་དང ། །གཡུལ་ན་འདུག་དང་དོང་ན་འདུག་།རྩ་བའི་སྨན་ནི་ལྔ་པ་སྟེ། །སྡེ་ཚན་ཡང་དག་བསྡུས་པ་ཡིན། །འདི་ལྟར་གཞན་དག་གི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་ས་ལ་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ས་དེ་འཇམ་ཞིང་མུ་གཅིག་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གྱོང་གྲུགས་སམ། གས་པ་འམ། ཡི་གེ་བྲིས་པ་འམ། ཚོན་སྣ་ཚོགས་བཀྲ་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་གཞན་དག་གི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་སྣོད་ན་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན
5.63b
པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་སྣོད་དེ་འཇམ་ཞིང་དུམ་བུ་གཅིག་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གྱོང་གྲུགས་སམ། གས་པ་འམ། མཚམས་ཅན་ནམ། ཡི་གེ་བྲིས་པ་འམ། ཚོན་སྣ་ཚོགས་བཀྲ་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་གཞན་དག་གིས་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གཡུལ་ན་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གཡུལ་དེ་འབྲུ་ཁ་དོག་གཅིག་པས་གང་བ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་འབྲུ་ཁ་དོག་སྣ་ཚོགས་ཀྱིས་གང་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་གཞན་དག་གི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། །དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་དོང་ན་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད།
5.64a
ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དོང་དེ་འབྲུ་ཁ་དོག་གཅིག་པས་གང་བ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་འབྲུ་ཁ་དོག་སྣ་ཚོགས་ཀྱིས་གང་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །གལ་ཏེ་དོང་དེ་གང་ཞིང་མུ་དང་ཁ་ད་ཆད་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་མ་གང་བ་ཡིན་ན་དེ་ལ་ཤིང་བུས་བར་དུ་ཆོད་པ་འམ། སེག་གིས་བར་དུ་ཆོད་པ་འམ། རེ་ལྡེས་བར་དུ་ཆོད་པ་གང་དག་ཡིན་པ་དེ་དག་ཕྱོགས་ཐ་དད་པར་བརྗོད་པར་བྱའོ། །འདི་ལྟར་མི་རྣམས་ཀྱི་རྩ་བའི་ལས་ཀྱི་མཐའ་འདི་ལྟ་སྟེ། གླ་སྒང་ངམ། ཤུ་དག་གམ། ཡུང་ངམ། སྒེའུ་གཤེར་རམ། བོང་ང་དཀར་པོ་དེ་ལྟ་བུ་དེ་དག་ཉེ་བར་གནས་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད། འབྱིན་པར་བྱེད། ཁུར་འདྲག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང ། དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། ་་་་་་་།སྡོམ་ལ། ནམ་མཁའ་ལ་ནི་གསུམ་དུ་བྱ། །བྱ་རྣམས་ཀྱིས་ནི་རྒྱན་གསུམ་དང ། །གསང་སྔགས་དག་གིས་འདྲེན་བྱས་ཏེ། །སྡེ་ཚན་ཡང་དག་བསྡུས་པ་ཡིན། །འདི་ལྟར་མི་རྣམས་ཀྱི
5.64b
ཁང་ཐོག་དག་ཏུ་གོས་ཁ་དོག་སྣ་ཚོགས་དག་བཏིང་བ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། ཡ་གད་འཛུགས་པར་བྱེད། ཁྲི་འཕང་དང་ཐག་སྐས་འཆའ་བར་བྱེད། དཔྱང་ཐག་འདོར་བར་བྱེད། འཛེག་པར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད། གོས་དག་སྡུད་པར་བྱེད། བམ་པོ་སྒྲེ་བར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་གཙོ་བླག་མཁན་གྱི་གོས་དག་བཏིང་བ་རླུང་གིས་ཁྱེར་ཞིང་དེ་དག་དགེ་སློང་རྣམས་ཀྱི་འཆག་ས་དག་གམ། དག་ར་དག་གམ། སྒོ་ཁང་དག་ཏུ་ལྟུང་བ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད། གོས་དག་སྡུད་པར་བྱེད། བམ་པོ་སྒྲེ་བར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁང་པ་བརྩེགས་པ་འམ། ཁང་པ་བརྩེགས་པའི་སྟེང་དུ་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་བཞག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། ཡ་གད་འཛུགས་པར་བྱེད། ཁྲི་འཕང་དང་ཐག་སྐས་འཆའ་བར་བྱེད། དཔྱང་ཐག་འདོར
5.65a
བར་བྱེད། འཛེག་པར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁྱིམ་དག་གམ། ཆུའི་གནས་དག་ཏུ་འདུག་པའི་ཤིང་ལྗོན་པ་དག་བསྐྱེད་པ་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གིས་བརྒྱན་པ་དེ་ལས་ཟས་ལ་ཆགས་པའི་བྱས་རྒྱན་གང་ཡང་རུང་བ་ཁྱེར་བ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བྱ་འཛིན་པར་བྱེད་ཅིང་ཇི་སྲིད་དུ་རྒྱན་ལ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་ལ། དེ་འདི་སྙམ་དུ་བྱ་ལས་བརྐུ་བར་བྱའི་མི་ལས་མ་ཡིན་ནོ་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁང་ཐོག་དག་གམ། སྐོན་པ་དག་ཏུ་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང །
5.65b
མུ་ཏིག་གི་ཆུན་པོ་དག་བཞག་པ་དེ་ལས་ཟས་ལ་ཆགས་པའི་བྱས་རྒྱན་གང་ཡང་རུང་བ་ཁྱེར་བ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བྱ་འཛིན་པར་བྱེད་ཅིང་ཇི་སྲིད་དུ་རྒྱན་ལ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་ལ། དེ་འདི་སྙམ་དུ་བྱ་ལས་བརྐུ་བར་བྱའི་མི་ལས་མ་ཡིན་ནོ་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁྱིམ་དག་གམ། ཆུའི་གནས་དག་ཏུ་རྩེད་མོའི་བྱ་འདི་ལྟ་སྟེ། ནེ་ཙོ་འམ། རི་སྐེགས་སམ། ཁུ་བྱུག་གམ། ཤང་ཤང་ཏེའུ་འམ། རྨ་བྱ་དག་བཞག་པ་དེ་དག་ལ་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གིས་བརྒྱན་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བྱ་འཛིན་པར་བྱེད་ཅིང་ཇི་སྲིད་དུ་རྒྱན་ལ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་ལ། དེ་འདི་སྙམ་དུ་བྱ་ལས་བརྐུ་བར་བྱའི་མི་ལས་མ་ཡིན་ནོ་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ
5.66a
སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གཏེར་གཉིས་པོ་བདག་པོ་དང་བཅས་པ་དང ། བདག་པོ་མེད་པ་ལས་དགེ་སློང་གིས་བདག་པོ་དང་བཅས་པའི་གཏེར་གྱི་ཕྱིར་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། དཀྱིལ་འཁོར་ཉུག་པར་བྱེད། ཕྱོགས་གཞིར་སེང་ལྡེང་གི་ཕུར་པ་འཛུགས་པར་བྱེད། ཚོན་སྐུད་སྣ་ལྔས་བསྐོར་ཏེ་མེ་སྦར་བར་བྱེད། ཡམ་སྲེག་ཤིང་འཛུད་པར་བྱེད། གསང་སྔགས་རྗོད་པར་བྱེད་ཅིང ། བདག་ལ་བདག་པོ་དང་བཅས་པའི་གཏེར་འོང་བར་གྱུར་ལ། བདག་པོ་མེད་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་དང་བཅས་པའི་གཏེར་འོང་བར་གྱུར་ཅིང་བདག་པོ་མེད་པ་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །དགེ་སློང་གིས་བདག་པོ་དང་བཅས་པའི་གཏེར་གྱི་ཕྱིར་སྦྱོར་བ་བྱས་ནས། དེ་འདི་སྙམ་དུ་བདག་ལ་བདག་པོ་མེད་པའི་གཏེར་འོང་བར་གྱུར་ལ། བདག་པོ་དང་བཅས་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་མེད་པའི་གཏེར་འོང་བར་གྱུར་ཅིང་བདག་པོ་དང་བཅས་པ་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་བྱས་སུ་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་
5.66b
པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །དགེ་སློང་གིས་བདག་པོ་མེད་པའི་གཏེར་གྱི་ཕྱིར་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། དཀྱིལ་འཁོར་ཉུག་པར་བྱེད། ཕྱོགས་བཞིར་སེང་ལྡེང་གི་ཕུར་པ་འཛུགས་པར་བྱེད། ཚོན་སྐུད་སྣ་ལྔས་བསྐོར་ཏེ་མེ་སྦར་བར་བྱེད། ཡམ་སྲེག་ཤིང་འཛུད་པར་བྱེད། གསང་སྔགས་རྗོད་པར་བྱེད་ཅིང་བདག་ལ་བདག་པོ་མེད་པའི་གཏེར་འོང་བར་གྱུར་ལ། བདག་པོ་དང་བཅས་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་མེད་པའི་གཏེར་འོང་བར་གྱུར་ཅིང་བདག་པོ་དང་བཅས་པ་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་བྱས་སུ་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །དགེ་སློང་གིས་བདག་པོ་མེད་པའི་གཏེར་གྱི་ཕྱིར་སྦྱོར་བ་བྱས་ནས་དེ་འདི་སྙམ་དུ། བདག་ལ་བདག་པོ་དང་བཅས་པའི་གཏེར་འོང་བར་གྱུར་ལ། བདག་པོ་མེད་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་དང་བཅས་པའི་གཏེར་འོང་བར་གྱུར་ཅིང་བདག་པོ་མེད་པར་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། ་་་་་་་།སྡོམ་ལ། སའི་གཅལ་དང་རྡོ་དང་ནི། །སྤང་ལེབ་དང་ནི་རྩིག་རྨང་དང ། །རྩིག་པའི་སྟེང་དང་གཡོགས་མ་དང ། །རིམ་པ་ཆོས་གོས་རྡང་ཁུང་དང ། །ཆོས་གོས་རྡང་དང་ཟུ་ང་དང ། །ལྕགས་སྒྱེད་ཁྲི་དང་ཁྲེའུ་དང་ནི། །ན་ཁྲི་དང་ནི་སྒོ་སྐྱེས་དང ། །ཤིང་ལྗོན་རྣམ་པ་གསུམ་པོ་ཡིན། །འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་ས་ལ་གཅལ་བཏིང
5.67a
བའི་སྟེང་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གཅལ་ཏེ་རྩཝ་ཁ་དོག་གཅིག་པ་དག་གིས་བཀྲམ་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་རྩཝ་ཁ་དོག་སྣ་ཚོགས་དག་གིས་བཀྲམ་པ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་རྡོའི་སྟེང་ན་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད་ཅེས་བྱ་བ་ནས། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་སྔ་མ་བཞིན་ནོ། །གལ་ཏེ་རྡོ་དེ་འཇམ་ཞིང་མུ་གཅིག་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གྱོང་གྲུགས་སམ། གས་པ་འམ། མཚམས་ཅན་ནམ། ཡི་གེ་བྲིས་པ་འམ། ཚོན་སྣ་ཚོགས་བཀྲ་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །རྡོ་ལ་ཇི་ལྟ་བ་བཞིན་དུ་སྤང་ལེབ་དང ། རྩིག་རྨང་དང ། རྩིག་པ་དང ། སྟེང་དང ། གཡོགས་མ་དང ། རིམ་པ་དང ། ཆོས་གོས་ཀྱི་རྡང་ཁུང་དང ། ཆོས་གོས་ཀྱི་རྡང་དང ། ཟུ་ང་དང ། ལྕགས་སྒྱེད་དང ། ཁྲི་དང ། ཁྲིའུ་དང ། ན་ཁྲིའུ་དང ། སྒོ་སྐྱེས་དང ། ཤིང་ལྗོན་པ་གསུམ་པོ་མེ་ཏོག་གི་ཤིང་ལྗོན་པ་དང ། འབྲས་བུ་འི་ཤིང་ལྗོན་པ་དང ། བདུག་པའི་ཤིང་ལྗོན་པ་ལ་ཡང་དེ་བཞིན་ཏེ། དགེ་སློང་གིས་མེ་ཏོག་གི་ཤིང་ལྗོན་པ་ཕྱུང་སྟེ་རྐུ་ན་མེ་ཏོག་གི་ཤིང་ལྗོན་པའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ
5.67b
སྦོམ་པོར་འགྱུར་རོ། །མེ་ཏོག་གི་ཤིང་ལྗོན་པ་ལ་ཇི་ལྟ་བ་བཞིན་དུ་འབྲས་བུའི་ཤིང་ལྗོན་པ་དང ། བདུག་པའི་ཤིང་ལྗོན་པ་ལ་ཡང་དེ་བཞིན་ནོ། ་་་་་་་་་།སྡོམ་ལ། བཞོན་དང་སྲང་གི་ཁང་པ་དང ། །གླང་ཆེན་བཞོན་དང་རྟ་བཞོན་དང ། །ཤིང་རྟའི་བཞོན་དང་རྐང་འགྲོ་དང ། །ཟུང་ཁྱོགས་བཞོན་དང་ཤིང་རྟ་དང ། །ཁྱོགས་སྤྱིལ་བྱིས་པའི་བཞོན་པ་ཡིན། །འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་བཞོན་པའི་སྟེང་ན་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བཞོན་པ་ལ་ཞོན་པར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བཞོན་པ་དེ་གོས་ཁ་དོག་གཅིག་པ་དག་གིས་བཤམས་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གོས་ཁ་དོག་སྣ་ཚོགས་དག་གིས་བཤམས་པ་ཡིན་ན་ཕྱོགས་ཐ་དད་པར་བརྗོད་པར་བྱའོ། །བཞོན་པ་ལ་ཇི་ལྟ་བ་བཞིན་དུ་སྲང་གི་ཁང་པ་ལ་ཡང་དེ་བཞིན་ནོ། །འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གླང་པོ་ཆེའི་བཞོན་པའི་སྟེང་ན་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གླང་པོ་ཆེ་ལ་ཞོན་པར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ
5.68a
སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གླང་པོ་ཆེ་དེ་ཚོ་བ་དང ། ལྤགས་པ་དང ། ཤ་དང་ཁྲག་རྒྱས་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པ་ཡིན་ན་དེ་ལ་སོས་བར་དུ་ཆོད་པ་འམ། སྣས་བར་དུ་ཆོད་པ་འམ། རྣ་བས་བར་དུ་ཆོད་པ་འམ། རྩིབ་མས་བར་དུ་ཆོད་པ་འམ། རྐེད་པས་བར་དུ་ཆོད་པ་འམ། འཇུག་ངོས་བར་དུ་ཆོད་པ་གང་དག་ཡིན་པ་དེ་དག་ཕྱོགས་ཐ་དད་པར་བརྗོད་པར་བྱའོ། །གླང་པོའི་རྒྱབ་དེར་ཁང་པ་བརྩེགས་པ་དང ། བཅས་ཤིང་ཁང་པ་བརྩེགས་པ་དེར་རྒྱན་སྣ་ཚོགས་པ་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་བཞག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གླང་པོ་ཆེ་ལ་ཞོན་པར་བྱེད། ཁང་པ་བརྩེགས་པ་ལ་འཇུག་པར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཁང་པ་བརྩེགས་པ་དེ་གོས་ཁ་དོག་གཅིག་པ་དག་གིས་བཤམས་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གོས་ཁ་དོག་སྣ་ཚོགས་དག་གིས་བཤམས་པ་ཡིན་ན་ཕྱོགས་ཐ་དད་པར་བརྗོད་པར་བྱའོ། །ཁང་པ་བརྩེགས་པ་ལ་ཇི་ལྟ་བ་བཞིན་དུ་ཁང་པ་བརྩེགས་པ་ཕྱེད་ལ
5.68b
ཡང་དེ་བཞིན་ནོ། །གླང་པོ་ཆེའི་བཞོན་པ་ལ་ཇི་ལྟ་བ་བཞིན་དུ་རྟའི་བཞོན་པ་དང ། ཤིང་རྟའི་བཞོན་པ་དང ། རྐང་གིས་འགྲོ་བ་དང ། ཟུང་ཁྱོགས་ཀྱི་བཞོན་པ་དང ། ཤིང་རྟ་དང ། ཁྱོགས་སྤྱིལ་དང ། བྱིས་པའི་བཞོན་པ་ལ་ཡང་དེ་བཞིན་ནོ། ་་་་་།སྡོམ་ལ། གྲུ་སྐྱོད་རྒྱུན་ཕྱོགས་བཟློག་ཕྱོགས་དང ། །ཚུ་རོལ་ཕ་རོལ་སྐམ་ས་དང ། །རྫབ་ཏུ་སྦེད་པར་བྱེད་པ་དང ། །བདེ་བ་མེད་པར་ཆུད་གཟོན་པའོ། །དགེ་སློང་གི་རྐུན་སེམས་ཀྱིས་གྲུ་ཕུར་པ་ལ་བཏགས་པ་བསྐྱོད་པར་བྱེད་ན་ཉེས་བྱས་སུ་འགྱུར་རོ། །གལ་ཏེ་ཆུའི་རྒྱུན་ཕྱོགས་སུ་ཁྲིད་པར་བྱེད་ན་ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཆུའི་རྒྱུན་ལས་བཟློག་ཕྱོགས་སུ་ཁྲིད་པར་བྱེད་ན་ཇི་སྲིད་དུ་གྲུ་ཚུགས་ལས་འདས་པར་མ་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གྲུ་ཚུགས་ལས་འདས་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཚུ་རོལ་ནས་ཕ་རོལ་ཏུ་ཁྲིད་པར་བྱེད་དམ། ཕ་རོལ་ནས་ཚུ་རོལ་དུ་འདྲེན་པར་བྱེད་ན་ཇི་སྲིད་དུ་མིག་སྔར་སྣང་བར་འགྱུར་བ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་སྐམ་ས་ལ་ཕྱུང་སྟེ་རྐུ་བར་བྱེད་ན་ཇི་སྲིད་དུ་མིག་སྔར་སྣང་བར་འགྱུར་བ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕྱིས་བཀུར་རོ་སྙམ་པས
5.69a
རྫབ་ཏུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་རྫབ་ཏུ་སྦེད་པར་བྱེད་དམ། སྲེག་པར་བྱེད་དམ། གཅོག་པར་བྱེད་དམ། འཆག་པར་བྱེད་ན་ཉེས་པ་སྦོམ་པོར་འགྱུར་རོ། ་་་་་་་་།སྡོམ་ལ། སྟོན་ཀ་འབྱུང་དང་གྲུ་གསུམ་དང ། །ངང་པ་དང་ནི་ཨུད་པ་ལ། །ཆུ་ནས་སྐྱེ་དང་སྐམ་ལས་སྐྱེས། །རྔོན་སྤྱད་དང་ནི་ཉ་སྡང་ངོ ། །འདི་ལྟར་མི་རྣམས་ཀྱི་སྟོན་ཀ་འབྱུང་བའི་ལས་ཀྱི་མཐའ་འདི་ལྟ་སྟེ། ས་ལུའི་ལས་ཀྱི་མཐའ་དང ། བུ་རམ་ཤིང་གི་ལས་ཀྱི་མཐའ་དང ། ལན་ཚཝའི་ལས་ཀྱི་མཐའ་དེ་ལྟ་བུ་དེ་དག་ཉེ་བར་གནས་པར་གྱུར་ཅིང ། དེ་དག་ལན་འགའ་ནི་ཆུ་ཤིན་ཏུ་མོད་ཅིང ། ལན་འགའ་ནི་ཆུ་ཤིན་ཏུ་དཀོན་པར་གྱུར་པ་ན། དགེ་སློང་གིས་ཆུ་ཤིན་ཏུ་དཀོན་པའི་ཚེ་བདག་གི་འབྱོར་པར་གྱུར་ལ། གཞན་གྱི་རྒུད་པར་གྱུར་ཅིག་སྙམ་པས་བདག་གི་ས་ལུའི་རྣང་ལ་ཡུར་བ་གཏོང་བར་བྱེད་ཅིང་གཞན་གྱི་ལ་གཅོད་པར་བྱེད་ན། གལ་ཏེ་དེའི་འབྱོར་པར་གྱུར་ཅིང་གཞན་གྱི་རྒུད་པར་གྱུར་ན། དེའི་འབྱོར་པའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །ཆུ་ཤིན་དུ་མོད་པའི་ཚེ་བདག་གི་འབྱོར་པར་འགྱུར་ལ། གཞན་གྱི་རྒུད་པར་གྱུར་ཅིག་སྙམ་པས་བདག་གི་ལ་གཅོད་པར་བྱེད་ཅིང ། གཞན་གྱི་ལ་གཏོང་བར་བྱེད་ན། གལ་ཏེ་དེའི་འབྱོར་པར་གྱུར་ཅིང་གཞན་གྱི་རྒུད་པར་གྱུར་ན་དེའི་འབྱོར་པའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་བདག་གི་ལ་ཡང་གཏོང་བར་བྱེད་ཅིང་གཞན་གྱི་ལ་ཡང་གཏོང་བར་བྱེད་ན་ཉེས་པ་སྦོམ
5.69b
པོར་འགྱུར་རོ། །ས་ལུའི་ལས་ཀྱི་མཐའ་ལ་ཇི་ལྟ་བ་བཞིན་དུ་བུ་རམ་ཤིང་གི་ལས་ཀྱི་མཐའ་དང ། ལན་ཚཝའི་ལས་ཀྱི་མཐའ་ལ་ཡང་དེ་བཞིན་ནོ། །གྲུ་ནི་གསུམ་སྟེ། བུམ་པའི་གྲུ་དང ། རྫ་མའི་གྲུ་དང ། ར་རྐྱལ་གྱིའོ། །ཟོང་ནི་བཞི་སྟེ། ཟོང་ལྕི་ཞིང་རིན་ལྕི་བ་ཡང་ཡོད། ཟོང་ཡང་ཞིང་རིན་ལྕི་བ་ཡང་ཡོད། ཟོང་ལྕི་ཞིང་རིན་ཡང་བ་ཡང་ཡོད། ཟོང་ཡང་ཤིང་རིན་ཡང་བ་ཡང་ཡོད་དོ། །ཟོང་ལྕི་ཞིང་རིན་ལྕི་བ་གང་ཞེ་ན། འདི་ལྟ་སྟེ། ནོར་བུ་དག་དང ། མུ་ཏིག་དང ། བཻ་དཱུརྱ་དང ། མན་ཤེལ་དཀར་པོ་དང ། བྱུ་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་ཁྱིལ་ཏེ། དེ་ནི་ཟོང་ལྕི་ཞིང་རིན་ལྕི་བ་ཡིན་ནོ། །ཟོང་ཡང་ཞིང་རིན་ལྕི་བ་གང་ཞེ་ན། འདི་ལྟ་སྟེ། དར་དག་དང ། སྲིན་བལ་དང ། གུར་ཀུམ་དང ། སུམ་སྨེལ་ཏེ། དེ་ནི་ཟོང་ཡང་ཞིང་རིན་ལྕི་བ་ཡིན་ནོ། །ཟོང་ལྕི་ཞིང་རིན་ཡང་བ་གང་ཞེ་ན། འདི་ལྟ་སྟེ། ལྕགས་དང ། རྡོ་དང ། ཁྲོ་ཆུ་སྟེ། དེ་ནི་ཟོང་ལྕི་ཞིང་རིན་ཡང་བ་ཡིན་ནོ། །ཟོང་ཡང་ཞིང་རིན་ཡང་བ་གང་ཞེ་ན། འདི་ལྟ་སྟེ། བལ་དང ། ཤ་ན་དང ། རས་བལ་དང ། ན་མེ་རུ་སྟེ། དེ་ནི་ཟོང་ཡང་ཞིང་རིན་ཡང་བ་ཡིན་ནོ། །དེ་ལ་ཟོང་ལྕི་ཞིང་རིན་ལྕི་བ་གང་ཡིན་པ་དེ་དང་ཟོང་ཡང་ཞིང་རིན་ཡང་བ་གང་ཡིན་པ་དེ་གྲུ་གཅིག་ཏུ་བཅུག་པར་གྱུར་པ་ལས་དེ་དག་གི་གྲུ་དེ་རྒུད་པར་གྱུར་ཅིང་འབྱོར་པར་མ་གྱུར་ཏེ་ཟོང་འཕྱོ་བ་ན། ཤེས་ལྡན་དག་བྱིང་བ་གང་ཡིན་པ་དེ་ནི་ཁོ་བོ་ཅག་གི་ཡིན་ལ། འཕྱོ་བ་གང་ཡིན་པ་དེ་ནི་ཅི་བདེ་ཁོ་ནར་འབྱིན་ལ་རག་གོ་ཞེས་ཐོབ་རྒྱལ་དུ་སྒྲོགས་པར་བྱེད་པ་ན། དགེ་སློང་གིས་ཟོང་བྱིང་བའི་ཕྱིར་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད། འབྱུང་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས
5.70a
ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕྱིས་བཀུར་རོ་སྙམ་པས་རྫབ་ཏུ་འཛུད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ་བདག་གིར་ཡང་མ་གྱུར་ཅིག་སྙམ་པས་རྫབ་ཏུ་འཛུད་པར་བྱེད་ན་ཉེས་པ་སྦོམ་པོར་འགྱུར་རོ། །དེ་ལ་ཟོང་ཡང་ཞིང་རིན་ལྕི་བ་གང་ཡིན་པ་དེ་དང ། ཟོང་ལྕི་ཞིང་རིན་ཐང་ཡང་བ་གང་ཡིན་པ་དེ་གྲུ་གཅིག་ཏུ་བཅུག་པར་གྱུར་པ་ལས་དེ་དག་གི་གྲུ་དེ་རྒུད་པར་གྱུར་ཅིང་འབྱོར་པར་མ་གྱུར་ཏེ་ཟོང་བྱིང་བ་ན། ཤེས་ལྡན་དག་འཕྱོ་བ་གང་ཡིན་པ་དེ་ནི་ཁོ་བོ་ཅག་གི་ཡིན་ལ། བྱིང་བ་གང་ཡིན་པ་དེ་ནི་ཅི་བདེ་ཁོ་ནར་འབྱིན་ལ་རག་གོ་ཞེས་ཐོབ་རྒྱལ་དུ་སྒྲོགས་པར་བྱེད་པ་ན་དགེ་སློང་གིས་ཟོང་འཕྱོ་བའི་ཕྱིར་ཁྲི་ལས་ལྡང་བར་བྱེད། །ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད། འབྱུང་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕྱིས་བཀུར་རོ་སྙམ་པས་རྫབ་ཏུ་འདུད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་རྫབ་ཏུ
5.70b
འཛུད་པར་བྱེད་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁྱིམ་དག་གམ། ཆུའི་གནས་དག་ཏུ་རྫིང་བུ་སྣ་ཚོགས་དག་བྱས་ཤིང་རྫིང་བུ་དེ་དག་ཏུ་རྩེད་མོའི་བྱ་སྣ་ཚོགས་འདི་ལྟ་སྟེ། ངང་པ་དག་དང ། ཀ་རན་དྷཱ་བ་ཀ་དག་དང ། ངུར་པ་དག་བཞག་པར་གྱུར་ལ། དེ་དག་ཀྱང་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གིས་བརྒྱན་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད། བྱ་འཛིན་པར་བྱེད་ཅིང་ཇི་སྲིད་དུ་རྒྱན་ལ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གལ་ཏེ་དེ་འདི་སྙམ་དུ་བྱ་ལས་བརྐུ་བར་བྱའི་མི་ལས་མ་ཡིན་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན། དེ་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །རྫིང་བུ་དེ་དག་ཏུ་ཕྲེང་བ་རྒྱུ་ཆུ་ནས་སྐྱེ་བ་སྣ་ཚོགས་འདི་ལྟ་སྟེ། ཨུཏྤ་ལ་དང ། ཀུ་མུ་ད་དང ། པད་མ་དཀར་པོ་དང ། དྲི་མཆོག་དང ། དྲི་ངད་འཇམ་དང ། དུས་ཚིགས་ཐམས་ཅད་པ་དང ། དུས་ཐམས་ཅད་པ་སྐྱེ་བོ་ཐམས་ཅད་ལས་བསྐྱབས་པ་དག་བསྐྱེད་པ་ལ་དགེ་སློང་གིས་དེ་ལ
5.71a
སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད་ཅིང་ཇི་སྲིད་དུ་འཐོག་པར་མི་བྱེད། ཁུར་འདྲག་པར་མི་བྱེད། གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་འཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །རྫིང་བུ་དེ་དག་གི་འགྲམ་གཉིས་སུ་ཕྲེང་བ་རྒྱུ་སྐམ་ལས་སྐྱེ་བ་སྣ་ཚོགས་འདི་ལྟ་སྟེ། ཨ་ཏི་མུག་ཏ་ཀ་དང ། ཙམ་པ་ཀ་དང ། སྐྱ་སྣར་དང ། བར་ཤི་ཀ་དང ། མ་ལི་ཀ་དང ། ན་བ་མ་ལི་ཀ་དང ། ཡིད་དགའ་དང ། ཡུ་ཏི་ཀ་དང ། དྷཱ་ནུ་སྐ་རི་དང ། དུས་ཚིགས་ཐམས་ཅད་པ་དང ། དུས་ཐམས་ཅད་པ་སྐྱེ་བོ་ཐམས་ཅད་ལས་བསྐྱབས་པ་དག་བསྐྱེད་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང་ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད། ཉུག་པར་བྱེད། མེ་ཏོག་གི་ཤིང་ལ་འཛེག་པར་བྱེད། མེ་ཏོག་འཐོག་པར་བྱེད། ཐུ་བ་འགེངས་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མེ་ཏོག་འཐོག་པར་བྱེད་ཅིང་ཐུ་བ་བཀང་སྟེ་གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་རི་དགས་ཀྱི་རྔོན་པ་འམ་རི་དགས་ཀྱི་རྔོན་པའི་སློབ་མ་མཁས་པས་དགོན་པ་ནགས་མཆོག་ཏུ་འདི་ལྟ་སྟེ། རི་དགས་མང་པོ་དྲུངས་དབྱུང་བའི་ཕྱིར་དང ། ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་བཙུགས་པ་ལ་དགེ་སློང་གིས་རྐུ་སེམས་ཀྱིས་རྔོན་སྤྱད་རྐུ
5.71b
བར་བྱེད་ན་རྔོན་སྤྱད་ཀྱི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕན་པ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་སྲེག་པར་བྱེད་དམ། གཅོག་པར་བྱེད་དམ། འཆེག་པར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་གྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་སྲེག་པར་བྱེད་དམ། གཅོག་པར་བྱེད་དམ། འཆེག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་རྔོན་སྤྱད་ལ་ཐོགས་པའི་རི་དགས་རྐུ་བར་བྱེད་ན། རི་དགས་ཀྱི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་གཏོང་བར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་གྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་གཏོང་བར་བྱེད་ན་ཉེས་བྱས་སུ་འགྱུར་རོ། །འདི་ལྟར་ཉ་པ་འམ། ཉ་པའི་སློབ་མ་མཁས་པས་ཆུ་ཀླུང་གི་ཁར་རམ། ཡུར་པོ་ཆེའི་ཁར་འདི་ལྟ་སྟེ། ཉ་མང་པོ་དག་དྲུངས་དབྱུང་བའི་ཕྱིར་དང ། ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་ཉ་སྡང་བཙུགས་པ་ལ་དགེ་སློང་གིས་རྐུ་སེམས་ཀྱིས་ཉ་སྡང་རྐུ་བར་བྱེད་ན་ཉ་སྡང་གིས་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕན་པ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་སྲེག་པར་བྱེད་དམ། གཅོག་པར་བྱེད་དམ། འཆེག་པར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི
5.72a
བསམ་པས་འདིས་སེམས་ཅན་འདི་དག་སྲོག་དང་བྲལ་བར་གྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་སྲེག་པར་བྱེད་དམ། གཅོག་པར་བྱེད་དམ། འཆེག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཉ་སྡང་ལ་ཐོགས་པའི་ཉ་རྐུ་བར་བྱེད་ན་ཉའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་གཏོང་བར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་འགྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་གཏོང་བར་བྱེད་ན་ཉེས་བྱས་སུ་འགྱུར་རོ། ་་་་་་་་་།སྡོམ་ལ། སྐམ་སར་མི་ཡི་ཆུ་དང་ནི། །དེ་བཞིན་དུད་འགྲོའི་ཆུ་དང་ཡང ། །རྒྱ་མཚོར་མི་ཡི་ཆུ་དག་དང ། །དུད་འགྲོའི་ཆུ་ཡང་དེ་བཞིན་ནོ། །འདི་ལྟར་ཚོང་པ་རབ་ཏུ་མང་པོ་དག་ཟོང་ཁྱེར་ཏེ་དགོན་པའི་ལམ་དུ་ཞུགས་པ་ན་དེ་ན་ཆུ་དཀོན་ཞིང་རིན་ཆེ་བར་གྱུར་པའི་ཚེ་དེ་དག་གིས་དེར་སྣོད་སྣ་ཚོགས་འདི་ལྟ་སྟེ། རྫ་མ་དག་དང ། ཕྲུ་བ་དག་དང ། རིལ་བ་དག་དང ། ར་རྐྱལ་དག་གིས་ཆུའི་ཚོགས་བྱས་ཤིང་དེ་ན་ཆུའི་ཚད་མི་ལ་ནི་འདི་ཙམ་ཞིག་གོ། །དུད་འགྲོ་ལ་ནི་འདི་ཙམ་ཞིག་གོ་ཞེས་སྦྱིན་པར་བྱེད་པ་ན། དགེ་སློང་གིས་རྐུ་སེམས་ཀྱིས་མིའི་སྐལ་བའི་ཆུ་བདག་གིར་བྱེད་ན། དེའི་གནས་སྐབས་སུ་མིའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དུད་འགྲོའི་སྐལ་བའི་ཆུ་བདག་གིར་བྱེད་ན། དེའི་གནས་སྐབས་སུ་དུད་འགྲོའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས
5.72b
སུ་འགྱུར་རོ། །འདི་ལྟར་འཛམ་བུའི་གླིང་པའི་ཚོང་པ་རབ་ཏུ་མང་པོ་ནོར་སྒྲུབ་པ་དག་རྒྱ་མཚོའི་གྲུར་ཞུགས་ཏེ་རྒྱ་མཚོ་ཆེན་པོར་འཇུག་པ་ན་རྒྱ་མཚོ་ཆེན་པོ་ལན་ཚཝའི་རོ་འབའ་ཤིག་ཡིན་པས་དེ་དག་གིས་དེར་སྣོད་སྣ་ཚོགས་འདི་ལྟ་སྟེ། རྫ་མ་དག་དང ། ཕྲུ་བ་དག་དང ། རིལ་བ་དག་དང ། ར་རྐྱལ་དག་གིས་ཆུའི་ཚོགས་བྱས་ཤིང་དེ་ན་ཆུའི་ཚད་མི་ལ་ནི་འདི་ཙམ་ཞིག་གོ། །དུད་འགྲོ་ལ་ནི་འདི་ཙམ་ཞིག་གོ་ཞེས་སྦྱིན་པར་བྱེད་པ་ན། དགེ་སློང་གིས་རྐུ་སེམས་ཀྱིས་མིའི་སྐལ་བའི་ཆུ་བདག་གིར་བྱེད་ན། དེའི་གནས་སྐབས་སུ་མིའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དུད་འགྲོའི་སྐལ་བའི་ཆུ་བདག་གིར་བྱེད་ན། དེའི་གནས་སྐབས་སུ་དུད་འགྲོའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། ་་་་་་་་།སྡོམ་ལ། རྐུ་བ་གོམ་པ་སྲི་བ་དང ། །དེ་བཞིན་གོམ་པ་སྐྱེད་པ་དང ། །གནས་ནས་ཁྱམས་སུ་འགྲོ་ལ་སོགས། །སྡེ་ཚན་ཡང་དག་བསྡུས་པ་ཡིན། །འདི་ལྟར་མཁན་པོ་དང ། སློབ་དཔོན་ལམ་གྱི་བགྲོད་པར་ཞུགས་པ་དེ་དག་གིས་ལྷན་ཅིག་གནས་པ་དང་ཉེ་གནས་དག་གི་ལག་ཏུ་ཆོས་གོས་དག་གཏད་པ་ན། དེ་ལ་དེ་དག་རྐུ་སེམས་ཉེ་བར་གནས་པར་གྱུར་ཅིང་དེ་དག་གོམ་པ་སྲི་བས་འགྲོ་ཞིང་སྤྱང་འབྲེང་དུ་འགྲོ་ན་ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གོམ་པ་བསྐྱེད་དེ་མདུན་དུ་འགྲོ་ན་ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ
5.73a
པོར་འགྱུར་རོ། །འདི་ལྟར་དགེ་སློང་ལྷན་ཅིག་གནས་པ་དང ། ཉེ་གནས་དག་གིས་རྐུ་སེམས་ཀྱིས་མཁན་པོ་དང ། སློབ་དཔོན་དག་གི་ཆོས་གོས་དག་རྐུ་བར་བྱེད་ཅིང་དེ་དག་གིས་དེ་དག་ཁྱེར་ཏེ་གནས་ཁང་ནས་ཁྱམས་སུ་དང ། ཁྱམས་ནས་གནས་ཁང་དུ་འཇུག་པ་དང ། གནས་ཁང་ནས་ཡང་ཁྱམས་སུ་འབྱུང་བ་དང ། སྟེང་གི་གཞིར་འཛེག་པ་དང ། དེ་ནས་ཡང་འབབས་ཤིང་འོག་གི་གཞིར་འབབ་པ་དང ། སྒོ་ཁང་དུ་འཇུག་པ་དང ། སྒོ་ཁང་ནས་ཕྱི་རོལ་གྱི་བང་རིམ་དུ་འབྱུང་བ་དང ། ཕྱི་རོལ་གྱི་བང་རིམ་ནས་ལྕོང་དུ་འབབ་པ་དང ། ལྕོང་ནས་ཐང་ལ་འཛེག་པ་དང ། ཐང་ནས་ཡང་ལྕོང་དུ་འབབ་པ་དང ། ལྕོང་ནས་ཐིབ་པོར་འཇུག་པ་དང ། ཐིབས་པོ་ནས་བླ་གབ་མེད་པར་འབྱུང་བར་བྱེད་ན་ཐམས་ཅད་དུ་ཡང་ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་རྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། ་་་་་་་་་།སྡོམ་ལ། རྐུན་ཤས་ནོད་པར་བྱེད་པ་དང ། །འགྱོད་པར་གྱུར་ཅིང་ཟློག་བྱེད་དང ། །ཁྱིམ་དུ་སྦྲོན་པར་བྱེད་པ་ཡི། །སྡེ་ཚན་ཡང་དག་བསྡུས་པ་ཡིན། །འདི་ལྟར་དགེ་སློང་དགོན་པ་ན་གནས་པ་དེ་ལ་ཆོམ་རྐུན་པ་གྲོང་འཇོམ་པ་དག་འོངས་ཏེ་སྨྲས་པ། འཕགས་པ་གྲོང་ཆེ་གེ་མོ་ཞིག་ཤེས་སམ། ཤེས་སོ། །འཕགས་པ་འོ་ན་གྲོང་དེར་བུད་མེད་མང་བ་དང ། སྐྱེས་པ་ཉུང་བ་དང ། ལ་གཅན་པ་དང ། ཐག་རིང་བ་དང ། ཁྱི་ཟ་བ་མེད་པ་དང ། འཇུག་སླ་བ་དང ། འབྱུང་སླ་བ་དང ། བདག་ཅག་གིས་དེར་མི་སྨས་མི་ཉམས་པར་ལས་བྱ་བར་ནུས་སམ། བདེ་ལེགས་སུ་ཕྱིར་འོངས་ན་འཕགས་པ་ལ་ཡང་སྐལ་བ་སྦྱིན་ནོ་ཞེས་ཟེར་བ་ལ། གལ་ཏེ་དགེ་སློང་གིས་འདི་སྐད་ཅེས་ཤེས་ལྡན་དག་གྲོང་དེ་ཏེ་པོར་བུད་མེད་མང་བ་དང ། སྐྱེས་པ་ཉུང་བ་དང ། ལ་གཅན་པ་དང ། ཐག་རིང་བ་དང ། ཁྱི་ཟ
5.73b
བ་མེད་པ་དང ། འཇུག་སླ་བ་དང ། འབྱུང་སླ་བ་དང ། ཁྱེད་ཅག་གིས་དེར་མི་སྨས་མི་ཉམས་པར་ལས་བྱ་བར་ནུས་སོ་ཞེས་སྨྲས་ཏེ། ཆོམ་རྐུན་པ་དག་གིས་དེར་ལས་བྱས་ཤིང་བདེ་ལེགས་སུ་ཕྱིར་འོངས་ནས་དགེ་སློང་ལ་རྐུན་ཤས་འབུལ་བར་བྱེད་ཅིང་དགེ་སློང་གིས་རྐུན་ཤས་བདག་གིས་བྱེད་ན། རྐུན་ཤས་ཀྱི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ཆོམ་རྐུན་པ་དེ་དག་གི་གན་དུ་སོང་སྟེ་འདི་སྐད་ཅེས་ཤེས་ལྡན་དག་ཤེས་པར་གྱིས་ཤིག་།འདི་ལྟ་སྟེ། བྱིས་པ། བླུན་པ། མི་གསལ་བ། མི་མཁས་པ་བདག་གིས་ཏེ་པོར་གྱ་ཙོམ་དང་བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། གྲོང་དེ་ནི་ཏེ་པོར་བུད་མེད་ཉུང་བ་དང ། སྐྱེས་པ་མང་བ་དང ། ལ་གཅན་པ་དང་ཐག་ཉེ་བ་དང ། ཁྱི་ཟ་བ་དང ། འཇུག་དཀའ་བ་དང ། འབྱུང་དཀའ་བ་དང ། ཁྱེད་ཅག་གིས་དེར་མི་སྨས་མི་ཉམས་པར་ལས་བྱ་བར་མི་ནུས་སོ་ཞེས་སྨྲས་ན། ཆོམ་རྐུན་པ་དག་གིས་དེར་ལས་བྱས་ཀྱང་རུང་མ་བྱས་ཀྱང་རུང་སྟེ། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེས་ཆོམ་རྐུན་པ་དེ་དག་བཙལ་བ་ན་མ་མཐོང་ནས་ཁྱིམ་དེར་དོང་སྟེ་འདི་སྐད་ཅེས་ཤེས་ལྡན་དག་བྱ་ར་གྱིས་ཤིག་།ཤེས་ལྡན་དག་བག་གྱིས་ཤིག་།དེང་འདིར་ཆོམ་རྐུན་པ་གྲོང་འཇོམས་པ་དག་འོང་བར་འགྱུར་གྱིས། དེ་དག་གིས་ཁྱེད་ཀྱི་རྫས་ཕྲོགས་པར་གྱུར་ཏམ། ཐམས་ཅད་དང་ཐམས་ཅད་དུ་སྲོག་དང་ཕྲལ་བར་གྱུར་ན་མི་རུང་ངོ་ཞེས་སྨྲས་ན་ཆོམ་རྐུན་པ་དག་གིས་དེར་ལས་བྱས་ཀྱང་རུང་མ་བྱས་ཀྱང་རུང་སྟེ། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། ་་་་་་་།སྡོམ་ལ། ཞིང་གི་ས་གཞི་འོག་གཟུར་དང ། །བླ་ཡི་གྲཝ་ཡང་དེ་བཞིན་ཏེ། །ཁྱིམ་གྱི་གཞི་ལའང་རྣམ་གཉིས་དང ། །ཟོང་གི་གཞི་ཡང་རྣམ་གཉིས་ཡིན། །ས་གཞི་ནི
5.74a
གསུམ་སྟེ། ཞིང་གི་ས་གཞི་དང ། ཁྱིམ་གྱི་ས་གཞི་དང ། ཟོང་གི་ས་གཞིའོ། །ཞིང་གི་ས་གཞི་ནི་རྣམ་པ་གཉིས་ཀྱིས་བརྐུས་པ་ཡིན་ཏེ། ཤགས་ཀྱིས་དང ། ཡོངས་སུ་བསྐོར་བས་སོ། །ཇི་ལྟར་ཤགས་ཀྱིས་ཤེ་ན། དགེ་སློང་གིས་ཞིང་གི་ས་གཞིའི་ཕྱིར་ཁྱིམ་པ་དང་ལྷན་ཅིག་འོག་གཟུར་ཤགས་འགྱེད་པར་བྱེད་ན་གལ་ཏེ་དགེ་སློང་ཁྱིམ་པས་ཕམ་པར་བྱས་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་ཁྱིམ་པ་ཕམ་པར་བྱས་ན་ཇི་སྲིད་དུ་ཁྱིམ་པས་སྦྱོར་བ་མ་བཏང་བ་དེ་སྲིད་དུ་དགེ་སློང་ལ་ཉེས་པ་སྦོམ་པོར་འགྱུར་རོ། །ཁྱིམ་པས་སྦྱོར་བ་གཏང་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་ཁྱིམ་པ་དང་ལྷན་ཅིག་བླའི་གྲཝར་ཤགས་འགྱེད་པར་བྱེད་ན། གལ་ཏེ་དགེ་སློང་ཁྱིམ་པས་ཕམ་པར་བྱས་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་ཁྱིམ་པ་ཕམ་པར་བྱས་ན་དགེ་སློང་དག་རྒྱལ་པོ་ནི་རྩོད་པ་ཐམས་ཅད་ཀྱི་དཔོན་པོ་ཡིན་པས་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །དེ་ལྟར་ཤགས་ཀྱིས་སོ། །ཇི་ལྟར་ཡོངས་སུ་བསྐོར་བར་ཤེ་ན། འདི་ལྟར་དགེ་སློང་གིས་ཞིང་གི་ས་གཞི་རྩིག་པ་དག་གམ། ཡལ་ག་དག་གམ། སེག་དག་གམ། རེ་ལྡེ་དག་གམ། འོབས་དག་གམ། ཚེར་མ་དག་གིས་ཡོངས་སུ་སྐོར་བར་བྱེད་ན་ཇི་སྲིད་དུ་མཚམས་གྱི་སྣ་དང ། འཚམས་ཀྱི་སྣར་མ་ཕྲད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མཚམས་ཀྱི་སྣ་དང་མཚམས་ཀྱི་སྣར་ཕྲད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །ཞིང་གི་ས་གཞི་ལ་ཇི་ལྟ་བ་བཞིན་དུ་ཁྱིམ་གྱི་ས་གཞི་དང ། ཟོང་གི་ས་གཞི་ལ་ཡང་དེ་བཞིན་ནོ། ་་་་་་་་།སྡོམ་ལ། འཆོལ་དང་ལེན་དང་སྲུངས་མ་དང ། །བླག་ཅོར་པ་མ་མདུན་བྱུང་སློང ། །ཡུག་ཅེན་རྒན
5.74b
གཞོན་རུང་བྱ་དང ། །དྲི་བྱ་སྒེའུ་ཆུང་སྦོད་པའོ། །གང་གི་ཚེ་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་ཐུགས་སུ་ཆུད་ཅིང་བསྟན་པ་རྒྱས་པར་མ་གྱུར་པ་དེའི་ཚེ་ན་དགེ་སློང་དག་སྤ་དགོང་སླ་ཞིང་ཁྱིམ་བདག་སྤ་དཀོང་དཀའ་བའི་ཚེ་ཇི་ཙམ་ན་དགེ་སློང་རབ་ཏུ་མང་པོ་དག་ཚོང་པ་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། དེ་དག་གིས་ཚོང་པ་རྣམས་ལ་སྨྲས་པ། བཞིན་བཟངས་དག་ཁོ་བོ་ཅག་ལ་ཤོ་གམ་གཞལ་དགོས་པའི་རྫས་ཅུང་ཞིག་ཡོད་པ་དེ་ཤོ་གམ་པ་དག་གིས་ཤོ་གམ་འཇལ་དུ་འཇུག་པར་མི་འགྱུར་བར་རེ་ཤིག་ཤོ་གམ་གྱི་གནས་ནས་ཟློས་ལ་ཕྱིར་བྱིན་ཅིག་།ཚོང་པ་དག་གིས་སྨྲས་པ། འཕགས་པ་དག་བཀའ་བཞིན་འཚལ། བཟླ་བར་བགྱིའོ། །ཚོང་པ་དེ་དག་གིས་དགེ་སློང་དེ་དག་གི་ཤོ་གམ་གཞལ་དགོས་པའི་རྫས་དེ་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དག་མཐར་གྱིས་རྒྱུ་ཞིང་འདོང་བ་ན་གཙུག་ལག་ཁང་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོང་པ་ལེགས་སོ། །འོང་པ་ལེགས་སོ། །ཇི་ལྟར་བདེ་བར་བརྒྱུས་སམ། ཁྱེད་ཅག་ཤོ་གམ་པ་དག་དང ། ལ་གཅན་པ་དག་དང ། གྲུ་བཙེས་གཅོད་པ་དག་གིས་ཡོངས་སུ་གཙེས་པར་མ་གྱུར་ཏམ། དེ་དག་གིས་སྨྲས་པ། ཚེ་དང་ལྡན་པ་དག་བདེ་བར་བརྒྱུས་ཏེ། སུས་ཀྱང་ཡོངས་སུ་གཙེས་པར་མ་གྱུར་ཏོ། །ཅི་ཁྱེད་ཅག་ལ་ཤོ་གམ་གཞལ་དགོས་པའི་རྫས་མེད་དམ། དེ་དག་གིས་སྨྲས་པ། བདག་ཅག་ལ་ཤོ་གམ་གཞལ་དགོས་པའི་རྫས་ཡོད་མོད་ཀྱི་འོན་ཀྱང་ཚོང་པ་བཤེས་པ་དག་གིས་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དེ་དག་གིས་སྨྲས་པ། ཁྱེད་ཅག་གིས་སར་ཕྱིན་པའི་ཤོ་གམ་བཟླར་རུང་ངམ། དེ་དག་གིས་སྨྲས་པ། རུང་ཡང་སྲིད་མི་རུང་ཡང་སྲིད་དེ། འདི་ལྟར་བདག་ཅག་གིས་ནི་བཟླས་སོ། །དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་སྐབས་དེ་དགེ་སློང
5.75a
རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། ཡང་དགེ་སློང་གིས་སར་ཕྱིན་པའི་ཤོ་གམ་བཟླར་གཞུག་པར་མི་བྱའོ། །དགེ་སློང་གིས་སར་ཕྱིན་པའི་ཤོ་གམ་བཟླར་འཛུད་པར་བྱེད་ན་འགལ་ཚབས་ཅན་དུ་འགྱུར་རོ། །གང་གིས་ཚེ་བཅོམ་ལྡན་འདས་ཀྱི་ཤ་པའི་ཚལ་གསེབ་ཏུ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང ། མ་ག་དྷར་བྱུང་བའི་བྲམ་ཟེ་དང་ཁྱིམ་བདག་འབུམ་ཕྲག་དུ་མ་དག་དང་ལྷན་ཅིག་བདེན་པ་དག་ལ་བཀོད་ནས་མཉན་ཡོད་དུ་གཤེགས་ཏེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་ནས་དེ་གཉིས་ཀྱིས་དགེ་སློང་རྣམས་ལ་གཞོན་ནུའི་ཡོངས་སུ་སྤང་བ་བྱིན་ཞིང་དགེ་སློང་མ་རྣམས་ལ་བཙུན་མའི་འཁོར་གྱི་ཡོངས་སུ་སྤང་བ་བྱིན་ཏེ། དགེ་སློང་རྣམས་ཤོ་གམ་མེད་པ་དང ། ལ་གཅན་མེད་པ་དང ། གྲུ་བཙས་མེད་པར་བཏང་བ་དེའི་ཚེ་ན་བཅོམ་ལྡན་འདས་ཀྱི་བསྟན་པ་རྒྱས་པར་གྱུར་ཏེ། ཁྱིམ་པ་དག་སྤ་དགོང་སླ་ཞིང་དགེ་སློང་དག་སྤ་དགོང་དཀའ་བའི་ཚེ་ཇི་ཙམ་དུས་གཞན་ཞིག་ན་དགེ་སློང་རབ་ཏུ་མང་པོ་དག་ཚོང་པ་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། ཚོང་པ་དེ་དག་གིས་དགེ་སློང་རྣམས་ཀྱི་རྐང་པ་གཉིས་ལ་གཏུགས་ཏེ་སྨྲས་པ། འཕགས་པ་དག་བདག་ཅག་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུངས་བཞིན་པ་དང ། བཀྲེས་པ་དང ། སྐོམ་པ་དག་གིས་གནོད་བཞིན་པ་དང ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱིས་རེག་པ་དག་གིས་ཉེན་བཞིན་དུ་ལོངས་སྤྱོད་དག་མངོན་པར་བསྒྲུབ་པའི་སླད་དུ་སྤྲོ་བར་བགྱིད། འབད་པར་བགྱིད། རྩོལ་བར་བགྱིད་པ་གང་ལགས་པ་དེ་དག་ཐམས་ཅད་སངས་རྒྱས་དང ། ཆོས་དང ། དགེ་འདུན་ལ་མཆོད་པ་དག་བགྱིའོ་སྙམ་པ་ལགས་པས་དེའི་སླད་དུ་བདག་ཅག་ལ་ཤོ་གམ་གཞལ་འཚལ་བའི་རྫས་མཆིས་པ་ཤོ་གམ་གྱི་གནས་ནས་བཟླས་ཏེ་སྩལ་བར་རིགས་སོ། །དགེ་སློང་དེ་དག་གིས་སྨྲས་པ། བཞིན་བཟངས་དག་འཇལ་གྱིས་བཟླ་བར་བྱའོ། །དགེ་སློང་དེ
5.75b
དག་གིས་ཚོང་པ་དེ་དག་གི་ཤོ་གམ་གཞལ་དགོས་པའི་རྫས་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དག་མཐར་གྱིས་རྒྱུ་ཞིང་འདོང་བ་ན་མཉན་ཡོད་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཁྱེད་ཅག་ཤོ་གམ་པ་དག་དང ། ལ་གཅན་པ་དག་དང ། གྲུ་བཙས་གཅོད་པ་དག་གིས་ཡོངས་སུ་གཙེས་པར་མ་གྱུར་ཏམ། དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་རེ་ཤིག་གཞན་དག་ཀྱང་དགའ་བར་བྱས་ན་བདག་ཅག་ལྟ་ཅི་སྨོས་ཏེ་སུས་ཀྱང་ཡོངས་སུ་གཙེས་པར་མ་གྱུར་ཏོ། །དགེ་སློང་དེ་དག་གིས་སྨྲས་པ། ཇི་ལྟར་གྱུར། དེ་དག་གིས་སྐབས་དེ་དགེ་སློང་དེ་དག་ལ་རྒྱས་པར་བརྗོད་དོ། །དགེ་སློང་དེ་དག་གིས་སྨྲས་པ། ཁྱེད་ཅག་གིས་སར་ཕྱིན་པའི་ཤོ་གམ་བཟླར་རུང་ངམ། དེ་དག་གིས་སྨྲས་པ། རུང་ཡང་སྲིད་མི་རུང་ཡང་སྲིད་དེ། འདི་ལྟར་བདག་ཅག་གིས་ནི་བཟླས་སོ། །དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ། སྙམ་དུ་འགྱོད་པ་སྐྱེས་ནས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི་ཡང་དགེ་སློང་གིས་སར་ཕྱིན་པའི་ཤོ་གམ་བཟླ་བར་མི་བྱའོ། །དགེ་སློང་གིས་སར་ཕྱིན་པའི་ཤོ་གམ་ཟློ་བར་བྱེད་ན་འགལ་ཚབས་ཅན་དུ་འགྱུར་རོ་ཞེས་དེ་ལྟར་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ། །ཇི་ཙམ་དུས་གཞན་ཞིག་ན་དགེ་སློང་རབ་ཏུ་མང་པོ་དག་ཚོང་པ་དོན་མཐུན་དང་ལྷན་ཅིག་ལྗོངས་རྒྱུར་འདོང་བ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང་ཚོང་པ་དེ་དག་གིས་དགེ་སློང་རྣམས་ཀྱི་རྐང་པ་གཉིས་ལ་གཏུགས་ཏེ་སྨྲས་པ། འཕགས་པ་དག་བདག་ཅག་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུངས་བཞིན་པ་དང ། བཀྲེས་པ་དང་སྐོམ་པ་དག་གིས་གནོད་བཞིན་པ་དང ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱི་རེག་པ་དག་གིས
5.76a
ཉེན་བཞིན་དུ་ལོངས་སྤྱོད་དག་མངོན་པར་བསྒྲུབ་པའི་སླད་དུ་སྤྲོ་བར་བགྱིད། འབད་པར་བགྱིད། རྩོལ་བར་བགྱིད་པ་གང་ལགས་པ་དེ་དག་ཐམས་ཅད་སངས་རྒྱས་དང ། ཆོས་དང ། དགེ་འདུན་ལ་མཆོད་པ་དག་བགྱིའོ་སྙམ་པ་ལགས་པས། དེའི་སླད་དུ་བདག་ཅག་ལ་ཤོ་གམ་གཞལ་འཚལ་བའི་རྫས་མཆིས་པ་ཤོ་གམ་གྱི་གནས་ནས་བཟླས་ཏེ་སྩལ་བར་རིགས་སོ། །དགེ་སློང་དེ་དག་གིས་སྨྲས་པ། བཞིན་བཟངས་དག་བཅོམ་ལྡན་འདས་ཀྱིས་ཡང་དགེ་སློང་གིས་སར་ཕྱིན་པའི་ཤོ་གམ་བཟླ་བར་མི་བྱའོ་ཞེས་བསླབ་པའི་གཞི་བཅའ་བ་མཛད་པས་བདག་ཅག་གིས་བཟླ་བར་མི་བྱའོ། །ཚོང་པ་རྣམས་ཀྱིས་འཕགས་པ་འདི་དག་ནི་མི་མཐུན་པར་བྱེད་པ་ཡིན་པས་བཟླ་བར་མི་བྱེད་ཀྱིས་ཐབས་ཀྱི་རྣམ་པ་བྱའོ་སྙམ་དུ་ཤེས་ཤིང་རིག་ནས་དེ་དག་གིས་ཕན་ཚུན་གྲོས་བྱས་ཏེ་སྨྲས་པ། འཕགས་པ་དག་དེང་བདག་ཅག་བྲེལ་བས་ཁྱེད་ཅག་ལ་བསོད་སྙོམས་དབུལ་བའི་རྔོ་མི་ཐོགས་གིས་བཞུད་ལ་གྲོང་དུ་བསོད་སྙོམས་ལ་འཇུག་པར་མཛོད་ཅིག་།དགེ་སློང་དེ་དག་གྲོང་དུ་བསོད་སྙོམས་ལ་ཞུགས་པ་དང་ཚོང་པ་དེ་དག་གིས་དགེ་སློང་བསོད་སྙོམས་ལ་ཞུགས་པ་དེ་དག་གི་གཏུར་བུ་དག་དང ། ལྷུང་བཟེད་ཀྱི་སྣོད་དག་དང ། བར་བུར་སྣོད་དག་ཏུ་ཤོ་གམ་གཞལ་དགོས་པའི་རྫས་བཅུག་གོ། །དགེ་སློང་དག་བསོད་སྙོམས་བརྒྱུས་ནས་གྲོང་ནས་ཕྱིར་བྱུང་སྟེ། དེ་དག་ཟས་ཀྱི་བྱ་བ་བྱས་ནས་གང་གི་ཚེ་ཤོ་གམ་གྱི་གནས་ནས་འདས་པ་དེའི་ཚེ་ཚོང་པ་དེ་དག་གིས་དགེ་སློང་དེ་དག་གི་སྣོད་ལ་ནོམ་པར་བརྩམས་པ་དང་དགེ་སློང་རྣམས་ཀྱིས་སྨྲས་པ། བཞིན་བཟངས་དག་ཅིའི་ཕྱིར་ཁོ་བོ་ཅག་གི་སྣོད་དག་ལ་ནོམ་པར་བྱེད། ཚོང་པ་དག་གིས་སྨྲས་པ། འཕགས་པ་དག་བདག་ཅག་གིས་འདིར་ཤོ་གམ་གཞལ་འཚལ་བའི་རྫས་བཅུག་པ་དེ་འབྱིན་ཏོ། །དགེ་སློང་དག་གིས་སྨྲས་པ། བཞིན་བཟངས་དག་ཁྱེད་ཀྱིས་ཆེད་དུ་བསམས་ཏེ་ཁོ་བོ་ཅག་ལྟུང་བ་དང་བཅས་པར་བྱས་མོད། ཚོང་པ་དག་གིས་སྨྲས་པ། འཕགས
5.76b
པ་དག་འདི་ལ་ཁྱེད་ཀྱི་ལུས་ཀྱིས་ལས་ཀྱང་མ་མཆིས། ངག་གི་ལས་ཀྱང་མ་མཆིས་ན་ཇི་ལྟར་ཁྱེད་ཅག་ལྟུང་བ་དང་བཅས་པ་ལགས། དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེ་དག་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། ཁྱེད་ཅག་ཤོ་གམ་པ་དག་དང ། ལ་གཅན་པ་དག་དང ། གྲུ་བཙས་གཅོད་པ་དག་གིས་ཡོངས་སུ་གཙེས་པར་མ་གྱུར་ཏམ། དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་དེ་དག་གིས་ཡོངས་སུ་གཙེས་པར་མ་གྱུར་མོད་ཀྱི་འོན་ཀྱང་བདག་ཅག་བསོད་སྙོམས་ལ་ཞུགས་པ་དག་གི་གཏུར་བུ་དག་དང ། ཆོས་གོས་ཀྱི་སྣོད་དག་དང ། བར་བུར་སྣོད་དག་ཏུ་ཚོང་པ་དག་གིས་ཤོ་གམ་གཞལ་དགོས་པའི་རྫས་བཅུག་པ་དེ་བདག་ཅག་གིས་མ་ཤེས་ནས་ཤོ་གམ་གྱི་གནས་ནས་བཟླས་པས་དེའི་ཕྱིར་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་སོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། ཡང་དགེ་སློང་གིས་སྣོད་དག་ཡལ་བར་བོར་ཏེ་འགྲོ་བར་མི་བྱ་བར་འདི་ལྟར་སྲུངས་མ་དགེ་སློང་གཞག་པར་བྱའོ། །དེ་དག་གིས་དགེ་སློང་བཞག་སྟེ་བསོད་སྙོམས་ལ་ཞུགས་པ་ན་དགེ་སློང་དེ་གང་གི་ཚེ་བཤང་བ་འམ། གཅི་བ་འམ། ཆུ་འཚག་ཏུ་འགྲོ་བ་དེའི་ཚེ་ཚོང་པ་དེ་དག་གིས་དེ་ཁོ་ན་བཞིན་དུ་ཤོ་གམ་གཞལ་དགོས་པའི་རྫས་དག་གཏུར་བུ་དག་དང ། ལྷུང་བཟེད་ཀྱི་སྣོད་དག་དང ། བར་བུར་སྣོད་དག་ཏུ་འཛུད་པར་བྱེད་ཅིང་དེ་ཁོ་ན་བཞིན་དུ་ཤོ་གམ་གྱི་གནས་ནས་འདས་པ་དེའི་ཚེ་ཚོང་པ་དག་དགེ་སློང་དེ་དག་གི་སྣོད་དག་ལ་ནོམ་པར་བྱེད་ནས་དགེ་སློང་དག་འགྱོད་པར་གྱུར་པ་ན་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས
5.77a
བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི་འོན་ཀྱང་སྲུངས་མ་དགེ་སློང་གཉིས་གཞག་པར་བྱའོ། །དགེ་སློང་རབ་ཏུ་མང་པོ་དག་ཚོང་པ་དོན་འཐུན་དང་ལྷན་ཅིག་འདོང་བ་ན་སྲུངས་མ་དགེ་སློང་གཉིས་བཞག་སྟེ་བསོད་སྙོམས་ལ་ཞུགས་པ་དང ། དེ་གཉིས་ལས་གཅིག་ཇི་སྲིད་དུ་བཤང་བ་དང ། གཅི་བ་འམ། ཆུ་འཚག་ཏུ་སོང་བ་དེ་སྲིད་དུ་ཚོང་པ་དེ་དག་གིས་གཅིག་ཤོས་དེའི་ལག་པ་ལ་འཇུ་བར་བྱེད། རྐང་པ་ལ་འཇུ་བར་བྱེད་ཅིང ། གཞན་གྱིས་སྣོད་དག་ཏུ་འཇུད་པར་བྱེད་དོ། །དགེ་སློང་དེས་ཚངས་པ་མཚུངས་པར་སྤྱོད་པ་ལྷགས་པ་རྣམས་ལ་བཟླ་བར་བྱའོ་སྙམ་དུ་ཤེས་ནས་དགེ་སློང་དེ་དག་ཀྱང་སྤྱོད་ཡུལ་ནས་ལྷགས་པ་དང ། ཚོང་པ་རྣམས་ཀྱིས་ཇི་ནས་ཀྱང་དགེ་སློང་དེ་གཉིས་ཀྱིས་དགེ་སློང་དེ་དག་ལ་བརྗོད་མི་ནུས་པར་འགྱུར་བ་དེ་ལྟ་བུའི་བླག་ཅོར་དག་བྱས་སོ། །དེ་དག་གང་གི་ཚེ་ཤོ་གམ་གྱི་གནས་ནས་འདས་པ་དེའི་ཚེ་སྣོད་དག་ལ་ནོམ་པར་བྱེད་ནས་དགེ་སློང་རྣམས་ཀྱིས་དེ་དག་ལ་སྨྲས་པ། བཞིན་བཟངས་དག་ཅིའི་ཕྱིར་སྣོད་དག་ལ་ནོམ་པར་བྱེད། དེ་དག་གིས་སྨྲས་པ། འཕགས་པ་དག་འདིར་བདག་ཅག་གི་ཤོ་གམ་གཞལ་འཚལ་བའི་རྫས་བཅུག་པ་འབྱིན་ཏོ། །དགེ་སློང་རྣམས་ཀྱིས་སྲུངས་མའི་དགེ་སློང་དེ་གཉིས་ལ་ཁྱེད་གཉིས་འདིར་བཞག་པ་དག་གིས་ཁོ་བོ་ཅག་ལྟུང་བ་དང་བཅས་པར་བྱས་སོ། །ཞེས་གྱོད་སྨྲས་པ་དང ། དེ་གཉིས་ཀྱིས་བྱུང་བའི་མཐའ་ཇི་ལྟ་བ་བཞིན་དུ་བརྗོད་དོ། །དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེ་དག་གིས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། ཤོ་གམ་གཞལ་དགོས་པའི་རྫས་དེ་ཁྱིམ་པ་འམ། དགེ་ཚུལ་གྱིས་ཕྱུང་སྟེ་ཚོང
5.77b
པ་དེ་དག་ལ་ཕྱིར་གཏད་པར་བྱའོ། །ཁྱིམ་པའམ། དགེ་ཚུལ་མེད་ན་རང་ཉིད་ཀྱིས་ཕྱུང་སྟེ་མདུན་དུ་གཞག་པར་བྱ་ཞིང་ཁྱེད་ཀྱི་རྫས་འདི་ཡིན་གྱིས་ཤེས་པར་གྱིས་ཤིག་ཅེས་ཀྱང་བརྗོད་པར་བྱའོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་ལྔ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱད་པར་བྱེད་པ་དེའི་ཆུང་མ་ལས་བུ་བྱུང་ནས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ་ཞེས་བྱ་བའི་བར་དུ་སྔ་མ་བཞིན་ནོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་ལྗོངས་རྒྱུར་སོང་བས་རས་ཡུག་ཆེན་གཉིས་ཤིག་རྙེད་ནས། དེས་བཅོམ་ལྡན་འདས་ཀྱིས་རབ་ཏུ་བྱུང་བས་ཀྱང་ཕ་མ་དག་ལ་མཁོ་བ་བསྟབས་པར་བྱའོ་ཞེས་གསུངས་པས་དེའི་ཕྱིར་གཅིག་ནི་ཕ་ལ་དབུལ་ལོ། །ཅིག་ཤོས་ནི་མ་ལ་དབུལ་ལོ་སྙམ་དུ་ཤེས་ནས། དེ་ཇི་དགའ་བར་ལྗོངས་སུ་འདུག་ནས་ལྷུང་བཟེད་དང ། ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་འགྲོ་བ་ན་མཐར་གྱིས་རྒྱུ་ཞིང་འགྲོ་བའི་ཚེ་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མ་མཆིས་སམ། དགེ་སློང་དེས་སྨྲས་པ། བཞིན་བཟངས་མེད་དོ། །ཤོ་གམ་པས་སྨྲས་པ། བལྟས་གཞག་ཏུ་གསོལ་ཞེས་དེས་བརྟག་པར་བརྩམས་པ་དང་ཇི་ཙམ་ན་རས་ཡུག་ཆེན་གཉིས་མཐོང་ནས་དེས་སྨྲས་པ། འཕགས་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བས་རས་ཡུག་ཆེན་གཉིས་ཙམ་གྱི་སླད་དུ་བརྫུན་དུ་སྨྲ་བ་གསུང་ངམ། དགེ་སློང་དེས་སྨྲས་པ། བཞིན་བཟངས་འདི་གཉིས་ནི་ཁོ་བོ་མི་དབང་ངོ ། །འཕགས་པ་འོ་ན་སུ་དབང །
5.78a
བཞིན་བཟངས་གཅིག་ནི་ཕའི་འོ། །གཅིག་ཤོས་ནི་མའི་འོ། །འཕགས་པ་བདག་གིས་ཡབ་ཀྱང་མ་འཚལ་ཡུམ་ཡང་མ་འཚལ་གྱིས་ཤོ་གམ་སྩོལ་ལ་བཞུད་ཅིག་།དགེ་སློང་དེ་ཤོ་གམ་པ་དེས་ཡུན་རིང་ཞིག་བསྒྱངས་ཏེ་བཏང་ན་དེ་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དེ་འགྱོད་པ་སྐྱེས་ནས་དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི། ཡང་དགེ་སློང་གིས་དེ་བཞིན་དུ་འགྲོ་བར་མི་བྱ་བར་འདི་ལྟར་ཤོ་གམ་པའི་མདུན་དུ་ཕ་མའི་བསྔགས་པ་བརྗོད་པར་བྱ་སྟེ། བཞིན་བཟངས་བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་བསྙོད་པར་བྱེད་པ་གསོ་བར་བྱེད་པ། སྐྱེད་པར་བྱེད་པ། ནུ་མ་བསྣུན་པར་བྱེད་པ། འཛམ་བུའི་གླིང་སྣ་ཚོགས་སྟོན་པར་བྱེད་པ་གཉིས་ནི་བྱ་དཀའ་བ་བྱེད་པ་དག་ཡིན་ཏེ། བུས་ཕྲག་པ་གཅིག་གིས་ནི་ཕ། གཅིག་ཤོས་ཀྱིས་ནི་མ་ལོ་བརྒྱ་ཐམ་པར་ཡོངས་སུ་སྤང་བ་བྱས་སམ། ས་ཆེན་པོ་འདིར་ནོར་བུ་དང ། མུ་ཏིག་དང ། བཻ་དཱུརྱ་དང ། མན་ཤེལ་དཀར་པོ་དང ། བྱུ་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་བ་དང ། དེ་ལྟ་བུའི་དབང་ཕྱུག་གི་བདག་པོ་ལ་བཀོད་པར་གྱུར་པ་གང་ཡིན་པ་དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང་ཉེ་བར་བྱས་པར་མི་འགྱུར་གྱི། དེས་ཕ་མ་མ་དད་པ་གཉིས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་འཛུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་པ་དང ། ཚུལ་ཁྲིམས་འཆལ་བ་གཉིས་ཚུལ་ཁྲིམས་ཕུན་སུམ་ཚོགས་པ་དང ། སེར་སྣ་ཅན་གཉིས་གཏོང་བ་ཕུན་སུམ་ཚོགས་པ་དང ། ཤེས་རབ་འཆལ་བ་གཉིས་ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཛུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་ན། དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང ། ཉེ་བར་བྱས་པར་འགྱུར་ཞེས་གསུངས་སོ་ཞེས་བརྗོད་པར་བྱའོ། །
5.78b
གལ་ཏེ་དེ་ལྟར་ཕ་མ་གཉིས་ཀྱི་བསྔགས་པ་བརྗོད་པ་ན་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཤོ་གམ་གཞལ་ཏེ་འགྲོ་བར་བྱའོ། །དེ་བཞིན་དུ་མི་འགྲོ་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་བཙས་ནས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ་ཞེས་བྱ་བའི་བར་དུ་སྔ་མ་བཞིན་ནོ། །གང་གི་ཚེ་དེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །བཅོམ་ལྡན་འདས་ཀྱིས་བསོད་ནམས་དག་ནི་བྱ་བ་སྟེ། །བསོད་ནམས་མ་བྱས་སྡུག་བསྔལ་འགྱུར། །འཇིག་རྟེན་འདི་དང་ཕ་རོལ་ཏུ། །བསོད་ནམས་བྱས་པ་དགའ་བར་འགྱུར་ཞེས་གསུངས་པ་ཐོས་ནས་དགེ་སློང་དག་གིས་འདུན་པ་ལས་བྱུང་བའི་སློངས་མོ་བྱས་ཏེ། སངས་རྒྱས་དང ། ཆོས་དང ། དགེ་འདུན་དག་ལ་མཆོད་པ་དག་བྱ་བར་བརྩམས་ཤིང་བཅོམ་ལྡན་འདས་ཀྱི་བསྟན་པ་རྒྱས་པར་གྱུར་པ་ན། དགེ་སློང་དེས་དགེ་སློང་འདུན་པ་ལས་བྱུང་བ་སློང་བ་མང་ཞིང་འདི་དག་ཟད་པར་གྱིས་མཉན་ཡོད་ཁྱབ་པར་འགྱུར་གྱིས་བདག་ལྗོངས་སུ་འགྲོ་ཞིང་སོང་ནས་ཡང་དག་པར་སྦྱོར་དུ་གཞུག་གོ་སྙམ་དུ་ཤེས་ནས་དེ་ལྗོངས་སུ་སོང་བ་དང ། དེས་ལྗོངས་དག་ཏུ་སངས་རྒྱས་དང ། ཆོས་དང ། དགེ་འདུན་གྱི་ཕྱིར་གོས་ཁ་དོག་སྣ་ཚོགས་ཀྱིས་གང་བའི་གཏུར་བུ་གསུམ་ཡང་དག་པར་སྦྱོར་དུ་བཅུག་གོ། །དེ་ལྗོངས་སུ་ཅི་དགར་འདུག་ནས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་ཞིང་འགྲོ་བའི་ཚེ་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མ་མཆིས་སམ། དགེ་སློང
5.79a
དེས་སྨྲས་པ། བཞིན་བཟངས་མེད་དོ། །ཤོ་གམ་པས་སྨྲས་པ། བལྟས་གཞག་ཏུ་གསོལ་ཞེས་དེས་བརྟག་པར་བརྩམས་པ་དང ། ཇི་ཙམ་ན་གོས་ཁ་དོག་སྣ་ཚོགས་ཀྱིས་གང་བ་གཏུར་བུ་གསུམ་མཐོང་ནས། དེས་སྨྲས་པ། འཕགས་པ་གོས་ཁ་དོག་སྣ་ཚོགས་ཀྱིས་གང་བའི་གཏུར་བུ་གསུམ་པོ་འདི་དག་ནི་ཉུང་བས་གལ་ཏེ་རྔ་མོའི་ཁལ་ལངས་པར་གྱུར་ན་དེ་ལྟ་ན་ཁྱོད་ཀྱིས་ཤོ་གམ་གཞལ་དགོས་པར་འགྱུར་རོ། །དགེ་སློང་དེས་སྨྲས་པ། བཞིན་བཟངས་འདི་དག་ནི་ཁོ་བོ་མི་དབང་ངོ་འཕགས་པ་འོ་ན་སུ་དབང ། བཞིན་བཟངས་གཅིག་ནི་སངས་རྒྱས་ཀྱིའོ། །གཅིག་ནི་ཆོས་ཀྱིའོ། །གཅིག་ནི་དགེ་འདུན་གྱིའོ། །འཕགས་པ་བདག་གིས་སངས་རྒྱས་ཀྱང་མ་འཚལ། ཆོས་ཀྱང་མ་འཚལ། དགེ་འདུན་ཀྱང་མ་འཚལ་གྱིས་ཤོ་གམ་སྩོལ་ལ་བཞུད་ཅིག་།དགེ་སློང་དེ་ཤོ་གམ་པ་དེས་ཡུན་རིང་ཞིག་བསྒྱངས་ཏེ་བཏང་ནས་དེ་མཐར་གྱིས་མཉན་ཡོད་དུ་ཕྱིན་པ་དང ། དེ་འགྱོད་པ་སྐྱེས་ནས་དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི་ཡང་དགེ་སློང་གིས་དེ་བཞིན་དུ་འགྲོ་བར་མི་བྱ་བར་འདི་ལྟར་ཤོ་གམ་པའི་མདུན་དུ་སངས་རྒྱས་དང ། ཆོས་དང ། དགེ་འདུན་གྱི་བསྔགས་པ་བརྗོད་པར་བྱ་སྟེ། འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཡིན་ནོ། །བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ་ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ་ཡིན་ནོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ། རིགས་པར་ཞུགས་པ། དྲང་པོར་ཞུགས་པ། འཐུན་པར
5.79b
ཞུགས་པ། ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ། ཆོས་ཀྱི་རྗེས་སུ་འཐུན་པར་སྤྱོད་པ་སྟེ། དགེ་འདུན་ལ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་རྒྱུན་དུ་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བ་དག་ཀྱང་ཡོད། དགེ་འདུན་ལ་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ཕྱིར་མི་འོང་བ་དག་ཀྱང་ཡོད། དགེ་འདུན་ལ་དགྲ་བཅོམ་པ་ཉིད་ཀྱི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད་དོ། །དགེ་འདུན་ལ་དགྲ་བཅོམ་པ་དག་ཀྱང་ཡོད་དེ་དེ་ལྟར་དེ་དག་ནི་སྐྱེས་བུ་ཟུང་བཞི་དང ། སྐྱེས་བུ་གང་ཟག་བརྒྱད་ཡིན་ནོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དེ་ནི་ཚུལ་ཁྲིམས་ཕུན་སུམ་ཚོགས་པ། ཏིང་ངེ་འཛིན་ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ། རྣམ་པར་གྲོལ་བ་ཕུན་སུམ་ཚོགས་པ། རྣམ་པར་གྲོལ་བའི་ཤེས་པ་དང་མཐོང་བ་ཕུན་སུམ་ཚོགས་པ། ཀུན་སྦྱིན་པའི་འོས་སུ་གྱུར་པ། རབ་ཏུ་སྦྱིན་པའི་འོས་སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་ཞིང་བླ་ན་མེད་པ། འཇིག་རྟེན་གྱི་ཡོན་གནས་ཡིན་ནོ་ཞེས་བརྗོད་པར་བྱའོ། །གལ་ཏེ་དེ་ལྟར་སངས་རྒྱས་དང ། ཆོས་དང ། དགེ་འདུན་གྱི་བསྔགས་པ་བརྗོད་པ་ན་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཤོ་གམ་གཞལ་ཏེ་འགྲོ་བར་བྱའོ། །དེ་བཞིན་དུ་འགྲོ་ན་འགལ་ཚབས་ཅན་དུ་འགྱུར་རོ། །དགེ་སློང་དག་གིས་དཀོན་མཆོག་གསུམ་གྱི་ཕྱིར་ཤོ་གམ་གཞལ་དགོས་པའི་རྫས་བསྐུར་བར་བརྩམས་ཤིང་ཤོ་གམ་གྱི་གནས་སུ་སངས་རྒྱས་དང ། ཆོས་དང ། དགེ་འདུན་དག་གི་བསྔགས་པ་བརྗོད་པ་ན་མི་གཏོང་ནས། དགེ་སློང་དག་གཅིག་གི་སྐལ་བ་ལས་སྦྱིན་པར་བྱེད་པ་དང ། བཅོམ་ལྡན་འདས་ཀྱིས་བཀའ་སྩལ་པ། གསུམ་ཅར་ལས་ཀྱང་སྤྱིར་སྦྱིན་པར་བྱའོ། །དགེ་སློང་དག་གསུམ་ཅར་ལས་སྤྱིར་སྦྱིན་པར་བྱེད་པ་ན་དོན་འཐུན་དང་ཡོངས་སུ་བྲལ་ནས་དེ་དག་སེང་གེ་དག་དང ། སྟག་དག་དང ། ཆོམ
5.80a
རྐུན་པ་དག་གིས་བགྲོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གཅིག་གི་ལས་བྱིན་ལ་ཕྱིས་སྐལ་བ་བསབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་སྡེ་སྣོད་གསུམ་དང་ལྡན་པ། ཆོས་སྨྲ་བ། རིགས་པ་དང་གྲོལ་བའི་སྤོབས་པ་དང་ལྡན་པ་ཞིག་འདུག་པ་དེ་ལྗོངས་རྒྱུར་སོང་བ་ན་མཐར་གྱིས་རྒྱལ་པོའི་ཁབ་ཏུ་ཕྱིན་ནས་རྒྱལ་པོའི་ཁབ་ཏུ་དབྱར་གནས་ཏེ་ཟླ་བ་གསུམ་འདས་པ་དང་མཉན་ཡོད་དུ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏུ་འཕགས་པ་ན་དོན་འཐུན་བཙལ་བ་དང་ཇི་ཙམ་ན་དེད་དཔོན་ཞིག་གིས་རྒྱལ་པོའི་ཁབ་ནས་ཟོང་བླངས་ཏེ་མཉན་ཡོད་དུ་འཕགས་ནས། དེའི་དྲུང་དུ་སོང་སྟེ་བསོད་ནམས་བྱ་བའི་གཞི་གསུམ་པོ་དག་གི་བསྔགས་པ་བརྗོད་ཅིང་དེ་དག་ལ་བཀོད་ནས་ཅི་ནས་ཀྱང་དེའི་ཚེ་སེམས་མངོན་པར་དད་པར་འགྱུར་བ་དེ་ལྟ་དེ་ལྟར་རྣམ་པར་བཤད་པ་དང ། དེ་དད་པ་སྐྱེས་པས་དགེ་སློང་དེ་ལ་ཟན་བྱིན་ཏེ་རས་ཡུག་ཆེན་རིན་ཆེ་བ་ཆེ་བར་འོས་པས་བཀབ་ནས་དེའི་འོག་ཏུ་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་གིས་ཅི་བགྱི་བ་བཀའ་སྩོལ་ཅིག་།དགེ་སློང་དེས་སྨྲས་པ། བཞིན་བཟངས་བདག་མཉན་ཡོད་དུ་སྟོན་པའི་ཞབས་ལ་ཕྱག་འཚལ་དུ་འགྲོ་འདོད་ཀྱིས་དེའི་ཕྱིར་བདག་ལ་བྱམས་པས་བསྐྱང་བ་གྱིས་ཤིག་།ཁྱིམ་བདག་དེས་སྨྲས་པ། འཕགས་པ་བཀའ་བཞིན་འཚལ་མ་ནོངས་ཀྱིས་གཤེགས་སོ། །དགེ་སློང་དེ་དེད་དཔོན་དེ་དང་ལྷན་ཅིག་འཕགས་པ་དང ། དེད་དཔོན་དེས་སྨྲས་པ། འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ་བདག་ནི་བསོད་ནམས་འཚལ་བ་ལགས་ཀྱིས། རྒྱལ་པོའི་ཁབ་ནས་མཉན་ཡོད་ཀྱི་བར་ཇི་སྲིད་པར་ཆོས་གོས་དང ། བསོད་སྙོམས་དང ། གནས་མལ་དང ། ནད་པའི་རྐྱེན་དང ། སྨན་གྱི་ཡོ་བྱད་དག་གིས་ཐུགས་ལས་ཆུང་ངུར་མཛད་དུ་གསོལ། དགེ་སློང་དེས་དང་དུ་བླངས་ནས་ཇི་ཙམ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། དེད་དཔོན་གྱི་རྫས་ཤོ་གམ་བཅད་ནས་དེད་དཔོན་དེས་བདག
5.80b
གི་རྫས་ཤོ་གམ་བཅད་ཅིང ། འཕགས་པའི་རས་ཡུག་ཆེན་ནི་ཤོ་གམ་མ་བཅད་པས་བདག་ཁོ་ནས་ཤོ་གམ་གཞལ་དགོས་པར་འགྱུར་བའི་གནས་དེ་ལྟ་བུ་ཡོད་པས་བདག་ཉིད་ཀྱི་སྣོད་དུ་གཞུག་པར་བྱའོ་སྙམ་དུ་ཤེས་ནས། དེད་དཔོན་དེས་དགེ་སློང་དེ་ལ་སྨྲས་པ། འཕགས་པ་རས་ཡུག་ཆེན་སླར་སྩོལ་ཅིག་།དགེ་སློང་དེས་སྨྲས་པ། བཞིན་བཟངས་ཅི་ཟེར་ཁྱོད་འགྱོད་པ་སྐྱེས་པར་མ་གྱུར་ཏམ། དེད་དཔོན་གྱིས་སྨྲས་པ། འཕགས་པ་བདག་ལ་འགྱོད་པ་མ་མཆིས་ཏེ། འདི་ལྟར་བདག་གི་རྫས་ནི་ཤོ་གམ་བཀུམ་ལ། ཁྱོད་ཀྱི་རས་ཡུག་ཆེན་འདི་ནི་ཤོ་གམ་མ་བཀུམ་པས་གལ་ཏེ་ཤོ་གམ་པ་དག་རས་ཡུག་ཆེན་གྱི་ཤོ་གམ་འཚལ་ན་དོན་གྱིས་བདག་ཁོ་ནས་གཞལ་བར་བགྱི་བ་ལགས་པས་ཤོ་གམ་གྱི་གནས་ནས་བཟླས་ཏེ་དབུལ་བར་བགྱིའོ། །དགེ་སློང་དེས་སྨྲས་པ། བཞིན་བཟངས་བཅོམ་ལྡན་འདས་ཀྱིས་དགེ་སློང་གིས་ཤོ་གམ་གཞལ་དགོས་པའི་རྫས་ཤོ་གམ་གྱི་གནས་ནས་བཟླ་བར་མི་བྱའོ་ཞེས་བསླབ་པའི་གཞི་བཅའ་བ་མཛད་པས་བདག་ལྟུང་བ་དང་བཅས་པར་གྱུར་ན་མི་རུང་བས་མི་སྦྱིན་ནོ། །དེད་དཔོན་དེས་འཕགས་པ་དག་ནི་མི་མཐུན་པར་བྱེད་པ་ཡིན་པས་འདི་ལ་བདག་གིས་དུས་ཤེས་པར་འགྱུར་རོ་སྙམ་དུ་ཤེས་ནས་དེད་དཔོན་དེས་དགེ་སློང་དེ་ལ་སྨྲས་པ། འཕགས་པ་དེས་བདག་བྲེལ་བས་ཁྱོད་ཀྱི་བསོད་སྙོམས་འགའ་ཡང་བསྒྲུབ་པར་རྔོ་མི་ཐོག་གིས་བཞུད་ལ་གྲོང་དུ་བསོད་སྙོམས་ལ་འཇུག་པར་མཛོད་ཅིག་།དགེ་སློང་དེ་བསོད་སྙོམས་ལ་ཞུགས་པ་དང ། ཇི་སྲིད་དུ་དེ་ཞུགས་པ་དེའི་བར་དུ་དེད་དཔོན་དེས་རས་ཡུག་ཆེན་དེ་བདག་ཉིད་ཀྱི་སྣོད་དུ་བཅུག་གོ། །ཇི་ཙམ་ན་དགེ་སློང་དེ་ལ་ཤོ་གམ་པས་དྲིས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ། དགེ་སློང་དེས་སྨྲས་པ། བཞིན་བཟངས་རས་ཡུག་ཆེན་གཅིག་ཡོད་དོ། །ཤོ་གམ་པས་སྨྲས་པ། འཕགས་པ་བལྟས་གཞག་ཏུ་གསོལ། དགེ་སློང་དེས་གཏུར་བུར་བརྟགས་པ་དང ། རས་ཡུག་ཆེན
5.81a
མི་སྣང་ནས་དེ་བཞིན་བསྒྱུར་ཞིང་ལག་པ་གཉིས་འདྲིལ་བར་བྱེད་དོ། །ཤོ་གམ་པས་སྨྲས་པ། འཕགས་པ་ཅིའི་སླད་དུ་འདི་ལྟར་མཛད། དགེ་སློང་དེས་སྨྲས་པ། བཞིན་བཟངས་ཁོ་བོའི་རས་ཡུག་ཆེན་དེ་མ་བྱིན་པར་ལེན་པ་དག་གིས་བརྐུས་སོ། །ཤོ་གམ་པ་དེས་སྨྲས་པ། འཕགས་པ་དེ་ནི་ཁྱོད་ཀྱིས་མ་བརྐུས་ཀྱི་འདི་ལྟར་བདག་གིས་བརྐུས་པ་ལགས་ཏེ། དེས་ན་བདག་གིས་ཤོ་གམ་མ་ཐོབ་བོ། །གང་གི་ཚེ་དགེ་སློང་དེ་ཤོ་གམ་གྱི་གནས་ནས་འདས་པ་དེའི་ཚེ་དེད་དཔོན་དེས་སྨྲས་པ། འཕགས་པ་ཅིའི་སླད་དུ་སེམས་ཁོངས་སུ་ཆུད། བཞིན་བཟངས་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་སྐྱེས་མོད་ཀྱི་ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་མ་སྐྱེས་སོ། །འཕགས་པ་ཅིའི་སླད་དུ་ཁོ་བོའི་རས་ཡུག་ཆེན་དེ་མ་བྱིན་པར་ལེན་པ་དག་གིས་བརྐུས་སོ། །དེད་དཔོན་དེས་སྨྲས་པ། འཕགས་པ་དེ་ནི་མ་བྱིན་པར་ལེན་པ་དག་གིས་མ་བརྐུས་ཏེ། འདི་ལྟར་བདག་གིས་ཤོ་གམ་གྱིས་འཇིགས་པས་རང་གི་སྣོད་དུ་སྩལ་ཏེ་འཚལ་ཏེ་མཆིས་ན་ཇི་ལྟར་བགྱི་དབུལ་ལམ། དགེ་སློང་དེས་སྨྲས་པ། བཞིན་བཟངས་བདག་ལ་མ་བྱིན་པར་ལེན་པ་དག་གིས་བརྐུས་པ་ནི་ལེགས་ཀྱི་བདག་ལྟུང་བ་དང་བཅས་པར་གྱུར་པ་ནི་མ་ལེགས་སོ། །འཕགས་པ་འདི་ལ་ཁྱོད་ཀྱི་ལུས་ཀྱི་ལས་ཀྱང་མ་མཆིས། ངག་གི་ལས་ཀྱང་མ་མཆིས་ན་ཅིའི་སླད་དུ་ཁྱོད་ལྟུང་བ་དང་བཅས་པར་འགྱུར། དགེ་སློང་དེ་འགྱོད་པ་སྐྱེས་ནས་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དགེ་སློང་དེས་སྐབས་དེ་དེ་དག་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ལྟུང་བ་མེད་མོད་ཀྱི་འོན་ཀྱང་ངས་དགེ་སློང་ལམ་དུ་ཞུགས་པའི་ཀུན་དུ་སྤྱད་པའི་ཆོས་དག་བཅའ་བར་བྱ་སྟེ། དགེ་སློང་ལམ་དུ་ཞུགས་པ་གྲོང་དུ་བསོད་སྙོམས་ལ་འཇུག་པས་སྣོད་ལ་མཚན་མ
5.81b
བཏབ་སྟེ་འགྲོ་བར་བྱ་ཞིང་ཕྱིར་འོངས་ནས་ཀྱང་སོ་སོར་བརྟག་པར་བྱའོ། །དགེ་སློང་ལམ་དུ་ཞུགས་པས་ཀུན་དུ་སྤྱད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྒན་པོ་ཞིག་དང་གཞོན་ནུ་ཞིག་གཉིས་ལྗོངས་རྒྱུར་འཕགས་སོ། །དེ་ན་རྒན་པོ་ནི་ཤེས་པ་དང་ལྡན་པ། རྫས་མང་བ། ཡོ་བྱད་མང་བ་ཡིན་ལ། གཞོན་ནུ་ནི་ཤེས་པ་ཆུང་བ་ཆོས་གོས་གསུམ་ལ་འཆེལ་བ་ཡིན་པས་རྒན་པོ་ལ་ཤོ་གམ་གཞལ་དགོས་པའི་རྫས་ཡོད་ནས་ཇི་ཙམ་ན་མཐར་གྱིས་ཤོ་གམ་གྱི་དྲུང་དུ་ཕྱིན་པ་དང ། རྒན་པོས་བདག་ལ་ཤོ་གམ་གཞལ་དགོས་པའི་རྫས་ཡོད་པས་གལ་ཏེ་ཤོ་གམ་པ་དག་འཕགས་པ་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ་ཞེས་འདྲི་ན། གལ་ཏེ་མེད་དོ་ཞེས་བརྗོད་ན་ནི་བརྫུན་དུ་སྨྲ་བར་འགྱུར་ལ། གལ་ཏེ་ཡོད་དོ་ཞེས་བརྗོད་ན་ནི་ངེས་པར་ཤོ་གམ་གཞལ་དགོས་པར་འགྱུར་བས་དེའི་ཕྱིར་གང་གིས་ཤོ་གམ་ཡང་གཞལ་མི་དགོས་ལ་བརྫུན་དུ་སྨྲ་བར་ཡང་མི་འགྱུར་བའི་ཐབས་ཅི་ཡོད་སྙམ་དུ་ཤེས་ནས་དེ་འདི་སྙམ་དུ་སེམས་ཏེ། གཞོན་ནུ་འདི་ལ་སྦྱིན་ཞིང་ཤོ་གམ་གྱི་གནས་ནས་འདས་ན་བླང་བར་བྱའོ་སྙམ་ནས་དེས་གཞོན་ནུ་དེ་ལ་སྨྲས་པ། ཚེ་དང་ལྡན་པ་རེ་ཤིག་ལྷུང་བཟེད་དང་ཆོས་གོས་ལོང་ཤིག་།གཞོན་ནུ་དེས་གནས་བརྟན་ངལ་བར་གྱུར་པས་དེས་ན་བདག་ལ་སྦྱིན་གོར་མ་ཆག་སྙམ་དུ་ཤེས་ནས། དེས་བླངས་ཤིང་དེས་དེ་ཁྱེར་ཏེ་མདུན་དུ་འཕགས་པ་དང ། ཤོ་གམ་པས་མཐོང་ནས་དེས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ། དགེ་སློང་དེས་སྨྲས་པ། བཞིན་བཟངས་མེད་དོ། །ཤོ་གམ་པ་དེས་དགེ་སློང་དེ་ཡལ་བར་བོར་ནས་ཤོ་གམ་གྱི་གནས་ནས་འདས་པ་དང ། རྒན་པོ་ཡང་སྟོང་པར་འབྲང་ཞིང་འོང་ནས་ཤོ་གམ་པ་དེས་རྒན་པོ་དེ་ལ་ནི་མ་དྲིས་སོ། །རྒན་པོ་དེ་གང་གི་ཚེ་ཤོ
5.82a
་ གམ་གྱི་གནས་ནས་འདས་པ་དེའི་ཚེ་སྨྲས་པ། ཚེ་དང་ལྡན་པ་རྫས་ཁྱེར་ཤོག་།གཞོན་ནུ་སྨྲས་པ། གནས་བརྟན་ཅི་ལགས་མཉེལ་བཤོས་ལགས་སམ། རྒན་པོས་སྨྲས་པ། ཚེ་དང་ལྡན་པ་ཁོ་བོ་ངལ་བས་ཁྱོད་ལ་བྱིན་པ་ནི་མ་ཡིན་གྱི། འདི་ལྟར་ཁོ་བོ་ལ་ཤོ་གམ་གཞལ་དགོས་པའི་རྫས་ཡོད་པས་གལ་ཏེ་ཁོ་བོ་ལ་ཤོ་གམ་པ་འཕགས་པ་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ་ཞེས་འདྲི་ན་གལ་ཏེ་མེད་དོ་ཞེས་བརྗོད་ན་ནི་བརྫུན་དུ་སྨྲ་བར་འགྱུར་ལ། གལ་ཏེ་ཡོད་དོ་ཞེས་བརྗོད་ན་ནི་ངེས་པར་ཤོ་གམ་གཞལ་དགོས་པར་འགྱུར་རོ་སྙམ་པའི་བློ་སྐྱེས་པས་དེའི་ཕྱིར་ཁོ་བོས་ལྷུང་བཟེད་དང་ཆོས་གོས་བྱིན་པ་ཡིན་པས་དེ་ནི་ཤོ་གམ་གྱིས་གནས་ལས་འདས་པས་དེས་ན་ཡང་ཕྱིར་ལེན་ཏོ། །གཞོན་ནུས་སྨྲས་པ། དེ་ལྟ་ན་གནས་བརྟན་གྱིས་བདག་ཉིད་ཐར་བར་མཛད་ལ་ངན་བུ་ནི་ལྟུང་བ་དང་བཅས་པར་བགྱིས་སོ། །རྒན་པོས་སྨྲས་པ། ཚེ་དང་ལྡན་པ་ཁྱོད་ཀྱིས་མི་ཤེས་པས་འདི་ལ་ཁྱོད་ཀྱིས་ལྟུང་བ་ཅི་ཞིག་ཡོད། དགེ་སློང་གཞོན་ནུ་དེ་འགྱོད་པ་སྐྱེས་ནས་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དགེ་སློང་དེས་སྨྲས་པ། འདིར་ག་ལ་བདེ་བར་བརྒྱུས། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅིའི་ཕྱིར་དེ་སྐད་ཟེར། དགེ་སློང་དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི་ཡང་དགེ་སློང་ལམ་དུ་ཞུགས་པས། མ་དྲིས་པར་རྫས་བླང་བར་མི་བྱ་བར་ལེན་པ་ཉིད་ན་འདི་ན་ཤོ་གམ་གཞལ་དགོས་པའི་རྫས་ཅུང་ཟད་མེད་དམ་ཞེས་དྲི་བར་བྱ་བའོ། །མ་དྲིས་པར་ལེན་ན་འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ། །ཟླ་བར་བྱེད་ན་འགལ་ཚབས་ཅན་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས
5.82b
ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ་ཞེས་བཀའ་སྩལ་པ་ན། དགེ་སློང་དྲུག་བཅུ་ལྗོངས་རྒྱུ་ཞིང་འདོང་བའི་ཚེ་རི་བྲགས་ཤིག་ཏུ་ཕྱིན་པ་དང ། རི་བྲགས་དེ་ན་ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་འདུག་ཅིང་དེ་ཡང་དད་པ་དང་ལྡན་པ་ཡིན་པས་དེས་དགེ་སློང་དེ་དག་འགྲོན་དུ་བོས་ཏེ་ཟས་བྱིན་ནས་རེ་རེ་ལ་གོས་ཕྲུགས་རེ་བསྐོན་པར་བྱས་པ་དང ། དགེ་སློང་རྣམས་ཀྱིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ་ཞེས་དགག་པ་མཛད་པས་དེའི་ཕྱིར་བདག་ཅག་གིས་ཇི་ལྟར་བླང་བར་བྱ། ཁྱིམ་བདག་དེ་ཅང་མི་སྨྲ་བར་འདུག་པ་དང ། དགེ་སློང་རྣམས་ཀྱི་ཡོན་བཤད་པ་བྱས་ཏེ་དོང་ནས་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དེ་དག་གིས་སྨྲས་པ། བདེ་བར་བརྒྱུས་མོད་ཀྱི། འོན་ཀྱང་ཁྱིམ་བདག་ཅིག་གིས་བདག་ཅག་ལ་ཟན་བྱིན་ཏེ་གོས་ཕྲུགས་རེ་བསྐོན་པར་བྱས་ན། དེ་ལ་བདག་ཅག་གིས་ཁྱིམ་བདག་བཅོམ་ལྡན་འདས་ཀྱིས་དགེ་སློང་གིས་ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ། །ཞེས་དགག་པ་མཛད་པས་དེའི་ཕྱིར་བདག་ཅག་གིས་ཇི་ལྟར་བླང་བར་བྱ་ཞེས་མ་བླངས་སོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་རུང་བར་བྱས་ཏེ་ལམ་དུ་བཟླ་བར་བྱའོ། །དགེ་སློང་དག་ཚོན་རྩི་དང ། ཤིང་དང ། ཟངས་དང ། བུམ་པ་དག་ཚོལ་བ་ན་ལམ་གྱིས་དུབ་ཅིང་སྒྱིད་ལུག་པ་དང་དོན་འཐུན་དང་བྲལ་བར་གྱུར་ནས་དེ་དག་སེང་གེ་དང ། སྟག་དག་དང ། ཆོམ་རྐུམ་པ་དག་གིས་བགྲོད་པར་གྱུར་ཏོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མཐའ་ཆགས་སམ་རང་ཆགས་བྱས་ཏེ་འགྲོ་བར་བྱའོ། །ཉེས་དམིགས་དེ་ཉིད་དུ་གྱུར་ནས། བཅོམ་ལྡན་འདས་ཀྱིས། བཀའ་སྩལ་པ། བ་ལང
5.83a
གི་ལྕི་བ་བཙིར་བས་རུང་བར་བྱ་བ་འམ་བཀྲུ་བར་བྱའོ། །དེ་ལྟ་ན་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཐ་ན་ཁ་ཚར་རམ་ཕུན་ཚར་ཡང་གཅད་པར་བྱའོ། །ངས་ཕོངས་པ་དག་ཏུ་རྗེས་སུ་གནང་བ་གང་ཡིན་པ་དེ་གནས་སྐབས་ཐ་མལ་པ་དག་ཏུ་ལྷག་པར་སྤྱད་པར་མི་བྱའོ། །ལྷག་པར་སྤྱོད་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་ཞིག་རྒྱལ་པོའི་ཁབ་ཏུ་དབྱར་གནས་པར་ཁས་བླངས་ནས་དེ་དབྱར་ཟླ་བ་གསུམ་འདས་ནས་ཆོས་གོས་མ་རྙེད་པ་ཁོ་ནར་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འཕགས་པ་དང་དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཆོས་གོས་ཀྱིས་རྙེད་པ་མ་ཐོབ་ཀྱི་བར་དུ་ཁྱོད་མ་རིངས་ཤིག་།དེ་མངོན་པར་མི་དགའ་བས་མི་སྡོད་པ་དང ། དེ་ལ་དགེ་སློང་ཞིག་གིས་རས་ཡུག་ཆེན་བྱིན་ནས། དེས་གལ་ཏེ་འདི་རུང་བར་བྱེད་ན་ཚངས་པ་མཚུངས་པར་སྤྱོད་པ་དག་མི་མཐོང་བར་འགྱུར་བས་དགེ་སློང་བཤེས་པ་ཞིག་ལ་རུང་བར་བྱེད་དུ་གཞུག་གོ་སྙམ་དུ་ཤེས་ནས། དེས་དགེ་སློང་བཤེས་པ་ལ་སྨྲས་པ། ཁོ་བོ་ཚངས་པ་མཚུངས་པར་སྤྱོད་པ་དག་ལ་ལྟ་བའི་བར་དུ། རས་ཡུག་ཆེན་འདི་རུང་བར་གྱིས་ལ་གཏུར་བུར་ཆུག་ཤིག་།དེ་ལེ་ལོ་ཅན་ཞིག་པས་དེས་རུང་བར་མ་བྱས་པ། ཁོ་ནར་གཏུར་བུར་བཅུག་གོ། །ཇི་ཙམ་ན་དགེ་སློང་དེས་གཏུར་བུ་ཐོགས་ཏེ་འཕགས་ནས། མཐར་གྱིས་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ། བཞིན་བཟངས་མེད་དོ། །བལྟས་གཞག་ཏུ་གསོལ། དེས་བརྟག་པར་བརྩམས་པ་དང ། རས་ཡུག་ཆེན་མཐོང་ནས་དེས་སྨྲས་པ། འཕགས་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ན་ཇི་ལྟར་རས་ཡུག་ཆེན་གྱི་སླད་དུ་བརྫུན་དུ་སྨྲ་བ་གསུང ། དགེ་སློང་དེས་སྨྲས་པ། བཞིན་བཟངས་ཁོ་བོས་མི་ཤེས་ཏེ
5.83b
ཁོ་བོ་འཕགས་པ་ན་རས་ཡུག་ཆེན་འདི་རྙེད་ནས་ཁོ་བོས་བཤེས་པ་ལ་ཁོ་བོ་ཚངས་པ་མཚུངས་པར་སྤྱོད་པ་དག་ལ་ལྟ་བའི་བར་དུ་རས་ཡུག་ཆེན་འདི་རུང་བར་གྱིས་ལ་གཏུར་བུར་ཆུག་ཤིག་ཅེས་སྨྲས་ན། དེ་ལེ་ལོ་ཅན་ཞིག་པས་དེས་འདི་རུང་བར་མ་བྱས་པ་ཁོ་ནར་གཏུར་བུར་བཅུག་གོ། །ཤོ་གམ་པས་སྨྲས་པ། འཕགས་པ་དེ་ནི་ཁྱོད་ཀྱི་བཤེས་པ་མ་ལགས་ཀྱི་འདི་ལྟར་དེ་ནི་བདག་གི་བཤེས་པ་ལགས་ཏེ་དེས་ན་བདག་ལ་ཤོ་གམ་བྱུང་གིས་སྩོལ་ལ་བཞུད་ཅིག་།དགེ་སློང་དེ་འགྱོད་པ་སྐྱེས་ནས་དེ་མཐར་གྱིས་མཉན་ཡོད་དུ་ཕྱིན་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ་དེས་སྨྲས་པ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། དེ་དག་གིས་སྨྲས་པ། ཚེ་དང་ལྡན་པ་ཅིའི་ཕྱིར་དེ་སྐད་ཟེར། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་ལ་ནི་ལྟུང་བ་མེད་མོད་ཀྱི་ཡང་དགེ་སློང་གིས་མ་དྲིས་པར་བླང་བར་མི་བྱ་བར་ཅི་ཁྱོད་ཀྱིས་རུང་བར་བྱས་སམ། འོན་ཏེ་མ་བྱས་ཤེས་དྲི་བར་བྱའོ། །མ་དྲིས་པར་ལེན་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུས་ཏེ། འགྲོ་ན་ཡང་འགྲོ་བར་ཆས་པའི་རྙེད་པ་སྒྲུབ་པར་བྱེད། འོང་ན་ཡང་གློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང་སྐྱེ་བོ་མང་པོ་དགའ་བ་དང ། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང ། གང་ནས་ཀྱང་མི་འོང་བས་རྙེད་པ་འཐོབ་པ་དང ། སྐྱེ་བོ་མང་པོ་དགའ་བ་དང ། ཡིད་དུ་འོང་བར་ག་ལ་འགྱུར་གྱིས་ཡུ་བུ་ཅག་ཀྱང་འདོང་ངོ ། །གང་དུ་འདོང ། གང་དུ་དོན་འཐུན་འགྲུབ་པར་རོ། །དེ་དག་གིས་དོན་འཐུན་བཙལ་བར་བརྩམས་པ་དང ། དེ་དག་གིས་བྱང་ལམ་དུ་འགྲོ་བའི་དོན་འཐུན་མཐོང
5.84a
ནས་དེའི་དྲུང་དུ་སོང་སྟེ་སྨྲས་པ། བཞིན་བཟངས་དག་ཁྱེད་གང་དུ་འཕགས། འཕགས་པ་དག་བྱང་ལམ་དུའོ། །བཞིན་བཟངས་ཁོ་བོ་ཅག་ཀྱང་ཁྱེད་དང་ལྷན་ཅིག་འདོང་ངོ ། །འཕགས་པ་དག་བྱང་ལམ་ནི་མཐོན་དམན་ཅན་ཁྱི་ཟ་བ། བུད་མེད་ཀྱི་ཡུལ་གནས་ངན་ལེན་ཀུན་དུ་སྤྱོད་པ་ལགས་པས་ཁྱེད་ཅག་དེར་དགྱེས་པར་མི་འགྱུར་རོ། །བཞིན་བཟངས་དག་གལ་ཏེ་དེ་ལྟ་བུ་ཡིན་དུ་ཟིན་ཀྱང་ཡུལ་མཐོང་བར་འགྱུར་བས་འདོང་བར་བྱའོ། །འཕགས་པ་དག་གལ་ཏེ་དེ་ལྟ་ན་ཚུར་སྤྱོན་བཞུད་དོ། །དྲུག་སྡེ་དག་དོན་འཐུན་དེ་དང་ལྷན་ཅིག་བྱང་ལམ་དུ་འཕགས་ནས་མཐར་གྱིས་བྱང་ལམ་དུ་ཕྱིན་པ་དང ། ཉི་མ་གང་ཁོ་ན་ལ་བྱང་ལམ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི་དགའ་བར་གྱུར་ནས། དེ་དག་ནང་པར་སྔར་ལངས་ཏེ་ལམ་སྲང་དུ་དོང་བ་དང ། ཚོང་པ་དེ་དག་གིས་དྲུག་སྡེ་དག་མཐོང་ནས་དེ་དག་གི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་བྱང་ལམ་ཅི་འདྲ། ཁྱེད་ཅག་མངོན་པར་མི་དགྱེས་པར་མ་གྱུར་ཏམ། བཞིན་བཟངས་དག་ཉི་མ་གང་ཁོ་ན་ལ་བྱང་ལམ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི་དགའ་བར་གྱུར་ཏོ། །འཕགས་པ་དག་བདག་ཅག་གིས་ཁྱེད་ལ་དང་པོ་ཁོ་ན་ནས་བྱང་ལམ་ནི་མཐོན་དམན་ཅན། ཁྱི་ཟ་བ། བུད་མེད་ཀྱི་ཡུལ་གནས་ངན་ལེན་ཀུན་དུ་སྤྱོད་པ་ལགས་པས་ཁྱེད་ཅག་དེར་དགྱེས་པར་མི་འགྱུར་རོ་ཞེས་མ་བགྱིས་སམ། བཞིན་བཟངས་དག་ཅི་དེ་ལྟར་ན་འགྲོ་འམ་འདོང་ངོ ། །འཕགས་པ་དག་བདག་ཅག་གིས་ཟོང་མ་བསྒྱུར་ཏེ། དེ་ལྟ་ལགས་མོད་ཀྱི་འོན་ཀྱང་བདག་ཅག་དང ། བཤེས་པའི་ཚོང་པ་གཞན་དག་མཆིས་པ་དེ་དག་གིས་ཟོང་བསྒྱུར་བས་དེ་དག་ལ་གཏད་པར་བགྱིས་དེ་དག་དང་ཐབས་གཅིག་བཞུད་ཅིག་།དྲུག་སྡེ་དག་གིས་སྨྲས་པ། དེ་མ་ནོངས་ཀྱི་དེ་བཞིན་བགྱིའོ། །དྲུག་སྡེ་དག་དོན་འཐུན་དེ་དག་གིས་གཏད་པའི་དོན་འཐུན་དེ་དང་ལྷན་ཅིག་འཕགས་སོ། །དྲུག་སྡེ་དག་གིས་ཀུན་དུ་སྤྱོད་པ་ནི་རྡུལ་གྱིས་འཇིགས་པས་ཡང་ན་ནི་དོན་འཐུན་གྱི་མདུན་དུ་འགྲོའོ། །ཡང་ན་ནི་ཕྱི་ནས་འགྲོ་བས། དེ་དག་ཕྱི་ནས་འགྲོ་བར་བརྩམས་པ་དང ། ཇི་ཙམ་ན་ཡུལ
5.84b
དབུས་ནས་ཕྱིར་འོང་བའི་དོན་འཐུན་འོངས་ནས་ཚོང་པ་དེ་དག་གིས་དོན་འཐུན་ཕྱིར་འོང་བ་དེ་དག་ལ་འོངས་པ་ལེགས་སོ་ཞེས་བརྗོད་པས་སོ་སོར་ཡང་དག་པར་དགའ་བར་བྱས་ཏེ་སྨྲས་པ། ཁྱེད་ག་ལས་འོངས། ཡུལ་དབུས་ནས་སོ། །ཤེས་ལྡན་དག་ཇི་ལྟར་ཡུལ་དབུས་སུ་ཁེ་སྤོགས་མང་པོ་གྲུབ་བམ། ཤོ་གམ་འམ། ལ་གཅན་ནམ། གྲུ་བཙས་ཀྱིས་ཡོངས་སུ་ཡི་ཆད་པ་མེད་དམ། དེ་དག་གིས་སྨྲས་པ། ཤེས་ལྡན་དག་ཡུལ་དབུས་སུ་ཁེ་སྤོགས་མང་པོ་གྲུབ་མོད་ཀྱི་འོན་ཀྱང་དེ་ན་གོས་དཀར་པོ་ཅན་ཆོམ་རྐུན་པ་ལྟ་བུ་ཤོ་གམ་དང ། ལ་གཅན་དང ། གྲུ་བཙས་ཀྱི་ལྕེ་རྟེན་གྱིས་བདེན་པས་མི་མགུ་བ་དག་འཁོད་པས་རྫས་ཐམས་ཅད་འཕྲོག་པར་བྱེད་པས་ཤོ་གམ་དང ། ལ་གཅན་དང ། གྲུ་བཙས་ཀྱིས་ཡོངས་སུ་ཡི་ཆད་པ་ཡོད་དོ། །དེ་དག་གིས་ཐོས་ནས་འཚེར་ཞིང་ཕྱོགས་གཅིག་ཏུ་དོང་ནས་ལག་པ་འགྲམ་པ་ལ་གཏད་དེ་སེམས་ཁོངས་སུ་ཆུད་ཅིང་འཁོད་དོ། །དྲུག་སྡེ་དག་ལྷག་ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་ལག་པ་ལ་འགྲམ་པ་ལ་གཏད་དེ་སེམས་ཁོངས་སུ་ཆུད་ཅིང་འདུག་།ཚོང་པ་དག་གིས་སྨྲས་པ། འཕགས་པ་དག་བདག་ཅག་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུངས་བཞིན་པ་དང ། བཀྲེས་པ་དང་སྐོམ་པ་དག་གིས་གནོད་བཞིན་པ་དང ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱི་རེག་པ་དག་གིས་ཉེན་བཞིན་དུ་ལོངས་སྤྱོད་དག་མངོན་པར་སྒྲུབ་པའི་སླད་དུ་སྤྲོ་བར་བགྱིད། འབད་པར་བགྱིད། རྩོལ་པར་བགྱིད་པ་གང་ལགས་པ་དེ་དག་ཐམས་ཅད་བདག་ཡུལ་དབུས་སུ་འཕགས་པ་ལགས་ཏེ། ཡུལ་དབུས་སུ་ཁེ་སྤོགས་མང་པོ་འགྲུབ་པ་ལགས་མོད་ཀྱི། འོན་ཀྱང་བདག་ཅག་གི་དོན་འཐུན་སླར་མཆི་བ་དག་ལས་ཐོས་ན་དེ་ན་གོས་དཀར་པོ་ཅན་ཆོམ་རྐུན་པ་ལྟ་བུ་ཤོ་གམ་དང ། ལ་གཅན་དང ། གྲུ་བཙས་ཀྱི་ལྕེ་རྟེན་གྱི་བདེན་པས་མི་མགུ་བ་དག་འཁོད་པས་རྫས་ཐམས་ཅད་འཕྲོག་པར་བགྱིད་པས་ཤོ་གམ་དང ། ལ་གཅན་དང ། གྲུ་བཙས་ཀྱིས་ཡོངས་སུ་ཡི་ཆད་པར་འགྱུར་རོ་ཞེས་མཆིའོ། །དྲུག་སྡེ་དག་གིས་སྨྲས་པ་བཞིན
5.85a
བཟངས་དག་གང་དག་ལ་ཁོ་བོ་ཅག་བཤེས་སུ་བདོག་པ་ཁྱེད་ཀྱང་སེམས་ཁོངས་སུ་ཆུད་ཅིང་འཁོད་དམ། འཕགས་པ་དག་ཅི་ལགས་ཁྱེད་ཀྱིས་བདག་ཅག་གི་སླད་དུ་རྒྱལ་པོ་ལ་གསོལ་བ་བགྱི་འམ། བཞིན་བཟངས་དག་རྒྱལ་པོ་ལ་ནི་གསོལ་བར་མི་བྱེད་དེ། འོན་ཀྱང་མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་ལ། དེ་ལ་སྒོ་ནི་བཅཝ་བརྒྱད། སྒེའུ་ཆུང་ནི་སུམ་བཅུ་རྩ་དྲུག་ཡོད་པས་ཁྱེད་ཅག་སྒེའུ་ཆུང་ནས་འཇུག་ཏུ་གཞུག་གིས་ལོངས་ཤིག་འདོང་ངོ ། །ཚོང་པ་དེ་དག་ཡོངས་སུ་མགུ་ནས་འཕགས་པ་དང ། མཉན་ཡོད་དང་ཧ་ཅང་མི་རིང་བའི་རི་བྲག་ཞིག་ཏུ་ཕྱིན་ནས། དྲུག་སྡེ་དག་གིས་སྨྲས་པ། བཞིན་བཟངས་དག་རེ་ཤིག་ངལ་བསོས་ལ་མཉན་ཡོད་དུ་མཚན་མོ་འཇུག་པར་བྱས། རྔ་མོ་དང ། གླང་དང ། བོང་བུ་དག་ཐོང་ཤིག་།ཚོང་པ་དེ་དག་གིས་དེ་དག་བཏང་ནས། ཇི་ཙམ་ན་ཉི་མ་ནུབ་པར་འགྱུར་བ་དེའི་ཚེ་དུས་ཡིན་ནོ་ཞེས་རེ་ཤིག་ངལ་བསོ་བར་བྱེད་དོ། །མཉན་ཡོད་ན་ཤོ་གམ་པ་དག་གིས་བྱང་ལམ་ནས་དོན་འཐུན་ཕུན་སུམ་ཚོགས་པ་འོངས་སོ། །ཞེས་ཐོས་ནས། དེ་དག་གིས་གནོད་སྦྱིན་ལ་གཏོར་མ་བྱས་ཏེ་སྒོ་དག་མནན་ཏེ། སྡོད་དོ། །དྲུག་སྡེ་དག་གིས་སྨྲས་པ། ཤེས་ལྡན་དག་མིག་ལམ་ཆད་ཀྱིས་ལོངས་ཤིག་འདོང་ངོ ། །ཡོངས་སུ་མི་ཤེས་པར་སྒེའུ་ཆུང་ནས་བདེ་བར་འཇུག་ཏུ་གཞུག་གོ། །དེ་དག་འཕགས་ཏེ་མཐར་གྱིས་བོང་བུ་དང ། རྔ་མོ་དང ། གླང་དག་འདེབས་ཤིང ། སྒེའུ་ཆུང་ནས་མཉན་ཡོད་དུ་ཞུགས་ནས་མཚན་མོ་ནམ་ནངས་པ་དང ། སྲང་དུ་དོང་སྟེ་བྱང་ལམ་པའི་ཟོང་བཀྲམ་ནས་བཙོང་བར་བརྩམས་སོ། །མི་ཞིག་དོན་འཐུན་དེ་ཉིད་དང་བྲལ་བ་སྒོ་ནས་ཞུགས་པ་ཤོ་གམ་པ་དག་གིས་མཐོང་ནས་སྨྲས་པ། ཀྱེ་ནང་རྗེ་ག་ལས་འོངས། མི་དེས་སྨྲས་པ། རི་བྲག་ཆེ་གེ་མོ་ཞིག་ནས་སོ། །དེ་དག་གིས་སྨྲས་པ་ཀྱེ་ནང་རྗེ་རི་བྲག་དེ་ན་བྱང་ལམ་པའི་དོན་འཐུན་འདུག་ཅེས་གྲག་ན་ཁྱོད་ཀྱིས་དེ་མ་མཐོང་ངམ། མི་དེས་སྨྲས་པ། ཤེས་ལྡན་དག་ཁོ་བོ་ནི་དོན་འཐུན་དེ་ཉིད་དང་བྲལ་ཞིང་འགྲོ་བ་ཡང་ཡིན་ཏེ་དེ་ནི་སྔར་སོང་ཟིན་ཏོ། །ཤོ་གམ་པ་དག་གིས
5.85b
ཐོས་ནས་ཡིད་མི་བདེ་བར་གྱུར་ཏེ་སྨྲས་པ། ཀྱེ་ནང་རྗེ་ཁོ་བོ་ཅག་སྒོ་གནོན་ཅིང་འཁོད་ན་དེ་ག་ལས་ཞུགས། མི་དེས་སྨྲས་པ། ཤེས་ལྡན་དག་གལ་ཏེ་ཁྱེད་ཅག་ཡིད་མི་ཆེས་ན་ཚུར་ཤོག་སྲང་དུ་འདོང་དང་རང་ཉིད་ཀྱིས་མཐོང་བར་འགྱུར་རོ། །དེ་དག་དེ་དང་ལྷན་ཅིག་སྲང་དུ་དོང་བ་དང་དོན་འཐུན་དག་བྱང་ལམ་པའི་ཟོང་བཀྲམ་ཞིང་ཚོང་པ་མཐོང་ནས་དེ་དག་གིས་དྲིས་པ། ཤེས་ལྡན་དག་ཁྱེད་ཅག་གང་གིས་ཞུགས། དོན་འཐུན་དག་གིས་སྨྲས་པ། རྐང་པ་དག་གིས་སོ། །ཤོ་གམ་པ་དག་གིས་སྨྲས་པ། ཁྱེད་ཅག་ཇི་ལྟར་རྐང་པ་དག་གིས་ཞུགས་པར་ལྟ་ཁོ་བོ་ཅག་གིས་ཀྱང་ཤེས་ཀྱི། འདི་ལྟར་ཁྱེད་ཅག་གང་གིས་འཇུག་ཏུ་བཅུག་པ་དང ། སྒོ་གང་ནས་ཞུགས་པ་དེ་འདྲིས་སྨྲོས་ཤིག་དང ། ཁྱེད་ཅག་དང་བཤེས་པར་བྱའོ། །དེ་དག་གིས་སྨྲས་པ། འཕགས་པ་དྲུག་སྡེ་དག་གིས་སྒེའུ་ཆུང་ནས་འཇུག་ཏུ་བཅུག་གོ། །ཤོ་གམ་པ་དེ་དག་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ནོ། །བྲམ་ཟེའི་ཚུལ་ནི་ཚིག་པ་ཡིན་ཏེ། གང་ལ་ད་ལྟར་གཞན་གྱི་འཚོ་བ་ལ་ཡང་གནོད་པར་བྱེད་དོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གཞན་གྱི་འཚོ་བ་ལ་གནོད་པར་མི་བྱའོ། །གནོད་པར་བྱེད་ན་འགལ་ཚབས་ཅན་དུ་འགྱུར་རོ། །ཤོ་གམ་པ་དག་གིས་དྲུག་སྡེ་འདི་དག་ནི་དགེ་སྦྱོང་མི་སྲུན་པ་དག་ཡིན་པས་ངོ་བྱའོ་སྙམ་དུ་བསམས་ནས། ཇི་ཙམ་དུས་གཞན་ཞིག་ན་ཚེ་དང་ལྡན་པ་ཉེ་དགའ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་ཤོ་གམ་པ་ཞིག་གིས་མཐོང་ནས་དེས་སྨྲས་པ། འཕགས་པ་ཕྱག་འཚལ་ལོ། ལྷུང་བཟེད་ན་ཅུང་ཟད་མཆིས་སམ་གཟིགས། ཉེ་དགས་སྨྲས་པ། བཞིན་བཟངས་ཅི་སེམས་ལྷུང་བཟེད་ན་ཤོ་གམ་གཞལ་དགོས་པའི་རྫས་མེད་དོ། །དེས་སྨྲས་པ། འཕགས་པ་སྡིག་པ་ཞི་བར་གྱུར་ཅིག་།བདག་དེ་སྙམ་མི་སེམས་ཀྱི་འདི་ལྟར་བཅའ་བ་དང་བཟའ་བ་བསོད་པ་ཅུང་ཟད་མཆིས་ན། དེ་ཁྱོད་ལས་བསླངས་ཏེ
5.86a
འཚལ་སྙམ་མོ། །ཉེ་དགས་སྨྲས་པ། བཞིན་བཟངས་ཅི་ཆུ་ཀླུང་རྒྱུན་ལས་བཟློག་ཕྱོགས་སུ་འབབ་བམ། ཁྱོད་ཀྱིས་ཁོ་བོ་ལ་སྦྱིན་པར་བྱ་བ་ཡིན་གྱི་ཁོ་བོས་ཁྱོད་ལ་སྦྱིན་པར་བྱ་བ་མ་ཡིན་ནོ། །དེས་སྨྲས་པ། འཕགས་པ་བཞད་གད་བགྱིའོ། །ཚུར་སྤྱོན་ཁྱིམ་དུ་བཞུད་དོ། །ཤོ་གམ་པ་དེས་ཉེ་དགའ་ཁྱིམ་དུ་ཁྲིད་ནས་བཅའ་བ་དང་བཟའ་བ་བསོད་པས་ལྷུང་བཟེད་བཀང་སྟེ་བྱིན་ནས། སྨྲས་པ། འཕགས་པ་བདག་ལ་བཀའ་སྩོལ་ཅིག་དང ། བཀའ་བཞིན་བགྱིད་ཅིང་འཕགས་པས་བཀའ་སྩལ་པ་ཐམས་ཅད་བསྒྲུབ་པར་བགྱིའོ། ཉེ་དགས་བཞིན་བཟངས་ཁྱོད་ནད་མེད་པར་གྱུར་ཅིག་ཅེས་སྨྲས་ཏེ་སོང་ངོ ། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཆོས་བསྟན་པར་བྱ། རྒོལ་བ་དག་ཚར་གཅད་པར་བྱ། རང་གི་གྲགས་པ་བསྒྲག་པར་བྱ། རྙེད་པ་ཡང་བསྒྲུབ་པར་བྱའོ་ཞེས་ཡང་ན་ནི་སྒོ་དྲུང་དུ་གཙུག་ལག་ཁང་ནོད་པར་བྱེད། ཡང་ན་ནི་ལམ་དང་ཉེ་བར་གཙུག་ལག་ཁང་ནོད་པར་བྱེད་པས། ཉེ་དགས་ལམ་དང་ཉེ་བར་གཙུག་ལག་ཁང་མནོས་ནས་དེ་དེའི་སྟེང་དུ་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བའི་སྦྱོར་བ་ལ་རྗེས་སུ་བརྩོན་པར་གནས་སོ། །ཇི་ཙམ་དུས་གཞན་ཞིག་ན་ཚོང་པ་ཤོ་གམ་འདྲལ་བ་དག་གཙུག་ལག་ཁང་དང་ཧ་ཅང་ཐག་མི་རིང་བ་ནས་འདོང་བ་དང ། ཉེ་དགའ་སྒྲ་ལ་མཁས་པས་དེས་དེ་དག་གི་རྟིང་སྒྲ་ཐོས་ནས་ཡོངས་སུ་གཡོ་བ་དང་བཅས་བཞིན་དུ་སྨྲས་པ། འདོང་བ་འདི་དག་སུ་ཡིན། ཚོང་པ་དེ་དག་ཅང་མི་སྨྲ་བར་སྡོད་པ་དང ། ཉེ་དགའ་མྱུར་བ་མྱུར་བར་གཙུག་ལག་ཁང་གི་སྟེང་ནས་བབས་ཏེ། ཚོང་པ་དེ་དག་གི་དྲུང་དུ་སོང་ནས་སྨྲས་པ། ཤེས་ལྡན་དག་མཚན་མོ་ནོར་དང་བཅས་པ་ཁོ་ནར་འདོང་བ་འདི་དག་སུ་ཡིན། ཚོང་པ་དེ་དག་གིས་སྨྲས་པ། འཕགས་པ་བདག་ཅག་ནི་ཚོང་པ་ཤོ་གམ་འདྲལ་བ་དག་ལགས་སོ། །ཉེ་དགས་སྨྲས་པ། བཀྲེན་པ་དག་ཁོ་བོ་ཅག་ལ་རྒྱལ་པོ་ཡོ་བྱད་ཐམས་ཅད་ཀྱིས་ཉེ་བར་གནས་པ་ཡིན་ཏེ། གནས་བརྟན་ཀུན་ཤེས་ཀཽཎྜི་ནྱ་ཡང་དེ་ལ་འདི་སྐད་ཅེས་ཇི་ནས་ཀྱང་རྒྱལ་པོ་འདིའི་ལོངས
5.86b
སྤྱོད་མ་བྱུང་བ་དག་ནི་འབྱུང་བར་གྱུར་ཅིག་།བྱུང་བ་དག་ནི་རྒྱས་པ་དང ། འཕེལ་བ་དང ། ཡངས་པར་གྱུར་ཅིག་ཅེས་ཡོན་བཤད་པ་བྱེད་པ་ཡིན་ན། ཁྱེད་ཅག་དེ་དབང་བའི་ཤོ་གམ་དྲལ་ཏེ་འདོང་ན་ཁོ་བོ་ཅག་གིས་ཅིའི་ཕྱིར་ཡལ་བར་དོར་བར་བྱ། དེང་ཁྱེད་ལ་གནོད་པ་བྱེད་དུ་གཞུག་གོ། །དེ་དག་སྐྲག་ནས་སྨྲས་པ། འཕགས་པ་ཁྱེད་ནི་ཐུགས་རྗེ་ཅན་དག་ལགས་པས་བཟོད་པར་མཛོད་ཅིག་དང་བདག་ཅག་གིས་འཕགས་པ་ལ་མཁོ་བ་དག་བགྱིའོ། །ཉེ་དགས་སྨྲས་པ། ཅི་ཞིག་བྱ་བཅའ་བའི་ཆ་རིན་དག་དབུལ་ལོ། །འབུལ་ལམ། འབུལ་ལོ་དེང་ཤིག་།དེ་དག་དེ་ནས་དོང་སྟེ་ཉེ་དགའི་དྲུང་ནས་བྲལ་བ་དང ། འདི་སྐད་ཅེས་ཡུ་བུ་ཅག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཡང་ཤོ་གམ་མི་འཇལ་ན། དགེ་སྦྱོང་མགོ་རེག་ཉེ་དགའ་ལ་འཇལ་བ་ལྟ་སྨོས་ཀྱང་ཅི་དགོས་ཤེས་ཀུན་དུ་རྗོད་པར་བྱེད་དོ། །ཉེ་དགའ་ཡང་མྱུར་བ་མྱུར་བར་ཟས་ཀྱི་བྱ་བ་བྱས་ཏེ་སྒོ་དྲུང་ན་ལྷུང་བཟེད་འཁྲུ་ཞིང་ཕྱོགས་བཞིར་རྣམ་པར་ལྟ་བར་བྱེད་དོ། །གཞོན་ནུ་ཞིག་གིས་ཉེ་དགའ་ཕྱོགས་བཞིར་རྣམ་པར་ལྟ་བར་བྱེད་པ་མཐོང་ནས། དེས་སྨྲས་པ། གནས་བརྟན་ཅིའི་སླད་དུ་ཕན་ཚུན་རྣམ་པར་གཟིགས་པར་མཛད། ཉེ་དགས་སྨྲས་པ། ཚེ་དང་ལྡན་པ་ཁོ་བོའི་མཛའ་བཤེས་ཚོང་པ་དག་ཟོང་ཐོགས་ཏེ་མཉན་ཡོད་དུ་ཞུགས་པ་དེ་དག་ལྟའོ། །གཞོན་ནུ་དེས་སྨྲས་པ། གནས་བརྟན་ཁྱོད་ཇི་ཙམ་ན་ཟས་ཀྱི་བྱ་བ་མཛད་པ་དེ་ཙམ་ན་དེ་དག་དོང་ལགས་སོ། །ཉེ་དགའ་མི་བཟོད་པ་སྐྱེས་ནས་ཁོ་བོ་ཡང་དེ་དག་གིས་བསླུས་ཏེ་སྤུ་གྲི་ལ་ཁུ་ཚུར་གྱིས་བརྡེགས་ཤིང་རང་ཐགས་ཀྱི་རྡོ་ལ་རྩཝས་ཕུག་གིས་ཁོ་བོས་དེ་དག་ལ་གང་བྱ་བ་ཤེས་སོ་སྙམ་དུ་སེམས་སོ། །ཇི་ཙམ་ན་ཚོང་པ་དེ་དག་ཡང་དེ་ཁོ་ན་བཞིན་དུ་འོངས་པ་དང ། ཉེ་དགས་ཀྱང་དེ་ཁོ་ན་བཞིན་ལན་གཉིས་སུ་བཟུང་སྟེ། ཁྱེད་ཀྱིས་ཁོ་བོ་ཡང་བསླུས་སོ་ཞེས་སྨྲས་པ་དང ། ཚོང་པ་དེ་དག་གིས་སྨྲས་པ། འཕགས་པ་བདག་ཅག་ལ་བགྱི་བ་ཅུང་ཞིག་བྱུང་བས་དེས་ན་བདག་ཅག་མ་ཞུས་པར་མཆིས་ཏེ། ད་ནི་དེ་དང་གཞན་ཡང་ཐམས་ཅད་འབུལ་ལོ། །འབུལ་ལམ།
5.87a
འབུལ་ལོ། །དེང་ཤིག་དེ་དག་དེ་ནས་དོང་སྟེ་ཉེ་དགའི་དྲུང་ནས་བྲལ་བ་དང ། འདི་སྐད་ཅེས་ཡུ་བུ་ཅག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཡང་ཤོ་གམ་མི་འཇལ་ན། དགེ་སྦྱོང་མགོ་རེག་ཉེ་དགའ་ལ་འཇལ་བ་ལྟ་སྨོས་ཀྱང་ཅི་དགོས་ཞེས་ཀུན་དུ་རྗོད་པར་བྱེད་དོ། །ཉེ་དགས་ཚོང་པ་དེ་དག་གིས་བདག་ལ་མང་པོ་ཞིག་ཁས་བླངས་པས་ཡང་དེ་ཁོ་ན་བཞིན་དུ་མི་ལྟ་བར་སོང་ན་མི་རུང་གིས་མཚན་མ་དང་བཅས་པ་ཁོ་ནར་ལངས་ཏེ། དེ་དག་གི་དྲུང་དུ་འགྲོ་བར་བྱའོ། །སྙམ་དུ་བསམས་ནས་དེས་སྣམ་སྦྱར་བགོས་ཏེ་སྲང་དུ་སོང་བ་དང ། ཚོང་པ་དེ་དག་ཀྱང་ཟོང་བཀྲམ་སྟེ་འཚོང་བར་བྱེད་ནས་ཉེ་དགས་དེ་དག་ལ་མཚན་མ་བསྟན་པར་བརྩམས་པ་དང ། དེ་དག་གིས་སྨྲས་པ། འཕགས་པ་ཇེ་ཟོང་བསྒྱུར་བར་བགྱིས་བཞུད་ཅིག་དང་བདག་ཅག་མཆིས་ཏེ་དབུལ་བར་བགྱིའོ། །ཉེ་དགས་སྨྲས་པ། གལ་ཏེ་བདེན་ནའོ། །དེ་དག་གིས་སྨྲས་པ། འཕགས་པ་ཁྱོད་ནི་འདའ་བར་བགྱི་བ་མ་ལགས་ཀྱིས་བཞུད་ཅིག་།ཉེ་དགའ་སོང་སྟེ་མྱུར་བ་མྱུར་བར་གཙུག་ལག་ཁང་དུ་སོང་ནས་ཟས་ཀྱི་བྱ་བ་བྱས་ཏེ། ལྷུང་བཟེད་འཁྲུ་ཞིང་ཕྱོགས་སུ་རྣམ་པར་ལྟ་བར་བྱེད་དོ། །དེ་བཞིན་དུ་གཞོན་ནུ་ཞིག་གིས་སྨྲས་པ། གནས་བརྟན་ཅིའི་སླད་དུ་ཕན་ཚུན་རྣམ་པར་གཟིགས་པར་མཛད། ཉེ་དགས་སྨྲས་པ། ཚེ་དང་ལྡན་པ་ཁོ་བོའི་མཛའ་བཤེས་ཚོང་པ་དག་ཟོང་ཐོགས་ཏེ་མཉན་ཡོད་དུ་ཞུགས་པ་དེ་དག་ལྟའོ། །གཞོན་ནུ་དེས་སྨྲས་པ། གནས་བརྟན་ཁྱོད་ཇི་ཙམ་ན་ཟས་ཀྱི་བྱ་བ་མཛད་པ་དེ་ཙམ་ན་དེ་དག་དོང་ལགས་སོ། །ཉེ་དགའ་རྒྱ་ཆེར་མི་བཟོད་པ་སྐྱེས་ནས་མགོ་བསིགས་ཏེ་ཁོ་བོ་དེ་དག་གིས་ལན་གཉིས་སུ་བསླུས་ཀྱིས། ད་ནི་གལ་ཏེ་དེ་དག་མཐོང་ན་གང་གིས་ཕྱིན་ཆད་ཚོང་པར་མི་འགྱུར་བ་དེ་འདྲ་བའི་ཁྲིམས་འཆར་གཞུག་གོ་སྙམ་དུ་སེམས་སོ། །ཇི་ཙམ་ན་ཡང་ཚོང་པ་དེ་དག་དེ་ཁོ་ན་བཞིན་དུ་འོངས་པ་དང ། ཉེ་དགས་སྨྲས་པ་ཤེས་ལྡན་དག་ཁྱེད་ཀྱིས་ཡང་དང་ཡང་དུ་ཁོ་བོ་བསླུས་པས། ད་ནི་གང་བྱ་བ་དེ་ལྟོས་ཤིག་།དེ་དག་གིས་སྨྲས་པ། འཕགས་པ་བཟོད་པར་མཛོད་ཅིག་།བདག་ཅག
5.87b
ཚོང་པ་དག་ནི་རྟག་ཏུ་མཇལ་ཚོངས་ཀྱིས་སེམས་གཡེངས་པ་ལགས་པས་ད་ནི་སྔར་མཆིད་ཀྱིས་འཚལ་བ་གང་ལགས་པ་དང ། སླད་ཀྱི་མཆིད་ཀྱིས་འཚལ་བ་གང་ལགས་པ་དེ་དང་གཞན་ཐམས་ཅད་ཀྱང་དབུལ་བར་བགྱིའོ། །ཉེ་དགས་གལ་ཏེ་འདི་དག་ལ་གཟུ་ལུམས་སུ་འཛུད་པར་བྱས་ན་ཤེས་པར་འགྱུར་གྱིས་འཐུན་པར་བརྗོད་པར་བྱའོ་སྙམ་དུ་ཤེས་ཤིང་རིག་ནས་སྨྲས་པ། བཞིན་བཟངས་དག་ངེས་པར་འབུལ་ལམ། འཕགས་པ་ངེས་པར་འབུལ་ལོ། །གལ་ཏེ་དེ་ལྟ་ན་ཁྱེད་ཅག་ལ་ཉེས་དམིགས་འགའ་ཞིག་བྱུང་བར་གྱུར་ཏམ། ཁོ་བོ་ཅག་ལ་ཡང་གཙུག་ལག་ཁང་གི་དྲུང་དུ་ཚོང་པ་དག་ཚོང་པ་མ་ཡིན་པར་རྣམ་པར་གཞག་པར་གྱུར་ན་མ་ལེགས་ཀྱིས་རེ་ཤིག་ལམ་ལྟ་བ་དེ་སྲིད་ཀྱི་བར་དུ་སྡོད་ཅིག་།དེ་དག་སྡོད་པ་དང་ཉེ་དགའ་དེ་ན་ཤོ་གམ་པ་དག་གི་དྲུང་དུ་སོང་ངོ ། །དེའི་ཚེ་ན་ཤོ་གམ་པ་དག་ཤེས་ལྡན་དག་ཚོང་པ་ཤོ་གམ་འདྲལ་བ་དག་གིས་ཤོ་གམ་དྲལ་ཅིང་དྲལ་ཅིང་སྒེའུ་ཆུང་ནས་འཇུག་པས་ལོ་ཏང་འདུ་བ་མི་འབྱུང་ལ། དུས་ལ་ནི་བབ། རྒྱལ་པོ་ནི་གཏུམ་པས་བདག་ཅག་བུ་དང ། ཆུང་མ་དང ། རྩ་ལག་དང་བཅས་པ་བཙོན་རར་བཅུག་སྟེ་བསད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ་ཞེས་ཟེར་ཞིང་སེམས་ཁོངས་སུ་ཆུད་ཅིང་འདུག་གོ། །དེ་དག་དེ་ལྟར་སེམས་ཁོངས་སུ་ཆུད་ཅིང་འདུག་པ་ན་ཉེ་དགས་སྨྲས་པ། ཁྱེད་ཅག་ཅིའི་ཕྱིར། འདི་ལྟར་སེམས་ཁོངས་སུ་ཆུད་ཅིང་འདུག་།འཕགས་པ་ཇི་ལྟར་སེམས་ཁོངས་སུ་ཆུད་ཅིང་མི་མཆི། ཚོང་པ་ཤོ་གམ་འདྲལ་བ་དག་གིས་ཤོ་གམ་དྲལ་ཅིང་སྒེའུ་ཆུང་ནས་འཇུག་པས་ལོ་ཏང་འདུ་བ་མི་འབྱུང་ལ་དུས་ལ་ནི་བབ། རྒྱལ་པོ་ནི་གཏུམ་པས་བདག་ཅག་བུ་དང ། ཆུང་མ་དང ། རྩ་ལག་དག་དང་བཅས་པ་བཙོན་རར་བཅུག་སྟེ་བསད་པར་འགྱུར་བ་གང་ལགས་པ། དེ་ལྟ་བུའི་གནས་མཆིས་སོ། །བཀྲེན་པ་དག་ཁྱེད་ཅག་སུས་ཤོ་གམ་གྱི་གནས་སུ་བཞག་།ཁྱེད་ཅག་ནི་ལྕག་རྒོད་མང་པོས་བྲིམས་ལས་སྐྱེད་པ་འམ། ཤིང་འཆེག་ཏུ་གཞུག་པར་བྱ་བ་ཡིན་ནོ། །ཅིའི་ཕྱིར་ཁྱེད
5.88a
ཀྱིས་ཚོང་པ་ཤོ་གམ་འདྲལ་བ་གཅིག་ཙམ་ཡང་ནོར་ཐམས་ཅད་དང་བྲལ་བར་མི་བྱེད། འཕགས་པ་མཉན་ཡོད་ནི་ཀུན་ཤེས་པའི་ཤོ་གམ་ཅན་ལགས་ཀྱི་ཉེས་པ་བྱེད་པའི་ཤོ་གམ་ཅན་མ་ལགས་པས་ཇི་ལྟར་ནོར་ཐམས་ཅད་དང་བྲལ་བར་བགྱི། བཀྲེན་པ་དག་མཉན་ཡོད་ནི་ཉེས་པ་བྱེད་པའི་ཤོ་གམ་ཅན་ཡིན་གྱི་ཀུན་ཤེས་པའི་ཤོ་གམ་ཅན་མ་ཡིན་ནོ། །འཕགས་པ་བདག་ཅག་གིས་ཡུན་དེ་སྲིད་དུ་ཤོ་གམ་བསྒྲུབས་ན་ལན་འགའ་ཡང་ཉེས་པ་བགྱིད་པའི་ཤོ་གམ་ཅན་མ་ལགས་ན། ད་ཇི་ལྟར་ཉེས་པ་བགྱིད་པའི་ཤོ་གམ་ཅན་དུ་འགྱུར། བཀྲེན་པ་དག་སྡོད་ཅིག་དང་ང་སོང་ལ་ཚོང་པ་ཤོ་གམ་འདྲལ་བ་དག་གཏང་བར་བྱས། དེ་དག་ཁྱེད་ཀྱིས་ཟུང་ལ་ནོར་ཐམས་ཅད་དང་བྲལ་བར་གྱིས་ཤིག་།གལ་ཏེ་མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་གྱི་ཉེས་པ་བྱེད་པའི་ཤོ་གམ་ཅན་ནི་མ་ཡིན་ནོ་ཞེས་ཟེར་ན། མཉན་ཡོད་ནི་ཉེས་པ་བྱེད་པའི་ཤོ་གམ་ཅན་ཡིན་གྱི་ཀུན་ཤེས་པའི་ཤོ་གམ་ཅན་ནི་མ་ཡིན་ནོ་ཞེས་བརྗོད་པར་བྱའོ། །གལ་ཏེ་ཡུན་དེ་སྲིད་དུ་ཁོ་བོ་ཅག་ཚོང་པའི་ཐ་སྙད་བྱེད་པ་ན། ལན་འགའ་ཡང་མཉན་ཡོད་ཉེས་པ་བྱེད་པའི་ཤོ་གམ་ཅན་མ་ཡིན་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ། ཚུར་ཤོག་ཚོང་པའི་ཚོགས་ཀྱི་ནང་དུ་འདོང་ངོ ། །ཞེས་ཟེར་ན་རྒྱལ་པོའི་ཕོ་བྲང་དུ་བཀྲི་བར་བྱའོ། །གལ་ཏེ་རྒྱལ་པོ་ན་རེ་ཤེས་ལྡན་དག་ཡུན་དེ་སྲིད་དུ་ངའི་རྒྱལ་སྲིད་བྱེད་དུ་བཅུག་ན། ལན་འགའ་ཡང་ངས་མཉན་ཡོད་ཉེས་པ་བྱེད་པའི་ཤོ་གམ་ཅན་དུ་མ་ཐོས་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ་ཞེས་ཟེར་ན། རྒྱལ་པོ་ཨ་ར་ད་ཚངས་བྱིན་ཚོང་པའི་ཚོགས་དང་བཅས་པས་གང་བསྐྱེད་མོས་ཚལ་ལམ། འདུན་ས་འམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་ལ་དེ་ལ་ནི་ཀུན་ཤེས་པའི་ཤོ་གམ་ཅན་ཡིན་ལ། གང་བསྐྱེད་མོས་ཚལ་ལམ། འདུན་ས་འམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་དེ་ལ་ཉེས་པ་བྱེད་པའི་ཤོ་གམ་ཅན་ཡིན་ནོ། །ཞེས་ཁྲིམས་སུ་བྱ་བ་རྣམ
5.88b
པར་གཞག་པ་གང་ལགས་པ་དེ་ལྷ་ལ་བརྩན་ནམ་ཞེས་བརྗོད་པར་བྱའོ། །གལ་ཏེ་བརྩན་ནོ་ཞེས་ཟེར་ན། ལྷ་མཛོད་ཆེ་གེ་མོ་ཞིག་ན་སྒྲོམ་མཆིས་པ་དེ་ན་ཟངས་མའི་གླེགས་བུ་ལ་ཡི་གེ་བྲིས་པ་མཆིས་པ་དེ་ལྷས་གཟིགས་སུ་གསོལ་ཞེས་བརྗོད་པར་བྱའོ། །ཇི་ཙམ་ན་ཤོ་གམ་པ་དེ་དག་གིས་ཚོང་པ་ཤོ་གམ་འདྲལ་བ་དེ་དག་བཟུང་སྟེ་ནོར་ཐམས་ཅད་དང་བྲལ་བར་བྱས་པ་ན་ཚོང་པ་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་ཁོ་བོ་ཅག་ནོར་ཐམས་ཅད་དང་བྲལ་བར་བྱེད། མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་གྱི་ཉེས་པ་བྱེད་པའི་ཤོ་གམ་ཅན་ནི་མ་ཡིན་ནོ། །ཤོ་གམ་པ་དག་གིས་སྨྲས་པ། མཉན་ཡོད་ནི་ཉེས་པ་བྱེད་པའི་ཤོ་གམ་ཅན་ཡིན་གྱི་ཀུན་ཤེས་པའི་ཤོ་གམ་ཅན་ནི་མ་ཡིན་ནོ། །ཚོང་པ་དག་གིས་སྨྲས་པ། ཡུན་དེ་སྲིད་དུ་ཁོ་བོ་ཅག་ཚོང་པའི་ཐ་སྙད་བྱེད་བྱེད་ན་ལན་འགའ་ཡང་མཉན་ཡོད་ཉེས་པ་བྱེད་པའི་ཤོ་གམ་ཅན་མ་ཡིན་ན་ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ། ཚུར་ཤོག་ཚོང་པའི་ཚོགས་ཀྱི་ནང་དུ་འདོང་ངོ ། །ཤོ་གམ་པ་དག་གིས་སྨྲས་པ། ཚོང་པའི་ཚོགས་ཀྱི་ནང་དུ་མི་འགྲོས་ཚུར་ཤོག་།རྒྱལ་པོའི་ཕོ་བྲང་དུ་འདོང་ངོ་ཞེས་དེ་དག་འཁང་བཞིན་དུ་མཐུས་རྒྱལ་པོའི་ཕོ་བྲང་དུ་ཁྲིད་པ་དང ། དེ་དག་གིས་ཚོང་པའི་ཚོགས་ལ་ཤེས་ལྡན་དག་ཁོ་བོ་ཅག་ཤོ་གམ་པ་དག་གིས་ནོར་ཐམས་ཅད་དང་བྲལ་བར་བྱས་ཀྱིས་གྲོགས་གྱིས་ཤིག་ཅེས་ར་མདའ་ཟློག་པའི་སྐད་ཕྱུང་ངོ ། །ཚོང་པའི་ཚོགས་ཀྱང་དེ་དག་དང་ལྷན་ཅིག་རྒྱལ་པོའི་སྤྱན་སྔར་སོང་ནས། ལྷ་ཁྱོད་ཀྱི་རྒྱལ་སྲིད་ལ་ཤོ་གམ་པ་དག་གིས་ཚོང་པ་གློ་བུར་དུ་ལྷགས་པ་དག་ནོར་ཐམས་ཅད་བྲལ་བར་བགྱིས་ཀྱིས་ཡོངས་སུ་བསྐྱབ་ཏུ་གསོལ་ཞེས་སྨྲས་སོ། །རྒྱལ་པོས་བློན་པོ་རྣམས་ལ་ཤེས་ལྡན་དག་ཤོ་གམ་པ་དག་ཁུག་ཤིག་ཅེས་བསྒོ་ནས་བློན་པོ་རྣམས་ཀྱིས་ཤོ་གམ་པ་དག་བཀུག་པ་དང ། རྒྱལ་པོས་སྨྲས་པ། ཤེས་ལྡན་དག་ཅིའི་ཕྱིར་ཁྱེད་ཀྱིས་ཚོང་པ་དག་ནོར་ཐམས་ཅད་དང་བྲལ་བར་བྱས། ཤོ་གམ་པ་དག་གིས་སྨྲས་པ། ལྷ་
5.89a
ཚོང་པ་འདི་དག་ནི་ཤོ་གམ་འདྲལ་བ་ལགས་ལ། མཉན་ཡོད་ནི་ཉེས་པ་བགྱིད་པའི་ཤོ་གམ་ཅན་ལགས་པས་དེའི་སླད་དུ་བདག་ཅག་གིས་འདི་དག་ནོར་ཐམས་ཅད་དང་བྲལ་བར་བགྱིས་སོ། །རྒྱལ་པོས་སྨྲས་པ། ཤེས་ལྡན་དག་ཡུན་དེ་སྲིད་དུ་ངའི་རྒྱལ་སྲིད་བྱེད་དུ་བཅུག་ན་ལན་འགའ་ཡང་ངས་མཉན་ཡོད་ཉེས་པ་བྱེད་པའི་ཤོ་གམ་ཅན་དུ་མ་ཐོས་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ། ཤོ་གམ་ཡང་དག་པ་ལོང་ལ་ཐོང་ཤིག་།ཤོ་གམ་པ་དག་གིས་སྨྲས་པ། རྒྱལ་པོ་ཨ་ར་ད་ཚངས་བྱིན་ཚོང་པའི་ཚོགས་དང་བཅས་པས་གང་བསྐྱེད་མོས་ཚལ་ལམ། འདུན་ས་འམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་དེ་ལ་ནི་ཀུན་ཤེས་པའི་ཤོ་གམ་ཅན་ཡིན་ལ། གང་བསྐྱེད་མོས་ཚལ་ལམ། འདུན་ས་འམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་དེ་ལ་ནི་གནོད་པ་བྱེད་པའི་ཤོ་གམ་ཅན་ཡིན་ནོ་ཞེས་ཁྲིམས་སུ་བྱ་བ་རྣམ་པར་གཞག་པ་གང་ལགས་པ་དེ་ལྷ་ལ་བརྩན་ནམ། རྒྱལ་པོས་སྨྲས་པ། ཤེས་ལྡན་དག་ངའི་ཡབ་ཀྱིས་མཛད་པ་གང་ཡིན་པ་དེ་ནི་བརྒྱ་བྱིན་གྱིས་མཛད་པ། ཚངས་པས་མཛད་པ་ཡིན་ཏེ་མཆོག་ཏུ་བརྩན་ནོ། །ཤོ་གམ་པ་དག་གིས་སྨྲས་པ། ལྷ་མཛོད་ཆེ་གེ་མོ་ཞིག་ན་སྒྲོམ་མཆིས་པ་དེ་ན་ཟངས་མའི་གླེགས་བུ་ལ་ཡི་གེ་བྲིས་པ་མཆིས་པ་དེ་ལྷས་གཟིགས་སུ་གསོལ། རྒྱལ་པོས་གཏོགས་པར་བྱས་པ་དག་ལ་ཟངས་མའི་གླེགས་བུ་དེ་འོན་ཅིག་ཅེས་བསྒོ་ནས་བླངས་ཏེ་བླགས་པ་དང ། རྒྱལ་པོས་ཕའི་བསྔགས་པ་ཐོས་ནས་མཆི་མ་དང་བཅས་པའི་སྐད་ཀྱིས་སྨྲས་པ། ཤེས་ལྡན་དག་ངའི་ཡབ་ཀྱིས་མཛད་པ་གང་ཡིན་པ་དེ་ནི་བརྒྱ་བྱིན་གྱིས་མཛད་པ། ཚངས་པས་མཛད་པ་ཡིན་ཏེ། གལ་ཏེ་ནོར་ཐམས་ཅད་དང་བྲལ་བར་བྱས་ན་ལེགས་སོ། །ཚོང་པ་དེ་དག་རེ་བ་མེད་པར་གྱུར་ནས་མཆི་མ་དང་བཅས་པའི་སྐད་ཀྱིས་དོང་ནས་དེ་དག་གིས་ཤོ་གམ་པ་དེ་དག་ལ་སྨྲས་པ། ཤེས་ལྡན་དག་ཁྱེད་ལ་སུས་སྦྲན་པ་སྨྲོས་ཤིག་།ཤོ་གམ་པ་དག་གིས་སྨྲས་པ། ཁོ་བོ་ཅག་ལ་སུ་ཞིག་སྦྲོན་པར་འགྱུར། ཁོ་བོ་ཅག་ཉིད
5.89b
ཀྱིས་ཤེས་མོད་ཀྱི་འོན་ཀྱང་ཁོ་བོ་ཅག་ཁྱེད་ལ་སྙིང་རྗེ་བས་ཡལ་བར་བོར་རོ། །ཁྱེད་ཅག་ཧ་ཅང་བྱ་བ་བྱེད་པར་བརྩམས་པས་དེས་ན་ཁོ་བོ་ཅག་མི་བཟོད་པ་སྐྱེས་སོ། །ཚོང་པ་དག་གིས་སྨྲས་པ། ཁྱེད་ལ་སྙིང་རྗེ་ག་ལ་ཡོད། སྨྲོས་ཤིག་དང་ཁོ་བོ་ཅག་ཁྱེད་དང་མཛའ་བོར་འགྱུར་རོ། །ཤོ་གམ་པ་དག་གིས་སྨྲས་པ། འཕགས་པ་དྲུག་སྡེ་དག་གིས་སོ། །ཚོང་པ་དེ་དག་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ནོ། །བྲམ་ཟེའི་ཚུལ་ནི་ཚིག་པ་ཡིན་ཏེ། གང་ལ་དེ་ལྟར་གཞན་གྱི་འཚོ་བ་ལ་ཡང་གནོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གཞན་གྱི་འཚོ་བ་ལ་གནོད་པར་མི་བྱའོ། །གནོད་པ་བྱེད་ན་འགལ་ཚབས་ཅན་དུ་འགྱུར་རོ། ་་་་་་་་།སྡོམ་ལ། རྐང་མེད་དང་ནི་རྐང་གཉིས་དང ། །རྐང་བཞི་པ་དང་རྐང་མངས་ཀྱི། །སྡེ་ཚན་ཡང་དག་བསྡུས་པ་ཡིན། །རྐང་མེད་ཅེས་བྱ་བ་ནི་སྦྲུལ་དང ། པད་པ་དང ། སྲོག་ཆགས་དྲིའུ་སྲིན་དག་གོ། །དེ་དག་ནི་གསུམ་གྱིས་སོགས་པར་བྱེད་དེ་སྦྲུལ་ཁས་སྡིགས་པ་དག་དང ། རྒྱལ་པོའི་སྨན་པ་དག་དང ། ཁ་ལུངས་པའི་ཡ་བ་ན་དག་གིས་སོ། །ཇི་ལྟར་སྦྲུལ་ཁས་སྡིགས་པ་དག་གིས་ཞེ་ན། འདི་ལྟར་སྦྲུལ་ཁས་སྡིགས་པ་དག་སྦྲུལ་ལ་བརྟེན་ཏེ་འཚོ་བར་བྱེད་པ་སྟེ། དེ་ལྟར་སྦྲུལ་ཁས་སྡིགས་པ་དག་གིས་སོ། །ཇི་ལྟར་རྒྱལ་པོའི་སྨན་པ་དག་གིས་ཤེས་ན། འདི་ལྟར་རྒྱལ་པོའི་སྨན་པ་དག་པད་པ་ལ་བརྟེན་ཏེ་འཚོ་བར་བྱེད་པ་སྟེ། དེ་ལྟར་རྒྱལ་པོའི་སྨན་པ་དག་གིས་སོ། །ཇི་ལྟར་ཁ་ལུངས་པའི་ཡ་བ་ན་དག་གིས་ཤེ་ན། འདི་ལྟར་ཁ་ལུངས་པའི་ཡ་བ་ན་དག་སྲོག་ཆགས་དྲིའུ་སྲིན་དག་བག་བྱེ་སྩོན་པར་བྱེད། ས་འབྱིན་པར་བྱེད་ཅིང་སླ་ང་ལ་རྔོད་པར་བྱེད་དེ། དེ་དག་དེ་འཆའ་ཞིང་མྱོས་པ་འགྱུར་བའི་བཏུང་བ་རྣམ་པ་དུ་མ་འཐུང་བར་བྱེད་དེ། དེ་ལྟར་ཁ་ལུངས་པའི་ཡ་བ་ན་དག་གིས་སོ། །དགེ་སློང་གིས་སྲོག་ཆགས་རྐང་མེད་དག་རྐུ་བར་བྱེད་ན། སྲོག་ཆགས
5.90a
རྐང་མེད་དག་གི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །རྐང་གཉིས་ཤེས་བྱ་བ་ནི་མི་རྣམས་དང ། བྱ་ཁ་ཅིག་གོ་མི་རྣམས་ནི་རྣམ་པ་གསུམ་གྱིས་རྐུ་སྟེ། ཡུལ་ཕྱོགས་དང ། བརྡའ་དང ། མཚན་མས་སོ། །ཇི་ལྟར་ཡུལ་ཕྱོགས་ཀྱིས་ཤེ་ན། གང་གི་ཚེ་ན་ཁོ་བོ་བསྐྱེད་མོས་ཚལ་ལམ། འདུན་ས་འམ། ལྷའི་གནས་ཆེ་གེ་མོ་ཞིག་ཏུ་མཐོང་བ་དེའི་ཚེ་ཁྱོད་ཀྱིས་བྱ་བ་དེ་བྱས་པར་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་ཡུལ་ཕྱོགས་ཀྱིས་སོ། །ཇི་ལྟར་བརྡས་ཤེ་ན། གང་གི་ཚེ་ཁོ་སྔ་དྲོ་འམ། གུང་ཚིགས་སམ། ཕྱེམ་བྲེད་མཐོང་བ་དེའི་ཚེ་ཁྱོད་ཀྱིས་བྱ་བ་དེ་བྱས་པར་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་བརྡས་སོ། །ཇི་ལྟར་མཚན་མས་ཤེ་ན། གང་གི་ཚེ་ཁོ་བོ་སྐྲ་དང་ཁ་སྤུ་བྲེགས་ནས་རིང་པོར་མ་ལོན་པ་འམ། སྣམ་སྦྱར་དམར་སེར་རམ། ཞ་ཉེའི་དབྱར་འདབ་ཀྱིས་གླན་པའི་ལྷུང་བཟེད་དམ། ཁར་བ་སྦུབས་ཅན་ནམ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཐོགས་པར་མཐོང་བ་དེའི་ཚེ་ཁྱོད་ཀྱིས་བྱ་བ་དེ་བྱས་པར་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་མཚན་མས་སོ། །དགེ་སློང་གིས་མི་རྐུ་བར་བྱེད་ན་མིའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །བྱ་ནི་རྣམ་པ་གཉིས་ཀྱིས་རྐུ་སྟེ། སྤར་བ་དང ། མངོན་སུམ་དུ་བབས་པས་སོ། །ཇི་ལྟར་སྤར་བས་ཞེ་ན། འདི་ལྟར་དགེ་སློང་གིས་བྱ་སྤར་ཏེ་རྐུ་བར་བྱེད་ན་བྱའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་སྤར་བས་སོ། །ཇི་ལྟར་མངོན་སུམ་དུ་བབས་པས་ཤེ་ན། འདི་ལྟར་བྱ་བ་འམ། བྱ་བའི་སློབ་མ་མཁས་པ་ཞིག་གིས་བྱ་དྲུངས་དབྱུང་བའི་ཕྱིར་དང ། ཆུད་གཟན་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར
5.90b
ནགས་མེས་བཏང་བར་གྱུར་ཅིང་དེ་ན་བྱ་ཁ་ཅིག་དུ་བས་ཁྱབ་ཅིང་འཁྲུགས་པར་གྱུར་ནས། དགེ་སློང་རྣམས་ཀྱི་འཆག་ས་དག་ཏུ་བབས་སམ། དག་ར་དག་གམ། སྒོ་ཁང་དག་ཏུ་བབས་པར་གྱུར་པ་ན། དགེ་སློང་གིས་དེ་ལྟར་བབས་པའི་བྱ་རྐུ་བར་བྱེད་ན། བྱའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་མངོན་སུམ་དུ་བབས་པས་སོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་པ། རྐང་བཞི་པ་ཞེས་བྱ་བ་ནི་གླང་པོ་ཆེ་དང ། རྟ་དང ། རྔ་མོ་དང ། བ་ལང་དང ། བོང་བུ་དང ། ར་དང ། རི་དགས་དང ། མ་ཧེ་དང ། ཕག་དག་གོ། །དེ་དག་ནི་རྣམ་པ་གཉིས་ཀྱིས་རྐུ་སྟེ། ཁྱུ་ནས་དགར་བ་དང ། བརྟོད་པས་སོ། །ཇི་ལྟར་ཁྱུ་ནས་དགར་བས་ཤེ་ན། དགེ་སློང་གིས་གླང་པོ་ཆེ་ཁྱུ་ནས་དགར་བས་རྐུ་བར་བྱེད་ན། ཇི་སྲིད་མིག་སྔར་སྣང་བ་དེ་སྲིད་དུ་ཉེས་པ་སྦོམ་པོར་འགྱུར་ལ། མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་ཁྱུ་ནས་དགར་བས་སོ། །ཇི་ལྟར་བརྟོད་པས་ཤེ་ན། དགེ་སློང་གིས་གླང་པོ་ཆེ་བརྟོད་པ་སྣ་ཚོགས་ཤིང་ལྗོན་པ་འམ། རྩིག་པ་འམ། གཞན་དག་ལ་བརྟོད་པར་བྱེད་ནས། ཇི་སྲིད་མིག་སྔར་སྣང་བ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན། བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་བརྟོད་པས་སོ། །གླང་པོ་ཆེ་ལ་ཇི་ལྟ་བ་བཞིན་དུ་རྟ་ལ་སོགས་པ་རྐང་བཞི་པ་ལྷག་མ་རྣམས་ལ་ཡང་དེ་བཞིན་ནོ། །རྐང་མངས་ཤེས་བྱ་བ་ནི་གྲོག་མོ་དང ། ཕྱེ་མ་ལེབ་དང ། ཏིལ་དང ། ཕུབ་མ་དང ། རུལ་བ་ཟ་བ་དང ། སྡིག་པ་དང ། ཏྲྱ་མ་བུ་ཀ་དང ། ཏྲེའི་ལ་ཏ་དག་གོ། །དེ་དག་ནི་གསུམ་གྱིས་སོགས་པར་བྱེད་དེ། གནོད་བྱེད་དག་དང ། གྲོང་ཁྱེར
5.91a
སྲུང་བའི་སྣ་ཆེན་པོ་ལ་གཏོགས་པ་དག་དང ། རྒྱ་མཚོའི་ཚོང་པ་དག་གིས་སོ། །ཇི་ལྟར་གནོད་བྱེད་དག་གིས་ཤེ་ན། འདི་ལྟར་གནོད་བྱེད་དག་གིས་སྲོག་ཆགས་རྐང་མངས་དག་གིས་བུམ་པས་སོ་བཏང་བ་བཀང་སྟེ། འཇོག་པར་བྱེད་ཅིང་དེ་དག་གིས་གང་གི་ཚེ་ཆད་པས་གཅད་པ་དག་ཁྲིད་དེ། དེ་དག་གི་རྐང་པ་འམ། ལག་པ་བུམ་པ་དེ་དག་གི་ནང་དུ་འཇུག་པར་བྱེད་ཅིང ། དེ་དག་དེ་དག་གིས་ཟིན་པ་ན་མྱུར་དུ་དབྱ་དང ། གསུག་མང་པོ་འཇལ་བར་བྱེད་དེ། དེ་ལྟར་གནོད་བྱེད་དག་གིས་སོ། །ཇི་ལྟར་གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་གིས་ཤེ་ན། འདི་ལྟར་གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་གིས་སྲོག་ཆགས་རྐང་མངས་དག་གིས་བུམ་པ་སོ་མ་བཏང་བ་བཀང་སྟེ་འཇོག་པར་བྱེད་ཅིང་དེ་དག་གིས་གང་གི་ཚེ་ཕ་རོལ་ཀྱི་དཔུང་འོང་བ་དེའི་ཚེ་དེ་དང་ལྷན་ཅིག་གཡུལ་སྤྲོད་པར་བྱེད་པ་ན། གལ་ཏེ་དེ་དག་གིས་འཇོམ་པར་ནུས་ན་དེ་ལྟ་ན་ལེགས། གལ་ཏེ་མི་ནུས་ན་སྲོག་ཆགས་རྐང་མངས་དག་གིས་བཀང་བའི་བུམ་པ་སོ་མ་བཏང་བ་ར་བ་ལ་གནས་པ་འཕེན་པར་བྱེད་ཅིང་དེ་དག་སྲོག་ཆགས་རྐང་མངས་དག་གིས་ཟིན་པ་ན་འབྱེར་བར་འགྱུར་ཏེ། དེ་ལྟར་གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་གིས་སོ། །ཇི་ལྟར་རྒྱ་མཚོའི་ཚོང་པ་དག་གིས་ཤེ་ན། འདི་ལྟར་རྒྱ་མཚོའི་ཚོང་པ་དག་གིས་སྲོག་ཆགས་རྐང་མངས་དག་གིས་བུམ་པ་སོ་མ་བཏང་བ་བཀང་སྟེ་རྒྱ་མཚོའི་གྲུ་སྦྱར་ནས་ནོར་སྒྲུབ་པ་དག་རྒྱ་མཚོ་ཆེན་པོར་རྒལ་བ་ན་དེར་དེ་དག་ལ་ཆོམ་རྐུན་པ་རྟགས་མཚན་སྔོན་པོ་འམ་ནག་པོ་ཅན་དག་འོང་ཞིང ། གྲུ་འཇོམས་པར་བྱེད་པ་ན་ཚོང་པ་དག་གིས་དེ་དག་དང ། ལྷན་ཅིག་གཡུལ་སྤྲོད་པར་བྱེད་པ་ན། གལ་ཏེ་དེ་དག་གིས་འཇོམས་པར་བྱེད་ནུས་ན་དེ་ལྟ་ན་ལེགས། གལ་ཏེ་མི་ནུས་ན་སྲོག་ཆགས་རྐང་མངས་དག་གིས་བཀང་བའི་བུམ་པ་སོ་མ་བཏང་བ་འཕེན་པར་བྱེད་ཅིང ། དེ་དག་སྲོག་ཆགས་རྐང་མངས་དག་གིས་ཟིན་པ་ན། འབྱེར་བར་འགྱུར་ཏེ། དེ་ལྟར་རྒྱ་མཚོའི་ཚོང་པ་དག་གིས་སོ། །དགེ་སློང་གིས་སྲོག་ཆགས་རྐང་མངས་དག
5.91b
རྐུ་བར་བྱེད་ན། སྲོག་ཆགས་རྐང་མངས་དག་གི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། ་་་་་་་་།སྡོམ་ལ། གདོལ་པ་དང་ནི་བག་རྫངས་ཅན། །སྣམ་སྦྱར་རེ་ཤིག་དུས་དང་ནི། །མཚན་བཟངས་དང་ནི་ནོར་གྱིས་བྱིན། །རང་གིར་ཤེས་པས་ལྷུང་བཟེད་ལེན། །མི་ཕམ་དང་ནི་ཟླ་བས་སྦས། །བདག་ཉིད་སུན་འབྱིན་རྐུ་བ་ཡིན། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་གདོལ་པ་དང་བག་རྫངས་ཅན་ཞེས་བྱ་བ་གཏམ་འདྲེ་བ། ཕེབས་པར་སྨྲ་བ། འགྲོགས་བཤེས། སྨོས་འདྲིན་གནས་སྐབས་མཉམ་པར་སྤྱོད་པ་གཉིས་ཤིག་འཁོད་དེ། དེ་ལ་གདོལ་པ་ནི་གྲགས་པ་དང ། བསོད་ནམས་ཆེ་བ་ཡིན་མོད་ཀྱི་ལུས་ཆུང་སྟེ། དེ་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་ལྷག་པ་དག་ཡོད་དོ། །བག་རྫངས་ཅན་ནི་ལུས་ཆེ་བ་ཡིན་མོད་ཀྱི་གྲགས་པ་དང ། བསོད་ནམས་ཆུང་སྟེ། ཆོས་གོས་གསུམ་ལྷུར་ལེན་ཅིང་དེའི་ཆོས་གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་པ་ཡིན་ནོ། །དགེ་སློང་རྣམས་ཀྱིས་བག་རྫངས་ཅན་ལ་སྨྲས་པ། ཚེ་དང་ལྡན་པ་ཁྱོད་ཏེ་པོར་འདོད་པ་ཆུང་བར་གྱུར་ན། ཅིའི་ཕྱིར་བདག་ཉིད་གཅེར་བུར་སྟོན་པར་བྱེད། ཅི་རྙེད་པས་སམ། མ་རྙེད་པས། བག་རྫངས་ཅན་གྱིས་སྨྲས་པ། མ་རྙེད་པས་སོ། །ཅིའི་ཕྱིར་སྦྱོར་དུ་མི་འཛུད། སངས་རྒྱས་དང ། ཆོས་དང ། དགེ་འདུན་སྤངས་ཏེ། སུ་ཞིག་ཁོ་བོ་ལ་སྦྱིན་པར་བྱེད། དགེ་སློང་གདོལ་པ་དེ་ཁྱོད་ཀྱི་གཏམ་འདྲེ་བ། ཕེབས་པར་སྨྲ་བ། འགྲོགས་བཤེས། སྨོས་འདྲིན་ཡིན་ལ། དེ་ལ་ལྷུང་བཟེད་དང ། ཆོས་གོས་དང ། ར་བ་དང ། ཕོར་བུ་དང ། སྐ་རགས་ལྷག་པ་དག་ཡོད་ན་ཅིའི་ཕྱིར་དེ་ལ་མི་སློང ། བག་རྫངས་ཅན་གྱིས་སྨྲས་པ། མི་སྟེར་རོ། །ཅི་ཁྱོད་ཀྱིས་སྔོན་ལན་འགའ་བསླངས་སམ། ལན་འགའ་ཡང་མ་བསླངས་སོ། །ཅི་ཆུའི་སྒྲ
5.92a
ཁོ་ནས་ལྷམ་དག་འབུད་པར་བྱེད་དམ། སོང་ལ་སློངས་ཤིག་དང་སྟེར་རོ། །བག་རྫངས་ཅན་དེ་དགེ་སློང་དེ་དག་གིས་སྤྲོ་བར་བྱས་ནས་གདོལ་པའི་གན་དུ་སོང་བ་དང ། གདོལ་པ་མེད་ནས་བག་རྫངས་ཅན་གྱིས་གདོལ་པ་ནི་ལུས་ཆུང་བ་ཡིན་པས་ཇི་འདིའི་ཆོས་གོས་གཞལ་བར་བྱ་སྟེ། གལ་ཏེ་བདག་གི་ལུས་ཀྱི་ཚད་དུ་འགྱུར་ན་བསླང་བར་བྱའི། གལ་ཏེ་མི་འགྱུར་ན་ཅིའི་ཕྱིར་དེ་དྲིན་བགྲང་དུ་གཞུག་པར་བྱ་སྙམ་དུ་བསམས་ནས། བག་རྫངས་ཅན་གདོལ་པའི་གནས་ཁང་དུ་ཞུགས་ཏེ་སྣམ་སྦྱར་ལྟ་བར་བརྩམས་པ་དང ། ཇི་ཙམ་ན་ཆོས་གོས་ཀྱི་གདང་ལ་སྣམ་སྦྱར་དམར་སེར་འདུག་པ་མཐོང་ནས། བག་རྫངས་ཅན་གྱིས་ཕོག་སྟེ། གྱོན་ཞིང་བསྙམས་ནས། ངོས་དང་ངོས་ལ་རྟོག་པར་བྱེད་པ་ན་གདོལ་པ་འོངས་ཏེ་མཐོང་མ་ཐག་ཏུ་སྨྲས་པ། ཚེ་དང་ལྡན་པ་ཁྱོད་ཀྱིས་སྣམ་སྦྱར་འདི་རྐུ་སེམས་ཀྱིས་བླངས་སོ། །བག་རྫངས་ཅན་གྱིས་སྨྲས་པ། ཚེ་དང་ལྡན་པ་ཁོ་བོས་རྐུ་སེམས་ཀྱིས་མ་བླངས་ཏེ། འདི་ལྟར་ཁོ་བོ་ལ་གདོལ་པ་ནི་ལུས་ཆུང་བ་ཡིན་པས་ཇེ་འདིའི་ཆོས་གོས་གཞལ་པར་བྱ་སྟེ། གལ་ཏེ་བདག་གི་ལུས་ཀྱི་ཚད་དུ་འགྱུར་ན་བསླང་བར་བྱའི། གལ་ཏེ་མི་འགྱུར་ན་ཡོ་བྱད་དོན་མེད་པ་འདིས་ཅི་བྱ་སྙམ་པའི་བློ་སྐྱེས་སོ། །གདོལ་པས་སྨྲས་པ། ཚེ་དང་ལྡན་པ་ཅིའི་ཕྱིར་གཞན་ནས་གཞན་དུ་འཕྲོ་བར་བྱེད། ཁྱོད་ཀྱི་རྐུ་སེམས་ཀྱིས་བླངས་པས་ཁྱོད་ལ་ཕམ་པར་འགྱུར་བའི་ལྟུང་བ་བྱུང་ངོ ། །བག་རྫངས་ཅན་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་ཀྱི་བསམ་པ་ཇི་ལྟ་བུས་སྣམ་སྦྱར་དེ་བགོས། བག་རྫངས་ཅན་གྱིས་ཇི་ལྟར་གྱུར་པ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དཔྱོད་པའི་བསམ་པ་ཅན་འདི་ལ་ནི་ལྟུང་བ་མེད་དེ། ཡང་དགེ་སློང་གིས་ཡིད་གཅུགས་པ་མ་ཡིན་པ་ལ་ཡིད་གཅུགས
5.92b
པ་བསྐྱེད་པར་མི་བྱའོ། །འདི་ལྟར་མཛའ་བཤེས་ནི་གསུམ་སྟེ། ཐ་མ་དང ། འབྲིང་དང ། ཆེན་པོའོ། །འདི་ལ་མཛའ་བཤེས་ཐ་མ་ལ་ནི་ཡིད་གཅུགས་པ་ཆུང་ངུ་བྱའི། འབྲིང་ཡང་མི་བྱ། །ཆེན་པོ་ཡང་མི་བྱའོ། །མཛའ་བཤེས་འབྲིང་ལ་ནི་ཡིད་གཅུགས་པ་ཆུང་ངུ་དང ། འབྲིང་བྱའི་ཆེན་པོ་མི་བྱའོ། །མཛའ་བཤེས་ཆེན་པོ་ལ་ནི་ཡིད་གཅུགས་པ་ཆུང་ངུ་དང་འབྲིང་དང ། ཆེན་པོ་ཡང་བྱའོ། །དགེ་སློང་གིས་ཡིད་གཅུགས་པ་མ་ཡིན་པ་ལ་ཡིད་གཅུགས་པ་སྐྱེད་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མཚན་བཟངས་དང ། ནོར་གྱིས་བྱིན་ཞེས་བྱ་བ་གཏམ་འདྲེ་བ། ཕེབས་པར་སྨྲ་བ། འགྲོགས་བཤེས་སྨོས་འདྲིན་མཚུངས་པར་འདོན་པ་གཉིས་ཤིག་འཁོད་དེ། མཚན་བཟངས་ཀྱི་ལྷུང་བཟེད་ནི་མཛེས་པ། གསལ་བ། ཟླུམ་པ། ལོངས་སྤྱད་བཟོད་པ་ཡིན་ལ། ནོར་གྱིས་བྱིན་གྱི་ལྷུང་བཟེད་ཆུང་ངུ་ཡང་མཛེས་པ་གསལ་བ། ཟླུམ་པ། ལོངས་སྤྱད་བཟོད་པ་ཡིན་ནོ། །དེ་གཉིས་དུས་གཞན་ཞིག་ན་ཟས་ཀྱི་བྱ་བ་བྱས་ཏེ། འཆག་ས་ན་ལྷུང་བཟེད་འཁྲུ་བའི་ཚེ་མཚན་བཟངས་ཀྱིས་ནོར་གྱིས་བྱིན་དབང་བའི་ལྷུང་བཟེད་ཆུང་ངུ་རང་གི་ལྷུང་བཟེད་དུ་བཅུག་སྟེ་སྨྲས་པ། ཚེ་དང་ལྡན་པ་ནོར་གྱིས་བྱིན་གང་ལ་ལྷུང་བཟེད་དང ། ལྷུང་བཟེད་ཆུང་ངུ་འདི་ལྟ་བུ་བདོག་པ་དེ་ནི་སྙིང་ལས་ཆུང་ངུས་དགེ་བའི་ཕྱོགས་སྤྱོད་པར་བྱེད་དོ། །ནོར་གྱིས་བྱིན་གྱིས་སྨྲས་པ། གལ་ཏེ་ཐོབ་ན་ཁྱེར་ཅིག་།ཇི་ཙམ་དུ་གཞན་ཞིག་ན་ནོར་གྱིས་སྦྱིན་ལ་རི་བྲག་ཤིག་ཏུ་བྱ་བ་ཆུང་ཞིག་བྱུང་ནས་དེས་སྨྲས་པ། ཚེ་དང་ལྡན་པ་མཚན་བཟངས་ཁོ་བོ་ལ་རི་བྲག་ཤིག་ཏུ་བྱ་བ་ཆུང་ཞིག་བྱུང་ན། ཁོ་བོའི་བྱ་བ་དེ་བྱེད་པ་དེ་ལ་ཁོ་བོས་ལྷུང་བཟེད་ཆུང་ངུ་སྦྱིན་ནོ། །མཚན་བཟངས་ཀྱིས་སྨྲས་པ། སྦྱིན་ནམ། སྦྱིན་ནོ། །ཐབས་ཡིན་ནོ། །མཚན་བཟངས་ཀྱིས་ཐབས་ཡིན་ནོ། །ཞེས་བྱས་ནས་བདག་ལ་གཞི་འདིས་ཚངས་པ་མཚུངས་པར་སྤྱོད་པ་རྣམས་མཚན་བཟངས་ནི་གླ་རྔན་གྱིས་ལས་བྱེད་དོ། །ཞེས་ཟེར་བར
5.93a
འགྱུར་རོ་སྙམ་ནས་འགྱོད་པ་སྐྱེས་ཏེ་མ་སོང་ངོ ། །ཇི་ཙམ་དུ་གཞན་ཞིག་ན་མཚན་བཟངས་ལ་རི་བྲག་དེར་བདག་ཉིད་ཀྱི་བྱ་བ་ཞིག་བྱུང་ནས། དེས་སོང་ལ་དེ་གཉི་ག་བྱས་ཏེ་ཕྱིར་འོང་ངོ་སྙམ་དུ་བསམས་ནས། མཚན་བཟངས་སོང་སྟེ་གཉི་ག་བྱས་ནས་ཕྱིར་འོངས་ཏེ་སྨྲས་པ། ཚེ་དང་ལྡན་པ་ནོར་གྱིས་བྱིན་ཁོ་བོས་ཁྱོད་ཀྱི་དགོས་པ་དེ་བསྒྲུབས་ཀྱིས་ལྷུང་བཟེད་ཆུང་ངུ་བྱིན་ཅིག་།ནོར་གྱིས་བྱིན་གྱིས་སྨྲས་པ། ཁྱོད་བདག་ཉིད་ཀྱི་དགོས་པ་ལ་སོང་བ་ཡིན་གྱི། ཁོ་བོའི་དགོས་པ་ལ་སོང་བ་མ་ཡིན་པས་ཁོ་བོས་མི་སྦྱིན་ནོ། །མཚན་བཟངས་ཀྱིས་སྨྲས་པ། གལ་ཏེ་མི་སྦྱིན་ན་ཁོ་བོ་རང་ཉིད་ཀྱིས་བླང་བར་བྱའོ། །གལ་ཏེ་ཐོབ་ནའོ། །ཇི་ཙམ་ན་ནོར་གྱིས་བྱིན་ཕྱིར་བྱུང་བ་དེ་ན་མཚན་བཟངས་ཀྱིས་ལྷུང་བཟེད་ཆུང་ངུ་བླངས་ཏེ་རང་གི་ལྷུང་བཟེད་དུ་བཅུག་སྟེ་བཞག་གོ། །ཇི་ཙམ་ན་ནོར་གྱིས་བྱིན་འོངས་པ་ན་ལྷུང་བཟེད་ཆུང་ངུ་མི་སྣང་ནས་དེས་སྨྲས་པ། ཚེ་དང་ལྡན་པ་ཁོ་བོའི་ལྷུང་བཟེད་ཆུང་ངུ་སུས་བླངས་མཚན་བཟངས་ཀྱིས་སྨྲས་པ། སུ་དབང་བས་སོ། །སུ་དབང ། ཁོ་བོ་དབང་ངོ ། །ནོར་གྱིས་བྱིན་གྱིས་སྤྱོས་ཏེ་སྨྲས་པ། ཁྱོད་ཀྱིས་རྐུ་སེམས་ཀྱིས་བླངས་པས་ཁྱོད་ལ་ཕམ་པར་འགྱུར་བའི་ལྟུང་བ་བྱུང་ངོ ། །མཚན་བཟངས་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་མཚན་བཟངས་ལ་བཀའ་སྩལ་པ། དགེ་སློང་ཁྱོད་ཀྱིས་བསམ་པ་ཇི་ལྟ་བུས་ལྷུང་བཟེད་ཆུང་ངུ་དེ་བླངས། དེས་ཇི་ལྟར་གྱུར་པ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་རང་གིར་འདུ་ཤེས་པས་ལྷུང་བཟེད་ཆུང་ངུ་བླངས་པས་འདི་ལ་ནི་ལྟུང་བ་མེད་དེ། ཡང་དགེ་སློང་གི་གླ་རྔན་གྱི་ལས་མི་བྱ་བར་འདི་ལྟར་ལག་པོད་དམ། བསོད་ནམས་འདོད་པས་ལས་བྱའོ། །དགེ་སློང་གིས་གླ་རྔན་གྱིས་ལས་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས
5.93b
བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མི་ཕམ་དང ། ཟླ་བས་སྦས་ཤེས་བྱ་བ་གཏམ་འདྲེ་བ། ཕེབས་པར་སྨྲ་བ། འགྲོགས་བཤེས་སྨོས་འདྲིན་གཉིས་ཤིག་འཁོད་དོ། །ཟླ་བས་སྦས་ནི་གྲགས་པ་དང ། བསོད་ནམས་ཆེ་བ་ཡིན་ཏེ། དེ་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་ལྷག་པ་དག་ཡོད་དོ། །མི་ཕམ་ནི་གྲགས་པ་དང ། བསོད་ནམས་ཆུང་སྟེ། ཆོས་གོས་གསུམ་ལྷུར་ལེན་ཅིང་དེའི་ཆོས་གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་པ་ཡིན་ནོ། །དགེ་སློང་རྣམས་ཀྱི་མི་ཕམ་ལ་སྨྲས་པ། ཚེ་དང་ལྡན་པ་ཁྱོད་ཏེ་པོར་འདོད་པ་ཆུང་བར་གྱུར་ན་ཅིའི་ཕྱིར་བདག་ཉིད་གཅེར་བུར་སྟོན་པར་བྱེད། ཅི་རྙེད་པས་སམ། མ་རྙེད་པས། མི་ཕམ་གྱིས་སྨྲས་པ། མ་རྙེད་པས་སོ། །ཅིའི་ཕྱིར་སྦྱར་དུ་མི་འཛུད། སངས་རྒྱས་དང ། ཆོས་དང ། དགེ་འདུན་སྤངས་ཏེ་སུ་ཞིག་ཁོ་བོ་ལ་སྦྱིན་པར་བྱེད། དགེ་སློང་ཟླ་བས་སྦས་དེ་ཁྱོད་ཀྱི་གཏམ་འདྲེ་བ། ཕེབས་པར་སྨྲ་བ། འགྲོགས་བཤེས། སྨོས་འདྲིན་ཡིན་ལ། དེ་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུར་དང ། སྐ་རགས་ལྷག་པ་དག་ཡོད་ན་ཅིའི་ཕྱིར་དེ་ལ་མི་སློང ། མི་ཕམ་གྱིས་སྨྲས་པ། མི་སྟེར་རོ། །ཅི་ཁྱོད་ཀྱིས་སྔོན་ལན་འགའ་བསླངས་སམ། ལན་འགའ་ཡང་མ་བསླངས་སོ། །ཅིའི་ཕྱིར་ཆུའི་སྒྲ་ཁོ་ནས་ལྷམ་དག་འབུད་པར་བྱེད་དམ། སོང་ལ་སློངས་ཤིག་དང་སྟེར་རོ། །མི་ཕམ་དེ་དགེ་སློང་དེ་དག་གིས་སྤྲོ་བར་བྱས་ནས་ཟླ་བས་སྦས་ཀྱི་གན་དུ་སོང་སྟེ་སྨྲས་པ། ཚེ་དང་ལྡན་པ་ཟླ་བས་སྦས་བདག་ལ་ལྷུང་བཟེད་བྱིན་ཅིག་།ཟླ་བས་སྦས་ཀྱིས་སྨྲས་པ། མི་སྦྱིན་ནོ། །མི་ཕམ་གྱིས་སྨྲས་པ། གལ་ཏེ་ལྷུང་བཟེད་མི་སྦྱིན་ན་ཆོས་གོས་བྱིན་ཅིག་།ཟླ་བས་སྦས་ཀྱིས་སྨྲས་པ། ཅི་ཁོ་བོ་ཁྱོད་ཀྱིས་ཁྱིམ་བདག་མགོ་རེག་ཏུ་མཐོང་ངམ་ཁྱོད་ལ་ཁ་ཚར་ཡང་ཡོངས་སུ་མི་གཏང་ན། ཆོས་གོས་ལྟ་སྨོས་ཀྱང་ཅི་དགོས། མི་ཕམ་གྱིས་སྤྱོས་ཏེ། ཁོ་བོ་འདིའི
5.94a
འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་ན། འདི་དེ་སྐད་ཅེས་ཁ་ཚར་ཡང་ཁྱོད་ལ་ཡོངས་སུ་མི་གཏང་ན། ཆོས་གོས་ལྟ་སྨོས་ཀྱང་ཅི་དགོས་ཤེས་ཟེར་རོ་སྙམ་དུ་བསམས་ནས་མི་ཕམ་གྱིས་སྨྲས་པ། དེ་གོས་ཐམས་ཅད་མ་ཕྲོགས་ན་མི་ཕམ་ཞེས་བྱ་བའི་མིང་མི་བཟུང་ངོ་ཞེས་མི་ཕམ་དེ་ནམ་ཞིག་ན་འདིའི་ཆོས་གོས་དག་རྐུ་བར་བྱ་སྙམ་དུ་སྐབས་ཚོལ་ཞིང་དེ་ལྷུར་ལེན་བཞིན་དུ་སྡོད་དོ། །ཇི་ཙམ་དུས་གཞན་ཞིག་ན་ཟླ་བས་སྦས་ལ་བཙོ་བླག་གི་ལས་ཉེ་བར་གནས་པར་གྱུར་པ་དང ། མི་ཕམ་དེ་ཟླ་བས་སྦས་ཀྱི་དྲུང་དུ་སོང་སྟེ་སྨྲས་པ། ཚེ་དང་ལྡན་པ་ཟླ་བས་སྦས་ཁོ་བོས་ཀྱང་གྲོགས་བྱའོ། །ཟླ་བས་སྦས་ཀྱིས་སྨྲས་པ། མ་ཉེས་ཀྱིས་དེ་བཞིན་གྱིས་ཤིག་།མི་ཕམ་དེ་ཟླ་བས་སྦས་ཀྱི་ཆོས་གོས་དག་འཚེད་པར་བྱེད། བྱི་དོར་བྱེད། འདྲེན་པར་བྱེད་ཅིང་ཟློག་ཅིང་ཟློག་ཅིང་རྟོག་པར་བྱེད་དོ། །ཟླ་བས་སྦས་ཀྱིས་འདི་འདི་ལྟར་ལྟ་བས་བདག་གི་ཆོས་གོས་དག་ཟློག་ཅིང་ཟློག་ཅིང་རྟོག་པར་བྱེད་པ་ལས་ན་གདོན་མི་ཟ་བར་བདག་གི་ཆོས་གོས་འདི་དག་རྐུ་བར་བྱེད་དོ། །སྙམ་དུ་བསམས་ནས་ཟླ་བས་སྦས་དོགས་པ་དང་བཅས་པས་ཆོས་གོས་དག་ཁ་བསྒྱུར་ནས་གཏུར་བུར་བཅུག་སྟེ་དེ་དག་སྔས་སུ་བཅུག་ནས་ཉལ་ལོ། །དགེ་སློང་དག་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་སྤྱོད་པས་མི་ཕམ་གྱིས་སྨྲས་པ། ཚེ་དང་ལྡན་པ་ཟླ་བས་སྦས་ཚུར་ཤོག་།དགེ་བའི་ཕྱོགས་བྱེད་དུ་འདོང ། ཟླ་བས་སྦས་ཀྱིས་སྨྲས་པ། ཁྱོད་སོང་ཤིག་ཁོ་བོ་ངལ་བས་ཕྱི་བཞིན་འོང་ངོ ། །མི་ཕམ་པ་ཚེ་དང་ལྡན་པ་ཤོག་ཤིག་ཅེས་ཟེར་ཏེ་ཕྱིར་བྱུང་ངོ ། །ཟླ་བས་སྦས་ཀྱིས་གལ་ཏེ་འགྲོ་ན་ནི་ཆོས་གོས་དག་རླག་པར་འགྱུར། འོན་ཏེ་མི་འགྲོ་ན་ནི་བདག་གི་དགེ་བའི་ཕྱོགས་ཡོངས་སུ་ཉམས་པར་འགྱུར་ན། གང་གི་ཕྱིར་བདག་གི་ཆོས་གོས་དག་ཀྱང་བརླག་པར་མི་འགྱུར་ལ། དགེ་བའི་ཕྱོགས་ཉམས་པར་མི་འགྱུར་བའི་ཐབས
5.94b
ཅི་ཡོད་སྙམ་དུ་སེམས་ཤིང་རིག་ནས། བདག་ཉིད་ཀྱི་གཏུར་བུ་མི་ཕམ་གྱི་སྔས་སུ་བཅུག་སྟེ། མི་ཕམ་དབང་བའི་གཏུར་བུ་བདག་ཉིད་ཀྱི་སྔས་སུ་བཅུག་ནས་ཉལ་ལོ། །དགེ་སློང་དག་གིས་ནམ་གྱི་ཆ་སྨད་ལ་ཁ་ཏོན་བྱ་བར་བརྩམས་པ་དང ། ཟླ་བས་སྦས་ཀྱིས་མི་ཕམ་ལ་སྨྲས་པ། ཚེ་དང་ལྡན་པ་མི་ཕམ་ལོངས་ལ་དགེ་བའི་ཕྱོགས་སྤྱོད་ཅིག་།མི་ཕམ་གྱིས་སྨྲས་པ། ཁོ་བོས་དགེ་བའི་ཕྱོགས་བྱས་ཟིན་གྱིས། ད་ཁྱོད་སོང་ལ་དགེ་བའི་ཕྱོགས་སྤྱོད་ཅིག་།ཁོ་བོ་ངལ་བ་ངལ་བསོས་སོ་ཞེས་ཟླ་བས་སྦས་དགེ་བའི་ཕྱོགས་ཀྱི་ཆེད་དུ་སོང་ངོ ། །མི་ཕམ་གྱིས་རེ་ཤིག་དུས་ནི་སྣང་ན་ལམ་གྱི་དུས་ཡིན་ནམ་མ་ཡིན་སྙམ་དུ་བསམས་ནས། དུས་བཟང་པོ་མཐོང་བ་དང ། དེ་ཟླ་བས་སྦས་ཀྱི་སྔས་ནས་བདག་ཉིད་ཀྱིས་གཏུར་བུ་ཁྱེར་ཏེ་སོང་ངོ ། །ཇི་ཙམ་ན་མཚན་མོ་ནམ་ནངས་པར་གྱུར་པ་དང ། དེས་རེ་ཤིག་གོས་ཅི་འདྲ་བ་དག་གིས་བདག་ཕམ་པར་གྱུར་པའི་ལྟུང་བ་བྱུང་བ་བལྟའོ་སྙམ་དུ་བསམས་ནས། ཇི་ཙམ་ན་བདག་ཉིད་ཀྱི་རྙང་རྙིང་དག་མཐོང་ནས་ཡིད་མི་བདེ་བར་གྱུར་ཏེ། བདག་ཉིད་ཀྱི་ཆོས་གོས་དག་ཁོ་ནས་བདག་ཕམ་པར་གྱུར་གྱིས་ལྕགས་ཀྱི་ཐུ་ལུམ་འཆའ་བས་ཅི་བྱ། ཕྱིར་འབབས་པར་བྱའོ་སྙམ་མོ། །དེས་ཡང་ཇེ་བཅོམ་ལྡན་འདས་ཀྱི་སྤྱན་སྔར་འགྲོ་བར་བྱས་ཏེ། གལ་ཏེ་སྐལ་བ་ཡོད་པར་གྱུར་ན་ནི་བཅོམ་ལྡན་འདས་ཀྱི་དྲུང་དུ་ཚངས་པར་སྤྱོད་པ་སྤྱད་པར་བྱའོ། །འོན་ཏེ་སྐལ་བ་མེད་ན་ནི་ཕྱིར་འབབས་སོ་སྙམ་དུ་བསམས་ནས། དེ་བཅོམ་ལྡན་འདས་གང་ན་བ་དེར་སོང་ངོ ། །དེའི་ཚེ་ན་བཅོམ་ལྡན་འདས་དགེ་སློང་བརྒྱ་ཕྲག་དུ་མའི་འཁོར་གྱི་མདུན་ན་ཆོས་སྟོན་པའི་ཕྱིར་བཞུགས་ཤིང་ཆོས་སྟོན་ཏོ། །བཅོམ་ལྡན་འདས་ཀྱིས་ཚེ་དང་ལྡན་པ་མི་ཕམ་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་ཐག་རིང་པོ་ཁོ་ན་ནས་འོང་བའི་དགེ་སློང་དེ་མཐོང་ངམ། བཙུན་པ་མཐོང་ངོ ། །དགེ་སློང་དག་མི་ཕམ་མི་གཏི་མུག་ཅན་འདི་ནི་རང་གི་ཆོས་གོས་རྙང་རྙིང་དག་གིས་ཉེས་པ་སྦོམ་པོའི་ལྟུང་བ་བྱུང་ངོ ། །དགེ་སློང་དག་དེ་ལྟར་རྐུ་སེམས
5.95a
ལ་ནི་ཉེས་དམིགས་འདི་དང་གཞན་དག་ཀྱང་ཡོད་པས་དེའི་ཕྱིར་དགེ་སློང་གིས་རྐུ་སེམས་ཀྱིས་རང་གི་ལྷུང་བཟེད་དང ། ཆོས་གོས་ཀྱང་བླང་བར་མི་བྱའོ། །དགེ་སློང་གིས་རྐུ་སེམས་ཀྱིས་རང་གི་ལྷུང་བཟེད་དང་ཆོས་གོས་ལེན་ན་ཉེས་པ་སྦོམ་པོར་འགྱུར་རོ། ་་་་་་་།སྡོམ་ལ། སྣམ་སྦྱར་འཕྱང་བར་གྱུར་པ་དང ། །བགམ་ཕྱིར་འབྲུ་མར་སློང་བ་དང ། །ཁྱིམ་བདག་བུ་དང་ཚ་བོ་དང ། །ལྷ་འབངས་པི་ལིན་ད་ཡི་བུ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མ་ཤར་ནས་སྐྱེས་པ་དང ། ལྷོ་ནས་སྐྱེས་པ་གཉིས་ཤིག་འདུག་སྟེ། ཤར་ནས་སྐྱེས་པ་ནི་མདུན་དུ་འགྲོ་བའི་དགེ་སློང་མ་ཡིན། ལྷོ་ནས་སྐྱེས་པ་ནི་ཕྱི་བཞིན་འབྲང་བའི་དགེ་སློང་མ་ཡིན་ནོ། །དེ་གཉིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཞིང་སྤྱན་སྔར་སོང་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །བཅོམ་ལྡན་འདས་ཀྱིས་དེ་གཉིས་ལ་ཆོས་བསྟན་ནས། དེ་གཉིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་དོང་བ་དང ། ཤར་ནས་སྐྱེས་པ་མདུན་དུ་འགྲོ་བ་དེའི་སྣམ་སྦྱར་ཕྲག་པ་ལ་གྱོན་པ་འཕྱང་བར་གྱུར་ནས། ལྷོ་ནས་སྐྱེས་པ་ཕྱི་བཞིན་འོང་བས་སྨྲས་པ། འཕགས་མ་ཨ་བ་ས་ཋ་ཨ་བ་ས་ཋ། ཤར་ནས་སྐྱེས་པ་དེ་ཆོས་ཀྱི་ཤུགས་ཐོབ་པས་མི་སེམས་པས། སྣམ་སྦྱར་ལྷུང་བར་གྱུར་ནས། ལྷོ་ནས་སྐྱེས་པས་བླངས་ཏེ། དེས་འདི་ལྟར་བདག་གིས་དེ་ཕུལ་ན། འཕགས་མའི་དགེ་བའི་ཕྱོགས་ཡོངས་སུ་ཉམས་པར་འགྱུར་བས་དབྱར་ཁང་དུ་ཕྱིན་ནས་དབུལ་བར་བྱའོ་སྙམ་དུ་བསམས་ནས། དེ་གཉིས་དབྱར་ཁང་དུ་སོན་པ་དང ། ཤར་ནས་སྐྱེས་མྱུར་བ་མྱུར་བ་ཁོ་ནར་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས་གཙུག་ལག་ཁང་དུ་ཞུགས་ཏེ་དཀྱིལ་མོ་དཀྲུང་ཕྱེད་ཀྱིས་འདུག་གོ། །ལྷོ་ནས་སྐྱེས་པས་གལ་ཏེ་ཕུལ་ན་ཉེས་དམིགས་དེ་ཁོ་ན་བསྟབས་པར
5.95b
འགྱུར་བས་རེ་ཤིག་ཕྱིས་ལངས་པ་ལ་དབུལ་ལོ་སྙམ་དུ་བསམས་ནས། དེས་སྣམ་སྦྱར་དེ་རང་གི་གནས་ཁང་དུ་ཁྱེར་ཏེ་ཆོས་གོས་ཀྱི་རྡང་ལ་བཞག་གོ། །ཇི་ཙམ་ཉི་མ་གཞན་ཞིག་ན་མཚན་མོ་ནམ་ནངས་པ་དང ། ཤར་ནས་སྐྱེས་པས་སྨྲས་པ། གཞོན་ནུ་མ་སྣམ་སྦྱར་ཁྱེར་ཤོག་།བསོད་སྙོམས་ལ་འགྲོའོ། །གཞོན་ནུ་མ་དེ་གནས་ཁང་དུ་ཞུགས་ཏེ། ཆོས་གོས་ཀྱི་རྡང་ལ་བལྟས་པ་དང ། སྣམ་སྦྱར་མ་མཐོང་ནས་དེས་སྨྲས་པ། འཕགས་མ་སྣམ་སྦྱར་མ་མཆིས་སོ། །ཤར་ནས་སྐྱེས་པས་སྨྲས་པ། ལྷོ་ནས་སྐྱེས་པའི་གནས་ཁང་དུ་ལྟོས་ཤིག་།གཞོན་ནུ་མ་དེ་ལྷོ་ནས་སྐྱེས་པའི་གནས་ཁང་དུ་ཞུགས་པ་དང ། ཆོས་གོས་ཀྱི་རྡང་ལ་སྣམ་སྦྱར་བཞག་པ་མཐོང་ངོ ། །མཐོང་ནས་ཀྱང་སུས་འཕགས་མའི་སྣམ་སྦྱར་འདི་འདིར་ཁྱེར་སྙམ་དུ་སེམས་སོ། །ལྷོ་ནས་སྐྱེས་པས་ཐོས་ནས་དེས་སྨྲས་པ། ཁོ་མོས་ཁྱེར་ཏེ་འོངས་སོ། །ཅིའི་ཕྱིར་ལྷོ་ནས་སྐྱེས་པས་ཇི་ལྟར་གྱུར་པ་དེ་ལ་གོ་བར་བྱས་སོ། །དགེ་སློང་མ་དེ་དེ་ལ་ནང་དང་བཅས་པས་གཤེ་ཞིང་སྨྲས་པ། ཁྱོད་ཀྱིས་རྐུ་སེམས་ཀྱིས་རང་གི་གནས་ཁང་དུ་བཅུག་སྟེ། བཞག་པས་ཁྱོད་ལ་ཕམ་པར་འགྱུར་བའི་ལྟུང་བ་བྱུང་ངོ ། །ལྷོ་ནས་སྐྱེས་པའི་དགེ་སློང་མ་དེ་བདག་ལ་ཡང་དག་པ་ཁོ་ནར་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེས་སྐབས་དེ་དགེ་སློང་མ་རྣམས་ལ་བརྗོད་པ་དང ། དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་དགེ་སློང་མ་དེ་ལ་སྨྲས་པ། དགེ་སློང་མ་ཁྱོད་ཀྱིས་ཨ་བ་ས་ཋ་ཞེས་བརྗོད་པ་ཅིའི་ཐ་ཚིག་།བཙུན་པ་ཡུལ་དབུས་ན་ནར་བ་དང ། ལྷུང་བ་གང་ལགས་པ་དེ་ལ་བདག་ཅག་ཨ་བ་ས་ཋ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་འདི་ལ་ནི་སྐད་ཀྱི་ངེས་པའི་ཚིག་དང ། ཡུལ་གྱི་ངེས་པའི་ཚིག་དང ། ལྗོངས་ཀྱི་ངེས་པའི་ཚིག་གིས་ལྟུང་བ་མེད་མོད་ཀྱི། འོན་ཀྱང་ཉེས་དམིགས་གང
5.96a
ཡིན་པ་དེ་ཐམས་ཅད་གཞན་གྱི་དངོས་པོ་ལྷུང་བ་ཡུན་རིང་དུ་འཆང་བ་ལས་གྱུར་པ་ཡིན་པས་དེ་ལྟ་བས་ན་དགེ་སློང་ངམ། དགེ་སློང་མས་གཞན་གྱི་དངོས་པོ་ལྷུང་བ་ཡུན་རིང་དུ་བཅང་བར་མི་བྱ་སྟེ། འཆང་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་ངམ་དགེ་སློང་མས་གཞན་གྱི་དངོས་པོ་ལྷུང་བ་ཡུན་རིང་དུ་བཅང་བར་མི་བྱའོ་ཞེས་གསུངས་ནས། དགེ་སློང་ཞིག་གིས་གཞན་གྱི་དངོས་པོ་ལྷུང་བ་མཐོང་ནས་འདི་དགེ་སློང་ཆེ་གེ་མོ་ཞིག་གི་ཡིན་ནོ་ཞེས་ངོ་ཤེས་ནས་དགེ་སློང་དེའི་གནས་ཁང་དུ་སོང་སྟེ་དལ་བུས་ཁད་ཀྱིས་ཁད་ཀྱིས་སྒོ་གཏན་ལ་བརྡུངས་པ་དང ། དགེ་སློང་དེ་ཏིང་ངེ་འཛིན་ལས་ལངས་ནས་སྨྲས་པ། འདི་སུ། དེས་སྨྲས་པ། ཚེ་དང་ལྡན་པ་ཁྱོད་ཀྱི་དངོས་པོ་ལྷུང་བ་འདི་ཁོ་བོས་མཐོང་གིས་ལོང་ཤིག་།དེས་སྨྲས་པ། ཚེ་དང་ལྡན་པ་ཁོ་བོ་ལ་དངོས་པོ་དེ་མ་བྱིན་པར་ལེན་པ་དག་གིས་བརྐུས་པར་གྱུར་པ་ནི་བླའི། ཁོ་བོ་ཁྱོད་ཀྱི་ཏིང་ངེ་འཛིན་གྱི་མཚན་མ་བཟང་པོ་འདི་འདྲ་བ་ལས་བསླང་བ་ནི་མ་ཡིན་ནོ། །དགེ་སློང་དེ་བདག་ལ་དགེ་སློང་ཏིང་ངེ་འཛིན་ལས་བསླང་བས་ལྟུང་བ་དང་བཅས་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་དགེ་སློང་དོན་དེའི་ཕྱིར་ཏིང་ངེ་འཛིན་ལས་བསླང་བར་མི་བྱ་བར་འདི་ལྟར་དེའི་མངོན་སུམ་དུ་གཟར་ཐག་ལ་བཏགས་ཏེ་གཞག་པར་བྱའོ། །དགེ་སློང་ཞིག་གིས་གཞན་གྱི་དངོས་པོ་ལྷུང་བ་མཐོང་ནས་དེས་འདི་དགེ་སློང་ཆེ་གེ་མོ་ཞིག་གི་ཡིན་ནོ་ཞེས་ངོ་ཤེས་ནས་དེས་དེ་ཁྱེར་ཏེ་དགེ་སློང་དེའི་དྲུང་དུ་སོང་ནས། ཚེ་དང་ལྡན་པ་ཁྱོད་ཀྱི་དངོས་པོ་ལྷུང་བ་འདི་ཁོ་བོས་མཐོང་གིས་ལོང་ཤིག་།དགེ་སློང་དེ་དེ་ལ་ནང་དང་བཅས་པ་ཡིན་པས་སྨྲས་པ། ཚེ་དང་ལྡན་པ་ཁྱོད་ཀྱིས་འདི་ལྷུང་བ་མཐོང་བ་མ་ཡིན་གྱི་འདི་ལྟར་ཁྱོད་ཀྱི་རྐུ་སེམས་ཀྱིས་བརྐུས་སོ། །
5.96b
དགེ་སློང་དེ་བདག་ལྟུང་བ་དང་བཅས་པར་མ་གྱུར་ཏམ་སྙམ་དུ་འགྱོད་པ་སྐྱེས་པར་གྱུར་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི་འོན་ཀྱང་དགེ་སློང་གིས་དགེ་སློང་གི་ཡོ་བྱད་ལྷུང་བ་མཐོང་ན་དགེ་བསྐོས་ལ་གཏད་པར་བྱ་ཞིང ། དགེ་བསྐོས་ཀྱིས་ཀྱང་ཉི་མ་གཉིས་སམ། གསུམ་དུ་དགེ་འདུན་གྱི་ནང་དུ་བྲིམ་པར་བྱ་ཞིང་གལ་ཏེ་ངོ་ཤེས་པ་ཡོད་ན་དེ་གཏད་པར་བྱའོ། །གལ་ཏེ་མེད་ན་དགེ་འདུན་གྱིས་ཅི་བདེར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་ཀྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མ་རི་མ་ཞེས་བྱ་བ་དགྲ་བཅོམ་པ་རྣམ་པར་རྒྱལ་བར་བྱ་བ་ལས་རྣམ་པར་རྒྱལ་བ་ཞིག་འདུག་པ་དེ་ལ་སྤོས་འཚོང་གི་ཁྱེའུ་ཞིག་མངོན་པར་དད་པར་གྱུར་ནས། དེས་དེའི་རྐང་པ་གཉིས་ལ་ཕྱག་འཚལ་ཏེ། འཕགས་མ་ཁྱོད་ལ་ཅི་དང་ཅི་འཚལ་བ་དེའི་སླད་དུ་བཀའ་སྩོལ་ཅིག་དང་ཐམས་ཅད་བསྒྲུབ་པར་བགྱིའོ་ཞེས་ཡོ་བྱད་ཐམས་ཅད་ཀྱིས་བསྟབས་པ་དང ། དེས་ཀྱང་བཞིན་བཟངས་ཨ་རོག་ཁྱ་དེ་ལྟར་བྱའོ་ཞེས་དང་དུ་བླངས་སོ། །ཇི་ཙམ་དུས་གཞན་ཞིག་ན་དགེ་སློང་མ་རི་མ་ན་བར་གྱུར་ནས་བསོད་སྙོམས་ལ་མ་སོང་ཞིང་དགེ་སློང་མ་དག་བསོད་སྙོམས་ལ་ཞུགས་པ་དང ། སྤོས་འཚོང་གི་ཁྱེའུ་དེས་དེ་དག་ལ་ཕྱག་འཚལ་ཏེ་སྨྲས་པ། འཕགས་མ་དག་འཕགས་མ་རི་མ་རེ་ཤིག་མི་གདའ་ན་གར་བཞུད་ཞུའོ། །དེ་དག་གིས་སྨྲས་པ། བཞིན་བཟངས་ཐུགས་མི་བདེའོ། །དེས་སྨྲས་པ། འཕགས་མ་དེ་ལ་བདག་གིས་ཡོ་བྱད་ཐམས་ཅད་ཀྱིས་བསྟབས་ན་དེས་བདག་ལ་ལན་འགའ་ཡང་ཅུང་ཟད་ཀྱང་མ་བླངས་ནས་དེའི་སླད་དུ་གལ་ཏེ་དེ་ལ་འཚལ་བ་འགའ་ཞིག་མཆིས་ན་སྤྱོན་ལ་སྙོམས་ཤིག་།དེ་དག་གིས་སྨྲས་པ། བཞིན་བཟང་ཨ་རོག་ཁྱ་དེ་བཞིན་བྱའོ་ཞེས་སྨྲས་ཏེ་དོང་ངོ ། །དེས་དེ་བཞིན་ལན་གསུམ་གྱི་བར་དུ་བསྟབས་པ་དང །
5.97a
དེ་ན་གཞོན་ནུ་མ་ཞིག་གིས་སྤོས་འཚོང་གི་ཁྱེའུ་འདི་ཡང་དང་ཡང་དུ་སྟོབས་པར་བྱེད་ན། ཅི་འདིའི་ཡང་དག་པར་སྟོབས་པས་སྟོབས་པར་བྱེད་དམ། འོན་ཏེ་རྟོག་པས་སྟོབས་པར་བྱེད་པ་བགམ་པར་བྱའོ་སྙམ་དུ་བསམས་ནས་དེས་དེ་ལ་འཕགས་མ་རི་མ་ལ་འབྲུ་མར་དགོས་སོ་ཞེས་ལྷུང་བཟེད་ཆུང་ངུ་ཕུལ་བ་དང ། དེས་དེ་ཉིད་ལ་འཕྲལ་ལ་བཙིར་བའི་འབྲུ་མར་གྱིས་ལྷུང་བཟེད་ཆུང་ངུ་བཀང་སྟེ་བྱིན་ནས་སྨྲས་པ། འཕགས་མ་གལ་ཏེ་ཡང་དེ་ལ་འཚལ་བ་ཅུང་ཟད་མཆིས་སྤྱོན་ལ་སྣོམས་ཤིག་གཞོན་ནུ་མ་དེས་བཞིན་བཟང་ཨ་རོག་ཁྱ་དེ་ལྟར་བྱའོ་ཞེས་སྨྲས་ཏེ་སོང་ནས། དེས་འབྲུ་མར་དེ་དགེ་སློང་མ་རི་མའི་ལག་པའི་བསྐུ་མཉེ་དང ། རྐང་པའི་བསྐུ་མཉེ་དང ། མགོ་དང་ལུས་ཀྱི་བསྐུ་མཉེ་དང་མར་མེའི་འབྲུ་མར་དུ་སྤྱད་དོ། །ཇི་ཙམ་དུས་གཞན་ཞིག་ན་དགེ་སློང་མ་རི་མ་ནད་སོས་ཏེ་བསོད་སྙོམས་ལ་ཞུགས་པ་དང ། སྤོས་འཚོང་གི་ཁྱེའུ་དེས་མཐོང་ནས། དེས་ཕྱག་འཚལ་ཏེ་སྨྲས་པ། འཕགས་མ་ཧ་ཅང་ཡུན་རིང་ཞིག་གིས་མཐོང་ངོ ། །དེས་སྨྲས་པ། བུ་བདག་བྲོ་འཚལ་བར་གྱུར་ཏོ། །འཕགས་མ་བདག་གིས་ཡོ་བྱད་ཐམས་ཅད་ཀྱིས་བཏབས་ན། ཁྱོད་ཀྱིས་ལན་འགའ་ཡང་ཅུང་ཟད་ཀྱང་བཀའ་སྩལ་ནས། འདི་ལྟར་འཕགས་མ་གཅིག་ཅིག་མཆིས་ཏེ་འཕགས་མ་རི་མ་ལ་འབྲུ་མར་འཚལ་ལོ་ཞེས་མཆི་ནས། བདག་གིས་དེ་ཉིད་ཀྱི་སུག་པར་འབྲུ་མར་འཕྲལ་ལ་བཙིར་བས་ལྷུང་བཟེད་ཆུང་ངུ་བཀང་སྟེ་སྩལ་ཏོ། །དེས་སྨྲས་པ། ཨ་རོག་ཁྱ་མ་ནོངས་སོ་ཞེས་སྨྲས་ཏེ། སོང་ནས་བསོད་སྙོམས་བརྒྱུས་ཏེ་དབྱར་ཁང་དུ་ཕྱིན་ནས་སྨྲས་པ། གཞོན་ནུ་མ་ཁྱེད་ཀྱིས་ཁོ་མོའི་མིང་གིས་སྤོས་འཚོང་གི་ཁྱེའུ་ཆེ་གེ་མོ་ཞིག་ལས་ལན་ཅིག་འབྲུ་མར་བསླངས་སམ། གཞོན་ནུ་མ་དེས་སྨྲས་པ། འཕགས་མ་བདག་བསོད་སྙོམས་ལ་ཞུགས་པ་ན་དེས་ལན་གསུམ་གྱི་བར་དུ་འཕགས་མ་རི་མ་ལ་བདག་གིས་ཡོ་བྱད་ཐམས་ཅད་ཀྱིས་བསྟབས་ན། དེས་བདག་ལ་ལན་འགའ་ཡང་ཅུང་ཟད་ཀྱང་མ་བསླངས་ན། གལ་ཏེ་འཕགས་མ་ལ་འཚལ་བ་ཅུང་ཟད་མཆིས་ན་སྤྱོན་ལ
5.97b
སྣོམས་ཤིག་ཅེས་མཆི་ནས། བདག་ལ་འདི་ཡང་དང་ཡང་དུ་སྟོབས་ན་ཅི་འདི་ཡང་དག་པར་སྟོབས་པས་སྟོབས་པར་བགྱིད་དམ། འོན་ཏེ་རྟོག་པས་སྟོབས་པར་བགྱིད་པ་བགམ་མོ་སྙམ་པའི་བློ་བྱུང་ནས་བདག་གིས་དེ་ལ་འཕགས་མ་རི་མ་ལ་འབྲུ་མར་འཚལ་ལོ་ཞེས་ལྷུང་བཟེད་ཆུང་ངུ་ཕུལ་བ་དང ། དེས་འབྲུ་མར་གྱི་ལྷུང་བཟེད་ཆུང་ངུ་བལྟམ་སྟེ་སྩལ་ནས་བདག་གིས་དེ་འཕགས་མའི་ཕྱག་དང ། ཞབས་དང ། དབུ་དང ། སྐུའི་བསྐུ་མཉེ་དང ། ཞུགས་མར་གྱི་འབྲུ་མར་དུ་སྤྱད་དོ། །དེས་སྨྲས་པ། ཅི་ཁོ་མོས་ཁྱོད་ལ་ལན་འགའ་ཞིག་དེའི་གན་དུ་སོང་ལ་འབྲུ་མར་ཁྱེར་ཏེ་ཤོག་ཤིག་ཅེས་སྨྲས་སམ། ལན་འགའ་ཡང་བཀའ་མ་སྩལ་ཏོ། །དེ་ལ་ནང་དང་བཅས་པའི་དགེ་སློང་མ་གཞན་ཞིག་གིས་སྨྲས་པ། འཕགས་མ་ཅི་འདི་འབའ་ཞིག་ཏུ་བས་སྙམ་འམ། འདིས་འཕགས་མ་རི་མ་རྒྱུར་བགྱིས་ཏེ། མཉན་ཡོད་ཐམས་ཅད་ཁྱབ་པར་བགྱིས་པས་ཕམ་པར་གྱུར་པ་དག་གིས་ལྟོ་གང་ངོ ། །དགེ་སློང་མ་དེ་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་མ་རྣམས་ལ་བརྗོད་དོ། །དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་དགེ་སློང་མ་དེ་ལ་རྨས་པ། དགེ་སློང་མ་ཁྱོད་ཀྱིས་བསམ་པ་ཇི་ལྟ་བུས་འབྲུ་མར་བསླངས། བཅོམ་ལྡན་འདས་བགམ་པའི་བསམས་པས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་བགམ་པའི་བསམ་པ་ཅན་འདི་ལ་ནི་ལྟུང་བ་མེད་དེ། ཡང་དགེ་སློང་ངམ། དགེ་སློང་མས་ནད་པ་ལ་མ་དྲིས་པར་སྨན་སྦྱོར་དུ་གཞུག་པར་མི་བྱ་བར་འདི་ལྟར་དགེ་འདུན་གྱི་ནད་པའི་སྨན་ཁང་ནས་བསླང་བར་བྱ་བ་འམ། འོན་ཏེ་དད་པ་ཅན་ལས་སམ། ཉེ་དུ་འམ་ཉེ་དུ་མང་བ་ཉིད་ཡིན་ན་ཡང་གང་སྦྱོར་དུ་གཞུག་ཅེས་ནད་པ་ལ་དྲི་བར་བྱ་ཞིང ། དེས་གང་བརྗོད་པ་དེ་ལས་བླང་བར་བྱའོ། །དགེ་སློང་ངམ་དགེ་སློང་མས་ནད་པ་ལ་མ་དྲིས་པར་སྨན་སྦྱོར་དུ་འཇུག་ན། འགལ་ཚབས་ཅན་དུ་འགྱུར་རོ། །
5.98a
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་བསོད་སྙོམས་ལ་རྒྱུ་ཞིང་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་ག་ལ་བ་དེར་སོང་ངོ ། །དེའི་ཚེ་ན་ཁྱིམ་བདག་མགོན་མེད་ཟས་སྦྱིན་གྱི་བུ་དག་ཕྱི་རོལ་གྱི་བསྟན་བཅོས་དག་ཀློག་གོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཁྱིམ་བདག་མགོན་མེད་ཟས་སྦྱིན་གྱི་བུ་དག་ཕྱི་རོལ་གྱི་བསྟན་བཅོས་དག་ཀློག་པ་མཐོང་ངོ ། །མཐོང་ནས་ཀྱང་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱེའུ་དག་ཅི་ཀློག་།འཕགས་པ་སླད་རོལ་གྱི་བསྟན་བཅོས་དག་གོ། །ཁྱིམ་བདག་ཕྱི་རོལ་གྱི་བསྟན་བཅོས་དག་ནི་ལྕགས་ཀྱི་སེའུ་དང་འདྲ་སྟེ་རྟོགས་པར་དཀའ་ཞིང ། རྟོགས་ན་ཡང་དེ་དག་གིས་ངེས་པ་ལ་འཇུག་པར་ཡང་མི་འགྱུར། ཟག་པ་ཟད་པར་ཡང་མི་འགྱུར་རོ། །སངས་རྒྱས་ཀྱི་བཀར་ནི་ཐོག་མ་དང ། བར་དང ། ཐ་མར་དགེ་བ། མངོན་པར་ཤེས་པ་དང ། རྫོགས་པར་བྱང་ཆུབ་པ་དང ། མྱ་ངན་ལས་འདའ་བར་འགྱུར་བ་ཡིན་ན་ཅིའི་ཕྱིར་དེ་མི་ཀློག་།འཕགས་པ་སུས་དེ་ཀློག་ཏུ་སྩོལ། ཁོ་བོས་ཀློག་ཏུ་གཞུག་གོ། །འཕགས་པ་མ་ནོངས་ཀྱིས་ཀློག་ཏུ་སྩོལ་ཅིག་།ཁྱིམ་བདག་མགོན་མེད་ཟས་སྦྱིན་གྱིས་ཁྱེའུ་དེ་དག་ལ་སྨྲས་པ། ཁྱེའུ་དག་འཕགས་པའི་དྲུང་དུ་རྒྱལ་བྱེད་ཀྱི་ཚལ་དུ་དེང་ལ་སངས་རྒྱས་ཀྱི་བཀའ་ཀློགས་ཤིག་།ཁྱེའུ་དེ་དག་ཉི་མ་རེ་རེ་ཞིང་རྒྱན་གྱིས་ཀླུབས་ཏེ། ཁྱེའུ་མངག་གཞུག་པ་དག་གིས་ཡོངས་སུ་བསྐོར་ནས་རྒྱལ་བྱེད་ཀྱི་ཚལ་དུ་དོང་སྟེ། ཚེ་དང་ལྡན་པ་མཽད་གལ་གྱི་བུ་ཆེན་པོ་ལས་སངས་རྒྱས་ཀྱི་བཀའ་ཀླག་པར་བརྩམས་སོ། །མཉན་ཡོད་ན་སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ཆོམ་རྐུན་པ་དག་གི་ཀུན་ཏུ་སྤྱོད་པ་ནི་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན་དེས་བརྩལ་མི
5.98b
དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་ལ་ཁྱིམ་བདག་མགོན་མེད་ཟས་སྦྱིན་གྱི་བུ་དག་ཉི་མ་རེ་རེ་ཞིང་རྒྱན་ཐམས་ཅད་ཀྱིས་ཀླུབས་ཏེ་ཁྱེའུ་མངག་གཞུག་པ་དག་གིས་བསྐོར་ནས་རྒྱལ་བྱེད་ཀྱི་ཚལ་དུ་འདོང་ཞིང་འཕགས་པ་མཽད་གལ་གྱི་བུ་ཆེན་པོ་ལས་སངས་རྒྱས་ཀྱི་བཀའ་ཀློག་པར་བྱེད་ཀྱིས་ལམ་གྱི་བར་དུ་བསྡད་དེ་དེ་དག་བཟུང་ན་འཕགས་པ་མཽད་གལ་གྱི་བུ་ཆེན་པོས་ནི་ཁྱེའུ་དག་ཁྱིམ་ན་འཁོད་དོ་སྙམ་དུ་ཤེས་ལ། ཁྱིམ་བདག་གིས་ཀྱང་འཕགས་པ་མཽད་གལ་གྱི་བུ་ཆེན་པོའི་དྲུང་ན་འཁོད་དོ་སྙམ་དུ་ཤེས་པས་གལ་ཏེ་ཁྱེའུ་དག་དབྲོག་པར་ནུས་ན་ནི་བདག་ཅག་གི་འཚོ་བའི་བར་གྱི་འཚོ་བ་ཡོད་ལ། ཇི་སྟེ་མ་ནུས་ན་རྒྱན་དབྲོག་པར་བྱ་སྟེ། དེས་ཀྱང་བདག་ཅག་བཙལ་མི་དགོས་པར་ལོ་བསྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་རོ་སྙམ་པའི་བློ་སྐྱེས་སོ། །དེ་དག་བརྡ་བྱས་ཏེ་ལམ་གྱི་བར་དུ་དོང་ནས་འཁོད་པ་དང ། ཁྱེའུ་དེ་དག་ཀྱང་རྒྱན་ཐམས་ཅད་ཀྱིས་ཀླུབས་ཏེ་འོངས་ནས་ཆོམ་རྐུན་པ་དེ་དག་གིས་ཁྱེའུ་དེ་དག་ཁྱེར་རོ། །ཁྱེའུ་དེ་དག་གི་ཕྱི་བཞིན་ཁྱེའུ་མངག་གཞུག་པ་དག་འདོང་བ་དེ་དག་གིས་ཁྱེའུ་དེ་དག་ཆོམ་རྐུན་པ་དག་གིས་བརྐུས་པ་མཐོང་ནས། དེ་དག་གིས་ཁྱིམ་བདག་མགོན་མེད་ཟས་སྦྱིན་གྱི་དྲུང་དུ་བརྒྱུགས་ཏེ་སྦྲན་པ། ཁྱིམ་བདག་ཁྱོད་ཀྱི་སྲས་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་ཀྱིས་ཐབས་དགོངས་ཤིག་།ཁྱིམ་བདག་མགོན་མེད་ཟས་བྱིན་བརྒྱུགས་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གན་དུ་སོང་ནས་སྨྲས་པ། ལྷ་བདག་གི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་ཀྱིས་བུའི་སློངས་མོ་སྩལ་དུ་གསོལ། རྒྱལ་པོ་གསལ་རྒྱལ་གྱིས་རྒྱལ་བུ་གཞོན་ནུ་འཕགས་སྐྱེས་པོ་ལ་བསྒོ་བ། སོང་ལ་ཁྱིམ་བདག་གི་བུ་རྣམས་དང་ཆོམ་རྐུན་པ་དག་མྱུར་དུ་ཁུག་ཤིག་།འཕགས་སྐྱེས་པོ་ཡུན་རིང་པོ་ནས་ཁྱིམ་བདག་མགོན་མེད་ཟས་སྦྱིན་དང་ནང་དང་བཅས་པར་གྱུར་པས་དེའི་མོད་ལ་མ་སོང་ངོ ། །
5.99a
དེ་ནས་ལྷ་གང་དག་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་མངོན་པར་དད་པ་དེ་དག་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱོད་ཀྱི་ཉེ་གནས་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་ཀྱིས་བརྩོན་པར་མཛད་དུ་གསོལ། ཚེ་དང་ལྡན་པ་མཽད་གལ་གྱི་བུ་ཆེན་པོས་གལ་ཏེ་ཁྱེའུ་དག་ལ་མ་བསམས་ན། རེ་ཤིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་འགྱུར་ཞིང ། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུངས་ཀྱི་གཡོན་ཅན་དག་གི་འཕྲོག་པར་བྱེད་ན། ཕྱིན་ཆད་སུ་ཞིག་རྒྱལ་བྱེད་ཀྱི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས། ཚེ་དང་ལྡན་པ་མཽད་གལ་གྱི་བུ་ཆེན་པོས་རྫུ་འཕྲུལ་གྱིས་འཕགས་སྐྱེས་པོའི་དཔུང་མངོན་པར་སྤྲུལ་ཏེ། ཕྱོགས་བཞིར་རྔ་པ་ཊ་ཧ་བརྡུངས་པ་དང ། སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཤེས་ལྡན་དག་བདག་ཅག་དམག་དཔོན་འཕགས་སྐྱེས་པོས་ཕྱོགས་བཞི་ནས་བསྐོར་གྱིས་ཟིན་པར་གྱུར་ན་མི་རུང་གིས་བོར་ལ་འདོང་ངོ་སྙམ་དུ་བསམས་ནས་དེ་དག་གིས་ཁྱེའུ་དེ་དག་བོར་ཏེ་བྱེར་རོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཀྱང་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བརྟུལ་ནས་ལམ་དང་ཉེ་བར་ཤིང་ལྗོན་པའི་དྲུང་དུ་འདུག་གོ། །ཁྱེའུ་དེ་དག་ཀྱང་འོངས་པ་དང ། འཕགས་པ་མཽད་གལ་གྱི་བུ་ཆེན་པོས་སྨྲས་པ། ཁྱེའུ་དག་ཁྱེད་ཅག་གར་དོང་དོང ། འཕགས་པ་བདག་ཅག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་སོ། །འོ་ན་སུས་ཐར་བར་བྱས། དམག་དཔོན་འཕགས་སྐྱེས་པོས་སོ། །ཁྱེའུ་དག་དེ་རིང་ཁྱེད་ཅག་གི་ཕ་མ་དག་ཡིད་མི་བདེ་བར་འཁོད་ཀྱིས་དེང་ལ་སང་ལྷོགས་ཤིག་།ཁྱེའུ་དེ་དག་ཁྱིམ་དུ
5.99b
འཕགས་པ་དང ། དམག་དཔོན་འཕགས་སྐྱེས་པོ་ཡང་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་མཉན་ཡོད་ནས་བྱུང་ངོ ། །འཕགས་སྐྱེས་པོས་ཁྱེའུ་དེ་དག་མཐོང་ནས་སྨྲས་པ། ཁྱེའུ་དག་ཁྱེད་ཅག་གར་དོང་དོང ། དེ་དག་གིས་སྨྲས་པ། རྒྱལ་བྱེད་ཀྱི་ཚལ་དུ་འདོང་བ་ན་བདག་ཅག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་སོ། །འོ་ན་ཁྱེད་ཅག་སུས་ཐར་བར་བྱས། དམག་དཔོན་འཕགས་སྐྱེས་པོས་སོ། །འཕགས་སྐྱེས་པོས་བདག་ད་ལྟར་འགྲོ་བས་བདག་གིས་ཇི་ལྟར་འདི་དག་ཐར་བར་བྱས། འཕགས་པ་རྫུ་འཕྲུལ་ཆེ་བ། མཐུ་ཆེ་བ་འགའ་ཞིག་གིས་འདི་དག་ཐར་བར་བྱས་གོར་མ་ཆག་སྙམ་དུ་བསམས་ཤིང་རིག་ནས་སྨྲས་པ། ཁྱེའུ་དག་ཁྱེད་ཅག་གིས་ཕྱོགས་དེ་ན་སུ་མཐོང ། འཕགས་པ་མཽད་གལ་གྱི་བུ་ཆེན་པོའོ། །འཕགས་སྐྱེས་པོ་དེས་འདི་དག་ཐར་བར་བྱས་ཀྱི་གཞན་སུ་ཞིག་གིས་ནུས་སྙམ་དུ་བསམས་ཤིང་རིག་ནས་ཡིད་དགའ་ཞིང་ཡིད་དགའ་ནས་བདག་ཅག་གི་ཡུལ་ན་འཕགས་པ་དེ་ལྟར་རྫུ་འཕྲུལ་ཆེ་བ། དེ་ལྟར་མཐུ་ཆེ་བ་ཚེ་འདིའི་དོན་དང ། ཚེ་ཕྱི་མའི་དོན་དང ། ཚེ་འདི་དང་ཚེ་ཕྱི་མའི་དོན་ལ་སྐྱབས་མཛད་པ་བཞུགས་པ་དེ་ནི་བདག་ཅག་གིས་རྙེད་པ་ལེགས་པར་བརྙེད་དོ་ཞེས་ཆེད་དུ་བརྗོད་པར་བྱེད་དོ། །དེ་བསྔགས་པ་བརྗོད་ཅིང་མཉན་ཡོད་དུ་འཇུག་པ་ན་དྲུག་སྡེ་དག་ཀྱང་ཕྱིར་འབྱུང་ཞིང་དྲུག་སྡེ་དག་གིས་སྨྲས་པ། ཁྱོད་སུའི་བསྔགས་པ་བརྗོད། འཕགས་སྐྱེས་པོས་སྨྲས་པ ། ཁྱེད་ཀྱིའོ། །ངེད་ཀྱིས་ཅི་བྱས། འཕགས་པ་མཽད་གལ་གྱི་བུ་ཆེན་པོས་ཁྱིམ་བདག་མགོན་མེད་ཟས་སྦྱིན་གྱི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པ་ཐར་བར་བྱས་སོ། །བཀྲེན་པ་དག་ཁོ་བོ་ཅག་དེ་འདྲ་ཡང་འོན་ཀྱང་འདི་ན་ལ་ལ་བྱི་བོ་གཅེར་བུ་དག་ལ་མངོན་པར་དད་དེ། གལ་ཏེ་གཅེར་བུ་དག་གིས་མཐོང་བར་གྱུར་དུ་ཟིན་ན། དེ་དག་གིས་ལམ་ཡང་ཉེ་བར་བསྟན་པར་འགྱུར་རོ། །
5.100a
དེ་དག་ཅང་མི་སྨྲ་བར་འཁོད་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་སོ། །དོན་ཉུང་ངུ་ལ་ལྟུང་བ་བྱུང་གིས་དོང་ལ་འཆགས་སུ་བཞུག་གོ། །དྲུག་སྡེ་དག་གཙུག་ལག་ཁང་དུ་དོང་སྟེ་ཟས་ཀྱི་བྱ་བ་བྱས་ནས་རྒན་རིམས་ཀྱིས་ཕྱག་འཚལ་ཏེ། ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ་གནས་བརྟན་ཇེ་སྐབས་ཕྱེ་ཤིག་།ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཁྱིམ་བདག་མགོན་མེད་ཟས་སྦྱིན་གྱི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པ་ཐར་བར་བགྱིས་སམ། དེ་བཞིན་ཏེ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱིས་བདག་ཅག་གིས་ཐུགས་རྗེ་ཕྱོགས་གཅིག་པ་དང ། ལྡན་ཞིང་ཉེ་གནས་ལ་ཐུགས་རྗེ་བར་མཛད་ལ་སྟོན་ཟླ་ཐ་ཆུངས་ཀྱི་གཡོན་ཅན་དག་ལ་ཐུགས་རྗེ་བར་མི་མཛད་པར་མ་འཚལ་ཏོ། །གཞན་དག་གིས་བདག་གིར་བགྱིས་པའི་ནོར་དག་ཐར་བར་བགྱིས་པའི་ལྟུང་བ་བྱུང་བ་ཆོས་བཞིན་དུ་སླར་མཛོད་ཅིག་ལྟུང་བ་མ་མཐོང་ངོ ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཞེས་གསུངས་གྱིས་ཁང་སྐྱོང་སུ་སྣང་གཎ་ཌཱི་བརྡུངས་ཤིག་།འདི་གནས་ནས་དབྱུང་བའི་ལས་བྱའོ། །ཞེས་ཁང་སྐྱོང་གི་གན་དུ་དོང་ནས་སྨྲས་པ། ཚེ་དང་ལྡན་པ་གཎ་ཌཱི་རྡུངས་ཤིག་།ཅིའི་ཕྱིར་ཚེ་དང་ལྡན་པ་མཽད་གལ་གྱི་བུ་ཆེན་པོ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས། དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་ཀྱི་སྒྱུ་ཐབས་ཀྱིས་མི་མཐུན་པ་འགའ་མི་འབྱུང་ངམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་སྨྲས་པ། ཚེ་དང་ལྡན་པ་སུ་ཞིག
5.100b
ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད། གནས་བརྟན་སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་མཽད་གལ་གྱི་བུ་ཆེན་པོ་ལྟུང་བ་ཆོས་བཞིན་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་ཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་སོང་ལ་ཞུས་ཤིག་དང ། བཅོམ་ལྡན་འདས་ཀྱིས་ཁྱེད་ཅག་ལ་ཇི་སྐད་ལུང་སྟོན་པར་མཛད་པ་དེ་དེ་བཞིན་དུ་ཟུང་ཤིག་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཁྱོད་ཀྱི་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན་བཙུན་པ་བདག་འདི་སྙམ་བགྱིད་དེ། གལ་ཏེ་ཁྱེའུ་དག་ལ་མ་བསམས་ན་རེ་ཤིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང ། ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་འགྱུར་ཞིང ། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་འཕྲོག་པར་བྱེད་ན། ཕྱིན་ཆད་སུ་ཞིག་རྒྱལ་བྱེད་ཀྱི་ཚལ་དུ་འགྲོ་བར་འགྱུར་ཞེས་གཞན་དུ་འགྱུར་གྱིས། བདག་གིས་རྫུ་འཕྲུལ་རྣམ་པར་བསྟན་པར་བགྱིའོ། །སྙམ་དུ་བསམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མཽད་གལ་གྱི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེ་ནས་ཚེ་དང་ལྡན་པ
5.101a
པི་ལིན་དའི་བུ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས་མཐར་གྱིས་བསོད་སྙོམས་ལ་རྒྱུ་ཞིང་དམག་པའི་ཁྱིམ་ག་ལ་བ་དེར་སོང་ངོ ། །དེའི་ཚེ་ན་ཚེ་དང་ལྡན་པ་པི་ལིན་དའི་བུའི་ཚ་བོ་དག་ཕྱི་རོལ་གྱི་བསྟན་བཅོས་དག་ཀློག་གོ། །ཚེ་དང་ལྡན་པ་པི་ལིན་དའི་བུས་ཚ་བོ་དག་ཕྱི་རོལ་གྱི་བསྟན་བཅོས་དག་ཀློག་པ་མཐོང་ངོ ། །མཐོང་ནས་ཀྱང་དམག་པ་ལ་འདི་སྐད་ཅེས་སྨྲས་སོ། །ཚ་བོ་ཁྱེའུ་དག་ཅི་ཀློག་།འཕགས་པ་སླད་རོལ་གྱི་བསྟན་བཅོས་དག་གོ། །ཚ་བོ་ཕྱི་རོལ་གྱི་བསྟན་བཅོས་དག་ནི་ལྕགས་ཀྱི་སེའུ་དང་འདྲ་སྟེ་རྟོགས་པར་དཀའ་ཞིང་རྟོགས་ན་ཡང་དེ་དག་གིས་ངེས་པ་ལ་འཇུག་པར་ཡང་མི་འགྱུར། ཟག་པ་ཟད་པར་ཡང་མི་འགྱུར་རོ། །སངས་རྒྱས་ཀྱི་བཀའ་ནི་ཐོག་མ་དང ། བར་དང ། ཐ་མར་དགེ་བ། མངོན་པར་ཤེས་པ་དང ། རྫོགས་པར་བྱང་ཆུབ་པ་དང ། མྱ་ངན་ལས་འདའ་བར་འགྱུར་བ་ཡིན་ན་ཅིའི་ཕྱིར་དེ་མི་ཀློག་།འཕགས་པ་སུས་དེ་ཀློག་དུ་སྩོལ། ཁོ་བོས་ཀློག་ཏུ་གཞུག་གོ། །འཕགས་པ་མ་ནོངས་ཀྱིས་ཀློག་དུ་སྩོལ་ཅིག་།དམག་པ་དེས་ཁྱེའུ་དེ་དག་ལ་སྨྲས་པ། ཁྱེའུ་དག་འཕགས་པའི་དྲུང་དུ་འོད་མའི་ཚལ་དུ་དེང་ལ་སངས་རྒྱས་ཀྱི་བཀའ་ལྷོགས་ཤིག་།ཁྱེའུ་དེ་དག་ཉི་མ་རེ་རེ་ཞིང་རྒྱན་གྱིས་ཀླུབས་ཏེ་ཁྱེའུ་མངག་གཞུག་པ་དག་གིས་ཡོངས་སུ་བསྐོར་ནས་འོད་མའི་ཚལ་དུ་དོང་སྟེ། ཚེ་དང་ལྡན་པ་པི་ལིན་དའི་བུ་ལས་སངས་རྒྱས་ཀྱི་བཀའ་བཀླག་པར་བརྩམས་སོ། །རྒྱལ་པོའི་ཁབ་ན་སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ཆོམ་རྐུན་པ་དག་གིས་ཀུན་ཏུ་སྤྱོད་པ་ནི་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན། དེས་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་ལ་འཕགས་པ་པི་ལིན་དའི་བུའི་ཚ་བོ་དག་ཉི་མ་རེ་རེ་ཞིང་རྒྱན་ཐམས་ཅད་ཀྱིས་ཀླུབས་ཏེ། ཁྱེའུ་མངག་གཞུག་པ་དག་གིས་བསྐོར་ནས་འོད་མའི་ཚལ་དུ་འདོང་ཞིང
5.101b
འཕགས་པ་པི་ལིན་དའི་བུ་ལས་སངས་རྒྱས་ཀྱིས་བཀའ་ཀློག་པར་བྱེད་ཀྱིས་ལམ་གྱི་བར་དུ་བསྡད་དེ། དེ་དག་བཟུང་ན་འཕགས་པ་པི་ལིན་དའི་བུས་ནི་ཁྱེའུ་དག་ཁྱིམ་ན་འཁོད་དོ་སྙམ་དུ་ཤེས་ལ། བྲམ་ཟེས་ཀྱང་འཕགས་པ་པི་ལིན་དའི་བུའི་དྲུང་ན་འཁོད་དོ་སྙམ་དུ་ཤེས་པས། གལ་ཏེ་ཁྱེའུ་དག་དབྲོག་པར་ནུས་ན་ནི་བདག་ཅག་གི་འཚོ་བའི་བར་གྱི་འཚོ་བ་ཡོད་ལ། ཅི་སྟེ་མ་ནུས་ན་ནི་རྒྱན་དབྲོག་པར་བྱ་སྟེ། དེས་ཀྱང་བདག་ཅག་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་རོ་སྙམ་པའི་བློ་སྐྱེས་སོ། །དེ་དག་བརྡ་བྱས་ཏེ་ལམ་གྱི་བར་དུ་དོང་ནས་འཁོད་པ་དང ། ཁྱེའུ་དེ་དག་ཀྱང་རྒྱན་ཐམས་ཅད་ཀྱིས་ཀླུབས་ཏེ་འོངས་ནས་ཆོམ་རྐུན་པ་དེ་དག་གིས་ཁྱེའུ་དེ་དག་གྲུར་བཅུག་སྟེ་ཁྱེར་རོ། །ཁྱེའུ་དེ་དག་གི་ཕྱི་བཞིན་ཁྱེའུ་མངག་གཞུག་པ་དག་འདོང་བ་དེ་དག་གིས་ཁྱེའུ་དེ་དག་ཆོམ་རྐུན་པ་དག་གིས་བརྐུས་པ་མཐོང་ནས། དེ་དག་གིས་ཚེ་དང་ལྡན་པ་པི་ལིན་དའི་བུའི་དམག་པའི་དྲུང་དུ་བརྒྱུགས་ཏེ་སྦྲན་པ། ཇོ་བོ་ཁྱོད་ཀྱི་སྲས་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་ཀྱིས་ཐབས་དགོངས་ཤིག་།བྲམ་ཟེ་ཡང་བརྒྱུགས་ཏེ། མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་གན་དུ་སོང་ནས་སྨྲས་པ། ལྷ་བདག་གི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་ཀྱིས་བུའི་སློངས་མོ་སྩལ་དུ་གསོལ། རྒྱལ་པོ་གཟུགས་ཅན་སྙིང་པོས་རྒྱལ་པོ་གཞོན་ནུ་མ་སྐྱེས་དགྲ་ལ་བསྒོ་བ། སོང་ལ་བྲམ་ཟེའི་བུ་རྣམས་དང ། ཆོམ་རྐུན་པ་དག་མྱུར་དུ་ཁུག་ཤིག་།མ་སྐྱེས་དགྲ་ཡུན་རིང་པོ་ནས་བྲམ་ཟེ་དེ་དང ། ནང་དང་བཅས་པར་གྱུར་པས་དེའི་མོད་ལ་མ་སོང་ངོ ། །དེ་ན་ལྷ་གང་དག་ཚེ་དང་ལྡན་པ་པི་ལིན་དའི་བུ་ལ་མངོན་པར་དད་པ་དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱོད་ཀྱི་ཚ་བོ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་ཀྱི་བརྩོན་པར་མཛད་དུ་གསོལ།
5.102a
ཚེ་དང་ལྡན་པ་པི་ལིན་དའི་བུས་གལ་ཏེ་ཁྱེའུ་དག་ལ་མ་བསམས་ན། རེ་ཤིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང ། ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་གྱུར་ཞིང ། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་འཕྲོག་པར་བྱེད་ན། ཕྱིན་ཆད་སུ་ཞིག་འོད་མའི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས། ཚེ་དང་ལྡན་པ་པི་ལིན་དའི་བུས་རྫུ་འཕྲུལ་གྱིས་སོང་སྟེ་གྲུའི་དྲུང་དུ་འདུག་པ་དང་གྲུ་དེ་མི་འགུལ་བར་འདུག་གོ། །ཆོམ་རྐུན་པ་དག་གིས་ཅིའི་ཕྱིར་གྲུ་འདི་མི་འགུལ་པར་འདུག་སྙམ་དུ་བསམས་པ་དང་ཚེ་དང་ལྡན་པ་པི་ལིན་དའི་བུ་གྲུ་དང་ཉེ་བ་ན་འདུག་པ་མཐོང་ངོ ། །མཐོང་ནས་ཀྱང་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་ཅིའི་སླད་དུ་ཐོ་འཚམ་པར་མཛད། རྒ་བའི་ཆོས་ཅན་དག་ཁོ་བོ་འབའ་ཤིག་ཐོ་འཚམ་པར་བྱེད་དམ། གལ་ཏེ་ཁོ་བོས་ཡོན་ཏན་གྱི་ཚོགས་འདི་ལྟ་བུ་རྟོགས་པར་མ་གྱུར་དུ་ཟིན་ན་དེང་ཁྱེད་ཀྱིས་ཁོ་བོའི་ཚ་བོ་དག་བརྐུས་པར་མི་འགྱུར་རམ། འཕགས་པ་གཏང་དུ་གསོལ་དེང་ཤིག་།ཚེ་དང་ལྡན་པ་པི་ལིན་དའི་བུས་རྫུ་འཕྲུལ་མངོན་པར་འདུ་བྱ་བ་དེ་དག་ཕྱིར་བརྟུལ་ནས་ཁྱེའུ་དེ་དག་ལ་འདི་སྐད་ཅེས་སྨྲས་སོ། །ཁྱེའུ་དག་དེ་རིང་ཁྱེད་ཅག་གི་ཕ་མ་དག་ཡིད་མི་བདེ་བར་འཁོད་ཀྱིས། དེང་ལ་སང་ལྷོགས་ཤིག་།ཁྱེའུ་དེ་དག་ཁྱིམ་དུ་འཕགས་པ་དང ། གཞོན་ནུ་མ་སྐྱེས་དགྲ་ཡང་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་རྒྱལ་པོའི་ཁབ་ནས་བྱུང་ངོ ། །མ་སྐྱེས་དགྲས་ཁྱེའུ་དེ་དག་མཐོང་ནས་སྨྲས་པ། ཁྱེའུ་དག་ཁྱེད་ཅག་གར་དོང་ངོ ། དེ་དག་གིས་སྨྲས་པ། འོད་མའི་ཚལ་དུ་འདོང་བ་ན་བདག་ཅག་སྟོན་ཟླ་ཐ་ཆུངས་གྱི་གཡོན་ཅན
5.102b
དག་གིས་བརྐུས་སོ། །འོ་ན་ཁྱེད་ཅག་སུས་ཐར་བར་བྱས། འཕགས་པ་པི་ལིན་དའི་བུས་སོ། །མ་སྐྱེས་དགྲ་ཡིད་དགའ་ཞིང་ཡིད་དགའ་ནས་བདག་ཅག་གི་ཡུལ་ན་འཕགས་པ་དེ་ལྟར་རྫུ་འཕྲུལ་ཆེ་བ། དེ་ལྟར་མཐུ་ཆེ་བ། ཚེ་འདིའི་དོན་དང ། ཚེ་ཕྱི་མའི་དོན་དང ། ཚེ་འདི་དང་ཕྱི་མའི་དོན་ལ་སྐྱབས་མཛད་པ་བཞུགས་པ་ནི་བདག་ཅག་གིས་རྙེད་པ་ལེགས་པར་རྙེད་དོ་ཞེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་བསྔགས་པ་བརྗོད་ཅིང་རྒྱལ་པོའི་ཁབ་ཏུ་འཇུག་པ་ན་དྲུག་སྡེ་དག་ཀྱང་ཕྱིར་བྱུང་ཞིང་དྲུག་སྡེ་དག་གིས་སྨྲས་པ། ཁྱོད་སུའི་བསྔགས་པ་བརྗོད། མ་སྐྱེས་དགྲས་སྨྲས་པ། ཁྱེད་ཀྱིའོ། །ངེད་ཀྱིས་ཅི་བྱས། འཕགས་པ་པི་ལིན་དའི་བུས་བྲམ་ཟེའི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པ་ཐར་བར་བྱས་སོ། །བཀྲེན་པ་དག་ཁོ་བོ་ཅག་དེ་འདྲ་ཡང་འོན་ཀྱང་འདི་ན་ལ་ལ་བྱི་བོ་གཅེར་བུ་དག་ལ་མངོན་པར་དད་དེ། གལ་ཏེ་གཅེར་བུ་དག་གིས་མཐོང་བར་གྱུར་ཏུ་ཟིན་ན། དེ་དག་གིས་ལམ་ཡང་ཉེ་བར་བསྟན་པར་འགྱུར་རོ། །དེ་དག་ཅང་མི་སྨྲ་བར་འཁོད་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་སོ། །དོན་ཉུང་ངུ་ལ་ལྟུང་བ་བྱུང་གིས་དོང་ལ་ཆགས་སུ་གཞུག་གོ། །དྲུག་སྡེ་དག་གཙུག་ལག་ཁང་དུ་དོང་སྟེ་ཟས་ཀྱི་བྱ་བ་བྱས་ནས་རྒན་རིམས་ཀྱིས་ཕྱག་འཚལ་ཏེ། ཚེ་དང་ལྡན་པ་པི་ལིན་དའི་བུ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་ཨ་རོག་ཁྱ་གནས་བརྟན་ཇེ་སྐབས་ཕྱེ་ཤིག་།ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་བྲམ་ཟེའི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པ་ཐར་བར་བགྱིས་སམ། དེ་བཞིན་དུ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱིས། བདག་ཅག་གིས་ཐུགས་རྗེ་ཕྱོགས་གཅིག་པ་དང
5.103a
ལྡན་ཞིང་བྲམ་ཟེའི་བུ་དག་ལ་ཐུགས་རྗེ་བར་མཛད་ལ། སྟོན་ཟླ་ཐ་ཆུངས་ཀྱི་གཡོན་ཅན་དག་ལ་ཐུགས་རྗེ་བར་མི་མཛད་པར་མ་འཚལ་ཏོ། །གཞན་དག་གིས་བདག་གིར་བགྱིས་པའི་ནོར་དག་ཐར་བར་བགྱིས་པའི་ལྟུང་བ་བྱུང་བ་ཆོས་བཞིན་དུ་སླར་མཛོད་ཅིག་།ལྟུང་བ་མ་མཐོང་ངོ ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱི་ཁང་སྐྱོང་སུ་སྣང་གཎ་ཌཱི་རྡུངས་ཤིག་།འདི་གནས་ནས་དབྱུང་བའི་ལས་བྱའོ་ཞེས་ཁང་སྐྱོང་གི་གན་དུ་དོང་ནས་སྨྲས་པ། ཚེ་དང་ལྡན་པ་གཎ་ཌཱི་རྡུངས་ཤིག་།ཅིའི་ཕྱིར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་སྒྱུ་ཐབས་ཀྱིས་མི་མཐུན་པ་འགའ་མི་འབྱུང་ངམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་སྨྲས་པ། ཚེ་དང་ལྡན་པ་སུ་ཞིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད། གནས་བརྟན་སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་ཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས། དེའི་གན་དུ་སོང་ལ་ཞུས་ཤིག་དང ། བཅོམ་ལྡན་འདས་ཀྱིས་ཁྱེད་ཅག་ལ་ཇི་སྐད་ལུང་སྟོན་པར་མཛད་པ་དེ་དེ་བཞིན་དུ་ཟུང་ཤིག་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་པི་ལིན་དའི་བུ་ལ
5.103b
བཀའ་སྩལ་པ། པི་ལིན་དའི་བུ་ཁྱོད་ཀྱིས་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་ཁྱེའུ་དག་ལ་མ་བསམས་ན་རེ་ཤིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་འགྱུར་ཞིང ། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པར་བྱེད་ན། ཕྱིན་ཆད་སུ་ཞིག་འོད་མའི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས། བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམ་དུ་བསམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་པི་ལིན་དའི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ།། ་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོ་གཟུགས་ཅན་སྙིང་པོའི་ཀུན་ཏུ་སྤྱོད་པ་ནི་ཉི་མ་རེ་རེ་ཞིང་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོའོ། །ཇི་ཙམ་ན་དུས་གཞན་ཞིག་ན། རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །བཅོམ་ལྡན་འདས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་མཐའ་གཅིག་ཏུ་འདུག་པ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར
5.104a
གཟེང་སྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་སྟན་ལས་ལངས་ཏེ་སོང་ནས། ཚེ་དང་ལྡན་པ་པི་ལིན་དའི་བུའི་གཙུག་ལག་ཁང་ག་ལ་བ་དེར་སོང་ངོ ། །དེའི་ཚེ་ན་ཚེ་དང་ལྡན་པ་པི་ལིན་དའི་བུ་གཙུག་ལག་ཁང་དེ་རལ་པ་དང་འདྲུམས་པ་རང་ཉིད་ཀྱིས་ཕྱིར་འཆོས་པར་བྱེད་དོ། །ཚེ་དང་ལྡན་པ་པི་ལིན་དའི་བུས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ལག་པ་དང ། རྐང་པ་དག་བཀྲུས་ཏེ་སྟན་བཤམས་པ་ཉིད་ལ་འདུག་གོ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཚེ་དང་ལྡན་པ་པི་ལིན་དའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་ཅི་ལགས། རང་ཉིད་ཀྱིས་རལ་པ་དང་འདྲུམས་པ་སླར་འཆོས་པར་མཛད་དམ། རྒྱལ་པོ་ཆེན་པོ་རབ་ཏུ་བྱུང་བ་ནི་རང་ཉིད་ཀྱིས་བྱེད་པ་ཡིན་ཏེ། བདག་ཅག་ནི་རབ་ཏུ་བྱུང་བ་ཡིན་པས་གཞན་སུ་ཞིག་བྱེད་པར་འགྱུར། འཕགས་པ་གལ་ཏེ་དེ་ལྟ་ན་བདག་གིས་འཕགས་པ་ལ་ཞབས་འབྲིང་བ་དབུལ་ལོ། །རྒྱལ་པོ་ཆེན་པོ་ཨ་རོག་ཁྱ་དེ་བཞིན་ལན་བཞིའི་བར་དུ་སྨྲས་ནས། ལན་ལྔ་པ་ལ་ཡང་དེ་ཁོ་ན་སྐད་དུ་བདག་གིས་འཕགས་པ་ལ་ཞབས་འབྲིང་བ་དབུལ་ལོ་ཞེས་ཟེར་བ་དང ། ཚེ་དང་ལྡན་པ་པི་ལིན་དའི་བུའི་ལྷན་ཅིག་གནས་པ་བདེན་པ་དང ། འཐུན་པ་དང ། ངོ་ཟློག་ཕོད་པར་སྨྲ་བ་ཞིག་གིས་སྨྲས་པ། རྒྱལ་པོ་ཆེན་པོ་གང་ཚུན་ཆད་ནས་རྒྱལ་པོ་ཆེན་པོས་མཁན་པོ་ལ་ཞབས་འབྲིང་དག་གིས་བསྟབས་པ་ནས་མཁན་པོས་གལ་ཏེ་གཙུག་ལག་ཁང་འདི་ཡལ་བར་བོར་དུ་ལགས་ན་ད་ཙམ་ངོས་རྡིབ་པར་ཡང་གྱུར་ཏོ། །རྒྱལ་པོས་སྨྲས་པ། འཕགས་པ་ཅི་ལགས་བདག་ཅག
5.104b
གིས་ཡང་དང་ཡང་དུ་ཁས་བླངས་སམ། རྒྱལ་པོ་ཆེན་པོ་ལན་ཅིག་ཏུ་མ་བས་ཀྱི་འདི་ལྟར་འདི་ནི་ལན་ལྔ་པ་ལགས་སོ། །རྒྱལ་པོ་དེ་བརྗེད་ངས་པས་རྒྱལ་པོ་དེའི་ཀུན་ཏུ་སྤྱོད་པ་ནི་གང་ཡང་རུང་བ་ལ་ཆུང་ཟད་ཁས་བླངས་པ་ཅི་ཡང་རུང་སྟེ། དེ་ཐམས་ཅད་ཕྱི་ན་འདུག་པའི་མིས་ཡི་གེར་འདྲི་བར་བྱེད་པས་རྒྱལ་པོ་དེས་མི་དེ་ལ་སྨྲས་པ། ཀཝའེ་ནང་རྗེ་ཁོ་བོས་ཡང་དང་ཡང་དུ་ཁས་བླངས་པ་བདེན་ནམ། ལྷ་མད་དེ་འདི་ནི་ལྔ་པ་ལགས་སོ། །དེ་ལྟ་ན་ཁོ་བོ་ཆད་པའི་ལས་ལ་ཐུག་གིས་ཁོ་བོས་འཕགས་པ་ལ་ཞབས་འབྲིང་བ་ལྔ་བརྒྱ་དབུལ་ལོ། །དེས་བློན་པོ་རྣམས་ལ་བསྒོ་བ། འཕགས་པ་ལ་ཞབས་འབྲིང་བ་ལྔ་བརྒྱ་ཕུལ་ཅིག་།ཚེ་དང་ལྡན་པ་པི་ལིན་དའི་བུས་སྨྲས་པ། རྒྱལ་པོ་ཆེན་པོ་ཁོ་བོ་རང་གི་གཡོག་ཉིད་སྤངས་ཏེ་རབ་ཏུ་བྱུང་བ་ལ་གཡོག་དག་གིས་ཅི་བྱ། འཕགས་པ་དགེ་འདུན་གྱི་དོན་དུ་བཞེས་ཤིག་།རྒྱལ་པོ་ཆེན་པོ་གལ་ཏེ་དེ་ལྟ་ན་བཅོམ་ལྡན་འདས་ལ་ཞུའོ། །འཕགས་པ་དེ་མ་ནོངས་ཀྱིས་ཞུས་ཤིག་།སྐབས་དེ་ཚེ་དང་ལྡན་པ་པི་ལིན་དའི་བུས་བཅོམ་ལྡན་འདས་ལ་ཞུས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་དོན་དུ་གཡོག་དག་བླང་བར་བྱའོ། །ཚེ་དང་ལྡན་པ་པི་ལིན་དའི་བུས་གཡོག་དེ་དག་བླངས་པ་དང ། གཡོག་དེ་དག་ཡང་དང་ཡང་དུ་རྒྱལ་པོའི་ཕོ་བྲང་དུ་ལས་བྱེད་དུ་བཅུག་ནས། དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་བདག་ཅག་འཕགས་པ་དག་གི་ཞབས་འབྲིང་བར་ཕུལ་བ་ནི། བདག་ཅག་བློ་བ་དགའ་ན་ཅིའི་སླད་དུ་བདག་ཅག་ཡང་དང་ཡང་དུ་རྒྱལ་པོའི་ཕོ་བྲང་དུ་སུག་ལས་བགྱིད། བཞིན་བཟངས་དག་འཁྲུག་ལོང་མ་བྱེད་ཅིག་དང ། ཁོ་བོས་རྒྱལ་པོ་ལ་གསོལ་བར་བྱའོ། །ཇི་ཙམ་དུས་གཞན་ཞིག་ན་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་ཚེ་དང་ལྡན་པ་པི་ལིན་དའི་དྲུང་དུ་འོངས་ཏེ་རྐང་པ་ལ་ཕྱག་འཚལ་ནས། ཚེ་དང་ལྡན་པ་པི་ལིན་དའི་བུའི་མདུན་དུ་འདུག་པ་དང ། ཚེ་དང་ལྡན་པ་པི་ལིན་དའི་བུས་སྨྲས་པ། རྒྱལ་པོ་ཆེན་པོ་ཁྱོད་དགེ་འདུན་གྱི་དོན་དུ་གཡོག
5.105a
དག་ཕུལ་བས་འགྱོད་པར་མ་གྱུར་ཏམ། འཕགས་པ་བདག་ལ་འགྱོད་པ་འགའ་ཡང་མ་མཆིས་སོ། །འོ་ན་ཅིའི་ཕྱིར་གཡོག་དེ་དག་ཡང་རྒྱལ་པོའི་ཕོ་བྲང་དུ་ལས་བྱེད་དུ་བཅུག་།རྒྱལ་པོས་སྟན་དེ་ཉིད་ལ་འདུག་བཞིན་དུ་བློན་པོ་རྣམས་ལ་བསྒོ་བ། ཤེས་ལྡན་དག་འཕགས་པ་རྣམས་ཀྱིས་ཞབས་འབྲིང་བ་དག་ཕྱིན་ཆད་རྒྱལ་པོའི་ཕོ་བྲང་དུ་ལས་བྱེད་དུ་མ་གཞུག་ཤིག་།བློན་པོ་རྣམས་ཀྱིས་གང་ཡང་རུང་བ་དག་ལ་རྒྱལ་པོའི་ཕོ་བྲང་དུ་ལས་གྱིས་ཤིག་ཅེས་བསྒོ་བ་ན། དེ་དག་ན་རེ་བདག་ཅག་འཕགས་པ་དག་གི་ཡིན་ནོ་ཞེས་ཟེར་ནས། བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་གང་ལ་ཡང་མཆིད་སྩལ་བར་རྔོ་མ་ཐོག་སྟེ། གང་ཡང་རུང་བ་དག་ལ་རྒྱལ་པོའི་ཕོ་བྲང་དུ་སུག་ལས་ཚོལ་ཅིག་ཅེས་བགྱིས་ན། དེ་དག་བདག་ཅག་འཕགས་པ་རྣམས་ཀྱི་ལགས་སོ་ཞེས་མཆིའོ། །རྒྱལ་པོས་སྨྲས་པ། སོང་ལ་ཐམས་ཅད་ལས་བྱེད་དུ་ཆུག་ཤིག་།དེ་དག་ཐམས་ཅད་ཡང་རྒྱལ་པོའི་ཕོ་བྲང་དུ་ལས་བྱེད་དུ་བཅུག་ནས། དེ་དག་གིས་ཡང་ཚེ་དང་ལྡན་པ་པི་ལིན་དའི་བུ་ལ་སྨྲས་པ། འཕགས་པ་བདག་ཅག་ཡང་དེ་ཁོ་ན་བཞིན་དུ་རྒྱལ་པོའི་ཕོ་བྲང་དུ་སུག་ལས་བགྱིད་དུ་སྩལ་ན། འཕགས་པས་མ་གསོལ་ཏམ། བཞིན་བཟངས་དག་གསོལ་ཏེ། ཡང་གསོལ་བ་བྱའོ། །ཚེ་དང་ལྡན་པ་པི་ལིན་དའི་བུས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་དེ་ཁོ་ན་བཞིན་འོངས་པ་ལ་སྨྲས་པ། རྒྱལ་པོ་ཆེན་པོ་ཅི་ལགས། ཁྱོད་ཀྱང་འགྱོད་པ་སྐྱེས་པར་གྱུར་ཏམ། འཕགས་པ་ཅི་ནོངས། གཡོག་དག་ཡང་དེ་ཁོ་ན་བཞིན་དུ་ལས་བྱེད་དུ་བཅུག་གོ། །འཕགས་པ་གང་ལ་ཡང་མཆིད་སྩལ་པར་རྔོ་མ་ཐོག་སྟེ། གང་ཡང་རུང་བ་ལ་མཆིད་སྩལ་བ་ན་དེ་དག་བདག་ཅག་འཕགས་པ་དག་གི་ལགས་སོ་ཞེས་མཆིའོ། །ེ་མ་འཕགས་པ་དག་གི་ལྷ་འབངས་ཀྱི་སྡུམ་པ་ལོགས་ཤིག་ཏུ་རྩིག་ཏུ་སྩལ་ན། འདི་དག་ནི་རྒྱལ་པོའི་འོ། །འདི་དག་ནི་འཕགས་པ་དག་གིའོ། །ཞེས་འཚལ་བར་འགྱུར་རོ། །ཚེ་དང་ལྡན་པ་པི་ལིན་དའི་བུས་སྨྲས་པ། བཅོམ་ལྡན་འདས
5.105b
ལ་ཞུའོ། །དེ་ནས་ཚེ་དང་ལྡན་པ་པི་ལིན་དའི་བུས་དོན་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལྷ་འབངས་ཀྱི་སྡུམ་པ་རྩིག་ཏུ་འཇུད་པར་རྗེས་སུ་གནང་ངོ ། །དགེ་སློང་དག་གིས་གནས་གང་དུ་ལྷ་འབངས་ཀྱི་སྡུམ་པ་རྩིག་ཏུ་གཞུགས་པ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོའི་ཕོ་བྲང་གི་ཕྱི་རོལ་དང ། འོད་མའི་ཚལ་གྱི་ཕྱི་རོལ་གྱིས་བར་གང་དུ་སྐད་ཀྱིས་བོས་པ་ཐོས་ནས་དགེ་འདུན་གྱི་དོན་སྒྲུབ་པར་འགྱུར་བ་དེར་ལྷ་འབངས་ཀྱི་སྡུམ་པ་རྩིག་ཏུ་གཞུག་གོ། །དགེ་སློང་རྣམས་ཀྱིས་ཞང་བློན་དག་ལ་བསྒོ་བ། བཅོམ་ལྡན་འདས་ཀྱིས་ཕྱོགས་འདིར་ལྷ་འབངས་ཀྱི་སྡུམ་པ་རྩིག་ཏུ་ཆུག་ཤིག་ཅེས་བཀའ་སྩལ་གྱིས་དེ་ཁྱེད་ཅག་གིས་ཤེས་པར་གྱིས་ཤིག་།ཞང་བློན་དག་གིས་རྒྱལ་པོའི་ཁབ་ཏུ་དྲིལ་གྱིས་སྒྲ་སྒྲོག་ཏུ་བཅུག་སྟེ། གང་དག་འཕགས་པ་རྣམས་ཀྱི་ཞབས་འབྲིང་བ་ཡིན་པ་དེ་དག་རྒྱལ་པོའི་ཁབ་ཀྱི་ཕྱི་རོལ་དང ། འོད་མའི་ཚལ་གྱི་ཕྱི་རོལ་གྱི་བར་དུ་འདུག་པར་ཆད་ཀྱིས་དེང་ལ་དེར་སྡུམ་པ་རྩིགས་ཤིག་ཅེས་བསྒོ་ནས། དེ་དག་དེར་དོང་སྟེ་སྡུམ་པ་བརྩིགས་སོ། །ལྷ་འབངས་ཀྱི་སྡུམ་པ་བརྩིགས་ནས་དེ་དག་གཙུག་ལག་ཁང་དུ་དོང་སྟེ་ལས་བྱེད་ཅིང ། དགེ་སློང་རྣམས་ཀྱིས་དེ་དག་ལ་ལས་འདི་ནི་རུང་བ་ཡིན་གྱིས་ཁྱེད་ཀྱིས་བྱའོ། །འདི་ནི་རུང་བ་མ་ཡིན་གྱིས་ཁྱེད་ཀྱིས་མི་བྱའོ་ཞེས་ལས་བསྟན་ནས། དེ་དག་ལས་རུང་བ་བྱེད་པས་ལྷ་འབངས་ལྷ་འབངས་ཤེས་བྱ་བའི་མིང་དུ་གྱུར་ཏོ། །དགེ་འདུན་གྱི་ཀུན་དགའི་ར་བ་སྐྱོང་བར་བྱེད་པས་རྩེ་རྒོད་ཅེས་བྱ་བའི་མིང་དུ་གྱུར་ཏོ། །དེ་དག་ཐམས་ཅད་གཙུག་ལག་ཁང་དུ་འཇུག་པས་བླག་ཅོར་གྱི་སྒྲས་དགེ་སློང་དག་གིས་སེམས་རྩེ་གཅིག་པ་ཉིད་མི་འགྲུབ་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་སྙེད་དག་གིས་ལས་འགྲུབ་པ་དེ་སྙེད་འཇུག་པར་བྱའི་ཐམས་ཅད་མི་བྱའོ། །དགེ་སློང་དག་གིས་དེ་དག་ཐམས་ཅད་ལ་ཟས་དང་གོས་སྦྱིན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་ལས་བྱེད་པ་དེ་དག་
5.106a
ལ་ཟས་དང་གོས་སྦྱིན་པར་བྱའི་ཐམས་ཅད་ལ་མི་བྱའོ། །དགེ་སློང་རྣམས་ཀྱིས་དེ་དག་ན་བ་ཡལ་བར་བོར་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་ན་བ་དེ་དག་ལ་ཟས་དང་གོས་སྦྱིན་པར་བྱ་ཞིང་སྙེན་བཀུར་ཡང་བྱའོ། །ཇི་ཙམ་དུས་གཞན་ཞིག་ན་ཉེ་དགའ་དགེ་བསྐོས་བྱེད་པས་དེས་ལྷ་འབངས་དེ་དག་ལ་སྨྲས་པ། བཞིན་བཟངས་དག་ཁོ་བོ་དགེ་བསྐོས་བྱེད་ཀྱིས་ཁྱེད་ཅག་ནང་པར་སྔར་ཤོག་ཤིག་།རྒྱལ་པོའི་ཁབ་ན་སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ཆོམ་རྐུན་པ་དག་གིས་ཀུན་ཏུ་སྤྱོད་པ་ནི་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན་དེས་བཙལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་གནས་པར་འགྱུར་ཞེས་ཕན་ཚུན་གྲོས་བྱེད་དོ། །དེ་ན་དགེ་སློང་གིས་རྒྱུས་ཤེས་པ་ཅིག་འདུག་པ་དེས་སྨྲས་པ། ཤེས་ལྡན་དག་འཕགས་པ་དག་གི་གཡོག་གང་དག་གྲོང་ཁྱེར་གྱི་ཕྱི་རོལ་ན་འཁོད་པ་དེ་དག་གཞོམ་པར་བྱའོ། །གཞན་དག་གིས་སྨྲས་པ། རེ་ཤིག་དེ་དག་གི་ཇོ་བོ་གང་དག་ཡིན་པ་དེ་དག་ཀྱང་སྒོ་འཕར་བརྒྱ་སྙེད་བཟླ་བ་བྱས་ཀྱང་ལྟོ་ཁེངས་པ་འགྲུབ་པར་དཀའ་བས་དེ་དག་ལ་ཡང་ཅུང་ཟད་ཀྱང་མེད་ན་དེ་དག་གི་གཡོག་དེ་དག་ལྟ་སྨོས་ཀྱང་ཅི་དགོས། དགེ་སློང་གི་རྒྱུས་ཤེས་པ་དེས་སྨྲས་པ། ཤེས་ལྡན་དག་ཁྱེད་མི་ཤེས་ཏེ། དེ་དག་ནི་ཟན་གཞན་ལས་ཟ་ཞིང་རང་གི་ལས་རྗེས་སུ་བསྒྲུབ་པ་དེ་ལྷུར་ལེན་ཏེ། ཐབས་དུ་མ་དག་གིས་ནོར་སྒྲུབ་པར་བྱེད་པས་དེ་དག་ལ་གང་ཡོད་པ་དེ་ནི་གྲོང་ཁྱེར་འདི་ན་ཡང་མེད་ཀྱི་ཅུང་ཞིག་གཞོམ་པར་བྱའོ། །དེ་དག་གིས་བརྡ་བྱས་ཏེ་དོང་ནས་དེ་དག་གཞོམ་པར་བརྩམས་སོ། །དེ་ནས་ལྷ་གང་དག་ཚེ་དང་ལྡན་པ་པི་ལིན་དའི་བུ་ལ་མངོན་པར་དད་པ་དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱེད་ཀྱི་ཞབས་འབྲིང་བ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་འཇོམས་པར་འགྱུར་གྱིས་བརྩོན་པར་མཛད་དུ་གསོལ། ཚེ་དང་ལྡན་པ་པི་ལིན་དའི་བུས་གལ་ཏེ་གཡོག་དག་ལ་མ་བསམས་ན་གཡོག་དག་ཀྱང་རེ་ཤིག་ནོར་དང་བྲལ་བ་ལས་བྱུང་བའི་སྡུག་བསྔལ
5.106b
ཉམས་སུ་མྱོང་བར་འགྱུར་ལ། མ་དད་པ་རྣམས་ཀྱིས་ཀྱང་གླགས་རྙེད་པར་འགྱུར་ཞིང་དད་པ་རྣམས་ཀྱང་འདི་ལྟར་སྦྱིན་པར་བྱ་བའི་ཆོས་བྱིན་པ་དག་ཡོངས་སུ་སྐྱོང་བར་མི་བྱེད་ན། ཕྱིན་ཆད་སུ་ཞིག་ཤཱཀྱའི་སྲས་ཀྱི་དགེ་སློང་རྣམས་ལ་སྦྱིན་པ་དང་བྱ་བར་སེམས་ཤེས་གཞན་དུ་གྱུར་པ་ཉིད་དུ་འགྱུར་གྱིས། རྫུ་འཕྲུལ་རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས། ཚེ་དང་ལྡན་པ་པི་ལིན་དའི་བུས་ལྷ་འབངས་ཀྱི་སྡུམ་པ་དེ་ལྕགས་ཀྱི་ར་བས་བསྐོར་ཏོ། །ཆོམ་རྐུན་པ་དག་གིས་རྐུན་རྫས་ཐོགས་ཏེ་འཕགས་པ་དང ། ལྕགས་ཀྱི་ར་བ་མཐོང་ནས་དེ་དག་གིས་ཕན་ཚུན་ཀུན་ཏུ་འགྲོ་བར་བརྩམས་ན་ལམ་མ་རྙེད་དོ། །དེ་དག་གིས་རྐུན་རྫས་བོར་ཏེ་འཕགས་པ་དང ། ལྕགས་ཀྱི་ར་བ་དེ་ཡང་མི་སྣང་བར་གྱུར་ཏོ། །དེ་དག་གིས་ཡང་རྐུན་རྫས་བླངས་པ་དང ། ལྕགས་ཀྱི་ར་བ་དེ་ཡང་ཡང་ཕྱིར་བྱུང་སྟེ། ལན་བདུན་གྱི་བར་དུ་དེ་ལྟར་གྱུར་པ་དང ། དེ་དག་གིས་སྨྲས་པ། ཤེས་ལྡན་དག་འཕགས་པ་རྫུ་འཕྲུལ་ཆེ་བ། མཐུ་ཆེ་བ་འགའ་ཞིག་གིས་འདི་དག་ལ་དགོངས་པ་འདྲས་རྐུན་རྫས་བོར་ལ་བྲོས་པར་བྱའོ། །དེ་དག་གིས་རྐུན་རྫས་ཕྱོགས་གཅིག་ཏུ་བོར་ཏེ་བྲོས་སོ། །ལྷ་འབངས་དེ་དག་སད་པ་དང ། ཤེས་ལྡན་དག་བདག་ཅག་བཅོམ་མོ། །བདག་ཅག་བཅོམ་མོ་ཞེས་ཀུ་ཅོ་འདོན་ཅིང་དེ་དག་ནོར་དང་བྲལ་བ་ལས་བྱུང་བའི་ཡིད་མི་བདེ་བ་དང་ལྡན་ཞིང་ཐམས་ཅད་འདུས་ནས་ལྷ་འབངས་ཀྱི་སྡུམ་པ་ཀུན་ཏུ་བྱུལ་བར་བརྩམས་པ་དང ། ཕྱོགས་གཅིག་ན་རྫས་ཐམས་ཅད་སྤུངས་ཏེ་བཞག་པ་མཐོང་ངོ ། །དེ་ནས་དགའ་བ་དང་ཡིད་བདེ་བ་སྐྱེས་ཏེ་རང་རང་གིས་རྫས་བླངས་ནས་ཁྱིམ་ཁྱིམ་དུ་དོང་ངོ ། །དེ་དག་གིས་སོ་སོའི་ཁྱིམ་སྲུང་བ་བཞག་སྟེ། གཉིད་ལོག་པ་ན་ལྷ་དེས་དེ་དག་གི་རྨི་ལམ་དུ་སྦྲན་པ། ཤེས་ལྡན་དག་ཁྱེད་ཅག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་མ་བཅོམ་པ་འདི་དག་ཐམས་ཅད་ནི་འཕགས་པ་པི་ལིན་དའི་བུའི་མཐུ་ཡིན་ནོ། །དེ་ནས་མཚན་མོ་ནམ་ནངས་པ་དང ། ཐམས་ཅད་འདུས་ཏེ་སྨྲས་པ། ཤེས་ལྡན་དག་ལྷས་རྨི་ལམ་དུ་ཁྱེད་ཅག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་མ་བཅོམ་པ
5.107a
འདི་དག་ཐམས་ཅད་ནི་འཕགས་པ་པི་ལིན་དའི་བུའི་མཐུ་ཡིན་ནོ་ཞེས་བསྟན་ཏེ། དེ་ནི་དེ་ཁོ་ན་བཞིན་ཡིན་གྱི་གཞན་དུ་ན་འཕགས་པ་པི་ལིན་དའི་བུ་མ་གཏོགས་པ་གཞན་སུ་ཞིག་བདག་ཅག་ལ་སྙིང་རྗེ་བར་འགྱུར། དེའི་ཚེ་དེ་དག་ཇེ་བྱི་དོར་བྱས་ལ་ཕྱིས་གཙུག་ལག་ཁང་དུ་འདོང་ངོ་ཞེས་དེ་དག་ཁྲུས་བྱས་ཤིང་གོས་དཀར་པོ་དང ། དྲི་དང ། ཕྲེང་བ་རྒྱུས་བརྒྱན་ཏེ། བྱི་དོར་བྱས་ཏེ་གཙུག་ལག་ཁང་དུ་དོང་ངོ ། །ཉེ་དགའ་ཡང་ནང་པར་སྔར་ལངས་ནས་ལྡེ་མིག་དང་ལྡེ་མིག་ཀྱོག་པོ་ཐོགས་ནས་གཙུག་ལག་ཁང་གི་སྒོ་ཕྱེ་སྟེ། མར་མེའི་ཀོང་བུ་བསལ་ནས་གཙུག་ལག་ཁང་དུ་ཆག་ཆག་དང་བྱུག་པ་བྱས་ཏེ། གནས་མལ་བཤམས་ནས་མཆོད་རྟེན་གྱི་འཁོར་སར་བདུག་སྤོས་བྲིམས་ནས་ཁང་སྟེང་དུ་འཛེགས་ཏེ། གཎ་ཌཱི་རྡུང་ཞིང་ཕྱོགས་གཞིར་རྣམ་པར་བལྟའོ། །དེས་དེ་དག་གོས་དཀར་པོ་དང ། དྲི་དང ། ཕྲེང་བ་རྒྱུས་བརྒྱན་པ་མཐོང་ནས། དེ་འདི་དག་ནོར་ཅན་དག་གམ་ཚོང་དཔོན་དག་གམ། དེད་དཔོན་གཙུག་ལག་ཁང་ལྟར་འོང་བ་སུ་ཞིག་ཡིན་སྙམ་དུ་སེམས་སོ། །གང་གི་ཚེ་མཆོད་རྟེན་གྱི་འཁོར་སར་ཞུགས་པ་དེའི་ཚེ་དེས་དེ་དག་ངོ་ཤེས་ནས་ཉེ་དགས་གཤེ་ཞིང་སྨྲས་པ། ངས་ཁྱེད་ཅག་ལ་སང་ནང་པར་སྔར་ཤོག་ཤིག་ཅེས་མ་བསྒོ་འམ། ཁྱེད་གར་དོང་དོང ། དེ་དག་གིས་སྨྲས་པ། འཕགས་པ་གལ་ཏེ་བདག་ཅག་ལ་འཕགས་པ་པི་ལིན་དའི་བུས་མ་དགོངས་སུ་ལགས་ན། བདག་ཅག་དེང་ཁོ་ནར་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཚུལ་མ་ལགས་པས། སྡུག་བསྔལ་བསྒྲུབས་པར་འགྱུར་རོ། །ཉེ་དགས་གཤེ་ཞིང་སྨྲས་པ། ཁྱེད་ཅག་རེ་ཤིག་གང་གི་མཐུས་སྙེམས་པ་དེ་ལ་ཡང་ཇེ་ཁྲིམས་བཅའ་བར་བྱའོ་ཞེས་རིག་ནས་དྲུག་སྡེ་དག་སྦྲན་ཏེ། ཚེ་དང་ལྡན་པ་པི་ལིན་དའི་བུ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །གནས་བརྟན་ལ་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ། གནས་བརྟན་ཇེ་སྐབས་ཕྱེ་ཤིག་།ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཞབས་འབྲིང་བ་དག་གི་ནོར
5.107b
སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་པ་ཐར་བར་བགྱིས་སམ། དེ་བཞིན་ཏེ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམ་པར་འཇུག་པ་དག་གི་བདེ་བ་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱིས། བདག་ཅག་གིས་ཐུགས་རྗེ་ཕྱོགས་གཅིག་པ་དང་ལྡན་ཞིང་ཞབས་འབྲིང་བ་དག་ལ་ཐུགས་རྗེ་བར་མཛད་ལ། སྟོན་ཟླ་ཐ་ཆུངས་ཀྱི་གཡོན་ཅན་དག་ལ་མི་མཛད་པར་མ་འཚལ་ཏོ། །གཞན་གྱིས་བདག་གིར་བགྱིས་པའི་ནོར་དག་ཐར་པར་བགྱིས་པའི་ལྟུང་བ་བྱུང་བ་ཆོས་བཞིན་དུ་སླར་མཛོད་ཅིག་།ལྟུང་བ་མ་མཐོང་ངོ ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱིས། ཁང་སྐྱོང་སུ་སྣང ། གཎ་ཌཱི་རྡུངས་ཤིག་།འདི་གནས་ནས་དབྱུང་བའི་ལས་བྱའོ་ཞེས་དེ་དག་ཁང་སྐྱོང་གི་གན་དུ་དོང་ནས་སྨྲས་པ། ཚེ་དང་ལྡན་པ་གཎ་ཌཱི་རྡུངས་ཤིག་།ཅིའི་ཕྱིར་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་འཆོས་པས་དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་ཀྱི་སྒྱུ་ཐབས་ཀྱིས་མི་མཐུན་པ་འགའ་འབྱུང་བར་མི་འགྱུར་རམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་རྨས་པ། ཚེ་དང་ལྡན་པ་སུ་ཤིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད། སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པ་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ
5.108a
དེང་ལ་དོན་འདི་ཞུས་ཤིག་དང ། བཅོམ་ལྡན་འདས་ཀྱིས་ཁྱོད་ལ་ཇི་སྐད་ལུང་བསྟན་པ་དེ་དེ་ཁོ་ན་བཞིན་དུ་ཟུང་ཤིག་།སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་ཡིན་པས་སངས་རྒྱས་བཅོམ་ལྡན་འདས་རྣམས་ཀྱིས་ཚེ་དང་ལྡན་པ་པི་ལིན་དའི་བུ་ལ་རྨས་པ། པི་ལིན་དའི་བུ་ཁྱོད་ཀྱིས་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་སུག་རྗེད་དག་ལ་མ་བསམས་ན། སུག་རྗེད་དག་ཀྱང་རེ་ཤིག་ནོར་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་མ་དད་པ་རྣམས་ཀྱིས་ཀྱང་གླགས་རྙེད་པར་འགྱུར་ལ། དད་པ་རྣམས་ཀྱང་འདི་ལྟར་སྦྱིན་པར་བྱ་བའི་ཆོས་བྱིན་པ་ཡོངས་སུ་སྐྱོང་བར་མི་བྱེད་པས་ཕྱིན་ཆད་སུ་ཞིག་ཤཱཀྱའི་སྲས་ཀྱི་དགེ་སློང་རྣམས་ལ་སྦྱིན་པ་དང་བྱ་བར་སེམས་ཤེས་གཞན་དུ་གྱུར་པ་ཉིད་དུ་འགྱུར་གྱིས། བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམས་པས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་པི་ལིན་དའི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ནོར་ཅན་གྱིས་དགེ་སློང་གི་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་བྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཀྱིས་འདི་ལྟར་འདས་པའི་དུས་ན་ཡང་འདིས་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་སྟེ། དེ་ཉོན་ཅིག་དགེ་སློང་དག་འཇིག་རྟེན་འདི་འཇིག་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཇིག་པ་ན་སེམས་ཅན་དག་ཕལ་ཆེར་འོད་གསལ་གྱི་ལྷའི་རིས་སུ་སྐྱེའོ། །དེ་དག་དེ་ན་གཟུགས་ཅན་ཡིད་ལས་བྱུང་བ་མ་ཚང་བ་མེད་པ།
5.108b
དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་ས་ཆེན་པོ་འདི་ཆུ་འབའ་ཤིག་དང ། རྒྱ་མཚོ་འབའ་ཤིག་ཏུ་གྱུར་ཏེ། ས་ཆེན་པོ་ཆུ་འབའ་ཤིག་དང ། རྒྱ་མཚོ་འབའ་ཤིག་ཏུ་གྱུར་པའི་སྟེང་དུ་རླུང་གིས་ཕྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དེ། འདི་ལྟ་སྟེ། དཔེར་ན་འོ་མ་བསྐོལ་བ་གྲངས་བར་གྱུར་པའི་སྟེང་དུ་ཕྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་པ་དེ་བཞིན་དུ། ས་ཆེན་པོ་ཆུ་འབའ་ཤིག་དང ། རྒྱ་མཚོ་འབའ་ཤིག་ཏུ་གྱུར་པའི་སྟེང་དུ་ཡང་རླུང་གིས་ཕྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དོ། །དེ་ནི་སའི་བཅུད་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་ཡིན་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་མར་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དགེ་སློང་དག་འཇིག་རྟེན་འདི་འཆགས་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཆགས་པ་ན་འོད་གསལ་གྱིས་ལྷའི་རིས་དེ་ནས་སེམས་ཅན་ཁ་ཅིག་ཚེ་ཟད། ལས་ཟད། བསོད་ནམས་ཟད་པས་ཤི་འཕོས་ཏེ། འདི་ལྟ་བུ་ཉིད་དུ་མི་རྣམས་དང་སྐལ་བ་འཐུན་པ་ཉིད་དུ་འོང་ཞིང་འདིར་ཡང་གཟུགས་ཅན་ཡིད་ལས་བྱུང་བ། མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་མ་བྱུང་ངོ ། །འཇིག་རྟེན་དུ་རྒྱུ་སྐར་དག་ཀྱང་མ་བྱུང ། མཚན་མོ་དང ། ཉིན་མོ་དག་ཀྱང་མ་བྱུང ། སྐད་ཅིག་དང ། ཐང་ཅིག་དང ། ཡུད་ཙམ་དག་ཀྱང
5.109a
མ་བྱུང ། ཟླ་བ་དང ། ཟླ་བ་ཕྱེད་དང ། དུས་ཚིགས་དང ། ལོ་དག་ཀྱང་མ་བྱུང་ངོ ། །བུད་མེད་ཀྱང་མེད། སྐྱེས་པ་ཡང་མེད་དེ། སེམས་ཅན་སེམས་ཅན་ཞེས་བྱ་བ་འབའ་ཤིག་གིས་གྲངས་སུ་འགྲོའོ། །དེ་ནས་སེམས་ཅན་བརྐམ་པའི་རང་བཞིན་ཅན་ཞིག་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །སེམས་ཅན་གཞན་དག་གིས་ཀྱང་སེམས་ཅན་དེ་སོར་མོའི་རྩེ་མོས་སའི་བཅུད་མྱང་བར་བྱེད་པ་ན་ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་པ་དང ། ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་མཐོང་ངོ ། །མཐོང་ནས་སེམས་ཅན་དེ་དག་ཀྱང་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ ། །བདག་ཅག་གིས་ཀྱང་སོར་མོའི་རྩེ་མོས་སའི་བཅུད་མྱང་བར་བྱའོ་སྙམ་དུ་སེམས་ཤིང ། དེ་དག་ཀྱང་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་གིས་ལུས་ལ་སྲ་བ་ཉིད་དང ། ལྕི་བ་ཉིད་བྱུང་ཞིང་དེ་དག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ་དགེ་སློང་དག་ཆོས་ཉིད་ཀྱིས་ནི་འཇིག་རྟེན་དུ་མུན་པ་བྱུང་བ་ན་འཇིག་རྟེན་དུ་ཉི་མ་དང ། ཟླ་བ་དག་ཀྱང་འབྱུང་བར་འགྱུར་རོ། །འཇིག་རྟེན་དུ་རྒྱུ་སྐར་དག་དང ། མཚན་མོ་དང ། ཉིན་མོ་དག་དང ། སྐད་ཅིག་དང ། ཐང་ཅིག་དང ། ཡུད་ཅིག་དག་དང ། ཟླ་བ་དང ། ཟླ་བ་ཕྱེད་དང ། དུས་ཚིགས་དང ། ལོ་དག་ཀྱང་འབྱུང་བར་འགྱུར་རོ། །དེ་དག་དེ་ཟ་ཞིང་ཟས་དེ་དག་དང་ལྡན་པ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ།
5.109b
གང་ཟས་ཆེ་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་སའི་བཅུད་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཀྱང་ཟེར་ཏེ། འདི་ལྟ་སྟེ་དཔེར་ན་དེང་སང་མི་དག་ཟས་ཞིམ་པ་བཟང་པོ་ཅུང་ཞིག་རྙེད་ནས་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་ཀྱང་སའི་བཅུད་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད་དེ། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གི་སའི་བཅུད་མེད་པར་གྱུར་པ་ན་ས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན་དོང་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམས་གཉིས་ཉིད་དུ་མངོན་ལ། ཁ་དོག་རྣམས་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀཝའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ། །
5.110a
ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་མི་དག་སྡུག་བསྔལ་དང ། ཡིད་མི་བདེ་བ་ལ་འབའ་ཞིག་གིས་རེག་པ་ན་ཡི་གེ་དང་སྦྱར་བ་དང ། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང ། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་ཀྱང་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་ཀྱེ་མའོ་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གི་ས་ཞག་མེད་པར་གྱུར་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པར་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་ཀ་དམ་བུ་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ། ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ་ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །
5.110b
དགེ་སློང་དག་སེམས་ཅན་དེ་དག་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་མི་དག་སྨད་པ་རྣོན་པོ་འགའ་ཞིག་གིས་སྨད་པ་ན་ཡི་གེ་དང་སྦྱར་བ་དང ། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཕར་སོང་ཕར་སོང་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ། །ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གི་མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ་སོ་བ་མེད་པ། སྦུན་པ་མེད་པ། དག་པ། གཙང་བ། སོར་བཞི་པ། ཀུན་ནས་མ་དཀྲིས་པ། ནུབ་བརྔས་ན་ནང་རྒྱས་ཞིང་ཕྱིར་སྐྱེ་ལ། ནང་བརྔས་ན་ནུབ་རྒྱས་ཞིང་ཕྱིར་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་འབྱུང་བར་འགྱུར་ཏེ། དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་ལ་དབང་པོ་ཐ་དད་པ་བྱུང་བར་གྱུར་ཏེ། ཁ་ཅིག་ནི་ཕོའི་དབང་པོ་དང་ལྡན། ཁ་ཅིག་ནི་མོའི་དབང་པོ་དང་ལྡན་ནོ། །དེ་ན་གང་དག་ཕོའི་དབང་པོ་དང་ལྡན་པ་དང ། གང་དག་མོའི་དབང་པོ་དང་ལྡན་པ་དེ་དག་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་དོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་པ་དེ་ལྟ་དེ་ལྟར་ཀུན་ཏུ་ཆགས་སོ། །ཇི་ལྟ་ཇི་ལྟར་ཀུན་ཏུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ངོ ། །མཐོང་ནས
5.111a
སས་ཀྱང་འཐོར་བར་བྱེད། བོང་བ་དང ། གསེག་མ་དང ། གྱོ་མོ་དང ། གྱོ་དུམ་དག་ཀྱང་འཕེན་པར་བྱེད་ཅིང ། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའི་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་སེམས་ཅན་དག་བག་སར་བག་མར་ལེན་པ་ན་ཕྱེ་མས་ཀྱང་འཐོར་བར་བྱེད། དྲི་དང་མེ་ཏོག་དང ། འབྲས་ཡོས་དག་གིས་ཀྱང་འཐོར་བར་བྱེད་ཅིང ། འདི་སྐད་ཅེས་སྲུ་བདེ་བར་གྱུར་ཅིག་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་གིས་ཀྱང་སེམས་ཅན་ལ་ལོག་པར་ཞུགས་པ་མཐོང་ནས་སས་ཀྱང་འཐོར་བར་བྱེད། བོང་བ་དང ། གསེག་མ་དང ། གྱོ་མོ་དང་གྱོ་དུམ་དག་ཀྱང་འཕེན་པར་བྱེད་ཅིང ། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་རོ། །དགེ་སློང་དག་དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་དེང་སང་ཆོས་སུ་གྲགས་ལ། སྔོན་འདུལ་བ་མ་ཡིན་པར་གྲགས་པ་གང་ཡིན་པ་དེ་ནི་དེང་སང་འདུལ་བར་གྲགས། སྔོན་སྨད་པར་བྱ་བ་གང་ཡིན་པ་དེ་ནི་དེང་སང་བསྟོད་པར་བྱ་བ་ཡིན་ནོ། །དེ་ཉི་མ་གཅིག་ཙམ་སྤོང་བར་བྱེད། ཉི་མ་གཉིས་སམ། གསུམ་མམ། བདུན་ཙམ་སྤོང་བར་བྱེད་དོ། །གང་གི་ཕྱིར་སེམས་ཅན་དེ་དག་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ཤིན་ཏུ་ལྟུང་བར་བྱེད་པས་བརྟུལ་ཞུགས་ལ་ཞུགས་པ་དེའི་ཕྱིར་དེ་དག་ཁྱིམ་བརྩིག་པ་ལ་ཞུགས་ཏེ། བདག་ཅག་གིས་འདིར་བྱ་བ་མ་ཡིན་པ་བྱའོ། །བདག་ཅག་གིས་འདིར་བྱ་བ་མ་ཡིན་པར་བྱའོ་ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ ། །དགེ་སློང་དག་འདི་ནི་ཁྱིམ་གྱི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དེ་དག་དརྒོངས་ཀར་ཡང་དརྒོངས་ཀ་ཟ་འདོད་པས་སཱ་ལུའི་དོན་དུ་འདོང་བར
5.111b
བྱེད་ནང་པར་ཡང་ནང་པར་ཟ་འདོད་པས་སཱ་ལུའི་དོན་དུ་འདོང་བར་བྱེད་དོ། །དེ་ནས་སེམས་ཅན་ལེ་ལོའི་རང་བཞིན་ཅན་ཞིག་གིས་དརྒོངས་ཀ་དང་ནང་པར་གྱི་སཱ་ལུ་གཅིག་ཅར་བླངས་པར་གྱུར་ཏོ། །སེམས་ཅན་ཞིག་གིས་སེམས་ཅན་དེ་ལ་སྨྲས་པ། ཀཝའེ་སེམས་ཅན་ཚུར་ཤོག་སཱ་ལུའི་ཕྱིར་འདོང་ངོ ། །སེམས་ཅན་དེས་སྨྲས་པ། ཀཝའེ་སེམས་ཅན་ཁྱོད་རང་གི་སཱ་ལུའི་ཕྱིར་སོམས་ཤིག་།བདག་གིས་དརྒོངས་ཀ་དང ། ནང་པར་གྱི་སཱ་ལུ་གཅིག་ཅར་བླངས་ཟིན་ཏོ། །དེ་ནས་སེམས་ཅན་དེ་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ ། །བདག་གིས་ཀྱང་ཉི་མ་གཉིས་ཀྱི་དང ། ཉི་མ་གསུམ་གྱི་དང ། ཉི་མ་བདུན་གྱི་བར་གྱི་སཱ་ལུ་བླང་བར་བྱའོ་སྙམ་ནས། དེས་ཉི་མ་གཉིས་ཀྱི་དང ། ཉི་མ་གསུམ་གྱི་དང ། ཉི་མ་བདུན་གྱི་བར་གྱི་སཱ་ལུ་བླངས་པར་གྱུར་ཏོ། །དེ་ནས་སེམས་ཅན་ཞིག་གིས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཀཝའེ་སེམས་ཅན་ཚུར་ཤོག་སཱ་ལུའི་ཕྱིར་འདོང་ངོ ། །སེམས་ཅན་དེས་སྨྲས་པ། ཀཝའེ་སེམས་ཅན་ཁྱོད་རང་གི་སཱ་ལུའི་ཕྱིར་སོམས་ཤིག་།བདག་གིས་ཉི་མ་གཉིས་ཀྱི་དང ། ཉི་མ་གསུམ་གྱི་དང ། ཉི་མ་བདུན་གྱི་སཱ་ལུ་བླངས་ཟིན་ཏོ། །དེ་ནས་སེམས་ཅན་དེ་འདི་སྙམ་དུ། ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ ། །བདག་གིས་ཀྱང་ཟླ་བ་ཕྱེད་ཀྱི་དང ། ཟླ་བ་གཅིག་གི་སཱ་ལུ་བླང་བར་བྱའོ་སྙམ་ནས། དེས་ཟླ་བ་ཕྱེད་ཀྱི་དང ། ཟླ་བ་གཅིག་གི་སཱ་ལུ་བླངས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་སོགས་འཇོག་གི་ཡོངས་སུ་སྤྱོད་པས་ཟོས་པར་གྱུར་པ་དེའི་ཕྱིར་སཱ་ལུ་དེ་ལ་སོ་བ་དང ། སྦུན་པ་དང་འབྲས་ཀུན་ནས་དཀྲིས་པར་གྱུར་ཅིང་བརྔས་སོ་ཅོག་ཀྱང་ཕྱིར་མི་སྐྱེ་ལ། བརྔས་པར་ཡང་མངོན་ཞིང ། སཱ་ལུ་བྱིངས་དང་བྱིངས་མ་ཡིན་པ་དག་ན་རྣམ་པར་གནས་སོ། །དེ་ནས་སེམས་ཅན་དེ་དག་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་ཤེས་ལྡན་དག་བདག་ཅག་སྔོན་གཟུགས་ཅན་ཡིད་ལས་བྱུང་བ་མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ་ཁ་དོག་དང་ལྡན་པ། རང་ལས་འོད
5.112a
འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་པ་ན་བདག་ཅག་ལ་སའི་བཅུད་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ། ཕྱུང་བར་གྱུར་ནས། གང་གི་ཕྱིར་བདག་ཅག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་བདག་ཅག་གི་ལུས་ལ་སྲ་བ་ཉིད་དང ། ལྕི་བ་ཉིད་བྱུང་ཞིང་བདག་ཅག་གིས་མདོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་པ་ལས་བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །སའི་བཅུད་མེད་པར་གྱུར་པ་ན་ས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །ས་ཞག་མེད
5.112b
པར་གྱུར་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་དུ་གནས་སོ། །བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀཝའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ལ་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏེ། མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ་སོ་བ་མེད་པ། སྦུན་པ་མེད་པ། དག་པ་གཙང་བ་སོར་བཞི་པ་ཀུན་ནས་མ་དཀྲིས་པ་ནུབ་བརྔས་ནས་ནང་རྒྱལ་ཞིང་ཕྱིར་སྐྱེ་ལ། ནང་བརྔས་ན་ནུབ་རྒྱལ་ཞིང་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་བདག་ཅག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་སོགས་འཇོག་གི་ཡོངས་སུ་སྤྱོད་པས་ཟོས་པར་གྱུར་པ་དེའི་ཕྱིར་བདག་ཅག་ལ་འབྲས་སཱ་ལུ་སོ་བ་དང ། སྦུན་པ་དང ། འབྲས་ཀུན་ནས་དཀྲིས་པར་གྱུར་ཅིང་བརྔས་སོ་ཅོག་ཀྱང་ཕྱིར་མི་སྐྱེ་ལ། བརྔས་པར་ཡང་མངོན་ཞིང་སཱ་ལུ་བྱིངས་དང་བྱིངས་མ་ཡིན་པ་དག་ན་རྣམ་པར་གནས་པར་གྱུར་གྱིས་བདག་ཅག་འདུས་ཤིང་ལྷགས་ནས་མཚམས་གཅད་པར་བྱ་ཞིང་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་རྣམ་པར་གཞག་པར་བྱ་བ་སྙམ་ཞེས་དེ་དག་འདུས་ཤིང་ལྷགས་ནས། མཚམས་གཅོད་པར་བྱེད་ཅིང་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་རྣམ་པར་འཇོག་པར་བྱེད་དོ། །དགེ་སློང་དག་འདི་ནི་མུ་ཐུག་གིས་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱིས་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ།
5.113a
རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དེ་ནས་སེམས་ཅན་གཞན་ཞིག་གིས་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་ཞིག་གིས་སེམས་ཅན་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དེ་མཐོང་ངོ ། །མཐོང་ནས་ཀྱང་སེམས་ཅན་དེ་ལ། འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན། ཀཝའི་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།སེམས་ཅན་དེས་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་དེས་ཀྱང་སེམས་ཅན་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དེ་མཐོང་ངོ ། །མཐོང་ནས་ཀྱང་ཡང་སེམས་ཅན་དེ་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་ཅེས་སེམས་ཅན་དེས་སེམས་ཅན་དེ་འདྲེན་པར་བྱེད། ཁྲིད་པར་བྱེད་ཅིང་འཁོར་གྱི་ནང་དུ་ཡང་ཤེས་ལྡན་དག་སེམས་ཅན་འདི་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་ཏོ་ཞེས་སྨོད་པའི་བར་དུ་བྱེད་དོ། །དེ་ནས་སེམས་ཅན་དེ་དག་གིས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན། ཀཝའི་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།དེ་ནས་སེམས་ཅན་མ་བྱིན་པར་ལེན་པ་དེས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཤེས་ལྡན་དག་སེམས་ཅན་འདིས་ཁོ་བོ་ལ་སཱ་ལུའི་ཕྱིར་སྨྲས་ཏེ་འདྲེན་པར་བྱེད། ཁྲིད་པར་བྱེད་ཅིང་འཁོར་གྱི་ནང་དུ་སྣང་བའི་བར་དུ་བྱེད་དོ། །དེ་ནས་སེམས་ཅན་དེ་དག་གིས་སེམས་ཅན་སཱ་ལུའི་ཕྱིར་སྨྲ་བ་དེ་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་སཱ་ལུའི་ཕྱིར་སེམས་ཅན་ལ་སྨྲས་ཤིང་འདྲེན་པར་བྱེད། ཁྲིད་པར་བྱེད་ལ། འཁོར་གྱི་ནང་དུ་སྨོད་པའི་བར་དུ་བྱེད། ཀཝའེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།
5.113b
དེ་ནས་སེམས་ཅན་དེ་དག་འདི་སྙམ་དུ་ཤེས་ལྡན་དག་སཱ་ལུའི་ཕྱིར་འདྲེན་པར་བྱེད། ཁྲིད་པར་བྱེད་པ་ནས་འཁོར་གྱི་ནན་དུ་སྨོད་པར་བྱེད་པའི་བར་དག་སྣང་གིས། བདག་ཅག་འདུས་ཤིང་ལྷགས་ནས་བདག་ཅག་གི་ནང་ནས་སེམས་ཅན་གང་ཆེས་གཟུགས་བཟང་བ། ཆེས་ལྟ་ན་སྡུག་པ། ཆེས་མཛེས་པ། ཆེས་ལུས་ཆེ་བ་དེ་དག་བདག་ཅག་གིས་ཞིང་རྣམས་ཀྱི་བདག་པོར་བསྐོས་ནས། བདག་ཅག་ལས་གང་ཆད་པས་གཅད་པར་བྱ་བ་ཡང་ཆད་པས་གཅོད་པར་འགྱུར་ཞིང ། ཕན་གདགས་པར་བྱ་བ་ལ་ཡང་ཕན་འདོགས་པར་འགྱུར་ལ། བདག་ཅག་གི་ཞིང་དག་ལས་ཅི་འབྱུང་བར་འགྱུར་བ་དེ་ལས་ཆོས་དང་ལྡན་པའི་ཐོག་ཤས་ཀྱང་དབུལ་བར་བྱའོ་སྙམ་ནས་སེམས་ཅན་དེ་དག་འདུས་ཤིང་ལྷགས་ནས་དེ་དག་གི་ནང་ནས་སེམས་ཅན་གང་ཆེས་གཟུགས་བཟང་བ། ཆེས་བལྟ་ན་སྡུག་པ། ཆེས་མཛེས་པ། ཆེས་ལུས་ཆེ་བ་དེ་ཞིང་རྣམས་ཀྱི་བདག་པོར་བསྐོ་ཞིང་འདི་སྐད་ཅེས། ཀྱེ་སེམས་ཅན་ཁྱོད་ཚུར་སྤྱོན། ཁྱོད་ཀྱིས་བདག་ཅག་ལས་གང་ཆད་པས་གཅད་པར་བྱ་བ་ཡང་ཆད་པས་ཆོད་ཅིག་།ཕན་གདགས་པར་བྱ་བ་ལ་ཡང་ཕན་ཐོགས་ཤིག་།བདག་ཅག་གི་ཞིང་དག་ལས་ཅི་འབྱུང་བ་དེ་ལས་ཀྱང་བདག་ཅག་གིས་ཁྱོད་ལ་ཆོས་དང་འཐུན་པའི་ཐོག་ཤས་དབུལ་ལོ་ཞེས་སྨྲས་ཏེ། དེ་ལྟར་སྐྱེ་བོ་མང་པོས་བཀུར་ཅིང་སྐྱེ་བོ་མང་པོས་བཀུར་བས་དེ་མང་པོས་བཀུར་བ་མང་པོས་བཀུར་བ་ཞེས་བྱ་བའི་མིང་དུ་གྱུར་ཏོ། །ཞིང་རྣམས་ཀྱི་བདག་པོ་དང ། སྨས་པ་ལས་སྐྱོབ་པར་བྱེད་པས་རྒྱལ་རིགས་རྒྱལ་རིགས་ཤེས་བྱ་བའི་མིང་དུ་གྱུར་ཏོ། །ཚུལ་ཁྲིམས་ཀྱི་སྤྱོད་པ་ཀུན་ཏུ་སྤྱོད་པ་དང ། ཤེས་རབ་ཀྱི་སྤྱོད་པ་ཀུན་ཏུ་སྤྱོད་པས་ཆོས་ཀྱི་སྐྱེ་དགུ་དགའ་བར་བྱེད་པས་རྒྱལ་པོ་རྒྱལ་པོ་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་རྒྱལ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་བྲམ་ཟེའི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་གང་ཞེ་ན། དགེ་སློང་དག་དེ་ནས་སེམས་ཅན་ཁ་ཅིག་གིས་ཡོངས་སུ་འཛིན་པ་ནི་ནད་དོ། །ཡོངས་སུ་འཛིན་པ་ནི
5.114a
འབྲས་སོ། །ཡོངས་སུ་འཛིན་པ་ནི་ཟུག་རྔུའོ། །ཡོངས་སུ་འཛིན་པ་ནི་སྡུག་བསྔལ་གྱི་རྩ་བའོ་ཞེས་བྱ་བར་རིག་ནས། གྲོང་ནས་དགོན་པའི་གནས་སུ་དོང་སྟེ། ཡལ་ག་དང ། ལོ་མའི་སྤྱིལ་པོ་དག་བྱས་ནས་གནས་བཅས་ཏེ་འཁོད་དོ། །དེ་དག་རྒོངས་ཀར་ཡང་རྒོངས་ཀའི་ཟས་འདོད་པས་གྲོང་དུ་བསོད་སྙོམས་ལ་ཞུགས་སོ། །ནང་པར་ཡང་ནང་པར་གྱི་ཟས་འདོད་པས་གྲོང་དུ་བསོད་སྙོམས་ལ་ཞུགས་སོ། །དེ་ནས་སེམས་ཅན་གཞན་དག་འདི་སྙམ་དུ། ཤེས་ལྡན་འདི་དག་གིས་འདི་ལྟར་ཡོངས་སུ་འཛིན་པ་ནི་ནད་དོ། །ཡོངས་སུ་འཛིན་པ་ནི་འབྲས་སོ། །ཡོངས་སུ་འཛིན་པ་ནི་ཟུག་རྔུའོ། །ཡོངས་སུ་འཛིན་པ་ནི་སྡུག་བསྔལ་གྱི་རྩ་བའོ། །ཞེས་བྱ་བར་རིག་ནས་གྲོང་ནས་དགོན་པའི་གནས་སུ་དོང་སྟེ། ཡལ་ག་དང་ལོ་མའི་སྤྱིལ་པོ་དག་བྱས་ནས་གནས་བཅས་ཏེ་འཁོད་ཅིང ། རྒོངས་ཀར་ཡང་རྒོངས་ཀའི་ཟས་འདོད་པས་གྲོང་དུ་བསོད་སྙོམས་ལ་འཇུག་པར་བྱེད། ནང་པར་ཡང་ནང་པར་གྱི་ཟས་འདོད་པས་གྲོང་དུ་བསོད་སྙོམས་ལ་འཇུག་པར་བྱེད་པ་ནི་དཀའ་བ་བྱེད་པ་ཡིན་ནོ་སྙམ་ནས། དེ་དག་ལ་ཏེ་པོར་སྦྱིན་པ་དག་བྱ་བར་སེམས་སོ། །དེ་ནས་སེམས་ཅན་ཁ་ཅིག་བསམ་གཏན་དེ་དང ། རབ་ཏུ་དབེན་པ་དེ་མངོན་པར་རྫོགས་པར་མ་རྟོགས་པ་ན་མཐའ་གཅིག་ཏུ་དོང་སྟེ། ཡལ་ག་དང་ལོ་མའི་སྤྱིལ་པོ་དག་བྱས་ནས་འདིར་བདག་ཅག་གིས་གསང་སྔགས་ཀྱི་གཞུང་དག་བྱ། རིག་བྱེད་དག་སྦྱོར་བར་བྱའོ་ཞེས་གནས་བཅས་ཏེ་འཁོད་པར་གྱུར་ཅིང ། དེ་དག་དེ་ན་གསང་སྔགས་ཀྱི་གཞུང་དག་བྱེད། རིག་བྱེད་དག་སྦྱོར་བར་བྱེད་དོ། །དེ་ནས་དེ་ལས་སེམས་ཅན་ཁ་ཅིག་གིས་བསམ་གཏན་དེ་དང ། རབ་ཏུ་དབེན་པ་དེ་དང ། གསང་སྔགས་ཀྱི་གཞུང་དེ་དང ། རིག་བྱེད་སྦྱར་བ་དེ་མངོན་པར་རྫོགས་པར་མ་རྟོགས་པ་ན་ཡང་ཕྱིར་དགོན་པ་ནས་གྲོང་མཐར་ལྷགས་ཏེ་ཁང་ཁྱིམ་སྒོ་བཞི་པ་དག་བརྩིགས་ནས་འདིར་བདག་ཅག་གིས་སྦྱིན་པ་དག་སྦྱིན་པར་བྱ། བསོད་སྙོམས་དག་སྤེལ་བར་བྱ། སྐྱེ་བོ་འགྲོན་པ་འོངས་ཤིང་ལྷགས་པ་རྣམས་ལ་ཅི་ནུས་ཅི་ལྕོགས་སུ་བཟའ་བ་དང ། བཏུང་བས་ཚིམ་པར་བྱའོ་ཞེས་དེ་དག་དེ་ན་སྦྱིན་པ་དག་སྦྱིན། བསོད་ནམས་དག་བྱེད། སྐྱེ་བོ་འགྲོན་པ་འོངས་ཤིང་ལྷགས་པ
5.114b
རྣམས་ལ་ཅི་ནུས་ཅི་ལྕོགས་སུ་བཟའ་བ་དང་བཏུང་བས་ཚིམ་པར་བྱེད་དོ། །འདི་དག་གྲོང་ལས་ཕྱི་རོལ་ཏུ་རྟེན་ཅིང་ཕྱི་རོལ་ཏུ་སེམས་པ་ཞེས་བྱ་བ་ལས་བྲམ་ཟེ་བྲམ་ཟེ་ཞེས་བྱ་བའི་མིང་དུ་གྱུར་ཏོ། །ཡང་འདི་དག་ནི་བསམ་གཏན་མི་བྱེད་དོ་ཞེས་བྱ་བ་ལས་ཀློག་ཏུ་འཛུད་པ་ཀློག་ཏུ་འཛུད་པ་ཞེས་བྱ་བའི་མིང་དུ་གྱུར་ཏོ། །དགོན་པ་ནས་ཡང་ཕྱིར་གྲོང་མཐར་ལྷགས་པས་གྲོང་པ་གྲོང་པ་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་བྲམ་ཟེའི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱིས་ཆོས་མཆོག་ཡིན་ནོ། །དགེ་སློང་དག་རྗེའུ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་གང་ཞེ་ན། དགེ་སློང་དེ་ནས་སེམས་ཅན་ཁ་ཅིག་ཁང་ཁྱིམ་སོ་སོ་དང་ལྡན་པའི་བཟོའི་གནས་དང ། ལས་ཀྱི་གནས་དག་ལ་བརྩོན་པ་དག་ལ་སེམས་ཅན་འདི་དག་བཟོའི་གནས་དང ། ལས་ཀྱི་གནས་སོ་སོར་སྒྲུབ་པར་བྱེད་དོ་ཞེས་བྱ་བ་ལས་རྗེའུ་རིགས་རྗེའུ་རིགས་ཤེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་རྗེའུ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་ཆོས་ཉིད་ཀྱིས་ན་དཀྱིལ་འཁོར་གསུམ་པོ་དག་འཇིག་རྟེན་དུ་བྱུང་བས་བཞི་པ་དགེ་སྦྱོང་གི་དཀྱིལ་འཁོར་ཡང་འཇིག་རྟེན་དུ་འབྱུང་བར་འགྱུར་རོ། །ཇི་ལྟར་ཞེ་ན། དགེ་སློང་དག་རྒྱལ་རིགས་ཀྱི་ཁྱིམ་ནས་ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པས་རྒྱལ་རིགས་ཀྱིས་ཀྱང་དེ་དག་ལ་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང་གདུད་པའི་ལས་བྱ་བར་འོས་པ་ཡིན་ལ། བྲམ་ཟེ་དང ། རྗེའུ་རིགས་དག་གིས་ཀྱང་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང ། གདུད་པའི་ལས་བྱ་བར་འོས་པ་ཡིན་ནོ། །བྲམ་ཟེའི་ཁྱིམ་དང་རྗེའུ་རིགས་ཀྱི་ཁྱིམ་ནས
5.115a
ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་ཅིང ། རྒྱལ་རིགས་ཀྱིས་ཀྱང་དེ་དག་ལ་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང ། གདུད་པའི་ལས་བྱ་བར་འོས་པ་ཡིན་ལ། བྲམ་ཟེ་དང ། རྗེའུ་རིགས་དག་གིས་ཀྱང་དེ་དག་ལ་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང ། གདུད་པའི་ལས་བྱ་བར་འོས་པ་ཡིན་ནོ། །དགེ་སློང་དག་དེ་ལ་དེའི་ཚེ་དེའི་དུས་ན་གང་གིས་དེའི་དང་པོར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་པའི་སེམས་ཅན་དེ་ནི་དགེ་སློང་ནོར་ཅན་ཏེ། འདིས་དེའི་ཚེ་ཡང་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ ། །འདིས་ད་ལྟར་ཡང་དགེ་སློང་གི་དགེ་འདུན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤང་བའི་ཕྱིར་འབད་པར་བྱའོ། །ཞེ་སྡང་སྤང་བའི་ཕྱིར་དང ། གཏི་མུག་སྤང་བའི་ཕྱིར་འབད་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་གཉིས་པ་རྫོགས་སོ།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བརྒྱད་པ། ཕམ་པར་འགྱུར་བ་གསུམ་པའི་སྤྱི་སྡོམ་ལ། བྲན་པ་དང་ནི་བདག་ཉིད་དང ། །དུག་དང་རོ་ལངས་བསྲོ་གང་ངོ་།། ་་་།། སྡོམ་ལ། བྲན་པ་དང་ནི་སྐྱོང་བ་དང ། །མཆུ་ཅན་དང་ནི་ཤི་རི་ཀ་།ལྷུང་བཟེད་དང་ནི་ཆོས་གོས་དང ། །མངལ་ན་གནས་དང་ཚོང་དཔོན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་བྲན་པ་དང ། སྐྱོང་བ་ཞེས་བྱ་བ་ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས་སྨོས་འདྲིན་འཐུན་པར་བརྗོད་པ་གཉིས་ཤིག་འཁོད་དོ། །ཇི་ཙམ་དུས་གཞན་ཞིག་ན་སྐྱོང་བ་ན་བར་གྱུར་ནས་དེའི་ནད་གཡོག
5.115b
བྲན་པ་བྱེད་པ་ན་སྐྱོང་བས་མཚན་མོ་སྒྲ་བསྒྲག་པར་བརྩམས་པ་དང ། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཁོ་བོ་བཀྲེས་སོ། །སྐོམ་མོ། བྲན་པས་སྨྲས་པ། ཚེ་དང་ལྡན་པ་སྐྱོང་བ་རབ་ཏུ་བྱུང་བའི་སེམས་ཉེ་བར་གཞག་པར་གྱིས་ཤིག་།གལ་ཏེ་ད་ལྟར་སྨན་ཡོད་དུ་ཟིན་ཀྱང་རེ་ཤིག་བྱིན་ལེན་སྟོབས་པ་ཡང་མེད་ན་ཁྱོད་ལ་སྨན་ལྟ་སྨོས་ཀྱང་ཅི་དགོས་ཏེ་མེད་དོ། །སྐྱོང་བ་དེ་སོ་སོར་རྟོག་པ་མི་མངའ་བ་ཡིན་པས་དེ་ཁོ་བོ་སྐོམ་མོ། །བཀྲེས་སོ། །ཞེས་སྒྲ་སྒྲོགས་བཞིན་པ་ལས་ནམ་ནངས་པ་དང ། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁོ་བོས་སྨན་པ་ལ་དྲིས་ཏེ་འོང་གི་བར་དུ་ཁྱོད་ཀྱི་རེ་ཤིག་སོ་ཤིང་འོར་ཅིག་།བྲན་པས་སྨན་པའི་གན་དུ་སོང་ཏེ་སྨྲས་པ། བཞིན་བཟང་གཞོན་ནུ་ཞིག་ན་ན་དེ་ལ་འཕྲོད་པའི་སྨན་སྟོན་ཅིག་།སྨན་པས་སྨྲས་པ། འཕགས་པ་དགེ་སློང་དེའི་སྨན་ནི་འདི་དང་འདི་ལྟ་བུ་ལགས་སོ། །བྲན་པ་སྨན་པའི་གན་དུ་ཇི་སྲིད་སོང་བ་དེའི་ཚེ་ན་ཚེ་དང་ལྡན་པ་སྐྱོང་བ་ཁྲི་ལས་ལངས་ཏེ་ཤམ་ཐབས་གྱོན་ནས་འདག་རྫས་དང་རིལ་པ་སྤྱི་བླུགས་དང ། སོ་ཤིང་ཐོགས་ཏེ་བང་རིམ་དུ་བྱུང་ནས་སོ་ཤིང་དོར་བར་བརྩམས་པ་དང ། དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མཚན་མོ་ཏེ་པོར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཚེ་དང་ལྡན་པ་དག་ཁོ་བོ་ཏེ་པོར་སྐོམ་པ་དང ། བཀྲེས་པར་གྱུར་ཏོ། །དེ་ནས་དགེ་སློང་ཞིག་གིས་སྨྲས་པ། ཚེ་དང་ལྡན་པ་སྐྱོང་བ་ཁོ་བོ་ལ་ཆུའི་ཐུག་པ་ཡོད་ན་ཅི་མི་འཐུང་ངམ། སྐྱོང་བས་སྨྲས་པ། མ་ནོངས་ཀྱིས་བཏུང་ངོ་ཞེས་དེས་དེ་འཐུངས་སོ། །དགེ་སློང་གཞན་དག་གིས་སྨྲས་པ། ཁོ་བོ་ཅག་ལ་འོ་ཐུག་དང ། ཞོ་ཐུག་དང ། འཁུར་བ་དང ། ཤ་དང ། སྤྱན་གཟིགས་དག་ཡོད་ན་ཅི་མི་ཟ་འམ། སྐྱོང་བས་དགེ་སློང་དེ་དག་ལས་ཚངས་པ་མཚུངས་པར་སྤྱོད་པ་རྗེས་སུ་བསྲུང་བ་དང་བརྐམ་ཆགས་ཉིད་ཀྱིས་ཅུང་ཟད་ཅུང་ཟད་ལོངས་སྤྱད་པ་དང ། ཧ་ཅང་ཟས་དྲགས་ནས་དེ་གློས་ཕབ་སྟེ་ཉལ་ལོ། །བྲན་པ་ཡང་སྨན་པ་ལ་དྲིས་ནས་མྱུར་བ་མྱུར་བར་འོངས་ཏེ། དེ་ནས་སྨན་པས་ཇི་སྐད་བསྟན་པའི་སྨན་སྦྱར་ཏེ་སྨྲས་པ། ཚེ་དང་ལྡན་པ་སྐྱོང་བ་ལོངས་ལ་སོ་ཤིང་འོར་ཅིག་།སྐྱོང་བས་སྨྲས་པ། བོར་ཟིན་ཏོ། །བྲན་པས་སྨྲས་པ།
5.116a
མ་ཉེས་སོ་ཞེས་དེས་དཀྱིལ་འཁོར་བྱུགས་ཤིང་སྣོད་དང་ཁ་གཟར་བྱི་དོར་བྱས་ཏེ། ལོངས་ལ་ཟོ་ཅིག་ཅེས་སྨྲས་པ་དང ། སྐྱོང་བས་དེ་རྗེས་སུ་སྲུང་བས་ལངས་སོ། །བྲན་པས་སྨན་བྱིན་ལེན་བྱེད་དུ་བཅུག་སྟེ་ཕུལ་བ་དང ། སྐྱོང་བས་ཁ་གཟར་དོ་འམ། གསུམ་བཀང་སྟེ་ཟོས་ནས་གློས་ཕབ་སྟེ་ཉལ་ལོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མི་ཟ། སྐྱོང་བས་སྨྲས་པ། ཁོ་བོ་མི་འདོད་དོ། །བྲན་པས་སྨྲས་པ། ཁྱོད་ཀྱིས་མཚན་ཐོག་ཐག་ཏུ་ཁོ་བོ་བཀྲེས་སོ། །སྐོམ་མོ་ཞེས་ཁོ་བོ་ལ་ཐོ་བརྩམས་ན། ད་ནི་ཁྱོད་མི་འདོད་དོ་ཞེས་ཟེར་ན་ད་ཁྱོད་དུས་ལ་བབ་བོ། །དགེ་སློང་རྣམས་ཀྱིས་བྲན་པ་ལ་སྨྲས་པ། ཚེ་དང་ལྡན་པ་བྲན་པ་འདི་ལ་བག་བྱོས་ཤིག་།འདིས་ཁོ་བོ་ཅག་ལས་ཆུའི་ཐུག་པ་དང ། འོ་ཐུག་དག་འཐུངས་ཤིང་ཁུར་བ་དང ། ཤ་དང ། སྤྱན་གཟིགས་དག་ཟོས་སོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁྱོད་ཀྱིས་དེ་ལྟ་བྱས་པ་བདེན་ནམ། སྐྱོང་བ་ཉེས་པ་དང་བཅས་པས་ཡི་གེ་བསྒྱངས་ཏེ་སྨྲས་པ་བྱས་སོ། །བྲན་པས་སྨྲས་པ། ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་པ་ཟོས་པ་ནི་མ་ཡིན་ནོ། །སྐྱོང་བ་ངོ་ཚ་ནས་བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན། བདག་དེ་ལྟར་མི་མཐུན་པ་བྱེད་པས་བདག་གིས་དུག་ཟོས་པ་ནི་བླའི། དེ་ལྟར་མི་མཐུན་པ་བྱེད་པ་ནི་མ་ཡིན་པས་བདག་གིས་དུག་ཟའོ་སྙམ་དུ་བསམས་ནས་དེ་ལངས་ཏེ་སྣོད་དུ་བརྟག་པར་བརྩམས་པ་དང ། དེས་པར་བུར་སྣོད་ན་དུག་གི་དུམ་བུ་མཐོང་ནས་དེས་དེ་ཟོས་པ་དང ། དེ་དུག་གིས་ཡོངས་སུ་འཁྲུགས་པར་གྱུར་པའི་སེམས་ཀྱིས་འཆི་བར་བརྩམས་ཏེ་ཁ་ཆུ་འཛག་།མིག་འགྱུར། བཞིན་སྒྱུར་ཞིང་འདི་སྐད་ཅེས་བྲན་པ་ཁོ་བོ་ཤིའོ། །ཁོ་བོ་ཤིའོ་ཞེས་ཀྱང་ཟེར་རོ། །བྲན་པས་ཐོས་ནས་དེ་བརྟད་ཅིང་མྱུར་བ་མྱུར་བར་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་དེ་སྐད་ཀུ་ཅོ་འདོན་པར་བྱེད། སྐྱོང་བས
5.116b
སྨྲས་པ། ཁྱོད་ན་རེ་ཚེ་དང་ལྡན་པ་སྐྱོང་བ་ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན་ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། ཁྱོད་ཀྱིས་དེ་ལྟར་མི་མཐུན་པ་ཟོས་པ་ནི་མ་ཡིན་ནོ་ཞེས་ཟེར་བས་བདག་ལ་བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན་བདག་དེ་ལྟར་མི་མཐུན་པ་བྱེད་པས་བདག་གིས་དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་པ་ཟོས་པ་ནི་མ་ཡིན་པས་བདག་གིས་དུག་ཟའོ་སྙམ་པའི་བློ་སྐྱེས་ནས། བདག་གི་སྣོད་དུ་བརྟག་པར་བརྩམས་པ་དང་བར་བུར་སྣོད་ན་དུག་གི་དུམ་བུ་མཐོང་ནས་བདག་གིས་དེ་ཟོས་སོ། །བྲན་པས་ཡི་ཆད་པའི་བཞིན་གྱིས་སྨྲས་པ། ཚེ་དང་ལྡན་པ་ཁྱོད་ཀྱིས་མ་ལེགས་པ་བྱས་སོ་ཞེས་སྨྲས་ཏེ། སྨན་པའི་དྲུང་དུ་སོང་བ་དང ། དུག་དེ་རྣོན་པོ་ཞིག་ཡིན་པས་གཟུང་བར་མ་ནུས་ཏེ་དེ་དུས་ལ་བབ་བོ། །བྲན་པས་སྨན་པ་ཁྲིད་དེ་འོངས་པ་ན་དེ་དུས་ལ་བབ་པ་མཐོང་ནས་བྲན་པ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ་དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ནད་པ་ལ་གང་ཐོས་ན་ནད་པ་འཆི་བའི་ཕྱིར་རྩོལ་བར་བྱེད་པ་དེ་ལྟ་བུའི་གཏམ་ཉེ་བར་བརྗོད་པས་ཉེ་བར་བརྗོད་པར་མི་བྱའོ། །དགེ་སློང་གིས་ནད་པ་ལ་གང་ཐོས་ནས་ནད་པ་འཆི་བའི་ཕྱིར་རྩོལ་བར་འགྱུར་བ་དེ་ལྟ་བུའི་གཏམ་ཉེ་བར་བརྗོད་པ་ཉེ་བར་བརྗོད་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ནི་རེ་ཤིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མཆུ་ཅན་དང ། ཤི་རི་ཀ་ཞེས་བྱ་བ་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས་སྨོས
5.117a
འདྲིན་མཚུངས་པར་བརྗོད་པ་གཉིས་ཤིག་འཁོད་དོ། །མཆུ་ཅན་ནི་རྔོན་པ་ལས་རབ་ཏུ་བྱུང་བ་ཡིན་ལ། ཤི་རི་ཀ་ནི་ཁྱིམ་བདག་ལས་རབ་ཏུ་བྱུང་བ་ཡིན་ནོ། །ཇི་ཙམ་དུས་གཞན་ཞིག་ན་མཆུ་ཅན་གྱི་ཚ་བོ་གཉིས་ཤིག་ཕ་མ་དང་བྲལ་བས་དེ་དང་དེར་འཁྱམ་པ་ན་རྒྱལ་བྱེད་ཀྱི་ཚལ་དུ་ཕྱིན་ཏེ་སྒོ་ན་སྡོད་དོ། །མཆུ་ཅན་ཕྱིར་བྱུང་བ་དང་དེས་དེ་གཉིས་བཞིན་གཟུགས་ལས་ངོ་ཤེས་ནས་དེས་དེ་གཉིས་ལ་སྨྲས་པ། ཁྱེད་གཉིས་ཀྱི་ཕ་མ་གར་དོང ། དེ་གཉིས་ཀྱིས་སྨྲས་པ། དུས་ལ་བབ་བོ། །དེ་ཉེ་དུ་ལ་མཉེས་གཤིན་པས་ཐོས་ནས་མཆི་མ་དང་བཅས་པའི་སྐད་ཀྱིས་འདུག་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མཆུ་ཅན་ཁྱེའུ་འདི་གཉིས་སུ། མཆུ་ཅན་གྱིས་སྨྲས་པ། བདག་གི་ཚ་བོ་གཉིས་ཡིན་ནོ། །དགེ་སློང་རྣམས་ཀྱིས་སྨྲས་པ། ཅིའི་ཕྱིར་འདི་གཉིས་སྡུད་པར་མི་བྱེད། མཆུ་ཅན་གྱིས་སྨྲས་པ། བདག་ཀྱང་རེ་ཤིག་དཀའ་བས་བསོད་སྙོམས་སྒྲུབ་པར་བྱེད་ན་འདི་གཉིས་ཅི་ཞིག་གིས་བསྡུ་བར་བྱ། དགེ་སློང་དག་གིས་སྨྲས་པ། འདི་གཉིས་འདོད་ན་དགེ་སློང་རྣམས་ལ་མདབ་མ་དང ། མེ་ཏོག་དང ། འབྲས་བུ་དང ། སོ་ཤིང་དག་འབུལ་དུ་ཆུག་ཤིག་དང་དགེ་སློང་དག་གིས་ཀྱང་འདི་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་འགྱུར་རོ། །མཆུ་ཅན་གྱིས་དེ་གཉིས་བླངས་ནས། དེ་གཉིས་ཀྱང་གྲིམས་པ། ལེ་ལོ་མེད་པ། སྒྲུབ་ཕོད་པ་ཡིན་པས་དགེ་སློང་རྣམས་ལ་མདབ་མ་དང ། མེ་ཏོག་དང ། འབྲས་བུ་དང ། སོ་ཤིང་དག་འབུལ་བར་བྱེད་ནས་དགེ་སློང་རྣམས་ཀྱིས་ཀྱང་དེ་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་བྱེད་དོ། །དེ་གཉིས་གོས་དང ། ཟས་བཟང་པོ་དུས་ཡུན་མི་རིང་བས་ལྤགས་པ་དང་ཤ་དང ། ཁྲག་རྟས་ཤིང་དེ་གཉིས་སྟོབས་དང་སྙེམས་པ་དང་ལྡན་པར་གྱུར་ཏོ། །དེ་གཉིས་དུས་གཞན་ཞིག་ན་རྒྱལ་བྱེད་ཀྱི་ཚལ་གྱི་སྒོ་ན་རྩེ་ཞིང་འཁོད་པ་དང ། དེ་གཉིས་ཀྱི་ཉེ་དུ་དག་ལག་ན་མདའ་གཞུ་ཐོགས་ཤིང་རྒྱལ་བྱེད་ཀྱི་ཚལ་གྱི་སྒོ་ནས་རི་དགས་ཤོར་དུ་འདོང་བ་དེ་དག་གིས་དེ་གཉིས་མཐོང་ནས་དེ་དག་གིས་སྨྲས་པ། ཁྱེའུ་གཉིས་ཁྱེད་གཉིས་ག་ལས་འདིར་འོངས། ཁྱེའུ་གཉིས་ཀྱིས་སྨྲས་པ། ཤཱཀྱའི་སྲས་ཀྱི་དགེ་སྦྱོང་གི་ནང་འདི་ན་བདག་ཅག་གཉིས་ཀྱི་ཞང་པོ་རབ་ཏུ་བྱུང་བ་དེའི་གནས་ན་འཁོད་དོ། །དེ་དག
5.117b
གིས་སྨྲས་པ། ཁྱེད་གཉིས་ཀྱི་ཞང་པོ་དེ་ཡང་རེ་ཤིག་ཤཱཀྱའི་སྲས་ཀྱི་དགེ་སྦྱོང་ལས་མེད་པའི་ངང་ཚུལ་ཅན་རྣམས་ཀྱི་ནང་དུ་རབ་ཏུ་བྱུང་བ་ཡིན་ན། ཅི་ཁྱེད་གཉིས་ཀྱང་ལས་མེད་པའི་ངང་ཚུལ་ཅན་དུ་བྱེད་དམ། ཚུར་ཤོག་ཕའི་ལས་རྗེས་སུ་སྒྲུབས་ཤིག་དེ་གཉིས་ཀྱིས་སྨྲས་པ། ཁོ་བོ་ཅག་གཉིས་ལ་ཞང་པོས་ཕན་བཏགས་པས་ཇེ་དེ་ལ་དྲི་བར་བྱའོ་ཞེས་དེ་གཉིས་ཚེ་དང་ལྡན་པ་མཆུ་ཅན་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་མཆུ་ཅན་ལ་འདི་སྐད་ཅེས་སྨྲས་སོ། །ཞང་པོ་བདག་ཅག་གཉིས་ཕའི་ལས་རྗེས་སུ་སྒྲུབ་ཏུ་མཆིའོ། །མཆུ་ཅན་གྱིས་སྨྲས་པ། ཁོ་བོས་ཁྱེད་གཉིས་དད་པས་སྦྱིན་པར་བྱས་པས་བསྐྱེད་བསྐྱེད་ན་ད་ཅིའི་ཕྱིར་ཉེས་པར་སྤྱོད་པའི་ལས་འདི་ལྟ་བུ་བྱེད། དེ་གཉིས་ཀྱིས་སྨྲས་པ། ཞང་པོ་བདག་ཅག་གཉིས་མགོ་ལ་གསེར་གྱི་ཕྲེང་བས་བཅིངས་པ་ནི་ངོ་ཚའི། ཕའི་ལས་རྗེས་སུ་སྒྲུབ་པས་ནི་དེ་ལྟ་མ་ལགས་ཀྱི་མཆིའོ་ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་དོང་ནས། དེ་གཉིས་རི་དགས་གསོད་ཅིང་འཚོ་བར་བྱེད་དོ། །ཇི་ཙམ་དུས་གཞན་ཞིག་ན་ཤི་རི་ཀ་ན་བར་གྱུར་ནས་མཆུ་ཅན་དེའི་ནད་གཡོག་བྱེད་པ་ན་ཤི་རི་ཀ་སྡུག་བསྔལ་གྱི་ཚོར་བ་དག་གིས་ཉེན་ནས་བདག་རེ་ཤིག་ཚུལ་ཁྲིམས་དང་ལྡན་པས་བདག་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་བས་རྣམ་པ་ཐམས་ཅད་དུ་བདག་ཉིད་གསད་པར་བྱའོ་སྙམ་དུ་སེམས་སོ། །ཡང་བདག་ཉིད་གསོད་པར་བྱེད་པ་ནི་སྡུག་བསྔལ་བ་ཡིན་གྱིས། གསོད་པ་བྱེད་པ་ཞིག་བཙལ་ལོ་སྙམ་དུ་སེམས་ཤིང་དེ་བདག་གི་སྲོག་གཅོད་པར་བྱེད་པ་སུ་ཡོད་སྙམ་དུ་དཔྱོད་པ་ལ་ཞུགས་པ་དང ། དེ་ལ་མཆུ་ཅན་གྱི་ཚ་བོ་གཉིས་དྲག་ཤུལ་ཅན་ལག་པ་དམར་བ། སྣུན་པ་དང ། རབ་ཏུ་བསྣུན་པ་ལ་ཞུགས་པ་གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཛུད་པ། གཞན་གྱི་སྲོག་གཅོད་པས་འཚོ་བར་བྱེད་པ་ཡིན་པས་དེ་གཉིས་ཀྱི་བདག་གསོད་པར་ནུས་ཀྱི། གཞན་སུས་ཀྱང་མི་ནུས་སོ་སྙམ་པའི་བློ་སྐྱེས་ཤིང་རིག་ནས། ཚེ་དང་ལྡན་པ་མཆུ་ཅན་ལ་སྨྲས་པ། ཚེ་དང་ལྡན་པ་མཆུ་ཅན་ཁྱོད་ཀྱི་ཚ་བོ་དེ་གཉིས་མི་སྣང་ན་གར་དོང ། མཆུ་ཅན་གྱིས་སྨྲས་པ།
5.118a
ཁྱོད་དེ་གཉིས་ཀྱི་མིང་མ་འཛིན་ཅིག་།དེ་གཉིས་ནི་འདི་ལྟ་བུའི་སྡིག་པ་བྱེད་པ་ཡིན་ཏེ། དེ་གཉིས་ཁོ་བོས་དད་པས་སྦྱིན་པར་བྱ་བས་བསྐྱེད་བསྐྱེད་ན་དེ་གཉིས་ད་ཉེས་པར་སྤྱོད་པའི་ལས་བྱ་བ་ལ་ཞུགས་ཤིང་ཕའི་ལས་རྗེས་སུ་སྒྲུབ་པར་བྱེད་དེ། གཞན་གྱི་སྲོག་འཕྲོག་པར་བྱེད། གཞན་གྱི་སྲོག་གཅོད་པས་འཚོ་བར་བྱེད་དོ། །ཤི་རི་ཀས་སྨྲས་པ། དེ་གཉིས་ལ་ཀུན་ནས་མནར་སེམས་མ་སྐྱེད་ཅིག་།དེ་ནི་འདུ་འཛིའི་རིག་པ་ཡིན་ཏེ། གང་གི་ཚེ་དེ་གཉིས་རྒྱལ་བྱེད་ཀྱི་ཚལ་ན་འཁོད་པ་དེའི་ཚེ་ན་དེ་གཉིས་ཀྱིས་གྲོག་སྦུར་ཕྲ་མོའི་སྲོག་ཀྱང་མ་བཅད་དོ། །དེ་གཉིས་དེ་ལྟ་བུ་དག་དང་ལྷན་ཅིག་གནས་པས་དེ་ལྟ་བུའི་ཉེས་པར་སྤྱོད་པ་དག་བྱེད་ན་དེ་གཉིས་དེ་དག་དང་ཤིན་ཏུ་དབྲལ་བར་བྱ་ཞིང ། འདི་ལྟར་གང་གི་ཚེ་ཁྱོད་ག་ཤེད་དུ་འགྲོ་བ་དེའི་ཚེ་ན་ཁོ་བོ་སྲུང་བར་བྱེད་པ་འགའ་ཡང་མེད་པས་གལ་ཏེ་དེ་གཉིས་སྣང་ན་ཁོ་བོའི་གན་དུ་ཐོང་ལ་དེ་གཉིས་ཁོ་བོ་སྲུང་དུ་ཆུག་ཤིག་།ཇི་ཙམ་ན་མཆུ་ཅན་བསོད་སྙོམས་ལ་ཞུགས་པ་ན་དེའི་ཚ་བོ་དེ་གཉིས་ཚོང་འདུས་ན་ཤ་འཚོང་ཞིང་འདུག་པ་དེས་མཐོང་ནས། དེ་གཉིས་ལངས་ཏེ་དེའི་རྐང་པ་གཉིས་ལ་གཏུགས་པ་དང ། དེས་སྨྲས་པ། ཁྱེའུ་གཉིས་ཁོ་བོ་ཁྱེད་གཉིས་ཀྱི་ཅིར་འོང ། ཞང་པོར་མཆིའོ། །ཤི་རི་ཀ་ཅིར་འོང ། དེ་ཡང་ཞང་པོར་མཆིའོ། །དེ་དུས་དེ་སྲིད་དུ་ན་ན་ཁྱེད་གཉིས་དེ་ལ་ལྟར་མ་དོང་ངམ། ཞང་པོ་བདག་ཅག་གིས་མ་འཚལ་ཏོ། །ད་དེང་ཤིག་།བདག་ཅག་གཉིས་ཀྱིས་བགྱི་བ་ཅི་མཆིས། དེ་ཅི་ཟེར་བ་དེ་བཞིན་དུ་གྱིས་ཤིག་།དེ་གཉིས་ཚེ་དང་ལྡན་པ་ཤི་རི་ཀ་ག་ལ་བ་དེར་སོང་སྟེ་ཕྱིན་ནས་དེའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཤི་རི་ཀས་སྨྲས་པ། ཁྱེའུ་གཉིས་མཆུ་ཅན་ཁྱེད་གཉིས་ཀྱི་ཅིར་འོང ། ཞང་པོར་མཆིའོ། །ཁོ་བོ་ཅིར་འོང ། ཞང་པོར་མཆིའོ། །ཁོ་བོ་དུས་དེ་སྲིད་དུ་ན་ན་ཁྱེད་གཉིས་ཀྱིས་ཁོ་བོ་ལན་འགའ་ཡང་མ་བལྟས་སོ། །ཞང་པོ་བདག་ཅག་གཉིས་ཀྱིས་མ་འཚལ་ཏེ། བདག་ཅག་གཉིས་ཀྱིས་ད་གཟོད་ཐོས་ནས་དེའི་སླད་དུ་བདག་ཅག་གཉིས་མཆིས་སོ། །ཚ་བོ་གཉིས་ཁྱེད་གཉིས་ཁོ་བོ་ལྷ་རྣམས་ཀྱི་ནང་དུ་སྐྱེ་བར་འདོད་དམ། ཞང་པོ་བདག་ཅག་གཉིས་གཞན་ཡང་ལྷ་རྣམས་ཀྱི་ནང་དུ་སྐྱེ་བར་འཚལ་ན།
5.118b
ཞང་པོ་ལྟ་སྨོས་ཀྱང་ཅི་འཚལ། ཚ་བོ་གཉིས་གལ་ཏེ་དེ་ལྟ་ན་ཁོ་བོ་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་ན། བདག་ལ་རྩོམ་པར་བྱེད་པ་སྡུག་བསྔལ་བ་ཡིན་གྱིས། ཁྱེད་གཉིས་ཀྱི་ཁོ་བོ་སོད་ཅིག་།ཞང་པོ་གལ་ཏེ་གཞན་འགའ་ཞིག་གིས་ཁྱོད་དགྲོངས་པར་བགྱིད་ན་ཡང་བདག་ཅག་གཉིས་ཀྱིས་དེ་དགུམ་པར་བགྱི་ན་བདག་ཅག་གཉིས་ཀྱིས་ཞང་པོ་བཀྲོངས་པ་ལྟ་སྨོས་ཀྱང་ཅི་ཚལ། མཆུ་ཅན་གྱིས་ཁྱེད་གཉིས་ལ་ཇི་སྐད་བསྒོ། ཞང་པོ་ཅི་གསུང་བ་དེ་བཞིན་གྱིས་ཤིག་ཅེས་སོ། །ཚ་བོ་གཉིས་གལ་ཏེ་དེ་ལྟ་ན་ཁོ་བོ་འདི་སྐད་ཟེར་ཏེ། ཁོ་བོ་སྡུག་བསྔལ་གྱི་ཚོར་བས་ཉེན་གྱིས་ཁོ་བོ་སོད་ཅིག་།དེ་གཉིས་འདི་དང་ཞང་པོ་སྔར་བགྲོས་པར་གྱུར་གོར་མ་ཆག་སྟེ། དེས་ན་ཞང་པོས་བདག་ཅག་གཉིས་འདིའི་གན་དུ་བཏང་ངོ་སྙམ་དུ་བསམས་ནས། དེ་གཉིས་ལས་གཅིག་ཆེས་དྲག་ཤུལ་ཅན་ཡིན་པས་མཚོན་རྣོན་པོས་དེའི་མགོ་བཅད་ནས་དེའི་འོག་ཏུ་རས་ཀྱིས་གཡོགས་ཏེ་འཁོད་དོ། །མཆུ་ཅན་ཡང་སྤྱོད་ཡུལ་ནས་ཕྱིར་འོངས་ཏེ། དེས་དེ་རས་ཀྱིས་གཡོགས་པ་མཐོང་ནས་དེས་སྨྲས་པ། ཚ་བོ་གཉིས་ཁྱེད་གཉིས་འཁོད་བཞིན་དུ་ཡང་འདི་ཉལ་ལམ། ཞང་པོ་འདི་ལྟར་ནམ་ཡང་ལྡང་པར་མི་འགྱུར་བ་དེ་ལྟར་ཉལ་ལོ། །མཆུ་ཅན་གྱིས་འདི་གཉིས་སྔོན་མ་བྱུང་བའི་ཚིག་སྨྲ་ན། དྲིའོ་སྙམ་དུ་བསམས་ནས། དེས་དེ་གཉིས་ལ་དྲིས་པ་དང ། དེ་གཉིས་ཀྱིས་སྐབས་དེ་རྒྱས་པར་མཆུ་ཅན་ལ་བརྗོད་དོ། །མཆུ་ཅན་ཡིད་མི་བདེ་བ་སྐྱེས་པས་རས་དེ་བཤུས་པ་དང ། དེ་མཐོང་ནས་དེ་བདག་གིས་མཚོན་ཐོགས་པ་གཉེར་བར་མ་གྱུར་ཏམ་སྙམ་དུ་འགྱོད་པ་ཡང་སྐྱེས། བཤེས་པ་དང་བྲལ་བས་འགྱོད་པས་གདུངས་པའི་སེམས་ཀྱིས་ཡིད་མི་བདེ་བར་གྱུར་ནས། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ནད་པའི་ནད་གཡོག་མི་མཁས་པ་བཞག་སྟེ་འགྲོ་བར་མི་བྱའོ། །གལ་ཏེ་འགྲོ་དགོས་པའི་རྐྱེན་དེ་ལྟ་བུ་ཞིག་བྱུང་ན་ནད
5.119a
གཡོག་མི་མཁས་པ་ལ་གལ་ཏེ་འདི་མེར་མཆོད་དམ། དུག་ཟ་འམ། མཚོན་འབྱིན་ཏམ། བདག་ཉིད་གཡང་སར་མཆོང་ངམ། ཐག་པས་འཆིང་ངམ། གཞན་ཡང་མི་འཕྲོད་པ་ཟ་བར་བྱེད་ན་བཟློག་པར་བྱའོ་ཞེས་བསྒོ་སྟེ་འགྲོ་བར་བྱའོ། །དགེ་སློང་གིས་ནད་གཡོག་མི་མཁས་པ་ལ་མ་བསྒོ་བར་དེ་བཞིན་དུ་འགྲོ་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཤིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་ལྷུང་བཟེད་ལ་བཙའ་ཞུགས་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་ལྷུང་བཟེད་འདི་བཙའ་ཞུགས་ན་ཅིའི་ཕྱིར་མི་སྲེག་།དེས་སྨྲས་པ། འདི་ལ་རྫ་བོ་དང ། ལྕི་བ་དང ། ཏིལ་གྱི་ཚིགས་མ་དང ། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི་ལྷུང་བཟེད་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་ལྷུང་བཟེད་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན་དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ་ན་ཚབས་ཆེ་བ་ཡུན་མི་རིང་བར་དུས་བྱེད་པར་འགྱུར་བ་དེའི་ལྷུང་བཟེད་གསལ་བ། ཟླུམ་པ་ལོངས་སྤྱད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་ལྷུང་བཟེད་ཀྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དགེ་སློང་དེ་ངོ་ཚ་བར་གྱུར་ནས་ཅང་མི་སྨྲ་བར་འདུག་གོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ལྷུང་བཟེད་ཀྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་ལྷུང་བཟེད་ཀྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་བྱེད་ན་འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་ལྷུང་བཟེད་མིག་བཞིན་དུ་ཡོངས་སུ་བསྐྱང་བར་བྱ་སྟེ། ཀླན་པར་འོས་པ་ནི་ཀླན་པར་བྱ། བསྲེག་པར་འོས་པ་ནི་བསྲེག་པར་བྱའོ། །
5.119b
དགེ་སློང་གིས་ལྷུང་བཟེད་ཀླན་པར་འོས་པ་ཀློན་པར་མི་བྱེད་དམ། བསྲེག་པར་འོས་པ་སྲེག་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཤིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་སྣམ་སྦྱར་རྙིངས་ཤིང་དྲི་མས་གོས་ལ། རྡོལ་བར་གྱུར་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་སྣམ་སྦྱར་འདི་རྙིངས་ཤིང་དྲི་མས་གོས་ལ། རྡོལ་བར་གྱུར་ན་ཅིའི་ཕྱིར་འདི་མི་ཁྲུ། མི་འཚེམ། ཁ་སྒྱུར་བར་མི་བྱེད། དེས་སྨྲས་པ། འདི་ལ་ཟངས་དང ། ཆུ་དང ། ཤིང་དང ། སྐུད་པ་དང ། ཚོན་དང ། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི་སྣམ་སྦྱར་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་སྣམ་སྦྱར་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན་དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ། ན་ཚབས་ཆེ་བ། ཡུན་མི་རིང་བར་དུས་བྱེད་པར་འགྱུར་བ་དེའི་སྣམ་སྦྱར་ཉི་རིམ་དམར་སེར་ཚོན་སར་པས་ཁ་བསྒྱུར་བ། ལོངས་སྤྱད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དེ་ངོ་ཚ་བར་གྱུར་ནས་ཅང་མི་སྨྲ་བར་འདུག་གོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན། འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་སྣམ་སྦྱར་ལྤགས་པ་བཞིན་དུ་ཡོངས་སུ་བཅང་བར་བྱ་སྟེ། བཀྲུ་བར་འོས་པ་ནི་བཀྲུ་བར་བྱ། བཙེམ་པར་འོས་པ་ནི་བཙེམ་པར་བྱ། ཁ་བསྒྱུར་བར་འོས་པ་ནི་ཁ་བསྒྱུར་བར་བྱ་འོ། །
5.120a
དགེ་སློང་གིས་སྣམ་སྦྱར་བཀྲུ་བར་འོས་པ་འཁྲུ་བར་མི་བྱེད་དམ། བཙེམ་པར་འོས་པ་འཚེམ་པར་མི་བྱེད་དམ། ཁ་བསྒྱུར་བར་འོས་པ་ཁ་བསྒྱུར་བར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཤིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་སྟོབས་སྡེ་ཞེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བྱུང་ངོ ། །ཉི་མ་བདུན་གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཤེས་མིང་འདོགས་པར་བྱེད་པ་ན་ཉེ་དུ་རྣམས་ཀྱིས་སྨྲས་པ། གང་གི་ཕྱིར་ཁྱེའུ་འདི་ཁྱིམ་བདག་སྟོབས་སྡེའི་བུ་ཡིན་པ་དེའི་ཕྱིར། ཁྱེའུ་སྡེ་པ་ཞེས་བྱའོ་ཞེས་དེའི་མིང་སྡེ་པ་ཞེས་བྱ་བར་བཏགས་སོ། །ཁྱིམ་བདག་སྟོབས་སྡེ་དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་ཞིག་བཙས་ནས་དེའི་མིང་ནི་ཉེ་སྡེ་ཞེས་བྱ་བར་བཏགས་སོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེའི་ཆུང་མ་དུས་ལ་བབ་ནས་དེ་དེ་དག་གིས་གོས་སྔོན་པོ་དང ། སེར་པོ་དང ། དམར་པོ་དང ། དཀར་པོ་དག་གིས་ཁྱོགས་བརྒྱན་ཏེ། དུར་ཁྲོད་དུ་བསྐྱལ་ནས་བསྲེགས་ཏེ་མྱ་ངན་བསང་བ་བྱས་ཏེ་འཁོད་དོ། །ཁྱིམ་བདག་སྟོབས་སྡེས་དེའི་ཤིད་དག་བྱས་ནས་གལ་ཏེ་བདག་གིས་ཆུང་མ་གཞན་བླངས་པར་གྱུར་ན་ཁྱེའུ་གཉིས་སྡུག་བསྔལ་བར་འགྱུར་གྱིས། བདག་གིས་སྡེ་པའི་ཁྱིམ་དབུབ་པར་བྱའོ་སྙམ་དུ་བསམས་ནས།
5.120b
དེས་དེའི་ཁྱིམ་ཕུབ་བོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེ་ན་བར་གྱུར་ནས། དེ་ལ་རྩ་བ་དང ། སྡོང་བུ་དང ། མདབ་མ་དང ། མེ་ཏོག་དང ། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ནད་དེ་ཉེ་བར་ཞི་བར་མ་གྱུར་ཅིང་ཉམ་དམས་ནས། དེས་སྡེ་པ་དང ། ཉེ་སྡེ་གཉིས་ལ་སྙིང་བཞོས་ནས། བསགས་པ་ཀུན་གྱི་མཐའ་ཟད་ཅིང ། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་པ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །དེ་ཁྱེའུ་གཉིས་ཀྱིས་གོས་སྔོན་པོ་དང ། སེར་པོ་དང ། དམར་པོ་དང ། དཀར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ། དེའི་འོག་ཏུ་མྱ་ངན་བསང་བ་བྱས་ནས་ཤིད་དག་བྱས་ཏེ་འཁོད་དོ། །སྡེ་པས་བསམས་པ། གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བ་བྱེད་ན། ད་ནི་དེའི་དུས་ལ་བབ་པས་ཁྱིམ་གྱི་བྱ་བ་སྦྱར་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་འགྱུར་བས་བདག་ཟོང་ཐོགས་ཏེ་ཡུལ་གཞན་དུ་འགྲོའོ་སྙམ་དུ་རིག་ནས། ཉེ་སྡེ་ལ་སྨྲས་པ། ནུ་བོ་གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བར་བྱེད་ན་ད་ནི་དེའི་དུས་ལ་བབ་པས་ཁྱིམ་གྱི་བྱ་བ་སྦྱར་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་འགྱུར་གྱིས། ཁྱོད་ནི་འདི་ཉིད་ན་ཁྱིམ་གྱི་བྱ་བ་གྱིས་ཤིག་།ཁོ་བོ་ནི་ཟོང་ཐོགས་ཏེ་ཡུལ་གཞན་དུ་འགྲོའོ། །ཉེ་སྡེས་སྨྲས་པ། དེ་ལྟར་མཛོད་ཅིག་སྡེ་པ་ཟོང་མང་པོ་ཐོགས་ཏེ་ཡུལ་གཞན་དུ་སོང་བ་དང ། དེས་དེར་ཁེ་སྤོགས་མང་པོ་གྲུབ་ནས་སྡེ་པས་ནུ་བོ་ཉེ་སྡེ་ལ་ནུ་བོ་ཁོ་བོས་ཁེ་སྤོགས་མང་པོ་གྲུབ་སྟེ་རིང་པོར་མི་ཐོགས་པར་འོང་གིས་བརྟན་པ་དང ། སྤུངས་དང ། སྤྲོ་བ་ཆེན་པོར་གྱིས་ཤིག་ཅེས་སྤྲིང་ཡིག་བསྐུར་རོ། །སྡེ་པས་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས་དེས་ཕྱིས་ཀྱང་དེ་ཁོ་ན་བཞིན་དུ་སྤྲིང་ཡིག་བསྐུར་རོ། །ཡང་སྡེ་པས་ཕྱི་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས། དེས་ཡང་དེ་ཁོ་ན་བཞིན་དུ་སྤྲིང་ཡིག་བསྐུར་ཏེ་སྡེ་པ་དེ་དེ་བཞིན་དུ་དུས་དང་འཐུན
5.121a
པའི་དུས་སུ་སྤྲིང་ཡིག་སྐུར་བར་བྱེད་དོ། །ཆོས་ཉིད་ཀྱིས་ན། གང་ཕྱིར་རྙེད་པ་དེ་ཕྱིར་ཆགས། །རྙེད་ལས་ཆགས་པ་སྐྱེ་བར་འགྱུར། །ཆགས་པས་ཟིལ་ནོན་མི་ཡིས་ནི། །བྱ་དང་བྱ་མིན་རྟོགས་མི་འགྱུར། །ཞེས་བྱ་བ་ཡིན་པས་སྡེ་པ་ཤིན་ཏུ་ཐག་རིང་པོར་སོང་ནས་ཕྱིན་ཆད་སྤྲིང་ཡིག་སྐུར་བར་མི་བྱེད་དོ། །དེ་ནས་སྡེ་པའི་ཆུང་མ་གོས་དང་ཟས་བཟངས་བས་ཉོན་མོངས་པ་དག་གིས་གནོན་པར་གྱུར་ནས། དེས་ཉེ་སྡེ་ལ་མཚན་མ་སྟོན་པར་བྱེད་པ་དང ། ཉེ་སྡེས་དབང་པོ་རྣམས་ཕྱིར་བླན་ཏེ་འདུག་གོ། །སྡེ་པའི་ཆུང་མ་དེ་ངོ་ཚ་མེད་པར་གྱུར་ནས་ཡང་སྨྲས་པ། ཉེ་སྡེ་ཚུར་སྤྱོན། འདི་དང་འདི་ལྟ་བུ་བགྱིའོ། །ཉེ་སྡེས་རྣ་བ་བཀབ་སྟེ་སྨྲས་པ། ཁྱོད་ཁོ་བོའི་མ་དང་འདྲས་ཕྱིན་ཆད་དེ་སྐད་མ་ཟེར་ཅིག་།བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་སྡེ་པའི་ཆུང་མ་དེ་ཉེ་དུའི་ཁྱིམ་དུ་སོང་ནས། གོས་དྲི་མ་ཅན་དག་བགོས་ཏེ། ཁྲི་ཞིག་པ་ལ་འདུག་ཅིང་འདུག་གོ། །དེ་ལ་མ་དང ། ནང་མི་དག་གིས་སྨྲས་པ། ཁྱོད་ཅིའི་ཕྱིར་འདི་ལྟར་འདུག་།སྡེ་པའི་ཆུང་མས་སྨྲས་པ། ཅི་བུད་མེད་ཀྱི་ཡུལ་ལ་གང་གནོད་པ་དེ་མི་ཤེས་སམ། ཁོ་མོ་ཉོན་མོངས་པ་དག་གིས་ཤིན་ཏུ་གནོད་པར་གྱུར་ཏོ། །དེ་དག་གིས་སྨྲས་པ། ཁྱོད་ཀྱི་སྐུད་པོ་ཉེ་སྡེ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ན་ཅིའི་ཕྱིར་དེ་ལ་ཚོལ་བར་མི་བྱེད། སྡེ་པའི་ཆུང་མས་སྨྲས་པ། བདག་གིས་དེ་ལ་བཅོལ་ན་མ་གྲུབ་བོ། །དེ་དག་གིས་སྨྲས་པ། བུད་མེད་གཞན་གང་དག་ཁྱིམ་ཐབ་དག་ཆེས་ཡུན་རིང་ནས་དོང་སྟེ། དུས་སུ་མ་འཁོར་བ་དེ་དག་ཆེས་དཀའ་བ་བྱེད་པ་ཡིན་ནོ། །སྡེ་པའི་ཆུང་མས་སྨྲས་པ། དེ་དག་ལ་ནི་ཁྱིམ་ཐབ་དག་གིས་དུས་དང་འཐུན་པའི་དུས་སུ་གཏམ་རྨེད་པར་བྱེད་དེ། ཁོ་མོ་ལ་ཡང་གང་གི་ཚེ་ཁྱིམ་ཐབ་གསོན་པར་གྱུར་པ་དེའི་ཚེ་ན་ནི་དུས་དང་འཐུན་པའི་དུས་སུ་སྤྲིང་ཡིག་བསྐུར་བར་ཡང་གྱུར་ན། ད་སྐུར་བར་མི་བྱེད་པས་དུས་ལ་བབ་གོར་མ་ཆག་གོ། །དེ་དག་གིས་སྡེ་པའི་ཆུང་མ་དེ་ལ་ཐབས་དུ་མ་དག་གིས་ཡིད་བཞོས་ཀྱང་ཁྲི་ལས་ལྡང་བར་མི་བྱེད་ཅིང ། དེས་སྨྲས་པ། གལ་ཏེ་ཁོ་མོ་གཞན་ལ་མི་སྦྱིན་ན་ཁོ་མོས་ངེས་པར་རིགས་གཉིས་ག་ལ་མི་སྙན་པ་འབྱུང་བར་བྱའོ། །དེ་ནས་སྡེ་པའི་ཆུང་མའི་ཕ་མ་དང །
5.121b
ཉེ་དུ་དང་རྩ་ལག་གི་ཚོགས་དག་གིས་གྲོས་བྱ་བར་བརྩམས་ཏེ། འདི་དེ་ལྟར་ཟློག་ཏུ་མ་བཏུབ་པས་ངེས་པར་རིགས་གཉི་ག་ལ་མི་སྙན་པ་འབྱུང་བར་བྱེད་ཀྱིས་ཉེ་སྡེ་འགྲོན་དུ་བོས་ཏེ་ཟས་བྱིན་ལ་དེ་ལ་འདི་སྦྱིན་པར་བྱ་བ་ནི་འདིར་དུས་ལ་བབ་པ་ཡིན་ནོ་ཞེས་གྲོས་བྱས་ནས། དེ་དག་གིས་ཉེ་སྡེ་འགྲོན་དུ་བོས་ཏེ་ཟན་བྱིན་ནས་སྨྲས་པ། ཉེ་སྡེ་ཁྱོད་ཀྱི་ཕུ་བོའི་ཆུང་མ་འདི་ཉོན་མོངས་པ་ཀུན་ཏུ་སྤྱོད་པས་ཤིན་ཏུ་གཡེན་སྤྱོ་བར་གྱུར་པས་ངེས་པར་རིགས་གཉི་ག་ལ་མི་སྙན་པ་འབྱིན་པར་བྱེད་ན། གལ་ཏེ་ཁྱོད་འདི་དང་ལྷན་ཅིག་ཏུ་སྤྱོད་པར་བྱེད་ན་དེ་ལྟ་ན་ལེགས། གལ་ཏེ་མི་བྱེད་ན་བདག་ཅག་གིས་འདི་གཞན་ལ་སྦྱིན་པར་བྱའོ། །ཉེ་སྡེས་བསམས་པ། འདི་བདག་ཅག་གིས་བྱིས་པ་ནས་བསྐྱེད་པ་ཡིན་པས་གལ་ཏེ་གཞན་དུ་འགྲོ་བར་འགྱུར་ཞིང་རིགས་གཉིས་ག་ལ་མི་སྙན་པ་འབྱིན་པར་འགྱུར་ན་མ་ལེགས་ཀྱིས། བདག་གིས་འདི་བདག་གིར་བྱའོ་སྙམ་དུ་རིག་ནས། དེས་དང་དུ་བླངས་པར་ཁས་བླངས་སོ། །དེ་ནས་ཉེ་སྡེས་སྡེ་པའི་ཆུང་མ་རང་གི་ཁྱིམ་དུ་ཁྲིད་ནས་དེ་དེ་དང་ལྷན་ཅིག་ཏུ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་མངལ་ན་གནས་པའི་མཚན་མ་དག་བྱུང་བར་གྱུར་ནས། དེ་ལ་ན་ཟླ་དག་གིས་སྨྲས་པ། འདི་ག་ལས་འོངས། སྡེ་པའི་ཆུང་མས་སྨྲས་པ། ཁོ་མོ་ཚུལ་ཁྲིམས་དང་ལྡན་པ་ཁོ་ན་ཡིན་གྱིས་ཁྱེད་ཅག་བརྫུན་གྱི་སྐུར་བས་ཁོ་མོ་ལ་ཀུན་ཏུ་མ་སྤྱོད་ཅིག་།དེའི་གྲོགས་མོ་ཆེས་མཛའ་བ་ཞིག་ཡོད་པ་དེས་སྨྲས་པ། ཅིའི་ཕྱིར་གསང་བར་བྱེད། འདི་གདོན་མི་ཟ་བར་གྲགས་པར་འགྱུར་གྱིས་སྨྲོས་ཤིག་།སྡེ་པའི་ཆུང་མས་སྨྲས་པ། ཉེ་སྡེ་ལས་སོ། །ལེགས་ཏེ་ཁྱིམ་ཐབ་ལས་སམ། སྐུད་པོ་ལས་ཀྱང་རུང་འདི་ལ་ཉེས་པ་འགའ་ཡང་མེད་དོ། །སྡེ་པའི་ཆུང་མ་དེ་སེམས་ཅན་དང་ལྡན་པར་གྱུར་པ་ན། སྡེ་པས་ཉེ་སྡེ་ལ་ནུ་བོ་བརྟན་པ་དང ། སྤུངས་དང ། སྤྲོ་བ་ཆེར་གྱིས་ཤིག་།ཁོ་བོ་ཡང་ཡི་གེའི་རྗེས་བཞིན་ཁོ་ནར་འོང་ངོ་ཞེས་སྤྲིང་ཡིག་བསྐུར་རོ། །ཉེ་སྡེས་ཐོས་ནས་ཉམ་ང་བར་གྱུར་ཏེ་བསམས་པ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱོད་པ་འདི་ལྟ་བུ་བྱས་ན་དེ་འོང་བར
5.122a
གྱུར་ཏེ་ཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པ་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་ཀྱིས་བྲོས་ཏེ་འགྲོའོ་སྙམ་མོ། །ཡང་བསམས་པ། ཡུལ་ཡོངས་སུ་གཏོང་བར་བྱེད་པ་ནི་སྡུག་བསྔལ་བ་ཡིན་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་གཞོན་ནུའི་ཡོངས་སུ་སྤང་བ་ཐོབ་པས་དེ་དག་གི་ནང་དུ་རབ་ཏུ་བྱུང་ན་དེས་དེར་ཅི་ཞིག་བྱ་བར་འགྱུར་སྙམ་ནས། ཉེ་སྡེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གིས་གན་དུ་ཕྱིན་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟངས་ལེགས་ཏེ་ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་ཕྱུང་ཤིག་།དགེ་སློང་དེས་ཉེ་སྡེ་རབ་ཏུ་ཕྱུང་རྫོགས་པར་བསྙེན་པར་བྱས་ནས། དེའི་འོག་ཏུ་ཉི་མ་གཉིས་སམ། གསུམ་དུ་ཀུན་ཏུ་སྤྱོད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟངས་རི་དགས་ཀྱིས་རི་དགས་མི་གསོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་རྒྱུས་ལ་འཚོ་བར་གྱིས་ཤིག་།ཉེ་སྡེ་མཁན་པོས་དེ་སྐད་བསྒོ་ནས་མཁན་པོ་བཀའ་བཞིན་འཚལ་ཞེས་སྨྲས་ཏེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་ཞུགས་སོ། །དེ་སྤྱོད་ཡུལ་ལ་མི་མཁས་པས་གྲོང་རིམ་གྱིས་རང་གི་ཁྱིམ་དུ་ཞུགས་པ་དང ། སྡེ་པའི་ཆུང་མས་ཉེ་སྡེ་མཐོང་ནས་དེས་བྲང་བརྡུངས་ཏེ་སྨྲས་པ། ཉེ་སྡེ་ཅིའི་སླད་དུ་ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང ། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཅིའི་སླད་དུ། ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང་ཞེས་ཟེར་རམ། གང་གིས་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། བདག་གིས་ཉེས་པར་སྤྱོད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། ཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྡེ་པའི་ཆུང་མས་སྨྲས་པ། ཁྱོད་ཀྱིས་ནི་རེ་ཤིག་བདག་ཉིད་ཐར་བར་བགྱིས་ན། ཁོ་མོས་ཇི་ལྟར་བསྒྲུབ་པར་བགྱི། ཉེ་སྡེས་སྨྲས་པ། དེ་ནི་ཁྱོད་ཉིད་ཀྱིས་ཉོན་མོངས་པའི་དབང་གིས་རྣམ་པར་བསམས་པ
5.122b
ཡིན་གྱི་ཁོ་བོ་ནི་མི་འདོད་བཞིན་བྱེད་དུ་བཅུག་པ་ཡིན་པས་ཁྱོད་ཉིད་ཤེས་སོ་ཞེས་སྨྲས་ཏེ་སོང་ངོ ། །ཉེ་སྡེའི་ཆུང་པོ་གྲོགས་སྔོན་སྨན་པ་སྤོས་འཚོང་གི་ཁྱེའུ་ཞིག་ཡོད་པ་དེ་སྡེ་པའི་ཆུང་མའི་ཁྱིམ་དུ་སོང་སྟེ། ཉེ་སྡེ་གར་སོང་ཞེས་དྲིས་པ་དང ། སྡེ་པའི་ཆུང་མས་སྨྲས་པ། ཉེ་སྡེས་ལམ་ལམ་པོར་བྱས་ཏེ་རབ་ཏུ་བྱུང་ངོ ། །གང་དུ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །གལ་ཏེ་ཡིད་མི་ཆེས་ན་རྒྱལ་བྱེད་ཀྱི་ཚལ་དུ་སོང་ལ་ལྟོས་ཤིག་།དེ་རྒྱལ་བྱེད་ཀྱི་ཚལ་དུ་སོང་བ་ན་རབ་ཏུ་བྱུང་བ་ཐམས་ཅད་ཆ་ལུགས་འདྲ་བས་དེ་གང་ཡིན་མི་ཤེས་ནས། དེས་དགེ་སློང་ཞིག་ལ་དྲིས་པ། འཕགས་པ་མཉན་ཡོད་པའི་ཁྱིམ་བདག་གི་བུ་ཉེ་སྡེ་ཞེས་བགྱི་བ་འདིར་རབ་ཏུ་བྱུང་ན་ག་ལ་མཆིས། དགེ་སློང་དེས་བསྟན་ནས། སྤོས་ཚོང་གི་ཁྱེའུ་དེ་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན་ཁོ་བོ་ལ་ཡང་མ་དྲིས་པར་རབ་ཏུ་བྱུང ། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན་ཁོ་བོ་ལ་ཡང་མ་དྲིས་པར་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་བལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། ཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྤོས་འཚོང་གི་ཁྱེའུས་སྨྲས་པ། ཁོ་བོ་ཅག་སྤོས་འཚོང་གི་ཁྱེའུ་དག་ནི་སྨན་པའི་ཕྱེད་ཡིན་པས་ཁོ་བོས་རེ་ཤིག་མངལ་ན་གནས་པ་བླུགས་པར་བྱ་བ་དེ་ལྟ་བུ་དག་བྱིན་པར་གྱུར་ན་དེས་མངལ་ན་གནས་པ་དེ་དུམ་བུ་དུམ་བུར་ཞིག་པར་འགྱུར་བ་ཞིག་ན། ཁྱོད་ཀྱིས་ཁོ་བོ་ལ་ཅིའི་ཕྱིར་མ་སྨྲས། འདི་ལྟར་ད་ཡང་སྦྱིན་པར་བྱའོ། །ཉེ་སྡེས་དང་དུ་བླངས་སོ། །དེ་ནས་སྤོས་འཚོང་གི་ཁྱེའུ་དེས་རྫས་རྣོན་པོ་དག་ཕྱེ་མར་བྱས་ཏེ་བུ་མོ་ཞིག་གི་ལག་ཏུ་བྱིན་ནས་སྨྲས་པ། ཁྱོད་སོང་ལ་སྡེ་པའི་ཁྱིམ་དུ་སོང་སྟེ། སྡེ་པའི་ཆུང་མ་ལ་ཉེ་སྡེ་ན་རེ་ཕྱེ་མ་འདི་ཆུ་དྲོན་མོ་དང་སྦྱོར་ལ་འཐུང་ཤིག་དང་ཁྱོད་སོས་པར་འགྱུར་ཞེས་ཟེར་རོ་ཞེས་བགྱིས་ཤིག་།བུ་མོ་དེས་ཇོ་བོ་བཀའ་བཞིན་འཚལ་ཞེས་སྤོས་འཚོང་གི་ཁྱེའུ་ལས་མཉན་ནས་སྡེ་པའི་ཁྱིམ་ག་ལ་བ་དེར་སོང་སྟེ་ཕྱིན་ནས། སྡེ་པའི
5.123a
ཆུང་མ་ལ་སྨྲས་པ། ཉེ་སྡེའི་ཞལ་ནས་ཕྱེ་མ་འདི་ཆུ་དྲོན་མོ་དང་སྦྱོར་ལ་འཐུང་ཤིག་དང་ཁྱོད་སོས་པར་འགྱུར་ཞེས་གསུང་ངོ ། །སྡེ་པའི་ཆུང་མ་དེས་ཕྱེ་མ་དེ་ཆུ་དྲོན་མོ་དང་སྦྱར་ཏེ་འཐུངས་པ་དང ། དེ་ནས་དེའི་མངལ་ན་གནས་པ་དེ་དུམ་བུ་དུམ་བུར་ཞིག་པར་གྱུར་ཅིང་མངལ་ན་གནས་པའི་མཚན་མ་དག་ཀྱང་མེད་པར་གྱུར་ཏོ། །ཡང་ན་ཟླ་དག་གིས་མཐོང་ནས་དེ་དག་གིས་སྨྲས་པ། ཁྱོད་ཀྱི་མངལ་ན་གནས་པ་དེ་གར་སོང ། སྡེ་པའི་ཆུང་མས་སྨྲས་པ། ཁོ་མོས་དང་པོ་ཉིད་ནས་ཁོ་མོ་ཚུལ་ཁྲིམས་དང་ལྡན་པ་ཉིད་ཡིན་གྱིས་ཁྱེད་ཅག་རྫུན་གྱི་སྐུར་པས་ཁོ་མོ་ལ་ཀུན་ཏུ་མ་སྤྱོད་ཅིག་ཅེས་མ་སྨྲས་སམ། དེའི་གྲོགས་མོ་ཆེས་མཛའ་བ་དེ་དེའི་གན་དུ་སོང་སྟེ་སྨྲས་པ། ཁྱོད་ཀྱིས་སྔར་འདི་སྐད་ཅེས་ཉེ་སྡེ་ལས་སོ་ཞེས་ཁོ་མོ་ལ་སྨྲས་པའི་མངལ་ན་གནས་པ་དེ་དག་གར་སོང་སྡེ་པའི་ཆུང་མས་སྨྲས་པ། གང་ཁོ་ན་ལས་འོངས་པ་དེ་ཁོ་ནར་སོང་ངོ ། །ཇི་ལྟར་གྱུར། ཉེ་སྡེས་ཕྱེ་མ་རྣོན་པོ་དེ་ལྟ་བུ་བྱིན་པས་དེས་ན་མངལ་ན་གནས་པ་དེ་དུམ་བུ་དུམ་བུར་ཞིག་པར་གྱུར་ཏོ། །དེ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་མངལ་ན་གནས་པ་ཡང་རླུགས་པར་བྱེད་དོ། །ཞེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བར་བྱེད་དོ། །ཉེ་སྡེས་སྡིག་པའི་ལས་འདི་དང་འདི་ལྟ་བུ་བྱས་སོ་ཞེས་བྱ་བའི་སྒྲ་དེ་ཡང་མཉན་ཡོད་ཀུན་ཏུ་གྲགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་སྡེ་ལ་རྨས་པ། ཉེ་སྡེ་ཁྱོད་ཀྱིས་སྡིག་པའི་ལས་དེ་ལྟ་བུ་དེ་བྱས་པ་བདེན་ནམ། བཙུན་པ་མ་བགྱིས་ཏེ། འདི་ལྟར་བདག་གིས་རྗེས་སུ་ཡི་རང་བར་ནི་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཉེ་སྡེ་ལ་ནི་ལྟུང་བ་མེད་དོ། །ཡང་དགེ་སློང་གིས་གནས་དེ་ལྟ་བུ་ལ་རྗེས་སུ་ཡི་རང་བར་མི་བྱའོ། །དགེ་སློང་གནས་དེ་ལྟ་བུ་ལ་རྗེས་སུ་ཡི་རང་བར་བྱེད་ན་འགལ་ཚབས་ཅན་དུ་འགྱུར་རོ། །དེའི་བར་སྐབས་སུ་སྡེ་པ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་ཕྱིན་ཏོ། །འཇིག་རྟེན་ནི་འབྱོར་པ་འདོད་ལ། རྒུད་པ་དང་མི་མཐུན་པ་ཡིན་པས་ཁ་ཅིག་གིས་མྱུར་བ
5.123b
མྱུར་བར་དོང་སྟེ་སྡེ་པའི་ཆུང་མ་ལ་སྨྲས་པ། ཁྱོད་ཀྱི་ཁྱིམ་ཐབ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་འོངས་ཀྱིས་སྤྲོ་བ་སྐྱེད་ཅིག་།བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་སྡེ་པའི་ཆུང་མ་དེ་ཡི་ཆད་པའི་སེམས་ཀྱིས་གོས་དྲི་མ་ཅན་དག་བགོས་ཏེ། ཁྲི་ཞིག་པ་ལ་འདུག་ཅིང་འདུག་གོ། །ཇི་ཙམ་ན་སྡེ་པ་མཉན་ཡོད་དུ་ཞུགས་ནས་ཟོང་མཛོད་དུ་མཁོས་སུ་ཕབ་སྟེ་རང་གི་ཁྱིམ་དུ་འོངས་པ་དང ། ཁྱིམ་མ་བྱུགས། བྱི་དོར་མ་བྱས། གསོལ་བ་མེད་པ་མཐོང་ནས། དེས་བུ་མོ་མངག་གཞུག་མ་ལ་དྲིས་པ། ཁྱིམ་བདག་གི་ཆུང་མ་གར་སོང ། བུ་མོས་སྨྲས་པ། རྗེའི་སྲས་སྤྱོད་ལམ་བཅད་དེ་ཁྲི་ཞིག་པ་ལ་མཆིས་ཤིང་མཆིས་སོ། །དེ་ནས་སྡེ་པ་ཡིད་མི་བདེ་བ་སྐྱེས་ཏེ་ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཁོ་བོ་འོངས་པས་མི་བདེ་བ་འམ། རྗེའི་སྲས་བདག་ཁྱོད་བྱོན་པས་མི་བདེ་བ་མ་མཆིས་ཏེ། འདི་ལྟར་རྗེའི་སྲས་ཀྱིས་སྲུང་མ་གང་ལགས་པ་དེ་དག་ཉིད་རྐུན་མ་དག་ལགས་སོ། །ཅི་ཞིག་བྱས། བཀག་བཞིན་དུ་ཉེ་སྡེས་ནན་གྱིས་ཁོ་མོ་བདག་གིར་བགྱིས་སོ། །བཟང་མོ་དེ་ནི་དེས་ཁྱོད་ཟིལ་གྱིས་མནན་པ་མ་ཡིན་གྱི་ཁོ་བོ་ཟིལ་གྱིས་མནན་པ་ཡིན་གྱིས་ལོངས་ཤིག་ཁོ་བོས་དེ་ལ་མཚམས་གཅད་པར་བྱའོ། །བཟང་མོ་ཉེ་སྡེ་ག་ལ་འདུག་།རྗེའི་སྲས་ཁྱོད་བྱོན་པ་ཐོས་ནས་རབ་ཏུ་བྱུང་ངོ ། །གང་དུ་རྒྱལ་བྱེད་ཀྱི་ཚལ་དུ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །བཟང་མོ་ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ། །འཇིག་རྟེན་ནི་མཛའ་བཤེས་དང ། དགྲ་བོ་དང ། བར་མ་ཡིན་པས་ཁ་ཅིག་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱེད་ཀྱི་ཕུ་བོ་འོངས་སོ། །ཉེ་སྡེས་སྨྲས་པ། ཇི་སྐད་ཟེར། དེ་དག་གིས་སྨྲས་པ། ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་ཞེས་ཟེར་རོ། །ཉེ་སྡེས་ཐོས་ནས་ཉམ་ང་བར་གྱུར་ཏེ་བསམས་པ། བདག་འཇིགས་པ་དག་གིས་རབ་ཏུ་བྱུང་བ་དེ་འདིར་ཡང་འབྱུང་བར་མི་འགྱུར་རམ། འདི་ལྟར་བདག་ཅག་རྒྱལ
5.124a
པོས་གཞོན་ནུའི་ཡོངས་སུ་སྤང་བ་བྱིན་མོད་ཀྱི་འོན་ཀྱང་བདག་ཉེས་པ་དང་བཅས་པ་ཡིན་པས་གལ་ཏེ་ན་བདག་ལ་འདིར་ཡང་གནོད་པ་བྱེད་པར་འགྱུར་བའི་གནས་ཡོད་ཀྱིས་བྲོས་ཏེ་འགྲོའོ་སྙམ་ནས། དེས་མཁན་པོ་ལ་མཁན་པོ་བདག་འཇིགས་པ་གང་གིས་རབ་ཏུ་བྱུང་བ་དེ་འདིར་ཡང་རྗེས་སུ་འབྲེལ་བར་གྱུར་ཏོ་ཞེས་བྱུང་བའི་མཐའ་དེ་རྒྱས་པར་བརྗོད་དོ། །མཁན་པོས་སྨྲས་པ། བུ་ཅི་ཉེས་མཁན་པོ་བདག་གི་ཕུ་བོ་དེ་མཆིས་ནས་ཏེ་པོར་མཆིད་འབོ་ཞིང་ཇི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་ཞེས་མཆིའོ། །འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་སྩལ་མོད་ཀྱི་འོན་ཀྱང་བདག་ནོངས་པ་དང་བཅས་པ་ལགས་པས་གལ་ཏེ་ན་འདིར་ཡང་བདག་ལ་གནོད་པ་བགྱིད་པར་འགྱུར་བའི་གནས་མཆིས་ཀྱིས་བྲོས་ཏེ་མཆིའོ། །བུ་གང་དུ་འགྲོ་མཁན་པོ་རྒྱལ་པོའི་ཁབ་ཏུ་འོ། །བུ་དེ་ན་ཁོ་བོའི་མཛའ་བཤེས་དགེ་སློང་ཞིག་འདུག་གིས་དེ་ལ་སྤྲིང་ཡིག་བསྐུར་གྱིས། དེའི་དྲུང་ན་འདུག་ཤིག་དང ། དེ་ཁྱོད་ལ་བྱམས་པས་རྗེས་སུ་སྐྱོང་བར་འགྱུར་རོ། །མཁན་པོ་ལེགས་སོ། །དེས་དགེ་སློང་དེ་ལ་སྔར་བྲོ་རྨ་བ་དྲིས་ཏེ། བདག་གི་ལྷན་ཅིག་གནས་པ་བདག་གིས་ཁྱོད་ཀྱི་གན་དུ་གཏང་སྟེ་འོང་གིས། དེའི་སླད་དུ་ཇི་ལྟར་འདི་ནི་མངོན་པར་དགའ་བ་བཞིན་དུ་བྱམས་པས་རྗེས་སུ་སྐྱོང་ཤིག་ཅེས་སྤྲིང་ཡིག་བྲིས་ནས། ཉེ་སྡེས་སྤྲིང་ཡིག་དེ་མནོས་ཏེ་བག་ཚ་བས་ཡིད་མི་བདེ་ཞིང་ཕྱོགས་སུ་རྣམ་པར་ལྟ་བ་བཞིན་དུ་རྒྱལ་པོའི་ཁབ་ཏུ་འཕགས་ཏེ་མཐར་གྱིས་རྒྱལ་པོའི་ཁབ་ཏུ་སོང་ནས་ཐོས་པ་བརྒྱུད་པས་དགེ་སློང་དེའི་གན་དུ་ཕྱིན་ནས་རྐང་པ་གཉིས་ལ་མགོ་བོས་ཕྱག་འཚལ་ཏེ་སྤྲིང་ཡིག་ཕུལ་ནས་མཐའ་གཅིག་ཏུ་འདུག་གོ། །དེ་ནས་དགེ་སློང་དེས་སྤྲིང་ཡིག་བླགས་ཏེ་སྨྲས་པ། ཚེ་དང་ལྡན་པ་འོངས་པ་ལེགས་སོ་འོངས་པ་ལེགས་སོ། །ཇི་ལྟར་ཁྱོད་དེའི་ཉེ་གནས་ཡིན་པ་དེ་བཞིན་དུ་ཁོ་བོའི་ཡང་ཡིན་གྱིས་བསླབ་པ་ལ་གུས་པར་གྱིས་ཤིག་དང ། ཁོ་བོས་ཁྱོད་ལྷུང་བཟེད་དང་ཆོས་གོས་དང ། དྲ་བ་དང ། ཕོར་བུ་དང ། སྐ་རགས་ཀྱིས་མི་བྲེལ་བར་བྱའོ། །གཞན་ཡང་དགེ་སློང་གི་ལས་ནི་གཉིས་ཏེ། བསམ་གཏན་དང ། ཀློག་པ་ཡིན་ན།
5.124b
ཁྱོད་བསམ་གཏན་དང ། ཀློག་པ་གང་འདོད། བསམ་གཏན་འཚལ་ལོ། །བུ་ལེགས་སོ། །དེས་དེ་ལ་གདམ་ངག་བྱིན་ནས་ཉེ་སྡེ་བསིལ་བ་ཚལ་གྱི་དུར་ཁྲོད་དུ་སོང་སྟེ་བརྩོན་པ་དང ། འབད་པ་དང ། བརྩལ་བས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེའི་བར་སྐབས་སུ་སྡེ་པ་ཡང་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། རབ་ཏུ་བྱུང་ངོ ། །དེ་ག་ལ་མཆིས། རྒྱལ་པོའི་ཁབ་ཏུ་སོང་ངོ ། །དེ་ཁྱེད་ཀྱི་ཅིར་འོང ། ནུ་བོར་མཆིའོ། །སྡེ་པས་དགེ་སློང་དེ་དག་གི་རྐང་པ་ལ་ཕྱག་འཚལ་ཏེ་སོང་ནས་བསམས་པ། རྒྱལ་པོའི་ཁབ་ཀྱང་འཇིགས་པ་མེད་པའི་གྲོང་ཁྱེར་མ་ཡིན་གྱིས་བདག་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་སྙམ་ནས། དེ་ལམ་བརྒྱགས་མང་པོ་དང ། ཀཱར་ཥཱ་པ་ཎ་དག་ཁྱེར་ཏེ་རྒྱལ་པོའི་ཁབ་ཏུ་སོང་ངོ ། །དེ་འོད་མའི་ཚལ་དུ་སོང་ནས་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། འདིར་འོངས་སོ། །དེ་ཁྱོད་ཀྱི་ཅིར་འོང ། ནུ་བོར་མཆིའོ། །དེ་ག་ལ་མཆིས། བསིལ་བ་ཚལ་གྱི་དུར་ཁྲོད་ནའོ། །སྡེ་པ་དེ་བསིལ་བ་ཚལ་གྱི་དུར་ཁྲོད་དུ་སོང་བ་དང ། དེས་ཉེ་སྡེ་བྱིས་པའི་གནས་སྐབས་ན་མཐོང་བ་ཆེན་པོར་གྱུར་པས་མཁས་པ་དང ། རྣམ་པར་གནོན་པ་ལས་ངོ་མི་ཤེས་མོད་ཀྱི་ཏེ་པོར་བརྟགས་པ་དང ། བཞིན་གཟུགས་ལས་ངོ་ཤེས་པར་གྱུར་ནས། དེས་བསམས་པ། གལ་ཏེ་འདིས་བདག་ངོ་ཤེས་པར་གྱུར་ན་ངེས་པར་འདིས་བདག་གསོད་པར་བྱེད་པས
5.125a
དེའི་ཐབས་སྦྱར་བར་བྱའོ་སྙམ་ནས། དེ་མཐའ་གཅིག་ཏུ་སོང་སྟེ་ཕྱོགས་སུ་རྣམ་པར་བལྟ་ཞིང་འདུག་གོ། །ཇི་ཙམ་ན་ལམ་དེར་རྔོན་པ་ལག་ན་མདའ་གཞུ་ཐོགས་པ་ཞིག་རི་དགས་ཤོར་བའི་ཕྱིར་འོངས་པ་དང ། སྡེ་པ་དེའི་གན་དུ་སོང་སྟེ་སྨྲས་པ། ཀྱེ་གྲོགས་པོ་ཁྱོད་ལག་ན་མདའ་གཞུ་ཐོགས་ཏེ་གར་འགྲོ། དེས་སྨྲས་པ། གྲོགས་པོ་རི་དགས་ཤོར་དུའོ། །དེ་ལས་ཁྱོད་ཀྱི་རྙེད་པ་ཇི་ཙམ་འགྲུབ། གྲོགས་པོ་ལན་འགའ་ནི་འགྲུབ། ལན་འགའ་ནི་མི་འགྲུབ་བོ། །གང་གི་ཚེ་འགྲུབ་པ་དེའི་ཚེ་ན་མང་ཉུང་ཇི་ཙམ། གྲོགས་པོ་ཀཱར་ཥ་པཱ་ཎ་ལྔ་བརྒྱ་ཙམ་མོ། །སྡེ་པས་སྨྲས་པ། གྲོགས་པོ་གལ་ཏེ་དེ་ལྟ་ན་རབ་ཏུ་བྱུང་བ་འདི་སོད་ཅིག་དང་ཁོ་བོས་ཁྱོད་ལ་ཀཱར་ཥ་པཱ་ཎ་ལྔ་བརྒྱ་སྦྱིན་ནོ། །རྔོན་པ་དེ་འདོད་པས་དྲངས་པའི་ཡིད་དང་ལྡན་པས་དེས་སྡེ་པ་ལས་ཀཱར་ཥ་པཱ་ཎ་ལྔ་བརྒྱ་བླངས་ནས་དེའི་འོག་ཏུ་བསམས་པ། རབ་ཏུ་བྱུང་བ་འདི་དག་ནི་རྒྱལ་པོ་གཟུགས་ཅན་སྙིང་པོས་གཞོན་ནུའི་ཡོངས་སུ་སྤང་བ་བྱིན་པ་ཡིན་ལ། བདག་ནི་ཕྱོགས་འདིར་རྟག་ཏུ་རྒྱུ་བ་ཡིན་པས་གལ་ཏེ་བདག་གིས་རབ་ཏུ་བྱུང་བ་འདི་བསད་པར་གྱུར་ན་བདག་ཀྱང་བུ་དང ། རྩ་ལག་དང ། ཕྱུགས་དང་བཅས་ཏེ་ངེས་པར་བཙོན་རར་བཅུག་ཅིང་བསད་པར་འགྱུར་རོ། །འདི་ལྟར་ཁྱིམ་བདག་འདི་ནི་ན་ལེ་ཤམ་དཀར་པོ་འབྱུང་བ་དང་འདྲ་བར་འདི་ག་ལས་འོངས་པ་སུས་ཀྱང་མི་ཤེས་པ་ཡིན་གྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས་རྔོན་པ་དེས་མདའ་དུག་ཅན་གྱིས་གཞུ་རྔའི་དབྱིབས་ལྟར་རྣ་དྲུང་དུ་ཐུག་པར་བཀང་སྟེ་སྡེ་པའི་གནད་དུ་བསྣུན་ཏོ། །སྡེ་པ་དེ་སྡུག་བསྔལ་གྱི་ཚོར་བ་དག་གིས་ཉེན་པས་བདག་བསད་པར་གྱུར་པ་གང་ཡིན་པ་དེ་ཐམས་ཅད་ངེས་པར་རབ་ཏུ་བྱུང་བ་འདིས་རྔོན་པ་འདི་དང་ལྷན་ཅིག་བརྡ་བྱས་པ་ཡིན་གྱི་གང་དུ་འདི་གསོད་པར་འགྱུར་བ་དེར་སྐྱེ་བ་བླང་ངོ་སྙམ་དུ་སེམས་དག་གསོ་བར་བྱེད་ཅིང་དེས་སྨོན་ལམ་ལོག་པར་བཏབ་ནས། ཉེ་སྡེའི་གནས་ཁང་གི་སྒོ་གླེགས་འདྲུད་པའི་འོག་ཏུ་སྦྲུལ་དུག་མྱུར་དུ་ཁྱབ་པར་བྱེད་པ་ཞིག་ཏུ་སྐྱེས་སོ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས་ཉེ་སྡེས་སྒོ་གླེགས་ཕྱེ་བས་སྦྲུལ་དུག་མྱུར་དུ་ཁྱབ་པར་བྱེད་པ་དེ་ཤི་བར་གྱུར་ཏོ། །དེ་ནས
5.125b
སྒོ་གླེགས་འདྲུད་པའི་སྟེང་དུ་སྐྱེས་ནས་དེར་ཡང་ཤི་བར་གྱུར་ཏོ། །དེ་ནས་ཁྲིའི་རྐང་རྟེན་གཅིག་གི་འོག་ཏུ་སྐྱེས་ནས་དེར་ཡང་ཤི་བར་གྱུར་ཏོ། །དེ་བཞིན་དུ་ལན་གཉིས་ལན་གསུམ་ལན་བཞིར་འོག་ཏུ་སྐྱེས་ནས་དེར་ཡང་ཤི་བར་གྱུར་ཏོ། །ཇི་ལྟ་ཇི་ལྟར་འཆི་བར་འགྱུར་བ་དེ་ལྟ་དེ་ལྟར་དུག་ཤིན་དུ་རྣོ་བ་དང ། ལུས་ཤིན་ཏུ་ཕྲ་བས་ཉིང་མཚམས་སྦྱོར་བ་ལེན་པ་བྱེད་དོ། །ཇི་ཙམ་དུས་གཞན་ཞིག་ན་དེ་སྟེང་གི་སྤང་ལེབ་ཀྱི་བར་དུ་སྐྱེས་ནས་ཚེ་དང་ལྡན་པ་ཉེ་སྡེ་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་ལ་ཞུགས་པའི་ལུས་ལ་ལྷུང་བར་གྱུར་ཏོ། །དེ་ནས་ཚེ་དང་ལྡན་པ་ཉེ་སྡེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པ། འདི་ལྟ་སྟེ། དཔེར་ན་མིག་སྨན་གྱི་ཐུར་མ་ལྟར་ཕྲ་བ་ལྷུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་བཟུང་ལ་འདི་ཉིད་དུ་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཤིག་།དེའི་ཚེ་ན་ཚེ་དང་ལྡན་པ་ཤཱ་རིའི་བུ་ཚེ་དང་ལྡན་པ་ཉེ་སྡེ་དང་ཧ་ཅང་མི་རིང་བའི་ཤིང་དྲུང་ཞིག་ན་རྟེན་ཅིང་ཉིན་མོ་གནས་པའི་ཕྱིར་འདུག་གོ། །ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ཚིག་བརྗོད་པ་རྣམ་པ་དེ་ལྟ་བུ་དེ་ཐོས་སོ། །ཐོས་ནས་ཀྱང་ཚེ་དང་ལྡན་པ་ཉེ་སྡེ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། །བདག་གིས་ཚེ་དང་ལྡན་པ་ཉེ་སྡེའི་བཞིན་གཞན་དུ་གྱུར་པ་འམ། དབང་པོ་རྣམས་སྣ་ཚོགས་སུ་གྱུར་པ་མ་མཐོང་ན། འོན་ཀྱང་ཚེ་དང་ལྡན་པ་ཉེ་སྡེ་འདི་སྐད་ཅེས་ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པ་འདི་ལྟ་སྟེ། དཔེར་ན་མིག་སྨན་གྱི་ཐུར་མ་ལྟར་ཕྲ་བ་ལྷུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་བཟུང་ལ་འདི་ཉིད་དུ་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཤིག་ཅེས་ཟེར་རོ། །ཚེ་དང་ལྡན་པ་ཤཱ་རིའི་བུ་གང་ལ་འདི་ལྟར་མིག་བདག་ཡིན་ནོ། །མིག་བདག
5.126a
གི་ཡིན་ནོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང ། དྲི་དང ། རོ་དང ། རེག་བྱ་དང ། ཆོས་བདག་ཡིན་ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ། །ཚོར་བའི་ཕུང་པོ་དང ། འདུ་ཤེས་ཀྱི་ཕུང་པོ་དང ། འདུ་བྱེད་ཀྱི་ཕུང་པོ་དང ། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ་ཞེས་བྱ་བ་ཡོད་པ་དེ་ལ་ནི་བཞིན་གཞན་དུ་གྱུར་པ་འམ། དབང་པོ་རྣམས་སྣ་ཚོགས་སུ་གྱུར་པར་འགྱུར་གྱི། ཚེ་དང་ལྡན་པ་ཤཱ་རིའི་བུ་ཁོ་བོ་ལ་ནི་འདི་ལྟར་མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང ། དྲི་དང ། རོ་དང ། རེག་བྱ་དང ། ཆོས་བདག་ཡིན་ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ། །ཚོར་བའི་ཕུང་པོ་དང ། འདུ་ཤེས་ཀྱི་ཕུང་པོ་དང ། འདུ་བྱེད་ཀྱི་ཕུང་པོ་དང ། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ། །ཞེས་བྱ་བ་མེད་པས་ཁོ་བོའི་བཞིན་གཞན་དུ་གྱུར་པ་འམ། དབང་པོ་རྣམས་སྣ་ཚོགས་སུ་གྱུར་པ་ག་ལ་འགྱུར། ཚེ་དང་ལྡན་པ་ཉེ་སྡེ་ཡུན་རིང་པོ་ནས་བདག་ཏུ་འཛིན་པ་དང ། བདག་གིར་འཛིན་པ་དང ། ངའི་སྙམ་པའི་ང་རྒྱལ་དང ། མངོན་པར་ཞེན་པ་དང ། བག་ལ་ཉལ་བ་དག་སྤངས་ཤིང་ཡོངས་སུ་ཤེས་ལ། ཏཱ་ལའི་མགོ་བཞིན་དུ
5.126b
དྲུང་ནས་བཅད་ཅིང་གཞི་མི་སྣང་ལ་ཕྱིས་ཀྱང་མི་སྐྱེ་བའི་ཆོས་ཅན་དུ་གྱུར་པས་ཁྱོད་ལ་བཞིན་གཞན་དུ་གྱུར་པ་འམ། དབང་པོ་རྣམས་སྣ་ཚོགས་སུ་གྱུར་པར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུ་དགེ་སློང་རབ་ཏུ་མང་པོ་དག་དང་བཅས་པས། ཚེ་དང་ལྡན་པ་ཉེ་སྡེའི་ལུས་ཀྱི་ཐན་ཀོར་ནས་བཟུང་སྟེ་གཙུག་ལག་ཁང་གི་ཕྱི་རོལ་དུ་བསྐྱལ་ནས། ཚེ་དང་ལྡན་པ་ཉེ་སྡེའི་ལུས་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་རྣམ་པར་བརྒྱར་ཞིགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་ཚིགས་སུ་བཅད་པ་སྨྲས་པ། ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །ནད་དང་བྲལ་བ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམ་པ་ནི། །ཚེ་ཟད་དགའ་བར་འགྱུར་བ་སྟེ། །དུག་སྣོད་སྤངས་པ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམས་པ་ནི། །འབར་བའི་ཁྱིམ་ནས་ཐར་བ་ལྟར། །འཆི་བའི་མཐར་ནི་མྱ་ངན་མེད། །ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམས་པ་ནི། །གང་ཚེ་འཇིག་རྟེན་ཤེས་རབ་ཀྱིས། །རྩཝ་དང་ཤིང་འདྲར་མཐོང་གྱུར་པ། །དེ་ཚེ་ཉིང་མཚམས་སྦྱོར་མེད་ལས། །གཞན་པ་འདོད་པར་མི་བྱེད་དོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ལུས་ལ་ལུས་ཀྱི་མཆོད་པ་བྱས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་ཉེ་སྡེའི་ལུས་ལ་སྦྲུལ་དུག་མྱུར་དུ་ཁྱབ་པར་བགྱིད་པ། འབར་བ། རྣོ་བ། དུག་དྲག་པ་འདི་ལྟ་སྟེ། དཔེར་བགྱི་ན། མིག་སྨན་གྱི་ཐུར་མ་ལྟར་ཕྲ་བ་ལྷུང་ནས། དེའི་ལུས་འདི་ལྟ་སྟེ། དཔེར་བགྱི་ན་སྦུན་པའི་ཆང་བུ་ལྟར་ཞིགས་པར་གྱུར་ཏོ། །ཤཱ་རིའི་བུ་ཚེ་དང་ལྡན་པ་ཉེ་སྡེ་ལ་གལ་ཏེ་དེའི་ཚེ་ཚིགས་སུ་བཅད་པ་འདི་དག་དང ། གསང་སྔགས་ཀྱི
5.127a
ཚིག་འདི་དག་སྣང་བར་གྱུར་ན་དེའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ་འབར་བ། རྣོ་བ། དུག་དྲག་པས་ཚུགས་པར་མི་འགྱུར་ཞིང ། དེའི་ལུས་འདི་ལྟ་སྟེ། དཔེར་ན་སྤུན་པའི་ཆང་བུ་ལྟར་ཞིགས་པར་ཡང་མི་འགྱུར་རོ། །བཙུན་པ་ཚིགས་སུ་བཅད་པ་དེ་དག་དང ། གསང་སྔགས་ཀྱི་ཚིག་དེ་དག་གང་ལགས་དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། ང་ནི་ཡུལ་འཁོར་སྲུང་ལ་བྱམས། །ས་སྲུང་བུ་ལ་བྱམས་པ་སྟེ། །ལ་བ་དང་ནི་མགྱོགས་མཆོག་དང ། །གཅོད་ལྡན་བུ་ལ་ང་བྱམས་སོ། །གཽ་ཏ་མ་ནི་ནག་པོ་དང ། །མིག་མི་བཟང་ལ་ང་བྱམས་ཏེ། །ཀླུ་གང་དགའ་བོ་ཉེ་དགའ་བོ། །དེ་གཉིས་ལ་ནི་ང་རྟག་བྱམས། །རྐང་མེད་རྣམས་ལ་ང་བྱམས་ཏེ། །རྐང་གཉིས་རྣམས་ལ་འང་ང་བྱམས་སོ། །རྐང་བཞི་རྣམས་ལ་ང་བྱམས་ཏེ། །རྐང་མངས་རྣམས་ལ་འང་ང་བྱམས་སོ། །གང་དག་རྒྱ་མཚོར་རྟེན་པ་ཡི། །ཀླུ་རྣམས་ཀུན་ལ་ང་བྱམས་སོ། །སེམས་ཅན་གང་དག་མགུལ་གནས་པའི། །སེམས་ཅན་ཀུན་ལ་ང་བྱམས་སོ། །སེམས་ཅན་ཀུན་དང་སྲོག་ཆགས་ཀུན། །འབྱུང་པོ་ཀུན་དང་མ་འདྲེས་ཤོག་།ཐམས་ཅད་བདེ་བ་ཉིད་གྱུར་ཅིང ། །ཐམས་ཅད་ནད་ནི་མེད་གྱུར་ཅིག་།ཀུན་གྱི་བཟང་པོ་མཐོང་གྱུར་ཅིང ། །གང་ལ་འང་སྡིག་པར་མ་གྱུར་ཅིག་།སྦྲུལ་གྱིས་གང་བའི་བྱ་སྐྱིབས་སུ། །རྟག་ཏུ་བདག་ནི་གནས་གྱུར་ཀྱང ། །དུག་མྱུར་ཁྱབ་དང་དུག་དྲག་པོས། །བདག་གི་སྲོག་ལ་གནོད་མི་འགྱུར། །བདག་གི་བདེན་ཚིག་གང་གིས་ནི། །སྟོན་པ་འཇིག་རྟེན་བླ་མེད་པ། །བདག་གི་བདེན་ཚིག་དེ་ཡིས་ནི། །བདག་གིས་ལུས་ལ་དུག་མ་འཇུག་།འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་ཆོས་ནི་དུག་མི་མངའ། །ཆོས་ཀྱི་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མི་མངའ། །དགེ་འདུན་བདེན་པས་དུག་བཅོམ་མོ། །དུག་དང་དྲག་པོའི་དུག་བཅོམ་སྟེ། །བསྲུང
5.127b
བས་ཡོངས་སུ་གཟུང་བར་བྱས། །སངས་རྒྱས་ཐམས་ཅད་དུག་བཅོམ་པས། །བྲང་འགྲོ་ཁྱོད་ཀྱི་དུག་བཅོམ་མོ། །དེ་ལ་གསང་སྔགས་ཀྱི་ཚིགས་རྣམས་འདི་དག་ཡིན་ཏེ། ཏཱད་ཡ་ཐཱ། ཨོཾ་ཏུམ་བི་ལེ། ཏུམ་བི་ལེ། ཏུམ་བེ་པྲ་ཏུམ་བེ། ན་ཊ་ཊེ། སུ་ན་ཊ་ཊེ། ཀེ་པ་ཊ་ཊེ། མུ་ན་ཡེ་ས་མ་ཡེ། དན་ཏེ། དན་ཏི་ལེ། ནཱི་ལེ་ནཱི་ལ་ཀེ་ཤེ་།བཱ་ལེ་བཱ་ལ་ཀོ་པེ། ཨོ་ལེ་ནྱང་གོ་ལེ་སཝཱ་ཧཱ། ཤཱ་རིའི་བུ་གལ་ཏེ་དེའི་ཚེ་རིགས་ཀྱི་བུ་ཉེ་སྡེ་ལ་ཚིགས་སུ་བཅད་པ་དེ་དག་དང ། གསང་བསྔགས་ཀྱི་ཚིག་དེ་དག་སྣང་བར་གྱུར་ན་དེའི་ལུས་ལ་དུག་མྱུར་དུ་ཁྱབ་པར་བྱེད་པས་ཚུགས་པར་མི་འགྱུར་ཞིང ། དེའི་ལུས་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་རྣམ་པ་བརྒྱར་ཞིགས་པར་ཡང་མི་འགྱུར་རོ། །བཙུན་པ་དེའི་ཚེ་ན་ཚེ་དང་ལྡན་པ་ཉེ་སྡེས་ཚིགས་སུ་བཅད་པ་དེ་དག་དང ། གསང་བསྔགས་ཀྱི་ཚིག་དེ་དག་སྔོན་མ་ཐོས་པས་དེ་ལ་ད་ལྟར་བཅོམ་ལྡན་འདས་ལ་ཇི་ལྟ་བ་བཞིན་དུ་སྣང་བར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱིས་སྤྱན་སྔ་ནས་སོང་ངོ་།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་དགུ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་སྡེས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་ཞིག་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་དུག་གིས་གཟིར་བའི་སྙུན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ཉེ་སྡེ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཉེ་སྡེ་ཉིད་ཀྱི་ལས་བྱས་ཤིང ། བསགས་པ་དག་གཞན
5.128a
སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་ན་རི་བྲག་ཞིག་ན་རྔོན་པ་ཞིག་འདུག་སྟེ། རི་བྲག་དེ་དང་ཧ་ཅང་མི་རིང་བ་ཞིག་ན་རི་དགས་དང་བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང་བྱ་མང་པོ་དག་དྲུངས་དབྱུང་བའི་ཕྱིར་དང ། ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང ། སྙི་དང་རྙོང་མང་པོ་དག་འཛུགས་པར་བྱེད་དོ། །དེའི་རྔོན་སྤྱད་དང ། སྙི་དང ། རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན་རི་བྲག་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རི་བྲག་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས། རི་བྲག་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས་དེ་རི་བྲག་ནས་བྱུང་སྟེ་འདི་ནི་ཞི་བའོ། །འདི་ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས་ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ་རྐང་པ་གཉིས་པ་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ
5.128b
འདུག་ནས་ཟས་ཀྱི་བྱ་བ་བྱས་ཏེ་ལག་པ་གཉིས་བསྙལ་ནས་ཁ་བཀྲུས་ཏེ་ལྷུང་བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས་རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་དཀྲུང་བཅས་ཏེ་སྤྱོད་ལམ་ཞི་བར་འདུག་པ་དང ། དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ནས་རྔོན་པ་དེ་ནང་པར་སྔར་ལངས་ཏེ་མཚེའུ་དེ་ག་ལ་བ་དེར་སོང་ནས་དེས་རྔོན་སྤྱད་དང ། སྙི་དང ། རྙོང་དེ་དག་བྱུལ་བར་བརྩམས་པ་དང ། རི་དགས་གཅིག་ཀྱང་མ་མཐོང་ནས་དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང ། སྙི་དང ། རྙོང་འདི་དག་དོན་ཡོད་པ་ཡིན་ན་གང་གི་ཕྱིར་དེང་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང ། མིའི་རྗེས་མཐོང་ནས་དེ་རྗེས་དེའི་ཕྱི་བཞིན་དུ་སོང་བ་དང་རང་སངས་རྒྱས་སྤྱོད་ལམ་ཞི་བར་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས་གལ་ཏེ་བདག་གིས་འདིའི་སྲོག་གཅད་པར་མ་བྱས་ན་འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བ་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང ། ཉམས་པར་གྱུར་ན་མི་རུང་གིས་འདི་ལག་ནས་དྲང་བ་སྦྱིན་ནོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས། འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས། རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ། རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་སྒྱེལ་ནས་སྨྲས་པ།
5.129a
ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ་རྨ་ལྷན་གྱི་གླན་ནས་སྨྲས་པ། འཕགས་པ་སྡུག་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པ་ཀླན་པར་མཛད་ན་དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ་བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས་དེའི་ཕྱིར་ད་ནི་ཞི་བ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས་དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ་ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས་དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་གཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་བརྩིག་ཏུ་བཅུག་སྟེ། གདུགས་དང ། རྒྱལ་མཚན་དང ། བ་དན་དག་བསྒྲེང་ཞིང ། དྲི་དང ། ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། སིལ་སྙན་དག་གིས་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་འཐུན་པར་མི་འགྱུར་བར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ། བལྟ་ན་སྡུག་པ། མཛེས་པར་སྐྱེས་ཞིང་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ཀྱིས་རྔོན་པ་གང་ཡིན་པ་དེ་ནི་ཉེ་སྡེ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱི་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ
5.129b
པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས། ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་དུག་གིས་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་དེ་དུག་གིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ། ནོར་མང་བ་ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ། བལྟ་ན་སྡུག་པ། མཛེས་པར་སྐྱེས་ཤིང ། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང་འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །འདི་ཡང་རེ་ཤིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཚོང་དཔོན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་བཙས་ནས་དེ་བཙས་པའི་རིམ་གྱིས་རིགས་དང་འཐུན་པའི་མིང་བཏགས་ཏེ། དེ་བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །ཇི་ཙམ་ན་ཚོང་དཔོན་དེའི་ཆུང་མ་དུས་ལ་བབ་ནས་དེས་ཆུང་མ་གཞན་ཞིག་བླངས་ཏེ། ཚོང་དཔོན་དེས
5.130a
ཆུང་མ་དེ་ལ་སྨྲས་པ། བཟང་མོ་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱི། མི་མཐུན་པར་སྐྱེས་པས་ནི་མི་ནུས་པས་ཁྱེའུ་འདི་ཁྱོད་ཀྱི་བུ་ཡིན་གྱིས་ཁྱོད་ཀྱིས་འདི་ལ་མཁོ་བ་བསྟབས་པར་བྱའོ། །ཇི་ཙམ་དུས་གཞན་ཞིག་ན་ཆུང་མ་གཉིས་པ་དེ་ལ་ཡང་སེམས་ཅན་ཞུགས་པར་གྱུར་ནས་དེས་བསམས་པ། བདག་ལ་ཡང་བུ་ཡོད་པར་གྱུར་པས་ཁྱེའུ་འདི་དེའི་ཟླ་བོར་འགྱུར་གྱིས་འདི་བསྟོད་པར་མི་བྱའོ་སྙམ་ནས་དེས་ཁྱེའུ་དེ་ཟས་ངན་པ་དང ། གོས་ངན་པ་བསྲེལ་དུ་འཇུག་ཅིང་ཁུ་ཚུར་དང་ཐལ་ཅག་དག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེ་ཕའི་གན་དུ་སོང་སྟེ་སྨྲས་པ། ཡབ་བདག་ལ་མ་ཡར་མོ་འདིས་ཟས་ངན་པ་དང ། གོས་ངན་པ་བསྲེལ་དུ་སྩོལ་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་དོ། །ཚོང་དཔོན་དེས་སྨྲས་པ། བུ་ཅི་ནས་ཀྱང་ཕྱིན་ཆད་དེ་ལྟར་མི་བྱེད་པར་བཟློག་པར་བྱའོ། །ཚོང་དཔོན་དེས་ཆུང་མ་ལ་སྨྲས་པ། བཟང་མོ་ཁོ་བོས་ཁྱོད་ལ་དང་པོ་ཉིད་ནས་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱི་མི་མཐུན་པར་སྐྱེས་པས་ནི་མི་ནུས་པས་ཁྱེའུ་འདི་ཁྱོད་ཀྱི་བུ་ཡིན་གྱིས་ཁྱོད་ཀྱིས་འདི་ལ་མཁོ་བ་བསྟབས་པར་བྱའོ་ཞེས་མ་སྨྲས་སམ། ཅིའི་ཕྱིར་ཁྱོད་ཀྱིས་འདི་ལ་ཟས་ངན་པ་དང ། གོས་ངན་པ་བསྲེལ་དུ་འཛུད་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད། ཆུང་མས་སྨྲས་པ། རྗེའི་སྲས་བདག་གིས་འདི་བསླབ་པར་བགྱི་སྟེ། འདི་ནི་ཚོང་དཔོན་གྱི་བུ་ལགས་པས་གལ་ཏེ་མ་བསླབས་ན་རྗེའི་སྲས་ཉིད་ལ་ཡང་འཇིག་རྟེན་དག་ངེས་པར་སྨོད་པར་འགྱུར་རོ། །ཚོང་དཔོན་གྱིས་སྨྲས་པ། ཁྱོད་འདི་སློབ་པར་མ་བསྐོས་ཀྱིས་ཕྱིན་ཆད་འདི་ཟས་ངན་པ་དང ། གོས་ངན་པ་བསྲེལ་དུ་མི་གཞུག་ཅིང་ཁུ་ཚུར་དང ། ཐལ་ལྕག་གིས་ཡང་དང་ཡང་དུ་མ་རྡེག་ཤིག་།ཆུང་མ་དེ་ཚོང་དཔོན་དེའི་ཤིན་ཏུ་གནང་ཆེན་ཡིན་པས། ཆུང་མ་དེས་ཁྱེའུ་དེ་ཕྱིར་ཞིང་ཤས་ཆེར་གོས་ངན་པ་དང ། ཟས་ངན་པ་སྲེལ་དུ་འཛུད་ཅིང ། ཁུ་ཚུར་དང་ཐལ་ལྕག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེས་བསམས་པ། བདག་གི་ཕས་མ་ཡར་མོ་འདི་དྲག་ཏུ་མ
5.130b
བཟློག་པས་དེས་མ་ཡར་མོ་འདི་བདག་ལ་ཕྱིར་ཞིང་ཤས་ཆེར་ཟས་ངན་པ་དང ། གོས་ངན་པ་སྲེལ་དུ་འཛུད་ཅིང ། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་ཀྱིས་བདག་རབ་ཏུ་འབྱུང་དུ་འགྲོའོ་སྙམ་ནས། ཁྱེའུ་དེས་ཕ་ལ་ཡབ་ཁྱོད་ཀྱིས་བདག་གི་མ་ཡར་མོ་འདི་བཟློག་ཀྱང་འདིར་སླར་ཞིང་ཤས་ཆེར་བདག་ཟས་ངན་པ་དང ། གོས་ངན་པ་སྲེལ་དུ་སྩལ་ཅིང ། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་ཀྱིས་བདག་རབ་ཏུ་འབྱུང་དུ་མཆིའོ། །ཞེས་ཅི་ནས་ཅིར་བསྒྱུར་ཏེ་གསོལ་བ་བྱས་སོ། །ཚོང་དཔོན་དེ་ཆུང་མ་དེ་ལ་ཧ་ཅང་བྱམས་ཤིང་དེའི་སེམས་སྲུང་བས་དེ་དྲག་ཏུ་བཟློག་པར་མ་ནུས་ནས་དེས་སྨྲས་པ། བུ་ཁྱིམ་བདག་གི་ཆུང་མ་འདི་གཏུམ་པ་བརྟུན་ངས་པ། དྲག་ཤུལ་ཆེ་བ་ཡིན་གྱིས་སོང་ལ་རབ་ཏུ་བྱུང་ཤིག་དང ། ཁྱོད་གསོན་པ་མཐོང་བར་ཡང་འགྱུར་གྱི། གལ་ཏེ་ན་ཁྱོད་ལ་གནོད་པ་བྱེད་པར་འགྱུར་བའི་གནས་ཀྱང་ཡོད་དོ། །ཁྱེའུ་དེ་ཕས་གནང་ནས་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་དྲུང་དུ་སོང་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟངས་ཁྱོད་ཀྱིས་སེམས་བསྐྱེད་པ་ལེགས་ཏེ། ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་བྱུང་ཤིག་།དགེ་སློང་དེས་ཁྱེའུ་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟངས་དགེ་སློང་གི་ལས་ནི་གཉིས་ཏེ། བསམ་གཏན་དང ། ཀློག་པ་ཡིན་ནོ། །ཁོ་བོ་ནི་བསམ་གཏན་པ་ཡིན་ན་ཁྱོད་བསམ་གཏན་དང ། ཀློག་པ་གང་བྱེད། དེས་སྨྲས་པ། མཁན་པོ་ཀློག་པའོ། །བུ་ལེགས་ཀྱིས་ཁྱོད་ཀྱིས་སྡེ་སྣོད་གསུམ་པོ་དག་ཀླག་པར་བྱའོ། །དེས་བསམས་པ། གཞུང་མང་ལ་མཁན་པོ་རྗེས་སུ་བསྲུང་དགོས་པས། འདི་ན་བདག་ལ་ཀློག་ཏུ་འཛུད་པ་མེད་ཀྱིས། ཡུལ་གཞན་དུ་འགྲོའོ་སྙམ་ནས་དེ་ཡུལ་གཞན་དུ་སོང་ངོ ། །དེས་དེར་སྡེ་སྣོད་གསུམ་པོ་དག་བླགས་ཤིང་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེས་བསམས་པ།
5.131a
བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་སྙོད་པར་བྱེད་པ། གསོ་བར་བྱེད་པ། སྐྱེད་པར་བྱེད་པ་ནུ་མ་སྣུན་པར་བྱེད་པ། འཛམ་བུའི་གླིང་སྣ་ཚོགས་སྟོན་པར་བྱེད་པ་གཉིས་ནི་དཀའ་བ་བྱེད་པ་དག་ཡིན་ཏེ། བུས་ཕྲག་པ་གཅིག་གིས་ནི་ཕ། གཅིག་ཤོས་ཀྱིས་ནི་མ་ལོ་བརྒྱ་ཐམ་པར་ཡོངས་སུ་སྤང་བ་བྱས་སམ། ས་ཆེན་པོ་འདིར་ནོར་བུ་དང ། མུ་ཏིག་དང ། བཻ་དཱུརྱ་དང ། མན་ཤེལ་དཀར་པོ་དང ། བྱི་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་བ་དང ། དེ་ལྟ་བུའི་དབང་ཕྱུག་གི་བདག་པོ་ལ་བཀོད་པར་གྱུར་པ་གང་ཡིན་པ་དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང ། ཉེ་བར་བྱས་པར་མི་འགྱུར་གྱི། དེས་ཕ་མ་མ་དད་པ་གཉིས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་འཛུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་པ་དང ། ཚུལ་ཁྲིམས་འཆལ་བ་གཉིས་ཚུལ་ཁྲིམས་ཕུན་སུམ་ཚོགས་པ་དང ། སེར་སྣ་ཅན་གཉིས་གཏོང་བ་ཕུན་སུམ་ཚོགས་པ་དང ། ཤེས་རབ་འཆལ་བ་གཉིས་ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཛུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་ན། དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང་ཉེ་བར་བྱས་པར་འགྱུར་རོ། །ཞེས་གསུངས་པས་བདག་གི་ཕ་དེ་ཡང་མ་དད་པ་ཡིན་གྱིས་བདག་སོང་ལ་དེ་ལ་ཆོས་བསྟན་པར་བྱའོ་སྙམ་ནས་དེ་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་མཉན་ཡོད་དུ་ཕྱིན་ནས་དེ་མཉན་ཡོད་དུ་འཇུག་པ་ཉིད་ན་རྒྱལ་བྱེད་ཀྱི་ཚལ་དུ་སོང་ངོ ། །མཉན་ཡོད་ཀུན་ཏུ་ཚོང་དཔོན་ཆེ་གེ་མོའི་བུ་ཞིག་ལྗོངས་ནས་སྡེ་སྣོད་གསུམ་བླགས་ཏེ་རྒྱལ་བྱེད་ཀྱི་ཚལ་དུ་འོངས་སོ། །ཞེས་བྱ་བའི་སྒྲས་ཁྱབ་པར་གྱུར་པ་དེ་ཚོང་དཔོན་དེས་ཐོས་ནས་བདག་གི་བུ་སྡེ་སྣོད་གསུམ་བླགས་ཏེ་ལྗོངས་ནས་རྒྱལ་བྱེད་ཀྱི་ཚལ་དུ་འོངས་ཀྱིས་དེ་ཡང་དག་པར་རབ་ཏུ་དགའ་བར་བྱེད་དུ་འགྲོའོ་སྙམ་ནས། ཚོང་དཔོན་དེ་རྒྱལ་བྱེད་ཀྱི་ཚལ་དུ་སོང་བ་དང ། དེས་བུ་དེ་མཐོང་ནས་སྨྲས་པ། བུ་ཁྱོད་ཀྱིས་ཁོ་བོ་སྤངས་ཏེ་རབ་ཏུ་བྱུང་མོད་ཀྱི།
5.131b
ཁྱོད་དགེ་སློང་དུ་རེད་ཅིང་མང་དུ་ཐོས་པར་གྱུར་པ་ལེགས་ཏེ། བདག་ཀྱང་ཡོངས་སུ་དགའོ་ཞེས་སྨྲས་ནས་དེའི་མདུན་དུ་འདུག་གོ། །དགེ་སློང་དེས་ཚོང་དཔོན་དེ་ལ་གང་གིས་ཚོང་དཔོན་དེ་དད་པ་སྐྱེས་པས་སྐྱབས་སུ་འགྲོ་བ་དང ། བསླབ་པའི་གཞི་དག་བཟུང་བར་གྱུར་པ་དེ་འདྲ་བའི་ཆོས་བསྟན་པ་བྱས་སོ། །ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ་ཕྱི་དེ་ཉིན་པར་ཟན་ལ་འགྲོན་དུ་བོས་པ་དང ། བུ་དེས་ཀྱང་ཅང་མི་སྨྲ་བས་དང་དུ་བླངས་སོ། །དེ་ནས་ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ་སོང་བ་དང ། དེ་ལ་ལམ་ཀར་བློ་སྐྱེས་པ། བདག་གིས་བུ་དེ་མ་བགྲོས་པར་གྱ་ཙོམ་དུ་འགྲོན་དུ་བོས་ན་བདག་གི་ཆུང་མ་དེ་ཡང་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་པས་བུ་དེ་ལ་བསྙེན་བཀུར་བྱེད་པར་མི་འགྱུར་ན། དེ་ལ་ཇི་ལྟར་བསྒྲུབ་པར་བྱ་སྙམ་མོ། །ཡང་བསམས་པ། ད་ནི་དེ་འགྲོན་དུ་བོས་ཟིན་པས་ཅི་བྱར་ཡང་མེད་ཀྱིས་བདག་གིས་གང་གིས་ཆུང་མ་དེ་འཁྲུགས་པར་མི་འགྱུར་བར་རྣམ་པ་ཐམས་ཅད་དུ་དགའ་བ་དང་སྙན་པའི་ཚིག་དག་གིས་ཐབས་བཤམ་པར་བྱའོ་སྙམ་ནས་དེ་ཁྱིམ་དུ་སོང་སྟེ་ཆུང་མ་ལ་སྨྲས་པ། བཟང་མོ་འཁྱམས་པ་དང ། ཤི་བ་དང ། རབ་ཏུ་བྱུང་བ་ཞེས་བྱ་བ་དག་དོན་གཅིག་གམ། འོན་ཏེ་ཐ་དད་དུ་བྱ་བ་ཅུང་ཟད་ཡོད། ཆུང་མས་སྨྲས་པ། རྗེའི་སྲས་ཐ་དད་དུ་བགྱི་བ་ཅུང་ཟད་ཀྱང་མ་མཆིས་སོ། །ཚོང་དཔོན་གྱིས་སྨྲས་པ། བཟང་མོ་གཞན་དག་ན་རེ་ཁྱོད་ཀྱི་བུ་ཡར་པོ་དེ་དགེ་སློང་བཟང་པོར་རེད་དེ་ལྗོངས་ནས་སྡེ་སྣོད་གསུམ་བླགས་ནས་རྒྱལ་བྱེད་ཀྱི་ཚལ་དུ་འོངས་ཏེ། སྡེ་སྣོད་གསུམ་དང་ལྡན་པ་འབའ་ཤིག་ཏུ་ཡང་མ་ཟད་ཀྱི། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་དུ་ཡང་གྱུར་ཅེས་ཟེར་རོ། །ཆུང་མས་སྨྲས་པ། རྗེའི་སྲས་གལ་ཏེ་དེ་ལྟ་ན་ཅིའི་སླད་དུ་འཚལ་མ་ལ་གཡར་མི་དྲང ། བཟང་མོ་འགྲོན་དུ་བོས་ཀྱིས་ཟས་སྟ་གོན་གྱིས་ཤིག་།ཆུང་མ་དེ་དེ་ལ་ཞེ་སྡང་གི་ཀུན་ནས་དཀྲིས་པ་དང་བྲལ་ནས་དེས་ཟས་བསིལ་བའི་རོ་དང་ལྡན་པ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། ཟས་དྲོ་བའི་རོ་དང་ལྡན་པ་གང་དག་ཡིན་པ
5.132a
དེ་དག་ནི་ཕྱི་དེ་ཉིན་པར་སྟ་གོན་བྱས་ནས། བཙུན་པ་གདུགས་ཚོད་གཡར་དགོངས་འཚལ་ལགས་ན་དེའི་དུས་ལགས་པར་དགོངས་སུ་གསོལ་ཞེས་གཡར་འདྲེན་པའི་མི་བཏང་ངོ ། །དགེ་སློང་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ནས་ཕའི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ། །དེ་ནས་ཚོང་དཔོན་དེ་ཆུང་མ་དང་བཅས་པས་རང་གི་ལག་ནས་ཟས་བསོད་པས་དགེ་སློང་དེ་ཚིམ་པར་བྱས་ཤིང་རང་གི་ལག་ནས་བསྟབས་སོ། །ཚིམ་པར་བྱས་ཤིང་བསྟབས་ཏེ་ཟོས་ཟིན་པར་རིག་ནས་ལག་པ་བསྙལ་ཅིང་ལྷུང་བཟེད་བཞག་པ་ན་རྐང་པ་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེས་མ་ཡར་མོ་དེ་ལ་ཡང་གང་ཐོས་ན་དེས་ཀྱང་སྐྱབས་སུ་འགྲོ་བ་དང ། བསླབ་པའི་གཞི་དག་བཟུང་བར་གྱུར་པའི་རྣམ་པ་དེ་ལྟར་ཆོས་བསྟན་པར་བྱས་སོ། །དེས་ཁྱིམ་དེ་འདི་ལྟར་དགེ་སློང་རྣམས་དང་དགེ་སློང་མ་རྣམས་ཀྱིས་ཁྲོན་པ་ལྟ་བུར་གྱུར་པ་དེ་ལྟར་བཏུལ་ནས་དེ་དག་སྦྱིན་པ་དང་བྱ་བར་སེམས་པ་གང་ཡིན་པ་ཅི་ཡང་རུང་སྟེ་དེ་ཐམས་ཅད་དགེ་སློང་རྣམས་དང ། དགེ་སློང་མ་རྣམས་ལ་སེམས་སོ། །ཇི་ཙམ་དུས་གཞན་ཞིག་ན་ཚོང་དཔོན་དེའི་འབྱུང་བ་ཆེན་པོ་མ་སྙོམས་པས་ན་བར་གྱུར་ནས། དེའི་བུས་བདག་གི་ཕ་ན་བར་གྱུར་ཏོ་ཞེས་ཐོས་ནས་དེ་འདི་སྙམ་དུ་སེམས་ཏེ། བདག་སོང་ལ་ཕ་དེ་ལ་མཆོག་ཏུ་དགའ་བར་འགྱུར་བའི་ཆོས་བསྟན་པར་བྱའོ་སྙམ་ནས། དགེ་སློང་དེ་དེའི་དྲུང་དུ་དུས་དང་འཐུན་པའི་དུས་སུ་སོང་ནས་འདི་སྐད་ཅེས་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། འདི་ལྟར་ཁྱོད་ཀྱིས་དགེ་བའི་བཤེས་གཉེན་བདག་ལ་བརྟེན་ནས་སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིང་བསླབ་པའི་གཞི་དག་བླངས། སྦྱིན་པ་དག་བྱིན། བསོད་ནམས་དག་བྱས་པས་ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ནས་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཆོས་སྟོན་པར་བྱེད་དོ། །ཚོང་དཔོན་གྱིས་སྨྲས་པ། བུ་དེ་དེ་བཞིན་ནོ། །དེ་དེ་བཞིན་ཏེ།
5.132b
བདག་གིས་དགེ་བའི་བཤེས་གཉེན་ཁྱོད་ལ་བརྟེན་ནས། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིག་བསླབ་པའི་གཞི་དག་བླངས་སྦྱིན་པ་དག་བྱིན། བསོད་ནམས་དག་བྱས་པས་བདག་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚོང་དཔོན་དེའི་བུ་དེས་ཕ་ལ་དེ་ལྟར་ཆོས་བསྟན་ནས་སོང་ངོ ། །ཚོང་དཔོན་དེ་ལ་བློ་སྐྱེས་པ་བདག་གི་བུ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང ། གྲོལ་བའི་སྤོབས་པ་ཅན་དེ་གཞན་དུ་སྨྲ་བར་མི་འགྱུར་བས་བདག་སྡུག་བསྔལ་གྱི་ཚོར་བས་ཉེན་པ་ནི་ཐུན་མོང་མ་ཡིན་པས་བདག་གིས་བདག་ཉིད་གསོད་པར་བྱའོ་སྙམ་མོ། །ཡང་བསམས་པ། བདག་ཉིད་ལ་རྩོམ་པར་བྱེད་པ་ནི་སྡུག་བསྔལ་བ་ཡིན་ན། དེའི་ཕྱིར་བདག་སྲོག་དང་བྲལ་བར་བྱེད་ནུས་པ་སུ་ཡོད་སྙམ་ནས། དེ་ལ་བྲན་མོ་མངག་གཞུག་མ་སྐྱོང་མ་ཞེས་བྱ་བ་སྦོམ་མོ། །གླེན་མ། དམན་པ་ཞིག་ཡོད་ནས། ཚོང་དཔོན་དེས་བསམས་པ། སྐྱོང་མ་འདི་ནི་སྦོམ་མོ་གླེན་མ། དམན་པ་ཡིན་པས་འདིས་བདག་སྲོག་དང་བྲལ་བར་བྱེད་ནུས་ཀྱིས་གཞན་གྱིས་ནི་མི་ནུས་སྙམ་མོ། །ཚོང་དཔོན་དེའི་ཁྱིམ་དང་ཧ་ཅང་ཐག་མི་རིང་བ་ཞིག་ན་ཁྱིམ་བདག་ཅིག་གིས་བུས་ཆུང་མ་བླངས་པ་དེར་ཚོང་དཔོན་དེའི་ཆུང་མ་བྲན་མོ་མངག་གཞུག་མ་སྐྱོང་མ་དང་བཅས་ཤིང་འགྲོན་དུ་བོས་ཏེ་སོང་ངོ ། །བག་མ་བླང་པ་དང ། སྟོན་མོ་ཟིན་ནས་ཚོང་དཔོན་གྱི་ཆུང་མས་སྐྱོང་མ་ལ་སྨྲས་པ། སྐྱོང་མ་ཁྱོད་སོང་ལ་ཚོང་དཔོན་གཉིད་ལོག་པར་མི་འགྱུར་བར་སྲུངས་ཤིག་།ཁོ་མོ་ཡང་ཕྱི་བཞིན་འོང་ངོ ། །སྐྱོང་མས་རྗེ་མོའི་ཚིག་མཉན་ཏེ་ཁྱིམ་དུ་སོང་ནས་ཚོང་དཔོན་གྱི་དྲུང་དུ་ཕྱིན་པ་དང ། ཚོང་དཔོན་གྱིས་སྨྲས་པ། སྐྱོང་མ་ཁྱོད་ག་ལས་འདིར་འོངས། སྐྱོང་མས་སྨྲས་པ། རྗེའི་སྲས་ཁྱིམ་བདག་ཆེ་གེ་མོའི་བུས་བག་མ་བླངས་པ་དེ་བདག་གིས་བལྟས་ཏེ་འཚལ་མ་འཚལ་ནས་མཆིས་སོ། །སྐྱོང་མ་བག་མ་ལེན་པ་བཟང་ངམ། རྗེའི་སྲས་བཟང་ངོ ། །གལ་ཏེ་ངས་ཁྱོད་དེ་ལྟར་བག་མར་གཏང་བར་བྱ་ན་ཁྱོད
5.133a
དགའ་འམ། རྗེའི་སྲས་དགའོ། །གལ་ཏེ་དེ་ན་ཁོ་བོ་ཅི་ཟེར་བ་དེ་བཞིན་དུ་བྱེད་ན་ཁོ་བོ་ཁྱོད་དགའ་བར་འགྱུར་བ་ཤེས་སོ། །སྐྱོང་མས་སྨྲས་པ། རྗེའི་སྲས་དེ་བཞིན་དུ་བགྱིའོ། །སྐྱོང་མ་གལ་ཏེ་དེ་ལྟ་ན་ཁོ་བོའི་ལྟོར་མི་མ་ཡིན་པ་ཞིག་ཞུགས་ཀྱིས་དེ་སོད་ཅིག་།རྗེའི་སྲས་གོ་རིམས་ཇི་ལྟར་བགྱི། སྐྱོང་མ་དང་པོར་ངའི་རྐང་པ་གཉིས་ཚིར་ཅིག་།དེའི་འོག་ཏུ་བྱིན་པ་གཉིས། དེའི་འོག་ཏུ་པུས་མོ་གཉིས། དེའི་འོག་ཏུ་བརླ་གཉིས། དེའི་འོག་ཏུ་རྐེད་པ། དེའི་འོག་ཏུ་ལྟོ་བ། དེའི་འོག་ཏུ་བྲང ། དེའི་འོག་ཏུ་གྲེ་བ་ཚིར་ལ། གལ་ཏེ་ཁོ་བོ་འགུལ་ན་མ་གཏང་ཤིག་།སྐྱོང་མ་གླེན་མ་དེས་དེ་བཞིན་དུ་བྱས། དམ་དུ་བཙིར་བ་དང ། ཚོང་དཔོན་གྱིས་བསམས་པ། ཀྱེ་མའོ་བདག་སྐྱོང་མ་འདིས་བཏང་ཡང་ཅི་མ་རུང་སྙམ་ན་སྐྱོང་མས་དེ་བས་ཀྱང་ཆེས་དམ་དུ་བཙིར་ཏོ། །ལྷས་ཚིགས་སུ་བཅད་པ་སྨྲས་པ། བློ་ངན་གྱིས་ནི་གང་འཛིན་པ། །རུས་སྦལ་གྱིས་ནི་གང་འཛིན་བཞིན། །སྐྱོང་མས་ཟིན་པར་གྱུར་པས་ན། །ཁྱོད་ནི་འཚོ་བར་མ་མཐོང་ངོ ། །ཚོང་དཔོན་དེ་དུས་ལ་བབ་ནས་སྐྱོང་མས་རས་ཀྱིས་གཡོགས་ཏེ་བཞག་གོ། །དེ་ནས་ཚོང་དཔོན་གྱི་ཆུང་མ་ཕྱི་བཞིན་འོངས་ནས་དེ་སྨྲས་པ། སྐྱོང་མ་ཁྱོད་འདུག་བཞིན་དུ་ཚོང་དཔོན་ཉལ་དུ་བཅུག་གམ་ཞེས་ཚོང་དཔོན་གྱི་ཆུང་མ་དེས་ཚོང་དཔོན་བསླང་བར་བརྩམས་པ་དང ། སྐྱོང་མས་སྨྲས་པ། ངན་བུས་འདིའི་ལྟོ་ན་དགྲ་བོ་མཆིས་པ་ཕྱུང་བས་དེས་ན་འདི་ཉལ་བར་གྱུར་གྱིས་འདི་མ་བསླང་ཤིག་།ཚོང་དཔོན་གྱི་ཆུང་མས་བསམས་པ། འདིའི་དགྲ་བོ་ཅི་འདྲ་བ་ཞིག་ཡིན་པ་ཇེ་བལྟ་འོ་སྙམ་ནས། དེས་བརྟག་པར་བརྩམས་པ་དང ། དུས་ལ་བབ་པར་མཐོང་ངོ ། །ཚོང་དཔོན་གྱི་ཆུང་མ་དེ་ལ་བློ་སྐྱེས་པ། འདི་ནི་སྐྱོང་མའི་སྤོབས་པ་མ་ཡིན་གྱི། འདི་ནི་བུ་ཟན་མོའི་བུ་སྡེ་སྣོད་གསུམ་དང་ལྡན་པ་དེའི་སྤོབས་པ་ཡིན་ཏེ། དེས་སྡེ་སྣོད་གསུམ་བླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས
5.133b
ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས་ད་ནི་འདིའི་ལུས་ཀྱང་ཞིག་།ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག་།ཁོ་མོ་དང་ལྷན་ཅིག་དགའ་མགུར་སྤྱོད་ཅིག་།ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག་ཅེས་ཆུང་མ་སྡུག་བསྔལ་གྱི་ཚོར་བས་ཉེན་པ་དེས་ཚིག་ཏུ་བརྗོད་ནས། དེའི་འོག་ཏུ་གོས་སྔོན་པོ་དང ། སེར་པོ་དང ། དམར་པོ་དང ། དཀར་པོ་དག་གིས་ཁྱོགས་བརྒྱན་ནས་མཉན་ཡོད་ཀྱི་ཕྱི་རོལ་གྱི་དུར་ཁྲོད་དུ་བསྲེགས་ཏེ་དེ་ནས་མྱ་ངན་བསང་བ་བྱས་ཏེ་འདུག་གོ། །ཆུང་མ་དེས་བར་བར་དུ་ཡང་དེ་སྐད་ཤ་དག་ཟེར་བས་དགེ་སློང་སྡེ་སྣོད་གསུམ་པ་དེས་བདག་གི་ཕ་དུས་ལ་བབ་པར་ཐོས་ནས་བསམས་པ། འདི་ནི་འདུས་བྱས་རྣམས་ཀྱི་ཆོས་ཉིད་ཡིན་མོད་ཀྱི་འོན་ཀྱང་མ་ཡར་མོ་དེའི་མྱ་ངན་བསང་བ་བྱས་འགྲོའོ་སྙམ་ནས། དེ་སོང་བ་དང་མ་ཡར་མོ་དེས་ཐག་རིང་པོ་ཁོ་ན་ནས་དགེ་སློང་དེ་མཐོང་ངོ ། །མཐོང་ནས་ཀྱང་ཡང་བུ་ཟན་མོའི་བུ་སྡེ་སྣོད་གསུམ་དང་ལྡན་པས་སྡེ་སྣོད་གསུམ་བླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས་ད་ནི་འདིའི་ལུས་ཀྱང་ཞིག་།ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག་ཁོ་མོ་དང་ལྷན་ཅིག་དགའ་མགུར་སྤྱོད་ཅིག་།ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག་།ཅེས་སྨྲ་བར་བརྩམས་པ་དང ། དགེ་སློང་དེ་ཉམ་ང་ནས་དེ་ཉིད་ནས་ཕྱིར་ལོག་གོ། །དེ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ལྟུང་བ་མེད་དོ། །ཡང་དགེ་སློང་གིས་ནད་པ་ལ་གང་ཐོས་ན་ནད་པ་འཆི་བར་སེམས་པ་དེ་འདྲ་བའི་ཆོས་བསྟན་པར་མི་བྱའོ། །དགེ་སློང་གིས་ནད་པ་ལ་གང་ཐོས་ན་ནད་པ་འཆི་བར་སེམས་པ་དེ་འདྲ་བའི་ཆོས་སྟོན་པར་བྱེད་ན
5.134a
འགལ་ཚབས་ཅན་དུ་འགྱུར་རོ། །འདི་ཡང་རེ་ཤིག་བྱུང་བ་ཡིན་གྱིས་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་སྤོང་བྱེད་དག་ན་ཆུ་ཀླུང་ཡིད་འོང་ལྡན་གྱི་འགྲམ་ན་སྒྲོན་ཤིང་གི་ཚལ་གསེབ་ན་བཞུགས་སོ། །དེ་ན་བཅོམ་ལྡན་འདས་དགེ་སློང་གིས་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག་།མི་སྡུག་པ་བསྟེན་ཅིང་གོམས་པར་བྱས་ལན་མང་དུ་བྱས་ན་འབྲས་བུ་ཆེན་པོ་དང ། ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་བསྒོམ་པའི་སྔགས་པ་བརྗོད་པར་ཡང་མཛད་དོ། །བཅོམ་ལྡན་འདས་ཀྱིས་དགེ་སློང་དག་མི་སྡུག་པ་སྒོམས་ཤིག་།མི་སྡུག་པ་བསྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་གསུངས་པས་དེའི་ཚེ་ན་དགེ་སློང་དག་མི་སྡུག་པ་སྒོམ་པར་བྱེད་དེ། དེ་དག་མི་སྡུག་པ་སྒོམ་པར་བྱེད་པ་དེའི་ཚེ་རྣག་གིས་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བྱེད་པ་ན་མཚོན་ཡང་འབྱིན་པར་བྱེད་དུག་ཀྱང་ཟ་བར་བྱེད། ཐག་པས་འཆིང་བས་ཀྱང་འཆི་བར་བྱེད། གཡང་སར་ཡང་མཆོང་བར་བྱེད་ཅིང་འདི་ལྟར་དགེ་སློང་གིས་ཀྱང་དགེ་སློང་ལ་རྩོལ་བར་བྱེད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བྱེད་པ་ན་རི་དགས་ཟློག་དགེ་སྦྱོང་སྦེད་ག་ལ་བ་དེར་སོང་སྟེ་ཕྱིན་ནས་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟངས་ཚུར་ཤོག་།ཁོ་བོ་སྲོག་དང་ཕྲོལ་ཅིག་དང ། ཁོ་བོའི་ལྷུང་བཟེད་དང ། ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ། །དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གོས་པ་ཁྱེར་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་སོང་ནས་ཕྱིན་པ་དང ། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་འདུག་སྟེ་རལ་གྲི་ཁྲག་གིས་གོས་པ་འཁྲུ་བར་བྱེད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་འདུག་ནས་རི་དགས་ཟློག་དགེ་སྦྱོང
5.134b
སྦེད་ལ་འདི་སྐད་ཅེས་སྨྲས་སོ། །བཞིན་བཟངས་ལེགས་སོ་ལེགས་སོ། །འདི་ལྟར་ཁྱོད་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང ། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ། །དེ་ལྟར་དེ་ལ་རི་དགས་ཟློག་དགེ་སྦྱོང་སྦེད་འདི་སྙམ་དུ་འདི་ལྟར་བདག་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་པར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་འདའ་བར་བྱེད་པ་ནི་བདེན་མོད། བདག་ལ་བསོད་ནམས་མང་དུ་སྐྱེ་ཞིང་དེ་དག་གི་ལྷུང་བཟེད་དང ། ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་ཁྱེར་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆགས་ས་ནས་འཆགས་སར་དང ། ལམ་གོལ་བར་རྗེས་སུ་རྒྱུ་བ་ན་དགེ་སློང་དེ་དང ། དེ་དག་མཐོང་ནས་འདི་སྐད་ཅེས་སྨྲས་སོ། །དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་དགྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན། དེས་ན་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པ་ན་གནས་ནས་ཕྱིར་བྱུང་སྟེ། རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟངས
5.135a
བདག་མ་རྒལ་བ་ཡིན་གྱིས་སྒྲོལ་ཅིག་།བདག་མ་གྲོལ་བ་ཡིན་གྱིས་ཁྲོལ་ཅིག་།བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཤིག་།བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལས་ཟློས་ཤིག་།དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་བྲལ་བར་བྱས་ཏེ། དེ་བཞིན་དུ་གཉིས་དང ། གསུམ་ནས་དགེ་སློང་དྲུག་ཅུའི་བར་དག་སྲོག་དང་བྲལ་བར་བྱས་སོ། །དེའི་ཚེ་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང ། དགེ་སློང་གི་དགེ་འདུན་སྲབས་པར་གྱུར་ཏོ། །དེ་ནས་བཅོམ་ལྡན་འདས་དེ་ཉིད་ཀྱི་ཚེས་བཅཝ་ལྔའི་གསོ་སྦྱོང་ལ་དགེ་སློང་གི་དགེ་འདུན་གྱི་གུང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་རྣམ་པར་གཟིགས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་དུས་གཅིག་ན་བཅོམ་ལྡན་འདས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག་།མི་སྡུག་པ་སྟེན་ཅིང ། གོམས་པར་བྱས་ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་སྒོམ་པའི་བསྔགས་པ་བརྗོད་པར་ཡང་མཛད་དོ། །དེའི་ཚེ་ན་དགེ་སློང་དག་མི་སྡུག་པ་སྒོམ་པར་བགྱིད་དེ། དེ་དག་མི་སྡུག་པ་སྒོམ་པར་བགྱིད་པའི་ཚེ་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བགྱིད་པ་ན་མཚོན་ཡང་འབྱིན་པར་བགྱིད། དུག་ཀྱང་འཚལ་བར་བགྱིད། ཐག་པས་འཆིང་བས་ཀྱང་འགུམ་པར་བགྱིད། གཡང་སར་ཡང་མཆོང་བར་བགྱིད་ཅིང ། དགེ་སློང་གིས་ཀྱང་དགེ་སློང་ལ་རྩོལ་བར་བགྱིད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བགྱིད་པ་ན་རི་དགས་ཟློག་དགེ་སྦྱོང་སྦེད་ག་ལ་བ་དེར་མཆིས་ཏེ་ཕྱིན་ནས། རི་དགས་ཟློག་དགེ་སྦྱོང
5.135b
སྦེད་ལ་འདི་སྐད་ཅེས་བཞིན་བཟང་ཚུར་ཤོག་ཁོ་བོ་སྲོག་དང་ཕྲོལ་ཅིག་དང་ཁོ་བོའི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ་ཞེས་མཆིའོ། །དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་འཚལ་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་མཆིས་ནས་ཕྱིན་པ་དང ། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་མཆིས་ཏེ། རལ་གྲི་ཁྲག་གིས་གོས་པ་འཁྲུ་བར་བགྱིད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་མཆིས་ནས་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་བཞིན་བཟང་ལེགས་སོ་ལེགས་སོ། །འདི་ལྟར་ཁྱོད་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང ། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ་ཞེས་མཆིས་ནས། དེ་ལྟར་དེ་ལ་རི་དགས་ཟློག་དགེ་སྦྱོང་སྦེད་འདི་སྙམ་དུ་འདི་ལྟར་བདག་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད། བདག་ལ་བསོད་ནམས་མང་དུ་སྐྱེ་ཞིང་དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་བདག་གིས་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་འཚལ་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆགས་ས་ནས་འཆག་སར་དང ། ཤུལ་གོལ་བ་རྗེས་སུ་རྒྱུ་བ་ན་དགེ་སློང་དེ་དང་དེ་དག་མཐོང་ནས། འདི་སྐད་ཅེས་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། མ་རྒལ་བ
5.136a
རྒལ་བར་བྱ་བ། མ་གྲོལ་བ་གྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན་ཞེས་མཆིའོ། །དེ་ནས་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པ་ན་གནས་ནས་སླར་བྱུང་སྟེ། རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་བཞིན་བཟངས་བདག་མ་རྒལ་བ་ཡིན་གྱིས་སྒྲོལ་ཅིག་།བདག་མ་གྲོལ་བ་ཡིན་གྱིས་ཁྲོལ་ཅིག་།བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཤིག་།བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལ་ཟློས་ཤིག་ཅེས་མཆིའོ། །དེ་ནས་རི་དགས་ཟློག་དགེ་སྦྱོང་སྦེད་ཀྱི་དགེ་སློང་དེ་སྲོག་དང་བྲལ་བར་བགྱིས་ཏེ། དེ་བཞིན་དུ་གཉིས་དང ། གསུམ་ནས་དགེ་སློང་དྲུག་ཅུའི་བར་དག་སྲོག་དང་བྲལ་བར་བགྱིས་པས་བཙུན་པ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དགེ་སློང་ཡང་དགེ་སློང་ལ་རྩོལ་བ་བྱེད་དམ། བཙུན་པ་རྩོལ་བར་བགྱིད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གིས་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་སྨད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང །
5.136b
ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མི་འམ་མིར་ཆགས་པ་ལ་བསམས་བཞིན་དུ་རང་གི་ལག་དར་ཏེ་སྲོག་བཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས་ཀྱེ་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་སེམས་ཀྱི་འདོད་པ་དང ། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་རྩོམ་པ་དེས་དུས་བྱས་ན་དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་རྣམ་པ་བཞི་པོ་མིང་གི་དགེ་སློང་དང ། ཁས་འཆེ་བའི་དགེ་སློང་དང ། སློང་བའི་ཕྱིར་དགེ་སློང་དང ། ཉོན་མོངས་པ་བཅོམ་པའི་ཕྱིར་དགེ་སློང་ངོ ། །མིང་གི་དགེ་སློང་གང་ཞེ་ན། གང་གི་མིང་དང་མིང་དུ་བརྗོད་པ་དང ། ཚིག་གཉིས་པ་དང ། ཚིག་བླ་དྭགས་དང ། འདུ་ཤེས་དང ། བོད་པ་དང ། གདགས་པ་དང ། ཐ་སྙད་དགེ་སློང་ཞེས་འམ། དགེ་སློང་གི་རིགས་ཞེ་འམ། དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང ། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་དེ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་དགེ་སློང་གང་ཞེ་ན། ཆོས་དང་ལྡན་པས་སློངས་མོ་སྤྱོད་པས་འཚོ་བར་བྱེད་པ་དེ་ནི་སློང་བའི་ཕྱིར་དགེ་སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན།
5.137a
གང་གིས་ཟག་པ་ཀུན་ནས་ཉོན་མོངས་པར་བྱེད་པ། ཡང་སྲིད་པར་བྱེད་པ། རིམས་ནད་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང ། རྒ་བ་དང ། འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང ། ཡོངས་སུ་ཤེས་པ་དང ། རྩ་བ་ནས་བཅད་པ་དང ། ཤིང་ཏ་ལའི་མགོ་བཞིན་དུ་གཞི་མི་སྣང་བ་དང ། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང་གཞིའི་ལས་མི་གཡོ་བ་བཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་ནི་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །མི་འམ་ཞེས་བྱ་བ་ནི་གང་གིས་མའི་ལྟོར་དབང་པོ་དྲུག་པོ་འདི་ལྟ་སྟེ། མིག་གི་དབང་པོ་དང ། རྣ་བའི་དབང་པོ་དང ། སྣའི་དབང་པོ་དང ། ལྕེའི་དབང་པོ་དང ། ལུས་ཀྱི་དབང་པོ་དང ། ཡིད་ཀྱི་དབང་པོ་ཐོབ་པར་གྱུར་པའོ། །མིར་ཆགས་པ་ལ་ཞེས་བྱ་བ་ནི་གང་གིས་མའི་ལྟོར་དབང་པོ་གསུམ་པོ་འདི་ལྟ་སྟེ། ལུས་ཀྱི་དབང་པོ་དང ། ཚོར་བའི་དབང་པོ་དང ། ཡིད་ཀྱི་དབང་པོ་ཐོབ་པར་གྱུར་པ་ལའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་པ་ནས་སོ། །རང་གི་ལག་དར་ཏེ་ཞེས་བྱ་བ་ནི་ལག་པས་ལག་པའོ། །སྲོག་བཅད་དམ་ཞེས་བྱ་བ་ནི་དེའི་སྲོག་བཅད་པར་གྱུར་ནའོ། །དེ་ལ་མཚོན་བྱིན་ནམ་ཞེས་བྱ་བ་ནི་རལ་གྲི་འམ། སྤུ་གྲི་འམ། ཆུ་གྲིའོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི་སྐྱེས་པ་འམ། བུད་མེད་དམ། མ་ནིང་ངོ ། །དེ་འཆིར་བཅུག་གམ་ཞེས་བྱ་བ་ནི་འཆིར་གཞུག་པ་ནི་རྣམ་པ་གསུམ་སྟེ། ཚུལ་ཁྲིམས་འཆལ་བ་དང ། ཚུལ་ཁྲིམས་དང་ལྡན་པ་དང ། ནད་པའོ། །ཚུལ་ཁྲིམས་འཆལ་བ་ལ་ཇི་ལྟར་ཞེ་ན། འདི་ལྟར་དགེ་སློང་ཚུལ་ཁྲིམས་འཆལ་བ་ལ་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གིས་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན་དེ་འདི་སྙམ་དུ་སེམས་ཏེ། ཇི་སྲིད་དུ་ཚེ་དང་ལྡན་པ་འདི་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་དེའི་དྲུང་དུ་སོང་སྟེ
5.137b
འདི་སྐད་ཅེས་ཚེ་དང་ལྡན་པ་ནི་ཚུལ་ཁྲིམས་འཆལ་བ། སྡིག་པའི་ཆོས་ཅན། ལུས་ཀྱིས་ཉེས་པར་སྤྱད་པ་དང་ལྡན་པ། ངག་དང་ཡིད་ཀྱིས་ཉེས་པར་སྤྱད་པ་དང་ལྡན་པ་ཡིན་པས་ཚེ་དང་ལྡན་པ་ཇི་སྲིད་ཡུན་རིང་དུ་འཚོ་བར་འགྱུར་བ་དེ་སྲིད་དུ་བསོད་ནམས་མ་ཡིན་པ་མང་དུ་འཕེལ་བར་འགྱུར་ཞིང ། བསོད་ནམས་མ་ཡིན་པ་མང་དུ་འཕེལ་ན་ཡུན་རིང་དུ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ་ཞེས་སྨྲས་པ་ན། ཚུལ་ཁྲིམས་འཆལ་བ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོ་ཇི་ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག་ཁྱོད་ཀྱིས་བདག་ཉིད་ཐོང་ཤིག་།བདག་ཉིད་སོད་ཅིག་།བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་སྨྲས་ན། གལ་ཏེ་ཚུལ་ཁྲིམས་འཆལ་བ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཇུག་ན་དགེ་སློང་དེ་ཕམ་པར་འགྱུར་རོ། །གལ་ཏེ་ཚུལ་ཁྲིམས་འཆལ་བ་དེ་འདི་སྙམ་དུ་དེ་ལྟར་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཇུད་དོ་ཞེས་ཟེར་ཞིང ། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང ། དེ་ཚུལ་ཁྲིམས་འཆལ་བ་དེའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ཤེས་པར་གྱིས་ཤིག་།འདི་ལྟ་སྟེ། བྱིས་པ། བླུན་པ། མི་གསལ་བ། མི་མཁས་པ་བདག་གིས་ཏེ་པོར་གྱ་ཙོམ་དང ། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པས་དགེ་བའི་བཤེས་གཉེན་འགའ་ཞིག་མགུ་བར་བྱས་ན། དེས་ལུས་ཀྱི་ཀུན་ཏུ་སྤྱོད་པ་ཡོངས་སུ་མ་དག་པ་ཉིད་འདི་ལས་བསླང་སྟེ། ལུས་ཀྱི་ཀུན་ཏུ་སྤྱོད་པ་ཡོངས་སུ་དག་པ་ཉིད་ལ་འཇོག་པ་དང ། ངག་དང་ཡིད་ཀྱི་ཀུན་ཏུ་སྤྱོད་པ་ཡོངས་སུ་མ་དག་པ་ཉིད་འདི་ལས་བསླང་སྟེ་ངག་དང ། ཡིད་ཀྱི་ཀུན་ཏུ་སྤྱོད་པ་ཡོངས་སུ་དག་པ་ཉིད་ལ་འཇོག་པར་གྱུར་པ། དེ་ལྟ་ན་ཚེ་དང་ལྡན་པ་ལུས་ཀྱི་ཀུན་དུ་སྤྱོད་པ
5.138a
ཡོངས་སུ་དག་པ་དང ། ངག་དང་ཡིད་ཀྱིས་ཀུན་ཏུ་སྤྱོད་པ་ཡོངས་སུ་དག་པ་ཡིན་པས་ལུས་ཞིག་ན་ཡང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སྨྲས་པ་ན། གལ་ཏེ་ཚུལ་ཁྲིམས་འཆལ་བ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དགེ་སློང་དེས་འདི་སྐད་ཅེས་ཚེ་དང་ལྡན་པ་བདག་ཉིད་མ་གཏོང་ཤིག་།བདག་ཉིད་སྲོག་དང་བྲལ་བར་བྱེད་དུ་མ་འཛུད་ཅིག་ཅེས་སྨྲས་ནས། གལ་ཏེ་ཚུལ་ཁྲིམས་འཆལ་བ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ཀྱང་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ཚུལ་ཁྲིམས་འཆལ་བ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ ། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཛུད་དོ་ཞེས་ཟེར་ཞིང ། གལ་ཏེ་དེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཛུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། རེ་ཤིག་ཚུལ་ཁྲིམས་འཆལ་བ་ལ་ནི་དེ་ལྟར་རོ། །ཚུལ་ཁྲིམས་དང་ལྡན་པ་ལ་ཇི་ལྟར་ཞེ་ན། འདི་ལྟར་དགེ་སློང་ཚུལ་ཁྲིམས་དང་ལྡན་པ་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སློང་གི་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན་དེ་འདི་སྙམ་དུ་སེམས་ཏེ། ཇི་སྲིད་དུ་ཚེ་དང་ལྡན་པ་འདི་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས་བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་དེའི་དྲུང་དུ་སོང་སྟེ་འདི་སྐད་ཅེས་ཚེ་དང་ལྡན་པ་ནི་ཚུལ་ཁྲིམས་དང་ལྡན་པ། དགེ་བའི་ཆོས་ཅན་ལྷུག་པར་གཏོང་ལ་ལག་རྐྱོང་བ། རྣམ་པར་གཏོང་བ་ལ་དགའ་བ། མཆོད་སྦྱིན་རྒྱུན་དུ་བྱེད་པ། གཏོང་བ་ཕུན་སུམ་ཚོགས་པ། སྦྱིན་པ་ལ་འགེད་པར་དགའ་བ་ཡིན་པས་ཚེ་དང་ལྡན་པ་ཀུན་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ།
5.138b
ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སྨྲས་པ་ན། ཚུལ་ཁྲིམས་དང་ལྡན་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག་།ཁྱོད་ཀྱིས་བདག་ཉིད་ཐོང་ཤིག་།བདག་ཉིད་སོད་ཅིག་།བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་སྨྲས་ནས། གལ་ཏེ་ཚུལ་ཁྲིམས་དང་ལྡན་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ་བདག་ཉིད་སྲོག་དང་བྲལ་བར་བྱེད་དུ་འཛུད་ན་དགེ་སློང་དེ་ཕམ་པར་འགྱུར་རོ། །གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ ། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཛུད་དོ་ཞེས་ཟེར་ཞིང ། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཛུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ཚུལ་ཁྲིམས་དང་ལྡན་པ་དེའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཤེས་པར་གྱིས་ཤིག་།འདི་ལྟ་སྟེ་བྱིས་པ། བླུན་པ། མི་གསལ་བ། མི་མཁས་པ་དག་གིས་ཏེ་པོར་གྱ་ཙོམ་དང ། བྱུང་རྒྱལ་གྱིས་སོ་སོར་མ་རྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པ་ནི་ཚུལ་ཁྲིམས་དང་ལྡན་པ་དགེ་བའི་ཆོས་ཅན། ལྷུག་པར་གཏོང་བ། ལག་སྐྱོང་བ་རྣམ་པར་གཏོང་བ་ལ་དགའ་བ། མཆོད་སྦྱིན་རྒྱུན་དུ་བྱེད་པ། གཏོང་བ་ཕུན་སུམ་ཚོགས་པ། སྦྱིན་པ་ལ་འགེད་པར་དགའ་བ་ཡིན་པས་ཚེ་དང་ལྡན་པ་ཇི་སྲིད་དུ་ཡུན་རིང་དུ་འཚོ་བར་འགྱུར་བ་དེ་སྲིད་དུ་བསོད་ནམས་མང་དུ་འཕེལ་བར་འགྱུར་ཞིང་བསོད་ནམས་མང་དུ་འཕེལ་ན་ཡུན་རིང་དུ་མཐོ་རིས་དག་ཏུ་དགའ་བར་འགྱུར་རོ་ཞེས་སྨྲས་པ་ན། གལ་ཏེ་ཚུལ་ཁྲིམས་དང་ལྡན་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དགེ་སློང་དེས་འདི་སྐད་ཅེས་ཚེ་དང་ལྡན་པ་ཁྱོད་བདག་ཉིད་མ་གཏོང་ཤིག་བདག་མ་གསོད་ཅིག་བདག་ཉིད་སྲོག་དང་བྲལ་བར་བྱེད་དུ་མ་འཇུད་ཅིག་ཅེས་སྨྲས་ནས། གལ་ཏེ་ཚུལ་ཁྲིམས་དང
5.139a
ལྡན་པ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ཀྱང་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱིས་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ ། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཛུད་དོ་ཞེས་ཟེར་ཞིང ། གལ་ཏེ་དེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཛུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ཚུལ་ཁྲིམས་དང་ལྡན་པ་ལ་ནི་དེ་ལྟར་རོ། །ནད་པ་ལ་ཇི་ལྟར་ཞེ་ན། འདི་ལྟར་དགེ་སློང་ནད་པ་ལ་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གིས་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན་དེ་འདི་སྙམ་དུ་སེམས་ཏེ། ཚེ་དང་ལྡན་པ་ན་བ། སྡུག་བསྔལ་བ་ནད་ཚབས་ཆེ་བ་འདི་ཇི་སྲིད་དུ་གསོན་པ་དེ་སྲིད་དུ་བདག་ལ་མི་སྟེར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་དེའི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་ནི་ན་བ་སྡུག་བསྔལ་བ་ནད་ཚབས་ཆེ་བ་ཡིན་པས་ཚེ་དང་ལྡན་པ་ཇི་སྲིད་དུ་ཡུན་རིང་དུ་འཚོ་བ་དེ་སྲིད་དུ་ཚོར་བ་སྡུག་བསྔལ་བ། མི་བཟད་པ། རྩུབ་པ་ཚ་བ། ཡིད་དུ་མི་འོང་བ་དག་ཉམས་སུ་མྱོང་བར་འགྱུར་རོ། །ཞེས་སྨྲས་པ་ན་ནད་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག་།ཁྱོད་ཀྱིས་བདག་ཉིད་ཐོང་ཤིག་།བདག་ཉིད་སོད་ཅིག་།བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་སྨྲས་ནས། གལ་ཏེ་ནད་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཛུད་ན་དགེ་སློང་དེ་ཕམ་པར་འགྱུར་རོ། །གལ་ཏེ་ནད་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ ། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཛུད་དོ་ཞེས་ཟེར་ཞིང ། གལ་ཏེ་བདག་ཉིད་གཏོང
5.139b
བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཛུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ནད་པ་དེའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཤེས་པར་གྱིས་ཤིག་།འདི་ལྟ་སྟེ་བྱིས་པ། བླུན་པ། མི་གསལ་བ། མི་མཁས་པ་བདག་གིས་ཏེ་པོར་གྱ་ཙོམ་དང ། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པ་དགེ་བའི་བཤེས་གཉེན་འགའ་ཞིག་མགུ་བར་བྱས་ཏེ་དེས་ཁྱོད་ལ་སྨན་འཐུན་པ་དང ། འཕྲོད་པ་དག་དང ། ཟས་སོ་སོར་བསྟེན་པར་བྱ་བ་དག་དང ། ནད་གཡོག་ཚུལ་དང་འཐུན་པ་དག་གིས་བསྙེན་བཀུར་བྱེད་པར་འགྱུར་ཏེ། དེ་ལྟར་ན་ཚེ་དང་ལྡན་པ་ཡུན་མི་རིང་བ་ཁོ་ནར་བདེ་བ་དང ། ནད་མེད་པ་དང ། སྟོབས་དང་ལྡན་པ་དང ། གང་དུ་དགའ་བར་འགྲོ་བར་འགྱུར་རོ་ཞེས་སྨྲས་པ་ན། གལ་ཏེ་ནད་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དགེ་སློང་དེས་འདི་སྐད་ཅེས་ཚེ་དང་ལྡན་པ་ཁྱོད་བདག་ཉིད་མ་གཏོང་ཤིག་།བདག་ཉིད་མ་གསོད་ཅིག་།བདག་ཉིད་སྲོག་དང་བྲལ་བར་བྱེད་དུ་མ་འཇུད་ཅིག་ཅེས་སྨྲས་ནས། གལ་ཏེ་ནད་པ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ཀྱང ། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ནད་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ ། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཇུད་དོ་ཞེས་ཟེར་ཞིང ། གལ་ཏེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཇུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ནད་པ་ལ་ནི་དེ་ལྟར་རོ། །དེས་ན་འཆིར་བཅུག་གམ་ཞེས་གསུངས་སོ། །དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ་ཞེས་བྱ་བ་ནི་འཆི་བར་མངོན་པར་དགའ་བའི་མདུན་དུ་འཆི་བའི་བསྔགས་པ་བརྗོད་པའོ། །དེ་ལ་འདི་སྐད་ཅེས་ཀྱེ་མི་ཁྱོད་ཅེས་བྱ་བ་ནི་བོད་པའི་ཚིག་བླ་དགས་ཡིན་ནོ། །འཚོ་བའི་སྡིག་པ་མི
5.140a
གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་བྱ་བ་དེ་དག་ནི་སྨད་པའི་ཚིག་ཡིན་ནོ་ཟེར་ཞིང་ཞེས་བྱ་བ་ནི་བརྗོད་པར་བྱེད་ཅིང་ངོ ། །སེམས་ཀྱི་འདོད་པ་དང ། སེམས་ཀྱི་ཀུན་དུ་རྟོག་པ་དག་གིས་ཤེས་བྱ་བ་ནི་སེམས་ཀྱི་མངོན་པར་འདོད་པ་དང ། སེམས་ཀྱི་རྣམ་པར་རྟོག་པ་དག་གིས་སོ། །རྣམ་གྲངས་དུ་མས་ཤེས་བྱ་བ་ནི་རྣམ་པ་མང་པོས་སོ། །དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ་ཞེས་སྨོས་པ་ནི་འཆི་བར་མངོན་པར་དགའ་བའི་མདུན་དུ་རྣམས་གྲངས་དུ་མས་འཆི་བའི་སྔགས་པ་བརྗོད་པ་བཟློག་པའི་ཕྱིར་རོ། །དེ་ཡང་རྩོམ་པ་དེས་དུས་བྱས་ན་ཤེས་བྱ་བ་ནི་དེ་ཉིད་ཀྱིས་ཡིན་གྱི་གཞན་གྱིས་མ་ཡིན་ནའོ། །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང ། བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་ཕྱིན་པར་བྱེད་པ་ཉིད་གང་ཡིན་པ་དང ། གང་ཟག་དེའི་ཁས་ལེན་པ་དང ། མངོན་པར་ཁས་ལེན་པ་དང ། ཕྱིར་མི་ཟློག་པ་དང ། ཕྱིར་མི་ཟློག་པ་ཉིད་དང ། ངག་དང་ཚིག་དང ། ཐ་སྙད་དང ། སྐད་དང ། རྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པའོ། །དེ་ཞེས་བྱ་བ་ནི་ཉེ་བར་བསྟན་པ་དང ། ཀུན་ཏུ་བསྟན་པའི་ཚིག་བླ་དགས་དེའོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི་དེ་མཐར་གྱུར་པ་དང ། ལྟུང་བ་དང ། དམན་པ་དང ། མཇུག་ན་འདུག་པ་དང ། ཐ་ཆད་དང ། ཡིད་དང་མི་མཐུན་པ་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། །དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ།
5.140b
འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་དེ་བཞིན་དུ་དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སྦྱོང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་བས་དེས་ན་ཕམ་པར་གྱུར་པ་ཡིན་གྱིས་ཤེས་གསུངས་སོ། །གནས་པར་མི་བྱའོ་ཞེས་བྱ་བ་ནི། དགེ་སློང་རྣམས་ཀྱིས་དེ་དང་གསོ་སྦྱོང་དང ། དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ལ་གནས་པར་མི་བྱའོ། །གང་ཟག་བཅུ་གཉིས་པོ་དག་ཏུ་བསྐོ་བར་མི་བྱ་བ་སྟེ། དེས་ན་གནས་པར་མི་བྱའོ་ཞེས་གསུངས་སོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་པ། དེ་ལ་ལྟུང་བ་ཇི་ལྟར་འགྱུར་ཞེ་ན། ་་་་་་།སྡོམ་ལ། བདག་ཉིད་ཀྱིས་ནི་ཟིན་པ་དང ། །ཕྱི་རོལ་ཏུ་ནི་འཕངས་པ་དང ། །གཉི་ག་དང་ནི་ལྡན་པ་ཡི། །སྡེ་ཚན་ཡང་དག་བསྡུས་པ་ཡིན། །ཇི་ལྟར་བདག་ཉིད་ཀྱིས་ཟིན་པས་ཞེ་ན། དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་བསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཅིག་གིས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་དེ་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །སོར་མོ་གཅིག་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཉིས་ཀྱིས་སམ། གསུམ་གྱིས་སམ། བཞིས་སམ། ལྔས་སམ། ཁུ་ཚུར་གྱིས་སམ། གྲུ་མོས་སམ། ཕྲག་པས་སམ། མགོ་བོས་སམ། གློས་སམ། རྐེད་པས་སམ། བརླས་སམ། པུས་མོས་སམ། རྗེ་ངར་གྱིས་སམ། ལོང་བུས་སམ། རྐང་མཐིལ
5.141a
གྱིས་སམ། ཐ་ན་རྐང་པའི་མཐེ་བོང་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་བདག་ཉིད་ཀྱིས་ཟིན་པས་སོ། །ཇི་ལྟར་ཕྱིར་རོལ་དུ་འཕངས་པས་ཞེ་ན། དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་བསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་མདས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ། དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །མདས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ལྕགས་མདས་སམ། མདའ་ཕྱེད་ལྕགས་ལས་བྱས་པས་སམ། སྟེའུ་ཁ་མས་སམ། མདེའུ་བེའུ་སོ་ལྟ་བུས་སམ། མདེའུ་ཟུར་བཞི་པས་སམ། མདེའུ་ཀ་ར་བི་རའི་ལོ་མ་ལྟ་བུས་སམ། མདེའུ་བྱིའུ་སྙིང་མས་སམ། འཁོར་ལོས་སམ། རྡོ་རྗེ་རྩེ་གཅིག་པས་སམ། མདའ་བོ་ཆེས་སམ། མཚོན་རྩེ་ཅིག་པས་སམ། ཐ་ན་རྒྱ་ཤུག་གི་འབྲས་བུས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་ཕྱི་རོལ་དུ་འཕངས་པས་སོ། །ཇི་ལྟར་གཉི་ག་དང་ལྡན་པས་ཤེ་ན། དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་རལ་གྲིས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར
5.141b
འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་དུས་བྱེད་པར་གྱུར་ཅིག་སྙམ་པས་ཤང་ལང་གིས་སམ། རལ་གྲི་སོ་གཅིག་པས་སམ། རལ་གྲི་སོ་གཉིས་པས་སམ། མདུང་གིས་སམ། མདུང་ཐུང་གིས་སམ། འཕང་མདུང་གིས་སམ། ཁྱོ་བ་ཁ་བྲག་གིས་སམ། ཚ་ལྕགས་ཀྱིས་སམ། ཐ་ན་རྩཝ་མདས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་གཉི་ག་དང་ལྡན་པས་སོ། ་་་་་་་་་་།སྡོམ་ལ། དུག་དང་ཕྱེ་མའི་སྦྱོར་བ་དང ། །ས་དང་ཤིང་ལ་འཆིང་བ་དང ། །མྱོས་པར་བྱེད་དང་བྲང་འདེབས་དང ། །འཁྲུལ་འཁོར་དང་ནི་རྔོན་སྤྱད་དོ། །དགེ་སློང་གིས་སྐྱེས་པ་དང ། བུད་མེད་དང་མ་ནིང་ལ་བསད་པའི་སེམས་ཀྱིས། འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་འདི་ལྟ་སྟེ། བཅའ་བར་རམ། བཟའ་བར་རམ། བལྡག་པར་རམ། བཞིབ་པར་རམ། བཏུང་བར་དུག་གི་སྦྱོར་བ་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་བསད་པའི་སེམས་ཀྱིས་རྩོམ་པ་འདིས་འདི་དུས་བྱེད་པར་འགྱུར་ཅིག་སྙམ་པས་འདི་ལྟ་སྟེ། དྲིལ་ཕྱིར་རམ། ཁྲུས་སུ་འམ། མཉེ་བར་རམ། ཕྲེང་བ་དང ། དྲི་དང ། བྱུག་པར་རམ། བདུག་སྤོས་སུ་དུག་གི་ཕྱེ་མའི་སྦྱོར་བ་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ
5.142a
སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །འཆིང་བ་ནི་གཉིས་ཏེ། ས་ལ་འཆིང་བ་དང ། ཤིང་ལ་འཆིང་བའོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་སའི་འཆིང་བར་འཇོག་པར་བྱེད་ཅིང་ལོང་བུ་མན་ཆད་འཇུད་པར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ལོང་བུ་མན་ཆད་ཇི་ལྟ་བ་དེ་བཞིན་དུ། འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་བྱིན་པ་མན་ཆད་དམ། བརླ་མན་ཆད་དམ། རྐེད་པ་མན་ཆད་དམ། བྲང་མན་ཆད་དམ། མགྲིན་པ་མན་ཆད་འཇུད་པར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་བརྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ
5.142b
དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པས་ཉམ་ཆུང་བའི་དཀྲིས་པས་དུས་བྱེད་པར་གྱུར་ཅིག་སྙམ་པས་ཤིང་ལ་འཆིང་བར་བྱེད། འཇོག་པར་བྱེད་ཅིང ། ཀ་བ་འམ། ཕུར་བ་བརྟན་པོ་ལ་འབྲེང་རློན་གྱིས་ལོང་བུ་མན་ཆད་འཆིང་བར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ལོང་བུ་མན་ཆད་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་བྱིན་པ་མན་ཆད་དམ། བརླ་མན་ཆད་དམ། རྐེད་པ་མན་ཆད་དམ། བྲང་མན་ཆད་དམ། མགྲིན་པ་མན་ཆད་འཆིང་བར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསོད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་པས་སམ། བཀྲེས་པ་དང །
5.143a
སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་ཆང་གིས་མྱོས་པར་བྱེད་དུ་འཇུད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཆང་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། རྒྱལ་པོ་འམ། བློན་པོ་འམ། ཆོམ་རྐུན་པ་དག་གིས་སམ། གཡོན་ཅན་དག་གིས་སམ། ཐོང་མི་པ་དག་གིས་སམ། དགྲ་བོ་དག་གིས་སམ། ཕས་ཀྱི་དགྲ་དག་གིས་དུས་བྱེད་པར་གྱུར་ཅིག་སྙམ་པས་བཅོས་པའི་ཆང་གིས་སམ། འབྲུའི་ཆང་དང ། བཅོས་པའི་ཆང་གིས་སམ། རྩ་བའི་བཏུང་བས་སམ། སྡོང་བུའི་བཏུང་བས་སམ། འདབ་མའི་བཏུང་བས་སམ། མེ་ཏོག་གི་བཏུང་བས་སམ། འབྲས་བུའི་བཏུང་བས་མྱོས་པར་བྱེད་དུ་འཇུད་དམ། གསང་སྔགས་དག་གམ། སྨན་དག་གམ། རིག་སྔགས་དག་གིས་སེམས་འཁྲུགས་པར་བྱེད་དམ། གཉིད་ལོག་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས། འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་བྲང་དུ་འདེབས་པ་སྦྱོར་བར་བྱེད་ཅིང ། སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་འོང་བར་འགྱུར་བ་དེའི་ལག་པ་འམ། རྐང་པ་འམ། གདོང་ངམ། ཡན་ལག་དང ། ཉིང་ལག་གང་ཡང་རུང་བ་གཅོད་པར་གྱུར་ཅིག་སྙམ་པ་འམ། ཐམས་ཅད་ཀྱི་ཐམས་ཅད་དུ་སྲོག་དང་བྲལ་བར་བྱེད་པར་གྱུར་ཅིག་སྙམ་པས་དེ་ལ་ཡང་རལ་གྲི་འམ། སྤུ་གྲི་འམ། ཆུ་གྲི་འདོགས་པར་བྱེད་ཅིང ། གལ་ཏེ་དེས་དེའི་ལག་པ་འམ།
5.143b
རྐང་པ་འམ། གདོང་ངམ། ཡན་ལག་དང་ཉིང་ལག་གང་ཡང་རུང་བ་གཅོད་པར་བྱེད་དམ། ཐམས་ཅད་ཀྱིས་ཐམས་ཅད་དུ་སྲོག་དང་བྲལ་བར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །འཁྲུལ་འཁོར་དང་རྔོན་སྤྱད་ལ་ཡང་དེ་བཞིན་དུ་བརྗོད་པར་བྱའོ། ་་་་་་་་་།སྡོམ་ལ། རོ་ལངས་དང་ནི་རོ་ལངས་ཕྱེད། །དཀུ་མཉེད་པ་དང་སྲོག་འགོག་དང ། །གཡང་ས་ཆུ་དང་མེ་དང་ནི། །མངགས་པ་དང་ནི་གྲང་དྲོ་འོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་ཟླ་བ་མར་གྱི་ངོའི་ཚེས་བཅུ་བཞི་ལ་དུར་ཁྲོད་དུ་སོང་སྟེ་ཤི་བའི་རོ་ཐ་ན་སྲོག་ཆགས་གྲོག་སྦུར་ཕྲ་མོས་ཀྱང་མ་སྨས་མ་ཉམས་པ་ཚོལ་བར་བྱེད་ཅིང་རྙེད་ནས་ས་ཀར་གྱིས་དྲིལ་ཕྱི་བྱེད་ཅིང ། ས་ཀར་གྱིས་དྲིལ་ཕྱི་བྱས་ནས་སྤོས་ཆུས་འཁྲུ་བར་བྱེད་ལ། སྤོས་ཆུས་བཀྲུས་ནས་རས་སར་པ་སྐོན་པར་བྱེད་ཅིང ། དེའི་རྐང་པ་གཉིས་ཀྱང་སྐུད་པར་བྱེད། གསང་སྔགས་ཀྱང་རྗོད་པར་བྱེད་པ་ན་དེ་ལངས་པར་འགྱུར་ཏེ་བྱ་སྨྱངས་བྱེད་པའི་ཚེ་དེས་དེ་འཁོར་ལོ་གཉིས་དང་ལྡན་པའི་ཤིང་རྟ་ལ་འཇོག་པར་བྱེད་ཅིང ། དེའི་མགུལ་དུ་དྲིལ་བུ་གཉིས་ཀྱང་འདོགས་པར་བྱེད། ལག་པར་རལ་གྲི་སོ་གཉིས་པ་ཡང་སྦྱིན་པར་བྱེད་པ་ན་དེ་ལངས་ཏེ་བླག་བླག་ཟེར་ཞིང་འདི་སྐད་ཅེས་ངས་གང་བཏང་བར་བྱ། ངས་གང་གསད་པར་བྱ། ངས་གང་སྲོག་དང་བྲལ་བར་བྱ་ཞེས་ཟེར་བའི་ཚེ་དགེ་སློང་དེས་རོ་ལངས་དེ་ལ་འདི་སྐད་ཅེས་ཁྱོད་ཀྱིས་སྐྱེས་པ་དང ། བུད་མེད་དང ། མ་ནིང་ཆེ་གེ་མོ་ཞིག་ཤེས་སམ་ཞེས་སྨྲས་པ་ན། ཤེས་སོ་ཞེས་ཟེར་བའི་ཚེ་དེ་ཐོང་ཤིག་།དེ་སོད་ཅིག་།དེ་སྲོག་དང་བྲལ་བར་གྱིས་ཤིག་ཅེས་སྨྲས་ནས། གལ་ཏེ་རོ་ལངས་དེས་དེ་གཏོང་བར་བྱེད་དམ། གསོད་པར་བྱེད་དམ། སྲོག་དང་བྲལ་བར་བྱེད་ན་དགེ་སློང་ཕམ་པར་འགྱུར་རོ། །གལ་ཏེ་དེ་ན་སྲུང་བར་བྱེད་པ་འདི་ལྟ་བུ་འདི་ལྟ་སྟེ། སྒོར་ནགས་ཀྱི་ཕྲེང་བ་བཏགས་པ་འམ། བུམ་པ་གང་བ
5.144a
བཞག་པ་འམ། བ་དང་བེའུ་འདྲ་བ་བཏགས་པ་འམ། ལུག་བཏགས་པ་འམ། མཆིག་མཆིག་གུ་དང་བཅས་པ་བཞག་པ་འམ། སྒོར་འཁོར་གཏན་བསྙལ་བ་འམ། མེ་ཚུགས་སྦར་བ་འམ། རྒྱལ་བ་བཞུགས་པ་འམ། རྒྱལ་བས་བཀའ་སྩལ་པ་འམ། འཁོར་ལོས་སྒྱུར་བ་འམ། འཁོར་ལོས་སྒྱུར་བའི་མའི་མངལ་དུ་འཁོར་ལོས་སྒྱུར་བ་ཞུགས་པ་འམ། བྱང་ཆུབ་སེམས་དཔའ་འམ། བྱང་ཆུབ་སེམས་དཔའི་མའི་མངལ་དུ་བྱང་ཆུབ་སེམས་དཔའ་ཞུགས་པ་འདུག་པ་འམ། སོ་སོར་ཐར་པའི་མདོ་མ་བཏོན་བར་འདོན་པར་བྱེད་པ་འམ། བཏོན་པ་རྒྱ་ཆེར་དབྱངས་ཀྱིས་ཁ་ཏོན་བྱེད་པ་འམ། མདོ་སྡེའི་སྡེ་ཚན་བཞི་པོ་གང་རུང་བ་མ་བཏོན་པ་འདོན་པར་བྱེད་པ་འམ། བཏོན་པ་རྒྱ་ཆེར་དབྱངས་ཀྱིས་ཁ་ཏོན་བྱེད་པ་འམ། མདོ་ཆེན་པོ་ཆེ་བ་འདི་ལྟ་སྟེ། ཆུང་ངུ་སྟོང་པ་ཉིད་དང ། ཆེན་པོ་སྟོང་པ་ཉིད་དང ། ལྔ་གསུམ་པ་དང ། སྒྱུ་མའི་དྲ་བ་དང ། གཟུགས་ཅན་སྙིང་པོས་བསུ་བ་དང ། རྒྱལ་མཚན་དམ་པ་དང ། ཀུན་ཏུ་རྒྱུ་བ་དང་ཀུན་ཏུ་མི་རྒྱུ་བ་དང་འཐུན་པའི་མདོ་དང ། འདུས་པ་ཆེན་པོའི་མདོ་དེ་དག་མ་བཏོན་པ་འདོན་པར་བྱེད་པ་དང ། བཏོན་པ་དག་རྒྱ་ཆེར་དབྱངས་ཀྱིས་ཁ་ཏོན་བྱེད་པ་བཞག་པར་གྱུར་ན། གཏང་ཉེས་པ་ཡིན་པས་རོ་ལངས་ཀྱིས་དགེ་སློང་བདག་ཉིད་གསོད་པར་སེམས་པར་འགྱུར་བས། གལ་ཏེ་རོ་ལངས་ཀྱིས་དགེ་སློང་གསོད་པར་བྱེད་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་རོ་ལངས་གསོད་པར་བྱེད་ན་དགེ་སློང་ལ་ཉེས་པ་སྦོམ་པོ་གཉིས་སུ་འགྱུར་ཏེ། གཅིག་ནི་རོ་ལངས་བསད་པ་ལས་སོ། །གཉིས་པ་ནི་སྦྱོར་བ་སྔ་མ་དེ་ཉིད་ལས་སོ། །རོ་ལངས་ལ་ཇི་ལྟ་བ་བཞིན་དུ་རོ་ལངས་ཕྱེད་ལ་ཡང་དེ་བཞིན་ཏེ། རོ་ལངས་དང ། རོ་ལངས་ཕྱེད་ལ་བྱེ་བྲག་ནི་འདི་ཡོད་དེ། འཁོར་ལོ་གཅིག་དང་ལྡན་པའི་ཤིང་རྟ་ལ་འཇོག་པ་དང ། མགུལ་དུ་དྲིལ་བུ་གཅིག་འདོགས་པ་དང ། ལག་པར་རལ་གྲི་སོ་གཅིག་པ་སྦྱིན་པ་ནི་རོ་ལངས་ཕྱེད་ཅེས་བྱའོ། །ལྟུང་བ་རྣམ་པར་གཞག་པ་ནི་ཐམས་ཅད་སྔ་མ་བཞིན་དུ་བརྗོད་པར་བྱའོ། །དགེ་སློང་གིས
5.144b
བུད་མེད་གསད་པའི་སེམས་ཀྱིས་བུད་མེད་གསད་པར་བྱའི། མངལ་ན་གནས་པ་ནི་མི་བྱའོ་སྙམ་པས་སྦྲུམ་མའི་དཀུ་མཉེད་པར་བྱེད་ཅིང ། གལ་ཏེ་བུད་མེད་ཤི་བར་གྱུར་ལ། མངལ་ན་གནས་པ་མ་ཡིན་ན་དགེ་སློང་ཕམ་པར་འགྱུར་རོ། །གལ་ཏེ་མངལ་ན་གནས་པ་ཤི་བར་གྱུར་ལ་བུད་མེད་མ་ཤི་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཉི་ག་ཤི་བར་གྱུར་ན་དགེ་སློང་ཕམ་པར་འགྱུར་རོ། །གཉི་ག་ཤི་བར་མ་གྱུར་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་མངལ་ན་གནས་པ་གསད་པའི་སེམས་ཀྱིས་མངལ་ན་གནས་པ་གསད་པར་བྱའི་བུད་མེད་ནི་མི་བྱའོ་སྙམ་པས་བུད་མེད་ཀྱི་དཀུ་མཉེད་པར་བྱེད་ཅིང ། གལ་ཏེ་མངལ་ན་གནས་པ་ཤི་བར་གྱུར་ལ། བུད་མེད་མ་ཤི་ན་དགེ་སློང་ཕམ་པར་འགྱུར་རོ། །གལ་ཏེ་བུད་མེད་ཤི་བར་གྱུར་ལ་མངལ་ན་གནས་པ་མ་ཤི་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཉི་ག་ཤི་བར་གྱུར་ན་དགེ་སློང་ཕམ་པར་འགྱུར་རོ། །གཉི་ག་ཤི་བར་མ་གྱུར་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། དཀྱིལ་འཁོར་ཉུག་པར་བྱེད། མེ་སྦར་བར་བྱེད། ཡམ་སྲེག་ཤིང་འཛུད་པར་བྱེད། གསང་སྔགས་རྗོད་པར་བྱེད་ཅིང་ཡམ་སྲེག་ཤིང་འདི་དག་ཀྱང་ཚིག་པར་གྱུར་ཅིག་།སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་ཡམ་སྲེག་ཤིང་དེ་དག་འཚིག་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགགས་པར་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་ཡམ་སྲེག་ཤིང་དེ་དག་ཚིག་པར་གྱུར་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན། དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད།
5.145a
འགྲོ་བར་བྱེད། ཏིལ་བྲེའུ་ཆུང་གང་ངམ། ཡུངས་ཀར་བྲེའུ་ཆུང་གང་གཏུན་དུ་བླུགས་ཏེ་གཏུན་བུའི་རྩེ་མོས་རྡུང་བར་བྱེད། གསང་སྔགས་རྗོད་པར་བྱེད་ཅིང ། འབྲུ་འདི་དག་ཀྱང་འདྲེས་པར་གྱུར་པ་ན་སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་འབྲུ་དེ་དག་འདྲེ་བ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགགས་པར་མ་གྱུར་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་འབྲུ་དེ་དག་འདྲེས་པར་གྱུར་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། འོ་མ་བྲེའུ་ཆུང་གང་ངམ། ཞོ་བྲེའུ་ཆུང་གང་སྣོད་དུ་བླུགས་ཏེ་སོར་མོས་དཀྲུག་པར་བྱེད། གསང་སྔགས་རྗོད་པར་བྱེད་ཅིང ། འདི་ཡང་ཁྲག་ཏུ་གྱུར་ཅིག་།སྐྱེས་པ་འམ་བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས་གལ་ཏེ་དེ་ཁྲག་ཏུ་གྱུར་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགགས་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་ཁྲག་ཏུ་གྱུར་པ་ན། སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་ཚོན་སྣ་ལྔའི་སྐུད་པས་སྣམ་སྦྱར་ལ་འཚེམ་པར་བྱེད། གསང་སྔགས་རྗོད་པར་བྱེད་ཅིང ། སྣམ་སྦྱར་འདི་ཡང་བཙེམས་པར་གྱུར་ཅིག་།སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས་གལ་ཏེ་སྣམ་སྦྱར་དེ་འཚེམ་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགག་པར་མ་གྱུར་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་སྣམ་སྦྱར་དེ་བཙེམས་པར་གྱུར་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང
5.145b
ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་ས་ལ་རི་མོ་བདུན་འདྲེན་པར་བྱེད། གསང་སྔགས་རྗོད་པར་བྱེད་ཅིང ། རི་མོ་འདི་དག་ཀྱང་བྱིད་པར་གྱུར་ཅིག་།སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་རི་མོ་དེ་དག་འབྱིད་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགག་པར་མ་གྱུར་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་རི་མོ་དེ་དག་བྱིད་པར་གྱུར་པ་ན། སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་གཡང་ས་ནས་གཡང་དུ་གཏོང་བར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཡང་ས་ནས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཁང་བཟངས་ནས་སམ། ར་བ་ལས་སམ། གླང་པོ་ཆེའི་གཤུལ་ནས་སམ། རྟའི་རྒྱབ་ནས་སམ། ཁྱོགས་སྤྱིལ་ལས་སམ། ཁྲི་ལས་སམ། ཁྲིའུ་ལས་སམ། ཕྲག་པ་ནས་སམ། གློ་ནས་སམ། རྐེད་པ་ནས་སམ། བརླ་ནས་སམ། བྱིན་པ་ནས་སམ། ཐ་ན་ལོང་བུ་ནས་ས་ལ་ལྟུང་བར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཆུར་འཇུད་པར་བྱེད
5.146a
ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཆུར་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཤར་ཕྱོགས་ཀྱི་རྒྱ་མཚོ་ཆེན་པོར་རམ། ལྷོ་ཕྱོགས་ཀྱི་རྒྱ་མཚོ་ཆེན་པོར་རམ། ནུབ་ཕྱོགས་ཀྱི་རྒྱ་མཚོ་ཆེན་པོར་རམ། བྱང་ཕྱོགས་ཀྱི་རྒྱ་མཚོ་ཆེན་པོར་རམ། མཚོར་རམ། ལྟེང་ཀར་རམ། ལྗན་ལྗིན་དུ་འཇུད་དམ། ཐ་ན་དེའི་ཁར་སྙིམ་པའི་ཆུ་ལྡུགས་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་མེར་འཇུད་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །མེར་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་གྲོང་ཁྱེར་སྲེག་པ་འམ། གྲོང་སྲེག་པ་འམ། ཡུལ་སྲེག་པ་འམ། རྒྱལ་ཐབས་འམ། ད་ནུར་དུ་འཇུད་དམ། ཐ་ན་དེའི་ཁར་མགལ་པ་ཙམ་འཇུད་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ
5.146b
པ་འདིས་འདི་དུས་བྱེད་པར་གྱུར་ཅིག་སྙམ་པས། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། ཉི་མ་དང་རླུང་དག་གིས་ཡོངས་སུ་སྐམ་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་པས་སམ། བཀྲེས་པ་དང ། སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་འཇིགས་པ་དང་བཅས་པའི་ཕྱོགས་སུ་མངག་པ་ཉིད་དུ་གཏོང་བར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་དུས་གྲང་བ། མཆོག་ཏུ་གྲང་བ་གང་དག་ཡིན་པ་དེ་དག་གི་ཚེས་བརྒྱད་ཀྱི་བར་གང་དག་ཏུ་འོད་མ་འགས་པའི་རླུང་དག་ལྡང་བ་དེ་དག་ཏུ་ཉིན་མོ་སྟེང་གཡོགས་པར་འཛིན་དུ་བཅུག་ནས་མཚན་མོ་བླ་གབ་མེད་པར་འཛིན་ཅིང་དེའི་སྟེང་དུ་སོག་མའི་ཆག་ཆག་འདེབས་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང ། བུད་མེད་དང ། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་དུས་ཚ་བ། མཆོག་ཏུ་ཚ་བ་གང་དག་ཡིན་པ། དེ་དག་གིས་སོ་ཀའི་གུང་གིས་ཚ་བ་ལ་བབ་པ་གང་དག་ཏུ་སྲོག་ཆགས་ཕྲ་མོ་སྐྱེ་བ་དེ་དག་ཏུ་ཉིན་མོ་བླ་གབ་མེད་པར་འཛིན་ཏུ་བཅུག་ནས་མཚན་མོ་སྟེང་གཡོགས་པར་འཛིན་ཅིང ། དེའི་ལུས་ལ་གསེག་གམ། རེ་ལྡེས་ཀྱང་འཁྲི་བར་བྱེད། དུ་བ་རྔུབ་པས་ཀྱང་འདུག་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ
5.147a
མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ།། ་་་་་་་་་་་།།སྡོམ་ལ། བསྲོ་གང་དང་ནི་མེ་ཁང་དང ། །འཆར་ཀ་དང་ནི་གཉིས་པོ་དང ། །སྐྱོང་མ་དང་ནི་བཅུ་བདུན་སྡེ། །རི་བྲགས་པ་དང་རྒན་ཞུགས་སོ། །སངས་རྒྱས་བཅོམ་ལྡན་འདས་འབྲོག་གནས་ན་འབྲོག་གི་གནས་མཆོག་ན་བཞུགས་སོ། །དེ་ན་དགེ་སློང་བསོད་སྙོམས་པ་ཞིག་ཁྱིམ་བདག་ཅིག་གི་སྡུམ་པར་དུས་དང་འཐུན་པའི་དུས་སུ་འགྲོ་ཞིང་ཆོས་ཀྱང་སྟོན་པར་བྱེད་དོ། །ཇི་ཙམ་ན་དགེ་སློང་དེས་ཁྱིམ་བདག་དེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་རབ་ཏུ་བཞག་གོ། །དེ་ནས་ཡང་དགེ་སློང་དེ་ཉེ་བར་སོང་ནས་ཁྱིམ་བདག་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གིས་བསྔགས་པ་རྒྱ་ཆེར་བརྗོད་པ་དང ། ཁྱིམ་བདག་དེས་སྨྲས་པ། འཕགས་པ་བདག་གིས་ཀྱང་དགེ་འདུན་ལ་རྫས་ལས་བྱུང་བའི་བསོད་ནམས་བྱ་བའི་གཞི་འགའ་ཞིག་བགྱིད་དུ་སྩལ་ཏོ། །བསོད་སྙོམས་པས་སྨྲས་པ། ཁྱིམ་བདག་ལེགས་ཀྱིས་བྱེད་དུ་ཆུག་ཤིག་།འཕགས་པ་ཅི་ཞིག་བགྱིད་དུ་སྩལ། ཁྱིམ་བདག་དགེ་འདུན་ལ་བསྲོ་ཁང་གི་ཁང་པ་མེད་ཀྱིས་དེ་བྱེད་དུ་ཆུག་ཤིག་།འཕགས་པ་བདག་ལ་ཀཱར་ཥ་པཱ་ཎ་དག་ནི་མཆིས་མོད་ཀྱི་འོན་ཀྱང་བསོད་ནམས་ཀྱིས་གྲོགས་བགྱིད་པ་མ་མཆིས་སོ། །ཁྱིམ་བདག་ཁོ་བོ་ཁྱེད་ཀྱི་བསོད་ནམས་ཀྱི་གྲོགས་ཡིན་ནོ། །འཕགས་པ་ལེགས་སོ། །ཁྱིམ་བདག་དེས་བསོད་སྙོམས་པ་དེ་ལ་ཀཱར་ཥ་པཱ་ཎ་དག་ཕུལ་ནས་བསོད་སྙོམས་པ་དེ་དགེ་འདུན་གྱི་བསྲོ་ཁང་གི་ཁང་པ་བྱེད་དུ་འཛུད་པ་ལ་ཞུགས་སོ། །ཇི་ཙམ་དུས་གཞན་ཞིག་ན་འབྲོག་གནས་སུ་དུས་སྟོན་བྱུང་ནས་བླ་མི་དག་མ་འོངས་པ་དང ། བསོད་སྙོམས་པས་དེ་དག་བོས་ཏེ་སྨྲས་པ། བཞིན་བཟངས་དག་དེང་ཁྱེད་ཅག་ཅིའི་ཕྱིར་མ་འོངས། དེ་དག་གིས་སྨྲས་པ། འཕགས་པ་དེང་འཇིག་རྟེན་གྱི་དུས་སྟོན་ལགས་པས་དེའི་སླད་དུ་བདག་ཅག་མ་མཆིས་སོ། །བསོད་སྙོམས་པས་སྨྲས་པ།
5.147b
བཞིན་བཟངས་དག་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་དུས་སྟོན་ཡོད་ན། ཁྱེད་ཅག་མཁར་ལན་གྱི་འབྲས་བུས་འཚོ་བ་དག་ལ་དུས་སྟོན་ཅི་འདྲ་བ་དག་ཅིག་ཡོད། ཚུར་ཤེག་ལ་ལས་གྱིས་ཤིག་དང ། དེའི་ཕྱིར་གླ་ཉིས་གྱུར་དུ་སྦྱིན་ནོ། །དེ་དག་གིས་སྨྲས་པ། འཕགས་པ་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་རྟག་པ་ཁོ་ནར་དུས་སྟོན་མཆིས་ཀྱི། བདག་ཅག་ནི་མཁར་ལན་གྱི་འབྲས་བུས་འཚོ་བ་ལགས་པས་དེ་ཉིད་ཀྱིས་ན་བདག་ཅག་ལ་བརྒྱ་ལ་བརྒྱ་ལམ་ན་དུས་སྟོན་འབྱུང་བས་གལ་ཏེ་གླ་སུམ་གྱུར་དུ་སྩལ་དུ་ལགས་ཀྱང་བདག་དེང་ནི་ལས་མི་བགྱིད་དོ་ཞེས་དེ་དག་མ་བཏུབ་སྟེ་དོང་ནས་བསོད་སྙོམས་པ་ཡང་སྙིང་ལས་ཆུང་ངུར་འདུག་གོ། །ཁྱིམ་བདག་གིས་བསམས་པ། བདག་གིས་སྦྱིན་པར་བྱ་བའི་ཆོས་དེ་ལ་ཇི་ཙམ་ནི་བྱས། ཇི་ཙམ་ནི་མ་བྱས་པ་དེ་ལྟར་འགྲོའོ་སྙམ་ནས་དེ་ནང་པར་སྔར་ལངས་ཏེ་སོང་བ་དང ། འགའ་ཡང་ལས་མི་བྱེད་པ་མཐོང་ན་དེ་བསོད་སྙོམས་པའི་དྲུང་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་གླ་མི་དག་དེང་ལས་མི་བགྱིད་དམ། ཁྱིམ་བདག་མི་བྱེད་དོ། །ཅིའི་སླད་དུ་དེ་དག་ན་རེ་དེང་འཇིག་རྟེན་གྱི་དུས་སྟོན་ཡིན་པས་བདག་ཅག་ལས་མི་བྱེད་དོ་ཞེས་ཟེར་རོ། །ཁྱིམ་བདག་གིས་སྨྲས་པ། འཕགས་པ་དེ་དག་ནི་མཁར་ལན་གྱི་འབྲས་བུས་འཚོ་བ་ལགས་པས་འཕགས་པས་དེ་དག་ལ་གླ་མ་སྩལ་པས་དེས་ན་མ་བཏུབ་གོར་མ་བཀུམ། བསོད་སྙོམས་པས་སྨྲས་པ། ཁྱིམ་བདག་ཁོ་བོས་གླ་ཉིས་གྱུར་བྱིན་ཡང་མ་གྲུབ་སྟེ། དེ་དག་ན་རེ་འཕགས་པ་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ནི་རྟག་པ་ཁོ་ནར་དུས་སྟོན་མཆིས་ཀྱི། བདག་ཅག་ནི་མཁར་ལན་གྱི་འབྲས་བུས་འཚོ་བ་ལགས་པས་དེ་ཉིད་ཀྱིས་ན་བདག་ཅག་ལ་བརྒྱ་ལ་བརྒྱ་ལམ་ན་དུས་སྟོན་འབྱུང་བས་གལ་ཏེ་གླ་སུམ་གྱུར་དུ་སྩལ་དུ་ལགས་ཀྱང་བདག་ཅག་དེང་ནི་ལས་མི་བགྱིད་དོ་ཞེས་ཟེར་རོ། །ཁྱིམ་བདག་གིས་སྨྲས་པ། འཕགས་པ་བདག་ནི་བདག་གི་སླད་དུ་ཡང་བགྱིད་དུ་མ་སྩོལ་ལ། ཉེ་དུ་རྣམས་ཀྱི་སླད་དུ་ཡང་བགྱིད་དུ་མི་རྩོལ་གྱི། འདི་ལྟར་འཕགས་པ་རྣམས་ཀྱི
5.148a
སླད་དུ་བགྱིད་དུ་རྩོལ་བ་ལགས་པས་ཀྱེ་མ་འཕགས་པ་རྣམས་ཀྱིས་ཀྱང་བརྒྱ་ལ་བརྒྱ་ལམ་དུ་མཁར་ལན་གྱི་སྟོངས་མོ་མཛོད་ཅིག་།བསོད་སྙོམས་པས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལན་གྱི་སྟོངས་མོ་བྱའོ། །བཅོམ་ལྡན་འདས་ཀྱིས་གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་དག་གིས་མཁར་ལན་གྱི་སྟོངས་མོ་བྱ་བར་བརྩམས་ནས། དེ་དག་ཕན་ཚུན་སོ་ཕག་འཕེན་པར་བྱེད་དོ། །ཇི་ཙམ་ན་དགེ་སློང་ཞིག་གིས་དགེ་སློང་ལ་སོ་ཕག་འཕངས་པ་དང་ལག་པ་ནས་ཤོར་ཏེ་དགེ་སློང་གི་མགོ་ལ་ཕོག་ནས་དེ་དུས་ལ་བབ་བོ། །དགེ་སློང་དེ་དག་འགྱོད་པ་སྐྱེས་ཤིང ། དེ་དག་ཡིད་མི་བདེ་ནས་འདི་སྐད་ཅེས་ཚེ་དང་ལྡན་པ་དག་བསོད་སྙོམས་པ་ལས་མེད་པས་ལས་ཕྱུང་ནས་བདག་ཅག་ཚངས་པ་མཚུངས་པར་སྤྱོད་པ་ཡིད་དུ་འོང་བ་དང་བྲལ་བར་གྱུར་ཅིང ། བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་པར་གྱུར་ཏོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་རྣམས་ཀྱིས་སོ་ཕག་འཕང་བར་མི་བྱ་བར་འདི་ལྟར་ལག་པས་ལག་པར་བརྒྱུད་པར་བྱའོ། །གལ་ཏེ་བྱེ་བ་འམ། གས་པ་ཡིན་ན་གོ་བར་བྱ་སྟེ་བརྒྱུད་པར་བྱའོ། །གོ་བར་མ་བྱས་པར་བརྒྱུད་པར་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་མཁར་ལན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་རྣམས་ཉི་མ་རངས་པར་ལས་བྱེད་ནས་བྲམ་ཟེ་དང་ཁྱིམ་བདག་དག་ཅིའི་ཕྱིར་དགེ་སློང་འདི་དག་ཉི་མ་རངས་པར་གླ་མི་བཞིན་དུ་ལས་བྱེད་ཅེས་འཕྱ་བར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཉི་མ
5.148b
རངས་པར་ལས་མི་བྱ་བར་འདི་ལྟར་ལན་གཅིག་བྱའོ། །དགེ་སློང་དག་སོ་ཀ་ནི་ཕྱི་དྲོ་ལས་བྱེད་ལ། དགུན་ནི་སྔ་དྲོ་ལས་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། སོ་ཀ་ནི་སྔ་དྲོ་ལས་བྱ་ལ། དགུན་ནི་ཕྱི་དྲོ་ལས་བྱའོ། །དེ་དག་དུས་རྟིང་ལ་ཐུག་པ་ན་གཏོང་ཞིང་འཇིམ་རྫབ་ཀྱིས་གོས་པའི་ལུས་ཀྱིས་དེ་བཞིན་རིངས་པ་རིངས་པར་བསོད་སྙོམས་ལ་འཇུག་པ་ན་མ་དད་པ་དག་འཕགས་པ་དག་ཁྱེད་ཅག་གིས་གླ་མི་དག་ཀྱང་ཕམ་པར་བྱས་ཏེ། དེ་དག་ཀྱང་ཟས་ཀྱི་དུས་ཡོངས་སུ་སྤོང་བར་བྱེད་ན། ཁྱེད་ཅག་ཟས་ཀྱི་དུས་ཀྱང་སྤོང་བར་མི་བྱེད་དོ་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བསོད་སྙོམས་པ་གང་དག་ཡིན་པ་དེ་དག་གིས་ནི་སྟ་གོན་བྱས་ནས་གྲོང་དུ་བསོད་སྙོམས་ལ་འཇུག་ཁོམ་པ་དང ། གང་དག་དགེ་འདུན་གྱི་རྙེད་པ་དབང་བ་དེ་དག་གིས་ནི་སྟ་གོན་བྱས་ནས་དགེ་འདུན་གྱི་དབུས་སུ་འཇུག་ཁོམ་པ་དེ་ལྟར་དུས་ཤེས་པར་བྱས་ཏེ་གཏང་བར་བྱའོ། །བཅོམ་ལྡན་འདས་ཀྱིས་སྟ་གོན་བྱས་ནས་གྲོང་དུ་བསོད་སྙོམས་ལ་འཇུག་པར་བྱ་ཞིང་དགེ་འདུན་གྱི་དབུས་སུ་ཡང་འཇུག་པར་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ཙམ་གྱིས་ན་སྟ་གོན་བྱས་པར་བརྗོད་པར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ཙམ་གྱིས་ལག་པ་གཉིས་དང ། རྐང་པ་གཉིས་བཀྲུས་པ་དང ། ལྷུང་བཟེད་བཀྲུས་པར་གྱུར་པ་དེ་ཙམ་གྱིས་སྟ་གོན་བྱས་པར་བརྗོད་པར་བྱའོ། །གཞན་ཡང་ངས་དགེ་སློང་མཁར་ལན་བྱེད་པ་དག་གིས་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་མཁར་ལན་བྱེད་པས་དུས་ཇི་ལྟ་བ་བཞིན་དུ་སྔ་དྲོ་ནི་ཁྱེའུ་སུས་དག་སྦྱོར་དུ་གཞུག་པར་བྱའོ། །ཕྱི་དྲོ་ནི་སྐོམ་དང ། ལག་པ་དང ། རྐང་པའི་བསྐུ་མཉེ་རྒྱུ་དག་སྦྱོར་དུ་གཞུག་པར་བྱའོ། །དགེ་སློང་མཁར་ལན་བྱེད་པས་ཀུན་དུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །འབྲོག་གནས་སུ་བསོད་སྙོམས་པས་བསྲོ་གང་བྱེད་དུ་བཅུག་པ་ཇི་ལྟ་བ་བཞིན་དུ་མེ་ཁང
5.149a
གི་གླེང་གཞི་ཡང་དེ་ཁོ་ན་བཞིན་དུ་རྒྱས་པར་བརྗོད་པར་བྱའོ། །བྱེ་བྲག་ནི་འདི་ཡོད་དེ། བཅོམ་ལྡན་འདས་ཀྱིས་གཞི་མ་ཟིན་པ་ལ་མཁར་ལན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་དག་མེ་ཁང་གི་ལས་བྱེད་ཅིང་ཕྱམ་དག་ཕར་སྦེད་ཚུར་སྦེད་པ་ན་དེ་དག་གི་འོག་ན་ཤིང་མཁན་ཞིག་ཞལ་ཏ་བྱེད་དེ། ཇི་ཙམ་ན་ཕྱམ་དག་སྦེད་པ་ན། དགེ་སློང་གི་ལག་ནས་ཕྱམ་ཤོར་བས་ཤིང་མཁན་གྱི་མགོར་ཕོག་ནས་དེ་དུས་ལ་བབ་པ་དང ། དགེ་སློང་དེ་དག་ཚེ་དང་ལྡན་པ་དག་བསོད་སྙོམས་པ་ལས་མེད་པ་ལས་བྱུང་བས་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་དག་གིས་མི་བཟོད་པའི་ཁུར་འདེག་པར་མི་བྱའོ། །རྐྱེན་དེ་ལྟ་བུ་ཞིག་བྱུང་ན་མདོ་མདོར་ཁྱིམ་པ་དག་འཛིན་དུ་གཞུག་པར་བྱ་ཞིང་གདེགས་པ་དག་དང ། གཞག་པ་དག་ཀྱང་བརྗོད་པར་བྱ་སྟེ། མཉམ་དུ་གདེག་པ་དང ། མཉམ་དུ་གཞག་པར་བྱའོ། །དགེ་སློང་དག་མི་བཟོད་པའི་ཁུར་འདེག་པར་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་དག་གིས་མི་བཟོད་པའི་ཁུར་འདེག་པར་མི་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ཙམ་ནི་བཟོད་པ་ཡིན། ཇི་ཙམ་ནི་མི་བཟོད་པ་ཡིན་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་གཅིག་གི་ཁུར་གང་ཡིན་པ་དེ་དག་དགེ་སློང་གཉིས་ཀྱིས་གདེག་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་གཏུམ་མོ་བཏུལ་ཏེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་པ་དེའི་ཚེ་དེས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ནས་ཡོ་བྱད་ཐམས་ཅད་ཀྱིས་བསྟབས་པ་དང ། ཚེ་དང་ལྡན་པ་འཆར་ཀས་དང་དུ་མ་བླངས་ཏེ་སྨྲས་པ། སྲིང་མོ་བཅོམ་ལྡན་འདས་ཀྱི་བསྟན་པ་ནི་གཞན་ལ་ཕན་པས་རྗེས་སུ་འཛིན་པར་ཞུགས་པ་ཡིན་པས།
5.149b
ཁོ་བོས་ཀྱང་གཞན་ལ་ཕན་པར་བྱ་དགོས་སོ། །གཏུམ་མོས་སྨྲས་པ། འཕགས་པ་གལ་ཏེ་དེ་ལྟ་ལགས་ཏེ་དང་དུ་མི་བཞེས་ན། བདག་གིས་འཕགས་པའི་སླད་དུ་དྲང་སྲོང་གི་གདན་བཤམ་པར་བགྱིས། ཁྱོད་ཀྱིས་བསོད་སྙོམས་བརྒྱུས་ནས་དྲང་སྲོང་གི་གདན་ལ་ལོངས་སྤྱད་དེ་གཤེགས་པར་རིགས་སོ། །ཚེ་དང་ལྡན་པ་འཆར་ཀས་སྨྲས་པ། སྲིང་མོ་དེ་བཞིན་བྱའོ་ཞེས་ཚེ་དང་ལྡན་པ་འཆར་ཀ་ཉི་མ་རེ་རེ་ཞིང་བསོད་སྙོམས་བརྒྱུས་ནས་གཏུམ་མོའི་ཁྱིམ་དུ་དྲང་སྲོང་གི་སྟན་ལ་ལོངས་སྤྱད་དེ་འགྲོའོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་འཆར་ཀ་ལ་ལྗོངས་སུ་བྱ་བ་ཞིག་བྱུང་ནས་ཚེ་དང་ལྡན་པ་འཆར་ཀས་བསམས་པ། བདག་ཇེ་སོང་ལ་སྲིང་མོ་བལྟ་བར་བྱའོ་སྙམ་ནས། ཚེ་དང་ལྡན་པ་འཆར་ཀ་གཏུམ་མོའི་གན་དུ་སོང་སྟེ་སྨྲས་པ། སྲིང་མོ་ཁོ་བོ་ལྗོངས་རྒྱུར་འགྲོ་ཡིས། ཁྱོད་ཀྱིས་ཆོས་ཀྱི་ལུས་ལ་བག་གྱིས་ཤིག་།གཏུམ་མོས་སྨྲས་པ། འཕགས་པ་མྱུར་དུ་སླར་གཤེགས་པའི་རིགས་ཏེ། དེར་བཞུགས་པར་མི་མཛད་ཅིང་དེར་དགྱེས་པ་མི་བསྐྱེད་དུ་གསོལ། ཚེ་དང་ལྡན་པ་འཆར་ཀས་གཏུམ་མོ་བལྟས་ཏེ་ལྗོངས་རྒྱུར་འཕགས་པ་དང ། ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་།ཚེ་དང་ལྡན་པ་འཆར་ཀས་ཐོས་ནས་བསམས་པ། སངས་རྒྱས་ཀྱི་རྒྱུ་བ་ལ་ནི་ཕན་ཡོན་བཅཝ་བརྒྱད་ཡོད་དེ། རྒྱལ་པོའི་འཇིགས་པ་མེད་པ་དང ། ཆོམ་རྐུན་གྱི་འཇིགས་པ་མེད་པ་དང ། མེའི་འཇིགས་པ་མེད་པ་དང ། མིའི་འཇིགས་པ་མེད་པ་དང ། མི་མ་ཡིན་པའི་འཇིགས་པ་མེད་པ་དང ། ཀླུའི་འཇིགས་པ་མེད་པ་དང ། གདུག་པའི་འཇིགས་པ་མེད་པ་དང ། སེང་གེའི་འཇིགས་པ་མེད་པ་དང ། སྟག་གི་འཇིགས་པ་མེད་པ་དང ། གུང་གི་འཇིགས་པ་མེད་པ་དང ། ཕ་རོལ་གྱི་དམག་ཚོགས་ཀྱི་འཇིགས་པ་མེད་པ་དང ། སྤྱང་ཀིའི་འཇིགས་པ་མེད་པ་དང ། ཤོ་གམ་གྱི་འཇིགས་པ་མེད་པ་དང ། ལ་གཅན་གྱི་འཇིགས་པ་མེད་པ་དང ། གྲུ་བཙས་ཀྱི
5.150a
འཇིགས་པ་མེད་པ་དང ། དུས་དང་དུས་སུ་ལྷའི་གཟུགས་དག་མཐོང་ཞིང་ལྷའི་སྒྲ་དག་ཐོས་ལ་ཀུན་ཤེས་པ་བརྡ་སྤྲོད་པ་དག་ཐོས་པ་དང ། ཆོས་ཀྱི་ལོངས་སྤྱོད་དང ། ཟང་ཟིང་གི་ལོངས་སྤྱོད་ཡོད་པ་དང ། སངས་རྒྱས་ཀྱི་རྒྱུ་བ་ལ་གནོད་པ་ཉུང་བ་ཡིན་གྱིས། བདག་ཀྱང་བཅོམ་ལྡན་འདས་དང་ཐབས་གཅིག་ལྗོངས་རྒྱུར་འགྲོས་ཕྱིར་ལྡོག་པར་བྱའོ་སྙམ་ནས། ཚེ་དང་ལྡན་པ་འཆར་ཀ་ཕྱིར་ལོག་གོ། །དེའི་བར་སྐབས་སུ་གཏུམ་མོའི་ཁྱིམ་དུ་བུ་མོ་ཞིག་ལ་ཁྱེའུ་ཞིག་བཙས་ནས། གཏུམ་མོས་ཁྱེའུ་དེའི་མ་ལ་སྨྲས་པ། བུ་མོ་ཁྱེའུ་འདི་ཁྲུས་གྱིས་ལ་གོས་དཀར་པོས་དཀྲིས་ཏེ་དྲང་སྲོང་གི་སྟན་འདི་ལ་སྙོལ་ཅིག་དང་ཡུན་རིང་དུ་འཚོ་བར་འགྱུར་ཞིང་ཚེ་རིང་དུ་སྐྱོང་བར་འགྱུར་རོ། །བུ་མོ་དེས་ཁྱེའུ་དེ་ཁྲུས་བྱས་ཏེ་གོས་དཀར་པོས་དཀྲིས་ནས། དྲང་སྲོང་དེའི་སྟན་དེ་ལ་རྟག་ཏུ་བསྙལ་ལོ། །ཚེ་དང་ལྡན་པ་འཆར་ཀ་ཡང་ཉི་མ་གཞན་ཞིག་ན་བསོད་སྙོམས་ལ་ཞུགས་ནས་གཏུམ་མོའི་ཁྱིམ་ག་ལ་བ་དེར་སོང་ངོ ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས། ཚེ་དང་ལྡན་པ་འཆར་ཀ་དེ་བཞིན་དུ་དྲང་སྲོང་གི་སྟན་དེ་ལ་འདུག་པ་དང ། བུད་མེད་ཀྱི་ཡུལ་དེ་བརྟད་པ་དང་བཅས་ཤིང་འཕགས་པ་ཁྱེའུ་འཕགས་པ་ཁྱེའུ་ཞེས་ཟེར་ནས་ཚེ་དང་ལྡན་པ་འཆར་ཀ་མྱུར་དུ་ལངས་ཏེ་བལྟས་ན་ཁྱེའུ་དུས་ལ་བབ་པ་མཐོང་ངོ ། །ཁྱིམ་མི་དག་གིས་ཆོ་ངེས་གདབ་པར་བརྩམས་པ་དང ། ཚེ་དང་ལྡན་པ་འཆར་ཀས་སྨྲས་པ། སྲིང་མོ་མ་ངུ་ཤིག་།སེམས་ཅན་འདིས་ཚེ་ཐུང་བར་འགྱུར་བའི་ལས་བྱས་ཏེ། བཅོམ་ལྡན་འདས་ཀྱིས་ཀྱང་འདུ་བྱེད་ཐམས་ཅད་ནི་མི་རྟག་གོ་ཞེས་གསུངས་སོ། །དེ་ལྟ་མོད་ཀྱི་འདི་ལ་ཁོ་བོས་ངུད་མོས་གདབ་པར་བྱ་བ་ཡིན་ཏེ། འདི་ལྟར་ཁོ་བོས་དགྲ་བཅོམ་པ་ཉིད་ཐོབ་ཀྱང་ཁོ་བོ་ལ་བརྟེན་ཏེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་འགྱུར་རོ། །དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་འཆར་ཀ་ལ་ནི་ལྟུང་བ་མེད་དེ།
5.150b
ཡང་དགེ་སློང་གིས་ཁྱིམ་གཞན་དུ་སྟན་ལ་མ་བརྟགས་པར་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ། ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས། སྨོས་འདྲིན་གཉིས་ཤིག་འཁོད་དོ། །ཇི་ཙམ་དུས་གཞན་ཞིག་ན་དེ་གཉིས་ནོར་ཟད་པ་དང ། ལོངས་སྤྱོད་ཟད་པར་གྱུར་ནས་དེ་གཉིས་ཀྱིས་གྲོས་བྱ་བར་བརྩམས་པ། བདག་ཅག་གཉིས་འདི་ཉིད་དུ་མ་ཐོས་པ་དང་དམས་པར་གྱུར་པས་རྣམ་པ་འདི་ལྟ་བུའི་འཚོ་བ་ཟ་ཞིང་ལོངས་སྤྱོད་པས་ཅི་བྱ། རབ་ཏུ་འབྱུང་དུ་འདོང་ངོ་ཞེས་དེ་གཉིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་ན་གཅིག་ན་བར་གྱུར་ནས་གཅིག་ཤོས་དེའི་ནད་གཡོག་བྱེད་དོ། །ནད་པ་དེ་ཉམས་དམས་ཤིང་སོས་པར་མ་གྱུར་ནས། ནད་གཡོག་དེས་ནད་པ་ལ་སྨྲས་པ། ཚེ་དང་ལྡན་པ་ཁྱོད་ལ་སྔོན་ཁྱིམ་པའི་ཚེ་ན་ལན་འགའ་ནད་འདི་ལྟ་བུ་བྱུང་ངམ། སྔོན་ཡང་བྱུང་ངོ ། །འོ་ན་ཇི་ཞིག་གིས་ཞི་བར་གྱུར། ལན་ཚཝའི་སྨན་རྩབས་ཀྱིས་སོ། །འོ་ན་དེ་ཅིའི་ཕྱིར་ལན་ཚཝའི་སྨན་རྩབས་མི་འཐུང་ཞེས་ནད་གཡོག་དེས་ལན་ཚཝའི་སྨན་རྩབས་བསླངས་ཏེ་ནད་པ་ལ་བླུད་པ་དང ། ནད་པ་དེ་དུས་ཀྱི་ཆོས་དང་ལྡན་པར་གྱུར་ནས་དགེ་སློང་དེ་བདག་གིས་འདི་ལ་སྨན་མ་ཡིན་པ་བྱིན་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྨན་པ་ལ་མ་དྲིས་པར་རང་གི་བློས་ནད་པ་ལ་སྨན་སྦྱིན་པར་མི་བྱའོ། །གལ་ཏེ་སྨན་པ་མེད་ན་སྨན་པ་རབ་ཏུ་བྱུང་བ་ལ་དྲི་བར་བྱའོ་སྨན་པ་རབ་ཏུ་བྱུང་བ་མེད་ན་སྨན་པས་བཀོལ་བ་ལ་དྲི་བར་བྱའོ། །སྨན་པས་བཀོལ་བ་མེད་ན་ནད་ཀྱིས་ཐེབས་པ་ལ་དྲི་བར་བྱའོ། །ནད་ཀྱིས་ཐེབས་པ་མེད་ན་དགེ་སློང་རྒན་པ་རྒན་པ་དག་ལ་དྲི་བར་བྱའོ། །
5.151a
དགེ་སློང་གིས་སྨན་པ་ལ་མ་དྲིས་སམ། ཇི་སྐད་བསྟན་པའི་རིམ་པ་བཞིན་མ་བྱས་པར་རང་གི་བློས་ནད་པ་ལ་སྨན་སྦྱིན་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དགེ་སློང་དེ་ལ་སྨན་གང་ལགས་པ་དེ་ཉིད་སྨན་མ་ལགས་པ་ཉིད་དུ་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་སྔོན་ཁྱིམ་པའི་ཚེ་ན་རླུང་དང་བད་ཀན་ཅན་དུ་གྱུར་ལ། ད་ལྟར་ནི་རླུང་དང་མཁྲིས་པ་ཅན་དུ་གྱུར་པས་དེས་ན་དེ་ལ་སྨན་གང་ཡིན་པ་དེ་ཉིད་སྨན་མ་ཡིན་པ་ཉིད་དུ་གྱུར་ཏོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་མ་ག་དྷཱར་བྱུང་བའི་བྲམ་ཟེ་དང་ཁྱིམ་བདག་བརྒྱ་སྟོང་ཕྲག་དུ་མ་དང་ལྷན་གཅིག་བདེན་པ་དག་ལ་བཀོད་པ་དེའི་ཚེ་ན་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་པོའི་ཁབ་ཏུ་འདི་སྐད་ཅེས་རྒྱལ་པོའི་ཁབ་ཏུ་འཁོད་པ་དང ། ཕོ་བྲང་འཁོར་བ་དང ། ཡུལ་ཐ་དད་པ་ནས་ལྷགས་པའི་ཚོང་པའི་ཚོགས་ཤེས་ལྡན་དག་ཉོན་ཅིག་།ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེ་ངས་ཡུལ་མེད་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་སོ། །གང་གི་ཚེ་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་བ་དེའི་ཚེ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཀྱང་མཉན་ཡོད་དུ་འདི་སྐད་ཅེས་མཉན་ཡོད་ན་འཁོད་པ་དང ། ཕོ་བྲང་འཁོར་བ་དང ། ཡུལ་ཐ་དད་པ་ནས་ལྷགས་པའི་ཚོང་པའི་ཚོགས་ཤེས་ལྡན་དག་ཉོན་ཅིག་།ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེས་ངས་བསད་པའི་གྱོད་ལ་བསྒྲིན་པར་བྱའོ། །བཅོམ་པ་རྣམས་ཀྱི་རྐུན་རྫས
5.151b
ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་སོ། །དེའི་བར་སྐབས་ན་ཆོམ་རྐུན་པ་གང་དག་ཡུལ་མ་ག་དྷཱ་ན་གནས་པ་དག་དང ། ཆོམ་རྐུན་པ་གང་དག་ཡུལ་ཀོ་ས་ལ་ན་གནས་པ་དེ་དག་ས་མཚམས་ཀྱི་བར་དུ་དོང་སྟེ་འཁོད་དོ། ཐམས་ཅད་དུ་ཆོམ་རྐུན་པ་གང་དག་ཡུལ་མ་ག་དྷཱ་ན་གནས་པ་དག་དང ། ཆོམ་རྐུན་པ་གང་དག་ཡུལ་ཀོ་ས་ལ་ན་གནས་པ་དེ་དག་ས་མཚམས་ཀྱི་བར་དུ་དོང་སྟེ་འཁོད་ཅིང་དོན་འཐུན་འཇོམས་པར་བྱེད་དོ་ཞེས་བྱ་བའི་སྒྲ་དེ་ལྟ་བུས་ཀྱང་ཁྱབ་པར་གྱུར་ཏོ། །དེ་ཐོས་ནས་ཡུལ་མ་ག་དྷཱ་ནས་དོན་འཐུན་བསེལ་བ་དང་བཅས་པས་ཡུལ་ཀོ་ས་ལར་འགྲོ་བར་བརྩམས་ཤིང་ཡུལ་ཀོ་ས་ལ་ནས་ཀྱང་དོན་འཐུན་བསེལ་བ་དང་བཅས་པས་ཡུལ་མ་ག་དྷར་འགྲོ་བར་བརྩམས་སོ། །ཇི་ཙམ་དུས་གཞན་ཞིག་ན་ཡུལ་མ་ག་དྷ་ནས་དོན་འཐུན་བསེལ་བ་དང་བཅས་པ་ཡུལ་ཀོ་ས་ལར་འཕགས་ནས་དེ་གང་གི་ཚེ་ས་མཚམས་ཀྱི་བར་ལས་འདས་ཏེ་ཡུལ་ཀོ་ས་ལར་ཞུགས་པ་དེའི་ཚེ་ན་དེད་དཔོན་གྱིས་སྨྲས་པ། ཤེས་ལྡན་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་ནི་གཏུམ་པ། རྟུན་ངས་པ་དྲག་ཤུལ་ཆེ་བ། དཔའ་བ། རྩལ་ཆེ་བ་ཞེས་གྲགས་པས། གལ་ཏེ་དོན་འཐུན་ཆོམ་རྐུན་པས་བཅོམ་པར་གྱུར་ན་ཡང་དེས་བདག་ཅག་ལ་རྐུན་རྫས་སྦྱིན་པར་ནུས་ཀྱིས་བསེལ་བ་ཕྱིར་ཐོང་ཤིག་།དོན་འཐུན་དག་གིས་སྨྲས་པ། དེད་དཔོན་གལ་ཏེ་དེ་ལྟ་ན་དེ་ལྟར་བགྱིའོ་ཞེས་དེ་དག་གིས་བསེལ་བ་ཕྱིར་བཏང་ངོ ། །ཆོམ་རྐུན་པ་དག་གིས་བྱ་མ་རྟ་བཞག་སྟེ་འཁོད་པ་དང ། བྱ་མ་རྟ་དག་གིས་བསེལ་བ་ཕྱིར་བཏང་བ་དེ་མཐོང་ནས་དེ་དག་གིས་སྨྲས་པ། ཤེས་ལྡན་དག་བསེལ་བ་ཕྱིར་ལོག་གིས་དོན་འཐུན་གཞོམ་པར་བྱས་འདོང་ངོ་ཞེས་དེ་དག་གིས་དོན་འཐུན་ས་ལའི་དགོན་པར་ཞུགས་པ་བཅོམ་མོ། །དེ་ན་ཚོང་པ་ཁ་ཅིག་ནི་བསད། ཁ་ཅིག་ནི་བྱེར་རོ། །དེ་ན་གང་དག་བྱེར་བ་དེ་དག་མགོ་ས་རྡུལ་གྱིས་བཀང་སྟེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་དྲུང་དུ་དོང་ནས་སྨྲས་པ། ལྷ་བདག་ཅག་ཚོང་པ་རྣམས་ཁྱོད་ཀྱི་ཡུལ་དུ་ཚོང་པར་མི་རུང་བར
5.152a
རྣམ་པར་བཀོད་དོ། །ཅི་ཞིག་བྱས། ལྷ་བདག་ཅག་ཆོམ་རྐུན་པ་དག་གིས་བཅོམ་མོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། གཞོན་ནུ་སོང་ལ་ཆོམ་རྐུན་པ་དག་དང་རྐུན་རྫས་དག་མྱུར་དུ་ཁུག་ཤིག་།དམག་དཔོན་འཕགས་སྐྱེས་པོས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་མྱུར་བ་མྱུར་བར་ས་ལའི་དགོན་པར་སོང་ངོ ། །དེའི་བར་སྐབས་ན་ཆོམ་རྐུན་པ་དག་ས་ལའི་དགོན་པ་ཤིན་ཏུ་སྟུག་པོའི་ནང་ན་ཞུགས་ནས་བག་ཕབ་སྟེ་རྐུན་རྫས་བགེད་པར་བྱེད་དོ། །འཕགས་སྐྱེས་པོས་ཀྱང་དེ་དག་གིས་སྟེང་དུ་བརྫིས་ནས་དེ་ན་ཆོམ་རྐུན་པ་ཁ་ཅིག་ནི་བསད། ཁ་ཅིག་ནི་བྱེར། ཆོམ་རྐུན་པ་དྲུག་བཅུ་ནི་གསོན་པོར་བཟུང་ངོ ། །དེ་ནས་གཡུལ་ལས་རྣམ་པར་རྒྱལ་ཞིང་ཆོམ་རྐུན་པ་དང་རྐུན་རྫས་ཁྱེར་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་དྲུང་དུ་སོང་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཆོམ་རྐུན་པ་ནི་འདི་དག་ལགས། རྐུན་རྫས་ནི་འདི་དག་ལགས་སོ། །རྒྱལ་པོས་ཆོམ་རྐུན་པ་དག་ལ་སྨྲས་པ། ཤེས་ལྡན་དག་ངས་འདི་སྐད་ཅེས་ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེ་ངས་གསད་པའི་གྱོད་ལ་བསྒྲིན་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་པ་དེ་ཁྱོད་ཀྱིས་མ་ཐོས་སམ། ལྷ་ཐོས་སོ། །འོ་ན་ཁྱེད་ཀྱིས་ཅིའི་ཕྱིར་ཚོང་པ་འདི་དག་བཅོམ། ལྷ་བདག་ཅག་འཚོ་བ་མ་མཆིས་སོ། །གལ་ཏེ་དེ་ལྟ་ན་ཡང་ཅིའི་ཕྱིར་གཞན་གསད་པར་གྱུར། ལྷ་འཇིགས་པ་བསྟན་པའི་སླད་དུའོ། །ངས་ཀྱང་ཁྱེད་ལ་སྔོན་སུས་ཀྱང་མ་བསྟན་པ་དེ་ལྟ་བུའི་འཇིགས་པ་བསྟན་པར་བྱའོ། །རྒྱལ་པོ་དེ་གཏུམ་པས་དེས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་ཆོམ་རྐུན་པ་འདི་དག་བསད་སར་ཁྲིད་ལ་ལག་པ་དང ། རྐང་པ་ཆོད་ཅིག་།
5.152b
ཚོང་པ་འདི་དག་གི་ཅི་ཕྲོགས་པ་ངའི་བང་བ་དང་མཛོད་ནས་བྱིན་ཅིག་།བློན་པོ་དེ་དག་གིས་ཆོམ་རྐུན་པ་དེ་དག་དུར་ཁྲོད་དུ་ཁྲིད་དེ་ལག་པ་དང་རྐང་པ་བཅད་ནས་ཚོང་པ་རྣམས་ལ་ཀུན་རྫས་རྒྱལ་པོའི་བང་བ་དང་མཛོད་ནས་བྱིན་ནོ། །བཅོམ་ལྡན་འདས་ཀྱིས་དགེ་སློང་དག་བདག་གི་རྒུད་པ་དང ། གཞན་གྱི་རྒུད་པ་ལ་ཡང་དང་ཡང་དུ་སོ་སོར་རྟོགས་ཤིག་།བདག་གི་འབྱོར་པ་དང ། གཞན་གྱི་འབྱོར་པ་ལ་ཡང་དང་ཡང་དུ་སོ་སོར་རྟོགས་ཤིག་།དེ་ཅིའི་ཕྱིར་ཞེ་ན། དགེ་སློང་དག་བདག་དང་གཞན་གྱིས་རྒུད་པ་ལ་ནི་ཡིད་འབྱུང་བའི་གནས་ཡིན་ལ། བདག་དང་གཞན་གྱི་འབྱོར་པ་ཡང་ཡིད་འབྱུང་བའི་གནས་ཡིན་པའི་ཕྱིར་རོ། །ཞེས་བཀའ་སྩལ་ནས། དགེ་སློང་དག་ལངས་ཤིང་ལངས་ཤིང་དུར་ཁྲོད་རྒྱུར་འགྲོ་བར་བརྩམས་སོ། །དགེ་སློང་མ་དག་ཀྱང་ལངས་ཤིང་ལངས་ཤིང་དུར་ཁྲོད་རྒྱུར་འགྲོ་བར་བརྩམས་སོ། །དེའི་ཚེ་ན་རབ་ཏུ་མང་པོ་དག་དུར་ཁྲོད་རྒྱུར་དོང་ཞིང་དེ་དང་དེ་དག་གིས་ཆོམ་རྐུན་པ་དག་ལ་ངེས་པར་བརྟག་པར་བརྩམས་སོ། །མི་གཞན་ཞིག་ཀྱང་དེ་དག་ཉིད་ལ་རྟོག་ཅིང་འདུག་པ་དེས་སྨྲས་པ། གལ་ཏེ་དོན་འདོད་པ་འགའ་ཞིག་གིས་འདི་དག་ལ་ལན་ཚཝའི་སྨན་རྩབས་བླུད་པར་གྱུར་ན། དེས་ན་འདི་དག་འདི་ནས་ཤི་འཕོས་ན་མ་གཞོན་ནུ་དག་གི་ནུ་ཞོ་འཐུང་བར་འགྱུར་རོ། །དགེ་སློང་མ་དེ་དག་གི་ནང་ན་དགེ་སློང་མ་སྐྱོང་མ་ཞེས་བྱ་བ་སྦོམ་མོ། གླེན་མ། མི་གསལ་བ་ཞིག་འདུག་པ་དེས་དེ་ཐོས་ནས་དེས་བསམས་པ། གལ་ཏེ་བདག་བསོད་ནམས་ཀྱི་ཕུང་པོ་དེ་ལྟ་བུ་ལས་ཡོངས་སུ་ཉམས་པར་གྱུར་ན། བདག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཅི་ཞིག་རྙེད་ཀྱིས་བདག་སོང་ལ་ལན་ཚཝའི་སྨན་རྩབས་བསླངས་ཏེ་འདི་དག་ལ་བླུད་པར་བྱའོ་སྙམ་ནས། དགེ་སློང་མ་སྐྱོང་མ་དེ་དགེ་སློང་མ་རྣམས་ཀྱི་ནང་ནས་ཕྱིར་བྱུང་སྟེ། གནས་སུ་སོང་ནས་དེ་ནས་ལན་ཚཝའི་སྨན་རྩབས་ཀྱི་ཕྲུ་བ་དང ། ཁམ་ཕོར་དྲུག་བཅུ་བསླངས་ཏེ། ཆོམ་རྐུན་པ་དག་གི་དྲུང་དུ་སོང་བ་དང ། ཆོམ་རྐུན་པ་དེ་དག་སྡུག་བསྔལ་གྱི་ཚོར་བ་དག་གིས
5.153a
ཉེན་ཅིང་སྲོག་ལ་མི་ལྟོས་པ་སྐོམ་པས་གདུངས་པ་དག་གིས་བསམས་པ། ཀྱེ་མ་འཕགས་མ་འདིས་བདག་ཅག་སྐོམ་གྱིས་གདུངས་པ་རྣམས་ལ་བུམ་པ་དེ་ནས་སྐོམ་བླུད་ན་ཅི་མ་རུང་སྙམ་མོ། །སྐྱོང་མས་བསོད་ནམས་ཀྱི་འདུ་ཤེས་ཀྱིས་རེ་རེ་ལ་ཁམ་ཕོར་བྱིན་ཏེ་ལན་ཚཝའི་སྨན་རྩབས་བྲིམས་པ་དང ། གང་གིས་འཐུངས་པ་དེ་དུས་ལ་བབ་སྟེ་དེ་བཞིན་དུ་ཐམས་ཅད་དུས་ལ་བབ་བོ། །སྐྱོང་མ་ཆོམ་རྐུན་པ་དེ་དག་ལ་ལན་ཚཝའི་སྨན་རྩབས་འདྲིམ་པར་བྱེད་པ་ན་ནམ་སྲོས་པར་གྱུར་ནས་དགེ་སློང་མའི་དབྱར་ཁང་སྒོ་བཅད་པ་ན་སྐྱོང་མ་འོངས་ནས་དེས་དལ་བུས་ཁད་ཀྱིས་ཁད་ཀྱིས་སྒོ་གཏན་བརྡུངས་པ་དང ། དགེ་སློང་མ་རྣམས་ཀྱིས་སྨྲས་པ། སྒོ་གཏན་རྡུང་བར་བྱེད་པ་འདི་སུ། སྐྱོང་མས་སྨྲས་པ། བདག་སྐྱོང་མའོ། །ཁྱོད་ནམ་སྲོས་ནས་ག་ལས་འོངས། ཕུ་ནུ་མོ་དག་རྗེས་སུ་ཡི་རང་བར་གྱིས་ཤིག་།རྗེས་སུ་ཡི་རང་བར་གྱིས་ཤིག་།ཅི་ཁྱེད་ཀྱིས་དགྲ་བཅོམ་པ་ཉིད་མངོན་སུམ་དུ་བྱས་སམ། འོན་ཏེ་ཕྱིར་མི་འོང་བའི་འབྲས་བུ་འམ། ལན་ཅིག་ཕྱིར་འོང་བའི་འབྲས་བུ་འམ། རྒྱུན་དུ་ཞུགས་པའི་འབྲས་བུ་མངོན་དུ་བྱས་སམ། འོན་ཏེ་དགེ་འདུན་གྱི་གཙུག་ལག་ཁང་བྱེད་དུ་བཅུག་།ཕུ་ནུ་མོ་དག་མ་ཡིན་ནོ། །འོ་ན་འབྲས་ཆན་ནམ། སྐྱོ་མ་འམ། ཐུག་པའི་བཏུང་བ་འམ། རས་ཡུག་ཆེན་སྦྱོར་དུ་བཅུག་གམ། སྐྱོང་མས་སྨྲས་པ། ཕུ་ནུ་མོ་དག་ཅི་ཁྱེད་ཅག་ལ་འབྲས་ཆན་དང ། སྐྱོ་མ་དང ། ཐུག་པའི་བཏུང་བ་དང ། རས་ཡུག་ཆེན་སྦྱོར་དུ་གཞུག་པ་བཙལ་བ་ལས་ལས་གཞན་མེད་དམ། འོ་ན་གཞན་ཅི་བྱས། ཁྱེད་ཅག་གིས་ཆོམ་རྐུན་པ་དྲུག་བཅུ་པོ་ལག་པ་དང ། རྐང་པ་བཅད་པ་དེ་དག་མཐོང་ངམ། མཐོང་ངོ ། །བདག་གིས་ལན་ཚཝའི་སྨན་རྩབས་བསླངས་ཏེ་དེ་དག་འཐུང་དུ་བཅུག་ནས་འཐུངས་པ་དང ། དེ་དག་དུས་ལ་བབ་པས་མ་གཞོན་ནུ་དག་གི་ནུ་ཞོ་འཐུང་དུ་བཅུག་གོ། །སྐལ་ཆད་མ་ཁྱོད་ལྟོ་ཕམ་པར་འགྱུར་བ་དག་གིས་བཀང་བ་ལ་ངེད་ཅག་རྗེས་སུ་ཡི་རང་བར་བྱེད་དུ་འཇུད་དམ། དེ་བདག་ལ་ཡང་དག་པར་ཕམ་པར་འགྱུར་བའི་ལྟུང་བ་མ་བྱུང
5.153b
ངམ་སྙམ་དུ་འགྱོད་པ་སྐྱེས་ནས་དེས་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་དེ་ལ་འདུ་ཤེས་ཀྱང་ཡོད། སེམས་པ་ཡང་ཡོད་པས་ཕམ་པར་གྱུར་ཏོ། །དེ་ལྟ་བས་ན་དགེ་སློང་ངམ། དགེ་སློང་མས་ནད་པ་ལ་ཇི་ནས་ཀྱང་ནད་པ་དུས་བྱེད་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་མི་བྱ་བར་འདི་ལྟར་ཅི་ནས་ཀྱང་ནད་སོས་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་བྱའོ། །དགེ་སློང་གིས་ནད་པ་ལ་ཅི་ནས་ཀྱང་ནད་པ་དུས་བྱེད་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བར་འཁོར་ལ་སོགས་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་བཅུ་བདུན་སྡེ་དག་གལ་ཏེ་གཅིག་ལ་ལས་སུ་བསྐོ་བ་བབ་ན་ཡང་དེ་དག་ཐམས་ཅད་སྡོངས་ཏེ་བྱེད་དོ། །ཇི་ཙམ་དུས་གཞན་ཞིག་ན་གཙུག་ལག་ཁང་དེར་མཚན་ཐོག་ཐག་ཏུ་ཆོས་མཉན་པ་བྱུང་བས་དེར་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །ཕྱི་དེ་ཉིན་པར་དགེ་འདུན་གྱི་བསྲོ་གང་བྱུང་ནས་དེར་ཡང་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །དེའི་ཕྱི་དེ་ཉིན་པར་བཅུ་བདུན་སྡེ་ལས་གཅིག་ལ་དགེ་སྐོས་བབ་ནས་དེའི་ཉིན་མོ་ཡང་ཐམས་ཅད་ཀྱིས་གཙུག་ལག་ཁང་བརྒྱན་ཏེ་འཁོད་དོ། །དེ་ན་དགེ་སྐོས་ཏྲོན་བྱེད་པའི་ཚེ་བཅུ་བདུན་སྡེ་ལས་གཅིག་ལ་བློ་བྱུང་བ་བདག་ནི་ཆད་ཀྱིས་ཉལ་ལོ། །མི་བཅུ་དྲུག་གིས་ཅིའི་ཕྱིར་ཏྲོན་མི་ནུས་སྙམ་མོ། །དེ་བཞིན་དུ་རེ་རེ་ལ་ཡང་བློ་དེ་ལྟ་བུ་བྱུང་ནས་གཞན་བཅུ་དྲུག་པོ་ཐམས་ཅད་སོ་སོར་ཉལ་དུ་དོང་ངོ ། །དགེ་སྐོས་དེ་འབའ་ཤིག་གཅིག་པུས། མཚན་ཐོག་ཐག་ལས་བྱས་ཏེ། མཚན་མོ་ནམ་ནངས་པ་དང །
5.154a
མར་མེའི་ཀོང་བུ་དག་བསྡུས། སྒོ་དག་ཕྱེ། གཙུག་ལག་ཁང་ཆག་ཆག་བཏབ། བྱུག་པ་བྱས་ཏེ། དུས་ཤེས་པར་བྱས་ནས་སྟན་བཤམས་ཤིང་མཆོད་རྟེན་གྱི་འཁོར་སར་བདུག་སྤོས་བྲིམས་ཏེ། གཙུག་ལག་ཁང་གི་སྟེང་དུ་འགྲེང་ནས་གཎ་ཌཱི་བརྡུང་བར་བརྩམས་སོ། །དེ་ནས་བཅུ་དྲུག་པོ་དེ་དག་གཎ་ཌཱིའི་སྒྲས་སད་ནས་རང་རང་གི་གནས་ཁང་དག་ནས་ལྷུང་བཟེད་ཐོགས་ཏེ་བྱུང་བ་དང ། དེ་དག་གིས་དགེ་སྐོས་དེ་གཅིག་པུ་ཕར་རྒྱུག་ཚུར་རྒྱུག་ཅིང་འདུག་པ་མཐོང་ནས་དེ་དག་གིས་ཕན་ཚུན་སྨྲས་པ། ཚེ་དང་ལྡན་པ་དག་འདི་གཅིག་པུ་ཕར་རྒྱུག་ཚུར་རྒྱུག་ཅིང་འདུག་ན་ཡུ་བུ་ཅག་ལས་སུས་ཀྱང་འདིའི་གྲོགས་མ་བྱས་སམ། གཅིག་གིས་སྨྲས་པ། ཁོ་བོ་ལ་བློ་བྱུང་བ་བདག་ནི་ཆད་ཀྱི་ཉལ་ལོ། །མི་བཅུ་དྲུག་གིས་ཅིའི་ཕྱིར་ཏྲོན་མི་ནུས་སྙམ་མོ། །དེ་བཞིན་དུ་གཞན་ཡང་དེ་སྐད་ཟེར། གཞན་དག་ཀྱང་ཟེར་ཏེ། ཐམས་ཅད་ཀྱིས་དེ་སྐད་སྨྲས་སོ། །དེ་ནས་བཅུ་དྲུག་པོ་དག་གིས་སྨྲས་པ། ཚེ་དང་ལྡན་པ་དག་འདི་བདག་ཅག་གི་འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་ན་བདག་ཅག་གིས་འདིའི་གྲོགས་མ་བྱས་པ་ནི་ཡུ་བུ་ཅག་གིས་མ་ལེགས་པ་བྱས་ཏེ། འདི་བདག་ཅག་ལ་གཤེ་བར་འགྱུར་གྱིས་ཟན་ཟོས་མ་ཐག་ཏུ་བཟོད་པ་གསོལ་བར་བྱའོ་ཞེས་དེ་དག་གིས་ཟན་ཟོས་ནས་བཟོད་པ་གསོལ་བར་བརྩམས་ཏེ། གཞོན་པ་རྣམས་ཀྱིས་ནི་དེའི་རྐང་པ་གཉིས་ལ་གཏུགས། རྒན་པ་རྣམས་ཀྱིས་ནི་མགུལ་ནས་འཁྱུད་དེ་ཚེ་དང་ལྡན་པ་བཟོད་པར་གསོལ་ཞེས་བྱས་ནས་དེ་ཅང་མི་སྨྲ་བ་ཉིད་དུ་འདུག་གོ། །དེ་དང་ཆེས་བཤེས་པ་གཅིག་ཡོད་པ་དེས་ག་ག་ཚིལ་བྱས་པ་དང ། དེས་རྒོད་པར་བསམས་ཏེ། བཟོད་དོ་ཞེས་ཀྱང་ཟེར་རོ། །དེ་དག་གིས་བསམས་པ། དེ་ནི་ཐབས་ལེགས་པ་ཡིན་ནོ་སྙམ་ནས་གཞན་གྱིས་ཀྱང་ག་ག་ཚིལ་བྱས་ཤིང་དེ་བཞིན་དུ་ཐམས་ཅད་ཀྱི་བར་གྱིས་ག་ག་ཚིལ་བྱས་པ་དང ། དེ་རླུང་གྱེན་དུ་འཆུགས་ཏེ་དུས་ལ་བབ་བོ། །དེ་དག་བརྟད་ཅིང་མྱ་ངན་བྱ་བར་བརྩམས་པ་དང ། དགེ་སློང་རྣམས་གྱིས་སྨྲས་པ། ཀྱེ་བཅུ་བདུན་སྡེ་དག་ཅིའི་ཕྱིར་བརྟད་ཅིང
5.154b
མྱ་ངན་བྱེད། དེ་དག་གིས་སྨྲས་པ། བདག་ཅག་སྔོན་ནི་བཅུ་བདུན་སྡེར་གྱུར་ན་ད་ནི་བཅུ་དྲུག་སྡེར་གྱུར་ཏེ་ཚངས་པ་མཚུངས་པར་སྤྱོད་པ་ཡིད་དུ་འོང་བ་དང་བྲལ་ཞིང་ཕམ་པར་གྱུར་པའི་ལྟུང་བ་བྱུང་ངོ ། །དགེ་སློང་དེ་དག་གིས་མ་ལེགས་སོ་ཞེས་སྨྲས་ཏེ་དོང་ངོ ། །བཅུ་དྲུག་པོ་དེ་དག་ཀྱང་མཐའ་གཅིག་ཏུ་དོང་སྟེ། སེམས་ཁོངས་སུ་ཆུད་ཅིང་འཁོད་པ་དགེ་སློང་གཞན་དག་གིས་མཐོང་ནས་དགེ་སློང་དེ་དག་གིས་སྦྱོར་བར་བརྩམས་ཏེ། ཚེ་དང་ལྡན་པ་བཅུ་བདུན་སྡེ་འདི་དག་ནི་སོག་མའི་མེ་བཞིན་དུ་སྐད་ཅིག་གིས་འབར་ཞིང་སྐད་ཅིག་གིས་ཤི་བར་གྱུར་ཏེ། ཡུད་ཙམ་ཞིག་གིས་རྒོད་བག་བྱེད་ཅིང་ཡུད་ཙམ་ཞིག་གིས་སེམས་ཁོངས་སུ་ཆུད་ཅིང་འཁོད་དོ་ཞེས་ཟེར་རོ། །དེ་དག་མྱ་ངན་གྱི་མེས་ཡིད་གདུངས་པས་ཡོངས་སུ་སྤྱོས་ཀྱང་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་རྣམས་ལ་ནི་ལྟུང་བ་མེད་དེ། ཡང་དགེ་སློང་གིས་ག་ག་ཚིལ་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ནས་ཧ་ཅང་མི་རིང་བ་ན། རི་བྲགས་ཞིག་ཡོད་པ་དེ་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་འདུག་སྟེ། དེ་ཡང་དད་པ་ཅན་བཟང་བ་དགེ་བའི་བསམ་པ་ཅན་ཡིན་པས་དེས་དགེ་འདུན་ལ་བསྔོས་ཏེ་གཙུག་ལག་ཁང་རྟ་བབས་མཐོན་པོ་དང ། སྐར་ཁུང་དང ། སྐར་ཁུང་དྲ་བ་ཅན་དང ། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ། མཐོ་རིས་ཀྱི་ཐེམ་སྐས་སུ་གྱུར་པ་ཞིག་བྱེད་དུ་བཅུག་གོ། །གཙུག་ལག་ཁང་དེར་དགེ་སློང་དྲུག་བཅུས་དབྱར་གནས་པ་དག་བྱས་ཏེ་དོང་ནས་ཁྱིམ་བདག་དེས་དེར་མ་བྱིན་པར་ལེན་པ་དག་གི་ཁྲི་འམ། ཁྲིའུ་དག་མ་རྐུས་པར་གྱིས་ཤིག་ཅེས་སྲུངས་མའི་མི་བཞག་གོ། །ཇི་ཙམ་དུས
5.155a
གཞན་ཞིག་ན་དགེ་སློང་གཞན་དྲུག་བཅུ་ལྗོངས་རྒྱུ་ཞིང་འགྲོ་བ་ན་རི་བྲགས་དེར་ཕྱིན་ནས་བསྟི་གནས་རྙན་པར་བྱེད་པ་ན་མི་ཞིག་གིས་སྨྲས་པ། འཕགས་པ་དག་ཁྱེད་ཅག་ཅིའི་སླད་དུ་གཙུག་ལག་ཁང་དུ་མི་གནས། བཞིན་བཟངས་གཙུག་ལག་ཁང་ག་ལ་ཡོད། འཕགས་པ་དག་དགོན་པ་འདི་ནའོ། །དགེ་སློང་དེ་དག་དེར་དོང་བ་དང་སྲུངས་མའི་མིས་མཐོང་ནས་དེས་འོངས་པ་ལེགས་སོ་ཞེས་བྱ་བའི་ཚིག་གིས་བསྙེན་བཀུར་བྱས་ཏེ། གནས་ཁང་དག་བསྐོས་ནས་ཁྲི་དང ། ཁྲིའུ་དང ། སྟན་ནང་ཚངས་ཅན་དང ། ལ་བ་ལ་སོགས་པ་དག་ཕུལ་ཏེ་སྤྱངས་ཚགས་གཡར་ནས་སྨྲས་པ། འཕགས་པ་དག་རེ་ཤིག་ཆབ་བཙག་པར་མཛོད་ཅིག་དང་དེའི་བར་དུ་བདག་གིས་ཁྱིམ་བདག་ལ་བརྗོད་པར་བགྱིའོ་ཞེས་མི་དེ་ཁྱིམ་བདག་གི་དྲུང་དུ་སོང་སྟེ་སྨྲས་པ། ཁྱིམ་བདག་དགྱེས་པ་སྐྱེད་ཅིག་།ཁྱོད་ཀྱི་གཙུག་ལག་ཁང་དུ་དགེ་སློང་གློ་བུར་དུ་ལྷགས་པ་དྲུག་བཅུ་མཆིས་སོ། །ཁྱིམ་བདག་གུས་པར་བསྒྲིམ་པ་དང་བཅས་པས་ནང་མི་དག་ལ་སྨྲས་པ། ཤེས་ལྡན་དག་ཁོ་བོའི་གཙུག་ལག་ཁང་དུ་དགེ་སློང་གི་དགེ་འདུན་བྱོན་པ་དེ་དག་ལེགས་པར་སྦྱར་བའི་བཏུང་བས་མཚིམ་པར་བྱས། བུ་རམ་དང ། ཧཝགས་དང ། ལི་ཁ་ར་དང ། དགུན་དང ། བལ་བུ་སེའུ་ལོང་ཤིག་ཅེས་ཁྱིམ་བདག་དེས་ལེགས་པར་སྦྱར་བའི་བཏུང་བ་སྦྱར་ནས་གཙུག་ལག་ཁང་དུ་སོང་བ་དང ། དགེ་སློང་དག་ཀྱང་ཆུ་བཙགས་ཏེ་རང་རང་གི་སྤྱོད་ལམ་གྱིས་འཁོད་དོ། །ཁྱིམ་བདག་དེས་དགེ་སློང་དེ་དག་ཐག་རིང་པོ་ཁོ་ན་ནས་མཐོང་སྟེ། དེས་གཙུག་ལག་ཁང་དེ་མཚོ་པད་མས་གང་བ་བཞིན་དུ་མཐོང་ནས་རྒྱ་ཆེར་དད་པའི་ཤུགས་ཀྱིས་བསྒྱུར་བའི་རྒྱུད་ཀྱིས་ཚིགས་སུ་བཅད་པ་སྨྲས་པ། གྲོང་ངམ་ཡང་ན་དགོན་པ་འང་རུང ། །གཤོང་ངམ་ཡང་ན་ཐང་ཡང་རུང ། །གང་ན་འོས་པ་གནས་པ་ཡི། །ས་གཞི་དེ་ནི་དགའ་བྱེད་ཡིན། །དེ་ནས་ལེགས་པར་སྦྱར་བའི་བཏུང་བ་སྟ་གོན་བྱས་ཏེ་རང་གི་ལག་ནས་དགེ་སློང་གི་དགེ་འདུན་དེ་ཚིམ་པར་བྱས་ནས་རང་ཉིད་ཀྱིས་པོག་ཕོར་ཐོགས་ཏེ་དགེ་སློང་གི་དགེ་འདུན་དང་ལྷན་ཅིག་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་ཞུགས་ཏེ
5.155b
རྒན་པའི་མཐའ་ལོགས་སུ་འདུག་གོ། །དགེ་འདུན་གྱི་གནས་བརྟན་གྱིས་ཡོན་བཤད་ནས་ཁྱིམ་བདག་དེས་རྐང་པ་གཉིས་ལ་ཕྱག་འཚལ་ཏེ་སང་བདག་གི་སྡུམ་པར་འཕགས་པའི་དགེ་འདུན་གྱིས་གདུགས་ཚོད་གསོལ་བར་ཅི་གནང་ཞེས་སྨྲས་པ་དང ། དགེ་སློང་རྣམས་ཀྱིས་ཀྱང་དང་དུ་བླངས་ནས་ཁྱིམ་བདག་དེས་རྐང་པ་གཉིས་ལ་ཕྱག་འཚལ་ཏེ་སོང་ངོ ། །ཁྱིམ་བདག་དེས་ཕྱི་དེ་ཉིན་པར་ཟས་བསོད་པས་དགེ་སློང་དག་ཚིམ་པར་བྱས་ཤིང་དུས་མ་ཡིན་པར་ཡང་བཏུང་བ་བླུད་ནས་དགེ་སློང་རྣམས་ཀྱིས་ཀྱང་ཆོས་བསྟན་ཏོ། །ཕྱིས་ཀྱང་དེ་ཁོ་ན་བཞིན་དུ་དགེ་འདུན་གྱི་གནས་བརྟན་གྱིས་ཡོན་བཤད་པ་དང ། ཁྱིམ་བདག་དེ་རྒན་པའི་མཐའ་ལོགས་སུ་འདུག་སྟེ་སྨྲས་པ། འཕགས་པ་དག་བདག་གིས་གཙུག་ལག་ཁང་འདི་བདག་ཉིད་ཀྱི་སླད་དུ་ཡང་བགྱིད་དུ་མ་སྩལ། ཉེ་དུ་རྣམས་ཀྱི་སླད་དུ་ཡང་བགྱིད་དུ་མ་སྩལ་གྱི། འདི་ལྟར་འཕགས་པ་རྣམས་ཀྱི་སླད་དུ་བགྱིད་དུ་སྩལ་པ་ལགས་ཀྱིས་འདི་ཉིད་དུ་དབྱར་གནས་པར་ཞལ་གྱིས་བཞེས་ཤིག་དང ། བདག་གིས་འཕགས་པ་རྣམས་ལ་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །དགེ་སློང་རྣམས་ཀྱིས་སྨྲས་པ། ཁྱིམ་བདག་གཉན་ཡོད་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང ། དུས་དང་དུས་སུ་དགེ་སློང་ཆེ་གེ་མོ་ཞིག་གིས་ནི་དགྲ་བཅོམ་པ་ཉིད་མངོན་སུམ་དུ་བྱས། ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་དག་ཀྱང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་ཏུ་དད། བཙུན་མོ་ཕྲེང་ལྡན་མ་དང ། རྒྱལ་རིགས་དབྱར་ཚུལ་མ་དང ། བླ་མཁྱེན་དྲང་སྲོང་བྱིན་དང ། རྙིང་པ་དང ། དགེ་བསྙེན་མ་ས་ག་དང ། རི་དགས་འཛིན་གྱི་མ་དང ། གཞན་ཡང་དད་པ་ཅན་མང་དུ་ཡོད་པས་དེར་ཟང་ཟིང་གི་ལོངས་སྤྱོད་དང ། ཆོས་ཀྱི་ལོངས་སྤྱོད་ཆེན་པོ་ཡང་འགྲུབ་པས་བདག་ཅག་དེ་ཉིད་དུ་འདོང་ངོ ། །འཕགས་པ་དག་ཆོས་ཀྱི་ལོངས་སྤྱོད་ནི་འཕགས་པ་བདག་ཉིད་ལ་རག་ལས་པ་ལགས་ཀྱི། ཟང་ཟིང་གི་ལོངས་སྤྱོད་ནི་བདག་ལ་རག་ལས་པ་ལགས་པས་དགྱེས་པ་སྐྱེད་ཅིག་དང ། ཅུང་ཟད་ཀྱང་ཉམས་པར་མི་འགྱུར་རོ། །དགེ་འདུན་གྱི་གནས་བརྟན་གྱིས་སྨྲས་པ། ཚེ་དང
5.156a
ལྡན་པ་དག་བཅོམ་ལྡན་འདས་ཀྱིས་དད་པ་ཅན་གྱི་དད་པ་སྤེལ་བར་བྱ་ཞིང་སྦྱིན་བདག་ལ་རྗེས་སུ་སྙིང་བརྩེ་བར་བྱའོ་ཞེས་གསུངས་པས་འདི་ཉིད་དུ་འཁོད་པར་བྱའོ་ཞེས་དེ་དག་དེར་འཁོད་ནས་བློ་བརྟན་པས་གཙུག་ལག་ཁང་དེའི་ཕྱི་ནང་བཅས་པར་སོ་སོར་བརྟག་པར་བརྩམས་པ་དང ། གཙུག་ལག་ཁང་དེ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཤིན་ཏུ་དགའ་བ་མཐོང་ནས་དགེ་འདུན་གྱི་གནས་བརྟན་གྱིས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཤིན་དུ་དགའ་བ་ཡིན་པས་གལ་ཏེ་བདག་ཅག་གིས་འདིར་དབྱར་སྔ་མ་གནས་པར་ཁས་བླངས་ན་མེ་ཏོག་དང་འབྲས་བུ་ཐམས་ཅད་ཡོངས་སུ་ལོངས་སྤྱད་པར་མི་འགྱུར་གྱིས། བདག་ཅག་གིས་ངེས་པར་དབྱར་ཕྱི་མ་གནས་པར་ཁས་བླང་བར་བྱའོ་ཞེས་དེ་དག་གིས་དེར་དབྱར་ཕྱི་མར་གནས་པར་ཁས་བླངས་སོ། །ཁྱིམ་བདག་དེ་ལ་གཙུག་ལག་ཁང་དེ་གཅིག་པུ་འབའ་ཤིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་དོ། །རི་བྲགས་དེ་ན་ཡང་གཙུག་ལག་ཁང་གཞན་མེད་པས། རི་བྲགས་པ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་དོ། །དེའི་ཉེན་ཀོར་ན་ཡང་གཙུག་ལག་ཁང་གཞན་མེད་པས་རི་བྲགས་ཀྱི་ཉེན་ཀོར་བ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་དག་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་པས་དེར་དབྱར་གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ ། །སྟོན་ཟླ་ཐ་ཆུངས་ཀྱི་གཡོན་ཅན་དག་གི་ཀུན་ཏུ་སྤྱོད་པ་ནི་དགག་དབྱེ་བྱས་མ་ཐག་ཏུ་འདུས་ཏེ། བདག་ཅག་གིས་ལས་ཅི་ཞིག་བྱས་ན་དེས་བཙལ་མི་དགོས་པར་ལོ་བསྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་འདི་སྙམ་དུ་སེམས་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གཞོམ་པར་བྱའོ་སྙམ་མོ། །གཞན་དག་གིས་སྨྲས་པ། དེ་དག་ནི་སྒོ་འཕར་བརྒྱ་སྙེད་བཟླ་བ་བྱས་ཀྱང་ལྟོ་ཁེངས་པ་འགྲུབ་པར་དཀའ་བས་དེ་དག་ལ་ཅི
5.156b
ཡང་མེད་ན་བདག་ཅག་ཅིའི་ཕྱིར་ཡུལ་དེ་སྲིད་དུ་བསྡད་པར་བྱ། དེ་ན་དགེ་སློང་གི་རྒྱུས་ཤེས་པ་གཅིག་འདུག་པས་སྨྲས་པ། ཁྱེད་ཅི་ཤེས་དེ་དག་ལ་མང་དུ་ཡོད་དོ། །ཇི་ལྟ་རེ་ཤིག་གཙུག་ལག་ཁང་འདི་གང་གི་ཡིན་པ་ཁྱིམ་བདག་དེ་ནི་དད་ཅན་བཟང་བ་དགེ་བའི་བསམ་པ་ཅན་ཡིན་ལ་ཁྱིམ་བདག་དེ་ལ་ཡང་གཙུག་ལག་ཁང་འདི་གཅིག་པུ་འབའ་ཤིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདི་ན་ཡང་གཙུག་ལག་ཁང་གཞན་མེད་པས་རི་བྲགས་པ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདིའི་ཉེན་ཀོར་ན་ཡང་གཙུག་ལག་ཁང་གཞན་མེད་པས་རི་བྲགས་ཀྱི་ཉེན་ཀོར་བ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་པས་འདིར་དབྱར་གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ ། །གལ་ཏེ་ཡིད་མི་ཆེས་ན་སོང་ལ་ལྟོས་ཤིག་དང་རང་ཉིད་ཀྱི་མངོན་སུམ་དུ་འགྱུར་རོ། །གལ་ཏེ་དེ་ལྟ་ན་ཁྱོད་ཉིད་ཇེ་སོང་ལ། མངོན་སུམ་དུ་གྱིས་ཤིག་དང ། ཁོ་བོ་ཅག་ཕྱིས་འོང་ངོ ། །དེས་སྨྲས་པ། ལེགས་ཀྱིས་དེ་བཞིན་གྱིས་ཤིག་དང་ཁོ་བོ་འགྲོ་འོ་ཞེས་དེས་གོས་ཚགས་བཅོས་ཏེ་འཕགས་ཤིང་དེ་ནས་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ཏེ། གཙུག་ལག་ཁང་དེར་ཞུགས་སོ། །ཇི་ཙམ་ན་སྒོ་ཁང་ན་རྒན་ཞུགས་ཞིག་འདུག་ནས་གཡོན་ཅན་དེ་དེའི་རྐང་པ་ལ་ཕྱག་འཚལ་ཏེ་དྲི་བར་བརྩམས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། བཞིན་བཟངས་ཁྱིམ་བདག་ཆེ་གེ་མོ་ཞིག་གི་ཡིན་ནོ། །འཕགས་པ་ཅི་འདི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས་གཙུག་ལག་ཁང་ནི་ཇི་ལྟ་བུ་ཡིན། ཕོངས་པ་ནི་ཇི་ལྟ་བུ་ཡིན། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་སོ། །
5.157a
གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འོ་ན་འདི་ནི་གཙུག་ལག་ཁང་ཡིན་གྱི་ཕོངས་པ་མ་ཡིན་ཏེ། འདི་ན་ཡོ་བྱད་ཕུན་སུམ་ཚོགས་པ་ཡོད་ཀྱི་འདི་ན་ཡོ་བྱད་མེད་པ་མ་ཡིན་ནོ། །འཕགས་པ་ཟས་ཟ་བ་ནི་འགའ་ཡང་ས་རྡུལ་མི་ཟ་ལ། གོས་དག་གྱོན་པ་ནི་འགའ་ཡང་ཤིང་ཤུན་དག་མི་གྱོན་པས་ཁྱེད་ཅག་ལ་གོས་ཅུང་ཟད་མཆིས་སམ། རྒན་ཞུགས་དེ་དྲང་པོའི་རང་བཞིན་ཅན་ཡིན་པས་དེས་གཡོན་ཅན་དེའི་ལག་ནས་བཟུང་སྟེ་གནས་ཁང་དུ་བཅུག་ནས་སྨྲས་པ། བཞིན་བཟངས་གོས་ཀྱི་རྡང་གོས་དག་གིས་ཕུར་ཤོག་ཅིང་འདུག་པ་ལ་ལྟོས། འཕགས་པ་ཅི་འདི་ཁྱོད་ཀྱི་ལགས་སམ། འོན་ཏེ་དགེ་འདུན་གྱི་ལགས། བཞིན་བཟངས་འདི་ཁོ་བོ་གང་ཟག་གི་ཡིན་ནོ། །འཕགས་པ་འོ་ན་ཁྱོད་ནི་གོར་མ་བཀུམ་པར་དགེ་འདུན་གྱི་གནས་བརྟན་ནམ། ཆོས་སྒྲོག་པ་ཞིག་ལགས་སམ། །བཞིན་བཟངས་ཁོ་བོ་ནི་དགེ་འདུན་གྱི་གནས་བརྟན་ཡང་མ་ཡིན་ལ། ཆོས་སྒྲོག་པ་ཡང་མ་ཡིན་ཏེ། འདི་ལྟར་ཁོ་བོ་ནི་དགེ་འདུན་གསར་བུ་དགེ་ཚུལ་ཞིག་ཡིན་ནོ། །འཕགས་པ་དེ་ནི་མཇལ་ན་འདི་ན་དགེ་འདུན་གྱི་གནས་མལ་ཅུང་ཟད་མཆིས་སམ། བཞིན་བཟངས་མང་དུ་ཡོད་དེ་རེ་ཤིག་ཁོ་བོའི་བྱུག་རིས་སུ་ཡང་དངོས་པོ་བདུན་པོ་དག་འཐོབ་བོ། །འཕགས་པ་དེ་ཡང་མཇལ་གྱིས་འདི་ཞུའོ། །གཙུག་ལག་ཁང་འདི་ན་གང་ལ་ལ་འཚལ་མ་བགྱིད་པ་དེ་ཅི་རྫ་མཁན་གྱི་སྣོད་དུ་འཚོད་དམ། འོན་ཏེ་ཟངས་མའི་སྣོད་དུ་འཚོད་བཞིན་བཟངས་ཁྱོད་ཀྱིས་གནས་ཁང་འདི་དག་མཐོང་ངམ། འཕགས་པ་མཐོང་ངོ ། །བཞིན་བཟངས་གནས་ཁང་འདི་ཟངས་མའི་སྣོད་ཀྱིས་གང་ཞིང་འདུག་གོ། །གཡོན་ཅན་དེས་བསམས་པ། ལེགས་པར་བྲིད་ཟིན་གྱིས་ད་ནི་འགྲོའོ་སྙམ་ནས་གཡོན་ཅན་དེས་སྨྲས་པ། འཕགས་པ་ཁྱོད་ཀྱི་དགེ་བའི་ཕྱོགས་ཡོངས་སུ་ཉམས་པ་ནི་བདག་གི་དོན་ཡོངས་སུ་ཉམས་པ་ལགས་པས་བདག་སླད་ཀྱིས་ཀྱང་མཆི་ཡིས་ད་ནི་མཆིའོ། །བཞིན་བཟངས་དེ་བཞིན་གྱིས་ཤིག་།གཡོན་ཅན་དེས་རྒན་ཞུགས་དེའི་རྐང་པ་ལ་ཕྱག་འཚལ་ཏེ་སོང་ནས་གཡོན་ཅན་དེ་ཆོམ་རྐུན་པ
5.157b
དེ་དག་གི་དྲུང་དུ་སོང་སྟེ་སྨྲས་པ། པད་མའི་མིག་ཅན་དག་རྫས་ཐམས་ཅད་ཀྱིས་གང་བའི་གྲུ་བོ་ཆེ་སྐམས་ལ་འདུག་གིས་ཕྲོགས་ཤིག་།ཕྲོགས་ཤིག་།དེ་ནས་གཅིག་གིས་སྨྲས་པ། དེ་ན་འཁོད་པའི་རབ་ཏུ་བྱུང་བ་དྲུག་བཅུ་པོ་དག་ནི་འཕོང་གི་སློབ་དཔོན་ཤ་སྟག་ཡིན་ཞེས་གྲགས་པས་དེ་བཞིན་དུ་གཞོམ་པར་མི་ནུས་ཀྱིས། གང་གིས་ཚེ་དེ་དག་མཚན་མོ་ཆོས་ཉན་པ་དེའི་ཚེ་གཞོམ་མོ། །གཞན་དག་གིས་སྨྲས་པ། ཉི་མ་གང་ལ་དེ་དག་གི་ཆོས་ཉན་པ་འབྱུང་བར་འགྱུར། དེས་སྨྲས་པ། ཚེས་བརྒྱད་དང་བཅུ་བཞི་ལ་འབྱུང་སྟེ། དེ་ལ་ཚེས་བརྒྱད་ནི་ཐལ་ཟིན་པས་ཚེས་བཅུ་བཞི་ལ་འབྱུང་བར་འགྱུར་རོ། །དེ་དག་སོར་མོ་དག་གིས་ཉི་མ་བགྲང་ཞིང་འཁོད་འཁོད་པ་ནས་ཇི་ཙམ་ན་ཚེས་བཅུ་བཞི་ལ་བབ་སྟེ། དགེ་འདུན་གྱི་གནས་བརྟན་གྱིས་སོ་སོར་ཐར་པའི་མདོ་བཏོན་ཏེ་དགེ་འདུན་གྱི་གསོ་སྦྱོང་བྱས་ནས་ཆོས་སྒྲོག་པ་སེང་གེའི་ཁྲི་ལ་འཛེགས་ཏེ། འདི་སྐད་ཅེས་མི་མཆོག་འདུལ་བ་ཁ་ལོ་སྒྱུར་མཛད་པ། །ཀུན་སྦྱོར་འཆིང་བ་གཅོད་པ་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་བཞུགས་པའི་བཀའ་བཞིན་བྱེད་ལ་གསུངས། །ཞེས་སྨྲ་བར་བརྩམས་པ་དང ། གཡོན་ཅན་དེ་དག་གིས་སྒོ་བརྡུངས་སོ། །དགེ་སློང་དེ་དག་གིས་ཚོར་ནས་སྨྲས་པ། ཤེས་ལྡན་དག་ཁྱེད་ཅག་སུ་ཡིན། འཕགས་པ་དག་བདག་ཅག་རིགས་ཀྱི་བུ་དག་གོ། །དགེ་སློང་རྣམས་ཀྱིས་བསམས་པ། རི་བྲགས་ནས་སྐྱེ་བོའི་ཚོགས་དག་ཆོས་ཉན་དུ་ལྷགས་གོར་མ་ཆག་གིས་སྒོ་དབྱེའོ་སྙམ་ནས་དེ་དག་གིས་སྒོ་ཕྱེ་བ་དང་དེ་དག་ཞུགས་སོ། །ཇི་ཙམ་ན་གཞོམ་པར་བརྩམས་པ་དང ། དགེ་སློང་རྣམས་ཀྱིས་སྨྲས་པ། ཤེས་ལྡན་དག་ཁྱེད་ཅག་ན་རེ་བདག་ཅག་རིགས་ཀྱི་བུ་དག་གོ་ཞེས་ཟེར་ན་ད་ངེད་ཅག་འཇོམ་པར་བྱེད་དམ། དེ་དག་གིས་སྨྲས་པ། འཕགས་པ་དག་བདག་ཅག་ལ་མིང་གཉིས་ཏེ། སླད་རོལ་དུ་ནི་རིགས་ཀྱི་བུ་དག་ཅེས་བགྱི་ལ། ནང་དུ་ནི་ཆོམ་རྐུན་པ་དག་ཅེས་བགྱིའོ། །ཁྱེད་ཅག་མིང་འདོགས་པར་བྱེད་པ་ནི་ཉམས་སོ། །གཡོན་ཅན་དེ་དག་གིས་དགེ་སློང་དག་བཅོམ་སྟེ་དོང་ནས། དགེ་སློང་བཅོམ་པ་དེ་དག་གིས་གྲོས་བྱས་པ།
5.158a
ཚེ་དང་ལྡན་པ་དག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ་ཞེས་གསུངས་པས་རེ་ཤིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་སྦྱིན་དུ་བཅུག་སྟེ་ཡང་ཅི་བྱ། བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱས། བདག་ཅག་མཉན་ཡོད་ཉིད་དུ་དོང་ན་དེར་བདག་ཅག་རེ་རེ་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ་ཞེས་གྲོས་བྱས་སོ། །ཇི་ལྟར་འདོང་བར་བྱ། མཚན་མོ་འགེབས་པས་འདོང་ཞིང་ཉིན་མོ་ཐིབས་པོར་ཞུགས་ཏེ་འགྲོ་བར་བྱའོ་ཞེས་དེ་དག་གིས་ཁྱིམ་བདག་ལ་ཡང་མ་བལྟས་པར་དོང་ངོ ། །ཇི་ཙམ་ན་མཐར་གྱིས་མཉན་ཡོད་དུ་ཕྱིན་པ་དང ། དགེ་སློང་དག་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པ་དེ་དག་གིས་དགེ་སློང་དེ་དག་སྒྲེན་མོར་སྒོའི་གམ་ཡོ་ན་རྒྱུ་བ་མཐོང་ནས་སྨྲས་པ། གཅེར་བུ་སྒྲེ་བྱི་དག་ཁྱེད་ཅག་འདིར་ཅི་འདོད། འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ་འདུག་གནས་ཀྱང་མ་ཡིན་ནོ། །དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གཅེར་བུ་དག་མ་ཡིན་ནོ། །འོ་ན་ཁྱེད་སུ་ཡིན། དགེ་སློང་དག་གོ། །འདི་ལྟ་བུ་དག་དགེ་སློང་ཡིན་ནམ། གང་དག་ཆོམ་རྐུན་པོ་དག་གིས་བཅོམ་པ་དེ་དག་ཇི་ལྟ་བུ་ཡིན། ཁྱེད་ཅག་མིང་ཅི། སངས་རྒྱས་འཚོའོ། །ཆོས་འཚོའོ། །དགེ་འདུན་འཚོའོ། །ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཞེས་དེ་དག་གིས་སྒོ་ཕྱེ་ནས་དགེ་སློང་དེ་དག་འཇུག་ཏུ་བཅུག་སྟེ། དེ་དག་ལ་ལ་ལས་ནི་ཆོས་གོས་བྱིན། ལ་ལས་ནི་ཤམ་ཐབས་བྱིན། ལ་ལས་ནི་རྔུལ་ཟན་བྱིན། ལ་ལས་ནི་ལྷུང་བཟེད་བྱིན། ལ་ལས་ནི་ཆུ་ཚགས་བྱིན་ཏེ། བགོ་བཤའ་ཇི་ལྟ་བ་བཞིན་དུ་ཐམས་ཅད་བགོ་བཤའ་བྱས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མི་ཤེས་པ་ལ་གཙུག་ལག་ཁང་གི་སྒོ་གྱ་ཚོམ་དུ་དབྱེ་བར་མི་བྱ་སྟེ། གལ་ཏེ་འགའ་ཞིག་མཚན་མོ་སྒོ་འདོད་ན་དེའི་མིང་དང་རུས་དྲི་བར་བྱ་ཞིང་གལ་ཏེ་ངོ་ཤེས་ན་སྒོ་དབྱེ་བར་བྱ་ཞིང །
5.158b
ངོ་མི་ཤེས་ན་སྒོ་དབྱེ་བར་མི་བྱའོ། །གཞན་ཡང་ཆོས་མཉན་པ་ལ་བབ་པའི་ཚེ་དགེ་སློང་མེལ་ཙེ་བ་གཞག་པར་བྱ་ཞིང ། གལ་ཏེ་ཆོམ་རྐུན་པ་འོངས་ན་གཎ་ཌཱི་འོན་ཅིག་།གཎ་ཌཱི་ཐེ་འུ་འོན་ཅིག་།དུས་ཀྱི་འཁོར་ལོ་འོན་ཅིག་།སྣམ་སྦྱར་དང ། བདུན་པ་དང ། ལྔ་པ་དང ། གཏུར་བུ་དང ། རྒྱ་ཅང་དང ། ཤུར་བུ་དང ། ལྕག་པོད་དང ། ཤུར་བུ་ཕྲེའུ་འོན་ཅིག་ཅེས་ཚམ་ངམ་བྱའོ། །གཞན་ཡང་ངས་དགེ་སློང་དགེ་འདུན་གྱི་གནས་བརྟན་གྱི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་དགེ་འདུན་གྱི་གནས་བརྟན་གྱིས་ཆོས་མཉན་པ་ལ་བབ་པའི་ཚེ་དགེ་སྐོས་ལ་ཚེ་དང་ལྡན་པ་ཁྱོད་ཀྱིས་གཙུག་ལག་ཁང་གི་སྒོ་བཅད་དམ། སོ་སོར་བརྟགས་སམ། ཆོས་སྨྲ་བ་ལ་གསོལ་བ་བཏབ་བམ། བཤང་བ་དང་གཅི་བའི་སྐྱབས་བྱི་དོར་བྱས་སམ་ཞེས་དྲི་བར་བྱའོ། །དགེ་སློང་དགེ་འདུན་གྱི་གནས་བརྟན་གྱིས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་ཆོམ་རྐུན་པས་བཅོམ་པའི་དགེ་སློང་དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁོ་བོ་ཅག་གིས་ཁྱེད་ཅག་ལ་བགོ་བཤའ་ཇི་ལྟ་བ་བཞིན་དུ་བགོ་བཤའ་བྱས་མོད་ཀྱི་འོན་ཀྱང་ད་དུང་ཁྱེད་ཅག་ཆོས་གོས་དག་གིས་བྲེལ་གྱིས་ཁྱེད་ཅག་ཁྱིམ་བདག་གང་གི་གཙུག་ལག་ཁང་དུ་བཅོམ་པར་གྱུར་པའི་ཁྱིམ་བདག་དེ་ནི་དད་པ་ཅན་བཟང་བ་དགེ་བའི་བསམས་པ་ཅན་ཡིན་པས་དེ་ཉིད་ཀྱི་གཙུག་ལག་ཁང་དུ་དེང་ཤིག་དང་དེ་ཉིད་ཀྱིས་ཁྱེད་ལ་ཆོས་གོས་དག་གིས་མི་བྲེལ་བར་བྱེད་པར་འགྱུར་རོ། །དགེ་སློང་དེ་དག་མཐའ་གཅིག་ཏུ་དོང་སྟེ་ཕན་ཚུན་གྲོས་བྱ་བར་བརྩམས་པ། ཚེ་དང་ལྡན་པ་དག་ཚངས་པར་མཚུངས་པར་སྤྱོད་པ་འདི་དག་ཟེར་བ་ནི་བཟང་སྟེ། བདག་ཅག་གིས་ཁྱིམ་བདག་ལ་མ་བལྟས་པར་འོངས་པས་ཡང་ཕྱིར་དེ་ཉིད་དུ་དོང་ན་དེས་བདག་ཅག་ལ་ཆོས་གོས་དག་གིས་བགོ་བཤའ་བྱེད་པར་འགྱུར་བའི་གནས་ཀྱང་ཡོད་དོ། །ཞེས་དེ་དག་ཡང་ཕྱིར་དེར་དོང་ངོ ། །དེ་ནས་ཁྱིམ་བདག་དེས་མཐོང་ནས་སྨྲས་པ། ་
5.159a
འཕགས་པ་དག་ཅིའི་སླད་དུ་ཁྱེད་ཀྱིས་བདག་ལ་མ་གཟིགས་པར་བཞུད། དགེ་སློང་དེ་དག་གིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ་ཞེས་གསུངས་པས་དེས་ན་བདག་ཅག་ལ་བློ་བྱུང་བ་རེ་ཤིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་སྦྱིན་དུ་བཅུག་སྟེ་ཡང་ཅི་བྱ། བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱས། བདག་ཅག་མཉན་ཡོད་དུ་དོང་ན་དེར་བདག་ཅག་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ་སྙམ་ནས་དེའི་ཕྱིར་བདག་ཅག་མཉན་ཡོད་དུ་དོང་ངོ ། །ཁྱིམ་བདག་གིས་སྨྲས་པ། འཕགས་པ་དག་གལ་ཏེ་བདག་གི་གཙུག་ལག་ཁང་བཅོམ་པས་ཅི་ཁྱིམ་ན་བདག་དབང་བའི་རྫས་ཀྱང་བཅོམ་སྙམ་མམ། འཕགས་པ་དག་ཁྱེད་ཅག་གང་གི་སླད་དུ་བྱོན་པ་ནི་ལེགས་སོ། །ཞེས་ཁྱིམ་བདག་དེས་ཡང་རྒྱ་ཆེར་གུས་པ་དང་བཅས་པས་མཁོས་སུ་ཕབ་སྟེ་དགེ་སློང་རེ་རེ་ལ་ཡང་ཡོ་བྱད་བཅུ་གསུམ་བཅུ་གསུམ་ཕུལ་ལོ། །ཆོམ་རྐུན་པ་དེ་དག་ཡང་ཕྱིར་འོངས་ཏེ་གཙུག་ལག་ཁང་གི་སྒོ་རྡུང་བར་བྱེད་པ་དང ། དགེ་སློང་རྣམས་ཀྱིས་ཚོར་ནས་དེ་དག་གིས་སྨྲས་པ། ཚེ་དང་ལྡན་པ་དག་གཡོན་ཅན་དེ་དག་ཉིད་ལྷགས་ཀྱིས་ཚམ་ངམ་གྱིས་ཤིག་ཅེས་གཎ་ཌཱི་འོན་ཅིག་ཅེས། གཎ་ཌཱི་དེའི་ཐེའུ་དང ། དུས་ཀྱི་འཁོར་ལོ་དང ། སྣམ་སྦྱར་དང ། བདུན་པ་དང ། ལྔ་པ་དང ། གཏུར་བུ་དང ། རྒྱ་ཅང་དང ། ཤུར་བུ་དང ། ལྕག་པོད་དང ། ཤུར་བུ་ཕྲེའུ་འོན་ཅིག་ཅེས་ཚམ་ངམ་བྱ་བར་བརྩམས་པ་དང ། གཡོན་ཅན་དེ་དག་སྐྲག་སྟེ་འབྱེར་བར་བརྩམས་པ་ན་ལྷས་ཚིགས་སུ་བཅད་པ་སྨྲས་པ། ལེགས་གསུངས་རྐང་གཉིས་གཙོ་བོ་ཐུབ་པ་ཡིས། །ཉན་ཐོས་རྣམས་ཀྱི་ཚམ་ངམ་གང་བསྟན་པ། །ཚམ་ངམ་རབ་བརྩོན་པ་དག་མཆོག་ཡིན་གྱི། །གཡོན་ཅན་གཡུལ་ལ་སྡར་བ་གོ་གྱོན་པ། །ལྔ་བརྒྱ་དག་ནི་དེ་ལྟ་མ་ཡིན་ནོ། །གཡོན་ཅན་དེ་དག་ལ་དགེ་སློང་གི་རྒྱུས་ཤེས་པ་དེས་སྨྲས་པ། ཤེས་ལྡན་དག་ཁྱེད་ཅག་ཅིའི་ཕྱིར་འབྱེར་བར་བྱེད། དེ་དག་གིས་སྨྲས་པ། ཁྱེད་ཉིད་ན་རེ།
5.159b
འདི་ན་འཁོད་པའི་རབ་ཏུ་བྱུང་བ་དྲུག་བཅུ་པོ་དག་ནི་འཕོང་གི་སློབ་དཔོན་ཤ་སྟག་ཡིན་ནོ་ཞེས་ཟེར་བས་ཇི་ལྟར་མི་འབྲོས་སུ་རུང ། གཞན་ཡང་བདག་ཅག་གིས་གཎ་ཌཱི་ཞེས་བྱ་བ་ལ་སོགས་པའི་མཚོན་དེ་ལྟ་བུ་དག་གི་མིང་ནི་སྔོན་ལན་འགའ་ཡང་མ་ཐོས་སོ། །དེས་སྨྲས་པ། དེ་དག་ནི་མཚོན་མ་ཡིན་ནོ། །འོ་ན་དེ་དག་ཅི་ཡིན། རེ་ཤིག་གཎ་ཌཱི་ཞེས་བྱ་བ་ནི་དེ་དག་གི་བརྡུང་བའོ། །གཎ་ཌཱིའི་ཐེའུ་ཞེས་བྱ་བ་ནི་གང་གིས་རྡུང་བར་བྱེད་པའོ། །དུས་ཀྱི་འཁོར་ལོ་ནི་དུས་ཡོངས་སུ་གཅོད་པར་བྱེད་པའོ། །སྣམ་སྦྱར་དང ། བདུན་པ་དང ། ལྔ་པ་ཞེས་བྱ་བ་དེ་དག་ནི་ཆོས་གོས་དག་གི་མིང་ངོ ། །གཏུར་བུ་ཞེས་བྱ་བ་ནི་གང་དུ་དེ་དག་གཞུག་པའོ། །རྒྱ་ཅང་དང ། ཤུར་བུ་དང ། ལྕག་པོད་དང ། ཤུར་བུ་ཕྲེའུ་ཞེས་བྱ་བ་དེ་དག་གི་སྐ་རགས་ཀྱི་མིང་ཡིན་གྱི་ཁྱེད་ཅག་མ་སྡར་བར་ཡང་ཕྱིར་འདོང་ལ་གཞོམ་པར་བྱའོ་ཞེས་སྨྲས་ནས། དེ་དག་ཡང་ཕྱིར་ལོག་སྟེ་ཆོམ་རྐུན་པའི་དམག་དཔོན་གྱིས་ཡ་གད་གཙུགས་ཏེ་འཛེག་པར་བརྩམས་པ་དང ། དེ་ན་རྒན་ཞུགས་ཞིག་མེལ་ཙེ་བར་བཞག་པ་དེས་ཆོམ་རྐུན་པའི་དམག་དཔོན་འཛེག་པ་མཐོང་ནས་རྒན་ཞུགས་དེས་བསམས་པ། གཡོན་ཅན་འདི་དག་ནི་གང་དག་གིས་བདག་ཅག་ལྷུང་བཟེད་དང་ཆོས་གོས་ཕྲོགས་ཏེ་སྒྲིན་མོར་བཞག་པ་དག་ཡིན་གྱིས། གལ་ཏེ་འདི་དག་ལ་བཏང་སྙོམས་བྱས་ན་ཡང་འདི་དག་གིས་བདག་ཅག་གི་ལྷུང་བཟེད་དང་ཆོས་གོས་ཕྲོགས་ཏེ་སྒྲིན་མོར་བཞག་པར་འགྱུར་བས་འདི་དག་བསྡིགས་པར་བྱའོ་སྙམ་ནས། རྒན་ཞུགས་དེས་དལ་བུས་ཁད་ཀྱིས་ཁད་ཀྱིས་སོང་སྟེ་ཆོམ་རྐུན་པའི་དམག་དཔོན་དེའི་མགོར་གཎ་ཌཱི་འཕངས་པ་དང་དེའི་གླད་པ་ཞོམ་ནས་དེ་བསྣུན་པ་དྲག་པོས་ཕོག་པས། སྡུག་བསྔལ་གྱི་ཚོར་བ་དག་གིས་ཉེན་ནས་ཚེགས་ཆེན་པོས་བབས་ཏེ་ཅུང་ཞིག་ཏུ་སོང་བ་དང་དུས་ལ་བབ་བོ། །རྒན་ཞུགས་དེས་ཆོམ་རྐུན་པ་ཆོམ་རྐུན་པ་ཞེས་ཀུ་ཅོའི་སྒྲ་ཕྱུང་བ་དང ། དགེ་སློང་རྣམས་ཀྱིས་ཆོས་ཉན་པ་བཅད་དེ། ཁང་སྟེང་དུ་འཛེགས་ནས་སྨྲས་པ། ཆོམ་རྐུན་པ་དེ་དག་གར་དོང ། རྒན་ཞུགས
5.160a
་ ཀྱིས་སྨྲས་པ། ཕྱོགས་འདིར་ཡ་གད་བཙུགས་ཏེ་འཛེགས་པ་ན་ཁོ་བོས་བསྡིགས་ནས་བྱེར་རོ། །དགེ་སློང་རྣམས་ཀྱིས་སྨྲས་པ། གལ་ཏེ་བྱེར་ན་ལེགས་སོ་ཞེས་དེ་དག་བབས་ཏེ། ཇི་ཙམ་ན་མཚན་མོ་ནམ་ནངས་པ་དང ། གཙུག་ལག་ཁང་གི་ཉེན་ཀོར་སོ་སོར་བརྟགས་པར་བརྩམས་ཏེ། ཆོམ་རྐུན་པ་དེ་དག་འཛེགས་པར་གྱུར་པའི་ཕྱོགས་དེ་གང་ཡིན་ཞེས་དེ་དག་གིས་སོ་སོར་བརྟགས་པ་ན་ཁྲག་མཐོང་ངོ ། །དེ་དག་ཁྲག་རྗེས་སུ་དོང་བ་དང་ཆོམ་རྐུན་པའི་དམག་དཔོན་བསད་པ་མཐོང་ངོ ། །མཐོང་ནས་ཀྱང་བསླབ་པ་འཁྲུགས་པའི་འཇིགས་པས་སྐྲག་སྟེ་སྨྲ་བར་བརྩམས་པ། ཚེ་དང་ལྡན་པ་དག་བདག་ཅག་སྔོན་མ་བཅོམ་གྱིས་བདག་ཅག་གང་གིས་ཕམ་པར་གྱུར་པའི་ལྟུང་བ་བྱུང་བས་ད་ནི་བཅོམ་པར་གྱུར་ཏོ་ཞེས་དེ་དག་འགྱོད་པ་སྐྱེས་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་གིས་ཅི་ནས་ཀྱང་འདི་ལ་བསྣུན་པས་བསྣུན་པར་བྱའོ་སྙམ་པ་དེ་ལྟ་བུའི་སེམས་ཀྱིས་འཕང་བར་མི་བྱ་བར་འདི་ལྟར་གློ་འམ་རྒྱབ་ལོགས་སུ་འཕང་བར་བྱ་ཞིང་བསྡིགས་པ་བསྐྱེད་པའི་ཕྱིར་ཚམ་ངམ་བྱའོ། །དགེ་སློང་གིས་ཅི་ནས་ཀྱང་བསྣུན་པས་བསྣུན་པར་བྱའོ་སྙམ་པ་དེ་ལྟ་བུའི་སེམས་ཀྱིས་འཕེན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་གཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་དུས་གཞན་ཞིག་ན་ཁྱིམ་བདག་དེ་ཉེ་དུ་ཟད་པར་གྱུར་ཅིང་ནོར་དང
5.160b
ལོངས་སྤྱོད་ཀྱང་ཟད་པར་གྱུར། དེའི་ཆུང་མ་ཡང་དུས་ལ་བབ་ནས་དེས་བུ་ལ་སྨྲས་པ། བུ་ཁོ་བོས་ནི་རྒས་པའི་གནས་སྐབས་སུ་ནོར་སྒྲུབ་ཏུ་འགྲོ་མི་ནུས་ཀྱིས་རབ་ཏུ་འབྱུང་དུ་འགྲོའོ། །བུས་སྨྲས་པ། ཡབ་གལ་ཏེ་དེ་ལྟ་ན་བདག་ཀྱང་རབ་ཏུ་འབྱུང་ངོ ། །བུ་ལེགས་སོ། །ཞེས་དེས་ཁྱེའུ་དེ་ཁྲིད་དེ་རྒྱལ་བྱེད་ཀྱི་ཚལ་དུ་སོང་ནས་དགེ་སློང་གི་དྲུང་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། ཅི་ཁྱེའུ་འདི་ཡང་རབ་ཏུ་འབྱུང་ངམ། འཕགས་པ་རབ་ཏུ་འབྱུང་ངོ ། །དགེ་སློང་དེ་ཁྱེའུ་དེ་འདོད་པས་དེ་བུ་དང་བཅས་ཏེ་རབ་ཏུ་བྱུང་ངོ ། །ཆོས་ཉིད་ཀྱིས་ན་རྒན་པའི་མཐའ་ནས་རྙེད་པ་འཐོབ་ལ། གཞོན་པའི་མཐའ་ནས་ལས་སུ་བསྐོ་བ་ཡིན་པས་རྒན་ཞུགས་ཀྱི་བུ་རྟག་ཏུ་ལས་སུ་སྐོ་བར་བྱེད་ནས། དེས་ཕ་ལ་སྨྲས་པ། ཡབ་བདག་ཅག་གཉིས་གང་ཅུང་ཟད་ཟིལ་གྱིས་ནོན་པ་དེ་ཐམས་ཅད་ཐོས་པ་ཉུང་བ་ལས་གྱུར་པ་ལགས་ཀྱིས་བཞེངས་ཤིག་དང ། སྐོལ་ཅག་གཉིས་ཡུལ་གཞན་དུ་བཞུད་ལ་ཐོས་པ་གཟུང་བར་བགྱིའོ། །རྒན་ཞུགས་ཀྱིས་སྨྲས་པ། བུ་ལེགས་ཀྱིས་འདོང་ངོ་ཞེས་དེ་གཉིས་ཡུལ་གཞན་དུ་དོང་ངོ ། །འོན་ཀྱང་གཞོན་པའི་མཐའ་ཉིད་ནས་ལས་སུ་བསྐོ་བས་དེ་གཉིས་སོན་མ་ཐག་ཁོ་ནར་ལས་སུ་བསྐོ་བར་བསྐོས་པ་དང ། བུས་རྒན་ཞུགས་ལ་སྨྲས་པ། ཡབ་མཉན་ཡོད་ན་ལས་སུ་བསྐོ་བ་མཆིས་སུ་ལགས་ཀྱང་དེ་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང་དུས་དང་དུས་སུ་དགེ་སློང་ཆེ་གེ་མོ་ཞིག་གིས་ནི་དགྲ་བཅོམ་པ་ཉིད་མངོན་དུ་བྱས་སོ། །ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་ཡང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་དུ་དད་ཅིང་བཙུན་མོ་ཕྲེང་ལྡན་མ་དང་རྒྱལ་རིགས་དབྱར་ཚུལ་མ་དང ། བླ་མཁྱེན་དྲང་སྲོང་བྱིན་དང ། རྙིང་པ་དང ། དགེ་བསྙེན་མ་ས་ག་དང ། རི་དགས་འཛིན་གྱི་མ་དང ། གཞན་ཡང་དད་པ་ཅན་མང་དུ་མཆིས་པས། དེ་ན་ཟང་ཟིང་གི་ལོངས་སྤྱོད་དང ། ཆོས་ཀྱི་ལོངས་སྤྱོད་ཆེན་པོ་ཡང་མཆིས་ཀྱིས། དེར་བཞུད་དོ་ཞེས་སྨྲས་ནས།
5.161a
དེ་གཉིས་ཅི་དགའ་བར་ལྗོངས་སུ་འཁོད་ནས་མཉན་ཡོད་ག་ལ་བ་དེར་རྒྱུ་ཞིང་དོང་བ་ན་མཐར་གྱིས་རྒྱུ་ཞིང་འདོང་བའི་ཚེ་མཉན་ཡོད་དུ་ཕྱིར་ཕྱིན་ཏོ། །ཇི་ཙམ་ན་རྒྱལ་བྱེད་ཀྱི་ཚལ་དང་ཉེ་བར་ཕྱིན་པ་ན་གཎ་ཌཱི་ཡང་བརྡུངས་ནས་བུས་སྨྲས་པ། ཡང་གཙུག་ལག་ཁང་དུ་གཎ་ཌཱི་བརྡུངས་ཀྱིས་མྱུར་བ་མྱུར་བར་བཞུད་དོ། །རྒན་ཞུགས་དེས་རྒས་པར་གྱུར་པས་ཤིན་དུ་ངལ་ཞིང་འགྲོ་མི་ནུས་པས་དེ་དལ་བུས་འགྲོ་བ་ན་བུས་དེའི་གཉའ་བ་ནས་བཟུང་སྟེ་ཕུལ་བ་དང ། རྒན་ཞུགས་དེས་མྱུར་བ་མྱུར་བར་འགྲོ་བར་བརྩམས་སོ། །བུས་བསམས་པ། ཐབས་འདི་ནི་བཟང་པོ་ཞིག་ཡིན་གྱིས་ཡང་ཕུལ་བར་བྱའོ་སྙམ་ནས། བུས་དེས་རྒན་ཞུགས་དེ་ཡང་དེ་བཞིན་དུ་ཕུལ་བ་དང ། རྒན་ཞུགས་དེ་ས་ལ་ཁས་བུབ་དུ་སྒྱེལ་ནས་དེའི་ཁ་ཕང་ལོས་གློགས་པའི་སས་གང་སྟེ་དུས་ལ་བབ་བོ། །བུ་དེས་ངུད་མོས་བཏབ་སྟེ་རྒན་ཞུགས་ཀྱི་རོ་དེ་ལམ་གྱི་མཐའ་གཅིག་ཏུ་བོར་རོ། །དེ་ནས་བུ་དེས་ལྷུང་བཟེད་དང་ཆོས་གོས་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་བ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། རྒན་ཞུགས་ཀྱི་བུ་འོངས་པ་ལེགས་སོ། །འོངས་པ་ལེགས་སོ། །ཁྱོད་ཀྱི་རྒན་ཞུགས་དེ་ག་ལ་འདུག་ཅེས་དྲིས་པ་དང ། གསར་བུ་དེས་ངུ་བར་བརྩམས་སོ། །དགེ་སློང་རྣམས་ཀྱིས་སྨྲས་པ། བུ་ཅིའི་ཕྱིར་ངུ་བར་བྱེད། གསར་བུ་དེས་སྨྲས་པ། བདག་གི་རྒན་ཞུགས་དེ་དུས་ལ་བབ་བོ། །དགེ་སློང་དེ་དག་གིས་སྨྲས་པ། བུ་འདུ་བྱེད་ཐམས་ཅད་ཀྱི་ཆོས་དེ་ལྟ་བུ་ཡིན་ལ་ཁྱོད་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་ཡིན་པས་མྱ་ངན་མ་བྱེད་ཅིག་།གསར་བུ་དེས་སྨྲས་པ། དེ་བདག་གིས་བསད་དོ། །དགེ་སློང་དེ་དག་གིས་སྨྲས་པ། བུ་འོ་ན་ཁྱོད་ཀྱིས་མཚམས་མེད་པའི་ལས་གང་ཡིན་པ་ཡང་བྱས་ལ་ཕམ་པར་འགྱུར་བའི་ལྟུང་བ་གང་ཡིན་པ་ཡང་བྱུང་བས་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་འགྱུར་བས་ད་ངུ་བའི་རིགས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང །
5.161b
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་ལམ་དུ་ཞུགས་པས་དགེ་སློང་ལམ་གྱིས་དུབ་པ་ཕུལ་བར་མི་བྱའོ། །ངས་དགེ་སློང་ལམ་དུ་ཞུགས་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ལམ་དུ་ཞུགས་པས་དགེ་སློང་ལམ་གྱིས་དུབ་པ་ངལ་སོར་གཞུག་པར་བྱ། ཆོས་གོས་གསུམ་དང ། ལྷུང་བཟེད་དང ། ཆུ་ཚགས་དང ། ལྷུང་བཟེད་ཀྱི་སྣོད་དང ། བར་བུར་སྣོད་ཀྱི་རྫས་བླང་བར་བྱའོ། །དུས་ཤེས་པར་བྱ་སྟེ། གལ་ཏེ་འགྲོ་ནུས་ན་དེ་ལྟ་ན་ལེགས། གལ་ཏེ་མི་ནུས་ན་ཆེས་སྔར་སོང་སྟེ། ལྷུང་བཟེད་བཀྲུ་བར་བྱ། གོས་གཞག་པར་བྱ། སྣོད་དག་བྱིན་ལེན་བྱེད་དུ་བཅུག་ནས་སོ་སོར་བརྟག་པར་བྱའོ། །གལ་ཏེ་འོང་མི་ནུས་ན་ཟས་མནོས་ཏེ་བསུ་བར་བྱའོ། །དུས་མ་ཡིན་ན་སྐོམ་གྱིས་བསུ་བར་བྱའོ། །དགེ་སློང་ལམ་དུ་ཞུགས་པས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒན་ཞུགས་ཀྱིས་བུ་འདིས་ཕ་སྲོག་དང་བྲལ་ཡང་མཚམས་མ་མཆིས་པའི་ཁ་ན་མ་ཐོ་བས་ཀྱང་མ་རེག་ལ། ཕམ་པར་འགྱུར་བའི་ལྟུང་བ་ཡང་མ་བྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཤིག་ཏུ་མ་ཟད་དེ་འདི་ལྟར་འདས་པའི་དུས་ན་ཡང་འདིས་ཕ་སྲོག་དང་ཕྲལ་ཡང་མཚམས་མེད་པའི་ཁ་ན་མ་ཐོ་བས་མ་རེག་སྟེ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་བཙོ་བླག་མཁན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་དུས་གཞན་ཞིག་ན་རི་བྲགས་དེར་དུས་སྟོན་བྱུང་ནས་དེ་ལ་གོས་བཀྲུ་བཤལ་བྱ་བ་
5.162a
མང་པོ་དག་བྱུང་བ་དང་དེས་བུ་ལ་སྨྲས་པ། བུ་གོས་མང་པོ་དག་བཀྲུ་བཤལ་བྱ་དགོས་པས་ཁོ་བོ་ཁྱིམ་དུ་སོང་སྟེ་ཟན་ཟ་མི་ནུས་ཀྱི་ཚུར་ཤོག་གོས་དག་ཁྱེར་ཏེ་འདོང་ངོ ། །ཕྱིར་སོང་ལ་ཟས་ཁྱེར་ཏེ་ཤོག་ཤིག་།དེ་བུ་དང་ལྷན་ཅིག་གོས་དག་ཁྱེར་ཏེ་སོང་ངོ ། །བུ་ཕྱིར་སོང་སྟེ་ཟན་ཁྱེར་ཏེ་འོངས་ནས་དེས་ཟན་ཟོས་ཏེ་སྨྲས་པ། བུ་ཁོ་བོ་ངལ་གྱིས་ཉལ་ལོ། །ཁྱོད་རེ་ཤིག་གོས་དག་བཀྲུ་བཤལ་གྱིས་ཤིག་།བུས་སྨྲས་པ། དེ་ལྟར་བགྱིའོ། །བཙོ་བླག་མཁན་དེ་ཕྱོགས་གཅིག་ཏུ་གློས་ཕབ་སྟེ་གཉིད་ལོག་གོ། །དེ་སྤྱི་ཆེར་ཞིག་ཡིན་པས་དེའི་མགོ་ལ་སྦྲང་བུ་ཆགས་སོ། །ཇི་ཙམ་ན་བཙོ་བླག་མཁན་གྱི་བུ་དེས་གོས་དག་བཀྲུ་བཤལ་བྱས་ནས་ཕའི་གན་དུ་སོང་བ་དང་ཕའི་མགོ་ལ་སྦྲང་བུ་ཆགས་པ་མཐོང་ནས་དེས་བསྐྲད་པར་བརྩམས་པ་དང ། སྦྲང་བུ་ཁྲག་གིས་མྱོས་པ་འཕུར་དུ་མ་བཏུབ་ནས་བུ་དེ་མི་བཟོད་པ་སྐྱེས་ཏེ་བསམས་པ། སྦྲང་བུ་འདིས་བདག་གི་ཕ་གསོན་བཞིན་དུ་ཁྲག་འཐུང་བར་བྱེད་ཀྱིས་གསད་པར་བྱའོ་སྙམ་ནས། བུ་དེས་དེ་ལ་སྤང་ལེབ་ཀྱིས་བསྣུན་པ་དང ། །སྦྲང་བུ་དེ་ནི་བྲོས་ཏེ་སོང་གི་ཕའི་གླད་པ་ཞོམ་ནས་དེ་དུས་ལ་བབ་པ་དང ། ལྷས་ཚིགས་སུ་བཅད་པ་སྨྲས་པ། དགྲ་བོ་བློ་གྲོས་ལྡན་པ་མཆོག་ཡིན་ཏེ། །མཛའ་བཤེས་བློ་གྲོས་བྲལ་བ་དེ་ལྟ་མིན། །བློ་གྲོས་ཆུང་ངུས་སྦྲང་བུ་གསད་སྙམ་ནས། །ཐོ་བས་ཕ་ཡི་གླད་པ་བཅོམ་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་བཙོ་བླག་མཁན་གང་ཡིན་པ་དེ་ནི་རྒན་ཞུགས་འདི་ཉིད་ཡིན་ནོ། །དེའི་ཚེ་དེའི་དུས་ན་བཙོ་བླག་མཁན་གྱི་བུ་གང་ཡིན་པ་དེ་ནི་རྒན་ཞུགས་ཀྱི་བུ་འདི་ཉིད་ཡིན་ཏེ། འདིས་དེའི་ཚེ་ཡང་ཕ་སྲོག་དང་ཕྲལ་ཡང་མཚམས་མེད་པའི་ཁ་ན་མ་ཐོ་བས་མ་རེག་ལ། ད་ལྟར་ཡང་ཕ་སྲོག་དང་ཕྲལ་ཡང་མཚམས་མེད་པའི་ཁ་ན་མ་ཐོ་བས་ཀྱང་མ་རེག་ལ་ཕམ་པར་འགྱུར་བའི་ལྟུང་བ་ཡང་མ་བྱུང་ངོ ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་གསུམ་པ་རྫོགས་སྷོ།། ་་་་་་་་།།
5.162b
སངས་རྒྱས་བཅོམ་ལྡན་འདས་ཡངས་པ་ཅན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་ཉ་པ་ལྔ་བརྒྱ་ཆུ་ཀླུང་ཡིད་འོང་ལྡན་ལ་རྟེན་ཅིང་འཁོད་དོ། །དེ་དག་ལ་རྒྱ་མོ་སྤྱོད་པ་དང ། སྤྱོད་པ་ཆེན་མོ་ཞེས་བྱ་བ་གཉིས་ཤིག་ཡོད་དོ། །དེ་དག་ལན་འགའ་ནི་རྒྱ་མོ་སྤྱོད་པ་འཛུད་པར་བྱེད་ལ། ལན་འགའ་ནི་སྤྱོད་པ་ཆེན་མོ་འཛུད་པར་བྱེད་དེ། གང་གི་ཚེ་ཉ་དག་ཉོ་བ་མེད་པ་དེའི་ཚེ་ན་རྒྱ་མོ་སྤྱོད་པ་འཛུད་པར་བྱེད་ལ། གང་གི་ཚེ་ཉ་དག་ཉོ་བ་ཡོད་པ་དེའི་ཚེ་ནི་སྤྱོད་པ་ཆེན་མོ་འཛུད་པར་བྱེད་དོ། །ཇི་ཙམ་དུས་གཞན་ཞིག་ན་ཡངས་པ་ཅན་དུ་དུས་སྟོན་བྱུང་ནས། དེ་དག་གིས་རྒྱ་མོ་གཉིས་ཀ་བཅུག་སྟེ། ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་བཅུག་།ཉིས་བརྒྱ་ལྔ་བཅུས་ནི་སྤྱོད་པ་ཆེན་པོ་བཅུག་གོ། །གང་དག་གིས་རྒྱ་མོ་སྤྱོད་པ་བཅུག་པ་དེ་དག་གིས་ནི་ཉ་དང ། རུས་སྦལ་དང ། སྦལ་པ་དང ། ཆུ་སྲིན་བྱིས་པ་གསོད་དང ། ཉ་ཁྱི་བ་ལ་སོགས་མང་པོ་དག་འདི་ལྟ་སྟེ། དཔེར་ན་ཏིལ་དང ། འབྲས་ཐུག་པོ་ཆེ་དང ། རྒྱ་ཤུག་དང ། རྒྱ་སྲན་ལ་སོགས་པ་བཞིན་དུ་ཕུང་པོ་ཆེན་པོར་རྣམ་པར་བཞག་གོ། །གང་དག་གིས་རྒྱ་མོ་སྤྱོད་པ་ཆེན་མོ་བཅུག་པ་དེ་དག་གིས་ནི་རྒྱ་མཚོ་ཆན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པ་ཆུ་སྲིན་ཉའི་རིགས་བོང་ཚོད་ཆེན་པོ་ཉལ་བ་ཟིན་ནས་དེ་དག་གིས་དེ་དྲང་བར་བརྩམས་སོ། །དེ་དག་གིས་དྲངས་པ་ན་དེ་སད་ནས་ཉ་པ་ཉིས་བརྒྱ་ལྔ་བཅུ་པོ་དེ་དག་དང་རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་ཞུགས་སོ། །ཉ་པ་དེ་དག་གིས་ཉ་པ་ཉིས་བརྒྱ་ལྔ་བཅུ་པོ་གཞན་དག་ལ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང་བདག་ཅག་ཁྱེར་གྱིས་ར་མདའ་ཟློག་ཤིག་ཅེས་བྱས་སོ། །དེ་དག་གིས་ཐོས་ནས་ཉ་པ་ཉིས་བརྒྱ་ལྔ་བཅུ་པོ་གཞན་དག་ཀྱང་ལྷགས་ཏེ་དེ་ཉིད་ལ་རུབ་པ་དང་དེས་ཉ་པ་ལྔ་བརྒྱ་དང་རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་ཞུགས་ནས་གཟུང་བར་མ་ནུས་སོ། །སྐྱབས་མེད་པ་དེ་དག་གིས་ཀུན་དུ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང་བདག་ཅག་ཁྱེར་གྱིས་གྲོགས་གྱིས་ཤིག་ཅེས་ར་མདའ་བཟློག་པ་དང་ལས་མ་མཐོང་བའི་མི་བ་ལང་རྫི་དག་དང ། ཕྱུགས་རྫི་དག་དང ། ཤིང་ཐུན་དག་དང ། རྩཝ་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་དང །
5.163a
གཞན་ཡང་སྲོག་ཆགས་བརྒྱ་སྟོང་ཕྲག་དུ་མ་དག་ལོག་ནས་དེ་དག་གིས་ལུས་སྨས་པ་དང ། རྣམ་པར་སྨས་པ་དག་གིས་རྒྱ་མོ་རལ་པ་དང་རབ་ཏུ་རལ་པས་ཆུ་སྲིན་དེ་ཆུ་ནས་སྐམ་ལ་ཕྱུང་ངོ ། །དེ་ལ་མགོ་བཅཝ་བརྒྱད་དང ། མིག་སུམ་ཅུ་རྩ་དྲུག་ཡོད་དེ། དེའི་མགོ་ལ་ལ་ནི་གླང་པོ་ཆེའི་མགོ་འདྲ། ལ་ལ་ནི་རྟའི་མགོ་འདྲ། ལ་ལ་ནི་རྔ་མོའི་མགོ་དང ། བོང་བུའི་མགོ་དང ། བ་ལང་གི་མགོ་དང ། སྤྲེའུ་ཡི་མགོ་དང ། སེང་གེའི་མགོ་དང ། སྟག་གི་མགོ་དང ། དོམ་གྱི་མགོ་དང ། དྲེད་མོའི་མགོ་དང ། གུང་གི་མགོ་དང ། བྱི་ལའི་མགོ་དང ། རའི་མགོ་དང ། ལུག་གི་མགོ་དང ། རི་དགས་ཀྱི་མགོ་དང ། མ་ཧེའི་མགོ་དང ། ཕག་གི་མགོ་དང ། ཁྱིའི་མགོ་འདྲའོ། །ཀུན་དུ་ཆུ་ཀླུང་ཡིད་འོང་ལྡན་པའི་ཉ་པ་ལྔ་བརྒྱས་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པའི་ཆུ་སྲིན་ཉའི་རིགས་བོང་ཚོད་ཆེན་པོ་ཞིག་རྒྱ་མོ་སྤྱོད་པ་ཆེན་མོས་ཟིན་ཏེ། ཆུ་ནས་སྐམ་ལ་ཕྱུང་ཞིང་དེ་ལ་མགོ་བཅཝ་བརྒྱད་དང་མིག་སུམ་ཅུ་རྩ་དྲུག་ཡོད་དོ་ཞེས་སྒྲས་ཁྱབ་པར་གྱུར་ཏོ། །དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མ་དག་ཆུ་ཀླུང་ཡིད་འོང་ལྡན་གྱི་འགྲམ་དུ་ལྷགས་ཏེ། ཁ་ཅིག་ནི་ལྟད་མོ་སྐྱེས་པར་གྱུར། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བར་གྱུར་ཏོ། །རྫོགས་བྱེད་ལ་སོགས་པའི་སྟོན་པ་དྲུག་པོ་ཡངས་པ་ཅན་ན་རྟེན་ཅིང་གནས་པ་དག་ཀྱང་ལྟད་མོ་སྐྱེས་ཏེ་དེར་ལྷགས་སོ། །སྐྱེ་བོའི་ཚོགས་ཆེན་པོ་ཡང་ཡ་མཚན་སྐྱེས་ཏེ་མིག་ཚུགས་སུ་རྟོག་ཅིང་ཤེས་ལྡན་དག་འདིའི་མགོ་ལ་ལ་ནི་གླང་པོ་ཆེའི་མགོ་འདྲ་ལ་དེ་ནས་རྟོག་པར་བྱེད། དེའི་མགོ་ལ་ལ་ནི་ཁྱིའི་བར་གྱི་མགོ་འདྲ་ལ་དེ་ནས་རྟོག་པར་བྱེད་དོ་ཞེས་ཟེར་རོ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང ། མི་གཟིགས་པ་དང ། མ་རིག་པ་དང ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་བཞུགས་པ། བསྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས
5.163b
པ་རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱངས་པ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་འགྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང ། ཉམ་ང་བ་དང ། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་བབ། གང་ནི་ངན་སོང་ལ་འབབ། ངས་གང་ནི་ངན་སོང་གི་ལམ་ནས་བསླངས་ཏེ་མཐོ་རིས་དང ། ཐར་པ་དང ། འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་པ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་རྣམས་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ཡིན་པ་ནི་རྣམ་པར་གྲོལ་བར་བྱ་ཞེས་མཁྱེན་པ་དང ། གཟིགས་པ་འཇུག་གོ། །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ
5.164a
བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པ་འང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །གཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་བྱམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ། ཆུ་སྲིན་ཉའི་རིགས་གནོད་པ་དང ། ཉམ་ང་བ་དང ། མི་བདེ་བ་ཐོབ་པར་གྱུར་པ་འདི་ནི་སྔོན་གྱི་སངས་རྒྱས་དག་ལ་བྱ་བ་ལྷག་པར་བྱས་པ་ཡིན་གྱིས། ངས་ཆུ་སྲིན་ཉའི་རིགས་འདི་ལ་རྟེན་ཏེ་གདུལ་བར་གྱུར་པའི་རྒྱ་མོ་ཆེན་མོ་དྲང་བར་བྱས། དེའི་ཕྱིར་ཆུ་ཀླུང་ཡིད་འོང་ལྡན་གྱི་འགྲམ་དུ་འགྲོའོ་སྙམ་མོ། །སངས་རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་རྣམས་ཀྱི་ཆོས་ཉིད་ནི་གདུལ་བར་གྱུར་པའི་སྐྱེ་བོ་ལ་རྗེས་སུ་ཐུགས་བརྩེ་བས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང ། དུད་འགྲོ་རྒྱུ་བ་དང ། ཡི་དགས་རྒྱུ་བ་དང ། ལྷ་རྒྱུ་བ་དང ། ལྗོངས་རྒྱུ་བ་དང ། ཆུ་ཀླུང་རྒྱུ་བ་དང ། རི་རྒྱུ་བ་དང ། དུར་ཁྲོད་རྒྱུ་བ་དང ། གཙུག་ལག་ཁང་རྒྱུར་གཤེགས་པས་དོན་འདིར་ནི་སངས་རྒྱས་བཅོམ་ལྡན་འདས་ཆུ་ཀླུང་རྒྱུར་གཤེགས་པར་བཞེད་ནས་འཛུམ་པ་མཛད་དོ། །ཆོས་ཉིད་ཀྱིས་ནི་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཁ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ནས་ཁ་ཅིག་ནི་འོག་ལོགས་སུ་འདོང ། ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང ། ཐིག་ནག་དང ། བསྡུས་གཞོམ་དང ། ངུ་འབོད་དང ། ངུ་འབོད་ཆེན་པོ་དང ། ཚ་བ་དང ། རབ་ཏུ་ཚ་བ་དང ། མནར་མེད་པ་དང ། ཆུ་བུར་ཅན་དང ། ཆུ་བུར་རྡོལ་བ་དང ། སོ་ཐམས་ཐམས་དང ། ཀྱེ་ཧུད་ཟེར་བ་དང ། ་ཆུ་ཟེར་བ་དང ། ུཏྤལ་ལྟར་གས་པ་དང ། པད་མ་ལྟར་གས་པ་དང ། པད་མ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང
5.164b
དག་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་འདོང་བ་དེ་དག་ནི་རྒྱལ་ཆེན་བཞི་པ་དང ། སུམ་ཅུ་རྩ་གསུམ་པ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་རིས་དང ། ཚངས་པའི་མདུན་ན་འདོན་དང ། ཚངས་ཆེན་དང ། འོད་ཆུང་དང ། ཚད་མེད་འོད་དང ། འོད་གསལ་དང ། དགེ་ཆུང་དང ། ཚད་མེད་དགེ་དང ། དགེ་རྒྱས་དང ། སྤྲིན་མེད་དང ། བསོད་ནམས་སྐྱེས་དང ། འབྲས་བུ་ཆེ་དང ། མི་ཆེ་དང ། མི་གདུང་བ་དང ། གྱ་ནོམ་སྣང་དང ། ཤིན་ཏུ་མཐོང་དང ། འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པ་ཞེས་བྱ་བའི་སྒྲ་སྒྲོག་པར་བྱེད་ཅིང་ཚིགས་སུ་བཅད་པ་གཉིས་པོ། བརྩམས་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས
5.165a
འོད་ཟེར་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་ལོང་བུར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་ལུང་སྟོན་པར་བཞེད་ན་ནི་གཙུག་ཏོར་ཏུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ལྟེ་བར་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། བཙུན་པ་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། ཚིགས་སུ་བཅད་པ་ཡང་གསོལ་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བདལ་བར་གྱུར་པ་ཇི་བཞིན་ནོ། །རྒོད་བྲལ་ཞུམ་དང་རྒྱགས་པ
5.165b
རབ་སྤངས་པ། །སངས་རྒྱས་འགྲོ་བ་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བསྟན་པ་རང་བློས་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང ། །དམ་པ་དགེ་བ་དག་གིས་བསལ་དུ་གསོལ། །ཚཝ་ཆུ་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་རྣམས་གློ་བུར་འཛུམ་མི་སྟོན། །བསྟན་པ་ཅི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་ཀྱིས། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ཆུ་ཀླུང་རྒྱུར་གཤེགས་བཞེད་ཀྱིས། ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་དུ་ཆུ་ཀླུང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཆུ་ཀླུང་རྒྱུར་གཤེགས་བཞེད་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ཏུ་ཆུ་ཀླུང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག ། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་གཉིས་པ། དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ
5.166a
མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐག་ཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་ཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་དུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ་གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གི་གཟུགས་ཅན་བརྒྱན་པ། ཉི་མ
5.166b
སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། ཀུན་ཤེས་ཀཽཎྜི་ནྱ་དང ། རླངས་པ་དང ། མིང་ཆེན་དང ། མ་འགགས་པ་དང ། ཤཱ་རིའི་བུ་དང ། མཽད་གལ་གྱི་བུ་དང ། འོད་སྲུང་དང ། ཀུན་དགའ་བོ་དང ། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང ། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་རྒྱུ་ཞིང་གཤེགས་སོ། །འཁོར་དེས་ཐག་རིང་པོ་ཁོ་ན་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་མཐོང་ངོ ། །མཐོང་ནས་ཀྱང་གང་དག་མ་དད་པ་དེ་དག་ནི་དགེ་སྦྱོང་གཽ་ཏ་མ་ལྟད་མོ་དང་བྲལ་ལོ་ཞེས་གྲགས་ན། དེ་ཡང་ལྟད་མོ་སྐྱེས་ཏེ་ཆུ་སྲིན་ཉའི་རིགས་བལྟ་བའི་ཕྱིར་ཉེ་བར་འོངས་སོ་ཞེས་ཟེར་རོ། །གང་དག་དད་པ་དང་ལྡན་པ་དེ་དག་ནི་མ་དད་པ་དེ་དག་ལ་ཤེས་ལྡན་དག་སངས་རྒྱས་བཅོམ་ལྡན་འདས་རྣམས་ནི་ལྟད་མོ་དང་བྲལ་བ་ཁོ་ན་ཡིན་ཏེ། བཅོམ་ལྡན་འདས་ཆུ་སྲིན་ཉའི་རིགས་ལས་བརྩམས་ཏེ། སྐྱེ་བོའི་ཚོགས་ཆེན་པོ་ལ་ངོ་མཚར་རྨད་དུ་བྱུང་བའི་ཆོས་ཅུང་ཞིག་སྟོན་པར་བཞེད་གོར་མ་ཆག་གོ་ཞེས་ཟེར་ཞིང་འདི་སྐད་ཅེས་ཀྱང་སྨྲས་སོ། །ཐུབ་པ་ལྟད་མོ་བྲལ་བའི་དགོངས་ལྡན་པ། །ལྟད་མོ་མེད་ལ་སྐྱེ་ངན་དོན་མེད་སྨྲ། །གཞན་ཕན་དེ་ལ་གཞོལ་བའི་རྒྱལ་བ་འདི། །ལུས་ཅན་ཕན་ཕྱིར་ངེས་པར་འདིར་གཤེགས་སོ། །དེ་ནས་འཁོར་དེས་བཅོམ་ལྡན་འདས་མཐོང་ནས་འཕྲལ་ཁོ་ན་ལ་མངོན་པར་ལངས་ཏེ། འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་པས་ཡབ་དང ། ཡུམ་དང ། མཁན་པོ་དང ། སློབ་དཔོན་དང ། བླ་མ་དང ། བླ་མའི་གནས་ལྟ་བུ་དག་ལ་མངོན་པར་བཞེངས་པ་མཛད་པའི་ཕྱིར་རོ། །དེ་ནས་བཅོམ་ལྡན་འདས་འཁོར་དེའི་དབུས་སུ་གཤེགས་ཏེ་དགེ་སློང་གི་དགེ་འདུན་གྱི་གོང་དུ་གདན་གཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཉ་པ་ལྔ་བརྒྱ་པོ་དེ་དག་ལ་བཀའ་སྩལ་པ། བཞིན་བཟངས་དག་རེ་ཤིག་ཁྱེད་ཅག་ནི་ཉེས་པར་བྱས་པའི་ལས
5.167a
བྱེད་པ་ཡིན་ཏེ། དེས་ན་ད་ལྟ་ཉ་པའི་སྐྱེ་གནས་དམན་པར་སྐྱེས་ཤིང་ཁྱེད་ཅག་ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང་རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོག་པ་གཞན་གྱི་སྲོག་གཅོད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱེད་ཅག་གི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེ་དག་གིས་གསོལ་པ། བཅོམ་ལྡན་འདས་བདག་ཅག་གིས་ཅི་ཞིག་བགྱི་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཉ་དང ། རུས་སྦལ་དང ། སྦལ་པ་དང ། ཆུ་སྲིན་བྱིས་པ་གསོད་དང ། ཉ་ཁྱི་བ་ལ་སོགས་པ་ཆུ་ནས་བཏོན་པ་འདི་དག་ཐོང་ཤིག་།བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་བཏང་བར་བགྱིའོ་ཞེས་དེ་དག་གིས་བཅོམ་ལྡན་འདས་ཀྱི་བཀའ་སྩལ་པའི་དུས་ཀྱི་མཇུག་ཐོགས་སུ་དེ་དག་བཏང་ངོ ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངས་ཅི་ནས་ཀྱང་ཆུ་སྲིན་ཉའི་རིགས་མ་གཏོགས་པ་ཉ་དང ། རུས་སྦལ་དང ། སྦལ་པ་དང ། ཆུ་སྲིན་བྱིས་པ་གསོད་དང ། ཉ་ཁྱི་བ་ལ་སོགས་པའི་སྲོག་ཆགས་འདི་དག་ཆུ་ཇི་ལྟ་བ་ཁོ་ན་བཞིན་དུ་ཆུ་ཀླུང་ཡིད་འོང་ལྡན་དུ་འཇུག་པར་འགྱུར་བ་དང ། ཆུ་སྲིན་ཉའི་རིགས་ཀྱང་སྔོན་གྱི་སྐྱེ་བ་རྗེས་སུ་དྲན་ཞིང་མིའི་སྐད་རྗོད་པར་འགྱུར་ལ། ང་དང་ཐབས་གཅིག་སྨྲ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་ཅི་ནས་ཀྱང་ཆུ་སྲིན་ཉའི་རིགས་མ་གཏོགས་པ་ཉ་དང ། རུས་སྦལ་དང ། སྦལ་པ་དང ། ཆུ་སྲིན་བྱིས་པ་གསོད་དང ། ཉ་ཁྱི་བ་ལ་སོགས་པའི་སྲོག་ཆགས་དེ་དག་ཆུ་ཇི་ལྟ་བ་ཁོ་ན་བཞིན་དུ་ཆུ་ཀླུང་ཡིད་འོང་ལྡན་དུ་འཇུག་པར་འགྱུར་བ་དང ། ཆུ་སྲིན་ཉའི་རིགས་ཀྱང་སྔོན་གྱི་སྐྱེ་བ་རྗེས་སུ་དྲན་ཞིང་མིའི་སྐད་བརྗོད་པར་འགྱུར་ལ། བཅོམ་ལྡན་འདས་དང་ཐབས་གཅིག་སྨྲ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་བཅོམ་ལྡན་འདས་ཀྱིས་ཆུ་སྲིན་ཉའི་རིགས་ལ་བཀའ་སྩལ་པ། བུ་ཁྱོད་སེར་སྐྱ་ཡིན་ནམ་བཅོམ་ལྡན་འདས་བདག་སེར་སྐྱ་ལགས་སོ། །བུ་ཁྱོད་སེར་སྐྱ་ཡིན་ནམ་བདེ་བར་གཤེགས་པ་བདག་སེར་སྐྱ་ལགས་སོ། །
5.167b
བུ་ཁྱོད་ལ་ལུས་ཀྱིས་ཉེས་པར་སྤྱད་པ་ཡོད་དམ། བཅོམ་ལྡན་འདས་མཆིས་ལགས་སོ། །བུ་ཁྱོད་ལ་ངག་དང་ཡིད་གཉིས་ཀྱིས་ཉེས་པར་སྤྱད་པ་ཡོད་དམ། བདེ་བར་གཤེགས་པ་མཆིས་སོ། །བུ་ཁྱོད་ཀྱིས་ལུས་ཀྱིས་ཉེས་པར་སྤྱད་པའི་རྣམ་པར་སྨིན་པ་ཉམས་སུ་མྱོང་ངམ། བཅོམ་ལྡན་འདས་ཉམས་སུ་མྱོང་ངོ ། །བུ་ཁྱོད་ཀྱིས་ངག་དང་ཡིད་ཀྱི་ཉེས་པར་སྤྱད་པའི་རྣམ་པར་སྨིན་པ་ཉམས་སུ་མྱོང་ངམ། བདེ་བར་གཤེགས་པ་ཉམས་སུ་མྱོང་ངོ ། །འོ་ན་ཁྱོད་ཀྱི་མི་དགེ་བའི་བཤེས་གཉེན་སུ་ཡིན། བདག་གི་མ་ལགས་སོ། །དེ་གང་དུ་སྐྱེས་སེམས་ཅན་དམྱལ་བ་རྣམས་སུའོ། །ཁྱོད་གང་དུ་སྐྱེས། དུད་འགྲོར་རོ། །ཇི་སྙམ་དུ་སེམས། ཁྱོད་འདི་ནས་ཤི་འཕོས་ནས་གང་དུ་སྐྱེ་བར་འགྱུར། བཅོམ་ལྡན་འདས་སེམས་ཅན་དམྱལ་བ་རྣམས་སུའོ། །བདེ་བར་གཤེགས་པ་སེམས་ཅན་དམྱལ་བ་རྣམས་སུའོ་ཞེས་གསོལ་ནས་ངུ་བ་ལ་ཞུགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། ཁྱོད་ནི་དུད་འགྲོའི་སྐྱེ་གནས་སྐྱེས། །མི་ཁོམ་ཞུགས་པར་གྱུར་པ་ལ། །དེ་ལྟར་ངས་ཀྱང་ཅི་བྱར་མེད། །དོན་མེད་ངུས་པས་ཅི་ལ་ཕན། །ཐུགས་རྗེ་ལྡན་རྒྱལ་ང་ལ་ནི། །ལེགས་པར་སེམས་ནི་དད་གྱིས་དང ། །དུད་འགྲོའི་སྐྱེ་འདིར་ཆགས་བྲལ་ཞིང ། །དེ་ནས་མཐོ་རིས་འགྲོ་བར་འགྱུར། །དེས་བཅོམ་ལྡན་འདས་ལ་སེམས་དད་པར་བྱས་ནས་དེ་ནས་བཅོམ་ལྡན་འདས་ཀྱི་དེ་ལ་བཞིན་བཟངས་འདི་ལྟར་འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་ཚིག་གསུམ་གྱིས་ཆོས་བསྟན་ཏོ། །དེ་ནས་འཁོར་དེ་མཆོག་ཏུ་ངོ་མཚར་སྐྱེས་ནས་ཤེས་ལྡན་དག་བཅོམ་ལྡན་འདས་ཀྱིས་བཀའ་སྩལ་པས་སྔོན་གྱི་སྐྱེ་བ་དྲན་པར་བྱས་ཤིང་མིའི་སྐད་ཀྱང་རྗོད་པར་བྱེད་ལ། བཅོམ་ལྡན་འདས་དང་ཐབས་གཅིག་སྨྲ་བར་བྱེད་པ་འདི་སུ་ཞིག་ཡིན། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང ། བཟོད་པར་དཀའ་བ་ཡིན་པས་བདག་ཅག་གིས་བཅོམ་ལྡན་འདས་ལ་དོན་དེ་ཞུ་བར་ནི་མི་ནུས་ཀྱིས་བདག་ཅག་འཕགས་པ་ཀུན་དགའ་བོ་ག་ལ་བ་དེར་དོང་སྟེ་ཕྱིན་ནས་འཕགས་པ་ཀུན་དགའ་བོ་ལ་དོན་དེ་ཞུ་བར་བྱ་ཞིང ། འཕགས་པ
5.168a
ཀུན་དགའ་བོས་བདག་ཅག་ལ་ཇི་སྐད་ལུང་སྟོན་པར་འགྱུར་བ་དེ་དེ་ཁོ་ན་བཞིན་དུ་གཟུང་བར་བྱའོ་ཞེས་ཟེར་རོ། །དེ་ནས་འཁོར་དེ་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །འཕགས་པ་ཀུན་དགའ་བོ་བཅོམ་ལྡན་འདས་ཀྱིས་བཀའ་སྩལ་པས། སྔོན་གྱི་སྐྱེ་བ་དྲན་པར་བགྱིས་ཤིང་མིའི་སྐད་ཀྱང་རྗོད་པར་བགྱིད་ལ། བཅོམ་ལྡན་འདས་དང་ཐབས་གཅིག་སྨྲ་བར་བགྱིད་པ་འདི་སུ་ཞིག་ལགས། ཀུན་དགའ་བོས་སྨྲས་པ། ཤེས་ལྡན་དག་བཅོམ་ལྡན་འདས་ཉིད་ལ་དོན་དེ་ཞུས་ཤིག་།འཕགས་པ་ཀུན་དགའ་བོ་སངས་རྒྱས་བཅོམ་ལྡན་འདས་རྣམས་ནི་བསྟེན་པར་དཀའ་བ་དང ། བཟོད་པར་དཀའ་བ་ལགས་པས་བདག་ཅག་གིས་བཅོམ་ལྡན་འདས་ལ་དོན་དེ་ཞུ་བར་རྔོ་མི་ཐོག་གོ། །ཤེས་ལྡན་དག་ཁོ་བོ་ལ་ཡང་སངས་རྒྱས་བཅོམ་ལྡན་འདས་རྣམས་བསྟེན་པར་དཀའ་བ་དང ། བཟོད་པར་དཀའ་བ་ཡིན་པས་ཁོ་བོས་ཀྱང་བཅོམ་ལྡན་འདས་ལ་དོན་དེ་ཞུ་བར་མི་ནུས་མོད་ཀྱི། འོན་ཀྱང་ཁྱོད་ཀྱི་དོན་དུ་ཞུ་བར་བྱའོ་ཞེས་སྨྲས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་བཀའ་སྩལ་པས་སྔོན་གྱི་སྐྱེ་བ་དྲན་པར་བགྱིས་ཤིང་མིའི་སྐད་ཀྱང་རྗོད་པར་བགྱིས་ལ། བཅོམ་ལྡན་འདས་དང་ཐབས་གཅིག་སྨྲ་བར་བགྱིད་པ་འདི་སུ་ཞིག་ལགས། ཀུན་དགའ་བོ་འདི་ནི་ཆུ་སྲིན་ཉའི་རིགས་ཡིན་ནོ། །ཀུན་དགའ་བོ་ཁྱོད་ཆུ་སྲིན་ཉའི་རིགས་ཀྱི་སྔོན་གྱི་ལས་ཀྱི་རྒྱུ་བ་ལས་བརྩམས་ཏེ་ཆོས་དང་ལྡན་པའི་གཏམ་ཉན་པར་འདོད་དམ་བཅོམ་ལྡན་འདས་ཀྱིས་ཆུ་སྲིན་ཉའི་རིགས་ཀྱི་སྔོན་གྱི་ལས་ཀྱི་རྒྱུ་བ་ལས་བརྩམས་ཏེ་དགེ་སློང་རྣམས་དང་སྐྱེ་བོའི་ཚོགས་ལ་ཆོས་དང་ལྡན་པའི་བཀའ་མཆིད་བཀའ་སྩལ་ན། བཅོམ་ལྡན་འདས་ལས་ཐོས་ནས་དགེ་སློང་རྣམས་དང་སྐྱེ་བོའི་ཚོགས་དག་འཛིན་པར་འགྱུར་བས་བཅོམ་ལྡན་འདས་དེ་ནི་དུས་ལགས་སོ། །
5.168b
བདེ་བར་གཤེགས་པ་དེ་ནི་དུས་ལགས་སོ། །ཀུན་དགའ་བོ་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་གྱིས་ཤིག་དང་བཤད་པར་བྱའོ། །ཀུན་དགའ་བོ་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེས་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་ཚེ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཀྲི་ཀི་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང ། མི་མང་པོས་གང་བ། ཐབ་མོ་དང ། འཐབ་པ་དང ། ཕྱི་དགྲ་དང ། ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང ། ནད་དང་བྲལ་བ། སཱ་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །དེ་ནས་ཤེད་བུ་གསང་ཚིག་འདོད་པ་གསང་ཚིག་ཚོལ་བ་ཞིག་ཡུལ་དབུས་ནས་ལྷོ་ལམ་དུ་སོང་ངོ ། །དེ་ན་བྲམ་ཟེ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་དུ་སོན་པ། ཡུལ་ཐ་དད་པ་ན་གནས་པའི་བྲམ་ཟེ་རྣམས་ཀྱིས་སྟོན་པར་གྱུར་པ་ཞིག་འདུག་ནས། ཤེད་བུ་དེ་བྲམ་ཟེ་དེའི་དྲུང་དུ་སོང་སྟེ་ཕྱིན་ནས་ཞི་བ་དང་སྤྱོད་ལམ་ཞི་བས་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེ་ནས་བྲམ་ཟེ་དེས་ཤེད་བུ་དེ་ལ་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་ནས་སྨྲས་པ། ཀྱེ་ཤེད་བུ་ཁྱོད་ག་ལས་འོངས། ཅི་ཞིག་འདོད། ཤེད་བུས་སྨྲས་པ། བདག་ཡུལ་དབུས་ནས་མཆིས་ཏེ་མཁན་པོའི་ཞབས་ལ་སྲི་ཞུ་བགྱིད་པར་འཚལ་ལོ། །ཅི་ཞིག་གི་ཕྱིར། རིག་བྱེད་ཀླག་པའི་སླད་དུའོ། །ཤེད་བུ་ལེགས་ཀྱིས་དེ་བཞིན་གྱིས་ཤིག་།དེ་ནི་བྲམ་ཟེས་བྱ་བ་ཡིན་ནོ། །ཤེད་བུ་དེས་བྲམ་ཟེའི་དྲུང་དུ་རིག་བྱེད་ཀླག་པར་བྱ་བར་བརྩམས་སོ། །ཤེད་བུ་རྣམས་ཀྱི་ཀུན་ཏུ་སྤྱོད་པ་ནི་འདི་ཡིན་ཏེ། གང་གི་ཚེ་མི་ཀློག་པར་གྱུར་པ་དེའི་ཚེ་ན་ལན་འགའ་ནི་ཆུ་ངོགས་སུ་ཉེ་རེག་བྱེད་དུ
5.169a
འདོང་ངོ ། །ལན་འགའ་ནི་གྲོང་ཁྱེར་ལྟར་འདོང་ངོ ། །ལན་འགའ་ནི་ཡམ་སྲེག་ཤིང་ཐུར་འདོང་ངོ ། །ཅི་ཙམ་དུས་གཞན་ཞིག་ན་དེ་དག་མི་ཀློག་པར་གྱུར་ནས་དེའི་ཚེ་དེ་དག་ཡམ་སྲེག་ཤིང་ཐུར་དོང་བ་དང ། དེ་དག་ལ་ལམ་གྱི་བར་དུ་བར་སྐབས་ཀྱི་གཏམ་རྗོད་པ་འདི་ལྟ་བུ་འདི་བྱུང་སྟེ། ཀྱེ་ཀུད་སའི་རིགས་དག་།བད་སའི་རིགས་དག་།ཤན་དི་ལའི་རིགས་དག་།བ་ར་དྭ་ཛའི་རིགས་དག་།ལྔ་པའི་རིགས་དག་།ཉེ་ལྔའི་རིགས་དག་ཇེ་ཁྱེད་ཅག་ལས་གང་ནི་ཡུལ་ག་ལས་འོངས་པ་དྲི་བར་བྱའོ། །དེ་ན་ཤེད་བུ་གཅིག་གིས་སྨྲས་པ། ཁོ་བོ་ནི་ཡུལ་ཤར་ནས་སོ། །གཞན་ཞིག་གིས་སྨྲས་པ། ཁོ་བོ་ནི་ལྷོ་ལམ་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་ནུབ་ཀྱི་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་བྱང་ལམ་ནས་སོ། །ཤེད་བུ་དེས་སྨྲས་པ། ཁོ་བོ་ནི་ཡུལ་དབུས་ནས་སོ། །དེ་དག་གིས་སྨྲས་པ། ཤེས་ལྡན་དག་བདག་ཅག་གིས་ཡུལ་ཐམས་ཅད་མཐོང་ཞིང་ཐོས་ནས་ཡུལ་དབུས་མ་མཐོང་མ་ཐོས་སོ། །ཤར་ན་བློ་ཅན་གནས་པ་སྟེ། །ལྷོ་ལམ་ན་ནི་ཡོན་བྱེད་འདུག་།ནུབ་ཀྱི་ཡུལ་ན་ཕྲ་མ་ཅན། །བྱང་ལམ་ན་ནི་ཚིག་རྩུབ་བོ། །ཞེས་ཚིགས་སུ་བཅད་པ་ཡང་སྨྲས་སོ། །དེ་ནས་དྲིས་པ། ཤེད་བུ་ཡུལ་དབུས་ཅི་འདྲ། ཤེས་ལྡན་དག་ཡུལ་དབུས་ནི་ཡུལ་རྣམས་ཀྱི་མཆོག་ཡིན་ཏེ། སཱ་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ། སློངས་མོ་བ་བརྒྱས་ཁྱབ་པ། དབུས་པའི་སྐྱེ་བོས་གང་བ་མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པ། དེ་ན་ཆུ་ཀླུང་གང་གཱ་ཁ་རྗེ་དང ། བསོད་ནམས་དང ། བཀྲ་ཤིས་དང ། གཙང་བ་དང ། གཙང་བ་ཉིད་ཀྱི་གནས་སུ་གྲགས་པ། འགྲམ་གཉིས་ནས་རླན་འཕྱོ་བ། དྲང་སྲོང་རྣམས་ཀྱི་བསྟི་གནས་ཤེས་བྱ་བ་ཆུ་དགུར་བཅཝ་བརྒྱད་འབབ་པ་ཡོད་དེ། དེར་དྲང་སྲོང་རྣམས་ཀྱིས་དཀའ་ཐུབ་སྤྱད་ན་རང་གི་ལུས་ཉིད་ཀྱིས་མཐོ་རིས་སུ་འདོང་བ་ཡིན་ནོ། །ཀྱེ་ཤེད་བུ་དེ་ནི་མཇལ་གྱིས་གཞན་འདི་འདྲིའོ། །ཡུལ་དབུས་ན་མཁས་པར་བགྲང་བ་དག་ཡོད་དམ། ཤེས་ལྡན་དག་ཁོ་བོས་དང་པོ་ཉིད་ནས་ཤེས་ལྡན་དག་ཡུལ་དབུས་ནི་དབུས་པའི་སྐྱེ་བོས་གང་བ།
5.169b
མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པའོ་ཞེས་མ་སྨྲས་སམ། ཤེད་བུ་ཁྱོད་ཀྱིས་དེ་སྐད་སྨྲས་སོ། །ཤེད་བུ་ཡུལ་དབུས་ན་འདི་ལྟ་སྟེ། དཔེར་ན་བདག་ཅག་གི་མཁན་པོ་དང་འདྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དམ། ཤེས་ལྡན་དག་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ་སྙན་པར་སྨྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དོ། །ཤེད་བུ་དེ་དག་ལ་དེ་ལྟ་དེ་ལྟར་ཡུལ་དབུས་ཀྱི་བསྔགས་པ་བརྗོད་པ་དང ། འདི་ལྟར་དེ་དག་ཐམས་ཅད་ཡུལ་དབུས་སུ་འདོང་འདོད་པར་གྱུར་ཏོ། །དེ་ནས་ཤེད་བུ་དེ་དག་གིས་ཡམ་སྲེག་ཤིང་དག་བཙལ་ཏེ། ཡམ་སྲེག་ཤིང་གི་ཁུར་ཐོགས་ནས་བྲམ་ཟེ་དེའི་ཁྱིམ་གལ་བ་དེར་དོང་སྟེ། ཕྱིན་ནས་ཡམ་སྲེག་ཤིང་གི་ཁུར་མཐའ་གཅིག་ཏུ་བཞག་སྟེ། བྲམ་ཟེ་དེ་ག་ལ་བར་དོང་སྟེ་ཕྱིན་པ་དང ། བྲམ་ཟེ་དེ་ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག་།ཤེད་བུ་འདིས་ཅི་ནས་ཀྱང་བདག་ཅག་ཐམས་ཅད་ཡུལ་དབུས་སུ་མཆི་འཚལ་བར་གྱུར་པ་དེ་ལྟར་ཡུལ་དབུས་ཀྱི་བསྔགས་པ་བརྗོད་དོ། །བྲམ་ཟེ་དེས་སྨྲས་པ། བུ་དག་ཅི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། འདི་ལྟར་ཡུལ་དག་ནི་ཐོས་ནས་དགའ་བར་འགྱུར་བ་ཡིན་པས་མཉན་པར་བྱའི་བགྲོད་པར་ནི་མི་བྱའོ། །མཁན་པོ་ཤེད་བུ་འདིའི་མཆིད་ནས་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ་སྙན་པར་སྨྲ་བ་སྨྲ་བའི་ཁྱུ་མཆོག་དེ་ལྟ་བུ་དག་མཆིས་སོ་ཞེས་མཆིའོ། །བུ་དག་ཅི་ཁོ་བོ་ན་རེ་སའི་སྟེང་ན་ཁོ་བོ་གཅིག་པུ་ཁོ་ན་སྨྲ་བ་ཡིན་གྱི་སྨྲ་བ་གཞན་འགའ་ཡང་མེད་དོ་ཞེས་ཟེར་རམ། ས་ནི་རིན་པོ་ཆེ་མང་པོ་འཛིན་པ་ཡིན་པས་ས་གཞི་ནི་མཛེས་པ་མཛེས་པ་དག་གིས་གང་བ་ཡིན་ནོ། །མཁན་པོ་རེ་ཤིག་ཡུལ་དེ་ཡང་མཐོང་བར་འགྱུར་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལ་ཡང་བསྙེན་བཀུར་བགྱི། རྒོལ་བ་དག་ཀྱང་ཚར་གཅད་པར་བགྱི། རང་གི་གྲགས་པ་ཡང་བསྒྲག་པར་བགྱི། རྙེད་པ་ཡང་བསྒྲུབ་པར་བགྱིས། བདག་ཅག་ཡུལ་དབུས་སུ་མཆི་འོ། །བྲམ་ཟེ་དེ་སློབ་མ་ལ་རྗེས་སུ་ཆགས་པ
5.170a
དང་བཅས་པ་དང་འཁོར་ཉུང་བ་ཡིན་པས་དེས་ཤེད་བུ་དེ་དག་ལ་འདི་སྐད་ཅེས་སྨྲས་སོ། །བུ་དག་གལ་ཏེ་དེ་ལྟ་ན་གཡང་གཞི་དག་དང ། ཤིང་ཤུན་དག་དང ། དབྱུག་གུ་དག་དང ། གླུགས་གཟར་དག་དང ། དགང་གཟར་དག་དང ། རིལ་བ་དག་ལོང་ཤིག་དང་ཡུལ་དབུས་སུ་འདོང་ངོ ། །དེ་དག་གིས་དེ་དག་བླངས་ནས་བྲམ་ཟེ་དེ་ཤེད་བུ་དེ་དག་དང་ལྷན་ཅིག་ཡུལ་དབུས་སུ་འཕགས་པ་དང ། དེས་རྒོལ་བ་ཁ་ཅིག་ནི་ཚར་བཅད་དེ་རྒོལ་བའི་ཤིང་རྟ་ལ་སྦྱོར་བར་བྱེད། ཁ་ཅིག་ནི་མགོར་ཐལ་བའི་བུམ་པ་དག་གིས་བསྣུན། ཁ་ཅིག་ནི་འཕོང་གི་དཔོང་སར་ཁཝ་བཞིན་དུ་ཐག་རིང་པོ་ནས་ཡོངས་སུ་སྤོང་བར་བྱེད། ཁ་ཅིག་ནི་གདུགས་དང་རྒྱལ་མཚན་དང ། བ་དན་དག་གིས་བསུ་བར་བྱེད། ཁ་ཅིག་ནི་སློབ་མ་ཉིད་དུ་ཁས་ལེན་པར་བྱེད་ཅིང་དེ་མཐར་གྱིས་གྲོང་དང ། གྲོང་ཁྱེར་དང ། གྲོང་རྡལ་དང ། དབྱེ་ཚོངས་དང ། ཚོང་རྡལ་དག་ཏུ་རྒོལ་བ་འདུལ་ཞིང་བཱ་རཱ་ཎ་སཱིར་ཕྱིན་ཏོ། །བྲམ་ཟེ་དེས་བསམས་པ། བདག་གིས་ཅིའི་ཕྱིར་རྩ་བ་སྤངས་ཏེ་ཡལ་ག་དང ། འདབ་མ་དང ། ལོ་མ་ལ་ཉུག་པར་བྱ། རྒོལ་བ་གང་དག་དང་མཁས་པར་བགྲང་བ་གང་ཇི་སྙེད་པ་དེ་དག་ཐམས་ཅད་ཀྱང་རྒྱལ་པོ་དང་ཉེ་བ་ཡིན་གྱིས་བདག་ཀྱང་རྒྱལ་པོའི་གན་དུ་འགྲོའོ་སྙམ་ནས། བྲམ་ཟེ་དེ་རྒྱལ་པོ་ཀྲི་ཀི་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ཀྲི་ཀི་ལ་རྒྱལ་བ་དང་ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་རྒྱལ་པོ་ཀྲི་ཀི་ལ་འདི་སྐད་ཅེས་སྨྲས་སོ། །ལྷ་བདག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ་དེའི་སླད་དུ་ལྷའི་སྤྱན་སྔར་རྒོལ་བ་དག་དང་ལྷན་ཅིག་བཀའ་མཆིད་དམ་པར་གཏན་ལ་དབབ་པར་འཚལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཡུལ་ན་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་འབེབས་པར་བྱེད་པའི་རྒོལ་བ་འགའ་ཡོད་དམ། བློན་པོ་རྣམས་ཀྱིས་སྨྲས་པ། ལྷ་རི་བྲགས་ཆེ་གེ་མོ་ཞིག་ན་བྲམ་ཟེ་སེར་སྐྱ་ཞི་བ་ཞེས་བགྱི་བ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་མཆིས་པ། ཞུགས་ལྟ་བུའི་ཤེས་པས་རང་གི་སྨྲ་བ་གསལ་བར་བགྱིད་པ། གཞན་གྱི་སྨྲ་བ་ཚར་གཅོད་པར་རྔོ་ཐོག་པ་ཞིག་མཆིས་སོ། །
5.170b
མཁན་པོ་དེ་བོས་ཤིག་།ལྷ་བོད་པར་བགྱིའོ་ཞེས་དེ་དག་གིས་དེ་བོས་ནས། དེ་རྒྱལ་པོ་ཀྲི་ཀི་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ཀྲི་ཀི་ལ་རྒྱལ་བ་དང ། ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་པ་དང ། བློན་པོ་རྣམས་ཀྱིས་སྨྲས་པ། ལྷ་མཁན་པོ་དེ་འདི་ལགས་སོ། །རྒྱལ་པོས་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་ཏུ་སྤྱད་དེ་སྨྲས་པ། མཁན་པོ་ཁྱོད་ཁོ་བོའི་མདུན་དུ་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་དབབ་པར་བྱེད་ནུས་སམ། སེར་སྐྱ་ཞི་བས་སྨྲས་པ། བདག་གིས་རྔོ་ཅི་ཐོག་པས་རྒྱལ་པོ་དགྱེས་པར་བགྱིའོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒོལ་བའི་དཀྱིལ་འཁོར་ཤོམས་ཤིག་།ཕྱོགས་དང་གཞན་གྱི་ཕྱོགས་དག་རྣམ་པར་ཞོག་ཤིག་།བློན་པོ་རྣམས་ཀྱིས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་དག་རྣམ་པར་བཞག་གོ། །དེ་ནས་བློན་པོ་རྣམས་ཀྱིས་རྒྱལ་པོའི་རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཕྱོགས་སྔ་མ་གང་བགྱིད་དུ་སྩལ། རྒྱལ་པོས་སྨྲས་པ། བྲམ་ཟེ་འདི་འགྲོན་པོ་ཡིན་གྱིས་འདི་ཕྱོགས་སྔ་མ་བྱེད་དུ་ཆུག་ཤིག་།བྲམ་ཟེ་དེ་ཕྱོགས་སྔ་མ་བྱེད་དུ་བཅུག་ནས་དེས་རྒྱུད་ཆགས་ལྔ་བརྒྱ་བཟླས་སོ། །སེར་སྐྱ་ཞི་བས་ཕྱིར་བཟླས་སོ། །འདི་ནི་རིགས་པ་མེད་པ་ཡིན་ནོ། །འདི་ནི་མི་མཐུན་པ་ཡིན་ནོ། །འདི་ནི་མི་འཐད་པ་ཡིན་ནོ་ཞེས་སྐྱོན་བཏགས་པ་དང ། བྲམ་ཟེ་དེ་ཅང་མི་སྨྲ་བར་འདུག་གོ། །ཚར་གཅད་པའི་གནས་རྣམས་ཀྱི་ནང་ན་འདི་ལྟ་སྟེ་ལན་ལ་སྤོབས་པ་མེད་པ་འདི་ནི་ཐ་ཆད་ཡིན་ནོ། །དེ་ནས་རྒྱལ་པོ་མངོན་པར་དགའ་ནས་སྨྲས་པ། མཁན་པོ་ཁྱོད་གནས་གང་དུ་གནས། སེར་སྐྱ་ཞི་བས་སྨྲས་པ། ལྷ་རི་བྲགས་ཆེ་གེ་མོ་ཞིག་ཏུའོ། །ཁྱོད་སོང་ལ་རི་བྲགས་དེ་ཁྱོད་ཀྱི་རྒོལ་བའི་ལོངས་སྤྱོད་གྱིས་ཤིག་།སེར་སྐྱ་ཞི་བ་རངས་པ་དང ། དགའ་བ་དང ། མཆོག་ཏུ་དགའ་བར་གྱུར་ནས་སྐྱེ་བོ་མཁས་པ་དག་གིས་ཡོངས་སུ་བསྐོར་ཏེ་རི་བྲགས་དེར་སོང་ངོ ། །འཇིག་རྟེན་ནི་འབྱོར་པ་འདོད་པ་ཡིན་པས་སེར་སྐྱ་ཞི་བ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ
5.171a
བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་བུ་རལ་པ་སེར་སྐྱ་ཅན་ཞིག་བཙས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ཏེ། ཁྱེའུ་ཡི་མིང་ཅིར་གདགས་ཤེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། ཁྱེའུ་འདི་བྲམ་ཟེ་སེར་སྐྱ་ཞི་བའི་བུ་ཡིན་ལ་འདིའི་རལ་པ་ཡང་སེར་སྐྱར་འདུག་པས་ཁྱེའུ་འདིའི་མིང་སེར་སྐྱར་གདགས་སོ་ཞེས་དེའི་མིང་སེར་སྐྱར་བཏགས་སོ། །དེ་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ན་ཡི་གེ་དང ། གྲངས་དང ། རྩིས་དང ། ལག་རྩིས་དང ། དབྱུང་བ་དང ། གཞུག་པ་དང ། གཞག་པ་དང ། འབྱེད་པ་དང ། ཀློག་པའི་ཕ་རོལ་དུ་སོན་ཅིང ། དེའི་ཚེ་ན་བྲམ་ཟེའི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ཀུན་དུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་བླང་བ་དང ། ས་བླང་བ་དང ། ལག་ལྟང་དང ། ཐོར་ཚུགས་དང ། རབ་བསྔགས་བྱ་བ་དང ། ཀྱེ་ཞེས་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུག་པ་དང ། ཀློག་པ་དང ། ཀློག་ཏུ་འཇུད་པ་དང ། ་སྦྱིན་པ་དང ། ལེན་པ་ལ་མཁས་པའི་བྲམ་ཟེའི་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་སོན་པ། མེ་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེའི་ཚེ་ན་བྲམ་ཟེ་སེར་སྐྱ་ཞི་བས་བྲམ་ཟེའི་ཁྱེའུ་ལྔ་བརྒྱ་ཙམ་དག་བྲམ་ཟེའི་གསང་ཚིག་དག་འདོན་དུ་བཅུག་གོ། །ཇི་ཙམ་དུས་གཞན་ཞིག་ན། ཤེད་བུ་སེར་སྐྱ་ཀློག་པར་བྱེད་པས་ཕ་ལ་སྨྲས་པ། ཡབ་རི་ཙ་ཞེས་བགྱི་བ་འདིའི་དོན་ཅི་ལགས། སེར་སྐྱ་ཞི་བས་སྨྲས་པ། བུ་ཡི་གེ་དག་ནི་ཡུན་རིང་པོ་ནས་བྲལ་བ་དག་སྟེ་བླ་མའི་ཚིག་ཤེས་པར་དཀའ་བ་ཡིན་པས་དྲང་སྲོང་དེ་དག་གིས་དོན་དང་བྲལ་བའི་བསྟན
5.171b
བཅོས་ཉེ་བར་སྦྱར་བ་འདི་ཅི་ཡིན་མི་ཤེས་སོ། །སེར་སྐྱས་སྨྲས་པ། ཡབ་བདག་གིས་རི་ཙ་ཞེས་བགྱི་བ་འདིའི་དོན་དེ་འཚལ་ཏོ། །བྲམ་ཟེ་སེར་སྐྱ་ཞི་བས་བསམས་པ། འདི་ལྟར་ཕས་བུ་ལ་བདག་དང་མཉམ་པ་འམ་ཁྱད་པར་དུ་འཕགས་པ་དེ་ནི་འདོད་པར་བྱ་བ་ཡིན་པས་དེའི་ཕྱིར་འདི་བདག་པས་ཆེས་ཁྱད་པར་དུ་འཕགས་པ་ཡིན་གྱིས་བདག་གིས་འདི་ལ་བྲམ་ཟེའི་ཁྱེའུ་ལྔ་བརྒྱ་པོ་འདི་དག་གཏད་པར་བྱའོ་སྙམ་དུ་རིག་ནས་བྲམ་ཟེའི་ཁྱེའུ་སེར་སྐྱ་ལ་སྨྲས་པ། བུ་འདི་ལྟར་ཕས་བུ་ལ་བདག་དང་མཉམ་པ་འམ་ཁྱད་པར་དུ་འཕགས་པ་དེ་ནི་འདོད་པར་བྱ་བ་ཡིན་པས་དེའི་ཕྱིར་ཁྱོད་ཁོ་བོ་བས་ཆེས་ཁྱད་པར་དུ་འཕགས་པ་ཡིན་གྱིས། ཁྱོད་ཀྱིས་བྲམ་ཟེའི་ཁྱེའུ་ལྔ་བརྒྱ་པོ་འདི་དག་བྲམ་ཟེའི་གསང་ཚིག་དག་འདོན་དུ་ཆུག་ཤིག་།སེར་སྐྱས་སྨྲས་པ། བཀའ་བཞིན་འཚལ་འདོན་དུ་སྩལ་ཏོ་ཞེས་དེས་བྲམ་ཟེའི་ཁྱེའུ་ལྔ་བརྒྱ་པོ་དེ་དག་བྲམ་ཟེའི་གསང་ཚིག་དག་འདོན་དུ་གཞུགས་པར་བརྩམས་སོ། །བྲམ་ཟེ་སེར་སྐྱ་ཞི་བ་ཡང་བྱ་བ་མེད་ཅིང་ཅིར་དགར་འགྲོ་བ་དང ། སྤྱོད་པས་དགའ་མགུར་སྤྱོད་པར་བརྩམས་སོ། །དེ་དུས་གཞན་ཞིག་ན་དྲང་སྲོང་སྨྲ་བར་སོང་སྟེ་དེར་དགེ་སློང་ཞིག་གི་གན་དུ་སོང་ནས་སྨྲས་པ། སློབ་དཔོན་ཚིག་འདིའི་དོན་ཅི་ལགས། དགེ་སློང་དེས་སྨྲས་པ། ཚེ་དང་ལྡན་པ་དྲི་བ་དེ་ནི་དེ་སྐད་དྲི་བར་མི་བྱ་སྟེ། དྲི་བ་དེ་དེ་སྐད་དྲིས་ན་ཡོངས་སུ་རྫོགས་པར་མི་འགྱུར་རོ། །འདི་ལྟར་དྲི་བ་དེ་ནི་འདི་སྐད་དྲི་བར་བྱ་སྟེ། དྲི་བ་དེ་འདི་སྐད་དྲིས་ན་ཚིག་འདིའི་དོན་འདི་ཡིན་ནོ་ཞེས་ཡོངས་སུ་རྫོགས་པར་འགྱུར་རོ། །བྲམ་ཟེ་སེར་སྐྱ་ཞི་བས་བསམས་པ། བདག་གིས་འདི་དག་ལ་དྲི་བ་ཡང་འདྲི་བར་མི་ནུས་ན་བདག་གིས་འདི་དག་དང་ལྷན་ཅིག་ཅི་ལྟར་སྨྲ་བ་བྱ་བར་འགྱུར་སྙམ་ནས། དེ་དགེ་སློང་རྣམས་ལ་ཤིན་དུ་མངོན་པར་དད་པར་གྱུར་ནས་དུས་དང་དུས་སུ་དགེ་སློང་དག་འགྲོན་དུ་བོས་ཏེ་ཁྱིམ་གཞན་དུ་ཟན་སྦྱིན་པར་བྱེད་དོ། །དེ་དུས་གཞན་ཞིག་ན་ན་བར་གྱུར་ནས་དེས་ཤེད་བུ་སེར་སྐྱ་ལ་སྨྲས་པ། བུ་ཇི་ཙམ་ན་ཉི་མ་འཆར་བ་དང ། ཇི་ཙམ་ན་ནུབ་པ་དེའི་བར་དུ་ཁྱོད་དང་འདྲ་བའི་སྨྲ་བ་གཞན་མེད་ཀྱིས། དེའི་ཕྱིར་ཁྱོད་ཀྱིས་ཁོ་བོ་འདས་ནས་སྨྲ་བ་ཐམས་ཅད་དང
5.172a
ལྷན་ཅིག་འཇིགས་པ་མེད་པ་དང ། བག་ཚ་བ་མེད་པར་སྨྲ་བར་བྱའོ། །འོད་སྲུང་གི་དགེ་སྦྱོང་རྣམས་ནི་མ་གཏོགས་ཏེ། དེ་དག་ནི་རྒྱུད་རྒྱ་ཆེན་པོ་དང་ལྡན་པ། རྒྱུད་ཟབ་མོ་དང་ལྡན་པ། རྒྱུད་བཟང་པོ་དང་ལྡན་པ། འཇིག་རྟེན་པ་ལ་ཕམ་པར་མི་ནུས་པ། འཇིག་རྟེན་ལས་འདས་པ་ལ་གཏིང་མེད་པ་ཡིན་ཏེ། དེ་དག་ནི་མང་བ་དང ། འཐུན་པ་དང ། ལོངས་སྤྱོད་དག་དོན་དུ་མི་གཉེར་བ་ཡིན་ནོ། །སེར་སྐྱས་སྨྲས་པ། ཡབ་དེ་བཞིན་བགྱིའོ། །བྲམ་ཟེ་སེར་སྐྱ་ཞི་བ་ན་བ་ལས་མ་ལངས་ཏེ། དེ་རྩ་བ་དང་སྡོང་བུ་དང ། འདབ་མ་དང ། མེ་ཏོག་དང ། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ཉམས་པ་ཉིད་དུ་གྱུར་ནས། ཇི་ཙམ་ན་བསགས་པ་ཀུན་གྱི་མཐའ་ཟད་ཅིང ། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་རྣམས་དང་ལྡན་པར་གྱུར་ཏོ། །དེ་ཤེད་བུ་སེར་སྐྱ་དང་ནང་མིས་གོས་སྔོན་པོ་དང ། སེར་པོ་དང ། དམར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ་དེའི་འོག་ཏུ་མྱ་ངན་གསང་བ་བྱས་ནས་འཁོད་དོ། །ལྷོ་ཕྱོགས་ནས་ལྷགས་པའི་སྨྲ་བ་དེ་དག་གིས་བྲམ་ཟེ་སེར་སྐྱ་ཞི་བ་དུས་ལ་བབ་ཅེས་ཐོས་སོ། །ཐོས་ནས་ཀྱང་ཕན་ཚུན་སྨྲ་བར་བརྩམས་པ། ཤེས་ལྡན་དག་བྲམ་ཟེ་སྨྲ་བ་དེ་དུས་ལ་བབ་ཀྱིས་ད་ནི་འདོང་བར་བྱའོ་ཞེས་དེ་དག་ཐམས་ཅད་འདུས་ཏེ་རྒྱལ་པོ་ཀྲི་ཀིའི་གན་དུ་དོང་ངོ ། །དེ་ནས་རྒྱལ་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་སྨྲས་པ། ལྷ་བདག་ཅག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ་བདག་ཅག་ལྷའི་སྤྱན་སྔར་བཀའ་མཆིད་རྣམ་པར་གཏན་ལ་དབབ་པ་བགྱིད་པར་འཚལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་མཁན་པོ་དེ་བོས་ཤིག་།བློན་པོ་རྣམས་ཀྱིས་སྨྲས་པ། ལྷ་བྲམ་ཟེ་སྨྲ་བ་དེ་དུས་ལ་བབ་བོ། །རྒྱལ་པོས་སྨྲས་པ། དེའི་ཕྱིར་འདི་དག་གཡུལ་དུ་ཕུག་རོན་བཞིན་དུ་འདུས་ཏེ་ངའི་དྲུང་དུ་ལྷགས་ཀྱིས། བྲམ་ཟེ་དེའི་བུ་འམ་ཕུ་ནུ་བོ་འགའ་ཅི་ཡོད། ལྷ་དེའི་བུ་ཤེད་བུ་སེར་སྐྱ་ཞེས་བགྱི་བ་མཆིས་སོ། །མཁན་པོའི་བུ་དེ་བོས་ཤིག་།དེ་དག་གིས་དེ་བོས་ནས་དེས་རྒྱལ་པོ་ལ
5.172b
རྒྱལ་བ་དང་ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་པ་དང ། བློན་པོ་རྣམས་ཀྱིས་སྨྲས་པ། ལྷ་དེའི་བུ་ཤེད་བུ་སེར་སྐྱ་ཞེས་བགྱི་བ་འདི་ལགས་སོ། །རྒྱལ་པོས་དེ་ལ་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་ཏུ་སྤྱད་ནས་སྨྲས་པ། མཁན་པོའི་བུ་བྲམ་ཟེ་སྨྲ་བར་འདོད་པ་ཡུལ་ཐ་དད་པ་ན་གནས་པ་འདི་དག་ངའི་དྲུང་དུ་ལྷགས་ན། ཁྱོད་འདི་དག་དང་ལྷན་ཅིག་སྨྲ་བར་བྱེད་པར་ནུས་སམ། རྔོ་ཅི་ཐོག་གིས་ལྷ་དགྱེས་པར་བགྱིའོ། །དེ་ནས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་དག་རྣམ་པར་བཞག་སྟེ་དེ་དག་ཕྱོགས་སྔ་མ་བྱེད་དུ་བཅུག་པ་དང ། སྨྲ་བ་དེ་དག་བྲམ་ཟེ་སེར་སྐྱ་དང་ལྷན་ཅིག་གཞི་གང་དང་གང་ལ་སྨྲ་བ་དེ་དང་དེ་ལ་བྲམ་ཟེ་སེར་སྐྱས་སྤོབས་པ་མེད་པར་བྱས་ནས་དེ་དག་ཅང་མི་སྨྲ་བར་འཁོད་དོ། །ཚར་གཅད་པའི་གནས་རྣམས་ཀྱི་ནང་ན་འདི་ལྟ་སྟེ། ལན་ལ་སྤོབས་པ་མེད་པ་ཉིད་ནི་ཐ་ཆད་ཡིན་ནོ། །རྒྱལ་པོ་ངོ་མཚར་སྐྱེས་ཏེ། ཨེ་མ་ན་ཚོད་གཞོན་ལ་ཤེས་རབ་ཀྱི་སྤོབས་པ་འདི་དང་འདི་ལྟ་བུ་ཡོད་དོ་ཞེས་ངོ་མཚར་སྐྱེས་ནས་དེའི་འོག་ཏུ་མངོན་པར་དད་པས་གླང་པོ་ཆེའི་གཤུལ་དུ་བསྐྱོན་ཏེ་སྨྲ་བའི་རྒྱལ་སྲིད་ལ་དབང་བསྐུར་ཏོ། །སེར་སྐྱ་དེའི་མ་སེམས་ཁོངས་སུ་ཆུད་ཅིང་རྣམ་པར་རྟོག་པ་བཟང་པོ་མ་ཡིན་པ་དག་ལ་རྣམ་པར་རྟོག་པར་བྱེད་དེ། སེར་སྐྱ་དེས་ཧབ་ཤུར་གྱིས་རྒོལ་བའི་ལོངས་སྤྱོད་འཕྲོག་ཏུ་བཅུག་སྟེ། འོང་བར་མི་འགྱུར་རམ་སྙམ་དུ་དེ་དེ་ལྟར་སེམས་ཁོངས་སུ་ཆུད་ཅིང་རྣམ་པར་རྟོག་པ་བཟང་པོ་མ་ཡིན་པ་དག་ལ། རྣམ་པར་རྟོག་པར་བྱེད་ཅིང་འདུག་པ་ན་ཤེད་བུ་སེར་སྐྱ་སྨྲ་བའི་རྒྱལ་སྲིད་ལ་དབང་བསྐུར་བས་དབང་བསྐུར་ཏེ། སྐྱེ་བོ་མཁས་པས་ཡོངས་སུ་བསྐོར་ནས་རང་གི་སྡུམ་པར་འོངས་སོ། །དེ་ནས་དེའི་མས་གུས་པར་བསྒྲིམ་པ་དང་བཅས་པས་སྨྲས་པ། བུ་ཁྱོད་ཀྱིས་སྨྲ་བ་ཐམས་ཅད་ཚར་བཅད་དམ། སེར་སྐྱས་སྨྲས་པ། ཡུམ་ཚར་བཅད་དེ་འོད་སྲུང་གི་དགེ་སྦྱོང་རྣམས་ནི་མ་གཏོགས་སོ། །སེར་སྐྱའི་མ་དེ་བཞིན་སྒྱུར་བར་བྱེད། ལག་མཐིལ་གཉིས་འདྲིལ་བར་བྱེད་དོ། །
5.173a
ཤེད་བུ་སེར་སྐྱས་སྨྲས་པ། ཡུམ་ཁྱོད་ཅིའི་སླད་དུ་བཞིན་སྒྱུར་བར་མཛད། ལག་མཐིལ་གཉིས་འདྲིལ་བར་མཛད། མས་སྨྲས་པ། བུ་ད་དུང་ཡང་ཁྱོད་འགྲན་ཟླ་དང་བཅས་པ་ཡིན་པས། འོད་སྲུང་གི་དགེ་སྦྱོང་དེ་དག་གིས་རྒོལ་བའི་ལོངས་སྤྱོད་དག་ཕྲོགས་པར་འགྱུར་བའི་གནས་དེ་ལྟ་བུ་ཡོད་ཀྱིས་སོང་ལ་འདི་དག་ཚར་ཆོད་ཅིག་།སེར་སྐྱས་སྨྲས་པ། ཡུམ་བདག་ལ་ཕའི་མཆིད་ནས་བུ་ཇི་ཙམ་ན་ཉི་མ་འཆར་བ་དང ། ཇི་ཙམ་ན་ནུབ་པ་དེའི་བར་དུ་ཁྱོད་དང་འདྲ་བའི་སྨྲ་བ་གཞན་མེད་ཀྱིས་དེའི་ཕྱིར་ཁྱོད་ཀྱིས་ཁོ་བོ་འདས་ནས་སྨྲ་བ་ཐམས་ཅད་དང་ལྷན་ཅིག་འཇིགས་པ་མེད་པ་དང ། བག་ཚ་བ་མེད་པར་སྨྲ་བར་བྱའོ། །འོད་སྲུང་གི་དགེ་སྦྱོང་རྣམས་ནི་མ་གཏོགས་ཏེ། དེ་དག་ནི་རྒྱུད་རྒྱ་ཆེན་པོ་དང་ལྡན་པ། རྒྱུད་ཟབ་མོ་དང་ལྡན་པ། རྒྱུད་བཟང་པོ་དང་ལྡན་པ། འཇིག་རྟེན་པ་ལ་ཕམ་པར་མི་ནུས་པ། འཇིག་རྟེན་ལས་འདས་པ་ལ་གཏིང་མེད་པ་ཡིན་ཏེ། དེ་དག་ནི་མང་བ་དང ། འཐུན་པ་དང ། ལོངས་སྤྱོད་དང་དོན་དུ་མི་གཉེར་བ་ཡིན་ནོ་ཞེས་མཆིའོ། །མས་སྨྲས་པ། བུ་ཁྱོད་ཀྱི་ཕ་ནི་དགེ་སྦྱོང་གི་བྲན་དུ་གྱུར་པ་ཡིན་ན་ཅི་ཁྱོད་ཀྱང་དགེ་སྦྱོང་གི་བྲན་དུ་འགྱུར་རམ། སོང་ལ་དེ་དག་ཚར་ཆོད་ཅིག་།སེར་སྐྱ་དེ་མ་ལ་གུས་པ་ཡིན་པས་དེས་མའི་ཚིག་མདུན་དུ་བྱས་ཏེ། དྲང་སྲོང་སྨྲ་བར་འཕགས་པ་དང ། དགེ་སློང་ཞིག་ཀྱང་བཱ་རཱ་ཎ་སཱིར་འཕགས་ནས། སེར་སྐྱས་དགེ་སློང་དེ་ལམ་གྱི་བར་དུ་མཐོང་ནས་སྨྲས་པ། ཀྱེ་དགེ་སློང་ག་ལས་འོངས། དྲང་སྲོང་སྨྲ་བ་ནས་སོ། །དྲང་སྲོང་སྨྲ་བ་ན་དགེ་སློང་ཇི་སྙེད་ཡོད། དགེ་སློང་ཉི་ཁྲི་ལྷག་ཙམ་མོ། །རེ་ཤིག་དགེ་སློང་དག་ནི་མང་ན་བསྟན་བཅོས་ཀྱི་ཚད་ཇི་ཙམ། སྡེ་སྣོད་གསུམ་མོ། །སྡེ་སྣོད་ཀྱི་ཚད་ཇི་ཙམ་སྟོང་ཕྲག་བརྒྱའོ། །ཁྱིམ་པས་གཟུང་དུ་རུང་ངམ། མདོ་སྡེ་དང་ཆོས་མངོན་པ་གཉིས་ནི་རུང་ངོ ། །འདུལ་བ་ནི་ཆོ་གའི་གཞུང་ཡིན་པས་མི་རུང་ངོ ། །སེར་སྐྱས་བསམས་པ། འདི་དག་གི་སྨྲ་བའི་བསྟན་བཅོས་གང་ཡིན་པ་དེ་ནི་ཁྱིམ་པ་ལ་མི་སྟོན་ཏོ་སྙམ་དུ་རིག་ནས་སྨྲས་པ།
5.173b
ཀྱེ་དགེ་སློང་ཇེ་སངས་རྒྱས་ཀྱི་བཀའ་ལས་ཅུང་ཞིག་སྨྲོས་ཤིག་།དགེ་སློང་དེས་བསམས་པ། བྲམ་ཟེ་འདི་ནི་སྨྲ་བ་ཡིན་པས་ཇི་འདི་འཇལ་བར་འདོད་པས་དྲི་བ་འདྲི་འམ། འོན་ཏེ་ཀུན་ཤེས་པར་འདོད་པས་དྲི་བ་འདྲི་བ་ཇི་བལྟའོ་སྙམ་ནས། དེས་ཚིགས་སུ་བཅད་པ་སྨྲས་པ། མཚོ་རྣམས་གང་དུ་ལྡོག་པར་འགྱུར། །ལམ་ནི་གང་དུ་ལྡོག་པར་འགྱུར། །གང་དུ་འཇིག་རྟེན་བདེ་སྡུག་བསྔལ། །མ་ལུས་པར་ནི་འགག་པར་འགྱུར། །ཞེས་བརྗོད་དེ་སྨྲས་པ། བྲམ་ཟེ་ཚིགས་སུ་བཅད་པ་འདིའི་དོན་ཅི་ཡིན་སྨྲོས་ཤིག་བྲམ་ཟེས་རིག་པའི་གནས་ཐམས་ཅད་ལ་རྣམ་པར་དཔྱད་པར་བརྩམས་ན་མཚོ་ཡང་མ་ཤེས། ལམ་ཡང་མ་ཤེས། ལྡོག་པ་ཡང་མ་ཤེས་ནས་དེ་བདག་ལ་ལས་མཐོང་བར་མ་གྱུར་ཏམ་སྙམ་དུ་ཕྱོགས་བཞིར་རྣམ་པར་ལྟ་བར་བྱེད་ཅིང་བསམས་པ། གལ་ཏེ་འདི་ན་གཟུ་བོ་འགའ་ཞིག་ཡོད་པར་གྱུར་དུ་ཟིན་ན་བདག་དེང་ཉིད་དུ་ཚར་གཅད་པར་འགྱུར་བས་རྣམ་པ་ཐམས་ཅད་དུ་སྤང་བར་བྱའོ་སྙམ་དུ་རིག་ནས་སྨྲས་པ། ཀྱེ་དགེ་སློང་ཚིགས་སུ་བཅད་པ་དེ་ནི་རྒྱུད་རྒྱ་ཆེན་པོ་དང་ལྡན་པ། དོན་ཟབ་མོ་ཉིད་དང་ལྡན་པ་ཡིན་ལ་ཁྱོད་ཀྱང་བཱ་རཱ་ཎ་སཱིར་འཕགས་པ་ཡིན། ཁོ་བོ་ཡང་དྲང་སྲོང་སྨྲ་བར་འཕགས་པ་ཡིན་པས་འདིའི་དོན་འཕྲལ་ཁོ་ནར་སྨྲ་བར་མི་ནུས་ཀྱིས་སོང་ཤིག་དང ། ཕྱིས་ཀྱང་འདིའི་དོན་སྨྲ་བར་མི་དཀའོ་ཞེས་དེ་དྲང་སྲོང་སྨྲ་བར་སོང་བ་དང ། དགེ་སློང་ཀློག་པ་དང ། ཁ་ཏོན་དང ། ཡིད་ལ་བྱེད་པའི་སྦྱོར་བའི་རྗེས་སུ་བརྩོན་པ་དག་མཐོང་ངོ ། །མཐོང་མ་ཐག་ཏུ་དེ་སེམས་མངོན་པར་དད་པར་གྱུར་ནས། བསམས་པ། སུ་ཞིག་སྙིང་རྗེ་མེད་ཅིང་འཇིག་རྟེན་ཕ་རོལ་བཏང་སྟེ། འདི་དག་ལ་རབ་ཏུ་སྡང་བའི་སེམས་སྐྱེད་ཅིང་འདི་དག་དང་ལྷན་ཅིག་རྩོད་པ་སྐྱེད་པར་འགྱུར་སྙམ་དུ་རིག་ནས་རང་གི་ཁྱིམ་དུ་སོང་བ་དང་དེ་ལ་མས་སྨྲས་པ། བུ་ཁྱོད་ཀྱིས་འོད་སྲུང་གི་དགེ་སློང་དག་ཚར་བཅད་དམ། སེར་སྐྱས་སྨྲས་པ། ཡུམ་ཁྱོད་བདག་གི་རྒོལ་བའི་ལོངས་སྤྱོད་དག་གིས་མི་དགྱེས་སམ། འདི་ལྟར་ཁྱོད་ནི་རྒོལ་བའི་ལོངས་སྤྱོད་དག་འཕྲོག་ཏུ་སྩོལ་བར་བཞེད་པར་གདའོ། །བུ་ཇི་སྐད་ཟེར། ཡུམ་བདག་དེང་དྲང་སྲོང་སྨྲ་བར་འཕགས་པ་དང ། ཇི་ཙམ་ན་བདག
5.174a
གིས་ཤུལ་གྱི་བར་དུ་དགེ་སློང་ཞིག་མཐོང་ནས་བདག་གིས་དེ་ལ་ཀྱེ་དགེ་སློང་ཅི་སངས་རྒྱས་ཀྱི་བཀའ་ལས་ཅུང་ཞིག་སྨྲོས་ཤིག་ཅེས་བགྱིས་པ་དང ། དེས་ཚིགས་སུ་བཅད་པ། མཚོ་རྣམས་གང་དུ་ལྡོག་པར་འགྱུར། །ལམ་ནི་གང་དུ་ལྡོག་པར་འགྱུར། །གང་དུ་འཇིག་རྟེན་བདེ་སྡུག་བསྔལ། །མ་ལུས་པར་ནི་འགག་པར་འགྱུར། །ཞེས་བརྗོད་ནས་བདག་གིས་རིག་པའི་གནས་ཐམས་ཅད་ལ་རྣམ་པར་དཔྱད་པར་བརྩམས་ན་མཚོ་ཡང་མ་འཚལ། ལམ་ཡང་མ་འཚལ། ལྡོག་པ་ཡང་མ་འཚལ་ནས། གལ་ཏེ་དེ་ན་གཟུའོ་འགའ་ཞིག་མཆིས་པར་གྱུར་དུ་ལགས་ན་བདག་དེང་ཉིད་དུ་ཚར་བཀུམ་པར་ཡང་འགྱུར་རོ། །བུ་གལ་ཏེ་དེ་ལྟ་ན་སོང་ལ་སངས་རྒྱས་ཀྱི་བཀའ་ལྷོགས་ཤིག་།ཡུམ་ཅི་ཞིག་ཀླག་པར་བགྱི་སྟེ། དེ་དག་གི་སྨྲ་བའི་བསྟན་བཅོས་གང་ལགས་པ་དེ་ནི་ཁྱིམ་པ་ལ་མི་སྟོན་ཏོ། །བུ་སོང་ལ་རབ་ཏུ་བྱུང་སྟེ་ལྷོགས་ཤིག་།ཡུམ་རིགས་མཆོག་ཏུ་གྱུར་ནས་རིགས་ཐ་དད་པ་རྣམས་ཀྱི་ནང་དུ་ཇི་ལྟར་རབ་ཏུ་འབྱུང་བར་བགྱི། བུ་ཅི་ཁྱོད་ཀྱི་མགོ་བོ་ལ་སྨྱིག་མ་དང་རྩཝ་དག་སྐྱེ་བར་འགྱུར་རམ་ཡང་ཕྱིར་བོབས་ཤིག་།དེ་མ་ལ་གུས་པས་ནན་གྱིས་མནན་པ་ན་རབ་ཏུ་འབྱུང་ངོ་ཞེས་དྲང་སྲོང་སྨྲ་བར་སོང་སྟེ་དགེ་སློང་གི་དྲུང་དུ་སོང་ནས་སྨྲས་པ། ཀྱེ་དགེ་སློང་བདག་རབ་ཏུ་འབྱུང་བར་འཚལ་ལོ། །དགེ་སློང་གིས་བསམས་པ། བྲམ་ཟེ་སྨྲ་བ་འདི་རབ་ཏུ་བྱུང་ན་བསྟན་པ་ལ་གཅེས་པ་བསྟན་པར་འགྱུར་རོ་སྙམ་དུ་རིག་ནས་སྨྲས་པ། བྲམ་ཟེ་ལེགས་ཀྱིས་དེ་ལྟར་བྱའོ། །ལོངས་སྤྱོད་དག་ནི་མི་རྟག་པ་ཡིན་པས། རབ་ཏུ་བྱུང་ཤིག་།སེར་སྐྱས་སྨྲས་པ། ཀྱེ་དགེ་སློང་བདག་ནི་རབ་ཏུ་ཤེས་པའི་བྲམ་ཟེ་ལགས་པས་བདག་གིས་འདིར་རབ་ཏུ་འབྱུང་བར་རྔོ་མི་ཐོག་གིས་ལྗོངས་སུ་བཞུད་དོ། །དགེ་སློང་དེས་བྲམ་ཟེ་དེ་ལྗོངས་སུ་ཁྲིད་ནས་རབ་ཏུ་ཕྱུང་རྫོགས་པར་བསྙེན་པར་བྱས་ཏེ་ཀླག་པ་དང ། ཁ་ཏོན་དག་ལ་ངེས་པར་སྦྱར་ཏོ། །སེར་སྐྱ་དེས་ཀླག་པ་དང་ཁ་ཏོན་བྱས་པ་ན་སྡེ་སྣོད་གསུམ་པོ་དག་བླགས་ཤིང་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །གང་གི་ཚེ་དེ་ཆོས་མཉན་པ་སྦྱིན་པར་འདོད་པ་དེའི་ཚེ་ན་སེང་གེའི
5.174b
ཁྲི་རིན་པོ་ཆེ་སྣ་ཚོགས་ཀྱིས་བརྒྱན་པ་ཤོམ་པར་བྱེད། དུང་སྒྲིལ་མ་འབུད་དུ་འཛུད་པར་བྱེད། རྔ་བོ་ཆེ་རྡུང་དུ་འཛུད་པར་བྱེད་ཅིང་རྒྱལ་པོ་དང་བཅས་པའི་འཁོར་སྡུད་པར་བྱེད། སྐྱེ་བོ་ཕལ་པོ་ཆེའི་ཚོགས་ཀྱང་མངོན་པར་དད་པར་བྱེད་དོ། །ཆོས་སྒྲོག་པ་སེར་སྐྱས་བསམས་པ། བདག་གིས་ཐོས་པས་ཐོབ་པར་བྱ་བ་གང་ཡིན་པ་དེ་ཐོབ་ཀྱིས་བདག་བཱ་རཱ་ཎ་སཱིར་སོང་སྟེ། ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱའོ་སྙམ་ནས། དེ་ལྗོངས་སུ་ཅི་དགར་འདུག་སྟེ་བཱ་རཱ་ཎ་སཱིར་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་ཞིང་འགྲོ་བའི་ཚེ་བཱ་རཱ་ཎ་སཱིར་ཕྱིན་ཏོ། །དེ་ནས་དེའི་མས་ཐོས་ནས་མ་དེ་བུ་ཚོལ་ཞིང་དྲང་སྲོང་སྨྲ་བར་སོང་བ་དང་དེས་བུ་མཐོང་ནས་སྨྲས་པ། བུ་ཁྱོད་ཀྱིས་འོད་སྲུང་གི་དགེ་སྦྱོང་རྣམས་ཚར་བཅད་དམ། ཡུམ་བདག་ནི་ལུང་ཙམ་དང་ལྡན་པ་ལགས་ལ་དེ་དག་ནི་ལུང་དང་རྟོགས་པ་དང་ལྡན་པ་ལགས་པས་དེའི་སླད་དུ་བདག་གིས་དེ་དག་ཚར་དགུམ་པར་ཇི་ལྟར་རྔོ་ཐོག་།བུ་ཁྱོད་ཀྱིས་དེ་དག་གདོན་མི་ཟ་བར་ཚར་གཅད་པར་བྱ་བ་ཡིན་གྱིས་ཚར་ཆོད་ཅིག་།སེར་སྐྱ་དེ་མ་ལ་གུས་པས་མས་ནན་གྱིས་མནན་པ་དང ། དང་དུ་བླངས་ཏེ་སྨྲས་པ། ཡུམ་གང་གི་ཚེ་སེང་གེའི་ཁྲི་བཤམས་པར་གྱུར། དུང་སྒྲིལ་མ་བུས་པར་གྱུར། རྔ་བོ་ཆེ་བརྡུངས་པར་གྱུར་ཅིང་རྒྱལ་པོ་དང་བཅས་པའི་འཁོར་འདུས་པར་གྱུར་པ་དེའི་ཚེ་ན་ཁྱོད་སྤྱོན་ཅིག་།བུ་ལེགས་ཀྱིས་འོང་བར་བྱའོ། །ཇི་ཙམ་དུས་གཞན་ཞིག་ན་སེར་སྐྱ་ལ་ཆོས་སྒྲོག་པར་གསོལ་བ་བཏབ་ནས་སེང་གེའི་ཁྲི་བཤམས་པར་གྱུར། དུང་སྒྲིལ་མ་བུས་པར་གྱུར། རྔ་བོ་ཆེ་བརྡུངས་པར་གྱུར་ཅིང ། རྒྱལ་པོ་དང་བཅས་པའི་འཁོར་འདུས་པར་གྱུར་ཏོ། །དེ་ནས་སེར་སྐྱའི་མས་དུང་དང་རྔ་བོ་ཆེའི་སྒྲ་ཐོས་ནས་རིངས་པ་རིངས་པར་དྲང་སྲོང་སྨྲ་བར་སོང་སྟེ་གཙུག་ལག་ཁང་དུ་ཞུགས་ནས་སེང་གེའི་ཁྲིའི་རྒྱབ་ལོགས་སུ་འདུག་གོ། །ཆོས་སྒྲོག་པ་སེར་སྐྱ་ཡང་སེང་གེའི་ཁྲི་ལ་འཛེགས་ཏེ་ཆོས་བསྟན་པར་བརྩམས་ནས་དེས་ཆོས་ཇི་ཙམ་པ་དེ་ཙམ་ཞིག་བསྟན་ནས་ཆོས་མ་ཡིན་པ་བསྟན་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པ་མ་བྱེད་ཅིག་།
5.175a
ཆོས་ཀྱི་ཁྲིད་བྱེད་རྣམ་པར་དཀྲུག་པར་མ་བྱེད་ཅིག་།ཆོས་ཀྱི་མངལ་མ་རྟོལ་ཅིག་།ཆོས་ཀྱི་རྒྱལ་མཚན་མ་རྟིབ་ཤིག་།བདུད་ཀྱི་རྒྱལ་མཚན་མ་བསྒྲེང་ཤིག་།སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག་།སེར་སྐྱ་དེ་ཉམ་ང་ནས་བབས་ཏེ་དེའི་འོག་ཏུ་མ་ལ་སྨྲས་པ། ཡུམ་ཁྱོད་ཀྱིས་གཟིགས་སམ། བུ་མཐོང་ངོ ། །བདག་གིས་དང་པོ་ནས་ཁྱོད་ལ་ཡུམ་བདག་ནི་ལུང་ཙམ་དང་ལྡན་པ་ལགས་ལ་དེ་དག་ནི་ལུང་དང་རྟོགས་པ་དང་ལྡན་པ་ལགས་པས་དེའི་སླད་དུ་བདག་གིས་དེ་དག་ཚར་དགུམ་པར་ཇི་ལྟར་རྔོ་ཐོག་ཅེས་མ་བགྱིས་སམ། བུ་གང་གི་ཚེ་ཁྱོད་ཆོས་སྟོན་པ་དེའི་ཚེ་ནི་ཆོས་ཇི་ཙམ་པ་དེ་ཙམ་ཞིག་བསྟན་ནས་ཆོས་མ་ཡིན་པ་སྟོན་ཅིག་།གལ་ཏེ་ཁྱོད་ལ་དེ་དག་ན་རེ་ཚེ་དང་ལྡན་པ་མདོ་སྡེའི་མཐའ་ལ་གནོད་པ་མ་བྱེད་ཅིག་།ཆོས་ཀྱི་ཁྲིད་བྱེད་རྣམ་པར་དཀྲུག་པ་མ་བྱེད་ཅིག་།ཆོས་ཀྱི་མངལ་མ་རྟོལ་ཅིག་།ཆོས་ཀྱི་རྒྱལ་མཚན་མ་རྟིབ་ཤིག་།བདུད་ཀྱི་རྒྱལ་མཚན་མ་སྒྲེང་ཤིག་།སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག་ཅེས་ཟེར་ན། དེའི་ཚེ་ཁྱོད་ཀྱིས་ཚིག་གི་མཚོན་གྱིས་གདབ་པར་བྱ་སྟེ། དེ་དག་ནི་ལེགས་པ་མ་ཡིན་པ་བྱེད་པས་འཇིགས་པ་ཡིན་པས་ཅང་མི་སྨྲ་བར་འདུག་པར་འགྱུར་ཏེ། དེས་ན་འཇིག་རྟེན་དག་གི་མིག་ལམ་ན་ཚར་བཅད་དོ། །སྙམ་དུ་ཤེས་པར་འགྱུར་རོ། །ཡུམ་ཐབས་དེ་ནི་བཟང་སྟེ། འོན་ཀྱང་དེའི་ཚེ་ཁྱོད་ཀྱང་ཡང་སྤྱོན་ཅིག་།བུ་དེ་ལྟར་བྱ་སྟེ་ཁོ་མོ་ཡང་འོང་ངོ ། །ཇི་ཙམ་ན་ཡང་ཆོས་མཉན་པའི་སེང་གེའི་ཁྲི་བཤམས་ནས་སེར་སྐྱ་ལ་ཆོས་སྒྲོག་པར་གསོལ་བ་བཏབ་སྟེ་དུང་སྒྲིལ་མ་ཡང་བུས། རྔ་བོ་ཆེ་ཡང་བརྡུངས་ཤིང་རྒྱལ་པོ་དང་བཅས་པའི་འཁོར་འདུས་པ་དང ། སེར་སྐྱའི་མ་དེ་ཡང་སྔ་མ་བཞིན་དུ་འོངས་ཏེ་སེང་གེའི་ཁྲིའི་རྒྱབ་ལོགས་སུ་འདུག་གོ། །ཆོས་སྒྲོག་པ་སེར་སྐྱ་ཡང་སེང་གེའི་ཁྲི་ལ་འཛེགས་ཏེ་ཆོས་བསྟན་པར་བརྩམས་ནས། དེས་ཆོས་ཇི་ཙམ་པ་དེ་ཙམ་ཞིག་བསྟན་ནས་ཡང་ཆོས་མ་ཡིན་པ་བསྟན་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པར་མ་བྱེད་ཅིག་།ཆོས
5.175b
ཀྱི་ཁྲིད་བྱེད་རྣམ་པར་དཀྲུག་པར་མ་བྱེད་ཅིག་།ཆོས་ཀྱི་མངལ་མ་རྟོལ་ཅིག་།ཆོས་ཀྱི་རྒྱལ་མཚན་མ་རྟིབ་ཤིག་།བདུད་ཀྱི་རྒྱལ་མཚན་མ་སྒྲེང་ཤིག་།སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག་།སེར་སྐྱ་དེ་མས་བསླུས་པས་མི་བཟོད་པ་སྐྱེས་ནས་ཚིག་གི་མཚོན་གྱིས་གདབ་པར་བརྩམས་ཏེ། གླང་པོ་ཆེའི་མགོ་ཅན་ཁྱོད་ཀྱིས་རེ་ཤིག་ཆོས་སམ་ཆོས་མ་ཡིན་པ་འམ། འདུལ་བ་འམ་འདུལ་བ་མ་ཡིན་པ་ཅི་ཤེས། རྟའི་མགོ་ཅན། རྔ་མོའི་མགོ་ཅན། བོང་བུའི་མགོ་ཅན། བ་ལང་གི་མགོ་ཅན། སྤྲེའུ་མགོ་ཅན། སེང་གེའི་མགོ་ཅན། སྟག་མགོ་ཅན། དོམ་མགོ་ཅན། དྲེད་མགོ་ཅན། གུང་མགོ་ཅན། བྱི་ལའི་མགོ་ཅན། ར་མགོ་ཅན། ལུག་མགོ་ཅན། རི་དགས་མགོ་ཅན། མ་ཧེའི་མགོ་ཅན། ཕག་གི་མགོ་ཅན། ཁྱི་མགོ་ཅན་ཁྱེད་ཀྱིས་ཆོས་སམ། ཆོས་མ་ཡིན་པ་འམ། འདུལ་བ་འམ། འདུལ་བ་མ་ཡིན་པ་ཅི་ཤེས་ཞེས་སྨྲས་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འདིས་ཚིག་གི་མཚོན་གྱིས་གདབ་པར་བརྩམས་ཀྱིས་འདོང་ངོ་ཞེས་ཟེར་རོ། །དེ་ན་གང་དག་སོ་སོར་རྟོག་པ་མི་མང་བ་དེ་དག་ནི་འདོང་ངོ ། །གང་དག་སྤྲོ་རིང་བ་དེ་དག་ནི་གལ་ཏེ་རེ་ཤིག་ཆོས་སྟོན་པར་འགྱུར་ན་ནི་མཉན་པར་བྱའོ། །འོན་ཏེ་ཆོས་མ་ཡིན་པ་སྟོན་པར་འགྱུར་ན་ནི་འདི་ཉིད་ཀྱིས་འགྱུར་བར་ཟད་དོ་ཞེས་དེ་ཉིད་ན་འཁོད་དོ། །དེ་ནས་ཆོས་སྒྲོག་པ་སེར་སྐྱས་དགེ་སློང་སློབ་པ་དང་མི་སློབ་པ་དག་ལ་ངག་གིས་ཉེས་པར་སྤྱད་པ་བཅཝ་བརྒྱད་བྱས་ནས་སེང་གེའི་ཁྲི་ལས་བབས་ཏེ་མ་ལ་སྨྲས་པ། ཡུམ་ཁྱོད་དགྱེས་པར་གྱུར་ཏམ། བུ་ཁོ་མོ་དགའ་བར་གྱུར་གྱིས་ཚུར་ཤོག་ཁྱིམ་དུ་འདོང་ངོ ། །སེར་སྐྱས་སྨྲས་པ། ཡུམ་བདག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་མངོན་པར་དགས་མི་མཆིའོ། །བུ་ཁྱོད་ཀྱིས་མའི་ཚིག་ཚིག་མ་ཡིན་པར་མི་བྱའོ་ཞེས་བྱ་བ་མ་ཐོས་སམ་ཚུར་ཤོག་འདོང་ངོ ། །སེར་སྐྱས་སྨྲས་པ། ཁོ་བོ་འཁོར་བ་ན་ཁྱོད་འདྲ་བའི་མ་ཡོད་པར་མ་གྱུར་ཅིག་།དེང་མི་དགེ་བའི་བཤེས་གཉེན་ཁྱོད་ལ་བརྟེན་ནས་ཁོ་བོས་གང་ཟག་སློབ་པ་དང་མི་སློབ་པ་དག་ལ་ངག་གི་ལས་རྩུབ་པོ་བརྗོད་པས་དེ་ནི་རྣམ་པར་སྨིན་པ་མི་འདོད་པ
5.176a
སོ་སོར་མྱོང་བར་འགྱུར་རོ། །སེར་སྐྱའི་མ་དེས་བཱ་རཱ་ཎ་སཱིའི་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ཏུ་བཱ་རཱ་ཎ་སཱི་ན་གནས་པ་དང ། ཕོ་བྲང་འཁོར་བ་དང ། ཡུལ་མི་ཤེས་ལྡན་དག་ཉོན་ཅིག་།འོད་སྲུང་གི་དགེ་སློང་རྣམས་ཀྱིས་ཁོ་མོའི་བུ་ཕྲོགས་ཀྱིས་གྲོགས་གྱིས་ཤིག་ཅེས་ཁུ་ཅོ་གདོན་པར་བརྩམས་སོ། །དེ་ན་གང་དག་དད་པ་ཅན་དེ་དག་ནི་ཡང་དག་པར་དབུགས་འབྱིན་པར་བྱེད་དོ། །གང་དག་མ་དད་པ་དེ་དག་ནི་མཐོ་འཚམ་པར་བྱེད་དོ། །སེར་སྐྱའི་མ་དེ་ལ་ཐོ་བཙམས་པ་ན་འདི་ལྟ་བུའི་ཀུན་ནས་དཀྲིས་པ་བྱུང་སྟེ། དེས་ཁྲག་ཚ་བ་སྐྱུགས་ནས་དུས་ལ་བབས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་སོ། །ཆོས་སྒྲོག་པ་སེར་སྐྱ་ཡང་དགེ་སློང་སློབ་པ་དང་མི་སློབ་པ་རྣམས་ལ་ངག་གི་ཉེས་པར་སྤྱད་པ་བཅཝ་བརྒྱད་བྱས་པས་དུས་ལ་བབ་སྟེ། དུད་འགྲོ་རྣམས་ཀྱི་ནང་དུ་ཆུ་སྲིན་ཉའི་རིགས་འཇིགས་སུ་རུང་བ་འདིར་སྐྱེས་སོ། །དེ་ནས་འཁོར་དེ་ཡིད་ལ་གཅགས་ཏེ། ཤེས་ལྡན་དག་ཆོས་སྒྲོག་པ་སེར་སྐྱ་སྡེ་སྣོད་གསུམ་དང་ལྡན་པ་རིགས་པ་དང་གྲོལ་བའི་སྤོབས་པ་ཅན་གྱིས་སྲོག་ཆགས་བརྒྱ་སྟོང་ཕྲག་དུ་མ་དག་གི་རྣ་བའི་སྦུབས་དག་ཚིམ་པར་བྱས་ནས་ངག་གི་ཉེས་པར་སྤྱད་པ་ཙམ་གྱིས་དུད་འགྲོའི་སྐྱེ་གནས་ངན་པར་སྐྱེས་པར་གྱུར་ན། བདག་ཅག་འདི་ནས་ཤི་འཕོས་པ་རྣམས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་ཁ་ཅིག་གིས་དྲི་བར་གྱུར་པ་དག་རྟོགས་པ་དང ། ཁ་ཅིག་གིས་རྩེ་མོ་དག་དང ། ཁ་ཅིག་གིས་བཟོད་པ་དག་དང ། ཁ་ཅིག་གིས་འཇིག་རྟེན་པའི་ཆོས་ཀྱི་མཆོག་དག་རྟོགས་པ་དང ། ཁ་ཅིག་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དང ། ཁ་ཅིག་གིས་ལན་ཅིག་ཕྱིར་འོང་བའི་འབྲས་བུ་དང ། ཁ་ཅིག་གིས་ནི་ཕྱིར་མི་འོང་བའི་འབྲས་བུ་དང ། ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ
5.176b
བྱས་པ་དང ། ཁ་ཅིག་གིས་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་པ་དང ། ཁ་ཅིག་གིས་རང་སངས་རྒྱས་ཀྱི་བྱང་ཆུབ་དང ། ཁ་ཅིག་གིས་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད་པ་དང ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་གཞག་པ་དེ་ལྟ་བུའི་ཆོས་བསྟན་པ་མཛད་དོ། །དེ་ནས་བཅོམ་ལྡན་འདས་གདུལ་བའི་དོན་ཆེན་པོ་མཛད་ནས་གཤེགས་སོ། །དེ་ནས་ཆུ་སྲིན་ཉའི་རིགས་འདི་སྙམ་དུ་སེམས་ཏེ། གང་གི་ཕྱིར་བདག་གིས་བཅོམ་ལྡན་འདས་ཀྱི་སྤྱན་སྔར་ཚིག་གསུམ་གྱི་ཆོས་ཐོས་ནས་ཟས་ཟ་བར་བྱེད་པ་ནི་བདག་གི་ཚུལ་དང་འཐུན་པ་མ་ཡིན་ནོ་སྙམ་ནས། དེས་ཟས་མི་ཟ་བ་ལ་ཞུགས་སོ། །དུད་འགྲོའི་སྐྱེ་གནས་སུ་སྐྱེས་པ་རྣམས་ཀྱི་མེ་ནི་རྣོ་བ་ཡིན་པས་དེ་བཀྲེས་པས་ཉམ་དམས་པ་ན། བཅོམ་ལྡན་འདས་ལ་སེམས་མངོན་པར་དད་པར་བྱས་ནས་དུས་ལ་བབ་པ་དང་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུ་འམ་ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང ། གང་དུ་སྐྱེས་པ་དང ། །ལས་གང་གིས་སྐྱེས་པའོ། །དེས་དུད་འགྲོ་རྣམས་ཀྱི་ནང་ནས་ཤི་འཕོས་པ་དང ། རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པ་དང ། བཅོམ་ལྡན་འདས་ལ་སེམས་མངོན་པར་དད་པར་བྱས་པས་སྐྱེས་པ་མཐོང་ངོ ། །དེ་ནས་སྔོན་ཆུ་སྲིན་ལྷའི་བུ་དེ་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟན་ཏེ་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་འཐུན་པ་མ་ཡིན་གྱིས། བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་སྔོན་ཆུ་སྲིན་ལྷའི་བུ་རྣ་ཅ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ། དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོ་དག་གིས་ཐུ་བ་བཀང་སྟེ་ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང ། བཅོམ་ལྡན་འདས
5.177a
ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང ། འདི་ལྟར་སྔོན་ཆུ་སྲིན་ལྷའི་བུའི་ཁ་དོག་གིས་མཐུས་ཁང་པ་བརྩེགས་པའི་ཁང་བཟངས་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྔོན་ཆུ་སྲིན་ལྷའི་བུའི་བསམ་པ་དང ། བག་ལ་ཉལ་བ་དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་སྔོན་ཆུ་སྲིན་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡིད་དགས་དག་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་དུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བ་ལྷ་མིན་མི་དང
5.177b
ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱངས་པས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང ། །དེ་ནས་སྔོན་ཆུ་སྲིན་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང ། ཞིང་པ་ལོ་ཐོག་འབྱོར་པ་ལྟ་བུ་དང ། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང ། ནད་པ་ནད་ཐམས་ཅད་ལས་ཡོངས་སུ་ཐར་པ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ ། །དགེ་སློང་དག་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་པའི་རྗེས་སུ་བརྩོན་པར་གནས་པ་དེ་དག་གིས་བཅོམ་ལྡན་འདས་ཀྱི་སྤྱན་སྔར་སྣང་བ་རྒྱ་ཆེན་པོས་ཁྱབ་པར་གྱུར་པ་མཐོང་ངོ ། །མཐོང་ནས་ཐེ་ཚོམ་ཟ་བའི་ཡིད་ཀྱིས་མཚན་མོ་ནམ་ནངས་པ་དང་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས་མདང་སུམ་མི་མཇེད་ཀྱི་བདག་པོ་ཚངས་པ་འམ། ལྷའི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་འམ། ལྷའི་བུ་འབྱོར་པ་ཆེ་བ་མཐུ་ཆེ་བ་གཞན་ཞིག་བཅོམ་ལྡན་འདས་ལ་བལྟ་བའི་སླད་དུ་ཉེ་བར་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མི་མཇེད་ཀྱི་བདག་པོ་ཚངས་པ་ང་ལ་བལྟ་བའི་ཕྱིར་ཉེ་བར་འོངས་པ་ཡང་མ་ཡིན། ལྷའི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ཡང་མ་ཡིན། ལྷའི་བུ་འབྱོར་པ་ཆེ་བ་མཐུ་ཆེ་བ་གཞན་མ་ཡིན་ཏེ། དགེ་སློང་དག་འདི་ལྟར་ཁྱེད་ཀྱིས་ངས་ཆུ་སྲིན་ཉའི་རིགས་གང་ལ་ཚིག་གསུམ་གྱི་ཆོས་བསྟན་པ་དེ་མཐོང་ངམ། བཅོམ་ལྡན་འདས་མཐོང་ངོ ། །དགེ་སློང་དག་དེ་དེ་ནས་ཤི་འཕོས་ཏེ་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་ནས་དེ་མདང་སུམ་ངའི་གན་དུ་འོངས་ཏེ། ངས་དེ་ལ་ཆོས་བསྟན་ནས་དེས་བདེན་པ་མཐོང་སྟེ་རང་གི་གནས་སུ་སོང་ངོ ། །ཡང་དགེ་སློང་རྣམས་ཀྱིས་བཅོམ་ལྡན་འདས་ལ་ཞུས་པ། བཙུན་པ་སྔོན་ཆུ་སྲིན
5.178a
ལྷའི་བུས་ལས་ཅི་བགྱིས་ན་དེས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པར་གྱུར། ལས་ཅི་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བར་བགྱིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་ཆུ་སྲིན་ལྷའི་བུ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། སྔོན་ཆུ་སྲིན་ལྷའི་བུས་ལས་བྱས་ཤིང་བསགས་པ་དག་གཞན་སུ་ཞིག་གིས་ཉམས་སུ་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་ཏེ། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྐྱེས་ནས་མྱོང་བར་འགྱུར་བའི་ལས་ཀྱང་ཡོད། ལན་གྲངས་གཞན་ལ་མྱོང་བར་འགྱུར་བའི་ལས་ཀྱང་ཡོད་དོ། །སྐྱེས་ནས་མྱོང་བར་འགྱུར་པའི་ལས་གང་ཞེ་ན། འདིས་ཆུ་སྲིན་དུ་གྱུར་པ་ན་ང་ལ་སེམས་མངོན་པར་དད་པ་བྱས་པ་གང་ཡིན་པ་དེ་ནི་སྐྱེས་ནས་མྱོང་བར་འགྱུར་བའི་ལས་ཤེས་བྱ་སྟེ། དེའི་རྣམ་པར་སྨིན་པས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པར་གྱུར་ཏོ། །ལན་གྲངས་གཞན་ལ་མྱོང་བར་འགྱུར་བའི་ལས་གང་ཞེ་ན། སེར་སྐྱས་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བ་དང ། ལུང་ཕོག་པ་དང་བླགས་པ་དང ། ཁ་ཏོན་བྱས་པ་དང ། ཕུང་པོ་ལ་མཁས་པ་དང ། ཁམས་ལ་མཁས་པ་དང ། སྐྱེ་མཆེད་ལ་མཁས་པ་དང ། རྟེན་ཅིང་འབྲེལ་བར་འབྱུང་བ་ལ་མཁས་པ་དང ། གནས་དང་གནས་མ་ཡིན་པ་ལ་མཁས་པར་བྱས་པ་གང་ཡིན་པ་དེ་ནི་ལན་གྲངས་གཞན་ལ་མྱོང་བར
5.178b
འགྱུར་བའི་ལས་ཞེས་བྱ་སྟེ། ལས་དེའི་ཚོགས་ཀྱི་དངོས་པོས་ད་ལྟར་ལྷའི་བུར་གྱུར་པས་ངའི་སྤྱན་སྔར་བདེན་པ་མཐོང་བར་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་གསུམ་པ། དེ་ནས་རིགས་ཀྱི་བུ་ལྔ་བརྒྱ་པོ་དེ་དག་འདི་སྙམ་དུ་སེམས་ཏེ། ཤེས་ལྡན་དག་རེ་ཤིག་ཆོས་སྒྲོག་པ་སེར་སྐྱ་དེ་སྡེ་སྣོད་གསུམ་དང་ལྡན་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏེ་སྲོག་ཆགས་བརྒྱ་སྟོང་ཕྲག་དུ་མ་དག་གི་རྣ་བའི་སྦུབས་དག་ཚིམ་པར་བྱས་ནས། ངག་གིས་ཉེས་པར་སྤྱད་པ་ཙམ་གྱིས་དུད་འགྲོའི་སྐྱེ་གནས་ངན་པར་སྐྱེས་པར་གྱུར་ན། བདག་ཅག་ད་ལྟར་དྲག་ཤུལ་ཅན། ལག་པ་དམར་པ། སྣུན་པ་དང་རབ་ཏུ་སྣུན་པ་ལ་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཇུད་པ། གཞན་གྱི་སྲོག་གཅོད་པས་འཚོ་བར་བྱེད་པ་དག་ཡིན་པས། བདག་ཅག་འདི་ནས་ཤི་འཕོས་པ་རྣམས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། གལ་ཏེ་བདག་ཅག་རིགས་དམའ་བར་སྐྱེས་པར་མ་གྱུར་ན། བདག་ཅག་གིས་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་ཆུ་བོ་རྣམས་ལས་རྒལ་བར་བྱ་བ་དང ། སྦྱོར་བ་རྣམས་ལས་ཡང་དག་པར་འདའ་བར་བྱ་བའི་ཕྱིར་སྤྲོ་བར་བྱ། འབད་པར་བྱ། བརྩལ་བར་བྱ་བ་ཞིག་ན་སྙམ་མོ། །སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ཀྱི
5.179a
ཆོས་ཉིད་ནི་འདུལ་བར་གྱུར་པའི་སྐྱེ་བོ་ལ་ཐུགས་བརྩེ་བས་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་པ་མཛད་དོ། །ཉན་ཐོས་ཆེན་པོ་རྣམས་ཀྱང་དེ་བཞིན་པས་ཚེ་དང་ལྡན་པ་ཤཱ་རིའི་བུས་ཉན་ཐོས་ཀྱི་མིག་གིས་འཇིག་རྟེན་ལ་རྣམ་པར་བལྟས་པ་ན་རིགས་ཀྱི་བུ་ལྔ་བརྒྱ་པོ་དེ་དག་ཤིན་དུ་ཡིད་ལ་གཅགས་ཤིང་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འཁོད་པ་དག་མཐོང་ངོ ། །མཐོང་ནས་ཀྱང་རིགས་ཀྱི་བུ་ལྔ་བརྒྱ་པོ་དེ་དག་ག་ལ་བ་དེར་སོང་སྟེ་ཕྱིན་ནས་དེ་དག་ལ་འདི་སྐད་ཅེས་སྨྲས་སོ། །བཞིན་བཟངས་དག་ཁྱེད་ཅག་ཅིའི་ཕྱིར་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འཁོད། དེ་དག་གིས་སྨྲས་པ། འཕགས་པ་འདི་ལྟར་ཆོས་སྒྲོག་པ་སེར་སྐྱ་དེ་སྡེ་སྣོད་གསུམ་དང་ལྡན་པ་རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏེ་སྲོག་ཆགས་བརྒྱ་སྟོང་ཕྲག་དུ་མ་དག་གི་རྣ་བའི་སྦུབས་དག་ཚིམ་པར་བགྱིས་ནས། ངག་གིས་ཉེས་པར་སྤྱད་པ་ཙམ་གྱིས་དུད་འགྲོའི་སྐྱེ་གནས་ངན་པར་སྐྱེས་པར་གྱུར་ན། བདག་ཅག་ད་ལྟར་དྲག་ཤུལ་ཅན། སུག་པ་དམར་བ། སྣུན་པ་དང་རབ་ཏུ་སྣུན་པ་ལ་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་སྩོལ་བ། གཞན་གྱི་སྲོག་གཅོད་པས་འཚོ་བར་བགྱིད་པ་དག་ལགས་པས་བདག་ཅག་འདི་ནས་ཤི་འཕོས་པ་རྣམས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། གལ་ཏེ་བདག་ཅག་རིགས་དམའ་བར་སྐྱེས་པར་མ་གྱུར་ན། བདག་ཅག་གིས་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང ། ཆུ་བོ་རྣམས་ལས་རྒལ་བར་བགྱི་བ་དང ། སྦྱོར་བ་རྣམས་ལས་ཡང་དག་པར་འདའ་བར་བགྱི་བའི་སླད་དུ་སྤྲོ་བར་བགྱི། འབད་པར་བགྱི། བརྩལ་བར་བགྱི་བ་ཞིག་ན་སྙམ་པས་བདག་ཅག་ཇི་ལྟར་སེམས་ཁོངས་སུ་ཆུད་ཅིང་མི་མཆིས་སུ་རུང ། བཞིན་བཟངས་དག་ཐུབ་པའི་དབང་པོའི་གསུང་རབ་འདི་ལ་ནི་རིགས་གཅེས་པ་མ་ཡིན། ཁྱིམ་གཅེས་པ་མ་ཡིན། རུས་གཅེས་པ་མ་ཡིན་གྱི། ཐུབ་པའི་དབང་པོའི་གསུང
5.179b
རབ་འདི་ལ་ནི་སྒྲུབ་པ་གཅེས་པ་ཡིན་ནོ། །ཡང་སྨྲས་པ། དེ་བཞིན་གཤེགས་རྣམས་རིགས་དང་ནི། །ཁྱིམ་དང་རུས་དག་རྟོག་མི་མཛད། །ཡུན་རིང་བྱས་པར་གྱུར་ཀྱང་ནི། །ལས་རྣམས་ལ་ནི་ཡོངས་རྟོག་མཛད། །གལ་ཏེ་ཁྱེད་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འདོད་ན་ཚུར་ཤོག་།ཡུ་བུ་ཅག་བཅོམ་ལྡན་འདས་ག་ལ་བ་དེར་འདོང་དང ། བཅོམ་ལྡན་འདས་ཀྱིས་ཁྱེད་ཅག་རབ་ཏུ་འབྱིན་པར་འགྱུར་རོ། །འཕགས་པ་ལེགས་ཏེ། གལ་ཏེ་དེ་ལྟ་ན་བདག་ཅག་བཅོམ་ལྡན་འདས་ཀྱི་སྤྱན་སྔར་རབ་ཏུ་འབྱུང་དུ་མཆིའོ། །དེ་ནས་ཚེ་དང་ལྡན་པ་ཤཱ་རིའི་བུས་རིགས་ཀྱི་བུ་ལྔ་བརྒྱ་པོ་དེ་དག་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རིགས་ཀྱི་བུ་ལྔ་བརྒྱ་པོ་འདི་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་དག་རབ་ཏུ་དབྱུང་དུ་གསོལ། བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་པས་རབ་ཏུ་བྱུང་ཞིང་དགེ་སློང་དག་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང ། དེ་དག་བཅོམ་ལྡན་འདས་ཀྱི་བཀའ་མཇུག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་ཏོ། །སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང ། ལག་པ་ལྷུང་བཟེད་དང་བྱ་མ་བུམ་གྱིས་བྲེལ་བ་དང ། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་བཅོམ་ལྡན་འདས
5.180a
ཀྱིས་རིགས་ཀྱི་བུ་ལྔ་བརྒྱ་པོ་དེ་དག་རབ་ཏུ་ཕྱུང་བསྙེན་པར་རྫོགས་པར་མཛད་ནས་ཡངས་པ་ཅན་དུ་ཅི་དགྱེས་པར་བཞུགས་ཏེ། འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་གཤེགས་ནས་མཐར་གྱིས་རྒྱུ་ཞིང་གཤེགས་པ་ན་འོད་མ་ཅན་གྱི་གྲོང་དུ་བྱོན་ནས་འོད་མ་ཅན་གྱི་གྲོང་ན་གྲོང་གི་བྱང་ཕྱོགས་ཤིང་ཤ་པའི་ཚལ་ན་བཞུགས་སོ། །དེའི་ཚེ་ན་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ལྟར་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་དག་ལ་ལྟ་སྨོས་ཀྱང་ཅི་དགོས་པ་བྱུང་གིས། དགེ་སློང་དག་ཁྱེད་ཅག་ཚུར་ཤོག་ལ་སྨོས་འདྲིན་ཇི་ལྟ་བ་དང ། ཕེབས་པར་སྨྲ་བ་ཇི་ལྟ་བ་དང ། འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་ལོང་ཤིག་།ང་ཡང་འོད་མ་ཅན་གྱི་གྲོང་འདི་ཉིད་དུ་བསྙེན་བཀུར་བ་དགེ་སློང་ཀུན་དགའ་བོ་དང་དབྱར་གནས་པར་ཁས་ལེན་གྱིས། ཐམས་ཅད་ཉིད་ནི་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ ། །དགེ་སློང་དེ་དག་གིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་སྨོས་འདྲིན་ཇི་ལྟ་བ་དང ། ཕེབས་པར་སྨྲ་བ་ཇི་ལྟ་བ་དང ། འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་སོ། །བཅོམ་ལྡན་འདས་ཀྱང་འོད་མ་ཅན་གྱི་གྲོང་དེ་ཉིད་དུ་བསྙེན་བཀུར་བ་ཚེ་དང་ལྡན་པ་ཀུན་དགའ་བོ་དང་དབྱར་གནས་པར་ཞལ་གྱིས་བཞེས་སོ། །དེ་ནས་དགེ་སློང་ལྔ་བརྒྱ་པོ་དེ་དག་འདི་སྙམ་དུ་སེམས་ཏེ། ཚེ་དང་ལྡན་པ་དག་ཤེས་པར་གྱིས་ཤིག་།བཅོམ་ལྡན་འདས་ཀྱིས་འདི་སྐད་ཅེས། དགེ་སློང་དག་ད་ལྟར་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང
5.180b
རང་གི་བུ་དག་ལ་ཟས་སྦྱིན་པ་དང་བྱ་བ་སེམས་པ་དཀའ་ན་སློངས་མོ་པ་དག་ལ་ལྟ་སྨོས་ཀྱང་ཅི་དགོས་པ་དག་བྱུང་གིས། དགེ་སློང་ཁྱེད་ཅག་ཚུར་ཤེག་ལ། སྨོས་འདྲིན་ཇི་ལྟ་བ་དང ། ཕེབས་པར་སྨྲ་བ་ཇི་ལྟ་བ་དང ། འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་ལོང་ཤིག་།ང་ཡང་འོད་མ་ཅན་གྱི་གྲོང་འདི་ཉིད་དུ་བསྙེན་བཀུར་བ་དགེ་སློང་ཀུན་དགའ་བོ་དང་དབྱར་གནས་པར་ཁས་ལེན་གྱིས། ཐམས་ཅད་ཉིད་ནི་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ་ཞེས་བཀའ་སྩལ་ན། འདི་ན་བདག་ཅག་ལ་ཉེ་དུ་འགའ་ཡང་མེད་དེ་ཉ་པའི་གྲོང་ན་བདག་ཅག་གི་ཉེ་དུ་དག་འཁོད་ཀྱིས་བདག་ཅག་ཉ་པའི་གྲོང་དུ་དོང་སྟེ་ཉེ་དུ་རྣམས་བལྟས་ནས་ཉ་པའི་གྲོང་གི་ཉེན་ཀོར་དུ་ལོ་མ་དང་འདབ་མའི་སྤྱིལ་བུ་དག་བྱས་ཏེ་དབྱར་གནས་པར་ཁས་བླང་བར་བྱ་གོར་མ་ཆག་སྙམ་མོ། །དེ་ནས་དགེ་སློང་ལྔ་བརྒྱ་པོ་དེ་དག་ཉ་པའི་གྲོང་དུ་དོང་སྟེ་ཉེ་དུ་དག་ལ་བལྟས་ནས་ཉ་པའི་གྲོང་གི་ཉེན་ཀོར་དུ་ལོ་མ་དང ། འདབ་མའི་སྤྱིལ་བུ་དག་བྱས་ཏེ་དབྱར་གནས་པར་ཁས་བླངས་སོ། །དེ་དག་འདི་སྙམ་དུ་སེམས་ཏེ། ཚེ་དང་ལྡན་པ་དག་ཤེས་པར་གྱིས་ཤིག་།བདག་ཅག་ནི་ཐོས་པ་ཉུང་ངུ་དང་ལྡན་པ་དག་ཡིན་པས་བདག་ཅག་གི་ཉེ་དུ་དག་ཉེ་བར་འོངས་པར་གྱུར་ན་བདག་ཅག་གིས་ཉེ་བར་འོངས་པ་དེ་དག་ལ་ཆོས་སྟོན་པར་མི་ནུས་ཀྱིས། བདག་ཅག་གིས་ཉེ་དུ་འོངས་པ་དག་ལ་ཉེ་དུ་དག་ཁྱེད་ཅག་གང་དག་གི་གྲོང་ཚིགས་ན་དགེ་སློང་གི་དགེ་འདུན་འདི་འདི་ལྟར་དབྱར་གནས་པར་ཁས་བླངས་པར་གྱུར་པའི་ཉེ་དུ་དེ་དག་གིས་ནི་རྙེད་པ་ལེགས་པ་རྙེད་པ་ཡིན་ཏེ། དགེ་སློང་འདི་ནི་མི་རྟག་པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས་དང ། སྤོང་བའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང །
5.181a
འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་སྡུག་པའི་འདུ་ཤེས་དང ། རྣམ་པར་སྔོས་པའི་འདུ་ཤེས་དང ། རྣམ་པར་རྣགས་པའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར་འབུས་བཞིགས་པའི་འདུ་ཤེས་དང ། རྣམ་པར་ཟོས་པའི་འདུ་ཤེས་དང ། རྣམ་པར་དམར་བའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་གོང་གི་འདུ་ཤེས་དང ། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང ། གཉིས་པ་དང ། གསུམ་པ་དང ། བཞི་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང ། རྒྱུན་དུ་ཞུགས་པའི་འབྲས་བུ་དང ། ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། རྫུ་འཕྲུལ་གྱི་ཡུལ་དང ། ལྷའི་རྣ་བ་དང ། སེམས་ཡོངས་སུ་ཤེས་པ་དང ། སྔོན་གྱི་གནས་དང ། འཆི་འཕོ་དང་སྐྱེ་བ་དང ། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉི་གའི་ཆ་ལས་རྣམ་པར་གྲོལ་བ་ཡིན་ནོ་ཞེས་གཅིག་གིས་གཅིག་གི་ཡོན་ཏན་བསྒྲག་པར་བྱ་གོར་མ་ཆག་སྙམ་མོ། །དེ་དག་གི་ཉེ་དུ་དག་ཉེ་བར་འོངས་པར་གྱུར་ནས། དེ་དག་གིས་ཉེ་དུ་དག་ཉེ་བར་འོངས་པ་དེ་དག་ལ་གཅིག་གིས་གཅིག་གི་ཡོན་ཏན་བསྒྲག་པར་བརྩམས་ཏེ། ཉེ་དུ་དག་ཁྱེད་ཅག་གང་དག་གི་གྲོང་ཚིགས་ན་དགེ་སློང་གི་དགེ་འདུན་ཡོན་གྱི་གནས་འདི་ལྟ་བུ་དབྱར་གནས་པར་ཁས་བླངས་པར་གྱུར་པའི་ཉེ་དུ་དེ་དག་གིས་ནི་རྙེད་པ་ལེགས་པར་རྙེད་པ་ཡིན་ཏེ། དགེ་སློང་འདི་ནི་མི་རྟག་པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས
5.181b
དང་སྤོང་བའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་སྡུག་པའི་འདུ་ཤེས་དང ། རྣམ་པར་སྔོས་པའི་འདུ་ཤེས་དང ། རྣམ་པར་རྣགས་པའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར་འབུས་བཞིགས་པའི་འདུ་ཤེས་དང ། རྣམ་པར་ཟོས་པའི་འདུ་ཤེས་དང ། རྣམ་པར་དམར་བའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་གོང་གི་འདུ་ཤེས་དང ། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང ། གཉིས་པ་དང ། གསུམ་པ་དང ། བཞི་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང ། རྒྱུན་དུ་ཞུགས་པའི་འབྲས་བུ་དང ། ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། རྫུ་འཕྲུལ་གྱི་ཡུལ་དང ། ལྷའི་རྣ་བ་དང ། སེམས་ཡོངས་སུ་ཤེས་པ་དང ། སྔོན་གྱི་གནས་དང ། འཆི་འཕོ་དང ། སྐྱེ་བ་དང ། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉི་གའི་ཆ་ལས་རྣམ་པར་གྲོལ་བ་ཡིན་ནོ། །དེ་དག་གིས་སྨྲས་པ། འཕགས་པ་དག་ཁྱེད་ཀྱིས་ཡོན་ཏན་གྱི་ཚོགས་དེ་ལྟ་བུ་དག་ཐོབ་བམ། ཐོབ་བོ། །འཇིག་རྟེན་ནི་ཡོན་ཏན་ལ་དགའ་བ་ཡིན་པས་རེ་ཤིག་རང་གི་བུ་དག་ལས་ཀྱང་ཕྲོགས་ཏེ། དེ་དག་ལ་བསོད་སྙོམས་སྦྱིན་པ་དང་བྱ་བར་སེམས་སོ། །སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་ཉན་ཐོས་རྣམས་ཀྱིས་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་དབྱར་ཉེ་བར་སྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཟླ་བ་ཉ་ལའོ། །དེ་ལ་གང་དག་དབྱར་ཟླ་འབྲིང་པོའི་ཉ་ལ་དབྱར་ཉེ་བར་སྒྲུབ་པའི་ཚེ་གདམས་ངག་མནོས་ཏེ། གྲོང་དང ། གྲོང་རྡལ་དང །
5.182a
ཡུལ་འཁོར་དང ། རྒྱལ་པོའི་ཕོ་བྲང་དག་ཏུ་དབྱར་གནས་པར་ཁས་ལེན་པ་དེ་དག་ནི་སྟོན་ཟླ་འབྲིང་པོའི་ཟླ་བ་ཉ་ལ་ལྷགས་ནས་ཇི་ལྟར་ཐོབ་པ་ནི་བརྗོད་པར་བྱེད་མ་ཐོབ་པ་ནི་ཐོབ་པར་བྱ་བའི་ཕྱིར་འོག་ཏུ་འདྲི་བར་བྱེད་དོ། །དེ་ནས་དགེ་སློང་གང་དག་ཡངས་པ་ཅན་གྱི་ཉེན་ཀོར་སྤོང་བྱེད་གྱི་གྲོང་དུ་དབྱར་གནས་པར་ཁས་བླངས་པ་དེ་དག་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པས་ལྷུང་བཟེད་དང་ཆོས་གོས་ཐོགས་ཏེ། འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་འདོང་བ་ན་མཐར་གྱིས་རྒྱུ་ཞིང་འདོང་བའི་ཚེ་འོད་མ་ཅན་གྱི་གྲོང་དུ་ཕྱིན་པ་དང ། ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པ་དང་བཅས་པ་ཉིད་ཀྱིས་ཚིག་གིས་བསུ་ནས་ལྷུང་བཟེད་དང ། ཆོས་གོས་དང ། ཁར་བ་དང ། གཏུར་བུ་དང ། རིལ་བ་སྤྱི་བླུགས་དང ། འབྲུ་མར་སྣོད་དང ། ཞཝ་དང ། ལྷམ་ཡུ་ཆད་དང ། མཆིལ་ལྷམ་ལེན་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་ཚུར་ཤོག་འོངས་པ་ལེགས་སོ། །ཚེ་དང་ལྡན་པ་དག་ཁྱེད་ཅག་གང་ནས་ད་ལྟར་འདིར་འོངས། ཁྱེད་ཅག་གང་དུ་དབྱར་གནས་པར་ཁས་བླངས། ཚེ་དང་ལྡན་པ་ཀུན་དགའ་བོ་བདག་ཅག་སྤོང་བྱེད་ཀྱི་གྲོང་ནས་འདིར་འོངས་སོ། །བདག་ཅག་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་སོ། །ཚེ་དང་ལྡན་པ་དག་ཇི་ལྟར་སྤོང་བྱེད་ཀྱི་གྲོང་དུ་བདེ་བ་ལ་རེག་པར་དབྱར་གནས་པར་ཁས་བླངས་སམ། ཁྱེད་ཅག་བསོད་སྙོམས་ཀྱིས་ངལ་བར་མ་གྱུར་ཏམ། ཚེ་དང་ལྡན་པ་ཀུན་དགའ་བོ་བདག་ཅག་སྤོང་བྱེད་ཀྱི་གྲོང་དུ་ཏེ་པོར་བདེ་བ་ལ་རེག་པར་དབྱར་གནས་པར་ཁས་བླངས་མོད་ཀྱི་བདག་ཅག་བསོད་སྙོམས་ཀྱིས་ངལ་བར་གྱུར་ཏེ། ཚེ་དང་ལྡན་པ་དག་དེ་ཁོ་ན་ལྟར་སྣང་སྟེ་འདི་ལྟར་བསོད་སྙོམས་ཀྱིས་བྲེལ་བས་རིད་པ་དང །
5.182b
ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པ་དང ། ལྤགས་པ་དང ། ཤ་དང ། ཁྲག་བྲི་བར་གྱུར་ཏོ། །དགེ་སློང་གང་དག་ཉ་པའི་གྲོང་གི་ཉེན་ཀོར་དུ་དབྱར་གནས་པར་ཁས་བླངས་པ་དེ་དག་ཀྱང་དབྱར་གྱི་ཟླ་བ་གསུམ་པོ་དག་འདས་ནས། ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ཚོ་བ་དང ། ལྤགས་པ་དང ། ཤ་དང ། ཁྲག་རྒྱས་པས་ལྷུང་བཟེད་དང ། ཆོས་གོས་ཐོགས་ཏེ་འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་འདོང་བ་ན། མཐར་གྱིས་རྒྱུ་ཞིང་འདོང་བའི་ཚེ་འོད་མ་ཅན་གྱི་གྲོང་དུ་ཕྱིན་པ་དང ། ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པ་དང་བཅས་པ་ཉིད་ཀྱི་ཚིག་གིས་བསུ་ནས་ལྷུང་བཟེད་དང ། ཆོས་གོས་དང ། ཁར་བ་དང ། གཏུར་བུ་དང ། རིལ་བ་སྤྱི་བླུགས་དང ། འབྲུ་མར་སྣོད་དང ། ཞཝ་དང ། ལྷམ་ཡུ་ཆད་དང ། མཆིལ་ལྷམ་ལེན་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་ཚུར་ཤོག་།འོངས་པ་ལེགས་སོ། །ཚེ་དང་ལྡན་པ་དག་ཁྱེད་ཅག་གང་ནས་ད་ལྟར་འདིར་འོངས། ཁྱེད་ཅག་དབྱར་གང་དུ་གནས་པར་ཁས་བླངས། ཚེ་དང་ལྡན་པ་ཀུན་དགའ་བོ་བདག་ཅག་ཉ་པའི་གྲོང་ནས་འདིར་འོངས་སོ། །བདག་ཅག་ཉ་པའི་གྲོང་དུ་དབྱར་གནས་པར་ཁས་བླངས་སོ། །ཚེ་དང་ལྡན་པ་དག་ཇི་ལྟར་ཉ་པའི་གྲོང་དུ་བདེ་བ་ལ་རེག་པར་དབྱར་གནས་པར་ཁས་བླངས་སམ། ཁྱེད་ཅག་བསོད་སྙོམས་ཀྱིས་ངལ་བར་མ་གྱུར་ཏམ། ཚེ་དང་ལྡན་པ་ཀུན་དགའ་བོ་བདག་ཅག་ཉ་པའི་གྲོང་དུ་ཏེ་པོར་བདེ་བ་ལ་རེག་པར་དབྱར་གནས་པར་ཁས་བླངས་སོ། །བདག་ཅག་བསོད་སྙོམས་ཀྱིས་ཀྱང་ངལ་བར་མ་གྱུར་ཏོ། །ཚེ་དང་ལྡན་པ་དག་དེ་ཁོ་ན་ལྟར་སྣང་སྟེ། འདི་ལྟར་བསོད་སྙོམས་ཀྱིས་བྲེལ་བ་མེད་པས་ཚོ་བ་དང ། ལྤགས་པ་དང ། ཤ་དང ། ཁྲག་རྒྱས་པར་གྱུར་ཏོ། །ཚེ་དང་ལྡན་པ་དག་ད་ལྟར་མུ་གེ་ཉམ་ང་བ། དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང ། བྱ་བར་སེམས་དཔའ་དཀའ་ན་སློངས་མོ་པ་ལྟ་སྨོས
5.183a
ཀྱང་ཅི་དགོས་པ་བྱུང་ན་འདིར་ཚེ་དང་ལྡན་པ་ཁྱེད་ཅག་བསོད་སྙོམས་ཀྱིས་བྲེལ་བ་མེད་པར་གྱུར་པའི་རྒྱུ་ནི་གང་ཡིན་རྐྱེན་ནི་གང་ཡིན། ཚེ་དང་ལྡན་པ་ཀུན་དགའ་བོ་བདག་ཅག་ཉེ་དུ་རྣམས་ཀྱིས་མདུན་དུ་གཅིག་གིས་གཅིག་གི་ཡོན་ཏན་བསྒྲག་པ་བྱས་ཏེ། དགེ་སློང་འདི་ནི་མི་རྟག་པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས་དང ། སྤོང་བའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་སྡུག་པའི་འདུ་ཤེས་དང ། རྣམ་པར་སྔོས་པའི་འདུ་ཤེས་དང ། རྣམ་པར་རྣགས་པའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར་འབུས་བཞིགས་པའི་འདུ་ཤེས་དང ། རྣམ་པར་ཟོས་པའི་འདུ་ཤེས་དང ། རྣམ་པར་དམར་པའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་གོང་གི་འདུ་ཤེས་དང ། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང ། གཉིས་པ་དང ། གསུམ་པ་དང ། བཞི་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང ། རྒྱུན་དུ་ཞུགས་པའི་འབྲས་བུ་དང ། ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། རྫུ་འཕྲུལ་གྱི་ཡུལ་དང ། ལྷའི་རྣ་བ་དང ། སེམས་ཡོངས་སུ་ཤེས་པ་དང ། སྔོན་གྱི་གནས་དང ། འཆི་འཕོ་དང་སྐྱེ་བ་དང ། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉི་གའི་ཆ་ལས་རྣམ་པར་གྲོལ་བ་ཡིན་ནོ་ཞེས་གཅིག་གིས་གཅིག་གི་ཡོན་ཏན་བསྒྲག་པར་བྱས་སོ། །ཅི་ཡང་དག་པས་སམ། ཡང་དག་པ་མ་ཡིན་པསོ
5.183b
ཡང་དག་པ་མ་ཡིན་པས་སོ། ཁྱེད་ཅག་ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་བླ་མ་མེད་ལ་མེད་བཞིན་དུ་སྨྲར་རུང་ངམ། རུང་ཡང་སྲིད་མི་རུང་ཡང་སྲིད་དེ། འདི་ལྟར་བདག་ཅག་གིས་སྨྲས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་བླ་མ་མེད་ལ་མེད་བཞིན་དུ་སྨྲ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཆུ་ཀླུང་ཡིད་འོང་ལྡན་གྱི་འགྲམ་ན་གནས་པའི་དགེ་སློང་རྣམས་ལ་སྨྲས་པ། དགེ་སློང་དག་ཁྱོད་ཀྱིས་ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་བླ་མ་མེད་ལ་མེད་བཞིན་དུ་སྨྲས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །དགེ་སློང་དག་གསུམ་པོ་འདི་དག་ནི་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་ཡིན་ཏེ། གསུམ་གང་ཞེ་ན། དགེ་སློང་དག་འདི་ལ་རྐུན་པོ་འཁོར་བརྒྱ་དང་ལྡན་པ་འམ། འཁོར་སྟོང་དང་ལྡན་པ་དེ་བརྒྱ་འམ་སྟོང་གི་མདུན་དུ་སོང་སྟེ། ཁྱིམ་འབུགས་པར་བྱེད། མདུད་པ་འགྲོལ་བར་བྱེད། རིལ་གྱིས་འཕྲོག་པར་བྱེད། ལམ་བསྒུགས་ཤིང་འདུག་པར་བྱེད། མེ་གཏོང་བར་བྱེད། ལམ་པ་འཇོམས་པར་བྱེད། རྒྱལ་པོའི་མཛོད་རྐུ་བར་བྱེད། གྲོང་འཇོམས་པར་བྱེད། གྲོང་ཁྱེར་འཇོམས་པར་བྱེད། ཡུལ་འཇོམས་པར་བྱེད་པ་དེ་ནི་དགེ་སློང་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་དང་པོ་ཡིན་ནོ། །དགེ་སློང་དག་གཞན་ཡང་རྐུན་པོ་རྐུན་པོ་ཆེན་པོ་འཁོར་བརྒྱ་དང་ལྡན་པ་ཡང་མ་ཡིན།
5.184a
འཁོར་སྟོང་དང་ཡང་ལྡན་པ་མ་ཡིན་ལ། དེ་བརྒྱ་འམ། སྟོང་གི་མདུན་དུ་སོང་སྟེ། ཁྱིམ་འབུགས་པར་མི་བྱེད། མདུད་པ་འགྲོལ་བར་མི་བྱེད། རིལ་གྱིས་འཕྲོགས་པར་མི་བྱེད། ལམ་སྒུགས་ཤིང་འདུག་པར་མི་བྱེད། མེ་གཏོང་བར་མི་བྱེད། ལམ་པ་འཇོམས་པར་མི་བྱེད། རྒྱལ་པོའི་མཛོད་རྐུ་བར་མི་བྱེད། གྲོང་འཇོམས་པར་མི་བྱེད། གྲོང་ཁྱེར་འཇོམས་པར་མི་བྱེད། ཡུལ་འཇོམས་པར་མི་བྱེད་མོད་ཀྱི། འོན་ཀྱང་དགེ་འདུན་གྱི་རྩ་འམ། ཤིང་ངམ། མེ་ཏོག་གམ། འབྲས་བུ་འམ། འོད་མ་འམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་བྱེད་པ་དང ། དེས་ཁྱིམ་མི་གསོ་བར་བྱེད་པ་འདི་ནི་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་གཉིས་པ་ཡིན་ནོ། །དགེ་སློང་དག་གཞན་ཡང་རྐུན་པོ་རྐུན་པོ་ཆེན་པོ་འཁོར་བརྒྱ་དང་ལྡན་པ་ཡང་མ་ཡིན། འཁོར་སྟོང་དང་ལྡན་པ་ཡང་མ་ཡིན་ལ། དེ་བརྒྱ་འམ། སྟོང་གི་མདུན་དུ་སོང་སྟེ། ཁྱིམ་འབུགས་པར་མི་བྱེད། མདུད་པ་འགྲོལ་བར་མི་བྱེད། རིལ་གྱིས་འཕྲོག་པར་མི་བྱེད། ལམ་སྒུགས་ཤིང་འདུག་པར་མི་བྱེད། མེ་གཏོང་བར་མི་བྱེད། ལམ་པ་འཇོམས་པར་མི་བྱེད། རྒྱལ་པོའི་མཛོད་རྐུ་བར་མི་བྱེད། གྲོང་འཇོམས་པར་མི་བྱེད། གྲོང་ཁྱེར་འཇོམས་པར་མི་བྱེད། ཡུལ་འཇོམས་པར་མི་བྱེད། དགེ་འདུན་གྱི་རྩཝ་འམ། ཤིང་ངམ། མེ་ཏོག་གམ། འབྲས་བུ་འམ། འོད་མ་འམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་མི་བྱེད་ལ། དེས་ཁྱིམ་མི་གསོ་བར་མི་བྱེད་མོད་ཀྱི་འོན་ཀྱང་མི་ཆོས་བླ་མ་མེད་ལ་མེད་བཞིན་དུ་སྨྲ་བར་བྱེད་པ་འདི་ནི་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་གསུམ་པ་ཡིན་ནོ། །དགེ་སློང་དག་རྐུན་པོ་རྣམས་ཀྱི་ནང་ན་རྐུན་པོ་གང་འཁོར་བརྒྱ་དང་ལྡན་པ་འམ། འཁོར་སྟོང་དང་ལྡན་པ་འམ། བརྒྱ་འམ་སྟོང་གི་མདུན་དུ་སོང་སྟེ། ཁྱིམ་འབུགས་པར་བྱེད། མདུད་པ་འགྲོལ་བར་བྱེད། རིལ་གྱིས་འཕྲོག་པར་བྱེད། ལམ་སྒུགས་ཤིང་འདུག་པར་བྱེད། མེ་གཏོང་བར་བྱེད། ལམ་པ་འཇོམས་པར་བྱེད། རྒྱལ་པོའི་མཛོད་རྐུ་བར་བྱེད། གྲོང
5.184b
འཇོམས་པར་བྱེད། གྲོང་ཁྱེར་འཇོམས་པར་བྱེད། ཡུལ་འཇོམས་པར་བྱེད་པ་དེ་ནི་ཅུང་ཟད་ཙམ་ཡིན་ནོ། །རྐུན་པོ་རྣམས་ཀྱི་ནང་ན་རྐུན་པོ་གང་དགེ་འདུན་གྱི་རྩཝ་འམ། ཤིང་ངམ། མེ་ཏོག་གམ། འབྲས་བུ་འམ། འོད་མ་འམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་བྱེད་པ་དང ། དེས་ཁྱིམ་མི་གསོ་བར་བྱེད་པ་དེ་ཡང་ཅུང་ཟད་ཙམ་ཡིན་ནོ། །དགེ་སློང་དག་རྐུན་པོ་རྣམས་ཀྱི་ནང་ན་གང་མིའི་ཆོས་བླ་མ་མེད་ལ་མེད་བཞིན་དུ་སྨྲ་བར་བྱེད་པ་དེ་ནི་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང ། ལྷ་དང་མིར་བཅས་པའི་ནང་ན་རྐུན་པོ་རྐུན་པོ་ཆེན་པོ་ཡིན་ནོ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །འདི་ན་གང་ཞིག་དགྲ་བཅོམ་མ་གྱུར་པར། །བདག་ཉིད་དགྲ་བཅོམ་ཡིན་ཞེས་བརྗོད་བྱེད་པ། །དེ་ནི་ཚངས་བཅས་འཇིག་རྟེན་རྐུན་པོ་སྟེ། །ཚུལ་ཁྲིམས་འཆལ་བ་ཡིན་པར་བརྗོད་པར་བྱ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་ངས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། དགེ་འདུན་བསྡུ་བའི་ཕྱིར་ཞེས་བྱ་བ་ནས། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་ལ་ཡང་དག་པར་བསྟན་པ་ཡུན་རིང་དུ་གནས་པར་བྱ་བའི་བར་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང ། འཕགས་པ་དང་བྱེ་བྲག་ཐོབ་པ་དང ། ཤེས་པ་དང ། མཐོང་བ་དང ། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང ། འདི་སྐད་ཅེས་ཚེ་དང་ལྡན་པ་དག་བདག
5.185a
གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་མཛད་དོ། །དགེ་སློང་རབ་ཏུ་མང་པོ་གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ན་རྣལ་འབྱོར་གྱི་རྗེས་སུ་བརྩོན་པར་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ཡིད་ལ་བྱེད་པས་ཉོན་མོངས་པ་དག་རྣམ་པར་མནན་པས་དེས་ན་འདོད་པ་ལ་འདོད་ཆགས་དང ། གནོད་སེམས་དག་དེ་དག་གི་རྒྱུད་ལ་ཀུན་དུ་མི་འབྱུང་ནས་དེའི་འོག་ཏུ་དེ་དག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག་།དགོན་པ་པ་དག་གིས་ཐོབ་པར་བྱ་བ་གང་ཡིན་པ་དེ་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད། ཚངས་པར་སྤྱད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤོག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། དེ་དག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང ། དེར་དེ་དག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བའི་དགེ་ཚུལ་རྣམས་དང ། ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་ཏུ་བྱུང་བར་གྱུར་ནས་དེ་དག་འདི་སྙམ་དུ་སེམས་ཏེ། ཚེ་དང་ལྡན་པ་དག་ཤེས་པར་གྱིས་ཤིག་།བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་འདི་ལྟར་བཅའ་བ་མཛད་དེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང ། འཕགས་པ་དང ། བྱེ་བྲག་ཐོབ་པ་དང ། ཤེས་པ་དང ། མཐོང་བ་དང ། རེག་པར་སྤྱོད་པ
5.185b
མེད་ལ་མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང ། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན་དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ། །ཞེས་བཅའ་བ་མཛད་ན། བདག་ཅག་གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ན་གནས་པ་དག་གིས་ཞི་གནས་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ཡིད་ལ་བྱེད་པས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་ཏུ་མི་འབྱུང་ནས། བདག་ཅག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག་།དགོན་པ་དག་གིས་ཐོབ་པར་བྱ་བ་གང་ཡིན་པ་དེ་དག་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད། ཚངས་པར་སྤྱད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། བདག་ཅག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང ། དེར་བདག་ཅག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང ། ཀུན་དགའ་ར་བའི་དགེ་ཚུལ་རྣམས་དང་ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་ཏུ་བྱུང་བར་མ་གྱུར་ན། བདག་ཅག་ལ་ཕམ་པར་གྱུར་པའི་ལྟུང་བ་བྱུང་བར་མ་གྱུར་ཏམ། ཚུར་ཤོག་བདག་ཅག་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་ཞིང་ཕྱིན་ནས། ཚེ་དང་ལྡན་པ་ཀུན་དགའ་བོ་ལ་དོན་དེ་ཡོངས་སུ་དྲི་བར་བྱ་སྟེ། བདག་ཅག་ལ་ཚེ་དང་ལྡན་པ་ཀུན་དགའ་བོས་ཇི་སྐད་དུ་ལུང་སྟོན་པར་འགྱུར་བ་དེ་ཁོ་ན་བཞིན་དུ་གཟུང་བར་བྱའོ་སྙམ་ནས། དེ་དག་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས།
5.186a
ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་མཁྱེན་པར་མཛོད་ཅིག་།བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འདི་ལྟར་བཅའ་བ་མཛད་དེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང ། འཕགས་པ་དང ། བྱེ་བྲག་ཐོབ་པ་དང ། ཤེས་པ་དང ། མཐོང་བ་དང ། རེག་པར་སྤྱོད་པ་མེད་པས་མེད་བཞིན་དུ་འདི་ཤེས་སོ། །འདི་མཐོང་ངོ ། །ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ། །ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བཅའ་བ་མཛད་ན། བདག་ཅག་གནས་མལ་དགོན་པ་ནགས་ཁྲོད་དང ། རི་དྲུང་དང་བས་མཐའ་དག་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ཡིད་ལ་བྱེད་པས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་མི་འབྱུང་ནས། བདག་ཅག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག་།དགོན་པ་པ་དག་གིས་ཐོབ་པར་བྱ་བ་གང་ཡིན་པ་དེ་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད ། ཚངས་པར་སྤྱོད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། བདག་ཅག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང ། དེར་བདག་ཅག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བའི་དགེ་ཚུལ་རྣམས་དང ། ལྷན་ཅིག་འདྲེ་ཞིང
5.186b
གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་ཏུ་བྱུང་བར་གྱུར་ན། བདག་ཅག་ལ་ཕམ་པར་གྱུར་པའི་ལྟུང་བ་བྱུང་བར་མ་གྱུར་ཏམ། ཚུར་ཤེག་བདག་ཅག་ཚེ་དང་ལྡན་པ་ཀུན་དགའ་བོ་ག་ལ་བ་དེར་འདོང་ཞིང་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་དོན་དེ་ཡོངས་སུ་དྲི་བར་བྱ་སྟེ། བདག་ཅག་ལ་ཚེ་དང་ལྡན་པ་ཀུན་དགའ་བོས་ཇི་སྐད་དུ་ལུང་སྟོན་པར་འགྱུར་བ་དེ་ཁོ་ན་བཞིན་དུ་གཟུང་བར་བྱའོ་སྙམ་ནས། བདག་ཅག་ཚེ་དང་ལྡན་པ་ཀུན་དགའ་བོ་ལ་དོན་དེ་ཡོངས་སུ་འདྲི་ན། ཚེ་དང་ལྡན་པ་བདག་ཅག་ལ་ཕམ་པར་གྱུར་པའི་ལྟུང་བ་འབྱུང་བར་མ་གྱུར་ཏམ། དེ་ནས་ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཁྲིད་དེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འདི་ལྟར་བཅའ་བ་མཛད་དེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང ། འཕགས་པ་དང ། བྱེ་བྲག་ཐོབ་པ་དང ། ཤེས་པ་དང ། མཐོང་བ་དང ། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ། །འདི་མཐོང་ངོ ། །ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང ། མ་དྲིས་ཀྱང་རུང་འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་སྟེ། གསོབ་གསོག་བརྫུན་དུ་སྨྲས་སོ། །ཞེས་ཟེར་ན་དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་ན། ཚེ་དང་ལྡན་པ་གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ན་གནས་པ་འདི་དག་གིས
5.187a
ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ཡིད་ལ་བགྱིད་པས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་མི་འབྱུང་ནས། འདི་དག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག་།དགོན་པ་པ་དག་གིས་ཐོབ་པར་བྱ་བ་གང་ཡིན་པ་དེ་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད། ཚངས་པར་སྤྱོད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤོག་བདག་ཅག་གནས་མལ་དགོན་པ་དག་བཏང་སྟེ་གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། འདི་དག་གིས་གནས་མལ་དགོན་པ་དག་བཏང་སྟེ་གནས་མལ་གྲོང་མཐའ་བ་དག་ཏུ་ཞུགས་པ་དང ། དེར་འདི་དག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བ་པའི་དགེ་ཚུལ་རྣམས་དང་ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་བྱུང་བར་གྱུར་ནས། འདི་དག་བདག་ཅག་ལ་ཕམ་པར་གྱུར་བའི་ལྟུང་བ་བྱུང་བར་མ་གྱུར་ཏམ། སྙམ་དུ་འགྱོད་པ་སྐྱེས་པར་གྱུར་ན་དེའི་སླད་དུ་བདག་བཅོམ་ལྡན་འདས་ལ་དོན་འདི་ཡོངས་སུ་ཞུ་སྟེ། འདི་དག་ལ་ཕམ་པར་གྱུར་པའི་ལྟུང་བ་བྱུང་བར་མ་གྱུར་ཏམ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་ལྟ་བས་ན་མངོན་པའི་ང་རྒྱལ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་རྗེས་སུ་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར
5.187b
གདོན་པར་བྱའོ། །ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང ། འཕགས་པ་དང ། བྱེ་བྲག་ཐོབ་པ་དང ། ཤེས་པ་དང ། མཐོང་བ་དང ། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང ། མ་དྲིས་ཀྱང་རུང ། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་བཞི་པོ་དག་ལས་ཞེས་བྱ་བ་ནས་དོན་གྱི་སྐབས་འདིར་ནི་གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་དགེ་སློང་དུ་དགོངས་ཏེ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་ཡང་དགེ་སློང་གང་ཞེས་གསུངས་སོ། །མངོན་པར་མི་ཤེས་ཤིང་ཞེས་བྱ་བ་ལ་ཅི་ཞིག་མངོན་པར་མི་ཤེས་ཤིང་ཞེ་ན། གཟུགས་མངོན་པར་མི་ཤེས་པ་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་མངོན་པར་མི་ཤེས་ཤིང་ངོ ། ཡོངས་སུ་མི་ཤེས་ལ་ཞེས་བྱ་བ་ལ་ཅི་ཞིག་ཡོངས་སུ་མི་ཤེས་ལ་ཞེ་ན། གཟུགས་ཉིད་ཡོངས་སུ་མི་ཤེས་པ་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཡོངས་སུ་མི་ཤེས་ལའོ། །མིའི་ཆོས་ཤེས་བྱ་བ་ནི་མི་རྣམས་ཀྱི་ཆོས་མྱ་ངན་ལས་འདས་པ་སྟེ། དེ་མི་རྣམས་ཀྱིས་འཐོབ་ཀྱི་ཟ་མ་དང ། མ་ནིང་དང ། མཚན་གཉིས་པ་དག་གིས་ཀྱང་མི་འཐོབ་ན་སེམས་ཅན་དམྱལ་བ་དང ། དུད་འགྲོ་དང ། ཡི་དགས་རྣམས་གྱིས་ལྟ་སྨོས་ཀྱང་ཅི་དགོས་པའི་ཕྱིར་རོ། །བླ་མ་ཞེས་བྱ་བ་ནི་འདོད་པའི་ཁམས་པས་གཟུགས་ཀྱི་ཁམས་བླ་མ་ཡིན་ལ། གཟུགས་ཀྱི་ཁམས་པས་གཟུགས་མེད་པའི་ཁམས་བླ་མ་ཡིན་པའོ། །
5.188a
ཡང་ན་མིའི་ཆོས་ཞེས་བྱ་བ་ནི་སྒྲིབ་པ་ལྔ་པོ་དག་གོ། །བླ་མ་ཞེས་བྱ་བ་ནི་དེ་དག་སྤངས་པ་གང་ཡིན་པའོ། །མཐའ་ཞེས་བྱ་བ་ལ་མཐའ་ཞེས་བྱ་བ་ནི་མྱ་ངན་ལས་འདས་པའོ། །འཕགས་པ་ཞེས་བྱ་བ་ལ་འཕགས་པ་ནི་སངས་རྒྱས་རྣམས་དང ། སངས་རྒྱས་ཀྱི་ཉན་ཐོས་རྣམས་སོ། །བྱེ་བྲག་ཐོབ་པ་ཞེས་བྱ་བ་ལ་བྱེ་བྲག་ཐོབ་པ་ནི་དགེ་སྦྱོང་གི་ཚུལ་གྱི་འབྲས་བུ་བཞི་པོ་དག་སྟེ། རྒྱུན་དུ་ཞུགས་པའི་འབྲས་བུ་དང ། ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པ་ཉིད་དོ། །ཤེས་པ་ཞེས་བྱ་བ་ནི་ཤེས་པ་བཞི་པོ་དག་སྟེ། སྡུག་བསྔལ་ཤེས་པ་དང ། ཀུན་འབྱུང་བ་ཤེས་པ་དང ། འགོག་པ་ཤེས་པ་དང ། ལམ་ཤེས་པའོ། །མཐོང་བ་ཤེས་བྱ་བ་ནི་མཐོང་བ་བཞི་པོ་དག་སྟེ། སྡུག་བསྔལ་མཐོང་བ་དང ། ཀུན་འབྱུང་བ་མཐོང་བ་དང ། འགོག་པ་མཐོང་བ་དང ། ལམ་མཐོང་བའོ། །རེག་པར་སྤྱོད་པ་ཞེས་བྱ་བ་ལ་རེག་པར་སྤྱོད་པ་ནི་བསམ་གཏན་བཞི་པོ་དག་སྟེ། སྙོམས་པར་འཇུག་པ་ལས་ཡིན་གྱི་སྐྱེ་བ་ལས་ནི་མ་ཡིན་ནོ། །མེད་ལ་ཞེས་བྱ་བ་ནི་དེའི་དངོས་པོ་མེད་ལའོ། །མེད་བཞིན་དུ་ཞེས་བྱ་བ་ནི་བདག་ཉིད་ལ་འོ། །འདི་ཤེས་སོ་ཞེས་བྱ་བ་ལ་ཅི་ཞིག་ཤེས་ཞེ་ན། སྡུག་བསྔལ་ཤེས་པ་དང ། ཀུན་འབྱུང་བ་དང ། འགོག་པ་དང ། ལམ་ཤེས་སོ་ཞེས་སོ། །འདི་མཐོང་ངོ་ཞེས་བྱ་བ་ལ་ཅི་ཞིག་མཐོང་ངོ་ཞེ་ན། ལྷ་རྣམས་མཐོང་ངོ ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མིའམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་མཐོང་ངོ ། །ལྷ་རྣམས་ཀྱིས་ཀྱང་བདག་མཐོང་ངོ ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས
5.188b
ཀྱིས་ཀྱང་བདག་མཐོང་ངོ ། །ལྷ་རྣམས་ཀྱི་སྒྲ་ཐོས་སོ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་གི་སྒྲ་ཐོས་སོ། །ལྷ་རྣམས་བལྟ་བའི་ཕྱིར་འགྲོ་འོ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ། །ལྷ་རྣམས་བདག་བལྟ་བའི་ཕྱིར་འོང་ངོ ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་བདག་བལྟ་བའི་ཕྱིར་འོང་ངོ ། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། ཀུན་དུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད།
5.189a
སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། རྡུལ་ཁྲོད་ཀྱི་ཤ་ཟ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས་དང ། སྤོང་བའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་སྡུག་པའི་འདུ་ཤེས་དང ། རྣམ་པར་སྔོས་པའི་འདུ་ཤེས་དང ། རྣམ་པར་རྣགས་པའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར་འབུས་གཞིགས་པའི་འདུ་ཤེས་དང ། རྣམ་པར་ཟོས་པའི་འདུ་ཤེས་དང ། རྣམ་པར་དམར་བའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་གོང་གི་འདུ་ཤེས་དང ། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་བོ། །མ་ཐོབ་བཞིན་དུ་བདག་གིས་བསམ་གཏན་དང་པོ་དང ། གཉིས་པ་དང ། གསུམ་པ་དང ། བཞི་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང ། རྒྱུན་དུ་ཞུགས་པའི་འབྲས་བུ་དང །
5.189b
ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པ་ཉིད་ཀྱི་འབྲས་བུ་དང ། རྫུ་འཕྲུལ་གྱི་ཡུལ་དང ། ལྷའི་རྣ་བ་དང ། སེམས་ཡོངས་སུ་ཤེས་པ་དང ། སྔོན་གྱི་གནས་དང ། འཆི་འཕོ་དང་སྐྱེ་བ་དང ། ཟག་པ་ཟད་པ་ཐོབ་བོ། །བདག་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང ། གཉི་གའི་ཆ་ལས་རྣམ་པར་གྲོལ་བ་ཡིན་ནོ་ཞེས་པའོ། །ཁས་འཆེས་པ་ལས་ཞེས་བྱ་བ་ནི་ཁས་བླངས་པ་ལས་སོ། །དེ་ལྟུང་བ་བྱུང་བ་ཞེས་བྱ་བ་ནི་གཞི་དེའིའོ། །རྣམ་པར་དག་པར་འདོད་ནས་ཞེས་བྱ་བ་ནི་རྣམ་པར་ལྡང་བར་འདོད་ནས་སོ། །དུས་གཞན་ཞིག་ན་ཞེས་བྱ་བ་ནི་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་དེ་བདག་ཉིད་ལ་འགྱོད་པ་དང ། ཅུང་ཟད་འགྱོད་པ་དང ། རྣམ་པར་འགྱོད་པ་དང ། རབ་ཏུ་འགྱོད་པ་སྐྱེས་པས་སོ། །འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ། །ཞེས་སྨྲས་ཞེས་བྱ་བ་ནི་ཡིད་ཀྱི་རྣམ་པར་ཤེས་པས་སོ། །མ་མཐོང་བར་མཐོང་ངོ་ཞེས་སྨྲས་ཏེ། ཞེས་བྱ་བ་ནི་མིག་གི་རྣམ་པར་ཤེས་པས་སོ། །གསོབ་གསོག་བརྫུན་དུ་སྨྲས་སོ་ཞེས་བྱ་བ་དེ་དག་ནི་སྨྲས་པའི་རྣམ་གྲངས་ཀྱི་ཚིག་ཡིན་ནོ། །ཟེར་ན་ཞེས་བྱ་བ་ནི་བརྗོད་ནའོ། །མངོན་པའི་ང་རྒྱལ་མ་གཏོགས་ཏེ་ཞེས་བྱ་བ་ནི་མངོན་པའི་ང་རྒྱལ་བཞག་སྟེའོ། །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་སྟེ། སྔ་མ་བཞིན་ནོ། །དེ་ཡང་ཞེས་བྱ་བ་དེ་ནི་ཉེ་བར་བསྟན་པ་དང ། ཀུན་ཏུ་བསྟན་པའི་ཚིག་བླ་དགས་ཡིན་ནོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི་སྔ་མ་བཞིན་ནོ། །གནས་པར་མི་བྱའོ་ཞེས་བྱ་བ་ཡང་གང་ཟག་བཅུ་གཉིས་པོ་དག་གི་བསྐོ་བར་མི་བྱའོ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། ་་་་་་་།སྡོམ་ལ། འདུ་ཤེས་བསྒྱུར་དང་དགོན་པ་དང ། །ཁྱིམ་རྣམས་སུ་ནི་སྟན་བཀྲ་དང ། །རང་གི་མཚན་ཉིད་འཛིན་པ་དང ། །བདག་ཉིད་ཉེ་བར་སྟོན་པའོ། །དགེ་སློང་གིས
5.190a
འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་མཐོང་ངོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་ངོ་ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་མཐོང་ངོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་ཀྱི་སྒྲ་ཐོས་སོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་གྱི་སྒྲ་ཐོས་སོ་ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་བལྟ་བའི་ཕྱིར་འགྲོའོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་བལྟ་བའི་ཕྱིར་འགྲོའོ་ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་བདག་བལྟ་བའི་ཕྱིར་འོང་ངོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བདག་བལྟ་བའི་ཕྱིར་འོང་ངོ་ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱང་བདག་བལྟ་བའི་ཕྱིར་འོང་ངོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་དང
5.190b
ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ། འདི་སྐད་ཅེས་ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་ཡང་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱང་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་ཐོབ་བོ་ཞེས་ཟེར་ན་ཕམ་པར་འགྱུར་རོ། །མི་རྟག་པ་ལ་སྡུག་བསྔལ་བའི་འདུ་ཤེས་ནས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་བར་དུ་ཐོབ་བོ་ཞེས་ཟེར་ན་ཕམ་པར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་མ
5.191a
ཐོབ་བཞིན་དུ་བདག་གིས་བསམ་གཏན་དང་པོ་ཐོབ་བོ་ཞེས་ཟེར་ན་ཕམ་པར་འགྱུར་རོ། །དེ་བཞིན་དུ་གཉིས་པ་དང ། གསུམ་པ་དང ། བཞི་པ་དང ། སྔ་མ་བཞིན་དུ་བདག་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང ། གཉི་གའི་ཆ་ལས་རྣམ་པར་གྲོལ་བའོ་ཞེས་ཟེར་ན་ཕམ་པར་འགྱུར་རོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་བཞི་པ། འདི་ལྟར་དགེ་སློང་རབ་ཏུ་མང་པོ་དག་གྲོང་མེད་པའི་དགོན་པའི་གནས་ཤིག་ན་གནས་ཤིང་དེ་ན་དེ་དག་ལ་མི་མ་ཡིན་པ་དག་གིས་འཚེ་བ་ན། དེ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་མི་མ་ཡིན་པ་དག་གིས་འཚེ་བར་མི་བྱེད་ནས། དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་དེ་ན་གནས་ཏེ། དེ་ན་བདག་ལ་མི་མ་ཡིན་པ་རྣམས་འཚེ་བར་མི་བྱེད་དོ་ཞེས་ཟེར་ན་ཕམ་པར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་ཁྱིམ་རྣམས་སུ་འགྲོན་དུ་བོས་ཏེ་ཟ་བར་བྱེད་ཅིང ། དེ་ན་དེ་དག་ལ་སྟན་ཁྲ་བོ་ཉེ་བར་བཀྲ་བ་དག་བཤམས་ཤིང ། དེ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས། དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་ཀྱང་ཁྱིམ་དེར་འགྲོན་དུ་བོས་ཤིང་ཟོས་ཏེ་དེ་ན་བདག་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་དོ། །ཞེས་ཟེར་ན་ཕམ་པར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དགོན་པ་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ
5.191b
མི་འབྱུང་ནས། དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་དེ་ན་གནས་ཤིང་བདག་གིས་ཀྱང་དེ་ན་གནས་པ་ན་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་བདག་གི་རྒྱུད་ལ་ཡང་ཀུན་ཏུ་མི་འབྱུང་ངོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་གིས་ལྷ་རྣམས་མཐོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོ་འོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་བ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོ་འོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་གིས་རྡུལ་ཁྲོད་ཀྱི་ཤ་ཟ་རྣམས་མཐོང་བ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་གིས་ལྷ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་གྱི་སྒྲ་ཐོས་པ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་གིས་རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན
5.192a
པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་ལྷ་རྣམས་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོ་འོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་ལ་ལྷ་རྣམས་བལྟ་བའི་ཕྱིར་འོང་བ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འོང་བ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་ལ་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འོང་བ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད།
5.192b
རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་དང་ལྷན་ཅིག་ལྷ་རྣམས་གཏམ་འདྲེ་བར་བྱེད། ཕེབས་པར་སྨྲ་བར་བྱེད། །སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་ཡང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་དང་ལྷན་ཅིག་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། །སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གི་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་གིས་མི་རྟག་པའི་འདུ་ཤེས་ཐོབ་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །མི་རྟག་པའི་འདུ་ཤེས་ཇི་ལྟ་བ་དེ་བཞིན་དུ་གང་གིས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་བར་དུ་ཐོབ་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །
5.193a
དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་གིས་བསམ་གཏན་དང་པོ་ཐོབ་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །བསམ་གཏན་དང་པོ་ཇི་ལྟ་བ་དེ་བཞིན་དུ་གང་གིས་སྔ་མ་བཞིན་དུ་གཉིས་པ་དང ། གསུམ་པ་དང ། བཞི་པ་ནས་དགེ་སློང་གང་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང ། གཉི་གའི་ཆ་ལས་རྣམ་པར་གྲོལ་བའི་བར་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་གྲོང་མེད་པའི་དགོན་པའི་གནས་ཤིག་ན་གནས་ཤིང་དེ་ལ་དེ་དག་ན་མི་མ་ཡིན་པ་དག་གིས་འཚེ་བ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་མི་མ་ཡིན་པ་དག་གིས་འཚེ་བར་མི་བྱེད་ནས་དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་གྲོང་མེད་པའི་དགོན་པའི་གནས་དེ་ན་གནས་པ་དེ་ལ་དེ་ན་མི་མ་ཡིན་པ་རྣམས་འཚེ་བར་མི་བྱེད་པ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་ཁྱིམ་རྣམས་སུ་འགྲོན་དུ་བོས་ཏེ་ཟ་བར་བྱེད་ཅིང་དེ་ན་དེ་དག་ལ་སྟན་ཁྲ་བོ་ཉེ་བར་བཀྲ་བ་དག་བཤམས་ཤིང་དེ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས། དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་ཁྱིམ་དེར་འགྲོན་དུ་བོས་ཤིང་ཟོས་ཏེ། དེ་ན་དེ་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་པ་དེ་ཡོད་དོ་ཞེས་ཟེར་ཞིང །
5.193b
འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་དགོན་པ་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམས་པར་མནན་པས་འདོད་པ་ལ་འདོད་ཆགས་དང་གནོད་སེམས་དག་རྒྱུད་ལ་ཀུན་དུ་མི་འབྱུང་ནས་དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་དགེ་སློང་གང་གིས་གྲོང་མེད་པའི་དགོན་པའི་གནས་དེ་ན་གནས་ཤིང་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་མི་འབྱུང་བ་དེ་ཡོད་དོ་ཞེས་ཟེར་ཞིང ། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། ་་་་་་་་།སྡོམ་ལ། ཕན་ཚུན་ཞེ་ནི་འགྲས་པ་དང ། །ཆར་འབབ་པ་དང་མཚན་གྱུར་དང ། །རྒྱལ་པོའི་ཁབ་ཀྱི་ཆུ་དྲོན་དང ། །གླང་ཆེན་རྣམས་ཀྱི་སྒྲ་སྐད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་དང ། ཡངས་པ་ཅན་གྱི་ལིད་ཙ་བི་རྣམས་ཕན་ཚུན་ཞེ་འགྲས་པར་གྱུར་ཏོ། །དེ་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ། ཡུལ་སྤོང་བྱེད་གཞོམ་པར་བརྩམས་པ་དང ། ཡུལ་སྤོང་བྱེད་ན་གནས་པའི་སྐྱེ་བོའི་ཚོགས་ཀྱིས་ཡངས་པ་ཅན་གྱི་ལིད་ཙ་བི་རྣམས་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་དཔུང་གི་ཚོགས་ཡན་ལག་བཞི་པོ་གླང་པོ་ཆེ་བའི་ཚོགས་དང ། རྟ་པའི
5.194a
ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་ཡུལ་སྤོང་བྱེད་འཇོམས་པར་བྱེད་དོ་ཞེས་ར་མདའ་བ་བཟློག་གོ། །ཡངས་པ་ཅན་གྱི་ལིད་ཙ་བི་རྣམས་ཀྱིས་ཐོས་ནས་དེ་དག་གིས་ཀྱང་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ། ཡངས་པ་ཅན་ནས་འབྱུང་བར་བརྩམས་པ་དང ། དེ་དག་འབྱུང་བ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་སོ། །ཡངས་པ་ཅན་གྱི་ལིད་ཙ་བི་རྣམས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། ཤེས་ལྡན་དག་འདི་ནི་མཆོག་གསུམ་པ་ཡིན་ཏེ། འདིས་མི་ཤེས་པ་འམ། མི་མཐོང་བ་འམ། མ་རིག་པ་འམ། རྣམ་པར་མི་ཤེས་པ་ཅུང་ཟད་ཀྱང་མེད་དོ་ཞེས་གྲག་གིས་བདག་ཅག་གིས་འདི་ལ་བདག་ཅག་གང་རྒྱལ་བར་འགྱུར་བ་དྲི་བར་བྱའོ་སྙམ་ནས། དེ་དག་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་དྲིས་པ། འཕགས་པ་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲས་ཡུལ་སྤོང་བྱེད་འཇོམས་པར་བགྱིད་པས་བདག་ཅག་གཡུལ་འགྱེད་པའི་སླད་དུ་མངོན་དུ་མཆི་ན། བདག་ཅག་གང་རྒྱལ་བར་འགྱུར། མཽད་གལ་གྱི་བུ་ཆེན་པོས་སྨྲས་པ། བ་སིཥྠའི་རིགས་དག་ཁྱེད་ཅག་རྒྱལ་བར་འགྱུར་རོ། །དེ་དག་འཕགས་པ་མཽད་གལ་གྱི་བུ་ཆེན་པོས་བདག་ཅག་རྒྱལ་བར་ལུང་བསྟན་ཏོ་ཞེས་རངས་པ་དང ། དགའ་བ་དང ། མཆོག་ཏུ་དགའ་བ་དང ། མགུ་བ་དང ། ཡིད་བདེ་བ་སྐྱེས་པ་ནས་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲ་མ་བརྩིས་པ་ཚམ་ཚོམ་མེད་པ་ཁོ་ནར་དེའི་སྟེང་དུ་བརྟུལ་བ་དང ། དེ་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ཕམ་པ་དང ། སྐྲག་པ་དང ། བཅོམ་པ་དང ། གཞན་རྒྱལ་བ་དང ། རྒྱབ་ཀྱིས་ཕྱོགས་པར་བྱས་ཏེ།
5.194b
ཆུ་ཀླུང་གང་གཱའི་འགྲམ་དུ་ཕྱིན་ཏོ། །ཡངས་པ་ཅན་གྱི་ལིད་ཙ་བི་རྣམས་རྒྱ་ཆེར་རབ་ཏུ་དགའ་བའི་ཡིད་ཀྱིས་ཕྱི་བཞིན་ཁོ་ནར་འབྲང་བ་དང ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བསམས་པ། ཡངས་པ་ཅན་གྱི་ལིད་ཙ་བི་འདི་དག་ནི་གདུག་ཅིང་རྣམ་པར་གནོན་པ་ཡིན་པས་གལ་ཏེ་བདག་གང་གཱའི་ནང་དུ་ཞུགས་ན་ཡང་འདི་དག་གིས་རྒྱ་མོ་འམ་མཆིལ་པས་དབྱུང་བས་འབྱིན་པར་བྱེད་ཅིང་ཚུལ་མ་ཡིན་པས་སྡུག་བསྔལ་བར་འགྱུར་བའི་གནས་ཡོད་ཀྱིས་བདག་མངོན་དུ་ཕྱོགས་ཏེ་ཤི་བ་ནི་ལེགས་སོ་སྙམ་དུ་རིག་ནས། དེས་འཆི་བའི་ཤུགས་ཀྱིས་བསྔོས་པ་དང ། དཔུང་ཐམས་ཅད་ཕྱིར་ལོག་ནས་ཡངས་པ་ཅན་གྱི་ལིད་ཙ་བི་རྣམས་ཕམ་པ་དང ། སྐྲག་པ་དང ། བཅོམ་པ་དང ། གཞན་རྒྱལ་བ་དང ། རྒྱབ་ཀྱིས་ཕྱོགས་པར་བྱས་ནས། གར་ཡང་མ་འཁོར་བར་ཡངས་པ་ཅན་དུ་ཞུགས་ནས། སྒོ་དག་བཅད་དེ་ར་བའི་ཁར་སྦྲེངས་ནས་འདུག་གོ། །ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གཡུལ་ལས་རྣམ་པར་རྒྱལ་ཞིང་ཡུལ་སྤོང་བྱེད་བཅོམ་ནས་རྒྱལ་པོའི་ཁབ་ཏུ་སོང་ངོ ། །དེ་ནས་ཡངས་པ་ཅན་གྱི་ལིད་ཙ་བི་རྣམས་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ན་འཕགས་པ་མཽད་གལ་གྱི་བུ་ཆེན་པོས་ཁྱེད་ཅག་རྒྱལ་བར་འགྱུར་རོ་ཞེས་བདག་ཅག་ལ་ལུང་བསྟན་ན། དེ་ཅི་གལ་ཏེ་བདག་ཅག་གི་ཡངས་པ་ཅན་ཕྲོགས་པར་གྱུར་ན་དེ་ལྟ་ན་རྒྱལ་བར་འགྱུར་རམ་ཞེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བར་བྱེད་དོ། །དེ་དག་སྨོད་པར་བྱེད་པ་ན་དྲུག་སྡེ་དག་ཀྱང་བསོད་སྙོམས་ལ་ཞུགས་ནས་དེ་དག་གིས་དེ་དག་ལ་འཕྱ་བ་ཐོས་ནས་དྲུག་སྟེ་དག་གིས་སྨྲས་པ། ཤེས་ལྡན་དག་ཁྱོད་ཅག་སུ་ལ་སྨོད། ཁྱེད་ཅག་ལའོ། །འཕགས་པ་མཽད་གལ་གྱི་བུ་ཆེན་པོས་ཁྱེད་ཅག་རྒྱལ་བར་འགྱུར་རོ་ཞེས་བདག་ཅག་ལ་ལུང་བསྟན་ན། དེ་ཅི་གལ་ཏེ་བདག་ཅག་གི་ཡངས་པ་ཅན་ཕྲོགས་པར་གྱུར་ན་དེ་ལྟ་ན་རྒྱལ་བར་འགྱུར་རམ། དྲུག་སྡེ་དག་གིས་སྨྲས་པ། ཤེས་ལྡན་དག་དང་པོར་གཡུལ་སྤྲད་པ་གང་ཡིན་པ་དེར་སུ་རྒྱལ། ཁོ་བོ་ཅག་གོ། །གལ་ཏེ་ཁྱེད་ཅག་རྒྱལ་ན་དེའི
5.195a
འོག་ཏུ་ཅིའི་ཕྱིར་ལྡོག་པར་མི་བྱེད། ཅི་ཡུལ་མ་ག་དྷ་བཅོམ་སྟེ་རྒྱལ་པོའི་ཁབ་ལེན་པར་འདོད་དམ། ཁྱེད་ཅག་གི་ཧ་ཅང་མནན་ན་ཝ་ཡང་སེང་གེ་ལྟ་བུར་འགྱུར་རོ་ཞེས་བྱ་བ་མ་ཐོས་སམ། དེ་དག་སྤོབས་པ་མེད་པར་གྱུར་ནས་ཅང་མི་སྨྲ་བར་འཁོད་པ་དང ། དྲུག་སྟེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་ཟིན་མོད་ཀྱི་འོན་ཀྱང་དོན་ཉུང་ངུ་དེ་ལ་ལྟུང་བ་བྱུང་གིས་ཚུར་ཤེག་དེའི་གན་དུ་དོང་ལ་འཆགས་སུ་གཞུག་གོ་ཞེས་དེ་དག་ཟས་ཀྱི་བྱ་བ་བྱས་ནས་ཕྱག་འཚལ་ཏེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ། གནས་བརྟན་ཇེ་སྐབས་ཕྱེ་ཤིག་།ཚེ་དང་ལྡན་པ་དག་ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཡངས་པ་ཅན་གྱི་ལི་ཙ་བི་རྣམས་ལ་རྒྱལ་བར་ལུང་བསྟན་ཏམ། ལུང་བསྟན་ཏོ། །ཅི་གལ་ཏེ་དེ་དག་གི་ཡངས་པ་ཅན་ཕྲོགས་པར་གྱུར་ན་དེ་ལྟ་ན་རྒྱལ་བར་འགྱུར་རམ། ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ཁྱེད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག་།ཚེ་དང་ལྡན་པ་དག་ལྟུང་བ་མ་མཐོང་ངོ ། །དྲུག་སྡེ་རྣམས་ཀྱིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ། །བོས་ཤིག་།བོས་སོ། །ཚེ་དང་ལྡན་པ་གཎ་ཌཱི་རྡུངས་ཤིག་།མཽད་གལ་གྱི་བུ་ཆེན་པོ་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས། དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང ། དྲུག་སྡེ་དག་ཀྱང་དེ་དང་ལྷན
5.195b
ཅིག་དོང་ངོ ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎ་ཌཱི་བརྡུངས་པ་ན་ཚེ་དང་ལྡན་པ་སུ་ཞིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་རྨེད་པར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་འང་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པ་མི་བགྱིད་དེ། འདི་ལྟར་ཚེ་དང་ལྡན་པ་མཽད་གལ་གྱི་བུ་ཆེན་པོས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས་དེས་ན་མིའི་ཆོས་བླ་མ་དམ་འཆའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས་དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་ཐོ་མ་བརྩམས་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་སྤྱན་སྔར་དེང་ལ་དོན་འདི་ཞུས་ཤིག་།བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་དུ་ཟུང་ཤིག་།སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གཡུལ་ངོར་དང་པོ་མི་མ་ཡིན་པ་དག་གཡུལ་འགྱེད་ཅིང ། དེའི་འོག་ཏུ་མི་རྣམས་གཡུལ་འགྱེད་དེ། གང་དུ་མི་མ་ཡིན་པ་རྣམས་རྒྱལ་བར་འགྱུར་བ་དེར་མི་རྣམས་ཀྱང་རྒྱལ་བར་འགྱུར་བས་དེའི་ཕྱིར་དགེ་སློང་མཽད་གལ་གྱི་བུ་ཆེན་པོས་ཡངས་པ་ཅན་གྱི་ལི་ཙ་བི་རྣམས་ལ་ལུང་བསྟན་པ་དེའི་ཚེ་ན་ཡངས་པ་ཅན་པའི་མི་མ་ཡིན་པ་རྣམས་ཀྱིས
5.196a
རྒྱལ་པོའི་ཁབ་པའི་མི་མ་ཡིན་པ་རྣམས་ཕམ་པར་བྱས་སོ། །གང་གི་ཚེ་དེ་དག་གང་གཱའི་འགྲམ་དུ་ཕྱིན་པ་དེའི་ཚེ་རྒྱལ་པོའི་ཁབ་པའི་མི་མ་ཡིན་པ་དག་གིས་ཡངས་པ་ཅན་པའི་མི་མ་ཡིན་པ་དག་ཕམ་པར་བྱས་སོ། །གལ་ཏེ་དགེ་སློང་མཽད་གལ་གྱི་བུ་ཆེན་པོ་ལ་དེ་ཡང་དྲིས་པར་གྱུར་ན། དགེ་སློང་མཽད་གལ་གྱི་བུ་ཆེན་པོས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མཽད་གལ་གྱི་བུ་ཆེན་པོ་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །ཇི་ལྟར་ཡངས་པ་ཅན་པ་དག་གིས་སྔར་རྒྱལ་བར་བྱས་ནས། ཕྱིས་རྒྱལ་པོ་མ་སྐྱེས་དགྲས་གང་གཱའི་འགྲམ་དུ་འཆི་བའི་ཤུགས་ཀྱིས་བསྡོས་པས་ཕམ་པར་བྱས་པ་དེ་བཞིན་དུ་རྒྱལ་པོ་མ་སྐྱེས་དགྲས་སྔར་རྒྱལ་བ་བྱས་ནས། ཕྱིས་ཡངས་པ་ཅན་པ་དག་གིས་གང་གཱའི་འགྲམ་དུ་འཆི་བའི་ཤུགས་ཀྱིས་བསྡོས་ནས་ཕམ་པར་བྱས་པ་ཡང་དེ་བཞིན་རྒྱས་པར་སྦྱར་བར་བྱའོ། །སངས་རྒྱས་བཅོམ་ལྡན་འདས་ཡངས་པ་ཅན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་མུ་སྟེགས་ཅན་རྣམས་ཀྱིས་ལོ་བཅུ་གཉིས་སུ་ཐན་པ་འབྱུང་བར་བསྟན་ཏོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་པ་དང ། དེ་ལ་ཡངས་པ་ཅན་གྱི་ལི་ཙ་བི་རྣམས་ཀྱིས་དྲིས་པ། འཕགས་པ་ཡུན་ཇི་སྲིད་ཀྱིས་ལྷས་ཆར་འབེབས་པར་འགྱུར། དེས་སྨྲས་པ། ཤེས་ལྡན་དག་ཉི་མ་བདུན་འདས་ནས་སོ། །དེ་དག་འཕགས་པ་མཽད་གལ་གྱི་བུ་ཆེན་པོས་ཉི་མ་བདུན་འདས་ནས་ལྷས་ཆར་འབེབས་པར་འགྱུར་རོ། །ཞེས་ལུང་བསྟན་ཏོ་ཞེས་དེ་དག་གི་ཁྱིམ་དང་བང་བ་ན་འདུག་པའི་འབྲུ་གང་དག་ཡིན་པ་དེ་དག་ཀྱང་ཕྱི་རོལ་ཏུ་ཁྱེར་ཏེ་བོར་རོ། །ཇི་ཙམ་ན་ཉི་མ་བདུན་འདས་ནས་ལྷས་འབྲུག་བསྒྲགས་ཤིང་སྒྲ་ཕྱུང་ནས་ས་རྒྱས་བཏབ་སྟེ་བཏང་བ་དང ། དེ་དག་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ན་ཤེས་ལྡན
5.196b
དག་མུ་སྟེགས་ཅན་རྣམས་དམ་པ་ཡིན་གྱི། ཤཱཀྱའི་བུའི་དགེ་སྦྱོང་རྣམས་ནི་དེ་ལྟ་མ་ཡིན་ཏེ། རྟག་ཏུ་འགྲོ་བའི་ཤིང་ལྗོན་པ་བཞིན་དུ་ངུར་སྨྲིག་དག་གིས་ལུས་དག་དཀྲིས་ཤིང་འཁོད་པར་ཟད་ཀྱི་ཅུང་ཟད་ཀྱང་མི་ཤེས་སོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དེ་དག་སྨོད་པར་བྱེད་པ་ན་དྲུག་སྡེ་དག་ཀྱང་བསོད་སྙོམས་ལ་ཞུགས་ནས་དེ་དག་གིས་དེ་དག་སྨོད་པ་ཐོས་ནས་དྲུག་སྡེ་དག་གིས་སྨྲས་པ། ཤེས་ལྡན་དག་ཁྱེད་ཅག་སུ་ལ་སྨོད། ཁྱེད་ཅག་ལའོ། །ངེད་ཀྱིས་ཅི་བྱས། མུ་སྟེགས་ཅན་རྣམས་ཀྱིས་ལོ་བཅུ་གཉིས་སུ་ཐན་པ་འབྱུང་བ་བསྟན་ན་འཕགས་པ་མཽད་གལ་གྱི་བུ་ཆེན་པོས་ཉི་མ་བདུན་འདས་ནས་ལྷས་ཆར་འབེབས་པར་འགྱུར་རོ་ཞེས་ལུང་བསྟན་ནས། བདག་ཅག་གིས་ཁྱིམ་དང་བང་བ་ན་འདུག་པའི་འབྲུ་གང་དག་ཡིན་པ་དེ་དག་ཀྱང་ཕྱི་རོལ་ཏུ་ཁྱེར་ཏེ་བོར་ན་ལྷས་ཆར་མ་ཕབ་བོ། །དྲུག་སྡེ་དག་གིས་སྨྲས་པ། ཤེས་ལྡན་དག་མུ་སྟེགས་ཅན་རྣམས་ཀྱི་ཀུན་དུ་སྤྱོད་པ་ནི་གལ་ཏེ་སྤྲིན་ཀྱང་ཡོད། སྤྲིན་ལས་འབྲུག་ཀྱང་གྲག་།གློག་ཀྱང་འབྱུང ། ཕྱོགས་བཞི་ནས་རླུང་བསིལ་བ་དག་ཀྱང་ལྡང ། ལྷས་ཁད་ཀྱིས་དལ་བུ་དལ་བུས་ཆར་ཅུང་ཟད་ཀྱང་འབེབས་པ་དེའི་ཚེ་ན་དེ་དག་དང ། འཇིག་རྟེན་དག་ཀྱང་ལྷས་གདོན་མི་ཟ་བར་ཆར་འབེབས་སོ་ཞེས་ཟེར་ན། ཆར་ཆེར་བབ་ཅིང་ས་རྒྱས་བཏབ་པར་གྱུར་ན་ལྟ་སྨོས་ཀྱང་ཅི་དགོས་པ་ཡིན་ནོ། །འདི་ལྟར་ཅི་འཕགས་པ་མཽད་གལ་གྱི་བུ་ཆེན་པོས་ལོ་ཏོག་ཐམས་ཅད་འགྲུབ་པར་འགྱུར་རོ། །ཞེས་ལུང་བསྟན་ཏམ། དེ་དག་སྤོབས་པ་མེད་པར་གྱུར་ནས་ཅང་མི་སྨྲ་བར་འཁོད་པ་དང ། དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་ཟིན་མོད་ཀྱི་འོན་ཀྱང་དོན་ཉུང་ངུ་དེ་ལ་ལྟུང་བ་བྱུང་གིས་ཚུར་ཤེག་།དེའི་གན་དུ་དོང་ལ་འཆགས་སུ་གཞུག་གོ། །ཞེས་དེ་དག་ཟས་ཀྱི་བྱ་བ་བྱས་ནས་ཕྱག་འཚལ་ཏེ། ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན
5.197a
ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ། གནས་བརྟན་ཇེ་སྐབས་ཕྱེ་ཤིག་།ཚེ་དང་ལྡན་པ་དག་ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །མུ་སྟེགས་ཅན་རྣམས་ཀྱིས་ལོ་བཅུ་གཉིས་སུ་ཐན་པ་འབྱུང་ངོ་ཞེས་བསྟན་ན། ཁྱོད་ཀྱིས་ཆར་འབབ་པར་འགྱུར་རོ། །ཞེས་ལུང་བསྟན་གྱིས། ཆོས་གོས་ཀྱི་གྲཝ་རྫབ་ཀྱིས་མ་རུངས་པར་གྱུར་ན་མི་རུང་གིས་ཐེག་ཤིག་།ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག་།ཚེ་དང་ལྡན་པ་དག་ལྟུང་བ་མ་མཐོང་ངོ ། །དྲུག་སྡེ་རྣམས་ཀྱིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་དབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ། །བོས་ཤིག་།བོས་སོ། །ཚེ་དང་ལྡན་པ་དག་གཎ་ཌཱི་རྡུངས་ཤིག་།མཽད་གལ་གྱི་བུ་ཆེན་པོ་དོན་ཉུང་ངུ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང ། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎ་ཌཱི་བརྡུངས་པ་ན་ཚེ་དང་ལྡན་པ་སུ་ཞིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་རྨེད་པར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མཽད་གལ་གྱི་བུ་ཆེན་པོས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང
5.197b
བཟེད་ནག་པོས་འཚོ་བར་མི་བགྱིད་པས་དེས་ན་མིའི་ཆོས་བླ་མ་དམ་འཆའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ་དེ་ཡང་འབྲས་བུ་མ་མཆིས་པར་གྱུར་ནས། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་ཐོ་མ་བརྩམས་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང ། ཤེས་བྱ་དག་ལ་བླ་ན་མེད་པའི་མངའ་བརྙེས་པ་ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་སྤྱན་སྔར་དེང་ལ་དོན་འདི་ཞུས་ཤིག་།བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་དུ་ཟུང་ཤིག་།སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་ལྔ་དང་རྐྱེན་ལྔ་ཡིན་ཏེ། ལྔ་གང་ཞེ་ན། འདི་ལྟར་སྤྲིན་ཀྱང་ཡོད། གློག་ཀྱང་འབྱུང ། སྤྲིན་ལས་འབྲུག་ཀྱང་གྲག་།ཕྱོགས་བཞི་ནས་རླུང་བསིལ་བ་དག་ཀྱང་ལྡང ། ལྟས་མཁན་དག་ཀྱང་ལྷས་ཆར་འབབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་ས་གཞི་ཆེན་པོ་འདི་ལས་མེའི་ཁམས་མངོན་པར་འཕགས་ནས་དེས་ཆར་པ་དེ་བར་མ་དོ་ཁོ་ནར་སྐམ་པར་བྱེད་དེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་དང་པོ་དང་རྐྱེན་དང་པོ་ཡིན་ནོ། །གཞན་ཡང་སྤྲིན་ཡང་ཡོད། གློག་ཀྱང་འབྱུང ། སྤྲིན་ལས་འབྲུག་ཀྱང་གྲག་།ཕྱོགས་བཞི་ནས་རླུང་བསིལ་བ་དག་ཀྱང་ལྡང ། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་ནམ་མཁའ་ལ་མི་མཉམ་པའི་རླུང་དག་ལྡང་ཞིང་དེས་ཆར་པ་དེ་ད་ཎ་ཌའི་ཀའི་དགོན་པ་དག་དང ། ཀ་ལིང་ཀའི་དགོན་པ་དག་དང ། མ་ཏང་ཀའི་དགོན་པ་དག་ཏུ
5.198a
འབེབས་པར་བྱེད་དེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོགས་པ་ཐན་པ་ཆེན་པོའི་རྒྱུ་གཉིས་པ་དང ། རྐྱེན་གཉིས་པ་ཡིན་ནོ། །གཞན་ཡང་སྤྲིན་ཀྱང་ཡོད། གློག་ཀྱང་འབྱུང ། སྤྲིན་ལས་འབྲུག་ཀྱང་གྲག་།ཕྱོགས་བཞི་ནས་རླུང་བསིལ་བ་དག་ཀྱང་ལྡང ། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ། །ཞེས་སྟོན་མོད་ཀྱི་འོན་ཀྱང་ལྷའི་བུ་ཆར་གྱི་ཤུགས་ཅན་དག་རབ་ཏུ་མྱོས་པར་གནས་པ་དང ། བག་མེད་པར་གནས་ཤིང་དེ་དག་རབ་ཏུ་མྱོས་པར་གནས་པ་དང ། བག་མེད་པར་གནས་པས་ལྷས་དུས་དང་དུས་སུ་ཆུའི་རྒྱུན་ལེགས་པར་འབེབས་སུ་མི་སྟེར་ཏེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་གསུམ་པ་དང་རྐྱེན་གསུམ་པ་ཡིན་ནོ། །གཞན་ཡང་སྤྲིན་ཡང་ཡོད། གློག་ཀྱང་འབྱུང ། སྤྲིན་ལས་འབྲུག་ཀྱང་གྲག་།ཕྱོགས་བཞི་ནས་རླུང་བསིལ་བ་དག་ཀྱང་ལྡང ། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་མི་རྣམས་ཆོས་མ་ཡིན་པའི་འདོད་ཆགས་ཀྱིས་ཆགས་པ་དང ། འདོད་པ་དཀའ་བས་ཟིལ་གྱིས་ནོན་པ་དང ། ཆོས་ལོག་པས་དཀྲིས་པར་གྱུར་ན། ཆོས་མ་ཡིན་པའི་འདོད་ཆགས་ཀྱིས་ཆགས་པ་དང ། འདོད་པ་དགའ་བས་ཟིལ་གྱིས་ནོན་པ་དང ། ཆོས་ལོག་པས་དཀྲིས་པ་དེ་དག་ལ་ལྷས་དུས་དང་དུས་སུ་ཆུའི་རྒྱུན་ལེགས་པར་འབབ་ཏུ་མི་སྟེར་ཏེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་བཞི་པ་དང་རྐྱེན་བཞི་པ་ཡིན་ནོ། །གཞན་ཡང་སྤྲིན་ཡང་ཡོད། གློག་ཀྱང་འབྱུང ། སྤྲིན་ལས་འབྲུག་ཀྱང་གྲག་།ཕྱོགས་བཞི་ནས་རླུང་བསིལ་བ་དག་ཀྱང་ལྡང ། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ། །ཞེས་སྟོན་མོད་ཀྱི། འོན་ཀྱང་ལྷ་མ་ཡིན་གྱི་དབང་པོ་སྒྲ་གཅན་རྒྱ་མཚོ་ཆེན་པོ་ནས་མངོན་པར་འཕགས་ནས་དེས་ཆར་པ་དེ་ལག་པ་གཉིས་ཀྱིས་བཟེད་ཅིང་རྒྱ་མཚོ་ཆེན་པོར་ལྡུགས
5.198b
པར་བྱེད་དེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོགས་པ་ཐན་པ་ཆེན་པོའི་རྒྱུ་ལྔ་པ་དང་རྐྱེན་ལྔ་པ་ཡིན་ནོ། །དགེ་སློང་དག་འདི་ལྟར་དེའི་ཚེ་ལྷས་ཆར་ཕབ་མོད་ཀྱི། དེ་ན་ལྷ་མ་ཡིན་གྱི་དབང་པོ་སྒྲ་གཅན་རྒྱ་མཚོ་ཆེན་པོ་ནས་མངོན་པར་འཕགས་ནས་དེས་ཆར་པ་དེ་ལག་པ་གཉིས་ཀྱིས་བཟེད་ཅིང་རྒྱ་མཚོ་ཆེན་པོར་བླུགས་སོ། །ཅི་དེ་དག་གིས་ལོ་ཏོག་ཐམས་ཅད་གྲུབ་པར་འགྱུར་རམ་ཞེས་དྲིས་སམ། གལ་ཏེ་དགེ་སློང་མཽད་གལ་གྱི་བུ་ཆེན་པོ་ལ་དེ་ཡང་དྲིས་པར་གྱུར་ན། དགེ་སློང་མཽད་གལ་གྱི་བུ་ཆེན་པོས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མཽད་གལ་གྱི་བུ་ཆེན་པོས་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་ཡངས་པ་ཅན་ན་གཅེར་བུ་པའི་ཉན་ཐོས་ཤིག་འདུག་པ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་སོ། །དེ་མཐར་གྱིས་བསོད་སྙོམས་རྒྱུ་བ་ན་དེའི་ཁྱིམ་དུ་ཞུགས་པ་དང ། དེས་བསམས་པ། འཕགས་པ་མཽད་གལ་གྱི་བུ་ཆེན་པོ་འདི་ནི་མཆོག་གསུམ་པ་སྟེ། འདིས་མི་ཤེས་པ་འམ། མ་མཐོང་བ་འམ། མ་རིག་པ་འམ། རྣམ་པར་མི་ཤེས་པ་ཅུང་ཟད་ཀྱང་མེད་དོ་ཞེས་གྲག་གིས་བདག་གིས་འདི་ལ་བདག་གི་ཆུང་མ་སྦྲུམ་པ་འདི་ལས་ཁྱེའུ་འམ། བུ་མོ་འམ་ཅི་ཞིག་སྐྱེ་བར་འགྱུར་བ་གསུངས་ཤིག་ཅེས་དྲི་བར་བྱའོ་སྙམ་དུ་རིག་ནས། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བདག་གི་མཆིས་འབྲང་འདི་སྦྲུམ་ན་ཅི་འདིའི་མངལ་ན་ཁྱེའུ་མཆིས་སམ། འོན་ཏེ་བུ་མོ་མཆིས། དེས་སྨྲས་པ། བཞིན་བཟངས་ཁྱེའུ་འོ། །འཇིག་རྟེན་ནི་འབྱོར་པ་འདོད་པས་དེ་རངས་པ་དང ། དགའ་བ་དང ། རབ་ཏུ་དགའ་བས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ
5.199a
བཟའ་བ་དང ། བཅའ་བ་གཙང་བ་བསོད་པས་ལྷུང་བཟེད་བཀང་སྟེ་བྱིན་ནས་སྨྲས་པ། འཕགས་པ་ཡང་གཤེགས་སུ་གསོལ། ཚེ་དང་ལྡན་པ་མཽད་གལ་གྱི་བུ་ཆེན་པོས་ཨ་རོག་ཁྱ་ཞེས་སྨྲས་ཏེ་སོང་ངོ ། །དེའི་ཁྱིམ་དང་ཧ་ཅང་མི་རིང་བ་ན་གཅེར་བུ་པ་ཞིག་འདུག་པ་དེས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལྷུང་བཟེད་བཀང་སྟེ་སོང་བ་མཐོང་ནས་དེས་བསམས་པ། བདག་གི་སློངས་མོ་སྟེར་བའི་ཁྱིམ་གཅིག་པུ་ཡོད་པ་གང་ཡིན་པ་དེར་ཤཱཀྱའི་བུ་དགེ་སྦྱོང་དག་རྒྱུ་བར་འགྱུར་བ་ནི་མ་ལེགས་ཀྱིས་དེའི་ཕྱིར་ཇེ་ཁྱིམ་བདག་དེའི་གན་དུ་སོང་ལ་དེས་ཁྱིམ་བདག་དང་ལྷན་ཅིག་གཏམ་ཅི་ཞིག་བྱས་པར་གྱུར་པ་དྲིའོ་སྙམ་ནས། དེ་མྱུར་བ་མྱུར་བར་ཁྱིམ་བདག་གི་གན་དུ་སོང་སྟེ་སྨྲས་པ། ཁྱིམ་བདག་དགེ་སྦྱོང་མཽད་གལ་གྱི་བུ་ཆེན་པོ་འོངས་སམ། འོངས་སོ། ཁྱོད་ཀྱིས་ཅུང་ཟད་དྲིས་སམ། དྲིས་སོ། །ཅི་དྲིས། བདག་གི་མཆིས་འབྲང་འདི་སྦྲུམ་ན་ཅི་འདིའི་མངལ་ན་ཁྱེའུ་མཆིས་སམ། འོན་ཏེ་བུ་མོ་མཆིས་ཤེས་དྲིས་པ་དང ། དེ་ན་རེ་ཁྱེའུ་འོ་ཞེས་ཟེར་རོ། །གཅེར་བུ་པ་དེ་རྟོག་གེའི་ཤེས་པ་ལ་མཁས་པས་བརྩི་བར་བརྩམས་པ་དང ། ཇི་ཙམ་ན་བུ་མོར་མཐོང་ནས་དེ་བཞིན་སྒྱུར་བར་བྱེད། ལག་པ་གཉིས་འདྲིལ་བར་བྱེད་དོ། །ཁྱིམ་བདག་དེས་གཅེར་བུ་པ་དེ་ལ་དྲིས་པ། ཅིའི་ཕྱིར་བཞིན་སྒྱུར་བར་བྱེད། ལག་པ་གཉིས་འདྲིལ་བར་བྱེད། གཅེར་བུ་པས་སྨྲས་པ། ཁོ་བོས་བུ་མོར་མཐོང་གི་ཁྱེའུར་མ་མཐོང་ངོ ། །ཁྱིམ་བདག་དེས་སྤྱོས་ནས་འཕྲལ་བར་འཕྲལ་རྩ་གསུམ་བསྒྲེང་ཞིང་ཁྲོ་གཉེར་བྱས་ཏེ་སྨྲས་པ། གཅེར་བུ་པ་སྒྲེ་བྱི་ཁྱོད་ཅི་ཤེས། ཁྱོད་པས་འཕགས་པ་མཽད་གལ་གྱི་བུ་ཆེན་པོའི་མཁྱེན་པ་ཆེས་དྲི་མ་ཅན་ཡིན་ནམ། འཕགས་པ་མཽད་གལ་གྱི་བུ་ཆེན་པོས་ཁྱེའུ་འོ་ཞེས་ལུང་བསྟན་ན། ཁྱོད་བུ་མོའོ་ཞེས་ཟེར་རམ། དེ་དེ་ལྟར་ཚར་བཅད་ནས་ཡང་བརྩི་བར་བརྩམས་པ་དང་བུ་མོ་ཉིད་དུ་མཐོང་ནས་ཀུན་ནས་དཀྲིས་པས་སྨྲས་པ། གལ་ཏེ་དགེ་སྦྱོང་ཤཱཀྱའི་བུ་ཉིད་ཀྱིས་ལུང་བསྟན་དུ་ཟིན་ཀྱང ། དེ་ལྟ་ན་ཡང་འདི་ནི་བུ་མོ་ཉིད་ཡིན་གྱི་ཁྱེའུ་མ་ཡིན་ནོ། །
5.199b
ཇི་ཙམ་ན་དེ་ཟླ་བ་དགུ་འདས་ཏེ་བཙས་པ་ལས་བུ་མོ་ཞིག་སྐྱེས་ནས། ཁྱིམ་བདག་དེ་ནང་མི་དང་བཅས་བ་གཅེར་བུ་པ་དག་དམ་པ་ཡིན་གྱི། ཤཱཀྱའི་བུའི་དགེ་སྦྱོང་རྣམས་ནི་དེ་ལྟ་མ་ཡིན་ཏེ། འཕགས་པ་མཽད་གལ་གྱི་བུ་ཆེན་པོས་ཁྱེའུའོ་ཞེས་ལུང་བསྟན་ན། འདི་བུ་མོར་གྱུར་ཏོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །ཐོས་པ་གཅིག་ནས་གཅིག་ཏུ་བརྒྱུད་པས་ཡངས་པ་ཅན་ན་གནས་པའི་སྐྱེ་བོའི་ཚོགས་ཀྱང་ལམ་པོ་ཆེ་དང ། སྲང་དང་བཞི་མདོ་དང ། སུམ་མདོ་དག་ན་སྨོད་པ་ལ་ཞུགས་པར་གྱུར་ཏོ། །དེ་དག་སྨོད་པར་བྱེད་པ་ན་དྲུག་སྡེ་དག་སྔ་དྲོ་ཤམ་ཐབས་དགོས་ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་པ་དང ། དེ་དག་གིས་དེ་དག་སྨོད་པ་ཐོས་སོ། །ཐོས་ནས་སྨྲས་པ་ཤེས་ལྡན་དག་ཁྱེད་ཅག་སུ་ལ་སྨོད། ཁྱེད་ཅག་ལའོ། །ངེད་ཀྱིས་ཅི་བྱས། འཕགས་པ་མཽད་གལ་གྱི་བུ་ཆེན་པོས་གཅེར་བུ་པའི་ཉན་ཐོས་ཀྱི་ཆུང་མའི་མངལ་ན་ཁྱེའུ་ཡོད་དོ་ཞེས་ལུང་བསྟན་ན། དེ་ལས་ད་བུ་མོ་བཙས་སོ། །དྲུག་སྡེ་དག་གིས་སྨྲས་པ། ཤེས་ལྡན་དག་འཇིག་རྟེན་ཐམས་ཅད་ཤེས་པ་རྒྱ་མཚོ་ལ་འཁྲུལ་པ་ཡོད་ཀྱིས། བཅོམ་ལྡན་འདས་ཉག་གཅིག་ཆོས་རྣམས་ལ་སྐྱོབ་པ་ཡིན་གྱི། སྐྱོབ་པ་གཞན་མེད་དོ། །གཞན་ཡང་མིའི་སྐྱེ་དགུ་རྣམས་ལ་ཁྱེའུ་འམ། བུ་མོ་བཙའ་བར་ཟད་ཀྱི། གཞན་མཚན་ཅི་ཞིག་ཏུ་འགྱུར། ཅི་ཁྱི་ཞིག་གམ། འོན་ཏེ་སྤྲེའུ་ཞིག་ཏུ་འགྱུར་སྙམ་འམ། དེ་དག་སྤོབས་པ་མེད་པར་གྱུར་ཏེ། ཅང་མི་སྨྲ་བར་འཁོད་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་ཟིན་མོད་ཀྱི་དོན་ཉུང་ངུ་དེ་ལ་ལྟུང་བ་བྱུང་གིས་ཚུར་ཤེག་།དེའི་གན་དུ་དོང་ལ་འཆགས་སུ་གཞུག་གོ། །ཞེས་དེ་དག་ཟས་ཀྱི་བྱ་བ་བྱས་ནས་ཕྱག་འཚལ་ཏེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ་ནད་མེད་པར་གྱུར་ཅིག
5.200a
གནས་བརྟན་ཇེ་སྐབས་ཕྱེད་ཤིག་།ཚེ་དང་ལྡན་པ་དག་ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཅི་གཅེར་བུ་པའི་ཉན་ཐོས་ཀྱི་ཆུང་མའི་མངལ་ན་ཁྱེའུ་ཡོད་དོ་ཞེས་ལུང་བསྟན་ཏམ། ལུང་བསྟན་ཏོ། །བཞུད་ཅིག་དང་དགའ་བ་འཕེལ་བ་ཉམས་སུ་མྱོང་ཞིང་འབྲུ་མར་དང་བུ་རམ་ཡང་ཐོབ་པར་འགྱུར་རོ། །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་ཁོ་བོ་ཅག་གིས་བསོད་སྙོམས་ཀྱང་མི་ཐོབ་ཀྱིས་ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག་།ཚེ་དང་ལྡན་པ་དག་ལྟུང་བ་མ་མཐོང་ངོ ། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ། །བོས་ཤིག་།བོས་སོ། །ཚེ་དང་ལྡན་པ་གཎ་ཌཱི་རྡུངས་ཤིག་།མཽད་གལ་གྱི་བུ་ཆེན་པོ་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང ། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎ་ཌཱི་བརྡུངས་པ་ན་ཚེ་དང་ལྡན་པ་དག་སུ་ཞིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་འདྲི་བར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མཽད་གལ་གྱི་བུ་ཆེན་པོས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས་དེས་ན
5.200b
མིའི་ཆོས་བླ་མ་དམ་འཆའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་ཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག་།བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་ཟུང་ཤིག་།སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གནས་བཞི་པོ་འདི་དག་ནི་བསམ་པར་མི་བྱ་བ་དག་ཡིན་ཏེ། གང་དག་སེམས་པར་བྱེད་པ་དག་མྱོས་པ་དང ། རྨོངས་པར་འགྱུར་ཞིང་སེམས་རྣམ་པར་གཡེངས་པ་ཐོབ་པར་འགྱུར་བ་ཡིན་ནོ། བཞི་གང་ཞེ་ན། འདི་ལྟ་སྟེ། བདག་ལ་སེམས་པ་དང ། འཇིག་རྟེན་ལ་སེམས་པ་དང ། སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་དང ། སངས་རྒྱས་རྣམས་ཀྱི་སངས་རྒྱས་ཀྱི་ཡུལ་ལོ། །འདི་ལྟར་གང་གི་ཚེ་དགེ་སློང་མཽད་གལ་གྱི་བུས་ལུང་བསྟན་པ་དེའི་ཚེ་ན་དེ་ཁྱེའུར་ཡོད་པ་ཡིན་ལ། ཕྱིས་དེའི་ལས་ཀྱི་རྣམ་པར་སྨིན་པས་མཚན་གྱུར་ཏོ། །གལ་ཏེ་དགེ་སློང་མཽད་གལ་གྱི་བུ་ལ་དེ་ཡང་དྲིས་པར་གྱུར་ན། དགེ་སློང་མཽད་གལ་གྱི་བུས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མཽད་གལ་གྱི་བུས་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་ཁྱིམ་བདག་ཅིག་འདུག་པ་དེས་གང་དགེ་སློང་གི་དགེ་འདུན་ལ་སོ་སོར་རིག་པར་མ་བྱས་པར་ཟས་སྦྱིན་པ་དེ་འཕྲལ་ན་ལོངས་སྤྱོད་དག་གིས་མངོན་པར་འཕེལ་ལོ་ཞེས་ཐོས་སོ། །ཐོས
5.201a
ནས་ཀྱང་དེ་འདི་སྙམ་དུ་སེམས་ཏེ། དེ་ནི་ནོར་གྲུབ་པའི་ཐབས་བཟང་པོ་ཡིན་གྱིས། བདག་གིས་ཀྱང་དགེ་སློང་གི་དགེ་འདུན་ལ་སོ་སོར་རིག་པར་མ་བྱས་པར་ཟས་སྦྱིན་པར་བྱའོ་སྙམ་ནས་དེས་སྲང་དུ་སོང་སྟེ། ཤ་མང་པོ་ཉོས་ནས་དེའི་འོག་ཏུ་ཟངས་ཀྱི་ནང་དུ་ཞུན་མར་མང་པོ་དང་སྦྱར་བའི་ཐུག་པ་བསྐོལ་ནས་གྲོང་ཁྱེར་གྱི་སྒོར་སྒོ་བ་ལ་ཀྱེ་ནང་རྗེ་དགེ་སློང་གང་ལ་ལ་ཞིག་བསོད་སྙོམས་ལ་འཇུག་ན་དེ་ཁོ་བོའི་ཁྱིམ་དུ་ཐོང་ཤིག་ཅེས་སྤྲིང་པ་དང ། སྒོ་བ་དེས་སྨྲས་པ། ཁྱིམ་བདག་དེ་བཞིན་དུ་བཏང་ངོ་ཞེས་དགེ་སློང་བསོད་སྙོམས་ལ་འཇུག་པ་གང་མཐོང་བ་དེ་ལ་འཕགས་པ་ཁྱིམ་བདག་ཆེ་གེ་མོ་ཞིག་དེང་དགེ་སློང་རྣམས་ལ་བསོད་སྙོམས་འབུལ་གྱིས་དེའི་སྡུམ་པར་བཞུད་ཅིག་ཅེས་སྨྲས་པ་དང ། དེ་དེའི་ཁྱིམ་དུ་སོང་ངོ ། །དེ་བཞིན་དུ་སྒོ་བས་བསོད་སྙོམས་པ་ཐམས་ཅད་ལ་བསྒོ་བ་དང ། བསོད་སྙོམས་པ་ཐམས་ཅད་ཁྱིམ་བདག་དེའི་ཁྱིམ་དུ་དོང་ངོ ། །དེ་ནས་ཁྱིམ་བདག་དེས་ཤིན་དུ་སྣུམ་པའི་ཤའི་ཐུག་པ་དག་གིས་དེ་དག་སོ་སོའི་ལྷུང་བཟེད་བཀང་སྟེ་བྱིན་ནོ། །དེའི་ཉིན་མོ་ནམ་མཁའ་སྤྲིན་གྱིས་ཁེབས་ཤིང་ཡུལ་ངན་བྱུང་བར་གྱུར་ནས་དགེ་སློང་དག་ཟན་ཟོས་ནས་ལྷུང་བཟེད་སྣུམ་པོ་འདི་དག་རྩུབ་པར་བྱ་མི་ནུས་ཀྱིས་དེ་ན་ཆུ་དྲོན་ཡོད་ཀྱིས་ཆུ་དྲོན་གྱི་གན་དུ་སོང་སྟེ། བཀྲུ་བར་བྱའོ་ཞེས་དེ་དག་ཆུ་དྲོན་གྱི་གན་དུ་སོང་སྟེ་བཀྲུ་བར་བརྩམས་པ་དང ། ཇི་ཙམ་ན་དགེ་སློང་གཞོན་ནུ་ཞིག་ལ་ཆུ་དྲོན་འདི་གང་ནས་འོང་སྙམ་པའི་ཚུལ་བཞིན་ཡིད་ལ་བྱེད་པ་བྱུང་ནས་དེ་དང་ཡང་ཧ་ཅང་མི་རིང་བ་ན་ཚེ་དང་ལྡན་པ་ཉེ་དགའ་ལྷུང་བཟེད་འཁྲུ་བར་བྱེད་དེ་དེའི་གན་དུ་སོང་ནས། བཙུན་པ་ཉེ་དགའ་ཆུ་དྲོན་འདི་གང་ནས་འོང་ཞེས་དྲིས་པ་དང ། དེ་དང་ཡང་ཧ་ཅང་མི་རིང་བ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལྷུང་བཟེད་འཁྲུ་བར་བྱེད་ནས་ཉེ་དགས་སོང་ལ་དོན་ཉུང་ངུ་འདི་ལ་དྲིས་ཤིག་།ཅེས་གཞོན་ནུ་ཚེ་དང་ལྡན་པ་མཽད་གལ་གྱི་བུ་ཆེན་པོའི་གན་དུ་བཏང་བ་དང ། གཞོན་ནུ་དེ་སྤྱོད་ལམ་ཞི་བ་རྒྱ་ཆེན་པོས་དེའི་གན་དུ་སོང་སྟེ་གུས་པ་དང་བཅས་པས་དྲིས་པ་གནས་བརྟན་ཆབ
5.201b
དྲོན་འདི་ག་ལས་མཆི། དེས་སྨྲས་པ། ཚེ་དང་ལྡན་པ་མཚོ་ཆེན་པོ་མ་དྲོས་པ་ནས་སོ། །ཉེ་དགས་ཐོས་ནས་དེས་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པར་མ་བྱེད་ཅིག་།ཆོས་ཀྱི་ཁྲིད་བྱེད་རྣམ་པར་མ་དཀྲུག་ཤིག་།ཆོས་ཀྱི་མངལ་མ་རྟོལ་ཅིག་།འདི་ལྟར་ཁོ་བོ་ཅག་ལ་རྟོགས་པ་མེད་ཀྱང་ཅི་ལུང་ཡང་མེད་དམ། བཅོམ་ལྡན་འདས་ཀྱིས་མཚོ་ཆན་པོ་མ་དྲོས་པའི་ཆུ་ནི་ཡན་ལག་བརྒྱད་དང་ལྡན་པ་ཡིན་ཏེ། བསིལ་བ་དང ། མངར་བ་དང ། ཡང་བ་དང ། འཇམ་པ་དང ། དང་བ་དང ། དྲི་ང་བ་མེད་པ་དང ། འཐུང་བ་ན་མགུལ་པ་ལ་མི་གནོད་པ་དང ། འཐུངས་ན་ལྟོ་ལ་མི་གནོད་པའོ་ཞེས་གསུངས་ན། དེའི་ཕྱིར་ཁྱོད་ཀྱིས་ཡན་ལག་དང་པོ་ཉིད་ཀྱིས་བསླུས་སོ། །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག་།ཚེ་དང་ལྡན་པ་ལྟུང་བ་མ་མཐོང་ངོ ། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་འབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ། །བོས་ཤིག་།བོས་སོ། །ཚེ་དང་ལྡན་པ་གཎ་ཌཱི་རྡུངས་ཤིག་།མཽད་གལ་གྱི་བུ་ཆེན་པོ་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང ། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎ་ཌཱི་བརྡུངས་པ་ན། ཚེ་དང་ལྡན་པ་དག་སུ་ཞིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་འདྲི་བར་བྱེད་དོ། །དྲུག་སྡེ
5.202a
དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པ་དང ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མཽད་གལ་གྱི་བུ་ཆེན་པོས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས་དེས་ན་མིའི་ཆོས་བླ་མ་དམ་འཆའ་ཞིང་ཀུན་ཤེས་པ་བརྡ་སྤྲོད་པ་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས་དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་ཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག་།བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་ཟུང་ཤིག་།སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ནོ། །དེ་དེ་བཞིན་ཏེ། ཆུ་དྲོན་དེ་ནི་མཚོ་ཆེན་པོ་མ་དྲོས་པ་ཁོ་ན་ལས་འོང་ངོ ། །དགེ་སློང་རྣམས་ཀྱིས་གསོལ་པ། བཅོམ་ལྡན་འདས་གལ་ཏེ་ཆབ་དེ་མཚོ་ཆེན་པོ་མ་དྲོས་པ་ལས་མཆི་ན་ཅིའི་སླད་དུ་དྲོ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ཆུ་དེ་ཉིད་ཚ་བའི་སེམས་ཅན་དམྱལ་བ་ལྔ་བརྒྱའི་སྟེང་ནས་འོང་བའི་ཕྱིར་རོ། །གལ་ཏེ་དགེ་སློང་མཽད་གལ་གྱི་བུ་ལ་དེ་ཡང་དྲིས་པར་གྱུར་ན་དགེ་སློང་མཽད་གལ་གྱི་བུས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མཽད་གལ་གྱི་བུས་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན
5.202b
མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོ་ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པས། རྫིང་བུ་དལ་གྱིས་འབབ་གྱི་འགྲམ་ན་གླང་པོ་ཆེ་གཙོ་བོ་རབ་ཏུ་མང་པོ་དག་གིས་སྒྲ་སྐད་ཐོས་སོ། །དེའི་ཚེ་ན་ཚེ་དང་ལྡན་པ་ཉེ་དགའ་འཁོར་དེ་ཉིད་ན་འདུག་ཅིང་འཐུན་པར་གྱུར་ནས་དེས་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པ་མ་བྱེད་ཅིག་།ཆོས་ཀྱི་ཁྲིད་བྱེད་རྣམ་པར་མ་དཀྲུག་ཤིག་།ཆོས་ཀྱི་མངལ་མ་རྟོལ་ཅིག་།འདི་ལྟར་བདག་ཅག་ལ་རྟོགས་པ་མེད་ཀྱང་ཅི་ལུང་ཡང་མེད་དམ། བཅོམ་ལྡན་འདས་ཀྱིས་ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པའི་གཟུགས་ཀྱི་འདུ་ཤེས་རྣམ་པར་གཞིག་ཅིང་སྒྲའི་འདུ་ཤེས་དང་བྲལ་ལོ་ཞེས་གསུངས་ན། དེའི་ཕྱིར་ཇི་ལྟར་གཟུགས་ཀྱི་འདུ་ཤེས་རྣམ་པར་བཤིག་ཅིང་སྒྲའི་འདུ་ཤེས་དང་བྲལ་བ་དེས་གཟུགས་དག་མཐོང་བར་འགྱུར་ཞིང་སྒྲ་དག་ཐོས་པར་འགྱུར་ཏེ་དེ་ནི་གནས་མེད་དོ། །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས་ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག་།ཚེ་དང་ལྡན་པ་ལྟུང་བ་མ་མཐོང་ངོ ། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ། །བོས་ཤིག་།བོས་སོ། །ཚེ་དང་ལྡན་པ་གཎ་ཌཱིའི་རྡུངས་ཤིག་།མཽད་གལ་གྱི་བུ་དོན་ཉུང་ངུ་ལ་ལྟུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང ། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎ་ཌཱི་བརྡུངས་པ་ན་ཚེ་དང་ལྡན་པ་དག་སུ
5.203a
ཞིག་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་འདྲི་བར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པ་འམ། གཞི་ནས་ཡོངས་སུ་གནས་པ་འམ། མགུ་བར་བྱ་བ་འམ། གཞི་ནས་མགུ་བར་བྱ་བ་འམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མཽད་གལ་གྱི་བུ་ཆེན་པོས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས་དེས་ན་མིའི་ཆོས་བླ་མ་དམ་བཅའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་ཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག་།བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་དུ་ཟུང་ཤིག་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ནོ། །དེ་དེ་བཞིན་ཏེ། ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པའི་གཟུགས་ཀྱི་འདུ་ཤེས་རྣམ་པར་བཤིག་ཅིང་སྒྲའི་འདུ་ཤེས་དང་བྲལ་བས་གཟུགས་ཀྱི་འདུ་ཤེས་རྣམ་པར་བཤིག་ཅིང་སྒྲའི་འདུ་ཤེས་དང་བྲལ་བ་དེས་གཟུགས་དག་མཐོང་བར་མི་འགྱུར་ཞིང ། སྒྲ་དག་ཐོས་པར་མི་འགྱུར་ཏེ་དེ་ནི་གནས་མེད་དོ། །འདི་ལྟར་དགེ་སློང་མཽད་གལ་གྱི་བུ་ནི་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དག
5.203b
ཐོབ་པ་ཡིན་ཏེ། དེ་ནི་མྱུར་དུ་སྙོམས་པར་འཇུག་ཅིང་རྣམ་པར་ལྡང་བར་བྱེད་པས་དེས་སྙོམས་པར་ཞུགས་པའི་སེམས་ཉེ་བར་རྟོགས་ཤིང་རྣམ་པར་ལངས་པའི་སེམས་ནི་མ་རྟོགས་ཏེ། དགེ་སློང་དག་དགེ་སློང་མཽད་གལ་གྱི་བུ་རྣམ་པར་ལངས་པས་སྒྲ་དེ་ཐོས་སོ། །དགེ་སློང་དག་དགེ་སློང་མཽད་གལ་གྱི་བུས་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གི་ཉེན་པ་ལ་ལྟུང་བ་མེད་དོ། །ཕམ་པར་འགྱུར་བ་བཞི་པ་རྫོགས་ཏེ། ཕམ་པར་འགྱུར་བ་རྣམས་རྫོགས་སྷོ།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅོ་ལྔ་པ། སྡོམ་ལ། ཁུ་བ་འབྱིན་པ་འཁྲིག་ཚིག་བསྙེན་བཀུར་སྨྱེན། །ཁང་པ་ཁང་ཆེན་དང་ནི་གཞི་མེད་པ། །བག་ཙམ་དགེ་འདུན་དབྱེན་དང་དེ་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ།། ་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འཆར་ཀའི་ཀུན་དུ་སྤྱོད་པ་ནི་གྲོང་ངམ་གྲོང་རྡལ་གང་ན་ཉེ་བར་བརྟེན་ཅིང་གནས་པ་དེ་ནང་པར་སྔར་ལངས་ཏེ། གཙུག་ལག་ཁང་དུ་ཆག་ཆག་འདེབས་པར་བྱེད། ལེགས་པར་ཉུག་པར་བྱེད། བ་ལང་གི་ལྕི་བ་སར་པའི་བྱུག་པས་སྐུད་པར་བྱེད་ཅིང ། དེ་གཙུག་ལག་ཁང་གི་ཕྱི་རོལ་ཏུ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་སོ་ཤིང་བོར་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་གྲོང་ངམ། གྲོང་རྡལ་དེ་ཉིད་དུ་ལུས་མ་བསྲུངས། དབང་པོ་རྣམས་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་འཇུག་ཅིང ། དེ་གྲོང་ངམ། གྲོང་རྡལ་དེར་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ། རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་འཇུག་པར་བྱེད་དོ། །གལ་ཏེ་དེའི་སེམས་འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པར་གྱུར་ན། དེས་རང་གི
5.204a
ཡན་ལག་གི་རྣམ་པ་ལས་སུ་རུང་བར་བྱས་ཏེ། ལག་པ་གཉིས་ཀྱིས་བཟུང་ནས་རྩོལ་བར་བྱེད་ཅིང་ཁུ་བ་འབྱིན་པར་བྱེད་དོ། །དེ་ནས་དགེ་སློང་རབ་ཏུ་མང་པོ་དག་གཙུག་ལག་ཁང་རྒྱུ་ཞིང་འདོང་བ་ན་ཚེ་དང་ལྡན་པ་འཆར་ཀའི་གཙུག་ལག་ཁང་ག་ལ་བ་དེར་དོང་སྟེ་ཕྱིན་ནས། ཚེ་དང་ལྡན་པ་འཆར་ཀ་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང ། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་དགེ་སློང་རབ་ཏུ་མང་པོ་དག་གིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཇི་ལྟར་ཁྱོད་བཟོད་དམ། འཚོ་འམ། བདེ་བ་ལ་རེག་པར་གནས་སམ། བསོད་སྙོམས་ཀྱིས་ངལ་བར་མ་གྱུར་ཏམ། ཚེ་དང་ལྡན་པ་དག་བདག་ཏེ་པོར་བཟོད་དོ། །འཚོའོ། །བདེ་བ་ལ་རེག་པར་གནས་སོ། །བསོད་སྙོམས་ཀྱིས་ངལ་བར་མ་གྱུར་ཏོ། །ཚེ་དང་ལྡན་པ་འཆར་ཀ་ཁྱོད་ཇི་ལྟར་བཟོད་པ་དང ། འཚོ་བ་དང ། བདེ་བ་ལ་རེག་པར་གནས་པ་དང ། བསོད་སྙོམས་ཀྱིས་ངལ་བར་མ་གྱུར། ཚེ་དང་ལྡན་པ་དག་བདག་གྲོང་ངམ། གྲོང་རྡལ་གང་ན་ཉེ་བར་རྟེན་ཅིང་གནས་པར་བདག་ནང་པར་སྔར་ལངས་ཏེ། གཙུག་ལག་ཁང་ཆག་ཆག་འདེབས་པར་བྱེད། ལེགས་པར་ཉུག་པར་བྱེད། བ་ལང་གི་ལྕི་བ་སར་པའི་བྱུག་པས་སྐུད་པར་བྱེད་ཅིང ། བདག་གཙུག་ལག་ཁང་གི་ཕྱི་རོལ་ཏུ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་སོ་ཤིང་བོར་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་གྲོང་ངམ། གྲོང་རྡལ་དེ་ཉིད་དུ་བསོད་སྙོམས་ལ་འཇུག་ཅིང་བདག་གྲོང་ངམ། གྲོང་རྡལ་དེ་ཉིད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ། རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་འཇུག་པར་བྱེད་དོ། །གལ་ཏེ་བདག་ནི་སེམས་འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པར་གྱུར་ན། བདག་གིས་རང་གི
5.204b
ཡན་ལག་གི་རྣམ་པ་ལས་སུ་རུང་བར་བྱས་ཏེ། ལག་པ་གཉིས་ཀྱིས་བཟུང་ནས་རྩོལ་བར་བྱེད་ཅིང་ཁུ་བ་ཕྱུང་ནས་རིམས་ནད་དང་བྲལ་ཞིང་ཡོངས་སུ་གདུང་བ་དང་བྲལ་བས་བདེ་བ་ལ་རེག་པར་གནས་ཤིང་བསོད་སྙོམས་ཀྱིས་ངལ་བར་ཡང་མེད་དེ། ཚེ་དང་ལྡན་པ་དག་བདག་དེ་ལྟར་ན་བཟོད་པ་དང ། འཚོ་བ་དང ། བདེ་བ་ལ་རེག་པར་གནས་པ་དང ། བསོད་སྙོམས་ཀྱིས་ངལ་བ་ཡང་མེད་དོ། །དགེ་སློང་དེ་དག་དེས་སྨྲས་པ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་མི་བྱེད་ཅིང ། མངོན་པར་བསྟོད་པར་མ་བྱས། ཕྱིར་བཟློག་པར་ཡང་མ་བྱས་པར་དོང་སྟེ་བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་དགེ་སློང་རབ་ཏུ་མང་པོ་དག་གིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ།
5.205a
རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །འཆར་ཀ་ངས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་ལ་ཁྱོད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར། མི་གཏི་མུག་ཅན་ཁྱོད་ཀྱིས་ལག་པ་གང་དག་གིས་བྲམ་ཟེ་དང ། ཁྱིམ་བདག་དད་པ་ཅན་དག་ལས་དད་པས་སྦྱིན་པར་བྱ་བ་ལེན་པར་བྱེད་པའི་ལག་པ་དེ་དག་ཉིད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར། མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པར་བྱེད་པ། དུག་དྲག་པ། དུག་རྣོ་བ་ལག་པ་གཉིས་ཀྱིས་གཟུང་བར་གྱུར་པ་ནི་བླའི། དེ་ལྟར་གྱུར་པས་རང་གི་ཡན་ལག་གི་རྣམ་པར་བཟུང་བ་ནི་མ་ཡིན་ནོ་ཞེས་རྣམ་པར་སྨད་པ་མཛད་དོ། །འཆར་ཀ་ཇི་སྙམ་དུ་སེམས། དེ་ལྟ་ན་བདག་ཉིད་ཀྱི་ལུས་ཀྱི་བསྙེན་བཀུར་བདག་གིར་མ་བྱས་སམ། བཙུན་པ་བགྱིས་སོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པར་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བ་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར
5.205b
རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བསམ་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ། །བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་དགེ་སློང་རབ་ཏུ་མང་པོ་ཉལ་བ་དག་གི་རྨྱི་ལམ་ན་མི་གཙང་བ་ཤོར་ཅིང་ཁུ་བ་ཕྱུང་བར་གྱུར་ཏེ་དེ་དག་ལ་འདུ་ཤེས་ཀྱང་ཡོད། སེམས་པ་ཡང་ཡོད་པས་དེ་དག་འགྱོད་པ་སྐྱེས་པར་གྱུར་ནས། འདི་ལྟར་བཅོམ་ལྡན་འདས་ཀྱིས་བསམ་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་བཅའ་བ་མཛད་ན། བདག་ཅག་དགེ་སློང་རབ་ཏུ་མང་པོ་ཉལ་བ་དག་གི་རྨྱི་ལམ་ན་མི་གཙང་བ་ཤོར་ཞིང་ཁུ་བ་བྱུང་བར་གྱུར་ཏེ། བདག་ཅག་ལ་འདུ་ཤེས་ཀྱང་ཡོད། སེམས་པ་ཡང་ཡོད་པས་བདག་ཅག་ལ་དགེ་འདུན་ལྷག་མའི་ལྟུང་བ་བྱུང་བར་མ་གྱུར་ཏམ། ཚུར་ཤེག་བདག་ཅག་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་ཞིང་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་བརྗོད་པར་བྱ་ཞིང་བདག་ཅག་ལ་ཚེ་དང་ལྡན་པ་ཀུན་དགའ་བོས་ཇི་སྐད་ལུང་སྟོན་པར་འགྱུར་བ་དེ་དེ་ཁོ་ན་བཞིན་དུ་གཟུང་བར་བྱའོ་སྙམ་མོ། །དེ་ནས་དགེ་སློང་རབ་ཏུ་མང་པོ་དག་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་མཁྱེན་པར་མཛོད་ཅིག་།འདི་ལྟར་བཅོམ་ལྡན་འདས་ཀྱིས་བསམ་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་ན། བདག་ཅག་དགེ་སློང་རབ་ཏུ་མང་པོ་ཉལ་བ་དག་གི་རྨི་ལམ་ན་མི་གཙང་བ་ཤོར་ཅིང་ཁུ་བ་བྱུང་བར་གྱུར་ཏེ། བདག་ཅག་ལ་འདུ་ཤེས་ཀྱང་མཆིས་ལ། སེམས་པ་ཡང་མཆིས་པས་བདག་ཅག་ལ་དགེ
5.206a
འདུན་ལྷག་མའི་ལྟུང་བ་བྱུང་བར་མ་གྱུར་ཏམ། དེ་ནས་ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཁྲིད་དེ་བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་འདི་ལྟར་བསམ་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་ན། ཚེ་དང་ལྡན་པ་དགེ་སློང་རབ་ཏུ་མང་པོ་འདི་དག་མཆིས་ཉལ་བའི་གཡར་ལམ་ན་མི་གཙང་བ་ཤོར་ཅིང་ཁུ་བ་ཕྱུང་བར་གྱུར་ཏེ། འདི་དག་ལ་འདུ་ཤེས་ཀྱང་མཆིས། སེམས་པ་ཡང་མཆིས་པས་འདི་དག་ལ་དགེ་འདུན་ལྷག་མའི་ལྟུང་བ་བྱུང་བར་མ་གྱུར་ཏམ། ཀུན་དགའ་བོ་འདི་དག་ལ་འདུ་ཤེས་ཀྱང་ཡོད། སེམས་པ་ཡང་ཡོད་པས་དེ་མེད་དོ་ཞེས་ང་མི་སྨྲ་མོད་ཀྱི་འདི་དག་གི་དེ་ནི་ཐ་སྙད་དུ་བྱར་རུང་བ་མ་ཡིན་ཏེ། ཀུན་དགའ་བོ་དེ་ལྟ་བས་ན་རྨི་ལམ་གྱི་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བསམ་བཞིན་དུ་ཁུ་བ་ཕྱུང་ན་རྨི་ལམ་གྱི་མ་གཏོགས་ཏེ་དགེ་འདུན་ལྷག་མའོ། །བསམས་བཞིན་དུ་ཞེས་བྱ་བ་ནི་རྣམ་པར་དཔྱད་ནས་སོ། །ཁུ་བ་ཞེས་བྱ་བ་ནི་ཁུ་བ་རྣམ་པ་ལྔ་སྟེ། སྔོན་པོ་དང ། སེར་པོ་དང ། དམར་པོ་དང ། བསྐ་བ་དང ། སླ་བའོ། །དེ་ལ་སྔོན་པོ་ནི་འཁོར་ལོས་སྒྱུར་བའི་རྒྱལ་པོའི་འོ། །འཁོར་ལོས་སྒྱུར་བའི་རྒྱལ་པོའི་བུ་ཐུ་བོ་དབང་བསྐུར་བར་འོས་ལ་དབང་མ་བསྐུར་བ་གནས་པ་མཚམས་ཐོབ་པ་གང་ཡིན་པ་དེ་ཁུ་བ་ཡང་སྔོན་པོ་ཡིན་ནོ། །
5.206b
སེར་པོ་ནི་འཁོར་ལོས་སྒྱུར་བའི་རྒྱལ་པོའི་བུ་དེ་ལས་གཞན་པ་དག་གིའོ། །དམར་པོ་ནི་སྣ་ཆེན་པོ་ལ་གཏོགས་པ་འཁོར་ལོའི་མཐའ་པའི་འོ། །སྐ་བ་ནི་དབང་པོ་ཡོངས་སུ་སྨིན་པ་རྣམས་ཀྱིའོ། །སླ་བ་ནི་དབང་པོ་ཡོངས་སུ་མ་སྨིན་པ་རྣམས་ཀྱིའོ། །ཡང་ན་བུད་མེད་ཀྱིས་དུབ་པ་དང ། ཁུར་གྱིས་དུབ་པ་དང ། ལམ་གྱིས་དུབ་པ་དང ། གཏའ་གམ་པ་དང ། ཡ་ཟ་མ་ལུག་གང་ཡིན་པ་དེའི་ཡང་སླ་བ་ཡིན་ནོ། །ཕྱུང་ན་ཞེས་བྱ་བ་ནི་དེ་མ་ཐག་ཏུ་ཕྱུང་བའོ། །རྨི་ལམ་གྱི་མ་གཏོགས་ཏེ་ཞེས་བྱ་བ་ནི་རྨི་ལམ་གྱི་བཞག་སྟེ་འོ། །དགེ་འདུན་ལྷག་མའོ་ཞེས་བྱ་བ་ནི་ལྟུང་བ་དེ་དགེ་འདུན་ལ་རག་ལུས་པ་དང ། དགེ་འདུན་དང་འབྲེལ་བ་དང ། དགེ་འདུན་ལ་རྟེན་པ་ཡིན་ཏེ། ལྟུང་བ་དེ་དགེ་འདུན་ལས་རྣམ་པར་ལྡང་བར་འགྱུར་གྱི་གང་ཟག་ལས་མ་ཡིན་པའོ། །གཞན་ཡང་ཕམ་པར་འགྱུར་བའི་ཆོས་བཞི་པོ་དག་ནི་ལྷག་མ་མེད་པ་ཡིན་གྱི། འདི་ནི་ལྷག་མ་དང་བཅས་པ་ཡིན་པ་སྟེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། གཞི་ལྔས་ཏེ་བདེ་བ་འདོད་པ་དང ། ས་བོན་འདོད་པ་དང ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་སོ། །ཇི་ལྟར་བདེ་བ་འདོད་པས་ཤེ་ན། དགེ་སློང་གིས་བདེ་བ་འདོད་པས་ནང་གི་གཟུགས་ཉེ་བར་ལེན་ཅིང་སེམས་པར་བྱེད། རྩོལ་བར་བྱེད་ལ་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །ཁུ་བ་མ་འབྱིན་ན་ཉེས་པ་སྦོམ་པོར་འགྱུར་རོ། །བདེ་བ་འདོད་པས་ཇི་ལྟ་བ་བཞིན་དུ་ས་བོན་འདོད་པ་དང ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་ཀྱང་དེ་བཞིན་ནོ། །དགེ་སློང་གིས་བདེ་བ་འདོད་པས་ནང་གི་གཟུགས་ཉེ་བར་ལེན་ཅིང་སེམས་པར་བྱེད། རྩོལ་བར་བྱེད། རིལ་གྱིས་འཆང་བར་བྱེད། དམ་དུ་འཆང་བར་བྱེད་ལ། ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །ཁུ་བ་མི་འབྱིན་ན་ཉེས་པ་སྦོམ་པོར་འགྱུར་རོ། །བདེ་བ་འདོད་པས་ཇི་ལྟ་བ་བཞིན་དུ་ས་བོན་འདོད་པ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་ཀྱང་དེ་བཞིན་ནོ། །དགེ་སློང་གིས་བདེ་བ་འདོད་པས་ནང་གི་གཟུགས་ཉེ་བར་ལེན་ཅིང་སེམས་པར་བྱེད། རྩོལ་བར་བྱེད།
5.207a
རིལ་གྱིས་འཆང་བར་བྱེད། དམ་དུ་འཆང་བར་བྱེད་ལ་དེས་ཀྱང་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །ཁུ་བ་མི་འབྱིན་ན་ཉེས་པ་སྦོམ་པོར་འགྱུར་རོ། །བདེ་བ་འདོད་པས་ཇི་ལྟ་བ་བཞིན་དུ་ས་བོན་འདོད་པ་དང ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་ཀྱང་དེ་བཞིན་ནོ། །དགེ་སློང་གིས་བདེ་བ་འདོད་པས་ནང་གི་གཟུགས་ཉེ་བར་ལེན་ཅིང་སེམས་པར་བྱེད། རྩོལ་བར་བྱེད། རིལ་གྱིས་འཆང་བར་བྱེད། དམ་དུ་འཆང་བར་བྱེད་ལ། དེས་ཀྱང་བྱུང་ལ་ཐུག་པའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །ཁུ་བ་མི་འབྱིན་ན་ཉེས་པ་སྦོམ་པོར་འགྱུར་རོ། །བདེ་བ་འདོད་པས་ཇི་ལྟ་བ་བཞིན་དུ་ས་བོན་འདོད་པ་དང ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་ཀྱང་དེ་བཞིན་ནོ། །དགེ་སློང་གིས་བདེ་བ་འདོད་པས་ནང་གིས་གཟུགས་ཉེ་བར་ལེན་ཅིང་སེམས་པར་བྱེད། རྩོལ་བར་བྱེད། རིལ་གྱིས་འཆང་བར་བྱེད་ལ། དེས་ཀྱང་ངད་ལས་པའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །ཁུ་བ་མི་འབྱིན་ན་ཉེས་པ་སྦོམ་པོར་འགྱུར་རོ། །བདེ་བ་འདོད་པས་ཇི་ལྟ་བ་བཞིན་དུ་ས་བོན་འདོད་པ་དང ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་ཀྱང་དེ་བཞིན་ནོ། །དགེ་སློང་གིས་བདེ་བ་འདོད་པས་ནང་གི་གཟུགས་ཉེ་བར་ལེན་ཅིང་སེམས་པར་བྱེད། རྩོལ་པར་བྱེད། རིལ་གྱིས་འཆང་བར་བྱེད། དམ་དུ་འཆང་བར་བྱེད་ལ། དེས་ཀྱང་བྱེ་བྲག་ངེས་པར་མྱོང་བའི་བདེ་བ་དང ། བྱུང་ལ་ཐུག་པའི་བདེ་བ་དང ། ངད་ལངས་པའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །ཁུ་བ་མི་འབྱིན་ན་ཉེས་པ་སྦོམ་པོར་འགྱུར་རོ། །བདེ་བ་འདོད་པས་ཇི་ལྟ་བ་བཞིན་དུ་ས་བོན་འདོད་པ་དང ། རིག་སྔགས་འདོད་པ་དང ། སྨན་འདོད་པ་དང ། བརྟག་པ་འདོད་པས་ཀྱང་དེ་བཞིན་ནོ། །ནང་གི་གཟུགས་ཇི་ལྟ་བ་བཞིན་དུ་ཕྱི་རོལ་གྱི་གཟུགས་ཉེ་བར་ལེན་པ་ལ་ཡང་དེ་བཞིན་དུ་རྒྱས་པར་སྦྱར་རོ། ་་་་་་་་།བར་སྡོམ་ལ། གར་བྱེད་རབ་ཏུ་གར་བྱེད་དང ། །མཁའ་དང་ཤུགས་དང
5.207b
སྦུབས་འོངས་དང ། །ཀུན་དུ་མཉེད་དང་བྱེ་བྲག་ངེས། །འཇལ་བ་དང་ནི་ལྟ་བ་དང ། །རྒྱུན་ལས་བཟློག་དང་རྫི་བཟློག་པའི། །སྡེ་ཚན་ཡང་དག་བསྡུས་པ་ཡིན། །དགེ་སློང་གིས་གར་བྱེད་པས་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་རབ་ཏུ་གར་བྱེད་པས་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་ནམ་མཁའ་ལ་རྐེད་པ་སྐྱོད་པས་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་ཤུགས་བཏང་སྟེ། ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་སྦུབས་སུ་འོངས་པའི་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་ཀུན་དུ་མཉེད་པའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཁུ་བ་མི་འབྱིན་ན་ཉེས་བྱས་སུ་འགྱུར་རོ། །དགེ་སློང་གིས་ཀུན་དུ་ཆགས་པའི་སེམས་ཀྱིས་རང་གི་ཡན་ལག་གི་རྣམ་པ་འཇལ་བར་བྱེད་ན་ཉེས་པ་སྦོམ་པོར་འགྱུར་རོ། །དགེ་སློང་གིས་ཆགས་པའི་སེམས་ཀྱིས་རང་གི་ཡན་ལག་གི་རྣམ་པ་ལ་ལྟ་ན་ཉེས་བྱས་སུ་འགྱུར་རོ། །དགེ་སློང་གིས་ཆགས་པའི་སེམས་ཀྱིས་རང་གི་ཡན་ལག་གི་རྣམ་པ་ཆུའི་རྒྱུན་ལས་བཟློག་ཕྱོགས་སུ་གཏོད་པར་བྱེད་ན་ཉེས་པ་སྦོམ་པོར་འགྱུར་རོ། །ཆུའི་རྒྱུན་ཕྱོགས་སུ་གཏོད་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཆགས་པའི་སེམས་ཀྱིས་རང་གི་ཡན་ལག་གི་རྣམ་པ་རྫི་ཕྱོགས་མ་ཡིན་པར་གཏོད་པར་བྱེད་ན་ཉེས་པ་སྦོམ་པོར་འགྱུར་རོ། །རྫི་ཕྱོགས་སུ་གཏོད་པར་བྱེད་ན་ཉེས་བྱས་སུ་འགྱུར་རོ། །རྨ་སྦྱང་བ་དང ། ཤུ་བ་དང ། གཡན་པ་དང ། མཛེ་དང ། ཕོལ་མིག་དང ། སྐྲངས་པ་དང ། ཁྱི་རྔོ་དང ། གློག་པ་དང ། འབྲུམ་བུ་དང ། ཕྱི་རོལ་དུ་མཆོང་བ་དང ། འོབས་ལ་མཆོང་བ་དང ། བརླ་ལ་རེག་པ་དང ། གོས་ལ་རེག་པ་དང ། ཆགས་པར་འགྱུར་བའི
5.208a
གཟུགས་དག་མཐོང་བ་དང ། སྔོན་སྤྱད་པའི་ཡུལ་རྗེས་སུ་དྲན་པ་དང ། བསྲོ་ཁང་གི་ལས་ཉམས་སུ་མྱོང་བར་བྱེད་པས་ཁུ་བ་ཕྱུང་བ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཁུ་བ་འབྱིན་པའི་དགེ་འདུན་ལྷག་མ་སྟེ་དང་པོ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །མཉན་ཡོད་ན་གནས་པའི་བྲམ་ཟེ་དང་ཁྱིམ་བདག་གི་ཆུང་མ་རྣམས་ཀྱི་ཀུན་དུ་སྤྱོད་པ་ནི་བསྐྱེད་མོས་ཚལ་དུ་སོང་སྟེ། རྒྱལ་བྱེད་ཀྱི་ཚལ་དུ་འཇུག་པ་དང ། གཙུག་ལག་ཁང་བལྟ་བ་དང ། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་ཏུ་འགྲོ་བས། བྲམ་ཟེ་དང ། ཁྱིམ་བདག་དག་གི་ཆུང་མ་རབ་ཏུ་མང་པོ་དག་བསྐྱེད་མོས་ཚལ་དུ་བྱུང་སྟེ་གཙུག་ལག་ཁང་ལྟ་འདོད་པས་རྒྱལ་བྱེད་ཀྱི་ཚལ་ག་ལ་བ་དེར་དོང་ངོ ། །དྲུག་སྡེ་དག་གིས་གྲོང་ཁྱེར་ཆེན་པོ་དྲུག་པོ་དག་ན་འཁོད་པའི་མི་རྣམས་འདི་ལྟ་སྟེ། རིགས་ལས་སམ། རུས་ལས་སམ། རྒྱུད་ལས་སམ། མིང་ལས་སམ། གཟུགས་ལས་སམ། བཟོ་ལས་སམ། འཚོ་བ་ལས་མི་ཤེས་པ་འམ། མ་མཐོང་བ་འམ། མ་ཐོས་པ་འམ། མ་རིག་པ་འམ། རྣམ་པར་མི་ཤེས་པ་འགའ་ཡང་མེད་པས། ཚེ་དང་ལྡན་པ་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་འདི་སྐད་ཅེས་སྨྲས་སོ། །ཆེ་གེ་མོའི་མ། ཆེ་གེ་མོའི་ཆུང་མ། ཆེ་གེ་མོའི་མནའ་མ། ཆེ་གེ
5.208b
མོའི་བུ་མོ། ཆེ་གེ་མོའི་སྲིང་མོ་འོངས་པ་ལེགས་སོ་འོངས་པ་ལེགས་སོ། །ཁྱེད་ཅག་ཅིའི་ཕྱིར་ཡུན་རིང་མོ་རིང་མོ་ནས་ཟླ་བ་ལྟར་རྒྱུ་བར་བྱེད། དེ་དག་གིས་སྨྲས་པ། བཙུན་པ་འཆར་ཀ་བཅོམ་ལྡན་འདས་ཀྱིས་མི་ཁོམ་པ་བརྒྱད་ནི་གང་ཟག་གི་ཚངས་པར་སྤྱད་པའི་དུས་མ་ལགས་སོ་ཞེས་ལེགས་པར་གསུངས་ན། བདག་ཅག་ནི་འདི་ལྟ་སྟེ། ཁྱིམ་གྱི་འདུ་འཛི་དང་ལྡན་པས་མི་ཁོམ་པ་དགུ་པ་ལགས་སོ། །འཆར་ཀས་སྨྲས་པ། སྲིང་མོ་དག་ཁྱེད་ཀྱིས་འགའ་ཞིག་གིས་འདི་སྐད་ཅེས། དུག་ཅན་ལ་སོགས་རྒྱལ་པོ་ཡིས། །བྱ་བ་དག་ནི་མ་བྱས་པར། །དེ་དག་ཉིད་དང་བྱ་བ་རྣམས། །ཞིག་པ་ཉིད་དུ་གྱུར་པ་ཡིན། །བྱ་བ་དེ་དག་ཉིད་ཀྱང་ནི། །ཡོངས་སུ་རྫོགས་པར་མ་གྱུར་པར། །འཇིག་རྟེན་དགྲ་བོ་འཆི་བདག་དེ། །འོང་བ་ཉིད་དུ་འགྱུར་བ་ཡིན། །ཞེས་སྨྲས་པ་མ་ཐོས་སམ། དེ་དག་གིས་སྨྲས་པ། བཙུན་པ་འཆར་ཀ་དེའི་སླད་དུ་བདག་ཅག་བསྐྱེད་མོས་ཚལ་དུ་མཆིས་ཏེ་རྒྱལ་བྱེད་ཀྱི་ཚལ་དུ་འཇུག་པ་དང ། གཙུག་ལག་ཁང་བལྟ་བ་དང ། བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་བའི་སླད་དུ་མཆིས་པ་ལགས་སོ། །འཆར་ཀས་སྨྲས་པ། སྲིང་མོ་དག་གལ་ཏེ་ཁྱེད་ཅག་དེའི་ཕྱིར་འོངས་ན་བཅོམ་ལྡན་འདས་ཀྱིས་ཀྱང་སྙིང་པོ་མེད་པའི་ལུས་ལས་སྙིང་པོ་བླང་བར་བྱའོ་གསུངས་པས་ལེགས་སོ་ལེགས་སོ། །སྲིང་མོ་དག་དེ་ནི་མཇལ་གྱིས་འདི་ལྟར་ལྟད་མོ་ཇི་ལྟར་བལྟ་བ་དྲི་བར་བྱའོ། །སྲིང་མོ་དག་ཁྱེད་ཅག་གང་དུ་འཇུག་པར་བྱེད། བཙུན་པ་འཆར་ཀ་བདག་ཅག་ཀུན་དགའ་ར་བར་འཇུག་ཅིང་གཙུག་ལག་ཁང་ལྟ་བར་འཚལ་ལོ། །སྲིང་མོ་དག་བཅོམ་ལྡན་འདས་ཀྱིས། མཁས་པ་གང་ཞིག་རབ་ཏུ་སེམས་དང་བས། །སངས་རྒྱས་མཆོད་རྟེན་དག་ལ་གོམ་འདོར་ན། །འཛམ་བུ་ཆུ་བོ་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་གསུངས་པས་དེ་ཡང་ལེགས་སོ། །སྲིང་མོ་དག་ཁྱེད་ཀྱིས་གང་ཁྱེད་ཅག་གཙུག་ལག་ཁང་སྟོན་པར་བྱེད་པའི་དགེ་སློང་འགའ་ཞིག་བཙལ་ཏམ། འཕགས་པ་ཅི་བདག་ཅག་སྒྲོན་མ་སུག་པ་ན་ཐོགས་བཞིན་དུ་ཞུགས་གཞན་དུ་ཚོལ་ལམ། བཙུན་པ་འཆར་ཀ
5.209a
སྤངས་ཏེ་དགེ་སློང་གཞན་ག་ལ་ཚོལ། ཁྱོད་བས་གཞན་ཁྱད་པར་དུ་འཕགས་པ་སུ་ཞིག་མཆིས་ཀྱིས། ཁྱོད་ཉིད་ཀྱིས་བསྟན་དུ་གསོལ། དེ་ནས་ཚེ་དང་ལྡན་པར་འཆར་ཀ་འདི་སྙམ་དུ་སེམས་ཏེ། གལ་ཏེ་འདི་དག་ལ་གཙུག་ལག་ཁང་བསྟན་པར་བྱ་ན་ནི་བདག་གི་དགེ་བའི་ཕྱོགས་ཡོངས་སུ་ཉམས་པར་ཡང་འགྱུར། གལ་ཏེ་བསྟན་པར་མི་བྱ་ན་ནི་ཚིག་པའི་བསོད་སྙོམས་ཀྱང་སྟེར་བར་མི་འགྱུར་ལ། བཅོམ་ལྡན་འདས་ཀྱིས་ཀྱང་མ་དད་པ་རྣམས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་གཞུག་པར་བྱ། གདུལ་བར་བྱ། གཟུང་བར་བྱ། རབ་ཏུ་དགོད་པར་བྱའོ་ཞེས་གསུངས་པས་དེའི་ཕྱིར་འདི་དག་དགེ་བ་ལ་ངེས་པར་སྦྱར་བར་བྱ། རྣམ་པ་ཐམས་ཅད་དུ་བསྟན་པར་བྱའོ་སྙམ་དུ་རིག་ནས་དེས་མེ་ཏོག་དང ། བདུག་སྤོས་ལ་སོགས་པ་མཆོད་པ་རྣམ་པ་སྣ་ཚོགས་ཐོགས་ཏེ་པོག་པོར་ལག་ཏུ་བླངས་ནས་གོ་རིམ་ཇི་ལྟ་བ་བཞིན་དུ་བསྟན་པར་བརྩམས་ཏེ། སྲིང་མོ་དག་འདི་ནི་བཅོམ་ལྡན་འདས་ཀྱི་དྲི་གཙང་ཁང་སྟེ། གང་དུ་བཅོམ་ལྡན་འདས་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་འགྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང ། ཉམ་ང་བ་དང ། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་གི་ལམ་ནས་བསླངས་ཏེ་མཐོ་རིས་དང ། ཐར་པ་དང ། འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། དགེ་བའི་རྩ་བ་དག་བསྐྱེད་པ་གང་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང ། གཟིགས་པ་འཇུག་ཅིང་འདི་ལྟར། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །
5.209b
དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡིས། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ་ཞེས་བྱ་བ་འཇུག་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུའི་སྟོབས་དང་ལྡན་པ། མི་འཇིགས་པ་བཞིས་བསྙེངས་པ་མི་མངའ་བ། ཁྱུ་མཆོག་རླབས་པོ་ཆེའི་གནས་སུ་དམ་འཆའ་བ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་པ་གང་ཡིན་པ་དེའི་ཡིན་གྱིས་འདིར་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་ཀུན་ཤེས་ཀཽཎྜི་ནྱའི་གཙུག་ལག་ཁང་སྟེ། བཅོམ་ལྡན་འདས་ཀྱི་འཇིག་རྟེན་མི་ཤེས་པའི་མུན་པ་དང ། འདྲེན་པ་མེད་པ་དང ། ཡོངས་སུ་འདྲེན་པ་མེད་པ་ན་དེའི་དང་པོར་ཡེ་ཤེས་ཀྱི་མིག་སྨན་གྱི་ཐུར་མས་གང་གི་ཆོས་ཀྱི་མིག་རྣམ་པར་སྦྱངས་པ། བཅོམ་ལྡན་འདས་ཀྱིས་གནས་བརྟན་རྣམས་དང ། རྒྱལ་ཚབ་ལྟ་བུ་རྣམས་དང ། ཡུན་རིང་པོ་ནས་རབ་ཏུ་བྱུང་བ་རྣམས་དང ། ཚངས་པར་སྤྱོད་པ་མངོན་པར་སྤྱད་པ་རྣམས་དང ། སྣམ་སྦྱར་གྱི་རྒྱལ་མཚན་ཐོགས་པ་རྣམས་གྱི་མཆོག་ཏུ་ལུང་བསྟན་པ་གང་ཡིན་པ་གང་གི་རྒྱུད་ལ་དེའི་དང་པོར་བཅོམ་ལྡན་འདས་ཀྱིས་འཇིག་རྟེན་དུ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་བསྐོར་མི་ནུས་པ་ཆོས་དང་ལྡན་པའི་ཆོས་ཀྱི་འཁོར་ལོ་སྐྱེ་བོ་མང་པོའི་དོན་དང ། སྐྱེ་བོ་མང་པོ་ལ་ཕན་པ་དང ། བདེ་བ་དང ། འཇིག་རྟེན་ལ་རྗེས་སུ་ཐུགས་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང ། བདེ་བའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བ་དེའི་ཡིན་གྱིས་འདིར་ཡང་ཞབས་ལ་ཕྱག་དག་ཚོལ་ཅིག་།འདི་ནི་ཚེ་དང་ལྡན་པ་འོད་སྲུང་ཆེན་པོའི་གཙུག་ལག་ཁང་སྟེ། བྲམ་ཟེ་ཤིང་སཱ་ལ་ཆེན་པོ་ལྟ་བུ་རྨོན་པ་དོར་སྟོང་དུ་གཅིག་གིས
5.210a
མ་ཆོག་པ་སྤངས་ཏེ་རབ་ཏུ་བྱུང་བ་དབྱིག་བྱེ་བ་ཕྲག་དྲུག་ཅུ་དང་ལྡན་པ། གསེར་གྱི་ནས་བང་ཆུང་བརྒྱད་ཅུ་བདོག་པ། བྲན་གྱི་གྲོང་བཅཝ་བརྒྱད་བདོག་པ། སྦྱོར་བའི་གྲོང་བཅུ་དྲུག་བདོག་པ། སེར་སྐྱ་བཟང་མོ་ལུས་གསེར་བས་ལྷག་པ་དང་ལྡན་པ་མཆིལ་མའི་ཐལ་བ་སྨིན་པ་ལྟར་སྤངས་ཏེ་མཚན་མོའི་ཐུན་ཐ་མ་ལ་རས་སྦྱར་མའི་སྣམ་སྦྱར་རིན་ཐང་འབུམ་རི་བ་ཐོགས་ཏེ་འཇིག་རྟེན་ན་དགྲ་བཅོམ་པ་གང་དག་བཞུགས་པ་དེ་དག་གི་ཕྱིར་རབ་ཏུ་བྱུང་བ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པར་བསྐྱེད་པའི་ཕྱིར་ནགས་ན་བརྟེན་པ་གང་ཡིན་པ། གང་མཐོང་ན་སྤོས་ཀྱི་གླང་པོ་ཆེ་དག་ཀྱང་རྒྱགས་པ་དང་བྲལ་བར་འགྱུར་བ། གང་གིས་བུ་མངས་ཀྱི་མཆོད་རྟེན་དུ་སྟོན་པར་ཁས་བླངས་ནས་དགེ་སློང་གི་སྡོམ་པ་ཐོབ་པ། བཅོམ་ལྡན་འདས་ཀྱིས་ཀྱང་དགེ་སློང་དག་ངའི་ཉན་ཐོས་ཀྱི་དགེ་སློང་འདོད་པ་ཆུང་བ་ཆོག་ཤེས་པ། སྦྱངས་པའི་ཡོན་ཏན་སྨྲ་བ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟ་སྟེ། དགེ་སློང་འོད་སྲུང་ཆེན་པོའོ་ཞེས་གསུངས་ཤིང ། བཅོམ་ལྡན་འདས་ཀྱིས་རྗེས་སུ་བསྔགས་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་ཚོལ་ཅིག་།འདི་ནི་ཚེ་དང་ལྡན་པ་ཤཱ་རིའི་བུའི་གཙུག་ལག་ཁང་སྟེ། མཆོག་ཐོབ་པའི་བུ་གང་ཡིན་པ། གང་གིས་ལོ་བརྒྱད་གཉིས་སུ་དབང་པོའི་བརྡ་སྤྲོད་པ་བླགས་པ། རྒོལ་བ་ཐམས་ཅད་ཚར་གཅད་པ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། བཅོམ་ལྡན་འདས་ཀྱིས་ཤེས་རབ་ཆེན་པོ་རྣམས་དང ། སྤོབས་པ་ཆེན་པོ་རྣམས་ཀྱི་མཆོག་ཏུ་བསྟན་པ་གང་ཡིན་པ། བཅོམ་ལྡན་འདས་ཀྱིས་འཇིག་རྟེན་ཐམས་ཅད་གང་གི་ཆ་བཅུ་དྲུག་པར་གཞག་ཅིང་བཅོམ་ལྡན་འདས་ཀྱིས། དེ་བཞིན་གཤེགས་པ་མ་གཏོགས་པར། །འཇིག་རྟེན་ཀུན་གྱི་ཤེས་རབ་གང ། །ཤཱ་རིའི་བུ་ཡི་ཤེས་རབ་ཀྱི། །བཅུ་དྲུག་ཆར་ཡང་མི་ཆོག་གོ། །གལ་ཏེ་ལྷར་བཅས་འཇིག་རྟེན་འདི། །ཤཱ་རིའི་བུ་དང་མཉམ་གྱུར་པས། །དེ་བཞིན་གཤེགས་པའི་ཡེ་ཤེས་ཀྱི། །བཅུ་དྲུག་ཆར་ཡང་མི་ཆོག་གོ། །ཞེས་གསུངས་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག
5.210b
ཚོལ་ཅིག་།འདི་ནི་ཚེ་དང་ལྡན་པ་མཽད་གལ་གྱི་བུ་ཆེན་པོའི་གཙུག་ལག་ཁང་སྟེ། མདུན་ན་འདོན་གྱི་བུ་ཅོད་པན་མེད་པའི་རྒྱལ་སྲིད་སྤངས་ཏེ་རབ་ཏུ་བྱུང་བ་གང་ཡིན་པ་གང་གིས་ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བྱེད་རྐང་པ་གཡས་པའི་མཐེ་བོས་ལན་གསུམ་དུ་བསྒུལ། ཀུན་ཏུ་བསྒུལ། ཀུན་ཏུ་རབ་ཏུ་བསྒུལ་བ། གང་གི་རྫུ་འཕྲུལ་གྱིས་བཅོམ་ལྡན་འདས་འཇིག་རྟེན་གྱི་ཁམས་འོད་ཅན་དུ་ཉིན་མཚན་བདུན་གྱིས་གཤེགས་པ། བཅོམ་ལྡན་འདས་ཀྱིས་རྫུ་འཕྲུལ་ཆེན་པོ་རྣམས་དང ། མཐུ་ཆེན་པོ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་མ་འགགས་པའི་གཙུག་ལག་ཁང་སྟེ། མི་སྐལ་བ་བཟང་པོ་ལས་རབ་ཏུ་བྱུང་བ་གང་ཡིན་པ། བཅོམ་ལྡན་འདས་ཀྱི་ཡབ་ཀྱི་མཆེད་ཀྱི་སྲས་གང་གི་མིང་ཡང་དག་པར་བསྒྲགས་པས་ཚོང་པ་དག་རྒྱ་མཚོ་ཆན་པོ་ནས་བཞོན་པའི་སྣོད་ལེགས་པར་གྲུབ་ཅིང་འོང་བར་འགྱུར་བ། བཅོམ་ལྡན་འདས་ཀྱིས་ལྷའི་མིག་ཅན་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་ཀུན་དགའ་བོའི་གཙུག་ལག་ཁང་སྟེ། ཡུན་རིང་པོ་ནས་བཅོམ་ལྡན་འདས་ཀྱིས་བསྙེན་བཀུར་བ་གང་ཡིན་པ། བཅོམ་ལྡན་འདས་ཀྱི་ཞ་འབྲིང་ན་ཉེ་བར་སྤྱོད་པ། སྟོན་པས་ཡང་དག་པར་བསྔགས་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་ཡང་དག་པར་བཀུར་བ་གང་ཡིན་པ། བཅོམ་ལྡན་འདས་ཀྱི་ཡབ་ཀྱི་མཆེད་ཀྱི་སྲས་ལས་རབ་ཏུ་བྱུང་བ། བཅོམ་ལྡན་འདས་ཀྱིས་མང་དུ་ཐོས་པ་རྣམས་དང ། ཐོས་པ་འཛིན་པ་རྣམས་དང ། ཐོས་པ་བསགས་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་མཛེས་དགའི་གཙུག་ལག་ཁང་སྟེ། བཅོམ་ལྡན་འདས་ཀྱི་གཅུང་པོ་སྲུའི་སྲས་ལས་རབ་ཏུ་བྱུང་བ། གལ་ཏེ་རབ་ཏུ་མ་བྱུང་ན་སྟོབས་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་བ། བཅོམ་ལྡན་འདས་ཀྱིས་དབང་པོ་དག་གི་སྒོ་བསྡམས་པ་རྣམས་ཀྱི
5.211a
མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་འདི་ནི་ཚེ་དང་ལྡན་པ་སྒྲ་གཅན་ཟིན་གྱི་གཙུག་ལག་ཁང་སྟེ། བཅོམ་ལྡན་འདས་ཀྱིས་སྲས་ལས་རབ་ཏུ་བྱུང་བ། གལ་ཏེ་རབ་ཏུ་མ་བྱུང་ན་མཐུ་དང་ལྡན་པའི་རྒྱལ་པོར་འགྱུར་བ་གང་ཡིན་པ། གང་རབ་ཏུ་བྱུང་ན་རྒྱལ་པོ་མང་པོས་བཀུར་གྱི་རྒྱུད་ཅིག་ནས་གཅིག་ཏུ་བརྒྱུད་པ་ཡང་དག་པར་རྒྱུན་ཆད་པ། བཅོམ་ལྡན་འདས་ཀྱིས་བསླབ་པ་འདོད་པ་རྣམས་དང ། བསླབ་པ་ལ་གུས་པ་རྣམས་དང ། བསླབ་པ་ལ་ཡོ་བྱད་བསྙུངས་པ་ཐོབ་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་དགའ་བོའི་གཙུག་ལག་ཁང་ངོ ། །འདི་ནི་ཉེ་དགའི་འོ། །འདི་ནི་འདུན་པའི་འོ། །འདི་ནི་འགྲོ་མགྱོགས་ཀྱིའོ། །འདི་ནི་ནབ་སོའི་འོ། །འདི་ནི་ཁོ་བོའི་གཙུག་ལག་ཁང་ངོ ། །ཅི་འདི་ཡང་ལྟ་བར་བྱེད་དམ། འཕགས་པ་ཅི་བདག་ཅག་གིས་གཙུག་ལག་ཁང་ཐམས་ཅད་བལྟས་ནས་གདོད་འཕགས་པ་འཆར་ཀའི་གཙུག་ལག་ཁང་བལྟ་བར་མི་བགྱི་འམ། བདག་ཅག་གིས་འཕགས་པ་འཆར་ཀའི་གཙུག་ལག་ཁང་འདི་ད་ཤིན་དུ་བལྟ་བར་བགྱིའོ། །སྲིང་མོ་དག་དེ་བཞིན་གྱིས་ཤིག་།ཚེ་དང་ལྡན་པ་འཆར་ཀ་དེ་འདོད་ཆགས་སྤྱོད་པ་ཡིན་པས་དེའི་གཙུག་ལག་ཁང་ན་གཞི་མོན་སྲན་གྲེའུ་འི་ཕྱེ་མས་བསྐུས་པ་དང ། རྩིག་པ་ཅུང་ཞིག་ཉེ་བར་བཀྲ་བ་དང ། མལ་སྟན་བེའུ་ཕྲུག་གི་སྙིང་པོ་ཅན་བཤམས་པ་དང ། བུམ་པ་བཏུང་བས་བཀང་བ་བཅུ་སྣོད་དང་བཅས་པ་བཞག་པ་དང ། སྐོན་པའི་ནང་ན་བཅའ་བ་སྣ་ཚོགས་ཀྱིས་གང་བ་དག་ཡོད་དོ། །ཚེ་དང་ལྡན་པ་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་རང་གི་གཙུག་ལག་ཁང་དུ་འོངས་པ་རྣམས་ལ་སྨྲས་པ། སྲིང་མོ་དག་ཅི་ཇེ་ཁྱེའུ་སུས་བྱ་འམ། འོན་ཏེ་བཏུང་བ་བཏུང ། འཕགས་པ་ཅི་ཆུ་ཀླུང་བཟློག་ཕྱོགས་སུ་འབབ་བམ། བདག་ཅག་གིས་འཕགས་པ་ལ་གསོལ་བར་བགྱི་བ་གང་ལགས་པ་དེ་ཉིད་འཕགས་པས་བདག་ཅག་ལ་སྩོལ་ཏམ། འདི་ལྟར་བདག་ཅག་ལ་གང་དཀོན་པ་དེ་སྩོལ་ཅིག་།སྲིང་མོ་དག་ཁྱེད་ཅག་ལ་ཅི་ཞིག་དཀོན།
5.211b
འཕགས་པ་ཆོས་མཉན་པའོ། །སྲིང་མོ་དག་བཅོམ་ལྡན་འདས་ཀྱིས་གནས་དྲུག་པོ་དག་འཇིག་རྟེན་དུ་བྱུང་བ་ནི་ངོ་མཚར་རྨད་དུ་བྱུང་བ་ཡིན་ཏེ། དྲུག་པོ་དེ་དག་གང་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང ། དེ་བཞིན་གཤེགས་པས་གསུངས་པའི་ཆོས་འདུལ་བ་དང ། མི་ཉིད་དང ། དབུས་པའི་གནས་སུ་སྐྱེ་བ་དང ། དབང་པོ་མ་ཚང་བ་མེད་པ་དང ། དགེ་བའི་ཆོས་ལ་འདུན་པའོ་ཞེས་ལེགས་པར་གསུངས་པས་དེའི་ཕྱིར་ཁྱེད་ཅག་དགེ་བའི་ཆོས་ལ་འདུན་པ་སྐྱེས་པ་འདི་ནི་སངས་རྒྱས་འབྱུང་བ་དང་འདྲ་སྟེ་ལེགས་སོ་ལེགས་སོ། །སྲིང་མོ་དག་འཁོད་ཅིག་དང་ཁོ་བོས་ཁྱེད་ལ་ཆོས་བསྟན་པར་བྱའོ། །དེ་དག་གིས་དེའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འཁོད་པ་དང ། དེས་དེ་དག་ལ་ཆོས་བསྟན་པར་བརྩམས་སོ། །ཇི་ལྟ་ཇི་ལྟར་ཆོས་སྟོན་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་གི་ཡན་ལག་དང་ཉིང་ལག་དག་ལ་ཉུག་པར་བརྩམས་སོ། །འདི་ལྟ་སྟེ་དཔེར་ན་མི་གསང་སྔགས་ཉིད་རྗོད་པར་བྱེད་པ་འབྱུང་པོ་འམ། ཤ་ཟས་ཐལ་ལྕག་གིས་བསྣུན་པས་བསྣུན་པར་གྱུར་པ་དེ་བཞིན་དུ་དེ་ཡང་དེ་དག་ལ་ཇི་ལྟ་ཇི་ལྟར་ཆོས་སྟོན་པར་བྱེད་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་གི་ཡན་ལག་དང་ཉིང་ལག་དག་ལ་ཉུག་པར་བརྩམས་སོ། །དེ་ན་གང་དག་བདག་གིར་བྱེད་པ་དེ་དག་ནི་དེ་དང་ལྷན་ཅིག་གཞོག་སྟེག་དང ། ཕྱར་གཡེང་དང ། ཐོ་འཚམ་པ་དང ། ཀུན་དུ་རྩེ་བ་དང ། ཀུན་དུ་ཅ་ཅོ་འདོན་པ་དང ། དགོད་པ་དང ། དྲེགས་པ་དང ། ལུས་སྒྱུར་བར་བྱེད་དོ། །གང་དག་བདག་གིར་མི་བྱེད་པ་དེ་དག་ནི་དེ་ནས་ཕྱིར་བྱུང་སྟེ། འཆག་ས་དང ། དག་ར་དང ། སྒོ་ཁང་དག་ན། གང་ལས་ཆུ་འབྱུང་དེ་ལས་འབར། །གང་ལས་སྐྱོབ་པ་དེ་ལས་འཇིགས། །འཇིགས་པ་མེད་ལས་འཇིགས་པ་སྐྱེས། །སྐྱབས་ལས་འཇིགས་པ་སྐྱེས་པར་གྱུར། །བདག་ཅག་གི་ཕྱོགས་གཅིག་ཏུ་བདེ་བ་ཞི་བ། བདེ་ལེགས
5.212a
བརྗོད་པ། བདེ་ལེགས་སུ་འགྱུར་བ་གང་ཡིན་པ་དེ་ལས་འཇིགས་པ་དང ། ཡམས་དང ། འགོ་བའི་ནད་དང ། འཁྲུག་པ་བྱུང་བར་གྱུར་ཏོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དེ་དག་སྨོད་ཅིང་འདོད་པ་ན་དགེ་སློང་དག་གི་མངོན་སུམ་དུ་གྱུར་ན་དེ་དག་གིས་དེ་དག་སྨོད་པ་ཐོས་པ་དང ། དེ་དག་གིས་སྨྲས་པ། སྲིང་མོ་དག་ཁྱེད་ཅག་སུ་ལ་སྨོད། འཕགས་པ་དག་ཁྱེད་ཅག་ལའོ། །ངེད་ཀྱི་ཅི་བྱས། འཕགས་པ་དག་བདག་ཅག་གི་ཡན་ལག་དང་ཉིང་ལག་ཁྱིམ་ཐབ་ཀྱིས་ཀྱང་མ་བྱུགས་པ་གང་དག་ལགས་པ་དེ་དག་འཕགས་པ་འཆར་ཀས་བྱུགས་སོ། །གལ་ཏེ་བདག་ཅག་གི་ཕ་མ་འམ། ཕུ་ནུ་མོ་དག་གིས་ཐོས་པར་གྱུར་ན་རྒྱལ་བྱེད་ཀྱི་ཚལ་ག་ལ་བ་དེར་ལྟར་ཡང་མི་སྟེར་ན་མཆི་བར་ལྟ་སྨོས་ཀྱང་ཅི་འཚལ། སྲིང་མོ་དག་ཁ་རོག་ཤིག་།དགེ་སློང་དེ་ནི་མདུན་ན་འདོན་གྱི་བུ་ལས་རབ་ཏུ་བྱུང་བ། ཚུལ་ཁྲིམས་དང་ལྡན་པ་ཡིན་མོད་ཀྱི། འོན་ཀྱང་འདོད་ཆགས་ཤས་ཆེ་བ་ཡིན་པས་རྩོམ་པ་དེས་ཉོན་མོངས་པ་སེལ་བར་བྱེད་དོ། །འཕགས་པ་དག་ཅི་ལགས། གླང་བུ་གང་ལ་རཝ་རྣོན་པོ་གཉིས་མཆིས་པ་དེས་བདག་ཉིད་ཀྱི་དཀུ་འདྲལ་བར་བགྱིད་དམ། དེ་ནི་མི་རིགས་སོ། །སྲིང་མོ་དག་ཁ་རོག་ཤིག་དང་བཟློག་པར་བྱའོ། །འཕགས་པ་དག་གལ་ཏེ་བཟློག་ན་དེ་ལྟ་ན་ལེགས། གལ་ཏེ་བཟློག་པར་མི་མཛད་ན། བདག་ཅག་སླན་ཅད་རྒྱལ་བྱེད་ཀྱི་ཚལ་དུ་མི་མཆིའོ། །སྲིང་མོ་དག་ཁ་རོག་ཤིག་དང་ཅི་ནས་ཀྱང་ཕྱིན་ཆད་དེ་ལྟ་བྱེད་པར་མི་འགྱུར་བར་བཟློག་པར་བྱའོ། །དགེ་སློང་རྣམས་ཀྱིས་དེ་དག་ལ་བསྒོ་སྟེ་དོང་བ་དང ། ལྷག་མ་རྣམས་ཀྱང་གཙུག་ལག་ཁང་ནས་བྱུང་སྟེ་དོང་ངོ ། །དེ་ནས་ཚེ་དང་ལྡན་པ་འཆར་ཀ་ཡང་རྒོད་བཞིན་དུ་གཙུག་ལག་ཁང་ནས་བྱུང་བ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། ཚེ་དང་ལྡན་པ་འཆར་ཀ་ཁྱོད་མི་མཛེས་པ་དེ་ལྟ་བུ་དེ་བྱས་ནས་ད་ཅི་རྒོད། འཆར་ཀས་སྨྲས་པ། ཁོ་བོས་ཆང་འཐུངས་སམ། སྐུན་དོང་ཟོས་སམ་ཅི། ཚེ་དང་ལྡན་པ་ཅི་དེ་ཡང་བྱས་སམ། གཞན་ཅི་ཞིག་བྱས། བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དེ་དག་འཕྱ་ཞིང་དོང་ངོ ། །འཆར་ཀས་སྨྲས་པ། ཚེ་དང་ལྡན་པ་དག
5.212b
ལྷུང་བཟེད་ནག་པོ་ཅན་རྣམས་ཀྱི་རང་བཞིན་ནི་སེར་སྣས་གང་ལ་ཡང་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་མི་སྟོན་ལ། དེ་དག་ནི་གང་གཞན་ལ་སྟོན་པ་དེ་ལ་འཕྱ་བར་བྱེད་དོ། །དེ་དག་གིས་སྨྲས་པ། ཅི་ཁྱོད་ཀྱིས་དེ་དག་བདེན་པ་དག་ལ་བཀོད་དམ་དེས་སྨྲས། ཇེ་དེ་དག་གི་དབང་པོ་ཡོངས་སུ་སྨིན་པར་བྱ་བར་བརྩམས་ན་མཐར་གྱིས་བདེན་པ་ཡང་མཐོང་བར་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་དག་ཉིད་ཀྱིས་ཁེངས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །དེ་ནས་བཅོམ་ལྡན་འདས་ཀྱིས་རྣམས་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་དང་ལྷན་ཅིག་ལུས་ལ་རེག་པར་བྱེད་དམ། ལག་པ་ནས་བཟུང་ངམ། དཔུང་པ་ནས་བཟུང་ངམ། ལན་བུ་ནས་བཟུང་ངམ། ཡན་ལག་དང་ཉིང་ལག་གང་ཡང་རུང་བ་ལ་ནོམ་པ་དང ། ཉུག་པ་བདག་གིར་བྱེད་ན་དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་དང་འདྲ་བ
5.213a
གང་ཡིན་པའོ། །དྲལ་ཅིང་གྱུར་པའི་སེམས་ཀྱིས་ཤེས་བྱ་བ་ལ། སེམས་དྲལ་ཅིང་མ་གྱུར་པ་ཡང་ཡོད། གྱུར་ཅིང་མ་དྲལ་བ་ཡང་ཡོད། དྲལ་ཅིང་གྱུར་པ་ཡང་ཡོད། མ་དྲལ་ཅིང་མ་གྱུར་པ་ཡང་ཡོད་དོ། །དེ་ལ་རེ་ཤིག་དྲལ་ཅིང་མ་གྱུར་པ་ནི་སེམས་ཆགས་པ་དང ། ཀུན་དུ་ཆགས་པ་དང ། ཀུན་ནས་དཀྲིས་པ་གང་ཡིན་པའོ། །གྱུར་ཅིང་མ་དྲལ་བ་ནི་སེམས་ལྟོས་པ་དང་ལྡན་ཞིང་སེམས་འབྲེལ་བ་གང་ཡིན་པའོ། །དྲལ་ཅིང་གྱུར་པ་ནི་སེམས་ཆགས་པ་དང ། ཀུན་དུ་ཆགས་པ་དང ། ཀུན་ནས་དཀྲིས་ཤིང་སེམས་ལྟོས་པ་དང་ལྡན་པ་དང་འབྲེལ་བ་གང་ཡིན་པའོ། །མ་དྲལ་ཅིང་མ་གྱུར་པ་ནི་རྣམ་པ་དེ་དག་མ་གཏོགས་པའོ། །བུད་མེད་ཀྱི་ཡུལ་དང་ལྷན་ཅིག་ཅེས་བྱ་བ་ནི་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དང་ངོ ། །ལུས་རེག་པར་ཞེས་བྱ་བ་ནི་ལུས་ལ་ལུས་གཞོལ་བར་རོ། །བྱེད་དམ་ཞེས་བྱ་བ་ནི་བྱེད་པར་གྱུར་ཏམ་མོ། །ལག་པ་ནས་བཟུང་ངམ་ཞེས་བྱ་བ་ནི་འཁྲིག་མ་མན་ཆད་ཀྱི་ལག་པ་ནས་སོ། །དཔུང་པ་ནས་བཟུང་ངམ་ཞེས་བྱ་བ་ནས་འཁྲིག་མ་ཡན་ཆད་ནས་སོ། །ལན་བུ་ནས་བཟུང་ངམ་ཞེས་བྱ་བ་ལ། ལན་བུ་ཞེས་བྱ་བ་ནི་སྐྲ་དག་དང ། དེ་དང་འབྲེལ་བའི་གོས་སོ། །ཡན་ལག་དང་ཉིང་ལག་གང་ཡང་རུང་བ་ཞེས་བྱ་བ་ནི་ལག་པ་ནས་བཟུང་བ་དང ། དཔུང་པ་ནས་བཟུང་བ་མ་གཏོགས་པ་དེ་ལས་གཞན་པའི་ཡན་ལག་གི་རྣམ་པ་གང་ཡིན་པ་ལའོ། །ནོམ་པ་དང་ཉུག་པ་བདག་གིར་བྱེད་ན་ཞེས་བྱ་བ་ནི་རོ་མྱོང་བར་བྱེད་ནའོ། །དགེ་འདུན་ལྷག་མའོ་ཞེས་བྱ་བ་ནི་ལྟུང་བ་དེ་དགེ་འདུན་ལ་རག་ལས་པ་སྟེ། དེས་ན་དགེ་འདུན་ལྷག་མའོ་ཞེས་གསུངས་སོ་ཞེས་བྱ་བའི་བར་དུ་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། གཞི་དགུས་ཏེ། ནོམ་པར་བྱེད་པ་དང ། ཉུག་པར་བྱེད་པ་དང ། སྤྲོད་པར་བྱེད་པ་དང ། འཛིན་པར་བྱེད་པ་དང ། འདྲེན་པར་བྱེད་པ་དང ། ཡོངས་སུ་འདྲེན་པར་བྱེད་པ་དང ། འོག་ནས་འཁྱུད་པར་བྱེད་པ་དང ། སྟེང་ནས་འཁྱུད་པར་བྱེད་པ་དང ། དམ་དུ་སྦྱོར་བར་བྱེད་པས་སོ། །ཇི་ལྟར་ནོམ
5.213b
པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེའི་སྤྱི་བོ་ལ་ནོམ་པར་བྱེད་ན་གོས་ཀྱིས་བར་དུ་མ་ཆོད་པ་ལ་ནོམ་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ནོམ་ན་ཉེས་པ་སྦོམ་པོར་འགྱུར་རོ། །སྤྱི་བོ་ལ་ཇི་ལྟ་བ་དེ་བཞིན་དུ་འཕྲལ་བ་དང ། མཁུར་བ་དང ། མཆུ་དང ། ཀོ་སྐོ་དང ། མགྲིན་པ་དང ། རྣ་བ་དང ། སྣ་དང ། ཟ་འགྲམ་དང ། ཕྲག་པ་དང ། མཆན་ཀུང་དང ། ཐལ་གོང་དང ། བློ་དང ། རྒྱབ་དང ། བྲང་དང ། རྐེད་པ་དང ། པུས་མོ་དང ། བརླ་དང ། རྗེ་ངར་དང ། རྐང་པའི་རྩེ་མོ་དང ། ཐ་ན་རྐང་པའི་མཐེ་བོ་ལ་ནོམ་པར་བྱེད་ན་གོས་ཀྱིས་བར་དུ་མ་ཆོད་པ་ལ་ནོམ་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ནོམ་ན་ཉེས་པ་སྦོམ་པོར་འགྱུར་རོ། །ནོམ་པར་བྱེད་པ་ལ་ཇི་ལྟ་བ་བཞིན་དུ་ཉུག་པར་བྱེད་པ་དང་སྤྲོད་པ་བྱེད་པ་དང ། འཛིན་པར་བྱེད་པ་ལ་ཡང་དེ་བཞིན་ནོ། །ཇི་ལྟར་འདྲེན་པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེ་ཐག་རིང་པོ་ནས་དྲུང་དུ་འདྲེན་པར་བྱེད་དམ། དྲུང་ནས་ཐག་རིང་པོར་འདྲེན་པར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་འདྲེན་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་འདྲེན་ན་ཉེས་པ་སྦོམ་པོར་འགྱུར་ཏེ། དེ་ལྟར་འདྲེན་པར་བྱེད་པས་སོ། །ཇི་ལྟར་ཡོངས་སུ་འདྲེན་པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟོན་ནུས་པ་གང་ཡིན་པ་དེ་རྐང་པའི་མཐའ་ནས་མགོའི་མཐར་རམ། མགོའི་མཐའ་ནས་རྐང་པའི་མཐར་ཡོངས་སུ་འདྲེན་པར་བྱེད་དམ། གློ་གཡོན་པ་ནས་གློ་གཡས་པར་རམ། གློ་གཡས་པ་ནས་གློ་གཡོན་པར་ཡོངས་སུ་འདྲེན་པར་བྱེད་ན་གོས་ཀྱིས་བར་དུ་ཆོད་པ་མེད་པ་ཡོངས་སུ་འདྲེན་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ཡོངས་སུ་འདྲེན་ན་ཉེས་པ
5.214a
སྦོམ་པོར་འགྱུར་ཏེ། དེ་ལྟར་ཡོངས་སུ་འདྲེན་པར་བྱེད་པས་སོ། །ཇི་ལྟར་འོག་ནས་འཁྱུད་པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེ་ས་ནས་རྐང་པའི་རྩེ་མོར་འོག་ནས་འཁྱུད་པར་བྱེད་ན་གོས་ཀྱིས་བར་དུ་ཆོད་པ་མེད་པར་འོག་ནས་འཁྱུད་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པར་འོག་ནས་འཁྱུད་ན་ཉེས་པ་སྦོམ་པོར་འགྱུར་རོ། །ས་ནས་རྐང་པའི་རྩེ་མོར་ཇི་ལྟ་བ་དེ་བཞིན་དུ་རྐང་པའི་རྩེ་མོ་ནས་རྗེ་ངར་དུ་དང ། རྗེ་ངར་ནས་བརླར་དང ། བརླ་ནས་རྐེད་པར་དང ། རྐེད་པ་ནས་བྲང་དུ་དང ། བྲང་ནས་གློར་དང ། གློ་ནས་རྒྱབ་ཏུ་དང ། རྒྱབ་ནས་ཕྲག་པར་དང ། ཕྲག་པ་ནས་མགྲིན་པར་དང ། མགྲིན་པ་ནས་ཀོས་སྐོར་དང ། ཀོས་སྐོ་ནས་ཟ་འགྲམ་དུ་དང ། ཟ་འགྲམ་ནས་མཁུར་བ་དང ། མཁུར་བ་ནས་འཕྲལ་བར་དང་འཕྲལ་བ་ནས་སྤྱི་བོར་དང ། སྤྱི་བོ་ནས་ཁྲིའུར་དང ། ཁྲིའུ་ནས་ཁྲིར་དང ། ཁྲི་ནས་ཁྱོགས་སྤྱིལ་དུ་དང ། ཁྱོགས་སྤྱིལ་ནས་རྟའི་རྒྱབ་ཏུ་དང ། རྟའི་རྒྱབ་ནས་གླང་པོ་ཆེའི་རྒྱབ་ཏུ་དང ། གླང་པོ་ཆེའི་རྒྱབ་ནས་ཁང་བཟངས་སུ་འོག་ནས་འཁྱུད་པར་བྱེད་ན་གོས་ཀྱིས་བར་དུ་ཆོད་པ་མེད་པར་འོག་ནས་འཁྱུད་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པར་འོག་ནས་འཁྱུད་ན་ཉེས་པ་སྦོམ་པོར་འགྱུར་ཏེ། དེ་ལྟར་འོག་ནས་འཁྱུད་པར་བྱེད་པས་སོ། །ཇི་ལྟར་སྟེང་ནས་འཁྱུད་པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེ་ཁང་བཟངས་ནས་གླང་པོ་ཆེའི་རྒྱབ་ཏུ་སྟེང་དུ་འཁྱུད་པར་བྱེད་ན་གོས་ཀྱིས་བར་དུ་ཆོད་པ་མེད་པར་སྟེང་ནས་འཁྱུད་པར་བྱེད་ན། དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པར་སྟེང་ནས་འཁྱུད་ན་ཉེས་པ་སྦོམ་པོར་འགྱུར་རོ། །ཁང་བཟངས་ནས་གླང་པོ་ཆེའི་རྒྱབ་ཏུ་ཇི་ལྟ་བ་དེ་བཞིན་དུ་གླང་པོའི་རྒྱབ་ནས་རྟའི་རྒྱབ་དུ་དང ། རྟའི་རྒྱབ་ནས་ཁྱོགས
5.214b
སྤྱིལ་དུ་དང ། ཁྱོགས་སྤྱིལ་ནས་ཁྲིར་དང ། ཁྲི་ནས་ཁྲིའུ་དང ། ཁྲིའུ་ནས་སྤྱི་བོར་དང ། སྤྱི་བོ་ནས་འཕྲལ་བར་དང ། འཕྲལ་བ་ནས་མཁུར་བར་དང ། མཁུར་བ་ནས་ཟ་འགྲམ་དུ་དང ། ཟ་འགྲམ་ནས་ཀོས་སྐོར་དང ། ཀོས་སྐོ་ནས་མགྲིན་བར་དང ། མགྲིན་པ་ནས་ཕྲག་པར་དང ། ཕྲག་པ་ནས་རྒྱབ་ཏུ་དང ། རྒྱབ་ནས་གློར་དང ། གློ་ནས་བྲང་དུ་དང ། བྲང་ནས་རྐེད་པར་དང ། རྐེད་པ་ནས་བརླར་དང ། བརླ་ནས་རྗེ་ངར་དུ་དང ། རྗེ་ངར་ནས་རྐང་པའི་རྩེ་མོར་དང ། རྐང་པའི་རྩེ་མོ་ནས་ས་ལ་སྟེང་ནས་འཁྱུད་པར་བྱེད་ན་གོས་ཀྱིས་བར་དུ་ཆོད་པ་མེད་པར་སྟེང་ནས་འཁྱུད་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པར་སྟེང་ནས་འཁྱུད་ན་ཉེས་པ་སྦོམ་པོར་འགྱུར་ཏེ། དེ་ལྟར་སྟེང་ནས་འཁྱུད་པར་བྱེད་པས་སོ། །ཇི་ལྟར་དམ་དུ་སྦྱོར་བར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེའི་སྤྱི་བོར་གོས་ཀྱིས་བར་དུ་ཆོད་པ་མེད་པར་དམ་དུ་སྦྱོར་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པར་དམ་དུ་སྦྱོར་ན་ཉེས་པ་སྦོམ་པོར་འགྱུར་རོ། །སྤྱི་བོར་ཇི་ལྟ་བ་དེ་བཞིན་དུ་འཕྲལ་བ་དང ། མཁུར་བ་དང ། མཆུ་དང ། ཀོས་སྐོ་དང ། མགྲིན་པ་དང ། རྣ་བ་དང ། སྣ་དང ། ཟ་འགྲམ་དང ། ཕྲག་པ་དང ། མཆན་ཁུང་དང ། ཐལ་གོང་དང ། གློ་དང ། རྒྱབ་དང ། བྲང་དང ། རྐེད་པ་དང ། པུས་མོ་དང ། བརླ་དང ། རྗེ་ངར་དང ། རྐང་པའི་རྩེ་མོ་དང ། ཐ་ན་རྐང་པའི་མཐེ་བོར་དམ་དུ་སྦྱོར་བར་བྱེད་ན་གོས་ཀྱིས་བར་དུ་ཆོད་པ་མེད་པར་དམ་དུ་སྦྱོར་ན་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པར་དམ་དུ་སྦྱོར་ན་ཉེས་པ་སྦོམ་པོར་འགྱུར་ཏེ། དེ་ལྟར་དམ་དུ་སྦྱོར་བར་བྱེད་པས་སོ། །གཞན་ཡང་ཇི་ལྟར་ནོམ་པར་བྱེད་པས་ཤེ་ན། བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེས་དགེ་སློང་གི་སྤྱི་བོ་ལ་ནོམ་པར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར
5.215a
ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་རོ། །སྤྱི་བོ་ལ་ཇི་ལྟ་བ་དེ་བཞིན་དུ་འཕྲལ་བ་དང ། མཁུར་བ་དང ། མཆུ་དང ། ཀོས་སྐོ་དང ། མགྲིན་པ་དང ། རྣ་བ་དང ། སྣ་དང ། ཟ་འགྲམ་དང ། ཕྲག་པ་དང ། མཆན་ཁུང་དང ། ཐལ་གོང་དང ། གློ་དང ། རྒྱབ་དང ། བྲང་དང ། རྐེད་པ་དང ། པུས་མོ་དང ། བརླ་དང ། རྗེ་ངར་དང ། རྐང་པའི་རྩེ་མོ་དང ། ཐ་ན་རྐང་པའི་མཐེ་བོ་ལ་ནོམ་པར་བྱེད་པ་ན་གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་ཉེས་པ་སྦོམ་པོར་འགྱུར་རོ། །ནོམ་པར་བྱེད་པ་ལ་ཇི་ལྟ་བ་བཞིན་དུ་ཉུག་པར་བྱེད་པ་དང ། སྤྲོད་པར་བྱེད་པ་དང ། འཛིན་པར་བྱེད་པ་ཡང་དེ་བཞིན་ནོ། །ཇི་ལྟར་འདྲེན་པར་བྱེད་པས་ཤེ་ན། བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེས་དགེ་སློང་ཐག་རིང་པོ་ནས་དྲུང་དུ་འདྲེན་པར་བྱེད་དམ། དྲུང་ནས་ཐག་རིང་པོར་འདྲེན་པར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་ཉེས་པ་སྦོམ་པོར་འགྱུར་ཏེ། དེ་ལྟར་འདྲེན་པར་བྱེད་པས་སོ། །ཇི་ལྟར་ཡོངས་སུ་འདྲེན་པར་བྱེད་པས་ཤེ་ན། བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེས་དགེ་སློང་རྐང་པའི་མཐའ་ནས་མགོའི་མཐར་རམ། མགོའི་མཐའ་ནས་རྐང་པའི་མཐར་ཡོངས་སུ
5.215b
འདྲེན་པར་བྱེད་དམ། གློ་གཡོན་པ་ནས་གློ་གཡས་པར་རམ། གློ་གཡས་པ་ནས་གློ་གཡོན་པར་ཡོངས་སུ་འདྲེན་པར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད་ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་ཏེ། དེ་ལྟར་ཡོངས་སུ་འདྲེན་པར་བྱེད་པས་སོ། །ཇི་ལྟར་འོག་ནས་འཁྱུད་པར་བྱེད་པས་ཤེ་ན། བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེས་དགེ་སློང་ས་ནས་རྐང་པའི་རྩེ་མོར་འོག་ནས་འཁྱུད་པར་བྱེད་པ་ན་གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་རོ། །ས་ནས་རྐང་པའི་རྩེ་མོར་ཇི་ལྟ་བ་དེ་བཞིན་དུ་རྐང་པའི་རྩེ་མོ་ནས་རྗེ་ངར་དུ་དང ། རྗེ་ངར་ནས་བརླར་དང ། བརླ་ནས་རྐེད་པར་དང ། རྐེད་པ་ནས་བྲང་དུ་དང ། བྲང་ནས་གློར་དང ། གློ་ནས་རྒྱབ་ཏུ་དང ། རྒྱབ་ནས་ཕྲག་པ་དང ། ཕྲག་པ་ནས་མགྲིན་པར་དང ། མགྲིན་པ་ནས་ཀོས་སྐོར་དང ། ཀོས་སྐོ་ནས་ཟ་འགྲམ་དུ་དང ། ཟ་འགྲམ་ནས་འཁུར་བར་དང ། འཁུར་བ་ནས་འཕྲལ་བར་དང ། འཕྲལ་བ་ནས་སྤྱི་བོར་དང ། སྤྱི་བོ་ནས་ཁྲིའུར་དང ། ཁྲིའུ་ནས་ཁྲིར་དང ། ཁྲི་ནས་ཁྱོགས་སྤྱིལ་དུ་དང ། ཁྱོགས་སྤྱིལ་ནས་རྟའི་རྒྱབ་ཏུ་དང ། རྟའི་རྒྱབ་ནས་གླང་པོ་ཆེའི་རྒྱབ་ཏུ་དང ། གླང་པོ་ཆེའི་རྒྱབ་ནས་ཁང་བཟངས་སུ་འོག་ནས་འཁྱུད་པར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས
5.216a
ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་ཏེ། དེ་ལྟར་འོག་ནས་འཁྱུད་པར་བྱེད་པས་སོ། །ཇི་ལྟར་སྟེང་ནས་འཁྱུད་པར་བྱེད་པས་ཤེ་ན། བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེས་དགེ་སློང་ཁང་བཟངས་ནས་གླང་པོ་ཆེའི་རྒྱབ་ཏུ་སྟེང་ནས་འཁྱུད་པར་བྱེད་པ་ན་གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་རོ། །ཁང་བཟངས་ནས་གླང་པོ་ཆེའི་རྒྱབ་ཏུ་ཇི་ལྟ་བ་དེ་བཞིན་དུ་གླང་པོ་ཆེའི་རྒྱབ་ནས་རྟའི་རྒྱབ་ཏུ་དང ། རྟའི་རྒྱབ་ནས་ཁྱོགས་སྤྱིལ་དུ་དང ། ཁྱོགས་སྤྱིལ་ནས་ཁྲིར་དང ། ཁྲི་ནས་ཁྲིའུར་དང ། ཁྲིའུ་ནས་སྤྱི་བོར་དང ། སྤྱི་བོ་ནས་འཕྲལ་བར་དང ། འཕྲལ་བ་ནས་མཁུར་བར་དང ། མཁུར་བ་ནས་ཟ་འགྲམ་དུ་དང ། ཟ་འགྲམ་ནས་ཀོས་སྐོར་དང ། ཀོས་སྐོ་ནས་མགྲིན་པར་དང ། མགྲིན་པ་ནས་ཕྲག་པར་དང ། ཕྲག་པ་ནས་རྒྱབ་ཏུ་དང ། རྒྱབ་ནས་གློར་དང ། གློ་ནས་བྲང་དུ་དང ། བྲང་ནས་རྐེད་པར་དང ། རྐེད་པ་ནས་བརླར་དང ། བརླ་ནས་རྗེ་ངར་དུ་དང ། རྗེ་ངར་ནས་རྐང་པའི་རྩེ་མོར་དང ། རྐང་པའི་རྩེ་མོ་ནས་ས་ལ་སྟེང་ནས་འཁྱུད་པར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། །ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན། གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་ཏེ། དེ་ལྟར་སྟེང་ནས་འཁྱུད་པར
5.216b
བྱེད་པས་སོ། །ཇི་ལྟར་དམ་དུ་སྦྱོར་བར་བྱེད་པས་ཤེ་ན། བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་སྟེན་ནུས་པ་གང་ཡིན་པ་དེས་དགེ་སློང་གི་སྤྱི་བོར་དམ་དུ་སྦྱོར་བར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་བར་བྱེད་ན་དགེ་སློང་ལ་ཉེས་པ་སྦོམ་པོར་འགྱུར་རོ། །སྤྱི་བོ་ལ་ཇི་ལྟ་བ་དེ་བཞིན་དུ་འཕྲལ་བ་དང ། མཁུར་བ་དང ། མཆུ་དང ། ཀོས་སྐོ་དང ། མགྲིན་པ་དང ། རྣ་བ་དང ། སྣ་དང ། ཟ་འགྲམ་དང ། ཕྲག་པ་དང ། མཆན་ཁུང་དང ། ཐལ་གོང་དང ། གློ་དང ། རྒྱབ་དང ། བྲང་དང ། རྐེད་པ་དང ། པུས་མོ་དང ། བརླ་དང ། རྗེ་ངར་དང ། རྐང་པའི་རྩེ་མོ་དང ། ཐ་ན་རྐང་པའི་མཐེ་བོང་ལ་དམ་དུ་སྦྱོར་བར་བྱེད་པ་ན། གལ་ཏེ་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ལུས་ཉེ་བར་གཞོལ་བར་བྱེད་པ་ན་གོས་ཀྱིས་བར་དུ་ཆོད་པ་མེད་པ་ལ་ཉེ་བར་གཞོལ་ན་དགེ་སློང་ལ་དགེ་འདུན་ལྷག་མར་འགྱུར་རོ། །གོས་ཀྱིས་བར་དུ་ཆོད་པ་དང་བཅས་པ་ལ་ཉེ་བར་གཞོལ་ན་དགེ་སློང་ལ་ཉེས་པ་སྦོམ་པོར་འགྱུར་ཏེ། དེ་ལྟར་དམ་དུ་སྦྱོར་བར་བྱེད་པས་སོ། །ནུས་པ་ལ་དགེ་འདུན་ལྷག་མ་གང་ཡིན་པ་དེ་མི་ནུས་པ་ལ་ཉེས་པ་སྦོམ་པོའོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་ལ་ཉེས་པ་སྦོམ་པོའོ། །ནུས་པ་ལ་ཉེས་པ་སྦོམ་པོ་གང་ཡིན་པ་དེ་མི་ནུས་པ་ལ་ཉེས་བྱས་སོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་ལ་ཡང་ཉེས་བྱས་ཉིད་དོ། །དུད་འགྲོའི་སྐྱེ་གནས་སུ་སྐྱེས་པ་ལ་ཡང་ཉེས་བྱས་ཉིད་དོ། །ནུས་པ་ལ
5.217a
ཉེས་བྱས་གང་ཡིན་པ་དེ་མི་ནུས་པ་ལ་ཡང་ཉེས་བྱས་ཉིད་དོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་དང ། དུད་འགྲོའི་སྐྱེ་གནས་སུ་སྐྱེས་པ་ལ་ཡང་ཉེས་བྱས་ཉིད་དོ། །མ་ཡང་ཡིན་ལ། མར་འདུ་ཤེས་པ་ཡང་ཡོད་པ་དང ། སྲིང་མོ་ཡང་ཡིན་ལ། སྲིང་མོར་འདུ་ཤེས་པ་ཡང་ཡོད་པ་དང ། བུ་མོ་ཡང་ཡིན་ལ། བུ་མོར་འདུ་ཤེས་པ་ཡང་ཡོད་པ་ལ་ལྟུང་བ་མེད་དོ། །མེར་མཆོང་བ་དང ། ཆུས་ཁྱེར་བ་དང ། དུག་ཟ་བ་དང ། མཚོན་འབྱིན་པ་དང ། གཡང་ས་ནས་འཆོང་བ་དང ། ཐག་པས་འཆིང་བ་དང ། འཆི་བ་ལ་མངོན་པར་ཕྱོགས་པ་འཆི་བ་ལས་ཐར་པར་བྱེད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལུས་ཀྱིས་རེག་པའི་དགེ་འདུན་ལྷག་མ་སྟེ་གཉིས་པ་རྫོགས་སྷོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་དྲུག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ། རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །མཉན་ཡོད་ན་གནས་པའི་བྲམ་ཟེ་དང ། ཁྱིམ་བདག་གི་ཆུང་མ་རྣམས་ཀྱི་ཀུན་དུ་སྤྱོད་པ་ནི་བསྐྱེད་མོས་ཚལ་དུ་སོང་སྟེ་རྒྱལ་བྱེད་ཀྱི་ཚལ་དུ་འཇུག་པ་དང ། གཙུག་ལག་ཁང་ལྟ་བ་དང ། བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བས་བྲམ་ཟེ་དང །
5.217b
ཁྱིམ་བདག་གི་ཆུང་མ་རབ་ཏུ་མང་པོ་དག་བསྐྱེད་མོས་ཚལ་ཏུ་བྱུང་སྟེ། གཙུག་ལག་ཁང་ལྟ་འདོད་པས་རྒྱལ་བྱེད་ཀྱི་ཚལ་ག་ལ་བ་དེར་དོང་ངོ་ཞེས་བྱ་བ་ནས། དེས་དེ་དག་ལ་ཆོས་བསྟན་པར་བརྩམས་སོ་ཞེས་བྱ་བའི་བར་དུ་དགེ་འདུན་ལྷག་མ་གཉིས་པའི་སྐབས་སུ་བསྟན་པ་བཞིན་ནོ། །ཇི་ལྟ་ཇི་ལྟར་ཆོས་བསྟན་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་ལས་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲ་བར་བརྩམས་སོ། །འདི་ལྟ་སྟེ་དཔེར་ན་མི་གསང་སྔགས་ཉིད་རྗོད་པར་བྱེད་པ་འབྱུང་པོ་འམ། ཤ་ཟས་ཐལ་ལྕག་གིས་སྣུན་པས་བསྣུན་པར་གྱུར་པ་དེ་བཞིན་དུ་དེ་ཡང་དེ་དག་ལ་ཇི་ལྟ་ཇི་ལྟར་ཆོས་སྟོན་པར་བྱེད་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲ་བར་བརྩམས་སོ། །དེ་ན་གང་དག་བདག་གིར་བྱེད་པ་དེ་དག་ནི་དེ་དང ། ལྷན་ཅིག་གཞོག་སྟེག་དང ། ཕྱར་གཡེང་དང ། ཐོ་འཚམ་པ་དང ། ཀུན་དུ་རྩེ་བ་དང ། ཀུན་དུ་ཅ་ཅོ་འདོན་པ་དང ། རྒོད་པ་དང་དྲེགས་པ་དང ། ལུས་སྒྱུར་བར་བྱེད་དེ། གང་དག་བདག་གིར་མི་བྱེད་པ་དེ་དག་ནི་དེ་ནས་ཕྱིར་བྱུང་སྟེ་འཆག་ས་དང ། དག་ར་དང ། སྒོ་ཁང་དག་ན། གང་ལས་ཆུ་འབྱུང་དེ་ལས་འབར། །གང་ལས་སྐྱོབ་པ་དེ་ལས་འཇིགས། །འཇིགས་པ་མེད་པས་འཇིགས་པ་སྐྱེས། །སྐྱབས་ལས་འཇིགས་པ་སྐྱེས་པར་འགྱུར། །བདག་ཅག་གིས་ཕྱོགས་གཅིག་ཏུ་བདེ་བ། ཞི་བ་བདེ་ལེགས་རྗོད་པ། བདེ་ལེགས་སུ་འགྱུར་བ་གང་ཡིན་པ་དེ་ལས་འཇིགས་པ་དང ། ཡམས་དང ། གནོད་པ་དང ། འགོ་བའི་ནད་དང་འཁྲུག་པ་བྱུང་བར་གྱུར་ཏོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དེ་དག་སྨོད་ཅིང ། འདོང་བ་ན་དགེ་སློང་དག་གི་མངོན་སུམ་དུ་གྱུར་ནས། དེ་དག་གིས་དེ་དག་སྨོད་པ་ཐོས་པ་དང །
5.218a
དེ་དག་གིས་སྨྲས་པ། སྲིང་མོ་དག་ཁྱེད་ཅག་སུ་ལ་སྨོད། འཕགས་པ་དག་ཁྱེད་ཅག་ལའོ། །ངེད་ཀྱིས་ཅི་བྱས། འཕགས་པ་དག་བདག་ཅག་གིས་དྭ་རྣམས་དང ། རྒྱན་པོ་པ་རྣམས་དང ། ནལ་གྱི་བུ་རྣམས་ལས་ཀྱང་ཚིག་གང་དག་སྔོན་མ་ཐོས་པ་དེ་དག་འཕགས་པ་འཆར་ཀ་ལས་ཐོས་སོ། །གལ་ཏེ་བདག་ཅག་གི་ཕ་མ་དང ། ཕུ་ནུ་མོ་དག་གིས་ཐོས་པར་གྱུར་ན་རྒྱལ་བྱེད་ཀྱི་ཚལ་ག་ལ་བ་དེར་ལྟར་ཡང་མི་སྟེར་ན་མཆི་བར་ལྟ་སྨོས་ཀྱང་ཅི་འཚལ། སྲིང་མོ་དག་ཁ་རོག་ཤིག་།དགེ་སློང་དེ་ནི་མདུན་ན་འདོན་གྱི་བུ་ལས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ཡིན་མོད་ཀྱི་འོན་ཀྱང་འདོད་ཆགས་ཤས་ཆེ་བ་ཡིན་པས་རྩོམ་པ་དེས་ཉོན་མོངས་པ་སེལ་བར་བྱེད་དོ། །འཕགས་པ་དག་ཅི་ལགས་གླང་བུ་གང་ལ་རཝ་རྣོན་པོ་གཉིས་མཆིས་པ་དེས་བདག་ཉིད་ཀྱི་དཀུ་འདྲལ་བར་བགྱིད་དམ། དེ་ནི་མི་རིགས་སོ། །སྲིང་མོ་དག་ཁ་རོག་ཤིག་དང ། བཟློག་པར་བྱའོ། །འཕགས་པ་དག་གལ་ཏེ་བཟློག་ན་དེ་ལྟ་ན་ལེགས། གལ་ཏེ་ཟློག་པར་མི་མཛད་ན་བདག་ཅག་སླན་ཆད་རྒྱལ་བྱེད་ཚལ་དུ་མི་མཆིའོ། །སྲིང་མོ་དག་ཁ་རོག་ཤིག་དང་ཅི་ནས་ཀྱང་ཕྱིན་ཆད་དེ་ལྟ་བྱེད་པར་མི་འགྱུར་བར་བཟློག་པར་བྱའོ། །དགེ་སློང་རྣམས་ཀྱིས་དེ་དག་ལ་བསྒོ་སྟེ་དོང་བ་དང ། ལྷག་མ་རྣམས་ཀྱང་གཙུག་ལག་ཁང་ནས་བྱུང་སྟེ་དོང་ངོ ། །དེ་ནས་ཚེ་དང་ལྡན་པ་འཆར་ཀ་ཡང ། རྒོད་བཞིན་དུ་གཙུག་ལག་ཁང་ནས་བྱུང་བ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། ཚེ་དང་ལྡན་པ་འཆར་ཀ་ཁྱོད་མི་མཛེས་པ་དེ་ལྟ་བུ་དེ་བྱས་ནས་དེ་ཅི་རྒོད། འཆར་ཀས་སྨྲས་པ། ཁོ་བོས་ཆང་འཐུངས་སམ། སྐུན་འདོང་ཟོས་སམ་ཅི། ཚེ་དང་ལྡན་པ་ཅི་དེ་ཡང་བྱས་སམ། གཞན་ཅི་ཞིག་བྱས། བྲམ་ཟེ་དང ། ཁྱིམ་བདག་གི་ཆུང་མ་རབ་ཏུ་མང་པོ་དེ་དག་སྨོད་ཅིང་དོང་ངོ ། །འཆར་ཀས་སྨྲས་པ། ཚེ་དང་ལྡན་པ་དག་ལྷུང་བཟེད་ནག་པོ་ཅན་རྣམས་ཀྱིས་རང་བཞིན་ནི་སེར་སྣས་གང་ལ་ཡང་ཚིག་བཞི་པའི་ཚིགས་སུ་བཅད་པ་གཅིག་ཙམ་མི་སྟོན་ལ། དེ་དག་ནི་གང་གཞན་ལ་སྟོན་པ་དེ་ལ་སྨོད་པར་བྱེད་དོ། །དེ་དག་གིས་སྨྲས་པ། ཅི་ཁྱོད
5.218b
ཀྱིས་དེ་དག་བདེན་པ་དག་ལ་བཀོད་དམ། དེས་སྨྲས་པ། ཇེ་དེ་དག་གིས་དབང་པོ་ཡོངས་སུ་སྨིན་པར་བྱ་བ་བརྩམས་ནས་མཐར་གྱིས་བདེན་པ་ཡང་མཐོང་བར་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་ཉིད་ཀྱིས་ཁེངས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སློང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲས་ན་དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ་གཞན་ཡང་དེ་ལྟ་བུ་གང་ཡིན་པའོ། །དྲལ་ཅིང་གྱུར་པའི་སེམས་ཀྱིས་ཤེས་བྱ་བ་ནི་སེམས་དྲལ་ཅིང་མ་གྱུར་པ་ཡང་ཡོད། གྱུར་ཅིང་མ་དྲལ་བ་ཡང་ཡོད། དྲལ་ཅིང་གྱུར་པ་ཡང་ཡོད། མ་དྲལ་ཅིང་མ་གྱུར་པ་ཡང་ཡོད་དོ། །
5.219a
དེ་ལ་རེ་ཤིག་སེམས་དྲལ་ཅིང་མ་གྱུར་པ་ནི་སེམས་ཆགས་པ་དང ། ཀུན་དུ་ཆགས་པ་དང ། ཀུན་ནས་དཀྲིས་པ་གང་ཡིན་པའོ། །གྱུར་ཅིང་མ་དྲལ་བ་ནི་སེམས་ལྟོས་པ་དང་བཅས་ཤིང་འབྲེལ་བ་གང་ཡིན་པའོ། །དྲལ་ཅིང་གྱུར་པ་ནི་སེམས་ཆགས་པ་དང ། ཀུན་དུ་ཆགས་པ་དང ། ཀུན་ནས་དཀྲིས་པ་དང ། སེམས་ལྟོས་པ་དང་བཅས་ཤིང་འབྲེལ་བ་གང་ཡིན་པའོ། །མ་དྲལ་ཅིང་མ་གྱུར་པ་ནི་རྣམ་པ་དེ་དག་མ་གཏོགས་པའོ། །བུད་མེད་ཀྱི་ཡུལ་ལ་ཞེས་བྱ་བ་ནི་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་ལའོ། །གནས་ངན་ལེན་ཅེས་བྱ་བ་ལ། གནས་ངན་ལེན་ནི་གཉིས་ཏེ། ཕམ་པར་འགྱུར་བ་ཀུན་ནས་སློང་བ་དང ། དགེ་འདུན་ལྷག་མ་ཀུན་ནས་སློང་བའོ། །ཅིའི་ཕྱིར་དེ་དག་གནས་ངན་ལེན་ཅེས་བྱ་ཞེ་ན། ངོ་བོ་ཉིད་ལས་དང་ཀུན་ནས་སློང་བ་ལས་སོ། །ཚིག་ཅེས་བྱ་བ་ནི་བརྗོད་པའོ། །སྡིག་པ་ཅན་ཞེས་བྱ་བ་ལ། སྡིག་པ་ཞེས་བྱ་བ་ནི་ཁ་ན་མ་ཐོ་བའོ། །ཚོགས་པར་མི་དབྱུང་བ་ཞེས་བྱ་བ་ནི་དབུས་པའི་མཚམས་ལས་འདས་པ་སྟེ་ཚུལ་དང་མི་མཐུན་པའོ། །འཁྲིག་པ་དང་ལྡན་པ་ཞེས་བྱ་བ་ནི་མི་ཚངས་པར་སྤྱོད་པ་དང་ལྡན་པའོ། །སྐྱེས་བུས་ན་ཆུང་ལ་ཇི་ལྟ་བ་བཞིན་དུ་ཞེས་བྱ་བ་ལ། སྐྱེས་བུ་ཞེས་བྱ་བ་ནི་སྐྱེས་པའོ། །ན་ཆུང་ཞེས་བྱ་བ་ནི་བུད་མེད་དོ། །སྨྲས་ན་ཞེས་བྱ་བ་ནི་མ་སྨྲས་པ་ལ་སྨྲས་པ་དང ། སྨྲས་པ་ལ་ཕྱིར་སྨྲས་ནའོ། །དགེ་འདུན་ལྷག་མའོ། །ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། གཞི་དགུས་ཏེ། བསྔགས་པ་བྱེད་པ་དང ། བསྔགས་པ་མ་ཡིན་པ་བྱེད་པ་དང ། གསོལ་བ་བྱེད་པ་དང ། ཉེ་བར་གསོལ་བ་བྱེད་པ་དང ། འདྲི་བར་བྱེད་པ་དང ། ཡོངས་སུ་འདྲི་བར་བྱེད་པ་དང ། རྗོད་པར་བྱེད་པ་དང ། སྨོན་པར་བྱེད་པ་དང ། གཤེ་བར་བྱེད་པས་སོ། དེ་ལ་ཇི་ལྟར་བསྔགས་པ་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས
5.219b
པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་སྲུ་ཁྱོད་ཀྱི་རྨའི་སྒོ་གསུམ་པོ་དག་ནི་ཏེ་པོར་ལེགས་པར་དོད་པ་དང ། ལེགས་པར་གནས་པ་དང ། ལེགས་པར་གྱུར་པ་དག་ཡིན་ནོ་ཞེས་ཟེར་ཞིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་བརྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུའི་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་བསྔགས་པ་བྱེད་པས་སོ། །ཇི་ལྟར་བསྔགས་པ་མ་ཡིན་པ་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པ་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་སྲུ་ཁྱོད་ཀྱི་རྨའི་སྒོ་གསུམ་པོ་དག་ནི་ཏེ་པོར་མ་ལེགས་པར་དོད་པ་དང ། མ་ལེགས་པར་གནས་པ་དང ། མ་ལེགས་པར་གྱུར་པ་དག་ཡིན་ནོ། །ཞེས་ཟེར་ཞིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་བསྔགས་པ་མ་ཡིན་པ་བྱེད་པས་སོ། །ཇི་ལྟར་གསོལ་བ་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་སྲུ་ཚུར་ཤོག་དེ་དང་དེ་བྱའོ་ཞེས་ཟེར་ཞིང ། འཁྲིག་པ་དང་ལྡན་པའི་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་གསོལ་བར་བྱེད་པས་སོ། །ཇི་ལྟར་ཉེ་བར་གསོལ་བ་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་སྲུ་བུད་མེད་དང ། སྐྱེས་པ་དེ་དང་དེ་བྱེད་པ་གང་ཡིན
5.220a
པ་དེ་ནི་དེའི་དགའ་བ་དང་ཡིད་དུ་འོང་བ་ཡིན་གྱིས་སྲུ་བདག་ཅག་ཀྱང་དེ་དང་དེ་བྱ་ན་སྲུ་བདག་གི་དགའ་བ་དང་ཡིད་དུ་འོང་བར་འགྱུར་རོ། །ཞེས་ཟེར་ཞིང་འཁྲིག་པ་དང་ལྡན་པའི་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་ཉེ་བར་གསོལ་བར་བྱེད་པས་སོ། །ཇི་ལྟར་འདྲི་བར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་སྲུ་སྐྱེས་པ་གང་བུད་མེད་གང་ལ་དེ་དང་དེ་བྱེད་པ་དེ་ནི་དེའི་དགའ་བ་དང་ཡིད་དུ་འོང་བར་གྱུར་ན། ཁོ་བོས་ཀྱང་སྲུ་ལ་དེ་དང་དེ་བྱ་ན་སྲུ་ཁོ་བོའི་དགའ་བ་དང་ཡིད་དུ་འོང་བར་འགྱུར་རམ་ཞེས་ཟེར་ཞིང ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་འདྲི་བར་བྱེད་པས་སོ། །ཇི་ལྟར་ཡོངས་སུ་འདྲི་བར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་སྲུ་སྐྱེས་པ་གང་བུད་མེད་དང་དེ་དང་དེ་བྱེད་པ་དེ་ནི་དེའི་དགའ་བ་དང ། ཡིད་དུ་འོང་བར་འགྱུར་ན། ཁོ་བོས་ཀྱང་སྲུ་ལ་དེ་དང་དེ་བྱ་ན་སྲུ་ཁོ་བོ་ལ་དགའ་བ་དང་ཡིད་དུ་འོང་བར་འགྱུར་བ་དེ་དེ་བཞིན་ནམ་འོན་ཏེ་མ་ཡིན། དེ་ལ་སྲུ་ཇི་སྙམ་བྱེད་ཅིང་ཟེར་ཞིང་འཁྲིག་པ་དང་ལྡན་པ། རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་ཡོངས་སུ་འདྲི་བར་བྱེད་པས་སོ། །ཇི་ལྟར་རྗོད་པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར
5.220b
ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་སྲུ་མདང་སུམ་ཁོ་བོའི་གན་དུ་བསྐྱེད་མོས་ཚལ་ལམ། ལྷའི་གནས་སམ། དུས་མལ་ཆེ་གེ་མོ་ཞིག་ཏུ་བུད་མེད་དེ་ལྟ་བུ་ཞིག་དོན་དེའི་ཕྱིར་འོངས་པར་གྱུར་ནས། ཁོ་བོས་མལ་མེ་ཏོག་གིས་བཀྲམ་པ་བཤམས་ཤིང་མཚན་ཐོག་ཐག་འབྲུ་མར་གྱི་མར་མེ་བཙུགས་ནས་ཁོ་བོས་དེ་དང་ལྷན་ཅིག་བཅའ་བ་དེ་དང་དེ་ལྟ་བུ་འཆོས་ཤིང་བཟའ་བ་དེ་དང་དེ་ལྟ་བུ་ཡང་ཟོས། བཏུང་བ་དེ་དང་དེ་ལྟ་བུ་ཡང་འཐུངས་ཤིང ། ཁོ་བོས་དེ་དང་ལྷན་ཅིག་དེ་དང་དེ་ཡང་བྱས་ཏེ། སྲུ་དོན་དེའི་ཕྱིར་འོངས་པར་གྱུར་ན་ཁོ་བོས་མལ་མེ་ཏོག་གིས་བཀྲམ་པ་བཤམས་ཤིང་མཚན་ཐོག་ཐག་འབྲུ་མར་གྱི་མར་མེ་བཙུགས་ནས་ཁོ་བོས་སྲུ་དང་ལྷན་ཅིག་བཅའ་བ་དེ་དང་དེ་ལྟ་བུ་འཆོས་ཤིང་བཟའ་བ་དེ་དང་དེ་ལྟ་བུ་ཡང་ཟོས། བཏུང་བ་དེ་དང་དེ་ལྟ་བུ་ཡང་འཐུངས་ཤིང ། ཁོ་བོས་སྲུ་དང་ལྷན་ཅིག་དེ་དང་དེ་ཡང་བྱས་པ་འགྱུར་རོ་ཞེས་ཟེར་ཞིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་རྗོད་པར་བྱེད་པས་སོ། །ཇི་ལྟར་སྨོན་པར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་སུ་གང་དག་སྲུ་དང་ལྷན་ཅིག་དེ་ལྟ་དེ་ལྟར་བྱེད་པ་དེ་དག་ནི་བདེ་བར་གྱུར་ཅིང་མཐོ་རིས་ཐོབ་པ་ཡིན་པས་ཁོ་བོས་ཡང་གལ་ཏེ་སྲུ་དང་ལྷན་ཅིག་དེ་དང་དེ་བྱས་ན། བདེ་བར་འགྱུར་ཞིང་མཐོ་རིས་ཀྱང་ཐོབ་པར་འགྱུར་རོ། །ཞེས་ཟེར་ཞིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན། དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན། ཉེས་པ་སྦོམ་པོར་འགྱུར་རོ། །དེ་ལྟར་སྨོན་པར་བྱེད་པས་སོ། །ཇི་ལྟར་གཤེ་བར་བྱེད་པས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར
5.221a
སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་རོ་ལྟ་བུ་ཞེས་བྱ་བ་ལ་སོགས་པས་སྤྱོ་བ་དག་གིས་སྤྱོ་བར་བྱེད་ཅིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་གཤེ་བར་བྱེད་པས་སོ། །གཞན་ཡང་ཇི་ལྟར་བསྔགས་པ་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་ཁྱོད་ཀྱི་རྨའི་སྒོ་གསུམ་པོ་དག་ནི་ཏེ་པོར་ལེགས་པར་དོད་པ་དང ། ལེགས་པར་གནས་པ་དང ། ལེགས་པར་གྱུར་པ་ཡིན་ནོ་ཞེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་བསྔགས་པ་བྱེད་པས་སོ། །ཇི་ལྟར་བསྔགས་པ་མ་ཡིན་པ་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་ཁྱོད་ཀྱི་རྨའི་སྒོ་གསུམ་པོ་དག་ནི་ཏེ་པོར་མ་ལེགས་པར་དོད་པ་དང ། མ་ལེགས་པར་གནས་པ་དང ། མ་ལེགས་པར་གྱུར་པ་དག་ཡིན་ནོ། །ཞེས་ཟེར་བ་ན་དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང ། འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང་འཁྲིག་པ་དང
5.221b
ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་བསྔགས་པ་མ་ཡིན་པ་བྱེད་པས་སོ། །ཇི་ལྟར་གསོལ་བ་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་ཚུར་སྤྱོན། དེ་དང་དེ་བགྱིའོ་ཞེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་གསོལ་བ་བྱེད་པས་སོ། །ཇི་ལྟར་ཉེ་བར་གསོལ་བར་བྱེད་པས་ཤེ་ན། བུད་མེད་དམ་གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་བུད་མེད་དང ། སྐྱེས་པ་དེ་དག་དེ་བགྱིད་པ་གང་ལགས་པ་དེ་ནི་དེའི་དགའ་བ་དང་ཡིད་དུ་འོང་བ་ལགས་ཀྱིས། འཕགས་པ་བདག་ཅག་ཀྱང་དེ་དང་དེ་བགྱིད་ན་འཕགས་པ་བདག་གི་དགའ་བ་དང་ཡིད་དུ་འོང་བར་འགྱུར་རོ་ཞེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན། དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན། ཉེས་པ་སྦོམ་པོར་འགྱུར་ཏེ། དེ་ལྟར་ཉེ་བར་གསོལ་བར་བྱེད་པས་སོ། །ཇི་ལྟར་འདྲི་བར་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས
5.222a
རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་སྐྱེས་པ་གང་བུད་མེད་གང་ལ་དེ་དང་དེ་བྱེད་པ་དེ་ནི་དེའི་དགའ་བ་དང ། ཡིད་དུ་འོང་བར་འགྱུར་ན། ཁོ་མོས་ཀྱང་འཕགས་པ་ལ་དེ་དང་དེ་བགྱིད་ན་འཕགས་པ་ཁོ་མོའི་དགའ་བ་དང་ཡིད་དུ་འོང་བར་འགྱུར་རམ་ཞེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་འདྲི་བར་བྱེད་པས་སོ། །ཇི་ལྟར་ཡོངས་སུ་འདྲི་བར་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་སྐྱེས་པ་གང་བུད་མེད་ལ་དེ་དང་དེ་བགྱིད་པ། དེ་ནི་དེའི་དགའ་བ་དང་ཡིད་དུ་འོང་བར་འགྱུར་ན། ཁོ་མོས་ཀྱང་འཕགས་པ་ལ་དེ་དང་དེ་བགྱིད་ན་འཕགས་པ་ཁོ་མོ་དགའ་བ་དང ། ཡིད་དུ་འོང་བར་འགྱུར་བ་དེ་དེ་བཞིན་ནམ། འོན་ཏེ་མ་ལགས། དེ་ལ་འཕགས་པ་ཇི་སྙམ་མཛད་ཅེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་ཡོངས་སུ་འདྲི་བར་བྱེད་པས་སོ། །ཇི་ལྟར་རྗོད་པར་བྱེད་པས་ཞེས་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན
5.222b
པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་མདང་སུམ་ཁོ་མོའི་གན་དུ་བསྐྱེད་མོས་ཚལ་ལམ། ལྷའི་གནས་སམ། དུས་མལ་ཆེ་གེ་མོ་ཞིག་ཏུ་སྐྱེས་པ་དེ་ལྟ་བུ་ཞིག་དོན་དེའི་སླད་དུ་མཆིས་པར་གྱུར་ནས། ཁོ་མོས་མལ་མེ་ཏོག་གིས་བཀྲམ་པ་བཤམས་ཤིང་མཚན་ཐོག་ཐག་ཏུ་འབྲུ་མར་གྱི་མར་མེ་བཙུགས་ནས་ཁོ་མོས་དེ་དང་ལྷན་ཅིག་བཅའ་བ་དེ་དང་དེ་ལྟ་བུ་འཆོས་ཤིང་བཟའ་བ་དེ་དང་དེ་ལྟ་བུ་ཡང་འཚལ། བཏུང་བ་དེ་དང་དེ་ལྟ་བུ་ཡང་འཚལ་ཅིང་ཁོ་མོས་དེ་དང་དེ་ཡང་བགྱིས་ཏེ་འཕགས་པ་ཡང་དོན་དེའི་སླད་དུ་བྱོན་པར་གྱུར་ན། ཁོ་མོས་མལ་མེ་ཏོག་གིས་བཀྲམ་པ་བཤམས་ཤིང་མཚན་ཐོག་ཐག་འབྲུ་མར་གྱི་མར་མེ་བཙུགས་ནས་ཁོ་མོས་འཕགས་པ་དང་ལྷན་ཅིག་བཅའ་བ་དེ་དང་དེ་ལྟ་བུ་འཆོས་ཤིང་བཟའ་བ་དེ་དང་དེ་ལྟ་བུ་ཡང་འཚལ་བཏུང་བ་དེ་དང་དེ་ལྟ་བུ་ཡང་འཚལ་ཅིང་ཁོ་མོས་འཕགས་པ་དང་ལྷན་ཅིག་དེ་དང་དེ་ཡང་བགྱིས་པར་འགྱུར་རོ་ཞེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོགས་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་རྗོད་པར་བྱེད་པས་སོ། །ཇི་ལྟར་སྨོན་པར་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་འཕགས་པ་གང་དག་འཕགས་པ་དང་ལྷན་ཅིག་དེ་ལྟ་དེ་ལྟར་བགྱིད་པ་དེ་དག་ནི་བདེ་བར་གྱུར་ཅིང ། མཐོ་རིས་ཐོབ་པ་ལགས་པས། ཁོ་མོས་ཡང་གལ་ཏེ་འཕགས་པ་དང ། ལྷན་ཅིག་དེ་དང་དེ་བགྱིས་ན་བདེ་བར་འགྱུར་ཞིང་མཐོ་རིས་ཀྱང་ཐོབ་པར་འགྱུར་རོ་ཞེས་ཟེར་བ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད་ལྷག་པར་ཆགས་པར་བྱེད།
5.223a
ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་སྨོན་པར་བྱེད་པས་སོ། །ཇི་ལྟར་གཤེ་བར་བྱེད་པས་ཤེ་ན། བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེ་དགེ་སློང་གི་གན་དུ་འོངས་ཏེ་འདི་སྐད་ཅེས་རོ་ལྟ་བུ་ཞེས་བྱ་བ་ལ་སོགས་པས་སྤྱོ་བ་དག་གིས་སྤྱོ་བར་བྱེད་པ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས་དེའི་རོ་མྱང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང་འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བའི་མིང་རྗོད་པར་བྱེད་ན་དགེ་འདུན་ལྷག་མར་འགྱུར་རོ། །རྒྱའི་རྣ་རུ་ཞེས་བྱ་བའི་མིང་རྗོད་པར་མི་བྱེད་ན་ཉེས་པ་སྦོམ་པོར་འགྱུར་ཏེ། དེ་ལྟར་གཤེ་བར་བྱེད་པས་སོ། །ནུས་པ་ལ་དགེ་འདུན་ལྷག་མ་གང་ཡིན་པ་དེ་མི་ནུས་པ་ལ་ཉེས་པ་སྦོམ་པོའོ། །སྐྱེས་པ་དང་ཟ་མ་དང་མ་ནིང་དང ། མཚན་གཉིས་པ་ལ་ཉེས་པ་སྦོམ་པོའོ། །ནུས་པ་ལ་ཉེས་པ་སྦོམ་པོ་གང་ཡིན་པ་དེ་མི་ནུས་པ་ལ་ཉེས་བྱས་སོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་ལ་ཡང་ཉེས་བྱས་ཉིད་དོ། །དུད་འགྲོའི་སྐྱེ་གནས་སུ་སྐྱེས་པ་ལ་ཡང་ཉེས་བྱས་ཉིད་དོ། །ནུས་པ་ལ་ཡང་ཉེས་བྱས་གང་ཡིན་པ་དེ་མི་ནུས་པ་ལ་ཡང་ཉེས་བྱས་ཉིད་དོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་ལ་ཡང་ཉེས་བྱས་ཉིད་དོ། །དུད་འགྲོའི་སྐྱེ་གནས་སུ་སྐྱེས་པ་ལ་ཡང་ཉེས་བྱས་ཉིད་དོ། །སྐད་ཀྱི་ངེས་པའི་ཚིག་དང ། ཡུལ་གྱི་ངེས་པའི་ཚིག་དང ། ལྗོངས་ཀྱི་ངེས་པའི་ཚིག་གིས་ནི་ལྟུང་བ་མེད་དོ། །ནས་ཀྱི་མིང་དང ། རྩཝའི་མིང་དང ། ཡོལ་བའི་མིང་བརྗོད་པ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ནི
5.223b
ལྟུང་བ་མེད་དོ། །འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་སྟེ་གསུམ་པ་རྫོགས་སྷོ།། ་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་དགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གིས་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བར་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །མཉན་ཡོད་ན་གནས་པའི་བྲམ་ཟེ་དང་ཁྱིམ་བདག་གི་ཆུང་མ་རྣམས་ཀྱི་ཀུན་དུ་སྤྱོད་པ་ནི་བསྐྱེད་མོས་ཚལ་དུ་སོང་སྟེ་རྒྱལ་བྱེད་ཀྱི་ཚལ་དུ་འཇུག་པ་དང ། གཙུག་ལག་ཁང་བལྟ་བ་དང ། བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བས་བྲམ་ཟེ་དང་ཁྱིམ་བདག་གི་ཆུང་མར་རབ་ཏུ་མང་པོ་དག་བསྐྱེད་མོས་ཚལ་དུ་བྱུང་སྟེ་གཙུག་ལག་ཁང་ལྟ་འདོད་པས་རྒྱལ་བྱེད་ཀྱི་ཚལ་ག་ལ་བ་དེར་དོང་ངོ་ཞེས་བྱ་བ་ནས། དེས་དེ་དག་ལ་ཆོས་བསྟན་པར་བརྩམས་སོ་ཞེས་བྱ་བའི་བར་དུ་དགེ་འདུན་ལྷག་མ་གཉིས་པའི་སྐབས་སུ་བསྟན་པ་བཞིན་ནོ། །ཇི་ལྟ་ཇི་ལྟར་ཆོས་སྟོན་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་གི་མདུན་དུ་བདག་ཉིད་ཀྱི་ལུས་ཀྱི་བསྙེན་བཀུར་གྱི་ཕྱིར་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བསྔགས་པ་བརྗོད་པར་བརྩམས་སོ། །འདི་ལྟ་སྟེ། དཔེར་ན་མི་གསང་སྔགས་ཉིད་རྗོད་པར་བྱེད་པ་འབྱུང་པོ་འམ། ཤ་ཟས་ཐ་ལྕག་གི་སྣུན་པས་བསྣུན་པར་གྱུར་པ་དེ་བཞིན་དུ། དེ་ཡང་དེ་དག་ལ་ཇི
5.224a
ལྟ་ཇི་ལྟར་ཆོས་སྟོན་པར་བྱེད་པ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་གི་མདུན་དུ་བདག་ཉིད་ཀྱི་ལུས་ཀྱི་བསྙེན་བཀུར་གྱི་ཕྱིར་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ། །ཞེས་བསྔགས་པ་བརྗོད་པར་བརྩམས་སོ། །དེ་ན་གང་དག་བདག་གིར་བྱེད་པ་དེ་དག་ནི་དེ་དང་ལྷན་ཅིག་གཞོག་སྟེག་དང ། ཕྱར་གཡེང་དང ། ཐོ་འཚམ་པ་དང ། ཀུན་དུ་རྩེ་བ་དང ། ཀུན་དུ་ཅ་ཅོ་འདོན་པ་དང ། རྒོད་པ་དང ། དྲེགས་པ་དང ། ལུས་སྒྱུར་བར་བྱེད་དོ། །གང་དག་བདག་གིར་མི་བྱེད་པ་དེ་དག་ནི་དེ་ནས་ཕྱིར་བྱུང་སྟེ། འཆག་ས་དང ། དག་ར་དང ། སྒོ་ཁང་དག་ན་གང་ལས་ཆུ་འབྱུང་དེ་ལས་འབར། །གང་ལས་སྐྱོབ་པ་དེ་ལས་འཇིགས། །འཇིགས་པ་མེད་ལས་འཇིགས་པ་སྐྱེས། །སྐྱབས་ལས་འཇིགས་པ་སྐྱེས་པར་གྱུར། །བདག་ཅག་གིས་ཕྱོགས་གཅིག་ཏུ་བདེ་བ། ཞི་བ། བདེ་ལེགས་རྗོད་པ་བདེ་ལེགས་སུ་འགྱུར་བ་གང་ཡིན་པ་དེ་ལས་འཇིགས་པ་དང ། ཡམས་དང ། གནོད་པ་དང ། འགོ་བའི་ནད་དང ། འཁྲུག་པ་བྱུང་བར་གྱུར་ཏོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དེ་དག་སྨོད་ཅིང་འདོང་བ་ན་དགེ་སློང་དག་གི་མངོན་སུམ་དུ་གྱུར་ནས། དེ་དག་གིས་དེ་དག་སྨོད་པ་ཐོས་པ་དང ། དེ་དག་གིས་སྨྲས་པ། སྲིང་མོ་དག་ཁྱེད་ཅག་སུ་ལ་སྨོད། འཕགས་པ་དག་ཁྱེད་ཅག་ལའོ། །ངེད་ཀྱིས་ཅི་བྱས། འཕགས་པ་དག་བདག་ཅག་གིས་རང་གི་ཁྱིམ་ཐབ་ལས་ཀྱང་ཚིག་གང་དག་མ་ཐོས་པ། དེ་དག་འཕགས་པ་འཆར་ཀ་ལས་ཐོས་སོ། །གལ་ཏེ་བདག་ཅག་གིས་ཕ་མ་འམ། ནུ་མོ་དག་གིས་ཐོས་པར་གྱུར་ན། རྒྱལ་བྱེད་ཀྱི་ཚལ་ག་ལ་བ་དེར་ལྟར་ཡང་མི་སྟེར་ན་མཆི་བར་ལྟ་སྨོས་ཀྱང་ཅི་འཚལ། སྲིང་མོ་དག་ཁ་རོག་ཤིག་།དགེ་སློང་དེ་ནི་འདུན་ན་འདོན་གྱི་བུ་ལས་རབ
5.224b
ཏུ་བྱུང་བ་ཚུལ་ཁྲིམས་དང་ལྡན་པ་ཡིན་མོད་ཀྱི་འོན་ཀྱང་འདོད་ཆགས་ཤས་ཆེ་བ་ཡིན་པས་རྩོམ་པ་དེས་ཉོན་མོངས་པ་སེལ་བར་བྱེད་དོ། །འཕགས་པ་དག་ཅི་ལགས། གླང་བུ་གང་ལ་རཝ་རྣོན་པོ་གཉིས་མཆིས་པ་དེས་བདག་ཉིད་ཀྱི་དཀུ་འདྲལ་བར་བགྱིད་དམ། དེ་ནི་མི་རིགས་སོ། །སྲིང་མོ་དག་ཁ་རོག་ཤིག་དང་བཟློག་པར་བྱའོ། །འཕགས་པ་དག་གལ་ཏེ་བཟློག་ན་དེ་ལྟ་ན་ལེགས། གལ་ཏེ་ཟློག་པར་མི་མཛད་ན་བདག་ཅག་སླན་ཆད་རྒྱལ་བྱེད་ཀྱི་ཚལ་དུ་མི་མཆིའོ། །སྲིང་མོ་དག་ཁ་རོག་ཤིག་དང ། ཅི་ནས་ཀྱང་ཕྱིན་ཆད་དེ་ལྟར་བྱེད་པར་མི་འགྱུར་བར་བཟློག་པར་བྱའོ། །དགེ་སློང་རྣམས་ཀྱིས་དེ་དག་ལ་བསྒོ་སྟེ་དོང་བ་དང ། ལྷག་མ་རྣམས་ཀྱང་གཙུག་ལག་ཁང་ནས་བྱུང་སྟེ་དོང་ངོ ། །དེ་ནས་ཚེ་དང་ལྡན་པ་འཆར་ཀ་ཡང་རྒོད་བཞིན་དུ་གཙུག་ལག་ཁང་ནས་བྱུང་བ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། ཚེ་དང་ལྡན་པ་འཆར་ཀ་ཁྱོད་མི་མཛེས་པ་དེ་ལྟ་བུ་དེ་བྱས་ནས་ད་ཅི་རྒོད། འཆར་ཀས་སྨྲས་པ། ཁོ་བོས་ཆང་འཐུངས་སམ། སྐུན་འདོང་ཟོས་སམ་ཅི། ཚེ་དང་ལྡན་པ་ཅི་དེ་ཡང་བྱས་སམ། གཞན་ཅི་ཞིག་བྱས། བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དེ་དག་འཕྱ་ཞིང་དོང་ངོ ། །འཆར་ཀས་སྨྲས་པ། ཚེ་དང་ལྡན་པ་དག་ལྷུང་བཟེད་ནག་པོ་ཅན་རྣམས་ཀྱི་རང་བཞིན་ནི་སེར་སྣས་གང་ལ་ཡང་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་མི་སྟོན་ལ། དེ་དག་ནི་གང་གཞན་ལ་སྟོན་པ་དེ་ལ་འཕྱ་བར་བྱེད་དོ། །དེ་དག་གིས་སྨྲས་པ། ཅི་ཁྱོད་ཀྱིས་དེ་དག་བདེན་པ་དག་ལ་བཀོད་དམ། དེས་སྨྲས་པ། ཇེ་དེ་དག་གི་དབང་པོ་ཡོངས་སུ་སྨིན་པར་བྱ་བ་བརྩམས་ནས་མཐར་གྱིས་བདེན་པ་ཡང་མཐོང་བར་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་ཉིད་ཀྱིས་ཁེངས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །
5.225a
ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་གྱི་མདུན་དུ་བདག་ཉིད་ཀྱི་ལུས་ཀྱི་བསྙེན་བཀུར་གྱི་ཕྱིར་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བསྔགས་པར་བརྗོད་ན་དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་དང་འདྲ་བ་གང་ཡིན་པའོ། །དྲལ་ཅིང་གྱུར་པའི་སེམས་ཀྱིས་ཤེས་བྱ་བ་ནི་སེམས་དྲལ་ཅིང་མ་གྱུར་པ་ཡང་ཡོད། གྱུར་ཅིང་མ་དྲལ་བ་ཡང་ཡོད། དྲལ་ཅིང་གྱུར་པ་ཡང་ཡོད། མ་དྲལ་ཅིང་མ་གྱུར་པ་ཡང་ཡོད་དོ། །དེ་ལ་རེ་ཤིག་དྲལ་ཅིང་མ་གྱུར་པ་ནི་སེམས་ཆགས་པ་དང ། ཀུན་དུ་ཆགས་པ་དང ། ཀུན་ནས་དཀྲིས་པ་གང་ཡིན་པའོ། །གྱུར་ཅིང་མ་དྲལ་བ་ནི་སེམས་ལྟོས་པ་དང ། ལྡན་ཞིང་སེམས་འབྲེལ་བ་གང་ཡིན་པའོ། །དྲལ་ཅིང་མ་གྱུར་པ་ནི་ཆགས་པ་དང ། ཀུན་དུ་ཆགས་པ་དང ། ཀུན་ནས་དཀྲིས་པའི་སེམས་དང ། སེམས་ལྟོས་པ་དང་བཅས་ཤིང་འབྲེལ་བ་གང་ཡིན་པའོ། །མ་དྲལ་ཅིང་མ་གྱུར་པ་ནི་རྣམ་པ་དེ་དག་མ་གཏོགས་པའོ། །
5.225b
བུད་མེད་ཀྱི་ཡུལ་གྱི་ཞེས་བྱ་བ་ནི་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པའི་འོ། །མདུན་དུ་ཞེས་བྱ་བ་ནི་མངོན་དུའོ། །བདག་ཉིད་ཀྱི་ལུས་ཀྱི་བསྙེན་བཀུར་གྱི་ཕྱིར་ཞེས་བྱ་བ་ནི་བདག་ཉིད་ཀྱི་ལུས་ཀྱི་ཀུན་ཏུ་སྤྱད་པའི་ཕྱིར་རོ། །འདི་ལྟ་སྟེ། ང་ལྟ་བུ་ཞེས་བྱ་བ་དེ་ནི་ཉེ་བར་བསྟན་པ་དང་ཀུན་དུ་བསྟན་པའི་ཚིག་བླ་དགས་ཡིན་ནོ། །དགེ་སློང་ཞེས་བྱ་བ་ནི་དགེ་སློང་གི་དངོས་པོ་ཇི་སྐད་བསྟན་པ་དང་ལྡན་པའོ། །ཚུལ་ཁྲིམས་དང་ལྡན་པ་ཞེས་བྱ་བ་ནི་ཚུལ་ཁྲིམས་ཀྱི་ཕུང་པོ་ཇི་སྐད་བསྟན་པ་དང་ལྡན་པའོ། །དགེ་བའི་ཆོས་ཅན་ཞེས་བྱ་བ་ནི་ཏིང་ངེ་འཛིན་གྱི་ཕུང་པོ་ཇི་སྐད་བསྟན་པ་དང་ལྡན་པའོ། །ཚངས་པར་སྤྱོད་པ་ལ་ཞེས་བྱ་བ་ནི་ཤེས་རབ་ཀྱི་ཕུང་པོ་ཇི་སྐད་བསྟན་པ་དང་ལྡན་པའོ། །འདི་ལྟར་འཁྲིག་པ་དང་ལྡན་པའི་ཞེས་བྱ་བ་ནི་མི་ཚངས་པར་སྤྱོད་པ་དང་ལྡན་པའི་འོ། །ཆོས་འདིས་ཤེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲས་བསྟན་པ་འདིས་ཡིན་གྱིས་གཞན་གྱིས་ནི་མ་ཡིན་པའོ། །བསྙེན་བཀུར་བྱས་ན་ཞེས་བྱ་བ་ནི་ཀུན་དུ་སྤྱད་པ་བྱས་ནའོ། །སྲུ་ཞེས་བྱ་བ་ནི་དགའ་བའི་ཚིག་བླ་དགས་སོ། །འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བྱ་བ་ལ་མཆོག་ཡིན་ན་ཞེས་བྱ་བ་ནི་གཙོ་བོ་ཡིན་ནོ། །བསྔགས་པ་བརྗོད་ན་ཞེས་བྱ་བ་ནི་བསྟོད་པ་བྱས་ནའོ། །དགེ་འདུན་ལྷག་མའོ་ཞེས་བྱ་བ་ནི་ལྟུང་བ་དེ་དགེ་འདུན་ལ་རག་ལས་པ་དང་ཞེས་བྱ་བ་ནས། དེ་ནི་དགེ་འདུན་ལྷག་མའོ་ཞེས་གསུངས་སོ། །ཞེས་བྱ་བའི་བར་དུ་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གཞི་བཅཝ་བརྒྱད་ཀྱིས་ཏེ། མཆོག་དང ། ཕུལ་དང ། ཁྱད་པར་དུ་འཕགས་པ་དང ། བཟང་བ་དང ། མཛེས་པ་དང ། དགེ་བ་དང ། མཆོད་པར་འོས་པ་དང ། བསྟོད་པར་འོས་པ་དང ། རྒྱ་ཆེ་བ་དང ། ཆེས་མཆོག་དང ། ཆེས་ཕུལ་དང ། ཆེས་ཁྱད་པར་དུ་འཕགས་པ་དང ། ཆེས་བཟང་བ་དང ། ཆེས་མཛེས་པ་དང ། ཆེས་དགེ་བ་དང ། ཆེས་མཆོད་པར་འོས་པ་དང ། ཆེས་བསྟོད་པར་འོས་པ་དང ། ཆེས་རྒྱ་ཆེ་བས་སོ། །དེ་ལ་ཇི་ལྟར་མཆོག་གིས་ཤེ་ན། དགེ་སློང་གིས་དྲལ་ཅིང་གྱུར་པའི་སེམས་ཀྱིས
5.226a
བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་ཀུན་དུ་སྤྱད་པ་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་དགེ་བའི་ཆོས་ཅན་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ།
5.226b
ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་དགེ་བའི་ཆོས་ཅན་ཚུལ་ཁྲིམས་དང་ལྡན་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚངས་པར་སྤྱོད་པ་ཚུལ་ཁྲིམས་དང་ལྡན་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚངས་པར་སྤྱོད་པ་དགེ་བའི་ཆོས་ཅན་ལ་འདི
5.227a
ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་ཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བརྗོད་ན་དགེ་འདུན་ལྷག་མར་འགྱུར་རོ། །མཆོག་ཇི་ལྟ་བ་བཞིན་དུ་ཕུལ་དང ། ཁྱད་པར་དུ་འཕགས་པ་དང ། བཟང་བ་དང ། མཛེས་པ་དང ། དགེ་བ་དང ། མཆོད་པར་འོས་པ་དང ། བསྟོད་པར་འོས་པ་དང ། རྒྱ་ཆེ་བ་དང ། ཆེས་མཆོག་དང ། ཆེས་ཕུལ་དང ། ཆེས་ཁྱད་པར་དུ་འཕགས་པ་དང ། ཆེས་བཟང་བ་དང ། ཆེས་མཛེས་པ་དང ། ཆེས་དགེ་བ་དང ། ཆེས་མཆོད་པར་འོས་པ་དང ། ཆེས་བསྟོད་པར་འོས་པ་དང ། ཆེས་རྒྱ་ཆེ་བར་ཡང་དེ་བཞིན་ནོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་དགེ་བའི་ཆོས་ཅན་ལ་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག
5.227b
ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་གྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་དགེ་བའི་ཆོས་ཅན་ཚུལ་ཁྲིམས་དང་ལྡན་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག
5.228a
ཡིན་ནོ་ཞེས་ཟེར་ཞིང་འདི་སྐད་ཅེས་སྤྲོད་པ་ལས་བྱུང་བ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚངས་པར་སྤྱོད་པ་ཚུལ་ཁྲིམས་དང་ལྡན་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚངས་པར་སྤྱོད་པ་དགེ་བའི་ཆོས་ཅན་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ་གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར
5.228b
སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །མཆོག་ཇི་ལྟ་བ་བཞིན་དུ་ཕུལ་དང ། ཁྱད་པར་དུ་འཕགས་པ་དང ། བཟང་བ་དང ། མཛེས་པ་དང ། དགེ་བ་དང ། མཆོད་པར་འོས་པ་དང ། རྒྱ་ཆེ་བ་དང ། ཆེས་མཆོག་དང ། ཆེས་ཕུལ་དང ། ཆེས་ཁྱད་པར་དུ་འཕགས་པ་དང ། ཆེས་བཟང་བ་དང ། ཆེས་མཛེས་པ་དང ། ཆེས་དགེ་བ་དང ། ཆེས་མཆོད་པར་འོས་པ་དང ། ཆེས་བསྟོད་པར་འོས་པ་དང ། ཆེས་རྒྱ་ཆེ་བ་ཡང་དེ་བཞིན་ནོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ། འདི་སྐད་ཅེས་འདི་ལྟ་སྟེ། དགེ་སློང་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས། ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར
5.229a
རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས། འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ་དགེ་སློང་ཚུལ་ཁྲིམས་དང་ལྡན་པ་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ། །ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ་དགེ་སློང་དགེ་བའི་ཆོས་ཅན་ཚུལ་ཁྲིམས་དང་ལྡན་པ་ལ་འདི་ལྟ་སྟེ། འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི
5.229b
སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ་དགེ་སློང་ཚངས་པར་སྤྱོད་པ་ཚུལ་ཁྲིམས་དང་ལྡན་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚངས་པར་སྤྱོད་པ་དགེ་བའི་ཆོས་ཅན་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས། འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ། །ཞེས་ཟེར་ཞིང་འདི་སྐད་ཅེས་ང་ལྟ་བུ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །མཆོག་ཇི་ལྟ་བ་བཞིན་དུ། ཕུལ་དང ། ཁྱད་པར་དུ་འཕགས་པ་དང ། བཟང་བ་དང ། མཛེས་པ་དང ། དགེ་བ་དང ། མཆོད་པར་འོས་པ་དང ། བསྟོད་པར་འོས་པ་དང ། རྒྱ་ཆེ་བ་དང ། ཆེས་མཆོག་དང ། ཆེས་ཕུལ་དང ། ཆེས་ཁྱད་པར་དུ་འཕགས་པ་དང ། ཆེས་བཟང་བ་དང ། ཆེས་མཛེས་པ་དང ། ཆེས་དགེ་བ་དང ། ཆེས་མཆོད་པར་འོས་པ་དང ། ཆེས་བསྟོད་པར་འོས་པ་དང ། ཆེས་རྒྱ་ཆེ་བ་ཡང་དེ་བཞིན་ནོ།། ་་་་་་་་་་་་།།
5.230a
འདུལ་བ་རྣམ་པར་འབྱེད་པ། བམ་པོ་བཅུ་བདུན་པ། དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ་དགེ་སློང་ཚུལ་ཁྲིམས་དང་ལྡན་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ་ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་དགེ་བའི་ཆོས་ཅན་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ་ང་ལྟ་བུ
5.230b
ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་དགེ་བའི་ཆོས་ཅན་ཚུལ་ཁྲིམས་དང་ལྡན་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚངས་པར་སྤྱོད་པ་ཚུལ་ཁྲིམས་དང་ལྡན་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག
5.231a
ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚངས་པར་སྤྱོད་པ་དགེ་བའི་ཆོས་ཅན་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་དྲལ་ཅིང་གྱུར་པའི་སེམས་ཀྱིས་བུད་མེད་དམ། གཞོན་ནུ་མ་ལེགས་པར་སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་དེའི་གན་དུ་སོང་སྟེ་འདི་སྐད་ཅེས་འདི་ལྟ་སྟེ། དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་ཟེར་ཞིང་འདི་སྐད་ཅེས་འཁྲིག་པ་དང་ལྡན་པ་ཞེས་ཀྱང་མི་ཟེར་ལ། ང་ལྟ་བུ་ཞེས་ཀྱང་མི་ཟེར་ན་ཉེས་བྱས་སུ་འགྱུར་རོ། །མཆོག་ཇི་ལྟ་བ་བཞིན་དུ་ཕུལ་དང ། ཁྱད་པར་དུ་འཕགས་པ་དང ། བཟང་བ་དང ། མཛེས་པ་དང ། དགེ་བ་དང ། མཆོད་པར་འོས་པ་དང ། བསྟོད་པར་འོས་པ་དང ། རྒྱ་ཆེ་བ་དང ། ཆེས་མཆོག་དང ། ཆེས་ཕུལ་དང ། ཆེས་ཁྱད་པར་དུ་འཕགས་པ་དང ། ཆེས་བཟང་བ་དང ། ཆེས་མཛེས་པ་དང ། ཆེས་དགེ་བ་དང ། ཆེས་མཆོད་པར་འོས་པ་དང ། ཆེས་བསྟོད་པར་འོས་པ་དང ། ཆེས་རྒྱ་ཆེ་བ་ཡང་དེ་བཞིན་ནོ། །ནུས་པ་ལ་དགེ་འདུན་ལྷག་མ་གང་ཡིན་པ་དེ་མི་ནུས་པ་ལ་ཉེས་པ་སྦོམ་པོའོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་ལ་ཡང་ཉེས་པ་སྦོམ་པོའོ། །ནུས་པ་ལ་ཉེས་པ་སྦོམ་པོ་གང་ཡིན་པ་དེ་མི་ནུས་པ་ལ་ཉེས་བྱས་སོ། །སྐྱེས་པ་དང་ཟ་མ་དང་མ་ནིང་དང ། མཚན་གཉིས་པ་ལ་ཡང་ཉེས་བྱས་སོ། །དུད་འགྲོའི་སྐྱེ
5.231b
གནས་སུ་སྐྱེས་པ་ལ་ཡང་ཉེས་བྱས་སོ། །ནུས་པ་ལ་ཉེས་བྱས་གང་ཡིན་པ་དེ་མི་ནུས་པ་ལ་ཡང་ཉེས་བྱས་ཉིད་དོ། །སྐྱེས་པ་དང ། ཟ་མ་དང ། མ་ནིང་དང ། མཚན་གཉིས་པ་ལ་ཡང་ཉེས་བྱས་ཉིད་དོ། །དུད་འགྲོའི་སྐྱེ་གནས་སུ་སྐྱེས་པ་ལ་ཡང་ཉེས་བྱས་ཉིད་དོ། །ལས་དང་པོ་པ་དང་སྨྱོས་པ་དང་སེམས་འཁྲུགས་པ་དང ། ཚོར་བ་དག་གི་ཉེན་པ་ལ་ལྟུང་བ་མེད་དོ། །བསྙེན་བཀུར་བསྔགས་པའི་དགེ་འདུན་ལྷག་མ་སྟེ་བཞི་པ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་མཉན་ཡོད་ན་རི་དགས་འཛིན་གྱི་བུ་ནག་པོ་ཞེས་བྱ་བ་འདུག་སྟེ། དེ་མཉན་ཡོད་པའི་བྲམ་ཟེ་དང ། ཁྱིམ་བདག་རྣམས་ཀྱི་གཏམ་འདྲེ་བ་ཕེབས་པར་སྨྲ་བ་སྨོས་འདྲིན་འགྲོགས་བཤེས། ཡིད་གཅུག་པ། ཁྱིམ་དུ་འཇུག་པར་བྱེད་པ་ཡིན་པས་གང་ཡང་རུང་བ་དག་ལ་བུ་མོ་སྦྱིན་པར་བྱ་བ་ཡོད་པ་དེ་དག་ཀྱང་རི་དགས་འཛིན་གྱི་བུ་ནག་པོའི་གན་དུ་སོང་སྟེ། འདི་སྐད་ཅེས་ནག་པོ་ཁྱོད་ཀྱིས་ཁྱིམ་ཆེ་གེ་མོ་ཞིག་ཤེས་སམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང ། དེ་དག་དེ་ལ་ནག་པོ་ཇི་ལྟར་དེ་ན། ཁྱེའུ་དེ་མཁས་པ་དང་ལེ་ལོ་མེད་པ་དང ། སྒྲུབ་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་ནུས་པ་དང ། ལས་ཆུང་བ་ཡིན་ནམ་ཞེས་འདྲིའོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་ཁྱེའུ་དེ་ཏེ་པོར་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་མི་ནུས་པ་དང ། ལས་ཆེ་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པར་མི་བྱེད་དོ། །གལ་ཏེ་རི་དགས་འཛིན་ཀྱི་བུ་ནག་པོས་འདི་སྐད་ཅེས་ཁྱེའུ་དེ་ཏེ་པོར་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་ནུས་པ་དང ། ལས་ཆུང་བ་ཡིན་ནོ་ཞེས་བསྟན་པར་གྱུར་ན་དེས་ན། དེ་དག་བུ་མོ་དེ་ཁྱེའུ་དེ་ལ་སྦྱིན་པར་བྱེད་དོ། །གང་ཡང་རུང་བ་དག་བུ་མོ་སློང་བར་བྱེད་པ་དེ་དག་ཀྱང་རི་དགས་འཛིན་ཀྱི་བུ་ནག་པོའི་གན་དུ
5.232a
སོང་སྟེ་འདི་སྐད་ཅེས་ནག་པོ་ཁྱོད་ཀྱིས་ཁྱིམ་ཆེ་གེ་མོ་ཞིག་ཤེས་སམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང ། དེ་དག་དེ་ལ་ནག་པོ་ཇི་ལྟ་དེ་ན་བུ་མོ་དེ་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་ནམ་ཞེས་འདྲིའོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་བུ་མོ་དེ་ཏེ་པོར་མི་མཁས་པ་དང་ལེ་ལོ་ཅན་དང་སྒྲུབ་མི་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་སློང་བར་མི་བྱེད་དོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་བུ་མོ་དེ་ཏེ་པོར་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་ནོ་ཞེས་བསྟན་པར་གྱུར་ན་དེ་དག་བུ་མོ་དེ་སློང་བར་བྱེད་དོ། །རི་དགས་འཛིན་གྱི་བུ་ནག་པོས་དེ་ལྟར་བསྟན་ནས་གང་ཡང་རུང་བ་དག་གི་བུ་མོ་སྦྱིན་ཉེས་པར་གྱུར་ན། དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་མི་ནུས་པ་དང ། ལས་ཆེ་བ་ཡིན་པས་གང་དག་ལ་རི་དགས་འཛིན་གྱི་བུ་ནག་པོས་གཏམ་འདྲེས་པ། ཕེབས་པར་སྨྲ་བ་སྨོས་འདྲིན། འགྲོགས་བཤེས་ཡིད་གཅུགས་པ། ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ། །ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གི་བུ་མོ་སྦྱིན་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་ནུས་པ་དང ། ལས་ཆུང་བ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ་སྨོས་འདྲིན་འགྲོགས་བཤེས། ཡིད་གཅུགས་པ། ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར
5.232b
འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་བཞིན་དུ་གང་ཡང་རུང་བ་དག་གིས་བུ་མོ་བསླང་ཉེས་པར་གྱུར་ན། དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བསླང་ན་བུ་མོ་དེ་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། བུ་མོ་དེ་བག་ཡོད་པས། ཁྱིམ་ན་གནས་པར་མི་ནུས་པ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེས་པ་ཕེབས་པར་སྨྲ་བ་སྨོས་འདྲིན། འགྲོགས་བཤེས། ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་མི་བསྔགས་པ་བརྗོད་པར་བྱེད་དོ། །གང་ཡང་རུང་བ་དག་གིས་བུ་མོ་བསླང་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བསླངས་ན་བུ་མོ་དེ་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ་སྨོས་འདྲིན། འགྲོགས་བཤེས། ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་ན་རི་དགས་འཛིན་གྱི་བུ་ནག་པོ་ལ་མཉན་ཡོད་ན་དུས་གཅིག་ཏུ་བསྔགས་པ་དང་བསྔགས་པ་མ་ཡིན་པ་དག་བྱུང་བར་གྱུར་ཏོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིང ། དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག་།མ་བྱིན་པར་ལེན་པ་དང ། འདོད་པས་ལ་ལོག་པར་གཡེམ་པ་དང ། བརྫུན་དུ་སྨྲ་བ་དང ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལྡོག་གོ། །དེ་དུས་ཅུང་ཞིག་ཁྱིམ་པར
5.233a
ཁྱིམ་ན་འདུག་ནས་དད་པ་སྔ་མ་དེ་ཉིད་རྗེས་སུ་སྤེལ་ཞིང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ལེགས་པར་གསུངས་པའི་ཆོས་འདུལ་བ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་ཀྱང་མཉན་ཡོད་པའི་བྲམ་ཟེ་དང་ཁྱིམ་བདག་རྣམས་དང་སྔོན་བཤེས་པ་ཉིད་ཀྱིས་དེ་དག་གི་གཏམ་འདྲེ་བ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ། ཁྱིམ་དུ་འཇུག་པར་བྱེད་པ་ཡིན་པས་གང་ཡང་རུང་བ་དག་ལ་བུ་མོ་སྦྱིན་པར་བྱ་བ་ཡོད་པ་དེ་དག་ཀྱང་རི་དགས་འཛིན་གྱི་བུ་ནག་པོའི་གན་དུ་སོང་སྟེ། འདི་སྐད་ཅེས་འཕགས་པ་ཁྱོད་ཀྱིས་ཁྱིམ་ཆེ་གེ་མོ་ཞིག་མཁྱེན་ཏམ། ཞེས་འདྲིའོ། །དེས་ཤེས་སོ་ཞེས་སྨྲས་པ་དང ། དེ་དག་དེ་ལ་འཕགས་པ་ཇི་ལྟ་དེ་ན་ཁྱེའུ་དེ་མཁས་པ་དང ། ལེ་ལོ་མ་མཆིས་པ་དང ། སྒྲུབ་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྩོལ་རྔོ་ཐོག་པ་དང ། ལས་ཆུང་བ་ལགས་སམ་ཞེས་འདྲིའོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟངས་དག་ཁྱེའུ་དེ་ཏེ་པོར་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་མི་ནུས་པ་དང ། ལས་ཆེ་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པ་མི་བྱེད་དོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟངས་དག་ཁྱེའུ་དེ་ཏེ་པོར་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་ནུས་པ་དང ། ལས་ཆུང་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པར་བྱེད་དོ། །གང་ཡང་རུང་བ་དག་བུ་མོ་སློང་བར་བྱེད་པ་དེ་དག་ཀྱང་རི་དགས་འཛིན་གྱི་བུ་ནག་པོའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་ཀྱིས་ཁྱིམ་ཆེ་གེ་མོ་ཞིག་མཁྱེན་ཏམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང ། དེ་དག་དེ་ལ་འཕགས་པ་ཇི་ལྟ་དེ་ན་བུ་མོ་དེ་མཁས་པ་དང ། ལེ་ལོ་མ་མཆིས་པ་དང །
5.233b
སྒྲུབ་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་རྔོ་ཐོག་པ་ལགས་སམ་ཞེས་འདྲིའོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟངས་དག་བུ་མོ་དེ་ཏེ་པོར་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་ནོ་ཞེས་བསྟན་པར་གྱུར་ན། དེས་ན་དེ་དག་བུ་མོ་དེ་སློང་བར་མི་བྱེད་དོ། །གལ་ཏེ་རི་དགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟངས་དག་བུ་མོ་དེ་ཏེ་པོར་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་སློང་བར་བྱེད་དོ། །རི་དགས་འཛིན་གྱི་བུ་ནག་པོས་དེ་ལྟར་བསྟན་ནས་གང་ཡང་རུང་བ་དག་གི་བུ་མོ་སྦྱིན་ཉེས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་མི་ནུས་པ་དང ། ལས་ཆེ་བ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ་སྨོས་འདྲིན། འགྲོགས་བཤེས་ཡིད་གཅུག་པ། ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གི་བུ་མོ་སྦྱིན་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་སྦྱིན་ན་ཁྱེའུ་དེ་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། ཁྱེའུ་དེ་བུ་མོ་ལ་བཟའ་བ་དང ། བགོ་བ་མང་པོ་སྦྱིན་ནུས་པ་དང ། ལས་ཆུང་བ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ་སྨོས་འདྲིན། འགྲོགས་བཤེས་ཡིད་གཅུགས་པ། ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་བཞིན་དུ་གང་ཡང་རུང་བ་དག་གིས་བུ་མོ
5.234a
བསླང་ཉེས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་དེ་བསླངས་ན་བུ་མོ་དེ་མི་མཁས་པ་དང ། ལེ་ལོ་ཅན་དང ། སྒྲུབ་མི་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེ་བ། ཕེབས་པར་སྨྲ་བ་སྨོས་འདྲིན་འགྲོགས་བཤེས། ཡིད་གཅུགས་པ། ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གི་བུ་མོ་བསླང་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བསླངས་ན་བུ་མོ་དེ་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་གཏམ་འདྲེ་བ། ཕེབས་པར་སྨྲ་བ་སྨོས་འདྲིན། འགྲོགས་བཤེས། ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་ན་རི་དགས་འཛིན་གྱི་བུ་ནག་པོ་ལ་མཉན་ཡོད་ན་དུས་གཅིག་ན་བསྔགས་པ་དང་བསྔགས་པ་མ་ཡིན་པ་དག་བྱུང་བར་གྱུར་ཏོ། །དེ་ནི་རེ་ཤིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་ཀྱིས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་ནི་མ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་བུད་མེད་ལ། སྐྱེས་པའི་ཚིག་དང ། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་བུད་མེད་ལ་སྐྱེས་པའི་ཚིག་དང ། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དང ། མཛའ་ན་མོ་ཉིད་དུ་སྨྱན་བྱེད་དེ། བྲམ་ཟེ་དང ། ཁྱིམ་བདག་བསླབ་པའི་གཞི་ཡང་དག་པར་མ་བླངས་པ་གཞན་དག་ཀྱང་བུད་མེད་ལ་སྐྱེས་པའི་ཚིག
5.234b
དང ། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན། ཤེས་ལྡན་དག་ཤཱཀྱའི་བུའི་དགེ་སློང་རྣམས་དང ། བྲམ་ཟེ་དང ། ཁྱིམ་བདག་བསླབ་པའི་གཞི་ཡང་དག་པར་མ་བླངས་པ་རྣམས་ལ་བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། དགེ་སྦྱོང་མགོ་རེག་འདི་དག་ལ་སུ་ཞིག་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བ་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་དྲུག་སྡེ་རྣམས་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན
5.235a
ཡོན་བཅུ་ཡང་དག་པར་གཟིགས་པ་ལ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ལ་སྐྱེས་པའི་ཚིག་དང ། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན་ཐ་ན་ཐང་འགའ་ཕྲད་པ་ལ་ཡང་རུང་སྟེ་དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ་གཞན་ཡང་དེ་དང་འདྲ་བ་གང་ཡིན་པའོ། །བུད་མེད་ལ་སྐྱེས་པའི་ཚིག་དང་ཞེས་བྱ་བ་ནི་སྐྱེས་པའི་ཀུན་ཏུ་སྤྱད་པའི་བསམ་པའི་ཚིག་གང་ཡིན་པ་དེ་བུད་མེད་ལ་བརྗོད་པར་བྱེད་པས་སོ། །སྐྱེས་པ་ལ་བུད་མེད་གྱི་ཚིག་གིས་ཤེས་བྱ་བ་ནི་བུད་མེད་ཀྱི་ཀུན་དུ་སྤྱད་པའི་བསམ་པའི་ཚིག་གང་ཡིན་པ་དེ་སྐྱེས་པ་ལ་རྗོད་པར་བྱེད་པས་སོ། །ཆུང་མ་ཉིད་དམ་མཛའ་ན་མོ་ཉིད་དུ་ཞེས་བྱ་བ་ནི་ཆུང་མ་བདུན་དང ། མཛའ་ན་མོ་བཅུ་ཉིད་དུའོ། །ཆུང་མ་བདུན་གང་ཞེ་ན། ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་དང ། དང་སམ་དུ་འདུས་པ་དང ། གོས་ཟས་ཀྱིས་འཚོས་པ་དང ། ཁ་དུམ་པ་དང ། ཐང་འགའ་ཕྲད་པ་ནི་བདུན་པའོ། །དེ་ལ་ཆུ་ཚིགས་ཀྱིས་བྱིན་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་ཕ་མ་དག་གིས་སྐྱེས་པ་ལ་བྱིན་ནས། ཁྱོད་ཀྱི་ཆུང་མ་སྐྱེ་དགུའི་བདག་མོ་བྱོས་ཤིག་ཅེས་ཆུ་ཚིགས་ཀྱིས་བྱིན་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས། དེས་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ་དེ་ནི་ཆུ་ཚིགས་ཀྱིས་བྱིན་པའི་ཆུང་མ་ཞེས་བྱའོ། །རིན་ཆས་ཉོས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པས་འདི་དག་གི་ཆུང་མ་སྐྱེ་དགུའི་བདག་མོ་བྱའོ་ཞེས་ཕ་མ་དག་ལས་རིན་ཆས་ཉོས་ཤིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ་དེ་ནི
5.235b
རིན་ཆས་ཉོས་པའི་ཆུང་མ་ཞེས་བྱའོ། །བཙན་ཕྲོགས་སུ་ཐོབ་པའི་ཆུང་མ་གང་ཞེ་ན། འདི་ལྟ་སྟེ། རྒྱལ་པོ་རྒྱལ་རིགས་སྤྱི་བོར་དབང་བསྐུར་བས་དཔུང་གི་ཚོགས་ཡན་ལག་པ་བཞི་པ་གོ་བསྐོན་ཏེ། ཕ་རོལ་གྱི་ཡུལ་འཁོར་དང ། ཕ་རོལ་གྱི་ཡུལ་དུ་སོང་ནས་མ་ཕེབས་པ་ཕབ་ཅིང ། ཕེབས་པར་གནས་ནས་ཐོབ་རྒྱལ་དུ་སྒྲོགས་པར་བྱེད་པའི་ཚེ་དེ་ན་སྐྱེས་པས་རྒྱལ་པོ་རྒྱལ་མཚན་དུ་བྱས་ནས་བུད་མེད་དམ་གཞོན་ནུ་མ་གང་ཡིན་པ་འདི་བདག་གི་ཆུང་མ་སྐྱེ་དགུའི་བདག་མོ་བྱའོ་ཞེས་ཕྲོགས་ཤིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པས་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་བཙན་ཕྲོགས་སུ་ཐོབ་པའི་ཆུང་མ་ཞེས་བྱའོ། །གཞན་ཡང་བཙན་ཕྲོགས་སུ་ཐོབ་པའི་ཆུང་མ་གང་ཞེ་ན། འདི་ལྟ་སྟེ། ཆོམ་རྐུན་པ་དག་གིས་གྲོང་གཞོམ་པ་འམ། གྲོང་ཁྱེར་གཞོམ་པ་འམ། ལྗོངས་གཞོམ་པ་བྱས་ཏེ། རང་གི་མགོ་རྒྱལ་མཚན་དུ་བྱས་ནས། བུད་མེད་དམ་གཞོན་ནུ་མ་གང་འདི་བདག་གི་ཆུང་མ་སྐྱེ་དགུའི་བདག་མོ་བྱའོ་ཞེས་ཕྲོགས་ཤིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས། དེས་དེ་འདི་ལ་གཞན་དག་འདོད་པ་དག་གི་ཕྱིར། སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ་དེ་ནི་བཙན་ཕྲོགས་སུ་ཐོབ་པའི་ཆུང་མ་ཞེས་བྱའོ། །དང་སམ་དུ་འདུས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་རང་གི་དད་པ་དང ། གཅུགས་པ་དང ། དགའ་བས་སྐྱེས་པའི་གན་དུ་འོངས་ཏེ། འདི་སྐད་ཅེས་རྗེའི་སྲས་ཚུར་སྤྱོན་ཁྱོད་བདག་གི་ཁྱིམ་ཐབ་མཛོད་ཅིག་དང་བདག་གིས་ཁྱོད་ཀྱི་བཙུན་མོ་སྐྱེ་དགུའི་བདག་མོ་བགྱིའོ་ཞེས་ཟེར་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་དང་སམ་དུ་འདུས་པའི་ཆུང་མ་ཞེས་བྱའོ། །གོས་ཟས་ཀྱིས་འཚོས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པའི
5.236a
གན་དུ་འོངས་ཏེ་འདི་སྐད་ཅེས་རྗེའི་སྲས་ཚུར་སྤྱོན། ཁྱོད་ཀྱིས་བདག་ལ་གོས་དང་ཟས་སྩོལ་ཅིག་དང ། བདག་གིས་ཁྱོད་ཀྱིས་བཙུན་མོ་སྐྱེ་དགུའི་བདག་མོ་བགྱིའོ། །ཞེས་ཟེར་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་གོས་ཟས་ཀྱིས་འཚོས་པའི་ཆུང་མ་ཞེས་བྱའོ། །ཁ་དུམ་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པའི་གན་དུ་འོངས་ཏེ་འདི་སྐད་ཅེས་རྗེའི་སྲས་ཚུར་སྤྱོན། ཁྱོད་ཀྱི་ནོར་གང་ལགས་པ་དེ་དང་བདག་གི་ནོར་གང་ལགས་པ་དེ་དག་གཅིག་ཏུ་བསྡུས་ཏེ། བདག་ཅག་གཉིས་མཉམ་དུ་འཚོ་བར་བགྱི་ཞིང་བདག་ཅག་གཉིས་ལས་ཁྱེའུ་འམ། བུ་མོ་གང་དག་མཆིས་པར་འགྱུར་བ་དེ་དག་ཀྱང་བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུ་འམ། མང་པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བགྱིས་ནས་འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བགྱིད་པར་གྱུར་པ་བགྱིའོ་ཞེས་ཟེར་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས། དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་ཁ་དུམ་པའི་ཆུང་མ་ཞེས་བྱའོ། །ཐང་འགའ་ཕྲད་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པས་དེང་བདག་འདི་དང་ལྷན་ཅིག་དགའ་མགུར་སྤྱད་པར་བྱའོ་སྙམ་ནས་དེའི་དུས་སུ་གླས་ཤིང་ཡུད་ཙམ་ཕྲད་པར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་ཐང་འགའ་ཕྲད་པའི་ཆུང་མ་ཞེས་བྱའོ། །མཛའ་ན་མོ་བཅུ་གང་ཞེ་ན། མས་བསྲུངས་པ་དང ། ཕས་བསྲུངས་པ་དང ། མིང་པོས་བསྲུངས་པ་དང ། ཕུ་ནུ་མོས་བསྲུངས་པ་དང ། སྒྱུག
5.236b
མོས་བསྲུངས་པ་དང ། གྱོས་པོས་བསྲུངས་པ་དང ། ཉེ་དུས་བསྲུངས་པ་དང ། རིགས་ཀྱིས་བསྲུངས་པ་དང ། རུས་ཆགས་ཀྱིས་བསྲུངས་པ་དང ། རྣམ་པར་འཁྲུག་པ་མེད་པ་ནི་བཅུ་པའོ། །དེ་ལ་མས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་མའི་གན་ན་གནས་ཤིང་མས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་མས་བསྲུངས་པའི་མཛའ་ན་མོ་ཞེས་བྱའོ། །ཕས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེའི་ཕའི་གན་ན་གནས་ཤིང་ཕས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་ཕས་བསྲུངས་པའི་མཛའ་ན་མོ་ཞེས་བྱའོ། །མིང་པོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཕ་མ་དང ། ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་མིང་པོའི་གན་ན་གནས་ཤིང་མིང་པོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ
5.237a
ཤིན་ཏུ་བསྲུངས་པ། སྦས་པ་ཤིན་དུ་སྦས་པ། དེ་ནི་མིང་པོས་བསྲུངས་པའི་མཛའ་ན་མོ་ཞེས་བྱའོ། །ཕུ་ནུ་མོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཕ་མ་དང ། ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་ཕུ་ནུ་མོའི་གན་ན་གནས་ཤིང་ཕུ་ནུ་མོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་ཕུ་ནུ་མོས་བསྲུངས་པའི་མཛའ་ན་མོ་ཞེས་བྱའོ། །སྒྱུག་མོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་སྒྱུག་མོའི་གན་ན་གནས་ཤིང ། སྒྱུག་མོས་དེ་ལ་འདི་སྐད་ཅེས་ཁོ་མོའི་བུ་མཐོང་བ་གང་ཡིན་པ་དེ་ནི་ཁྱོད་མཐོང་བ་ཡིན་ལ། ཁྱོད་མཐོང་བ་གང་ཡིན་པ་དེ་ཡང་ཁོ་མོའི་བུ་མཐོང་བ་ཡིན་པས་ཁོ་མོའི་ཟས་དང ། གོས་ཀྱིས་མནའ་མ་གནས་པར་གྱིས་ཤིག་།མནའ་མ་དགའ་བར་གྱིས་ཤིག་ཅེས་སྨྲས་ནས། སྒྱུག་མོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་སྒྱུག་མོས་བསྲུངས་པའི་མཛའ་ན་མོ་ཞེས་བྱའོ། །གྱོས་པོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གིས་ཕ་མ་དང ། ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ།
5.237b
སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་གྱོས་པོའི་གན་ན་གནས་ཤིང་གྱོས་པོས་དེ་ལ་འདི་སྐད་ཅེས་ཁོ་བོའི་བུ་མཐོང་བ་གང་ཡིན་པ་དེ་ནི་ཁྱོད་མཐོང་བ་ཡིན་ལ་ཁྱོད་མཐོང་བ་གང་ཡིན་པ་དེ་ཡང་ཁོ་བོའི་བུ་མཐོང་བ་ཡིན་པས་ཁོ་བོའི་ཟས་དང་གོས་ཀྱིས་མནའ་མ་གནས་པར་གྱིས་ཤིག་།མནའ་མ་དགའ་བར་གྱིས་ཤིག་།ཅེས་སྨྲས་ནས་གྱོས་པོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ་དེ་ནི་གྱོས་པོས་བསྲུངས་པའི་མཛའ་ན་མོ་ཞེས་བྱའོ། །ཉེ་དུས་བསྲུངས་པའི་མཛའ་ན་མོ་གང་ཞེ་ན། ཉེ་དུ་ཞེས་བྱ་བ་ནི་ཁྱིམ་བདུན་པ་ཚུན་ཆད་ལས་བརྟེན་པ་ནི་ཉེ་དུ་ཡིན་ལ་དེ་ཕན་ཅད་ནི་ཉེ་དུ་མ་ཡིན་ཏེ། བུད་མེད་དམ་གཞོན་ནུ་མ་གང་གི་ཕ་མ་དང ། ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་ཉེ་དུའི་གན་ན་གནས་ཤིང་ཉེ་དུས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས། བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ། དེ་ནི་ཉེ་དུས་བསྲུངས་པའི་མཛའ་ན་མོ་ཞེས་བྱའོ། །རིགས་ཀྱིས་བསྲུངས་པའི་མཛའ་ན་མོ་གང་ཞེ་ན། རིགས་ཤེས་བྱ་བ་ནི་བྲམ་ཟེ་དང ། རྒྱལ་རིགས་དང ། རྗེའུ་རིགས་དང ། དམངས་རིགས་ཏེ། བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས། ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པར་གྱུར་ནས། དེ་རིགས་གཅིག་པའི་གན་ན་གནས་ཤིང་རིགས་གཅིག་པས། དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་དུ
5.238a
བསྲུངས་པ། སྦས་པ་ཤིན་དུ་སྦས་པ། དེ་ནི་རིགས་ཀྱིས་བསྲུངས་པའི་མཛའ་ན་མོ་ཞེས་བྱའོ། །རུས་ཆགས་ཀྱིས་བསྲུངས་པའི་མཛའ་ན་མོ་གང་ཞེ་ན། རུས་ཤེས་བྱ་བ་ནི་ཀུ་སའི་རིགས་དང ། བད་སའི་རིགས་དང ། ཤན་དི་ལིའི་རིགས་དང ། བྷ་ར་དྭ་ཛའི་རིགས་དང ། ལྔ་པའི་རིགས་དང ། ཉེ་ལྔའི་རིགས་དང ། གཽ་ཏ་མའི་རིགས་ཏེ། བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ། བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང ། སེམས་འཁྲུགས་པ་དང་ཚོར་བ་དག་གིས་ཉེན་པར་གྱུར་ནས། དེ་རུས་ཆགས་ཀྱི་གན་ན་གནས་ཤིང་རུས་ཆགས་ཀྱིས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས། བསྲུངས་པ་ཤིན་དུ་བསྲུངས་པ། སྦས་པ་ཤིན་དུ་སྦས་པ་དེ་ནི་རུས་ཆགས་ཀྱིས་བསྲུངས་པའི་མཛའ་ན་མོ་ཞེས་བྱའོ། །རྣམ་པར་འཁྲུག་པ་མེད་པའི་མཛའ་ན་མོ་གང་ཞེ་ན། དགེ་སློང་མ་དང ། སྤྱོད་ཅན་མོ་དང ། ཀུན་དུ་རྒྱུའི་མོ་དང ། ཁྱིམ་ཐབ་ཀྱི་མལ་གྱི་རྗེས་སུ་འཇུག་པ་དང ། ཆོས་བཞིན་སྤྱོད་པ་དེ་ནི་རྣམ་པར་འཁྲུག་པ་མེད་པའི་མཛའ་ན་མོ་ཞེས་བྱའོ། །སྨྱན་ཞེས་བྱ་བ་ནི་ཕྲིན་བྱེད་པའོ། །བྱེད་ན་ཞེས་བྱ་བ་ནི་བྱེད་པར་གྱུར་ནའོ། །ཐ་ན་ཐང་འགའ་ཕྲད་པ་ལ་ཡང་རུང་སྟེ་ཞེས་བྱ་བ་ནི་ཐ་ན་ཡུད་ཙམ་ལ་ཡང་རུང་སྟེ། དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་།བར་སྡོམ་ལ། སྤྲིང་བའི་ཕྲིན་དང་དགེ་སློང་གཉིས། །སྤྱོད་ལམ་དང་ནི་སྔོན་འགྲོ་དང ། །བདག་དང་བདག་མྱིན་ཡུལ་ཕྱོགས་ཚིགས། །སྤྲིང་ཡིག་ལག་ཡིག་ཆུང་མ་འོ། །དགེ་སློང་གིས་བདག་ཉིད་ཀྱིས་སྤྲིང་བ་མནོས་ཏེ་བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང ། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་ཉིད་ཀྱིས་སྤྲིང་བ་མནོས་ཏེ། བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང་མངགས་པས་ཕྲིན་ཚུར་སྐྱེལ་བར་བྱེད་ན་དགེ
5.238b
འདུན་ལྷག་མར་འགྱུར་རོ། །དགེ་སློང་གིས་བདག་ཉིད་ཀྱིས་སྤྲིང་བ་མནོས་ཏེ། མངགས་པས་ཕྲིན་ཕར་སྐྱེལ་བར་བྱེད་ཅིང་བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་ཉིད་ཀྱིས་སྤྲིང་བ་མནོས་ཏེ། མངགས་པས་ཕྲིན་ཕར་ཡང་སྐྱེལ་བར་བྱེད་ཅིང་མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང་བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང་མངགས་པས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། མངགས་པས་ཕྲིན་ཕར་སྐྱེལ་བར་བྱེད་ཅིང་བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། མངགས་པས་ཕྲིན་ཕར་སྐྱེལ་བར་བྱེད་ཅིང་མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང་བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང་མངགས་པས་མངགས་པས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། མངགས་པས་མངགས་པས་ཕྲིན་ཕར་སྐྱེལ་བར་བྱེད་ཅིང་བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ།
5.239a
མངགས་པས་མངགས་པས་ཕྲིན་ཕར་ཡང་སྐྱེལ་བར་བྱེད་ཅིང ། མངགས་པས་མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ། གཉི་གས་ཕྲིན་ཕར་ཡང་སྐྱེལ་བར་བྱེད་ཅིང་གཉི་གས་ཕྲིན་ཚུར་ཡང་སྐྱེལ་བར་བྱེད་ན་གཉི་ག་ལ་དགེ་འདུན་ལྷག་མར་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ། དེ་ན་གཅིག་འདི་སྐད་ཅེས་རེ་ཤིག་ཁོ་བོའི་དོན་དུ་ཕྲིན་ཕར་ཡང་སྐྱོལ་ལ། ཕྲིན་ཚུར་ཡང་སྐྱོལ་ཅིག་ཅེས་ཟེར་ནས། དེས་དེའི་དོན་དུ་ཕྲིན་ཕར་ཡང་སྐྱེལ་བར་བྱེད་ཅིང་ཕྲིན་ཚུར་ཡང་སྐྱེལ་བར་བྱེད་ན་གཉི་ག་ལ་དགེ་འདུན་ལྷག་མར་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ། དེ་ན་གཅིག་འདི་སྐད་ཅེས་ཁོ་བོ་ནི་ཕྲིན་ཕར་ནི་སྐྱེལ་ལོ། །ཕྲིན་ཚུར་ནི་མི་སྐྱེལ་ལོ་ཞེས་ཟེར་ན་དེ་གཉིས་ལས་གང་ཕྲིན་ཕར་ཡང་སྐྱེལ་བར་བྱེད་ཅིང་ཕྲིན་ཚུར་ཡང་སྐྱེལ་བར་བྱེད་པ་དེ་ལ་ནི་དགེ་འདུན་ལྷག་མར་འགྱུར་རོ། །གང་ཕྲིན་ཕར་ནི་སྐྱེལ་བར་བྱེད་ལ་ཕྲིན་ཚུར་ནི་སྐྱེལ་བར་མི་བྱེད་པ་དེ་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ། དེ་ན་གཅིག་འདི་སྐད་ཅེས་ཁོ་བོ་ནི་ཕྲིན་ཕར་ཡང་མི་སྐྱེལ་ལ་ཕྲིན་ཚུར་ཡང་མི་སྐྱེལ་ལོ། །ཞེས་ཟེར་ན་དེ་གཉིས་ལས་གང་ཕྲིན་ཕར་ཡང་སྐྱེལ་བར་བྱེད་ཅིང་ཕྲིན་ཚུར་ཡང་སྐྱེལ་བར་བྱེད་པ་ལ་ནི་དགེ་འདུན་ལྷག་མར་འགྱུར་ལ། གང་ཕྲིན་ཕར་ཡང་སྐྱེལ་བར་མི་བྱེད་ལ། ཕྲིན་ཚུར་ཡང་སྐྱེལ་བར་མི་བྱེད་པ་དེ་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ། གཉི་གས་ཕྲིན་ཕར་ནི་སྐྱེལ་བར་བྱེད་ལ། ཕྲིན་ཚུར་ནི་སྐྱེལ་བར་མི་བྱེད་ན་གཉི་ག་ལ་ཉེས་པ་སྦོམ་པོ་གཉིས་གཉིས་སུ་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ། དེ་ན་གཉི་ག་འདི་སྐད་ཅེས་བདག་ཅག་གཉི་ག་ཕྲིན་ཕར་ཡང་སྐྱེལ་བར་མི་བྱེད་ལ། ཕྲིན་ཚུར་ཡང་སྐྱེལ་བར་མི་བྱེད་དོ་ཞེས་ཟེར་ན
5.239b
གཉི་ག་ལ་ཉེས་པ་སྦོམ་པོ་རེ་རེར་འགྱུར་རོ། །དགེ་སློང་གཅིག་གིས་ཁྱིམ་པ་གཅིག་དང་ཁྱིམ་པ་མོ་གཅིག་འདྲོན་ལམ་དུ་འགྲོ་བ་ན་དེ་ན་གལ་ཏེ་ཁྱིམ་པ་དེ་དགེ་སློང་དེ་ལ་འདི་སྐད་ཅེས་འཕགས་པ་ཁྱོད་ཁྱིམ་པ་མོ་འདི་ལ་འདི་སྐད་ཅེས་ཁྱོད་ཁྱིམ་པ་འདིའི་ཆུང་མ་འམ། མཛའ་ན་མོ་འམ། སྨོས་འདྲིན་གྱིས་ཤིག་ཅེས་སྨྲ་ནུས་སམ་ཞེས་ཟེར་རམ། ཡང་ན་ཁྱིམ་པ་མོ་དེ་དགེ་སློང་དེ་ལ་འདི་སྐད་ཅེས་འཕགས་པ་ཁྱོད་ཁྱིམ་པ་འདི་ལ་འདི་སྐད་ཅེས་ཁྱོད་ཁྱིམ་པ་མོ་འདིའི་ཁྱོ་འམ། མཛའ་ན་པོ་འམ། སྨོས་འདྲིན་གྱིས་ཤིག་ཅེས་སྨྲ་ནུས་སམ་ཞེས་ཟེར་བ་ལ་དགེ་སློང་དེས་སྤྲིང་བ་རྣམ་པ་དེ་ལྟ་བུ་དེ་མནོས་ཏེ། ཕྲིན་ཕར་སྐྱེལ་བར་བྱེད་དམ། ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །འགྲོ་བ་ལ་ཇི་ལྟ་བ་བཞིན་དུ་སྡོད་པ་དང ། འདུག་པ་དང ། ཉལ་བ་དག་ལ་ཡང་དེ་བཞིན་ནོ། །དགེ་སློང་གཅིག་དང ། ཁྱིམ་པ་གཅིག་དང ། ཁྱིམ་པ་མོ་གཅིག་ལ་ཇི་ལྟ་བ་བཞིན་དུ་དགེ་སློང་གཉིས་དང ། ཁྱིམ་པ་གཉིས་དང ། ཁྱིམ་པ་མོ་གཉིས་དང ། དགེ་སློང་རབ་ཏུ་མང་པོ་དང ། ཁྱིམ་པ་རབ་ཏུ་མང་པོ་དང ། ཁྱིམ་པ་མོ་རབ་ཏུ་མང་པོ་ལ་ཡང་དེ་བཞིན་དུ་ཅི་རིགས་པར་རྒྱས་པར་སྦྱར་རོ། །དགེ་སློང་མདུན་དུ་འགྲོ་བའི་དགེ་སྦྱོང་དང ། ཕྱི་བཞིན་འབྲང་བའི་དགེ་སྦྱོང་གཉིས་ལས་མདུན་དུ་འགྲོ་བའི་དགེ་སྦྱོང་གིས་སྤྲིང་བ་མནོས་ཏེ། མདུན་དུ་འགྲོ་བའི་དགེ་སློང་གིས་ཕྲིན་ཕར་ཡང་སྐྱེལ་བར་བྱེད་ཅིང་མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན། མདུན་དུ་འགྲོ་བའི་དགེ་སྦྱོང་ལ་དགེ་འདུན་ལྷག་མར་འགྱུར་རོ། །མདུན་དུ་འགྲོ་བའི་དགེ་སྦྱོང་གིས་སྤྲིང་བ་མནོས་ཏེ། མདུན་དུ་འགྲོ་བའི་དགེ་སྦྱོང་གིས་ཕྲིན་ཕར་སྐྱེལ་བར་བྱེད་ཅིང་ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན། མདུན་དུ་འགྲོ་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །མདུན་དུ་འགྲོ་བའི་དགེ་སྦྱོང་གིས་སྤྲིང་བ་མནོས་ཏེ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་སྐྱེལ་བར་བྱེད་ཅིང་མདུན
5.240a
དུ་འགྲོ་བའི་དགེ་སློང་གིས་ཕྲིན་ཚུར་སྐྱེལ་བར་བྱེད་ན། མདུན་དུ་འགྲོ་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །མདུན་དུ་འགྲོ་བའི་དགེ་སྦྱོང་གིས་སྤྲིང་བ་མནོས་ཏེ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང་ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་ལ་ཉེས་པ་སྦོམ་པོ་གཅིག་ཏུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་མདུན་དུ་འགྲོ་བའི་དགེ་སྦྱོང་དང ། ཕྱི་བཞིན་འབྲང་བའི་དགེ་སྦྱོང་གཉིས་ལས་ཕྱི་བཞིན་འབྲང་བའི་དགེ་སྦྱོང་གིས་སྤྲིང་བ་མནོས་ཏེ་ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང་ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན་ཕྱི་བཞིན་འབྲང་བའི་དགེ་སྦྱོང་ལ་དགེ་འདུན་ལྷག་མར་འགྱུར་རོ། །ཕྱི་བཞིན་འབྲང་བའི་དགེ་སྦྱོང་གིས་སྤྲིང་བ་མནོས་ཏེ་ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་སྐྱེལ་བར་བྱེད་ཅིང་མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན། ཕྱི་བཞིན་འབྲང་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། མདུན་དུ་འགྲོ་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་གིས་སྤྲིང་བ་མནོས་ཏེ་མདུན་དུ་འགྲོ་བའི་དགེ་སྦྱོང་གིས་ཕྲིན་ཕར་སྐྱེལ་བར་བྱེད་ཅིང ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན། ཕྱི་བཞིན་འབྲང་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། མདུན་དུ་འགྲོ་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་གིས་སྤྲིང་བ་མནོས་ཏེ། མདུན་དུ་འགྲོ་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང ། མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན། ཕྱི་བཞིན་འབྲང་བའི་དགེ་སྦྱོང་ལ་ཉེས་པ་སྦོམ་པོ་གཅིག་ཏུ་འགྱུར་ལ་མདུན་དུ་འགྲོ་བའི་དགེ་སྦྱོང་ལ་ནི་ཉེས་པ་སྦོམ་པོ
5.240b
གཉིས་སུ་འགྱུར་རོ། །ཁྱིམ་བདག་ནི་གཉིས་ཏེ། བདག་པོ་དང ། བདག་པོ་མ་ཡིན་པའོ། །དེ་ལ་བདག་པོ་ཞེས་བྱ་བ་ནི་བུ་མོ་སྦྱིན་པ་དང ། འཕྲོག་པའི་བདག་པོར་གྱུར་ཅིང་བླའི་གྲཝའི་ནང་དུ་སོང་ཡང་རུང ། འོག་གཟུའི་ནང་དུ་སོང་ཡང་རུང་སྟེ། དེའི་ཚིག་ཡང་དག་པ་མ་ཡིན་པ་ཡང་གཟུང་བར་འོས་པར་འགྱུར་བ་གང་ཡིན་པ་དེ་ནི་བདག་པོ་ཞེས་བྱའོ། །བདག་པོ་མ་ཡིན་པ་ཞེས་བྱ་བ་ནི་བུ་མོ་སྦྱིན་པ་དང ། འཕྲོག་པའི་བདག་པོར་གྱུར་པ་མ་ཡིན་ཞིང་བླའི་གྲཝའི་ནང་དུ་སོང་ཡང་རུང ། འོག་གཟུའི་ནང་དུ་སོང་ཡང་རུང་སྟེ། དེའི་ཚིག་ཡང་དག་པར་ཡང་གཟུང་བར་འོས་པར་མི་འགྱུར་བ་གང་ཡིན་པ་དེ་ནི་བདག་པོ་མ་ཡིན་པ་ཞེས་བྱའོ། །དགེ་སློང་གིས་བདག་པོ་ལས་སྤྲིང་བ་མནོས་ཏེ། བདག་པོ་ལས་ཕྲིན་ཕར་ཡང་སྐྱེལ་བར་བྱེད་ཅིང་བདག་པོ་ལ་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་པོ་ལས་སྤྲིང་བ་མནོས་ཏེ། བདག་པོ་ལ་ཕྲིན་ཕར་སྐྱེལ་བར་བྱེད་ཅིང་བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང ། ཉེས་བྱས་གཅིག་ཏུ་འགྱུར་རོ། །དགེ་སློང་གིས་བདག་པོ་ལས་སྤྲིང་བ་མནོས་ཏེ། བདག་པོ་མ་ཡིན་པ་ལ་ཕྲིན་ཕར་སྐྱེལ་བར་བྱེད་ཅིང་བདག་པོ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང ། ཉེས་བྱས་གཅིག་ཏུ་འགྱུར་རོ། །དགེ་སློང་གིས་བདག་པོ་ལས་སྤྲིང་བ་མནོས་ཏེ། བདག་པོ་མ་ཡིན་པ་ལ་ཕྲིན་ཕར་སྐྱེལ་བར་བྱེད་ཅིང་བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང ། ཉེས་བྱས་གཉིས་སུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་བ་མནོས་ཏེ། བདག་པོ་མ་ཡིན་པ་ལ་ཕྲིན་ཕར་ཡང་སྐྱེལ་བར་བྱེད་ཅིང ། བདག་པོ་མ་ཡིན་པ་ལ་ཕྲིན་ཚུར་ཡང་སྐྱེལ་བར་བྱེད་ན། ཉེས་བྱས་གསུམ་དུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་བ་མནོས་ཏེ། བདག་པོ་ལ་ཕྲིན་ཕར་སྐྱེལ་བར་བྱེད་ཅིང ། བདག་པོ་མ་ཡིན་པ་ལས་ཕྲིན་ཚུར་སྐྱེལ་བར་བྱེད་ན། ཉེས་པ་སྦོམ་པོ་གཅིག་དང ། ཉེས་བྱས་གཉིས་སུ་འགྱུར་རོ། །
5.241a
དགེ་སློང་གིས་བདག་པོ་མ་ཡིན་པ་ལས་སྤྲིང་བ་མནོས་ཏེ་བདག་པོ་མ་ཡིན་པ་ལས་ཕྲིན་ཕར་སྐྱེལ་བར་བྱེད་ཅིང་བདག་པོ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང ། ཉེས་བྱས་གཉིས་སུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་བ་མནོས་ཏེ་བདག་པོ་ལ་ཕྲིན་ཕར་ཡང་སྐྱེལ་བར་བྱེད་ཅིང ། བདག་པོ་ལ་ཕྲིན་ཚུར་ཡང་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང ། ཉེས་བྱས་གཅིག་ཏུ་འགྱུར་རོ། །རྒྱུ་གསུམ་གྱིས་སྤྲིང་བའི་ཕྲིན་ཚུར་བསྐྱེལ་བར་འགྱུར་ལ་ཕར་བསྐྱེལ་བར་ནི་མི་འགྱུར་ཏེ། གསུམ་གང་ཞེ་ན། ཡུལ་ཕྱོགས་དང ། བརྡ་དང ། མཚན་མས་སོ། །ཇི་ལྟར་ཡུལ་ཕྱོགས་ཀྱིས་ཤེ་ན། གང་གི་ཚེ་ཁོ་བོ་བསྐྱེད་མོས་ཚལ་ལམ། མདུན་ས་འམ། ལྷའི་གནས་ག་གེ་མོ་ཞིག་ན་འདུག་པ་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་ཡུལ་ཕྱོགས་ཀྱིས་སོ། །ཇི་ལྟར་བརྡས་ཤེ་ན། གང་གི་ཚེ་ཁོ་བོ་སྔ་དྲོ་འམ། གུང་ཚིགས་སམ། ཕྱེམ་བྲེད་ན་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ་དེ་ལྟར་བརྡས་སོ། །ཇི་ལྟར་མཚན་མས་ཤེ་ན། གང་གི་ཚེ་ཁོ་བོ་སྐྲ་དང ། ཁ་སྤུ་བྲེགས་ནས་རིང་པོ་མ་ལོན་པ་འམ། སྣམ་སྦྱར་དམར་སེར་གྱོན་པ་འམ། ལྷུང་བཟེད་ཞ་ཉེའི་དབྱར་མདབ་ཅན་ནམ། ཁར་བ་ལྕགས་སྦུབས་ཅན་ནམ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཐོགས་པ་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་མཚན་མས་སོ། །རྒྱུ་གསུམ་གྱིས་ནི་སྤྲིང་བའི་ཕྲིན་ཕར་བསྐྱལ་བར་ཡང་འགྱུར་ལ་ཕྲིན་ཚུལ་བསྐྱལ་བར་ཡང་འགྱུར་ཏེ། གསུམ་གང་ཞེ་ན། ཚིག་དང ། སྤྲིང་ཡིག་དང ། ལག་ཡིག་གིས་སོ། །དགེ་སློང་གིས་ཚིག་གིས་སྤྲིང་བ་མནོས་ཏེ། ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན། དགེ་འདུན་ལྷག་མར་འགྱུར
5.241b
རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་སྐྱེལ་བར་ཡང་བྱེད་ཅིང ། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་ཡང་བྱེད་ཅིང ། སྤྲིང་ཡིག་གིས་ཕྲིན་ཚུར་སྐྱེལ་བར་ཡང་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་སྐྱེལ་བར་བྱེད་ན། དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་ཡང་བྱེད་ཅིང ། ལག་ཡིག་གིས་ཕྲིན་ཚུར་སྐྱེལ་བར་ཡང་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །
5.242a
དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ། ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་བ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ། ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཚིག་གིས་ཕྲིན་ཚུར་སྐྱེལ་བར་བྱེད་ན། དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ།
5.242b
ཚིག་གིས་ཕྲིན་ཕར་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་བ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅཝ་བརྒྱད་པ། དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ། འཐབས་པ་ཉིད་ཀྱི་མོད་ཡིན་ལ་འཐབས་པའི་འོག་མ་ཡིན་པ་དང ། དུམ་པ་མ་བཅད་པ་དང ། རྡེའུ་གསུམ་མ་གཏོར་བ་དང ། ཆོ་ག་མ་གཏང་བ་དང ། ཆུང་མ་མ་ཡིན
5.243a
པར་མ་བསྒྲགས་པ་དང ། དྲིལ་མ་བསྒྲགས་པ་དག་གི་སྡུམས་བྱེད་ཅིང་འཐུན་ན་ཉེས་བྱས་གཅིག་ཏུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་དེ་དག་ཉིད་འཐབས་པ་ཉིད་ཀྱི་མོད་དང་འཐབས་པའི་འོག་ཡིན་ལ། དུམ་པ་མ་བཅད་པ་དང ། རྡེའུ་གསུམ་མ་གཏོར་བ་དང ། ཆོ་ག་མ་གཏང་བ་དང ། ཆུང་མ་མ་ཡིན་པར་མ་བསྒྲགས་པ་དང ། དྲིལ་མ་བསྒྲགས་པ་དག་གི་སྡུམས་བྱེད་ཅིང་འཐུན་པར་གྱུར་ན་ཉེས་བྱས་གཉིས་སུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་དེ་དག་ཉིད་འཐབས་པ་ཉིད་ཀྱི་མོད་དང ། འཐབས་པའི་འོག་དང ། དུམ་པ་བཅད་པ་ཡིན་ལ། རྡེའུ་གསུམ་མ་གཏོར་བ་དང ། ཆོ་ག་མ་བཏང་བ་དང ། ཆུང་མ་མ་ཡིན་པར་མ་བསྒྲགས་པ་དང ། དྲིལ་མ་བསྒྲགས་པ་དག་གི་སྡུམས་བྱེད་ཅིང་འཐུན་པར་གྱུར་ན་ཉེས་བྱས་གསུམ་དུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང ། འཐབས་པའི་འོག་དང ། དུམ་པ་བཅད་པ་དང ། རྡེའུ་གསུམ་གཏོར་བ་ཡིན་ལ། ཆོ་ག་མ་བཏང་བ་དང ། ཆུང་མ་མ་ཡིན་པར་མ་བསྒྲགས་པ་དང ། དྲིལ་མ་བསྒྲགས་པ་དག་གི་སྡུམས་བྱེད་ཅིང་འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་གཅིག་ཏུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང ། འཐབས་པའི་འོག་དང ། དུམ་པ་བཅད་པ་དང ། རྡེའུ་གསུམ་གཏོར་བ་དང ། ཆོ་ག་བཏང་བ་ཡིན་ལ། ཆུང་མ་མ་ཡིན་པར་མ་བསྒྲགས་པ་དང ། དྲིལ་མ་བསྒྲགས་པ་དག་གི་སྡུམས་བྱེད་ཅིང་འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས
5.243b
བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང ། འཐབས་པའི་འོག་དང ། དུམ་པ་བཅད་པ་དང ། རྡེའུ་གསུམ་གཏོར་བ་དང ། ཆོ་ག་བཏང་བ་དང ། ཆུང་མ་མ་ཡིན་པར་བསྒྲགས་པ་ཡིན་ལ། དྲིལ་མ་བསྒྲགས་པ་དག་གི་སྡུམས་བྱེད་ཅིང ། འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་གསུམ་དང ། དགེ་འདུན་ལྷག་མ་གཅིག་ཏུ་འགྱུར་རོ། །དགེ་སློང་གི་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང ། འཐབས་པའི་འོག་དང ། དུམ་པ་བཅད་པ་དང ། རྡེའུ་གསུམ་གཏོར་བ་དང ། ཆོ་ག་བཏང་བ་དང ། ཆུང་མ་མ་ཡིན་པར་བསྒྲགས་པ་དང ། དྲིལ་བསྒྲགས་པ་དག་གི་སྡུམས་བྱེད་ཅིང་འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་བཞི་དང ། དགེ་འདུན་ལྷག་མ་གཉིས་སུ་འགྱུར་རོ། །དགེ་སློང་གིས་ཆུང་མ་དེ་ལས་གཞན་པ་འཐབས་པ་ཉིད་ཀྱི་མོད་དང ། འཐབས་པའི་འོག་དང ། དུམ་པ་བཅད་པ་དང ། རྡེའུ་གསུམ་གཏོར་བ་དང ། ཆོ་ག་གཏང་བ་དང ། ཆུང་མ་མ་ཡིན་པར་བསྒྲགས་པ་དང ། དྲིལ་བསྒྲགས་པ་དག་གི་སྡུམས་བྱེད་ཅིང་འཐུན་པར་གྱུར་ན་དགེ་འདུན་ལྷག་མར་འགྱུར་རོ། །དགེ་སློང་ཁྱིམ་དུ་འགྲོ་བས་ཁྱིམ་དུ་སོང་སྟེ་འདི་སྐད་ཅེས་ཅིའི་ཕྱིར་ཁྱེའུ་ཆེན་པོ་འདིའི་ཁྱིམ་མི་དབུབ་ཅེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་བུ་མོ་ཆེན་མོ་འདི་མི་བཀྲི་ཞེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་ཁྱེའུ་འདི་དང་བུ་མོ་འདི་མི་སྤྲད་ཅེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་ཁྱེའུ་འདི་གྱོས་པོའི་གན་དུ་མི་འགྲོ་ཞེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་བུ་མོ་འདི་གྱོས་པོའི་གན་དུ་མི་བཀྲི་ཞེས་ཟེར་ན་ཉེས་བྱས་སུ་འགྱུར་རོ། །དགེ་སློང་ཁྱིམ་དུ་འགྲོ་བས་དེ་ལྟར་དེ་དང་འཐུན་པའི་ཚིག་རྗོད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྨྱན་བྱེད་པའི་དགེ་འདུན་ལྷག་མ་སྟེ་ལྔ་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས
5.244a
སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྣམས་ལ་ཁང་པ་འདི་ལྟ་བུར་མང་བ་ཉིད་དུ་གྱུར་ཏེ། ཁ་ཅིག་ནི་ཁང་པ་འདི་ཧ་ཅང་རིངས་སོ་ཞེས་དེ་བོར་ནས་གཞན་བྱེད་དུ་འཇུད་དོ། །ཁ་ཅིག་ནི་ཁང་པ་འདི་ཧ་ཅང་ཐུངས་སོ། །འདི་ཧ་ཅང་ཡངས་སོ། །འདི་ཧ་ཅང་དོག་གོ། །འདི་ཧ་ཅང་རྙིངས་སོ། །འདི་ཧ་ཅང་སྟོབས་ཆུང་ངོ ། །འདི་ཧ་ཅང་བརྩིག་ཉེས་སོ་ཞེས་དེ་བོར་ནས། གཞན་བྱེད་དུ་འཇུག་གོ། །དེ་དག་ཁང་པ་བྱེད་པ་དང ། བྱེད་དུ་འཇུད་པས་བྱ་བ་དང ། བྱེད་པ་མང་བར་གྱུར་ནས་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱེད་པ་གཏོང་ཞིང ། ཡང་དང་ཡང་དུ་རྩ་བ་དང ། ཤིང་དང ། མི་བླས་དང ། ཤིང་རྟའི་ལས་སློང་བར་བྱེད་པས་བྲམ་ཟེ་དང ། ཁྱིམ་བདག་རྣམས་ཀྱིས་ཁ་བྱ་བར་གྱུར་ཏོ། །དེའི་ཚེ་ན་ཚེ་དང་ལྡན་པ་འོད་སྲུང་ཆེན་པོ་མཉན་ཡོད་ན་ཤར་གྱི་ཀུན་དགའ་ར་བ་རི་དགས་འཛིན་གྱི་མའི་ཁང་བཟངས་ན་འདུག་གོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་དགེ་སློང་རབ་ཏུ་མང་པོ་དག་ལ་ཁང་པ་དེ་ལྟ་བུར་མང་བ་ཉིད་དུ་གྱུར་པ་ཐོས་སོ། །ཐོས་ནས་ཀྱང་ཕྱི་དྲོ་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཙུན་པ་ད་ལྟར་དགེ་སློང་རྣམས་ལ་ཁང་པ་འདི་ལྟ་བུར་མང་བ་ཉིད་དུ་གྱུར་ཏེ། ཁ་ཅིག་ནི་ཁང་པ་འདི་ཧ་ཅང་རིངས་སོ། །ཞེས་དེ་བོར་ནས་གཞན་བགྱིད་དུ་སྩལ་ཏོ། །ཁ་ཅིག་ནི་ཁང་པ་འདི་ཧ་ཅང་ཐུངས་སོ། །འདི་ཧ་ཅང་ཡངས་སོ། །འདི་ཧ་ཅང་དོག་གོ། །འདི་ཧ་ཅང་རྙིངས་སོ། །འདི་ཧ་ཅང་སྟོབས་ཆུང་ངོ ། །འདི་ཧ་ཅང་བརྩིག་ནོངས་སོ། །ཞེས་དེ་བོར་ནས་གཞན་བགྱིད་དུ་སྩལ་ཏོ། །དེ་དག་ཁང་པ་བགྱིད་པ་དང ། བགྱིད་དུ་སྩལ་བས་བྱ་བ་དང ། བྱེད་པ་མང་བར་གྱུར་ནས
5.244b
ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བགྱིད་པ་གཏོང་ཞིང ། ཡང་དང་ཡང་དུ་རན་དང ། ཞུགས་ཤིང་དང ། མི་བླས་དང ། ཤིང་རྟའི་ལས་སློང་བར་བགྱིད་པས་བྲམ་ཟེ་དང ། ཁྱིམ་བདག་རྣམས་ཀྱིས་ཁ་བགྱི་བར་གྱུར་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་དགེ་སློང་རྣམས་ལ་ཁང་པ་དང ། ཁང་པའི་གཞི་ལེགས་པར་བསྟན་དུ་གསོལ། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་ཅང་མི་གསུང་བས་གནང་ངོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་འོད་སྲུང་ཆེན་པོ་དེ་ཉིད་ཀྱི་མཚན་མོ་འདས་པ་དང་ཚངས་པ་མཚུངས་པར་སྤྱོད་པ་རྣམས་ཀྱི་སེམས་བསྲུང་བའི་ཕྱིར་ལྷུང་བཟེད་དང ། ཆོས་གོས་ཐོགས་ཏེ་ལྗོངས་རྒྱུར་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དགེ་སློང་རབ་ཏུ་མང་པོ་དག་ལ་རྨས་པ། དགེ་སློང་དག་ཁྱེད་ཅག་ལ་ཁང་པ་འདི་ལྟ་བུར་མང་བ་ཉིད་དུ་གྱུར་ཏེ། ཁ་ཅིག་ནི་ཁང་པ་འདི་ཧ་ཅང་རིངས་སོ་ཞེས་དེ་བོར་ནས་གཞན་བྱེད་དུ་འཇུག་།ཁ་ཅིག་ནི་ཁང་པ་འདི་ཧ་ཅང་ཐུངས་སོ། །འདི་ཧ་ཅང་ཡངས་སོ། །འདི་ཧ་ཅང་དོག་གོ། །འདི་ཧ་ཅང་རྙིངས་སོ། །འདི་ཧ་ཅང་སྟོབས་ཆུང་ངོ ། །འདི་ཧ་ཅང་བརྩིག་ཉེས་སོ་ཞེས་དེ་བོར་ནས་གཞན་བྱེད་དུ་འཇུད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བའི་བསྔགས་པ་བརྗོད་དེ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང །
5.245a
མཛེས་པ་དང ། ཚོད་ཤེས་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་བདག་གིས་བསླངས་པ་བདག་པོ་མེད་པ། བདག་གི་ཕྱིར་ཁང་པ་རྩིག་ཏུ་འཇུད་ན་དགེ་སློང་དེས་ཁང་པ་ཚད་བཞིན་དུ་རྩིག་ཏུ་ཆུག་ཤིག་།དེ་ལ་ཁང་པའི་ཚད་ནི་འདི་ཡིན་ཏེ། ནང་སྲིད་དུ་བདེ་བར་གཤེགས་པའི་མཐོའི་མཐོ་བཅུ་གཉིས། ཞེང་དུ་མཐོ་བདུན་ནོ། །གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང ། རྩོད་པ་མེད་པ་དང ། བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བ་འམ། རྩོད་པ་དང་བཅས་པ་འམ། བརྩམ་དུ་མི་རུང་བ་བདག་གིས་བསླངས་པ་བདག་པོ་མེད་པ་བདག་གི་ཕྱིར་ཁང་པ་བརྩིག་ཏུ་འཇུད་དམ་གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ཏམ། ཚད་ལས་འདས་ན་དགེ་འདུན་ལྷག་མའོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །བདག་གིས་བསླངས་པ་ཞེས་བྱ་བ་ནི་འདུན་པ་ལས་བྱུང་བའི་སློངས་མོ་ལ་ལ་ལས་ནི་ཤིང ། ལ་ལ་ལས་ནི་རྩཝ། ལ་ལ་ལས་ནི་མི་བླས། ལ་ལ་ལས་ནི་ཤིང་རྟའི་ལས་བསླངས་པའོ། །བདག་པོ་མེད་པ་ཞེས་བྱ་བ་ནི་གང་ལ་བདག་པོ་སྐྱེས་པ་འམ་བུད་མེད་དམ་མ་ནིང་མེད་པའོ། །བདག་གི་ཕྱིར་ཞེས་བྱ་བ་ནི་བདག་ཉིད་ལ་བསྔོས་ཏེའོ། །ཁང་པ་ཞེས་བྱ་བ་ནི་གང་དུ་སྤྱོད་ལམ་བཞི་པོ་འཆག་པ་དང ། འགྲེང་བ་དང ། འདུག་པ་དང ། ཉལ་བ་དག་ཤོང་བའོ། །རྩིག་ཏུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་གྱིས་སོ། །དགེ་སློང་དེས་ཁང་པ་ཚད་བཞིན་དུ་རྩིག་ཏུ་ཆུག་ཤིག་།དེ་ལ་ཁང་པའི་ཚད་ནི་འདི་ཡིན་ཏེ། ནང་སྲིད་དུ་བདེ་བར
5.245b
གཤེགས་པའི་མཐོའི་མཐོ་བཅུ་གཉིས་ཞེང་དུ་མཐོ་བདུན་ནོ་ཞེས་བྱ་བ་ལ། བདེ་བར་གཤེགས་པ་ཞེས་བྱ་བ་ནི་སྟོན་པ་སྟེ། དེའི་མཐོ་བཅུ་གཉིས་གང་དག་ཡིན་པ་དེ་དག་ལ་ནི་ཚད་དང་ལྡན་པའི་ཁྲུའི་ཁྲུ་བཅཝ་བརྒྱད་དེ། ནང་གི་སྲིད་དུ་ཚད་དང་ལྡན་པའི་ཁྲུ་བཅཝ་བརྒྱད་དོ། །བདེ་བར་གཤེགས་པའི་མཐོ་བདུན་གང་དག་ཡིན་པ་དེ་དག་ལ་ནི་ཚད་དང་ལྡན་པའི་ཁྲུའི་ཁྲུ་ཕྱེད་དང་བཅུ་གཅིག་སྟེ། ནང་གི་ཞེང་དུ་ཁྲུ་ཕྱེད་དང་བཅུ་གཅིག་གོ། །གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ་ཞེས་བྱ་བ་ལ། གཞི་བལྟ་བའི་ཕྱིར་ཞེས་བྱ་བ་ནི་ས་གཞི་རུང་བ་དང ། རྩོད་པ་མེད་པ་དང ། བརྩམ་དུ་རུང་བ་ཉིད་བལྟ་བའི་ཕྱིར་རོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །དགེ་སློང་དག་བཀྲི་བར་བྱའོ་ཞེས་བྱ་བ་ནི། དེ་ན་དགེ་སློང་གང་དག་ཡོད་པ་དག་ཡིན་གྱི་ཇི་ཙམ་གྱིས་གཞི་དེ་མིག་གིས་བལྟས་པར་འགྱུར་བའི་དགེ་སློང་དེ་ཙམ་བཀྲི་བར་བྱ་བ་ནི་མ་ཡིན་ནོ། །གལ་ཏེ་དེ་ན་སྦྲུལ་གྱི་གནས་སམ། སྡིག་པའི་གནས་སམ། སྲིལ་གྱི་གནས་སམ། གྲོག་མའི་གནས་ཡོད་པ་ཡིན་ན་མི་རུང་བ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་རུང་བ་ཡིན་ན་དེའི་འོག་ཏུ་ཉེ་བར་བརྟག་པར་བྱ་སྟེ་གལ་ཏེ་རྒྱལ་པོའི་གཞི་འམ། མཆོད་རྟེན་གྱི་གཞི་འམ། ཁྱིམ་བདག་གི་གཞི་འམ། མུ་སྟེགས་ཅན་གྱི་གཞི་འམ། དགེ་སློང་མའི་དབྱར་ཁང་ངམ། ཤིང་ལྗོན་པ་གཅད་པར་བྱ་བ་ཡོད་ན། རྩོད་པ་དང་བཅས་པ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་གཞི་རུང་བ་དང ། རྩོད་པ་མེད་པ་ཡིན་ན་དེའི་ཉེན་ཀོར་འདོམ་གང་ཁོ་ར་ཁོར་ཡུག་ཉེ་བར་བརྟག་པར་བྱ་སྟེ། གལ་ཏེ་དེ་ན་གཞི་ཆུ་ཀླུང་ལ་རྟེན་ཏམ། ཁྲོན་པ་ལ་རྟེན་ཏམ། ལམ་ལ་རྟེན་ཏམ། ངམ་གྲོག་ལ་རྟེན་པ་ཡིན་ན་བརྩམ་དུ་མི་རུང་བའི་ཕྱིར་བསྟན་པར་མི་བྱའོ། །གལ་ཏེ་གཞི་དེ་རུང་བ་དང ། རྣམ་པ་ཐམས་ཅད་ཡོངས་སུ་རྫོགས་པ་ཡིན་ན་དགེ་སློང་དེས་གཙུག་ལག་ཁང་དུ་སོང་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ། དྲིས་པའི་ཚིག་གིས་དགེ
5.246a
སློང་དག་ལ་བསྐུལ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་མཆིལ་ལྷམ་ཕུད་དེ། བླ་གོས་ཕྲག་པ་གཅིག་ཏུ་བྱས་ནས་རྒན་རིམས་བཞིན་དུ་ཕྱག་འཚལ་ཏེ་རྒན་པའི་མཐའ་ལོགས་སུ་ཙོག་བུར་འདུག་ནས་ཐལ་མོ་སྦྱར་ཏེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་ལག་གི་བླ་མིང་འདི་ཞེས་བགྱི་བས་ཁང་པའི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་ཞིག་བཙལ་ཏེ། བདག་དགེ་སློང་ལག་གི་བླ་མིང་འདི་ཞེས་བགྱི་བ་དགེ་འདུན་ལས་ཁང་པའི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་ལག་གི་བླ་མིང་འདི་ཞེས་བགྱི་བ་ལ་ཁང་པའི་གཞི་རུང་བ་རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་སློང་དེ་དག་གིས་ཀྱང་དགེ་སློང་དེ་ལ་དད་པས་སམ་ཡིད་ཆེས་པས་འགྲོ་བར་མི་བྱ་བར་འདི་ལྟར་དགེ་འདུན་ཐམས་ཅད་དེར་འགྲོ་བར་བྱ་བ་འམ། དགེ་འདུན་གྱིས་བསྐོས་པའི་དགེ་སློང་དག་གཏང་བར་བྱའོ། །དེ་དག་གིས་གཞི་དེ་མིག་གིས་བལྟ་བར་བྱ་ཞིང ། གལ་ཏེ་དེ་ན་སྦྲུལ་གྱི་གནས་སམ། སྡིག་པའི་གནས་སམ། སྲིལ་གྱི་གནས་སམ། གྲོག་མའི་གནས་ཡོད་པ་ཡིན་ན་མི་རུང་བ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་རུང་བ་ཡིན་ན་དེའི་འོག་ཏུ་ཉེ་བར་བརྟག་པར་བྱ་སྟེ། གལ་ཏེ་རྒྱལ་པོའི་གཞི་འམ། མཆོད་རྟེན་གཞི་འམ། ཁྱིམ་བདག་གི་གཞི་འམ། མུ་སྟེགས་ཅན་གྱི་གཞི་འམ། དགེ་སློང་མའི་དབྱར་ཁང་ངམ། ཤིང་ལྗོན་པ་གཅད་པར་བྱ་བ་ཡོད་ན་རྩོད་པ་དང་བཅས་པ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་གཞི་རུང་བ་དང ། རྩོད་པ་མེད་པ་ཡིན་ན་དེའི་ཉེན་ཀོར་འདོམ་གང་ཁོ་ར་ཁོར་ཡུག་ཉེ་བར་བརྟག་པར་བྱ་སྟེ། གལ་ཏེ་དེ་ན་གཞི་ཆུ་ཀླུང་ལ་རྟེན་ཏམ། ཁྲོན་པ་ལ་རྟེན་ཏམ། ལམ་ལ་རྟེན་ཏམ། ངམ་གྲོག་ལ་རྟེན་པ།
5.246b
ཡིན་ན་བརྩམ་དུ་མི་རུང་བའི་ཕྱིར་བསྟན་པར་མི་བྱའོ། །གལ་ཏེ་གཞི་དེ་རུང་བ་དང ། རྣམ་པ་ཐམས་ཅད་ཡོངས་སུ་རྫོགས་པ་ཡིན་ན་དེའི་ཚེ་དགེ་སློང་དེ་དག་གིས་རྒན་པའི་མཐའ་ལོགས་སུ་གུས་པ་དང་བཅས་པས་འདུག་སྟེ་འདི་སྐད་ཅེས་བརྗོད་པར་བྱའོ། །གནས་བརྟན་དག་གཞི་དེ་རུང་བ་དང ། རྩོད་པ་མ་མཆིས་པ་དང ། བརྩམ་དུ་རུང་བ་ལགས་ཀྱིས་ད་དེའི་དུས་ལ་བབ་པར་མཁྱེན་པར་མཛོད་ཅིག་དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ། ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདིས་ཁང་པའི་གཞི་རུང་བ་རྩོད་པ་མ་མཆིས་པ། བརྩམ་དུ་རུང་བ་ཞིག་བཙལ་ཏེ། དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ཁང་པའི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་ཁང་པའི་གཞི་རུང་བ་རྩོད་པ་མ་མཆིས་པ་བརྩམ་དུ་རུང་བ་བསྟན་པ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདིས་ཁང་པའི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་ཞིག་བཙལ་ཏེ། དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ཁང་པའི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་ཁང་པའི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩོལ་ན་ཚེ་དང་ལྡན་པ་གང་དག་དགེ་སློང་ལག་གི་བླ་མིང་འདི་ཞེས་བགྱི་བ་ལ་ཁང་པའི་གཞི་རུང་བ། རྩོད་པ་མ་མཆིས་པ་བརྩམ་དུ་རུང་བ་བསྟན་པ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ཁང་པའི་གཞི་རུང་བ། རྩོད་པ་མ
5.247a
མཆིས་པ། བརྩམ་དུ་རུང་བ་བསྟན་པ་སྩལ་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །དགེ་འདུན་གྱིས་དགེ་སློང་ལག་གི་བླ་གང་ལ་ཁང་པའི་གཞི་རུང་བ། རྩོད་པ་མེད་པ། བརྩམ་དུ་རུང་བ་བསྟན་པ་བྱིན་པ་དེས་ཁང་པ་བརྩིག་ཏུ་གཞུག་པར་བྱ་སྟེ་འདི་ལ་འགྱོད་པར་མི་བྱའོ། །ཁྲིད་པའི་དགེ་སློང་དག་གིས་ཀྱང་ཞེས་བྱ་བ་ནི་དེར་དགེ་སློང་གང་དག་ཁྲིད་པ་དག་གིས་ཀྱང་ངོ ། །གཞི་ཞེས་བྱ་བ་ནི་ཁང་པའི་དབང་དུ་བྱས་པའི་གཞི་གང་ཡིན་པའོ། །རུང་བ་ཞེས་བྱ་བ་ནི་སྦྲུལ་གྱི་གནས་དང ། སྡིག་པའི་གནས་ལ་སོགས་པ་དང་བྲལ་བའོ། །རྩོད་པ་མེད་པ་ཞེས་བྱ་བ་ནི་འཐབ་མོ་དང ། མཚང་འདྲུ་བ་སོགས་པ་དང་བྲལ་བའོ། །བརྩམ་དུ་རུང་བ་ཞེས་བྱ་བ་ནི་དེའི་ཉེན་ཀོར་འདོམ་གང་ཁོ་ར་ཁོར་ཡུག་ན་སྐྱོན་མེད་པར་རོ། །བལྟ་བར་བྱའོ་ཞེས་བྱ་བ་ནི་སོ་སོར་བརྟག་པར་བྱའོ། །གལ་ཏེ་དགེ་སློང་གིས་གཞི་མི་རུང་བ་འམ་ཞེས་བྱ་བ་ནི་སྦྲུལ་དང་སྡིག་པ་ལ་སོགས་པའི་གནས་ཀྱི་ཤས་ཆེ་བའོ། །རྩོད་པ་དང་བཅས་པ་འམ་ཞེས་བྱ་བ་ནི་ཐབ་མོ་དང་བཅས་པ་དང ། མཚང་འདྲུ་བ་དང་བཅས་པ་དང་རྩོད་པ་དང་བཅས་པ་དང ། འགྱེད་པ་དང་བཅས་པའོ། །བརྩམ་དུ་མི་རུང་བ་ཞེས་བྱ་བ་ནི་གང་གི་ཉེན་ཀོར་འདོམ་གང་ཁོ་ར་ཁོར་ཡུག་མེད་པར་རོ། །བདག་གིས་བསླངས་པ་བདག་པོ་མེད་པ། བདག་གི་ཕྱིར་ཁང་པ་བརྩིག་ཏུ་འཛུད་དམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ཏམ། ཚད་ལས་འདས་ན་ཞེས་བྱ་བ་ནི་ཚད་ཇི་སྐད་བསྟན་པ་དེ་ལས་ལྷག་པར་རྩིག་ཏུ་འཛུད་ནའོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ཏེ། དེས་ན་དགེ་འདུན་ལྷག་མའོ། །ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན་དགེ་སློང་གིས་ཁང་པ་བྱེད་དུ་འཛུད་ཅིང་མི་རུང་བ་བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པ་བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །མ་བསྟན་པར
5.247b
བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །ཚད་ལས་འདས་པར་བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཁོ་བོའི་ཕྱིར་ཁང་པ་རུང་བ། རྩོད་པ་མེད་པ་བརྩམ་དུ་རུང་བ། བསྟན་པ་ཚད་དང་ལྡན་པ་བྱེད་དུ་ཆུག་ཤིག་ཅེས་སྨྲས་པ་ལས་དེས་དེའི་ཕྱིར་ཁང་པ་བྱེད་དུ་འཇུད་ཅིང་མི་རུང་བར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན། བྱེད་པ་པོ་ལ་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །ཚད་ལས་འདས་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་བྱེད་པ་པོ་ལ་དགེ་འདུན་ལྷག་མར་འགྱུར་རོ། །གལ་ཏེ་དེ་དེའི་གན་དུ་སོང་སྟེ་འདི་སྐད་ཅེས་ལེགས་པར་བྱས་སོ། །ཤིན་དུ་བྱས་སོ། །ངས་ཁྱོད་ལ་འདི་སྐད་བསྒོའོ་ཞེས་ཟེར་ཞིང་དེས་ཀྱང་དེ་ལ་ཤིང་ངམ། རྩཝ་འམ། ལྕི་བ་འམ། ས་འཇིམ་འབུལ་བར་བྱེད་ལ། གལ་ཏེ་དེས་མི་རུང་བར་བྱེད་དུ་འཇུད་ན། གཉི་ག་ལ་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །ཚད་ལས་འདས་པར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་གཉི་ག་ལ་དགེ་འདུན་ལྷག་མར་འགྱུར་རོ། །གལ་ཏེ་དེ་དེའི་གན་དུ་སོང་སྟེ་འདི་སྐད་ཅེས་ལེགས་པར་མ་བྱས་སོ། །ཤིན་དུ་མ་བྱས་སོ། །ངས་ཁྱོད་ལ་འདི་ལྟར་མ་བསྒོའོ། །ཞེས་ཟེར་ཞིང་དེས་དེ་ལ་ཤིང་ངམ། རྩཝ་འམ། ལྕི་བ་འམ། ས་འཇིམ་འབུལ་བར་མི་བྱེད་ལ། གལ་ཏེ་དེས་མི་རུང་བར་བྱེད་དུ་འཇུད་ན་བྱེད་པ་པོ
5.248a
ལ་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །ཚད་ལས་འདས་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་བྱེད་པ་པོ་ལ་དགེ་འདུན་ལྷག་མར་འགྱུར་རོ། །བྱས་པ་རྙེད་པ་དང ། བྱས་པ་ལ་ལོངས་སྤྱོད་པ་དག་ལ་ནི་ལྟུང་བ་མེད་དོ། །རྙིང་པ་འཆོས་པ་ལ་ཡང་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁང་པའི་དགེ་འདུན་ལྷག་མ་སྟེ་དྲུག་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་ཀཽ་ཤམྦི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང་དེ་དག་དེ་དག་ན་གནས་པ་ན་དགའ་བོ་ཉེ་དགའ་ལྟོས་ཤིག་།གཙུག་ལག་ཁང་འདི་ནི་གྱོང་གྲུགས་སུ་གྱུར་པ་ཡིན་ནོ། །འདི་ནི་གས་པ་ཡིན་ནོ། །འདི་ནི་མཚམས་ཉམས་པ་ཡིན་ནོ། །འདི་ནི་ངོས་ཉམས་པ་ཡིན་ནོ། །འདི་ནི་མ་མོའི་ཁྱིམ་འདྲ་བ་ཡིན་ནོ་ཞེས་འཕྱ་བར་བྱེད་པ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་རེ་ཤིག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང ། ཁྱེད་ཅག་གིས་རྡོ་ཡང་སྒྲེང་བར་མི་ནུས་ལ། འོན་ཀྱང་འཕྱ་བར་བྱེད་དོ། །དེ་སྐད་ཅེས་སྨྲས་པ་དང ། དེ་དག་ང་རྒྱལ་གྱིས་ཁེངས་པར་གྱུར་ནས། ཕན་ཚུན་སྨྲ་བར་བརྩམས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་གིས་བདག་ཅག་ལ་ཁྱེད་ཅག་རེ་ཤིག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང ། ཁྱེད་ཅག་གིས་རྡོ་ཡང་སྒྲེང་བ་མི་ནུས་ལ་འོན་ཀྱང་འཕྱ་བར་བྱེད་དོ། །ཞེས་ཧ་ཅང་ཟིལ་གྱིས་མནན་གྱིས་ཚུར་ཤེག་།བདག་ཅག་གིས་སྔོན་ལྷུང་བཟེད་ནག་པོ་ཅན་གང་གིས
5.248b
ཀྱང་བྱེད་དུ་མ་བཅུག་པའི་གཙུག་ལག་ཁང་ཅི་འདྲ་བའི་གཙུག་ལག་ཁང་བྱེད་དུ་གཞུག་གོ། །གལ་ཏེ་བདག་ཅག་ཐམས་ཅད་ལག་གི་བླ་ལ་བརྩོན་པར་གྱུར་ན་ལྷུང་བཟེད་ནག་པོ་ཅན་དག་རྟག་པ་ཁོ་ནར་བདག་ཅག་ལ་སྐབས་ཚོལ་བས་དེ་དག་གིས་དྲུག་སྡེ་དག་ཐམས་ཅད་ལག་གི་བླ་ལ་ཞུགས་སོ་ཞེས་སྐབས་རྙེད་པར་ཡང་འགྱུར་ལ། བདག་ཅག་གིས་སློངས་མོའི་ཁྱིམ་གང་དག་ཡིན་པ་དེ་དག་ཏུ་ཡང་བྲེལ་བ་དག་གི་སྐྱོན་བརྗོད་ནས་རྗེས་སུ་འཇུག་པར་བྱེད་པར་འགྱུར་གྱིས། བདག་ཅག་གིས་བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་གང་ཡིན་པ་དེའི་གན་དུ་བདག་ཅག་དོང་ལ་སྤྲོ་བ་བསྐྱེད་པར་བྱ་གོར་མ་ཆག་ན། དེའི་ཕྱིར་བདག་ཅག་གི་ནང་ན་མཁས་པ་སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་གང་ཡིན། བདག་ཅག་གི་ནང་ན་ཚེ་དང་ལྡན་པ་འདུན་པ་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་ཡིན་གྱིས་བདག་ཅག་དེའི་གན་དུ་འདོང་ལ་སྤྲོ་བ་བསྐྱེད་པར་བྱའོ། །ཞེས་དེ་དག་འདུན་པའི་གན་དུ་དོང་སྟེ་སྨྲས་པ། ཚེ་དང་ལྡན་པ་འདུན་པ་ལྷུང་བཟེད་ནག་པོ་ཅན་འདི་དག་གིས་བདག་ཅག་ལ་ཁྱེད་ཅག་རེ་ཤིག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང་ཁྱེད་ཅག་གིས་རྡོ་ཡང་སྒྲེང་བར་མི་ནུས་ལ། འོན་ཀྱང་འཕྱ་བར་བྱེད་དོ་ཞེས་ཧ་ཅང་ཟིལ་གྱིས་མནན་ནས། ཁོ་བོ་ཅག་འདི་སྙམ་དུ་སེམས་ཏེ། ལྷུང་བཟེད་ནག་པོ་ཅན་འདི་དག་གིས་བདག་ཅག་ལ་ཁྱེད་ཅག་རེ་ཤིག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང་ཁྱེད་ཅག་གིས། རྡོ་ཡང་སྒྲེང་བར་མི་ནུས་ལ། འོན་ཀྱང་འཕྱ་བར་བྱེད་དོ་ཞེས་ཧ་ཅང་ཟིལ་གྱིས་མནན་གྱིས་ཚུར་ཤེག་།བདག་ཅག་གིས་སྔོན་ལྷུང་བཟེད་ནག་པོ་ཅན་གང་གིས་ཀྱང་བྱེད་དུ་མ་བཅུག་པའི་གཙུག་ལག་ཁང་ཅི་འདྲ་བ་དེ་འདྲ་བའི་གཙུག་ལག་ཁང་བྱེད་དུ་གཞུག་གོ། །གལ་ཏེ་བདག་ཅག་ཐམས་ཅད་ལག་གི་བླ་ལ་བརྩོན་པར་གྱུར་ན། ལྷུང་བཟེད་ནག་པོ་ཅན་དག་རྟག་པ་ཁོ་ནར་བདག་ཅག
5.249a
ལ་སྐབས་ཚོལ་བས་དེ་དག་གིས་དྲུག་སྡེ་དག་ཐམས་ཅད་ལག་གི་བླ་ལ་ཞུགས་སོ་ཞེས་སྐབས་རྙེད་པར་ཡང་འགྱུར་ལ། བདག་ཅག་གི་སློངས་མོའི་ཁྱིམ་གང་དག་ཡིན་པ་དེ་དག་ཏུ་ཡང་བྲེལ་བ་དག་གི་སྐྱོན་བརྗོད་ནས་རྗེས་སུ་འཇུག་པར་བྱེད་པར་འགྱུར་གྱིས། བདག་ཅག་གིས་བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་གང་ཡིན་པ་དེའི་གན་དུ་བདག་ཅག་དོང་ལ་སྤྲོ་བ་བསྐྱེད་པར་བྱ་གོར་མ་ཆག་ན། དེའི་ཕྱིར་བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་གང་ཡིན། བདག་ཅག་གི་ནང་ན་ཚེ་དང་ལྡན་པ་འདུན་པ་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་ཡིན་གྱིས་བདག་ཅག་དེའི་གན་དུ་དོང་ལ་སྤྲོ་བ་བསྐྱེད་པར་བྱའོ་སྙམ་ནས། བདག་ཅག་གིས་ཚེ་དང་ལྡན་པ་གཙུག་ལག་ཁང་གི་ཕྱིར་སྤྲོ་བར་བྱ་ཞིང་ཁྱོད་ལ་གསོལ་བ་འདེབས་ཀྱིས་ལྷུང་བཟེད་ནག་པོ་ཅན་དག་ཡན་ལག་འདིས་ཟིལ་གྱིས་ནོན་པར་གྱིས་ཤིག་།འདུན་པས་སྨྲས་པ། ཐབས་ཡིན་གྱིས་དེ་ལྟར་བྱའོ། །དེ་དག་ཡིད་དགའ་ནས་དོང་ངོ ། །ཚེ་དང་ལྡན་པ་འདུན་པ་ཡང་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས་གཙུག་ལག་ཁང་དུ་ཞུགས་ཏེ། འདུག་ནས་ཐབས་ཅི་ཡོད་ན་དེས་དགེ་འདུན་གྱིས་གཙུག་ལག་ཁང་འགྲུབ་པར་འགྱུར་སྙམ་དུ་སེམས་པ་ལ་ཞུགས་སོ། །དེས་སུ་ཞིག་སུ་ལ་མངོན་པར་དད་སྙམ་དུ་རྣམ་པར་དཔྱད་པར་བརྩམས་པ་དང ། དེ་འདི་སྙམ་དུ་སེམས་ཏེ། རེ་ཤིག་འཇིག་རྟེན་ལྷ་དང་བཅས་པ་ནི་བཅོམ་ལྡན་འདས་ལ་མངོན་པར་དད་པ་ཡིན། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ། ཁྱིམ་ཆེ་གེ་མོ་ཞིག་ནི། ཚེ་དང་ལྡན་པ་འོད་སྲུང་ཆེན་པོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཤཱ་རིའི་བུ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་མ་འགགས་པ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་རྟ་ཐུལ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་བཟང་ལྡན་ལ། ཁྱིམ་ཆེ་གེ་མོ
5.249b
ཞིག་ནི་ཚེ་དང་ལྡན་པ་རླངས་པ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་མིང་ཆེན་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་གང་པོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་དྲི་མ་མེད་པ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་བ་ལང་བདག་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཀུན་དགའ་བོ་ལ། ཁྱིམ་ཆེ་གེ་མོ་ཞིག་ནི་བཅོམ་ལྡན་འདས་ཀྱི་གཅུང་སྲུའི་སྲས་ཚེ་དང་ལྡན་པ་མཛེས་དགའ་ལ། ཁྱིམ་ཆེ་གེ་མོ་ཞིག་ནི་བཅོམ་ལྡན་འདས་ཀྱི་སྲས་ཚེ་དང་ལྡན་པ་སྒྲ་གཅན་ཟིན་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་གྱད་བུ་ནོར་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་དགའ་བོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཉེ་དགའ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་འགྲོ་མགྱོགས་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་འཆར་ཀ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ནབ་སོ་ལ་མངོན་པར་དད་པ་ཡིན་པས་དེའི་ཕྱིར་དེ་དག་སྦྱོར་དུ་གཞུག་ཏུ་ནི་མི་ནུས་ཀྱིས། འདི་ལྟར་ཀཽ་ཤམྦི་ན་བྲམ་ཟེ་ཕྱུག་པ། ནོར་མང་བ། ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་བ་ཆེ་བ་ཞིག་འདུག་ན་དེ་ནི་སེར་སྣ་ཅན་མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་འཛིན་པ་ཡིན་ལ། དེ་ལ་དབྱིག་དང ། གསེར་མང་པོ་བདོག་པས་གལ་ཏེ་དེ་རྗེས་སུ་འཇུག་པར་བྱེད་ནུས་ན་དགེ་འདུན་གྱི་གཙུག་ལག་ཁང་འགྲུབ་པར་འགྱུར་རོ་སྙམ་ནས། དེ་དེ་ལྟར་སེམས་པ་ལ་ཞུགས་པས། ཚེགས་ཆེན་པོས་ནམ་ནངས་པར་བྱས་ནས། སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། ཀཽ་ཤམྦིར་བསོད་སྙོམས་ལ་ཞུགས་སོ། །དེས་ཁྱིམ་གཉིས་སམ། གསུམ་དུ་བསོད་སྙོམས་རྒྱུས་ནས་ཕྱེ་ཉུང་ཤས་ཤིག་ཁྱེར་ཏེ། བྲམ་ཟེ་དེའི་ཁྱིམ་དུ་འཇུག་པར་བརྩམ་པ་དང ། སྒོ་བས་འཕགས་པ་སྡོད་ཅིག་།མ་འཇུག་ཅེས་བགགས་སོ། །དེས་སྨྲས་པ། བཞིན་བཟངས་བཅོམ་ལྡན་འདས་ཀྱིས་ཁོ་བོ་ཅག་གི་སྤྱོད་ཡུལ་མ་ཡིན་པ་ནི་རྣམ་པ་ལྔ་གསུངས་ཏེ། རོལ་མོ་མཁན་གྱི་གནས་དང ། འཇུད་འཐུན་མའི་གནས་དང ། ཆང་པའི་གནས་དང ། གདོལ་པའི་གནས་དང ། རྒྱལ་པོའི་ཕོ་བྲང་ཡིན་ན་ཅི་ཁྱིམ་འདི་ནི་རོལ་མོ
5.250a
མཁན་གྱི་གནས་ཡིན་ནམ། འོན་ཏེ་འཇུད་འཐུན་མའི་གནས་སམ། ཆང་པའི་གནས་སམ། གདོལ་པའི་གནས་སམ། རྒྱལ་པོའི་ཕོ་བྲང་ཡིན་ནམ་ཅི་ན་དེའི་ཕྱིར་ཁོ་བོ་འགོག་པར་བྱེད། སྒོ་བས་སྨྲས་པ། འཕགས་པ་ཁྱོད་མང་དུ་བཀྱོན་པར་འགྱུར་མོད་ཀྱི་འདི་ནི་རོལ་མོ་མཁན་གྱི་གནས་ཀྱང་མ་ལགས། འཇུད་འཐུན་མའི་གནས་དང ། ཆང་པའི་གནས་དང ། གདོལ་པའི་གནས་དང ། རྒྱལ་པོའི་ཕོ་བྲང་ཡང་མ་ལགས་ཏེ། འདི་ལྟར་འདི་ནི་བྲམ་ཟེ་ཆེ་གེ་མོ་ཞིག་གི་ཁྱིམ་ལགས་སོ། །འདུན་པས་བསམས་པ། གང་དུ་རེ་ཤིག་ངོ་ཕྲད་པར་ཡང་མེད་པ་དེར་གཞན་ཅི་ཞིག་ཡོད་པར་འགྱུར་སྙམ་ནས། དེ་དེ་ལྟར་སྒོར་བགགས་ཏེ། སེམས་ཁོངས་སུ་ཆུད་ཅིང་འདུག་པ་ན་ཁྱིམ་བདག་ཅིག་གི་བུ་བྱུང་བ་དེར་བཅུ་གཉིས་འདུས་པའི་དགའ་འདུན་གར་དང ། གླུ་དང ། སིལ་སྙན་གྱིས་ཞུགས་པ་དང ། སྒོ་བ་དེས་དེ་དག་ལ་ཏེ་པོར་བརྟག་པར་བརྩམས་ཏེ་སྒོ་ལ་མི་ལྟ་བའི་ཚེ། ཚེ་དང་ལྡན་པ་འདུན་པས་འཇུག་པ་ཐོབ་སྟེ་ཞུགས་ནས་དེའི་སྤྱོད་ལམ་གྱིས་འདོད་ཆགས་དང་བྲལ་བའི་ས་སྦྱོང་བར་བྱེད་པ་དེ། བྲམ་ཟེ་དེས་མཐོང་ནས་སྨྲས་པ། བཙུན་པ་འདུན་པ་བྱོན་པ་ལེགས་སོ། །གདན་འདི་ལ་བཞུགས་ཤིག་།འདུན་པ་དོན་ཡོད་པས་འདུག་པ་དང་གཏམ་གྱི་སྐབས་མ་རྙེད་ནས་འདུན་པས་སྨྲས་པ། བྲམ་ཟེ་ཁོ་བོས་བསོད་སྙོམས་ཀྱི་ཕྱེ་ཉུང་ཤས་ཤིག་རྙེད་པ་འདི་འཚག་ཏུ་ཆུག་སྟེ་བྱིན་ཅིག་།བྲམ་ཟེས་བུ་མོ་ལ་བསྒོ་བ། བུ་མོ་འཕགས་པའི་བསོད་སྙོམས་ཀྱི་ཕྱེ་ཚོགས་ཏེ་ཕུལ་ཅིག་།བུ་མོ་དེས་བཙག་པར་བརྩམས་པ་དང ། ཚེ་དང་ལྡན་པ་འདུན་པས་ཕྱེ་ལ་བརྟག་པར་བརྩམས་སོ། །བྲམ་ཟེས་སྨྲས་པ། འཕགས་པ་ཅི་རྟོག་།སྲོག་ཆགས་སོ། །གལ་ཏེ་མཆིས་ན་ཇི་ལྟར་བགྱི། བཟའ་བར་མི་བྱའོ། །གལ་ཏེ་གསོལ་བར་གྱུར་ན་ནོངས་པ་ཅི་མཆིས། བྲམ་ཟེ་བཅོམ་ལྡན་འདས་ཀྱིས་སྲོག་གཅོད་པ་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལུས་ཞིག་སྟེ་ཤི་བའི་འོག་ཏུ་ངན་སོང་དང ། ངན་འགྲོ་དང ། ལོག་པར་ལྟུང་བ་དང ། སེམས་ཅན་དམྱལ་བ་རྣམས་སུ་སྐྱེ་བར་འགྱུར
5.250b
ཞིང ། གལ་ཏེ་འདི་ལྟ་བུ་ཉིད་དུ་མི་རྣམས་དང་སྐལ་བ་མཉམ་པར་འོངས་ན་ཡང་ཚེ་ཐུང་བར་འགྱུར་རོ་ཞེས་གསུངས་སོ་ཞེས་བྱ་བ་ལ་སོགས་པ་མི་དགེ་བ་བཅུ་དང ། དགེ་བ་བཅུའི་ལས་ཀྱི་ལམ་དག་རྒྱས་པར་བརྗོད་པ་དང ། བྲམ་ཟེ་དེ་མངོན་པར་དད་པར་གྱུར་ནས་རང་ཉིད་ཀྱིས་བཟའ་བ་དང ། བཅའ་བ་གཙང་ཞིང་བསོད་པས་སྣོད་བཀང་སྟེ་སྨྲས་པ། འཕགས་པ་ཐུགས་བརྩེ་བའི་སླད་དུ་འདི་བཞེས་སུ་གསོལ། ཚེ་དང་ལྡན་པ་འདུན་པས་བསམས་པ། གལ་ཏེ་བླངས་པར་གྱུར་ན་འདི་ལྟ་སྟེ་དཔེར་ན་ཤིང་ལས་བྱས་པའི་སྣོད་དུ་བསྐོལ་བ་དང་འདྲ་བར་བདག་གི་དང་པོ་འདི་ཉིད་ཐ་མར་འགྱུར་རོ་སྙམ་དུ་རིག་ནས་སྨྲས་པ། བྲམ་ཟེ་ཁོ་བོས་བསོད་སྙོམས་ཀྱི་ཕྱེ་ཉུང་ཤས་ཤིག་རྙེད་པ་འདི་ཉིད་ཡོངས་སུ་ལོངས་སྤྱོད་པར་བྱའི། །དད་པས་སྦྱིན་པར་བྱ་བ་བླངས་ཏེ་དོར་དུ་ག་ལ་རུང ། བྲམ་ཟེས་སྨྲས་པ། འཕགས་པ་བདག་ཅག་བྲམ་ཟེ་རྣམས་ཀྱི་ཀུན་ཏུ་སྤྱོད་པ་ནི་གལ་ཏེ་ངན་པ་རྙེད་ནས་བཟང་པོ་རྙེད་པར་གྱུར་ན་ངན་པ་སྤངས་ཏེ་བཟང་པོ་ཡོངས་སུ་ལོངས་སྤྱོད་པར་བགྱིད་པ་ལགས་ན་དེ་ཁྱེད་ཅག་ལ་ཅི་ནོངས། བྲམ་ཟེ་ཁོ་བོ་ཅག་ནི་བསླབ་པའི་གཞི་ཡང་དག་པར་བླངས་པ་ཡིན་ལ། ཁྱེད་ཅག་བྲམ་ཟེ་དག་ནི་བསླབ་པའི་གཞི་ཡང་དག་པར་བླངས་པ་མ་ཡིན་པས་ཁྱེད་ཅག་བྲམ་ཟེ་དག་ནི་ཅི་དགར་འཇུག་པར་བྱེད་པ་ཡིན་ནོ། །ཁོ་བོ་ཅག་ལ་ནི་བཅོམ་ལྡན་འདས་ཀྱིས་འཕགས་པའི་རིགས་བཞི་བཀའ་སྩལ་ཏེ། བཞི་གང་ཞེ་ན། ཆོས་གོས་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། བསོད་སྙོམས་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། གནས་མལ་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། སྤོང་བ་ལ་དགའ་བ་དང ། བསྒོམ་པ་ལ་དགའ་བ་འཕགས་པའི་རིགས་སོ། །བྲམ་ཟེ་དེ་ཤིན་དུ་མངོན་པར་དད་པར་གྱུར་ནས་སྨྲས་པ། འཕགས་པ་འདི་ནི། ཁྱོད་ཀྱི་ཁབ་ལགས་ཀྱིས་དུས་དང་དུས་སུ་གཤེགས་སུ་གསོལ། བྲམ་ཟེ་ཁྱོད་ཀྱི་སྒོ་བ་འདི་ནི་གཤིན་རྗེའི་དབྱུག་པ་དང་འདྲ་བ་ཡིན་པས་སུ་ཡང་འཇུག་ཏུ་མི་སྟེར་གྱིས། ལེགས་པར་བསྒོ་བ་གྱིས་ཤིག་དང ། དེས་ན་ཁོ་བོ་ལ་འགོག་པར་མི་བྱེད་དོ། །
5.251a
བྲམ་ཟེས་སྒོ་བ་བཀུག་སྟེ་ལེགས་པར་བསྒོ་བ། ཀཝའེ་ནང་རྗེ་ཁྱིམ་འདི་འཕགས་པ་འདུན་པའི་ཡིན་གྱིས་ཁྱོད་ཀྱིས་མ་བགག་ཤིག་།ནང་མི་ལ་ཡང་བསྒོ་བ། ཁྱེད་ཅག་གིས་འཕགས་པ་འདུན་པ་ལ་མི་གུས་པར་མི་བྱའོ། །ཚེ་དང་ལྡན་པ་འདུན་པས་བསམས་པ། བྲམ་ཟེ་འདི་ནི་མངོན་པར་དད་པར་གྱུར་ན་འོན་ཀྱང་གལ་ཏེ་འདིར་ལྷུང་བཟེད་ནག་པོ་ཅན་འཇུག་པར་གྱུར་ན། དེས་འདི་ཅི་ནས་ཀྱང་འཁྲུག་པར་བྱེད་པར་འགྱུར་བས་ཐབས་ཀྱི་རྣམ་པ་ཞིག་བྱའོ་སྙམ་ནས། འདུན་པས་སྒོ་བ་དེ་ལ་སྨྲས་པ། ཀཝའེ་ནང་རྗེ་ཁྱོད་ཀྱིས་བྲམ་ཟེ་དེ་ཇི་ལྟར་ཁོ་བོ་ལ་མངོན་པར་དད་པར་གྱུར་པ་མཐོང་ངམ། འཕགས་པ་མཐོང་ངོ ། །དེས་ཁོ་བོ་འབའ་ཤིག་འདིར་འཇུག་ཏུ་གནང་གིས་ལྷུང་བཟེད་ནག་པོ་ཅན་སུ་ཡང་འཇུག་ཏུ་མ་གཞུག་ཅིག་།གལ་ཏེ་འདིར་ལྷུང་བཟེད་ནག་པོ་ཅན་འགའ་ཞིག་འཇུག་ཏུ་བཅུག་ན་ཁོ་བོས་ཁྱོད་ལ་ཁྲིམས་ཆེན་པོ་འཆར་གཞུག་པར་བྱའོ། །འཕགས་པ་ཤིན་དུ་བག་ཡངས་སུ་བཞུད་ཅིག་།ཁྱོད་ཉིད་ཀྱང་རེ་ཤིག་དེའུ་མ་ཆུད་པ་ལགས་ན་ལྷུང་བཟེད་ནག་པོ་ཅན་གཞན་འཇུད་པར་འགྱུར་བ་ལྟ་སྨོས་ཀྱང་ཅི་འཚལ། ཚེ་དང་ལྡན་པ་འདུན་པ་ཡིད་བདེ་བ་སྐྱེས་ཏེ་སོང་ནས་དེ་དུས་དང་དུས་སུ་བྲམ་ཟེ་དེའི་ཁྱིམ་དུ་འགྲོ་བར་བྱེད་དོ། །བྲམ་ཟེས་ཀྱང་དེ་ཁོ་ན་བཞིན་དུ་ཡང་དང་ཡང་དུ་སྟོབས་པར་བྱེད་ན་ཚེ་དང་ལྡན་པ་འདུན་པས་དང་དུ་ལེན་པར་མི་བྱེད་པར་སྦྱིན་པ་དང་ལྡན་པའི་ཆོས་བསྟན་པ་འབའ་ཤིག་བྱས་ཤིང་བྱས་ཤིང་འགྲོ་བར་བྱེད་དོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་འདུན་པས་བྲམ་ཟེ་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གིས་བསྔགས་པ་བརྗོད་ཅིང་དེ་དག་རྒྱ་ཆེར་ལེགས་པར་བཤད་པ་དང ། བྲམ་ཟེས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་འགའ་ཞིག་བགྱིའོ། །བྲམ་ཟེ་དེ་བཞིན་གྱིས་ཤིག་།འཕགས་པ་ཅི་ཞིག་བགྱི། དགེ་འདུན་གྱི་གཙུག་ལག་ཁང་བྱེད་དུ་ཆུག་ཤིག་།བྲམ་ཟེས་བསམས་པ། བདག་གིས་འཕགས་པ་འདུན་པ་ལ་རྣམ་པ་དུ་མར་བསྟབས་ན་འདིས་ལན་འགའ་ཡང་དང་དུ་མ་བླངས་ཏེ། ད་དང་དུ་བླངས
5.251b
པ་གང་ཡིན་པ་འདི་ཡང་དགེ་འདུན་གྱི་ཕྱིར་རོ་སྙམ་ནས་དེ་ངོ་མཚར་སྐྱེས་ནས་སྨྲས་པ། འཕགས་པ་བདག་ལ་ཀཱར་ཥཱ་པ་ཎ་དག་ནི་མཆིས་ན། འོན་ཀྱང་ས་གཞི་ནི་རྒྱལ་པོ་དབང་བས་གང་དུ་དགེ་འདུན་གྱི་གཙུག་ལག་ཁང་བགྱིད་དུ་སྩལ་བའི་དོག་ས་མ་མཆིས་སོ། །བྲམ་ཟེ་ཁྱོད་སྙིང་ལས་ཆུང་ངུར་གྱིས་ཤིག་དང་ཁོ་བོས་རྒྱལ་པོ་ལས་ས་བསླང་བར་བྱའོ། །འཕགས་པ་གལ་ཏེ་དེ་ལྟ་ན་ལེགས་སོ། །ཚེ་དང་ལྡན་པ་འདུན་པས་བསམས་པ། ཇི་ལྟར་བྱ་ཇེ་རྒྱལ་པོ་ལ་བསྟེན་པར་བྱ་འམ་འོན་ཏེ་བློན་པོ་རྣམས་ལ་བསྟེན་པར་བྱ་སྙམ་ནས་དེ་འདི་སྙམ་དུ་སེམས་ཏེ། ལ་ལ་ན་རེ་འདི་སྐད་ཅེས་བསྟེན་པ་ལ་བསྟེན་པར་མི་བྱ་བར་བསྟེན་པ་ལ་བསྟེན་པ་བསྟེན་པར་བྱའོ་ཞེས་ཟེར་རོ་སྙམ་ནས། དེས་བློན་པོ་རྣམས་ལ་བསྟེན་པར་བརྩམས་ཏེ། དེ་དག་ལ་དུས་ལ་ཅུང་ཟད་ཅིག་བསྟེན་པ་དང ། བློན་པོ་རྣམས་ཀྱིས་སྨྲས་པ། འཕགས་པ་བཀའ་སྩལ་པ་ཅི་མཆིས། འདུན་པས་སྨྲས་པ། བཞིན་བཟངས་དག་བྲམ་ཟེ་ཞིག་གིས་དགེ་འདུན་གྱི་ཕྱིར་གཙུག་ལག་ཁང་བྱེད་དུ་བཅུག་ན་ས་གཞི་རྒྱལ་པོ་དབང་བས་གང་དུ་གཙུག་ལག་ཁང་བརྩིག་ཏུ་གཞུག་པའི་ས་མེད་ན་དེའི་ཕྱིར་ས་གཞིའི་ཆེད་དུ་ལྷའི་སྙན་དུ་གསོལ་བ་ཞིག་འདོང་ན་དེ་ཁྱེད་ཅག་གིས་གྲོགས་གྱིས་ཤིག་།འཕགས་པ་གང་གི་ཚེ་རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་པ་དེའི་ཚེ་ཁྱོད་སྦྲན་པར་བགྱི་ཡིས་སྤྱོན་ཅིག་།ཇི་ཙམ་དུས་གཞན་ཞིག་ན་རྒྱལ་པོ་ཚོགས་ཉུང་ངུ་དང་དབེན་པ་ན་འདུག་པའི་ཚེ་བློན་པོ་དེ་དག་གིས་ཚེ་དང་ལྡན་པ་འདུན་པ་ལ། འཕགས་པ་རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་ཀྱིས་སྤྱོན་ཅིག་ཅེས་བང་ཆེན་བཏང་བ་དང ། འདུན་པ་འོངས་ནས་རྒྱལ་པོ་ལ་ཨ་རོག་ཁྱ་ཞེས་བྱས་ཏེ་མཐའ་གཅིག་ཏུ་འདུག་གོ། །བློན་པོ་རྣམས་ཀྱིས་རྒྱལ་པོ་ལ་གསོལ་པ། ལྷ་འདི་ནི་འཕགས་པ་འདུན་པ་ཞེས་བགྱི་སྟེ། ཤཱཀྱ་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་དང་ལྡན་པ་ལགས་སོ། །རྒྱལ་པོས་སྨྲས
5.252a
འཕགས་པ་བྱོན་པ་ལེགས་སོ། །ཅིའི་སླད་དུ་བྱོན། འདུན་པས་སྨྲས་པ། ལྷ་བྲམ་ཟེ་ཞིག་གིས་དགེ་འདུན་གྱི་སླད་དུ་གཙུག་ལག་ཁང་བགྱིད་དུ་སྩལ་ན། ས་གཞི་རྒྱལ་པོ་མངའ་བས་དེའི་དོག་ས་མ་མཆིས་ན་ལྷས་དོག་ས་སྩལ་བར་རིགས་སོ། །འཕགས་པ་རྒྱལ་པོའི་ཕོ་བྲང་འབའ་ཤིག་མ་གཏོགས་པ་གང་དུ་བཞེད་པ་དེར་གཙུག་ལག་ཁང་རྩིག་ཏུ་སྩོལ་ཅིག་།ཚེ་དང་ལྡན་པ་འདུན་བས་ཨ་རོག་ཁྱ་ཞེས་སྨྲས་ཏེ། ཡིད་བདེ་བ་སྐྱེས་ནས་རྒྱལ་པོའི་ཕོ་བྲང་ནས་ཕྱིར་བྱུང་སྟེ་དྲུག་སྡེ་གཞན་དག་གི་གན་དུ་སོང་ནས་དེས་སྨྲས་པ། དགའ་བོ་ཉེ་དགའ་བྲམ་ཟེ་ཆེ་གེ་མོ་ཞིག་གིས་དགེ་འདུན་གྱི་ཕྱིར་གཙུག་ལག་ཁང་བྱེད་དུ་བཅུག་ནས་ཁོ་བོས་རྒྱལ་པོ་ལ་ས་གཞིའི་ཕྱིར་གསོལ་བ་བྱས་ན། རྒྱལ་པོ་ན་རེ་འཕགས་པ་རྒྱལ་པོའི་ཕོ་བྲང་འབའ་ཞིག་མ་གཏོགས་པ་གང་དུ་འདོད་པ་དེར་གཙུག་ལག་ཁང་རྩིག་ཏུ་སྩོལ་ཅིག་ཅེས་ཟེར་གྱིས་ས་གཞི་འདོམས་ཤིག་།དེ་དག་འདུས་ཏེ་བྲམ་ཟེ་དེའི་དྲུང་དུ་སོང་ནས་སྨྲས་པ། བྲམ་ཟེ་རྒྱལ་པོས་བདག་ཅག་ལ་རྒྱལ་པོའི་ཕོ་བྲང་འབའ་ཞིག་མ་གཏོགས་པ་གང་དུ་འདོད་པ་དེར་གཙུག་ལག་ཁང་རྩིག་ཏུ་ཆུག་ཤིག་ཅེས་དམ་པ་བྱིན་གྱིས་ཀར་ཥ་པཱ་ཎ་དག་འོན་ཅིག་དང་གཙུག་ལག་ཁང་རྩིག་ཏུ་གཞུག་གོ། །བྲམ་ཟེ་དེས་དྲུག་སྡེ་དེ་དག་ལ་ཀཱར་ཥ་པཱ་ཎ་དག་བྱིན་ནས། དེ་དག་གིས་ཀཱར་ཥ་པཱ་ཎ་དག་བླངས་ཏེ་ཕན་ཚུན་གྲོས་བྱ་བར་བརྩམས་པ། ཕྱོགས་གང་དུ་གཙུག་ལག་ཁང་རྩིག་ཏུ་གཞུག་ཅེས་གླེངས་སོ། །ཀཽ་ཤམྦི་དང་གདངས་ཅན་གྱི་ཀུན་དགའ་ར་བའི་བར་དག་ན་གནས་གྱི་ཤིང་ལྗོན་པ་ཞིག་ཡོད་པ་དེའི་དྲུང་དུ། བྲམ་ཟེ་འཁོར་ཤིན་དུ་མང་པོ་དང་ལྡན་པ་ཞིག་བྲམ་ཟེའི་ཁྱེའུ་ལྔ་བརྒྱ་བྲམ་ཟེའི་གསང་ཚིག་དག་ཀློག་ཏུ་འཇུད་པ་དེའི་བྲམ་ཟེའི་ཁྱེའུ་ལྔ་བརྒྱ་པོ་དེ་དག་དྲུག་སྡེ་དག་བསོད་སྙོམས་ལ་འཇུག་པ་དང་འབྱུང་བ་ན་ཡང་དང་ཡང་དུ་ཀྱེ་དྲུག་སྡེ་དག་ཅི་བསོད་སྙོམས་མཆོག་དང་བསོད་སྙོམས་དང་པོ་ཐོབ་བམ། སྣོད་ཁེངས་སམ་ཞེས་ཅོ་འདྲི་བར་བྱེད་པས་དེའི་ཚེ་དྲུག་སྡེ་དག་འདི་སྙམ་དུ་སེམས་ཏེ། གནས་ཀྱི་ཤིང་ལྗོན་པ་དེའི་དྲུང་ན་བྲམ་ཟེ་དེའི་སློབ་མ
5.252b
བྲམ་ཟེའི་ཁྱེའུ་དེ་དག་རྟག་ཏུ་བདག་ཅག་ལ་ཀྱེ་དྲུག་སྡེ་དག་ཅི་བསོད་སྙོམས་མཆོག་དང་བསོད་སྙོམས་དང་པོ་ཐོབ་བམ། སྣོད་ཁེངས་སམ་ཞེས་ཅོ་འདྲི་བར་བྱེད་ཀྱིས་དེ་དག་མི་དགའ་བར་བྱ་ཞིང་གནས་ཀྱི་ཤིང་ལྗོན་པ་དེ་གཅོད་དུ་བཅུག་སྟེ་ཕྱོགས་དེར་གཙུག་ལག་ཁང་རྩིག་ཏུ་བཅུག་ན་དེས་ན་ཕྱིན་ཆད་ཡང་དང་ཡང་དུ་ཅོ་འདྲི་བར་མི་བྱེད་དོ་ཞེས་དེ་དག་གིས་གྲོས་བྱས་ནས་ཀར་ཥ་པ་ཎ་དག་ཁྱེར་ཏེ་གླ་མིའི་སྲང་དུ་དོང་ནས་བཞིན་བཟངས་དག་གླ་སྦྱིན་གྱིས་གཙུག་ལག་ཁང་དུ་ལས་གྱིས་ཤིག་ཅེས་སྨྲས་ནས། དེ་དག་གིས་གླ་མི་དག་བསྒྲུབས་སོ། །དྲུག་སྡེ་དག་གིས་གླ་མི་དེ་དག་ཁྱེའུ་སུས་བྱིན་ཏེ་ལུས་བསྐུ་བ་དང ། མགོ་བསྐུ་བ་ཡང་བྱིན་པ་དང ། དེ་དག་མགུ་ནས་སྨྲས་པ། འཕགས་པ་དག་བཞུད་ལ་བདག་ཅག་ལ་སུག་ལས་དག་ཕོབ་ཤིག་།དྲུག་སྡེ་དག་གིས་སྨྲས་པ། ལས་ཀྱང་འབྱུང་བར་འགྱུར་གྱིས་རེ་ཤིག་སྡོད་ཅིག་ཅེས་དེ་དག་གིས་དེ་དག་རེ་ཤིག་བགགས་པ་དང ། ཇི་ཙམ་ན་ཉི་མ་ནུབ་ནས་དེ་དག་གིས་སྨྲས་པ། འཕགས་པ་དག་བདག་ཅག་ད་སླར་མཆི་ཡིས་དེང་གི་གླ་སྩོལ་ཅིག་།དྲུག་སྡེ་དག་གིས་སྨྲས་པ། ཁྱེད་ཅག་གིས་ལས་མང་པོ་ཞིག་བྱས་པས་དེའི་ཕྱིར་གླ་དེད་དམ། དེ་དག་གིས་སྨྲས་པ། འཕགས་པ་དག་ཁྱེད་ཅག་གིས་བདག་ཅག་ལ་བཀའ་སྩལ་པ་གང་ཞིག་བདག་ཅག་གིས་མ་བགྱིས། བཞིན་བཟངས་དག་སྟ་རེ་དང ། གཞོར་དང ། གླེ་བ་དག་ལོང་ཤིག་དང་ལས་བྱེད་དུ་འདོང་ངོ ། །གླ་མི་དེ་དག་དྲུག་སྡེ་དག་དང་ལྷན་ཅིག་སྟ་རེ་དང ། གཞོར་དང ། གླེ་བ་དག་ཐོགས་ཏེ། མིག་ལམ་ཆད་པ་དང་གནས་ཀྱི་ཤིང་ལྗོན་པ་དེའི་གན་དུ་སོང་ནས་དྲུག་སྡེ་དག་གིས་སྨྲས་པ། ཤེས་ལྡན་དག་གནས་ཀྱི་ཤིང་ལྗོན་པ་འདི་ཆོད་ཅིག་།དེ་དག་གིས་སྨྲས་པ། འཕགས་པ་དག་འདི་ནི་གནས་ཀྱི་ཤིང་ལྗོན་པ་ལགས་པས། ཅི་ག་བདག་ཅག་ལ་མགོ་གཉིས་མཆིས་སམ་མི་གཅོད་དོ། །བཀྲེན་པ་དག་ས་གཞི་ནི་རྒྱལ་པོ་དབང་བས་དེས་ཁོ་བོ་ཅག་ལ་རྒྱལ་པོའི་ཕོ་བྲང་འབའ་ཞིག་མ་གཏོགས་པ་གང་དུ་འདོད་པ་དེར་གཙུག་ལག་ཁང་རྩིག་ཏུ་ཆུག་ཅེས་དམ་པ་བྱིན་པས་སུ་ཞིག་ཁྱེད་ཀྱི་མགོ་གཅོད་པར་བྱེད།
5.253a
བག་ཚ་བ་མེད་པར་ཆོད་ཅིག་།དེ་དག་གིས་གནས་ཀྱི་ཤིང་ལྗོན་པ་དེ་བཅད་ནས་ཤིང་དེ་ཐམས་ཅད་ཀྱང་རྩ་བ་ནས་ཕྱུང ། ས་ཕྱོགས་དེ་ཡང་ཅི་ནས་ཀྱང་གནས་ཀྱི་ཤིང་ལྗོན་པ་དེ་ཕྱོགས་གང་ན་འདུག་འདུག་པར་གྱུར་ཅེས་བྱ་བར་མི་ཤེས་པ་དེ་ལྟར་མཉམ་པར་བྱས་སོ། །དྲུག་སྡེ་དག་གིས་ཕྱོགས་དེར་མིག་གིས་བརྟག་པར་བརྩམས་ཏེ། དགའ་བོ་ཉེ་དགའ་ཕྱོགས་འདིར་ནི་བཅོམ་ལྡན་འདས་ཀྱི་དྲི་གཙང་ཁང་བརྩིག་པར་བྱའོ། །ཕྱོགས་འདིར་ནི་སྒོ་ཁང་བྱའོ། །ཕྱོགས་འདིར་ནི་མེ་ཁང་བྱའོ། །ཕྱོགས་འདིར་ནི་རུང་བའི་ཁང་པ་བྱའོ། །ཕྱོགས་འདིར་ནི་ཉེ་བར་གནས་པའི་ཁང་པ་བྱའོ། །ཞེས་མཚན་མ་བྱས་ཏེ་དོང་ངོ ། །བྲམ་ཟེའི་ཁྱེའུ་དེ་དག་གི་ཀུན་ཏུ་སྤྱོད་པ་ནི་རེས་ཀྱིས་གནས་ཀྱི་ཤིང་ལྗོན་པ་དེའི་དྲུང་དུ་ཆག་ཆག་འདེབས་པར་བྱེད། ལེགས་པར་སྐུད་པར་བྱེད། བ་ལང་གི་ལྕི་བ་སར་བའི་བྱུག་པས་ཉུག་པར་བྱེད་པས་ཇི་ཙམ་ན་བྲམ་ཟེའི་ཁྱེའུ་ཞིག་ལ་རེས་བབ་ནས་དེ་ནང་པར་སྔར་ལངས་ཏེ་སོང་བ་དང ། དེས་གནས་ཀྱི་ཤིང་ལྗོན་པ་དེ་མ་མཐོང་ནས་དེ་མཁན་པོའི་གན་དུ་འོངས་ནས་སྨྲས་པ། མཁན་པོ་གནས་ཀྱི་ཤིང་ལྗོན་པ་དེ་མ་མཆིས་སོ། །བྲམ་ཟེས་སྨྲས་པ། ཀཝའེ་བྲམ་ཟེའི་ཁྱེའུ་ཅི་ལོག་པར་མ་སོང་ངམ། མཚན་མོ་གཞན་གྱིས་ཤིང་ལྗོན་པ་དེ་གར་སོང ། བྲམ་ཟེའི་ཁྱེའུ་གཞན་ཞིག་ཀྱང་དེ་དང་ལྷན་ཅིག་གད་མོས་འདེབས་ཤིང་དེས་སྨྲས་པ། མཁན་པོ་བྲམ་ཟེའི་ཁྱེའུ་འདིས་མདང་སུམ་འབྲས་བུའི་རྩབས་འཚལ་བས་དེས་ན་མ་མཐོང་ངོ་ཞེས་མཆིའོ། །བྲམ་ཟེས་བྲམ་ཟེའི་ཁྱེའུ་ཆེས་སྒྲིན་པ་གཞན་ཞིག་བཏང་ན། དེས་ཀྱང་དེ་ཁོ་ན་བཞིན་དུ་མ་མཐོང་ནས། དེ་ཡང་འོངས་ཏེ་སྨྲས་པ། མཁན་པོ་དེ་དེ་བཞིན་ཏེ་གནས་ཀྱི་ཤིང་ལྗོན་པ་དེ་ཡེ་མ་མཆིས་སོ། །དེ་ནས་ཐམས་ཅད་འདུས་ཏེ་དོང་བ་དང ། དེ་དག་གིས་དེ་ཁོ་ན་བཞིན་དུ་མ་མཐོང་ནས། བྲམ་ཟེའི་ཁྱེའུ་དྲན་པ་དང་ལྡན་པ་ཞིག་ཡོད་པ་དེ་ན་རེ་ཕྱོགས་འདི་ན་ནི་མཁན་པོ་གསང་ཚིག་འདོན་པར་མཛད་མཛད་དོ། །ཕྱོགས་འདི་ན་ནི་བདག་སྤྱོད་སྤྱོད་ན
5.253b
དེ་ཅི་ནོངས་ཇི་ལྟར་གྱུར་པ་མ་འཚལ་ཏོ་ཞེས་ཟེར་རོ། །དེ་དག་དེ་ལྟར་སེམས་ཁོངས་སུ་ཆུད་ཅིང་འདུག་པ་ན་མི་ཞིག་འོངས་ནས་དེས་སྨྲས་པ། བྲམ་ཟེ་ཅིའི་ཕྱིར་འཁོར་དང་བཅས་པ་དེ་ལྟར་སེམས་ཁོངས་སུ་ཆུད་ཅིང་འཁོད། ཀྱེ་ནང་པོ་ཕྱོགས་འདི་ན་གནས་ཀྱི་ཤིང་ལྗོན་པ་ཞིག་འདུག་པར་གྱུར་པ་དེ་མཚན་མོ་གཞན་གྱིས་གར་སོང་མ་ཤེས་སོ། །བྲམ་ཟེ་ཁོ་བོས་མདང་སུམ་མིག་ལ་མ་ཆད་པ་ན་ཕྱོགས་འདི་ན་དྲུག་སྡེ་དག་མི་སྟ་རེ་དང ། གཞོར་དང ། གླེ་བ་དག་གིས་ལག་བྲེལ་བ་དང་ལྷན་ཅིག་འདུག་པ་མཐོང་ན་དེ་དག་གིས་བཅད་པར་མ་གྱུར་ཏམ། བྲམ་ཟེས་སྨྲས་པ། ཀྱེ་ནང་པོ་འོན་ཏང་དེ་ལགས་སོ་ཞེས་དེ་དག་དེ་བཞིན་དུ་སེམས་ཁོངས་སུ་ཆུད་ཅིང་འཁོད་པ་ན་དྲུག་སྡེ་དག་ལྷགས་ནས་དེ་དག་གིས་སྨྲས་པ། བྲམ་ཟེ་དག་ཅིའི་ཕྱིར་སེམས་ཁོངས་སུ་ཆུད་ཅིང་འཁོད། འཕགས་པ་དག་ཕྱོགས་འདི་ན་གནས་ཀྱི་ཤིང་ལྗོན་པ་ཞིག་མཆིས་པར་གྱུར་པ་དེ་མཚན་མོ་གཞན་གྱིས་གར་མཆིས་མ་འཚལ་ཏོ། །དྲུག་སྡེ་དག་གིས་བགད་པར་བརྩམས་པ་དང ། བྲམ་ཟེས་སྨྲས་པ། འཕགས་པ་དག་ཁྱེད་ཅག་གིས་མ་བཀུམ་འམ། བཀྲེན་པ་དག་ཁྱེད་ཅག་རྟག་ཏུ་དེའི་དྲུང་ན་འཁོད་ཅིང་ཁོ་བོ་ཅག་ལ་ཀྱེ་དྲུག་སྡེ་དག་ཅི་བསོད་སྙོམས་མཆོག་དང ། བསོད་སྙོམས་དང་པོ་ཐོབ་བམ། སྣོད་ཁེངས་སམ་ཞེས་ཅོ་འདྲི་བར་བྱེད་པས། དེའི་ཕྱིར་འདི་ལྟར་ཁྱེད་ཅག་མི་དགའ་བར་བྱའོ། །དེ་དག་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་གནས་ཀྱི་ཤིང་ལྗོན་པ་ཡང་བཅད་པར་གྱུར་ཏོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །ཐོས་པ་གཅིག་ནས་གཅིག་ཏུ་བརྒྱུད་པས་ཀཽ་ཤམྦི་ན་གནས་པའི་སྐྱེ་བོའི་ཚོགས་དང ། ཡུལ་ཐ་དད་པ་ན་གནས་པ་དེར་ལྷགས་པ་དག་གིས་ཀྱང་ཐོས་ནས་དེ་དག་ཀྱང་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ན་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ཅིང་གང་དག་མ་དད་པ་དེ་དག་གིས་ནི་བསོད་སྙོམས་ལ
5.254a
ཞུགས་པ་དག་ལ་ཡང་བསོད་སྙོམས་སྦྱིན་པར་མི་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུད་ན་གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང ། རྩོད་པ་མེད་པ་དང ། བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བ་འམ། རྩོད་པ་དང་བཅས་པ་འམ། བརྩམ་དུ་མི་རུང་བར་བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་བརྩིག་ཏུ་འཇུད་དམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ན་དགེ་འདུན་ལྷག་མའོ། །དགེ་སློང་གིས་ཞེས་བྱ་བ་ནི། དྲུག་སྡེ་འམ། གཞན་ཡང་ཆོས་འདི་བས་སོ། །བདག་པོ་ཡོད་པ་ཞེས་བྱ་བ་ནི། གང་ལ་བདག་པོ་སྐྱེས་པ་འམ། བུད་མེད་དམ། མ་ནིང་ཡོད་པའོ། །དགེ་འདུན་གྱི་ཕྱིར་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་ཕྱིར་རོ། །གཙུག་ལག་ཁང་ཞེས་བྱ་བ་ནི། གང་དུ་སྤྱོད་ལམ་བཞི་པོ་འཆག་པ་དང ། འགྲེང་བ་དང ། འདུག་པ་དང ། ཉལ་བ་དག་ཤོང་བའོ། །ཆེན་པོ་ཞེས་བྱ་བ་ནི་ཆེན་པོ་གཉིས་པོ་སྦྱིན་པར་བྱ་བ་དང ། ཚད་ཀྱིས་ཏེ། དེ་ལས་འདིར་ནི་སྦྱིན་པར་བྱ་བས་ཆེན་པོར་དགོངས་པ་ཡིན་གྱི་ཚད་ཀྱིས་ནི་མ་ཡིན་ནོ། །རྩིག་ཏུ་འཇུད་ན་ཞེས་བྱ་བ་ནི་བདག་ཉིད་ཀྱིས་སམ་གཞན་གྱིས་སོ། །གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ་ཞེས་བྱ་བ་ལ། གཞི་བལྟ་བའི་ཕྱིར་ཞེས་བྱ་བ་ནི་ས་གཞི་རུང་བ་དང ། རྩོད་པ་མེད་པ་དང ། བརྩམ་དུ་རུང་བ་ཉིད་བལྟ་བའི་ཕྱིར་རོ། །དགེ་སློང་དེས་ཤེས་བྱ་བ་ནི་དགེ་སློང་གང
5.254b
ཡིན་པ་དེས་སོ། །དགེ་སློང་དག་བཀྲི་བར་བྱའོ། །ཞེས་བྱ་བ་ནི་དེ་ན་དགེ་སློང་གང་དག་ཡོད་པ་དག་ཡིན་གྱི། ཇི་ཙམ་གྱིས་གཞི་དེ་མིག་གིས་བལྟས་པར་འགྱུར་བའི་དགེ་སློང་དེ་ཙམ་བཀྲི་བར་བྱ་བ་ནི་མ་ཡིན་ནོ། །གལ་ཏེ་དེ་ན་སྦྲུལ་གྱི་གནས་སམ། སྡིག་པའི་གནས་སམ། སྲིན་གྱི་གནས་སམ། གྲོག་མའི་གནས་ཡོད་པ་ཡིན་ན་མི་རུང་བ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་རུང་བ་ཡིན་ན་དེའི་འོག་ཏུ་ཉེ་བར་བརྟག་པར་བྱ་སྟེ། གལ་ཏེ་རྒྱལ་པོའི་གཞི་འམ། མཆོད་རྟེན་གྱི་གཞི་འམ། ཁྱིམ་བདག་གི་གཞི་འམ། མུ་སྟེགས་ཅན་གྱི་གཞི་འམ། དགེ་སློང་མའི་དབྱར་ཁང་འམ། ཤིང་ལྗོན་པ་གཅད་པར་བྱ་བ་ཡོད་ན་རྩོད་པ་དང་བཅས་པ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་གཞི་རུང་བ་དང ། རྩོད་པ་མེད་པ་ཡིན་ན་དེའི་ཉེན་ཀོར་འདོམ་གང་ཁོ་ར་ཁོར་ཡུག་ཉེ་བར་བརྟག་པར་བྱ་སྟེ། གལ་ཏེ་དེ་ན་གཞི་ཆུ་ཀླུང་ལ་རྟེན་ཏམ། ཁྲོན་པ་ལ་རྟེན་ཏམ། ལམ་ལ་རྟེན་ཏམ། ངམ་གྲོག་ལ་རྟེན་པ་ཡིན་ན་བརྩམ་དུ་མི་རུང་བའི་ཕྱི་བསྟན་པར་མི་བྱའོ། །གལ་ཏེ་གཞི་དེ་རུང་བ་དང ། རྣམ་པ་ཐམས་ཅད་ཡོངས་སུ་རྫོགས་པ་ཡིན་ན། དགེ་སློང་དེས་གཙུག་ལག་ཁང་དུ་སོང་སྟེ་གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་དག་ལ་བསྐུལ་ནས་དགེ་འདུན། ཐམས་ཅད་འདུག་ཅིང་འཐུན་པར་གྱུར་པ་ལ་མཆིལ་ལྷམ་ཕུད་དེ་བླ་གོས་ཕྲག་པ་གཅིག་ཏུ་བྱས་ནས། རྒན་རིམས་བཞིན་དུ་ཕྱག་འཚལ་ཏེ། རྒན་པའི་མཐའ་ལོགས་སུ། ཙོག་པུར་འདུག་ནས་ཐལ་མོ་སྦྱར་ཏེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་ལག་གི་བླ་མིང་འདི་ཞེས་བགྱི་བས་གཙུག་ལག་ཁང་གི་གཞི་རུང་བ་རྩོད་པ་མ་མཆིས་པ། བརྩམ་དུ་རུང་བ་ཞིག་བཙལ་ཏེ། བདག་དགེ་སློང་ལག་གི་བླ་མིང་འདི་ཞེས་བགྱི་བ་དགེ་འདུན་ལས་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་ལག་གི་བླ་མིང་འདི་ཞེས་བགྱི་བ་ལ་གཙུག་ལག་ཁང་གི
5.255a
གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་སློང་དེ་དག་གིས་ཀྱང་དགེ་སློང་དེ་ལ་དད་པས་སམ་ཡིད་ཆེས་པས་འགྲོ་བར་མི་བྱ་བར་འདི་ལྟར་དགེ་འདུན་ཐམས་ཅད་དེར་འགྲོ་བར་བྱ་བ་འམ། དགེ་འདུན་གྱིས་བསྐོས་པའི་དགེ་སློང་དག་བཏང་བར་བྱའོ། །དེ་དག་གིས་གཞི་དེ་མིག་གིས་བལྟ་བར་བྱ་ཞིང་གལ་ཏེ་དེ་ན་སྦྲུལ་གྱི་གནས་སམ། སྡིག་པའི་གནས་སམ། སྲིལ་གྱི་གནས་སམ། གྲོག་མའི་གནས་ཡོད་པ་ཡིན་ན་མི་རུང་བ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་རུང་བ་ཡིན་ན་དེའི་འོག་ཏུ་ཉེ་བར་བརྟག་པར་བྱ་སྟེ། གལ་ཏེ་རྒྱལ་པོའི་གཞི་འམ། མཆོད་རྟེན་གྱི་གཞི་འམ། ཁྱིམ་བདག་གི་གཞི་འམ། མུ་སྟེགས་ཅན་གྱི་གཞི་འམ། དགེ་སློང་མའི་དབྱར་ཁང་ངམ། ཤིང་ལྗོན་པ་གཅད་པར་བྱ་བ་ཡོད་ན་རྩོད་པ་དང་བཅས་པ་ཡིན་པའི་ཕྱིར་བསྟན་པར་མི་བྱའོ། །གལ་ཏེ་གཞི་རུང་བ་དང ། རྩོད་པ་མེད་པ་ཡིན་ན་དེའི་ཉེན་ཀོར་འདོམ་གང་ཁོ་ར་ཁོར་ཡུག་ཉེ་བར་བརྟག་པར་བྱ་སྟེ། གལ་ཏེ་དེ་ན་གཞི་ཆུ་ཀླུང་ལ་རྟེན་ཏམ། ཁྲོན་པ་ལ་རྟེན་ཏམ། ལམ་ལ་རྟེན་ཏམ། ངམ་གྲོག་ལ་རྟེན་པ་ཡིན་ན་བརྩམ་དུ་མི་རུང་བའི་ཕྱིར་བསྟན་པར་མི་བྱའོ། །གལ་ཏེ་གཞི་དེ་རུང་བ་དང ། རྣམ་པ་ཐམས་ཅད་ཡོངས་སུ་རྫོགས་པ་ཡིན་ན་དེའི་ཚེ། དགེ་སློང་དེ་དག་གིས་རྒན་པའི་མཐའ་ལོགས་སུ་གུས་པ་དང་བཅས་པས་འདུག་སྟེ། འདི་སྐད་ཅེས་བརྗོད་པར་བྱའོ། །གནས་བརྟན་དག་གཞི་དེ་རུང་བ་དང ། རྩོད་པ་མ་མཆིས་པ་དང ། བརྩམ་དུ་རུང་བ་ལགས་ཀྱིས། ད་དེའི་དུས་ལ་བབ་པ་མཁྱེན་པར་མཛོད་ཅིག་།དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདིས་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་ཞིག་བཙལ་ཏེ། དགེ་སློང་ལག་གི་བླ་མིང་འདི་ཞེས་བགྱི་བ་འདི
5.255b
དགེ་འདུན་ལས་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདིས་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་ཞིག་བཙལ་ཏེ། དགེ་སློང་ལག་གི་བླ་མིང་འདི་ཞེས་བགྱི་བ་དགེ་འདུན་ལས་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་གཙུག་ལག་ཁང་གི་གཞི་རུང་བ་རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩོལ་ན། ཚེ་དང་ལྡན་པ་གང་དག་དགེ་སློང་ལག་གི་བླ་མིང་འདི་ཞེས་བགྱི་བ་ལ་གཙུག་ལག་ཁང་གི་གཞི་རུང་བ་རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་གཙུག་ལག་ཁང་གི་གཞི་རུང་བ། རྩོད་པ་མ་མཆིས་པ། བརྩམ་དུ་རུང་བ་བསྟན་པ་སྩལ་ལགས་ཏེ། འདི་ལྟར་ཅང་མི་གསུང་བས། དེ་དེ་བཞིན་དུ་འཛིན་ཏོ། །དགེ་འདུན་གྱིས་དགེ་སློང་ལག་གི་བླ་གང་ལ་གཙུག་ལག་ཁང་གི་གཞི་རུང་བ། རྩོད་པ་མེད་པ། བརྩམ་དུ་རུང་བ་བསྟན་པ་བྱིན་པ་དེས་གཙུག་ལག་ཁང་རྩིག་ཏུ་གཞུག་པར་བྱ་སྟེ། འདི་ལ་འགྱོད་པར་མི་བྱའོ། །ཁྲིད་པའི་དགེ་སློང་དག་གིས་ཀྱང་ཞེས་བྱ་བ་ནི་དེར་དགེ་སློང་གང་དག་ཁྲིད་པ་དག་གིས་ཀྱང་ངོ ། །གཞི་ཞེས་བྱ་བ་ནི་གཙུག་ལག་ཁང་གི་དབང་དུ་བྱས་པའི་གཞི་གང་ཡིན་པའོ། །རུང་བ་ཞེས་བྱ་བ་ནི་སྦྲུལ་གྱི་གནས་དང ། སྡིག་པའི་གནས་ལ་སོགས་པ་དང་བྲལ་བའོ། །རྩོད་པ་མེད་པ་ཞེས་བྱ་བ་ནི་ཐབ
5.256a
མོ་དང ། མཚང་འདྲུ་བ་ལ་སོགས་པ་དང་བྲལ་པའོ། །བརྩམ་དུ་རུང་བར་ཞེས་བྱ་བ་ནི་དེའི་ཉེན་ཀོར་འདོམ་གང་ཁོ་ར་ཁོར་ཡུག་ན་སྐྱོན་མེད་པར་རོ། །བལྟ་བར་བྱའོ་ཞེས་བྱ་བ་ནི་སོ་སོར་བརྟག་པར་བྱའོ། །གལ་ཏེ་དགེ་སློང་གིས་གཞི་མི་རུང་བ་འམ་ཞེས་བྱ་བ་ནི་སྦྲུལ་དང་སྡིག་པ་ལ་སོགས་པའི་གནས་ཀྱི་ཤས་ཆེ་བའོ། །རྩོད་པ་དང་བཅས་པ་འམ་ཞེས་བྱ་བ་ནི་ཐབ་མོ་དང་བཅས་པ་དང་མཚང་འདྲུ་བ་དང་བཅས་པ་དང ། རྩོད་པ་དང་བཅས་པ་དང ། འགྱེད་པ་དང་བཅས་པའོ། །བརྩམ་དུ་མི་རུང་བ་ཞེས་བྱ་བ་ནི་གང་གི་ཉེན་ཀོར་འདོམ་གང་ཁོ་ར་ཁོར་ཡུག་མེད་པར་རོ། །བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུད་དམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ན་དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་གིས་དགེ་འདུན་གྱི་ཕྱིར་གཙུག་ལག་ཁང་བྱེད་དུ་འཇུད་ཅིང་མི་རུང་བར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་གི་གན་དུ་སོང་སྟེ། འདི་སྐད་ཅེས་དགེ་འདུན་གྱི་ཕྱིར་གཙུག་ལག་ཁང་རུང་བ། རྩོད་པ་མེད་པ། བརྩམ་དུ་རུང་བ་བསྟན་པ་བྱེད་དུ་ཆུག་ཤིག་ཅེས་སྨྲས་པ་ལས། གལ་ཏེ་དེས་དགེ་འདུན་གྱི་ཕྱིར་གཙུག་ལག་ཁང་བྱེད་དུ་འཇུད་ཅིང ། མི་རུང་བ་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན། བྱེད་པ་པོ་ལ་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ
5.256b
འཇུད་ན་བྱེད་པ་པོ་ལ་དགེ་འདུན་ལྷག་མར་འགྱུར་རོ། །གལ་ཏེ་དེ་དེའི་གན་དུ་སོང་སྟེ་འདི་སྐད་ཅེས་ལེགས་པར་བྱས་སོ། །ཤིན་དུ་བྱས་སོ། །ངས་ཁྱོད་ལ་འདི་ལྟར་བསྒོའོ་ཞེས་ཟེར་ཞིང་དེས་ཀྱང་དེ་ལ་ཤིང་ངམ། རྩཝ་འམ། ལྕི་བ་འམ། ས་འཇིམ་འབུལ་བར་བྱེད་ལ། གལ་ཏེ་དེས་མི་རུང་བར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་གཉི་ག་ལ་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་གཉི་ག་ལ་དགེ་འདུན་ལྷག་མར་འགྱུར་རོ། །གལ་ཏེ་དེ་དེའི་གན་དུ་སོང་སྟེ་འདི་སྐད་ཅེས་ལེགས་པར་མ་བྱས་སོ། །ཤིན་ཏུ་མ་བྱས་སོ། །ངས་ཁྱོད་ལ་འདི་ལྟར་མ་བསྒོའོ་ཞེས་ཟེར་ཞིང་དེས་དེ་ལ་ཤིང་ངམ། རྩཝ་འམ། ལྕི་བ་འམ། ས་འཇིམ་འབུལ་བར་མི་བྱེད་ལ་གལ་ཏེ་དེས་མི་རུང་བར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་བྱེད་པ་པོ་ལ་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་བྱེད་པ་པོ་ལ་དགེ་འདུན་ལྷག་མར་འགྱུར་རོ། །བྱས་པ་རྙེད་པ་དང ། བྱས་པ་ལ་ལོངས་སྤྱོད་པ་ལ་ནི་ལྟུང་བ་མེད་དོ། །རྙིང་པ་འཆོས་པ་ལ་ཡང་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཙུག་ལག་ཁང་གི་དགེ་འདུན་ལྷག་མ་སྟེ་བདུན་པ་རྫོགས་སྷོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་བཅུ་དགུ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་སྡིག་བྱུང་ན། གྱད་ཀྱི་སྣ་ཆེན་པོ་ལ་གཏོགས་པ། རྒྱལ་སྡེ་ཞེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ
5.257a
གཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ། གྱད་རྣམས་ལ་ཅོད་པན་མེད་པའི་རྒྱལ་སྲིད་བྱེད་དུ་འཇུད་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་ཀྱང་དེ་ལ་བུ་ཡང་མེད། བུ་མོ་ཡང་མེད་ནས་དེས་བུ་མེད་ཅིང་བུ་མངོན་པར་འདོད་པས་ཞི་བ་དང ། ཆུ་ལྷ་དང ། ལུས་ངན་དང ། བརྒྱ་བྱིན་དང ། ཚངས་པ་ལ་སོགས་པ་དག་ལ་གསོལ་བ་འདེབས་ཤིང ། ལྷའི་བྱེ་བྲག་གཞན་འདི་ལྟ་སྟེ། ཀུན་དགའ་ར་བའི་ལྷ་དག་དང ། ཚལ་གྱི་ལྷ་དག་དང ། བཞི་མདོའི་ལྷ་དག་དང ། སུམ་མདོའི་ལྷ་དག་དང ། གཏོར་མ་ལེན་པའི་ལྷ་དག་དང ། ལྷན་ཅིག་སྐྱེས་པ་དག་དང ། ཆོས་འཐུན་པ་དག་དང ། རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་རྟེན་ན་གང་གསོལ་བ་འདེབས་པའི་རྒྱུ་ལས་བུ་དང་བུ་མོ་དག་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་བུ་མ་ཡིན་ཏེ། གལ་ཏེ་དེ་ལྟར་འགྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕ་དང་མ་གཉིས་ཆགས་པར་གྱུར་ཅིང་འདུས་པ་དང ། མ་དུས་ལ་བབ་ཅིང་ཟླ་མཚན་དང་ལྡན་པ་དང ། དྲི་ཟ་ཉེ་བར་གནས་ཤིང་འཇུག་འདོད་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ན་སེམས་ཅན་སྲིད་པ་ཐ་མ་པ་སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང ། སྐྱེ་བ་དོན་དུ་མི་གཉེར་བ་ལུས་ཐ་མ་འཛིན་པ་ཞིག་ཀྱང ། ལྷའི་རིས་བཟང་པོ་ཞིག་ནས་ཤི་འཕོས་ཏེ་དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ།
5.257b
ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ་ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་དེ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ་གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་ཁྱིམ་ཐབ་ལ་སྨྲས་པ། རྗེའི་སྲས་བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་གྱིས་དགྱེས་པ་བསྐྱེད་དུ་གསོལ། དེ་ཡང་ཡིད་དགའ་ཞིང་ཡིད་དགའ་ནས་རོ་སྟོད་བསྲང་སྟེ། ལག་པ་གཡས་པ་བརྐྱང་ནས་འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པས་བུའི་ངོ་མཐོང་བ་དང ། ཁོ་བོ་དང་འཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་ལ་སྤྱོད་པ་དང ། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང ། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུ་འམ། མང་པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞི་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚ་བ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་ཆེ་བ་དང ། མངར་བ་དང ། ཚ་བ་དང ། བསྐ་བ་རྣམ་པར་སྤངས་པའི་ཟས་དག་དང ། དོ་ཤལ་དང ། སེ་མོ་དོ་དང །
5.258a
རྒྱན་གྱིས་ཀླུབས་པའི་ལུས་ལ་ལྷའི་བུ་མོ་དགའ་བའི་ཚལ་ན་རྣམས་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུར་དང ། ཤོད་ཀྱི་གཞིར་མི་འབབ་པ་དང ། དེ་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུད་དོ། །དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་བོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་ཡི་མིང་ཅིར་གདགས་ཤེས་མིང་འདོག་པར་བྱེད་དོ། །ཁྱེའུ་དེའི་ཀུན་དུ་སྤྱོད་པ་ནི་ཇི་སྲིད་དུ་མལ་ཆེན་པོ་ནས་མ་ཕབ་པ་དེ་སྲིད་དུ་བཤང་བ་དང་གཅི་བ་མི་བྱེད་པ་ཡིན་ལ། ཡུལ་དབུས་ན་ཀུན་དུ་སྤྱོད་པ་ནི་གང་མཁས་པ་སྤྱོད་པ་གསལ་བ་དེ་ལ་ནོར་ལྟ་བུ་ཞེས་ཟེར་བས་ཉེ་དུ་དེ་དག་གིས་སྨྲས་པ། ཤེས་ལྡན་དག་ཁྱེའུ་འདི་གྱད་གྱི་སྣ་ཆེན་པོ་ལ་གཏོགས་པ་རྒྱལ་སྡེའི་བུ་ཡང་ཡིན་ལ། ཇི་སྲིད་དུ་མལ་ཆེན་པོ་ནས་མ་ཕབ་པ་དེ་སྲིད་དུ་བཤང་བ་དང་གཅི་བ་མི་བྱེད་དེ། མཁས་པ་སྤྱོད་པ་གསལ་བས་ནོར་ལྟ་བུ་ཡང་ཡིན་པའི་ཕྱིར་ཁྱེའུ་འདིའི་མིང་གྱད་བུ་ནོར་ཞེས་བྱའོ་ཞེས་དེའི་མིང་གྱད་བུ་ནོར་ཞེས་བྱ་བར་བཏགས་སོ། །ཉི་མ་གང་ལ་གྱད་བུ་ནོར་བཙས་པའི་ཉི་མ་དེ་ཉིད་ལ་བློན་པོ་ལྔ་བརྒྱ་དག་ལ་ཡང་བུ་དག་བཙས་ཏེ་དེ་དག་གི་མིང་ཡང་ཁྱིམ་དང་འཐུན་པ་དག་ཏུ་བཏགས་ཤིང ། དེ་དག་ཀྱང་གྱད་བུ་ནོར་གྱིས་ནེའུ་ལྡངས་སུ་བྱས་སོ། །ཁྱེའུ་གྱད་བུ་ནོར་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེད་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་པར་བྱེད་སྐྱེད་པར་བྱེད་ཅིང ། རྫིང་ན་གནས
5.258b
པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་མ་མའི་པང་ན་འདུག་པ་ན་བྲམ་ཟེ་མཚན་མཁན་ཞིག་གིས་མཐོང་ནས་དེས་དེ་ལ་ཤིན་དུ་ངེས་པར་བརྟག་པར་བྱ་སྟེ་དེས་བསམས་པ། ཁྱེའུ་འདི་ནི་རྐང་གཉིས་པ་བསོད་ནམས་ཀྱི་ཞིང་ཡིན་ཏེ། གང་དག་འདི་ལ་མཆོད་པ་དག་བྱེད་པ་དེ་དག་གི་མཆོད་པ་བྱས་པ་དེ་དག་ནི་ཤིན་དུ་འབྲས་བུ་ཆེན་པོ་དང ། ཕན་ཡོན་ཆེན་པོ་དང ། གསལ་བ་ཆེན་པོ་དང ། ཡངས་པ་ཆེན་པོར་འགྱུར་རོ་སྙམ་ནས། བྲམ་ཟེ་མཚན་མཁན་དེས་མ་མ་དེ་ལ་སྨྲས་པ། ཁྱེའུ་འདི་ཁོ་བོ་ལ་ཡུད་ཙམ་ཞིག་བྱིན་ཅིག་དང་ཁོ་བོ་འདི་ལ་མཆོད་པ་དག་བྱའོ། །མ་མས་སྨྲས་པ། བྲམ་ཟེ་ཁོ་མོ་ལ་ཁྱེའུ་སྦྱིན་པའི་དབང་མེད་ཀྱིས་གལ་ཏེ་ཁྱོད་ཁྱེའུ་འདོད་ན་དམག་དཔོན་གྱི་གན་དུ་སོང་ལ་གསོལ་ཅིག་།དེ་ནས་བྲམ་ཟེ་དེ་གྱད་ཀྱི་སྣ་ཆེན་པོ་ལ་གཏོགས་པའི་གན་དུ་སོང་སྟེ། ཤིས་པ་བརྗོད་པ་སྔར་བྱས་ནས་སྨྲས་པ། དམག་དཔོན་ཁྱོད་ཀྱི་ཁྱེའུ་འདི་ནི་རྐང་གཉིས་པ་བསོད་ནམས་ཀྱི་ཞིང་ཡིན་ཏེ་གང་དག་འདི་ལ་མཆོད་པ་དག་བྱེད་པ་དེ་དག་གི་མཆོད་པ་བྱས་པ་དེ་དག་ནི་ཤིན་དུ་འབྲས་བུ་ཆེན་པོ་དང ། ཕན་ཡོན་ཆེན་པོ་དང ། གསལ་བ་ཆེན་པོ་དང ། ཡངས་པ་ཆེན་པོར་འགྱུར་བས་དེའི་ཕྱིར་ཁྱེའུ་འདི་ཁོ་བོ་ལ་ཡུད་ཙམ་ཞིག་བྱིན་ཅིག་དང ། ཁོ་བོས་འདི་ལ་མཆོད་པ་དག་བྱའོ། །དམག་དཔོན་གྱིས་སྨྲས་པ། བྲམ་ཟེ་གལ་ཏེ་དེ་ལྟ་ན་སྦྱིན་གྱིས་ཁྱེར་ཅིག་།བྲམ་ཟེ་དེ་ཡིད་རབ་ཏུ་དགའ་བས་ཁྱེའུ་དེ་རང་གི་ཁྱིམ་དུ་ཁྱེར་ནས་ཆུང་མའི་དྲུང་དུ་ཡོན་ཏན་བརྗོད་དེ་སྨྲས་པ། བཟང་མོ་ཤེས་པར་གྱིས་ཤིག་།ཁྱེའུ་འདི་ནི་རྐང་གཉིས་པ་བསོད་ནམས་ཀྱི་ཞིང་ཡིན་ཏེ། གང་དག་འདི་ལ་མཆོད་པ་དག་བྱེད་པ་དེ་དག་གི་མཆོད་པ་བྱས་པ་དེ་དག་ནི་ཤིན་དུ་འབྲས་བུ་ཆེན་པོ་དང ། ཕན་ཡོན་ཆེན་པོ་དང ། གསལ་བ་ཆེན་པོ་དང ། ཡངས་པ་ཆེན་པོར་འགྱུར་བས་དེའི་ཕྱིར་འདི་ལ་མཆོད་པ་དག་གྱིས་ཤིག་།དེས་དེའི་ཡོན་ཏན་བརྗོད་པ་ཐོས་ནས་ཡིད་བདེ་བ་སྐྱེས་ཏེ་སྨྲས་པ། བྲམ་ཟེ་གལ་ཏེ་དེ་ལྟ་ན་རེ་ཤིག་གཞེས་ཤིག་དང་ཁྱིམ་གྱི་གོ་རིམས་དག་བགྱིའོ་ཞེས་དེས་ཁྱིམ
5.259a
བྱུག་པས་བྱུགས་ཤིང་ཞལ་ཞལ་བྱས་ནས་རྩ་ལག་གི་སྐྱེ་བོ་སྙིང་དུ་སྡུག་ཅིང་འབྲེལ་བ་དག་འགྲོན་དུ་བོས་ནས་དེའི་འོག་ཏུ་ཁྱེའུ་དེ་བཀུར་སྟི་ཆེན་པོས་དྲིལ་ཕྱིས་བྱས་ཤིང་ཁྲུས་བྱས་ཏེ། སྤོས་དང ། མེ་ཏོག་དག་གིས་བརྒྱན་ནས་སྦྲང་རྩི་དང ། འོ་མས་ལེགས་པར་བསྙོད་དོ། །དེ་ལྟར་བརྒྱན་ཅིང་གཉེན་འདབ་ཀྱིས་ཡོངས་སུ་བསྐོར་ནས་རང་གི་ཁྱིམ་དུ་ཕྱིར་ཁྲིད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང ། གྲངས་དང ། རྩིས་དང ། ལག་རྩིས་དང ། དབྱུང་བ་དང ། གཞུག་པ་དང ། གཞག་པ་ལ་ཉེ་བར་ཞུགས་ནས་དེ་ཡི་གེའི་མཐར་ཕྱིན་ཅིང་འབྱེད་པ་དང ། ཀློག་པ་དང ། མཁས་པ་དང ། སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །རྒྱལ་པོ་རྒྱལ་རིག་སྤྱི་བོ་ནས་དབང་བསྐུར་བ། ལྗོངས་ཀྱི་དབང་ཕྱུག་མཐུ་དང་བརྩོན་འགྲུས་ཐོབ་པ། ས་ཆེན་པོའི་དཀྱིལ་འཁོར་མངོན་པར་རྒྱལ་བར་བྱས་ཏེ་གནས་པ་རྣམས་ཀྱི་བཟོའི་གནས་དང ། ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉར་བཞོན་པ་དང ། རྟ་ལ་བཞོན་པ་དང ། ཤིང་རྟའི་ཐབས་དང ། རལ་གྲིའི་ཐབས་དང ། འཕོང་དང ། ཕྱིར་བསྣུར་བ་དང ། མདུན་དུ་བསྣུར་བ་དང ། ལྕགས་ཀྱུས་བསྒྱུར་ཐབས་དང ། ཞགས་པས་གདབ་པ་དང ། མདའ་བོ་ཆེ་འཕེན་ཐབས་དང ། འཛིན་སྟངས་དང ། གོམས་སྟངས་དང ། ཐོར་ཚུགས་དང ། གཅད་པ་དང ། དྲལ་བ་དང ། དབུག་པ་དང ། གནས་ལྔ་པོ་འདི་ལྟ་སྟེ། རྒྱང་ནས་ཕོག་པ་དང ། སྒྲ་གྲག་པར་ཕོག་པ་དང ། གནད་དུ་ཕོག་པ་དང ། མི་འཆོར་བར་ཕོག་པ་དང ། ཚབས་ཆེ་བ་དེ་དག་ལ་ཡང་ཞུགས་ཤིང་བྱང་བར་གྱུར་ཏོ། །བློན་པོའི་བུ་ལྔ་བརྒྱ་པོ་དེ་དག་ཀྱང་བཟོའི་གནས་དང ། ལས་ཀྱི་གནས་དག་ལ་བྱང་བར་གྱུར་ཏོ། །
5.259b
ཕས་དེའི་ཆུང་མའི་འཁོར་གསུམ་པོ་རབ་དང ། འབྲིང་དང ། ཐ་མ་དག་རྣམ་པར་བཞག་གོ། །འདུག་པའི་གནས་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ། །བསྐྱེད་མོས་ཚལ་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ། །དེ་སྟེང་གི་ཁང་བཟངས་ཀྱི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེའི་ནེའུ་ལྡངས་ལྔ་བརྒྱ་པོ་དེ་དག་ཀྱང་དུས་གསུམ་དུ་དེ་བལྟ་བའི་ཕྱིར་འོང་ཞིང་དེ་དག་དང་ལྷན་ཅིག་སྟེན་གྲོགས་ཀྱི་དགའ་བས་རྩེ་མོ་རྣམ་པ་སྣ་ཚོགས་དག་གིས་རྩེ་བར་བྱེད་དོ། །ཇི་ཙམ་དུས་གཞན་ཞིག་ན་གཞོན་ནུ་ལྔ་བརྒྱ་པོ་དེ་དག་ནང་པར་སྔར་ལངས་ཏེ་རི་དགས་ཤོར་དུ་དོང་བ་དང ། དེ་དག་གིས་དེའི་ཉིན་མོ་རི་དགས་གཅིག་ཀྱང་མ་རྙེད་ནས་དེ་དག་གིས་བསམས་པ། དེང་བདག་ཅག་གིས་རི་དགས་གཅིག་ཀྱང་མ་རྙེད་པས་ཇི་ལྟར་ལག་པ་སྟོང་པ་དག་གིས་ཁྱིམ་དུ་འདོང་བར་བྱ། དེང་འདི་ཉིད་དུ་བསྡད་དེ་སང་རི་དགས་དག་གཤོར་ལ་ཁྱིམ་དུ་འདོང་བར་བྱའོ་སྙམ་ནས། དེ་དག་དེའི་ནུབ་མོ་དེར་འཁོད་ནས་ཕྱི་དེ་ཉིན་པར་རི་དགས་དག་བཤོར་ཏེ་མཚན་མོ་མིག་ལམ་ཆད་པ་དང་རང་རང་གི་ཁྱིམ་དུ་དོང་ངོ ། །དེ་དག་འདི་སྙམ་དུ་སེམས་ཏེ། དེང་ནི་ནམ་སྲོས་ཀྱིས་སང་གཞོན་ནུ་ལྟར་འདོང་ངོ་སྙམ་ནས། དེ་དག་མཚན་མོ་ནམ་ནངས་པ་དང ། ཉི་མ་གསུམ་པ་དེ་ལ་གཞོན་ནུ་གྱད་བུ་ནོར་བལྟར་དོང་བ་དང ། གཞོན་ནུས་སྨྲས་པ། ཤེས་ལྡན་དག་ཁྱེད་ཅག་ཁོ་བོའི་ནེའུ་ལྡངས་མཉམ་དུ་སྐྱེས་པ་ས་ལ་ལྷན་ཅིག་རྩེ་བ་དག་ཡིན་ན་ཅིའི་ཕྱིར་ཁྱེད་ཅག་དེ་བར་ཁོ་བོའི་གན་དུ་མ་འོངས་པར་དེང་ཉི་མ་གསུམ་པ་གདོད་འོངས། གཞོན་ནུ་བདག་ཅག་རི་དགས་ཤོར་དུ་མཆིས་པར་གྱུར་ནས་དེའི་སླད་དུ་མ་མཆིས་སོ། །ཁྱེད་ཅག་གིས་དེར་ཅི་ཞིག་བྱས། གཞོན་ནུ་རི་དགས་དག་བཀུམ་མོ། །རི་དགས་དེ་དག་ཅི་ཟ་ཅི་འཐུང ། གཞོན་ནུ་རན་དག་འཚལ་ཞིང ། ཆབ་དག་འཚལ་ལོ། །ཤེས་ལྡན་དག་གལ་ཏེ་དེ་ལྟ་ན་དེ་དག་གིས་ཁྱེད་ཅག་ལ་
5.260a
གནོད་པ་ཅི་ཞིག་བྱས་ན་ཁྱེད་ཅག་དེ་དག་གསོད་པར་བྱེད། གཞོན་ནུ་བདག་ཅག་དེས་གློ་བ་དགའ་བ་ཉིད་དུ་འགྱུར་རོ། །ཤེས་ལྡན་དག་དགའ་བ་དེ་ནི་མི་བཟང་སྟེ། གཞན་ལ་གནོད་པས་དགའ་བ་གང་ཡིན་པ་དེ་ཐོང་ཤིག་།གཞོན་ནུ་ལྔ་བརྒྱ་པོ་དེ་དག་ཅང་མི་སྨྲ་བར་འཁོད་དེ། རྒྱལ་པོའི་ཕོ་བྲང་ནས་ཕྱིར་བྱུང་ནས་སྨྲས་པ། ཤེས་ལྡན་དག་གཞོན་ནུ་འདི་ཆུང་མའི་འཁོར་སྤངས་ཏེ་འགྲོ་མི་འདོད་པས་དེའི་ཕྱིར་བདག་ཅག་ལ་སྨོད་པར་བྱེད་ཀྱིས། དེའི་ཕྱིར་བདག་ཅག་གིས་ཅི་ནས་ཀྱང་དམག་དཔོན་ལ་གོ་བར་བྱ་བའི་ཐབས་ཤིག་གིས་འདི་ཡང་རི་དགས་ཤོར་དུ་འགྲོ་བར་འགྱུར་བ་དེ་ལྟ་བུའི་ཐབས་ཤིག་བྱས་ན་དེས་ན་འདི་ཡང་བདག་ཅག་དང་ལྷན་ཅིག་རི་དགས་ཤོར་དུ་འགྲོ་བར་འགྱུར་རོ་ཞེས་དེ་དག་གིས་གྲོས་བྱས་ནས་དམག་དཔོན་གྱི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། དམག་དཔོན་གཞོན་ནུ་གང་དག་གྲིབ་མར་སྐྱེས་པར་གྱུར་པ་དེ་དག་ནི་ངེས་པར་ཉི་འོག་གི་མཁར་གྱི་རྒྱལ་པོ་དག་གིས་ཟིལ་གྱིས་གནོན་པར་འགྱུར་བ་ལགས་ན། ཅིའི་སླད་དུ་གཞོན་ནུ་གྲིབ་མར་སྐྱེད་པར་མཛད་ཅིང་བདག་དང་ལྷན་ཅིག་རི་དགས་ཤོར་དུ་མི་གཏོང ། བདག་ཅག་དང་ལྷན་ཅིག་མཆིས་ན་གདུག་པ་དང ། རྩལ་ཆེ་བ་དང ། ཉི་འོག་གི་མཁར་གྱི་རྒྱལ་པོ་དག་གིས་ཟིལ་གྱིས་མི་ནོན་པར་འགྱུར་རོ། །ཤེས་ལྡན་དག་གལ་ཏེ་དེ་ལྟར་ན་གཞོན་ནུ་གཏང་གིས་དེང་ཤིག་།དམག་དཔོན་གྱིས་གཞོན་ནུ་བོས་ཏེ་སྨྲས་པ། གཞོན་ནུ་ཁྱོད་ཀྱི་ནེའུ་ལྡངས་དག་རི་དགས་ཤོར་དུ་འདོང་གིས་ཁྱོད་ཀྱང་དེ་དག་དང་ལྷན་ཅིག་སོང་ཤིག་།ཡབ་བདག་གཞན་གྱི་སྲོག་ལ་གནོད་པར་མི་བགྱིད་ན། ཅིའི་སླད་དུ་དེ་དག་དང་ལྷན་ཅིག་མཆི། གཞོན་ནུ་བདག་ཅག་རྒྱལ་རིགས་དག་ནི་མཚོན་གྱིས་འཚོ་བ་ཡིན་པས་ཆོས་འདི་རྒྱལ་རིགས་དག་དང་མི་འགལ་གྱིས་སོང་ཤིག་།གཞོན་ནུ་དེ་ཕ་ལ་གུས་ཤིང་རྗེ་ས་བྱེད་པ་ཡིན་པས་དེས་ཁས་བླངས་ཏེ་དེ་ཕྱི་དེ་ཉིན་པར་དེ་དག་དང་ལྷན
5.260b
ཅིག་རི་དགས་ཤོར་དུ་སོང་བ་དང ། གཞོན་ནུ་ལྔ་བརྒྱ་པོ་དེ་དག་གིས་གྲོས་བྱ་བར་བརྩམས་པ། ཤེས་ལྡན་དག་གཞོན་ནུ་འདི་ནི་དམག་དཔོན་འདས་ནས་དམག་དཔོན་དུ་འགྱུར་བས་འདི་བསྟེན་པའི་དུས་ཀྱིས་ནི་འབྲས་བུ་སྟེར་བར་འགྱུར་གྱིས། བདག་ཅག་གིས་ད་འདི་བསྟེན་པར་བྱའོ་ཞེས་དེ་དག་གིས་བློ་གྲོས་གཅིག་གིས་དེ་ལ་སྨྲས་པ། གཞོན་ནུ་ཁྱོད་འདི་ཁོ་ནར་གཞེས་ཤིག་དང་བདག་ཅག་གིས་རི་དགས་དག་ཅི་ནས་ཀྱང་ཁྱོད་ཀྱི་དྲུང་ཁོ་ནར་མཆི་བར་འགྱུར་བ་དེ་ལྟར་གདབ་པར་བགྱིས་དེ་ན་ཁྱོད་ཀྱིས་རི་དགས་མཆིས་སོ་འཚལ་ཁུམས་པར་འགྱུར་རོ། །དེ་ནས་དེ་དག་གིས་གཞོན་ནུ་དེ་འཕན་ཀར་བཞག་ནས་རི་དགས་མང་པོ་དག་ཕྱོགས་ཀུན་ནས་བསྐོངས་ཤིང་བྲིམས་ནས་དེ་དག་འཆི་བའི་འཇིགས་པས་ལུས་སྨས་པ་དང ། རྣམ་པར་སྨས་བཞིན་དུ་ལྕེ་ཕྱུང་སྟེ་གཞོན་ནུའི་དྲུང་དུ་ལྷགས་སོ། །གཞོན་ནུས་རི་དགས་དེ་དག་གནས་སྐབས་དེ་ལྟར་གྱུར་པ་ཐག་རིང་པོ་ཁོ་ན་ནས་མཐོང་ནས་དེས་བསམས་པ། སྙིང་རྗེ་མེད་པའི་སྙིང་གིས་འཇིག་རྟེན་ཕ་རོལ་བཏང་སྟེ་འདི་དག་ལ་སེམས་ཀྱིས་རབ་ཏུ་སྡང་བར་འགྱུར་བ་ཡང་སུ་ཞིག་ཡོད་ན་འདི་དག་གི་སྲོག་གཅོད་པར་འགྱུར་བ་ལྟ་སྨོས་ཀྱང་ཅི་དགོས་སྙམ་དུ་རིག་ནས་ཕྱོགས་བཞིར་རྣམ་པར་བལྟ་བར་བརྩམས་པ་དང ། དེ་དང་ཧ་ཅང་མི་རིང་བ་ན་མི་ཞིག་འདུག་པ་མཐོང་ནས་དེས་དེའི་སེམས་བསྲུང་བའི་ཕྱིར་མདའ་གཉིས་སམ། གསུམ་ཞིག་འཕངས་ཏེ་མདའ་དེ་དག་ཀྱང་རི་དགས་དེ་དག་གི་རཝའི་བར་དག་དང་རྐང་ལག་གི་བར་དག་ཏུ་བཏང་ནས་དེའི་འོག་ཏུ་དེས་བརྩལ་བ་བཏང་སྟེ་འདུག་པ་དང་རི་དགས་དེ་དག་ཀྱང་བྱེར་ཏེ་དོང་ངོ ། །བློན་པོའི་བུ་རྣམས་ཀྱིས་བསམས་པ། གཞོན་ནུ་ནི་གནས་ལྔ་དག་ལ་བྱང་བར་གྱུར་པ་ཡིན་པས་དེས་གདོན་མི་ཟ་བར་རི་དགས་མང་པོ་དག་བསད་པར་གྱུར་གྱིས་བདག་ཅག་མྱུར་དུ་འདོང་ངོ་སྙམ་ནས་དེ་དག་མྱུར་དུ་ལྷགས་པ་དང ། རི་དགས་གཅིག་ཀྱང་མ་སོད་པར་མཐོང་ནས་དེ་དག་འདི་སྙམ་དུ་སེམས་ཏེ། གཞོན་ནུས་གདོན་མི་ཟ་བར་ཤིང་རྟ་དག་དང ། རྔ་མོ་དག
5.261a
གིས་སྔར་བསྐྱས་པར་གྱུར་པ་ལྟ་སྙམ་དུ་རིག་ནས་སྨྲས་པ། གཞོན་ནུ་རི་དགས་དེ་དག་གར་མཆིས། ཤེས་ལྡན་དག་རི་དགས་དག་ག་རེ། རི་དགས་དག་སུའི་ཡིན། དེ་དག་ནི་རི་དགས་ཉིད་ཡིན་ཏེ། ཕྱིར་བཅོས་པར་མི་ནུས་སོ། །དེ་དག་སྤྱོད་པ་དེ་ལྟ་བུ་དང་ཤུགས་དེ་ལྟ་བུས་རྒྱུག་པས་དེའི་ཕྱིར་དེ་དག་གིས་ཁོ་བོ་ཉིད་ཀྱང་དེའུ་བསད་དོ། །མི་དེས་སྨྲས་པ། ཤེས་ལྡན་དག་ཁྱེད་ཀྱིས་ཆོས་ལ་དགའ་བ་འདི་འཕན་ཀར་བཞག་པས་རི་དགས་ག་ལ་སོད། གལ་ཏེ་འདི་མངོན་པར་འདོད་པར་གྱུར་ན་རི་དགས་གཅིག་ཀྱང་བྲོས་པར་མི་འགྱུར་རོ། །དེ་དག་མི་བཟོད་པ་སྐྱེས་ནས་མཐའ་ཅིག་ཏུ་དོང་སྟེ་སྨྲས་པ། ཤེས་ལྡན་དག་བདག་ཅག་གི་ལུས་སྨས་པ་དང ། རྣམ་པར་སྨས་པ་དག་གིས་རི་དགས་དག་འདི་ག་ལ་བ་དེར་བཏབ་སྟེ་འདིས་བསད་གྲང་སྙམ་ན་འདིས་ཡལ་བར་བོར་གྱིས་འདོང་ལ་འདི་ཉིད་གསད་པར་བྱའོ། །དེ་དག་གིས་ཡང་བསམས་པ། གལ་ཏེ་འདི་བསད་པར་གྱུར་ན་ཐོས་པ་གཅིག་ནས་གཅིག་ཏུ་བརྒྱུད་པས་དམག་དཔོན་གྱིས་ཐོས་ན་བདག་ཅག་ལ་གནོད་པ་བྱེད་པར་འགྱུར་གྱིས་འདི་བསད་པར་མི་བྱ་བར་འདི་འདི་ལྟར་འདི་ཉིད་དུ་བསྐྱུར་ཏེ་བོར་ལ་བདག་ཅག་འདོང་བར་བྱའོ་སྙམ་ནས། དེ་དག་གིས་དེ་ལ་མ་བལྟས་པར་འདོང་ངོ ། །གཞོན་ནུས་བསམས་པ། དེ་དག་བདག་གི་ནེའུ་ལྡངས་མཉམ་དུ་སྐྱེས་པ་ས་ལ་ལྷན་ཅིག་རྩེ་རྩེ་བ་ཡིན་ན་རི་དགས་ཙམ་གྱི་ཕྱིར་དེ་དག་གིས་བདག་དགོན་པར་བསྐྱུར་ཏེ་བོར་ནས་དོང་བ་ལས་ན། གང་གི་ཚེ་བདག་གི་ཕ་འདས་ནས་བདག་དམག་དཔོན་དུ་གྱུར་པ་དེའི་ཚེ་ན་བདག་གིས་གདོན་མི་ཟ་བར་སེམས་ཅན་གྱི་གནས་ལ་ཉེས་པར་སྤྱོད་པ་མང་པོ་བྱ་དགོས་པར་འགྱུར་རོ་སྙམ་ནས། དེ་སྙིང་སྟོང་ཞིང་ཟུག་རྔུས་ཟུག་པ་བཞིན་དུ་རྟོག་པ་ན། ཁྱིམ་དུ་སོང་སྟེ་ལག་པ་ལ་འགྲམ་པ་གཏད་ནས་སེམས་ཁོངས་སུ་ཆུད་ཅིང་འདུག་གོ། །དེའི་གན་དུ་ཆུང་མའི་འཁོར་དག་འོང་བ་དེ་དག་དེས་མཐོང་བ་དང་དབང་པོ་དག་ཕྱིར་གློན་པར་བྱེད་དོ། །དེ་དག་གིས་གཅིག་ནས་གཅིག་ཏུ་བརྒྱུད་པས་དམག་དཔོན་ལ་གཞོན་ནུ་ཏེ་པོར་སེམས་ཁོངས་སུ་ཆུད་དེ། འཆིས་འབྲང་གི་འཁོར་ལ
5.261b
ཡང་མི་སེམས་པར་དབང་པོ་དག་སླར་གློན་ཞིང་མཆིས་སོ་ཞེས་གོ་བར་བྱས་སོ། །དམག་དཔོན་གྱིས་ཐོས་ནས་དེ་ཡང་ཡིད་མི་བདེ་བར་གྱུར་ནས་གཞོན་ནུའི་གན་དུ་སོང་སྟེ་སྨྲས་པ། བུ་གཞོན་ནུ་ཁྱོད་ཅིའི་ཕྱིར་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་།ཡབ་ཀྱིས་བདག་ལས་མི་འདྲ་བར་བསྐོས་ཏེ་གང་གི་ཚེ་རྔོན་པ་དྲག་ཤུལ་ཅན་ལག་པ་དམར་བ་བསྣུན་པ་དང་རབ་ཏུ་བསྣུན་པས་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཇུད་པ། གཞན་གྱི་སྲོག་གཅོད་པས་འཚོ་བར་བགྱིད་པ་རྣམས་ཀྱི་ལས་དེ་ལ་ངེས་པར་སྦྱར་ན་བདག་ཇི་ལྟར་སེམས་ཁོངས་སུ་ཆུད་ཅིང་མི་མཆིས་སུ་རུང་བུ་གཞོན་ནུ་གལ་ཏེ་ཁྱོད་བདེ་བར་འདུག་ལ་བསམ་པ་ཐོང་སྟེ་ཕྱིན་ཆད་མ་འགྲོ་ཤིག་།དེ་ནས་གཞོན་ནུ་དེ་སེམས་ཅན་ལ་གནོད་པ་ལས་སྐྱེས་པའི་ཡིད་མི་བདེ་བ་ལས་ངེས་པར་བྱུང་སྟེ་མངོན་པར་དགའ་བར་གྱུར་ནས་དགེ་བ་གང་ཡིན་ཞེས་ཚོལ་བས་ངེས་པར་འབྱུང་བའི་མངོན་པར་དགའ་བ་བཙལ་བར་བརྩམས་སོ། །དེའི་ཚེ་ན་རྫོགས་བྱེད་ལ་སོགས་པ་སྟོན་པ་དྲུག་པོ་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་མངོན་པའི་ང་རྒྱལ་ཅན་དག་སྡིག་བྱུང་ན་ཉེ་བར་རྟེན་ཅིང་གནས་སོ། །དེ་ནས་གཞོན་ནུ་གྱད་བུ་ནོར་གྱིས་ཕ་དང་ཆུང་མའི་འཁོར་ལ་མ་བལྟས་པར་འོད་སྲུང་རྫོགས་བྱེད་ག་ལ་བ་དེར་སོང་སྟེ་ཕྱིན་ནས། འོད་སྲུང་རྫོགས་བྱེད་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། རྫོགས་བྱེད་ཀྱིས་སྨྲས་པ། གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ་སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་སྤྱད་པའི་ལས་རྣམས་ཀྱི་འབྲས་བུ་དང ། རྣམ་པར་སྨིན་པ་མེད་དོ། །འཇིག་རྟེན་འདི་ནི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་རྫུས་ཏེ
5.262a
སྐྱེས་པ་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་རྟོགས་པ། ཡང་དག་པར་སྒྲུབ་པ། གང་དག་ཚེ་འདི་ཉིད་ལ་རང་གི་མངོན་པར་ཤེས་པས་འཇིག་རྟེན་འདི་དང་འཇིག་རྟེན་ཕ་རོལ་མངོན་སུམ་དུ་བྱས་ནས་བསྒྲུབས་ཏེ། བདག་ཅག་ནི་སྐྱེ་བ་ཟད་དོ། །ཚངས་པར་སྤྱད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་པ་དག་མེད་དོ། །སྲོག་ནི་འདི་ཉིད་ལ་འཚོ་ཞིང་དེ་ཕྱིས་འཆད་པར་འགྱུར། ཞིག་པར་འགྱུར་ཏེ་ཤི་བའི་འོག་ཏུ་མི་འབྱུང་ངོ ། །སྐྱེས་བུའི་ལུས་ནི་འབྱུང་བ་ཆེན་པོ་བཞི་ལས་གྱུར་པ་ཡིན་ཏེ། དེ་ནི་གང་གི་ཚེ་དུས་བྱེད་པ་ན་དེའི་སའི་ལུས་ནི་སའི་བག་ལ་ཞ། ཆུའི་ལུས་ནི་ཆུའི། མེའི་ལུས་ནི་མེའི། རླུང་གི་ལུས་ནི་རླུང་གི་བག་ལ་ཞ་བར་འགྱུར་རོ། །དབང་པོ་རྣམས་ནི་ནམ་མཁའི་རྗེས་སུ་འགྲོ་བར་འགྱུར་རོ། །སྐྱེས་བུའི་རོ་ནི་ཁྲི་དང་ལྔའི་མི་དག་གིས་ཁྱེར་ཏེ་དུར་ཁྲོད་དུ་འགྲོ་ཞིང་བསྲེགས་ཕན་ཆད་མི་མངོན་པར་འགྱུར་རོ། །བསྲེག་བྱ་དག་ནི་ཐལ་བར་འགྱུར་རོ། །རུས་པ་དག་ནི་ཐི་བའི་མདོག་འདྲ་བར་གནས་སོ། །འདི་ལྟར་རྨོངས་པ་ཉེ་བར་བསྟན་པ་ནི་སྦྱིན་ལ། མཁས་པ་ཉེ་བར་བསྟན་པ་ནི་ལེན་ཏོ། །དེ་ལ་གང་དག་ཡོད་པར་སྨྲ་བ་དེ་དག་ཐམས་ཅད་ནི་གསོབ་གསོག་།བརྫུན་དུ་སྨྲ་བ་དག་ཡིན་ནོ། །འདི་ལྟར་བྱིས་པ་དང ། མཁས་པ་དེ་གཉིས་ནི་ཕྱིས་འཆད་པར་འགྱུར། ཞིག་པར་འགྱུར་ཏེ། ཤི་བའི་འོག་ཏུ་མི་འབྱུང་ངོ ། །དེ་ནས་གྱད་བུ་ནོར་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ནི་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས
5.262b
སྣོད་སྟོང་པ་བཞིན་དུ་བརྡབས་ཏེ་སོང་ངོ ། །དེ་ནས་གྱད་བུ་ནོར་གནག་ལྷས་ཀྱི་བུ་ཀུན་དུ་རྒྱུ་ག་ལ་བ་དེར་སོང་སྟེ་ཕྱིན་ནས་གནག་ལྷས་ཀྱི་བུ་ཀུན་དུ་རྒྱུ་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ཀུན་དུ་རྒྱུས་སྨྲས་པ། གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སེམས་ཅན་རྣམས་ཀུན་ནས་ཉོན་མོངས་པར་གྱུར་པ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཀུན་ནས་ཉོན་མོངས་པར་འགྱུར་རོ། །སེམས་ཅན་རྣམས་རྣམ་པར་དག་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་རྣམ་པར་དག་པར་འགྱུར་རོ། །སེམས་ཅན་རྣམས་ཤེས་པ་མེད་པར་འགྱུར་བ་དང ། མཐོང་བ་མེད་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་མེད་པ་དང ། མཐོང་བ་མེད་པར་འགྱུར་རོ། །སེམས་ཅན་རྣམས་ཤེས་པར་འགྱུར་བ་དང ། མཐོང་བར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་དང ། མཐོང་བར་འགྱུར་རོ། །སྟོབས་མེད་དོ། །བརྩོན་འགྲུས་མེད་དོ། །སྟོབས་དང་བརྩོན་འགྲུས་མེད་དོ། །སྐྱེས་བུའི་རྩལ་མེད་དོ། །ཕ་རོལ་གནོན་པ་མེད་དོ། །སྐྱེས་བུའི་རྩལ་དང་ཕ་རོལ་གནོན་པ་མེད་དོ། །བདག་གི་རྩལ་མེད་དོ། །གཞན་གྱི་རྩལ་མེད་དོ། །བདག་གི་རྩལ་དང་གཞན་གྱི་རྩལ་མེད་དོ། །སེམས་ཅན་ཐམས་ཅད་དང ། སྲོག་ཆགས་ཐམས་ཅད་དང ། འབྱུང་པོ་ཐམས་ཅད་མཐུ་མེད། སྟོབས་མེད། དབང་མེད། བརྩོན་འགྲུས་མེད། ཕ་རོལ་གནོན་པ་མེད་དོ། །འགྲོ་བ་མཚམས་སྦྱོར་བའི་སྲིད་པ་དག་ངེས་པར་གྱུར་ཏོ། །འདི་ལྟར་འགྲོ་བ་དྲུག་པོ་དག་ཏུ་བདེ་བ་དང ། སྡུག་བསྔལ་སོ་སོར་མྱོང་བར་འགྱུར་རོ། །དེ་ནས་གྱད་བུ་ནོར་འདི་སྙམ་དུ
5.263a
སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིགས་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་སོང་ངོ ། །དེ་ནས་གྱད་བུ་ནོར་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ག་ལ་བ་དེར་སོང་སྟེ་ཕྱིན་ནས་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ཡང་དག་རྒྱལ་བ་ཅན་གྱིས་སྨྲས་པ། གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། བྱེད་པ་དང་བྱེད་དུ་འཇུད་པ་དང ། གཅོད་པ་དང་གཅོད་དུ་འཇུད་པ་དང ། སྲེག་པ་དང་སྲེག་ཏུ་འཇུད་པ་དང ། རྡེག་པ་དང་རྡེག་ཏུ་འཇུད་པ་དང ། སྲོག་ཆགས་ལ་འཚེ་བ་དང ། མ་བྱིན་པར་ལེན་པ་དང ། འདོད་པ་ལ་ལོག་པར་སྤྱོད་པ་དང ། ཤེས་བཞིན་དུ་བརྫུན་སྨྲ་བ་དང ། མྱོས་པར་འགྱུར་བའི་བཏུང་བ་འཐུང་བ་དང ། ཁྱིམ་འབིགས་པ་དང ། མདུད་པ་འགྲོལ་བ་དང ། རིལ་གྱིས་འཕྲོག་པ་དང ། ལམ་འགོག་ཅིང་འདུག་པ་དང ། གྲོང་འཇོམས་པར་བྱེད་པ་དང ། གྲོང་ཁྱེར་འཇོམས་པར་བྱེད་པ་དང ། ཡུལ་འཇོམས་པར་བྱེད་པ་དང ། ས་གཞི་ཆེན་པོ་འདི་ལ་སེམས་ཅན་གང་དག་ཡོད་པ་དེ་དག་ཐམས་ཅད་འཁོར་ལོའི་མཐའ་སྤུ་གྲི་ལས་བྱས་པས་ཀུན་དུ་གཅོད་པར་བྱེད། ཀུན་དུ་འཚེག་པར་བྱེད། ཀུན་དུ་རྡུང་བར་བྱེད། ཀུན་དུ་འདྲལ་བར་བྱེད་ཅིང་སེམས་ཅན་དེ་དག་ཐམས་ཅད་ཀུན་དུ་གཅད། ཀུན་དུ་གཤེགས། ཀུན་དུ་བརྡུངས། ཀུན་དུ་དྲལ་ནས་ཤའི་ཐང་མ་གཅིག་ཏུ་བྱེད། ཤའི་ཚོམས་གཅིག་ཏུ་བྱེད།
5.263b
ཤའི་བུངས་གཅིག་ཏུ་བྱེད། ཤའི་ཕུང་པོ་གཅིག་ཏུ་བྱེད་ཅིང་ཤའི་ཐང་མ་གཅིག་ཏུ་བྱས། ཤའི་ཚོམས་གཅིག་ཏུ་བྱས། ཤའི་བུངས་གཅིག་ཏུ་བྱས། ཤའི་ཕུང་པོ་གཅིག་ཏུ་བྱས་ནས། དེ་ལྟར་ཀུན་དུ་སྒྲུབ་པར་བྱེད་པ་ལ་གཞི་དེ་ལས་སྡིག་པ་ཡང་མེད། གཞི་དེ་ལས་སྡིག་པར་འགྱུར་བ་ཡང་མེད་དོ། །ཆུ་ཀླུང་གང་གཱའི་ལྷོ་ནས་ཀུན་དུ་གཅོད་པར་བྱེད། ཀུན་དུ་འཚེག་པར་བྱེད། ཀུན་དུ་རྡུང་བར་བྱེད། ཀུན་དུ་འདྲལ་བར་བྱེད་ཅིང་འགྲོ་ལ། ཆུ་ཀླུང་གང་གཱའི་བྱང་ནས་སྦྱིན་པ་བྱེད། མཆོད་སྦྱིན་བྱེད་ཅིང་འགྲོ་བར་གྱུར་ན། གཞི་དེ་ལས་སྡིག་པ་དང་བསོད་ནམས་ཀྱང་མེད། གཞི་དེ་ལས་སྡིག་པ་དང་བསོད་ནམས་སུ་འགྱུར་བ་མེད་དོ། །སྦྱིན་པ་དང ། དུལ་བ་དང ། ཡང་དག་པར་སྡོམ་པ་དང ། དོན་སྤྱོད་པ་དང ། དོན་འཐུན་པས་དེ་ལྟར་བྱེད་པ་ཡང་བསོད་ནམས་མི་བྱེད་པ་ཁོ་ན་ཡིན་ནོ། །དེ་ནས་གྱད་བུ་ནོར་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ཡང་དག་པར་སྒྲུབ་པ་ཡིན་ཏེ། འཇིགས་པ་དང་བཅས་པའི་ལམ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་སོང་ངོ ། །དེ་ནས་གྱད་བུ་ནོར་མི་ཕམ་སྐྲའི་ལ་བ་ཅན་ག་ལ་བ་དེར་སོང་སྟེ་ཕྱིན་ནས། མི་ཕམ་སྐྲའི་ལ་བ་ཅན་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། མི་ཕམ་གྱིས་སྨྲས་པ། གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། ལུས་བདུན་པོ་འདི་དག་ནི་མ་བྱས་པ། བྱས་པར་མ་བྱས་པ། མ་སྤྲུལ་པ། སྤྲུལ་པས་མ་བྱས་པ། གནོད་པར་བྱ་བ་མ་ཡིན་པ་ཐེར་ཟུག་ཏུ་གནས་པ། ཀ་བ་བཞིན་དུ་གནས་པ་དག་ཡིན་ཏེ། བདུན་གང་ཞེ་ན།
5.264a
འདི་ལྟ་སྟེ། སའི་ལུས་དང ། ཆུའི་ལུས་དང ། མེའི་ལུས་དང ། རླུང་གི་ལུས་དང ། བདེ་བ་དང ། སྡུག་བསྔལ་བ་དང ། སྲོག་གསོན་པ་ཉིད་ནི་བདུན་པ་སྟེ། ལུས་བདུན་པོ་དེ་དག་ནི་མ་བྱས་པ། བྱས་པས་མ་བྱས་པ། མ་སྤྲུལ་པ། སྤྲུལ་པས་མ་བྱས་པ། གནོད་པར་བྱ་བ་མ་ཡིན་པ། ཐེར་ཟུག་ཏུ་གནས་པ། ཀ་བ་བཞིན་དུ་གནས་པ་དག་ཡིན་ནོ། །དེ་དག་ནི་འདི་ལྟ་སྟེ། བསོད་ནམས་སུ་འགྱུར་བའི་ཕྱིར་རམ། སྡིག་པར་འགྱུར་བའི་ཕྱིར་རམ། བསོད་ནམས་དང་སྡིག་པར་འགྱུར་བའི་ཕྱིར་རམ། བདེ་བར་འགྱུར་བའི་ཕྱིར་རམ། སྡུག་བསྔལ་བར་འགྱུར་བའི་ཕྱིར་རམ། བདེ་བ་དང་སྡུག་བསྔལ་བར་འགྱུར་བའི་ཕྱིར་གཡོ་བར་མི་བྱེད། རྣམ་པར་འགྱུར་བར་མི་བྱེད། གཅིག་ལ་གཅིག་གནོད་པར་མི་བྱེད་དོ། །སྐྱེས་བུ་གང་གིས་སྐྱེས་བུ་མགོ་གཅོད་པར་བྱེད་པ་དེས་ཀྱང་འཇིག་རྟེན་ན་གཡོ་བ་འམ། གནས་པ་ལ་གནོད་པ་ཅུང་ཟད་མི་བྱེད་དེ། ལུས་བདུན་པོ་དག་ལ་བར་མེད་པར་མཚོན་ཐལ་བྱུང་དུ་འགྲོ་ཞིང་དེར་སྲོག་ལ་ཡང་གནོད་པ་མེད་དོ། །དེ་ལ་གསོད་པར་བྱེད་པ་འམ། གསོད་དུ་བཅུག་པ་འམ། སྐུལ་བར་བྱེད་པ་འམ། སྐུལ་དུ་བཅུག་པ་འམ། དྲན་པར་བྱེད་པ་འམ། དྲན་པར་བྱེད་དུ་བཅུག་པ་འམ། རྣམ་པར་རིག་པར་བྱེད་པ་འམ། རྣམ་པར་རིག་པར་བྱེད་དུ་བཅུག་པ་འགའ་ཡང་མེད་དོ། །བྱིས་པ་འམ། མཁས་པ་གང་དག་ཡིན་པ་དག་ནི་སྐྱེ་གནས་གཙོ་བོ་དང་ལྡན་པ་ཁྲི་བཞི་སྟོང་དང ། རྟོག་པ་ཆེན་པོ་དྲུག་ཁྲི་དང ། དྲུག་བརྒྱ་དང ། ལས་ལྔ་དང ། ལས་གསུམ་དང ། ལས་གཉིས་དང ། ལས་དང ། ལས་ཕྱེད་དང ། ལས་དྲུག་ཅུ་རྩ་གཉིས་དང ། རྟོག་པ་བར་མ་དྲུག་ཅུ་རྩ་གཉིས་དང ། སེམས་ཅན་དམྱལ་བ་བརྒྱ་ཉི་ཤུ་དང ། དབང་པོ་བརྒྱ་ཉི་ཤུ་དང ། རྡུལ་གྱི་ཁམས་དྲུག་ཅུ་རྩ་གཉིས་དང ། ཀླུའི་རིགས་བཞི་ཁྲི་དགུ་སྟོང་དང ། ནམ་མཁའ་ལྡིང་གི་རིགས་བཞི་ཁྲི་དགུ་སྟོང་དང ། ཀུན་དུ་རྒྱུའི་རིགས་བཞི་ཁྲི་དགུ་སྟོང་དང ། ཀུན་དུ་འཚོའི་རིགས་བཞི་ཁྲི་དགུ་སྟོང་དང ། གཅེར་བུ་བའི་རིགས་བཞི་ཁྲི་དགུ་སྟོང་དང །
5.264b
འདུ་ཤེས་ཅན་གྱི་གནས་བདུན་དང ། འདུ་ཤེས་མེད་པའི་གནས་བདུན་དང ། གཅེར་པུ་བའི་གནས་བདུན་དང ། ལྷ་མ་ཡིན་བདུན་དང ། ཤ་ཟ་བདུན་དང ། ལྷ་བདུན་དང ། མི་བདུན་དང ། མཚོ་ཆེན་པོ་བདུན་དང ། མཚོ་བདུན་བརྒྱ་དང ། རྨི་ལམ་ཆེན་པོ་བདུན་དང ། རྨི་ལམ་བདུན་བརྒྱ་དང ། འབྲི་བ་ཆེན་པོ་བདུན་དང ། འབྲི་བ་བདུན་བརྒྱ་དང ། འཕེལ་བ་ཆེན་པོ་བདུན་དང ། འཕེལ་བ་བདུན་བརྒྱ་དང ། སད་པ་ཆེན་པོ་བདུན་དང ། སད་པ་བདུན་བརྒྱ་དང ། གཡང་ས་ཆེན་པོ་བདུན་དང ། གཡང་ས་བདུན་བརྒྱ་དང ། རིགས་བཙུན་པ་དང ། མངོན་པར་མཐོ་བ་བཅུ་དང ། སྐྱེས་བུ་ཆེན་པོའི་ས་བརྒྱད་པོ་དེ་དག་ཏུ་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་སྦྱར་ཅིང་འཁོར་ནས་སྡུག་བསྔལ་མཐར་བྱེད་དོ། །འདི་ལྟ་སྟེ། དཔེར་ན་སྐུད་པའི་དྲུག་བུ་ཡང་བ་སྟེང་གི་ནམ་མཁའ་ལས་འཕངས་པ་གཟངས་བ་ན་ས་ལ་འབབ་པ་དེ་བཞིན་དུ་བྱིས་པ་འམ། མཁས་པ་གང་དག་ཡིན་པ་དག་ཀྱང་དེ་དག་ཏུ་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་སྦྱར་ཅིང་འཁོར་ནས་སྡུག་བསྔལ་མཐར་བྱེད་དོ། །དེ་ལ་དགེ་སྦྱོང་ངམ། བྲམ་ཟེ་གང་འདི་སྐད་ཅེས་བདག་ཚུལ་ཁྲིམས་སམ། བརྟུལ་ཞུགས་སམ། དཀའ་ཐུབ་བམ། ཚངས་པར་སྤྱོད་པ་ལ་གནས་པ་འདིས་ལས་ཡོངས་སུ་མ་སྨིན་པ་ནི་སྨིན་པར་བྱ་ཞིང ། ཡོངས་སུ་སྨིན་པ་ནི་རེག་པར་བྱས་ནས་བྱང་བར་བྱའོ་ཞེས་ཟེར་བ་འགའ་ཡང་མེད་དོ། །བདེ་བ་དང་སྡུག་བསྔལ་འདི་ནི་ངེས་པ་ཡིན་ནོ། །ཡར་སྐྱེ་བ་དང ། མར་འགྲིབ་པ་ནི་མི་སྲིད་དོ། །འདི་ལྟ་བུ་ཉིད་དང ། གཞན་མ་ཡིན་པས་འཁོར་བ་གཞལ་ལོ། །དེ་ནས་གྱད་བུ་ནོར་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས
5.265a
སྨྲས་ནས་སྣོད་སྟོང་པ་བཞིན་དུ་བརྡབས་ཏེ་སོང་ངོ ། །དེ་ནས་གྱད་བུ་ནོར་ཀཱ་ཏྱཱ་ཡ་བུ་ནོག་ཅན་ག་ལ་བ་དེར་སོང་སྟེ་ཕྱིན་ནས། ཀཱ་ཏྱཱ་ཡ་བུ་ནོག་ཅན་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ནོག་ཅན་གྱིས་སྨྲས་པ། གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་ཅེས་སྨྲ་སྟེ། གལ་ཏེ་འགའ་ཞིག་ཁོ་བོའི་གན་དུ་འོངས་ཏེ་འདི་སྐད་ཅེས་འཇིག་རྟེན་ཕ་རོལ་ཡོད་དམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་ཡོད་དོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་མེད་དམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་མེད་དོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་ཡོད་པ་དང་མེད་པ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་ཡོད་པ་དང་མེད་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་ཡོད་པ་ཡང་མ་ཡིན་མེད་པ་ཡང་མ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་ཡོད་པ་ཡང་མ་ཡིན་མེད་པ་ཡང་མ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །དེ་བཞིན་དུ་གལ་ཏེ་འགའ་ཞིག་ཁོ་བོའི་གན་དུ་འོངས་ཏེ་འདི་སྐད་ཅེས་འཇིག་རྟེན་ཕ་རོལ་འདི་ལྟ་བུ་ཉིད་དང ། འདི་ལྟ་བུ་ཉིད་མ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་འདི་ལྟ་བུ་དང ། འདི་ལྟ་བུ་ཉིད་མ་ཡིན་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་གཞན་ཉིད་དང་གཞན་ཉིད་མ་ཡིན་པ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་གཞན་ཉིད་དང ། གཞན་ཉིད་མ་ཡིན་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག
5.265b
རྟེན་ཕ་རོལ་དེ་ཉིད་དང་དེ་ཉིད་མ་ཡིན་པ་ཉིད་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་དེ་ཉིད་དང་དེ་ཉིད་མ་ཡིན་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །དེ་ནས་གྱད་བུ་ནོར་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་སོང་ངོ ། །དེ་ནས་གྱད་བུ་ནོར་གཉེན་གྱི་བུ་གཅེར་བུ་ག་ལ་བ་དེར་སོང་སྟེ་ཕྱིན་ནས་གཉེན་གྱི་བུ་གཅེར་བུ་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། གཅེར་བུས་སྨྲས་པ། གཞོན་ནུ་ཁོ་བོ་འདི་ལྟར་ལྟ་ཞིང་འདི་སྐད་ཅེས་སྨྲ་སྟེ། སྐྱེས་བུ་གང་ཟག་འདིས་སོ་སོར་མྱོང་བ་གང་ཡིན་པ་ཅི་ཡང་རུང་སྟེ། དེ་ཐམས་ཅད་སྔོན་བྱས་པའི་རྒྱུ་ལས་བྱུང་བ་ཡིན་ནོ། །ལས་རྙིང་པ་རྣམས་ནི་དཀའ་ཐུབ་ཀྱིས་བྱང་བར་འགྱུར་ལ། ལས་སར་པ་རྣམས་ནི་མི་བྱ་བའི་ཆུ་ལོན་གྱིས་བཟློག་པར་བྱའོ། །དེ་ལྟར་ན་ཕྱིན་ཆད་ཟག་པ་མེད་དོ། །ཟག་པ་མེད་ན་ལས་ཟད་དོ། །ལས་ཟད་ན་སྡུག་བསྔལ་ཟད་དོ། །སྡུག་བསྔལ་ཟད་ན་སྡུག་བསྔལ་མཐར་བྱེད་པར་འགྱུར་རོ། །དེ་ནས་གྱད་བུ་ནོར་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་སྟེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ
5.266a
བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་སོང་ངོ ། །དེ་ནས་གྱད་བུ་ནོར་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟེང་གི་ཁང་བཟངས་ཀྱི་གཞིར་གཏོགས་པ་ན་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་ནས། དེ་འདི་སྙམ་དུ་སེམས་ཏེ། མ་ལ་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ་དང ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང ། ལྷ་དང་མིར་བཅས་པའི་ནང་ན་གང་གིས་བདག་འཁོར་བ་དགོན་པ་འདི་ནས་རབ་ཏུ་ཐར་བར་བྱེད་པའི་དགེ་སྦྱོང་ངམ། བྲམ་ཟེ་སྨན་དང ། གསང་སྔགས་དང ། རིག་སྔགས་ཚིག་གཅིག་གམ། ཚིག་གཉིས་སམ། ཚིག་བཞི་ཙམ་འཆང་བ་དེ་ལྟ་བུ་སུ་ཡོད་སྙམ་དུ་སེམས་སོ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང ། མ་གཟིགས་པ་དང ། མ་རིག་པ་དང ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་བ། ཉག་གཅིག་དཔའ་པ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་ཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། འདུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན
5.266b
པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལ་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་འགྱུར། གང་ནི་གནོད་པར་འགྱུར། གང་ནི་ཉམ་ང་བར་འགྱུར། གང་ནི་མི་བདེ་བར་གྱུར། གང་ནི་གནོད་པ་དང ། ཉམ་ང་བ་དང ། མི་བདེ་བར་འགྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ནས་བསླང་སྟེ་མཐོ་རིས་དང ། ཐར་པ་དང ། འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། དགེ་བའི་རྩ་བ་དག་བསྐྱེད་པ་གང་ནི་ཡོངས་སུ་སྨིན་པ་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་གོ། །ཡང་སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདས་པར་འགྱུར་སྲིད་ཀྱི། །སངས་རྒྱས་འདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་པར་བྱེད་ཅིང་དེ་སྲོག་སྲུང་བྱེད་ལྟར། །དེ་བཞིན་གཤེགས་པ་འང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །གཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་པའི་གདུལ་བ་ལ། །རབ་ཉམས་བེའུ་ལ་བྱམས་པའི་བ་བཞིན་ནོ། །དེ་ལྟར་བཅོམ་ལྡན་འདས་ཀྱིས་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ན། སྡིག་བྱུང་ན་གྱད་བུ་ནོར་དེ་རྒྱུད་ཡོངས་སུ་སྨིན་པ། སྔོན་གྱི་སངས་རྒྱས་རྣམས་ལ་བྱ་བ་ལྷག་པར་བྱས་པ་ཡིན་ཏེ། དེ
5.267a
གདུལ་བའི་དུས་ནི་དཔེར་ན་འབྲས་ཡོངས་སུ་སྨིན་པ་མཚོན་གྱིས་བརྟོལ་བ་ལ་སྡོད་པ་ལྟ་བུ་ཡིན་པར་གཟིགས་ནས། བཅོམ་ལྡན་འདས་འདི་སྙམ་དུ་དགོངས་ཏེ། ཅི་འདི་རེ་ཤིག་སྟོན་པས་གདུལ་བ་ཡིན་ནམ། འོན་ཏེ་ཉན་ཐོས་ཀྱིས་གདུལ་བ་ཡིན་སྙམ་དུ་དགོངས་ན། ཉན་ཐོས་ཀྱིས་གདུལ་བ་ཡིན་པར་གཟིགས་སོ། །སྒོ་གང་ནས་འཇུག་པར་འགྱུར། ཅི་རྫུ་འཕྲུལ་གྱིས་གདུལ་བ་ཡིན་ནམ། འོ་ན་ཏེ་སྤྱོད་ལམ་གྱིས་གདུལ་བ་ཡིན་སྙམ་དུ་དགོངས་ན། སྤྱོད་ལམ་གྱིས་གདུལ་བ་ཡིན་པ་གཟིགས་སོ། །བཅོམ་ལྡན་འདས་ནི་གང་ལ་སྤྱོད་ལམ་གྱིས་དུལ་བ་དེ་ལ་ཚེ་དང་ལྡན་པ་རྟ་ཐུལ་གཏོང་བར་མཛད་དེ། འདི་ལྟར་དེའི་སྤྱོད་ལམ་གྱིས་ནི་ལྷ་དང་མིའི་ཡིད་སྡུད་པར་བྱེད་པ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་བཀའ་སྩལ་པ། རྟ་ཐུལ་ཁྱོད་ཀྱིས་སྡིག་བྱུང་ན་གྱད་བུ་ནོར་འདུག་པ་ལ་སོམས་ཤིག་།ཚེ་དང་ལྡན་པ་རྟ་ཐུལ་གྱིས་ཅང་མི་སྨྲ་བས་བཅོམ་ལྡན་འདས་ལས་དང་དུ་བླངས་སོ། །དེ་ནས་ཚེ་དང་ལྡན་པ་རྟ་ཐུལ་བཅོམ་ལྡན་འདས་ཀྱི་བཀའ་ལ་ལྷག་པར་བྱ་བ་བྱེད་པ་ཡིན་པས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་རྟ་ཐུལ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང ། ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ཡོངས་སུ་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང ། ཆོས་གོས་ཐོགས་ནས་སྡིག་བྱུང་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་ཞིང་འགྲོ་བའི་ཚེ་སྡིག་བྱུང་དུ་ཕྱིན་ནས་སྡིག་བྱུང་ན་པད་པའི་ནགས་ཁྲོད་ན་འདུག་གོ། །དེ་ནས་ཚེ་དང་ལྡན་པ་རྟ་ཐུལ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། འགྲོ་བ་དང ། ལྡོག་པ་དང ། ཅུང་ཟད་བལྟ་བ་དང ། རྣམ་པར་བལྟ་བ་དང །
5.267b
བསྐུམ་པ་དང ། བརྐྱང་བ་དང ། སྣམ་སྦྱར་དང ། ཆོས་གོས་དང ། ལྷུང་བཟེད་ཐོགས་པ་མཛེས་པས་སྡིག་བྱུང་དུ་བསོད་སྙོམས་ལ་ཞུགས་སོ། །དེའི་ཚེ་ན་གྱད་བུ་ནོར་སྟེང་གི་ཁངས་བཟངས་ཀྱི་གཞིར་གཏོགས་པ་ན་དགེ་བ་གང་ཡིན་ཚོལ་བས་གྲོང་ཁྱེར་ལ་ལྟ་ཞིང་འདུག་པས་གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་འགྲོ་བ་དང ། ལྡོག་པ་དང ། ཅུང་ཟད་བལྟ་བ་དང ། རྣམ་པར་བལྟ་བ་དང ། བསྐུམ་པ་དང ། བརྐྱང་བ་དང ། སྣམ་སྦྱར་དང ། ཆོས་གོས་དང ། ལྷུང་བཟེད་ཐོགས་པ་མཛེས་པས་སྡིག་བྱུང་ན་བསོད་སྙོམས་ལ་རྒྱུ་བ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། སྡིག་བྱུང་འདིར་རབ་ཏུ་བྱུང་བ་ཇི་སྙེད་ཅིག་ལྷགས་ཤིང་གནས་པ་དག་ལས་འདི་ལྟ་སྟེ། རབ་ཏུ་བྱུང་བ་འདིའི་སྤྱོད་ལམ་ལྟ་བུ་ནི་བདག་གིས་སྔོན་ཆད་འགའ་ཡང་མ་མཐོང་ངོ་སྙམ་ནས། ཡང་འདི་སྙམ་དུ་སེམས་ཏེ། རབ་ཏུ་བྱུང་བ་དག་ལ་ནི་གང་དག་གྲོང་དུ་སྤྱོད་ལམ་འཆོས་ལ་དགོན་པར་ཅི་དགར་སྤྱོད་པ་དག་ཀྱང་ཡོད་པས་བདག་གིས་དགོན་པར་འདིའི་སྤྱོད་ལམ་བརྟག་པར་བྱའོ་སྙམ་དུ་རིགས་ནས་མི་ཞིག་ལ་སྨྲས་པ། ཀཝའེ་ནང་རྗེ་ཚུར་ཤོག་རབ་ཏུ་བྱུང་བ་འདིའི་ཕྱི་བཞིན་དུ་རྗེས་སུ་སོང་ལ་འདི་ཇི་ལྟར་གྲོང་དུ་སྤྱོད་ལམ་ཞི་བ་ལྟར་དགོན་པར་ཡང་དེ་བཞིན་ནམ། འོན་ཏེ་མ་ཡིན་པ་རྟོགས་ཤིག་།མི་དེས་གཞོན་ནུ་བཀའ་བཞིན་འཚལ་ཞེས་གྱད་བུ་ནོར་ལས་མཉན་ནས་ཚེ་དང་ལྡན་པ་རྟ་ཐུལ་གྱི་ཕྱི་བཞིན་ཕྱི་བཞིན་རྗེས་སུ་སོང་ངོ ། །དེ་ནས་ཚེ་དང་ལྡན་པ་རྟ་ཐུལ་སྡིག་བྱུང་དུ་བསོད་སྙོམས་བརྒྱུས་ནས། པད་པའི་ནགས་ཁྲོད་ག་ལ་བ་དེར་སོང་སྟེ་ཕྱིན་པ་དང ། ལྷུང་བཟེད་དང ། ཆུ་ཚགས་མཐའ་ཅིག་ཏུ་བཞག་ནས་སྣམ་སྦྱར་སྤྲུགས་ཏེ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བརྩགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ་ལོ་མ་ལྷགས་པ་དག་བོར་ནས། ལག་པ་གཉིས་བསྙལ་ཏེ་ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་ནས་རྐང་པ་གཉིས་བཀྲུས་ཏེ་ཤིང་ལྗོན་པ་ཞིག་གིས་དྲུང་དུ་བརྟེན་ནས། བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་དཀྱིལ་མོ་དཀྲུང་བཅས་ཏེ་སྤྱོད་ལམ
5.268a
ཞི་བས་འདུག་གོ། །དེ་ནས་མི་དེ་ཚེ་དང་ལྡན་པ་རྟ་ཐུལ་གྱི་སྤྱོད་ལམ་ཞི་བས་ལྷ་དང་མིའི་སེམས་སྡུད་པར་བྱེད་པས་ཡིད་བསྡུས་ནས་གྱད་བུ་ནོར་ག་ལ་བ་དེར་སོང་སྟེ་ཕྱིན་ནས་གྱད་བུ་ནོར་ལ་འདི་སྐད་ཅེས་སྨྲས་སོ། །གཞོན་ནུ་མཁྱེན་པར་མཛོད་ཅིག་།ཁྱོད་ཀྱིས་རབ་ཏུ་བྱུང་བ་དེ་སྤྱོད་ལམ་ཇི་ལྟ་བུས་གྲོང་དུ་བསོད་སྙོམས་རྒྱུ་བ་གཟིགས་པ་དེ་བས་བརྒྱ་སྟོང་གིས་ལྷག་པའི་སྤྱོད་ལམ་གྱིས་དགོན་པར་མཆིས་ཏེ་གནས་ཏོ། །དེ་ནས་གྱད་བུ་ནོར་ཚེ་དང་ལྡན་པ་རྟ་ཐུལ་གྱི་སྤྱོད་ལམ་འབྱོར་པ་ཕུན་སུམ་ཚོགས་པ་ཐོས་པས་ཡིད་བསྡུས་ནས་གུས་པར་བསྒྲིམ་པ་དང་བཅས་པས་མི་དེ་ལ་སྨྲས་པ། ཀཝའེ་ནང་རྗེ་མྱུར་དུ་བཞོན་པ་བདེ་བ་སྟོད་ཅིག་དང་ཁོ་བོ་དེ་ལ་ཞོན་ཏེ་དེང་རབ་ཏུ་བྱུང་བ་དེ་ལྟར་འགྲོའོ། །མི་དེས་གཞོན་ནུ་བཀའ་བཞིན་འཚལ་ཞེས་གྱད་བུ་ནོར་ལས་མཉན་ནས་མྱུར་དུ་བཞོན་པ་བདེ་བ་བསྟད་དེ། གྱད་བུ་ནོར་ག་ལ་བ་དེར་སོང་ནས་ཕྱིན་པ་དང ། གྱད་བུ་ནོར་ལ་འདི་སྐད་ཅེས་སྨྲས་སོ། །གཞོན་ནུ་གོར་བུ་བསྒྲོན་ལགས་ཀྱིས་ད་དེའི་དུས་ལ་བབ་པར་མཁྱེན་པར་མཛོད་ཅིག་།དེ་ནས་གྱད་བུ་ནོར་བཞོན་པ་བདེ་བ་ལ་ཞོན་ཏེ། སྡིག་བྱུང་ནས་ཕྱིར་བྱུང་ནས་པད་པའི་ནགས་ཁྲོད་ག་ལ་བ་དེར་ཤིང་རྟ་བསྒྱུར་ཏེ་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་ཏེ། རྐང་པ་དག་ཉིད་ཀྱིས་པད་པའི་ནགས་ཁྲོད་དུ་ཞུགས་པ་དང ། གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་དབང་པོ་ཤིན་དུ་མཉམ་པར་བཞག་ཅིང་སྤྱོད་ལམ་ཞི་བས་འདུག་པ་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། འདི་ལྟར་བདག་གིས་རབ་ཏུ་བྱུང་བ་ཏིང་ངེ་འཛིན་འདི་ལས་བསླང་བ་ནི་བདག་གི་ཚུལ་དང་འཐུན་པ་མ་ཡིན་གྱིས། གང་གི་ཚེ་འདི་ཏིང་ངེ་འཛིན་ལས་ལངས་པར་གྱུར་པ་དེའི་ཚེ་དེའི་དྲུང་དུ་འགྲོ་བར་བྱའོ་སྙམ་དུ་རིག་ནས། མཐའ་ཅིག་ཏུ་འདུག་སྟེ། དེ་ལྡང་བ་ལ་སྡོད་ཅིང་འདུག་གོ། །དེ་ནས་ཚེ་དང་ལྡན་པ་རྟ་ཐུལ་ཕྱེམ་བྲེད་ནང་དུ་ཡང་དག་འཇོག་ལས་ལངས་ནས་མཐའ་ཅིག་ཏུ་འདུག་གོ། །དེ་ནས་གྱད་བུ་ནོར་ཚེ་དང་ལྡན་པ་རྟ་ཐུལ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་རྟ་ཐུལ
5.268b
དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང ། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འདུག་གོ། །མཐའ་ཅིག་ཏུ་འདུག་ནས་གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་སོ། །ཤེས་ལྡན་ཅི་ཁྱོད་སྟོན་པ་ལགས་སམ། འོན་ཏེ་ཉན་ཐོས་ལགས། བཞིན་བཟངས་ཁོ་བོ་ནི་ཉན་ཐོས་སྟོན་པའི་ལམ་གྱི་རྗེས་སུ་ཞུགས་པ་ཡིན་ནོ། །ཤེས་ལྡན་སྟོན་པ་དང ། ཉན་ཐོས་ལ་ཁྱད་པར་ཅི་མཆིས། བཞིན་བཟངས་ཁྱད་པར་ཤིན་དུ་ཆེ་སྟེ། འདི་ལྟ་སྟེ། དཔེར་ན་རིའི་རྒྱལ་པོ་རི་རབ་དང་ཡུངས་ཀར་ལྟ་བུ་དང ། རྒྱ་མཚོ་ཆེན་པོ་དང་བ་ལང་གི་རྗེས་ལྟ་བུ་དང ། ཉི་མ་དང་སྲིན་བུ་མེ་ཁྱེར་ལྟ་བུ་དང ། ནམ་མཁའ་དང་པད་མའི་རྩ་བའི་བུ་ག་ལྟ་བུའོ། །དེ་ལ་རིའི་རྒྱལ་པོ་རི་རབ་ཇི་ལྟ་བ་དེ་ལྟར་ནི་སྟོན་པ་བལྟ་བར་བྱ་ལ། ཡུངས་ཀར་ཇི་ལྟ་བ་དེ་ལྟར་ནི་ཉན་ཐོས་བལྟ་བར་བྱའོ། །རྒྱ་མཚོ་ཆེན་པོ་ཇི་ལྟ་བ་དེ་ལྟར་ནི་སྟོན་པ་བལྟ་བར་བྱ་ལ། བ་ལང་གི་རྗེས་ཇི་ལྟ་བ་དེ་ལྟར་ནི་ཉན་ཐོས་བལྟ་བར་བྱའོ། །ཉི་མ་ཇི་ལྟ་བ་དེ་ལྟར་ནི་སྟོན་པ་བལྟ་བར་བྱ་ལ། སྲིན་བུ་མེ་ཁྱེར་ཇི་ལྟ་བ་དེ་ལྟར་ནི་ཉན་ཐོས་བལྟ་བར་བྱའོ། །ནམ་མཁའ་ཇི་ལྟ་བ་དེ་ལྟར་ནི་སྟོན་པ་བལྟ་བར་བྱ་ལ། པད་མའི་རྩ་བའི་བུ་ག་ཇི་ལྟ་བ་དེ་ལྟར་ནི་ཉན་ཐོས་བལྟ་བར་བྱའོ། །ཞེས་སྨྲས་ནས། ཚིགས་སུ་བཅད་པ་སྨྲས་པ། རི་རྒྱལ་ཡུངས་ཀར་གཉིས་ལ་ཁྱད་པར་གང་ཡོད་དང ། །དུག་ཅན་གླང་རྗེས་ཆུ་ལ་ཁྱད་པར་གང་ཡོད་དང ། །ཉི་མ་མེ་ཁྱེར་སྲིན་ལ་ཁྱད་པར་གང་ཡོད་པ། །ནམ་མཁའ་པད་མའི་བུ་གར་ཁྱད་པར་གང་ཡོད་པ། །སངས་རྒྱས་ཉན་ཐོས་བྱང་ཆུབ་ཁྱད་པར་དེ་ཡོད་དོ། །དེ་ནས་གྱད་བུ་ནོར་འདི་སྙམ་དུ་སེམས་ཏེ། ཇི་ལྟར་རབ་ཏུ་བྱུང་བ་འདིའི་སྟོན་པ་ལ་བསྟོད་པར་བྱེད་ཅིང་བདག་ཉིད་ལ་སྨོད་པར་བྱེད་པ་ལས་ན། སངས་རྒྱས་ནི་དམ་པ་མ་ཡིན་པར་མི་འགྱུར་ལ། ཆོས་བསྟན་པ་ཡང་དམ་པ་མ་ཡིན་པར་མི
5.269a
འགྱུར་རོ་སྙམ་དུ་རིག་ནས། ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་སོ། །འཕགས་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་བགྱིའོ། །བདག་འཕགས་པའི་དྲུང་ན་ཚངས་པར་སྤྱོད་པ་སྤྱད་པར་བགྱིའོ། །བཞིན་བཟངས་ཁྱོད་ཕ་མ་དག་གིས་གནང་ངམ། འཕགས་པ་མ་གནང་ངོ ། །བཞིན་བཟངས་དེ་བཞིན་གཤེགས་པ་དང ། དེ་བཞིན་གཤེགས་པའི་ཉན་ཐོས་ནི་ཕ་མ་དག་གིས་མ་གནང་བའི་རིགས་ཀྱི་བུ་རབ་ཏུ་འབྱིན་པར་མི་མཛད། བསྙེན་པར་རྫོགས་པར་མི་མཛད་དོ། །འཕགས་པ་ཁྱོད་ཀྱིས་བདག་རབ་ཏུ་དབྱུང་བ་འབའ་ཞིག་མཛོད་ཅིག་དང ། ཅི་ནས་ཀྱང་བདག་ཕ་མ་དག་གིས་གནང་བར་འགྱུར་བ་དེ་ལྟར་བདག་བགྱིད་དོ། །ཚེ་དང་ལྡན་པ་རྟ་ཐུལ་གྱིས་དེ་ལ་བཞིན་བཟངས་ལེགས་ཀྱིས་དེ་ལྟར་བྱོས་ཤིག་ཅེས་སྨྲས་སོ། །དེ་ནས་གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་གྱིས་སྨྲས་པ་ལ་མངོན་པར་བསྟོད་པ་བྱས་ཤིང་རྗེས་སུ་ཡི་རང་བ་བྱས་ནས་རང་གི་ཁྱིམ་ག་ལ་བ་དེར་སྟོང་སྟེ་ཕྱིན་ནས་ཕ་མ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་མཁྱེན་པར་མཛོད་ཅིག་།བདག་ལེགས་པར་གསུངས་པའི་ཆོས་འདུལ་བ་ལ་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ ། །བུ་གཞོན་ནུ་ཤེས་པར་གྱིས་ཤིག་།ཁྱོད་ངེད་ཀྱི་བུ་གཅིག་པ། སྡུག་པ། ཡིད་དུ་འོང་བ་བཟོད་པ་མཐོང་ན་མི་མཐུན་པ་མེད་པ་ཡིན་པས། ཁྱོད་ཤི་བར་གྱུར་ན་ངེད་མི་འདོད་བཞིན་དུ་འབྲལ་བ་ཁོ་ན་ཡིན་གྱི། གསོན་བཞིན་དུ་བཏང་བ་ལྟ་སྨོས་ཀྱང་ཅི་དགོས། ཡབ་ཡུམ་གལ་ཏེ་གནང་ན་དེ་ལྟ་ན་ལེགས། གལ་ཏེ་མི་གནང་ན་དེང་སླན་ཆད་འཚལ་མ་ཡང་མི་འཚལ། ཕྱག་ལ་ཡང་མི་འཚལ་ལོ། །བུ་གཞོན་ནུ་མི་གནང་གིས་ཇི་སྲིད་ངེད་གསོན་གྱི་བར་དུ་ཁྱོད་ངེད་ཀྱི་མིག་ལམ་ན་འདུག་ལ་བྱ་བ་གཞན་མ་སེམས་ཤིག་།དེ་ནས་གྱད་བུ་ནོར་གྱིས
5.269b
ཉི་མ་གཅིག་གི་ཟན་བཅད་པ་བྱས་སོ། །གཉིས་པ་དང ། གསུམ་ནས་དྲུག་གི་བར་དུ་ཡང་ཟན་བཅད་པ་བྱས་སོ། །དེ་ནས་གྱད་བུ་ནོར་གྱི་ཕ་མ་གཉིས་ཀྱིས་གྱད་བུ་ནོར་ལ་འདི་སྐད་ཅེས་སྨྲས་སོ། །བུ་གཞོན་ནུ་ཤེས་པར་གྱིས་ཤིག་།ཁྱོད་ནི་ཤིན་དུ་གཞོན་པ་བདེ་བ་འདོད་པ་ཡིན་པས་ཁྱོད་ཀྱིས་སྡུག་བསྔལ་མི་ཤེས་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པ་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང ། རྩེད་མོ་དག་ལས་དབེན་པར་བྱ་དགོས་སོ། །གཞོན་ནུ་ཚུར་ཤོག་།འདུག་ལ་འདོད་པ་དག་ལ་ཡོངས་སུ་སྤྱོད་ཅིང ། སྦྱིན་པ་དག་ཀྱང་བྱིན་ཅིག་།བསོད་ནམས་དག་ཀྱང་གྱིས་ཤིག་།དེ་སྐད་སྨྲས་ཀྱང་གྱད་བུ་ནོར་ཅང་མི་སྨྲའོ། །དེ་ནས་གྱད་བུ་ནོར་གྱི་ཕ་མ་གཉིས་ཀྱིས་ཉེ་དུ་རྣམས་ལ་བསྒོ་བ། ཀྱེ་ཉེ་དུ་དག་ཚུར་ཤོག་།བུ་གཞོན་ནུ་གྱད་བུ་ནོར་སློང་ཤིག་།དེ་ནས་གྱད་བུ་ནོར་གྱི་ཉེ་དུ་དག་གྱད་བུ་ནོར་ག་ལ་བ་དེར་སོང་སྟེ་ཕྱིན་ནས། གྱད་བུ་ནོར་ལ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག་།ཁྱོད་ནི་ཤིན་དུ་གཞོན་པ་བདེ་བ་བཞེད་པ་ལགས་པས་ཁྱོད་ཀྱིས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པ་བགྱིད་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག
5.270a
པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང ། རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་ཚུར་སྤྱོན་བཞུགས་ལ་འདོད་པ་དག་ལ་ཡང་ཡོངས་སུ་སྤྱོད་ཅིག་།སྦྱིན་པ་དག་ཀྱང་སྩོལ་ཅིག་།བསོད་ནམས་དག་ཀྱང་མཛོད་ཅིག་།དེ་སྐད་སྨྲས་ཀྱང་གྱད་བུ་ནོར་ཅང་མི་སྨྲའོ། །དེ་ནས་གྱད་བུ་ནོར་གྱི་ཕ་མ་གཉིས་ཀྱིས་གྱད་བུ་ནོར་གྱི་ནེའུ་ལྡངས་རྣམས་ལ་བསྒོ་བ། ཀྱེ་གཞོན་ནུ་དག་ཚུར་ཤོག་།བུ་གཞོན་ནུ་གྱད་བུ་ནོར་སློང་ཤིག་།དེ་ནས་གྱད་བུ་ནོར་གྱི་ནེའུ་ལྡངས་དག་གྱད་བུ་ནོར་ག་ལ་བ་དེར་སོང་སྟེ་ཕྱིན་ནས་གྱད་བུ་ནོར་ལ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག་།ཁྱོད་ནི་ཤིན་དུ་གཞོན་པ་བདེ་བ་བཞེད་པ་ལགས་པས་ཁྱོད་ཀྱིས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པ་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང ། རི་དྲུང་དང ། བས་མཐའ་དག་ཏུ་གནས་པར་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང ། རྩེ་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་ཚུར་སྤྱོན་བཞུགས་ལ་འདོད་པ་དག་ལ་ཡང་ཡོངས་སུ་སྤྱོད
5.270b
ཅིག་།སྦྱིན་པ་དག་སྩོལ་ཅིག་།བསོད་ནམས་དག་ཀྱང་མཛོད་ཅིག་།དེ་སྐད་སྨྲས་ཀྱང་གྱད་བུ་ནོར་ཅང་མི་སྨྲའོ། །དེ་ནས་གྱད་བུ་ནོར་གྱི་ནེའུ་ལྡངས་རྣམས་གྱད་བུ་ནོར་གྱི་ཕ་མ་གཉིས་ག་ལ་བ་དེར་སོང་སྟེ་ཕྱིན་ནས། གྱད་བུ་ནོར་གྱི་ཕ་མ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་དག་མཁྱེན་པར་མཛོད་ཅིག་།ཞི་བ་གཞོན་ནུ་གུམ་པས་ཅི་ཞིག་བགྱི། རབ་ཏུ་བྱུང་བ་ནི་མཁས་པས་བསྔགས་པ་ལགས་པས་གལ་ཏེ་རབ་ཏུ་བྱུང་ནས་མངོན་པར་དགའ་བར་གྱུར་ན་ཡང་དེ་གསོན་པོ་ཉིད་དུ་གཟིགས་པར་འགྱུར་ལ། མངོན་པར་དགའ་བར་མ་གྱུར་ན་ཡང་དྲང་སྲོང་དག་ནི་སླར་ལྡོག་པ་ལགས་པས་བུའི་གནས་ཕ་མ་གཉིས་མ་གཏོགས་པ་གཞན་སུ་ཞིག་མཆིས་པར་འགྱུར་གྱིས་རབ་ཏུ་བྱུང་ན་ལེགས་སོ། །དེ་ནས་གྱད་བུ་ནོར་གྱི་ཕ་མ་གཉིས་ཀྱིས་གྱད་བུ་ནོར་ལ་འདི་སྐད་ཅེས་སྨྲས་སོ། །བུ་གཞོན་ནུ་ཁྱོད་ལ་རབ་ཏུ་འབྱུང་བ་ལེགས་པར་བྱེད་པ་ཡིན་ལ། ཁྱིམ་ན་གནས་པ་ལེགས་པ་བྱེད་པ་མ་ཡིན་ནམ། ཡབ་ཡུམ་བདག་ལ་རབ་ཏུ་འབྱུང་བ་ལེགས་པ་བགྱིད་པ་ལགས་ལ། ཁྱིམ་ན་གནས་པ་ལེགས་པ་བགྱིད་པ་མ་ལགས་སོ། །བུ་གཞོན་ནུ་ད་དེའི་དུས་ལ་བབ་པར་ཤེས་པར་གྱིས་ཤིག་།དེ་ནས་གྱད་བུ་ནོར་ཕ་མ་གཉིས་ཀྱིས་གནང་ནས་འབྲས་ཁུའི་རིམ་གྱིས་ལུས་ཀྱི་མཐུ་དང ། སྟོབས་དང ། བརྩོན་འགྲུས་བསྐྱེད་དེ་སྡིག་བྱུང་ནས་ཕྱིར་བྱུང་ནས་ཚེ་དང་ལྡན་པ་རྟ་ཐུལ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འདུག་གོ། །མཐའ་གཅིག་ཏུ་འདུག་ནས་གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།བདག་ཕ་མ་གཉིས་ཀྱིས་གནང་གིས་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་བགྱིའོ། །བདག་འཕགས་པའི་དྲུང་ན་ཚངས་པར་སྤྱོད་པ་སྤྱད་པར
5.271a
བགྱིའོ། །ཚེ་དང་ལྡན་པ་རྟ་ཐུལ་གྱིས་སྨྲས་པ། བཞིན་བཟངས་ལེགས་སོ། །ལོངས་སྤྱོད་དག་ནི་མི་རྟག་པ་ཡིན་ལ། རབ་ཏུ་འབྱུང་བ་ནི་ལེགས་པ་ཡིན་གྱིས་དེ་ལྟར་གྱིས་ཤིག་།བཅོམ་ལྡན་འདས་ཀྱིས་ཀྱང་ཕན་ཡོན་ལྔ་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་ཏེ། ལྔ་གང་ཞེ་ན། བདག་གིས་རང་གི་དོན་མ་འདྲེས་པ་རྗེས་སུ་ཐོབ་པར་འགྱུར་རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང ། བདག་གང་དག་གི་བྲན་དང ། མངག་གཞུག་དང ། བསྒོ་བ་དང ། རང་དབང་མེད་པ་དང ། དགའ་མགུར་འགྲོར་མེད་པ་ཡིན་པ་དེ་དག་གི་མཆོད་པར་བྱ་བ་དང ། བསྟོད་པར་བྱ་བར་འགྱུར་རོ་ཞེས་བྱ་བར་འགྱུར་རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང ། གྲུབ་པ་དང ། བདེ་བ་བླ་ན་མེད་པའི་མྱ་ངན་ལས་འདས་པ་འཐོབ་པར་འགྱུར་རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང ། གྲུབ་པ་དང ། བདེ་བ་བླ་ན་མེད་པའི་མྱ་ངན་ལས་འདས་པ་འཐོབ་པ་ལས་ཉམས་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང ། རབ་ཏུ་བྱུང་བ་ནི་སངས་རྒྱས་རྣམས་དང ། སངས་རྒྱས་ཀྱི་ཉན་ཐོས་དམ་པ་ཡང་དག་པར་རྟོགས་པ། ཡང་དག་པར་སྒྲུབ་པ། སྐྱེས་བུ་དམ་པ་རྣམས་ཀྱིས་རྣམ་གྲངས་དུ་མས་བསྔགས་སོ་ཞེས་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་སོ་ཞེས་གསུངས་ཀྱིས་རབ་ཏུ་བྱུང་ཤིག་།དེ་ནས་ཚེ་དང་ལྡན་པ་རྟ་ཐུལ་གྱིས་རིགས་ཀྱི་བུ་གྱད་བུ་ནོར་རབ་ཏུ་ཕྱུང་བསྙེན་པར་རྫོགས་པར་བྱས་ནས་སྨྲས་པ། བུ་དགེ་སློང་གི་ལས་ནི་གཉིས་ཏེ།
5.271b
བསམ་གཏན་དང ། ཀློག་པ་ཡིན་ན། ཁྱོད་བསམ་གཏན་དང ། ཀློག་པ་གང་འདོད། གྱད་བུ་ནོར་གྱིས་སྨྲས་པ། མཁན་པོ་གཉི་ག་ཡང་བགྱི་སྟེ། གདུགས་ལ་ནི་གློག་པ་བགྱི། དགུང་ལ་ནི་བསམ་གཏན་བགྱིའོ། །ཚེ་དང་ལྡན་པ་རྟ་ཐུལ་གྱིས་སྨྲས་པ། བུ་དེ་བཞིན་གྱིས་ཤིག་།དེ་ནས་ཚེ་དང་ལྡན་པ་གྱད་བུ་ནོར་གྱིས་ཉིན་མོ་ཀླག་པ་དང ། ཁ་ཏོན་བྱས་པས་སྡེ་སྣོད་གསུམ་པོ་དག་ལྷོགས་པར་གྱུར་ཏོ། །མཚན་མོ་བསམ་གཏན་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང ། མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང ། རྣམ་པར་འཐོར་བ་དང ། རྣམ་པར་འཇིག་པའི་ཆོས་ཉིད་ཀྱི་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པར་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རབ་ཏུ་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་བོ། །སྲིད་པ་དང ། འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ།། ་་་་་་་་།།འདུལ་བ་རྣམ་པར
5.272a
འབྱེད་པ། བམ་པོ་ཉི་ཤུ་པ། ཇི་ལྟར་སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་ཉན་ཐོས་རྣམས་ཀྱི་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་དབྱར་ཉེ་བར་སྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཟླ་བ་ཉ་ལ་ཡིན་པ་དེ་བཞིན་དུ་ཉན་ཐོས་ཆེན་པོ་རྣམས་ལ་ཡང་ཉན་ཐོས་རྣམས་ཀྱི་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་དབྱར་ཉེ་བར་སྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཟླ་བ་ཉ་ལའོ། །དེ་ལ་གང་དག་དབྱར་ཟླ་འབྲིང་པོའི་ཉ་ལ་དབྱར་ཉེ་བར་སྒྲུབ་པའི་ཚེ་གདམས་ངག་མནོས་ཏེ་གྲོང་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དག་ཏུ་དབྱར་གནས་པར་ཁས་ལེན་པ་དེ་དག་ནི་སྟོན་ཟླ་འབྲིང་པོའི་ཟླ་བ་ཉ་ལ་ལྷགས་ནས་ཇི་ལྟར་ཐོབ་པ་ནི་རྗོད་པར་བྱེད། མ་ཐོབ་པ་ནི་ཐོབ་པར་བྱེད་པའི་ཕྱིར་འོག་ཏུ་མདོ་སྡེ་དང ། འདུལ་བ་དང ། ཆོས་མངོན་པ་དེ་དག་གི་ཁ་ཏོན་དག་དང་ཡོངས་སུ་འབྲི་བ་དག་ཚོལ་བར་བྱེད་དོ། །དེ་ནས་ཚེ་དང་ལྡན་པ་རྟ་ཐུལ་གྱི་ལྷན་ཅིག་གནས་པ་དང་ཉེ་གནས་གང་དག་ལྗོངས་སུ་དབྱར་གནས་པར་ཁས་བླངས་པ་དེ་དག་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ལྷུང་བཟེད་དང་ཆོས་གོས་ཐོགས་ཏེ་ཚེ་དང་ལྡན་པ་རྟ་ཐུལ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་དེ་དག་ཁ་ཅིག་ནི་ཇི་ལྟར་ཐོབ་པ་རྗོད་པར་བྱེད་དོ། །ཁ་ཅིག་ནི་མདོ་སྡེ་དང ། འདུལ་བ་དང ། ཆོས་མངོན་པ་དག་གི་ཁ་ཏོན་དག་དང ། ཡོངས་སུ་འདྲི་བ་དག་ཚོལ་བར་བྱེད་དོ། །ཚེ་དང་ལྡན་པ་རྟ་ཐུལ་གྱིས་དེ་དག་གི་སྡེ་སྣོད་གསུམ་དང་བསམ་གཏན་གྱི་ལམ་ལ་སོམ་ཉི་དང་ཡིད་གཉིས་ཡང་དག་པར་བཅད་ནས་དེ་དག་གིས་ཕན་ཚུན་སྨྲ་བར་བརྩམས
5.272b
པ། ཚེ་དང་ལྡན་པ་དག་བདག་ཅག་གིས་མཁན་པོ་མཐོང་ཞིང་བསྙེན་བཀུར་བྱས་ཟིན་ཀྱིས་ད་ནི་རྒྱལ་པོའི་ཁབ་ཏུ་བཅོམ་ལྡན་འདས་ལ་བསྙེན་བཀུར་བྱེད་དུ་འདོང་ངོ ། །དེ་ནས་ཚེ་དང་ལྡན་པ་གྱད་བུ་ནོར་གྱིས་དེ་དག་གིས་གཏམ་འདྲེ་བ་ཐོས་ནས་དེ་ལ་ཀྱེ་མ་བདག་གིས་ཀྱང་བཅོམ་ལྡན་འདས་བལྟའོ་སྙམ་པའི་འདོད་པ་སྐྱེས་ཤིང་རིག་ནས་ཚེ་དང་ལྡན་པ་རྟ་ཐུལ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག་།བདག་གིས་བཅོམ་ལྡན་འདས་ཆོས་ཀྱི་སྐུའི་སྒོ་ནས་ནི་མཐོང་ན་གཟུགས་ཀྱི་སྐུའི་སྒོ་ནས་མ་མཐོང་བས་དེའི་སླད་དུ་བཅོམ་ལྡན་འདས་ཀྱི་གཟུགས་ཀྱི་སྐུ་བལྟ་བར་འཚལ་ན་མཆི་བར་ཅི་གནང ། ཚེ་དང་ལྡན་པ་རྟ་ཐུལ་གྱིས་སྨྲས་པ། བུ་མ་ཉེས་ཀྱིས་བལྟ་བར་གྱིས་ཤིག་།བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང ། དེ་དག་འབྱུང་བ་ནི་འདི་ལྟ་སྟེ་དཔེར་ན་ཨུ་དུམ་བ་རའི་མེ་ཏོག་བཞིན་དུ་དཀོན་པ་ཡིན་གྱིས་དེ་བཞིན་གྱིས་ཤིག་།དེ་ནས་ཚེ་དང་ལྡན་པ་གྱད་བུ་ནོར་མཁན་པོས་གནང་ནས། བཅོམ་ལྡན་འདས་ལ་བལྟ་བར་སྤྲོ་བའི་བློ་གྲོས་ཀྱིས་ཡིད་བདེ་བ་སྐྱེས་ནས་དེ་ཉིད་ཀྱིས་མཚན་མོ་འདས་པ་དང ། སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་སྡིག་བྱུང་དུ་བསོད་སྙོམས་ལ་ཞུགས་སོ། །སྡིག་བྱུང་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལྡོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་ནས་ལྷུང་བཟེད་དང་ཆོས་གོས་ཐོགས་ཏེ་མཁན་པོ་གཅིག་པ་དང ། སློབ་དཔོན་གཅིག་པ་དང་ལྷན་ཅིག་རྒྱལ་པོའི་ཁབ་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་རྒྱལ་པོའི་ཁབ་ཏུ་ཕྱིན་ཏོ། །དེ་ནས་ཚེ་དང་ལྡན་པ་གྱད་བུ་ནོར་གྱིས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་བཅོམ་ལྡན་འདས་ག
5.273a
ལ་བ་དེར་སོང་ངོ ། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཆོས་སྟོན་ཏེ། བཅོམ་ལྡན་འདས་ཀྱིས་ཚེ་དང་ལྡན་པ་གྱད་བུ་ནོར་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་ཚེ་དང་ལྡན་པ་གྱད་བུ་ནོར་ལ་བཀའ་སྩལ་པ། གྱད་བུ་ནོར་ཚུར་ཤོག་།འོངས་པ་ལེགས་སོ། །ཁྱོད་དུས་སུ་ཕྱིན་ཏོ། །གྱད་བུ་ནོར་རང་གི་སྟན་ཇི་ལྟ་བ་ལ་འདུག་ཤིག་།དེ་ནས་ཚེ་དང་ལྡན་པ་གྱད་བུ་ནོར་གྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེའི་ཚེ་ན་རྒྱལ་པོའི་ཁབ་ན་གནས་མལ་མི་མཐུན་པ་འབོག་པར་བྱེད་དེ། མདོ་སྡེ་འཛིན་པ་རྣམས་དང་འདུལ་བ་འཛིན་པ་རྣམས་ཀྱི། མདོ་སྡེ་འཛིན་པ་རྣམས་དང་མ་མོ་འཛིན་པ་རྣམས་ཀྱི། མདོ་སྡེ་འཛིན་པ་རྣམས་དང་ཆོས་སྒྲོག་པ་རྣམས་ཀྱི། མདོ་སྡེ་འཛིན་པ་རྣམས་དང་སྤོང་བ་པ་རྣམས་ཀྱི་གནས་མལ་ལྷན་ཅིག་ཏུ་འབོག་པར་བྱེད། འདུལ་བ་འཛིན་པ་རྣམས་དང་མདོ་སྡེ་འཛིན་པ་རྣམས་ཀྱི། འདུལ་བ་འཛིན་པ་རྣམས་དང་མ་མོ་འཛིན་པ་རྣམས་ཀྱི། འདུལ་བ་འཛིན་པ་རྣམས་དང་ཆོས་སྒྲོག་པ་རྣམས་ཀྱི། འདུལ་བ་འཛིན་པ་རྣམས་དང་སྤོང་བ་པ་རྣམས་ཀྱི་གནས་མལ་ལྷན་ཅིག་འབོག་པར་བྱེད། མ་མོ་འཛིན་པ་རྣམས་དང་མདོ་སྡེ་འཛིན་པ་རྣམས་ཀྱི། མ་མོ་འཛིན་པ་རྣམས་དང་འདུལ་བ་འཛིན་པ་རྣམས་ཀྱི། མ་མོ་འཛིན་པ་རྣམས་དང་ཆོས་སྒྲོག་པ་རྣམས་ཀྱི། མ་མོ་འཛིན་པ་རྣམས་དང་སྤོང་བ་པ་རྣམས་ཀྱི་གནས་མལ་ལྷན་ཅིག་ཏུ་འབོག་པར་བྱེད། ཆོས་སྒྲོག་པ་རྣམས་དང་མདོ་སྡེ་འཛིན་པ་རྣམས་ཀྱི། ཆོས་སྒྲོག་པ་རྣམས་དང་འདུལ་བ་འཛིན་པ་རྣམས་ཀྱི། ཆོས་སྒྲོག་པ་རྣམས་དང་མ་མོ་འཛིན་པ་རྣམས་ཀྱི། ཆོས་སྒྲོག་པ་རྣམས་དང་སྤོང་བ་པ་རྣམས་ཀྱི་གནས་མལ་ལྷན་ཅིག་ཏུ་འབོག་པར་བྱེད། སྤོང་བ་པ་རྣམས་དང་མདོ་སྡེ་འཛིན་པ་རྣམས་ཀྱི། སྤོང་བ་པ་རྣམས་དང་འདུལ་བ་འཛིན་པ་རྣམས་ཀྱི། སྤོང་བ་པ་རྣམས་དང་མ་མོ་འཛིན་པ་རྣམས་ཀྱི།
5.273b
སྤོང་བ་པ་རྣམས་དང་ཆོས་སྒྲོག་པ་རྣམས་ཀྱི་གནས་མལ་ལྷན་ཅིག་ཏུ་འབོག་པར་བྱེད་དོ། །གནས་མལ་མི་མཐུན་པར་འབོག་པ་ན་དགེ་སློང་དག་ཕན་ཚུན་སེམས་སྲུང་བས་དགེ་བའི་ཕྱོགས་དག་མི་བྱེད་ཅིང་དེ་དག་དགེ་བའི་ཆོས་རྣམས་ཀྱིས་མི་འཕེལ་ཏོ། །དཔེར་ན་ཆུ་མེད་པ་ན་ཨུཏྤལ་བཞིན་ནོ། །བཅོམ་ལྡན་འདས་ཀྱིས་དགོངས་པ། གྱད་བུ་ནོར་འདིས་སྔོན་གྱི་སངས་རྒྱས་རྣམས་དང ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་ཀྱེ་མ་བདག་སྐྱེ་དགུའི་ཚེ་ལོ་བརྒྱ་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་གནས་མལ་འབོག་པ་རྣམས་ཀྱི་མཆོག་ཏུ་གྱུར་ཅིག་ཅེས་སྨོན་ལམ་བཏབ་པས་འདི་དགེ་སློང་རྣམས་ཀྱི་གནས་མལ་འབོག་པར་སྐོར་གཞུག་གོ་སྙམ་དུ་དགོངས་ནས་དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་གྱད་བུ་ནོར་རམ། གཞན་ཡང་དེ་ལྟ་བུ་གང་ཡིན་པ་གནས་མལ་འབོག་པར་བསྐོ་བར་བྱའོ། །གནས་མལ་འབོག་པ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། གནས་མལ་ཕོག་པ་དང་མ་ཕོག་པ་མི་ཤེས་པའོ། །གནས་མལ་འབོག་པ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། གནས་མལ་ཕོག་པ་དང ། མ་ཕོག་པ་ཤེས་པའོ། །འདི་ལྟར་བསྐོ་བར་བྱ་སྟེ། གནས་མལ་བཤམ་པར་བྱས་ནས་གཎྜི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་བསྐུལ་ནས་དགེ་འདུན་ཐམས་ཅད་འདུག་ཅིང་འཐུན
5.274a
པར་གྱུར་པ་ལ་ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་ལ་གནས་མལ་འབོག་པར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་ཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོག་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོག་པར་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོག་གོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོག་པར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་ལ་གནས་མལ་འབོག་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོག་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོག་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་གི་ཚེ་ཚེ་དང་ལྡན་པ་གྱད་བུ་ནོར་གནས་མལ་འབོག་པར་བསྐོས་པ་དེའི་ཚེ་ན་དེས་གནས་མལ་དེ་དག་མཐུན་པར་རྣམ་པར་བཞག་སྟེ། མདོ་སྡེ་འཛིན་པ་རྣམས་ཀྱང་མདོ་སྡེ་འཛིན་པ་རྣམས་དང་ལྷན་ཅིག་རྣམ་པར་བཞག་།འདུལ་བ་འཛིན་པ་རྣམས་ཀྱང་འདུལ་བ་འཛིན་པ་རྣམས་དང ། མ་མོ་འཛིན་པ་རྣམས་ཀྱང་མ་མོ་འཛིན་པ་རྣམས་དང ། ཆོས་སྒྲོག་པ་རྣམས་ཀྱང་ཆོས་སྒྲོག་པ་རྣམས་དང །
5.274b
སྤོང་བ་པ་རྣམས་ཀྱང་སྤོང་བ་པ་རྣམས་དང་ལྷན་ཅིག་རྣམ་པར་བཞག་གོ། །དེ་དག་གནས་མལ་འཐུན་པར་ཕོག་པས་ཕན་ཚུན་གཏམ་དང་འབེལ་བའི་གཏམ་གྱིས་རྣམ་པར་གཏན་ལ་འབེབས་པས་དགེ་བའི་ཆོས་རྣམས་ཀྱིས་རྣམ་པར་འཕེལ་ཏེ། དཔེར་ན་ཆུ་ནས་ཨུཏྤ་ལ་བཞིན་ནོ། །དེ་ན་གང་དག་མཚན་མོ་འོང་བ་དེ་དག་ལ་ནི་ཚེ་དང་ལྡན་པ་གྱད་བུ་ནོར་གྱིས་རྫུ་འཕྲུལ་གྱིས་སོར་མོ་གཅིག་ལས་འོད་སྦར་ཏེ་གནས་མལ་འབོག་པར་བྱེད་དོ། །དེ་ན་གང་དག་མཚན་མོ་ཆེས་འཕྱི་བ་ན་འོང་བ་དེ་དག་ལ་ནི་ཚེ་དང་ལྡན་པ་གྱད་བུ་ནོར་གྱིས་རྫུ་འཕྲུལ་གྱིས་སོར་མོ་གཉིས་ལས་འོད་སྦར་ཏེ་གནས་མལ་འབོག་པར་བྱེད་དོ། །དེ་ན་དགེ་སློང་གང་དག་ཚེ་དང་ལྡན་པ་གྱད་བུ་ནོར་གྱིས་མིའི་ཆོས་བླ་མ་རྫུ་འཕྲུལ་གྱི་ཆོ་འཕྲུལ་ལྟ་བར་འདོད་པ་དེ་དག་ནི་ཆེད་དུ་བསམས་ཏེ་མཚན་མོ་འོང་བར་བྱེད་པས་དེ་དག་ལ་ཚེ་དང་ལྡན་པ་གྱད་བུ་ནོར་གྱིས་རྫུ་འཕྲུལ་གྱིས་སོར་མོ་ལྔ་ཆར་ལས་འོད་སྦར་ཏེ་གནས་མལ་འབོག་པར་བྱེད་དོ། །དེ་དག་འདི་སྙམ་དུ་སེམས་ཏེ། བདག་ཅག་གིས་སྟོན་པ་དང་འདྲ་བའི་ཉན་ཐོས་ཆེན་པོ་འདི་ལྟ་བུས་གནས་མལ་ཕོག་པ་ལ་གློས་ཕབ་སྟེ་གཉིད་ལོག་པར་བྱེད་པ་ནི་བདག་ཅག་གི་ཚུལ་དང་འཐུན་པ་མ་ཡིན་གྱིས། བདག་ཅག་གིས་ནམ་གྱི་ཆ་སྟོད་དང ། ནམ་གྱི་ཆ་སྨད་ལ་མི་ཉལ་བར་སྦྱོར་བ་ལ་རྗེས་སུ་བརྩོན་པར་གནས་པར་བྱའོ་སྙམ་ནས་དེ་དག་ནམ་གྱི་ཆ་སྟོད་དང ། ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པས་མ་ཐོབ་པ་ནི་ཐོབ་པར་གྱུར་ཅིང ། ཐོབ་པ་ལས་ནི་ཡོངས་སུ་མི་ཉམས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་གནས་མལ་འབོག་པ་རྣམས་ཀྱི་ནང་ན་འདི་ལྟ་སྟེ། ངའི་གྱད་བུ་ནོར་འདི་མཆོག་ཡིན་ནོ། །གང་གི་ཚེ་བཅོམ་ལྡན་འདས་ཀྱིས་བསྟན་པ་རྒྱས་པར་གྱུར་པ་དེའི་ཚེ་བྲམ་ཟེ་དང ། ཁྱིམ་བདག་དད་པ་རྣམས་ཀྱིས་ཁྱིམ་དག་ཏུ་དགེ་འདུན་གྱི་ཟས་དག་བཤམས་པ་ན་དྲུག་སྡེ
5.275a
དག་གང་ན་ཟས་དག་བསོད་པ་དེར་སོང་སྟེ་ཡོངས་སུ་ལོངས་སྤྱོད་པར་བྱེད་ནས། བྲམ་ཟེ་དང ། ཁྱིམ་བདག་དད་པ་དེ་དག་གིས་སྨྲས་པ། འཕགས་པ་དག་ཁྱེད་ཅག་འབའ་ཞིག་གདུགས་གཅིག་བཞིན་དུ་བྱོན་ན་ཅིའི་སླད་དུ་དགེ་སློང་གནས་བརྟན་གནས་བརྟན་དེ་དག་མ་བྱོན། དྲུག་སྡེ་དག་གིས་སྨྲས་པ། དེ་དག་ཟས་འདི་ལྟ་བུ་དག་ལ་ཡོངས་སུ་ལོངས་སྤྱོད་པར་མི་བྱེད་དོ། །འོ་ན་ཇི་ལྟ་བུ་དག་ལ་ཡོངས་སུ་ལོངས་སྤྱོད་པར་མཛད། བསོད་པ་དག་ལའོ། །འཕགས་པ་དག་བཅོམ་ལྡན་འདས་ཀྱིས་བདག་ཅག་བསོད་པ་སྦྱིན་པར་བྱེད་པ་རྣམས་ཀྱིས་མཆོག་ཏུ་བསྟན་ན་ཁྱེད་ཅག་ཅིའི་སླད་དུ་དེ་སྐད་ཅེས་དེ་དག་ཟས་འདི་ལྟ་བུ་དག་ལ་ཡོངས་སུ་ལོངས་སྤྱོད་པར་མི་བྱེད་དོ་ཞེས་གསུང ། བཅོམ་ལྡན་འདས་ཀྱིས་འཕགས་པའི་རིགས་ཀྱི་མདོ་ལས། ཆོས་གོས་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། བསོད་སྙོམས་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། གནས་མལ་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། སྤོང་བ་ལ་མངོན་པར་དགའ་བ་དང་བསྒོམ་པ་ལ་མངོན་པར་དགའ་བ་འཕགས་པའི་རིགས་ཤེས་གསུངས་ན། ཁྱེད་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཅིའི་སླད་དུ་བྱུང་རྒྱལ་དུ་སྨྲ་བར་མཛད། བཞུད་ལ་སླན་ཆད་འདིར་མ་བྱོན་ཅིག་།དྲུག་སྡེ་དག་སྤོབས་པ་མེད་པར་གྱུར་ནས་ཅང་མི་སྨྲ་བར་དོང་ངོ ། །ཐོས་པ་གཅིག་ནས་གཅིག་ཏུ་བརྒྱུད་པས་དགེ་སློང་དག་གིས་ཐོས་ནས་དགེ་སློང་དག་གིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་གྱད་བུ་ནོར་རམ། གཞན་ཡང་དེ་ལྟ་བུ་གང་ཡིན་པ་ཟས་ལ་སྐོ་བར་བསྐོ་བར་བྱའོ། །ཟས་ལ་སྐོ་བ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང །
5.275b
ཟས་ལ་བསྐོས་པ་དང་མ་བསྐོས་པ་མི་ཤེས་པའོ། །ཟས་ལ་སྐོ་བ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། ཟས་ལ་བསྐོས་པ་དང་མ་བསྐོས་པ་ཤེས་པའོ། །འདི་ལྟར་བསྐོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་བསྐུལ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་སློང་རྣམས་ལ་ཟས་ལ་སྐོ་བར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་སྐོ་བར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་སྐོ་བར་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་བསྐོའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་སྐོ་བར་སྤྲོ་སྟེ། དགེ་སློང་མིང་འདི་ཞེས་བགྱི་བ་དགེ་སློང་རྣམས་ལ་ཟས་ལ་སྐོ་བར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་དགེ་སློང་རྣམས་ལ་ཟས་ལ་སྐོ་བ་བསྐོ་བར་བཟོད་པ་དེ་དག་ནི་ཅང་མ་གསུངས་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་རྣམས་ལ་ཟས་ལ་སྐོ་བར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་གི་ཚེ་ཚེ་དང་ལྡན་པ་གྱད་བུ་ནོར་ཟས་ལ་སྐོ་བར་བསྐོས་པ་དེའི
5.276a
ཚེ་ན་དེས་དགེ་འདུན་ལ་ཟས་རྣམ་པ་གསུམ་བཤམས་ཏེ། བསོད་པ་དག་དང ། འབྲིང་དག་དང ། ངན་པ་དག་གོ། །དགེ་སློང་གང་དག་གློ་བུར་དུ་ལྷགས་པ་དེ་དག་ལ་ནི་ཉི་མ་དང་པོ་ལ་ནི་ཟས་བསོད་པ་དག་ཏུ་སྐོ་བར་བྱེད། ཉི་མ་གཉིས་པ་ནི་འབྲིང་དུ། གསུམ་པ་ལ་ནི་ངན་པར་སྐོ་བར་བྱེད་དོ། །ཉི་མ་བཞི་པ་ལ་ནི་དེ་དག་རང་གི་སྤྱོད་ཡུལ་ཤེས་པས་བསོད་སྙོམས་ལ་འཇུག་པར་བྱེད་དོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྒྱལ་པོའི་ཁབ་ན་གནས་པ་དང ། གཉུག་མར་གནས་པ་དང ། གསོལ་བ་བྱེད་པ་དང ། གཏམས་པ་འཛིན་པ་དང ། གནས་མལ་འབོག་པ་དང ། ཟས་ལ་སྐོ་བར་བྱེད་པས་དེ་དགེ་འདུན་ལ་ལུགས་ཇི་ལྟ་བ་བཞིན་དང ། རྒན་རིམས་ཇི་ལྟ་བ་བཞིན་དང ། གོ་རིམས་ཇི་ལྟ་བ་བཞིན་དང ། ཐེད་རྒལ་མེད་པར་ཟས་ལ་སྐོ་བར་བྱེད་དོ། །ཚེ་དང་ལྡན་པ་གྱད་བུ་ནོར་དང ། དགེ་སློང་མཛའ་བོ་དང ། ས་ལས་སྐྱེས་གཉིས་ཚེ་རབས་ཚེ་རབས་སུ་ཁོན་ཡོད་པས་དེ་གཉིས་ལྷའི་རི་བོ་དག་ཏུ་ལྗོངས་རྒྱུ་ཞིང་འདོང་བ་ན་རྒྱལ་པོའི་ཁབ་ཏུ་ཕྱིན་ནས་དེ་གཉིས་ཀྱིས་དགེ་སློང་ཞིག་ལ་དྲིས་པ། ཚེ་དང་ལྡན་པ་དགེ་འདུན་གྱིས་གནས་མལ་འབོག་པར་བསྐོས་པ་སུ་ཡིན། དེས་སྨྲས་པ། ཚེ་དང་ལྡན་པ་གྱད་བུ་ནོར་རོ། །དེ་ནས་དེ་གཉིས་ཚེ་དང་ལྡན་པ་གྱད་བུ་ནོར་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་གྱད་བུ་ནོར་ལ་འདི་སྐད་ཅེས་སྨྲས་སོ། །ཁོ་བོ་ཅག་གཉིས་ཀྱི་གནས་མལ་ཕོག་ཤིག་།དེའི་ཚེ་ན་མལ་ཆ་བཟང་པོ་གང་དག་ཡིན་པ་དེ་དག་ནི་གནས་བརྟན་གནས་བརྟན་རྣམས་ལ་ཕོག་ཟིན་པས་ལྷག་མ་ངན་པ་དག་ལུས་སོ། །གཙུག་ལག་ཁང་ཡང་ཉེན་ཀོར་གྱི་གང་དག་ཡིན་པ་དེ་དག་ནི་གནས་བརྟན་གནས་བརྟན་རྣམས་ཀྱིས་བསྐོས་ཟིན་པས་མཐའི་གཙུག་ལག་ཁང་དག་འབའ་ཞིག་ལུས་ནས་ཚེ་དང་ལྡན་པ་གྱད་བུ་ནོར་གྱིས་དེ་གཉིས་ལ་མལ་ཆ་ངན་པ་དག་ཕོག་ཅིང་གཙུག་ལག་ཁང་ཡང་མཐའ་དག་ཏུ་བསྐོས་སོ། །དེ་གཉིས་ཀྱིས་སྨྲས་པ། དགེ་འདུན་གྱི་ཟས་ལ་སྐོ་བ་སུ་ཡིན། ཚེ་དང་ལྡན་པ་གྱད་བུ་ནོར་གྱིས་སྨྲས་པ། བདག་སྟེ་གྱད་བུ་ནོར་རོ། །ཁོ་བོ་ཅག
5.276b
གཉིས་ཀྱི་ཟས་བསྐོ་ཤིག་།ཚེ་དང་ལྡན་པ་གྱད་བུ་ནོར་གྱིས་ཉི་མ་དང་པོ་ལ་དེ་གཉིས་ཟས་བསོད་པ་དག་ཏུ་བསྐོས་པ་དང ། བྲམ་ཟེ་དང ། ཁྱིམ་བདག་དད་པ་དག་གིས་དྲིས་པ། སང་བདག་ཅག་གི་འདིར་འགྲོན་སུ་འོང་བར་འགྱུར། གཞན་དག་གིས་སྨྲས་པ། མཛའ་བོ་དང ། ས་ལས་སྐྱེས་གཉིས་སོ། །དེ་དག་གིས་བསམས་པ། དེ་གཉིས་ནི་གནས་ངན་ལེན་ཀུན་ཏུ་སྤྱོད་པ་ཡིན་པས་སུ་ཞིག་དེ་གཉིས་ཀྱི་ཕྱིར་གུས་པར་བྱེད་པར་འགྱུར་ཏེ་ཅི་ཡང་རུང་བ་ཟོས་ཤིང་འགྲོ་བར་གྱུར་ཅིག་སྙམ་ནས་དེ་དག་གིས་དེ་གཉིས་ལ་གུས་པ་མ་བྱས་པར་ཟས་ངན་པ་བྱིན་ནོ། །ཚེ་དང་ལྡན་པ་གྱད་བུ་ནོར་གྱིས་ཉི་མ་གཉིས་པ་ལ་དེ་གཉིས་ཟས་འབྲིང་དག་ཏུ་བསྐོས་པ་དང ། དེ་བཞིན་དུ་བྲམ་ཟེ་དང ། ཁྱིམ་བདག་དད་པ་དག་གིས་དྲིས་པ། སང་བདག་ཅག་གི་འདིར་འགྲོན་སུ་འོང་བར་འགྱུར། གཞན་དག་གིས་སྨྲས་པ། མཛའ་བོ་དང ། ས་ལས་སྐྱེས་གཉིས་སོ། །དེ་དག་གིས་བསམས་པ། དེ་གཉིས་ནི་གནས་ངན་ལེན་ཀུན་ཏུ་སྤྱོད་པ་ཡིན་པས་སུ་ཞིག་དེ་གཉིས་ཀྱི་ཕྱིར་གུས་པར་བྱེད་པར་འགྱུར་ཏེ་ཅི་ཡང་རུང་བ་ཟོས་ཤིང་འགྲོ་བར་གྱུར་ཅིག་སྙམ་ནས་དེ་དག་གིས་དེ་གཉིས་ལ་གུས་པ་མ་བྱས་པར་ཟས་ངན་པ་བྱིན་ནོ། །ཚེ་དང་ལྡན་པ་གྱད་བུ་ནོར་གྱིས་ཉི་མ་གསུམ་པ་ལ་ནི་དེ་གཉིས་རང་བཞིན་གྱིས་ཟས་ངན་པ་དག་ཏུ་བསྐོས་སོ། །དེ་ནས་མཛའ་བོ་དང ། ས་ལས་སྐྱེས་གཉིས་འདི་སྙམ་དུ་སེམས་ཏེ། ཀྱེ་མའོ་སྡུག་བསྔལ་ལོ། །ཀྱེ་མའོ་མི་བཟད་དོ། །ཚེ་དང་ལྡན་པ་གྱད་བུ་ནོར་གྱིས་བསམས་བཞིན་དུ་བདག་ཅག་གཉིས་ལན་གསུམ་གྱི་བར་དུ་གང་དག་ཟོས་ན་རྗུད་པར་འགྱུར་བའི་ཟས་ངན་པ་ཤིན་ཏུ་ཡིད་དུ་མི་འོང་བ་དག་གིས་ཐོ་བཙམས་གྱིས་བདག་ཅག་གཉིས་ཀྱིས་འདི་ལ་གནོད་པ་ཇི་ལྟ་བུ་ཞིག་བྱ་སྙམ་མོ། །དེའི་ཚེ་ན་དགེ་སློང་མཛའ་བོ་དང་ས་ལས་སྐྱེས་གཉིས་ཀྱི་སྲིང་མོ་དགེ་སློང་མ་མཛའ་མོ་ཞེས་བྱ་བ་རྒྱལ་པོའི་ཁབ་ན་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ན་འདུག་གོ། །དགེ་སློང་མ་མཛའ་མོ་དགེ་སློང་མཛའ་བོ་དང ། ས་ལས་སྐྱེས་གཉིས་ག་ལ་བ
5.277a
དེར་སོང་སྟེ་ཕྱིན་ནས། དགེ་སློང་མཛའ་བོ་དང ། ས་ལས་སྐྱེས་གཉིས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་པ་དང ། དགེ་སློང་མཛའ་བོ་དང ། ས་ལས་སྐྱེས་གཉིས་དགེ་སློང་མ་མཛའ་མོ་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ཅུང་ཟད་ལྟ་བར་མི་བྱེད། རྣམ་པར་ལྟ་བར་མི་བྱེད་དོ། །དེ་ནས་དགེ་སློང་མ་མཛའ་མོས་དགེ་སློང་མཛའ་བོ་དང ། ས་ལས་སྐྱེས་གཉིས་ལ་འདི་སྐད་ཅེས་སྨྲས་སོ། །འཕགས་པ་གཉིས་ཅིའི་སླད་དུ་ཁྱེད་གཉིས་བདག་ལ་གཏམ་འདྲེ་བར་མི་མཛད། ཕེབས་པར་སྨྲ་བར་མི་མཛད། ཅུང་ཟད་ལྟ་བར་མི་མཛད། རྣམ་པར་ལྟ་བར་མི་མཛད། སྲིང་མོ་ཁོ་བོ་ཅག་གཉིས་ཚེ་དང་ལྡན་པ་གྱད་བུ་ནོར་གྱིས་བསམ་བཞིན་དུ་ལན་གསུམ་གྱི་བར་དུ་གང་དག་ཟོས་ན་རྗུད་པར་འགྱུར་བའི་ཟས་ངན་པ་ཤིན་ཏུ་ཡིད་དུ་མི་འོང་བ་དག་གིས་ཐོ་བཙམས་པ་དེ་ཁྱོད་ཀྱིས་ཡལ་བར་དོར་རམ། འཕགས་པ་གཉིས་འོ་ན་བདག་གིས་ཅི་ཞིག་བགྱི། སྲིང་མོ་ཚུར་ཤོག་།བཅོམ་ལྡན་འདས་ག་ལ་བ་དེར་སོང་ལ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་པ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ་ཞེས་སྨྲོས་ཤིག་དང ། ཁོ་བོ་ཅག་གཉིས་ཀྱིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་བ་དེ་ཁོ་ན་བཞིན་དུ་བདག་ཅག་གཉིས་ཀྱིས་ཀྱང་འཚལ་ཏོ་ཞེས་སྨྲ་བར་བྱའོ། །འཕགས་པ་གཉིས་ཇི་ལྟར་བདག་གིས་དགེ་སློང་དག་པ་ལྟུང་བ་མ་མཆིས་པ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་གདབ་པར་བགྱི། སྲིང་མོ་ཁྱོད་ཇི་སྲིད་དུ་དེ་སྐད་མི་ཟེར་བ་དེ་སྲིད་དུ་ཁོ་བོ་ཅག་གཉིས་ཁྱོད་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ཅུང་ཟད་ལྟ་བར་མི་བྱེད། རྣམ་པར་ལྟ་བར་མི་བྱེད་དོ། །དེ་ནས་དགེ་སློང་མ་མཛའ་མོ་ཡུད་ཙམ་ཞིག་ཅང་མི་སྨྲ་བར་འདུག་ནས། དགེ་སློང་མཛའ་བོ་དང ། ས་ལས་སྐྱེས་གཉིས
5.277b
ལ་འདི་སྐད་ཅེས་སྨྲས་སོ། །འཕགས་པ་གཉིས་དེ་ལྟ་ན་བདག་གིས་དེ་སྐད་བགྱིའོ། །སྲིང་མོ་དེའི་ཕྱིར་ཁྱོད་ཇི་སྲིད་དུ་ཁོ་བོ་ཅག་གཉིས་བཅོམ་ལྡན་འདས་ག་ལ་བ་དེར་མ་སོན་པ་དེ་སྲིད་དུ་རེ་ཤིག་སྡོད་ལ། གང་གི་ཚེ་ཁོ་བོ་ཅག་གཉིས་བཅོམ་ལྡན་འདས་ཀྱི་དྲུང་དུ་སོན་པ་དེའི་ཚེ་ན་ཁྱོད་ཕྱི་བཞིན་ཤོག་ཤིག་།དེ་ནས་དགེ་སློང་མཛའ་བོ་དང ། ས་ལས་སྐྱེས་གཉིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེ་ནས་དགེ་སློང་མ་མཛའ་མོས་དགེ་སློང་མཛའ་བོ་དང ། ས་ལས་སྐྱེས་གཉིས་དོང་ནས་རིང་པོ་མ་ལོན་པར་རིག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་མ་མཛའ་མོས་འདི་སྐད་ཅེས་གསོལ་ཏོ། །བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་པ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ། །དགེ་སློང་མཛའ་བོ་དང ། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་བ་དེ་ཁོ་ན་བཞིན་དུ་བདག་ཅག་གཉིས་ཀྱིས་ཀྱང་འཚལ་ཏོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་འཁོར་དེ་ཉིད་ན་འདུག་ཅིང་འཐུན་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྱད་བུ་ནོར་ལ་བཀའ་སྩལ་པ། གྱད་བུ་ནོར་ཁྱོད་ཀྱིས་ཐོས་སམ། བཅོམ་ལྡན་འདས་བདག་གིས་ཐོས་སོ། །གྱད་བུ་ནོར་ཁྱོད་ཀྱིས་ཐོས་སམ། བདེ་བར་གཤེགས་པ་བདག་གིས་ཐོས་སོ། །གྱད་བུ་ནོར་ཁྱོད་དེ་ལ་ཇི་སྙམ་དུ་སེམས། བཅོམ་ལྡན་འདས་ཀྱིས་བདག་ལ་ཇི་ལྟར་མཁྱེན་པ་ལགས་སོ། །བདེ་བར་གཤེགས་པས་བདག་ལ་ཇི་ལྟར་མཁྱེན་པ་ལགས་སོ། །གྱད་བུ་ནོར
5.278a
དེ་སྐད་ཅེས་བཅོམ་ལྡན་འདས་ཀྱིས་བདག་ལ་ཇི་ལྟར་མཁྱེན་པ་ལགས་སོ། །བདེ་བར་གཤེགས་པས་བདག་ལ་ཇི་ལྟར་མཁྱེན་པ་ལགས་སོ་ཞེས་ཟེར་བ་དེ་ནི་དུས་མ་ཡིན། འདི་ནི་སྐབས་མ་ཡིན་ཏེ། འདི་ལྟར་དྲན་ན་ཡང་དྲན་ཞེས་བརྗོད་པར་བྱའོ། །མི་དྲན་ན་ཡང་མི་དྲན་ཞེས་བརྗོད་པར་བྱའོ། །བཅོམ་ལྡན་འདས་མི་དྲན་ནོ། །བདེ་བར་གཤེགས་པ་མི་དྲན་ནོ། །དེའི་ཚེ་ན་ཚེ་དང་ལྡན་པ་སྒྲ་གཅན་ཟིན་བཅོམ་ལྡན་འདས་ཀྱི་སྣམ་ལོགས་ན་འདུག་པར་གྱུར་ཅིང་རྡུལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་པར་བྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་སྒྲ་གཅན་ཟིན་གྱིས་འདི་སྐད་ཅེས་གསོལ་ཏོ། །བཙུན་པ་འདི་ལྟར་དགེ་སློང་མ་མཛའ་མོ་བཅོམ་ལྡན་འདས་ག་ལ་བ་དེར་མཆིས་ཏེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་མཆིས་ཤིང་མཐའ་གཅིག་ཏུ་མཆིས་ནས། བཅོམ་ལྡན་འདས་ལ་དགེ་སློང་མ་མཛའ་མོས་འདི་སྐད་ཅེས་བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་པ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ་ཞེས་གསོལ་ནས། དགེ་སློང་མཛའ་བོ་དང ། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་དུ་བདག་ཅག་གཉིས་ཀྱིས་ཀྱང་འཚལ་ཏོ་ཞེས་གསོལ་ན། བཙུན་པ་དེའི་སླད་དུ་ཚེ་དང་ལྡན་པ་གྱད་བུ་ནོར་ལ་རྨ་ཅི་འཚལ། སྒྲ་གཅན་ཟིན་དེའི་ཕྱིར་དེ་ཁྱོད་ཉིད་ལ་དྲིའི་ཁྱོད་ཀྱིས་ཇི་ལྟར་བཟོད་པ་དེ་ཁོ་ན་བཞིན་དུ་ལན་ཐོབ་ཤིག་།སྒྲ་གཅན་ཟིན་གལ་ཏེ་དགེ་སློང་མ་མཛའ་མོ་ང་ག་ལ་བ་དེར་འོངས་ཏེ་ཕྱིན་ནས་ངའི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་ཅིང་མཐའ་གཅིག་ཏུ་འདུག་ནས། ང་ལ་དགེ་སློང་མ་མཛའ་མོས་འདི་སྐད་ཅེས་བཙུན་པ་འདི་ལྟར་འཕགས་པ་སྒྲ་གཅན་ཟིན་བདག་དང་ལྷན་ཅིག་མི་ཚངས་པར་སྤྱད་དེ་ཕམ་པར
5.278b
གྱུར་པ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ་ཞེས་གསོལ་ནས། དགེ་སློང་མཛའ་བོ་དང ། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་དུ་བདག་ཅག་གཉིས་ཀྱིས་ཀྱང་འཚལ་ཏོ་ཞེས་གསོལ་ནས། ངས་ཁྱོད་ལ་སྒྲ་གཅན་ཟིན་དེ་ལ་ཁྱོད་ཇི་སྙམ་དུ་སེམས་ཤེས་རྨས་ན། ཁྱོད་ཇི་སྐད་ལན་འདེབས་པར་བྱེད། བཙུན་པ་བདག་འདི་སྐད་ཅེས་དྲན་ན་ཡང་དྲན་ཞེས་གསོལ་ལོ། །མི་དྲན་ན་ཡང་མི་དྲན་ཞེས་གསོལ་ལོ། །མི་གཏི་མུག་ཅན་འོ་ན་ཁྱོད་ཀྱིས་དོན་དེ་འཐོབ་ན་དགེ་སློང་གྱད་བུ་ནོར་དག་པ་ལྟུང་བ་མེད་པས་ཅིའི་ཕྱིར་མི་འཐོབ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱོད་ཀྱིས་དགེ་སློང་གྱད་བུ་ནོར་ནི་དྲན་པ་དང་ལྡན་པར་ཟུང་ཤིག་།དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ་བར་བྱའོ། །དགེ་སློང་མཛའ་བོ་དང ། ས་ལས་སྐྱེས་གཉིས་ལ་ནི་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་དོན་ཅི་ལ་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེང་བར་གྱིས་ཤིག་།བརྟག་པར་གྱིས་ཤིག་ཅེས་བཀའ་སྩལ་ནས། བཅོམ་ལྡན་འདས་གདན་ལས་བཞེངས་ཏེ་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་དགེ་སློང་རབ་ཏུ་མང་པོ་དག་གིས་བཅོམ་ལྡན་འདས་ནང་དུ་ཡང་དག་འཇོག་ལ་ཞུགས་ནས་རིང་པོ་མ་ལོན་པར་རིག་ནས་ཚེ་དང་ལྡན་པ་གྱད་བུ་ནོར་ནི་དྲན་པ་དང་ལྡན་པར་བཟུང ། དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ། དགེ་སློང་མཛའ་བོ་དང ། ས་ལས་སྐྱེས་གཉིས་ལ་ནི་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་ཅིའི་ཕྱིར་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེངས་ཤིང
5.279a
བརྟགས་སོ། །དགེ་སློང་རབ་ཏུ་མང་པོ་དག་གིས་ལེགས་པར་རབ་ཏུ་གླེངས་ཤིང་བརྟགས་པ་ན་དེ་གཉིས་ཀྱིས་སྨྲས་པ། ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱོད་པའི་ཕམ་པར་གྱུར་པ་མ་བྱུང་སྟེ། འདི་ལྟར་ཚེ་དང་ལྡན་པ་གྱད་བུ་ནོར་གྱིས་བདག་ཅག་གཉིས་གང་དག་ཟོས་ན་རྗུད་པར་འགྱུར་བ་ཤིན་ཏུ་ཡིད་དུ་མི་འོང་བའི་ཟས་ངན་པ་དག་གིས་ལན་གསུམ་གྱི་བར་དུ་ཐོ་བཙམས་པས་བདག་ཅག་གཉིས་ཀྱིས་ཚེ་དང་ལྡན་པ་གྱད་བུ་ནོར་ལ་འདུན་པས་སྨྲས་པ། ཞེ་སྡང་དང ། གཏི་མུག་དང ། འཇིགས་པས་སྨྲས་པར་ཟད་ཀྱི། ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱོད་པའི་ཕམ་པར་འགྱུར་བ་མ་བྱུང་སྟེ། འདི་ལྟར་དགེ་སློང་དག་པ་ལྟུང་བ་མེད་པ་ཡིན་ནོ། དེ་ནས་བཅོམ་ལྡན་འདས་ཕྱེམ་བྲེད་ནང་དུ་ཡང་དག་འཇོག་ལས་བཞེངས་ནས་དགེ་སློང་གི་དགེ་འདུན་གྱི་མདུན་དུ་གདན་བཤམས་པ་ཉིད་ལ་བཞུགས་སོ། །དེ་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཅག་དགེ་སློང་རབ་ཏུ་མང་པོ་དག་གིས་བཅོམ་ལྡན་འདས་ནང་དུ་ཡང་དག་འཇོག་ལ་ཞུགས་ནས་རིང་པོ་མ་ལགས་པར་རིག་ནས་ཚེ་དང་ལྡན་པ་གྱད་བུ་ནོར་ནི་དྲན་པ་དང་ལྡན་པར་བཟུང ། དགེ་སློང་མ་མཛའ་མོ་ནི་རང་གི་མཆིད་ཀྱིས་འཚལ་བས་བསྙིལ། དགེ་སློང་མཛའ་བོ་དང ། ས་ལས་སྐྱེས་གཉིས་ལ་ནི་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་ཅིའི་ཕྱིར་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེངས་ཤིང་བརྟགས་ཏེ། བདག་ཅག་དགེ་སློང་རབ་ཏུ་མང་པོ་དག་གིས་ལེགས་པར་རབ་ཏུ་གླེངས་ཤིང་བརྟགས་པ་ན། དེ་གཉིས་ཀྱིས་མཆིད་ནས་ཚེ་དང་ལྡན་པ་དག་ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱོད་པའི་ཕམ་པར་འགྱུར་བ་མ་བྱུང་སྟེ། འདི་ལྟར་ཚེ་དང་ལྡན་པ་གྱད་བུ་ནོར་གྱིས་བདག་ཅག་གཉིས་གང་དག་ཟོས་ན་རྗུད་པར་འགྱུར་བ་ཤིན་ཏུ་ཡིད་དུ་མི་འོང་བའི་ཟས་ངན་པ་དག་གིས་ལན་གསུམ་གྱི་བར་དུ་ཐོ་བཙམས་པས
5.279b
བདག་ཅག་གཉིས་ཀྱིས་ཚེ་དང་ལྡན་པ་གྱད་བུ་ནོར་ལ་འདུན་པས་སྨྲས། ཞེ་སྡང་དང ། གཏི་མུག་དང ། འཇིགས་པས་སྨྲས་པར་ཟད་ཀྱི། ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱོད་པའི་ཕམ་པར་འགྱུར་བ་མ་བྱུང་སྟེ། འདི་ལྟར་དགེ་སློང་དག་པ་ལྟུང་བ་མེད་པ་ཡིན་ནོ་ཞེས་མཆིའོ། །དགེ་སློང་དག་མི་གཏི་མུག་ཅན་དེ་གཉིས་ཀྱིས་ཅིའི་ཕྱིར་ཟང་ཟིང་ཅུང་ཟད་ཙམ་གྱི་ཕྱིར་ཤེས་བཞིན་དུ་བརྫུན་གྱི་ཚིག་སྨྲས་པར་གྱུར། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་གཉིས་བཀའ་སྩལ་པ། ལུས་ཅན་བརྫུན་དུ་སྨྲ་བ་ཡི། །ཆོས་གཅིག་ལས་ནི་འདས་གྱུར་ཅིང ། །འཇིག་རྟེན་ཕ་རོལ་དྲལ་བ་ཡིས། །འདི་ལ་སྡིག་པ་མི་བྱ་མེད། །ལྕགས་གོང་མེ་ལྕེ་འདྲ་བ་དག་།ཟོས་པར་གྱུར་པ་མཆོག་ཡིན་གྱི། ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །དེའི་སྐབས་སུ་ནམ་མཁའི་དཀྱིལ་ན་གནས་པའི་ལྷ་རྣམས་ཀྱིས་ངན་ཏོ་ཞེས་བྱ་བ་བརྗོད་དེ། ཁམ་གྱི་ཟས་ནི་ངན་ཏོ། །མི་བཟད་དོ། །མཆོག་ཏུ་མི་བཟད་དོ། །འདི་ལྟར་དགེ་སློང་སྨས་པ་དག་ཟང་ཟིང་ཅུང་ཟད་ཙམ་གྱི་ཕྱིར་དགེ་སློང་དག་པ་ལྟུང་བ་མེད་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་བ་འདེབས་པར་བྱེད་དོ། །ཡང་སྨྲས་པ། འཇིག་རྟེན་དག་ན་འཁོར་བ་ལ། །བློ་ལྡན་སུ་ཞིག་དགའ་བར་བྱེད། །སྲིད་གསུམ་གྲོལ་བའི་ནོར་གྱིས་ཀྱང ། །སྐུར་པ་ཐོབ་པར་གྱུར་ཕྱིར་རོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་མཛའ་བོ་དང ། ས་ལས་སྐྱེས་གཉིས་ལ་རྨས་པ། མི་གཏི་མུག་ཅན་ཁྱོད་གཉིས་ཀྱིས་དགེ་སློང་དག་པ་ལྟུང་བ་མེད
5.280a
པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་བ་བཏབ་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་གསུམ་པོ་འདི་དག་ནི་མ་སྤངས་ན་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་དག་ཡིན་ཏེ། གསུམ་གང་ཞེ་ན། འདི་ལ་གང་ཟག་འདོད་པ་དག་ཀྱང་སྟེན་པར་བྱེད་ལ་སྡིག་པའི་ལས་ཀྱང་བྱེད་པ་འདི་ནི་གང་ཟག་དེ་མ་སྤངས་ན་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་དང་པོ་ཡིན་ནོ། །གཞན་ཡང་གང་ཟག་བདག་ཉིད་ཚུལ་ཁྲིམས་འཆལ་ཅིང་གཞན་ལ་ཚུལ་ཁྲིམས་ཀྱི་དབང་དུ་བྱས་ཏེ་སྨྲ་བ་འདི་ནི་གང་ཟག་དེ་མ་སྤངས་ན་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་གཉིས་པ་ཡིན་ནོ། །གཞན་གང་ཟག་བདག་ཉིད་མི་ཚངས་པར་སྤྱོད་ཅིང་གཞན་ལ་གཞི་མེད་པར་མི་ཚངས་པར་སྤྱོད་པ་ཕམ་པར་འགྱུར་བའི་ཆོས་ཀྱིས་སྐུར་བ་འདེབས་པར་བྱེད་པ་འདི་ནི་གང་ཟག་དེ་མ་སྤངས་ན་ངན་སོང་དུ་འགྲོ་བ་སེམས་ཅན་དམྱལ་བར་འགྲོ་བ་གསུམ་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ཚིག་གིས་ཉེས་སྨྲས་བརྗོད་བྱེད་ན། །སྐྱེས་བུ་སྐྱེས་པའི་ཁ་ནས་ནི། །སྟ་རེ་སྐྱེ་ཞིང་དེ་ཡིས་ནི། །བདག་ཉིད་གཅོད་པར་བྱེད་པར་འགྱུར། །གང་ཞིག་སྨད་བྱ་བསྟོད་བྱེད་ཅིང ། །བསྟོད་བྱ་རྣམ་པར་སྨོད་བྱེད་པ། །དེ་ཡི་ཁ་ནས་ཐབ་ཀྲོལ་སྐྱེད། །ཐབ་ཀྲོལ་ཅན་གྱིས་བདེ་མི་མྱོང ། །གང་འདིར་ཆོ་ལོས་རང་ནོར་ཕམ་བྱེད་པ། །ཐབ་ཀྲོལ
5.280b
དེ་ནི་ཅུང་ཟད་ཙམ་དུ་ཟད། །གང་ཞིག་བདེ་གཤེགས་ཡིད་རབ་ཁྲོ་བྱེད་པ། །དེ་འདིར་ཐབ་ཀྲོལ་ཤིན་དུ་ཆེན་པོ་ཡིན། །འཕགས་པས་སྨད་པ་གང་ཡིན་སྡིག་བརྟེན་ན། །བྱེ་བ་བརྒྱ་སྟོང་དང་ནི་དུང་ཕྱུར་ཕྲག་།སུམ་བཅུ་དྲུག་དང་ལྔ་པོ་ཇི་སྙེད་པར། །སེམས་ཅན་དམྱལ་བ་རྣམས་སུ་འགྲོ་བར་འགྱུར། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམས་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྡེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་དག་པ་ལྟུང་བ་མེད་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་བ་ལས་དེ་དུས་གཞན་ཞིག་ན་དྲིས་ཀྱང་རུང ། མ་དྲིས་ཀྱང་རུང ། རྩོད་པ་དེ་ཡང་གཞི་མེད་པ་ཡིན་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན། དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་མཛའ་བོ་དང ། ས་ལས་སྐྱེས་སམ། གཞན་ཡང་དེ་ལྟ་བུ་གང་ཡིན་པའོ། །ཁྲོས་ཤིང་ཞེས་བྱ་བ་ནི་འཁྲུགས་ཤིང་ངོ ། །ཞེ་སྡང་བར་གྱུར་ནས་ཞེས་བྱ་བ་ནི་ཡིད་མི་དགའ་བར་གྱུར་ནས་འཁྲུགས་པ་མ་བསལ་བར་རོ། །ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་ཞེས་བྱ་བ་ནི་ཅི་ནས་ཀྱང་འདི་དགེ་སློང་གི་ཚུལ་དང་དབྲལ་ལོ་སྙམ་ནས་སོ། །དགེ་སློང་དག་པ་ཞེས་བྱ་བ་ནི་གྱད་བུ་ནོར་རམ་གཞན་ཡང་དེ་ལྟ་བུ་གང་ཡིན་པའོ། །ལྟུང་བ་མེད་པ་ལ་ཞེས་བྱ་བ་ནི་གཞི་དེའི་ལྟུང་བ་མེད་པ་ལའོ། །གཞི་མེད་པར་ཞེས་བྱ་བ་ནི་གཞི་གསུམ་པོ་མཐོང་བའི་གཞི་དང ། ཐོས་པའི་གཞི་དང ། དོགས་པའི་གཞི་མེད་པར་རོ། །ཕམ་པར་འགྱུར་བའི་ཆོས་ཀྱིས་ཤེས་བྱ་བ་ནི་ཆོས་བཞི་པོ་གང་ཡང་རུང་བས་ཏེ། དེ་ནི་ཆོས་མ
5.281a
ཡིན་པ་ཆོས་ཀྱི་སྒྲར་གསུངས་པ་ཡིན་ནོ། །སྐུར་པ་ལས་ཞེས་བྱ་བ་ནི་སྐུར་པ་བཏབ་པ་ལས་སོ། །དེ་དུས་གཞན་ཞིག་ན་ཞེས་བྱ་བ་ནི་དེ་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་དེ་རང་ཉིད་འགྱོད་པ་དང ། ཅུང་ཟད་འགྱོད་པ་དང ། རྣམ་པར་འགྱོད་པ་དང ། རབ་ཏུ་འགྱོད་པར་གྱུར་ནས་སོ། །རྩོད་པ་དེ་ཡང་ཞེས་བྱ་བ་ནི་རྩོད་པ་བཞི་པོ་འགྱེད་པའི་ཕྱིར་རྩོད་པ་དང ། མི་གདམས་པའི་ཕྱིར་རྩོད་པ་དང ། ལྟུང་བའི་ཕྱིར་རྩོད་པ་དང ། བྱ་བའི་ཕྱིར་རྩོད་པའོ། །གཞི་མེད་པ་ཡིན་ལ་ཞེས་བྱ་བ་ནི་གཞི་གསུམ་པོ་དག་མེད་པ་ཡིན་ལའོ། །དགེ་སློང་ཡང་ཞེ་སྡང་ལ་གནས་པས་ཤེས་བྱ་བ་ནི་སྐུར་པ་འདེབས་པར་འདོད་པས་སོ། །ཞེ་སྡང་གིས་སྨྲས་སོ་ཞེ་ན་ཞེས་བྱ་བ་ནི་སྐུར་བ་བཏབ་པར་གྱུར་ཏོ་ཞེས་ཟེར་ནའོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། གང་ཟག་དག་པ་ལ་སྐུར་བ་འདེབས་པ་ལ་བཞི་བཅུས་ནི་ལྟུང་བར་འགྱུར་ལ། གཞི་ལྔས་ནི་ལྟུང་བར་མི་འགྱུར་རོ། །ཇི་ལྟར་གཞི་བཅུས་ལྟུང་བར་འགྱུར་ཞེ་ན། དེ་མ་མཐོང་བ་དང ། མ་ཐོས་པ་དང ། མི་དོགས་པར་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་བཞིན་དུ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། ཐོས
5.281b
པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་ཏེ། དེ་ལྟར་གཞི་བཅུས་ལྟུང་བར་འགྱུར་རོ། །ཇི་ལྟར་གཞི་ལྔས་ལྟུང་བར་མི་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ ། །ཐོས་སོ། །དོགས་སོ་ཞེས་ཟེར་ན་ལྟུང་བར་མི་འགྱུར་རོ། །དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་ལྟུང་བར་མི་འགྱུར་ཏེ། དེ་ལྟར་གཞི་ལྔས་ལྟུང་བར་མི་འགྱུར་རོ། །ཇི་ལྟར་གང་ཟག་དག་པ་ལ་སྐུར་བ་འདེབས་པ་ལ་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་བ་དེ་བཞིན་དུ་གང་ཟག་དག་པ་མ་དག་པ་ལྟར་བཅོས་པ་ལ་སྐུར་བ་འདེབས་པ་ལ་ཡང་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་རོ། །གང་ཟག་མ་དག་པ་ལ་སྐུར་བ་འདེབས་པ་ལ་ནི་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གཞི་བཅུ་གཅིག་གིས་ལྟུང་བར་འགྱུར་ཞེ་ན། དེ་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཅིང་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །དེས་མཐོང་ལ་དེ་ཡང་བརྗེད་པ་དང ། དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང་མ
5.282a
བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། དོགས་པ་ལ་དོགས་པ་ན་བདག་གིས་མཐོང་ངོ ། །ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་ཏེ། དེ་ལྟར་གཞི་བཅུ་གཅིག་གིས་ལྟུང་བར་འགྱུར་རོ། །ཇི་ལྟར་གཞི་དྲུག་གིས་ལྟུང་བ་མེད་པར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ ། །ཐོས་སོ། །དོགས་སོ་ཞེས་ཟེར་ན་ལྟུང་བར་མི་འགྱུར་རོ། །དེས་མཐོང་ལ་དེ་ཡང་མ་བརྗེད་པ་དང ། དེས་ཐོས་ལ་དེ་ཡང་མ་བརྗེད་པ་དང ། དེ་དོགས་ལ་དེ་ཡང་མ་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་བར་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་ལྟུང་བར་མི་འགྱུར་ཏེ། དེ་ལྟར་གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གང་ཟག་མ་དག་པ་ལ་སྐུར་བ་འདེབས་པ་ལ་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་བ་དེ་བཞིན་དུ་གང་ཟག་མ་དག་པ་དག་པ་ལྟར་བཅོས་པ་ལ་སྐུར་པ་འདེབས་པ་ལ་ཡང་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །དྲིལ་བསྒྲགས་པ་ལ་ནི་ལྟུང་བ་མེད་དོ། །ངོས་ལ་རི་མོ་བྲིས་པ་ཕན་ཅད་ལ་ཡང་ལྟུང་བ་མེད་དེ། ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས
5.282b
ཅད་ཀྱིས་ཀྱང་ཤེས་སོ་སྙམ་ནའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གྱད་བུ་ནོར་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་ཞིག་བགྱིས་ན་དེས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས། ལས་ཅི་ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་ཡང་དག་པ་མ་ལགས་པས་སྐུར་པར་གྱུར། ལས་ཅི་ཞིག་བགྱིས་ན་དེ་གནས་མལ་འབོག་པ་རྣམས་ཀྱི་མཆོག་ཏུ་བསྟན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིག་ཀྱི་བུ་གྱད་བུ་ནོར་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་གྱད་བུ་ནོར་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི་འདི་ལྟར་ལས་དགེ་བ་དང ། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་བ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་དེད་དཔོན་རྐྱལ་ཆེན་ཅན་ཞེས་བྱ་བ་འདུག་སྟེ། དེ་རྒྱ་མཚོ་ཆེན་པོར་འགྲོ་བའི་ཟོང་ཐོགས་ཏེ་དོན་འཐུན་དང་ལྷན་ཅིག་རྒྱ་མཚོ་ཆེན་པོར་འཕགས་སོ། །སངས་རྒྱས་རྣམས
5.283a
འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །དེ་ནས་རང་སངས་རྒྱས་ཤིག་དེད་དཔོན་དེ་ཉིད་དང་ལྷན་ཅིག་ལྗོངས་རྒྱུར་འཕགས་ནས་དེའི་མཚན་མོ་མེའི་ཁམས་ལ་སྙོམས་པར་ཞུགས་སོ། །མི་གཙོ་བོ་དག་གི་ཀུན་ཏུ་སྤྱོད་པ་ནི་མི་མེལ་ཚེ་བ་མཚན་མོ་རེས་ཀྱིས་རེས་ཀྱིས་མེལ་ཚེ་བྱེད་པས་ཇི་ཙམ་ན་མི་ཞིག་ལ་རེས་བབ་སྟེ། མེལ་ཚེ་བྱེད་པས་དེས་དེ་མེའི་ཕུང་པོ་བཞིན་དུ་འབར་བ་མཐོང་ནས་དེས་ཡ་མཚན་གྱིས་བསྡུས་པའི་ཡིད་ཀྱིས་མཚན་མོ་ནམ་ནངས་པ་དང་དེད་དཔོན་རྐྱལ་ཆེན་ཅན་ལ་སྨྲས་པ། དེད་དཔོན་རབ་ཏུ་བྱུང་བ་དེད་དཔོན་དང་ཐབས་གཅིག་འཕགས་པ་འདི་ནི་བརྟུལ་ཞུགས་གྲུབ་པ་བདག་ཉིད་ཆེན་པོ་ཞིག་ལགས་ཏེ། བདག་གིས་མཚན་མོ་ཞུགས་ཀྱི་ཕུང་པོ་ལྟར་འབར་བ་མཐོང་ངོ ། །དེད་དཔོན་གྱིས་སྨྲས་པ། ཀྱེ་ནང་རྗེ་དེ་ཕྱོགས་གང་ན་འདུག་།དེད་དཔོན་ག་གེ་མོ་ཞིག་ནའོ། །དེད་དཔོན་དེ་དགའ་བ་སྐྱེས་ནས་དེའི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ། བདག་ཀྱང་བསོད་ནམས་འཚལ་བ་ལགས་པས་བདག་གི་བསོད་སྙོམས་གསོལ་ཞིང་གཤེགས་སུ་གསོལ། དེས་དེའི་དང་དུ་བླངས་ནས་ཇི་ཙམ་ན་དེད་དཔོན་རྐྱལ་ཆེན་ཅན་གྲོང་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དང ། ཚོང་རྡལ་དག་ཏུ་མཐར་ཀྱིས་རྣམ་པར་རྒྱུ་བ་ན་རྒྱ་མཚོ་ཆེན་པོའི་འགྲམ་དུ་ཕྱིན་ནས་དེས་ལམ་གྱིས་དུབ་པ་བསལ་ཏེ་རྙིང་པ་ལྔ་རྒྱས་གྲུ་སྦྱར་ནས་ཞོ་ཤས་འཚོ་བ་ལྔ་པོ་སྟོབས་པར་བྱེད་པ་དང ། སེལ་བར་བྱེད་པ་དང ། རྐྱལ་ཆེན་དང ། གྲུ་དང ། རླུང་ཡོར་ཐོགས་པ་དག་ཁྲིད་དེ། རང་སངས་རྒྱས་ག་ལ་བ་དེར་སོང་ནས་ཕྱིན་པ་དང ། རྗེ་ས་དང་བཅས་པས་རྐང་པ་གཉིས་ལ་ཕྱག་འཚལ་ཏེ་རང་སངས་རྒྱས་ལ་འདི་སྐད་ཅེས་སྨྲས
5.283b
སོ། །འཕགས་པ་བདག་ནི་རྒྱ་མཚོ་ཆེན་པོར་འཇུག་ན་ཅི་འཕགས་པ་འཇུག་གམ། དེས་སྨྲས་པ། བཞིན་བཟངས་ཁྱོད་ནི་རེ་ཤིག་ཕ་མ་དང ། བུ་དང ། ཆུང་མ་དང ། བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། དགེ་སྦྱོང་དང ། བྲམ་ཟེ་རྣམས་དང ། བཀྲེན་པ་དང ། སྡུག་ཕོངས་པའི་སྐྱེ་བོ་རྣམས་ཀྱི་དོན་དུ་རྒྱ་མཚོ་ཆེན་པོར་འཇུག་པ་ཡིན་གྱི། ཁོ་བོ་ནི་ཁྱིམ་གྱི་ལས་ཀྱི་མཐའ་སྤངས་པ། སྲིད་པ་དང ། ལོངས་སྤྱོད་ལ་མི་ཕྱོགས་པ། གཅིག་པུ་གཉིས་པ་མེད་པ་ཡིན་པས་གང་གི་དོན་དུ་རྒྱ་མཚོ་ཆེན་པོར་འཇུག་།དེད་དཔོན་རྐྱལ་ཆེན་ཅན་གྱིས་བསམས་པ། བདག་གིས་འཕགས་པ་འདི་ལ་བསོད་སྙོམས་ནི་ཕུལ་ན་གོས་མ་བསྐོན་གྱིས། བདག་གིས་ད་འདི་ཟན་བྱིན་ལ། ཆེན་པོ་ལ་འོས་པའི་རས་ཡུག་ཆེན་པོ་བསྐོན་པར་བྱའོ་སྙམ་ནས་དེད་དཔོན་དེས་དེ་ཟས་བསོད་པས་ཚིམ་པར་བྱས་ནས་ཆེན་པོ་ལ་འོས་པའི་རས་ཡུག་ཆེན་བསྐོན་ནོ། །དེ་ནས་རང་སངས་རྒྱས་ཀྱིས་ཟས་ཀྱི་བྱ་བ་བྱས་ནས། དེ་ལ་སྙིང་བརྩེ་བའི་ཕྱིར་ངང་པའི་རྒྱལ་པོ་མདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་དེད་དཔོན་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨོན་ལམ་གདབ་པར་བརྩམས་པ། བདག་གིས་ཡོན་གནས་ཡང་དག་པར་གྱུར་པ་འདི་ལྟ་བུ་ལ་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག་།འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་དག་ཀྱང་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་དེའི་ཚེ་དེའི་དུས་ན་དེད་དཔོན
5.284a
རྐྱལ་ཆེན་ཅན་གང་ཡིན་པ་དེ་ནི་གྱད་བུ་ནོར་འདི་ཡིན་ཏེ། དེས་རང་སངས་རྒྱས་ལ་མཆོད་པ་བྱས་ནས་བདག་གིས་ཡོན་གནས་ཡང་དག་པར་གྱུར་པ་འདི་ལྟ་བུ་ལ་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག་ཅེས་སྨོན་ལམ་བཏབ་པ་དེས་ནི་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་དག་ཀྱང་ཐོབ་པར་གྱུར་ཅིག་ཅེས་སྨོན་ལམ་བཏབ་པ་དེས་ནི་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང་འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དེས་དགྲ་བཅོམ་པ་ཉིད་ཐོབ་ཀྱང་ཡང་དག་པ་མ་ཡིན་པས་སྐུར་བར་གྱུར་པ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་རི་བྲག་ཤིག་ན་ཁྱིམ་བདག་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་ཡང་མེད། བུ་མོ་ཡང་མེད་ནས་དེ་འདི་སྙམ་དུ་བདག་གི་ཁྱིམ་ནོར་དུ་མ་དང་ལྡན་ན་བདག་ལ་བུ་ཡང་མེད། བུ་མོ་ཡང་མེད་པས་བདག་འདས་ནས་བུ་མེད་པའི་ཕྱིར་ནོར་ཐམས་ཅད་རྒྱལ་པོས་དབང་དུ་བྱས་པར་འགྱུར་རོ་སྙམ་ནས་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་གོ། །ཆུང་མས་དེ་མཐོང་ནས་སྨྲས་པ། རྗེའི་སྲས་ཁྱོད་ཅིའི་སླད་དུ་ལག་པ་ལ་འགྲམ
5.284b
པ་གཏད་དེ་སེམས་ཁོངས་སུ་ཆུད་ཅིང་བཞུགས། དེས་སྨྲས་པ། བཟང་མོ་བདག་གི་ཁྱིམ་ནོར་དུ་མ་དང་ལྡན་ན་བདག་ལ་བུ་ཡང་མེད། བུ་མོ་ཡང་མེད་པས་བདག་འདས་ནས་བུ་མེད་པའི་ཕྱིར་ནོར་ཐམས་ཅད་རྒྱལ་པོས་དབང་དུ་བྱས་པར་འགྱུར་རོ་སྙམ་ན་ཇི་ལྟར་སེམས་ཁོངས་སུ་ཆུད་ཅིང་མི་འདུག་ཏུ་རུང ། ཆུང་མས་བསམས་པ། ཅི་འདི་ལ་སྐལ་བ་མེད་པས་བུ་ཡང་མེད། བུ་མོ་ཡང་མེད་དམ། འོན་ཏེ་བདག་ལ་སྐལ་བ་མེད་པས་བུ་ཡང་མེད་བུ་མོ་ཡང་མེད་པ་གང་ཡིན་པ་ནི་གཏོལ་མེད་ན་འདི་ནི་ངེས་པར་བདག་ལ་སྐྱོན་འདོགས་ཤིང་ཆུང་མ་གཞན་ལེན་པར་འདོད་པས་དེས་ནི་འདི་སྐད་ཅེས་བདག་གི་ཁྱིམ་ནོར་དུ་མ་དང་ལྡན་ན་བདག་ལ་བུ་ཡང་མེད་བུ་མོ་ཡང་མེད་པས་བདག་འདས་ནས་བུ་མེད་པའི་ཕྱིར་ནོར་ཐམས་ཅད་རྒྱལ་པོའི་དབང་དུ་བྱས་པར་འགྱུར་རོ། །ཞེས་ཟེར་ཞིང་བདག་གི་དྲུང་ན་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་པ་ལྟར་བྱེད་ཅིང་འདུག་གིས་དེའི་ཕྱིར་རེ་ཤིག་བདག་ཉིད་ཐར་བར་བྱའོ་སྙམ་དུ་རིག་ནས་སྨྲས་པ། རྗེའི་སྲས་གལ་ཏེ་བདག་ལ་སྐལ་བ་མ་མཆིས་པས་ཁྱོད་ལ་སྲས་ཀྱང་མི་མངའ། སྲས་མོ་ཡང་མི་མངའ་བ་ལགས་ན་བཙུན་མོ་གཞན་བཞེས་ཤིག་དང་དེའི་འོག་ཏུ་ཁྱོད་ལ་སྲས་ཀྱང་མངའ། སྲས་མོ་ཡང་མངའ་བར་འགྱུར་རོ། །དེས་སྨྲས་པ། བཟང་མོ་ཁྱོད་ཀྱིས་སྐྱེས་པ་གང་ལ་ཆུང་མ་གཉིས་ཡོད་པ་དེས་ལན་འགའ་ཡང་སྐྱོ་མ་གྲང་མོ་མི་འཐུང་ལ། རྟག་ཏུ་དེའི་ཁྱིམ་ན་ཐབ་མོ་དང ། མཚང་འདྲུ་བ་དང ། རྩོད་པ་དང ། འགྱེད་པས་ནང་མི་ཡོངས་སུ་འཁྲུག་པར་བྱེད་ཅིང་རང་གི་ལས་རྗེས་སུ་སྒྲུབ་པ་ལྷུར་ལེན་པར་ཡང་མི་འགྱུར་རོ་ཞེས་བྱ་བ་དེ་མ་ཐོས་སམ། ཆུང་མས་སྨྲས་པ། རྗེའི་སྲས་བཞེས་ཤིག་དང ། གལ་ཏེ་རེ་ཤིག་ཕུ་ནུ་མོ་ལྟ་བུ་ཞིག་ལགས་ན་ནི་ཕུ་ནུ་མོའི་འདུ་ཤེས་ཀྱིས་བསྐྱང་བར་བགྱིའོ། །གལ་ཏེ་བུ་མོ་ལྟ་བུ་ཞིག་ལགས་ན་ནི་བུ་མོའི་འདུ་ཤེས་ཀྱིས་བསྐྱང་བར་བགྱིའོ། །ཁྱིམ་བདག་དེ་ཆུང་མ་དེས
5.285a
གཡོའི་ཀུན་དུ་སྤྱོད་པ་སྨྲས་པ་ན་བུ་མོ་ཚོལ་བར་རྩོམ་མོ། །ཇི་ཙམ་ན་རི་བྲགས་ཤིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེ་ལ་བུ་གཉིས་དང་བུ་མོ་གཅིག་བཙས་ནས་དེས་དེ་དག་བསྲིངས་ཤིང་བསྐྱེད་ནས་ཁྱིམ་བདག་དེ་དུས་ལ་བབ་བོ། །དེ་ནས་བུ་མོ་ཚོལ་བའི་ཁྱིམ་བདག་དེས་དེ་གཉིས་ལས་བུ་མོ་དེ་བསླངས་ནས་དཔལ་དང་ལྡན་པའི་ཡོ་ལང་ཆེན་པོས་བག་མར་བླངས་སོ། །ཆོས་ཉིད་ཀྱིས་ན་སར་པ་ཐམས་ཅད་ཀྱིས་རྙིང་པ་ཟིལ་གྱིས་གནོན་པ་ཡིན་པས་ཁྱིམ་བདག་དེ་བག་མ་སར་པ་དེ་ལ་ཤིན་དུ་ལྟོས་པ་དང་ལྡན་ཞིང་སེམས་འབྲེལ་བར་གྱུར་ཏོ། །དེ་ནས་དེའི་ཆུང་མ་སྔ་མ་དེ་ཕྲག་དོག་གི་རང་བཞིན་གྱིས་མངལ་གྱི་གནས་རྣམ་པར་དག་ཅིང་དེའི་མངལ་དུ་སེམས་ཅན་ཞུགས་པར་གྱུར་ཏོ། །དེ་ནས་དེ་མཆོག་ཏུ་དགའ་བ་སྐྱེས་ནས་ཁྱིམ་ཐབ་ལ་སྨྲས་པ། རྗེའི་སྲས་བདག་ལ་སེམས་ཅན་ཞུགས་ཀྱིས་དགྱེས་པ་སྐྱེད་ཅིག་།ཁྱིམ་བདག་གིས་སྨྲས་པ། བཟང་མོ་ལེགས་ཏེ་གལ་ཏེ་ཁྱེའུར་སྐྱེ་བར་འགྱུར་ན་ཁོ་བོ་འདས་ནས་ཁྱིམ་གྱི་བདག་པོར་འགྱུར་རོ། །ཆུང་མས་སྨྲས་པ། རྗེའི་སྲས་གལ་ཏེ་ཁྱོད་ཀྱི་བག་སར་གྱི་མངལ་ན་གནས་པ་རླུགས་པར་བགྱི་བའི་ཚུལ་གྱིས་རླུགས་པར་མ་བགྱིས་ན་ཁྱེའུ་འདི་ཁྱིམ་གྱི་བདག་པོར་འགྱུར་རོ། །ཁྱིམ་བདག་གིས་སྨྲས་པ། བཟང་མོ་ཁོ་བོས་དང་པོ་དང་པོ་ཉིད་ནས་དོན་དེ་ཁྱོད་ལ་གོ་བར་མ་བྱས་སམ་ད་དུང་ཅིར་ཡང་མ་གྱུར་པ་ནས་ཁྱོད་ཀྱིས་བརྩམས་སོ། །ཆུང་མ་དེ་སྤོབས་པ་མེད་པར་གྱུར་ནས་ཅང་མི་སྨྲ་བར་འདུག་གོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེ་བཙས་པའི་བཙས་སྟོན་བྱས་ཏེ་ཁྱིམ་དང་འཐུན་པའི་མིང་བཏགས་ནས་དེ་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད
5.285b
པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཚིག་སྨྲ་ནུས་པར་གྱུར་པ་དེའི་ཚེ་ན་གང་ཅུང་ཟད་ཅི་སྨྲ་བ་དེ་ཐམས་ཅད་བདེན་པར་སྨྲ་ཞིང་བརྫུན་དུ་མི་སྨྲ་བས་དེའི་མིང་ཁྱིམ་དང་འཐུན་པར་བཏགས་པ་གང་ཡིན་པ་དེ་ནུབ་ཅིང་བདེན་སྨྲ་ཞེས་བྱ་བའི་མིང་ཆགས་པར་གྱུར་ཏེ་ཁ་ནས་ཀྱང་ཨུཏྤལ་སྔོན་པོའི་དྲི་འབྱུང་ངོ ། །དེའི་མས་བསམས་པ་བདག་ལ་བུ་ཡོད་ཀྱང་སྔོན་སྐལ་བ་མེད་པ་བཞིན་དུ་ཁྱིམ་ཐབ་འདི་ད་དུང་ཡང་བག་སར་ལ་ལྟོས་པ་དང་ལྡན་ཞིང་སེམས་འབྲེལ་བར་བྱེད་ཀྱིས་དེའི་ཕྱིར་ཐབས་ཀྱི་རྣམ་པ་ཞིག་བྱའོ་སྙམ་ནས་དེ་ཕྲག་དོག་དང ། སེར་སྣས་ཀུན་ནས་དཀྲིས་པའི་སེམས་ཀྱིས་ཤུགས་མི་བཟོད་པ་ན་ཁྱིམ་ཐབ་ཀྱི་གན་དུ་སོང་སྟེ་སྨྲས་པ། རྗེའི་སྲས་ཁྱོད་བག་སར་འདི་ལ་ཁྱོད་འདི་ལྟར་ཧ་ཅང་ལྟོས་པ་དང་ལྡན་ཞིང་སེམས་འབྲེལ་བས་དགྱེས་པར་མ་མཛད་ཅིག་།ཁྱིམ་བདག་གིས་སྨྲས་པ། བཟང་མོ་ཡང་ཁྱོད་ཀྱིས་བརྩམས་སོ། །དེས་སྤོབས་པ་མེད་པར་གྱུར་ནས་ཅང་མི་སྨྲ་བར་འདུག་གོ། ་་་་་་་་་།།འདུལ་བ་རྣམ་པར་འབྱེད་པ། བམ་པོ་ཉི་ཤུ་གཅིག་པ། སྐྱེས་པ་འམ་བུད་མེད་འདོད་པ་དག་བསྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་དེས་བུ་ལ་སྨྲས་པ། བུ་ཁྱོད་ཀྱིས་བུད་མེད་རྣམས་ལ་ཤིན་དུ་གནོད་པ་གང་ཡིན་ཤེས་སམ། བུས་སྨྲས་པ། ཡུམ་འཚལ་ཏེ། ཕྲག་དོག་དང ། སེར་སྣའོ། །བུ་མཉེས་ཏེ་ཁྱོད་ནི་ཤེས་རབ་ཀྱིས་རྟོགས་པ་དང་ལྡན་པས་དེ་དེ་བཞིན་ནོ། །ཁོ་མོ་ཁྱོད་ཀྱི་མ་ཡར་མོ་སུན་འབྱིན་པར་བྱེད་ཀྱིས་ཁྱོད་ཀྱིས་ཆེ་བཞི་ཕྱེ་ཤིག་།ཡུམ་ཅི་ཡང་དག་པས་སམ། ཡང་དག་པ་མ་ལགས་པས། བུ་ཡང་དག་པ་མ་ཡིན་པས་སོ། །ཡུམ་བདག་འཇིག་རྟེན་ཐམས་ཅད་ལ་བདེན་སྨྲ་ཞེས་བགྱི་བར་གྲགས་ན་དེའི་སླད་དུ་ད་ཇི་ལྟར་བརྫུན་དུ་སྨྲ་བར་བགྱི། ་བུ་ཁྱོད་ཁོ་མོས་ཟླ་བ་དགུར་ལྟོ་ན་བསྲེལ་བསྲེལ་ན་རེ་ཤིག་དེ་ཙམ་ཡང་སྨྲ་བར་མི་ནུས་ཏེ། དེ་ལྟར་ན་ཁྱོད་ཚིག་ཏུ་མ་སྨྲ་བར་གང་གི་ཚེ་ཁྱོད་ལ
5.286a
ཕས་དྲིས་པ་དེའི་ཚེ་ན་ཁྱོད་ཀྱིས་མགོ་ལྕོགས་ཤིག་།བུས་བསམས་པ། མའི་ཚིག་ཚིག་མ་ཡིན་པར་བྱར་མི་རུང་ངོ་སྙམ་དུ་རིག་ནས་སྨྲས་པ། ཡུམ་གལ་ཏེ་དེ་ལྟ་ན་མ་ནོངས་ཀྱིས། མགོ་ལྕོག་པར་བགྱིའོ། །དེས་བུ་དེ་དམ་འཆར་བཅུག་ནས་ཁྱིམ་བདག་གི་གན་དུ་སོང་སྟེ་སྨྲས་པ། རྗེའི་སྲས་ཁྱོད་ཀྱི་བག་སར་གྱི་རྟུལ་བ་བདག་གིས་མཐོང་ངོ ། །ཅི་བྱས། སྐྱེས་པ་གཞན་དང་ལྷན་ཅིག་དགའ་མགུར་སྤྱོད་དོ། །ཁྱིམ་བདག་དེ་ཀུན་ནས་དཀྲིས་པས་སྨྲས་པ། སྡིག་ཅན་མ་ཡང་ཁྱོད་ཀྱིས་བརྩམས་སོ། །རྗེའི་སྲས་ཁྱོད་བདེན་སྨྲ་ལ་ཡང་ཐུགས་མི་ཆེས་སམ། ཡིད་ཆེས་ཏེ་དེ་འཇིག་རྟེན་ཐམས་ཅད་ལ་བདེན་པར་སྨྲ་བ་ཡིན་ན་ཁོ་བོ་ལ་ཇི་ལྟར་བརྫུན་དུ་སྨྲ་བར་འགྱུར། རྗེའི་སྲས་གལ་ཏེ་དེ་ལྟ་ན་དེ་རྩེ་ཞིང་མཆིས་གྱིས་བོས་ཤིག་།ཁྱིམ་བདག་དེས་བུ་དེ་བོས་ནས་པང་པར་བཞག་སྟེ་སྨྲས་པ། བུ་ཁྱོད་ཀྱི་མ་ཡར་མོ་འདིས་སྐྱེས་པ་གཞན་དང་ལྷན་ཅིག་དགའ་མགུར་སྤྱོད་པ་བདེན་ནམ། བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་དེས་དེའི་ཁ་ལག་པས་བཀབ་ནས་སྨྲས་པ། བུ་དེ་ཁྱོད་ཀྱི་མ་དང་འདྲ་བ་ཡིན་གྱིས་ཚིག་ཏུ་མ་སྨྲ་ཤིག་།གལ་ཏེ་བདེན་པ་ཡིན་ན་མགོ་ལྕོགས་ཤིག་།ཁྱེའུ་དེས་མགོ་ལྕོགས་སོ། །ལས་ཤིན་ཏུ་རྔམས་ཆེ་ཞིང་ཡོངས་སུ་རྫོགས་པ་དག་ནི། ལུས་འཇིག་པ་ལ་མི་ལྟོས་པས། ཁྱེའུ་དེའི་ཁ་ནས་ཚེ་འདི་ཉིད་ལ་དྲི་ང་བ་བྱུང་བར་གྱུར་ཏོ། །ཀུན་ཏུ་ཡང་བདེན་སྨྲ་དེས་མ་ཡར་མོ་ལ་ཡང་དག་པ་མ་ཡིན་པས་སྐུར་བས་དེ་ནི་བདེན་སྨྲ་མ་ཡིན་གྱི་བརྫུན་དུ་སྨྲ་བ་ཡིན་ནོ་ཞེས་བྱ་བའི་སྒྲས་ཁྱབ་པར་གྱུར་ཏེ། དེའི་མིང་བདེན་སྨྲ་ཞེས་བྱ་བ་གང་ཡིན་པ་དེ་ནུབ་པར་གྱུར་ཅིང ། བརྫུན་སྨྲ་ཞེས་བྱ་བའི་མིང་ཆགས་པར་གྱུར་ཏོ། །དེ་ནས་ཁྱིམ་བདག་དེས་ཆུང་མ་དེ་ལ་སྨྲས་པ། ཁྱོད་ཉེས་པར་སྤྱོད་པ་ཡིན་གྱིས། ཁྱོད་ཁོ་བོའི་ཁྱིམ་ན་མ་འདུག་ཤིག་།ཆུང་མ་དེས་མ་ཉེས་སོ། །ཞེས་སྨྲ་མོད་ཀྱི་འོན་ཀྱང་འཇིག་རྟེན་དག་ཚིག་ངན་སྨྲ་བས་འཇིགས་ནས་ཁྱིམ
5.286b
ནས་བསྐྲད་པ་དང ། དེ་མ་རངས་བཞིན་དུ་མིང་པོ་གཉིས་ཀྱི་ཁྱིམ་དུ་སོང་ངོ ། །མིང་པོ་གཉིས་ཀྱིས་དེ་ལ་སྨྲས་པ། སྲིང་མོ་ཁྱོད་ཅིའི་ཕྱིར་འདིར་འོངས། དེས་སྨྲས་པ། བདག་ཁྱིམ་ཐབ་ཀྱིས་རང་གི་ཁྱིམ་ནས་བསྐྲད་དོ། །ཅིའི་ཕྱིར་ཉེས་པར་སྤྱོད་ཅེའོ། །གལ་ཏེ་དེ་ལྟ་ན་ཁྱོད་འདིར་ཡང་མ་འདུག་ཤིག་།དེས་སྨྲས་པ། བདག་གིས་ཉེས་པར་མ་སྤྱད་དེ་འདི་ལྟར་བདེན་སྨྲ་མས་བསླུས་པ་དེས་ཡང་དག་པ་མ་ཡིན་པས་སྐུར་ཏེ་དེ་ནི་བདེན་སྨྲ་མ་ཡིན་གྱི་བརྫུན་སྨྲ་ཡིན་ནོ། །དེ་ཇི་ལྟར་ཤེས། གལ་ཏེ་ཁྱེད་གཉིས་ཡིད་མི་ཆེས་ན་སྡུམ་ཚེས་ཀྱི་སྐྱེ་བོ་དག་ཁྱེད་གཉིས་ལ་སྨྲ་བར་འགྱུར་བས་དེ་དག་ཆེ་བཞི་ཡིན་ནོ། །དེ་གཉིས་འཇིག་རྟེན་དག་ཁ་ཟེར་བས་འཇིགས་པས་སོང་སྟེ་ཁྱིམ་བདག་དེའི་སྡུམ་ཚེས་ཀྱི་སྐྱེ་བོ་དག་ལ་དྲིས་པ་དང ། དེ་དག་ན་རེ་འདི་ནི་ཉེས་པར་སྤྱོད་པ་མ་ཡིན་གྱི་འདི་ལྟར་བདེན་སྨྲ་མས་བསླུས་པ་དེ་ཡང་དག་པ་མ་ཡིན་པས་སྐུར་ཏེ་དེ་ནི་བདེན་སྨྲ་མ་ཡིན་གྱི་བརྫུན་སྨྲ་ཡིན་ནོ་ཞེས་ཟེར་རོ། །དེ་ནས་དེ་གཉིས་བདེན་སྨྲ་ལ་ཁྲོ་བའི་ཀུན་ནས་དཀྲིས་པ་སྐྱེས་ནས་ཉེ་དུའི་ཚོགས་སྙིང་དུ་སྡུག་པ་དག་ལ་ཇི་ལྟར་གྱུར་པ་གོ་བར་བྱས་ནས། སྲིང་མོ་དེ་རང་གི་ཁྱིམ་ན་བསྲེལ་ཞིང་དེ་ལ་ཡང་གླན་ཀ་བཙལ་བ་ལྷུར་ལེན་ཅིང་འཁོད་དོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་གནས་སུ་གྱུར་པ་དག་འཇིག་རྟེན་དུ་འབྱུང་ངོ ། །ཇི་ཙམ་ན་རང་སངས་རྒྱས་ཤིག་ལྗོངས་རྒྱུ་ཞིང་འགྲོ་བ་ན། རི་བྲགས་དེར་ཕྱིན་ནས། དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་བསོད་སྙོམས་རྒྱུ་ཞིང་ཁྱིམ་རིམ་གྱིས་འགྲོ་བ་ན་ལྷ་དང་མིའི་ཡིད་སྡུད་པར་བྱེད་པའི་སྤྱོད་ལམ་ཞི་བས་ཁྱིམ་དེར་ཞུགས་པ་དེ་བདེན་སྨྲས་ཡང་དག་པ་མ་ཡིན་པས་སྐུར་བའི་ཆུང་མ་དེས་མཐོང་ནས། དེས་བསམས་པ། རབ་ཏུ་བྱུང་བ་འདིའི་སྤྱོད་ལམ་འདི་འདྲ
5.287a
བ་ལས་ན་འདི་ནི་བརྟུལ་ཞུགས་གྲུབ་པ་བདག་ཉིད་ཆེན་པོ་ཡིན་ཏེ། གང་དག་གིས་འདི་ལ་མཆོད་པ་བྱས་ཤིང་སྨོན་ལམ་འདེབས་པར་བྱེད་པ་དེ་དག་གང་སེམས་པ་དང ། གང་འདོད་པ་དེ་ནི་དེ་དག་ལས་ཐམས་ཅད་འགྲུབ་པར་འགྱུར་རོ། །སྙམ་དུ་རིག་ནས་དེས་དེའི་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ་བདག་ནི་བསོད་ནམས་འཚལ་བ་ལགས་ཀྱིས་འདི་ཉིད་དུ་གདུགས་ཚོད་གསོལ་ཅིག་།བདག་ཉིད་ཆེན་པོ་དེ་དག་ནི་གཞན་གྱི་དོན་ལ་ཞུགས་པ་ཡིན་པས་དེས་དང་དུ་བླངས་སོ། །དེ་ནས་དེས་རང་སངས་རྒྱས་དེ་བསོད་པ་དང་བཅས་པའི་ཟས་ཀྱིས་ཚིམ་པར་བྱས་ནས་རྐང་པ་གཉིས་ལ་ཕྱག་འཚལ་ཏེ། སྨོན་ལམ་ལོག་པ་འདི་སྐད་ཅེས་པ་བདག་གིས་ཡོན་གནས་ཡང་དག་པར་གྱུར་པ་འདི་ལྟ་བུ་ལ་མཆོད་པ་དག་བྱས་པའི་དགེ་བའི་རྩ་བ་འདིས་ཇི་ལྟར་བདེན་སྨྲ་དེས་བདག་སུན་མ་བྱུང་བ་གནོད་པ་མེད་པ་ལ་ཡང་དག་པ་མ་ཡིན་པས་སྐུར་བ་དེ་ལྟར་བདག་གིས་ཀྱང་དེ་གང་དང་གང་དུ་སྐྱེས་པ་དེ་དང་དེར་དེས་དགྲ་བཅོམ་པ་ཉིད་ཐོབ་ཀྱི་བར་དུ་ཡང་དག་པ་མ་ཡིན་པས་དེ་ལ་སྐུར་བ་འདེབས་པར་གྱུར་ཅིག་ཅེས་བཏབ་བོ། །མིང་པོ་གཉིས་ཀྱིས་དེ་ལ་དྲིས་པ། སྲིང་མོ་ཁྱོད་ཀྱིས་སྨོན་ལམ་ཅི་ཞིག་བཏབ། དེས་སྨྲས་པ། མིང་པོ་གཉིས་འདི་དང ། འདི་ལྟ་བུ་ཞིག་གོ། །དེ་གཉིས་ཀྱིས་སྨྲས་པ། གལ་ཏེ་དེ་ལྟ་ན་ཁོ་བོ་ཅག་གཉིས་ཀྱང་ཁྱོད་ཀྱི་མིང་པོ་ཡིན་པས་ཆེ་བཞི་དབྱེ་བར་བྱའོ། །དགེ་སློང་དག་དེ་ལ་དེའི་ཚེ་དེའི་དུས་ན་ཁྱིམ་བདག་གི་བུ་བདེན་སྨྲ་གང་ཡིན་པ་དེ་ནི་གྱད་བུ་ནོར་འདི་ཡིན་ནོ། །དེའི་ཚེ་དེའི་དུས་ན་དེའི་མ་ཡར་མོ་གང་ཡིན་པ་དེ་ནི། དགེ་སློང་མ་མཛའ་མོ་འདི་ཡིན་ནོ། །དེའི་མིང་པོ་གཉིས་གང་དག་ཡིན་པ་དེ་གཉིས་ནི་དགེ་སློང་མཛའ་བོ་དང ། ས་ལས་སྐྱེས་ཡིན་ནོ། །དེས་མ་ཡར་མོ་ལ་ཡང་དག་པ་མ་ཡིན་པས་སྐུར་བ་གང་ཡིན་པའི་ལས་དེའི་རྣམ་པར་སྨིན་པས་ལོ་བརྒྱ་ཕྲག་མང་པོ་དང ། ལོ་སྟོང་ཕྲག་མང་པོ་དག་ཏུ་སེམས་ཅན་དམྱལ་བ་དག་ཏུ་གདུངས་ནས་ལས་དེ་ཉིད་ཀྱི
5.287b
ལྷག་མས་ཚེ་རབས་ལྔ་བརྒྱར་དེ་ལ་འདིས་ཡང་དག་པ་མ་ཡིན་པས་སྐུར་ཅིང་དེ་གཉིས་ཀྱིས་ཀྱང་ཆེ་བཞི་ཕྱེའོ། །དེས་ན་ད་ལྟར་དགྲ་བཅོམ་པ་ཉིད་ཐོབ་ཀྱང་དགེ་སློང་མ་མཛའ་མོས་ཡང་དག་པ་མ་ཡིན་པས་སྐུར་ཅིང་མཛའ་བོ་དང ། ས་ལས་སྐྱེས་གཉིས་ཀྱིས་ཆེ་བཞི་ཕྱེ་བར་གྱུར་ཏོ། །གནས་མལ་འབོག་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན་དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་གནས་མལ་འབོག་པ་རྣམས་ཀྱི་མཆོག་ཏུ་བསྟན་ཏོ། །དེ་ནས་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས། བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང
5.288a
ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང ། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་གནས་མལ་འབོག་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱ་སེང་གེ། ཤཱཀྱའི་རྒྱལ་པོ་གཙོ་བོ་དེས་གནས་མལ་འབོག་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་གནས་མལ་འབོག་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང ། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱོད་ཀྱིས་དེ་ལྟར་བསླབ་པར་བྱའོ། །གཞི་མེད་པར་སྐུར་བ་འདེབས་པའི་དགེ་འདུན་ལྷག་མ་སྟེ་བརྒྱད་པ་རྫོགས་སྷོ།། ་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་འདུག་སྟེ། དེ་དང་ཧ་ཅང་མི་རིང་བ་ན་རྫིང་བུ་རྡོ་རྩིགས་ཅན་ཞེས་བྱ་བ་འདུག་པ། དེའི་འགྲམ་ན་ཚེ་དང་ལྡན་པ་གྱད་བུ་ནོར་ཉིན་མོ། གནས་པར་བྱེད་དོ། །གང་གི་ཚེ་ཨུཏྤ་ལའི་མདོག
5.288b
དགེ་བའི་བཤེས་གཉེན་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བརྟེན་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་དགྲ་བཅོམ་པ་རྣམ་པར་རྒྱལ་བར་བྱ་བ་ལས་རྣམ་པར་རྒྱལ་བར་གྱུར་པ་དེའི་ཚེ་ན་དེ་ཤེས་ནས་དད་པ་དང་ལྡན་པས་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ལ་ཡང་དང་ཡང་དུ་བལྟ་བའི་ཕྱིར་འགྲོ་ཞིང ། ལྷག་པར་ཡང་ཚེ་དང་ལྡན་པ་གྱད་བུ་ནོར་ལ་འདི་འདི་ལྟར་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པར་གྱུར་ཀྱང་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་ལ་སྙོམས་པར་འཇུག་པའི་བདེ་བ་དག་སྤངས་ཏེ་དགེ་འདུན་གྱི་ཆོས་དང་ལྡན་པའི་ཞལ་ཏའི་ལས་དག་ལ་བརྩོན་པར་གྱུར་པ་ནི་དཀའ་བ་བྱེད་པ་ཡིན་ནོ་སྙམ་ནས་ཡང་དང་ཡང་དུ་དེ་བལྟ་བའི་ཕྱིར་འགྲོའོ། །དེ་དུས་གཞན་ཞིག་ན་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་ནས་ཚེ་དང་ལྡན་པ། གྱད་བུ་ནོར་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་གྱད་བུ་ནོར་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེའི་ཚེ་ན་དགེ་སློང་མཛའ་བོ་དང ། ས་ལས་སྐྱེས་གཉིས་ཕྱག་དར་ཁྲོད་ཅིག་རྙེད་ཅིང་དེ་གཉིས་ཚེ་དང་ལྡན་པ་གྱད་བུ་ནོར་དང་ཚེ་རབས་ཚེ་རབས་སུ་འཁོན་བྱུང་སྟེ། རྟག་ཏུ་གླན་ཀ་ཚོལ་བ་ལ་བརྩོན་པ་ཡིན་པས། མཛའ་བོས་སྨྲས་པ། ས་ལས་སྐྱེས་ཕྱག་དར་ཁྲོད་རྙེད་པ་འདི་གང་དུ་འཁྲུར་གཞུག་།ས་ལས་སྐྱེས་ཀྱིས་སྨྲས་པ། རྫིང་བུ་རྡོ་རྩིགས་ཅན་ནི་རྒྱུན་ལུགས་ཉུང་ཞིང་ཉེན་ཀོར་གཙང་བ་ཡིན་པས་དེར་འདོང་ངོ ། །དེ་གཉིས་ཕྱག་དར་ཁྲོད་ཁྱེར་ཏེ་རྫིང་བུ་རྡོ་རྩིགས་ཅན་དུ་དོང་ནས་དེ་གཉིས་ཀྱིས་ཕྱག་དར་ཁྲོད་དེར་འཁྲུར་བཅུག་ནས། ཉི་མ་ལ་བཏིང་སྟེ་འཁོད་དོ། །དེའི་ཚེ་ན་རི་དགས་ཀྱི་ཁྱུ་དག་རྫིང་བུ་རྡོ་རྩིགས་ཅན་དུ་ལྷགས་ནས་ཆུ་འཐུངས་ཏེ་འདོང་བར་བྱེད་དོ། །རི་དགས་དག་གི་ཆོས་ཉིད་ནི། གཅིག་གི་རྒྱབ་ཏུ་གཅིག་རྒལ་བར་བྱེད་པ་ཡིན་པས། ཇི་ཙམ་ན་རི་དགས་ཞིག་གིས། རི་དགས་མོ་ཞིག་གི་རྒྱབ་ཏུ་རྒལ་ཏེ་མི་ཚངས་པར་སྤྱོད་པ
5.289a
འཁྲིག་པའི་ཆོས་བརྟེན་པར་བརྩམས་སོ། །དེ་མཛའ་བོས་མཐོང་ནས་དེས་སྨྲས་པ། ས་ལས་སྐྱེས་གྱད་བུ་ནོར་འདི་དགེ་སློང་མ་ཨུཏྤ་ལའི་མདོག་ལ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་གྱི་འདོང་ལ་དགེ་སློང་རྣམས་ལ་བརྗོད་པར་བྱའོ། །ས་ལས་སྐྱེས་ཀྱིས་སྨྲས་པ། ཚེ་དང་ལྡན་པ་མཛའ་བོ་དེའི་ཚེ་ཡང་རེ་ཤིག་བདག་ཅག་གཉིས་གནས་ནས་དབྱུང་བའི་ལས་བྱས་ན་ཅི་ད་ཡང་གནས་ནས་དབྱུང་བའི་ལས་བྱེད་དུ་འཇུད་པར་འདོད་དམ་མཛའ་བོས་སྨྲས་པ། ཚེ་དང་ལྡན་པ་ས་ལས་སྐྱེས་དེའི་ཚེ་ན་ནི་ཡང་དག་པ་མ་ཡིན་པས་ཡིན་གྱི་ད་ནི་བག་ཙམ་ལས་བསམ་པ་ཡོད་དོ། །གྱད་བུ་ནོར་དང་དགེ་སློང་མ་ཨུཏྤ་ལའི་མདོག་དང་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་མ་མཐོང་ངམ། ཚེ་དང་ལྡན་པ་འདི་ལ་བརྫུན་དུ་སྨྲ་བ་ག་ལ་ཡོད་ཀྱིས་ཚུར་ཤོག་འདོང་ལ་དགེ་སློང་རྣམས་ལ་བརྗོད་པར་བྱའོ། །ས་ལས་སྐྱེས་དེ་མཛའ་བོས་བསླུས་པ་ན་བཏུབ་པར་གྱུར་ནས་དེ་གཉིས་གཙུག་ལག་ཁང་དུ་དོང་སྟེ་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་འདི་ལྟར་བདག་ཅག་གཉིས་ཀྱིས་ཚེ་དང་ལྡན་པ་གྱད་བུ་ནོར་དགེ་སློང་མ་ཨུཏྤ་ལའི་མདོག་དང ། མི་ཚངས་པར་སྤྱོད་པ་འཁྲིག་པའི། ཆོས་སྟེན་པ་མཐོང་སྟེ། འདི་ལ་བདག་ཅག་གཉིས་གང་གི་དད་པ་འམ་ཡིད་ཆེས་པས་འགྲོ་བར་བྱ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་གཉིས། ཅི་ཁྱེད་གཉིས་ལྷ་དང ། མི་རྣམས་གཅིག་ཏུ་ཡོངས་སུ་བཏང་ཞིང ། སེམས་ཅན་དམྱལ་བ་དང ། ཡི་དགས་དང ། དུད་འགྲོ་བ་རྣམས་སུ་གཅིག་ཏུ་གནས་སམ། ཅི་ན་དགེ་སློང་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ། མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་རྣམ་པར་སྟོན་པ་དེ་ལ་ཁྱེད་གཉིས་གཞན་གྱི་ཆ་མ་ཡིན་པ་དང་འཐུན་པར་ཕམ་པར་འགྱུར་བའི་ཆོས་ཀྱིས་སྐུར་བ་འདེབས་པར་བྱེད། དེ་གཉིས་ཀྱིས་སྨྲས་པ། ཚེ་དང་ལྡན་པ་དག་དེ་ནི་བདག་ཅག་གཉིས་ཀྱིས་མ་ཉེས་ཀྱི་འདི་ལྟར་བདག་ཅག་གཉིས་ཀྱི་མིག་དག་གིས་མཐོང་བས་མིག
5.289b
དབྱུང་བར་བྱ་གྲང ། བཅོམ་ལྡན་འདས་ཀྱིས་སྔར་ལྟར་དེ་གཉིས་ལ་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་དོན་ཅི་ལ་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེང་བར་གྱིས་ཤིག་།བརྟག་པར་གྱིས་ཤིག་ཅེས་བཀའ་སྩལ་པས། དགེ་སློང་རྣམས་ཀྱིས་དེ་གཉིས་ལ་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་ཅིའི་ཕྱིར་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེངས་ཤིང་བརྟགས་སོ། །དགེ་སློང་རབ་ཏུ་མང་པོ་དག་གིས་ལེགས་པར་རབ་ཏུ་གླེངས་ཤིང་བརྟགས་པ་ན་དེ་གཉིས་ཀྱིས་སྨྲས་པ། ཚེ་དང་ལྡན་པ་དག་ཚེ་དང་ལྡན་པ་གྱད་བུ་ནོར་གྱིས་དགེ་སློང་མ་ཨུཏྤ་ལའི་མདོག་ལ་མི་ཚངས་པར་སྤྱོད་པ་འཁྲིག་པའི་ཆོས་མ་བསྟེན་ཏེ། འདི་ལྟར་ཚེ་དང་ལྡན་པ་གྱད་བུ་ནོར་གྱིས་བདག་ཅག་གཉིས་གང་དག་ཟོས་ན་རྫུད་པར་འགྱུར་བ་ཤིན་དུ་ཡིད་དུ་མི་འོང་བའི་ཟས་ངན་པ་དག་གིས་ལན་གསུམ་གྱི་བར་དུ་ཐོ་བཙམས་པས་བདག་ཅག་གཉིས་ཀྱིས་ཚེ་དང་ལྡན་པ་གྱད་བུ་ནོར་ལ་གཞན་གྱི་ཆ་མ་ཡིན་པ་དང་འཐུན་པ་ཕམ་པར་འགྱུར་པའི་ཆོས་ཀྱིས་སྐུར་བ་བཏབ་པར་ཟད་ཀྱི་ཚེ་དང་ལྡན་པ་གྱད་བུ་ནོར་གྱིས་དགེ་སློང་མ་ཨུཏྤ་ལའི་མདོག་ལ་མི་ཚངས་པར་སྤྱོད་པ་འཁྲིག་པའི་ཆོས་མ་བསྟེན་ཏེ། འདི་ལྟར་དགེ་སློང་དག་པ་ལྟུང་བ་མེད་པ་ཡིན་ནོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་དག་པ་ལྟུང་བ་མེད་པ་ལ་གཞན་གྱི་ཆ་མ་ཡིན་པ་དང་འཐུན་པ་ཕམ་པར་འགྱུར་པའི་ཆོས་ཀྱིས་སྐུར་བ་འདེབས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དག་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་ཤིང ། ཞེ་སྡང་བར་གྱུར་ནས་ཅི་ནས་ཀྱང ། འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་དག་པ་ལྟུང་བ་མེད་པ་ལ་གཞན་གྱི་ཆ་མ་ཡིན་པ་དང་འཐུན་པ
5.290a
ཕམ་པར་འགྱུར་བའི་ཆོས་ཀྱིས་སྐུར་བ་ལས་དེ་དུས་གཞན་ཞིག་ན་དྲིས་ཀྱང་རུང ། མ་དྲིས་ཀྱང་རུང་རྩོད་པ་དེ་ཡང་གཞན་གྱི་ཆ་མ་ཡིན་པ་དང་འཐུན་པ་ཡིན་ལ་རྩོད་པ་དེ་གཞན་གྱི་ཆ་མ་ཡིན་པ་དང་འཐུན་པས་བག་ཙམ་ལས་བསམས་པ་ཙམ་གྱི་ཆོས་འགའ་ཞིག་བླངས་པར་གྱུར་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན། དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་མཛའ་བོ་དང ། ས་ལས་སྐྱེས་སམ། གཞན་ཡང་དེ་ལྟ་བུ་གང་ཡིན་པའོ། །ཁྲོས་ཤིང་ཞེས་བྱ་བ་ནི་འཁྲུགས་ཤིང་ངོ ། །ཞེ་སྡང་བར་གྱུར་ནས་ཞེས་བྱ་བ་ནི་ཡིད་མི་དགའ་བར་གྱུར་ནས་ཏེ་འཁྲུགས་པ་མ་བསལ་བར་རོ། །ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་ཤེས་བྱ་བ་ནི་ཅི་ནས་ཀྱང་འདི་དགེ་སློང་གི་ཚུལ་དང་དབྲལ་ལོ་སྙམ་ནས་སོ། །དགེ་སློང་དག་པ་ཞེས་བྱ་བ་ནི་གྱད་བུ་ནོར་རམ། གཞན་ཡང་དེ་ལྟ་བུ་གང་ཡིན་པའོ། །ལྟུང་བ་མེད་པ་ལ་ཞེས་བྱ་བ་ནི་གཞི་དེའི་ལྟུང་བ་མེད་པའོ། །གཞན་གྱི་ཆ་མ་ཡིན་པ་དང་འཐུན་པ་ཞེས་བྱ་བ་ནི་མྱ་ངན་ལས་འདས་པའོ། །དེའི་ཆ་དང་འཐུན་པ་མ་ཡིན་པ་ནི་ཕམ་པར་འགྱུར་བའི་ཆོས་བཞི་པོ་དག་གོ། །ཕམ་པར་འགྱུར་བའི་ཞེས་བྱ་བ་ནི་བཞི་པོ་གང་ཡང་རུང་བའི་འོ། །ཆོས་ཀྱིས་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པས་སོ། །སྐུར་བ་ལས་ཞེས་བྱ་བ་ནི་སྐུར་བ་བཏབ་པ་ལས་སོ། །དེ་དུས་གཞན་ཞིག་ན་ཞེས་བྱ་བ་ནི་དེ་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་རང་ཉིད་འགྱོད་པ་དང ། ཅུང་ཟད་འགྱོད་པ་དང ། རྣམ་པར་འགྱོད་པ་དང ། རབ་ཏུ་འགྱོད་པར་གྱུར་ནས་སོ། །རྩོད་པ་དེ་ཡང་ཞེས་བྱ་བ་ནི་རྩོད་པ་བཞི་པོ་འགྱེད་པའི་ཕྱིར་རྩོད་པ་དང ། མི་གདམས་པའི་ཕྱིར་རྩོད་པ་དང ། ལྟུང་བའི་ཕྱིར་རྩོད་པ་དང ། བྱ་བའི་ཕྱིར་རྩོད་པའོ། །གཞན་གྱི་ཆ་མ་ཡིན་པ་དང་འཐུན་པ་ཡིན་ལ་ཞེས་བྱ་བ་ནི། མྱ་ངན་ལས་འདས་པའི་ཆ་མ་ཡིན་པ་དང་འཐུན་པར་ཕམ་པར་འགྱུར་བ། ཞེས་བྱ་བ་ཡིན་ལའོ། །
5.290b
རྩོད་པ་དེ་གཞན་གྱི་ཆ་མ་ཡིན་པ་དང་འཐུན་པས་བག་ཙམ་ལས་བསམ་པ་ཙམ་གྱིས་ཆོས་འགའ་ཞིག་བླངས་པར་གྱུར་ལ་ཞེས་བྱ་བ་ལ། བག་ཙམ་ལས་བསམ་པ་ཙམ་གྱིས་ཞེས་བྱ་བ་ནི་རི་དགས་དང ། རི་དགས་མོའི་འོ། ཆོས་ཤེས་བྱ་བ་ནི་ཆོས་མ་ཡིན་པ་དེ་ཆོས་ཀྱི་སྒྲར་གསུངས་པའོ། །བླངས་པར་གྱུར་ལ་ཞེས་བྱ་བ་ནི་བཟུང་བར་གྱུར་ལའོ། །དགེ་སློང་ཡང་ཞེ་སྡང་ལ་གནས་པས་ཤེས་བྱ་བ་ནི་སྐུར་བ་འདེབས་པར་འདོད་པས་སོ། །ཞེ་སྡང་གིས་སྨྲས་སོ་ཞེ་ན་ཞེས་བྱ་བ་ནི་སྐུར་བ་བཏབ་པར་གྱུར་ཏོ་ཞེས་ཟེར་ནའོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པར་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་སྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད
5.291a
ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཉིད་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་དགེ་འདུན་ལྷག་མའི་ལྟུང་བ་འབྱིན་པ་མཐོང་ཤིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེས་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས། དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར
5.291b
ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེས་དེ་ལ་ལྟུང་བྱེད་ཀྱི་ལྟ་བ་ཉིད་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་ལ་སོ་སོར་གཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ། འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས
5.292a
བྱས་ཀྱི་ལྟ་བ་ཐོབ་པར་གྱུར་ན་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཉིད་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ
5.292b
བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང་བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཉིད་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དྲིལ་བསྒྲགས་པ་ལ་ནི་ལྟུང་བ་མེད་དོ། །ངོས་ལ་རི་མོར་བྲིས་པ་ཕན་ཆད་ཀྱང་ལྟུང་བ་མེད་དེ།
5.293a
ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས་ཅད་ཀྱིས་ཀྱང་ཤེས་སོ་སྙམ་ནའོ། །ལས་དང་པོ་པ་དང ། མྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཞན་གྱི་ཆ་མ་ཡིན་པ་དང་འཐུན་པའི་དགེ་འདུན་ལྷག་མ་སྟེ་དགུ་པ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་མུ་གེ་ཉམ་ང་བ་དགོན་པ་སློངས་མོ་པས་བསོད་སྙོམས་རྙེད་པར་དཀའ་བ་བྱུང་བའོ། །དེ་ན་དགེ་སློང་གང་དག་རྫུ་འཕྲུལ་ཐོབ་པ་དེ་དག་ནི་གང་གི་མིང་གིས་འཛམ་བུའི་གླིང་ཞེས་བྱ་བར་ཤེས་པའི་ཤིང་འཛམ་བུ་དེ་ལས་འཛམ་བུའི་འབྲས་བུ་ལྷགས་པ་ཁ་དོག་དང ། དྲི་དང ། རོ་དང་ལྡན་པ་དག་དང ། དེའི་ཉེན་ཀོར་ན་སྐྱུ་རུ་རའི་ཚལ་དང ། བིལ་བའི་ཚལ་དང ། ཀ་པིད་ཐའི་ཚལ་ནས་དེ་དག་གི་འབྲས་བུ་ལྷགས་པ་ཁ་དོག་དང ། དྲི་དང ། རོ་དང་ལྡན་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱེད་དོ། །ཤར་གྱི་ལུས་འཕགས་དང ། ནུབ་ཀྱི་བ་ལང་སྤྱོད་དུ་ཡང་སོང ། བྱང་གི་སྒྲ་མི་སྙན་དུ་ཡང་སོང་སྟེ། མ་རྨོས་མ་བཏབ་པའི་འབྲས་ས་ལུའི་འབྲུ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱེད་དོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་ཡང་སོང ། སུམ་བཅུ་རྩ་གསུམ་པའི་རིས་ཀྱི་ལྷ་རྣམས་ཀྱི་ནང་དུ་ཡང་སོང་སྟེ་ལྷའི་བདུད་རྩི་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱེད་དོ། །ཡུལ་གང་དག་འབྱོར་པ་རྒྱས་པ་བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ་དེ་དག་ཏུ་ཡང་སོང་སྟེ་བཅའ་བ་དང ། བཟའ་བ་གཙང་བ་བསོད་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་དག་ལ་ཡང
5.293b
བགོ་བཤའ་བྱེད་དོ། །དེ་ནས་ལྷས་བྱིན་འདི་སྙམ་དུ་སེམས་ཏེ། དེ་ལྟར་མུ་གེ་ཉམ་ང་བ་དགོན་པ་སློངས་མོ་པས་བསོད་སྙོམས་རྙེད་པར་དཀའ་བ་བྱུང་སྟེ། འདི་ན་དགེ་སློང་གང་དག་རྫུ་འཕྲུལ་ཐོབ་པ་དེ་དག་ནི་གང་གི་མིང་གིས་འཛམ་བུའི་གླིང་ཞེས་བྱ་བར་ཤེས་པའི་ཤིང་འཛམ་བུ་དེ་ལས་འཛམ་བུའི་འབྲས་བུ་ལྷགས་པ། ཁ་དོག་དང ། དྲི་དང ། རོ་དང་ལྡན་པ་དག་དང ། དེའི་ཉེན་ཀོར་ན་སྐྱུ་རུ་རའི་ཚལ་དང ། བིལ་བའི་ཚལ་དང ། ཀ་པིད་ཐའི་ཚལ་ནས་དེ་དག་གི་འབྲས་བུ་ལྷགས་པ་ཁ་དོག་དང ། དྲི་དང ། རོ་དང་ལྡན་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱེད། ཤར་གྱི་ལུས་འཕགས་དང ། ནུབ་ཀྱི་བ་ལང་སྤྱོད་དུ་ཡང་སོང ། བྱང་གི་སྒྲ་མི་སྙན་དུ་ཡང་སོང་སྟེ། མ་རྨོས་མ་བཏབ་པའི་འབྲས་ས་ལུའི་འབྲུ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱེད། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་ཡང་སོང ། སུམ་བཅུ་རྩ་གསུམ་པའི་རིས་ཀྱི་ལྷ་རྣམས་ཀྱི་ནང་དུ་ཡང་སོང་སྟེ། ལྷའི་བདུད་རྩི་དག་གིས་ལྷུང་བཟེད་བསྐང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱེད། ཡུལ་གང་དག་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང ། མི་མང་པོས་གང་བ་དེ་དག་ཏུ་ཡང་སོང་སྟེ་བཅའ་བ་དང་བཟའ་བ་གཙང་བ་བསོད་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱེད། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱེད་ཀྱིས། བདག་གིས་ཀྱང་གལ་ཏེ་རྫུ་འཕྲུལ་ཐོབ་པར་གྱུར་ན་བདག་གིས་ཀྱང་གང་གི་མིང་གིས་འཛམ་བུའི་གླིང་ཞེས་བྱ་བར་ཤེས་པའི་ཤིང་འཛམ་བུ་དེ་ལས་འཛམ་བུའི་འབྲས་བུ་ལྷགས་པ་ཁ་དོག་དང ། དྲི་དང ། རོ་དང་ལྡན་པ་དག་དང ། དེའི་ཉེན་ཀོར་ན་སྐྱུ་རུ་རའི་ཚལ་དང ། བིལ་བའི་ཚལ་དང ། ཀ་པིད་ཐའི་ཚལ་ནས་དེ་དག་གི
5.294a
འབྲས་བུ་ལྷགས་པ་ཁ་དོག་དང ། དྲི་དང ། རོ་དང་ལྡན་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱ། ཤར་གྱི་ལུས་འཕགས་དང ། ནུབ་ཀྱི་བ་ལང་སྤྱོད་དུ་ཡང་སོང ། བྱང་གི་སྒྲ་མི་སྙན་དུ་ཡང་སོང་སྟེ། མ་རྨོས་མ་བཏབ་པའི་འབྲས་ས་ལུའི་འབྲུ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱ། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་ཡང་སོང ། སུམ་བཅུ་རྩ་གསུམ་པའི་རིས་ཀྱི་ལྷ་རྣམས་ཀྱི་ནང་དུ་ཡང་སོང་སྟེ། ལྷའི་བདུད་རྩི་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱ། ཡུལ་གང་དག་འབྱོར་པ། རྒྱས་པ། ལོ་ལེགས་པ། སྐྱེ་བོ་དང ། མི་མང་པོས་གང་བ་དེ་དག་ཏུ་ཡང་སོང་སྟེ་བཅའ་བ་དང་བཟའ་བ་གཙང་བ་བསོད་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱ་ན། དེའི་ཕྱིར་བདག་ཉིད་ལ་རྫུ་འཕྲུལ་གྱི་ལམ་སྟོན་པར་ནུས་པ་སུ་ཡོད་སྙམ་མོ། །དེ་ནས་ལྷས་བྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ལྷས་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་རྫུ་འཕྲུལ་གྱི་ལམ་བསྟན་དུ་གསོལ། དེ་ནས་བཅོམ་ལྡན་འདས་ཀྱིས། ལྷས་བྱིན་ལ་སྡིག་པ་ཅན་གྱི་འདོད་པའི་རྣམ་པ་དེ་ལྟ་བུ་དེ་བྱུང་བར་ཐུགས་སུ་ཆུད་ནས། ལྷས་བྱིན་ལ་འདི་སྐད་ཅེས་བཀའ་སྩལ་ཏོ། གཽ་ཏ་མའི་བུ་ཁྱོད་ཀྱིས་ལྷག་པའི་ཚུལ་ཁྲིམས་ལ་མངོན་པར་བརྩོན་པར་གྱིས་ཤིག་དང ། ཁྱོད་ལ་རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །
5.294b
གཽ་ཏ་མའི་བུ་ཁྱོད་ཀྱིས་ལྷག་པའི་སེམས་དང ། ལྷག་པའི་ཤེས་རབ་ལ་མངོན་པར་བཙོན་པར་གྱིས་ཤིག་དང ། ཁྱོད་ལ་རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །དེ་ནས་ལྷས་བྱིན་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་བདག་ལ་རྫུ་འཕྲུལ་གྱི་ལམ་མི་སྟོན་ཏོ་སྙམ་དུ་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་འདི་སྐད་ཅེས་སྨྲས་སོ། །གནས་བརྟན་གྱིས་བདག་ལ་རྫུ་འཕྲུལ་གྱི་ལམ་བསྟན་དུ་གསོལ། ཚེ་དང་ལྡན་པ་ཀུན་ཤེས་ཀཽཎྜི་ནྱས་བཅོམ་ལྡན་འདས་ཀྱི་ཐུགས་ལ་ཡང་རྣམ་པར་བལྟས། ལྷས་བྱིན་ལ་སྡིག་པ་ཅན་གྱི་འདོད་པའི་རྣམ་པ་དེ་ལྟ་བུ་དེ་བྱུང་བར་ཡང་རིག་ནས་ལྷས་བྱིན་ལ་འདི་སྐད་ཅེས་སྨྲས་སོ། །ལྷས་བྱིན་ཁྱོད་ཀྱིས་གཟུགས་ཚུལ་བཞིན་ཡིད་ལ་གྱིས་ཤིག་དང ། ཁྱོད་ལ་རྫུ་འཕྲུལ་དང ། གཞན་ཡང་འབྱུང་བར་འགྱུར་རོ། །ལྷས་བྱིན་ཁྱོད་ཀྱིས་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཚུལ་བཞིན་ཡིད་ལ་གྱིས་ཤིག་དང ། ཁྱོད་ལ་རྫུ་འཕྲུལ་དང ། གཞན་ཡང་འབྱུང་བར་འགྱུར་རོ། །དེ་ནས་ལྷས་བྱིན་འདི་སྙམ་དུ་སེམས་ཏེ། གནས་བརྟན་ཀུན་ཤེས་ཀཽཎྜི་ནྱ་ཡང་བདག་ལ་རྫུ་འཕྲུལ་གྱི་ལམ་སྟོན་པར་མི་བྱེད་དོ་སྙམ་དུ་རིག་ནས། ཚེ་དང་ལྡན་པ་རྟ་ཐུལ་དང ། བཟང་པོ་དང ། རླངས་པ་དང ། མིང་ཆེན་དང ། གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟངས་ལ་སོགས་པ་གནས་བརྟན་ལྔ་བརྒྱ་པོ་དག་ག་ལ་བ་དེར་སོང་སྟེ་ཕྱིན་ནས། གནས་བརྟན་ལྔ་བརྒྱ་པོ་དག་ལ་འདི་སྐད་ཅེས་སྨྲས་སོ། །གནས་བརྟན་དག་གིས་བདག་ལ་རྫུ་འཕྲུལ་གྱིས་ལམ་བསྟན་དུ་གསོལ། དེ་ནས་གནས་བརྟན་ལྔ
5.295a
བརྒྱ་པོ་དག་གིས་བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཐུགས་ཡིད་ལ་རྣམ་པར་བལྟས། ལྷས་བྱིན་ལ་སྡིག་པ་ཅན་གྱི་འདོད་པའི་རྣམ་པ་དེ་ལྟ་བུ་དེ་བྱུང་བར་ཡང་རིག་ནས་ལྷས་བྱིན་ལ་འདི་སྐད་ཅེས་སྨྲས་སོ། །ལྷས་བྱིན་ཁྱོད་ཀྱིས་གཟུགས་ཚུལ་བཞིན་ཡིད་ལ་གྱིས་ཤིག་དང ། ཁྱོད་ལ་རྫུ་འཕྲུལ་དང ། གཞན་ཡང་འབྱུང་བར་འགྱུར་རོ། །ལྷས་བྱིན་ཁྱོད་ཀྱིས་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཚུལ་བཞིན་དུ་ཡིད་ལ་གྱིས་ཤིག་དང ། ཁྱོད་ལ་རྫུ་འཕྲུལ་དང ། གཞན་ཡང་འབྱུང་བར་འགྱུར་རོ། །དེ་ནས་ལྷས་བྱིན་འདི་སྙམ་དུ་སེམས་ཏེ། གནས་བརྟན་ལྔ་བརྒྱ་པོ་དག་ཀྱང་བདག་ལ་རྫུ་འཕྲུལ་གྱི་ལམ་མི་སྟོན་ཏེ། འདི་ལྟར་ཚེ་དང་ལྡན་པ་འདི་དག་གིས་སྔར་བཅོམ་ལྡན་འདས་དང་ལྷན་ཅིག་ཡང་དག་པར་འགྲོས་པར་གྱུར་པས་དེས་ན་འགའ་ཡང་བདག་ལ་རྫུ་འཕྲུལ་གྱི་ལམ་སྟོན་པར་མི་བྱེད་ན་བདག་ལ་རྫུ་འཕྲུལ་གྱི་ལམ་སྟོན་པར་ནུས་པ་གཞན་སུ་ཡོད་སྙམ་མོ། །དེའི་ཚེ་ན་ཚེ་དང་ལྡན་པ་འོད་སྲུང་སྟོབས་བཅུ་པ་རྒྱལ་པོའི་ཁབ་ན་སྡེ་ཅན་མའི་ཕུག་ན་འདུག་གོ། །དེ་ནས་ལྷས་བྱིན་འདི་སྙམ་དུ་སེམས་ཏེ། གནས་བརྟན་འོད་སྲུང་སྟོབས་བཅུ་པ་འདི་ནི་ཡུན་རིང་པོ་ནས་གཡོ་མེད་པ། སྒྱུ་མེད་པ། དྲང་པོ་དྲང་པོའི་རང་བཞིན་ཅན་བདག་གི་ཕུ་ནུ་བོ་རྒན་པ་ཀུན་དགའ་བོའི་མཁན་པོ་ཡིན་པས་གནས་བརྟན་འོད་སྲུང་སྟོབས་བཅུ་པས་བདག་ལ་རྫུ་འཕྲུལ་གྱི་ལམ་སྟོན་པར་ནུས་སོ་སྙམ་དུ་རིག་ནས། ཚེ་དང་ལྡན་པ་འོད་སྲུང་སྟོབས་བཅུ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་འོད་སྲུང་སྟོབས་བཅུ་པའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། ཚེ་དང་ལྡན་པ་འོད་སྲུང་སྟོབས་བཅུ་པ་ལ་ལྷས་བྱིན་གྱིས
5.295b
འདི་སྐད་ཅེས་སྨྲས་སོ། །གནས་བརྟན་གྱིས་བདག་ལ་རྫུ་འཕྲུལ་གྱི་ལམ་བསྟན་དུ་གསོལ། དེ་ནས་ཚེ་དང་ལྡན་པ་འོད་སྲུང་སྟོབས་བཅུ་པས། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཐུགས་ཡིད་དང ། ལྷས་བྱིན་ལ་སྡིག་པ་ཅན་གྱི་འདོད་པའི་རྣམ་པ་དེ་ལྟ་བུ་དེ་བྱུང་བ་ལ། རྣམ་པར་མ་ལྟས་པར་ལྷས་བྱིན་ལ་རྫུ་འཕྲུལ་གྱི་ལམ་བསྟན་ཏོ། །དེ་ནས་ལྷས་བྱིན་གྱིས་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པས། སྤྱོད་ཅིང་བསམ་གཏན་དང་པོ་ལ་བརྟེན་ནས་འཇིག་རྟེན་པའི་ལམ་གྱི་རྫུ་འཕྲུལ་མངོན་པར་བསྒྲུབས་ནས་དེ་གཅིག་ཏུ་གྱུར་ནས་མང་པོར་འགྱུར་རོ། །མང་པོར་གྱུར་ནས་གཅིག་ཏུ་འགྱུར་རོ། །ཤེས་པ་དང ། མཐོང་བས་སྣང་བ་དང ། མི་སྣང་བ་ཡང་ཉམས་སུ་མྱོང་བར་བྱེད་དོ། །ངོས་ཀྱི་རྩིག་པ་དང ། ངོས་ཀྱི་ར་བ་དང ། རི་ལ་ཡང་ལུས་ཀྱིས་མི་ཐོགས་པར་འགྲོ་སྟེ། དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང ། བྱེའུ་ཟུལ་བྱེད་དོ། །དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ནུབ་པར་རྒྱུན་ཕྱོགས་སུ་འགྲོ་སྟེ། དཔེར་ན་ས་ཆེན་པོ་ལ་བྱ་བ་བཞིན་ནོ། །ནམ་མཁའ་ལ་ཡང་དཀྱིལ་མོ་དཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །དུ་བ་འཐུལ་བར་ཡང་བྱེད། འབར་བར་ཡང་བྱེད་དེ། དཔེར་ན་མེའི་ཕུང་པོ་ཆེན་པོ་བཞིན་ནོ། །ལུས་ལས་ཆུའི་རྒྱུན་ཆེན་པོ་འབྱིན་ཏེ། དཔེར་ན་སྤྲིན་ཆེན་པོ་བཞིན་ནོ། །ཉི་མ་དང ། ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་གཟི་བརྗིད་ཆེ་བ་ལ་ཡང་ལག་པས་ནོམ་ཞིང་ཉུག་པར་བྱེད་དོ། །དེ་ནས་ལྷས་བྱིན་འདི་སྙམ་དུ་སེམས་ཏེ། བདག་ལ་གང་གི་མིང་གིས་འཛམ་བུའི་གླིང་ཞེས་བྱ་བར་ཤེས་པའི་ཤིང་འཛམ་བུ་དེ་ལས་འཛམ་བུའི་འབྲས་བུ་ལྷགས་པ
5.296a
ཁ་དོག་དང ། དྲི་དང ། རོ་དང་ལྡན་པ་རྣམས་དང ། དེའི་ཉེན་ཀོར་ན་སྐྱུ་རུ་རའི་ཚལ་དང ། བིལ་བའི་ཚལ་དང ། ཀ་པིད་ཐའི་ཚལ་དེ་ལས་དེ་དག་གི་འབྲས་བུ་ལྷགས་པ་ཁ་དོག་དང ། དྲི་དང ། རོ་དང་ལྡན་པ་རྣམས་ཀྱིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱད་པར་བྱ། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱ་བ་དང ། ཤར་གྱི་ལུས་འཕགས་དང ། ནུབ་ཀྱི་བ་ལང་སྤྱོད་དུ་ཡང་སོང ། བྱང་གི་སྒྲ་མི་སྙན་དུ་ཡང་སོང་སྟེ། མ་རྨོས་མ་བཏབ་པའི་འབྲས་ས་ལུའི་འབྲུ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱད་པར་བྱ། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱ་བ་དང ། རྒྱལ་ཆེན་བཞིའི་རིས་ཀྱིས་ལྷ་རྣམས་ཀྱི་ནང་དུ་ཡང་སོང ། སུམ་བཅུ་རྩ་གསུམ་པའི་རིས་ཀྱི་ལྷ་རྣམས་ཀྱི་ནང་དུ་ཡང་སོང་སྟེ། ལྷའི་བདུད་རྩི་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱད་པར་བྱ། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱ་བ་དང ། ཡུལ་གང་དག་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང ། མི་མང་པོས་གང་བ་དེ་དག་ནས་བཅའ་བ་དང ། བཟའ་བ་གཙང་བ་བསོད་པ་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ལྷག་མ་ཡོད་ན་དགེ་སློང་དག་ལ་ཡང་བགོ་བཤའ་བྱ་བས་ཅི་ཞིག་བྱས། བདག་གིས་མ་ག་དྷའི་ཞིང་འདི་ན་མི་གཙོ་བོ་གང་ཡིན་པ་རྗེས་སུ་འཇུག་པར་བྱ་ན། མ་ག་དྷའི་ཞིང་འདི་ན་གང་རྗེས་སུ་འཇུག་པར་བྱས་ནས་ཚེགས་ཆུང་ངུས་སྐྱེ་བོ་ཕལ་པོ་ཆེའི་ཚོགས་ཀྱང་རྗེས་སུ་འཇུག་པར་འགྱུར་བའི་མིའི་གཙོ་བོ་རྗེས་སུ་འཇུག་པར་བྱ་བ་གང་ཡོད་སྙམ་མོ། །དེ་ནས་ལྷས་བྱིན་འདི་སྙམ་དུ་སེམས་ཏེ། གཞོན་ནུ་མ་སྐྱེས་དགྲ་འདི་ནི། ཕ་འདས་ནས། ཕའི་རྒྱལ་སྲིད་ཀྱི་དབང་ཕྱུག་གི་བདག་པོ་ལ་གནས་པར་གྱུར་པ་ཡིན་གྱིས། བདག་གིས་གཞོན་ནུ་མ་སྐྱེས་དགྲ་རྗེས་སུ་འཇུག་པར་བྱ་སྟེ། དེ་རྗེས་སུ་ཞུགས་པ་ན།
5.296b
ཚེགས་ཆུང་ངུས་སྐྱེ་བོ་ཕལ་པོ་ཆེའི་ཚོགས་ཀྱང་རྗེས་སུ་འཇུག་པར་འགྱུར་རོ་སྙམ་མོ། །དེ་ནས་ལྷས་བྱིན་གྱིས་གླང་པོ་ཆེ་མཐུ་དང་ལྡན་པའི་བུ་རིགས་བཙུན་པར་བསྒྱུར་ནས་གཞོན་ནུ་མ་སྐྱེས་དགྲའི་ཁྱིམ་དུ་སྒོ་ནས་ཞུགས་ཏེ། སྒེའུ་ཅུང་ནས་ཕྱིར་བྱུང་ཞིང་སྒེའུ་ཅུང་ནས་ཞུགས་ཏེ། སྒོ་ནས་ཕྱིར་བྱུང་ངོ ། །རྟ་མཐུ་དང་ལྡན་པའི་བུ་རིགས་བཙུན་པར་བསྒྱུར་ནས་སྒོ་ནས། ཞུགས་ཏེ་སྒེའུ་ཅུང་ནས་ཕྱིར་བྱུང་ཞིང ། སྒེའུ་ཆུང་ནས་ཞུགས་ཏེ། སྒོ་ནས་ཕྱིར་བྱུང་ངོ ། །དེ་ནས་དགེ་སློང་མགོ་བྲེགས་པ་སྣམ་སྦྱར་གྱོན་པར་བསྒྱུར་ནས་གཞོན་ནུ་མ་སྐྱེས་དགྲའི་ཁྱིམ་དུ་སྒོ་ནས་ཞུགས་ཏེ། སྒེའུ་ཅུང་ནས་ཕྱིར་བྱུང་ཞིང ། སྒེའུ་ཅུང་ནས་ཞུགས་ཏེ། སྒོ་ནས་ཕྱིར་བྱུང་བ་དང ། གཞོན་ནུ་མ་སྐྱེས་དགྲས་ཀྱང་ཀྱེ་མ་འདི་ནི་འཕགས་པ་ལྷས་བྱིན་ཡིན་ནོ་སྙམ་དུ་ཤེས་སོ། །དེ་ནས་ལྷས་བྱིན་གྱིས་སྐྱེས་ཕྲན་གཞོན་ནུ་གསེར་གྱི་འོག་པག་ཅན་དུ་བསྒྱུར་ནས་གཞོན་ནུ་མ་སྐྱེས་དགྲའི་པང་པ་ན་འགྲེ་བར་བྱེད། ལྡོག་པར་བྱེད་ཅིང ། གཞོན་ནུ་མ་སྐྱེས་དགྲ་ཡང་དེ་ལ་འཁྱུད་པར་བྱེད། ཁ་སྦྱོར་བར་བྱེད། ཀུན་ཏུ་འཁྱུད་པར་བྱེད་ཅིང ། དེའི་ཁར་མཆིལ་མ་ཡང་ལྡུགས་པར་བྱེད་པ་ན་ཡང་འདི་ལྟ་སྟེ། ལྷས་བྱིན་རྙེད་པ་དང ། བཀུར་སྟིས་ཟིལ་གྱིས་གནོན་ཅིང་སེམས་ཡོངས་སུ་གཏུགས་པས་དེ་ཡང་མྱིད་པར་བྱེད་དོ། །གཞོན་ནུ་མ་སྐྱེས་དགྲས་ཀྱང་ཀྱེ་མ། འདི་ནི་འཕགས་པ་ལྷས་བྱིན་ཡིན་ནོ། །སྙམ་དུ་ཡང་ཤེས་སོ། །དེ་ནས་གཞོན་ནུ་མ་སྐྱེས་དགྲས། ཀྱེ་མ་འཕགས་པ་ལྷས་བྱིན་ནི་སྟོན་པ་བས་ཀྱང་ཆེས་རྫུ་འཕྲུལ་ཆེ་བ་ཡིན་ནོ་སྙམ་པའི་སྡིག་པ་ཅན་གྱི་ལྟ་བ་རྒྱ་ཆེན་པོ་ཐོབ་པར་གྱུར་ཅིང་དེ་ལ་དད་པའི་ཆེད་དུ་བྱ་བ་བྱེད་པར་གྱུར་ཏེ་ནང་པར་དང ། དགོངས་ཀར་ཤིང་རྟ་ལྔ་བརྒྱ་ཙམ་དང ། ལྷན་ཅིག་འབྱུང་ཞིང ། དེ་ལ་བསྙེན་བཀུར་བྱེད་དོ། །དེ་ལ་སྣོད་དུ་བཙོས་པ་ལྔ་བརྒྱ་ཙམ་གྱི་ཟས་ཀྱི་ཚོམ་བུ་ཚོམ་བུ་དག་འབུལ་བར
5.297a
བྱེད་དོ། །ལྷས་བྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་ཟས་ཀྱི་གྲལ་དུ་བཀད་པར་བྱེད་དོ། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས་ལྷུང་བཟེད་དང ། ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་ན་དགེ་སློང་རབ་ཏུ་མང་པོ་དག་རྒྱལ་པོའི་ཁབ་ན་བསོད་སྙོམས་རྒྱུ་བས་ལྷས་བྱིན་ལ་རྙེད་པ་དང ། བཀུར་སྟི་རྣམ་པ་འདི་ལྟ་བུ་འདི་འབྱུང་སྟེ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ནང་པར་དང ། དགོངས་ཀར་ཤིང་རྟ་ལྔ་བརྒྱ་ཙམ་དང ། ལྷན་ཅིག་འབྱུང་ཞིང ། དེ་ལ་བསྙེན་བཀུར་བྱེད་དོ། །དེ་ལ་སྣོད་དུ་བཙོས་པ་ལྔ་བརྒྱ་ཙམ་གྱི་ཟས་ཀྱི་ཚོམ་བུ་ཚོམ་བུ་དག་ཀྱང་འབུལ་བར་བྱེད་དོ། །ལྷས་བྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་ཟས་ཀྱི་གྲལ་དུ་བཀད་པར་བྱེད་དོ་ཞེས་ཐོས་སོ། །ཐོས་ནས་ཀྱང་རྒྱལ་པོའི་ཁབ་ཏུ་བསོད་སྙོམས་བརྒྱུས་ནས། ཟས་ཀྱི་བྱ་བ་བྱེད་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས། ལྷུང་བཟེད་དང་ཆོས་གོས་མཁོས་སུ་ཕབ་སྟེ། རྐང་པ་གཉིས་བཀྲུས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཅག་དགེ་སློང་རབ་ཏུ་མང་པོ་དག་།སྔ་དྲོ་ཤམ་ཐབས་འཚལ། ལྷུང་བཟེད་དང ། ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་ན། བདག་ཅག་དགེ་སློང་རབ་ཏུ་མང་པོ་དག་རྒྱལ་པོའི་ཁབ་ན་བསོད་སྙོམས་རྒྱུ་བས། ལྷས་བྱིན་ལ་རྙེད་པ་དང ། བཀུར་སྟི་རྣམ་པ་འདི་ལྟ་བུ་འདི་བྱུང་སྟེ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ། ནང་པར་དང ། དགོངས་ཀར་ཤིང་རྟ་ལྔ་བརྒྱ་ཙམ་དང ། ལྷན་ཅིག་འབྱུང་ཞིང ། དེ་ལ་བསྙེན་བཀུར་བགྱིད་དོ། །དེ་ལ་སྣོད་དུ་བསྒྲལ་བ་ལྔ་བརྒྱ་ཙམ་གྱི་ཟས་ཀྱི
5.297b
ཚོམ་བུ་ཚོམ་བུ་དག་ཀྱང་འབུལ་བར་བགྱིད་དོ། །ལྷས་བྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་ཟས་ཀྱི་གྲལ་དུ་བཀད་པར་བགྱིད་དོ་ཞེས་ཐོས་སོ། །དགེ་སློང་དག་ཁྱེད་ཅག་ལྷས་བྱིན་གྱི་རྙེད་པ་དང་བཀུར་སྟི་ལ་དགའ་བར་མ་བྱེད་ཅིག་།དེ་ཅིའི་ཕྱིར་ཞེ་ན། དགེ་སློང་དག་ལྷས་བྱིན་གྱི་རྙེད་པ་དང་བཀུར་སྟི་ནི་གསོད་པར་འགྱུར་བ་དང ། ལྷས་བྱིན་གྱི་རྙེད་པ་དང ། བཀུར་སྟི་ནི་ཟིལ་གྱིས་གནོན་པར་འགྱུར་བ་ཡིན་པའི་ཕྱིར་རོ། །དགེ་སློང་དག་འདི་ལྟ་སྟེ། དཔེར་ན་ཆུ་ཤིང་འབྲས་བུ་རྒྱས་པ་ནི་གསོད་པར་འགྱུར་བ་དང ། ཆུ་ཤིང་འབྲས་བུ་རྒྱས་པ་ནི་ཟིལ་གྱིས་གནོན་པར་འགྱུར་བ་དེ་བཞིན་དུ་ལྷས་བྱིན་གྱི་རྙེད་པ་དང་བཀུར་སྟི་ཡང་གསོད་པར་འགྱུར་བ་དང ། ལྷས་བྱིན་གྱི་རྙེད་པ་དང་བཀུར་སྟི་ཡང་ཟིལ་གྱིས་གནོན་པར་འགྱུར་བ་ཡིན་ནོ། །འདི་ལྟ་སྟེ། དཔེར་ན་འོད་མ་དང ། འདམ་བུ་འབྲས་བུ་རྒྱས་པ་ནི་གསོད་པར་འགྱུར་བ་དང ། འོད་མ་དང ། འདམ་བུའི་འབྲས་བུ་རྒྱས་པ་ནི། ཟིལ་གྱིས་གནོན་པར་འགྱུར་བ་དེ་བཞིན་དུ། ལྷས་བྱིན་གྱི་རྙེད་པ་དང ། བཀུར་སྟི་ཡང་གསོད་པར་འགྱུར་བ་དང ། ལྷས་བྱིན་གྱི་རྙེད་པ་དང ། བཀུར་སྟི་ཡང་ཟིལ་གྱིས་གནོན་པར་འགྱུར་བ་ཡིན་ནོ། །འདི་ལྟ་སྟེ། དཔེར་ན་དྲེའུ་མོས་མངལ་ན་གནས་པ་འཛིན་པ་ནི་གསོད་པར་འགྱུར་བ་དང ། དྲེའུ་མོས་མངལ་ན་གནས་པ་འཛིན་པ་ནི་ཟིལ་གྱིས་གནོན་པར་འགྱུར་བ་དེ་བཞིན་དུ་ལྷས་བྱིན་གྱི་རྙེད་པ་དང་བཀུར་སྟི་ཡང་གསོད་པར་འགྱུར་བ་དང ། ལྷས་བྱིན་གྱི་རྙེད་པ་དང ། བཀུར་སྟི་ཡང་ཟིལ་གྱིས་གནོན་པར་འགྱུར་བ་ཡིན་ནོ། །དགེ་སློང་དག་ལྷས་བྱིན་ལ་ཇི་ཙམ་དུ་རྙེད་པ་དང ། བཀུར་སྟི་རྣམ་པ་དེ་ལྟ་བུ་དེ་འབྱུང་བར་འགྱུར་བ་ནི་མི་གཏི་མུག་ཅན་དེ་ལ་ཡུན་རིང་པོར་དོན་མེད་པ་དང ། གནོད་པ་དང ། སྡུག་བསྔལ་དུ་འགྱུར་རོ། །དགེ་སློང་དག་དེ་ལྟ་བས་ན། ཁྱོད་ཀྱིས་འདི་ལྟར་བསླབ་པར་བྱ་སྟེ།
5.298a
རྙེད་པ་དང ། བཀུར་སྟི་ཟིལ་གྱིས་གནོན་པར་བྱ་ཞིང་རྙེད་པ་དང ། བཀུར་སྟི་བྱུང་བས། སེམས་ཡོངས་སུ་གཏུག་ཤིང ། གནས་པར་མི་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ཆུ་ཤིང་འབྲས་བུས་གསོད་པར་བྱེད། །འོད་མའི་འདམ་བུ་འབྲས་བུས་གསོད། །དྲེའུ་མོ་རང་གི་མངལ་གྱིས་ལྟར། །མི་ངན་བཀུར་སྟིས་གསོད་པར་བྱེད། །བྱིས་པ་ཇི་ཙམ་གྲགས་གྱུར་པ། །དོན་མེད་ཉིད་དུ་འགྱུར་བ་ཡིན། །བྱིས་པའི་དཀར་ཆ་གསོད་བྱེད་ཅིང ། །རྩེ་མོ་ལས་ཀྱང་ལྟུང་བར་འགྱུར། །དེ་ནས་ལྷས་བྱིན་རྙེད་པ་དང ། བཀུར་སྟིས་ཟིལ་གྱིས་ནོན་ཅིང་སེམས་ཡོངས་སུ་གཏུགས་པ་ལ་སྡིག་པ་ཅན་གྱི་འདོད་པའི་རྣམ་པ་འདི་ལྟ་བུ་འདི་བྱུང་སྟེ། ད་ལྟར་བཅོམ་ལྡན་འདས་ནི་རྒན་པོ་རྒས་པ་དགོག་ཏུ་གྱུར་པས་འཁོར་བཞི་པོ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་འདོམས་པས་ངལ་བར་འགྱུར་བས། ཀྱེ་མ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་བཏང་བར་གྱུར་ན་བདག་གིས་ཀྱང་དགེ་སློང་གི་དགེ་འདུན་ཡོངས་སུ་དྲང་བར་བྱ་ཞིང ། བཅོམ་ལྡན་འདས་ཀྱང་ཚེ་འདི་ལ་བདེ་བར་གནས་པ་ལ་སྦྱོར་བའི་རྗེས་སུ་བརྩོན་པས། ཐུགས་ལས་ཆུང་ངུར་གནས་པར་འགྱུར་རོ་སྙམ་མོ། །སེམས་བསྐྱེད་མ་ཐག་ཏུ་དེའི་རྫུ་འཕྲུལ་ཡོངས་སུ་ཉམས་པར་གྱུར་ཅིང་ཡོངས་སུ་ཉམས་ཀྱང་བདག་ཡོངས་སུ་ཉམས་སོ་སྙམ་དུ་མི་ཤེས་པར་གྱུར་ཏོ། །དེའི་ཚེ་ན་བཅོམ་ལྡན་འདས་ཀྱི་ཉན་ཐོས་ཀོའུ་ཏྱའི་བུ་དགེ་སློང་ནོག་ཅན་གྱིས་བཅོམ་ལྡན་འདས་ཀྱི་དྲུང་དུ་ཚངས་པར་སྤྱོད་པ་སྤྱད་པ་དེ་ཚངས
5.298b
པའི་གནས་བཞི་པོ་དག་བསྒོམས་ནས། འདོད་པ་དག་ལ་འདོད་པ་ལ་འདུན་པ་སྤངས་ཏེ་དེས་མང་དུ་གནས་པས་ཚངས་པའི་འཇིག་རྟེན་དང་རིས་མཐུན་པར་སྐྱེས་སོ། །དེའི་ཚེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་ངན་སྤོང་གི་བུ་དག་ན་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་ན་འདུག་གོ། །དེ་ནས་ཚངས་པ་ནོག་ཅན་གྱིས་ལྷས་བྱིན་རྫུ་འཕྲུལ་དེ་ལས་ཡོངས་སུ་ཉམས་པར་རིག་ནས་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པས་ལག་ངར་བསྐུམས་པ་ལས་བརྐྱང་བ་འམ། བརྐྱང་བ་ལས་བསྐུམ་པར་བྱེད་པ་དེ་བཞིན་དུ་ཚངས་པ་ནོག་ཅན་ཚངས་པའི་འཇིག་རྟེན་ནས་མི་སྣང་བར་གྱུར་ནས་ངན་སྤོང་གི་བུ་དག་ཏུ་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་སུ་ཚེ་དང་ལྡན་པ་མཽད་གལ་གྱི་བུ་ཆེན་པོའི་མདུན་དུ་འདུག་གོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ཚངས་པ་ནོག་ཅན་གྱིས་འདི་སྐད་ཅེས་སྨྲས་སོ། །འཕགས་པ་མཽད་གལ་གྱི་བུ་མཁྱེན་པར་མཛོད་ཅིག་།ལྷས་བྱིན་གྱི་རྙེད་པ་དང ། བཀུར་སྟིས་ཟིལ་གྱིས་ནོན་ཅིང་སེམས་ཡོངས་སུ་གཏུགས་པ་ལ་སྡིག་པ་ཅན་གྱི་འདོད་པའི་རྣམ་པ་འདི་ལྟ་བུ་འདི་བྱུང་སྟེ། ད་ལྟར་བཅོམ་ལྡན་འདས་ནི་རྒན་པོ་རྒས་པ་དགོག་ཏུ་གྱུར་པས་འཁོར་བཞི་པོ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་འདོམས་པས་ངལ་བར་འགྱུར་བས། ཀྱེ་མ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་བཏང་བར་གྱུར་ན། བདག་གིས་ཀྱང་དགེ་སློང་གི་དགེ་འདུན་དྲང་བར་བྱ་ཞིང་བཅོམ་ལྡན་འདས་ཀྱང་ཚེ་འདི་ལ་བདེ་བར་གནས་པ་ལ་སྦྱོར་བའི་རྗེས་སུ་བརྩོན་པས། ཐུགས་ལས་ཆུང་ངུར་གནས་པར་འགྱུར་རོ་སྙམ་ནས་སེམས་བསྐྱེད་མ་ཐག་ཏུ་དེའི་རྫུ་འཕྲུལ་ཡོངས་སུ་ཉམས་པར་གྱུར་ཅིང ། ཡོངས་སུ་ཉམས་ཀྱང ། བདག་ཡོངས་སུ་ཉམས་སོ་སྙམ་དུ་མི་ཤེས་པར་གྱུར་གྱིས་བཙུན་པ་མཽད་གལ་གྱི་བུ
5.299a
ཆེན་པོ་བཅོམ་ལྡན་འདས་ག་ལ་བ་དེར་བཞུད་དེ་བྱོན་ནས་དོན་དེ་བཅོམ་ལྡན་འདས་ལ་རྒྱས་པར་གསོལ་ན་ལེགས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པ་ནོག་ཅན་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཚེ་དང་ལྡན་པ་ནོག་ཅན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ། དེ་ཉིད་དུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པ་ནོག་ཅན་སོང་ནས་རིང་པོ་མ་ལོན་པར་རིག་ནས། ཇི་ལྟར་སེམས་མཉམ་པར་བཞག་ན། འདི་ལྟ་སྟེ་དཔེར་ན། སྐྱེས་བུ་སྟོབས་དང་ལྡན་པས་ལག་ངར་བསྐུམས་པ་ལས་བརྐྱང་བ་འམ། བརྐྱང་བ་ལས་བསྐུམ་པར་བྱེད་པ་དེ་བཞིན་དུ་ཚེ་དང་ལྡན་པ་མཽད་གལ་གྱི་བུ་ཆེན་པོ་ངན་སྤོང་གི་བུ་དག་ནས་མི་སྣང་བར་གྱུར་ཅིང ། རྒྱལ་པོའི་ཁབ་ཏུ་འོད་མའི་ཚལ་བྱ་ཀ་ལན་ད་ཀའི་གནས་སུ་གནས་པར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་ལ་ཚངས་པ་ནོག་ཅན་དང་ལྷན་ཅིག་བར་དུ་གཏམ་བརྗོད་པ་ཅི་བྱུང་བར་གྱུར་པ་དེ་དག་ཐམས་ཅད་བཅོམ་ལྡན་འདས་ལ་རྒྱས་པར་གསོལ་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ཁྱོད་ཀྱིས་ཆེས་སྔར་ལྷས་བྱིན་གྱིས
5.299b
སེམས་ལ་སེམས་ཀྱིས་ཁྱབ་པར་བྱས་ཏེ་རིག་ནས་དེའི་འོག་ཏུ་ཚངས་པ་ནོག་ཅན་གྱིས་མ་བརྗོད་དམ། བཙུན་པ་དེ་ལགས་ཏེ། བདག་གིས་ཆེས་སྔར་ལྷས་བྱིན་གྱིས་སེམས་ལ་སེམས་ཀྱིས་ཁྱབ་པར་བགྱིས་ཏེ་རིག་ནས་དེའི་འོག་ཏུ་ཚངས་པ་ནོག་ཅན་གྱི་བརྗོད་ལགས་སོ། །བཅོམ་ལྡན་འདས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་ཐབས་གཅིག་བར་དུ་བཀའ་མཆིད་འདི་གསུང་བའི་སྐབས་སུ་ལྷས་བྱིན་གྲོགས་དགེ་སློང་བཞི་པོ་ཀོ་ཀ་ལི་ཀ་དང ། ཁཎ་ཌ་དྲབ་བྱ་དང ། ཀ་ཏི་མོ་ར་ཀ་ཏི་ཤྱ་དང ། རྒྱ་མཚོས་བྱིན་དང་ལྷན་ཅིག་བཅོམ་ལྡན་འདས་ག་ལ་བ་དེར་སོང་ངོ ། །བཅོམ་ལྡན་འདས་ཀྱིས་ལྷས་བྱིན་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ལྷས་བྱིན་དེ་འོང་ཞིང་ད་མི་གཏི་མུག་ཅན་དེ་ངའི་མདུན་དུ་བདག་ཉིད་ཀྱི་བདག་ཉིད་ལུང་སྟོན་པར་བྱེད་གྱིས་ད་ཚིག་སྲུངས་ཤིག་།དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། ཇི་ལྟར་སེམས་མཉམ་པར་བཞག་ན། འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པས། ལག་ངར་བསྐུམ་པ་ལས་བརྐྱང་བ་འམ། བརྐྱང་བ་ལས་བསྐུམ་པར་བྱེད་པ་དེ་བཞིན་དུ་ཚེ་དང་ལྡན་པ་མཽད་གལ་གྱི་བུ་ཆེན་པོ་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀའི་གནས་ནས་མི་སྣང་བར་གྱུར་ཅིང་ངན་སྤོང་གི་བུ་དག་ཏུ་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་སུ་གནས་པར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ལྷས་བྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ལ་ལྷས
5.300a
བྱིན་གྱིས་འདི་སྐད་ཅེས་གསོལ་ཏོ། །ད་ལྟར་བཅོམ་ལྡན་འདས་ནི། བགྲེས་པོ་བགྲེས་པ། དགོག་ཏུ་གྱུར་པས་འཁོར་བཞི་པོ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་འདོམས་པས་མཉེལ་བར་འགྱུར་བས་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་བཏང་ན་ལེགས་ཏེ། བདག་གིས་དགེ་སློང་གི་དགེ་འདུན་ཡོངས་སུ་དྲང་བར་བགྱི་ཞིང་བཅོམ་ལྡན་འདས་ཀྱང་ཚེ་འདི་ལ་བདེ་བར་གནས་པ་ལ་སྦྱོར་བའི་རྗེས་སུ་བརྩོན་པས་ཐུགས་ལས་ཆུང་ངུར་གནས་པར་འགྱུར་རོ། །མི་གཏི་མུག་ཅན་ཤཱ་རིའི་བུ་དང ། མཽད་གལ་གྱི་བུ་ཚངས་པ་མཚུངས་པར་སྤྱོད་པ་དེས་པ་དེས་པ་དག་ལ་ཡང་རེ་ཤིག་དགེ་སློང་གི་དགེ་འདུན་གཏོང་བར་མི་བྱེད་ན། རོ་འདྲ་བ་མཆིལ་མ་ཟ་བ་ཁྱོད་ལ་གཏོང་རེ་སྐན། དེ་ནས་ལྷས་བྱིན་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཤཱ་རིའི་བུ་དང ། མཽད་གལ་གྱི་བུ་གཉིས་ཀྱི་བསྔགས་པ་བརྗོད་ཅིང ། བདག་ལ་རོ་དང་འདྲ་བ། མཆིལ་མ་ཟ་བ་ཞེས་བརྗོད་པས་ཀུན་དུ་སྤྱད་དོ་སྙམ་ནས། དེ་ན་ལྷས་བྱིན་གྱིས་དེའི་དང་པོར་བཅོམ་ལྡན་འདས་ལ་ཀུན་ནས་མནར་སེམས་དང ། མི་བཟོད་པ་དང ། ཡིད་མི་ཆེས་པ་བྱས་པར་གྱུར་ཏོ། །དེ་ནས་ལྷས་བྱིན་གྱིས། སྡོད་ཅིག་ཅེས་བརྗོད་དེ། མགོ་ལན་གསུམ་ལྕོགས་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །། #
6.1a
(ཆ)་༄#། !་།འདུལ་བ་ལུང་བཞུགས་སོ། །[(黃)་律師戒行經第六部]
6.1b
འདུལ་བ་རྣམ་པར་འབྱེད་པ། བམ་པོ་ཉི་ཤུ་གཉིས་པ། དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ་བཅོམ་ལྡན་འདས་ལ་བསིལ་ཡབ་ཀྱིས་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་ལྷས་བྱིན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་འོད་མའི་ཚལ་ཀ་ལན་དཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་སྡུས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་བསྡུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས
6.2a
གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འདུག་གོ། །མཐའ་ཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་མཆིས་ཤིང་འཐུན་པར་གྱུར་ན་བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་དཔོང་སའི་ཁང་པ་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལྔ་པོ་འདི་དག་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་དག་ཡིན་ཏེ། ལྔ་གང་ཞེ་ན། འདི་ན་སྟོན་པ་གཅིག་ནི་ཚུལ་ཁྲིམས་ཡོངས་སུ་མ་དག་བཞིན་དུ་བདག་གི་ཚུལ་ཁྲིམས་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་ཚུལ་ཁྲིམས་ཡོངས་སུ་མ་དག་བཞིན་དུ་བདག་གི་ཚུལ་ཁྲིམས་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི། བདག་ཅག་གིས་གལ་ཏེ་སྟོན་པ་འདི་གཞན་ལ་བརྗོད་པར་གྱུར་ན། དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ། སྟོན་པ་ཤེས་ལྡན་འདི་རང་ཉིད་ཀྱིས་ཤེས་པར་ཟད་དོ། །འདི་བདག་ཅག་ལ་འདི་ལྟ་སྟེ་ཆོས་གོས་དང ། བསོད་སྙོམས་དང ། གནས་མལ་དང ། ན་བའི་རྐྱེན་དང ། སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་ཚུལ་ཁྲིམས་ཀྱི་སྒོ་ནས་རྗེས་སུ་བསྲུང་བ་བྱ་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ལས་ཚུལ་ཁྲིམས་རྗེས་སུ་སྲུང་བར་རེ་བར་བྱེད་དེ། འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་དང་པོ་ཡིན་ནོ། །
6.2b
གཞན་ཡང་འདི་ན་སྟོན་པ་གཅིག་ནི་འཚོ་བ་ཡོངས་སུ་མ་དག་བཞིན་དུ་བདག་གི་འཚོ་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་འཚོ་བ་ཡོངས་སུ་མ་དག་བཞིན་དུ་བདག་གི་འཚོ་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི། བདག་ཅག་གིས་སྟོན་པ་འདི་གལ་ཏེ་གཞན་ལ་བརྗོད་པར་གྱུར་ན་དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ། སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ། །འདི་བདག་ཅག་ལ་འདི་ལྟ་སྟེ། ཆོས་གོས་དང ། བསོད་སྙོམས་དང ། གནས་མལ་དང ། ན་བའི་རྐྱེན་དང ། སྨན་གྱི་ཡོ་བྱད་དག་གིས་སེམས་པར་བྱེད་དོ། །སྙམ་པས་ཉན་ཐོས་རྣམས་ཀྱང་དེ་ལ་འཚོ་བའི་སྒོ་ནས་རྗེས་སུ་བསྲུང་བ་བྱ་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ལས་འཚོ་བ་རྗེས་སུ་སྲུང་བ་རེ་བར་བྱེད་དེ། འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་གཉིས་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ཤེས་པ་དང་མཐོང་བ་ཡོངས་སུ་མ་དག་བཞིན་དུ་བདག་གི་ཤེས་པ་དང་མཐོང་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་ཤེས་པ་དང་མཐོང་བ་ཡོངས་སུ་མ་དག་བཞིན་དུ་བདག་གི་ཤེས་པ་དང་མཐོང་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི་བདག་ཅག་གིས་སྟོན་པ་འདི་གཞན་ལ་བརྗོད་པར་གྱུར་ན་དེས་འདི་ཡིད་མི་དགའ་བར་འགྱུར་བས། བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ། སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ། །འདི་བདག་ཅག་ལ་འདི་ལྟ་སྟེ། ཆོས་གོས་དང་བསོད་སྙོམས་དང ། གནས་མལ་དང ། ན་བའི་རྐྱེན་དང ། སྨན་གྱི་ཡོ་བྱད་དག་གིས་སེམས་པ
6.3a
བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་ཤེས་པ་དང་མཐོང་བའི་སྒོ་ནས་རྗེས་སུ་བསྲུང་བ་བྱ་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ལས་ཤེས་པ་དང་མཐོང་བ་རྗེས་སུ་སྲུང་བ་རེ་བར་བྱེད་དེ། འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་གསུམ་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་བརྡའ་སྤྲོད་པ་ཕུན་སུམ་ཚོགས་པ་མ་ཡིན་བཞིན་དུ་བདག་ནི་བརྡའ་སྤྲོད་པ་ཕུན་སུམ་ཚོགས་ཤིང་ཀུན་ནས་ཉོན་མོངས་པ་མེད་དོ། །ཞེས་དམ་འཆའ་བར་བྱེད་དེ། དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་བརྡའ་སྤྲོད་པ་ཕུན་སུམ་ཚོགས་པ་མ་ཡིན་བཞིན་དུ་བདག་ནི་བརྡའ་སྤྲོད་པ་ཕུན་སུམ་ཚོགས་ཤིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི། བདག་ཅག་གིས་སྟོན་པ་འདི་གཞན་ལ་བརྗོད་པར་གྱུར་ན་དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ། སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ། །འདི་བདག་ཅག་ལ་འདི་ལྟ་སྟེ་ཆོས་གོས་དང་བསོད་སྙོམས་དང་གནས་མལ་དང ། ན་བའི་རྐྱེན་དང་སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་བརྡའ་སྤྲོད་པ་ཕུན་སུམ་ཚོགས་པའི་སྒོ་ནས་རྗེས་སུ་བསྲུང་བ་བྱ་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ལས་བརྡའ་སྤྲོད་པ་ཕུན་སུམ་ཚོགས་པ་རྗེས་སུ་སྲུང་བ་རེ་བར་བྱེད་དེ། འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་བཞི་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ཆོས་འདུལ་བ་ཉེས་པར་བཤད་པ་དང་ལྡན་བཞིན་དུ་བདག་ནི་ཆོས་འདུལ་བ་ལེགས་པར་གསུངས་པ་དང་ལྡན་ཞིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་ཆོས་འདུལ་བ་ཉེས་པར་བཤད་པ་དང་ལྡན་བཞིན་དུ་བདག་ནི་ཆོས་འདུལ་བ་ལེགས་པར་གསུངས་པ་དང་ལྡན་ཞིང་ཀུན་ནས་ཉོན་མོངས་པ་མེད་དོ། །ཞེས་དམ
6.3b
འཆའ་བར་ཤེས་མོད་ཀྱི། བདག་ཅག་གིས་སྟོན་པ་འདི་གཞན་ལ་བརྗོད་པར་གྱུར་ན། དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ། སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ། །འདི་བདག་ཅག་ལ་འདི་ལྟ་སྟེ་ཆོས་གོས་དང་བསོད་སྙོམས་དང་གནས་མལ་དང་ན་བའི་རྐྱེན་དང་སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་ཆོས་འདུལ་བ་ལེགས་པར་གསུངས་པའི་སྒོ་ནས་རྗེས་སུ་བསྲུང་བ་བྱ་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ལས་ཆོས་འདུལ་བ་ལེགས་པར་བཤད་པ་རྗེས་སུ་སྲུང་བ་རེ་བར་བྱེད་དེ། འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་ལྔ་པ་ཡིན་ནོ། །དགེ་སློང་དག་ང་ནི་ཚུལ་ཁྲིམས་ཡོངས་སུ་དག་པ་ཁོ་ན་ཡིན་པས་ངའི་ཚུལ་ཁྲིམས་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། ང་ལ་ཉན་ཐོས་རྣམས་ཚུལ་ཁྲིམས་ཀྱི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་ང་ཡང་ཉན་ཐོས་རྣམས་ལས་ཚུལ་ཁྲིམས་རྗེས་སུ་སྲུང་བ་རེ་བར་མི་བྱེད་དོ། །དགེ་སློང་དག་ང་ནི་འཚོ་བ་ཡོངས་སུ་དག་པ་ཁོ་ན་ཡིན་པས་ངའི་འཚོ་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ་ང་ལ་ཉན་ཐོས་རྣམས་འཚོ་བའི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་ང་ཡང་ཉན་ཐོས་རྣམས་ལས་འཚོ་བ་ཡོངས་སུ་སྲུང་བ་རེ་བར་མི་བྱེད་དོ། །དགེ་སློང་དག་ང་ནི་ཤེས་པ་དང་མཐོང་བ་ཡོངས་སུ་དག་པ་ཁོ་ན་ཡིན་པས་ངའི་ཤེས་པ་དང་མཐོང་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དོ། ང་ལ་ཉན་ཐོས་རྣམས་ཤེས་པ་དང་མཐོང་བའི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་ང་ཡང་ཉན་ཐོས་རྣམས་ལས་ཤེས་པ་དང་མཐོང་བ་རྗེས་སུ་སྲུང་བ་རེ་བར་མི་བྱེད་དོ། །དགེ་སློང་དག་ང་ནི་བརྡའ་སྤྲོད་པ་ཕུན་སུམ་ཚོགས་པ་ཁོ་ན་ཡིན་པས་ངའི་བརྡའ་སྤྲོད་པ་ཕུན་སུམ་ཚོགས་ཤིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། ང་ལ་ཉན་ཐོས་རྣམས་བརྡའ་སྤྲོད་པ་ཕུན་སུམ
6.4a
ཚོགས་པའི་སྒོ་ནས་རྗེས་སུ་སྲུང་བ་བྱ་བར་མི་སེམས་ཤིང ། ང་ཡང་ཉན་ཐོས་རྣམས་ལས་བརྡའ་སྤྲོད་པ་ཕུན་སུམ་ཚོགས་པ་རྗེས་སུ་སྲུང་བ་རེ་བར་མི་བྱེད་དོ ། །དགེ་སློང་དག་ང་ནི་ཆོས་འདུལ་བ་ལེགས་པར་གསུངས་པ་དང་ལྡན་པ་ཁོ་ན་ཡིན་པས་ངའི་ཆོས་འདུལ་བ་ལེགས་པར་གསུངས་པ་ཡིན་ཞིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ། ང་ལ་ཉན་ཐོས་རྣམས་ཆོས་འདུལ་བ་ལེགས་པར་གསུངས་པའི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང ། ང་ཡང་ཉན་ཐོས་རྣམས་ལས་ཆོས་འདུལ་བ་ལེགས་པར་བཤད་པ་རྗེས་སུ་སྲུང་བ་རེ་བར་མི་བྱེད་དོ། །དགེ་སློང་དག་ང་ནི་ཁྱེད་ལ་ཚར་བཅད་ཅིང་ཚར་བཅད་ཅིང་སྨྲ་བར་བྱེད་ཟིལ་གྱིས་མནན་ཅིང་ཟིལ་གྱིས་མནན་ཅིང་སྨྲ་བར་བྱེད་དེ། ཁྱེད་ལ་དབྱིག་ཏུ་མི་འཛིན་ཅིང་རྫ་མཁན་གྱི་སྣོད་སོ་མ་བཏང་བ་དག་བཞིན་དུ་གང་སྙིང་པོ་ཡོད་པ་དེ་འཇོག་པར་བྱེད་ཀྱིས་ངའི་ཚིག་གི་ལམ་དག་ལ་བཟོད་པར་གྱིས་ཤིག་།དེ་ནས་ལྷས་བྱིན་གྱིས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཏ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་ལ་སྨྲས་པ། ཀོ་ཀ་ལི་ཀ་།ཁན་ད་དྲ་བྱ། ཀ་ཏ་མོ་ར་ཀ་ཏི་ཤྱ། རྒྱ་མཚོས་བྱིན་དག་ཁྱེད་ཅག་ཚུར་ཤེག་།དགེ་སྦྱོང་གཽ་ཏ་མ་འདུག་བཞིན་དུ་ཉན་ཐོས་ཀྱི་དགེ་འདུན་འཐུན་པ་དབྱེ་བར་བྱ་ཞིང་འཁོར་ལོ་ཡང་དབྱེ་བར་བྱ་སྟེ། དེས་ན་བདག་ཅག་ཤི་ཞིང ། དུས་ལ་བབ་པ་དག་ལ་དགེ་སྦྱོང་གཽ་ཏ་མ་དེ་ཙམ་དུ་རྫུ་འཕྲུལ་ཆེ་བ། དེ་ཙམ་དུ་མཐུ་ཆེ་བ་འདུག་བཞིན་དུ་ལྷས་བྱིན་དང ། ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཏ་མོ་ར་ཀ་ཏི་ཤྱ་དང ། རྒྱ་མཚོས་བྱིན་གྱིས་ཉན་ཐོས་ཀྱི་དགེ་འདུན་འཐུན་པ་ཕྱེ་ཞིང་འཁོར་ལོ་ཡང་དབྱེ་བ་བྱས་སོ་ཞེས་ཕྱོགས་དང་ཕྱོགས་མཚམས་རྣམས་སུ་སྙན་པའི་སྒྲའི་ཚོགས་རྒྱ་ཆེན་པོ་དགེ་བ་མངོན་པར་གྲགས་པར་འགྱུར་རོ། །ལྷས་བྱིན་བདག་ཅག་གིས་དེ་ལྟར་བྱར་མི་ནུས་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱི་ཉན་ཐོས་མཐུ་ཆེ་བ། རྫུ་འཕྲུལ་ཆེ་བ། ལྷའི་མིག་དང་ལྡན་པ། གཞན་གྱི་སེམས་ཤེས་པ་གང་དག་ཡོད་པ་དེ་དག་ནི་ཐག་རིང་པོ་ཡང་མཐོང་ལ་དྲུང་ན་འདུག་པས་ཀྱང་མི་མཐོང་ཞིང་དེ་དག་གི་སེམས
6.4b
ཀྱིས་བདག་ཅག་གི་སེམས་ལ་ཁྱབ་པར་བྱ་སྟེ། ཡིད་ཀྱིས་ཀྱང་བདག་ཅག་རྣམ་པར་ཤེས་པར་བྱེད་པས་དེ་དག་གིས་བདག་ཅག་འཕགས་པ་ཉིད་ཀྱང་ཤེས་པར་འགྱུར་བའི་ཕྱིར་རོ། །ཀོ་ཀ་ལི་ཀ་ཐབས་འགའ་ཞིག་ཡོད་དོ། །ལྷས་བྱིན་ཐབས་དེ་གང་ཡིན། ཚུར་ཤེག་དང་བདག་ཅག་དགེ་སློང་གནས་བརྟན་གནས་བརྟན་རྣམས་ཀྱི་དྲུང་དུ་དོང་སྟེ། གནས་བརྟན་དག་ཐུགས་ལས་ཆུང་ངུར་མཛོད་ཅིག་དང་བདག་ཅག་གིས་གནས་བརྟན་རྣམས་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ་ཞེས་ཡོ་བྱད་ཐམས་ཅད་ཀྱིས་བསྟབས་པར་བྱའོ། །གཞོན་ནུ་རྣམས་ལ་ནི་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་དང་ལུང་དབོག་པ་དང ། ཀླག་པ་དང་ཁ་ཏོན་དང ། རྣལ་འབྱོར་དང་ཡིད་ལ་བྱ་བས་བསྙེན་བཀུར་དང་སྟོངས་མོ་བྱའོ། །ལྷས་བྱིན་གལ་ཏེ་ཐབས་དེ་ལྟ་བུ་ཡོད་ན་དེ་ལྟར་བྱའོ། །དེ་ནས་ལྷས་བྱིན་གྱིས་དགེ་འདུན་འཐུན་པ་དབྱེ་བའི་ཕྱིར་བརྟུལ་བ་དང ། དགེ་སློང་གནས་བརྟན་གནས་བརྟན་རྣམས་ཀྱིས་འཕགས་མ་ཐག་ཏུ་ལྷས་བྱིན་གྱིས་དགེ་འདུན་འཐུན་པ་དབྱེ་བའི་ཕྱིར་བརྟུལ་ཏོ། །ཞེས་རྣམ་པར་ཤེས་པར་གྱུར་ནས། དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལྷས་བྱིན་དང་གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ། །འདི་སྐད་ཅེས་བསྒོ་བར་བྱ་སྟེ། ཚེ་དང་ལྡན་པ་ལྷས་བྱིན་ཁྱོད་དགེ་འདུན་འཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག་།དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག་།ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་འདོན་པ་གཅིག་ཅིང ། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ལྷས་བྱིན་ལ
6.5a
ཚེ་དང་ལྡན་པ་ལྷས་བྱིན་ཁྱོད་དགེ་འདུན་འཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག་།དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག་།ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་འདོན་པ་གཅིག་ཅིང ། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བཞམས་ཏེ་བསྒོའོ། །དགེ་སློང་རྣམས་ཀྱིས་དེ་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་ལྷས་བྱིན་དང་གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །འདི་ལྟར་བསྒོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལྷས་བྱིན་འདིས་དགེ་འདུན་འཐུན་པ་དབྱེ་བའི་སླད་དུ་བརྟུལ་ཏེ། དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ནས། འདི་ལ་དགེ་སློང་མང་པོས་བཞམས་ཏེ་བསྒོ་ན་འདི་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་ལྷས་བྱིན་ལ་ཚེ་དང་ལྡན་པ་ལྷས་བྱིན
6.5b
ཁྱོད་དགེ་འདུན་འཐུན་པ་དབྱེ་བའི་ཕྱིར་བརྟུལ་བར་མ་བྱེད་ཅིག་།དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག་།ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་།འདོན་པ་གཅིག་ཅིང ། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ་དགེ་སློང་ལྷས་བྱིན་འདིས་དགེ་འདུན་འཐུན་པ་དབྱེ་བའི་སླད་དུ་བརྟུལ་ཏེ་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ནས། འདི་ལ་དགེ་སློང་མང་པོས་བཞམས་ཏེ་བསྒོ་ན་འདི་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་ལྷས་བྱིན་ལ་ཚེ་དང་ལྡན་པ་ལྷས་བྱིན་ཁྱོད་དགེ་འདུན་འཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག་།དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག་།ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་།འདོན་པ་གཅིག་ཅིང ། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ་སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན ། ཚེ་དང་ལྡན་པ་གང་དག་ལྷས་བྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུངས་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ
6.6a
ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ལྷས་བྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ལྷས་བྱིན་ལ་གསོལ་བ་དང་བཞིའི་ལས་ཀྱིས་བསྒོའོ། །གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་དོ། །དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བའི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཏ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དེ་དག་ཀྱང་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི། མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཏ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དང ། གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ། །འདི་སྐད་བསྒོ་བར་བྱ་སྟེ། ཚེ་དང་ལྡན་པ་ཀོ་ཀ་ལི་ཀ་།ཁན་ད་དྲ་བྱ། ཀ་ཏ་མོ་ར་ཀ་ཏི་ཤྱ། རྒྱ་མཚོས་བྱིན་ཁྱེད་ཤེས་བཞིན་དུ་དགེ་སློང་གང་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ཅིང ། དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུན་པ་དེའི་གྲོགས་བྱེད་ཅིང་མི་འཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་།དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན།
6.6b
ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི། མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང་འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག་།ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་འཐུན་པ་ཉིད་དུ་འདོད་པར་གྱིས་ཤིག་ཚེ་དང་ལྡན་པ་དག་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བའི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ
6.7a
དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་།དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང ། འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང ། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག་།ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་འཐུན་པ་ཉིད་དུ་འདོད་པར་གྱིས་ཤིག་།ཚེ་དང་ལྡན་པ་དག་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོའོ། །དགེ་སློང་རྣམས་ཀྱིས་དེ་དག་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས
6.7b
བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་བསྩལ་པ། དགེ་སློང་དག་ཁྱེད་ཀྱིས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་དང ། གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །འདི་ལྟར་བསྒོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་འདི་དག་དགེ་སློང་གང་དགེ་འདུན་འཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་པ་དེའི་གྲོགས་བགྱིད་ཅིང་མི་འཐུན་པར་སྨྲ་ནས། འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ན་འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ་ཚེ་དང་ལྡན་པ་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་འཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་།དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང
6.8a
འདི་ནི་ཆོས་དང ། འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཤིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང ། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག་།ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་འཐུན་པ་ཉིད་དུ་འདོད་པར་གྱིས་ཤིག་།ཚེ་དང་ལྡན་པ་དག་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང ། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་འདི་དག་དགེ་སློང་གང་དགེ་འདུན་འཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་པ་དེའི་གྲོགས་བགྱིད་ཅིང་མི་མཐུན་པར་སྨྲ་ནས་འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ན། འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི
6.8b
བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ། ཚེ་དང་ལྡན་པ་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང ། འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག་དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི་ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ་དགེ་སློང་འདི་ནི་ཆོས་མ་ཡིན་པ་དང ། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག་།ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་འཐུན་པ་ཉིད་དུ་འདོད་པར་གྱིས་ཤིག་།ཚེ་དང་ལྡན་པ་དག་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང །
6.9a
མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོའོ། །གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལྷས་བྱིན་གྱིས་ངའི་ཉན་ཐོས་ཀྱི་དགེ་འདུན་འཐུན་པ་དབྱེ་བ་དང་འཁོར་ལོ་ཡང་འབྱེད་པར་ནུས་ཏེ། འདི་ལྟར་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་ཡོད་པའི་ཕྱིར་རོ། །ལྷས་བྱིན་གྱིས་དགེ་སྦྱོང་གཽ་ཏ་མས་དགེ་སློང་དག་ལྷས་བྱིན་གྱིས་ངའི་ཉན་ཐོས་ཀྱི་དགེ་འདུན་འཐུན་པ་དབྱེ་བ་དང་འཁོར་ལོ་ཡང་འབྱེད་པར་ནུས་ཏེ་འདི་ལྟར་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ
6.9b
ར་ཀ་ཏི་ཤྱ་དང ། རྒྱ་མཚོས་བྱིན་དག་ཡོད་པའི་ཕྱིར་རོ་ཞེས་བདག་ལ་ལུང་བསྟན་ཏོ་ཞེས་ཐོས་སོ། །ཐོས་ནས་ཀྱང་ཀོ་ཀ་ལི་ཀ་དང ། ཁན་ད་དྲབ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ་སྨྲས་པ། ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་ཤེས་པར་གྱིས་ཤིག་།དགེ་སྦྱོང་གཽ་ཏ་མས་ལྷས་བྱིན་གྱིས་ངའི་ཉན་ཐོས་ཀྱི་དགེ་འདུན་འཐུན་པ་དབྱེ་བ་དང་འཁོར་ལོ་ཡང་འབྱེད་པར་ནུས་ཏེ། འདི་ལྟར་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་ཡོད་པའི་ཕྱིར་རོ་ཞེས་ཁོ་བོ་ལ་ལུང་བསྟན་ཏོ། །དེ་དག་གིས་སྨྲས་པ། ལྷས་བྱིན་གལ་ཏེ་དེ་ལྟ་ན་ལེགས་སོ། །དེས་རྒྱ་ཆེར་དགེ་འདུན་འཐུན་པ་དབྱེ་བའི་ཕྱིར་བརྟུལ་བར་བརྩམས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། སངས་རྒྱས་བཅོམ་ལྡན་འདས་ཀྱིས་ལྷས་བྱིན་ལ་རྨས་པ། ལྷས་བྱིན་ཁྱོད་གྱིས་དགེ་འདུན་འཐུན་པ་དབྱེ་བའི་ཕྱིར་བརྟུལ་ཞིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་རྗེས་སུ་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་བའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར
6.10a
འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་ན། དགེ་སློང་དེ་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་ཁྱེད་དགེ་འདུན་འཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག་།དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག་།ཚེ་དང་ལྡན་པ་དགེ་འདུན་དང་འཐུན་པར་གྱིས་ཤིག་དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་ཁྱེད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་ལྷས་བྱིན་ནམ་གཞན་ཡང་དེ་ལྟ་བུ་གང་ཡིན་པའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །འཐུན་པ་ཞེས་བྱ་བ་ནི་རོ་གཅིག་པའོ། །དབྱེ་བའི་ཕྱིར་ཞེས་བྱ་བ་ནི་གཉིས་སུ་བྱ་བའི་ཕྱིར་རོ། །རྟུལ་བར་བྱེད་ཅིང་ཞེས་བྱ་བ་ནི་རྩོལ་བར་བྱེད་ཅིང་ངོ ། །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་ན་ཞེས་བྱ་བ་ནི་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་ཡང་དག་པར་བླངས་ནས་རབ་ཏུ་བཟུང་སྟེ་འདུག་ནའོ། །དགེ་སློང་དེ་ལ་ཞེས་བྱ་བ་ནི་ལྷས་བྱིན་ལའོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་ཤེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ། །གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བ་དེ་ཡོངས་སུ
6.10b
གཏོང་ནའོ། །དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ། །ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་སྟེ། ཡང་དག་པར་བསྒོ་བ་དེ་ནི་དེ་ཡིན། ཡང་དག་པར་བསྟན་པ་དེ་ནི་དེ་ཡིན་ནོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ་ཡིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཅུང་ཟད་ཇི་ཙམ་དུ་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གསོལ་བ་བྱས་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །རྫོགས་པར་བརྗོད་པ་ན་གལ་ཏེ་འཐུན་པ་དང་ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ། །མི་མཐུན་པ་དང་ཆོས་ཀྱི་བསྒོ་བར་བྱེད་ན་ལྟུང་བ་མེད་དོ། །འཐུན་པ་དང་ཆོས་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །མི་མཐུན་པ་དང་ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང་འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་འཐུན་པས་བསྒོ་བར་བྱེད་ན་རྫོགས་པར་བརྗོད་པ་ན་དགེ
6.11a
འདུན་ལྷག་མར་འགྱུར་རོ། །དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་བརྗོད་ན་དེ་ཕྱིན་ཆད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ། །དེ་བས་ན་དགེ་སློང་གིས་ཇི་ཙམ་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་འདུན་གྱི་དབྱེན་བྱེད་པའི་དགེ་འདུན་ལྷག་མ་སྟེ་བཅུ་པ་རྫོགས་སྷོ།། ་་་་་་་་་།། དེ་ནས་བཅོམ་ལྡན་འདས་ཀྱིས་གདན་དེ་ཉིད་ལ་བཞུགས་བཞིན་དུ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་གཉིས་པ་བཅའ་བར་བཞེད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་འདུན་གྱིས་བྱ་བ་ཅུང་ཞིག་ཡོད་ཀྱིས་རེ་ཤིག་སྟན་ལས་མ་ལྡང་ཤིག་།སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་རྣམས་ལ་རྨས་པ། ཀོ་ཀ་ལི་ཀ་།ཁན་ད་དྲ་བྱ། ཀ་ཊ་མོ་ར་ཀ་ཏི་ཤྱ། རྒྱ་མཚོས་བྱིན་ཁྱེད་ཤེས་བཞིན་དུ་དགེ་སློང་གང་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་འཐུན་པར་སྨྲ་བའི་རྗེས་སུ་ཕྱོགས་ནས་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང ། འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང
6.11b
བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་སྨྲས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སློང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་རྗེས་སུ་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་གཅིག་གམ། གཉིས་སམ། མང་པོ་དག་ཡོད་ཅིང ། གལ་ཏེ་དེ་དག་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་ཟེར་ན་དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དེ་སྐད་ཅེས་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང ། འདུལ་བ་ཡང་དག་པར་བླངས་ནས། རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས
6.12a
སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང ། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག་།ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་འཐུན་པ་ཉིད་དུ་འདོད་པར་གྱིས་ཤིག་།ཚེ་དང་ལྡན་པ་དག་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ཀུན་དུ་དགའ་མི་རྩོད། མཆོག་གཅིག་།འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། །ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །དགེ་སློང་དེའི་ཞེས་བྱ་བ་ནི་ལྷས་བྱིན་གྱིའོ། །གྲོགས་བྱེད་པའི་དགེ་སློང་ཞེས་བྱ་བ་ནི་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་གོ་།མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་ཞེས་བྱ་བ་ནི་ལྟ་བ་དེ་དག་དང ། འདོད་པ་དེ་དག་དང ། བསམ་པ་དེ་དག་དང་ལྡན་པའོ། །གཅིག་གམ། གཉིས་སམ། མང་པོ་དག་ཡོད་ཅིང་ཞེས་བྱ་བ་ནི་གཉིས་ལས་ལྷག་པ་ནི་མང་བའོ། །གལ་ཏེ་དེ་དག་ཅེས་བྱ་བ་ནི་རྗེས་སུ་ཕྱོགས་པ་དེ་དག་གོ། །དགེ་སློང་རྣམས་ལ་ཞེས་བྱ་བ་ནི་ཆོས་འདི་པ་རྣམས་ལའོ། །འདི
6.12b
སྐད་ཅེས་ཤེས་བྱ་བ་ནི་འདི་སྐད་ཅེས་ཟེར་ནའོ། །དགེ་ཡང་རུང་ཞེས་བྱ་བ་ནི་དགེ་བ་ལ་སྦྱོར་བར་ཡང་མ་བྱེད་ཅིག་པའོ། །སྡིག་ཀྱང་རུང་ཞེས་བྱ་བ་ནི་སྡིག་པ་ལས་ཟློག་པར་ཡང་མ་བྱེད་ཅིག་ཅེས་བྱ་བའོ། །དགེ་སློང་འདི་ལ་ཞེས་བྱ་བ་ནི་ལྷས་བྱིན་ལའོ། །ཅི་ཡང་མ་སྨྲ་ཤིག་ཅེས་བྱ་བ་ནི་ཅུང་ཟད་ཀྱང་མ་སྨྲ་ཤིག་པའོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་འདུལ་བ་སྨྲ་བ། དགེ་སློང་འདི་ནི་ཆོས་དང ། འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་ཞེས་བྱ་བ་ནི་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ནི་ལྟ་བ་དེ་ལྟར་རྗེས་སུ་ཐ་སྙད་འདོགས་པར་བྱེད་པའོ། །དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ་ཞེས་བྱ་བ་ནི་དོན་རྟོགས་པ་ཡིན་གྱི། དོན་མ་རྟོགས་པ་མ་ཡིན་པའི་ཕྱིར་རོ། །དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ། །ཞེས་ཟེར་ན་ཞེས་བྱ་བ་ནི་དགེ་སློང་ལྷས་བྱིན་འདི་གཞི་གང་འདོད་པ་དེ་བདག་ཅག་ཀྱང་འདོད་དོ་ཞེས་ཟེར་ནའོ། །དགེ་སློང་དེ་དག་ལ་ཞེས་བྱ་བ་ནི་ཀོ་ཀ་ལི་ཀ་དང ། ཁན་ད་དྲ་བྱ་དང ། ཀ་ཊ་མོ་ར་ཀ་ཏི་ཤྱ་དང ། རྒྱ་མཚོས་བྱིན་དག་ལ་འོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་ཤེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བའོ། །དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ། །གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བ་དེ་ཡོངས་སུ་གཏོང་ནའོ། །དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ། །ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང ། བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བ་སྟེ། ཡང་དག་པར་བསྒོ་བ་དེ་ནི་དེ་ཡིན། ཡང་དག་པར་བསྟན་པ་དེ་ནི་དེ་ཡིན་ནོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ
6.13a
ཡིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཅུང་ཟད་ཇི་ཙམ་དུ་དགེ་འདུན་འཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པ་སྨྲ་བའི་རྗེས་སུ་ཕྱོགས་པར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པར་འགྱུར་རོ། །གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གསོལ་བ་བྱས་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་བོར་འགྱུར་རོ། །ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །རྫོགས་པར་བརྗོད་པ་ན་གལ་ཏེ་འཐུན་པ་དང ། ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ། །མི་མཐུན་པ་དང་ཆོས་ཀྱིས་བསྒོ་བར་བྱེད་ན་ལྟུང་བ་མེད་དོ། །འཐུན་པ་དང ། ཆོས་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །མི་མཐུན་པ་དང ། ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་འཐུན་པས་བསྒོ་བར་བྱེད་ན་རྫོགས་པར་བརྗོད་པ་ན་དགེ་འདུན་ལྷག་མར་འགྱུར་རོ། །དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་བརྗོད་ན་དེ་ཕྱིན་ཅད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ། །དེ་བས་ན་དགེ་སློང་གིས་ཇི་ཙམ་དུ་གཞི
6.13b
དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྗེས་སུ་ཕྱོགས་པའི་དགེ་འདུན་ལྷག་མ་སྟེ་བཅུ་གཅིག་པ་རྫོགས་སོ།། ་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རེ་ལྡེ་རི་ལ་དགེ་སློང་འགྲོ་མགྱོགས་དང ། ནབ་སོ་གཉིས་དང ། དགེ་སློང་དམར་སེར་ཅན་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་དག་འཁོད་དོ། །དེ་དག་བུད་མེད་ཀྱི་ཡུལ་དང་ལྷན་ཅིག་ཐོ་འཚམ་པར་བྱེད། ཀུན་དུ་རྩེ་བར་བྱེད། ཀུན་ཏུ་ཅ་ཅོ་འདོན་པར་བྱེད། རྒོད་པ་དང ། དྲེགས་པ་དང ། ལུས་སྒྱུར་བར་བྱེད། སྟན་གཅིག་ལ་འདུག་པར་བྱེད། སྣོད་གཅིག་ཏུ་ཟ་བར་བྱེད། ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་དག་འཐུང་བར་བྱེད། མེ་ཏོག་དག་འཐོག་པར་བྱེད། འཐོག་ཏུ་འཇུད་པར་བྱེད། ཕྲེང་བ་དག་རྒྱུད་པར་བྱེད། རྒྱུད་དུ་འཇུད་པར་བྱེད། མེ་ཏོག་རྣ་རྒྱན་དག་ཐོགས་པར་བྱེད། ཐོགས་སུ་འཇུད་པར་བྱེད། བྲོ་བརྡུང་བར་བྱེད། བྲོ་རྡུང་དུ་འཇུད་པར་བྱེད། གླུ་ལེན་པར་བྱེད། གླུ་ལེན་དུ་འཇུད་པར་བྱེད། རོལ་མོའི་སྒྲ་འབྱིན་པར་བྱེད། རོལ་མོའི་སྒྲ་འབྱིན་དུ་འཇུད་པར་བྱེད། བྲོ་མཁས་པ་དང ། གླུ་མཁས་པ་དང ། རོལ་མོའི་སྒྲ་འབྱིན་པ་མཁས་པ་ལ་ངོ་སོ་ལས་བྱུང་བ་སྦྱིན་པར་བྱེད། ཆོས་གོས་དག་བརྫེས་ཏེ་རྒྱུག་པར་བྱེད། མཆོང་བར་བྱེད། རབ་ཏུ་མཆོང་བར་བྱེད། བརླ་སྐོར་བར་བྱེད། ལག་པ་སྐོར་བར་བྱེད། ཉ་ལྟར་སྐོར་བར་བྱེད། ཆུར་འཕྱོ་བ་འཕེན་པར་བྱེད། ཆུ་ལ་རྔ་མང་དུ་ཀ་ལྟར་རྡུང་བར་བྱེད། གླང་པོ་ཆེའི་སྐད་ཀྱི་སྒྲ་འབྱིན་པར་བྱེད། རྟའི་སྐད་ཀྱི་སྒྲ་འབྱིན་པར་བྱེད། ཁྱུ་མཆོག་གི་སྐད་ཀྱི་སྒྲ་འབྱིན་པར་བྱེད། རྨ་བྱའི་སྐད་ཀྱི་སྒྲ་འབྱིན་པར་བྱེད། ཁུ་བྱུག་གི་སྐད་ཀྱི་སྒྲ་འབྱིན་པར་བྱེད། ཁས་རྫ་རྔའི་སྒྲ་འབྱིན་པར་བྱིན་པར་བྱེད། ཁས་དུང་གི་སྒྲ་འབྱིན་པར་བྱེད། ཁས་རྔ་བོ་ཆེའི་སྒྲ་འབྱིན་པར་བྱེད། གླང་པོ་ཆེའི་ཐབ་མོ་ཡང་བྱེད། གླང་པོ་ཆེའི་ཐབ་མོ་བྱེད
6.14a
དུ་འཇུད་པར་ཡང་བྱེད། རྟའི་ཐབ་མོ་དང ། ཁྱུ་མཆོག་གི་ཐབ་མོ་དང ། མ་ཧེའི་ཐབ་མོ་དང ། རའི་ཐབ་མོ་དང ། ལུག་གི་ཐབ་མོ་དང ། བུད་མེད་ཀྱི་ཐབ་མོ་དང ། སྐྱེས་པའི་ཐབ་མོ་དང ། གཞོན་ནུའི་ཐབ་མོ་དང ། གཞོན་ནུ་མའི་ཐབ་མོ་དང ། བྱ་གག་གི་ཐབ་མོ་དང ། ཐི་བའི་ཐབ་མོ་དང ། ངུར་པའི་ཐབ་མོ་ཡང་བྱེད། བྱེད་དུ་འཇུད་པར་ཡང་བྱེད་དེ། དེ་དག་དང་གཞན་ཡང་དགེ་སློང་གི་ལས་མ་ཡིན་པ་དག་བྱེད་ཅིང་བྱེད་དུ་འཇུད་དེ། དེ་དག་གི་སྤྱོད་ཚུལ་དང ། སྤྱོད་པ་དང ། ལོག་པར་སྒྲུབ་པ་དེས་རེ་ལྡེའི་རི་ལ་དགེ་སློང་མ་འོངས་པ་དག་ཀྱང་མི་འོང་ལ། འོངས་པ་དག་ཀྱང་མངོན་པར་མི་དགའ་ཞིང་རེ་ལྡེའི་རིའི་གནས་སྤོང་བར་བྱེད་དོ། །རེ་ལྡེའི་རི་ལ་གནས་པའི་བྲམ་ཟེ་དང ། ཁྱིམ་བདག་དག་ཀྱང་ཡིད་མི་དགའ་ཞིང་ཞེ་བཅིལ་བར་གྱུར་ནས་དགེ་སློང་གཉུག་མར་གནས་པ་དག་ལ་ཡང་བསོད་སྙོམས་དབུལ་བ་དང ། བྱ་བར་སེམས་པ་དཀའ་ན། བློ་བུར་དུ་ལྷག་པ་རྣམས་ལ་ལྟ་སྨོས་ཀྱང་ཅི་དགོས་པར་གྱུར་ཏོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་ཀུན་དགའ་བོ་ཡུལ་ཀ་ཤི་ཀ་དག་ཏུ་ལྗོངས་རྒྱུ་ཞིང་འགྲོ་བ་ན་རེ་ལྡེ་རིར་ཕྱིན་ནས་རེ་ལྡེ་རིའི་ནགས་ན་འདུག་གོ། །དེ་ནས་ཚེ་དང་ལྡན་པ་ཀུན་དགའ་བོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རེ་ལྡེ་རི་ལ་བསོད་སྙོམས་ལ་ཞུགས་པ་དང ། དེ་ཇི་ལྟར་ལྷུང་བཟེད་བཀྲུས་པ་ཁོ་ནས་རེ་ལྡེ་རི་ལ་བསོད་སྙོམས་ལ་ཞུགས་པ་དེ་ལྟར་ལྷུང་བཟེད་བཀྲུས་པ་ཁོ་ནས་ཐ་ན་སློངས་མོ་གཅིག་སྦྱིན་པ་ཡང་མ་ཐོབ། ཕྱིར་གཏོང་བ་ཡང་མ་ཐོབ་པར་ཕྱིར་བྱུང་ངོ ། །དེ་ནས་ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ། སྔོན་ནི་རེ་ལྡེ་རི་འདི་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་པོས་ཀྱང་གང་བར་གྱུར་ལ། འདིར་སློངས་མོ་བས་ཀྱང་བསོད་སྙོམས་རྙེད་སླ་བར་གྱུར་ན། ད་ལྟར་ཡང་རེ་ལྡེ་རི་འདི་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང་མི་མང་པོས་ཀྱང་གང་བ་ནི་ཡིན་ན། འོན་ཀྱང་བདག་ཇི་ལྟར་ལྟུང་བཟེད་བཀྲུས་པ་ཁོ་ནས་རེ་ལྡེ་རི་ལ་བསོད་སྙོམས་ལ་ཞུགས་པ་དེ་ལྟར་ལྷུང་བཟེད་བཀྲུས་པ་ཁོ་ནས་ཐ་ན་སློངས་མོ་གཅིག་སྦྱིན་པ་ཡང་མ་ཐོབ། ཕྱིར་གཏོང་བ་ཡང
6.14b
མ་ཐོབ་པར་ཕྱིར་བྱུང་བ་ལས་ན་འདིར་བཅོམ་ལྡན་འདས་ཀྱི་ཉན་ཐོས་བྱིན་པ། བླུན་པ། མི་གསལ་བ། མི་མཁས་པ་འགའ་ཞིག་གིས་ཉོན་མོངས་པའི་དབང་དུ་གྱུར་པས་སྤྱོད་ཡུལ་ལམ་སྤྱོད་ཡུལ་གྱི་གྲོང་ངམ་རིགས་ཀྱི་བུད་མེད་དམ། རིགས་ཀྱི་གཞོན་ནུ་མ་དག་ལ་ཀུན་དུ་སྨྲས་པ་འམ། ནོམ་པ་འམ། ཉུག་པ་བྱས་པར་མ་གྱུར་ཏམ་སྙམ་མོ། དེའི་ཚེ་ན་རེ་ལྡེ་རི་པའི་བྲམ་ཟེ་དང ། ཁྱིམ་བདག་རྣམས་ཀྱི་དཔོང་སའི་གནས་ན་བྲམ་ཟེ་དང ། ཁྱིམ་བདག་ལྔ་བརྒྱ་ཙམ་བྱ་བ་ཞིག་གི་ཕྱིར་འདུག་སྟེ་འཐུན་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་རེ་ལྡེ་རི་པའི་བྲམ་ཟེ་དང ། ཁྱིམ་བདག་རྣམས་ཀྱི་དཔོང་སའི་གནས་ག་ལ་བ་དེར་སོང་སྟེ་ཕྱིན་ནས། རེ་ལྡེ་རི་པའི་བྲམ་ཟེ་དང ། ཁྱིམ་བདག་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་སྔོན་ནི་རེ་ལྡེ་རི་འདི་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་པོས་ཀྱང་གང་བར་གྱུར་ལ། འདིར་སློངས་མོ་བས་ཀྱང་བསོད་སྙོམས་རྙེད་སླ་བར་གྱུར་ན། ད་ལྟར་ཡང་རེ་ལྡེ་རི་འདི་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་བ་དང ། སྐྱེ་བོ་དང ། མི་མང་པོས་གང་བ་ནི་ཡིན་ན། འོན་ཀྱང་བདག་ཇི་ལྟར་ལྷུང་བཟེད་བཀྲུས་པ་ཁོ་ནས་རེ་ལྡེ་རི་ལ་བསོད་སྙོམས་ལ་ཞུགས་པ་དེ་ལྟར་ལྷུང་བཟེད་བཀྲུས་པ་ཁོ་ནས་ཐ་ན་སློངས་མོ་གཅིག་སྦྱིན་པ་ཡང་མ་ཐོབ། ཕྱིར་གཏོང་བ་ཡང་མ་ཐོབ་པར་ཕྱིར་བྱུང་བར་གྱུར་ཏོ། །དེ་སྐད་ཅེས་སྨྲས་པ་དང ། རེ་ལྡེ་རི་པའི་བྲམ་ཟེ་དང ། ཁྱིམ་བདག་དེ་དག་དབང་པོ་རྣམས་ཕྱིར་བླན་ཏེ་འཁོད་དོ། །དེའི་ཚེ་ན་དགེ་བསྙེན་ཆུ་རྒྱུན་ཅན་འཁོར་དེ་ཉིད་དུ་འདུག་ཅིང་འཐུན་པར་གྱུར་ཏོ། །དེ་ནས་དགེ་བསྙེན་ཆུ་རྒྱུན་ཅན་གྱིས་ཚེ་དང་ལྡན་པ་ཀུན་དགའ་བོའི་ལག་པ་གཉིས་ནས་བཟུང་སྟེ་མཐའ་གཅིག་ཏུ་ཁྲིད་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་མཁྱེན་པར་མཛོད་ཅིག་།རེ་ལྡེ་རི་འདི་ལ་དགེ་སློང་འགྲོ་མགྱོགས་དང ། ནབ་སོ་གཉིས་དང ། དགེ་སློང་དམར་སེར་ཅན་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་དག་མཆིས་ཏེ། དེ་དག་བུད་མེད་ཀྱི་ཡུལ་དང་ལྷན
6.15a
ཅིག་ཐོ་འཚམ་པར་བགྱིད། ཀུན་དུ་རྩེ་བར་བགྱིད། ཀུན་དུ་ཅ་ཅོ་འདོན་པར་བགྱིད། རྒོད་པ་དང ། དྲེགས་པ་དང ། ལུས་སྒྱུར་བར་བགྱིད། སྟན་གཅིག་ལ་མཆིས་པར་བགྱིད། སྣོད་གཅིག་ཏུ་འཚལ་བར་བགྱིད། ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་དག་འཚལ་བར་བགྱིད། མེ་ཏོག་དག་འཐོག་པར་བགྱིད། འཐོག་ཏུ་སྩོལ་བར་བགྱིད། ཕྲེང་བ་དག་རྒྱུད་པར་བགྱིད། རྒྱུད་དུ་སྩལ་བར་བགྱིད། མེ་ཏོག་རྣ་རྒྱན་དག་ཐོགས་པར་བགྱིད། འཐོག་དུ་སྩལ་བར་བགྱིད། བྲོ་རྡུང་བར་བགྱིད། བྲོ་རྡུང་དུ་སྩལ་བར་བགྱིད། མཆིད་མཆི་བར་བགྱིད། མཆིད་མཆིར་སྩོལ་བར་བགྱིད། རོལ་མོའི་སྒྲ་འབྱིན་པར་བགྱིད། རོལ་མོའི་སྒྲ་འབྱིན་དུ་སྩལ་བར་བགྱིད། བྲོ་མཁས་པ་དང ། གླུ་མཁས་པ་དང ། རོལ་མོའི་སྒྲ་འབྱིན་མཁས་པ་ལ་ངོ་སོ་ལས་བྱུང་བ་སྩོལ་བར་བགྱིད། ཆོས་གོས་དག་བརྫེས་ཏེ་རྒྱུག་པར་བགྱིད། མཆོང་བར་བགྱིད། རབ་ཏུ་མཆོང་བར་བགྱིད། བརླ་སྐོར་བར་བགྱིད། ལག་པ་སྐོར་བར་བགྱིད། ཉ་ལྟར་སྐོར་བར་བགྱིད། ཆབ་ཏུ་འཕྱོ་བ་འཕེན་པར་བགྱིད། ཆབ་ལ་རྔ་མ་དུ་ཀ་ལྟར་རྡུང་བར་བགྱིད། ཆབ་ལ་རྔ་བོ་ཆེ་ལྟར་རྡུང་བར་བགྱིད། གླང་པོ་ཆེའི་སྐད་ཀྱི་སྒྲ་འབྱིན་པར་བགྱིད། རྟའི་སྐད་ཀྱི་སྒྲ་འབྱིན་པར་བགྱིད། ཁྱུ་མཆོག་གི་སྐད་ཀྱི་སྒྲ་འབྱིན་པར་བགྱིད། རྨ་བྱའི་སྐད་ཀྱི་སྒྲ་འབྱིན་པར་བགྱིད། ཁུ་བྱུག་གི་སྐད་ཀྱི་སྒྲ་འབྱིན་པར་བགྱིད། ཁས་རྫ་རྔའི་སྒྲ་འབྱིན་པར་བགྱིད། ཁས་དུང་གི་སྒྲ་འབྱིན་པར་བྱེད། ཁས་རྔ་བོ་ཆེའི་སྒྲ་འབྱིན་པར་བགྱིད། གླང་པོ་ཆེའི་ཐབ་མོ་ཡང་བགྱིད། གླང་པོ་ཆེའི་ཐབ་མོ་བགྱིད་དུ་སྩོལ་བར་ཡང་བགྱིད། རྟའི་ཐབ་མོ་དང ། ཁྱུ་མཆོག་གི་ཐབ་མོ་དང ། མ་ཧེའི་ཐབ་མོ་དང ། རའི་ཐབ་མོ་དང ། ལུག་གི་ཐབ་མོ་དང ། བུད་མེད་ཀྱི་ཐབ་མོ་དང ། སྐྱེས་པའི་ཐབ་མོ་དང ། གཞོན་ནུའི་ཐབ་མོ་དང ། གཞོན་ནུ་མའི་ཐབ་མོ་དང ། བྱ་གག་གི་ཐབ་མོ་དང ། ཐི་བའི་ཐབ་མོ་དང ། ངུར་བའི་ཐབ་མོ་ཡང་བགྱིད། བགྱིད་དུ་སྩལ་བར་ཡང་བགྱིད་དེ། དེ་དག་དང་གཞན་ཡང་དགེ་སྦྱོང་གི་ལས་མ་ལགས་པ་དག་བགྱིད་ཅིང་བགྱིད་དུ
6.15b
སྩལ་ཏོ། །དེ་དག་གི་སྤྱོད་ཚུལ་དང ། སྤྱོད་པ་དང ། ལོག་པར་སྒྲུབ་པ་དེས་རེ་ལྡེ་རི་ལ་དགེ་སློང་མ་མཆིས་པ་དག་ཀྱང་མི་མཆིས་ལ། མཆིས་པ་དག་ཀྱང་མངོན་པར་མི་དགའ་ཞིང་རེ་ལྡེ་རིའི་གནས་སྤོང་བར་བགྱིད་དོ། །རེ་ལྡེ་རི་ལ་གནས་པའི་བྲམ་ཟེ་དང ། ཁྱིམ་བདག་དག་ཀྱང་ཡིད་མི་དགའ་ཞིང ། ཞེ་བཅིལ་བར་གྱུར་ནས་དགེ་སློང་གཉུག་མར་གནས་པ་དག་ལ་ཡང་བསོད་སྙོམས་དབུལ་བ་དང་བགྱི་བར་སེམས་པ་དཀའ་ན། གློ་བུར་དུ་ལྷགས་པ་རྣམས་ལ་ལྟ་སྨོས་ཀྱང་ཅི་འཚལ་བར་གྱུར་གྱིས་བཙུན་པ་ཀུན་དགའ་བོ་གལ་ཏེ་ཁྱོད་མི་དགའ་ན་ཁྱོད་ཀྱིས་ཐུགས་བརྩེ་བའི་སླད་དུ་དོན་འདི་བཅོམ་ལྡན་འདས་ལ་རྒྱས་པར་གསོལ་ཅིག་།ཚེ་དང་ལྡན་པ་ཀུན་དགའ་བོས་དགེ་བསྙེན་ཆུ་རྒྱུན་ཅན་ལ་ཅང་མི་སྨྲ་བས་དང་དུ་བླངས་སོ། །དེ་ནས་དགེ་བསྙེན་ཆུ་རྒྱུན་ཅན་གྱིས་ཚེ་དང་ལྡན་པ་ཀུན་དགའ་བོས་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བདག་གི་སྡུམ་པར་བསོད་སྙོམས་གཅིག་གསོལ་བར་ཅི་གནང ། ཚེ་དང་ལྡན་པ་ཀུན་དགའ་བོས་དགེ་བསྙེན་ཆུ་རྒྱུན་ཅན་ལ་ཅང་མི་སྨྲ་བས་དང་དུ་བླངས་སོ། །དེ་ནས་དགེ་བསྙེན་ཆུ་རྒྱུན་ཅན་གྱིས་ཚེ་དང་ལྡན་པ་ཀུན་དགའ་བོས་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་ཀུན་དགའ་བོ་བདེ་བར་འདུག་པ་ལ་རང་གི་ལག་ནས་བཅའ་བ་དང་བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་ཅིང ། རང་གི་ལག་ནས་བཅའ་བ་དང་བཟའ་བ་གཙང་ཞིང་བསོད་པ་རྣམ་གྲངས་དུ་མས་ཚིམ་པར་བྱས་ཤིང་བསྟབས་ནས་ཚེ་དང་ལྡན་པ་ཀུན་དགའ་བོས་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་ཁྱེར་ཏེ། ཚེ་དང་ལྡན་པ་ཀུན་དགའ་བོའི་མདུན་དུ་ཆོས་མཉན་པའི་ཕྱིར་འདུག་གོ། །དེ་ནས་ཚེ་དང་ལྡན་པ་ཀུན་དགའ་བོ་དགེ་བསྙེན་ཆུ་རྒྱུན་ཅན་ལ་ཆོས་དང་ལྡན་པའི་གཏམ་ཡང་དག་པར་སྟོན། ཡང་དག་པར་འཛིན་དུ་བཅུག་།ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་བྱེད་ཅིང
6.16a
ཆོས་དང་ལྡན་པའི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་ཉི་ཤུ་གསུམ་པ། དེ་ནས་ཚེ་དང་ལྡན་པ་ཀུན་དགའ་བོས་ཇི་ལྟར་ཡོངས་སུ་སྤྱད་པའི་གནས་མལ་མཁོས་སུ་ཕབ་ནས་ལྷུང་བཟེད་དང ། ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ་དེ་ནས་ཚེ་དང་ལྡན་པ་ཀུན་དགའ་བོས་ལྟུང་བཟེད་དང ། ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་དེ་ལ་དགེ་བསྙེན་ཆུ་རྒྱུན་ཅན་དང་ལྷན་ཅིག་སྐབས་སུ་གཏམ་བརྗོད་པ་ཇི་སྙེད་བྱུང་བར་གྱུར་པ་དེ་དག་ཐམས་ཅད་བཅོམ་ལྡན་འདས་ལ་རྒྱས་པར་གསོལ་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་རེ་ལྡེའི་རི་ལ་སོང་ལ་དགེ་སློང་འགྲོ་མགྱོགས་དང ། ནབ་སོ་གཉིས་བསྐྲད་པའི་ལས་གྱིས་ཤིག་།འདི་ལྟར་བྱ་སྟེ། ལམ་གྱི་བར་དུ་འདུག་ལ་དགེ་སློང་གླེང་བ་པོ་བསྐོ་བར་བྱ་སྟེ། དགེ་སློང་གླེང་བ་པོ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ཞིང་བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། གླེངས་པ་དང་མ་གླེངས་པ་མི་ཤེས་པ་སྟེ། དགེ་སློང་གླེང་བ་པོ་ཆོས་ལྔ་པོ་དེ་དག་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ཞིང ། བསྐོས་པ་ཡང་དབྱུང་བར་བྱའོ། །དགེ་སློང་གླེང་བ་པོ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ཞིང་བསྐོས་པ་ཡང་དབྱུང་བར
6.16b
མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། གླེངས་པ་དང་མ་གླེངས་པ་ཤེས་པ་སྟེ། །དགེ་སློང་གླེང་བ་པོ་ཆོས་ལྔ་པོ་དེ་དག་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ཞིང་བསྐོས་པ་ཡང་དབྱུང་བར་མི་བྱའོ། །འདི་ལྟར་བསྐོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་ཇེ་དང་པོ་སྤྲོ་བར་བྱ་སྟེ། ཚེ་དང་ལྡན་པ་མིང་འདི་ཞེས་བྱ་བ་ཁྱོད་རེ་ལྡེ་རི་ལ་སོང་སྟེ། དགེ་སློང་འགྲོ་མགྱོགས་དང ། ནབ་སོ་ལ་དགེ་སྦྱོང་གི་ཆོས་མ་ཡིན་པ་རྣམ་པ་མང་པོས་གླེང་བར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་གླེང་བ་པོ་མིང་འདི་ཞེས་བགྱི་བ་འདི་རེ་ལྡེ་རི་ལ་མཆིས་ཏེ་དགེ་སློང་འགྲོ་འགྱོགས་དང ། ནབ་སོ་ལ་དགེ་སྦྱོང་གི་ཆོས་མ་ལགས་པ་རྣམ་པ་མང་པོས་གླེང་བར་སྤྲོ་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང ། ནབ་སོ་ལ་གླེང་བར་བསྐོའོ། །འདི་ནི་གསོལ་བའོ། ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་གླེང་བ་པོ་མིང་འདི་ཞེས་བགྱི་བ་འདི་རེ་ལྡེ་རི་ལ་མཆིས་ནས་དགེ་སློང་འགྲོ་མགྱོགས་དང ། ནབ་སོ་ལ་དགེ་སྦྱོང་གི་ཆོས་མ་ལགས་པ་རྣམ་པ་མང་པོས་གླེང་བར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང ། ནབ་སོ་ལ་གླེང་བར་བསྐོ་ན། ཚེ་དང་ལྡན་པ་གང་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང ། ནབ་སོ་ལ་གླེང་བར་བསྐོ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི
6.17a
བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང ། ནབ་སོ་ལ་གླེང་བར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་དག་ངས་དགེ་སློང་གླེང་བ་པོའི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། དགེ་སློང་གླེང་བ་པོས་སྲིན་བུ་ཅན་གྱི་རིལ་སོང་སྟེ་གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་དགེ་སློང་འགྲོ་མགྱོགས་དང ། ནབ་སོ་གཉིས་ལ་གླེང་བར་བྱའོ། །གལ་ཏེ་འཐུན་པ་མི་སྦྱིན་ན་མ་གུས་པ་དེ་ཉིད་ཀྱིས་གནས་ནས་བསྐྲད་པའི་ལས་བྱའོ། །གལ་ཏེ་འཐུན་པ་སྟེར་ན་སྐབས་འབྱེད་དུ་གཞུག་པར་བྱའོ། །གལ་ཏེ་སྐབས་མི་འབྱེད་ན་མ་གུས་པ་དེ་ཉིད་ཀྱིས་བསྐྲད་པའི་ལས་བྱའོ། །གལ་ཏེ་སྐབས་འབྱེད་ན་གླེང་བར་བྱའོ། །གལ་ཏེ་ལྟུང་བ་མ་མཐོང་ངོ་ཞེས་ཟེར་ན་མ་གུས་པ་དེ་ཉིད་ཀྱིས་བསྐྲད་པའི་ལས་བྱའོ། །གལ་ཏེ་ལྟུང་བ་མཐོང་ངོ་ཞེས་ཟེར་ན་འདི་སྐད་ཅེས་དེ་ཁོ་ནའི་ཕྱིར་དགེ་འདུན་གྱིས་ཁྱེད་གཉིས་ལ་བསྐྲད་པའི་ཕྲིན་ལས་མཛད་དོ་ཞེས་བརྗོད་པར་བྱའོ་དགེ་སློང་གླེང་བ་པོས་གླེང་བ་པོའི་ཆོས་ཇི་ལྟར་བཅས་པ་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་རེ་ལྡེ་རི་ལ་སོང་སྟེ། ལམ་གྱི་བར་དུ་འདུག་ནས་དགེ་སློང་གླེང་བ་པོ་བསྐོས་སོ། །དེ་ན་དགེ་སློང་དམར་སེར་ཅན་གང་དག་དགེ་སློང་འགྲོ་མགྱོགས་དང ། ནབ་སོ་གཉིས་དང་མཚུངས་པར་བྱེད་པ་དེ་དག་གིས་ཚེ་དང་ལྡན་པ་ཀུན་དགའ་བོ་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་འདིར་འོངས་ཏེ་ལམ་གྱི་བར་དུ་འདུག་ནས། དགེ་སློང་གླེང་བ་པོ
6.17b
བསྐོས་ཏེ་དགེ་སློང་འགྲོ་མགྱོགས་དང ། ནབ་སོ་གཉིས་སྐྲོད་པའི་ལས་བྱེད་པར་འགྱུར་རོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། ཚེ་དང་ལྡན་པ་འདི་གཉིས་ཀྱིས་ཀུན་དུ་སྤྱད་པ་དང ། སྨྲས་པ་དང ། བརྟུལ་བ་གང་ཡིན་པ་དག་ལས་བདག་ཅག་གིས་ཀུན་དུ་མ་སྤྱད་པ་དང ། མ་བརྟུལ་བ་ཅི་ཡང་མེད་པས་དེའི་ཕྱིར་འདི་གཉིས་ལ་སྐྲོད་པའི་ལས་བྱེད་ན་བདག་ཅག་ལ་ཡང་ཅིའི་ཕྱིར་མི་བྱེད་དེ། །གང་གི་ཚེ་ཚེ་དང་ལྡན་པ་ཀུན་དགའ་བོ་དང་དགེ་སློང་གནས་བརྟན་གནས་བརྟན་རྣམས་འདིར་འོངས་ཏེ་དང་པོར་འགྲོ་མགྱོགས་དང ། ནབ་སོ་གཉིས་བསྐྲད་པའི་ལས་བྱས་ནས་དེའི་འོག་ཏུ་བདག་ཅག་ལ་ཡང་སྐྲོད་པའི་ལས་བྱེད་པར་འགྱུར་བའི་གནས་ཡོད་པར་འགྱུར་བས་བདག་ཅག་གཏུར་བུའི་ཁུར་དྲགས་ཏེ་ཉན་རྣ་བ་བཞག་ཅིང་འཁོད་ནས། ཚེ་དང་ལྡན་པ་ཀུན་དགའ་བོ་དང ། དགེ་སློང་གནས་བརྟན་གནས་བརྟན་རྣམས་སྒོ་གཅིག་ནས་འཇུག་པར་འགྱུར་བ་ན། བདག་ཅག་གཏུར་བུའི་ཁུར་དག་ཐོགས་ཏེ་སྒོ་གཅིག་ནས་འབྱུང་ཞིང་མཉན་ཡོད་དུ་འདོང་བར་བྱ་གོར་མ་ཆག་སྙམ་མོ། །དེ་ནས་དགེ་སློང་གླེང་བ་པོ་རེ་ལྡེ་རི་ལ་སོང་སྟེ་གནས་མལ་བཤམ་པ་བྱས་ནས། གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་དགེ་སློང་འགྲོ་མགྱོགས་དང ། ནབ་སོ་གཉིས་ཀྱིས་འཐུན་པ་བྱིན་ཏེ་སྐབས་ཕྱེ་ནས་དགེ་སློང་གླེང་བ་པོས་གླེངས་པ་དང ། དེ་གཉིས་ཀྱིས་སྨྲས་པ། ཚེ་དང་ལྡན་པ་ལྟུང་བ་མཐོང་ངོ ། །གླེང་བ་པོས་སྨྲས་པ། དེ་ཁོ་ནའི་ཕྱིར་དགེ་འདུན་གྱིས་ཁྱེད་གཉིས་ལ་བསྐྲད་པའི་ཕྲིན་ལས་མཛད་དོ། །དེ་ནས་ཚེ་དང་ལྡན་པ་ཀུན་དགའ་བོ་དང ། དགེ་སློང་གནས་བརྟན་གནས་བརྟན་རྣམས་སྒོ་གཅིག་ནས་ཞུགས་པར་གྱུར་པ་ན་དགེ་སློང་དམར་སེར་ཅན་དག་གཏུར་བུའི་ཁུར་དག་ཐོགས་ཏེ་སྒོ་གཅིག་ནས་བྱུང་ཞིང་མཉན་ཡོད་དུ་དོང་ནས་དེ་དག་གིས་ལྟུང་བ་བཤགས་པར་བྱ་བ་གང་ཡིན་པ་དེ་དག་ཀྱང
6.18a
བཤགས་ཤིང ། སེམས་ཀྱི་རྣམ་པར་རྟོག་པ་སྣ་ཚོགས་བསྡམ་པར་བྱ་བ་དག་ཀྱང་སེམས་ཀྱིས་བསྡམས་ཏེ། དགེ་སློང་རང་བཞིན་དུ་གནས་པ་དག་དང་ལྷན་ཅིག་གནས་ཤིང་དགེ་འདུན་གྱི་བྱ་བ་ཡང་རྗེས་སུ་སྲུང་བར་བྱེད་དོ། །དེ་ནས་ཚེ་དང་ལྡན་པ་ཀུན་དགའ་བོ་དང ། དགེ་སློང་གནས་བརྟན་གནས་བརྟན་རྣམས་ཀྱིས་དགེ་སློང་འགྲོ་མགྱོགས་དང ། ནབ་སོ་གཉིས་ལ་བསྐྲད་པའི་ལས་བྱས་ནས་མཉན་ཡོད་ག་ལ་བ་དེར་སོང་སྟེ། མཐར་གྱིས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ཏོ། །འགྲོ་མགྱོགས་དང ། ནབ་སོ་གཉིས་ཀྱིས་བསམས་པ། གང་ས་ལ་སྒྱེལ་བ་དེ་ནི་ས་ཉིད་ལས་བརྟེན་ཏེ་ལྡང་བ་ཡིན་པས་བདག་ཅག་གཉིས་ཀྱང་མཉན་ཡོད་ཉིད་དུ་སོང་སྟེ། བཅོམ་ལྡན་འདས་དང་དགེ་སློང་གི་དགེ་འདུན་ལ་བཟོད་པ་གསོལ་བར་བྱའོ་སྙམ་ནས་འགྲོ་མགྱོགས་ཀྱིས་སྨྲས་པ། ནབ་སོ་གང་ས་ལ་སྒྱེལ་བ་དེ་ནི་ས་ཉིད་ལས་བརྟེན་ཏེ་ལྡང་བ་ཡིན་པས་བདག་ཅག་གཉིས་ཀྱང་མཉན་ཡོད་ཉིད་དུ་སོང་སྟེ། བཅོམ་ལྡན་འདས་དང་དགེ་སློང་གི་དགེ་འདུན་ལ་བཟོད་པ་གསོལ་བར་བྱས་འདོང་ངོ ། །ནབ་སོས་སྨྲས་པ། མ་ཉེས་ཀྱིས་ཚུར་ཤོག་བཟོད་པ་གསོལ་དུ་འདོང་ངོ ། །དེ་གཉིས་ཀྱིས་གྲོས་བྱས་ནས་དེ་ཉིད་ཀྱི་མཚན་མོ་འདས་པ་དང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རེ་ལྡེ་རི་ལ་བསོད་སྙོམས་ལ་ཞུགས་ནས། རེ་ལྡེ་རི་ལ་བསོད་སྙོམས་བརྒྱུས་ཏེ་ཟས་ཀྱི་བྱ་བ་བྱས་ནས་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་སྤྱད་པའི་གནས་མལ་མཁོས་སུ་ཕབ་སྟེ་ལྷུང་བཟེད་དང་ཆོས་གོས་ཐོགས་ནས་མཉན་ཡོད་ག་ལ་བ་དེར་རྒྱུ་ཞིང་དོང་སྟེ་མཐར་གྱིས་རྒྱུ་ཞིང་དོང་བ་ན་མཉན་ཡོད་དུ་ཕྱིན་ནས་དགེ་སློང་གནས་བརྟན་གནས་བརྟན་རྣམས་ཀྱིས་དེ་གཉིས་མཐོང་བ་དང ། དེ་དག་དེ་གཉིས་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད་དོ། །དགེ་སློང་དམར་སེར་ཅན་དག་གིས་ཀྱང་དེ་གཉིས་མཐོང་བ་དང་དེ་དག་ཀྱང་དེ་གཉིས་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད་དོ། །དེ་ནས་དགེ་སློང་འགྲོ་མགྱོགས་དང
6.18b
ནབ་སོ་གཉིས་ཀྱིས་དགེ་སློང་དམར་སེར་ཅན་དག་ལ་སྨྲས་པ། ཚེ་དང་ལྡན་པ་དག་དགེ་སློང་གནས་བརྟན་གནས་བརྟན་དག་ཁོ་བོ་ཅག་གཉིས་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད་པ་ནི་རིགས་ན། ཁྱེད་ཅག་ཅིའི་ཕྱིར་ཁོ་བོ་ཅག་གཉིས་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ཁོ་བོ་ཅག་གཉིས་ཀྱིས་ཀུན་དུ་སྤྱད་པ་དང ། སྨྲས་པ་དང ། བརྟུལ་བ་གང་ཡིན་པ་དག་ལས་ཁྱེད་ཅག་གིས་ཀུན་དུ་མ་སྤྱད་པ་དང ། མ་སྨྲས་པ་དང ། མ་བརྟུལ་བ་ཅི་ཞིག་ཡོད། དེ་དག་གིས་སྨྲས་པ། ཚེ་དང་ལྡན་པ་གཉིས་དེ་ཡང་བདེན་མོད་ཀྱི་འོན་ཀྱང་ཁོ་བོ་ཅག་གིས་ལྟུང་བ་བཤགས་པར་བྱ་བ་གང་དག་ཡིན་པ་དེ་དག་ཀྱང་བཤགས་ཤིང་སེམས་ཀྱི་རྣམ་པར་རྟོག་པ་སྣ་ཚོགས་བསྡམ་པར་བྱ་བ་དག་ཀྱང་སེམས་ཀྱིས་བསྡམས་ཏེ། ད་ལྟར་དགེ་སློང་རང་བཞིན་དུ་གནས་པ་དག་དང་ལྷན་ཅིག་གནས་ཤིང་དགེ་འདུན་གྱི་བྱ་བ་ཡང་རྗེས་སུ་སྲུང་བར་བྱེད་པས་ཁོ་བོ་ཅག་ཕྱིན་ཅད་གནས་ངན་ལེན་ཀུན་དུ་སྤྱོད་པ་དག་དང་ལྷན་ཅིག་ལོངས་སྤྱོད་པར་མི་བྱེད་དོ། །དེ་གཉིས་ཀྱིས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། །ཁ་ཅིག་ནི་སྐྲོད་པར་མི་བྱེད་དོ་ཞེས་འཕྱ་བར་བརྩམས་པ་དང ། དགེ་སློང་རྣམས་ཀྱིས་དེ་གཉིས་ལ་སྨྲས་པ། ཚེ་དང་ལྡན་པ་གཉིས་ཁྱེད་ཅག་གཉིས་སུ་ལ་འདུན་པས་འགྲོ་བ་ཞེས་ཟེར། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་ཟེར། ཚེ་དང་ལྡན་པ་དག་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་བདག་ཅག་བསྐྲད་པའི་ལས་བྱས་པ་དག་ལའོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་བདག་ཅག་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་ཟེར། ཞེ་སྡང་གིས་འགྲོ་བ། གཏི་མུག་གིས
6.19a
འགྲོ་བ། འཇིགས་པས་འགྲོ་བ་ཞེས་ཟེར་ཞིང ། དགེ་སློང་རྣམས་ལ་ཡང་དེ་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱི་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འགྲོ་མགྱོགས་དང ། ནབ་སོ་གཉིས་དང ། གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ། །འདི་སྐད་བསྒོ་བར་བྱ་སྟེ། ཚེ་དང་ལྡན་པ་འགྲོ་མགྱོགས་དང ། ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག་།ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་མ་ཟེར་ཅིག་།དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ། །ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་དེ་དག་ནི་འདུན་པས་འགྲོ་བ་མ་ཡིན། ཞེ་སྔང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི
6.19b
ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་འགྲོ་མགྱོགས་དང ། ནབ་སོ་གཉིས་ལ་ཚེ་དང་ལྡན་པ་འགྲོ་མགྱོགས་དང ། ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག་།ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་མ་ཟེར་ཅིག་།དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ། །ཞེས་མ་ཟེར་ཅིག་།དེཅིའི་ཕྱིར་ཞེ་ན། དགེ་སློང་དེ་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་བཞམས་ཏེ་བསྒོའོ། །དགེ་སློང་རྣམས་ཀྱིས་དེ་གཉིས་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འགྲོ་མགྱོགས་དང ། ནབ་སོ་གཉིས་དང །
6.20a
གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །འདི་ལྟར་བསྒོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འགྲོ་མགྱོགས་དང ། ནབ་སོ་འདི་གཉིས་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་མཆིས་ནས་འདི་གཉིས་བསྐྲད་པའི་ལས་བགྱིད་པར་འཚལ་བཞིན་དུ་དེ་དག་ལ་འདུན་པས་འགྲོ་བ་ཞེས་མཆི། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་མཆི་ཞིང ། དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ། །ཞེས་མཆི་ནས། འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ན། འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་འགྲོ་མགྱོགས་དང་ནབ་སོ་གཉིས་ལ་ཚེ་དང་ལྡན་པ་འགྲོ་མགྱོགས་དང་ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག་།ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་མ་ཟེར་ཅིག་།དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ།
6.20b
འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་དེ་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་དུ་སྦྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འགྲོ་མགྱོགས་དང ། ནབ་སོ་འདི་གཉིས་དགེ་སློང་ཚེ་དང་ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་མཆིས་ནས་འདི་གཉིས་བསྐྲད་པའི་ལས་བགྱིས་པར་འཚལ་བཞིན་དུ། དེ་དག་ལ་འདུན་པས་འགྲོ་བ་ཞེས་མཆི། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་མཆི་ཞིང ། དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་མཆི་ནས། འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ན་འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་དགེ་སློང་འགྲོ་མགྱོགས་དང ། ནབ་སོ་གཉིས་ལ་ཚེ་དང་ལྡན་པ་འགྲོ་མགྱོགས་དང ། ནབ་སོ་གཉིས་ཁྱེད་དགེ་སློང་ཚེ་དང
6.21a
ལྡན་པ་ཀུན་དགའ་བོ་དང ། གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པས་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག་།ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་མ་ཟེར་ཅིག་།དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་དེ་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་དགེ་སློང་འགྲོ་མགྱོགས་དང ། ནབ་སོ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འགྲོ་མགྱོགས་དང ། ནབ་སོ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་འགྲོ་མགྱོགས་དང ། ནབ་སོ་གཉིས་ལ་གསོལ་བ་དང
6.21b
བཞིའི་ལས་ཀྱིས་བསྒོའོ། །གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་རབ་ཏུ་མང་པོ་དག་གྲོང་ངམ། གྲོང་རྡལ་ཞིག་ན་ཉེ་བར་རྟེན་ཅིང་གནས་པར་གྱུར་ལ་དེ་དག་ཀྱང་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པར་གྱུར་ཅིང ། དེ་དག་གིས་ཁྱིམ་དག་སུན་ཕྱུང་བར་མཐོང་ངམ། ཐོས་སམ། རབ་ཏུ་ཤེས་སམ། དེ་དག་སྡིག་པ་ཀུན་དུ་སྤྱོད་པར་མཐོང་ངམ། ཐོས་སམ། རབ་ཏུ་ཤེས་ན་དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་དག་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ། ཁྱེད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་ཀྱིས། ཚེ་དང་ལྡན་པ་དག་ཁྱེད་འདི་ན་གནས་པས་ཆོག་གིས་གནས་འདི་ནས་དེང་ཤིག་ཅེས་བསྒོ་བར་བྱའོ། །གལ་ཏེ་དེ་དག་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་ཟེར་ན་དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་དག་ཁྱེད་དེ་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ།
6.22a
འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ། །ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་དེ་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན། གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །དགེ་སློང་ཞེས་བྱ་བ་ནི་འགྲོ་མགྱོགས་དང ། ནབ་སོ་དག་གམ། །གཞན་ཡང་དེ་ལྟ་བུ་གང་ཡིན་པའོ། །རབ་ཏུ་མང་པོ་དག་ཅེས་བྱ་བ་ནི་གཉིས་ལས་ལྷག་པ་ནི་རབ་ཏུ་མང་པོ་དག་གོ། །གྲོང་ངམ། གྲོང་རྡལ་ཞིག་ན་ཞེས་བྱ་བ་ནི་རེ་ལྡེ་རི་ལའོ། དེ་དག་ཀྱང་ཁྱིམ་སུན་འབྱིན་པ་ཞེས་བྱ་བ་ལ། ཁྱིམ་ཞེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་དག་གོ། །དེ་དག་ནི་རྒྱུ་གཉིས་ཀྱིས་སུན་འབྱིན་པར་བྱེད་དེ། འགྲོགས་པ་དང་ལོངས་སྤྱོད་པས་སོ། །ཇི་ལྟར་འགྲོགས་པས་ཤེ་ན། བུད་མེད་ཀྱི་ཡུལ་དང་ལྷན་ཅིག་སྟན་གཅིག་ལ་འདུག་པར་བྱེད། སྣོད་གཅིག་ཏུ་ཟ་བར་བྱེད། ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་དག་འཐུང་བར་བྱེད་པ་སྟེ། དེ་ལྟར་འགྲོགས་པས་སོ། །ཇི་ལྟར་ལོངས་སྤྱོད་པས་ཤེ་ན། ཟས་ཀྱིས་དང །
6.22b
སྐོམ་གྱིས་དང ། གོས་ཀྱིས་དང ། མེ་ཏོག་གིས་དང ། འབྲས་བུས་དང ། སོ་ཤིང་གིས་ཏེ། དེ་ལྟར་ལོངས་སྤྱོད་པས་སོ། །སྡིག་པའི་ཆོས་ཀུན་དུ་སྤྱོད་པར་གྱུར་ཅིང་ཞེས་བྱ་བ་ནི་གནས་ངན་ལེན་ཀུན་དུ་སྤྱོད་པར་གྱུར་ཅིང་ངོ ། །དེ་དག་གིས་ཁྱིམ་དག་ཅེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་དག་གོ། །མཐོང་ངམ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །ཐོས་སམ་ཞེས་བྱ་བ་ནི་རྣ་བའི་རྣམ་པར་ཤེས་པས་སོ། །རབ་ཏུ་ཤེས་སམ་ཞེས་བྱ་བ་ནི་དེ་ལས་གཞན་པའི་རྣམ་པར་ཤེས་པའི་ཚོགས་དག་གིས་སོ། །དེ་དག་སྡིག་པ་ཀུན་དུ་སྤྱོད་པར་ཞེས་བྱ་བ་ནི་གནས་ངན་ལེན་ཀུན་དུ་སྤྱོད་པར་རོ། །དགེ་སློང་དེ་དག་ལ་དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་ཤེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱའོ། །དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ན་འོ། །གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བ་དེ་ཡོངས་སུ་གཏོང་ནའོ། །དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ན་འོ། །ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བ་སྟེ། ཡང་དག་པར་བསྒོ་བ་དེ་ནི་དེ་ཡིན ། ཡང་དག་པར་བསྟན་པ་དེ་ནི་དེ་ཡིན་ནོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ་ཡིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཅུང་ཟད་ཇི་ཙམ་དུ་དགེ་སློང་གང་དག་གིས་བདག་ཉིད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་ཟེར་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །
6.23a
གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གསོལ་བ་བྱས་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །རྫོགས་པར་བརྗོད་པ་ན་གལ་ཏེ་འཐུན་པ་དང་ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ། །མི་འཐུན་པ་དང་ཆོས་ཀྱིས་བསྒོ་བར་བྱེད་ན་ལྟུང་བ་མེད་དོ། །འཐུན་པ་དང་ཆོས་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །མི་མཐུན་པ་དང་ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་འཐུན་པས་བསྒོ་བར་བྱེད་ན་རྫོགས་པར་བརྗོད་ན་དགེ་འདུན་ལྷག་མར་འགྱུར་རོ། །དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་རྗོད་ན་དེ་ཕྱིན་ཅད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ། །དེ་བས་ན་དགེ་སློང་གིས་ཇི་ཙམ་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། ཁྱིམ་སུན་འབྱིན་པའི་དགེ་འདུན་ལྷག་མ་སྟེ་བཅུ་གཉིས་པ་རྫོགས་སོ།། ་་་་་་་་་།། སངས་རྒྱས་བཅོམ
6.23b
ལྡན་འདས་ཀཽ་ཤམ་བི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འདུན་པ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་ནས་དེ་ལ་དགེ་སློང་དོན་འདོད་པ། ཕན་པ་འདོད་པ། བདེ་བ་འདོད་པ། བདེ་བ་ལ་རེག་པར་འདོད་པ། གྲུབ་པ་དང་བདེ་བ་འདོད་པ་རྣམས་ཀྱིས་ཚེ་དང་ལྡན་པ་འདུན་པ་ཁྱོད་ལྟུང་བ་བྱུང་བ་དེ་དག་ཆོས་བཞིན་དུ་ཕྱིར་གྱིས་ཤིག་ཅེས་གླེང་བར་བྱེད། དྲན་པར་བྱེད་པ་ན་དེས་སྨྲས་པ། སུ་ལ་ལྟུང་བ་དེ་ཕྱིར་བྱེད་པར་འགྱུར་རོ། །ཁྱོད་ལ་ལྟུང་བ་བྱུང་ན་སུ་ཞིག་ཕྱིར་བྱེད་པར་འགྱུར་སུ་འགྱོད་པར་འགྱུར་བའོ། །ཁྱོད་ལ་ལྟུང་བ་བྱུང་བ་ལ་སུ་འགྱོད་པར་འགྱུར། དེ་ལ་དགེ་སློང་རྣམས་ཀྱིས་ཕྱིར་ཞིང་ཕྱིར་ཞིང་སྨྲས་པ་ན་དེར་འཐུར་ཞིང་སྨྲས་པ། ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་བདག་ལ་ཅི་ཡང་མ་སྨྲ་ཤིག་།བདག་ཀྱང་དགེ་ཡང་རུང་སྡིག་ཀྱང་རུང་ཚེ་དང་ལྡན་པ་དག་ལ་ཅི་ཡང་མི་སྨྲའོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཤིག་།ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ། འདི་ལྟར་ཁྱེད་ཅག་ནི་རིགས་སྣ་ཚོགས་དང ། རུས་སྣ་ཚོགས་དང ། ཁྱིམ་སྣ་ཚོགས་ནས་རབ་ཏུ་བྱུང་བ་དག་ཡིན་ཏེ། འདི་ལྟ་སྟེ། དཔེར་ན་ཤིང་ལྗོན་པ་དག་གི་ལོ་མ་སྣ་ཚོགས་རླུང་གིས་བླགས་པ་དག་གཅིག་ཏུ་ལྷུང་ཞིང་གཅིག་ཏུ་འདུག་པ་དེ་བཞིན་དུ་ཁྱེད་ཅག་ཀྱང་རིགས་སྣ་ཚོགས་དང ། རུས་སྣ་ཚོགས་དང ། ཁྱིམ་སྣ་ཚོགས་ནས་རབ་ཏུ་བྱུང་བ་དག་ཡིན་གྱི། ཁོ་བོའི་འཕགས་པས་ནི་བྱང་ཆུབ་ཐུགས་སུ་ཆུད་པ་ཡིན་ནོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ནི་བདག་ཉིད་བརྗོད་པར་བྱ་བ་མ་ཡིན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འདུན་པ་དང ། གཞན་ཡང་དེ་ལྟ་བུ་གང་ཡིན་པ
6.24a
ལ་བཞམས་ཏེ་བསྒོ་བར་བྱའོ། །འདི་སྐད་ཅེས་བསྒོ་བར་བྱ་སྟེ། ཚེ་དང་ལྡན་པ་འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན་བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག་།དགེ་སློང་རྣམས་ཚེ་དང་ལྡན་པ་ལ་ཆོས་དང་འཐུན་པ་དང་འདུལ་བ་དང་འཐུན་པར་སྨྲ་བ་ན་ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲོས་ཤིག་།འདི་ལྟ་སྟེ། གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འདི་འཕེལ་བར་འགྱུར་གྱིས། ཚེ་དང་ལྡན་པ་འདུན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་འདུན་པ་ལ་ཚེ་དང་ལྡན་པ་འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག་།དགེ་སློང་རྣམས་ཚེ་དང་ལྡན་པ་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲ་བ་ན་ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨོས་ཤིག་།འདི་ལྟ་སྟེ། གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ
6.24b
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འདི་འཕེལ་བར་འགྱུར་གྱིས། ཚེ་དང་ལྡན་པ་འདུན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་འདི་ཐོང་ཤིག་ཅེས་བཞམས་ཏེ་བསྒོའོ། །དེ་ལ་དགེ་སློང་རྣམས་ཀྱིས་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འདུན་པ་དང ། གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །འདི་ལྟར་བསྒོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་ནས། འདི་ལ་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་བདག་ལ་ཅི་ཡང་མ་སྨྲ་ཤིག་།བདག་ཀྱང་དགེ་ཡང་རུང་སྡིག་ཀྱང་རུང་ཚེ་དང་ལྡན་པ་དག་ལ་ཅི་ཡང་མི་སྨྲའོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཤིག་།ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ་ཞེས་བདག་ཉིད་བརྗོད་པར་བགྱི་བ་མ་ལགས་པར་བགྱིད་ནས། འདི་ལ་དགེ་སློང་མང་པོས་བཞམས་ཏེ་བསྒོ་ན་འདི་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། །དགེ་འདུན་གྱིས་དགེ་སློང་འདུན་པ་ལ
6.25a
ཚེ་དང་ལྡན་པ་འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན་བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག་།དགེ་སློང་རྣམས་ཚེ་དང་ལྡན་པ་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲ་བ་ན། ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲོས་ཤིག་།འདི་ལྟ་སྟེ། གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འདི་འཕེལ་བར་འགྱུར་གྱིས། ཚེ་དང་ལྡན་པ་འདུན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་ནས་འདི་ལ་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་བདག་ལ་ཅི་ཡང་མ་སྨྲ་ཤིག་།བདག་ཀྱང་དགེ་ཡང་རུང་སྡིག་ཀྱང་རུང་ཚེ་དང་ལྡན་པ་དག་ལ་ཅི་ཡང་མི་སྨྲའོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཤིག་།ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ་ཞེས་བདག་ཉིད་བརྗོད་པར་བགྱི་བ་མ་ལགས་པར་བགྱིད་ནས། འདི་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་
6.25b
བརྫུན་པའོ། །ཞེས་རྗེས་སུ་ཐ་སྙད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་དགེ་སློང་འདུན་པ་ལ་ཚེ་དང་ལྡན་པ་འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན་བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག་།དགེ་སློང་རྣམས་ཚེ་དང་ལྡན་པ་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲ་བ་ན། ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨོས་ཤིག་།འདི་ལྟ་སྟེ། གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་བའི་སངས་རྒྱས་དེའི་འཁོར་འདི་འཕེལ་བར་འགྱུར་གྱིས། ཚེ་དང་ལྡན་པ་འདུན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་དགེ་སློང་འདུན་པ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འདུན་པ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་འདུན་པ་ལ་གསོལ་བ་དང་བཞིའི་ལས་ཀྱིས་བསྒོའོ། །གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས
6.26a
རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་འདུན་པ་ལ་རྨས་པ། འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན་བདག་ཉིད་བརྗོད་པ་བྱ་བ་མ་ཡིན་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འདི་ན་དགེ་སློང་འགའ་ཞིག་བཀའ་བློ་མི་བདེ་བའི་རང་བཞིན་ཅན་དུ་གྱུར་ལ། དེ་ལ་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་བདག་ལ་ཅི་ཡང་མ་སྨྲ་ཤིག་།བདག་ཀྱང་དགེ་ཡང་རུང་སྡིག་ཀྱང་རུང་ཚེ་དང་ལྡན་པ་དག་ལ་ཅི་ཡང་མི་སྨྲ་འོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཤིག་།ཁྱོད་ལ་ཡང་བདག་གིས་སྨྲས་པས
6.26b
ཅི་ཞིག་བྱ་ཞེས་བདག་ཉིད་བརྗོད་པར་བྱ་བ་མ་ཡིན་པར་བྱེད་ན། དགེ་སློང་དེ་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག་།དགེ་སློང་རྣམས་ཚེ་དང་ལྡན་པ་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲ་བ་ན་ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲོས་ཤིག་།འདི་ལྟ་སྟེ་གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འདི་འཕེལ་བར་འགྱུར་གྱིས་ཚེ་དང་ལྡན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་འདི་ཐོང་ཤིག་།ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །འདི་ན་དགེ་སློང་འགའ་ཞིག་ཅེས་བྱ་བ་ནི་འདུན་པ་འམ་གཞན་ཡང་དེ་ལྟ་བུ་གང་ཡིན་པའོ། །བཀའ་བློ་མི་བདེ་བའི་རང་བཞིན་ཅན་དུ་གྱུར་ལ་ཞེས་བྱ་བ་ལ། བཀའ་བློ་མི་བདེ་བ་ཞེས་བྱ་བ་ནི་ཚིག་གི་ལམ་རྗེས་སུ་འཐུན་པ། རྗེས་སུ་མཉན་པར་བྱ་བ། ཚུལ་དང་འཐུན་པ། དྲང་པོར་འཇུག་པ། འགྲུས་སྐྱོང་གི་ཡན་ལག་གི་ཚོགས་དག་ཀུན་དུ་འགོག་པ་དང ། མི་འཛིན་པ་དང ། མི་བྱ་བ་དང ། མི་མཐུན་པར་འཛིན་པའོ། །
6.27a
དེ་ལ་ཞེས་བྱ་བ་ནི་འདུན་པ་ལའོ། །དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །གདོན་པར་གཏོགས་པའི་བསླབ་པའི་གཞི་རྣམས་ཤེས་བྱ་བ་ལ། གདོན་པ་ཞེས་བྱ་བ་ནི་ཕམ་པར་འགྱུར་བའི་ཆོས་བཞི་དང ། དགེ་འདུན་ལྷག་མའི་ཆོས་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་གོ། །བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཤེས་བྱ་བ་ལ། བདེ་བར་གཤེགས་པ་ཞེས་བྱ་བ་ནི་སྟོན་པའོ། །མདོ་ཞེས་བྱ་བ་ནི་དེས་ཉེ་བར་སྦྱར་བའི་མདོ་འམ། ཡང་ན་མདོ་ཡང་དག་པར་སྦྱོར་བའོ། །ཆོས་དང་འཐུན་པ་ཞེས་བྱ་བ་ནི་མདོ་སྡེ་དང ། མ་མོ་དང་ངོ ། །འདུལ་བ་དང་འཐུན་པ་ཞེས་བྱ་བ་ནི་འདུལ་བ་ཉིད་དང་ངོ ། །སྨྲས་པ་ན་ཞེས་བྱ་བ་ནི་བཟློག་པ་ན་སྟེ། ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བ་ནའོ། །ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་བདག་ལ་ཅི་ཡང་མ་སྨྲ་ཤིག་ཅེས་བྱ་བ་ནི་དགེ་བ་ལ་སྦྱོར་བར་ཡང་མ་བྱེད་ལ་སྡིག་པ་ལས་ཟློག་པར་ཡང་མ་བྱེད་ཅིག་ཅེས་པའོ། །བདག་ཀྱང་དགེ་ཡང་རུང་སྡིག་ཀྱང་རུང་ཚེ་དང་ལྡན་པ་དག་ལ་ཅི་ཡང་མི་སྨྲའོ་ཞེས་བྱ་བ་ནི་དགེ་བ་ལ་སྦྱོར་བར་ཡང་མི་བྱེད་ལ་སྡིག་པ་ལས་ཟློག་པར་ཡང་མི་བྱེད་དོ། །ཞེས་པའོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཤིག་།ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ་ཞེས་བྱ་བ་ནི་རྒྱ་ཆེར་བདག་ཉིད་བརྗོད་པར་བྱ་བ་མ་ཡིན་པ་ཉིད་དུ་འཇོག་པར་བྱེད་པའོ། །བདག་ཉིད་བརྗོད་པར་བྱ་བ་མ་ཡིན་པར་བྱེད་ན་ཞེས་བྱ་བ་ནི་བདག་ཉིད་བརྗོད་པར་བྱ་བ་མ་ཡིན་པ་ཉིད་དུ་འཇོག་པར་བྱེད་ནའོ། །དགེ་སློང་དེ་ལ་ཞེས་བྱ་བ་ནི་འདུན་པ་ལའོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བའོ། །དགེ་སློང་དེ་ལ་དགེ་སློང་རྣམས་ཀྱིས་འདི་སྐད་བསྒོ་བ་ཞེས་བྱ་བ་ནི་བཞམས་ཏེ་བསྒོ
6.27b
བས་བཟློག་པ་ནའོ། །གལ་ཏེ་གཞི་དེ་ཞེས་བྱ་བ་ནི་བཀའ་བློ་མི་བདེ་བ་ཉིད་དོ། །གཏོང་ན་ཞེས་བྱ་བ་ནི་ཡོངས་སུ་གཏོང་ནའོ། །དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ། །ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་སྟེ། ཡང་དག་པར་བསྒོ་བ་དེ་ནི་དེ་ཡིན་ནོ། །ཡང་དག་པར་བསྟན་པ་དེ་ནི་དེ་ཡིན་ནོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ་ཡིན་ཏེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཅུང་ཟད་ཇི་ཙམ་དུ་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན་བདག་ཉིད་བརྗོད་པར་བྱ་བ་མ་ཡིན་པར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གསོལ་བ་བྱས་པ་ན་ཉེས་བྱས་སྦོམ་པོར་འགྱུར་རོ། །ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །རྫོགས་པར་བརྗོད་པ་ན་གལ་ཏེ་འཐུན་པ་དང་ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ། །མི་མཐུན་པ་དང་ཆོས་ཀྱིས་བསྒོ་བར་བྱེད་ན་ལྟུང་བ་མེད་དོ། །འཐུན་པ་དང་ཆོས་ལྟར་བཅོས་པས་བསྒོ་བར་བྱེད་ན་ལྟུང་བ
6.28a
མེད་དོ། །མི་མཐུན་པ་དང ། ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་འཐུན་པས་བསྒོ་བར་བྱེད་ན་རྫོགས་པར་བརྗོད་པ་ན་དགེ་འདུན་ལྷག་མར་འགྱུར་རོ། །དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་བརྗོད་ན་དེ་ཕྱིན་ཅད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ། །དེ་བས་ན་དགེ་སློང་གིས་ཇི་ཙམ་དུ་གཞི་དེ་མ་བཤགས་ཤིང་སོ་སོར་མ་བཤགས་པར་གསོལ་བ་དང ། གསོལ་བ་དང་གཉིས་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ།། ་་་་་་་་།།འདུལ་བ་རྣམ་པར་འབྱེད་པ། བམ་པོ་ཉི་ཤུ་བཞི་པ། དགེ་སློང་རྣམས་ཐེ་ཚོམ་སྐྱེས་ནས་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འདུན་པ་འདི་ཚངས་པ་མཚུངས་པར་སྤྱོད་པ་དེས་པ་རྣམས་ཀྱི་མདུན་དུ་བཅོམ་ལྡན་འདས་ཉེ་དུ་ལགས་པར་སྟོན་ཅིང་བདག་ཉིད་སྨྲ་བ་དང་རྣམ་བར་སྨྲ་བར་བགྱིད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་འདིས་བྲམ་ཟེ་དང་ཁྱིམ་བདག་དེས་པ་དེས་པ་རྣམས་ཀྱི་མདུན་དུ་ང་ཉེ་དུ་ཡིན་པར་བསྟན་ཅིང་བདག་ཉིད་སྨྲ་བ་དང་རྣམ་པར་སྨྲ་བར་བྱས་པ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་རྡོ་འཇོག་ན་བྲམ་ཟེ་ཟླ་གྲགས་ཤེས་བྱ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ
6.28b
བཙས་ནས་དེའི་མིང་ཉི་ཟླ་ཞེས་བྱ་བར་བཏགས་ཏེ་དེ་བསྲིངས་བསྐྱེད་ནས་ཆེན་པོར་གྱུར་ཏོ ། །ཇི་ཙམ་དུས་གཞན་ཞིག་ན་བྲམ་ཟེ་ཟླ་གྲགས་ན་བར་གྱུར་ནས། དེ་ཆུང་མ་དང་བུས་ཡལ་བར་བོར་ཞིང་ན་བ་མ་སོས་ནས་དེ་ལ་བུ་མོ་མངག་གཞུག་མ་ཞིག་ཡོད་པ་དེས་བསམས་པ། བྲམ་ཟེ་ཟླ་གྲགས་ཀྱིས་ཁྲུས་གཞལ་བ་བརྒྱ་དག་གིས་ལོངས་སྤྱོད་དག་བསྒྲུབས་ཏེ་འདི་ན་བར་གྱུར་ན་ཆུང་མ་དང་བུས་ཡལ་བར་བོར་ཞིང་ན་བ་མ་སོས་པས་བདག་གིས་རྗེ་བོ་ཡལ་བར་དོར་བ་ནི་བདག་ལ་ཚུལ་དང་འཐུན་པ་མ་ཡིན་ནོ་སྙམ་ནས་དེ་དགེ་བའི་བསམ་པ་དང་རྗེ་བོ་ལ་སྙིང་ཉེ་བས་སྨན་པའི་གན་དུ་སོང་སྟེ་སྨྲས་པ། བཞིན་བཟངས་ཁྱོད་ཀྱིས་བྲམ་ཟེ་ཟླ་གྲགས་ཞེས་བྱ་བ་དེ་ཤེས་སམ། ཤེས་ཏེ་དེ་ཅི་ཉེས། དེ་ན་བར་གྱུར་ནས་ཆུང་མ་དང་བུས་ཡལ་བར་བོར་ནས་ན་བ་མ་སོས་ཀྱིས་དེའི་སྨན་སྟོན་ཅིག་།སྨན་པས་སྨྲས་པ། བུ་མོ་གལ་ཏེ་དེ་ཆུང་མ་དང་བུས་ཡལ་བར་བོར་ན་གཡོག་སུས་བྱེད། བཞིན་བཟངས་སྨན་སྟོན་ཅིག་དང་བདག་གིས་གཡོག་བྱའོ། །སྨན་པ་དེས་དེ་ལ་ནད་ཅི་ལས་གྱུར་པ་དྲིས་ནས་སྨན་བསྟན་ཏོ། །དེ་ནས་བུ་མོ་དེས་བྲམ་ཟེ་ཟླ་གྲགས་ཀྱི་གཡོག་བྱས་ནས་དེས་ནད་དེ་ལས་སོས་སོ། །བྲམ་ཟེ་ཟླ་གྲགས་ཀྱིས་བསམས་པ། བདག་ནད་དེ་ལྟ་བུས་བཏབ་ན་ཆུང་མ་དང་བུས་ཡལ་བར་བོར་ནས་སྲོག་དག་དང་ཅུང་ཟད་མ་བྲལ་བ་གང་ཡིན་པ་དེ་ནི་བུ་མོ་འདིའི་མཐུ་ཡིན་པས་བདག་གིས་འདི་ལ་ངལ་བ་འབྲས་བུ་དང་བཅས་པ་བསྐྱེད་པར་བྱའོ་སྙམ་དུ་རིག་ནས་བུ་མོ་དེ་བོས་ཏེ་སྨྲས་པ། བུ་མོ་ཁོ་བོ་ནད་དེ་ལྟ་བུས་བཏབ་ན་ཆུང་མ་དང་བུས་ཡལ་བར་བོར་ནས་ཁྱོད་ཀྱི་མཐུས་སྲོག་དག་དང་མ་བྲལ་བར་ཁོ་བོས་ཤེས་ཀྱིས་ཁྱོད་ལ་དམ་པ་ཅི་ཞིག་སྦྱིན་པར་བྱ་བ་དེ་སྨྲོས་ཤིག་།ཇོ་བོ་གལ་ཏེ་ཁྱོད་བདག་ལ་དགྱེས་ན་བདག་ཁྱོད་དང་ལྷན་ཅིག་མཇལ་བར་འཚལ་ལོ། །བུ་མོ་ཁྱོད་ལ་ཁོ་བོ་དང་ལྷན་ཅིག་ཕྲད་པས་ཅི་བྱ། ཁོ་བོས་ཁྱོད་ཀར་ཤ་པ་ཎ་ལྔ་བརྒྱ་སྦྱིན་ཞིང་བྲན་མོ་ལས་གཏང་ངོ ། །ཇོ་བོ་བདག
6.29a
ཤིན་དུ་རིང་དུ་མཆིས་སུ་ལགས་ཀྱང་བྲན་མོ་ཉིད་ལགས་ཀྱིས། གལ་ཏེ་ཁྱོད་བདག་ལ་དགྱེས་ན་བདག་ཁྱོད་དང་ལྷན་ཅིག་མཇལ་བར་འཚལ་ལོ། །དེས་དེ་གདོན་མི་ཟ་བར་དངན་དུས་བྱེད་པར་རིག་ནས་སྨྲས་པ། བུ་མོ་གང་གི་ཚེ་ཁྱོད་དུས་ལ་བབ་ཅིང་ཟླ་མཚན་དང་ལྡན་པར་གྱུར་པ་དེའི་ཚེ་ཁྱོད་ཁོ་བོའི་གན་དུ་ཤོག་ཤིག་།བུ་མོ་དེ་དེའི་ཚིག་གིས་སྙིང་དགའ་བར་གྱུར་ནས། ཟླ་མཚན་འཛག་པའི་ཉི་མ་བགྲང་ཞིང་འདུག་འདུག་ནས་གང་གི་ཚེ་ཟླ་མཚན་དང་ལྡན་པར་གྱུར་པ་དེའི་ཚེ་བྲམ་ཟེ་དེའི་གན་དུ་སོང་བ་དང ། དེས་དེ་དང་ལྷན་ཅིག་དགའ་མགུར་སྤྱད་ནས་དེ་ལ་སེམས་ཅན་ཞུགས་པར་གྱུར་ཏོ། །དེའི་ཆུང་མ་བྲམ་ཟེ་མོས་བྲམ་ཟེ་འདི་བུ་མོ་འདི་དང་ལྷན་ཅིག་དགའ་མགུར་སྤྱད་དོ་སྙམ་དུ་རིག་ནས་དེ་ཕྲག་དོག་གི་ཀུན་ནས་དཀྲིས་པ་ཀུན་དུ་སྤྱོད་པས་མི་བཟོད་པ་སྐྱེས་ནས་བུ་མོ་དེ་ལ་རྟག་ཏུ་ཁུ་ཚུར་དང་ཐལ་ལྕག་གིས་རྡེག་ཅིང་ཟས་ངན་པ་དང ། གོས་ངན་པ་སྲེལ་དུ་འཇུད་དོ། །བུ་མོ་དེས་བསམས་པ་བདག་གི་མངལ་དུ་ཞུགས་པའི་སེམས་ཅན་སྐལ་ཆད་འདི་སུ་ཞིག་ཡིན་ན་འདི་མངལ་དུ་ཞུགས་པའི་དུས་ཚུན་ཅད་ནས་བདག་རྟག་ཏུ་ཁུ་ཚུར་དང་ཐལ་ལྕག་དག་གིས་རྡེག་ཅིང་ཟས་ངན་པ་དང ། གོས་ངན་པ་སྲེལ་དུ་བཅུག་གོ་སྙམ་ནས་དེ་བདག་ཉིད་མྱ་ངན་བྱེད་ཅིང་འདུག་གོ། །ཇི་ཙམ་ན་ཟླ་བ་དགུ་ཚང་ནས་བཙས་པ་ལས་ཁྱེའུ་ཞིག་བྱུང་ནས་དེས་བསམས་པ། སེམས་ཅན་སྐལ་ཆད་འདི་བདག་གི་མངལ་དུ་ཞུགས་ནས་བདག་གིས་དེ་འདྲ་བའི་གནས་སྐབས་ཐོབ་པར་གྱུར་པས་གལ་ཏེ་འདི་སྐྱེས་པར་གྱུར་ན་བདག་ཐམས་ཅད་ཀྱི་ཐམས་ཅད་དུ་མེད་པར་འགྱུར་རོ་སྙམ་དུ་རིག་ནས་དེ་ཆོལ་ཟངས་སུ་བཞག་སྟེ་དོར་བར་བརྩམས་པ་དང ། དེའི་ཚེ་བྲམ་ཟེ་དེས་མཐོང་ནས་སྨྲས་པ། བུ་མོ་དེ་ཅི་ཡིན། དེས་སྨྲས་པ། ཅང་མ་ལགས་སོ། །དེས་ཆོལ་ཟངས་དེ་བལྟས་པ་དང ། ཇི་ཙམ་ན་ཁྱེའུ་ཞིག་མཐོང་ནས་དེས་སྨྲས་པ། བུ་མོ་ཅིའི་ཕྱིར་འདི་འདོར་བར་བྱེད། ཇོ་བོ་གང་ཚུན་ཆད་ནས་སེམས་ཅན་སྐལ་ཆད་འདི་བདག་གི་མངལ་དུ་ཞུགས་པར་གྱུར་པ་དེ་ཚུན་ཆད་ནས་བདག་བྲམ་ཟེ་མོ་འདིས་རྟག་ཏུ
6.29b
ཁུ་ཚུར་དང་ཐལ་ལྕག་དག་གིས་རྡེག་ཅིང ། འཚལ་མ་ངན་པ་དང་རད་པ་ངན་པ་སྲེལ་དུ་སྩལ་བས་གལ་ཏེ་འདི་སྐྱེས་པར་གྱུར་ན་བདག་ཐམས་ཅད་ཀྱི་ཐམས་ཅད་དུ་མ་མཆིས་པར་འགྱུར་བའི་སླད་དུའོ། །དེས་སྨྲས་པ། བུ་མོ་དེ་ནི་དེས་མ་ཉེས་ཀྱི་ཁོ་བོས་ཉེས་ཀྱིས་འདི་སྐྱེད་ཅིག་དང་འདི་ལ་ཁོ་བོས་དུས་ཤེས་པར་བྱའོ། །དེས་དེ་བསྙོད་པར་བརྩམས་པ་དང ། བྲམ་ཟེས་ཀྱང་བྲམ་ཟེ་མོ་ལ་སྨྲས་པ། གང་གི་ཚེ་ཁོ་བོ་དེ་ལྟར་ན་བར་གྱུར་པ་ན་ཁྱོད་དང་བུས་ཡལ་བར་བོར་བ་དེའི་ཚེ་ན་བུ་མོ་འདིས་སྨན་དང་གཡོག་གིས་ལེགས་པར་གསོས་པར་ཁོ་བོས་ཤེས་ཀྱིས། དེའི་ཕྱིར་གལ་ཏེ་འདི་ལ་མཁོ་བ་སྟོབས་པར་བྱེད་ན་དེ་ལྟ་ན་ལེགས། གལ་ཏེ་མི་བྱེད་ན་ཁོ་བོས་འདི་ཁྱིམ་བདག་མོར་གཞག་ཅིང་ཁྱོད་འདིའི་བྲན་མོར་བསྐོའོ། །བྲམ་ཟེ་མོ་དེ་སྐྲག་ཏེ་བསམས་པ། བྲམ་ཟེ་འདི་གཏུམ་པས་གལ་ཏེ་དེ་ལྟར་མ་བྱས་ན་དེ་ལྟ་བྱེད་པར་འགྱུར་བའི་གནས་ཡོད་དོ། །སྙམ་དུ་རིག་ནས་དེས་སྨྲས་པ། བྲམ་ཟེ་ཁྱོད་ཀྱིས་བུ་མོ་མངག་གཞུག་མ་ལ་དགའ་མགུར་སྤྱད་པ་དང ། ཁྱེའུ་འདི་ཁྱོད་ཀྱི་སྲས་ལགས་པར་ཡང་བདག་གིས་མ་འཚལ་ཏེ་ད་སླན་ཅད་ཅུང་ཟད་ཀྱང་ཐོ་འཚམ་པར་མི་བྱེད་དོ། །ཁྱེའུ་དེ་ཆོལ་ཟངས་སུ་བཅུག་པས་དེའི་མིང་ཆོལ་ཟངས་པ་ཞེས་བྱ་བར་ཆགས་སོ། །བྲམ་ཟེ་དེ་ཆོལ་ཟངས་པ་ལ་འདིའི་ལས་བདག་གི་གཡོག་བྱས་ཤིང་འདི་ཡང་བདག་ལས་བྱུང་བ་ཡིན་ནོ་སྙམ་པས་ཤིན་ཏུ་བྱམས་པ་དང་ལྡན་པར་འགྱུར་ཏེ། དེ་དེ་དང་ལྷན་ཅིག་གཅིག་ཏུ་ཟ་ཞིང་གང་དུ་འགྲོན་དུ་བོས་པར་འགྲོ་བ་དེར་ཡང་དེ་དང་ལྷན་ཅིག་འགྲོའོ། །ཇི་ཙམ་དུས་གཞན་ཞིག་ན་བྲམ་ཟེ་དེ་ཡང་ན་བར་གྱུར་ནས་དེ་རྩ་བ་དང ། སྡོང་བུ་དང ། འདབ་མ་དང ། མེ་ཏོག་དང ། འབྲས་བུའི་སྨན་དག་གིས་གསོ་བར་བྱེད་དེ། གསོ་བར་བྱེད་པ་ན་ནད་ན་བ་ཁོ་ནར་གྱུར་ནས་གང་གི་ཚེ་དེ་འཆི་བ་ལ་ཐུག་པའི་ཚོར་བ་བྱུང་ཞིང་རིང་པོ་མི་ཐོགས་པར་དུས་བྱེད་པར་འགྱུར་བ་དེའི་ཚེ་ན་དེས་བུ་ཐུ་བོ་ཉི་ཟླ་བཀུག་སྟེ་སྨྲས་པ། བུ་ཁོ་བོ་འདས་ནས་ཁྱོད་ནི་མྱ་ངན་བྱ་བ་མ་ཡིན་གྱི། ཁྱོད་ཀྱི་ནུ་བོ་ཆོལ་ཟངས་པ་འདི
6.30a
མྱ་ངན་བྱ་བར་འགྱུར་བས་ཁྱོད་ཀྱིས་འདི་ལ་མཁོ་བ་བསྟབས་པར་བྱའོ་ཞེས་སྨྲས་ནས། བསགས་པ་ཀུན་གྱི་མཐའ་ཟད་ཅིང ། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དེ་དུས་ཀྱི་ཆོས་དང་ལྡན་པར་གྱུར་ནས་དེ་ཉི་ཟླ་དང ། ཆོལ་ཟངས་པ་དང ། སྙིང་དུ་སྡུག་ཅིང་འབྲེལ་པའི་རྩ་ལག་གཞན་དག་གིས་དུར་ཁྲོད་དུ་ཁྱེར་ཏེ་བསྲེགས་ནས་དེའི་འོག་ཏུ་མྱ་ངན་བསང་བ་བྱས་ཏེ་འཁོད་དོ། །ཇི་ཙམ་དུས་གཞན་ཞིག་ན་ཉི་ཟླས་ཟན་གྱི་དུས་སུ་ཆོལ་ཟངས་པ་ཚུར་ཤོག་འདིར་ཟན་ཟོ་ཤིག་ཅེས་བོས་པ་དང ། དེ་ལ་མས་སྨྲས་པ། བུ་ཁྱོད་བྲན་མོའི་བུ་དང་ཇི་ལྟར་ལྷན་ཅིག་ཟན་ཟ་བར་བྱེད། མ་བདག་གིས་དུས་ཐམས་ཅད་དུ་ནུ་བོ་འདི་དང་ལྷན་ཅིག་ཟོས་ཤིང་འཐུངས་ན་ད་ཇི་ལྟར་བྲན་མོའི་བུ་ཞེས་བྱ། མས་སྨྲས་པ། བུ་ཁྱོད་ཀྱི་ཕ་གཏུམ་པར་གྱུར་པས་དེ་ལ་ཅུང་ཟད་སྨྲ་བར་སུས་ནུས་འདི་ནི་བྲན་མོའི་བུ་ཁོ་ན་ཡིན་ནོ། །ཆོལ་ཟངས་པས་ཐོས་ནས་དེ་མའི་གན་དུ་སོང་སྟེ་སྨྲས་པ། མ་བདག་བྲན་མོའི་བུ་ཡིན་པ་བདེན་ནམ། བུ་འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་པ་ཡིན་པས་སུ་ཞིག་སུའི་བྲན་ཡིན། བུ་ཡུལ་གཞན་དུ་སོང་ལ་ཐོས་པ་འཛིན་ཅིང་འདུག་ཤིག་།དེ་ཡུལ་གཞན་དུ་སོང་ནས་དེ་ཡུལ་གཞན་དུ་རང་གི་མིང་ཆོལ་ཟངས་པ་ཞེས་བྱ་བ་བཏང་སྟེ་ཟླ་བ་ཞི་བ་ཞེས་བྱ་བར་བསྒྲགས་ནས་ཇི་ཙམ་ན་མཐར་གྱིས་མཉན་ཡོད་དུ་ཕྱིན་ནས། དེ་ན་བྲམ་ཟེ་མདུན་ན་འདོན་ཞིག་འདུག་ནས། དེ་གཅིག་ནས་གཅིག་ཏུ་དེའི་གན་དུ་སོང་སྟེ་ཆ་ལུགས་དུལ་བ་དང་སྤྱོད་ལམ་ཞི་བས་གུས་པར་སྨྲ་བ་བྱས་ཏེ་མཐའ་གཅིག་ཏུ་འདུག་གོ། །དེ་ནས་བྲམ་ཟེ་དེས་འོངས་པ་ལེགས་སོ་ཞེས་བྱ་བའི་ཚིག་ཀུན་དུ་བརྗོད་པས་རབ་ཏུ་དགའ་བར་བྱས་ཏེ་དྲིས་པ། ཀྱེ་བྲམ་ཟེའི་ཁྱེའུ་ཁྱོད་ག་ལས་འོངས། རྡོ་འཇོག་ནས་མཆིས་སོ། །ཁྱོད་ཀྱིས་རྡོ་འཇོག་ན་འཁོད་པའི་སྐྱེ་བོའི་ཚོགས་དག་ཤེས་སམ་འཚལ་ཏོ། །དེ་ན་བྲམ་ཟེ་ཟླ་གྲགས་དེའི་གཏམ་ཅི་གྲག་བྲམ་ཟེའི་ཁྱེའུ་དེས་ངུ་བར་བརྩམས
6.30b
པ་དང ། དེས་སྨྲས་པ། བྲམ་ཟེའི་ཁྱེའུ་ཅིའི་ཕྱིར་ངུ ། དེ་བདག་གི་ཕ་ལགས་སོ། །འོ་ན་ཅིའི་ཕྱིར་ངུ ། དེ་གུམ་མོ། །བྲམ་ཟེའི་ཁྱེའུ་སྐྱེས་པས་ནི་གདོན་མི་ཟ་བར་འཆི་བར་བྱ་དགོས་ཀྱིས་ཁོ་བོ་ཁྱོད་ཀྱི་ཕའི་ཆུང་པོ་གྲོགས་ཡིན་གྱིས་བག་ཕོབ་ཤིག་དང་ཐམས་ཅད་བྱའོ། །དེས་སྨྲས་པ། མཁན་པོ་རེ་ཤིག་བགྱི་བ་གཞན་བཏང་སྟེ། ཇེ་རིག་བྱེད་ཀླག་པར་བགྱིའོ། །བུ་མ་ཉེས་ཏེ། བྲམ་ཟེ་རང་གི་རིགས་སྒྲོགས་པས་བྱ་བ་ནི་དེ་ཡིན་ནོ། །དེས་དེའི་དྲུང་དུ་རིག་བྱེད་ཀླག་པར་བརྩམས་པ་དང ། དེ་བློ་རྣོ་བ་དང ། བརྟན་པ་དང ། བརྩོན་འགྲུས་བརྩམས་པ་ཡིན་པས་དེས་དུས་ཅུང་ཞིག་གིས་རིག་བྱེད་བཞི་པོ་དག་བླགས་སོ། །བྲམ་ཟེ་དེ་མངོན་པར་དགའ་ནས་དེས་དེའི་བུ་མོ་རྒྱན་ཐམས་ཅད་ཀྱིས་བརྒྱན་ཏེ་དེའི་ཆུང་མར་བྱིན་ཞིང་བདག་དབང་བའི་ནོར་མང་པོ་དག་ཀྱང་བྱིན་ནོ། དེ་བྲམ་ཟེ་མདུན་ན་འདོན་གྱི་དམག་པར་གྱུར་ཅིང་རིག་བྱེད་བཞི་དང་ལྡན་པ་ཞེས་འཇིག་རྟེན་ཐམས་ཅད་ལ་རྣམ་པར་གྲགས་ཤིང ། སྦྱིན་པ་དང ། མཆོད་པ་དང ། བསྙེན་བཀུར་དག་གིས་ཁྱིམ་གྱི་འབྱོར་པ་ཉེ་བར་བསགས་པར་གྱུར་ཏོ། །ཇི་ཙམ་དུས་གཞན་ཞིག་ན་རྡོ་འཇོག་ན་གནས་པའི་སྐྱེ་བོའི་ཚོགས་དག་ཟོང་ཐོགས་ཏེ་མཉན་ཡོད་དུ་ལྷགས་ནས། དེ་དག་གིས་ཆོལ་ཟངས་པ་ཇི་ལྟར་བྲམ་ཟེ་མདུན་ན་འདོན་གྱི་དམག་པར་གྱུར་ཅིང ། རིག་བྱེད་བཞི་དང་ལྡན་པ། སྦྱིན་པ་དང ། མཆོད་པ་དང ། བསྙེན་བཀུར་དག་གིས་ཁྱིམ་གྱི་འབྱོར་པ་ཉེ་བར་བསགས་པར་གྱུར་པ་ཐོས་སོ། །ཐོས་ནས་ཀྱང་གྲོས་བྱ་བར་བརྩམས་པ། བདག་ཅག་འདོང་ཞིང་དེ་མངོན་སུམ་དུ་བྱས་ཏེ་རྡོ་འཇོག་ན་ཉི་ཟླ་བདེ་བའི་གཏམ་བྱའོ། །སྙམ་ནས་དེ་དག་དེའི་གན་དུ་སོང་སྟེ། དེ་དག་གིས་དེ་ངོ་ཤེས་ནས་ཅང་མ་སྨྲས་པར་དེ་ནས་ཟོང་བསྒྱུར་ཏེ་རིན་བླངས་ནས་རྡོ་འཇོག་ཏུ་དོང་ངོ ། །དེ་དག་གིས་ལམ་གྱི་ངལ་བ་བསོ་སྟེ་ཉི་ཟླ་ལ་སྨྲས་པ། མཉན་ཡོད་ན་ཁྱོད་ཀྱི་ནུ་བོ་ཆོལ་ཟངས་པ་བྲམ་ཟེ་འདུན་ན་འདོན་གྱི་དམག་པར་གྱུར་ཅིང ། རིག་བྱེད་བཞི་དང་ལྡན་པར་འཇིག་རྟེན་ཐམས་ཅད་ལ་རྣམ་པར་གྲགས་ཏེ། སྦྱིན་པ་དང ། མཆོད་པ་དང ། བསྙེན་བཀུར་དག
6.31a
གིས་ཁྱིམ་གྱི་འབྱོར་པ་ཉེ་བར་བསགས་པར་གྱུར་ཏོ། །དེ་ཡིད་དགའ་བ་སྐྱེས་ནས་མ་ལ་སྨྲས་པ། མ་ཆོལ་ཟངས་པ་དེ་མཉན་ཡོད་ན་བྲམ་ཟེ་མདུན་ན་འདོན་གྱི་དམག་པར་གྱུར་ཅིང ། རིག་བྱེད་བཞི་དང་ལྡན་པར་འཇིག་རྟེན་ཐམས་ཅད་ལ་གྲགས་ཏེ། སྦྱིན་པ་དང ། མཆོད་པ་དང ། བསྙེན་བཀུར་དག་གིས་ཁྱིམ་གྱི་འབྱོར་པ་ཉེ་བར་བསགས་ཤེས་གྲག་གོ། །མས་སྨྲས་པ། དེ་ལྟར་ག་ལ་འགྱུར་ཏེ། བྲན་མོའི་བུ་དེ་ལ་སུ་ཞིག་སྦྱིན་པ་དང ། མཆོད་པ་དང ། བསྙེན་བཀུར་བྱེད་པར་འོས་ན་དེ་ལ་བསྙེན་བཀུར་བྱེད་པར་འགྱུར། དེ་ནས་དེ་ཅང་མི་སྨྲ་བར་འདུག་གོ། །ཇི་ཙམ་དུས་གཞན་ཞིག་ན་ཉི་ཟླ་ལོངས་སྤྱོད་སྲབས་པར་གྱུར་ནས་མས་དེ་ལ་སྨྲས་པ། བུ་ནུ་བོ་དེའི་གན་དུ་སོང་ཤིག་དང་གལ་ཏེ་ན་དེ་ཁྱོད་ལ་ལོངས་སྤྱོད་དག་གིས་བགོ་བཤའ་བྱེད་པར་འགྱུར་རོ། །དེས་སྨྲས་པ། མ་དེའི་ཚེ་ན་དེ་བྲན་མོའི་བུ་ཡིན་ན་ད་ཇི་ལྟར་ནུ་བོར་འགྱུར། མས་སྨྲས་པ། བུ་གལ་ཏེ་དེ་ལྟ་ན་ཡང་སོང་ལ་དེ་ལས་བླང་བ་མ་བཟློག་ཤིག་།དེ་མས་ནན་གྱིས་མནན་པ་ན་དོན་འཐུན་བཙལ་ཏེ་མཉན་ཡོད་དུ་སོང་ངོ ། །ཆོལ་ཟངས་པས་ཇི་ལྟར་བདག་གི་ཕུ་བོ་ཉི་ཟླ་དེ་དོན་འཐུན་དང་ལྷན་ཅིག་འདིར་འོངས་ཏེ་ཕྱོགས་ག་གེ་མོ་ཞིག་ན་འདུག་གོ་ཞེས་ཐོས་སོ། །ཐོས་ནས་ཀྱང་བསུ་ནས་དེས་དེ་ལ་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་ནས་སྨྲས་པ། བདག་གིས་འདིར་ཟླ་བ་ཞི་བ་ཞེས་བྱ་བའི་མིང་བཏགས་ཀྱིས། བདག་ལ་ཁྱོད་ཆོལ་ཟངས་པ་ཞེས་མ་འབོད་ཅིག་།ཉི་ཟླས་སྨྲས་པ། ཁྱོད་ཟླ་བ་ཞི་བ་ཡིན་ན་སུ་ཞིག་གཞན་དུ་འབོད་པར་འགྱུར་དེས་ཉི་ཟླ་ཁྱིམ་དུ་ཁྲིད་དེ་བཀུར་སྟི་ཆེན་པོས་མཁོས་སུ་ཕབ་ནས་ཟན་བྱིན་ཏེ་བྲམ་ཟེ་མོ་ལ་སྨྲས་པ། ཁྱོད་ཤེས་པར་གྱིས་ཤིག་།འདི་ནི་ཁོ་བོའི་ཕོ་བོ་ཉི་ཟླ་ཞེས་བྱ་བ་ཡིན་གྱིས་ཁྱོད་ཀྱིས་འདི་ལ་མཁོ་བ་ཐམས་ཅད་བསྟབས་པར་བྱ་ཞིང་ཚིག་མི་གཅག་པ་དང ། རྟག་ཏུ་གུས་པ་དང་བཅས་པར་གྱིས་ཤིག་།དེས་ཀྱང་ཁས་བླངས་སོ། །ཉི་ཟླ་ནི་དེས་ཤིང་འགྲོགས་ན་བདེ་བ་ཡིན་ལ། ཆོལ་ཟངས་པ་ནི་གཏུམ་ཞིང་གཟུ་ལུམས་དང ། དྲག་ཤུལ་ཅན་ཡིན་པས་དེ་ཆུང་མ་དེ་ལ་ཉེས་པ་ཅུང་ཟད་ཙམ་གྱིས་ཀྱང་ཁུ་ཚུར་དང་ཐལ་ལྕག་དག
6.31b
གིས་རྡེག་པར་བྱེད་དོ། །བྲམ་ཟེ་མོ་དེས་ཉི་ཟླ་ལ་སྨྲས་པ། ཇོ་བོ་ཁྱོད་གཉིས་ནུ་མ་གཅིག་ལ་གསོལ་གསོལ་བའི་མཆེད་ལགས་ན་གང་གི་སླད་དུ་ཁྱོད་ནི་དེས་ཤིང་འགྲོགས་ན་བདེ་བ་ལགས་ལ། ཁྱོད་ཀྱི་གཅུང་པོ་འདི་ནི་གཏུམ་ཞིང་གཟུ་ལུམས་དང ། དྲག་ཤུལ་ཅན་ལགས་པ་འདི་ལ་རྒྱུ་ཅི་མཆིས། ཉི་ཟླས་སྨྲས་པ། སྲུ་འདིས་ཁྱིམ་གྱི་རིག་པ་མ་བླགས་སོ། །ཇོ་བོ་བདག་ལ་ཁྱིམ་གྱི་རིག་པ་དེ་སྩོལ་ཅིག་།ཉི་ཟླས་ཚིགས་སུ་བཅད་པ་སྨྲས་པ། རིག་པ་སུ་ལ་འང་སྦྱིན་བྱ་མིན། །རིག་དང་བཅས་ཏེ་འཆི་བར་བྱ། །རིག་པ་རིག་དང་གུས་པ་དང ། །ནོར་གྱིས་སྦྱིན་པར་བྱ་བ་ན། །བྲམ་ཟེ་མོས་སྨྲས་པ། ཇོ་བོ་ནོར་ཇི་ཙམ་གྱིས་སྩོལ་བར་མཛད། སྲུ་ཀར་ཤ་པ་ཎ་ལྔ་བརྒྱས་སོ། །དེས་ཀར་ཤ་པ་ཎ་ལྔ་བརྒྱ་ཐོགས་ཏེ་དེའི་རྐང་པ་གཉིས་ལ་གཏུགས་ནས་སྨྲས་པ། ཇོ་བོ་ཁྱིམ་གྱི་རིག་པ་དེ་སྩོལ་ཅིག་།ཉི་ཟླས་སྨྲས་པ། སྲུ་ཇེ་ཁོ་བོ་རྫོངས་ཤིག་དང་ནམ་འགྲོ་བའི་ཚེ་སྦྱིན་ནོ། །བྲམ་ཟེ་མོ་དེ་ཁྱིམ་ཐབ་ཀྱི་གན་དུ་སོང་སྟེ་སྨྲས་པ། རྗེའི་སྲས་ཁྱོད་ཀྱི་གཅེན་འདི་ཁྱིམ་གྱི་བྱ་བ་སེམས་པས་མི་དགའ་བར་འགྱུར་གྱིས་འདི་སླར་ཐོང་ཤིག་།དེས་སྨྲས་པ། བཟང་མོ་གལ་ཏེ་དེ་ལྟ་ན་ཁྱོད་ཀྱིས་ཇེ་འདིའི་ལམ་རྒྱགས་སྟ་གོན་གྱིས་ཤིག་དང ། ཁོ་བོས་དོན་འཐུན་བཙལ་བར་བྱའོ། །དེས་རྡོ་འཇོག་ཏུ་འགྲོ་བའི་དོན་འཐུན་བཙལ་བར་བརྩམས་ནས། བྲམ་ཟེ་མོ་དེས་དེའི་ལམ་རྒྱགས་སྟ་གོན་བྱས་ནས་ཀཱར་ཥ་པ་ཎ་ལྔ་བརྒྱ་ཐོགས་ཏེ་ཉི་ཟླའི་རྐང་པ་གཉིས་ལ་གཏུགས་ནས་སྨྲས་པ། ཇོ་བོ་ཁྱོད་བརྫང་བའི་དུས་འདི་ལགས་ཀྱིས་ཁྱིམ་གྱི་རིག་པ་སྩོལ་ཅིག་།ཉི་ཟླས་སྨྲས་པ། སྲུ་གང་གི་ཚེ་ཟླ་བ་ཞི་བ་ཁྱོད་ལ་རྡེག་པར་བྱེད་པ་དེའི་ཚེ་ཁྱོད་ཀྱིས་རིག་པ་འདི་ཀླག་པར་བྱའོ། །སྐྱེ་བོ་མང་པོ་གཞན་དག་དང ། །གཞན་གྱི་ཁྱིམ་དུ་འང་ཤེས་གྱུར་ཅིང ། །གྲོང་སྲུང་རིགས་ཀྱིས་ཤེས་གྱུར་གྱིས། །ཁ་རོག་འདུག་ཤིག་ཆོལ་ཟངས་པ། །གལ་ཏེ་སྨྲས་པ་འདི་དོན་ཅི་ཞེས་ཟེར་ན་དེ་ལ་གལ་ཏེ་རྡེག་པར་བྱེད་ན
6.32a
དོན་ཡང་བཤད་པར་བྱའོ་ཞེས་བརྗོད་པར་བྱའོ། །སྲུ་གསང་སྔགས་ཀྱི་ཚིག་དོན་དང་ལྡན་པ་འདི་དག་ནི་བརྗོད་པ་ཙམ་ཁོ་ནས་འབྲས་བུ་དང་བཅས་པར་འགྱུར་བ་ཡིན་གྱིས་ཕྱིས་འགྱོད་པར་མི་འགྱུར་བར་ལེགས་པར་ཟུང་ཤིག་།བྲམ་ཟེ་མོ་དེས་ཡི་གེ་དེ་དག་ལེགས་པར་བཟུང་ནས་ཟླ་བ་ཞི་བས་ཀྱང་རྡོ་འཇོག་ཏུ་འགྲོ་བའི་དོན་འཐུན་བཙལ་ནས་ཉི་ཟླ་ལ་ཀར་ཤ་པ་ཎ་དག་གིས་བགོ་བཤའ་བྱས་ཏེ་ལམ་རྒྱགས་བྱིན་ནས་དེ་སྐྱེལ་དུ་སོང་ངོ ། །བུ་མོ་དེས་བསམས་པ། ཅི་གསང་སྔགས་ཀྱི་ཚིག་འདི་དག་བདེན་ནམ་བརྫུན་པ་སད་པར་བྱའོ་སྙམ་ནས། དེས་ཟླ་བ་ཞི་བས་ཉི་ཟླ་བསྐྱལ་ཏེ་ཕྱིར་ལོག་པའི་ཚེ་བཟའ་བ་དང ། །བཏུང་བ་དང ། ཁྲུས་བྱ་བ་ཅི་ཡང་སྟ་གོན་མ་བྱས་སོ། །དེ་ནས་ཟླ་བ་ཞི་བས་སྨྲས་པ། བཟང་མོ་ཆུ་ཁྱེར་ཏེ་ཤོག་།ཁྲུས་བྱའོ། །ཆུང་མས་སྨྲས་པ། རྗེའི་སྲས་ཆབ་སྟ་གོན་མ་བགྱིས་སོ། །བཟང་མོ་གལ་ཏེ་དེ་ལྟ་ན་ཟས་ཁྱེར་ཏེ་ཤོག་བཟའོ། །རྗེའི་སྲས་དེ་ཡང་སྟ་གོན་མ་བགྱིས་སོ། །དེ་ཁྲོས་ཏེ་སྨྲས་པ། ངའི་ཕུ་བོ་འདུག་པ་དེའི་ཚེ་ན་ངས་རེ་ཤིག་ཁྱོད་བཏང་སྙོམས་སུ་བཞག་པར་ཟད་ཀྱི། ཁྱོད་ཀྱི་རང་བཞིན་ནི་མ་བརྡེགས་ཀྱི་བར་དུ་བྱེད་དུ་མི་བཏུབ་པ་ཡིན་ནོ་ཞེས་དེས་བསྣུན་པ་གཟས་ཏེ་བརྡེག་པར་བརྩམས་པ་དང ། ཆུང་མས་སྨྲས་པ། རྗེའི་སྲས་རེ་ཤིག་གཞེས་ཤིག་དང་ཁྱིམ་གྱི་རིག་པ་ཇེ་གསན་པར་བགྱིའོ། །དེས་སྨྲས་པ། ཐོས་པར་གྱིས་ཤིག་ཆུང་མས་སྐྱེ་བོ་མང་པོ་གཞན་དག་དང ། །གཞན་གྱི་ཁྱིམ་དུ་འང་ཤེས་གྱུར་ཅིང ། །གྲོང་སྲུང་རིགས་ཀྱིས་ཤེས་གྱུར་གྱིས། །ཁ་རོག་འདུག་ཤིག་ཆོལ་ཟངས་པ་ཞེས་སྨྲས་པ་དང ། དེས་སྨྲས་པ། བཟང་མོས་སྨྲས་པ་དེའི་དོན་ཅི་ཡིན། ཆུང་མས་སྨྲས་པ། གལ་ཏེ་རྡེག་པར་མཛད་ན་དོན་ཡང་ཁྱོད་ལ་བརྗོད་པར་བགྱིའོ། །དེ་རི་དགས་གནད་དུ་ཕོག་པ་ལྟར་ཟུག་རྔུས་ཟུག་ནས་སྨྲས་པ། མི་རྡེག་གིས་ཐོང་ལ་དོན་མ་སྨྲ་ཤིག་ཅེས་ཟེར་རོ། །དགེ་སློང་དག་དེའི་ཚེ་དེའི་དུས་ན་བྲམ་ཟེ་ཟླ་གྲགས་ཤེས་བྱ་བ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་ཆོལ་ཟངས་པ་ཞེས་བྱ་བ་གང་ཡིན་པ་དེ་ནི་འདུན་པ་འདི་ཡིན་ནོ། །དགེ་སློང་དག་དེའི་ཚེ་ཡང་འདིས་བྲམ་ཟེ་དང །
6.32b
ཁྱིམ་བདག་དེས་བདག་གི་མདུན་དུ་ང་ཉེ་དུར་བརྗོད་ཅིང་བདག་ཉིད་སྨྲ་བ་དང ། རྣམ་པར་སྨྲ་བ་བྱས་སོ། །ད་ལྟར་ཡང་འདིས་ཚངས་པ་མཚུངས་པར་སྤྱོད་པ་དེས་པ་དེས་པ་རྣམས་ཀྱི་མདུན་དུ་ང་ཉེ་དུར་བརྗོད་ཅིང་བདག་ཉིད་སྨྲ་བ་དང ། རྣམ་པར་སྨྲ་བར་བྱེད་དོ། །དགེ་སློང་དག་དེ་ལྟ་བས་ན་ང་ཉེ་དུར་བརྗོད་པ་རྣམས་ཀྱིས་ཚངས་པ་མཚུངས་པར་སྤྱོད་པ་གནས་བརྟན་རྣམས་དང ། བར་མ་རྣམས་དང ། གསར་བུ་རྣམས་ལ་ཡང་གུས་པ་དང་བཅས་པ་དང ། རྗེ་ས་དང་བཅས་པ་དང ། འཇིགས་པ་དང་བཅས་པའི་དབང་དུ་འགྱུར་བ་དག་གིས་གནས་པར་བྱའོ། །བཀའ་བློ་མི་བདེ་བའི་དགེ་འདུན་ལྷག་མ་སྟེ། བཅུ་གསུམ་པ་རྫོགས་སྷོ།། ་་་་་་་་་།།ཚེ་དང་ལྡན་པ་དག་བདག་གི་དགེ་འདུན་ལྷག་མའི་ཆོས་བཅུ་གསུམ་པོ་དག་བཏོན་ཟིན་ནོ། །དེ་དག་ལས་དགུ་ནི་ལྟུང་བ་དང་པོ་དག་ཉིད་ཀྱིས་སོ། །བཞི་ནི་ལན་གསུམ་གྱི་བར་གྱིས་སོ། །དགེ་སློང་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ལ་ཇི་སྲིད་དུ་ཤེས་བཞིན་དུ་འཆབ་པར་བྱེད་པ་དེ་སྲིད་དུ་དེས་མི་འདོད་བཞིན་དུ་སྤོ་བ་བྱའོ། །དགེ་སློང་གིས་མི་འདོད་བཞིན་དུ་སྤོ་བ་བྱས་ནས་འོག་ཏུ་ཞག་དྲུག་གི་བར་དུ་དགེ་འདུན་མགུ་བར་བྱ་བ་སྤྱད་པར་བྱའོ། །དགེ་སློང་གིས་མགུ་བར་བྱ་བ་སྤྱད་ནས་དབྱུང་བ་ལ་ཐོགས་ཏེ་ཆོས་དང་འཐུན་པར་བྱས་ལ་དགེ་སློང་གི་དགེ་འདུན་གྱི་སེམས་མགུ་བར་བྱས་ན། གང་ན་དགེ་སློང་ཉི་ཤུའི་ཚོགས་ཀྱི་དགེ་འདུན་ཡོད་པ་དེར་དགེ་སློང་དེ་དབྱུང་བར་བྱའོ། །གལ་ཏེ་དགེ་སློང་ཉི་ཤུར་གཅིག་གིས་མ་ཚང་བའི་ཚོགས་ཀྱི་དགེ་འདུན་གྱིས་དགེ་སློང་དེ་འབྱིན་པར་བྱེད་ན་དགེ་སློང་དེ་ཡང་མ་ཕྱིན་ལ། དགེ་སློང་དེ་དག་ཀྱང་སྨད་པར་བྱ་བ་ཡིན་ཏེ། དེ་ལ་དེ་ནི་ཆོ་ག་ཡིན་ནོ། །དགེ་འདུན་ལྷག་མ་རྣམས་རྫོགས་སྷོ།། ་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སྷོ། །དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབ་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་མཉན་ཡོད་དུ་བསོད་སྙོམས་ལ་རྒྱུ་བ་ན་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་ངོ ། །ཁྱིམ་བདག་གི་ཆུང་མ་སྦེད་མས་ཚེ་དང
6.33a
ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་ཚེ་དང་ལྡན་པ་འཆར་ཀའི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་འཆར་ཀ་ཚུར་སྤྱོན། བཙུན་པ་འཆར་ཀ་བྱོན་པ་ལེགས་སོ། །བཙུན་པ་འཆར་ཀ་གདན་བཤམས་པ་ཉིད་ལ་བཞུགས་ཤིག་།ཚེ་དང་ལྡན་པ་འཆར་ཀ་སྟན་བཤམས་པ་དེ་ལ་འདུག་གོ། །དེ་ནས་ཁྱིམ་བདག་གི་ཆུང་མ་སྦེད་མས། ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་པུས་མོ་གཉིས་ལ་པུས་མོ་གཉིས་གཏད་དེ་ཆོས་ཉན་པའི་ཕྱིར་འདུག་གོ། །ཚེ་དང་ལྡན་པ་འཆར་ཀས་དེ་ལ་ཆོས་སྙན་པ་དག་བསྟན་པར་བརྩམས་སོ། །དེའི་ཚེ་ན་རི་དགས་འཛིན་གྱི་མ་ས་ག་ཁྱིམ་དེའི་ཉེན་ཀོར་ན་འགྲོ་བས་རི་དགས་འཛིན་གྱི་མ་ས་གས་ཁྱིམ་བདག་གི་ཆུང་མ་སྦེད་མའི་ཁྱིམ་ན་ཚེ་དང་ལྡན་པ་འཆར་ཀའི་སྐད་ཀྱི་གདངས་གྲག་པ་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། ཀྱེ་མ་འཕགས་པ་འཆར་ཀ་སྐད་ཀྱི་གདངས་ཀྱིས་ཁྱིམ་བདག་གི་ཆུང་མ་སྦེད་མ་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་སྙན་པ་དག་སྟོན་པར་བྱེད་ཀྱིས་བདག་ཀྱང་གཞན་ལ་བརྩམས་པའི་ཆོས་མཉན་པའི་ཕྱིར་འགྲོའོ་སྙམ་མོ། །དེ་ནས་རི་དགས་འཛིན་གྱི་མ་ས་ག་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་བ་དང ། རི་དགས་འཛིན་གྱི་མ་ས་གས་ཁྱིམ་བདག་གི་ཆུང་མ་སྦེད་མ་ཚེ་དང་ལྡན་པ་འཆར་ཀའི་པུས་མོ་གཉིས་ལ་པུས་མོ་གཉིས་གཏད་དེ་ཆོས་མཉན་པའི་ཕྱིར་འདུག་པ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། གལ་ཏེ་ཁྱིམ་བདག་གམ། ཁྱིམ་བདག་གི་ཆུང་མ་འམ། ཁྱིམ་བདག་གི་བུ་མ་དད་པ་འགའ་ཞིག་གིས་འདི་མཐོང་བར་གྱུར་ན། འཕགས་པ་འཆར་ཀ་འདིས་ཁྱིམ་བདག་གི་ཆུང་མ་སྦེད་མ་དང་ལྷན་ཅིག་དབེན་པ་སྐྱབས་ཡོད་པར་དགེ་སྦྱོང་གི་ཚུལ་མ་ཡིན་པ་སྡིག་པའི་ལས་ཅུང་ཞིག་བྱས་སམ་བྱེད་པར་སེམས་སོ། །སྙམ་དུ་གདོན་མི་ཟ་བར་མཐར་ཐུག་པར་འགྲོ་བར་འགྱུར་བས་དེའི་ཕྱིར་འདི་ནི་བདག་གི་བྱ་བ་ཡིན་ནོ་སྙམ་ནས། དེ་ནས་རི་དགས་འཛིན་གྱི་མ་ས་ག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།
6.33b
མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རི་དགས་འཛིན་གྱི་མ་ས་གས་འདི་སྐད་ཅེས་གསོལ་ཏོ། །བཙུན་པ་བདག་གིས་ཁྱིམ་བདག་གི་མཆིས་བྲང་སྦེད་མའི་སྡུམ་པ་ན་ཚེ་དང་ལྡན་པ་འཆར་ཀའི་སྐད་ཀྱི་གདངས་གྲག་པ་ཐོས་ཏེ། ཐོས་ནས་བདག་འདི་སྙམ་བགྱིད་དེ། ཀྱེ་མ་འཕགས་པ་འཆར་ཀ་ཁྱིམ་བདག་གི་མཆིས་བྲང་སྦེད་མ་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་སྙན་པ་དག་སྟོན་པར་བགྱིད་ཀྱིས། བདག་ཀྱང་གཞན་ལ་བརྩམས་པའི་ཆོས་མཉན་པའི་སླད་དུ་མཆི་འོ་སྙམ་ནས། བདག་ཁྱིམ་བདག་གི་མཆིས་བྲང་སྦེད་མའི་སྡུམ་པ་ག་ལ་བ་དེར་མཆིས་པ་དང ། བདག་གིས་ཁྱིམ་བདག་གི་མཆིས་བྲང་སྦེད་མ་ཚེ་དང་ལྡན་པ་འཆར་ཀའི་པུས་མོ་གཉིས་ལ་པུས་མོ་གཉིས་གཏད་དེ་མཆིས་པ་མཐོང་ངོ ། །མཐོང་ནས་ཀྱང་བདག་འདི་སྙམ་བགྱིད་དེ། །གལ་ཏེ་ཁྱིམ་བདག་གམ། ཁྱིམ་བདག་གི་མཆིས་བྲང་ངམ། ཁྱིམ་བདག་གི་བུ་མ་དད་པ་འགའ་ཞིག་གིས་འདི་མཐོང་བར་གྱུར་ན། འཕགས་པ་འཆར་ཀ་འདིས་ཁྱིམ་བདག་གི་མཆིས་བྲང་སྦེད་མ་དང་ལྷན་ཅིག་དབེན་པ་སྐྱབས་མཆིས་པར་དགེ་སྦྱོང་གི་ཚུལ་མ་ལགས་པ་སྡིག་པའི་ལས་ཅུང་ཞིག་བགྱིས་སམ་བགྱིད་པར་སེམས་སོ་སྙམ་དུ་གདོན་མི་འཚལ་བར་མཐར་ཐུག་པར་མཆི་བར་འགྱུར་བས་དེའི་སླད་དུ་འདི་ནི་བདག་གི་བགྱི་བ་ལགས་སོ་སྙམ་བགྱིད་ན། བཙུན་པ་དེའི་སླད་དུ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ། གང་གིས་འཕགས་པ་དག་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་མཆིས་པ་ན་སྟན་ལ་མཆིས་པར་མི་འགྱུར་བར་འཕགས་པ་རྣམས་ལ་དྲན་པ་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ལེགས་སོ། །བཅོམ་ལྡན་འདས་ཀྱིས་རི་དགས་འཛིན་གྱི་མ་ས་ག་ལ་ཅང་མི་གསུང་བས་གནང་ངོ ། །དེ་ནས་རི་དགས་འཛིན་གྱི་མ་ས་གས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ནས་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི
6.34a
ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འདོད་པ་བྱར་རུང་བར་སྟན་ལ་འདུག་པར་བྱེད་ཅིང ། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཆོས་གསུམ་པོ་ཕམ་པར་འགྱུར་བ་འམ། དགེ་འདུན་ལྷག་མ་འམ། ལྟུང་བྱེད་ལས་ཆོས་གང་ཡང་རུང་བས་སྨྲས་པར་གྱུར་ལ་དགེ་སློང་གིས་འདུག་པར་ཁས་བླངས་ན་ཆོས་གསུམ་པོ་ཕམ་པར་འགྱུར་བ་འམ། དགེ་འདུན་ལྷག་མ་འམ། ལྟུང་བྱེད་ལས་ཆོས་གང་ཡང་རུང་བས་བྱེད་དུ་གཞུག་ཅིང ། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་གཞུག་སྟེ་དེ་ནི་མ་ངེས་པའི་ཆོས་སོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ་གཞན་ཡང་དེ་ལྟ་བུ་གང་ཡིན་པའོ། །བུད་མེད་ཀྱི་ཡུལ་དང་ཞེས་བྱ་བ་ནི་བུད་མེད་དམ་གཞོན་ནུ་མ་མི་ཚངས་པར་སྤྱད་པ་ལས་བྱུང་བའི་ཆོས་སྟེན་ནུས་པ་དང་ངོ ། །ལྷན་ཅིག་ཅེས་བྱ་བ་ནི་དེ་དང་ལྷན
6.34b
ཅིག་གོ། །གཅིག་པུ་གཅིག་དང་ཞེས་བྱ་བ་ནི་དེ་དེ་དང་ངོ ། །དབེན་པ་ཞེས་བྱ་བ་ནི་གང་ན་བུད་མེད་དང་སྐྱེས་པ་དང་མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ན་ཞེས་བྱ་བ་ནི་ལྔས་བསྐྱབས་པ་སྟེ། རྩིག་པས་བསྐྱབས་པ་དང ། རིབ་མས་བསྐྱབས་པ་དང ། ཡོལ་བས་བསྐྱབས་པ་དང ། ཐིབས་པོས་བསྐྱབས་པ་དང ། མཚན་མོས་བསྐྱབས་པ་ནའོ། །འདོད་པ་བྱར་རུང་བར་ཞེས་བྱ་བ་ནི་མི་ཚངས་པར་སྤྱོད་པ་བྱར་རུང་བར་རོ། །སྟན་ལ་ཞེས་བྱ་བ་ནི་གཞི་ལའོ། །འདུག་པར་བྱེད་ཅིང་ཞེས་བྱ་བ་ནི་འདོམ་གང་གི་ནང་དུ་རྐུབ་བཙོས་འཇོག་པར་བྱེད་ཅིང་ངོ ། །དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཤེས་བྱ་བ་ལ་ཡིད་ཆེས་པ་ཞེས་བྱ་བ་ནི་སངས་རྒྱས་ལ་མངོན་པར་དད་པ་དང ། ཆོས་དང་དགེ་འདུན་ལ་མངོན་པར་དད་པ་དང ། སངས་རྒྱས་ལ་སྐྱབས་སུ་སོང་བ་དང ། ཆོས་དང་དགེ་འདུན་ལ་སྐྱབས་སུ་སོང་བ་དང ། སངས་རྒྱས་ལ་གཅིག་ཏུ་གྱུར་པ་དང ། ཆོས་དང་དགེ་འདུན་ལ་གཅིག་ཏུ་གྱུར་པ་དང ། སངས་རྒྱས་ལ་ནེམ་ནུར་མེད་ཅིང་ཐེ་ཚོམ་མེད་པ་དང ། ཆོས་དང་དགེ་འདུན་དང ། སྡུག་བསྔལ་དང ། ཀུན་འབྱུང་དང ། འགོག་པ་དང ། ལམ་ལ་ནེམ་ནུར་མེད་ཅིང་ཐེ་ཚོམ་མེད་པ་དང ། བདེན་པ་མཐོང་བ་དང ། འབྲས་བུ་ཐོབ་པ་དང ། མངོན་པར་རྟོགས་པ་དང་ལྡན་པ་དང ། གང་གི་རང་གི་སྲོག་གི་ཕྱིར་ཡང་ཤེས་བཞིན་དུ་བརྫུན་གྱི་ཚིག་སྨྲ་བར་མི་ནུས་པའོ། །ཆོས་གསུམ་པོ་ཞེས་བྱ་བ་ལ། གསུམ་པོ་ཞེས་བྱ་བ་ནི་གྲངས་བསྟན་པའོ། །ཕམ་པར་འགྱུར་བ་འམ། དགེ་འདུན་ལྷག་མ་འམ། ལྟུང་བྱེད་ལས་ཆོས་གང་ཡང་རུང་བས་ཤེས་བྱ་བ་ལ། ཕམ་པར་འགྱུར་བ་ཞེས་བྱ་བ་ནི་བཞི་པོ་དག་ལས་གང་ཡང་རུང་བས་སོ། །དགེ་འདུན་ལྷག་མ་ཞེས་བྱ་བ་ནི་བཅུ་གསུམ་པོ་དག་ལས་གང་ཡང་རུང་བས་སོ། །ལྟུང་བྱེད་ཅེས་བྱ་བ་ནི་དགུ་བཅུ་པོ་དག་ལས་གང་ཡང་རུང་བས་སོ། །འདི་ལྟར་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ནི་ལྟུང་བ་ལ་མི་མཁས་པ་དང ། ལྟུང་བའི་གླེང་གཞི་ལ་མི་མཁས་པ་དང ། ལྟུང་བ་ཀུན་ནས་སློང་བ་ལ་མི
6.35a
མཁས་པ་ཡིན་པས་འདི་ལྟར་དེས་དགེ་སློང་མི་ཆོས་བླ་མ་སྨྲ་བ་འམ། བུད་མེད་ཀྱི་ཡུལ་དང་ལྷན་ཅིག་སྟན་གཅིག་ལ་ལུས་ཀྱིས་རེག་པར་བྱེད་པ་འམ། སྣོད་གཅིག་ཏུ་ཟ་བར་བྱེད་པ་འམ། ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་འཐུང་བ་འམ། ས་རྐོ་བ་འམ། རྩཝ་སྔོན་པོ་གཅོད་པ་འམ། དུས་མ་ཡིན་པར་ཟ་བ་འམ། གཞན་ཡང་རང་བཞིན་དང་བཅས་པའི་ཁ་ན་མ་ཐོ་བ་དང་བཅས་བའི་ལས་གང་བྱེད་པར་མཐོང་བ་དེ་དག་ལས་གང་ཁས་བླངས་པ་དེ་བྱེད་དུ་གཞུག་པའོ། །བྱེད་དུ་གཞུག་ཅེས་བྱ་བ་ནི་འཆགས་སུ་གཞུག་པའོ། །དེ་ནི་མ་ངེས་པའི་ཆོས་སོ་ཞེས་བྱ་བ་ནི་དེ་ནི་རྣམ་པར་མ་བཞག་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་ཁས་ལེན་ཅིང་འགྲེང་བ་ཡང་མི་ལེན་འདུག་པ་ཡང་མི་ལེན་ཉལ་བ་ཡང་མི་ལེན་ན། གང་ཁས་ལེན་པ་དེ་བྱེད་དུ་གཞུག་གོ། །དགེ་སློང་གིས་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་དང ། འགྲེང་བ་ཁས་ལེན་ཅིང་འདུག་པ་ཡང་མི་ལེན། ཉལ་བ་ཡང་མི་ལེན་ན་གང་ཁས་ལེན་པ་དེ་བྱེད་དུ་གཞུག་གོ། །དགེ་སློང་གིས་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་དང ། འགྲེང་བ་དང ། འདུག་པས་ཁས་ལེན་ཅིང་ཉལ་བ་མི་ལེན་ན་གང་ཁས་ལེན་པ་དེ་བྱེད་དུ་གཞུག་གོ། །དགེ་སློང་གིས་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་ཁས་ལེན་ན་ཐམས་ཅད་བྱེད་དུ་གཞུག་གོ། །གལ་ཏེ་དགེ་སློང་གིས་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་ཡང་ཁས་མི་ལེན་ཅིང་འགྲེང་བ་ཡང་མི་ལེན་འདུག་པ་ཡང་མི་ལེན། ཉལ་བ་ཡང་མི་ལེན་ན་དེ་ལ་ཆད་པའི་ལས་འོས་པ་ཡིན་པས་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་དེའི་ངོ་བོ་ཉིད་ཚོལ་དུ་གཞུག་པ་སྦྱིན་པར་བྱའོ། །འདི་ལྟར་སྦྱིན་པར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ
6.35b
འདུན་ཐམས་ཅད་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་འཆར་ཀ་འདི་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་ཡང་མཆིད་ཀྱིས་མི་འཚལ། འགྲེང་བ་ཡང་མི་འཚལ། འདུག་པ་ཡང་མི་འཚལ། ཉལ་བ་ཡང་མི་འཚལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་ཚེ་དང་ལྡན་པ་འཆར་ཀ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་དེའི་ངོ་བོ་ཉིད་ཚོལ་དུ་གཞུག་པ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་འཆར་ཀ་འདི་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་འགྲོ་བ་ཡང་མཆིད་ཀྱིས་མི་འཚལ། འགྲེང་བ་ཡང་མི་འཚལ། འདུག་པ་ཡང་མི་འཚལ ། ཉལ་བ་ཡང་མི་འཚལ་ཏེ། དེའི་སླད་དུ་དགེ་འདུན་གྱིས་ཚེ་དང་ལྡན་པ་འཆར་ཀ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་དེའི་ངོ་བོ་ཉིད་ཚོལ་དུ་གཞུག་པ་སྩོལ་ན། ཚེ་དང་ལྡན་པ་གང་དག་ཚེ་དང་ལྡན་པ་འཆར་ཀ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་དེའི་ངོ་བོ་ཉིད་ཚོལ་དུ་གཞུག་པ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ཚེ་དང་ལྡན་པ་འཆར་ཀ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་དེའི་ངོ་བོ་ཉིད་ཚོལ་དུ་གཞུག་སྩལ་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་དག་ངས་དགེ་སློང་དེའི་ངོ་བོ་ཉིད་ཚོལ་དུ་གཞུག་པ་བྱིན་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་དེའི་ངོ་བོ་ཉིད་ཚོལ་དུ་གཞུག་པ་བྱིན་པས་རབ་ཏུ་དབྱུང་བར་མི་བྱ།
6.36a
བསྙེན་པར་རྫོགས་པར་མི་བྱ། གནས་སྦྱིན་པར་མི་བྱ། དགེ་ཚུལ་ཉེ་བར་གཞག་པར་མི་བྱའོ། །དེས་དགེ་སློང་ལ་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། ཆོ་ག་ཉམས་པ་དང ། འཚོ་བ་ཉམས་པས་གླེང་བར་མི་བྱ། དྲན་པར་མི་བྱའོ། །དགེ་སློང་མ་ལ་སྟོན་པར་བསྐོ་བར་མི་བྱའོ། །སྔར་བསྐོས་ན་ཡང་དེས་དགེ་སློང་མ་ལ་བསྟན་པར་མི་བྱའོ། །དེས་གདམས་ངག་གཞག་པར་མི་བྱ། གསོ་སྦྱོང་གཞག་པར་མི་བྱ། དགག་དབྱེ་གཞག་པར་མི་བྱའོ། །དེས་གསོལ་བ་མི་བྱ་གསོལ་བ་དང་གཉིས་དང ། གསོལ་བ་དང་བཞིའི་ལས་མི་བྱའོ། །དེས་དགེ་འདུན་གྱི་ནང་དུ་གང་ཟག་འདུལ་བ་འཛིན་པ་གཞན་དག་ཡོད་ན་སོ་སོར་ཐར་པའི་མདོ་གདོན་པར་མི་བྱའོ། །དགེ་སློང་དེའི་ངོ་བོ་ཉིད་ཚོལ་དུ་གཞུག་པ་བྱིན་པས་ཀུན་དུ་སྤྱད་པར་བྱ་བའི་ཆོས་ཇི་ལྟར་བཅས་པ་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །མ་ངེས་པའི་ཆོས་དང་པོ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སྷོ། །དེ་ནས་དགེ་སློང་ཤི་རི་ཀ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས། མཐར་གྱིས་རྒྱལ་པོའི་ཁབ་ཏུ་བསོད་སྙོམས་རྒྱུ་བ་ན་ཁྱིམ་བདག་གི་ཆུང་མ་གསོ་སྦྱོང་འཕགས་ཀྱི་ཁྱིམ་ག་ལ་བ་དེར་སོང་ངོ ། །ཁྱིམ་བདག་གི་ཆུང་མ་གསོ་སྦྱོང་འཕགས་ཀྱིས་དགེ་སློང་ཤི་རི་ཀ་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་དགེ་སློང་ཤི་རི་ཀའི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་ཤི་རི་ཀ་ཚུར་སྤྱོན། བཙུན་པ་ཤི་རི་ཀ་བྱོན་པ་ལེགས་སོ། །བཙུན་པ་ཤི་རི་ཀ་གདན་བཤམས་པ་ཉིད་ལ་བཞུགས་ཤིག་།དགེ་སློང་ཤི་རི་ཀ་སྟན་བཤམས་པ་དེ་ལ་འདུག་གོ། །དེ་ནས་ཁྱིམ་བདག་གི་ཆུང་མ་གསོ་སྦྱོང་འཕགས་ཀྱིས་དགེ་སློང་ཤི་རི་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་པུས་མོ་གཉིས་ལ་པུས་མོ་གཉིས་མ་རེག་པར་ཆོས་མཉན་པའི་ཕྱིར་འདུག་གོ། །དགེ་སློང་ཤི་རི་ཀས
6.36b
དེ་ལ་ཆོས་སྙན་པ་སྙན་པ་དག་བསྟན་པར་བརྩམས་སོ། །དེའི་ཚེ་ན་དགེ་བསྙེན་མ་ལེགས་སྐྱེས་དེའི་ཉེན་ཀོར་ན་འགྲོ་བས་དགེ་བསྙེན་མ་ལེགས་སྐྱེས་ཀྱིས་ཁྱིམ་བདག་གི་ཆུང་མ་གསོ་སྦྱོང་འཕགས་ཀྱི་ཁྱིམ་ན་དགེ་སློང་ཤི་རི་ཀའི་སྐད་ཀྱི་གདངས་གྲགས་པ་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། ཀྱེ་མ་འཕགས་པ་ཤི་རི་ཀའི་སྐད་ཀྱི་གདངས་ཀྱིས་ཁྱིམ་བདག་གི་ཆུང་མ་གསོ་སྦྱོང་འཕགས་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་སྙན་པ་དག་སྟོན་པར་བྱེད་ཀྱིས། བདག་ཀྱང་གཞན་ལ་བརྩམས་པའི་ཆོས་མཉན་པའི་ཕྱིར་འགྲོའོ་སྙམ་མོ། །དེ་ནས་དགེ་བསྙེན་མ་ལེགས་སྐྱེས་ཁྱིམ་བདག་གི་ཆུང་མ་གསོ་སྦྱོང་འཕགས་ཀྱི་ཁྱིམ་ག་ལ་བ་དེར་སོང་བ་དང ། དགེ་བསྙེན་མ་ལེགས་སྐྱེས་ཀྱིས་ཁྱིམ་བདག་གི་ཆུང་མ་གསོ་སྦྱོང་འཕགས་དགེ་སློང་ཤི་རི་ཀའི་པུས་མོ་གཉིས་ལ་པུས་མོ་གཉིས་མ་རེག་པར་ཆོས་མཉན་པའི་ཕྱིར་འདུག་པ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། གལ་ཏེ་ཁྱིམ་བདག་གམ། ཁྱིམ་བདག་གི་ཆུང་མ་འམ། ཁྱིམ་བདག་གི་བུ་མ་དད་པ་འགའ་ཞིག་གིས་འདི་མཐོང་བར་གྱུར་ན་འཕགས་པ་ཤི་རི་ཀ་འདིས་ཁྱིམ་བདག་གི་ཆུང་མ་གསོ་སྦྱོང་འཕགས་དང་ལྷན་ཅིག་དབེན་པ་སྐྱབས་ཡོད་པར་དགེ་སྦྱོང་གི་ཚུལ་མ་ཡིན་པ་སྡིག་པའི་ལས་ཅུང་ཞིག་བྱས་སམ། བྱེད་པར་སེམས་སོ་སྙམ་དུ་གདོན་མི་ཟ་བར་མཐར་ཐུག་པར་འགྲོ་བར་འགྱུར་བས་དེའི་ཕྱིར་འདི་ནི་བདག་གིས་བྱ་བ་ཡིན་ནོ་སྙམ་ནས་དེ་ནས་དགེ་བསྙེན་མ་ལེགས་སྐྱེས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་དགེ་བསྙེན་མ་ལེགས་སྐྱེས་ཀྱིས་འདི་སྐད་ཅེས་གསོལ་ཏོ། །བཙུན་པ་བདག་གིས་ཁྱིམ་བདག་གི་མཆིས་བྲང་གསོ་སྦྱོང་འཕགས་ཀྱི་སྡུམ་པ་ན་འཕགས་པ་ཤི་རི་ཀའི་སྐད་ཀྱི་གདངས་གྲགས་པ་ཐོས་ཏེ། ཐོས་ནས་ཀྱང་བདག་འདི་སྙམ་བགྱིད་དེ། ཀྱེ་མ་འཕགས་པ་ཤི་རི་ཀ་ཁྱིམ་བདག་གི་མཆིས
6.37a
བྲང་གསོ་སྦྱོང་འཕགས་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་སྙན་པ་དག་སྟོན་པར་བགྱིད་ཀྱིས། བདག་ཀྱང་གཞན་ལ་བརྩམས་པའི་ཆོས་མཉན་པའི་སླད་དུ་མཆིའོ་སྙམ་ནས་བདག་ཁྱིམ་བདག་གི་མཆིས་བྲང་གསོ་སྦྱོང་འཕགས་ཀྱི་སྡུམ་པ་ག་ལ་བ་དེར་མཆིས་པ་དང ། བདག་གིས་ཁྱིམ་བདག་གི་མཆིས་བྲང་གསོ་སྦྱོང་འཕགས་དགེ་སློང་ཤི་རི་ཀའི་པུས་མོ་གཉིས་ལ་པུས་མོ་གཉིས་མ་རེག་པར་མཆིས་པ་མཐོང་ངོ ། །མཐོང་ནས་ཀྱང་བདག་འདི་སྙམ་བགྱིད་དེ། གལ་ཏེ་ཁྱིམ་བདག་གམ། ཁྱིམ་བདག་གི་མཆིས་བྲང་ངམ། ཁྱིམ་བདག་གི་བུ་མ་དད་པ་འགའ་ཞིག་གིས་འདི་མཐོང་བར་གྱུར་ན་འཕགས་པ་ཤི་རི་ཀ་འདིས་ཁྱིམ་བདག་གི་མཆིས་བྲང་གསོ་སྦྱོང་འཕགས་དང་ལྷན་ཅིག་དབེན་པ་སྐྱབས་མཆིས་པར་དགེ་སྦྱོང་གི་ཚུལ་མ་ལགས་པ་སྡིག་པའི་ལས་ཅུང་ཞིག་བགྱིས་སམ། བགྱིད་པར་སེམས་སོ་སྙམ་དུ་གདོན་མི་འཚལ་བར་མཐར་ཐུག་པར་མཆིས་པར་འགྱུར་བས་དེའི་སླད་དུ་འདི་ནི་བདག་གི་བགྱི་བ་ལགས་སོ་སྙམ་བགྱིད་ན། བཙུན་པ་དེའི་སླད་དུ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་དག་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་མཆིས་པ་ན་སྟན་ལ་མཆིས་པར་མི་འགྱུར་བར་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་ལགས་སོ། །བཅོམ་ལྡན་འདས་ཀྱིས་དགེ་བསྙེན་མ་ལེགས་སྐྱེས་ལ་ཅང་མི་གསུངས་བས་གནང་ངོ ། །དེ་ནས་དགེ་བསྙེན་མ་ལེགས་སྐྱེས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ནས་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་ཤི་རི་ཀ་ལ་རྨས་པ། ཤི་རི་ཀ
6.37b
ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འདོད་པ་བྱར་མི་རུང་བར་སྟན་ལ་འདུག་པར་བྱེད་ཅིང་དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གཉིས་པོ་དགེ་འདུན་ལྷག་མ་འམ། ལྟུང་བྱེད་ལས་ཆོས་གང་ཡང་རུང་བས་སྨྲས་པར་གྱུར་ལ། དགེ་སློང་གིས་འདུག་པར་ཁས་བླངས་ན་ཆོས་གཉིས་པོ་དགེ་འདུན་ལྷག་མ་འམ། ལྟུང་བྱེད་ལས་ཆོས་གང་ཡང་རུང་བས་བྱེད་དུ་གཞུག་ཅིང་དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་གཞུག་སྟེ་དེ་ཡང་མ་ངེས་པའི་ཆོས་སོ། །ཡང་དགེ་སློང་གང་ཞེས་བྱ་བ་ནི་ཤི་རི་ཀ་འམ་གཞན་ཡང་དེ་ལྟ་བུ་གང་ཡིན་པའོ། །བུད་མེད་ཀྱི་ཡུལ་དང་ཞེས་བྱ་བ་ནི་བུད་མེད་དང་གཞོན་ནུ་མ་མི་ཚངས་པར་སྤྱོད་པ་ལས་བྱུང་བའི་ཆོས་སྟེན་ནུས་པ་དང་ངོ ། །ལྷན་ཅིག་ཅེས་བྱ་བ་ནི་དེ་དང་ལྷན་ཅིག་གོ། །གཅིག་པུ་གཅིག་དང་ཞེས་བྱ་བ་ནི་དེ་དེ་དང་ངོ ། །དབེན་པ་ཞེས་བྱ་བ་ནི་གང་ན་བུད་མེད་དང ། སྐྱེས་པ་དང ། མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ན་ཞེས་བྱ་བ་ནི་ལྔས་བསྐྱབས་པ་སྟེ། རྩིག་པས་བསྐྱབས་པ་དང ། རིབ་མས་བསྐྱབས་པ་དང ། ཡོལ་བས་བསྐྱབས་པ་དང ། ཐིབས་པོས་བསྐྱབས་པ་དང ། མཚན
6.38a
མོས་བསྐྱབས་པ་ནའོ། །འདོད་པ་བྱར་མི་རུང་བར་ཞེས་བྱ་བ་ནི་མི་ཚངས་པར་སྤྱོད་པ་བྱར་མི་རུང་བར་རོ། །སྟན་ལ་ཞེས་བྱ་བ་ནི་ཁྲི་དང་ཁྲིའུ་ལའོ། །འདུག་པར་བྱེད་ཅིང་ཞེས་བྱ་བ་ནི་མདོམ་གང་གི་ནང་མ་ཡིན་པར་རྐུབ་བཙོས་འཇོག་པར་བྱེད་ཅིང་ངོ ། །དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཞེས་བྱ་བ་ལ། ཡིད་ཆེས་པས་ཞེས་བྱ་བ་ནི་སངས་རྒྱས་ལ་མངོན་པར་དད་པ་དང ། ཆོས་དང་དགེ་འདུན་ལ་མངོན་པར་དད་པ་དང ། སངས་རྒྱས་ལ་སྐྱབས་སུ་སོང་བ་དང ། ཆོས་དང་དགེ་འདུན་ལ་སྐྱབས་སུ་སོང་བ་དང ། སངས་རྒྱས་ལ་གཅིག་ཏུ་གྱུར་པ་དང ། ཆོས་དང་དགེ་འདུན་ལ་གཅིག་ཏུ་གྱུར་པ་དང ། སངས་རྒྱས་ལ་ནེམ་ནུར་མེད་ཅིང་ཐེ་ཚོམ་མེད་པ་དང ། ཆོས་དང ། དགེ་འདུན་དང ། སྡུག་བསྔལ་བ་དང ། ཀུན་འབྱུང་བ་དང ། འགོག་པ་དང ། ལམ་ལ་ནེམ་ནུར་མེད་ཅིང་ཐེ་ཚོམ་མེད་པ་དང ། བདེན་པ་མཐོང་བ་དང ། འབྲས་བུ་ཐོབ་པ་དང ། མངོན་པར་རྟོགས་པ་དང་ལྡན་པ་དང ། གང་གིས་རང་གི་སྲོག་གི་ཕྱིར་ཡང་ཤེས་བཞིན་དུ་བརྫུན་གྱི་ཚིག་སྨྲ་བར་མི་ནུས་པའོ། །ཆོས་གཉིས་པོ་ཞེས་བྱ་བ་ལ་གཉིས་པོ་ཞེས་བྱ་བ་ནི་གྲངས་བསྟན་པའོ། །དགེ་འདུན་ལྷག་མ་འམ། ལྟུང་བྱེད་ལས་ཆོས་གང་ཡང་རུང་བས་ཞེས་བྱ་བ་ལ། དགེ་འདུན་ལྷག་མ་ཞེས་བྱ་བ་ནི་བཅུ་གསུམ་པོ་དག་ལས་གང་ཡང་རུང་བས་སོ། །ལྟུང་བྱེད་ཅེས་བྱ་བ་ནི་དགུ་བཅུ་པོ་དག་ལས་གང་ཡང་རུང་བས་སོ། །འདི་ལྟར་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ནི་ལྟུང་བ་ལ་མི་མཁས་པ་དང ། ལྟུང་བའི་གླེང་གཞི་ལ་མི་མཁས་པ་དང ། ལྟུང་བ་ཀུན་ནས་སློང་བ་ལ་མི་མཁས་པ་ཡིན་པས་འདི་ལྟར་དེས་དགེ་སློང་མིའི་ཆོས་བླ་མ་སྨྲ་བ་འམ། བུད་མེད་ཀྱི་ཡུལ་དང་ལྷན་ཅིག་སྟན་གཅིག་ལ། ལུས་ཀྱིས་རེག་པར་བྱེད་པ་འམ། སྣོད་གཅིག་ཏུ་ཟ་བར་བྱེད་པ་འམ། ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་འཐུང་བ་འམ། ས་རྐོ་བ་འམ། རྩཝ་སྔོན་པོ་གཅོད་པ་འམ། དུས་མ་ཡིན་པར་ཟ་བ་དང ། གཞན་ཡང་རང་བཞིན་དང་བཅས་པའི་ཁ་ན་མ་ཐོ་བ
6.38b
དང་བཅས་པའི་ལས་གང་བྱེད་པར་མཐོང་བ་དེ་དག་ལས་གང་ཁས་བླངས་པ་དེ་བྱེད་དུ་གཞུག་པའོ། །བྱེད་དུ་གཞུག་ཅེས་བྱ་བ་ནི་འཆགས་སུ་གཞུག་པའོ། །དེ་ཡང་མ་ངེས་པའི་ཆོས་སོ་ཞེས་བྱ་བ་ནི་དེ་ཡང་རྣམ་པར་མ་བཞག་པའི་ཆོས་ཡིན་པའོ། །ལྟུང་བ་རྣམ་པར་བཞག་པ་དང ། དེའི་ངོ་བོ་ཉིད་ཚོལ་དུ་གཞུག་པའི་སྦྱིན་པ་དང ། དེའི་ངོ་བོ་ཉིད་ཚོལ་དུ་གཞུག་པ་བྱིན་པའི་ཀུན་དུ་སྤྱོད་པའི་ཆོས་དག་ནི་སྔ་མ་བཞིན་དུ་ཤེས་པར་བྱའོ། །མ་ངེས་པའི་ཆོས་གཉིས་རྫོགས་སྷོ།། ་་་་་་་།། སྡོམ་ལ། འཆང་བ་འབྲལ་བ་འཇོག་པ་དང ། །འཁྲུར་འཇུག་པ་དང་ལེན་པ་དང ། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྣམས་ལ་ཆོས་གོས་མང་བ་ཉིད་འདི་ལྟ་བུ་འདི་བྱུང་སྟེ། ཆོས་གོས་གཞན་གྱིས་ནི་གཙུག་ལག་ཁང་དུ་ཆགས་ཆག་འདེབས་པར་བྱེད། གཞན་གྱིས་ནི་ལེགས་པར་ཉུག་པར་བྱེད། གཞན་གྱིས་ནི་ལྕི་བ་སར་པའི་བྱུག་པས་སྐུད་པར་བྱེད། གཞན་གྱིས་ནི་ལག་པ་དང་རྐང་པ་དག་འཁྲུ་བར་བྱེད། གཞན་གྱིས་ནི་སོ་ཤིང་འདོར་བར་བྱེད། གཞན་གྱིས་ནི་གྲོང་དུ་བསོད་སྙོམས་ལ་རྒྱུ་བར་བྱེད། གཞན་གྱིས་ནི་ཟས་ཀྱི་གྲལ་དུ་བཀད་པར་བྱེད། གཞན་གྱིས་ནི་མཁན་པོ་དང་སློབ་དཔོན་དག་ལ་བལྟར་འགྲོ་བར་བྱེད། གཞན་གྱིས་ནི་སྟོན་པའི་གདམས་ངག་ཉམས་སུ་མྱོང་བར་བྱེད། གཞན་གྱིས་ནི་ཉིན་མོ་ཆོས་མཉན་པ་ཉམས་སུ་མྱོང་བར་བྱེད། གཞན་གྱིས་ནི་མཚན་མོ་ཆོས་མཉན་པ་ཉམས་སུ་མྱོང་བར་བྱེད་དེ། དེ་དག་གྱོན་པ་དང་འབུད་པར་བྱེད་པ་ན་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་རྣམས་ལ་ཆོས་གོས་མང་བ་ཉིད་འདི་ལྟ་བུ་འདི་བྱུང་སྟེ། ཆོས་གོས་གཞན་གྱིས་ནི་གཙུག་ལག་ཁང་ཆག་ཆག་འདེབས་པར་བྱེད། གཞན་གྱིས་ནི་ལེགས་པར་ཉུག
6.39a
པར་བྱེད། གཞན་གྱིས་ནི་ལྕི་བ་སར་པའི་བྱུག་པས་སྐུད་པར་བྱེད། གཞན་གྱིས་ནི་ལག་པ་དང་རྐང་པ་དག་འཁྲུ་བར་བྱེད། གཞན་གྱིས་ནི་སོ་ཤིང་འདོར་བར་བྱེད། གཞན་གྱིས་ནི་གྲོང་དུ་བསོད་སྙོམས་ལ་རྒྱུ་བར་བྱེད། གཞན་གྱིས་ནི་ཟས་ཀྱི་གྲལ་དུ་བཀད་པར་བྱེད། གཞན་གྱིས་ནི་མཁན་པོ་དང་སློབ་དཔོན་དག་ལ་བལྟར་འགྲོ་བར་བྱེད། གཞན་གྱིས་ནི་སྟོན་པའི་གདམས་ངག་ཉམས་སུ་མྱོང་བར་བྱེད། གཞན་གྱིས་ནི་ཉིན་མོ་ཆོས་མཉན་པ་ཉམས་སུ་མྱོང་བར་བྱེད། གཞན་གྱིས་ནི་མཚན་མོ་ཆོས་མཉན་པ་ཉམས་སུ་མྱོང་བར་བྱེད་དེ། དེ་དག་བྱོན་པ་དང་འབུད་པར་བྱེད་པ་ན་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ་ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་ལ་ཆོས་གོས་མང་བ་ཉིད་འདི་ལྟ་བུ་འདི་བྱུང་སྟེ། ཆོས་གོས་གཞན་གྱིས་ནི་གཙུག་ལག་ཁང་དུ་ཆགས་ཆགས་འདེབས་པར་བྱེད། གཞན་གྱིས་ནི་ལེགས་པར་ཉུག
6.39b
པར་བྱེད། གཞན་གྱིས་ནི་ལྕི་བ་སར་པའི་བྱུག་པས་སྐུད་པར་བྱེད། གཞན་གྱིས་ནི་ལག་པ་དང་རྐང་པ་དག་འཁྲུ་བར་བྱེད། གཞན་གྱིས་ནི་སོ་ཤིང་འདོར་བར་བྱེད། གཞན་གྱིས་ནི་གྲོང་དུ་བསོད་སྙོམས་ལ་རྒྱུ་བར་བྱེད། གཞན་གྱིས་ནི་ཟས་ཀྱི་གྲལ་དུ་བཀད་པར་བྱེད། གཞན་གྱིས་ནི་མཁན་པོ་དང་སློབ་དཔོན་དག་ལ་བལྟར་འགྲོ་བར་བྱེད། གཞན་གྱི་ནི་སྟོན་པའི་གདམས་ངག་ཉམས་སུ་མྱོང་བར་བྱེད། གཞན་གྱིས་ནི་ཉིན་མོ་ཆོས་མཉན་པ་ཉམས་སུ་མྱོང་བར་བྱེད། གཞན་གྱིས་ནི་མཚན་མོ་ཆོས་མཉན་པ་ཉམས་སུ་མྱོང་བར་བྱེད་དེ། ཁྱེད་ཅག་གྱོན་པ་དང་འབུད་པར་བྱེད་པ་ན་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་གསོ་དཀའ་བ་དང ། དགང་དཀའ་བ་དང ། འདོད་པ་ཆེ་བ་དང ། ཆོག་མི་ཤེས་པ་རྣམ་པར་སྨད་དོ། །དེ་ནས་བཅོམ་ལྡན་འདས་ཀྱིས་གསོ་སླ་བ་དང ། དགང་སླ་བ་དང ། འདོད་པ་ཆུང་བ་དང ། ཆོག་ཤེས་པ་དང ། ཕྲེང་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། ཚོད་ཤེས་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམས་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ
6.40a
གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་ཆོས་གོས་གསུམ་བཅང་བར་བྱའོ། །དེ་ལས་ལྷག་པར་འཆང་ན་སྤང་བའི་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་ཚེ་དང་ལྡན་པ་འོད་སྲུང་ཆེན་པོ་རྒྱལ་པོའི་ཁབ་ན་དགོན་པའི་སྤྱིལ་བུ་ན་འདུག་སྟེ། གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་དགེ་འདུན་ལ་གཏད་པའི་ཚེ་ཁྱིམ་བདག་གཅིག་གིས་ཡུན་རིང་པོ་ནས་སྨོན་པ་ཀྱེ་མ་བདག་གིས་གནས་བརྟན་འོད་སྲུང་ཆེན་པོ་ལྷ་དང་མིས་མཆོད་པ་བཤོས་གསོལ་ཏེ། རས་ཡུག་ཆེན་ཞིག་བསྐོན་ན་ཅི་མ་རུང་སྙམ་ན་དེའི་འདོད་པ་ཡོངས་སུ་རྫོགས་པར་མ་གྱུར་ནས། དེ་ནས་ཁྱིམ་བདག་དེ་རས་ཡུག་ཆེན་ཐོགས་ནས་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་ཁྱོད་ཀྱིས་ད་ལྟར་གནས་བརྟན་འོད་སྲུང་ཆེན་པོ་ག་ལ་བཞུགས་ཅི་གསན། ཁྱིམ་བདག་དགོན་པའི་སྤྱིལ་བུ་ན་འདུག་ཅེས་ཐོས་སོ ། །ཇི་ཙམ་བྱོན་པར་འགྱུར། འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེའོ། །བཙུན་པ་ཀུན་དགའ་བོ་མཁྱེན་པར་མཛོད་ཅིག་།འདི་ན་བདག་ཡུན་རིང་པོ་ནས་སྨོན་པ། ཀྱེ་མ་བདག་གིས་གནས་བརྟན་འོད་སྲུང་ཆེན་པོ་ལྷ་དང་མིས་མཆོད་པ་བཤོས་གསོལ་ཏེ་རས་ཡུག་ཆེན་ཞིག་བཀོན་ན་ཅི་མ་རུང་སྙམ་ན། བདག་གིས་རས་ཡུག་ཆེན་དེ་ཡང་འཚལ་ཏེ་མཆིས་ན། བཙུན་པ་ཀུན་དགའ་བོ་མཁྱེན་པར་མཛོད་ཅིག་།བདག་ཅག་ཁྱིམ་པ་དག་ནི་བགྱི་བ་མང་བ་དང ། བགྱིད་པ་མང་བ་ལགས་ཀྱི། ཀྱེ་མ་བཙུན་པ་ཀུན་དགའ་བོས་བདག་ལ་ཐུགས་བརྩེ་བའི་སླད་དུ་གནས་བརྟན་འོད་སྲུང་ཆེན་པོ་ལྷ་དང་མིས་མཆོད་པ་ལ་རས་ཡུག་ཆེན་འདི་བསྐོན་དུ་གསོལ། དེ་ནས་ཚེ་དང་ལྡན
6.40b
པ་ཀུན་དགའ་བོ་འདི་སྙམ་དུ་སེམས་ཏེ། གལ་ཏེ་བདག་གིས་ཁྱིམ་བདག་ལས་རས་ཡུག་ཆེན་བླངས་ན་ནི་བསླབ་པའི་གཞི་རལ་བར་ཡང་འགྱུར། གལ་ཏེ་མ་བླངས་ན་ནི་ཁྱིམ་བདག་གི་བསོད་ནམས་ཀྱི་བར་ཆད་དང ། གནས་བརྟན་འོད་སྲུང་ཆེན་པོའི་རྙེད་པའི་བར་ཆད་དུ་ཡང་འགྱུར་ན་བདག་གིས་བླངས་པར་གྱུར་ན་དུས་ཡིན་པའི་ཕྱིར་བཅོམ་ལྡན་འདས་ཀྱིས་གནང་བར་འགྱུར་བ་གང་ཡིན་པ་དེའི་གནས་ཀྱང་ཡོད་པར་འགྱུར་གྲང་སྙམ་ནས། དེ་ནས་ཚེ་དང་ལྡན་པ་ཀུན་དགའ་བོས་ཁྱིམ་བདག་ལས་རས་ཡུག་ཆེན་བླངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ལེགས་སོ་ལེགས་སོ། །ངས་གནང་བ་གང་ཡིན་པ་དེ་ཁྱོད་ཀྱིས་ཤེས་ཏེ། དེ་ལྟ་བས་ན་དགེ་སློང་གིས་ཞག་བཅུའི་བར་དུ་གོས་ལྷག་པ་རུང་བར་མ་བྱས་པ་བཅང་བར་རྗེས་སུ་གནང་ངོ ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་རྣམས་དང ། བསླབ་པ་ལ་གུས་པ་རྣམས་དང ། བསླབ་པ་ལ་ཡོ་བྱད་བསྙུངས་པ་རྣམས་དང ། སྦྱངས་པའི་ཡོན་ཏན་རྣམས་དང ། མཛེས་པ་རྣམས་དང ། ཚོད་ཤེས་པ་རྣམས་ཀྱི་བསྔགས་པ་བརྗོད་ནས་དགེ་སློང་རྣམས་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་ཞག་བཅུའི་བར་དུ་གོས་ལྷག་པ་རུང་བར་མ་བྱས་པ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །ཆོས་གོས་ཟིན་པས་སྲ་བརྐྱང་ཕྱུང་ན་ཞེས་བྱ་བ་ལ། ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡང་ཡོད། སྲ་བརྐྱང་ཕྱུང་ལ་ཆོས་གོས་མ་ཟིན་པ་ཡང་ཡོད།
6.41a
ཆོས་གོས་ཟིན་ཅིང་སྲ་བརྐྱང་ཕྱུང་བ་ཡང་ཡོད། ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཡང་ཡོད་དོ། །དེ་ལ་རེ་ཤིག་ཇི་ཙམ་གྱིས་ན་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡིན་ཞེ་ན། འདི་ལྟ་སྟེ། དགེ་སློང་གིས་ཆོས་གོས་དག་བཀྲུ་བ་དང ། དྲ་བ་དང ། དྲུབ་པ་དང ། ཁ་བསྒྱུར་ཟིན་ལ་དགེ་འདུན་གྱིས་སྲ་བརྐྱང་མ་ཕྱུང་བ་ཡིན་ཏེ། དེ་ཙམ་གྱིས་ན་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡིན་ནོ། །ཇི་ཙམ་གྱིས་ན་སྲ་བརྐྱང་ཕྱུང་ལ་ཆོས་གོས་མ་ཟིན་པ་ཡིན་ཞེ་ན། འདི་ལྟ་སྟེ། དགེ་སློང་གིས་ཆོས་གོས་དག་བཀྲུ་བ་དང ། དྲ་བ་དང ། དྲུབ་པ་དང ། ཁ་བསྒྱུར་མ་ཟིན་ལ་དགེ་འདུན་གྱིས་སྲ་བརྐྱང་ཕྱུང་བ་ཡིན་ཏེ། དེ་ཙམ་གྱི་ན་སྲ་བརྐྱང་ཕྱུང་ལ་ཆོས་གོས་མ་ཟིན་པ་ཡིན་ནོ། །ཇི་ཙམ་གྱིས་ན་ཆོས་གོས་ཟིན་ཅིང་སྲ་བརྐྱང་ཕྱུང་བ་ཡིན་ཞེ་ན། འདི་ལྟ་སྟེ། དགེ་སློང་གིས་ཆོས་གོས་དག་བཀྲུ་བ་དང ། དྲ་བ་དང ། དྲུབ་པ་དང ། ཁ་བསྒྱུར་ཟིན་ཅིང་དགེ་འདུན་གྱིས་ཀྱང་སྲ་བརྐྱང་ཕྱུང་བ་ཡིན་ཏེ། དེ་ཙམ་གྱིས་ན་སྲ་བརྐྱང་ཕྱུང་ཞིང་ཆོས་གོས་ཟིན་པ་ཡིན་ནོ། །ཇི་ཙམ་གྱིས་ན་ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཡིན་ཞེ་ན། རྣམ་པ་དེ་དག་མ་གཏོགས་པའོ། །ཞག་བཅུའི་བར་དུ་ཞེས་བྱ་བ་ནི་མཚན་མོ་བཅུའི་མཐར་རོ། །གོས་ལྷག་པ་ཞེས་བྱ་བ་ནི་བྱིན་གྱིས་བརླབ་པར་བྱ་བ་ལས་ལྷག་པའོ། །རུང་བར་མ་བྱས་པ་ཞེས་བྱ་བ་ནི་བརྟག་པ་མ་བྱས་པའོ། །བཅང་བར་བྱའོ་ཞེས་བྱ་བ་ནི་བདག་གིར་བྱ་བའོ། །དེ་ལས་འདས་པར་འཆང་ན་ཞེས་བྱ་བ་ནི་དེ་ལས་ཐལ་བར་འཆང་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་ཉི་ཤུ་ལྔ་པ། དེ་ལ་ལྟུང་བར་ཇི་ལྟར་འགྱུར་ཞེ་ན། འདི་ལྟ་སྟེ་དགེ་སློང་གིས་ཚེས་ལ་གོས་རྙེད་ན་དགེ་སློང་དེས་གོས་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི
6.41b
བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་གོས་མ་རྙེད་ཀྱང་ཚེས་གཉིས་སམ། ཚེས་གསུམ་འམ། ཚེས་དགུ་འམ། ཚེས་བཅུ་ཚུན་ཅད་ཀྱིས་གོས་རྙེད་ན་དགེ་སློང་དེས་གོས་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་གོས་ཤིག་རྙེད་ཅིང་དེས་ཚེས་གཉིས་ལ་ཡང་གཞན་ཞིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་བྱིན་གྱིས་བརླབ་པར་བྱ་ཞིང་ཕྱི་མ་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་བྱིན་གྱིས་བརླབས་པར་བྱ་ཞིང་སྔ་མ་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་དང་ཚེས་གཉིས་ལ་མ་རྙེད་ཀྱང་ཚེས་གསུམ་དང་ཚེས་བཅུ་ཚུན་ཅད་ཀྱིས་གོས་ཤིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་བྱིན་གྱིས་བརླབ་པར་བྱ་ཞིང་ཕྱི་མ་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་བྱིན་གྱིས་བརླབ་པར་བྱ་ཞིང་སྔ་མ་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་གོས་གཉིས་རྙེད་ན་དགེ་སློང་དེས་གོས་དེ་གཉིས་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར
6.42a
བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། །གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་གོས་གཉིས་མ་རྙེད་ཀྱང་ཚེས་གཉིས་སམ། ཚེས་གསུམ་འམ། ཚེས་དགུ་འམ། ཚེས་བཅུ་ཚུན་ཅད་ཀྱིས་གོས་གཉིས་རྙེད་ན་དགེ་སློང་དེས་གོས་དེ་གཉིས་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་གོས་གཉིས་ཤིག་རྙེད་ཅིང་དེས་ཚེས་གཉིས་ལ་ཡང་གོས་གཞན་གཉིས་ཤིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་གཉིས་བྱིན་གྱིས་བརླབ་པར་བྱ་ཞིང་ཕྱི་མ་གཉིས་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་གཉིས་བྱིན་གྱིས་བརླབ་པར་བྱ་ཞིང་སྔ་མ་གཉིས་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་དང་ཚེས་གཉིས་ལ་མ་རྙེད་ཀྱང་ཚེས་གསུམ་དང་ཚེས་བཅུ་ཚུན་ཅད་ཀྱིས་གོས་གཉིས་ཤིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་གཉིས་བྱིན་གྱིས་བརླབ་པར་བྱ་ཞིང་ཕྱི་མ་གཉིས་གཏོང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་གཉིས་བྱིན་གྱིས་བརླབ་པར་བྱ་ཞིང་སྔ་མ་གཉིས་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རིང་ཤར་ན
6.42b
སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་གོས་མང་པོ་རྙེད་ན་དགེ་སློང་དེས་གོས་དེ་དག་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏོང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་གོས་མང་པོ་མ་རྙེད་ཀྱང་ཚེས་གཉིས་སམ། ཚེས་གསུམ་འམ། ཚེས་དགུ་འམ། ཚེས་བཅུ་ཚུན་ཅད་ཀྱིས་གོས་མང་པོ་རྙེད་ན་དགེ་སློང་དེས་གོས་དེ་དག་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏོང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་གོས་མང་པོ་དག་ཅིག་རྙེད་ཅིང་དེས་ཚེས་གཉིས་ལ་ཡང་གཞན་མང་པོ་དག་ཅིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་དག་བྱིན་གྱིས་བརླབ་པར་བྱ་ཞིང་ཕྱི་མ་དག་གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་དག་བྱིན་གྱིས་བརླབ་པར་བྱ་ཞིང་སྔ་མ་དག་གཏོང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་དང་ཚེས་གཉིས་ལ་མ་རྙེད་ཀྱང་ཚེས་གསུམ་དང་ཚེས་བཅུ་ཚུན་ཅད་ཀྱིས་གོས་མང་པོ་དག་ཅིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་དག་གཏོང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན
6.43a
སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་སྲིད་དུ་སྤང་བའི་དངོས་པོ་དེ་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོད་བྱད་གང་ཡང་རུང་བ་གཞན་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཆང་བའི་སྤང་བ་སྟེ་དང་པོ་རྫོགས་སོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྣམས་ལ་ཆོས་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་དབྱར་གནས་པར་ཁས་བླངས་པ་གང་ཡང་རུང་བས་ཆོས་གོས་རྙེད་ནས་དེས་དེ་བཀྲུས་ཤིང་དྲས་ཏེ་དྲུབས་ནས་ཁ་བསྒྱུར་ཏེ་གཏུར་བུའི་བམ་པོ་བསྒྲེས་ནས་དགེ་སློང་གནས་པ་དང ། གཉུག་མར་གནས་པ་རྣམས་ལ་རྗེས་སུ་གཏད་དེ། དགེ་སློང་དག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འདོང་ཞིང་དེ་དག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འདོང་བ་ན་མ་སྦས་པ་དང་སྦེད་དུ་མ་བཅུག་པར་གྱུར་ཏོ། །དགེ་སློང་གནས་པ་དང་གཉུག་མར་གནས
6.43b
པ་དག་ཀྱང་ཆོས་གོས་དེ་དག་སྐེམས་པ་དང ། གསང་བ་དང་འདིང་བ་དང ། སྤྲུག་པ་དང ། བརྟུལ་བ་དང ། སྦེད་པ་དག་བྱེད་པས་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་རྣམས་ལ་ཆོས་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་དབྱར་གནས་པར་ཁས་བླངས་པ་གང་ཡང་རུང་བས་ཆོས་གོས་རྙེད་ནས་དེས་དེ་བཀྲུས་ཤིང་དྲས་ཏེ་དྲུབས་ནས་ཁ་བསྒྱུར་ཏེ་གཏུར་བུའི་བམ་པོ་བསྒྲེས་ནས་དགེ་སློང་གནས་པ་དང ། གཉུག་མར་གནས་པ་རྣམས་ལ་རྗེས་སུ་གཏད་དེ། དགེ་སློང་དག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འདོང་ཞིང་དེ་དག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འདོང་བ་ན་མ་སྦས་པ་དང་སྦེད་དུ་མ་བཅུག་པར་གྱུར། དགེ་སློང་གནས་པ་དང་གཉུག་མར་གནས་པ་དག་ཀྱང་ཆོས་གོས་དེ་དག་སྐེམས་པ་དང ། བསང་བ་དང ། འདིང་བ་དང ། སྤྲུག་པ་དང ། བརྟུལ་བ་དང ། སྦེད་པ་དག་བྱེད་པས་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་མང་པོ་དག་ལ་རྨས་པ། དགེ་སློང་དག་ཁྱེད་ལ་ཆོས་གོས་མང་བ་ཉིད
6.44a
འདི་ལྟ་བུ་བྱུང་སྟེ། དགེ་སློང་དབྱར་གནས་པར་ཁས་བླངས་པ་གང་ཡང་རུང་བས་ཆོས་གོས་རྙེད་ནས་དེས་དེ་བཀྲུས་ཤིང་དྲས་ཏེ་དྲུབས་ནས་ཁ་བསྒྱུར་ཏེ་གཏུར་བུའི་བམ་པོ་བསྒྲེས་ནས་དགེ་སློང་གནས་པ་དང ། གཉུག་མར་གནས་པ་རྣམས་ལ་རྗེས་སུ་གཏད་དེ། དགེ་སློང་དག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འདོང་ཞིང་ཁྱེད་ཅག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འདོང་བ་ན་མ་སྦས་པ་དང ། སྦེད་དུ་མ་བཅུག་པར་གྱུར་ལ། དགེ་སློང་གནས་པ་དང་གཉུག་མར་གནས་པ་དག་ཀྱང་ཆོས་གོས་དེ་དག་སྐེམས་པ་དང ། བསང་བ་དང ། འདིང་བ་དང ། སྤྲུག་པ་དང ། རྟུལ་བ་དང ། སྦེད་པ་དག་བྱེད་པས་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་གསོ་དཀའ་བ་དང ། དགང་དཀའ་བ་དང ། འདོད་པ་ཆེ་བ་དང ། ཆོག་མི་ཤེས་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་གསོ་སླ་བ་དང ། དགང་སླ་བ་དང ། འདོད་པ་ཆུང་བ་དང ། ཆོག་ཤེས་པ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་ཉིད་དང ། ཚོད་ཤེས་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་རྗེས་སུ་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འདི་ལྟར་བཅའ་བར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་གལ་ཏེ་ནུབ་གཅིག་ཀྱང་ཆོས་གོས་གསུམ་ལས་ཆོས་གོས་གང་ཡང་རུང་བ་དང་མཚམས་ཀྱི་ཕྱི་རོལ་དུ་བྲལ་བར་བྱེད་ན་སྤང་བའི་ལྟུང་བྱེད་དོ། །ཞེས་བཅོམ་ལྡན་འདས་ཀྱིས
6.44b
འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་ཚེ་དང་ལྡན་པ་འོད་སྲུང་ཆེན་པོ་རྒྱལ་པོའི་ཁབ་ན་སྡེ་ཅན་མའི་ཕུག་ན་གསོ་སྦྱོང་གཅིག་པའི་གནས་ཀྱི་སྡོམ་པས་དགེ་འདུན་དང་འཐུན་པར་འདུག་གོ། །དགེ་སློང་རབ་ཏུ་མང་པོ་དག་དེ་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་གསོ་སྦྱོང་གི་གནས་སུ་འདུག་ཅིང་འཐུན་པར་གྱུར་ནས་གཙོ་ཆེར་ཚེ་དང་ལྡན་པ་འོད་སྲུང་ཆེན་པོ་འོང་བ་ལ་སྡོད་དོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་གསོ་སྦྱོང་གི་གནས་སུ་འཕགས་པ་ན་ཆུ་ཀླུང་དབྱར་བཟང་ལྡན་རྒལ་བ་དང་ཆུ་རླབས་ཆེན་པོ་བྱུང་བ་དེས་དེའི་སྣམ་སྦྱར་གཤེར་བར་གྱུར་ཏོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་སྣམ་སྦྱར་དེ་འཚིར་བ་དང ། འདིང་བ་དང ། སྐེམས་པ་ན་ཡུན་རིང་དུ་ཐོགས་པར་གྱུར་ཏོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་སྣམ་སྦྱར་དེ་བཙིར་ཅིང་བཏིང་སྟེ་བསྐམས་ནས་གསོ་སྦྱོང་གི་གནས་ག་ལ་བ་དེར་སོང་སྟེ་ཕྱིན་ནས་དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་ནས་དགེ་སློང་རབ་ཏུ་མང་པོ་དག་གིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་མཁྱེན་པར་མཛོད་ཅིག་།འདི་ན་བདག་ཅག་དགེ་སློང་རབ་ཏུ་མང་པོ་དག་གསོ་སྦྱོང་གི་གནས་སུ་འདུག་ཅིང་འཐུན་པར་གྱུར་ནས་གཙོ་ཆར་ཚེ་དང་ལྡན་པ་འོད་སྲུང་ཆེན་པོ་ལ་སྡོད་ཅིང་འཁོད་ན། འོན་ཀྱང་ཚེ་དང་ལྡན་པ་འོད་སྲུང་ཆེན་པོ་འཕྱིས་པར་གྱུར་ཏོ། །ཚེ་དང་ལྡན་པ་དག་འདི་ན་བདག་གསོ་སྦྱོང་གི་གནས་སུ་འཕགས་པ་ན་ཆུ་ཀླུང་དབྱར་བཟང་ལྡན་རྒལ་བ་དང་ཆུ་རླབས་ཆེན་པོ་བྱུང་བ་དེས་བདག་གི་སྣམ་སྦྱར་གཤེར་བར་གྱུར་ནས། བདག་སྣམ་སྦྱར་འཚིར་བ་དང ། འདིང་བ་དང ། སྐེམས་པ་ན་ཡུན་རིང་ཞིག་ཐོགས་པར་གྱུར་ཏོ། །ཚེ་དང་ལྡན་པ་དག་ད་ལྟར་བདག་དགེ་སློང་འོད་སྲུང་ཆེན་པོ་རྒན་པོ་རྒས་པ་དགོག་ཏུ་གྱུར
6.45a
པ་ལགས་ལ་བདག་གི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོག་ན། བདག་གིས་ཇི་ལྟར་བགྱི་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འོད་སྲུང་ཆེན་པོ་རྒན་པོ་རྒས་པ་དགོག་ཏུ་གྱུར་པ་དང ། གཞན་ཡང་དེ་ལྟ་བུ་གང་ཡིན་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་བྱིན་ཅིག་།འདི་ལྟར་སྦྱིན་པར་བྱ་སྟེ། གནས་མལ་བཤམས་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དཀྱིལ་འཁོར་བར་དགེ་སློང་བཞིའི་ཚོགས་ལས་མི་ཉུང་བའི་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་འོད་སྲུང་གིས་བླ་གོས་ཕྲག་པ་གཅིག་ཏུ་བྱས་ཏེ་རྒན་རིམས་བཞིན་དུ་ཕྱག་འཚལ་ནས་རྒན་པའི་མཐའ་ལོགས་སུ་ཙོག་པུར་འདུག་སྟེ་ཐལ་མོ་སྦྱར་ནས་དགེ་འདུན་ལ་སྣམ་སྦྱར་ཉེ་བར་བསྟན་ཏེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་ལགས་ལ་བདག་གི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོག་ནས། བདག་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་དགེ་འདུན་ལས་སྣམ་སྦྱར་དང་འབྲལ་བར་མི་འགྱུར་བའི་གནང་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འོད་སྲུང་འདི་རྒན་པོ་རྒས་པ་དགོག་ཏུ་གྱུར་པ་ལགས་ལ་འདིའི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོགས་ནས། དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་འདི་དགེ་འདུན་ལས་སྣམ་སྦྱར་དང་འབྲལ་བར་མི་འགྱུར་བའི་གནང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན
6.45b
གྱིས་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འོད་སྲུང་འདི་རྒན་པོ་རྒས་པ་དགོག་ཏུ་གྱུར་པ་ལགས་ལ་འདིའི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོགས་ནས། དགེ་སློང་འོང་སྲུང་རྒན་པོ་རྒས་པ་དགོག་ཏུ་གྱུར་པ་འདི་དགེ་འདུན་ལས་སྣམ་སྦྱར་དང་འབྲལ་བར་མི་འགྱུར་བའི་སྣང་བ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩོལ་ན། ཚེ་དང་ལྡན་པ་གང་དག་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འོད་སྲུང་རྒན་པོ་རྒས་པ་དགོག་ཏུ་གྱུར་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་དགེ་སློང་གང་ཡང་རུང་བ་ལ་སྣམ་སྦྱར་དང ། འབྲལ་བར་མི་འགྱུར་བའི་གནང་བ་བྱིན་པར་གྱུར་ན་དེས་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ་བར་བྱ་སྟེ། འདི་ལ་འགྱོད་པར་མི་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་འཁོར་དེ་ཉིད་དུ་འདུག་ཅིང་འཐུན་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ད་ལྟར་བདག་དགེ་སློང་ཤཱ་རིའི་བུ་རླུང་ནད་ཅན་ལགས་ལ། བདག་གི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོག་ན་བདག་གིས་ཇི་ལྟར་བགྱི་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་ཤཱ་རིའི་བུ་རླུང་ནད་ཅན་དང་གཞན་ཡང་དེ་ལྟ་བུ་གང་ཡིན་པ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་བྱིན་ཅིག་།འདི་ལྟར
6.46a
སྦྱིན་པར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དཀྱིལ་འཁོར་བར་དགེ་སློང་བཞིའི་ཚོགས་ལས་མི་ཉུང་བའི་དགེ་འདུན་ཐམས་ཅད་འདུག་ཅིང ། འཐུན་པར་གྱུར་པ་ལ་དགེ་སློང་ཤཱ་རིའི་བུས་བླ་གོས་ཕྲག་པ་གཅིག་ཏུ་བྱས་ཏེ་རྒན་རིམས་བཞིན་དུ་ཕྱག་འཚལ་ནས་རྒན་པའི་མཐའ་ལོགས་སུ་ཙོག་བུར་འདུག་སྟེ་ཐལ་མོ་སྦྱར་ནས་དགེ་འདུན་ལ་སྣམ་སྦྱར་ཉེ་བར་བསྟན་ཏེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་ཤཱ་རིའི་བུ་རླུང་ནད་ཅན་ལགས་ལ་བདག་གི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོག་ནས། བདག་དགེ་སློང་ཤཱ་རིའི་བུ་རླུང་ནད་ཅན་དགེ་འདུན་ལས་སྣམ་སྦྱར་དང་འབྲལ་བར་མི་འགྱུར་བའི་གནང་བ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་ཤཱ་རིའི་བུ་རླུང་ནད་ཅན་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ཤཱ་རིའི་བུ་འདི་རླུང་ནད་ཅན་ལགས་ལ་འདིའི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོག་ནས། དགེ་སློང་ཤཱ་རིའི་བུ་རླུང་ནད་ཅན་འདི་དགེ་འདུན་ལས་སྣམ་སྦྱར་དང་འབྲལ་བར་མི་འགྱུར་བའི་གནང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་ཤཱ་རིའི་བུ་རླུང་ནད་ཅན་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ཤཱ་རིའི་བུ་འདི་རླུང་ནད་ཅན་ལགས་ལ་འདིའི་སྣམ་སྦྱར་ནི་ལྕི་བས་ཡོངས་སུ་སྐྱོང་བར་རྔོ་མི་ཐོག་ནས། དགེ་སློང་ཤཱ་རིའི་བུ་རླུང་ནད་ཅན་འདི་དགེ་འདུན་ལས་སྣམ་སྦྱར་དང་འབྲལ་བར་མི་འགྱུར་བའི་གནང་བ་གསོལ་ཏེ། དེའི་སླད་དུ་དགེ
6.46b
འདུན་གྱིས་དགེ་སློང་ཤཱ་རིའི་བུ་རླུང་ནད་ཅན་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩོལ་ན། ཚེ་དང་ལྡན་པ་གང་དག་དགེ་སློང་ཤཱ་རིའི་བུ་རླུང་ནད་ཅན་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་ཤཱ་རིའི་བུ་རླུང་ནད་ཅན་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་དགེ་སློང་གང་ཡང་རུང་བ་ལ་སྣམ་སྦྱར་དང་འབྲལ་བར་མི་འགྱུར་བའི་གནང་བ་བྱིན་པར་གྱུར་ན། དེས་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ་བར་བྱ་སྟེ། འདི་ལ་འགྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་རྣམས་ཀྱི་བསྔགས་པ་བརྗོད་ཅིང་བསླབ་པ་ལ་གུས་པ་རྣམས་དང ། བསླབ་པ་ལ་ཡོ་བྱད་བསྙུངས་པ་རྣམས་དང ། ཕྲི་བ་རྣམས་དང ། སྦྱངས་པའི་ཡོན་ཏན་རྣམས་དང ། མཛེས་པ་རྣམས་དང ། ཚོད་ཤེས་པ་རྣམས་ཀྱི་ཡོན་ཏན་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་གལ་ཏེ་ནུབ་གཅིག་ཀྱང་ཆོས་གོས་གསུམ་ལས་ཆོས་གོས་གང་ཡང་རུང་བ་དང་མཚམས་ཀྱི་ཕྱི་རོལ་དུ་འབྲལ་བར་བྱེད་ན་དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །ཆོས་གོས་ཟིན་པས་སྲ་བརྐྱང་ཕྱུང་ན་ཞེས་བྱ་བ་ནི་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡང་ཡོད། ཆོས་གོས་མ་ཟིན་ལ་སྲ་བརྐྱང་ཕྱུང་བ་ཡང་ཡོད། ཆོས་གོས་ཟིན་ཅིང་སྲ་བརྐྱང་ཕྱུང་བ་ཡང་ཡོད། ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཡང་ཡོད་དེ། སྔ་མ་བཞིན་དུ་མུ་བཞིར་རྒྱས་པར་སྦྱར་རོ། །གལ་ཏེ་ནུབ་གཅིག་ཀྱང་ཞེས་བྱ་བ་ནི་ནུབ་གཅིག་གི་མཐར
6.47a
ཡང་ངོ ། །ཆོས་གོས་གསུམ་ལས་ཆོས་གོས་གང་ཡང་རུང་བ་དང་ཞེས་བྱ་བ་ནི་སྣམ་སྦྱར་དང་བླ་གོས་དང་མཐར་གོས་ལས་གང་ཡང་རུང་བ་དང་ངོ ། །མཚམས་ཀྱི་ཕྱི་རོལ་དུ་འབྲལ་བར་བྱེད་ན་ཞེས་བྱ་བ་ནི་གཞན་དུ་སྐྱ་རེང་འཆར་བར་བྱེད་ནའོ། །དགེ་འདུན་གྱིས་གནང་བ་མ་གཏོགས་ཏེ་ཞེས་བྱ་བ་ནི་དགེ་འདུན་གྱིས་གནང་བ་བཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན ། ་་་་་་་བར་སྡོམ་ལ། ཁྱིམ་གཅིག་པ་དང་ཁྱིམ་གཉིས་དང ། །ཁྱིམ་གྱི་ཚོགས་དང་ལྡན་པ་དང ། །རྩིག་པ་རིབ་མ་འོབས་བསྐོར་དང ། །རྣམ་བཞིར་བྱ་བ་གྲོང་དང་ཁྱིམ། །སྟེན་འགྲོ་མུ་སྟེགས་ཚོང་རྡལ་དང ། །ཚོང་ཁང་སྒྲ་ཁང་གཡུལ་དང་ནི། །གཡུལ་ཚོམས་གྲུ་དང་ཤིང་རྟ་དང ། །ཤིང་ལྗོན་ཀུན་དགའི་ར་བ་ཡིན། །ལམ་དུ་འགྲོ་སྡོད་འདུག་ཉལ་དང ། །ཐད་ཀར་ཡང་ནི་དེ་བཞིན་ཏེ། །མཚམས་གཞན་ཉལ་བ་ཐ་མ་ཡི། །སྡེ་ཚན་ཡང་དག་བསྡུས་པ་ཡིན། །ཁྱིམ་གཅིག་དང་ལྡན་པའི་གྲོང་དང ། ཁྱིམ་གཉིས་དང་ལྡན་པའི་གྲོང་དང ། ཁྱིམ་གྱི་ཚོགས་དང་ལྡན་པའི་གྲོང་དང ། རྩིག་པས་བསྐོར་བའི་གྲོང་དང ། རིབ་མས་བསྐོར་བའི་གྲོང་དང ། འོབས་ཀྱིས་བསྐོར་བའི་གྲོང་དང་རྣམ་པ་བཞིར་བྱ་བ་གྲོང་ཉེན་ཀོར་གཅིག་པ་དང ། གྲོང་ཉེན་ཀོར་ཐ་དད་པ་དང ། གྲོང་རབ་ཏུ་མང་པོ་ཉེན་ཀོར་གཅིག་པ་དང ། གྲོང་རབ་ཏུ་མང་པོ་ཉེན་ཀོར་ཐ་དད་པ་དང ། ཁྱིམ་ཉེན་ཀོར་གཅིག་པ་དང ། ཁྱིམ་ཉེན་ཀོར་ཐ་དད་པ་དང ། ཁྱིམ་རབ་ཏུ་མང་པོ་ཉེན་ཀོར་གཅིག་པ་དང ། ཁྱིམ་རབ་ཏུ་མང་པོ་ཉེན་ཀོར་ཐ་དད་པ་དང ། སྟེན་འགྲོའི་ཁྱིམ་ཉེན་ཀོར་གཅིག་པ
6.47b
དང ། སྟེན་འགྲོའི་ཁྱིམ་ཉེན་ཀོར་ཐ་དད་པ་དང ། སྟེན་འགྲོའི་ཁྱིམ་རབ་ཏུ་མང་པོ་ཉེན་ཀོར་གཅིག་པ་དང ། སྟེན་འགྲོའི་ཁྱིམ་རབ་ཏུ་མང་པོ་ཉེན་ཀོར་ཐ་དད་པ་དང ། མུ་སྟེགས་ཅན་གྱི་ཁྱིམ་ཉེན་ཀོར་གཅིག་པ་དང ། མུ་སྟེགས་ཅན་གྱི་ཁྱིམ་ཉེན་ཀོར་ཐ་དད་པ་དང ། མུ་སྟེགས་ཅན་གྱི་ཁྱིམ་རབ་ཏུ་མང་པོ་ཉེན་ཀོར་གཅིག་པ་དང ། མུ་སྟེགས་ཅན་གྱི་ཁྱིམ་རབ་ཏུ་མང་པོ་ཉེན་ཀོར་ཐ་དད་པ་དང ། ཚོང་རྡལ་ཉེན་ཀོར་གཅིག་པ་དང ། ཚོང་རྡལ་ཉེན་ཀོར་ཐ་དད་པ་དང ། ཚོང་རྡལ་རབ་ཏུ་མང་པོ་ཉེན་ཀོར་གཅིག་པ་དང ། ཚོང་རྡལ་རབ་ཏུ་མང་པོ་ཉེན་ཀོར་ཐ་དད་པ་དང ། ཚོང་ཁང་ཉེན་ཀོར་གཅིག་པ་དང ། ཚོང་ཁང་ཉེན་ཀོར་ཐ་དད་པ་དང ། ཚོང་ཁང་རབ་ཏུ་མང་པོ་ཉེན་ཀོར་གཅིག་པ་དང ། ཚོང་ཁང་རབ་ཏུ་མང་པོ་ཉེན་ཀོར་ཐ་དད་པ་དང ། སྒྲ་ཁང་ཉེན་ཀོར་གཅིག་པ་དང ། སྒྲ་ཁང་ཉེན་ཀོར་ཐ་དད་པ་དང ། སྒྲ་ཁང་རབ་ཏུ་མང་པོ་ཉེན་ཀོར་གཅིག་པ་དང ། སྒྲ་ཁང་རབ་ཏུ་མང་པོ་ཉེན་ཀོར་ཐ་དད་པ་དང ། གཡུལ་ཉེན་ཀོར་གཅིག་པ་དང ། གཡུལ་ཉེན་ཀོར་ཐ་དད་པ་དང ། གཡུལ་རབ་ཏུ་མང་པོ་ཉེན་ཀོར་གཅིག་པ་དང ། གཡུལ་རབ་ཏུ་མང་པོ་ཉེན་ཀོར་ཐ་དད་པ་དང ། གཡུལ་གྱི་ཚོམས་ཉེན་ཀོར་གཅིག་པ་དང ། གཡུལ་གྱི་ཚོམས་ཉེན་ཀོར་ཐ་དད་པ་དང ། གཡུལ་གྱི་ཚོམས་རབ་ཏུ་མང་པོ་ཉེན་ཀོར་གཅིག་པ་དང ། གཡུལ་གྱི་ཚོམས་རབ་ཏུ་མང་པོ་ཉེན་ཀོར་ཐ་དད་པ་དང ། གྲུ་ཉེན་ཀོར་གཅིག་པ་དང ། གྲུ་ཉེན་ཀོར་ཐ་དད་པ་དང ། གྲུ་རབ་ཏུ་མང་པོ་ཉེན་ཀོར་གཅིག་པ་དང ། གྲུ་རབ་ཏུ་མང་པོ་ཉེན་ཀོར་ཐ་དད་པ་དང ། ཤིང་རྟ་ཉེན་ཀོར་གཅིག་པ་དང ། ཤིང་རྟ་ཉེར་ཀོར་ཐ་དད་པ་དང ། ཤིང་རྟ་རབ་ཏུ་མང་པོ་ཉེན་ཀོར་གཅིག་པ་དང ། ཤིང་རྟ་རབ་ཏུ་མང་པོ་ཉེན་ཀོར་ཐ་དད་པ་དང ། ཤིང་ལྗོན་པ་ཉེན་ཀོར་གཅིག་པ་དང ། ཤིང་ལྗོན་པ་ཉེན་ཀོར་ཐ་དད་པ་དང ། ཤིང་ལྗོན་པ་རབ་ཏུ་མང་པོ་ཉེན་ཀོར་གཅིག་པ་དང ། ཤིང་ལྗོན་པ་རབ་ཏུ་མང་པོ་ཉེན་ཀོར་ཐ་དད་པ་དང ། ཀུན་དགའི་ར་བ་ཉེན་ཀོར་གཅིག་པ་དང ། ཀུན་དགའི་ར་བ་ཉེན་ཀོར་ཐ་དད་པ་དང །
6.48a
ཀུན་དགའི་ར་བ་རབ་ཏུ་མང་པོ་ཉེན་ཀོར་གཅིག་པ་དང ། ཀུན་དགའི་ར་བ་རབ་ཏུ་མང་པོ་ཉེན་ཀོར་ཐ་དད་པ་དང ། ལམ་དུ་འགྲོ་བ་ལ་སོགས་པ་དང ། ཐད་ཀར་འགྲོ་བ་ལ་སོགས་པ་དང ། མཚམས་གཞན་དག་གི་གནས་ཐུན་མོང་དང་ཐུན་མོང་མ་ཡིན་པའི་བྱེ་བྲག་གིས་དགེ་སློང་ཆོས་གོས་དང་མི་འབྲལ་བའི་ལྟུང་བ་རྣམ་པར་བཞག་པའི་བྱེ་བྲག་རྒྱ་ཆེར་སྟོན་ཏོ། །དེ་ལ་ཁྱིམ་གཅིག་དང་ལྡན་པའི་གྲོང་གང་ཞེ་ན། འདི་ལྟ་སྟེ་རི་ཁྲོད་པ་རྣམས་དང ། བོད་རྣམས་དང ། ཀླ་ཀློ་རྣམས་ཀྱི་གྲོང་ངོ ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་འམ། གང་དུ་དེ་དག་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཁྱིམ་གཉིས་དང་ལྡན་པའི་གྲོང་གང་ཞེ་ན། འདི་ལྟ་སྟེ་ཁྱིམ་གཅིག་དང་ལྡན་པའི་གྲོང་ཇི་ལྟ་བ་བཞིན་དུ་ཁྱིམ་གཉིས་དང་ལྡན་པའི་གྲོང་ཡང་དེ་བཞིན་ནོ། །ཁྱིམ་གྱི་ཚོགས་དང་ལྡན་པའི་གྲོང་གང་ཞེ་ན། འདི་ལྟ་སྟེ་གྲོང་སྒོ་སྣ་ཚོགས་ནས་ཀུན་ནས་གནས་པ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །རྩིགས་པས་བསྐོར་བའི་གྲོང་གང་ཞེ་ན། འདི་ལྟ་སྟེ་གྲོང་རྩིག་པས་བསྐོར་བ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་བ་ལང་དྲུག་དང་ལྡན་པའི་ཤིང་རྟ་སྨྱིག་མ་ཅན་གྱིས་ཁྱབ་ཅིང་འདུག་པ་དང ། བྱ་གག་སྤར་ནས་འདུག་པའི་བར་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ
6.48b
སྐྱེ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །རིབ་མས་བསྐོར་བའི་གྲོང་གང་ཞེ་ན། འདི་ལྟ་སྟེ་གྲོང་རིབ་མས་བསྐོར་བ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་ངམ། གང་དུ་ར་ལུག་བཏོན་པ་དག་གི་རྨིག་པས་བསླང་བའི་རྡུལ་འབབ་པ་དང ། མི་རང་བཞིན་གྱིས་ངོ་ཚ་དང་ལྡན་པ་བཤང་སར་འགྲོ་བའི་བར་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །འོབས་ཀྱིས་བསྐོར་བའི་གྲོང་གང་ཞེ་ན། འདི་ལྟ་སྟེ་གྲོང་འོབས་ཀྱིས་བསྐོར་བ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་འདོམ་གང་ངམ། གང་དུ་སྐས་གདང་བུ་བཅུ་གཉིས་པས་ཁྱབ་ཅིང་འདུག་པ་དང ། ཕྱག་དར་བོར་བའི་བོང་བ་རགས་པ་འདྲིལ་བའི་བར་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ། ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གྲོང་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། གྲོང་གང་ན་བསྐྱེད་མོས་ཚལ་ལམ་མདུན་ས་འམ། ལྷའི་གནས་གཅིག་ཡོད་པ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ལྷའི་གནས་སོ། །དགེ་སློང་གིས་གྲོང་དུ་ཆོས་གོས་དག་བཞག་སྟེ
6.49a
ལྷའི་གནས་སུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ལྷའི་གནས་སུ་ཆོས་གོས་དག་བཞག་སྟེ་གྲོང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །གྲོང་ངམ་ལྷའི་གནས་སུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གྲོང་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་གྲོང་གང་ན་བསྐྱེད་མོས་ཚལ་ལམ། འདུན་ས་འམ། ལྷའི་གནས་རབ་ཏུ་མང་པོ་དག་ཡོད་པ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །གྲོང་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། གྲོང་གང་དག་ན་བསྐྱེད་མོས་ཚལ་ལམ། མདུན་ས་འམ། ལྷའི་གནས་གཅིག་ཡོད་པ་གང་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ལྷའི་གནས་སོ། །དགེ་སློང་གིས་གྲོང་དུ་ཆོས་གོས་དག་བཞག་སྟེ་ལྷའི་གནས་སུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ལྷའི་གནས་སུ་ཆོས་གོས་དག་བཞག་སྟེ་གྲོང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །གྲོང་ངམ་ལྷའི་གནས་སུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གྲོང་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་གྲོང་གང་དག་ན་བསྐྱེད་མོས་ཚལ་ལམ། འདུན་ས་འམ། ལྷའི་གནས་རབ་ཏུ་མང་པོ་དག་ཡོད་པ་གང་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཁྱིམ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་ཕྱེ་བ་དག་གི་ཁྱིམ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། །གང་དུ་དེ་དག་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །
6.49b
དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ། གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། ཁྱིམ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཁྱིམ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། སྒོའོ། །དགེ་སློང་གིས་ནང་དུ་ཆོས་གོས་དག་བཞག་སྟེ་སྒོར་སྐྱ་རེང་འཆར་བར་བྱེད་ན་ལྟུང་བ་མེད་དོ། །སྒོར་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་སྒོར་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཁྱིམ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་ཁྱིམ་རབ་ཏུ་མང་པོ་དག་གང་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཁྱིམ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་ནི། ཁྱིམ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །སྟེན
6.50a
འགྲོའི་ཁྱིམ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་སྟེན་འགྲོའི་ཁྱིམ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་འདོམ་གང་ངམ། གང་དུ་དེ་དག་གི་གླིང་བུ་འཇོག་པར་བྱེད་པ་དང ། རྔ་པ་ཏ་ཧ་དང ། པི་བང་དང ། རྫ་རྔ་ཁ་གཅིག་པ་དང ། ཁར་རྔ་དང ། སུ་གྷོ་ཤ་ཀ་འཇོག་པར་བྱེད་པ་དང ། མོང་ཕང་དང་ཕང་ལོ་འཇོག་པར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །སྟེན་འགྲོའི་ཁྱིམ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་སྟེན་འགྲོའི་ཁྱིམ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། རྒྱལ་མཚན་གྱི་ཤིང་ངོ ། །དགེ་སློང་གིས་ནང་དུ་ཆོས་གོས་དག་བཞག་སྟེ་རྒྱལ་མཚན་གྱི་ཤིང་ལ་སྐྱ་རེང་འཆར་བར་བྱེད་ན་ལྟུང་བ་མེད་དོ། །རྒྱལ་མཚན་གྱི་ཤིང་ལ་ཆོས་གོས་དག་བཞག་སྟེ། ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་རྒྱལ་མཚན་གྱི་ཤིང་ལ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །སྟེན་འགྲོའི་ཁྱིམ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་སྟེན་འགྲོའི་ཁྱིམ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་འདོམ་གང་འམ། གང་དུ་དེ་དག་གི་གླིང་བུ་འཇོག་པར་བྱེད་པ་དང ། རྔ་པ་ཏ་ཧ་དང ། པི་བང་དང ། རྫ་རྔ་ཁ་གཅིག་པ་དང ། ཁར་རྔ་དང ། སུ་གྷོ་ཤ་ཀ་འཇོག་པར་བྱེད་པ་དང །
6.50b
མོང་ཕང་དང ། ཕང་ལོ་འཇོག་པར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །སྟེན་འགྲོའི་ཁྱིམ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་སྟེན་འགྲོའི་ཁྱིམ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །མུ་སྟེགས་ཅན་གྱི་ཁྱིམ་ཉེན་ཀོར་གཅིག་པ་གང་ཞེ་ན། །འདི་ལྟ་སྟེ། མུ་སྟེགས་ཅན་གྱི་ཁྱིམ་ལྟ་བ་གཅིག་པ་དང ། བཟོད་པ་གཅིག་པ་དང ། འདོད་པ་གཅིག་པ་དང ། བསམ་པ་གཅིག་པ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་ལྕི་བ་དག་གདིང་བ་བྱེད་པ་དང ། ཡམ་སྲེག་ཤིང་དག་འཇོག་པར་བྱེད་པ་དང ། གཡང་གཞི་དག་དང ། ཤིང་ཤུན་དག་དང ། དབྱིག་གུ་དག་དང ། རིལ་བ་དག་དང ། བླུགས་གཟར་དག་དང ། དགང་གཟར་དག་འཇོག་པ་དག་དང ། མེ་སྦར་བར་བྱེད་པ་དང ། ཡམ་སྲེག་ཤིང་དག་སྲེག་པར་བྱེད་པ་དང ། གང་དུ་དེ་དག་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་བར་བྱེད་པ་དང ། འཆའ་བར་བྱེད་བ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན
6.51a
ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །མུ་སྟེགས་ཅན་གྱི་ཁྱིམ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མུ་སྟེགས་ཅན་གྱི་ཁྱིམ་ལྟ་བ་ཐ་དད་པ་དང ། བཟོད་པ་ཐ་དད་པ་དང ། འདོད་པ་ཐ་དད་པ་དང ། བསམ་པ་ཐ་དད་པ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ལྷའི་གནས་སོ། །དགེ་སློང་གིས་མུ་སྟེགས་ཅན་གྱི་ཁྱིམ་དུ་ཆོས་གོས་དག་བཞག་སྟེ་ལྷའི་གནས་སུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ལྷའི་གནས་སུ་ཆོས་གོས་དག་བཞག་སྟེ་མུ་སྟེགས་ཅན་གྱི་ཁྱིམ་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །མུ་སྟེགས་ཅན་གྱི་ཁྱིམ་འམ་ལྷའི་གནས་སུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །མུ་སྟེགས་ཅན་གྱི་ཁྱིམ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མུ་སྟེགས་ཅན་གྱི་ཁྱིམ་རབ་ཏུ་མང་པོ་ལྟ་བ་གཅིག་པ་དང ། བཟོད་པ་གཅིག་པ་དང ། འདོད་པ་གཅིག་པ་དང ། བསམ་པ་གཅིག་པ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་འམ། གང་དུ་དེ་དག་ལྕི་བ་དག་འདིང་བར་བྱེད་པ་དང ། ཡམ་སྲེག་ཤིང་དག་འཇོག་པར་བྱེད་པ་དང ། གཡང་གཞི་དག་དང ། ཤིང་ཤུན་དག་དང ། དབྱིག་གུ་དག་དང ། རིལ་བ་དག་དང ། བླུགས་གཟར་དག་དང ། དགང་གཟར་དག་འཇོག་པར་བྱེད་པ་དང ། མེ་སྦར་བར་བྱེད་པ་དང ། ཡམ་སྲེག་ཤིང་སྲེག་པར་བྱེད་པ་དང ། གང་དུ་དེ་དག་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ། གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །མུ་སྟེགས་ཅན
6.51b
གྱི་ཁྱིམ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མུ་སྟེགས་ཅན་གྱི་ཁྱིམ་རབ་ཏུ་མང་པོ་ལྟ་བ་ཐ་དད་པ་དང ། བཟོད་པ་ཐ་དད་པ་དང ། འདོད་པ་ཐ་དད་པ་དང ། བསམ་པ་ཐ་དད་པ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཚོང་རྡལ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་ཚོང་རྡལ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་དེ་དག་ཟོང་འཇོག་པར་བྱེད་པ་དང ། ཉོ་བར་བྱེད་པ་དང ། འཚོང་བར་བྱེད་པ་དང ། བགྲང་བར་བྱེད་པ་དང ། འཇལ་བར་བྱེད་པ་དང ། འཇོག་པར་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཚོང་རྡལ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཚོང་རྡལ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། གཞག་སྟེགས་སོ། །དགེ་སློང་གིས་ནང་དུ་ཆོས་གོས་དག་བཞག་སྟེ་སྟེགས་སུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །གཞག་སྟེགས་སུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་གཞག་སྟེགས་སུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཚོང་རྡལ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། མི་གཅིག་གི་འམ། སྤུན་སྒོ་མ་བྱེ་བདག་གི་ཚོང་རྡལ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་དེ་དག་ཟོང་འཇོག་པར་བྱེད་པ་དང ། ཉོ་བར་བྱེད་པ
6.52a
དང ། འཚོང་བར་བྱེད་པ་དང ། བགྲང་བར་བྱེད་པ་དང ། འཇལ་བར་བྱེད་པ་དང ། འཇོག་པར་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཚོང་རྡལ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཚོང་རྡལ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཚོང་ཁང་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་ཚོང་ཁང་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་ཟོང་འཇོག་པར་བྱེད་པ་དང ། གྲོ་དག་དང ། ནས་དག་དང ། མོན་སྲན་གྲེའུ་དག་དང ། ས་ལུ་དག་དང ། འབྲས་དག་དང ། ཏིལ་དག་དང ། འབྲས་ཐུག་པོ་ཆེ་དག་དང ། བུ་རམ་དག་དང ། མར་དག་དང ། རས་བལ་དག་དང ། སྐུད་པ་དག་དང ། གོས་དག་འཇོག་པར་བྱེད་པ་དང ། འབྲུ་སྤུང་བར་བྱེད་པ་དང ། བྲེའུ་ཆུང་དང ། གླེ་བ་འཇོག་པར་བྱེད་པ་དང ། འཇལ་བར་བྱེད་པ་དང ། །རླུང་ཡོར་འཛུགས་པར་བྱེད་པ་དང ། ཉོ་བར་བྱེད་པ་དང ། འཚོང་བར་བྱེད་པ་དང ། བགྲང་བར་བྱེད་བ་དང ། འཇལ་བར་བྱེད་པ་དང ། འཇོག་པར་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཚོང་ཁང་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད
6.52b
པ་དག་གི་འམ། སྤུན་སྒོ་བྱེ་བ་དག་གི་ཚོང་ཁང་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། འདུག་སྟེགས་སོ། །དགེ་སློང་གིས་ནང་དུ་ཆོས་གོས་དག་བཞག་སྟེ་འདུག་སྟེགས་སུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །འདུག་སྟེགས་སུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་འདུག་སྟེགས་སུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཚོང་ཁང་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་ཚོང་ཁང་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་ཟོང་འཇོག་པར་བྱེད་པ་དང ། གྲོ་དག་དང ། ནས་དག་དང ། མོན་སྲན་གྲེའུ་དག་དང ། ས་ལུ་དག་དང ། འབྲས་དག་དང ། ཏིལ་དག་དང ། འབྲས་ཐུག་པོ་ཆེ་དག་དང ། བུ་རམ་དག་དང ། མར་དག་དང ། རས་བལ་དག་དང ། སྐུད་པ་དག་དང ། གོས་དག་འཇོག་པར་བྱེད་པ་དང ། འབྲུ་སྤུང་བར་བྱེད་པ་དང ། བྲེའུ་ཆུང་དང ། གླེ་བ་འཇོག་པར་བྱེད་པ་དང ། འཇལ་བར་བྱེད་པ་དང ། རླུང་ཡོར་འཛུགས་པར་བྱེད་པ་དང ། ཉོ་བར་བྱེད་པ་དང ། འཚོང་བར་བྱེད་པ་དང ། བགྲང་བར་བྱེད་པ་དང ། འཇལ་བར་བྱེད་པ་དང ། འཇོག་པར་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཚོང་ཁང་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཚོང་ཁང་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །
6.53a
སྒྲ་ཁང་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་སྒྲ་ཁང་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་དེ་དག་གླང་དག་འདོགས་པར་བྱེད་པ་དང ། རྩཝ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་ངང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །སྒྲ་ཁང་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་སྒྲ་ཁང་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན་ཡ་གད་དོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཡ་གད་ལ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཡ་གད་ལ་ཆོས་གོས་དག་བཞག་སྟེ། སྒྲ་ཁང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །སྒྲ་ཁང་ངམ་ཡ་གད་ལ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །སྒྲ་ཁང་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་སྒྲ་ཁང་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་དེ་དག་གླང་དག་འདོགས་པར་བྱེད་པ་དང ། རྩཝ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཆའ་བར
6.53b
བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །སྒྲ་ཁང་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་སྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་སྒྲ་ཁང་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །གཡུལ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་དེ་དག་འབྲུ་རྡུང་བར་བྱེད་པ་དང ། འཕྱར་བར་བྱེད་པ་དང ། འཁྲབ་པར་བྱེད་པ་དང ། སྤུང་བར་བྱེད་པ་དང ། བྲེའུ་ཆུང་དང ། གླེ་བ་འཇོག་པར་བྱེད་པ་དང ། འཇལ་བར་བྱེད་པ་དང ། རླུང་ཡོར་འཛུགས་པར་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གཡུལ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་གཡུལ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། གཡུལ་གྱི་དཀྱིལ་ལོ། །དགེ་སློང་གིས་གཡུལ་གྱི་དཀྱིལ་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་གཡུལ་གྱི་དཀྱིལ་དུ་སྐྱ་རེང་འཆར་བར་བྱེད་ན་ཡང་ལྟུང
6.54a
བ་མེད་དོ། །གཡུལ་གྱི་དཀྱིལ་དུ་འམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གཡུལ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་འབྲུ་རྡུང་བར་བྱེད་པ་དང ། འཕྱར་བར་བྱེད་པ་དང ། འཁྲབ་པར་བྱེད་པ་དང ། སྤུང་བར་བྱེད་པ་དང ། བྲེའུ་ཆུང་དང ། གླེ་བ་འཇོག་པར་བྱེད་པ་དང ། འཇལ་བར་བྱེད་པ་དང ། རླུང་ཡོར་འཛུགས་པར་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གཡུལ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་གཡུལ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་ཉི་ཤུ་དྲུག་པ། གཡུལ་གྱི་ཚོམས་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་གྱི་ཚོམས་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་གླང་དག་འདོགས་པར་བྱེད་པ་དང ། རྩཝ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། ལྕི་བ་དག་འདོར་བར་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར
6.54b
དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། གཡུལ་གྱི་ཚོམས་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་གཡུལ་གྱི་ཚོམས་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། སྒོའོ། །དགེ་སློང་གིས་ནང་དུ་ཆོས་གོས་དག་བཞག་སྟེ་སྒོར་སྐྱ་རེང་འཆར་བར་བྱེད་ན་ལྟུང་བ་མེད་དོ། །སྒོར་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་སྒོར་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གཡུལ་གྱི་ཚོམས་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་གྱི་ཚོམས་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ་གང་དུ་དེ་དག་གླང་དག་འདོགས་པར་བྱེད་པ་དང ། རྩཝ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། ལྕི་བ་དག་འདོར་བར་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གཡུལ་གྱི་ཚོམས་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་གཡུལ་གྱི་ཚོམས་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པ་འོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །གྲུ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་གྲུ་གང་ཡིན་པའོ། །དེའི་ཉེན་ཀོར་གང་ཞེ་ན། འགྲོ་བའི་ནི་ནང་ཐམས་ཅད་དང ། ཕྱི་རོལ་མདོམ་གང་ངམ། འདུག་པ་ནི་ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་ཕུར་པ་འདེབས་བར་བྱེད་པ་དང ། གྲུ་རྟོད་པར་བྱེད་པ་དང །
6.55a
གདོས་པ་དག་འཇོག་པར་བྱེད་པ་དང ། གྲུ་སྐྱ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གྲུ་ཉེན་ཀོར་ཐ་དད་པ་གང་ཞེ་ན་འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་གྲུ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། གྲུ་གདོང་ངོ ། །དགེ་སློང་གིས་ནང་དུ་ཆོས་གོས་དག་བཞག་སྟེ་གྲུ་གདོང་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །གྲུ་གདོང་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་གྲུ་གདོང་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གྲུ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་གྲུ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། འགྲོ་བའི་ནི་ནང་ཐམས་ཅད་དང་ཕྱི་རོལ་མདོམ་གང་ངོ ། །འདུག་པའི་ནི་ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་ཕུར་པ་འདེབས་པར་བྱེད་པ་དང ། གྲུ་རྟོད་པར་བྱེད་པ་དང ། གདོས་པ་དག་འཇོག་པར་བྱེད་པ་དང ། གྲུ་སྐྱ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ
6.55b
ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །གྲུ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་གྲུ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཤིང་རྟ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་ཤིང་རྟ་གང་ཡིན་པའོ། །དེའི་ཉེན་ཀོར་གང་ཞེ་ན། འགྲོ་བའི་ནི་ནང་ཐམས་ཅད་དང ། ཕྱི་རོལ་མདོམ་གང་ངོ ། །འདུག་པའི་ནི་ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་ཕུར་པ་འདེབས་པར་བྱེད་པ་དང ། གླང་དག་འདོགས་པར་བྱེད་པ་དང ། རྩཝ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཤིང་རྟ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཤིང་རྟ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཁ་ལོ་པའི་གནས་སོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཁ་ལོ་པའི་གནས་སུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཁ་ལོ་པའི་གནས་སུ་ཆོས་གོས
6.56a
དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཁ་ལོ་པའི་གནས་སུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཤིང་རྟ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་མི་གཅིག་གི་འམ། སྤུན་སྒོ་མ་བྱེ་བ་དག་གི་ཤིང་རྟ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན་འགྲོ་བའི་ནི་ནང་ཐམས་ཅད་དད་ཕྱི་རོལ་མདོམ་གང་ངོ ། །འདུག་པའི་ནི་ནང་ཐམས་ཅད་དང་ཕྱི་རོལ་མདོམ་གང་འམ། གང་དུ་དེ་དག་ཕུར་པ་འདེབས་པར་བྱེད་པ་དང ། གླང་དག་འདོགས་པར་བྱེད་པ་དང ། རྩཝ་དག་འཇོག་པར་བྱེད་པ་དང ། མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། འཐག་པར་བྱེད་པ་དང ། འཆའ་བར་བྱེད་པ་དང ། ཟ་བར་བྱེད་པ་དང ། འཐུང་བར་བྱེད་པ་དང ། ཁྱེའུ་སུས་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཤིང་རྟ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཤིང་རྟ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཤིང་ལྗོན་པ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་ཤིང་ལྗོན་པ་ཡལ་གའི་ཚོགས་འབྲེལ་བ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་ལོ་མ་ལྷགས་པ་རླུང་གིས་མ་བདས་པ་དག་འབབ་བ་དང ། ཆར་ཆད་པའི་ཐིགས་པ་སྦོམས་པོ་དག་འབབ་བ་དང ། གང་དུ་གུང་ཚིགས་ཀྱི་ཚེ་ཤིང་ལྗོན་པའི་གྲིབ་མས་ཁྱབ་ཅིང་འདུག་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ
6.56b
ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཤིང་ལྗོན་པ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་ཤིང་ལྗོན་པ་ཡལ་གའི་ཚོགས་མ་འབྲེལ་བ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན་རྩ་བའོ། །དགེ་སློང་གིས་རྩ་བར་ཆོས་གོས་དག་བཞག་སྟེ་ཡལ་གར་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཡལ་གར་ཆོས་གོས་དག་བཞག་སྟེ་རྩ་བར་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །རྩཝ་བ་འམ་ཡལ་གར་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཤིང་ལྗོན་པ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ་ཤིང་ལྗོན་པ་རབ་ཏུ་མང་པོ་ཡལ་གའི་ཚོགས་འབྲེལ་བ་གང་ཡིན་པའོ། །དེ་དག་གི་ཉེན་ཀོར་གང་ཞེ་ན་ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་ལོ་མ་ལྷགས་པ་རླུང་གིས་མ་བདས་པ་དག་འབབ་པ་དང ། ཆར་ཆད་པའི་ཐིགས་པ་སྦོམ་པོ་དག་འབབ་པ་དང ། གང་དུ་གུང་ཚིགས་ཀྱི་ཚེ་ཤིང་ལྗོན་པའི་གྲིབ་མས་ཁྱབ་ཅིང་འདུག་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཤིང་ལྗོན་པ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ། ཤིང་ལྗོན་པ་རབ་ཏུ་མང་པོ་ཡལ་གའི་ཚོགས་མ་འབྲེལ་བ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན།
6.57a
ཅི་ཡང་མ་ཡིན་ནོ། །ཀུན་དགའི་ར་བ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། མི་གཅིག་གི་འམ། སྤུན་སྒོ་མ་བྱེ་བ་དག་གི་ཀུན་དགའི་ར་བ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང་ཕྱི་རོལ་མདོམ་གང་ངམ། གང་དུ་དེ་དག་མེ་ཏོག་དག་ཐུ་བར་བྱེད་པ་དང ། སྐོན་པ་དག་འཇོག་པར་བྱེད་པ་དང ། ཕྲེང་བ་དག་རྒྱུད་པར་བྱེད་པ་དང ། འཇལ་བར་བྱེད་པ་དང ། ཉོ་བར་བྱེད་པ་དང ། འཚོང་བར་བྱེད་པ་དང ། དྲེའུ་ཆུང་དང ། ཕུལ་འཇོག་པར་བྱེད་པ་དེ་ནི་དེའི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཀུན་དགའི་ར་བའི་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ་མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཀུན་དགའི་ར་བ་གང་ཡིན་པའོ། དེའི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཁྲོན་པའོ། །དགེ་སློང་གིས་ནང་དུ་ཆོས་གོས་དག་བཞག་སྟེ། ཁྲོན་པར་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཁྲོན་པར་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཁྲོན་པར་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཀུན་དགའི་ར་བ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། མི་གཅིག་གི་འམ། སྤུན་སྒོ་མ་བྱེ་བ་དག་གི་ཀུན་དགའི་ར་བ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་དེ་དག་མེ་ཏོག་དག་ཐུ་བར་བྱེད་པ་དང ། སྐོན་པ་དག་འཇོག་པར་བྱེད་པ་དང ། ཕྲེང་བ་དག་རྒྱུད་པར་བྱེད་པ་དང ། འཇལ་བར་བྱེད་པ་དང ། ཉོ་བར་བྱེད་པ་དང ། འཚོང་བར་བྱེད་པ་དང ། བྲེའུ་ཆུང་དང ། ཕུལ་འཇོག་པར་བྱེད་པ་དེ་ནི་དེ་དག་གི་ཉེན་ཀོར་ཡིན་ནོ། །དགེ་སློང་གིས་ནང་དུ་ཆོས་གོས་དག་བཞག་སྟེ་ཉེན་ཀོར
6.57b
དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཀུན་དགའི་ར་བ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ། མི་ཐ་དད་པ་དག་གི་འམ། སྤུན་སྒོ་བྱེ་བ་དག་གི་ཀུན་དགའི་ར་བ་རབ་ཏུ་མང་པོ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ་དགེ་སློང་གིས་ཆོས་གོས་དག་དགེ་སློང་ལ་གཏད་དེ་འདྲོན་ལམ་དུ་མཆི་ན། བཙུན་པ་དེའི་ཉེན་ཀོར་གང་ལགས། ཉེ་བར་འཁོར་ངས་བྲམ་ཟེ་གྲོ་ཞིན་སྐྱེས་ལ་ཨ་མྲའི་སྡོང་པོ་ཤིན་ཏུ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཡལ་ག་ཕུན་སུམ་ཚོགས་པ། མདོམ་བདུན་གྱིས་བར་དུ་ཆོད་པའི་ཨ་མྲའི་སྡོང་པོ་བདུན་པོ་གང་དག་ཡིན་པ་དེ་དག་ལ་མདོམ་བཞི་བཅུ་རྩ་དགུ་ཡོད་པར་བསྟན་པ་དེ་ནི་དགེ་སློང་ལམ་དུ་ཞུགས་པའི་ཆོས་གོས་དག་གི་ཉེན་ཀོར་ཡིན་ནོ། །འགྲེང་བ་དང ། འདུག་པ་དང ། ཉལ་བའི་ཉེན་ཀོར་ནི་མདོམ་གང་ཁོ་ར་ཁོར་ཡུག་གོ། །ཐད་ཀར་འགྲོ་བའི་ཉེན་ཀོར་ཡང་མདོམ་གང་ཁོ་ར་ཁོར་ཡུག་གོ། །ཐད་ཀར་འགྲེང་བ་དང ། འདུག་པ་དང་ཉལ་བའི་ཉེན་ཀོར་ཡང་མདོམ་གང་ཁོ་ར་ཁོར་ཡུག་གོ། །བཙུན་པ་དགེ་སློང་འཚམས་གཞན་དུ་མཆིས་ནས། ཉལ་བར་བགྱིད་ན་དེའི་ཆོས་གོས་དག་གི་ཉེན་ཀོར་གང་ལགས། ཉེ་བར་འཁོར་ཇི་ཙམ་དུ་ཆོས་གོས་ཀྱི་གྲཝ་ལུས་དང་མ་འབྲལ་བ་ཚུན་ཅད་དོ། །དགེ་སློང་གིས་ཆོས་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གིས་ཆོས་གོས་སྤང་བར་གྱུར་ན། དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གིས་ཆོས་གོས་སྤང་བར་གྱུར་ན
6.58a
དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་སྲིད་དུ་སྤང་བའི་དངོས་པོ་དེས་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འབྲལ་བའི་སྤང་བ་སྟེ་གཉིས་པ་རྫོགས་སོ།། ་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྣམས་ལ་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་གང་ཡང་རུང་བས་གོས་སྔོན་པོ་ཞིག་རྙེད་ན་དེས་དེ་བྱེད་དུ་མི་འཛུད་པར་དེ་གང་གི་ཚེ་འདི་དང་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་གཞུག་གོ་སྙམ་དུ་རེ་བས་དེ་འཇོག་པར་བྱེད་ཅིང ། སྔོན་པོ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་རྣམས་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་གང་ཡང་རུང་བས་གོས་སྔོན་པོ་ཞིག་རྙེད་ན་དེས་དེ་བྱེད་དུ་མི་འཛུད་པར་དེ་གང་གི་ཚེ་འདི་དང་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་བཞུག་གོ་སྙམ་དུ་རེ་བས་འཇོག་པར་བྱེད་ཅིང་སྔོན་པོ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རབ་ཏུ་མང་པོ་དག་ལ་རྨས་པ། དགེ་སློང་དག་ཁྱེད་ལ་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་གང་ཡང་རུང་བས་གོས་སྔོན་པོ་ཞིག་རྙེད་ན་དེས་དེ
6.58b
བྱེད་དུ་མི་འཛུད་པར་དེ་གང་གི་ཚེ་འདི་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་འཇུག་གོ་སྙམ་དུ་རེ་བས་དེ་འཇོག་པར་བྱེད་ཅིང ། སྔོན་པོ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་དུ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བའི་བསྔགས་པ་བརྗོད་ཅིང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་རྣམས་དང ། མཛེས་པ་ཉིད་དང ། དྲོད་རིག་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་དུས་མ་ཡིན་པའི་གོས་ཤིག་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །བླངས་ནས་གལ་ཏེ་ལངས་ན་མྱུར་བ་ཁོ་ནར་གོས་སུ་བྱ་སྟེ་བཅང་བར་བྱའོ། །གལ་ཏེ་མི་ལངས་ལ་ཁ་མ་ལངས་པ་ཁ་སྐོང་བའི་གོས་ལ་རེ་བ་ཡོད་ན་དགེ་སློང་དེས་གོས་དེ་ཟླ་བ་གཅིག་གི་མཐར་གཞག་པར་བྱའོ། །དེ་ལས་འདས་པར་འཇོག་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །ཆོས་གོས་ཟིན་པས་སྲ་བརྐྱང་ཕྱུང་ན་ཞེས་བྱ་བ་ནི་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡང་ཡོད། ཆོས་གོས་མ་ཟིན་ལ་སྲ་བརྐྱང་ཕྱུང་བ་ཡང་ཡོད། ཆོས་གོས་ཟིན་ཅིང་སྲ་བརྐྱང་ཕྱུང་བ་ཡང་ཡོད། ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཡང་ཡོད་དེ། མུ་བཞིར་བཅད་པ་སྔ་མ་བཞིན་ནོ། །དུས་མ་ཡིན་པའི་གོས་ཤིག་ཅེས་བྱ་བ་ལ་དགེ་སློང་གིས་གོས་ཀྱི་དུས་ནི་གང་ཡིན། དུས་མ་ཡིན་པ་ནི་གང་ཡིན་ཞེ་ན། སྲ་བརྐྱང་བཏིང་བའི་གནས་ན་ནི་སྟོན་ཟླ་འབྲིང
6.59a
པོ་ཉ་ནས་དཔྱིད་ཟླ་ར་བ་ཉའི་བར་གྱི་ཟླ་བ་དེ་དག་ནི་གོས་ཀྱི་དུས་ཡིན་ལ། དེ་ཕན་ཅད་ནི་དུས་མ་ཡིན་ནོ། །སྲ་བརྐྱང་མ་བཏིང་བའི་གནས་ན་ནི་ཐམས་ཅད་དུས་མ་ཡིན་ནོ། །རྙེད་ལ་ཞེས་བྱ་བ་ནི་གཞན་ལས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེས་གོས་དེ་བླང་བར་བྱའོ་ཞེས་བྱ་བ་ནི་བདག་གིར་བྱའོ། །གལ་ཏེ་ལངས་ན་ཞེས་བྱ་བ་ནི་གལ་ཏེ་ཆོག་ནའོ། །མྱུར་བ་ཁོ་ནར་གོས་སུ་བྱས་ཏེ་བཅང་བར་བྱའོ་ཞེས་བྱ་བ་ནི་མི་བསྒྱང་བ་ཁོ་ནར་བྱིན་གྱིས་བརླབ་ཏུ་རུང་བར་བྱས་ཏེའོ། །ཁ་མ་ལངས་པ་ཁ་སྐོང་བའོ་ཞེས་བྱ་བ་ནི་སྣམ་སྦྱར་རམ། བླ་གོས་སམ། མཐང་གོས་ཁ་མ་ལངས་པ་ཁ་སྐོང་བའི་འོ། །གོས་ལ་རེ་བ་ཡོད་ན་ཞེས་བྱ་བ་ནི་དགེ་སློང་ལ་མས་བདག་ལ་གོས་སྦྱིན་པའི་རེ་བ་འམ། ཕ་འམ། ཕུ་ནུ་འམ། སྲིང་མོ་འམ། སློབ་དཔོན་ནམ། མཁན་པོས་བདག་ལ་གོས་སྦྱིན་པའི་རེ་བ་འམ། ལོ་ལྔའི་དུས་སྟོན་གྱི་ཚེ་འམ། ལོ་དྲུག་གི་དུས་སྟོན་གྱི་ཚེ་འམ། གཙུག་ཕུད་འདྲེག་པའི་དུས་སྟོན་གྱི་ཚེ་འམ། གནས་ཁང་གི་དུས་སྟོན་གྱི་ཚེ་འམ། དུས་སྟོན་ཆེན་པོའི་ཚེ་རྙེད་དུ་རེ་བ་ཡོད་ནའོ། །དགེ་སློང་དེས་གོས་དེ་ཟླ་བ་གཅིག་གི་མཐར་གཞག་པར་བྱའོ། །ཞེས་བྱ་བ་ནི་ཟླ་བ་གཅིག་གི་མཐའ་ཚུན་ཆད་དུའོ། །དེ་ལས་འདས་པར་འཇོག་ན་ཞེས་བྱ་བ་ནི་དེ་ལས་ཐལ་བར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། །བར་སྡོམ་ལ། དོགས་བཅས་དོགས་པ་མེད་པ་དང ། །ཉམས་གྱུར་གྲུབ་པར་མ་གྱུར་དང ། །རྒྱུན་ཆད་གོས་ལྔ་གོས་གཉིས་དང ། །སྦྱར་བ་དང་ནི་ཚད་རྣམས་སོ། །དགེ་སློང་གིས་ཚེས་ལ་གོས་སྔོན་པོ་ཞེས་རྙེད་ནས་དེས་དེ་བྱེད་དུ་མི་འཛུད་པར་དེ་གང་གི་ཚེ་འདི་དང་འདྲ་བ་རྙེད་པ་དེའི་ཚེ་གོས་བྱེད་དུ་གཞུག་གོ། །སྙམ་དུ་རེ་བས་དེ་འཇོག་པར་བྱེད་ཅིང་དེས་ཚེས་དེ་ཉིད་ལ་གོས་སྔོན་པོ་དོགས་པ་དང་བཅས་པ་གཞན་ཞིག་རྙེད་པར་གྱུར་ན། དགེ་སློང་དེས
6.59b
གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་གསུམ་འམ། ཚེས་བཅུ་ཚུད་ཅད་ཀྱིས་གོས་སྔོན་པོ་ཞིག་རྙེད་ན། དགེ་སློང་དེས་གོས་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་དེ་བཅུ་ལ་མ་རྙེད་ཀྱང་ཉི་མ་བཅུ་དགུ་ཚུན་བཅད་ཀྱིས་རྙེད་ན། དགེ་སློང་དེས་གོས་དེ་ཉི་མ་ཉི་ཤུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་ཉི་ཤུ་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཉི་མ་ཉི་ཤུ་པ་ལ་མ་རྙེད་ཀྱང་ཉི་མ་ཉི་ཤུ་རྩ་དགུ་ཚུན་ཅད་ཀྱིས་རྙེད་ན་དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་བར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་སུམ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་གང་གི་ཚེ་འདི་དང་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་གཞུག་གོ་སྙམ་དུ་རེ་བ་མེད་པས་དེ་འཇོག་པར་བྱེད་ཅིང་དེས་ཚེས
6.60a
དེ་ཉིད་ལ་གོས་སྔོན་པོ་དོགས་པ་མེད་པ་གཞན་ཞིག་རྙེད་པར་གྱུར་ན། དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་བཅུ་ཚུན་ཅད་དམ། ཉི་མ་བཅུ་དགུ་ཚུན་ཅད་དམ། ཉི་མ་ཉི་ཤུ་རྩ་དགུ་ཚུན་ཅད་ཀྱིས་གོས་སྔོན་པོ་ཞིག་རྙེད་ན། དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་སུམ་བཅུ་གཅིག་གི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་གོས་ལ་རེ་བ་ཡོད་པ་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་ཉམས་པར་གྱུར། འགྱངས་པར་གྱུར། ཉམས་ཆུང་བར་གྱུར་ཅིང ། དེས་ཚེས་དེ་ཉིད་ལ་གོས་སྔོན་པོ་གཞན་ཞིག་རྙེད་པར་གྱུར་ན། དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་གཉིས་སམ། ཚེས་བཅུ་ཚུན་ཆད་དམ། ཚེས་བཅུ་ལ་མ་རྙེད་ཀྱང་ཉི་མ་ཉི་ཤུ་རྩ་དགུ་ཚུན་ཆད་ཀྱི་གོས་སྔོན་པོ་ཞིག་རྙེད་ན་དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱི་བརླབ་པར་བྱ་བ་འམ། གཏང་བར་བྱ་བ
6.60b
འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་སུམ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་རེ་བས་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་གྲུབ་པར་མ་གྱུར། རྒྱུན་ཆད་པར་མ་གྱུར་པར་དེས་ཚེས་དེ་ཉིད་ལ་གོས་སྔོན་པོ་གཞན་ཞིག་རྙེད་པར་གྱུར་ན་དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཉི་མ་ཉི་ཤུ་དགུ་ཚུན་ཆད་ཀྱིས་རྙེད་ན་དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་སུམ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་རེ་བས་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་རྒྱུན་ཆད་པར་གྱུར་ན་དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན།
6.61a
ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཉི་མ་ཉི་ཤུ་རྩ་དགུ་ཚུན་ཆད་ཀྱིས་རྙེད་ནས་དེས་དེ་བྱེད་དུ་མི་འཛུད་པར་དེ་རེ་བས་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་རྒྱུན་ཆད་པར་གྱུར་ན་དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། རུང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ་གོས་དག་དུ་མཆིས། ཉེ་བར་འཁོར་ལྔ་སྟེ། གོས་བདག་པོ་ཡོད་པ་དང ། གོས་བདག་པོ་མེད་པ་དང ། གོས་བོར་བླངས་དང ། གོས་དུར་ཁྲོད་པ་དང ། གོས་ཕྱག་དར་ཁྲོད་པ་ཉིད་ནི་ལྔ་པའོ། །དེ་ལ་གོས་བདག་པོ་ཡོད་པ་གང་ཞེ་ན། གང་ལ་བདག་པོ་སྐྱེས་པ་འམ། བུད་མེད་དམ། མ་ནིང་ཡོད་པ་དེ་ནི་གོས་བདག་པོ་ཡོད་པ་ཞེས་བྱའོ། །གོས་བདག་པོ་མེད་པ་གང་ཞེ་ན། གང་ལ་བདག་པོ་སྐྱེས་པ་འམ། བུད་མེད་དམ། མ་ནིང་མེད་པ་དེ་ནི་གོས་བདག་པོ་མེད་པ་ཞེས་བྱའོ། །གོས་བོར་བླངས་གང་ཞེ་ན། འདི་ལྟ་སྟེ། ཉེ་དུ་དག་གིས་ཉེ་དུ་ཉམས་པ་དང ། ཤི་བ་དང ། དུས་ལ་བབ་པར་རིགས་ནས་དེའི་རྒྱབ་ནས་གོས་ཀྱིས་བཀབ་སྟེ་དུར་ཁྲོད་དུ་ཁྱེར་ནས་དེ་དག་གིས་གོས་དེ་ཡང་ཕྱིར་ཁྱེར་ཏེ་འོངས་ནས་དགེ་འདུན་ལ་འབུལ་བ་དེ་ནི་གོས་བོར་བླངས་ཞེས་བྱའོ། །གོས་དུར་ཁྲོད་པ་གང་ཞེ་ན། ཡོངས་སུ་འཛིན་པ་མེད་པའི་དུར་ཁྲོད་ནས་བླངས་པ་གང་ཡིན་པ་དེ་ནི་གོས་དུར་ཁྲོད་པ་ཞེས་བྱའོ། །གོས་ཕྱག་དར་ཁྲོད་པ་གང་ཞེ་ན། ཕྱག་དར་ཁྲོད་པ་རྣམ་པ་ལྔ་སྟེ། ལམ་པོ་ཆེའི་གོས་དང ། དགོན་པར་བོར་བ་དང ། ཆུ་འགྲམ་པ་དང ། སྲིལ་ཟན་དང ། རལ་རུལ་ཉིད་ནི་ལྔ་པ་ཡིན་ཏེ། རལ་རུལ་ཞེས་བྱ་བ་ནི་ཧ་ཅང
6.61b
ཟེགས་པ་གང་ཡིན་པའོ། །གཞན་ཡང་ཕྱག་དར་ཁྲོད་པ་རྣམ་པ་ལྔ་སྟེ། མེས་ཚིག་པ་དང ། ཆུས་ཁྱེར་བ་དང ། བྱི་བས་ཟོས་པ་དང ། བེའུས་ཟོས་པ་དང ། མ་མའི་གོས་ཉིད་ནི་ལྔ་པ་ཡིན་ནོ། །གཞན་ཡང་གོས་གཉིས་ཏེ། སར་པ་དང་དུས་ཚིགས་སུ་སྤྱད་པའོ། །གོས་སར་པ་གང་ཞེ་ན། ཐ་ག་པས་གསར་དུ་བཏགས་པ་དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བའི་དུས་ཚིགས་སུ་མ་སྤྱད་པ་གང་ཡིན་པ་དེ་ནི་གོས་སར་པ་ཞེས་བྱའོ། །གོས་དུས་ཚིགས་སུ་སྤྱད་པ་གང་ཞེ་ན། དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བའི་དུས་ཚིགས་སུ་སྤྱད་པ་གང་ཡིན་པ་སྟེ། དུས་ཚིགས་ཤེས་བྱ་བ་ནི་ཟླ་བ་བཞི་སྟེ། དེ་ནི་གོས་དུས་ཚིགས་སུ་སྤྱད་པ་ཞེས་བྱའོ། །དགེ་སློང་གིས་གོས་སར་པ་རྙེད་ན་གལ་ཏེ་དགེ་སློང་དེས་བཅག་པ་དང ། གདིང་བ་དང ། དྲ་བ་དང ། བཙེམ་པ་དང ། ཁ་བསྒྱུར་བར་ནུས་ན་དགེ་སློང་དེས་གོས་དེ་ལས་སྣམ་སྦྱར་ནི་ཉི་རིམ་དུ་བྱ། གདིང་བ་ཡང་ཉི་རིམ་དུ་བྱ། བླ་གོས་ནི་ཅིག་རྐྱང་དུ་བྱ། མཐང་གོས་ཀྱང་ཅིག་རྐྱང་དུ་བྱའོ། །དགེ་སློང་གིས་སྣམ་སྦྱར་ཉི་རིམ་ལ་རིམ་པ་གསུམ་པ་གློན་པར་བྱེད་ན་དེ་གློན་པར་བྱེད་པ་ན་ཉེས་བྱས་སུ་འགྱུར་ལ། ཞག་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་ཉི་རིམ་ལས་གཞན་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་ཉི་རིམ་ལས་བཀྲུས་ཤིང་ཁ་བསྒྱུར་ཏེ་འདི་ཉིད་ལ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ལྟུང་བ་མེད་ལ། ཉི་མ་བཅུ
6.62a
འདས་ན་སྤང་བའི་ལྟུང་བྱེད་དུ་འགྱུར་རོ། །སྣམ་སྦྱར་ལ་ཇི་ལྟ་བ་བཞིན་དུ་གདིང་བ་ལ་ཡང་དེ་བཞིན་ནོ། །དགེ་སློང་གིས་བླ་གོས་ཅིག་བརྐྱང་ལ་རིམ་པ་ཀློན་པར་བྱེད་ན་དེ་ཀློན་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །བླ་གོས་ལ་ཇི་ལྟ་བ་བཞིན་དུ་མཐང་གོས་ལ་ཡང་དེ་བཞིན་ནོ། །དགེ་སློང་གིས་གོས་དུས་ཚིགས་སུ་སྤྱད་པ་ཞིག་རྙེད་ལ་གལ་ཏེ་དགེ་སློང་དེས་བཅག་པ་དང ། །གདིང་བ་དང ། དྲ་བ་དང ། བཅོམ་པ་དང ། ཁ་བསྒྱུར་བར་ནུས་ན་དགེ་སློང་དེས་གོས་དེ་ལས་སྣམ་སྦྱར་ནི་བཞི་རིམ་དུ་བྱ། གདིང་བ་ཡང་བཞི་རིམ་དུ་བྱ། བླ་གོས་ནི་ཉི་རིམ་དུ་བྱ། མཐང་གོས་ཀྱང་ཉི་རིམ་དུ་བྱའོ། །དགེ་སློང་གིས་སྣམ་སྦྱར་བཞི་རིམ་ལ་རིམ་པ་ལྔ་པ་ཀློན་པར་བྱེད་ན་དེ་ཀློན་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་བཞི་རིམ་ལས་གཞན་དུ་ཀློན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་བཞི་རིམ་ལས་བཀྲུས་ཤིང་ཁ་བསྒྱུར་ཏེ་འདི་ཉིད་དུ་ཀླན་པར་བྱའོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ལྟུང་བ་མེད་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །སྣམ་སྦྱར་ལ་ཇི་ལྟ་བ་དེ་བཞིན་དུ་གདིང་བ་ལ་ཡང་དེ་བཞིན་དུ་བརྗོད་པར་བྱའོ། །དགེ་སློང་གིས་བླ་གོས་ཉི་རིམ་ལ་རིམ་པ་གསུམ་པ་ཀློན་པར་བྱེད་ན་དེ་ཀློན་པ་ན་ཉེས་བྱས་སུ་འགྱུར་ལ་ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་བླ་གོས་ཉི་རིམ་ལས་གཞན་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་བླ་གོས་ཉི་རིམ་ལས་འདི་ཉིད་བཀྲུས་ཤིང་ཁ་བསྒྱུར་ཏེ་འདི་ཉིད་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ལྟུང་བ་མེད་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །
6.62b
བླ་གོས་ལ་ཇི་ལྟ་བ་བཞིན་དུ་མཐང་གོས་ལ་ཡང་དེ་བཞིན་ནོ། །ཕྱག་དར་ཁྲོད་ལ་ནི་ཇི་ཙམ་འདོད་པ་ཀླན་པར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ་སྣམ་སྦྱར་དག་གི་སྣམ་ཕྲན་དུ་ལགས། ཉེ་བར་འཁོར་དགུ་སྟེ། སྣམ་ཕྲན་དགུ་པ་དང ། སྣམ་ཕྲན་བཅུ་གཅིག་པ་དང ། སྣམ་ཕྲན་བཅུ་གསུམ་པ་དང ། སྣམ་ཕྲན་བཅཝ་ལྔ་པ་དང ། སྣམ་ཕྲན་བཅུ་བདུན་པ་དང ། སྣམ་ཕྲན་བཅུ་དགུ་པ་དང ། སྣམ་ཕྲན་ཉི་ཤུ་གཅིག་པ་དང་སྣམ་ཕྲན་ཉི་ཤུ་གསུམ་པ་དང ། སྣམ་ཕྲན་ཉི་ཤུ་ལྔ་པའོ། །ཉེ་བར་འཁོར་དེ་ལ་སྣམ་ཕྲན་དགུ་པ་ནི་གསུམ་སྦྱར་གསུམ་མོ། །སྣམ་ཕྲན་བཅུ་གཅིག་པ་ནི་གསུམ་སྦྱར་གསུམ་དང་སྣམ་ཕྲན་གཉིས་སོ། །སྣམ་ཕྲན་བཅུ་གསུམ་པ་ནི་གསུམ་སྦྱར་བཞི་དང་སྣམ་ཕྲན་གཅིག་གོ། །སྣམ་ཕྲན་བཅཝ་ལྔ་པ་ནི་གསུམ་སྦྱར་ལྔའོ། །སྣམ་ཕྲན་བཅུ་བདུན་པ་ནི་གསུམ་སྦྱར་ལྔ་དང་སྣམ་ཕྲན་གཉིས་སོ། །སྣམ་ཕྲན་བཅུ་དགུ་པ་ནི་གསུམ་སྦྱར་དྲུག་དང་སྣམ་ཕྲན་གཅིག་གོ། །སྣམ་ཕྲན་ཉི་ཤུ་གཅིག་པ་ནི་གསུམ་སྦྱར་བདུན་ནོ། །སྣམ་ཕྲན་ཉི་ཤུ་གསུམ་པ་ནི་གསུམ་སྦྱར་བདུན་དང་སྣམ་ཕྲན་གཉིས་སོ། །སྣམ་ཕྲན་ཉི་ཤུ་ལྔ་པ་ནི་གསུམ་སྦྱར་བརྒྱད་དང་སྣམ་ཕྲན་གཅིག་གོ། །ཉེ་བར་འཁོར་དེ་ལ་སྣམ་སྦྱར་སྣམ་ཕྲན་དགུ་པ་གང་ཡིན་པ་དང ། སྣམ་ཕྲན་བཅུ་གཅིག་པ་གང་ཡིན་པ་དང ། སྣམ་ཕྲན་བཅུ་གསུམ་པ་གང་ཡིན་པ་དེ་གསུམ་ནི་གླེགས་བུ་ཕྱེད་དང་གསུམ་པར་བྱས་ཏེ་བཅང་བར་བྱའོ། །སྣམ་སྦྱར་སྣམ་ཕྲན་བཅཝ་ལྔ་པ་གང་ཡིན་པ་དང ། སྣམ་ཕྲན་བཅུ་བདུན་པ་གང་ཡིན་པ་དང ། སྣམ་ཕྲན་བཅུ་དགུ་པ་གང་ཡིན་པ་དེ་གསུམ་ནི་གླེགས་བུ་ཕྱེད་དང་བཞི་པར་བྱས་ཏེ་བཅང་བར་བྱའོ། །སྣམ་སྦྱར་སྣམ་ཕྲན་ཉི་ཤུ་གཅིག་པ་གང་ཡིན་པ་དང ། སྣམ་ཕྲན་ཉི་ཤུ་གསུམ་པ་གང་ཡིན་པ་དང ། སྣམ་ཕྲན་ཉི་ཤུ་ལྔ་པ་གང་ཡིན་པ་དེ་གསུམ་ནི་གླེགས་བུ་ཕྱེད་དང་ལྔ་པར་བྱས་ཏེ་བཅང་བར་བྱའོ། །ཉེ་བར་འཁོར་དེ་ཡན་ཅད་ནི་ཚེམ་བུའོ། །བཙུན་པ་སྣམ་སྦྱར་གྱི་ཚད་ཇི་ཙམ་ལགས། ཉེ་བར་འཁོར་གསུམ་སྟེ། སྣམ་སྦྱར་ཆེན་པོ
6.63a
དང ། འབྲིང་དང ། ཆུང་ངུར་རིག་པར་བྱའོ། །དེ་ལ་ཆེན་པོ་ནི་ཁྲུ་གསུམ་དང་ལྔའོ། །ཆུང་ངུ་ནི་ཁྲུ་ཕྱེད་དང་གསུམ་དང་ཕྱེད་དང་ལྔའོ། །འབྲིང་གི་ནི་དེ་གཉིས་ཀྱི་བར་མའོ། །སྣམ་སྦྱར་ཇི་ལྟ་བ་བཞིན་དུ་བླ་གོས་དང ། མཐང་གོས་ཀྱང་དེ་བཞིན་ནོ། །གཞན་ཡང་མཐང་གོས་རྣམ་པ་གཉིས་ཏེ། ཁྲུ་དོ་དང་ལྔ་པ་དང ། ཁྲུ་དོ་དང་བཞི་པའོ། །མཐང་གོས་ཐ་མ་ནི་འཁོར་གསུམ་ཁེབས་པ་གང་ཡིན་པའོ། །སྤང་བ་རྣམས་ཀྱི་གོས་ཐ་མ་ནི་ཁྲུ་གང་ཁོ་ར་ཁོར་ཡུག་གོ། །དགེ་སློང་གི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤངས་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་ཇི་ཙམ་དུ་དགེ་སློང་གི་སྤང་བའི་དངོས་པོ་དེ་ཉིད་ཀྱིས་མ་བཤགས་ཤིང ། སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཇོག་པའི་སྤང་བ་སྟེ་གསུམ་པ་རྫོགས་སྷོ།། ་་་་་་་་་་།། གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པས་གཟིགས་པ་ལྔ་པོ་རིགས་དང ། ཡུལ་དང ། དུས་དང ། རུས་དང ། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་གླང་པོ་ཆེར་སྣང་བར་བསྒྱུར་ཏེ་ཡུམ་གྱི་ལྷུམས་སུ་ཞུགས་པ
6.63b
དེའི་ཚེ་ན་ས་ཆེན་པོ་ཤིན་ཏུ་གཡོས་པར་གྱུར་ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་གནག་མུན་པར་བྱེད་པས་གནས་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས་སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་ཏོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་ཟླ་བ་བཅུ་འདས་ནས་ཡུམ་གྱི་ལྷུམས་ནས་བལྟམ་པ་དེའི་ཚེ་ཡང་ས་ཆེན་པོ་ཤིན་ཏུ་གཡོས་པར་གྱུར་ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང ། ཟླ་བ་འདི་ལྟར་རྫུ་འཕྲུལ་ཆེ་བ་འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་གནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་ཆེན་པོས་ཁྱབ་པར་གྱུར་ནས་སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང ། འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་ཏོ། །གང་གི་ཉིན་མོ་བཅོམ་ལྡན་འདས་བྱང་ཆུབ་སེམས་དཔའ་བལྟམས་པར་གྱུར་པ་དེའི་ཉིན་མོ་རྒྱལ་པོ་ཆེན་པོ་བཞི་དག་གི་བུ་ཡང་བཙས་པར་གྱུར་ཏེ། མཉན་ཡོད་ན་རྒྱལ་པོ་ཆེན་པོ་རྩིབས་ཀྱིས་འཕུར་ཚངས་སྦྱིན་གྱི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་གསལ་བ་གསལ་བ་ལྟར་སྣང་བས་གཞོན་ནུ་འདིའི་མིང་གསལ་རྒྱལ་དུ་གདགས་སོ་སྙམ་ནས་བུ་དེའི་མིང་གསལ་རྒྱལ་ཞེས་བྱ་བར་བཏགས་སོ། །རྒྱལ་པོའི་ཁབ་ན་རྒྱལ་པོ་ཆེན
6.64a
པོ་པད་མ་ཆེན་པོའི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་ཉི་མའི་གཟུགས་ཤར་བ་ལྟར་སྣང་ཞིང་འདི་བཙུན་མོ་གཟུགས་ཅན་གྱི་བུ་ཡིན་པས་གཞོན་ནུ་འདིའི་མིང་གཟུགས་ཅན་སྙིང་པོར་གདགས་སོ་སྙམ་ནས་བུ་དེའི་མིང་གཟུགས་ཅན་སྙིང་པོ་ཞེས་བྱ་བར་བཏགས་སོ། །ཀཽ་ཤམྦི་ན་རྒྱལ་པོ་ཆེན་པོ་དམག་བརྒྱ་པའི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་ཉི་མ་ཤར་བ་ལྟར་སྣང་བར་གྱུར་པས་གཞོན་ནུ་འདིའི་མིང་ཤར་བར་གདགས་སོ་སྙམ་ནས་བུ་དེའི་མིང་ཤར་བ་ཞེས་བྱ་བར་བཏགས་སོ། །འཕགས་རྒྱལ་ན་རྒྱལ་པོ་ཆེན་པོ་མུ་ཁྱུད་མཐའ་ཡས་ཀྱི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་རབ་ཏུ་སྣང་བས་སྣང་བར་གྱུར་པས་གཞོན་ནུ་འདིའི་མིང་རབ་སྣང་ཞེས་བྱ་བར་གདགས་སོ་སྙམ་ནས་བུ་དེའི་མིང་རབ་སྣང་ཞེས་བྱ་བར་བཏགས་སོ། །རྒྱལ་པོ་རེ་རེས་བསམས་པ། ཡང་བདག་གི་བུའི་མཐུ་ཡིན་ནོ། །བདག་གི་བུའི་མཐུ་ཡིན་ནོ་སྙམ་མོད་ཀྱི། དེ་ནི་དེ་ལྟ་མ་ཡིན་ཏེ། འདི་ལྟར་དེ་དག་ཐམས་ཅད་ནི་བྱང་ཆུབ་སེམས་དཔའི་མཐུ་ཡིན་པའི་ཕྱིར་རོ། །གང་གི་ཉིན་མོ་བཅོམ་ལྡན་འདས་བྱང་ཆུབ་སེམས་དཔའ་བལྟམས་པ་དེ་ཉིད་ཀྱི་ཉིན་མོ་ཤཱཀྱ་གཞོན་ནུ་བཟང་ལྡན་ལ་སོགས་པ་ལྔ་བརྒྱ་ཡང་བཙས་སོ། །བསྙེན་བཀུར་བ་འདུན་བྱེད་ལ་སོགས་པ་ལྔ་བརྒྱ་ཡང་བཙས་སོ། །རྟ་རྒོད་མ་ལྔ་བརྒྱ་ལས་རྟེའུ་བསྔགས་ལྡན་ལ་སོགས་པ་ལྔ་བརྒྱ་ཡང་འབྲངས་སོ། །ལྷ་རྣམས་ཀྱིས་ཀྱང་གཏེར་ལྔ་བརྒྱ་ཉེ་བར་བསྟན་ཏོ། །བཅོམ་ལྡན་འདས་བྱང་ཆུབ་སེམས་དཔའ་དེ་བྲམ་ཟེ་ལྟས་པ་དང་མཚན་མཁན་དག་གིས་ལུང་བསྟན་པ། གལ་ཏེ་གཞོན་ནུ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང །
6.64b
བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམ་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ་ཞེས་ལུང་བསྟན་ཏོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་འཇིག་རྟེན་དུ་བྱུང་བ་དེའི་ཚེ་ན་ཐམས་ཅད་དུ་གངས་ཀྱི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང ། ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་སྟེ། དེ་བྲམ་ཟེ་ལྟས་པ་དང ། མཚན་མཁན་དག་གིས་གལ་ཏེ་གཞོན་ནུ་དེ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་དང་འཐུན་ཞིང །
6.65a
སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ་ཞེས་ལུང་བསྟན་ཏོ་ཞེས་སྒྲ་བསྒྲགས་པར་གྱུར་ཏོ། །ཉི་འོག་གི་ཁམས་ཀྱི་རྒྱལ་པོ་དག་གིས་ཀྱང་གངས་རིའི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་སྟེ། དེ་བྲམ་ཟེ་ལྟས་པ་དང ། མཚན་མཁན་དག་གིས་གལ་ཏེ་གཞོན་ནུ་དེ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ། །ཞེས་ལུང་བསྟན་ཏོ་ཞེས་ཐོས་སོ། །ཐོས་ནས་ཀྱང་ཉི་འོག་གི་ཁམས་ཀྱི་རྒྱལ་པོ་དེ་དག་འདི་སྙམ་དུ་སེམས་ཏེ། ད་གཞོན་ནུ་བསྟེན་ན་དུས་སུ་འབྲས་བུ་སྟེར་བར་འགྱུར་བས་གང་བསྟེན་པར་འགྱུར་སྙམ་མོ། །དེ་དག་གིས་བསམས་པ། རྒྱལ་པོ་ཟས་གཙང་བསྟེན
6.65b
པར་བྱ་སྟེ། དེ་བསྟེན་ན་གཞོན་ནུ་བསྟེན་པར་འགྱུར་རོ་སྙམ་ནས། དེ་དག་གིས་རྒྱལ་པོ་ཟས་གཙང་བསྟེན་པར་བརྩམས་ཏེ། དུས་དང་འཐུན་པའི་དུས་སུ་འདུད་པས་ཕོ་ཉ་དང ། དཀོར་སྒྲོམ་དག་སྐུར་བར་བྱེད་དོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ་བདག་གི་བུ་བཙས་པ་ན་དོན་ཐམས་ཅད་དང་ལས་ཀྱི་མཐའ་ཐམས་ཅད་གྲུབ་པས་དེའི་ཕྱིར་གཞོན་ནུ་འདིའི་མིང་དོན་ཐམས་ཅད་གྲུབ་པ་ཞེས་བྱ་བར་གདགས་སོ་སྙམ་ནས་དེའི་མིང་དོན་ཐམས་ཅད་གྲུབ་པ་ཞེས་བྱ་བར་བཏགས་སོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་ཆེན་པོར་འཁྲུངས་ཤིང་དེས་རྒན་པོ་དང ། ནད་པ་དང ། ཤི་བ་གཟིགས་ནས་ཐུགས་བྱུང་སྟེ་ནགས་ཀྱི་ནང་དུ་གཤེགས་པ་དེའི་ཚེ་ན་རྒྱལ་པོ་ཟས་གཙང་དང ། ཤཱཀྱ་ལེགས་པར་རབ་རྟོགས་ཀྱིས་བཀའ་མཆིད་གསོལ་བའི་མི་ཉིས་བརྒྱ་ལྔ་བཅུ་ཉིས་བརྒྱ་ལྔ་བཅུ་བཀྱེ་སྟེ། དེ་དག་གིས་ཉི་མ་རེ་རེ་ཞིང་དེར་ནི་གཞོན་ནུ་ཏིལ་འབྲུ་གཅིག་གམ། འབྲས་ཐུག་པོ་ཆེ་འབྲུ་གཅིག་གམ། མོན་སྲན་སྡེའུ་འབྲུ་གཅིག་གམ། མོན་སྲན་གྲེའུ་འབྲུ་གཅིག་གམ། རྒྱ་ཤུག་གི་འབྲུ་གཅིག་གམ། རྒྱ་སྲན་འབྲུ་གཅིག་གིས་འཚོ་བར་མཛད་དོ་ཞེས་བཅོམ་ལྡན་འདས་བྱང་ཆུབ་སེམས་དཔའི་བཀའ་མཆིད་ཁྱེར་ཏེ་འོང་ངོ ། །ཉི་འོག་གི་ཁམས་ཀྱི་རྒྱལ་པོ་དག་གིས་དེ་ལྟར་གཞོན་ནུ་དོན་ཐམས་ཅད་གྲུབ་པ་རྒན་པོ་དང ། ནད་པ་དང ། ཤི་བ་གཟིགས་ནས་ཐུགས་བྱུང་སྟེ་རབ་ཏུ་བྱུང་ངོ་ཞེས་ཐོས་ནས་དེ་དག་འདི་སྙམ་དུ་སེམས་ཏེ། གང་གི་ཕྱིར་བདག་ཅག་རྒྱལ་པོ་ཟས་གཙང་ལ་སྟེན་པར་བྱེད་པའི་གཞོན་ནུ་དེ་རབ་ཏུ་བྱུང་ངོ་སྙམ་ནས། དེ་དག་ལས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་མ་གཏོགས་པ་གཞན་ཐམས་ཅད་ཀྱིས་འདུད་པ་དང ། ཕོ་ཉ་དང་དཀོར་སྒྲོམ་འབུལ་བ་རྒྱུན་བཅད་པར་གྱུར་ཏོ། །དེའི་ཚེ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་བློན་པོའི་མཆོག་སྦེད་པ་ཞེས་བྱ་བ་ཞིག་ཡོད་ལ། རྒྱལ་པོ་ཟས་གཙང་ལ་ནི་མདུན་ན་འདོན་གྱི་བུ་འཆར་ཀ་ཞེས་བྱ་བ་ཡོད་དེ། གང་གི་ཚེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་རྒྱལ་པོ་ཟས་གཙང་གི་གན་དུ་ཕོ་ཉ་གཏོང་བར་བྱེད་པ
6.66a
དེའི་ཚེ་ན་བློན་པོའི་མཆོག་སྦེད་པ་གཏོད་བར་བྱེད་དེ། དེས་རྒྱལ་པོའི་བྱ་བ་དག་དང ། རྒྱལ་པོའི་བྱེད་པ་དག་བྱས་ནས་འཆར་ཀའི་ཁྱིམ་དུ་འཇུག་པར་བྱེད་དོ། །གང་གི་ཚེ་རྒྱལ་པོ་ཟས་གཙང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གན་དུ་ཕོ་ཉ་གཏོང་བར་བྱེད་པ་དེའི་ཚེ་ན་ནི་མདུན་ན་འདོན་གྱི་བུ་འཆར་ཀ་གཏོང་བར་བྱེད་དོ། །དེས་ཀྱང་རྒྱལ་པོའི་བྱ་བ་དག་དང ། རྒྱལ་པོའི་བྱེད་པ་དག་བྱས་ནས་བློན་པོའི་མཆོག་སྦེད་པའི་ཁྱིམ་དུ་འཇུག་པར་བྱེད་དོ། །སྦེད་པ་ལ་ཆུང་མ་སྦེད་མ་ཞེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་དགའ་བ་ཞིག་ཡོད་དེ། འཆར་ཀ་སྦེད་མ་དང་ལྷན་ཅིག་ཁ་དུམ་པར་གྱུར་ཏོ། །སྦེད་པས་ཇི་ལྟར་འཆར་ཀ་སྦེད་མ་དང་ལྷན་ཅིག་ཁ་དུམ་པར་གྱུར་པར་ཤེས་ནས་དེས་བསམས་པ། འདི་གསད་པར་བྱའོ་སྙམ་མོ། །ཡང་བསམས་པ། གལ་ཏེ་འདི་བསད་པར་གྱུར་ན་ཡུལ་འཁོར་གཉིས་འཁྲུག་པ་ཆེན་པོར་འགྱུར་བས་བདག་གིས་བུད་མེད་ཀྱི་ལུས་ཀྱི་ཕྱིར་ཅིའི་ཕྱིར་བྲམ་ཟེ་གསད་པར་བྱ་སྙམ་ནས་དེ་བཏང་སྙོམས་སུ་བཞག་གོ། །དེ་ནས་འཆར་ཀ་འདི་སྙམ་དུ་སེམས་ཏེ། བདག་སྦེད་པས་འཕྲིགས་སོ་སྙམ་དུ་རིག་ནས་སྐྲག་སྟེ་ཁྱིམ་ནས་བྱུང་ཞིང་གཞན་ན་འདུག་པ་དང ། སྦེད་པས་སྨྲས་པ། འཆར་ཀ་ཁྱོད་ཅིའི་ཕྱིར་རང་གི་ཁྱིམ་སྤངས་ཏེ་གཞན་ན་འདུག་ཚུར་ཤོག་།འདི་ཁྱོད་རང་གི་ཁྱིམ་ཡིན་གྱིས་ཅི་བདེར་འདུག་ཤིག་།དེ་ནས་འཆར་ཀ་འདི་སྙམ་དུ་སེམས་ཏེ། དོན་གྱིས་ན་འདིས་བདག་ལ་རྗེས་སུ་གནང་ངོ་སྙམ་དུ་རིག་ནས་དེ་ཉིད་ན་འདུག་གོ། ་་་་་་་་།།འདུལ་བ་རྣམ་པར་འབྱེད་པ། བམ་པོ་ཉི་ཤུ་བདུན་པ། དེ་ནས་དུས་གཞན་ཞིག་ན་བློན་པོའི་མཆོག་སྦེད་པ་དུས་ལ་བབ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་དེ་ལ་བུ་མེད་པའི་ཕྱིར་ནོར་ཐམས་ཅད་རང་གི་མཛོད་དང་བང་བར་བཅུག་གོ། །སྦེད་མས་འཆར་ཀ་ལ་གང་གི་ཚེ་བདག་གི་ཁྱིམ་ཐབ་གསོན་ཞིང་འདུག་སྟེ་འཚོ་ཞིང་སྡོད་པ་དེའི་ཚེ་ན་ཁྱོད་རྟག་པ་ཁོ་ནར་བྱོན་ན་ད་དེའི་དུས་ལ་བབ་སྟེ་ཀོ་ས
6.66b
ལར་བྱུང་བའི་རྒྱལ་པོ་གསལ་རྒྱལ་གྱིས་ཀྱང་བུ་མ་མཆིས་པའི་སླད་དུ་ནོར་ཐམས་ཅད་རང་གི་མཛོད་དང་བང་བར་སྩལ་ན། ད་ཁྱོད་ཀྱིས་བཀའ་མཆིད་ཙམ་ཡང་མི་སྤྲིང་ངམ་ཞེས་ཡི་གེ་སྤྲིང་ངོ ། །དེ་ནས་འཆར་ཀ་སྤྲིང་ཡིག་གི་དོན་ཐོས་ནས་འདི་སྙམ་དུ་སེམས་ཏེ། གལ་ཏེ་བདག་དེར་སོང་བར་གྱུར་ན་གཞི་དེ་ལས་འཆར་ཀ་བུད་མེད་ཀྱི་ཕྱིར་དེར་སོང་ངོ་ཞེས་གཞན་དག་ཁ་ཟེར་བར་འགྱུར་གྱིས་བདག་གིས་ཐབས་ཀྱི་རྣམ་པ་ཞིག་བྱའོ་སྙམ་ནས་དེས་ལན་གཉིས་སམ་གསུམ་དུ་རྒྱལ་པོའི་བྱ་བ་དག་དང ། རྒྱལ་པོའི་བྱེད་པ་དག་བྱས་ནས་རྒྱལ་པོ་ཟས་གཙང་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ། །ལྷ་གང་གི་ཚེ་གཞོན་ནུ་དོན་ཐམས་ཅད་གྲུབ་པ་བལྟམས་པ་དེའི་ཚེ་ན་ཉི་འོག་གི་ཁམས་ཀྱི་རྒྱལ་པོ་ཐམས་ཅད་འདུད་ཅིང་ཐམས་ཅད་ཀྱིས་ཕོ་ཉ་དང ། དཀོར་སྒྲོམ་དག་གསོལ་ནས། གང་གི་ཚེ་གཞོན་ནུ་དོན་ཐམས་ཅད་གྲུབ་པ་རྒན་པོ་དང ། ནད་པ་དང ། གུམ་པ་གཟིགས་ནས་ཐུགས་བྱུང་སྟེ་ནགས་སུ་གཤེགས་པ་དེའི་ཚེ་ན་ཉི་འོག་གི་ཁམས་ཀྱི་རྒྱལ་པོ་དེ་དག་ལས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་མ་གཏོགས་པ་གཞན་ཐམས་ཅད་ཀྱིས་ཕོ་ཉ་དང ། དཀོར་སྒྲོམ་འབུལ་བ་རྒྱུན་བཀུམ་ནས་ལྷས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཕོ་ཉ་དང ། དཀོར་སྒྲོམ་དག་བཀའ་སྩལ་ཅིང་བསྐུར་ནས་དེ་ལྟ་དེ་ལྟར་རྐྱེན་པར་གྱུར་པ་ལས་ད་ཡལ་བར་བོར་ན་སླད་ཀྱིས་གནོད་པ་ཆེན་པོར་འགྱུར་བ་དེ་སྐོལ་དང་མཚམས་འབྲེལ་བར་མཆིས་པས་དེ་དང་ལྷན་ཅིག་རྐྱེན་པར་མཛད་པའི་རིགས་སོ། །འཆར་ཀ་གལ་ཏེ་དེ་ལྟ་ན་ཁྱོད་ཉིད་ཕོ་ཉར་སོང་ཤིག་།ལྷ་བཀའ་བཞིན་འཚལ་ཞེས་དེ་ནས་འཆར་ཀས་དཀོར་སྒྲོམ་དག་ཁྱེར་ཏེ་མཉན་ཡོད་ག་ལ་བ་དེར་འཕགས་ནས་མཐར་གྱིས་མཉན་ཡོད་དུ་ཕྱིན་ཏོ། །དེ་ནས་འཆར་ཀ་འདི་སྙམ་དུ་སེམས་ཏེ། སྟེན་པ་ལ་བསྟེན་པར་མི་བྱ་བར་བསྟེན་པ་ལ་བསྟེན་པ་བསྟེན་པར་བྱ་བ་ཡིན་པས་ཇེ་དང་པོར་བློན་པོ་རྣམས་བལྟ་བར་བྱ་ཞིང་དེའི་འོག་ཏུ་རྒྱལ་པོ་བལྟ་སྟེ། སྦེད་མའི་ཕྱིར་རྒྱལ་པོ་ལ་གསོལ་བ་བྱའོ་སྙམ་ནས། དེས་བློན་པོ་རྣམས་ལ་བལྟ་བར་བརྩམས་ཏེ་སྨྲས་པ། ཤེས་ལྡན་དག་ཁྱེད་ཀྱིས་ཁོ་བོ་ཇི་ལྟར
6.67a
སྦེད་མ་དང་ལྷན་ཅིག་བཤེས་པ་དེ་མི་ཤེས་སམ། དེ་ཁྱིམ་ཐབ་དུས་ལ་བབ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བུ་མེད་པའི་ཕྱིར་དེའི་ནོར་ཐམས་ཅད་རང་གི་མཛོད་དང ། བང་བར་བཅུག་པས་དེའི་ཕྱིར་ཁོ་བོ་རྒྱལ་པོ་ལ་གསོལ་བ་བྱེད་ཀྱིས་ཁྱེད་ཀྱིས་གྲོགས་གྱིས་ཤིག་།དེ་དག་གིས་དེ་བཞིན་དུ་ཁས་བླངས་སོ། །དེ་ནས་འཆར་ཀ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་རྒྱལ་བ་དང ། ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་ནས་ལན་གཉིས་ལན་གསུམ་དུ་རྒྱལ་པོའི་བྱ་བ་དག་དང ། རྒྱལ་པོའི་བྱེད་པ་དག་བྱས་ཏེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་བདག་གི་གནས་སྩོལ་ཅིག་།འཆར་ཀ་ཁྱོད་སྔོན་གང་དུ་ཞུགས། ལྷ་བློན་པོའི་མཆོག་སྦེད་པའི་སྡུམ་པར་མཆིས་སོ། །འཆར་ཀ་སོང་ལ་དེ་ཉིད་དུ་ཞུགས་ཤིག་།ལྷ་བློན་པོའི་མཆོག་སྦེད་པ་དུས་ལ་བབ་བོ། །གལ་ཏེ་དེ་དུས་ལ་བབ་ན་ཅི་དེའི་ཁྱིམ་ཡང་དུས་ལ་བབ་བམ། ལྷ་དེའི་སྡུམ་པ་ནི་དུས་ལ་མ་བབ་མོད་ཀྱི་འོན་ཀྱང་དེ་ན་སྟན་ཙམ་ཡང་མ་མཆིས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ཁྱེད་ཀྱིས་འཆར་ཀའི་གནས་བྱིན་ཅིག་།འཆར་ཀའི་ཕྱིར་བྱུང་བ་དང ། བློན་པོ་རྣམས་ཀྱིས་སྨྲས་པ། ལྷ་ཅི་ལགས་འཆར་ཀ་ལ་གནས་མ་མཆིས་སྙམ་འམ། འདི་ལྟར་འཆར་ཀ་སྦེད་མ་དང་ལྷན་ཅིག་མཆིད་མཇལ་བས་དོན་གྱིས་ན་འཆར་ཀས་སྦེད་མའི་སླད་དུ་ལྷ་ལ་གསོལ་བ་ལགས་ཀྱིས། ལྷ་འཆར་ཀ་ནི་བྲམ་ཟེ་མདུན་ན་འདོན་གྱི་བུ་ལགས་པས་བྲམ་ཟེ་ནི་མི་འདོད་བཞིན་དུ་གཟུང་བར་བགྱི་བ་ལགས་ཏེ། འདི་ལེགས་པར་བཟུང་ན་རྒྱལ་པོ་ཟས་གཙང་ལེགས་པར་བཟུང་བར་འགྱུར་རོ། །དེ་ནས་རྒྱལ་པོས་འཆར་ཀ་བོས་ཏེ་སྨྲས་པ། འཆར་ཀ་ངས་ཁྱོད་ཇི་ལྟར་སྦེད་མ་དང་ལྷན་ཅིག་བཤེས་པར་སྔར་མ་ཤེས་ཀྱིས་ད་སོང་ལ་སྦེད་མ་དང ། དེའི་ཁྱིམ་དང ། ནོར་ཐམས་ཅད་ཁྱོད་ཁྱེར་ཅིག་།ལྷ་བཀའ་སྩལ་པ་བཞིན་འཚལ་ལོ་ཞེས་སྨྲས་ནས། འཆར་ཀ་སྦེད་མའི་ཁྱིམ་ག་ལ་བ་དེར་སོང་བ་དང ། སྦེད་མས་འཆར་ཀ་འོངས་སོ་ཞེས་ཐོས་ནས་སྒོ་ཁང་དུ་འདུག་སྟེ་ངུ་བར
6.67b
བརྩམས་སོ། །འཆར་ཀས་མཐོང་ནས་སྨྲས་པ། སྦེད་མ་ཁྱོད་ཅིའི་ཕྱིར་ངུ ། དེས་སྨྲས་པ། བདག་འཚལ་བའི་ཁྱིམ་ཐབ་དུས་ལ་བབ་ན་ཅི་ཁྱོད་ཀྱིས་ཀྱང་ཡོངས་སུ་བཏང་ངམ། དེ་ནས་འཆར་ཀ་འདི་སྙམ་དུ་སེམས་ཏེ། གལ་ཏེ་བདག་གིས་འཐུན་པར་སྨྲས་ན་འདི་ཤིན་དུ་ངུ་བར་འགྱུར་བས་བདག་གིས་འདི་ཚར་གཅད་པར་བྱའོ་སྙམ་དུ་རིག་ནས་འཆར་ཀས་སྦེད་མ་ལ་སྨྲས་པ། སྦེད་མ་བྱང་ཆུབ་སེམས་དཔའ་དཀའ་བ་བྱེད་པ་གང་གིས་བཙུན་མོ་གྲགས་འཛིན་དང ། ས་འཚོ་མ་དང ། རི་དགས་སྐྱེས་ལ་སོགས་པ་བུད་མེད་དྲུག་ཁྲི་སྤངས་ཏེ་རབ་ཏུ་བྱུང་བ་དེ་དག་གི་རྐང་པའི་རྡུལ་ཙམ་དུ་ཡང་ཁྱོད་ཀྱིས་མི་ཕོད་དོ། །དེ་ནས་དེ་ཅང་མི་སྨྲ་བར་འདུག་པ་དང ། འཆར་ཀས་སྨྲས་པ། ཁོ་བོས་ཁྱོད་མ་བཏང་བས་ཁྱོད་ཉིད་ཀྱི་ཕྱིར་འདིར་འོངས་པ་ཡིན་ནོ། །ཁོ་བོས་རྒྱལ་པོ་ལས་ཁྱོད་དང་ཁྱིམ་དང ། ནོར་ཐམས་ཅད་ཐོབ་ན་ཅི་ཁྱོད་འདི་ཉིད་དུ་འདུག་གམ། སེར་སྐྱའི་གནས་སུ་འགྲོ། དེས་བསམས་པ། གལ་ཏེ་སེར་སྐྱའི་གནས་སུ་སོང་ནས་བྲམ་ཟེ་མོ་ལས་སྲོག་ཀྱང་མི་ཐོབ་བོ་སྙམ་དུ་རིག་ནས་འདི་ཉིད་དུ་མཆིས་སོ་ཞེས་སྨྲས་ཏེ་དེ་དེ་ཉིད་དུ་འདུག་གོ། །དེའི་ཚེ་ན་འཆར་ཀ་ལ་ཁྱིམ་གཉིས་ཡོད་དེ། གཅིག་ནི་མཉན་ཡོད་ནའོ། །གཅིག་ནི་སེར་སྐྱའི་གནས་ནའོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱད་དེ་དཀའ་བ་བྱེད་པ་ཅི་ཡང་མེད་པར་རིག་ནས། ཅི་བདེར་དབུགས་རྔུབ་པར་མཛད་ཅི་བདེར་དབུགས་འབྱིན་པར་མཛད་ཅིང ། འབྲས་ཆན་དང ། ཟན་དྲོན་ལ་སོགས་པ་ཞལ་ཟས་རྒྱ་ཆེན་པོ་དག་ཀྱང་གསོལ་བར་མཛད། ཞུན་མར་དང ། འབྲུ་མར་དག་གིས་སྐུ་དག་ཀྱང་སྐུད་པར་མཛད། ཆུ་དྲོན་པོས་ཀྱང་སྐུ་བསིལ་བར་མཛད་ཅིང ། གྲོང་སྡེ་འདོང་དུ་གཤེགས་ནས་གྲོང་པའི་བུ་མོ་དགའ་མོ་དང ། དགའ་སྟོབས་མ་གཉིས་ལས་ལན་བཅུ་དྲུག་བཟླས་པའི་འོ་མ་སྦྲང་རྩི་དང་བསྲེས་པ་གསོལ་ཏེ། ཀླུའི་རྒྱལ་པོ་ནག་པོས་མངོན་པར་བསྟོད་པ་ན་རྩཝ་བཀྲ་ཤིས་འཚོང་པ་ལས་རྩཝ་གསེར་གྱི་མདོག་ལྟ་བུ་དག་བཞེས་ནས་བྱང་ཆུབ་ཀྱི་གཞི་ག་ལ་བ་དེར་གཤེགས་ཏེ་བྱོན་ནས། ཉིད་ཀྱིས་རྩཝ་མ་འཁྲུགས་པའི་གདན་བཤམས་ནས་དཀྱིལ་མོ་དཀྲུང་བཅས་ཏེ་སྐུ
6.68a
དྲང་པོར་བསྲང་ནས་དྲན་པ་ཕྱོགས་པར་བཞག་སྟེ་བཞུགས་ནས་ཐུགས་བསྐྱེད་ཅིང་གསུང་བརྗོད་པ། ཇི་སྲིད་ཟག་མེད་མ་ཐོབ་བར། །དེ་སྲིད་དཀྱིལ་དཀྲུང་གཞིག་མི་བྱ། །དེ་ཡིས་ཇི་སྲིད་ཟག་མེད་པ། །མ་བརྙེས་དཀྱིལ་དཀྲུང་འཇིག་མི་མཛད། །གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང ། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ་བླ་ན་མེད་པའི་མཁྱེན་པ་ཐུགས་སུ་ཆུད་ནས་ཚངས་པས་གསོལ་ཏོ། །བཱ་རཱ་ཎ་སཱིར་གཤེགས་ནས་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་བ་དེའི་ཚེ་ལྔ་པ་དང ། ཉེ་ལྔ་དག་དང ། གྲོང་པའི་ཁྱེའུ་མཐོ་བ་མཐོ་བ་ལྔ་བཅུ་བཏུལ་ཏོ། །ཀར་པ་སིའི་ཚལ་གསེབ་ཏུ་གཤེགས་ནས་བཟང་སྡེའི་ཚོགས་དྲུག་བཅུ་བདེན་པ་དག་ལ་བཀོད་དོ། །གྲོང་སྡེ་འདོན་དུ་གཤེགས་ནས་གྲོང་པའི་བུ་མོ་དགའ་མོ་དང ། དགའ་སྟོབས་མ་གཉིས་བདེན་པ་དག་ལ་བཀོད་དོ། །སྟེང་རྒྱས་སུ་གཤེགས་ནས་རལ་པ་ཅན་སྟོང་རབ་ཏུ་ཕྱུང་ཞིང་རྫོགས་པར་བསྙེན་པར་མཛད་དོ། །ག་ཡཱ་མགོའི་མཆོད་རྟེན་དུ་གཤེགས་ནས་དགེ་སློང་སྟོང་པོ་དེ་དག་ཆོ་འཕྲུལ་གསུམ་གྱིས་གདམས་པ་མཛད་ནས་འཁོར་བའི་དགོན་པ་ལས་བསྒྲལ་ཏེ་ཤིན་དུ་མཐར་ཐུག་པ་གྲུབ་པ་དང་བདེ་བ་བླ་ན་མེད་པའི་མྱ་ངན་ལས་འདས་པ་ལ་བཀོད་དོ། །ཤར་པའི་ཚལ་གསེབ་ཏུ་གཤེགས་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང ། མ་ག་དྷཱར་བྱུང་བའི་བྲམ་ཟེ་དང ། ཁྱིམ་བདག་འབུམ་ཕྲག་དུ་མ་དང་ལྷན་ཅིག་བདེན་པ་དག་ལ་བཞག་གོ། །རྒྱལ་པོའི་ཁབ་ཏུ་གཤེགས་ནས་འོད་མའི་ཚལ་བཞེས་ཏེ་ཤཱ་རིའི་བུ་དང ། མཽད་གལ་གྱི་བུ་འཁོར་ཉིས་བརྒྱ་ལྔ་བཅུ་དང་ལྡན་པ་རབ་ཏུ་ཕྱུང་ཞིང་རྫོགས་པར་བསྙེན་པར་མཛད་དོ། །མཉན་ཡོད་དུ་གཤེགས་ནས་རྒྱལ་བྱེད་ཀྱི་ཚལ་བཞེས་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོས་བཏུལ་ནས། དེ་ནས་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི
6.68b
ཀུན་དགའ་ར་བ་ན་བཞུགས་སོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རྒྱལ་པོ་ཟས་གཙང་གི་གན་དུ་ཕོ་ཉ་བཏང་སྟེ། ལྷ་དགྱེས་པ་སྐྱེད་ཅིག་།ཁྱོད་ཀྱི་སྲས་ཀྱིས་བདུད་རྩི་ཐུགས་སུ་ཆུད་དེ། བདུད་རྩིས་འགྲོ་བ་ཚིམ་པར་མཛད་ཅིང ། མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ་ཞེས་སྤྲིང་ངོ ། །རྒྱལ་པོ་ཟས་གཙང་གིས་ཐོས་ནས་བཅོམ་ལྡན་འདས་ཀྱི་སྤྱན་སྔར་ཕོ་ཉ་བཏང་སྟེ། གཞོན་ནུ་བདག་གིས་རིང་དུ་མ་མཐོང་སྟེ། བདག་གཞོན་ནུ་མཐོང་བས་ཡོངས་སུ་སྐོམ་མོ་ཞེས་གསོལ་པ་དང ། ཕོ་ཉ་དེ་དེ་ཉིད་དུ་རབ་ཏུ་ཕྱུང་ངོ ། །ཕོ་ཉ་གཉིས་པ་བཏང་བ་དང་དེ་ཡང་དེ་ཉིད་དུ་རབ་ཏུ་ཕྱུང་ངོ ། །བཅོམ་ལྡན་འདས་ཀྱིས་ཆོས་འདུལ་བ་ནི་ལེགས་པར་གསུངས་པ་ཡིན་པའི་ཕྱིར་གང་དང་གང་ཕོ་ཉར་བཏང་བ་དེ་དང་དེ་དེ་ཉིད་དུ་རབ་ཏུ་བྱུང་ངོ ། །དེ་ནས་དུས་གཞན་ཞིག་ན་རྒྱལ་པོ་ཟས་གཙང་གིས་དེ་ཐོས་ནས་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་པ་འཆར་ཀས་མཐོང་ནས་སྨྲས་པ། ལྷ་ཅིའི་སླད་དུ་ཕྱག་ལ་ཞལ་གཏད་དེ་ཐུགས་ཁོངས་སུ་ཆུད་ཅིང་བཞུགས། འཆར་ཀ་གང་གི་ཚེ་གཞོན་ནུ་དོན་ཐམས་ཅད་གྲུབ་པ་དཀའ་བ་དག་སྤྱོད་པའི་ཚེ་ངས་གཏམ་རྨེད་པའི་མི་དག་བཏང་ན་དེ་དག་ཉི་མ་རེ་རེ་ཞིང་གཏམ་ཁྱེར་ཏེ་འོངས་ནས་གཞོན་ནུ་དོན་ཐམས་ཅད་གྲུབ་པ་གནས་པ་འདིས་གནས་སོ་ཞེས་གཏམ་སྙོད་པར་བྱེད་ན། ད་གཞོན་ནུ་དོན་ཐམས་ཅད་གྲུབ་པས་བདུད་རྩི་ཐུགས་སུ་ཆུད་དེ་བདུད་རྩིས་འགྲོ་བ་ཚིམ་པར་མཛད་ཅིང ། མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཤེས་ཐོས་ནས་ངས་གཏམ་རྨེད་པའི་མི་དག་བཏང་ན། འགས་ཀྱང་གཞོན་ནུ་དོན་ཐམས་ཅད་གྲུབ་པའི་གཏམ་ཁྱེར་ཏེ་མི་འོང་བར་གང་དང་གང་ཕོ་ཉར་བཏང་བ་དེ་དང་དེ་དེ་ཉིད་དུ་འདུག་པར་གྱུར་ན་ང་ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་མི་འདུག་ཏུ་རུང ། འཆར་ཀས་སྨྲས་པ། ལྷ་བདག་ལ་བཀའ་སྩལ་དུ་གསོལ། ཁྱོད་ཀྱང་དེར་འདུག་པར་འགྱུར་རོ། །ལྷ་བདག་གིས་ལྷའི་སྤྱན་སྔར་བཀའ་མཆིད་འཚལ་ཏེ་མཆིའོ། །རྒྱལ་པོ་ཟས་གཙང་གིས་རང་ཉིད་ཀྱིས་ཕྲིན་ཡིག
6.69a
འདི་སྐད་ཅེས། མ་རུམ་བཞུགས་པ་ཚུན་ཆད་ནས། །བདག་གིས་ལེགས་པར་ཁྱོད་བསྲུངས་ཏེ། །ཉོན་མོངས་གདུགས་ཀྱིས་རབ་གདུངས་པས། །རྒྱལ་བའི་ལྗོན་ཤིང་སྡོད་ཅིང་མཆིས། །སློབ་མའི་ཡལ་ག་རྩ་ལག་གིས། །ད་ལྟར་ཁྱོད་ནི་རྒྱས་གྱུར་པས། །གཞན་དག་བདེ་བས་དགའ་མཛད་ན། །བདག་ནི་སྡུག་བསྔལ་སྟེན་པར་གྱུར། །གང་ཚེ་དང་པོ་ཁྱོད་འཁྲུངས་ཚེ། །ཤིན་ཏུ་དོན་ཆེན་མཛད་ནས་ནི། །ཉེ་དུ་རྗེས་སུ་གཟུང་མཛད་ཅེས། །དེ་ཚེ་ཁྱོད་ཀྱིས་ཐུགས་དམ་བཅས། དེ་སླད་གོ་འཕང་ཞི་བརྙེས་ཁྱོད། །བདག་དང་ཉེ་དུའི་ཚོགས་རྣམས་ལ། །རྗེས་སུ་ཐུགས་བརྩེ་ཉེར་བཟུང་སྟེ། །བྱོན་པའི་བློ་གྲོས་མཛད་དུ་གསོལ། །ཞེས་བྲིས་སོ། །དེ་ནས་འཆར་ཀ་ཕྲིན་ཡིག་དེ་བླངས་ཏེ་མཉན་ཡོད་དུ་འཕགས་ནས་དེ་མཐར་གྱིས་མཉན་ཡོད་དུ་ཕྱིན་ནས་ཇི་ཙམ་ན་འཆར་ཀས་བཅོམ་ལྡན་འདས་ལ་ཕྲིན་ཡིག་ཕུལ་བ་དང ། བཅོམ་ལྡན་འདས་ཉིད་ཀྱིས་ཕྲིན་ཡིག་ཀླག་པ་མཛད་ནས། འཆར་ཀས་གསོལ་པ། བཅོམ་ལྡན་འདས་སེར་སྐྱའི་གནས་སུ་གཤེགས་སམ། འཆར་ཀ་འོང་ངོ ། །འཆར་ཀས་སྔོན་གྱི་གཅུགས་པ་དེ་ཉིད་ཀྱིས་འདི་སྐད་ཅེས་གསོལ་ཏེ། །གལ་ཏེ་བཅོམ་ལྡན་འདས་མི་གཤེགས་ན་བདག་གིས་མཐུས་བཀྲི་བར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། གང་ལ་ཁྲིད་བྱེད་སྲེད་པ་ཡི། །དྲ་བཀྲམ་གང་ནའང་ཡོད་མིན་པ། །སྤྱོད་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །གང་ལ་ཁྲིད་བྱེད་སྲེད་པ་ཡི། །དྲ་བཀྲམ་གང་ནའང་ཡོད་མིན་པ། །རྩལ་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །གང་རྒྱལ་མི་ཉམས་གང་ལ་ནི། །འཇིག་རྟེན་མ་རྒྱལ་ཡོད་མེད་པ། །སྤྱོད་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །གང་རྒྱལ་མི་ཉམས་གང་ལ་ནི། །འཇིག་རྟེན་མ་རྒྱལ་ཡོད་མེད་པ། །རྩལ་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །འཆར་ཀས་གསོལ་པ། བཅོམ་ལྡན་འདས་བདག་རྒྱལ་པོ་ཟས་གཙང་ལ་བརྗོད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ།
6.69b
འཆར་ཀ་རྒྱལ་བའི་ཕོ་ཉ་དག་ནི་དེ་ལྟ་བུ་མ་ཡིན་ནོ། །བཅོམ་ལྡན་འདས་འོ་ན་རྒྱལ་བའི་ཕོ་ཉ་དག་ཇི་ལྟ་བུ་ལགས། སྐྲ་བྲེགས་ཤིང་གོས་ངུར་སྨྲིག་གོན་པ་རབ་ཏུ་བྱུང་བ་དག་ཡིན་ནོ། །བཅོམ་ལྡན་འདས་བདག་གིས་རྒྱལ་པོ་ཟས་གཙང་ལ་སླར་མཆིས་པར་མཆིད་ཀྱིས་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་བྱུང་སྟེ་སོང་ཤིག་།འདི་ལྟར་བཅོམ་ལྡན་འདས་བྱང་ཆུབ་སེམས་དཔར་གྱུར་པས་སྔོན་ཚེ་རབས་རྗེས་པ་དེ་དང་དེ་དག་ཏུ་ཡབ་དང ། ཡུམ་དང ། མཁན་པོ་དང ། སློབ་དཔོན་དང ། བླ་མ་དང ། བླ་མའི་གནས་ལྟ་བུ་དག་གི་ཆོས་དང་ལྡན་པའི་ཚིག་འགའ་ཡང་མ་བཅག་པས་བཀའ་སྩལ་མ་ཐག་ཏུ་འཆར་ཀས་གསོལ་པ། བཅོམ་ལྡན་འདས་བདག་རབ་ཏུ་འབྱུང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་འཆར་ཀ་རབ་ཏུ་ཕྱུང་ཤིག་དང ། དེ་ནི་འདི་ལ་ཡུན་རིང་པོའི་དོན་དང ། ཕན་པ་དང ། བདེ་བར་འགྱུར་རོ། །ཚེ་དང་ལྡན་པ་ཤཱ་རིའི་བུས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འཆར་ཀ་རབ་ཏུ་ཕྱུང་བསྙེན་པར་རྫོགས་པར་བྱས་ཏེ། དེ་ལ་འདི་ནི་ཁྱོད་ཀྱི་བྱ་བ་ཡིན་ནོ། །འདི་ནི་ཁྱོད་ཀྱིས་བྱ་བ་མ་ཡིན་ནོ། །འཆར་ཀ་ཁྱོད་ཀྱིས་དེང་ཕྱིན་ཅད་བུད་མེད་ཀྱི་ཡུལ་དང་ལྷན་ཅིག་ཁྱིམ་གཅིག་ཏུ་ཉལ་བར་མི་བྱའོ་ཞེས་བྱ་བ་ལ་སོགས་པ་ཀུན་དུ་སྤྱད་པའི་ཆོས་ཐམས་ཅད་བརྗོད་དོ། །འཆར་ཀས་མཁན་པོ་བཀའ་བཞིན་འཚལ་ཞེས་ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེར་སྐྱའི་གནས་སུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་ཁྱོད་ཀྱིས་ཚམ་ཚོམ་མེད་པར་རྒྱལ་པོའི་ཕོ་བྲང་དུ་འཇུག་པར་མི་བྱ་བར་སྒོར་འགྲེང་སྟེ་ཤཱཀྱའི་དགེ་སློང་འོངས་སོ་ཞེས་བརྗོད་པར་བྱའོ། །གལ་ཏེ་ཤཱཀྱའི་དགེ་སློང་གཞན་དག་ཀྱང་ཡོད་དམ་ཞེས་འདྲི་ན་ཤཱཀྱའི་དགེ་སློང་གཞན་དག་ཀྱང་ཡོད་དོ་ཞེས་བརྗོད་པར་བྱའོ། །གལ་ཏེ་ཞུགས
6.70a
ཤིག་ཅེས་ཟེར་ན་འཇུག་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་ཡང་ཆ་ལུགས་འདི་འདྲ་བ་ཉིད་ཡིན་ནམ་ཞེས་འདྲི་ན། ཆ་ལུགས་འདི་འདྲ་བ་ཉིད་ཡིན་ནོ་ཞེས་བརྗོད་པར་བྱའོ། །ཁྱོད་ཀྱིས་རྒྱལ་པོའི་ཕོ་བྲང་དུ་གནས་པར་མི་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་ཡང་རྒྱལ་པོའི་ཕོ་བྲང་དུ་གནས་འཆའ་བར་མི་བྱེད་དམ་ཞེས་འདྲི་ན། གནས་འཆའ་བར་མི་བྱེད་དོ་ཞེས་བརྗོད་པར་བྱའོ། །གལ་ཏེ་གང་དུ་གནས་འཆའ་བར་བྱེད་ཅེས་འདྲི་ན། དགོན་པ་འམ། གཙུག་ལག་ཁང་དུའོ་ཞེས་བརྗོད་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་འོང་ངམ་ཞེས་འདྲི་ན་འོང་ངོ་ཞེས་བརྗོད་པར་བྱའོ། །གལ་ཏེ་ཡུན་ཇི་ཙམ་ན་འོང་ཞེས་འདྲི་ན་ཞག་བདུན་འདས་ནས་སོ་ཞེས་བརྗོད་པར་བྱའོ། །ཚེ་དང་ལྡན་པ་འཆར་ཀས་བཅོམ་ལྡན་འདས་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །འཆར་ཀ་འོང་བའི་ཚེ་མཉན་ཡོད་དུ་ཉི་མ་མང་པོ་དག་གིས་ཕྱིན་ན་ཕྱིར་འགྲོ་བའི་ཚེ་འདི་ལྟ་སྟེ། སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང ། ལྷ་རྣམས་ཀྱི་ལྷའི་མཐུས་ཉི་མ་གཅིག་གིས་སེར་སྐྱའི་གནས་སུ་ཕྱིན་ཏོ། །དེ་ནས་ཚེ་དང་ལྡན་པ་འཆར་ཀ་རྒྱལ་པོ་ཟས་གཙང་གི་ཕོ་བྲང་ག་ལ་བ་དེར་སོང་སྟེ་ཕྱིན་ནས་མི་སྒོ་བ་བོས་ཏེ་སྨྲས་པ། ཀྱེ་ནང་རྗེ་ཁྱོད་སོང་ལ་རྒྱལ་པོ་ལ་ཤཱཀྱའི་དགེ་སློང་འོངས་སོ་ཞེས་སྦྲོན་ཅིག་།དེས་སྨྲས་པ། ཤཱཀྱའི་དགེ་སློང་གཞན་དག་ཀྱང་མཆིས་སམ། འཆར་ཀས་སྨྲས་པ། ཤཱཀྱའི་དགེ་སློང་གཞན་དག་ཀྱང་ཡོད་དོ། །སྒོ་བས་རྒྱལ་པོ་ལ་སྦྲན་པ་དང ། རྒྱལ་པོས་སྨྲས་པ། ཤཱཀྱ་འཇུག་ཏུ་ཆུག་ཤིག་།སུ་ཞིག་ཤཱཀྱ་ཟློག་པར་བྱེད། དེ་ནས་ཚེ་དང་ལྡན་པ་འཆར་ཀ་སྒོ་བས་ངོ་ཤེས་ནས་རྒྱལ་པོ་ཟས་གཙང་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ལ་བཅོམ་ལྡན་འདས་ཨ་རོག་ཁྱ་ཞེས་གསུང་ངོ ། །རྒྱལ་པོ་ཟས་གཙང་གིས་འཆར་ཀ་སྐད་ལས་ངོ་ཤེས་ནས་སྨྲས་པ། ཁྱོད་འཆར་ཀ་ཡིན་ནམ། ལྷ་བདག་སྐྱེ་བོས་དེ་ལྟར་འཚལ་ཏོ། །རྒྱལ་པོས
6.70b
སྨྲས་པ། གཞོན་ནུ་དོན་ཐམས་ཅད་གྲུབ་པ་ཡང་ཆ་ལུགས་འདི་འདྲ་བ་ཉིད་ཡིན་ནམ། ལྷ་ཆ་ལུགས་འདི་འདྲ་བ་ཉིད་ལགས་སོ། །རྒྱལ་པོ་སེང་གེའི་ཁྲི་ལས་བརྒྱལ་ཏེ་ས་ལ་ལྷུང་ནས་ཆུས་དབང་བསྐུར་བས་སྲོག་ཕྱིར་འོངས་ནས་དྲིས་པ། གཞོན་ནུ་དོན་ཐམས་ཅད་གྲུབ་པ་འོང་ངམ། ལྷ་མཆིའོ། །ཡུན་ཇི་ཙམ་ན་འོང ། དགུང་བདུན་འདས་ནས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་དེང་ལ་རྒྱལ་པོའི་ཕོ་བྲང་དང ། བཙུན་མོའི་འཁོར་དག་བྱི་དོར་གྱིས་ཤིག་།ལྷ་གཞོན་ནུ་དོན་ཐམས་ཅད་གྲུབ་པ་དེ་རྒྱལ་པོའི་ཕོ་བྲང་ངམ། བཙུན་མོའི་འཁོར་གྱི་ནང་དུ་གནས་འཆའ་བར་མི་བགྱིད་དོ། །འོ་ན་གང་དུ་གནས་འཆའ་བར་བྱེད། དགོན་པ་འམ། གཙུག་ལག་ཁང་དུའོ། །གཙུག་ལག་ཁང་ཅི་འདྲ་བར། འཆར་ཀས་མཉན་ཡོད་ན་གཙུག་ལག་ཁང་ཅི་འདྲ་བ་དག་མཐོང་བ་དེ་འདྲ་བ་བརྗོད་དོ། །དེའི་ཚེ་ན་རྒྱལ་པོ་ཟས་གཙང་ལ་སྐྱེད་མོས་ཚལ་སྐྱེ་ཡོད་དང ། ནྱ་གྲོ་ངྷའི་ཀུན་དགའ་ར་བ་དང ། ཚངས་པའི་གནས་ལ་སོགས་པ་སྐྱེད་མོས་ཚལ་ལྔ་བརྒྱ་ཡོད་པས་རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ཁྱེད་དེང་ལ། སྐྱེད་མོས་ཚལ་གསུམ་པོ་སྐྱེ་ཡོད་དང ། ནྱ་གྲོ་ངྷའི་ཀུན་དགའ་ར་བ་དང ། ཚངས་པའི་གནས་དག་ཏུ་སྐྱེད་མོས་ཚལ་རེ་རེར་ཡང་རྒྱལ་བྱེད་ཀྱི་ཚལ་འདྲ་བའི་གཙུག་ལག་ཁང་ཁང་ཆེན་བཅུ་དྲུག་དང ། ཁང་པའི་གཞི་དྲུག་བཅུ་ཡོད་པ་དག་མྱུར་དུ་བྱེད་དུ་ཆུག་ལ། གྲོང་ཁྱེར་སེར་སྐྱའི་གནས་ཐམས་ཅད་ཀྱང་རྡོ་བ་དང་གསེག་མ་དང ། གྱོ་མོ་མེད་པར་གནས་པར་གྱིས་ཤིག་།རྒྱལ་པོ་རྣམས་ནི་ཚིག་གིས་འགྲུབ་པ་ཡིན་ལ། ལྷ་རྣམས་ནི་སེམས་ཀྱིས་འགྲུབ་པ་ཡིན། རྣལ་འབྱོར་པ་རྣམས་ནི་སེམས་བསྐྱེད་པ་ཙམ་གྱིས་ཐམས་ཅད་འགྲུབ་པ་ཡིན་པས་བློན་པོ་རྣམས་ཀྱིས་ལྷ་བཀའ་བཞིན་འཚལ་ཞེས་རྒྱལ་པོ་ཟས་གཙང་ལས་མཉན་ནས་བསྐྱེད་མོས་ཚལ་གསུམ་པོ་སྐྱེ་ཡོད་དང ། ནྱ་གྲོ་ངྷའི་ཀུན་དགའ་ར་བ་དང ། ཚངས་པའི་གནས་དག་ཏུ་བསྐྱེད་མོས་ཚལ་རེ་རེར་ཡང་རྒྱལ་བྱེད་ཀྱི་ཚལ་འདྲ་བའི་གཙུག་ལག་ཁང་ཁང་ཆེན་བཅུ་དྲུག་དང ། ཁང་པའི་གཞི་དྲུག་བཅུ་ཡོད་པ་དག་བྱེད་དུ་བཅུག་ཅིང་གྲོང་ཁྱེར
6.71a
སེར་སྐྱའི་གནས་ཐམས་ཅད་ཀྱང་རྡོ་བ་དང ། གསེག་མ་དང ། གྱོ་མོ་མེད་པར་གནས་པར་བྱས་སོ། །སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་གདོན་མི་ཟ་བར་བགྱི་བ་བཅུ་མངའ་སྟེ། སངས་རྒྱས་བཅོམ་ལྡན་འདས་ཀྱིས་ཇི་སྲིད་དུ་སངས་རྒྱས་སུ་ལུང་མ་བསྟན་པ་དང ། ཇི་སྲིད་དུ་སེམས་ཅན་གཞན་གྱིས་བླ་ན་མེད་པའི་བྱང་ཆུབ་ཏུ་ཕྱིར་མི་ལྡོག་པའི་སེམས་མ་བསྐྱེད་པ་དང ། སངས་རྒྱས་ཀྱིས་གདུལ་བར་བྱ་བ་ཐམས་ཅད་མ་བཏུལ་བ་དང ། ཇི་སྲིད་དུ་སྐུ་ཚེའི་ཆ་ལྔ་པ་མ་ལུས་པ་དང ། ཇི་སྲིད་དུ་མཚམས་བཅད་པ་མ་མཛད་པ་དང ། ཇི་སྲིད་དུ་ཉན་ཐོས་ཟུང་གཅིག་མཆོག་ཏུ་མ་བསྟན་པ་དང ། ཇི་སྲིད་དུ་གྲོང་ཁྱེར་ཀུན་འོད་དུ་ལྷ་ལས་བབས་པ་མ་བསྟན་པ་དང ། ཇི་སྲིད་དུ་མཉན་ཡོད་དུ་ཆོ་འཕྲུལ་ཆེན་པོ་རྣམ་པར་མ་བསྟན་པ་དང ། ཇི་སྲིད་དུ་མཚོ་ཆན་པོ་མ་དྲོས་པར་ཉན་ཐོས་རྣམས་དང་ཐབས་གཅིག་སྔོན་གྱི་ལས་ཀྱི་རྒྱུ་བ་ལུང་མ་བསྟན་པ་དང ། ཇི་སྲིད་དུ་ཡབ་ཡུམ་གཉིས་བདེན་པ་དག་ལ་མ་བཀོད་པ་དེ་སྲིད་དུ་ཡོངས་སུ་མྱ་ངན་ལས་མི་འདའ་བ་ཡིན་ནོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། རྒྱལ་པོ་ཆེན་པོ་ཟས་གཙང་དང ། ཤཱཀྱ་འབུམ་ཕྲག་དུ་མ་དག་གདུལ་བའི་དུས་ཉེ་བར་གནས་པར་གྱུར་ཅིང ། འདི་ལྟ་སྟེ། ཡབ་ཡུམ་གཉིས་བདེན་པ་དག་ལ་གཞག་པ་དེ་ནི་དེ་བཞིན་གཤེགས་པས་གདོན་མི་ཟ་བར་མཛད་པ་ཡིན་ནོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཁྱོད་སོང་ལ་དགེ་སློང་རྣམས་ལ་དེ་བཞིན་གཤེགས་པ་སེར་སྐྱའི་གནས་སུ་གཤེགས་ཀྱིས། ཁྱེད་ཅག་ལས་གང་དེ་བཞིན་གཤེགས་པ་དག་ཐབས་གཅིག་སེར་སྐྱའི་གནས་སུ་འགྲོ་བ་དང ། ཡབ་དང་སྲས་མཇལ་བ་ལྟ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག་།ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཚེ་དང་ལྡན་པ་དག་བཅོམ
6.71b
ལྡན་འདས་སེར་སྐྱའི་གནས་སུ་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་སེར་སྐྱའི་གནས་སུ་འགྲོ་བ་དང ། ཡབ་དང་སྲས་མཇལ་བ་ལྟ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དགེ་སློང་དག་གིས་ཚེ་དང་ལྡན་པ་དེ་བཞིན་བགྱིའོ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལས་མཉན་ཏོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། །གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའི་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་གྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར
6.72a
གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐག་བཟངས་རིས་ལྟར་ལྷ་མ་ཡིན་གྱིས་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཤིན་ཏུ་དུལ་བ། སྤྱོད་ལམ་དང ། སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམས་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ། འཁོར་ཉན་ཐོས་ཆེན་པོ་ཚེ་དང་ལྡན་པ་ལྟེང་རྒྱས་འོད་སྲུང་དང །
6.72b
ག་ཡ་འོད་སྲུང་དང ། ཆུ་ཀླུང་འོད་སྲུང་ལ་སོགས་པ་སྔོན་གྱི་རལ་པ་ཅན་སྟོང་དང ། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་ལ་སོགས་པ་དགེ་སློང་གི་དགེ་འདུན་མང་པོས་མདུན་དུ་བདར་ཏེ་སེར་སྐྱའི་གནས་ག་ལ་བ་དེར་རྒྱུ་ཞིང་གཤེགས་སོ། །དེའི་ཚེ་ན་རྒྱལ་པོ་ཟས་གཙང་གིས་ཉི་མ་བདུན་པ་ལ་གྲོང་ཁྱེར་སེར་སྐྱའི་གནས་ཐམས་ཅད་རྡོ་བ་དང ། གསེག་མ་དང ། གྱོ་མོ་མེད་པར་བཞག་ཅིང་བདུག་པ་དང ། ཕྱེ་མ་འཁྲིགས་པ་དང ། མེ་ཏོག་སྣ་ཚོགས་བཀྲམ་པ་དང ། རྒྱལ་མཚན་དང ། བ་དན་བསྒྲེང་བ་ལ་སོགས་པ་མཆོད་པའི་ཡོ་བྱད་རྒྱ་ཆེན་པོ་དག་བཤམས་ཤིང ། ནྱ་གྲོ་ངྷའི་ཀུན་དགའ་ར་བར་ས་ཕྱོགས་གོ་སྐབས་ཡངས་པར་གདན་ཐམས་ཅད་ཟླ་ཁམ་ལྟ་བུར་བཤམས་ཏེ། ནྱ་གྲོ་ངྷའི་ཀུན་དགའ་ར་བ་ནས་གྲོང་ཁྱེར་སེར་སྐྱའི་གནས་ཀྱི་བར་གྱི་ལམ་ཐམས་ཅད་མཛེས་ཤིང་རྡོ་བ་དང ། གསེག་མ་དང ། གྱོ་མོ་མེད་པར་བཞག་སྟེ། སྤོས་ཆུའི་ཆག་ཆག་བཏབ་ཅིང་བར་བར་དུ་དར་གྱི་ཆུན་པོ་མང་པོ་སྤྱངས་ཤིང ། མེ་ཏོག་གི་ཚོམས་དག་ཀྱང་བཤམས། བདུག་སྤོས་དྲི་ཞིམ་པོའི་དུ་བ་འཁྲིགས་པ་དང ། མེ་ཏོག་སྣ་ཚོགས་བཀྲམ་པ་དང ། རྒྱལ་མཚན་དང ། བ་དན་བསྒྲེང་བ་དག་རྣམ་པར་བཞག་གོ། །རྒྱལ་པོ་ཟས་གཙང་ཉིད་ཀྱིས་རྒྱལ་པོའི་འབྱོར་པ་ཆེན་པོ་དང ། རྒྱལ་པོའི་མཐུ་ཆེན་པོས་ནྱ་གྲོ་ངྷའི་ཀུན་དགའ་ར་བ་ན་འདི་ལྟ་སྟེ། བཅོམ་ལྡན་འདས་ལ་སྡོད་ཅིང་འདུག་གོ། །དེ་ནས་བཅོམ་ལྡན་འདས་མཐར་གྱིས་རྒྱུ་ཞིང་གཤེགས་པ་ན་ཆུ་རླུང་རོ་ཧ་ཀའི་འགྲམ་དུ་གཤེགས་སོ། །དེ་ན་དགེ་སློང་ཁ་ཅིག་ནི་ལག་པ་དང་རྐང་པ་དག་འཁྲུ་བར་བྱེད། ཁ་ཅིག་ནི་སོ་ཤིང་འདོར་བར་བྱེད། ཁ་ཅིག་ནི་ཆུ་འཚག་པར་བྱེད། ཁ་ཅིག་ནི་ཁྲུས་བྱེད་དོ། །གྲོང་ཁྱེར་སེར་སྐྱའི་གནས་ན་འཁོད་པའི་ཤཱཀྱ་རྣམས་ཀྱིས་གཞོན་ནུ་དོན་ཐམས་ཅད་གྲུབ་པ་འོངས་ཤིང ། རྒྱལ་པོ་ཟས་གཙང་གིས་ནྱ་གྲོ་ངྷའི་ཀུན་དགའ་ར་བར་ས་ཕྱོགས་གོ་སྐབས་ཡངས་པར་གནས་མལ་བཤམས་ཤེས་ཐོས་སོ། །ཐོས་ནས་ཀྱང་ཤཱཀྱ་འབུམ་ཕྲག་དུ་མ་དག་ནྱ་གྲོ་ངྷའི་ཀུན་དགའ་ར་བར་འདུས་པར་གྱུར་ཅིང ། དེ་ན་ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་ཞིང་ལྷགས་སོ། །ཁ་ཅིག་ནི་ཡ
6.73a
མཚན་སྐྱེས་ཏེ་ཇེ་དང་པོར་ཡབ་ཀྱིས་སྲས་ཀྱི་ཞབས་ལ་ཕྱག་འཚལ་བར་མཛད་དམ། འོན་ཏེ་སྲས་ཀྱིས་ཡབ་ཀྱི་ཞབས་ལ་ཕྱག་འཚལ་བར་མཛད་པ་བལྟའོ་སྙམ་པས་ལྷགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་དེ་བཞིན་གཤེགས་པ་ཞབས་ཀྱིས་སེར་སྐྱའི་གནས་སུ་གཤེགས་ན་ཤཱཀྱ་ང་རྒྱལ་ཅན་དག་གཞོན་ནུ་དོན་ཐམས་ཅད་གྲུབ་པས་ཆེན་པོ་མ་རྙེད་དེ། འདི་ལྟར་འདི་སྔོན་བྱང་ཆུབ་སེམས་དཔར་གྱུར་པ་ན་གྲོང་ཁྱེར་སེར་སྐྱའི་གནས་ནས་ལྷ་འབུམ་ཕྲག་དུ་མས་བསུ་སྟེ་སྟེང་གི་ནམ་མཁའ་ལས་བྱུང་སྟེ་སོང་ན། ད་འདིས་བླ་ན་མེད་པའི་ཡེ་ཤེས་རྟོགས་ཀྱང་རྐང་པས་འོངས་སོ་ཞེས་མ་དད་པ་སྐྱེ་བར་འགྱུར་བས་བདག་རྫུ་འཕྲུལ་གྱིས་སེར་སྐྱའི་གནས་སུ་འཇུག་པར་བྱའོ་སྙམ་དུ་དགོངས་ཤིང་རིག་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ནི་རྐང་པ་དག་གིས་ཆུ་ཀླུང་རོ་ཧ་ཀ་རྒོལ་ཅིག་།དེ་བཞིན་གཤེགས་པ་ནི་རྫུ་འཕྲུལ་གྱིས་གཤེགས་སོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། རྐང་པ་དག་གིས་ཆུ་ཀླུང་རོ་ཧ་ཀ་རྒལ་ཏེ་ནྱ་གྲོ་ངྷའི་ཀུན་དགའ་ར་བ་ག་ལ་བ་དེར་དོང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ཏིང་ངེ་འཛིན་འདི་ལྟ་བུ་ལ་སྙོམས་པར་ཞུགས་ཏེ། ཇི་ལྟར་ཐུགས་མཉམ་པར་བཞག་ན་རྫུ་འཕྲུལ་གྱིས་ཆུ་ཀླུང་རོ་ཧ་ཀའི་ཕ་རོལ་གྱི་འགྲམ་ནས་མི་སྣང་བར་གྱུར་ཅིང་སྟེང་གི་ནམ་མཁའ་ལ་ངང་པའི་རྒྱལ་པོ་འདབ་མ་བརྐྱང་བ་ལྟར་མངོན་པར་འཕགས་ནས་སེར་སྐྱའི་གནས་ཀྱི་སྟེང་ནས་ནྱ་གྲོ་དྷའི་ཀུན་དགའ་ར་བ་ག་ལ་བ་དེར་གཤེགས་ཏེ་བྱོན་ནས་ནྱ་གྲོ་ངྷའི་ཀུན་དགའ་ར་བའི་སྟེང་གི་ནམ་མཁའ་ལ་དཀྱིལ་མོ་དཀྲུང་བཅས་ཏེ་བཞུགས་སོ། །དེ་ན་བཅོམ་ལྡན་འདས་ཤར་ཕྱོགས་ལོགས་སུ་སྤྱོད་ལམ་བཞི་པོ་འདི་ལྟ་སྟེ། འཆག་པ་དང་བཞེངས་པ་དང ། བཞུགས་པ་དང ། མནལ་བ་དག་མཛད་དོ། །མེའི་ཁམས་ལ་ཡང་སྙོམས་པར་འཇུག་པ་མཛད་དེ། སངས་རྒྱས་བཅོམ་ལྡན་འདས་མེའི་ཁམས་ལ་སྙོམས་པར་ཞུགས་པའི་སྐུ་ལས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དག་དང །
6.73b
སེར་པོ་དག་དང ། དམར་པོ་དག་དང ། དཀར་པོ་དག་དང ། བཙོད་ཀ་དག་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ངོ ། །ཆོ་འཕྲུལ་ཟུང་དག་ཀྱང་རྣམ་པར་སྟོན་པ་མཛད་དེ། སྐུའི་སྨད་ནས་མེ་འབར་ཞིང་སྐུའི་སྟོད་ནས་ཆུ་གྲང་མོའི་རྒྱུན་འབབ་པར་མཛད་དོ། །སྐུའི་སྟོད་ནས་མེ་འབར་ཞིང་སྐུའི་སྨད་ནས་ཆུ་གྲང་མོའི་རྒྱུན་འབབ་པར་མཛད་དོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་སུ་ཡང་དེ་བཞིན་དུ་མཛད་དོ། །དེ་ལྟར་ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བཞི་སྟོན་པར་མཛད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་དེ་བཞིན་གཤེགས་པས་རྒྱལ་པོ་ཟས་གཙང་གི་རྐང་པ་གཉིས་ལ་གཏུགས་པར་གྱུར་ན་ནི་དེའི་སྤྱི་བོ་ཚལ་པ་བདུན་དུ་འགས་པར་འགྱུར་ལ། གལ་ཏེ་རྒྱལ་པོ་ཟས་གཙང་གིས་དེ་བཞིན་གཤེགས་པའི་ཞབས་གཉིས་ལ་གཏུགས་པར་གྱུར་ན་ནི་ཤཱཀྱ་ང་རྒྱལ་ཅན་དག་ཅིའི་ཕྱིར་ཡབ་ཏུ་གྱུར་པས་སྲས་ཀྱི་རྐང་པ་གཉིས་ལ་གཏུགས་པར་བྱེད་ཅེས་མ་དད་པ་སྐྱེ་བར་འགྱུར་བས་བདག་གིས་ཅི་ནས་ཀྱང་རྒྱལ་པོ་ཟས་གཙང་གིས་ལུས་མ་བཏུད་བཞིན་དུ་དེ་བཞིན་གཤེགས་པའི་ཞབས་གཉིས་ལ་ཕྱག་འཚལ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱའོ་སྙམ་དུ་དགོངས་ཤིང་རིག་ནས་ཏ་ལ་བདུན་སྲིད་ཙམ་གྱི་སྟེང་གི་ནམ་མཁའ་ལ་གཞེས་ཤིང ། ཏ་ལ་དྲུག་དང ། ལྔ་དང ། བཞི་དང ། གསུམ་དང ། གཉིས་དང ། གཅིག་སྲིད་ཙམ་ན་བཞུགས་སོ། །དེ་ནས་སྐྱེས་བུ་བདུན་སྲིད་ཙམ་ན་གཞེས་ཤིང་སྐྱེས་བུ་དྲུག་དང ། ལྔ་དང ། བཞི་དང ། གསུམ་དང ། གཉིས་དང ། གཅིག་སྲིད་ཙམ་ན་གཞེས་སོ། །དེ་ནས་རྒྱལ་པོ་ཟས་གཙང་གིས་མ་བཏུད་བཞིན་དུ་དེ་བཞིན་གཤེགས་པའི་ཞབས་གཉིས་ལ་མགོ་བོས་ཕྱག་འཚལ་ནས་ཤཱཀྱ་རྣམས་ལ་གོ་བར་བྱ་བའི་ཕྱིར་དེའི་ཚེ་ཚིགས་སུ་བཅད་པ་སྨྲས་པ། གང་ཚེ་ཁྱོད་བལྟམས་དོག་ས་རབ་གཡོས་དང ། །འཛམ་བུའི་གྲིབ་མས་ཁྱོད་སྐུ་མ་བཏང་དང ། །འདི་དང་ལན་གསུམ་ཀུན་གཟིགས་མཁྱེན་ལྡན་པ། །སངས་རྒྱས་ཁྱོད་ཀྱི་ཞབས་ལ་བདག་ཕྱག་འཚལ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ
6.74a
མངོན་པར་འདུ་མཛད་པ་དེ་སླར་བསྡུ་བ་མཛད་ནས་ནྱ་གྲོ་ངྷའི་ཀུན་དགའ་ར་བར་གཤེགས་ཏེ། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཟས་གཙང་དང ། བྲེ་བོ་ཟས་དང ། ཟས་དཀར་དང ། བདུད་རྩི་ཟས་དང ། ཤཱཀྱ་འབུམ་ཕྲག་དུ་མ་དག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཤཱཀྱ་ཁ་ཅིག་ནི་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་མཐའ་གཅིག་ཏུ་འཁོད་དོ། །ཤཱཀྱ་ཁ་ཅིག་ནི་ཐག་རིང་པོ་ཁོ་ན་ནས་བཅོམ་ལྡན་འདས་མཐོང་ནས་ཅང་མི་སྨྲ་བར་མཐའ་གཅིག་ཏུ་འཁོད་དོ། །དེ་ནས་རྒྱལ་པོ་ཟས་གཙང་གིས་བཅོམ་ལྡན་འདས་ལ་ཚིགས་སུ་བཅད་པའི་སྐད་ཀྱིས་ཞུ་བ་ཞུས་པ། དཔའ་བོ་བཅིབས་པ་གླང་པོ་དང ། །ཆིབས་དང་ཤིང་རྟས་ཁབ་གཤེགས་ན། །ཚེར་བཅས་དོག་སའི་གཞི་དག་ལ། །ཇི་ལྟར་ཞབས་ཀྱིས་གཤེགས་པ་མཛད། །བཅོམ་ལྡན་འདས་ཀྱིས་བཀའ་སྩལ་པ། བདག་ནི་རྫུ་འཕྲུལ་རྐང་པ་དང ། །ཡང་དག་སྩོལ་བའི་བཞོན་པ་ཡིས། །ཉོན་མོངས་ཚེར་མས་མ་སྨས་པར། །ས་གཞི་ཀུན་དུ་རྣམ་པར་རྒྱུ། །རྒྱལ་པོས་གསོལ་པ། དཔའ་བོ་སྔན་ཆད་ཀ་ཤི་ཀའི། །ན་བཟའ་གསོལ་བས་རྣམ་མཛེས་ན། །ངུར་སྨྲིག་ན་བཟའ་རྩུབ་པོ་དག་།ཇི་ལྟར་ཁྱོད་སྐུས་བཟོད་པར་མཛད། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་བདག་ནི་ཁྲེལ་འཛེམ་པའི། །སྣམ་སྦྱར་གོས་གྱོན་མཛེས་པ་ཡིན། །གང་གིས་ཐུབ་པའི་གོས་གྱོན་པ། །ཞི་བའི་ནགས་ན་མཛེས་པར་འགྱུར། །རྒྱལ་པོས་གསོལ་པ། བརྟན་པ་སྔན་ཆད་གསེར་སྣོད་ནས། །ཞལ་ཟས་རོ་མང་ལྡན་གསོལ་ནས། ད་ལྟར་བསོད་སྙོམས་ངན་པ་དག་།ཇི་ལྟར་ཁྱོད་ཀྱི་མགུར་དུ་བྱོན། །བཅོམ་ལྡན་འདས་ཀྱིས་བཀའ་སྩལ་པ། ཆོས་ལྡན་དགའ་བ་དག་གི་ཟས། །ངེས་འབྱུང་ལྡན་ཞིང་མཉམ་བཞག་ཡིན། །ཟས་སྲེད་སྤངས་ཀྱང་འཇིག་རྟེན་ཀུན། །རྗེས་སུ་གཟུང་ཕྱིར་བདག་སྤྱོད་བྱེད ། །རྒྱལ་པོས་གསོལ་པ། བློ་བཟང་ཁྱོད་སྔོན་ཡང་ཐོག་གི་།གཞལ་མེད་ཁང་སྟེང་དུས་མཐུན་བཞུགས། །ཉག་གཅིག་ནགས་ན་ཁྱོད་བཞུགས་ན། །ཇི་ལྟར
6.74b
བསྙེངས་དང་བྲལ་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། གཽ་ཏམ་འཇིགས་ཀུན་རྩ་དང་སྲིད། །དེ་དག་བག་ཉལ་བཅས་སྤངས་པས། །མྱ་ངན་འཇིགས་བྲལ་ནགས་གནས་ཏེ། །དེ་ན་བདག་འཇིགས་ཅི་ཡང་མེད། །རྒྱལ་པོས་གསོལ་པ། ཐུབ་དབང་ཁྱོད་སྔོན་རབ་དགྱེས་པའི། །ཁབ་ན་རྟག་ཏུ་ཁྲུས་མཆོག་མཛད། །ནགས་ན་ཉག་གཅིག་ཁྱོད་བཞུགས་ན། །དེ་ན་འབྱོར་ཁྲུས་སུ་དག་བགྱིད། །བཅོམ་ལྡན་འདས་ཀྱིས་བཀའ་སྩལ་པ ། གཽ་ཏམ་ཆོས་རྫིང་བསོད་ནམས་འགྲམ། །རྙོག་མེད་དམ་པས་བསྔགས་པ་སྟེ། །མི་ལུས་མི་གཤེར་དེར་བཀྲུས་པ། །རིག་བྱེད་ཡོན་ཏན་ཕ་རོལ་འགྲོ། །རྒྱལ་པོས་གསོལ་པ། དཔའ་བོ་རང་གི་ཕོ་བྲང་ན། །གསེར་དངུལ་བུམ་པས་ཁྲུས་མཛད་ན། །ཆབ་ཚན་རྙོག་དང་བཅས་པ་ཡིས། །ཇི་ལྟར་ཁྱོད་ཀྱི་སྐུ་ཁྲུས་མཛད། །བཅོམ་ལྡན་འདས་ཀྱིས་བཀའ་སྩལ་པ། གཽ་ཏམ་དང་ཀླུང་ཚུལ་ཁྲིམས་འགྲམ། །དང་བ་བསིལ་བ་མཁས་པས་བསྔགས། །མི་ལུས་མི་གཤེར་དེར་བཀྲུས་པ། །རིག་བྱེད་ཡོན་ཏན་ཕ་རོལ་འགྲོ། །རྒྱལ་པོ་ཟས་གཙང་གིས་གསོལ་པ། ཟིལ་གནོན་གང་ནས་སྐྱེ་འགྱུར་ཞིང ། །འཇིགས་སྐྲགས་གང་ནས་འབྱུང་བར་འགྱུར། །ཡིད་འབྱུང་གང་ནས་སྐྱེ་བར་འགྱུར། །ཞུས་པ་དེ་ནི་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། ཟིལ་གནོན་གང་ནས་སྐྱེ་འགྱུར་ཞིང ། །འཇིགས་སྐྲག་གང་ནས་འབྱུང་བར་འགྱུར། །ཡིད་འབྱུང་གང་ནས་སྐྱེ་འགྱུར་བ། །གསོན་ཅིག་བདག་གིས་ཁྱོད་ལ་བཤད། །རྒ་དང་ན་དང་འཆི་འགྱུར་བ། །གལ་ཏེ་དེ་གསུམ་ཡོད་མིན་ན། །བདག་ཀྱང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་འགྱུར། །རྒྱལ་པོས་གསོལ་པ། ཤཱཀྱའི་རིགས་རྣམས་དགའ་མཛད་པ། །དཔའ་བོ་འཇིག་རྟེན་ཆོས་བརྒྱད་ཀྱིས། །ཁྱོད་ལ་གོས་པ་མི་མངའ་བ། །ལེགས་པར་འཁྲུངས་པ་ལེགས་པ་ལགས། །དེ་ནས་རབ་དགའ་དད་རྒྱས་པས། །དྲང་སྲོང་དགེ་འདུན་བསྐོར་བྱས་ཏེ། །ཐུབ་དབང་ཞབས་ལ་མགོས་གཏུགས་ནས། །བདེ་གཤེགས་ཀུན་ནས་རྟོག་ཅིང་སྡོད། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བདག་གི་བུས་ཡོན་ཏན
6.75a
གྱི་ཚོགས་འདི་ལྟ་བུ་རྟོགས་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས། འདི་ལྟར་རྒྱལ་པོ་ཟས་གཙང་དང ། ལྷས་སྦྱིན་སྡིག་པ་འདོད་པ་ང་རྒྱལ་ལས་ཀྱང་ང་རྒྱལ་ཙམ་མ་གཏོགས་པ་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་བདེན་པ་དག་མཐོང་བར་གྱུར་པ་དེ་ལྟར་ཆོས་བསྟན་པ་མཛད་དོ། །དེ་ནས་སྲོག་ཆགས་སྟོང་ཕྲག་མང་པོ་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་གཞག་པར་མཛད་དོ། །རྒྱལ་པོ་ཟས་གཙང་ནི་བདག་གི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཡིན་ནོ་སྙམ་དུ་ཧ་ཅང་དགའ་བས་བདེན་པ་མ་མཐོང་ངོ ། །ལྷས་བྱིན་ནི་སྡིག་པ་འདོད་པ་དང ། ང་རྒྱལ་ལས་ཀྱང་ང་རྒྱལ་གྱིས་བདེན་པ་མ་མཐོང་ངོ ། །ལྷས་བྱིན་བདེན་པ་མ་མཐོང་ཞིང་ཁྲོ་བས་ཟིལ་གྱིས་ནོན་པས་སྨྲས་པ། གལ་ཏེ་བདག་གིས་ཀྱང་འདི་ལྟར་རྗེས་སུ་འཇུག་པར་བྱེད་པའི་སྒྱུ་མ་ཤེས་པར་གྱུར་ན། བདག་གིས་ཀྱང་འཇིག་རྟེན་ཐམས་ཅད་རྗེས་སུ་འཇུག་པར་བྱ་བ་ལ་རག་གོ། །ཤཱཀྱ་གཅུགས་པར་གྱུར་པ་དགའ་བ་སྟོན་པ་དག་གིས་དེ་ལ་སྨྲས་པ། ལྷས་བྱིན་ཐོང་ཤིག་བཅོམ་ལྡན་འདས་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་གྱིས་དེ་སྐད་མ་ཟེར་ཅིག་།དེ་ནས་དེ་ཅང་མི་སྨྲ་བར་འདུག་གོ། །ཉི་མ་གཉིས་པ་ལ་བསྐྱེད་མོས་ཚལ་སྐྱེ་ཡོད་དུ་ས་ཕྱོགས་གོ་སྐབས་ཡངས་པར་གདན་ཐབས་ཟླ་གམ་ལྟ་བུ་བཤམས་པ་བྱས་ནས། དེར་ཡང་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེའི་བསམ་པ་དང་བག
6.75b
ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་འདི་ལྟར་རྒྱལ་པོ་ཟས་གཙང་དང ། ལྷས་བྱིན་སྡིག་པ་འདོད་པ་ང་རྒྱལ་ལས་ཀྱང་ང་རྒྱལ་ཅན་མ་གཏོགས་བྲེ་བོ་ཟས་ལ་སོགས་པ་ཤཱཀྱ་བདུན་ཁྲི་དྲུག་སྟོང་གིས་བདེན་པ་དག་མཐོང་བར་གྱུར་པ་དེ་ལྟར་ཆོས་བསྟན་པ་མཛད་དོ། །དེ་ན་སྲོག་ཆགས་སྟོང་ཕྲག་མང་པོ་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཏེ་འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་གཞག་པར་མཛད་དོ། །རྒྱལ་པོ་ཟས་གཙང་ནི་བདག་གི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཡིན་ནོ་སྙམ་དུ་ཧ་ཅང་དགའ་བས་བདེན་པ་མ་མཐོང་ངོ ། །ལྷས་བྱིན་ནི་སྡིག་པ་འདོད་པ་དང ། ང་རྒྱལ་ལས་ཀྱང་ང་རྒྱལ་གྱིས་བདེན་པ་མ་མཐོང་ངོ ། །ལྷས་བྱིན་བདེན་པ་མ་མཐོང་ཞིང་ཁྲོ་བའི་ཟིལ་གྱིས་ནོན་པས་སྨྲས་པ། གལ་ཏེ་བདག་གིས་ཀྱང་འདི་ལྟར་རྗེས་སུ་འཇུག་པར་བྱེད་པའི་སྒྱུ་མ་ཤེས་པར་གྱུར་ན། བདག་གིས་ཀྱང་འཇིག་རྟེན་ཐམས་ཅད་རྗེས་སུ་འཇུག་པར་བྱ་བ་ལ་རག་གོ། །ཤཱཀྱ་གཅུགས་པར་གྱུར་པ་དགའ་བ་སྟོན་པ་དག་གིས་དེ་ལ་སྨྲས་པ། ལྷས་བྱིན་ཐོང་ཤིག་།བཅོམ་ལྡན་འདས་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་གྱིས་དེ་སྐད་མ་ཟེར་ཅིག་།དེ་ནས་དེ་ཅང་མི་སྨྲ་བར་འདུག་གོ། །ཉི་མ་གསུམ་པ་ལ་བསྐྱེད་མོས་ཚལ་ཚངས་པའི་གནས་སུ་ས་ཕྱོགས་གོ་སྐབས་ཡངས་པར་གདན་ཐབས་ཟླ་གམ་ལྟ་བུ་བཤམས་པ་བྱས་ནས། དེར་ཡང་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཐུགས་སུ་ཆུད་ནས་འདི་ལྟར་རྒྱལ་པོ་ཟས་གཙང་དང ། ལྷས་བྱིན་སྡིག་པ་འདོད་པ་ང་རྒྱལ་ལས་ཀྱང་ང་རྒྱལ་ཅན་མ་གཏོགས་པ་བདུད་རྩི་ཟས་ལ་སོགས་པ་ཤཱཀྱ་བདུན་ཁྲི་ལྔ
6.76a
སྟོང་གིས་བདེན་པ་དག་མཐོང་བར་གྱུར་པ་དེ་ལྟར་ཆོས་བསྟན་པ་མཛད་དོ། །དེ་ན་སྲོག་ཆགས་སྟོང་ཕྲག་མང་པོ་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཏེ་འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་གཞག་པར་མཛད་དོ། །རྒྱལ་པོ་ཟས་གཙང་ནི་བདག་གི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཡིན་ནོ་སྙམ་དུ་ཧ་ཅང་དགའ་བས་བདེན་པ་མ་མཐོང་ངོ ། །ལྷས་བྱིན་ནི་སྡིག་པ་འདོད་པ་དང ། ང་རྒྱལ་ལས་ཀྱང་ང་རྒྱལ་གྱིས་བདེན་པ་མ་མཐོང་ངོ ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཅིའི་ཕྱིར་རྒྱལ་པོ་ཟས་གཙང་བདེན་པ་མཐོང་བར་མི་བྱེད་སྙམ་དུ་དགོངས་ན། རྒྱུ་གཉིས་ཀྱིས་བདེན་པ་མི་མཐོང་སྟེ། སེམས་ཧ་ཅང་མཐོ་བ་དང ། ཧ་ཅང་ཞུམ་པས་སོ། །དེ་ལྟར་རྒྱལ་པོ་ཟས་གཙང་གི་སེམས་གཞོན་ནུ་དོན་ཐམས་ཅད་གྲུབ་པ་སྔོན་ཅད་ལྷ་དང་མིས་མཆོད་པར་གྱུར་ན། ད་ནི་མིས་མཆོད་ཅིང་ལྷས་མཆོད་པར་མ་གྱུར་ཏོ། །སྙམ་དུ་ཧ་ཅང་ཞུམ་པར་གྱུར་པར་ཐུགས་སུ་ཆུད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་རྒྱལ་པོ་ཟས་གཙང་གདུལ་བའི་ཕྱིར་ལྷའི་འཁོར་འབའ་ཞིག་ལ་ཆོས་བསྟན་པར་བྱའོ་སྙམ་དུ་དགོངས་ཤིང་རིག་ནས་འཇིག་རྟེན་པའི་ཐུགས་བསྐྱེད་པ་མཛད་དོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་གལ་ཏེ་འཇིག་རྟེན་པའི་ཐུགས་བསྐྱེད་པར་མཛད་ན་ནི་ཐ་ན་སྲོག་ཆགས་གྲོག་སྦུར་གྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་ལ་ཇི་སྟེ་འཇིག་རྟེན་ལས་འདས་པའི་ཐུགས་བསྐྱེད་པར་མཛད་ན་ནི་རང་སངས་རྒྱས་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་མི་ཤེས་ན་ཉན་ཐོས་ལ་སོགས་པས་ལྟ་སྨོས་ཀྱང་ཅི་དགོས།
6.76b
དེ་ནས་ཚངས་པ་དང ། བརྒྱ་བྱིན་ལ་སོགས་པ་ལྷ་རྣམས་འདི་སྙམ་དུ་སེམས་ཏེ། ཅིའི་སླད་དུ་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་སྙམ་པ་དང ། བཅོམ་ལྡན་འདས་རྒྱལ་པོ་ཟས་གཙང་གདུལ་བའི་སླད་དུ་ལྷའི་འཁོར་འབའ་ཞིག་ལ་ཆོས་སྟོན་པ་བཞེད་པར་མཐོང་ངོ ། །དེ་ནས་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་ནས། འདི་ལྟ་སྟེ། དཔེར་ན་སྐྱེས་བུའི་ལག་པ་བསྐུམས་པ་ལས་རྐྱོང་བར་བྱེད་པ་འམ། བརྐྱང་བ་ལས་སྐུམ་པར་བྱེད་པ་དེ་བཞིན་དུ། འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་རྣམས་ལྷའི་འཇིག་རྟེན་ནས་མི་སྣང་བར་གྱུར་ཏེ་བསྐྱེད་མོས་ཚལ་ཚངས་པའི་གནས་སུ་བཅོམ་ལྡན་འདས་ཀྱི་སྤྱན་སྔར་ལྷགས་སོ། །བཅོམ་ལྡན་འདས་ཀྱིས་ཀྱང་རྫུ་འཕྲུལ་གྱིས་རིན་པོ་ཆེ་སྣ་བཞི་ལས་བྱས་པའི་ཁང་བཟངས་སྒོ་བཞི་པ་སྤྲུལ་པ་མཛད་དེ། སྒོ་བཞི་པོ་དག་ཏུ་འཇིག་རྟེན་སྐྱོང་བ་བཞི་པོ་དག་སྒོ་སྲུངས་སུ་རྣམ་པར་གཞག་པར་མཛད་དོ། །དེ་ནས་གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་གཡས་ཕྱོགས་སུ་ཉེ་བར་བརྟེན་ཏེ་འཁོད་དོ། །འདོད་པ་ན་སྤྱོད་པའི་ལྷ་རྣམས་ཀྱིས་ཀྱང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། །བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་གཡོན་ཕྱོགས་སུ་ཉེ་བར་བརྟེན་ཏེ་འཁོད་དོ། །རྒྱལ་པོ་ཟས་གཙང་གི་ཀུན་དུ་སྤྱོད་པ་ནི་ཉིན་མོ་ལན་གསུམ་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་འགྲོའོ། །དེ་ནས་རྒྱལ་པོ་ཟས་གཙང་ནང་པར་སྔར་ལངས་ཏེ་ཁང་བཟངས་ཀྱི་ཤར་སྒོ་ག་ལ་བ་དེར་སོང་བ་དང ། ཡུལ་འཁོར་སྲུང་གིས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག་།ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་ཡུལ་འཁོར་སྲུང་ཡིན་ནོ། །
6.77a
དེ་ནས་རྒྱལ་པོ་ཟས་གཙང་ཁང་བཟངས་ཀྱི་ལྷོ་སྒོ་ག་ལ་བ་དེར་སོང་བ་དང ། འཕགས་སྐྱེས་པོས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག་།ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་འཕགས་སྐྱེས་པོ་ཡིན་ནོ། །དེ་ནས་རྒྱལ་པོ་ཟས་གཙང་ཁང་བཟངས་ཀྱི་ནུབ་སྒོ་ག་ལ་བ་དེར་སོང་བ་དང ། མིག་མི་བཟང་གིས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག་།ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་མིག་མི་བཟང་ཡིན་ནོ། །དེ་ནས་རྒྱལ་པོ་ཟས་གཙང་ཁང་བཟངས་ཀྱི་བྱང་སྒོ་ག་ལ་བ་དེར་སོང་བ་དང ། རྣམ་ཐོས་ཀྱི་བུས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག་།ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་རྣམ་ཐོས་ཀྱི་བུ་ཡིན་ནོ། །དེ་ནས་རྒྱལ་པོ་ཟས་གཙང་ཀྱེ་མ་བདག་གིས་བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པ་མཐོང་ན་ཅི་མ་རུང་སྙམ་དུ་འདོད་པ་སྐྱེས་སོ། །བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་སེམས་ཐུགས་ཀྱིས་མཁྱེན་ནས་ཁང་བཟངས་ཤེལ་གྱི་རང་བཞིན་དུ་སྤྲུལ་པ་མཛད་པ་དང ། འདི་ལྟར་རྒྱལ་པོ་ཟས་གཙང་གིས་བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པ་མེ་ལོང་གི་གཟུགས་ཀྱི་ནང་ན་འདུག་པ་ལྟར་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། སུ་ལ་ཡང་འདི་ལྟ་སྟེ། ད་ལྟར་བདག་གི་དོན་ཐམས་ཅད་གྲུབ་པ་ལྟ་བུའི་བུ་མེད་དོ་སྙམ་མོ། །དེ་ནས་རྒྱལ་པོ་ཟས་གཙང་གི་སེམས་ཀྱི་རྒྱུད་ཧ་ཅང་མཐོ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད
6.77b
པ་དེ་སླར་བསྡུ་བ་མཛད་ནས་རྒྱལ་པོ་ཟས་གཙང་ལ་ཆོས་བསྟན་པར་བརྩམ་པ་མཛད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཅིའི་ཕྱིར་རྒྱལ་པོ་ཟས་གཙང་བདེན་པ་མཐོང་བར་མི་བྱེད་སྙམ་དུ་དགོངས་པ་དང ། ད་ལྟར་རྒྱལ་པོ་ཟས་གཙང་སུ་ལ་ཡང་འདི་ལྟ་སྟེ། ད་ལྟར་བདག་གི་དོན་ཐམས་ཅད་གྲུབ་པ་ལྟ་བུའི་བུ་མེད་དོ་སྙམ་དུ་ཧ་ཅང་དགའ་བས་སེམས་ཀྱི་རྒྱུད་ཧ་ཅང་མཐོ་བར་གྱུར་པར་ཐུགས་སུ་ཆུད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཁྱོད་ཀྱིས་རྒྱལ་པོ་ཟས་གཙང་ལ་སོམས་ཤིག་།ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་རྒྱལ་པོ་ཟས་གཙང་ག་ལ་བ་དེར་སོང་ངོ ། །རྒྱལ་པོ་ཟས་གཙང་གིས་ཚེ་དང་ལྡན་ལ་མཽད་གལ་གྱི་བུ་ཆེན་པོ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཚུར་གཤེགས། བཙུན་པ་མཽད་གལ་གྱི་བུ་བྱོན་པ་ལེགས་སོ། །བཙུན་པ་མཽད་གལ་གྱི་བུ་གདན་བཤམས་པ་ཉིད་ལ་བཞུགས་ཤིག་།དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱིས་སྐབས་དབྱེ་བ་མཛད་པས་ཏིང་ངེ་འཛིན་འདི་ལྟ་བུ་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་རང་གི་སྟན་ལས་མི་སྣང་བར་གྱུར་ཅིང་ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ཏེ། སྤྱོད་ལམ་བཞི་པོ་འདི་ལྟ་སྟེ། འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་འཇུག་སྟེ། ཚེ་དང་ལྡན་པ་མཽད་གལ་གྱི་བུ་ཆེན་པོ་མེའི་ཁམས་ལ་སྙོམས་པར་ཞུགས་པའི་ལུས་ལས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དག་དང ། སེར་པོ་དག་དང ། དམར་པོ་དག་དང ། དཀར་པོ་དག་དང ། བཙོད་ཀ་དག་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ངོ ། །ཆོ་འཕྲུལ་ཟུང་དག་ཀྱང་རྣམ་པར་སྟོན་ཏེ། ལུས་ཀྱི་སྨད་ནས་མེ་འབར་ཞིང་ལུས་ཀྱི་སྟོད་ནས་ཆུ་གྲང་མོའི་རྒྱུན་འབབ་པར་བྱེད་དོ། །ལུས་ཀྱི་སྟོད་ནས་མེ་འབར་ཞིང་ལུས
6.78a
ཀྱི་སྨད་ནས་ཆུ་གྲང་མོའི་རྒྱུན་འབབ་པར་བྱེད་དོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་དང་ནུབ་དང ། བྱང་ཕྱོགས་སུ་འང་དེ་བཞིན་ཏེ། ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ཏེ་སྟན་བཤམས་པ་ཉིད་ལ་འདུག་གོ། །དེ་ནས་རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱི་ཉན་ཐོས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། གཞན་དག་ཀྱང་མཆིས་སམ། དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་དེའི་ཚེ་ཚིགས་སུ་བཅད་པ་སྨྲས་པ། ཐུབ་པའི་ཉན་ཐོས་མཐུ་ཆེ་བ། །གསུམ་རིག་སེམས་ཀྱི་རྣམ་གྲངས་ཤེས། །ཟག་པ་ཟད་པར་གྱུར་པ་དང ། །དགྲ་རྣམས་བཅོམ་པ་མང་དུ་ཡོད། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བཅོམ་ལྡན་འདས་ཉག་གཅིག་རྫུ་འཕྲུལ་ཆེ་བ། མཐུ་ཆེ་བར་མ་ཟད་ཀྱི། འདི་ལྟར་ཉན་ཐོས་རྣམས་ལ་ཡང་རྫུ་འཕྲུལ་ཆེ་བ་མཐུ་ཆེ་བ་དག་ཡོད་དོ་སྙམ་ནས། དེ་ན་རྒྱལ་པོ་ཟས་གཙང་གི་སེམས་ཀྱི་རྒྱུད་སྙོམས་པར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྒྱལ་པོ་ཟས་གཙང་ཁྲིད་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་སེམས་ཐུགས་ཀྱིས་མཁྱེན་ཅིང ། བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས། འདི་ལྟར་རྒྱལ་པོ་ཟས་གཙང་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས།
6.78b
རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། །དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང ། མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་བའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །ཚིགས་སུ་བཅད་པ་ཡང་གསོལ་པ། བུ་ཕོ་བཟང་པོས་ཕ་ལ་ནི། །ལན་དུ་ཕན་གདགས་གང་བགྱི་བ། །དེ་ནི་ཁྱོད་ཀྱིས་བདག་ལ་བགྱིས། །སེམས་ནི་མཐོ་རིས་གཞོལ་བར་གྱུར། །བུ་ཕོ་བཟང་པོས་ཕ་ལ་ནི། །ལན་དུ་ཕན་གདགས་གང་བགྱི་བ། །དེ་ནི་ཁྱོད་ཀྱིས་བདག་ལ་བགྱིས། །སེམས་ནི་ཐར་ལ་གཞོལ་བར་གྱུར། །ངན་སོང་དག་ལས་ལེགས་ཕྱུང་ཞིང ། །ཁྱོད་ཀྱིས་མཐོ་རིས་ཐར་པ་ལ། །རབ་ཏུ་འབད་པས་བདག་བཞག་སྟེ། །ཁྱོད་ཀྱིས་དཀའ་བ་ལེགས་པར་མཛད། །ཚོང་པས་ཁེ་སྤོགས་རྙེད་པ་ལྟར། །མཐོ་རིས་རྙེད་པ་བདག་གིས་རྙེད། །དགེ་བའི་བཤེས་གཉེན་རྣམས་ལ་ནི། །ཉེ་བར་རྟེན་པ་བཟང་བ་ལགས། །དེ་ནས་རྒྱལ་པོ་ཟས་གཙང་གིས་བདེན་པ་མཐོང་ནས་ཟས་དཀར་ལ་སྨྲས་པ། གཞོན་ནུ་ཁྱོད་ཀྱིས་རྒྱལ་སྲིད་བྱེད་དུ་ཆུག་ཤིག་།ད་ནི་རྒྱལ་པོའི་དྲང་སྲོང་གིས་ཚངས་པར་སྤྱད་པ་སྤྱོད་དོ། །ལྷ་ཅིའི་སླད་དུ་རྒྱལ་སྲིད
6.79a
བགྱིད་དུ་མི་སྩོལ། ངས་བདེན་པ་དག་མཐོང་ངོ ། །ལྷས་ནམ་གཟིགས ། དེང་ཉིད་དོ། །ལྷས་དེང་ཉིད་གཟིགས་ཀྱི་བདག་གིས་གང་གི་གདུགས་ལ་བཅོམ་ལྡན་འདས་འདིར་གཤེགས་པ་དེ་ཉིད་ཀྱི་གདུགས་ལ་བདེན་པ་དག་མཐོང་ལགས་སོ། །དེ་ནས་རྒྱལ་པོ་ཟས་གཙང་གིས་བྲེ་བོ་ཟས་དང་བདུད་རྩི་ཟས་ལ་སྨྲས་པ། གཞོན་ནུ་གཉིས་ཁྱེད་ཀྱིས་རྒྱལ་སྲིད་བྱེད་དུ་ཆུག་ཤིག་།ང་ནི་རྒྱལ་པོའི་དྲང་སྲོང་གིས་ཚངས་པར་སྤྱད་པ་སྤྱོད་དོ། །ཅིའི་སླད་དུ་རྒྱལ་སྲིད་བགྱིད་དུ་མི་སྩོལ། ངས་བདེན་པ་མཐོང་ངོ ། །ལྷས་ནམ་གཟིགས། དེང་ཉིད་དོ། །ལྷས་དེང་ཉིད་གཟིགས་ཀྱི་བདག་ཅག་གིས་ཆེས་སྔར་མཐོང་ལགས་སོ། །རྒྱལ་པོས་སྨྲས་པ། གཞོན་ནུ་རྣམས་ཀྱི་བུ་ཐུ་བོ་གང་ཡིན། གཞོན་དུ་བཟང་ལྡན་ལགས་སོ། །རྒྱལ་པོ་ཟས་གཙང་གིས་གཞོན་ནུ་བཟང་ལྡན་ཤཱཀྱའི་རྒྱལ་པོར་དབང་བསྐུར་རོ། །དེའི་ཚེ་ན་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ། ཉིན་གཅིག་མི་ཆད་པར་རྒྱལ་པོའི་ཕོ་བྲང་དུ་གདུགས་ཚོད་གསོལ་བ་དང ། རྒྱལ་པོ་ཟས་གཙང་གིས་རལ་བ་ཅན་ལས་རབ་ཏུ་བྱུང་བ་དཀའ་ཐུབ་ཀྱིས་ལུས་མི་སྡུག་པར་སྣང་བ་དག་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་ཉིད་ཆེན་པོ་འདི་དག་སེམས་ནི་བཟང་བ་ཡིན་ན་ལུས་མི་བཟང་སྟེ། དཀའ་ཐུབ་དྲག་པོ་དག་གིས་ལུས་མི་སྡུག་པར་སྣང་བ་དག་ཡིན་ནོ། །བཅོམ་ལྡན་འདས་ཀྱི་འཁོར་ནི་བཅོམ་ལྡན་འདས་ཉིད་ཅི་འདྲ་བར་འཁོར་ཡང་དེ་འདྲ་བ་ཉིད་དུ་གྱུར་ན་དེ་ལྟ་ན་བཅོམ་ལྡན་འདས་མཛེས་པར་འགྱུར་རོ་སྙམ་མོ། །དེ་ནས་རྒྱལ་པོ་ཟས་གཙང་གིས་ཤཱཀྱ་རྣམས་བསྡུས་ཏེ་སྨྲས་པ། ཤེས་ལྡན་དག་གལ་ཏེ་གཞོན་ནུ་དོན་ཐམས་ཅད་གྲུབ་པ་རབ་ཏུ་མ་བྱུང་བར་གྱུར་ན་ཅིར་འགྱུར། ལྷ་འཁོར
6.79b
ལོས་སྒྱུར་བའི་རྒྱལ་པོར་འགྱུར་རོ། །ཁྱེད་ཀྱི་བུ་དག་ཅིར་འགྱུར། ལྷ་ཞབས་རིང་བར་འགྱུར་རོ། །འོ་ན་ད་གཞོན་ནུ་དོན་ཐམས་ཅད་གྲུབ་པས་བདུད་རྩི་ཐུགས་སུ་ཆུད་དེ། བདུད་རྩིས་འགྲོ་བ་ཚིམ་པར་མཛད་ན་ཁྱེད་ཀྱི་བུ་དག་ཅིའི་ཕྱིར་ཞབས་རིང་མི་བྱེད། ལྷ་ཅི་ལགས་དེ་དག་རབ་ཏུ་དབྱུང་ངམ། རབ་ཏུ་ཕྱུང་ཤིག་།ལྷ་ཤཱཀྱའི་རིགས་རྒྱུན་ཆད་པར་འགྱུར་རོ། །རྒྱལ་པོས་སྨྲས་པ། ཁྱིམ་རེ་རེ་ནས་རེ་རེ་རབ་ཏུ་ཕྱུང་ཤིག་།ལྷ་བཀའ་སྩལ་པ་བཞིན་འཚལ་ལོ། །རྒྱལ་པོ་ཟས་གཙང་གིས་ཤཱཀྱ་གཞོན་ནུ་རྣམས་ཀྱིས་ཁྱིམ་རེ་རེ་ནས་རེ་རེ་རབ་ཏུ་དབྱུང་བར་བྱའོ་ཞེས་དྲིལ་བསྒྲགས་པ་བྱས་སོ། །གང་གི་ཚེ་རྒྱལ་པོ་ཟས་གཙང་གིས་དྲིལ་བསྒྲགས་པ་དེའི་ཚེ་ན་བཟང་ལྡན་དང་མ་འགགས་པ་དང ། ནམ་གྲུ་ལ་སོགས་པ་ཤཱཀྱའི་གཞོན་ནུ་ལྔ་བརྒྱ་རབ་ཏུ་བྱུང་ངོ ། །གང་གི་ཚེ་བཅོམ་ལྡན་འདས་ཀྱིས་ཤཱཀྱ་གཞོན་ནུ་ལྔ་བརྒྱ་རབ་ཏུ་ཕྱུང་བ་དེའི་ཚེ་ན་བཅོམ་ལྡན་འདས་ཀྱིས་འདི་ལྟ་སྟེ། རིགས་མཐོན་པོ་ལས་རབ་ཏུ་བྱུང་བ་ནི་རྙེད་པའི་ཕྱིར་དང་ཉེ་བ་ཡིན་ནོ། །ཞེས་གསུངས་པས་དེ་དག་ལས་རྙེད་པ་དང་བཀུར་སྟི་ཆེན་པོ་བྱུང་བར་གྱུར་ཏོ། །བཅོམ་ལྡན་འདས་ཀྱིས་དགོངས་པ། རིགས་ཀྱི་བུ་འདི་དག་གཞན་གྱི་ཕྱིར་ཁོ་ནར་རབ་ཏུ་བྱུང་བ་ཡིན་ན། གཞན་ཁོ་ན་ལ་ཆགས་སོ་སྙམ་དུ་དགོངས་ནས། དེ་ནས་བཅོམ་ལྡན་འདས་དེ་དག་ལས་རྙེད་པ་དང་བཀུར་སྟི་བྱུང་བ་གཅད་པར་བཞེད་ནས་སེར་སྐྱའི་གནས་སུ་ཅི་དགྱེས་པར་བཞུགས་ནས་མཉན་ཡོད་ག་ལ་བ་དེར་གཤེགས་ཏེ། མཐར་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་ཉི་ཤུ་བརྒྱད་པ།
6.80a
དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། མཐར་གྱིས་མཉན་ཡོད་ན་བསོད་སྙོམས་ལ་རྒྱུ་བ་ན། ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་ངོ ། །ཁྱིམ་བདག་གི་ཆུང་མ་སྦེད་མས་ཚེ་དང་ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་བྲང་བརྡུངས་ཏེ་སྨྲས་པ། འཆར་ཀ་ཅིའི་སླད་དུ་ཁྱོད་ཀྱིས་བདག་སྤངས་ཏེ་རབ་ཏུ་བྱུང ། འཆར་ཀས་སྨྲས་པ། བྱང་ཆུབ་སེམས་དཔས་བཙུན་མོ་གྲགས་འཛིན་མ་དང ། ས་འཚོ་མ་དང ། རི་དགས་སྐྱེས་ལ་སོགས་པ་བུད་མེད་དྲུག་ཁྲི་སྤངས་ཏེ་རབ་ཏུ་བྱུང་བ་ནི་ཤིན་ཏུ་དཀའ་བ་ཡིན་གྱི་རྡུལ་གྱི་རྫབ་འདྲ་བ་ཁྱོད་ལ་མི་བྲ་བ་ཅི་ཡོད། འཆར་ཀ་བདག་ཀྱང་རབ་ཏུ་འབྱུང་ངོ ། །དེ་ལྟར་གྱིས་ཤིག་།ཁྱིམ་གྱི་བྱ་བ་ལེགས་པར་བསྡུ་བར་བགྱིའོ། །འཆར་ཀ་དེ་དེར་དུས་དང་འཐུན་པའི་དུས་སུ་འོང་ཞིང་སྨྲས་པ། སྦེད་མ་རབ་ཏུ་མི་འབྱུང་ངམ། སྦེད་མས་སྨྲས་པ། ད་དུང་ཁྱིམ་གྱི་བྱ་བ་ལེགས་པར་མ་བསྡུས་སོ། །སྦེད་མ་དུས་དེ་ཙམ་གྱིས་ཀོ་ས་ལར་བྱུང་བའི་ཁྱིམ་གྱི་བྱ་བ་ཡང་ལེགས་པར་བསྡུས་པར་འགྱུར་རོ། །འཆར་ཀ་དེང་ལེགས་པར་བསྡུས་ཏེ་སང་རབ་ཏུ་འབྱུང་ངོ ། །འཆར་ཀ་འདི་སྙམ་དུ་སྔོན་ཡང་བདག་ལྷུང་བཟེད་ནག་པོ་ཅན་རྣམས་ཀྱིས་ཟིལ་གྱིས་མནན་པར་འགྱུར་བས་གལ་ཏེ་བདག་གིས་དགེ་སློང་མ་རབ་ཏུ་ཕྱུང་བར་གྱུར་ན་དྲུག་སྡེ་དག་གིས་དགེ་སློང་མ་རབ་ཏུ་ཕྱུང་ངོ་ཞེས་རྒྱ་ཆེར་ཟིལ་གྱིས་གནོན་པར་འགྱུར་རོ་སྙམ་དུ་འགྱོད་པ་སྐྱེས་ནས་དེ་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་རྒྱལ་པོའི་ཁབ་ཏུ་ཕྱིན་ནས་དེ་རྒྱལ་པོའི་ཁབ་ཏུ་དབྱར་གནས་པར་ཁས་བླངས་ཏེ་འདུག་གོ། །སྦེད་མ་ཡང་ཕྱི་དེ་ཉིན་པར་ཁྱིམ་གྱི་བྱ་བ་ལེགས་པར་བསྡུས་ཏེ་རྒྱལ་བྱེད་ཀྱི་ཚལ་དུ་འོངས་ནས་དེ་དགེ་སློང་རྣམས་ཀྱི་གན་དུ་སོང་སྟེ་དྲིས་པ། འཕགས་པ་དག་དེ་གར་མཆིས། དེ་སུ་ཡིན། འཕགས་པ་འཆར་ཀའོ། །དེ་རྒྱལ་པོའི་ཁབ་ཏུ་སོང་ངོ ། །སྦེད་མས་ངུ་བར་བརྩམས་པ་དང ། དགེ་སློང་རྣམས་ཀྱིས་སྨྲས་པ། སྦེད་མ་ཅིའི་ཕྱིར་ངུ། འཕགས་པ་འཆར་ཀའི་མཆིད་ནས་ཁྱིམ་གྱི་བྱ་བ་ལེགས་པར་བསྡུས་ལ
6.80b
མཆི་ཤིག་དང ། བདག་གིས་རབ་ཏུ་དབྱུང་ངོ་ཞེས་མཆི་ནས་བདག་གིས་ཁྱིམ་གྱི་བྱ་བ་ལེགས་པར་བསྡུས་ཏེ་མཆིས་ན་དེ་རྒྱལ་པོའི་ཁབ་ཏུ་མཆིས་པས་ད་ནི་བདག་ཁྱིམ་ན་གནས་པ་ཡང་མ་ལགས་ལ། རབ་ཏུ་བྱུང་བ་ཡང་མ་ལགས་སོ། །དགེ་སློང་རྣམས་ཀྱིས་དེ་ལ་སྨྲས་པ། སྦེད་མ་འཆར་ཀ་སྤུ་གྲིའི་ཕྱིར་རྒྱལ་པོའི་ཁབ་ཏུ་སོང་བས་སྤུ་གྲི་སར་པས་ཁྱོད་ཀྱི་སྐྲ་འདྲེག་པར་འགྱུར་རོ། །དགེ་སློང་མ་གསོ་སྦྱོང་འབུལ་བ་དག་རྒྱལ་བྱེད་ཀྱི་ཚལ་དུ་ལྷགས་ནས་དེ་དག་གིས་སྦེད་མ་ངུ་བ་མཐོང་ནས་སྨྲས་པ། སྦེད་མ་ཅིའི་ཕྱིར་ངུ། འཕགས་པ་འཆར་ཀའི་མཆིད་ནས་ཁྱིམ་གྱི་བྱ་བ་ལེགས་པར་བསྡུས་ལ་མཆི་ཤིག་དང ། བདག་གིས་རབ་ཏུ་དབྱུང་ངོ་ཞེས་མཆི་ནས་བདག་གིས་ཁྱིམ་གྱི་བྱ་བ་ལེགས་པར་བསྡུས་ཏེ་མཆིས་ན། དེ་རྒྱལ་པོའི་ཁབ་ཏུ་མཆིས་པས་ད་ནི་བདག་ཁྱིམ་ན་གནས་པ་ཡང་མ་ལགས་ལ་རབ་ཏུ་བྱུང་བ་ཡང་མ་ལགས་སོ། །གཡེངས་མ་དགེ་སློང་དག་སུ་ཞིག་དགེ་སློང་མ་རབ་ཏུ་འབྱིན་པར་བྱེད། འདི་ལྟར་དགེ་སློང་མ་རྣམས་ཀྱིས་དགེ་སློང་མ་རབ་ཏུ་འབྱིན་པར་བྱེད་ཀྱིས་ཚུར་ཤོག་།འཕགས་མ་སྐྱེ་དགུའི་བདག་མོ་ཆེན་མོ་གཽ་ཏ་མིས་ཁྱོད་རབ་ཏུ་འབྱིན་པར་འགྱུར་རོ། །དེ་དག་གིས་དེ་སྐྱེ་དགུའི་བདག་མོ་ཆེན་མོ་གཽ་ཏ་མའི་གན་དུ་ཁྲིད་ནས་སྨྲས་པ། འཕགས་མ་ཁྱིམ་བདག་གི་མཆིས་བྲང་སྦེད་མ་འདི་རབ་ཏུ་འབྱུང་བར་འཚལ་ལོ། །སྐྱེ་དགུའི་བདག་མོ་ཆེན་མོ་གཽ་ཏ་མིས་དེ་རབ་ཏུ་ཕྱུང་རྫོགས་པར་བསྙེན་པར་བྱས་སོ། །འཆར་ཀ་འདི་སྙམ་དུ་བདག་གིས་ལྷུང་བཟེད་ནག་པོ་ཅན་རྣམས་རྗེས་སུ་སྲུང་བས་ཁྱིམ་བདག་གི་ཆུང་མ་སྦེད་མ་རབ་ཏུ་མ་ཕྱུང་བས་རྒྱ་ཅང་དང ། ལྕག་པོར་དང ། ཤུར་བུ་དང ། ཤུར་བུ་ཕྲེའུ་དག་གི་བར་ཆད་ཀྱང་བྱས་ལ། དེ་ཡང་ལྷུང་བཟེད་ནག་པོ་ཅན་འགའ་ཞིག་གིས་རབ་ཏུ་ཕྱུང་བར་གྱུར་ན་དེ་དང་ཕྲད་དུ་ཡང་མི་སྟེར་རོ་སྙམ་དུ་འགྱོད་པ་སྐྱེས་ནས་དེ་མི་དགའ་བཞིན་དུ་དབྱར་གནས་པར་ཁས་བླངས་སོ། །མཉན་ཡོད་ན་རྒན་ཞུགས
6.81a
ཤིག་མི་དགའ་བཞིན་དུ་དབྱར་གནས་པར་ཁས་བླངས་པ་དེས་ལྷུང་བཟེད་དང་ཆོས་གོས་མཆན་ཁུང་དུ་བཅུག་སྟེ་དགག་དབྱེ་བྱས་པ་ན་དགག་དབྱེ་ལེགས་པར་བྱས་སོ། །དགག་དབྱེ་ཤིན་དུ་བྱས་སོ་ཞེས་དེ་རྒྱལ་པོའི་ཁབ་ག་ལ་བ་དེར་སོང་སྟེ། མཐར་གྱིས་རྒྱུ་ཞིང་འགྲོ་བ་ན་རྒྱལ་པོའི་ཁབ་ཏུ་ཕྱིན་པ་དང ། ཚེ་དང་ལྡན་པ་འཆར་ཀ་གཙུག་ལག་ཁང་གི་སྒོ་ན་ལམ་ལ་རྣམ་པར་ལྟ་ཞིང་འདུག་པ་དེས་ཐག་རིང་པོ་ཁོ་ན་ནས་རྒན་ཞུགས་མགོ་སྤྲ་བའི་མེ་ཏོག་ལྟར་སྐྱ་བ། སྨིན་མ་འཕྱང་བ་ཞིག་འོང་བ་དེ་མཐོང་ནས་འཆར་ཀས་བསམས་པ། དགེ་སློང་འོང་བ་འདི་གནས་བརྟན་གང་ཡིན་པ་སུའོ་སྙམ་ནས། དེས་སྨྲས་པ། གནས་བརྟན་བྱོན་པ་ལེགས་སོ། །བྱོན་པ་ལེགས་སོ་ཕྱག་འཚལ་ལོ། །དེས་སྨྲས་པ། སློབ་དཔོན་ཕྱག་འཚལ་ལོ། །འཆར་ཀས་འདི་ནི་རྒན་ཞུགས་ཤིག་སྟེ། སློབ་དཔོན་ཡང་མི་ཤེས། མཁན་པོ་ཡང་མི་ཤེས་པ་ཞིག་གོ་སྙམ་དུ་ཤེས་ནས་འཆར་ཀས་དེ་གཙུག་ལག་ཁང་དུ་བཅུག་སྟེ་སྨྲས་པ། རྒན་ཞུགས་ཁྱོད་ག་ལས་འོངས། དེས་སྨྲས་པ། མཉན་ཡོད་ནས་སོ། །འཆར་ཀས་བསམས་པ། གལ་ཏེ་དང་པོ་ཁོ་ནར་སྦེད་མའི་གཏམ་དྲིས་ན་འཕྱ་བར་འགྱུར་བས་འདི་ལྟར་སྔ་ཕྱིར་བྱས་ཏེ་དྲི་བར་བྱའོ་སྙམ་ནས་སྨྲས་པ། ཚེ་དང་ལྡན་པ་ཇི་ལྟ་བཅོམ་ལྡན་འདས་གནོད་པ་ཆུང་བ་དང ། ཉམ་ང་བ་ཆུང་བ་དང ། བདེ་བ་དང ། སྙུན་མི་མངའ་བ་དང ། སྟོབས་དང་ལྡན་པར་མཉན་ཡོད་དུ་དབྱར་གནས་པར་ཞལ་གྱིས་བཞེས་སམ། བཙུན་པ་འཆར་ཀ་དེ་བཞིན་ཏེ། བཅོམ་ལྡན་འདས་གནོད་པ་ཆུང་བ་དང ། ཉམ་ང་བ་ཆུང་བ་དང ། བདེ་བ་དང ། སྙུན་མི་མངའ་བ་དང ། སྟོབས་དང་ལྡན་པར་མཉན་ཡོད་དུ་དབྱར་གནས་པར་ཞལ་གྱིས་བཞེས་སོ། །ཚེ་དང་ལྡན་པ་ཇི་ལྟ་དགེ་སློང་གི་དགེ་འདུན་དང ། དགེ་སློང་མའི་དགེ་འདུན་དང ། དགེ་བསྙེན་གྱི་འཁོར་དང ། དགེ་བསྙེན་མའི་འཁོར་གནོད་པ་ཆུང་བ་དང ། ཉམ་ང་བ་ཆུང་བ་དང ། བདེ་བ་དང ། ནད་མེད་པ་དང ། སྟོབས་དང་ལྡན་པར་མཉན་ཡོད་ན་གནས་སམ། སྟོན་པ་ལ་ལྟ་བར་འདོད་དམ། དམ་པའི་ཆོས་ཉན་པར་འདོད་དམ། བཙུན་པ་འཆར་ཀ་དེ་བཞིན་ཏེ། དགེ་སློང་གི་དགེ་འདུན་དང ། དགེ་སློང་མའི
6.81b
དགེ་འདུན་དང ། དགེ་བསྙེན་གྱི་འཁོར་དང ། དགེ་བསྙེན་མའི་འཁོར་གནོད་པ་ཆུང་བ་དང ། ཉམ་ང་བ་ཆུང་བ་དང ། བདེ་བ་དང ། ནད་མེད་པ་དང ། སྟོབས་དང་ལྡན་པར་མཉན་ཡོད་ན་གནས་ཤིང་སྟོན་པ་ལ་བལྟ་བར་འདོད་པ་དང ། དམ་པའི་ཆོས་ཉན་པར་འདོད་དོ། །ཚེ་དང་ལྡན་པ་ཇི་ལྟ་གནས་བརྟན་ཀུན་ཤེས་ཀཽ་ཎྜི་ཎྱ་དང ། གནས་བརྟན་འོད་སྲུང་ཆེན་པོ་དང ། གནས་བརྟན་ཤཱ་རིའི་བུ་དང ། གནས་བརྟན་མཽད་གལ་གྱི་བུ་ཆེན་པོ་དང ། གཞན་ཡང་དགེ་སློང་གནས་བརྟན་གནས་བརྟན་དག་གནོད་པ་ཆུང་བ་དང ། ཉམ་ང་བ་ཆུང་བ་དང ། བདེ་བ་དང ། ནད་མེད་པ་དང ། སྟོབས་དང་ལྡན་པར་མཉན་ཡོད་ན་གནས་སམ། བཙུན་པ་འཆར་ཀ་དེ་བཞིན་ཏེ། གནོད་པ་ཆུང་བ་དང ། ཉམ་ང་བ་ཆུང་བ་དང ། བདེ་བ་དང ། ནད་མེད་པ་དང ། སྟོབས་དང་ལྡན་པར་མཉན་ཡོད་ན་གནས་སོ། །ཚེ་དང་ལྡན་པ་ཇི་ལྟ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང ། བླ་མཁྱེན་དྲང་སྲོང་བྱིན་དང ། རྙིང་པ་དང ། ཁྱིམ་བདག་གི་ཆུང་མ་རི་དགས་འཛིན་གྱི་མ་ས་ག་དང ། ལེགས་སྐྱེས་དག་ཤེས་སམ། བཙུན་པ་འཆར་ཀ་དེ་བཞིན་ཏེ་ཤེས་སོ། །ཚེ་དང་ལྡན་པ་འོ་ན་ཁྱོད་ཀྱིས་ཁྱིམ་བདག་གི་ཆུང་མ་སྦེད་མ་ཤེས་སམ། བཙུན་པ་འཆར་ཀ་ཤེས་ཏེ་དེ་ནི་བཙུན་པ་འཆར་ཀའི་སྔོན་གྱི་ཆུང་མ་ཡིན་ནོ། །རྒན་ཞུགས་གཏམ་ཤེས་སོ། །དེ་ད་དུང་ཡང་ཁྱོད་ཀྱི་ཁྱིམ་བདག་གི་ཆུང་མ་ཡིན་སྙམ་འམ། དེ་ནི་རབ་ཏུ་བྱུང་ངོ ། སུས་རབ་ཏུ་ཕྱུང ། སྐྱེ་དགུའི་བདག་མོ་ཆེན་མོ་གཽ་ཏ་མིས་སོ། །འཆར་ཀས་བསམས་པ། ད་དུང་སྤྱོད་ཡུལ་ལྷག་མ་དང་བཅས་པ་ཡིན་ནོ་སྙམ་ནས་སྨྲས་པ། རྒན་ཞུགས་ཚུར་ཤོག་།རྐང་པ་དག་ཁྲུས་ཤིག་ཅེས་དེས་དེ་ལ་རྐང་པ་བསྐུ་བ་དང ། ལག་པ་བསྐུ་བ་མང་པོ་བྱིན་ནས་དེས་དེའི་ལྷུང་བཟེད་དང་ཆོས་གོས་ཡ་གད་བཙུགས་ཏེ་ཟུང་མཐོན་པོ་ལ་བཞག་ནས་སྨྲས་པ། རྒན་ཞུགས་གཙུག་ལག་ཁང་འདི་ནི་ཟས་དང་བཅས་པ། རྙེད་པ་དང་བཅས་པ་ཡིན་གྱིས་གཙུག་ལག་ཁང་འདིར་མངོན་པར་དགའ་བར་གྱིས་ཤིག་།དེས་སྨྲས་པ། བཙུན་པ་འཆར་ཀ་བདག་ནི་མཆོད་རྟེན་ལ་ཕྱག་འཚལ་དུ་འོངས་ཏེ་འགྲོ་བ་ཡིན་པས་བདག་གནས་འདི་མི་འདོད་དོ། །འཆར་ཀས་དེའི་མདུན་དུ
6.82a
སྒོ་ལྕགས་དང་ལྡེ་མིག་ཁྱོག་པོ་དག་བཞག་སྟེ་འདི་སྐད་ཅེས་ཚེ་དང་ལྡན་པ་བཅོམ་ལྡན་འདས་ཀྱིས་དགེ་སློང་གིས་གཙུག་ལག་ཁང་གནས་པ་དང་བཅས་པར་བྱའི་མི་གནས་པར་མི་བྱའོ་ཞེས་བཀའ་སྩལ་ཏོ་ཞེས་སྨྲས་ནས་མིག་ལམ་དུ་མི་སྣང་བར་སོང་སྟེ། དེ་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས་འཆར་ཀས་རང་གི་གཙུག་ལག་ཁང་ཆག་ཆག་བཏབ། ལེགས་པར་བྱུགས། ལྕི་བ་སར་པའི་བྱུག་པས་བྱུགས་ཏེ་སྒོ་བཅད་ནས་ཁྲིའི་སྟེང་ན་ཕྱི་གན་དུ་ཉལ་ཞིང་སྐད་ཀྱི་གདངས་ཀྱིས་ཁ་ཏོན་བྱེད་ཅིང་འདུག་གོ། །དགེ་སློང་མ་འདུན་པ་འབུལ་བ་དག་ལྷགས་ནས་དེ་དག་གིས་དེའི་སྐད་ཀྱི་གདངས་ཐོས་ནས་དེ་དག་གིས་དེ་ལ་ཕྱག་འཚལ་ཏེ་སྨྲས་པ། འཕགས་པ་འཆར་ཀ་ཁྱོད་གར་བཞུད་བཞུད། འཆར་ཀས་སྨྲས་པ། རྒྱལ་པོའི་ཁབ་ཏུའོ། །དེ་དག་དབྱར་ཁང་དུ་དོང་ནས་སྦེད་མ་ལ་སྨྲས་པ། སྦེད་མ་དགའ་བ་སྐྱེད་ཅིག་།ཁྱོད་ཀྱི་སློབ་དཔོན་འོངས་སོ། །ཁོ་མོའི་སློབ་དཔོན་གང ། འཆར་ཀའོ། །དེ་ཇི་ལྟར་ཁོ་མོའི་སློབ་དཔོན། ཅི་ཁོ་མོས་དེའི་གན་ནས་བླགས་སམ། གཡེངས་མ་ཁྱོད་ཀྱིས་མི་ཤེས་དགེ་སློང་མ་རྣམས་ནི་དགེ་སློང་ལ་རག་མང་དུ་ལས་ཀྱིས་ཁྱོད་སོང་ལ་ལྟོས་ཤིག་།སྦེད་མས་ནས་ཀྱི་དར་ཕྱེ་དང་ཁྲུས་ཀྱི་ཆལ་དང ། འབྲུ་མར་ཐོགས་ཏེ་འཆར་ཀའི་གཙུག་ལག་ཁང་དུ་སོང་ནས་སྦེད་མས་འཆར་ཀའི་གཙུག་ལག་ཁང་གི་སྒོ་བརྡུངས་པ་དང ། འཆར་ཀས་སྨྲས་པ། དེ་སུ་ཡིན། སྦེད་མས་སྨྲས་པ། བདག་སྦེད་མའོ། །ཁྱིམ་བདག་གི་ཆུང་མ་སྦེད་མ་འོངས་པ་ལེགས་སོ། །བདག་ད་དུང་ཡང་ཁྱོད་ཀྱི་ཁྱིམ་བདག་གི་ཆུང་མ་ལགས་སམ། འོ་ན་ཅི་ཡིན། བདག་རབ་ཏུ་བྱུང་ངོ ། །ཁྱོད་སུས་རབ་ཏུ་ཕྱུང ། འཕགས་མ་སྐྱེ་དགུའི་བདག་མོ་ཆེན་མོ་གཽ་ཏ་མིས་སོ། །ཁོ་བོ་རེ་ཤིག་བྱ་བ་དེ་ལྟ་བུ་ཞིག་བྱུང་ནས་དེའི་ཕྱིར་ཁོ་བོ་རྒྱལ་པོའི་ཁབ་ཏུ་སོང་ན་ཁྱོད་ལ་བརྟད་པ་ཅི་བྱུང་ན་དེའི་ཕྱིར་ཁྱོད་རབ་ཏུ་བྱུང ། ཁྱོད་གྱི་ཞལ་ནས་ཁྱིམ་གྱི་བྱ་བ་ལེགས་པར་བསྡུས་ལ་ཤོག་ཤིག་དང ། ཁོ་བོས་ཁྱོད་རབ་ཏུ་དབྱུང་ངོ་ཞེས་གསུངས་ནས། བདག་གིས་ཁྱིམ་གྱི་བྱ་བ་ལེགས་པར་བསྡུས་ཏེ
6.82b
མཆིས་ན་ཁྱོད་རྒྱལ་པོའི་ཁབ་ཏུ་བཞུད་དེ། གལ་ཏེ་བདག་འཕགས་མས་རབ་ཏུ་མ་ཕྱུང་དུ་ལགས་ན་བདག་ཁྱིམ་ན་གནས་པ་ཡང་མ་ལགས་ལ་རབ་ཏུ་བྱུང་བ་ཡང་མ་ལགས་པར་འགྱུར་རོ། །འཆར་ཀས་སྨྲས་པ། སྦེད་མས་ཅི་ཁོ་བོ་བདག་ཉིད་ཀྱི་ལག་ངར་ལ་སོས་འདེབས་པར་བྱེད་དམ། སྐྱེ་དགུའི་བདག་མོ་ཆེན་མོ་གཽ་ཏ་མིས་རབ་ཏུ་ཕྱུང་ཡང་རུང ། ཁོ་བོས་རབ་ཏུ་ཕྱུང་ཡང་རུང་སྟེ་ལེགས་ཀྱིས་ནང་དུ་ཞུགས་ཤིག་དང་ཆོས་བསྟན་པར་བྱའོ། །སྦེད་མས་འཆར་ཀའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེས་དེ་ལ་ཆོས་བསྟན་པར་བརྩམས་ཏེ། དེས་དེ་ལ་ཇི་ཙམ་པ་དེ་ཙམ་དུ་ཆོས་བསྟན་ནས་སྔོན་གྱི་བགད་པ་དང ། དགའ་བར་བྱས་པ་དང ། རྩེས་པ་དང ། དགའ་མགུར་སྤྱད་པ་དྲན་པར་བྱ་བར་བརྩམས་ཏེ། སྦེད་མ་བདག་ཅག་གཉིས་ཀྱིས་བསྐྱེད་མོས་ཚལ་དང ། འདུན་ས་དང ། ལྷའི་གནས་ག་གེ་མོ་ཞིག་ཏུ་ཟས་འདི་དང་འདི་ལྟ་བུ་ཟོས་པ་དང ། བཅའ་བ་འདི་དང་འདི་ལྟ་བུ་འཆོས་པ་དང ། བཏུང་བ་འདི་དང་འདི་ལྟ་བུ་འཐུངས་པ་གང་ཡིན་པ་དེ་དྲན་ནམ་ཞེས་སྨྲས་པ་དང་འཆར་ཀ་ཀུན་དུ་ཆགས་པར་གྱུར་ཏོ། །ཇི་ལྟ་ཇི་ལྟར་ཆགས་པར་གྱུར་པ་དེ་ལྟ་དེ་ལྟར་དྲལ་ཏོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ་ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་དེ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་བརྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་བརྟེན་ཅིང་འདུག་པའོ། །སྦེད་མ་དེས་འཆར་ཀ་དེ་ཆགས་སོ་སྙམ་དུ་ཤེས་ནས་སྦེད་མས་སྨྲས་པ། སླད་རོལ་དུ་མཆིས་ཏེ་སླར་མཆིའོ། །འཆར་ཀས་བསམས་པ། འདི་བཤང་བ་བྱེད་འདོད་དམ། གཅི་བ་བྱེད་འདོད་གོར་མ་ཆག་སྙམ་ནས་དེས་སྨྲས་པ། སོང་ཤིག་།སྦེད་མ་ཕྱིར་བྱུང་ནས་ཤིང་ང་དཔུང་བཅད་བརྫེས་ཏེ་རྒྱུག་པར་བརྩམས་པ་དང ། འཆར་ཀ
6.83a
དེ་སྒྲ་ལ་མཁས་པ་ཡིན་པས་དེས་དེའི་སྒྲ་ཐོས་ནས་དེས་དེའི་ཕྱི་བཞིན་དུ་བྱུང་སྟེ། དགེ་སྦྱོང་མ་མགོ་རེག་མོ་གར་འབྲོས་ཤེས་དེ་དེའི་ཕྱི་བཞིན་རྒྱུག་པར་བརྩམས་པ་དང ། དེ་ལ་བརླའི་རེག་པས་ཁུ་བ་བྱུང་ནས་དེ་ཀུན་ནས་དཀྲིས་པ་དང་བྲལ་ཏེ་གླང་པོ་ཆེ་ཆགས་པ་དང་བྲལ་བ་བཞིན་དུ་གཞི་དེ་དག་ཉིད་ན་འདུག་གོ། །སྦེད་མས་དེ་ཀུན་ནས་བཀྲིས་པ་དང་བྲལ་ཞིང་ཕྱིར་ལོག་པ་མཐོང་ནས་འདི་ཀུན་ནས་དཀྲིས་པ་དང་བྲལ་ལོ་སྙམ་དུ་རིག་ནས་དྲུང་དུ་སོང་སྟེ་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །འཕགས་པ་གལ་ཏེ་བདག་གིས་དང་དུ་བླངས་པར་གྱུར་ན་བདག་ཀྱང་དགེ་སློང་མར་མི་རུང་བ་ཉིད་དུ་འགྱུར་ལ། ཁྱོད་ཀྱང་དགེ་སློང་དུ་མི་རུང་བ་ཉིད་དུ་འགྱུར་རོ། །སྲིང་མོ་བཅོམ་ལྡན་འདས་ཀྱིས་ཀྱང་བདག་ཉིད་སྲུང་ན་གཞན་སྲུང་བར་བྱེད་ལ། གཞན་སྲུང་ན་བདག་ཉིད་སྲུང་བར་བྱེད་དོ་ཞེས་ལེགས་པར་གསུངས་སོ། །ཇི་ལྟར་བདག་ཉིད་སྲུང་ན་གཞན་སྲུང་བར་བྱེད་ཅེ་ན། སྟེན་པར་བྱེད་པ་དང ། གོམས་པར་བྱེད་པ་དང ། ལམ་མང་དུ་བྱེད་པ་དང ། རྗེས་སུ་སྲུང་བར་བྱེད་པ་དང ། རེག་པར་བྱེད་པ་དང ། མངོན་སུམ་དུ་བྱེད་པ་སྟེ། དེ་ལྟར་བདག་ཉིད་སྲུང་ན་གཞན་སྲུང་བར་བྱེད་དོ། །ཇི་ལྟར་གཞན་སྲུང་ན་བདག་ཉིད་སྲུང་བར་བྱེད་ཅེ་ན། ཐོ་མི་འཚམས་པ་དང ། མི་གཤེ་བ་དང ། མི་འཚེ་བ་དང ། རྗེས་སུ་བརྩེ་བ་དང ། རྗེས་སུ་སྙིིང་བརྩེ་བ་དང ། བྱམས་པའི་སེམས་ཀྱིས་ཏེ། དེ་ལྟར་གཞན་སྲུང་ན་བདག་ཉིད་སྲུང་བར་བྱེད་དོ། །འཕགས་པ་ཤམ་ཐབས་འདི་ཚུར་སྩོལ་བཀྲུ་བར་བགྱིའོ། །འཆར་ཀས་ཤམ་ཐབས་དེ་སྦེད་མ་ལ་བྱིན་ནོ། །སྦེད་མས་ཁུ་བ་དེ་མཐོང་ནས་འགྱོད་པ་སྐྱེས་ཏེ། བདག་གི་ལུས་ཀྱི་ཕྱོགས་བཙུན་པ་འཆར་ཀས་སྔོན་མ་མཐོང་བ་འམ་སྔོན་མ་མནམས་པ་འམ། སྔོན་མ་བྱུགས་པ་ཅི་ཞིག་ཡོད་ན་བདག་གིས་དང་དུ་མ་བླངས་པ་ནི་མ་ལེགས་པ་ཞིག་བྱས་སོ་སྙམ་དུ་འགྱོད་པ་སྐྱེས་སོ། །སྦེད་མ་དེ་ལྟར་རྣམ་པར་རྟོག་པ་ན་དེ་ཀུན་དུ་ཆགས་ཤིང་དྲལ་བར་གྱུར་པའི་སེམས་ཀྱིས་ཁུ་བ་དེ་རང་གི་མངལ་གྱི་གོ་སར་བླུགས་སོ། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པས་དེ་ལ་སེམས་ཅན་ཞུགས་པར
6.83b
གྱུར་ཏོ། །དེ་དགེ་སློང་མ་རྣམས་ཀྱིས་མཐོང་ནས་སྨྲས་པ། སྦེད་མ་ཁོ་མོ་ཅག་ཀོ་ཁྱོད་ཆོས་བཟང་པོའི་ཆོས་ཀྱིས་འཕགས་པ་འཆར་ཀའི་གན་དུ་འགྲོ་བར་སེམས་ཀྱི་ཁོ་མོ་ཅིག་གིས་དེས་ཁྱོད་གནས་སྐབས་འདི་ལྟ་བུར་བྱས་པར་མི་སེམས་སོ། །སྦེད་མས་སྨྲས་པ། ཕུ་ནུ་མོ་དག་དགེ་སློང་དེ་ནི་ཚུལ་ཁྲིམས་དང་ལྡན་པ་ཡིན་ཏེ། གང་ཚུན་ཆད་རབ་ཏུ་བྱུང་ནས་དེས་ཁོ་མོ་ལ་སྔོན་ཆད་ལན་འགའ་ཡང་ལག་གིས་ཀྱང་མ་བྱུགས་སོ། །དེ་དག་གིས་སྨྲས་པ། མ་བྱུགས་ན་ཡང་དེས་ཁྱོད་གནས་སྐབས་འདི་འདྲ་བར་བྱས་ན། གལ་ཏེ་བྱུགས་ན་དེས་ཁྱོད་གནས་སྐབས་ཇི་ལྟ་བུར་བྱས་པར་འགྱུར་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་དེ་ནི་ཕམ་པར་མ་གྱུར་གྱིས་འདི་ལྟར་ཕྱོགས་དབེན་པར་བཞག་སྟེ་བསོད་སྙོམས་ཀྱིས་བྲེལ་བ་མེད་པ་གྱིས་ཤིག་དང ། བུ་གཞོན་ནུ་འོད་སྲུང་ཞེས་བྱ་བ་བཙའ་བར་འགྱུར་ཞིང་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་ཏེ་འདི་ལྟ་སྟེ། དགེ་སློང་གཞོན་ནུ་འོད་སྲུང་དེ་ནི་ངའི་གཏམ་སྣ་ཚོགས་དང ། གཏམ་སྙན་པ་དང ། སྤོབས་པ་དགེ་བ་ཅན་རྣམས་ཀྱི་མཆོག་ཏུ་འགྱུར་རོ། །བཅོམ་ལྡན་འདས་ཀྱིས་དགོངས་པ་དགེ་སློང་རྣམས་ཀྱི་ཉེས་དམིགས་བྱུང་བ་གང་ཡིན་པ་དེ་ནི་དགེ་སློང་མ་ཉེ་དུ་མ་ཡིན་པ་ལ་གོས་རྙིང་པ་འཁྲུར་འཛུད་པ་ལས་གྱུར་པ་ཡིན་ནོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་གོས་རྙིང་པ་འཁྲུར་འཛུད་དམ། འཚེད་དུ་འཛུད་དམ། འཆག་ཏུ་འཇུད་ན་སྤངས་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ
6.84a
འམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ལས་བརྟེན་པའི་བདུན་པ་ཚུན་ཆད་ནི་ཉེ་དུ་ཡིན་པ་དེ་ཕན་ཅད་ནི་ཉེ་དུ་མ་ཡིན་ནོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་དག་ལས་གང་ཡང་རུང་བའོ། །རྙིང་པ་ཞེས་བྱ་བ་ནི་དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བར་སྤྱད་པ་གང་ཡིན་པའོ། །འཁྲུར་འཛུད་དམ་ཞེས་བྱ་བ་ནི་ཐ་ན་ཆུར་སྙུག་པ་བྱེད་དུ་འཛུད་ནའོ། །འཚེད་དུ་འཛུད་དམ་ཞེས་བྱ་བ་ནི་ཐ་ན་ཚོན་དུ་སྙུག་པ་བྱེད་དུ་འཛུད་ནའོ། །འཆག་ཏུ་འཛུད་དམ་ཞེས་བྱ་བ་ནི་ཐ་ན་ཐལ་མོས་རྡེབས་པར་བྱེད་དུ་འཛུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ་དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་རྙིང་པ་འཁྲུར་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཚེད་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཆག་ཏུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཁྲུར་འཇུད་པ་དང་འཚེད་དུ་འཛུད་དམ། འཁྲུར་འཛུད་པ་དང་འཆག་ཏུ་འཇུད་དམ། འཚེད་དུ་འཛུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་པ་དང་འཁྲུར་འཇུད་དམ། འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང ། འཆག་ཏུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་རྙིང་པ་འཁྲུར་འཇུག་ན་སྤང་བའི་ལྟུང་བྱེད་དུ་འགྱུར་རོ། །འཚེད་དུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཆག་ཏུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཁྲུར་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཛུད་པ
6.84b
དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་པ་དང་འཁྲུར་འཇུད་དམ། འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང ། འཆག་ཏུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་གོས་རྙིང་པ་འཁྲུར་འཇུད་ན་ཉེས་བྱས་སུ་འགྱུར་རོ། །འཚེད་དུ་འཇུད་ན་ཉེས་བྱས་སུ་འགྱུར་རོ ། །འཆག་ཏུ་འཇུད་ན་ཡང་ཉེས་བྱས་སུ་འགྱུར་རོ། །འཁྲུར་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཇུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་པ་དང་འཁྲུར་འཇུད་དམ། །འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང ། འཆག་ཏུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཡིད་གཉིས་ཟ་བས་གོས་རྙིང་པ་འཁྲུར་འཛུད་ན་ཉེས་བྱས་སུ་འགྱུར་རོ། །འཚེད་དུ་འཇུད་ན་ཉེས་བྱས་སུ་འགྱུར་རོ། །འཆག་ཏུ་འཇུད་ན་ཉེས་བྱས་སུ་འགྱུར་རོ། །འཁྲུར་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཇུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་པ་དང་འཁྲུར་འཇུད་དམ། འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང ། འཆག་ཏུ་འཇུད་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་དག་འདི་ལྟ་སྟེ། རིགས་མཐོན་པོ་ལས་རབ་ཏུ་བྱུང་བ་འདི་ནི་རྙེད་པ་རྣམས་ཀྱི་ཕྱེད་དང་ཉེ་བ་ཡིན་ནོ། །ཞེས་བཀའ་སྩལ་པས་དེ་ན་ཡང་ཤཱཀྱའི་ཁྱིམ་ནས་རབ་ཏུ་བྱུང་བ་དེ་དག་ལ་རྙེད་པ་དང་བཀུར་སྟི་ཆེན་པོ་བྱུང་ནས
6.85a
དེ་དག་ཤིན་ཏུ་གོས་ཀྱིས་ཆ་བ་ལ་སྦྱོར་བའི་རྗེས་སུ་བརྩོན་པར་གནས་ཤིང ། ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང ། སྐ་རགས་ལྷག་པ་དག་ཀྱང་འཆང་བར་བྱེད་པས་བཅོམ་ལྡན་འདས་ཀྱིས་དེ་དག་ལ་དུས་དང་དུས་སུ་ཆོས་བསྟན་ཀྱང་དེ་དག་གིས་བདེན་པ་དག་མ་མཐོང་ངོ ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཅིའི་ཕྱིར་ཤཱཀྱ་རབ་ཏུ་བྱུང་བ་དག་བདེན་པ་དག་མཐོང་བར་མི་བྱེད་སྙམ་དུ་དགོངས་ནས་དེ་དག་ཤིན་དུ་གོས་ཀྱིས་ཆ་བ་ལ་སྦྱོར་བའི་རྗེས་སུ་བརྩོན་པར་གནས་ཤིང་དེ་དག་ལྷུང་བཟེད་དང ། ཆོས་གོས་དང་དྲ་བ་དང་ཕོར་བུ་དང ། སྐ་རགས་ལྷག་པ་དག་འཆང་བའི་ཕྱིར་ཏེ། གལ་ཏེ་ངས་ཤཱཀྱ་རབ་ཏུ་བྱུང་བ་རྣམས་ལ་སྨད་ན་དབྲལ་དཀའ་བར་འགྱུར་རོ། །སྙམ་དུ་དགོངས་ནས། སངས་རྒྱས་བཅོམ་ལྡན་འདས་རྣམས་ནི་གདུལ་བ་ལ་མཁས་པ་བླ་ན་མེད་པ་ཡིན་པས་དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་བཞེད་ཀྱིས། ངའི་སྤྱན་སྔར་དགེ་སློང་བསོད་སྙོམས་སྟོབས་པ་ཅིག་དང ། འདི་ཉིད་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་དགེ་སློང་གང་གིས་ཀྱང་ཉེ་བར་འོང་བར་མི་བྱའོ། །དགེ་སློང་གི་དགེ་འདུན་གྱིས་ཀྱང་ཚེ་དང་ལྡན་པ་དག་དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་ཅིག་དང ། འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་བདག་ཅག་ལས་གང་གིས་ཀྱང་བཅོམ་ལྡན་འདས་ལ་ལྟར་འགྲོ་བར་མི་བྱ་སྟེ། དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་ཅིག་དང ། འདི་ཉིད་ཀྱི་གོས་སྦྱོང་བཅཝ་ལྔ་པའི་ཚེ་མ་གཏོགས་པར་བདག་ཅག་ལས་གང་བཅོམ་ལྡན་འདས་ལ་ལྟར་འགྲོ་བ་དེ་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་ཁྲིམས་སུ་བྱ་བ་བཅས་སོ། །བཅོམ་ལྡན་འདས་ཟླ་བ་གསུམ་ནང་དུ་ཡང་དག་འཇོག་ལ་ཞུགས་པ་ན་དགེ་སློང་བསོད་སྙོམས་སྟོབས་པ་ཅིག་དང ། དེ་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་དེར་དགེ་སློང་འགའ་ཡང་མི་འགྲོའོ། །དེའི་ཚེ་ན་ཚེ་དང་ལྡན་པ་ཉེ་སྡེ་ཟླ་བ
6.85b
ཤོལ་མ་བོར་བས་དབྱར་ལྗོངས་སུ་གནས་པར་ཁས་བླངས་ལ། བཅོམ་ལྡན་འདས་ནི་ཟླ་བཤོལ་བོར་བས་དབྱར་ལྗོངས་སུ་གནས་པར་ཞལ་གྱིས་བཞེས་སོ། །དེ་ནས་ཚེ་དང་ལྡན་པ་ཉེ་སྡེ་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་མཛེས་པ་འཁོར་མཛེས་པ་དང་ལྡན་པས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ། །དེ་ནས་ཚེ་དང་ལྡན་པ་ཉེ་སྡེ་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་བཅོམ་ལྡན་འདས་ཀྱི་གཙུག་ལག་ཁང་ག་ལ་བ་དེར་སོང་བ་དང ། དགེ་སློང་དྲུག་སྡེ་དག་གིས་ཚེ་དང་ལྡན་པ་ཉེ་སྡེ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་འདི་སྐད་ཅེས་ཚེ་དང་ལྡན་པ་དག་ད་ལྟར་ཁོ་ན་ན་དོན་ཉུང་ངུས་དགེ་འདུན་གྱི་ཁྲིམས་སུ་བྱ་བ་འདྲལ་བར་འགྱུར་རོ། །ཞེས་སྨྲས་སོ། །གཞན་དག་གི་སྨྲས་པ། དེས་དེ་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ། །གཞན་དག་གིས་སྨྲས་པ་ད་ལྟར་སྦྱོར་བ་ལ་འཇུག་གིས་གང་གི་ཚེ་དྲལ་བར་གྱུར་པ་དེའི་ཚེ་ན་དེས་དེ་བྱེད་དུ་གཞུག་གོ། །དེ་ནས་ཚེ་དང་ལྡན་པ་ཉེ་སྡེས་བཅོམ་ལྡན་འདས་ཀྱི་གཙུག་ལག་ཁང་དུ་དལ་བུས་ཁད་ཀྱིས་སྒོ་གཏན་བརྡུངས་པ་དང ། བཅོམ་ལྡན་འདས་ཀྱིས་དེ་ལ་ཆབ་སྒོ་དབྱེ་བ་མཛད་དོ། །དེ་ནས་ཚེ་དང་ལྡན་པ་ཉེ་སྡེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་དགེ་སློང་གློ་བུར་དུ་འོངས་པ་ལ་དགེ་སློང་ཁྱོད་ད་ལྟ་ག་ལས་འོངས། གང་དུ་དབྱར་གནས་པར་ཁས་བླངས་ཤེས་བྱ་བའི་སོ་སོར་ཀུན་དགའ་བར་མཛད་པ་འདིས་སོ་སོར་ཀུན་དགའ་བར་མཛད་པ་ཡིན་པས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་སྡེ་ལ་ཉེ་སྡེ་ཁྱོད་ད་ལྟར་ག་ལས་འོངས། གང་དུ་དབྱར་གནས་པར་ཁས་བླངས་ཤེས་སོ་སོར་ཀུན་དགའ་བར་མཛད་པ་དང ། ཚེ་དང་ལྡན་པ་ཉེ་སྡེས་གསོལ་བ། བཙུན་པ་བདག་ད་ལྟར་ལྗོངས་ནས་མཆིས་སོ། །བདག་ལྗོངས་སུ
6.86a
དབྱར་གནས་པར་མཆིད་ཀྱིས་འཚལ་ཏོ། །ཉེ་སྡེ་ལྗོངས་སུ་དགེ་སློང་རྣམས་ཀྱིས་དགག་དབྱེ་བྱས་སམ། བཙུན་པ་བགྱིས་སོ། །ཉེ་སྡེ་གང་གིས་ཁྱོད་མཛེས་པ་འཁོར་མཛེས་པ་དང་ལྡན་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་འདི་ན་གལ་ཏེ་བདག་གི་གཡར་སྔར་རབ་ཏུ་འབྱུང་བ་ལ་ལྟོས་པ་ཞིག་མཆིས་ན། བདག་དེ་ལ་འདི་སྐད་ཅེས་བཞིན་བཟངས་ཁྱོད་ཚུར་མཆི། དགོན་པ་པ་འཚོལ་ཅིག་ཅེས་མཆི་ཞིང་དགོན་པ་པ་ཉིད་ཀྱི་བསྔགས་པ་ཡང་བརྗོད་པར་བགྱིད། བསོད་སྙོམས་པ་དང ། ཆོས་གོས་གསུམ་པ་དང ། ཕྱག་དར་ཁྲོད་པ་དང ། ཤིང་དྲུང་པ་འཚོལ་ཅིག་ཅེས་མཆི་ཞིང་ཤིང་དྲུང་པ་ཉིད་ཀྱི་བསྔགས་པ་ཡང་བརྗོད་པར་བགྱིད་དོ། །གལ་ཏེ་དེ་ལྟར་བགྱིའོ་ཞེས་མཆི་ན། དེ་རབ་ཏུ་འབྱིན་པར་བགྱིད་དོ། །གལ་ཏེ་རྫོགས་པར་བསྙེན་པར་འཚལ་བ་དང ། གནས་ལ་ཞུགས་པ་དང ། ཀླག་པ་ལ་ཞུགས་པ་དང ། མཆིད་དོན་ལ་ཞུགས་པ་དང ། ཡིད་ལ་བགྱི་བ་ལ་ཞུགས་པ་ཞེས་མཆིས་ན། བདག་དེ་ལ་ཡང་འདི་སྐད་ཅེས་བཞིན་བཟངས་ཁྱོད་ཚུར་མཆི། དགོན་པ་པ་འཚོལ་ཅིག་ཅེས་མཆི་ཞིང་དགོན་པ་པ་ཉིད་ཀྱི་བསྔགས་པ་ཡང་བརྗོད་པར་བགྱིད། བསོད་སྙོམས་པ་དང ། ཆོས་གོས་གསུམ་པ་དང ། ཕྱག་དར་ཁྲོད་པ་དང ། ཤིང་དྲུང་པ་འཚོལ་ཅིག་ཅེས་མཆི་ཞིང་ཤིང་དྲུང་པ་ཉིད་ཀྱི་བསྔགས་པ་ཡང་བརྗོད་པར་བགྱིད་དོ། །གལ་ཏེ་དེ་ལྟར་བགྱིའོ་ཞེས་མཆི་ན་དེ་ལ་ཡིད་ལ་བགྱི་བ་སྩོལ་བར་བགྱིད་དེ། བཙུན་པ་གང་གིས་བདག་མཛེས་པ་འཁོར་མཛེས་པ་དང་ལྡན་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཉེ་སྡེ་ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང ། བདེ་བའི་ཕྱིར་ཞུགས་པ་ལེགས་སོ་ལེགས་སོ། །ཉེ་སྡེ་གང་ལ་ལ་ཞིག་སྦྱངས་པའི་ཡོན་ཏན་དེ་དག་གིས་བསྔགས་པ་རྗོད་པར་མི་བྱེད་པ་དེ་ནི་ངའི་བསྔགས་པ་རྗོད་པར་མི་བྱེད་པ་ཡིན་ནོ། །གང་ལ་ལ་སྦྱངས་པའི་ཡོན་ཏན་དེ་དག་གི་བསྔགས་པ་རྗོད་པར
6.86b
བྱེད་པ་དེ་ནི་ངའི་བསྔགས་པ་རྗོད་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ངས་སྦྱངས་པའི་ཡོན་ཏན་དེ་དག་ཡུལ་རིང་པོ་ནས་བསྟོད་པ་དང ། བཀུར་བ་དང ། བསྔགས་པ་དང་རབ་ཏུ་བསྔགས་པའི་ཕྱིར་རོ། །ཉེ་སྡེ་ཁྱོད་དགེ་འདུན་གྱི་ཁྲིམས་སུ་བྱ་བ་མི་སྲུང་ངམ། བཙུན་པ་བདག་གིས་དགེ་འདུན་གྱི་ཁྲིམས་ནི་གང་ལགས། ཁྲིམས་སུ་བགྱི་བ་ནི་གང་ལགས་མ་འཚལ་ཏོ། །ཉེ་སྡེ་འདི་ན་ངས་དགེ་སློང་རྣམས་ལ་འདི་སྐད་ཅེས་དགེ་སློང་དག་ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་བཞེད་ཀྱིས། ངའི་སྤྱན་སྔར་དགེ་སློང་བསོད་སྙོམས་སྟོབས་པ་ཅིག་དང ། འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་དགེ་སློང་གང་གིས་ཀྱང་འོང་བར་མི་བྱའོ་ཞེས་བཀའ་སྩལ་པ་དང ། དགེ་སློང་གི་དགེ་འདུན་གྱིས་ཀྱང་ཚེ་དང་ལྡན་པ་དག་དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་ཅིག་དང ། འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་བདག་ཅག་ལས་གང་གིས་ཀྱང་བཅོམ་ལྡན་འདས་ལ་ལྟར་འགྲོ་བར་མི་བྱ་སྟེ། དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་ཅིག་དང ། འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་བདག་ཅག་ལས་གང་བཅོམ་ལྡན་འདས་ལ་ལྟར་འགྲོ་བ་དེ་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་ཁྲིམས་སུ་བྱ་བ་བཅས་སོ། །བཙུན་པ་བདག་ནི་གློ་བུར་དུ་མཆིས་པ་ལགས་ཏེ། དོན་དེ་ནི་དགེ་སློང་གཉུག་མར་གནས་པ་རྣམས་ཀྱིས་བསྲུང་བར་བགྱི་བ་ལགས་སོ། །ཉེ་སྡེ་དགེ་སློང་གློ་བུར་དུ་འོངས་པ་དང ། གཉུག་མར་གནས་པས་ཀྱང་དགེ་འདུན་གྱི་ཁྲིམས་སུ་བྱ་བ་བསྲུང་བར་བྱ་བ་ཁོ་ན་ཡིན་ནོ། །ཉེ་སྡེ་འདི་ལྟར་ངས་དགེ་སློང་གློ་བུར་དུ་ལྷགས་པ་རྣམས་ཀྱི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་གློ་བུར་དུ་འོངས་པས་གཙུག་ལག་ཁང་དུ་ཞུགས་ནས་དགེ་སློང་དག་ལ་གནས་འདི་ན་ཁྲིམས་སུ་བྱ་བ་ཇི་ལྟ་བུ་ཡོད་ཅེས་དྲི་བར་བྱའོ། །གལ་ཏེ་འདྲི་ན་དེ་ལྟ་ན་ལེགས།
6.87a
གལ་ཏེ་མི་འདྲི་ན་འགལ་ཚབས་ཅན་དུ་འགྱུར་རོ། །ཉེ་སྡེ་དེ་ལྟ་མོད་ཀྱི་ངས་དགེ་སློང་དགོན་པ་པ་ལ་དགོན་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་དགོན་པ་པ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་ལྟར་འགྲོ་བའི་དུས་མ་ཡིན་པ་མེད་དོ། །དགེ་སློང་བསོད་སྙོམས་པ་དང ། རྙེད་པས་ཆོག་པའི་བསོད་སྙོམས་པ་དང ། ཟས་ཕྱིས་མི་ལེན་པ་དང ། སྟན་གཅིག་པ་དང ། ཆོས་གོས་གསུམ་པ་དང ། ཕྱིང་བ་པ་དང ། ཕྱག་དར་ཁྲོད་པ་དང ། ཤིང་དྲུང་པ་དང ། དུར་ཁྲོད་པ་དང ། ཅོག་པུ་པ་དང ། བླ་གབ་མེད་པ་དང ། གཞི་ཇི་བཞིན་པ་ལ་གཞི་ཇི་བཞིན་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་གཞི་ཇི་བཞིན་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་འགྲོ་བའི་དུས་མ་ཡིན་པ་མེད་དོ། །དེ་ནས་ཚེ་དང་ལྡན་པ་ཉེ་སྡེས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་པ་དང་རྗེས་སུ་ཡི་རང་བར་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་དྲུག་སྡེ་དག་ཚེ་དང་ལྡན་པ་ཉེ་སྡེ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉེ་སྡེ་ཇེ་སྐབས་ཕྱེ་ཤིག་།ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་གྱིས་ཤིག་།ལྟུང་བ་མ་མཐོང་ངོ ། ཁྱོད་ཀྱིས་དགེ་འདུན་གྱི་ཁྲིམས་སུ་བྱ་བ་མ་དྲལ་ཏམ། དགེ་འདུན་གྱི་ཁྲིམས་སུ་བྱ་བ་ཇི་ལྟ་བུ་ཡིན། །དྲུག་སྡེ་དག་གིས་སྐབས་དེ་རྒྱས་པར་བརྗོད་པ་དང ། ཚེ་དང་ལྡན་པ་ཉེ་སྡེས་དྲུག་སྡེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ཉེ་སྡེ་དེ་ལྟ་མོད་ཀྱི་ངས་དགེ་སློང་དགོན་པ་པ་ལ་དགོན་པ་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་དགོན་པ་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་ལྟར་འགྲོ་བའི་དུས་མ་ཡིན་པ་མེད་དོ། །དགེ་སློང་བསོད་སྙོམས་པ་དང ། རྙེད་པས་ཆོག་པའི་བསོད་སྙོམས་པ་དང ། ཟས་ཕྱིས་མི་ལེན་པ་དང ། སྟན་གཅིག་པ་དང ། ཆོས་གོས་གསུམ་པ་དང ། ཕྱིང་པ་པ་དང ། ཕྱག་དར་ཁྲོད་པ་དང ། ཤིང་དྲུང་པ་དང ། དུར་ཁྲོད་པ་དང །
6.87b
ཅོག་བུ་པ་དང ། བླ་གབ་མེད་པ་དང ། གཞི་ཇི་བཞིན་པ་ལ་གཞི་ཇི་བཞིན་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་གཞི་ཇི་བཞིན་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་འགྲོ་བའི་དུས་མ་ཡིན་པ་མེད་དོ་ཞེས་གསུངས་སོ། །དེ་ནས་ཤཱཀྱ་རབ་ཏུ་བྱུང་བ་དེ་དག་འདི་སྙམ་དུ་སེམས་ཏེ། དེ་ལྟར་བཅོམ་ལྡན་འདས་ཀྱིས་འདོད་པ་ཆེ་བ་རྣམ་པར་སྨད་ཅིང ། འདོད་པ་ཆུང་བ་ལ་བསྟོད་པ་ནི་དོན་གྱིས་ན་བཅོམ་ལྡན་འདས་ཀྱིས་བདག་ཅག་སྨད་པ་མཛད་པ་ཡིན་གྱིས་བདག་ཅག་གིས་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་ལྷག་པ་དག་ཚེ་དང་ལྡན་པ་ཀུན་དགའ་བོ་ལ་བཏད་སྟེ་རྒྱུད་དག་པས་བཅོམ་ལྡན་འདས་ག་ལ་བ་དེར་འདོང་ངོ་སྙམ་མོ། །དེ་ནས་དགེ་སློང་དེ་དག་ལྷུང་བཟེད་དང ། ཆོས་གོས་དང ། ཕོར་བུ་དང ། སྐ་རགས་ལྷག་པ་དག་ཁྱེར་ཏེ་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་ནས་ཕྱིན་པ་དང་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་ཐུགས་བརྩེ་བའི་སླད་དུ་བདག་ཅག་ལས་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང་སྐ་རགས་ལྷག་པ་འདི་དག་བཞེས་ཤིག་།ཚེ་དང་ལྡན་པ་དག་དེའི་ཕྱིར་བདག་གིས་བཅོམ་ལྡན་འདས་ལ་ཞུས་དེའི་བར་དུ་སྡོད་ཅིག་།དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། །ཀུན་དགའ་བོ་དེའི་ཕྱིར་ལོང་ལ་བླངས་ནས་ཀྱང་གཙུག་ལག་ཁང་ཆེན་པོ་ཞིག་ཏུ་སྤུངས་ཏེ་ཞོག་ལ་དགེ་སློང་གང་དེས་བྲེལ་བའི་དགེ་སློང་དེ་ལ་དེ་སྦྱིན་པར་བྱའོ། །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཤཱཀྱ་རབ་ཏུ་བྱུང་བ་རྣམས་ལས་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས
6.88a
ལྷག་པ་དག་བླངས་ནས་གཙུག་ལག་ཁང་ཆེན་པོ་ཞིག་ཏུ་སྤུངས་ཏེ་བཞག་གོ། །དེ་ནས་ཤཱཀྱ་རབ་ཏུ་བྱུང་བ་དེ་དག་ལྷུང་བཟེད་དང ། ཆོས་གོས་དང ། དྲ་བ་དང་ཕོར་བུ་དང ། སྐ་རགས་ལྷག་པ་དག་ནད་ཇི་ལྟ་བ་དང ། འབྲས་ཇི་ལྟ་བ་དང ། ཟུག་རྔུ་ཇི་ལྟ་བཞིན་དུ་སྤངས་ནས་ཆོས་གོས་གསུམ་པ་ལྷུར་ལེན་ཅིང་རྒྱུད་དག་པ་དང ། ཡོ་བྱད་བསྙུངས་པའི་ཚུལ་དག་གིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །བཅོམ་ལྡན་འདས་ཀྱིས་ཤཱཀྱ་རབ་ཏུ་བྱུང་བ་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་འདི་ལྟར་ཤཱཀྱ་གཞོན་ནུ་ལྔ་བརྒྱ་པོ་དེ་དག་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེ་དག་གིས་བདེན་པ་མཐོང་ནས་གསོལ་པ། བཙུན་པ་བདག་ཅག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་བཅོམ་ལྡན་འདས་ཀྱིས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང་ལྷ་དང ། མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད
6.88b
གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཇི་ཙམ་དུ་བཅོམ་ལྡན་འདས་ཀྱིས་ཤཱཀྱ་གཞོན་ནུ་ལྔ་བརྒྱ་པོ་དག་ཚེ་དང་ལྡན་པ་ཉེ་སྡེ་ལ་བརྟེན་ཏེ་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ་ཤིན་དུ་མཐར་ཐུག་པའི་གྲུབ་པ་དང་བདེ་བ་མྱ་ངན་འདས་པ་ལ་བཞག་པ་མཛད་པ་ནི་ངོ་མཚར་ཏོ། །དགེ་སློང་དག་ད་ལྟར་ང་འདོད་ཆགས་དང་བྲལ་བ། སྲེད་པ་མེད་པ། ལེན་པ་མེད་པ། ཐམས་ཅད་མཁྱེན་པ་མཁྱེན་པ་དང་ཤེས་བྱ་ཐམས་ཅད་ལ་མངའ་བརྙེས་པས་ཤཱཀྱ་གཞོན་ནུ་ལྔ་བརྒྱ་པོ་དག་རིགས་ཀྱི་བུ་ཉེ་སྡེ་ལ་བརྟེན་ཏེ་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ་ཤིན་དུ་མཐར་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་གཞག་པ་མཛད་པ་ངོ་མཚར་ཅི་ཆེ། འདི་ལྟར་འདས་པའི་དུས་ན་ང་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ། སྲེད་པ་དང་བཅས་པ། ལེན་པ་དང་བཅས་པ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་ལས་རྣམ་པར་མ་གྲོལ་བས་ཀྱང་ཤཱཀྱ་གཞོན་ནུ་ལྔ་བརྒྱ་པོ་འདི་དག་རིགས་ཀྱི་བུ་ཉེ་སྡེ་ལ་བརྟེན་ཏེ་འདོད་པ་ཆེ་བ་དང ། ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ་མངོན་པར་ཤེས་པ་ལྔ་པོ་དག་ལ་གཞག་པར་མཛད་པ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང ། མི་མང་པོས་གང་བ། ཐབ་མོ་དང ། འཐབ་པ་དང ། རྩོད་པ་དང ། འགྱེད་པ་དང ། འཁྲུག་ལོང་དང ། ནང་འཁྲུག་དང ། ཆོམ་རྐུན་དང ། མུ་གེ་དང ། ནད་རབ་ཏུ་ཞི་བ་བྱེད་དུ་བཅུག་སྟེ། དེས་བུ་གཅིག་པ་སྙིང་དུ་སྡུག་པ་དང་འདྲ་བར་རྒྱལ་སྲིད་སྐྱོང་དུ་བཅུག་གོ། །རྒྱལ་པོ་ཚངས་བྱིན་ལ་བཙུན་མོ་ཚངས་ལྡན་ཞེས་བྱ་བ་དང ། རྫིང་བུ་ཚངས་ལྡན་ཞེས་བྱ་བ་ཡོད་དེ། རྒྱལ་པོ་ཚངས་བྱིན་དེ་ལ་བུ་མེད་ནས་དེས་བུ་འདོད་པས་ཞི་བ་དང ། ཆུ་ལྷ་དང ། ལུས་ངན་དང ། བརྒྱ་བྱིན་དང ། ཚངས་པ་དང ། གཞན་ཡང་ལྷའི་བྱེ་བྲག
6.89a
འདི་ལྟ་སྟེ། ཀུན་དགའ་ར་བའི་ལྷ་དག་དང ། ཚལ་གྱི་ལྷ་དག་དང ། བཞི་མདོའི་ལྷ་དག་དང ། སུམ་མདོའི་ལྷ་དག་དང ། གཏོར་མ་ལེན་པའི་ལྷ་དག་དང ། ལྷན་ཅིག་སྐྱེས་པའི་ལྷ་དག་དང ། ཆོས་འཐུན་པ་དག་དང ། རྟག་ཏུ་རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་རྟེན་ན་གང་གསོལ་བ་འདེབས་པའི་རྒྱུ་ལས་བུ་དག་དང་བུ་མོ་དག་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་མ་ཡིན་ཏེ། གལ་ཏེ་དེ་ལྟར་འགྱུར་དུ་ཟིན་ན། རེ་རེ་ལ་ཡང་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་མངོན་དུ་གྱུར་པ་ལས་མའི་མངལ་དུ་མངལ་ན་གནས་པ་འཇུག་པར་འགྱུར་ཏེ། གསུམ་པོ་དེ་དག་གང་ཞེ་ན། ཕ་མ་གཉིས་ཆགས་པར་གྱུར་ཅིང་ཕྲད་པ་དང ། མ་དུས་ལ་བབ་ཅིང་ཟླ་མཚན་དང་ལྡན་པ་དང ། དྲི་ཟ་ཉེ་བར་གནས་ཤིང་འཇུག་འདོད་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་དང་བུ་མོ་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་པ་ལ་ཞུགས་པ་ན་སེམས་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། ཡི་དམ་བརྟན་པ་ཞིག་སེམས་ཅན་དམྱལ་བ་ནས་ཤི་འཕོས་ནས་བཙུན་མོ་ཚངས་ལྡན་གྱི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ་ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་དེ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ནས་རྒྱལ་པོ་ཚངས་བྱིན་ལ་སྨྲས་པ། ལྷ་དགྱེས་པ་བསྐྱེད་དུ་གསོལ། བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས
6.89b
པར་ཁྱེའུར་འགྱུར་རོ། །རྒྱལ་པོ་ཚངས་བྱིན་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས་ཀྱེ་མ་ཁོ་བོ་ཡུན་རིང་པོ་ནས་མངོན་པར་འདོད་པའི་བུའི་ངོ་མཐོང་བ་དང ། ཁོ་བོ་དང་འཐུན་པར་སྐྱེ་ཞིང་མི་འཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་ལ་སྤྱོད་པ་དང ། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང ། བདག་ཅག་ཤི་ཞིང་དུས་ལས་འདས་པ་དག་ལ་ཉུང་ངུ་འམ་མང་པོ་ཡང་རུང་བའི་སྦྱིན་པ་དག་སྦྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ་མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གཏོགས་པ་ན་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་ཁ་ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚ་བ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་དང ། མངར་བ་དང ། ཚ་བ་དང ། བསྐ་བ་རྣམ་པར་སྤངས་བའི་ཟས་དག་དང ། དོ་ཤལ་དང ། སེ་མོ་དོ་དང ། རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུར་དང ། ཤོད་ཀྱིས་གཞིར་མི་འབབ་པ་དང ། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཛུད་དོ། །དེ་ནས་དུས་གཞན་ཞིག་ན་བཙུན་མོ་ཚངས་ལྡན་ལ་འདོད་པ་འདི་ལྟ་བུ་འདི་སྐྱེས་ཏེ། ཀྱེ་མ་ལྷས་གྲོང་ཁྱེར་གྱི་ཤར་སྒོར་སྦྱིན་པ་དག་བྱིན་པར་གྱུར་ཅིང ། བསོད་ནམས་དག་བྱེད་པར་གྱུར་ཅིག་།ལྷོ་སྒོ་དང ། ནུབ་སྒོ་དང ། བྱང་སྒོ་དང ། དབུས་ཀྱི་བཞི་མདོར་ཀྱང
6.90a
སྦྱིན་པ་དག་སྦྱིན། བསོད་ནམས་དག་བྱེད་ཅིང་བཙོན་ཐམས་ཅད་ཐར་བར་བྱེད་པར་གྱུར་ཅིག་སྙམ་མོ། །དེ་ནས་རྒྱལ་པོ་ཚངས་བྱིན་གྱིས་བཙུན་མོ་ཚངས་ལྡན་ལ་འདོད་པ་དེ་ལྟ་བུ་དེ་སྐྱེས་པར་ཐོས་ནས་གྲོང་ཁྱེར་གྱི་ཤར་སྒོར་སྦྱིན་པ་དག་སྦྱིན་ཞིང་བསོད་ནམས་དག་བྱེད་དོ། །དེ་བཞིན་དུ་ལྷོ་སྒོ་དང ། ནུབ་སྒོ་དང་བྱང་སྒོ་དང ། དབུས་ཀྱི་བཞིར་མདོར་ཡང་སྦྱིན་པ་དག་སྦྱིན། བསོད་ནམས་དག་བྱེད་ཅིང ། བཙོན་ཐམས་ཅད་ཐར་བར་བྱས་སོ། །ཡང་བཙུན་མོ་ཚངས་ལྡན་ལ་འདོད་པ་འདི་ལྟ་བུ་འདི་སྐྱེས་ཏེ་ཀྱེ་མ་བདག་ལྷ་དང་ལྷན་ཅིག་བསྐྱེད་མོས་ཚལ་དང ། དཀའ་ཐུབ་ཀྱི་ནགས་སུ་རྩེ་བ་དང ། དགའ་བ་དང ། དགའ་མགུར་སྤྱོད་པར་གྱུར་ཅིག་སྙམ་མོ། །དེ་ནས་རྒྱལ་པོ་ཚངས་བྱིན་གྱི་བཙུན་མོ་ཚངས་ལྡན་ལ་འདོད་པ་རྣམ་པ་དེ་ལྟ་བུ་དེ་སྐྱེས་པར་ཐོས་ནས། བཙུན་མོ་ཚངས་ལྡན་དང་ལྷན་ཅིག་སྐྱེད་མོས་ཚལ་དང ། དཀའ་ཐུབ་ཀྱི་ནགས་སུ་ཞུགས་ཏེ། རྩེ་བ་དང ། དགའ་བ་དང ། དགའ་མགུར་སྦྱོད་པ་དག་བྱས་སོ། །ཡང་བཙུན་མོ་ཚངས་ལྡན་ལ་འདོད་པའི་རྣམ་པ་འདི་ལྟ་བུ་འདི་སྐྱེས་ཏེ། ཀྱེ་མ་བདག་ལྷ་དང་ཐབས་གཅིག་ཆུར་འཇུག་པའི་གྲུར་ཞུགས་ཏེ། རྫིང་བུ་ཚངས་ལྡན་དུ་རྩེ་བ་དང ། དགའ་བ་དང ། དགའ་མགུར་སྤྱོད་པར་གྱུར་ཅིག་སྙམ་མོ། །དེ་ནས་རྒྱལ་པོ་ཚངས་བྱིན་གྱིས་བཙུན་མོ་ཚངས་ལྡན་ལ་འདོད་པའི་རྣམ་པ་དེ་ལྟ་བུ་དེ་བྱུང་བར་ཐོས་ནས་བཙུན་མོ་ཚངས་ལྡན་དང་ལྷན་ཅིག་ཆུར་འཇུག་པའི་གྲུ་མེ་ཏོག་ཨུཏ་པ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོས་བཀང་བར་ཞུགས་ཏེ་རྫིང་བུ་ཚངས་ལྡན་དུ་རྩེ་བ་དང ། དགའ་བ་དང ། དགའ་མགུར་སྤྱོད་པ་བྱས་སོ། །དེ་གྲུ་དེ་ཉིད་དུ་བཙས་པ་ལས་ཁྱེའུ་ཚེ་རབས་དྲན་པ། གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ་སྣའི
6.90b
གཟངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཤེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་ཆུའི་ནང་དུ་བཙས་པ་དེའི་ཕྱིར་ཁྱེའུའི་མིང་ཆུ་སྐྱེས་ཤེས་བྱའོ་ཞེས་དེའི་མིང་ཆུ་སྐྱེས་ཤེས་བྱ་བར་བཏགས་སོ། །གཞོན་ནུ་ཆུ་སྐྱེས་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང ། ཞོ་དང་ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུང་དུ་སྐྱེད་པར་བྱེད་དོ། །དེ་ནས་གཞོན་ནུ་ཆུ་སྐྱེས་འདི་སྙམ་དུ་སེམས་ཏེ། བདག་གང་ནས་ཤི་འཕོས་ཏེ་འདིར་སྐྱེས་སྙམ་ན། སེམས་ཅན་དམྱལ་བ་དག་ནས་ཤི་འཕོས་ཏེ་འདིར་སྐྱེས་པར་ཤེས་སོ། །ལས་ཅི་བྱས་ན་དེས་སེམས་ཅན་དམྱལ་བ་རྣམས་སུ་སྐྱེས་སྙམ་ན། ལོ་དྲུག་བཅུར་རྒྱལ་ཚབ་ཀྱི་རྒྱལ་སྲིད་དུ་བཅུག་པས་དེ་དག་ཏུ་སྐྱེས་པར་ཤེས་སོ། །ད་ལྟར་གང་དུ་སྐྱེས་སྙམ་ན་མི་རྣམས་ཀྱི་ནང་དུ་རྒྱལ་པོའི་རིགས་སུ་སྐྱེས་པར་ཤེས་ནས། དེ་འདི་སྙམ་དུ་སེམས་ཏེ། བདག་ཡང་རྒྱལ་སྲིད་བྱེད་དུ་བཅུག་ན་ཡང་སེམས་ཅན་དམྱལ་བ་རྣམས་སུ་འགྲོ་བར་འགྱུར་ན་མ་ལེགས་ཀྱིས། བདག་གིས་སྒྱུ་ཐབས་ཅུང་ཞིག་བྱའོ་སྙམ་ནས། དེས་བདག་ཉིད་འཕྱེ་བོ་ཉིད་དུ་བསྟན་ཏེ་འདུག་གོ། །གང་གི་ཉིན་མོ་གཞོན་ནུ་ཆུ་སྐྱེས་བཙས་པ་དེ་ཉིད་ཀྱི་ཉིན་མོ་བློན་པོ་ལྔ་བརྒྱ་དག་གི་བུ་དག་ཀྱང་བཙས་ཏེ་དེ་དག་ཀྱང་རང་རང་གི་རིགས་དང་འཐུན་པའི་མིང་དག་བཏགས་པར་གྱུར་ཏོ། །བློན་པོ་དེ་དག་གིས
6.91a
ཀུན་དུ་སྤྱོད་པ་ནི་ཉི་མ་རེ་རེ་ཞིང་རྒྱལ་པོ་ཚངས་བྱིན་དང ། གཞོན་ནུ་ཆུ་སྐྱེས་ལྟར་འོང་ངོ ། །དེ་ནས་དུས་གཞན་ཞིག་ན་གཞོན་ནུ་ལྔ་བརྒྱ་པོ་དེ་དག་མཆོངས་པ་དང ། དཀྱུས་མོ་བྱེད་ནུས་པར་གྱུར་ཏོ། །དེ་ནས་རྒྱལ་པོ་ཚངས་བྱིན་འདི་སྙམ་དུ་སེམས་ཏེ། གལ་ཏེ་ངའི་བུ་གཞོན་ནུ་ཆུ་སྐྱེས་ཀྱང་འཕྱེ་བོར་མ་གྱུར་དུ་ཟིན་ན། དེ་ཡང་ད་ཙམ་མཆོངས་པ་དང ། དཀྱུས་མོ་བྱེད་ནུས་པར་འགྱུར་གྱིས། འདི་ལྟར་བདག་གི་དེ་འཕྱེ་བོ་ཡིན་ཡང་བླས་རྒྱལ་སྲིད་ཀྱི་དབང་ཕྱུག་ལ་གཞག་པར་བྱའོ་སྙམ་མོ། །དེ་ནས་གཞོན་ནུ་ཆུ་སྐྱེས་ཀྱིས་དེ་ཐོས་ནས་འདི་སྙམ་དུ་སེམས་ཏེ། རྒྱལ་པོ་འདི་ནི་གཅུགས་མེད་པར་གནོད་པ་བྱེད་པ་ཡིན་གྱིས་བདག་གིས་ལྐུག་པ་ཉིད་དུ་བསྟན་ཏེ་འདུག་པར་བྱའོ་སྙམ་ནས། དེས་ཆེད་དུ་བསམས་ཏེ་ལྐུག་པ་ཉིད་དུ་བསྟན་ཏེ་འདུག་གོ། །དེ་ནས་དུས་གཞན་ཞིག་ན་གཞོན་ནུ་ལྔ་བརྒྱ་པོ་དེ་དག་སྨྲ་ནུས་པར་གྱུར་ཏོ། །དེ་ནས་རྒྱལ་པོ་ཚངས་བྱིན་འདི་སྙམ་དུ་སེམས་ཏེ། གལ་ཏེ་བདག་གི་གཞོན་ནུ་ཆུ་སྐྱེས་ཀྱང་ལྐུག་པར་མ་གྱུར་དུ་ཟིན་ན་དེ་ཡང་ད་ཙམ་སྨྲ་ནུས་པར་འགྱུར་རོ་སྙམ་མོ། །དེའི་ཚེ་ན་གཞོན་ནུ་ཆུ་སྐྱེས་ཀྱི་མིང་གཞོན་ནུ་ཆུ་སྐྱེས་གཞོན་ནུ་ཆུ་སྐྱེས་ཤེས་བྱ་བ་གང་ཡིན་པ་དེ་ནུབ་པར་གྱུར་ཅིང་གཞོན་ནུ་ལྐུག་འཕྱེ་གཞོན་ནུ་ལྐུག་འཕྱེ་ཞེས་བྱ་བའི་མིང་ཆགས་པར་གྱུར་ཏོ། །དེ་ནས་དུས་གཞན་ཞིག་ན་རྒྱལ་པོ་ཚངས་བྱིན་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་ནས། བློན་པོ་རྣམས་ཀྱིས་སྨྲས་པ། ལྷ་ཅིའི་སླད་དུ་ཕྱག་ལ་ཞལ་གཏད་དེ་ཐུགས་ཁོངས་སུ་ཆུད་ཅིང་བཞུགས། རྒྱལ་པོས་སྨྲས་པ། འདི་ལྟར་ངའི་རྒྱལ་སྲིད་ཀྱི་དབང་ཕྱུག་འདི་འདྲ་བ་ལ་བུ་ཡང་མེད་བུ་མོ་ཡང་མེད་པས་ང་འདས་ནས་གདུང་ཆད་པར་ཡང་འགྱུར་ལ། བུ་གཅིག་བདོག་པ་དེ་ཡང་ལྐུག་འཕྱེར་གྱུར་ན། ང་ཇི་ལྟར་སེམས་ཁོངས་སུ་ཆུད་ཅིང་མི་འདུག་ཏུ་རུང ། བློན་པོ་རྣམས་ཀྱིས་སྨན་པ་གཉེར་ཏེ་སྨན་པ་ལ་རྨས་ནས་སྨྲས་པ། ལྷ་གཞོན་ནུ་འདིའི་དབང་པོ་གསལ་བར་གདའ་སྟེ། འདི་ལ་བྲོ་ནད་ཀྱིས་རྣམ་པ་ནི་ཅུང་ཟད་ཀྱང་མ་མཆིས་པས་བསྡིགས་པར་བགྱི་བའི་རིགས་སོ། །རྒྱལ་པོ་ཚངས
6.91b
བྱིན་གྱིས་གཤེད་མ་དག་བཀུག་ནས་གསང་སྟེ་བསྒོ་བ། ངས་གཞོན་ནུ་ལྐུག་འཕྱེ་འདི་སྐྱེ་བོ་ཕལ་པོ་ཆེའི་མངོན་སུམ་དུ་ཡོངས་སུ་གཏང་བར་བྱས། ཁྱེད་ཀྱིས་གསད་པར་མི་བྱའོ། །ལྷ་བཀའ་བཞིན་འཚལ། རྒྱལ་པོ་ཚངས་བྱིན་གྱིས་འཁོར་གྱི་ནང་དུ་སོང་སྟེ་གཤེད་མ་རྣམས་ལ་བསྒོ་བ། ངས་གཞོན་ནུ་འདི་ཡོངས་སུ་བཏང་གིས་ཁྱོད་ཀྱིས་འོར་ཅིག་།ལྷ་བཀའ་བཞིན་འཚལ་ཞེས་དེ་ནས་གཤེད་མའི་མི་དེ་དག་གིས་རྒྱལ་པོ་ཚངས་བྱིན་ལས་མཉན་ནས་གཞོན་ནུ་ལྐུག་འཕྱེ་ཤིང་རྟར་བཅུག་སྟེ། གྲོང་ཁྱེར་བཱ་རཱ་ཎ་སཱིའི་ནང་ནས་ཕྱིར་ཁྲིད་དེ། དེ་ནས་གཞོན་ནུ་ལྐུག་འཕྱེས་གྲོང་ཁྱེར་བཱ་རཱ་ཎ་སཱིའི་འབྱོར་པ་དང་རྒྱས་པ་མཐོང་ནས་འདི་སྐད་ཅེས་སྨྲས་སོ། །ཅི་བཱ་རཱ་ཎ་སཱི་འདི་སྟོང་པ་ཡིན་ནམ། འོན་ཏེ་གནས་པ་ཡིན། གཤེད་མའི་མི་རྣམས་ཀྱི་གཞོན་ནུ་ལྐུག་འཕྱེ་རྒྱལ་པོ་ལ་ཕུལ་ནས་ལྷ་གཞོན་ནུ་ལྐུག་འཕྱེས་ཚིག་འདི་ལྟ་བུ་བརྗོད་དོ་ཞེས་སྨྲས་སོ། །དེ་ནས་རྒྱལ་པོ་ཚངས་བྱིན་གྱིས་གཞོན་ནུ་ལྐུག་འཕྱེ་པང་དུ་བཞག་སྟེ་འདི་སྐད་ཅེས་སྨྲས་སོ། །གཞོན་ནུ་གང་གསད་པར་བྱ། གང་གསོད་དུ་གཞུག་པར་བྱ། གང་སྲོག་དང་དབྲལ་བར་བྱ། གང་ལ་ཅི་ཞིག་སྦྱིན་པར་བྱ། དེ་སྐད་སྨྲས་ཀྱང་གཞོན་ནུ་ལྐུག་འཕྱེ་ཅང་མི་སྨྲའོ། །རྒྱལ་པོ་ཚངས་བྱིན་གྱིས་ཡང་གཤེད་མ་རྣམས་ལ་སྨྲས་པ། ངས་གཞོན་ནུ་འདི་ཡོངས་སུ་བཏང་གིས་ཁྱེད་ཀྱིས་འོར་ཅིག་།གཤེད་མའི་མི་རྣམས་ཀྱིས་ལྷ་བཀའ་བཞིན་འཚལ་ཞེས་ཡང་གཞོན་ནུ་ལྐུག་འཕྱེ་ཤིང་རྟར་བཅུག་སྟེ། གྲོང་ཁྱེར་བཱ་རཱ་ཎ་སཱིའི་ནང་ནས་ཕྱིར་ཁྲིད་པ་དང ། གཞོན་ནུ་ལྐུག་འཕྱེས་མིའི་རོ་མི་བཞིས་ཁྱེར་བ་ཞིག་མཐོང་ནས་སྨས་པ། ཅི་རོ་འདི་ཤི་བ་ཉིད་ཀྱི་རོ་ཡིན་ནམ། འོན་ཏེ་གསོན་པོའི་རོ་ཡིན། ཡང་གཤེད་མའི་མི་རྣམས་ཀྱིས་གཞོན་ནུ་ལྐུག་འཕྱེ་རྒྱལ་པོ་ལ་ཕུལ་ནས་ལྷ་གཞོན་ནུ་ཚིག་འདི་ལྟ་བུ་འདི་བརྗོད་དོ་ཞེས་སྨྲས་སོ། །རྒྱལ་པོ་ཚངས་བྱིན་གྱིས་ཡང་གཞོན་ནུ་ལྐུག་འཕྱེ་པང་དུ་བཞག་སྟེ་འདི་སྐད་ཅེས་སྨྲས་སོ། །གཞོན་ནུ་གང་གསད་པར་བྱ།
6.92a
གང་གསོད་དུ་གཞུག་པར་བྱ། གང་སྲོག་དང་དབྲལ་བར་བྱ། གང་ལ་ཅི་ཞིག་སྦྱིན་པར་བྱ། དེ་སྐད་སྨྲས་ཀྱང་གཞོན་ནུ་ལྐུག་འཕྱེ་ཅང་མི་སྨྲའོ། །ཡང་རྒྱལ་པོ་ཚངས་བྱིན་གྱིས་གཤེད་མ་རྣམས་ལ་སྨྲས་པ། ངས་གཞོན་ནུ་ཡོངས་སུ་བཏང་གིས་ཁྱེད་ཀྱིས་འོར་ཅིག་།གཤེད་མའི་མི་རྣམས་ཀྱིས་ལྷ་བཀའ་བཞིན་འཚལ་ཞེས་ཡང་གཞོན་ནུ་ལྐུག་འཕྱེ་ཤིང་རྟར་བཅུག་སྟེ་གྲོང་ཁྱེར་བ་རཱ་ཎ་སཱིའི་ནང་ནས་ཕྱིར་ཁྲིད་པ་དང ། །གཞོན་ནུ་ལྐུག་འཕྱེས་འབྲུའི་ཕུང་པོ་ཆེན་པོ་ཞིག་མཐོང་ནས་སྨྲས་པ། གལ་ཏེ་འབྲུའི་ཕུང་པོ་འདི་དང་པོ་ཉིད་ནས་དྲུང་མ་ཟོས་ན་ཆེན་པོར་འགྱུར་རོ། །གཤེད་མའི་མི་རྣམས་ཀྱིས་ཡང་གཞོན་ནུ་ལྐུག་འཕྱེ་རྒྱལ་པོ་ལ་ཕུལ་ནས། ལྷ་གཞོན་ནུ་ཚིག་འདི་ལྟ་བུ་འདི་བརྗོད་དོ་ཞེས་སྨྲས་སོ། །རྒྱལ་པོ་ཚངས་བྱིན་གྱིས་ཡང་གཞོན་ནུ་ལྐུག་འཕྱེ་པང་དུ་བཞག་སྟེ་འདི་སྐད་ཅེས་སྨྲས་སོ། །གཞོན་ནུ་གང་གསད་པར་བྱ། གང་གསོད་དུ་གཞུག་པར་བྱ། གང་སྲོག་དང་དབྲལ་བར་བྱ། གང་ལ་ཅི་ཞིག་སྦྱིན་པར་བྱ། དེ་སྐད་སྨྲས་ཀྱང་གཞོན་ནུ་ལྐུག་འཕྱེ་ཅང་མི་སྨྲའོ། །རྒྱལ་པོ་ཚངས་བྱིན་གྱིས་ཡང་གཤེད་མ་རྣམས་ལ་སྨྲས་པ། ངས་གཞོན་ནུ་ཡོངས་སུ་བཏང་གིས་ཤེས་ལྡན་དག་སོང་ལ་གཞོན་ནུ་ནགས་ཁྲོད་དུ་མྱུར་དུ་ས་ཐམས་སུ་ཆུག་ཤིག་།ལྷ་བཀའ་བཞིན་འཚལ་ཞེས་གཤེད་མའི་མི་རྣམས་ཀྱིས་ཡང་གཞོན་ནུ་ལྐུག་འཕྱེ་ཤིང་རྟར་བཅུག་སྟེ་ནགས་ཁྲོད་ག་ལ་བ་དེར་སོང་ནས་ཕྱིན་པ་དང ། དོང་བརྐོ་བར་བརྩམས་སོ། །དེ་ནས་ལྐུག་འཕྱེས་དེའི་ཚེ་ཚིགས་སུ་བཅད་པ་སྨྲས་པ། ཁ་ལོ་སྒྱུར་བ་ཅི་ཕྱིར་ཁྱོད། །བརྟད་དང་བཅས་པས་དོང་བརྐོ་བྱེད། །ཅི་ཕྱིར་ཁྱེད་ཅག་དོང་བརྐོ་བ། །དྲིས་པ་ང་ལ་མྱུར་དུ་སྨྲོས། །ཁ་ལོ་སྒྱུར་བས་སྨྲས་པ། རྒྱལ་པོའི་སྲས་བུ་མི་སྨྲ་བ། །ལྐུག་འཕྱེ་བཙས་ནས་དེ་ཡིས་ནི། །མྱུར་བར་འདི་ནི་ནགས་ཁྲོད་དུ། །དོང་དུ་ཆུག་ཅེས་བཀའ་སྩལ་ཏོ། །དེ་ནས་གཞོན་ནུ་ལྐུག
6.92b
འཕྱེ་འདི་སྙམ་དུ་སེམས་ཏེ། འདི་དག་ནི་དྲག་ཤུལ་ཅན། ལག་པ་དམར་བ། སྣུན་པ་དང ། རབ་ཏུ་སྣུན་པ་ལ་ཞུགས་པ། གཞན་གྱི་སྲོག་གཅོད་པ། གཞན་གྱི་སྲོག་གཅོད་པས་འཚོ་བར་བྱེད་པ་དག་ཡིན་པས་གལ་ཏེ་ན་འདི་དག་གིས་བདག་གསད་པར་འགྱུར་དུ་འོང་ངོ་སྙམ་དུ་རིག་ནས་དེ་སྐྲག་སྟེ་གཤེད་མ་རྣམས་ལ་སྨྲས་པ། གལ་ཏེ་ལྷས་བདག་ལ་དམ་པ་ཅིག་སྩོལ་ན། བདག་རྐང་པས་གྲོང་ཁྱེར་དུ་འཇུག་ཅིང་ཚིག་ཀྱང་སྨྲའོ། །གཤེད་མ་པ་རྣམས་ཀྱིས་རྒྱལ་པོའི་གན་དུ་སོང་སྟེ་རྒྱས་པར་བརྗོད་པ་དང ། རྒྱལ་པོས་སྨྲས་པ། གཞོན་ནུ་གལ་ཏེ་རྒྱལ་སྲིད་འདོད་ན་ངས་དེ་ཡང་གཞོན་ནུ་ལ་སྦྱིན་ནོ། །དེ་ནས་རྒྱལ་པོ་ཚངས་བྱིན་གྱིས་ཡིད་དགའ་ཞིང་ཡིད་དགའ་ནས་བློན་པོ་རྣམས་ལ་སྨྲས་པ། ཤེས་ལྡན་དག་དེང་ལ་གྲོང་ཁྱེར་ཐམས་ཅད་མྱུར་དུ་རྡོ་བ་དང ། གསེག་མ་དང ། གྱོ་མོ་མེད་པར་ཞོག་ལ། བདུག་སྤོས་དང ། །ཕྱེ་མ་འཁྲིགས་པ་དང ། རྒྱལ་མཚན་དང ། བ་དན་བསྒྲེང་བ་དང ། མེ་ཏོག་སྣ་ཚོགས་བཀྲམ་པ་གྱིས་ཤིག་།རྒྱལ་པོ་རྣམས་ནི་ཚིག་གིས་འགྲུབ་ལ། ལྷ་རྣམས་ནི་སེམས་ཀྱིས་འགྲུབ། རྣལ་འབྱོར་པ་རྣམས་ནི་སེམས་བསྐྱེད་པ་ཙམ་གྱིས་ཐམས་ཅད་འགྲུབ་པས་བློན་པོ་རྣམས་ཀྱིས་ལྷ་བཀའ་བཞིན་འཚལ་ཞེས་རྒྱལ་པོ་ལས་མཉན་ནས། གྲོང་ཁྱེར་ཐམས་ཅད་རྡོ་བ་དང ། གྱོ་མོ་དང ། གསེག་མ་མེད་པར་བཞག་ཅིང ། བདུག་སྤོས་དང ། ཕྱེ་མ་འཁྲིགས་པ་དང ། རྒྱལ་མཚན་དང ། བ་དན་བསྒྲེང་བ་དང ། མེ་ཏོག་སྣ་ཚོགས་བཀྲམ་པ་བྱས་སོ། །ལྗོངས་ཀྱི་མི་འབུམ་ཕྲག་དུ་མ་དག་ཀྱང་གཞོན་ནུ་ལྐུག་འཕྱེ་རྐང་པས་གྲོང་ཁྱེར་དུ་འཇུག་ཅིང་ཚིག་ཀྱང་སྨྲ་བར་འགྱུར་རོ། །ཞེས་ཡ་མཚན་སྐྱེས་ནས་འདུས་པར་གྱུར་ཏོ།། ་་་་་་་་་་།།འདུལ་བ་རྣམ་པར་འབྱེད་པ།
6.93a
བམ་པོ་ཉི་ཤུ་དགུ་པ། དེ་ནས་གཞོན་ནུ་ལྐུག་འཕྱེ་རྐང་པས་གྲོང་ཁྱེར་དུ་ཞུགས་ནས་རྒྱལ་པོ་ཚངས་བྱིན་ག་ལ་བ་དེར་སོང་སྟེ་ཕྱིན་ནས། རྒྱལ་པོ་ཚངས་བྱིན་གྱི་རྐང་པ་གཉིས་ལ་གཏུགས་ཏེ། དེའི་ཚེ་ཚིགས་སུ་བཅད་པ་སྨྲས་པ། བདག་ལྐུག་མ་ལགས་འཕྱེ་མ་ལགས། །གླེན་པ་མ་ལགས་བློ་མེད་མིན། །གསལ་བར་བགྱིད་པའི་ཚིག་རྣམས་ཀྱིས། །སྨྲ་བ་བདག་ལགས་མི་དབང་པོ། །བདག་ལྐུག་མ་ལགས་འཕྱེ་མ་ལགས། །གླེན་པ་མ་ལགས་བློ་མེད་མིན། །དབང་པོ་ཚང་བ་གསལ་བ་དང ། །ལྡན་པ་བདག་ལགས་མི་དབང་པོ། །རྒྱལ་པོས་སྨྲས་པ། བུ་ཁྱེད་ཅིའི་ཕྱིར་ཚིག་སྨྲ་བར་མི་བྱེད་ཅིང་རྐང་པས་འགྲོ་བར་མི་བྱེད། ལྷ་དེའི་སླད་དུ་གསོན་ཅིག་།བདག་གིས་སྔོན་གྱི་ཚེ་རབས་སུ། དགུང་ལོ་དྲུག་བཅུར་བདག་གིས་ནི། །མི་རྣམས་ནང་དུ་རྒྱལ་འཚབ་ཀྱི། །རྒྱལ་སྲིད་རིགས་འཐུན་བགྱིད་སྩལ་པས། །དགུང་ལོ་སྟོང་ཕྲག་དྲུག་བཅུ་རུ། །སེམས་ཅན་དམྱལ་བར་རབ་ཏུ་བསྲེགས། །སེམས་དམྱལ་སྡུག་བསྔལ་མི་བཟད་པ། །དྲག་པོ་འཇིགས་རུང་དྲན་གྱུར་ནས། །རྒྱལ་སྲིད་མངོན་པར་མི་འཚལ་ཞིང ། །སླན་ཅད་སེམས་དམྱལ་མཆི་མི་བགྱི། །ཡབ་ཀྱིས་བདག་ནི་རབ་འབྱུང་བར། །རྗེས་སུ་གནང་བ་མཛད་དུ་གསོལ། །རྒྱལ་པོས་སྨྲས་པ། བུ་དྲང་སྲོང་དག་གང་གི་ཕྱིར་དཀའ་ཐུབ་ཀྱིས་གདུང་བ་དང ། སྦྱིན་སྲེག་དང ། མཆོད་སྦྱིན་བྱེད་པ་ནི་རྒྱལ་སྲིད་ཀྱི་ཕྱིར་ཡིན་ན། ཁྱོད་ཅིའི་ཕྱིར་ལག་མཐིལ་ན་འདུག་པ་སྤངས་ཏེ་རབ་ཏུ་འབྱུང་བར་བྱེད། དེ་ནས་གཞོན་ནུ་ལྐུག་འཕྱེས་དེའི་ཚེ་ཚིགས་སུ་བཅད་པ་སྨྲས་པ། ཁོན་གཅུགས་ཐབ་རྩོད་བགྱིད་པ་ཡིས། །འདོད་ལ་སྤྱོད་པ་བདག་མི་འཚལ། །འཁོན་གཅུགས་འཐབ་རྩོད་འཇིགས་བགྱིད་པའི། །ཚངས་སྤྱོད་བདག་གིས་སྤྱད་པར་བགྱི། །ཀིམ་པའི་འབྲས་བུ་འདྲ་བ་ཡི། །འདོད་པ་སྤྱོད་པར་བདག་མི་འཚལ། །འབྲས་བུ་བདུད་རྩིའི་རོ་བདའ་བའི། །ཚངས་སྤྱོད་བདག་གིས་སྤྱད་པར་བགྱི། །རྒྱལ་པོས་སྨྲས་པ། བདེ་བ་གང་དང་གང་དག་ཉམས་སུ་མྱོང་བར་འགྱུར་བ་དེ་དག་ཐམས་ཅད་ནི་རྒྱལ་པོ་ཉིད་ཡིན་ན། ཁྱོད་ཅིའི་ཕྱིར་རྒྱལ
6.93b
སྲིད་སྤངས་ཏེ་རབ་ཏུ་འབྱུང་བར་བྱེད། དེ་ནས་གཞོན་ནུ་ལྐུག་འཕྱེས་དེའི་ཚེ་ཚིགས་སུ་བཅད་པ་སྨྲས་པ། གང་ལས་སྡུག་བསྔལ་སྐྱེ་འགྱུར་བའི། །བདེ་བ་དེ་ལ་བདེར་མི་སེམས། །གང་ལས་བདེ་བ་སྐྱེ་འགྱུར་བའི། །སྡུག་བསྔལ་དེ་ལ་བདེ་བར་སེམས། །ཡབ་ཀྱིས་བདག་ནི་དཀའ་ཐུབ་ཀྱི། །ནགས་སུ་མཆི་བ་གནང་བར་མཛོད། །རྒྱལ་པོས་སྨྲས་པ། བུ་འདི་ནི་ཡང་ཏོག་གི་སྟེང་བདུག་སྤོས་དང ། ཕྱེ་མ་འཁྲིགས་པར་མེ་ཏོག་སྣ་ཚོགས་བཀྲམ་ཞིང་གནས་མལ་འཇམ་པོ་ལེགས་པར་བཤམས་པ་དག་ཏུ་གང་ནས་ཀྱང་འཇིགས་པ་མེད་པར་ཉལ་བར་བྱ་ཞིང ། སིལ་སྙན་གྱི་སྒྲ་སྙན་པ་དག་གིས་སད་པར་བྱ་བ་དང ། གོས་འཇམ་པོ་བགོ་བར་བྱ་བ་དང ། ཞིམ་པོ་བཟའ་བར་བྱ་བ་དང ། ཞིམ་པོ་བཏུང་བར་བྱ་བ་ཡིན་ན་དགོན་པར་རབ་ཏུ་བྱུང་བས་རྟག་ཏུ་ཤིང་དྲུང་དུ་རྩཝ་བཏིང་བ་འམ། ལོ་མ་བཏིང་བ་ལ་བྲེད་ངས་ཀྱིས་འཇིགས་པ་དང་བཅས་པའི་སེམས་ཀྱིས་རི་དགས་གདུག་པ་དག་དང་ལྷན་ཅིག་ཉལ་བར་བྱ་བ་དང ། ཝའི་སྐད་ཀྱིས་སད་པར་བྱ་བ་དང ། གཡང་གཞི་དང་ཤིང་ཤུན་བགོ་བར་བྱ་བ་དང ། རྩ་བ་དང་འབྲས་བུ་དག་བཟའ་བར་བྱ་བ་དང ། ཆུ་དྲོན་པོ་རྙོག་པ་ཅན་དག་བཏུང་བར་བྱ་དགོས་ན། ཅིའི་ཕྱིར་ཁྱོད་རྒྱལ་སྲིད་སྤངས་ཏེ་རབ་ཏུ་འབྱུང་བར་བྱེད། དེ་ནས་གཞོན་ནུ་ལྐུག་འཕྱེས་དེའི་ཚེ་ཚིགས་སུ་བཅད་པ་སྨྲས་པ། ནགས་ན་ཤིང་ཤུན་རྩཝ་གྱོན་ཞིང ། །རྩ་བ་འབྲས་བུ་འཆའ་བ་དང ། །རི་དགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིགས་བགྱིད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་འཆིང་དང་བརྡེག་པ་དག་།བགྱིད་པ་དེ་ལྟ་མ་ལགས་ཀྱིས། །ཡབ་ཀྱིས་བདག་ནི་དཀའ་ཐུབ་ཀྱི། །ནགས་སུ་མཆི་བ་གནང་བར་མཛོད། །རྒྱལ་པོས་སྨྲས་པ། བུ་ཇེ་ཁོ་བོའི་ཐེ་ཚོམ་གསུམ་པོ་འདི་དག་ཆོད་ཅིག་དང ། དེའི་འོག་ཏུ་ཁྱོད་རབ་ཏུ་འབྱུང་བ་མི་དཀའོ། །ཁྱོད་ཀྱིས་གྲོང་ཁྱེར་བཱ་རཱ་ཎ་སཱིའི་འབྱོར་པ་དང་རྒྱས་པ་མཐོང་ནས་འདི་སྐད་ཅེས་བཱ་རཱ་ཎ་སཱི་འདི་སྟོང་པ་ཡིན་ནམ། འོན་ཏེ་གནས་པ་ཡིན་ཞེས་སྨྲས་པ་དེ་ཁྱོད་ཀྱིས་ཅི་ལས་བསམས་ཏེ
6.94a
སྨྲས། ལྷ་དེའི་སླད་དུ་གསོན་ཅིག་།ལྷས་བདག་རྒྱུ་མ་མཆིས་པར་ཁུམ་ཤིག་ཅེས་བཀའ་སྩལ་ན། འགའ་ཡང་ཅིའི་སླད་དུ་གཞོན་ནུ་འདི་དགུམ་པར་བགྱི་ཞེས་ཆོས་དང་ལྡན་པའི་ཚིག་མི་སྨྲ་བས་བདག་གིས་དེ་ལས་བསམས་ཏེ་སྨྲས་སོ། །བུ་མ་ཉེས་སོ། །ཁྱོད་ཀྱིས་མིའི་རོ་མི་བཞིས་ཁྱེར་བ་ཞིག་མཐོང་ནས་འདི་སྐད་ཅེས་ཅི་རོ་འདི་ཤི་བ་ཉིད་ཀྱི་རོ་ཡིན་ནམ། འོན་ཏེ་གསོན་པོའི་རོ་ཡིན་ཞེས་སྨྲས་པ། དེ་ཁྱོད་ཀྱིས་ཅི་ལས་བསམས་ཏེ་སྨྲས། ལྷ་དེའི་སླད་དུ་གསོན་ཅིག་།གང་ནོངས་པ་བགྱིད་པའི་ལས་བགྱིས་པའི་རོ་དེ་ནི་གུམ་པ་ཉིད་ཀྱི་རོ་ལགས་ལ། གང་ལེགས་པ་བགྱིད་པའི་ལས་བགྱིས་པའི་རོ་དེ་ནི་གསོན་པོའི་རོ་ལགས་པས་བདག་གིས་དེ་ལས་བསམས་ཏེ་སྨྲས་སོ། །བུ་མ་ཉེས་སོ། །ཁྱོད་ཀྱིས་འབྲུའི་ཕུང་པོ་ཆེན་པོ་ཞིག་མཐོང་བ་ན། འདི་སྐད་ཅེས་གལ་ཏེ་འབྲུའི་ཕུང་པོ་འདི་དང་པོ་ཉིད་ནས་དྲུང་མ་ཟོས་ན་ཆེན་པོར་འགྱུར་རོ་ཞེས་སྨྲས་པ་དེ་ཁྱོད་ཀྱིས་ཅི་ལས་བསམས་ཏེ་སྨྲས། ལྷ་དེའི་སླད་དུ་གསོན་ཅིག་།ལྷ་ཞིང་པ་གང་དག་འབྲུ་སྐྱིན་པོ་བགྱིས་ཏེ་འཚལ་ནས། ལས་བགྱིད་པ་དེ་དག་ནི་འབྲུ་སྨིན་པ་ན་འབྲུའི་ཕུང་པོ་ཆེན་པོ་བུ་ལོན་པ་དག་ལ་འབུལ་བར་བགྱིས་པས་དེ་དག་གིས་ནི་དང་པོ་ཉིད་ནས་དྲུང་འཚལ་བ་ལགས་སོ། །དེ་བཞིན་དུ་དགེ་བ་བཅུའི་ལས་ཀྱི་ལམ་དག་གིས་མི་ཉིད་རྙེད་པ་ན། གལ་ཏེ་དེ་རྙེད་ནས་དགེ་བའི་ལས་ཀྱི་ལམ་སོགས་པར་མི་བགྱིད་པ་དེའི་སྔོན་གྱི་དགེ་བའི་རྩ་བ་དེ་ཡང་རྒྱུན་ཆད་པར་འགྱུར་ཞིང ། དགེ་བའི་རྩ་བ་རྒྱུན་ཆད་ན་བདེ་འགྲོ་ལས་ཡོངས་སུ་ཉམས་ཤིང་ངན་འགྲོ་ལ་རྟེན་པར་འགྱུར་བས་བདག་གིས་དེ་ལས་བསམས་ཏེ་སྨྲས་སོ། །དེ་ནས་རྒྱལ་པོས་བུའི་ཚིག་དེ་ཐོས་ནས། མཆི་མས་བརྣངས་པས་བུ་བླངས་ཏེ་ཚིག་སྨྲས་པ། བརྟུལ་ཞུགས་དེས་འཆང་རང་གི་ཆོས་སྤྱོད་ཅིག་།བདག་ཀྱང་ཁྱོད་ཀྱི་སློབ་མར་ཁས་ལེན་ནོ། །དེ་ནས་རྒྱལ་པོ་ཚངས་བྱིན་གྱིས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་གཞོན་ནུ་ལྐུག་འཕྱེ་རབ་ཏུ་མ་བྱུང་ན་ཅིར་འགྱུར། ལྷ་རྒྱལ་པོར་འགྱུར་རོ། །ཁྱོད་ཀྱི་བུ་དག་ཅིར་འགྱུར། ལྷ་ཞབས་རིང་བར་འགྱུར་རོ། །འོ་ན་ད་དེ་རབ་ཏུ་འབྱུང་ན་ཁྱེད་ཀྱི་བུ་དེ་དག་ཅིའི་ཕྱིར་རབ
6.94b
ཏུ་མི་འབྱུང ། ལྷ་བཀའ་སྩལ་པ་བཞིན་འཚལ་ལོ། །དེའི་ཚེ་ན་གྲོང་ཁྱེར་བཱ་རཱ་ཎ་སཱི་དང་ཧ་ཅང་མི་རིང་བ་ན་བསྟི་གནས་ཤིག་ཡོད་པ་དེ་ན་དྲང་སྲོང་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། བརྩེ་བ་དང་ལྡན་པ། སེམས་ཅན་ལ་བྱམས་པ་ཞིག་འདུག་ནས་གཞོན་ནུ་ལྐུག་འཕྱེ་འཁོར་ལྔ་བརྒྱ་དང་ལྡན་པ་འབྱོར་པ་ཆེན་པོས་དྲང་སྲོང་དེའི་དྲུང་དུ་རབ་ཏུ་བྱུང་ངོ ། །དྲང་སྲོང་དེས་ལྐུག་འཕྱེ་ལ་གདམས་ངག་བྱིན་ནས་ལྐུག་འཕྱེས་བརྩལ་བ་དང ། འབད་པ་དང ། བསྒྲིམ་པ་བྱས་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེ་ནས་དུས་གཞན་ཞིག་ན་དྲང་སྲོང་དེ་དུས་ཀྱི་ཆོས་དང་ལྡན་པར་གྱུར་ནས་གཞོན་ནུ་ལྐུག་འཕྱེས་དྲང་སྲོང་དེའི་ལུས་སྤོས་ཀྱི་ཤིང་སྣ་ཚོགས་ཀྱི་ཕུང་པོར་བཅེར་ཏེ་བསྲེགས་ནས་མཆོད་པ་དང་བསྙེན་བཀུར་ཆེན་པོ་བྱས་སོ། །གཞོན་ནུ་ལྐུག་འཕྱེས་བྲལ་ཟེའི་ཁྱེའུ་ལྔ་བརྒྱ་པོ་དེ་དག་ཡོངས་སུ་བསྐྱང་བར་བརྩམས་ནས་དེའི་མིང་གཞོན་ནུ་ལྐུག་འཕྱེ་ཞེས་བྱ་བ་གང་ཡིན་པ་དེ་ནུབ་པར་གྱུར་ཅིང ། སྟོན་པ་ལྐུག་འཕྱེ་སྟོན་པ་ལྐུག་འཕྱེ་ཞེས་བྱ་བའི་མིང་ཆགས་པར་གྱུར་ཏོ། །དེ་ནས་དུས་གཞན་ཞིག་ན་སྟོན་པ་ལྐུག་འཕྱེ་འདི་སྙམ་དུ་སེམས་ཏེ། ཅིའི་ཕྱིར་བྲམ་ཟེའི་ཁྱེའུ་ལྔ་བརྒྱ་པོ་འདི་དག་མངོན་པར་ཤེས་པ་ལྔ་མངོན་སུམ་དུ་མི་བྱེད་སྙམ་ནས་དེ་འདི་སྙམ་དུ་སེམས་ཏེ། འདི་དག་གཡང་གཞི་དང་ཤིང་ཤུན་དང་དབྱུག་གུ་དང ། རིལ་བ་དང ། བླུགས་གཟར་དང ། དགང་གཟར་ལྷག་པ་འཆང་ཞིང ། ཤིན་དུ་ལོ་མ་དང ། ཁྲི་རྒོད་དང ། ུད་པ་ལའི་རྩ་བ་ལ་སྦྱོར་བའི་རྗེས་སུ་བརྩོན་པར་གནས་པའི་ཕྱིར་རོ་སྙམ་མོ། །དེ་ནས་སྟོན་པ་ལྐུག་འཕྱེ་འདི་སྙམ་དུ་སེམས་ཏེ། གལ་ཏེ་བདག་གིས་བྲམ་ཟེའི་ཁྱེའུ་འདི་དག་སྨད་ན་དབྲལ་དཀའ་བར་འགྱུར་རོ་སྙམ་ནས། བྱང་ཆུབ་སེམས་དཔའ་རྣམས་ནི་གདུལ་བ་ལ་མཁས་པ་བླ་ན་མེད་པ་ཡིན་པས་དེ་ནས་སྟོན་པ་ལྐུག་འཕྱེས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་དག་ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་འདོད་ཀྱིས་ངའི་གན་དུ་བྲམ་ཟེའི་ཁྱེའུ་རྩ་བ་དང ། འབྲས་བུ་སྟོབས་པ་གཅིག་དང་འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་གང་གིས་ཀྱང་ཉེ་བར་འོང་བར་མི་བྱའོ། །བྲམ་ཟེའི་ཁྱེའུ་རྣམས་ཀྱིས་ཀྱང་དབྱར་གྱི་ནང་དག་ཏུ་བྲམ་ཟེའི་ཁྱེའུ་རྩ་བ་དང །
6.95a
འབྲས་བུ་སྟོབས་པ་གཅིག་དང་འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་བདག་ཅག་ལས་བྲམ་ཟེའི་ཁྱེའུ་གང་གིས་ཀྱང་མཁན་པོ་ལ་ལྟར་འགྲོ་བར་མི་བྱའོ། །དབྱར་གྱི་ནང་དག་ཏུ་བྲམ་ཟེའི་ཁྱེའུ་རྩ་བ་དང ། འབྲས་བུ་སྟོབས་པ་གཅིག་དང་འདི་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་བདག་ཅག་ལས་བྲམ་ཟེའི་ཁྱེའུ་གང་མཁན་པོ་ལ་ལྟར་འགྲོ་བ་དེ་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་ཁྲིམས་སུ་བྱ་བ་བཅས་སོ། །སྟོན་པ་ལྐུག་འཕྱེས་ཟླ་བ་གསུམ་ནང་དུ་ཡང་དག་འཇོག་ལ་ཞུགས་པ་ན། དེའི་གན་དུ་བྲམ་ཟེའི་ཁྱེའུ་རྩ་བ་དང ། འབྲས་བུ་སྟོབས་པ་གཅིག་དང ། དེ་ཉིད་ཀྱི་གསོ་སྦྱོང་བཅཝ་ལྔ་པའི་ཚེ་མ་གཏོགས་པར་བྲམ་ཟེའི་ཁྱེའུ་གང་ཡང་ཉེ་བར་མི་འགྲོའོ། །སྟོན་པ་ལྐུག་འཕྱེས་ཐག་རིང་པོ་ཁོ་ན་ནས་རི་དགས་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །རི་དགས་ཚུར་ཤོག་།རི་དགས་ཁྱོད་འོངས་པ་ལེགས་སོ། །ཁྱོད་དང་ཁོ་བོ་མཚུངས་ཏེ། ཁྱོད་ཀྱང་ལྟོ་ཁེངས་པའི་ཟས་ཀྱིས་ཆོག་ཤེས་པ་དང ། ཀུན་དུ་ཆོག་ཤེས་པ་ཡིན་ལ། ཁོ་བོ་ཡང་ལྟོ་ཁེངས་པའི་བསོད་སྙོམས་ཀྱིས་ཆོག་ཤེས་པ་དང ། ཀུན་དུ་ཆོག་ཤེས་པ་ཡིན་ནོ། །འདི་ན་ཁ་ཅིག་ཤིན་ཏུ་ལོ་མ་དང ། ཁྲེ་རྒོད་དང ། ུད་པ་ལའི་རྩ་བ་ལ་སྦྱོར་བའི་རྗེས་སུ་བརྩོན་པར་གནས་པ་དག་ནི་མ་ཡིན་ནོ། །དེ་ནས་བྲམ་ཟེའི་ཁྱེའུ་དེ་དག་འདི་སྙམ་དུ་སེམས་ཏེ། གོར་མ་ཆག་པར་མཁན་པོའི་བརྟུལ་ཞུགས་རྫོགས་པར་གྱུར་ཏེ། འདི་ལྟར་མཁན་པོ་རི་དགས་དང་ལྷན་ཅིག་ཕེབས་པར་སྨྲ་བར་བྱེད་དོ་སྙམ་དུ་རིག་ནས་སྟོན་པ་ལྐུག་འཕྱེ་ག་ལ་བ་དེར་དོང་སྟེ་ཕྱིན་ནས། སྟོན་པ་ལྐུག་འཕྱེའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེ་ནས་སྟོན་པ་ལྐུག་འཕྱེ་ཅང་མི་སྨྲ་བར་འདུག་གོ། །དེ་ནས་བྲམ་ཟེའི་ཁྱེའུ་དེ་དག་འདི་སྙམ་དུ་སེམས་ཏེ། མཁན་པོ་དུད་འགྲོ་རྣམས་དང་ལྷན་ཅིག་ཕེབས་པར་སྨྲ་བར་བྱེད་ཀྱི། མི་རྣམས་དང་མི་བྱེད་གོར་མ་ཆག་སྙམ་ནས་སྟན་ལས་ལངས་ཏེ་དོང་ངོ ། །དེ་ནས་རི་དགས་ཀྱི་བརྟུལ་ཞུགས་ཅན་ཞིག་སྟོན་པ་ལྐུག་འཕྱེ་ག་ལ་བ་དེར་དོང་བ་དང ། སྟོན་པ་ལྐུག་འཕྱེས་རི་དགས་ཀྱི་བརྟུལ་ཞུགས་ཅན་དེ་ཐག་རིང་པོ་ཁོ་ན་ནས
6.95b
མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །རི་དགས་ཀྱི་བརྟུལ་ཞུགས་ཅན་ཚུར་ཤོག་།རི་དགས་ཀྱི་བརྟུལ་ཞུགས་ཅན་ཁྱོད་འོངས་པ་ལེགས་སོ། །ཁྱོད་དང་ཁོ་བོ་མཚུངས་ཏེ། ཁྱོད་ཀྱང་གཡང་གཞི་གཅིག་འཆང་ལ། ཁོ་བོ་ཡང་གཡང་གཞི་གཅིག་འཆང་ངོ ། །ཁྱོད་ཀྱང་ཤུང་ཤིན་གཅིག་དང ། དབྱུག་གུ་གཅིག་དང ། རིལ་བ་གཅིག་དང ། བླུགས་གཟར་དང ། དགང་གཟར་གཅིག་འཆང་ལ། ཁོ་བོ་ཡང་ཤིང་ཤུན་གཅིག་དང ། དབྱུག་གུ་གཅིག་དང ། རིལ་བ་གཅིག་དང ། བླུགས་གཟར་དང ། དགང་གཟར་གཅིག་འཆང་ངོ ། །ཁྱོད་ཀྱང་ལྟོ་ཁེངས་པའི་བསོད་སྙོམས་ཀྱིས་ཆོག་ཤེས་པ་དང ། ཀུན་དུ་ཆོག་ཤེས་པ་ཡིན་ལ། ཁོ་བོ་ཡང་ལྟོ་ཁེངས་པའི་བསོད་སྙོམས་ཀྱིས་ཆོག་ཤེས་པ་དང ། ཀུན་དུ་ཆོག་ཤེས་པ་ཡིན་ནོ། །འདི་ན་ཁ་ཅིག་གཡང་གཞི་དང ། ཤིང་ཤུན་དང ། དབྱུག་གུ་དང ། རིལ་བ་དང ། བླུགས་གཟར་དང ། དགང་གཟང་ལྷག་པར་འཆང་བ་དག་ནི་མ་ཡིན་ནོ། །དེ་ནས་བྲམ་ཟེའི་ཁྱེའུ་དེ་དག་འདི་སྙམ་དུ་སེམས་ཏེ། འདི་ལྟར་མཁན་པོས་འདོད་པ་ཆེ་བ་སྨད་ཅིང ། འདོད་པ་ཆུང་བ་ཉིད་བསྟོད་པ་ནི་དོན་གྱིས་ན་མཁན་པོས་བདག་ཅག་སྨད་པ་ཡིན་གྱིས། བདག་ཅག་གིས་གཡང་གཞི་དང ། ཤིང་ཤུན་དང ། དབྱུག་གུ་དང ། རིལ་བ་དང ། བླུགས་གཟར་དང ། དགང་གཟར་ལྷག་པ་དག་ཆུ་ཀླུང་ཟློག་བྱེད་ཀྱི་ནང་དུ་བོར་ཏེ། མཁན་པོ་ག་ལ་བ་དེར་འདོང་ངོ་སྙམ་ནས། དེ་དག་གི་གཡང་གཞི་དང ། ཤིང་ཤུན་དང ། དབྱུག་གུ་དང ། རིལ་པ་དང ། བླུགས་གཟར་དང ། དགང་གཟར་ལྷག་པ་དག་ཆུ་ཀླུང་ཟློག་བྱེད་དུ་བོར་ནས་རྒྱུད་དག་པ་དང ། ཡོ་བྱད་བསྙུངས་པའི་ཚུལ་དག་གིས་སྟོན་པ་ལྐུག་འཕྱེ་ག་ལ་བ་དེར་དོང་སྟེ་ཕྱིན་ནས། སྟོན་པ་ལྐུག་འཕྱེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེ་ནས་སྟོན་པ་ལྐུག་འཕྱེས་བྲམ་ཟེའི་ཁྱེའུ་དེ་དག་གི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོངས་སུ་ཆུད་ནས། འདི་ལྟར་བྲམ་ཟེའི་ཁྱེའུ་ལྔ་བརྒྱ་པོ་དེ་དག་གིས་མངོན་པར་ཤེས་པ་ལྔ་མངོན་སུམ་དུ་བྱས་པར་གྱུར་པ་དེ་ལྟར་ཆོས་བསྟན་པ་བྱས་སོ། །དགེ་སློང་དག་དེའི་ཚེ་དེའི་དུས་ན་སྟོན་པ་ལྐུག་འཕྱེ་གང་ཡིན་པ་དེ་ནི་ང་བྱང་ཆུབ
6.96a
སེམས་དཔའི་སྤྱོད་པ་ལ་འཇུག་པ་ཡིན་ནོ། །དེའི་ཚེ་དེའི་དུས་ན་བྲམ་ཟེའི་ཁྱེའུ་ལྔ་བརྒྱ་པོ་གང་དག་ཡིན་པ་དེ་དག་ནི་ཤཱཀྱ་གཞོན་ནུ་ལྔ་བརྒྱ་པོ་འདི་དག་ཡིན་ནོ། །དེའི་ཚེ་དེའི་དུས་ན་རི་དགས་ཀྱི་བརྟུལ་ཞུགས་ཅན་གང་ཡིན་པ་དེ་ནི་དགེ་སློང་ཉེ་སྡེ་ཡིན་ཏེ། དེའི་ཚེ་ཡང་ངས་ཤཱཀྱ་གཞོན་ནུ་ལྔ་བརྒྱ་པོ་འདི་དག་རིགས་ཀྱི་བུ་ཉེ་སྡེ་ལ་བརྟེན་ནས་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ། མངོན་པར་ཤེས་པ་ལྔ་པོ་དག་ལ་གཞག་པར་བྱས་ལ་ད་ལྟར་ཡང་ངས་ཤཱཀྱ་གཞོན་ནུ་ལྔ་བརྒྱ་པོ་འདི་དག་རིགས་ཀྱི་བུ་ཉེ་སྡེ་ལ་བརྟེན་ནས་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ། ཤིན་དུ་མཐར་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་གཞག་པ་མཛད་དོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང ། འདྲེན་མ་སྤངས་ནས་ལས་གཅིག་ཏུ་དཀར་བ་དག་ལ་བརྩལ་བར་བྱ་སྟེ། དགེ་སློང་དག་དེ་ལྟར་ཁྱོད་ཀྱིས་བསླབ་པར་བྱའོ། །འཁྲུར་འཇུག་པའི་སྤང་བ་སྟེ་བཞི་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་ཀྱིས་དགོན་པར་གནས་པ་མ་བཀག་པ་དེའི་ཚེ་ན་དགེ་སློང་མ་རྣམས་ཀྱང་དགོན་པའི་གནས་སུ་དོང་སྟེ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་དོ། །དེ་ནས་དགེ་སློང་མ་ཨུད་པ་ལའི་མདོག་འཁོར་ལྔ་བརྒྱ་དང་ནགས་མུན་པ་ཅན་ག་ལ་བ་དེར་སོང་སྟེ་ཕྱིན་ནས་ཤིང་ལྗོན་པའི་དྲུང་ཞིག་ཏུ་བརྟེན་ཏེ་དཀྱིལ་མོ་དཀྲུང་ཕྱེད་ཀྱིས་འདུག་ནས་བསམ་གཏན་དང་རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་དོ། །དགེ་སློང་མ་དེ་དག་ཕྱེམ་བྲེད་མཉན་ཡོད་དུ་འཇུག་འདོད་ནས་སྨྲས་པ། འཕགས་མ་ཨུད་པ་ལའི་མདོག་བསླང་བར་བྱའོ། །ཁ་ཅིག་གིས་སྨྲས་པ། འཕགས་མ་ཨུད་པ་ལའི་མདོག་ནི་མཐུ
6.96b
ཆེ་བ་རྫུ་འཕྲུལ་ཆེ་བ་ཡིན་པས་དང་པོ་ཁོ་ནར་དབྱར་ཁང་དུ་འགྲོ་བར་འགྱུར་བའི་གནས་ཀྱང་ཡོད་དོ་ཞེས་ཟེར་ནས་དེ་དག་གིས་དེ་མ་བསླང་བ་ཁོ་ནར་དོང་ངོ ། །ུད་པ་ལའི་མདོག་ཀྱང་ཕྱེམ་བྲེད་ལངས་ནས་དགེ་སློང་མ་དེ་དག་ཐམས་ཅད་དོང་བར་མཐོང་བ་དང ། དེས་བསམས་པ ། ཅི་ང་འགྲོ་འམ། འོན་ཏེ་འདི་ཉིད་དུ་འདུག་སྙམ་ནས་དེ་དེ་ཉིད་དུ་འགོག་པ་ལ་སྙོམས་པར་ཞུགས་སོ། །གཡོན་ཅན་ལྔ་བརྒྱ་ཙམ་གྱིས་ལས་དག་བྱས་ནས་ནགས་མུན་པ་ཅན་དུ་ལྷགས་ཏེ། དེ་དག་གིས་སྨྲས་པ། བདག་ཅག་ལས་ཉིས་བརྒྱ་ལྔ་བཅུས་ནི་བསྐལ་པ་དག་བགོ་བར་བྱའོ། །ཉིས་བརྒྱ་ལྔ་བཅུས་ནི་ནགས་བྱུལ་བར་བྱའོ་ཞེས་དེ་དག་ལས་ཉིས་བརྒྱ་ལྔ་བཅུས་ནི་སྐལ་བ་དག་བགོ་བར་བརྩམས། ཉིས་བརྒྱ་ལྔ་བཅུས་ནི་ནགས་བྱུལ་བར་བརྩམས་པ་དང ། དེ་དག་གིས་ཨུད་པ་ལའི་མདོག་འདུག་པ་མཐོང་ངོ ། །དེ་ན་ཁ་ཅིག་ན་རེ་ཤེས་ལྡན་དག་འདི་ནི་ཐོ་ཡོར་ཞིག་ཡིན་ནོ་ཞེས་ཟེར། ཁ་ཅིག་ན་རེ་འདི་ནི་མི་ཞིག་ཡིན་ནོ་ཞེས་ཟེར། ཁ་ཅིག་ན་རེ་འདི་ནི་དགེ་སློང་ཞིག་ཡིན་ནོ་ཞེས་ཟེར་རོ། །དེ་ན་དགེ་སློང་གི་རྒྱུས་ཤེས་པ་ཞིག་འདུག་པ་དེས་སྨྲས་པ། འདི་ནི་དགེ་སློང་མ་ཞིག་ཡིན་གྱི་དགེ་སློང་ནི་མ་ཡིན་ནོ། །ཇི་ལྟར་ཤེས། དགེ་སློང་དག་ནི་དཀྱིལ་མོ་དཀྲུང་གིས་འདུག་ལ། དགེ་སློང་མ་རྣམས་ནི་དཀྱིལ་མོ་དཀྲུང་ཕྱེད་ཀྱིས་འདུག་གོ། །དེ་དག་ངོ་མཚར་སྐྱེས་ནས་ཤེས་ལྡན་དག་འདི་ལྟ་བུའི་ནགས་འཇིགས་སུ་རུང་བའི་ནང་ན་དགེ་སློང་མ་གཅིག་པུ་མཚན་མོ་གནས་པར་ཁས་བླངས་པ་ལྟོས་ཤེས་ཟེར་རོ། །དེ་དག་དམག་དཔོན་གྱི་གན་དུ་སོང་བ་དང ། དམག་དཔོན་གྱིས་དེ་དག་ལ་དྲིས་པ། ཤེས་ལྡན་དག་ཁྱེད་ཀྱི་ནགས་མུན་པ་ཅན་འདི་ན་ངོ་མཚར་ཅུང་ཟད་མཐོང་བ་ཡོད་དམ་མཆིས་ཏེ། འདི་ལྟ་བུའི་ནགས་འཇིགས་སུ་རུང་བའི་ནང་ན། དགེ་སློང་མ་གཅིག་པུ་མཚན་མོ་གནས་པར་ཁས་བླངས་པ་མཆིས་སོ། །དེ་བལྟས་འདོང་ངོ་ཞེས་དེ་དག་དེའི་དྲུང་དུ་དོང་བ་དང ། དམག་དཔོན་གྱིས་དགེ་སློང་མ་ཨུད་པ་ལའི
6.97a
མདོག་གཟུགས་བཟང་བ། བལྟ་ན་སྡུག་པ། མཛེས་པ་མཐོང་ངོ ། །མཐོང་ནས་ཀྱང་མངོན་པར་དད་པར་གྱུར་ནས་དེ་མངོན་པར་དད་པ་སྐྱེས་པས་སྨྲས་པ། ཀྱེ་མ་དགེ་སློང་མ་འདི་ནི་གཉི་ག་ནས་བཟང་བ་ཡིན་ཏེ། མཚན་མོ་ཟླ་བ་ཉི་མོ་ལྟར་འདུག་པ་གང་ཡིན་པ་དང ། གཟུགས་བཟང་བ། བལྟ་ན་སྡུག་པ། མཛེས་པ་གང་ཡིན་པས་སོ་ཞེས་དེ་བསླང་བར་བརྩམས་པ་དང ། དེ་དག་གིས་སྨྲས་པ། ཅིའི་ཕྱིར་འདི་སློང་བར་བྱེད། ཟས་སྦྱིན་པར་བྱའོ། །དགེ་སློང་གི་རྒྱུས་ཤེས་པ་གཅིག་གིས་སྨྲས་པ། འདི་ནི་དུས་མ་ཡིན་པར་མི་ཟའོ། །དམག་དཔོན་གྱིས་སྨྲས་པ། ཅིའི་ཕྱིར། དེས་སྨྲས་པ། འདི་ནི་དུས་མ་ཡིན་པའི་ཟས་སྤངས་པ་ཡིན་ནོ། །དམག་དཔོན་གྱིས་སྨྲས་པ། ཀྱེ་མ་དགེ་སློང་མ་འདི་ནི་གཉིས་ཀ་ནས་བཟང་བ་ཡིན་ཏེ། གཟུགས་བཟང་བ། བལྟ་ན་སྡུག་པ། མཛེས་པ་གང་ཡིན་པ་དང ། དུས་མ་ཡིན་པའི་ཟས་སྤངས་པ་གང་ཡིན་པས་སོ། །ཡང་སྨྲས་པ། འདི་ལ་ཆང་བླུད་པར་བྱའོ། །དགེ་སློང་གི་རྒྱུས་ཤེས་པ་དེས་སྨྲས་པ། འདི་ནི་མྱོས་པར་འགྱུར་བའི་བཏུང་བ་སྤངས་པ་ཡིན་ནོ། །དམག་དཔོན་གྱིས་སྨྲས་པ། ཀྱེ་མ་དགེ་སློང་མ་འདི་ནི་གཉི་ག་ནས་བཟང་བ་ཡིན་ཏེ། གཟུགས་བཟང་བ། བལྟ་ན་སྡུག་པ། མཛེས་པ་གང་ཡིན་པ་དང ། མྱོས་པར་འགྱུར་བའི་བཏུང་བ་སྤངས་པ་གང་ཡིན་པས་སོ། །ཡང་སྨྲས་པ། ཁོ་བོས་ཡོན་གནས་ཀྱི་ཞིང་འདི་ལྟ་བུ་ལ་བསོད་སྙོམས་ཀྱིས་བསྒྲུབ་པར་མ་ནུས་སོ་ཞེས་དེས་རས་ཡུག་ཆེན་པོ་ལ་འོས་པ་གཅིག་དང ། བསོད་སྙོམས་ཀྱི་ཕུད་ཅིག་ཕུལ་ནས་ཤིང་ལྗོན་པའི་ཡལ་ག་ལ་བཏགས་ཏེ་བཞག་ནས་སྨྲས་པ། འཕགས་མ་འདི་ལྟར་ཁྱོད་ལ་མི་མཁྱེན་པ་དང ། མི་གཟིགས་པ་དང ། མི་རིག་པ་དང ། རྣམ་པར་མི་མཁྱེན་པ་ཅི་ཡང་མི་མངའ་བས་བདག་གིས་ཁྱོད་ལ་བསོད་སྙོམས་དང་ན་བཟའ་འདི་འབུལ་ལོ་ཞེས་སྨྲས་ཏེ་སོང་ངོ ། །ུད་པ་ལའི་མདོག་ནང་པར་སྔར་ལངས་པས་སྐྱེ་བོ་ཕལ་པོ་ཆེའི་རྗེས་ཤུལ་མཐོང་ནས་དེས་བསམས་པ་དང ། གཡོན་ཅན་ལྔ་བརྒྱ་ཉེ་བར་འོངས་པར་མཐོང་ནས་མི་མཛེས་པ་འགའ་ཞིག་རིག་པར་མ་བྱས་སམ་སྙམ་ན་འགའ་ཡང་མ་བྱས་པར
6.97b
མཐོང་ངོ ། །ཤིང་ལྗོན་པའི་ཡལ་ག་ལ་རས་ཡུག་ཆེན་དང ། བསོད་སྙོམས་བཏགས་ཏེ་བཞག་པ་མཐོང་ནས་དེས་བསམས་པ། འདི་ནི་དད་པར་གྱུར་པ་རྣམས་ཀྱིས་དད་པའི་དབང་དུ་བྱས་པ་ཡིན་ནོ་སྙམ་ནས་དེས་བསམས་པ། གལ་ཏེ་བྱིན་ལེན་སྟོབས་པ་ལ་བསྡད་ན་བྱ་འམ། སྤྲེའུས་ཆུད་གཟན་པར་འགྱུར་བས་བདག་ནི་དགེ་འདུན་ལ་བསོད་སྙོམས་ཀྱི་ཕུད་འབུལ་བ་ཡིན་ལ་འདི་ལྟར་དགེ་སློང་རྣམས་ལ་མི་རུང་བ་གང་ཡིན་པ་དེ་ནི་དགེ་སློང་མ་རྣམས་ལ་རུང་བ་ཡིན་ལ། དགེ་སློང་མ་རྣམས་ལ་མི་རུང་བ་གང་ཡིན་པ་དེ་ནི་དགེ་སློང་རྣམས་ལ་རུང་བ་ཡིན་པས་བདག་རང་ཉིད་ཀྱིས་འདི་ཁྱེར་ཏེ། དགེ་འདུན་ལ་བསོད་སྙོམས་ཀྱི་ཕུད་འབུལ་དུ་འགྲོའོ་སྙམ་ནས་དེས་དེ་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་ངོ ། །དྲུག་སྡེ་རྣམས་ཀྱི་ཀུན་དུ་སྤྱོད་པ་ནི་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེས་ཨུད་པ་ལའི་མདོག་མཐོང་ནས་སྨྲས་པ། །སྲིང་མོ་ཅིའི་ཕྱིར་ནང་པ་སྔར་མཉན་ཡོད་ཀྱི་སྒོ་དག་ཕྱེ་སྟེ་འོངས། དེས་སྨྲས་པ། བདག་མཉན་ཡོད་དུ་མ་མཆིས་ཀྱི། བདག་མདང་སུམ་ནགས་མུན་པ་ཅན་དུ་མཆིས་པར་ཁས་བླངས་སོ། །ཉེ་དགས་སྨྲས་པ། ཉེ་དགའ་ནི་ཉིན་མོ་ཉིད་ནགས་མུན་པ་ཅན་དུ་ཞུགས་ན་ཡང་སྤུ་དག་གྱེན་དུ་འགྲེང་བར་འགྱུར་རོ། །སྲིང་མོ་ཁྱེར་བ་འདི་ཅི་ཡིན། དེས་སྨྲས་པ། ཆོམ་རྐུན་པ་ལྔ་བརྒྱ་ཙམ་དེར་མཆིས་ནས་དེ་དག་དད་པར་གྱུར་པས་བདག་ལ་དད་པའི་དབང་དུ་བགྱིས་པ་སྩལ་ཏོ། །སྲིང་མོ་ཁྱོད་ནི་ཆོམ་རྐུན་པས་ཀྱང་དད་པར་བྱ་བ་ཡིན་གྱི། གལ་ཏེ་ཉེ་དགའ་དེ་དག་གིས་མཐོང་དུ་ཟིན་ན་ལྕག་རྒོད་མང་པོས་བརྡབས་ཏེ་ཁུར་ཙ་བར་འགྱུར་རོ། །འདི་ལྟར་གང་ལ་རས་ཡུག་ཆེན་འདི་ལྟ་བུ་ཡོད་པ་དེ་ནི་གོས་སར་པ་ལས་སྣམ་སྦྱར་ཉི་རིམ་བྱས་ཏེ་སེམས་ལས་ཆུང་ངུས་དགེ་བའི་ཕྱོགས་ལ་ཏྲོན་བྱེད་པར་འགྱུར་རོ། །འཕགས་པ་ཁྱོད་རས་ཡུག་ཆེན་འདི་བཞེད་དམ། ལྷའི་གནས་ཀྱི་ལྷག་མ་བཞིན་དུའོ། །འཕགས་པ་བདག་གིས་དགེ་འདུན་ལ་བསོད་སྙོམས་ཀྱི་ཕུད་ཕུལ་ཏེ་སླར་མཆིས་པའི་བར་དུ
6.98a
གཞེས་ཤིག་དང ། དེའི་འོག་ཏུ་ཁྱོད་ལ་རས་ཡུག་ཆེན་གསོལ་ལོ། །ཉེ་དགས་བསམས་པ། ལྷུང་བཟེད་ནག་པོ་ཅན་འགའ་ཞིག་གིས་འདི་ལ་བསླངས་པ་དང་དེ་ལ་བྱིན་པར་འགྱུར་རོ་སྙམ་ནས། སྲིང་མོ་བདག་གིས་བསོད་སྙོམས་ཀྱི་ཕུད་ལེན་པ་དག་ཁྲིད་དེ་འོང་གིས་དེའི་བར་དུ་འདི་ཉིད་དུ་སྡོད་ཅིག་།ཉེ་དགའ་རྒྱལ་བྱེད་ཀྱི་ཚལ་དུ་ཞུགས་པ་དང ། དེས་དགེ་སློང་བསོད་སྙོམས་ཀྱི་ཕུད་ལེན་པ་དག་སྙིང་ལས་ཆུང་ངུར་འཁོད་པ་མཐོང་ནས་དེས་སྨྲས་པ། ཚེ་དང་ལྡན་པ་དག་སྦྱིན་བདག་དག་ནི་ཁུར་གྱིས་ངལ་ཞིང་སྡོད་ལ། ཁྱེད་ཅག་ནི་འདི་ན་སྙིང་ལས་ཆུང་ངུར་འཁོད་ན་ཚུར་ཤོག་བསོད་སྙོམས་ཀྱི་ཕུད་ལོང་ཤིག་།དེ་དག་གིས་གཞོང་བུ་ཐོགས་ཏེ་དོང་བ་དང ། ུད་པ་ལའི་མདོག་གིས་དེ་དག་ལ་བསོད་སྙོམས་ཀྱི་ཕུད་ཕུལ་ནས་རས་ཡུག་ཆེན་སྤྲུགས་ནས་ཉེ་དགའ་ལ་ཕུལ་ལོ། །ཉེ་དགས་ཁྱོད་སྦྱིན་པ་འདིས་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་དང ། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་སོ། །ུད་པ་ལའི་མདོག་གིས་བསམས་པ། ང་དབྱར་ཁང་དུ་སོང་སྟེ་ཅི་རུང ། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོ་བར་བྱའོ་སྙམ་ནས། དེ་ནས་ཨུད་པ་ལའི་མདོག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེའི་ཚེ་ན་ཨུད་པ་ལའི་མདོག་གིས་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པར་གྱུར་ནས། དེ་ན་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་རྣམས་ཀྱིས་དབྱར་གྱི་གོས་ཀྱི་རྙེད་པ་མ་གྲུབ་བམ། བཙུན་པ་གྲུབ་བོ། །འོ་ན་ཅིའི་ཕྱིར་དགེ་སློང་མ་ཨུད་པ་ལའི་མདོག་གི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པར་གྱུར། བཙུན་པ་སྲིང་མོ་འདི་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ལགས་ཏེ། འདིས་སངས་རྒྱས་སམ། ཆོས་སམ། དགེ་འདུན་ནམ། དགེ་སློང་ཡིད་དུ་འཐད་པ་དག་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། འདིས་དང
6.98b
ཡང་རས་ཡུག་ཆེན་རྙེད་ནས་དེ་ཡང་འདིས་བཙུན་པ་ཉེ་དགའ་ལ་སྩོལ་ཏོ། །ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་གོས་ལྷག་པ་ལེན་ཏམ། བཙུན་པ་ལེན་ཏོ། །ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་འདི་སྙམ་དུ་འདིའི་ཆོས་གོས་ལྔ་ཚང་ངམ། འོན་ཏེ་མ་ཚང་སྙམ་དུ་མི་སེམས་པར་འདི་ལྟར་ཐོབ་བོ་ཅོག་ལེན་པར་བྱེད་ཀྱི། ཉེ་དུ་ལ་ནི་བྱིན་ཡང་ལེན་པར་མི་བྱེད་དོ། །དེ་ནས་བཅོམ་ལྡན་འདས་ཀྱི་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་ཨུད་པ་ལའི་མདོག་ལ་གཙུག་ལག་ཁང་ཆེན་པོ་ནས་ཆོས་གོས་ལྔ་བྱིན་ཅིག་།ཚེ་དང་ལྡན་པ་ཀུན་དགའ་བོས་དགེ་སློང་མ་ཨུད་པ་ལའི་མདོག་ལ་གཙུག་ལག་ཁང་ཆེན་པོ་ནས་ཆོས་གོས་ལྔ་བྱིན་ནོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་སྤང་བའི་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་བདག་གི་ཁྱིམ་ནོར་དུ་མ་དང་ལྡན་ན་བདག་གིས་འཇིག་རྟེན་ཕ་རོལ་གྱི་ལམ་རྒྱགས་ཅུང་ཟད་ཀྱང་མ་ཁྱེར་རོ་སྙམ་ནས་ལག་པ་ལ་འགྲམ་པ་གཏད་དེ་སེམས་ཁོང་སུ་ཆུད་ཅིང་འདུག་པ་ཆུང་མས་མཐོང་ནས་སྨྲས་པ། རྗེའི་སྲས་ཁྱོད་ཅིའི་སླད་དུ་ཕྱག་ལ་འགྲམ་པ་གཏད་དེ་སེམས་ཁོང་སུ་ཆུད་ཅིང་བཞུགས། བཟང་མོ་ཁོ་བོའི་ཁྱིམ་ནོར་དུ་མ་དང་ལྡན་ན་བདག་གིས་འཇིག་རྟེན་ཕ་རོལ་གྱི་ལམ་རྒྱགས་ཅུང་ཟད་ཀྱང་མ་ཁྱེར་ཏེ། གལ་ཏེ་བདག་གིས་སངས་རྒྱས་ལ
6.99a
སོགས་པ་དགེ་སློང་གི་དགེ་འདུན་བཤོས་གསོལ་ཏེ་རེ་རེ་ལ་རས་བཅོས་བུ་སར་པ་ཕྲུགས་རེ་བསྐོན་ན་དེས་བདག་གི་འཇིག་རྟེན་ཕ་རོལ་གྱི་ལམ་རྒྱགས་ཁྱེར་བར་འགྱུར་རོ། །ཆུང་མས་སྨྲས་པ། རྗེའི་སྲས་དེ་བཞིན་མཛོད་ཅིག་།དེ་ནས་ཁྱིམ་བདག་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཁྱིམ་བདག་དེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་གཅིག་ཏུ་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཁྱིམ་བདག་དེ་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བར་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཁྱིམ་བདག་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་ལེགས་པར་སྦྱར་ནས་ནང་པར་སྔར་ལངས་ཏེ་གདན་བཤམས་ནས་ཆུར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས། བཙུན་པ་གདུགས་ཚོད་སྦྱར་བའི་དུས་ལགས་ན། ད་བཅོམ་ལྡན་འདས་ཀྱིས་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས
6.99b
གདུགས་ཚོད་ལ་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། ཁྱིམ་བདག་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ ། །དེ་ནས་ཁྱིམ་བདག་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། རང་གི་ལག་གིས་བཅའ་བ་དང་བཟའ་བ་གཙང་ཞིང་བསོད་པས་ཚིམ་པར་བྱེད་དོ། །རྣམ་གྲངས་དུ་མས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་རེ་རེ་ལ་རས་བཅོས་བུ་སར་པ་ཕྲུགས་རེ་རེ་གསོལ་ཏོ། །དེ་ནས་ཁྱིམ་བདག་དེས་སྟན་དམའ་བ་ཞིག་བླངས་ནས་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེང་བསྟོད་པར་མཛད། །ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་ཁྱིམ་བདག་དེས་བཅོམ་ལྡན་འདས་ཀྱི་སླད་བཞིན་ཕ་ཟད་ཙམ་དུ་སོང་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔ་ནས་ཕྱིར་ལོག་སྟེ་རང་གི་ཁྱིམ་ག་ལ་བ་དེར་སོང་ནས་ཕྱིན་པ་དང ། སྟེང་གི་ཁང་བཟངས་ཀྱི་གཞིར་གཏོགས་པ་ན་རྗེས་སུ་དྲན་པར་སྒོམ་པ་ན་ཆུང་མ་ལ་སྨྲས་པ། བཟང་མོ་བདག་ཅག་གིས་འཇིག་རྟེན་ཕ་རོལ་གྱི་ལམ་རྒྱགས་མང་དུ་ཁྱེར་གྱིས་མཆོག་ཏུ་དགའ་བ་དང །
6.100a
རྗེས་སུ་ཡི་རང་བར་གྱིས་ཤིག་།ཆུང་མས་སྨྲས་པ། རྗེའི་སྲས་ཀྱིས་ནི་འཇིག་རྟེན་ཕ་རོལ་གྱི་ལམ་རྒྱགས་བསྣམས་ན། བདག་གིས་མ་འཚལ་ཏོ། །བཟང་མོ་བདག་ཅག་གཉིས་ཀྱི་ལོངས་སྤྱོད་དག་ཐུན་མོང་མ་ཡིན་ནམ། རྗེའི་སྲས་འདི་ལྟར་འོ་སྐོལ་ཅག་གི་ལོངས་སྤྱོད་དག་ཐུན་མོང་ལགས་མོད་ཀྱི་འོན་ཀྱང་བདག་གིས་ཀྱང་སྐྱེ་དགུའི་བདག་མོ་ཆེན་མོ་གཽ་ཏ་མི་ལ་སོགས་པ་དགེ་སློང་མའི་དགེ་འདུན་བཤོས་གསོལ་ཏེ། ཆེན་པོ་ལ་འོས་པའི་གོས་དག་ཕུལ་ན་དེ་ལྟ་ན་བདག་གིས་ཀྱང་འཇིག་རྟེན་ཕ་རོལ་གྱི་ལམ་རྒྱགས་འཚལ་བར་འགྱུར་རོ། །ཁྱིམ་བདག་གིས་སྨྲས་པ། བཟང་མོ་ཅི་སྔར་སྦྱིན་པ་བྱིན་པས་ཕྱིན་སྦྱིན་པར་བྱར་མེད་དམ། །དེ་བཞིན་གྱིས་ཤིག་།དེ་ནས་ཁྱིམ་བདག་གི་ཆུང་མ་དེ་སྐྱེ་དགུའི་བདག་མོ་ཆེན་མོ་གཽ་ཏ་མི་ག་ལ་བ་དེར་སོང་སྟེ་ཕྱིན་ནས་སྐྱེ་དགུའི་བདག་མོ་ཆེན་མོ་གཽ་ཏ་མིའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་སྐྱེ་དགུའི་བདག་མོ་ཆེན་མོ་གཽ་ཏ་མིས་ཁྱིམ་བདག་གི་ཆུང་མ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་བསྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དེ། རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་ཁྱིམ་བདག་གི་ཆུང་མ་དེ་སྟན་ལས་ལངས་ཏེ་སྐྱེ་དགུའི་བདག་མོ་ཆེན་མོ་གཽ་ཏ་མི་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །འཕགས་མ་སང་བདག་གི་སྡུམ་པར་དགེ་སློང་མའི་དགེ་འདུན་དང་ཐབས་གཅིག་གདུགས་ཚོད་གསོལ་བར་ཅི་གནང ། སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཁྱིམ་བདག་གི་ཆུང་མ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཁྱིམ་བདག་གི
6.100b
ཆུང་མ་དེས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཅང་མི་སྨྲ་བས་དང་དུ་བླངས་པར་རིག་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། སྐྱེ་དགུའི་བདག་མོ་ཆེན་མོ་གཽ་ཏ་མཱིའི་རྐང་པ་གཉིས་ལ་མགོ་བོས་ཕྱག་འཚལ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་དྲུང་ནས་སོང་ངོ ། །དེ་ནས་ཁྱིམ་བདག་གི་ཆུང་མ་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་ལེགས་པར་སྦྱར་ནས་ནང་པར་སྔར་ལངས་ཏེ་སྟན་བཤམས་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་སྤྱན་འདྲེན་གྱིས་འཕགས་མ་གདུགས་ཚོད་སྦྱར་བའི་དུས་ལགས་ན། ད་འཕགས་མས་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་དྲོ་ལ་བོས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མི་སྔ་དྲོ་ཤམ་ཐབས་བགོས། ལྷུང་བཟེད་དང ། ཆོས་གོས་ཐོགས་ཏེ་དགེ་སློང་མའི་ཚོགས་ཀྱིས་ཡོངས་སུ་བསྐོར་ཅིང ། དགེ་སློང་མའི་དགེ་འདུན་གྱིས་མདུན་དུ་བདར་ཏེ་ཁྱིམ་བདག་གི་ཆུང་མ་དེའི་བཀད་ས་ག་ལ་བ་དེར་སོང་སྟེ་ཕྱིན་ནས་དགེ་སློང་མའི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་ནས་ཁྱིམ་བདག་གི་ཆུང་མ་དེས་སྐྱེ་དགུའི་བདག་མོ་ཆེན་མོ་གཽ་ཏ་མི་ལ་སོགས་པ་དགེ་སློང་མའི་དགེ་འདུན་བདེ་བར་འདུག་པར་རིག་ནས། རང་གི་ལག་ནས་བཅའ་བ་དང་བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། དེས་ཆེན་པོ་ལ་འོས་པའི་གོས་དག་གི་སྤྲོག་མ་ཕྱེ་ནས་ཆེན་པོ་ལ་འོས་པའི་གོས་དག་ཐོགས་ཏེ་རྒན་པའི་མཐའ་ལོགས་སུ་འདུག་གོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མི་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་པས་གལ་ཏེ་རེ་ཤིག་བླངས་པར་གྱུར་ན་ནི་བསླབ་པའི་གཞི་འཁྲུགས་པར་ཡང་འགྱུར། །གལ་ཏེ་མ་བླངས་ན་ནི་ཁྱིམ་བདག་གི་ཆུང་མའི་བསོད་ནམས་ཀྱི་བར་ཆད་དང ། དགེ་སློང
6.101a
མའི་དགེ་འདུན་གྱི་རྙེད་པའི་བར་ཆད་དུ་འགྱུར་རོ་སྙམ་མོ། །དགེ་སློང་མ་རྣམས་ཀྱིས་བསམས་པ། ཀྱེ་མ་འཕགས་མ་སྐྱེ་དགུའི་བདག་མོ་ཆེན་མོ་གཽ་ཏ་མིས་ཆེན་པོ་ལ་འོས་པའི་གོས་དག་བླངས་པར་གྱུར་ཅིག་།བདག་ཅག་གིས་བླངས་པར་གྱུར་ན་བཅོམ་ལྡན་འདས་ཀྱིས་ཀྱང་དུས་ལགས་པའི་སླད་དུ་གནང་བར་འགྱུར་རོ་སྙམ་མོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མིས་ཆེན་པོ་ལ་འོས་པའི་གོས་དག་བླངས་ནས། ཁྱིམ་བདག་གི་ཆུང་མ་ལ་ཡོན་བཤད་པ་བྱས་ཏེ་སྟན་ལས་ལངས་ཏེ་སོང་སྟེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་སྐྱེ་དགུའི་བདག་མོ་ཆེན་མོ་གཽ་ཏ་མིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མིས་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མི་ངས་གནང་བ་གང་ཡིན་པ་དེ་ཁྱོད་ཀྱིས་ཤེས་པ་ལེགས་སོ་ལེགས་སོ། །དེ་ལྟ་བས་ན་ངས་དགེ་སློང་མ་རྣམས་ཀྱིས་ཆེན་པོ་ལ་འོས་པའི་གོས་དག་བླངས་ནས་དགེ་སློང་རྣམས་དང་ལྷན་ཅིག་བརྗེ་བར་བྱ་བ་རྗེས་སུ་གནང་ངོ ། །དེ་ནས་དགེ་སློང་མ་བཅུ་གཉིས་སྡེ་དག་གིས་གོས་དེ་དག་ཁྱེར་ཏེ་དྲུག་སྡེ་དག་གི་གན་དུ་དོང་ནས་སྨྲས་པ། འཕགས་པ་དག་བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་རྙེད་པ་འདི་དག་ཁྱེད་བཞེས་ལ་བདག་ཅག་ལ་ངན་པ་དག་སྩོལ་ཅིག་།དྲུག་སྡེ་དག་གིས་སྨྲས་པ། སྲིང་མོ་དག་བདག་ཅག་ལ་དགེ་སློང་མའི་རས་མ་དག་དགོས་པ་མེད་དེ། དེའི་ཚེ་ཡང་བདག་ཅག་བྱིས་པ་རྨོངས་པ་མི་གསལ་བ། མི་མཁས་པ་དག་ལ་ཁུར་དག་བསླང་བར་གྱུར་གྱིས་བདག་ཅག་མི་ལེན་ཏོ། །དགེ་སློང་མ་གཞན་དག་དགེ་སློང་གནས་བརྟན་གནས་བརྟན་རྣམས་ཀྱི་དྲུང་དུ་དོང་སྟེ་སྨྲས་པ། འཕགས་པ་དག་བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ
6.101b
འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་རྙེད་པ་འདི་དག་ཁྱེད་བཞེས་ལ། བདག་ཅག་ལ་ངན་པ་དམན་པ་དག་སྩོལ་ཅིག་།སྲིང་མོ་དག་བཅོམ་ལྡན་འདས་ལ་ཞུའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་བརྗེས་པ་མ་གཏོགས་ཏེ། དེ་ལ་བརྗེ་བ་ནི་འདི་ཡིན་ཏེ། དེ་ཙམ་གྱིས་སམ། ཇི་ཙམ་གྱིས་དགེ་སློང་མ་དགའ་བར་འགྱུར་བས་བརྗེ་བར་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པའི་བསྔགས་པ་བརྗོད་དེ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། ཕྲི་བ་དང ། དྲོད་རིག་པའི་བསྔགས་པ་བརྗོད་དོ། །དགེ་སློང་རྣམས་ལ་ཡང་དེ་དང་འཐུན་པ་དང ། དེ་དང་འཚམ་པ་དང ། དེའི་ཤས་ཆེ་བ་དང ། དེ་དང་ལྡན་པའི་ཆོས་དང་འཐུན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་བརྗེས་པ་མ་གཏོགས་ཏེ་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཉེ་དགའ་འམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ལས་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ཉེ་དུ་ཡིན་ལ་དེ་ཕན་ཅད་ནི་ཉེ་དུ་མ་ཡིན་ནོ། །གོས་ཤེས་བྱ་བ་ནི་གོས་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། །ལེན་ན་ཞེས་བྱ་བ་ནི་བདག་གིར་བྱེད་ནའོ། །བརྗེས་པ་མ་གཏོགས་ཏེ་ཞེས་བྱ་བ་ནི་བརྗེས་པ་བཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །
6.102a
དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པའི་འདུ་ཤེས་ཀྱིས་གོས་ལེན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་ལན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པའི་འདུ་ཤེས་ཀྱིས་གོས་ལེན་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཡིད་གཉིས་ཟ་བས་གོས་ལེན་ན་ཉེས་བྱས་སུ་འགྱུར་རོ། །དགེ་འདུན་ལ་གོས་འབུལ་བ་དང ། ལེགས་པར་སྨྲ་བ་ལ་ལྟུང་བ་མེད་དོ། །རྫོགས་པར་བསྙེན་པ་བྱེད་པ་དང་བོར་རླག་བྱུང་བ་ལ་ལྟུང་བ་མེད་དོ། །རིན་གྱིས་ལེན་པ་དང ། བརྗེས་པ་ལ་ལྟུང་བ་མེད་དོ། །དགེ་སློང་མ་གྲགས་པ་བསོད་ནམས་ཆེ་བ་ཡིན་ལ། དེས་དགེ་སློང་གི་མདུན་དུ་བཞག་ནས་འདི་སྐད་ཅེས་འཕགས་པ་བདག་ལ་རྫས་འདི་ལྟ་བུ་དག་མཆིས་ཀྱིས། འཕགས་པས་བདག་ལ་ཐུགས་བརྩེ་བའི་སླད་དུ་བཞེས་ཤིག་ཅེས་བརྗོད་དེ་མི་ལྟོས་པར་སོང་བ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལེན་པའི་སྤང་བ་སྟེ་ལྔ་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་པ་དེས་ཆུང་མ་ལ་སྨྲས་པ། བཟང་མོ་ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས་རེ་ཤིག་གཞོན་པའི་གནས་སྐབས་སུ་རོལ་པ་དང ། དགྱེས་པ་དང ། དགྱེས་མགུར་སྤྱོད་པ་མཛོད་ལ། བགྲེས་པའི་གནས་སྐབས་སུ་ནོར་སྒྲུབ་པར་མཛོད་ཅིག་།བཟང་མོ་ཇི་ཙམ་དུ་གཞོན་པའི་འབྱུང་བ་ཆེན་པོ་དག་ནི་གྲང་བ་དང ། དྲོ་བ་བཟོད་པ་ཡིན་པས་ཇེ་ནོར་བསྒྲུབ་པར་བྱ་ཞིང ། རྒས་པའི་གནས་སྐབས་སུ་བདེ་བ་སྤྱད་ཅིང་འདུག་པར་བྱའོ། །ཆུང་མས་བསམས་པ། བདག་གིས་བསྐུལ་བར་བྱ་བ་གང་ཡིན་པ་དེ་རང་ཉིད་བྱེད་དོ་སྙམ་ནས་སྨྲས་པ། རྗེའི་སྲས་དེ་ལྟར
6.102b
མཛོད་ཅིག་།ཁྱིམ་བདག་དེས་ཆུང་མ་དེ་ལ་ཁ་ཟས་ཙམ་བྱིན་ནས་ཟོང་ཁྱེར་ཏེ་ཡུལ་གཞན་དུ་སོང་ངོ ། །དེའི་ཆུང་མ་དེས་བསམས་པ། བདག་གི་ཁྱིམ་ཐབ་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུངས་བཞིན་པ་དང ། བཀྲེས་པ་དང ། སྐོམ་པས་གནོད་བཞིན་པ་དང ། །ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱི་རེག་པ་དག་གིས་ཉེན་བཞིན་དུ་ལོངས་སྤྱོད་དག་མངོན་པར་བསྒྲུབ་པའི་ཕྱིར་སྤྲོ་བར་བྱེད། འབད་པར་བྱེད། རྩོལ་བར་བྱེད་པ་གང་ཡིན་པ་དེ་དག་ཐམས་ཅད་བདག་གི་ཕྱིར་བྱའོ་སྙམ་པ་ཡིན་པས་བདག་ལས་མེད་པར་འདུག་པ་ནི་བདག་གི་ཚུལ་དང་འཐུན་པ་མ་ཡིན་ནོ་སྙམ་ནས། དེས་ཚོངས་དུས་སུ་སོང་སྟེ་རས་བལ་བཟང་པོ་བླངས་ནས་དོག་པ་བཟང་པོ་བཀལ་ཏེ། ཐ་ག་པ་མཁས་པ་ལ་རས་ཟུང་བཟང་པོ་འཐག་ཏུ་བཅུག་ནས། དེས་རས་དེ་སྤོས་སྣ་ཚོགས་ཀྱིས་བསྒོས་ཏེ་གོས་ཀྱི་ཟ་མ་ཏོག་ཏུ་བཅུག་སྟེ་བཞག་གོ། །ཁྱིམ་བདག་དེས་ཀྱང་དོན་ལེགས་པར་གྲུབ་ནས་ཁེ་སྤོགས་རྙེད་དེ་ལེགས་པར་འོངས་ནས་ཆུང་མ་དེས་ཁྱིམ་བདག་དེ་ཁྲུས་བྱས་ནས་དེ་ལ་རས་ཟུང་དེ་ཕུལ་ལོ། །ཁྱིམ་བདག་དེས་བསམས་པ། བདག་གིས་འདི་ལ་ཁ་ཟས་ཙམ་བཞག་པ་གང་ཡིན་པ་དེ་དག་ཐམས་ཅད་ཀྱིས་ཀྱང་རས་ཟུང་འདི་མི་རྙེད་དོ་སྙམ་དུ་རིག་ནས་ཆུང་མ་ལ་སྨྲས་པ། བཟང་མོ་རས་ཟུང་འདི་ག་ལས་རྙེད། རྗེའི་སྲས་ཇེ་གསོལ་ཅིག་།ཁྱིམ་བདག་དེས་དེ་གྱོན་ནས་ཡང་སྨྲས་པ། བཟང་མོ་རས་ཟུང་འདི་ག་ལས་རྙེད། རྗེའི་སྲས་ཇེ་བཤོས་མནོབས་ཤིག་།དེས་ཟན་ཟོས་ནས་ཡང་དྲིས་པ། བཟང་མོ་རས་ཟུང་འདི་ག་ལས་རྙེད། དེས་སྐབས་དེ་རྒྱས་པར་བརྗོད་པ་དང ། ཁྱིམ་བདག་གིས་སྨྲས་པ། བཟང་མོ་ལེགས་སོ། །ཁོ་བོ་ནི་སྒྲུབ་པ་ཡིན་ལ། ཁྱོད་ཀྱང་འདི་ལྟར་སྦེད་པ་ཡིན་ན། བདག་ཅག་གི་ལོངས་སྤྱོད་དག་རིང་པོ་མི་ཐོགས་པ་ཁོ་ནར་འཕེལ་ཞིང་རྒྱས་པ་དང ། ཡངས་པར་འགྱུར་རོ། །ཆུང་མས་སྨྲས་པ། རྗེའི་སྲས་འདི་ནི་བདག་གིས་དཀའ་བས་བསྒྲུབས་པ་ལགས་ཀྱིས། ཁྱོད་ཀྱིས་སུ་ལ་ཡང་མ་སྩོལ་ཅིག་།ཁྱིམ་བདག་དེ་དད་པ་དང
6.103a
ལྡན་པ། བཟང་བ། དགེ་བའི་བསམ་པ་ཅན་ཡིན་པས་དེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་རྒྱལ་བྱེད་ཀྱི་ཚལ་དུ་བྱུང་སྟེ་འགྲོ་བ་ན་མི་སྒོ་བས་མཐོང་ནས་དེས་བསམས་པ། ཁྱིམ་བདག་འདི་རས་ཟུང་འདི་ལྟ་བུ་གྱོན་པ་ལས་ན་འདིས་ནི་རྙེད་པ་མང་པོ་རྙེད་པ་ཡིན་ནོ་སྙམ་མོ། །དྲུག་སྡེ་དག་གི་ཀུན་དུ་སྤྱོད་པ་ནི་དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིག་འདུག་པ་དེས་ཁྱིམ་བདག་དེ་མཐོང་ནས་བསམས་པ། ཁྱིམ་བདག་འདི་རས་ཟུང་འདི་ལྟ་བུ་གྱོན་པ་ལས་ན་འདིས་ནི་རྙེད་པ་མང་པོ་རྙེད་པ་ཡིན་གྱིས། གལ་ཏེ་བདག་གིས་འདི་མ་ཕྲོགས་ན་ཉེ་དགའ་ཞེས་བྱ་བའི་མིང་མི་གཟུང་ངོ་སྙམ་ནས་དེས་དེ་ལ་སྨྲས་པ། ཁྱིམ་བདག་འོངས་པ་ལེགས་སོ། །འོངས་པ་ལེགས་སོ། །ཁྱོད་ཡུན་རིང་མོ་རིང་མོ་ནས་ཟླ་བ་བཞིན་དུ་ག་ལས་འཁོར་འཁོར། འཕགས་པ་བདག་ཟོང་ཐོགས་ཏེ་ཡུལ་གཞན་དུ་མཆིས་པར་གྱུར་ཏོ། །ཁྱིམ་བདག་ཁྱོད་ཀྱིས་རྙེད་པ་མང་པོ་གྲུབ་བམ། འཕགས་པ་ཅུང་ཟད་ཙམ་མོ། །ཁྱིམ་བདག་མཚེའུ་ནི་རྙོག་མ་ཅན་ནམ། དད་པའི་རྒྱུ་འཐུན་པས་རིག་པར་བྱ་སྟེ། ཁྱོད་རས་ཟུང་འདི་ལྟ་བུ་གྱོན་པ་ལས་ན་ཁྱོད་ཀྱིས་རྙེད་པ་མང་པོ་གྲུབ་པར་མངོན་གྱིས་ཚུར་ཤོག་།ཆོས་བསྟན་པར་བྱའོ། །དྲུག་སྡེ་དག་གི་ཀུན་དུ་སྤྱོད་པ་ནི་གལ་ཏེ་ཚུལ་ཁྲིམས་ཀྱི་གཏམ་དག་བྱེད་ན་ཉན་པ་པོ་དག་བདག་ཅག་ལྷ་རྣམས་སུ་སྐྱེས་སོ་སྙམ་དུ་སེམས་ལ། གལ་ཏེ་སྦྱིན་པའི་གཏམ་བྱེད་ན་ཉན་པ་པོ་དག་རང་གི་ཤ་གང་ཡིན་པ་དེ་ཡང་བཅད་ཅིང་བཅད་ཅིང་སྦྱིན་པར་བྱའོ་སྙམ་དུ་སེམས་སོ། །གལ་ཏེ་ངན་སོང་གི་གཏམ་དག་བྱེད་ན་ཉན་པ་པོ་དག་བདག་ཅག་ངན་སོང་རྣམས་སུ་སྐྱེས་སོ་སྙམ་དུ་སེམས་པར་འགྱུར་བ་ཡིན་ནོ། །ཁྱིམ་བདག་དེས་ཉེ་དགའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་པ་དང ། ཉེ་དགས་དེ་ལ་ཆོས་བསྟན་པར་བརྩམས་ནས། དེས་དེ་ལ་ཅི་ནས་ཀྱང་དེའི་སེམས་དད་པར་འགྱུར་བ
6.103b
དེ་ལྟར་ཆོས་ཀྱི་གཏམ་བྱས་སོ། །དེ་དད་པར་གྱུར་ནས་སྨྲས་པ། བདག་གིས་འཕགས་པ་ལ་ལེགས་པར་གསུངས་པའི་ན་བཟའ་ཕྲུགས་གཅིག་འབུལ་ལོ། །བཞིན་བཟངས་ཨ་རོག་ཁྱ། སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་དང ། ལྷ་རྣམས་ཀྱི་གོས་དག་ཐོབ་པར་གྱུར་ཅིག་།བཞིན་བཟངས་བཅོམ་ལྡན་འདས་ཀྱིས་ཀྱང་འདི་སྐད་ཅེས། སང་དག་འཆི་འང་སུ་ཤེས་ཀྱིས། །དེ་རིང་ཉིད་དུ་བརྟུལ་ཏེ་བྱ། །འཆི་བདག་སྡེ་ཆེན་དེ་དག་ནི། །ཁྱེད་ཅག་བཤེས་པ་མ་ཡིན་ནོ་ཞེས་གསུངས་ཀྱིས། བཞིན་བཟངས་ཁྱོད་ཀྱིས་རས་ཟུང་བཟང་པོ་གྱོན་པ་འདི་ཉིད་ཁོ་བོ་ལ་བྱིན་ཅིག་དང ། ཁོ་བོས་འདི་ལས་སྣམ་སྦྱར་ཉི་རིམ་བྱས་ཏེ་སེམས་ལས་ཆུང་ངུས་དགེ་བའི་ཕྱོགས་ལ་བདེ་བར་ཏྲོན་བྱའོ། །འཕགས་པ་ཁྱོད་འདི་བཞེད་དམ། ལྷའི་གནས་ཀྱི་ལྷག་མ་ཇི་ལྟ་བ་བཞིན་དུའོ། །འཕགས་པ་བདག་ཁྱོད་ལ་མི་འབུལ་བ་ནི་མ་ལགས་ན། འདི་ལྟར་འདི་ནི་མཆིས་བྲང་གིས་བདག་ལ་སྩལ་བ་ལགས་སོ། །ཁྱིམ་བདག་ཁོ་བོས་ཁྱོད་གཞན་ལ་དད་པར་བྱས་ན་ཁྱོད་ཀོ་བུད་མེད་ཁོ་ནའི་དབང་ཡིན་ནམ། ཞེས་ཉེ་དགས་དངན་དུས་ཀྱི་ཕྱེད་ཀྱིས་དེའི་བླ་གོས་བླངས་ནས་དེ་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་དོ། །ཁྱིམ་བདག་གིས་དེ་ལ་སྨྲས་པ། འཕགས་པ་འདི་ཅིའི་ཐ་ཚིག་ཁྱིམ་བདག་འདི་ནི་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་བྱ་བའི་གཞི་ནི་ཡོད་ན་ཡོངས་སུ་ལོངས་སྤྱོད་པ་ལས་བྱུང་བའི་བསོད་ནམས་བྱ་བའི་གཞི་ནི་མེད་དེ། ནམ་ཞིག་ན་འདི་དང་འདྲ་བ་རྙེད་ན་འདི་ལས་ཆོས་གོས་བྱེད་པར་འགྱུར་བས་འདི་ཆོས་གོས་ཀྱི་གདང་ཁོ་ན་ལ་ཟད་པར་འགྱུར་རོ། །འཕགས་པ་ཅི་བདག་སྒྲེན་མོར་མཆི་བར་བགྱི་འམ། ཁྱིམ་བདག་ཁྱོད་ལ་གོས་གྱོན་པས་ཅི་ཞིག་བྱ། ཚུལ་ཁྲིམས་དང ། རིགས་དང ། སྤྱོད་པ་གྱོན་པས་ཆོག་མོད། གཅེར་བུ་ལ་ངོ་ཚ་ཤེས་པ་དང ། ཁྲེལ་ཡོད་པ་ཉམས་པ་དེ་དག་ནི་སྒྲེན་མོར་འགྲོ་ན་མི་སྡུག་པ
6.104a
ཡིན་གྱི་ཁྱོད་ལྟ་བུ་ངོ་ཚ་ཤེས་པ་དང ། ཁྲེལ་ཡོད་པ་དང་ལྡན་པ་ལ་སྒྲེན་མོར་འགྲོ་བ་མི་སྡུག་པ་ཅི་ཡོད། ཁྱིམ་བདག་ཁྱོད་དོར་ཐུང་མི་གྱོན་ནམ། འཕགས་པ་འཚལ་ལོ། ཁྱིམ་བདག་ཁྱིམ་བདག་རྣམས་ཀྱི་ཀུན་དུ་སྤྱོད་པ་ནི་དོར་ཐུང་གྱོན་ཏེ་ཤིང་ཚལ་ཐོགས་ལ། བ་ལང་གི་ཕྱི་བཞིན་འགྲོ་བ་ཡིན་པས་ཁྱོད་ཀྱང་ཤིང་ཚལ་ཐོགས་ལ་བ་ལང་གི་ཕྱི་བཞིན་སོང་ཤིག་དང ། སྐྱེ་བོ་དག་གིས་བ་ལང་སུར་འགྲོ་བ་ཕྱིར་བྱུང་བ་ཞིག་ཡིན་པར་ཤེས་པར་འགྱུར་རོ། །ཞེས་ཉེ་དགས་དངན་དུས་ཀྱི་ཕྱེད་ཀྱིས་དེའི་སྨད་གཡོགས་ཀྱང་བླངས་སོ། །ཁྱིམ་བདག་དེ་ཤིང་ཚལ་པ་ཐོགས་ཏེ་བ་ལང་གི་ཕྱི་བཞིན་ཞུགས་པ་དང ། མི་སྒོ་བས་མཐོང་ནས་སྨྲས་པ། ཁྱིམ་བདག་ཁོ་བོས་ད་ཅི་ཁོ་ན་ཁྱོད་ཆེན་པོ་ལ་འོས་པའི་རས་ཟུང་གྱོན་པར་མཐོང་ན། ཅི་དེ་དག་ཆོམ་རྐུན་པ་དག་གིས་བཅོམ་འམ། བཞིན་བཟངས་ཁོ་བོ་ཆོམ་རྐུན་པ་དག་གིས་ནི་མ་བཅོམ་མོད་ཀྱི། འདི་ལྟར་བཙུན་པ་ཉེ་དགས་ཁའི་ཆོས་ཀྱིས་བཅོམ་མོ། །ཁྱིམ་བདག་མགོན་མེད་ཟས་སྦྱིན་གྱི་ཀུན་དུ་སྤྱོད་པ་ནི་ནང་པར་ནང་པར་སྔར་ལངས་ཏེ་འཁོར་ལྔ་བརྒྱ་དང་ལྷན་ཅིག་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བ་ཡིན་པས་ཁྱིམ་བདག་མགོན་མེད་ཟས་སྦྱིན་ནང་པར་སྔར་ལངས་ཏེ་འཁོར་ལྔ་བརྒྱ་དང་ལྷན་ཅིག་མཉན་ཡོད་ནས་བྱུང་སྟེ་འགྲོ་བ་མི་སྒོ་བས་མཐོང་ནས་དེས་སྨྲས་པ། ཁྱིམ་བདག་ཁྱོད་ཀྱིས་དོན་འཐུན་མང་དུ་ཁྲིད་དེ་འོངས་ཀྱིས་ཅི་ནས་ཀྱང་མི་ཆོམས་པར་བག་གྱིས་ཤིག་།ཀྱེ་ནང་རྗེ་རྒྱལ་བྱེད་ཀྱི་ཚལ་དང་ལམ་གྱི་བར་ན་ཆོམ་རྐུན་པ་དག་འཁོད་དམ་ཅི། ལམ་གྱི་བར་ན་མ་ཡིན་གྱི་རྒྱལ་བྱེད་ཀྱི་ཚལ་ཉིད་ན་འཁོད་དོ། །ཀྱེ་ནང་རྗེ་ཁྱོད་ནི་བལ་གྱི་རིགས་ནག་པོ་དང་འདྲ་སྟེ། སྒོ་འདི་ནས་བཅོམ་ལྡན་འདས
6.104b
དང ། དགེ་སློང་གནས་བརྟན་གནས་བརྟན་དག་གཤེགས་པ་གང་གིས་ཀྱང་ཁྱོད་དཀར་པོར་མཛད་མ་སྤྱོད་དོ། །བཅོམ་ལྡན་འདས་དང་དགེ་སློང་གནས་བརྟན་རྣམས་ཀྱི་ཞབས་ཀྱི་རྡུལ་ནི་བདག་གིས་མགོས་བླང་བ་ཡིན་ན། ཁར་ཙང་གི་ཉིན་མོ་ཁྱིམ་བདག་ཅིག་ཆེན་པོ་ལ་འོས་པའི་རས་ཟུང་གྱོན་ཏེ་བྱུང་བ་དེའི་རས་དེ་ཉེ་དགས་ཁའི་ཆོས་ཀྱིས་ཕྲོགས་ནས་ཁྱིམ་བདག་དེ་སྨོད་ཅིང་དོར་ཐུང་གིས་ཞུགས་པར་གྱུར་ཏོ། །དེ་ནས་ཁྱིམ་བདག་མགོན་མེད་ཟས་སྦྱིན་འདི་སྙམ་དུ་སེམས་ཏེ། དེ་ནི་བདག་གི་བྱ་བ་ཡིན་ནོ་སྙམ་ནས་རྒྱལ་བྱེད་ཀྱི་ཚལ་དུ་སོང་བ་དང ། ཉེ་དགས་མཐོང་ནས་སྨྲས་པ། ཁྱིམ་བདག་ཨ་རོག་ཁྱ། ཁྱིམ་བདག་གིས་སྨྲས་པ། ཨ་རོག་མི་ཁྱ་ཡང་རུང་ངོ ། །ཁྱིམ་བདག་ཁྱོད་ཁོ་བོ་ལ་སྔན་ཆད་དུ་བ་འཐུལ་ན་ད་ཅི་མེ་ཁོ་ནར་འབར་རོ། །ཁོ་བོ་མེར་མི་འབར་དུ་ཇི་ལྟར་རུང ། གཞན་དག་རབ་ཏུ་བྱུང་བ་ནི་འདོད་པ་སྤངས་པའི་ཕྱིར་ཡིན་ན་བཙུན་པ་ཉེ་དགའ་ནི་འདོད་པ་མངོན་པར་སྤེལ་བའི་ཕྱིར་ཁོ་ནར་ཡིན་ནོ། །ཁོ་བོས་ཅི་བྱས། ཁྱོད་ཀྱིས་ཁྱིམ་བདག་ཅིག་རྒྱལ་བྱེད་ཀྱི་ཚལ་ལྟར་འོངས་པ་དེའི་རས་ཟུང་དངན་དུས་ཀྱིས་ཕྲོགས་ནས་ཁྱིམ་བདག་དེ་སྨོད་པར་མི་བྱེད་དམ། ཉེ་དགས་སྨྲས་པ། དེ་ནི་འཇིག་རྟེན་ན་ལྷ་ནི་སྦྱིན་པར་བྱེད་ལ་ཡི་དགས་ནི་ཟློག་པར་བྱེད་དོ་ཞེས་ཟེར་བ་ཡིན་ནོ། །ཅི་དེས་ཁྱོད་ལ་རིལ་པ་བྷྲིང་ག་ར་ཐོགས་ཏེ་ཕུལ་ལམ། ཁྱིམ་བདག་གལ་ཏེ་མི་བཟོད་ན་བསླབ་པའི་གཞི་འཆར་ཆུག་ཤིག་།ཅི་ཁོ་བོས་དེ་ཡལ་བར་བོར་དུ་རེ་འམ། དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་འདི་སྐད
6.105a
ཅེས་གསོལ་ཏོ། །བཙུན་པ་འཕགས་པ་འདི་དག་ཁྱིམ་བདག་གམ་ཁྱིམ་བདག་གི་མཆིས་བྲང་ཉེ་དུ་མ་ལགས་པ་ལས་གོས་སློང་བར་བགྱིད་ན། ཀྱེ་མ་བཅོམ་ལྡན་འདས་ཀྱིས་གང་གིས་འཕགས་པ་དག་ཁྱིམ་བདག་གམ། ཁྱིམ་བདག་གི་མཆིས་བྲང་ཉེ་དུ་མ་ལགས་པ་ལས་གོས་སློང་བར་མི་འགྱུར་བར་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བར་མཛད་པའི་རིགས་སོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཀྱིས་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་ལས་གོས་བསླངས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ
6.105b
ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་སྤང་བའི་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གྲོང་ཕྲེང་བ་ཅན་པའི་དགེ་སློང་བཞི་བཅུ་དོན་འཐུན་པ་དང་ལྷན་ཅིག་ལྗོངས་རྒྱུ་ཞིང་འདོང་བ་ན་ཆོམ་རྐུན་པ་དག་གིས་བཅོམ་ནས་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་སྤང་བའི་ལྟུང་བྱེད་དོ། །ཞེས་བསླབ་པའི་གཞི་བཅའ་བར་མཛད་པས་འདི་ན་བདག་ཅག་ལ་ཉེ་དུ་འགའ་ཡང་མེད་ཀྱིས་བདག་ཅག་མཉན་ཡོད་དུ་སོང་ན་དེར་བདག་ཅག་ལ་ཚངས་པ་མཚུངས་པར་སྤྱོད་པ་རྣམས་ཀྱིས་གོས་དག་གིས་བགོ་བཤའ་བྱེད་པར་འགྱུར་རོ་སྙམ་ནས། དེ་དག་གིས་སྨྲས་པ། ཅི་བདག་ཅག་སྒྲེན་མོར་འདོང་བར་བྱ་འམ། མཚན་མོ་འགེབས་པས་འདོང་བར་བྱ་ཞིང་ཉིན་མོ་ཚང་ཚིང་གི་ནང་དུ་ཞུགས་ཏེ་འཁོད་ལ་མཚན་མོ་ལམ་དུ་འཇུག་པར་བྱའོ་ཞེས་དེ་དག་མཚན་མོ་འགེབས་པས་རྒྱལ་བྱེད་ཀྱི་ཚལ་དུ་དོང་བ་དང ། དགེ་སློང་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པ་དག་གིས་དེ་དག་མཐོང་ནས་སྨྲས་པ། གཅེར་བུ་སྒྲེ་བྱི་དག་འདི་ཁྱེད་ཀྱི་འདུག་གནས་ཀྱང་མ་ཡིན། གཙུག་ལག་ཁང་ཡང་མ་ཡིན་ན་ཁྱེད་ག་ལས་འོངས། ཚེ་དང་ལྡན་པ་དག་བདག་ཅག་ནི་གཅེར་བུ་པ་མ་ཡིན་ནོ། །འོ་ན་ཁྱེད་ཅག་སུ་ཡིན་དགེ་སློང་དག་གོ་དགེ་སློང་འདི་ལྟ་བུ་ཡོད་དམ། གང་དག་ཆོམ་རྐུན་པ་དག་གིས་བཅོམ་པ་དག་ཅི་འདྲ་བ་ཡིན་ཁྱེད་ཅག་མིང་ཅི་གྲོང་ཕྲེང་བ་ཅན་དེའི་དགེ
6.106a
སློང་བཞི་བཅུའོ། །ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ་ཞེས་དེ་དག་གིས་དེ་དག་ལ་ལ་ལས་ནི་སྣམ་སྦྱར་བྱིན་ལ་ལས་ནི་བླ་གོས་བྱིན་ལ་ལས་ནི་མཐང་གོས་བྱིན། ལ་ལས་ནི་རྔུལ་གཟན་བྱིན་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དུས་མ་གཏོགས་ཏེ། དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་དེ་ལ་དེ་ནི་དུས་ཡིན་ནོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་ཡང་དེ་དང་འཐུན་པ་དང ། དེའི་ཤས་ཆེ་བ་དང་དེ་དང་ལྡན་པའི་ཆོས་དང་འཐུན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་དུས་མ་གཏོགས་ཏེ་སྤང་བའི་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་ཞེས་བྱ་བ་ནི་ཉེ་དགའ་འམ་གཞན་ཡང་དེ་ལྟ་བུ་གང་ཡིན་པའོ། །ཁྱིམ་བདག་གམ་ཞེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པའི་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཅད་ནི་ཉེ་དུ་མ་ཡིན་ནོ། །གན་དུ་སོང་སྟེ་ཞེས་བྱ་བ་ནི་དྲུང་དུ་སོང་སྟེའོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། རས་བལ་གྱི་གོས་དང ། དུ་གུ་ལའི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། སློང་ན་ཞེས་བྱ་བ་ནི་སློངས་མོ་བྱེད་ནའོ། །དུས
6.106b
མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱའོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆོམ་རྐུན་པ་དག་གམ། གཡོན་ཅན་དག་གིས་ཕྲོགས་པར་གྱུར་པའོ། །གོས་རླག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླག་པར་གྱུར་པ་འམ། འཁྱམས་པར་གྱུར་པའོ། །གོས་ཚིག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་མེས་ཚིག་པར་གྱུར་པའོ། །གོས་རླུང་གིས་ཁྱེར་རམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླུང་གིས་ཁྱེར་བར་གྱུར་པའོ། །གོས་ཆུས་ཁྱེར་ན་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆུས་ཁྱེར་བར་གྱུར་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང ། ཁ་དོག་དང ། ཁྲུ་ཚད་ལས་ཏེ། ཇི་ལྟར་རིན་ཐང་ལས་ཤེ་ན། དགེ་སློང་གི་གོས་ཀཱར་ཥཱ་པ་ཎ་ལྔ་རི་བ་སློང་བར་བྱེད་ཅིང ། དེས་ཀཱར་ཥཱ་པ་ཎ་ལྔ་རི་བའི་གོས་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །ཀཱར་ཥཱ་པ་ཎ་ལྔ་རི་བ་ཇི་ལྟ་བ་དེ་བཞིན་དུ་ཀཱར་ཥཱ་པ་ཎ་བཅུ་རི་བ་དང ། ཀཱར་ཥཱ་པ་ཎ་བཅཝ་ལྔ་རི་བ་དང ། ཀཱར་ཥཱ་པ་ཎ་ཉི་ཤུ་རི་བ་དང ། ཀཱར་ཥཱ་པ་ཎ་ལྔ་བཅུ་རི་བའི་བར་གྱི་གོས་སློང་བར་བྱེད་ཅིང ། དེས་ཀཱར་ཥཱ་པ་ཎ་ལྔ་བཅུ་རི་བའི་གོས་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཀཱར་ཥཱ་པ་ཎ་ལྔ་རི་བའི་གོས་སློང་བར་བྱེད་ཅིང་ལྷག་པ་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ལྷག་པ་ཐོབ་ན་ལྟུང་བ་མེད་དོ། །ཀཱར་ཥཱ་པ་ཎ་ལྔ་རི་བ་ཇི་ལྟ་བ་དེ་བཞིན་དུ་ཀཱར་ཥཱ་པ་ཎ་བཅུ་རི་བ་དང ། ཀཱར་ཥཱ་པ་ཎ་བཅཝ་ལྔ་རི་བ་དང ། ཀཱར་ཥཱ་པ་ཎ་ཉི་ཤུ་རི་བ་དང ། ཀཱར་ཥཱ་པ་ཎ་ལྔ་བཅུའི་བར་རི་བའི་གོས་སློང་ཞིང་ལྷག་པ་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ལྷག་པ་ཐོབ་ན་ལྟུང་བ་མེད་དོ། །དེ་ལྟར་རིན་ཐང་ལས་སོ། །ཇི་ལྟར་ཁ་དོག་ལས་ཤེ་ན། དགེ་སློང་གིས་གོས་སྔོན་པོ་སློང་བར་བྱེད་ཅིང་དེས་གོས་སྔོན་པོ་ཐོབ་ན
6.107a
དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔོན་པོ་ཇི་ལྟ་བ་དེ་བཞིན་དུ་སེར་པོ་དང ། དམར་པོ་དང ། གོས་སྟུག་པོ་དང ། སྲབ་མོ་སློང་བར་བྱེད་ཅིང ། དེས་སྲབ་མོ་ཐོབ་ན་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གོས་སྔོན་པོ་སློང་བར་བྱེད་པ་ན་སེར་པོ་ཐོབ་ན། སྔོན་པོ་སློང་བ་དེ་ལ་ཉེས་བྱས་སུ་འགྱུར་ལ། སེར་པོ་ཐོབ་པ་ལ་ལྟུང་བ་མེད་དོ། །སྔོན་པོ་སློང་བ་ལ་ཇི་ལྟ་བ་དེ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་སློང་བ་ན་སྟུག་པོ་ཐོབ་ན། སྲབ་མོ་སློང་བ་དེ་ལ་ཉེས་བྱས་སུ་འགྱུར་ལ། གོང་མ་ཐོབ་པ་ལ་ལྟུང་བ་མེད་དེ། དེ་ལྟར་ཁ་དོག་ལས་སོ། །ཇི་ལྟར་ཁྲུ་ཚད་ལས་ཤེ་ན། དགེ་སློང་གིས་གོས་ཁྲུ་ལྔ་པ་སློང་བར་བྱེད་ཅིང ། དེས་གོས་ཁྲུ་ལྔ་པ་ཐོབ་ན། དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང ། ཁྲུ་བཅཝ་ལྔ་པ་དང ། ཁྲུ་ཉི་ཤུ་པ་དང ། ཁྲུ་ལྔ་བཅུ་པའི་བར་གྱི་གོས་སློང་བར་བྱེད་ཅིང ། གོས་ཁྲུ་ལྔ་བཅུ་པ་ཐོབ་ན། དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གོས་ཁྲུ་ལྔ་པ་སློང་བ་ན་ལྷག་པ་ཐོབ་ན། ཁྲུ་ལྔ་པ་སློང་བ་དེ་ལ་ཉེས་བྱས་སུ་འགྱུར་ལ། ལྷག་པ་ཐོབ་པ་ལ་ལྟུང་བ་མེད་དོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང ། ཁྲུ་བཅཝ་ལྔ་པ་དང ། ཁྲུ་ཉི་ཤུ་པ་དང ། ཁྲུ་ལྔ་བཅུ་པའི་བར་གྱི་གོས་སློང་བར་བྱེད་པ་ན་ལྷག་པ་ཐོབ་ན་གོས་ཁྲུ་ལྔ་བཅུ་པ་སློང་བར་བྱེད་པ་དེ་ལ་ཉེས་བྱས་སུ་འགྱུར་ལ། ལྷག་པ་ཐོབ་པ་ལ་ལྟུང་བ་མེད་དེ། དེ་ལྟར་ཁྲུ་ཚད་ལས་སོ། །རས་མ་སློང་བ་ན་ཁ་ཚར་ཐོབ་པ་དང ། ཁ་ཚར་སློང་བ་ན་རས་མ་ཐོབ་པ་དང ། རས་མ་སློང་བ་ན་རས་ཡུག་ཆེན་དང ། རས་ཡུག་ཕྲན་ཐོབ་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ
6.107b
མེད་དོ། །སློང་བའི་སྤང་བ་སྟེ་དྲུག་པ་རྫོགས་སྷོ།། ་་་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཉེ་དགའ་ལ་བློ་སྐྱེས་པ། འདི་དག་ཐམས་ཅད་ཁྱིམ་བདག་མགོན་མེད་ཟས་སྦྱིན་གྱིས་བསླབ་པའི་གཞི་དག་གིས་བསྡམས་པས་ཕྱིན་ཅད་གང་ནས་ཀྱང་བཅའ་བའི་རིན་ཙམ་ཡང་བསླང་བར་མི་ནུས་ན། འདི་ལྟར་བཅོམ་ལྡན་འདས་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་ལ་བརྟེན་ནས་བསླབ་པའི་གཞི་བག་ཡངས་སུ་མཛད་པ་ཡོད་པས་བདག་གིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་སྔོན་དུ་བཏང་སྟེ་རྙེད་པ་བསྒྲུབ་པར་བྱའོ་སྙམ་ནས། དེ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་ག་ལ་བ་དེར་སོང་བ་དང ། ཇི་ཙམ་ན་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རྙང་རྙིང་དག་འཚེམ་ཞིང་འཁོད་པ་མཐོང་ནས། དེས་དེ་དག་ལ་སྨྲས་པ། ཚེ་དང་ལྡན་པ་དག་བདག་གིས་གཞན་ཐོས་ལ་གཞན་མཐོང་སྟེ། བདག་ཀོ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་ཅིང་འདུག་པར་སེམས་ཀྱི། བདག་ཚེ་དང་ལྡན་པ་དག་འདི་ལྟར་རྙང་རྙིང་དག་འཚེམ་ཞིང་འཁོད་པར་ནི་མི་སེམས་སོ། །གནས་བརྟན་བདག་ཅག་ཆོམ་རྐུན་པ་དག་གིས་བཅོམ་མོ། །ཀྱེ་མ་མ་ལེགས་སོ། །མ་ལེགས་སོ། །གནས་བརྟན་སུའི་མྱ་ངན་བྱེད། ཅི་ཁོ་བོ་ཅག་གི་འམ། མ་ཡིན་ཏེ་གང་དག་གིས་ཁྱེད་ཅག་བཅོམ་པའི་མ་བྱིན་པར་ལེན་པ་དེ་དག་སྒྲེན་མོ་ཁོ་ནར་སྐྱེ་བར་འགྱུར་ཞིང ། སྒྲེན་མོ་ཁོ་ནར་དུས་བྱེད་པར་འགྱུར་བས་དེ་དག་གི་མྱ་ངན་བྱེད་དོ། །ཚེ་དང་ལྡན་པ་དག་ཁྱེད་ཅིའི་ཕྱིར་གོས་དག་མི་སློང ། གནས་བརྟན་སུ་ཞིག་སངས་རྒྱས་དང ། ཆོས་དང ། དགེ་འདུན་སྤངས་ཏེ་ཁོ་བོ་ཅག་ལ
6.108a
སྦྱིན་པ་དང་བྱ་བར་སེམས་པར་འགྱུར། ཚེ་དང་ལྡན་པ་དག་ཁྱེད་ཅག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་ངེས་པར་བསྟོད་པ་དང ། བཀུར་བ་དང ། བསྔགས་པ་དང ། རབ་ཏུ་བསྔགས་པ་དག་མ་ཡིན་ནམ། གནས་བརྟན་ཁོ་བོ་ཅག་གིས་སུ་ལ་བསླང་བ་ཡང་མི་ཤེས་སོ། །ཚེ་དང་ལྡན་པ་དག་དགེ་སློང་རབ་ཏུ་ཤེས་པ་གང་གིས་ཁྱེད་ཀྱིས་གོས་དག་སློང་བར་འགྱུར་བ་འགའ་ཞིག་ལ་ཅིའི་ཕྱིར་མི་བཅོལ། གནས་བརྟན་དགེ་སློང་རབ་ཏུ་ཤེས་པ་སུ་ཞིག་བདག་ཉིད་ཀྱི་དགེ་བའི་ཕྱོགས་ཡོངས་སུ་ཉམས་པར་བྱས་ཏེ་ཁོ་བོ་ཅག་གི་དོན་དུ་གོས་དག་སློང་བར་འགྱུར། ཚེ་དང་ལྡན་པ་དག་རེ་ཤིག་ཁོ་བོ་བདག་ཉིད་དང་བཅུ་པ་ལ་ཡང་ཐབས་ཡོད་ལ། གཞན་ཡང་ཁོ་བོ་ཅག་མི་དྲུག་རེ་རེ་ཡང་བདག་ཉིད་དང་བཅུ་པ་ཡིན་པས་ཁོ་བོ་ཅག་མི་དྲུག་བཅུ་ལ་ཡང་ཐབས་ཡོད་དོ། །གཞན་ཡང་གལ་ཏེ་ཁྱེད་ཅག་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང ། རས་ཡུག་ཆེན་སློང་བར་བྱེད་དོ། །གནས་བརྟན་དེ་ལ་ཁོ་བོ་ཅག་ལ་གནོད་པ་ཅི་ཡོད། རེ་ཤིག་རེ་རེས་ཀྱང་ཆོས་གོས་གསུམ་གསུམ་སློང་ལ་རག་གོ། །ཚེ་དང་ལྡན་པ་དག་ཁོ་བོ་ཅག་གིས་བསོད་སྙོམས་ལ་རྒྱུ་བ་དང ། གོས་དག་བསླང་བ་གཉིས་ཀ་མི་ནུས་ཀྱིས། འདི་ལྟར་གང་གི་ཚེ་ཕྱི་རོལ་དུ་ཟས་ལ་བོས་པ་དེའི་ཚེ་བསླང་བར་བྱའོ་ཞེས་ཉེ་དགའ་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ནས་གཙུག་ལག་ཁང་གི་ནང་དུ་ཞུགས་ཏེ་འདུག་ནས་དེས་བསམས་པ། ཐབས་ཅི་ཞིག་བྱས་ན་དེས་མཉན་ཡོད་ཐམས་ཅད་ཆུབ་པར་འགྱུར་སྙམ་ནས་དེས་ཡང་བསམས་པ། རྗེ་དང་པོ་ཁོ་ནར་དབུལ་པོའི་སྲང་དུ་འགྲོ་བར་བྱ་ཞིང་དེའི་འོག་ཏུ་ཕྱུག་པོའི་སྲང་དུ་འགྲོ་བར་བྱ། དེའི་འོག་ཏུ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཕོ་བྲང་དང་བཙུན་མོ་རྒྱལ་རིགས་དབྱར་ཚུལ་མའི་ཁྱིམ་དང ། བཙུན་མོ་ཕྲེང་ལྡན་མའི་ཁྱིམ་དང ། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དང ། བླ་མཁྱེན་དྲང་སྲོང་བྱིན་དང ། རྙིང་པ་གཉིས་ཀྱི་ཁྱིམ་དང ། དགེ་བསྙེན་མ་རི་དགས་འཛིན་
6.108b
གྱི་མ་ས་གའི་ཁྱིམ་དང ། དགེ་བསྙེན་མ་ཁྱིམ་བདག་གི་ཆུང་མ་ལེགས་སྐྱེས་ཀྱི་ཁྱིམ་དག་ཏུ་འགྲོ་བར་བྱའོ་སྙམ་མོ། །དེའི་ཚེ་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་ཉེ་དགས་གཞོན་ནུ་རྣམས་ལ་སྨྲས་པ། ཚེ་དང་ལྡན་པ་དག་གལ་ཏེ་ཁྱེད་ཅག་ལ་ལས་སུ་བསྒོ་བ་དག་འོང་བར་གྱུར་ན། ཁྱེད་ཅག་གིས་མི་གནོད་པར་འདི་སྐད་ཅེས་བདག་ཅག་ལ་མཁན་པོ་དང ། སློབ་དཔོན་དག་གི་བྱ་བ་ཅུང་ཞིག་ཡོད་དོ་ཞེས་བརྗོད་པར་བྱའོ། །ཉེ་དགས་ཕྱི་དེ་ཉིན་པར་གཞོན་ནུ་ཞིག་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་གི་གན་དུ་བཏང་སྟེ་ཆོས་གོས་དག་བསླང་གིས་ཚུར་ཤེག་ཤིག་ཅེས་སྤྲིང་ངོ ། །གཞོན་ནུ་དེ་དེར་སོང་བ་དང ། ཇི་ཙམ་ན་དེ་དག་སྙོམས་པར་ཞུགས་པ་མཐོང་ནས་དེས་བསམས་པ། སྙིང་རྗེ་མེད་པའི་སྙིང་དང་ལྡན་པ་འཇིག་རྟེན་ཕ་རོལ་བཏང་བ་སུ་ཞིག་འདི་དག་ཏིང་ངེ་འཛིན་ལས་སློང་བར་འགྱུར་སྙམ་ནས་དེ་ཉེ་དགའི་གན་དུ་སོང་སྟེ་སྨྲས་པ། སློབ་དཔོན་དེ་དག་སྙོམས་པར་ཞུགས་ཤིང་མཆིས་པས་སུས་ཀྱང་དེ་དག་ཏིང་ངེ་འཛིན་དེ་ལས་སློང་བར་མི་ནུས་སོ། །ཉེ་དགས་སྨྲས་པ། བཀྲེན་པ་ཁྱོད་བརྩོན་འགྲུས་འདི་ལྟ་བུས་ཟག་པ་ཟད་པ་མངོན་སུམ་དུ་བྱེད་པར་འགྱུར་རམ། ཉེ་དགའ་རང་ཉིད་འགྲོའོ་ཞེས་དེ་སོང་ནས་དཔོང་སའི་ཁང་པར་སྒོ་གླེགས་ལ་རྟིང་བས་བརྡབས་པ་དང ། དཔོང་སའི་ཁང་པ་ཐམས་ཅད་འགུལ་ནས་དེ་དག་ཏིང་ངེ་འཛིན་དེ་ལས་ལངས་ནས་སྨྲས་པ། ཚེ་དང་ལྡན་པ་དགེ་སློང་བཞི་བཅུ་པོ་དག་ཆོས་གོས་གསུམ་བསླང་བར་བྱ་ན་ཁྱེད་ཅག་སྙིང་ལས་ཆུང་ངུར་འཁོད་དམ། ཚུར་ཤེག་འདོང་ངོ ། །གནས་བརྟན་ཇེ་སོ་ཤིང་བོར་ནས་འདོང་ངོ ། །ཚུར་ཤེག་ལམ་ཀ་ཉིད་དུ་འོར་ཅིག་།དེ་དག་འཕགས་པ་དང་ཉེ་དགས་སྨྲས་པ། ཚེ་དང་ལྡན་པ་དག་ཁོ་བོ་ཅག་དྲུག་སྡེ་དག་ནི་བྱ་རོག་དཀར་པོ་དང་འདྲ་བས་ཁོ་བོ་ཅག་གིས་རྒན་རིམས་བཞིན་དུ་འཁོད་པར་མི་བྱ་བར་བར་བར་དུ་རྒན་པ་དག་གིས་འཁོད་པར་བྱའོ། །དེ་དག་དབུལ་པོའི་སྲང་དུ་དོང་ནས་དངར་ཁ་བྱས་ཏེ་བསྡད་པ་དང ། དེ་དག་གིས་དེ་དག་མཐོང་ནས་ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ
6.109a
ཞིག་མ་བྱུང་ངམ། བཞིན་བཟངས་དག་ཉེས་དམིགས་བྱུང་ངོ ། །ཅི་ནོངས་ཁྱོད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ་དེ་དག་ཐོས་སམ། ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས་པ། ཤེས་ལྡན་དག་མདའ་གཞུ་ལོང་ཤིག་།ཕུབ་དང ། དབྱུག་པ་དག་ལོང་ཤིག་།ཆོམ་རྐུན་པ་དག་འཛིན་དུ་འདོང་ངོ ། །དྲུག་སྡེ་དག་གིས་སྨྲས་པ། དེ་དག་བཅོམ་ནས་ཡུན་རིང་དུ་ལོན་ཞིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བགྱི། དེ་དག་ལ་གོས་དག་བྱིན་ཅིག་།དེ་དག་གིས་དེ་དག་ལ་གོས་སར་པ་དང་རྙིང་པ་དག་བྱིན་ནོ། །དེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་དག་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག་།གཞོན་ནུ་དག་གིས་དེ་དག་ཁྱེར་ཏེ་གཙུག་ལག་ཁང་དུ་དོང་བ་དང ། དེ་དག་ཕྱུག་པོའི་སྲང་དུ་དོང་ནས། དངར་ཁ་བྱས་ཏེ་བསྡད་པ་དང ། དེ་དག་ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ་ཞིག་མ་བྱུང་ངམ། ཉེས་དམིགས་བྱུང་ངོ ། །ཅི་ནོངས། ཁྱེད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ། དེ་དག་ཐོས་སམ། ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས་པ། ཤེས་ལྡན་དག་མདའ་གཞུ་ལོང་ཤིག་།ཕུབ་དང ། དབྱུག་པ་དག་ལོང་ཤིག་།ཆོམ་རྐུན་པ་དག་འཛིན་དུ་འདོང་ངོ ། །དྲུག་སྡེ་དག་གིས་སྨྲས་པ། དེ་དག་བཅོམ་ནས་ཡུན་རིང་དུ་ལོན་ཅིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བགྱི། དེ་དག་ལ་གོས་དག་བྱིན་ཅིག་།དེ་དག་གིས་དེ་དག་ལ་ཆེན་པོ་ལ་འོས་པའི་གོས་དག་བྱིན་ཏོ། །དྲུག་སྡེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་དག་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག་།དེ་དག་གིས་གོས
6.109b
དག་ཁྱེར་ཏེ་གཙུག་ལག་ཁང་དུ་དོང་བ་དང ། དེ་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཕོ་བྲང་དུ་དོང་ནས་དངར་ཁ་བྱས་ཏེ་བསྡད་པ་དང ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་དེ་དག་མཐོང་ནས། ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ་ཞིག་མ་བྱུང་ངམ། ལྷ་ཉེས་དམིགས་བྱུང་ངོ ། །ཅི་ནོངས། ལྷས་གྲོང་ཁྱེར་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ་བཀུར་བ། བསྔགས་པ། རབ་ཏུ་བསྔགས་པ་དེ་དག་གསན་ཏམ། ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། སོང་ལ་མྱུར་དུ་ཆོམ་རྐུན་པ་དག་དང ། རྐུན་རྫས་དག་ཁུག་ཤིག་།དྲུག་སྡེ་དག་གིས་སྨྲས་པ། ལྷ་དེ་དག་ནི་བཅོམ་ནས་ཡུན་རིང་དུ་ལོན་ཅིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བྱ། ལྷ་དེ་དག་ལ་གོས་དག་སྩོལ་ཅིག་།རྒྱལ་པོས་དགེ་སློང་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །དྲུག་སྡེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་རྣམས་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག་།དེ་དག་གིས་གོས་དེ་དག་ཁྱེར་ཏེ་གཙུག་ལག་ཁང་དུ་དོང་བ་དང ། གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་གིས་སྨྲས་པ། གནས་བརྟན་དག་ད་ཆོག་གིས་ཐོང་ཤིག་།དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཧ་ཅང་བརྟབས་མངས་ཤིག་།ཁྱེད་ལ་ཁོ་བོ་ཅག་གིས་དང་པོ་ཉིད་ནས་ཚེ་དང་ལྡན་པ་དག་གལ་ཏེ་ཁྱེད་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང ། རས་ཡུག་ཆེན་དག་སློང་ངོ་ཞེས་མ་སྨྲས་སམ། དེ་དག་དགེ་སློང་དབང་ཆེ་བར་གྲགས་པས་བསྒོ་བས་ཅང་མི་སྨྲས་བར་འཁོར་དོ། །དེ་དག་བཙུན་མོ་རྒྱལ་རིགས་དབྱར་ཚུལ་མའི་ཁྱིམ་དང ། བཙུན་མོ་ཕྲེང་ལྡན་མའི་ཁྱིམ་དང ། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དང ། བླ་མཁྱེན་དྲང་སྲོང
6.110a
ཁྱིམ་དང ། རྙིང་པ་གཉིས་ཀྱི་ཁྱིམ་དང ། དགེ་བསྙེན་མ་རི་དགས་འཛིན་གྱི་མ་ས་གའི་ཁྱིམ་དང ། དགེ་བསྙེན་མ་ཁྱིམ་བདག་གི་ཆུང་མ་ལེགས་སྐྱེས་ཀྱི་ཁྱིམ་དུ་མཐར་གྱིས་དོང་སྟེ་སྔར་བསྟན་པ་སྐད་བརྗོད་པ་དང ། དེ་དག་གིས་ཀྱང་དགེ་སློང་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །དེ་ནས་དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་གལ་ཏེ་དགེ་སློང་བརྒྱ་གྲལ་དུ་མ་བཀོད་ན་གྲལ་སྟོངས་པར་འགྱུར་གྱིས་དེང་ལ་གྲལ་དུ་བཀོད་ཅིག་།མ་ཉེས་ཏེ་བདག་ཅག་ཀྱང་བསོད་སྙོམས་བླངས་ཏེ་འོང་ངོ ། །དྲུག་སྡེ་དག་གིས་གཙུག་ལག་ཁང་དུ་དོང་སྟེ་རྙང་རྙིང་དག་ལས་བཞི་བཅུ་ཕུང་པོར་བྱས་ཏེ་བཞག་གོ། །དགེ་སློང་བཞི་བཅུ་པོ་དག་ཟས་ཀྱི་བྱ་བ་བྱས་ཏེ་འོངས་པ་དང ། དྲུག་སྡེ་དག་གིས་ལྷན་ཅིག་གནས་པ་དང ། ཉེ་གནས་དག་ལ་སྨྲས་པ། ཚེ་དང་ལྡན་པ་དག་ཚུར་ཤེག་དོན་ཉུང་ངུ་དག་བོས་ཤིག་།དེ་དག་གིས་དེ་དག་བོས་པ་དང ། དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཅི་ཁོ་བོ་ཅག་ཁྱེད་ཀྱི་གོས་སྲུང་བ་ཡིན་ནམ། རང་གི་གོས་དག་ལོང་ཤིག་།དགེ་སློང་བཞི་བཅུ་པོ་དག་གིས་ཕན་ཚུན་གདོང་དུ་བལྟ་བར་བརྩམས་པ་དང ། དྲུག་སྟེ་དག་གིས་སྨྲས་པ། ཚེ་དང་ལྡན་པ་དག་ཅིའི་ཕྱིར་ཕན་ཚུན་གདོང་དུ་ལྟ། གནས་བརྟན་དག་ཐམས་ཅད་རྙང་རྙིང་ཤ་སྟག་ཡིན་ནོ། །ཚེ་དང་ལྡན་པ་དག་འདི་དག་མདུད་པ་འོར་ཅིག་དང་སྣམ་སྦྱར་ཡིན་ནོ། །འདི་དག་ནི་དྲུབས་ཤིག་དང་བླ་གོས་ཡིན་ནོ། །འདི་དག་ནི་དྲུབས་ཤིག་དང་མཐང་གོས་ཡིན་ནོ། །འདི་དག་ནི་དྲུབས་ཤིག་དང་རྔུལ་ཟན་ཡིན་ནོ། །གལ་ཏེ་མི་དགའ་ན་འདོང་དང་ཡང་བསླང་བར་བྱའོ། །ཀྱེ་མའོ་གནས་བརྟན་དག་འདི་དག་ཉིད་ཀྱང་མ་བསླངས་ཀྱང་རུང་ངོ ། །དེ་དག་གིས་རྙང་རྙིང་དེ་དག་ཁྱེར་ཏེ་དགོན་པར་དོང་ནས་འཚེམ་ཞིང་འཁོད་དོ། །ཐམས་ཅད་དུ་སྒྲ་གྲགས་པ། གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་གྲགས་གོ། །དེ་དག་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་དག་བདག་ཅག་གིས་གཞན་ཐོས་ལ་གཞན་མཐོང་སྟེ། བདག་ཅག་གིས་གྲོང་ཕྲེང་བ
6.110b
ཅན་པའི་དགེ་སློང་བཞི་བཅུ་པོ་དག་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་ཐོས་ན། ཚེ་དང་ལྡན་པ་དག་ཀོ་རྙང་རྙིང་དག་འཚེམ་ཞིང་འཁོད་དོ། །དེ་དག་གིས་སྨྲས་པ། ཁྱེད་ཅག་གིས་ལྟ་ཁོ་བོ་ཅག་རང་རང་ཕྲག་པ་དག་གིས་ཀྱང་ཁྱེར་ཞེས་ཀྱང་ཐོས་སོ་ཞེས་ཟེར་བའི་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་ལ་རྨས་པ། དགེ་སློང་དག་ཁྱེད་ལེན་པའི་དྲོད་མི་ཤེས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང ། མི་སྦྱོར་བ་དང ། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང ། སྦྱོར་བ་དང ། བརྟགས་ཏེ་སྤྱོད་པའི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ལ་གོས་བསླང་བར་བྱའོ། །གལ་ཏེ་དེ་ལ་བྲམ་ཟེ་འམ། ཁྱིམ་བདག་དད་པ་ཅན་ཞིག་གིས་དུས་ཀྱིས་གོས་མང་པོ་སྟོབས་པར་འདོད་ན་དགེ་སློང་དེས་དེ་ལས་གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པར་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །གོས་ཕྲོགས་སམ
6.111a
ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆོམ་རྐུན་པ་དག་གམ། གཡོན་ཅན་དག་གིས་ཕྲོགས་པར་གྱུར་པའོ། །གོས་རླག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླག་གམ་འཁྱམས་པར་གྱུར་པའོ། །གོས་ཚིག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་མེས་ཚིག་པར་གྱུར་པའོ། །གོས་རླུང་གིས་ཁྱེར་རམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླུང་གིས་ཁྱེར་བར་གྱུར་པའོ། །གོས་ཆུས་ཁྱེར་ན་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆུས་ཁྱེར་བར་གྱུར་པའོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ཉེ་དུ་ཡིན་ལ། དེ་ཕན་ཅད་ནི་ཉེ་དུ་མ་ཡིན་ནོ། །གན་དུ་སོང་ལ་ཞེས་བྱ་བ་ནི་གན་དུ་སོང་སྟེའོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། །བསླང་བར་བྱའོ་ཞེས་བྱ་བ་ནི་སློངས་མོ་བྱ་བའོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པ་བླང་བར་བྱའོ་ཞེས་བྱ་བ་ནི་སྟོད་གཡོགས་སྨད་གཡོགས་དང་བཅས་པ་ནི་གཉིས་ཏེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་དང ། ཁྱིམ་པའི་སྟོད་གཡོགས་སྨད་གཡོགས་དང་བཅས་པའོ། །དགེ་སློང་གི་སྟོད་གཡོགས་སྨད་གཡོགས་དང་བཅས་པ་ནི་སར་པ་ལས་སྣམ་སྦྱར་ཉི་རིམ་དང ། རས་ཡུག་ཕྲན་ཁྲུ་ལྔ་པ་དང་དོ་པའོ། །ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ནི་རས་ཡུག་ཆེན་ཁྲུ་བཅུ་གཉིས་པ་དང ། རས་ཡུག་ཕྲན་ཁྲུ་བདུན་པ་དང་དོ་པའོ། །དེ་ལས་ལྷག་པ་ལེན་ན་ཞེས་བྱ་བ་ནི་དེ་ལས་གོང་མའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་ཁྱིམ་པའི
6.111b
སྟོད་གཡོགས་སྨད་གཡོགས་དང་བཅས་པ་སློང་བས་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན་ལྷག་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་སྟོད་གཡོགས་སྨད་གཡོགས་དང་བཅས་པ་སློང་བས་དགེ་སློང་གི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན། ལྷག་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་སློང་བས་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན། གལ་ཏེ་ཆུང་ན་ཡང་བསླང་བར་མི་བྱ་ལ། ལྷག་ན་ཡང་སྦྱིན་པར་མི་བྱའོ། །དགེ་སློང་དགེ་སློང་གི་སྟོད་གཡོགས་སྨད་གཡོགས་དང་བཅས་པ་སློང་བས་དགེ་སློང་གི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན། གལ་ཏེ་ཆུང་ན་བསླང་བར་བྱ་ལ་ལྷག་ན་ཡང་སྦྱིན་པར་བྱའོ། །དེ་ལྟར་ན་དགེ་སློང་གིས་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ལས་ལྷག་པ་སློང་བ་དང ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་ལས་ལྷག་པར་སྦྱིན་པར་མི་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན། དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ནི་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་ཙམ་དུ་སྤང་བའི་དངོས་པོ་དེ་ཉིད་ཀྱིས་མ་བཤགས་ཤིང
6.112a
སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སློང་བར་རིགས་པའི་སྤང་བ་སྟེ་བདུན་པ་རྫོགས་སྷོ།། ་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཁྱིམ་བདག་དེ་གཞན་གྱི་ཆུང་མ་ལ་ཆགས་པར་གྱུར་ནས་དེ་ལ་ཆུང་མས་རྗེའི་སྲས་དེ་ལྟར་མ་མཛད་ཅིག་ཅེས་ཕྱིར་བཟློག་ན་ཇི་ཙམ་དུ་དེ་ཕྱིར་བཟློག་ཀྱང་ཕྱིར་མ་ལོག་པ་དེ་ཙམ་དུ་དེའི་ཆུང་མ་དེ་ཡང་སྐྱེས་པ་གཞན་དག་དང་ལྷན་ཅིག་འཁྲུལ་བ་རྩོམ་པར་བྱེད་དོ། །ཁྱིམ་བདག་དེ་ཡང་བུད་མེད་གཞན་དག་ལ་སྦྱིན་པར་བྱེད་ལ། ཆུང་མ་དེ་ཡང་སྐྱེས་པ་གཞན་དག་ལ་སྦྱིན་པར་བྱེད་པས་དེ་ལྟར་ཁྱིམ་དེ་གཉིས་ཀ་ནས་རྒུད་པར་གྱུར་ནས་དེ་གཉིས་ལ་བུ་མོ་མངག་གཞུག་མ་ཞིག་ཡོད་ནས་ཁྱིམ་བདག་དེས་བུ་མོ་དེ་ལ་འདིས་ཁྱིམ་རྒུད་པར་བྱས་སོ་ཞེས་ཁུ་ཚུར་དང་ཐལ་ལྕག་དག་གིས་རྡེག་པར་བྱེད་དོ། །བུ་མོ་དེས་སྨྲས་པ། བདག་གིས་ཁྱིམ་རྒུད་པར་གྱུར་པ་འདི་ཅི་ལས་གྱུར་པ་འཚལ་མོད་ཀྱི། འོན་ཀྱང་བདག་གིས་ཇི་ལྟར་རྗེ་དག་ལ་བསྔགས་པ་མ་ལགས་པ་བརྗོད་པར་བགྱིར་རུང ། ཉེ་དགས་དེ་ཚོར་ནས་ཁྱིམ་བདག་དེ་དང་ཁྱིམ་བདག་གི་ཆུང་མ་དེའི་གན་དུ་སོང་སྟེ། ཅི་ནས་ཀྱང་དེ་གཉིས་སྐྱབས་སུ་འགྲོ་བ་དང་བསླབ་པའི་གཞི་དག་ལ་གནས་པར་འགྱུར་བ་དེ་ལྟ་དེ་ལྟར་ཚུལ
6.112b
ཁྲིམས་ཀྱི་བསྔགས་པ་བརྗོད་ཅིང་ཚུལ་ཁྲིམས་འཆལ་བའི་བསྔགས་པ་མ་ཡིན་པ་བརྗོད་ནས། དེས་དེ་གཉིས་སྐྱབས་སུ་འགྲོ་བ་དང་བསླབ་པའི་གཞི་དག་ལ་གནས་པར་བྱས་སོ། །ཁྱིམ་བདག་དེ་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་པས་ཡང་བུ་མོ་དེ་ལ་བརྡེག་པར་བརྩམས་པ་དང ། ཆུང་མས་དེ་ལ་སྨྲས་པ། རྗེའི་སྲས་གང་གི་ཚེ་བདག་ཅག་ལས་དང་ལས་ཀྱི་རྣམ་པར་སྨིན་པ་མི་མཁྱེན་པ་དེའི་ཚེ་གོ་རྡེག་པར་མཛད་མོད། ད་བདག་ཅག་དགེ་བའི་བཤེས་གཉེན་འཕགས་པ་ཉེ་དགའ་ལ་བརྟེན་ནས་ལས་དང་ལས་ཀྱི་རྣམ་པར་སྨིན་པ་མཁྱེན་པས་འདི་ལྟར་འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་པ་ལགས་པས་སུ་ཞིག་སུའི་བྲན་ལགས། བུ་མོ་འདི་ལ་རྡེག་པར་མ་མཛད་ཅིག་།བཟང་མོ་ཁྱོད་ཟེར་བ་མ་ཉེས་སོ། །བུ་མོ་ཚུར་ཤོག་།ཁྲུས་གྱིས་ལ་ཤོག་ཤིག་།བུ་མོ་དེ་ཁྲུས་བྱས་ཏེ་འོངས་པ་དང་དེས་དེ་ལ་གོས་ཕྲུགས་ཅིག་བསྐོན་ནས་སྨྲས་པ། བུ་མོ་དགའ་ཞིང་ལས་བྱོས་ཤིག་།བུ་མོ་དེས་བསམས་པ། ཁྱིམ་བདག་ཁྱོ་ཤུག་འདི་སྔོན་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་ཏེ། ཡང་དང་ཡང་དུ་བདག་ལ་ཁུ་ཚུར་དང ། ཐལ་ལྕག་དག་གིས་རྡེག་པར་བྱེད་ཅིང ། ཟས་དང་གོས་ངན་པ་དག་སྦྱིན་པར་བྱེད་ན། ད་འདི་བདག་གི་ཕ་མ་དང་འདྲ་བར་གྱུར་ཏོ་སྙམ་ནས། ཡང་བསམས་པ། གང་ཚུན་ཆད་ནས་འཕགས་པ་ཉེ་དགའ་ཁྱིམ་དུ་འཇུག་པར་བརྩམས་པ་དེ་ཚུན་ཆད་ནས་ཁྱིམ་བདག་འདི་ཕ་མ་དང་འདྲ་བར་གྱུར་པས་བདག་གིས་འཕགས་པ་ཉེ་དགའ་ལ་ཅི་ཞིག་གི་དགའ་བར་བྱ་སྙམ་ནས་དེས་བསམས་པ། གལ་ཏེ་བདག་གིས་འདི་ལ་ཅུང་ཞིག་བརྐུས་ཏེ་དབུལ་དུ་ནི་ཁྱིམ་བདག་འདིས་བདག་བརྡེག་བཙོག་མང་པོ་བྱས་ཏེ་སྔོན་གྱི་གནས་སུ་བཞག་པར་འགྱུར་རོ་སྙམ་ནས་དེ་སྡོད་ཅིང་འདུག་གོ། །ཁྱིམ་བདག་གི་ཆུང་མ་དེས་ཁྱིམ་བདག་དེ་ལ་སྨྲས་པ། རྗེའི་སྲས་མཁྱེན་པར
6.113a
མཛོད་ཅིག་།འཕགས་པ་ཉེ་དགའ་ནི་བདག་ཅག་གི་དགེ་བའི་བཤེས་གཉེན་ལགས་ཏེ། འཕགས་པ་ཉེ་དགས་བདག་ཅག་ལས་དྲི་མ་ཅན་དང་ཕྲལ་ནས་སྐྱབས་སུ་འགྲོ་བ་དང་བསླབ་པའི་གཞི་དག་ལ་བཀོད་དེ། ཡང་དང་ཡང་དུ་བདག་ཅག་ལ་ཆོས་ཀྱིས་སྡུད་པར་བྱེད་པས་བདག་ཅག་གིས་ཀྱང་དེ་ལ་ཟང་ཟིང་ཅུང་ཟད་ཀྱིས་བསྡུ་བར་བགྱིའོ། །བཟང་མོ་དེ་བཞིན་བྱའོ། །ཅི་ཞིག་བགྱི། དེ་ལ་རས་ཡུག་ཆེན་ཅིག་དབུལ་བར་བྱའོ། །བུ་མོ་དེས་དེ་ཐོས་ནས་བསམས་པ། བདག་གིས་འཕགས་པ་ཉེ་དགའ་ལ་དགའ་བ་དེ་སྦྲན་པར་བྱའོ་སྙམ་མོ། །ཉེ་དགའ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ཏེ་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང ། བུ་མོ་དེས་ཁྱིམ་ལེགས་པར་བྱུགས་ཤིང་ཕྱག་དར་བོར་ནས་དེས་ཉེ་དགའ་མཐོང་བ་དང་རྐང་པ་གཉིས་ལ་ཕྱག་འཚལ་ཏེ་སྨྲས་པ། བདག་གིས་འཕགས་པ་ཉེ་དགའ་ལ་དགྱེས་པ་སྦྲན་པར་བགྱིའོ། །ཁྱིམ་བདག་འདི་ཁྱོད་ལ་རས་ཡུག་ཆེན་འབུལ་བར་འགྱུར་རོ། །ཉེ་དགས་བསམས་པ། སའི་སྟེང་ན་འདོད་པའི་བདག་ཉིད་ཅན་གང་ཇི་སྙེད་པ་དེ་དག་དང་བདག་མཉམ་པར་དེང་བུ་མོ་འདིས་ཀྱང་འཕྲིགས་སོ་སྙམ་ནས་དེས་གཤེ་སྟེ་སྨྲས་པ། བུ་མོ་གལ་ཏེ་བདེན་པར་གྱུར་ན་ནི་ངས་ཁྱོད་ལ་གཤེ་བ་དག་ལ་ཆུགས་མ་བྱའོ། །ཇི་སྟེ་བརྫུན་པར་གྱུར་ན་ནི་བརྡེག་བཙོག་མང་པོ་བྱེད་དུ་བཅུག་སྟེ་སྔོན་གྱི་གནས་ཇི་ལྟ་བར་གཞག་པར་བྱའོ། །འཕགས་པ་སྤྱོ་བ་མང་དུ་མཛད་ན་བཞུད་ཅིག་དང་ཁྱོད་ཉིད་ཀྱིས་མཁྱེན་པར་འགྱུར་རོ། །དེ་བཞུད་ནས་སྟན་བཤམས་པ་ཉིད་ལ་འདུག་པ་དང ། ཁྱིམ་བདག་དེ་ཆུང་མ་དང་བཅས་པས་རྐང་པ་ལ་ཕྱག་འཚལ་ཏེ་སྟན་ཆེས་དམའ་བ་བླངས་ནས་ཆོས་མཉན་པའི་ཕྱིར་མདུན་དུ་འདུག་གོ། །ཉེ་དགས་སྨྲས་པ། ཁྱིམ་བདག་ཁོ་བོ་ལ་བསྐོན་པར་བྱ་བའི་རས་ཡུག་ཆེན་གང་ཡིན་པ་དེ་བལྟའོ། །དེ་གཉིས་ཀྱིས་ཕན་ཚུན་གདོང་དུ་བལྟ་བར་བརྩམས་ཏེ་འདི་སྐད་ཅེས་སྨྲས་སོ། །འཕགས་པ་བདག་ཅག་གིས་གསང་སྟེ་སྨྲས་པ་དེ་འཕགས་པ་ལ་སུས་བགྱིས། ཅི་འཕགས་
6.113b
པས་གཞན་གྱི་སེམས་ཀྱང་མཁྱེན་ནམ། ཉེ་དགས་སྨྲས་པ། ཁོ་བོ་ལྷུང་བཟེད་དུ་ཟོས་ཤིང་སོ་ལྷགས་པ་དང ། སྐྲ་དཀར་པོར་གྱུར་པ་ཡིན་ན་ཁོ་བོ་ལ་དེ་ཙམ་ཡང་མི་སྲིད་དམ། ཁྱིམ་བདག་དེས་རས་ཡུག་ཆེན་དེ་བླངས་ཏེ་ཉེ་དགའ་ལ་ཕུལ་བ་དང ། ཉེ་དགས་རས་ཡུག་ཆེན་དེ་མཐོང་ནས་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་དོ། །ཁྱིམ་བདག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད་ཞལ་སྒྱུར་བར་མཛད། ཉེ་དགས་སྨྲས་པ། ཁྱིམ་བདག་འདི་ནི་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་ནི་ཡོད་ན་ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་མེད་དེ། རས་ཡུག་ཆེན་འདི་ནི་མཆིལ་ལྷམ་ཕྱི་བ་འམ། སྐར་ཁུང་ཀླན་པར་རུང་སྟེ། འདི་ནི་ཆོས་གོས་ཀྱི་གདོང་ལ་ཡོངས་སུ་ཟད་པ་དང་མཐར་ཐུག་པར་འགྱུར་རོ། །འོ་ན་ཇི་ལྟར་བགྱི། རས་ཡུག་ཆེན་བཟང་པོ་གཞན་བྱིན་ཅིག་།རས་ཡུག་ཆེན་གཞན་མ་མཆིས་སོ། །ཚོངས་འདུས་ནས་ཉོས་ཏེ་བྱིན་ཅིག་རིན་མ་མཆིས་སོ། །དུས་ཐོབ་ལ་བྱིན་ཅིག་།ཁྱིམ་བདག་དེས་ཆུང་མའི་གདོང་དུ་བལྟ་བར་བརྩམས་པ་དང ། ཆུང་མས་སྨྲས་པ། རྗེའི་སྲས་བདག་ཅག་ལ་འཕགས་པ་ཉེ་དགས་ཕན་བཏགས་ཀྱིས་རས་ཡུག་ཆེན་མཇོལ་ལ་དེ་ལ་ཕུལ་ཅིག་།ཁྱིམ་བདག་དེ་ཉེ་དགའ་དང་ལྷན་ཅིག་སྲང་དུ་སོང་ནས། ཚོང་ཁང་དུ་ཕྱིན་པ་དང ། ཉེ་དགས་བསམས་པ། ཚོང་པ་འདི་ང་རྒྱལ་བསྐྱེད་པར་བྱ་སྟེ། དེས་ན་རས་ཡུག་ཆེན་བཟང་པོ་སྟེར་བར་འགྱུར་རོ། །སྙམ་ནས་ཉེ་དགས་ཁྱིམ་བདག་ལ་སྨྲས་པ། ཁྱིམ་བདག་ཚོང་པ་འདི་ནི་གཅམ་བུ་ཞིག་ཡིན་པས་འདི་ལ་རས་ཡུག་ཆེན་བཟང་པོ་མེད་ཀྱིས་གཞན་དུ་འདོང་ངོ ། །ཚོང་པ་དེས་དེ་ཐོས་ནས་དེས་ཆེན་པོ་ལ་འོས་པའི་རས་ཡུག་ཆེན་བསྟན་ཏེ་སྨྲས་པ། འཕགས་པ་རས་ཡུག་ཆེན་ལ་གཟིགས། རས་ཡུག་ཆེན་འདི་ནི་བཟང་ན་འདི་རིན་ཇི་ཙམ་འདི་དང་འདི་ཙམ་མོ། །ཁྱིམ་བདག་འདི་མཇལ་ལོ། །ཁྱིམ་བདག་མཇལ་ལམ་མཇལ་ལོ། །དུས་ཇི་ཙམ་ན། དུས་འདི་ཙམ་ནའོ། །ཚོང་པ་དེས་ཁྱིམ
6.114a
བདག་དེ་ལ་རས་ཡུག་ཆེན་དེ་བྱིན་ནས་ཁྱིམ་བདག་དེས་ཉེ་དགའ་ལ་ཕུལ་བ་དང ། ཉེ་དགའ་ཁྱིམ་བདག་ཨ་རོག་ཁྱ་ཞེས་སྨྲས་ནས། ཁྱོད་སྦྱིན་པ་འདིས་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་ཏེ་སོང་ངོ ། །ཁྱིམ་བདག་དེ་ལོངས་སྤྱོད་སྲབས་ནས། དེས་རིན་དེ་དུས་དེ་ཙམ་གྱིས་འབུལ་བར་མ་ནུས་ནས། ཚོང་པ་དེས་ཁྱིམ་བདག་དེ་ཉི་མ་ལ་བཏགས་པ་དང་དེ་ཆུང་པོ་གྲོགས་དག་གིས་མཐོང་ནས་སྨྲས་པ། ཅི་ཁྱོད་ཞུན་མར་འཐུངས་སམ། འོན་ཏེ་རིམས་ཀྱིས་བཏབ། བུ་ལོན་པས་བཟུང་སྟེ་འདུག་གོ། །ཁྱོད་ཀྱི་ཕས་ཀྱང་བུ་ལོན་པ་ཡོད་པར་མ་བྱས། མེས་པོ་དག་གིས་ཀྱང་མ་བྱས་ན་བུ་ལོན་པ་ག་ལས་བྱུང ། དེས་སྨྲས་པ། གང་དག་ཤཱཀྱའི་བུའི་དགེ་སྦྱོང་དག་ལ་དད་པར་བྱེད་པ་དེ་དག་འདི་ལྟར་འགྱུར་ཏེ། འདི་ལྟར་གང་བྱིན་པ་དེ་མི་ལེན་པར་ལྷག་པར་སློང་བར་བྱེད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་གང་བྱིན་པས་མི་མགུ་ཞིང་ལྷག་པ་སློང་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས
6.114b
རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གི་ཕྱིར་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་དག་སྤགས་ནས་བདག་གི་གོས་ཀྱི་རིན་འདི་དག་གིས་གོས་འདི་དང་འདི་ལྟ་བུ་ཞིག་ཉོས་ལ་དགེ་སློང་མིང་འདི་ཞེས་བྱ་བ་འོངས་པ་དང་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས། དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་སྟེ། བཟང་པོ་འདོད་པའི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་དེའི་གན་དུ་སོང་ནས་འདི་སྐད་ཅེས་ཚེ་དང་ལྡན་པས་བདག་གི་ཕྱིར་གོས་ཀྱི་རིན་གང་དག་སྤགས་པའི་གོས་ཀྱི་རིན་དེ་དག་གིས་ཚེ་དང་ལྡན་པ་གོས་འདི་དང་འདི་ལྟ་བུ་ཞིག་ཉོས་ལ་བདག་ལ་གོས་རུང་བ་དུས་སུ་ལེགས་པར་བསྐོན་ཅིག་ཅེས་སྨྲས་ཏེ་གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །ཁྱིམ་བདག་གམ་ཞེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པས་ཤེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་ཀྱི་རིན་དག་ཅེས་བྱ་བ་ནི་གསེར་རམ་དངུལ་ལོ། །གོས་འདི་དང་འདི་ལྟ་བུ་ཞིག་ཅེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། །ཉོས་ལ་ཞེས་བྱ་བ་ནི་ཉོས་ཏེའོ། །དགེ་སློང་མིང་འདི་ཞེས་བྱ་བ་འོང ། དང་ཞེས་བྱ་བ་ནི་ཤཱཀྱའི་བུ་ཉེ་དགའོས་པ་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས་ཤེས་བྱ་བ་ནི་ལོངས་སྤྱད་པར་བཟོད་པའོ། །དེ་ནི་གལ་ཏེ་དགེ་སློང་དེ་ལ་སྔར་མ་བསྟབས་པར་ཞེས་བྱ་བ་ནི་སྔར་འགྲོན་དུ་མ་བོས་པར་རོ། །རྣམ་པར་རྟོག་པ་འགའ་ཞིག་བྱུང་སྟེ་ཞེས་བྱ་བ་ནི་བསྙེན་བཀུར་བྱེད་པ་ཞིག་བྱུང་སྟེའོ། །བཟང་པོ་འདོད་པའི་ཕྱིར་ཞེས་བྱ་བ་ནི་རབ་དང་མཆོག་གི་ཕྱིར་རོ། །ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ
6.115a
མ་ཡིན་པ་དེའི་གན་དུ་སོང་ནས་ཞེས་བྱ་བ་ནི་དྲུང་དུ་སོང་ནས་སོ། །གོས་གྲུབ་ན་ཞེས་བྱ་བ་ནི་གོས་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང ། ཁ་དོག་དང ། ཁྲུ་ཚད་ལས་ཏེ། ཇི་ལྟར་རིན་ཐང་ལས་ཤེ་ན། དགེ་སློང་གིས་ཀཱར་ཤཱ་པ་ཎ་ལྔ་རི་བའི་གོས་ཐོབ་པ་ན་དེ་དེ་ལས་ལྷག་པར་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ཀཱར་ཤཱ་པ་ཎ་ལྔ་རི་བ་ཇི་ལྟ་བ་བཞིན་དུ་ཀཱར་ཤཱ་པ་ཎ་བཅུ་རི་བ་དང ། ཀཱར་ཤཱ་པ་ཎ་ཉི་ཤུ་རི་བ་དང་ཀཱར་ཤཱ་པ་ཎ་ལྔ་བཅུ་རི་བའི་བར་གྱི་གོས་ཐོབ་པ་ན། དེ་དེ་ལས་ལྷག་པ་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དེ་དེ་ལྟར་རིན་ཐང་ལས་སོ། །ཇི་ལྟར་ཁ་དོག་ལས་ཤེ་ན། དགེ་སློང་གིས་གོས་སྔོན་པོ་ཐོབ་པ་ན་དེ་དེ་ལས་ལྷག་པར་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །སྔོན་པོ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཐོབ་ན་དེ་དེ་ལས་ལྷག་པ་སློང་བ་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། དེ་ལྟར་ཁ་དོག་ལས་སོ། །ཇི་ལྟར་ཁྲུ་ཚད་ལས་ཤེ་ན། དགེ་སློང་གིས་གོས་ཁྲུ་ལྔ་པ་ཐོབ་པ་ན་དེ་དེ་ལས་ལྷག་པ་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང ། ཁྲུ་ཉི་ཤུ་པ་དང ། ཁྲུ་ལྔ་བཅུ་པའི་བར་གྱི་གོས་ཐོབ་ན་དེ་དེ་ལས་ལྷག་པ་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་ཏེ། དེ་ལྟར་ཁྲུ་ཚད་ལས་སོ། །དགེ་སློང་གི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང
6.115b
གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གི་གོས་སྤང་བར་གྱུར་ན་ཇི་སྲིད་དུ་དངོས་པོ་དེ་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཉེ་བར་འཇོག་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ཁ་ཚར་སློང་བ་ན་ལྷན་པ་ཐོབ་པ་དང ། ལྷན་པ་སློང་བ་ན་རས་ཡུག་ཕྲན་ནམ་རས་ཡུག་ཆེན་ཐོབ་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྤགས་པ་ལས་ལྷག་པ་སློང་བའི་སྤང་བ་སྟེ་བརྒྱད་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཁྱིམ་བདག་དེ་གཞན་གྱི་ཆུང་མ་ལ་ཆགས་པར་གྱུར་ནས་དེ་ལ་ཆུང་མས་རྗེའི་སྲས་དེ་ལྟར་མ་མཛད་ཅིག་ཅེས་ཕྱིར་བཟློག་ན། ཇི་ཙམ་དུ་དེ་ཕྱིར་བཟློག་ཀྱང་ཕྱིར་མ་ལོག་པ་དེ་ཙམ་དུ་དེའི་ཆུང་མ་དེ་ཡང་སྐྱེས་པ་གཞན་དག་དང་ལྷན་ཅིག་འཕྲུལ་བརྩོམ་པར་བྱེད་དོ། །ཁྱིམ་བདག་དེ་ཡང་བུད་མེད་གཞན་དག་ལ་སྦྱིན་པར་བྱེད་ལ། ཆུང་མ་དེ་ཡང་སྐྱེས་པ་གཞན་དག་ལ་སྦྱིན་པར་བྱེད་པས་དེ་ལྟར་ཁྱིམ་དེ་གཉིས་ཀ་ནས་རྒུད་པར་གྱུར་ནས། དེ་གཉིས་ལ་བུ་མོ་མངག་གཞུག་མ་ཞིག་ཡོད་ནས་ཁྱིམ་བདག་དེས་བུ་མོ་དེ་ལ་འདིས་ཁྱིམ་རྒུད་པར་བྱས་སོ་ཞེས་ཁུ་ཚུར
6.116a
དང་ཐལ་ལྕག་དག་གིས་བརྡེག་པར་བྱེད་དོ། །བུ་མོས་སྨྲས་པ། བདག་གིས་ཁྱིམ་རྒུད་པར་གྱུར་པ་འདི་ཅི་ལས་གྱུར་པ་འཚལ་མོད་ཀྱི། འོན་ཀྱང་བདག་གིས་ཇི་ལྟར་རྗེ་དག་ལ་བསྔགས་པ་མ་ལགས་པ་བརྗོད་པར་བགྱིར་རུང ། ཉེ་དགས་དེ་ཚོར་ནས་ཁྱིམ་བདག་དང ། ཁྱིམ་བདག་གི་ཆུང་མ་དེའི་གན་དུ་སོང་སྟེ། ཅི་ནས་ཀྱང་དེ་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་གནས་པར་འགྱུར་བ་དེ་ལྟ་དེ་ལྟར་ཚུལ་ཁྲིམས་ཀྱི་བསྔགས་པ་བརྗོད་ཅིང ། ཚུལ་ཁྲིམས་འཆལ་བའི་བསྔགས་པ་མ་ཡིན་པ་བརྗོད་ནས། དེས་དེ་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་གནས་པར་བྱས་སོ། །ཁྱིམ་བདག་དེ་གཏུམ་པ ། བརྟུན་ངས་པ། དྲག་ཤུལ་ཆེ་བ་ཡིན་པས་ཡང་བུ་མོ་དེ་ལ་བརྡེག་པར་བརྩམས་པ་དང ། ཆུང་མས་དེ་ལ་སྨྲས་པ། རྗེའི་སྲས་གང་གི་ཚེ་བདག་ཅག་ལས་དང་ལས་ཀྱི་རྣམ་པར་སྨིན་པ་མི་མཁྱེན་པ་དེའི་ཚེ་གོ་རྡེག་པར་མཛད་མོད། ད་བདག་ཅག་དགེ་བའི་བཤེས་གཉེན་འཕགས་པ་ཉེ་དགའ་ལ་བརྟེན་ནས་ལས་དང་ལས་ཀྱི་རྣམ་པར་སྨིན་པ་མཁྱེན་པས་འདི་ལྟར་འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་པ་ལགས་པས་སུ་ཞིག་སུའི་བྲན་ལགས། བྲན་མོ་འདི་ལ་རྡེག་པར་མ་མཛད་ཅིག་།བཟང་མོ་ཁྱོད་ཟེར་བ་མ་ཉེས་སོ། །བུ་མོ་ཚུར་ཤོག་ཁྲུས་གྱིས་ལ་ཤོག་ཤིག་།བུ་མོ་དེས་ཁྲུས་བྱས་ཏེ་འོངས་པ་དང ། དེས་དེ་ལ་གོས་ཕྲུགས་ཅིག་བསྐོན་ནས་སྨྲས་པ། བུ་མོ་དགའ་ཞིང་ལས་བྱོས་ཤིག་།བུ་མོ་དེས་བསམས་པ། ཁྱིམ་བདག་ཁྱོ་ཤུག་འདི་སྔོན་གཏུམ་པ། བརྟུན་ངས་པ། དྲག་ཤུལ་ཅན་ཡིན་ཏེ། ཡང་དང་ཡང་དུ་བདག་ལ་ཁུ་ཚུར་དང ། ཐལ་ལྕག་དག་གིས་རྡེག་པར་བྱེད་ཅིང་ཟས་དང་གོས་ངན་པ་དག་སྦྱིན་པར་བྱེད་ན། ད་འདི་བདག་གི་ཕ་མ་དང་འདྲ་བར་གྱུར་ཏོ་སྙམ་ནས་ཡང་བསམས་པ། གང་ཚུན་ཆད་ནས་འཕགས་པ་ཉེ་དགའ་ཁྱིམ་འདིར་འཇུག་པར་བརྩམས་པ་དེ་ཚུན་ཆད་ནས་ཁྱིམ་བདག་འདི་ཕ་མ་དང་འདྲ་བར་གྱུར་པས། བདག་གིས་འཕགས་པ་ཉེ་དགའ་ལ་ཅི་ཞིག་གིས་དགའ་བར་བྱ་སྙམ་ནས་དེས་བསམས་པ
6.116b
གལ་ཏེ་བདག་གིས་འདི་ལས་ཅུང་ཞིག་བརྐུས་ཏེ་དབུལ་དུ་ནི་ཁྱིམ་བདག་འདིས་བརྡེག་བཙོག་མང་པོ་བྱས་ཏེ་སྔོན་གྱི་གནས་སུ་བཞག་པར་འགྱུར་རོ་སྙམ་ནས་དེ་སྡོད་ཅིང་འདུག་གོ། །ཁྱིམ་བདག་གི་ཆུང་མ་དེས་ཁྱིམ་བདག་དེ་ལ་སྨྲས་པ། རྗེའི་སྲས་མཁྱེན་པར་མཛོད་ཅིག་།འཕགས་པ་ཉེ་དགའ་ནི་བདག་ཅག་གི་དགེ་བའི་བཤེས་གཉེན་ལགས་ཏེ། འཕགས་པ་ཉེ་དགས་བདག་ཅག་ལས་དྲི་མ་ཅན་དང་ཕྲལ་ནས་སྐྱབས་སུ་འགྲོ་བ་དང ། བསླབ་བའི་གཞི་དག་ལ་བཀོད་དེ། ཡང་དང་ཡང་དུ་བདག་ཅག་ལ་ཆོས་ཀྱིས་སྡུད་པར་བྱེད་པས་བདག་ཅག་གིས་ཀྱང་དེ་ལ་ཟང་ཟིང་ཅུང་ཟད་ཀྱིས་བསྡུ་བར་བགྱིའོ། །བཟང་མོ་དེ་བཞིན་བྱའོ། །ཅི་ཞིག་བགྱི། དེ་ལ་བདག་ཅག་སོ་སོ་ནས་རས་ཡུག་ཆེན་དབུལ་བར་བྱའོ། །བུ་མོ་དེས་དེ་ཐོས་ནས་བསམས་པ། བདག་གིས་འཕགས་པ་ཉེ་དགའ་ལ་དགའ་བ་དེ་སྦྲན་པར་བྱའོ་སྙམ་མོ། །ཉེ་དགའ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ཏེ་མཐར་གྱིས་བསོད་སྙོམས་རྒྱུ་བ་ན་ཁྱིམ་དེར་ཞུགས་པ་དང ། བུ་མོ་དེས་ཁྱིམ་དག་ལེགས་པར་བྱུགས་ཤིང་ཕྱག་དར་བོར་ནས་དེས་ཉེ་དགའ་མཐོང་བ་དང་རྐང་པ་གཉིས་ལ་ཕྱག་འཚལ་ཏེ་སྨྲས་པ། བདག་གིས་འཕགས་པ་ཉེ་དགའ་ལ་དགྱེས་པ་སྦྲན་པར་བགྱིའོ། །ཁྱིམ་བདག་དང་ཁྱིམ་བདག་གི་ཆུང་མ་འདི་ཁྱོད་ལ་སོ་སོ་ནས་རས་ཡུག་ཆེན་འབུལ་བར་འགྱུར་རོ། །ཉེ་དགས་བསམས་པ། སའི་སྟེང་ན་འདོད་པའི་བདག་ཉིད་ཅན་གང་ཇི་སྙེད་པ་དེ་དག་དང་བདག་མཉམ་པར་དེང་བུ་མོ་འདིས་ཀྱང་འཕྲིགས་སོ་སྙམ་ནས་དེས་གཤེས་ཏེ་སྨྲས་པ། བུ་མོ་གལ་ཏེ་བདེན་པར་གྱུར་ན་ནི་དེས་ཁྱོད་ལ་གཤེ་བ་དག་ལ་ཆུགས་མ་བྱའོ། །ཇི་སྟེ་བརྫུན་པར་གྱུར་ན་ནི་བརྡེག་བཙོག་མང་པོ་བྱེད་དུ་བཅུག་སྟེ་སྔོན་གྱི་གནས་ཇི་ལྟ་བར་གཞག་པར་བྱའོ། །འཕགས་པ་སྤྱོ་བ་མང་དུ་མཛད་ན་བཞུད་ཅིག་དང་ཁྱོད་ཉིད་ཀྱིས་མཁྱེན་པར་འགྱུར་རོ། །དེ་ཞུགས་ནས
6.117a
སྟན་བཤམས་པ་ཉིད་ལ་འདུག་པ་དང་ཁྱིམ་བདག་དེ་ཆུང་མ་དང་བཅས་པས་རྐང་པ་ལ་ཕྱག་འཚལ་ཏེ་སྟན་ཆེས་དམའ་བ་བླངས་ནས་ཆོས་མཉན་པའི་ཕྱིར་མདུན་དུ་འདུག་གོ། །ཉེ་དགས་སྨྲས་པ། ཁྱིམ་བདག་ཁོ་བོ་ལ་སོ་སོ་ནས་རས་ཡུག་ཆེན་སྦྱིན་པར་བྱས་པ་དེ་བལྟའོ། །དེ་གཉིས་ཀྱིས་ཕན་ཚུན་གདོང་དུ་བལྟ་བར་བརྩམས་ཏེ་འདི་སྐད་ཅེས་ཀྱང་སྨྲས་སོ། །འཕགས་པ་བདག་ཅག་གིས་གསང་སྟེ་སྨྲས་པ་དེ་འཕགས་པ་ལ་སུས་བགྱིས། ཅི་འཕགས་པས་གཞན་གྱི་སེམས་ཀྱང་མཁྱེན་ནམ། ཉེ་དགས་སྨྲས་པ། ཁོ་བོ་ལྷུང་བཟེད་དུ་ཟོས་ཤིང་སོ་ལྷགས་པ་དང ། སྐྲ་དཀར་པོར་གྱུར་པ་ཡིན་ན་ཁོ་བོ་ལ་དེ་ཙམ་ཡང་མི་སྲིད་དམ། ཁྱིམ་བདག་དང་ཆུང་མས་སོ་སོ་ནས་རས་ཡུག་ཆེན་བླངས་ཏེ་ཉེ་དགའ་ལ་ཕུལ་བ་དང་ཉེ་དགས་རས་ཡུག་ཆེན་དེ་དག་མཐོང་ནས་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་དོ། །ཁྱིམ་བདག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད། ཞལ་སྒྱུར་བར་མཛད། ཉེ་དགས་སྨྲས་པ། ཁྱིམ་བདག་འདི་དག་ནི་ཁྱེད་ལ་ཡོངས་སུ་བཏང་བ་ལས་བྱུང་བའི་བསོད་ནམས་ནི་ཡོད་ན་ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་མེད་དེ་རས་ཡུག་ཆེན་འདི་དག་ནི་མཆིལ་ལྷམ་ཕྱི་བ་འམ། སྐར་ཁུང་ཀླན་པར་རུང་སྟེ། འདི་དག་ནི་ཆོས་གོས་ཀྱི་གདང་ལ་ཡོངས་སུ་ཟད་པ་དང་མཐར་ཐུག་པར་འགྱུར་རོ། །འོ་ན་ཇི་ལྟར་བགྱི་རས་ཡུག་ཆེན་བཟང་པོ་གཞན་དག་བྱིན་ཅིག་།རས་ཡུག་ཆེན་དག་མ་མཆིས་སོ། །ཚོང་དུས་ནས་ཉོས་ཏེ་བྱིན་ཅིག་།རིན་དག་མ་མཆིས་སོ། །དུས་ཐོབ་ལ་བྱིན་ཅིག་།ཁྱིམ་བདག་དེས་ཆུང་མའི་གདོང་དུ་བལྟ་བར་བརྩམས་པ་དང ། ཆུང་མས་སྨྲས་པ། རྗེའི་སྲས་བདག་ཅག་ལ་འཕགས་པ་ཉེ་དགས་ཕན་བཏགས་ཀྱིས་རས་ཡུག་ཆེན་དག་མཇལ་ལ་དེ་ལ་ཕུལ་ཅིག་།ཁྱིམ་བདག་དེ་ཉེ་དགའ་དང་ལྷན་ཅིག་སྲང་དུ་སོང་ནས་ཚོང་ཁང་དུ་ཕྱིན་པ་དང་ཉེ་དགས་བསམས་པ། ཚོང་པ་འདི་ང་རྒྱལ་བསྐྱེད་པར་བྱ་སྟེ། དེས་ན་རས་ཡུག་ཆེན་བཟང་པོ་སྟེར་བར་འགྱུར་རོ། །སྙམ་ནས་ཉེ་དགས་ཁྱིམ་བདག་ལ་སྨྲས་པ།
6.117b
ཁྱིམ་བདག་ཚོང་པ་འདི་ནི་གཅམ་བུ་ཞིག་ཡིན་པས་འདི་ལ་རས་ཡུག་ཆེན་བཟང་པོ་མེད་ཀྱིས་གཞན་དུ་འདོང་ངོ ། །ཚོང་པ་དེས་དེ་ཐོས་ནས་དེས་ཆེན་པོ་ལ་འོས་པའི་རས་ཡུག་ཆེན་བསྟན་ཏེ་སྨྲས་པ། འཕགས་པ་རས་ཡུག་ཆེན་ལ་གཟིགས། རས་ཡུག་ཆེན་འདི་ནི་བཟང་ན་འདིའི་རིན་ཇི་ཙམ། འདི་དང་འདི་ཙམ་མོ། །ཁྱིམ་བདག་འདི་མཇལ་ལོ། །ཁྱིམ་བདག་མཇལ་ལམ། མཇལ་ལོ། །དུས་ཇི་ཙམ་ན་དུས་འདི་ཙམ་ནའོ། །ཚོང་པ་དེས་ཁྱིམ་བདག་དེ་ལ་རས་ཡུག་ཆེན་དེ་བྱིན་ནས་ཁྱིམ་བདག་དེས་ཉེ་དགའ་ལ་ཕུལ་བ་དང ། ཉེ་དགས་ཁྱིམ་བདག་ཨ་རོག་ཁྱ་ཞེས་སྨྲས་ནས་ཁྱོད་སྦྱིན་པ་འདིས་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་ཏེ་སོང་ངོ ། །ཁྱིམ་བདག་དེ་ལོངས་སྤྱོད་སྲབས་ནས་དེས་རིན་དེ་དུས་དེ་ཙམ་གྱིས་འབུལ་བར་མ་ནུས་ནས་ཚོང་པ་དེས་ཁྱིམ་བདག་དེ་ཉི་མ་ལ་བཏགས་པ་དང ། དེ་ཆུང་པོ་གྲོགས་དག་གིས་མཐོང་ནས་སྨྲས་པ། ཅི་ཁྱོད་ཞུན་མར་འཐུངས་སམ། འོན་ཏེ་རིམས་ཀྱིས་བཏབ། བུ་ལོན་པས་བཟུང་སྟེ་འདུག་གོ། །ཁྱོད་ཀྱི་ཕས་ཀྱང་བུ་ལོན་དག་ཡོད་པར་མ་བྱས། མེས་པོ་དག་གིས་ཀྱང་མ་བྱས་ན་བུ་ལོན་པ་ག་ལས་བྱུང་དེས་སྨྲས་པ། གང་དག་ཤཱཀྱའི་བུའི་དགེ་སྦྱོང་དག་ལ་དད་པར་བྱེད་པ་དེ་དག་འདི་ལྟར་འགྱུར་ཏེ། འདི་ལྟར་གང་བྱིན་པ་དེ་མི་ལེན་པར་ལྷག་པ་སློང་བར་བྱེད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་གང་བྱིན་པས་མི་མགུ་ཞིང་ལྷག་པ་སློང་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས
6.118a
དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གི་ཕྱིར་ཁྱིམ་བདག་དང ། ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་སོ་སོ་བ་དག་སྤགས་ནས་བདག་ཅག་གཉིས་ཀྱིས་གོས་ཀྱི་རིན་སོ་སོ་བ་འདི་དག་གིས་གོས་འདི་དང་འདི་ལྟ་བུ་སོ་སོ་བ་དག་ཉོས་ལ་དགེ་སློང་མིང་འདི་ཞེས་བྱ་བ་འོངས་དང་བདག་ཅག་གཉིས་ཀྱིས་སོ་སོ་ནས་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས། དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་སྟེ། བཟང་པོ་འདོད་པའི་ཕྱིར་ཁྱིམ་བདག་དང་ཁྱིམ་བདག་གི་ཆུང་མ་ཉེ་དུ་མ་ཡིན་པ་དེ་དག་གི་གན་དུ་སོང་ནས་འདི་སྐད་ཅེས་ཚེ་དང་ལྡན་པ་དག་གིས་བདག་གི་ཕྱིར་གོས་ཀྱི་རིན་སོ་སོ་བ་གང་དག་སྤགས་པའི་གོས་ཀྱི་རིན་སོ་སོ་བ་དེ་དག་གིས་ཚེ་དང་ལྡན་པ་དག་གོས་འདི་དང་འདི་ལྟ་བུ་སོ་སོ་བ་དག་ཉོས་ལ་གཉི་ག་འདུས་ཏེ་བདག་ལ་གོས་རུང་བ་ཅིག་དུས་སུ་ལེགས་པར་སྐོན་ཅིག་ཅེས་སྨྲས་ཏེ་གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པ་འོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པས་ཤེས་བྱ་བ་ནི་ཕྱི་མོ་དང་མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ནོ། །གོས་ཀྱི་རིན་ཅེས་བྱ་བ་ནི་གསེར་རམ། དངུལ་ལོ། །གོས་འདི་དང་འདི་ལྟ་བུ་ཞིག་ཅེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས
6.118b
དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། །ཉོས་ལ་ཞེས་བྱ་བ་ནི་ཉོས་ཏེའོ། །དགེ་སློང་མིང་འདི་ཞེས་བྱ་བ་འོངས་དང་ཞེས་བྱ་བ་ནི་ཤཱཀྱའི་བུ་ཉེ་དགའོ། །དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས་ཞེས་བྱ་བ་ནི་ལོངས་སྤྱད་པར་བཟོད་པའོ། །དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་ཞེས་བྱ་བ་ནི་སྔར་འགྲོན་དུ་མ་བོས་པར་རོ། །རྣམ་པར་རྟོག་པ་འགའ་ཞིག་བྱུང་སྟེ་ཞེས་བྱ་ནི་བསྙེན་བཀུར་བྱེད་པ་ཞིག་བྱུང་སྟེའོ། །བཟང་པོ་འདོད་པའི་ཕྱིར་ཞེས་བྱ་བ་ནི་རབ་དང་མཆོག་གི་ཕྱིར་རོ། །ཁྱིམ་བདག་དང་ཁྱིམ་བདག་གི་ཆུང་མ་ཉེ་དུ་མ་ཡིན་པ་དེ་དག་གི་གན་དུ་སོང་ནས་ཤེས་བྱ་བ་ནི་དྲུང་དུ་སོང་ནས་སོ། །གཉི་ག་འདུས་ཏེ་ཞེས་བྱ་བ་ནི་གཉི་ག་ཚོགས་ཏེ་འོ། །གོས་གྲུབ་ན་ཞེས་བྱ་བ་ནི་གོས་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང ། ཁ་དོག་དང ། ཁྲུ་ཚད་ལས་ཏེ་ཇི་ལྟར་རིན་ཐང་ལས་ཤེ་ན། དགེ་སློང་གིས་ཀཱར་ཤཱ་པ་ཎ་ལྔ་རི་བའི་གོས་ཐོབ་པ་ན་དེ་དེ་ལས་ལྷག་པ་སློང་ན་ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ཀཱར་ཥཱ་པ་ཎ་ལྔ་རི་བ་ཇི་ལྟ་བ་དེ་བཞིན་དུ་ཀཱར་ཥཱ་པ་ཎ་བཅུ་རི་བ་དང ། ཀཱར་ཥཱ་པ་ཎ་ཉི་ཤུ་རི་བ་དང ། ཀཱར་ཥཱ་པ་ཎ་ལྔ་བཅུ་རི་བའི་བར་གྱི་གོས་ཐོབ་པ་ན་དེ་དེ་ལས་ལྷག་པ་སློང་ན་ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །དེ་ལྟར་རིན་ཐང་ལས་སོ། །ཇི་ལྟར་ཁ་དོག་ལས་ཤེ་ན། དགེ་སློང་གིས་གོས་སྔོན་པོ་ཐོབ་པ་ན་དེ་དེ་ལས་ལྷག་པ་སློང་ན་ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །གོས་སྔོན
6.119a
པོ་ལ་ཇི་ལྟ་བ་དེ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ཐོབ་པ་ན་དེ་དེ་ལས་ལྷག་པ་སློང་ན་ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། དེ་ལྟར་ཁ་དོག་ལས་སོ། །ཇི་ལྟར་ཁྲུ་ཚད་ལས་ཤེ་ན། དགེ་སློང་གི་གོས་ཁྲུ་ལྔ་པ་ཐོབ་པ་ན་དེ་དེ་ལས་ལྷག་པ་སློང་ན་ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང ། ཁྲུ་ཉི་ཤུ་པ་དང ། ཁྲུ་ལྔ་བཅུ་པའི་བར་གྱི་གོས་ཐོབ་ན་དེ་དེ་ལས་ལྷག་པ་སློང་ན་ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་ཏེ། དེ་ལྟར་ཁྲུ་ཚད་ལས་སོ། །དགེ་སློང་གི་གོས་དག་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན། དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན། དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གི་གོས་སྤང་བར་གྱུར་ན་ཇི་སྲིད་དུ་དངོས་པོ་དེ་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་དང ། སྐ་རགས་སམ། དགེ་སློང་གི་འཚོ་བའི་ཡོ་བྱད་གང་ཡང་རུང་བ་ཉེ་བར་འཇོག་ན། དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ཁ་ཚར་སློང་བ་ན་ལྷན་པ་ཐོབ་པ་དང ། ལྷན་པ་སློང་བ་ན་རས་ཡུག་ཕྲན་ནམ། རས་ཡུག་ཆེན་ཐོབ་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང
6.119b
ཚོར་བ་དག་གིས་ཉེན་པ་ལ་ལྟུང་བ་མེད་དོ། །སོ་སོ་ནས་སྤགས་པ་ལས་ལྷག་པ་སློང་བའི་སྤང་བ་སྟེ་དགུ་པ་རྫོགས་སྷོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་གཅིག་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །ཉེ་དགའ་ལ་བློ་སྐྱེས་པ་འདི་ཐམས་ཅད་ཁྱིམ་བདག་མགོན་མེད་ཟས་སྦྱིན་གྱིས་བསླབ་པའི་གཞི་དག་གིས་བསྡམ་པ་བྱས་པས་ཕྱིན་ཅད་རས་ཡུག་ཕྲན་སྒྲེ་བོ་ཡང་སུ་ལས་ཀྱང་བསླང་བར་མི་ནུས་ཀྱིས་འདི་ལྟར་བདག་དང་ལྷན་ཅིག་ཡི་གེའི་གཝ་ན་ཡིག་འབྲུའི་ཡི་གེ་དག་སློབ་སློབ་པ་བྲམ་ཟེ་དབྱར་ཚུལ་ཡོད་ཀྱིས་དེའི་གན་དུ་སོང་སྟེ་བལྟས་ན་དེ་ལས་ཅུང་ཟད་འཐོབ་ཀྱང་སྲིད་དོ་སྙམ་ནས་དེ་དེའི་ཁྱིམ་དུ་སོང་བ་དང ། སྒོ་བས་འཕགས་པ་མ་བཞུད་ཅིག་ཅེས་བགགས་སོ། །ཉེ་དགས་སྨྲས་པ། བཞིན་བཟངས་བཅོམ་ལྡན་འདས་ཀྱིས་བདག་ཅག་གི་སྤྱོད་ཡུལ་མ་ཡིན་པ་ནི་རྣམ་པ་ལྔ་གསུངས་ཏེ། རོལ་མོ་མཁན་གྱི་ཁྱིམ་དང ། འཇུད་འཐུན་མའི་ཁྱིམ་དང ། ཆང་པའི་ཁྱིམ་དང ། རྒྱལ་པོའི་ཕོ་བྲང་དང ། གདོལ་པའི་ཁྱིམ་ཡིན་ན། ཅི་འདི་རོལ་མོ་མཁན་གྱི་ཁྱིམ་འམ། འཇུད་འཐུན་མའི་ཁྱིམ་འམ། ཆང་པའི་ཁྱིམ་འམ། རྒྱལ་པོའི་ཕོ་བྲང་ངམ། གདོལ་པའི་གནས་ཡིན་ནམ། འཕགས་པ་ཁྱོད་སྤྱོ་བ་མང་དུ་མཛད་དེ། འདི་ནི་རོལ་མོ་མཁན་གྱི་ཁྱིམ་ཡང་མ་ལགས། འཇུད་འཐུན་མའི་ཁྱིམ་ཡང་མ་ལགས། ཆང་པའི་ཁྱིམ་ཡང་མ་ལགས། རྒྱལ་པོའི་ཕོ་བྲང་ཡང་མ་ལགས། གདོལ་པའི་གནས་ཀྱང་མ་ལགས་ཏེ། འདི་ལྟར་འདི་ནི་བྲམ་ཟེ་དབྱར་ཚུལ་གྱི་སྡུམ་པ་ལགས་སོ། །ཀཝའི་ནང་རྗེ་སོང་ལ་བྲམ་ཟེ་དབྱར་ཚུལ་ལ་ཉེ་དགའ་ཤེས་ལྡན་ལྟ་བར་འདོད་ཅིང་སྒོ་ན་སྡོད་དོ་ཞེས་གྱིས་ཤིག་།སྒོ་བས་སྨྲས་པ།
6.120a
ཁྱོད་རྒྱལ་པོ་གཟུགས་ཅན་སྙིང་པོའི་སྙིང་ཚོམས་མཆིས་པ་ལགས་སྙམ་མམ། བཀྲེན་པ་གལ་ཏེ་སྦྲོན་ན་ནི་སྦྲོན་ཅིག་།མི་སྦྲོན་ན་ཁྱོད་ལ་མཚམས་ཆེན་པོ་བཅད་པ་སྦྱིན་པར་བྱའོ། །སྒོ་བས་བསམས་པ ། འདི་ནི་འདི་ལྟར་འཇིགས་པ་མེད་པ་དང ། བག་ཚ་བ་མེད་པར་ཚིག་གཏོང་བ་ལས་ན་མ་སྦྲན་ན་གནོད་པ་བྱེད་ཀྱིས་སོང་ལ་སྦྲན་ནོ་སྙམ་ནས་དེ་དེར་སོང་སྟེ་སྨྲས་པ། ཇོ་བོ་བཙུན་པ་ཉེ་དགའ་ཇོ་བོ་ལྟ་བར་འཚལ་ཞིང་ཆབ་སྒོ་ན་སྡོད་དོ། །དབྱར་ཚུལ་གྱིས་སྨྲས་པ། བཙུན་པ་ཉེ་དགའ་ལ་སུ་འགོག་།བཙུན་པ་ཉེ་དགའ་འཇུག་ཏུ་ཆུག་ཤིག་།ཉེ་དགའ་ཞུགས་པ་དང ། དབྱར་ཚུལ་གྱིས་སྨྲས་པ། བཙུན་པ་ཉེ་དགའ་བྱོན་པ་ལེགས་སོ། །བྱོན་པ་ལེགས་སོ། །བཙུན་པ་ཉེ་དགའ་གདན་བཤམས་པ་ཉིད་ལ་བཞུགས་ཤིག་།ཉེ་དགའ་དེའི་མདུན་དུ་འདུག་སྟེ་དེར་སྒྲ་མཐོན་པོ་དང་སྒྲ་ཡིད་དུ་འོང་བ་དང ། སྒྲ་ཟབ་མོས་སྦྱིན་པའི་བསྔགས་པ་བརྗོད་པར་བརྩམས་སོ། །གང་གི་ཚེ་ཉེ་དགའ་ཡིད་དགའ་ཞིང་ཡིད་དགའ་ནས་སྦྱིན་པའི་བསྔགས་པ་རྗོད་པར་བྱེད་པ་དེའི་ཚེ་ན་བྲམ་ཟེ་དང ། ཁྱིམ་བདག་དད་པ་ཅན་དག་འདི་སྙམ་དུ་ཀྱེ་མ་རང་ཤ་དག་ཀྱང་བཅད་ཅིང་བཅད་ཅིང་སྦྱིན་པར་བྱའོ་སྙམ་དུ་སེམས་པས་བྲམ་ཟེ་དབྱར་ཚུལ་གྱིས་སྨྲས་པ། བཙུན་པ་ཉེ་དགའ་དབྱར་གནས་པ་ལ་ཀཱར་ཤཱ་པ་ཎ་དྲུག་བཅུ་འབུལ་ལོ། ། རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང་ལྷ་དང་མི་རྣམས་ཀྱི་ལོངས་སྤྱོད་ཀྱང་ཐོབ་པར་གྱུར་ཅིག་ཅེས་སྨྲས་ཏེ་སོང་ངོ ། །མཉན་ཡོད་ནས་དགེ་སློང་གཉིས་ཤིག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་རྒྱལ་པོའི་ཁབ་ཏུ་འོངས་སོ། །བཅོམ་ལྡན་འདས་ཀྱིས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ
6.120b
བོ་ཁྱོད་སོང་ལ་དགེ་སློང་རྣམས་ལ་དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱོད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱོད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་།དགེ་སློང་རྣམས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལ་མཉན་ཏོ། །མཉན་ཡོད་ནས་འོངས་པའི་དགེ་སློང་དེ་གཉིས་ཀྱིས་དེ་ཐོས་ནས་བདག་ཅག་ཀྱང་མཉན་ཡོད་དུ་འགྲོ་དགོས་སོ་སྙམ་ནས་མི་དགའ་བར་གྱུར་ཏོ། །ཉེ་དགས་ཐོས་ནས་ཉམ་ང་བར་གྱུར་ཏེ། བདག་ལ་བརྒྱ་ལ་བརྒྱ་ལམ་ན་རྙེད་པ་བྱུང་བ་དེའི་བར་ཆད་བྱུང་ངོ་སྙམ་ནས། དེ་བྲམ་ཟེ་དབྱར་ཚུལ་གྱི་གན་དུ་སོང་སྟེ་སྒྲ་དམའ་བ་དང ། སྒྲ་ཡིད་དུ་མི་འོང་བ་དང ། སྒྲ་ཞུམ་པས་སྦྱིན་པའི་བསྔགས་པ་བརྗོད་པར་བརྩམས་པ་དང ། དབྱར་ཚུལ་གྱིས་སྨྲས་པ། བཙུན་པ་ཉེ་དགའ་ཁྱོད་སྔོན་སྒྲ་མཐོན་པོ་དང ། སྒྲ་ཡིད་དུ་འོང་བ་དང ། སྒྲ་ཟབ་མོས་སྦྱིན་པའི་བསྔགས་པ་བརྗོད་པར་མཛད་ན། ཁྱོད་ད་ལྟར་སྒྲ་དམའ་བ་དང ། སྒྲ་ཡིད་དུ་མི་འོང་བ་དང ། སྒྲ་མི་ཟབ་པས་སྦྱིན་པའི་བསྔགས་པ་བརྗོད་པར་མཛད་པ་འདི་ལ་རྒྱུ་ཅི་མཆིས། ཆུང་པོ་གྲོགས་བདག་ཅག་བརྒྱ་ལ་བརྒྱ་ལམ་ན་ཕྲད་པ་འབྱུང་ན་དེ་ཡང་ཡུན་མི་རིང་བ་ཁོ་ནས་འབྲལ་བར་འགྱུར་བའི་ཕྱིར་རོ། །མ་ག་དྷ་པ་ཟུར་གྱིས་གོ། །ཀོ་ས་ལ་པ་བརྗོད་ནས་ཤེས། །པན་ཙ་ལ་པ་ཡིག་ཕྱེད་ཀྱིས། །ནུབ་མི་མ་སྨྲས་མི་ཤེས་སོ། །ཞེས་བྱ་བ་ཡིན་པས་དབྱར
6.121a
ཚུལ་གྱིས་བསམས་པ། འདི་ནི་ཤཱཀྱའི་རིགས་རྒྱ་ཆེན་པོ་དེ་སྙེད་སྤངས་ཏེ་རབ་ཏུ་བྱུང་བ་ཡིན་པས་འདི་བདག་དང་འབྲལ་བ་ལ་མྱ་ངན་མི་བྱེད་ཀྱི་ཀཱར་ཥ་པ་ཎ་དྲུག་བཅུ་འཆོར་བའི་མྱ་ངན་བྱེད་དོ་སྙམ་ནས་སྨྲས་པ། བཙུན་པ་ཉེ་དགའ་གང་དང་གང་དུ་གནས་པར་བདག་གིས་ཀར་ཤ་པ་ཎ་དྲུག་བཅུ་བསྐུར་བར་བགྱིའོ། ། རོག་ཁྱ་དེ་ལྟ་ན་ཕན་ཕུན་མེད་པ་དང ། ཀུན་ནས་ཉོན་མོངས་པ་མེད་པའི་སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་ཡིན་ནོ་ཞེས་སྨྲས་ནས་སྟན་ལས་ལངས་ཏེ་སོང་ངོ ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ་དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར
6.121b
བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐག་བཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་དུ་དུལ་བ། སྤྱོད་ལམ་དང ། སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ།
6.122a
བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་འཕགས་པ། ཀུན་ཤེས་ཀཽཎྜི་ནྱ་དང ། རླངས་པ་དང ། མིང་ཆེན་དང ། མ་འགགས་པ་དང ། ཤཱ་རིའི་བུ་དང ། མཽད་གལ་གྱི་བུ་དང ། འོད་སྲུང་དང ། ཀུན་དགའ་བོ་དང ། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང ། གཞན་ཡང་དགེ་སློང་གི་དགེ་འདུན་མང་པོས་ཡོངས་སུ་བསྐོར་ཅིང་མདུན་དུ་བདར་ནས་ཀོ་ས་ལ་དག་ཏུ་ལྗོངས་རྒྱུར་གཤེགས་ཏེ་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་པའི་ཚོང་པ་དག་ཟོང་ཐོགས་ཏེ་རྒྱལ་པོའི་ཁབ་ཏུ་དོང་བ་དག་གལ་ཏེ་དོན་འཐུན་མང་ན་དེ་ལ་རྒྱལ་པོ་འམ། བྲམ་ཟེ་དབྱར་ཚུལ་ཤོ་གམ་གཅོད་པར་བྱེད་པས་བྲམ་ཟེ་དབྱར་ཚུལ་གྱིས་ཤོ་གམ་པ་དག་ལ་སྨྲས་པ། གང་གི་ཚེ་མཉན་ཡོད་པའི་ཚོང་པ་དག་མཉན་ཡོད་དུ་ཕྱིར་འགྲོ་བ་དེའི་ཚེ་ན་ཁོ་བོ་ལ་སྦྲོན་ཅིག་།ཤོ་གམ་པ་དག་གིས་ཚོང་པ་དག་ལ་བསྒོ་ནས་དེ་དག་གིས་ཟོང་བསྒྱུར་ཏེ་རིན་བླངས་ནས་བྲམ་ཟེ་དབྱར་ཚུལ་གྱི་གན་དུ་དོང་སྟེ་བདག་ཅག་མཉན་ཡོད་དུ་མཆི་ན་བགྱི་བ་ཅི་མཆིས་ཤེས་སྨྲས་པ་དང ། བྲམ་ཟེ་དབྱར་ཚུལ་གྱིས་ཚོང་པ་གཅིག་ལ་ཀཱར་ཥཱ་པ་ཎ་དྲུག་བཅུ་གཏད་དེ་ཁྱོད་ཀྱིས་འདི་བཙུན་པ་ཉེ་དགའི་གན་དུ་ཁྱེར་ལ་ཕུལ་ཅིག་ཅེས་བསྒོའོ། །ཚོང་པ་དེས་བསམས་པ། གང་བྲམ་ཟེ་དབྱར་ཚུལ་གྱིས་དད་པར་བྱ་བའི་དགེ་སློང་དེ་ནི་གདོན་མི་ཟ་བར་གྲགས་པ་ཡིན་པས་བདག་གིས་ཀྱང་དེ་ལ་དགའ་བ་ཅུང་ཟད་བྱས། གོས་དག་བསྐོན་ནོ་སྙམ་ནས་དེ་འོད་མའི་ཚལ་དུ་སོང་སྟེ་དགེ་སློང་གི་གན་དུ་ཕྱིན་ནས་དྲིས་པ།
6.122b
འཕགས་པ་དགེ་སློང་གི་ཚུལ་དང་འཐུན་པའི་གོས་དག་ཇི་ལྟར་ལགས། བཞིན་བཟངས་ཅི་དགེ་འདུན་ལ་རས་ཡུག་ཆེན་གྱི་སྦྱིན་པ་བྱེད་དམ། འཕགས་པ་དགེ་འདུན་ལ་རས་ཡུག་ཆེན་གྱི་སྦྱིན་པ་མི་བགྱིད་དེ། འདི་ལྟར་བྲམ་ཟེ་དབྱར་ཚུལ་གྱིས་བཙུན་པ་ཉེ་དགའ་ལ་ཀཱར་ཥཱ་པ་ཎ་དྲུག་བཅུ་བསྐུར་བ་དག་དེའི་གོས་དག་ཏུ་བསྒྱུར་ཏེ་མཆིའོ། །དགེ་སློང་དེས་སྨྲས་པ། བཞིན་བཟངས་གོས་དག་ཀྱང་ལེན་ཅིང་ཁྱོད་ཀཱར་ཥཱ་པ་ཎ་དྲུག་བཅུ་ཡང་འབུལ་དུ་འཇུད་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །ཚོང་པ་དེས་བསམས་པ། འདི་ནི་གོར་མ་ཆག་པར་དེ་དང་ཁོན་ཡོད་པ་ཡིན་ནོ་སྙམ་ནས་དེ་དགེ་སློང་གཞན་ཞིག་གི་གན་དུ་སོང་སྟེ་དྲིས་པ། འཕགས་པ་དགེ་སློང་གི་ཚུལ་དང་འཐུན་པའི་གོས་དག་ཇི་ལྟ་བུ་ལགས། བཞིན་བཟངས་ཅི་དགེ་འདུན་ལ་རས་ཡུག་ཆེན་གྱི་སྦྱིན་པ་བྱེད་དམ། འཕགས་པ་དགེ་འདུན་ལ་རས་ཡུག་ཆེན་གྱི་སྦྱིན་པ་མི་བགྱིད་དེ་འདི་ལྟར་བྲམ་ཟེ་དབྱར་ཚུལ་གྱིས་བཙུན་པ་ཉེ་དགའ་ལ་ཀཱར་ཥཱ་པ་ཎ་དྲུག་བཅུ་བསྐུར་བ་དག་དེའི་གོས་དག་ཏུ་བསྒྱུར་ཏེ་མཆིའོ། །དགེ་སློང་དེས་སྨྲས་པ། གལ་ཏེ་རྒྱས་མ་བཏབ་པར་ཁྱེར་ན་ཁྱོད་ཡུལ་གྱི་ཁེ་སྤོགས་འབུལ་དུ་འཇུད་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །ཚོང་པ་དེས་བསམས་པ། འདི་དང་དེ་གཉིས་འཐུན་ནོ་སྙམ་ནས་དེ་བྲམ་ཟེ་དབྱར་ཚུལ་གྱི་གན་དུ་སོང་སྟེ་སྨྲས་པ། དབྱར་ཚུལ་ཀཱར་ཥཱ་པ་ཎ་འདི་དག་རྒྱས་ཐོབ་ཤིག་།བཞིན་བཟངས་ཡིད་ཆེས་ཀྱིས་ཁྱོད་ཉིད་ཀྱིས་ཁྱེར་ཅིག་།དབྱར་ཚུལ་བདག་ལ་ཐུགས་ཆེས་མོད་ཀྱིས་འོན་ཀྱང་བདག་གིས་ལེགས་པར་བགྱི་བ་བགྱིའོ། །དབྱར་ཚུལ་གྱིས་རྒྱས་བཏབ་ནས་དེས་དེ་དག་ཁྱེར་ཏེ་མཉན་ཡོད་དུ་སོང་ནས་དེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་རྣམས་ལ་དྲིས་པ། འཕགས་པ་དག་འཕགས་པ་ཉེ་དགའི་གཙུག་ལག་ཁང་གང་ལགས། དེ་དག་གིས་དེའི་གཙུག་ལག་ཁང་འདི་ཡིན་ནོ་ཞེས་བསྟན་ནས་དེ་དེར་སོང་བ་དང་ཉེ་དགའ་མི་སྣང་ནས་དེས་དགེ་སློང་ཞིག་ལ་དྲིས་པ། འཕགས
6.123a
པ་བཙུན་པ་ཉེ་དགའ་གར་བཞུད། དེས་སྨྲས་པ། ཉིན་མོ་སྤྱོད་པའི་ཕྱིར་རོ། །ཚོང་པ་དེས་སྨྲས་པ། བྲམ་ཟེ་དབྱར་ཚུལ་གྱིས་དེ་ལ་ཀཱར་ཥཱ་པ་ཎ་དྲུག་བཅུ་བསྐུར་བ་འདི་དག་ཞོག་ལ་དེ་མཆིས་ན་སྩོལ་ཅིག་།བཞིན་བཟངས་ཁྱོད་ཀྱིས་སྒྲོན་མ་རབ་ཏུ་འབར་བ་མགོ་བོས་འཛིན་པ་འགའ་མཐོང་ངམ། དེས་བསམས་པ། འདི་ནི་གདོན་མི་ཟ་བར་དེ་དང་ཁོན་ཡོད་པ་ཡིན་ནོ་སྙམ་ནས་དེས་དགེ་སློང་གཞན་ཞིག་གི་གན་དུ་སོང་སྟེ་སྨྲས་པ། འཕགས་པ་བྲམ་ཟེ་དབྱར་ཚུལ་གྱིས་བཙུན་པ་ཉེ་དགའ་ལ་ཀཱར་ཥཱ་པ་ཎ་དྲུག་བཅུ་བསྐུར་བ་འདི་དག་ཞོག་ལ་དེ་མཆིས་ན་སྩོལ་ཅིག་།བཞིན་བཟངས་གལ་ཏེ་ཁྱོད་ཀྱིས་རྒྱས་མ་བཏབ་པར་འོངས་ན་ཁྱོད་ཡུལ་གྱི་ཁེ་སྤོགས་འཇལ་དུ་འཇུད་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །དེས་བསམས་པ། འདི་དང་དེ་གཉིས་སུ་འཐུན་གྱིས་ཁྱིམ་དུ་སོང་ལ་དེ་ཉིད་དུ་དེ་འོངས་པ་ལ་བདེ་བར་ཚིག་གི་ལན་གདབ་བོ་སྙམ་ནས་སྨྲས་པ། འཕགས་པ་བཙུན་པ་ཉེ་དགའ་ལ་ཁྱིམ་བདག་གི་མཆིད་ནས་འདི་སྐད་ཅེས་བདག་གི་སྡུམ་པ་ནི་ཕྱོགས་ག་གེ་མོ་ཞིག་ན་མཆིས་ཀྱིས་གལ་ཏེ་ཀཱར་ཥཱ་པ་ཎ་བཞེད་ན་གཤེགས་སུ་གསོལ་ཞེས་གསུངས་ཤིག་ཅེས་སྨྲས་ཏེ་སོང་ངོ ། ཉེ་དགའ་ཡང་གཙུག་ལག་ཁང་དུ་འོངས་ནས་དགེ་སློང་རྣམས་ཀྱིས་སྨྲས་པ། བཙུན་པ་ཉེ་དགའ་བཅོམ་ལྡན་འདས་ཀྱིས་ཚུལ་ཁྲིམས་དང་ལྡན་པའི་སེམས་ཀྱི་སྨོན་པ་འགྲུབ་སྟེ། དེ་ཡང་ཚུལ་ཁྲིམས་རྣམ་པར་དག་པའི་ཕྱིར་རོ་ཞེས་བྱ་བ་དེ་ལེགས་པར་གསུངས་པ་ཡིན་ཏེ། ཁྱོད་དེང་ཁོ་ན་ཉིན་མོ་སྤྱོད་དུ་སོང་བས་དེང་ཉིད་དུ་ཀཱར་ཥཱ་པ་ཎ་དྲུག་བཅུ་གྲུབ་བོ། །གང་གིས་བཅོམ་ལྡན་འདས་ཀྱི་འཁོར་སྟོང་ཉིས་བརྒྱ་ལྔ་བཅུ་རེ་རེ་ལ་ཀཱར་ཥཱ་པ་ཎ་དྲུག་བཅུ་དྲུག་བཅུ་བྱིན་པའི་སྦྱིན་བདག་དེ་ལྟ་བུ་དེ་གང་ཡིན། བཙུན་པ་ཉེ་དགའ་དགེ་འདུན་ཐམས་ཅད་ལ་མ་ཡིན་གྱི་ཁྱོད་གཅིག་པུ་ལའོ། །གང་གིས་ཉེ་དགའ་ལ་ཀཱར་ཥཱ་པ་ཎ་དྲུག་བཅུ་བྱིན་པའི་སྦྱིན་བདག་དེ་ལྟ་བུ་དེ་གང་ཡིན། བྲམ་ཟེ་དབྱར་ཚུལ་གྱིས་བསྐུར་རོ། །
6.123b
དེ་ནི་ཕྱི་རོལ་གྱི་རྙེད་པ་ཁོ་ན་ཡིན་ན་རྒྱ་མ་བྱིད་དམ། མ་ཞུ་འམ། སྒྱུ་མ་ཞུགས་སམ་སུས་བརྟགས། མ་བརྟགས་པ་ཁོ་ནར་བླངས་སམ། སུས་བླངས། ཁོ་བོ་ནི་དགྲ་བོ་ཤ་སྟག་གི་ནང་ན་འདུག་གོ། །དགེ་སློང་གཞན་དེས་སྨྲས་པ། བཙུན་པ་ཉེ་དགའ་ཡི་ཆད་དུ་ཅི་ཡོད། ཁྱིམ་བདག་དེ་ན་རེ་བདག་གི་སྡུམ་པ་ནི་ཕྱོགས་ག་གེ་མོ་ཞིག་ན་མཆིས་ཀྱིས་གལ་ཏེ་ཀཱར་ཥཱ་པ་ཎ་བཞེད་ན་གཤེགས་སུ་གསོལ་ཞེས་ཟེར་རོ། །ཉེ་དགས་སྣམ་སྦྱར་བླངས་ཏེ་གོམ་པ་བསྐྱེད་དེ་སོང་བ་དང ། ཁྱིམ་བདག་དེས་དེ་ཐག་རིང་པོ་ཁོ་ན་ནས་འོང་བ་མཐོང་ནས། དེས་བསམས་པ། དགེ་སྦྱོང་ཧྲལ་པོ་གོམ་པ་འདི་ལྟ་བུས་འོང་བ་འདི་ནི་བཙུན་པ་ཉེ་དགའ་ཡིན་གོར་མ་ཆག་སྙམ་ནས། དེས་ཐག་རིང་པོ་ཁོ་ན་ནས་དེ་ལ་སྨྲས་པ། ཁྱོད་བཙུན་པ་ཉེ་དགའ་མ་ལགས་སམ། ཁོ་བོ་ཡིན་ནོ། །བྲམ་ཟེ་དབྱར་ཚུལ་གྱིས་ཁྱོད་ལ་ཀཱར་ཥཱ་པ་ཎ་དྲུག་བཅུ་བསྐུར་བ་འདི་ལགས་ཀྱིས་བཞེས་ཤིག་། རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་ལོངས་སྤྱོད་ཀྱང་ཐོབ་པར་གྱུར་ཅིག་།འཕགས་པ་ཅིའི་སླད་དུ་བདག་གི་མིང་གིས་ཡོན་བཤད་པ་མཛད། བྲམ་ཟེ་དབྱར་ཚུལ་གྱི་མིང་གིས་ཡོན་བཤད་པ་མཛོད་ཅིག་།བཀྲེན་པ་འདི་ལ་དགོས་པ་ཅི་ཡོད། འདི་ལྟར་ཁྱོད་ཀྱིས་ཀྱང་མང་དུ་བྱས་ཏེ་ཁྱོད་ཀྱིས་ཁྱེར་ཏེ་འོངས་པའི་ཕྱིར་རོ། །གང་གིས་འདི་ཁྱེར་ཏེ་སྲང་དུ་འགྲོ་བའི་ཁྱེའུ་ཞིག་རེ་ཤིག་རྙོས་ཤིག་།འཕགས་པ་བདག་ལ་ཁྱེའུ་མ་མཆིས་སོ། །བཀྲེན་པ་རྒྱལ་པོའི་ཁབ་ནས་ཐག་རིང་པོ་འདི་སྲིད་དུ་ཁྱེར་ཏེ་འོངས་ན་སྲང་དུ་སྐྱེལ་མི་ནུས་སམ། དེས་ཁྱེའུ་ལ་སྨྲས་པ། ཀཱར་ཥཱ་པ་ཎ་ཁྱེར་ཏེ་འཕགས་པའི་ཕྱི་བཞིན་སོང་ལ་ཕྱི་རོལ་དུ་མ་འབྱུང་ཤིག་།འདིས་ཁྱོད་ལ་བཅའ་བའི་རིན་སྦྱིན་དུ་མ་གཞུག་ཤིག་།ཁྱེའུ་དེས་ཀཱར་ཥཱ་པ་ཎ་ཁྱེར་ཏེ་དེའི་ཕྱི
6.124a
བཞིན་སྲང་དུ་སོང་ནས་ཚོང་རྡལ་དང་པོར་ཕྱིན་པ་དང ། དེས་སྨྲས་པ། འཕགས་པ་ཀཱར་ཥཱ་པ་ཎ་འདི་དག་འདིར་འཇོག་ཏུ་སྩོལ་ཅིག་།ཉེ་དགས་ཁྱེའུ་ཁྱོད་ཤིན་དུ་ལེགས་པར་བསླབས་སོ། །ཞེས་དེས་སྤོས་འཚོང་གི་ཁྱེའུ་ཞིག་ལ་སྨྲས་པ། བཞིན་བཟངས་ཀཱར་ཥཱ་པ་ཎ་འདི་དག་རེ་ཤིག་ཞོག་ཤིག་།འཕགས་པ་བདག་ནི་བླ་མ་ལ་རག་ལས་པ་ལགས་སོ། །ཁྱོད་ནམ་ཡང་རང་ལ་རག་ལས་པར་མ་གྱུར་ཅིག་།དེས་སྤོས་འཚོང་གི་ཁྱེའུ་གཞན་ཞིག་གི་གན་དུ་སོང་སྟེ་སྨྲས་པ། བཞིན་བཟངས་ཀཱར་ཥཱ་པ་ཎ་འདི་དག་རེ་ཤིག་ཞོག་ཤིག་།འཕགས་པ་བདག་གི་བླ་མ་སླད་རོལ་དུ་མཆིས་སོ། །ནམ་ཡང་འཇུག་པར་མ་གྱུར་ཅིག་།དེ་སྤོས་འཚོང་གི་ཁྱེའུ་དད་པ་གསར་དང་ལྡན་པ་ཞིག་ཡོད་པ་དེའི་གན་དུ་སོང་སྟེ་སྨྲས་པ། བཞིན་བཟངས་ཀཱར་ཥཱ་པ་ཎ་འདི་དག་རེ་ཤིག་ཞོག་ཤིག་།འཕགས་པ་བདག་མ་ལ་རག་ལས་པ་ལགས་སོ། །ཁོ་བོས་ཀོ་ཁྱོད་དད་པ་དང་ལྡན་པར་ཤེས་ཀྱི་ཁོ་བོས་ཁྱོད་ཇི་ལྟར་རྟུག་པ་ལ་དད་པར་ནི་མི་ཤེས་སོ། །གལ་ཏེ་ཁྱོད་ཀྱིས་དད་པ་མ་ཐོབ་ཏུ་ཟིན་ན་ཁྱོད་ཀྱིས་ཤིང་ཚལ་བླངས་ཏེ་དགེ་སློང་སྐྲོད་པར་ཡང་འགྱུར་རོ། །དེ་སྐྱེངས་ནས་སྨྲས་པ། འཕགས་པ་གཞན་ཏུ་གསོལ། ཉེ་དགས་ཀཱར་ཥཱ་པ་ཎ་དེ་དག་དེར་བཞག་སྟེ་ཁྱིམ་བདག་གི་ཁྱེའུ་དེ་ཕྱིར་བཏང་སྟེ་སོང་ངོ ། །ཚོང་པའི་ཚོགས་ཀྱིས་ཀྱང་བདག་ཅག་ལས་གང་ཉི་མ་ཤར་ན་འོང་བ་དེ་བདག་ཅག་གིས་ཀཱར་ཥཱ་པ་ཎ་དྲུག་བཅུ་འཇལ་དུ་གཞུག་གོ་ཞེས་ཁྲིམས་སུ་བྱ་བ་བཅས་ནས་སྤོས་འཚོང་གི་ཁྱེའུ་དེ་ལ་མས་སྨྲས་པ། བུ་ཅི་ནས་ཀྱང་བདག་ཉིད་ཀཱར་ཥཱ་པ་ཎ་དྲུག་བཅུ་འཇལ་དུ་མི་གཞུག་པ་དེ་ལྟར་གྱིས་ཤིག་།ཉེ་དགའ་མཚན་མོ་འགྱོད་པ་སྐྱེས་ཏེ་སྤོས་འཚོང་གི་ཁྱེའུ་དེ་དད་པ་གསར་དང་ལྡན་པ་ཡིན་པས་ཀཱར་ཥཱ་པ་ཎ་དེ་དག་བསྙོན་པར་འགྱུར་བའི་གནས་གང་ཡིན་པ་དེ་ལྟ་བུ་ཡོད་པར་འགྱུར་རོ་སྙམ་ནས་དེ་ནང་པར་སྔར་ལངས་ཏེ་ཁྱེའུ
6.124b
ཞིག་ཁྲིད་ནས་དེ་ཚོང་རྡལ་དུ་སོང་བ་དང ། སྤོས་འཚོང་གི་ཁྱེའུ་དེ་ཚོང་རྡལ་འབྱེད་ཅིང་འདུག་པ་དེས་མཐོང་ནས་སྨྲས་པ། བཞིན་བཟངས་ཀཱར་ཥཱ་པ་ཎ་དེ་དག་བྱིན་ཅིག་།འཕགས་པ་ཚོང་པའི་ཚོགས་ཀྱིས་བདག་ཅག་ལས་གང་གདུགས་ཤར་ན་མཆི་བ་དེ་ཀཱར་ཥཱ་པ་ཎ་དྲུག་བཅུ་འཇལ་དུ་སྩལ་བའི་ཁྲིམས་སུ་བགྱི་བ་བཅས་པས་བདག་ཅག་ཚོང་པའི་ཚོགས་ཀྱི་ནང་དུ་མཆིས་ཏེ། སླར་མཆིས་ཀྱི་བར་དུ་ཡུད་ཙམ་ཞིག་བཞེས་སུ་གསོལ། བཀྲེན་པ་སུ་ཞིག་ཁྱོད་ཀྱི་ལྟོ་གོལ་བ་ཡིན་སྙམ་སུ་ཞིག་སྒྱིད་པ་གཉིས་སྐྲངས་སྐྲངས་སུ་སྡོད་པར་འགྱུར། གལ་ཏེ་མ་བྱིན་པར་འགྲོ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཀཱར་ཥཱ་པ་ཎ་དྲུག་བཅུ་འཇལ་དུ་གཞུག་པའི་གྱོད་ལ་བསྒྲིན་པར་བྱའོ། །སྤོས་འཚོང་གི་ཁྱེའུ་ཁྲོས་ནས་ཀཱར་ཥཱ་པ་ཎའི་ཐུམ་བུ་དེ་འཕངས་པ་དང ། དེའི་རྒྱ་གོགས་སོ། །ཉེ་དགས་སྨྲས་པ། རྒྱ་མ་བྱིད་དམ། མ་ཞུ་འམ། རྒྱ་མ་ཞུགས་སམ་བལྟའོ། །ཅི་ཁོ་བོ་ཁྱོད་ཀྱིས་བརྟགས་ཏེ་གཏད་དམ། གལ་ཏེ་ཁྱོད་ཀྱིས་བརྟགས་ཏེ་བླངས་ན་ཅིའི་ཕྱིར་རྒྱ་གཅོག་པར་བྱེད། ཉེ་དགས་སྤོས་འཚོང་གི་ཁྱེའུ་དེ་དེ་སྲིད་དུ་བསྒོར་གྱི་བར་དུ་ཚོང་པའི་ཚོགས་ཀྱིས་དེའི་ཁྱིམ་ནས་ཀཱར་ཥཱ་པ་ཎ་དྲུག་བཅུའི་གཏའ་བཅད་ནས། དེ་ལ་མས་སྨྲས་པ། བུ་ཁྱོད་ཀྱིས་ལས་ཅི་བྱས་ན་དེས་ཁྱོད་ཀྱིས་བདག་ཉིད་ཀཱར་ཥཱ་པ་ཎ་དྲུག་བཅུའི་གྱོད་ལ་བསྒྲིན་པར་གྱུར། ཁྱེའུ་སྨྲས་པ། གང་དག་ཤཱཀྱའི་སྲས་ཀྱི་དགེ་སྦྱོང་རྣམས་ལ་མངོན་པར་དད་པར་བྱེད་པ་དེ་དག་འདི་ལྟར་འགྱུར་ཏེ། དད་པའི་མྱུ་གུ་སྐྱེས་མ་ཐག་པ་ཉིད་ཉམས་པར་བྱས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད
6.125a
དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་དགའ་ལ་རྨས་པ། ཉེ་དགའ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གི་ཕྱིར་རྒྱལ་པོ་འམ། བློན་པོ་ཆེན་པོ་འམ་བྲམ་ཟེ་འམ་ཁྱིམ་བདག་གམ། གྲོང་རྡལ་གྱི་མི་འམ་ཡུལ་གྱི་མི་འམ། ནོར་ཅན་ནམ། ཚོང་དཔོན་ནམ། དེད་དཔོན་གྱིས་ཕོ་ཉའི་ལག་ཏུ་གོས་ཀྱི་རིན་དག་བསྐུར་བར་གྱུར་ལ། དེ་ནས་ཕོ་ཉ་དེ་གོས་ཀྱི་རིན་དེ་དག་ཁྱེར་ནས་དགེ་སློང་དེ་ག་ལ་བ་དེར་སོང་སྟེ་ཕྱིན་ནས་དགེ་སློང་དེ་ལ་འདི་སྐད་ཅེས་འཕགས་པ་མཁྱེན་པར་མཛོད་ཅིག་་།ཁྱོད་ལ་རྒྱལ་པོ་འམ། བློན་པོ་ཆེན་པོ་འམ། བྲམ་ཟེ་འམ་ཁྱིམ་བདག་གམ། གྲོང་རྡལ་གྱི་མི་འམ། ཡུལ་གྱི་མི་འམ། ནོར་ཅན་ནམ། དེད་དཔོན་ཆེ་གེ་མོས་གོས་ཀྱི་རིན་འདི་དག་བསྐུར་གྱིས་འཕགས་པས་ཐུགས་བརྩེ་བའི་སླད་དུ་འདི་དག་བཞེས་ཤིག་ཅེས་ཟེར་ན་དགེ་སློང་དེས། ཕོ་ཉ་དེ་ལ་འདི་སྐད་ཅེས་ཚེ་དང་ལྡན་པ་ཕོ་ཉ་དགེ་སློང་དག་ནི་གོས་ཀྱི་རིན་དག་ལེན་དུ་མི་རུང་སྟེ། བདག་ཅག་གོས་རུང་བ་དུས་སུ་རྙེད་ན་ནི་ལེན་ཏོ་ཞེས་བརྗོད་པར་བྱའོ། །གལ་ཏེ་ཕོ་ཉ་དེས་དགེ་སློང་དེ་ལ་འདི་སྐད་ཅེས་འཕགས་པ་རྣམས་ཀྱི་ཞལ་ཏ་བགྱིད་པ། འཕགས་པ་རྣམས་ཀྱི་ཞལ་ཏ་ཉམས་སུ་ལེན་པ་གང་ལགས་པ།
6.125b
འགའ་མཆིས་སམ་ཞེས་ཟེར་ན་དགེ་སློང་གོས་འདོད་པས་ཕོ་ཉ་འདི་ནི་དགེ་སློང་རྣམས་ཀྱི་ཞལ་ཏ་བྱེད་པ་སྟེ། འདི་ནི་དགེ་སློང་རྣམས་ཀྱི་ཞལ་ཏ་ཉམས་སུ་ལེན་པའོ་ཞེས་ཀུན་དགའི་ར་བ་པ་འམ། དགེ་བསྙེན་ཞལ་ཏ་བྱེད་པ་བསྟན་པར་བྱའོ། །དེ་ནས་ཕོ་ཉ་དེས་གོས་ཀྱི་རིན་དེ་དག་ཁྱེར་ནས་ཞལ་ཏ་བྱེད་པ་ག་ལ་བ་དེར་འགྲོ་བར་བྱ་ཞིང་ཕྱིན་ནས་ཞལ་ཏ་བྱེད་པ་དེ་ལ་འདི་སྐད་ཅེས་ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག་།ཁྱོད་ཀྱི་གོས་ཀྱི་རིན་འདི་དག་གིས་གོས་འདི་དང་འདི་ལྟ་བུ་ཞིག་ཉོས་ལ་དགེ་སློང་མིང་འདི་ཞེས་བྱ་བ་འོངས་དང་དེ་ལ་གོས་རུང་བ་དུས་སུ་སྐོན་ཅིག་ཅེས་བརྗོད་པར་བྱའོ། །དེ་ནས་ཕོ་ཉ་དེས་ཞལ་ཏ་བྱེད་པ་དེ་ལ་ཤིན་ཏུ་ལེགས་པར་ཡང་དག་པར་བསྒོ་ཞིང་ཡང་དག་པར་བསྟན་ནས། དགེ་སློང་དེ་ག་ལ་བ་དེར་འགྲོ་བར་བྱ་ཞིང་ཕྱིན་ནས་དགེ་སློང་དེ་ལ་འདི་སྐད་ཅེས་འཕགས་པས་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་ལགས་ཀྱིས་དེའི་གན་དུ་བཞུད་ཅིག་དང ། དེས་ཁྱོད་ལ་གོས་རུང་བ་དུས་སུ་སྐོན་པར་འགྱུར་རོ་ཞེས་བརྗོད་པར་བྱའོ། །དགེ་སློང་གོས་འདོད་པས་ཞལ་ཏ་བྱེད་པའི་གན་དུ་སོང་ལ་ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ། །ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ་ཞེས་ལན་གཉིས་ལན་གསུམ་དུ་བསྐུལ་བར་བྱ། དྲན་པར་བྱའོ། །ལན་གཉིས་ལན་གསུམ་དུ་བསྐུལ་ཞིང་དྲན་པར་བྱས་པ་ན་གལ་ཏེ་གོས་དེ་གྲུབ་ན་དེ་ལྟ་ན་ལེགས། གལ་ཏེ་མ་གྲུབ་ན་ལན་བཞི་ལན་ལྔ་ལན་དྲུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པར་བྱའོ། །ལན་བཞི་ལན་ལྔ་ལན་དྲུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པ་ན། གལ་ཏེ་གོས་དེ་གྲུབ་ན་དེ་ལྟ་ན་ལེགས། གལ་ཏེ་མ་གྲུབ་ན་དེའི་འོག་ཏུ་གོས་བསྒྲུབ་པའི་ཕྱིར་བརྩལ་ཏེ། གོས་གྲུབ་པ་ན་སྤང་བའི་ལྟུང་བྱེད་དོ། །གལ་ཏེ་མ་གྲུབ་ན་ཕྱོགས་གང་ནས་གོས་ཀྱི་རིན་དེ་དག་འོངས་པ་དེར་བདག་འགྲོ་བར་བྱའོ། །ཡང་ཡིད་བརྟན་པའི་ཕོ་ཉས་ཚེ་དང་ལྡན་པ་དག་གིས་དགེ་སློང་ཆེ་གེ་མོའི་ཕྱིར་གོས་ཀྱི
6.126a
རིན་གང་དག་བསྐུར་བ་དེ་དག་ནི་དགེ་སློང་དེའི་དོན་ཅི་ཡང་མ་གྲུབ་ཀྱིས། ཤེས་པར་གྱིས་ཤིག་ཚེ་དང་ལྡན་པ་དག་གིས་རང་གི་ནོར་ཆུད་མ་གཟན་ཅིག་ཅེས་སྤྲིང་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །དགེ་སློང་གི་ཕྱིར་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའི་ཕྱིར་རོ། །རྒྱལ་པོ་འམ་ཞེས་བྱ་བ་ནི་འདི་ལྟ་སྟེ། བུད་མེད་རྒྱལ་སྲིད་ལ་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ལ། རྒྱལ་རིགས་དང ། བྲམ་ཟེ་དང ། རྗེའི་རིགས་དང ། དམངས་རིགས་དག་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ནོ། །བློན་པོ་ཆེན་པོ་འམ་ཞེས་བྱ་བ་ནི་རྒྱལ་པོ་ལས་གཞན་པ་བློན་པོ་དང ། རྩིས་མཁན་དང ། སྣ་ཆེན་པོ་ལ་གཏོགས་པ་རྒྱལ་སྲིད་བྱེད་པ་གསང་ཚིག་འཐུན་པས་འཚོ་བ་གང་དག་རྒྱལ་པོ་ལ་བརྟེན་ནས་འཚོ་བར་བྱེད་པ་དག་གོ། །བྲམ་ཟེ་འམ་ཞེས་བྱ་བ་ནི་བྲམ་ཟེ་གཙང་སྦྲ་ཅན་ནོ། །ཁྱིམ་བདག་གམ་ཞེས་བྱ་བ་ནི་ཕྱུག་པའོ། །གྲོང་རྡལ་གྱི་མི་འམ་ཞེས་བྱ་བ་ནི་གྲོང་ཁྱེར་གྱི་མིའོ། །ཡུལ་གྱི་མི་འམ་ཞེས་བྱ་བ་ནི་ཡུལ་མིའོ། །ནོར་ཅན་ནམ་ཞེས་བྱ་བ་ནི་ནོར་བྱེད་པས་ཕྱུག་པའོ། །ཚོང་དཔོན་ནམ་ཞེས་བྱ་བ་ནི་ཅོད་པན་བཅིངས་པའོ། །དེད་དཔོན་གྱིས་ཤེས་བྱ་བ་ནི་གང་གིས་ལན་གཉིས་སམ་གསུམ་དོན་འཐུན་འདས་པར་གྱུར་པས་སོ། །ཕོ་ཉའི་ལག་ཏུ་ཞེས་བྱ་བ་ནི་སྐྱེས་པ་དང ། བུད་མེད་དང ། མ་ནིང་གིའོ། །གོས་ཀྱི་རིན་དག་ཅེས་བྱ་བ་ནི་གསེར་རམ་དངུལ་དག་གོ། །ཟེར་ན་ཞེས་བྱ་བ་ནི་སྨྲ་ན་འོ། །གོས་རུང་བ་ཞེས་བྱ་བ་ནི་སྤྱད་བཟོད་པའོ། །དགེ་སློང་གོས་འདོད་པས་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །ཀུན་དགའི་ར་བ་པ་ཞེས་བྱ་བ་ནི་རུང་བ་བྱེད་པའོ། །དགེ་བསྙེན་ཞེས་བྱ་བ་ནི་གསུམ་ལ་སྐྱབས་སུ་སོང་བ་བསླབ་པའི་གཞི་ལྔ་བླངས་པའོ། །ཕྱོགས་སུ་ཞེས་བྱ་བ་ནི་ཕྱོགས་བཞི་པོ་དག་ཏུ་སྟེ། ཕྱོགས་བཞི་པོ་དག་གང་ཞེ་ན། འབོད་གནས་དང ། ཁྱིམ་གནས་དང ། ལས་ཀྱི་མཐའ་དང ། ལས་ཀྱི་གནས་དག་གོ། །འབོད་གནས་ནི་རྫ་མཁན་གྱི་གནས་དང ། འབྲེག་མཁན་གྱི་གནས་དང །
6.126b
ཁྱིམ་གནས་ནི་ཁྱིམ་འམ་ཆུའི་གནས་སོ། །ལས་ཀྱི་མཐའ་ནི་བུ་རམ་ཤིང་གི་ལས་ཀྱི་མཐའ་དང ། སཱ་ལུའི་ལས་ཀྱི་མཐའ་དང ། ལན་ཚཝའི་ལས་ཀྱི་མཐའ་དག་གོ། །ལས་ཀྱི་གནས་ནི་ཚོང་ཁང་དང་ཚོང་རྡལ་ལོ། །ཅང་མི་སྨྲ་བར་བསྡད་པར་བྱའོ། །ཞེས་བྱ་བ་ནི་བསྐུལ་བའི་སྒོ་དྲུག་པོ་དག་གིས་ཏེ། བསྐུལ་བའི་སྒོ་དྲུག་པོ་དག་གང་ཞེ་ན། ཁྱོད་འོངས་སམ་ཞེས་ཟེར་བ་ལ་དེའི་ཕྱིར་རོ་ཞེས་བྱ་བ་དང ། འོངས་པ་ལེགས་སོ་ཞེས་ཟེར་བ་ལ་དེའི་ཕྱིར་རོ་ཞེས་བྱ་བ་དང ། སྟན་འདི་ལ་འདུག་ཤིག་ཅེས་ཟེར་བ་ལ་དེའི་ཕྱིར་རོ་ཞེས་བྱ་བ་དང ། རྐང་པ་ཁྲུས་ཤིག་ཅེས་ཟེར་བ་ལ་དེའི་ཕྱིར་རོ་ཞེས་བྱ་བ་དང ། བཅའ་བ་དང་བཟའ་བ་ཟོ་ཤིག་ཅེས་ཟེར་བ་ལ་དེའི་ཕྱིར་རོ་ཞེས་བྱ་བ་དང ། བཏུང་བ་འཐུང་ཤིག་ཅེས་ཟེར་བ་ལ་དེའི་ཕྱིར་རོ་ཞེས་བྱ་བའོ། །བསྐུལ་བའི་སྒོ་དྲུག་པོ་དེ་དག་ཧ་ཅང་མྱུར་བ་དང ། ཐོགས་པ་མེད་པར་བརྗོད་ཅིང་དེ་ལ་གཞན་གྱི་ཚིག་གི་སྐབས་མེད་པར་བྱེད་ན་བསྐུལ་བའི་སྒོ་དྲུག་པོ་དག་ཡོངས་སུ་མ་རྫོགས་པར་བརྗོད་པར་བྱའོ། །བསྐུལ་བའི་སྒོ་དྲུག་པོ་དེ་དག་ཧ་ཅང་མི་མྱུར་བ་དང ། ཐོགས་པ་དང་བཅས་པར་བརྗོད་པར་བྱེད་ཅིང་དེ་ལ་གཞན་གྱི་ཚིག་གི་སྐབས་ཡོད་པར་བྱེད་ན། བསྐུལ་བའི་སྒོ་དྲུག་པོ་དག་ཡོངས་སུ་རྫོགས་པར་བརྗོད་པར་བྱའོ། །དེའི་འོག་ཏུ་ཞེས་བྱ་བ་ནི་དེའི་འོག་རོལ་དུའོ། །གོས་གྲུབ་ན་ཞེས་བྱ་བ་ནི་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ། །ཞེས་གསུངས་སོ། །གལ་ཏེ་མ་གྲུབ་ན་ཕྱོགས་གང་ནས་གོས་ཀྱི་རིན་དེ་དག་འོངས་པ་དེར་བདག་འགྲོ་བར་བྱའོ། །ཞེས་བྱ་བ་ནི་བདག་ཉིད་འགྲོ་བར་བྱའོ། །ཡང་ན་ཡིད་བསྟན་པའི་ཕོ་ཉ་ལས་ཤེས་བྱ་བ་ནི་ལྷན་ཅིག་གནས་པ་འམ་ཉེ་གནས་ལས་སོ། །དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གལ་ཏེ་ཞལ་ཏ་བྱེད་པ་དེ་དགེ་སློང་དེའི་གན་དུ་འོངས་ནས་འདི་སྐད་ཅེས་འཕགས་པ་གོས་འདི་དག་བཞེས་ཤིག་ཅེས་ཟེར་ན་དགེ་སློང་དེས་ཞལ་ཏ་བྱེད་པ་དེ་ལ་འདི་སྐད་ཅེས་བདག
6.127a
གིས་འདི་དག་སྤངས་ཟིན་གྱིས་སོང་ལ་དེ་ཉིད་ལ་བྱིན་ཅིག་ཅེས་བརྗོད་པར་བྱའོ། །གལ་ཏེ་ཞལ་ཏ་བྱེད་པ་དེ་དགེ་སློང་དེ་ལ་འདི་སྐད་ཅེས་འཕགས་པ་བདག་གིས་དེའི་སེམས་བསྡུ་བ་རྗེས་སུ་བསྒྲུབ་ཀྱིས་བཞེས་ཤིག་ཅེས་ཟེར་ན་བླང་བར་བྱའོ། །དགེ་སློང་གིས་གོ་རིམས་དེ་ལྟ་བུ་མ་བྱས་པར་གང་ཅུང་ཟད་ལེན་ན་ཐམས་ཅད་དུ་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང ། མི་མ་ཡིན་པས་རུང་བར་བྱེད་ན་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང ། མིས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མིའི་ཕོ་ཉ་དང ། མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང ། མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མིའི་ཕོ་ཉ་དང ། མི་མ་ཡིན་པས་རུང་བར་བྱེད་ན་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མི་མ་ཡིན་པ་འི་ཕོ་ཉ་དང་མིས་རུང་བར་བྱེད་ན་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མིའི་ཕོ་ཉ་དང ། མིས་རུང་བར་བྱེད་ན་ནི་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གོས་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གོས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་སྲིད་དུ་གཞི་དེས་མ
6.127b
བཤགས་ཤིང་སོ་སོར་མ་བཤགས་པར་ལྷུང་བཟེད་དམ་ཆོས་གོས་སམ་དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཉེ་བར་འཇོག་ན་དེ་ཡང་སྤང་བར་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསྐུར་བའི་སྤང་བ་སྟེ་བཅུ་པ་རྫོགས་སྷོ།། ་་་་་་་་་་།། སྡོམ་ལ་སྲིན་བལ་འབའ་ཞིག་ཆ་གཉིས་དང ། །དྲུག་དང་མཐོ་གང་ལམ་དང་ནི། །འཁྲུ་བ་དང་ནི་གསེར་དངུལ་དང ། །མངོན་མཚན་ཅན་དང་ཉོ་འཚོང་ངོ ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དག་སྲིན་བལ་གྱི་སྟན་སར་པ་བྱེད་པ་དང ། བྱེད་དུ་འཇུད་དེ། དགེ་སློང་དག་སྲིན་བལ་གྱི་སྟན་སར་པ་བྱེད་པ་དང་བྱེད་དུ་འཇུད་པ་ན་སྲིན་བལ་དཀོན་ཞིང་རིན་ཆེ་བས་བྱ་བ་མང་བ་དང་བྱེད་པ་མང་བར་གྱུར་ཅིང ། ལུང་ནོད་པ་དང་ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་ཀྱང་གཏོང་བར་བྱེད། སྲིན་བལ་འདོད་པ་དང ། སྲིན་བལ་གྱི་དོན་ཉིད་དུ་འོངས་པ་དག་བྲམ་ཟེ་དང ། ཁྱིམ་བདག་རྣམས་ལ་ཡང་དང་ཡང་དུ་རིག་པར་བྱེད་ནས། གཞན་མུ་སྟེགས་ཅན་དག་ཤཱཀྱའི་བུའི་དགེ་སྦྱོང་འདི་དག་ནི་སྲོག་གཅོད་པར་བྱེད་པ་དག་སྟེ། སྲོག་གཅོད་པ་ལས་མ་ལོག་མ་སྤངས་པས་དེས་ན་སྲིན་བལ་གྱི་སྟན་སར་པ་བྱེད་པ་དང ། བྱེད་དུ་འཇུད་པས་སྲིན་བལ་འབྱུང་བའི་སྲིན་བུ་སྲོག་ཆགས་མང་པོའི་ཚོགས་བསྒྲུབ་ཤིང་སྲོག་གཅོད་པར་བྱེད་དེ། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །
6.128a
སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱོད་སྲིན་བལ་གྱི་སྟན་སར་པ་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། །ཕྲེང་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་སྲིན་བལ་གྱི་སྟན་སར་པ་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །སྲིན་བལ་གྱི་སྟན་ཞེས་བྱ་བ་ནི་སྟན་གཉིས་ཏེ། ནང་ཚངས་ཅན་དང ། རླིངས་པ་སྟེ། དོན་འདིར་ནི་གཉིས་ཀ་ཡིན་པར་དགོངས་སོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང ། རྙེད་པས་སར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་སམ་གཞན་བྱེད་དུ་འཛུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ། །ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཆུན་པོ་དང ། འདའ་བ་དང ། ཕུང་པོ་ལས་ཏེ། དགེ་སློང་གིས་སྲིན་བལ་དག་གི་ཆུན་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྲིན་བལ་དག་གི་འདའ་བར་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ།
6.128b
སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྲིན་བལ་དག་གི་ཕུང་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྲིན་བལ་དག་གི་ཆུན་པོ་དང་འདའ་བ་དང ། ཆུན་པོ་དང་ཕུང་པོ་དང ། འདའ་བ་དང ། ཆུན་པོ་དང་འདའ་བ་དང ། ཕུང་པོ་དང་ཆུན་པོ་དང ། ཕུང་པོ་དང་འདའ་བ་དང ། ཕུང་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །བྱས་ཟིན་པ་རྙེད་པ་དང ། བྱས་ཟིན་པ་ལ་ཡོངས་སུ་ལོངས་སྤྱོད་པ་དང ། རྙིང་པ་མངོན་པར་འདུ་བྱེད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྲིལ་བལ་གྱི་སྤང་བ་སྟེ་བཅུ་གཅིག་པ་རྫོགས་སྷོ།། ་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། དེའི་ཚེ་ན་དགེ་སློང་དག་ལུག་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཛུད་དེ། དགེ་སློང་དག་ལུག་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཇུག་པ་ན་ལུག་བལ་ནག་པོ་འབའ་ཞིག་དཀོན་ཞིང་རིན་ཆེ་བས་བྱ་བ་མང་བ་དང ། བྱེད་པ་མང་བར་གྱུར་ཅིང ། ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་ཀྱང་གཏོང་བར་བྱེད། ལུག་བལ་ནག་པོ་འབའ་ཞིག་འདོད་པ་དང ། ལུག་བལ་ནག་པོ་འབའ་ཞིག་གི་དོན་ཉིད་དུ་འོངས་པ་དག་བྲམ་ཟེ་དང ། ཁྱིམ་བདག་རྣམས་ལ་ཡང་དང་ཡང་དུ་རིག་པར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར། དགེ་སློང་དག་ལུག་གི་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཇུད་དེ། དགེ་སློང་དག་ལུག་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཇུད་པ་ན་ལུག་བལ་ནག་པོ་འབའ་ཤིག་དཀོན་ཞིང་རིན་ཆེ་བས་བྱ་བ་མང་བ་དང ། བྱེད་པ་མང་བར་གྱུར་ཅིང
6.129a
ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་ཀྱང་གཏོང་བར་བྱེད། ལུག་བལ་ནག་པོ་འབའ་ཞིག་འདོད་པ་དང ། ལུག་བལ་ནག་པོ་འབའ་ཞིག་གི་དོན་ཉིད་དུ་འོངས་པ་དག་བྲམ་ཟེ་དང ། ཁྱིམ་བདག་རྣམས་ལ་ཡང་དང་ཡང་དུ་རིག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་ལུག་བལ་ནག་པོ་འབའ་ཞིག་གི་སྟན་སར་པ་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ལུག་བལ་ནག་པོ་འབའ་ཞིག་གི་སྟན་སར་པ་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །ལུག་བལ་ཞེས་བྱ་བ་ནི་ལུག་གི་བལ་ལོ། །ནག་པོ་འབའ་ཞིག་གི་ཞེས་བྱ་བ་ནི་ནག་པོ་བཞི་སྟེ། །
6.129b
རང་བཞིན་གྱིས་གནག་པ་དང ། སྔོ་བས་གནག་པ་དང ། འདམ་ཁ་དང ། ཁམ་པའོ། །སྟན་ཞེས་བྱ་ནི་སྟན་གཉིས་ཏེ། ནང་ཚངས་ཅན་དང ། རླིངས་པ་སྟེ། དོན་འདིར་ནི་རླིངས་པ་ཡིན་པར་དགོངས་སོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང ། རྙེད་པས་སར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་སམ། གཞན་བྱེད་དུ་འཇུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ། །ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཆུན་པོ་དང་འདའ་བ་དང ། ཕུང་པོ་ལས་ཏེ། དགེ་སློང་གིས་ལུག་བལ་ནག་པོ་འབའ་ཞིག་དག་གི་ཆུན་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ལུག་བལ་ནག་པོ་འབའ་ཞིག་དག་གི་འདའ་བ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ལུག་བལ་ནག་པོ་འབའ་ཞིག་དག་གི་ཕུང་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ལུག་བལ་ནག་པོ་འབའ་ཞིག་དག་གི་ཆུན་པོ་དང ། འདའ་བ་དང ། ཆུན་པོ་དང ། ཕུང་པོ་དང ། འདའ་བ་དང ། ཆུན་པོ་དང ། འདའ་བ་དང ། ཕུང་པོ་དང ། ་ཕུང་པོ་དང ། ཆུན་པོ་དང ། ཕུང་པོ་དང ། འདའ་བ་དང ། ཆུན་པོ་དང ། འདའ་བ་དང ། ཕུང་པོ་འབྱེད་པར་བྱེད། འཇིག་པར་བྱེད་རྨེལ་བར་བྱེད་ཅིང་ཇི་སྲིད་དུ་སྟན་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། སྟན་བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །བྱས་ཟིན་པ་རྙེད་པ་དང ། བྱས་ཟིན་པ་ལ་ཡོངས་སུ་ལོངས་སྤྱོད་པ་དང ། རྙེད་པ་མངོན་པར་།།
6.130a
འདུ་བྱེད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བལ་ནག་པོ་འབའ་ཞིག་གི་སྤང་བ་སྟེ་བཅུ་གཉིས་པ་རྫོགས་སོ།། ་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་ལུག་གི་བལ་ནག་པོ་འབའ་ཞིག་གི་སྟན་སར་པ་མི་བྱའོ་ཞེས་གསུངས་པས། དེ་དག་བལ་དཀར་པོ་དང ། མཁོབ་བལ་ཅུང་ཞིག་བཅུག་ནས་ལུག་གི་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཇུད་དེ། དེས་ཀྱང་དེ་དག་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་ཀྱང་གཏོང་བར་བྱེད་དོ། །དེ་འདོད་པ་དང ། དེའི་དོན་ཉིད་དུ་འོངས་པ་དག་བྲམ་ཟེ་དང ། ཁྱིམ་བདག་རྣམས་ལ་ཡང་དང་ཡང་དུ་རིག་པར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བལ་དཀར་པོ་དང ། མཁོ་བལ་ཅུང་ཞིག་བཅུག་ནས་ལུག་གི་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཇུད་དེ། དེས་ཀྱང་བྱ་བ་མང་བ་དང ། བྱེད་པ་མང་བར་གྱུར་ཅིང ། ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་ཀྱང་གཏོང་བར་བྱེད། དེ་འདོད་པ་དང ། དེའི་དོན་ཉིད་དུ་འོངས་པ་དག་བྲམ་ཟེ་དང ། ཁྱིམ་བདག་རྣམས་ལ་ཡང་དང་ཡང་དུ་རིག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ངས་དགེ་སློང
6.130b
གིས་ལུག་གི་བལ་ནག་པོ་འབའ་ཞིག་གི་སྟན་སར་པ་མི་བྱའོ། །ཞེས་གསུངས་པས་བལ་དཀར་པོ་དང ། མཁོབ་བལ་ཅུང་ཞིག་བཅུག་ནས་ལུག་གི་བལ་ནག་པོ་འབའ་ཞིག་གི་སྟན་སར་པ་བྱེད་པ་དང ། བྱེད་དུ་འཇུད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས། འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲེང་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སྟན་སར་པ་བྱེད་ན་ཆ་གཉིས་ནི་ལུག་བལ་ནག་པོ་འབའ་ཞིག་ལས་གཞུག་པར་བྱ། གསུམ་པ་ནི་དཀར་པོ་ལས། བཞི་པ་ནི་མཁོབ་བལ་ལས་གཞུག་པར་བྱའོ། །གལ་ཏེ་དགེ་སློང་གིས་ཆ་གཉིས་ལུག་བལ་ནག་པོ་འབའ་ཤིག་ལས་མ་གཅུག་གམ། གསུམ་པ་ནི་དཀར་པོ་ལས། བཞི་པ་ནི་མཁོབ་བལ་ལས་མ་བཅུག་པར་སྟན་སར་པ་བྱེད་ན་སྤང་བའི་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །སྟན་ཞེས་བྱ་བ་ནི་སྟན་གཉིས་ཏེ། ནང་ཚངས་ཅན་དང ། རླིངས་པ་སྟེ། དོན་འདིར་ནི་རླིངས་པ་ཡིན་པར་དགོངས་སོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང ། རྙེད་པས་སར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་སམ། གཞན་བྱེད་དུ་འཇུད་ནའོ། །ཆ་གཉིས་ནི་ལུག་བལ་ནག་པོ་འབའ་ཞིག་ལས་གཞུག་བར་བྱ་ཞེས་བྱ་བ་ལ། ལུག་བལ་ཞེས་བྱ་བ་ནི་ལུག་བལ་ལོ། །ནག་པོ་འབའ་ཞིག་ཅེས་བྱ
6.131a
བ་ནི་ནག་པོ་བཞི་སྟེ། རང་བཞིན་གྱིས་གནག་པ་དང ། སྔོ་བས་གནག་པ་དང ། །འདམ་ཁ་བ་དང ། ཁམ་པའོ། །གསུམ་པ་ནི་དཀར་པོ་ལས་ཤེས་བྱ་བ་ལས་དཀར་པོ་ཞེས་བྱ་བ་ནི་གློའི་བལ་དང ། རྒྱབ་ཀྱི་བལ་དང ། གཉའ་བའི་བལ་ལོ། །བཞི་པ་ནི་མཁོབ་བལ་ལས་གཞུག་པར་བྱའོ་ཞེས་བྱ་བ་ལ། མཁོབ་བལ་ཞེས་བྱ་བ་ནི་རྐང་པའི་བལ་དང ། མགོའི་བལ་དང ། ལྟོའི་བལ་ལོ། །མ་བཅུག་ཅེས་བྱ་བ་ནི་མ་བསྲེས་པར་རོ། །སྤང་བའི་ལྟུང་བྱེད་དོ། །ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་སྟན་སྲང་བཅུ་པ་བྱེད་ན་དེ་ལུག་བལ་ནག་པོ་འབའ་ཞིག་ལས་སྲང་ལྔ་དང ། དཀར་པོ་ལས་སྲང་ཕྲེད་དང་གསུམ་དང ། མཁོབ་བལ་ལས་སྲང་ཕྱེད་དང་གསུམ་གཞུག་པར་བྱའོ། །གལ་ཏེ་དགེ་སློང་གིས་ཆ་གཉིས་ལུག་བལ་ནག་པོ་འབའ་ཞིག་ལས་མ་བཅུག་གམ། གསུམ་པ་དཀར་པོ་ལས། བཞི་པ་མཁོབ་བལ་ལས་མ་བཅུག་པར་སྟན་སར་པ་བྱེད་ན་སྟན་ཟིན་ན་སྤང་བའི་ལྟུང་བྱེད་དུ་འགྱུར་རོ། །སྲང་བཅུ་པ་ཇི་ལྟ་བ་དེ་བཞིན་དུ་དགེ་སློང་གིས་སྟན་སྲང་ཉི་ཤུ་པ་དང ། སྲང་སུམ་བཅུ་པ་དང ། སྲང་བཞི་བཅུ་པ་དང ། སྲང་ལྔ་བཅུ་པ་བྱེད་ན་དེས་ལུག་བལ་ནག་པོ་འབའ་ཞིག་ལས་སྲང་ཉི་ཤུ་རྩ་ལྔ་དང ། དཀར་པོ་ལས་སྲང་ཕྱེད་དང་བཅུ་གསུམ་དང ། མཁོབ་བལ་ལས་སྲང་ཕྱེད་དང་བཅུ་གསུམ་གཞུག་པར་བྱའོ། །གལ་ཏེ་དགེ་སློང་གིས་ཆ་གཉིས་ལུག་བལ་ནག་པོ་འབའ་ཞིག་ལས་མ་བཅུག་གམ། གསུམ་པ་དཀར་པོ་ལས་བཞི་པ་མཁོབ་བལ་ལས་མ་བཅུག་པར་སྟན་སར་པ་བྱེད་ན། སྟན་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དཀར་པོ་དང ། མཁོབ་བལ་ལས་སྲང་གཅིག་གམ། སྲང་ཕྱེད་ཕྲི་སྟེ། ལུག་བལ་ནག་པོ་འབའ་ཞིག་ལས་སྟན་སར་པ་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །ནག་པོ་འབའ་ཤིག་མོད་པ་དང ། རིན་མཉམ་པ་དང ། དཀར་པོ་དང་མཁོབ་བལ། དཀོན་པ་དང ། རིན་ཆེ་བར་གྱུར་ན་ལྟུང་བ་མེད་དོ། །ལས་དང་པོ་པ་།།
6.131b
དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཆ་གཉིས་བསྲེས་པའི་སྤང་བ་སྟེ་བཅུ་གསུམ་པ་རྫོགས་སོ།། ་་་་་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྣམས་ལ་སྟན་མང་བ་ཉིད་འདི་ལྟ་བུ་འདི་བྱུང་བར་གྱུར་ཏེ། དེ་དག་སྟན་འདི་ནི་ཧ་ཅང་རིངས་སོ། །འདི་ནི་ཧ་ཅང་ཐུངས་སོ་ཞེས་དེ་བོར་ནས་གཞན་བྱེད་དུ་འཇུད་དོ། །སྟན་འདི་ནི་ཧ་ཅང་དོག་གོ། །འདི་ནི་ཧ་ཅང་ཡངས་སོ། །འདི་ནི་ཐམས་ཅད་ཀྱི་ཐམས་ཅད་དུ་བུག་རྡོལ་དང ། ཤ་ཟད་པ་དང ། བཅོས་དཀའ་བ་ཉིད་ཡིན་ནོ་ཞེས་དེ་བོར་ནས་གཞན་བྱེད་དུ་འཇུད་པས། དགེ་སློང་དེ་དག་སྟན་བྱས་ཤིང་བྱས་ཤིང་འདོར་བ་ན་བྱ་བ་མང་བ་དང ། བྱེད་པ་མང་བར་གྱུར་ཅིང ། །ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ནས། དགེ་སློང་དོན་ཉུང་དུ་དག་ཅིའི་ཕྱིར། དགེ་སློང་རྣམས་ལ་སྟན་མང་བ་ཉིད་འདི་ལྟ་བུ་འདི་བྱུང་བར་གྱུར་ཏེ། འདི་དག་སྟན་འདི་ནི་ཧ་ཅང་རིངས་སོ། །འདི་ནི་ཧ་ཅང་ཐུངས་སོ། །ཞེས་དེ་བོར་ནས་གཞན་བྱེད་དུ་འཇུད། སྟན་འདི་ནི་ཧ་ཅང་དོག་གོ། །འདི་ནི་ཧ་ཅང་ཡངས་སོ། །འདི་ནི་ཐམས་ཅད་དུ་བུག་རྡོལ་དང ། ཤ་ཟད་པ་དང ། བཅོས་དཀའ་བ་ཉིད་ཡིན་ནོ། །ཞེས་དེ་བོར་ནས་གཞན་བྱེད་དུ་འཇུད་པས། དགེ་སློང་འདི་དག་སྟན་བྱས་ཤིང་སྟན་བྱས་ཤིང་འདོར་བ་ན་བྱ་བ་མང་བ་དང ། བྱེད་བ་མང་བར་འགྱུར་ཅིང ། ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ཅེས་སྨོད་པར་བྱེད། ཁ་ཟེར་བར་བྱེད། ཕྱར་ཀ་གཏོང་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས
6.132a
བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་ལ་སྟན་མང་བ་ཉིད་འདི་ལྟ་བུ་འདི་བྱུང་བར་གྱུར་ཏེ། ཁྱེད་ཅག་སྟན་འདི་ནི་ཧ་ཅང་རིངས་སོ། །འདི་ནི་ཧ་ཅང་ཐུངས་སོ་ཞེས་དེ་བོར་ནས་གཞན་བྱེད་དུ་འཇུད། སྟན་འདི་ནི་ཧ་ཅང་དོག་གོ། །འདི་ནི་ཧ་ཅང་ཡངས་སོ། །འདི་ནི་ཐམས་ཅད་ཀྱི་ཐམས་ཅད་དུ་བུག་རྡོལ་དང ། ཤ་ཟད་པ་དང ། བཅོས་དཀའ་བ་དག་ཉིད་ཡིན་ནོ། །ཞེས་དེ་བོར་ནས་གཞན་བྱེད་དུ་འཇུད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང་ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སྟན་སར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང ། མ་སྤངས་ཀྱང་རུང་སྟན་སར་པ་གཞན་བྱེད་ན་སྤང་བའི་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་འབྲོག་གནས་ན་འབྲོག་གི་ནགས་ན་བཞུགས་སོ། །འབྲོག་གནས་གྲང་ཞིང
6.132b
རླུང་ཆེ་བས་དགེ་སློང་ལག་གི་བླ་དག་ལོ་དྲུག་ཏུ་སྟན་གྱིས་མི་ཐུབ་པ་དེ་དག་གྲང་བ་དག་གིས་ལས་སར་པ་དག་རྒྱུན་བཅད་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པར་རྨེད་པ། དོན་དང་མི་ལྡན་པར་མི་རྨེད་པས། སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པར་རྨེད་པ་ལ་ཆུ་ལོན་གྱིས་ཟློག་པ་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པར་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ཅིའི་ཕྱིར་དགེ་སློང་ལག་གི་བླ་དག་གིས་ལས་སར་པ་དག་རྒྱུན་བཅད་པར་གྱུར། བཙུན་པ་བཅོམ་ལྡན་འདས་ཀྱིས་འདི་ལྟར་དགེ་སློང་གིས་སྟན་སར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤང་ཀྱང་རུང ། མ་སྤངས་ཀྱང་རུང ། སྟན་སར་པ་གཞན་བྱེད་ན་སྤང་བའི་ལྟུང་བྱེད་དོ། །ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་པས། དགེ་སློང་ལག་གི་བླ་དག་དགུང་ལོ་དྲུག་གི་བར་དུ་སྟན་གྱིས་མི་ཐུབ་པ་དེ་དག་གྲང་བ་དག་གིས་ལས་སར་པ་དག་རྒྱུན་བཀུམ་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་ལག་གི་བླ་གང་ལ་ལོ་དྲུག་ཏུ་སྟན་གྱིས་མི་ཐུབ་པའི་དགེ་སློང་དེས་དགེ་འདུན་ལས་ལོ་དྲུག་ཚུན་ཆད་དུ་སྟན་གྱི་གནང་བ་གསོལ་བར་བྱའོ། །འདི་ལྟར་གསོལ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ་དགེ་སློང་ལག་གི་བླ་དེས་བླ་གོས་ཕྲག་པ་གཅིག་ཏུ་བྱས་ཏེ། རྒན་རིམས་ཀྱིས་ཕྱག་འཚལ་ནས། རྒན་པའི་མཐའ་ལོགས་སུ་ཙོག་པུར་འདུག་སྟེ།
6.133a
ཐལ་མོ་སྦྱར་ནས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་ལག་གི་བླ་མིང་འདི་ཞེས་བགྱི་བ་ལོ་དྲུག་ཏུ་སྟན་མི་བགྱིད་པ་ལས། བདག་དགེ་སློང་ལག་གི་བླ་མིང་འདི་ཞེས་བགྱི་བ་དགེ་འདུན་ལས་ལོ་དྲུག་ཚུན་ཆད་དུ་སྟན་གནང་བ་གསོལ་ན་ཐུགས་བརྩེ་བ་ཅན། དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་ལག་གི་བླ་མིང་འདི་ཞེས་བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས་ཏེ་གསོལ་བར་བྱའོ། །དགེ་སློང་དེ་དག་གིས་དགེ་སློང་ལག་གི་བླ་དེ་ལ་དད་པ་འམ་ཡིད་ཆེས་པས་འགྲོ་བར་མི་བྱ་བར་དགེ་འདུན་ཐམས་ཅད་དེར་འདོང་བར་བྱ་བ་འམ། དགེ་འདུན་གྱིས་བསྐོས་པའི་དགེ་སློང་དག་བཏང་བར་བྱ་ཞིང་དེ་དག་སྟན་དེ་རང་གི་མིག་སྔར་བབ་པར་བྱ་བ་འམ། ཡང་ན་སྟན་དེ་དགེ་འདུན་གྱི་དབུས་སུ་དབྱུང་བར་བྱ་སྟེ། གལ་ཏེ་སྟན་དེ་ཧ་ཅང་རིང་བ་ཡིན་ན་དེ་དག་གིས་བཅད་པར་བྱའོ། །གལ་ཏེ་ཧ་ཅང་ཐུང་བ་ཡིན་ན་བལ་སྦྱིན་པར་བྱའོ། །གལ་ཏེ་ཧ་ཅང་ཡངས་པ་ཡིན་ན་དེ་དག་གིས་བཅད་པར་བྱའོ། །གལ་ཏེ་ཧ་ཅང་དོག་པ་ཡིན་ན་བལ་སྦྱིན་པར་བྱའོ། །གལ་ཏེ་རལ་བ་དང་རྡོལ་བ་ཡིན་ན་བལ་སྦྱིན་པར་བྱའོ། །གལ་ཏེ་ཐམས་ཅད་ཀྱིས་ཐམས་ཅད་དུ་བུག་རྡོལ་བ་དང ། ཤ་ཟད་པ་དང ། བཅོས་དཀའ་བ་ཉིད་ཡིན་ན་དེའི་འོག་ཏུ་དགེ་སློང་ཅིག་གིས་གསོལ་བ་བྱ་སྟེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདི་ལོ་དྲུག་དུ་སྟན་མི་བགྱིད་པ་ལས་དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ལོ་དྲུག་ཚུན་ཆད་དུ་སྟན་གནང་བར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི
6.133b
བླ་མིང་འདི་ཞེས་བགྱི་བ་འདི་ལོ་དྲུག་ཏུ་སྟན་མི་བགྱིད་པ་ལས་དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ལོ་དྲུག་ཚུན་ཆད་སྟན་གནང་བར་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩལ་ན། ཚེ་དང་ལྡན་པ་གང་དག་དགེ་སློང་ལག་གི་བླ་མིང་འདི་ཞེས་བགྱི་བ་འདི་ལ་ལོ་དྲུག་ཚུན་ཆད་དུ་སྟན་གནང་བར་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་དགེ་སློང་ལག་གི་བླ་གང་ལ་ལོ་དྲུག་ཚུན་ཆད་དུ་སྟན་གནང་བ་བྱིན་པ་དེས་ལོ་དྲུག་ཚུན་ཆད་དུ་སྟན་བྱེད་དུ་གཞུག་སྟེ་འདི་ལ་འགྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་དོ། །དགེ་སློང་རྣམས་ལ་ཡང་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སྟན་སར་པ་བྱེད་ན་མི་འདོད་བཞིན་དུ་ལོ་དྲུག་དུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང་མ་སྤངས་ཀྱང་རུང ། སྟན་སར་པ་གཞན་བྱེད་ན་དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །སྟན་ཞེས་བྱ་བ་ནི་སྟན་གཉིས་ཏེ། ནང་ཚངས་ཅན་དང ། རླིངས་པ་སྟེ། དོན་འདིར་ནི་རླིངས་པ་ཡིན་པར་དགོངས་སོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང ། རྙེད་པས་སར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་སམ། གཞན་བྱེད་དུ་འཇུད་ན་འོ། །མི་འདོད་བཞིན་དུ
6.134a
ལོ་དྲུག་དུ་བཅང་བར་བྱའོ་ཞེས་བྱ་བ་ནི་ལོ་དྲུག་གི་མཐའ་ཚུན་ཆད་དུ་བཅང་བར་བྱ་བའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་ཞེས་བྱ་བ་ནི་དེའི་མཐའ་ཚུན་ཆད་དོ། །སྟན་རྙིང་པ་ཞེས་བྱ་བ་ནི་སྟན་གང་ཡོད་པ་དེའོ། །སྤངས་ཀྱང་རུང་མ་སྤངས་ཀྱང་རུང་སྟན་སར་པ་གཞན་བྱེད་ན་ཞེས་བྱ་བ་ནི་གཉིས་པའོ། །དགེ་འདུན་གྱིས་གནང་བ་མ་གཏོགས་སོ་ཞེས་བྱ་བ་ནི་དགེ་འདུན་གྱིས་གནང་བ་བཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤངས་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་་བར་སྡོམ་ལ། གཉིས་བརྩམས་ཕྱི་མ་ཟིན་པ་དང ། །གཉིས་བརྩམས་སྔ་མ་ཟིན་པ་དང ། །གཉིས་ཟིན་ནས་ནི་གཅིག་སྤོང་དང ། །གཉིས་ཀ་བརྩམས་ཏེ་གཏོང་བ་དང ། །ལོ་དྲུག་པ་ལ་ཉེས་མེད་པ། །དེ་ནི་སྟན་གྱི་བསྡུ་བ་ཡིན། །དགེ་སློང་གིས་ལོ་གང་ལ་སྟན་རྩོམ་པར་བྱེད་པའི་ལོ་དེ་ཉིད་ལ་སྟན་གཉིས་པ་རྩོམ་པར་བྱེད་ན་གཉིས་པ་རྩོམ་པ་དེ་ལ་ཉེས་བྱས་སུ་འགྱུར་ལ། བྱས་ཟིན་ན་ཡང་ཉེས་བྱས་སུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ལོ་དེ་ཉིད་ལ་སྟན་གཉིས་པ་མི་རྩོམ་ཡང་ལོ་གཉིས་པ་དང ། གསུམ་པ་དང ། བཞི་པ་དང ། ལོ་ལྔ་པ་ལ་སྟན་གཉིས་པ་རྩོམ་པར་བྱེད་ན་གཉིས་པ་རྩོམ་པ་དེ་ལ་ཉེས་བྱས་སུ་འགྱུར་ལ། བྱས་ཟིན་ན་ཡང་ཉེས་བྱས་སུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །དགེ་སློང་གིས་ལོ་གང་ལ་སྟན་རྩོམ་པར་བྱེད་པའི་ལོ་དེ་ཉིད་ལ་སྟན་གཉིས་པ་བརྩམས་ནས་སྔ་མ་ཟིན་པར་བྱེད་ན་གཉིས་པ་རྩོམ་པ་དེ་ལ་ཉེས་བྱས་སུ་འགྱུར་ལ། བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །ལོ་དེ་ཉིད་ལ་སྟན་གཉིས་པ་བརྩམས་ནས་ཟིན་པར་མི་བྱེད་ཀྱང་ལོ་གཉིས་པ་དང ། གསུམ་པ་དང ། བཞི་པ་དང ། ལྔ་པ་ལ་སྟན་གཉིས་པ་བརྩམས་ནས་སྔ་མ་ཟིན་པར་བྱེད་ན་དེ་རྩོམ་པ་ལ་ཉེས་བྱས་སུ་འགྱུར་ལ། བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ལོ་གང་ལ་སྟན་བྱས་པའི་ལོ་དེ་ཉིད་ལ་སྟན་གཉིས་པ་ཡང་བྱས་ནས་དེས་སྔ་མ་ཤོས་བྱིན་གྱིས་བརླབས་ཏེ
6.134b
ཕྱི་མ་ཤོས་གཏོང་བར་བྱེད་དམ། ཕྱི་མ་ཤོས་བཞག་སྟེ་སྔ་མ་ཤོས་གཏོང་བར་བྱེད་ན་གཉིས་པ་རྩོམ་པ་དེ་ལ་ཉེས་བྱས་སུ་འགྱུར་ལ། བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ལོ་དེ་ཉིད་ལ་སྟན་གཉིས་པ་མ་བྱས་ཀྱང་ལོ་གཉིས་པ་དང ། གསུམ་པ་དང ། བཞི་པ་དང ། ལྔ་པ་ལ་སྟན་གཉིས་པ་བྱས་ནས་དེས་སྔ་མ་ཤོས་བཞག་སྟེ་ཕྱི་མ་ཤོས་གཏོང་བར་བྱེད་དམ། ཕྱི་མ་ཤོས་བཞག་སྟེ་སྔ་མ་ཤོས་གཏོང་བར་བྱེད་ན་གཉིས་པ་རྩོམ་པ་དེ་ལ་ཉེས་བྱས་སུ་འགྱུར་ལ། བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །དགེ་སློང་གིས་ལོ་གང་ལ་སྟན་རྩོམ་པའི་དེ་ཉིད་ལ་སྟན་གཉིས་པ་ཡང་བརྩམས་ནས་དེ་མ་ཟིན་པར་གཏོང་བར་བྱེད་དམ། ལོ་གཉིས་པ་དང ། གསུམ་པ་དང ། བཞི་པ་དང ། ལྔ་པ་ལ་བརྩམས་ནས་དེ་མ་ཟིན་པར་གཏོང་བར་བྱེད་ན་དེ་རྩོམ་པར་བྱེད་པ་ལ་ཉེས་བྱས་ལྔར་འགྱུར་ལ། སྔ་མ་ལ་ནི་ལྟུང་བ་མེད་དོ། །དགེ་སློང་གིས་ལོ་གང་ལ་སྟན་བྱེད་པའི་ལོ་དེ་ཉིད་ལ་སྟན་གཉིས་པ་མི་བྱེད་ཅིང་ལོ་གཉིས་པ་ལ་ཡང་མི་བྱེད། གསུམ་པ་ལ་ཡང་མི་བྱེད། བཞི་པ་ལ་ཡང་མི་བྱེད། ལྔ་པ་ལ་ཡང་མི་བྱེད་པར་ལོ་དྲུག་པ་ལ་བྱེད་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལོ་དྲུག་ཏུ་བཅང་བའི་སྤང་བ་སྟེ་བཅུ་བཞི་པ་རྫོགས་སོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་གཉིས་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་བླ་ན་མེད་པའི་མཁྱེན་པ་ཐུགས་སུ་ཆུད་པ་དེའི་ཚེ་ན་ཐམས་ཅད་དུ་ཡུལ་དབུས་སུ་སངས་རྒྱས་འཇིག་རྟེན་དུ་བྱུང་ཞེས་གྲག་གོ་ཞེས་སྒྲ་གྲགས་སོ། །བྱང་ལམ་ན་ཚོང་པ་དག་གིས་ཡུལ་དབུས་སུ་སངས་རྒྱས་འཇིག་རྟེན་དུ་བྱུང་སྟེ། གང་དག་དེ་ལ་མཆོད་པ་དག་བྱེད་པ་དེ་དག་གི་མཆོད་པ་བྱས་པ་དེ་དག་ནི
6.135a
ཤིན་དུ་འབྲས་བུ་ཆེ་བ་དང ། ཕན་ཡོན་ཆེ་བ་དང ། གསལ་བ་ཆེ་བ་དང ། རྒྱ་ཆེན་པོར་འགྱུར་རོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། བདག་ཅག་ཟོང་དག་ཐོགས་ཏེ་མཉན་ཡོད་དུ་འདོང་ཞིང་དེར་བདག་ཅག་གིས་ཁེ་སྤོགས་ཀྱང་བསྒྲུབ་པར་བྱ། བཅོམ་ལྡན་འདས་ལ་ཡང་བསྙེན་བཀུར་བྱའོ་སྙམ་དུ་རིག་ནས་ཚོང་པ་ལྔ་བརྒྱ་བྱང་ལམ་ནས་ཟོང་དག་ཐོགས་ཏེ་ཡུལ་དབུས་སུ་འཕགས་སོ། །དེ་དག་མཐར་གྱིས་མཉན་ཡོད་དུ་ཕྱིན་ནས་དེ་དག་གིས་ཟོང་མཁོས་སུ་ཕབ་སྟེ། ཁྱིམ་བདག་མགོན་མེད་ཟས་སྦྱིན་ག་ལ་བ་དེར་དོང་ནས་ཕྱིན་པ་དང ། ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་བདག་བདག་ཅག་སངས་རྒྱས་བཅོམ་ལྡན་འདས་བལྟ་བར་འདོད་དོ། །ཤེས་ལྡན་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་པ་རྣམས་ནི་བལྟ་བར་བྱ་བ་རིན་པོ་ཆེ་ཁོ་ན་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་འདི་ལྟ་སྟེ། དཔེར་ན་ཨུ་དུམ་བ་རའི་མེ་ཏོག་ལྟར་བལྟམས་པ་དང ། འབྱུང་བ་དཀོན་པ་ཡིན་ནོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་ཚོང་པ་ལྔ་བརྒྱ་པོ་དེ་དག་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཚོང་པ་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཚོང་པ་དེ་དག་གིས་བཅོམ་ལྡན་འདས་ལ་བསྙེན་བཀུར་བྱས་ནས། དགེ་སློང་གནས་བརྟན་གནས་བརྟན་རྣམས་ཀྱི་གཙུག་ལག་ཁང་བལྟ་བར
6.135b
བརྩམས་པ་དང ། ཚོང་པ་དེ་དག་གིས་དགེ་སློང་གནས་བརྟན་གནས་བརྟན་རྣམས་ཀྱི་མལ་དག་ན་གདིང་བ་དབུས་རྡོལ་བ་དག་མཐོང་ངོ ། །མཐོང་ནས་ཀྱང་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཅིའི་ཕྱིར་དགེ་སློང་གནས་བརྟན་གནས་བརྟན་འདི་དག་གི་གདིང་བ་དག་དབུས་རྡོལ་བར་གྱུར། ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། བདག་ཉིད་ཆེན་པོ་འདི་དག་ནི་ཕལ་ཆེར་མཚན་མོ་སྐྱིལ་མོ་དཀྲུང་གིས་འདའ་བར་བྱེད་དོ། །དེ་དག་སེམས་མངོན་པར་དད་པར་གྱུར་ནས་དད་པ་སྐྱེས་པ་དེ་དག་གིས་དགེ་སློང་རྣམས་ལ་རས་ཡུག་ཆེན་ལྔ་བརྒྱ་ཕུལ་ལོ། །དགེ་སློང་རྣམས་ཀྱིས་གདིང་བ་རྙིང་པ་དེ་དག་ཁང་པ་ཆེན་པོའི་གཙུག་ལག་ཁང་བླ་གབ་མེད་པ་ཞིག་ཏུ་བཞག་གོ། །དེའི་ཚེ་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། དགེ་སློང་གི་དགེ་འདུན་ནི་ཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པ་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་པར་བཞེད་པ་དང ། ལྷ་རྣམས་ལ་ཆོས་སྟོན་པར་བཞེད་པ་དང ། ནད་པ་ལ་བལྟ་བར་བཞེད་པ་དང ། གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པས། རྫས་ལས་བྱུང་བ་ནི་བཞུགས་ཤིང་བསོད་སྙོམས་མངོན་པར་སྒྲུབ་པ་མཛད་དོ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ལྡེ་མིག་བསྣམས་ཏེ་ཀུན་དགའི་ར་བ་ནས། ཀུན་དགའི་ར་བ་ན། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ་འཆག་ས་ནས་འཆག་ས་དང ། གོལ་བར་གཤེགས་ཤིང་མཐར་གྱིས
6.136a
གཤེགས་པ་ན་ཁང་པ་ཆེན་པོའི་གཙུག་ལག་ཁང་ག་ལ་བ་དེར་གཤེགས་སོ། །དེའི་ཚེ་ན་ཁང་པ་ཆེན་པོའི་གཙུག་ལག་ཁང་དེ་ན་གདིང་བ་རྙིང་པ་རྡོལ་བ་དང་རལ་བས་རྡུལ་གྱི་ཕྱེ་མ་དང་འདྲེས་པ་རབ་ཏུ་མང་པོ་དག་ས་ལ་བཀྲམ་ཞིང་འདུག་གོ། །བཅོམ་ལྡན་འདས་ཀྱིས་གདིང་བ་རྙིང་པ་རྡོལ་བ་དང ། རལ་བ་ས་རྡུལ་གྱི་ཕྱེ་མ་དང་འདྲེས་པ་རབ་ཏུ་མང་པོ་དག་ས་ལ་བཀྲམ་ཞིང་འདུག་པ་དག་གཟིགས་སོ། །གཟིགས་ནས་ཀྱང་ཨེ་མ་ཞེས་གསུང་ཞིང་སྨད་ནས་འདི་སྙམ་དུ་དགོངས་ཏེ། བྲམ་ཟེ་དང་ཁྱིམ་བདག་དད་པ་ཅན་དག་གིས་ལྤགས་པ་དང་ཤ་དང་ཁྲག་དག་བཙིར་ཅིང་སྦྱིན་པ་དག་སྦྱིན། བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང ། སོ་སོར་མི་རྟོག་པར་ཡོངས་སུ་ལོངས་སྤྱོད་པར་བྱེད་དོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་གདིང་བ་རྙིང་པ་དེ་དག་ལེགས་པར་བརྟུལ་ཅིང་སྤྲུགས་ནས་བཏིང་ཞིང་བསྐམས་ཏེ་རྩིག་པ་ལ་མི་རེག་པར་མཛད་ནས། གཙུག་ལག་ཁང་གི་སླད་རོལ་ཏུ་ཞབས་གཉིས་བསིལ་ཏེ་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་དགེ་སློང་བསོད་སྙོམས་སྒྲུབ་པས་བསོད་སྙོམས་བླངས་ནས། བཅོམ་ལྡན་འདས་ག་ལ་བ་དེར་སོང་ངོ ། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱི་བསོད་སྙོམས་སྒྲུབ་པའི་དགེ་སློང་ལ་དགེ་སློང་ལས་ཇི་ལྟར་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་འདིས་སོ་སོར་ཀུན་དགའ་བར་མཛད་པ་ཡིན་པས་བཅོམ་ལྡན་འདས་ཀྱིས་དགེ་སློང་བསོད་སྙོམས་སྒྲུབ་པ་ལ། དགེ་སློང་ཇི་ལྟར་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་དང ། དེས་གསོལ་པ། བཙུན་པ་ཏེ་པོར་ཟས་བསོད་ཅིང་དགེ་སློང་གི་དགེ་འདུན་ཚིམ་པར་བགྱིས་སོ། །དེ་ནས་བཅོམ་ལྡན་འདས་ཞལ་ཟས་ཀྱི་བྱ་བ་མཛད་ནས། གཙུག་ལག་ཁང་གི་སླད་རོལ་དུ་ཞབས་གཉིས་བསིལ་ཏེ་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་བཅོམ་ལྡན་འདས་ཕྱི་དྲོ་ནང་དུ་ཡང་དག་འཇོག
6.136b
ལས་བཞེངས་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ན་ངས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཤེས་ནས་ལྡེ་མིག་ཁྱེར་ཏེ་ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང ། གོལ་བར་སོང་ཞིང་མཐར་གྱིས་འགྲོ་བ་ན་ཁང་པ་ཆེན་པོའི་གཙུག་ལག་ཁང་ཞིག་ག་ལ་བ་དེར་ཕྱིན་ནས་ངས་ཁང་པ་ཆེན་པོའི་གཙུག་ལག་ཁང་དེ་ན་གདིང་བ་རྙིང་པ་རྡོལ་བ་དང་རལ་བ་ས་རྡུལ་གྱི་ཕྱེ་མ་དང་འདྲེས་པ་རབ་དུ་མང་པོ་དག་ས་ལ་བཀྲམ་ཞིང་འདུག་པ་མཐོང་ངོ ། །མཐོང་ནས་ཀྱང་ཨེ་མ་ཞེས་བྱས་ཏེ་སྨད་ནས་འདི་སྙམ་དུ་བྲམ་ཟེ་དང ། ཁྱིམ་བདག་དད་པ་ཅན་དག་གིས་ལྤགས་པ་དང ། ཤ་དང ། ཁྲག་དག་བཙིར་ཅིང་བཙིར་ཅིང་སྦྱིན་པ་དག་སྦྱིན། བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང ། སོ་སོར་མི་རྟོག་པར་ཡོངས་སུ་ལོངས་སྤྱོད་པར་བྱེད་དོ་སྙམ་དུ་དགོངས་ཀྱིས། དགེ་སློང་དག་ཁྱེད་ཀྱིས་དད་པས་སྦྱིན་པར་བྱ་བ་ལ། དྲོད་རན་པར་ཡོངས་སུ་ལོངས་སྤྱད་པ་དང ། སྤང་ཞིང་ཡོངས་སུ་ལོངས་སྤྱད་པ་དང ། དུས་སུ་ཡོངས་སུ་ལོངས་སྤྱད་པ་དང ། བརྟག་ཅིང་ཡོངས་སུ་ལོངས་སྤྱད་པ་དང ། ཁད་ཀྱིས་ཡོངས་སུ་ལོངས་སྤྱད་ན་ལེགས་སོ། །བར་སྡོམ་ལ་དྲོད་རན་པ་དང་སྤང་བ་དང ། །དེ་བཞིན་དུས་དང་བརྟག་པ་དང ། །ཁད་ཀྱིས་ཡོངས་སུ་སྤྱད་པ་ཡིན། །དེ་ནས་བཅོམ་ལྡན་འདས་ཀྱིས་དྲོད་རན་པ་དང ། སྤང་བ་དང་དུས་བརྟག་པ་དང ། ཁད་ཀྱིས་ཡོངས་སུ་ལོངས་སྤྱད་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གདིང་བ་སར་པ་བྱེད་ན་སར་པ་བྱ་ཁ་དོག་མི་སྡུག
6.137a
པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་ཀླན་པར་བྱའོ། །གལ་ཏེ་དགེ་སློང་གིས་སར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་ཀླན་པར་གདིང་བ་སར་པ་སྤྱོད་ན་སྤང་བའི་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །གདིང་བ་ཞེས་བྱ་བ་ནི་སོ་སོར་གདིང་བའོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང ། རྙེད་པས་སར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་སམ། གཞན་བྱེད་དུ་འཇུག་ནའོ། །སར་པ་ཁ་དོག་མི་སྡུག་པར་བྱ་བའི་ཕྱིར་ཞེས་བྱ་བ་ནི་སར་པ་སྲ་བར་བྱ་བའི་ཕྱིར་རོ། །གདིང་བ་རྙིང་པ་བདེ་བར་གཤེགས་པའི་མཐོང་གང་འཁོར་བས་ཀླན་པར་བྱའོ་ཞེས་བྱ་བ་ནི་གལ་ཏེ་དེ་ལ་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བ་གཞན་ཡོད་ནའོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །བདེ་བར་གཤེགས་པའི་མཐོ་གང་ལ་ནི་ཚད་དང་ལྡན་པའི་ཁྲུའི་ཁྲུ་ཕྱེད་དང་དོ་ཡོད་དོ། །འཁོར་བས་ཤེས་བྱ་བ་ནི་ཀུན་ནས་མཐོ་རེ་ཡོད་པས་སོ། །ཀླན་པར་བྱའོ་ཞེས་བྱ་བ་ནི་སྦྱར་བར་བྱ་བའོ། །མ་ཀླན་པར་ཞེས་བྱ་བ་ནི་མ་སྦྱར་བར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་བཀླན་པར་ཇི་ཙམ་ཅུང་ཟད་དུ་གདིང་བ་སར་པ་སྤྱོད་པར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །གདིང་བ་རྙིང་པ་ཐམས་ཅད་ཀྱི་ཐམས་ཅད་དུ་ཤ་ཟད་པ་དང ། བུག་རྡོལ་དུ་གྱུར་པ་དང ། བཅོས་སུ་མི་རུང་བ་ཡིན་ན་ལྟུང་བ་མེད་དོ། །དེ་ཙམ་མེད་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མཐོ་གང་གི་སྤང་བ་སྟེ་བཅཝ་ལྔ་པ་རྫོགས་སོ།། ་་་་་་་་་།།
6.137b
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུའི་ཞག་གིས་བསྐུས་ཏེ་འགྲོ་ན་ཡང་འགྲོ་བར་ཆས་པའི་རྙེད་པ་སྒྲུབ་པར་བྱེད་འོང་ན་ཡང་བློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང་སྐྱེ་བོ་མང་པོ་དགའ་བ་དང ། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང ། གང་ནས་ཀྱང་མི་འོང་བས་རྙེད་པ་འཐོབ་པ་དང ། སྐྱེ་བོ་མང་པོ་དགའ་བ་དང ། ཡིད་དུ་འོང་བར་ག་ལ་འགྱུར་གྱིས་ཡུ་བུ་ཅག་ཀྱང་འདོང་ངོ ། །གང་དུ་འདོང ། གང་དུ་དོན་འཐུན་འགྲུབ་པར་རོ། །དེ་དག་གིས་བསམས་པ། གལ་ཏེ་ཐམས་ཅད་དོང་བར་འགྱུར་ན་བདག་ཅག་གི་ཉེ་བར་སྤྱོད་པའི་ཁྱིམ་གང་དག་ཡིན་པ་དེ་དག་ཀྱང་ལྷུང་བཟེད་ནག་པོ་ཅན་དག་གིས་རྗེས་སུ་འཇུག་པར་བྱེད་པར་འགྱུར་གྱིས་བདག་ཅག་གིས་གཅིག་བཞག་སྟེ་འདོང་བར་བྱ་ན་སུ་བཞག་པར་བྱ། བཙུན་པ་འཆར་ཀའོ། །བཙུན་པ་འཆར་ཀ་ཁྱོད་འདི་ཉིད་དུ་འདུག་ཤིག་།ཁོ་བོ་ཅག་འདོང་བར་བྱའོ། །དེ་བཞིན་གྱིས་ཤིག་ཅེས་འཆར་ཀ་དེ་ཉིད་དུ་འདུག་གོ། །ལྔ་པོ་དག་གིས་དོན་འཐུན་བཙལ་བར་བརྩམས་པ་དང ། དེ་དག་གིས་བལ་ཡུལ་དུ་འགྲོ་བའི་དོན་འཐུན་མཐོང་ནས། དེའི་དྲུང་དུ་སོང་སྟེ་སྨྲས་པ། བཞིན་བཟངས་དག་ཁྱེད་གང་དུ་འཕགས། འཕགས་པ་དག་བལ་ཡུལ་དུའོ། །བཞིན་བཟངས་དག་ཁོ་བོ་ཅག་ཀྱང་ཁྱེད་དང་ལྷན་ཅིག་འདོང་ངོ ། །འཕགས་པ་དག་བལ་ཡུལ་ནི་རྔ་མོའི་རྒྱབ་འདྲ་བ་ལགས་པས། ཁྱེད་ཅག་དེར་དགྱེས་པར་མི་འགྱུར་རོ། །བཞིན་བཟངས་དག་གལ་ཏེ་དེ་ལྟ་བུ་ཡིན་དུ་ཟིན་ཀྱང ། ཡུལ་མཐོང་བར་འགྱུར་བས་འདོང་བར་བྱའོ། །འཕགས་པ་དག་གལ་ཏེ་དེ་ལྟ་ན་ཚུར་སྤྱོན་བཞུད་དོ། །དྲུག་སྡེ་དག་དོན་འཐུན་དེ་དག་དང་ལྷན་ཅིག་བལ་ཡུལ་དུ་འཕགས་ནས་མཐར་གྱིས་བལ་ཡུལ་དུ་ཕྱིན་པ་དང ། ཉི་མ་གང་ཁོ་ན་ལ་བལ་ཡུལ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི
6.138a
་ དགའ་བར་གྱུར་ནས་དེ་དག་ནང་པར་སྔར་ལངས་ཏེ་ལམ་སྲང་དུ་དོང་བ་དང ། ཚོང་པ་དག་གིས་དྲུག་སྡེ་དག་མཐོང་ནས་དེ་དག་གི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་བལ་ཡུལ་ཅི་འདྲ། ཁྱེད་ཅག་མངོན་པར་མི་དགྱེས་པར་མ་གྱུར་ཏམ། བཞིན་བཟངས་དག་ཉི་མ་གང་ཁོ་ན་ལ་བལ་ཡུལ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི་དགའ་བར་གྱུར་ཏོ། །འཕགས་པ་དག་བདག་ཅག་གིས་ཁྱེད་ལ་དང་པོ་ཁོ་ན་ནས་བལ་ཡུལ་ནི་རྔ་མོའི་རྒྱབ་འདྲ་བ་ལགས་པས་ཁྱེད་ཅག་དེར་དགྱེས་པར་མི་འགྱུར་རོ་ཞེས་མ་བགྱིས་སམ། བཞིན་བཟངས་དག་ཅི་དེ་ལྟ་ན་འགྲོ་འམ་འདོང་ངོ ། །འཕགས་པ་དག་བདག་ཅག་གིས་ཟོང་མ་བསྒྱུར་དེ་དེ་ལྟ་ལགས་མོད་ཀྱི་འོན་ཀྱང་བདག་ཅག་དང་བཤེས་པའི་ཚོང་པ་གཞན་དག་མཆིས་པ་དེ་དག་གིས་ཟོང་བསྒྱུར་བས་དེ་དག་ལ་གཏད་པར་བགྱིས་དེ་དག་དང་ཐབས་ཅིག་བཞུད་ཅིག་།དྲུག་སྡེ་དག་གིས་སྨྲས་པ། དེ་མ་ནོངས་ཀྱིས་དེ་བཞིན་བགྱིའོ། །བལ་ཡུལ་ན་བལ་དང་ལྡོང་རོས་གཉིས་མོད་པས་དོན་འཐུན་དེ་དག་གིས་བལ་གྱིས་ཤིང་རྟ་བཀང་སྟེ་ཆས་པ་དང ། དྲུག་སྡེ་དག་ཀྱང་དོན་འཐུན་དེ་དང་ལྷན་ཅིག་འཕགས་སོ། །དྲུག་སྡེ་དག་གི་ཀུན་དུ་སྤྱོད་པ་ནི་རྡུལ་གྱིས་འཇིགས་པས་ཡང་ན་ནི་དོན་འཐུན་གྱི་མདུན་དུ་འགྲོ། ཡང་ན་ནི་ཕྱི་བཞིན་འབྲང་ཞིང་འགྲོ་བས་དེ་དག་དོན་འཐུན་གྱི་ཕྱི་བཞིན་འགྲོ་བར་བརྩམས་པ་དང ། ཇི་ཙམ་ན་ཚོང་པ་དེ་དག་གི་ཤིང་རྟའི་སྲོག་ཤིང་ཆག་ནས་ཚོང་པ་དེ་དག་གིས་བསམས་པ། གལ་ཏེ་ཤིང་རྟའི་སྲོག་ཤིང་བཅོས་ན་སྒྲས་ཆོམ་རྐུན་པ་དག་འོང་བར་འགྱུར་ཞིང་དེ་དག་གིས་དང་པོར་བདག་ཅག་བསད་པར་འགྱུར་ལ་དེའི་འོག་ཏུ་ནོར་ཡང་ཕྲོགས་པར་འགྱུར་གྱིས། བདག་ཅག་གིས་གཅེས་པ་དག་ཁྱེར་ཏེ་འདོང་ངོ་སྙམ་ནས་ཡིད་མི་དགའ་ཞིང་འཁོད་པ་དང ། དྲུག་སྡེ་དག་ལྷགས་ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་ཡིད་མི་དགའ་ཞིང་འཁོད། འཕགས་པ་དག་ཤིང་རྟའི་སྲོག་ཤིང་ཆག་སྟེ་གལ་ཏེ་ཤིང་རྟའི་སྲོག་ཤིང་བཅོས་ན་སྒྲས་ཆོམ་རྐུན་པ་དག་མཆིས་པར་འགྱུར
6.138b
ཞིང་དེ་དག་གིས་དང་པོར་བདག་ཅག་བཀུམ་པར་འགྱུར་ལ། དེའི་འོག་ཏུ་ནོར་ཡང་ཕྲོགས་པར་འགྱུར་བས་བདག་ཅག་གིས་གཅེས་པ་དག་འཚལ་དེ་མཆིའོ་སྙམ་ནས་ཡིད་མི་དགའ་ཞིང་མཆིས་སོ། །བཞིན་བཟངས་དག་ཁྱོད་ཀྱིས་བལ་དག་ཡོངས་སུ་བརྟང་ངམ། ཡོངས་སུ་བཏང་ངོ ། །གལ་ཏེ་ཁྱེད་ཅག་ལ་མི་གནོད་ན་ཞཝ་དང ། ལྷམ་སྒྲོག་གུ་ཅན་དང ། སྟོད་ཀོར་ནང་ཚངས་ཅན་དང ། རྒྱ་ཅང་དང ། ལྕག་པོད་དང ། ཤུར་བུ་ཕྲེའུ་ལ་སོགས་པའི་དོན་དུ་ཅུང་ཞིག་བསྐུར་རོ། །འཕགས་པ་དག་བདག་ཅག་ལ་འདིས་ཅི་བགྱི། ཐམས་ཅད་སྣོམས་ཤིག་།དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཕྱག་དར་ཁྲོད་པ་རྙེད་དོ་ཞེས་དེ་དག་གིས་ལྔ་ཅར་གྱི་ལྷུང་བཟེད་དང་ཆོས་གོས་དག་གཅིག་གིས་བསྐུར་ནས་མི་བཞིས་དེ་ཉིད་ལས་ཐག་པ་བཀའ་དེ་ཁུར་པོ་ཆེ་བ་བཞི་དྲགས་ནས་དེ་དག་གིས་དེ་ཁུར་ཏེ་དོང་ངོ ། །དེ་དག་གིས་ཁུར་དེ་དག་ཁྱེར་ཏེ་འཕགས་པ་དང ། ཚོང་པ་དེ་དག་གིས་དྲུག་སྡེ་དག་བལ་གྱི་ཁུར་བླང་སྟེ་ཕྱི་བཞིན་འོངས་པ་མཐོང་ནས་སྨྲས་པ། འཕགས་པ་དག་བདག་ཅག་གིས་གླ་མི་དག་ཁྲིད་དེ་མཆིའོ་སྙམ་དུ་བསམས་ནས། ཁྱེད་ཅག་གིས་བལ་འདི་ཐམས་ཅད་བསྣམས་དེ་བྱོན་ཀྱིས་འཕགས་པ་དག་ལ་གླ་གསོལ་ལོ། །བཀྲེན་པ་དག་ཁོ་བོ་ཅག་ཁྱོད་ཀྱི་གླ་མི་དག་ཡིན་ནམ། འཕགས་པ་དག་མད་ཀྱང་བཞད་གད་བགྱིའོ། །དོན་འཐུན་དེའི་ནང་ན་མུ་སྟེགས་ཅན་དག་ཅིག་འདོང་བ་དེ་དག་གིས་སྨྲས་པ། ཀྱེ་མ་དྲུག་སྡེ་དག་ཁྱེད་ཅག་གང་དུ་ཁུར་འཇིག་པར་འགྱུར། གང་དུ་རྙེད་པ་འགྲུབ་པར་འགྱུར། ཁྱོད་ཀྱི་མའི་ལྟོ་དྲལ་ཏེ་དེར་ཁུར་འཇིག་པར་འགྱུར་ཞིང་དེར་རྙེད་པ་འགྲུབ་པར་འགྱུར་རོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་གལ་ཏེ་དོན་མཐུན་དང་ལྷན་ཅིག་འདོང་ན་ཐོ་འཚམ་པ་མང་དུ་འབྱུང་གིས་དོན་འཐུན་གྱི་མདུན་དུ་འདོང་ངོ་ཞེས་དེ་དག་དོན་འཐུན་གྱི་མདུན་དུ་འཕགས་ཏེ་དོང་བ་དང ། རི་བྲགས་ཤིག་ན་ཆོམ་རྐུན་པ་གཅད་པའི་ཕྱིར་ཡང་རྒོད་ཀྱི་མི་མང་པོ་བཀོད་ཅིང་འཁོད་པ་དེ་དག་གིས་དེ་དག་ཐག་རིང་པོ་ཁོ་ན་ནས་མཐོང་ངོ ། །
6.139a
མཐོང་ནས་ཀྱང་ཉམ་ང་བར་གྱུར་ནས་དེ་དག་གིས་སྨྲས་པ། ཤེས་ལྡན་དག་གླང་པོ་ཆེ་དང་བཅས་པའི་དམག་བྱུང་ངོ་ཞེས་རི་བྲགས་པ་དེ་དག་ཐམས་ཅད་སྐྲག་ནས་ནགས་ཁྲོད་དུ་བྱེར་རོ། །དེ་དག་གི་ནང་ནས་ཁ་ཅིག་གིས་སྨྲས་པ། འདི་དག་ནི་གླང་པོ་ཆེ་དང་བཅས་པའི་དམག་མ་ཡིན་གྱི་འདི་ལྟར་རྔ་མོ་དག་ཅིག་འོང་བ་ཡིན་ནོ། །ཁ་ཅིག་གིས་སྨྲས་པ། འདི་དག་ནི་རྔ་མོ་མ་ཡིན་གྱི་འདི་ལྟར་གླང་དག་ཅིག་ཡིན་ནོ། །ཁ་ཅིག་གིས་སྨྲས་པ། འདི་དག་ནི་གླང་མ་ཡིན་གྱི་འདི་དག་ནི་ཁུར་ཐོགས་པ་དག་ཅིག་ཡིན་ནོ། །དེ་དག་ཐག་ཉེ་བར་གྱུར་པ་དང་ཡང་རྒོད་དེ་དག་གིས་སྨྲས་པ། འཕགས་པ་དག་ཁྱེད་ཅག་འདི་ལྟ་བུའི་ཁུར་དག་ཐོགས་པས་དེའི་ཕྱིར་རི་བྲགས་པ་ཐམས་ཅད་སྐྲག་སྟེ་ནགས་ཁྲོད་དུ་བྱེར་རོ། །བཀྲེན་པ་དག་གལ་ཏེ་ཆོམ་རྐུན་པ་དག་གིས་ཁྱེད་ཅག་དེ་དག་བྲེད་ངས་པར་ཤེས་པར་གྱུར་ན་ཉིན་མོའི་ཉི་མ་ཁོ་ན་ལ་ཡང་བཅིངས་ཏེ་ནགས་ཁྲོད་དུ་ཁྲིད་པར་འགྱུར་རོ། །དགའ་བོ་ཉེ་དགའ་གལ་ཏེ་ལམ་དུ་འདོང་ན་ཐོ་འཚམ་པ་མང་དུ་འབྱུང་གིས་ལམ་གོལ་བར་འདོང་ཞུགས་ཏེ་དོང་བ་དང ། ཤོ་གམ་པ་དག་གིས་ཚོང་པ་ཤོ་གམ་འདྲལ་བ་བསྒུགས་པའི་ཕྱིར་འགེ་གུ་པའི་མི་མང་པོ་དག་བཀོད་ཅིང་འཁོད་པ་དེ་དག་གིས་དེ་དག་མཐོང་ནས་སྨྲས་པ། ཨེ་མའོ་ཚོང་པ་ཤོ་གམ་འདྲལ་བ་དག་ཅིའི་ཕྱིར་ཤོ་གམ་དྲལ་ཏེ་འདོང ། བཀྲེན་པ་དག་ཁོ་བོ་ཅག་ཁྱེད་ཀྱི་ཚོང་པ་ཤོ་གམ་འདྲལ་བ་དག་ཡིན་ནམ། ཁྱེད་ཅག་སུ་ཡིན། འཕགས་པ་དྲུག་སྡེ་དག་ཡིན་ནོ། །བཞུད་ཅིག་དེ་དག་གིས་སྨྲས་པ། དགའ་བོ་ཉེ་དགའ་གལ་ཏེ་རྒྱལ་བྱེད་ཀྱི་ཚལ་གྱི་སྒོ་ནས་ཞུགས་ན་ལྷུང་བཟེད་ནག་པོ་ཅན་དག་ལས་ཐོ་འཚམ་པ་མང་དུ་འབྱུང་གིས་སྒེའུ་ཆུང་ནས་འཇུག་པར་བྱའོ་ཞེས་དེ་དགེ་སྒེའུ་ཆུང་ནས་ཞུགས་པ་དང ། རྒན་ཞུགས་ཤིགས་གིས་མཐོང་ནས་དེས་སྨྲས་པ། ཨེ་མའོ་ཁུར་ཙ་བ་དག་ཅིའི་ཕྱིར་གྲོང་དྲལ་ཏེ་འཇུག་པར་བྱེད། རྒན་ཞུགས་ཁོ་བོ་ཅག་ཁྱོད་ཀྱི་ཁུར་ཙ་བ་དག་ཡིན་ནམ། དེས་སྨྲས་པ་ཁྱེད་སུ་ཡིན། ཚེ་དང་ལྡན་པ་དྲུག་སྡེ་དག་ཡིན་ནོ། །ཚེ་དང་ལྡན་པ་དག་བྱོན་པ་ལེགས་སོ་བྱོན་པ་ལེགས་སོ། །དེ་དག་ནང་དུ་ཞུགས་ནས་དེ་དག་གི་བལ་གྱི་ཁུར་དེ་དག་བཤིག་པ་དང ། རི་རབ་ཀྱི་རྣམ་པ་འདྲ་བའི་ཕུང
6.139b
པོ་ཆེན་པོར་རྣམ་པར་གནས་སོ། །དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཅག་ཁུར་འདི་ལྟ་བུ་དག་ཐོགས་ནས་ཁྱེད་ལ་ཐོ་འཚམ་པ་དག་མི་འབྱུང་ངམ། ཚེ་དང་ལྡན་པ་དག་ཁྱེད་ཅི་ཁོ་བོ་ཅག་གིས་བཟའ་བ་ཁོ་ནའི་ཕྱིར་ཁ་མངོན་པར་བསྒྲུབས་སམ། གང་ཁོ་བོ་ཅག་ལ་ཐོ་འཚམ་པར་བྱེད་པ་དེ་ལ་ཁོ་བོ་ཅག་གིས་ཀྱང་ཉིས་གྱུར་སྦྱིན་པར་བྱའོ། །དགེ་སློང་དག་དོན་ཉུང་བ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡག་ལག་དེ་ཉིད་ཀྱིས་ཁེངས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། །ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་པ་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ལམ་དུ་ཞུགས་པས་ལུག་བལ་དག་རྙེད་ལ་འདོད་ན་དགེ་སློང་དེས་བླང་བར་བྱའོ། །བླངས་ནས་ཁྱེར་བ་མེད་ན་དཔག་ཚད་གསུམ་གྱི་མཐའི་བར་དུ་བདག་ཉིད་ཀྱིས་བཀུར་བར་བྱའོ། །དེ་ལས་འདས་པར་ཁྱེར་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་དྲུག་སྡེ་དག་གམ། གཞན་ཡང་དེ་ལྟ་བུ་གང་ཡིན་པའོ། །ལམ་དུ་ཞུགས་པས་ཞེས་བྱ་བ་ནི།
6.140a
ཞེས་བྱ་བ་དགོན་པའི་ལམ་དུ་ཞུགས་པས་སོ། །ལུག་བལ་དག་ཅེས་བྱ་བ་ནི་ལུག་གི་བལ་དག་གོ། །རྙེད་པ་ཞེས་བྱ་བ་ནི་གཞན་ལས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེས་བླང་བར་བྱའོ་ཞེས་བྱ་བ་ནི་མནོད་པར་བྱ་བའོ། །བླངས་ནས་ཁྱེར་བ་མེད་ན་ཞེས་བྱ་བ་ནི་རུང་བ་བྱེད་པ་མེད་ནའོ། །དཔག་ཚད་གསུམ་གྱི་མཐའི་བར་དུ་ཞེས་བྱ་བ་ནི་དཔག་ཚད་གསུམ་གྱི་མཐར་ཐུག་པའི་བར་ཚུན་ཆད་དུའོ། །བདག་ཉིད་ཀྱིས་བཀུར་བར་བྱའོ། །ཞེས་བྱ་བ་ནི་བདག་རང་གིས་བཀུར་བར་བྱ་བའོ། །དེ་ལས་འདས་པར་ཁྱེར་ན་ཞེས་བྱ་བ་ནི་དེ་ལས་ཐལ་བར་ཁྱེར་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ལུག་བལ་དག་རྙེད་ལ་ཁྱེར་བ་མེད་ན་བདག་ཉིད་ཀྱིས་དཔག་ཚད་གསུམ་གྱི་མཐའ་ལས་འདས་པར་ཁྱེར་ན་རྒྱང་གྲགས་ཕྱེད་དུ་ཕྱིན་ན་ཉེས་བྱས་སུ་འགྱུར་ལ། རྒྱང་གྲགས་ཀྱི་མཐར་ཕྱིན་ན་སྤང་བའི་ལྟུང་བྱེད་དུ་འགྱུར་རོ། །ཁྱེར་བ་ཡོད་བཞིན་དུ་བདག་ཉིད་ཀྱིས་ཁྱེར་ན་རྩོམ་པའི་དུས་ཁོ་ན་ན་ཉེས་བྱས་སུ་འགྱུར་ལ་རྒྱང་གྲགས་ཕྱེད་དུ་ཕྱིན་ན་ཉེས་བྱས་སུ་གཞན་གཅིག་ཏུ་འགྱུར། རྒྱང་གྲགས་ཀྱི་མཐར་ཕྱིན་ན་སྤང་བའི་ལྟུང་བྱེད་དུ་འགྱུར་རོ། །རྡུལ་ཕྲ་རབ་དྲུག་ལ་རྡུལ་ཕྲ་མོ་གཅིག་གོ། །རྡུལ་ཕྲ་མོ་དྲུག་ལ་ཆུ་རྡུལ་གཅིག་གོ། །ཆུ་རྡུལ་དྲུག་ལ་ལྕག་རྡུལ་གཅིག་གོ། །ལྕག་རྡུལ་དྲུག་ལ་རི་བོང་གི་རྡུལ་གཅིག་གོ། །རི་བོང་རྡུལ་དྲུག་ལ་ལུག་རྡུལ་གཅིག་གོ། །ལུག་རྡུལ་དྲུག་ལ་གླང་རྡུལ་གཅིག་གོ། །གླང་རྡུལ་དྲུག་ལ་ཉི་ཟེར་གྱི་རྡུལ་གཅིག་གོ། །ཉི་ཟེར་གྱི་རྡུལ་དྲུག་ལ་སྲོ་མ་གཅིག་གོ། །སྲོ་མ་དྲུག་ལ་ཤིག་གཅིག་གོ། །ཤིག་དྲུག་ལ་ནས་གཅིག་གོ། །ནས་དྲུག་ལ་སོར་གཅིག་གོ། །སོར་བཞི་དྲུག་ལ་ཁྲུ་གང་ངོ ། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུའོ། །གཞུ་ལྔ་བརྒྱ་ལ་རྒྱང་གྲགས་གཅིག་གོ། །རྒྱང་གྲགས་བརྒྱད་ལ་དཔག་ཚད་གཅིག་གོ། །དེ་ལ་དགེ་སློང་དགོན་པ་པ་ལམ་དུ་ཞུགས་པས་ལུག་བལ་དག་རྙེད་ལ། དེ་བླངས་ཏེ་ཁྱེར་བ་མེད་ན་རྒྱང་གྲགས་ཀྱིས་ཆོད་པའི་གྲོང
6.140b
བདུན་པོ་དག་གི་གྲོང་ཕྱེད་དུ་ནི་ཉེས་བྱས་སུ་འགྱུར་ལ། གྲོང་གི་མཐར་ནི་སྤང་བའི་ལྟུང་བྱེད་དུ་འགྱུར་རོ། །གྲོང་ནས་དགོན་པའི་ལམ་དུ་འཇུག་ན་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་སྤང་བའི་ལྟུང་བྱེད་དུ་འགྱུར་རོ། །ཞཝ་དང་ལྷམ་སྒྲོག་གུ་ཅན་དང ། སྟོད་ཀོར་ནང་ཚངས་ཅན་དང ། རྒྱ་ཅང་དང ། ལྕག་པོད་དང ། ཤུར་བུ་ཕྲེའུ་ལ་སོགས་པའི་དོན་དུ་དེ་ཙམ་དག་ཁྱེར་བ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བལ་ཐོགས་པའི་སྤང་བ་སྟེ་བཅུ་དྲུག་པ་རྫོགས་སོ།། ་་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བལ་བགོ་བར་བྱའོ། །ཆ་དུར་བྱ་དེ་དག་གིས་སྨྲས་པ། བདག་ཅག་གིས་བཙུན་པ་འཆར་ཀ་འདི་ཉིད་ན་འདུག་འདུག་པ་ལ་ཅིའི་ཕྱིར་སྐལ་བ་སྦྱིན། ཆ་ལྔར་བྱའོ། །འཆར་ཀས་ཐོས་ནས་དེས་སྨྲས་པ། ཚེ་དང་ལྡན་པ་དག་ཁྱེད་ཀྱིས་དེར་རྙེད་པ་གང་གྲུབ་པ་དེ་ཡང་ཁྱེད་ཀྱིས་གྱིས་ཤིག་།ཁོ་བོ་འདི་ཉིད་ན་འདུག་འདུག་པས་རྙེད་པ་གང་གྲུབ་པ་དེ་ཡང་ཁོ་བོ་ཉིད་ཀྱིར་བྱའོ། །ཉེ་དགས་བསམས་པ་འདི་འདི་ན་འདུག་འདུག་པས་རྙེད་པ་མང་པོ་གྲུབ་གོར་མ་ཆག་སྙམ་ནས་དེས་སྨྲས་པ། ཚེ་དང་ལྡན་པ་དག་བདག་ཅག་དུས་ཐམས་ཅད་དུ་དྲུག་སྡེ་ཡིན་ན་ད་ཅིའི་ཕྱིར་ལྔ་སྡེར་འགྱུར་བར་བྱ། ཆ་དྲུག་ཁོ་ནར་བྱའོ་སུ་བགོད་ཏུ་གཞུག་།བཙུན་པ་འཆར་ཀ་མ་དུབ་པ་ཡིན་གྱིས་དེ་འགོད་དུ་གཞུག་གོ། །འཆར་ཀས་དྲུག་ཏུ་བྱས་ཏེ་བདག་ཉིད་ཀྱི་སྐལ་བ་རང་གི་གནས་ཁང་དུ་བཅུག་སྟེ་བཞག་གོ། །དེ་དག་གིས་སྨྲས་པ། བཙུན་པ་འཆར་ཀ་ཁྱོད་ཀྱིས་རྙེད་པ་གང་གྲུབ་པ་དེ་ཁྱེར་ཤོག་བགོའོ། །འཆར་ཀས་སྨྲས་པ། ཁོ་བོས་དེའི་བར་དུ་ཀ་ཀ་ཎི་གཅིག་ཙམ་ཡང་མ་རྙེད་དོ། །ཁྱོད་ཀྱིས་ཁོ་བོ་ཅག་བསླུས་སོ། །འཆར་ཀས་བསམ་པ། བདག་གིས་བལ་ཉུང་ངུ་མ་ཞིག་རྙེད་པ་འདི་སུ་རྨེལ་དུ་གཞུག་།གལ་ཏེ་ཁྱིམ་པ་དག་ལ་བཅོལ་ན་ནི་དེ་དག་བསླབ་པ་ཡང་དག་པར་མ་བླངས་པ་ཡིན་པས་ཐམས་ཅད་བརྐུས་པར་འགྱུར་རོ། །གལ་ཏེ་བཅུ་གཉིས་སྡེ་དག་ལ་བཅོལ་ན་ནི་བཅའ་བའི་རིན་དུ་འཇོག་པར་འགྱུར་རོ། །ཆོས་བྱིན་ལ་བཅོལ་ཡང་ཆོས་བྱིན་ནི་མདོ་སྡེའི་མཐའ་པ
6.141a
ཡིན་ལ། འཁོར་ཡང་མདོ་སྡེའི་མཐའ་པ་དང་ལྡན་པ་ཡིན་པས་མདོ་སྡེའི་ཚིག་དག་སེམས་པ་ན་དུས་འགྱངས་པར་འགྱུར་རོ། །གཽ་ཏ་མཱི་སྐེམ་མོ་ལ་བཅོལ་དུ་ཡང་གཽ་ཏ་མཱི་སྐེམ་མོ་ནི་འདུལ་བ་འཛིན་པ་ཡིན་ལ། དེའི་འཁོར་ཡང་འདུལ་བ་འཛིན་པ་དང་ལྡན་པས་དེ་འདི་ནི་ལྟུང་བ་ཡིན་ནོ། །འདི་ནི་ལྟུང་བ་མ་ཡིན་ནོ་ཞེས་སེམ་པ་ན་དུས་འགྱངས་པར་འགྱུར་རོ། །སྐྱེ་དགུའི་བདག་མོ་ཆེན་མོ་གཽ་ཏ་མཱི་ནི་སྤོང་བ་མ་ཡིན་ལ། འཁོར་ཡང་སྤོང་བ་པ་དང་ལྡན་པས་དེས་སེམས་རྩེ་གཅིག་ཏུ་འཇོག་པ་ལ་བལ་རྨེལ་བ་མི་གནོད་ཀྱིས་བདག་གིས་དེ་ལ་བལ་རྨེལ་དུ་བཅོལ་ལོ་སྙམ་ནས། དེ་དེ་སྙམ་སེམས་ཞིང་འདུག་པ་ན་སྐྱེ་དགུའི་བདག་མོ་ཆེན་མོ་གཽ་ཏ་མཱིས་བཅོས་ལྡན་འདས་ག་ལ་བ་དེར་འོངས་པ་དེ་ཚེ་དང་ལྡན་པ་འཆར་ཀས་ཐག་རིང་པོ་ཁོ་ན་ནས་མཐོང་ནས་སྨྲས་པ། གཽ་ཏ་མཱིས་བཅོམ་ལྡན་འདས་ཀྱིས་ཚུལ་ཁྲིམས་དང་ལྡན་པའི་སེམས་ཀྱི་སྨོན་པ་འགྲུབ་སྟེ། དེ་ཡང་ཚུལ་ཁྲིམས་རྣམ་པར་དག་པའི་ཕྱིར་རོ་ཞེས་བཀའ་སྩལ་པ་དེ་ལེགས་པར་གསུངས་པ་ཡིན་ཏེ། ད་གཟོད་ཁོ་ན་བདག་ཀྱེ་མ་སྐྱེ་དགུའི་བདག་མོ་ཆེན་མོ་གཽ་ཏ་མཱི་འོངས་ན་ཅི་མ་རུང་སྙམ་པའི་བློ་སྐྱེས་ན་ཁྱོད་ཀྱང་འདིར་འོངས་སོ། །བདག་གིས་བལ་ཉུང་ཞིག་རྙེད་པ་དེ་ཁྱེད་ཀྱིས་རྨེལ་དུ་ཆུག་སྟེ་བྱིན་ཅིག་།འཕགས་པ་བདག་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་སླར་མཆིས་ནས་དགེ་སློང་མ་གཉིས་བཏང་གིས་དེ་གཉིས་ལ་བསྐུར་བར་སྩོལ་ཅིག་།འཆར་ཀས་བལ་དེ་དག་གཟར་ཐག་གིས་བམ་པོ་གཉིས་སུ་དམ་དུ་རབ་ཏུ་བཅིངས་ཏེ་སྒོ་གླེགས་ཀྱི་ཕག་ཏུ་བཞག་གོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། དབྱར་ཁང་དུ་སོན་ནས་དེས་དེའི་གན་དུ་དགེ་སློང་མ་གཉིས་བཏང་སྟེ། འཕགས་པ་འཆར་ཀའི་གན་དུ་དེང་ལ་བལ་དེ་བསྐུར་དུ་སྩོལ་ཞེས་གྱིས་ཤིག་ཅེས་བསྒོའོ། །དེ་གཉིས་དོང་སྟེ་སྨྲས་པ། འཕགས་པ་གཽ་ཏ་མཱིའི་མཆིད་ནས་བལ་དེ་བསྐུར་དུ་གསོལ་ཞེས་མཆིའོ། །འཆར་ཀས་དེ་གཉིས་ལ་སྨྲས་པ། སྒོ་གླེགས་ཀྱི་ཕག་ན་བམ་པོ་གཉིས་འདུག་པ་དེ་གཉིས་ཁྱེར་ལ་དེང་ཤིག་།དེ་གཉིས་གནས་ཁང་དུ
6.141b
ཞུགས་ཏེ་འདེགས་པར་བརྩམས་པ་དང ། བསྒུལ་བ་ཙམ་དུ་ཡང་མ་ནུས་ནས་དེ་གཉིས་ཀྱིས་སྨྲས་པ། འཕགས་པ་ཅི་འདིར་རང་ཐག་གི་གོར་མ་དག་སྩལ་ཏམ། གཞོན་ནུ་མ་གཉིས་ཅི་ཁྱེད་གཉིས་གཞོན་ནུ་མ་གཏའ་གམ་པ་ཡིན་ནམ། ཞེས་དེས་ཐེའུ་ཆུང་གིས་བཏེག་སྟེ་གཅིག་ནི་གཅིག་གི་མགོར་བསྐུར། གཅིག་ནི་གཅིག་གི་རྐེད་དུ་བསྐུར་རོ། །དེ་གཉིས་མགོ་ཆག་ལ་ཐུག་གོ། །རྐེད་པ་ཆག་ལ་ཐུག་གོ་ཞེས་ཟེར་ཞིང་དབྱར་ཁང་དུ་དོང་ནས་ཁུར་ས་ལ་བཞག་སྟེ་ཁྲི་སྟེང་དུ་སྒྱེལ་ཅིང་འདུག་གོ། །དགེ་སློང་མ་རྣམས་ཀྱིས་དེ་གཉིས་ལ་སྨྲས་པ། ཁྱེད་གཉིས་གཞོན་ནུ་མ་གཏའ་གམ་པ་ཡིན་ནམ། དེ་གཉིས་ཀྱིས་སྨྲས་པ། ཁྱེད་ཅག་ལས་སྟོབས་དང་ལྡན་པ་གང་ཡིན་པ་དེས་ཇེ་འདི་ཐེག་ཤིག་།དེ་དག་གིས་དེ་འདིག་པར་བརྩམས་པ་དང་བསྒུལ་བ་ཙམ་དུ་ཡང་མ་ནུས་ནས་དེ་དག་གིས་སྨྲས་པ། འཕགས་མ་གཉིས་ཅི་འདིར་རང་ཐག་གི་རྡོ་དག་བཅུག་གམ་ཞེས་དེ་དག་གིས་བམ་པོ་དེ་གཉིས་བཤིག་པ་དང་ཇི་ཙམ་ན་ཕུང་པོ་ཆེན་པོར་རྣམ་པར་གནས་པར་གྱུར་ཏོ། །དགེ་སློང་མ་རྣམས་ཀྱིས་རྟ་གད་ཀྱིས་བཏབ་སྟེ་སྨྲས་པ། འཕགས་པ་འཆར་ཀ་ན་རེ་བལ་ཅུང་ཞིག་ཟེར་ན་གལ་ཏེ་མང་བར་གྱུར་ན་ཇི་ལྟ་བུར་འགྱུར། སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ། ནུ་མོ་དག་མགོ་བྲེགས་ཤིང་མཆན་ཁུང་རལ་བུ་ཅན་དག་ཡིན་ན་གོད་ཏུ་ཅི་ཡོད། འཕགས་པ་འཆར་ཀའི་མཆིད་ནས་བལ་ཉུང་ཞིག་ཅེས་མཆི་ན་གལ་ཏེ་མང་བར་གྱུར་ན་ཇི་ལྟ་བུར་འགྱུར། སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ། ནུ་མོ་དག་དེ་དག་ནི་གནས་ངན་ལེན་ཀུན་ཏུ་སྤྱོད་པ་དག་ཡིན་པས་དེ་དག་གིས་བཅོམ་ལྡན་འདས་ཀྱི་བསྟན་པ་ལ་འདྲུམས་པ་ལྟུང་བས་ལྟུང་བར་བྱེད་དོ། །ནུ་མོ་དག་བཅོམ་ལྡན་འདས་ཀྱིས་འདི་གཉིས་ནི་སྐྱེས་བུ་དམ་པ་ཡིན་ཏེ། ཁུར་མ་བླངས་པ་མི་ལེན་པ་གང་ཡིན་པ་དང ། ཁུར་བླངས་པ་མཐར་ཕྱིན་པར་བྱེད་པ་གང་ཡིན་པའོ་ཞེས་གསུངས་པས། འདི་ནི་ཁུར་བླངས་པ་ཡིན་པས་མཐར་ཕྱིན་པར་བྱ་དགོས་ཀྱིས། ཁྱེད་ཅག་ལས་གང་གིས་ཇི་ཙམ་རྨེལ་བར་སྤྲོ་བ་དེ་ཙམ་རྨེལ་ལ་དེའི་གན་དུ་ཁྱེར་ཏེ་བྱིན་ཅིག །
6.142a
དེ་དག་ཡུན་རིང་དུ་ཐོགས་པ་དང་འཆར་ཀས་བསམས་པ། དེ་དག་གིས་གལ་ཏེ་བཅའ་བའི་རིན་དུ་བཞག་གོར་མ་ཆག་།བདག་གིས་མ་ལེགས་པ་ཞིག་བྱས་ཏེ་བདག་གིས་བལ་དེ་ནི་ཆར་པས་འཇིགས་པས་གང་ལ་ཁར་བཞག་པ་དང་འདྲ་བར་གྱུར་ཏོ་སྙམ་མོ། །དགེ་སློང་མ་གཉིས་ཀྱིས་བལ་ཁལ་ཅིག་རྨེལ་ཏེ་ཁྱེར་ཏེ་འོངས་ནས་སྨྲས་པ། འཕགས་པ་འཆར་ཀ་བལ་དག་འཚལ་ཏེ་མཆིས་ན་གང་དུ་གཞག་པར་བགྱི། འཆར་ཀས་བསམས་པ། ད་དུང་སྤྱོད་ཡུལ་ལྷག་མ་དང་བཅས་པ་ཡིན་ནོ་སྙམ་ནས་སྨྲས་པ་གནས་ཁང་དུ་ཆུག་སྟེ་ཞོག་ཤིག་།དེ་གཉིས་ཀྱིས་བཞག་སྟེ་སོང་བ་དང ། གཞན་དག་གིས་ཀྱང་ཁྱེར་ཏེ་འོངས་སོ། །ཇི་ཙམ་ཐམས་ཅད་ཀྱིས་ཀྱང་ཁྱེར་ཏེ་འོངས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་བཅོམ་ལྡན་འདས་ག་ལ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེའི་ཚེ་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་ལག་པ་གཉིས་འདི་ལྟ་སྟེ། དཔེར་ན་བཙོ་བླག་མཁན་གྱི་ལག་པ་ལྟར་དམར་བ་དམར་བ་དང་ཤིན་ཏུ་དམར་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྐྱེ་དགུ་འི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མཱི་ཅིའི་ཕྱིར་ཁྱོད་ཀྱི་ལག་པ་གཉིས་འདི་ལྟ་སྟེ། དཔེར་ན་བཙོ་བླག་མཁན་གྱི་ལག་པ་དམར་བ་ལྟར་དམར་བ་དང་ཤིན་ཏུ་དམར་བར་གྱུར། བཅོམ་ལྡན་འདས་འདི་ན་བགྱི་བ་གཞན་ལགས་ན་གཞན་བགྱིད་དོ། །ཇི་ལྟར་གྱུར་འཕགས་པ་འཆར་ཀས་བདག་བལ་རྨེལ་དུ་སྩལ་ཏོ་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་ལུག་བལ་དག་རྨེལ་དུ་འཛུད་དམ། བཙུན་པ་རྨེལ་དུ་སྩོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ་འཆར་ཀ་ཁྱོད་དགེ་སློང་མ་ཉེ་དུ་མ་ཡིན་པ་ལ་ལུག་བལ་དག་རྨེལ་དུ་འཛུད་པ་བདེན་ནམ་བཙུན་པ་མད་དོ་སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ
6.142b
འཐུན་པ་མ་ཡིན་པ་རུང་བ་མ་ཡིན་པ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་ལུག་བལ་འཁྲུར་འཛུད་དམ། འཚེད་དུ་འཛུད་དམ། རྨེལ་དུ་འཛུད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང་མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །ལུག་བལ་ཞེས་བྱ་བ་ནི་ལུག་གི་བལ་ལོ། །འཁྲུར་འཛུད་དམ་ཞེས་བྱ་བ་ནི་ཐ་ན་ཆུར་སྙུག་པ་བྱེད་དུ་འཛུད་ནའོ། །འཚེད་དུ་འཛུད་དམ་ཞེས་བྱ་བ་ནི་ཐ་ན་ཚོན་དུ་སྙུག་པ་བྱེད་དུ་འཛུད་ནའོ། །རྨེལ་དུ་འཛུད་ན་ཞེས་བྱ་བ་ནི་ཐ་ན་འདའ་བ་བྱེད་དུ་འཛུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་ལུག་བལ་དག་འཁྲུར་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཚེད་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །རྨེལ་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཁྲུར་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་རྨེལ་དུ་འཛུད་དམ། འཚེད་དུ་འཛུད་པ་དང་འཁྲུར་འཛུད་དམ། འཚེད་དུ་འཛུད་པ་དང་རྨེལ་དུ་འཛུད་དམ། རྨེལ་དུ་འཛུད་པ་དང་འཁྲུར་འཛུད་དམ། རྨེལ་དུ་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་འཚེད་དུ་འཛུད་པ་དང ། རྨེལ་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ
6.143a
སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་ལུག་བལ་དག་འཁྲུར་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཚེད་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །རྨེལ་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །འཁྲུར་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་རྨེལ་དུ་འཛུད་དམ། འཚེད་དུ་འཛུད་པ་དང་འཁྲུར་འཛུད་དམ། འཚེད་དུ་འཛུད་པ་དང་རྨེལ་དུ་འཛུད་དམ། རྨེལ་དུ་འཛུད་པ་དང་འཁྲུར་འཛུད་དམ། རྨེལ་དུ་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་འཚེད་དུ་འཛུད་པ་དང ། རྨེལ་དུ་འཛུད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་ལུག་བལ་དག་འཁྲུར་འཛུད་ན་ཉེས་བྱས་སུ་འགྱུར་རོ། །འཚེད་དུ་འཛུད་ན་ཉེས་བྱས་སུ་འགྱུར་རོ། །རྨེལ་དུ་འཛུད་ན་ཉེས་བྱས་སུ་འགྱུར་རོ། །འཁྲུར་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་རྨེལ་དུ་འཛུད་དམ། འཚེད་དུ་འཛུད་པ་དང་འཁྲུར་འཛད་དམ། འཚེད་དུ་འཛུད་པ་དང་རྨེལ་དུ་འཛུད་དམ། རྨེལ་དུ་འཛུད་པ་དང་འཁྲུར་འཛུད་དམ། རྨེལ་དུ་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་རྨེལ་དུ་འཛུད་དམ། འཚེད་དུ་འཛུད་པ་དང ། འཁྲུར་འཛུད་དམ། འཚེད་དུ་འཛུད་པ་དང་རྨེལ་དུ་འཛུད་དམ། རྨེལ་དུ་འཛུད་པ་དང་འཁྲུར་འཛུད་དམ། རྨེལ་དུ་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་འཚེད་དུ་འཛུད་དང ། རྨེལ་དུ་འཛུད་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཡིད་གཉིས་ཟ་བས་ལུག་བལ་དག་འཁྲུར་འཛུད་ན་ཉེས་བྱས་སུ་འགྱུར་རོ། །འཚེད་དུ་འཛུད་ན་ཉེས་བྱས་སུ་འགྱུར་རོ། །རྨེལ་དུ་འཛུད་ན་ཉེས་བྱས་སུ་འགྱུར་རོ། །འཁྲུར་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་རྨེལ་དུ་འཛུད་དམ། འཚེད་དུ་འཛུད་པ་དང་འཁྲུར་འཛུད་དམ། འཚེད་དུ་འཛུད་པ་དང་རྨེལ་དུ་འཛུད་དམ། རྨེལ་དུ་འཛུད་པ་དང་འཁྲུར་འཛུད་དམ། རྨེལ་དུ་འཛུད་པ་དང་འཚེད་དུ་འཛུད་དམ། འཁྲུར་འཛུད་པ་དང་འཚེད་དུ་འཛུད་པ་དང ། རྨེལ་དུ་འཛུད་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བལ་རྨེལ་དུ་འཛུད་པའི་སྤང་བ་སྟེ་བཅུ་བདུན་པ་རྫོགས་སྷོ།། ་་་་་་་་་་་་།།
6.143b
སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེ་ནས་གྲོང་དཔོན་གཙུག་ན་ནོར་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་གྲོང་དཔོན་གཙུག་ན་ནོར་བུས་འདི་སྐད་ཅེས་གསོལ་ཏོ། །བཙུན་པ་སྔོན་གྱི་གདུགས་རྣམས་ཀྱིས་ཆེས་སྔ་བ་ཞིག་ན་རྒྱལ་པོའི་ཕོ་བྲང་ན་རྒྱལ་པོ་དང་བློན་པོའི་འཁོར་མཆིས་ཤིང་འཐུན་པར་གྱུར་པ་རྣམས་ལ་བར་སྐབས་ཀྱི་བཀའ་མཆིད་ཀུན་ཏུ་བརྗོད་པ་འདི་ལྟ་བུ་འདི་བྱུང་བར་གྱུར་ཏེ། ཤེས་ལྡན་དག་ཅི་དགེ་སློང་རྣམས་ལ་མངོན་མཚན་ཅན་རུང་ངམ། ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དམ། འོན་ཏེ་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་ཅེས་མཆི་ནས། དེ་ན་ཁ་ཅིག་ནི་འདི་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དོ་ཞེས་མཆི། ཁ་ཅིག་ནི་འདི་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཤིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དོ་ཞེས་མཆི་ན། བཙུན་པ་དེ་ལ་གང་དག་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དོ་ཞེས་མཆིས་ན། བཙུན་པ་ཇི་ལྟར་གང་དག་དེ་སྐད་མཆི་བ་དེ་དག་དེ་ལྟར་བརྡ་སྤྲོད་པར་བགྱིད་པ་ན། བཅོམ་ལྡན་འདས་ལ་སྐུར་པ་འདེབས་པར་མི་བགྱིད་ཅིང་ཧ་ཅང་ཐལ་བར་ཡང་མི་བགྱིད་པ་དང ། དེ་དག་བཅོམ་ལྡན་འདས་ཀྱིས་གསུངས་པའི་རྗེས་སུ་སྨྲ་བ་དང ། ཆོས་སྨྲ་བ་དང ། ཆོས་ཀྱི་རྗེས་སུ་འཐུན་པའི་ཆོས་བརྡ་སྤྲོད་པར་བགྱིད་པ་དང ། གསུངས་པའི་རྗེས་སུ་སྨྲ་བ་དེ་དག་ལ་གཞན་ལས་ཆོས་དང་འཐུན་པས་སྨད་པའི་གནས་ལྟ་བུའི་ཆོས་འགའ་ཡང་མི་མཆི་བ་ལགས་སམ། གྲོང་དཔོན་གང་དག་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བྱེད་དོ་ཞེས་ཟེར་བ་དེ་དག་དེ་ལྟར་བརྡ་སྤྲོད་པར་བྱེད
6.144a
པ་ན་ང་ལ་སྐུར་པ་འདེབས་པར་བྱེད་ཅིང་ཧ་ཅང་ཐལ་བར་བྱེད་པ་དང ། དེ་དག་ངས་སྨྲས་པའི་རྗེས་སུ་སྨྲ་བ་མ་ཡིན་པ་དང་ཆོས་སྨྲ་བ་མ་ཡིན་པ་དང ། ཆོས་ཀྱི་རྗེས་སུ་འཐུན་པའི་ཆོས་བརྡ་སྤྲོད་པར་བྱེད་པ་མ་ཡིན་པ་དང ། སྨྲས་པའི་རྗེས་སུ་སྨྲ་བ་མ་ཡིན་པ་དེ་དག་ལ་གཞན་ལས་ཆོས་དང་འཐུན་པས་སྨད་པའི་གནས་ལྟ་བུའི་ཆོས་ཤིན་ཏུ་འོང་བ་ཡིན་ནོ། །དེ་ཅིའི་ཕྱིར་ཞེ་ན། གྲོང་དཔོན་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བྱེད་དེ་གང་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་པའི་ཕྱིར་རོ། །གྲོང་དཔོན་ངས་ཁྱོད་ལ་དོན་དེ་ཉིད་ཀྱི་ཕྱིར་ལན་གཉིས་ལན་གསུམ་གྱི་བར་དུ་བརྗོད་པར་བྱ་སྟེ། །དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བྱེད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་ནོ། །བཙུན་པ་གང་གི་སླད་དུ་བཅོམ་ལྡན་འདས་ཀྱིས་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བགྱིད་པ་དེ་ནི་དགེ་སྦྱོང་གི་ཆོས་མ་ལགས་ཤིང་དེ་ནི་ཤཱཀྱའི་སྲས་ཀྱི་ཆོས་མ་ལགས་སོ་ཞེས་བཀའ་སྩལ་ཏེ། ཇི་ཙམ་དུ་བཅོམ་ལྡན་འདས་ཀྱིས་ལེགས་པར་གསུངས་པ་ནི་ངོ་མཚར་ཏེ། བཙུན་པ་གང་གི་སླད་དུ་བཅོམ་ལྡན་འདས་ཀྱིས་དེ་སྐད་ཅེས། གྲོང་དཔོན་ངས་ཁྱོད་ལ་དོན་དེ་ཉིད་ཀྱི་ཕྱིར་ལན་གཉིས་ལན་གསུམ་གྱི་བར་དུ་བརྗོད་པར་བྱ་སྟེ། དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བགྱིད་པ་དེ་ནི་དགེ་སྦྱོང་གི་ཆོས་མ་ལགས་ཤིང་དེ་ནི་ཤཱཀྱའི་སྲས་ཀྱི་ཆོས་མ་ལགས་སོ་ཞེས་བཀའ་སྩལ་པའི་བཅོམ་ལྡན་འདས་ཀྱི་བཀའ་དེ་ནི་རྒྱ་ཆེར་བཟང་བ་ལགས་སོ། །བཙུན་པ་བདག་ཀྱང་འདི་སྙམ་བགྱིད་དེ། དགེ་སློང་རྣམས་ལ
6.144b
མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བགྱིད་པ་དེ་ལ་ནི་འདོད་པའི་ཡོན་ཏན་ལྔ་པོ་དག་ཀྱང་རུང་བ་ཁོ་ན་ལགས་སོ། །གྲོང་དཔོན་དེ་དེ་བཞིན་ནོ། །དེ་དེ་བཞིན་ཏེ། དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བྱེད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་ནོ། །དེ་ནས་གྲོང་དཔོན་གཙུག་ན་ནོར་བུས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་འདུག་པར་གྱུར་ཅིང་བསིལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་གྲོང་དཔོན་གཙུག་ན་ནོར་བུ་སོང་ནས་རིང་པོར་མ་ལོན་པར་ཐུགས་སུ་ཆུད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་བསྡུས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འོད་མའི་ཚལ་ཀ་ལན་དཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་བསྡུས་ཏེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་མཆིས་ཤིང་འཐུན་པར་གྱུར་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས
6.145a
བཅོམ་ལྡན་འདས་དཔོང་སའི་ཁང་པ་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ཅིའི་གྲོང་དཔོན་གཙུག་ན་ནོར་བུ་ང་ག་ལ་བ་དེར་འོངས་ཏེ་ཕྱིན་ནས་ངའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ང་ལ་གྲོང་དཔོན་གཙུག་ན་ནོར་བུ་འདི་སྐད་ཅེས་བཙུན་པ་སྔོན་གྱི་གདུགས་རྣམས་ཀྱི་ཆེས་སྔ་བ་ཞིག་ན་རྒྱལ་པོའི་ཕོ་བྲང་ན་རྒྱལ་པོ་དང་བློན་པོའི་འཁོར་མཆིས་ཤིང་མཐུན་པར་གྱུར་པ་རྣམས་ལ་བར་སྐབས་ཀྱི་བཀའ་མཆིད་ཀུན་ཏུ་རྗོད་པ་འདི་ལྟ་བུ་འདི་བྱུང་བར་གྱུར་ཏེ། ཤེས་ལྡན་དག་ཅི་དགེ་སློང་རྣམས་ལ་མངོན་མཚན་ཅན་རུང་ངམ་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དམ། འོན་ཏེ་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་ཅེས་མཆི་ནས། དེ་ན་ཁ་ཅིག་ནི་འདི་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དོ་ཞེས་མཆི། ཁ་ཅིག་ནི་འདི་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཞིག་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དོ་ཞེས་མཆི་ན། བཙུན་པ་དེ་ལ་གང་དག་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དོ་ཞེས་མཆི་ན། བཙུན་པ་ཇི་ལྟར་གང་དག་དེ་སྐད་མཆི་བ་དེ་དག་དེ་ལྟར་བརྡ་སྤྲོད་པར་བགྱིད་པ་ན་བཅོམ་ལྡན་འདས་ལ་སྐུར་པ་འདེབས་པར་མི་བགྱིད་ཅིང་ཧ་ཅང་ཐལ་བར་ཡང་མི་བགྱིད་པ་དང ། དེ་དག་བཅོམ་ལྡན་འདས་ཀྱིས་གསུངས་པའི་རྗེས་སུ་སྨྲ་བ་དང ། ཆོས་སྨྲ་བ་དང ། ཆོས་ཀྱི་རྗེས་སུ་འཐུན་པའི་ཆོས་བརྡ་སྤྲོད་པར་བགྱིད་པ་དང ། གསུངས་པའི་རྗེས་སུ་སྨྲ་བ་པ་དེ་དག་ལ་གཞན་ལས་ཆོས་དང་འཐུན་པས་སྨད་པའི་གནས་ལྟ་བུའི་ཆོས་འགའ་ཡང་མི་མཆི་བ་ལགས་སམ་ཞེས་ཟེར་ནས། ངས་དེ་ལ་འདི་སྐད་ཅེས་གྲོང་དཔོན་གང་དག་དེ་སྐད་ཅེས་དགེ་སློང་རྣམས་ལ་མངོན་མཚན
6.145b
ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བྱེད་དོ་ཞེས་ཟེར་བ་དེ་དག་དེ་ལྟར་བརྡ་སྤྲོད་པར་བྱེད་པ་ན་ང་ལ་སྐུར་པ་འདེབས་པར་བྱེད་ཅིང་ཧ་ཅང་ཐལ་བར་བྱེད་པ་དང ། དེ་དག་ངས་སྨྲས་པའི་རྗེས་སུ་སྨྲ་བ་མ་ཡིན་པ་དང ། ཆོས་སྨྲ་བ་མ་ཡིན་པ་དང ། ཆོས་ཀྱི་རྗེས་སུ་འཐུན་པའི་ཆོས་བརྡ་སྤྲོད་པར་བྱེད་པ་མ་ཡིན་པ་དང ། སྨྲས་པའི་རྗེས་སུ་སྨྲ་བ་མ་ཡིན་པ་དེ་དག་ལ་གཞན་ལས་ཆོས་དང་འཐུན་པས་སྨད་པའི་གནས་ལྟ་བུའི་ཆོས་ཤིན་ཏུ་འོང་བ་ཡིན་ནོ། །དེ་ཅིའི་ཕྱིར་ཞེ་ན། གྲོང་དཔོན་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བྱེད་དེ་གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་པའི་ཕྱིར་རོ། །གྲོང་དཔོན་ངས་ཁྱོད་ལ་དོན་དེ་ཉིད་ཀྱི་ཕྱིར་ལན་གཉིས་ལན་གསུམ་གྱི་བར་དུ་བརྗོད་པར་བྱ་སྟེ། དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བྱེད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་ནོ་ཞེས་སྨྲས་པ་དང ། དེང་ལ་འདི་སྐད་ཅེས་བཙུན་པ་གང་གི་སླད་དུ་བཅོམ་ལྡན་འདས་ཀྱིས་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བགྱིད་པ་དེ་ནི་དགེ་སྦྱོང་གི་ཆོས་མ་ལགས་ཤིང་དེ་ནི་ཤཱཀྱའི་སྲས་ཀྱི་ཆོས་མ་ལགས་སོ་ཞེས་བཀའ་སྩལ་ཏེ། ཇི་ཙམ་དུ་བཅོམ་ལྡན་འདས་ཀྱིས་ལེགས་པར་གསུངས་པ་ནི་ངོ་མཚར་ཏོ། །བཙུན་པ་གང་གི་སླད་དུ་བཅོམ་ལྡན་འདས་ཀྱིས་དེ་སྐད་ཅེས་གྲོང་དཔོན་ངས་ཁྱོད་ལ་དོན་དེ་ཉིད་ཀྱི་ཕྱིར་ལན་གཉིས་ལན་གསུམ་གྱི་བར་དུ་བརྗོད་པར་བྱ་སྟེ། དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བགྱིད་པ་དེ་ནི་དགེ་སྦྱོང་གི་ཆོས་མ་ལགས་ཤིང་དེ་ནི་ཤཱཀྱའི་སྲས་ཀྱི་ཆོས་མ་ལགས་སོ། །ཞེས་བཀའ་སྩལ་པའི
6.146a
བཅོམ་ལྡན་འདས་ཀྱི་བཀའ་དེ་ནི་རྒྱ་ཆེར་བཟང་བ་ལགས་སོ། །བཙུན་པ་བདག་ཀྱང་འདི་སྙམ་བགྱིད་དེ། དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དེ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བགྱིད་པ་དེ་ལ་ནི་འདོད་པའི་ཡོན་ཏན་ལྔ་པོ་དག་ཀྱང་རུང་བ་ཁོ་ན་ལགས་སོ་ཞེས་ཟེར་རོ། །ངས་དེ་ལ་འདི་སྐད་ཅེས་གྲོང་དཔོན་དེ་དེ་བཞིན་ནོ་དེ་དེ་བཞིན་ཏེ། ་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་དོ། །གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་ནོ་ཞེས་སྨྲས་སོ། །དེ་ནས་གྲོང་དཔོན་གཙུག་ན་ནོར་བུ་དེས་ངས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་ངའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ངའི་དྲུང་ནས་སོང་ངོ ། །དགེ་སློང་དག་དེ་ལྟར་གྲོང་དཔོན་གཙུག་ན་ནོར་བུ་དེས་རྒྱལ་པོ་དང་བཅས་པའི་འཁོར་གྱི་མདུན་དུ་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བྱེད་དོ། གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ལ་ནི་འདོད་པའི་ཡོན་ཏན་ལྔ་པོ་དག་ཀྱང་གདོན་མི་ཟ་བར་རུང་བ་ཡིན་ནོ་ཞེས་ཆ་གཅིག་བཟུང་སྟེ། ཁྱུ་མཆོག་གི་ཚིག་རྒྱ་ཆེན་པོ་སྨྲས་ཤིང་འཁོར་གྱི་ནང་དུ་ཡང་དག་པར་སེང་གེའི་སྒྲ་བསྒྲགས་སོ། །དགེ་སློང་དག་ངས་ཀྱང་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བྱེད་དེ། །གང་ལ་ལ་ལ་མངོན་མཚན་ཅན་རུང་ཞིང་གསེར་བདག་གིར་བྱེད་པ་དེ་ནི་དགེ་སྦྱོང་གི་ཆོས་མ་ཡིན་ཞིང་དེ་ནི་ཤཱཀྱའི་སྲས་ཀྱི་ཆོས་མ་ཡིན་ནོ་ཞེས་སྨྲས་སོ། །དགེ་སློང་དག་དེ་ལྟ་བས་ན་ཁྱེད་ཀྱིས་ད་དེང་ཕྱིན་ཅད་ཤིང་འདོད་པ་དག་གིས་ཤིང་ཡོངས་སུ་བཙལ་བར་བྱ། རྩཝ་འདོད་པ་དག་གིས་ནི་རྩཝ། ཤིང་རྟའི་ལས་འདོད་པ་དག་གིས་ནི་ཤིང་རྟའི་ལས། མི་བླས་འདོད་པ་དག་གིས་ནི་མི་བླས་ཡོངས་སུ་བཙལ་བར་བྱ་ཞེས་སྨྲ་བའི་འདི་སྐད་ཅེས་རྣམ་གྲངས་གང་གིས་ཀྱང་གསེར་བདག་གིར་བྱ་བ་ནི
6.146b
མི་སྨྲའོ། །འདི་ནི་རེ་ཤིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་རང་གི་ལག་གིས་གསེར་དང་དངུལ་ལེན་པར་བྱེད། ལེན་དུ་འཇུད་པར་བྱེད། ཕུང་པོ་གཅིག་ཏུ་བྱེད། ཕུང་པོ་གཉིས་སུ་བྱེད། ཁྲི་དང་ཁྲིའུ་དང་ཁྲི་འུ་ཆུང་ངུ་དག་ཏུ་འཇོག་པར་བྱེད་ནས། གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་དག་ནི་མ་ལོག་མ་སྤངས་སོ་སོར་མ་སྤངས་པ་ཡིན་ཏེ་འདི་ལྟར་རང་གི་ལག་གིས་གསེར་དང་དངུལ་ལེན་པར་བྱེད། ལེན་དུ་འཇུད་པར་བྱེད། ཕུང་པོ་གཅིག་ཏུ་བྱེད། ཕུང་པོ་གཉིས་སུ་བྱེད། ཁྲི་དང་ཁྲིའུ་དང་ཁྲིའུ་ཆུང་ངུ་དག་ཏུ་འཇོག་པར་བྱེད་དོ། །བྲམ་ཟེ་དང་ཁྱིམ་བདག་དག་ཀྱང་རང་གི་ལག་གིས་གསེར་དང་དངུལ་ལེན་པར་བྱེད་ལེན་དུ་འཇུད་པར་བྱེད། ཕུང་པོ་གཅིག་ཏུ་བྱེད། ཕུང་པོ་གཉིས་སུ་བྱེད། ཁྲི་དང་ཁྲིའུ་དང ། ཁྲི་འུ་ཆུང་ངུ་དག་འཇོག་པར་བྱེད་ན་ཤེས་ལྡན་དག་ཤཱཀྱའི་བུའི་དགེ་སྦྱོང་རྣམས་དང་བྲམ་ཟེ་དང ། ཁྱིམ་བདག་རྣམས་ཀྱི་འདི་ལ་བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་རང་གི་ལག་གིས་གསེར་དང་དངུལ་ལེན་པ་དང་ལེན་དུ་འཇུད
6.147a
པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་དང་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རང་གི་ལག་གིས་གསེར་དང་དངུལ་ལེན་ཏམ། ལེན་དུ་འཇུད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་དག་གམ་གཞན་ཡང་དེ་ལྟ་བུ་གང་ཡིན་པའོ། །རང་གི་ལག་གིས་ཤེས་བྱ་བ་ནི་རང་གི་ལག་པས་སོ། །གསེར་དང་དངུལ་ཞེས་བྱ་བ་ནི་དབྱིག་དང་གསེར་རོ། །ལེན་ཏམ་ཞེས་བྱ་བ་ནི་བདག་ཉིད་ཀྱིས་སོ། །ལེན་དུ་འཇུག་ན་ཞེས་བྱ་བ་ནི་གཞན་ནོ། །སྤང་བའི་ལྟུང་བྱེད་ཅེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གཞི་བཅཝ་བརྒྱད་ཀྱིས་ཏེ། འདི་ལོང་ཤིག་།འདི་ནས་ལོངས་ཤིག་།འདི་ཙམ་ལོང་ཤིག་ཅེས་བྱ་བ་དང ། འདི་ཁྱེར་ཤོག་།འདི་ནས་ཁྱེར་ཤོག་།འདི་ཙམ་ཁྱེར་ཤོག་ཅེས་བྱ་བ་དང ། འདི་ཞོག་ཤིག་།འདིར་ཞོག་ཤིག་།འདི་ཙམ་ཞོག་ཤིག་ཅེས་བྱ་བ་དང ། དེ་ལོང་ཤིག་དེ་ནས་ལོང་ཤིག་།དེ་ཙམ་ལོང་ཤིག་ཅེས་བྱ་བ་དང ། དེ་ཁྱེར་ཤོག་དེ་ནས་ཁྱེར་ཤོག་།དེ་ཙམ་ཁྱེར་ཤོག་ཅེས་བྱ་བ་དང ། དེ་ཞོག་ཤིག་དེར་ཞོག་ཤིག་།དེ་ཙམ་ཞོག་ཤིག་ཅེས་བྱ་བས་སོ། །དེ་ལ་འདི་ལོང་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་དབྱིག་གམ། གསེར་འདི་ལོང་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །འདི་ནས་ལོང་ཤིག་ཅེས་བྱ
6.147b
བ་ནི་འཐོབ་པར་འགྱུར་བའི་ཕྱོགས་སུ་ཟངས་པོ་ཆེ་ནས་སམ། ཟངས་ནས་སམ། རྫ་བོ་ནས་སམ། སྒྲོམ་ནས་སམ། ཀོ་ལྤགས་ནས་སམ། ཟ་མ་ཏོག་ནས་ལོང་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །འདི་ཙམ་ལོང་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་བརྒྱ་འམ། སྟོང་ངམ་འབུམ་ལོང་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །འདི་ཁྱེར་ཤོག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་དབྱིག་གམ། གསེར་འདི་ཁྱེར་ཤོག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། ཁྱེར་བ་ན་སྤང་བའི་ལྟུང་བྱེད་དུ་འགྱུར་རོ། །འདི་ནས་ཁྱེར་ཤོག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་ཟངས་པོ་ཆེ་ནས་སམ། ཟངས་ནས་སམ། རྫ་བོ་ནས་སམ། སྒྲོམ་ནས་སམ། ཀོ་ལྤགས་ནས་སམ། ཟ་མ་ཏོག་ནས་ཁྱེར་ཤོག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །འདི་ཙམ་ཁྱེར་ཤོག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་བརྒྱ་འམ། སྟོང་ངམ། འབུམ་ཁྱེར་ཤོག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། ཁྱེར་བ་ན་སྤང་བའི་ལྟུང་བྱེད་དུ་འགྱུར་རོ། །འདི་ཞོག་ཅིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་དབྱིག་གམ། གསེར་འདི་ཞོག་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བཞག་པ་ན་སྤང་བའི་ལྟུང་བྱེད་དུ་འགྱུར་རོ། །འདིར་ཞོག་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་ཟངས་པོ་ཆེར་རམ། ཟངས་སུ་འམ། རྫ་ཕོར་རམ། སྒྲོམ་དུ་འམ། ཀོ་ལྤགས་སུ་འམ། ཟ་མ་ཏོག་ཏུ་ཞོག་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ་བཞག་པ་ན་སྤང་བའི་ལྟུང་བྱེད་དུ་འགྱུར་རོ། །འདི་ཙམ་ཞོག་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་བརྒྱ་འམ། སྟོང་ངམ། འབུམ་ཞོག་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ
6.148a
ཉེས་བྱས་སུ་འགྱུར་ལ། བཞག་པ་ན་སྤང་བའི་ལྟུང་བྱེད་དུ་འགྱུར་རོ། །དེ་ལོང་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་དབྱིག་གམ། གསེར་དེ་ལོང་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །དེ་ནས་ལོང་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་ཟངས་པོ་ཆེ་ནས་སམ། ཟངས་ནས་སམ། རྫ་བོ་ནས་སམ། སྒྲོམ་ནས་སམ། ཀོ་ལྤགས་ནས་སམ། ཟ་མ་ཏོག་ནས་ལོང་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །དེ་ཙམ་ལོང་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་བརྒྱ་འམ། སྟོང་ངམ། འབུམ་ལོང་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ་བླངས་པ་ན་སྤང་བའི་ལྟུང་བྱེད་དུ་འགྱུར་རོ། །དེ་ཁྱེར་ཤོག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་དབྱིག་གམ། གསེར་དེ་ཁྱེར་ཤོག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། ཁྱེར་བ་ན་སྤང་བའི་ལྟུང་བྱེད་དུ་འགྱུར་རོ། །དེ་ནས་ཁྱེར་ཤོག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་ཟངས་པོ་ཆེ་ནས་སམ། ཟངས་སམ། རྫ་བོ་ནས་སམ། སྒྲོམ་ནས་སམ། ཀོ་ལྤགས་ནས་སམ། ཟ་མ་ཏོག་ནས་ཁྱེར་ཤོག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་ན་སྤང་བའི་ལྟུང་བྱེད་དུ་འགྱུར་རོ། །དེ་ཙམ་ཁྱེར་ཤོག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་བརྒྱ་འམ། སྟོང་ངམ། འབུམ་ཁྱེར་ཤོག་ཅེས་བསྒོ་བར་བྱེད་པ་སྟེ་དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། ཁྱེར་བ་ན་སྤང་བའི་ལྟུང་བྱེད་དུ་འགྱུར་རོ། །དེ་ཞོག་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་དབྱིག་གམ། གསེར་དེ་ཞོག་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བཞག་པ་ན་སྤང་བའི་ལྟུང་བྱེད་དུ་འགྱུར་རོ། །དེར་ཞོག་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་ཟངས་པོ་ཆེར་རམ། ཟངས་སུ་འམ། རྫ་ཕོར་རམ། སྒྲོམ་དུ་འམ། ཀོ་ལྤགས་སུ་འམ། ཟ་མ་ཏོག་ཏུ་ཞོག་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ།
6.148b
བཞག་པ་ན་སྤང་བའི་ལྟུང་བྱེད་དུ་འགྱུར་རོ། །དེ་ཙམ་ཞོག་ཤིག་ཅེས་བྱ་བ་ནི་འཐོབ་པར་འགྱུར་བའི་ཕྱོགས་སུ་བརྒྱ་འམ། སྟོང་ངམ། འབུམ་ཞོག་ཤིག་ཅེས་བསྒོ་བར་བྱེད་པ་སྟེ། དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བཞག་པ་ན་སྤང་བའི་ལྟུང་བྱེད་དུ་འགྱུར་རོ། །འདི་ལོང་ཤིག་འདི་ནས་ལོང་ཤིག་འདི་ཙམ་ལོང་ཤིག་ཅེས་བྱ་བ་དང ། འདི་ཁྱེར་ཤོག་འདི་ནས་ཁྱེར་ཤོག་།འདི་ཙམ་ཁྱེར་ཤོག་ཅེས་བྱ་བ་དང ། འདི་ཞོག་ཤིག་འདིར་ཞོག་ཤིག་།འདི་ཙམ་ཞོག་ཤིག་ཅེས་བྱ་བ་དང ། དེ་ལོང་ཤིག་དེ་ནས་ལོང་ཤིག་།དེ་ཙམ་ལོང་ཤིག་ཅེས་བྱ་བ་དང ། དེ་ཁྱེར་ཤོག་དེ་ནས་ཁྱེར་ཤོག་།དེ་ཙམ་ཁྱེར་ཤོག་ཅེས་བྱ་བ་དང ། དེ་ཞོག་ཤིག་དེར་ཞོག་ཤིག་།དེ་ཙམ་ཞོག་ཤིག་ཅེས་བྱ་བ་དེ་དག་འཐོབ་པར་འགྱུར་བ་མ་ཡིན་པའི་ཕྱོགས་སུ་བསྒོ་བར་བྱེད་ན་དེ་བསྒོ་བར་བྱེད་པ་ལ་ཉེས་བྱས་སུ་འགྱུར་ལ། བླངས་པ་དང་ཁྱེར་བ་དང ། བཞག་པ་ན་ཡང་ཉེས་བྱས་སུ་འགྱུར་རོ། །དགེ་སློང་གིས་དབྱིག་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །གསེར་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །དབྱིག་དང་གསེར་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དབྱིག་གམ། གསེར་བརྡུངས་པ་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །དབྱིག་དང་གསེར་མངོན་མཚན་ཅན་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །དངུལ་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །ནོར་བུ་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །མུ་ཏིག་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །བཻ་དཱུརྱ་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །ནོར་བུ་དང་མུ་ཏིག་དང་བཻ་དཱུརྱ་ལ་རེག་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཡུལ་གྱི་ཐ་སྙད་ཅན་གྱི་དབྱིག་དང ། གསེར་ལ་རེག་ན་ཉེས་བྱས་སུ་འགྱུར་རོ། །ར་གན་དང་ཟངས་མ་དང ། ལྕགས་དང་རྣོ་ལྕགས་དང་རོ་ཉེ་དང་ཞ་ཉེ་དང ། ཁྲོ་ཆུ་ལ་རེག་པ་ལ་ལྟུང་བ་མེད་དོ་ཞེས་དེ་ལྟར་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་གསུམ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི
6.149a
ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཙམ་པ་ན་ཁྱིམ་བདག་དད་པ་དང་ལྡན་པ། དགེ་བའི་བསམ་པ་ཅན། བཟང་པོ་སྦྱིན་པ་ཞིག་འདུག་པ་དེས་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་ཕྱིར་གཙུག་ལག་ཁང་རྟ་བབས་མཐོན་པོ་དང ། སྐར་ཁུང་དང་སྐར་ཁུང་དྲ་བ་ཅན་དང ། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ་མཐོ་རིས་ཀྱི་ཐེམ་སྐས་སུ་གྱུར་པ་ཞིག་བྱེད་དུ་བཅུག་ནས། དེར་དགེ་སློང་མང་པོ་དག་དབྱར་གནས་པར་ཁས་བླངས་ཏེ། དེ་དག་གིས་དགག་དབྱེ་བྱས་ནས་སྨྲས་པ། ཁྱིམ་བདག་བདག་ཅག་མཉན་ཡོད་དུ་སྟོན་པ་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོས་བདག་ཅག་ལ་གོས་དག་བྱིན་ཅིག་།ཁྱིམ་བདག་དེས་སྨྲས་པ། འཕགས་པ་དག་འདི་ན་གོས་བཟང་པོ་དག་མ་མཆིས་ཏེ། དོན་འཐུན་དག་མཆི་ཞེས་གྲག་གིས་དོན་མཐུན་དག་མཆིས་ཀྱི་བར་དུ་རེ་ཤིག་གཞེས་ཤིག་དང ། དེ་ནས་གོས་བཟང་པོ་དག་འཇལ་ཏེ་གསོལ་ལོ། །དེ་དག་གིས་སྨྲས་པ། ཁྱིམ་བདག་གལ་ཏེ་གོས་བཟང་པོ་དག་མེད་ན་གོས་ངན་པ་དག་བྱིན་ཅིག་།འཕགས་པ་དག་བདག་ནི་བཟང་པོ་སྦྱིན་པ་ལགས་ན། ཇི་ལྟར་བདག་གིས་ངན་པ་དག་གསོལ་བར་བགྱི། གལ་ཏེ་ཁྱེད་ཅག་རིངས་ན་གོས་ཀྱི་རིན་ཀཱར་ཥཱ་པ་ན་དག་སྣོམས་ལ་བཞུད་ཅིག་།ཁྱིམ་བདག་བཅོམ་ལྡན་འདས་ཀྱིས་ཀཱར་ཥཱ་པ་ཎ་དག་བཀག་པས་བདག་ཅག་མི་ལེན་ཏོ། །འཕགས་པ་དག་འདི་ལྟར་བདག་ལ་མ་བྱིན་པ་ནི་མི་མངའི། གོས་ངན་པ་དག་སྦྱིན་དུ་ནི་མི་རུང་ངོ ། །དགེ་སློང་དེ་དག་གིས་ཀཱར་ཥ་པ་ན་དག་མ་བླངས་པར་གོས་ངན་པ་དག་ཁོ་ནས་དོང་སྟེ། མཐར་གྱིས་མཉན་ཡོད་དུ་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཅག་གིས་དབྱར་གནས་པའི་གོས་ཀྱི་རྙེད་པ་མ་རྙེད་དམ། ཅི་ན་གང་གི་ཕྱིར་ཁྱེད་ཅག་གོས་དག་ངན་པར་གྱུར་མ་རྙེད་དོ། །ཁྱེད་ཅག་གང་དུ་དབྱར་གནས་པར་ཁས་བླངས་ཙམ་པར་རོ། །ཁྱིམ་བདག་གང་ལ་བརྟེན། ཆེ་གེ་མོ་ཞིག་ལའོ། །ཁྱིམ་བདག་དེ་བཟང་པོ་སྦྱིན་པ་ཞེས་གྲག་གོ་དེའི་ཕྱིར་མ་རྙེད་དོ། །ཅིའི་ཕྱིར་དེ་དག་གིས་སྐབས་དེ་རྒྱས་པར་བརྗོད་པ་དང ། དགེ་སློང་རྣམས
6.149b
ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མ་བྲམ་ཟེ་དང་ཁྱིམ་བདག་དད་པ་ཅན་དག་ཀྱང་གོས་ཀྱི་རིན་དག་སྦྱིན་པར་བྱེད་ལ། ངའི་ཉན་ཐོས་རྣམས་ཀྱང་གོས་ཀྱི་རིན་དག་འདོད་ཀྱིས་ངས་ཉན་ཐོས་རྣམས་ལ་རུང་བར་བྱ་བར་ཆུང་ཞིག་གནང་བར་བྱའོ། །སྙམ་དུ་དགོངས་ནས། བཅོམ་ལྡན་འདས་ཀྱིས་བཀའ་སྩལ་པ། བླངས་བར་བྱ་ཞིང་བླངས་ནས་ཀྱང་སྦྱིན་བདག་དེ་ཉིད་ལ་ཡིད་བརྟེན་ཏེ་བཅང་བར་བྱའོ། །གཞན་ཡང་དགེ་སློང་གིས་ཞལ་ཏ་བྱེད་པ་སྤྲོ་བར་བྱ་འོ། །དགེ་སློང་དག་གིས་ཞལ་ཏ་བྱེད་པ་གང་སྤྲོ་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་ར་བ་པ་འམ། དགེ་བསྙེན་སྤྲོ་བར་བྱ་སྟེ། ཀུན་དགའ་ར་བ་པ་ཞེས་བྱ་བ་ནི་རུང་བ་བྱེད་པའོ། །དགེ་བསྙེན་ཞེས་བྱ་བ་ནི་གསུམ་ལ་སྐྱབས་སུ་སོང་བ་བསླབ་པའི་གཞི་ལྔ་བཟུང་བའོ ། །དགེ་སློང་དག་ཡུལ་གཞན་དུ་འདོང་བ་ན་དེ་དག་འདི་ན་བདག་ཅག་ལ་སྦྱིན་བདག་དགའ་ཡང་མེད་དོ་ཞེས་འགྱོད་པ་སྐྱེས་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྦྱིན་བདག་དེ་ཉིད་ཇི་སྲིད་དུ་སོན་པ་དང ། འདུག་པ་དང ། འཚོ་བ་དང ། སྡོད་པའི་བར་ཏུ་ཤིན་ཏུ་རིང་དུ་སོང་ཡང་ཉམས་པ་མེད་དོ། །དགེ་སློང་རྣམས་ཀྱིས་ཆོས་གོས་ཀྱི་རིན་དག་རྙེད་ལ་སྦྱིན་བདག་མེད་ནས་དེ་དག་འགྱོད་པ་སྐྱེས་ཏེ། མི་ལེན་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླངས་བར་བྱ་ཞིང་བླངས་ནས་ཀྱང་དགེ་སློང་གི་མདུན་དུ་འགྲེང་སྟེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ལགས་པ་འདི་རྙེད་དེ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ལགས་པ་འདི་བྱིན་གྱིས་བརླབ་བོ། །དངོས་པོ་རུང་བ་མ་ལགས་པ་འདིས་དངོས་པོ་རུང་བ་བསྒྲུབ་པར་བགྱིའོ། །དེ་བཞིན་དུ་ལན་གཉིས་ལན་གསུམ་དུ་བརྗོད་པར་བྱ་སྟེ། འདི་ལ་འགྱོད་པར་མི་བྱའོ། །བྲམ་ཟེ་དང་ཁྱིམ་བདག་དད་པ་ཅན་དག་གིས་མཐའ་འཁོབ་དག་དུ་གཙུག་ལག་ཁང་དག་བྱེད་དུ་བཅུག་ནས་དེ་ན་དུས་དང་དུས་སུ་སྐྲག་པ་དག་བྱུང་ནས་དགེ་སློང་དག་གིས་གཙུག་ལག་ཁང་དུ་སྟོང་པར
6.150a
བོར་ཏེ་བྱེར་རོ། །མ་བྱིན་པར་ལེན་པ་དག་གིས་གཙུག་ལག་ཁང་སྟོང་པར་རིག་ནས་གཙུག་ལག་ཁང་བཅོམ་པ་དང ། བཅོམ་ལྡན་འདས་ཀྱིས་བཀའ་སྩལ་པ་དགེ་འདུན་བྱེ་འམ། མཆོད་རྟེན་གྱི་དབྱིག་དང་གསེར་སྦས་ཏེ་འགྲོ་བར་བྱའོ། །བཅོམ་ལྡན་འདས་ཀྱིས་སྦ་བར་བྱའོ་ཞེས་བཀའ་སྩལ་པ་དང ། དེ་དག་གིས་གང་གིས་སྦ་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་ར་བ་པ་འམ། དགེ་བསྙེན་གྱིས་སྦ་བར་བྱའོ། །གང་དག་སྦེད་པར་བྱེད་པ་དེ་དག་ཉིད་རྐུ་བར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན་དད་པ་ཅན་གྱིས་སྦ་བར་བྱའོ། །དགེ་བསྙེན་དད་པ་ཅན་མེད་ན་དགེ་ཚུལ་གྱིས་སྦ་བར་བྱའོ། །དགེ་ཚུལ་མེད་ན་དགེ་སློང་དག་གིས་རང་གིས་སྦ་བར་བྱའོ། །དེ་ལ་དོང་བརྐོ་བར་བྱ་བ་ཡོད་ནས་གང་གིས་བརྐོ་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་ར་བ་པ་འམ། དགེ་བསྙེན་གྱིས་བརྐོ་བར་བྱའོ། །དེ་ཉིད་རྐུ་བར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན་དད་པ་ཅན་གྱིས་བརྐོ་བར་བྱའོ། །དགེ་བསྙེན་དད་པ་ཅན་མེད་ན་དགེ་ཚུལ་གྱིས་བརྐོ་བར་བྱའོ། །དགེ་ཚུལ་མེད་ན་དགེ་སློང་དག་གིས་རང་གིས་བརྐོ་བར་བྱའོ། །འཇིགས་པ་དང་བྲལ་ན་རྣམ་པ་དེ་ལྟ་བུ་ཉིད་ཀྱིས་ཕྱུང་སྟེ་དགེ་འདུན་ལ་དབུལ་བར་བྱའོ། །དགེ་སློང་དག་ངས་ཕོངས་པའི་དུས་དག་དུ་གནང་བ་གང་ཡིན་པ་དེ་བདེ་བའི་གནས་སྐབས་དག་ཏུ་སྤྱད་པར་མི་བྱ་སྟེ། སྤྱོད་ན་འགལ་ཚབས་ཅན་དུ་འགྱུར་རོ། །ལས་དང་པོ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གསེར་དངུལ་ལ་རེག་པའི་སྤང་བ་སྟེ་བཅཝ་བརྒྱད་པ་རྫོགས་སོ། ་་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་འཇིག་རྟེན་དུ་བྱུང་བ་དེའི་ཚེ་ན་ཐམས་ཅད་དུ་ཡུལ་དབུས་སུ་སངས་རྒྱས་བཅོམ་ལྡན་འདས་བྱུང་ངོ་ཞེས་སྒྲ་གྲགས་ཏེ། དེའི་ཉན་ཐོས་རྣམས་འབར་བ་དང ། གསལ་བ་དང ། ཆར་འབབ་པ་དང ། གློག་འབྱིན་པའི་ཆོ་འཕྲུལ
6.150b
དག་བྱེད་པས་གང་དག་དེ་ལ་མཆོད་པ་དག་བྱེད་པ་དེ་དག་ནི་ཤིན་ཏུ་འབྲས་བུ་ཆེ་བ་དང ། ཕན་ཡོན་ཆེ་བ་དང ། གསལ་བ་ཆེ་བ་དང ། རྒྱས་པ་ཆེ་བར་འགྱུར་རོ་ཞེས་བྱང་ལམ་པའི་ཚོང་པ་དག་གིས་ཐོས་ནས་དེ་དག་གིས་སྨྲས་པ། ཤེས་ལྡན་དག་ཡུལ་དབུས་སུ་འདོང་ངོ ། །དེར་ཁེ་སྤོགས་མང་པོ་ཡང་བསྒྲུབ་བར་བྱ། སངས་རྒྱས་དང ། ཆོས་དང་དགེ་འདུན་དག་ལ་མཆོད་པ་བྱའོ་ཞེས་བྱང་ལམ་པའི་ཚོང་པ་དེ་དག་ཟོང་ཐོགས་ཏེ། ཡུལ་དབུས་སུ་འཕགས་ནས་མཐར་གྱིས་མཉན་ཡོད་དུ་ཕྱིན་ཏེ། །མཉན་ཡོད་ན་ཤེས་པ་ཅན་རྩིས་མཁས་པ་ཞིག་འདུག་པ་དེས་བྱང་ལམ་ནས་ཚོང་པ་དོན་འཐུན་འོངས་ཤེས་ཐོས་ནས་དེས་བསམས་པ། སོང་སྟེ་ཇེ་ལྟས་ན་དེར་ཅུང་ཟད་འཐོབ་བོ་སྙམ་ནས། དེས་ཅུང་ཟད་དམིགས་པས་ཀྱང་ཤེས། ཅུང་ཟད་རྟོག་གེས་ཀྱང་ཤེས་ནས་དེ་སོང་སྟེ། དེད་དཔོན་ལ་མིང་དང་རུས་ནས་བརྗོད་ཅིང་མིང་འདི་ཞེས་བྱ་བ་འོངས་པ་ལེགས་སོ་འོངས་པ་ལེགས་སོ། །ཁྱོད་ཀྱི་མ་ནི་མིང་འདི་ཞེས་བྱ། ཁྱོད་ཀྱི་ཕ་ནི་མིང་འདི་ཞེས་བྱ། ཁྱོད་ཀྱི་རྫས་ནི་འདི་སྙེད་ཅིག་འོངས་སོ། །ཉི་མ་མང་གེ་མོ་ཞིག་ལ་ནི་ཁལ་འཇིག་པར་འགྱུར་རོ། །ཁེ་སྤོགས་ནི་འདི་སྙེད་ཅིག་འགྲུབ་པར་འགྱུར་རོ་ཞེས་སྨྲས་པ་དང ། དེད་དཔོན་དེས་བསམས་པ། བཅོམ་ལྡན་འདས་ཀྱི་ཉན་ཐོས་གང་དག་འབར་བ་དང ། གསལ་བ་དང ། ཆར་འབབ་པ་དང ། གློག་འབྱིན་པའི་ཆོ་འཕྲུལ་དག་བྱེད་ཅེས་གྲག་པ་དེ་དག་ལས་འགའ་ཞིག་འདི་ཡིན་གོར་མ་ཆག་སྙམ་ནས་དེས་དེ་ལ་དད་པས་བྱང་ལམ་གྱི་ནགས་ཀྱི་འབྲས་བུས་སློང་ཕོར་བཀང་སྟེ་ཕྱིན་ནས་ལ་བ་སྲིན་བུའི་མདོག་ལྟ་བུ་ཅིག་ཀྱང་བསྐོན་ནོ། །ཤེས་པ་ཅན་དེས་བླངས་ཤིང་གྱོན་ཏེ་ཚངས་པ་མཚུངས་པར་སྤྱོད་པ་རྣམས་ཀྱི་གན་དུ་སོང་བ་དང ། དེ་དག་གིས་དེ་མཐོང་ནས་སྨྲས་པ། ཤེས་པ་ཅན་ཁྱོད་ཀྱིས་མགོ་བཟློག་སྟེ་ཉལ་བ་གང་ཞིག་ལས་ཐོབ་དེས་སྨྲས་པ། བྱང་ལམ་ནས་ཚོང་པ་དོན་འཐུན་འོངས་ནས་དེར་ཁོ་བོས་དེད་དཔོན་ལ་མིང་དང་རུས་ནས་བརྗོད་ནས་དེས་ཁོ་བོ་ལ་དད་པས་དད་པའི་དབང་དུ་བྱས་པ་སྦྱིན་ནོ། །དེ་དག་གིས་སྨྲས་པ། ཤེས་པ་ཅན་བདག་ཅག་ལ
6.151a
ཤཱཀྱའི་བུའི་དགེ་སྦྱོང་དེ་དག་རྟག་ཏུ་ཁྱེད་ལ་ཐག་པ་དག་དང་ཕྲེང་རྒྱུད་དག་དང ། འབྲུ་མར་མཁན་དག་ལས་གཞན་པ་མི་གཙོ་བོ་འགའ་ཡང་མངོན་པར་དད་པར་མི་བྱེད་དོ་ཞེས་ཐོ་འཚམ་པར་བྱེད་ཀྱིས། ཁྱོད་ལ་བ་འདི་གྱོན་ཏེ་སོང་ལ་ཤཱཀྱའི་བུའི་དགེ་སྦྱོང་དེ་དག་གི་སྙིང་དག་གས་པར་གྱིས་ཤིག་།དེ་ལྟར་བྱའོ་ཞེས་སྨྲས་ཏེ། དེ་ནས་ཤེས་པ་ཅན་དེ་ལ་བ་དེ་གྱོན་ནས་རྒྱལ་བྱེད་ཀྱི་ཚལ་དུ་སོང་ངོ ། །དྲུག་སྡེ་དག་གིས་ཀུན་ཏུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེས་ཤེས་པ་ཅན་དེ་ཐག་རིང་པོ་ཁོ་ན་ནས་མཐོང་ངོ ། །དེ་ནས་ཉེ་དགས་བསམས་པ། གཅེར་བུ་པ་ངན་པ་འདི་ལ་བ་བཟང་པོ་ཞིག་གྱོན་ཏེ་འོངས་ཀྱིས་གལ་ཏེ་བདག་གིས་དེ་མ་ཕྲོགས་ན་ཉེ་དགའ་ཞེས་བྱ་བའི་མིང་མི་གཟུང་ངོ་སྙམ་ནས། དེས་དེ་ལ་སྨྲས་པ། ཤེས་པ་ཅན་ཁྱོད་གཅེར་བུ་པ་ཡིན་ལ་ལ་བ་འདི་ལྟ་བུ་གྱོན་ན་ཕྱིར་བབས་སམ་ཅི་ཁོ་བོ་ཕྱིར་མ་བབས་ཏེ། འདི་ལྟར་བྱང་ལམ་ནས་ཚོང་པ་དོན་འཐུན་འོངས་ནས་དེར་ཁོ་བོས་དེད་དཔོན་ལ་མིང་དང་རུས་ནས་བརྗོད་ནས་དེས་ཁོ་བོ་ལ་དད་པས་དད་པའི་དབང་དུ་བྱས་པ་བྱིན་ནོ། །མ་ལེགས་སོ་མ་ལེགས་སོ། །ཁྱེད་ཀྱིས་རྒས་པའི་གནས་སྐབས་སུ་ཚུལ་ཁྲིམས་འཆལ་བ་ཀུན་ཏུ་སྤྱད་དོ། །ཚུར་ཤོག་འདུག་ཤིག་དང་ཆོས་བསྟན་པར་བྱའོ། །ཤེས་པ་ཅན་དེ་ཉེ་དགའི་མདུན་དུ་འདུག་པ་དང ། ཉེ་དགའ་ཡིད་དགའ་ཞིང་ཡིད་དགའ་ནས་དེ་ལ་སྦྱིན་པའི་བསྔགས་པ་བརྗོད་པར་བརྩམས་སོ། །དྲུག་སྡེ་དག་གི་ཀུན་ཏུ་སྤྱོད་པ་ནི་གལ་ཏེ་ཚུལ་ཁྲིམས་ཀྱི་གཏམ་དག་བྱེད་ན་ཉན་པ་པོ་དག་བདག་ཅག་ལྷ་རྣམས་སུ་སྐྱེས་སོ་སྙམ་དུ་སེམས་ལ་གལ་ཏེ་སྦྱིན་པའི་གཏམ་དག་བྱེད་ན་ཉན་པ་པོ་དག་རང་གི་ཤ་གང་ཡིན་པ་དེ་ཡང་བཅད་ཅིང་བཅད་ཅིང་སྦྱིན་པར་བྱའོ་སྙམ་དུ་སེམས་སོ། །གལ་ཏེ་ངན་སོང་གི་གཏམ་དག་བྱེད་ན་ཉན་པ་པོ་དག་བདག་ཅག་ངན་སོང་རྣམས་སུ་སྐྱེས་སོ་སྙམ་དུ་སེམས་པར་འགྱུར་བ་ཡིན་པས
6.151b
ཉེ་དགས་ཤེས་པ་ཅན་དེ་ལ་སྨྲས་པ། ཤེས་པ་ཅན་ཁྱོད་ཀྱི་སྟོན་པ་ནི་ངན་པ་ལ་མོས་པ་ཡིན་ཏེ། གལ་ཏེ་དེ་བཟང་པོ་འདོད་པ་གྱུར་ན་དེས་ཁྱེད་ཅག་ལ་གོས་འབུམ་རི་བ་དང ། ཟས་རོ་བརྒྱ་དང་ལྡན་པ་དང ། ཁང་པ་བརྩེགས་པ་མིག་ལྔ་བརྒྱ་པ་ཡང་གནང་བར་འགྱུར་བ་ཞིག་མ་གནང་ངོ ། །ཁོ་བོ་ཅག་གི་སྟོན་པ་ནི་བཟང་པོ་ལ་མོས་པ་ཡིན་པས། དེས་ཁོ་བོ་ཅག་ལ་གོས་འབུམ་རི་བ་དང ། ཟས་རོ་བརྒྱ་དང་ལྡན་པ་དང ། ཁང་པ་བརྩེགས་པ་མིག་ལྔ་བརྒྱ་པ་ཡང་གནང་ངོ ། །གལ་ཏེ་ཁྱོད་ལ་བ་འདི་ལྟ་བུ་གྱོན་ཏེ་སློང་མོ་ལ་འགྲོ་བར་གྱུར་ན་བྲམ་ཟེ་དང་ཁྱིམ་བདག་དད་པ་ཅན་དག་གིས་ཤེས་པ་ཅན་འདིས་ཚུལ་ཁྲིམས་འཆལ་བ་ཀུན་ཏུ་སྤྱད་དོ་སྙམ་དུ་ཤེས་པས་ཁྱེད་ཀྱིས་སློངས་མོ་ཡང་མི་རྙེད་པར་གྱུར་གྱིས། ཁྱོད་ཀྱི་ལ་བ་འདི་ཁོ་བོ་ལ་བྱིན་ཅིག་དང་ཁོ་བོས་ཁྱོད་ལ་ལ་བ་གཞན་ཞིག་སྦྱིན་ནོ། །ཁོ་བོ་ལ་བ་འདི་གྱོན་ཏེ་བསོད་སྙོམས་ལ་འཇུག་པ་ན་བྲམ་ཟེ་དང་ཁྱིམ་བདག་དད་པ་ཅན་དག་གིས་ཁོ་བོ་མཐོང་ནས་བཙུན་པ་ཉེ་དགས་ལ་བ་འདི་ལྟ་བུ་ག་ལས་རྙེད་ཅེས་ཟེར་ན། ཁོ་བོས་དེ་དག་ལ་འདི་སྐད་ཅེས་ཤེས་པ་ཅན་ཆེ་གེ་མོ་ཞིག་གིས་བྱིན་ནོ་ཞེས་བརྗོད་པར་བྱ་སྟེ། དེས་ན་དེ་དག་གིས་ཤེས་པ་ཅན་དད་པ་དང་ལྡན་པར་གྱུར་ཏོ་སྙམ་དུ་ཤེས་པར་འགྱུར་ཞིང་དེ་དག་གིས་ཁྱོད་སློངས་མོ་ལ་ཞུགས་པ་ལ་ཆང་དང་ནོར་རྫས་སློང་ཕོར་བཀང་སྟེ་སྦྱིན་པར་འགྱུར་རོ་དེས་སྨྲས་པ། བཙུན་པ་ཉེ་དགའ་བཞེས་ཤིག་།ཉེ་དགས་སྨྲས་པ། ཤེས་པ་ཅན་ཁྱོད་ཀྱི་ཚངས་པ་མཚུངས་པར་སྤྱོད་པ་དག་ནི་ཚུལ་ཁྲིམས་འཆལ་བ་ཡིན་པས་ཁྱོད་དེ་དག་གི་ཚིག་ཐོས་ནས་ཡང་ཕྱིར་འཕྲོག་དུ་འོང་བར་གྱུར་པ་དེ་ལྟ་བུའི་གནས་ཡོད་དོ། །བཙུན་པ་ཉེ་དགའ་ཅི་ཁོ་བོའི་ལ་བ་འདི་ཚངས་པ་མཚུངས་པར་སྤྱོད་པ་དེ་དག་དབང་བ་ཡིན་ནམ། ལ་བ་འདི་ནི་ཁོ་བོ་ཉིད་དབང་བ་ཡིན་གྱིས་བཞེས་ཤིག་དང ། སླར་འཕྲོག་ཏུ་མི་མཆིས་སོ། །ཉེ་དགས་ལ་བ་དེ་བླངས་ནས་ཀླམ་རྩུབ་པོ་གཞན་ཞིག་དེ་ལ་བྱིན་ནས་ཤེས་པ་ཅན་དེ་ཀླམ་རྩུབ་པོ་དེ་གྱོན་ནས་ཚངས་པ་མཚུངས་པར་སྤྱོད་པ་རྣམས་ཀྱི་གན་དུ་ཕྱིར་སོང་བ་དང ། དེ་དག་གིས་དེ་མཐོང་ནས་སྨྲས་པ། ཤེས་པ་ཅན་ཁྱོད་ཀྱིས་ཡང་མགོ་བསྒྱུར
6.152a
དེ་ཉལ་བ་གང་ཞིག་ལས་ཐོབ། དེས་སྨྲས་པ། འདི་ནི་གློ་གཞན་ནས་གྲུབ་པ་ཡིན་ནོ། །ཇི་ལྟར་གྱུར། ཁོ་བོས་ལ་བ་དེ་བཙུན་པ་ཉེ་དགའ་ལ་བྱིན་ནས་དེས་ཀྱང་ཁོ་བོ་ལ་ལ་བ་འདི་བྱིན་ནོ། །དེ་དག་གིས་སྤྱོས་ཏེ་སྨྲས་པ། ཤེས་པ་ཅན་ཤཱཀྱའི་བུའི་དགེ་སྦྱོང་རྣམས་ནི་ཡུ་བུ་ཅག་གསོན་པས་ཀྱང་མི་དགའ་བ་ཡིན་ནོ། །དྲུག་སྡེ་དག་ཇི་ལྟ་བར་གཞན་དེ་ལྟ་མ་ཡིན་ལ། ཉེ་དགའ་ཇི་ལྟ་བར་དྲུག་སྡེ་གཞན་དེ་ལྟ་མ་ཡིན་ནོ། །གལ་ཏེ་ཁྱོད་ཀྱིས་དགེ་སློང་གནས་བརྟན་གཞན་འགའ་ཞིག་ལ་བྱིན་པར་གྱུར་ན་ཁོ་བོ་ཅག་ཀྱང་རྗེས་སུ་ཡི་རང་བར་བྱེད་ན་ཁྱོད་ཀྱིས་ཉེ་དགའ་ལ་བྱིན་ཏེ། དེ་ནི་བདག་ཅག་ལས་ཟོང་གིས་ཀྱང་ཁྲག་གི་ཕྱིས་བུ་ལེན་པར་འདོད་པ་ཡིན་གྱིས། གལ་ཏེ་ལ་བ་ཁྱེར་ཏེ་འོང་ན་དེ་ལྟ་ན་ལེགས། གལ་ཏེ་ཁྱེར་ཏེ་མི་འོང་ན་ཁོ་བོ་ཅག་གིས་ཁྱོད་ཚངས་པ་མཚུངས་པར་སྤྱོད་པའི་ནང་ནས་གནས་ནས་དབྱུང་བར་བྱ་ཞིང ། ཚུལ་ཤིང་ཡང་དབྱུང་བར་བྱ། སྤང་ལེབ་ཁྲིའུ་ཡང་བསྒྱུར་བར་བྱ། སློང་ཕོར་ཡང་ཁས་དབུབ་པར་བྱ། ཁར་བ་ཡང་དོར་བར་བྱའོ། །དེ་སྐྲག་ནས་ཉེ་དགའ་ག་ལ་བ་དེར་སོང་བ་དང་ཉེ་དགས་ཐག་རིང་པོ་ཁོ་ན་ནས་དེ་འོང་བ་མཐོང་ནས་དེས་བསམས་པ། ཤེས་པ་ཅན་འགྲོས་འདི་ལྟ་བུས་འོང་བ་འདི་ནི་བདག་གི་ལ་བ་འཕྲོག་པར་བྱེད་པ་ཡིན་ནོ་སྙམ་ནས་དེ་གཙུག་ལག་ཁང་གི་ནང་དུ་ཞུགས་ནས་སྒོ་བཅད་དེ་འདུག་གོ། །ཤེས་པ་ཅན་དེས་སྒོ་བརྡུང་བར་བརྩམས་ཏེ་བཙུན་པ་ཉེ་དགའ་བཙུན་པ་ཉེ་དགའ་ཞེས་བོས་པ་དང ། ཉེ་དགའ་ཅང་མི་སྨྲ་བར་འདུག་གོ། །དགེ་སློང་རྣམས་ཀྱིས་དེ་ལ་སྨྲས་པ། ཤེས་པ་ཅན་ཁྱོད་ལ་བཙུན་པ་ཉེ་དགས་ཅི་བྱ། དེས་སྨྲས་པ། དེས་ཁོ་བོའི་ལ་བ་ཞིག་ཁྱེར་རོ། །ཤེས་པ་ཅན་གལ་ཏེ་ཁྱོད་ལ་བ་འདོད་ན་སོང་ལ་བཅོམ་ལྡན་འདས་ལ་སྐྱབས་སུ་སྒྲུབས་ཤིག་།དེ་བཅོམ་ལྡན་འདས་ག་ལ་བ་དེར་སོང་བ་དང ། བཅོམ་ལྡན་འདས་ཀྱིས་ཤེས་པ་ཅན་དེ་ཐག་རིང་པོ་ཁོ་ན་ནས་འོང་བ་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཤེས་པ་ཅན་ཐག་རིང་པོ་ཁོ་ན་ནས་འོང་བ་ལ་ལྟོས་ཤིག་།བཙུན་པ་བཀའ་བཞིན་འཚལ། འདི་ནི་ལ་བའི
6.152b
ཕྱིར་འོངས་ཏེ། གལ་ཏེ་ལ་བ་ཐོབ་ན་དེ་ལྟ་ན་ལེགས་གལ་ཏེ་མ་ཐོབ་ན་ཁྲག་ཚ་བ་སྐྱུགས་ཏེ་དུས་བྱེད་པར་འགྱུར་རོ། །དེ་ནས་ཤེས་པ་ཅན་དེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཙུན་པ་ཉེ་དགས་བདག་གིས་འཚལ་བ་དེ་བཅོམ་ལྡན་འདས་ཀྱིས་བདག་ལ་སླར་སྩལ་དུ་གསོལ་ཅིག་།གལ་ཏེ་བཅོམ་ལྡན་འདས་ཀྱིས་བདག་ལ་ལ་བ་སླར་སྩལ་དུ་མ་སྩལ་ན། འདི་ལྟར་བདག་ཚངས་པ་མཚུངས་པར་སྤྱོད་པའི་ནང་ནས་གནས་ནས་ཕྱུང་བར་འགྱུར་ཞིང་ཚུལ་ཤིང་ཡང་ཕྱུང་བར་གྱུར། སྤང་ལེབ་ཁྲིའུ་ཡང་བསྒྱུར་བར་འགྱུར། སློང་ཕོར་ཡང་ཁས་ཕུབ་པར་འགྱུར། ཁར་བ་ཡང་བོར་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཉེ་དགའི་གན་དུ་སོང་སྟེ། ཤེས་པ་ཅན་གྱི་ལ་བ་ཕྱིར་བྱིན་ཅིག་།གལ་ཏེ་མི་བྱིན་ན་ཤེས་པ་ཅན་འདི་ཁྲག་ཚ་བ་སྐྱུགས་ཏེ་དུས་བྱེད་པར་འགྱུར་བའི་གནས་དེ་ལྟ་བུ་ཡོད་དོ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཉེ་དགའ་ག་ལ་བ་དེར་སོང་བ་དང ། ཉེ་དགས་ཚེ་དང་ལྡན་པ་ཀུན་དགའ་བོ་ཐག་རིང་པོ་ཁོ་ན་ནས་འོང་བ་མཐོང་ནས་དེས་བསམས་པ། ཤེས་པ་ཅན་གྱི་ཕོ་ཉ་འདི་ལྟ་བུ་ཁྲིད་དེ་འོངས་པས་འདིས་ཁོ་བོ་འི་ལ་བ་ཕྲོགས་པར་འགྱུར་རོ་སྙམ་མོ། །དེ་ནས་ཚེ་དང་ལྡན་པ་ཀུན་དགའ་བོས་ཉེ་དགའ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་པ་ཅན་གྱི་ལ་བ་ཕྱིར་བྱིན་ཅིག་།གལ་ཏེ་འདིའི་ལ་བ་ཕྱིར་མྱུར་བར་མ་བྱིན་ན་ཤེས་པ་ཅན་འདི་ཁྲག་ཚ་བ་སྐྱུགས་ཏེ་དུས་བྱེད་པར་འགྱུར་པའི་གནས་དེ་ལྟ་བུ་ཡོད་པར་འགྱུར་རོ་ཞེས་བྱུང་ངོ ། །ཉེ་དགས་སྨྲས་པ། བཙུན་པ་ཀུན་དགའ་བོ་སྟོན་པའི་བཀའ་མཉན་པར་ཟད་ཀྱི། གཞན་དུ་ན་སྒྲེ་བྱི་གཅེར་བུ་འདི་ཁྲག་ཚ་བ་སྐྱུགས་ཏེ་དུས་བྱེད་པར་འགྱུར་བ་བས་གལ་ཏེ་ཤེས་པ་ཅན་ཤ་སྟག་གིས་འཛམ་བུའི་གླིང་འདི་ལྟ་སྟེ། དཔེར་ན་བུ་རམ་ཤིང་གི་ཚལ་ལམ། འདམ་བུའི་ཚལ་ལམ། འོད་མའི་ཚལ་བཞིན་དུ་གང་བར་གྱུར་ལ་དེ་དག་ཐམས་ཅད་ཁྲག་ཚ་བ་སྐྱུགས་ཏེ་ཁ་དག་ཅིང་དུས་བྱེད་པར་གྱུར་ཀྱང་ཉེ་དགའི
6.153a
སྤུའི་རྩེ་མོ་ཙམ་ཡང་མི་གཡོ་སྟེ། འོན་ཀྱང་བཞུད་ཅིག་དང་སྦྱིན་ནོ། །ཚེ་དང་ལྡན་པ་ཀུན་དགའ་བོ་སོང་བ་དང་ཉེ་དགས་སྨྲས་པ། ཀཝའི་གཅེར་བུ་པ་ཉོན་ཅིག་ཁྱོད་ཀྱིས་སྟོན་པ་བརྫུན་མ་དེས་བརྫུན་དུ་སྨྲ་བས་འཇིག་རྟེན་བསླུས་ནས་སེམས་ཅན་དམྱལ་བ་རྣམས་སུ་སྐྱེས་ཏེ། དེའི་ལྕེ་ལ་ཐོང་གཤོལ་ལྔ་བརྒྱས་རྨེད་པར་བྱེད་ན། ཁྱེད་ཀྱང་དེ་བས་ཀྱང་བརྫུན་མ་ཆེན་པོ་ཡིན་པས་ཁྱེད་ཀྱི་ལྕེ་ལ་ཡང་ཐོང་གཤོལ་སྟོང་གིས་རྨོ་བར་འགྱུར་རོ། །གཞན་ཡང་ཁོ་བོའི་ལ་བ་ཁྱོད་ཀྱིས་སྤྱོད་ན། ཅི་ཁོ་བོས་ཀྱང་ཁྱོད་ཀྱི་ལ་བ་སྤྱད་སྙམ་འམ། བཙུན་པ་ཉེ་དགའ་མ་ལགས་སོ། །ཉེ་དགའས་དེའི་ལ་བ་དེས་འདོམས་ཀྱི་ཕྱོགས་ཐམས་ཅད་ཕྱིས་ནས་བཞི་ལྟབ་ཏུ་བལྟབ་སྟེ། ལག་པ་གཡོན་པའི་སྟེང་དུ་བཞག་ནས་ལག་པ་གཡས་པས་ཐལ་ལྕག་གིས་བསྣུན་པ་དང་རིམ་པ་ཐམས་ཅད་རྡོལ་བར་གྱུར་ནས་སྨྲས་པ། ཤེས་པ་ཅན་ལག་པ་གཉིས་རྐྱོང་ཤིག་།དེས་ལག་པ་གཉིས་བརྐྱང་བ་དང་ཉེ་དགས་གང་གིས་དེ་ཁས་བུབ་ཏུ་འགྱེལ་བར་འགྱུར་བ་དེ་ལྟ་བུའི་ཤུགས་ཀྱིས་ལ་བ་ལག་ཏུ་བྱིན་པ་དང ། དེ་ཁས་བུབ་དུ་འགྱེལ་ནས་ཉེ་དགས་རྡོག་པས་བསྣུན་ཏེ་སྨྲས་པ། གཅེར་བུ་པ་སྒྲེ་བྱི་གཙུག་ལག་ཁང་སླ་ཙས་མ་གཏལ་བར་སོང་ཤིག་།བཙུན་པ་ཉེ་དགའ་གལ་ཏེ་མ་གུམ་ན་མཆི་སྟེ། སླན་ཆད་རྒྱལ་བྱེད་ཀྱི་ཚལ་དུ་མི་མཆིའོ། །དེ་ནི་རེ་ཤིག་བྱུང་བ་ཡིན་གྱི། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། ་་་་་་་་།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་བྱེད་དེ། ཀུན་ཏུ་སྦྱོར་བར་བྱེད། རབ་ཏུ་སྦྱོར་བར་བྱེད ། བུན་འགྱེད་པར་བྱེད། སྐྱེད་འགྱེད་པར་བྱེད། བྱས་པའི་ཕྱིར་བྱས་པ་དང ། བྱས་པའི་ཕྱིར་མ་བྱས་པ་དང ། མ་བྱས་པའི་ཕྱིར་བྱས་པ་དང ། མ་བྱས་པའི་ཕྱིར་མ་བྱས་པ་གཏོང་བར་བྱེད་དོ། །ཇི་ལྟར་ཀུན་ཏུ་སྦྱོར་བར་བྱེད་ཅེ་ན། ཀུན་ཏུ་རྩོམ་པར་བྱེད། ཡུལ་ཚོལ་བར་བྱེད། ཤིང་རྟ་སོག་པར་བྱེད། ཡུལ་དུ་འགྲོ་བའི
6.153b
རྫས་ཤོམ་པར་བྱེད། ལེའུ་པ་དང་གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་དེ། དེ་ལྟར་ཀུན་ཏུ་སྦྱོར་བར་བྱེད་དོ། །ཇི་ལྟར་རབ་ཏུ་སྦྱོར་བར་བྱེད་ཅེ་ན་བརྒྱད་ཤས་དང ། བཅུ་ཤས་དང ། བཅུ་གཉིས་ཤས་ཀྱི་ཕྱིར་དཔང་པོ་དང ། གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་དེ། དེ་ལྟར་རབ་ཏུ་སྦྱོར་བར་བྱེད་དོ། །ཇི་ལྟར་ཕུན་འགྱེལ་བར་བྱེད་ཅེ་ན། ནས་དང་འབྲུ་རྙིང་པ་གསེར་ཕྱེ་དང་ཉེ་སྡེའི་ཕྱིར་གཏོང་བ་དང ། གཞལ་བའི་སྣོད་དང ། བྲེའུ་ཆུང་དང ། ཕུལ་དང་གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་དེ། དེ་ལྟར་བུན་འགྱེད་པར་བྱེད་དོ། །ཇི་ལྟར་སྐྱེད་འགྱེད་པར་བྱེད་ཅེ་ན། དུང་གི་ཚོགས་ཀྱི་ཕྱིར་ནོར་བུའི་ཚོགས་གཏོང་བར་བྱེད་པ་དང ། ནོར་བུའི་ཚོགས་ཀྱི་ཕྱིར་མུ་ཏིག་གི་ཚོགས་གཏོང་བར་བྱེད་པ་དང ། མུ་ཏིག་གི་ཚོགས་ཀྱི་ཕྱིར་བཻ་དཱུརྱའི་ཚོགས་གཏོང་བར་བྱེད་ཅིང ། དཔང་པོ་དང ། གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་དེ། དེ་ལྟར་སྐྱེད་འགྱེད་པར་བྱེད་དོ། །ཇི་ལྟར་བྱས་པའི་ཕྱིར་བྱས་པ་གཏོང་བར་བྱེད་ཅེ་ན། གསེར་མངོན་མཚན་ཅན་གྱི་ཕྱིར་མངོན་མཚན་ཅན་གཏོང་བར་བྱེད་དེ། དེ་ལྟར་བྱས་པའི་ཕྱིར་བྱས་པ་གཏོང་བར་བྱེད་དོ། །ཇི་ལྟར་བྱས་པའི་ཕྱིར་མ་བྱས་པ་གཏོང་བར་བྱེད་ཅེ་ན། གསེར་མངོན་མཚན་ཅན་མེད་པ་གཏོང་བར་བྱེད་དེ། དེ་ལྟར་བྱས་པའི་ཕྱིར་མ་བྱས་པ་གཏོང་བར་བྱེད་དོ། །ཇི་ལྟར་མ་བྱས་པའི་ཕྱིར་བྱས་པ་གཏོང་བར་བྱེད་ཅེ་ན། གསེར་མངོན་མཚན་ཅན་མ་ཡིན་པའི་ཕྱིར་མངོན་མཚན་ཅན་གཏོང་བར་བྱེད་དེ། དེ་ལྟར་མ་བྱས་པའི་ཕྱིར་བྱས་པ་གཏོང་བར་བྱེད་དོ། །དེ་ལྟར་མ་བྱས་པའི་ཕྱིར་མ་བྱས་པ་གཏོང་བར་བྱེད་དོ། །ཇི་ལྟར་མ་བྱས་པའི་ཕྱིར་མ་བྱས་པ་གཏོང་བར་བྱེད་ཅེ་ན། གསེར་མངོན་མཚན་ཅན་མ་ཡིན་པའི་ཕྱིར་མངོན་མཚན་ཅན་མ་ཡིན་པར་གཏོང་བར་བྱེད་དེ། དེ་ལྟར་མ་བྱས་པའི་ཕྱིར་མ་བྱས་པ་གཏོང་བར་བྱེད་དོ། །གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་རྣམས་ནི་མ་ལོག་མ་སྤངས་སོ་སོར་མ་སྤངས་པ་ཡིན་ཏེ། འདི་ལྟར་མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་བྱེད་དེ།
6.154a
ཀུན་ཏུ་སྦྱོར་བར་བྱེད། རབ་ཏུ་སྦྱོར་བར་བྱེད། བུན་འགྱེད་པར་བྱེད། སྐྱེད་འགྱེད་པར་བྱེད། བྱས་པའི་ཕྱིར་བྱས་པ་དང ། བྱས་པའི་ཕྱིར་མ་བྱས་པ་དང་མ་བྱས་པའི་ཕྱིར་བྱས་པ་དང་མ་བྱས་པའི་ཕྱིར་མ་བྱས་པ་གཏོང་བར་བྱེད་དོ། །བྲམ་ཟེ་དང ། ཁྱིམ་བདག་རྣམས་ཀྱང་མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་བྱེད་དེ། ཀུན་ཏུ་སྦྱོར་བར་བྱེད། རབ་ཏུ་སྦྱོར་བར་བྱེད། བུན་འགྱེད་པར་བྱེད། སྐྱེད་འགྱེད་པར་བྱེད། བྱས་པའི་ཕྱིར་བྱས་པ་དང ། བྱས་པའི་ཕྱིར་མ་བྱས་པ་དང་མ་བྱས་པའི་ཕྱིར་བྱས་པ་དང ། མ་བྱས་པའི་ཕྱིར་མ་བྱས་པ་གཏོང་བར་བྱེད་ན་ཤེས་ལྡན་དག་ཤཱཀྱའི་བུའི་དགེ་སྦྱོང་རྣམས་དང་བྲམ་ཟེ་དང ། ཁྱིམ་བདག་རྣམས་ལ་བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་བྱེད་པ་བདེན་ནམ ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ
6.154b
བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་དག་གམ། གཞན་ཡང་དེ་ལྟ་བུ་གང་ཡིན་པའོ། །མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་ཤེས་བྱ་བ་ནི་རྣམ་པ་དུ་མའོ། །བྱེད་ན་ཞེས་བྱ་བ་ནི་ཀུན་ཏུ་སྦྱོར་བར་བྱེད་པ་དང ། རབ་ཏུ་སྦྱོར་བར་བྱེད་པ་དང ། བུན་འགྱེད་པར་བྱེད་པ་དང ། སྐྱེད་འགྱེད་པར་བྱེད་པ་ལྷག་པར་སྤྱོད་པར་བྱེད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་རྙེད་པ་འདོད་པས་ཡུལ་གྱི་ཐ་སྙད་ཀྱི་ཟོང་ཀུན་ཏུ་སྦྱོར་བར་བྱེད་ཅིང ། དེ་དེ་ལ་ཤིང་རྟ་དང་གླ་མི་དང ། དཔང་པོ་དང ། གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་དེ། ཤོ་གམ་དང་ལ་ཅན་དང་གྲུ་བཙས་སྦྱིན་པར་བྱེད་ན་ཇི་སྲིད་དུ་རྙེད་པ་དག་བདག་གིར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། རྙེད་པ་བདག་གིར་བྱེད་པ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་རྙེད་པ་འདོད་པས་དབྱིག་གམ། གསེར་རབ་ཏུ་སྦྱོར་བར་བྱེད་ཅིང ། དེ་དེ་ལ་དཔང་པོ་དང ། གྲོ་བ་དང་སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་ན་ཇི་སྲིད་དུ་རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། རྙེད་པ་དག་བདག་གིར་བྱེད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་རྙེད་པ་འདོད་པས་ནས་དང ། འབྲུའི་བུན་འགྱེད་པར་བྱེད་ཅིང ། དེ་དེ་ལ་གཞལ་བླུགས་དང ། བྲེའུ་ཆུང་དང ། ཕུལ་དང ། དཔང་པོ་དང ། གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་ན་ཇི་སྲིད་དུ་རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། རྙེད་པ་བདག་གིར་བྱེད་པ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་རྙེད་པ་འདོད་པས་དུང་གི་ཚོགས་ཀྱི་ཕྱིར་ནོར་བུའི་ཚོགས་གཏོང་བར་བྱེད་པ་དང ། ནོར་བུའི
6.155a
ཚོགས་ཀྱི་ཕྱིར་མུ་ཏིག་གི་ཚོགས་གཏོང་བར་བྱེད་པ་དང ། མུ་ཏིག་གི་ཚོགས་ཀྱི་ཕྱིར་བཻ་དཱུརྱའི་ཚོགས་གཏོང་བར་བྱེད་ཅིང ། དེ་དེ་ལ་དཔང་པོ་དང ། གྲོ་བ་དང ། སྣག་ཚ་དང ། སྨྱུ་གུ་དང ། ཡི་གེ་པ་ཚོལ་བར་བྱེད་ན། ཇི་སྲིད་དུ་རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། རྙེད་པ་བདག་གིར་བྱེད་ན་སྤང་པའི་ལྟུང་བྱེད་དུ་འགྱུར་རོ་ཞེས་དེ་ལྟར་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་མཛད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་ཡངས་པ་ཅན་པའི་ལིད་ཙ་བྱི་དག་གི་ཁང་པ་དག་དྲུག་རྩེག་དང་བདུན་རྩེག་ཏུ་བྱེད་དོ། །ཡངས་པ་ཅན་གྱི་ལིད་རྩུ་བྱི་རྣམས་ཀྱི་ཁང་པ་ཇི་ལྟ་བ་དེ་བཞིན་དུ་གཙུག་ལག་ཁང་དག་ཀྱང་དྲུག་རྩེག་དང་བདུན་རྩེག་ཏུ་བྱེད་པས་དེ་དག་མཐོ་ཆེས་པས་བརྩིགས་ཤིང་བརྩིགས་ཤིང་རྡིབ་ནས་སྦྱིན་བདག་དག་གིས་བསམས་པ། བདག་ཅག་གསོན་ཞིང་འདུག་སྟེ། འཚོ་ཞིང་སྡོད་པ་རྣམས་ཀྱི་གཙུག་ལག་ཁང་དག་ཀྱང་འདི་ལྟར་འཇིག་ན་ཤི་བ་རྣམས་ཀྱི་ཇི་ལྟར་འགྱུར། བདག་ཅག་གིས་མཁར་ལན་གྱི་རྒྱུར་དགེ་འདུན་ལ་མི་ཟད་པ་དབུལ་བར་བྱའོ་སྙམ་ནས་དེ་དག་མི་ཟད་པ་ཐོགས་ཏེ་དགེ་སློང་རྣམས་ཀྱི་གན་དུ་དོང་ནས་ཕྱིན་པ་དང ། དགེ་སློང་རྣམས་ལ་འདི་སྐད་ཅེས་སྨྲས་སོ། །འཕགས་པ་དག་མཁར་ལེན་གྱི་སླད་དུ་མི་ཟད་པ་འདི་དག་བཞེས་ཤིག་།དགེ་སློང་རྣམས་ཀྱིས་སྨྲས་པ། བཞིན་བཟངས་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བར་མཛད་པས་བདག་ཅག་མི་ལེན་ཏོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་མཁར་ལས་གྱི་རྒྱུ་མི་ཟད་པར་བླངས་བར་བྱའོ། །གཞན་ཡང་དགེ་སློང་གི་དགེ་འདུན་གྱི་གཙུག་ལག་ཁང་ནི་སུམ་རྩེག་ཏུ་བྱའོ་དགེ་སློང་མའི་དགེ་འདུན་གྱི་དབྱར་ཁང་ནི
6.155b
ཉིས་རྩེག་ཏུ་བྱའོ། །དགེ་སློང་རྣམས་ཀྱིས་བཅོམ་ལྡན་འདས་ལས་མཉན་ནས་མི་ཟད་པ་བླངས་ནས་དགེ་འདུན་གྱི་མཛོད་དུ་བཅུག་སྟེ་བཞག་གོ། །སྦྱིན་བདག་དག་འོངས་ཏེ་སྨྲས་པ། འཕགས་པ་དག་ཅིའི་སླད་དུ་གཙུག་ལག་ཁང་གི་མཁར་ལན་མི་བགྱིད་ཀར་ཤ་པ་ཎ་དག་མེད་དོ། །འོ་ན་བདག་ཅག་གིས་ཁྱེད་ལ་མི་ཟད་པ་དག་མ་ཕུལ་ལམ། དགེ་སློང་རྣམས་ཀྱིས་སྨྲས་པ། ཅི་ཁོ་བོ་ཅག་གིས་མི་ཟད་པ་དག་ཟོས་སྙམ་འམ། དགེ་འདུན་གྱི་མཛོད་ན་འདུག་གོ། །འཕགས་པ་དག་དེ་ལྟ་ན་མི་ཟད་པར་མི་འགྱུར་གྱི་འདི་ལྟར་ཟད་པར་འགྱུར་ཏེ་ཅི་བདག་ཅག་གི་སྡུམ་པ་ན་གནས་མ་མཆིས་སྙམ་འམ། ཅིའི་སླད་དུ་རབ་ཏུ་སྦྱོར་བར་མི་མཛད། དགེ་སློང་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་པས་བདག་ཅག་རབ་ཏུ་སྦྱོར་བར་མི་མཛད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་མཁར་ལན་གྱི་རྒྱུ་མི་ཟད་པ་རབ་ཏུ་སྦྱོར་བར་བྱའོ། །དེ་བཞིན་དུ་བྲམ་ཟེ་དང ། ཁྱིམ་བདག་དད་པ་ཅན་དག་སངས་རྒྱས་དང ། ཆོས་དང ། དགེ་འདུན་གྱི་ཕྱིར་མི་ཟད་པ་འབུལ་ནས། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་དང ། ཆོས་དང ། དགེ་འདུན་གྱི་ཕྱིར་མི་ཟད་པ་རབ་ཏུ་སྦྱོར་བར་བྱ་ཞིང་དེ་ལས་སྐྱེད་གང་གྲུབ་པ་དེས་སངས་རྒྱས་དང ། ཆོས་དང ། དགེ་འདུན་ལ་མཆོད་པར་བྱའོ། །དེ་དག་གིས་དེ་དག་ཉིད་ལ་བྱིན་ནས་དེ་དག་ལ་འདས་པ་ན་རྩོད་པར་བྱེད་ཅིང ། འཕགས་པ་དག་ཅིའི་ཕྱིར་བདག་ཉིད་ཀྱི་ནོར་ལས་རྩོད་པ་བྱུང་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་སྦྱིན་པར་མི་བྱའོ། །དེ་དག་གིས་ཕྱུག་པོ་དག་ལ་བྱིན་ནས། དེ་དག་ལ་འདས་པ་ན་མཐུ་དང་ལྡན་པ་ལ་རྟེན་ཅིང
6.156a
མི་སྟེར་བ་དང ། བླའི་གྲཝའི་མཐུས་མི་སྟེར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་སྦྱིན་པར་མི་བྱའོ། །དེ་དག་གིས་དབུལ་པོ་རྣམས་ལ་བྱིན་ནས་དེ་དག་གིས་ཀྱང་འཇལ་མི་ནུས་ནས་བཅོམ་ལྡན་འདས་ཀྱིས་བཀའ་སྩ་པ། གཏའ་ཉི་རིར་བླངས་ཏེ་དཔང་པོ་དང་བཅས་པའི་དམ་རྒྱའི་གླེགས་བུ་བྲིས་ཏེ་སྦྱིན་པར་བྱའོ། །གླེགས་བུ་དེ་ལ་ཡང་ལོ་དང ། ཟླ་བ་དང ། ཉི་མ་དང ། དགེ་འདུན་གྱི་གནས་བརྟན་དང ། དགེ་སྐོས་དང ། ལེན་པ་པོ་དང ། རྫས་དང ། སྐྱེད་རྣམས་ཀྱི་མིང་བྲི་བར་བྱའོ། །གང་ལ་སྦྱིན་པར་བྱ་བ་དགེ་བསྙེན་དད་པ་ཅན་བསླབ་པའི་གཞི་ལྔ་བཟུང་བ་ལ་ཡང་གཏའ་ཉི་རི་ཁོ་ནས་སྦྱིན་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མངོན་མཚན་ཅན་གྱིས་སྤྱོད་པའི་སྤང་བ་སྟེ་བཅུ་དགུ་པ་རྫོགས་སྷོ།། ་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་ཉོ་ཚོང་རྣམ་པ་སྣ་ཚོགས་བྱེད་དེ། ལེན་པར་བྱེད། གཏོང་བར་བྱེད། ཉོ་བར་བྱེད། འཚོང་བར་བྱེད་དོ། ཇི་ལྟར་ལེན་པར་བྱེད་ཅེ་ན། གང་གི་ཚེ་ལྗོངས་སུ་ལོ་ལེགས་ཤིང་གྲོང་ཁྱེར་དུ་ལོ་ཉེས་པ་དེའི་ཚེ་ན་ལྗོངས་ནས་གྲོང་ཁྱེར་དུ་ལེན་པར་བྱེད་དེ། དེ་ལྟར་ལེན་པར་བྱེད་དོ། ཇི་ལྟར་གཏོང་བར་བྱེད་ཅེ་ན། གང་གི་ཚེ་གྲོང་ཁྱེར་དུ་ལོ་ལེགས་ཤིང་ལྗོངས་སུ་ལོ་ཉེས་པ་དེའི་ཚེ་ན་གྲོང་ཁྱེར་ནས་ལྗོངས་སུ་གཏོང་བར་བྱེད་དེ། དེ་ལྟར་གཏོང་བར་བྱེད་དོ། །ཇི་ལྟར་ཉོ་བར་བྱེད་ཅེ་ན། གང་གི་ཚེ་རིན་ཆུང་བ་དེའི་ཚེ་ན་ཉོ་བར་བྱེད་དེ ། དེ་ལྟར་ཉོ་བར་བྱེད་དོ། །ཇི་ལྟར་འཚོང་བར་བྱེད་ཅེ་ན། གང་གི་ཚེ་རིན་ཆེ་བ་དེའི་ཚེ་ན་འཚོང་བར་བྱེད་དེ། དེ་ལྟར་འཚོང་བར་བྱེད་དོ། །གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་རྣམས་ནི་མ་ལོག་མ་སྤངས་སོ་སོར་མ་སྤངས་པ་ཡིན་ཏེ། འདི་ལྟར་ཉོ་འཚོང་རྣམ་པ་སྣ་ཚོགས་བྱེད་དེ། ལེན་པར་བྱེད། གཏོང་བར་བྱེད། ཉོ་བར་བྱེད། འཚོང་བར་བྱེད་ཅིང་བྲམ་ཟེ་དང ། ཁྱིམ་བདག་རྣམས་ཀྱང་ཉོ་འཚོང་རྣམ་པ་སྣ་ཚོགས་བྱེད་དེ། ལེན་པར་བྱེད། གཏོང་བར་བྱེད། ཉོ་བར་བྱེད། འཚོང་བར་བྱེད་ན་ཤཱཀྱའི་བུའི་དགེ་སྦྱོང་རྣམས་དང ། བྲམ་ཟེ་དང ། ཁྱིམ་བདག་འདི་དག་ལ་བྱེ་བྲག་ནི་ཅི
6.156b
ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཉོ་འཚོང་རྣམ་པ་སྣ་ཚོགས་བྱེད་དེ། ལེན་པར་བྱེད། གཏོང་བར་བྱེད། ཉོ་བར་བྱེད། འཚོང་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཉོ་འཚོང་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་དག་གམ། གཞན་ཡང་དེ་ལྟ་བུ་གང་ཡིན་པའོ། །ཉོ་འཚོང་རྣམ་པ་སྣ་ཚོགས་ཤེས་བྱ་བ་ནི་རྣམ་པ་མང་པོའོ། །བྱེད་ན་ཞེས་བྱ་བ་ནི་ལེན་པར་བྱེད་པ་དང ། གཏོང་བར་བྱེད་པ་དང ། ཉོ་བར་བྱེད་པ་དང ། འཚོང་བར་བྱེད་པ་དག་ལྷག་པར་སྤྱོད་པར་བྱེད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་རྙེད་པ་འདོད་པས་ཉོ་བར་བྱེད། འཚོང་བར་བྱེད་ན་ཉོ་བར་བྱེད་པ་ལ་ཉེས་བྱས་སུ་འགྱུར་ལ། འཚོང་བ
6.157a
ལ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་རྙེད་པ་འདོད་པས་ཉོ་བར་བྱེད་ཅིང་རྙེད་པ་མི་འདོད་པས་འཚོང་བར་བྱེད་པ་ལ་ཉེས་བྱས་སུ་འགྱུར་ལ། འཚོང་བར་བྱེད་པ་ལ་ལྟུང་བ་མེད་དོ། །དགེ་སློང་གིས་རྙེད་པ་མི་འདོད་པས་ཉོ་བར་བྱེད་ཅིང་རྙེད་པ་འདོད་པས་འཚོང་བར་བྱེད་ན་ཉོ་བར་བྱེད་པ་ལ་ལྟུང་བ་མེད་ལ། འཚོང་བར་བྱེད་པ་ལ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་རྙེད་པ་མི་འདོད་པས་ཉོ་བར་བྱེད་ཅིང་རྙེད་པ་མི་འདོད་པས་འཚོང་བར་བྱེད་ན་གཉིས་ཀ་ལ་ལྟུང་བ་མེད་དོ། །ཡུལ་གཞན་གྱི་སྦྱོར་བས་སྔ་མའི་རྒྱུད་སྦྱོང་བར་བྱེད་པ་ལ་ལྟུང་བ་མེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་བྱང་ལམ་པའི་ཚོང་པ་ལམ་གྱི་བགྲོད་པར་ཞུགས་པ་དག་གིས་གཙུག་ལག་ཁང་རྟ་བབས་མཐོན་པོ་དང་ལྡན་པ་སྐར་ཁུང་དང ། སྐར་ཁུང་དྲ་བ་ཅན་དང ། ལན་ཀན་གྱིས་བརྒྱན་པ། མིག་དང་སྙིང་འཕྲོག་པ་མཐོ་རིས་ཀྱི་ཐེམ་སྐས་སུ་གྱུར་པ་དག་མཐོང་ནས་དེ་དག་དད་པར་གྱུར་ཏེ། དེ་དག་གཙུག་ལག་ཁང་དུ་དོང་ནས་དགེ་སློང་རྣམས་ལ་འདི་སྐད་ཅེས་སྨྲས་སོ། །འཕགས་པ་དག་བདག་ཅག་གིས་དགེ་འདུན་ལ་མཆོད་སྟོན་བགྱིའོ། །དགེ་སློང་རྣམས་ཀྱིས་སྨྲས་པ། མཆོད་སྟོན་གྱི་ཡོ་བྱད་དག་ཁྱེར་ཏེ་ཤེག་ཤིག་།དེ་དག་གིས་སྨྲས་པ། བདག་ཅག་བློ་བུར་དུ་ལྷགས་པ་དག་ལགས་ཏེ། འདི་ལྟར་བདག་ཅག་རིན་འབུལ་གྱིས་ཁྱེད་ཀྱིས་འབྲས་དག་སྩོལ་ཅིག་།བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་པས་བདག་ཅག་འབྲས་དག་མི་འཚོང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་མི་བྱ་བར་འདི་ལྟར་གང་དག་དགེ་འདུན་གྱི་ཕྱིར་མཆོད་སྟོན་བྱེད་པ་དེ་ལ་རིན་གྱིས་འབྲས་སྦྱིན་པར་བྱའོ། །དགེ་སློང་དག་རི་བ་ཁོ་ན་སྦྱིན་ནས་བཅོམ་ལྡན་འདས་ཀྱིས་བཀའ་སྩལ་པ། གང་གཙུག་ལག་ཁང་དེ་ཉིད་དུ་མཆོད་སྟོན་བྱེད་པ་དེ་ལ་འཐེབ་དང་བཅས་པ་སྦྱིན་པར་བྱའོ། །བཅོམ་ལྡན་འདས་ཀྱིས
6.157b
རིན་གྱིས་འབྲས་སྦྱིན་པར་བྱའོ་ཞེས་བཅའ་བ་མཛད་པས་མང་པོ་དག་མཆོད་སྟོན་བྱེད་ནས་ཐམས་ཅད་ལ་བྱིན་ན་འབྲས་དག་སྤྱད་པས་སྤྱི་བུངས་ཆད་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་མི་བྱ་བར་འདི་ལྟར་རིན་དེས་འབྲས་གཞན་དག་ཉོ་བར་བྱའོ། །འབྲས་རྙིང་པ་དག་ཀྱང་སོ་སོར་བརྟགས་ནས་གལ་ཏེ་སྲོག་ཆགས་མེད་ན་དུས་སུ་བཙོངས་ཏེ་འབྲས་སར་པས་བང་བ་དག་དགང་བར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཉོ་འཚོང་བྱེད་པའི་སྤང་བ་སྟེ་ཉི་ཤུ་པ་རྫོགས་སྷོ།། ་་་་་་་་་།། སྡོམ་ལ། ལྷུང་བཟེད་གཉིས་དང་ཐ་ག་གཉིས། །བྱིན་འཕྲོག་སྟོན་ཟླ་ཐ་ཆུངས་དང ། །དགོན་པ་པ་དང་རས་ཆེན་དང ། །བསྔོས་པ་དང་ནི་གསོག་འཇོག་གོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་ཁྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་ཉེ་དགའ་འདི་སྙམ་དུ་སེམས་ཏེ། འདི་དག་ཐམས་ཅད་ཁྱིམ་བདག་མགོན་མེད་ཟས་སྦྱིན་གྱིས་བསླབ་པའི་གཞི་དག་གིས་ཁྱབ་པར་བྱས་པས་ཕྱིན་ཅད་གང་ནས་ཀྱང་རྙེད་པ་བསླང་བར་མི་ནུས་སོ་སྙམ་ནས་དེ་དེ་སྙམ་སེམས་པ་ན་དགའ་འདུན་དྲུག་བཅུ་བསྐྱེད་མོས་ཚལ་དུ་དོང་བ་དེ་དག་ཉེ་དགས་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། གལ་ཏེ་འདི་དག་ལས་རྙེད་པ་མ་གྲུབ་ན་ཉེ་དགའ་ཞེས་བྱ་བའི་མིང་གཟུང་བར་མི་བྱའོ་སྙམ་མོ། །དྲུག་སྡེ་དག་གི་ཀུན་དུ་སྤྱོད་པ་ནི་གལ་ཏེ་སྦྱིན་པའི་གཏམ་དག་བྱེད་ན་ཉན་པ་པོ་དག་བདག་ཅག་གིས་རང་གི་ཤ་དག་བཅད་ཅིང་བཅད་ཅིང་སྦྱིན་པར་བྱའོ་སྙམ་དུ་སེམས་ལ། གལ་ཏེ་ཚུལ་ཁྲིམས་ཀྱི་གཏམ་དག་བྱེད་ན་ཉན་པ་པོ་དག་བདག་ཅག་ལྷ་རྣམས་ཀྱི་ནང་དུ་སྐྱེས་སོ་སྙམ་དུ་སེམས་སོ། །གལ་ཏེ་ངན་སོང་གི་གཏམ་དག་བྱེད་ན་ཉན་པ་པོ་དག་བདག་ཅག་ངན་སོང་རྣམས་སུ་སྐྱེས་སོ་སྙམ་དུ་སེམས་པ་ཡིན་པས་དེས་ལྷུང་བཟེད་གསལ་བ། ཟླུམ་པ་ལོངས་སྤྱད་པར་བཟོད་པ་མཆན་ཁུང་གིས་ཁྱེར་ཏེ་དགའ་འདུན་དེ་དག་ག་ལ་བ་དེར་སོང་སྟེ་ཕྱིན་ནས་དགའ་འདུན
6.158a
པ་གཅིག་ལ་ཅི་ནས་ཀྱང་དེའི་སེམས་མངོན་པར་དད་པར་འགྱུར་བ་དེ་ལྟར་སྦྱིན་པའི་གཏམ་བྱས་ནས་དེས་མས་དད་པར་གྱུར་ཏེ་སྨྲས་པ། འཕགས་པ་ཅིའི་སླད་དུ་བྱོན། ཉེ་དགས་སྨྲས་པ། བཞིན་བཟངས་བདག་ལ་ལྷུང་བཟེད་དགོས་སོ། །འཕགས་པ་བདག་ལ་ལྷུང་བཟེད་མ་མཆིས་ཏེ་གལ་ཏེ་རིན་གྱིས་རྙེད་ན་བདག་གིས་མཇལ་ཏེ་གསོལ་ལོ། །ཉེ་དགས་ལྷུང་བཟེད་མཆན་ཁུང་ནས་ཕྱུང་སྟེ་དེ་ལ་བསྟན་ནས་སྨྲས་པ། བཞིན་བཟངས་ལྷུང་བཟེད་འདི་ཡང་རིན་གྱིས་རྙེད་པ་ཡིན་ནོ། །འཕགས་པ་འདིའི་རིན་ཇི་ཙམ། ཀཱར་ཥཱ་པ་ཎ་དྲུག་བཅུའོ། །བདག་གིས་འདིའི་རིན་ཀཱར་ཥཱ་པ་ཎ་དྲུག་བཅུ་འབུལ་ལོ། །བཞིན་བཟངས་ཨ་རོག་ཁྱ་དེ་དག་ཁྱོད་ཀྱིར་གྱུར་ཅིག་།སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་འཐོབ་པ་དང ། ལྷ་དང་མི་རྣམས་ཀྱི་ནང་དུ་སྣོད་ཏུ་འགྱུར་བར་གྱུར་ཅིག་།དེ་བཞིན་དུ་དེ་དེས་དགའ་འདུན་དྲུག་བཅུ་པོ་དག་རེ་རེ་ཡང་ཀཱར་ཥཱ་པ་ཎ་དྲུག་བཅུ་དྲུག་བཅུ་སྦྱོར་དུ་བཅུག་ནས་སོང་ངོ ། །དགའ་འདུན་དེ་དག་ཐམས་ཅད་གཅིག་ཏུ་འདུས་པར་གྱུར་ནས་དེ་ན་དགའ་འདུན་གཅིག་གིས་སྨྲས་པ། ཤེས་ལྡན་དག་ཁོ་བོས་བཙུན་པ་ཉེ་དགའ་ཤཱཀྱའི་རིགས་ལས་རབ་ཏུ་བྱུང་བ་ཆོས་སྒྲོག་པ་རིགས་པ་དང་གྲོལ་བའི་སྤོབས་པ་དང་ལྡན་པ་ལ་ལྷུང་བཟེད་ཀྱི་རིན་དུ་ཀཱར་ཥཱ་པ་ཎ་དྲུག་བཅུ་ཕུལ་གྱིས་རྗེས་སུ་ཡི་རང་བར་གྱིས་ཤིག་།གཞན་ཞིག་གིས་སྨྲས་པ། ཁོ་བོས་ཀྱང་ཕུལ་ལོ ། །ཡང་གཞན་ཞིག་གིས་སྨྲས་པ། ཁོ་བོས་ཀྱང་ཕུལ་ལོ། །དེ་བཞིན་དུ་ཐམས་ཅད་ཀྱིས་ཁོ་བོས་ཀྱང་ཕུལ་ལོ། །ཁོ་བོས་ཀྱང་ཕུལ་ལོ་ཞེས་སྨྲས་ནས་དེ་དག་ཕན་ཚུན་བལྟ་བར་བརྩམས་ཏེ། ཤེས་ལྡན་དག་དགེ་སློང་གཅིག་ལ་ལྷུང་བཟེད་དུ་དགོས་ཤེས་དེ་དག་གིས་དགེ་སློང་ཞིག་ལ་དྲིས་པ། འཕགས་པ་དགེ་སློང་གཅིག་ལ་ལྷུང་བཟེད་དུ་འཚལ། དེས་སྨྲས་པ། བཞིན་བཟངས་དག་གཅིག་ཁོ་ན་དགོས་སོ། །དེ་དག་གིས་ཤཱཀྱའི་སྲས་ཀྱི་དགེ་སྦྱོང་རྣམས་ནི་རྙེད་པ་འདོད་པས་ཟིལ་གྱིས་གནོན་པ་དག་ཡིན་ནོ་ཞེས་སྨད་པར་བརྩམས་སོ། །དེ་ནི་རེ་ཤིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ
6.158b
ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་ལྷུང་བཟེད་རྙེད་དོ་ཅོག་གསོག་པར་བྱེད་ཅིང་བདག་ཉིད་ཀྱང་སྤྱོད་པར་མི་བྱེད། དགེ་སློང་གཞན་དག་ལ་ཡང་སྦྱིན་པར་མི་བྱེད་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ལྷུང་བཟེད་རྙེད་དོ་ཅོག་གསོག་པར་བྱེད་ཅིང་བདག་ཉིད་ཀྱང་སྤྱོད་པར་མི་བྱེད། དགེ་སློང་གཞན་དག་ལ་ཡང་སྦྱིན་པར་མི་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་ལྷུང་བཟེད་རྙེད་དོ་ཅོག་སོགས་པར་བྱེད་ཅིང་བདག་ཉིད་ཀྱང་སྤྱོད་པར་མི་བྱེད། དགེ་སློང་གཞན་དག་ལ་ཡང་སྦྱིན་པར་མི་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་དང་འཐུན་པ་མ་ཡིན་པ། རྗེས་སུ་འཐུན་པ་མ་ཡིན་པ། །རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་ལྷུང་བཟེད་ལྷག་པ་ཞག་བཅུའི་བར་དུ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །དགེ་སློང
6.159a
གིས་ཤེས་བྱ་བ་ནི་ཆོས་འདི་པས་སོ། །ལྷུང་བཟེད་ལྷག་པ་ཞེས་བྱ་བ་ནི་བྱིན་གྱིས་བརླབ་པར་བྱ་བ་ལས་ལྷག་པའོ། །ཞག་བཅུའི་བར་དུ་ཞེས་བྱ་བ་ནི་ཉིན་མཚན་བཅུའི་མཐའི་བར་དུའོ། །བཅང་བར་བྱའོ་ཞེས་བྱ་བ་ནི་བདག་གིར་བྱའོ། །དེ་ལས་འདས་པར་འཆང་ན་ཞེས་བྱ་བ་ནི་དེ་ལས་ཐལ་བར་འཆང་བའོ། །སྤང་བའི་ལྷུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན་འདི་ལྟ་སྟེ། དགེ་སློང་གིས་ཚེས་ལ་ལྷུང་བཟེད་རྙེད་ན་དགེ་སློང་དེས་ལྷུང་བཟེད་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་བརྟག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་ལྷུང་བཟེད་མ་རྙེད་ཀྱང་ཚེས་གཉིས་སམ། ཚེས་གསུམ་མམ། ཚེས་དགུ་འམ། ཚེས་བཅུ་ཚུན་ཆད་ཀྱིས་ལྷུང་བཟེད་རྙེད་ན་དགེ་སློང་དེས་ལྷུང་བཟེད་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་བ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ལྷུང་བཟེད་ཅིག་རྙེད་ཅིང་དེས་ཚེས་གཉིས་ལ་ཡང་གཞན་ཞིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་བྱིན་གྱིས་བརླབ་པར་བྱ་ཞིང་ཕྱི་མ་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་བྱིན་གྱིས་བརླབ་པར་བྱ་ཞིང་སྔ་མ་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ་གཞན་ལ་སྦྱིན་པ་བྱའོ། །བྱིན་གྱིས་རློབ་པར་མི་བྱེད་དམ་གཏོང་བར་མི་བྱེད་དམ་རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ
6.159b
གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་དང ། ཚེས་གཉིས་ལ་མ་རྙེད་ཀྱང་ཚེས་གསུམ་དང་ཚེས་བཅུ་ཚུན་ཆད་ཀྱི་ལྷུང་བཟེད་ཅིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་བྱིན་གྱིས་བརླབ་པར་བྱ་ཞིང་ཕྱི་མ་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་བྱིན་གྱིས་བརླབ་པར་བྱ་ཞིང་སྔ་མ་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ་གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ་གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ལྷུང་བཟེད་གཉིས་རྙེད་ན་དགེ་སློང་དེས་ལྷུང་བཟེད་དེ་གཉིས་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་ལྷུང་བཟེད་གཉིས་མ་རྙེད་ཀྱང་ཚེས་གཉིས་སམ། ཚེས་གསུམ་མམ། ཚེས་དགུ་འམ། ཚེས་བཅུ་ཚུན་ཆད་ཀྱིས་ལྷུང་བཟེད་གཉིས་རྙེད་ན་དགེ་སློང་དེས་ལྷུང་བཟེད་དེ་གཉིས་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ་གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་ལྷུང་བཟེད་གཉིས་མ་རྙེད་ཀྱང་ཚེས་གཉིས་སམ། ཚེས་གསུམ་མམ། ཚེས་བཅུ་ཚུན་ཆད་ཀྱིས་ལྷུང་བཟེད་གཉིས་རྙེད་ན་དགེ་སློང་དེས་ལྷུང་བཟེད་དེ་གཉིས་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ།
6.160a
གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། དགེ་སློང་གིས་ཚེས་ལ་ལྷུང་བཟེད་གཉིས་ཤིག་རྙེད་ཅིང་དེས་ཚེས་གཉིས་ལ་ལྷུང་བཟེད་གཞན་གཉིས་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་གཉིས་བྱིན་གྱིས་བརླབ་པར་བྱ་ཞིང་ཕྱི་མ་གཉིས་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་གཉིས་བྱིན་གྱིས་བརླབ་པར་བྱ་ཞིང་སྔ་མ་གཉིས་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་དང ། ཚེས་གཉིས་ལ་མ་རྙེད་ཀྱང་ཚེས་གསུམ་དང ། ཚེས་བཅུ་ཚུན་ཆད་ཀྱིས་ལྷུང་བཟེད་གཉིས་ཤིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་གཉིས་བྱིན་གྱིས་བརླབ་པར་བྱ་ཞིང་ཕྱི་མ་གཉིས་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་བྱིན་པར་བྱའོ། །ཡང་ན་ཕྱི་མ་གཉིས་བྱིན་གྱིས་བརླབ་པར་བྱ་ཞིང་སྔ་མ་གཉིས་གཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ལྷུང་བཟེད་མང་པོ་རྙེད་ན་དགེ་སློང་དེས་ལྷུང་བཟེད་དེ་དག་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུག་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་ལྷུང་བཟེད་མང་པོ་མ་རྙེད་ཀྱང་ཚེས་གཉིས་སམ། ཚེས་གསུམ་མམ། ཚེས་དགུ་འམ།
6.160b
ཚེས་བཅུ་ཚུན་ཆད་ཀྱིས་ལྷུང་བཟེད་མང་པོ་རྙེད་ན་དགེ་སློང་དེས་ལྷུང་བཟེད་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ལྷུང་བཟེད་མང་པོ་དག་ཅིག་རྙེད་ཅིང་དེས་ཚེས་གཉིས་ལ་ཡང་གཞན་མང་པོ་དག་ཅིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་དག་བྱིན་གྱིས་བརླབ་པར་བྱ་ཞིང་ཕྱི་མ་དག་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་དག་བྱིན་གྱིས་བརླབ་པར་བྱ་ཞིང་སྔ་མ་དག་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་ཏུ་འགྱུར་རོ། །ཚེས་དང ། ཚེས་གཉིས་ལ་མ་རྙེད་ཀྱང་ཚེས་གསུམ་དང ། ཚེས་བཅུ་ཚུན་ཆད་ཀྱིས་ལྷུང་བཟེད་མང་པོ་དག་ཅིག་རྙེད་ན་དགེ་སློང་དེས་ཞག་བཅུ་པོ་དེ་ཉིད་ཀྱི་ནང་དུ་སྔ་མ་དག་བྱིན་གྱིས་བརླབ་པར་བྱ་ཞིང་ཕྱི་མ་དག་བཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་དག་བྱིན་གྱིས་བརླབ་པར་བྱ་ཞིང་སྔ་མ་དག་གཏང་བར་བྱ་བ་འམ། རྣམ་པར་བརྟག་པར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་སྤང་བར་འགྱུར་ན་དེ་མ་སྤངས་ཤིང་དབྲལ་བར་མ་བྱས་ལ་ལྟུང་བ་མ་བཤགས་པར་གཞན་ཤིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་ལྷུང་བཟེད་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས
6.161a
པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། དགེ་སློང་གི་ལྷུང་བཟེད་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ། ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་སྲིད་དུ་སྤང་བའི་དངོས་པོ་དེ་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལྷུང་བཟེད་ཆུང་ངུ་དང ། ལྷུང་བཟེད་སྐྱ་བ་དང ། ལྷུང་བཟེད་ཆེ་བ་དང ། ལྷུང་བཟེད་མ་ཚོས་པ་འཆང་བ་ལ་ལྟུང་བ་མེད་དོ། །རབ་ཏུ་འབྱུང་བ་ལ་ལྟོས་པའི་དོན་དུ་ལྟུང་བཟེད་འཆང་བ་ལ་ཐམས་ཅད་དུ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ ། །ལྷུང་བཟེད་འཆང་བའི་སྤང་བ་སྟེ་ཉི་ཤུ་གཅིག་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་སྤོས་འཚོང་གི་ཁྱེའུ་ཞིག་འདུག་པ་དེས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་དོ། །བསོད་སྙོམས་པ་ཞིག་ཀྱང་སྔ་དྲོ་ཤམ་ཐབས་བགོས་ལྷུང་བཟེད་དང ། ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེས་བསོད་སྙོམས་བརྒྱུས་ཏེ་སྲང་དུ་ཕྱིན་པ་དང ། སྤོས་འཚོང་གི་ཁྱེའུ་དེས་དེ་མཐོང་ནས་སྨྲས་པ། འཕགས་པ་བདག་གིས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་ཀྱིས་གལ་ཏེ་བཞེད་ན་སྣོམས་ཤིག་བཞིན་བཟངས་བདག་ལ་ལྟུང་བཟེད་ཡོད་དོ། །འཕགས་པ་གལ་ཏེ་དགེ་སློང་གཞན་འགའ་ཞིག་ལྷུང་བཟེད་འཚལ་བ་མཆིས་ན་དེ་བཏང་དུ་གསོལ། བཏང་བར་བྱའོ། །དེ་ནས་བསོད་སྙོམས་པ་དེས་མཉན་ཡོད་དུ་བསོད་སྙོམས་ལ་བརྒྱུས་ནས་རྒྱལ
6.161b
བྱེད་ཀྱི་ཚལ་དུ་སོང་སྟེ། དེས་ཟན་ཟོས་ནས་ལྷུང་བཟེད་འཁྲུ་བ་ན་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་སྲང་ག་གེ་མོ་ཞིག་ན་སྤོས་འཚོང་གི་ཁྱེའུ་ཞིག་འདུག་པ་དེས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་ཀྱིས་ཁྱེད་ཅག་ལས་གང་ལྷུང་བཟེད་འདོད་པ་དེ་སོང་ཤིག་།དེ་དང་ཧ་ཅང་ཐག་མི་རིང་བ་ན་ཉེ་དགའ་འདུག་པ་དེས་ཐོས་ནས་དེས་བསམས་པ། དེ་ལྷུང་བཟེད་ནག་པོ་ཅན་འགའ་ཞིག་གིས་ཐོས་ནས་རབ་ཏུ་རྒྱུག་པར་གྱུར་ན་མི་རུང་གིས་སྨད་པར་བྱའོ་སྙམ་ནས་དེས་དེ་ལ་སྨྲས་པ། ཚེ་དང་ལྡན་པ་ཁྱོད་དད་པས་བྱིན་པ་ཟོས་ནས་ལྷུང་བཟེད་ཀྱི་གཏམ་དང ། ཆོས་གོས་ཀྱི་གཏམ་ལས་གཞན་པའི་གཏམ་འགའ་ཡང་མེད་མོད། དེས་བསམས་པ། འཇིག་རྟེན་ན་འདོད་པའི་བདག་ཉིད་ཅན་གང་ཇི་སྙེད་པ་དེ་དག་དང་ཉེ་དགའ་མཚུངས་པ་ཡིན་ན་འདིས་ཀྱང་རེ་ཤིག་བདག་སྨད་པར་གྱུར་ན་གལ་ཏེ་དགེ་སློང་གནས་བརྟན་གཞན་འགའ་ཞིག་གིས་ཐོས་པར་གྱུར་ན་དེས་རྒྱ་ཆེར་སྨད་པར་འགྱུར་རོ་སྙམ་ནས་དེ་ཅང་མི་སྨྲ་བར་འདུག་གོ། །ཉེ་དགས་དེ་བཀར་ཏེ་སྨྲས་པ། ཚེ་དང་ལྡན་པ་ཁྱོད་ཀྱི་མཁན་པོ་དང་ཁོ་བོ་བཤེས་པས་དེའི་ཕྱིར་ཁྱོད་སྨད་ཀྱིས་མ་གཤེ་ཤིག་།གནས་བརྟན་གལ་ཏེ་བདག་ཡང་སྨྲ་བར་གྱུར་ན་ཁྱོད་ཀྱིས་བདག་ལ་ཡང་སྨད་པར་མཛོད་ཅིག་།ཚེ་དང་ལྡན་པ་ཁོ་བོ་ཡང་ཉེ་བར་མ་ཞི་བ་ཙམ་དུ་ཟད་ཀྱི་ཅི་ལྷུང་བཟེད་དེ་ལྷུང་བཟེད་མ་ཡིན་ནམ། གནས་བརྟན་སྔ་མ་ཉིད་ཀྱང་སྨྲ་བར་མི་བགྱི་བ་ལགས་ཀྱིས་འཚལ་ཏོ། །ཚེ་དང་ལྡན་པ་དེ་ལྟ་མོད་ཀྱི་འོན་ཀྱང་རེ་ཤིག་སྨྲོས་ཤིག་།གནས་བརྟན་སྲང་ཆེ་གེ་མོ་ཞིག་ན་སྤོས་འཚོང་གི་ཁྱེའུ་ཞིག་མཆིས་པ་དེས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་ནས་དེའི་མཆིད་ནས་གལ་ཏེ་དགེ་སློང་ལྷུང་བཟེད་འཚལ་བ་འགའ་ཞིག་མཆིས་ན་དེ་བཏང་དུ་གསོལ་ཞེས་མཆིའོ། །དེ་ནི་དེ་ཙམ་དུ་ཟད་དེ། དེ་ཡང་ཉེ་བར་མ་ཞི་བ་ཙམ་ཁོ་ནར་ཟད་དོ། །དེ་ནས་ཉེ་དགའ་སྣམ་སྦྱར་གྱོན་ཏེ་འགྲོས་བསྐྱེད་ནས་ཕྱ་ར་ར་སོང་བ་དང ། སྤོས
6.162a
འཚོང་གི་ཁྱེའུ་དེས་དེ་འགྲོས་བསྐྱེད་དེ་འོང་བ་ཐག་རིང་པོ་ཁོ་ན་ནས་མཐོང་ནས་དེས་བསམས་པ། དགེ་སྦྱོང་ཧྲལ་པ་འགྲོས་འདི་ལྟ་བུས་འོང་བ་འདིས་བདག་གི་ལྷུང་བཟེད་འདི་ཕྲོགས་པར་འགྱུར་དུ་འོང་ངོ་སྙམ་ནས་དེས་ལྷུང་བཟེད་དེ་བླངས་ཏེ་མཛོད་ཚེའི་འོག་ཏུ་བཅུག་སྟེ་བཞག་པ་དང་ཉེ་དགས་དེ་སྦེད་པའི་ཚེ་མཐོང་ནས་དེས་སྨྲས་པ། བཞིན་བཟངས་ཅི་ལྷུང་བཟེད་འདི་ནལ་གྱི་བུ་ཡིན་ནམ་ཅི་ན་དེ་ཕྱིར་སྦེད་པར་བྱེད་ཅེས་དེས་ལག་པ་བརྐྱང་སྟེ་ལྷུང་བཟེད་བླངས་ནས་སྨྲས་པ། བཞིན་བཟངས་ཨ་རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣམ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་ནང་ན་སྣོད་ཏུ་འགྱུར་བར་གྱུར་ཅིག་།འཕགས་པ་བདག་ཅག་ཚོང་པ་དག་ནི་ཁེ་སྤོགས་འཚལ་བས་འཚོ་བ་ལགས་པས་འདི་རིན་མ་མཆིས་པར་མི་དབུལ་ཏེ་འདི་ལྟར་རིན་གྱི་ཕྱིར་འབུལ་ལོ། །བཞིན་བཟངས་ཅི་ཁྱོད་དྲང་སྲོང་གི་སྣོད་འཚོང་བར་བྱེད་དམ། ཚིགས་སུ་བཅད་པ་ཡང་སྨྲས་པ། གལ་ཏེ་སྐྱེས་བུ་ས་སྣོད་ཀྱིས། །གསེར་གྱི་སྣོད་ནི་ཐོབ་གྱུར་ན། །དེ་ཡིས་མྱ་ངན་ཅི་ཕྱིར་བྱ། །བསླུས་པ་མེད་པར་ཁོ་བོས་མཐོང ། །འཕགས་པ་ཁྱོད་མང་དུ་གསུང་མོད་ཀྱི་འོན་ཀྱང་རིན་མ་མཆིས་པར་མི་འབུལ་ལོ། །ཉེ་དགས་སྨྲས་པ། ཁྱོད་ཀྱི་ལྷུང་བཟེད་ལ་ལྷག་པར་ཆགས་པ་འདིས་ཡི་དགས་ལྐོ་ལྦ་ཅན་དག་གི་ནང་དུ་སྐྱེ་བར་བྱ་དགོས་སོ་ཞེས་དེ་དེ་སྐད་སྤྱོ་བར་བྱེད་པ་ན་ཁྱིམ་བདག་ཅིག་ཕྱོགས་དེར་འོངས་ནས་དེས་སྨྲས་པ། འཕགས་པ་ཕྱག་འཚལ་ལོ། །བཙུན་པ་ཉེ་དགའ་ཕྱག་འཚལ་ལོ། །ཉེ་དགས་སྨྲས་པ། བཞིན་བཟངས་ཁྱོད་ཀྱི་ཕྱག་སྐམ་པོ་འདིས་ཅི་བྱ། འཕགས་པ་བདག་ལ་བཙུན་པ་ཉེ་དགས་བཀའ་སྩལ་པ་གང་ཞིག་བདག་གིས་མ་བསྒྲུབས། ལྷུང་བཟེད་འདི་ཉོས་ཏེ་བྱིན་ཅིག་།ཁྱིམ་བདག་དེས་སྤོས་འཚོང་གི་ཁྱེའུ་དེ་ལ་སྨྲས་པ། བཞིན་བཟངས། ལྷུང་བཟེད་འདི་རིན་ཅི་ཙམ། འདི་དང་འདི་ཙམ་མོ། །ཁོ་བོས་ཁྱོད་ལ་སྦྱིན་ནོ། །སྤོས་འཚོང་གི་ཁྱེའུ་དེས་ལྷུང་བཟེད་དེ་ཁྱིམ་བདག་དེ་ལ་བྱིན་ནས་ཁྱིམ་བདག་དེས་ཀྱང་ཉེ་དགའ
6.162b
ལ་ཕུལ་ལོ་ཉེ་དགས་སྨྲས་པ། ཨ་རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་ནང་ན་སྣོད་ཏུ་འགྱུར་བར་གྱུར་ཅིག་།ཁྱིམ་བདག་དེ་སོང་བ་དང ། ཉེ་དགས་སྤོས་འཚོང་གི་ཁྱེའུ་དེ་ལ་སྨྲས་པ། བཀྲེན་པ་ཁྱོད་ཀྱིས་ཉེ་དགས་ལྷུང་བཟེད་ཀྱི་རིན་སྦྱོར་དུ་འཇུད་མི་ནུས་སྙམ་དུ་ཤེས་སམ། ཁྱོད་ཀྱི་ལྷུང་བཟེད་ལ་ལྷག་པར་ཆགས་པ་འདིས་ཡི་དགས་ལྦ་བ་ཅན་དག་གི་ནང་དུ་སྐྱེ་བར་བྱ་དགོས་སོ། །འཕགས་པ་ཅི་ཞིག་སྦྱོར་མཆིས། ཁྱོད་ཀྱིས་ཀྱང་ལྷུང་བཟེད་ཐོབ་ལ། བདག་གིས་ཀྱང་རིན་ཐོབ་ཀྱིས་བཞུད་ཅིག་།ཉེ་དགའ་ཡང་ལྷུང་བཟེད་ཁྱེར་ཏེ་གཙུག་ལག་ཁང་དུ་སོང་ནས་དེས་ལྷུང་བཟེད་དེ་དགེ་སློང་རྣམས་ལ་བསྟན་ཏེ་སྨྲས་པ། ཚེ་དང་ལྡན་པ་དག་ལྟོས་ཤིག་།ཁོ་བོའི་ལྷུང་བཟེད་ཅི་འདྲ། གཞོན་ནུ་ཞིག་གིས་སྨྲས་པ། གནས་བརྟན་ཅི་ཁྱོད་ལ་ལྷུང་བཟེད་གཞན་མ་མཆིས་སམ། ཡོད་དོ། །འོ་ན་གནས་བརྟན་གྱིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་དུ་རུང་ངམ། དགྲ་བོ་རྣམས་ཀྱི་གྲེ་བར་རྐང་པས་མནན་ནས་སོ། །གནས་བརྟན་ལ་དགྲ་བོ་དག་ཀྱང་མཆིས་སམ། གང་གི་ཕྱིར་ཁྱོད་ཁོ་བོའི་ལྷུང་བཟེད་གཉིས་པ་ཡང་མི་བཟོད་པས་ཇེ་ཁྱོད་ཁོ་བོའི་དགྲ་བོ་ཐུ་བོ་ཡིན་ནོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་ཚོལ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ་དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་ཚོལ་བ་བདེན་ནམ། བཙུན་པ་མད་དོ།
6.163a
སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་གིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་བར་མི་བྱའོ།། ་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་བཞི་པ། བཅོམ་ལྡན་འདས་ཀྱིས་དགེ་སློང་གིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་བར་མི་བྱའོ་ཞེས་བཀའ་སྩལ་ནས་བསོད་སྙོམས་པ་ཞིག་གི་ལྷུང་བཟེད་ཅུང་ཞིག་རྡོལ་ནས་དེས་དེ་ཐོགས་ཏེ་མཉན་ཡོད་ཏུ་བསོད་སྙོམས་ལ་ཞུགས་པ་དང་དེས་ཕྱེ་དག་རྙེད་ནས་དེས་དེ་དག་ལྷུང་བཟེད་ཀྱི་སྣོད་ཀྱིས་མནོས་སོ། །འབྲས་ཅན་གཤེར་བ་རྙེད་ནས་དེས་དེ་དག་ལྷུང་བཟེད་ཀྱིས་མནོས་པ་དང་དེ་ནས་ཟགས་པས་ཕྱེ་དག་གཤེར་བར་གྱུར་ཏེ་དེ་དག་གིས་ལྷུང་བཟེད་ཀྱི་སྣོད་མ་རུང་བར་གྱུར་ནས་དེ་སྦྲང་བུ་དག་གིས་ཡོངས་སུ་བསྐོར་བར་གྱུར་པ་དང ། དེ་ལ་ཁྱེའུ་དང ། བུ་མོ་དག་གིས་སྨྲས་པ། འཕགས་པས་ནོར་ཅན་དང ། ཚོང་དཔོན་དང ། དེད་དཔོན་དག་བཞིན་དུ་འཁོར་མང་པོར་འགྱུར་བའི་ལས་བྱས་པས་སྦྲང་བུ་དག་གིས་ཡོངས་སུ་བསྐོར་ཅིང་བཞུད་དོ། །ཁྱིམ་བདག་མགོན་མེད་ཟས་སྦྱིན་གྱིས་དེ་མཐོང་ནས་སྨྲས་པ། བྱིས་པ་དག་ཅིའི་ཕྱིར་འཕགས་པ་ལ་ཐོ་འཚམ་པར་བྱེད། ཁྱིམ་བདག་འཕགས་པ་ལ་ཐོ་བཙམ་དུ་ཅི་མཆིས། འཕགས་པས་ནོར་ཅན་དང ། ཚོང་དཔོན་དང ། དེད་དཔོན་དག་བཞིན་དུ་འཁོར་མང་པོ་འགྱུར་བའི་ལས་བགྱིས་པས་སྦྲང་བུ་དག་གིས་ཡོངས་སུ་བསྐོར་ཅིང་བཞུད་དོ། །ཁྱིམ་བདག་མགོན་མེད་ཟས་སྦྱིན་གྱིས་དགེ་སློང་དེ་ལ་སྨྲས་པ། འཕགས་པ་བཅོམ་ལྡན་འདས་ཀྱིས་བསྟན་པ་ཀུན་དུ་མཛེས་པ་ལ་ཁྱོད་ཅི་ཅལ་ཅོལ་བྱེད། ཁྱིམ་བདག་འདི་ལ་ཅལ་ཅོལ་དུ་གྱུར་པ་ཅི་ཡོད། ཁྱོད་ཀྱིས་ཁོ་བོ
6.163b
རོལ་མོ་མཁན་གྱི་ཁྱིམ་དང ། འཇུད་འཐུན་མའི་ཁྱིམ་དང ། ཆང་པའི་ཁྱིམ་དང ། རྒྱལ་པོའི་ཕོ་བྲང་དང ། གདོལ་པའི་ཁྱིམ་དུ་ཞུགས་པར་མཐོང་ངམ། འཕགས་པ་འོ་ན་ཅིའི་ཕྱིར་ཁྱོད་བྱིས་པ་དག་གིས་བསྐོར་ཏེ་འཕགས་པར་བྱེད། ཁྱིམ་བདག་ཁོ་བོའི་ལྷུང་བཟེད་འདི་ཟག་གོ། །འོ་ན་ཅིའི་ཕྱིར་ལྷུང་བཟེད་གཞན་མི་ཚོལ། བཅོམ་ལྡན་འདས་ཀྱིས་དགེ་སློང་གིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་བར་མི་བྱའོ་ཞེས་གསུངས་སོ། །འཕགས་པ་ཁྱོད་ཀྱི་ལྷུང་བཟེད་འདི་འདྲ་བ་ཡོད་ཅིང་བདོག་པ་ཡིན་ནམ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གང་གི་ལྷུང་བཟེད་རྡོལ་བ་དེས་ཀླན་པར་བྱའོ། །བཅོམ་ལྡན་འདས་ཀྱིས་གང་གི་ལྷུང་བཟེད་རྡོལ་བ་དེས་ཀླན་པར་བྱའོ་ཞེས་བཅའ་བ་མཛད་ནས། དགེ་སློང་དག་ལྷན་པ་སྙི་བ་ལྔ་པོ་བུ་རམ་དང ། རྒྱ་སྐྱེགས་ཀྱི་ཚིགས་མ་དང ། སྤྲ་ཚིལ་དང ། རོ་ཉེ་དང ། ཚོན་མོ་སྟེང་དག་གིས་ཀློན་པར་བྱེད་ནས། དེ་དག་ཚ་བ་དང་ཕྲད་ནས་ཡང་ཟགས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལྷན་པ་སྙི་བ་ལྔ་པོ་དེ་དག་སྤངས་ཏེ་ལྷན་པ་སྲ་བ་ལྔ་པོ་གཞན་དག་གིས་ཀླན་པར་བྱའོ། །དགེ་སློང་དག་གིས་ལྷན་པ་སྲ་བ་ལྔ་པོ་དག་ཅི་འདྲ་བ་མི་ཤེས་ནས་བཅོམ་ལྡན་འདས་ཀྱིས་བཀལ་སྩལ་པ། ལྷན་རིངས་དང ། ཐམ་ཕྲན་དང ། ལྷན་པ་དང ། ཆུ་སྲིན་གྱི་སོ་ལྟ་བུ་དང ། ཕྱེ་མས་སོ། །དགེ་སློང་རྣམས་ཀྱིས་ཕྱེ་མ་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། །ཕྱེ་མ་གཉིས་ཏེ། ལྕགས་ཀྱི་ཕྱེ་མ་དང ། རྡོའི་ཕྱེ་མའོ། །ལྕགས་ཀྱི་ལྷུང་བཟེད་ལ་ནི་ལྕགས་ཀྱི་ཕྱེ་མས་བཀླན་པར་བྱའོ། །སའི་ལྷུང་བཟེད་ལ་ནི་རྡོའི་ཕྱེ་མས་བཀླན་པར་བྱའོ། །དེ་དག་ཆུར་ཕྱེ་མ་བདར་ཏེ་ཀློན་པར་བྱེད་ནས་དེ་དེ་བཞིན་དུ་འགོགས་ནས་བཅོམ
6.164a
ལྡན་འདས་ཀྱིས་བཀའ་སྩལ་པ། འབྲུ་མར་དུ་བདར་བས་བཀླན་པར་བྱའོ། །དེ་དག་ཧ་ཅང་དྲག་ཏུ་སྲེག་པས་དེ་འགོགས་པ་དང ། ཧ་ཅང་ཆུང་ངུར་སྲོས་པས་མི་འཆགས་ནས་བཅོམ་ལྡན་འདས་ཀྱིས་བཀའ་སྩལ་པ། ཅི་རན་ཙམ་དུ་བསྲོ་བར་བྱའོ། །ཧ་ཅང་རྩུབ་པོར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བདར་བར་བྱའོ། །དེ་དག་ཆུས་བླུགས་ཏེ་བདར་བར་བྱེད་པས་དེ་ཡང་འགོགས་ནས་བཅོམ་ལྡན་འདས་ཀྱིས་བཀའ་སྩལ་པ། འབྲུ་མར་བླུགས་ཏེ་བདར་བར་བྱའོ། །ས་ལས་བྱས་པའི་ལྷུང་བཟེད་དག་རྡོལ་ནས་བཅོམ་ལྡན་འདས་ཀྱིས་བཀའ་སྩལ་པ། བུ་རམ་དང ། འཇིམ་པས་ཀླན་ནས་དེ་དག་བསྲོ་བར་བྱའོ། །བཅོམ་ལྡན་འདས་ཀྱིས་དེ་ལྟར་ལྷན་པ་ལྔ་པོ་དག་གིས་བཀླན་པར་བྱའོ་ཞེས་བཅའ་བར་མཛད་ནས། དགེ་སློང་བསོད་སྙོམས་པ་ཞིག་གིས་ས་ལས་བྱས་པའི་ལྷུང་བཟེད་ལག་པ་ནས་ཤོར་ཏེ་གྱོ་དུམ་ལྔར་གྱུར་ནས། དེས་དེ་དག་བུ་གུ་ཕུག་སྟེ་གྱོ་དུམ་དག་སྐུད་པས་བརྒྱུས་ནས་བསོད་སྙོམས་ལ་རྒྱུ་བར་བྱེད་དོ། །བཅོམ་ལྡན་འདས་ཀྱིས་ལྷུང་བཟེད་ལ་ཟས་མེད་པར་བྱའོ་ཞེས་བཀའ་སྩལ་ནས་དེས་དེ་རུང་བར་བྱེད་པ་ན་བཤིག་ཅིང་རྒྱུད་པར་བྱེད་པས་སྔ་དྲོ་ཐམས་ཅད་ཟད་པར་གྱུར་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཅི་ཁྱོད་ཀྱི་དགེ་བའི་ཕྱོགས་འདི་ལྟ་སྟེ། བཅིངས་པ་འགྲོལ་བ་འདི་ཁོ་ན་ཡིན་ནམ། དེས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྷུང་བཟེད་ཆག་པ་ལ་ལྷན་པ་སྲ་བ་ལྔ་པོ་དག་གིས་ཀླན་པར་བྱའོ་ཞེས་བཅའ་བར་མཛད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་རྗེས་སུ་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ
6.164b
བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ལྷུང་བཟེད་ལྷན་པ་ལྔ་མེད་པ། སྤྱད་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར་ལྷུང་བཟེད་སར་པ་གཞན་ཚོལ་ཞིང་ལྷུང་བཟེད་གྲུབ་ན་སྤང་བའི་ལྟུང་བྱེད་དོ། །དགེ་སློང་དེས་ལྷུང་བཟེད་དེ་དགེ་སློང་གི་འཁོར་ལ་དབུལ་བར་བྱའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་པའི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །ལྷུང་བཟེད་ལྷན་པ་ལྔ་མེད་པ་ཞེས་བྱ་བ་ནི་ལྷུང་བཟེད་ལྷན་པ་ལྔར་མ་ཚང་བའོ། །སྤྱད་བཟོད་པ་ཡོད་བཞིན་དུ་ཞེས་བྱ་བ་ནི་ཡོངས་སུ་ལོངས་སྤྱད་པར་བཟོད་པ་ཡོད་བཞིན་དུའོ། །བཟང་པོ་འདོད་པའི་ཕྱིར་ཞེས་བྱ་བ་ནི་མཆོག་འདོད་པའི་ཕྱིར་རམ། ཡང་དང་ཡང་འདོད་པའི་ཕྱིར་རོ། །ལྷུང་བཟེད་སར་པ་ཞེས་བྱ་བ་ནི་སར་པ་གཉིས་ཏེ་གསར་པས་སར་པ་དང ། རྙེད་པས་སར་པ་སྟེ། དོན་འདིར་ནི་གཉིས་ཀ་ཡིན་པར་དགོངས་སོ། །གཞན་ཞེས་བྱ་བ་ནི་གཉིས་པའོ། །ཚོལ་ཞིང་ཞེས་བྱ་བ་ནི་ཚོལ་བར་བྱེད་ཅིང་ངོ ། །ལྷུང་བཟེད་གྲུབ་ན་ཞེས་བྱ་བ་ནི་ལྷུང་བཟེད་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །ལྷུང་བཟེད་དེ་ཞེས་བྱ་བ་ནི་ལྷུང་བཟེད་འབྲེལ་པ་མེད་པ་དེའོ། །དགེ་སློང་གི་འཁོར་ལ་དབུལ་བར་བྱའོ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་ལའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ།
6.165a
བཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་གི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ་ཞེས་བྱ་བ་ལ། དགེ་སློང་གི་དགེ་འདུན་གྱིས་ཀྱང་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་བསྐོ་བར་བྱ་སྟེ། ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། ལྷུང་བཟེད་འབྲེལ་པ་མེད་པ་བྲིམས་པ་དང་མ་བྲིམས་པ་མི་ཤེས་པའོ། །ལྷུང་བཟེད་འབྲེལ་བ་མེད་པ་འབྲིམས་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། ལྷུང་བཟེད་འབྲེལ་པ་མེད་པ་བྲིམས་པ་དང་མ་བྲིམས་པ་ཤེས་པའོ། །འདི་ལྟར་བསྐོ་བར་བྱ་སྟེ། རྗེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དེས་གནས་མལ་བཤམ་པ་བྱས་ཏེ། གཎ་ཌཱི་བརྡུངས་ནས་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་སྟེ། དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བྱ་བ་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་བསྐོའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ།
6.165b
དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྤྲོ་སྟེ། དེའི་སླད་ཏུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་ཚོགས་པའི་དུས་སུ་དགེ་འདུན་ལ་ཚེ་དང་ལྡན་པ་དག་བདག་སང་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་འགྱུར་གྱིས། ཁྱེད་ཅག་ནང་པར་གཎ་ཌཱི་བརྡུངས་པ་ན་རང་རང་གི་ལྷུང་བཟེད་དག་ཐོགས་ལ་དགེ་འདུན་གྱི་ནང་དུ་གཤེགས་པར་མཛོད་ཅིག་ཅེས་བསྒོ་བར་བྱའོ། །དེ་ནས་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་ཕྱི་དེ་ཉིན་པར་གནས་མལ་བཤམ་པ་བྱས་ཏེ། གཎ་ཌཱི་བརྡུངས་ནས་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་བར་བྱའོ། །དགེ་སློང་རྣམས་ཀྱིས་ཀྱང་རང་རང་གི་ལྷུང་བཟེད་དག་བྱིན་གྱིས་བརླབས་པ་ཕྱུང་ཞིང་ཐོགས་ཏེ་དགེ་འདུན་གྱི་ནང་དུ་འཇུག་པར་བྱའོ། །དེ་ནས་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་ལྷུང་བཟེད་འབྲེལ་པ་མེད་པ་ཐོགས་ཏེ་རྒན་པའི་མཐའ་ལོགས་སུ་ཕྱག་འཚལ་ནས་དགེ་འདུན་གྱི་གནས་བརྟན་གྱི་མདུན་དུ་འདུག་སྟེ། གནས་བརྟན་ལྷུང་བཟེད་འདི་ནི་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ལགས་ཀྱིས་གལ་ཏེ་བཞེད་ན་སྣོམས་ཤིག་ཅེས་ཡོན་ཏན་ཇི་ལྟ་བ་བཞིན་དུ་ལྷུང་བཟེད་འབྲེལ་པ་མེད་པའི་སྔགས་པ
6.166a
བརྗོད་དེ་དབུལ་བར་བྱའོ། །དགེ་འདུན་གྱི་གནས་བརྟན་གྱིས་ཀྱང་གལ་ཏེ་འདོད་ན་བླང་བར་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་ལྷུང་བཟེད་དེ་བླངས་ན་དགེ་འདུན་གྱི་གནས་བརྟན་གྱི་ལྷུང་བཟེད་གང་ཡིན་པ་དེ་གནས་བརྟན་གཉིས་པ་ལ་དབུལ་བར་བྱའོ། །གནས་བརྟན་གཉིས་པའི་ལྷུང་བཟེད་གང་ཡིན་པ་དེ་གནས་བརྟན་གསུམ་པ་ལ་དབུལ་བར་བྱའོ། །དེ་བཞིན་དུ་དགེ་འདུན་གྱི་གསར་བུ་གཉིས་པའི་ལྷུང་བཟེད་གང་ཡིན་པ་དེ་དགེ་འདུན་གྱི་སར་བུ་ལ་དབུལ་བའི་བར་དུ་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་མ་བླངས་ན་གནས་བརྟན་གཉིས་པ་ལ་དབུལ་བར་བྱའོ། །གལ་ཏེ་གནས་བརྟན་གཉིས་པས་མ་བླངས་ན་གནས་བརྟན་གསུམ་པ་ལ་དབུལ་བར་བྱའོ། །གལ་ཏེ་གནས་བརྟན་གསུམ་པས་མ་བླངས་ན་དགེ་འདུན་གྱི་གནས་བརྟན་སློང་བར་བྱེད་ན་བརྗོད་པ་དང་པོ་ལ་སྦྱིན་པར་མི་བྱ་ཞིང་བརྗོད་པ་གཉིས་པ་ལ་ཡང་སྦྱིན་པར་མི་བྱའོ། །བརྗོད་པ་གསུམ་པ་ལ་སྦྱིན་པར་བྱ་སྟེ། དགེ་འདུན་གྱི་གནས་བརྟན་གྱི་འདུལ་བ་དང་འགའ་བའི་ཉེས་བྱས་ཀྱི་ལྟུང་བ་བཤགས་པར་བྱའོ། །དེ་བཞིན་དུ་དགེ་འདུན་གྱི་གསར་བུ་གསུམ་པས་མ་བླངས་ན་གསར་བུ་གཉིས་པ་ལ་དབུལ་བར་བྱའོ། །གལ་ཏེ་གསར་བུ་གཉིས་པས་མ་བླངས་ན་གསར་བུ་ལ་དབུལ་བར་བྱའོ། །གལ་ཏེ་དགེ་འདུན་གྱི་གསར་བུས་བླངས་པ་ན་གསར་བུ་གསུམ་པ་སློང་བར་བྱེད་ན་བརྗོད་པ་དང་པོ་ལ་སྦྱིན་པར་མི་བྱ་ཞིང ། བརྗོད་པ་གཉིས་པ་ལ་ཡང་སྦྱིན་པར་མི་བྱའོ། །བརྗོད་པ་གསུམ་པ་ལ་སྦྱིན་པར་བྱ་སྟེ། དགེ་འདུན་གྱི་གསར་བུ་གསུམ་པས་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་པའི་བར་དུ་བྱའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་གི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱའོ། །ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་ཀུན་ཏུ་སྤྱད་པར་བྱ་བའི་ཆོས་ཇི
6.166b
ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །ངས་ལྷུང་བཟེད་འབྲེལ་པ་མེད་པ་འཆང་བའི་དགེ་སློང་གི་ཀུན་དུ་སྤྱད་པར་བྱ་བའི་ཆོས་དག་བཅའ་བར་བྱ་སྟེ་ལྷུང་བཟེད་འབྲེལ་པ་མེད་པ་འཆང་བའི་དགེ་སློང་གིས་ལྷུང་བཟེད་ཀྱི་སྣོད་གཉིས་ཉེ་བར་གཞག་པར་བྱ་ཞིང་དེ་ལ་བཟང་པོ་གང་ཡིན་པ་དེར་ལྷུང་བཟེད་འབྲེལ་པ་མེད་པ་གཞུག་པར་བྱ་ཞིང ། ཅིག་ཤོས་སུ་ལྷུང་བཟེད་བྱིན་གྱིས་བརླབས་པ་གཞུག་པར་བྱའོ། །དེས་ལྷུང་བཟེད་གཉི་ག་ཐོགས་ཏེ་བསོད་སྙོམས་ལ་འཇུག་པར་བྱ་ཞིང་གལ་ཏེ་འབྲས་ཆན་སྐམ་པོ་རྙེད་ན་ལྷུང་བཟེད་འབྲེལ་པ་མེད་པས་བླང་བར་བྱའོ། །གལ་ཏེ་འབྲས་ཆན་གཤེར་བ་རྙེད་ན་ལྷུང་བཟེད་བྱིན་གྱིས་བརླབས་པས་བླང་བར་བྱའོ། །གཙུག་ལག་ཁང་དུ་འོངས་ནས་དཀྱིལ་འཁོར་བྱས་ཏེ་ལྷུང་བཟེད་འབྲེལ་པ་མེད་པ་མདུན་དུ་བཞག་ནས་ལྷུང་བཟེད་བྱིན་གྱིས་བརླབས་པར་བཟའ་བར་བྱའོ། །ཟོས་ཟིན་ནས་བྱི་དོར་དང ། ཁ་ཟས་འབགས་པའི་དྲིལ་ཕྱི་བྱ་བ་ཡང་དང་པོར་ལྷུང་བཟེད་འབྲེལ་པ་མེད་པ་ལ་བྱ་ཞིང ། དེའི་འོག་ཏུ་ལྷུང་བཟེད་བྱིན་གྱིས་བརླབས་པ་ལ་བྱའོ། །བཀྲུ་བ་དང ། བསྐམ་པ་དང ། ལྕི་བས་བྲུད་པ་ལ་ཡང་དེ་བཞིན་དུ་བྱའོ། །གལ་ཏེ་ལྷུང་བཟེད་ཀྱི་ངོས་ཁུང་གཉིས་ཡོད་ན་བཟང་པོ་གང་ཡིན་པ་དེར་ལྷུང་བཟེད་འབྲེལ་པ་མེད་པ་གཞུག་པར་བྱ་ཞིང ། ཅིག་ཤོས་སུ་ལྷུང་བཟེད་བྱིན་གྱིས་བརླབས་པ་གཞུག་པར་བྱའོ། །གལ་ཏེ་ངོས་ཁུང་གཅིག་ཡོད་ལ་གལ་ཏེ་ཤོད་བཟང་ན་ཤོད་ཏུ་ལྷུང་བཟེད་འབྲེལ་པ་མེད་པ་གཞག་པར་བྱ་ཞིང ། ངོས་ཁུང་དུ་ལྷུང་བཟེད་བྱིན་གྱིས་བརླབས་པ་གཞུག་པར་བྱའོ། །གལ་ཏེ་ངོས་ཁུང་བཟང་ན་ངོས་ཁུང་དུ་ལྷུང་བཟེད་འབྲེལ་པ་མེད་པ་གཞུག་པར་བྱ་ཞིང ། ཤོད་དུ་ལྷུང་བཟེད་བྱིན་གྱིས་བརླབས་པ་གཞག་པར་བྱའོ། །ལྷུང་བཟེད་ཀྱི་ལས་བྱེད་པ་ན་གལ་ཏེ་རྫ་བོ་གཉིས་ཡོད་ན་རྫ་བོ་བཟང་པོ་གང་ཡིན་པ་དེར་ལྷུང་བཟེད་འབྲེལ་པ་མེད་པ་བསྲེག་པར་བྱ་ཞིང ། ཅིག་ཤོས་སུ་ལྷུང་བཟེད་བྱིན་གྱིས་བརླབས་པ་བསྲེག་པར་བྱའོ། །གལ་ཏེ་རྫ་བོ་གཅིག་ཡོད་ན་གལ་ཏེ་འོག་མ་ལེགས་པར་ཚོས་པར་འགྱུར་ན་འོག་ཏུ་ལྷུང
6.167a
བཟེད་འབྲེལ་པ་མེད་པ་གཞག་པར་བྱ་ཞིང ། སྟེང་དུ་ལྷུང་བཟེད་བྱིན་གྱིས་བརླབས་པ་གཞག་པར་བྱའོ། །གལ་ཏེ་སྟེང་དུ་བཞག་པ་ལེགས་པར་ཆོས་པར་འགྱུར་ན་སྟེང་དུ་ལྷུང་བཟེད་འབྲེལ་པ་མེད་པ་གཞག་པར་བྱ་ཞིང ། འོག་ཏུ་ལྷུང་བཟེད་བྱིན་གྱིས་བརླབས་པ་གཞག་པར་བྱའོ། །ལམ་དུ་འགྲོ་བ་ན་ལྷུང་བཟེད་ཀྱི་སྣོད་གཉིས་བསྐུར་བར་བྱ་སྟེ། དེ་ལ་བཟང་པོ་གང་ཡིན་པ་དེར་ལྷུང་བཟེད་འབྲེལ་པ་མེད་པ་གཞུག་པར་བྱ་ཞིང ། ཅིག་ཤོས་སུ་ལྷུང་ཟེད་བྱིན་གྱིས་བརླབས་པ་གཞུག་པར་བྱའོ། །གལ་ཏེ་ཁུར་ཚ་བ་འགའ་ཞིག་ཡོད་ན་དེ་ལ་ལྷུང་བཟེད་འབྲེལ་པ་མེད་པ་བསྐུར་བར་བྱ་ཞིང ། བདག་ཉིད་ཀྱིས་ལྷུང་བཟེད་བྱིན་གྱིས་བརླབས་པ་བསྐུར་བར་བྱའོ། །གལ་ཏེ་ཁུར་ཚ་བ་འགའ་ཡང་མེད་ན་ཕྲག་པ་གཡོན་པས་ལྷུང་བཟེད་འབྲེལ་པ་མེད་པ་བསྐུར་བར་བྱ་ཞིང ། ཕྲག་པ་གཡས་པས་ལྷུང་བཟེད་བྱིན་གྱིས་བརླབས་པ་བསྐུར་བར་བྱའོ། །འདི་ནི་རེ་ཤིག་ཆད་པའི་ལས་ཡིན་ཏེ་ཚུལ་ཁྲིམས་ཡང་དག་པར་རྗེས་སུ་སྲུང་བས་ཇི་སྲིད་འཚོའི་བར་དུ་སྤྱད་པར་བྱའོ། །ལྷུང་བཟེད་འབྲེལ་པ་མེད་པ་འཆང་བའི་དགེ་སློང་གིས་ཀུན་དུ་སྤྱད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགའ་ཚབས་ཅན་དུ་འགྱུར་རོ། །དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གི་ལྷུང་བཟེད་ཆག་ཀྱང་ལྷན་པ་གཅིག་གིས་ཀླན་པར་འོས་ཤིང་མ་ཀླན་ལ་སྤྱད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གཉིས་ཀྱིས་ཀླན་པར་འོས་ཤིང་མ་ཀླན་ལ་སྤྱད་བཟོད་པ་ཡིན་ན། དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གསུམ་གྱིས་ཀླན་པར་འོས་ཤིང་མ་ཀླན་ལ་སྤྱད་བཟོད་པ་ཡིན་ན། དེ་ལ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད
6.167b
སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་བཞིས་སླན་པར་འོས་ཤིང་མ་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གཅིག་གིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གཉིས་ཀྱིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གསུམ་གྱིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་བཞིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གི་ལྷུང་བཟེད་ཆག་ཅིང་ལྷན་པ་ལྔས་ཀླན་པར་འོས་པ་ཡིན་ན་དེ་དེས་ཀླན་ཀྱང་རུང ། མ་ཀླན་ཀྱང་རུང ། སྤྱད་བཟོད་ཀྱང་རུང ། སྤྱད་མི་བཟོད་ཀྱང་རུང ། ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཡང་ལྟུང་བ་མེད་ལ། ཐོབ་ན་ཡང་ལྟུང་བ་མེད་དོ། །རིན་གྱིས་ལེན་པ་དང ། བརྗེ་བས་ལེན་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལྷུང་བཟེད་ཚོལ་བའི་སྤང་བ་སྟེ་ཉི་ཤུ་།།
6.168a
གཉིས་པ་རྫོགས་སྷོ།། ་་་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཉེ་དགས་བསམས་པ། འདི་དག་ཐམས་ཅད་ཁྱིམ་བདག་མགོན་མེད་ཟས་སྦྱིན་གྱིས་བསླབ་པའི་གཞི་དག་གིས་བསྡམས་པས་ཕྱིན་ཆད་རས་ཡུག་ཕྲན་སྦོམ་པོ་ཅིག་གི་རིན་ཡང་གང་ལས་ཀྱང་བསླང་བར་མི་ནུས་ཀྱིས། སོང་སྟེ་བལྟས་ལ་གལ་ཏེ་ལ་ལ་ལས་བསླང་བར་ནུས་ཀྱང་སྲིད་དོ་སྙམ་ནས་དེ་སྔ་དྲོ་ཤམ་ཐམས་བགོས་ལྷུང་བཟེད་དང ། ཆོས་གོས་ཐོགས་ཏེ་མཉན་ཡོད་ཏུ་ཤར་སྒོ་ནས་བསོད་སྙོམས་ལ་ཞུགས་པ་དང ། བསྐྱེད་མོས་ཚལ་ཞིག་ན་ཡུགས་ས་མོ་ལྔ་བརྒྱ་ཙམ་དོག་པ་འཁལ་ཞིང་འཁོད་པ་དེ་དག་དེས་མཐོང་ནས་བསམས་པ། འདི་དག་ནི་ལས་བདག་གིར་བྱ་བ་དང་ལྡན་པ་དག་ཅིག་སྟེ། ཉིན་མཚན་དུ་ཐོང་གཤོལ་དཀར་པོ་སྤྱོད་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྒྱུར་དཔྱ་འཇལ་བར་མི་བྱེད་པ་དག་ཡིན་ནོ་སྙམ་ནས་དེས་དེ་དག་ལ་སྨྲས་པ། སྲིང་མོ་དག་ཨ་རོག་ཁྱ། ཨ་རོག་ཁྱ། དེ་དག་ཅང་མི་སྨྲ་བར་འཁོད་པ་དང་དེས་དེ་དག་ལ་སྨྲས་པ། སྲིང་མོ་དག་སྐྱེ་བོ་མང་པོ་མི་འདོད་པ་དང ། སྐྱེ་བོ་མང་པོ་མི་དགའ་བ་དང ། སྐྱེ་བོ་མང་པོ་ལ་མི་སྡུག་པ་དང ། སྐྱེ་བོ་མང་པོའི་ཡིད་ཏུ་མི་འོང་བ་འཇིག་རྟེན་ཐམས་ཅད་དང་ཐུན་མོང་བ་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོང་བར་འགྱུར་བས་ཁྱེད་ཅག་དེའི་ཚེ་ཚིག་སྨྲར་ནི་དང་པོ་ཉིད་ནས་མི་ནུས་པར་འགྱུར་རོ། །དེ་ན་གཞོན་ནུ་མ་བསོད་ནམས་འདོད་པ་ཅིག་འདུག་པ་དེས་སྟན་ལས་ལངས་ཏེ་ཉེ་དགའི་སྟན་བཏིང་བ་དང ། ཉེ་དགའ་དེ་ལ་འདུག་ནས་དེས་ཉེ་དགའི་རྐང་པ་ལ་ཕྱག་འཚལ་ཏེ་མདུན་དུ་འདུག་གོ། །ཉེ་དགས་དེ་དག་ལ་སྨྲས་པ། སྲིང་མོ་དག་ཁྱེད་ཅག་ལ་དགེ་བའི་ཆོས་ཡང་དག་པར་བླངས་ཏེ་འཇུག་པར་བྱ་བ་ཅུང་ཟད་ཡོད་དམ། འཕགས་པ་ཅི་ཡང་མ་མཆིས་སོ། །སྲིང་མོ་དག་མ་ལེགས་སོ། །བུ་མོ་འདིས་ནི་རེ་ཤིག་དགེ་བའི་ཆོས་གཉིས་བྱས་ཤིང་བསགས་ཏེ།
6.168b
འདིས་ཁོ་བོ་ལ་སེམས་མངོན་པར་དད་པར་བྱས་པ་གང་ཡིན་པ་དེས་ནི་འདིས་ཕྱུག་པོར་འགྱུར་བའི་ལས་བྱས་ཤིང་བསགས་པ་ཡིན་ནོ། །འདིས་ཁོ་བོ་ལ་མངོན་དུ་ལྡང་བ་བྱས་ཤིང་སྟན་བཏིང་བ་དང ། ཕྱག་བྱས་པ་གང་ཡིན་པ་དེས་ནི་འདིས་རིགས་མཐོན་པོར་འགྱུར་བའི་ལས་བྱས་ཤིང་བསགས་པ་ཡིན་ནོ། །གལ་ཏེ་ཅུང་ཟད་སྦྱིན་པར་བྱེད་ན་དེ་ནི་འདིའི་ལོངས་སྤྱོད་ཆེན་པོར་འགྱུར་བ་ཡིན་ནོ། །སྲིང་མོ་དག་ཁྱེད་ཅག་གི་འཚོ་ཚིས་དག་ག་ལས་འབྱུང ། འཕགས་པ་སྒྱུར་བ་འདི་ཉིད་ལས་སོ། །གོས་དག་ག་ལས་འབྱུང ། སྒྱུར་བ་འདི་ཉིད་ལས་སོ། །ཁྱེད་ཅག་གིས་འཇིག་རྟེན་ཕ་རོལ་ཏུ་འགྲོ་བའི་ལམ་རྒྱགས་ཅུང་ཟད་ཁྱེར་བ་ཡོད་དམ། འཕགས་པ་དེ་ནི་ཐམས་ཅད་ཀྱི་ཐམས་ཅད་དུ་མ་མཆིས་སོ་སྲིང་མོ་དག་མ་ལེགས་སོ་མ་ལེགས་སོ། །འཕགས་པ་སུ་ལ་ཐུགས་ངན་མཛད། ཁྱེད་ཅག་ལ་སྟེ། ཁྱེད་ཅག་འཇིག་རྟེན་ཕ་རོལ་ནས་ཀྱང་བཅོམ་ཞིང་འདིར་འོངས་ལ། འདི་ནས་བཅོམ་བཞིན་དུ་འཇིག་རྟེན་ཕ་རོལ་ཏུ་འགྲོ་བར་བྱེད་དོ། །འཕགས་པ་གང་གིས་བདག་ཅག་གིས་འཇིག་རྟེན་ཕ་རོལ་ཏུ་མཆི་བའི་ཤུལ་རྒྱགས་ཅུང་ཟད་བསྐུར་བའི་ཐབས་ཅི་མཆིས། སྲིང་མོ་དག་གལ་ཏེ་ཁྱེད་ཀྱིས་དགེ་སྦྱོང་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང ། གྲོལ་བའི་སྤོབས་པ་དང་ལྡན་པ་གང་ཡིན་པ་དེ་ལ་རས་ཡུག་ཆེན་པོ་སྐོན་ན་དེས་ཁྱེད་ཅག་གིས་འཇིག་རྟེན་ཕ་རོལ་ཏུ་འགྲོ་བའི་ལམ་རྒྱགས་མང་པོ་ཁྱེར་བར་འགྱུར་རོ། །འཕགས་པ་བདག་གིས་དགེ་སློང་དེ་ལྟ་བུ་ག་ལས་རྙེད། སྲིང་མོ་དག་ཁྱེད་ཀྱིས་ཁོ་བོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་དང་ལྡན་པ་ཡིན་པར་མི་ཤེས་སམ། འཕགས་པ་བདག་ཅག་ལ་རས་ཡུག་ཆེན་གྱི་འབྱོར་པ་ག་ལས་མཆིས། སྲིང་མོ་དག་ཁྱེད་ཀྱིས། བསོད་ནམས་ཆུང་ཡང་བརྙས་མི་བྱ། །དེ་ནི་བདག་ལ་མི་འོང་མིན། །ཆུ་ཡི་ཐིགས་པ་འཛག་པ་ཡིས། །སྣོད་ཆེན
6.169a
གང་བར་འགྱུར་བ་བཞིན། །བརྟན་པ་རྣམས་ཀྱིས་བསོད་ནམས་ནི། །ཅུང་ཟད་ཅུང་ཟད་བསགས་ན་རྫོགས། །ཞེས་བྱ་བ་དེ་མི་ཤེས་སམ། ཁྱེད་ཀྱིས་རེ་ཤིག་དོག་པ་སྲང་གཅིག་སྦྱིན་ནུས་སམ། རྔོ་ཐོག་གོ། །གཞན་ཞིག་གིས་སྨྲས་པ། བདག་གིས་ཀྱང་སྲང་ཕྱེད་དབུལ་ལོ། །གཞན་ཞིག་གིས་ཀྱང་སྨྲས་པ། བདག་གིས་ཀྱང་སྲང་གི་བཞི་ཆ་ཅིག་དབུལ་ལོ། །དེ་བཞིན་དུ་ཐམས་ཅད་ཀྱིས་ཀྱང་ཤས་ཤས་ཀྱིས་དབུལ་བར་ཁས་བླངས་སོ། །ཉེ་དགས་སྨྲས་པ། སྲིང་མོ་དག་དོག་པ་ཕྲ་མོ་དག་བྱིན་ཅིག་།འཕགས་པ་བདག་ཅག་ཐམས་ཅད་ནི་སྦོམ་པོ་འཁལ་བ་དག་ལགས་སོ། །བདག་ཅག་གི་ནང་ན་བདེ་གནས་མ་ཞིག་ནི་ཕྲ་མོར་འཁལ་ལོ། །སྲིང་མོ་དག་དེ་ཇེ་བོས་ཤིག་།དེ་དག་གིས་དེ་བོས་པ་དང ། ཉེ་དགས་དེ་ལ་སྨྲས་པ། བུ་མོ་ཇེ་དོག་པ་ཕྲར་ཁོལ་ཅིག་།དེས་ཕྲར་བཀལ་བ་དང ། ཉེ་དགས་སྨྲས་པ། བུ་མོ་དེ་བས་ཀྱང་ཕྲར་ཁོལ་ཅིག་།དེས་དེ་བས་ཀྱང་ཕྲར་བཀལ་བ་དང ། ཉེ་དགས་ཡང་དང་ཡང་དུ་བུ་མོ་དེ་བས་ཀྱང་ཕྲར་ཁོལ་ཅིག་ཅེས་སྨྲས་པ་དང ། དེས་སྨྲས་པ། འཕགས་པ་འདི་ལས་ཕྲ་བར་ནི་རྔོ་མི་ཐོག་གོ། །ཉེ་དགས་དེ་དག་ལ་སྨྲས་པ། སྲིང་མོ་དག་ཁྱེད་ཅག་ཐམས་ཅད་ཀྱིས་དོག་པ་འདི་འདྲ་བ་ཤ་སྟག་བྱིན་ཅིག་།འཕགས་པ་བདག་ཅག་གིས་དོག་པ་འདི་འདྲ་བ་འཁལ་དུ་རྔོ་མི་ཐོག་གོ། །བུ་མོ་འདིས་ཀྱང་མི་ནུས་སམ་ཅི། ཁྱེད་ཅག་གིས་འདིའི་དོན་དུ་འཁོལ་ལ་འདི་ཁྱེད་ཅག་གི་དོན་དུ་འཁལ་དུ་ཆུག་ཤིག་།འཕགས་པ་གལ་ཏེ་བཏུབ་ནའོ། ཉེ་དགས་དེ་ལ་སྨྲས་པ། བུ་མོ་གྱིས་ཤིག་དང་ཁྱོད་ལ་བསོད་ནམས་སུ་འགྱུར་རོ། །འཕགས་པ་དོག་པ་འདི་ནི་ཕྲ་བ་དར་ཆེ་བ་ལགས་པས་ཡུན་རིང་མོས་བཀའ་འཚལ་གྱིས་ཧ་ཅང་ངོས་དྲག་ཏུ་མ་མཛད་པར་དུས་འདི་ཙམ་ན་སྤྱོན་ཅིག་།ཉེ་དགས་དེ་ལ་ཨ་རོག་ཁྱ་ཞེས་སྨྲས་ནས་སྟན་ལས་ལངས་ཏེ་སོང་ངོ ། །བདེ་གནས་མ་དེས་དུས་དེ་སྲིད་ཀྱིས་དོག་པ་བཀལ་ནས་དེ་གཞན་དག་གི་གན་དུ་སོང་སྟེ་ཐམས་ཅད་འདུས་ནས་དོག་པ་དེ་ཉེ་དགའ་ལ་ཕུལ་ལོ། །ཉེ་དགས་དེ་དག་ལ་ཨ་རོག་ཁྱ་སྦྱིན་པ་འདིས་ཁྱེད
6.169b
སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་ཏེ་སོང་ངོ ། །དེ་ནས་ཉེ་དགས་དོག་པ་དེ་ཁྱེར་ཏེ་གཙུག་ལག་ཁང་དུ་སོང་ནས། དེས་དགེ་སློང་རྣམས་ལ་དོག་པ་དེ་བསྟན་ཏེ་སྨྲས་པ། ཚེ་དང་ལྡན་པ་དག་ཁོ་བོའི་དོག་པ་ཅི་འདྲ་ལྟོས། གནས་བརྟན་དོག་པ་བཟང་ངོ ། །གནས་བརྟན་གྱིས་གང་རས་ཡུག་ཆེན་འཐག་པར་འགྱུར་བའི་ཐག་པ་འགའ་བཙལ་བ་མཆིས་སམ། ཚེ་དང་ལྡན་པ་དག་ཅི་ཁྱེད་ཀྱིས་ཉེ་དགའ་ཟིལ་གྱིས་གནོན་ཏམ། གལ་ཏེ་ཉེ་དགའ་རབ་ཏུ་མ་བྱུང་དུ་ཟིན་ན་ཉེ་དགའ་རང་ཉིད་འཐག་པར་འགྱུར་རོ། །གནས་བརྟན་བདག་ཅག་གིས་གནས་བརྟན་གལ་ཟིལ་གྱིས་གནོན། འདི་ལྟར་ར་བ་ག་གེ་མོའི་དྲུང་ན་ཐ་ག་པ་སྤྱི་ཅེར་ཁྱོ་ཤུག་མཆིས་ཏེ། གལ་ཏེ་དེས་དོག་པ་འདི་རྙེད་ཏུ་ལགས་ན་ཆེན་པོ་ལ་འོས་པའི་རས་ཡུག་ཆེན་འགྲུབ་པར་འགྱུར་རོ། །བུ་དག་ཨ་རོག་ཁྱ་དོན་གྱིས་ན་ཁྱེད་ཀྱིས་ཁོ་བོའི་རས་ཡུག་ཆེན་འཐག་ཏུ་བཅུག་གོ་ཞེས་དེས་དོག་པ་དེ་ཁྱེར་ཏེ་ཐ་ག་པ་དེའི་ཁྱིམ་དུ་སོང་བ་དང ། དེས་ཐ་ག་པ་དེ་ཐག་རིང་པོ་ཁོ་ན་ནས་མཐོང་ནས་ཚིགས་སུ་བཅད་པ་སྨྲས་པ། མཁས་པ་རིང་ནས་རབ་སྣང་བ། །གངས་དང་ལྡན་པའི་རི་བོ་བཞིན། །མི་མཁས་རབ་ཏུ་མི་སྣང་བ། །མུན་པའི་ནང་དུ་མདའ་འཕངས་བཞིན། །བཞིན་བཟངས་ཁྱོད་ཀྱི་གྲགས་པས་མཉན་ཡོད་ཐམས་ཅད་གང་བར་གྱུར་པ་ནི་ཁྱོད་ཀྱིས་རྙེད་པ་ལེགས་པར་རྙེད་པ་ཡིན་ནོ། །དོག་པ་འདི་ཅི་འདྲ་ཇེ་ལྟོས་ཤིག་།འཕགས་པ་དོག་པ་བཟང་ངོ ། །དོག་པ་ནི་འདི་ལགས་ལ་ཐ་ག་པ་ནི་བདག་ལགས་ན་ཆེན་པོ་ལ་འོས་པའི་རས་ཡུག་ཆེན་དུ་འགྱུར་རོ། །བཞིན་བཟངས་ཐོགས་ཤིག་།འཕགས་པ་བདག་ལ་ཐགས་གླ་སུས་སྩོལ་བར་འགྱུར། བཞིན་བཟངས་ཁྱོད་རྟག་པ་ཉིད་ཏུ་ཐགས་གླས་མི་ངོམས་སམ། འཇིག་རྟེན་ཕ་རོལ་དུ་འགྲོ་བའི་ལམ་རྒྱགས་ཀྱང་བསྐུར་བར་གྱིས་ཤིག་།དེ་ལ་ཆུང་མས་སྨྲས་པ། རྗེའི་སྲས་འདིས་ཐག་རིང་པོ
6.170a
ཁོ་ན་ནས་བདག་ཅག་གཉིས་ཀྱི་བསྔགས་པ་བརྗོད་ཀྱིས་འདིའི་རས་ཡུག་ཆེན་ཐོགས་ཤིག་།འཕགས་པ་དོག་པ་འདི་ཕྲ་བ་དར་ཆེ་བ་ལགས་ཀྱིས་ཡུན་འདི་ཙམ་ན་སྤྱོན་ཅིག་།ཉེ་དགས་ཨ་རོག་ཁྱ་ཞེས་སྨྲས་ཏེ་སོང་ངོ ། །ཐ་ག་པ་དེས་རས་ཡུག་ཆེན་དེ་དུས་དེ་ཙམ་གྱིས་བཏགས་སོ། །ཉེ་དགས་ཡང་དུས་དེ་ཙམ་གྱིས་དེར་སོང་བ་དང་ཐ་ག་པ་དེས་དེ་ལ་རས་ཡུག་ཆེན་དེ་ཕུལ་ལོ། །ཉེ་དགས་དེ་ཁྱེར་ཏེ་གཙུག་ལག་ཁང་དུ་སོང་ནས་དེས་དགེ་སློང་རྣམས་ལ་རས་ཡུག་ཆེན་དེ་བསྟན་ཏེ་སྨྲས་པ། ཚེ་དང་ལྡན་པ་དག་ཁོ་བོའི་རས་ཡུག་ཆེན་ཅི་འདྲ་ལྟོས། གནས་བརྟན་རས་ཡུག་ཆེན་བཟང་ངོ ། །འདི་ལྟར་གང་ལ་འདི་ལྟ་བུ་གཉིས་པ་ཡང་མཆིས་པ་དེ་ནི་སར་པ་ལས་སྣམ་སྦྱར་ཉི་རིམ་དུ་བགྱིས་ཏེ་དགེ་བའི་ཕྱོགས་ལ་སྙིང་ལས་ཆུང་ངུས་ཏྲོན་བགྱིད་པར་འགྱུར་རོ། །ཚེ་དང་ལྡན་པ་དག་ཅི་ཁྱོད་ཀྱི་སྙིང་ལམ་ན་ཉེ་དགས་རས་ཡུག་ཆེན་འདི་འདྲ་བ་གཉིས་སྦྱོར་དུ་འཇུད་མི་ནུས་སྙམ་འམ། ཇི་ལྟར་སྦྱོར་དུ་འཇུད་པ་ལྟོས་ཤིག་།དེ་ནས་ཉེ་དགའ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ཏུ་ནུབ་སྒོ་ནས་བསོད་སྙོམས་ལ་ཞུགས་པ་དང ། སྐྱེད་མོས་ཚལ་ཞིག་ན་ཡུགས་ས་མོ་ལྔ་བརྒྱ་ཙམ་དོག་པ་འཁལ་ཞིང་འཁོད་པ་དེ་དག་དེས་མཐོང་ནས་བསམས་པ། འདི་དག་ནི་ལས་བདག་གིར་བྱ་བ་དང་ལྡན་པ་དག་ཅིག་སྟེ། ཉིན་མཚན་དུ་ཐོང་གཤོལ་དཀར་པོ་སྤྱོད་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྒྱུར་དཔྱ་འཇལ་བར་མི་བྱེད་པ་དག་ཡིན་ནོ་སྙམ་ནས་དེས་དེ་དག་ལ་སྨྲས་པ། སྲིང་མོ་དག་ཨ་རོག་ཁྱ། ཨ་རོག་ཁྱ། དེ་དག་ཅང་མི་སྨྲ་བར་འཁོད་པ་དང་དེ་དག་ལ་སྨྲས་པ། སྲིང་མོ་དག་སྐྱེ་བོ་མང་པོ་མི་འདོད་པ་དང་སྐྱེ་བོ་མང་པོ་མི་དགའ་བ་དང ། སྐྱེ་བོ་མང་པོ་ལ་མི་སྡུག་པ་དང ། སྐྱེ་བོ་མང་པོའི་ཡིད་ཏུ་མི་འོང་བ་འཇིག་རྟེན་ཐམས་ཅད་དང་ཐུན་མོང་བ་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོང་བར་འགྱུར་བས་ཁྱེད་ཅག་དེའི་ཚེ་ཚིག་སྨྲར་ནི་དང་པོ་ཉིད་ནས་མི་ནུས་པར་འགྱུར་རོ། །དེ་ན་གཞོན་ནུ་མ་བསོད་ནམས་འདོད་པ་ཅིག་འདུག་པ་དེས་སྟན
6.170b
ལས་ལངས་ཏེ་ཉེ་དགའི་སྟན་བཏིང་བ་དང་ཉེ་དགའ་དེ་ལ་འདུག་ནས་དེས་ཉེ་དགའི་རྐང་པ་ལ་ཕྱག་འཚལ་ཏེ་མདུན་དུ་འདུག་གོ། །ཉེ་དགས་དེ་དག་ལ་སྨྲས་པ། སྲིང་མོ་དག་ཁྱེད་ཅག་ལ་དགེ་བའི་ཆོས་ཡང་དག་པར་བླངས་ཏེ་འཇུག་པར་བྱ་བ་ཅུང་ཟད་ཡོད་དམ། འཕགས་པ་ཅི་ཡང་མ་མཆིས་སོ། །སྲིང་མོ་དག་མ་ལེགས་སོ། །བུ་མོ་འདིས་ནི་རེ་ཤིག་དགེ་བའི་ཆོས་གཉིས་བྱས་ཤིང་བསགས་ཏེ། འདིས་ཁོ་བོ་ལ་སེམས་མངོན་པར་དད་པར་བྱས་པ་གང་ཡིན་པ་དེས་ནི་འདིས་ཕྱུག་པོར་འགྱུར་བའི་ལས་བྱས་ཤིང་བསགས་པ་ཡིན་ནོ། །འདིས་ཁོ་བོ་ལ་མངོན་དུ་ལྡང་བ་བྱས་ཤིང་སྟན་བཏིང་བ་དང་ཕྱག་བྱས་པ་གང་ཡིན་པ་དེས་ནི་འདིས་རིགས་མཐོན་པོར་འགྱུར་བའི་ལས་བྱས་ཤིང་བསགས་པ་ཡིན་ནོ། །གལ་ཏེ་ཅུང་ཟད་སྦྱིན་པར་བྱེད་ན་དེ་ནི་འདིའི་ལོངས་སྤྱོད་ཆེན་པོར་འགྱུར་བ་ཡིན་ནོ། །སྲིང་མོ་དག་ཁྱེད་ཅག་གི་འཚོ་ཚིས་དག་ག་ལས་འབྱུང་འཕགས་པ་སྒྱུར་བ་འདི་ཉིད་ལས་སོ། །གོས་དག་ག་ལས་འབྱུང ། སྒྱུར་བ་འདི་ཉིད་ལས་སོ། །ཁྱེད་ཅག་གིས་འཇིག་རྟེན་ཕ་རོལ་དུ་འགྲོ་བའི་ལམ་རྒྱགས་ཅུང་ཟད་ཁྱེར་བ་ཡོད་དམ། འཕགས་པ་དེ་ནི་ཐམས་ཅད་ཀྱི་ཐམས་ཅད་ཏུ་མ་མཆིས་སོ། །སྲིང་མོ་དག་མ་ལེགས་སོ་མ་ལེགས་སོ། །འཕགས་པ་སུ་ལ་ཐུགས་ངན་མཛད། ཁྱེད་ཅག་ལ་སྟེ། ཁྱེད་ཅག་འཇིག་རྟེན་ཕ་རོལ་ནས་ཀྱང་བཅོམ་ཞིང་འདིར་འོངས་ལ། འདི་ནས་ཀྱང་བཅོམ་བཞིན་དུ་འཇིག་རྟེན་ཕ་རོལ་དུ་འགྲོ་བར་བྱེད་དོ། །འཕགས་པ་གང་གིས་བདག་ཅག་གིས་འཇིག་རྟེན་ཕ་རོལ་དུ་མཆི་བའི་ཤུལ་རྒྱགས་ཅུང་ཟད་བསྐུར་བའི་ཐབས་ཅི་མཆིས། སྲིང་མོ་དག་གལ་ཏེ་ཁྱེད་ཀྱིས་དགེ་སློང་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ་ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་དང་ལྡན་པ་གང་ཡིན་པ་དེ་ལ་རས་ཡུག་ཆེན་བསྐོན་ན་དེས་ཁྱེད་ཅག་གིས་འཇིག་རྟེན་ཕ་རོལ་དུ་འགྲོ་བའི་ལམ་རྒྱགས་མང་པོ་ཁྱེར་བར་འགྱུར་རོ། །འཕགས་པ་བདག་ཅག་གིས་དགེ་སློང་དེ་ལྟ་བུ
6.171a
ག་ལས་རྙེད། སྲིང་མོ་དག་ཁྱེད་ཀྱིས་ཁོ་བོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་དང་ལྡན་པ་ཡིན་པར་མི་ཤེས་སམ་འཕགས་པ་བདག་ཅག་ལ་རས་ཡུག་ཆེན་གྱི་འབྱོར་པ་ག་ལས་མཆིས། སྲིང་མོ་དག་ཁྱེད་ཀྱིས། བསོད་ནམས་ཆུང་ཡང་བརྙས་མི་བྱ། །དེ་ནི་བདག་ལ་མི་འོང་མིན། །ཆུ་ཡི་ཐིགས་པ་འཛག་པ་ཡིས། །སྣོད་ཆེན་གང་བར་འགྱུར་བ་བཞིན། །བརྟན་པ་རྣམས་ཀྱིས་བསོད་ནམས་ནི། །ཅུང་ཟད་ཅུང་ཟད་བསགས་ན་རྫོགས། །ཞེས་བྱ་བ་དེ་མི་ཤེས་སམ། ཁྱེད་ཀྱིས་རེ་ཤིག་དོག་པ་སྲང་གཅིག་སྦྱིན་ནུས་སམ། རྔོ་ཐོག་གོ། །གཞན་ཞིག་གིས་སྨྲས་པ། བདག་གིས་ཀྱང་སྲང་ཕྱེད་དབུལ་ལོ། །གཞན་ཞིག་གིས་ཀྱང་སྨྲས་པ། བདག་གིས་ཀྱང་སྲང་གི་བཞི་ཆ་ཅིག་དབུལ་ལོ། །དེ་བཞིན་དུ་ཐམས་ཅད་ཀྱིས་ཀྱང་ཤས་ཤས་ཀྱིས་དབུལ་བར་ཁས་བླངས་སོ། །ཉེ་དགས་སྨྲས་པ། སྲིང་མོ་དག་དོག་པ་ཕྲ་མོ་དག་བྱིན་ཅིག་།འཕགས་པ་བདག་ཅག་ཐམས་ཅད་ནི་སྦོམ་པོ་འཁལ་བ་དག་ལགས་སོ། །བདག་ཅག་གི་ནང་ན་བདེ་གནས་མ་ཞིག་ནི་ཕྲ་མོར་འཁལ་ལོ། །སྲིང་མོ་དག་དེ་ཇེ་བོས་ཤིག་།དེ་དག་གིས་དེ་བོས་པ་དང་ཉེ་དགས་དེ་ལ་སྨྲས་པ། བུ་མོ་ཇེ་དོག་པ་ཕྲར་ཁོལ་ཅིག་།དེས་ཕྲར་བཀལ་བ་དང་ཉེ་དགས་སྨྲས་པ། བུ་མོ་དེ་བས་ཀྱང་ཕྲར་ཁོལ་ཅིག་།དེས་དེ་བས་ཀྱང་ཕྲར་བཀལ་བ་དང ། ཉེ་དགས་ཡང་དང་ཡང་དུ་བུ་མོ་དེ་བས་ཀྱང་ཕྲར་ཁོལ་ཅིག་ཅེས་སྨྲས་པ་དང ། དེས་སྨྲས་པ། འཕགས་པ་འདི་ལས་ཕྲ་བར་ནི་རྔོ་མི་ཐོག་གོ། །ཉེ་དགས་དེ་དག་ལ་སྨྲས་པ། སྲིང་མོ་དག་ཁྱེད་ཅག་ཐམས་ཅད་ཀྱིས་དོག་པ་འདི་འདྲ་བ་ཤ་སྟག་བྱིན་ཅིག་།འཕགས་པ་བདག་ཅག་གིས་དོག་པ་འདི་འདྲ་བ་འཁལ་དུ་རྔོ་མི་ཐོག་གོ། །བུ་མོ་འདིས་ཀྱང་མི་ནུས་སམ་ཅི་ཁྱེད་ཅག་གིས་འདིའི་དོན་དུ་འཁོལ་ལ། འདི་ཁྱེད་ཅག་གི་དོན་དུ་འཁལ་དུ་ཆུག་ཤིག་།འཕགས་པ་གལ་ཏེ་བཏུབ་ནའོ། །ཉེ་དགས་དེ་ལ་སྨྲས་པ། བུ་མོ་གྱིས་ཤིག་དང་ཁྱོད་ལ་བསོད་ནམས་སུ་འགྱུར་རོ། །
6.171b
འཕགས་པ་དོག་པ་འདི་ནི་ཕྲ་བ་དར་ཆེ་བ་ལགས་པས་ཡུན་རིང་མོས་བཀལ་འཚལ་གྱིས་ཧ་ཅང་དོས་དྲག་པར་མ་མཛད་པར་དུས་འདི་ཙམ་ན་སྤྱོན་ཅིག་།ཉེ་དགས་དེ་ལ་ཨ་རོག་ཁྱ་ཞེས་སྨྲས་ནས་སྟན་ལས་ལངས་ཏེ་སོང་ངོ ། །བདེ་གནས་མ་དེས་དུས་དེ་སྲིད་ཀྱིས་དོག་པ་བཀལ་ནས་དེ་གཞན་དག་གི་གན་དུ་སོང་སྟེ་ཐམས་ཅད་འདུས་ནས་དོག་པ་དེ་ཉེ་དགའ་ལ་ཕུལ་ལོ། །ཉེ་དགས་དེ་དག་ལ་ཨ་རོག་ཁྱ། སྦྱིན་པ་འདིས་ཁྱེད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་ཐོབ་པ་དང ། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་ཏེ་སོང་ངོ ། །དེ་ནས་ཉེ་དགས་དོག་པ་དེ་ཁྱེར་ཏེ་གཙུག་ལག་ཁང་དུ་སོང་ནས་དེས་དགེ་སློང་རྣམས་ལ་དོག་པ་དེ་བསྟན་ཏེ་སྨྲས་པ། ཚེ་དང་ལྡན་པ་དག་ཁོ་བོའི་དོག་པ་འདི་ཅི་འདྲ་ལྟོས། གནས་བརྟན་དོག་པ་བཟང་ངོ ། །གནས་བརྟན་གྱིས་གང་རས་ཡུག་ཆེན་འཐག་པར་འགྱུར་བའི་ཐ་ག་པ་འགའ་བཙལ་བ་མཆིས་སམ། ཚེ་དང་ལྡན་པ་དག་ཅི་ཁྱེད་ཀྱིས་ཉེ་དགའ་ཟིལ་གྱིས་གནོན་ཏམ། གལ་ཏེ་ཉེ་དགའ་རབ་ཏུ་མ་བྱུང་དུ་ཟིན་ན་ཉེ་དགའ་རང་ཉིད་འཐག་པར་འགྱུར་རོ། །གནས་བརྟན་བདག་ཅག་གིས་གནས་བརྟན་ག་ལ་ཟིལ་གྱིས་གནོན། འདི་ལྟར་ར་བ་ག་གེ་མོའི་དྲུང་ན་ཐ་ག་པ་སྤྱི་ཅེར་ཁྱོ་ཤུག་མཆིས་ཏེ། གལ་ཏེ་དེས་དོག་པ་འདི་རྙེད་ཏུ་ལགས་ན་ཆེན་པོ་ལ་འོས་པའི་རས་ཡུག་ཆེན་འགྲུབ་པར་འགྱུར་རོ། །བུ་དག་ཨ་རོག་ཁྱ་དེ་དོན་གྱིས་ན་ཁྱེད་ཀྱིས་ཁོ་བོའི་རས་ཡུག་ཆེན་འཐག་ཏུ་བཅུག་གོ་ཞེས་དེས་དོག་པ་དེ་ཁྱེར་ཏེ་ཐ་ག་པ་དེའི་ཁྱིམ་དུ་སོང་བ་དང ། དེས་ཐ་ག་པ་དེ་ཐག་རིང་པོ་ཁོ་ན་ནས་མཐོང་ནས་ཚིགས་སུ་བཅད་པ་སྨྲས་པ། མཁས་པ་རིང་ནས་རབ་སྣང་བ། །གངས་དང་ལྡན་པའི་རི་བོ་བཞིན། །མི་མཁས་རབ་ཏུ་མི་སྣང་བ། །མུན་པའི་ནང་དུ་མདའ་འཕངས་བཞིན། །བཞིན་བཟངས་ཁྱོད་ཀྱི་གྲགས་པས་མཉན་ཡོད་ཐམས་ཅད་གང་བར་གྱུར་པ་ནི་ཁྱེད་ཀྱིས་རྙེད་པ་ལེགས་པར་རྙེད་པ་ཡིན་ནོ། །དོག་པ་འདི་ཅི་འདྲ་ཇེ་ལྟོས
6.172a
ཤིག་།འཕགས་པ་དོག་པ་བཟང་ངོ ། །དོག་པ་ནི་འདི་ལགས་ལ་ཐ་ག་པ་ནི་བདག་ལགས་ན་ཆེན་པོ་ལ་འོས་པའི་རས་ཡུག་ཆེན་དུ་འགྱུར་རོ། །བཞིན་བཟངས་འདི་ཡང་ཐོགས་ཤིག་།འཕགས་པ་བདག་ལ་ཐགས་གླ་སུས་སྩལ་བར་འགྱུར། བཞིན་བཟངས་ཁྱོད་རྟག་པ་ཉིད་དུ་ཐགས་གླས་མི་ངོམས་སམ། འཇིག་རྟེན་ཕ་རོལ་དུ་འགྲོ་བའི་ལམ་རྒྱགས་ཀྱང་བསྐུར་བར་གྱིས་ཤིག་།འཕགས་པ་རས་ཡུག་ཆེན་སྔ་མེད་འཐག་པ་ན་བདག་གིས་བུ་ལོན་གང་དག་བླངས་པ་དེ་དག་ཀྱང་ད་དུང་མ་འཁོར་རོ། །དེས་ཆུང་མའི་གདོང་དུ་བལྟ་བར་བརྩམས་པ་དང ། ཆུང་མས་སྨྲས་པ། འཕགས་པ་གལ་ཏེ་འདི་འཚལ་ཡང་བདག་ནི་མི་འཚལ་ལོ། །ཉེ་དགས་སྤྱོས་ཏེ་སྨྲས་པ། ཀཝའི་ཐ་ག་པ་སྤྱི་ཅེར་ཉོན་ཅིག་།ཁོ་བོས་གལ་ཏེ་ཁྱོད་རས་ཡུག་ཆེན་འདི་འཐག་ཏུ་མ་བཅུག་ན་སྤྱི་ཅེར་གྱི་མགོ་འདིས་མནའ་འདོར་རོ། །ཐ་ག་པ་དེས་ཀྱང་སྤྱོས་ཏེ་སྨྲས་པ། ཀཝའི་དགེ་སྦྱོང་མགོ་རེག་ཉོན་ཅིག་།ཁོ་བོ་གལ་ཏེ་ཁྱོད་ཀྱི་རས་ཡུག་ཆེན་འཐག་ན་མགོ་འདིས་མནའ་འདོར་རོ། །ཉེ་དགས་སྤྱོས་ཏེ་སོང་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཕོ་བྲང་གི་ཡིད་བརྟེན་པ་ཆེ་བ་ཞེས་བྱ་བ་ཉེ་དགའི་མཛའ་བོ་ཞིག་ཡོད་དེ། ཉེ་དགའ་དེའི་སྡུམ་པར་སོང་སྟེ། གཡོག་འཁོར་དག་ལ་སྨྲས་པ། ཀྱེ་ནང་རྗེ་དག་ཆེ་བ་གར་སོང ། དེ་དག་གིས་སྨྲས་པ། འཕགས་པ་སྲང་དུ་མཆིས་སོ། །ཉེ་དགའ་དེ་འོང་བའི་སྲང་དུ་སོང་བ་དང ། ཆེ་བ་ཆང་འཚོང་བའི་ཚོང་རྡལ་ཞིག་ཏུ་ཞུགས་སོ། །ཉེ་དགའ་ཚོང་རྡལ་དེའི་སྒོར་བསྡད་དེ་ཆེ་བ་ལ་ཉེ་དགའ་སྒོ་ན་སྡོད་ཀྱིས་ཕྱིར་བྱུང་ཤིག་ཅེས་ཕྲིན་སྤྲིང་བ་དང ། ཆེ་བ་ཕྱིར་བྱུང་ནས་སྨྲས་པ། བཙུན་པ་ཉེ་དགའ་ཕྱག་འཚལ་ལོ། །ཕྱག་འཚལ་ལོ། །ཉེ་དགས་སྨྲས་པ། ཆེ་བ་ཁོ་བོས་ཀོ་ཁྱོད་རྒྱལ་པོའི་བྱ་བ་དང ། རྒྱལ་པོའི་བྱེད་པ་དག་ལ་ན་རྩོན་པར་གྱུར་སྙམ་དུ་བསམས་ཀྱིས། ཁོ་བོས་ཁྱོད་འདི་ལྟར་ཆང་འཚོང་བའི་ཁྱིམ་ནས་ཆང་འཚོང་བའི་ཁྱིམ་དུ་འཕྱན་པར་ནི་མ་བསམས་སོ། །འཕགས་པ་བདག་རྒྱལ་པོའི་དགོས་པས་འདིར་ཞུགས་སོ། །བཙུན་པ་ཉེ་དགའ་བྱོན་པའི་དགོས་པ་ཅི་མཆིས། ཆེ་བ་དོག་པ་ཅུང་ཞིག་རྙེད་པ་འདིས་རེ་ཤིག་རས་ཡུག་ཆེན་འཐག་ཏུ་ཆུག་ཤིག་།བདག་གིས་བཙུན་པ་ཉེ་དགའ
6.172b
ལ་རས་ཡུག་ཆེན་ཉིད་དབུལ་ལོ། །དེ་ཡང་བསྐུར་ན་ཅི་དད་པས་སྦྱིན་པར་བྱ་བ་འདི་དོར་བར་བྱ་འམ། ཆེ་བས་མི་ཞིག་ལ་བསྒོ་བ། ཀྱེ་ནང་རྗེ་ཐ་ག་པའི་སྣ་བོའི་གན་དུ་སོང་ལ་འཕགས་པ་ཉེ་དགའི་རས་ཡུག་ཆེན་འདི་ཐོགས་ལ་ཕུལ་ཅིག་ཅེས་གྱིས་ཤིག་།ཉེ་དགས་སྨྲས་པ། འདི་ཐ་ག་པའི་སྣ་བོ་འཐག་ཏུ་མ་གཞུག་པར་འདི་ལྟར་ར་བ་ག་གེ་མོ་ཞིག་གི་དྲུང་ན་ཐག་པ་སྤྱི་ཅེར་ཁྱོ་ཤུག་འདུག་པ་དེས་འདི་བཏག་པར་བྱའོ། །ཆེ་བས་མི་དེ་ལ་སྨྲས་པ། ཀྱེ་ནང་རྗེ་ཐ་ག་པ་སྤྱི་ཅེར་དེའི་གན་དུ་སོང་ལ་འདི་སྐད་ཅེས་ཆེ་བ་ན་རེ་འདི་ཐོགས་ལ་བྱིན་ཅིག་ཅེས་ཟེར་རོ་ཞེས་གྱིས་ཤིག་།མི་དེས་དོག་པ་དེ་ཁྱེར་ཏེ་ཐ་ག་པ་སྤྱི་ཅེར་གྱི་གན་དུ་སོང་སྟེ་སྨྲས་པ། ཀྱེ་སྤྱི་ཅེར་ཆེ་བའི་ཞལ་ནས་འདི་ཐོགས་ལ་བྱིན་ཅིག་ཅེས་གསུང་ངོ ། །སྤྱི་ཅེར་གྱིས་དོག་པ་དེ་ངོ་ཤེས་ནས་དེས་སྨྲས་པ། བདག་གིས་རེས་ཁོར་རོ། །མི་དེ་སོང་སྟེ་ཆེ་བ་ལ་སྨྲས་པ། ཐ་ག་པ་སྤྱི་ཅེར་གྱི་མཆིད་ནས་བདག་གི་རེས་ཁོར་རོ་ཞེས་མཆིའོ། །ཆེ་བས་སྨྲས་པ། ཀྱེ་ནང་རྗེ་སྤྱི་ཅེར་གྱི་གན་དུ་སོང་ལ་འདི་སྐད་ཅེས་རེས་གཞན་བྱེད་ཏུ་མི་གཞུག་གོ་ཞེས་གྱིས་ཤིག་།མི་དེ་སོང་སྟེ་སྨྲས་པ། ཀྱེ་སྤྱི་ཅེར་ཆེ་བའི་ཞལ་ནས་རེས་གཞན་བྱེད་ཏུ་མི་གཞུག་གོ་ཞེས་གསུང་ངོ ། །སྤྱི་ཅེར་གྱིས་སྨྲས་པ། ཀྱེ་ནང་རྗེ་ཆེ་བ་མཉན་ཡོད་ཏུ་དབང་བྱེད་ན་ཁོ་བོ་མཉན་ཡོད་ཏུ་མི་གནས་པར་ཟད་མོད། ཁོ་བོ་སྐལ་བ་མ་ཡིན་པའི་ལས་མི་བྱེད་དོ། །མི་དེ་ཆེ་བའི་གན་དུ་སོང་སྟེ་སྨྲས་པ། སྤྱི་ཅེར་གྱི་མཆིད་ནས་ཆེ་བ་མཉན་ཡོད་ཏུ་དབང་བྱེད་ན་ཁོ་བོ་མཉན་ཡོད་ཏུ་མི་གནས་པར་ཟད་མོད། ཁོ་བོ་སྐལ་བ་མ་ཡིན་པའི་ལས་མི་བྱེད་དོ་ཞེས་མཆིའོ། །ཆེ་བས་སྨྲས་པ། ཀྱེ་ནང་རྗེ་ཐ་ག་པའི་སྣ་བོའི་གན་དུ་སོང་ལ་དོག་པ་འདི་ལས་རས་ཡུག་ཆེན་ཐོགས་ཤིག་ཅེས་བགྱི་ཤིག་།ཉེ་དགས་སྨྲས་པ། འདི་ཐ་ག་པའི་སྣ་བོས་བཏག་པར་མི་བྱ་བར་འདི་ལྟར་ཐ་ག་པ་སྤྱི་ཅེར་གྱིས་བཏག་པར་བྱའོ། །ཆེ་བས་མི་དེ་ལ་སྨྲས་པ། ཀྱེ་ནང་རྗེ་ཐ་ག་པ་སྤྱི་ཅེར་གྱི་གན་དུ་སོང་ལ། ཆེ་བ་ན་རེ་སྐོམ་ཟོང་སྦྱིན་གྱིས་རས་ཡུག་ཆེན་ཐོགས་ཤིག་ཅེས
6.173a
ཟེར་རོ་ཞེས་གྱིས་ཤིག་།དེ་འཕགས་པ་ཉེ་དགས་དེ་ལ་སྨྲས་པ། བཀྲེན་པ་ཁྱོད་སུ་ཞིག་གིས་རྒྱལ་པོའི་མིར་བཞག་།ཁྱོད་ལྕག་རྒོད་མང་པོས་བརྡབས་ཏེ་ས་དང་ཤིང་དག་སྐྱེད་ཏུ་གཞུག་པར་བྱ་བ་ཡིན་ནོ། །ཐ་ག་པ་སྤྱི་ཆེར་གྱི་གན་དུ་སོང་སྟེ་འདི་སྐད་ཅེས་ཆེ་བའི་ཞལ་ནས་རས་ཡུག་ཆེན་ཐོགས་ཤིག་ཅེས་བྱུང་ངོ ། །ཞེས་ཟེར་མི་ནུས་སམ། གལ་ཏེ་མི་འཐག་གོ་ཞེས་ཟེར་ན་ཐོར་ཏོ་དག་ནས་བཟུང་སྟེ་ཁུག་ལ་ཁུ་ཚུར་གྱིས་གཏོགས་ཤིག་གལ་ཏེ་ངུ་ན་ཐགས་མི་མཐུན་བར་དྲིལ་ཅིག་།གལ་ཏེ་དེའི་ཆུང་མ་ངུ་ན་ལན་བུ་ནས་བཟུང་སྟེ་དྲང་བར་བྱ་ཞིང ། ཁྱེད་གཉིས་ཀྱིས་ཆེ་བའི་མཆིད་བཅག་པས་ཁྱེད་གཉིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཀཱར་ཥཱ་པ་ཎ་ལྔ་བརྒྱ་གཞལ་དགོས་པའི་གྱོད་ལ་བསྒྲིན་ནོ་ཞེས་བརྗོད་པར་བྱའོ། །དེ་ལྟ་ན་ཁོ་བོའི་རས་ཡུག་ཆེན་ཡང་འགྲུབ་པར་འགྱུར་ལ་ཁྱོད་ཀྱིས་ཀྱང་གསུག་མང་པོ་འཐོབ་པར་འགྱུར་རོ། །དེ་སོང་སྟེ་སྨྲས་པ། ཆེ་བའི་ཞལ་ནས་སྐོམ་ཟོང་སྦྱིན་གྱིས་རས་ཡུག་ཆེན་ཐོགས་ཤིག་ཅེས་བྱུང་ངོ ། །སྤྱི་ཅེར་གྱིས་སྨྲས་པ། ཁོ་བོ་སྐལ་བ་མ་ཡིན་པ་འཐག་མི་ནུས་སོ། །དེས་དེའི་ཐོར་ཐོ་དག་ནས་བཟུང་སྟེ་བཀུག་ནས་ཁུ་ཚུར་གྱིས་བཏགས་སོ། །དེས་ངུ་བར་བརྩམས་པ་དང ། དེས་དེའི་ཐགས་མི་མཐུན་བར་དྲིལ་བར་བརྩམས་སོ། །དེའི་ཆུང་མས་ངུ་བར་བརྩམས་པ་དང ། དེས་དེའི་ལན་བུ་ནས་བཟུང་སྟེ་དྲང་བར་བརྩམས་ཤིང་ཁྱེད་གཉིས་ཀྱིས་ཆེ་བའི་མཆིད་བཅག་པས་ཁྱེད་གཉིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཀཱར་ཥཱ་པ་ཎ་ལྔ་བརྒྱ་གཞལ་དགོས་པའི་གྱོད་ལ་བསྒྲིན་པར་བྱས་ཚུར་ཤོག་།རྒྱལ་པོའི་ཕོ་བྲང་དུ་འདོང་ངོ་ཞེས་དེས་དེ་གཉིས་ཁྲིད་དེ་འཕགས་པ་དང ། ཆུང་མས་སྤྱི་ཅེར་ལ་སྨྲས་པ། རྗེའི་སྲས་གལ་ཏེ་བདག་ཅག་གཉིས་བཙོན་རར་བཅུག་པར་གྱུར་ན་བདག་ཅག་གཉིས་ལ་ཐར་བར་བྱེད་པ་འགའ་ཡང་མེད་པས་བཙོན་རར་གནོད་པ་དག་གིས་འཆི་བར་བྱ་དགོས་ཀྱིས་རས་ཡུག་ཆེན་འདི་ཐོགས་ཤིག་།སྤྱི་ཅེར་གྱིས་སྨྲས་པ། ཀྱེ་ནང་པོ་བདག་ཅག་རྒྱལ་པོའི་ཕོ་བྲང་དུ་མ་བཀྲི་བར་དོག་པ་ཞོག་ལ་བཞུད་ཅིག་དང་བདག་གིས་རས་ཡུག་ཆེན་ཡང་བཏག་ཅིང་ཁྱོད
6.173b
ལ་ཡང་གསུག་མང་པོ་དབུལ་ལོ། །དེས་དོག་པ་བཞག་སྟེ་སོང་བ་དང་སྤྱི་ཆེར་གྱིས་ཆུང་མ་ལ་སྨྲས་པ། བཟང་མོ་རས་ཡུག་ཆེན་འདི་གང་གིས་དོག་པར་ཡང་མི་རུང་ལ་རས་ཡུག་ཆེན་དུའང་མི་རུང་བར་འགྱུར་བ་དེ་ལྟར་བཏག་པར་བྱའོ། །ཆུང་མས་སྨྲས་པ། རྗེའི་སྲས་དེ་དགེ་སྦྱོང་ཧྲལ་པོ་དེ་ལྟ་བུ་ཡིན་པས་བདག་ཅག་གིས་རས་ཡུག་ཆེན་དེ་ལྟ་བུར་བྱས་ན་དེས་བཏང་རེ་སྐན། དེས་རས་ཡུག་ཆེན་དེ་བཏགས་ནས་དེ་རས་ཡུག་ཆེན་དེ་ཐགས་ལས་འགྲོལ་ཞིང་འདུག་པ་ན་ཉེ་དགའ་ཡང་འོངས་ནས་ཉེ་དགས་རས་ཡུག་ཆེན་དེ་བླངས་པ་དང ། སྤྱི་ཅེར་གྱིས་སྨྲས་པ། འཕགས་པ་བདག་ལ་སྐོམ་ཟོང་སྩོལ་ཅིག་།བཀྲེན་པ་ཁོ་བོ་ཁྱོད་ཀྱི་སྐོམ་ཟོང་དབུལ་བ་ཡིན་ནམ། དུག་ཅིའི་ཕྱིར་མི་བརྐྱུད། ནུ་རྫི་ཅིའི་ཕྱིར་མི་བརྐྱུད། དེ་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་ཁའི་ཆོས་ཅུང་ཟད་ཀྱིས་ཀྱང་འཐག་ཏུ་བཅུག་གོ། །རྒྱལ་པོའི་ཕོ་བྲང་གི་མཐུ་ཅུང་ཟད་ཀྱིས་ཀྱང་འཐག་ཏུ་བཅུག་གོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་སྟེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་སྨྲས་པ། ཉེ་དགའ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ
6.174a
ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རང་གིས་བསླངས་པའི་དོག་པས་ཐ་ག་པ་ཉེ་དུ་མ་ཡིན་པ་ལས་གོས་འཐག་ཏུ་འཇུད་ན་གོས་གྲུབ་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །རང་གིས་བསླངས་པའི་དོག་པས་ཞེས་བྱ་བ་ནི་འདུན་པས་ལ་ལ་ལས་སྲང་གཅིག་།ལ་ལ་ལས་སྲང་ཕྱེད། ལ་ལ་ལས་ཞོ་གཉིས། ལ་ལ་ལས་ཞོ་གཅིག་བསླངས་པའི་དོག་པས་སོ། །ཐ་ག་པ་ཞེས་བྱ་བ་ནི་ཐགས་མཁན་ནོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ལས་བརྟེན་པའི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་འཐག་ཏུ་འཇུད་ན་ཞེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལ་བ་གང་ཡང་རུང་བའོ། །གོས་གྲུབ་ན་ཞེས་བྱ་བ་ནི་གོས་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པ་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཉེ་དུ་མ་ཡིན་པ་ལས་དོག་པ་བསླངས་ཏེ་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན་དེ་སློང་བ་ལ་ཉེས་བྱས་སུ་འགྱུར་ལ། ཐ་ག་པ་ཉེ་དུ་མ་ཡིན་པ་ལ་འཐག་ཏུ་འཇུད་པ་ལ་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གིས་ཉེ་དུ་མ་ཡིན་པ་ལས་དོག་པ་བསླངས་ཏེ་ཐ་ག་པ་ཉེ་དུ་ལ་གོས་འཐག་ཏུ་འཇུད་ན་དེ་སློང་བ་ལ་ཉེས་བྱས་སུ་འགྱུར་ལ། ཐ་ག་པ་ཉེ་དུ་ལ་འཐག་ཏུ་འཇུད་པ་ལ་ལྟུང་བ་མེད་དོ། །དགེ་སློང་གིས་ཉེ་དུ་མ་ཡིན་པ་ལས་དོག་པ་བསླངས་ཏེ་བདག་ཉིད་ཀྱིས་འཐག་པར་བྱེད་ན། དེ་སློང་བ་ལ་ཉེས་བྱས་སུ་འགྱུར་ལ་བདག་ཉིད་ཀྱིས་འཐག་པ་ལ་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས
6.174b
ཉེ་དུ་མ་ཡིན་པ་ལས་དོག་པ་བསླངས་ཏེ་ཐ་ག་པ་ཉེ་དུ་དང་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན་དེ་སློང་བ་ལ་ཉེས་བྱས་སུ་འགྱུར་ལ། ཐ་ག་པ་ཉེ་དུ་ལ་འཐག་ཏུ་འཇུད་པ་ལ་ལྟུང་བ་མེད་དོ། །ཐ་ག་པ་ཉེ་དུ་མ་ཡིན་པ་ལ་འཐག་ཏུ་འཇུད་པ་ལ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཉེ་དུ་མ་ཡིན་པ་ལས་དོག་པ་བསླངས་ཏེ་བདག་ཉིད་དང་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན་དེ་སློང་བ་ལ་ཉེས་བྱས་སུ་འགྱུར་ལ། བདག་ཉིད་ཀྱིས་འཐག་པ་ལ་ཡང་ཉེས་བྱས་ཉིད་དུ་འགྱུར་རོ་ཐ་ག་པ་ཉེ་དུ་མ་ཡིན་པ་ལ་འཐག་ཏུ་འཇུད་པ་ལ་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གིས་ཉེ་དུ་མ་ཡིན་པ་ལས་དོག་པ་བསླངས་ཏེ་བདག་ཉིད་དང་ཐ་ག་པ་ཉེ་དུ་ལ་གོས་འཐག་ཏུ་འཇུད་ན་དེ་སློང་བ་ལ་ཉེས་བྱས་སུ་འགྱུར་ལ། བདག་ཉིད་ཀྱིས་འཐག་པ་ལ་ཡང་ཉེས་བྱས་ཉིད་དུ་འགྱུར་རོ། །ཐ་ག་པ་ཉེ་དུ་ལ་འཐག་ཏུ་འཇུད་པ་ལ་ལྟུང་བ་མེད་དོ། །དགེ་སློང་གིས་ཉེ་དུ་ལས་དོག་པ་བསླངས་ཏེ་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན་དེ་སློང་བ་ལ་ལྟུང་བ་མེད་ལ། ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་པ་ལ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཉེ་དུ་ལས་དོག་པ་བསླངས་ཏེ་ཐ་ག་པ་ཉེ་དུ་ལ་གོས་འཐག་ཏུ་འཇུད་ན་དེ་སློང་བ་ལ་ལྟུང་བ་མེད་ལ། ཐ་ག་པ་ཉེ་དུ་ལ་གོས་འཐག་ཏུ་འཇུད་པ་ལ་ཡང་ལྟུང་བ་མེད་དོ། །དགེ་སློང་གིས་ཉེ་དུ་ལས་དོག་པ་བསླངས་ཏེ་བདག་ཉིད་ཀྱིས་འཐག་པར་བྱེད་ན་དེ་སློང་བ་ལ་ལྟུང་བ་མེད་ལ་བདག་ཉིད་ཀྱིས་འཐག་པ་ལ་ཉེས་བྱས་ཉིད་དུ་འགྱུར་རོ། །དགེ་སློང་གིས་ཉེ་དུ་ལས་དོག་པ་བསླངས་ཏེ་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན་དེ་སློང་བ་ལ་ལྟུང་བ་མེད་ལ། ཐ་ག་པ་ཉེ་དུ་ལ་གོས་འཐག་ཏུ་འཇུད་པ་ལ་ཡང་ལྟུང་བ་མེད་དོ། །ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་པ་ལ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཉེ་དུ་ལས་དོག་པ་བསླངས་ཏེ་བདག་ཉིད་དང་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན་དེ་སློང་བ་ལ་ལྟུང་བ་མེད་ལ། བདག་ཉིད་ཀྱིས་འཐག་པ་ལ་ཉེས་བྱས་ཉིད་དུ་འགྱུར་རོ། །ཐ་ག་པ་ཉེ་དུ་མ་ཡིན་པ་ལ་འཐག་ཏུ་འཇུད་པ་ལ་སྤང་བའི
6.175a
ལྟུང་བྱེད་དུ་འགྱུར་རོ། དགེ་སློང་གིས་ཉེ་དུ་ལས་དོག་པ་བསླངས་ཏེ་བདག་ཉིད་དང་ཐ་ག་པ་ཉེ་དུ་ལ་གོས་འཐག་ཏུ་འཇུད་ན་དེ་སློང་བ་ལ་ལྟུང་བ་མེད་ལ། བདག་ཉིད་ཀྱིས་འཐག་པ་ལ་ཉེས་བྱས་ཉིད་ཏུ་འགྱུར་རོ། །ཐ་ག་པ་ཉེ་དུ་ལ་གོས་འཐག་ཏུ་འཇུད་པ་ལ་ལྟུང་བ་མེད་དོ། གླ་རྔན་གྱི་འཐག་ཏུ་འཇུད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཐག་ཏུ་འཇུད་པའི་སྤང་བ་སྟེ་ཉི་ཤུ་གསུམ་པ་རྫོགས་སྷོ།། ་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད་དགའ་མགུར་སྤྱོད་པར་བྱེད་དོ། །ཁྱིམ་བདག་དེ་དུས་གཞན་ཞིག་ན་གཞན་གྱི་ཆུང་མ་ལ་ཆགས་པར་གྱུར་ནས་དེ་ལ་ཆུང་མས་རྗེའི་སྲས་དེ་ལྟ་མ་མཛད་ཅིག་ཅེས་ཕྱིར་བཟློག་ན། ཇི་ཙམ་དུ་དེ་ཕྱིར་བཟློག་ཀྱང་མ་ལོག་པ་དེ་ཙམ་དུ་དེའི་ཆུང་མ་དེ་ཡང་སྐྱེས་པ་གཞན་དག་དང་ལྷན་ཅིག་འཁྲུལ་བ་རྩོམ་པར་བྱེད་དོ། །ཁྱིམ་བདག་དེ་ཡང་བུད་མེད་གཞན་དག་ལ་སྦྱིན་པར་བྱེད་ལ། ཆུང་མ་དེ་ཡང་སྐྱེས་པ་གཞན་དག་ལ་སྦྱིན་པར་བྱེད་པས་དེ་ལྟར་ཁྱིམ་དེ་གཉིས་ཀ་རྒུད་པར་གྱུར་ནས་དེ་གཉིས་ལ་བུ་མོ་མངག་གཞུག་མ་ཞིག་ཡོད་ནས་ཁྱིམ་བདག་དེས་བུ་མོ་དེ་ལ་འདིས་ཁྱིམ་རྒུད་པར་བྱས་སོ་ཞེས་ཁུ་ཚུར་དང ། ཐལ་ལྕག་དག་གིས་རྡེག་པར་བྱེད་དོ། །བུ་མོ་དེས་སྨྲས་པ། བདག་གིས་ཁྱིམ་རྒུད་པར་གྱུར་པ་འདི་ཅི་ལས་གྱུར་པ་འཚལ་མོད་ཀྱི་འོན་ཀྱང་བདག་གིས་ཇི་ལྟར་རྗེ་དག་ལ་བསྔགས་པ་མ་ལགས་པ་བརྗོད་པར་བགྱིར་རུང ། ཉེ་དགས་དེ་ཚོར་ནས་ཁྱིམ་བདག་དེ་དང་ཁྱིམ་བདག་གི་ཆུང་མ་དེའི་གན་དུ་སོང་སྟེ་ཅི་ནས་ཀྱང་དེ་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་གནས་པར་འགྱུར་བ་དེ་ལྟ་དེ་ལྟར་ཚུལ་ཁྲིམས་ཀྱི་བསྔགས་པ་བརྗོད་ཅིང ། ཚུལ་ཁྲིམས་འཆལ་བའི་བསྔགས་པ་མ་ཡིན་པ་བརྗོད་ནས་དེས
6.175b
དེ་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་གནས་པར་བྱས་སོ། །ཁྱིམ་བདག་དེ་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་པས་ཡང་བུ་མོ་དེ་ལ་བརྡེག་པར་བརྩམས་པ་དང ། ཆུང་མས་དེ་ལ་སྨྲས་པ། རྗེའི་སྲས་གང་གི་ཚེ་བདག་ཅག་ལས་དང་ལས་ཀྱི་རྣམ་པར་སྨིན་པ་མི་མཁྱེན་པ་དེའི་ཚེ་གོ་རྡེག་པར་མཛད་མོད། ད་བདག་ཅག་དགེ་བའི་བཤེས་གཉེན་འཕགས་པ་ཉེ་དགའ་ལ་བརྟེན་ནས་ལས་དང་ལས་ཀྱི་རྣམ་པར་སྨིན་པ་མཁྱེན་པས་འདི་ལྟར་འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་པ་ལགས་པས་སུ་ཞིག་སུའི་བྲན་ལགས། བུ་མོ་འདི་ལ་རྡེག་པར་མ་མཛད་ཅིག་།བཟང་མོ་ཁྱོད་ཟེར་བ་མ་ཉེས་སོ། །བུ་མོ་ཚུར་ཤོག་།ཁྲུས་གྱིས་ལ་ཤོག་ཤིག་།བུ་མོ་དེ་ཁྲུས་བྱས་ཏེ་འོངས་པ་དང ། དེས་དེ་ལ་གོས་ཕྲུགས་གཅིག་བསྐོན་ནས་སྨྲས་པ། བུ་མོ་དགའ་ཞིང་ལས་བྱོས་ཤིག་།བུ་མོ་དེས་བསམས་པ། ཁྱིམ་བདག་ཁྱོ་ཤུག་འདི་སྔོན་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་ཏེ། ཡང་དང་ཡང་དུ་བདག་ལ་ཁུ་ཚུར་དང་ཐལ་ལྕག་དག་གིས་རྡེག་པར་བྱེད་ཅིང་ཟས་དང་གོས་ངན་པ་དག་སྦྱིན་པར་བྱེད་ན། ད་འདི་བདག་གི་ཕ་མ་དང་འདྲ་བར་གྱུར་ཏོ་སྙམ་ནས། ཡང་བསམས་པ། གང་ཚུན་ཅད་ནས་འཕགས་པ་ཉེ་དགའ་ཁྱིམ་འདིར་འཇུག་པར་བརྩམས་པ་དེ་ཚུན་ཆད་ནས་ཁྱིམ་བདག་འདི་ཕ་མ་དང་འདྲ་བར་གྱུར་པས་བདག་གིས་འཕགས་པ་ཉེ་དགའ་ལ་ཅི་ཞིག་གིས་དགའ་བར་བྱ་སྙམ་ནས་དེས་བསམས་པ། གལ་ཏེ་བདག་གིས་འདི་ལས་ཆུང་ཞིག་བརྐུས་ཏེ་དབུལ་དུ་ནི་ཁྱིམ་བདག་འདིས་བདག་བརྡེག་བཙོག་མང་པོ་བྱས་ཏེ་སྔོན་གྱི་གནས་སུ་བཞག་པར་འགྱུར་རོ་སྙམ་ནས་དེ་སྡོད་ཅིང་འདུག་གོ། །ཁྱིམ་བདག་གི་ཆུང་མ་དེས་ཁྱིམ་བདག་དེ་ལ་སྨྲས་པ། རྗེའི་སྲས་མཁྱེན་པར་མཛོད་ཅིག་།འཕགས་པ་ཉེ་དགའ་ནི་བདག་ཅག་གི་དགེ་བའི་བཤེས་གཉེན་ལགས་ཏེ། འཕགས་པ་ཉེ་དགས་བདག་ཅག་ལས་དྲི་མ་ཅན་དང་ཕྲལ་ནས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་དེ། ཡང་དང་ཡང་དུ་བདག་ཅག་ལ་ཆོས་ཀྱིས་སྡུད་པར་བྱེད་པས
6.176a
བདག་ཅག་གིས་ཀྱང་དེ་ལ་ཟང་ཟིང་ཅུང་ཟད་ཀྱིས་བསྡུ་བར་བགྱིའོ། །བཟང་མོ་དེ་བཞིན་བྱའོ། །རྗེའི་སྲས་བདག་གིས་དོག་པ་འཇམ་པོ་བཀལ་ཏེ། དོག་པ་དེ་ལས་ཐ་ག་པ་ཆེ་གེ་མོ་ཞིག་ལ་རས་ཡུག་ཆེན་འཐག་ཏུ་སྩལ་ཅིང་སླད་ཀྱིས་རས་ཡུག་ཆེན་སྐོན་པར་བགྱིའོ། །ཁྱིམ་བདག་དེས་དོག་པ་དེ་ཐ་ག་པ་ལ་བྱིན་ནས་སྨྲས་པ། བཞིན་བཟངས་ཁྱོད་ཀྱིས་དོག་པ་འདི་ལས་རས་ཡུག་ཆེན་ཐོགས་ཤིག་དང་འཕགས་པ་ཉེ་དགའ་ལ་དབུལ་བར་བྱའོ། །དེ་ལྟར་བྱའོ། །བུ་མོ་དེས་དེ་ཐོས་ནས་བསམས་པ། བདག་གིས་འཕགས་པ་ཉེ་དགའ་ལ་དགའ་བ་དེ་སྦྲན་པར་བྱའོ་སྙམ་མོ། །ཉེ་དགའ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ཏུ་བསོད་སྙོམས་ལ་ཞུགས་ནས་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང ། བུ་མོ་དེས་ཁྱིམ་ལེགས་པར་བྱུགས་ཤིང་ཕྱག་དར་བོར་ནས། དེས་ཉེ་དགའ་མཐོང་བ་དང་རྐང་པ་གཉིས་ལ་ཕྱག་འཚལ་ཏེ་སྨྲས་པ། བདག་གིས་འཕགས་པ་ཉེ་དགའ་ལ་དགྱེས་པ་སྦྲན་པར་བགྱིའོ། །ཉེ་དགས་སྨྲས་པ། བུ་མོ་ཁྱོད་ཀྱིས་ཁོ་བོ་ལ་དགའ་བ་ཅི་ཞིག་སྦྲན་པར་བྱ། ཁྱིམ་བདག་འདི་ཁྱོད་ལ་རས་ཡུག་ཆེན་འབུལ་བར་འགྱུར་རོ། །ཉེ་དགས་བསམས་པ། སའི་སྟེང་ན་འདོད་པའི་བདག་ཉིད་ཅན་གང་ཇི་སྙེད་ཡོད་པ་དེ་དག་དང་བདག་མཉམ་པར་དེང་བུ་མོ་འདིས་ཀྱང་འཕྲིགས་སོ་སྙམ་དུ་རིག་ནས་བུ་མོ་དེ་ལ་འདི་སྐད་ཅེས་སྨྲས་སོ། །བུ་མོ་ཅི་ཁོ་བོ་ལ་ཐོ་འཚམ་པར་བྱེད་དམ། བུ་མོས་སྨྲས་པ། བདག་ཅིའི་སླད་ཏུ་འཕགས་པ་ལ་ཐོ་འཚམ་པར་བགྱིད། ཉེ་དགས་སྨྲས་པ། བུ་མོ་གལ་ཏེ་བདེན་པར་གྱུར་ན་ནི་ངས་ཁྱོད་ལ་གཤེ་བ་དག་ལ་ཆུགས་མ་བྱ་འོ། །ཇི་སྟེ་བརྫུན་པར་གྱུར་ན་ནི་བརྡེག་བཙོག་མང་པོ་བྱེད་ཏུ་བཅུག་སྟེ་སྔོན་གྱི་གནས་ཇི་ལྟ་བར་གཞག་པར་བྱའོ། །འཕགས་པ་གལ་ཏེ་བདག་ལ་ཐུགས་མི་ཆེས་ན་ཕྱོགས་ག་གེ་མོ་ཞིག་ན་ཐ་ག་པ་མཆིས་པ་དེར་བཞུད་ཅིག་དང་ཁྱོད་ཉིད་ཀྱིས་མཁྱེན་པར་འགྱུར་རོ། །དེ་དེར་སོང་ཏེ་ཐ་ག་པ་ལ་སྨྲས་པ། བཞིན་བཟངས་རས་ཡུག་ཆེན་འཐག་པ་འདི་སུའི་ཡིན། འཕགས་པ་བཙུན་པ་ཉེ
6.176b
དགའི་ལགས་སོ། །ཁྱོད་ཀྱིས་ཉེ་དགའ་ཤེས་སམ། མ་འཚལ་ཏོ། །དེ་ནི་ཁོ་བོ་ཡིན་ནོ། །བཞིན་བཟངས་སྲིད་ཏུ་འདི་ཙམ་གྱིས་སྲིངས་ཤིག་།འཕགས་པ་དོག་པ་སུས་སྩོལ་བར་འགྱུར། ཁྱིམ་བདག་དེ་ཉིད་ཀྱིས་སྦྱིན་པར་འགྱུར་རོ། །ཁོ་བོས་ཀྱང་ཁྱོད་ལ་ཅུང་ཞིག་ཉེ་བར་བསྒྲུབ་པར་བྱའོ། །ཉེ་དགའ་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ཏུ་བསོད་སྙོམས་ལ་ཞུགས་ནས་དེ་མཐར་གྱིས་བསོད་སྙོམས་ལ་རྒྱུ་བ་ན། བཙུན་མོ་ཕྲེང་ལྡན་མའི་ཁྱིམ་དུ་ཞུགས་ནས། དེས་དེའི་སྟན་བཏིང་བ་དང ། དེ་དེ་ལ་འདུག་ནས་བཙུན་མོ་ཕྲེང་ལྡན་མས་ཉེ་དགའི་རྐང་པ་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེས་དེ་ལ་ཆོས་བསྟན་ནས་དེས་སྨྲས་པ། འཕགས་པ་ཅི་ལགས། དེང་སྤྱན་དྲངས་སམ། བསོད་སྙོམས་མཛད། བསོད་སྙོམས་བགྱིད་དོ། །དེས་བསམས་པ་སུ་ཞིག་བདག་བས་བསོད་སྙོམས་ཆེས་བཟང་བ་འབུལ་བར་འགྱུར་སྙམ་ནས་དེས་དེ་ལ་ཧཝགས་ཀྱི་ལ་ཐུ་དག་གིས་ལྷུང་བཟེད་བཀང་སྟེ་ཕུལ་ལོ། །ཉེ་དགས་དེ་དག་བླངས་ཏེ་ཐ་ག་པ་དེའི་གན་དུ་སོང་ནས་དེས་དེ་ལ་སྨྲས་པ། བཞིན་བཟངས་ཇེ་ལག་པ་གཉིས་ཟེད་ཅིག་དེས་ལག་པ་གཉིས་བཟེད་པ་དང ། དེས་དེ་ལ་ལ་ཐུ་ཅིག་བྱིན་ནས་སྨྲས་པ། བཞིན་བཟངས་ཇེ་ཟོ་ཤིག་།དེས་དེ་ཟོས་པ་དང ། དེས་དེ་ལ་སྨྲས་པ། བཞིན་བཟངས་ལ་ཐུའི་རོ་ཅི་འདྲ། འཕགས་པ་བདའོ། །ཁྱོད་ཀྱིས་སྔོན་ལན་འགའ་ལ་ཐུ་འདི་འདྲ་བ་ཟོས་སམ། འཕགས་པ་ལན་འགའ་ཡང་མ་འཚལ་ཏོ། །ཐུ་བ་ཟེད་ཅིག་།དེས་ཐུ་བ་བཟེད་པ་དང ། དེས་དེའི་ཐུ་བར་ལ་ཐུ་ཐམས་ཅད་བླུགས་ཏེ་སྨྲས་པ། བཞིན་བཟངས་ཁོ་བོའི་རས་ཡུག་ཆེན་འདི་ལེགས་པར་ཐོགས་ཤིག་།ཁོ་བོས་ཁྱོད་ལ་ཕྱིས་ཀྱང་ལ་ཐུ་ཆུང་ཟད་ཉེ་བར་བསྒྲུབ་པར་བྱས་ཞིང་དུ་འདི་ཙམ་གྱིས་སྐྱེད་ཅིག་།འཕགས་པ་དོག་པ་བས་པར་གྱུར་ན་སུས་སྩོལ་བར་འགྱུར། ཁྱིམ་བདག་དེ་ཉིད་ཀྱིས་སྦྱིན་པར་འགྱུར་རོ། །དེས་རས་ཡུག་ཆེན་དེ་འཐག་པ་ན་དོག་པ་ཟད་ནས་དེ་ཁྱིམ་བདག་དེའི་གན་དུ་སོང་བ་དང ། ཇི་ཙམ་ན་ཁྱིམ་བདག་གི་ཆུང་མ་ནི་མེད། ཁྱིམ་བདག་ནི་འདུག
6.177a
ནས་ཐག་པ་དེས་ཁྱིམ་བདག་དེ་ལ་སྨྲས་པ། ཁྱིམ་བདག་རས་ཡུག་ཆེན་དེ་བཏག་པའི་དོག་པ་ཟད་ཀྱིས་དོག་པ་བྱིན་ཅིག་ཁྱིམ་བདག་དེས་བྱིན་ཏེ་བཏང་ངོ ། །ཡང་འཐག་པ་ན་དོག་པ་ཟད་པ་ནས་དེ་ཡང་ཁྱིམ་བདག་དེའི་གན་དུ་སོང་བ་དང ། ཇི་ཙམ་ན་ཁྱིམ་བདག་ནི་མེད་ཁྱིམ་བདག་གི་ཆུང་མ་ནི་འདུག་ནས་ཐ་ག་པ་དེས་ཁྱིམ་བདག་གི་ཆུང་མ་དེ་ལ་སྨྲས་པ། སྲུ་རས་ཡུག་ཆེན་དེ་བཏག་པའི་དོག་པ་ཟད་ཀྱིས་དོག་པ་བྱིན་ཅིག་།དེས་བྱིན་ཏེ་བཏང་ངོ ། །ཡང་འཐག་པ་ན་ཟད་ནས་དེ་ཁྱིམ་བདག་དེའི་ཁྱིམ་དུ་སོང་བ་དང ། ཅི་ཙམ་ན་ཁྱིམ་བདག་དང་ཁྱིམ་བདག་གི་ཆུང་མ་གཉི་ག་འདུག་ནས་ཐ་ག་པ་དེས་ཁྱིམ་བདག་དེ་ལ་སྨྲས་པ། །ཁྱིམ་བདག་ཡང་རས་ཡུག་ཆེན་དེ་བཏག་པའི་དོག་པ་ཟད་ཀྱིས་ཡང་དོག་པ་བྱིན་ཅིག་།ཁྱིམ་བདག་གི་ཆུང་མས་སྨྲས་པ། ཀྱེ་ཐ་ག་པ་ཅི་རས་ཡུག་ཆེན་དེ་བསྐྱེད་དམ། ཁྱིམ་བདག་གིས་ཆུང་མ་ལ་སྨྲས་པ། བཟང་མོ་ཅི་ཁྱོད་ཀྱིས་ཀྱང་འདི་ལ་དོག་པ་བྱིན་ནམ། སྩལ་ཏོ། །ཁྱིམ་བདག་གིས་སྨྲས་པ། ཀྱེ་ཐ་ག་པ་ཅི་རས་ཡུག་ཆེན་དེ་བསྐྱེད་དམ། ཐ་ག་པས་སྨྲས་པ། ཁྱིམ་བདག་ཅི་དེང་བསྐྱེད་པར་བརྩམས་སྙམ་འམ། ཉི་མ་གང་ཁོ་ན་ལ་བཙུན་པ་ཉེ་དགའ་མཆིས་ནས་འདི་སྐད་ཅེས་སྲིད་ཏུ་འདི་ཙམ་གྱིས་སྲིངས་ཤིག་།ཞེང་དུ་འདི་ཙམ་གྱིས་སྐྱེད་ཅིག་ཅེས་མཆི་བའི་ཉི་མ་དེ་ཁོ་ན་ལ་བསྐྱེད་པར་བརྩམས་སོ། །ཁྱིམ་བདག་གི་ཆུང་མས་བསམས་པ། རས་ཡུག་ཆེན་དེ་ཅི་འདྲ་ཇི་ལྟར་འགྲོའོ་སྙམ་ནས་དེ་དེར་སོང་བ་དང ། ཇི་ཙམ་ཆེན་པོ་ལ་འོས་པའི་རས་ཡུག་ཆེན་མཐོང་ངོ ། །དེ་མཐོང་ནས་དེའི་མིག་ཁྲག་གིས་གང་སྟེ་སྨྲས་པ། ཁོ་མོས་རས་ཡུག་ཆེན་འདི་འཕགས་པ་ཉེ་དགའ་ལ་མི་བྱིན་ནོ། །ཁོ་མོས་དེའི་དོན་དུ་རས་ཡུག་ཆེན་གཞན་ཞིག་འཐག་ཏུ་གཞུག་གོ་ཞེས་ཟེར་ཏེ་སོང་ངོ ། །ཉེ་དགའ་དུས་དང་དུས་སུ་དེར་འོངས་ནས་སྨྲས་པ། ཀྱེ་ཐ་ག་པ་རུང་ངམ། འཕགས་པ་བདག་གི་ནི་རུང་ན་ཁྱོད་ཀྱི་ནི་མི་རུང་ངོ ། །ཀྱེ་ཐ་ག་པ་ཇི་ལྟར་གྱུར། དེས་སྨྲས་པ། ཁྱིམ་བདག་གི་ཆུང་མ་མཆིས་པར་གྱུར་ཏེ་དེས་རས་ཡུག་ཆེན་མཐོང་ནས་དེའི་མིག
6.177b
ཁྲག་གིས་གང་སྟེ། ཁོ་མོས་འཕགས་པ་ཉེ་དགའ་ལ་རས་ཡུག་ཆེན་འདི་མི་སྦྱིན་ནོ། །ཁོ་མོས་དེའི་དོན་དུ་རས་ཡུག་ཆེན་གཞན་འཐག་ཏུ་གཞུག་གོ་ཞེས་མཆི་སྟེ་མཆིས་སོ། །ཀྱེ་ཐ་ག་པ་ཁྱོད་ལ་ཁོ་བོས་ཅུང་ཞིག་བྱས་པ་ཡོད་པ་ཤེས་སམ། དེས་སྨྲས་པ་ཅིའི་སླད་དུ་མ་འཚལ། བདག་ད་དུང་ཡང་ཁྱོད་ཀྱི་ལ་ཐུ་དག་འཚལ་ཞིག་མཆིས་སོ། །ཀྱེ་ཐ་ག་པ་གང་གི་ཚེ་ཁོ་བོ་ཁྱིམ་དེར་འོངས་པར་གྱུར་པ་དེའི་ཚེ་ན་ཁྱོད་ཀྱིས་རས་ཡུག་ཆེན་འདི་ཁྱེར་ཤོག་ཤིག་།འཕགས་པ་ཇེ་བཞུད་ཅིག་དང་བདག་གིས་ཀྱང་ཁ་ཚར་བཀལ་ཏེ་མཆིའོ། །ཉེ་དགའ་དེའི་ཁྱིམ་དུ་སོང་སྟེ་སྒོའི་ཐད་ཀར་འདུག་པ་དང ། ཁྱིམ་བདག་གི་ཆུང་མ་དེས་རྐང་པ་ལ་ཕྱག་འཚལ་ཏེ་ཁ་སྒོར་ལྟ་ཞིང་མདུན་དུ་འདུག་གོ། །ཐ་ག་པ་དེས་ཀྱང་རས་ཡུག་ཆེན་དེའི་ཁ་ཚར་དྲིལ་ནས་དེ་ཁྱེར་ཏེ་དེར་སོང་བ་དང ། ཁྱིམ་བདག་གི་ཆུང་མ་དེས་དེ་ཐག་རིང་པོ་ཁོ་ན་ནས་མཐོང་ནས་དེས་ལག་བརྡས་མ་འོང་ཤིག་ཅེས་བྱས་པ་དང ། ཐ་ག་པ་དེས་ཕྱོགས་བཞིར་རྣམ་པར་བལྟས་ནས་ལྟོས་བཟུང་བས་མགོ་སྨད་དེ་ནང་དུ་ཞུགས་ནས་དེས་རས་ཡུག་ཆེན་དེ་ཁྱིམ་བདག་གི་ཆུང་མ་དེའི་པང་དུ་བཞག་པ་དང ། ཉེ་དགས་ཚམ་ཚོམ་མེད་པར་བླངས་ཏེ་སྨྲས་པ། ཨ་རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། རྣལ་འབྱོར་གྱི་ཚོགས་དང ། དོན་གྱི་མཆོག་འཐོབ་པ་དང ། ལྷ་དང་མི་རྣམས་ཀྱི་གོས་ཐོབ་པར་གྱུར་ཅིག་།ཁྱིམ་བདག་གི་ཆུང་མས་སྨྲས་པ། འཕགས་པ་ཁྱིམ་བདག་གིས་རང་གི་སུག་པ་ནས་དབུལ་གྱིས་སླར་སྩོལ་ཅིག་།ཉེ་དགས་སྨྲས་པ། ཁོ་བོས་འདི་ཇེ་རུང་བར་བྱས། དེའི་འོག་ཏུ་ཁྱིམ་བདག་དྲང་སྲོང་གི་རྒྱལ་མཚན་སྐོན་དུ་གཞུག་གོ། །ཁྱིམ་བདག་གི་ཆུང་མས་སྨྲས་པ། འཕགས་པ་བཅོམ་ལྡན་འདས་ཀྱིས་ཁ་དོག་དཀར་པོ་བསྔགས་སོ། །ཉེ་དགས་སྨྲས་པ། དྲང་སྲོང་གི་རྒྱལ་མཚན་སྐོན་དུ་ཆུག་ཤིག་ཅེས་སྨྲས་ནས་ལངས་ཏེ་སོང་ངོ་།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་ལྔ་པ། ཐ་ག་པས་སྨྲས་པ། ཁྱིམ་བདག་གི་བཙུན་མོ་བདག་ལ་གླ་བྱིན་ཅིག་།དེས་སྨྲས་པ། ཁོ་མོའི་རས་ཡུག་ཆེན་གཅིག་ཀྱང
6.178a
འཕྲོག་ཏུ་བཅུག་ནས་གླ་གཞན་ཡང་དེད་དམ། སོང་ལ་ཁྱོད་ཀྱིས་གང་ལ་རས་ཡུག་ཆེན་བྱིན་པ་དེ་ཉིད་ལ་གླ་དོས་ཤིག་།དེ་ཉེ་དགའི་གན་དུ་སོང་སྟེ་སྨྲས་པ། འཕགས་པ་བདག་ལ་གླ་སྩོལ་ཅིག་།སོང་ལ་ཁྱིམ་བདག་གི་ཆུང་མ་དེ་ཉིད་ལ་དོས་ཤིག་།འཕགས་པ་ཁྱིམ་བདག་གི་མཆིས་བྲང་དེ་མཆིད་འབོ་ཞིང་འདི་སྐད་ཅེས་ཁྱོད་ཀྱིས་གང་ལ་རས་ཡུག་ཆེན་བྱིན་པ་དེ་ཉིད་ལ་གླ་དོས་ཤིག་ཅེས་མཆིའོ། །ཉེ་དགས་སྨྲས་པ། སོང་ཤིག་དང་བྱིན་པར་འགྱུར་རོ། །ཐ་ག་པ་དེ་ཡང་དེའི་གན་དུ་སོང་སྟེ་སྨྲས་པ། ཁྱིམ་བདག་གི་བཙུན་མོ་བདག་ལ་གླ་བྱིན་ཅིག་།དེས་སྨྲས་པ། ཀཝའི་ཁྱོ་ག་ཁྱོད་འདུག་མི་ཕོད་དམ། གལ་ཏེ་འདུག་ན་ནི་འདུག་ཤིག་།མི་འདུག་ན་ཁོ་མོས་ཁྱོད་ཀྱི་མགྲིན་པར་ཆོལ་ཟངས་བཏགས་ཏེ་མཉན་ཡོད་ཐམས་ཅད་ཏུ་བསྐོར་བར་བྱའོ། །ཐ་ག་པ་དེ་ཡང་ཉེ་དགའི་ཐད་ཏུ་སོང་སྟེ་སྨྲས་པ། འཕགས་པ་ཁྱིམ་བདག་གི་མཆིས་བྲང་དེས་བདག་སྤྱོས་ཏེ། ཀཝའི་ཁྱོ་ག་ཁྱོད་འདུག་མི་ཕོད་དམ། གལ་ཏེ་འདུག་ན་ནི་འདུག་ཤིག་མི་འདུག་ན་ཁོ་མོས་ཁྱོད་ཀྱིས་མགྲིན་པར་ཆོལ་ཟངས་བཏགས་ཏེ་མཉན་ཡོད་ཐམས་ཅད་ཏུ་བསྐོར་བར་བྱའོ་ཞེས་མཆི་ཡིས་འཕགས་པས་བདག་ལ་གླ་སྩོལ་ཅིག་།ཉེ་དགས་སྨྲས་པ། ཀྱེ་ནང་རྗེ་གལ་ཏེ་གང་གིས་ཁོ་བོའི་རས་ཡུག་ཆེན་འཐག་ཏུ་བཅུག་པ་དེའི་གླ་ཁོ་བོ་འཇལ་བར་གྱུར་ན་ཁོ་བོའི་ལྷུང་བཟེད་དང་ཆོས་གོས་ཀྱང་མེད་པར་འགྱུར་རོ། །གཞན་ཡང་ཚུར་ཤོག་རྩིས་བྱས་ཁྱོད་ཀྱིས་ཁོ་བོ་ལས་བག་ཕྱེའི་རིན་དང ། ཞུན་མར་དང ། ཧཝགས་ལ་སོགས་པ་ཇི་ཙམ་ཁྱེར་བ་དག་ཁོད་ཅིག་ཅེས་རྩིས་བྱས་པ་དང ། ཇི་ཙམ་ན་ཆེས་ལྷག་པར་ཁྱེར་བར་གྱུར་ནས། ཉེ་དགས་ཐ་ག་པ་དེ་ཡུད་ཙམ་ཞིག་ཉི་ཚན་ལ་བཏགས་ཏེ་བཏང་ངོ ། །ཐ་ག་པ་དེ་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། དེ་ལྟར་ལྷག་པ་ཁོ་ན་བྱའོ་ཞེས་ཟེར་ལ་འབྲི་བ་ཁོ་ནར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས
6.178b
ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གི་ཕྱིར་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པས་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་བཅུག་པ་ལས་དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་ནས་ཐ་ག་པ་ཉེ་དུ་མ་ཡིན་པའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཐ་ག་པ་ཤེས་པར་གྱིས་ཤིག་།གོས་འདི་ཁོ་བོའི་ཕྱིར་འཐག་གིས་ཚེ་དང་ལྡན་པ་ཐ་ག་པ་གོས་འདི་ཞེང་ཆེ་བ་དང ། ཁྲུན་རིང་བ་དང ། ཐར་གྱིས་ཞག་པ་དང ། ཐགས་རན་བཟང་བར་ལེགས་པར་གྱིས་ཤིག་།ཚེ་དང་ལྡན་པ་ཐ་ག་པ་འདི་ལྟར་ཁོ་བོས་གླ་རྔན་འདི་ལྟ་སྟེ། བཟའ་བ་འམ། བཅའ་བ་ཙམ་འམ་བཟའ་རྒྱུ་ཅུང་ཟད་སྦྱིན་ནོ་ཞེས་སྨྲས་ནས། དེ་ལ་གལ་ཏེ་དགེ་སློང་དེས་གོས་བསྒྲུབ་པའི་ཕྱིར་གླ་རྔན་འདི་ལྟ་སྟེ། བཟའ་བ་འམ། བཅའ་བ་ཙམ་འམ། བཟའ་རྒྱུ་ཅུང
6.179a
ཟད་ཅིག་སྦྱིན་ཞིང་གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་ཞེས་བྱ་བ་ནི་ཤཱཀྱའི་བུ་ཉེ་དགའ་འམ་གཞན་ཡང་དེ་ལྟ་བུ་གང་ཡིན་པའོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །ཐ་ག་པ་ཞེས་བྱ་བ་ནི་ཐགས་མཁན་ནོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་འཐག་ཏུ་བཅུག་པ་ལས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་དག་ལས་གང་ཡང་རུང་བའོ། །དེ་ན་གལ་ཏེ་དགེ་སློང་དེ་ལ་ཞེས་བྱ་བ་ནི་ཤཱཀྱའི་བུ་ཉེ་དགའ་ལའོ། །སྔར་མ་བསྟབས་པར་ཞེས་བྱ་བ་ནི་སྔར་མགྲོན་དུ་མ་བོས་པར་རོ། །རྣམ་པར་རྟོག་པ་འགའ་ཞིག་བྱུང་ནས་ཤེས་བྱ་བ་ནི་བསྙེན་བཀུར་བྱེད་པ་འགའ་བྱུང་ནས་སོ། །ཐ་ག་པ་ཉེ་དུ་མ་ཡིན་པའི་གན་དུ་སོང་སྟེ་ཞེས་བྱ་བ་ནི་དྲུང་དུ་སོང་སྟེའོ། །འདི་སྐད་ཅེས་ཚེ་དང་ལྡན་པ་ཐ་ག་པ་ཤེས་པར་གྱིས་ཤིག་།གོས་འདི་ཁོ་བོའི་ཕྱིར་འཐག་གིས་ཤེས་བྱ་བ་ནི་བདག་ཉིད་ཉེ་བར་སྟོན་པར་བྱེད་པའོ། །ཞིང་ཆེ་བ་ཞེས་བྱ་བ་ནི་རྒྱར་ཆེ་བའོ། །ཁྲུན་རིང་བ་ཞེས་བྱ་བ་ནི་ཆུར་རིང་བའོ། །ཐར་གྱིས་ཞག་པ་ཞེས་བྱ་བ་ནི་འཇུར་མདུད་མེད་པའོ། །ཐགས་རན་བཟང་བར་ཞེས་བྱ་བ་ནི་བྱེར་ཟུག་སྙོམས་པ་དང ། ཤས་བཟང་བ་དང ། སད་སེད་མེད་པར་རོ། །བཟའ་བ་འམ་ཞེས་བྱ་བ་ནི་བཟའ་བ་ལྔ་པོ་དག་གོ། །བཅའ་བ་ཙམ་འམ་ཞེས་བྱ་བ་ནི་བཅའ་བ་ལྔ་པོ་དག་གོ། །བཟའ་རྒྱུ་ཞེས་བྱ་བ་ནི་བཟའ་བའི་རྒྱུའོ། །དེ་ལ་གལ་ཏེ་དགེ་སློང་དེས་ཤེས་བྱ་བ་ནི་ཤཱཀྱའི་བུ་ཉེ་དགས་སོ། །གོས་བསྒྲུབ་པའི་ཕྱིར་ཞེས་བྱ་བ་ནི་གོས་ཐོབ་པར་བྱ་བའི་ཕྱིར་རོ། །གོས་གྲུབ་ན་ཞེས་བྱ་བ་ནི་གོས་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས
6.179b
གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་དུ་གོས་བསྒྲུབ་པའི་ཕྱིར་ཁྲི་ལས་ལྡང་བར་བྱེད། གོས་དག་དང ། ཤམ་ཐབས་གོན་པར་བྱེད། ལག་པ་དང ། ལྷུང་བཟེད་འཁྲུ་བར་བྱེད། བསོད་སྙོམས་ལ་འཇུག་པར་བྱེད། བཅའ་བ་ལྔ་དང་བཟའ་བ་ལྔ་དག་སློང་བར་བྱེད། ཐ་ག་པ་ལ་སྦྱིན་པར་བྱེད་ཅིང་ཇི་སྲིད་ཏུ་གོས་ཐོབ་པར་མི་བྱེད་ཀྱི་བར་དུ་ཉེས་བྱས་སུ་འགྱུར་རོ། །གོས་ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །གལ་ཏེ་ཕྱོགས་ག་གེ་མོ་ཞིག་ཏུ་གོས་འཐག་ཏུ་བཅུག་གིས་དེ་ཁྱོད་ཀྱིས་བལྟ་བར་བྱའོ་ཞེས་སྔར་བསྟབས་པར་གྱུར་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཐག་པ་སྐྱེད་པའི་སྤང་བ་སྟེ་ཉི་ཤུ་བཞི་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགའ་བོ་ལ་ལྷན་ཅིག་གནས་པ་ཆོས་ཤེས་བྱ་བ་ངོ་ཚ་ཤེས་པ་འགྱོད་པ་དང་ལྡན་པ་བསྡམས་པ། བསླབ་པ་འདོད་པ་ཞིག་ཡོད་པ་དེས་ཇི་སྲིད་ཏུ་དེ་གནས་ངན་ལེན་ཀུན་ཏུ་སྤྱོད་པར་མི་ཤེས་པ་དེ་སྲིད་ཏུ་དེ་དང་ལྷན་ཅིག་གནས་སོ། །གང་གི་ཚེ་དེས་དེ་གནས་ངན་ལེན་ཀུན་དུ་སྤྱོད་པར་ཤེས་པ་དེའི་ཚེ་ན་དེ་རང་བཞིན་དུ་གནས་པའི་དགེ་སློང་རྣམས་དང་ལྷན་ཅིག་གནས་པར་བརྩམས་ཏེ། བཅོམ་ལྡན་འདས་ཀྱི་བཀའ་ལུང་གིས་དུས་གསུམ་དུ་རྐང་པ་ལ་ཕྱག་འཚལ་དུ་འགྲོ་བ་འབའ་ཞིག་བྱེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་བཅོམ་ལྡན་འདས་དང་ཐབས
6.180a
གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་།དགའ་བོས་ཐོས་ཏེ། ཐོས་ནས་ཀྱང་ཉེ་དགའ་ལ་སྨས་པ། ཚེ་དང་ལྡན་པ་ཉེ་དགའ་ཤེས་པར་གྱིས་ཤིག་།ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་ཚེ་དང་ལྡན་པ་དག་ཤེས་པར་གྱིས་ཤིག་།བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ན། གལ་ཏེ་བདག་ཅག་འདི་ཉིད་ཏུ་འདུག་ན་ནི་སྒོ་འཕར་བརྒྱ་དག་འདས་ཏེ་ཅི་ནས་ཀྱང་ལྟོ་དགང་བ་བསྒྲུབ་པར་བྱ་དགོས་སོ། །ཇི་སྟེ་བཅོམ་ལྡན་འདས་དང་ཐབས་གཅིག་འགྲོ་ན་ནི་བཅོམ་ལྡན་འདས་ཀྱིས་སངས་རྒྱས་གཤེགས་པ་ལ་ཕན་ཡོན་བཅཝ་བརྒྱད་ཡོད་པར་གསུངས་པས་སྲོག་ཆགས་བརྒྱ་སྟོང་ཕྲག་དུ་མ་དག་ཀྱང་བཅོམ་ལྡན་འདས་དང་ཐབས་གཅིག་འགྲོ་བར་འགྱུར་བས། གལ་ཏེ་བཅོམ་ལྡན་འདས་དང་ཐབས་གཅིག་འགྲོ་ན་རེ་ཤིག་ཆུ་ཡང་རྙོག་པ་ཅན་དག་བཏུང་དགོས་པར་འགྱུར་ལ། ཤིང་ལྗོན་པའི་དྲུང་དུ་ཡང་གོ་ཐོབ་པར་མི་འགྱུར་གྱིས་བདག་ཅག་དགེ་སློང་རབ་ཏུ་བཤེས་པ་འགའ་ཞིག་ཁྲིད་དེ། སངས་རྒྱས་དང ། ཆོས་དང ། དགེ་འདུན་གྱི་བསྔགས་པ་བརྗོད་ཅིང་མདུན་དུ་དོང་ན་དེ་ལྟ་ན་བདག་ཅག་བདེ་བར་རྒྱུ་བར་འགྱུར་ཞིང་རྙེད་པ་མང་པོ་ཡང་འགྲུབ་པར་འགྱུར་རོ། །ཉེ་དགས་སྨྲས་པ། སློབ་དཔོན་རེ་ཤིག་གསེར་གྱི་སྣོད་སྤངས་ཏེ་སའི་སྣོད་ཀྱིས་བསོད་སྙོམས་རྒྱུ་བར་བྱེད་དམ། ཁྱོད་ཀྱི་ལྷན་ཅིག་གནས་པ་ཆོས་ལྟ་བུ་ངོ་ཚ་ཤེས་པ། འགྱོད་པ་དང་ལྡན་པ། བསྡམས་པ། བསླབ་པ་འདོད་པ་སུ་ལ་ཡོད། དེས་ཁོ་བོ་མཐོང་བར་ཡང་མི་འདོད་དོ། །སློབ་དཔོན་བཅོམ་ལྡན་འདས་ཀྱིས་བསྡུ་བའི་དངོས་པོ་བཞི་པོ་སྦྱིན་པ་དང ། སྙན་པར་སྨྲ་བ་དང ། དོན་སྤྱོད་པ་དང ། དོན་འཐུན་པ་གང་དག་བཀའ་སྩལ་པ་དེ་དག་ལས་སློབ་དཔོན་གྱིས་འགའ་ཞིག་ཡང་དག་པར་བླངས་ཏེ་འཇུད་པར་བྱས་པ་ཡོད་དམ། དེནི་ཐམས་ཅད་ཀྱི་ཐམས་ཅད་ཏུ་མེད་དོ། །དེའི་ཕྱིར་ཁྱོད་ཀྱི་གནས་སྐབས་དེ་ལྟ་བུ་དེར་གྱུར་ཏོ། །ཚེ་དང་ལྡན་པ་ཆོས་ཀྱི་སྣམ་སྦྱར
6.180b
རྙིངས་ནས་དེས་རས་ཡུག་ཆེན་ཞིག་རྙེད་ནས་བསམས་པ། བདག་སོང་ལ་མཁན་པོ་ལ་ཞུས་ཏེ་སྣམ་སྦྱར་བཙེམ་པར་བྱའོ་སྙམ་ནས། དེས་དེ་ཁྱེར་ཏེ་དགའ་བོའི་གན་དུ་འཕགས་པ་དང ། དེ་འགྲོ་བ་ན་བསོད་སྙོམས་པ་ཞིག་གིས་མཐོང་ནས་དེས་སྨྲས་པ། ཚེ་དང་ལྡན་པ་ཆོས་གར་འགྲོ། དེས་སྨྲས་པ། ཁོ་བོའི་སྣམ་སྦྱར་རྙིངས་ཏེ་ཁོ་བོའི་རས་ཡུག་ཆེན་འདི་རྙེད་པས་བདག་སོང་སྟེ་མཁན་པོ་ལ་ཞུས་ལ་སྣམ་སྦྱར་བཙེམ་པར་བྱའོ། །བསོད་སྙོམས་པས་སྨྲས་པ། གལ་ཏེ་ཁྱོད་སྣམ་སྦྱར་སར་པ་གཞན་འཚེམ་ན་སྣམ་སྦྱར་རྙིང་པ་འདི་ཁོ་བོ་ལ་བྱིན་ཅིག་།དེ་བཞིན་བྱའོ། །དེ་དགའ་བོའི་གན་དུ་སོང་སྟེ་སྨྲས་པ། མཁན་པོ་བདག་གི་སྣམ་སྦྱར་རྙིངས་ཏེ་བདག་གིས་རས་ཡུག་ཆེན་འདི་རྙེད་པས་སྣམ་སྦྱར་བཙེམ་པར་ཞུའོ། །ཉེ་དགས་སྨྲས་པ་སློབ་དཔོན་འདི་ནི་དེའི་དུས་ལགས་སོ། །དགའ་བོས་སྨྲས་པ། ཚེ་དང་ལྡན་པ་ཆོས་ཁོ་བོ་ཉིད་ལ་སྣམ་སྦྱར་ཞིག་ཡོད་པ་དེ་ཁོ་བོས་ཁྱོད་ལ་སྦྱིན་ནོ། །མཁན་པོ་མི་འཚལ་ཏེ་བདག་གིས་རས་ཡུག་ཆེན་འདི་ལས་སྣམ་སྦྱར་དྲུབས་ཏེ་བཅང་བར་བགྱིའོ། །ཉེ་དགས་སྨྲས་པ། ཚེ་དང་ལྡན་པ་ཆོས་ཁོ་བོས་ཀོ་གཞན་ཐོས་ལ་གཞན་མཐོང་སྟེ། ཁོ་བོས་ཁྱོད་ངོ་ཚ་ཤེས་པ། འགྱོད་པ་དང་ལྡན་པ། བསྡམས་པ། བསླབ་པ་འདོད་པ་ཡིན་པར་ཤེས་ཀྱི། ཁོ་བོས་ཁྱོད་འདི་ལྟར་མཁན་པོའི་ཆོས་དང་ལྡན་པའི་ཚིག་གཅོག་པར་མི་ཤེས་སོ། །ཅི་ཁྱོད་མཁན་པོ་དང་མི་མཐུན་པའི་དོན་ཡང་དག་པར་ལེན་པར་བྱེད་དམ། དེ་དགེ་སློང་དབང་ཆེན་པོས་སྨད་པས་ཅང་མི་སྨྲ་བར་འདུག་པ་དང ། དགའ་བོས་ཀྱང་དེ་ལ་སྣམ་སྦྱར་བྱིན་ནོ། །དེས་དེ་བླངས་ནས་སྨྲས་པ། མཁན་པོ་ཁྱོད་རས་ཡུག་ཆེན་འདི་བཞེས་ཤིག་།ཚེ་དང་ལྡན་པ་ཆོས་ཅི་ཁོ་བོས་ཁྱོད་ལ་བརྗེ་བའི་ཕྱིར་སྣམ་སྦྱར་བྱིན་ནས་རས་ཡུག་ཆེན་ཡང་ཁྱོད་ཉིད་ཁྱེར་ཅིག་།དེས་བསམས་པ། བདག་ལ་ཡོ་བྱད་དོན་མེད་པ་འདིས་ཅི་བྱ། བདག་གིས་རས་ཡུག་ཆེན་འདི་དགེ་འདུན་ལ་དབུལ་བར་བྱ་ཞིང་སྣམ་སྦྱར་རྙིང་པ་འདི་ཡང་བསོད་སྙོམས་པ་དེ་ལ་སྦྱིན་པ་མཁན་པོ་ལ་ཞུའོ་སྙམ་ནས་སྨྲས་པ། མཁན་པོ་བདག་གིས་རས་ཡུག་ཆེན་འདི་དགེ་འདུན་ལ་དབུལ་བར་བགྱི་ཞིང་སྣམ་སྦྱར་རྙིང་པ་འདི་ཡང་བསོད་སྙོམས་པ་ཞིག་གིས
6.181a
བསླངས་པས་དེ་ལ་སྩལ་བར་བགྱི་བ་མཁན་པོ་ལ་ཞུའོ། །དེ་བཞིན་གྱིས་ཤིག་།དེས་རས་ཡུག་ཆེན་དེ་དགེ་འདུན་ལ་ཕུལ་ཞིང་སྣམ་སྦྱར་རྙིང་པ་དེ་ཡང་བསོད་སྙོམས་པ་དེ་ལ་བྱིན་ནོ། །ཕྱི་དེ་ཉིན་པར་དེ་སྣམ་སྦྱར་དེ་གྱོན་ཏེ་མཁན་པོའི་རྐང་པ་ལ་ཕྱག་འཚལ་དུ་འོངས་པ་དང ། དགའ་བོས་སྨྲས་པ། ཚེ་དང་ལྡན་པ་ཆོས་ཤེས་པར་གྱིས་ཤིག་།ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་ཚེ་དང་ལྡན་པ་དག་ཤེས་པར་གྱིས་ཤིག་།བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ན། གལ་ཏེ་བདག་ཅག་འདི་ཉིད་དུ་འདུག་ན་ནི་སྒོ་འཕར་བརྒྱ་དག་འདས་ཏེ་ཅི་ནས་ཀྱང་ལྟོ་གང་བ་བསྒྲུབ་པར་བྱ་དགོས་སོ། །ཇི་སྟེ་བཅོམ་ལྡན་འདས་དང་ཐབས་གཅིག་འགྲོ་ན་ནི་བཅོམ་ལྡན་འདས་ཀྱིས་སངས་རྒྱས་གཤེགས་པ་ལ་ཕན་ཡོན་བཅཝ་བརྒྱད་ཡོད་པར་གསུངས་པས་སྲོག་ཆགས་བརྒྱ་སྟོང་ཕྲག་དུ་མ་དག་ཀྱང་བཅོམ་ལྡན་འདས་དང་ཐབས་གཅིག་འགྲོ་བར་འགྱུར་བས་གལ་ཏེ་བཅོམ་ལྡན་འདས་དང་ཐབས་གཅིག་འགྲོ་བ་ན་རེ་ཤིག་ཆུ་ཡང་རྙོག་པ་ཅན་དག་བཏུང་དགོས་པར་འགྱུར་ལ། ཤིང་ལྗོན་པའི་དྲུང་དུ་ཡང་གོ་ཐོབ་པར་མི་འགྱུར་གྱིས། བདག་ཅག་སངས་རྒྱས་དང ། ཆོས་དང ། དགེ་འདུན་གྱི་བསྔགས་པ་བརྗོད་ཅིང་མདུན་དུ་དོང་ན་དེ་ལྟ་ན་བདག་ཅག་བདེ་བར་རྒྱུ་བར་འགྱུར་ཞིང ། རྙེད་པ་མང་པོ་ཡང་འགྲུབ་པར་འགྱུར་རོ། །མཁན་པོ་བཅོམ་ལྡན་འདས་ཀྱིས་སངས་རྒྱས་གཤེགས་པ་ལ་ཕན་ཡོན་བཅཝ་བརྒྱད་མཆིས་པར་བཀའ་སྩལ་པ་གང་དག་ལགས་པ་དེ་དག་མཁན་པོ་ལ་ཉེས་དམིགས་ཁོ་ནར་གྱུར་ཏེ་བདག་ནི་རེ་ཤིག་བཅོམ་ལྡན་འདས་ཉིད་དང་ཐབས་གཅིག་མཆིའོ། །དགའ་བོས་སྨྲས་པ། ཁོ་བོ་དང་ལྷན་ཅིག་འདོང་ངོ ། །དེས་སྨྲས་པ། བཅོམ་ལྡན་འདས་ཉིད་དང་ལྷན་ཅིག་མཆིའོ། །དགའ་བོས་སྤྱོས་ཏེ་སྨྲས་པ། ངན་པ་ཅི་ཁོ་བོས་ཁྱོད་ལ་ཆོས་ལ་ཆོས་ཉིད་བཟང་པོས་སྣམ་སྦྱར་བྱིན་སྙམ་འམ། ཁྱོད་ཁོ་བོ་དང་ལྷན་ཅིག་འགྲོ་བའི་ཕྱིར་བྱིན
6.181b
པ་ཡིན་ན་གལ་ཏེ་ཁོ་བོ་དང་ལྷན་ཅིག་མི་འགྲོ་ན་སྣམ་སྦྱར་འོན་ཅིག་ཁྱོད་ལ་མི་སྦྱིན་ནོ། །ཚེ་དང་ལྡན་པ་ཆོས་ཀྱིས་བསམས་པ། བདག་ལ་ཆོས་གོས་ཕྲོགས་པ་ནི་བླའི་བདག་གནས་ངན་ལེན་ཀུན་དུ་སྤྱོད་པ་དག་དང་ལྷན་ཅིག་ལྗོངས་རྒྱུར་འགྲོ་བ་ནི་མི་རུང་ངོ་སྙམ་ནས་དེས་དེ་ལ་སྣམ་སྦྱར་ཕྱིར་བྱིན་ནོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བ་སྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་བསྐོར་བ། ཐགས་བཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས
6.182a
པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་ཏུ་དུལ་བ། སྤྱོད་ལམ་དང ། སྤྱོད་པ་མ་འཁྲུགས་པ་ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང་མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང ། ལྷག་མཐོང་གིས་བཞུགས་པ་རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ། འཁོར་ཉན་ཐོས་ཆེན་པོ་ཚེ་དང་ལྡན་པ་ལྟེང་རྒྱས་འོད་སྲུང་དང ། ག་ཡ་འོད་སྲུང་དང ། ཆུ་ཀླུང་འོད་སྲུང་ལ་སོགས་པ་སྔོན་གྱི་རལ་པ་ཅན་སྟོང་དང ། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་ལ་སོགས་པ་དགེ་སློང་གི་དགེ་འདུན་མང་པོས་མདུན་དུ་བདར་ཏེ་ཀོ་ས་ལ་དག་ཏུ་ལྗོངས་རྒྱུར་གཤེགས་སོ། །
6.182b
སངས་རྒྱས་བཅོམ་ལྡན་འདས་ལྗོངས་རྒྱུར་གཤེགས་པ་རྣམས་ནི་ཆོས་ཉིད་ཀྱིས་སྐུ་ཐམས་ཅད་ཀྱིས་གཡས་ཕྱོགས་སུ་གླང་པོ་ཆེའི་ལྟ་སྟངས་ཀྱིས་ལ་ལས་ལེགས་པར་མ་བགོས་པ་དང ། ལེགས་པར་མ་བཅངས་པར་མ་གྱུར་ཏམ་སྙམ་དུ་རྣམ་པར་གཟིགས་པར་མཛད་པས་བཅོམ་ལྡན་འདས་ཀྱིས་གཡས་ཕྱོགས་སུ་གླང་པོ་ཆེའི་ལྟ་སྟངས་ཀྱིས་རྣམ་པར་གཟིགས་པ་ན་ཚེ་དང་ལྡན་པ་ཆོས་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ་བ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་དབྱར་གནས་པ་རྣམས་ཀྱིས་ཆོས་གོས་ཀྱི་རྙེད་པ་མ་གྲུབ་འམ། བཅོམ་ལྡན་འདས་གྲུབ་བོ། །འོ་ན་ཅིའི་ཕྱིར་དགེ་སློང་ཆོས་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ། །དེས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་དག་དགེ་སློང་ལ་གོས་བྱིན་ནས་འཕྲོག་པར་བྱེད་དམ། བཙུན་པ་འཕྲོག་པར་བགྱིད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགའ་བོ་ལ་རྨས་པ། དགའ་བོ་ཁྱོད་ཀྱིས་དགེ་སློང་ལ་གོས་བྱིན་ནས་ཡང་ཕྱིར་ཕྲོགས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རུང་བ་མ་ཡིན་པ། རྗེས་སུ་འཐུན་པ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན
6.183a
ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་འཕྲོག་གམ་འཕྲོག་ཏུ་འཇུད་ཅིང ། དེ་ལ་འདི་སྐད་ཅེས་དགེ་སློང་ཁྱོད་ལ་གོས་མི་སྦྱིན་གྱིས་ཕྱིར་བྱིན་ཅིག་ཅེས་ཟེར་ན་དགེ་སློང་དེས་ལྷག་མ་ཡོད་པ་ཕྱིར་སྦྱིན་པར་བྱ་ཞིང་བཏང་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་དགའ་བོ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་ལ་ཞེས་བྱ་བ་ནི་ཆོས་འདི་པའོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། །བྱིན་ནས་ཤེས་བྱ་བ་ནི་ཕྱིར་སྦྱིན་མི་དགོས་པར་རོ་དེའི་འོག་ཏུ་ཞེས་བྱ་བ་ནི་དུས་གཞན་ནའོ། །ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་ཤེས་བྱ་བ་ནི་ཁྲོ་བ་མ་སངས་པར་རོ། །འཕྲོག་གམ་ཞེས་བྱ་བ་ནི་བདག་ཉིད་ཀྱིས་སོ། །འཕྲོག་ཏུ་འཇུད་ཅིང་ཞེས་བྱ་བ་ནི་གཞན་ནོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །ལྷག་མ་ཡོད་པ་ཞེས་བྱ་བ་ནི་དེའི་ལྷག་མ་གང་ཡོད་པའོ། །ཕྱིར་སྦྱིན་པར་བྱ་ཞིང་ཞེས་བྱ་བ་ནི་གཏང་བར་བྱ་ཞིང་ངོ ། །བཏང་ན་ཞེས་བྱ་བ་ནི་ལུས་དང་བྲལ་བར་བྱས་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ལུས་གཡོ་བར་བྱེད་པ་དང ། ཚིག་རྗོད་པར་བྱེད་པ་དང ། དེ་གཉིས་ཀ་དང་ལྡན་པ་དང ། གཞན་དག་གིས་སོ། དེ་ལ་ཇི་ལྟར་ལུས་གཡོ་བར་བྱེད་པས་ཤེ་ན། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་ལུས་ཀྱིས་རྟུལ་བར་བྱེད་ཅིང་འདྲེན་པར་བྱེད་ཁྲིད་པར་བྱེད་ལ། ཚིག་གིས་དགེ་སློང་ཁྱོད་ལ་གོས་མི་སྦྱིན་གྱིས་ཕྱིར་བྱིན་ཅིག་ཅེས་ནི་མི་ཟེར་ན་ཇི་སྲིད་ཏུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་ཉེས་བྱས་སུ་འགྱུར་ལ། གོས་ཀྱི་གྲ་ལུས་ལ་བྲལ་བར་བྱེད་ན་སྤང་བའི་ལྟུང་བྱེད་ཏུ་འགྱུར
6.183b
ཏེ། དེ་ལྟར་ལུས་གཡོ་བར་བྱེད་པས་སོ། །ཇི་ལྟར་ཚིག་རྗོད་པར་བྱེད་པས་ཤེ་ན། དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་ཁྱོད་ལ་གོས་མི་སྦྱིན་གྱིས་ཕྱིར་བྱིན་ཅིག་ཅེས་ཚིག་རྗོད་པར་བྱེད་ལ་ལུས་ཀྱིས་རྟུལ་བར་མི་བྱེད་ན་ཇི་སྲིད་ཏུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། གོས་ཀྱིས་གྲཝ་ལུས་ལས་བྲལ་བར་བྱེད་ན་སྤང་བའི་ལྟུང་བྱེད་ཏུ་འགྱུར་ཏེ། དེ་ལྟར་ཚིག་རྗོད་པར་བྱེད་པས་སོ། །ཇི་ལྟར་དེ་གཉིས་ཀ་དང་ལྡན་པས་ཤེ་ན་དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་ལུས་ཀྱིས་ཀྱང་རྡུལ་བར་བྱེད་ཅིང་ཚིག་གིས་ཀྱང་དགེ་སློང་ཁྱོད་ལ་གོས་མི་སྦྱིན་གྱིས་ཕྱིར་བྱིན་ཅིག་ཅེས་ཟེར་ན་ཇི་སྲིད་ཏུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་ལ། གོས་ཀྱི་གྲཝ་ལུས་ལས་བྲལ་བར་བྱེད་ན་སྤང་བའི་ལྟུང་བྱེད་དུ་འགྱུར་ཏེ། དེ་ལྟར་གཉིས་ཀ་དང་ལྡན་པས་སོ། །ཇི་ལྟར་གཞན་དག་གིས་ཤེ་ན་དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་འཕྲོག་ཏུ་འཇུད་ན་ཇི་སྲིད་དུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་གཉིས་ཀ་ལ་ཉེས་བྱས་རེ་རེར་འགྱུར་ལ། གོས་ཀྱི་གྲཝ་ལུས་ལས་བྲལ་བར་བྱེད་ན་གཉིས་ལ་སྤང་བའི་ལྟུང་བྱེད་རེ་རེར་འགྱུར་རོ། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་མ་འཕྲོག་ཏུ་འཇུད་ན་ཇི་སྲིད་ཏུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་གཉིས་ཀ་ལ་ཉེས་བྱས་རེ་རེར་འགྱུར་ལ། གོས་ཀྱི་གྲཝ་ལུས་ལས་བྲལ་བར་བྱེད་ན་དགེ་སློང་མ་ལ་ཉེས་བྱས་ཉིད་དུ་འགྱུར་ལ། དགེ་སློང་ལ་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློབ་མ་འཕྲོག་ཏུ་འཇུད་ན་ཇི་སྲིད་དུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་གཉིས་ཀ་ལ་ཉེས་བྱས་རེ་རེར་འགྱུར་ལ་གོས
6.184a
ཀྱི་གྲཝ་ལུས་ལས་བྲལ་བར་བྱེད་ན་དགེ་སློབ་མ་ལ་ཉེས་བྱས་ཉིད་ཏུ་འགྱུར་ལ། དགེ་སློང་ལ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་ཚུལ་འཕྲོག་ཏུ་འཇུད་ན། ཇི་སྲིད་ཏུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་གཉིས་ཀ་ལ་ཉེས་བྱས་རེ་རེར་འགྱུར་རོ། །གོས་ཀྱི་གྲཝ་ལུས་ལས་བྲལ་བར་བྱེད་ན་དགེ་ཚུལ་ལ་ཉེས་བྱས་ཉིད་ཏུ་འགྱུར་ལ། །དགེ་སློང་ལ་སྤང་བའི་ལྟུང་བྱེད་ཏུ་འཇུད་ན་ཇི་སིད་དུ་འགྱུར་རོ། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་ཚུལ་མ་འཕྲོག་ཏུ་འཇུད་ན་ཇི་སྲིད་ཏུ་གོས་ཀྱིས་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་གཉིས་ཀ་ལ་ཉེས་བྱས་རེ་རེར་འགྱུར་ལ། གོས་ཀྱི་གྲཝ་ལུས་ལས་བྲལ་བར་བྱེད་ན་དགེ་ཚུལ་མ་ལ་ཉེས་བྱས་ཉིད་དུ་འགྱུར་ལ། དགེ་སློང་ལ་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་ཁྱིམ་པ་འཕྲོག་ཏུ་འཇུད་ན་ཇི་སྲིད་ཏུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་ཁྱིམ་པ་ལ་བསོད་ནམས་མ་ཡིན་པ་མང་པོ་སྐྱེ་བར་འགྱུར་ཞིང ། དགེ་སློང་ལ་ཉེས་བྱས་སུ་འགྱུར་ལ། གོས་ཀྱི་གྲཝ་ལུས་ལས་བྲལ་བར་བྱེད་ན་ཁྱིམ་པ་ལ་བསོད་ནམས་མ་ཡིན་པ་ཆེས་མང་དུ་སྐྱེ་བར་འགྱུར་ཞིང ། དགེ་སློང་ལ་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གིས་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་ཁྱིམ་པ་མོ་འཕྲོག་ཏུ་འཇུད་ན་ཇི་སྲིད་དུ་གོས་ཀྱི་གྲཝ་ལུས་ལས་བྲལ་བར་མི་བྱེད་པ་དེ་སྲིད་ཏུ་ཁྱིམ་པ་མོ་ལ་བསོད་ནམས་མ་ཡིན་པ་མང་དུ་སྐྱེ་བར་འགྱུར་ཞིང་དགེ་སློང་ལ་ཉེས་བྱས་སུ་འགྱུར་ལ། གོས་ཀྱི་གྲཝ་ལུས་ལས་བྲལ་བར་བྱེད་ན་ཁྱིམ་པ་མོ་ལ་བསོད་ནམས་མ་ཡིན་པ་ཆེས་མང་དུ་སྐྱེ་བར་འགྱུར་ཞིང ། དགེ་སློང་ལ་སྤང་བའི་ལྟུང་བྱེད་ཏུ་འགྱུར་ཏེ། དེ་ལྟར་གཞན་དག་གིས་སོ། །དོན་གཞན་དང་འདུལ་བའི་ཡོ་བྱད་ཀྱིས་ནི་ལྟུང་བ་མེད་དོ། །ཇི་ལྟར་དོན་གཞན་གྱིས་ཤེ་ན། འདི་ལྟ་སྟེ། སློབ་དཔོན་དང ། མཁན་པོའི་ལྷན་ཅིག་གནས་པ་དང
6.184b
ཉེ་གནས་དག་འཇིགས་པ་དང་བཅས་པའི་ཕྱོགས་སུ་དུས་མ་ཡིན་པ་དང ། ཆུ་ཀླུང་གི་ཁ་འམ། ཡུར་པོ་ཆེའི་ཁར་འགྲོ་བ་དེ་དག་ལ་སློབ་དཔོན་དང ། མཁན་པོས་ཆོས་རྐུན་པ་དང ། གཡོན་ཅན་དག་གིས་གོས་དག་ཕྲོགས་པར་གྱུར་ན་མི་རུང་ངོ་སྙམ་པས་འཕྲོག་གམ། འཕྲོག་ཏུ་འཇུད་པ་སྟེ། དེ་ལྟར་དོན་གཞན་གྱིས་སོ། །ཇི་ལྟར་འདུལ་བའི་ཡོ་བྱད་ཀྱིས་ཤེ་ན། འདི་ལྟ་སྟེ། དགེ་སློང་རྣམས་ཀྱི་ལྷན་ཅིག་གནས་པ་དང ། ཉེ་གནས་དག་སྡིག་པའི་གྲོགས་པོ་དང ། སྡིག་པའི་ཟླ་བོ་དང ། སྡིག་པའི་སྟེན་གྲོགས་དག་དང་ལྷན་ཅིག་སྡིག་པ་སྟེན་ཅིང་ལམ་དུ་འགྲོ་བར་གྱུར་ན་དེ་དག་ལ་མཁན་པོ་དང ། སློབ་དཔོན་གྱིས་འདི་དག་སྡིག་པའི་གྲོགས་པོ་དང ། སྡིག་པའི་ཟླ་བོ་དང ། སྡིག་པའི་སྟེན་གྲོགས་ལ་སྟེན་པར་གྱུར་ན་མི་རུང་ངོ་སྙམ་པས་གོས་དག་འཕྲོག་ཏུ་འཇུད་པ་སྟེ། དེ་ལྟར་འདུལ་བའི་ཡོ་བྱད་ཀྱིས་སོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཕྲོག་པའི་སྤང་བ་སྟེ་ཉི་ཤུ་ལྔ་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲག་ཤིག་ན་ཁྱིམ་བདག་དད་པ་དང་ལྡན་པ་བཟང་བ་དགེ་བའི་བསམ་པ་ཅན་ཞིག་འདུག་པ་དེས་དགོན་པར་དགེ་འདུན་གྱི་གཙུག་ལག་ཁང་རྟ་བབས་མཐོན་པོ་དང་ལྡན་པ་མཐོང་ཁུང་དང ། སྐར་ཁུང་དྲ་བ་ཅན་དང ། ལན་ཀན་གྱིས་བརྒྱན་པ། སྙིང་དང་མིག་འཕྲོག་པར་བྱེད་པ། མཐོ་རིས་ཀྱི་ཐེམ་སྐས་སུ་གྱུར་པ། ཁྲི་དང ། ཁྲིའུ་དང ། ཡོ་བྱད་ཕུན་སུམ་ཚོགས་པ་ཞིག་བྱེད་དུ་བཅུག་སྟེ། དེ་ན་དགེ་སློང་དྲུག་བཅུ་གནས་པ་དེ་དག་ལ་ཁྱིམ་བདག་དེས་ཆོས་གོས་དང ། བསོད་སྙོམས་ལ་སོགས་པ་མཁོ་བ་སྟོབས་པར་བྱེད་དོ། །དེ་ནས་དུས་གཞན་ཞིག་ན་ཁྱིམ་བདག་དེ་དུས་ཀྱི་ཆོས་དང་ལྡན་པར་གྱུར་ནས་ཁྱིམ་བདག་དེ་ལ་བུ་ཞིག་ཡོད་པ་དེའི་གན་དུ་དགེ་སློང་དེ་དག་དོང་སྟེ་སྨྲས་པ། བཞིན་བཟངས་ཁྱོད་ཀྱི་ཕས་དགེ་སློང་དྲུག་བཅུ་ལ་ཆོས་གོས་དང ། བསོད་སྙོམས་ལ་སོགས་པས་མཁོ་བ་བསྟབས་པ་བྱས་པར་གྱུར་ན་ཁྱོད་ཀྱིས་ཀྱང་ཁོ་བོ་ཅག་དགེ་སློང་དྲུག་བཅུ་ལ་ཆོས་གོས་དང ། བསོད་སྙོམས་ལ་སོགས་པས་མཁོ་བ་སྟོབས
6.185a
པར་བྱེད་ནུས་སམ། དེས་སྨྲས་པ། འཕགས་པ་དག་ལ་ལ་ནི་བརྒྱ་ལ་བསྙེན་བཀུར་བྱེད། ལ་ལ་ནི་སྟོང་ལ། ལ་ལ་ནི་འབུམ་ལ་བསྙེན་བཀུར་བྱེད་པ་ཡང་ཡོད། ལ་ལས་ནི་བདག་ཉིད་ཀྱང་གསོ་བར་དཀའ་བས་བདག་གིས་རྔོ་མི་ཐོག་གོ། །དེ་ནས་དགེ་སློང་དེ་དག་གཙུག་ལག་ཁང་དེ་ནས་དོང་ངོ ། །རྒན་ཞུགས་རི་བྲག་དེ་ཉིད་ནས་རབ་ཏུ་བྱུང་བ་གཉིས་ཤིག་བསོད་སྙོམས་བརྒྱུས་ནས་གཙུག་ལག་ཁང་དེ་ཉིད་ན་འཁོད་དོ། །བྱང་ལམ་ནས་དོན་འཐུན་དག་ལྷགས་ནས་དེ་དག་གིས་གཙུག་ལག་ཁང་དེ་ཐག་རིང་པོ་ཁོ་ན་ནས་མཐོང་ནས་དེ་དག་དེར་དོང་སྟེ་ཚིགས་སུ་བཅད་པའི་སྐད་ཀྱིས་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་ཞུགས་པ་དང ། ཇི་ཙམ་ན་གཙུག་ལག་ཁང་སྟོང་པར་འདུག་ནས་དེ་དག་གིས་བསམས་པ། དགེ་སློང་དག་ནང་དུ་ཡང་དག་འཇོག་ལ་ཞུགས་སམ། ཡང་ན་ཉིན་མོ་སྤྱོད་ཏུ་དོང་གོར་མ་ཆག་སྙམ་ནས་དེ་དག་དེ་ན་ཡོངས་སུ་བསྐོར་བ་ན་རྒན་ཞུགས་དེ་གཉིས་མཐོང་ནས་དེ་དག་གིས་དེ་གཉིས་ལ་སྨྲས་པ་འཕགས་པ་གཉིས་དགེ་སློང་དག་གར་དོང ། དེ་གཉིས་ཀྱིས་སྨྲས་པ། བཞིན་བཟངས་དག་འདི་ན་དགེ་སློང་དག་མི་འཁོད་དོ་ཇི་སླད་ཏུ། ཁྱིམ་བདག་གང་གིས་གཙུག་ལག་ཁང་འདི་བྱེད་ཏུ་བཅུག་པ་དེས་དགེ་སློང་དྲུག་བཅུ་ལ་ཆོས་གོས་དང ། བསོད་སྙོམས་ལ་སོགས་པས་མཁོ་བ་བསྟབས་པར་བྱས་པར་གྱུར་ཏེ་དུས་ཀྱི་ཆོས་དང་ལྡན་པར་གྱུར་ནས་དགེ་སློང་རྣམས་ཀྱིས་དེ་ལ་བུ་ཞིག་ཡོད་པ་དེའི་གན་དུ་སོང་སྟེ་བཞིན་བཟངས་ཁྱོད་ཀྱི་ཕས་དགེ་སློང་དྲུག་བཅུ་ལ་ཆོས་གོས་དང ། བསོད་སྙོམས་ལ་སོགས་པས་བསྟབས་པར་བྱས་པར་གྱུར་ན་ཁྱོད་ཀྱིས་ཀྱང་ཁོ་བོ་ཅག་དགེ་སློང་དྲུག་བཅུ་ལ་ཆོས་གོས་དང ། བསོད་སྙོམས་ལ་སོགས་པས་མཁོ་བ་སྟོབས་པར་བྱེད་ནུས་སམ་ཞེས་སྨྲས་ན། དེ་ན་རེ་འཕགས་པ་དག་ལ་ལ་ནི་བརྒྱ་ལ་བསྙེན་བཀུར་བྱེད། ལ་ལ་ནི་སྟོང་ལ། ལ་ལ་ནི་འབུམ་ལ་བསྙེན་བཀུར་བྱེད་པ་ཡང་ཡོད། ལ་ལས་ནི་བདག་ཉིད་གསོ་བར་དཀའ་བས་བདག་གིས་རྔོ་མི་ཐོག་གོ་ཞེས་ཟེར་ནས་དགེ་སློང་དེ་དག་དོང་ངོ ། །ཁོ་བོ་ཅག་གཉིས་ནི་བསོད་སྙོམས་བརྒྱུས་ནས་གཙུག་ལག་ཁང་འདི་ཉིད་ན་འཁོད་དོ། །དེད་དཔོན་གྱིས་སྨྲས་པ། ཤེས་ལྡན་དག་བདག་ཅག་ཡུན་རིང་པོ་ནས་སྨོན་པ། ཀྱེ་མ་བདག་ཅག་གིས་དགེ་འདུན་གྱི
6.185b
གཙུག་ལག་ཁང་བྱེད་ཏུ་གཞུག་ཅིང་གཙུག་ལག་ཁང་བྱེད་ཏུ་བཅུག་ནས་དགེ་སློང་རྣམས་ལ་མཁོ་བ་བསྟབས་པར་བྱའོ། །སྙམ་ན། གཙུག་ལག་ཁང་འདི་ནི་བྱས་ཟིན་པ་ཡིན་པས་གཙུག་ལག་ཁང་འདི་ཉིད་ཏུ་དགེ་སློང་རྣམས་ལ་མཁོ་བ་བསྟབས་པར་བྱའོ་ཞེས་དེས་རས་ཡུག་ཆེན་བཏིང་སྟེ། ཤེས་ལྡན་དག་ཁྱེད་ཅག་ལས་གང་གིས་ཇི་ཡོངས་སུ་བཏང་བ་དེ་འདིར་ཕུལ་ཅིག་ཅེས་སྨྲས་པ་དང ། དེ་དག་གིས་ཀྱང་ཇི་འབྱོར་བ་དེར་ཕུལ་ནས་དེར་རྙེད་པ་མང་པོ་འདུས་པར་གྱུར་པ་དང་དེད་དཔོན་གྱིས་རྒན་ཞུགས་དེ་གཉིས་ལ་སྨྲས་པ། འཕགས་པ་གཉིས་འདི་ནི་དགེ་སློང་དྲུག་བཅུའི་ཟླ་བ་གསུམ་གྱི་བསོད་སྙོམས་ལགས་སོ། །འདི་ནི་བརྒྱད་སྟོན་དང ། བཅུ་བཞི་སྟོན་དང ། ཉ་སྟོན་གྱི་བསོད་སྙོམས་ལགས་སོ། །འདི་ནི་ན་བའི་རྐྱེན་དང ། སྨན་གྱི་ཡོ་བྱད་ལགས་སོ། །འདི་ནི་རྙེད་པ་ལགས་སོ། །འདི་ནི་ཆོས་གོས་ཀྱི་ཟོང་ལགས་ཀྱིས་དགེ་སློང་བཟང་པོ་དག་སྤྱན་དྲོངས་ཤིག་།བདག་ཅག་དབྱར་འདས་ནས་འདིར་མཆིས་ཏེ་དགེ་སློང་བརྒྱ་ལ་མཁོ་བ་བསྟབས་པར་བགྱིའོ་ཞེས་སྨྲས་ཏེ་དོང་ངོ ། །རྒན་ཞུགས་གཅིག་གིས་སྨྲས་པ། རྒན་ཞུགས་དགེ་འདུན་གྱི་རྙེད་པ་སུས་སྦ་བར་བྱ། ཅིག་ཤོས་ཀྱིས་སྨྲས་པ། གང་གཞོན་པས་སོ། །དེ་གཉིས་ལས་གང་གཞོན་པས་རྙེད་པ་དེ་སྦས་ནས་དེས་སྨྲས་པ། རྒན་ཞུགས་མཉན་ཡོད་ནས་དགེ་སློང་དག་བོད་ན་དེར་གང་འགྲོ་བར་བྱ། རྒན་པས་སྨྲས་པ། གང་གཞོན་པ་འགྲོ་བར་བྱའོ། །གཞོན་པས་སྨྲས་པ། ཁོ་བོས་རྙེད་པ་སྦས་ཀྱིས་ཁྱོད་དེར་སོང་ཤིག་།རྒན་པ་ཤོས་མཉན་ཡོད་ཏུ་དགེ་སློང་སྦྲོན་དུ་སོང་ངོ ། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཚེ་དང་ལྡན་པ་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེས་ཐག་རིང་པོ་ཁོ་ན་ནས་རྒན་ཞུགས་མགོ་སྤྲ་བའི་མེ་ཏོག་ལྟར་སྐྱ་བ་སྨིན་མ་འཕྱང་བ་ཞིག་འོང་བ་དེ་མཐོང་ནས་དེས་བསམས་པ། དགེ་སློང་གནས་བརྟན་ཞིག་འོང་བ་འདི
6.186a
གང་ཡིན་བསུའོ་སྙམ་ནས་དེས་དེ་ལ་གནས་བརྟན་བྱོན་པ་ལེགས་སོ། །བྱོན་པ་ལེགས་སོ། །ཕྱག་འཚལ་ལོ་ཞེས་སྨྲས་པ་དང ། དེ་ན་རེ་སློབ་དཔོན་ཕྱག་འཚལ་ལོ་ཞེས་ཟེར་ནས་ཉེ་དགས་བསམས་པ། ཀྱེ་མ་འདི་ནི་རྒན་ཞུགས་ཤིག་སྟེ་སློབ་དཔོན་ཡང་མི་ཤེས། མཁན་པོ་ཡང་མི་ཤེས་སོ་སྙམ་ནས་དེས་དེ་ལ་སྨྲས་པ། རྒན་ཞུགས་ག་ལས་འོངས། རི་བྲགས་ཀྱི་གཙུག་ལག་ཁང་ག་གེ་མོ་ཞིག་ནས་མཆིས་སོ། །རྒན་ཞུགས་ཅི་དེ་གཙུག་ལག་ཁང་ཡིན་ནམ། འོན་ཏེ་ཕོངས་པ་ཡིན་གཙུག་ལག་ཁང་ནི་ཅི་འདྲ། ཕོངས་པ་ནི་ཅི་འདྲ། གང་ན་ཡོ་བྱད་ཐམས་ཅད་དང་ལྡན་པ་ནི་གཙུག་ལག་ཁང་ཡིན་ལ། གང་ན་ཡོ་བྱད་ཐམས་ཅད་དང་བྲལ་བ་ནི་ཕོངས་པ་ཡིན་ནོ། །དེ་སྔོན་ནི་ཕོངས་པར་གྱུར་ལ། ད་ནི་གཙུག་ལག་ཁང་དུ་གྱུར་ཏོ། །ཇི་ལྟར་གྱུར་བྱང་ལམ་ནས་དོན་འཐུན་དག་ལྷགས་ནས་དེ་དག་གིས་དེར་དགེ་སློང་དྲུག་བཅུའི་ཟླ་བ་གསུམ་གྱི་བསོད་སྙོམས་དང ། བརྒྱད་སྟོན་དང ། བཅུ་བཞི་སྟོན་དང ། ཉ་སྟོན་དང ། ན་བའི་རྐྱེན་སྨན་གྱི་ཡོ་བྱད་དང ། རྙེད་པ་དང ། ཆོས་གོས་ཀྱི་ཟོང་དག་ཕུལ་ནས་འདི་སྐད་ཅེས་འཕགས་པ་དགེ་སློང་བཟང་པོ་དག་བོས་ཤིག་།བདག་ཅག་ཀྱང་དབྱར་འདས་ནས་འདིར་མཆིས་ཏེ་དགེ་སློང་བརྒྱ་ལ་མཁོ་བ་བསྟབས་པར་བགྱིའོ་ཞེས་མཆིའོ། །ཉེ་དགས་སྨྲས་པ། འོན་ཏང་ཁྱོད་དགེ་སློང་རྐུར་འོངས་མོད། ལགས་སོ། རྒན་ཞུགས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང ། བཙུན་མོ་ཕྲེང་ལྡན་མ་དང ། རྒྱལ་རིགས་དབྱར་ཚུལ་མ་དང ། ཁྱིམ་བདག་མགོན་མེད་ཟས་སྦྱིན་དང ། བླ་མཁྱེན་དྲང་སྲོང་བྱིན་དང ། རྙིང་པ་དང ། ཁྱིམ་བདག་གི་ཆུང་མ་རི་དགས་འཛིན་གྱི་མ་ས་ག་དང ། ལེགས་སྐྱེས་དང ། བྲམ་ཟེ་དང ། ཁྱིམ་བདག་དད་པ་ཅན་མང་པོ་གཞན་དག་གིས་ཀྱང་དགེ་སློང་རྣམས་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ཤིང ། དགེ་འདུན་གྱི་གནས་བརྟན་ཉི་མ་རེ་རེ་ཞིང་ཡོན་བཤད་པ་བྱེད་པ་ན་ཡང་གནས་འདིར་དགེ་སློང་གང་དག་མ་འོངས་པ་དེ་དག་ཀྱང་འོང་བར་འགྱུར་ཞིང་འོངས་པ་དག་ཀྱང་མངོན་པར་དགའ་བར་གྱུར་ཅིག་ཅེས་ཟེར་ལ།
6.186b
དེ་དག་ཀྱང་འདི་ལྟ་སྟེ། ཆོས་གོས་དང ། བསོད་སྙོམས་དང ། གནས་མལ་དང ། ན་བའི་རྐྱེན་དང ། སྨན་གྱི་ཡོ་བྱད་དག་གིས་བྲེལ་བ་མེད་ཅིང་བཅོམ་ལྡན་འདས་ཀྱང་མངོན་སུམ་དུ་ཆོས་སྟོན་པར་མཛད་པས་འདི་ན་ཆོས་ཀྱི་ལོངས་སྤྱོད་དང ། ཟང་ཟིང་གི་ལོངས་སྤྱོད་ཕུན་སུམ་ཚོགས་པ་ཡིན་པས་གལ་ཏེ་དགེ་སློང་རྣམས་ཀྱིས་ཁྱོད་དགེ་སློང་རྐུར་འདིར་འོངས་པར་ཤེས་པར་གྱུར་ན་ཁྱོད་གནས་ནས་དབྱུང་བའི་ལས་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། དགེ་སློང་གཞན་ལ་དེ་སྐད་མ་ཟེར་ཅིག་།འདི་ལྟར་ཁོ་བོ་ཅག་མི་དྲུག་རེ་རེ་ལ་ཡང་འཁོར་བཅུ་བཅུ་ཡོད་པས་ཁྱོད་ལ་སྙིང་བརྩེ་བའི་ཕྱིར་འོང་ངོ ། །སློབ་དཔོན་བདག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཆིས་ཏེ་སླད་ཀྱིས་མཆིའོ། །ཉེ་དགས་བསམས་པ། ལྷུང་བཟེད་ནག་པོ་ཅན་འགའ་ཞིག་གིས་འདི་མཐོང་ཞིང་དེ་ཐོས་ནས་དང་པོ་ཁོ་ནར་འགྲོ་བར་གྱུར་ན་མི་རུང་ངོ་སྙམ་ནས་སྨྲས་པ། རྒན་ཞུགས་ཁྱོད་ཀྱིས་ལྷ་ནི་ཡིད་ཀྱིས་བསྐོར་བ་ཡིན་གྱི་ལུས་ཀྱིས་བསྐོར་བ་མ་ཡིན་ནོ་ཞེས་བྱ་བ་མ་ཐོས་སམ། བཅོམ་ལྡན་འདས་ཀྱིས་ཀྱང ། ཆོས་རྣམས་ཡིད་ཀྱིས་འདྲེན་བྱེད་ཅིང ། །ཡིད་གཙོ་ཡིད་ཀྱི་འགྲོས་ཅན་ཡིན་ཞེས་གསུངས་ཀྱིས། འདི་ཉིད་ནས་བཅོམ་ལྡན་འདས་ཀྱི་ཞབས་ལ་ཕྱག་འཚོལ་ཅིག་ཅེས་དེས་དེའི་གཉའ་བ་ནས་བཟུང་སྟེ་རྒན་ཞུགས་སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ་ཞེས་གྱིས་ཤིག་ཅེས་འདུད་ཏུ་བཅུག་གོ། །སློབ་དཔོན་སྐོམ་གྱིས་ཇི་སྐོམ་འཐུང་དུ་མཆིའོ། །འདི་ཉིད་ཏུ་སྡོད་ཅིག་དང་ཁོ་བོས་སྐོམ་གྱིས་ཕོར་བུ་བཀང་སྟེ་ཁྱེར་ཏེ་འོང་ངོ་ཞེས་དེས་སྐོམ་གྱིས་ཕོར་བུ་བཀང་སྟེ་བླུད་ནས་སྨྲས་པ། རྒན་ཞུགས་ད་སོང་ཤིག་ཅེས་དེས་དེ་ཐག་རིང་པོར་བསྐྱལ་ནས་ད་ཕྱིར་མ་ལྡོག་ཅིག་ཅེས་བསྒོ་སྟེ་བདག་ཉིད་ཕྱིར་ལོག་གོ། །དྲུག་སྡེ་དག་གི་ཀུན་དུ་སྤྱོད་པ་ནི་གང་ཆུང་ཟད་ཅི་ཐོས་པ་དེ་ཕྱེམ་བྲེད་ཀྱི་དུས་ཀྱི་ཚེ་གཅིག་ཏུ་འདུས་ནས་ཕན་ཚུན་རྗོད་པར་བྱེད་པ་ཡིན་པས་ཉེ་དགའ་གཙུག་ལག་ཁང་དུ་སོང་སྟེ་དྲུག་སྡེ་རྣམས་ལ་སྨྲས་པ། ཚེ་དང་ལྡན་པ་དག་བདག་ཅག་གིས་ཡུན་ཇི་སྲིད་ཀྱིས་བྲེལ་བ་སྤང་བར་བྱ། ཁྱོད་ཀྱིས་ཐོས་པ་ཆུང་ཞིག་ཡོད་དམ། ཡོད་དེ། རི་བྲགས་ཀྱི་གཙུག
6.187a
ལག་ཁང་ག་གེ་མོ་ཞིག་ཏུ་བྱང་ལམ་ནས་དོན་འཐུན་དག་ལྷགས་ནས་དེ་དག་གིས་དེར་དགེ་སློང་དྲུག་བཅུའི་དབྱར་ཟླ་བ་གསུམ་གྱི་བསོད་སྙོམས་དང ། བརྒྱད་སྟོན་དང ། བཅུ་བཞི་སྟོན་དང ། ཉ་སྟོན་དང ། ན་བའི་རྐྱེན་དང ། སྨན་གྱི་ཡོ་བྱད་དང ། རྙེད་པ་དང་ཆོས་གོས་ཀྱི་ཟོང་དག་ཕུལ་གྱིས་དེར་དོང་ངོ ། །ཅི་དེ་ཉིད་ཏུ་དབྱར་གནས་པར་བྱ་འམ། མི་བྱ་སྟེ། འདི་ལྟར་དབྱར་གྱི་ནང་ཉིད་ཏུ་དེ་དག་ཟོས་ཏེ་འདི་ཉིད་ཏུ་འོངས་ལ་དབྱར་ཕྱི་མ་ཉེ་བར་སྒྲུབ་པའི་དུས་སུ་གནས་པར་ཁས་བླང་བར་བྱའོ། །དེ་དག་དེར་འོང་བ་དང་རྒན་ཞུགས་ཀྱིས་དེ་དག་ཐག་རིང་པོ་ཁོ་ན་ནས་འོང་བ་མཐོང་ནས། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ་ཞེས་དེ་གཉིས་ཀྱིས་དེ་དག་གི་གནས་ཁང་དག་བསྐོས་ཤིང་གནས་མལ་དང ། ཁྲི་དང ། ཁྲིའུ་དང ། ཆུ་ར་དང ། ཕོར་བུ་དང ། ཆུ་ཚགས་དང ། ལྡེ་མིག་ཁྱོག་པོ་དག་ཕོག་གོ། །དེ་དག་གིས་བསམས་པ། བདག་ཅག་དོན་གང་གི་ཕྱིར་ལྷགས་པ་དེ་ཇེ་བརྟག་པར་བྱའོ་སྙམ་ནས་དེ་དག་གིས་སྨྲས་པ། རྒན་ཞུགས་གཉིས་འདིར་རྙེད་པ་ཅི་གྲུབ་པ་དག་ཇི་བལྟས་འོན་ཅིག་།རྒན་ཞུགས་དེ་གཉིས་དྲང་པོའི་རང་བཞིན་ཅན་ཡིན་པས་དེ་གཉིས་ཀྱིས་འདི་ནི་དགེ་སློང་དྲུག་བཅུའི་ཟླ་བ་གསུམ་གྱི་བསོད་སྙོམས་སོ། །འདི་ནི་བརྒྱད་སྟོན་ནོ། །འདི་ནི་བཅུ་བཞི་སྟོན་ནོ། །འདི་ནི་ཉ་སྟོན་ནོ། །འདི་ནི་ན་བའི་རྐྱེན་ཏོ། །འདི་ནི་སྨན་གྱི་ཡོ་བྱད་དོ། །འདི་ནི་འདིའི་རྙེད་པའོ། །འདི་ནི་ཆོས་གོས་ཀྱི་ཟོང་ངོ་ཞེས་རྙེད་པ་དེ་དག་ཐམས་ཅད་བསྟན་ནོ། །དེ་དག་གིས་སྨྲས་པ། ཚེ་དང་ལྡན་པ་དག་རྒན་ཞུགས་སེར་སྣ་ཅན་ཡིན་པས་ཟས་བསོད་པ་སྦྱིན་པར་མི་ནུས་ལ་འདི་ལྟར་རྒན་ཞུགས་འདི་གཉིས་ཀྱིས་དགེ་འདུན་ལ་བསྙེན་བཀུར་བྱས་པས་ཡོངས་སུ་སྤང་བ་སྦྱིན་ནོ་ཞེས་དེ་དག་གིས་དེ་གཉིས་ལ་ཡོངས་སུ་སྤང་བ་སྦྱིན་ནས་དེ་གཉིས་ཀྱང་བདག་ཅག་གཉིས་ཀྱིས་ཡོངས་སུ་སྤང་བ་ཐོབ་བོ་ཞེས་དགའ་བར་གྱུར་ཏོ། །དེ་དག་གིས་སྨྲས་པ། ཚེ་དང་ལྡན་པ་དག་དགེ་སློང་ལྟོ་མདུན་ཅན་འགའ་ཞིག་ལ་བཅོལ་ན་དེས་དགེ་འདུན་ལ་ཉི་མ་རེ་རེ་ཞིང་བཅའ་བ་རྣམ་པ་བཅཝ་བརྒྱད་དང ། ཚོད་མ་སྣུམ་བག་ཅན་མང་པོ་སྣ་ཚོགས་དག་དང ། ལེགས་པར་སྦྱར་བའི་བཏུང་བ་ཡང་འབྲིམ་པར་འགྱུར་རོ་ཞེས་དེ་དག་གིས་དགེ་སློང
6.187b
ལྟོ་མདུན་ཅན་ཞིག་ལ་བཅོལ་བ་དང ། དེས་དེ་དག་ལ་ཉི་མ་རེ་རེ་ཞིང་བཅའ་བ་རྣམ་པ་བཅཝ་བརྒྱད་དང ། ཚོད་མ་སྣུམ་པ་བག་ཅན་མང་པོ་སྣ་ཚོགས་དག་དང ། ལེགས་པར་སྦྱར་བའི་བཏུང་བ་ཡང་འབྲིམ་པར་བྱེད་པས་དུས་ཅུང་ཟད་ཅིག་གིས་བསོད་སྙོམས་ཐམས་ཅད་སྤྱད་པ་དང ། དགེ་བསྐོས་ཀྱིས་རྒན་པའི་མཐའ་ལོགས་སུ་འདུག་སྟེ་སྨྲས་པ། ཚེ་དང་ལྡན་པ་དག་དགེ་འདུན་གྱི་གདུགས་གཅིག་ཁོ་ནའི་སྤྱི་བུངས་ཤིག་མཆིས་སོ། །དེ་དག་གིས་སྨྲས་པ། ཚེ་དང་ལྡན་པ་དག་གང་དག་བསླབ་པ་ཡང་དག་པར་མ་བླངས་པ་དེ་དག་ནི་བརྒྱད་སྟོན་དང ། བཅུ་བཞི་སྟོན་དང ། ཉ་སྟོན་བྱེད་ལ། བདག་ཅག་བསླབ་པ་ཡང་དག་པར་བླངས་པ་དག་དེ་མི་བྱེད་ཀྱིས་དེ་ཡང་བཟའོ་ཞེས་དེ་དག་གིས་དེ་ཡང་ཟོས་པ་དང ། དགེ་བསྐོས་ཀྱིས་ཡང་རྒན་པའི་མཐའ་ལོགས་སུ་འདུག་སྟེ་སྨྲས་པ། ཚེ་དང་ལྡན་པ་དག་ད་ནི་དགེ་འདུན་གྱི་ན་བའི་རྐྱེན་དང་ཡོ་བྱད་དག་གཅིག་མཆིས་སོ། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཇི་སྲིད་དུ་ཉེ་བར་ལེན་པའི་ཕུང་པོ་ལྔ་འཚོ་བ་དེ་སྲིད་ཏུ་བདག་ཅག་རྟག་ཏུ་ནད་པ་ཡིན་པས་ན་བའི་སྨན་དེ་ཡང་བཟའོ་ཞེས་དེ་དག་གིས་དེ་ཡང་ཟོས་ནས་དེ་དག་གིས་སྨྲས་པ། ཚེ་དང་ལྡན་པ་དག་ཁུར་ཡ་གཅིག་ན་འདུག་པར་དཀའ་བ་ཡིན་གྱིས་གོས་ཀྱི་རྙེད་པ་འདི་ཡང་བགོས་ལ། ཁུར་དོ་མཉམ་པས་བདེ་བར་འདོང་བར་བྱའོ་ཞེས་དེ་དག་གིས་དེ་ཡང་བགོས་པ་དང ། དགེ་བསྐོས་ཀྱིས་ཡང་རྒན་པའི་མཐའ་ལོགས་སུ་འདུག་སྟེ་སྨྲས་པ། ད་ནི་དགེ་འདུན་གྱི་གདུགས་གཅིག་ཁོ་ནའི་སྤྱི་བུངས་ལས་མ་མཆིས་སོ། །དེ་དག་གིས་སྨྲས་པ། རྒན་ཞུགས་གཉིས་ཁྱེད་གཉིས་ན་རེ་དགེ་སློང་དྲུག་བཅུའི་ཟླ་བ་གསུམ་གྱི་བསོད་སྙོམས་ཡོད་དོ་ཞེས་ཟེར་ན་དབྱར་གྱི་ནང་དུ་ཟད་པར་གྱུར་ཏོ། །དེ་གཉིས་ཀྱིས་སྨྲས་པ། ཅི་དེ་དག་གིས་བཅའ་བ་རྣམ་པ་བཅཝ་བརྒྱད་དང ། ཚོད་མ་སྣུམ་བག་ཅན་མང་པོ་སྣ་ཚོགས་དག་དང ། ལེགས་པར་སྦྱར་བའི་བཏུང་བ་ཤ་སྟག་རིམས་ཤིག་ཅེས་སྨྲས་སམ། དེ་དག་གིས་སྨྲས་པ། རྒན་ཞུགས་གཉིས་གཉའ་བ་སྨད་དེ་སྤྱོད་སྤྱོད་ལ་ད་སྨོད་པར་བྱེད་ཀྱིས་ཚེ་དང་ལྡན་པ་དག་འདི་གཉིས་གནས་ནས་དབྱུང་བའི་ལས་གྱིས་ཤིག་།ཁ་ཅིག་གིས་སྨྲས་པ། རྒན་ཞུགས་གཉིས་མྱུར་དུ་བཟོད
6.188a
པ་གསོལ་ཅིག་།ཕྱིས་བཟོད་པ་གསོལ་ན་ལྟག་པའི་སྤྱི་བྱི་བར་འགྱུར་རོ། །དེ་གཉིས་ཀྱིས་བཟོད་པ་གསོལ་བར་བརྩམས་པ་དང ། ཁ་ཅིག་གིས་སྨྲས་པ། ཚེ་དང་ལྡན་པ་དག་རྒན་ཞུགས་འདི་གཉིས་དྲང་པོའི་རང་བཞིན་ཅན་ཡིན་གྱིས་འདི་གཉིས་ལ་བཟོད་པ་གྱིས་ཤིག་།དེ་དག་གིས་སྨྲས་པ། རྒན་ཞུགས་གཉིས་བཟོད་པར་བྱའོ། །རི་བྲགས་འདི་ནི་མ་དད་པ་མང་བས་འདིར་བསོད་སྙོམས་ཀྱང་མི་རྙེད་ཀྱིས་གལ་ཏེ་ལྷག་རོལ་ཅུང་ཟད་ཡོད་ན་དེ་ཡང་བྱིན་ཅིག་།འོན་ཏེ་མེད་ན་ནི་ཁོ་བོ་ཅག་འདོང་ངོ ། །ཚེ་དང་ལྡན་པ་དག་ཅི་ཡང་མེད་ཀྱིས་དེང་ཤིག་།དེ་དག་དེ་ནས་དོང་སྟེ་མཉན་ཡོད་ཏུ་སོང་ནས་དེ་དག་དེར་ཕྱིན་པ་དང་དབྱར་ཕྱི་མར་གནས་པར་ཁས་བླངས་སོ། །དབྱར་འདས་པ་དང་དོན་འཐུན་དེ་དག་ཡང་ལྷགས་ནས་དེ་དག་གིས་དེ་བཞིན་དུ་ཚིགས་སུ་བཅད་པའི་སྐད་ཀྱིས་མཆོད་རྟེན་ལ་ཕྱག་འཚལ་ཏེ། གཙུག་ལག་ཁང་དུ་ཞུགས་པ་དང ། ཇི་ཙམ་ན་གཙུག་ལག་ཁང་སྟོང་པར་མཐོང་ནས་དེ་དག་གིས་བསམས་པ། དགེ་སློང་དག་ནང་དུ་ཡང་དག་འཇོག་ལ་ཞུགས་སམ། ཉིན་མོ་སྤྱོད་ཏུ་དོང་གོར་མ་ཆག་སྙམ་ནས། དེ་དག་དེ་ན་ཡོངས་སུ་བསྐོར་བ་ན་རྒན་ཞུགས་དེ་གཉིས་མཐོང་ནས་དེ་དག་གིས་སྨྲས་པ། འཕགས་པ་གཉིས་དགེ་སློང་དག་གར་དོང ། བཞིན་བཟངས་དག་འདི་ན་དགེ་སློང་དག་མི་འཁོད་དོ། །འཕགས་པ་གཉིས་བདག་ཅག་གིས་དགེ་སློང་དྲུག་བཅུའི་ཟླ་བ་གསུམ་གྱི་བསོད་སྙོམས་མ་ཕུལ་ལམ། དེ་གཉིས་ཀྱིས་སྨྲས་པ། དགེ་སློང་དག་ལྷགས་པར་གྱུར་ནས་དེ་དག་གིས་དབྱར་གྱི་ནང་ཉིད་ཏུ་ཐམས་ཅད་ཟོས་ཏེ་དོང་ངོ ། །ཁྱེད་གཉིས་ཀྱིས་དགེ་སློང་གང་དག་ཁྲིད་དེ་འོངས། དྲུག་སྡེ་དག་གོ། །འཕགས་པ་གཉིས་ཁྱེད་གཉིས་རྒྱ་མཚོ་ཆེན་པོར་དོང་ནས་ནོར་བུ་མཆིང་བུ་དག་ཁྱེར་ཏེ་འོངས་སོ། །དེ་ན་དགེ་སློང་གཞན་དག་མེད་དམ་ཅི་ན་དྲུག་སྡེ་དག་ཁྲིད་དེ་འོངས། དེ་དག་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་བདག་ཅག་གི་དད་པའི་མྱུ་གུ་སྐྱེས་མ་ཐག་ཏུ་བཅོམ་མོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང
6.188b
བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཀྱིས་དབྱར་གྱི་རྙེད་པ་དབྱར་གྱི་ནང་དུ་བགོས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་འདི་ལྟར་གདོན་པར་བྱ་སྟེ། དེ་ལྟ་བས་ན་དགེ་སློང་རྣམས་ཀྱིས་དབྱར་གྱི་རྙེད་པ་དབྱར་གྱི་ནང་དུ་བགོ་བར་མི་བྱའོ། །དགེ་སློང་རྣམས་ཀྱིས་དབྱར་གྱི་རྙེད་པ་དབྱར་གྱི་ནང་དུ་བགོ་བར་བྱེད་ན་འགལ་ཚབས་ཅན་དུ་འགྱུར་རོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱི་དང ། ཆོས་བྱིན་གཉིས་ལས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ནི་སྤོང་བ་མ་འཁོར་ཡང་སྤོང་བ་མ་དང་ལྡན་པ་ཡིན་ལ། ཆོས་བྱིན་ནི་མདོ་སྡེའི་མཐའ་པ་འཁོར་ཡང་མདོ་སྡེའི་མཐའ་པ་དང་ལྡན་པ་ཡིན་ཏེ། དེ་གཉིས་དབྱར་ཁང་ཅིག་ཏུ་གནས་པར་ཁས་བླངས་ནས་གང་གི་ཚེ། སྐྱེ་དགུའི་བདག་མོ་ཆེན་མོ་གཽ་ཏ་མཱིའི་འཁོར་རྣམ་པར་ལངས་པར་གྱུར་པ་དེའི་ཚེ་ན་ཆོས་བྱིན་གྱིས་རང་གི་འཁོར་ལ་ནུ་མོ་དག་བཅོམ་ལྡན་འདས་ཀྱིས་དགེ་སློང་མ་རྣམས་ལ་རབ་ཏུ་འབྱུང་བ་དང་རྫོགས
6.189a
པར་བསྙེན་པ་དགེ་སློང་མའི་དངོས་པོ་རྗེས་སུ་གནང་བ་གང་ཡིན་པ་དེ་ཐམས་ཅད་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལས་བརྟེན་པ་ཡིན་ལ། བཅོམ་ལྡན་འདས་ཀྱིས་ཀྱང་གཞན་གྱི་སེམས་སྲུང་བའི་གང་ཟག་ནི་བསོད་ནམས་མང་དུ་སྐྱེད་པར་བྱེད་དོ། །ཞེས་གསུངས་ཀྱིས། ཁྱེད་ཅག་ཀྱང་རེ་ཤིག་མི་རྟག་པ་ཉིད་ཡིད་ལ་བྱ་བ་སྒོམས་ཤིག་ཅེས་འདོམས་པར་བྱེད་ཅིང ། །དེ་དག་ཀྱང་མི་རྟག་པ་ཉིད་ཡིད་ལ་བྱ་བ་སྒོམ་པར་རྩོམ་མོ། །གང་གི་ཚེ་ཆོས་བྱིན་གྱི་འཁོར་རྣམ་པར་ལངས་པར་གྱུར་པ་དེའི་ཚེ་ན་སྐྱེ་དགུའི་བདག་མོ་ཆེན་མོ་གཽ་ཏ་མཱི་ཡང་རང་གི་འཁོར་ལ་ནུ་མོ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་པ་སྤྱོད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་དེ་བླ་ན་མེད་པའི་མཁྱེན་པ་ཐུགས་སུ་ཆུད་པ་གང་ཡིན་པ་དེ་ཐམས་ཅད་ལ་ཕན་པའི་རྒྱུ་ཡིན་ལ། བཅོམ་ལྡན་འདས་ཀྱིས་ཀྱང་གཞན་གྱི་སེམས་སྲུང་བའི་གང་ཟག་ནི་བསོད་ནམས་མང་པོ་སྐྱེད་པར་བྱེད་པར་བྱེད་དོ་ཞེས་གསུངས་ཀྱིས། ཁྱེད་ཅག་ཀྱང་རེ་ཤིག་མི་རྟག་པ་ཉིད་དང་ལྡན་པའི་མདོའ་སྡེའི་མཐའ་དག་ཁ་ཏོན་གྱིས་ཤིག་ཅེས་འདོམས་པར་བྱེད་ཅིང ། དེ་དག་ཀྱང་མི་རྟག་པ་ཉིད་དང་ལྡན་པའི་མདོའ་སྡེའི་མཐའ་དག་ཁ་ཏོན་དུ་བྱེད་པར་རྩོམ་མོ། །དགེ་སློང་མ་དག་དེ་ལྟར་ཕན་ཚུན་སེམས་རྗེས་སུ་སྲུང་བས་དགེ་བའི་ཆོས་རྣམས་ཀྱིས་མི་འཕེལ་ཏེ། ཆུ་མེད་པ་ནས་ཨུཏྤ་ལ་བཞིན་ནོ། །ཆོས་བྱིན་ལ་དགེ་བསྙེན་ས་ག་ཞེས་བྱ་བ་མངོན་པར་དད་པས་དེས་ཡོ་བྱད་ཐམས་ཅད་ཀྱིས་དེ་མགྲོན་དུ་བོས་སོ། །དུས་གཞན་ཞིག་ན་དགེ་བསྙེན་ས་ག་ཆོས་བྱིན་གྱི་རྐང་པ་ལ་ཕྱག་འཚལ་ཏུ་འོངས་པ་དང ། ཆོས་བྱིན་གྱིས་དེ་ལ་སྨྲས་པ། བཞིན་བཟངས་དགེ་སློང་མ་རབ་ཏུ་མང་པོ་དག་དབྱར་ཁང་གཅིག་ཏུ་གནས་པར་ཁས་བླངས་པས་དེ་དག་ཕན་ཚུན་སེམས་རྗེས་སུ་སྲུང་བས་དགེ་བའི་ཆོས་རྣམས་ཀྱིས་མི་འཕེལ་ཏེ་ཆུ་མེད་པ་ནས་ཨུཏྤ་ལ་བཞིན་དུ་གྱུར་ན་ཁྱོད་ཀྱིས་དགེ་སློང་མའི་དགེ་འདུན་གྱི་ཕྱིར་དབྱར་ཁང་བྱེད་དུ་འཇུད་ནུས་སམ། དེས་སྨྲས་པ། འཕགས་མ་བདག་ལ་ཀཱར་ཥཱ་པ་ཎ་དག་ནི་མཆིས་ན་ས་གཞི
6.189b
རྒྱལ་པོ་དབང་བས་ས་གཞིའི་སླད་ཏུ་རྒྱལ་པོ་ལ་གསོལ་བ་མཛོད་ཅིག་དང་དེར་བདག་གིས་དབྱར་ཁང་བགྱིད་ཏུ་སྩལ་ཏོ། །དགེ་སློང་མ་ཆོས་བྱིན་བཙུན་མོ་ཕྲེང་ལྡན་མའི་གན་དུ་སོང་བ་དང ། བཙུན་མོ་ཕྲེང་ལྡན་མས་སྨྲས་པ། འཕགས་མ་བྱོན་པ་ལེགས་སོ། །བྱོན་པ་ལེགས་སོ། །འཕགས་མ་སྐུ་དོན་ཅི་ཞིག་གི་སླད་ཏུ་བྱོན། བདག་དགེ་སློང་མའི་དབྱར་ཁང་ཞིག་བགྱིད་ཏུ་སྩོལ་བར་འཚལ་ན་ས་གཞི་རྒྱལ་པོ་དབང་བས་ས་གཞིའི་སླད་དུ་རྒྱལ་པོ་ལ་གསོལ་བ་བགྱི་བར་འཚལ་ལོ། །འཕགས་མ་ཁྱོད་བཞུད་ཅིག་དང ། བདག་གིས་འཕགས་མའི་སླད་དུ་ལྷ་ལ་གསོལ་བར་བགྱིའོ། །ཆོས་བྱིན་སོང་བ་དང་བཙུན་མོ་ཕྲེང་ལྡན་མ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གན་དུ་སོང་སྟེ་དེས་སྨྲས་པ། ལྷ་ཁྱོད་ཀྱི་ཕོ་བྲང་དུ་འཕགས་མ་ཆོས་བྱིན་བྱོན་པར་གྱུར་པ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །དེ་ཅིའི་སླད་ཏུ་བྱོན། དེ་དགེ་སློང་མའི་དབྱར་ཁང་ཞིག་བགྱིད་ཏུ་སྩོལ་བར་བཞེད་ནས། དོག་ས་རྒྱལ་པོ་མངའ་བས་དོག་སའི་སླད་ཏུ་རྒྱལ་པོ་ལ་གསོལ་བ་བགྱིད་ཅེས་མཆིའོ། །རྒྱལ་པོས་སྨྲས་པ། གལ་ཏེ་འཕགས་མ་ཆོས་བྱིན་རེ་ཤིག་གནས་འདི་ཉིད་ཏུ་བཞེད་ན་ཡང་དེ་འདི་ཉིད་ཏུ་བཞུགས་ལ་རག་སྟེ། ངའི་ཕོ་བྲང་གཞན་དུ་བྱེད་ཏུ་གཞུག་གོ། །གལ་ཏེ་མི་བཞེད་ན་གང་དུ་དགྱེས་པ་དེ་དབྱར་ཁང་བགྱིད་ཏུ་སྩོལ་ལ་རག་གོ། །བཙུན་མོ་ཕྲེང་ལྡན་མས་ཆོས་བྱིན་ལ་ལྷས་འཕགས་མ་ལ་དམ་པ་གསོལ་ཏེ། གལ་ཏེ་འཕགས་མ་ཆོས་བྱིན་གནས་འདི་ཉིད་ཏུ་བཞེད་ན་ཡང་དེ་འདི་ཉིད་ཏུ་བཞུགས་ལ་རག་སྟེ་ངའི་ཕོ་བྲང་གཞན་དུ་བྱེད་ཏུ་གཞུག་གོ། །གལ་ཏེ་མི་བཞེད་ན་གང་དུ་དགྱེས་པ་དེར་དབྱར་ཁང་བགྱིད་དུ་སྩོལ་ལ་རག་ཅེས་བྱུང་ངོ་ཞེས་སྤྲིང་ངོ ། །ཆོས་སྦྱིན་གྱིས་དགེ་བསྙེན་ས་ག་ལ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བདག་ལ་དམ་པ་བྱིན་ཏེ། གལ་ཏེ་འཕགས་མ་ཆོས་བྱིན་རེ་ཤིག་གནས་འདི་ཉིད་ཏུ་བཞུགས་རག་སྟེ་ངའི་ཕོ་བྲང་གཞན་དུ་བྱེད་ཏུ་གཞུག་གོ། །གལ་ཏེ་མི་བཞེད་ན་གང་དུ་དགྱེས་པ་དེར་དབྱར་ཁང་བགྱིད་ཏུ་སྩོལ་ལ་རག་ཅེས་བྱུང་ངོ་ཞེས་སྤྲིང་ངོ ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་རལ་གྲིའི་མཐུ་ཅན་དང །
6.190a
རྒྱལ་རིགས་བཟང་པོ་པ་ཞེས་བྱ་བའི་ཁྲོམ་གཉིས་ཡོད་པ་ལས། རལ་གྲིའི་མཐུ་ཅན་གྱི་ཁྲོམ་དམག་གི་གནས་སུ་སོང་བ་དང ། དེ་དག་གི་ཆུང་མ་རྣམས་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་པར་བྱེད་པས་ཕྱོགས་དེ་གོ་སྐབས་དབེན་པར་གྱུར་ནས་ཆོས་བྱིན་གྱིས་སྨྲས་པ། ཕྱོགས་འདིར་དབྱར་ཁང་བྱེད་ཏུ་ཆུག་ཤིག་།དགེ་བསྙེན་ས་གས་ཕྱོགས་དེར་དབྱར་ཁང་བྱེད་ཏུ་བཅུག་ནས་དགེ་སློང་མ་རྣམས་ཀྱིས་དེར་གནས་པར་བརྩམས་སོ། །རལ་གྲིའི་མཐུ་ཅན་གྱི་ཁྲོམ་དེ་དམག་གི་གནས་ནས་ཕྱིར་འོངས་ཏེ། དེ་དག་གིས་ཆུང་མ་དེ་དག་བཀུག་ཅིང་བཀུག་ཅིང་བརྡེག་པར་བརྩམས་པ་དང ། སྲང་དག་ན་དེ་དག་ངུ་བའི་སྒྲ་རྟའི་སྐད་དང ། གླང་པོ་ཆེའི་སྐད་ལྟ་བུའི་སྐད་མཐོན་པོ་དང ། སྐད་ཆེན་པོ་དག་བྱུང་ངོ ། །དགེ་སློང་མ་རྣམས་ཀྱིས་སྨྲས་པ། འཕགས་མ་བདག་ཅག་དགུང་ཆར་གྱིས་འཇིགས་པ་ས་དང་ལ་ཁའི་འོག་ཏུ་ཞུགས་སོ། །ཆོས་བྱིན་གྱིས་བསམས་པ། འདི་དག་ལས་ཁ་ཅིག་ལ་དགེ་བའི་རྩ་བ་ཡོད་དམ་སྙམ་དུ་བསམས་ན། ཡོད་པར་མཐོང་ངོ ། །སུ་ལ་རག་ལུས་སྙམ་དུ་བསམས་ན་བདག་ཉིད་ལ་རག་ལུས་པར་མཐོང་ནས་དེས་སྨྲས་པ། ནུ་མོ་དག་གདུལ་བ་ལ་ལྟོས་པས་ཐམས་ཅད་བཟོད་པར་བྱའོ། །ཆོས་བྱིན་གྱིས་ཕྱོགས་གཅིག་ཏུ་གྱོ་མོ་སར་པ་བཞག་སྟེ་དགེ་སློང་མ་རྣམས་ལ་སྨྲས་པ། ནུ་མོ་དག་ཁྱེད་ཅག་གང་ལ་སྡེར་ལྷག་ཡོད་པ་དེ་ཐམས་ཅད་གྱོ་མོ་འདིར་ཆུག་ཤིག་།དེ་དག་ལ་སྡེར་ལྷག་ཅི་ཡོད་པ་དེ་ཐམས་ཅད་གྱོ་མོ་དེར་འཇུད་པར་བྱེད་དོ། །དེ་ན་བྱིས་པ་དག་དེར་འོང་བར་གྱུར་ནས་ཆོས་བྱིན་གྱིས་དེ་ན་ཁྱེའུ་གང་དག་ཡིན་པ་དེ་དག་ལ་ནི་འབྲུ་མར་བྱིན་ནས་གཅིག་གིས་གཅིག་གི་མགོ་སྐུད་ཏུ་བཅུག་སྟེ་རང་གི་ལག་གིས་བཅའ་བ་དག་སྦྱིན་པར་བྱེད་དོ། །བུ་མོ་གང་དག་ཡིན་པ་དེ་དག་ལ་ནི་བདག་ཉིད་ཀྱིས་འབྲུ་མར་གྱིས་མགོ་བསྐུས་ནས་རང་གི་ལག་གིས་བཅའ་བ་དག་སྦྱིན་པར་བྱེད་དོ། །བྱིས་པ་དེ་དག་གིས་དེ་དག་ཁྱེར་ཏེ་རང་རང་གི་ཁྱིམ་དག་ཏུ་དོང་བ་དང་དེ་དག་གི་མ་དག་གིས་དྲིས་པ། ཁྱེད་ཅག་ལ་འདི་དག་སུས་བྱིན། དེ་དག་གིས་སྨྲས་པ། འཕགས་མ་ཆོས་བྱིན་གྱིས་སོ། །ཆུང་མ་དེ་དག་གིས་བསམས་པ། དོན་གྱིས་ན་འཕགས་མ་ཆོས་བྱིན་ནི
6.190b
བདག་ཅག་ལ་མ་མའི་བྱ་བ་མཛད་དོ་སྙམ་དུ་རིག་ནས་དེ་མངོན་པར་དད་པར་གྱུར་ཏེ། དེ་དག་གིས་བསམས་པ། གང་གི་ཚེ་བདག་ཅག་གི་ཁྱིམ་ཐབ་དག་དམག་གི་གནས་སུ་འདོང་བ་དེའི་ཚེ་ན་བདག་ཅག་གིས་ཁྱིམ་ཐབ་དག་བསྐྱལ་ནས་འཕགས་མ་ཆོས་བྱིན་ལ་བསྙེན་བཀུར་བྱའོ་སྙམ་མོ། །དུས་གཞན་ཞིག་ན་དེ་དག་གི་ཁྱིམ་ཐབ་དག་དམག་གི་གནས་སུ་འཕགས་པ་དང ། ཆོས་བྱིན་གྱིས་དེ་དག་འདུལ་བའི་དུས་ཤེས་ནས་གཙུག་ལག་ཁང་ཆག་ཆག་བཏབ། ལེགས་པར་བྱུགས། ལྕི་བ་སར་པའི་བྱུག་པས་བསྐུས་ཏེ་འདག་རྫས་དང ། ཆུ་དང་དྲི་དང ། གདུག་པ་དང ། མེ་ཏོག་དང ། པོག་པོར་བཞག་ནས་དགེ་སློང་མ་སྐད་སྙན་པ་དག་བསྐོས་ཏེ་བསྡད་པ་དང ། ཆུང་མ་དེ་དག་ཀྱང་ཁྱིམ་ཐབ་དག་བསྐྱལ་ཏེ་ཆོས་བྱིན་གྱི་དྲུང་དུ་ལྷགས་ནས་ཆོས་བྱིན་གྱིས་དེ་དག་ལ་འདག་རྫས་དང ། ལག་པ་བསྙལ་བའི་ཆུ་དང ། དྲི་དང ། བདུག་པ་དང ། མེ་ཏོག་དང ། པོག་པོར་དག་བྱིན་ནས་ཚིགས་སུ་བཅད་པའི་སྐད་ཀྱིས་མཆོད་རྟེན་ལ་ཕྱག་འཚལ་ཏེ་དགེ་སློང་མའི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་དག་ཀྱང་དེའི་རྐང་པ་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འཁོད་དོ། །ཆོས་བྱིན་གྱིས་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་ཇི་ནས་ཀྱང་དེ་དག་གིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་གིས་བདེན་པ་མཐོང་ནས་སྨྲས་པ། འཕགས་མ་བདག་ཅག་གིས་དགེ་བའི་ཤེས་གཉེན་འཕགས་མ་ལ་བརྟེན་ནས་འཕགས་མས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས
6.191a
ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། འཕགས་མ་བདག་ཅག་ནི་མངོན་པར་ཞུགས་པ་ལགས་སོ། །འཕགས་མ་བདག་ཅག་ནི་མངོན་པར་ཞུགས་པ་ལགས་ཏེ། འཕགས་མ་བདག་ཅག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིས། བདག་ཅག་དགེ་བསྙེན་མར་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་གློ་བ་ཐག་པ་ནས་སྐྱབས་སུ་མཆིའོ། །དེ་དག་མངོན་པར་དད་པར་གྱུར་ནས་ཁྱིམ་ཁྱིམ་དུ་དོང་སྟེ་ཆག་ཆག་བཏབ། ལེགས་པར་བྱུགས། ལྕི་བ་སར་པའི་བྱུག་པས་བསྐུས་ཏེ་སྤྱོད་ལམ་ཞི་བས་འཁོད་དོ། །དེ་དག་གི་ཁྱིམ་ཐབ་དག་དམག་གི་གནས་ནས་ཕྱིར་འོང་བ་ན་བསམས་པ། བདག་ཅག་གི་ཆུང་མ་གླང་པོ་ཆེ་འཚོ་བ་འམ། བ་ལང་རྫི་འམ། སུ་ཞིག་དང་ལྷན་ཅིག་དགའ་མགུར་སྤྱོད་པར་བྱེད་ཅིང་འདུག་སྙམ་མོ། །དེ་དག་གིས་བདག་ཅག་གི་ཁྱིམ་ཐབ་དག་འོངས་ཤེས་ཐོས་སོ། །ཐོས་ནས་ཀྱང་བཤེས་པ་དང་བཅས་པའི་ཚིག་གིས་རྗེའི་སྲས་དག་བྱོན་པ་ལེགས་སོ། །བྱོན་པ་ལེགས་སོ་ཞེས་བསུ་ནས་དེ་དག་རང་རང་གི་ཁྱིམ་དུ་དོང་བ་དང ། དེ་དག་རང་རང་གི་ཆུང་མ་དག་གིས་བསྐུ་མཉེ་དང་དྲིལ་ཕྱི་བྱས་ཏེ་ཁྲུས་བྱས་ནས་ལེགས་པར་བསྐུས་ཏེ་ཟས་བྱིན་ནོ། །དེ་དག་གིས་བསམས་པ། འདི་དག་གི་སྤྱོད་ལམ་འདི་ལྟ་བུ་ནི་སྔོན་མ་བྱུང་ངོ་སྙམ་ནས་དེ་དག་ལ་དྲིས་པ། བཟང་མོ་དག་ཁྱེད་ཀྱི་སྤྱོད་ལམ་འདི་ལྟ་བུ་འདི་སྔོན་མ་བྱུང་བ་ཡིན་ན་ཇི་ལས་གྱུར། དེ་དག་གིས་སྨྲས་པ། རྗེའི་སྲས་དག་འཕགས་མ་ཆོས་བྱིན་གྱིས་བདག་ཅག་ལ་ཇི་ནས་ཀྱང་བདག་ཅག་འཁོར་བ་ན་འཁོར་བ་རྣམས་ལ་སླན་ཆད་ཉོན་མོངས་པ་དེ་ལྟ་བུ་ཀུན་དུ་འབྱུང་བར་མི་འགྱུར་བ་དེ་ལྟར་ཆོས
6.191b
བསྟན་པ་མཛད་དོ། །དེ་དག་གིས་བསམས་པ། འཕགས་མ་ཆོས་བྱིན་ནི་མ་དུལ་བ་འདུལ་བར་མཛད་པ་ཡིན་ཏེ། དེས་འདི་དག་བཏུལ་བ་ལྟ་སྟེ། གང་གི་ཕྱིར་བདག་ཅག་གིས་འདི་དག་བསད་པ་དང ། བཅིང་བ་དང ། བརྡེག་པ་དང ། སྤྱོ་བས་གདུལ་བར་མ་ནུས་པ་དག་འཕགས་མ་ཆོས་བྱིན་གྱིས་ཆོས་བསྟན་པས་བཏུལ་བས་འཕགས་མ་ཆོས་བྱིན་གྱིས་བདག་ཅག་ལ་ཕན་བཏགས་ཀྱིས། བདག་ཅག་གིས་ཀྱང་རྒྱལ་པོ་བལྟས་ཏེ་འཕགས་མ་ཆོས་བྱིན་ལ་བསྙེན་བཀུར་བྱའོ་སྙམ་མོ། །ཆོས་བྱིན་གྱིས་ཀྱང་དེ་དག་གདུལ་བའི་དུས་ཤེས་ནས་གཙུག་ལག་ཁང་ཆག་ཆག་བཏབ། ལེགས་པར་བྱུགས། ལྕི་བ་སར་པའི་བྱུག་པས་བསྐུས་ཏེ་འདག་རྫས་དང ། ཆུ་དང ། དྲི་དང ། བདུག་པ་དང ། མེ་ཏོག་དང ། པོག་པོར་བཞག་ནས་དགེ་སློང་མ་སྐད་སྙན་པ་དག་བསྐོས་ཏེ་བསྡད་པ་དང ། དེ་དག་ཀྱང་རྒྱལ་པོ་བལྟས་ནས་ཆོས་བྱིན་གྱི་དྲུང་དུ་ལྷགས་པ་དང ། ཆོས་བྱིན་གྱིས་དེ་དག་ལ་འདག་རྫས་དང ། ལག་པ་བསྙལ་བའི་ཆུ་དང་དྲི་དང ། བདུག་པ་དང ། མེ་ཏོག་དང ། པོག་པོར་དག་བྱིན་ནས་ཚིགས་སུ་བཅད་པའི་སྐད་ཀྱིས་མཆོད་རྟེན་ལ་ཕྱག་འཚལ་ཏེ་དགེ་སློང་མའི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་དག་ཀྱང་དེའི་རྐང་པ་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འཁོད་དོ། །ཆོས་བྱིན་གྱིས་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་ཅི་ནས་ཀྱང་དེ་དག་གིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་གིས་བདེན་པ་མཐོང་ནས་སྨྲས་པ། འཕགས་མ་བདག་ཅག་གིས་དགེ་བའི་བཤེས་གཉེན་འཕགས་མ་ལ་བརྟེན་ནས་འཕགས་མས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། འཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང ། མཆི་མའི་རྒྱ་མཚོ་ནི་བསྐམས། རུས་པའི་རི་དག
6.192a
ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། འཕགས་མ་བདག་ཅག་ནི་མངོན་པར་ཞུགས་པ་ལགས་སོ། །འཕགས་མ་བདག་ཅག་ནི་མངོན་པར་ཞུགས་པ་ལགས་ཏེ། འཕགས་མ་བདག་ཅག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་གློ་བ་ཐག་པ་ནས་སྐྱབས་སུ་མཆིའོ། །དེ་དག་མངོན་པར་དད་པར་གྱུར་ནས་ཡང་སྨྲས་པ། འཕགས་མ་བདག་ཅག་གིས་ད་ནི་སྲོག་ཆགས་གྲོག་སྦུར་ལ་ཡང་བསམས་བཞིན་དུ་སྲོག་འགུམས་པའི་རྔོ་མི་ཐོག་ལ། བདག་ཅག་ནི་མཚོན་ཆས་འཚོ་བ་ལགས་ན་བདག་ཅག་གིས་ཇི་ལྟར་བསྒྲུབ་པར་བགྱི། ཆོས་བྱིན་གྱིས་སྨྲས་པ། གཞུ་གཞུ་རྒྱུད་མེད་པ་དག་དང ། མདའ་མདེའུ་མེད་པ་དག་དང ། ཤིང་གི་རལ་གྲི་དག་ཐོགས་ཤིག་།དེ་དག་གཞུ་གཞུ་རྒྱུད་མེད་པ་དག་དང ། མདའ་མདེའུ་མེད་པ་དག་དང ། ཤིང་གི་རལ་གྲི་དག་ཐོགས་སོ། །གང་གི་ཚེ་དེ་དག་གིས་བདེན་པ་དག་མཐོང་བ་དེའི་ཚེ་ན་ཕྱིན་ཆད་བརྒྱན་པོས་རྩེ་བར་མི་བྱེད། ཆང་འཐུང་བར་མི་བྱེད། བུད་མེད་གཞན་དག་དང་ལྷན་ཅིག་དགའ་མགུར་སྤྱོད་པར་མི་བྱེད་པས་དེ་དག་ལོངས་སྤྱོད་དག་གིས་ཕྱུགས་པ་དང་ཉེ་བར་བསགས་པར་གྱུར་ཏེ། །དེ་དག་གི་གླང་པོ་ཆེ་དག་དང ། རྟ་དག་ཀྱང་ཡོངས་སུ་མ་སྤྱད་པས་ཚོ་བ་དང ། ལྤགས་པ་དང ། ཤ་དང ། ཁྲག་རྒྱས་པར་གྱུར་ཏོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་རི་བྲགས་པ་ཞིག་ལོག་ནས་དེར་དམག་རུ་གཅིག་བཏང་ན་བཅོམ་པ་དང ། རབ་ཏུ་བཅོམ་པ་དང ། སོ་སོར་བཅོམ་པར་གྱུར་ཏེ་ཕྱིར་འོངས་སོ། །དེ་བཞིན་དུ་རུ་གཉིས་པ་བཏང་ན་དེ་ཡང་བཅོམ་པ་དང ། རབ་ཏུ་བཅོམ་པ་དང ། སོ་སོར་བཅོམ
6.192b
པར་གྱུར་ཏེ་ཕྱིར་འོངས་ནས་བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་རི་བྲགས་པའི་དཔུང་ནི་སྐྱེས་ཤིང་ལྷའི་དཔུང་ནི་ཉམས་ཏེ་གལ་ཏེ་ལྷ་ཉིད་དེར་མ་གཤེགས་ན་རི་བྲགས་པ་བསྒྲུབ་དཀའ་བར་འགྱུར་རོ། །རྒྱལ་པོས་དྲིལ་བསྒྲགས་པ་བྱས་ཏེ་ངའི་ཡུལ་ན་མཚོན་ཆས་འཚོ་བ་ཇི་སྙེད་འཁོད་པ་དེ་དག་ཐམས་ཅད་དེར་འགྲོ་བར་བྱའོ་ཞེས་བསྒོ་ནས། རྒྱལ་པོ་ཡང་དཔུང་གི་ཚོགས་ཡན་ལག་བཞི་པ་གོ་བཀོན་ཏེ་ཆས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་རལ་གྲིའི་མཐུ་ཅན་དང ། རྒྱལ་རིགས་བཟང་པོ་པ་བྱ་བའི་ཁྲོམ་གཉིས་ཡོད་པ་ལས་རལ་གྲིའི་མཐུ་ཅན་གྱི་ཁྲོམ་ནི་མདུན་དུ་འགྲོ་བའི་མི་ཡིན་ལ། རྒྱལ་རིགས་བཟང་པོའི་ཁྲོམ་ནི་ཕྱི་ནས་འོང་བའི་མི་ཡིན་པས་རྒྱལ་པོས་རལ་གྲིའི་མཐུ་ཅན་གྱི་ཁྲོམ་མདུན་དུ་སོང་བའི་མི་དག་ཚོ་ཞིང་ལྤགས་པ་དང ། ཤ་དང ། ཁྲག་རྒྱས་པ་དང ། དེ་དག་གི་གླང་པོ་ཆེ་དག་དང ། རྟ་དག་ཀྱང་ཚོ་ཞིང་ལྤགས་པ་དང ། ཤ་དང ། ཁྲག་རྒྱས་པ་མཐོང་ངོ ། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་ཁྲོམ་འདི་གང་གི་ཡིན། དེ་དག་གིས་སྨྲས་པ། ལྷའི་ཁྲོམ་རལ་གྲིའི་མཐུ་ཅན་ཞེས་བགྱི་བ་མདུན་དུ་མཆི་བ་ལགས་སོ། །རྒྱལ་པོས་རྒྱབ་ཏུ་བལྟས་པ་དང་ཇི་ཙམ་རྒྱལ་རིགས་བཟང་པོ་པའི་ཁྲོམ་གྱི་མི་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པ་དང ། དེ་དག་གི་གླང་པོ་ཆེ་དག་དང ། རྟ་དག་ཀྱང་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པ་མཐོང་ངོ ། །མཐོང་ནས་ཀྱང་བློན་པོ་རྣམས་ལ་སྨྲས་པ། །ཤེས་ལྡན་དག་འདི་གང་གི་ཁྲོམ་ཡིན། དེ་དག་གིས་སྨྲས་པ། ལྷའི་ཁྲོམ་རྒྱལ་རིགས་བཟང་པོ་པ་ཞེས་བགྱི་བ་སླད་བཞིན་མཆི་བ་ལགས་སོ། །རྒྱལ་པོས་སྨྲས་པ། ཤེས་ལྡན་དག་ཅི་འདི་དག་དབང་ཐང་མཉམ་པར་མི་སྦྱིན་ནམ། དེ་དག་གིས་སྨྲས་པ། ལྷ་དབང་ཐང་མཉམ་པར་སྩོལ་ཏོ། །དེ་དག་བོས་ཤིག་།དེ་དག་བོས་པ་དང་རྒྱལ་པོས་དེ་དག་ལ་སྨྲས་པ། ཤེས་ལྡན་དག་ཁྱེད་ཅག་དབང་ཐང་མཉམ་པར་མི་སྦྱིན་ནམ། ལྷ་མཉམ་པར་སྩོལ་ཏོ། །འོ་ན་ཅིའི་ཕྱིར་རལ
6.193a
གྲིའི་མཐུ་ཅན་གྱི་ཁྲོམ་འདི་དག་ནི་འབྱོར་པ་དང ། པགས་པ་དང ། ཤ་དང ། ཁྲག་རྒྱས་པར་གྱུར་ལ། རྒྱལ་རིགས་བཟང་པོའི་ཁྲོམ་ཁྱེད་ནི་རྒུད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར། ལྷ་གལ་ཏེ་བདག་ཅག་ཀྱང་གཞུ་གཞུ་རྒྱུད་མ་མཆིས་པ་དང ། མདའ་མདེའུ་མ་མཆིས་པ་དང ། ཞུགས་ཤིང་གི་རལ་གྲི་དག་ཐོགས་ཤིང་མཚོན་ཆ་དག་བཙོངས་ཤིང་བཙོངས་ཤིང་འཚལ་བར་འགྱུར་ན། བདག་ཅག་ཀྱང་འབྱོར་པ་དང ། ལྤགས་པ་དང ། ཤ་དང ། ཁྲག་རྒྱས་པར་འགྱུར་རོ། །གཞན་ཡང་འདི་དག་གི་གླང་པོ་ཆེ་དག་དང ། རྟ་དག་ནི་ཡོངས་སུ་མ་སྤྱད་ལ། བདག་ཅག་གི་རྟ་དང ། གླང་པོ་ཆེ་དག་ནི་ཡོངས་སུ་སྤྱད་དོ། །རྒྱལ་པོས་དེ་དག་ལ་སྨྲས་པ། །ཤེས་ལྡན་དག་ཁྱེད་དེ་ལྟར་གྱུར་པ་བདེན་ནམ། ལྷ་མད་དོ། །ཅི་ཁྱེད་ཅག་ད་དེར་ཁྲིད་ལ་རི་བྲགས་སུ་གསད་པར་འདོད་དམ། དེ་དག་གིས་སྨྲས་པ། ལྷ་ཅི་ལགས་མཚོན་ཆས་གཡུལ་སྤྲོད་དམ། ་མིས་གཡུལ་སྤྲོད། །རྒྱལ་པོས་སྤྱོས་ཏེ་སྨྲས་པ། །གལ་ཏེ་མཚོན་ཆས་གཡུལ་མི་སྤྲོད་ན་ཁྱེད་ཅག་ཉིད་དེང་ལ་རི་བྲགས་པ་དེ་ཕོབ་ཤིག་ཅེས་སྨྲས་ཏེ་རྒྱལ་པོ་དེ་ཉིད་ནས་ཕྱིར་ལོག་གོ། །རལ་གྲིའི་མཐུ་ཅན་གྱི་ཁྲོམ་དེ་དག་ཆོས་བྱིན་གྱི་གན་དུ་སོང་སྟེ་སྨྲས་པ། འཕགས་མ་བདག་ཅག་རྒྱལ་པོས་དམག་གི་གནས་སུ་བསྐོས་ན་བདག་ཅག་གིས་ཇི་ལྟར་བསླབ་པར་བགྱི། ཆོས་བྱིན་གྱིས་སྨྲས་པ། དེང་ཤིག་དང ། ཁྱེད་ཅག་དེར་དོང་བ་རྣམས་ལ་ཉེས་དམིགས་འགའ་ཡང་འབྱུང་བར་མི་འགྱུར་རོ། །འདི་ལྟར་གང་དང་གང་དུ་འབྲང་འདེབས་པ་དེ་དང་དེར་རྒྱུད་ཆགས་གསུམ་པ་ལྷོགས་ཤིག་།ཉི་མ་གང་ལ་རི་བྲགས་སྐོར་བར་བྱེད་པའི་ཉི་མ་དེ་ལ་མཚན་ཐམས་ཅད་དུ་ཆོས་མཉན་པ་བྱིན་ལ་མི་མཇེད་ཀྱི་བདག་པོ་ཚངས་པ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང ། གནོད་སྦྱིན་གྱི་དམག་དཔོན་ཆེན་པོ་ཉི་ཤུ་རྩ་བརྒྱད་དང ། གནོད་སྦྱིན་གྱི་དམག་དཔོན་ཆེན་པོ་ལྔས་རྩེན་དང ། ཀླུའི་རྒྱལ་པོ་དགའ་བོ་དང ། ཉེ་དགའི་མིང་གིས་ཡོན་བཤད་པ་གྱིས་ཤིག་།དེ་དག་གིས་འཕགས
6.193b
མ་ཆོས་བྱིན་གྱིས་སྨྲས་པ་ལ་མངོན་པར་བསྟོད་པ་དང ། རྗེས་སུ་ཡི་རང་བ་བྱས་ཏེ། འཕགས་ནས་དེ་དག་གང་དང་གང་དུ་འབྲང་འདེབས་པ་དེ་དང་དེར་རྒྱུད་ཆགས་གསུམ་པ་ཀློག་པར་བྱེད་ཅིང ། གང་གི་ཉིན་མོ་རི་བྲགས་སྐོར་བར་བྱེད་པ་དེའི་ཉིན་མོ་མཚན་ཐམས་ཅད་དུ་ཆོས་མཉན་པ་བྱིན་ནས་མི་མཇེད་ཀྱི་བདག་པོ་ཚངས་པ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང ། གནོད་སྦྱིན་གྱི་དམག་དཔོན་ཆེན་པོ་ཉི་ཤུ་རྩ་བརྒྱད་དང ། གནོད་སྦྱིན་གྱི་དམག་དཔོན་ཆེན་པོ་ལྔས་རྩེན་དང ། ཀླུའི་རྒྱལ་པོ་དགའ་བོ་དང ། ཉེ་དགའི་མིང་གིས་ཡོན་བཤད་པ་བྱས་པ་དང ། དེའི་ཚེ་ན་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་རྣམས་གནོད་སྦྱིན་འདུ་བར་འཕགས་པ་དང ། དེས་ཡོན་བཤད་པ་བྱེད་པ་དེ་ཐོས་ནས་དེས་བསམས་པ། བདག་གི་མིང་གིས་ཡོན་བཤད་པ་བྱེད་པ་འདི་སུ་ཞིག་སྙམ་ནས་ཇི་ཙམ་ན་ཆོས་ཀྱི་སྤུན་དག་གནས་མ་ཡིན་པར་བསྐོས་པ་མཐོང་ངོ ། །མཐོང་ནས་ཀྱང་གནོད་སྦྱིན་གྱི་དམག་དཔོན་ཆེན་པོ་ལྔས་རྩེན་ལ་སྨྲས་པ། ངའི་ཆོས་ཀྱི་སྤུན་འདི་དག་གནས་མ་ཡིན་པར་བསྐོས་ཀྱིས་སོང་ལ་རི་བྲགས་དེ་ཕོབ་སྟེ་འདི་དག་ལ་བྱིན་ལ་སྲོག་ཆགས་འགའ་ལ་ཡང་མི་གནོད་པར་གྱིས་ཤིག་།གནོད་སྦྱིན་གྱི་དམག་དཔོན་ཆེན་པོ་ལྔས་རྩེན་གྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་ལས་མཉན་ནས། རིའི་རྩེ་མོ་ལྟ་བུའི་གླང་པོ་ཆེ་དག་དང ། རྔ་མོ་ལྟ་བུའི་རྟ་དག་དང ། གཞལ་མེད་ཁང་ལྟ་བུའི་ཤིང་རྟ་དག་དང ། གནོད་སྦྱིན་གདུག་པ་ལྟ་བུའི་མི་དག་མངོན་པར་སྤྲུལ་ནས་རི་བྲག་པ་དག་གིས་དེ་དག་ཐག་རིང་པོ་ཁོ་ན་ནས་འོང་བ་མཐོང་ངོ ། །དེ་དག་གིས་དེ་དག་མཐོང་ནས་སྐྲག་སྟེ་བསམས་པ། །ཡུལ་དང་སྲོག་ལ་གནོད་གྱུར་ན། །སྐྱེས་བུས་ཀུན་དུ་སྲོག་བསྲུང་བྱ། །བློ་ཡིས་གཉིས་ཀ་དཔྱད་བྱས་ན། །ཡུལ་ནི་ཡང་རྙེད་སྲོག་རྣམས་མིན། །སྙམ་ནས་དེ་དག་གིས་རལ་གྲི་མགུལ་དུ་བཏགས་ཏེ་རི་བྲག་ནས་བྱུང་བ་དང ། དེ་དག་གིས་དེ་དག་བཟུང་ནས་སྒྱུ་དཔྱ་དང་བཅས་ཏེ་མཉན་ཡོད་ཏུ་བདས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གན་དུ་དོང་སྟེ་སྨྲས་པ། ལྷ་རི་བྲག་པ་ནི་འདི་ལགས། སྒྱུ་དཔྱ་ནི་འདི་དག་ལགས་སོ། །རྒྱལ་པོ་དགའ་ནས་དེས་སྨྲས་པ། ཤེས་ལྡན་དག་སྒྱུ་དཔྱ
6.194a
དག་ཁྱེད་ཅག་ཉིད་ཁྱེར་ཅིག་།དེ་དག་གིས་བསམས་པ། བདག་ཅག་གསོན་ཞིང་ལྷགས་པ་གང་ཡིན་པ་དེ་ཐམས་ཅད་འཕགས་མ་ཆོས་བྱིན་གྱི་མཐུ་ཡིན་པས་བདག་ཅག་དོང་ལ་སྒྱུ་དཔྱ་འདི་དག་འཕགས་མ་ཆོས་བྱིན་ལ་དབུལ་ལོ་སྙམ་ནས་དེ་དག་གིས་དེ་དག་ཁྱེར་ཏེ་ཆོས་བྱིན་གྱི་གན་དུ་དོང་ནས་སྨྲས་པ། འཕགས་མ་བདག་ཅག་སོན་ཞིང་ལྷགས་པ་དང ། བདག་ཅག་གི་དཔལ་དང་སྐལ་བ་བཟང་པོ་ཕུན་སུམ་ཚོགས་པ་གང་ལགས་པ་དེ་ཐམས་ཅད་འཕགས་མ་ཁོ་ནའི་མཐུ་ལགས་ཀྱིས། རྒྱལ་པོས་བདག་ཅག་ལ་སྒྱུ་དཔྱ་སྩལ་བ་འདི་དག་འཕགས་མས་ཐུགས་བརྩེ་བའི་སླད་ཏུ་བཞེས་སུ་གསོལ། དེས་སྨྲས་པ། བུ་དག་ལྷ་རྣམས་ཀྱི་ནང་དུ་ཡང་ལྷ་དབུལ་བ་ཡོད་ཀྱིས་སངས་རྒྱས་དང ། ཆོས་དང ། དགེ་འདུན་ལ་མཆོད་པ་གྱིས་ཤིག་དང ། དེས་ཁྱེད་ཅག་གི་ཡུན་རིང་པོའི་དོན་དང ། ཕན་པ་དང ། བདེ་བར་འགྱུར་རོ། །དེ་དག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་སྤྱན་དྲངས་ནས་དེ་དག་སྔ་དྲོ་ནི་སངས་རྒྱས་དང ། ཆོས་དང ། དགེ་འདུན་ལ་མཆོད་པ་དག་བྱེད། ཕྱི་དྲོ་ནི་ཆོས་ཉན་པར་བྱེད་དོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་དྲུག་པ། དུས་གཞན་ཞིག་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་རི་བྲག་པ་གཞན་ཞིག་ལོག་ནས་རྒྱལ་པོས་རྒྱལ་རིགས་བཟང་པོ་པའི་ཁྲོམ་ལ་བསྒོ་བ། དེང་ལ་རི་བྲག་པ་དེ་ཕོབ་ཤིག་།དེ་དག་གིས་སྨྲས་པ། ལྷ་བདག་ཅག་ནི་རྒུད་པ་ལགས་ལ། རལ་གྲིའི་མཐུ་ཅན་གྱི་ཁྲོམ་ནི་འབྱོར་པ་ལགས་ན། འདིའི་ཚེ་དེ་དག་ལ་བཀའ་སྩལ་ཅིང་བདག་ཅག་རེས་གཞན་ལ་མཆི་བར་ཅི་གནང ། རྒྱལ་པོས་རལ་གྲིའི་མཐུ་ཅན་གྱི་ཁྲོམ་ལ་བསྒོ་བ། དེང་ལ་རི་བྲགས་པ་ཆེ་གེ་མོ་ཞིག་ཕོབ་ཤིག་།དེ་དག་གིས་སྨྲས་པ། ལྷ་བདག་ཅག་གིས་རེས་ཁོར་ལགས་སོ། །དེང་ཤིག་དང་རེས་གཞན་ལ་མི་བཏང་ངོ ། །དེ་དག་གིས་བསམས་པ། དེའི་ཚེ་ནི་བདག་ཅག་གིས་གནོད་སྦྱིན་གྱི་དམག་དཔོན་ཆེན་པོ་ལྔས་རྩེན་གྱི་མཐུས་རི་བྲགས་པ་དེ་ཕབ
6.194b
ཀྱི། ད་ནི་བདག་གིས་དེ་ཉིད་དུ་འཆི་བར་བྱ་དགོས་པར་འགྱུར་བས་འདི་ལྟར་བདག་ཅག་གིས་འཕགས་པ་དག་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་སྤྱན་དྲངས་པ་དེ་དག་ལ་ཆོས་གོས་དག་ཕུལ་ཏེ་འདོད་པར་བྱའོ་སྙམ་ནས། དེ་དག་ཆོས་གོས་དག་ཐོགས་ཏེ་གཙུག་ལག་ཁང་དུ་དོང་ནས་དགེ་སློང་རྣམས་ལ་སྨྲས་པ། འཕགས་པ་དག་བདག་ཅག་རྒྱལ་པོས་དམག་གི་གནས་སུ་བཏང་སྟེ། གལ་ཏེ་ན་བདག་ཅག་དེ་ཉིད་ཏུ་འགུམ་པར་འགྱུར་བ་གང་ལགས་པ་དེ་ལྟ་བུའི་གནས་ཀྱང་མཆི་བར་འགྱུར་བས་ཆོས་གོས་འདི་དག་བཞེས་སུ་གསོལ། དགེ་སློང་རྣམས་ཀྱིས་སྨྲས་པ། བཞིན་བཟངས་དག་བཅོམ་ལྡན་འདས་ཀྱིས་དགེ་སློང་རྣམས་ཀྱིས་དབྱར་གྱི་ནང་དུ་བགོ་བར་མི་བྱའོ་ཞེས་བསླབ་པའི་གཞི་བཅའ་བ་མཛད་པས་བདག་ཅག་མི་ལེན་ཏོ། །དེ་དག་གིས་སྨྲས་པ། འཕགས་པ་དག་ཁྱེད་ཅག་གིས་བཞེས་ཏེ་ཞོག་ལ་དགག་དབྱེ་བགྱིས་ནས་བགོ་བར་མཛད་ཅིག་ཅེས་དེ་དག་གིས་དེ་དག་གི་གནས་ཁང་དུ་བཅུག་སྟེ་དོང་ངོ ། །དེ་དག་འཕགས་པ་དག་ཁྱིམ་བདག་མགོན་མེད་ཟས་སྦྱིན་གྱིས་མཐོང་ནས་སྨྲས་པ། ཤེས་ལྡན་དག་གར་འདོང ། ཁྱིམ་བདག་དམག་གི་གནས་གནས་སུ་མཆིའོ། །ཁྱེད་ཀྱིས་རེས་མ་ཁོར་རམ། ཁྱིམ་བདག་རེས་ཁོར་རོ། །འོ་ན་ཅིའི་ཕྱིར་འདོང ། ལྷའི་ཞལ་ནས་དེང་ཤིག་དང་རེས་གཞན་དུ་མི་བཏང་ངོ་ཞེས་བྱུང་ངོ ། །ཁོ་བོས་ལྷ་ལ་ཞུས་དེའི་བར་དུ་ཡུད་ཙམ་ཞིག་སྡོད་ཅིག་།དེ་རྒྱལ་པོའི་གན་དུ་སོང་སྟེ་སྨྲས་པ། ལྷས་རལ་གྲིའི་མཐུ་ཅན་གྱི་ཁྲོམ་གང་དུ་བཀའ་སྩལ། ཁྱིམ་བདག་རི་བྲགས་པ་ཆེ་གེ་མོ་ཞིག་ལོག་ནས་དེ་འབེབས་སུའོ། །ལྷ་དེ་དག་གིས་རེས་མ་ཁོར་རམ། ཁྱིམ་བདག་རེས་ཁོར་རོ། །འོ་ན་ཇི་སླད་ཏུ་བཀའ་སྩལ། རེས་གཞན་དུ་མི་བཏང་བར་བྱས་སོ། །ཅི་ལྷས་གཞུ་གཞུ་རྒྱུད་མ་མཆིས་པ་དང ། མདའ་མདེའུ་མ་མཆིས་པ་དང ། ཞུགས་ཤིང་གི་རལ་གྲི་ཐོགས་པ་དེ་དག་གིས་རི་བྲགས་པ་དག་མི་ཕེབས་པར་མི་མཁྱེན་ཏམ། གཞན་ཡང་དེ་དག་ནི་སངས་རྒྱས་ཀྱི་སྲས་ཤ་སྟག་སྟེ། དེ་དག་གིས་སྲོག་ཆགས་གྲོག་སྦུར་ལ་ཡང་བསམས་བཞིན་དུ་སྲོག་འགུམས་པའི་རྔོ་མི་ཐོག་གོ། །འདི་ལྟར་དེའི་ཚེ་ཡང་དེ་དག་གིས་གནོད་སྦྱིན་གྱི་དམག
6.195a
དཔོན་ཆེན་པོ་ལྔས་རྩེན་གྱི་མཐུས་རི་བྲག་པ་དེ་ཕབ་བོ། །འདི་ལྟར་དེ་དག་དེར་མཆིས་སུ་ལགས་ན་ནོངས་དམིགས་འགའ་ཞིག་ཀྱང་འབྱུང་བར་འགྱུར་ཞིང ། དེས་ལྷ་ལ་ཡང་མ་ལེགས་པར་འགྱུར་གོར་མ་བཀུམ་མོ། །ཁྱིམ་བདག་ཇི་དེ་དག་སངས་རྒྱས་ཀྱི་སྲས་ཤ་སྟག་ཡིན་ནམ། ལྷ་དེ་ལགས་ཏེ་དེ་དག་གིས་དགེ་བའི་བཤེས་གཉེན་འཕགས་མ་ཆོས་བྱིན་ལ་བརྟེན་ནས་ཐམས་ཅད་ཀྱིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ཕྱིན་ཆད་ཁྱེད་ཀྱིས་དམག་དཔོན་འཕགས་སྐྱེས་པོ་ལ་བསྒོ་བར་བྱའི། རལ་གྲིའི་མཐུ་ཅན་གྱི་ཁྲོམ་ལ་བསྒོ་བར་མི་བྱའོ་དེ་ནས་རལ་གྲིའི་མཐུ་ཅན་གྱི་ཁྲོམ་དེ་དག་ཕྱིར་མཁོས་སུ་ཕབ་ནས་དགེ་སློང་རྣམས་ཀྱིས་དགག་དབྱེ་བྱས་པའི་ཚེ་དགེ་སློང་དེ་དག་དེ་དག་གི་གན་དུ་དོང་སྟེ་སྨྲས་པ། བཞིན་བཟངས་དག་ཁོ་བོ་ཅག་དགག་དབྱེ་བྱས་ཀྱིས་ཆོས་གོས་དག་བྱིན་ཅིག་།འཕགས་པ་དག་བདག་ཅག་གིས་ཆོས་གོས་དག་ཕུལ་ལགས་ཀྱིས་དེ་དག་བཞེས་ཤིག་།དགེ་སློང་དེ་དག་དོང་སྟེ་གནས་ཁང་སྒོ་ཕྱེ་བ་དང ། ཕྱོགས་དེས་སྣུམ་ཞིང་མངར་བས་ཆོས་གོས་དེ་དག་སྲིལ་དག་གིས་རྨུགས་ཏེ་རྡུལ་དུ་བརླགས་ཏེ་འདུག་པར་སྣང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གོས་སྦེད་པའི་དགེ་སློང་བསྐོ་བར་བྱ་སྟེ། གོས་སྦེད་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ནི་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། གོས་ཀྱི་རྙེད་པ་སྦས་པ་དང་མ་སྦས་པ་མི་ཤེས་པའོ། །གོས་སྦེད་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། གོས་སྦས་པ་དང་མ་སྦས་པ་ཤེས་པའོ། །འདི་ལྟར
6.195b
བསྐོ་བར་བྱ་སྟེ། ཇི་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དབྱར་དགེ་འདུན་གྱི་རྙེད་པ་སྦེད་པར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ་དེའི་འོག་ཏུ་གནས་མལ་བཤམ་པ་བྱས་ཏེ། གན་ཌི་བརྡུངས་ནས་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་པར་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ་དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་པར་བསྐོ་སྟེ། དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དབྱར་དགེ་འདུན་གྱི་གོས་ཀྱི་རྙེད་པ་སྦེད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་རྣམས་དང ། བསླབ་པ་ལ་གུས་པ་རྣམས་དང ། བསླབ་པ་ལ་ཡོ་བྱད་བསྙུངས་པ་རྣམས་དང ། ཕྲི་བ་རྣམས་དང ། སྦྱངས་པའི་ཡོན་ཏན་རྣམས་དང ། མཛེས་པ་རྣམས་དང ། དྲོད་རིག་པ་རྣམས་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་པ་འདི་ནི་གནང་བ་ཡིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར
6.196a
བྱ་སྟེ། དགེ་སློང་གིས་སྟོན་ཟླ་ཐ་ཆུང་ཉར་ཞག་བཅུས་མ་ཚང་བ་ཚུན་ཆད་དུ་བརྟད་པ་ལས་བྱུང་བའི་གོས་ཤིག་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །བླངས་ནས་གོས་སྦྱིན་པའི་དུས་ཀྱི་བར་དུ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །སྟོན་ཟླ་ཐ་ཆུངས་ཉར་ཞག་བཅུས་མ་ཚང་བ་ཚུན་ཅད་ཏུ་ཞེས་བྱ་བ་ནི་ཞག་བཅུ་ན་དགག་དབྱེ་འབྱུང་བ་ཚུན་ཆད་ཏུའོ། །བརྟད་པ་ལས་བྱུང་བའི་གོས་ཤིག་ཅེས་བྱ་བ་ནི་བརྟད་པ་ལས་བྱུང་བའི་གོས་ལྔ་པོ་དག་སྟེ། ལྔ་གང་ཞེ་ན། ནད་པ་ལ་སྦྱིན་པ་དང ། ནད་པའི་ཕྱིར་སྦྱིན་པ་དང ། འཆི་བ་ལ་སྦྱིན་པ་དང ། ཤི་བའི་ཕྱིར་སྦྱིན་པ་དང ། འགྲོ་བར་ཆས་པ་ལ་སྦྱིན་པའོ། །རྙེད་པ་ལ་ཞེས་བྱ་བ་ནི་གཞན་ལས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །གོས་དེ་ཞེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་ལས་གང་ཡང་རུང་བའོ། །བླང་བར་བྱའོ་ཞེས་བྱ་བ་ནི་བདག་གིར་བྱ་བའོ། །བླངས་ནས་གོས་སྦྱིན་པའི་དུས་ཀྱི་བར་དུ་བཅང་བར་བྱའོ་ཞེས་བྱ་བ་ནི་སྦ་བར་བྱའོ། །དགེ་སློང་གི་གོས་སྦྱིན་པའི་དུས་ནི་གང་ཡིན། དུས་མ་ཡིན་པ་ནི་གང་ཡིན་ཞེ་ན། སྲ་བརྐྱང་མ་བཏིང་བའི་གནས་ནི་སྟོན་ཟླ་ཐ་ཆུང་ཉ་ཚུན་ཆད་ནི་གོས་སྦྱིན་པའི་དུས་མ་ཡིན་ལ། ལྷག་མ་ནི་དུས་ཡིན་ནོ། །སྲ་བརྐྱང་བཏིང་བའི་གནས་ན་ནི་སྟོན་ཟླ་ཐ་ཆུང་ཉ་ཕན་ཆད་ནས་དཔྱིད་ཟླ་འབྲིང་པོ་ཉ་ཚུན་ཆད་ནི་དུས་མ་ཡིན་ལ། ལྷག་མ་ནི་དུས་ཡིན་ནོ། །དེ་ལས་འདས་པར་འཆང་ན་ཞེས་བྱ་བ་ནི་དེ་ལས་ཐལ་བར་འཆང་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་དུ་དབྱར་གྱི་རྙེད་པ་དབྱར་གྱི་ནང་དུ་བདག་གིར་བྱེད་དམ། གོས
6.196b
སྦྱིན་པའི་དུས་ལས་འདས་པར་འཆང་ན་ཐམས་ཅད་ཏུ་སྤང་བའི་ལྟུང་བྱེད་དུ་འགྱུར་རོ། །བརྟད་པ་ལས་བྱུང་བའི་གོས་ལྔ་པོ་དག་བདག་གིར་བྱེད་པ་དང ། སྦྱིན་བདག་གིས་རང་གི་ལག་ནས་སྦྱིན་པར་བྱེད་ན་ལྟུང་བ་མེད་དོ། །གོས་སྦེད་པའི་དགེ་སློང་བསྐོས་པ་དང ། སྦྱིན་བདག་འོངས་ཏེ་འཕགས་པ་དག་བཞེས་ཤིག་དང ། གོས་འདི་བདག་མཆིས་ནས་རང་གི་སུག་པ་ཉིད་ནས་དབུལ་ལོ་ཞེས་ཟེར་བ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །བརྟད་པ་ལས་བྱུང་བའི་སྤང་བ་སྟེ་ཉི་ཤུ་དྲུག་པ་རྫོགས་སྷོ།། ་་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ནས་ཧ་ཅང་མི་རིང་བ་ན་རི་བྲག་ཤིག་ཡོད་པ་དེ་ན་ཁྱིམ་བདག་ཕྱུག་པ་ནོར་མང་བ། ལོངས་སྤྱོད་ཆེ་བ་ཞིག་འདུག་སྟེ་དེ་ཡང་དད་པ་ཅན་བཟང་བ་དགེ་བའི་བསམ་པ་ཅན་ཡིན་པས་དེས་དགེ་འདུན་ལ་བསྔོས་ཏེ་གཙུག་ལག་ཁང་རྟ་བབས་མཐོན་པོ་དང ། སྐར་ཁུང་དང ། སྐར་ཁུང་དྲ་བ་ཅན་དང ། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ་མཐོ་རིས་ཀྱི་ཐེམ་སྐས་སུ་གྱུར་པ་ཞིག་བྱེད་དུ་བཅུག་གོ། །གཙུག་ལག་ཁང་དེར་དགེ་སློང་དྲུག་བཅུས་དབྱར་དགག་དབྱེ་དག་བྱས་ཏེ་དོང་ནས་ཁྱིམ་བདག་དེས་དེར་མ་བྱིན་པར་ལེན་པ་དག་གིས་ཁྲི་འམ་ཁྲིའུ་དག་མ་བརྐུས་པར་གྱིས་ཤིག་ཅེས་སྲུངས་མའི་མི་བཞག་གོ། །ཇི་ཙམ་དུས་གཞན་ཞིག་ན་དགེ་སློང་གཞན་དྲུག་བཅུ་ལྗོངས་རྒྱུ་ཞིང་འགྲོ་བ་ན་རི་བྲག་དེར་ཕྱིན་ནས། བསྟི་གནས་རྙེད་པར་བྱེད་པ་ན་མི་ཞིག་གིས་སྨྲས་པ། འཕགས་པ་དག་ཁྱེད་ཅག་ཅིའི་སླད་ཏུ་གཙུག་ལག་ཁང་དུ་མི་གནས། བཞིན་བཟངས་གཙུག་ལག་ཁང་ག་ལ་ཡོད། འཕགས་པ་དག་དགོན་པ་འདི་ནའོ། །དགེ་སློང་དེ་དག་དེར་དོང་བ་དང ། སྲུངས་མའི་མིས་མཐོང་ནས། དེས་འོངས་པ་ལེགས་སོ་ཞེས་བྱ་བའི་ཚིག་གིས་བསྙེན་བཀུར་བྱས་ཏེ་གནས་ཁང་དག་བསྐོས་ནས་ཁྲི་དང་ཁྲིའུ་དང་སྟན་ནང་ཚང
6.197a
ཅན་དང ། ལ་བ་ལ་སོགས་པ་དག་ཕུལ་ཏེ། སྤྱངས་ཚགས་གཡར་ནས་སྨྲས་པ། འཕགས་པ་དག་རེ་ཤིག་ཆབ་བཙག་པར་མཛོད་ཅིག་དང་དེའི་བར་དུ་བདག་གིས་ཁྱིམ་བདག་ལ་བརྗོད་པར་བགྱིའོ་ཞེས་མི་དེ་ཁྱིམ་བདག་གི་དྲུང་དུ་སོང་སྟེ་སྨྲས་པ ། ཁྱིམ་བདག་དགྱེས་པ་སྐྱེད་ཅིག་།ཁྱོད་ཀྱི་གཙུག་ལག་ཁང་དུ་དགེ་སློང་བློ་བུར་དུ་ལྷགས་པ་དྲུག་བཅུ་མཆིས་སོ། །ཁྱིམ་བདག་གུས་པར་སྒྲིམ་པ་དང་བཅས་པས་ནང་མི་དག་ལ་སྨྲས་པ། ཤེས་ལྡན་དག་ཁོ་བོའི་གཙུག་ལག་ཁང་དུ་དགེ་སློང་གི་དགེ་འདུན་བྱོན་པ་དག་ལེགས་པར་སྦྱར་བའི་བཏུང་བས་ཚིམ་པར་བྱས། བུ་རམ་དང ། ཧཝགས་དང ། ལི་ཁ་ར་དང ། རྒུན་འབྲུམ་དང ། བལ་པོ་སེའུ་ལོང་ཤིག་ཅེས་ཁྱིམ་བདག་དེས་ལེགས་པར་སྦྱར་བའི་བཏུང་བ་སྦྱར་ནས་གཙུག་ལག་ཁང་དུ་སོང་བ་དང ། དགེ་སློང་དག་ཀྱང་ཆུ་བཙགས་ཏེ་རང་རང་གི་སྤྱོད་ལམ་གྱིས་འཁོད་དོ། །ཁྱིམ་བདག་དེས་དགེ་སློང་དེ་དག་ཐག་རིང་པོ་ཁོ་ན་ནས་མཐོང་སྟེ། དེས་གཙུག་ལག་ཁང་དེ་མཚོ་པད་མས་གང་བ་བཞིན་དུ་མཐོང་ནས། རྒྱ་ཆེར་དད་པའི་ཤུགས་ཀྱིས་བསྒྱུར་བའི་རྒྱུད་ཀྱིས་ཚིགས་སུ་བཅད་པ་སྨྲས་པ། གྲོང་ངམ་ཡང་ན་དགོན་པའང་རུང ། །གཤོང་ངམ་ཡང་ན་ཐང་ཡང་རུང ། །གང་ན་འོས་པ་གནས་པ་ཡི། །ས་གཞི་དེ་ན་དགའ་བྱེད་ཡིན། །དེ་ནས་ལེགས་པར་སྦྱར་བའི་བཏུང་བ་སྟ་གོན་བྱས་ཏེ། རང་གི་ལག་ནས་དགེ་སློང་གི་དགེ་འདུན་དེ་དག་ཚིམ་པར་བྱས་ནས་རང་ཉིད་ཀྱིས་པོག་པོར་ཐོགས་ཏེ། དགེ་སློང་གི་དགེ་འདུན་དང་ལྷན་ཅིག་མཆོད་རྟེན་ལ་ཕྱག་འཚལ་ནས། གཙུག་ལག་ཁང་དུ་ཞུགས་ཏེ་རྒན་པའི་མཐའི་ལོགས་སུ་འདུག་གོ་དགེ་འདུན་གྱི་གནས་བརྟན་གྱིས་ཡོན་བཤད་ནས་ཁྱིམ་བདག་དེས་རྐང་པ་གཉིས་ལ་ཕྱག་འཚལ་ཏེ། སང་བདག་གི་སྡུམ་པར་འཕགས་པའི་དགེ་འདུན་གྱིས་གདུགས་ཚོད་གསོལ་བར་ཅི་གནང་ཞེས་སྨྲས་པ་དགེ་སློང་རྣམས་ཀྱིས་ཀྱང་དང་དུ་བླངས་ནས། ཁྱིམ་བདག་དེ་རྐང་པ་གཉིས་ལ་ཕྱག་འཚལ་ཏེ་སོང་ངོ ། །ཁྱིམ་བདག་དེས་ཕྱི་དེ་ཉིན་པར་ཟས་བསོད་པས་དགེ་སློང་དག་ཚིམ་པར་བྱས་ཤིང་དུས་མ་ཡིན་པར་ཡང་བཏུང་བ
6.197b
བླུད་ནས་དགེ་སློང་རྣམས་ཀྱིས་ཀྱང་ཆོས་བསྟན་ཏོ། །ཕྱིས་ཀྱང་དེ་ཁོ་ན་བཞིན་དུ་དགེ་འདུན་གྱི་གནས་བརྟན་གྱིས་ཡོན་བཤད་པ་དང ། ཁྱིམ་བདག་དེ་རྒན་པའི་མཐའ་ལོགས་སུ་འདུག་སྟེ་སྨྲས་པ། འཕགས་པ་དག་བདག་གིས་གཙུག་ལག་ཁང་འདི་བདག་ཉིད་ཀྱི་སླད་ཏུ་ཡང་བགྱིད་དུ་མ་སྩལ། ཉེ་དུ་རྣམས་ཀྱི་སླད་དུ་ཡང་བགྱིད་དུ་མ་སྩལ་གྱི། འདི་ལྟར་འཕགས་པ་རྣམས་ཀྱི་སླད་དུ་སྩལ་པ་ལགས་ཀྱིས། འདི་ཉིད་ཏུ་དབྱར་གནས་པར་ཞལ་གྱིས་བཞེས་ཤིག་དང ། བདག་གིས་འཕགས་པ་རྣམས་ལ་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །དགེ་སློང་རྣམས་ཀྱིས་སྨྲས་པ། ཁྱིམ་བདག་མཉན་ཡོད་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང ། དུས་དང་དུས་སུ་དགེ་སློང་ཆེ་གེ་མོ་ཞིག་གིས་ནི་དགྲ་བཅོམ་པ་ཉིད་མངོན་སུམ་དུ་བྱས། ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་དག་ཀྱང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་ཏུ་དད། བཙུན་མོ་ཕྲེང་ལྡན་མ་དང ། རྒྱལ་རིགས་དབྱར་ཚུལ་མ་དང ། བླ་མཁྱེན་དྲང་སྲོང་བྱིན་དང ། རྙིང་པ་དང ། དགེ་བསྙེན་མ་ས་ག་དང ། རི་དགས་འཛིན་གྱི་མ་དང ། གཞན་ཡང་དད་པ་ཅན་མང་དུ་ཡོད་པས་དེར་ཟང་ཟིང་གི་ལོངས་སྦྱོད་དང ། ཆོས་ཀྱི་ལོངས་སྤྱོད་ཆེན་པོ་ཡང་འགྲུབ་པས་བདག་ཅག་དེ་ཉིད་ཏུ་འདོང་ངོ ། །འཕགས་པ་དག་ཆོས་ཀྱི་ལོངས་སྤྱོད་ནི་འཕགས་པ་དག་ཉིད་ལ་རག་ལས་པ་ལགས་ཀྱི། ཟང་ཟིང་གི་ལོངས་སྤྱོད་ནི་བདག་ལ་རག་ལས་པ་ལགས་པས་དགྱེས་པ་བསྐྱེད་ཅིག་དང་ཅུང་ཟད་ཀྱང་ཉམས་པར་མི་འགྱུར་རོ། །དགེ་འདུན་གྱི་གནས་བརྟན་གྱིས་སྨྲས་པ་ཚེ་དང་ལྡན་པ་དག་བཅོམ་ལྡན་འདས་ཀྱིས་དད་པ་ཅན་གྱི་དད་པ་སྤེལ་བར་བྱ་ཞིང་སྦྱིན་བདག་ལ་རྗེས་སུ་སྙིང་བརྩེ་བར་བྱའོ་ཞེས་གསུངས་པས། འདི་ཉིད་ཏུ་འཁོད་པར་བྱའོ་ཞེས་དེ་དག་དེར་འཁོད་ནས། བློ་བརྟན་པས་གཙུག་ལག་ཁང་དེའི་ཕྱི་ནང་བཅས་པར་སོ་སོར་བརྟག་པར་བརྩམས་པ་དང ། གཙུག་ལག་ཁང་དེ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཤིན་ཏུ་དགའ་བར་མཐོང་ནས། དགེ་འདུན་གྱི་གནས་བརྟན་གྱིས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་མེ་ཏོག་ཕུན
6.198a
སུམ་ཚོགས་པ། འབྲས་བུ་ཕུན་སུམ་ཚོགས་པ། ཤིན་ཏུ་དགའ་བ་ཡིན་པས་གལ་ཏེ་བདག་ཅག་གིས་འདིར་དབྱར་སྔ་མར་གནས་པར་ཁས་བླངས་ན་མེ་ཏོག་དང་འབྲས་བུ་ཐམས་ཅད་ཡོངས་སུ་ལོངས་སྤྱོད་པར་མི་འགྱུར་གྱིས། བདག་ཅག་གིས་ངེས་པར་དབྱར་ཕྱི་མར་གནས་པར་ཁས་བླང་བར་བྱའོ་ཞེས་དེ་དག་གིས་དེར་དབྱར་ཕྱི་མར་གནས་པར་ཁས་བླངས་སོ། །ཁྱིམ་བདག་དེ་ལ་གཙུག་ལག་ཁང་དེ་གཅིག་པུ་འབའ་ཞིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་ཏུ་སྦྱིན་ཞིང་བྱེད་དོ། །རི་བྲག་དེ་ན་ཡང་གཙུག་ལག་ཁང་གཞན་མེད་པས་རི་བྲག་པ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་ཏུ་སྦྱིན་པར་བྱེད་དོ། །རི་བྲག་དེའི་ཉེན་ཀོར་ན་ཡང་གཙུག་ལག་ཁང་གཞན་མེད་པས་རི་བྲགས་ཀྱི་ཉེན་ཀོར་པ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་པས་དེར་དབྱར་གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ ། །སྟོན་ཟླ་ཐ་ཆུངས་ཀྱི་གཡོན་ཅན་དག་གི་ཀུན་ཏུ་སྤྱོད་པ་ནི་དགག་དབྱེ་བྱས་མ་ཐག་ཏུ་འདུས་ཏེ་བདག་ཅག་གིས་ལས་ཅི་ཞིག་བྱས་ན་དེས་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་འདི་སྙམ་དུ་སེམས་ཏེ། ཤཱཀྱའི་སྲས་ཀྱི་དགེ་སློང་འདི་དག་གཞོམ་པར་བྱའོ་སྙམ་མོ། །གཞན་དག་གིས་སྨྲས་པ། དེ་དག་ནི་སྒོ་འཕར་བརྒྱ་སྙེད་བཟླ་བ་བྱས་ཀྱང་ལྟོ་ཁེངས་པ་འགྲུབ་པར་དཀའ་བས། དེ་དག་ལ་ཅི་ཡང་མེད་ན་བདག་ཅག་ཅིའི་ཕྱིར་ཡུན་དེ་སྲིད་དུ་བསྡད་པར་བྱ། དེ་ན་དགེ་སློང་གི་རྒྱུས་ཤེས་པ་ཅིག་འདུག་པས་སྨྲས་པ། ཁྱོད་ཅི་ཤེས་དེ་དག་ལ་མང་དུ་ཡོད་དོ། །ཇི་ལྟར་རེ་ཤིག་གཙུག་ལག་ཁང་འདི་གང་གི་ཡིན་པའི་ཁྱིམ་བདག་དེ་ནི་དད་པ་ཅན་བཟང་བ། དགེ་བའི་བསམ་པ་ཅན་ཡིན་ལ། ཁྱིམ་བདག་དེ་ལ་ཡང་གཙུག་ལག་ཁང་དེ་གཅིག་པུ་འབའ་ཤིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདི་ན་ཡང་གཙུག་ལག་ཁང་གཞན་མེད་བས་རི་བྲགས་པ་འདི་དག་ཀྱང་སྦྱིན་པ་དང་བྱ་བར་སེམས
6.198b
པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདིའི་ཉེ་འཁོར་ན་ཡང་གཙུག་ལག་ཁང་གཞན་མེད་པས་རི་བྲགས་ཀྱི་ཉེ་འཁོར་བ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་པས་འདིར་དབྱར་གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ ། །གལ་ཏེ་ཡིད་མི་ཆེས་ན་སོང་ལ་ལྟོས་ཤིག་དང་རང་ཉིད་ཀྱི་མངོན་སུམ་དུ་འགྱུར་རོ། །གལ་ཏེ་དེ་ལྟ་ན་ཁྱོད་ཉིད་ཇེ་སོང་ལ་མངོན་སུམ་དུ་གྱིས་ཤིག་དང་ཁོ་བོ་ཅག་ཕྱིས་འོང་ངོ ། །དེ་སྨྲས་པ། ལེགས་ཀྱིས་དེ་བཞིན་གྱིས་ཤིག་དང ། ཁོ་བོ་འགྲོའོ་ཞེས་དེ་གོས་ཚགས་བཅོས་ཏེ་འཕགས་ཤིང ། དེ་ནས་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ཏེ་གཙུག་ལག་ཁང་དེར་ཞུགས་སོ། །ཇི་ཙམ་ན་སྒོ་ཁང་ན་རྒན་ཞུགས་ཤིག་འདུག་ནས་གཡོན་ཅན་དེས་དེའི་རྐང་པ་ལ་ཕྱག་འཚལ་ཏེ་དྲི་བར་བརྩམས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པ། མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། བཞིན་བཟངས་ཁྱིམ་བདག་ཆེ་གེ་མོ་ཞིག་གི་ཡིན་ནོ། །འཕགས་པ་ཅི་འདི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས་གཙུག་ལག་ཁང་ནི་ཇི་ལྟ་བུ་ཡིན། ཕོངས་པ་ནི་ཇི་ལྟ་བུ་ཡིན། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་སོ། །གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འོ་ན་འདི་ནི་གཙུག་ལག་ཁང་ཡིན་གྱི་ཕོངས་པ་མ་ཡིན་ཏེ་འདི་ན་ཡོ་བྱད་ཕུན་སུམ་ཚོགས་པ་ཡོད་ཀྱི། འདི་ན་ཡོ་བྱད་མེད་པ་མ་ཡིན་ནོ། །འཕགས་པ་ཟས་ཟ་བ་ནི་འགའ་ཡང་ས་རྡུལ་མི་ཟ་ལ། གོས་དག་གྱོན་པ་ནི་འགའ་ཡང་ཤིང་ཤུན་དག་མི་གྱོན་པས་ཁྱེད་ཅག་ལ་གོས་ཅུང་ཟད་མ་མཆིས་སམ། རྒན་ཞུགས་དེ་དྲང་པོའི་རང་བཞིན་ཅན་ཡིན་པས་དེས་གཡོན་ཅན་དེའི་ལག་ནས་བཟུང་སྟེ་གནས་ཁང་དུ་བཅུག་ནས་སྨྲས་པ། བཞིན་བཟངས་གོས་ཀྱི་གདང་གོས་དག་གིས་ཕུར་ཤོག་ཅིང་འདུག་པ་ལ་ལྟོས། འཕགས་པ་ཅི་འདི་ཁྱོད་ཀྱི་ལགས
6.199a
སམ། འོན་ཏེ་དགེ་འདུན་གྱི་ལགས། བཞིན་བཟངས་འདི་ཁོ་བོ་གང་ཟག་གི་ཡིན་ནོ། །འཕགས་པ་འོ་ན་ཁྱོད་ནི་གོར་མ་བཀུམ་པར་དགེ་འདུན་གྱི་གནས་བརྟན་ནམ། ཆོས་སྒྲོག་པ་ཞིག་ལགས་སོ། །བཞིན་བཟངས་ཁོ་བོ་ནི་དགེ་འདུན་གྱི་གནས་བརྟན་ཡང་མ་ཡིན་ལ། ཆོས་སྒྲོག་པ་ཡང་མ་ཡིན་ཏེ། འདི་ལྟར་ཁོ་བོ་ནི་དགེ་འདུན་གྱི་གསར་བུ་དགེ་ཚུལ་ཞིག་ཡིན་ནོ། །འཕགས་པ་དེ་ནི་མཇལ་ན་འདི་ན་དགེ་འདུན་གྱི་གནས་མལ་ཅུང་ཟད་མ་མཆིས་སམ། བཞིན་བཟངས་མང་དུ་ཡོད་དེ་རེ་ཤིག་ཁོ་བོའི་བྱུག་རིས་སུ་ཡང་དངོས་པོ་བདུན་པོ་དག་འཐོབ་བོ། །འཕགས་པ་དེ་ཡང་མཇལ་གྱིས་འདི་ཞུའོ། །གཙུག་ལག་ཁང་འདི་ན་གང་ལ་ལ་འཚལ་མ་བགྱིད་པ་དེ་ཇི་རྫ་མཁན་གྱི་སྣོད་དུ་འཚེད་དམ། འོན་ཏེ་ཟངས་མའི་སྣོད་ཏུ་འཚེད་བཞིན་བཟངས་ཁྱོད་ཀྱིས་གནས་ཁང་འདི་དག་མཐོང་ངམ། འཕགས་པ་མཐོང་ངོ ། །བཞིན་བཟངས་གནས་ཁང་འདི་དག་ཟངས་མའི་སྣོད་ཀྱིས་གང་ཞིང་འདུག་གོ། །གཡོན་ཅན་དེས་བསམས་པ། ལེགས་པར་བྲིད་ཟིན་གྱིས་ད་ནི་འགྲོའོ་སྙམ་ནས་གཡོན་ཅན་དེས་སྨྲས་པ། འཕགས་པ་ཁྱོད་ཀྱི་དགེ་བའི་ཕྱོགས་ཡོངས་སུ་ཉམས་པ་ནི་བདག་གི་དོན་ཡོངས་སུ་ཉམས་པ་ལགས་པས་བདག་སླད་ཀྱིས་ཀྱང་མཆི་ཡིས་ད་ནི་མཆིའོ། །བཞིན་བཟངས་དེ་བཞིན་གྱིས་ཤིག་།གཡོན་ཅན་དེས་རྒན་ཞུགས་དེའི་རྐང་པ་ལ་ཕྱག་འཚལ་ཏེ་སོང་ནས་གཡོན་ཅན་དེ་ཆོམ་རྐུན་པ་དེ་དག་གི་དྲུང་དུ་སོང་སྟེ་སྨྲས་པ། པད་མའི་མིག་ཅན་དག་རྫས་ཐམས་ཅད་ཀྱིས་གང་བའི་གྲུ་བོ་ཆེ་སྐམ་ས་ན་འདུག་གིས་ཕྲོགས་ཤིག་།ཕྲོགས་ཤིག་།དེ་ན་གཅིག་གིས་སྨྲས་པ། དེ་ན་འཁོད་པའི་རབ་ཏུ་བྱུང་བ་དྲུག་བཅུ་པོ་དག་ནི་འཕོང་གི་སློབ་དཔོན་ཤ་སྟག་ཡིན་ཞེས་གྲགས་པས་དེ་བཞིན་དུ་གཞོམ་པར་མི་ནུས་ཀྱིས། གང་གི་ཚེ་དེ་དག་མཚན་མོ་ཆོས་ཉན་པ་དེའི་ཚེ་གཞོམ་མོ། །གཞན་དག་གིས་སྨྲས་པ་ཉི་མ་གང་ལ་དེ་དག་གི་ཆོས་ཉན་པ་འབྱུང་བར་འགྱུར། དེས་སྨྲས་པ། ཚེས་བརྒྱད་དང ། བཅུ་བཞི་ལ་འབྱུང་སྟེ། དེ་ལ་ཚེས་བརྒྱད་ནི་ཐལ་ཟིན་པས་ཚེས་བཅུ་བཞི་ལ་འབྱུང་བར་འགྱུར་རོ། །དེ་དག་སོར་མོ་དག་གིས་ཉི་མ་བགྲང་ཞིང་འཁོད་འཁོད་ནས། ཇི་ཙམ་ན
6.199b
ཚེས་བཅུ་བཞི་ལ་བབ་སྟེ། དགེ་འདུན་གྱི་གནས་བརྟན་གྱིས་སོ་སོར་ཐར་པའི་མདོ་བཏོན་ཏེ། དགེ་འདུན་གྱིས་གསོ་སྦྱོང་བྱས་ནས་ཆོས་སྒྲོག་པ་སེང་གེའི་ཁྲི་ལ་འཛེགས་ཏེ་འདི་སྐད་ཅེས། མི་མཆོག་གདུལ་བའི་ཁ་ལོ་སྒྱུར་མཛད་པ། །ཀུན་སྦྱོར་འཆིང་བ་གཅོད་པ་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་ཞུགས་པས་བཀའ་བཞིན་བྱེད་ལ་གསུངས། །ཞེས་བྱ་བར་བརྩམས་པ་དང ། གཡོན་ཅན་དེ་དག་གིས་སྒོ་བརྡུངས་སོ། །དགེ་སློང་དག་གིས་ཚོར་ནས་སྨྲས་པ། ཤེས་ལྡན་དག་ཁྱེད་ཅག་སུ་ཡིན། འཕགས་པ་དག་བདག་ཅག་རིགས་ཀྱི་བུ་དག་གོ། །དགེ་སློང་རྣམས་ཀྱིས་བསམས་པ། རི་བྲགས་ནས་སྐྱེ་བོའི་ཚོགས་དག་ཆོས་ཉན་དུ་ལྷགས་གོར་མ་ཆག་གིས་སྒོ་དབྱེའོ་སྙམ་ནས། དེ་དག་གིས་སྒོ་ཕྱེ་བ་དང་དེ་དག་ཞུགས་སོ། །ཇི་ཙམ་ན་གཞོམ་པར་བརྩམས་པ་དང ། དགེ་སློང་རྣམས་ཀྱིས་སྨྲས་པ། ཤེས་ལྡན་དག་ཁྱེད་ཅག་ན་རེ་བདག་ཅག་རིགས་ཀྱི་བུ་དག་གོ་ཞེས་ཟེར་ན། ད་ངེད་ཅག་འཇོམས་པར་བྱེད་དམ། དེ་དག་གིས་སྨྲས་པ། འཕགས་པ་དག་བདག་ཅག་ལ་མིང་གཉིས་མཆིས་ཏེ། སླད་རོལ་ཏུ་ནི་རིགས་ཀྱི་བུ་དག་ཅེས་བགྱི་ལ། ནང་དུ་ནི་ཆོམ་རྐུན་པ་དག་ཅེས་བགྱིའོ། །ཁྱེད་ཅག་གི་མིང་འདོགས་པར་བྱེད་པ་ནི་ཉམས་སོ། །གཡོན་ཅན་དེ་དག་གིས་དགེ་སློང་དེ་དག་བཅོམ་སྟེ་དོང་ནས་དགེ་སློང་བཅོམ་པ་དེ་དག་གིས་གྲོས་བྱས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ་ཞེས་གསུངས་པས། རེ་ཤིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་སྦྱིན་དུ་བཅུག་སྟེ་ཡང་ཅི་བྱ། བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱ། བདག་ཅག་མཉན་ཡོད་ཉིད་ཏུ་དོང་ན་དེར་བདག་ཅག་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ་ཞེས་གྲོས་བྱས་སོ། །ཇི་ལྟར་འདོང་བར་བྱ། མཚན་མོ་འགེབས་པས་འདོང་ཞིང་ཉིན་མོ་ཐིབས་པོར་ཞུགས་ཏེ་འགྲོ་བར་བྱའོ་ཞེས་དེ་དག་གིས་ཁྱིམ་བདག་ལ་ཡང་མ་བལྟས་པར་དོང་ངོ ། །ཇི་ཙམ་ན་མཐར་གྱིས་མཉན་ཡོད་ཏུ་ཕྱིན་པ་དང་དགེ་སློང་དག་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པ་དེ་དག
6.200a
གིས་དགེ་སློང་དེ་དག་སྒྲེན་མོར་སྒོའི་གམ་ཡོ་ན་རྒྱུ་བ་མཐོང་ནས་སྨྲས་པ། གཅེར་བུ་སྒྲེ་བྱི་དག་ཁྱེད་ཅག་འདིར་ཅི་འདོད་འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་ནོ། །དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གཅེར་བུ་དག་མ་ཡིན་ནོ། །འོ་ན་ཁྱེད་སུ་ཡིན། དགེ་སློང་དག་གོ། །འདི་ལྟ་བུ་དག་དགེ་སློང་ཡིན་ནམ། གང་དག་ཆོམ་རྐུན་པ་དག་གིས་བཅོམ་པ་དེ་དག་ཇི་ལྟ་བུ་ཡིན། ཁྱེད་ཅག་མིང་ཅི། སངས་རྒྱས་འཚོའོ། །ཆོས་འཚོའོ། །དགེ་འདུན་འཚོའོ། །ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ་ཞེས་དེ་དག་གིས་སྒོ་ཕྱེ་ནས་དགེ་སློང་དེ་དག་འཇུག་ཏུ་བཅུག་སྟེ། དེ་དག་ལ་ལ་ལས་ནི་ཆོས་གོས་བྱིན། ལ་ལས་ནི་ཤམ་ཐབས་བྱིན། ལ་ལས་ནི་རྔུལ་ཟན་བྱིན། ལ་ལས་ནི་ལྷུང་བཟེད་བྱིན། ལ་ལས་ནི་ཆུ་ཚགས་བྱིན་ཏེ། བགོ་བཤའ་ཇི་ལྟ་བ་བཞིན་དུ་ཐམས་ཅད་དུ་ཐམས་ཅད་བགོ་བཤའ་བྱས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་དགོན་པ་པས་ཆོས་གོས་གསུམ་ལས་ཆོས་གོས་གང་ཡང་རུང་བ་ཁྱིམ་གཞན་དུ་གཞག་པར་བྱའོ། །བཅོམ་ལྡན་འདས་ཀྱིས་ཆོས་གོས་གསུམ་ལས་ཆོས་གོས་གང་ཡང་རུང་བ་ཁྱིམ་གཞན་དུ་གཞག་པར་བྱའོ་ཞེས་བཀའ་སྩལ་ནས། དེ་དག་དེ་ཉིད་ཏུ་དོང་སྟེ་ཉལ་བར་བྱེད་པ་དང ། བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། འཕགས་པ་དག་ཁྱེད་ཅག་ཅིའི་སླད་ཏུ་འདིར་གཟིམས་པར་མཛད། ཁོ་བོ་ཅག་གིས་ཆོས་གོས་དག་འདིར་གཞག་གོ། །འཕགས་པ་དག་ཅི་ཁྱོད་ཀྱི་ཆོས་གོས་དག་རྐུ་བར་བགྱིད་དམ། གལ་ཏེ་ཐུགས་མི་ཆེས་ན་སྣོམས་ཏེ་བཞུད་ཅིག་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེར་ཉལ་བར་མི་བྱའོ། །དེ་དག་ཕྱིར་དོང་སྟེ་སྐྱ་རེང་འཆར་བར་བྱེད་པ་དང ། བུད་མེད་ཀྱི་ཡུལ་སྒྲེན་མོར་ཉལ་བ་དེ་དག་གིས་སྨྲས་པ། འཕགས་པ་དག་ཁྱེད་ཅག་ཅིའི་སླད་ཏུ་མཚན
6.200b
མོ་ཉིད་ལ་འདིར་བྱོན། ཁོ་བོ་ཅག་གིས་འདིར་ཆོས་གོས་དག་བཞག་གོ། །འཕགས་པ་དག་ཅི་ཁྱེད་ཅག་གི་ཆོས་གོས་དག་རྐུ་བར་བགྱིད་དམ། གལ་ཏེ་ཐུགས་མི་ཆེས་ན་སྣོམས་ཏེ་བཞུད་ཅིག་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེར་སྐྱ་རེང་འཆར་བར་མི་བྱའོ། དེ་དག་ཕྱིས་དེར་དོང་སྟེ་བང་རིམ་དུ་སྐྱ་རེང་འཆར་བར་བྱེད་པ་དང ། དེ་དག་ཆོམ་རྐུན་པ་དག་དང ། གཡོན་ཅན་དག་དང ། སེང་གེ་དག་དང ། སྟག་དང ། གུང་དག་གི་དབང་དུ་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་དུ་སྐྱ་རེང་འཆར་བར་བྱའོ། །དགེ་སློང་རྣམས་ལ་དགེ་འདུན་གྱི་དང ། མཆོད་རྟེན་གྱི་དང ། གང་ཟག་གི་བྱ་བའི་ཕྱིར་མཚམས་ཀྱི་ཕྱི་རོལ་ཏུ་འགྲོ་དགོས་པར་གྱུར་པ་དེ་དག་བདག་ཅག་གིས་ཁྱིམ་གཞན་དུ་ཆོས་གོས་དག་གཞག་གོ་ཞེས་དེར་མི་འགྲོ་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དགོན་པ་པས་ཞག་དྲུག་གི་མཐའ་ཚུན་ཆད་ཏུ་ཆོས་གོས་དེ་དང་མཚམས་ཀྱི་ཕྱི་རོལ་ཏུ་འབྲལ་བར་བྱའོ། །དགེ་སློང་དྲུག་སྡེ་དག་བསམས་བཞིན་དུ་ཞག་བདུན་དུ་འབྲལ་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་སྟེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ངས་དགེ་སློང་དགོན་པ་པས་ཞག་དྲུག་གི་མཐའ་ཚུན་ཆད་དུ་ཆོས་གོས་དེ་དང་མཚམས་ཀྱི་ཕྱི་རོལ་དུ་འབྲལ་བར་བྱའོ་ཞེས་གསུངས་ན། ཁྱེད་ཅག་བསམས་བཞིན་དུ་ཞག་བདུན་དུ་མཚམས་ཀྱི་ཕྱི་རོལ་དུ་འབྲལ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ
6.201a
ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་རབ་ཏུ་མང་པོ་དག་གནས་མལ་དགོན་པ་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུ་དབྱར་ཕྱི་མར་གྱུར་ལ། དགེ་སློང་དགོན་པ་པས་འདོད་ན་ཆོས་གོས་གསུམ་ལས་ཆོས་གོས་གང་ཡང་རུང་བ་ཁྱིམ་གཞན་དུ་གཞག་པར་བྱའོ། །དགེ་སློང་དགོན་པ་པ་ལ་མཚམས་ཀྱི་ཕྱི་རོལ་ཏུ་འགྲོ་དགོས་པ་དེ་ལྟ་བུའི་རྐྱེན་ཞིག་བྱུང་ན་དགེ་སློང་དགོན་པ་པ་དེས་ཞག་དྲུག་གི་མཐའ་ཚུན་ཆད་ཏུ་ཆོས་གོས་དེ་དང་མཚམས་ཀྱི་ཕྱི་རོལ་དུ་འབྲལ་བར་བྱའོ། །དེ་ལས་འདས་པར་འབྲལ་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །རབ་ཏུ་མང་པོ་དག་ཅེས་བྱ་བ་ནི་གཉིས་ཡན་ཆད་རབ་ཏུ་མང་པོ་དག་ཡིན་ནོ། །གནས་མལ་ཞེས་བྱ་བ་ནི་གཙུག་ལག་ཁང་ངོ ། །དགོན་པ་ཞེས་བྱ་བ་ནི་རྡུལ་ཕྲ་རབ་དྲུག་ལ་རྡུལ་ཕྲ་མོ་གཅིག་གོ། །རྡུལ་ཕྲ་མོ་དྲུག་ལ་ཆུ་རྡུལ་གཅིག་གོ། །ཆུ་རྡུལ་དྲུག་ལ་ལྕགས་རྡུལ་གཅིག་གོ། །ལྕགས་རྡུལ་དྲུག་ལ་རི་བོང་རྡུལ་གཅིག་གོ། །རི་བོང་རྡུལ་དྲུག་ལ་ལུག་རྡུལ་གཅིག་གོ། །ལུག་རྡུལ་དྲུག་པ་གླང་རྡུལ་གཅིག་གོ། །གླང་རྡུལ་དྲུག་ལ་ཉི་ཟེར་གྱི་རྡུལ་གཅིག་གོ། །ཉི་ཟེར་གྱི་རྡུལ་དྲུག་ལ་སྲོ་མ་གཅིག་གོ། །སྲོ་མ་དྲུག་ལ་ཤིག་གཅིག་གོ། །ཤིག་དྲུག་ལ་ནས་གཅིག་གོ། །ནས་དྲུག་ལ་སོར་གཅིག་གོ། །སོར་བཞི་དྲུག་ལ་ཁྲུ་གང་ངོ ། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུའོ། །གཞུ་ལྔ་བརྒྱ་ལ་རྒྱང་གྲགས་ཏེ་དེ་ཕན་ཅད་དགོན་པའོ། །དོགས་པ་དང་བཅས་པར་གྲགས་པ་ཞེས་བྱ་བ་ནི་ཆོམ་རྐུན་པ་དང ། གཡོན་ཅན་གྱིས
6.201b
འཇིགས་པར་གྲགས་པའོ། །འཇིགས་པ་དང་བཅས་པར་གྲགས་པ་ཞེས་བྱ་བ་ནི་སེང་གེ་དང ། སྟག་དང ། གུང་གིས་འཇིགས་པར་གྲགས་པའོ། །འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུ་ཞེས་བྱ་བ་ནི་ཤ་སྦྲང་དང ། སྦྲང་བུ་མཆུ་རིངས་དང ། རླུང་དང ། ཉི་མ་དང ། སྡིག་སྦྲུལ་གྱི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུའོ། །དབྱར་ཕྱི་མར་གྱུར་ལ་ཞེས་བྱ་བ་ནི་དབྱར་ཕྱི་མར་གནས་པར་ཁས་བླངས་པར་གྱུར་ལའོ། །དགེ་སློང་དགོན་པ་པས་ཞེས་བྱ་བ་ནི་དགེ་སློང་གང་ཡིན་པ་དེས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །ཆོས་གོས་གསུམ་ལས་ཆོས་གོས་གང་ཡང་རུང་བ་ཞེས་བྱ་བ་ནི་སྣམ་སྦྱར་དང ། བླ་གོས་དང ། མཐང་གོས་ལས་གང་འདོད་པའོ། །ཁྱིམ་གཞན་དུ་ཞེས་བྱ་བ་ནི་གང་ན་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ཡོད་པར་རོ། །གཞག་པར་བྱའོ་ཞེས་བྱ་བ་ནི་གཏམས་པར་བྱ་བའོ། །དགེ་སློང་དགོན་པ་ལ་མཚམས་ཀྱི་ཕྱི་རོལ་དུ་འགྲོ་དགོས་པ་དེ་ལྟ་བུའི་རྐྱེན་ཞིག་བྱུང་ན་ཞེས་བྱ་བ་ནི་དགེ་འདུན་གྱི་འམ། མཆོད་རྟེན་གྱི་འམ། གང་ཟག་གི་བྱ་བའི་ཕྱིར་མཚམས་ཀྱི་ཕྱི་རོལ་དུ་འགྲོ་དགོས་པ་དེ་ལྟ་བུའི་རྐྱེན་ཞིག་བྱུང་ནའོ། །དགེ་སློང་དགོན་པ་པ་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །ཞག་དྲུག་གི་མཐའ་ཚུན་ཅད་ཏུ་ཞེས་བྱ་བ་ནི་ཉིན་མཚན་དྲུག་གི་མཐའ་ཚུན་ཅད་ཏུའོ། །ཆོས་གོས་དེ་དང་མཚམས་ཀྱི་ཕྱི་རོལ་དུ་འབྲལ་བར་བྱའོ་ཞེས་བྱ་བ་ནི་ཆོས་གོས་བཞག་པ་གང་ཡིན་པ་དེ་དང་ངོ ། །དེ་ལས་འདས་པར་འབྲལ་ན་ཞེས་བྱ་བ་ནི་དེ་ལས་ལྷག་པར་སྐྱ་རེང་འཆར་བར་བྱེད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། འདི་ལྟར་དགེ་སློང་དགོན་པ་པས་ཆོས་གོས་གསུམ་ལས་ཆོས་གོས་གང་ཡང་རུང་བ་དང་མཚམས་ཀྱི་ཕྱི་རོལ་དུ་བྲལ་ན་ཐམས་ཅད་དུ་སྤང་བའི་ལྟུང་བྱེད་ཏུ་འགྱུར་རོ། །འདི་འམ་དེར་བར་ཆད་བརྒྱད་པོ་འདི་ལྟ་སྟེ། རྒྱལ་པོའི་འཇིགས་པ་དང ། ཆོམ
6.202a
རྐུན་པའི་འཇིགས་པ་དང ། མེའི་འཇིགས་པ་དང ། ཆུའི་འཇིགས་པ་དང ། སེང་གེའི་འཇིགས་པ་དང ། སྟག་གི་འཇིགས་པ་དང ། མིའི་འཇིགས་པ་དང ། མི་མ་ཡིན་པའི་འཇིགས་པ་ལས་གང་ཡང་རུང་བ་ཉེ་བར་གནས་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཞག་བདུན་གྱིས་འབྲལ་བའི་སྤང་བ་སྟེ་ཉི་ཤུ་བདུན་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་དབྱར་གྱི་གོས་རས་ཆེན་བཅང་བར་བྱའོ་ཞེས་བཀའ་སྩལ་ནས། དེ་ན་དགེ་སློང་གང་དག་སྔ་མས་དབྱར་གནས་པ་ཁས་ལེན་པ་དེ་དག་ནི་རང་གི་དུས་ཡིན་ནོ། །ཞེས་ཚོལ་བར་བྱེད་ཅིང་བདག་ཅག་གིས་ཅིའི་ཕྱིར་མི་བཅང་ཞེས་འཆང་བར་བྱེད་དོ། །ཕྱི་མས་དབྱར་གནས་པར་ཁས་ལེན་པ་དེ་དག་ཀྱང་རང་གི་དུས་ཡིན་ནོ་ཞེས་འཆང་བར་བྱེད་ཅིང་བདག་ཅག་གིས་ཅིའི་ཕྱིར་མི་བཙལ་ཞེས་ཚོལ་བར་བྱེད་དེ། དེ་དག་ཧ་ཅང་མྱུར་བར་ཚོལ་བ་དང ། ཧ་ཅང་ཡུན་རིང་དུ་འཆང་བར་བྱེད་པས་བྱ་བ་མང་བ་དང ། བྱེད་པ་མང་བར་གྱུར་ཏེ། ལུང་མནོད་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ནས། དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་དབྱར་གྱི་གོས་རས་ཆེན་བཅང་བར་བྱའོ་ཞེས་གསུངས་ན་ཅིའི་ཕྱིར་དེ་དག་ཧ་ཅང་མྱུར་དུ་ཚོལ་བར་བྱེད་ཅིང་ཧ་ཅང་ཡུན་རིང་དུ་འཆང་བར་བྱེད་པས་བྱ་བ་དང་བྱེད་པ་མང་བར་གྱུར་ཏེ། ལུང་མནོད་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང །
6.202b
སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་ངས་དགེ་སློང་གིས་དབྱར་གྱི་གོས་རས་ཆེན་བཅང་བར་བྱའོ་ཞེས་གསུངས་ན། ཁྱེད་ཅག་ཧ་ཅང་མྱུར་དུ་ཚོལ་བ་དང ། ཧ་ཅང་ཡུན་རིང་དུ་འཆང་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་གསོ་དཀའ་བ་དང ། དགང་དཀའ་བ་དང ། འདོད་པ་ཆེ་བ་དང ། ཆོག་མི་ཤེས་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་གསོ་སླ་བ་དང ། དགང་སླ་བ་དང ། འདོད་པ་ཆུང་བ་དང ། ཆོག་ཤེས་པ་དང ། ཕྲི་བ་དང ། །སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སོ་ཀ་རྣམས་ཀྱི་ཟླ་བ་གཅིག་ལུས་ན་དབྱར་གྱི་གོས་རས་ཆེན་བཙལ་བར་བྱའོ། །དབྱར་ཟད་ནས་འོག་ཏུ་ཟླ་བ་ཕྱེད་ཀྱི་བར་དུ་བཅང་བར་བྱའོ། །གལ་ཏེ་དགེ་སློང་གིས་སོ་ཀ་རྣམས་ཀྱི་ཟླ་བ་གཅིག་ལུས་པའི་སྔོན་རོལ་དུ་དབྱར་གྱི་གོས་རས་ཆེན་ཚོལ་བར་བྱེད་དམ། དབྱར་ཟད་ནས་འོག་དུ་ཟླ་བ་ཕྱེད་ལས་འདས་པར་འཆང་ན་སྤང་བའི་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །སོ་ཀ་རྣམས་ཀྱི་ཟླ་བ་གཅིག་ལུས་ན་ཞེས་བྱ་བ་ནི་ཟླ་བ་གཅིག་ན་དབྱར་ཉེ་བར་སྒྲུབ་པ་འབྱུང་བར་འགྱུར་བ་ནའོ། །དབྱར་གྱི་གོས་རས་ཆེན་ཞེས་བྱ་བ་ནི་ཆར་པ་བབ་པའི་གོས་སོ། །བཙལ་བར་བྱའོ་ཞེས་བྱ་བ་ནི་གཞན་ལས་སོ། །དབྱར་ཟད་ནས་འོག་ཏུ
6.203a
ཟླ་བ་ཕྱེད་ཀྱི་བར་དུ་བཅང་བར་བྱའོ་ཞེས་བྱ་བ་ནི་དགག་དབྱེ་བྱས་ནས་ཟླ་བ་ཕྱེད་ཀྱི་བར་དུའོ། །གལ་ཏེ་དགེ་སློང་གིས་སོ་ཀ་རྣམས་ཀྱི་ཟླ་བ་གཅིག་ལུས་པའི་སྔོན་རོལ་དུ་དབྱར་གྱི་གོས་རས་ཆེན་ཚོལ་བར་བྱེད་དམ་ཞེས་བྱ་བ་ནི་དེའི་མདུན་རོལ་དུའོ། །དབྱར་ཟད་ནས་འོག་ཏུ་ཟླ་བ་ཕྱེད་ལས་འདས་པར་འཆང་ན་ཞེས་བྱ་བ་ནི་དེ་ལས་འདས་པར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤང་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། སྔ་མ་དང ། ཕྱི་མ་ལས་ཏེ། དེ་ལ་གང་དག་དབྱར་སྔ་མར་གནས་པར་ཁས་ལེན་པ་དེ་དག་ལ་ནི་ཧ་ཅང་ཡང་ཡུན་རིང་དུ་འཆང་ན་སྤང་བའི་ལྟུང་བྱེད་དུ་འགྱུར་རོ། །གང་དག་དབྱར་ཕྱི་མར་གནས་པར་ཁས་ལེན་པ་དེ་དག་ལ་ཧ་ཅང་མྱུར་དུ་ཚོལ་ན་སྤང་བའི་ལྟུང་བྱེད་དུ་འགྱུར་རོ། །དེ་ལྟར་ན་དགེ་སློང་གིས་ཇི་ཙམ་དུ་ཧ་ཅང་མྱུར་དུ་ཚོལ་བར་བྱེད་པ་དང ། ཧ་ཅང་ཡུན་རིང་དུ་འཆང་བར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དབྱར་གྱི་རས་ཆེན་གྱི་སྤང་བ་སྟེ་ཉི་ཤུ་བརྒྱད་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་ཤཱཀྱ་རྣམས་ཀྱི་ནང་ན་ཤཱཀྱ་རྣམས་ཀྱི་གྲོང་རྡལ་ཝ་ཚོངས་ཅན་ཞེས་བྱ་བ་ན་བཞུགས་སོ། །དེའི་ཚེ་ན་ཁྱིམ་བདག་ཅིག་གིས་རང་གི་དད་པ་དང ། རང་གི་གཅུགས་པ་དང ། རང་གི་དང་བས་གཙུག་ལག་ཁང་བྱེད་ཏུ་བཅུག་ནས་ཚེ་དང་ལྡན་པ་སྒྲ་གཅན་ཟིན་ལ་གང་ཟག་གིར་ཕུལ་ལོ། །དེ་ནས་ཚེ་དང་ལྡན་པ་སྒྲ་གཅན་ཟིན་གཙུག་ལག་ཁང་དེར་ཇི་ཙམ་པ་དེ་ཙམ་འདུག་ནས་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུར་སོང་ངོ ། །ཁྱིམ་བདག་དེས་འཕགས་པ་སྒྲ་གཅན་ཟིན་གཙུག་ལག་ཁང་དེར་ཇི་ཙམ་པ་དེ་ཙམ་འདུག་ནས་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུར་སོང་ཞེས་ཐོས་སོ་ཐོས་ནས་ཀྱང་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ལོ། །དེ་ནས་ཚེ་དང་ལྡན་པ་སྒྲ་གཅན་ཟིན་ཅི་དགར་ལྗོངས་སུ་འདུག་ནས་ཤཱཀྱ་རྣམས་ཀྱི་གྲོང་རྡལ་ཝ་ཚོངས་ཅན་ག་ལ
6.203b
བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་ཞིག་འགྲོ་བའི་ཚེ་ཝ་ཚོངས་ཅན་དུ་ཕྱིན་ནས་ཚེ་དང་ལྡན་པ་སྒྲ་གཅན་ཟིན་གྱིས་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ལོ་ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་སྒྲ་གཅན་ཟིན་གྱིས་འདི་སྐད་ཅེས་གསོལ་ཏོ། །བཙུན་པ་འདི་ན་ཁྱིམ་བདག་ཅིག་གིས་རང་གི་དད་པ་དང་རང་གི་གཅུགས་པ་དང ། རང་གི་དང་བས་གཙུག་ལག་ཁང་བགྱིད་དུ་སྩལ་ནས་བདག་ལ་གང་ཟག་གིར་སྩལ་ཏེ། བདག་གཙུག་ལག་ཁང་དེར་ཅི་ཙམ་མཆིས་ནས་ལྷུང་བཟེད་དང ། ཆོས་གོས་འཚལ་ཏེ་ལྗོངས་རྒྱུར་མཆིས་པ་དང་ཁྱིམ་བདག་དེས་འཕགས་པ་སྒྲ་གཅན་ཟིན་གཙུག་ལག་ཁང་དེར་ཅི་ཙམ་པ་དེ་ཙམ་མཆིས་ནས་ལྷུང་བཟེད་དང ། ཆོས་གོས་འཚལ་ཏེ། ལྗོངས་རྒྱུར་མཆིས་ཤེས་ཐོས་ནས་ཀྱང་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ན། བཙུན་པ་དེ་ལ་བདག་གིས་ད་ཇི་ལྟར་བགྱི། སྒྲ་གཅན་ཟིན་ཚུར་ཤོག་།ཁྱོད་ཁྱིམ་བདག་དེ་ག་ལ་བ་དེར་སོང་ལ་ཕྱིན་ནས་ཁྱིམ་བདག་དེ་ལ་འདི་སྐད་ཅེས་ཁྱིམ་བདག་ཁྱོད་ཁོ་བོའི་ལུས་སམ། ངག་ལ་ཅུང་ཟད་སྨོད་པར་མི་བྱེད་དམ་ཞེས་སྨྲོས་ཤིག་།ཚེ་དང་ལྡན་པ་སྒྲ་གཅན་ཟིན་གྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་དེ་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཁོ་བོའི་ལུས་སམ། ངག་ལ་ཅུང་ཟད་སྨོད་པར་མི་བྱེད་དམ། འཕགས་པ་སྒྲ་གཅན་ཟིན་བདག་ཁྱོད་ཀྱི་སྐུ་འམ། གསུང་ལ་ཅུང་ཟད་ཀྱང་སྨོད་པར་མི་བགྱིད་དོ། །དེ་ནས་ཚེ་དང་ལྡན་པ་སྒྲ་གཅན་ཟིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་སྒྲ་གཅན་ཟིན་གྱིས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཁྱིམ་བདག་ག་ལ་བ་དེར་མཆིས་ཏེ་ཕྱིན་ནས་ཁྱིམ་བདག་དེ་ལ་འདི་སྐད
6.204a
ཅེས་ཁྱིམ་བདག་ཁྱོད་ཁོ་བོའི་ལུས་སམ། ངག་ལ་ཅུང་ཟད་སྨོད་པར་མི་བྱེད་དམ་ཞེས་བགྱིས་ན། དེ་འདི་སྐད་ཅེས་འཕགས་པ་སྒྲ་གཅན་ཟིན་བདག་ཁྱོད་ཀྱི་སྐུ་འམ། གསུང་ལ་སྨོད་པ་ཅུང་ཟད་ཀྱང་མ་མཆིས་སོ་ཞེས་མཆིའོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་འདུག་པར་གྱུར་ཅིང་བསིལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་ཇི་སྙེད་ཝ་ཚོངས་ཅན་ཉེ་བར་རྟེན་ཅིང་འཁོད་པ་དེ་དག་ཐམས་ཅད་དཔོང་སའི་ཁང་པར་བསྡུས་ཤིག་།ཚེ་དང་ལྡན་པ་ཀུན་དགའ་བོས་བཀའ་བཞིན་འཚལ། ཞེས་བཅོམ་ལྡན་འདས་ལས་མཉན་ནས་དགེ་སློང་ཇི་སྙེད་ཝ་ཚོངས་ཅན་ཉེ་བ་རྟེན་ཅིང་འཁོད་པ་དེ་དག་ཐམས་ཅད་དཔོང་སའི་ཁང་པར་བསྡུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་དགེ་སློང་ཇི་སྙེད་ཝ་ཚོངས་ཅན་ཉེ་བར་རྟེན་ཅིང་མཆིས་པ་དེ་དག་ཐམས་ཅད་དཔོང་སའི་ཁང་པར་མཆིས་ཤིང་འཐུན་པར་གྱུར་ན་བཅོམ་ལྡན་འདས་ཀྱིས་དེ་དེའི་དུས་ལ་བབ་པར་མཁྱེན་པར་མཛད་དུ་གསོལ། །དེ་ནས་བཅོམ་ལྡན་འདས་དཔོང་སའི་ཁང་པ་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་གིས་གང་ཟག་གཅིག་ལ་སྦྱིན་པ་བྱིན་ནས་གཞན་གཅིག་ལ་སྦྱིན་པར་བྱེད་པ་ནི་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ། ལོངས་སྤྱད་དུ་རུང་བ་མ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་བྱེད་པ་ཡང་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ་ལོངས་སྤྱོད་ཏུ་རུང་བ་མ་ཡིན་ནོ། །དགེ་སློང་དག་གང་གིས་གཉིས་ལ་སྦྱིན་པ་བྱིན་ནས་གཞན་གཅིག
6.204b
ལ་སྦྱིན་པར་བྱེད་པ་ནི་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ། ལོངས་སྤྱད་ཏུ་རུང་བ་མ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་བྱེད་པ་ཡང་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ་ལོངས་སྤྱད་ཏུ་རུང་བ་མ་ཡིན་ནོ། །དགེ་སློང་དག་གང་གིས་རབ་ཏུ་མང་པོ་ལ་སྦྱིན་པ་བྱིན་ནས་གཞན་གཅིག་ལ་སྦྱིན་པར་བྱེད་པ་ནི་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ་ལོངས་སྤྱད་ཏུ་རུང་བ་མ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་བྱེད་པ་ཡང་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ། ལོངས་སྤྱད་ཏུ་རུང་བ་མ་ཡིན་ནོ། །དགེ་སློང་དག་གང་གིས་དགེ་འདུན་ལ་སྦྱིན་པ་བྱིན་ནས་གཞན་གཅིག་ལ་སྦྱིན་པར་བྱེད་པ་ནི་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ། ལོངས་སྤྱད་ཏུ་རུང་བ་མ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་བྱེད་པ་ཡང་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ། ལོངས་སྤྱད་ཏུ་རུང་བ་མ་ཡིན་ནོ། །དགེ་སློང་དག་གང་གིས་དགེ་འདུན་བྱེ་ཞིང་གཉིས་སུ་གྱུར་ཏེ་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ན་ཕྱོགས་གཅིག་ལ་སྦྱིན་པ་བྱིན་ནས། ཕྱོགས་གཉིས་པ་ལ་སྦྱིན་པར་བྱེད་པ་ནི་ཆོས་དང་ལྡན་པའི་སྦྱིན་པ་མ་ཡིན་ཞིང་ཆོས་དང་ལྡན་པའི་ལེན་པ་མ་ཡིན་ལ། ལོངས་སྤྱད་ཏུ་རུང་བ་མ་ཡིན་ནོ། །དགེ་སློང་དག་གང་གིས་གང་ཟག་གཅིག་ལ་སྦྱིན་པ་བྱིན་ནས་གཞན་གཅིག་ལ་སྦྱིན་པར་མི་བྱེད་པ་ནི་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་མི་བྱེད་པ་ཡང་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །དགེ་སློང་དག་གང་གིས་གཉིས་ལ་སྦྱིན་པ་བྱིན་ནས་གཞན་གཅིག་ལ་སྦྱིན་པར་མི་བྱེད་པ་ནི་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །
6.205a
གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་མི་བྱེད་པ་ཡང་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །དགེ་སློང་དག་གང་གིས་རབ་ཏུ་མང་པོ་ལ་སྦྱིན་པ་བྱིན་ནས་གཞན་གཅིག་ལ་སྦྱིན་པར་མི་བྱེད་པ་ནི་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་མི་བྱེད་པ་ཡང་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །དགེ་སློང་དག་གང་གིས་དགེ་འདུན་ལ་སྦྱིན་པ་བྱིན་ནས་གཞན་གཅིག་ལ་བྱིན་པར་མི་བྱེད་པ་ནི་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །གཞན་གཉིས་སམ། རབ་ཏུ་མང་པོ་འམ། དགེ་འདུན་ལ་སྦྱིན་པར་མི་བྱེད་པ་ཡང་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །དགེ་སློང་དག་གང་གིས་དགེ་འདུན་བྱེ་ཞིང་གཉིས་སུ་གྱུར་ལ་ཕྱོགས་དག་གཞན་གྱི་ཕྱོགས་སུ་རྣམ་པར་གནས་པ་ན་ཕྱོགས་གཅིག་ལ་སྦྱིན་པ་བྱིན་ནས། ཕྱོགས་གཉིས་པ་ལ་སྦྱིན་པར་མི་བྱེད་པ་ནི་ཆོས་དང་ལྡན་པའི་སྦྱིན་པ་ཡིན་ཞིང་ཆོས་དང་ལྡན་པའི་ལེན་པ་ཡིན་ལ། ལོངས་སྤྱད་ཏུ་རུང་བ་ཡིན་ནོ། །དགེ་སློང་དག་དེ་ལྟ་བས་ན་སྔ་མ་ནི་སྦྱིན་པ་ཡིན་ལ། ཕྱི་མ་ནི་མ་ཡིན་ནོ། །རྒྱལ་པོ་ནི་ས་གཞི་ལ་དབང་ལ། བདག་པོ་ནི་གནས་མལ་ལ་དབང ། དགེ་སློང་ནི་ལྷུང་བཟེད་དང་ཆོས་གོས་ལ་དབང་ངོ ། །སྦྱིན་པ་པོ་དང་སྦྱིན་བདག་གིས་རང་གི་སྦྱིན་པར་བྱ་བའི་ཆོས་མངོན་པར་འདུ་བྱ་བར་ནི་རུང་གི་རང་གིས་གཞན་ལ་སྦྱིན་དུ་ནི་མི་རུང་ངོ ། །དགེ་སློང་དག་དགེ་སློང་སྒྲ་གཅན་ཟིན་ལ་གཙུག་ལག་ཁང་དེ་ཕྱིར་བྱིན་ཅིག་།དགེ་སློང་དེ་དག་གིས་ཚེ་དང་ལྡན་པ་སྒྲ་གཅན་ཟིན་ལ་གཙུག་ལག་ཁང་དེ་ཕྱིར་བྱིན་ནོ། །འདི་ནི་རེ་ཤིག་བྱུང་བ་ཡིན་གྱི་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན
6.205b
རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བསོད་སྙོམས་པ་ཞིག་གིས་ཁྱིམ་བདག་ཅིག་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་ནས་དུས་གཞན་ཞིག་ན་བསོད་སྙོམས་པ་དེས་ཁྱིམ་བདག་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གི་བསྔགས་པ་བརྗོད་པ་དང ། ཁྱིམ་བདག་དེས་སྨྲས་པ། འཕགས་པ་བདག་གིས་ཀྱང་རེ་ཤིག་རྫས་ལས་བྱུང་བའི་བསོད་ནམས་བགྱི་བའི་གཞི་ཅུང་ཞིག་བགྱིའོ། །དེ་བཞིན་གྱིས་ཤིག་།ཅི་ཞིག་བགྱི། སངས་རྒྱས་ལ་སོགས་པ་དགེ་སློང་གི་དགེ་འདུན་མཆོད་སྟོན་གསོལ་ཅིག་།དེ་བཞིན་བགྱིའོ། །ན་བཟའ་དབུལ་བ་ཡང་ཅུང་ཟད་ཡོད་དམ། འཕགས་པ་བདག་ནི་ལོངས་སྤྱོད་སྲབ་པ་ལགས་མོད་ཀྱི་རས་ཟུང་གཅིག་དབུལ་ལོ། །འཕགས་པ་ཁྱོད་ཀྱིས་སང་བདག་གི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་ལ་སྤྱན་དྲང་དུ་གསོལ། །བསོད་སྙོམས་པ་དེས་ཚོགས་པའི་དུས་སུ་ཁྱིམ་བདག་དེའི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། དགེ་སློང་རྣམས་ཀྱིས་སྨྲས་པ། བསོད་སྙོམས་པ་ཁྱོད་ཁྱིམ་དད་པར་བྱེད་པར་གྱུར་ཏོ། །བསོད་སྙོམས་པ་ཅི་ཁྱིམ་བདག་གིས་ཡོན་དང་བཅས་པའི་མཆོད་སྟོན་གསོལ་ལམ། འོན་ཏེ་ཡོན་མེད་པའི་མཆོད་སྟོན་གསོལ། ཚེ་དང་ལྡན་པ་དག་ཡོན་དང་བཅས་པ་སྟེ། འོན་ཀྱང་ཁྱིམ་བདག་དེ་ལོངས་སྤྱོད་སྲབ་པ་ལགས་པས་འདི་ལྟར་རས་ཟུང་གཅིག་འབུལ་ལོ། །ཉེ་དགས་ཐོས་ནས་དེས་བསམས་པ། གང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་རས་ཟུང་གཅིག་འབུལ་བ་དེ་ནི་ཆེན་པོ་ལ་འོས་པ་ཞིག་འབྱུང་གོར་མ་ཆག་གིས་གལ་ཏེ་བདག་གིས་རས་ཟུང་དེ་མ་ཕྲོགས་ན་ཉེ་དགའ་ཞེས་བྱ་བའི་མིང་མི་གཟུང་ངོ་སྙམ་ནས་ཉེ་དགའ་དེའི་ཕྱི་དེ་ཉིན་པར་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་ཁྱིམ་བདག་དེའི་ཁྱིམ་དུ་སོང་བ་དང ། ཇི་ཙམ་ན་དེས་ཁྱིམ་བདག་དེ་མཆོད་སྟོན་སྦྱོར་བ་མཐོང་ནས། དེས་ཁྱིམ་བདག་དེ་ལ་དྲིས་པ། ཁྱིམ་བདག་ཅི་བྱེད། འཕགས་པ་མཆོད་སྟོན་སྦྱོར་རོ། །ཁྱིམ་བདག་བཅོམ་ལྡན་འདས་ཀྱིས་སེམས་ཅན་གང་དག་སྔ་དྲོའི
6.206a
དུས་ཀྱི་ཚེ་ལུས་ཀྱིས་ལེགས་པར་སྤྱད་ཅིང་སྤྱོད། །ངག་དང་ཡིད་ཀྱིས་ལེགས་པར་སྤྱད་ཅིང་སྤྱོད་པའི་སེམས་ཅན་དེ་དག་ལ་དུས་དེ་ན་སྔ་དྲོ་བཟང་པོར་ཉེ་བར་གནས་པར་འགྱུར་ལ། སེམས་ཅན་གང་དག་གུང་ཚིགས་ཀྱི་དུས་ཀྱི་ཚེ་དང ། ཕྱེམ་འཕྲེད་ཀྱི་དུས་ཀྱི་ཚེ་ལེགས་པར་སྤྱད་ཅིང་སྤྱོད། ངག་དང་ཡིད་ཀྱིས་ལེགས་པར་སྤྱད་ཅིང་སྤྱོད་པའི་སེམས་ཅན་དེ་དག་ལ་དུས་དེ་ན་གུང་ཚིགས་བཟང་པོ་དང་ཕྱེམ་བྲེད་བཟང་པོར་ཉེ་བར་གནས་པར་འགྱུར་རོ་ཞེས་བཀའ་སྩལ་པ་དེ་ནི་ལེགས་པར་གསུངས་པ་ཡིན་ནོ། །ཁྱིམ་བདག་གོས་སྦྱིན་པ་ཡང་ཅུང་ཟད་ཡོད་དམ། འཕགས་པ་བདག་ནི་ལོངས་སྤྱོད་སྲབ་པ་ལགས་ཏེ་འོན་ཀྱང་རས་ཟུང་གཅིག་འབུལ་ལོ། ཁྱིམ་བདག་རས་ཟུང་དེ་ཅི་འདྲ་བལྟའོ། །དེས་བསྟན་པ་དང་ཅི་ཙམ་ན་བཟང་བར་མཐོང་ནས་ཉེ་དགས་སྨྲས་པ། ཁྱིམ་བདག་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་ནི་ཡོད་ན་ཡོངས་སུ་ལོངས་སྤྱོད་པ་ལས་བྱུང་བའི་བསོད་ནམས་ནི་ལན་འགའ་ཡང་མེད་དོ་བཅོམ་ལྡན་འདས་ཀྱི་འཁོར་སྟོང་ཉིས་བརྒྱ་ལྔ་བཅུ་ལ་རས་ཟུང་སྟོང་ཉིས་བརྒྱ་ལྔ་བཅུས་འགྲུབ་པས་འདིས་ནི་རེ་ཤིག་ཆོས་གོས་ཀྱི་རྡང་ཁོ་ན་ལ་ཡོངས་སུ་ཟད་པར་བྱ་དགོས་པར་འགྱུར་རོ། །བཅོམ་ལྡན་འདས་ཀྱིས་ཀྱང་ཟས་ཀྱི་རྙེད་པ་བྱུང་ན་ནི་པུ་ལ་སའི་འདབ་མས་ཀྱང་བགོ་བར་བྱ་ལ། གོས་ཀྱི་རྙེད་པ་བྱུང་ན་ནི་མར་མེའི་སྙིང་པོར་རུང་བས་ཀྱང་བགོ་བར་བྱ་འོ་ཞེས་གསུངས་ན། གལ་ཏེ་འགེད་པར་མི་བྱེད་ན་ཁྱོད་ཀྱི་འདི་ཡང་ལོངས་སྤྱོད་པར་མི་འགྱུར་རོ། །དེས་སྨྲས་པ། འཕགས་པ་གང་གིས་བདག་ལ་ཡོངས་སུ་བཏང་བ་ལས་བྱུང་བའི་བསོད་ནམས་ཀྱང་མཆིས་ལ། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ཀྱང་མཆིས་པར་འགྱུར་པའི་ཐབས་ཅི་མཆིས། ཁྱིམ་བདག་གལ་ཏེ་ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་པ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་གང་ཡིན་པ་དེ་ལ་རས་ཟུང་འདི་བསྐོན་ན་དེ་ལྟ་ན་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་དང ། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་སུ་ཡང་འགྱུར་རོ། །དེས་སྨྲས་པ། འཕགས་པ་ཤཱཀྱའི
6.206b
རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་སུ་མཆིས། ཁྱིམ་བདག་ཁོ་བོ་ཉིད་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་ཡིན་ནོ། །ཁྱིམ་བདག་དེས་ཉེ་དགའ་ལ་འཕགས་པ་ཁྱོད་རས་ཟུང་འདི་བཞེས་ཤིག་ཅེས་སྦྱིན་པར་བརྩམས་པ་དང ། ཉེ་དགས་སྨྲས་པ། ཁྱིམ་བདག་ཁྱོད་སྦྱིན་པ་སྦྱིན་ཡང་མི་ཤེས་སམ། གང་གི་ཚེ་སངས་རྒྱས་ལ་སོགས་པ་དགེ་སློང་གི་དགེ་འདུན་མཆོད་སྟོན་གསོལ་བ་དེའི་ཚེ་ན་ཁྱོད་ཀྱིས་རྒན་པའི་མཐའ་ལོགས་སུ་རྗེས་སུ་ཡི་རང་བ་བྱེད་ཏུ་ཆུག་ལ་ཁོ་བོ་ལ་བྱིན་ཅིག་།འཕགས་པ་དེ་བཞིན་བགྱིའོ་ཞེས་ཁྱིམ་བདག་དེས་དེ་ལས་མཉན་ནས་ཁྱིམ་བདག་དེས་དེའི་འོག་ཏུ་སངས་རྒྱས་ལ་སོགས་པ་དགེ་སློང་གི་དགེ་འདུན་མཆོད་སྟོན་གསོལ་ནས་རས་ཟུང་དེ་རྒན་པའི་མཐའ་ལོགས་སུ་ཡི་རང་བར་མཛོད་ཅིག་།རྗེས་སུ་ཡི་རང་བར་མཛོད་ཅིག་ཅེས་རྗེས་སུ་ཡི་རང་བར་བྱེད་དུ་བཅུག་ནས་ཉེ་དགའ་ལ་བྱིན་ནོ། །དགེ་སློང་རྣམས་ཀྱིས་དགེ་སྐོས་ལ་སྨྲས་པ། ཉེ་དགའ་ལས་རས་ཟུང་དེ་ལོང་ཤིག་།དགེ་བསྐོས་ཀྱིས་ཉེ་དགའ་ལ་སྨྲས་པ། རས་ཟུང་དེ་འོན་ཅིག་།ཅི་གཙུག་ལག་ཁང་དུ་ཁྱེར་ཏེ་སྦྱིན་ནམ། དགེ་བསྐོས་ཀྱིས་སྨྲས་པ། མ་ཡིན་ཏེ། འདི་ནི་དགེ་འདུན་ལ་ཕུལ་བ་ཡིན་ནོ། །ཉེ་དགས་སྨྲས་པ། ཁྱོད་ཅིའི་ཕྱིར་རང་གི་ལྷུང་བཟེད་དང ། ཆོས་གོས་དགེ་འདུན་ལ་དབུལ་བར་མི་བྱེད། འདི་ནི་ཁོ་བོ་ལ་བྱིན་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་པ་དང་བསོད་སྙོམས་པ་དེ་སྐྱེངས་ནས་དེ་ཉིད་ཏུ་འདུག་གོ། །དེ་ནས་བསོད་སྙོམས་པ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བཞུད་ནས་རིང་པོ་མ་ལོན་པར་རིག་ནས་ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་གིས་གཞན་དུ་འབྲུག་བསྒྲགས་ལ་གཞན་དུ་ཆར་ཕབ་བོ། །འཕགས་པ་ཇི་ལྟར་བགྱི། བཙུན་པ་ཉེ་དགའི་མཆིད་ནས་ཁྱིམ་བདག་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་ནི
6.207a
ཡོད་ན་ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་ལན་འགའ་ཡང་མེད་དེ། བཅོམ་ལྡན་འདས་ཀྱི་འཁོར་སྟོང་ཉིས་བརྒྱ་ལྔ་བཅུ་ལ་རས་ཟུང་སྟོང་ཉིས་བརྒྱ་ལྔ་བཅུས་འགྲུབ་པས་འདི་ནི་རེ་ཤིག་ཆོས་གོས་ཀྱི་རྡང་ཁོ་ན་ལ་ཡོངས་སུ་ཟད་པར་བྱ་དགོས་པར་འགྱུར་རོ། །བཅོམ་ལྡན་འདས་ཀྱིས་ཀྱང་ཟས་ཀྱི་རྙེད་པ་བྱུང་ན་ནི་པུ་ལ་སའི་འདབ་མས་ཀྱང་བགོ་བར་བྱ་ལ། གོས་ཀྱི་རྙེད་པ་བྱུང་ན་ནི་མར་མེའི་སྙིང་པོར་རུང་བས་ཀྱང་བགོ་བར་བྱའོ་ཞེས་གསུངས་ན། གལ་ཏེ་བགེད་པར་མི་བྱེད་ན་ནི་ཁྱོད་ཀྱི་འདི་ཡང་ལོངས་སྤྱད་པར་མི་འགྱུར་རོ་ཞེས་མཆི་ནས་བདག་གིས་དེ་ལ་འདི་སྐད་ཅེས་འཕགས་པ་གང་གིས་བདག་ལ་ཡོངས་སུ་བཏང་བ་ལས་བྱུང་བའི་བསོད་ནམས་མཆིས་ལ། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ཀྱང་མཆིས་པར་འགྱུར་བའི་ཐབས་ཅི་མཆིས་ཤེས་བགྱིས་ན། བཙུན་པ་ཉེ་དགའི་མཆིད་ནས་ཁྱིམ་བདག་གལ་ཏེ་ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་གང་ཡིན་པ་དེ་ལ་རས་ཟུང་འདི་བསྐོན་ན་དེ་ལྟ་ན་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་དང ། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་སུ་ཡང་འགྱུར་རོ་ཞེས་མཆིའོ། །བདག་གིས་དེ་ལ་འདི་སྐད་ཅེས་འཕགས་པ་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་སུ་མཆིས་ཤེས་བགྱིས་ན། བཙུན་པ་ཉེ་དགའ་བདག་ལ་འདི་སྐད་ཅེས་ཁྱིམ་བདག་ཁོ་བོ་ཉིད་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་ཡིན་ནོ་ཞེས་མཆི་ནས། བདག་གིས་བཙུན་པ་ཉེ་དགའ་ལ་འཕགས་པ་ཁྱོད་རས་ཟུང་འདི་བཞེས་ཤིག་ཅེས་སྦྱིན་པར་བརྩམས་པ་དང ། བཙུན་པ་ཉེ་དགའི་མཆིད་ནས་ཁྱིམ་བདག་ཁྱོད་སྦྱིན་པ་སྦྱིན་ཡང་མི་ཤེས་སམ། གང་གི་ཚེ་སངས་རྒྱས་ལ་སོགས་པ་དགེ་སློང་གི་དགེ་འདུན་མཆོད་སྟོན་གསོལ་བ་དེའི་ཚེ་ཁྱོད་ཀྱིས་རྒན་པའི་མཐའ་ལོགས་སུ་རྗེས་སུ་ཡི་རང་བ་བྱེད་ཏུ་ཆུག་ལ་ཁོ་བོ་ལ་བྱིན་ཅིག་ཅེས་མཆི་ནས། བདག་གིས་དེ་ཁོ
6.207b
ན་བཞིན་དུ་བགྱིས་པས་འདི་ལ་བདག་གིས་ནོངས་པ་ཅི་མཆིས། བསོད་སྙོམས་པ་དེ་གཙུག་ལག་ཁང་དུ་སོང་བ་དང ། དགེ་སློང་རྣམས་ཀྱིས་དེ་ལ་སྨྲས་པ། བསོད་སྙོམས་པ་དང་རིས་འཐུན་པ་གང་ཡིན་པས་ཀྱང་ཁྱིམ་བདག་ཅིག་ཇི་ལྟར་དད་པས་བསྐྱེད་ན་དེས་ཀྱང་གཞན་དུ་འབྲུག་བསྒྲགས་ལ་གཞན་དུ་ཆར་ཕབ་བོ། །དེས་སྨྲས་པ། དེས་ཅི་ཉེས་འདི་ལྟར་དེར་གཅིག་གཅིག་གིས་སོང་སྟེ་འདི་སྐད་ཅེས་ཁྱིམ་བདག་འདི་ནི་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་ནི་ཡོད་ན། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་ལན་འགའ་ཡང་མེད་དེ། བཅོམ་ལྡན་འདས་ཀྱི་འཁོར་སྟོང་ཉིས་བརྒྱ་ལྔ་བཅུ་ལ་རས་ཟུང་སྟོང་ཉིས་བརྒྱ་ལྔ་བཅུས་འགྲུབ་པས་འདི་ནི་རེ་ཤིག་ཆོས་གོས་ཀྱི་རྡང་ཁོ་ན་ལ་ཡོངས་སུ་ཟད་པར་འགྱུར་རོ། །བཅོམ་ལྡན་འདས་ཀྱིས་ཀྱང་ཟས་ཀྱི་རྙེད་པ་བྱུང་ན་ནི་པུ་ལ་སའི་འདབ་མས་ཀྱང་བགོ་བར་བྱ་ལ། གོས་ཀྱི་རྙེད་པ་བྱུང་ན་ནི་མར་མེའི་སྙིང་པོར་རུང་བས་ཀྱང་བགོ་བར་བྱའོ་ཞེས་གསུངས་ན་གལ་ཏེ་འགེད་པར་མི་བྱེད་ན་ནི་ཁྱོད་ཀྱི་འདི་ཡང་ལོངས་སྤྱད་པར་མི་འགྱུར་རོ་ཞེས་ཟེར་ནས་འདི་སྐད་ཅེས་འཕགས་པ་གང་གིས་བདག་ལ་ཡོངས་སུ་བཏང་བ་ལས་བྱུང་བའི་བསོད་ནམས་ཀྱང་མཆིས་ལ། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ཀྱང་མཆིས་པར་འགྱུར་བའི་ཐབས་ཅི་མཆིས་ཞེས་བྱས་ན། དེ་ན་རེ་འདི་སྐད་ཅེས་གལ་ཏེ་ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་གང་ཡིན་པ་དེ་ལ་རས་ཟུང་འདི་བསྐོན་ན་དེ་ལྟ་ན་ཁྱོད་ལ་ཡོངས་སུ་བཏང་བ་ལས་བྱུང་བ་བསོད་ནམས་དང་ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་སུ་ཡང་འགྱུར་རོ། །ཞེས་ཟེར་རོ། །དེས་འདི་སྐད་ཅེས་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་སུ་ཡོད་ཅེས་བྱས་ན་དེ་ན་རེ་ཁོ་བོ་ཉིད་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་ཡིན་ནོ་ཞེས་ཟེར་ནས། དེས་དེ་ལ་རས་ཟུང་དེ་སྦྱིན་པར་བརྩམས་པ་དང ། དེ་ན་རེ་ཁྱིམ་བདག་ཁྱོད་སྦྱིན་ཡང་མི་ཤེས་སམ། གང་གི་ཚེ་སངས་རྒྱས་ལ་སོགས་པ་དགེ་སློང་གི་དགེ་འདུན་མཆོད
6.208a
སྟོན་གསོལ་བ་དེའི་ཚེ་ཁྱོད་ཀྱིས་རྒན་པའི་མཐའ་ལོགས་སུ་རྗེས་སུ་ཡི་རང་བར་བྱེད་དུ་ཆུག་ལ་ཁོ་བོ་ལ་བྱིན་ཅིག་ཅེས་ཟེར་ནས། དེས་དེ་ཁོ་ན་བཞིན་བྱས་པས་དེས་ཉེས་པ་ཅི་ཡོད། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་གང་ཟག་བདག་ལ་སྔོས་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་གང་ཟག་བདག་ལ་བསྔོར་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། །རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་གང་ཟག་བདག་ལ་སྒྱུར་དུ་འཇུད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ་གཞན་ཡང་དེ་ལྟ་བུ་གང་ཡིན་པའོ། །དགེ་འདུན་ལ་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ལའོ། །བསྔོས་པའི་ཞེས་བྱ་བ་ནི་གཟས་པའི་འོ། །རྙེད་པ་ཞེས་བྱ་བ་ནི་རྙེད་པ་གཉིས་ཏེ། གོས་ཀྱི་རྙེད་པ་དང ། ཟས་ཀྱི་རྙེད་པ་སྟེ། དོན་འདིར་ནི་གོས་ཀྱི
6.208b
རྙེད་པ་ཡིན་པར་དགོངས་སོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་དེ་ཤེས་པར་གྱུར་པ་འམ། གཞན་དག་གིས་བརྗོད་པས་སོ། །གང་ཟག་བདག་ལ་སྒྱུར་དུ་འཇུད་ན་ཞེས་བྱ་བ་ནི་བདག་ལ་འབུལ་དུ་འཇུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་བདུན་པ། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་གང་ཟག་གཅིག་ལ་བསྔོས་པའི་རྙེད་པ་གང་ཟག་བདག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གོས་གང་ཟག་གཉིས་ལ་བསྔོས་པའི་རྙེད་པ་གང་ཟག་བདག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་ཏུ་འགྱུར་རོ། །དགེ་སློང་གིས་གང་ཟག་རབ་ཏུ་མང་པོ་དག་ལ་བསྔོས་པའི་རྙེད་པ་གང་ཟག་བདག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་འདུན་ལ་བསྔོས་པའི་རྙེད་པ་གང་ཟག་བདག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་གཅིག་ལ་བསྔོས་པའི་རྙེད་པ་གང་ཟག་གཞན་གཅིག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཉེས་བྱས་ཉིད་དུ་འགྱུར་རོ། །དགེ་སློང་གིས་གང་ཟག་གཅིག་ལ་བསྔོས་པའི་རྙེད་པ་གང་ཟག་གཞན་གཉིས་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གང་ཟག་གཅིག་ལ་བསྔོས་པའི་རྙེད་པ་གང་ཟག་གཞན་རབ་ཏུ་མང་པོ་དག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་སུ་འགྱུར་རོ། །དགེ་སློང་གིས་གང་ཟག་གཅིག་ལ་བསྔོས་པའི་རྙེད་པ་དགེ་འདུན་ལ་
6.209a
སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གང་ཟག་གཉིས་ལ་བསྔོས་པའི་རྙེད་པ་གང་ཟག་གཞན་གཅིག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གང་ཟག་གཉིས་ལ་བསྔོས་པའི་རྙེད་པ་གང་ཟག་གཞན་གཉིས་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གང་ཟག་གཉིས་ལ་བསྔོས་པའི་རྙེད་པ་གང་ཟག་གཞན་རབ་ཏུ་མང་པོ་དག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གང་ཟག་གཉིས་ལ་བསྔོས་པའི་རྙེད་པ་དགེ་འདུན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་གང་ཟག་རབ་ཏུ་མང་པོ་དག་ལ་བསྔོས་པའི་རྙེད་པ་གང་ཟག་གཞན་གཅིག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་གང་ཟག་རབ་ཏུ་མང་པོ་དག་ལ་བསྔོས་པའི་རྙེད་པ་གང་ཟག་གཞན་གཉིས་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་གང་ཟག་རབ་ཏུ་མང་པོ་དག་ལ་བསྔོས་པའི་རྙེད་པ་གང་ཟག་གཞན་རབ་ཏུ་མང་པོ་དག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་གང་ཟག་རབ་ཏུ་མང་པོ་དག་ལ་བསྔོས་པའི་རྙེད་པ་དགེ་འདུན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་དགེ་འདུན་ལ་བསྔོས་པའི་རྙེད་པ་གང་ཟག་གཅིག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་དགེ་འདུན་ལ་བསྔོས་པའི་རྙེད་པ་གང་ཟག་གཉིས་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར
6.209b
རོ། །དགེ་སློང་གིས་དགེ་འདུན་ལ་བསྔོས་པའི་རྙེད་པ་གང་ཟག་རབ་ཏུ་མང་པོ་དག་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་རོ། །ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་དགེ་འདུན་ལ་བསྔོས་པའི་རྙེད་པ་དགེ་འདུན་གཞན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་དགེ་འདུན་ལ་བསྔོས་པའི་རྙེད་པ་དགེ་སློང་མའི་དགེ་འདུན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་དགེ་སློང་མའི་དགེ་འདུན་ལ་བསྔོས་པའི་རྙེད་པ་དགེ་སློང་གི་དགེ་འདུན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གཉིས་ཀའི་དགེ་འདུན་ལ་བསྔོས་པའི་རྙེད་པ་དགེ་སློང་གི་དགེ་འདུན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གཉིས་ཀའི་དགེ་འདུན་ལ་བསྔོས་པའི་རྙེད་པ་དགེ་སློང་མའི་དགེ་འདུན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་དགེ་འདུན་བྱེ་ཞིང་གཉིས་སུ་གྱུར་ཏེ། ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ན་ཕྱོགས་གཅིག་ལ་བསྔོས་པའི་རྙེད་པའི་ཕྱོགས་གཉིས་པ་ལ་བསྔོར་འཇུད་ན་དེ་བསྔོར་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་ཏུ་འགྱུར་རོ། །དགེ་སློང་གིས་གནས་ཁང་གཅིག་ལ་བསྔོས་པའི་རྙེད་པ་གནས་ཁང་གཞན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་གནས་ཁང་ལ་བསྔོས་པའི་རྙེད་པ་ཁྱམས་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ་ཐོབ་ན་ཡང་ཉེས་བྱས་སུ་འགྱུར་རོ། །དགེ་སློང་གིས་ཁྱམས་ལ་བསྔོས་པའི་རྙེད་པ་གནས་ཁང་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་ཀ་བ་གཞན་ཅིག་ལ་བསྔོས་པའི་རྙེད་པ་ཀ་བ་གཞན་གཉིས་པ་ལ་སྒྱུར་དུ་འཇུད་ན་དེ
6.210a
སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་ཀ་བ་གཞན་ཅིག་ལ་བསྔོས་པའི་རྙེད་པ་སྒོ་ཁང་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་སྒོ་ཁང་ལ་བསྔོས་པའི་རྙེད་པ་ལ་བང་རིམ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་བང་རིམ་ལ་བསྔོས་པའི་རྙེད་པ་སྒོ་ཁང་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་སངས་རྒྱས་ཀྱི་སྐུ་གཟུགས་གཅིག་ལ་བསྔོས་པའི་རྙེད་པ་སངས་རྒྱས་ཀྱི་སྐུ་གཟུགས་གཞན་གཉིས་པ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་མཆོད་རྟེན་གཅིག་ལ་བསྔོས་པའི་རྙེད་པ་མཆོད་རྟེན་གཞན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་མཆོད་རྟེན་གྱི་ཐེམ་སྐས་ཀྱི་གཞི་དང་པོ་ལ་བསྔོས་པའི་རྙེད་པ་ཐེམ་སྐས་ཀྱི་གཞི་གཉིས་པ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །ཐེམ་སྐས་ཀྱི་གཞི་གཉིས་པ་དང་གསུམ་པ་དང ། བཞི་པ་དང ། ཐམས་ཅད་ཀྱི་སྟེང་མའི་བར་ལ་ཡང་དེ་བཞིན་ནོ། །དགེ་སློང་གིས་ཐེམ་སྐས་ཀྱི་གཞི་ཐམས་ཅད་ཀྱི་སྟེང་མ་ལ་བསྔོས་པའི་རྙེད་པ་མེ་ཏོག་ཁང་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་རོ། །གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས། མེ་ཏོག་ཁང་ལ་བསྔོས་པའི་རྙེད་པ་བ་གམ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ།
6.210b
གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་བ་གམ་གཅིག་ལ་བསྔོས་པའི་རྙེད་པ་བ་གམ་གཉིས་པ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །བ་གམ་གཉིས་པ་དང་གསུམ་པ་དང་བཞི་པ་ལ་ཡང་དེ་བཞིན་ནོ། །དགེ་སློང་གིས་བ་གམ་བཞི་པ་ལ་བསྔོས་པའི་རྙེད་པ་མཆོད་རྟེན་གྱི་བུམ་པ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ལྟུང་བ་མེད་དོ། །དགེ་སློང་གིས་མཆོད་རྟེན་གྱི་བུམ་པ་ལ་བསྔོས་པའི་རྙེད་པ་པུ་ཤུ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། དགེ་སློང་གིས་པུ་ཤུ་ལ་བསྔོས་པའི་རྙེད་པ་གདུགས་ཐ་མ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱིས་སྦྱིན་པ་ལ་ལྟུང་བ་མེད་དོ། །གདུགས་གཉིས་པ་དང ། གསུམ་པ་དང ། བཞི་པ་ནས་ཐམས་ཅད་ཀྱི་སྟེང་མའི་བར་ལ་ཡང་དེ་བཞིན་ནོ། །དགེ་སློང་གིས་གདུགས་ཐམས་ཅད་ཀྱི་སྟེང་མ་ལ་བསྔོས་པའི་རྙེད་པ་ཆར་ཁབ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་ཆར་ཁབ་ལ་བསྔོས་པའི་རྙེད་པ་གདུགས་ཐམས་ཅད་ཀྱི་སྟེང་མ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དང་འོག་དང ། གསུམ་པ་དང ། གདུགས་ཐ་མའི་བར་ལ་ཡང་དེ་བཞིན་ནོ། །དགེ་སློང་གིས་གདུགས་ཐ་མ་ལ་བསྔོས་པའི་རྙེད་པ་པུ་ཤུ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་པུ་ཤུ་ལ་བསྔོས་པའི་རྙེད་པ་མཆོད་རྟེན་གྱི་བུམ་པ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས
6.211a
སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་མཆོད་རྟེན་གྱི་བུམ་པ་ལ་བསྔོས་པའི་རྙེད་པ་བ་གམ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། དགེ་སློང་གིས་བ་གམ་ལ་བསྔོས་པའི་རྙེད་པ་མེ་ཏོག་ཁང་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །དགེ་སློང་གིས་མེ་ཏོག་ཁང་ལ་བསྔོས་པའི་རྙེད་པ་ཐེམ་སྐས་ཀྱི་གཞི་སྟེང་མ་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། གཡར་པོའི་ཆོས་ཀྱི་སྦྱིན་པ་ལ་ནི་ལྟུང་བ་མེད་དོ། །ཐེམ་སྐས་ཀྱི་གཞི་དང ། འོག་དང་གསུམ་པ་ནས་ཐམས་ཅད་ཀྱི་ཐ་མའི་བར་ལ་ཡང་དེ་བཞིན་ནོ། །དགེ་སློང་གིས་མུ་ལྟོ་བ་གཅིག་ལ་བསྔོས་པའི་རྙེད་པ་མུ་ལྟོ་བ་གཞན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། བཙལ་ཏེ་མ་རྙེད་པ་ལ་ནི་ལྟུང་བ་མེད་དོ། །དགེ་སློང་གིས་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་གཅིག་ལ་བསྔོས་པའི་རྙེད་པ་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་གཞན་ལ་སྒྱུར་དུ་འཇུད་ན་དེ་སྒྱུར་དུ་འཇུད་པ་ལ་ཉེས་བྱས་སུ་འགྱུར་ལ། ཐོབ་ན་ཡང་ཉེས་བྱས་ཉིད་དུ་འགྱུར་ཏེ། བཙལ་ཏེ་མ་རྙེད་པ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསྔོས་པ་ལས་བསྒྱུར་བའི་སྤང་བ་སྟེ། ཉི་ཤུ་དགུ་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་ཚེ་དང་ལྡན་པ་པི་ལིན་དའི་བུའི་ལྷན་ཅིག་གནས་པ་དང ། ཉེ་གནས་དགེ་སློང་དག་སྨན་གང་དག་དེ་ནས་ལག་ཉར་བླངས་པ་དང ། དེ་ལས་བྱིན་ལེན་བྱས་པ་དང ། ཟས་ཀྱི་ཕྱེ་མ་དང་འདྲེས་པ་དང ། ཕན་ཚུན་འདྲེས་པ་དང །
6.211b
རང་གི་རྒྱུད་ཀྱིས་མྱགས་པ་གང་དག་རྣམ་པར་དབྱེར་ཡང་མི་མངོན་པ་དེ་དག་དུས་སུ་ཡང་ཟ་བར་བྱེད། དུས་མ་ཡིན་པར་ཡང་ཟ་བར་བྱེད་ཅིང་དེ་དག་ལ་ཟ་བར་རྣམ་པར་དབྱེ་བ་ཡང་མི་མངོན་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་སྨན་གང་དག་དེ་ནས་ལག་ཉར་བླངས་པ་དང ། དེ་ལས་བྱིན་ལེན་བྱས་པ་དང ། ཟས་ཀྱི་ཕྱེ་མ་དང་འདྲེས་པ་དང ། ཕན་ཚུན་འདྲེས་པ་དང ། རང་གི་རྒྱུད་ཀྱིས་མྱགས་པ་གང་དག་རྣམ་པར་དབྱེར་ཡང་མི་མངོན་པ་དེ་དག་དུས་སུ་ཡང་ཟ་བར་བྱེད ། དུས་མ་ཡིན་པར་ཡང་ཟ་བར་བྱེད་ཅིང་དེ་དག་ལ་བཟའ་བར་རྣམ་པར་དབྱེ་བ་ཡང་མི་མངོན་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་པི་ལིན་དའི་བུའི་ལྷན་ཅིག་གནས་པ་དང་ཉེ་གནས་དགེ་སློང་རྣམས་ལ་རྨེས་པ། དགེ་སློང་དག་ཁྱེད་སྨན་གང་དག་དེ་ནས་ལག་ཉར་བླངས་པ་དང ། དེ་ལས་བྱིན་ལེན་བྱས་པ་དང ། ཟས་ཀྱི་ཕྱེ་མ་དང་འདྲེས་པ་དང ། ཕན་ཚུན་འདྲེས་པ་དང ། རང་གི་རྒྱུད་ཀྱིས་མྱགས་པ་གང་དག་རྣམ་པར་དབྱེར་ཡང་མི་མངོན་པ་དེ་དག་དུས་སུ་ཡང་ཟ་བར་བྱེད། དུས་མ་ཡིན་པར་ཡང་ཟ་བར་བྱེད་ཅིང་དེ་དག་ལ་བཟའ་བར་རྣམ་པར་དབྱེ་བ་ཡང་མི་མངོན་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་གསོ་དཀའ་བ་དང ། དགང་དཀའ་བ་དང ། འདོད་པ་ཆེ་བ་དང ། ཆོག་མི་ཤེས་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་གསོ་སླ་བ་དང ། དགང་སླ་བ་དང ། འདོད་པ་ཆུང་བ་དང ། ཆོག་ཤེས་པ་དང ། སྦྱངས་པའི་ཡོན་ཏན་རྣམས་དང ། མཛེས་པ་དང ། དྲོད་རིག་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན
6.212a
ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བཅོམ་ལྡན་འདས་ཀྱིས་དགེ་སློང་ན་བ་རྣམས་ལ་ཕན་པ་སོ་སོར་བསྟེན་པར་བྱ་བའི་སྨན་གང་དག་བཀའ་སྩལ་པ། འདི་ལྟ་སྟེ་ཞུན་མར་དང ། འབྲུ་མར་དང ། སྦྲང་རྩི་དང ། བུ་རམ་གྱི་དབུ་བ་དེ་དག་ལས་དགེ་སློང་ན་བས་འདོད་ན་རང་གིས་ཞག་བདུན་པར་བྱིན་གྱིས་བརླབས་ཏེ། གསོག་འཇོག་གི་ཡོངས་སུ་ལོངས་སྤྱོད་པས་ཡོངས་སུ་ལོངས་སྤྱད་པར་བྱའོ། །དེ་ལས་འདས་པར་ཡོངས་སུ་ལོངས་སྤྱོད་པར་བྱེད་ན་སྤང་བའི་ལྟུང་བྱེད་དོ། །བཅོམ་ལྡན་འདས་ཀྱིས་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །དགེ་སློང་ཞེས་བྱ་བ་ནི་ཆོས་འདི་པས་སོ། །ན་བ་རྣམས་ལ་ཞེས་བྱ་བ་ནི་ནད་པ་རྣམས་ལའོ། །ཕན་པ་ཞེས་བྱ་བ་ནི་རྗེས་སུ་འཐུན་པའོ། །སོ་སོར་བསྟེན་པར་བྱ་བའི་ཞེས་བྱ་བ་ནི་རུང་བའི་འོ། །སྨན་གང་དག་བཀའ་སྩལ་པ་ཞེས་བྱ་ནི་རབ་ཏུ་བསྟན་པའོ། །འདི་ལྟ་སྟེ་ཞུན་མར་ཞེས་བྱ་བ་ནི་མར་བཞུས་པའོ། །འབྲུ་མར་ཞེས་བྱ་བ་ནི་འབྲུའི་མར་ཉིད་དོ། །སྦྲང་རྩི་ཞེས་བྱ་བ་ནི་སྦྲང་བུའི་སྦྲང་རྩིའོ། །བུ་རམ་གྱི་དབུ་བ་ཞེས་བྱ་བ་ནི་བུ་རམ་མོ། །དགེ་སློང་ཞེས་བྱ་བ་ནི་དགེ་སློང་གང་ཡིན་པ་དེའོ། །ན་བས་ཞེས་བྱ་བ་ནི་ནད་པས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ན་འོ། །རང་གིས་ཞེས་བྱ་བ་ནི་བདག་ཉིད་ཀྱིས་སོ། །ཞག་བདུན་པར་བྱིན་གྱིས་བརླབས་ཏེ་ཞེས་བྱ་བ་ནི་ཉིན་མཚན་བདུན་བར་རོ། །གསོག་འཇོག་གི་ཡོངས་སུ་ལོངས་སྤྱོད་པས་ཡོངས་སུ་ལོངས་སྤྱོད་པར་བྱའོ། །ཞེས་བྱ་བ་ནི་རང་གིས་བླངས་ཏེ་བཟའ་བར་བྱའོ། །དེ་ལས་འདས་པར་ཡོངས་སུ་ལོངས་སྤྱོད་པར་བྱེད་ན་ཞེས་བྱ་བ་ནི་ཞག་བདུན་ལས་འདས་པར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་ཏེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །
6.212b
དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཚེས་ལ་ན་བའི་སྨན་ཞིག་རྙེད་ན་དགེ་སློང་དེས་སྨན་དེ་ཉི་མ་བདུན་པོ་དེ་ཉིད་ཀྱི་ནང་དུ་ཡོངས་སུ་ལོངས་སྤྱད་པར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ནས་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་གསུམ་མམ། ཚེས་བདུན་ཚུན་ཆད་ཀྱིས་ན་བའི་སྨན་ཞིག་རྙེད་ན་དགེ་སློང་དེས་སྨན་དེ་ཉི་མ་བདུན་པོ་དེ་ཉིད་ཀྱི་ནང་དུ་ཡོངས་སུ་ལོངས་སྤྱད་པར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ན་བའི་སྨན་ཞིག་རྙེད་ཅིང ། དེས་ཚེས་གཉིས་ལ་ཡང་སྨན་གཞན་ཞིག་རྙེད་ན་དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྨན་སྔ་མ་ཤོས་ཡོངས་སུ་ལོངས་སྤྱད་པར་བྱ་ཞིང ། ཕྱི་མ་ཤོས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་ཤོས་ཡོངས་སུ་ལོངས་སྤྱད་པར་བྱ་ཞིང་སྔ་མ་ཤོས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། །གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་གཅིག་དང་གཉིས་ལ་ཇི་ལྟ་བ་དེ་བཞིན་དུ་དེས་ཚེས་དྲུག་གི་བར་ལ་ན་བའི་སྨན་ཞིག་རྙེད་ཅིང ། དེས་ཚེས་བདུན་གྱི་བར་ལ་ཡང་གཞན་ཞིག་རྙེད་ན་དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྔ་མ་ཤོས་ཡོངས་སུ་ལོངས་སྤྱད་པར་བྱ་ཞིང ། ཕྱི་མ་ཤོས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་ཤོས་ཡོངས་སུ་ལོངས་སྤྱད་པར་བྱ་ཞིང་སྔ་མ་ཤོས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །
6.213a
དགེ་སློང་གིས་ཚེས་ལ་ན་བའི་སྨན་གཉིས་ཤིག་རྙེད་ན་དགེ་སློང་དེས་སྨན་དེ་གཉིས་ཉི་མ་བདུན་པོ་དེ་ཉིད་ཀྱི་ནང་དུ་ཡོངས་སུ་ལོངས་སྤྱད་པར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་གསུམ་འམ། ཚེས་བདུན་ཚུན་ཆད་ཀྱིས་ན་བའི་སྨན་གཉིས་ཞིག་རྙེད་ན། དགེ་སློང་དེས་སྨན་དེ་གཉིས་ཉི་མ་བདུན་པོ་དེ་ཉིད་ཀྱི་ནང་དུ་ཡོངས་སུ་ལོངས་སྤྱད་པར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེངས་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ན་བའི་སྨན་གཉིས་ཤིག་རྙེད་ཅིང་དེས་ཚེས་གཉིས་ལ་ཡང་གཞན་གཉིས་ཤིག་རྙེད་ན་དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྨན་སྔ་མ་གཉིས་ཡོངས་སུ་ལོངས་སྤྱད་པར་བྱ་ཞིང ། ཕྱི་མ་གཉིས་གཏང་བར་བྱ་བ་འམ། གཞན་ལ་སྦྱིན་པར་བྱའོ། ཡང་ན་ཕྱི་མ་གཉིས་ཡོངས་སུ་ལོངས་སྤྱད་པར་བྱ་ཞིང་སྔ་མ་གཉིས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་གཅིག་དང ། གཉིས་ལ་ཇི་ལྟ་བ་དེ་བཞིན་དུ་དེས་ཚེས་དྲུག་གི་བར་ལ་ན་བའི་སྨན་གཉིས་ཤིག་རྙེད་ཅིང་དེས་ཚེས་བདུན་གྱི་བར་ལ་ཡང་གཉིས་ཤིག་རྙེད་ན། དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྔ་མ་གཉིས་ཡོངས་སུ་ལོངས་སྤྱོད་པར་བྱ་ཞིང་ཕྱི་མ་གཉིས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་གཉིས་ཡོངས་སུ་ལོངས་སྤྱོད་པར་བྱ་ཞིང་སྔ་མ་གཉིས་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ན་བའི་སྨན་རབ་ཏུ་མང་པོ་དག་ཅིག་རྙེད་ན་དགེ་སློང
6.213b
དེས་སྨན་དེ་དག་ཉི་མ་བདུན་པོ་དེ་ཉིད་ཀྱི་ནང་དུ་ཡོངས་སུ་ལོངས་སྤྱོད་པར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་གསུམ་འམ། ཚེས་བདུན་ཚུན་ཆད་ཀྱིས་ན་བའི་སྨན་རབ་ཏུ་མང་པོ་དག་ཅིག་རྙེད་ན་དགེ་སློང་དེས་སྨན་དེ་དག་ཉི་མ་བདུན་པོ་དེ་ཉིད་ཀྱི་ནང་དུ་ཡོངས་སུ་ལོངས་སྤྱད་པར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཚེས་ལ་ན་བའི་སྨན་རབ་ཏུ་མང་པོ་དག་ཅིག་རྙེད་ཅིང་དེས་ཚེས་གཉིས་ལ་ཡང་གཞན་རབ་ཏུ་མང་པོ་དག་ཅིག་རྙེད་ན་དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྨན་སྔ་མ་དག་ཡོངས་སུ་ལོངས་སྤྱད་པར་བྱ་ཞིང ། ཕྱི་མ་དག་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་དག་ཡོངས་སུ་ལོངས་སྤྱད་པར་བྱ་ཞིང ། སྔ་མ་དག་གཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཏོང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་གཅིག་དང་གཉིས་ལ་ཇི་ལྟ་བ་དེ་བཞིན་དུ་དེས་ཚེས་དྲུག་གི་བར་ལ་ན་བའི་སྨན་རབ་ཏུ་མང་པོ་དག་ཅིག་རྙེད་ཅིང་དེ་ཚེས་བདུན་གྱི་བར་ལ་ཡང་གཞན་རབ་ཏུ་མང་པོ་དག་རྙེད་ན་དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྔ་མ་དག་ཡོངས་སུ་ལོངས་སྤྱད་པར་བྱ་ཞིང ། ཕྱི་མ་དག་བཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡང་ན་ཕྱི་མ་དག་ཡོངས་སུ་ལོངས་སྤྱད་པར་བྱ་ཞིང ། སྔ་མ་དག་བཏང་བར་བྱ་བ་འམ། གཞན་ལ་སྦྱིན་པར་བྱའོ། །ཡོངས་སུ་ལོངས་སྤྱོད་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །དེ་ལ་སྨན་གང་དག་དེ་ནས་ལག་ཉར་བླངས
6.214a
པ་དང ། །དེ་ལས་བྱིན་ལེན་བྱས་པ་དང ། ཟས་ཀྱི་ཕྱེ་མ་དང་འདྲེས་པ་དང ། ཕན་ཚུན་འདྲེས་པ་དང ། རང་གི་རྒྱུད་ཀྱིས་མྱགས་པ་གང་དག་རྣམ་པར་དབྱེར་ཡང་མི་མངོན་པ་དེ་དག་ནི་ཀུན་དགའི་ར་བ་འམ། དགེ་ཚུལ་དག་ལ་སྤང་བར་བྱའོ། །དེ་ལ་སྨན་གང་དག་དེ་ནས་ལག་ཉར་མ་བླངས་པ་དང ། དེ་ལས་བྱིན་ལེན་མ་བྱས་པ་དང ། ཟས་ཀྱི་ཕྱེ་མ་དང་མ་འདྲེས་པ་དང ། ཕན་ཚུན་མ་འདྲེས་པ་དང ། རང་གི་རྒྱུད་ཀྱིས་མ་མྱགས་པ་གང་དག་རྣམ་པར་དབྱེར་ཡང་མི་མངོན་པ་དེ་དག་ནི་དགེ་སློང་གིས་རང་གིས་ཞག་བདུན་པར་བྱིན་གྱིས་བརླབས་ཏེ་གསོག་འཇོག་གི་ཡོངས་སུ་ལོངས་སྤྱོད་པས་ཡོངས་སུ་ལོངས་སྤྱོད་པར་བྱའོ། །འདི་ལྟར་བྱིན་གྱིས་བརླབ་པར་བྱ་སྟེ། ལག་པ་བསྙལ་ནས་སྨན་བྱིན་ལེན་བྱས་ཏེ་ཚངས་པ་མཚུངས་པར་སྤྱོད་པའི་མདུན་དུ་འདུག་ནས་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། །བདག་དགེ་སློང་མིང་འདི་ཞེས་བགྱི་བས་སྨན་རུང་བ་འདི་བདག་ཉིད་དང་ཚངས་པ་མཚུངས་པར་སྤྱོད་པ་རྣམས་ཀྱིར་བགྱི་བའི་སླད་དུ་ཞག་བདུན་པར་བྱིན་གྱིས་བརླབ་བོ། །དེ་བཞིན་དུ་ལན་གཉིས། ལན་གསུམ་དུ་བཟླས་པར་བྱའོ། །ཇི་ཙམ་ཡོངས་སུ་ལོངས་སྤྱད་པ་ཡང་ཚངས་པ་མཚུངས་པར་སྤྱོད་པ་ལ་བརྗོད་པར་བྱ་སྟེ། དེང་དུ་བདག་གི་ཉི་མ་གཅིག་ཡོངས་སུ་ལོངས་སྤྱད་ལགས་ཏེ། ལྷག་མ་རྣམས་ཀྱང་ཡོངས་སུ་ལོངས་སྤྱད་པར་བགྱིའོ་ཞེས་དེ་བཞིན་དུ་ཉི་མ་བདུན་གྱི་བར་དུ་བརྗོད་པར་བྱའོ། །གལ་ཏེ་ལྷག་མ་ཡོད་ན་དེ་ཀུན་དགའི་ར་བ་པ་འམ། དགེ་ཚུལ་དག་ལ་སྤང་བར་བྱའོ། །དགེ་སློང་གི་ན་བའི་སྨན་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་ན་བའི་སྨན་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་ན་བའི་སྨན་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང
6.214b
བར་འགྱུར་རོ། །དགེ་སློང་གི་ན་བའི་སྨན་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་ཙམ་དུ་ན་བའི་སྨན་སྤང་བ་དེས་མ་སྤངས་ཤིང་སོ་སོར་མ་སྤངས་ལ་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བའི་བར་དག་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་པ་དང ། སྨྱོ་བ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གསོག་འཇོག་གི་སྤང་བ་སྟེ་སུམ་བཅུ་པ་རྫོགས་སྷོ།། ་་་་་་་་།།སྤང་བའི་ལྟུང་བྱེད་རྣམས་རྫོགས་སྷོ།། ་་་་་་་།། སྤྱི་སྡོམ་ལ། ཤེས་བཞིན་དང་ནི་ས་བོན་དང ། །མ་བསྐོས་པ་དང་ཡང་ཡང་དང ། །ཆུ་དང་ཁྱིམ་དང་བསམས་བཞིན་དང ། །འགྲོན་མང་རྐུན་མ་མཆོད་སྟོན་ནོ། ། སྡོམ་ལ། བརྫུན་སྐྱོན་དགེ་སློང་ཕྲ་མ་དང ། །སྐྱོ་སྔོགས་བྱེད་དང་སྟོན་པ་དང ། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་ཚེ་དང་ལྡན་པ་སྒྲ་གཅན་ཟིན་རྒྱལ་པོའི་ཁབ་ན་ཆུ་དྲོན་གྱི་ཀུན་དགའ་ར་བ་ན་འདུག་སྟེ། བྲམ་ཟེ་དང་ཁྱིམ་བདག་དད་པ་ཅན་དག་ཚེ་དང་ལྡན་པ་སྒྲ་གཅན་ཟིན་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་སྒྲ་གཅན་ཟིན་ལ་བཙུན་པ་སྒྲ་གཅན་ཟིན་བཅོམ་ལྡན་འདས་ལ་བཞུགས་ཤེས་འདྲི་བ་ན། གལ་ཏེ་བཅོམ་ལྡན་འདས་འོད་མའི་ཚལ་ན་བཞུགས་ན་ནི་དེ་ན་རེ་བྱ་རྒོད་ཕུང་པོ་ལ་བཞུགས་སོ་ཞེས་ཟེར། གལ་ཏེ་བཅོམ་ལྡན་འདས་བྱ་རྒོད་ཕུང་པོ་ལ་བཞུགས་ན་ནི་དེ་ན་རེ་འོད་མའི་ཚལ་ན་བཞུགས་སོ་ཞེས་ཟེར། གལ་ཏེ་བཅོམ་ལྡན་འདས་པིབ་པ་ལའི་ཕུག་ན་བཞུགས་ན་ནི་དེ་ན་རེ་སྡེ་ཅན་མའི་ཕུག་ན་བཞུགས་སོ་ཞེས་ཟེར། གལ་ཏེ་བཅོམ་ལྡན་འདས་སྡེ་ཅན་མའི་ཕུག་ན་བཞུགས་ན་ནི་པིབ་པ་ལའི་ཕུག་ན་བཞུགས་སོ་ཞེས་ཟེར་ནས། དེ་དག
6.215a
གིས་བཅོམ་ལྡན་འདས་བཙལ་ན་མ་རྙེད་ནས་དེ་དག་ལུས་ངལ་བ་དང ། ལུས་དུབ་པ་དང ། ལུས་རྒུད་པས་ཚེ་དང་ལྡན་པ་སྒྲ་གཅན་ཟིན་ག་ལ་བ་དེར་དོང་བ་དང ། དེ་ན་ཚེ་དང་ལྡན་པ་སྒྲ་གཅན་ཟིན་གྱིས་དེ་དག་ལ་དྲིས་པ། ཤེས་ལྡན་དག་བཅོམ་ལྡན་འདས་མཐོང་ངམ། བཙུན་པ་སྒྲ་གཅན་ཟིན་མ་མཐོང་ངོ ། །དེ་རྒོད་པ་དང་དེ་དག་གིས་སྨྲས་པ། བཙུན་པ་སྒྲ་གཅན་ཟིན་བསམས་བཞིན་དུ་བདག་ཅག་ལ་ཐོ་འཚམས་པར་མི་མཛད་དམ། དེ་ཡིན་ནོ། །དེ་དག་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་རྒྱལ་པོའི་ཁབ་ཏུ་བསོད་སྙོམས་ལ་གཤེགས་ནས་རྒྱལ་པོའི་ཁབ་ཏུ་བསོད་སྙོམས་བརྒྱུས་ཏེ་ཟས་ཀྱི་བྱ་བ་མཛད་ནས་ཕྱི་མའི་ཟས་ཀྱི་བསོད་སྙོམས་ལས་སླར་ལོག་པས་ཆུ་དྲོན་གྱི་ཀུན་དགའ་ར་བར་ཚེ་དང་ལྡན་པ་སྒྲ་གཅན་ཟིན་གྱི་གཙུག་ལག་ཁང་ག་ལ་བ་དེར་གཤེགས་སོ། །ཚེ་དང་ལྡན་པ་སྒྲ་གཅན་ཟིན་གྱིས་ཐག་རིང་པོ་ཁོ་ན་ནས་བཅོམ་ལྡན་འདས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ཀྱི་སླད་དུ་གདན་ཤོམ་པར་བྱེད། ཞབས་བསིལ་བའི་ཆབ་དང་ཞབས་རྟེན་མཐའ་གཅིག་ཏུ་འཇོག་པར་བྱེད་ཅིང་བསུ་ནས། ཆོས་གོས་ལེན་པར་བྱེད་ཅིང་འདི་སྐད་ཅེས་བཅོམ་ལྡན་འདས་གཤེགས་སུ་གསོལ། བཅོམ་ལྡན་འདས་བྱོན་པ་ལེགས་སོ། །བཅོམ་ལྡན་འདས་གདན་བཤམ་པ་ཉིད་ལ་བཞུགས་སུ་གསོལ། ཞེས་ཀྱང་སྨྲས་སོ། །བཅོམ་ལྡན་འདས་གདན་བཤམས་པ་ཉིད་ལ་བཞུགས་ནས། དེ་ནས་བཅོམ་ལྡན་འདས་ཀྱིས་ཉིད་ཀྱིས་ཞབས་གཉིས་བསིལ་ནས་ཆུ་སྣོད་ཏུ་ཆུའི་ལྷག་མ་ཉུང་ཞིག་བཞག་ནས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན་ངས་ཆུ་སྣོད་ཏུ་ཆུའི་ལྷག་མ་ཉུང་ཞིག་བཞག་པ་ཁྱོད་ཀྱིས་མཐོང་ངམ། བཙུན་པ་མཐོང་ངོ ། །སྒྲ་གཅན་ཟིན་དེ་བཞིན་དུ་ང་ནི་མི་གཏི་མུག་ཅན་གང་ལ་ལ་ཤེས་བཞིན་དུ་བརྫུན་སྨྲ་ཞིང་ངོ་ཚ་མེད་པ། འཛེམ་པ་མེད་པ། འགྱོད་པ་མེད་པ་དེའི་དགེ་སྦྱོང་གི་ཚུལ་ཆུང་བར་སྨྲའོ། །དེ་ནས་བཅོམ་ལྡན་འདས
6.215b
ཀྱིས་ཆུའི་ལྷག་མ་ཉུང་ངུ་དེ་ས་ལ་ཕོ་ནས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན་ངས་ཆུའི་ལྷག་མ་ཉུང་ངུ་མ་ས་ལ་ཕོ་བ་ཁྱོད་ཀྱིས་མཐོང་ངམ། བཙུན་པ་མཐོང་ངོ ། །སྒྲ་གཅན་ཟིན་དེ་བཞིན་དུ་ང་ནི་མི་གཏི་མུག་ཅན་གང་ལ་ལ་ཤེས་བཞིན་དུ་བརྫུན་སྨྲ་ཞིང་ངོ་ཚ་མེད་པ། འཛེམ་པ་མེད་པ། འགྱོད་པ་མེད་པ་དེའི་དགེ་སློང་གི་ཚུལ་བོར་བར་སྨྲའོ། །དེ་ནས་བཅོམ་ལྡན་འདས་ཀྱིས་ཆུ་སྣོད་དེ་ས་ལ་བཟུར་ནས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན་ངས་ཆུ་སྣོད་ས་ལ་བཟུར་བ་ཁྱོད་ཀྱིས་མཐོང་ངམ། བཙུན་པ་མཐོང་ངོ ། །སྒྲ་གཅན་ཟིན་དེ་བཞིན་དུ་ང་ནི་མི་གཏི་མུག་ཅན་གང་ལ་ལས་ཤེས་བཞིན་དུ་བརྫུན་སྨྲ་ཞིང་ངོ་ཚ་མེད་པ། འཛེམ་པ་མེད་པ། འགྱོད་པ་མེད་པ་དེའི་དགེ་སྦྱོང་གི་ཚུལ་བཟུར་བར་སྨྲའོ། །དེ་ནས་བཅོམ་ལྡན་འདས་ཀྱིས་ཆུ་སྣོད་དེ་ས་ལ་ཁས་བུབ་ནས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན་ངས་ཆུ་སྣོད་ས་ལ་ཁས་ཕུབ་པ་ཁྱོད་ཀྱིས་མཐོང་ངམ། བཙུན་པ་མཐོང་ངོ ། །སྒྲ་གཅན་ཟིན་དེ་བཞིན་དུ་ང་ནི་མི་གཏི་མུག་ཅན་གང་ལ་ལ་ཤེས་བཞིན་དུ་བརྫུན་སྨྲས་ཞིང་ངོ་ཚ་མེད་པ། འཛེམ་པ་མེད་པ། འགྱོད་པ་མེད་པ་དེའི་དགེ་སྦྱོང་གི་ཚུལ་ཁས་ཕུབ་པར་སྨྲའོ། །སྒྲ་གཅན་ཟིན་འདི་ལྟ་སྟེ། དཔེར་ན་རྒྱལ་པོའི་གླང་པོ་ཆེ་དྲེགས་པ་མ་ཏང་ག་ནས་བྱུང་བ་གཞོན་པ་ལོ་དྲུག་བཅུ་ལོན་པ། མཆེ་བ་ཤིང་རྟའི་མདའ་ཙམ་དང་ལྡན་པ། བྲང་དཀྱེལ་ཆེ་བ། གཡུལ་ངོར་སྤྱད་པ། གཡུལ་གྱི་ནང་དུ་སོན་པ། ལག་པ་གཉིས་དང ། རྐང་པ་གཉིས་དང ། རྐེད་པ་དང ། འཇུག་མ་དང ། གློ་གཉིས་དང ། རྒྱབ་དང ། ཟ་འགྲམ་གཉིས་དང ། མགྲིན་པ་དང ། རྣ་བ་གཉིས་དང ། མཆེ་བ་གཉིས་ཀྱིས་ལས་བྱེད་ཅིང་སྣས་ལས་མི་བྱེད་པ། ཕ་རོལ་གྱི་དཔུང་དང ། ཕ་རོལ་གྱི་དམག་འཇོམས་པར་བྱེད་པ་ན་དེ་ན་རྒྱལ་པོའི་གླང་པོ་ཆེ་ཞོན་པ་འདི་སྙམ་དུ་འདི་ལྟར་རྒྱལ་པོའི་གླང་པོ་ཆེ་དྲེགས་པ་མ་ཏང་ཀ་ནས་བྱུང་བ་གཞོན་པ་ལོ་དྲུག་བཅུ་ལོན་པ། །མཆེ་བ་ཤིང་རྟའི་མདའ་ཙམ་དང་ལྡན་པ། བྲང་དཀྱེལ་ཆེ་བ། གཡུལ་ངོར་སྤྱད་པ། གཡུལ་གྱི་ནང་དུ་སོང་བ་ལག་པ་གཉིས་དང ། རྐང་པ་གཉིས་དང ། བརླ་གཉིས་དང ། རྐེད་པ་དང །
6.216a
འཇུག་མ་དང ། གློ་གཉིས་དང ། རྒྱབ་དང ། ཟ་འགྲམ་གཉིས་དང ། མགྲིན་པ་དང ། རྣ་བ་གཉིས་དང ། མཆེ་བ་གཉིས་ཀྱིས་ལས་བྱེད་ཅིང་སྣས་ལས་མི་བྱེད་པ། ཕ་རོལ་ཀྱི་དཔུང་དང་ཕ་རོལ་ཀྱི་དམག་འཇོམས་པར་བྱེད་པའི་རྒྱལ་པོའི་གླང་པོ་ཆེ་ནི་སྣ་དྲུང་བར་བྱེད་པས་རྒྱལ་པོའི་གླང་པོ་ཆེས་སྲོག་ཡོངས་སུ་མ་བཏང་ངོ་སྙམ་དུ་སེམས་སོ། །སྒྲ་གཅན་ཟིན་གང་གི་ཕྱིར་རྒྱལ་པོའི་གླང་པོ་ཆེ་དྲེགས་པ་མ་ཏང་ཀ་ནས་བྱུང་བ་གཞོན་པ། ལོ་དྲུག་བཅུ་ལོན་པ། མཆེ་བ་ཤིང་རྟའི་མདའ་ཙམ་དང་ལྡན་པ། བྲང་དཀྱེལ་ཆེ་བ། གཡུལ་ངོར་སྤྱད་པ། གཡུལ་གྱི་ནང་དུ་སོན་པ། ལག་པ་གཉིས་དང ། རྐང་པ་གཉིས་དང ། བརླ་གཉིས་དང ། རྐེད་པ་དང ། འཇུག་མ་དང ། གློ་གཉིས་དང ། རྒྱབ་དང ། ཟ་འགྲམ་གཉིས་དང ། མགྲིན་པ་དང ། རྣ་བ་གཉིས་དང ། མཆེ་བ་གཉིས་དང ། སྣས་ཀྱང་ལས་བྱེད་པ། ཕ་རོལ་གྱི་དཔུང་དང ། ཕ་རོལ་གྱི་དམག་འཇོམས་པར་བྱེད་པ་ན་དེ་ན་རྒྱལ་པོའི་གླང་པོ་ཆེ་ལ་ཞོན་པ་འདི་སྙམ་དུ་འདི་ལྟར་རྒྱལ་པོའི་གླང་པོ་ཆེ་དྲེགས་པ་མ་ཏང་ག་ནས་བྱུང་བ་གཞོན་པ། ལོ་དྲུག་བཅུ་ལོན་པ། མཆེ་བ་ཤིང་རྟའི་མདའ་ཙམ་དང་ལྡན་པ། བྲང་དཀྱེལ་ཆེ་བ། གཡུལ་ངོར་སྤྱད་པ། གཡུལ་གྱི་ནང་དུ་སོན་པ། ལག་པ་གཉིས་དང ། རྐང་པ་དང ། བརླ་གཉིས་དང ། རྐེད་པ་དང ། མཇུག་མ་དང ། གློ་གཉིས་དང ། རྒྱབ་དང ། ཟ་འགྲམ་གཉིས་དང ། མགྲིན་པ་དང ། རྣ་བ་གཉིས་དང ། མཆེ་བ་གཉིས་དང ། སྣས་ཀྱང་ལས་བྱེད་པ། ཕ་རོལ་གྱི་དཔུང་དང ། ཕ་རོལ་གྱི་དམག་འཇོམས་པར་བྱེད་པའི་རྒྱལ་པོའི་གླང་པོ་ཆེ་ནི་སྣ་སྲུང་བར་མི་བྱེད་པས་རྒྱལ་པོའི་གླང་པོ་ཆེས་སྲོག་ཡོངས་སུ་བཏང་ངོ་སྙམ་དུ་སེམས་ཏེ། སྒྲ་གཅན་ཟིན་ང་ནི་དེའི་ཚེ་ན་རྒྱལ་པོའི་གླང་པོ་ཆེ་དེས་ལས་མི་བྱ་བ་ནི་ཡང་མེད་པར་སྨྲའོ། །སྒྲ་གཅན་ཟིན་དེ་བཞིན་དུ་གང་ལ་ལས་ཤེས་བཞིན་དུ་བརྫུན་སྨྲ་ཞིང་ངོ་ཚ་མེད་པ། འཛེམ་པ་མེད་པ། འགྱོད་པ་མེད་པར་གྱུར་ན་ང་ནི་མི་གཏི་མུག་ཅན་དེས་སྡིག་པའི་ལས་མི་བྱ་བ་ཅུང་ཟད་ཀྱང་མེད་པར་སྨྲའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་གཉིས་བཀའ་སྩལ་པ། ལུས་ཅན་བརྫུན་དུ་སྨྲ་བ་ཡིས། །ཆོས་གཅིག་ལས་ནི་འདས་གྱུར་ཅིང ། །འཇིག་རྟེན་ཕ་རོལ་བྲལ་བ་ཡིས། །འདི་ལ་སྡིག་པ་མི་བྱ་མེད། །ལྕགས་གོང་མེ་ལྕེ་འདྲ་བ
6.216b
དག་།ཟོས་པར་གྱུར་པ་མཆོག་ཡིན་གྱི། །ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །སྒྲ་གཅན་ཟིན་ཇི་སྙམས་དུ་སེམས། མི་རྣམས་ཀྱི་མེ་ལོང་ཅིའི་ཕྱིར་འཆང ། བཙུན་པ་འདི་ལྟར་རང་གི་བཞིན་གྱི་གཟུགས་སོ་སོར་བརྟག་པའི་སླད་དུའོ། །སྒྲ་གཅན་ཟིན་དེ་བཞིན་དུ་ཁྱོད་ཀྱིས་ཀྱང་ལུས་ཀྱི་ལས་བྱ་བར་བསམས་པ་གང་ཡིན་པའི་ལུས་ཀྱི་ལས་དེ་ལ་ཅི་བདག་གིས་ལུས་ཀྱིས་ལས་བྱ་བར་བསམས་པའི་ལུས་ཀྱི་ལས་གང་ཡིན་པ་དེ་བདག་དང་གཞན་ལ་གནོད་པར་འགྱུར་བ་མི་དགེ་བའི་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ལུས་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ལུས་ཀྱི་ལས་བྱ་བར་བསམས་པ་གང་ཡིན་པའི་ལུས་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན་སྒྲ་གཅན་ཟིན་ཁྱོད་ཀྱི་ལུས་ཀྱི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ལུས་ཀྱི་ལས་བྱ་བར་བསམས་པ་གང་ཡིན་པའི་ལུས་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པ་ཤེས་ན་སྒྲ་གཅན་ཟིན་ཁྱོད་ཀྱིས་ལུས་ཀྱི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་ཁྱོད་ཀྱི་ལུས་ཀྱིས་ལས་བྱེད་པ་གང་ཡིན་པའི་ལུས་ཀྱི་ལས་དེ་ལ་ཅི་བདག་གིས་ལུས་ཀྱི་ལས་བྱེད་པའི་ལུས་ཀྱི་ལས་གང་ཡིན་པ་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ལུས་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ལུས་ཀྱི་ལས་བྱེད་པ་གང་ཡིན་པའི་ལུས་ཀྱི་ལས
6.217a
དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན་སྒྲ་གཅན་ཟིན་ཁྱོད་ཀྱིས་ལུས་ཀྱི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ལུས་ཀྱི་ལས་བྱེད་པ་གང་ཡིན་པའི་ལུས་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ལུས་ཀྱི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་ཁྱོད་ཀྱིས་ལུས་ཀྱི་ལས་བྱ་བ་གང་ཡིན་པའི་ལུས་ཀྱི་ལས་དེ་ལ་ཅི་བདག་གིས་ལུས་ཀྱི་ལས་བྱས་པ་འདས་པ་ཟད་པ་འགགས་པ་བྲལ་བ་རྣམ་པར་འགྱུར་བ་གང་ཡིན་པ་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ལུས་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ལུས་ཀྱི་ལས་བྱས་པ་འདས་པ་ཟད་པ་འགགས་པ་བྲལ་བ་རྣམ་པར་གྱུར་པ་གང་ཡིན་པའི་ལུས་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ལུས་ཀྱི་ལས་དེ་སྟོན་པ་དང་ཚངས་པ་མཚུངས་པར་སྤྱོད་པ་མཁས་པ་རྣམས་ཀྱི་མདུན་དུ་སོ་སོར་བཤགས་པར་བྱ་ཞིང་ཕྱིན་ཆད་ཀྱང་བསྡམ་པ་བསྒྲུབ་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ལུས་ཀྱི་ལས་བྱས་པ་འདས་པ་ཟད་པ་འགགས་པ་བྲལ་བ་རྣམ་པར་གྱུར་པ་གང་ཡིན་པའི་ལུས་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་དགའ་བ་དང་མཆོག་ཏུ་དགའ་བ་དེ་ཉིད་ཀྱིས་ཉིན་མཚན་དུ་རྗེས་སུ་བསླབ་ཅིང་དྲན་པ་དང་ཤེས་བཞིན་གྱིས་མང་དུ་གནས་པར
6.217b
བྱའོ། །སྒྲ་གཅན་ཟིན་ཁྱོད་ཀྱིས་ངག་གི་ལས་བྱ་བར་བསམས་པ་གང་ཡིན་པའི་ངག་གི་ལས་དེ་ལ་ཅི་བདག་གིས་ངག་གིས་ལས་བྱ་བར་བསམས་པའི་ངག་གི་ལས་གང་ཡིན་པ་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ངག་གི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ངག་གི་ལས་བྱ་བར་བསམས་པ་གང་ཡིན་པའི་ངག་གི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ངག་གི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ངག་གི་ལས་བྱ་བར་བསམས་པ་གང་ཡིན་པའི་ངག་གི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ངག་གི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་ཁྱོད་ཀྱིས་ངག་གི་ལས་བྱེད་པ་གང་ཡིན་པའི་ངག་གི་ལས་དེ་ལ་ཅི་བདག་གིས་ངག་གི་ལས་བྱེད་པའི་ངག་གི་ལས་གང་ཡིན་པ་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ངག་གི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ངག་གི་ལས་བྱེད་པ་གང་ཡིན་པའི་ངག་གི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ངག་གི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད
6.218a
དེ་ལྟར་སོ་སོར་རྟོག་པ་ན་གལ་ཏེ་བདག་གིས་ངག་གི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ངག་གི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་ཁྱོད་ཀྱིས་ངག་གི་ལས་བྱས་པ་གང་ཡིན་པའི་ངག་གི་ལས་དེ་ལ་ཅི་བདག་གིས་ངག་གི་ལས་བྱས་པ་འདས་པ་ཟད་པ་འགགས་པ་བྲལ་བ་རྣམ་པར་གྱུར་པ་གང་ཡིན་པ་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ངག་གི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་ཀྱིས་དེ་ལྟར་སོ་སོར་རྟོག་པ་ན། གལ་ཏེ་བདག་གིས་ངག་གི་ལས་བྱས་པ་འདས་པ་ཟད་པ་འགགས་པ་བྲལ་བ་རྣམ་པར་གྱུར་པ་གང་ཡིན་པའི་ངག་གི་ལས་དེ་བདག་དང ། གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན། །སྒྲ་གཅན་ཟིན་ཁྱོད་ཀྱིས་ངག་གི་ལས་དེ་སྟོན་པ་དང ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱི་མདུན་དུ་སོ་སོར་བཤགས་པར་བྱ་ཞིང་ཕྱིན་ཆད་ཀྱང་བསྡམ་པ་བསྒྲུབ་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གིས་ངག་གི་ལས་བྱས་པ་འདས་པ་ཟད་པ་འགགས་པ་བྲལ་བ་རྣམ་པར་གྱུར་པ་གང་ཡིན་པའི་ངག་གི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་དགའ་བ་དང་མཆོག་ཏུ་དགའ་བ་དེ་ཉིད་ཀྱིས་ཉིན་མཚན་དུ་རྗེས་སུ་བསླབ་ཅིང་དྲན་པ་དང་ཤེས་བཞིན་གྱིས་མང་དུ་གནས་པར་བྱའོ། །སྒྲ་གཅན་ཟིན་ཡིད་ནི་འདས་པའི་འདུ་བྱེད་རྣམས་ལས་བརྟེན་ཏེ་སྐྱེ་བས་ཁྱོད་ཀྱི་ཡིད་ཀྱི་ལས་དེ་བདག་གི་ཡིད་འདས་པའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན
6.218b
ནམ། འོན་ཏེ་ཡིད་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གི་ཡིད་འདས་པའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ཡིད་ཀྱི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གི་ཡིད་འདས་པའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ཡིད་ཀྱི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་ཡིད་ནི་མ་འོངས་པའི་འདུ་བྱེད་རྣམས་ལས་བརྟེན་ཏེ་སྐྱེ་བས་ཁྱོད་ཀྱིས་ཡིད་ཀྱི་ལས་དེ་ལ་ཅི་བདག་གི་ཡིད་མ་འོངས་པའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ཡིད་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གི་ཡིད་མ་འོངས་པའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བར་ཤེས་ན། སྒྲ་གཅན་ཟིན་ཁྱོད་ཀྱིས་ཡིད་ཀྱི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གི་ཡིད་མ་འོངས་པའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད
6.219a
ཀྱིས་ཡིད་ཀྱི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་ཡིད་ནི་ད་ལྟར་བྱུང་བའི་འདུ་བྱེད་རྣམས་ལས་བརྟེན་ཏེ་སྐྱེ་བས་ཁྱོད་ཀྱིས་ལས་དེ་ལ་ཇི་བདག་གི་ཡིད་ད་ལྟར་བྱུང་བའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བ་ཡིན་ནམ། འོན་ཏེ་ཡིད་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་ཞེས་ཡང་དང་ཡང་དུ་སོ་སོར་བརྟག་པར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན། གལ་ཏེ་བདག་གི་ཡིད་ད་ལྟར་བྱུང་བའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་གནོད་པར་འགྱུར་བ་མི་དགེ་བ་སྡུག་བསྔལ་འབྱུང་བ་རྣམ་པར་སྨིན་པ་སྡུག་བསྔལ་བར་ཤེས་ན། སྒྲ་གཅན་ཟིན་ཁྱོད་ཀྱིས་ཡིད་ཀྱི་ལས་དེ་གཏང་བར་བྱའོ། །སྒྲ་གཅན་ཟིན་ཁྱོད་དེ་ལྟར་སོ་སོར་རྟོག་པ་ན་གལ་ཏེ་བདག་གི་ཡིད་ད་ལྟར་བྱུང་བའི་འདུ་བྱེད་རྣམས་ལས་བརྟེན་ཏེ་སྐྱེས་པ་གང་ཡིན་པའི་ཡིད་ཀྱི་ལས་དེ་བདག་དང་གཞན་ལ་ཕན་པར་འགྱུར་བ་དགེ་བ་བདེ་བ་འབྱུང་བ་རྣམ་པར་སྨིན་པ་བདེ་བ་ཡིན་པར་ཤེས་ན། སྒྲ་གཅན་ཟིན་ཁྱོད་ཀྱིས་ཡིད་ཀྱི་ལས་དེ་རྗེས་སུ་བསྒྲུབ་པར་བྱའོ། །སྒྲ་གཅན་ཟིན་དགེ་སྦྱོང་ངམ་བྲམ་ཟེ་གང་དག་ད་ལྟར་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་ལ་སོ་སོར་བརྟགས་ཤིང་སོ་སོར་བརྟགས་ནས་ཡོངས་སུ་སྦྱངས་ཤིང་ཡོངས་སུ་སྦྱངས་ཏེ་མང་དུ་གནས་པར་བྱེད་པ་དེ་དག་ཐམས་ཅད་ཀྱང་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་ལ་དེ་ལྟར་སོ་སོར་བརྟགས་ཤིང་སོ་སོར་བརྟགས་ནས་ཡོངས་སུ་སྦྱངས་ཤིང་ཡོངས་སུ་སྦྱངས་ཏེ་མང་དུ་གནས་པར་བྱེད་དོ། །དགེ་སྦྱོང་ངམ་བྲམ་ཟེ་གང་དག་འདས་པའི་དུས་ན་ལུས་ཀྱི་ལས་དང་ངག་གི་ལས་དང་ཡིད་ཀྱི་ལས་ལ་སོ་སོར་བརྟགས་ཤིང ། སོ་སོར་བརྟགས་ནས་ཡོངས་སུ་སྦྱངས
6.219b
ཤིང་ཡོངས་སུ་སྦྱངས་ཏེ་མང་དུ་གནས་པར་གྱུར་པ་དེ་དག་ཐམས་ཅད་ཀྱིས་ཀྱང་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་ལ་དེ་ལྟར་སོ་སོར་བརྟགས་ཤིང་སོ་སོར་བརྟགས་ནས་ཡོངས་སུ་སྦྱངས་ཤིང་ཡོངས་སུ་སྦྱངས་ཏེ་མང་དུ་གནས་པར་གྱུར་ཏོ། །དགེ་སྦྱོང་དང ། བྲམ་ཟེ་གང་དག་མ་འོངས་པའི་དུས་ན་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་ལ་སོ་སོར་བརྟགས་ཤིང་སོ་སོར་བརྟགས་ནས་ཡོངས་སུ་སྦྱངས་ཤིང་ཡོངས་སུ་སྦྱངས་ཏེ་མང་དུ་གནས་པར་འགྱུར་བ་དེ་དག་ཐམས་ཅད་ཀྱང་ལུས་ཀྱི་ལས་དང ། ངག་གི་ལས་དང་ཡིད་ཀྱི་ལས་ལ་དེ་ལྟར་སོ་སོར་བརྟགས་ཤིང་སོ་སོར་བརྟགས་ནས་ཡོངས་སུ་སྦྱངས་ཤིང་ཡོངས་སུ་སྦྱངས་ཏེ་མང་དུ་གནས་པར་འགྱུར་རོ། །སྒྲ་གཅན་ཟིན་དེ་ལྟ་བས་ན་འདི་ལྟར་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་དེ་ལ་སོ་སོར་བརྟགས་ཤིང་སོ་སོར་བརྟགས་ནས་ཡོངས་སུ་སྦྱངས་ཤིང་ཡོངས་སུ་སྦྱངས་ཏེ་མང་དུ་གནས་པར་བྱའོ་ཞེས་བསླབ་པར་བྱ་སྟེ། སྒྲ་གཅན་ཟིན་ཁྱོད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །སངས་རྒྱས་བསྟན་པ་དྲན་བྱེད་ན། །ལུས་ཀྱི་ལས་དང་ངག་ལས་དང ། །ཡིད་ཀྱི་ལས་ལ་མང་དུ་ནི། །སོ་སོར་རྟོགས་ཤིག་སྒྲ་གཅན་ཟིན། །འདི་ནི་དགེ་སྦྱོང་ལས་ཡིན་ཏེ། །འདི་ལ་སློབས་ཤིག་སྒྲ་གཅན་ཟིན། །འདི་ལ་ཁྱོད་ནི་སློབ་བྱེད་ན། །དགེ་བར་འགྱུར་ཞིང་སྡིག་མེད་ཡིན། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་བཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ
6.220a
ན་བཞུགས་སོ། །དེའི་ཚེ་ན་མཉན་ཡོད་ན་ཤཱཀྱའི་བུ་དགེ་སློང་ལག་བརྒྱུད་ཅེས་བྱ་བ་ཞིག་འདུག་པ་དེ་ཤིན་ཏུ་སྨྲ་བ་དང་གཞན་གྱི་སྨྲ་བའི་རྗེས་སུ་བརྩོན་པར་གནས་སོ། །དེ་ན་ཤེད་བུ་གསང་ཚིག་འདོད་པ། གསང་ཚིག་པ་ཚོལ་བ་ཞིག་ཡུལ་དབུས་ནས་ལྷོ་ལམ་དུ་སོང་ངོ ། །དེ་ན་བྲམ་ཟེ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་དུ་སོན་པ་ཡུལ་ཐ་དད་པ་ན་གནས་པའི་བྲམ་ཟེ་རྣམས་ཀྱི་སྟོན་པར་གྱུར་པ་ཞིག་འདུག་ནས། ཤེད་བུ་དེ་བྲམ་ཟེ་དེའི་དྲུང་དུ་སོང་སྟེ་ཕྱིན་ནས་ཞི་བ་དང་སྤྱོད་ལམ་ཞི་བས་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེ་ནས་བྲམ་ཟེ་དེས་ཤེད་བུ་དེ་ལ་འོངས་པ་ལེགས་སོ་ཞེས་བྱ་བའི་ཚིག་གི་ཀུན་ཏུ་སྤྱོད་པས་སྨྲས་པ། ཀྱེ་ཤེད་བུ་ཁྱོད་ག་ལས་འོངས་ཅི་ཞིག་འདོད། ཤེད་བུས་སྨྲས་པ། བདག་ཡུལ་དབུས་ནས་མཆིས་ཏེ། མཁན་པོའི་ཞབས་ལ་སྲི་ཞུ་བགྱིད་པར་འཚལ་ལོ། །ཅི་ཞིག་གི་ཕྱིར་རིག་བྱེད་ཀླག་པའི་སླད་དུའོ། །ཤེད་བུ་ལེགས་ཀྱིས་དེ་བཞིན་གྱིས་ཤིག་།དེ་ནི་བྲམ་ཟེས་བྱ་བ་ཡིན་ནོ། །ཤེད་བུ་དེས་བྲམ་ཟེ་དེའི་དྲུང་དུ་རིག་བྱེད་ཀླག་པ་བྱ་བར་བརྩམས་སོ། །ཤེད་བུ་རྣམས་ཀྱི་ཀུན་དུ་སྤྱོད་པ་ནི་འདི་ཡིན་ཏེ ། གང་གི་ཚེ་མི་ཀློག་པར་གྱུར་པ་དེའི་ཚེ་ན་ལན་འགའ་ནི་ཆུ་ངོགས་སུ་ཉེ་རེག་བྱེད་དུ་དོང་ངོ ། །ལན་འགའ་ནི་གྲོང་ཁྱེར་བལྟར་འདོང་ངོ ། །ལན་འགའ་ནི་ཡམ་སྲེག་ཤིང་ཐུར་འདོང་ངོ ། །ཇི་ཙམ་དུས་གཞན་ཞིག་ན་དེ་དག་མི་ཀློག་པར་གྱུར་ནས་དེའི་ཚེ་དེ་དག་ཡམ་སྲེག་ཤིང་ཐུར་དོང་བ་དང ། དེ་དག་ལ་ལམ་གྱི་བར་དུ་བར་སྐབས་ཀྱི་གཏམ་རྗོད་པ་འདི་ལྟ་བུ་འདི་བྱུང་སྟེ། ཀྱེ་ཀུད་སའི་རིགས་དག་བད་སའི་རིགས་དག་།ཤན་དི་ལིའི་རིགས་དག་།བྷ་ར་དྭ་ཛའི་རིགས་དག་།ལྔ་པའི་རིགས་དག་།ཉེ་ལྔའི་རིགས་དག་ཇི་ཁྱེད་ཅག་ལས་གང་ནི་ཡུལ་ག་ལས་འོངས་པ་དྲི་བར་བྱའོ། །དེ་ན་ཤེད་བུ་གཅིག་གིས་སྨྲས་པ། ཁོ་བོ་ནི་ཡུལ་ཤར་ནས་སོ། །གཞན་དག་གིས་སྨྲས། ཁོ་བོ་ནི་ལྷོ་ལམ་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་ནུབ་ཀྱི་ས་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་བྱང་ལམ་ནས་སོ། །ཤེད་བུ་དེས་སྨྲས་པ། ཁོ་བོ་ནི་ཡུལ་དབུས་ནས་སོ། །དེ་དག་གིས
6.220b
སྨྲས་པ་ཤེས་ལྡན་དག་བདག་ཅག་གིས་ཡུལ་ཐམས་ཅད་མཐོང་ཐོས་ན་ཡུལ་དབུས་ནི་མ་མཐོང་མ་ཐོས་སོ། །ཤར་ན་བློ་ཅན་གནས་པ་སྟེ། །ལྷོ་ལམ་ན་ནི་གཡོན་བྱེད་འདུག་།ནུབ་ཀྱི་ཡུལ་ན་ཕྲ་མ་ཅན། །བྱང་ལམ་ན་ནི་ཚིག་རྩུབ་པོ་ཞེས་ཚིགས་སུ་བཅད་པ་ཡང་སྨྲས་སོ། །དེ་ནས་དྲིས་པ། ཤེད་བུ་ཡུལ་དབུས་ཅི་འདྲ་ཤེས་ལྡན་དག་ཡུལ་དབུས་ནི་ཡུལ་རྣམས་ཀྱི་མཆོག་ཡིན་ཏེ། སཱ་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ། སློངས་མོ་པ་བརྒྱས་ཁྱབ་པ། དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པ། དེ་ན་ཆུ་ཀླུང་གང་གཱ་ཁ་རྗེ་དང་བསོད་ནམས་དང ། བཀྲ་ཤིས་དང ། གཙང་བ་དང ། གཙང་མ་ཉིད་ཀྱི་གནས་སུ་གྲགས་པ་འགྲམ་གཉིས་ནས་རླན་འཕྱོ་བ། དྲང་སྲོང་རྣམས་ཀྱི་བསྟི་གནས་ཤེས་བྱ་བ་ཆུ་དགུར་བཅཝ་བརྒྱད་འབབ་པ་ཡོད་དེ། དེར་དྲང་སྲོང་རྣམས་ཀྱིས་དཀའ་ཐུབ་སྤྱད་ན་རང་གི་ལུས་ཉིད་ཀྱིས་མཐོ་རིས་སུ་འདོང་བ་ཡིན་ནོ། །ཀྱེ་ཤེད་བུ་དེ་ནི་མཇལ་གྱིས་གཞན་འདི་འདྲིའོ། །ཡུལ་དབུས་ན་མཁས་པར་བགྲང་བ་དག་ཡོད་དམ། ཤེས་ལྡན་དག་ཁོ་བོས་དང་པོ་ཉིད་ནས་ཡུལ་དབུས་ནི་དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པའོ་ཞེས་མ་སྨྲས་སམ། ཤེད་བུ་ཁྱོད་ཀྱིས་དེ་སྐད་སྨྲས་སོ། །ཤེད་བུ་ཡུལ་དབུས་ན་འདི་ལྟ་སྟེ། དཔེར་ན་བདག་ཅག་གི་མཁན་པོ་དང་འདྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དམ། ཤེས་ལྡན་དག་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་བལྟ་བར་ཡང་མི་ནུས་པ། སྙན་པར་སྨྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དོ། །ཤེད་བུ་དེས་དེ་དག་ལ་དེ་ལྟ་དེ་ལྟར་ཡུལ་དབུས་ཀྱི་བསྔགས་པ་བརྗོད་པ་དང ། འདི་ལྟར་དེ་དག་ཐམས་ཅད་ཡུལ་དབུས་སུ་འདོང་འདོད་པར་གྱུར་ཏོ། །དེ་ནས་ཤེད་བུ་དེ་དག་གིས་ཡམ་སྲེག་ཤིང་དག་བཙལ་ཏེ། ཡམ་སྲེག་ཤིང་གི་ཁུར་ཐོགས་ནས་བྲམ་ཟེ་དེའི་ཁྱིམ་ག་ལ་བ་དེར་དོང་སྟེ་ཕྱིན་ནས་ཡམ་སྲེག་ཤིང་གི་ཁུར་མཐའ་གཅིག་ཏུ་བཞུག་སྟེ། བྲམ་ཟེ་དེ་ག་ལ་བ་དེར་དོང་ནས་ཕྱིན་པ་དང ། བྲམ་ཟེ་དེ
6.221a
ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག་།ཤེད་བུ་འདིས་ཅི་ནས་ཀྱང་བདག་ཅག་ཐམས་ཅད་ཡུལ་དབུས་སུ་མཆི་འཚལ་བར་གྱུར་པ་དེ་ལྟར་ཡུལ་དབུས་ཀྱི་བསྔགས་པ་བརྗོད་དོ། །བྲམ་ཟེ་དེས་སྨྲས་པ། བུ་དག་ཅི་ཇི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། འདི་ལྟར་ཡུལ་དག་ནི་ཐོས་ན་དགའ་བར་འགྱུར་བ་ཡིན་པས་མཉན་པར་བྱའི། བགྲོད་པར་ནི་མི་བྱའོ། །མཁན་པོ་ཤེད་བུ་འདིའི་མཆིད་ནས་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་བལྟ་བར་ཡང་མི་ནུས་པ། སྙན་པར་སྨྲ་བ་སྨྲ་བའི་ཁྱུ་མཆོག་དེ་ལྟ་བུ་དག་མཆིས་སོ་ཞེས་མཆིའོ། །བུ་དག་ཅི་ཁོ་བོ་ན་རེ་སའི་སྟེང་ན་ཁོ་བོ་གཅིག་པུ་ཁོ་ན་ལས་སྨྲ་བ་གཞན་འགའ་ཡང་མེད་དོ་ཞེས་ཟེར་རམ། ས་ནི་རིན་པོ་ཆེ་མང་པོ་འཛིན་པ་ཡིན་པས་ས་གཞི་ནི་མཛེས་པ་དག་གིས་གང་བ་ཡིན་ནོ། །མཁན་པོ་རེ་ཤིག་ཡུལ་དེ་ཡང་མཐོང་བར་འགྱུར་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལ་ཡང་བསྙེན་བཀུར་བགྱི། རྒོལ་བ་དག་ཀྱང་ཚར་གཅད་པར་བགྱི། རང་གི་གྲགས་པ་ཡང་བསྒྲག་པར་བགྱི། རྙེད་པ་ཡང་བསྒྲུབ་པར་བགྱིས། བདག་ཅག་ཡུལ་དབུས་སུ་མཆིའོ། །བྲམ་ཟེ་དེ་སློབ་མ་ལ་རྗེས་སུ་ཆགས་པ་དང་བཅས་པ་དང ། འཁོར་ཉུང་བ་ཡིན་པས་དེས་ཤེད་བུ་དེ་དག་ལ་འདི་སྐད་ཅེས་སྨྲས་སོ། །བུ་དག་གལ་ཏེ་དེ་ལྟ་ན་གཡང་གཞི་དག་དང ། ཤིང་ཤུན་དག་དང ། དབྱུག་གུ་དག་དང ། བླུགས་གཟར་དག་དང ། དགང་གཟར་དག་དང ། རིལ་བ་དག་ལོང་ཤིག་དང་ཡུལ་དབུས་སུ་འདོང་ངོ ། །དེ་དག་གིས་དེ་དག་བླངས་ནས་བྲམ་ཟེ་དེ་ཤེད་བུ་དེ་དག་དང་ལྷན་ཅིག་ཡུལ་དབུས་སུ་འཕགས་པ་དང ། དེས་རྒོལ་བ་ཁ་ཅིག་ནི་ཚར་བཅད་དེ་རྒོལ་བའི་ཤིང་རྟ་ལ་སྦྱོར་བར་བྱེད། ཁ་ཅིག་མགོར་ཐལ་བའི་བུམ་པ་དག་གིས་བསྣུན། ཁ་ཅིག་ནི་འཕོང་གི་དཔོང་སར་ཁཝ་བཞིན་དུ་ཐག་རིང་པོ་ནས་ཡོངས་སུ་སྤོང་བར་བྱེད། ཁ་ཅིག་ནི་གདུགས་དང ། རྒྱལ་མཚན་དང ། བ་དན་དག་གིས་བསུ་བར་བྱེད། ཁ་ཅིག་ནི་སློབ་མ
6.221b
ཉིད་དུ་ཁས་ལེན་པར་བྱེད་ཅིང་དེ་མཐར་གྱིས་གྲོང་རྡལ་དང ། དབྱེ་ཚོངས་དང ། ཚོང་རྡལ་དག་ཏུ་རྒོལ་བ་འདུལ་ཞིང་མཉན་ཡོད་དུ་ཕྱིན་ཏོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་བརྒྱད་པ། མཉན་ཡོད་ན་བྲམ་ཟེ་འཁོར་ཤིན་དུ་མང་བ་ཞིག་གིས་ལྷོ་ལམ་ནས་བྲམ་ཟེ་རྒོལ་བ་ཞིག་འོངས་ཤེས་ཐོས་སོ། །ཐོས་ནས་ཀྱང་དེས་རང་གི་འཁོར་རྣམས་ལ་སྨྲས་པ། ཤེས་ལྡན་དག་ཤེས་པར་གྱིས་ཤིག་།ཁོ་བོས་ལྷོ་ལམ་ནས་བྲམ་ཟེ་རྒོལ་བ་ཞིག་མཉན་ཡོད་ཏུ་འོངས་ཤེས་ཐོས་ཀྱིས་དེ་གལ་ཏེ་རིག་པའི་གནས་ཆེ་གེ་མོ་ཞིག་ལ་གཏམ་འདྲེ་བར་བྱེད་ན་ཁྱོད་ཀྱིས་དེ་དང་ལྷན་ཅིག་གཏམ་འདྲེ་བར་བྱའོ། །རིག་པའི་གནས་ཆེ་གེ་མོ་ཞིག་ལ་གཏམ་འདྲེ་བར་བྱེད་ན་ནི་ཁྱོད་ཀྱིས་དེ་དང་ལྷན་ཅིག་གཏམ་འདྲེ་བར་བྱའོ། །གལ་ཏེ་རེ་ཤིག་ཚར་གཅད་པར་ནུས་ན་དེ་ལྟ་ན་ལེགས། གལ་ཏེ་གཅད་པར་མ་ནུས་ན་ཤཱཀྱའི་དགེ་སྦྱོང་རྣམས་ཀྱི་ནང་དུ་གཏང་བར་བྱའོ། །གལ་ཏེ་རེ་ཤིག་ཤཱཀྱའི་བུའི་དགེ་སྦྱོང་རྣམས་ཚར་ཆོད་ན་བྲམ་ཟེ་མཆོག་ཉིད་ཏུ་འགྱུར་ལ། གལ་ཏེ་ཤཱཀྱའི་བུའི་དགེ་སྦྱོང་རྣམས་ཀྱིས་ཚར་གཅད་པར་གྱུར་ན། དེ་ལྟ་ན་ཡང་ལྷོ་ལམ་ནས་རྒོལ་བ་ཞིག་འོངས་པ་དེ་མཉན་ཡོད་ནས་ཚར་བཅད་དོ་ཞེས་བདག་ཅག་ལ་ཕྱོགས་དང་ཕྱོགས་མཚམས་རྣམས་སུ་སྙན་པའི་སྒྲའི་ཚོགས་རྒྱ་ཆེན་པོ་དགེ་བ་མངོན་པར་འབྱུང་བར་འགྱུར་རོ། །ལྷོ་ལམ་ནས་འོངས་པའི་བྲམ་ཟེ་དེ་ནང་པར་སྔར་ལངས་ཏེ་གོས་ཀྱིས་གློ་དགྲིས་ནས་རྩཝའི་སྒྲོན་མ་ཐོགས་ཏེ་མཉན་ཡོད་དུ་ཞུགས་པ་དང ། མཉན་ཡོད་པའི་བྲམ་ཟེའི་ཁྱེའུ་རྣམས་ཀྱིས་དེ་ལ་སྨྲས་པ། མཁན་པོ་ཅིའི་སླད་དུ་གོས་ཀྱིས་གློ་དཀྲིས་པར་གྱུར། ཁོ་བོས་ཐོས་པ་དེ་སྙེད་བཟུང་བ་གློ་རྡོལ་ཏེ་མི་འབྱུང་བར་བྱ་བའི་ཕྱིར་རོ། །གལ་ཏེ་དེ་ལྟ་ན་ཟངས་མའི་གླེགས་བུས་དཀྲིས་པར་བགྱི་བའི་རིགས་སོ། །ཅིའི་སླད་དུ་རྩཝའི་སྒྲོན་མ་བསྣམས། ཅི་འཇིག་རྟེན་མི་ཤེས་པའི་མུན་པ་ཅན་གྱི་ནང་དུ་ཤེས་པའི་སྒྲོན་མས་འཇུག་པར་བྱའོ། །དེ་དེ་དག་དང་ལྷན་ཅིག་རིག་པའི་གནས་གང་དང་གང་ལ་གཏམ་འདྲེ་བར་བྱེད་པ་དེ་ལ་དེས་དེ་དག་སྤོབས་པ་མེད
6.222a
པར་བྱེད་ཅིང ། གང་གི་ཚེ་ཐམས་ཅད་སྤོབས་པ་མེད་པར་བྱས་པ་དེའི་ཚེ་ན་དེ་དག་གིས་སྨྲས་པ། མཁན་པོ་ཅི་རང་གི་ཕྱོགས་འཇོམས་པ་ཁོ་ན་ལགས་སམ། དེས་སྨྲས་པ་ཅི་ཁོ་བོ་ལ་གཞན་གྱི་ཕྱོགས་འགའ་ཞིག་ཀྱང་ཡོད་དམ་དེ་དག་གིས་སྨྲས་པ། མཆིས་ཏེ་ཤཱཀྱའི་བུའི་དགེ་སྦྱོང་བྱུང་ནས་དུས་རིང་པོ་མ་ལགས་པ་དག་ལགས་ཏེ། དེ་དག་ནི་ཤིན་ཏུ་རིགས་བཞི་པོ་དག་རྣམ་པར་དག་པར་འདོད་པ་དང ། སྟོན་པ་དང ། འདོགས་པ་དང ། རབ་ཏུ་འཇོམས་པར་བགྱིད་པ་ལགས་ཀྱིས། དེ་དག་དང་རེ་ཤིག་ལྷན་ཅིག་གཏམ་འདྲེ་བར་མཛོད་ཅིག་།དེ་དག་ག་ལ་འཁོད་མཉན་ཡོད་འདི་ཉིད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ནའོ། །དེ་དག་གི་སྨྲ་བའི་ཁྱུ་མཆོག་གང་ཡིན། དེ་དག་ཐམས་ཅད་ཀྱང་མཁས་པ། སྤྱོད་པ་གསལ་བ་ཤ་སྟག་ལགས་མོད་ཀྱི། འོན་ཀྱང་དེ་དག་གི་སྨྲ་བའི་ཁྱུ་མཆོག་ནི་དགེ་སྦྱོང་ལག་བརྒྱུད་ཅེས་བགྱི་བ་ལགས་སོ། །དེ་ག་ལ་འདུག་།མཉན་ཡོད་འདི་ཉིད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ནའོ། །དེ་དག་དེ་ལྟར་གཏམ་འདྲེ་བར་བྱེད་པ་ན་ཤཱཀྱའི་བུ་ལག་བརྒྱུད་དེ་ཉིད་དུ་ཕྱིན་ནས་བྲམ་ཟེའི་ཁྱེའུ་དེ་དག་གིས་བྲམ་ཟེ་དེ་ལ་སྨྲས་པ། མཁན་པོ་རེ་ཤིག་ཤཱཀྱའི་བུའི་དགེ་སྦྱོང་གཞན་དག་ཞོག་ལ་ཤཱཀྱའི་བུ་ལག་བརྒྱུད་འདི་དང་ལྷན་ཅིག་གཏམ་འདྲེ་བར་མཛོད་ཅིག་།དེས་དེ་མཐོང་ནས་སྨྲས་པ། འདི་ལ་སློབ་དཔོན་གྱི་མཚན་ཡོད་པས་འདི་ནི་སྨྲ་བའི་ཁྱུ་མཆོག་ཡིན་ནོ་ཞེས་དེ་དེའི་གན་དུ་སོང་སྟེ་སྨྲས་པ། ཀྱེ་དགེ་སློང་བདག་གིས་བླ་མ་ལས་ཡི་གེ་ཅུང་ཟད་བླངས་པ་དག་ཅིག་ཡོད་དེ། བདག་ཁྱོད་དང་ལྷན་ཅིག་ཅུང་ཟད་གཏམ་རྣམ་པར་གཏན་ལ་དབབ་པར་བྱེད་པར་འདོད་དོ། །བྲམ་ཟེ་མཉེས་ཏེ། ཁོ་བོ་ལ་ཡང་གང་དུ་བདག་གི་རྒོལ་བའི་བསྟན་བཅོས་རྣོན་པོར་བྱ་སྙམ་པའི་བློ་སྐྱེས་ན་ཁྱོད་ཀྱང་འདིར་འོངས་ཀྱིས་དེ་བཞིན་བྱའོ། །ཉི་མ་གང་ལ་བྱ། སང་བྱའོ། །ཕྱོགས་གང་དུ། བསྐྱེད་མོས་ཚལ་ག་གེ་མོ་ཞིག་ཏུའོ། །དེ་བཞིན་བྱའོ་ཞེས་སྨྲས་ཏེ་སོང་ངོ ། །དེ་ནས་བྲམ་ཟེ་དེ་ཕྱོགས་དང་གཞན་གྱི་ཕྱོགས་སེམས་ཤིང་གལ་ཏེ་འདི
6.222b
སྐད་ཅེས་ཟེར་ན་བདག་གིས་འདི་སྐད་ཅེས་བྱའོ་སྙམ་དུ་སེམས་པ་ན་མཚན་ཐམས་ཅད་འདས་པར་གྱུར་ཏོ། །ཤཱཀྱའི་བུ་ལག་བརྒྱུད་ཀྱིས་བསམས་པ། གལ་ཏེ་བདག་གིས་རེ་ཤིག་བྲམ་ཟེ་ཚར་བཅད་ན་ནི་དེ་ལྟ་ན་ཡང་བདག་གིས་སྒོ་འཕར་བརྒྱ་དག་འདས་ཏེ། ཇི་ལྟར་ལྟོ་དགང་བ་བསྒྲུབ་པར་བྱ་དགོས་སོ། །གལ་ཏེ་བྲམ་ཟེས་བདག་ཚར་བཅད་ན་ནི་དེ་ལྟ་ན་བདག་གི་གྲགས་པའི་ཕྲེང་བ་མེད་པར་འགྱུར་རོ་སྙམ་མོ། །བྲམ་ཟེ་ཡང་ནང་པར་སྔར་ལངས་ཏེ་བསྐྱེད་མོས་ཚལ་དུ་སོང་ནས་དེས་དེར་དེ་ཡུན་རིང་དུ་བསྡད་དེ་དེ་མ་འོངས་པར་རིག་ནས་མཉན་ཡོད་དུ་ཞུགས་སོ། །ཤཱཀྱའི་བུ་ལག་བརྒྱུད་ཀྱང་བརྩད་པའི་དུས་ཡོལ་ནས་མཉན་ཡོད་དུ་བསོད་སྙོམས་ལ་ཞུགས་པ་དང་དེ་བྲམ་ཟེ་དེས་མཐོང་ནས་སྨྲས་པ། ཀྱེ་དགེ་སློང་ཁྱོད་བསྐྱེད་མོས་ཚལ་དེར་མ་འོངས་སོ། །ལག་བརྒྱུད་ཀྱིས་སྨྲས་པ། ཁོ་བོ་བསྐྱེད་མོས་ཚལ་གང་དུ་བོས་ན་མ་འོངས། སང་བསྐྱེད་མོས་ཚལ་ག་གེ་མོ་ཞིག་ཏུ་གཏམ་རྣམ་པར་གཏན་ལ་དབབ་པར་བྱའོ་ཞེས་སོ། །ལག་བརྒྱུད་ཀྱིས་སྨྲས་པ། བྲམ་ཟེ་ཁོ་བོས་ཡེ་བརྗེད་དོ། །བྲམ་ཟེས་བསམས་པ། བདག་ནི་མཚན་ཐོག་ཐག་ཏུ་ཕྱོགས་དང་གཞན་གྱི་ཕྱོགས་སེམས་པས་ནམ་ནངས་པར་གྱུར་ན་དགེ་སློང་འདི་ན་རེ་ཁོ་བོས་ཡེ་བརྗེད་དོ་ཞེས་ཟེར་བ་ལས་ན་ཡང་ན་ནི་བློན་པོ་ཆེན་པོ་ཞིག་ཡིན་ནོ། །ཡང་ན་ནི་ཤེས་པས་མི་འཁྲུགས་པ་ཞིག་ཡིན་ནོ་སྙམ་ནས་དེས་སྨྲས་པ། ཀྱེ་དགེ་སློང་སང་བྱའོ། །བྲམ་ཟེ་དེ་ལྟར་བྱའོ། །བྲམ་ཟེ་དེ་ཕྱི་དེ་ཉིན་པར་ཡང་ནང་པར་སྔར་ལངས་ཏེ་བསྐྱེད་མོས་ཚལ་དེར་སོང་ནས་དེས་དེར་ཡུན་རིང་དུ་བསྡད་དེ། དེ་མ་འོངས་པར་རིག་ནས་ཡང་མཉན་ཡོད་དུ་ཞུགས་སོ། །ཤཱཀྱའི་བུ་ལག་བརྒྱུད་ཀྱང་བརྩད་པའི་དུས་ཡོལ་ནས་མཉན་ཡོད་ཏུ་བསོད་སྙོམས་ལ་ཞུགས་པ་དང ། དེ་བྲམ་ཟེ་དེས་མཐོང་ནས་སྨྲས་པ། ཀྱེ་དགེ་སློང་ཁྱོད་བསྐྱེད་མོས་ཚལ་དེར་མ་འོངས་སོ། །ལག་བརྒྱུད་ཀྱིས་སྨྲས་པ། བྲམ་ཟེ་ཅི་ཁོ་བོའི་བྱ་བ་དེ་ཁོ་ནར་ཟད་དམ། ཁོ་བོས་ཇེ་སྟོན་པ་ལ་བསྙེན་བཀུར་བྱ་དགོས་སོ། །ཐོས་པ་གཟུང་བར་བྱ་དགོས་སོ། །ཚོགས་ཀློག་ཏུ་གཞུག་དགོས་སོ། །བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས
6.223a
བསྟན་པར་བྱ་དགོས་སོ། །བྲམ་ཟེས་སྨྲས་པ། དགེ་སློང་ཁྱོད་ཆེད་དུ་བསམས་ཏེ་ཐོ་འཚམ་པ་མི་བྱེད་དམ། དེ་ཡིན་ནོ། །དེའི་ཚེ་ན་ཤཱཀྱའི་བུ་ལག་བརྒྱུད་ཡུལ་ཕྱོགས་བྱེད་ཅིང་བརྡ་དང་མཚན་མ་བྱེད་དོ། །དེས་ཡུལ་ཕྱོགས་བྱས་ཤིང་བརྡ་དང་མཚན་མ་བྱས་ནས་ཆེད་དུ་བསམས་ཏེ་མི་འགྲོ་ནས་གཞན་མུ་སྟེགས་ཅན་དག་ཤེས་ལྡན་དག་།ཤཱཀྱའི་བུའི་དགེ་སྦྱོང་འདི་དག་ནི་བརྫུན་སྨྲ་བ་ལས་མ་ལོག་།མ་སྤངས་སོ་སོར་མ་སྤངས་པ་དག་ཡིན་ཏེ་ཡུལ་ཕྱོགས་བྱེད་ཅིང་བརྡ་དང་མཚན་མ་བྱེད་ལ། ཡུལ་ཕྱོགས་བྱས་ཤིང་བརྡ་དང་མཚན་མ་བྱས་ནས་ཆེད་ཏུ་བསམས་ཏེ་འགྲོ་བར་མི་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་ལག་བརྒྱུད་ལ་རྨས་པ། ལག་བརྒྱུད་ཁྱོད་ཡུལ་ཕྱོགས་བྱེད་ཅིང་བརྡ་དང་མཚན་མ་བྱེད་ལ། ཡུལ་ཕྱོགས་བྱས་ཤིང་བརྡ་དང་མཚན་མ་བྱས་ནས་ཆེད་ཏུ་བསམས་ཏེ་མི་འགྲོ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤེས་བཞིན་དུ
6.223b
བརྫུན་སྨྲ་ན་ལྟུང་བྱེད་དོ། །ཤེས་བཞིན་དུ་ཞེས་བྱ་བ་ནི་རྣམ་པར་དཔྱད་ནས་སོ། །བརྫུན་སྨྲ་ན་ཞེས་བྱ་བ་ལ་བརྫུན་སྨྲ་བ་ནི་རྣམ་པ་དགུ་ཡང་ཡོད། རྣམ་པ་བརྒྱད་ཀྱང་ཡོད། རྣམ་པ་བདུན་ཡང་ཡོད། རྣམ་པ་དྲུག་ཀྱང་ཡོད། རྣམ་པ་ལྔ་ཡང་ཡོད། རྣམ་པ་བཞི་ཡང་ཡོད། རྣམ་པ་གསུམ་ཡང་ཡོད། རྣམ་པ་གཉིས་ཀྱང་ཡོད་དོ། །དེ་ལ་བརྫུན་དུ་སྨྲ་བ་རྣམ་པར་དགུ་གང་ཞེ་ན། གཞི་མེད་པར་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང ། སོ་སོར་བཤགས་པར་བྱ་བ་དང ། ཉེས་བྱས་ཀྱིས་གླེང་བ་དང ། གཞི་མེད་པར་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། ཆོ་ག་ཉམས་པ་དང ། འཚོ་བ་ཉམས་པས་གླེང་བའོ། །བརྫུན་དུ་སྨྲ་བ་རྣམ་པ་བརྒྱད་གང་ཞེ་ན། གཞི་མེད་པར་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང ། སོ་སོར་བཤགས་པར་བྱ་བ་དང ། ཉེས་བྱས་ཀྱིས་གླེང་བ་དང ། གཞི་མེད་པར་མཐོང་བ་དང ། ཐོས་པ་དང ། དོགས་པས་གླེང་བའོ། །བརྫུན་དུ་སྨྲ་བ་རྣམ་པ་བདུན་གང་ཞེ་ན། གཞི་མེད་པར་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། ཆོ་ག་ཉམས་པ་དང ། འཚོ་བ་ཉམས་པས་གླེང་བ་དང ། གཞི་མེད་པར་མཐོང་བ་དང ། ཐོས་པ་དང ། དོགས་པས་གླེང་བའོ། །བརྫུན་དུ་སྨྲ་བ་རྣམ་པ་དྲུག་གང་ཞེ་ན། དགེ་སློང་བརྫུན་དུ་སྨྲ་བར་འདོད་པ་ནི་འདི་སྙམ་དུ་བརྫུན་སྨྲ་བར་བྱའོ་སྙམ་པ་དང ། བརྫུན་སྨྲ་བ་ན་འདི་སྙམ་དུ་བརྫུན་སྨྲའོ་སྙམ་པ་དང ། བརྫུན་སྨྲས་པ་ན་འདི་སྙམ་དུ་བརྫུན་སྨྲས་སོ་སྙམ་པ་དང ། དགེ་སློང་གཞི་མེད་པར་མཐོང་བ་དང ། ཐོས་པ་དང ། དོག་པས་བརྫུན་སྨྲ་བའོ། །བརྫུན་དུ་སྨྲ་བ་རྣམ་པ་ལྔ་གང་ཞེ་ན། གཞི་མེད་པར་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང ། སོ་སོར་བཤགས་པར་བྱ་བ་དང ། ཉེས་བྱས་ཀྱིས་གླེང་བའོ། །བརྫུན་དུ་སྨྲ་བ་རྣམ་པ་བཞི་གང་ཞེ་ན། གཞི་མེད་པར་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། ཆོ་ག་ཉམས་པ་དང ། འཚོ་བ་ཉམས་པས་གླེང་བའོ། །བརྫུན་དུ་སྨྲ་བ་རྣམ་པ་གསུམ་གང་ཞེ་ན། གཞི་མེད་པར་མཐོང་བ་དང ། ཐོས་པ་དང ། དོགས་པས་གླེང་བའོ། །གཞན་ཡང་བརྫུན་དུ་སྨྲ་བ་རྣམ་པ་གསུམ་གང་ཞེ་ན། བརྫུན་སྨྲ་བར་འདོད་པ་ན་འདི་སྙམ་དུ་བརྫུན་དུ་སྨྲ་བར
6.224a
བྱའོ་སྙམ་པ་དང ། བརྫུན་དུ་སྨྲ་བ་ན་འདི་སྙམ་དུ་བརྫུན་དུ་སྨྲའོ་སྙམ་པ་དང ། བརྫུན་དུ་སྨྲས་པ་ན་འདི་སྙམ་དུ་བརྫུན་སྨྲས་སོ་སྙམ་པའོ། །བརྫུན་དུ་སྨྲ་བ་རྣམ་པ་གཉིས་གང་ཞེ་ན། བརྫུན་དུ་སྨྲ་བ་ན་འདི་སྙམ་དུ་བརྫུན་སྨྲའོ་སྙམ་པ་དང ། བརྫུན་སྨྲས་པ་ན་འདི་སྙམ་དུ་བརྫུན་སྨྲས་སོ་སྙམ་པའོ། །བརྫུན་སྨྲ་བ་ལ་རྣམ་པ་གཅིག་པུ་འབའ་ཞིག་ནི་མེད་དོ། །བརྫུན་དུ་སྨྲ་བ་ནི་ཕམ་པར་འགྱུར་བ་ཡང་ཡོད། བརྫུན་དུ་སྨྲ་བ་ནི་དགེ་འདུན་ལྷག་མར་འགྱུར་བ་ཡང་ཡོད། བརྫུན་དུ་སྨྲ་བ་ནི་ཉེས་པ་སྦོམ་པོར་འགྱུར་བ་ཡང་ཡོད། ལྟུང་བྱེད་དུ་འགྱུར་བ་ཡང་ཡོད། ཉེས་བྱས་སུ་འགྱུར་བ་ཡང་ཡོད་དོ། །དེ་ལ་བརྫུན་དུ་སྨྲ་བ་ཕམ་པར་འགྱུར་བ་གང་ཞེ་ན། འདི་ལྟ་སྟེ། དགེ་སློང་མེད་ལ་མེད་བཞིན་དུ་མིའི་ཆོས་བླ་མ་སྨྲ་བའོ། །བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་གང་ཞེ་ན། འདི་ལྟ་སྟེ། དགེ་སློང་ཁྲོས་ཤིང་ཞེ་སྡང་བར་གྱུར་ནས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་དག་པ་ལྟུང་བ་མེད་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་པའོ། །བརྫུན་དུ་སྨྲ་བ་ཉེས་པ་སྦོམ་པོར་འགྱུར་བ་གང་ཞེ་ན། འདི་ལྟ་སྟེ། དགེ་སློང་དགེ་འདུན་གྱི་ནང་དུ་ཆེད་དུ་བསམས་ཏེ་ཆོས་མ་ཡིན་པ་ཆོས་སུ་སྟོན་པ་དང ། ཆོས་ཆོས་མ་ཡིན་པར་སྟོན་པ་དང ། འདུལ་བ་མ་ཡིན་པ་འདུལ་བར་སྟོན་པ་དང ། འདུལ་བ་འདུལ་བ་མ་ཡིན་པར་སྟོན་པའོ། །བརྫུན་དུ་སྨྲ་བ་ཉེས་བྱས་སུ་འགྱུར་བ་གང་ཞེ་ན། འདི་ལྟ་སྟེ། དགེ་སློང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་བསྟན་པ་འདོན་པ་ན་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིས་པ་ན་ཡོངས་སུ་མ་དག་བཞིན་དུ་ཅང་མི་སྨྲ་བར་སྡོད་པའོ། །བརྫུན་དུ་སྨྲ་བ་ལྟུང་བྱེད་དུ་འགྱུར་བ་གང་ཞེ་ན། འདི་ལྟ་སྟེ། བརྫུན་དུ་སྨྲ་བ་རྣམ་པ་བཞི་པོ་དེ་དག་མ་གཏོགས་པར་བརྫུན་དུ་སྨྲ་བ་གཞན་གང་ཡིན་པ་དེ་དག་ཐམས་ཅད་ནི་ལྟུང་བྱེད་ཏུ་འགྱུར་བ་ཡིན་ནོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚེད་པར་བྱེད།
6.224b
ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་བར་སྡོམ་ལ། མ་བརྗེད་པ་དང་ཡིད་གཉིས་དང ། །འདུ་ཤེས་པ་ནི་ཐ་མ་ཡིན། །དགེ་སློང་གིས་མ་མཐོང་བ་དང ། མ་ཐོས་པ་དང ། མ་རིག་པ་དང ། རྣམ་པར་མི་ཤེས་ལ། དེས་འདུ་ཤེས་བསྒྱུར་ཞིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་གིས་རིག་གོ། །བདག་གིས་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །དེས་མཐོང་ལ་དེ་ཡང་བརྗེད་པ་དང ། ཐོས་ཤིང་རིག་སྟེ་རྣམ་པར་ཤེས་ལ། དེ་ཡང་བརྗེད་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཤིང་རིག་ལ་རྣམ་པར་ཤེས་ཏེ་དེ་ཡང་མ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མཐོང་ལ་དེ་ལ་ཡིད་གཉིས་ཟ་བ་དང ། ཐོས་ཤིང་རིག་སྟེ་རྣམ་པར་ཤེས་ལ། དེ་ལ་ཡིད་གཉིས་ཟ་ནས། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། ་རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ལ་ཡིད་གཉིས་མི་ཟའོ། །བདག་གིས་ཐོས་ཤིང་རིག་ལ་རྣམ་པར་ཤེས་ཏེ། དེ་ལ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མཐོང་བ་ལ་མ་མཐོང་བར་འདུ་ཤེས་ཤིང ། ཐོས་པ་དང ། རིག་པ་དང ། རྣམ་པར་ཤེས་པ་ལ་རྣམ་པར་མ་ཤེས་པར་འདུ་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །ཐོས་སོ། །རིག་གོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །དེས་མ་མཐོང་ཞིང་ཐོས་པ་དང ། རིག་པ་དང ། རྣམ་པར་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་གི
6.225a
མ་ཐོས། མ་རིག་།རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །དེས་མ་ཐོས་ཤིང ། མཐོང་བ་དང ། རིག་པ་དང ། རྣམ་པར་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་ཐོས་ཀྱི། མ་མཐོང ། མ་རིག་རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །དེས་མ་རིག་ཅིང ། མཐོང་བ་དང ། ཐོས་པ་དང ། རྣམ་པར་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་རིག་གི། །མ་མཐོང ། མ་ཐོས། རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་རྣམ་པར་མ་ཤེས་ཤིང ། མཐོང་བ་དང ། ཐོས་པ་དང ། རིག་ལ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་རྣམ་པར་ཤེས་ཀྱི། མ་མཐོང་མ་ཐོས། མ་རིག་གོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །དེས་མཐོང་ལ་དེ་ཡང་བརྗེད་པ་དང་ཐོས་ཤིང་རིག་སྟེ་རྣམ་པར་ཤེས་ལ། དེ་ཡང་བརྗེད་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་མཐོང་སྟེ། དེ་ཡང་མ་བརྗེད་དོ། །མ་ཐོས། མ་རིག་།རྣམ་པར་མ་ཤེས་ཏེ་དེ་ཡང་མ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མཐོང་ལ་དེ་ལ་ཡིད་གཉིས་ཟ་བ་དང ། ཐོས་ཤིང་རིག་སྟེ་རྣམ་པར་ཤེས་ལ་དེ་ལ་ཡིད་གཉིས་ཟ་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་མཐོང་སྟེ་དེ་ལ་ཡིད་གཉིས་མི་ཟའོ། །བདག་གིས་མ་ཐོས། མ་རིག་།རྣམ་པར་མ་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མཐོང་ལ་མཐོང་བར་འདུ་ཤེས་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ
6.225b
དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་མཐོང་གི་ཐོས་ཤིང་རིག་ལ་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་ཐོས་ལ་ཐོས་པར་འདུ་ཤེས་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་ཐོས་ཀྱི། མཐོང་ཞིང་རིག་སྟེ་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་རིག་ལ་རིག་པར་འདུ་ཤེས་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་རིག་གི་མཐོང་ཞིང་ཐོས་ལ་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་རྣམ་པར་ཤེས་ལ་རྣམ་པར་ཤེས་པར་འདུ་ཤེས་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ། འདི་སྐད་ཅེས་བདག་གིས་རྣམ་པར་མ་ཤེས་ཀྱི། མཐོང་ཞིང་ཐོས་ལ་རིག་གོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དགེ་སློང་གིས་མཐོང་བ་དང ། ཐོས་པ་དང ། རིག་པ་དང ། རྣམ་པར་ཤེས་ལ་དེ་ལ་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་མཐོང་ངོ ། །བདག་གིས་མ་ཐོས་སོ། །བདག་གིས་མ་རིག་གོ། །བདག་གིས་རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མ་མཐོང་ལ་དེ་ཡང་མ་བརྗེད་པ་དང་མ་ཐོས་མ་རིག་རྣམ་པར་མ་ཤེས་ལ་དེ་ཡང་མ་བརྗེད་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང་བརྗེད་དོ། །བདག་གིས་ཐོས་ཤིང་རིག་ལ་རྣམ་པར་ཤེས་ཏེ་དེ་ཡང་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མ་མཐོང་ལ་དེ་ལ་ཡང་ཡིད་གཉིས་མི་ཟ་བ་དང ། མ་ཐོས་མ་རིག་རྣམ་པར་མ་ཤེས་ལ་དེ་ལ་ཡིད་གཉིས་མི་ཟ་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང །
6.226a
ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ལ་ཡིད་གཉིས་ཟའོ། །བདག་གིས་ཐོས་ཤིང་རིག་ལ་རྣམ་པར་ཤེས་ཏེ་དེ་ལ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མ་མཐོང་བ་ལ་མཐོང་བར་འདུ་ཤེས་ཤིང་མ་ཐོས་པ་དང ། མ་རིག་པ་དང ། རྣམ་པར་མ་ཤེས་པ་ལ་རྣམ་པར་ཤེས་པར་འདུ་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་མཐོང་ངོ ། །མ་ཐོས་སོ། །མ་རིག་གོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མཐོང་ཞིང་མ་ཐོས་པ་དང ། མ་རིག་པ་དང ། རྣམ་པར་མ་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་མཐོང་གི། །ཐོས་ཞིང་རིག་ལ་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་ཐོས་ཤིང་མ་མཐོང་མ་རིག་རྣམ་པར་མ་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་ཐོས་ཀྱི། མཐོང་ཞིང་རིག་ལ་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་རིག་ཅིང་མ་མཐོང་མ་ཐོས་རྣམ་པར་མ་ཤེས་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མ་རིག་གི། མཐོང་ཞིང་ཐོས་ལ་རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་རྣམ་པར་ཤེས་ཤིང་མ་མཐོང་མ་ཐོས་མ་རིག་ལ། དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་རྣམ་པར་མ་ཤེས་ཀྱི། མཐོང་ཞིང་ཐོས་ལ་རིག་གོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མ་མཐོང་བ་ན་ཡང་མ་བརྗེད་པ་དང ། མ་ཐོས་མ་རིག་རྣམ་པར་མ་ཤེས་ལ་དེ
6.226b
ཡང་མ་བརྗེད་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང་བརྗེད་དོ། །ཐོས་ཤིང་རིག་ལ་རྣམ་པར་ཤེས་ཏེ་དེ་ཡང་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེ་མ་མཐོང་བ་དེ་ལ་ཡིད་གཉིས་མི་ཟ་བ་དང ། མ་ཐོས་མ་རིག་རྣམ་པར་མ་ཤེས་ལ་དེ་ལ་ཡིད་གཉིས་མི་ཟ་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ལ་ཡིད་གཉིས་ཟའོ། །བདག་གིས་ཐོས་ཤིང་རིག་ལ་རྣམ་པར་ཤེས་ཏེ་དེ་ལ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མ་མཐོང་ལ་མ་མཐོང་བར་འདུ་ཤེས་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་གི། མ་ཐོས་མ་རིག་རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་མ་ཐོས་ལ་མ་ཐོས་པར་འདུ་ཤེས་ནས་དེས་འདུ་ཤེས་པ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་ཐོས་ཀྱི། མ་མཐོང་མ་རིག་རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །དེས་མ་རིག་ལ་མ་རིག་པར་འདུ་ཤེས་ནས་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་རིག་གི་མ་མཐོང་མ་ཐོས་རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དེས་རྣམ་པར་མ་ཤེས་ལ་རྣམ་པར་མ་ཤེས་པར་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་རྣམ་པར་ཤེས་ཀྱི། མ་མཐོང་མ་ཐོས་མ་རིག་གོ་ཞེས་ཟེར་ན་སྨྲས་སོ་ཅོག་ལྟུང་བྱེད་ཏུ་འགྱུར་རོ། །དགེ་སློང་ཇི་ཙམ་དུ་འདུ་ཤེས་བསྒྱུར་ཏེ་ཚིག་སྨྲ་བར་བྱེད་ན་ཐམས་ཅད།།
6.227a
ལྟུང་བྱེད་ཏུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བརྫུན་ཏུ་སྨྲ་བའི་ལྟུང་བྱེད་དེ་དང་པོ་རྫོགས་སྷོ།། ་་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་དགེ་སློང་རྣམས་ལ་འདི་ལྟ་སྟེ། ཞར་བ་དག་།ཐེང་པོ་དག་།སྨད་འཆལ་དག་།ལག་སོར་རྡུམ་པོ་དག་།སྒུར་པོ་དག་།མིའུ་ཐུང་དག་།ལྦ་བ་ཅན་དག་།ལྐུག་པ་དག་།འོན་པ་དག་།རྟེན་འཕྱེ་དག་།རྐང་བམ་དག་།གྱོལ་པོ་དག་།མཆུ་འཕྱངས་དག་།མགོ་བོ་ཆེ་དག་ཅེས་མིའི་སྐྱོན་ནས་སྨྲ་བས་ཀུན་དུ་སྤྱོད་པར་བྱེད་དོ། །མིའི་སྐྱོན་ནས་སྨྲ་བས་ཀུན་ཏུ་སྤྱོད་པ་ན་དགེ་སློང་དག་སྤ་གོང་བ་དང ། གཟེངས་དམས་པ་དང ། ཞུམ་པར་གྱུར་ནས་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་ཞིང་སྡུག་བསྔལ་དང ། ཡིད་མི་བདེ་བ་མང་བར་གནས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ལ་འདི་ལྟ་སྟེ། ཞར་བ་དག་།ཐེང་པོ་དག་།སྨད་འཆལ་དག་།ལག་སོར་རྡུམ་པོ་དག་།སྒུར་པོ་དག་།མིའུ་ཐུང་དག་།ལྦ་བ་ཅན་དག་།ལྐུག་པ་དག་།འོན་པ་དག་།རྟེན་འཕྱེ་དག་།རྐང་བམ་དག་།གྱོལ་པོ་དག་།མཆུ་འཕྱངས་དག་།མགོ་བོ་ཆེ་དག་ཅེས་མིའི་སྐྱོན་ནས་སྨྲ་བས་ཀུན་ཏུ་སྦྱོད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ
6.227b
སློང་རྣམས་ལ་འདི་ལྟ་སྟེ། ཞར་བ་དག་།ཐེང་པོ་དག་།སྨད་འཆལ་དག་།ལག་སོར་རྡུམ་པོ་དག་།སྒུར་པོ་དག་།མིའུ་ཐུང་དག་།ལྦ་བ་ཅན་དག་།ལྐུག་པ་དག་།འོན་པ་དག་།རྟེན་འཕྱེ་དག་།རྐང་འབམ་དག་།གྱོལ་པོ་དག་།མཆུ་འཕྱངས་དག་།མགོ་བོ་ཆེ་དག་ཅེས་མིའི་སྐྱོན་ནས་སྨྲ་བས་ཀུན་ཏུ་སྤྱོད་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཞིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་ཞིག་བྱུང་ནས་དེ་བསྲིངས་བསྐྱེད་ནས་ཆེན་མོར་གྱུར་ཏོ། །ཁྱིམ་བདག་དེ་ཞིང་པ་ཡིན་པས་རང་ཉིད་ཞིང་རྨེད་པར་བྱེད་དོ། །ཁྱིམ་བདག་ཅིག་གི་བུ་ཕ་མ་དང་བྲལ་ནས་དགོན་པ་ནས་ཤིང་ཁུར་ཐོགས་ཏེ་དེའི་ཞིང་དང་ཉེ་བར་ཤིང་ལྗོན་པའི་དྲུང་དུ་ཁུར་བཞག་སྟེ་ངལ་བསོ་ནས་དེས་སྨྲས་པ། ཞང་པོ་ཅིའི་ཕྱིར་ཁྱོད་རང་ཉིད་ཞིང་རྨོ་བར་བྱེད། ཁྱོད་ཀྱིས་གྲོང་དུ་གྲོང་གི་བྱ་བ་བྱ་བའི་རིགས་ན་ཁྱོད་དགོན་པར་དགོན་པའི་བྱ་བ་བྱེད་དམ། ཚ་བོ་ཁོ་བོ་ལ་བུ་ཡང་མེད། ཕུ་ནུ་ཡང་མེད་དོ། །ཞང་པོ་གཤོལ་འོན་ཅིག་དང་ཁོ་བོས་རྨོས་ཁྱོད་རེ་ཤིག་ངལ་སོ་ཤིག་ཅེས་དེས་ཞིང་རྨོ་བར་བརྩམས་པ་དང ། ཁྱིམ་བདག་དེས་དེའི་ཟན་ཁྱེར་ཏེ་འོངས་ནས་སྨྲས་པ་ཚ་བོ་ཚུར་ཤོག་ཟན་ཟའོ། །དེ་གཉིས་ཀྱིས་ཟན་ཟོས་ནས་ཁྱིམ་བདག་གི་བུ་དེས་སྨྲས་པ། ཞང་པོ་ཁོ་བོས་ཁྱོད་ཀྱི་ཁྱིམ་མི་ཤེས་ཀྱི་ཁྱོད་སོང་ཤིག་དང ། ཁོ་བོས་ཞིང་རྨོས་རྒོངས་ཀར་སུ་ཤིག་།ཁྱིམ་བདག་དེ་སོང་བ་དང ། ཁྱིམ་བདག་གི་བུ་དེས་ཀྱང་ཡུད་ཙམ་ཞིག་ཞིང་རྨོས་ནས་ཞིང་ཚིགས་ཀྱི་ཕྱོགས་སུ་གླང་གཉིས་ཟར་བཅུག་སྟེ། རྒོངས་ཀར་རྩཝ་ཁུར་ཅིག་ཐོགས་ནས་རི་བྲགས་དེར་འཇུག་པར་བརྩམས་པ་དང ། ཁྱིམ་བདག་དེས་ཀྱང་དེ་བསུ་ནས་ཁྱིམ་བདག་དེས་དེ་ཁྱིམ་དུ་ཁྲིད་དོ། །ཁྱིམ
6.228a
བདག་གི་བུ་དེས་གླང་བྲགས་སུ་སྩལ་ཏེ་གཅལ་བཀྲམ་ནས་དུ་བ་བཏུལ་ཏེ་གླང་གཉིས་ཀྱི་མདུན་དུ་རྩཝ་བཀྲམ་པ་དང ། ཁྱིམ་བདག་དེས་བསམས་པ། བདག་ཁྱིམ་བདག་གི་བུ་འདིས་བདེ་བར་བྱས་ཀྱིས་བདག་གིས་བུ་མོ་འདི་འདི་ལ་ཆུང་མར་སྦྱིན་ནོ་སྙམ་ནས་དེས་དེ་ལ་སྨྲས་པ། ཚ་བོ་མངོན་པར་དགའ་བཞིན་དུ་ལས་གྱིས་ཤིག་དང་བུ་མོ་འདི་ཁྱོད་ལ་ཆུང་མར་སྦྱིན་ནོ། །དེས་དེར་ཁྱིམ་བརྩིག་པར་བརྩམས་པ་དང ། དེའི་གླང་ཞིང་ཟན་ཅིག་ཞིང་ལ་བྲོས་ནས་དེས་དེ་བཟློག་ཀྱང་མ་བཟློགས་ནས་དེས་དེ་ལ་སྤྱོས་ཏེ་ཤིང་ཚལ་ཞིག་འཕངས་པ་དང ། དེས་དེའི་རཝ་ཆག་ནས་དེའི་མིང་རཝ་ཆག་ཅེས་བྱ་བར་བཏགས་སོ། །དུས་གཞན་ཞིག་ན་དེ་ཡང་ཞིང་ལ་བྲོས་ནས་དེས་དེ་བཟློག་ཀྱང་མ་བཟློགས་ནས་དེས་དེ་ལ་སྤྱོས་ཏེ་ཟོར་བ་འཕངས་པ་དང་དེས་དེའི་མཇུག་མ་ཆད་ནས་དེའི་མིང་མཇུག་རྡུམ་ཞེས་བྱ་བར་བཏགས་སོ། །དེ་ལྟར་དེའི་མིང་དུ་ཆག་རྡུམ་ཞེས་བྱ་བར་བཏགས་སོ། །དུས་གཞན་ཞིག་ན་ཁྱིམ་བདག་གི་བུ་དེས་ཁྱིམ་བདག་དེ་ལ་སྨྲས་པ། ཞང་པོ་ཇི་ལྟར་ཁས་བླངས་པ་བཞིན་གྱིས་ཤིག་།ཁྱིམ་བདག་དེས་ཆུང་མ་ལ་སྨྲས་པ། བཟང་མོ་བག་རྫངས་སྟ་གོན་གྱིས་ཤིག་།བུ་མོ་བག་མར་གཏང་བར་བྱའོ། །ཆུང་མས་སྨྲས་པ། རྗེའི་སྲས་བུ་མོ་འདི་སུ་ལ་ཡང་མ་སྩལ་ན་ཇི་ལྟར་བག་མར་གཏང་བར་བགྱི་དེས་སྨྲས་པ། ཁོ་བོས་འདི་གཞན་ལ་སྦྱིན་ནོ། །སུ་ལ་སྩལ། ཁྱིམ་བདག་གི་བུ་འདི་ལའོ། །ཆུང་མས་སྨྲས་པ། ཁོ་མོས་ན་ལེ་ཞམ་དཀར་པོ་བཞིན་དུ་ཇི་ལྟར་བྱུང་གཏོལ་མེད་པ་གང་ཡིན་པ་འདི་ལ་བུ་མོ་སྦྱིན་རེ་སྐན། འདི་ལྟར་གང་དུ་ཁོ་མོ་བགོ་བར་བྱ་བ་དང ། བཟའ་བར་བྱ་བ་ཡོད་པ་དེར་ཁོ་མོས་བུ་མོ་སྦྱིན་པར་བྱའོ། །དེས་སྨྲས་པ། བཟང་མོ་ཁྱིམ་བདག་གི་བུ་འདིས་ཁོ་བོ་བདེ་བར་གྱུར་ཏེ། གལ་ཏེ་འདི་འགྲོ་བར་གྱུར་ན་ཡང་ཁོ་བོས་ཞིང་རྨོ་དགོས་པར་འགྱུར་རོ། །ཆུང་མས་སྨྲས་པ། ཁོ་མོས་ལྟོ་གོལ་བ་འདི་ལ་བུ་མོ་སྦྱིན་པར་མི་ནུས་སོ། །ཁྱིམ་བདག་གིས་བསམས་པ། གལ་ཏེ་བདག་གིས་ཁྱེའུ་འདི་ལ་ཁོ་བོས་ཁྱོད་ལ་བུ་མོ་མི་སྦྱིན་ནོ་ཞེས་སྨྲས་ན་དེང་ཉིད་དུ་འདི་འགྲོ་བར
6.228b
འགྱུར་ཞིང་བདག་སྡུག་བསྔལ་བར་འགྱུར་རོ་སྙམ་ནས་དེ་ལ་སྒྱང་བ་བྱས་སོ། །ཁྱིམ་བདག་གི་བུ་དེས་ཁྱིམ་བདག་དེ་ལ་ཡང་སྨྲས་པ། ཞང་པོ་ཇི་ལྟར་ཁས་བླངས་པ་བཞིན་གྱིས་ཤིག་།དེས་སྨྲས་པ། ཚ་བོ་ཁོ་བོ་ཉེ་དུའི་འཁོར་རྒྱ་ཆེན་པོ་དག་ལ་ཟན་སྦྱར་དགོས་ཀྱིས་རེ་ཤིག་ས་ལུ་དག་སྒྲུབས་ཤིག་།དེས་ས་ལུ་དག་བསྒྲུབས་ནས་སྨྲས་པ། ཞང་པོ་བག་མ་རྫོངས་ཤིག་།དེས་སྨྲས་པ། ཚ་བོ་དེ་ལ་བུ་རམ་དག་ཀྱང་དགོས་ཀྱིས་རེ་ཤིག་བུ་རམ་ཤིང་དག་སྒྲུབས་ཤིག་།དེས་བུ་རམ་ཤིང་དག་བསྒྲུབས་ནས་སྨྲས་པ། ཞང་པོ་ད་བག་མ་རྫོངས་ཤིག་།དེས་སྨྲས་པ། ཚ་བོ་དེ་ལ་ཁུར་བ་དག་ཀྱང་དགོས་ཀྱིས་རེ་ཤིག་གྲོ་དག་སྒྲུབས་ཤིག་།དེས་གྲོ་དག་ཀྱང་བསྒྲུབས་ནས་སྨྲས་པ། ཞང་པོ་ད་བག་མ་རྫོངས་ཤིག་།ཁྱིམ་བདག་དེས་སྨྲས་པ། ཚ་བོ་ས་ལུ་སྔ་མ་དག་།ཟད་ཀྱིས་ད་ཡང་རེ་ཤིག་ས་ལུ་སྒྲུབས་ཤིག་།ཁྱིམ་བདག་གི་བུ་དེས་བསམས་པ། དེ་གསུམ་ནི་རང་བཞིན་གྱིས་དུས་གཅིག་ཏུ་བསྒྲུབ་པར་མི་ནུས་པས་འདི་སྒྱོང་བར་བྱེད་ཀྱིས་སྐྱེ་བོ་ཕལ་པོ་ཆེའི་ནང་དུ་སོང་སྟེ་ཁས་ལན་དུ་བཅུག་ལ་གལ་ཏེ་མི་སྟེར་ན་རྒྱལ་པོའི་ཕོ་བྲང་ནས་བདེ་བར་སྦྱིན་དུ་གཞུག་གོ་སྙམ་ནས་དེས་སྐྱེ་བོ་ཕལ་པོ་ཆེའི་ནང་དུ་དེ་ལ་སྨྲས་པ། ཞང་པོ་བག་མ་རྫོངས་ཤིག་།ཁྱིམ་བདག་དེས་སྤྱོས་ཏེ་སྨྲས་པ། ཤེས་ལྡན་དག་མི་འདི་ཁོ་བོའི་ལྟོ་གོལ་བ་ལྟོ་གླས་ལས་བྱེད་པ་ཡིན་ན་ཁོ་བོས་འདི་ལ་བུ་མོ་སྦྱིན་རེ་སྐན། ཁྱིམ་བདག་གི་བུ་དེས་བསམས་པ། བདག་གིས་ཀཱར་ཤཱ་པ་ཎ་དག་ཀྱང་མ་ཐོབ་ལ་བུ་མོ་ཡང་མ་ཐོབ་པས་འདི་ལ་གནོད་པ་ཅུང་ཞིག་བྱས་ཏེ་འགྲོའོ་སྙམ་ནས་དེས་གླང་དེ་དག་ཉིན་པར་ཞིང་རྨོས་ནས་ལྕག་མང་པོས་གཞུས་ཏེ་ཉི་མ་ལ་ཤིང་སྐམ་ལ་བཏགས་ཏེ་སོང་ངོ ། །ཆོས་ཉིད་ཀྱིས་ན་འཇིག་རྟེན་གནས་པ་ཆགས་ནས་རིང་པོ་མ་ལོན་པའི་ཚེ་ན་དུད་འགྲོ་དག་ཀྱང་སྨྲ་ཤེས་པ་ཡིན་པས་གླང་དེ་དག་གིས་དེ་ལ་སྨྲས་པ། ཀྱེ་མི་ཁྱོད་ཁོ་བོ་ཅག་གི་ཕ་མ་འདྲ་བར་འདུག་འདུག་སྟེ། རྟག་ཏུ་ཁོ་བོ་ཅག་ལེགས་པར་བདེ་བས་ཡོངས་སུ་སྐྱོང་བར་བྱེད་ན་ད་ཅིའི་ཕྱིར་ཉིན་པར་ཞིང
6.229a
རྨོས་ནས་ལྕག་མང་པོས་གཞུས་ཏེ་ཉི་མ་ལ་ཤིང་སྐམ་ལ་བཏགས་ཏེ་འགྲོ། །ཅི་ཁོ་བོ་ཅག་གིས་ཁྱོད་ལ་ཉེས་པ་ཞིག་བྱས་སམ། ཁྱེད་ཅག་གིས་ཁོ་བོ་ལ་ཉེས་པ་ཅུང་ཟད་ཀྱང་མ་བྱས་ཏེ། འདི་ལྟར་ཁྱེད་ཅག་གི་བདག་པོས་ཁོ་བོ་ལ་ཉེས་པ་བྱས་སོ། །དེས་ཅི་བྱས། ཁོ་བོ་ལ་བུ་མོ་སྦྱིན་པར་ཁས་བླངས་ནས་མ་སྟེར་རོ། །འོ་ན་རྒྱལ་པོའི་ཕོ་བྲང་དུ་ཅིའི་ཕྱིར་མི་འགྲོ། ཆེ་བཞི་དག་མེད་དོ། །སོང་ཤིག་དང་ཁོ་བོ་ཅག་གིས་ཆེ་བཞི་དབྱེའོ། །ཅི་མིའི་སྐད་ཏུ་སྨྲ་བར་འགྱུར་རམ། མ་ཡིན་ཏེ། འདི་ལྟར་ཁྱོད་ཀྱིས་བདེན་པས་གསོལ་བར་བྱ་སྟེ། ཁོ་བོ་ཅག་ཞག་བདུན་གྱི་བར་དུ་བྲགས་སུ་བཏགས་སྟེ། རྩཝ་ཡང་སྦྱིན་པར་མི་བྱ། ཆུ་ཡང་བླུད་པར་མི་བྱ་བར་གཞག་པར་བྱ་ཞིང་ཉི་མ་བདུན་པ་ལ་རྩཝ་ཕུན་སུམ་ཚོགས་པ་དང ། ཆུ་ཕུན་སུམ་ཚོགས་པའི་ཕྱོགས་སུ་གཏང་བར་བྱ་སྟེ། དེའི་ཚེ་ཁྱོད་ཀྱིས་རྒྱལ་པོའི་མདུན་དུ་གལ་ཏེ་བདག་བདེན་ན་གླང་འདི་དག་རྩཝ་ཡང་མི་ཟ་ཆུ་ཡང་མི་འཐུང་བར་གྱུར་ཅིག་ཅེས་བདེན་པའི་ཚིག་གིས་གསོལ་ཅིག་དང ། ཁོ་བོ་ཅག་ཇི་སྲིད་དུ་རྒྱལ་པོ་ཡིད་ཆེས་པར་མ་གྱུར་གྱི་བར་དུ་རྩཝ་ཡང་མི་ཟ་ཆུ་ཡང་མི་འཐུང་ངོ ། །ཁྱིམ་བདག་གི་བུ་དེས་རྒྱལ་པོའི་ཕོ་བྲང་དུ་སོང་སྟེ་རྒྱལ་པོ་ལ་གསོལ་པ། ལྷ་ཁྱིམ་བདག་ཆེ་གེ་མོ་ཞིག་གིས་བདག་ལ་བུ་མོ་སྩལ་བར་མཆིད་ཀྱིས་འཚལ་ནས་མི་སྟེར་རོ། །རྒྱལ་པོས་སྨྲས་པ། ཁྱོད་ལ་ཆེ་བཞི་འགའ་ཡོད་དམ། །ལྷ་མཆིས་སོ། །ཅི་མི་དག་གམ། མི་མ་ཡིན་པ་དག་།མི་མ་ལགས་པ་གླང་དག་གོ། །ཅི་མིའི་སྐད་ཏུ་སྨྲ་བར་འགྱུར་རམ། མ་ལགས་ཏེ་འདི་ལྟར་བདག་གིས་བདེན་པས་གསོལ་བར་བགྱི་སྟེ། བདག་གིས་དགུང་བདུན་གྱི་བར་དུ་གླང་དེ་དག་བྲགས་སུ་བཏགས་ཏེ་རན་ཡང་སྩལ་བར་མི་བགྱི། ཆབ་ཀྱང་སྩལ་བར་མི་བགྱི་བར་གཞག་པར་བགྱི་ཞིང ། གདུགས་བདུན་པ་ལ་རན་ཕུན་སུམ་ཚོགས་པ་དང ། ཆབ་ཕུན་སུམ་ཚོགས་པའི་ཕྱོགས་སུ་གཏང་བར་བགྱི་སྟེ། དེའི་ཚེ་བདག་གིས་ལྷའི་སྤྱན་སྔར་གལ་ཏེ་བདག་མད་ན་གླང་འདི་དག་རན་ཡང་མི་འཚལ་ཆབ་ཀྱང་མི་འཚལ་བར་གྱུར་ཅིག་ཅེས་བདེན་པའི་ཚིག་གིས
6.229b
གསོལ་ན་ཇི་སྲིད་དུ་ལྷ་ཐུགས་ཆེས་པར་མ་གྱུར་གྱི་བར་དུ་དེ་དག་རན་ཡང་མི་འཚལ། ཆབ་ཀྱང་མི་འཚལ་བར་འགྱུར་རོ། །རྒྱལ་པོས་བློན་པོ་རྣམས་ལ་བསྒོ་བ་ཤེས་ལྡན་དག་དེ་ལྟར་གྱིས་ཤིག་།དེ་དག་གིས་གླང་དེ་དག་བྲགས་སུ་བཏགས་ཏེ་བཞགས་པ་དང ། ཆག་རྡུམ་གྱིས་སྨྲས་པ། ནུབ་ཕྱོགས་ནས་ཉི་མ་ཤར་ཏམ། ཅི་ན་གང་གིས་བདག་ཅག་གཏོང་བར་མི་བྱེད། གཞན་དག་གིས་སྨྲས་པ། མ་ཡིན་ཏེ། བདག་ཅག་གིས་ཁྱིམ་བདག་གི་བུ་དེ་ལ་འདི་ལྟར་ཁྱོད་ཀྱིས་བདེན་པས་གསོལ་བར་བྱ་སྟེ། ཁོ་བོ་ཅག་ཞག་བདུན་གྱི་བར་དུ་བྲགས་སུ་བཏགས་ཏེ་རྩཝ་ཡང་སྦྱིན་པར་མི་བྱ། ཆུ་ཡང་བླུད་པར་མི་བྱ་བར་གཞག་པར་བྱ་ཞིང ། ཉི་མ་བདུན་པ་ལ་རྩཝ་ཕུན་སུམ་ཚོགས་པ་དང ། ཆུ་ཕུན་སུམ་ཚོགས་པའི་ཕྱོགས་སུ་གཏང་བར་བྱ་སྟེ། དེའི་ཚེ་ཁྱོད་ཀྱིས་རྒྱལ་པོའི་མདུན་དུ། གལ་ཏེ་བདག་བདེན་ན་གླང་འདི་དག་རྩཝ་ཡང་མི་ཟ། ཆུ་ཡང་མི་འཐུང་བར་གྱུར་ཅིག་ཅེས་བདེན་པའི་ཚིག་གིས་གསོལ་ཅིག་དང ། ཁོ་བོ་ཅག་ཇི་སྲིད་དུ་རྒྱལ་པོ་ཡིད་ཆེས་པར་མ་གྱུར་གྱི་བར་དུ་རྩཝ་ཡང་མི་ཟ་ཆུ་ཡང་མི་འཐུང་ངོ་ཞེས་ཁས་བླངས་སོ། །ཆག་རྡུམ་གྱིས་སྨྲས་པ། ཁོ་བོ་ནི་གལ་ཏེ་བཏང་བར་གྱུར་ན་རྡོ་བ་ཡང་ཟ་ན་རྩཝ་ལྟ་སྨོས་ཀྱང་ཅི་དགོས། དེ་དག་གིས་སྨྲས་པ། ཁྱིམ་བདག་གི་བུ་དེ་བདག་ཅག་གི་ཕ་མ་དང་འདྲ་བར་འདུག་འདུག་གིས། དེ་ལྟར་མ་བྱེད་ཅིག་།ཆག་རྡུམ་གྱིས་སྨྲས་པ། དེ་བདག་ཅག་གི་ཕ་མ་དང་འདྲ་བར་འདུག་འདུག་པ་ཡང་བདེན་མོད་ཀྱི་འོན་ཀྱང་དེ་ཁོ་བོ་ལ་ཆག་རྡུམ་ཞེས་འབོད་པས་ཁོ་བོ་ནི་དེ་ལྟར་མི་འདོད་དེ། འདི་ལྟར་ཁོ་བོ་ནི་དེའི་ལྟོ་འདྲལ་བར་ཡང་འདོད་དོ། ཁྱིམ་བདག་གི་བུ་དེ་དུས་དང་དུས་སུ་གླང་དེ་དག་གི་གན་དུ་སོང་སྟེ་དྲིས་པ། ཀཝའི་གླང་དག་ཇི་ལྟར་ཁྱོད་ཅག་རུང་ངམ། དེ་དག་གིས་སྨྲས་པ། ཁོ་བོ་ཅག་ནི་རུང་ན། ཁྱོད་ཀྱི་མི་རུང་ངོ ། །ཅི་ཉེས་ཆག་རྡུམ་འདི་ན་རེ་ཁོ་བོ་ནི་གལ་ཏེ་བཏང་བར་གྱུར་ན་རྡོ་བ་ཡང་ཟ་ན་རྩཝ་ལྟ་སྨོས་ཀྱང་ཅི་དགོས་ཞེས་ཟེར་རོ། །འོ་ན་ཅི་ཁོ་བོ་འབྲོས་པར་བྱ་འམ། མ་འབྲོས་པར་འདི་ལྟར་ཆག་རྡུམ་འདིའི་སྣ་ཕུག་ཤིག་དང ། གལ་ཏེ་འདི་རྩཝ་ཟ་བར་འགྱུར་རམ།
6.230a
ཆུ་འཐུང་བར་འགྱུར་བ་ན་ཁོ་བོ་ཅག་གིས་རཝ་དག་གིས་འདིའི་སྣ་བླངས་ཏེ་ཁ་གྱེན་དུ་གཟུང་བར་བྱས། ཁྱོད་ཀྱིས་ཀྱང་དེའི་ཚེ་འདི་དག་འཇིག་རྟེན་སྐྱོང་བ་ལྔ་པ་ཉི་མ་ཡང་ཆེ་བཞིར་ཡོད་ཅེས་ཉི་མ་སྟོན་པར་བྱེད་དོ་ཞེས་སྨྲ་བར་བྱའོ། །དེས་དེའི་སྣ་དབུག་པར་བརྩམས་པ་དང ། དེས་སྨྲས་པ། ཤེས་ལྡན་དག་འདི་ལྟར་ཁོ་བོ་ལ་ཐོ་འཚམ་པར་བྱེད་པ་ལ་ལྟོས་ཤིག་།དེ་དག་གིས་སྨྲས་པ། འདི་ཁྱོད་ལ་རྒྱན་འདོགས་པར་བྱེད་ཀྱིས་ཁ་རོག་ཤིག་།དེ་ནས་ཉི་མ་བདུན་པ་ལ་རྒྱལ་པོ་བློན་པོ་རྣམས་དང་ཐབས་གཅིག་ཚོགས་པས་གླང་དེ་དག་རྩཝ་ཕུན་སུམ་ཚོགས་པ་དང་ཆུ་ཕུན་སུམ་ཚོགས་པའི་ཕྱོགས་སུ་བཏང་བ་ན་ཆག་རྡུམ་དེས་རྩཝའི་ཁམ་བླང་བར་བརྩམས་པ་དང ། གླང་དེ་དག་གིས་རཝ་དག་གིས་དེའི་སྣ་བླངས་ཏེ་ཉི་མ་ལ་ལྟ་ཞིང་འཛིན་ཏོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་གླང་འདི་དག་ཉི་མ་ལ་ལྟ་ཞིང་འཁོད། དེ་ན་བློན་པོ་གཅིག་གིས་སྨྲས་པ། ལྷ་འདི་དག་དོན་གྱིས་ན་ལྷ་ལ་གསོལ་བར་བགྱིད་དེ་བདག་ཅག་འབའ་ཤིག་ཆེ་བཞི་ལགས་པར་མ་བས་ཀྱི་འཇིག་རྟེན་སྐྱོང་བ་ལྔ་པ་གདུགས་འདི་ཡང་ཆེ་བཞི་གཞན་ལགས་སོ་ཞེས་མཆིའོ། །རྒྱལ་པོ་ངོ་མཚར་སྐྱེས་ནས་བློན་པོ་རྣམས་ལ་བསྒོ་བ། ཤེས་ལྡན་དག་མི་མ་ཡིན་པ་དག་གིས་ཆེ་བཞི་ཕྱེས་ཁྱིམ་བདག་གི་བུ་འདི་ལ་དེའི་བུ་མོ་སྦྱིན་དུ་ཆུག་ཤིག་།ཁྱིམ་བདག་གི་བུ་དེས་ཁྱིམ་བདག་དེ་ཕམ་པར་བྱས་ནས་དེ་ལ་བུ་མོ་བྱིན་ནོ། །དགེ་སློང་དག་རེ་ཤིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་མིས་སྐྱོན་ནས་སྨྲ་བས་ཀུན་དུ་སྤྱོད་པ་ན་གསོད་པར་སེམས་ན་མི་རྣམས་ལྟ་སྨོས་ཀྱང་ཅི་དགོས། དེ་ལྟ་བས་ན་དགེ་སློང་གིས་དགེ་སློང་ལ་མིའི་སྐྱོན་ནས་སྨྲ་བས་ཀུན་ཏུ་སྤྱོད་པར་མི་བྱའོ། །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་ཁྱིམ་བདག་ཤིང་རྟ་སྤྱོད་པ་ཞིག་འདུག་པ་དེ་ལ་བ་དགའ་བྱེད་དང་ས་རི་ཞེས་བྱ་བ་གཉིས་ཤིག་ཡོད་པ་དེ་གཉིས་ལས་དཔྱིད་ཀྱི་ཟླ་བ་ལ་བེའུ་ཁྲ་བོ་དང ། ཉེ་བཀྲ་གཉིས་ཤིག་འབྲངས་སོ། །དེ་ནས་དགའ་བྱེད་ཀྱི་བེའུ་ནི་རུ་འདེལ་ཞིག་ཡིན་ལ། ས་རིའི་བེའུ་ནི་ཁུ་ཡུ་ཞིག་ཡིན་ནས་དེས་གཅིག་གི་མིང་ནི་དགའ
6.230b
བྱེད་རུ་འདེལ་ཞེས་བྱ་བར་བཏགས། གཅིག་གི་མིང་ནི་ས་རི་ཁུ་ཡུ་ཞེས་བྱ་བར་བཏགས་ཏེ། དེ་གཉིས་དུས་གཞན་ན་གླང་ཆེན་པོ་གཉིས་སུ་གྱུར་ཏོ། །དུས་གཞན་ཞིག་ན་ཤིང་རྟ་སྤྱོད་པ་དག་ཆང་གྲལ་འཚོགས་ཏེ་གཏམ་ཟེར་བ་ན་ཤེས་ལྡན་དག་བདག་ཅག་ལས་སུའི་གླང་དག་བཟང་ཞེས་སྨྲས་པ་དང ། དེ་ན་གཅིག་ན་རེ་ཁོ་བོའི་བཟང་ངོ་ཞེས་ཟེར་རོ། །ཡང་གཞན་ཞིག་ན་རེ་ཁོ་བོའི་བཟང་ངོ་ཞེས་ཟེར་རོ། །ཤིང་རྟ་སྤྱོད་པ་དེ་ན་རེ་ཁོ་བོའི་བཟང་ངོ་ཞེས་ཟེར་རོ། །དེ་དག་གིས་སྨྲས་པ། ཇི་ལྟར་ཤེས། དེས་སྨྲས་པ། ལམ་དམའ་བ་ནས་ཤིང་རྟར་ཁལ་འདི་ཙམ་བཞག་སྟེ་ཀཱར་ཥཱ་པ་ཎ་ལྔ་བརྒྱ་སྐུགས་སུ་བཙུགས་ལ་གླང་གཉིས་བདའ་བར་བྱའོ། །དེ་དག་གིས་ལམ་དམའ་བ་ནས་ཤིང་རྟར་ཁལ་དེ་ཙམ་བཞག་སྟེ་ཀཱར་ཥཱ་པ་ཎ་ལྔ་བརྒྱ་སྐུགས་སུ་བཙུགས་ནས་གླང་དེ་གཉིས་དེང་ཏུ་བཅུག་གོ། །ཤིང་རྟ་སྤྱོད་པ་དེས་དགའ་བྱེད་ཏུ་འདེལ་སོང་ཤིག་།ས་རི་ཁུ་ཡུ་སོང་ཤིག་ཅེས་བདའ་བར་བརྩམས་པ་དང ། གླང་དེ་གཉིས་མི་འགུལ་བར་འཁོད་ནས་དེས་གླང་དེ་གཉིས་ལ་ཁག་པས་བཙག་པར་བརྩམས་པ་དང ། ཤིང་རྟ་སྤྱོད་པ་གཞན་དག་གིས་སྨྲས་པ། ཁྱོད་ཕ་མ་གྱིས་བ་ལང་མ་གསོད་པར་གླང་འདི་གཉིས་ཐོང་ལ་སྐུགས་འཇོལ་ཅིག་ཅེས་དེ་དག་གིས་དེ་ཀཱར་ཥཱ་པ་ཎ་ལྔ་བརྒྱ་འཇལ་ཏུ་བཅུག་གོ། །ཤིང་རྟ་སྤྱོད་པ་དེས་གླང་དེ་གཉིས་ལ་སྤྱོས་ཏེ་ལྕག་མང་པོས་གཞུས་ནས་ཉི་མ་ལ་ཤིང་སྐམ་ལ་བཏགས་ཏེ་གཞག་གོ། །ཆོས་ཉིད་ཀྱིས་ན་འཇིག་རྟེན་གནས་པ་ཆགས་ནས་རིང་པོ་མ་ལོན་པའི་ཚེ་ན་དུད་འགྲོ་དག་ཀྱང་མིའི་སྐད་སྨྲ་ཤེས་པས་དེ་གཉིས་ཀྱིས་སྨྲས་པ། ཁྱོད་བདག་ཅག་གི་ཕ་མ་དང་འདྲ་བར་འདུག་འདུག་ན་བདག་ཅག་གིས་ཁྱོད་ལ་ཉེས་པ་བྱས་སམ། ཅི་ན་ཁྱོད་ཀྱིས་ད་བདག་ཅག་ལྕག་མང་པོས་གཞུས་ཏེ་ཉི་མ་ལ་ཤིང་སྐམ་ལ་བཏགས་ཏེ་འཇོག་པར་བྱེད་དེས་སྨྲས་པ། ཁྱོད་གཉིས་ཀྱིས་ནུས་བཞིན་དུ་སྒྱུ་བྱས་ཏེ་ཁོ་བོ་ཀཱར་ཥཱ་པ་ཎ་ལྔ་བརྒྱའི་སྐུགས་འཇལ་དུ་བཅུག་གོ། །དེ་གཉིས་ཀྱིས་སྨྲས་པ།
6.231a
ཁྱོད་རང་གི་ལྕེས་སྐུགས་འཇལ་དུ་བཅུག་གོ། །ཇི་ལྟར་གྱུར། བདག་ཅག་གཉིས་ཀྱི་གཅིག་གི་མིང་ནི་དགའ་བྱེད་ཅེས་བྱ། གཅིག་གི་མིང་ནི་ས་རི་ཞེས་བྱ་ན། ཁྱོད་ཅིའི་ཕྱིར་ཁོ་བོ་ཅག་གཉིས་ལ་རུ་འདེལ་དང ། ཁུ་ཡུ་ཞེས་མིང་མི་སྙན་པར་བརྗོད་པར་བྱེད། དེ་ལྟ་མོད་ཀྱི་ད་ལམ་ཆེས་དམའ་བ་ནས་ཤིང་རྟར་ཁལ་དེའི་ཉིས་གྱུར་ཞོག་སྟེ་ཀཱར་ཥཱ་པ་ཎ་དེའི་ཉིས་གྱུར་སྐུགས་སུ་ཚུགས་ལ་ཁོ་བོ་ཅག་གཉིས་དོས་ཤིག་།ཅི་ཁྱེད་གཉིས་ཡང་ཁོ་བོ་སྐུགས་འཇལ་དུ་གཞུག་པར་འདོད་དམ། བདག་ཅག་གཉིས་ལ་མིང་མི་སྙན་པར་མ་བརྗོད་ཅིག་དང་ཁྱོད་སྐུགས་ནོད་དུ་གཞུག་གོ། །དུས་གཞན་ཞིག་ན་ཤིང་རྟ་སྤྱོད་པ་དེ་དག་ཡང་ཆང་གྲལ་དུ་ཚོགས་ཏེ་གཏམ་ཟེར་བ་ན་ཤེས་ལྡན་དག་བདག་ཅག་ལས་སུའི་གླང་དག་བཟང་ཞེས་སྨྲས་པ་དང ། དེ་ན་གཅིག་ན་རེ་ཁོ་བོའི་བཟང་ངོ་ཞེས་ཟེར་རོ། །ཡང་གཞན་ཞིག་ན་རེ་ཁོ་བོའི་བཟང་ངོ་ཞེས་ཟེར་རོ། །ཤིང་རྟ་སྤྱོད་པ་དེ་ན་རེ་ཡང་ཁོ་བོའི་བཟང་ངོ་ཞེས་ཟེར་རོ། །དེ་དག་གིས་སྨྲས་པ། ཀྱེ་ནང་རྗེ་ཁྱོད་ཡང་བདག་ཉིད་སྐུགས་འཇལ་དུ་གཞུག་པར་འདོད་དམ། དེས་སྨྲས་པ། ཁྱེད་ཅག་ལ་ཅི་གནོད་ད་ལམ་ཆེས་དམའ་བ་ནས་ཤིང་རྟར་ཁལ་དེའི་ཉིས་གྱུར་བཞག་སྟེ། ཀཱར་ཥཱ་པ་ཎ་སྟོང་སྐུགས་སུ་བཙུག་ལ་གླང་དག་བདའ་བར་བྱའོ། །དེ་དག་གིས་ལམ་ཆེས་དམའ་བ་ནས་ཤིང་རྟར་ཁལ་དེའི་ཉིས་གྱུར་བཞག་སྟེ། ཀཱར་ཥཱ་པ་ཎ་སྟོང་སྐུགས་སུ་བཙུགས་ནས་གླང་དེ་གཉིས་དེད་དུ་བཅུག་གོ། །ཤིང་རྟ་སྤྱོད་པ་དེས་དགའ་བྱེད་སོང་ཤིག་།ས་རི་སོང་ཤིག་ཅེས་བདའ་བར་བརྩམས་པ་དང ། དེ་གཉིས་ཀྱིས་ཁལ་དེ་མྱུར་བ་མྱུར་བ་ཁོ་ནར་ཐང་ལ་བསྐྱལ་ཏེ་ཤིང་རྟ་སྤྱོད་པ་དེས་སྐུགས་ཀཱར་ཤཱ་པ་ཎ་སྟོང་ཐོབ་པ་དང ། ལྷས་ཚིགས་སུ་བཅད་པ་དག་སྨྲས་པ། གང་ཚེ་ཁལ་ནི་ཆེས་ལྕི་ཞིང ། །གང་ཚེ་ལམ་ཡང་ཆེས་དམའ་བ། །དེ་ཚེ་དེ་གཉིས་ཁལ་ཁྱེར་ཞིང ། །དེ་ཚེ་ཤིང་རྟ་འདྲེན་པར་བྱེད། །ཡིད་དུ་འོང་བ་བརྗོད་བྱས་ན། །ཤིན་དུ་ལྕི་བའི་ཁལ་ཁྱེར་ཞིང ། །དེ་ཡང་རྙེད་དང་ལྡན་གྱུར་ལ། །དེ་གཉིས་ཀྱང
6.231b
ནི་ཡིད་དགར་གྱུར། །དེ་བས་ཡིད་འོང་རྗོད་བྱ་ཞིང ། །ཡིད་དུ་མི་འོང་ནམ་ཡང་མིན། །ཡིད་དུ་འོང་བ་རྗོད་བྱེད་ན། །དགེ་བར་འགྱུར་ཞིང་སྡིག་མེད་ཡིན། །དགེ་སློང་དག་རེ་ཤིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་མིས་སྐྱོན་ནས་སྨྲ་བས་ཀུན་དུ་སྤྱད་པ་ན་བྱམས་པའི་རྒྱུན་གཅོད་པར་བྱེད་ན་མི་རྣམས་ལྟ་སྨོས་ཀྱང་ཅི་དགོས། དེ་ལྟ་བས་ན་དགེ་སློང་གིས་དགེ་སློང་ལ་མིའི་སྐྱོན་ནས་སྨྲས་པས་ཀུན་དུ་སྤྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན། ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མིའི་སྐྱོན་ནས་སྨྲ་ན་ལྟུང་བྱེད་དོ། །མིའི་སྐྱོན་ནས་སྨྲ་ན་ཞེས་བྱ་བ་ནི་མིའི་སྐྱོན་ནས་སྨྲ་བའི་བསམས་པས་ངག་དང་ཚིག་དང ། ཐ་སྙད་དང་སྐད་དང་རྗོད་པ་དང ། ངེས་པའི་ཚིག་དང་ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་སྨྲ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་དུད་འགྲོ་དང་ཡི་དགས་ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚེད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་བར་སྡོམ་ལ། རིགས་དང་བཟོ་དང་ལས་དང་ནི། །རྟགས་ནང་ལྟུང་བ་སྡེ་ལྔ་དང ། །ཉེ་བའི་ཉོན་མོངས་རྣམས་དང་ནི། །སྤྱོ་བར་བྱེད་པ་ཐ་མ་ཡིན། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བྲམ་ཟེ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲམ་ཟེ་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང
6.232a
སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྒྱལ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྒྱལ་རིགས་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྗེའུ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྗེའུ་རིགས་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དམངས་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་དམངས་རིགས་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས། ཐ་ག་པ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐ་ག་པ་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཁབ་རིས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁབ་རིས་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང ། དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བཟང་མཁན་ལས་རབ་ཏུ་བྱུང
6.232b
བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བཟང་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ལྕགས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ལྕགས་མགར་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྡུངས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྡུངས་མགར་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཀོ་ལྤགས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཀོ་ལྤགས་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྫ་མཁན་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྫ་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་འདྲེག་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་འདྲེག་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཤིང
6.233a
མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཤིང་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲ་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་སྨྱིག་མ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་སྨྱིག་མ་མཁན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བྲན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲན་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བྲམ་ཟེ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲམ་ཟེ་ལས་རབ་ཏུ་བྱུང་བ་ཡིན་གྱིས་ཚེ་དང་ལྡན་པས་རང་གི་བཟོ་འདི་ལྟ་སྟེ། བྲམ་ཟེའི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ཀུན་ཏུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་བླང་བ་དང ། ས་བླང་བ་དང་ལག་སྟངས་དང ། ཐོར་ཚུགས་དང ། རབ་བསྔགས་བྱ་བ་དང ། ཀྱེ་ཞེས་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུག་པ་དང ། ཀློག་པ་དང ། ཀློག་ཏུ་འཇུག་པ་དང ། སྦྱིན་པ་དང ། ལེན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྒྱལ
6.233b
རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྒྱལ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། གླང་པོ་ཆེའི་གཉར་བཞོན་པ་དང ། རྟ་ལ་བཞོན་པ་དང ། ཤིང་རྟའི་ཐབས་དང ། རལ་གྲིའི་ཐབས་དང ། འཕོང་དང་ཕྱིར་བསྣུར་བ་དང ། མདུན་དུ་བསྣུར་བ་དང ། ལྕགས་ཀྱུས་སྒྱུར་ཐབས་དང ། ཞགས་པ་གདབ་པ་དང ། མདའ་བོ་ཆེ་འཕེན་ཐབས་དང ། འཛིན་སྟངས་དང་གོམ་སྟངས་དང ། ཐོར་ཚུགས་དང ། གཅད་པ་དང་དྲལ་བ་དང་དབུག་པ་དང ། རྒྱང་ནས་ཕོག་པ་དང ། སྒྲ་གྲགས་པར་ཕོག་པ་དང ། གནད་དུ་ཕོག་པ་དང ། མི་འཆོར་བར་ཕོག་པ་དང ། ཚབས་ཆེ་བ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྗེའུ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྗེའུ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པ་རང་གི་བཟོ་འདི་ལྟ་སྟེ། ཞིང་རྨོ་བ་དང་བ་ལང་བསྲུང་བ་དང ། ཚོང་བྱ་བ་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དམངས་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་དམངས་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་སྟ་སྟེ་ཟོར་བ་དང ། །ཕྲག་རྡང་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཐ་ག་པ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ
6.234a
དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་གལ་ཡོད། ཚེ་དང་ལྡན་པ་ནི་ཐ་ག་པ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་སླ་སྟེ། དར་དག་དང ། རས་ཡུག་ཆེན་དག་དང ། བེའུ་རས་དག་དང ། དར་ལ་དག་དང ། དུ་གུ་ལ་དག་དང ། ཀོ་ཏམ་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཁབ་རིས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁབ་རིས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། བེའུ་རས་དང་རས་ཡུག་ཆེན་དང ། པར་ཐང་དང ། ཁབ་རིས་དང ། ཁྲེའུ་ཚེ་དང་གོར་བུ་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བཟང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བཟང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཞཝ་དང་ཞཝ་སྒྲེ་བོ་དང ། བྱིས་པའི་གོས་དག་དང ། ཤིང་ང་དཔུང་ཆད་དག་དང ། དོར་མང་དག་དང་དོར་ཐུང་དག་དང ། བཟང་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ལྕགས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ལྕགས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ་ལྷུང་བཟེད་དང་ལྷུང་བཟེད་ཆུང་ངུ་དང ། ཁབ་དང་གྲི་དག་དང ། སེན་གྲི་དག་དང ། ལྕགས་མགར་གྱི་བཟོ་གཞན་གང་ཡིན་པ་དེ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །
6.234b
དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྡུངས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྡུངས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཁར་གཞོང་དག་དང ། གཞོང་བུ་དག་དང ། ཆ་ལང་དག་དང ། སྐོམ་ཕོར་དག་དང ། རིལ་བ་དག་དང ། རྡུངས་མགར་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཀོ་ལྤགས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཀོ་ལྤགས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ལྷམ་སྒྲོག་གུ་ཅན་དག་དང ། ལྷམ་ཡུ་ཆད་དག་དང ། མཆིལ་ལྷམ་དག་དང ། སྒ་དག་དང ། དོང་པ་དག་དང ། ཀོ་ལྤགས་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྫ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་རྫ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། རྫ་མ་དག་དང ། བུམ་པ་དག་དང་རིལ་བ་དག་དང ། རྫེའུ་དག་དང ། ཁམ་ཕོར་དག་དང་རྫ་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་འབྲེག་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་འབྲེག་མཁན་ལས་རབ་ཏུ་བྱུང་བ་ཡིན་གྱིས། །ཚེ་དང་ལྡན་པས་རང་གི་བཟོ་འདི་ལྟ་སྟེ། སྐྲ་འབྲེག་པ་དང ། སེན་མོ་འབྲེག
6.235a
པ་དང ། ཁ་སྤུ་འབྲེག་པ་དང ། བྱིན་པ་བཅོས་པ་དང ། འབྲེག་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་འགྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཤིང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཤིང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཁྲི་དག་དང ། ཁྲིའུ་དག་དང ། ན་དག་དང ། ན་ཁྲིའུ་དག་དང ། སྒོ་གླེགས་དག་དང ། ཤིང་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་སྨྱིག་མ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་སྨྱིག་མ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། སྐོན་བུ་དག་དང ། སྤྲོག་མ་དག་དང ། གདུགས་དག་དང ། བསིལ་ཡབ་དག་དང ། དུད་གཟེབ་དག་དང ། སྨྱིག་མ་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བྲན་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། སྐུ་མཉེས་དང ། དྲིལ་ཕྱི་དང ། ཁྲུས་དང ། ཕོ་ཉར་འགྲོ་བ་དང ། མངག་པ་དང ། བྲན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ།། ་་་་་་་་་།།འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་དགུ་པ། དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བྲམ་ཟེ་ལས
6.235b
རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲམ་ཟེ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། བྲམ་ཟེའི་སྤྱོད་ཚུལ་དང ། སྤྱོད་པ་དང་གཙང་སྦྲ་དང ། ཀུན་ཏུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་བླང་བ་དང ། ས་བླངས་པ་དང ། ལག་སྟངས་དང ། ཐོར་ཚུགས་དང ། རབ་བསྔགས་བྱ་བ་དང ། ཀྱེ་ཞེས་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུད་པ་དང ། ཀློག་པ་དང ། ཀློག་ཏུ་འཇུད་པ་དང ། སྦྱིན་པ་དང ། ལེན་པ་དང ། བྲམ་ཟེའི་ལས་གཞན་གང་ཡིན་པ་དག་ཀྱང་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྒྱལ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྒྱལ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། གླང་པོ་ཆེའི་གཉར་བཞོན་པ་དང ། རྟ་ལ་བཞོན་པ་དང ། ཤིང་རྟའི་ཐབས་དང ། རལ་གྲིའི་ཐབས་དང ། འཕོང་དང ། ཕྱིར་བསྣུར་བ་དང ། མདུན་དུ་བསྣུར་བ་དང ། ལྕགས་ཀྱུས་སྒྱུར་ཐབས་དང ། ཞགས་པ་གདབ་པ་དང ། མདའ་བོ་ཆེ་འཕེན་ཐབས་དང ། འཛིན་སྟངས་དང ། གོམ་སྟངས་དང ། ཐོར་ཚུགས་དང ། གཅད་པ་དང ། དྲལ་བ་དང ། དབུག་པ་དང ། རྒྱང་ནས་ཕོག་པ་དང ། སྒྲ་གྲག་པར་ཕོག་པ་དང ། གནད་དུ་ཕོག་པ་དང ། མི་འཆོར་བར་ཕོག་པ་དང ། ཚབས་ཆེ་བ་དང ། རྒྱལ་རིགས་ཀྱི་ལས་གཞན་གང་ཡིན་པ་དག་ཀྱང་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྗེའུ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ
6.236a
དང་ལྡན་པ་ནི་རྗེའུ་རིགས་ལས་རབ་ཏུ་བྱུང་བ་ཡིན་གྱིས། །ཚེ་དང་ལྡན་པས་རང་གི་ལས་འདི་ལྟ་སྟེ། ཞིང་རྨོ་བ་དང ། བ་ལང་བསྲུང་བ་དང ། ཚོང་བྱ་བ་དང ། རྗེའུ་རིགས་ཀྱི་ལས་གཞན་གང་ཡིན་པ་དག་ཀྱང་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་མིའི་སྐྱོན་ནས་སྨྲ་བའི་བསམ་པས་དམངས་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་དམངས་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། ཟོར་བ་དང ། ཕྲག་རྡང་དང་དམངས་རིགས་ཀྱི་ལས་གཞན་གང་ཡིན་པ་དག་ཀྱང་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཐ་ག་པ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐ་ག་པ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། ཐགས་ཟངས་དང ། སོན་པ་དང ། དྲུ་བུ་དང ། སྣས་ལས་སོགས་པས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཁབ་རིས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁབ་རིས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ་རྒྱང་ཤིང ། སྐུད་པ་དང་ཚོན་དང ། ཕུར་དང ། སོ་མངས་ཀྱིས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བཟང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བཟང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། ཁབ་དང །
6.236b
སྐུད་པ་དང ། གྲི་དང་ཆན་པ་དང ། ལྕུག་མོས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ལྕགས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ལྕགས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ་སྦུད་པ་དང ། སྦུད་རུ་དང ། ཏི་ཙ་དང་སྐམ་པ་དང ། ཐོ་བས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྡུངས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྡུངས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་ནི་འདི་ལྟ་སྟེ། སྦུད་པ་དང ། སྦུད་རུ་དང ། ཏི་ཙ་དང ། སྐམ་པ་དང ། ཐོ་བས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཀོ་ལྤགས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད་བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཀོ་ལྤགས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། རྒྱུས་པ་དང ། རྒྱེའུ་དང ། འབྲེང་བུ་དང ། དྲ་གྲི་དང ། སྨྱུང་དང་སྨྱུང་བུས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་རྫ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད་བྲམ་ཟེའི་ཚུལ་ག་ལ་ཡོད་ཚེ་དང་ལྡན་པ་ནི་རྫ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ་འཁོར་ལོ་དང ། དབྱིག་གུ་དང ། ཐ་གུ་དང ། འཁོར་ལོའི་རྟེན་མ་དང ། གསལ་གྱིས་རང་གི་ལས་བྱའོ་ཞེས་སྨྲས་ན་དགེ་སློང་སྤ
6.237a
གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་འབྲེག་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་འབྲེག་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྤུ་གྲི་དང ། ཆན་པ་དང ། བདར་དང ། སྨང་ཙེར་དང ། སེན་གྲིས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་ཤིང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཤིང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ་སྟེ་འུ་དང ། སྟ་རེ་དང་གཟོང་དང ། སོག་ལེ་དང ། ཐོ་བས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་སྨྱིག་མ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་སྨྱིག་མ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྨྱིག་མ་དང་གྲི་དང ། ཚོན་དང ། སྨྱུག་ཐོ་དང ། ལྷང་ཚེར་གྱིས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་བྲན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། བསྐུ་མཉེ་དང་དྲིལ་ཕྱི་དང ། ཁྲུས་དང་ཕོ་ཉར་འགྲོ་བ་དང ། མངག་པས་རང་གི་ལས་བྱའོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དགེ་སློང་གི
6.237b
གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐེང་པོ་དང ། སྨད་འཆལ་དང ། ཞར་བ་དང ། ལག་སོར་རྡུམ་པོ་དང ། སྒུར་པོ་དང ། མིའུ་ཐུང་དང ། ལྦ་བ་ཅན་དང ། གླེན་པ་དང ། ལྐུག་པ་དང ། གྲུམ་པོ་དང ། འོན་པ་དང ། རྟེན་འཕྱེ་དང ། རྐང་འབམ་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་མཛེ་ཅན་དང ། འབྲུམ་བུ་ཕྲ་མོ་དང ། ངལ་སྐྱེན་པ་དང ། ཤུ་བ་ཅན་དང ། གཡན་པ་ཅན་དང ། ཁྱི་རྔོ་ཅན་དང ། གློག་པ་ཅན་དང ། རྐང་ཤུ་ཅན་དང ། སྐྱིགས་བུ་ཅན་དང ། སྐྱུག་བྲོ་བ་དང ། ཁོང་སྐེམ་ཅན་དང ། རིམས་ཅན་དང ། རིམས་དྲག་པོ་ཅན་དང ། ལུད་པ་ཅན་དང ། དབུགས་མི་བདེ་བ་ཅན་དང ། སྐེམ་ནད་དང ། བརྗེད་བྱེད་ཅན་དང ། བཀྲེས་ངབ་ཅན་དང ། སྐྱ་རྦབ་ཅན་དང ། ཚིལ་པོ་ཆེ་དང ། སྐྲན་ཅན་དང ། ཁྲག་ནད་ཅན་དང ། མཁྲིས་ནད་ཅན་དང ། མཚན་བར་རྡོལ་བ་ལས་རབ་ཏུ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང ། སོ་སོར་བཤགས་པར་བྱ་བ་དང ། ཉེས་བྱས་ཀྱི་ལྟུང་བ་བྱུང་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁྲོ་བ་དང ། ཁོན་དུ་འཛིན་པ་དང ། འཆབ་པ་དང ། དངན་དུས་ཅན་དང ། ཕྲག་དོག་ཅན་དང ། སེར་སྣ་ཅན་དང ། གཡོན་ཅན་དང ། སྒྱུ་ཅན་དང་ངོ་ཚ་མེད་པ་དང ། ཁྲེལ་མེད་པ་དང ། སྡིག་པ་འདོད་པ་དང །
6.238a
ལོག་པར་ལྟ་བ་ཡིན་ནོ་ཞེས་སྨྲས་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་མིའི་སྐྱོན་ནས་སྨྲ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རོ་ལྟ་བུ་ཡིན་ནོ་ཞེས་བྱ་བ་ལ་སོགས་པའི་སྤྱོ་བ་དག་གིས་སྤྱོ་བར་བྱེད་ན་དགེ་སློང་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །གལ་ཏེ་མིང་དེ་ལྟ་བུ་མང་པོ་དག་ཡོད་པར་གྱུར་ན་དེ་ལ་ལན་གདབ་པར་སྨྲ་བ་སངས་རྒྱས་སྐྱོང་གང་ཡིན་ཞེས་ཟེར་བ་ལ་བྲམ་ཟེ་ལས་རབ་ཏུ་བྱུང་བ་གང་ཡིན་པ་དེའོ་ཞེས་བྱ་བ་ལ་སོགས་པ་སྔ་མ་ལྟ་བུ་དག་བརྗོད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མིའི་སྐྱོན་ནས་སྨྲ་བའི་ལྟུང་བྱེད་དེ་གཉིས་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་དགེ་སློང་རྣམས་ལ་ཕྲ་མས་ཀུན་དུ་སྤྱོད་པར་བྱེད་དེ། ཕྲ་མས་ཀུན་ཏུ་སྤྱོད་པ་ན་དགེ་སློང་དག་སྤ་གོང་བ་དང ། གཟེང་དམས་པ་དང ། ཞུམ་པར་གྱུར་ནས་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་ཀྱང་གཏོང་བར་བྱེད། །འདི་ལྟར་དུས་ཡུན་རིང་པོ་ནས་ཉེ་བར་བསགས་པ་ཆོས་དང་ལྡན་པའི་གཅུགས་པའི་རྒྱུན་ཡང་གཅོད་པར་བྱེད་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ལ་ཕྲ་མས་ཀུན་དུ་སྤྱོད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ
6.238b
ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་རྣམས་ལ་ཕྲ་མས་ཀུན་དུ་སྤྱོད་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དགེ་སློང་དག་སྔོན་བྱུང་བ་འདས་པའི་དུས་ན་ནགས་ཚལ་ཞིག་ན་སེང་གེ་མོ་སྦྲུམ་མ་ཞིག་འདུག་སྟེ། དེ་ལ་སེང་གེ་མོ་རྣམས་ཀྱི་ཀུན་ཏུ་སྤྱོད་པ་ནི་གང་གི་ཚེ་འབྲང་བའི་དུས་ལ་བབ་པ་དེའི་ཚེ་ན་ཤའི་ཚོགས་བྱས་ཏེ་འབྲང་བར་བྱེད་པས་སེང་གེ་མོ་དེ་བ་ལང་གི་ཚོགས་ཆེན་པོ་ཞིག་གི་ཕྱི་བཞིན་དུ་རྗེས་སུ་སོང་བ་དང ། བ་འབྲངས་ནས་རིང་པོ་མ་ལོན་པ་བེའུ་རྗེས་སུ་སྐྱོང་བར་བྱེད་པ་ཞིག་ཁྱུའི་ཕྱི་བཞིན་འབྲང་ཞིང་འགྲོ་བ་དེ་སེང་གེ་མོ་དེས་བསད་ནས་ཤ་ཁྱེར་ཏེ་རང་གི་ཚང་དུ་སོང་ངོ ། །བེའུ་དེ་ཡང་མའི་ནུ་མ་འཐུང་འདོད་པས་དེའི་ཕྱི་བཞིན་དུ་སོང་བ་དང་སེང་གེ་མོས་བསམ་པ། བེའུ་འདི་ཡང་གསད་པར་བྱའོ་སྙམ་ནས་ཡང་བསམ་པ། གལ་ཏེ་བདག་གི་བུ་འབྲངས་པར་གྱུར་ན་འདིའི་གྲོགས་སུ་འགྱུར་གྱིས་མི་གསད་དོ་སྙམ་མོ། །སེང་གེ་མོ་དེ་འབྲངས་ནས་དེ་ལས་ཕྲུག་གུ་ཕོ་ཞིག་བྱུང་བ་དང ། སེང་གེ་མོ་དེས་རང་གི་ཕྲུག་གུ་དང ། བེའུ་དེ་གཉིས་ཀ་ནུ་མ་བསྣུན་པར་བརྩམས་ནས་ཇི་ཙམ་དུས་གཞན་ཞིག་ན་དེ་གཉིས་ཀ་ཆེན་པོར་གྱུར་ཏེ། དུས་གཞན་ཞིག་ན་སེང་གེ་མོ་དེ་ན་བར་གྱུར་ནས་དེ་འཆི་བའི་དུས་ཀྱི་ཚེ་སྨྲས་པ། བུ་གཉིས་ནུ་མ་གཅིག་ལ་ནུ་ནུ་བའི་སྤུན་ཡིན་ལ། ཕྲ་མ་ཅན་སྣོད་འབྱེད་པ་དག་གིས་འཇིག་རྟེན་གང་བར་འཁོད་ཀྱིས། ཁོ་མོ་འདས་པའི་འོག་ཏུ་ཁྱེད་གཉིས་ཀྱིས་འགའ་ཡང་མཉན་པར་མི་བྱའོ་ཞེས་སྨྲས་ནས། །བསགས་པ་ཀུན་གྱི་མཐའ་ཟད་ཅིང ། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །སེང་གེ་དེ་རི་དགས་དམ་པ་དམ་པ་དག་བསད་ནས་ཤ་དམ་པ་དམ་པ་དག་ཟ་ཞིང་ཁྲག་མང་པོ་དག་འཐུང་བས་ཆེན་པོར་གྱུར་ཏོ། །ཁྱུ་མཆོག་དེ་ཡང་སེང་གེས་བསྲུང་བའི་རྩཝ་བཟང་པོ་དག་ཟ
6.239a
ཞིང་ཆུ་གཙང་མ་དག་འཐུང་བས་ཆེན་པོར་གྱུར་ཏོ། །རི་དགས་ཀྱི་རྒྱལ་པོ་སེང་གེ་དེ་ལ་ཝ་རྒན་པོ་རབ་ཏུ་བརྐམ་པ་ལྷག་མ་ཟ་བ་ཞིག་འཁོར་ཞིང་ཕྱི་བཞིན་ཕྱི་བཞིན་རྗེས་སུ་འབྲང་ནས་སེང་གེ་དེས་རི་དགས་དམ་པ་དམ་པ་དག་བསད་ནས་ཤ་དམ་པ་དག་ཟོས་ཤིང་ཁྲག་དམ་པ་དག་འཐུངས་བག་ཚ་བ་མེད་པར་དེ་ན་འདུག་པས་ཕྱོགས་དེར་གཅན་གཟན་ཕྲ་མོ་གཞན་དག་གིས་ཉེ་མི་ཕོད་པས་ཝ་རྒན་པོ་དེ་སེང་གེ་དེས་རི་དགས་དམ་པ་དམ་པ་དག་བསད་ནས་ཤ་དམ་པ་དག་ཟོས་ཤིང་ཁྲག་དམ་པ་འཐུངས་པའི་ཤའི་ལྷག་མ་དང་ཁྲག་གི་ལྷག་མ་དག་ཟ་ཞིང་འཐུང་བས་ལྤགས་པ་དང ། ཤ་དང ། ཁྲག་རྒྱས་པར་གྱུར་ཏོ། །ཇི་ཙམ་དུས་གཞན་ཞིག་ན་སེང་གེ་དེ་རི་དགས་དམ་པ་དམ་པ་དག་བསད་ནས་ཤ་དམ་པ་དག་ཟོས་ཤིང་ཁྲག་དམ་པ་དག་འཐུངས་ནས་མྱུར་བ་ཁོ་ནར་ཚང་དུ་སོང་སྟེ། ཁྱུ་མཆོག་དེ་དང་ལྷན་ཅིག་རྩེ་ཞིང་འདུག་པར་བྱེད་ནས་ཤའི་ལྷག་མ་དེ་དག་ཀྱང་གཅན་གཟན་ཕྲ་མོ་གཞན་དག་གིས་ཟོས་ནས་ཝ་རྒན་པོ་དེས་བསམས་པ། སེང་གེ་འདི་གང་དུ་འགྲོ་བ་ཇི་བལྟ་བར་བྱའོ་སྙམ་ནས། དེ་དེའི་ཕྱི་བཞིན་ཕྱི་བཞིན་དུ་སོང་བ་དང ། ཇི་ཙམ་ན་ཁྱུ་མཆོག་དང་ལྷན་ཅིག་རྩེ་ཞིང་འདུག་པ་མཐོང་ནས་དེས་བསམས་པ། ཁྱུ་མཆོག་འདི་བདག་གི་ལྟོའི་དགྲར་གྱུར་བ་ཡིན་གྱིས། །བདག་གིས་འདི་གཉིས་དབྱེ་བར་བྱའོ་སྙམ་ནས་ཝ་རྒན་པོ་དེ་ཁྱུ་མཆོག་དེའི་མདུན་དུ་རྣ་བ་ཕབ་སྟེ་འདུག་པ་དང ། ཁྱུ་མཆོག་གིས་སྨྲས་པ། ཞང་པོ་རླུང་ཚ་བ་དག་མི་ལྡང་ངམ། ཝས་སྨྲས་པ། ཚ་བོ་རླུང་རབ་ཏུ་འབར་བ་དག་ལྡང་ངོ ། །ཅི་ཉེས། སེང་གེ་འདི་ན་རེ་ཁོ་བོའི་ཤ་ཚོགས་རྒྱུ་ཁྱུ་མཆོག་དེ་གར་སོང ། གང་གི་ཚེ་ཁོ་བོས་ཤ་གཞན་མ་རྙེད་པ་དེའི་ཚེ་ན་ཁོ་བོས་ཁྱུ་མཆོག་འདི་བཟའ་བར་བྱའོ་ཞེས་ཟེར་རོ། །ཁྱུ་མཆོག་གིས་སྨྲས་པ། ཞང་པོ་ཁོ་བོ་ཅག་གཉིས་ལ་མས་འཆི་ཀར་བུ་གཉིས་ཁྱེད་གཉིས་ནུ་མ་གཅིག་ལ་ནུ་ནུ་བའི་སྤུན་ཡིན་ལ་ཕྲ་མ་ཅན་སྣོད་འབྱེད་པ་དག་གིས་འཇིག་རྟེན་གང་བར་འཁོད་ཀྱི། ཁོ་མོ་འདས་པའི་འོག་ཏུ་ཁྱེད་གཉིས་ཀྱིས་འགའ་ཡང་མཉན་བར་མི་བྱའོ་ཞེས་ཁ་ཆེམས་བཞག་གིས་ཁྱོད་དེ་སྐད་མ་ཟེར་ཅིག་།ཝས་སྨྲས་པ། ཚ་བོ་ཁྱོད་ད་ཁོ་བོ་ཕན་པར་འདོད་པའི་ཚིག་མི་ཉན་ན་ཆུད་ཟོས་པར་འོང་ངོ ། །ཁྱུ་མཆོག་གིས་སྨྲས་པ། ཞང་པོ་གོ་རིམས་ཇི་ལྟར་འོང་བར་འགྱུར། ཝས་སྨྲས
6.239b
པ་ཚ་བོ་སེང་གེ་འདི་ཚང་ནས་བྱུང་ནས་བྱ་སྨྱངས་བྱེད་པར་འགྱུར་ལ། བྱ་སྨྱངས་བྱས་ནས་གླལ་བར་འགྱུར་ཞིང་གླལ་ནས་ཕྱོགས་བཞིར་རྣམ་པར་ལྟ་བར་འགྱུར། ཕྱོགས་བཞིར་རྣམ་པར་བལྟས་ནས་སེང་གེའི་སྐད་ཐང་གསུམ་ཕྱུང་སྟེ། ཁྱོད་ཀྱི་མདུན་དུ་འོང་བར་འགྱུར་བ་ན་ཁྱོད་ཀྱིས་བདག་འདིས་བསད་དོ་སྙམ་དུ་ཤེས་པར་གྱིས་ཤིག་།ཝ་དེ་དེའི་འོག་ཏུ་སེང་གེའི་མདུན་དུ་རྣ་བ་ཕབ་སྟེ་འདུག་པ་དང ། སེང་གེས་སྨྲས་པ། ཞང་པོ་རླུང་ཚ་བ་དག་མི་ལྡང་ངམ། ཝས་སྨྲས་པ། ཚ་བོ་རླུང་རབ་ཏུ་འབར་བ་དག་ལྡང་ངོ ། །ཅི་ཉེས། ཁྱུ་མཆོག་འདི་ན་རེ་ཁོ་བོའི་རྩའི་སེང་གེ་དེ་གར་སོང ། འདིའི་མས་ཁོ་བོའི་མ་བསད་ཀྱིས་འདིའི་ལྟོ་ངེས་པར་དྲལ་བར་བྱའོ་ཞེས་ཟེར་རོ། །སེང་གེས་སྨྲས་པ། ཞང་པོ་ཁོ་བོ་ཅག་གཉིས་ལ་མས་འཆི་ཀར་བུ་གཉིས་ཁྱེད་གཉིས་ནུ་མ་གཅིག་ལ་ནུ་ནུ་བའི་སྤུན་ཡིན་ལ། ཕྲ་མ་ཅན་སྣོད་འབྱེད་པ་དག་གིས་འཇིག་རྟེན་གང་བར་འཁོད་ཀྱིས། ཁོ་མོ་འདས་པའི་འོག་ཏུ་ཁྱོད་གཉིས་ཀྱིས་འགའ་ཡང་མཉན་པར་མི་བྱའོ་ཞེས་ཁ་ཆེམས་བཞག་གིས་ཁྱོད་དེ་སྐད་མ་ཟེར་ཅིག་།ཝས་སྨྲས་པ། ཚ་བོ་ཁྱོད་ད་ཁོ་བོ་ཕན་པར་འདོད་པའི་ཚིག་མི་ཉན་ན་ཆུད་ཟོས་པར་འོང་ངོ ། །སེང་གེས་སྨྲས་པ། ཞང་པོ་གོ་རིམས་ཇི་ལྟར་འོང་བར་འགྱུར། ཝས་སྨྲས་པ། ཚ་བོ་ཁྱུ་མཆོག་འདི་ལྷས་ནས་བྱུང་ནས་བྱ་སྨྱངས་བྱེད་པར་འགྱུར་ལ། བྱ་སྨྱངས་བྱས་ནས་འབུ་སྒྲ་འབྱིན་པར་འགྱུར་ཞིང་འབུ་སྒྲ་ཕྱུང་ནས་ཕུག་ཐརིག་བྱེད་པར་འགྱུར། ཕུག་ཐརིག་བྱས་ནས་རྔམ་པ་བྱས་ཏེ་ཁྱོད་ཀྱི་མདུན་དུ་འོང་བར་འགྱུར་ན། ཁྱོད་ཀྱིས་བདག་འདིས་བསད་དོ་སྙམ་དུ་ཤེས་པར་གྱིས་ཤིག་།དེ་གཉིས་རང་བཞིན་གྱིས་རྟག་ཏུ་དེ་ལྟ་བྱེད་མོད་ཀྱི་ལན་འགའ་ཡང་ཕན་ཚུན་མཚན་མར་མ་བཟུང་ངོ ། །དེ་ནས་དུས་གཞན་ཞིག་ན་རི་དགས་ཀྱི་རྒྱལ་པོ་སེང་གེ་དེ་ཚང་ནས་བྱུང་ནས་བྱ་སྨྱངས་བྱས་ཏེ་ཕྱོགས་བཞིར་རྣམ་པར་བལྟས་ཏེ་སེང་གེའི་སྐད་ཐང་གསུམ་ཕྱུང་ནས་ཁྱུ་མཆོག་གི་མདུན་དུ་སོང་ངོ ། །ཁྱུ་མཆོག་དེ་ཡང་ལྷས་ནས་བྱུང་ནས་བྱ་སྨྱངས་བྱས་ཏེ་འབུ་སྒྲ་ཕྱུང་ནས་ཕུག་ཐརིག་བྱས་ཏེ་རྔམ་པ་བྱས་ནས་སེང་གེའི་མདུན་དུ་སོང་ངོ ། །དེ་གཉིས་རང་བཞིན་གྱིས་རྟག་ཏུ་དེ་ལྟ་བྱེད་མོད་ཀྱི་ལན་འགའ་ཡང་མཚན་མར་མ་བཟུང
6.240a
སྟེ་གང་གི་ཚེ་རྒྱུད་ལ་དབྱེན་གྱི་ས་བོན་བཏབ་པ་དེའི་ཚེ་ན་མཚན་མར་བཟུང་བས། ཁྱུ་མཆོག་གིས་ཀྱང་བདག་འདིས་བསད་དོ་སྙམ་དུ་བསམས་ལ། སེང་གེས་ཀྱང་བདག་འདིས་བསད་དོ་སྙམ་དུ་བསམས་ནས། སེང་གེས་ཁྱུ་མཆོག་གི་བྲང་ལ་སྡེར་མོས་བཏབ་པ་དང ། ཁྱུ་མཆོག་གིས་ཀྱང་རཝས་སེང་གེའི་ལྟོ་དྲལ་ནས་དེ་གཉིས་ཀ་དུས་ལ་བབ་པ་དང ། ལྷས་ཚིགས་སུ་བཅད་པ་སྨྲས་པ། བཟང་པོ་དག་ལ་ལྟ་བའི་མིས། །སྐྱེ་བོ་ངན་པ་བསྟེན་མི་བྱ། །སེང་གེ་ཁྱུ་མཆོག་མཛའ་བ་ལ། །ཝ་ཡིས་ཐ་དད་ཕྱེ་ལ་ལྟོས། །དགེ་སློང་དག་རེ་ཤིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཕྲ་མས་ཀུན་དུ་སྤྱོད་པ་ན་གསོད་པར་སེམས་ན་མི་རྣམས་ལྟ་སྨོས་ཀྱང་ཅི་དགོས། དགེ་སློང་དག་དེ་ལྟ་བས་ན་དགེ་སློང་གིས་དགེ་སློང་ལ་ཕྲ་མས་ཀུན་དུ་སྤྱོད་པར་མི་བྱའོ། །དགེ་སློང་གིས་དགེ་སློང་ལ་ཕྲ་མས་ཀུན་དུ་སྤྱོད་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དག་སྔོན་བྱུང་བ་འདས་པའི་དུས་ན་ནགས་ཚལ་ཞིག་ན་སེང་གེ་མོ་ཕྲུག་གུ་དང་བཅས་པ་ཞིག་དང ། སྟག་མོ་ཕྲུག་གུ་དང་བཅས་པ་ཞིག་འདུག་སྟེ། སེང་གེ་མོ་སྤྱོད་ཡུལ་དུ་སོང་བ་དང ། དེའི་ཕྲུག་གུ་དེ་འཁྱམ་པ་ན་སྟག་མོའི་གན་དུ་སོང་ནས་སྟག་མོས་དེ་མཐོང་ནས་བསམས་པ་འདི་བསད་པར་བྱའོ་སྙམ་ནས། ཡང་བསམས་པ། འདི་བདག་གི་བུའི་ཆུང་པོ་གྲོགས་སུ་འགྱུར་གྱིས་མི་བསད་དོ་སྙམ་ནས་དེས་དེ་ནུ་མ་སྣུན་པར་བརྩམས་སོ། །སེང་གེ་མོ་དེས་ཀྱང་སྤྱོད་ཡུལ་བརྒྱུས་ཏེ་ཕྱིར་འོངས་པ་དང ། ཇི་ཙམ་ན་ཕྲུག་གུ་མི་སྣང་ནས་དེས་དེ་བཙལ་བར་བརྩམས་པ་དང ། དེས་ཕྲུག་གུ་སྟག་མོས་བསྣུན་པར་མཐོང་ངོ ། །སྟག་མོ་དེས་ཀྱང་སེང་གེ་མོ་དེ་མཐོང་ནས་སྐྲག་སྟེ་འབྲོས་པར་བརྩམས་པ་དང ། སེང་གེ་མོ་དེས་སྟག་མོ་ལ་སྨྲས་པ། ནུ་མོ་མ་འབྲོས་ཤིག་དང ། ལྷན་ཅིག་འཁོད་པར་བྱ་སྟེ། འདི་ལྟར་ཁོ་མོ་སྤྱོད་ཡུལ་དུ་སོང་བ་ན་ཁྱོད་ཀྱིས་ཁོ་མོའི་ཕྲུག་གུ་ལ་མཁོ་བ་བསྟབས་པས་གལ་ཏེ་ཁྱོད་སྤྱོད་ཡུལ་དུ་འགྲོ་བར་གྱུར་ན། ཁོ་མོས་ཀྱང་ཁྱོད་ཀྱི་ཕྲུག་གུ་ལ་མཁོ་བ་བསྟབས་པར་བྱའོ། །དེ་གཉིས་ལྷན་ཅིག་འཁོད་པར་བརྩམས
6.240b
ནས་དེ་གཉིས་ཀྱིས་སེང་གེའི་ཕྲུག་གུའི་མིང་ནི་མཆེ་བཟང་ཞེས་བྱ་བར་བཏགས། སྟག་ཕྲུག་གི་མིང་ནི་དཔུང་བཟང་ཞེས་བྱ་བར་བཏགས་ནས་དེ་གཉིས་དུས་གཞན་ཞིག་ཆེན་པོར་གྱུར་ཏོ། །དུས་གཞན་ཞིག་ན་སེང་གེ་མོ་དང ། སྟག་མོ་གཉིས་ན་བར་གྱུར་ནས་དེ་གཉིས་འཆི་བའི་དུས་ཀྱི་ཚེ་བུ་གཉིས་ལ་སྨྲས་པ། བུ་གཉིས་ཁྱེད་གཉིས་ནུ་མ་གཅིག་ལ་ནུ་ནུ་བའི་སྤུན་ཡིན་ལ་ཕྲ་མ་ཅན་སྣོད་འབྱེད་པ་དག་གིས་འཇིག་རྟེན་གང་བར་འཁོད་ཀྱིས། ཁོ་མོ་ཅག་གཉིས་འདས་པའི་འོག་ཏུ་ཁྱོད་གཉིས་ཀྱིས་འགའ་ཡང་མཉན་པར་མི་བྱའོ་ཞེས་སྨྲས་ནས། བསགས་པ་ཀུན་གྱི་མཐའ་ཟད་ཅིང ། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། ་་།གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །སེང་གེས་ནི་རི་དགས་དམ་པ་དམ་པ་དག་བསད་ནས་ཤ་དམ་པ་དག་ཟ་བར་བྱེད། ཁྲག་དམ་པ་དམ་པ་འཐུང་བར་བྱེད་ཅིང ། དེ་ཤ་དམ་པ་དག་ཟོས་ཤིང་ཁྲག་དམ་པ་དག་འཐུངས་ནས་མྱུར་བ་མྱུར་བ་ཁོ་ནར་ཚང་དུ་འགྲོ་བར་བྱེད་དོ། །སྟག་གིས་སྤྱོད་ཡུལ་དུ་སོང་ནས་ཚེགས་ཆེན་པོས་རི་དགས་དག་བསད་དེ། ཤ་དང་ཁྲག་ཟོས་ཤིང་འཐུངས་ནས་ཡུན་རིང་པོས་ཕྱིར་འོང་ངོ ། །དུས་གཞན་ཞིག་ན་སྟག་གིས་ལྷག་རོལ་དག་སྦས་ནས་དེས་དེ་ཟོས་ཏེ་མྱུར་དུ་ཕྱིར་འོངས་པ་དང ། སེང་གེས་སྟག་ལ་སྨྲས་པ། ཁྱོད་སྔོན་ཆད་ནི་ཡུན་རིང་ཞིག་གིས་ཕྱིར་འོངས་ན་དེང་མྱུར་དུ་ཕྱིར་འོངས་པ་འདི་ལ་རྒྱུ་ཅི་ཡོད། སྟག་གིས་སྨྲས་པ། ཁོ་བོས་ལྷག་རོལ་སྦས་པར་གྱུར་པ་དེ་ཟོས་ཏེ་ཕྱིར་འོངས་སོ། །སེང་གེས་སྨྲས་པ། ཁྱོད་ལྷག་རོལ་སྦེད་དམ། སྟག་གིས་སྨྲས་པ་སྦེད་དོ། །སེང་གེས་སྨྲས་པ། ཁོ་བོ་ནི་རི་དགས་དམ་པ་དམ་པ་དག་བསད་ནས་ཤ་དམ་པ་དག་ཟོས་ཤིང་ཁྲག་དམ་པ་དག་འཐུངས་ནས་ལྟོས་པ་མེད་པར་འགྲོའོ། །སྟག་གིས་སྨྲས་པ། ཁྱོད་ནི་སྟོབས་དང་ལྡན་པ་ཡིན་གྱིས། ཁོ་བོས་ནི་དེ་ལྟར་བྱེད་མི་ནུས་སོ། །སེང་གེས་སྨྲས་པ། བདག་ཅག་ལྷན་ཅིག་དོང་ངོ ། །དེ་གཉིས་ལྷན་ཅིག་འདོང་བར་བརྩམས་སོ། །རི་དགས་ཀྱི་རྒྱལ་པོ་སེང་གེ་དེ་ལ་ཝ་རྒན་པོ་རབ་ཏུ་གདུ་བ་ལྷག་མ
6.241a
ཟ་བ་ཞིག་འཁོར་ཞིང་ཕྱི་བཞིན་དུ་འབྲང་བ་དེས་བསམས་པ། སྟག་འདི་བདག་གི་ལྟོའི་དགྲར་གྱུར་པ་ཡིན་གྱིས་འདི་གཉིས་དབྱེ་བར་བྱའོ་སྙམ་ནས། དེ་ནས་ཝ་རྒན་པོ་དེ་སེང་གེའི་མདུན་དུ་རྣ་བ་ཕབ་སྟེ་འདུག་པ་དང ། སེང་གེས་སྨྲས་པ། ཞང་པོ་རླུང་ཚ་བ་དག་མི་ལྡང་ངམ། ཝས་སྨྲས་པ། ཚ་བོ་རླུང་རབ་ཏུ་འབར་བ་དག་ལྡང་ངོ ། །ཅི་ཉེས། སྟག་འདི་ན་རེ་ཁོ་བོའི་རྩའི་སེང་གེ་དེ་གར་སོང ། དེས་ཁོ་བོ་ལྷག་མ་ཟར་བཅུག་གིས་ཁོ་བོས་དེ་ངེས་པར་གསད་པར་བྱའོ་ཞེས་ཟེར་རོ། །སེང་གེས་སྨྲས་པ། ཞང་པོ་ཁོ་བོ་ཅག་གཉིས་ལ་མ་གཉིས་ཀྱིས་འཆི་ཀར་བུ་གཉིས་ནུ་མ་གཅིག་ལ་ནུ་ནུ་བའི་སྤུན་ཡིན་ལ། ཕྲ་མ་ཅན་སྣོད་འབྱེད་པ་དག་གིས་འཇིག་རྟེན་གང་བར་འཁོད་ཀྱིས། ཁོ་མོ་ཅག་གཉིས་འདས་པའི་འོག་ཏུ་ཁྱེད་གཉིས་ཀྱིས་འགའ་ཡང་མཉན་པར་མི་བྱའོ་ཞེས་ཁ་ཆེམས་བཞག་གིས་ཁྱོད་དེ་སྐད་མ་ཟེར་ཅིག་།ཝས་སྨྲས་པ། ཚ་བོ་ཁྱོད་ད་ཁོ་བོ་ཕན་པར་འདོད་པའི་ཚིག་མི་ཉན་ན་ཆུད་ཟོས་པར་འོང་ངོ ། །སེང་གེས་སྨྲས་པ། ཞང་པོ་གོ་རིམས་ཇི་ལྟར་འོང་བར་འགྱུར། ཝས་སྨྲས་པ། ཚ་བོ་སྟག་འདི་ཚང་ནས་བྱུང་ནས་བྱ་སྨྱངས་བྱེད་པར་འགྱུར་ལ། བྱ་སྨྱངས་བྱས་ནས་གླལ་བར་འགྱུར་ཞིང ། གླལ་ནས་ཕྱོགས་བཞིར་རྣམ་པར་བལྟ་བར་འགྱུར། ཕྱོགས་བཞིར་རྣམ་པར་བལྟས་ནས་སྟག་གི་སྐད་ཐང་གསུམ་ཕྱུང་སྟེ་ཁྱོད་ཀྱི་མདུན་དུ་འོང་བར་འགྱུར་བ་ན་ཁྱོད་ཀྱིས་བདག་འདིས་བསད་དོ་སྙམ་དུ་ཤེས་པར་གྱིས་ཤིག་།དེའི་འོག་ཏུ་སྟག་གི་མདུན་དུ་རྣ་བ་ཕབ་སྟེ་འདུག་པ་དང ། སྟག་གིས་སྨྲས་པ། ཞང་པོ་རླུང་ཚ་བ་དག་མི་ལྡང་ངམ ། ཝས་སྨྲས་པ། ཚ་བོ་རླུང་རབ་ཏུ་འབར་བ་དག་ལྡང་ངོ ། །ཅི་ཉེས། སེང་གེ་འདི་ན་རེ་ཁོ་བོའི་རྩའི་སྟག་དེ་གར་སོང ། དེ་ངེས་པར་གསད་པར་བྱའོ་ཞེས་ཟེར་རོ། །སྟག་གིས་སྨྲས་པ། ཞང་པོ་ཁོ་བོ་ཅག་གཉིས་ལ་མ་གཉིས་ཀྱིས་འཆི་ཀར་བུ་གཉིས་ཁྱེད་གཉིས་མ་གཅིག་ལ་ནུ་ནུ་བའི་སྤུན་ཡིན་ལ། ཕྲ་མ་ཅན་སྣོད་འབྱེད་པ་དག་གིས་འཇིག་རྟེན་གང་བར་འཁོད་ཀྱིས། ཁྱེད་གཉིས་ཀྱིས་འགའ་ཡང་མཉན་པར་མི་བྱ་འོ་ཞེས་ཁ་ཆེམས་བཞག་གིས་ཁྱོད་དེ་སྐད་མ་ཟེར་ཅིག་།ཝས་སྨྲས་པ། ཚ་བོ་ཁྱོད་ད་ཁོ་བོ་ཕན་པར
6.241b
འདོད་པའི་ཚིག་མི་ཉན་ན་ཆུད་ཟོས་པར་འོང་ངོ ། །ཞང་པོ་གོ་རིམས་ཇི་ལྟར་འོང་བར་འགྱུར། ཝས་སྨྲས་པ། ཚ་བོ་སེང་གེ་འདི་ཚང་ནས་བྱུང་ནས་བྱ་སྨྱངས་བྱེད་པར་འགྱུར་ལ། བྱ་སྨྱངས་བྱས་ནས་གླལ་བར་འགྱུར་ཞིང ། གླལ་ནས་ཕྱོགས་བཞིར་རྣམ་པར་ལྟ་བར་འགྱུར། ཕྱོགས་བཞིར་རྣམ་པར་བལྟས་ནས་སེང་གེའི་སྐད་ཐང་གསུམ་ཕྱུང་སྟེ་ཁྱོད་ཀྱི་མདུན་དུ་འོང་བར་འགྱུར་བ་ན་ཁྱོད་ཀྱིས་བདག་འདིས་བསད་པར་འགྱུར་རོ་སྙམ་དུ་ཤེས་པར་བྱའོ། །དེ་གཉིས་རང་བཞིན་གྱིས་རྟག་ཏུ་དེ་ལྟར་བྱེད་མོད་ཀྱི། ལན་འགའ་ཡང་མཚན་མར་མ་བཟུང་ངོ ། །དུས་གཞན་ཞིག་ན་རི་དགས་ཀྱི་རྒྱལ་པོ་སེང་གེ་དེ་ཚང་ནས་བྱུང་ནས་བྱ་སྨྱངས་བྱས་ཏེ་གླལ་ནས་ཕྱོགས་བཞིར་རྣམ་པར་བལྟས་ཏེ་སེང་གེའི་སྐད་ཐང་གསུམ་ཕྱུང་ནས་སྟག་གི་མདུན་དུ་སོང་ངོ ། །སྟག་གིས་ཀྱང་ཚང་ནས་བྱུང་ནས་བྱ་སྨྱངས་བྱས་ཏེ་གླལ་ནས་ཕྱོགས་བཞིར་རྣམ་པར་བལྟས་ཏེ་སྟག་སྐད་ཐང་གསུམ་ཕྱུང་ནས་སེང་གེའི་མདུན་དུ་སོང་ངོ ། །དེ་གཉིས་རྟག་ཏུ་དེ་ལྟ་བྱེད་མོད་ཀྱི། ལན་འགའ་ཡང་མཚན་མར་མ་བཟུང་སྟེ། གང་གི་ཚེ་རྒྱུད་ལ་དབྱེན་གྱི་ས་བོན་བཏབ་པ་དེའི་ཚེ་མཚན་མར་བཟུང་བས་སེང་གེས་ཀྱང་བདག་འདིས་བསད་དོ་སྙམ་དུ་བསམས་ལ། སྟག་གིས་ཀྱང་བདག་འདིས་བསད་དོ་སྙམ་དུ་བསམས་སོ། །ཡང་སེང་གེས་བསམས་པ། བདག་ནི་སྟོབས་དང་ལྡན་པ་ཡིན་ལ་སྟག་ནི་མ་ཡིན་པས་འདིས་བདག་ལ་རྒོལ་མི་ནུས་ཀྱིས་ཇེ་བརྟག་པར་བྱའོ་སྙམ་ནས་དེས་ཚིགས་སུ་བཅད་པས་སྨྲས་པ། ཆུ་ཞིང་ཕུན་སུམ་ཚོགས་པ་དང ། །རྩལ་དང་ཤུགས་དང་ལྡན་པ་ཡི། །མཆེ་བ་བཟང་ལ་རྒོལ་བྱེད་པ། །དཔུང་བཟང་དེ་ནི་རིགས་པ་མིན། སྟག་གིས་ཀྱང་ཚིགས་སུ་བཅད་པ་སྨྲས་པ། ཆུ་ཞིང་ཕུན་སུམ་ཚོགས་པ་དང ། །རྩལ་དང་ཤུགས་དང་ལྡན་པ་ཡི། །དཔུང་བཟང་ལ་ནི་རྒོལ་བྱེད་པ། །མཆེ་བཟང་དེ་ནི་རིགས་པ་མིན། །སེང་གེས་སྨྲས་པ། ཁྱོད་ལ་སུས་སྨྲས། སྟག་གིས་སྨྲས་པ། ཝ་འདིས་སོ། །སྟག་གིས་སྨྲས་པ། ཁྱོས་ལ་སུས་སྨྲས། སེང་གེས་སྨྲས་པ། ཝ་འདིས་སོ། །སེང་གེས་བསམས་པ། འདིས་བདག་ཅག་གཉིས་འབྱེད་པར་བྱེད་དོ་སྙམ་ནས་དེས་ཝ་དེ་ཐལ་ལྕག་གིས་བསྣུན་ཏེ་བསད་པ
6.242a
དང ། ལྷས་ཚིགས་སུ་བཅད་པ་སྨྲས་པ། གཞན་གྱི་ཚིག་གིས་མཛའ་བཤེས་མི་སྤང་ཞིང ། །གཞན་གྱིས་སྨྲས་པ་དག་ལ་བརྟག་པར་བྱ། །འབྱེད་པར་འདོད་པ་སྐབས་ཚོལ་བྱེད་པས་ན། །སྐྱེ་བོ་ཕྲ་མ་ཅན་ལ་ཡིད་མ་རྟོན། །ཝ་སྐྱེས་གྲོང་པ་བརྫུན་དུ་སྨྲ་བྱེད་པ། །མཛའ་བཤེས་འབྱེད་པར་བྱེད་པས་སྐྱེས་ཏོ་རེ། །ཕྲ་མ་སྨྲ་བ་དེ་ནི་བསད་གྱུར་ནས། །བདེ་བས་མཛའ་བཤེས་དགའ་བར་བྱེད་ལ་ལྟོས། །དགེ་སློང་དག་རེ་ཤིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཕྲ་མས་ཀུན་དུ་སྤྱོད་པ་ན་གསོད་པར་སེམས་ན་མི་རྣམས་ལ་སྨོས་ཀྱང་ཅི་དགོས། དགེ་སློང་དག་དེ་ལྟ་བས་ན་དགེ་སློང་གིས་དགེ་སློང་ལ་ཕྲ་མས་ཀུན་དུ་སྤྱད་པར་མི་བྱའོ། །དགེ་སློང་གིས་དགེ་སློང་ལ་ཕྲ་མས་སྤྱོད་པར་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ལ་ཕྲ་མ་བྱེད་ན་ལྟུང་བྱེད་དོ། །དགེ་སློང་ལ་ཕྲ་མ་བྱེད་ན་ཞེས་བྱ་བ་ནི་དགེ་སློང་ལ་ཕྲ་མ་བྱ་བའི་བསམ་པས་ངག་དང ། ཚིག་དང་ཐ་སྙད་དང ། སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་རྣམ་པར་རིག་བྱེད་སྨྲས་པའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚེད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་བར་སྡོམ་ལ། རིགས་དང་བཟོ་དང་ལས་དང་ནི། །རྟགས་ནད་ལྟུང་བ་སྡེ་ལྔ་དང ། །ཉེ་བའི་ཉོན་མོངས་རྣམས་དང་ནི། །སྤྱོ་བར་བྱེད་པ་ཐ་མ་ཡིན་དགེ་སློང་གིས་ཕྲ་མ་བྱ་བའི་བསམ་པས་བྲམ་ཟེ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད
6.242b
ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲམ་ཟེ་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ཉེས་བྱས་སུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་ཕྲ་མོར་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྒྱལ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྒྱལ་རིགས་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ཉེས་བྱས་སུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་ཕྲ་མོར་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྗེའུ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྗེའུ་རིགས་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན། མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དམངས་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་དམངས་རིགས་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཐ་ག་པ་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ
6.243a
ཡོད་བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐ་ག་པ་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན། མིང་བརྗོད་པ་ལ་ལྟུང་བྱེད་དུ་འགྱུར་ལ་རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཁབ་རིས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད་ཚེ་དང་ལྡན་པ་ནི་ཁབ་རིས་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན་མིང་འདི་ཞེས་བྱ་རིགས་འདི་ཞེས་བྱ། རུས་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བཟང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བཟང་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ་དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ལྕགས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ལྕགས་མགར་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྡུངས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྡུངས་མགར་ལས་རབ་ཏུ་བྱུང་བ་ཡིན་ནོ། །ཞེས་ཟེར་ཏེ།
6.243b
དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཀོ་ལྤགས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཀོ་ལྤགས་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྫ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྫ་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་འབྲེག་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་འབྲེག་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན་མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཤིང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཤིང་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ།
6.244a
རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་སྨྱིག་མ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་སྨྱིག་མ་མཁན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེན། མིང་ནི་འདི་ཞེས་བྱ། རིགས་ནི་འདི་ཞེས་བྱ་རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བྲན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲན་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ་རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བྲམ་ཟེ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲམ་ཟེ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། བྲམ་ཟེའི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ཀུན་ཏུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་པ་བླང་བ་དང ། ས་བླང་བ་དང ། ལག་སྟངས་དང ། ཐོར་ཚུགས་དང་རབ་བསྔགས་བྱ་བ་དང ། ཀྱེ་ཞེས་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུད་པ་དང ། ཀློག་པ་དང ། ཀློག་ཏུ་འཇུད་པ་དང ། སྦྱིན་པ་དང ། ལེན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ་རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ཉེས་བྱས་སུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་ཕྲ་མོར་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྒྱལ
6.244b
རིགས་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྒྱལ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ་གླང་པོ་ཆེའི་གཉར་བཞོན་པ་དང་རྟ་བཞོན་པ་དང ། ཤིང་རྟའི་ཐབས་དང ། རལ་གྲིའི་ཐབས་དང་འཕོང་དང་ཕྱིར་བསྣུར་བ་དང ། མདུན་དུ་བསྣུར་བ་དང ། ལྕགས་ཀྱུས་སྒྱུར་ཐབས་དང ། ཞགས་པ་གདབ་པ་དང ། མདའ་བོ་ཆེ་འཕེན་ཐབས་དང ། འཛིན་སྟངས་དང ། གོམ་སྟབས་དང ། ཐོར་ཚུགས་དང ། བཅད་པ་དང ། དྲལ་བ་དང ། དབུག་པ་དང ། རྒྱང་ནས་ཕོག་པ་དང ། སྒྲ་གྲག་པར་ཕོག་པ་དང ། གནད་དུ་ཕོག་པ་དང ། མི་འཆོར་བར་ཕོག་པ་དང ། ཚབས་ཆེ་བ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ཉེས་བྱས་སུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་ཕྲ་མོར་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྗེའུ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྗེའུ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཞིང་རྨོ་བ་དང ། བ་ལང་བསྲུང་བ་དང ། ཚོང་བྱ་བ་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དམངས་རིགས་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད་བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་དམངས་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཟོར་བ་དང ། ཕྲག་རྡང་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ
6.245a
ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཐ་ག་པ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐ་ག་པ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། དར་དག་དང ། རས་ཡུག་ཆེན་དག་དང ། བེའུ་རས་དག་དང ། དར་ལ་དག་དང ། དུ་གུ་ལ་དག་དང ། ཀོ་ཏམ་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཁབ་རིས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁབ་རིས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། བེའུ་རས་ཡུག་ཆེན་དང ། པར་ཐང་དང ། ཁབ་རིས་དང ། ཁྲེའུ་ཚེ་དང ། གོར་བུ་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བཟང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བཟང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཞཝ་དང་ཞཝ་སྒྲེ་བོ་དང ། བྱིས་པའི་གོས་དག་དང ། ཤི་ང་དཔུང་ཆད་དག་དང ། དོར་མང་དག་དང ། དོར་ཐུང་དག་དང ། བཟང་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས
6.245b
སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ལྕགས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ལྕགས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ལྷུང་བཟེད་དང ། ལྷུང་བཟེད་ཆུང་ངུ་དང ། ཁབ་དང ། གྲི་དག་དང ། སྲེན་གྲི་དག་དང ། ལྕགས་མགར་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྡུངས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྡུངས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཁར་གཞོང་དག་དང ། གཞོང་བུ་དག་དང ། ཆ་ལང་དག་དང ། སྐམ་ཕོར་དག་དང ། རིལ་བ་དག་དང ། རྡུངས་མགར་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཀོ་ལྤགས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཀོ་ལྤགས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ལྷམ་སྒྲོག་གུ་ཅན་དག་དང ། ལྷམ་ཡུ་ཆད་དག་དང ། མཆིལ་ལྷམ་དག་དང ། སྒ་དང ། དོང་པ་དག་དང ། ཀོ་ལྤགས་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས
6.246a
ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྫ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྫ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། རྫ་མ་དག་དང ། བུམ་པ་དག་དང ། རིལ་བ་དག་དང ། རྫེའུ་དག་དང ། ཁམ་ཕོར་དག་དང ། རྫ་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་འབྲེག་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་འབྲེག་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། སྐྲ་བྲེག་པ་དང ། སེན་མོ་བྲེག་པ་དང ། ཁ་སྤུ་བྲེག་པ་དང ། བྱིན་པ་བཅོས་པ་དང ། འབྲེག་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན། མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཤིང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཤིང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། ཁྲི་དག་དང ། ཁྲིའུ་དག་དང ། ན་དག་དང ། ན་ཁྲིའུ་དག་དང ། སྒོ་གླེགས་དག་དང ། ཤིང་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས
6.246b
སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་སྨྱིག་མ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་སྨྱིག་མ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། སྐོན་བུ་དག་དང ། སྤྲོག་མ་དག་དང ། གདུགས་དག་དང ། བསིལ་ཡབ་དག་དང ། དུང་གཟེབ་དག་དང ། སྨྱིག་མ་མཁན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བྲན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་བཟོ་འདི་ལྟ་སྟེ། བསྐུ་མཉེ་དང ། དྲིལ་ཕྱི་དང ། ཁྲུས་དང ། ཕོ་ཉར་འགྲོ་བ་དང ། མངག་པ་དང ། བྲན་གྱི་བཟོ་གཞན་གང་ཡིན་པ་དག་བསླབ་པར་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་པ། དགེ་སློང་གིས་ཕྲ་མ་བྱ་བའི་བསམ་པས་བྲམ་ཟེ་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲམ་ཟེ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། བྲམ་ཟེའི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ཀུན་དུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་བླང་བ་དང ། ལག་སྟངས་དང ། ཐོར་ཚུགས་དང ། རབ་བསྔགས་བྱ་བ་དང ། ཀྱེ་ཞེས་བྱ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག
6.247a
གི་རིག་བྱེད་དང ། སྲིད་སྲུང་གི་རིག་བྱེད་དང ། མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུད་པ་དང ། ཀློག་པ་དང ། ཀློག་ཏུ་འཇུད་པ་དང ། སྦྱིན་པ་དང ། ལེན་པ་དང ། བྲམ་ཟེའི་ལས་གཞན་གང་ཡིན་པ་དག་ཀྱང་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ཉེས་བྱས་སུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་ཕྲ་མོར་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྒྱལ་རིགས་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད་བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྒྱལ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། གླང་པོ་ཆེའི་གཉར་བཞོན་པ་དང ། རྟ་ལ་བཞོན་པ་དང ། ཤིང་རྟའི་ཐབས་དང་རལ་གྲིའི་ཐབས་དང ། འཕོང་དང ། ཕྱིར་བསྣུར་བ་དག་དང ། མདུན་དུ་བསྣུར་བ་དང ། ལྕགས་ཀྱུས་སྒྱུར་ཐབས་དང ། ཞགས་པ་གདབ་པ་དང ། མདའ་བོ་ཆེ་འཕེན་ཐབས་དང ། འཛིན་སྟངས་དང ། གོམ་སྟངས་དང ། ཐོར་ཚུགས་དང ། གཅད་པ་དང ། དྲལ་བ་དང ། དབུག་པ་དང ། རྒྱང་ནས་ཕོག་པ་དང ། སྒྲ་གྲག་པར་ཕོག་པ་དང ། གནད་དུ་ཕོག་པ་དང ། མི་འཆོར་བར་ཕོག་པ་དང ། ཚབས་ཆེ་བར་ཕོག་པ་དང ། རྒྱལ་རིགས་ཀྱི་ལས་གཞན་གང་ཡིན་པ་དག་ཀྱང་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ཉེས་བྱས་སུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་ཕྲ་མོར་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྗེའུ་རིགས་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྗེའུ་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། ཞིང་རྨོ་བ་དང ། བ་ལང་བསྲུང་བ་དང ། ཚོང་བྱ་བ་དང ། རྗེའུ་རིགས་ཀྱི་ལས་གཞན་གང་ཡིན་པ་དག་ཀྱང་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད
6.247b
པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དམངས་རིགས་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་དམངས་རིགས་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་རང་གི་ལས་འདི་ལྟ་སྟེ། ཟོར་བ་དང ། ཕྲག་རྡང་དང ། དམངས་རིགས་ཀྱི་ལས་གཞན་གང་ཡིན་པ་དེ་དག་ཀྱང་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཐ་ག་པ་ལ་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐ་ག་པ་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། ཐགས་ཟངས་དང ། སོན་པ་དང ། དྲུ་བུ་དང ། སྣས་མ་ལ་སོགས་པས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཁབ་རིས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁབ་རིས་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། རྒྱང་ཤིང་དང ། སྐུད་པ་དང ། ཚོན་དང ། ཕུར་པ་དང ། སོ་མངས་ཀྱིས་རང་གི་ལས་བྱའོ་ཞེས་ཟེར་ཏེ་དགེ་སློང་གང་ཞེ་ན། མིང་ནི་འདི་ཞེས་བྱ་རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བཟང་མཁན་ལས་རབ་ཏུ་བྱུང་བའི་གན་དུ་སོང་སྟེ། འདི་སྐད་ཅེས་ཚེ་དང་ལྡན་པ
6.248a
ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད་ཚེ་དང་ལྡན་པ་ནི་བཟང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། ཁབ་དང ། སྐུད་པ་དང ། གྲི་དང ། ཆན་པ་དང ། ལྕུབ་མོས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ལྕགས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ལྕགས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྦུད་པ་དང ། སྦུད་རུ་དང ། ཏི་ཙ་དང ། སྐམ་པ་དང ། ཐོ་བས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྡུངས་མགར་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྡུངས་མགར་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྦུད་པ་དང ། སྦུད་རུ་དང ། ཏི་ཙ་དང ། སྐམ་པ་དང ། ཐོ་བས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཀོ་ལྤགས་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས། ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཀོ་ལྤགས་མཁན་ལས་རབ
6.248b
ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། རྒྱུས་པ་དང ། རྒྱིའུ་དང ། འབྲེང་བུ་དང ། དྲ་གྲི་དང ། སྨྱུང་དང ། སྨྱུང་བུས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ་རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་རྫ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རྫ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། འཁོར་ལོ་དང ། དབྱིག་གུ་དང ། ཐ་གུ་དང ། འཁོར་ལོའི་རྟེན་མ་དང ། གསལ་གྱིས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་འབྲེག་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་འདྲེག་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྤུ་གྲི་དང ། ཆན་པ་དང ། བདར་དང ། སྨང་ཙེར་དང ། སེན་གྲིས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་ཤིང་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཤིང་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྟེའུ་དང ། སྟ་རེ་དང ། གཟོང་དང ། སོག་ལེ་དང ། ཐོ་བས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ
6.249a
བའི་བསམ་པས་སྨྱིག་མ་མཁན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་སྨྱིག་མ་མཁན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ། སྨྱིག་མ་དང ། གྲི་དང ། ཚོན་དང ། སྨྱུག་ཐོ་དང ། ལྷང་ཚེར་གྱིས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་བྲན་ལས་རབ་ཏུ་བྱུང་བའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་བྲན་ལས་རབ་ཏུ་བྱུང་བ་ཡིན་གྱིས། ཚེ་དང་ལྡན་པས་འདི་ལྟ་སྟེ་བསྐུ་མཉེ་དང ། དྲིལ་ཕྱི་དང ། ཁྲུས་དང ། ཕོ་ཉར་འགྲོ་བ་དང ། མངག་པས་རང་གི་ལས་བྱའོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཐེང་པོ་དང ། སྨད་འཆལ་དང ། ཞར་བ་དང ། ལག་སོར་རྡུམ་པོ་དང ། སྒུར་པོ་དང ། མིའུ་ཐུང་དང ། ལྦ་བ་ཅན་དང ། གླེན་པ་དང ། ལྐུག་པ་དང ། གྲུམ་པོ་དང ། འོན་པ་དང ། རྟེན་འཕྱེ་དང ། རྐང་འབམ་ལས་རབ་ཏུ་བྱུང་བ་ཡིན་གྱིས་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད།
6.249b
ཚེ་དང་ལྡན་པ་ནི་མཛེ་ཅན་དང ། འབྲུམ་བུ་ཕྲ་མོ་ཅན་དང ། ངལ་སྐྱེན་པ་དང ། ཤུ་བ་ཅན་དང ། གཡན་པ་ཅན་དང ། ཁྱི་རྔོ་ཅན་དང ། གློག་པ་ཅན་དང ། རྐང་ཤུ་ཅན་དང ། སྐྱིགས་བུ་ཅན་དང ། སྐྱུག་བྲོ་བ་དང ། ཁོང་སྐམ་ཅན་དང ། རིམས་ཅན་དང ། རིམས་དྲག་པོ་ཅན་དང ། ལུད་པ་ཅན་དང ། དབུགས་མི་བདེ་བ་ཅན་དང ། སྐེམ་ནད་ཅན་དང ། བརྗེད་བྱེད་ཅན་དང ། བཀྲེས་ངབ་ཅན་དང ། སྐྱ་རྦབ་ཅན་དང ། ཚིལ་པོ་ཆེ་དང ། སྐྲན་ཅན་དང ། ཁྲག་ནད་ཅན་དང ། མཁྲིས་ནད་དང ། མཚན་པར་རྡོལ་བ་ལས་རབ་ཏུ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང ། སོ་སོར་བཤགས་པར་བྱ་བ་དང ། ཉེས་བྱས་ཀྱི་ལྟུང་བ་བྱུང་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་ཁྲོ་བ་དང ། ཁོན་དུ་འཛིན་པ་དང ། འཆབ་པ་དང ། དངན་དུས་ཅན་དང ། ཕྲག་དོག་ཅན་དང ། སེར་སྣ་ཅན་དང ། གཡོན་ཅན་དང ། སྒྱུ་ཅན་དང ། ངོ་ཚ་མེད་པ་དང ། ཁྲེལ་མེད་པ་དང ། སྡིག་པ་འདོད་པ་དང ། ལོག་པར་ལྟ་བ་ཡིན་ནོ་ཞེས་ཟེར་ཏེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ། རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དགེ་སློང་གིས་ཕྲ་མ་བྱ་བའི་བསམ་པས་དགེ་སློང་གི
6.250a
གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཁྱོད་ལ་དགེ་སློང་ན་རེ་ཚེ་དང་ལྡན་པ་ལ་དགེ་སྦྱོང་གི་ཚུལ་ག་ལ་ཡོད། བྲམ་ཟེའི་ཚུལ་ག་ལ་ཡོད། ཚེ་དང་ལྡན་པ་ནི་རོ་ལྟ་བུ་ཡིན་ནོ་ཞེས་བྱ་བ་ལ་སོགས་པའི་སྤྱོ་བ་དག་གིས་སྤྱོ་བར་བྱེད་དེ། དགེ་སློང་གང་ཞེ་ན། མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ་ཞེས་སྨྲས་ན་མིང་བརྗོད་པ་ལ་ལྟུང་བྱེད་དུ་འགྱུར་ལ་རིགས་དང་རུས་བརྗོད་པ་ལ་ཉེས་བྱས་སུ་འགྱུར་རོ། །དེ་བཞིན་དུ་དགེ་སློང་གིས་ཇི་ཙམ་དུ་ཕྲ་མ་བྱ་བའི་བསམ་པས་དགེ་སློང་དག་དབྱེ་བའི་ཚིག་སྨྲ་ན་བདེན་ཡང་རུང ། བརྫུན་ཡང་རུང་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་ལ་ཕྲ་མ་བྱེད་པའི་ལྟུང་བྱེད་དེ་གསུམ་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་རྩོད་པ་འདི་ནི་ཤད་ཀྱིས་མ་བྱང་བ་དང ། ལེགས་པར་ཤད་ཀྱིས་མ་བྱང་བ་ཡིན་གྱིས་ཡང་ཤད་ཀྱིས་བྱང་བར་བྱའོ། །རྩོད་པ་འདི་ནི་ངེས་པར་མ་བརྟགས་པ་དང ། ལེགས་པར་ངེས་པར་མ་བརྟགས་པ་ཡིན་གྱིས་ཡང་ངེས་པར་བརྟག་པར་བྱའོ། །རྩོད་པ་འདི་ནི་ཉེ་བར་མ་ཞི་བ་དང ། ལེགས་པར་ཉེ་བར་མ་ཞི་བ་ཡིན་གྱིས་ཡང་ཉེ་བར་ཞི་བར་བྱའོ་ཞེས་ཡང་ལས་ཀྱིས་སྐྱོ་སྔོགས་བྱེད་དེ། དགེ་སློང་དག་ཡང་དང་ཡང་དུ་རྩོད་པ་ཉེ་བར་ཞི་བར་བྱེད་པ་ན་བྱ་བ་མང་བ་དང ། བྱེད་པ་མང་བར་གྱུར་ནས་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱི་ཞི་གནས་གཏོང་བར་བྱེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་རྩོད་པ་འདི་ནི་ཤད་ཀྱིས་མ་བྱང་བ་དང ། ལེགས་པར་ཤད་ཀྱིས་མ་བྱང་བ་ཡིན་གྱིས་ཡང་ཤད་ཀྱིས་སྦྱང་བར་བྱའོ། །རྩོད་པ་འདི་ནི་ངེས་པར་མ་བརྟགས་པ་དང ། ལེགས་པར་ངེས་པར་མ་བརྟགས་པ་ཡིན་གྱིས་ཡང་ངེས
6.250b
པར་བརྟག་པར་བྱའོ། །རྩོད་པ་འདི་ནི་ཉེ་བར་མ་ཞི་བ་དང ། ལེགས་པར་ཉེ་བར་མ་ཞི་བ་ཡིན་གྱིས་ཡང་ཉེ་བར་ཞི་བར་བྱའོ་ཞེས་ཡང་ལས་ཀྱིས་སྐྱོ་སྔོགས་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་ཡང་ལས་ཀྱིས་སྐྱོ་སྔོགས་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །འཐུན་པས་ཞེས་བྱ་བ་ནི་བློ་འཐུན་པས་སོ། །ཆོས་བཞིན་དུ་ཞེས་བྱ་བ་ནི་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་བཞིན་དུའོ། །རྩོད་པ་ཞེས་བྱ་བ་ནི་རྩོད་པ་བཞི
6.251a
པོ་འཐབ་པའི་ཕྱིར་རྩོད་པ་དང ། མི་གདམས་པའི་ཕྱིར་རྩོད་པ་དང ། ལྟུང་བའི་ཕྱིར་རྩོད་པ་དང ། བྱ་བའི་ཕྱིར་རྩོད་པའོ། །སྦྱངས་པ་ཞེས་བྱ་བ་ནི་ཉེ་བར་ཞི་བར་བྱས་པའོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་ཡོངས་སུ་རིག་པ་འམ། གཞན་དག་གིས་བརྗོད་པས་སོ། །ཡང་ལས་ཀྱིས་སྐྱོ་སྔོགས་བྱེད་ན་ཞེས་བྱ་བ་ནི་ཡང་བྱེད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་འཐབ་པའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་འཐབ་པའི་ཕྱོར་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་འཐབ་པའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང ། ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །
6.251b
ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་འཐབ་པའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་མི་གདམས་པའི་ཕྱིར་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་མི་གདམས་པའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་མི་གདམས་པའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས
6.252a
ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་མི་གདམས་པའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ལྟུང་བའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ལྟུང་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ལྟུང་བའི་ཕྱིར་རྩོད་པ་ལ་གདམས་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ
6.252b
འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ལྟུང་བའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་བྱ་བའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་བྱ་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་བྱ་བའི་ཕྱི་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ
6.253a
འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་བྱ་བའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཤད་ཀྱིས་མ་བྱང་བ་ལ་ཡིད་གཉིས་ཟ་ཞིང་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དེ་དག་ནི་གང་ཟག་ལྔ་སྟེ། གཉུག་མར་གནས་པ་དང ། ལས་བྱེད་པ་དང ། འདུན་པ་འབུལ་བ་དང ། ལྟ་བ་སྨྲ་བ་དང ། བློ་བུར་དུ་འོངས་པ་དག་གོ། །དེ་ལ་གང་ཟག་གཉུག་མར་གནས་པ་གང་ཞེ་ན། གང་གིས་རྩོད་པ་དེའི་ཐོག་མ་དང ། དབུས་དང ། ཐ་མ་དག་ཤེས་པའོ། །གང་ཟག་ལས་བྱེད་པ་གང་ཞེ་ན། གང་གིས་རྩོད་པ་དེ་ཉེ་བར་ཞི་བར་བྱ་བའི་ཕྱིར་ལས་བྱས་པའོ། །གང་ཟག་འདུན་པ་འབུལ་བ་གང་ཞེ་ན། གང་གིས་ལས་དེ་བྱ་བའི་ཕྱིར་འདུན་པ་ཕུལ་བར་གྱུར་པའོ། །གང་ཟག་ལྟ་བ་སྨྲ་བ་གང་ཞེ་ན། གང་གིས་རྩོད་པ་དེ་ལ་རང་གི་ལྟ་བ་སྨྲས་པར་གྱུར་པའོ། །གང་ཟག་བློ་བུར་དུ་འོངས་པ་གང་ཞེ་ན། གང་གིས་རྩོད་པ་དེའི་ཐོག་མ་དང ། དབུས་དང ། ཐ་མ་དག་མི་ཤེས་པའོ། །དེ་ལ་གང་ཟག་དང་པོ་གསུམ་པོ་གཉུག་མར་གནས་པ་དང ། ལས་བྱེད་པ་དང ། འདུན་པ་འབུལ་བའི་གང་ཟག་དེ་གསུམ་གྱིས་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །གང་ཟག་ཐ་མ་གཉིས་པོ་ལྟ་བ་སྨྲ་བ་དང ། བློ་བུར་དུ་འོངས་པའི་གང་ཟག་དེ་གཉིས་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་ཡང་ལས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྐྱོ་སྔོགས་བྱེད་པའི་ལྟུང་བྱེད་དེ་བཞི་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན
6.253b
མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འཆར་ཀ་ཤ་མཚན་གྱི་རིག་པ་ཤེས་ཏེ། དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་འཇུག་གོ། །དེ་བྲམ་ཟེ་དང ། ཁྱིམ་བདག་གི་ཁྱིམ་དག་ཏུ་སོང་སྟེ་ཆོས་སྟོན་པར་བྱེད་ཅིང་ཆོས་བསྟན་ནས་མནའ་མ་ལ་དྲིས་པ། སྲུ་མོ་ཁྱོད་ཀྱི་སྒྱུག་མོ་ཅི་འདྲ། དེས་སྨྲས་པ། འཕགས་པ་རི་བོང་མ་མདས་ཕོག་པ་ཅི་འདྲ་བ་དེ་འདྲའོ། །འཆར་ཀས་སྨྲས་པ། སྲུ་མོ་ཅི་དེ་དེའི་ཉེས་པ་ཡིན་སྙམ་འམ། འདི་ལྟར་དེ་ལ་གཏུམ་པའི་མཚན་ནུ་མའི་བར་དང ། འདོམས་ཀྱི་བར་དང ། རྐེད་པའི་བར་དག་ན་ཤ་རྨན་དང ། མཛེར་བུ་དང ། སྨེ་བ་དང ། སྨེ་བ་དམར་པོ་དང ། སྤུ་འཁྱིལ་བ་དག་ཡོད་པས་དེ་ནི་དེའི་ཉེས་པ་ཡིན་ནོ། །དེའི་འོག་ཏུ་སྒྱུག་མོའི་གན་དུ་སོང་སྟེ་དྲིས་པ། སྲུ་མོ་ཁྱོད་ཀྱི་མནའ་མ་ཅི་འདྲ། འཕགས་པ་དེའི་སྐྱོན་ནི་སེག་དར་གྱིས་བདར་འཚལ་ཏེ། ལེ་ལོ་ཅན་སྒྲུབ་མི་ཕོད་པ། གཏུམ་པ། གཤེ་བ། སྤྱོ་བར་བགྱིད་པ་ལགས་སོ། །སྲུ་མོ་ཅི་དེ་དེའི་ཉེས་པ་ཡིན་སྙམ་འམ། འདི་ལྟར་དེ་ལ་གཏུམ་པའི་མཚན་ནུ་མའི་བར་དང ། འདོམས་ཀྱི་བར་དང ། རྐེད་པའི་བར་དག་ན་ཤ་རྨན་དང ། མཛེར་བུ་དང ། སྨེ་བ་དང ། སྨེ་བ་དམར་པོ་དང ། སྤུ་འཁྱིལ་བ་དག་ཡོད་པས་དེ་ནི་དེའི་ཉེས་པ་ཡིན་ནོ། །དེ་དུས་གཞན་ཞིག་ན་ཡང་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་འཇུག་གོ། །དེ་བྲམ་ཟེ་དང ། ཁྱིམ་བདག་གི་ཁྱིམ་དག་ཏུ་སོང་སྟེ་ཆོས་སྟོན་པར་བྱེད་ཅིང ། ཆོས་སྟོན་པ་ན་སྒྱུག་མོ་ལ་དྲིས་པ། སྲུ་མོ་ཁྱོད་ཀྱི་མནའ་མ་ཅི་འདྲ། འཕགས་མ་བུ་མོ་འམ། ནུ་མོ་ཅི་འདྲ་བ་དེ་འདྲའོ། །སྲུ་མོ་དེ་ནི་འདིའི་ཡོན་ཏན་མ་ཡིན་ཏེ། འདི་ལྟར་དེ་ལ་ངེས་པའི་མཚན་ནུ་མའི་བར་དང ། འདོམས་ཀྱི་བར་དང ། རྐེད་པའི་བར་དག་ན་འདི་ལྟ་སྟེ། དཔལ་བེའུ་དང ། བུམ་པ་གང་བ་དང ། བཀྲ་ཤིས་དང ། གཡུང་དྲུང་དག་ཡོད་པས་དེ་ནི་དེའི་ཡོན་ཏན་ཡིན་ནོ། །དེའི་འོག་ཏུ་དེའི་མནའ་མའི་གན་དུ་སོང་སྟེ་དྲིས་པ། སྲུ་མོ་ཁྱོད་ཀྱི་སྒྱུག་མོ་ཅི་འདྲ། འཕགས་པ་མ་འམ། བུ
6.254a
མོ་ཅི་འདྲ་བ་དེ་འདྲའོ། །སྲུ་མོ་དེ་ནི་དེའི་ཡོན་ཏན་མ་ཡིན་ཏེ། འདི་ལྟར་དེ་ལ་ངེས་པའི་མཚན་ནུ་མའི་བར་དང ། འདོམས་ཀྱི་བར་དང ། རྐེད་པའི་བར་དག་ན་འདི་ལྟ་སྟེ། དཔལ་བེའུ་དང ། བུམ་པ་གང་བ་དང ། བཀྲ་ཤིས་དང ། གཡུང་དྲུང་དག་ཡོད་པས་དེ་ནི་དེའི་ཡོན་ཏན་ཡིན་ནོ། །དེ་ནས་དུས་གཞན་ཞིག་ན་བུད་མེད་དེ་དག་བསྐུ་མཉེ་དང ། དྲིལ་ཕྱི་དང ། ཁྲུས་བདག་གིར་བྱེད་པའི་ཚེ་གཅིག་ལ་གཅིག་གསང་བའི་གནས་ཀྱི་མཚན་མ་རྟོག་པར་བྱེད་པ་ན། ཇི་ཙམ་ན་ཚེ་དང་ལྡན་པ་འཆར་ཀས་ཇི་སྐད་བསྟན་པ་དེ་ཁོ་ན་ལྟ་བུའི་མཚན་བཟང་པོ་དང ། མཚན་ངན་པ་དག་མཐོང་ངོ ། །དེ་དག་གང་གི་ཚེ་ཐབ་མོ་བྱུང་བ་དེའི་ཚེ་ན་གཅིག་ལ་གཅིག་གླེང་བར་བྱེད་དེ། ཁྱོད་ཀྱང་ཁོ་མོ་དང་ལྷན་ཅིག་སྨྲ་བར་བྱེད་དམ། ཁྱོད་སྐྱེས་པ་གཞན་དག་དང་ལྷན་ཅིག་འདི་དང་འདི་ལྟར་བྱེད་དོ། །སྡིག་པ་ཞིའོ། །འོ་ན་ཁྱོད་ཀྱི་འདོམས་ཀྱི་བར་དག་ན་མཚན་དང ། མཚན་ངན་པ་དག་ཡོད་པ་སྐྱེས་པ་གཞན་གྱིས་ཇི་ལྟར་ཤེས། གལ་ཏེ་དེ་ལྟ་ན་ཁོ་མོ་ཡང་ཅིའི་ཕྱིར་མི་སྨྲ། ཁྱོད་ཀྱང་ཁོ་མོ་དང་ལྷན་ཅིག་སྨྲ་བར་བྱེད་དམ། ཁྱོད་སྐྱེས་པ་གཞན་དག་དང་ལྷན་ཅིག་འདི་དང་འདི་ལྟར་བྱེད་དོ། །སྡིག་པ་ཞིའོ། །འོ་ན་ཁྱོད་ཀྱི་འདོམས་ཀྱི་བར་དག་ན་མཚན་དང ། མཚན་ངན་པ་དག་ཡོད་པ་སྐྱེས་པ་གཞན་གྱིས་ཇི་ལྟར་ཤེས། གང་གི་ཚེ་དེ་དག་གཅིག་ལ་གཅིག་བཟོད་པ་གསོལ་བ་དེའི་ཚེ་ན་གཅིག་གིས་གཅིག་ལ་དྲིས་པ། ཁྱོད་ལ་སུས་སྨྲས། འཕགས་པ་འཆར་ཀས་སོ། །ཁྱོད་ལ་ཡང་སུས་སྨྲས། འཕགས་པ་འཆར་ཀས་སོ། །དེ་དག་འཕགས་པ་འཆར་ཀས་བསམས་བཞིན་དུ་བདག་ཅག་འཐབ་ཏུ་བཅུག་གོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དེ་དག་ཐེ་ཚོམ་སྐྱེས་ནས་དགེ་སློང་གནས་བརྟན་གནས་བརྟན་དག་བསོད་སྙོམས་ལ་ཞུགས་པ་ན་དེ་དག་གིས་དེ་དག་ལ་དྲིས་པ། འཕགས་པ་འཆར་ཀ་དགེ་སློང་ཇི་ལྟ་བུ་ལགས། སྲིང་མོ་དག་དེ་ནི་མདུན་ན་འདོན་གྱི་བུ་ལས་རབ་ཏུ་བྱུང་བ་དགེ་སློང་ཚུལ་ཁྲིམས་དང་ལྡན་པ་ཡིན་ནོ། །འཕགས་པ་དག་གལ་ཏེ་དགེ་སློང་ཚུལ་ཁྲིམས་དང་ལྡན་པ་ལགས་ན་དེས་ཇི་ལྟར་བུད་མེད་ཀྱི་ཡུལ་གྱི་གསང་བའི
6.254b
ཕྱོགས་དག་ན་ཤ་རྨན་མཆིས་པ་དག་འཚལ། དེ་དག་གིས་སྨྲས་པ། སྲིང་མོ་དག་དེས་ཤ་མཚན་བརྟགས་པའི་རིག་པ་ཤེས་པས་དེའི་མཐུས་ཤེས་སོ། །འཕགས་པ་དག་ཅི་ཇི་ཙམ་འཚལ་བ་དེ་དག་ཐམས་ཅད་བསྟན་པར་བགྱི་འམ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གང་གི་ཕྱིར་ཉེས་དམིགས་ཅུང་ཟད་ཅི་བྱུང་བ་དེ་དག་ཐམས་ཅད་དགེ་སློང་དག་བུད་མེད་ཀྱི་ཡུལ་ལ་ཆོས་སྟོན་པ་ལས་གྱུར་པ་ཡིན་གྱིས། དེའི་ཕྱིར་དགེ་སློང་གིས་བུད་མེད་ཀྱི་ཡུལ་ལ་ཆོས་བསྟན་པར་མི་བྱའོ་སྙམ་དུ་དགོངས་ནས་དེ་ལྟ་བས་ན་དགེ་སློང་གིས་བུད་མེད་ཀྱི་ཡུལ་ལ་ཆོས་བསྟན་པར་མི་བྱའོ་ཞེས་བཀའ་སྩལ་ཏོ། །བཅོམ་ལྡན་འདས་ཀྱིས་དགེ་སློང་གིས་བུད་མེད་ཀྱི་ཡུལ་ལ་ཆོས་བསྟན་པར་མི་བྱའོ་ཞེས་བཀའ་སྩལ་ནས་དགེ་སློང་དག་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་དག་གིས་སྨྲས་པ། འཕགས་པ་དག་ཆོས་བསྟན་དུ་གསོལ། སྲིང་མོ་དག་བཅོམ་ལྡན་འདས་ཀྱིས་མ་གནང་ངོ ། །དེ་དག་གིས་སྨྲས་པ། གལ་ཏེ་ཁྱོད་ཆོས་མི་སྟོན་ན་བདག་ཅག་ཀྱང་བསོད་སྙོམས་མི་འབུལ་ལོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཚིག་ལྔས་ཆོས་བསྟན་པར་བྱ་སྟེ། སྲིང་མོ་དག་འདི་ལྟར་གཟུགས་ནི་མི་རྟག་པའོ། །ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ནི་མི་རྟག་པའོ་ཞེས་བྱ་བས་སོ། །དགེ་སློང་དག་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་དག་གིས་སྨྲས་པ། འཕགས་པ་དག་ཆོས་བསྟན་དུ་གསོལ། དགེ་སློང་རྣམས་ཀྱིས་སྲིང་མོ་དག་འདི་ལྟར་གཟུགས་ནི་མི་རྟག་པའོ། །ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ནི་མི་རྟག་པའོ་ཞེས་ཚིག་ལྔས་ཆོས་བསྟན་པ་དང ། དེ་དག་གིས་སྨྲས་པ། འཕགས་པ་དག་ཡང་ཆོས་བསྟན་དུ་གསོལ། སྲིང་མོ་དག་བཅོམ་ལྡན་འདས་ཀྱིས་རེ་ཤིག་དེ་ཙམ་ཞིག་རྗེས་སུ་གནང་ངོ ། །དེ་དག་གིས་སྨྲས་པ། འཕགས་པ་དག་ལེགས་ཀྱིས་བདག་ཅག་ཀྱང་བསོད་སྙོམས་ཅུང
6.255a
ཞིག་འབུལ་ལོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཚིག་དྲུག་གིས་ཆོས་བསྟན་པར་བྱ་སྟེ། སྲིང་མོ་དག་འདི་ལྟར་མིག་ནི་མི་རྟག་པའོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་ནི་མི་རྟག་པའོ་ཞེས་བྱ་བས་སོ། །དགེ་སློང་དག་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་དག་གིས་སྨྲས་པ། འཕགས་པ་དག་ཆོས་བསྟན་དུ་གསོལ ། དགེ་སློང་རྣམས་ཀྱིས་སྲིང་མོ་དག་འདི་ལྟར་མིག་ནི་མི་རྟག་པའོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་ནི་མི་རྟག་པའོ་ཞེས་ཚིག་དྲུག་གིས་ཆོས་བསྟན་པ་དང ། དེ་དག་གིས་སྨྲས་པ། འཕགས་པ་དག་ཡང་ཆོས་བསྟན་དུ་གསོལ། སྲིང་མོ་དག་བཅོམ་ལྡན་འདས་ཀྱིས་རེ་ཤིག་དེ་ཙམ་ཞིག་རྗེས་སུ་གནང་ངོ ། །དེ་དག་གིས་སྨྲས་པ། འཕགས་པ་དག་ལེགས་ཀྱིས་བདག་ཅག་ཀྱང་བསོད་སྙོམས་ཆུང་ཞིག་འབུལ་ལོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྐྱེས་པ་བཞག་སྟེ་ཇི་ཙམ་འདོད་པར་ཆོས་བསྟན་པར་བྱའོ། །དགེ་སློང་དག་བསོད་སྙོམས་ལ་ཞུགས་པ་དག་ན་བུད་མེད་ཀྱི་ཡུལ་དག་གིས་སྨྲས་པ། འཕགས་པ་ཆོས་བསྟན་དུ་གསོལ། དགེ་སློང་རྣམས་ཀྱིས་སྨྲས་པ། སྲིང་མོ་དག་སྐྱེས་པ་འགའ་ཞིག་ཁྲིད་དེ་ཤོག་།འཕགས་པ་དག་སྐྱེས་པས་ཅི་བགྱི། སྲིང་མོ་དག་བཅོམ་ལྡན་འདས་ཀྱིས་སྐྱེས་པ་བཞག་སྟེ་ཅི་ཙམ་འདོད་པར་ཆོས་བསྟན་པར་བྱའོ་ཞེས་བསླབ་པའི་གཞི་བཅའ་བར་མཛད་དོ། །འཕགས་པ་དག་ལེགས་ཏེ་བདག་ཅག་ཀྱང་ཤིན་དུ་སྦས་པ་དང ། ཤིན་དུ་བསྲུངས་པར་འགྱུར་ལ། འཕགས་པ་དག་ཀྱང་མི་བསྙེངས་པར་ཆོས་སྟོན་པར་འགྱུར་རོ་ཞེས་དེ་དག་གིས་སྐྱེས་པ་ཁྲིད་དེ་འོངས་ནས་དགེ་སློང་དག་གིས་ཀྱང་ཅི་འདོད་པར་ཆོས་བསྟན་ཏེ་དོང་ངོ ། །དྲུག་སྡེ་དག་བསོད་སྙོམས་ལ་ཞུགས་ནས་དེ་དག་གིས་བུད་མེད་ཀྱི་ཡུལ་དག་ལ་སྨྲས་པ། སྲིང་མོ་དག་འཁོད་ཅིག་དང་ཆོས་བསྟན་པར་བྱའོ། །དེ་དག་གིས་སྨྲས་པ། འཕགས་པ་དག་སྐྱེས་པ་འགའ་ཞིག་ཁྲིད་དེ་མཆིའི་བར་དུ་རེ་ཤིག་ཡུད་ཙམ་ཞིག་བཞེས་སུ་གསོལ
6.255b
དྲུག་སྡེ་དག་གིས་སྨྲས་པ། ཁྱི་དང ། སྤྲེའུ་དང ། བེའུ་དང ། ཕྱི་སྐན་དུ་ཉལ་བ་དང ། གོག་པ་དང ། ཁྱེའུ་འདུག་པ་འདི་ལས་གཞན་པའི་སྐྱེས་པ་ཅི་དགོས་ཤེས་དེ་ག་ལ་ཆོས་བསྟན་ནས་དོང་ངོ ། །དགེ་སློང་གནས་བརྟན་གནས་བརྟན་དག་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་དག་གིས་སྨྲས་པ། འཕགས་པ་དག་ཆོས་བསྟན་དུ་གསོལ། སྲིང་མོ་དག་སྐྱེས་པ་འགའ་ཞིག་ཁྲིད་དེ་ཤོག་།དེ་དག་གིས་སྨྲས་པ། འཕགས་པ་དག་ཅི་ལགས་ཁྱི་དང ། སྤྲེའུ་དང ། བེའུ་དང ། ཕྱི་རྒན་དུ་ཉལ་བ་དང ། གོག་པ་དང ། ཁྱེའུ་འདི་དག་མ་མཆིས་སམ། སྲིང་མོ་དག་ཁོ་བོ་ཅག་སྐྱེས་པ་འདི་ལྟ་བུ་དང་ཆོས་མི་སྟོན་ཏེ། ཁྱེད་ཅག་ལ་སྐྱེས་པ་འདི་ལྟ་བུ་དང་ཆོས་སྟོན་པར་བྱེད་པ་དེ་སུ་ཡིན། དེ་དག་གིས་སྨྲས་པ། འཕགས་པ་དྲུག་སྡེ་དག་གོ། །དེ་ཁོ་ནའི་ཕྱིར་དེ་དག་གི་གནས་སྐབས་དེ་འདྲའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རིག་པའི་སྐྱེས་པ་བཞག་སྟེ་ཅི་འདོད་པར་ཆོས་བསྟན་པར་བྱའོ། །བཅོམ་ལྡན་འདས་ཀྱིས་བུད་མེད་ཀྱི་ཡུལ་ལ་ཚིག་ལྔ་འམ་དྲུག་གིས་ཆོས་བསྟན་པར་བྱའོ་ཞེས་བཀའ་སྩལ་ནས། དྲུག་སྡེ་དག་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་འཇུག་པར་བྱེད་ཅིང ། ཚིག་དྲུག་གིས་ཆོས་སྟོན་པ་ན་ཡང་བསམས་བཞིན་དུ་ཚིག་བདུན་པ་ལ་འཇུག་པར་བྱེད་ནས་དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ཚིག་ལྔ་འམ་དྲུག་གིས་ཆོས་བསྟན་པར་བྱའོ་ཞེས་བཀའ་སྩལ་ན། ཁྱེད་ཅག་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་འཇུག་པར་བྱེད་ཅིང ། ཚིག་དྲུག་གིས་ཆོས་སྟོན་པ་ན་ཡང་བསམས་བཞིན་དུ་ཚིག་བདུན་པ་ལ་འཇུག་པར་བྱེད་དམ། དེ་དག་གིས་སྨྲས་པ། ཚེ་དང་ལྡན་པ་དག་གང་ལ་ཚིག་ལྔ་པ་རུང་བ་དེ་ལ་ཚིག་དྲུག་པ་ཡང་རུང་ལ། གང་ལ་ཚིག་དྲུག་པ་རུང་བ་དེ་ལ་ཚིག་བདུན་པ་ཡང་རུང་སྟེ། ཚིག་དྲུག་པ་དང ། བདུན་པས་སྐུ་འདོང་ཟོས་སམ། ཆང་འཐུངས་སམ། ཇི་ན་དམིགས་ཀྱིས་དགག་པར་བྱ། དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་བུད་མེད་ཀྱི་ཡུལ་ལ་ཚིག
6.256a
ལྔ་འམ། དྲུག་གིས་ཆོས་བསྟན་པར་བྱའོ་ཞེས་བཀའ་སྩལ་ནས། ཅིའི་ཕྱིར་དགེ་སློང་དག་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་འཇུག་པར་བྱེད་ཅིང ། ཚིག་དྲུག་གིས་ཆོས་སྟོན་པ་ན་ཡང་བསམས་བཞིན་དུ་ཚིག་བདུན་པ་ལ་འཇུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ངས་བུད་མེད་ཀྱི་ཡུལ་ལ་ཚིག་ལྔ་འམ། དྲུག་གིས་ཆོས་བསྟན་པར་བྱའོ་ཞེས་བསྟན་ན། ཁྱེད་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་འཇུག་པར་བྱེད་ཅིང ། ཚིག་དྲུག་གིས་ཆོས་སྟོན་པ་ན་ཡང་བསམས་བཞིན་དུ་ཚིག་བདུན་པ་ལ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། །དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་ལ་ཚིག་ལྔ་འམ་དྲུག་ལས་ལྷག་པའི་ཆོས་སྟོན་ན། རིག་པའི་སྐྱེས་པ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །བུད་མེད་ཀྱི་ཡུལ་ལ་ཞེས་བྱ་བ་ནི་བུད་མེད་དམ། གཞོན་ནུ་མ་ལེགས་པར
6.256b
སྨྲས་པ་དང ། ཉེས་པར་སྨྲས་པའི་ཆོས་རྣམས་ཀྱིས་དོན་ཀུན་དུ་ཤེས་པར་ནུས་པ་ལའོ། །ཚིག་ལྔ་འམ་དྲུག་ལས་ལྷག་པར་ཞེས་བྱ་བ་ནི་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་ཐལ་བར་བྱེད་པ་དང ། ཚིག་དྲུག་གིས་ཆོས་སྟོན་པ་ན་ཡང་བསམས་བཞིན་དུ་ཚིག་བདུན་པ་ལ་ཐལ་བར་བྱེད་པའོ། །ཆོས་ཤེས་བྱ་བ་ནི་སངས་རྒྱས་ཀྱིས་གསུངས་པ་འམ། སངས་རྒྱས་ཀྱི་ཉན་ཐོས་ཀྱིས་བཤད་པའོ། །སྟོན་ན་ཞེས་བྱ་བ་ནི་འཆད་ན་འོ། །རིག་པའི་སྐྱེས་པ་མ་གཏོགས་ཏེ་ཞེས་བྱ་བ་ནི་རིག་པའི་སྐྱེས་པ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་སྟེང་གི་ཁང་ཐོག་དུ་བུད་མེད་ཀྱི་ཡུལ་ལ་ཆོས་སྟོན་པར་བྱེད་ན། དེས་ཚིག་ལྔ་འམ། དྲུག་གིས་ཆོས་བསྟན་པར་བྱ་སྟེ། དགེ་སློང་གིས་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་ཐལ་བར་བྱེད་ན་ལྟུང་བྱེད་དུ་འགྱུར་རོ། །ཚིག་དྲུག་གིས་ཆོས་སྟོན་པ་ན་བསམས་བཞིན་དུ་ཚིག་བདུན་པ་ལ་ཐལ་བར་བྱེད་ན་ལྟུང་བྱེད་དུ་འགྱུར་རོ། །ཆོས་བསྟན་ནས་ཁང་ཐོག་བར་མར་ཞུགས་པ་དེའི་ཕྱི་བཞིན་འོང་ཞིང་འཕགས་པ་ཆོས་བསྟན་དུ་གསོལ་ཞེས་ཟེར་ན་དེ་ལ་སྲིང་མོ་ཁྱོད་ལ་ཆོས་བསྟན་ཟིན་ཏོ་ཞེས་བྱས་ནས། འཕགས་པ་འདིར་ཡང་ཆོས་བསྟན་དུ་གསོལ་ཞེས་ཟེར་ན་དེར་ཡང་ཚིག་ལྔ་འམ་དྲུག་གིས་ཆོས་བསྟན་པར་བྱ་སྟེ། དགེ་སློང་གིས་ཚིག་ལྔས་ཆོས་སྟོན་པ་ན་བསམས་བཞིན་དུ་ཚིག་དྲུག་པ་ལ་ཐལ་བར་བྱེད་ན་ལྟུང་བྱེད་དུ་འགྱུར་རོ། །ཚིག་དྲུག་གིས་ཆོས་སྟོན་པ་ན་བསམས་བཞིན་དུ་ཚིག་བདུན་པ་ལ་ཐལ་བར་བྱེད་ན་ལྟུང་བྱེད་དུ་འགྱུར་རོ། །འོག་གཞིའི་ས་དང ། སྒོ་ཁང་དང ། བང་རིམ་གྱི་བར་དུ་ཡང་དེ་བཞིན་དུ་སྦྱར་རོ། །བུད་མེད་ཀྱི་ཡུལ་མཁས་པའི་རང་བཞིན་ཅན་གྱིས་གོང་ནས་གོང་དུ་དྲིས་པ་གཏན་ལ་དབབ་པ་བྱས་པ་དང ། སློབ་གཉེར་གསོད་པ་དང ། ཁ་ཏོན
6.257a
ཞུ་བ་དང ། དམིགས་ཀྱིས་འདྲི་བ་དང ། དུས་ཁྲིམས་དཔོག་པ་དང ། ཡོན་བཤད་པ་བྱེད་པ་ལ་ལྟུང་བ་མེད་དོ། །དགེ་སློང་གིས་ཇི་ཙམ་འདོད་པ་བཀག་པ་དང ། ལྡབ་ལྡིབ་ཅན་དང ། སྨྲ་བ་མྱུར་བ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྟོན་པའི་ལྟུང་བྱེད་དེ་ལྔ་པ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་གང་ཟག་རྫོགས་པར་མ་བསྙེན་པ་དག་དང་ཚིག་གིས་ཆོས་འདོན་པར་བྱེད་དེ། དེས་ཀུན་དགའི་ར་བའི་མཐར་སྒྲ་མཐོན་པོ་དང ། སྒྲ་ཆེན་པོ་སྐྱེ་བོ་ཕལ་པོ་ཆེའི་ཚོགས་ཀྱི་སྒྲ་ལྟ་བུ་འདི་ལྟ་སྟེ། དཔེར་ན་བྲམ་ཟེ་རྣམས་བྲམ་ཟེའི་གསང་ཚིག་འདོན་པ་ལྟ་བུ་དང ། རྩིས་མཁན་རྣམས་རྩིས་ཀྱི་གནས་ན་སྨྲ་བ་ལྟ་བུ་གྲགས་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའི་ར་བ་ན་མཐར་དེ་དག་གི་སྒྲ་མཐོན་པོ་དང ། སྒྲ་ཆེན་པོ་སྐྱེ་བོ་ཕལ་པོ་ཆེའི་ཚོགས་ཀྱི་སྒྲ་ལྟ་བུ་དེ་གསན་ཏོ། །གསན་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཀུན་དགའི་ར་བའི་མཐའ་ན་སྒྲ་མཐོན་པོ་དང ། སྒྲ་ཆེན་པོ་སྐྱེ་བོ་ཕལ་པོ་ཆེའི་ཚོགས་ཀྱི་སྒྲ་ལྟ་བུ་འདི་ལྟ་སྟེ། དཔེར་ན་བྲམ་ཟེ་རྣམས་བྲམ་ཟེའི་གསང་ཚིག་འདོན་པ་ལྟ་བུ་དང ། རྩིས་མཁན་རྣམས་རྩིས་ཀྱི་གནས་ན་སྨྲ་བ་ལྟ་བུ་འདི་ཅི་ཡིན། བཙུན་པ་དགེ་སློང་དྲུག་སྡེ་དག་གང་ཟག་རྫོགས་པར་མ་བསྙེན་པ་དག་དང་ཚིག་གིས་ཆོས་འདོན་པར་བགྱིད་དེ། དེས་ཀུན་དགའི་ར་བའི་མཐའ་སྒྲ་མཐོན་པོ་དང ། སྒྲ་ཆེན་པོ་སྐྱེ་བོ་ཕལ་པོ་ཆེའི་ཚོགས་ཀྱི་སྒྲ་ལྟ་བུ་འདི་ལྟ་སྟེ། དཔེར་བགྱི་ན་བྲམ་ཟེ་རྣམས་བྲམ་ཟེའི་གསང་ཚིག་འདོན་པ་ལྟ་བུ་དང ། རྩིས་མཁན་རྣམས་རྩིས་ཀྱི་གནས་ན་སྨྲ་བ་ལྟ་བུ་འདི་གྲག་པར་གྱུར་ཏོ། །ཀུན་དགའ་བོ་དགེ་སློང་དག་གང་ཟག་རྫོགས་པར་མ་བསྙེན་པ་དང་ལྷན་ཅིག་ཚིག་གིས་ཆོས་འདོན་པར་བྱེད་དམ། བཙུན་པ་བགྱིད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ
6.257b
སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་གང་ཟག་རྫོགས་པར་མ་བསྙེན་པ་དང་ལྷན་ཅིག་ཚིག་གིས་ཆོས་འདོན་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གང་ཟག་རྫོགས་པར་མ་བསྙེན་པ་དང་ཚིག་གིས་ཆོས་འདོན་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །གང་ཟག་རྫོགས་པར་མ་བསྙེན་པ་དང་ཞེས་བྱ་བ་ལ་རྫོགས་པར་བསྙེན་པ་ནི་གཉིས་ཏེ། དགེ་སློང་དང་དགེ་སློང་མའོ། །དེ་ལས་གཞན་པ་ནི་རྫོགས་པར་མ་བསྙེན་པའོ། །ཚིག་གིས་ཤེས་བྱ་བ་ནི་ཚིག་མཉམ་པ་དང ། ཚིག་སྔ་བ་དང ། ཡི་གེ་མཉམ་པ་དང ། ཡི་གེ་སྔ་བས་སོ། །ཇི་ལྟར་ཚིག་མཉམ་པས་ཤེ་ན། སློབ་དཔོན་འདི་སྐད་ཅེས་སྡིག་པ་ཐམས་ཅད་མི་བྱ་སྟེ་ཞེས་འདོན་པ་ན་ཉེ་གནས་ཀྱང་དུས་གཅིག་ཏུ་སྡིག་པ་ཐམས་ཅད་མི་བྱ་སྟེ་ཞེས་འདོན་པ་སྟེ། འདི་ལྟར་ཚིག་མཉམ་པས་སོ། །ཇི་ལྟར་ཚིག་སྔ་བས་ཤེ་ན། སློབ་དཔོན་གྱིས་རེ་ཤིག་སྡིག་པ་ཐམས་ཅད་མི་བྱ་སྟེ་ཞེས་མ་བཏོན་པར་ཉེ་གནས་དགེ་བ་ཕུན་སུམ་ཚོགས་པར་བྱ་ཞེས་འདོན་པ་སྟེ། དེ་ལྟར་ཚིག་སྔ་བས་སོ། །ཇི་ལྟར་ཡི་གེ་མཉམ་པས་ཤེ་ན། སློབ་དཔོན་ཨ་ཞེས་འདོན་པ་ན་ཉེ་གནས་ཀྱང་དུས་གཅིག་ཏུ་ཨ་ཞེས་འདོན་པ་སྟེ། དེ་ལྟར་ཡི་གེ་མཉམ་པས་སོ། །ཇི་ལྟར་ཡི་གེ་སྔ་བས་ཞེ་ན། སློབ་དཔོན་གྱིས་རེ་ཤིག་ཨ་ཞེས་མ་བཏོན
6.258a
པར་ཉེ་གནས་ཨ་ཞེས་འདོན་པ་སྟེ། དེ་ལྟར་ཡི་གེ་སྔ་བས་སོ། ཆོས་ཤེས་བྱ་བ་ནི་སངས་རྒྱས་ཀྱིས་གསུངས་པ་དང ། སངས་རྒྱས་ཀྱི་ཉན་ཐོས་ཀྱིས་བཤད་པའོ། །འདོན་པ་ཞེས་བྱ་བ་ནི་འཛིན་དུ་འཛུད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཚིག་མཉམ་པས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཚིག་སྔ་བས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཚིག་མཉམ་པས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཚིག་སྔ་བས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཡི་གེ་མཉམ་པས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཡི་གེ་སྔ་བས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཡི་གེ་མཉམ་པས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་མ་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཡི་གེ་སྔ་བས་ཆོས་འདོན་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཚིག་མཉམ
6.258b
པས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཚིག་སྔ་བས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཚིག་མཉམ་པས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཚིག་སྔ་བས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཡི་གེ་མཉམ་པས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ཡི་གེ་སྔ་བས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཡི་གེ་མཉམ་པས་ཆོས་འདོན་ན་ཉེས་བྱས་སུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་ཡིད་གཉིས་ཟ་བས་ཡི་གེ་སྔ་བས་ཆོས་འདོན་ན་ཉེས་བྱས་སུ་འགྱུར་རོ། །ལྡབ་ལྡིབ་ཅན་དང ། སྨྲ་བ་མྱུར་བ་ལ་ལྟུང་བ་མེད་དོ། །ཁ་ཏོན་ཞུར་གཞུག་པ་དང ། ཡོངས་སུ་འབྲིར་འཇུག་པ་ལ་ལྟུང་བ་མེད་དོ། །རྗེས་སུ་བསྒྲགས་ཏེ་ལུང་དབོག་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འདོན་པའི་ལྟུང་བྱེད་དེ་དྲུག་པ་རྫོགས་སྷོ།། ་་་་་་་་་་།། འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །འདོད་ཆགས་དང་བྲལ་བ་མེད་པ་ཉོན་མོངས་པ་རྣམས་མ་སྤངས་པའི་ཕྱིར་དགེ་སློང་དག་དགེ་འདུན་ལྷག་མའི་ལྟུང་བ་འབྱིན་པར་བྱེད་པ་དང ། ཁ་ཅིག་ནི་ལམ་གོལ་བར་རྒས་པས་དེ་དག་གང་གི་ཚེ་དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་ཐོས་པ་དེའི་ཚེ་ན་དེ་དག་ལྟུང་བ་དེ་ཆོས་བཞིན་དུ་ཕྱིར་བྱེད་ཅིང་དེ་དག་ཡོངས་སུ་གནས་པ
6.259a
དང ། མགུ་བར་བྱ་བ་སྤྱོད་པ་ན་དགེ་འདུན་ལ་ཆུ་འབྲིམ་པའི་ཚེ་བྲམ་ཟེ་དང ། ཁྱིམ་བདག་དད་པ་ཅན་དག་གིས་སྨྲས་པ། གང་དག་རིན་པོ་ཆེ་རྟོག་པ་དག་ཀྱང་དེ་ལས་ཉེ་བར་བརྟགས་ཤིང་རིན་པོ་ཆེ་དེ་དག་སྡུད་པར་བྱེད་དོ། །དགེ་སློང་གནས་བརྟན་གནས་བརྟན་བསོད་སྙོམས་པ་འདི་དག་ཀྱང་དགེ་འདུན་ལ་ཆུ་འབྲིམ་པའི་བསོད་སྙོམས་སོགས་པར་བྱེད་དོ། །དྲུག་སྡེ་ལྟོ་མདུན་ཅན་འདི་དག་ནི་ཟ་ཞིང་འཁོད་པར་བྱེད་དོ། །དེ་དག་སྨོད་པར་བྱེད་པ་ན་དྲུག་སྡེ་དག་གིས་ཐོས་ནས་དེ་དག་གིས་སྨྲས་པ། ཤེས་ལྡན་དག་ཅི་འདི་དག་ཆོས་བཟང་པོའི་ཆོས་ཀྱིས་དགེ་འདུན་ལ་ཆུ་འབྲིམ་པར་བྱེད་སྙམ་འམ། འདི་ལྟར་འདི་དག་ནི་ཆད་པའི་ལས་བྱེད་པ་ཡིན་ནོ། །དེ་དག་གིས་དྲིས་པ། འདི་དག་གིས་ཅི་བྱས། དྲུག་སྡེ་དག་གིས་ལག་པས་བྱ་བ་མ་ཡིན་པ་བྱས་ཏེ་འདི་ལྟར་འདི་ལྟར་བྱས་སོ་ཞེས་སྨྲས་པ་དང ། དེ་དག་དགེ་སློང་གནས་བརྟན་གནས་བརྟན་གང་དག་ཡིན་པ་དེ་དག་གི་གནས་སྐབས་ཀྱང་རེ་ཤིག་འདི་འདྲ་ན་དགེ་སློང་བར་མ་དང ། གསར་བུ་གང་དག་ཡིན་པ་དེ་དག་གི་གནས་སྐབས་ཅི་འདྲ་བར་འགྱུར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དགེ་སློང་ཡོངས་སུ་གནས་པ་བྱེད་པ་དེ་དག་ཕྱི་དྲོ་དབུ་སྐྲ་དང་སེན་མོའི་མཆོད་རྟེན་དག་ལ་ལྕི་བ་འཇམ་པོའི་བྱུག་པས་ཉུག་པར་བྱེད་པ་ན་དྲུག་སྡེ་དག་གིས་དེ་དག་གི་ལྷན་ཅིག་གནས་པ་དང ། ཉེ་གནས་དག་ལ་དྲིས་པ། དགེ་ཚུལ་དག་ཁྱེད་ཀྱི་མཁན་པོ་དང ། སློབ་དཔོན་དག་གར་དོང ། དེ་དག་གིས་སྨྲས་པ། བསོད་ནམས་དག་བྱེད་དེ། བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་དག་ལ་ལྕི་བ་འཇམ་པོའི་བྱུག་པས་ཉུག་པར་བྱེད་དོ། །ཁྱེད་ཅག་ཀྱང་དེ་ལྟ་བུའི་བསོད་ནམས་དག་གྱིས་ཤིག་།ཅི་དེ་དག་ཆོས་བཟང་པོའི་ཆོས་ཀྱིས་དབུ་སྐྲ་དང་སེན་མོའི་མཆོད་རྟེན་དག་ལ་ལྕི་བ་འཇམ་པོའི་བྱུག་པས་ཉུག་པར་བྱེད་སྙམ་འམ། འདི་ལྟར་དེ་དག་ནི་ཆད་པའི་ལས་བྱེད་པ་ཡིན་ནོ། །དེ་དག་གིས་དེ་དག་ལ་དྲིས་པ། དེ་དག་གིས་ཅི་བྱས། དྲུག་སྡེ་དག་གིས་ལག་པས་བྱ་བ་མ་ཡིན་པ་བྱས་ཏེ་འདི་ལྟར་འདི་ལྟར་བྱས་སོ་ཞེས་སྨྲས་སོ། །གང་གི་ཚེ་དགེ་སློང་ཡོངས་སུ་གནས་པ་བྱེད་པ་དེ་དག་ལྟུང་བ་དེ་ལས་ལངས་པར་གྱུར་པ་དེའི་ཚེ་ན་དགེ་ཚུལ་དག་ལ་དགེ་ཚུལ
6.259b
དག་འདི་དང་འདི་གྱིས་ཤིག་ཅེས་བསྒོ་བ་དང ། དགེ་ཚུལ་དེ་དག་གིས་སྨྲས་པ། ཁྱེད་རང་ཅིའི་ཕྱིར་མི་བྱེད། ཁོ་བོ་ཅག་གིས་བྱར་མི་རུང་ངོ ། །དེ་དག་གིས་སྨྲས་པ། ཁྱེད་ཀྱིས་འདི་ལྟ་འདི་ལྟར་བྱར་རུང་ན་འདི་ཅིའི་ཕྱིར་བྱར་མི་རུང ། དེ་དག་གིས་སྨྲས་པ། དེ་ལྟ་བུ་ཡང་ཡོད་མོད་ཀྱི་འོན་ཀྱང་ཁོ་བོ་ཅག་གིས་ལྟུང་བ་དེ་ཆོས་བཞིན་དུ་ཕྱིར་བྱས་ཟིན་ཏོ། །ཁྱེད་ལ་སུས་སྨྲས། དྲུག་སྡེ་དག་གིས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་གང་ཟག་རྫོགས་པར་མ་བསྙེན་པ་ལ་གནས་ངན་ལེན་གྱི་ལྟུང་བ་བརྗོད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་འདི་སྐད་ཅེས་ལན་གདབ་པར་བྱ་སྟེ། གང་ལ་ཉེས་པ་མེད་པ་ཡིན། །སྐྱོན་མི་བྱེད་པའི་མི་གང་ཡིན། །སུ་ཞིག་ཀུན་དུ་རྨོངས་མི་འགྱུར། །སུ་ཞིག་རྟག་ཏུ་བརྟན་པར་གསུངས། །ཡང་དག་མཁྱེན་པས་རྣམ་གྲོལ་བ། །རྫོགས་པའི་སངས་རྒྱས་རབ་མཁྱེན་པ། །དེ་ལ་ཉེས་པ་མེད་པ་ཡིན། །སྐྱོན་མི་བྱེད་པའི་མི་དེ་ཡིན། །དེ་ནི་ཀུན་དུ་རྨོངས་མི་འགྱུར། །དེ་ནི་རྟག་ཏུ་བརྟན་པར་གསུངས། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་གང་ཟག་རྫོགས་པར་མ་བསྙེན་པ་ལ་གནས་ངན་ལེན་གྱི་ལྟུང་བ་བརྗོད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན
6.260a
ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟག་རྫོགས་པར་མ་བསྙེན་པ་ལ་གནས་ངན་ལེན་གྱི་ལྟུང་བ་བརྗོད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །མཉན་ཡོད་ན་དགེ་སློང་འཕྲལ་བ་དང ། དགེ་སློང་མ་གསལ་མ་ཞེས་བྱ་བ་ཅི་ནས་ཀྱང་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེད་ཀྱིས་དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བྱེད་པའི་དགེ་སློང་བསྐོ་བར་བྱ་སྟེ། ཁྱིམ་རྣམས་སུ་སོ་སོར་གོ་བར་བྱེད་པའི་དགེ་སློང་ཆོས་ལྔ་དང་མི་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། གོ་བར་བྱས་པ་དང་མ་བྱས་པའི་ཁྱིམ་མི་ཤེས་པའོ། །ཁྱིམ་རྣམས་སུ་སོ་སོར་གོ་བར་བྱེད་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། གོ་བར་བྱ་བ་དང ། མ་བྱས་པའི་ཁྱིམ་ཤེས་པའོ། །འདི་ལྟར་བསྐོ་བར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་ཇེ་དང་པོར་སྤྲོ་བར་བྱ་སྟེ། དགེ་སློང་མིང་འདི་ཞེས་བྱ་བ་ཁྱོད་དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བྱེད་པར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང
6.260b
འཕྲལ་བ་དང ། དགེ་སློང་མ་གསལ་མ་ཅི་ནས་ཀྱང་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད་དེ། །དགེ་སློང་མིང་འདི་ཞེས་བགྱི་བ་འདི་དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བགྱིད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་ཁྱིམ་རྣམས་སུ་སོ་སོར་གོ་བར་བགྱིད་པར་བསྐོ་སྟེ། དགེ་སློང་མིང་འདི་ཞེས་བགྱི་བ་འདི་དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བགྱིད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཕྲལ་བ་དང ། དགེ་སློང་མ་གསལ་མ་ཅི་ནས་ཀྱང་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟར་དེ་ལྟར་ཁྱིམ་རྣམས་སུ་སྤྱོད་པར་བགྱིད་ནས་དགེ་སློང་མིང་འདི་ཞེས་བགྱི་བ་འདི་དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བགྱིད་པར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་ཁྱིམ་རྣམས་སུ་སོ་སོར་གོ་བར་བགྱིད་པར་བསྐོ་སྟེ། དགེ་སློང་མིང་འདི་ཞེས་བགྱི་བ་འདི་དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བགྱིད་ན་ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་ཁྱིམ་རྣམས་སུ་སོ་སོར་གོ་བར་བགྱིད་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུང་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་ཁྱིམ་རྣམས་སུ་སོ་སོར་གོ་བར་བགྱིད་པར་བསྐོས་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་དག་ངས་དགེ་སློང་ཁྱིམ་རྣམས་སུ་སོ་སོར་གོ་བར་བྱེད་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ཁྱིམ་རྣམས་སུ་སོ་སོར་གོ་བར་བྱེད་པས་འདི་སྐད་ཅེས་བརྗོད་པར་བྱ་སྟེ། ་
6.261a
ཚེ་དང་ལྡན་པ་དག་ཁྱེད་ཉོན་ཅིག་།ཁྱིམ་རྣམས་སུ་ཁྱིམ་སུན་པར་བྱེད་པ་དང ། གནས་རྣམས་སུ་གནས་སུན་པར་བྱེད་པ་འདི་ལྟ་སྟེ། དཔེར་ན་འབྲས་ས་ལུའི་ཞིང་ཕུན་སུམ་ཚོགས་པ་ལ་སེར་བ་འཁོར་ལོ་མི་བཟད་པ་བབ་ན་འདི་ལྟར་འབྲས་ས་ལུ་དེ་ཉིད་ཤིན་ཏེ་མ་དང ། ཆུད་ཟ་བ་དང ། ཚུལ་མ་ཡིན་པས་མ་རུང་བར་འགྱུར་བ་དང ། བུ་རམ་ཤིང་གི་ཞིང་ཕུན་སུམ་ཚོགས་པ་ལ་ནད་ཀྱི་རིགས་དམར་པོ་ཞེས་བྱ་བ་བྱུང་ན་འདི་ལྟར་བུ་རམ་ཤིང་དེ་ཉིད་ཤིན་ཏེ་མ་དང ། ཆུད་ཟ་བ་དང ། ཚུལ་མ་ཡིན་པས་མ་རུང་བར་འགྱུར་བ་ལྟ་བུ་དག་ཡོད་ཀྱིས། ཚེ་དང་ལྡན་པ་དག་ཁྱེད་ཅག་དགེ་སློང་འདི་དང་དགེ་སློང་མ་འདིས་བསྟན་པའི་ཚོད་མ་འཛིན་ཅིག་།འདི་ལྟར་དགེ་སློང་འདི་དང ། དགེ་སློང་མ་འདི་ནི་ཡོས་ཚིག་པ་བཞིན་དུ་ཆོས་འདུལ་བ་འདི་ལ་སྐྱེར་མི་རུང་བའི་ཆོས་ཅན་ཡིན་གྱིས། བཅོམ་ལྡན་འདས་དང ། གནས་བརྟན་ཀུན་ཤེས་ཀཽཎྜི་ནྱ་དང ། རླངས་པ་དང ། རྟ་ཐུལ་དང ། བཟང་ལྡན་དང ། གནས་བརྟན་གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟངས་དང ། ཤཱ་རིའི་བུ་དང ། མཽད་གལ་གྱི་བུ་ཆེན་པོ་དང ། གསུས་པོ་ཆེ་ཆེན་པོ་དང ། སྐུལ་བྱེད་ཆེན་པོ་དང ། ཀཱ་ཏྱཱའི་བུ་ཆེན་པོ་དང ། ལྟེང་རྒྱས་འོད་སྲུང་དང ། ཆུ་ཀླུང་འོད་སྲུང་དང ། ག་ཡཱ་འོད་སྲུང་དང ། འགབ་མ་འོད་སྲུང་དང ། འོད་སྲུང་ཆེན་པོ་དང ། དགའ་བྱེད་དང ། ཀིམ་པི་ལ་དང ། ལེགས་སྐྱེས་དང ། ནམ་གྲུ་དང ། ས་རི་དང ། ཉེ་སྡེ་དང ། སོམ་ཉི་ནམ་གྲུ་དང ། ལམ་བརྟན་དང ། ལམ་ཕྲན་བརྟན་དང ། བརྟག་པའི་ཤིང་རྟ་དང ། ཆེན་པོ་པ་དང ། གྲགས་སྦྱིན་དང ། དེ་དག་ལ་སོགས་པ་དགེ་སློང་གནས་བརྟན་གནས་བརྟན་རྣམས་ལ་ལྟོས་ཤིག་ཅེས་བརྗོད་པར་བྱའོ། །དགེ་སློང་ཁྱིམ་རྣམས་སུ་སོ་སོར་གོ་བར་བྱེད་པ་དེ་ཁྱིམ་རྣམས་སུ་སོ་སོར་གོ་བར་བྱེད་དུ་སོང་བ་དང ། དགེ་སློང་འཕྲལ་བས་དགེ་འདུན་གྱིས་དགེ་སློང་མིང་འདི་ཞེས་བྱ་བ་དེ་ཁྱིམ་རྣམས་སུ་སོ་སོར་གོ་བར་བྱེད་པར་བསྐོས་སོ་ཞེས་ཐོས་ནས་དེ་དེའི་གན་དུ་སོང་སྟེ་སྨྲས་པ། ཁྱོད་ཁྱིམ་རྣམས་སུ་ཁོ་བོ་སུན་འབྱིན་དུ་འགྲོ་འམ། དགེ་འདུན་གྱི་ཆོས་དང་ལྡན་པའི་བཀའ་བསྒྲུབ་པར་བྱའོ། །
6.261b
ཁོ་བོས་དེ་དང་དེ་བྱར་རུང་ན་ཁྱོད་ཀྱི་ལྟོ་དྲལ་ཏེ་རྒྱུ་མ་དག་གིས་རྒྱལ་བྱེད་ཀྱི་ཚལ་དཀྲི་བར་བྱ་བ་དང ། མགོ་ཡང་འབྲུ་མར་གྱི་སྣོད་བཞིན་དུ་རྒྱལ་བྱེད་ཀྱི་ཚལ་གྱི་སྒོར་དཔྱང་ལ་གདགས་པར་མི་རུང་བ་ཅི་ཡོད། དགེ་སློང་དེས་དགེ་སློང་རྣམས་ལ་འཕྲལ་བས་བདག་སྤྱོས་ཏེ། དེ་ན་རེ་ཁོ་བོས་དེ་དང་དེ་བྱར་རུང་ན་ཁྱོད་ཀྱི་ལྟོ་དྲལ་ཏེ་རྒྱུ་མ་དག་གིས་རྒྱལ་བྱེད་ཀྱི་ཚལ་དཀྲི་བར་བྱ་བ་དང ། མགོ་ཡང་འབྲུ་མར་གྱི་སྣོད་བཞིན་དུ་རྒྱལ་བྱེད་ཀྱི་ཚལ་གྱི་སྒོར་དཔྱང་ལ་གདགས་པར་མི་རུང་བ་ཅི་ཡོད་ཅེས་ཟེར་གྱིས། བདག་དེ་ཁྱིམ་རྣམས་སུ་སོ་སོར་གོ་བར་བྱེད་པར་མི་སྤྲོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མི་གཏི་མུག་ཅན་དེས་གང་ཟག་ནི་གསོད་པར་ནུས་ཀྱི། དགེ་འདུན་ནི་མི་ནུས་པས་དེའི་ཕྱིར་དགེ་འདུན་གྱིས་ཁྱིམ་རྣམས་སུ་སོ་སོར་གོ་བར་བྱའོ། །འདི་ལྟར་སོ་སོར་གོ་བར་བྱ་སྟེ། གསོལ་བ་འབའ་ཞིག་གི་ལས་བྱའོ། །དེ་ཡང་འདི་ལྟར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་ཅིག་གིས་གསོལ་བ་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཕྲལ་བ་འདི་དང ། དགེ་སློང་མ་གསལ་མ་འདི་ཅི་ནས་ཀྱང་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད། དགེ་སློང་འཕྲལ་བ་དང ། དགེ་སློང་མ་གསལ་མ་ཅི་ནས་ཀྱང་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད་ཀྱང ། དགེ་སློང་འཕྲལ་བ་དང ། དགེ་སློང་མ་གསལ་མ་ཁྱིམ་རྣམས་སུ་སོ་སོར་གོ་བར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་འཕྲལ་བ་དང ། དགེ་སློང་མ་གསལ་མ་ཅི་ནས་ཀྱང་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད
6.262a
པར་བགྱིད་པར་གང་གིས་མཐོང་ཞིང་གང་དུ་མཐོང་བ་དེས་ཁྱིམ་དེར་ཁྱེད་དགེ་སློང་འདི་དང ། དགེ་སློང་མ་འདིས་བསྟན་པའི་ཚོད་མ་འཛིན་ཅིག་།དགེ་སློང་འདི་དང ། དགེ་སློང་མ་འདི་ནི་ཡོས་ཚིག་པ་བཞིན་དུ་ཆོས་འདུལ་བ་འདི་ལ་སྐྱེར་མི་རུང་བའི་ཆོས་ཅན་ཡིན་གྱིས། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ལ་ལྟོས་ཤིག་ཅེས་སོ་སོར་གོ་བར་བགྱིད་དུ་སྩལ་ཏོ། །འདི་ནི་གསོལ་བའོ། །བཅོམ་ལྡན་འདས་ཀྱིས་སོ་སོར་རིག་པར་ཁྱིམ་དག་ཏུ་སོ་སོར་གོ་བར་བྱའོ་ཞེས་བཀའ་སྩལ་ན། དེ་དག་སོ་སོར་རིག་པ་དང ། སོ་སོར་མ་རིག་པའི་ཁྱིམ་དག་ཏུ་སོ་སོར་གོ་བར་བྱེད་པ་ན། དེ་དག་བསོད་སྙོམས་ཀྱིས་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སོ་སོར་རིག་པའི་ཁྱིམ་དག་ཏུ་སོ་སོར་གོ་བར་བྱའི། སོ་སོར་མ་རིག་པའི་ཁྱིམ་དག་ཏུ་སོ་སོར་གོ་བར་མི་བྱ་སྟེ། དེ་ལྟ་བས་ན་དགེ་འདུན་གྱིས་གནང་བ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གང་ཟག་རྫོགས་པར་མ་བསྙེན་པ་ལ་གནས་ངན་ལེན་གྱི་ལྟུང་བ་བརྗོད་ན་དགེ་འདུན་གྱིས་གནང་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །གང་ཟག་རྫོགས་པར་མ་བསྙེན་པ་ལ་ཞེས་བྱ་བ་ལ་རྫོགས་པར་བསྙེན་པ་ནི་གཉིས་ཏེ། དགེ་སློང་དང ། དགེ་སློང་མའོ། །དེ་ལས་གཞན་པ་ནི་རྫོགས་པར་མ་བསྙེན་པའོ། །
6.262b
གནས་ངན་ལེན་ཅེས་བྱ་བ་ལ་གནས་ངན་ལེན་ནི་གཉིས་ཏེ། ཕམ་པར་འགྱུར་བ་ཀུན་ནས་སློང་བ་དང ། དགེ་འདུན་ལྷག་མ་ཀུན་ནས་སློང་བའོ། །དེ་ཅིའི་ཕྱིར་དེ་དག་གནས་ངན་ལེན་ཅེས་བྱ་ཞེ་ན། ངོ་བོ་ཉིད་ལས་དང ། ཀུན་ནས་སློང་བ་ལས་སོ། །ལྟུང་བ་བརྗོད་ན་ཞེས་བྱ་བ་ནི་སྨྲ་ནའོ། །དགེ་འདུན་གྱིས་གནང་བ་མ་གཏོགས་ཏེ་ཞེས་བྱ་བ་ནི་དགེ་འདུན་གྱིས་གནང་བ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་སོ་སོར་མ་རིག་པའི་ཁྱིམ་དག་ཏུ་སོ་སོར་མ་རིག་པར་འདུ་ཤེས་པས་དགེ་སློང་སོ་སོར་གོ་བར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་སོ་སོར་མ་རིག་པའི་ཁྱིམ་དག་ཏུ་སོ་སོར་མ་རིག་པར་ཡིད་གཉིས་ཟ་བས་དགེ་སློང་སོ་སོར་གོ་བར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་སོ་སོར་རིག་པའི་ཁྱིམ་དག་ཏུ་སོ་སོར་མ་རིག་པར་འདུ་ཤེས་པས་དགེ་སློང་སོ་སོར་གོ་བར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་སོ་སོར་རིག་པའི་ཁྱིམ་དག་ཏུ་སོ་སོར་མ་རིག་པར་ཡིད་གཉིས་ཟ་བས་དགེ་སློང་སོ་སོར་གོ་བར་བྱེད་ན་ཉེས་བྱས་སུ་འགྱུར་རོ། །དྲིལ་བསྒྲགས་པ་ལ་ནི་ལྟུང་བ་མེད་དོ། །ངོས་ལ་རི་མོར་བྲིས་པ་ཕན་ཆད་ལ་ཡང་ལྟུང་བ་མེད་དོ། །ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས་ཅད་ཀྱིས་ཀྱང་ཤེས་སོ་སྙམ་ནའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གནས་ངན་ལེན་བརྗོད་པའི་ལྟུང་བྱེད་དེ་བདུན་པ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་ཉ་པ་ལྔ་བརྒྱ་ཆུ་ཀླུང་ཡིད་འོང་ལྡན་ལ་རྟེན་ཅིང་འཁོད་དོ། །དེ་དག་ལ་རྒྱ་མོ་སྤྱོད་པ་དང ། སྤྱོད་པ་ཆེན་མོ་ཞེས་བྱ་བ་གཉིས་ཤིག་ཡོད་དོ། །དེ་དག་ལན་འགའ་ནི་རྒྱ་མོ་སྤྱོད་པ་འཇུག་པར་བྱེད་ལ། ལན་འགའ་ནི་སྤྱོད་པ་ཆེན
6.263a
མོ་འཛུད་པར་བྱེད་དེ། གང་གི་ཚེ་ཉ་དག་ཉོ་བ་མེད་པ་དེའི་ཚེ་ནི་རྒྱ་མོ་སྤྱོད་པ་འཇུད་པར་བྱེད་ལ། གང་གི་ཚེ་ཉ་དག་ཉོ་བ་ཡོད་པ་དེའི་ཚེ་ནི་སྤྱོད་པ་ཆེན་མོ་འཛུད་པར་བྱེད་དོ། །ཇི་ཙམ་དུས་གཞན་ཞིག་ན་ཡངས་པ་ཅན་དུ་དུས་སྟོན་བྱུང་ནས་དེ་དག་གིས་རྒྱ་མོ་གཉིས་ཀ་བཅུག་སྟེ། ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་བཅུག་སྟེ། ཉིས་བརྒྱ་ལྔ་བཅུས་ནི་སྤྱོད་པ་ཆེན་མོ་བཅུག་གོ། །གང་དག་གིས་རྒྱ་མོ་སྤྱོད་པ་བཅུག་པ་དེ་དག་གིས་ནི་ཉ་དང ། རུས་སྦལ་དང ། སྦལ་པ་དང ། ཆུ་སྲིན་བྱིས་པ་གསོད་པ་དང ། ཉ་ཁྱི་བ་ལ་སོགས་པ་མང་པོ་དག་འདི་ལྟ་སྟེ། དཔེར་ན་ཏིལ་དང ། འབྲས་ཐུག་པོ་ཆེ་དང ། རྒྱ་ཤུག་དང ། རྒྱ་སྲན་ལ་སོགས་པ་བཞིན་དུ་ཕུང་པོ་ཆེན་པོ་རྣམ་པར་བཞག་གོ། །གང་དག་གིས་རྒྱ་མོ་སྤྱོད་པ་ཆེན་མོ་བཅུག་པ་དེ་དག་གིས་ནི་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པ་ཆུ་སྲིན་ཉའི་རིགས་བོང་ཚོད་ཆེན་པོ་ཉལ་བ་ཟིན་ནས་དེ་དག་གིས་དེ་དྲང་བར་བརྩམས་སོ། །དེ་དག་གིས་དྲངས་པ་ན་དེ་སད་ནས་ཉ་བ་ཉིས་བརྒྱ་ལྔ་བཅུ་པོ་དེ་དག་དང ། རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་ཞུགས་སོ། །ཉ་བ་དེ་དག་གིས་ཉ་བ་ཉིས་བརྒྱ་ལྔ་བཅུ་པོ་གཞན་དག་ལ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང ། བདག་ཅག་ཁྱེར་གྱིས་རམ་མདའ་ལོག་ཤིག་ཅེས་བྱས་སོ། །དེ་དག་གིས་ཐོས་ནས་ཉ་བ་ཉིས་བརྒྱ་ལྔ་བཅུ་པོ་དག་ཀྱང་ལྷགས་ཏེ་དེ་ཉིད་ལ་རུབ་པ་དང ། དེས་ཉ་བ་ལྔ་བརྒྱ་དང་རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་ཞུགས་ནས་གཟུང་བར་མ་ནུས་སོ། །སྐྱབས་མེད་པ་དེ་དག་གིས་ཀུན་དུ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང ། བདག་ཅག་ཁྱེར་གྱིས་གྲོགས་གྱིས་ཤིག་ཅེས་རམ་མདའ་བ་བཟློག་པ་དང ། ལས་མ་མཐོང་བའི་མི་བ་ལང་རྫི་དག་དང ། ཕྱུགས་རྫི་དག་དང ། ཤིང་ཐུན་དག་དང ། རྩཝ་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་དང ། གཞན་ཡང་སྲོག་ཆགས་བརྒྱ་སྟོང་ཕྲག་དུ་མ་དག་ལོག་ནས་དེ་དག་གིས་ལུས་སྨས་པ་དང ། རྣམ་པར་སྨས་པ་དག་གིས་རྒྱ་མོ་རལ་བ་དང ། རབ་ཏུ་རལ་བས་ཆུ་སྲིན་དེ་ཆུ་ནས་སྐམ་ལ་ཕྱུང་ངོ ། །དེ་ལ་མགོ་བཅཝ་བརྒྱད་དང ། མིག་སུམ་བཅུ་རྩ་དྲུག་ཡོད་དེ། དེའི་མགོ་ལ་ལ་ནི་གླང་པོ
6.263b
ཆེའི་མགོ་འདྲ། ལ་ལ་ནི་རྟའི་མགོ་འདྲ། ལ་ལ་རྔ་མོའི་མགོ་དང ། བོང་བུའི་མགོ་དང ། བ་ལང་གི་མགོ་དང ། སྤྲེའུའི་མགོ་དང ། སེང་གེའི་མགོ་དང ། སྟག་གི་མགོ་དང ། དོམ་གྱི་མགོ་དང ། དྲེད་མོའི་མགོ་དང ། གུང་གི་མགོ་དང ། བྱི་ལའི་མགོ་དང ། རའི་མགོ་དང ། ལུག་གི་མགོ་དང ། རི་དགས་ཀྱི་མགོ་དང ། མ་ཧེའི་མགོ་དང ། ཕག་གི་མགོ་དང ། ཁྱིའི་མགོ་འདྲའོ། །ཀུན་དུ་ཆུ་ཀླུང་ཡིད་འོང་ལྡན་པའི་ཉ་བ་ལྔ་བརྒྱས་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པའི་ཆུ་སྲིན་ཉའི་རིགས་བོང་ཚོད་ཆེན་པོ་ཞིག་རྒྱ་མོ་སྤྱོད་པ་ཆེན་མོས་ཟིན་ཏེ་ཆུ་ནས་སྐམ་ལ་ཕྱུང་ཞིང་དེ་ལ་མགོ་བཅཝ་བརྒྱད་དང ། མིག་སུམ་བཅུ་སོ་དྲུག་ཡོད་དོ་ཞེས་སྒྲས་ཁྱབ་པར་གྱུར་ཏོ། །དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མ་དག་ཆུ་ཀླུང་ཡིད་འོང་ལྡན་གྱི་འགྲམ་དུ་ལྷགས་ཏེ། ཁ་ཅིག་ནི་ལྟད་མོ་སྐྱེས་པར་གྱུར། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བར་གྱུར་ཏོ། །རྫོགས་བྱེད་ལ་སོགས་པ་སྟོན་པ་དྲུག་པོ་ཡངས་པ་ཅན་ན་རྟེན་ཅིང་གནས་པ་དེ་དག་ཀྱང་ལྟད་མོ་སྐྱེས་ཏེ་དེར་ལྷགས་སོ། །སྐྱེ་བོའི་ཚོགས་ཆེན་པོ་ཡང་ཡ་མཚན་སྐྱེས་ཏེ་མིག་ཚུགས་སུ་རྟོག་ཅིང་ཤེས་ལྡན་དག་འདིའི་མགོ་ལ་ལ་ནི་གླང་པོ་ཆེའི་མགོ་འདྲ་ལ་དེ་ནས་རྟོག་པར་བྱེད། འདིའི་མགོ་ལ་ལ་ནི་ཁྱིའི་བར་གྱི་མགོ་འདྲ་ལ་དེ་ནས་རྟོག་པར་བྱེད་དོ་ཞེས་ཀྱང་ཟེར་རོ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང ། མ་གཟིགས་པ་དང ། མ་རིག་པ་དང ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་ཤེས་བྱ་བ་ནས། བཅོམ་ལྡན་འདས་ཀྱིས་ཉ་བ་ལྔ་བརྒྱ་པོ་དེ་དག་རབ་ཏུ་ཕྱུང་རྫོགས་པར་བསྙེན་པར་མཛད་པའི་བར་དུ་སྔར་ཕམ་པར་འགྱུར་བ་བཞི་པའི་སྐབས་སུ་བསྟན་པ་བཞིན་དུ་རྒྱས་པར་སྦྱར་རོ། །དེ་ནས་དུས་གཞན་ཞིག་ན་ཆུ་ཀླུང་ཡིད་འོང་ལྡན་གྱི་འགྲམ་གྱི་དགེ་སློང་ལྔ་བརྒྱ་པོ་དེ་དག་གིས་གདོས་བུ་དང ། ཕོ་ལོང་གི་སྦྱོར་བས་སྤྲོ་བར་བྱེད། འབད་པར་བྱེད། རྩོལ་བར་བྱེད་པ་དག་གིས་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས
6.264a
ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེའི་ཚེ་ན་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་དག་ལ་ལྟ་སྨོས་ཀྱང་ཅི་དགོས་པ་བྱུང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ལྟར་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་གིས་དགེ་སློང་དག་ཁྱེད་ཅག་ཚུར་ཤེག་ལ་སྨོས་འདྲིན་ཇི་ལྟ་བ་དང ། ཕེབས་པར་སྨྲ་བ་ཇི་ལྟ་བ་དང ། འགྲོགས་བཤེས་ཇི་ལྟ་བས་ཡངས་པ་ཅན་ཡི་ཉེ་འཁོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་ལོང་ཤིག་།ང་ཡང་འོད་མ་ཅན་གྱི་གྲོང་འདི་ཉིད་དུ་བསྙེན་བཀུར་བ་དགེ་སློང་ཀུན་དགའ་བོ་དང་དབྱར་གནས་པར་ཁས་ལེན་གྱིས། ཐམས་ཅད་ནི་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ ། །དགེ་སློང་དག་གིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་སྨོས་འདྲིན་ཇི་ལྟ་བ་དང ། ཕེབས་པར་སྨྲ་བ་ཇི་ལྟ་བ་དང །
6.264b
འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་སོ། །བཅོམ་ལྡན་འདས་ཀྱང་འོད་མ་ཅན་གྱི་གྲོང་དེ་ཉིད་དུ་བསྙེན་བཀུར་བ་ཚེ་དང་ལྡན་པ་ཀུན་དགའ་བོ་དང་དབྱར་གནས་པར་ཞལ་གྱིས་བཞེས་སོ། །དེ་ནས་དགེ་སློང་ལྔ་བརྒྱ་པོ་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ན། འདི་ན་བདག་ཅག་ལ་ཉེ་དུ་འགའ་ཡང་མེད་དེ་ཉ་བའི་གྲོང་ན་བདག་ཅག་གི་ཉེ་དུ་དག་འཁོད་ཀྱིས་བདག་ཅག་ཉ་བའི་གྲོང་དུ་དོང་སྟེ་ཉེ་དུ་རྣམས་བལྟས་ནས་ཉ་བའི་གྲོང་གི་ཉེན་ཀོར་དུ་ལོ་མ་དང ། འདབ་མའི་སྤྱིལ་བུ་དག་བྱས་ཏེ་དབྱར་གནས་པར་ཁས་བླང་བར་བྱ་གོར་མ་ཆག་སྙམ་མོ། །དེ་ནས་ཆུ་ཀླུང་ཡིད་འོང་ལྡན་གྱི་འགྲམ་གྱི་དགེ་སློང་ལྔ་བརྒྱ་པོ་དེ་དག་འདི་སྙམ་དུ་སེམས་ཏེ། བདག་ཅག་གིས་སྔོན་ནི་ཉ་བའི་གྲོང་དུ་དོང་སྟེ་ཉེ་དུ་རྣམས་ལ་གཅིག་གིས་གཅིག་གི་ཡང་དག་པ་མ་ཡིན་པའི་ཡོན་ཏན་བསྒྲག་པ་བྱས་པས་ད་ནི་གཅིག་གིས་གཅིག་གི་ཡང་དག་པའི་ཡོན་ཏན་བསྒྲག་པར་བྱའོ་སྙམ་ནས་དགེ་སློང་ལྔ་བརྒྱ་པོ་དེ་དག་ཉ་བའི་གྲོང་དུ་དོང་སྟེ་ཉེ་དུ་དག་བལྟས་ནས་ཉ་བའི་གྲོང་གི་ཉི་ཀོར་དུ་ལོ་མ་དང ། འདབ་མའི་སྤྱིལ་བུ་དག་བྱས་ཏེ་དབྱར་གནས་པར་ཁས་བླངས་སོ། །དེ་དག་གི་ཉེ་དུ་དག་ཉེ་བར་འོངས་པར་གྱུར་ནས་དེ་དག་གིས་ཉེ་དུ་ཉེ་བར་འོངས་པ་དེ་དག་ལ་སྨྲས་པ། ཉེ་དུ་དག་ཁྱེད་ཅག་གང་དག་གི་གྲོང་ཚིགས་ན་དགེ་སློང་གི་དགེ་འདུན་ཡོན་གྱི་གནས་འདི་ལྟ་བུ་འདི་ལྟར་དབྱར་གནས་པར་ཁས་བླངས་པར་གྱུར་པའི་ཉེ་དུ་དེ་དག་གིས་ནི་རྙེད་པ་ལེགས་པར་རྙེད་པ་ཡིན་ཏེ། དགེ་སློང་འདི་ནི་མི་རྟག་པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས་དང ། སྤོང་བའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་སྡུག་པའི་འདུ་ཤེས་དང །
6.265a
རྣམ་པར་སྔོས་པའི་འདུ་ཤེས་དང ། རྣམ་པར་རྣགས་པའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར་འབུས་གཞིགས་པའི་འདུ་ཤེས་དང ། རྣམ་པར་ཟོས་པའི་འདུ་ཤེས་དང ། རྣམ་པར་དམར་བའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་གོང་གི་འདུ་ཤེས་དང ། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང ། །གཉིས་པ་དང ། གསུམ་པ་དང ། བཞི་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང ། རྒྱུན་དུ་ཞུགས་པའི་འབྲས་བུ་དང ། ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། རྫུ་འཕྲུལ་གྱི་ཡུལ་དང ། ལྷའི་རྣ་བ་དང ། སེམས་ཡོངས་སུ་ཤེས་པ་དང ། སྔོན་གྱི་གནས་དང ། འཆི་འཕོ་དང་སྐྱེ་བ་དང ། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉིས་ཀའི་ཆ་ལས་རྣམ་པར་གྲོལ་བ་ཡིན་ནོ། །དེ་དག་གིས་སྨྲས་པ། འཕགས་པ་དག་ཁྱེད་ཀྱིས་ཡོན་ཏན་གྱི་ཚོགས་དེ་ལྟ་བུ་དག་ཐོབ་བམ། ཐོབ་བོ། །འཇིག་རྟེན་ནི་ཡོན་ཏན་ལ་དགའ་བ་ཡིན་པས་རེ་ཤིག་རང་གི་བུ་དག་ལས་ཀྱང་ཕྲོགས་ཏེ་དེ་དག་ལ་བསོད་སྙོམས་སྦྱིན་པ་དང་བྱ་བར་སེམས་སོ། །སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་ཉན་ཐོས་རྣམས་ཀྱི་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོའི་ཉ་ལ་དབྱར་ཉེ་བར་སྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཉ་ལའོ། །དེ་ལ་གང་དག་དབྱར་ཟླ་འབྲིང་པོའི་ཉ་ལ་དབྱར་ཉེ་བར་སྒྲུབ་པའི་ཚེ་གདམས་ངག་མནོས་ཏེ། གྲོང་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དག་ཏུ་དབྱར་གནས་པར་ཁས་ལེན་པ་དེ་དག་ནི་སྟོན་ཟླ་འབྲིང་པོའི་ཟླ་བ་ཉ་ལ་ལྷགས་ནས་ཇི་ལྟར་ཐོབ་པ་ནི་བརྗོད་པར་བྱེད། མ་ཐོབ་པ་ནི་ཐོབ་པར་བྱ་བའི
6.265b
ཕྱིར་འོག་ཏུ་འདྲེ་བར་བྱེད་དོ། །དེ་ནས་དགེ་སློང་གང་དག་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་པ་དེ་དག་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང ། རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པས་ལྷུང་བཟེད་དང ། ཆོས་གོས་ཐོགས་ཏེ་འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་འདོང་བ་ན། མཐར་གྱིས་རྒྱུ་ཞིང་འདོང་བའི་ཚེ་འོད་མ་ཅན་གྱི་གྲོང་དུ་ཕྱིན་པ་དང ། ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པ་དང་བཅས་པ་ཉིད་ཀྱི་ཚིག་གིས་བསུ་ནས་ལྷུང་བཟེད་དང ། ཆོས་གོས་དང ། ཁར་བ་དང ། གཏུར་བུ་དང ། རིལ་བ་སྤྱི་བླུགས་དང ། འབྲུ་མར་སྣོད་དང ། ཞཝ་དང ། ལྷམ་ཡུ་ཆད་དང ། མཆིལ་ལྷམ་ལེན་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་ཚུར་ཤེག་།འོངས་པ་ལེགས་སོ། །ཚེ་དང་ལྡན་པ་དག་ཁྱེད་ཅག་གང་ནས་ད་ལྟར་འདིར་འོངས། ཁྱེད་ཅག་གང་དུ་དབྱར་གནས་པར་ཁས་བླངས། ཚེ་དང་ལྡན་པ་ཀུན་དགའ་བོ་བདག་ཅག་སྤོང་བྱེད་ཀྱི་གྲོང་ནས་འདིར་འོངས་སོ། །བདག་ཅག་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་སོ། །ཚེ་དང་ལྡན་པ་དག་ཇི་ལྟར་སྤོང་བྱེད་ཀྱི་གྲོང་དུ་བདེ་བ་ལ་རེག་པར་དབྱར་གནས་པར་ཁས་བླངས་སམ། ཁྱེད་ཅག་བསོད་སྙོམས་ཀྱིས་ངལ་བར་མ་གྱུར་ཏམ། ཚེ་དང་ལྡན་པ་ཀུན་དགའ་བོ་བདག་ཅག་སྤོང་བྱེད་ཀྱི་གྲོང་དུ་ཏེ་པོར་བདེ་བ་ལ་རེག་པར་དབྱར་གནས་པར་ཁས་བླངས་མོད་ཀྱི། བདག་ཅག་བསོད་སྙོམས་ཀྱིས་ངལ་བར་གྱུར་ཏོ། །ཚེ་དང་ལྡན་པ་དག་དེ་ཁོ་ན་ལྟར་སྣང་སྟེ། འདི་ལྟར་བསོད་སྙོམས་ཀྱིས་བྲེལ་བས་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པ་དང ། ལྤགས་པ་དང ། ཤ་དང ། ཁྲག་བྲི་བར་གྱུར་ཏོ། །དགེ་སློང་གང་དག་ཉ་བའི་གྲོང་གི་ཉེན་ཀོར་དུ་དབྱར་གནས་པར་ཁས་བླངས་པ་དེ་དག་ཀྱང་དབྱར་གྱི་ཟླ་བ་གསུམ་པོ་དག་འདས
6.266a
ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང ། ཚོ་བ་དང ། ལྤགས་པ་དང ། ཤ་དང ། ཁྲག་རྒྱས་པས་ལྷུང་བཟེད་དང ། ཆོས་གོས་ཐོགས་ཏེ་འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་འདོང་བ་ན་མཐར་གྱིས་རྒྱུ་ཞིང་འདོང་བའི་ཚེ་འོད་མ་ཅན་གྱི་གྲོང་དུ་ཕྱིན་པ་དང ། ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པ་དང་བཅས་པ་ཉིད་ཀྱི་ཚིག་གིས་བསུ་ནས་ལྷུང་བཟེད་དང ། ཆོས་གོས་དང ། ཁར་བ་དང ། གཏུར་བུ་དང ། རིལ་བ་སྤྱི་བླུགས་དང ། འབྲུ་མར་སྣོད་དང ། ཞཝ་དང ། ལྷམ་ཡུ་ཆད་དང ། མཆིལ་ལྷམ་ལེན་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་ཚུར་ཤེག་འོངས་པ་ལེགས་སོ། །ཚེ་དང་ལྡན་པ་དག་ཁྱེད་ཅག་གང་ནས་ད་ལྟར་འདིར་འོངས། ཁྱེད་ཅག་གང་དུ་དབྱར་གནས་པར་ཁས་བླངས། ཚེ་དང་ལྡན་པ་ཀུན་དགའ་བོ་བདག་ཅག་ཉ་བའི་གྲོང་ནས་འདིར་འོངས་སོ། །བདག་ཅག་ཉ་བའི་གྲོང་དུ་དབྱར་གནས་བར་ཁས་བླངས་སོ། །ཚེ་དང་ལྡན་པ་དག་ཇི་ལྟར་ཉ་བའི་གྲོང་དུ་བདེ་བ་ལ་རེག་པར་དབྱར་གནས་པར་ཁས་བླངས་སམ། ཁྱེད་ཅག་བསོད་སྙོམས་ཀྱིས་ངལ་བར་མ་གྱུར་ཏམ། ཚེ་དང་ལྡན་པ་ཀུན་དགའ་བོ་བདག་ཅག་ཉ་བའི་གྲོང་དུ་ཏེ་པོར་བདེ་བ་ལ་རེག་པར་དབྱར་གནས་པར་ཁས་བླངས་ཏེ་བདག་ཅག་བསོད་སྙོམས་ཀྱིས་ཀྱང་ངལ་བར་མ་གྱུར་ཏོ། །ཚེ་དང་ལྡན་པ་དག་དེ་ཁོ་ན་ལྟར་སྣང་སྟེ། འདི་ལྟར་བསོད་སྙོམས་ཀྱིས་བྲེལ་བ་མེད་པས་ཚོ་བ་དང ། ལྤགས་པ་དང ། ཤ་དང ། ཁྲག་རྒྱས་པར་གྱུར་ཏོ། །ཚེ་དང་ལྡན་པ་དག་ད་ལྟར་མུ་གེ་ཉམ་ང་བ་དགོན་པ་སློངས་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློངས་མོ་པ་ལྟ་ལ་སྨོས་ཀྱང་ཅི་དགོས་པ་བྱུང་ན། འདིར་ཚེ་དང་ལྡན་པ་ཁྱེད་ཅག་བསོད་སྙོམས་ཀྱིས་བྲེལ་བ་མེད་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། ཚེ་དང་ལྡན་པ་ཀུན་དགའ་བོ་བདག་ཅག་གིས་ཉེ་དུ་རྣམས་ཀྱི་མདུན་དུ་གཅིག་གིས་གཅིག་གི་ཡང་དག་པའི་ཡོན་ཏན་བསྒྲག་པ་བྱས་ཏེ། དགེ་སློང་འདི་ནི་མི་རྟག
6.266b
པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས་དང ། སྤོང་བའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་སྡུག་པའི་འདུ་ཤེས་དང ། རྣམ་པར་སྔོས་པའི་འདུ་ཤེས་དང ། རྣམ་པར་རྣགས་པའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར་འབུས་གཞིགས་པའི་འདུ་ཤེས་དང ། རྣམ་པར་ཟོས་པའི་འདུ་ཤེས་དང ། རྣམ་པར་དམར་བའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་གོང་གི་འདུ་ཤེས་དང ། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང ། གཉིས་པ་དང ། གསུམ་པ་དང ། བཞི་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང ། རྒྱུན་དུ་ཞུགས་པའི་འབྲས་བུ་དང ། ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། རྫུ་འཕྲུལ་གྱི་ཡུལ་དང ། ལྷའི་རྣ་བ་དང ། སེམས་ཡོངས་སུ་ཤེས་པ་དང ། སྔོན་གྱི་གནས་དང ། འཆི་འཕོ་དང་སྐྱེ་བ་དང ། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉིས་ཀའི་ཆ་ལས་རྣམ་པར་གྲོལ་བ་ཡིན་ནོ་ཞེས་གཅིག་གིས་གཅིག་གི་ཡང་དག་པའི་ཡོན་ཏན་བསྒྲག་པར་བྱས་སོ། །ཅི་ཡང་དག་པས་སམ། ཡང་དག་པ་མ་ཡིན་པས། ཡང་དག་པས་སོ། །ཚེ་དང་ལྡན་པ་དག་ཁྱེད་ཅག་གང་ཟག་རྫོགས་པར་མ་བསྙེན་པ་ལ་མིའི་ཆོས་བླ་མ་བདེན་པ་བརྗོད་དུ་རུང་ངམ། རུང་ཡང་སྲིད། མི་རུང་ཡང་སྲིད་དེ། འདི་ལྟར་བདག་ཅག་གིས་ནི་སྨྲས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་གང་ཟག་རྫོགས
6.267a
པར་མ་བསྙེན་པ་ལ་མིའི་ཆོས་བླ་མ་བདེན་པ་བརྗོད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཆུ་ཀླུང་ཡིད་འོང་ལྡན་གྱི་འགྲམ་ན་གནས་པའི་དགེ་སློང་རྣམས་ལ་རྨས་པ། དགེ་སློང་དག་ཁྱེད་ཀྱིས་གང་ཟག་རྫོགས་པར་མ་བསྙེན་པ་ལ་མིའི་ཆོས་བླ་མ་བདེན་པ་སྨྲས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང ། མི་སྦྱོར་བ་དང ། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང ། སྦྱོར་བ་དང ། བརྟགས་ཏེ་སྤྱོད་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གང་ཟག་རྫོགས་པར་མ་བསྙེན་པ་ལ་མིའི་ཆོས་བླ་མ་བདེན་པ་བརྗོད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །གང་ཟག་རྫོགས་པར་མ་བསྙེན་པ་ལ་ཞེས་བྱ་བ་ལ་རྫོགས་པར་བསྙེན་པ་ནི་གཉིས་ཏེ། དགེ་སློང་དང་དགེ་སློང་མའོ། །དེ་ལས་གཞན་པ་ནི་རྫོགས་པར་མ་བསྙེན་པའོ། །མིའི་ཆོས་ཤེས་བྱ་བ་ནི་མི་རྣམས་ཀྱི་ཆོས་མྱ་ངན་ལས་འདས་པ་སྟེ། དེ་མི་རྣམས་ཀྱིས་འཐོབ་ཀྱི་ཟ་མ་དང ། མ་ནིང་དང ། མཚན་གཉིས་པ་དག་གིས་ཀྱང་མི་འཐོབ་ན། སེམས་ཅན་དམྱལ་བ་དང ། དུད་འགྲོ་དང ། ཡི་དགས་རྣམས་ཀྱིས་ལྟ་སྨོས་ཀྱང་ཅི་དགོས་པའི་ཕྱིར་རོ། །བླ་མ་ཞེས་བྱ་བ་ནི་འདོད་པའི་ཁམས་པས་གཟུགས
6.267b
ཀྱི་ཁམས་བླ་མ་ཡིན་ལ། གཟུགས་ཀྱི་ཁམས་པས་གཟུགས་མེད་པའི་ཁམས་བླ་མ་ཡིན་པའོ། །ཡང་ན་མིའི་ཆོས་ཤེས་བྱ་བ་ནི་སྒྲིབ་པ་ལྔ་པོ་དག་གོ། །བླ་མ་ཞེས་བྱ་བ་ནི་དེ་དག་སྤངས་པ་གང་ཡིན་པའོ། །བདེན་པ་ཞེས་བྱ་བ་ནི་དེའི་དངོས་པོ་བདེན་པ་ཁོ་ན་ཡིན་པའོ། །སྨྲ་ན་ཞེས་བྱ་བ་ནི་བརྗོད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་བར་སྡོམ་ལ། འདུ་ཤེས་མ་བསྒྱུར་དགོན་པ་དང ། །ཁྱིམ་རྣམས་སུ་ནི་སྟན་བཀྲ་དང ། །རང་གི་མཚན་ཉིད་འཛིན་པ་དང ། །བདག་ཉིད་ཉེ་བར་སྟོན་པའོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་རྣམས་མཐོང་ངོ་ཞེས་ཟེར་ན་ལྟུང་བྱེད་དུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་ངོ་ཞེས་ཟེར་ན་ལྟུང་བྱེད་དུ་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་མཐོང་ངོ་ཞེས་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། ་རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་རྣམས་ཀྱི་སྒྲ་ཐོས་སོ་ཞེས་ཟེར་ན་ལྟུང་བྱེད་དུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་གྱི་སྒྲ་ཐོས་སོ་ཞེས་ཟེར་ན་ལྟུང་བྱེད་དུ་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ་ཞེས་ཟེར་ན་ཉེས་བྱས་སུ
6.268a
འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་རྣམས་བལྟ་བའི་ཕྱིར་འགྲོའོ་ཞེས་ཟེར་ན་ལྟུང་བྱེད་དུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འགྲོའོ་ཞེས་ཟེར་ན་ལྟུང་བྱེད་དུ་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ་ཞེས་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་རྣམས་བདག་བལྟ་བའི་ཕྱིར་འོང་ངོ་ཞེས་ཟེར་ན་ལྟུང་བྱེད་དུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་ལུས་སྲུལ་པོ་རྣམས་ཀྱི་བར་དག་བདག་བལྟ་བའི་ཕྱིར་འོང་ངོ་ཞེས་ཟེར་ན་ལྟུང་བྱེད་དུ་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱང་བདག་བལྟ་བའི་ཕྱིར་འོང་ངོ་ཞེས་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ལྟུང་བྱེད་དུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ལྟུང་བྱེད་དུ་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད།
6.268b
སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ལྟུང་བྱེད་དུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་ཡང་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ལྟུང་བྱེད་དུ་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱང་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ཐོབ་བཞིན་དུ་བདག་གིས་མི་རྟག་པའི་འདུ་ཤེས་ཐོབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །མི་རྟག་པ་ལ་སྡུག་བསྔལ་བའི་འདུ་ཤེས་ནས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་བར་དུ་ཐོབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ཐོབ་བཞིན་དུ་བདག་གིས་བསམ་གཏན་དང་པོ་ཐོབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །དེ་བཞིན་དུ་གཉིས་པ་དང ། གསུམ་པ་དང ། བཞི་པ་ནས་སྔ་མ་བཞིན་དུ་བདག་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང ། གཉིས་ཀའི་ཆ་ལས་རྣམ་པར་གྲོལ་བའོ་ཞེས་ཟེར་ན་ལྟུང་བྱེད་དུ་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་གྲོང་མེད་པའི་དགོན་པའི་གནས་ཤིག་ན་གནས་ཤིང་དེ་ན་དེ་དག་ལ་མི་མ་ཡིན་པ་དག་གིས་འཚེ་བ་དང ། དེ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ། དགྲ་བཅོམ་པ་ཡིན་པ་དེ་ལ་དེ་ན་མི་མ་ཡིན་པ་དག་གིས་འཚེ་བར་མི་བྱེད་ནས་དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་དེ་ན་གནས་ཏེ། དེ་ན་བདག་ལ་མི་མ་ཡིན་པ་རྣམས་འཚེ་བར་མི་བྱེད་དོ་ཞེས་ཟེར་ན་ལྟུང་བྱེད་དུ
6.269a
འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་ཁྱིམ་རྣམས་སུ་མགྲོན་དུ་བོས་ཏེ་ཟ་བར་བྱེད་ཅིང་དེ་ན་དེ་དག་ལ་སྟན་ཁྲ་བོ་བཀྲ་བ་དག་བཤམས་ཤིང་དེ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས་དགེ་སློང་གིས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་ཀྱང་ཁྱིམ་དེར་མགྲོན་དུ་བོས་ཤིང་ཟོས་ཏེ། དེ་ན་བདག་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་དོ་ཞེས་ཟེར་ན་ལྟུང་བྱེད་དུ་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དགོན་པ་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་མི་འབྱུང་ནས་དགེ་སློང་གིས་འདུ་ཤེས་མ་བསྒྱུར་ཅིང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་དེ་ན་གནས་ཤིང ། བདག་གིས་ཀྱང་དེ་ན་གནས་པ་ན་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་བདག་གི་རྒྱུད་ལ་ཡང་ཀུན་དུ་མི་འབྱུང་ངོ་ཞེས་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་གིས་ལྷ་རྣམས་མཐོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཐ་ན་འདི་སྐད་ཅེས་དགེ་སློང་གང་གིས་རྡུལ་ཁྲོད
6.269b
ཀྱི་ཤ་ཟ་རྣམས་མཐོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་གིས་ལྷ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་གྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཐ་ན་འདི་སྐད་ཅེས་དགེ་སློང་གང་གིས་རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་ལྷ་རྣམས་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཐ་ན་འདི་སྐད་ཅེས་དགེ་སློང་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་ལ་ལྷ་རྣམས་བལྟ་བའི་ཕྱིར་འོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །
6.270a
ཐ་ན་འདི་སྐད་ཅེས་དགེ་སློང་གང་ལ་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འོང་བ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཐ་ན་འདི་སྐད་ཅེས་དགེ་སློང་གང་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་དང་ལྷན་ཅིག་ལྷ་རྣམས་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཀླུ་རྣམས་དང ། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་ཡང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །ཐ་ན་འདི་སྐད་ཅེས་དགེ་སློང་གང་དང་ལྷན་ཅིག་རྡུལ་ཁྲོད་ཀྱི་ཤ་ཟ་རྣམས་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ
6.270b
བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་གིས་མི་རྟག་པའི་འདུ་ཤེས་ཐོབ་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །མི་རྟག་པའི་འདུ་ཤེས་ཇི་ལྟ་བ་དེ་བཞིན་དུ་གང་གིས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་བར་དུ་ཐོབ་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་གིས་བསམ་གཏན་དང་པོ་ཐོབ་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །བསམ་གཏན་དང་པོ་ཇི་ལྟ་བ་དེ་བཞིན་དུ་གང་གིས་སྔ་མ་བཞིན་དུ་གཉིས་པ་དང ། གསུམ་པ་དང ། བཞི་པ་ནས་དགེ་སློང་གང་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང ། གཉིས་ཀའི་ཆ་ལས་རྣམ་པར་གྲོལ་བའི་བར་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་གྲོང་མེད་པའི་དགོན་པའི་གནས་ཤིག་ན་གནས་ཤིང་དེ་ན་དེ་དག་ལ་མི་མ་ཡིན་པ་དག་གིས་འཚེ་བ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་མི་མ་ཡིན་པ་དག་གིས་འཚེ་བར་མི་བྱེད་ནས། དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་གྲོང་མེད་པའི་དགོན་པའི་གནས་དེ་ན་གནས་པ་དེ་ལ་དེ་ན་མི་མ་ཡིན་པ་རྣམས་འཚེ་བར་མི་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །འདི་ལྟར་དགེ
6.271a
སློང་རབ་ཏུ་མང་པོ་དག་ཁྱིམ་རྣམས་སུ་མགྲོན་དུ་བོས་ཏེ་ཟ་བར་བྱེད་ཅིང་དེ་ན་དེ་དག་ལ་སྟན་ཁྲ་བོ་ཉེ་བར་བཀྲ་བ་དག་བཤམས་ཤིང ། དེ་ན་དགེ་སློང་གང་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས། དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གང་ཁྱིམ་དེར་མགྲོན་དུ་བོས་ཤིང་ཟོས་ཏེ་དེ་ན་དེ་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་དགོན་པ་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་ཀྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་མི་འབྱུང་ནས་དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་གིས་གྲོང་མེད་པའི་དགོན་པའི་གནས་དེ་ན་གནས་ཤིང་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང ། གནོད་སེམས་དག་རྒྱུད་ལ་ཀུན་དུ་མི་འབྱུང་བ་དེ་ཡོད་དོ་ཞེས་ཟེར་ཞིག་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །མིའི་ཆོས་བླ་མ་བརྗོད་པའི་ལྟུང་བྱེད་དེ་བརྒྱད་པ་རྫོགས་སྷོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་གཉིས་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །གང་གི་ཚེ་ཚེ་དང་ལྡན་པ་གྱད་བུ་ནོར་གནས་མལ་འབོག
6.271b
པ་དང ། ཟས་ལ་སྐོ་བར་བསྐོས་པ་དེའི་ཚེ་ན་དེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཡིན་པས་དགེ་འདུན་ལ་ཆོས་དང་ལྡན་པས་ཞལ་ཏ་བྱེད་པའི་ལས་ལ་བརྩོན་པ་ཡིན་ལ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མེད་དེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ཆོས་གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཚེ་དང་ལྡན་པ་གྱད་བུ་ནོར་འདི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཡིན་པས་དགེ་འདུན་ལ་ཆོས་དང་ལྡན་པས་ཞལ་ཏ་བྱེད་པའི་ལས་ལ་བརྩོན་པ་ཡིན་ལ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མེད་དེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ཆོས་གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་ཀྱིས། གལ་ཏེ་དགེ་འདུན་གྱིས་རས་ཡུག་ཆེན་འགའ་ཞིག་རྙེད་ན་དེ་ཚེ་དང་ལྡན་པ་གྱད་བུ་ནོར་ལ་སྦྱིན་པར་བྱའོ་ཞེས་སྨྲས་ནས། དགེ་འདུན་གྱིས་ཀྱང་རས་ཡུག་ཆེན་རྙེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གསོལ་བ་བྱས་ཏེ་བྱིན་ན་མི་གཡོ་བར་འགྱུར་རོ། །འདི་ལྟར་བྱ་སྟེ། གནས་མལ་བཤམ་པ་བྱས་ནས་གཎྜཱི་དེ་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་ཅིག་གིས་གསོལ་བ་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་གྱད་བུ་ནོར་འདི་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་དེ་དགེ་འདུན་ལ་ཡང་ཆོས་ཀྱིས་ཞལ་ཏ་བགྱིད་པའི་ལས་ལ་བརྩོན་པ་ལགས་ལ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ཆོས
6.272a
གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་ལ་དགེ་འདུན་ལ་ནི་རས་ཡུག་ཆེན་འབྱོར་པར་མངའ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་དགེ་འདུན་གྱིས་ཚེ་དང་ལྡན་པ་གྱད་བུ་ནོར་ལ་རས་ཡུག་ཆེན་སྩོལ་ཏོ། །འདི་ནི་གསོལ་བའོ། །ཕྱིས་དགེ་འདུན་གྱིས་དེ་ལ་རས་ཡུག་ཆེན་བྱིན་པ་དང ། དགེ་སློང་མཛའ་བོ་དང ། ས་ལས་སྐྱེས་གཉིས་ཚེ་དང་ལྡན་པ་གྱད་བུ་ནོར་དང་ཚེ་རབས་ཚེ་རབས་ནས་རྗེས་སུ་འབྲེལ་བའི་ཁོན་ཡོད་པས་དེ་གཉིས་དགེ་སློང་རྣམས་ཀྱི་མདུན་ན་ཚེ་དང་ལྡན་པ་དག་འདི་ལྟར་དགེ་འདུན་གྱི་རྙེད་པ་རྙེད་དོ་ཅོག་གཅིག་གིས་གང་ཟག་ལ་ཡོངས་སུ་བསྔོ་བར་བྱེད་ན། དགེ་འདུན་གྱིས་རྙེད་པ་འགྲུབ་པར་ག་ལ་འགྱུར་ཞེས་སྨོད་པར་བྱེད་ནས་དགེ་སློང་རྣམས་ཀྱིས་དེ་གཉིས་ལ་སྨྲས་པ། ཚེ་དང་ལྡན་པ་གཉིས་ཁྱེད་གཉིས་དེར་མ་འདུས་སམ། འདུས་སོ། །འོ་ན་ཅིའི་ཕྱིར་སྨོད་པར་བྱེད། དེ་གཉིས་ཀྱིས་སྨྲས་པ། ཅི་ཁོ་བོ་ཅག་གཉིས་འདུར་ཡང་མི་གནང་ངམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་སྔར་ལེགས་པར་རུང་བར་བྱས་ནས། དེའི་འོག་ཏུ་འདི་སྐད་ཅེས་ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ་དགེ་འདུན་གྱི་རྙེད་པར་བསྔོས་པ་བདག་གི་གང་ཟག་ལ་བསྔོས་ཤེས་ཟེར་ཞིང་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་མཛའ་བོ་དང ། ས་ལས
6.272b
སྐྱེས་གཉིས་ལ་རྨས་པ། དགེ་སློང་གཉིས་ཁྱེད་གཉིས་ཀྱིས་སྔར་ལེགས་པར་རུང་བར་བྱས་ནས་དེའི་འོག་ཏུ་འདི་སྐད་ཅེས་ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ་དགེ་འདུན་གྱི་རྙེད་པར་བསྔོས་པ་བདག་གི་གང་ཟག་ལ་བསྔོས་སོ་ཞེས་སྨྲས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་སྔར་ལེགས་པར་རུང་བར་བྱས་ནས། དེའི་འོག་ཏུ་འདི་སྐད་ཅེས་ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ་དགེ་འདུན་གྱི་རྙེད་པར་བསྔོས་པ་བདག་གི་གང་ཟག་ལ་བསྔོས་སོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་མཛའ་བོ་དང་ས་ལས་སྐྱེས་སམ། གཞན་ཡང་དེ་ལྟ་བུ་གང་ཡིན་པའོ། །སྔར་ལེགས་པར་རུང་བར་བྱས་ནས་ཞེས་བྱ་བ་ནི་སྔར་དད་པ་ཕུལ་ནས་སོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །འདི་སྐད་ཅེས་ཤེས་བྱ་བ་ནི་འདི་སྐད་ཅེས་ཟེར་ནའོ། །ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ་ཞེས་བྱ་བ་ལ། དགེ་སློང་གི་བཤེས་པ་གང་ཞེ་ན། མཁན་པོའི་ནི་ལྷན་ཅིག་གནས་པའོ། །ལྷན་ཅིག་གནས་པའི་ནི་མཁན་པོའོ། །སློབ་དཔོན་གྱི་ནི་ཉེ་གནས་སོ། །ཉེ་གནས་ཀྱི་ནི་སློབ་དཔོན་ནོ། །མཁན་པོ་གཅིག་པའི་ནི་མཁན་པོ་གཅིག་པའོ། །སློབ་དཔོན་གཅིག་པའི
6.273a
ནི་སློབ་དཔོན་གཅིག་པའོ། །མཛའ་བོའི་ནི་མཛའ་བོའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །རྙེད་པ་ཞེས་བྱ་བ་ལ་རྙེད་པ་ནི་གཉིས་ཏེ། གོས་ཀྱི་རྙེད་པ་དང ། ཟས་ཀྱི་རྙེད་པ་སྟེ། དོན་འདིར་ནི་གོས་ཀྱི་རྙེད་པ་ཡིན་པར་དགོངས་སོ། །བསྔོས་པ་ཞེས་བྱ་བ་ནི་དགེ་འདུན་གྱི་ནང་དུ་གྲུབ་པའོ། །བདག་གི་གང་ཟག་ལ་བསྔོས་སོ་ཞེས་བྱ་བ་ནི་བདག་གི་དོན་དུའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་དུ་ཅུང་ཟད་སྔར་འཐུན་ཞིང་རུང་བར་བྱས་ནས་དེའི་འོག་ཏུ་འདི་སྐད་ཅེས་ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ་དགེ་འདུན་གྱི་རྙེད་པར་བསྔོས་པ་བདག་གི་གང་ཟག་ལ་བསྔོས་སོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །བཤེས་ངོར་བྱས་ཏེ་དགེ་འདུན་གྱི་རྙེད་པར་བསྔོས་པ་བདག་གི་གང་ཟག་ལ་བསྔོས་པ་བདེན་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྐུར་པ་འདེབས་པའི་ལྟུང་བྱེད་དེ་དགུ་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་གདོན་པར་བྱའོ་ཞེས་བཀའ་སྩལ་ནས། དགེ་སློང་རྣམས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ན། དྲུག་སྡེ་དག་ཕམ་པར་འགྱུར་བ་བཞི་པོ་དག་འདོན་པའི་ཚེ་ནི་ཅང་མི་སྨྲ་བར་འཁོད་དོ། །དགེ་འདུན་ལྷག་མ་བཅུ་གསུམ་འདོན་པའི་ཚེ་ན་འདི་སྐད་ཅེས་ཚེ་དང་ལྡན་པ་དག་གང་ལ་གཞི་ངེས་པ་དང ། གང་ཟག་ངེས་པར་རབ་ཏུ
6.273b
ཤེས་པ་ཡོད་བཞིན་དུ། བདག་ཅག་གིས་རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད། གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ་ཞེས་ཟེར་རོ། །དེ་བཞིན་དུ་མ་ངེས་པ་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་འདོན་པའི་ཚེ་ན་ཡང་འདི་སྐད་ཅེས་ཚེ་དང་ལྡན་པ་དག་གང་ལ་གཞི་ངེས་པ་དང ། གང་ཟག་ངེས་པ་རབ་ཏུ་ཤེས་པ་ཡོད་བཞིན་དུ་བདག་ཅག་གི་རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད། གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ་ཞེས་ཟེར་ནས། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་གི་ཕྱིར་ཁོ་བོ་ཅག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་མ་ཡིན་གྱི། འདི་ལྟར་ཁོ་བོ་ཅག་ནི་སྟོན་པའི་བཀའ་ལུང་གིས་འདོན་ཏོ། །གལ་ཏེ་ཁྱེད་ཅག་སྡུག་བསྔལ་བ་དང ། ཡིད་མི་བདེ་བ་སྐྱེ་ན་ཅིའི་ཕྱིར་ལྷག་པར་སྤྱོད་པར་བྱེད། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཕམ་པར་འགྱུར་བ་བཞི་པོ་དག་འདོན་པའི་ཚེ་ནི་ཅང་མི་སྨྲ་བར་འཁོད་ལ། དགེ་འདུན་ལྷག་མ་བཅུ་གསུམ་འདོན་པའི་ཚེ་ནི་འདི་སྐད་ཅེས་ཚེ་དང་ལྡན་པ་དག་གང་ལ་གཞི་ངེས་པ་དང ། གང་ཟག་ངེས་པ་རབ་ཏུ་ཤེས་པ་ཡོད་བཞིན་དུ་བདག་ཅག་གི་རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད། གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་བདག་གིས་ཅི་བྱ་ཞེས་ཟེར། དེ་བཞིན་དུ་མ་ངེས་པ་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ
6.274a
དང ། རྩོད་པ་ཞི་བར་བྱ་བའི་ཆོས་བདུན་པོ་དག་འདོན་པའི་ཚེ་ན་ཡང་འདི་སྐད་ཅེས་ཚེ་དང་ལྡན་པ་དག་གང་ལ་གཞི་ངེས་པ་དང ། གང་ཟག་ངེས་པ་རབ་ཏུ་ཤེས་པ་ཡོད་བཞིན་དུ་བདག་ཅག་གི་རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད། གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ་ཞེས་ཟེར་ཞིང་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཅག་ཕམ་པར་འགྱུར་བ་བཞི་པོ་དག་འདོན་པའི་ཚེ་ནི་ཅང་མི་སྨྲ་བར་འཁོད་ལ། དགེ་འདུན་ལྷག་མ་བཅུ་གསུམ་འདོན་པའི་ཚེ་ནི་འདི་སྐད་ཅེས་ཚེ་དང་ལྡན་པ་དག་གང་ལ་གཞི་ངེས་པ་དང ། གང་ཟག་ངེས་པ་རབ་ཏུ་ཤེས་པ་ཡོད་བཞིན་དུ་བདག་ཅག་གི་རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད། གང་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ། དེ་བཞིན་དུ་མ་ངེས་པ་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་འདོན་པའི་ཚེ་ཡང་འདི་སྐད་ཅེས་ཚེ་དང་ལྡན་པ་དག་གང་ལ་གཞི་ངེས་པ་དང ། གང་ཟག་ངེས་པ་རབ་ཏུ་ཤེས་པ་ཡོད་བཞིན་དུ
6.274b
བདག་ཅག་གི་རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད། གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ་ཞེས་སྨྲས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན། འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ་ཞེས་ཟེར་ཞིང་བསླབ་པ་ཁྱད་དུ་གསོད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཕྱེད་ཅིང་ངོ ། །སོ་སོར་ཐར་པ་ཞེས་བྱ་བ་ནི་ཕམ་པར་འགྱུར་བའི་ཆོས་བཞི་དང ། དགེ་འདུན་ལྷག་མའི་ཆོས་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་གོ། །མདོ་ཞེས་བྱ་བ་ནི་དེས་ཉེ་བར་སྦྱར་བའི་མདོ་འམ། ཡང་ན་མདོ་ཡང་དག་པར་སྦྱར་བའོ། །གདོན་པ
6.275a
འདོན་པ་ན་ཞེས་བྱ་བ་ནི་རབ་ཏུ་སྟོན་པ་ནའོ། །འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་བྱ་ཞེས་ཟེར་ཞིང་བསླབ་པ་ཁྱད་དུ་གསོད་ན་ཞེས་བྱ་བ་ནི་བསླབ་པ་ཁྱད་དུ་གསོད་པའི་བསམ་པས་ངག་དང ། ཚིག་དང ། ཐ་སྙད་དང ། སྐད་དང ། །བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་བརྗོད་པའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་ནི་དགེ་སློང་རྣམས་ཡིད་ལ་གཅགས་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་ལ་གནོད་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་གདུང་བར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་ཀུན་དུ་གདུང་བར་འགྱུར་བ་འདི་དག་བཏོན་པས་ཅི་བྱ
6.275b
ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་ཡོངས་སུ་གདུང་བར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འདོད་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་མངོན་པར་མི་དགའ་བར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ་སློང་ཕམ་པར་འགྱུར་བ་བཞི་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་རྣམ་པར་འཁྱམ་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དེ་བཞིན་དུ་དགེ་སློང ། དགེ་འདུན་ལྷག་མའི་ཆོས་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། །གནོད་པ་དང ། གདུང་བ་དང ། ཀུན་དུ་གདུང་བ་དང ། ཡོངས་སུ་གདུང་བ་དང ། འདོད་པ་དང ། མངོན་པར་མི་དགའ་བ་དང ། རྣམ་པར་འཁྱམ་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དེ་བཞིན་དུ་དགེ་སློང་གཞི་དག་དང ། ཕྲན་ཚེགས་དག་དང ། གླེང་གཞི་དག་དང ། སིལ་བུ་དག་དང ། འདུལ་བ་ལྔ་པ་དག་དང ། འདུལ་བ་དྲུག་པ་དང ། འདུལ་བའི་མ་མོ་དག་དང ། དེ་ལས་གཞན་པ་འདུལ་བ་དང་ལྡན་པའི་མདོ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་སེམས་དང ། གདུང་བ་དང ། ཀུན་དུ་གདུང་བ་དང ། ཡོངས་སུ་གདུང་བ་དང ། འདོད་པ་དང ། མངོན་པར་མི་དགའ་བ་དང ། རྣམ་པར་འཁྱམ་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ལྟུང་བྱེད་དུ་འགྱུར་རོ། །དགེ
6.276a
སློང་དེ་ལས་གཞན་པའི་མདོ་སྡེ་དག་འདོན་པ་ན་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང ། ཡིད་ལ་གཅགས་པ་དང ། གནོད་པ་དང ། གདུང་བ་དང ། ཀུན་དུ་གདུང་བ་དང ། ཡོངས་སུ་གདུང་བ་དང ། འདོད་པ་དང ། མངོན་པར་མི་དགའ་བ་དང ། རྣམ་པར་འཁྱམ་པར་འགྱུར་བ་འདི་དག་བཏོན་པས་ཅི་བྱ་ཞེས་ཟེར་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པ་ཁྱད་དུ་གསོད་པའི་ལྟུང་བྱེད་དེ་བཅུ་པ་རྫོགས་སྷོ།། ་་་་་་་་་་་།། སྡོམ་ལ། ས་བོན་འཕྱ་བ་བསྒོ་བ་དང ། །ཁྲི་དང་གདིང་དང་སྐྲོད་པ་དང ། །ཕྱིས་གནོད་འབྱུང་བ་འདེབས་པ་དང ། །རིམ་པ་གཉིས་སུ་རྩིག་པའོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་སྔོན་ཤིང་མཁན་རྒན་ཞུགས་བྱིས་པ། རྨོངས་པ། མི་གསལ་བ་མི་མཁས་པ་ཞིག་གིས་ཤིང་ལྗོན་པ་བཅད་ནས་དགེ་འདུན་གྱི་གཙུག་ལག་ཁང་བྱེད་དུ་བཅུག་གོ། །དེ་ནས་ཤིང་ལྗོན་པ་དེ་ལ་གནས་པའི་ལྷ་ཁ་དོག་ཤིན་དུ་འདས་པ་གང་ཡིན་པ་དེ་མཚན་མོ་ནམ་སྲོས་པ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང ། འདི་ལྟར་ལྷ་དེའི་ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ལྷ་དེས་འདི་སྐད་ཅེས་གསོལ་ཏོ། །བཙུན་པ་སྔོན་ཤིང་མཁན་རྒན་ཞུགས་བྱིས་པ། རྨོངས་པ། མི་གསལ་བ། མི་མཁས་པ་ཞིག་གིས་བདག་གི་གནས་པ་དང ། གླིང་དང ། སྐྱོབ་པ་དང ། སྐྱབས་དང ། དཔུང་གཉེན་དང ། གནས་མལ་དང ། གཞི་དང ། རྟེན་གྱི་ཞུགས་ཤིང་ལྗོན་པ་གང་ལགས་པ་དེ་བཀུམ་ནས་དགེ་འདུན་གྱི་གཙུག་ལག་ཁང་བགྱིད་དུ་སྩལ་ཏེ། བཙུན་པ་དགུན་གྱི་དགུང་ནི་རིང ། དགུན་སྨད་ཀྱི་དུས་ཀྱི་ཚེ་ནི་ཚེས་བརྒྱད་ཀྱི་བར་ལ་འོད་མ་འགས་པའི་བསེར་མ་དག་ལྡང་ཞིང་བཙུན་པ་བདག
6.276b
གི་བུ་དང་ཕྲུག་གུ་དག་ནི་ཆུང་ན་བདག་གིས་ཇི་ལྟར་བགྱི། དེ་ནས་བཅོམ་ལྡན་འདས་ཀྱིས་ལྷ་ཞིག་ལ་བཀའ་སྩལ་པ། ལྷ་ཁྱོད་ཀྱི་གནས་སུ་ལྷ་འདིའི་གནས་བྱིན་ཅིག་།ལྷ་དེས་འདི་ལྟ་སྟེ། སྟོན་པའི་བཀའ་ལུང་གིས་རང་གི་གནས་སུ་ལྷ་དེའི་གནས་བྱིན་ནོ། །དེ་ནས་བཅོམ་ལྡན་འདས་དེ་ཉིད་གྱི་མཚན་མོ་འདས་པ་དང་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མདང་ལྷ་ཁ་དོག་ཤིན་དུ་འདས་པ་ཞིག་མཚན་མོ་ནམ་སྲོས་པ་དང་ང་ག་ལ་བ་དེར་འོངས་ཏེ་ཕྱིན་ནས། ངའི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང ། འདི་ལྟར་ལྷ་དེའི་ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །མཐའ་གཅིག་ཏུ་འདུག་ནས་ང་ལ་ལྷ་དེ་འདི་སྐད་ཅེས་བཙུན་པ་སྔོན་ཤིང་མཁན་རྒན་ཞུགས་བྱིས་པ། རྨོངས་པ། མི་གསལ་བ། མི་མཁས་པ་ཞིག་གིས་བདག་གི་གནས་དང ། གླིང་དང ། སྐྱོབ་པ་དང ། སྐྱབས་དང ། དཔུང་གཉེན་དང ། གནས་མལ་དང ། གཞི་དང ། རྟེན་གྱི་ཞུགས་ཤིང་ལྗོན་པ་གང་ལགས་པ་དེ་བཀུམ་ནས་དགེ་འདུན་གྱི་གཙུག་ལག་ཁང་བགྱིད་དུ་སྩལ་ཏེ། བཙུན་པ་དགུན་གྱི་དགུང་ནི་རིང ། དགུན་སྨད་ཀྱི་དུས་ཀྱི་ཚེ་ནི་ཚེས་བརྒྱད་ཀྱི་བར་ལ་འོད་མ་འགས་པའི་བསེར་མ་དག་ལྡང་ཞིང ། བཙུན་པ་བདག་གི་བུ་དང་ཕྲུག་གུ་དག་ནི་ཆུང་ན་བདག་གིས་ཇི་ལྟར་བགྱི་ཞེས་ཟེར་བས་དགེ་སློང་དག་འདི་ལྟར་ལྷ་དག་དེ་སྐད་ཅེས་ཀྱེ་མ་ཤཱཀྱའི་བུའི་དགེ་སྦྱོང་རྣམས་ནི་འདི་ལྟ་སྟེ། དགེ་བའི་ཆོས་རྣམས་ཀྱིས་ཡོངས་སུ་ཉམས་པར་འགྱུར་རོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པ་དེ་ནི་མི་མཛེས་ཤིང་ཚུལ་དང་འཐུན་པ་མ་ཡིན་ནོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཉེས་དམིགས་གང་ཅུང་ཟད་ཅི་བྱུང་བ་དེ་ནི་དགེ་སློང་དག་ཤིང་ལྗོན་པ་གཅོད་པར་བྱེད་པ་ལས་གྱུར་པ་ཡིན་ནོ་སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་གིས་ཤིང་ལྗོན་པ་གཅད་པར་མི་བྱའོ། །གཅོད་ན་འགལ་ཚབས་ཅན་དུ་འགྱུར་རོ། །
6.277a
སངས་རྒྱས་བཅོམ་ལྡན་འདས་འབྲོག་གནས་ན་འབྲོག་གི་ནགས་མཆོག་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་ཤིང་ལྗོན་པ་གཅད་པར་མི་བྱའོ་ཞེས་བཀའ་སྩལ་ནས། དགེ་སློང་ལག་གི་བླ་དག་གིས་ཤིང་མེད་པས་མཁར་ལན་དག་བཏང་བར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ཅིའི་ཕྱིར་དགེ་སློང་ལག་གི་བླ་དག་གིས་མཁར་ལན་དག་བཏང་བར་གྱུར། བཙུན་པ་བཅོམ་ལྡན་འདས་ཀྱིས་དགེ་སློང་གིས་ཤིང་ལྗོན་པ་གཅད་པར་མི་བྱའོ་ཞེས་བཀའ་སྩལ་ནས། དགེ་སློང་ལག་གི་བླ་དག་གིས་ཞུགས་ཤིང་མ་མཆིས་པས་མཁར་ལན་བཏང་བ་གྱུར་ཏོ། །ཀུན་དགའ་བོ་ངས་དགེ་སློང་ལག་གི་བླའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ལག་གི་བླས་ཞག་བདུན་ནམ་བརྒྱད་ཀྱིས་ཤིང་ལྗོན་པ་གཅོད་པར་འགྱུར་བ་ན་ཤིང་ལྗོན་པ་དེའི་དྲུང་དུ་དཀྱིལ་འཁོར་བྱ་ཞིང ། སྤོས་དང ། མེ་ཏོག་དང ། གཏོར་མ་ཡང་སྦྱིན་པར་བྱ། རྒྱུད་ཆགས་གསུམ་པ་ཡང་ཀླག་པར་བྱ། ཡོན་བཤད་པ་ཡང་བྱ་ཞིང་དགེ་བ་བཅུའི་ལས་ཀྱི་ལམ་དག་ཉེ་བར་གཞག་པར་ཡང་བྱ། མི་དགེ་བ་བཅུའི་ལས་ཀྱི་ལམ་དག་གི་བསྔགས་པ་མ་ཡིན་པ་དག་ཀྱང་བརྗོད་པར་བྱ། འདི་སྐད་ཅེས་ཤིང་ལྗོན་པ་འདི་ལ་ལྷ་གང་གནས་པ་དེ་གནས་གཞན་ཚོལ་ཅིག་།ཤིང་ལྗོན་པ་འདིས་མཆོད་རྟེན་གྱི་འམ། ཆོས་ཀྱི་འམ། དགེ་འདུན་གྱི་བྱ་བ་བྱེད་པར་འགྱུར་རོ་ཞེས་ཀྱང་བརྗོད་པར་བྱའོ། །དེའི་འོག་ཏུ་ཉི་མ་བདུན་ནམ་བརྒྱད་ཀྱིས་ཤིང་ལྗོན་པ་དེ་གཅད་པར་བྱའོ། །གལ་ཏེ་འགྱུར་བ་སྟོན་ན་གཅད་པར་མི་བྱའོ། །དགེ་སློང་ལག་གི་བླས་ཀུན་དུ་སྤྱད་པའི་ཆོས་ཇི་ལྟར་བཅས་པ་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་ནི་མི་མཛད་དོ། །སངས་རྒྱས་བཅོམ་ལྡན
6.277b
འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་རང་གི་ལག་གིས་ཤིང་ལྗོན་པ་གཅོད་ཅིང་གཅོད་དུ་འཛུད་པར་ཡང་བྱེད། རྩཝ་སྔོན་པོ་རྔ་ཞིང་རྔར་འཛུད་པར་ཡང་བྱེད། མེ་ཏོག་དག་འཐོག་ཅིང་འཐོག་ཏུ་འཛུད་པར་ཡང་བྱེད་ནས་གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་རང་གི་ལག་གིས་ཤིང་ལྗོན་པ་གཅོད་ཅིང་གཅོད་དུ་འཛུད་པར་ཡང་བྱེད། རྩཝ་སྔོན་པོ་རྔ་ཞིང་རྔར་འཛུད་པར་ཡང་བྱེད། མེ་ཏོག་དག་འཐོག་ཅིང་འཐོག་ཏུ་འཛུད་པར་ཡང་བྱེད་དེ། བྲམ་ཟེ་དང་ཁྱིམ་བདག་འདི་དག་ཀྱང་རང་གི་ལག་གིས་ཤིང་ལྗོན་པ་གཅོད་ཅིང་གཅོད་དུ་འཛུད་པར་ཡང་བྱེད། རྩཝ་སྔོན་པོ་རྔ་ཞིང་རྔར་འཛུད་པར་ཡང་བྱེད། མེ་ཏོག་དག་འཐོག་ཅིང་འཐོག་ཏུ་འཛུད་པར་ཡང་བྱེད་པས་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་དང ། བྲམ་ཟེ་དང ། ཁྱིམ་བདག་འདི་དག་ལ་བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་བྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཅག་རང་གི་ལག་གིས་ཤིང་ལྗོན་པ་གཅོད་ཅིང་གཅོད་དུ་འཛུད་པར་ཡང་བྱེད། རྩཝ་སྔོན་པོ་རྔ་ཞིང་རྔར་འཛུད་པར་ཡང་བྱེད། མེ་ཏོག་དག་འཐོག་ཅིང་འཐོག་ཏུ་འཛུད་པར་ཡང་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི
6.278a
རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་བ་ཡང་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ས་བོན་གྱི་ཚོགས་དང ། འབྱུང་པོའི་གནས་འཇིག་གམ། འཇིག་ཏུ་འཛུད་ན་ལྟུང་བྱེད་དོ། །ས་བོན་གྱི་ཚོགས་ཤེས་བྱ་བ་ནི་ས་བོན་ལྔ་སྟེ། རྩ་བའི་ས་བོན་དང ། སྡོང་བུའི་ས་བོན་དང ། ཐོ་གུའི་ས་བོན་དང ། འགས་པའི་ས་བོན་དང ། ས་བོན་གྱི་ས་བོན་ཉིད་ནི་ལྔ་པའོ། རྩ་བའི་ས་བོན་གང་ཞེ་ན། གླས་གང་དང ། ཤུ་དག་དང ། ཡུང་དང ། སྒེའུ་གཤེར་དང ། བོང་ང་དཀར་པོ་དང ། གཞན་ཡང་རྩ་བ་བཏབ་པ་ལས་རྩ་བ་ཉིད་སྐྱེ་བ་གང་ཡིན་པའོ། །སྡོང་བུའི་ས་བོན་གང་ཞེ་ན། ཤིང་ཀན་ཙ་ན་དང ། ཀ་པི་ཏ་ལ་དང ། ་ཤཝད་ཐ་དང ། ུ་དུམ་བ་ར་དང ། ནྱ་གྲོ་ངྷ་དང ། གཞན་ཡང་སྡོང་བུ་བཏབ་པ་ལས་སྡོང་བུ་ཉིད་སྐྱེ་བ་གང་ཡིན་པའོ། །ཐོ་གུའི་ས་བོན་གང་ཞེ་ན། བུ་རམ་ཤིང་དང ། འདམ་བུ་དང ། སྨིག་མ་དང ། རྒྱ་མཚོ་ནས་འབྱུང་བ་དང ། གཞན་ཡང་ཐོ་གུ་བཏབ་པ་ལས་ཐོ་གུ་ཉིད་སྐྱེ་བ་གང་ཡིན་པའོ། །འགས་པའི་ས་བོན་གང་ཞེ་ན། ཨརྫ་ཀ་དང ། སརྫ་ཀ་དང ། ཕ་ནི་ནརྫ་ཀ་དང ། བྷུ་སྟྲིན་དང ། ཛམ་བྷིར་དང ། གཞན་ཡང་འགས་པ་བཏབ་པ་ལས་འགས་པ་ཉིད་སྐྱེ་བ་གང་ཡིན་པའོ། །ས་བོན་གྱི་ས་བོན་གང་ཞེ་ན། ས་ལུ་དང ། ནས་དང ། གྲོ་དང ། མོན་སྲན་སྡེའུ་དང ། ཡུངས་ཀར་དང ། གཞན་ཡང་ས་བོན་བཏབ་པ་ལས་ས་བོན་ཉིད་སྐྱེ་བ་གང་ཡིན་པའོ། །འབྱུང་པོའི་གནས་ཞེས་བྱ་བ་ལ་འབྱུང་པོ་ཞེས་བྱ་བ་ནི་གྲོག་སྦུར་དག་དང ། ཕྱེ་མ་ལེབ་དག་དང ། སྦྲང་བུ་དག་དང ། ཏིལ་དང་ཕུབ་མ་ཟ་བ་དག་དང ། སྦྲུལ་དག་དང ། སྡིག་པ་དག་དང ། སྦྲང་བུ་ཏྲེ་མ་པུ་ཀ་དག་དང ། ཏྲེ་ལ་ཏ་ཀ་དག་གོ། །གནས་ཤེས་བྱ་བ་ནི་ཤིང་ལྗོན་པ་ལ་སོགས་པའོ། །དེ་དག་འཇིག
6.278b
གམ་འཇིག་ཏུ་འཇུད་ན་ཞེས་བྱ་བ་ནི་འབྱིན་པ་དང ། སྙོལ་བ་དང ། གཅོད་པ་དང ། འབིགས་པ་དང ། འཚེག་པ་དང ། འཚེག་ཏུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་བར་སྡོམ་ལ། །ས་བོན་ལྔ་དང་ཉམས་བྱེད་དང ། །ལྗོན་ཤིང་གཅོད་དང་རྩཝ་རྔ་དང ། །སྔོན་དང་འཆག་དང་རྩཝ་རྒྱུན་དང ། །ཉ་ལྕིབས་ཤ་མོ་རླམ་ཉིད་དོ། །དགེ་སློང་གིས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་རྩ་བའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་རྩ་བའི་ས་བོན་ལ་ཐོ་གུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཛུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ
6.279a
ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་རྩ་བའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་རྩ་བའི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དེ་བཞིན་དུ་དགེ་སློང་གིས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་སྡོང་བུའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་སྡོང་བུའི་ས་བོན་ལ་ཐོ་གུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ
6.279b
འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་སྡོང་བུའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་སྡོང་བུའི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དེ་བཞིན་དུ་དགེ་སློང་གིས་ཐོ་གུའི་ས་བོན་ལ་ཐོ་གུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུག་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་ཐོ་གུའི་ས་བོན་ལ་རྩ་བའི་ས་བོན་དུ་འདུ་ཤེས་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུག་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས
6.280a
གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་ཐོ་གུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་ཐོ་གུའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་ཐོ་གུའི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དེ་བཞིན་དུ་དགེ་སློང་གིས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་འགས་པའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད
6.280b
གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུག་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་འགས་པའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། །གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་འགས་པའི་ས་བོན་ལ་ཐོ་གུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ ། །དགེ་སློང་གིས་འགས་པའི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དེ་བཞིན་དུ་དགེ་སློང་གིས་ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ
6.281a
ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་ས་བོན་གྱི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། དགེ་སློང་གིས་ས་བོན་གྱི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། དགེ་སློང་གིས་ས་བོན་གྱི་ས་བོན་ལ་ཐོ་གུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། དགེ་སློང་གིས་ས་བོན་གྱི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྔོན་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ལྟུང་བྱེད་དུ་འགྱུར་རོ། །སྐམ་པོ་ལ་སྔོན་པོར་འདུ་ཤེས་པས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །སྐམ་པོ་ལ་ཡིད་གཉིས་ཟ་བས་གཅོད་དམ། གཅོད་དུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་ས་བོན་ཉམས་པར་གྱུར་ཅིག་།ས་བོན་རྣམ་པར་ཉམས་པར་གྱུར་ཅིག་སྙམ་པས་ས་བོན་གྱི་རིགས་ལྔ་པོ་དག་མེར་འཇུད་པར་བྱེད་ཅིང ། ས་བོན
6.281b
ཉམས་པ་དང ། ས་བོན་རྣམ་པར་ཉམས་པར་གྱུར་ན་དགེ་སློང་ལ་ལྟུང་བྱེད་ལྔར་འགྱུར་རོ། །ས་བོན་ཉམས་པར་མ་གྱུར་ཅིང ། ས་བོན་རྣམ་པར་ཉམས་པར་མ་གྱུར་ན་ཉེས་བྱས་ལྔར་འགྱུར་རོ། །དགེ་སློང་གིས་ས་བོན་ཉམས་པར་གྱུར་ཅིག་།ས་བོན་རྣམ་པར་ཉམས་པར་གྱུར་ཅིག་སྙམ་པས་ས་བོན་གྱི་རིགས་ལྔ་པོ་དག་ཆུར་འཇུད་ཅིང ། ས་བོན་ཉམས་པ་དང ། ས་བོན་ཉམས་པར་གྱུར་ན་དགེ་སློང་ལ་ལྟུང་བྱེད་ལྔར་འགྱུར་རོ། ས་བོན་ཉམས་པར་མ་གྱུར་ཅིང ། ས་བོན་རྣམ་པར་ཉམས་པར་མ་གྱུར་ན་ཉེས་བྱས་ལྔར་འགྱུར་རོ། དགེ་སློང་གིས་ས་བོན་ཉམས་པར་གྱུར་ཅིག་།ས་བོན་རྣམ་པར་ཉམས་པར་གྱུར་ཅིག་སྙམ་པས་ས་བོན་གྱི་རིགས་ལྔ་པོ་དག་གཏུན་དུ་བླུགས་ཏེ་གཏུན་བུས་བརྡུངས་ནས་ས་བོན་ཉམས་པ་དང ། ས་བོན་རྣམ་པར་ཉམས་པར་གྱུར་ན་དགེ་སློང་ལ་ལྟུང་བྱེད་ལྔར་འགྱུར་རོ། །ས་བོན་ཉམས་པར་མ་གྱུར་ཅིང ། ས་བོན་རྣམ་པར་ཉམས་པར་མ་གྱུར་ན་ཉེས་བྱས་ལྔར་འགྱུར་རོ། །དགེ་སློང་གིས་ས་བོན་ཉམས་པར་གྱུར་ཅིག་།ས་བོན་རྣམ་པར་ཉམས་པར་གྱུར་ཅིག་སྙམ་པས་ས་བོན་གྱི་རིགས་ལྔ་པོ་དག་ས་སྐམ་པོ་ལ་འཇོག་ཅིང་ས་བོན་ཉམས་པ་དང ། ས་བོན་རྣམ་པར་ཉམས་པར་གྱུར་ན་དགེ་སློང་ལ་ལྟུང་བྱེད་ལྔར་འགྱུར་རོ། །ས་བོན་ཉམས་པར་མ་གྱུར་ཅིང ། ས་བོན་རྣམ་པར་ཉམས་པར་མ་གྱུར་ན་ཉེས་བྱས་ལྔར་འགྱུར་རོ། །དགེ་སློང་གིས་ས་བོན་ཉམས་པར་གྱུར་ཅིག་།ས་བོན་རྣམ་པར་ཉམས་པར་གྱུར་ཅིག་སྙམ་པས་ས་བོན་གྱི་རིགས་ལྔ་པོ་དག་ཚཝ་རྒོ་འམ། འགྱུར་བྱེད་དམ། ལྕི་བ་འམ། སས་འགེབས་པར་བྱེད་ཅིང་ས་བོན་ཉམས་པ་དང ། ས་བོན་རྣམ་པར་ཉམས་པར་གྱུར་ན་དགེ་སློང་ལ་ལྟུང་བྱེད་ལྔར་འགྱུར་རོ། །ས་བོན་ཉམས་པར་མ་གྱུར་ཅིང ། ས་བོན་རྣམ་པར་ཉམས་པར་མ་གྱུར་ན་ཉེས་བྱས་ལྔར་འགྱུར་རོ། །དགེ་སློང་གིས་ས་བོན་ཉམས་པར་གྱུར་ཅིག་།ས་བོན་རྣམ་པར་ཉམས་པར་གྱུར་ཅིག་སྙམ་པས་ས་བོན་གྱི་རིགས་ལྔ་པོ་དག་ལ་ཁུ་ཚན་ནམ། འབྲས་ཁུ་འམ། སྲན་ཚོད་ལྡུགས་པར་བྱེད་ཅིང ། ས་བོན་ཉམས་པ་དང ། ས་བོན་རྣམ་པར་ཉམས་པར་གྱུར་ན་དགེ་སློང་ལ་ལྟུང་བྱེད་ལྔར་འགྱུར་རོ། །ས་བོན་ཉམས་པར་མ་གྱུར་ཅིང ། ས་བོན་རྣམ་པར་ཉམས་པར་མ་གྱུར་ན་ཉེས་བྱས་ལྔར་འགྱུར་རོ། །
6.282a
དགེ་སློང་གིས་སྦྱོར་བ་གཅིག་གིས་ཤིང་ལྗོན་པ་གཅིག་གཅོད་ན་ཉེས་བྱས་གཅིག་དང ། ལྟུང་བྱེད་གཅིག་ཏུ་འགྱུར་རོ། །དགེ་སློང་གིས་སྦྱོར་བ་གཅིག་གིས་ཤིང་ལྗོན་པ་གཉིས་གཅོད་ན་ཉེས་བྱས་གཅིག་དང་ལྟུང་བྱེད་གཉིས་སུ་འགྱུར་རོ། །དགེ་སློང་གིས་སྦྱོར་བ་གཅིག་གིས་ཤིང་ལྗོན་པ་རབ་ཏུ་མང་པོ་གཅོད་ན་ཉེས་བྱས་གཅིག་དང ། ལྟུང་བྱེད་རབ་ཏུ་མང་པོར་འགྱུར་རོ། །དགེ་སློང་གིས་སྦྱོར་བ་གཉིས་ཀྱིས་ཤིང་ལྗོན་པ་གཅིག་གཅོད་ན་ཉེས་བྱས་གཉིས་དང ། ལྟུང་བྱེད་གཅིག་ཏུ་འགྱུར་རོ། དགེ་སློང་གིས་སྦྱོར་བ་གཉིས་ཀྱིས་ཤིང་ལྗོན་པ་གཉིས་གཅོད་ན་ཉེས་བྱས་གཉིས་དང ། ལྟུང་བྱེད་གཉིས་སུ་འགྱུར་རོ། །དགེ་སློང་གིས་སྦྱོར་བ་གཉིས་ཀྱིས་ཤིང་ལྗོན་པ་རབ་ཏུ་མང་པོ་གཅོད་ན་ཉེས་བྱས་གཉིས་དང ། ལྟུང་བྱེད་རབ་ཏུ་མང་པོར་འགྱུར་རོ། །དགེ་སློང་གིས་སྦྱོར་བ་རབ་ཏུ་མང་པོས་ཤིང་ལྗོན་པ་གཅིག་གཅོད་ན་ཉེས་བྱས་རབ་ཏུ་མང་པོ་དང ། ལྟུང་བྱེད་གཅིག་ཏུ་འགྱུར་རོ། །དགེ་སློང་གིས་སྦྱོར་བ་རབ་ཏུ་མང་པོས་ཤིང་ལྗོན་པ་གཉིས་གཅོད་ན་ཉེས་བྱས་རབ་ཏུ་མང་པོ་དང ། ལྟུང་བྱེད་གཉིས་སུ་འགྱུར་རོ། །དགེ་སློང་གིས་སྦྱོར་བ་རབ་ཏུ་མང་པོས་ཤིང་ལྗོན་པ་རབ་ཏུ་མང་པོ་གཅོད་ན་ཉེས་བྱས་རབ་ཏུ་མང་པོ་དང ། ལྟུང་བྱེད་རབ་ཏུ་མང་པོར་འགྱུར་རོ། །དགེ་སློང་གིས་སྦྱོར་བ་གཅིག་གིས་རྩཝ་གཅིག་རྔ་ན་ཉེས་བྱས་གཅིག་དང ། ལྟུང་བྱེད་གཅིག་ཏུ་འགྱུར་རོ། །དགེ་སློང་གིས་སྦྱོར་བ་གཅིག་གིས་རྩཝ་གཉིས་རྔ་ན་ཉེས་བྱས་གཅིག་དང ། ལྟུང་བྱེད་གཉིས་སུ་འགྱུར་རོ། །དགེ་སློང་གིས་སྦྱོར་བ་གཅིག་གིས་རྩཝ་རབ་ཏུ་མང་པོ་རྔ་ན་ཉེས་བྱས་གཅིག་དང ། ལྟུང་བྱེད་རབ་ཏུ་མང་པོར་འགྱུར་རོ། །དགེ་སློང་གིས་སྦྱོར་བ་གཉིས་ཀྱིས་རྩཝ་གཅིག་རྔ་ན་ཉེས་བྱས་གཉིས་དང ། ལྟུང་བྱེད་གཅིག་ཏུ་འགྱུར་རོ། །དགེ་སློང་གིས་སྦྱོར་བ་གཉིས་ཀྱིས་རྩཝ་གཉིས་རྔ་ན་ཉེས་བྱས་གཉིས་དང ། །ལྟུང་བྱེད་གཉིས་སུ་འགྱུར་རོ། །དགེ་སློང་གིས་སྦྱོར་བ་གཉིས་ཀྱིས་རྩཝ་རབ་ཏུ་མང་པོ་རྔ་ན་ཉེས་བྱས་གཉིས་དང ། ལྟུང་བྱེད་རབ་ཏུ་མང་པོར་འགྱུར་རོ། །དགེ་སློང་གིས་སྦྱོར་བ་རབ་ཏུ་མང་པོས་རྩཝ་གཅིག་རྔ་ན་ཉེས་བྱས་རབ་ཏུ་མང་པོ་དང ། ལྟུང་བྱེད་གཅིག་ཏུ་འགྱུར་རོ། །དགེ་སློང་གིས་སྦྱོར་བ་རབ་ཏུ་མང་པོས་རྩཝ་གཉིས་རྔ་ན་ཉེས་བྱས་རབ་ཏུ་མང་པོ་དང ། ལྟུང་བྱེད
6.282b
གཉིས་སུ་འགྱུར་རོ། །དགེ་སློང་གིས་སྦྱོར་བ་རབ་ཏུ་མང་པོས་རྩཝ་རབ་ཏུ་མང་པོ་རྔ་ན་ཉེས་བྱས་རབ་ཏུ་མང་པོ་དང ། ལྟུང་བྱེད་རབ་ཏུ་མང་པོར་འགྱུར་རོ། །ུཏྤ་ལ་དང ། པད་མ་ལ་སོགས་པ་ལ་ཡང་དེ་བཞིན་དུ་རྒྱས་པར་སྦྱར་རོ། །དགེ་སློང་གིས་སྔོ་ཉམས་པར་གྱུར་ཅིག་།སྔོ་རྣམ་པར་ཉམས་པར་གྱུར་ཅིག་སྙམ་པས་སྔོའི་ཕྱོགས་སུ་ཚཝ་རྒོ་འམ། འགྱུར་བྱེད་དམ། ལྕི་བ་འམ། སས་ཉུག་པར་བྱེད་ཅིང ། སྔོ་ཉམས་པ་དང ། རྣམ་པར་ཉམས་པར་གྱུར་ན་ལྟུང་བྱེད་དུ་འགྱུར་རོ། །སྔོ་ཉམས་པར་མ་གྱུར་ཅིང་རྣམ་པར་ཉམས་པར་མ་གྱུར་ན་ཉེས་བྱས་སུ་འགྱུར་རོ། །ཉུག་པའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་སྔོ་ཉམས་པར་གྱུར་ཅིག་།སྔོ་རྣམ་པར་ཉམས་པར་གྱུར་ཅིག་སྙམ་པས་སྔོའི་ཕྱོགས་སུ་ཁུ་ཚན་ནམ། འབྲས་ཁུ་འམ། སྲན་ཚོད་འཐོར་བར་བྱེད་ཅིང ། སྔོ་ཉམས་པ་དང ། རྣམ་པར་ཉམས་པར་གྱུར་ན་ལྟུང་བྱེད་དུ་འགྱུར་རོ། །སྔོ་ཉམས་པར་མ་གྱུར་ཅིང་རྣམ་པར་ཉམས་པར་མ་གྱུར་ན་ཉེས་བྱས་སུ་འགྱུར་རོ། །འདོར་བའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་སྔོ་ཉམས་པར་གྱུར་ཅིག་།སྔོ་རྣམ་པར་ཉམས་པར་གྱུར་ཅིག་སྙམ་པས་སྔོའི་ཕྱོགས་སུ་འཆག་པར་བྱེད་ཅིང་སྔོ་ཉམས་པ་དང ། རྣམ་པར་ཉམས་པར་གྱུར་ན་ལྟུང་བྱེད་དུ་འགྱུར་རོ། །སྔོ་ཉམས་པར་མ་གྱུར་ཅིང་སྔོ་རྣམ་པར་ཉམས་པར་མ་གྱུར་ན་ཉེས་བྱས་སུ་འགྱུར་རོ། །འཆག་པའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་སྔོ་ཉམས་པར་གྱུར་ཅིག་།སྔོ་རྣམ་པར་ཉམས་པར་གྱུར་ཅིག་སྙམ་པས་སྔོའི་ཕྱོགས་སུ་ཡལ་ག་འམ། སེག་གམ། རེ་ལྡེ་འདྲིན་པར་བྱེད་ཅིང ། སྔོ་ཉམས་པ་དང ། སྔོ་རྣམ་པར་ཉམས་པར་གྱུར་ན་ལྟུང་བྱེད་དུ་འགྱུར་རོ། །སྔོ་ཉམས་པར་མ་གྱུར་ཅིང་སྔོ་རྣམ་པར་ཉམས་པར་མ་གྱུར་ན་ཉེས་བྱས་སུ་འགྱུར་རོ། །འདྲུད་པའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་ཤ་བལ་ཉམས་པར་གྱུར་ཅིག་།ཤ་བལ་རྣམ་པར་ཉམས་པར་གྱུར་ཅིག་སྙམ་པས་ཤ་བལ་ཆགས་པའི་ཕྱོགས་སུ་འཆག་པར་བྱེད་ཅིང ། ཤ་བལ་ཉམས་པ་དང ། རྣམ་པར་ཉམས་པར་གྱུར་ན་ཉེས་བྱས་སུ་འགྱུར་རོ། །ཤ་བལ་ཉམས་པར་མ་གྱུར་ཅིང་རྣམ་པར་ཉམས་པར་མ་གྱུར་ན་ཡང་ཉེས་བྱས་སུ་འགྱུར་རོ། །འཆག་པའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་ཤ་བལ་ཉམས་པར་གྱུར་ཅིག་།ཤ་བལ་རྣམ་པར་ཉམས་པར་གྱུར་ཅིག་སྙམ་པས་ཤ་བལ
6.283a
ཆགས་པའི་ཕྱོགས་སུ་ཁུ་ཚན་ནམ། འབྲས་ཁུ་འམ། སྲན་ཚོད་འདོར་བར་བྱེད་ཅིང་ཤ་བལ་ཉམས་པ་དང ། ཤ་བལ་རྣམ་པར་ཉམས་པར་གྱུར་ན་ཉེས་བྱས་སུ་འགྱུར་རོ། །ཤ་བལ་ཉམས་པར་མ་གྱུར་ཅིང་རྣམ་པར་ཉམས་པར་མ་གྱུར་ན་ཉེས་བྱས་ཉིད་དུ་འགྱུར་རོ། །འདོར་བའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་ཤ་བལ་ཉམས་པར་གྱུར་ཅིག་།ཤ་བལ་རྣམ་པར་ཉམས་པར་གྱུར་ཅིག་སྙམ་པས་ཤ་བལ་ཆགས་པའི་ཕྱོགས་སུ་ཚཝ་རྒོ་འམ། འགྱུར་བྱེད་དམ། ལྕི་བ་འམ། སས་ཉུག་པར་བྱེད་ཅིང་ཤ་བལ་ཉམས་པ་དང ། ཤ་བལ་རྣམ་པར་ཉམས་པར་གྱུར་ན་ཉེས་བྱས་སུ་འགྱུར་རོ། །ཤ་བལ་ཉམས་པར་མ་གྱུར་ཅིང་རྣམ་པར་ཉམས་པར་མ་གྱུར་ན་ཡང་ཉེས་བྱས་ཉིད་དུ་འགྱུར་རོ། །ཉུག་པའི་བསམ་པ་ལ་ནི་ལྟུང་བ་མེད་དོ། །དགེ་སློང་གིས་ཤིང་ལྗོན་པའི་རྩ་རྒྱུན་འབྱིན་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཤིང་ལྗོན་པའི་རྩ་བ་འབྱིན་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཤིང་ལྗོན་པའི་ཤུན་པ་འཆུ་བར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཤིང་ལྗོན་པའི་སྙིང་པོ་འཆུ་བར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཤིང་ལྗོན་པའི་ལོ་མ་རློན་པ་རློག་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཤིང་ལྗོན་པའི་ལོ་མ་སེར་པོ་རློག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཤིང་ལྗོན་པའི་མེ་ཏོག་ཁ་མ་བྱེ་བ་རློག་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཤིང་ལྗོན་པའི་མེ་ཏོག་ཁ་བྱེ་བ་རློག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཤིང་ལྗོན་པའི་འབྲས་བུ་མ་སྨིན་པ་རློག་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཤིང་ལྗོན་པའི་འབྲས་བུ་སྨིན་པ་རློག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཉ་ལྕིབས་འབྱིན་པར་བྱེད་ན་ཇི་སྲིད་དུ་ཆུ་ནས་སྐམ་ལ་འདོན་པར་མི་བྱེད་ཀྱི་བར་དུ་ཉེས་བྱས་སུ་འགྱུར་རོ། །ཆུ་ནས་སྐམ་ལ་འདོན་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཉ་ཚང་འདོན་པར་བྱེད་ན་ཇི་སྲིད་དུ་ཆུ་ནས་སྐམ་ལ་འདོན་པར་མི་བྱེད་ཀྱི་བར་དུ་ཉེས་བྱས་སུ་འགྱུར་རོ། །ཆུ་ནས་སྐམ་ལ་འདོན་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་ཤ་མོ་འཐོག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཕ་བ་གོལ་གོལ་འཐོག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་རྫ་མ་འམ། ཕྲུ་བ་འམ། རིལ་བ་འམ། གོས་སམ། གོས་ཀྱི་རྡང་ལ་རླམ་ཆགས་པ་བསྐྱོད་ན་ཉེས་བྱས་སུ་འགྱུར་རོ། །རུང་བར་བྱས་ཏེ་སྤྱོད་པ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ས་བོན་དང་སྐྱེ་བ་འཇིག་པའི་ལྟུང་བྱེད་དེ་བཅུ་གཅིག་པ་རྫོགས་སྷོ།། ་་་་་་་་་།།སྔ་ཞུས་ཀུན་དགའོ། །གཉིས་ཞུས་སྔགས། གསུམ་ཞུས།།
7.1a
(ཇ)་༄#། !་།འདུལ་བ་ལུང་བཞུགས་སོ། །[(黃)་律師戒行經第七部]
7.1b
འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་གསུམ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །གང་གི་ཚེ་ཚེ་དང་ལྡན་པ་གྱད་བུ་ནོར་དགེ་འདུན་གྱིས་གནས་མལ་འབོག་པ་དང ། ཟས་ལ་སྐོ་བར་བསྐོས་པའི་ཚེ་ན་དགེ་སློང་མཛའ་བོ་དང ། ས་ལས་སྐྱེས་གཉིས་ཚེ་དང་ལྡན་པ་གྱད་བུ་ནོར་དང་ཚེ་རབས་ནས་ཁོན་ཡོད་པས་དགེ་སློང་མཛའ་བོ་དང ། ས་ལས་སྐྱེས་གཉིས་ཚེ་དང་ལྡན་པ་ཉེ་དགའ་དང་ལྷན་ཅིག་ཏུ་འདུ་འཛིའི་གཏམ་གྱིས་འཁོད་པ་ན། ཚེ་དང་ལྡན་པ་གྱད་བུ་ནོར་ཕྱོགས་དེར་འོངས་པ་དང ། དེ་གཉིས་ཀྱིས་ཉེ་དགའ་ལ་སྨྲས་པ། ཚེ་དང་ལྡན་པ་ཉེ་དགའ་གལ་ཏེ་ཁྱོད་ཀྱང་དགེ་འདུན་གྱིས་གནས་མལ་འབོག་པ་དང ། ཟས་ལ་སྐོ་བར་བསྐོས་པར་གྱུར་ན། ཁྱོད་ཀྱང་ཁོ་བོ་ཅག་ལ་འདི་ལྟ་སྟེ། དཔེར་ན་ཚེ་དང་ལྡན་པ་གྱད་བུ་ནོར་བཞིན་དུ་ཐོ་འཚམ་པར་འགྱུར་རོ། །ཉེ་དགས་དེ་གཉིས་ལ་སྨྲས་པ། ཚེ་དང་ལྡན་པ་གཉིས་ཁྱེད་གཉིས་དགེ་འདུན་འཐུན་པས་དགེ་སློང་གང་གནས་མལ་འབོག་པ་དང ། ཟས་ལ་སྐོ་བར་བསྐོས་པར་ཤེས་བཞིན་དུ་དེ་ལ་ངོར་འཕྱ་འམ། དེ་གཉིས་ཀྱིས་སྨྲས་པ། ཅི་ཁོ་བོ་ཅག་གཉིས་འདུར་ཡང་མི་དབང་ངམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་འཐུན་པས་དགེ་སློང་གང
7.2a
གནས་མལ་འབོག་པ་དང ། ཟས་ལ་སྐོ་བར་བསྐོས་པར་ཤེས་བཞིན་དུ་དེ་ལ་ངོར་འཕྱ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་མཛའ་བོ་དང ། ས་ལས་སྐྱེས་གཉིས་སམ། གཞན་ཡང་དེ་ལྟ་བུ་གང་ཡིན་པ་དེ་ངོར་འཕྱ་བའི་གྲངས་སུ་ཆུག་ཤིག་།འདི་ལྟར་གྲངས་སུ་གཞུག་པར་བྱ་སྟེ། གནས་མལ་བཤམ་པ་བྱས་ནས། གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མཛའ་བོ་དང ། ས་ལས་སྐྱེས་འདི་གཉིས་འཚལ་བཞིན་དུ་དགེ་སློང་གང་དགེ་འདུན་འཐུན་པས་གནས་མལ་འབོག་པ་དང ། ཟས་ལ་སྐོ་བར་བསྐོས་པ་ཚེ་དང་ལྡན་པ་གྱད་བུ་ནོར་དེ་ལ་ངོར་འཕྱ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མཛའ་བོ་དང ། ས་ལས་སྐྱེས་ངོར་འཕྱ་བའི་གྲངས་སུ་སྩལ་ཏོ། །འདི་ནི་གསོལ་བའོ། །གང་གི་ཚེ་དགེ་འདུན་གྱིས་དགེ་སློང་མཛའ་བོ་དང ། ས་ལས་སྐྱེས་གཉིས་ངོར་འཕྱ་བའི་གྲངས་སུ་བཅུག་པ་དེའི་ཚེ་ན་དེ་གཉིས་ཚེ་དང་ལྡན་པ་ཉེ་དགའ་དང་ལྷན་ཅིག་གཏམ་ཟེར་ཞིང་འདུག་པ་ན། ཚེ་དང་ལྡན་པ་གྱད་བུ་ནོར་ཕྱོགས་དེར་འོངས་པ་དང ། དེ་གཉིས་ཀྱིས་ཉེ་དགའ་ལ་སྨྲས་པ། ཚེ་དང་ལྡན་པ་ཉེ་དགའ་གལ་ཏེ་ཁྱོད་ཀྱང་དགེ་འདུན་གྱིས་གནས་མལ་འབོག་པ་དང ། ཟས་ལ་སྐོ་བར་བསྐོས་པར་གྱུར་ན། ཁྱོད་ཀྱང་ཁོ་བོ་ཅག་ལ་འདི་ལྟ་སྟེ་དཔེར་ན་ཁ་ཅིག་བཞིན་དུ་ཐོ་འཚམ་པར་འགྱུར་རོ། །ཉེ་དགས་དེ་གཉིས་ལ་སྨྲས་པ། ཚེ་དང་ལྡན་པ་གཉིས་ཁྱེད་གཉིས་དགེ་འདུན་འཐུན་པས་དགེ་སློང་གང་གནས་མལ་འབོག་པ་དང ། ཟས་ལ་སྐོ་བར་བསྐོས་པར་ཤེས་བཞིན་དུ་དེ་ལ་གཞོག་འཕྱས་བྱེད་དམ། དེ་གཉིས་ཀྱིས་སྨྲས་པ། ཅི་ཁོ་བོ་ཅག་གཉིས་ཀྱིས་འགའ་ཞིག་གི་མིང་ངམ་རུས་ནས་སྨོས་སམ། ཉེ་དགས་སྨྲས་པ།
7.2b
གལ་ཏེ་མིང་དང་རུས་མ་སྨོས་པར་གཞོག་འཕྱས་བྱེད་དུ་གནང་ན། ཉེ་དགས་ཀྱང་འཇིག་རྟེན་ཐམས་ཅད་ལ་མིང་དང་རུས་མི་སྨོས་པར་གཞོག་འཕྱས་བྱས་པར་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་འཐུན་པས། དགེ་སློང་གང་གནས་མལ་འབོག་པ་དང ། ཟས་ལ་སྐོ་བར་བསྐོས་པར་ཤེས་བཞིན་དུ་དེ་ལ་གཞོག་འཕྱས་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་མཛའ་བོ་དང ། ས་ལས་སྐྱེས་གཉིས་སམ། གཞན་ཡང་དེ་ལྟ་བུ་གང་ཡིན་པ་དེ་གཞོག་འཕྱས་བྱེད་པའི་གྲངས་སུ་ཆུག་ཤིག་འདི་ལྟར་གྲངས་སུ་གཞུག་པར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མཛའ་བོ་དང ། ས་ལས་སྐྱེས་འདི་གཉིས་འཚལ་བཞིན་དུ་དགེ་སློང་གང་དགེ་འདུན་འཐུན་པས་གནས་མལ་འབོག་པ་དང ། ཟས་ལ་སྐོ་བར་བསྐོས་པ་ཚེ་དང་ལྡན་པ་གྱད་བུ་ནོར་དེ་ལ་གཞོག་འཕྱས་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མཛའ་བོ་དང ། ས་ལས་སྐྱེས་གཞོག་འཕྱས་བགྱིད་པའི་གྲངས་སུ་སྩལ་ཏོ། །འདི་ནི་གསོལ་བའོ། །གང་གི་ཚེ་དགེ་འདུན་གྱིས་དགེ་སློང་མཛའ་བོ་དང ། ས་ལས་སྐྱེས་ངོར་འཕྱ་བ་དང ། གཞོག་འཕྱས་བྱེད་པའི་གྲངས་སུ་བཅུག་པ་དེའི་ཚེ་ན་དེ་གཉིས་ཚེ་དང་ལྡན་པ་གྱད་བུ་ནོར་ལ་ངོར་འཕྱ་བ་དང ། གཞོག་འཕྱས་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་འཐུན་པས་དགེ་སློང་གང་གནས་མལ་འབོག་པ་དང ། ཟས་ལ་སྐོ་བར་བསྐོས་པར་ཤེས་བཞིན་དུ་དེ་ལ་ངོར་འཕྱ་བ་དང ། གཞོག་འཕྱས་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི
7.3a
དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་མཛའ་བོ་དང ། ས་ལས་སྐྱེས་གཉིས་ལ་རྨས་པ། དགེ་སློང་ཁྱེད་གཉིས་ཤེས་བཞིན་དུ་དགེ་སློང་གང་དགེ་འདུན་འཐུན་པས་གནས་མལ་འབོག་པ་དང ། ཟས་ལ་སྐོ་བར་བསྐོས་པ་དགེ་སློང་གྱད་བུ་ནོར་དེ་ལ་ངོར་འཕྱ་བ་དང ། གཞོག་འཕྱས་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འཕྱ་འམ་གཞོག་འཕྱས་བྱེད་ན་ལྟུང་བྱེད་དོ། །འཕྱ་འམ་གཞོག་འཕྱས་བྱེད་ན་ཞེས་བྱ་བ་ནི་འཕྱ་བ་དང་གཞོག་འཕྱས་བྱ་བའི་བསམ་པས་ངག་དང ། ཚིག་དང་ཐ་སྙད་དང ། སྐད་དང ། རྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལམ་དང ། ངག་གི་རྣམ་པར་རིག་བྱེད་རྗོད་པའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དགེ་འདུན་གྱིས་བགྲངས་ཤིང ། དེ་ཡང་གང་ཟག་བཅུ་གཉིས་སུ་བསྐོས་པ་སྦྱོར་བ་མ་བཏང་བ་དག་ལ་འཕྱ་ན་ལྟུང་བྱེད་དུ་འགྱུར་རོ། །གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་བགྲངས་ཤིང
7.3b
དེ་ཡང་གང་ཟག་བཅུ་གཉིས་སུ་བསྐོས་པ་སྦྱོར་བ་བཏང་བ་དག་ལ་འཕྱ་ན་ལྟུང་བྱེད་དུ་འགྱུར་རོ། །གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་བགྲངས་ཤིང་དེ་ཡང་གང་ཟག་བཅུ་གཉིས་སུ་མ་བསྐོས་པ་སྦྱོར་བ་མ་བཏང་བ་དག་ལ་འཕྱ་ན་ལྟུང་བྱེད་དུ་འགྱུར་རོ། །གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་བགྲངས་ཤིང་དེ་ཡང་གང་ཟག་བཅུ་གཉིས་སུ་མ་བསྐོས་པ་སྦྱོར་བ་བཏང་བ་དག་ལ་འཕྱ་ན་ལྟུང་བྱེད་དུ་འགྱུར་རོ། །གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མ་བགྲངས་ཤིང་དེ་ཡང་གང་ཟག་བཅུ་གཉིས་སུ་བསྐོས་པ་སྦྱོར་བ་མ་བཏང་བ་དག་ལ་འཕྱ་ན་ཉེས་བྱས་སུ་འགྱུར་རོ། །གཞོག་འཕྱས་བྱེད་ན་ཉེས་བྱས་སུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ཉེས་བྱས་སུ་འགྱུར་རོ། །དགེ་སློང་དགེ་འདུན་གྱིས་མ་བགྲངས་ཤིང་དེ་ཡང་གང་ཟག་བཅུ་གཉིས་སུ་བསྐོས་པ་སྦྱོར་བ་བཏང་བ་དག་ལ་འཕྱ་ན་ཉེས་བྱས་སུ་འགྱུར་རོ། །གཞོག་འཕྱས་བྱེད་ན་ཉེས་བྱས་སུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ཉེས་བྱས་སུ་འགྱུར་རོ། །དགེ་སློང་དགེ་འདུན་གྱིས་མ་བགྲངས་ཤིང་དེ་ཡང་གང་ཟག་བཅུ་གཉིས་སུ་མ་བསྐོས་པ་སྦྱོར་བ་མ་བཏང་བ་དག་ལ་འཕྱ་ན་ཉེས་བྱས་སུ་འགྱུར་རོ། །གཞོག་འཕྱས་བྱེད་ན་ཉེས་བྱས་སུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ཉེས་བྱས་སུ་འགྱུར་རོ། །དགེ་སློང་དགེ་འདུན་གྱིས་མ་བགྲངས་ཤིང་དེ་ཡང་གང་ཟག་བཅུ་གཉིས་སུ་མ་བསྐོས་པ་སྦྱོར་བ་བཏང་བ་དག་ལ་འཕྱ་ན་ཉེས་བྱས་སུ་འགྱུར་རོ། །གཞོག་འཕྱས་བྱེད་ན་ཉེས་བྱས་སུ་འགྱུར་རོ། །འཕྱ་བ་དང་གཞོག་འཕྱས་བྱེད་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཕྱ་བའི་ལྟུང་བྱེད་དེ་བཅུ་གཉིས་པ། །
7.4a
རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་ཀཽ་ཤམྦི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་འདུན་པ་ལྟུང་བ་ཆོས་བཞིན་དུ་ཕྱིར་མི་བྱེད་ནས། དེ་ལ་དགེ་སློང་དོན་འདོད་པ། བདེ་བ་འདོད་པ། བདེ་བ་ལ་རེག་པར་འདོད་པ། གྲུབ་པ་དང་བདེ་བ་འདོད་པ་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འདུན་པ་ཆོས་བཞིན་དུ་ཕྱིར་གྱིས་ཤིག་།དེས་སྨྲས་པ། སུ་ལ་ལྟུང་བ་བྱུང་བ་དེ་ཕྱིར་བྱེད་པར་འགྱུར་རོ། །ཁྱོད་ལ་ལྟུང་བ་བྱུང་བ་སུ་ཞིག་ཕྱིར་བྱེད་པར་འགྱུར། སུ་འགྱོད་པར་འགྱུར་བའོ། །ཁྱོད་ལ་ལྟུང་བ་བྱུང་བ་ལ་སུ་འགྱོད་པར་འགྱུར། གལ་ཏེ་ཚེ་དང་ལྡན་པ་ཁྱེད་ཅག་ལ་ལྟུང་བ་བྱུང་ན་ཁོ་བོའི་མདུན་དུ་མ་འཆགས་པར་གཞན་གྱི་མདུན་དུ་ཤོག་ཤིག་།ཚེ་དང་ལྡན་པ་དག་ཁྱེད་ཅག་ནི་རིགས་སྣ་ཚོགས་དང ། རུས་སྣ་ཚོགས་དང ། ཁྱིམ་སྣ་ཚོགས་ནས་རབ་ཏུ་བྱུང་བ་དག་ཡིན་ཏེ། འདི་ལྟ་སྟེ་དཔེར་ན་ཤིང་ལྗོན་པ་དག་གི་ལོ་མ་སྣ་ཚོགས་རླུང་གིས་བརླགས་པ་དག་གཅིག་ཏུ་ལྟུང་ཞིང་གཅིག་ཏུ་འདུག་པ་དེ་བཞིན་དུ་ཁྱེད་ཅག་ཀྱང་རིགས་སྣ་ཚོགས་དང ། རུས་སྣ་ཚོགས་དང ། ཁྱིམ་སྣ་ཚོགས་ནས་རབ་ཏུ་བྱུང་བ་དག་ཡིན་གྱི། ཁོ་བོའི་འཕགས་པས་ནི་བྱང་ཆུབ་ཐུགས་སུ་ཆུད་པ་ཡིན་ནོ་ཞེས་དེ་དགེ་སློང་རྣམས་ཀྱིས་བསྒོ་བ་རྣ་ལ་གཟོན་པར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་བསྒོ་བ་རྣ་ལ་གཟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འདུན་པ་དང་གཞན་ཡང་དེ་ལྟ་བུ་གང་ཡིན་པ་ལ་བསྒོ་བ་རྣ་ལ་གཟོན་པའི་གྲངས་སུ་ཆུག་ཤིག་།འདི་ལྟར་གྲངས་སུ་གཞུག་པར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱ་སྟེ། དགེ་འདུན་བཙུན
7.4b
པ་རྣམས་གསན་དུ་གསོལ། ཚེ་དང་ལྡན་པ་འདུན་པ་འདི་ལྟུང་བ་བྱུང་ཡང་ཆོས་བཞིན་དུ་སླར་མི་བགྱིད་དེ། འདི་ལ་དགེ་སློང་དོན་འཚལ་བ། ཕན་པ་འཚལ་བ། བདེ་བ་འཚལ་བ། བདེ་བ་ལ་རེག་པར་འཚལ་བ། གྲུབ་པ་དང་བདེ་བ་འཚལ་བ་རྣམས་ཀྱིས་གཞི་དེས་གླེངས་ཀྱང་དགེ་སློང་རྣམས་ཀྱིས་བསྒོ་བ་རྣ་ལ་གཟོན་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་ཚེ་དང་ལྡན་པ་འདུན་པ་བསྒོ་བ་རྣ་ལ་གཟོན་པའི་གྲངས་སུ་སྩལ་ཏོ། །འདི་ནི་གསོལ་བའོ། །གང་གི་ཚེ་ན་ཚེ་དང་ལྡན་པ་འདུན་པ་བསྒོ་བ་རྣ་ལ་གཟོན་པའི་གྲངས་སུ་བཅུག་པ་དེའི་ཚེ་ན་དེས་བསམས་པ། བདག་ལ་ཉེས་པ་གང་བྱུང་བ་དེ་ནི་བདག་གིས་དེ་དག་ལ་ཚིག་སྨྲས་པ་ལས་གྱུར་པ་ཡིན་ཏེ། གང་གིས། སྐྱེས་བུ་མཁས་དང་ལྡན་པ་ཡིས། །ངག་རྣམས་བཞི་པོ་བསྲུང་བྱ་སྟེ། །ནགས་ཀྱི་ནང་དུ་གོང་མ་སྲེག་།སྒྲ་འབྱིན་པས་ནི་ཟིན་ལ་ལྟོས། །ཤེས་སྨྲས་པ་ནི་ལེགས་པར་སྨྲས་པ་ཡིན་ནོ་སྙམ་ནས། དེ་དགེ་སློང་རྣམས་ཀྱིས་སྨྲས་པ་ན་ཅང་མི་སྨྲ་བས། དགེ་སློང་རྣམས་ཀྱིས་བསྒོ་བ་རྣ་ལ་གཟོན་པར་བྱེད་ནས། ་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་སྨྲས་པ་ན་ཅང་མི་སྨྲ་བས་དགེ་སློང་རྣམས་ཀྱིས་བསྒོ་བ་རྣ་ལ་གཟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འདུན་པ་འམ་གཞན་ཡང་དེ་ལྟ་བུ་གང་ཡིན་པ་དེ་ཅང་མི་སྨྲ་བ་བསྒོ་བ་རྣ་ལ་གཟོན་པའི་གྲངས་སུ་ཆུག་ཤིག་།འདི་ལྟར་གཞུག་པར་བྱ་སྟེ། གནས་མལ་བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་འདུན་པ་འདི་ལྟུང་བ་བྱུང་ཡང་ཆོས་བཞིན་དུ་སླར་མི་བགྱིད་དེ། འདི་ལ་དགེ་སློང་དོན
7.5a
འཚལ་བ། ཕན་པ་འཚལ་བ། བདེ་བ་འཚལ་བ། བདེ་བ་ལ་རེག་པར་འཚལ་བ། གྲུབ་པ་དང་བདེ་བ་འཚལ་བ་རྣམས་ཀྱིས་གཞི་དེས་གླེངས་ཀྱང་དགེ་སློང་རྣམས་ལ་ཅང་མི་སྨྲ་བས་རྣ་ལ་གཟོན་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་ཚེ་དང་ལྡན་པ་འདུན་པ་ཅང་མི་སྨྲ་བས་རྣ་ལ་གཟོན་པའི་གྲངས་སུ་སྩལ་ཏོ། །འདི་ནི་གསོལ་བའོ། །གང་གི་ཚེ་དགེ་འདུན་གྱིས་དགེ་སློང་འདུན་པ་བསྒོ་བ་རྣ་ལ་གཟོན་པ་དང ། ཅང་མི་སྨྲ་བས་རྣ་ལ་གཟོན་པའི་གྲངས་སུ་བཅུག་པ་དེའི་ཚེ་ན་དགེ་སློང་རྣམས་ཀྱིས་བསྒོ་བ་རྣ་ལ་གཟོན་པ་དང ། ཅང་མི་སྨྲ་བས་རྣ་ལ་གཟོན་པར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་བསྒོ་བ་རྣ་ལ་གཟོན་པ་དང ། ཅང་མི་སྨྲ་བས་རྣ་ལ་གཟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་འདུན་པ་ལ་སྨྲས་པ། དགེ་སློང་ཁྱོད་དགེ་སློང་རྣམས་ཀྱིས་བསྒོ་བ་རྣ་ལ་གཟོན་པ་དང ། ཅང་མི་སྨྲ་བས་རྣ་ལ་གཟོན་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས
7.5b
པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བསྒོ་བ་རྣ་ལ་གཟོན་ན་ལྟུང་བྱེད་དོ། །བསྒོ་བ་རྣ་ལ་གཟོན་ན་ཞེས་བྱ་བ་ནི་བསྒོ་བ་རྣ་ལ་གཟོན་པའི་བསམ་པས་ངག་དང ། ཚིག་དང ། ཐ་སྙད་དང ། སྐད་དང ། རྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་བརྗོད་པའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དགེ་སློང་གི་གན་དུ་འོངས་ཏེ་འདི་སྐད་ཅེས་ཚེ་དང་ལྡན་པ་ཁྱོད་ཀྱིས་དགེ་སློང་སྐྲ་དང་ཁ་སྤུ་བྲེགས་ནས་རིང་པོ་མ་ལོན་པ་སྣམ་སྦྱར་དམར་སེར་དང་ལྷུང་བཟེད་ཞ་ཉེའི་དབྱར་འདབ་ཀྱིས་སྦྱར་བ་དང ། ཁར་བ་སྦུ་བུས་དཀྲིས་པ་དང ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཀྱིས་འོང་བ་མཐོང་ངམ་ཞེས་ཟེར་བ་ལ། དེས་འདི་སྐད་ཅེས་ཚེ་དང་ལྡན་པ་ཁོ་བོས་དགེ་སློང་སྐྲ་དང་ཁ་སྤུ་བྲེགས་ནས་རིང་པོ་མ་ལོན་པ་སྣམ་སྦྱར་དམར་སེར་དང་ལྷུང་བཟེད་ཞ་ཉེའི་དབྱར་འདབ་ཀྱིས་སྦྱར་བ་དང ། ཁར་བ་སྦུ་བུས་བཀྲིས་པ་དང ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཀྱིས་འོང་བ་ནི་མ་མཐོང་གི། །འདི་ལྟར་ཁོ་བོས་དགེ་སློང་རྐང་པ་གཉིས་ཀྱིས་འོང་བ་མཐོང་ངོ་ཞེས་སྨྲས་ན་ལྟུང་བྱེད་དུ་འགྱུར་རོ། །དགེ་སློང་དགེ་སློང་གི་གན་དུ་འོངས་ཏེ། འདི་སྐད་ཅེས་ཚེ་དང་ལྡན་པ་ཁྱོད་ཀྱིས་དགེ་སློང་མ་སྐྲ་བྲེགས་ནས་རིང་པོ་མ་ལོན་པ་སྣམ་སྦྱར་དམར་སེར་དང་ལྷུང་བཟེད་ཞ་ཉེའི་དབྱར
7.6a
འདབ་ཀྱིས་སྦྱར་བ་དང ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཀྱིས་འོང་བ་མཐོང་ངམ་ཞེས་ཟེར་བ་ལ། དེས་འདི་སྐད་ཅེས་ཚེ་དང་ལྡན་པ་ཁོ་བོས་དགེ་སློང་མ་སྐྲ་བྲེགས་ནས་རིང་པོ་མ་ལོན་པ་སྣམ་སྦྱར་དམར་སེར་དང་ལྷུང་བཟེད་ཞ་ཉེའི་དབྱར་འདབ་ཀྱིས་སྦྱར་བ་དང་ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཀྱིས་འོངས་པ་ནི་མ་མཐོང་གི། །འདི་ལྟར་ཁོ་བོས་དགེ་སློང་མ་རྐང་པ་གཉིས་ཀྱིས་འོང་བ་མཐོང་ངོ་ཞེས་སྨྲས་ན་ལྟུང་བྱེད་དུ་འགྱུར་རོ། །དགེ་སློང་མ་དང་དགེ་ཚུལ་དང ། དགེ་ཚུལ་མ་ལ་ཡང་དེ་བཞིན་དུ་ཅི་རིགས་པར་སྦྱར་རོ། །དགེ་སློང་དགེ་སློང་གི་གན་དུ་འོངས་ཏེ། འདི་སྐད་ཅེས་ཚེ་དང་ལྡན་པ་ཇི་ལྟར་ཁྱིམ་པ་བུ་རམ་ཤིང་གི་ཁུར་གྱིས་སམ། སྨྱིག་མའི་ཁུར་གྱིས་སམ། འདམ་བུའི་ཁུར་གྱིས་སམ། ཤིང་གི་ཁུར་གྱིས་སམ། ཞུན་མར་གྱི་བུམ་པས་སམ། འབྲུ་མར་གྱི་བུམ་པས་སམ། སྦྲང་རྩིའི་བུམ་པས་སམ། བུ་རམ་གྱི་དབུ་བའི་བུམ་པས་འོང་བ་མཐོང་ངོ་ཞེས་ཟེར་བ་ལ། དེས་འདི་སྐད་ཅེས་ཚེ་དང་ལྡན་པ་ཁོ་བོས་ཁྱིམ་པ་བུ་རམ་ཤིང་གི་ཁུར་གྱིས་སམ། སྨྱིག་མའི་ཁུར་གྱིས་སམ། འདམ་བུའི་ཁུར་གྱིས་སམ། ཤིང་གི་ཁུར་གྱིས་སམ། ཞུན་མར་གྱི་བུམ་པས་སམ། འབྲུ་མར་གྱི་བུམ་པས་སམ། སྦྲང་རྩིའི་བུམ་པས་སམ། བུ་རམ་གྱི་དབུ་བའི་བུམ་པས་འོངས་པ་ནི་མ་མཐོང་གི། །འདི་ལྟར་ཁོ་བོས་ཁྱིམ་པ་རྐང་པ་གཉིས་ཀྱིས་འོང་བ་མཐོང་ངོ་ཞེས་སྨྲས་ན་ལྟུང་བྱེད་དུ་འགྱུར་རོ། །དགེ་སློང་དགེ་སློང་གི་གན་དུ་འོངས་ཏེ། འདི་སྐད་ཅེས་ཚེ་དང་ལྡན་པ་ཇི་ལྟར་ཁྱིམ་པ་མོ་གོས་ཐམས་ཅད་སྔོན་པོས་སམ། ཐམས་ཅད་སེར་པོས་སམ། ཐམས་ཅད་དམར་པོས་སམ། ཐམས་ཅད་དཀར་པོས་སམ། ཞུན་མར་གྱི་བུམ་པས་སམ།
7.6b
འབྲུ་མར་གྱི་བུམ་པས་སམ། སྦྲང་རྩིའི་བུམ་པས་སམ། བུ་རམ་གྱི་དབུ་བའི་བུམ་པས་འོང་བ་མཐོང་ངམ་ཞེས་ཟེར་བ་ལ། དེས་འདི་སྐད་ཅེས་ཚེ་དང་ལྡན་པ་ཁོ་བོས་ཁྱིམ་པ་མོ་གོས་ཐམས་ཅད་སྔོན་པོས་སམ། ཐམས་ཅད་སེར་པོས་སམ། ཐམས་ཅད་དམར་པོས་སམ། ཐམས་ཅད་དཀར་པོས་སམ། ཞུན་མར་གྱི་བུམ་པས་སམ། འབྲུ་མར་གྱི་བུམ་པས་སམ། སྦྲང་རྩིའི་བུམ་པས་སམ། བུ་རམ་གྱི་དབུ་བའི་བུམ་པས་འོང་བ་ནི་མ་མཐོང་གི། །འདི་ལྟར་ཁོ་བོས་ཁྱིམ་པ་མོ་རྐང་པ་གཉིས་ཀྱིས་འོང་བ་མཐོང་ངོ་ཞེས་སྨྲས་ན་ལྟུང་བྱེད་དུ་འགྱུར་རོ། །དགེ་སློང་གིས་ཇི་ཙམ་དུ་གཞན་འདྲི་བ་ལ་ལན་གཞན་འདེབས་ན་ཐམས་ཅད་དུ་ལྟུང་བྱེད་དུ་འགྱུར་རོ། །རྣམ་གྲངས་དེ་དག་ཐམས་ཅད་ལ་ཅང་མི་སྨྲ་བས་རྣ་ལ་གཟོན་ན་ཉེས་བྱས་སུ་འགྱུར་རོ། །གཤེད་མའི་གསད་པར་བྱ་བ་བྲོས་ནས་དེ་དགེ་སློང་གི་གན་དུ་འོངས་ཏེ་འཕགས་པ་ཇི་ལྟར་གསད་པར་བྱ་བ་མཐོང་ངམ་ཞེས་འདྲི་ན། གལ་ཏེ་གྲང་བའི་དུས་ཡིན་དགེ་སློང་གིས་གཤེད་མ་ལ་བཞིན་བཟངས་མེ་ཁང་དུ་ཞུགས་ལ་མེ་འདེ་ཤིག་ཅེས་རྗོད་པར་བྱའོ། །གལ་ཏེ་ཚ་བའི་དུས་ཡིན་ན་བཞིན་བཟངས་ཇེ་དཔོང་སའི་ཁང་པར་ཞུགས་ཤིག་།ཇེ་སྐོམ་འཐུང་ཞིག་།ཇེ་ངལ་སོ་ཤིག་ཅེས་བརྗོད་པར་བྱའོ། །གལ་ཏེ་དེས་དེ་སྐད་ཅེས་བདག་མི་གྲང་ངོ ། །བདག་མི་ཚའོ། །བདག་མི་སྐོམ་མོ། །བདག་མ་ཆད་དོ། །འདི་ལྟར་བདག་གསད་པར་བྱ་བ་འདྲིའོ་ཞེས་ཟེར་ན། ཇེ་སེན་མོ་ལ་བལྟས་ཏེ་སེན་མོ་མཐོང་ངོ་ཞེས་བརྗོད་པར་བྱའོ། །ནམ་མཁའ་ལ་བལྟས་ཏེ་ནམ་མཁའ་མཐོང་ངོ་ཞེས་བརྗོད་པར་བྱའོ། །གལ་ཏེ་འདི་སྐད་ཅེས་བདག་སེན་མོ་མི་འདྲིའོ། །བདག་ནམ་མཁའ་མི་འདྲིའོ། །འདི་ལྟར་བདག་གསད་པར་བྱ་བ་འདྲིའོ། །ཞེས་ཟེར་ན། དགེ་སློང་དེས་ཕྱོགས་བཞིར་རྣམ་པར་བལྟས་ཏེ་འདུ་བྱེད་ཐམས་ཅད་བདག་མེད་པ་ཡིད་ལ་བྱས་ནས་དོན་དམ་པར་ན་སེམས་ཅན་མ་མཐོང་ངོ་ཞེས་བརྗོད་པར་བྱ་བ་ལ་ལྟུང་བ་མེད་དོ། །ཁ་ན་བ་དང ། ཁས་སྨན་འཛིན་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་
7.7a
གིས་ཉེན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་འདུན་པ་ཚངས་པ་མཚུངས་པར་སྤྱོད་པ་རྣམས་ཀྱི་ངག་མི་ཉན་ནས་བསྒོ་བ་རྣ་ལ་གཟོན་པ་དང ། ཅང་མི་སྨྲ་བས་རྣ་ལ་གཟོན་པའི་གྲངས་སུ་སྩལ་བ་ལ་གཟིགས། དགེ་སློང་དག་ད་ལྟར་དུ་མ་ཟད་ཀྱི་འདི་ལྟར་འདས་པའི་དུས་ན་ཡང་འདི་དགེ་བའི་བཤེས་གཉེན་རྣམས་ཀྱི་ངག་མི་ཉན་ནས་ཚུལ་མ་ཡིན་པས་སྡུག་བསྔལ་བར་གྱུར་ཏེ། དེ་ཉོན་ཅིག་།དགེ་སློང་དག་སྔོན་བྱུང་བའི་དུས་ན་རྫིང་ཞིག་ན་རུ་སྦལ་གཅིག་དང་ངང་པ་གཉིས་ཤིག་འཁོད་དེ། དེ་ནས་དུས་གཞན་ཞིག་ན་ལོ་བཅུ་གཉིས་སུ་ཐན་པ་བྱུང་ནས་དེས་རྫིང་དེ་བསྐམ་པར་བརྩམས་སོ། །ཆོས་ཉིད་ཀྱིས་ན་འཇིག་རྟེན་གནས་པ་ཆགས་ནས་རིང་པོ་མ་ལོན་པའི་ཚེ་ན་དུད་འགྲོ་དག་ཀྱང་སྨྲ་ཤེས་པས་ངང་པ་གཉིས་ཀྱིས་རུ་སྦལ་ལ་སྨྲས་པ། གྲོགས་པོ་ཁོ་བོ་ཅག་གཉིས་ནི་རྫིང་གཞན་དུ་འགྲོའོ། །རུ་སྦལ་གྱིས་སྨྲས་པ། གྲོགས་པོ་གཉིས་ཁོ་བོ་ཡང་ཁྲིད་དེ་སོང་ཤིག་།ངང་པ་གཉིས་ཀྱིས་སྨྲས་པ། ཁྱོད་ཇི་ལྟར་ཁྲིད་དེ་འགྲོ་བར་བྱ། རུ་སྦལ་གྱིས་སྨྲས་པ། ཁོ་བོ་ཤིང་གི་དབུས་སུ་ཁས་གཟུང་བར་བྱས། ཁྱེད་གཉིས་ཀྱིས་རྩེ་མོ་གཉིས་ནས་ཟུང་ལ་དེང་ཤིག་།ངང་པ་གཉིས་ཀྱིས་སྨྲས་པ། ཁྱོད་སྨྲ་འདོད་པ་ཡིན་པས་ཚིག་སྲུང་མི་ནུས་ཀྱིས་ཁོ་བོ་ཅག་གཉིས་ཁྱེར་ཏེ་མི་འགྲོའོ། །རུ་སྦལ་གྱིས་སྨྲས་པ། ཚིག་བསྲུང་བར་བྱའོ། །ངང་པ་གཉིས་ཀྱིས་རུ་སྦལ་དེ་ཁྱེར་ཏེ་སྟེང་གི་ནམ་མཁའ་ལ་འཕགས་ནས་ཇི་ཙམ་ན་རི་བྲགས་ཤིག་གི་སྟེང་ན་ཕར་སོང་བ་དང ། ཁྱེའུ་དང་བུ་མོ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ལྟོས་ཤིག་ངང་པ་གཉིས་ཀྱིས་རུ་སྦལ་ཞིག་ཁྱེར་ཏེ་སོང་ངོ་ཞེས་ཟེར་བ་ན། རུ་སྦལ་དེས་ཀྱང་དང་དུ་བླངས་སོ། །དེ་ནས་རི་བྲགས་གཞན་ཞིག་གི་སྟེང་ན་ཕར་སོང་བ་དང ། ཡང་ཁྱེའུ་དང་བུ་མོ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ལྟོས་ཤིག་།ངང་པ་གཉིས་ཀྱིས་རུ་སྦལ་ཞིག་ཁྱེར་ཏེ་སོང་ངོ་ཞེས་ཟེར་བ་དང ། རུ་སྦལ་དེས་བསམས་པ། བདག་གིས
7.7b
ཡུན་ཇི་སྲིད་དུ་ཐོ་འཚམ་པ་མནགས་པར་བྱ་སྙམ་ནས་སྨྲས་པ། ངང་པ་གཉིས་ཀྱིས་ཁོ་བོ་ཁྱེར་བ་མ་ཡིན་གྱིས་འདི་ལྟར་ཁོ་བོ་རང་འགྲོའོ་ཞེས་བྱས་པ་དང ། ཤིང་ཤོར་ནས་དེ་ས་ལ་ལྷུང་སྟེ། དེ་དག་གིས་བཟུང་ནས་ཚུལ་མ་ཡིན་པས་སྡུག་བསྔལ་བར་བྱས་པ་དང་ལྷས་ཚིགས་སུ་བཅད་པ་སྨྲས་པ། མཛའ་ཤེས་ཕན་པར་འདོད་རྣམས་ཀྱིས། །སྨྲས་པ་གང་ཞིག་མི་འཛིན་པ། །རུ་སྦལ་གྱིས་ནི་ཤིང་བཏང་ལྟར། །དེ་ནི་ལྷུང་ཞིང་ལས་པར་འགྱུར། །དགེ་སློང་དག་དེའི་ཚེ་དེའི་དུས་ན་ངང་པ་ཆེས་རྒན་ཤོས་གང་ཡིན་པ་དེ་ནི་ང་ཡིན་ནོ། །དེའི་ཚེ་དེའི་དུས་ན་ངང་པ་ཅིག་ཤོས་གང་ཡིན་པ་དེ་ནི་ཀུན་དགའ་བོ་ཡིན་ནོ། །དེའི་ཚེ་དེའི་དུས་ན་རུ་སྦལ་གང་ཡིན་པ་དེ་ནི་འདུན་པ་འདི་ཡིན་ཏེ། འདི་དེའི་ཚེ་ན་ཡང་དགེ་བའི་བཤེས་གཉེན་རྣམས་ཀྱི་ངག་མི་ཉན་པས་ཚུལ་མ་ཡིན་པས་སྡུག་བསྔལ་བར་གྱུར་ལ། ད་ལྟར་ཡང་འདི་ཚངས་པ་མཚུངས་པར་སྤྱོད་པ་རྣམས་ཀྱི་ངག་མི་ཉན་པས་བསྒོ་བ་རྣ་ལ་གཟོན་པ་དང་ཅང་མི་སྨྲ་བས་རྣ་ལ་གཟོན་པའི་གྲངས་སུ་བཅུག་གོ། །བསྒོ་བ་རྣ་ལ་གཟོན་པའི་ལྟུང་བྱེད་དེ་བཅུ་གསུམ་པ་རྫོགས་སྷོ།། ་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཁྱིམ་བདག་གཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། དགེ་སློང་གི་དགེ་འདུན་ནི་བཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་ལ་བཞེད་པ་དང ། ལྷ་རྣམས་ལ་ཆོས་སྟོན་པར་བཞེད་པ་དང ། ནད་པ་ལ་ལྟ་བར་བཞེད་པ་དང ། གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་འཆའ
7.8a
བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དོ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ལྡེ་མིག་བསྣམས་ཏེ་ཀུན་དགའི་ར་བ་ནས་ཀུན་དགའི་ར་བར་གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་ས་དང ། གོལ་བར་གཤེགས་ཤིང་མཐར་གྱིས་གཤེགས་པ་ན། ཁང་པ་ཆེན་པོའི་གཙུག་ལག་ཁང་ཞིག་ག་ལ་བ་དེར་གཤེགས་སོ། །དེའི་ཚེ་ན་ཁང་པ་ཆེན་པོའི་གཙུག་ལག་ཁང་དེ་ན་གནས་མལ་རབ་ཏུ་མང་པོ་དག་བླ་གབ་མེད་པར་བཞག་ཅིང ། དུས་མ་ཡིན་པའི་སྤྲིན་ཆེན་པོ་ཡང་འདུས་པར་གྱུར་ཏོ། །བཅོམ་ལྡན་འདས་ཀྱིས་ཁང་པ་ཆེན་པོའི་གཙུག་ལག་ཁང་དེ་ན་གནས་མལ་རབ་ཏུ་མང་པོ་དག་བླ་གབ་མེད་པར་བཞག་ཅིང་དུས་མ་ཡིན་པའི་སྤྲིན་ཆེན་པོ་འདུས་པ་ཡང་གཟིགས་སོ། །གཟིགས་ནས་ཀྱང་ཨེ་མ་ཞེས་གསུང་ཞིང་སྨད་ནས་འདི་སྙམ་དུ་དགོངས་སྟེ། བྲམ་ཟེ་དང་ཁྱིམ་བདག་དད་པ་ཅན་དག་གིས་ལྤག་པ་དང ། ཤ་དང་ཁྲག་དག་བཙིར་ཅིང་བཙིར་ཅིང་སྦྱིན་པ་དག་སྦྱིན། བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང ། སོ་སོར་མི་རྟོག་པར་ཡོངས་སུ་ལོངས་སྤྱོད་དོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་གྱིས་དུས་མ་ཡིན་པའི་སྤྲིན་ཆེན་པོ་དེ་ཕྱིར་དགག་པ་མཛད་དེ། བཅོམ་ལྡན་འདས་ཀྱིས་རྫུ་འཕྲུལ་གྱིས་དགག་པ་མཛད་པས་དེ་སྟེང་གི་བར་སྣང་ལ་ཆུ་ལོན་ལྟ་བུར་གྱུར་ཏེ། མཐའ་ན་འདུག་ཅིང་ཤས་ཆེར་བཅོམ་ལྡན་འདས་ལ་སྡོད་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་གནས་མལ་རབ་ཏུ་མང་པོ་དེ་དག་སྐྱབས་ཡོད་པར་བྲུབས་ནས་དབྱར་གྱི་ན་བཟའ་རས་ཆེན་བསྣམས་ཏེ་སྐུ་བསིལ་བར་བཞེད་ནས་བང་རིམ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དུས་མ་ཡིན་པའི་སྤྲིན་ཆེན་པོ་དེ་དགག་པའི་རྫུ་འཕྲུལ་དེ་སླར་བསྡུ་བ་མཛད་དེ། བཅོམ་ལྡན་འདས་ཀྱིས་རྫུ་འཕྲུལ་དེ་སླར
7.8b
བསྡུ་བ་མཛད་ནས་འབྲུག་གྲགས་ཤིང་ཆར་གྱིས་གཤོང་དང་ཐང་ཐམས་ཅད་ཚིམ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྐུ་དག་བསིལ་ནས་ཞབས་གཉིས་བསིལ་ཏེ། ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་དགེ་སློང་བསོད་སྙོམས་སྒྲུབ་པས་བསོད་སྙོམས་བླངས་ནས། བཅོམ་ལྡན་འདས་ག་ལ་བ་དེར་སོང་ངོ ། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་བསོད་སྙོམས་སྒྲུབ་པའི་དགེ་སློང་ལ། དགེ་སློང་ཇི་ལྟ་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་ཡིན་པས། བཅོམ་ལྡན་འདས་ཀྱིས་དགེ་སློང་བསོད་སྙོམས་བསྒྲུབ་པ་ལ། དགེ་སློང་ཇི་ལྟ་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་དང ། དེས་གསོལ་པ། བཙུན་པ་ཏེ་པོར་ཟས་བསོད་ཅིང ། དགེ་སློང་གི་དགེ་འདུན་ཚིམ་པར་བགྱིས་སོ། །དེ་ནས་བཅོམ་ལྡན་འདས་ཞལ་ཟས་ཀྱི་བྱ་བ་མཛད་ནས་གཙུག་ལག་ཁང་གི་སླད་རོལ་ཏུ་ཞབས་གཉིས་བསིལ་ཏེ། ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་བཅོམ་ལྡན་འདས་ཕྱི་དྲོ་ནང་དུ་ཡང་དག་འཇོག་ལས་བཞེངས་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་འདི་ན་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཤེས་ནས། ལྡེ་མིག་ཁྱེར་ཏེ་ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་ས་དང ། གོལ་བར་སོང་ཞིང་མཐར་གྱིས་འགྲོ་བ་ན། ཁང་པ་ཆེན་པོའི་གཙུག་ལག་ཁང་ཞིག་ག་ལ་བ་དེར་ཕྱིན་ནས། ངས་ཁང་པ་ཆེན་པོའི་གཙུག་ལག་ཁང་དེ་ན་གནས་མལ་རབ་ཏུ་མང་པོ་དག་བླ་གབ་མེད་པར་བཞག་ཅིང་དུས་མ་ཡིན་པའི་སྤྲིན་ཆེན་པོ་འདུས་པ
7.9a
མཐོང་ངོ ། །མཐོང་ནས་ཀྱང་ཨེ་མ་ཞེས་བྱས་ཏེ་སྨད་ནས། འདི་སྙམ་དུ་བྲམ་ཟེ་དང་ཁྱིམ་བདག་དད་པ་ཅན་དག་གིས་ལྤགས་པ་དང ། ཤ་དང ། ཁྲག་དག་བཙིར་ཅིང་བཙིར་ཅིང་སྦྱིན་པ་དག་སྦྱིན། བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང ། སོ་སོར་མི་རྟོག་པར་ཡོངས་སུ་ལོངས་སྤྱོད་དོ་སྙམ་དུ་དགོངས་ཀྱིས་དགེ་སློང་དག་ཁྱེད་ཀྱིས་དད་པས་སྦྱིན་པར་བྱ་བ་ལ་དྲོད་རན་པར་ཡོངས་སུ་ལོངས་སྤྱད་པ་དང ། སྤང་ཞིང་ཡང་ཡོངས་སུ་ལོངས་སྤྱད་པ་དང ། དུས་སུ་ཡོངས་སུ་ལོངས་སྤྱད་པ་དང ། བརྟག་ཅིང་ཡོངས་སུ་ལོངས་སྤྱད་པ་དང ། ཁད་ཀྱིས་ཡོངས་སུ་ལོངས་སྤྱད་ན་ལེགས་སོ། ་་་།བར་སྡོམ་ལ། དྲོད་རན་པ་དང་སྤང་བ་དང ། །དེ་བཞིན་དུས་དང་བརྟག་པ་དང ། །ཁད་ཀྱིས་ཡོངས་སུ་སྤྱད་པ་ཡིན། །དེ་ནས་བཅོམ་ལྡན་འདས་ཀྱིས་དྲོད་རན་པ་དང ། སྤང་བ་དང ། དུས་དང ། བརྟག་པ་དང ། ཁད་ཀྱིས་ཡོངས་སུ་ལོངས་སྤྱོད་པའི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཁྲི་འམ། ཁྲིའུ་འམ། སྟན་ནང་ཚངས་ཅན་ནམ། ལ་བ་འམ། སྔས་སམ། གོར་བུ་བླ་གབ་མེད་པར་བཏིང་ངམ་འདིང་དུ་བཅུག་ནས་མ་བསྡུས་སམ། སྡུད་དུ་མ་བཅུག་པར་དེ་ནས་སོང་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་མཛད་དོ། །དགེ་སློང་རབ་ཏུ་མང་པོ་དག་དོན་འཐུན་དང་ལྷན་ཅིག་ལྗོངས་རྒྱུར་དོང་བ་ན་རི་བྲགས་ཤིག་ཏུ་ཕྱིན་ནས། དེ་དག་གིས་རི་བྲགས་དེར་གནས་བཅའ་བར་བརྩམས་པ་དང ། རི་བྲགས་དེ་ན་གཙུག་ལག་ཁང་ཞིག་ཡོད་ནས་དེ་ན་དེ་དག་ལ་མི་ཞིག་གིས་སྨྲས་པ། འཕགས་པ་དག་ཁྱེད་ཅག་གཙུག་ལག་ཁང་དུ
7.9b
མི་གནས་སམ། བཞིན་བཟངས་མི་གནས་ཏེ་ཁོ་བོ་ཅག་ནི་དོན་འཐུན་ལ་རག་ལས་པ་ཡིན་པས། གལ་ཏེ་ཁོ་བོ་ཅག་གཙུག་ལག་ཁང་གནས་པར་གྱུར་ན་དོན་འཐུན་གྱིས་ཁོ་བོ་ཅག་བོར་ཏེ་འགྲོ་བར་འགྱུར་རོ། །དེས་སྨྲས་པ། འཕགས་པ་དག་བཞུད་ལ་གཙུག་ལག་ཁང་དུ་གཟིམས་ཤིག་དང ། དོན་འཐུན་ཆ་བའི་དུས་ཀྱི་ཚེ་བདག་གིས་འཕགས་པ་དག་བསླང་བར་བགྱིའོ། །དེ་དག་གཙུག་ལག་ཁང་དུ་དོང་སྟེ་གནས་མལ་བཤམས་ནས་ཉལ་བ་དང ། དོན་འཐུན་ཆས་ཏེ། གླང་ཐ་མ་བཀལ་ཟིན་པ་དང ། དེ་ནས་མི་དེ་སད་ནས་དེ་སོང་སྟེ་དགེ་སློང་རྣམས་ལ་སྨྲས་པ། འཕགས་པ་དག་དོན་འཐུན་ཆས་ཀྱིས་མྱུར་དུ་སྤྱོན་ཅིག་།དེ་དག་ཇི་སྲིད་དུ་ལག་པ་དག་བསྙལ་བར་བྱེད། སོ་ཤིང་དག་འདོར་བར་བྱེད། གནས་མལ་དག་གཏོང་བར་བྱེད་པ་དེ་སྲིད་དུ་དོན་འཐུན་ཐལ་བར་གྱུར་ནས། དེ་དག་ཕྱི་བཞིན་འབྲང་ཞིང་འདོང་བ་ན་ཆོམ་རྐུན་པ་དག་གིས་བཅོམ་པར་གྱུར་ནས་དེ་དག་མཐར་གྱིས་གཙུག་ལག་ཁང་དུ་ཕྱིན་པ་དང ། དེ་དག་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་བདེ་བར་བརྒྱུས་རེ་སྐན། ཅི་ཉེས། ཚེ་དང་ལྡན་པ་དག་ཁོ་བོ་ཅག་ཆོམ་རྐུན་པ་དག་གིས་བཅོམ་མོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འཁོད་པ་དག་ལ་བཅོལ་བར་བྱའོ། །བཅོམ་ལྡན་འདས་ཀྱིས་དགེ་སློང་འཁོད་པ་དག་ལ་བཅོལ་བར་བྱའོ་ཞེས་བཀའ་སྩལ་ནས། མཉན་ཡོད་ན་ཁྱིམ་བདག་གཉིས་ཤིག་འཁོད་པ་དེ་གཉིས་ཕན་ཚུན་ཁོན་ཡོད་ཅིང་གཅིག་ནི་དད་པ་དང་ལྡན་པ་ཡིན་ལ། གཅིག་ནི་མ་དད་པ་ཡིན་ནས། དད་པ་ཅན་གྱིས་བསམས་པ། ཁོན་སྤེལ་བས་ཅི་བྱ་སྟེ། ཁོན་ཞི་བར་བྱས་སོང་ལ་རབ་ཏུ་འབྱུང་བར་བྱའོ་སྙམ་ནས་དེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་རབ་ཏུ་བྱུང་ངོ ། །ཁྱིམ་བདག་མ་དད་པ་ཤོས་དེས་མི་ཞིག་ལ་དྲིས་པ། བཞིན་བཟངས
7.10a
ཁྱིམ་བདག་ཆེ་གེ་མོ་ཞེས་བྱ་བ་དེ་གར་སོང ། དེས་སྨྲས་པ། རབ་ཏུ་བྱུང་ངོ ། །གང་དུ། ཤཱཀྱའི་བུའི་དགེ་སྦྱོང་རྣམས་ཀྱི་ནང་དུའོ། །ཅི་དེ་མི་འཇིགས་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་གནོད་པར་བྱའོ། །འཇིག་རྟེན་ནི་མཛའ་ཤེས་དང ། དགྲ་བོ་དང ། ཐ་མལ་པ་ཡིན་པས་གཞན་ཞིག་དེའི་གན་དུ་སོང་སྟེ་སྨྲས་པ། ཁྱོད་ལ་ཁྱིམ་བདག་དེ་གཤེའོ། །དེས་བསམ་པ། བདག་ཉེས་དམིགས་གང་གིས་རབ་ཏུ་བྱུང་བའི་ཉེས་དམིགས་དེ་ཉིད་ཀྱིས་རྗེས་སུ་འབྲེལ་ཏོ་སྙམ་ནས་དེ་མཁན་པོའི་དྲུང་དུ་སོང་སྟེ། སྨྲས་པ། མཁན་པོ་བདག་ཉེས་དམིགས་གང་གིས་རབ་ཏུ་བྱུང་བའི་ཉེས་དམིགས་དེ་ཉིད་ཀྱིས་རྗེས་སུ་འབྲེལ་བར་གྱུར་གྱིས་མཆིའོ། །བུ་གང་དུ་འགྲོ། རྒྱལ་པོའི་ཁབ་ཏུའོ། །དེ་ལྟར་གྱིས་ཤིག་།དེ་རྒྱལ་པོའི་ཁབ་ཏུ་འཕགས་པ་དང ། ཁྱིམ་བདག་དེ་ཡང་རྒྱལ་བྱེད་ཀྱི་ཚལ་དུ་འོངས་ནས་དགེ་སློང་ལ་དྲིས་པ། འཕགས་པ་ཁྱིམ་བདག་འདི་ཞེས་བགྱི་བ་དེ་ཅི་རབ་ཏུ་བྱུང་ངམ། རབ་ཏུ་བྱུང་ངོ ། །དེ་གར་མཆིས། རྒྱལ་པོའི་ཁབ་ཏུ་སོང་ངོ ། །དེས་བསམ་པ། ཅི་དེ་མི་འཇིགས་པའི་གྲོང་ཁྱེར་ཡིན་ནམ། བདག་དེར་ཡང་སོང་ལ་དེ་ལ་མཚམས་བཅད་པར་བྱའོ་སྙམ་ནས་དེ་ཡང་རྒྱལ་པོའི་ཁབ་ཏུ་འཕགས་སོ། །དགེ་སློང་ནི་དུས་སུ་འགྲོ་ཞིང་དུས་མ་ཡིན་པར་མི་འགྲོ་ལ། ཁྱིམ་པ་ནི་དུས་སུ་ཡང་འགྲོ། དུས་མ་ཡིན་པར་ཡང་འགྲོ་བས་དགེ་སློང་དེ་རི་བྲགས་ཀྱི་གཙུག་ལག་ཁང་ཞིག་ཏུ་ཞུགས་པ་དང ། ཁྱིམ་བདག་དེས་མཐོང་ནས་དེས་བསམ་པ། གལ་ཏེ་བདག་གིས་འདི་ལ་ཅུང་ཟད་སྨྲ་བའི་རིགས་ན་འདིའི་གྲོགས་དགེ་སློང་དག་མང་བས་བདག་ལ་གནོད་པ་བྱེད་པར་འགྱུར་གྱིས་བདག་གིས་སང་འདི་ཤེས་པར་བྱའོ་སྙམ་མོ། །དགེ་སློང་དེ་ཡང་ནང་པར་སྔར་ལངས་ཏེ་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་འགྲོས་གནས་མལ་འདི་རེ་ཞེས་གནས་མལ་གཏད་པ་དང ། དགེ་སློང་རྣམས་ཀྱིས་སྨྲས་པ། ཁྱོད་གར་འགྲོ། རྒྱལ་པོའི་ཁབ་ཏུའོ། །ཚེ་དང་ལྡན་པ་ལམ་འདི་ནི་དོགས་པ་དང
7.10b
བཅས་པ་ཡིན་གྱིས་འདི་ནས་མ་འགྲོ་ཤིག་།འདི་ནི་ལམ་གཞན་ཡིན་གྱིས་དེ་ནས་སོང་ཤིག་།དེ་ལམ་དེ་ནས་སོང་བ་དང ། ཁྱིམ་བདག་དེ་ཡང་ནང་པར་སྔར་ལངས་ནས་གཙུག་ལག་ཁང་དུ་སོང་སྟེ་དགེ་སློང་ལ་དྲིས་པ། འཕགས་པ་དགེ་སློང་འདི་ཞེས་བགྱི་བ་གར་མཆིས། རྒྱལ་པོའི་ཁབ་ཏུ་འོ། །ཤུལ་གང་ནས། ཆེ་གེ་མོ་ཞིག་ནས་སོ། །དེ་དེའི་ཕྱི་བཞིན་སོང་བ་དང ། དགེ་སློང་དེས་དེ་མཐོང་ནས་དེས་དེ་ལ་སྨྲས་པ། བཞིན་བཟངས་ཁོན་ཞི་བར་གྱུར་ཅིག་།དེས་སྨྲས་པ། ད་ཞི་བར་བྱའོ་ཞེས་ཁྱིམ་བདག་དེས་དགེ་སློང་དེ་ཤིན་དུ་བརྡེག་བརྡེག་ནས་ལྷུང་བཟེད་ཀྱང་བཅག་།ཆོས་གོས་དག་ཀྱང་དྲལ་ཏེ་ཐ་མ་མ་ཤི་ཙམ་བྱས་ཏེ་བཏང་ནས། དབུགས་དེའུ་ཆད་པ་ལས་སོས་ཏེ་ཕྱིར་ལོག་ནས་གཙུག་ལག་ཁང་དེ་ཉིད་དུ་ཕྱིན་པ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། ཚེ་དང་ལྡན་པ་ཅིའི་ཕྱིར་ཁྱོད་གནས་སྐབས་འདི་ལྟ་བུར་གྱུར། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་ནས་ཡང་སྨྲས་པ། གལ་ཏེ་ཁོ་བོས་ཚེ་དང་ལྡན་པ་དག་གིས་བསྟན་པ་ལྟར་མ་བྱས་ན་ཁོ་བོ་གནས་སྐབས་འདི་འདྲ་བར་མི་འགྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་ཏེ། ཡང་དགེ་སློང་གང་དགེ་འདུན་གྱི་ཁྲི་འམ། ཁྲིའུ་འམ། སྟན་ནང་ཚངས་ཅན་ནམ། ལ་བ་འམ། སྔས་སམ། གོར་བུ་བླ་གབ་མེད་པར་བཏིང་ངམ། ་འདིང་དུ་བཅུག་ནས
7.11a
མ་བསྡུས་སམ། སྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་དེ་ནས་སོང་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཁྲི་ཞེས་བྱ་བ་ནི་ཁྲི་ཉིད་དོ། །ཁྲིའུ་ཞེས་བྱ་བ་ནི་ཁྲིའུ་ཉིད་དོ། །སྟན་ནང་ཚངས་ཅན་ཞེས་བྱ་བ་ནི་ཤིང་བལ་ཅན་ནོ། །ལ་བ་ཞེས་བྱ་བ་ནི་ལ་བ་ཉིད་དོ། །སྔས་ཤེས་བྱ་བ་ནི་སྔས་སུ་གཞུགས་པའོ། །གོར་བུ་ཞེས་བྱ་བ་ནི་གྲུ་བཞིའོ། །བླ་གབ་མེད་པར་ཞེས་བྱ་བ་ནི་མ་གཡོགས་པར་རོ། །བཏིང་ངམ་ཞེས་བྱ་བ་ནི་རང་གིས་སོ། །འདིང་དུ་བཅུག་ནས་ཤེས་བྱ་བ་ནི་གཞན་ནོ། །མ་བསྡུས་སམ་ཞེས་བྱ་བ་ནི་རང་གིས་སོ། །སྡུད་དུ་མ་བཅུག་གམ་ཞེས་བྱ་བ་ནི་གཞན་ནོ། །དགེ་སློང་འཁོད་པ་ལ་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ། །མ་བཅོལ་བར་ཞེས་བྱ་བ་ལ་བཅོལ་བ་ནི་རྣམ་པ་ལྔ་སྟེ། གཙུག་ལག་ཁང་འདེ་རེ་ཞེས་བྱ་བ་དང ། གཙུག་ལག་ཁང་ལྟོས་ཤིག་ཅེས་བྱ་བ་འམ། གནས་མལ་འདེ་རེ་ཞེས་བྱ་བ་དང ། གནས་མལ་སྡུས་ཤིག་ཅེས་བྱ་བ་དང ། སྒོ་ལྕགས་ཆུག་ཤིག་ཅེས་བྱ་བ་ཉིད་ནི་ལྔ་པའོ། །གལ་ཏེ་དགེ་སློང་མེད་ན་དགེ་ཚུལ་ལ་བཅོལ་བར་བྱའོ། །གལ་ཏེ་དགེ་ཚུལ་མེད་ན་ཁྱིམ་བདག་ལ་བཅོལ་བར་བྱའོ། །གལ་ཏེ་ཁྱིམ་བདག་མེད་ན་ཕྱོགས་བཞིར་རྣམ་པར་བལྟས་ཏེ་ལྡེ་མིག་སྦས་ནས་འགྲོ་བར་བྱའོ། །གལ་ཏེ་ལམ་ཀར་དགེ་སློང་མཐོང་ན་ཁོ་བོས་ཕྱོགས་ག་གེ་མོ་ཞིག་ཏུ་ལྡེ་མིག་སྦས་ཀྱིས་ལོང་ཤིག་ཅེས་བརྗོད་པར་བྱའོ། །དེ་ནས་སོང་ན་ཞེས་བྱ་བ་ནི་ཉེན་ཀོར་སྤངས་ནའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་དགེ་སློང་གི་གནས་མལ་གྱི་ཉེན་ཀོར་གང་ལགས། ཉེ་བ་འཁོར་ངས་བྲམ་ཟེ་གྲོ་བཞིན་སྐྱེས་ལ་ཨ་མྲའི་སྡོང་པོ་ཤིན་དུ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཡལ་གའི་ཚོགས་ཕུན་སུམ་ཚོགས་པ་འདོམ་བདུན་གྱིས་བར་དུ་ཆོད་པའི་ཨ་མྲའི་སྡོང་པོ་བདུན་པོ་གང་དག་ཡིན
7.11b
པ་དེ་དག་ལ་འདོམ་བཞི་བཅུ་རྩ་དགུ་ཡོད་པར་བསྟན་པ་དེ་ནི་དགེ་སློང་གི་གནས་མལ་གྱི་ཉེན་ཀོར་ཡིན་ནོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་པ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། འདི་ལྟ་སྟེ། དགེ་སློང་གིས་དགེ་འདུན་གྱི་གནས་མལ་བླ་གབ་མེད་པར་བཞག་སྟེ་དེ་ནས་སོང་ན་ཇི་སྲིད་དུ་ཉེན་ཀོར་མ་སྤངས་ཀྱི་བར་དུ་ཉེས་བྱས་སུ་འགྱུར་ལ། ཉེན་ཀོར་སྤངས་ན་ལྟུང་བྱེད་དུ་འགྱུར་རོ། །གལ་ཏེ་ལམ་ཀར་བདག་གི་དགེ་འདུན་གྱི་གནས་མལ་ཤོས་འདི་བུ་ཞིག་ཏུ་གཞག་གོ་སྙམ་དུ་དྲན་ཞིང ། གལ་ཏེ་དེ་འདི་སྙམ་དུ་བདག་གི་ཚངས་པ་མཚུངས་པར་སྤྱོད་པ་མཁས་པ་དག་སྡུད་པར་འགྱུར་རོ་སྙམ་ན་དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ་ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །གལ་ཏེ་ལམ་ཀར་དགེ་སློང་དེར་འགྲོ་བ་མཐོང་ཞིང ། གལ་ཏེ་དེ་འདི་སྙམ་སུ་འདིས་སྡུད་པར་འགྱུར་རོ་སྙམ་ན་དེ་ལ་འདི་སྐད་ཅེས་ཚེ་དང་ལྡན་པ་ཁོ་བོས་དགེ་འདུན་གྱི་གནས་མལ་ཕྱོགས་ག་གེ་མོ་ཞིག་ཏུ་བཞག་པ་དེ་སྡུས་ཤིག་ཅེས་བརྗོད་པར་བྱ་ཞིང་དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ་ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །དགེ་སློང་དེས་ཀྱང་དགེ་སློང་དེ་ལ་ཁས་བླངས་ནས་གུས་པར་བྱ་སྟེ་བསྡུ་བར་བྱའོ། །གལ་ཏེ་སྡུད་པར་མི་བྱེད་ན་འགལ་ཚབས་ཅན་དུ་འགྱུར་རོ། །གལ་ཏེ་དེར་སོན་ནས་བདག་གིས་དགེ་འདུན་གྱི་གནས་མལ་ཕྱོགས་འདི་ལྟ་བུ་ཞིག་ཏུ་གཞག་གོ་སྙམ་དུ་དྲན་ཞིང་གལ་ཏེ་དེ
7.12a
འདི་སྙམ་དུ་བདག་གི་ཚངས་པ་མཚུངས་པར་སྤྱོད་པ་མཁས་པ་དག་སྡུད་པར་འགྱུར་རོ་སྙམ་ན། དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ་ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །གལ་ཏེ་དེར་སོན་ནས་དགེ་སློང་དེར་འགྲོ་བ་མཐོང་ཞིང ། གལ་ཏེ་དེ་འདི་སྙམ་དུ་འདིས་སྡུད་པར་འགྱུར་རོ་སྙམ་ན་དེ་ལ་འདི་སྐད་ཅེས་ཚེ་དང་ལྡན་པ་ཁོ་བོས་དགེ་འདུན་གྱི་གནས་མལ་ཕྱོགས་ག་གེ་མོ་ཞིག་ཏུ་བཞག་པ་དེ་སྡུས་ཤིག་ཅེས་བརྗོད་པར་བྱ་ཞིང་དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ་ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །དགེ་སློང་དེས་ཀྱང་དགེ་སློང་དེ་ལ་ཁས་བླང་ནས་གུས་པར་བྱ་སྟེ་བསྡུ་བར་བྱའོ། །གལ་ཏེ་སྡུད་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་གིས་དགེ་འདུན་གྱི་གནས་མལ་བླ་གབ་མེད་པར་བཞག་ནས་གཙུག་ལག་ཁང་དུ་འདིར་བདག་གིས་སེམས་མཉམས་པར་མ་བཞག་པ་མཉམ་པར་གཞག་གོ་སྙམ་པ་འམ། སེམས་མཉམ་པར་བཞག་པ་རྣམ་པར་གྲོལ་བར་བྱའོ་སྙམ་པས་ནང་དུ་ཡང་དག་འཇོག་གི་ཕྱིར་འཇུག་པར་བྱེད་ཅིང ། དེ་ཏིང་ངེ་འཛིན་དེ་ལས་མཚན་མོའི་ཐུན་དང་པོ་འམ། ཐུན་ཕྱེད་ན་ལྡང་བར་བྱེད་ན་གལ་ཏེ་གནས་མལ་ཕན་ཕུན་དུ་མ་གྱུར་ན་ཉེས་བྱས་སུ་འགྱུར་ལ། གལ་ཏེ་ཕན་ཕུན་དུ་གྱུར་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་འདུན་གྱི་གནས་མལ་བླ་གབ་མེད་པར་བཞག་ནས་གཙུག་ལག་ཁང་དུ་འདིར་བདག་གིས་སེམས་མཉམ་པར་མ་བཞག་པ་མཉམ་པར་གཞག་གོ་སྙམ་པ་འམ། སེམས་མཉམ་པར་བཞག་པ་རྣམ་པར་གྲོལ་བར་བྱའོ་སྙམ་པས་ནང་དུ་ཡང་དག་འཇོག་གི་ཕྱིར་འཇུག་པར་བྱེད་ཅིང་དེ་ཏིང་ངེ་འཛིན་དེ་ལས་མཚན་མོའི་གུང་ཐུན་ནམ། ཐུན་ཐ་མ་འམ། སྐྱ་རེངས་མ་ཤར་བ་འམ། སྐྱ་རེངས་ཤར་བ་འམ། ཉི་མ་མ་ཤར་བ་འམ། ཉི་མ་ཤར་བ་འམ། ཉི་མའི་བརྒྱད་ཆ་ཤར་བ་འམ། ཉི་མའི་བཞི་ཆ་ཤར་བ་འམ། ཕྱེད་མ་ཡོལ
7.12b
བ་འམ། ཕྱེད་ཡོལ་བ་འམ། ཉི་མའི་བཞི་ཆ་ལུས་པ་འམ། ཉི་མའི་བརྒྱད་ཆ་ལུས་པ་འམ། ཉི་མ་མ་ནུབ་པ་འམ། ཉི་མ་ནུབ་པ་འམ། རྒྱུ་སྐར་དག་མ་ཤར་བ་འམ། རྒྱུ་སྐར་དག་ཤར་བ་ན་ལྡང་བར་བྱེད་ན། གལ་ཏེ་གནས་མལ་ཕན་ཕུན་དུ་མ་གྱུར་ན་ཉེས་བྱས་སུ་འགྱུར་ལ། གལ་ཏེ་ཕན་ཕུན་དུ་གྱུར་ན་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གནས་མལ་གྱི་ཕན་ཕུན་དུ་མཆིས། ཉེ་བ་འཁོར་གཉིས་ཏེ། རླུང་གི་ཕན་ཕུན་དང ། ཆར་པའི་ཕན་ཕུན་ནོ། །རླུང་གི་ཕན་ཕུན་གང་ཞེ་ན། རིམ་པ་གཅིག་ནས་རིམ་པ་གཉིས་པའི་བར་དུ་བཟློག་པར་གྱུར་པའོ། །ཆར་པའི་ཕན་ཕུན་གང་ཞེ་ན། རིམ་པ་གཅིག་ནས་རིམ་པ་གཉིས་པའི་བར་དུ་ཐལ་བར་གྱུར་པའོ། ་་་་།བར་སྡོམ་ལ། ཆོས་བསྟན་པ་དང་མགྲོན་འབོད་དང ། །གཙུག་ལག་ཁང་དང་ཆོས་ཉན་དང ། །འདུག་པ་དང་ནི་གཉིས་པོ་དང ། །སྐུ་གཟུགས་དང་ནི་ནད་པ་དང ། །སྟན་དང་ལྔ་དང་གཅིག་ལ་གཉིས། །ཕྱི་བཞིན་འགྲོ་དང་གྲོགས་བྱ་དང ། །ཁ་ཏོན་པ་དང་ཞུ་བ་དང ། །སྟན་བཀུར་བ་དང་ཟན་བཅད་དང ། །བྲུབ་པ་དང་ནི་བཅོལ་བ་དང ། །མེ་དང་ཆུ་ཡང་དེ་བཞིན་ནོ། །བྲམ་ཟེ་དང་ཁྱིམ་བདག་དད་པ་ཅན་དག་དགེ་སློང་དག་གི་གན་དུ་འོངས་ཏེ་སྨྲས་པ། འཕགས་པ་དག་ཆོས་བསྟན་དུ་གསོལ། དགེ་སློང་དག་གིས་སྨྲས་པ། བཅོམ་ལྡན་འདས་འདིར་བཞུགས་ཀྱིས། བཅོམ་ལྡན་འདས་ཀྱི་གན་དུ་དེང་ཤིག་དང ། བཅོམ་ལྡན་འདས་སྟོན་པར་འགྱུར་རོ། །འཕགས་པ་དག་སྟོན་པ་ཉག་གཅིག་ལགས་པས་རེ་ཤིག་ལྷ་རྣམས་ལ་ཆོས་སྟོན་ཏམ། འོན་ཏེ་ཀླུ་རྣམས་ལ་འམ། འོན་ཏེ་གནོད་སྦྱིན་རྣམས་ལ་འམ། འོན་ཏེ་དྲི་ཟ་རྣམས་ལ་འམ། འོན་ཏེ་མི་རྣམས་ལ་ཆོས་སྟོན་སུས་འཚལ་གྱིས་ཁྱེད་ཀྱིས་ཀྱང་སྟོན་ཅིག་།བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག
7.13a
དེ་ལྟ་བས་ན་རྗེས་སུ་གནང་གིས་དགེ་སློང་རྣམས་ཀྱིས་ཀྱང་ཆོས་བསྟན་པར་བྱའོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཀྱང་ཆོས་བསྟན་པར་བྱའོ་ཞེས་བཀའ་སྩལ་ནས། དགེ་སློང་དག་འགྲེང་བཞིན་དུ་ཆོས་སྟོན་པར་བྱེད་པ་ནི་དེ་དག་སྐྱེ་བོ་ཕལ་པོ་ཆེའི་ཚོགས་ཀྱིས་ཡོངས་སུ་བསྐོར་བར་གྱུར་ནས། བྲམ་ཟེ་དང་ཁྱིམ་བདག་དད་པ་ཅན་དག་གིས་སྨྲས་པ། འདི་དག་སྐྱེས་འབུལ་བ་དག་འོངས་པ་ཡིན་ནམ་ཅི་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། འདུག་སྟེ་ཆོས་བསྟན་པར་བྱའོ། །དགེ་སློང་དག་རང་རང་གི་སྟན་དག་ཐོགས་ཏེ་འདོང་བ་ན་མ་དད་པ་དག་གིས་མཐོང་ནས་རོལ་མོ་ལྟར་འདོང་ངམ་ཅི་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་གིས་དགེ་འདུན་གྱི་སྟན་དག་ཉེ་བར་གཞག་པར་བྱའོ། །བཅོམ་ལྡན་འདས་ཀྱིས་དགེ་འདུན་གྱི་སྟན་དག་ཉེ་བར་གཞག་པར་རྗེས་སུ་གནང་བ་ཁྱིམ་བདག་མགོན་མེད་ཟས་སྦྱིན་གྱིས་ཐོས་ནས། དེས་དགེ་འདུན་ལ་ཁྲི་ལྔ་བརྒྱ་ཕུལ་བ་དང ། དེ་དག་ཐམས་ཅད་ཆོས་སྟོན་པར་བྱེད་པ་ན་ཅ་ཅོར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གཅིག་གིས་ཆོས་བསྟན་པར་བྱའོ། །དེ་དག་གིས་གང་གིས་བསྟན་པར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་བརྟན་ནས་བཟུང་སྟེ། དགེ་འདུན་གྱི་གསར་བུའི་བར་གྱིས་ཆོས་བསྟན་པར་བྱའོ། །གལ་ཏེ་གསར་བུའི་མཐའ་དག་ཆོས་སྟོན་པར་བྱེད་པ་ན། རྒན་པའི་མཐའ་དག་མི་བརྗིད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྒན་པའི་མཐའ་ལོགས་སུ་འདུག་སྟེ་ཆོས་བསྟན་པར་བྱའོ། །དགེ་འདུན་གྱི་གནས་བརྟན་མི་བརྗིད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ།
7.13b
རྒན་པའི་མཐའ་ལོགས་སུ་སྟན་གཉིས་སམ་གསུམ་བཞག་སྟེ་ཆོས་བསྟན་པར་བྱའོ། །དེར་ཡང་ཆོས་སྟོན་པ་མི་བརྗིད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྒན་པའི་མཐའ་ལོགས་སུ་སྟན་གཉིས་སམ་གསུམ་བཞག་སྟེ་སེང་གེའི་ཁྲི་བཤམ་པར་བྱའོ། །ཆོས་སྟོན་པའི་འཛེག་དཀའ་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཕྱོགས་ངེས་པ་ཡིན་ན་སོ་ཕག་དག་གིས་ཐེམ་སྐས་བྱའོ། །གལ་ཏེ་ཕྱོགས་ངེས་པ་མ་ཡིན་ན་ཤིང་དག་གིས་ཐེམ་སྐས་བྱའོ། །དེ་མཆིལ་མ་འདོར་བས་ཡིད་དུ་མི་འོང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། མཆིལ་མའི་སྣོད་གཞག་པར་བྱའོ། །དེར་སྦྲང་བུ་དག་འདུ་ནས་བཅོམ་ལྡན་འདས་ཀྱིས་བཀའ་སྩལ་པ། གཅལ་གླུགས་པར་བྱའོ། །དགེ་སློང་རྣམས་ཀྱིས་ཅི་ཞིག་གླུག་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། བྱེ་མ་འམ་ཐལ་བ་གླུག་པར་བྱའོ། །དེ་དྲི་ང་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དུས་དུས་སུ་སྦྱང་བ་དང་བསྐམ་པར་བྱའོ། །དེ་དག་གྲལ་ཚར་གཅིག་ཁོ་ནར་རིང་པོར་ཤོམ་པར་བྱེད་པ་ན་གཞོན་པའི་མཐའ་དག་གིས་མི་ཐོས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་རྣམ་པ་གཉིས་སུ་བཤམ་པར་བྱ་སྟེ། ཟླ་གམ་གྱི་རྣམ་པ་ལྟ་བུ་འམ། རྫིང་བུའི་རྣམ་པ་ལྟ་བུར་འགྱུར་རོ། །བྲམ་ཟེ་དང་ཁྱིམ་བདག་དད་པ་ཅན་དག་གིས་དགེ་སློང་རྣམས་ཁྱིམ་གཞན་དུ་མགྲོན་དུ་བོས་པ་ན་དགེ་སློང་དག་དང་དུ་མི་ལེན་ནས། བྲམ་ཟེ་དང་ཁྱིམ་བདག་དད་པ་ཅན་དག་གིས་སྨྲས་པ། འཕགས་པ་དག་གང་གི་ཚེ་སངས་རྒྱས་འཇིག་རྟེན་དུ་མ་བྱུང་བ་དེའི་ཚེ་ན་ནི་མུ་སྟེགས་ཅན་དག་སྦྱིན་གནས་ལགས་མོད། ད་ནི་བཅོམ་ལྡན་འདས་འཇིག་རྟེན་དུ་བྱུང་བས་ཁྱེད་ཅག་སྦྱིན་གནས་ལགས་ཏེ། གལ་ཏེ་ཁྱེད་ཅག་དང་དུ་མི་བཞེས་ན། ཅི་བདག་ཅག་དགེ་བའི་ཤུལ་རྒྱགས་མ་མཆིས་པར་འཇིག་རྟེན་འདི་ནས་འཇིག་རྟེན་ཕ་རོལ་ཏུ་མཆི་བར་བགྱི་འམ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དང་དུ་བླང་བར
7.14a
བྱའོ། །དེ་དག་སྟན་དག་གཡར་པོ་བྱེད་པ་ན་དགེ་སློང་རྣམས་ཀྱིས་མི་སྟེར་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་དག་བརྙན་པར་བྱའོ། །དགེ་སློང་དག་ཟན་ཟོས་ནས། སྟན་དེ་དག་ཁྱེར་ཏེ་འདོང་བ་ན་དེ་དག་གིས་སྨྲས་པ། འཕགས་པ་དག་ཁྱེད་བཞུད་ཅིག་དང་བདག་ཅག་གིས་འཚལ་ཏེ་མཆིའོ་ཞེས་མཆི་བ་ན། དགེ་སློང་དག་འགྱོད་པས་མི་འཇོག་ནས། བཅོམ་ལྡན་འདས་ཀྱིས་བཀའ་སྩལ་པ། གཞག་པར་བྱའོ། །དེ་དག་གིས་སྨྲས་པ། འཕགས་པ་དག་སྐོམ་མནབས་ཏེ་བཞུད་ཀྱི་བར་དུ་རེ་ཤིག་གཞེས་ཤིག་ཅེས་ཟེར་བ་ན་དགེ་སློང་དག་མི་སྡོད་ནས། བཅོམ་ལྡན་འདས་ཀྱིས་བཀའ་སྩལ་པ། བསྡད་པར་བྱའོ། །དེ་དག་ལ་དེ་ལྟ་བུའི་རྐྱེན་བྱུང་ནས་དེས་ན་སྟན་དེ་དག་མི་སྐྱེལ་ནས། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ། །བཅོམ་ལྡན་འདས་ཀྱིས་བླང་བར་བྱའོ་ཞེས་བཀའ་སྩལ་ནས་དེ་དག་གིས་གང་གིས་བླང་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་པ་དག་གིས་གཎ་ཌཱི་ཆུང་ངུ་བརྡུངས་ཏེ་བླང་བར་བྱའོ། །བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་ལྷགས་ཏེ་དགེ་སློང་དག་མགྲོན་དུ་འབོད་པ་ན་དགེ་སློང་དག་དང་དུ་མི་ལེན་ནས། བཅོམ་ལྡན་འདས་ཀྱིས་བཀའ་སྩལ་པ། དང་དུ་བླང་བར་བྱའོ། །དེ་དག་དགེ་སློང་དག་ཟན་ཟོས་ནས་སྟན་དག་གཡར་པོ་བྱེད་པ་ན་དགེ་སློང་དག་གིས་མི་སྟེར་ནས་དེ་དག་གིས་སྨྲས་པ། འཕགས་པ་དག་བདག་ཅག་ནི་ཁྱེད་ལ་བཤོས་གསོལ་བ་ལགས་ན། ཁྱེད་ཀྱིས་བདག་ཅག་ལ་སྟན་དག་མི་གཡར་རམ་ཞེས་ཟེར་ནས་བཅོམ་ལྡན་འདས་ཀྱིས་བཀའ་སྩལ་པ། སྟན་དག་བརྙན་པར་བྱའོ། །དེ་དག་གིས་དེ་ཉིད་དུ་བོར་ཏེ་དོང་བ་ན་དེ་དག་མ་བྱིན་པར་ལེན་པ་དག་གིས་བརྐུས་ནས་བཅོམ་ལྡན་འདས་ཀྱིས་བཀའ་སྩལ་པ། བསྲུང་བའི་དགེ་སློང་གཞག་པར་བྱའོ། །དེ་དེ་དག་གི་ནང་ཉིད་དུ་ཞུགས་པ་དང་དེ་དག་གིས་སྨྲས་པ། འཕགས་པ་ཅི་ཡང་བཞེད་དམ། དེས་སྨྲས་པ།
7.14b
ཁོ་བོ་མི་འདོད་དེ། འདི་ལྟར་ཁོ་བོ་སྟན་དག་སྲུང་ངོ ། །དེ་དག་གིས་སྨྲས་པ། འཕགས་པ་ཅི་བདག་ཅག་ཁྱེད་ཀྱི་གདན་དག་རྐུ་སྙམ་འམ། གལ་ཏེ་ཐུགས་མི་ཆེས་ན་སྣོམས་ཏེ་བཞུད་ཅིག་ཅེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་པ། དེའི་ནང་དུ་འཇུག་པར་མི་བྱ་བར་མཐའ་གཅིག་ཏུ་འདུག་སྟེ། གལ་ཏེ་ཁ་ཏོན་པ་ཡིན་ན་ནི་དེས་ཁ་ཏོན་བྱ་ཞིང་དེ་ལ་ཡང་སེམས་གཏད་པར་བྱའོ། །གལ་ཏེ་སྤོང་བ་པ་ཡིན་ན་ནི་དེས་ཀྱང་མཐའ་གཅིག་ཏུ་འདུག་སྟེ་ཡིད་ལ་བྱ་བ་བསྐྱེད་པར་བྱ་ཞིང་དེ་ལ་ཡང་སེམས་གཏད་པར་བྱའོ། །གང་གིས་ཚེ་དོང་བར་གྱུར་པ་དེའི་ཚེ་ན་བྲུབ་པར་བྱའོ། །དེ་དག་ཆང་གི་ཚིགས་མ་དང ། སྣུམ་དང ། བཤང་བ་དང ། གཅི་བས་མ་རུང་བར་གྱུར་པ་ན་དགེ་སློང་དག་འདོར་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་དོར་བར་མི་བྱ་བར་གང་དག་ཆང་གི་ཚིགས་མས་མ་རུང་བར་གྱུར་པ་དེ་དག་ནི་ཆུ་དག་གིས་སྦྱང་བར་བྱའོ། །གང་དག་སྣུམ་གྱིས་མ་རུང་བར་གྱུར་པ་དེ་དག་ནི་ཆལ་གྱིས་སྦྱང་བར་བྱའོ། །གང་དག་བཤང་བ་དང་གཅི་བས་མ་རུང་བར་གྱུར་པ་དེ་དག་ནི་ས་འམ། འདག་རྫས་སམ། ལྕི་བས་སྦྱང་བར་བྱའོ། །བཅོམ་ལྡན་འདས་ཀྱིས་ཆོས་མཉན་པར་བྱའོ། །ཞེས་བཀའ་སྩལ་ནས། དགེ་སློང་དག་བླ་གབ་མེད་པར་བྱེད་པ་ན་ཉི་མ་ཚ་ནས། བཅོམ་ལྡན་འདས་ཀྱིས་བཀའ་སྩལ་པ། བླ་རེ་གདགས་པར་བྱའོ། །རླུང་དང་ཆར་བྱུང་ནས་དེ་དག་གིས་གནས་མལ་བོར་ཏེ་འདོང་བས་དེ་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། བྲུབ་པར་བྱའོ། །དེ་དག་གིས་སུས་བྲུབ་པ་མི་ཤེས་ཏེ། སུ་གང་ལ་ལ་འདུག་པ་དེས་དེ་འབྲུབ་པར་བྱེད་པ་ན་རྒན་པའི་མཐའ་དག་ལ་གཞི་བཟང་པོ་བཤམས་པ་དེ་དག་དགེ་སློང་གནས་བརྟན་གནས་བརྟན་དག་གིས་བྲུབ་པར་མི་ནུས་ནས་བཅོམ་ལྡན་འདས་ཀྱིས་བཀའ་སྩལ་པ། རྒན་པའི་མཐའ་དག་གི་ནི་གཞོན་པ་རྣམས་ཀྱིས་བྲུབ་པར་བྱ་ཞིང ། གཞོན་པའི་མཐའ་དག་གི་ནི་རྒན་པ་རྣམས་ཀྱིས་བྲུབ་པར་བྱའོ། །བྲུབས་ནས་ཚོམས་གཅིག་ཏུ་བྱེད་པས་དེ་དག་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ།
7.15a
འཐུན་པ་དང་འཐུན་པར་གཞག་པར་བྱའོ། །དེ་དག་ཕྱིས་ཆོས་མཉན་པ་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། གཡོགས་པ་འམ། བླ་གབ་མེད་པར་བྱའོ། །དེ་ལྟར་ཆོས་ཉན་པ་ན་བྲམ་ཟེ་དང ། ཁྱིམ་བདག་དད་པ་ཅན་དག་གིས་ནོར་བུས་སྤྲས་པ་དང ། གསེར་དང་དངུལ་གྱིས་བརྒྱན་པའི་གོས་དག་གིས་སེང་གེའི་ཁྲི་བཤམས་པ་དང ། དགེ་སློང་དག་འགྱོད་པས་མི་འདུག་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པའི་གོས་དག་ཡིན་པར་བྱ་སྟེ། མི་རྟག་པ་ཉིད་ཡིད་ལ་བྱ་བས་ཟིལ་གྱིས་མནན་ནས་འདུག་པར་བྱ་སྟེ། འདི་ལ་འགྱོད་པར་མི་བྱའོ། །དགེ་སློང་དག་དགེ་འདུན་གྱི་གནས་མལ་མི་འབྲུབ་ཅིང་དེ་ཉིད་དུ་འདོར་བ་ན་དེ་དག་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ཀྱང་བྲུབ་པར་བྱའོ། །ཁྱིམ་བདག་གཅིག་ལ་གཙུག་ལག་ཁང་དགོན་པ་དང ། གྲོང་མཐའ་པ་གཉིས་ཡོད་ནས་དེའི་གཙུག་ལག་ཁང་གྲོང་མཐའ་པ་ན་ནི་གནས་མལ་མང་དུ་ཡོད་ལ། གཙུག་ལག་ཁང་དགོན་པ་ན་ནི་གནས་མལ་ཉུང་ངོ ། །དུས་གཞན་ཞིག་ན་དགོན་པའི་གཙུག་ལག་ཁང་དུ་དུས་སྟོན་བྱུང་ནས། དགེ་སློང་དགོན་པ་པ་དག་གི་གྲོང་མཐའི་གཙུག་ལག་ཁང་ནས་གནས་མལ་གཡར་བ་དང ། དགེ་སློང་གྲོང་མཐའ་པ་དག་གིས་མ་སྟེར་ནས། བཅོམ་ལྡན་འདས་ཀྱིས་བཀའ་སྩལ་པ། བརྙན་པར་བྱའོ། །གལ་ཏེ་ཆར་འབབ་བམ། ཆར་འབབ་དུ་དོགས་ན་བརྙན་པར་མི་བྱའོ། །ལམ་ཀར་རླུང་དང ། ཆར་བབ་པས་དེ་དག་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཤིང་ལྗོན་པའི་དྲུང་ངམ། རྩིག་དྲུང་དུ་བཅེར་ཏེ་རྫས་གཅིག་གིས་གཡོག་པར་བྱའོ། །དེ་དག་རྫས་བཟང་པོས་གཡོག་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། རྫས་ངན་པས་གཡོག་པར་བྱའོ། །དུས་སྟོན་ཟིན་ནས་དེ་དག་གཙུག་ལག་ཁང་འདི་ཡང་ཁྱིམ་བདག་དེའི་ཡིན་ནོ་སྙམ་ནས་ཕྱིར་མི་འབུལ་ནས། བཅོམ་ལྡན་འདས་ཀྱིས་བཀའ
7.15b
སྩལ་པ། མཐུས་དགུག་པར་བྱའོ། །ངོ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གནས་མལ་འདི་ནི་ཁྱིམ་བདག་ཆེ་གེ་མོ་ཞིག་གི་དགོན་པའི་གཙུག་ལག་ཁང་གི་ཡིན་ནོ། །འདི་ནི་གྲོང་མཐའི་གཙུག་ལག་ཁང་གི་ཡིན་ནོ་ཞེས་ཡི་གེ་བྲི་ཞིང་གནས་མལ་ཇི་ལྟར་ངེས་པར་བྱས་པ་བཞིན་དུ་ལོངས་སྤྱད་པར་བྱའོ། །ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་འདི་སྐད་ཅེས་གསོལ་ཏོ། །གང་གི་ཚེ་བཅོམ་ལྡན་འདས་བགྲེས་པའི་མཐའ་ལོགས་ན་བཞུགས་པ་དེའི་ཚེ་ན་བགྲེས་པའི་མཐའ་བརྗིད་པར་གྱུར་ཅིང ། གང་གི་ཚེ་བཅོམ་ལྡན་འདས་བགྲེས་པའི་མཐའ་ལོགས་ན་མི་བཞུགས་པ་དེའི་ཚེ་ན་བགྲེས་པའི་མཐའ་མི་བརྗིད་པར་གྱུར་ན། གལ་ཏེ་བཅོམ་ལྡན་འདས་ཀྱིས་གནང་ན་བདག་གིས་འཛམ་བུའི་གྲིབ་མ་ལ་བཞུགས་པའི་སྐུ་གཟུགས་བགྱིད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། གནང་གིས་བྱེད་དུ་ཆུག་ཤིག་།དེས་འཛམ་བུའི་གྲིབ་མ་ལ་བཞུགས་པའི་སྐུ་གཟུགས་བྱེད་དུ་བཅུག་སྟེ། དེ་རྒན་པའི་མཐའ་ལོགས་སུ་བཞག་གོ། །རླུང་དང་ཆར་པ་བྱུང་ནས་དགེ་སློང་རྣམས་ཀྱིས་དེ་བོར་ཏེ་དོང་བ་དང ། བྲམ་ཟེ་དང་ཁྱིམ་བདག་དད་པ་ཅན་དག་ཁྱེད་ཀྱིས་སྟོན་པ་ཡང་བོར་རོ་ཞེས་སྨོད་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་འམ། དགེ་ཚུལ་གྱིས་སྤྱན་དྲང་བར་བྱའོ། །ཁྱིམ་པ་ཡང་མེད། དགེ་ཚུལ་ཡང་མེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་ཀྱིས་སྟོན་པའི་འདུ་ཤེས་བསྐྱེད་དེ་སྤྱན་དྲང་བར་བྱའོ། །དགེ་སློང་དག་ན་བར་གྱུར་ནས་དེ་དག་ལ་སུ་ཡང་མི་ལྟ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་དུས་གསུམ་དུ་བལྟ་བར་བྱའོ། །བཅོམ་ལྡན་འདས
7.16a
ཀྱིས་ནད་པ་དུས་གསུམ་དུ་བལྟ་བར་བྱའོ་ཞེས་བཀའ་སྩལ་ནས། དེ་དག་གིས་གང་གིས་བལྟ་བར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་བརྟན་ནས་བཟུང་སྟེ་དགེ་འདུན་གྱི་གསར་བུའི་བར་གྱིས་བལྟ་བར་བྱའོ། །བཅོམ་ལྡན་འདས་ཀྱིས་ནད་པ་བལྟ་བར་བྱའོ་ཞེས་བཀའ་སྩལ་ནས། དགེ་སློང་གནས་བརྟན་གནས་བརྟན་དག་ནད་པ་ལྟ་བར་བྱེད་པ་ན། དེ་དག་འགྲེང་བཞིན་དུ་ནད་པ་ལྟ་བར་བྱེད་པས་ནད་པ་དག་ཉམ་ང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། འདུག་སྟེ་ནད་པ་བལྟ་བར་བྱའོ། །བཅོམ་ལྡན་འདས་ཀྱིས་འདུག་སྟེ་ནད་པ་བལྟ་བར་བྱའོ། །ཞེས་བཀའ་སྩལ་ནས། དགེ་སློང་དག་རང་རང་གི་སྟན་དག་ཁྱེར་ཏེ་འདོང་བ་ན་མ་དད་པ་དག་འཕགས་པ་དག་རོལ་མོ་ལྟར་འདོང་ངམ་ཅི་ཞེས་ཐོ་འཚམ་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྟན་དག་ཁྱེར་ཏེ་འདོང་བར་མི་བྱ་བར་འདི་ལྟར་ནད་གཡོག་གིས་སྟན་དག་བཤམ་པར་བྱའོ། །དྲུག་སྡེ་དག་ནད་པ་ལྟར་དོང་བ་ན་དེ་དག་དེ་ཉིད་ན་འདུ་འཛིའི་གཏམ་གྱིས་ཡུན་རིང་དུ་འཁོད་ནས་ནད་གཡོག་རྣམས་ཀྱིས་སྨྲས་པ། ཚེ་དང་ལྡན་པ་དག་ནད་པའི་བྱ་བ་ཡོངས་སུ་ཉམས་པར་གྱུར་གྱིས་དེང་ཤིག་།དེ་དག་གིས་སྨྲས་པ། དེ་ཡང་གྱིས་ལ་གནས་མལ་ཡང་ལྟོས་ཤིག་དང་དེ་ལྟར་ན་ནད་པ་ཤི་བའི་ཡོ་བྱད་དྲུག་འཐོབ་པར་འགྱུར་རོ། །གཞན་ཡང་ཁྱེད་ནད་པའི་བྱ་བ་ཡོངས་སུ་ཉམས་པར་མ་བྱེད་པར་དེང་ཤིག་དང་ཁོ་བོ་ཅག་གིས་བལྟ་བར་བྱའོ། །ནད་གཡོག་དེ་དག་གིས་ནད་པ་ལ་མ་བཅོལ་བར་དོང་བ་དང ། དྲུག་སྡེ་དག་ཀྱང་དོང་ནས་རླུང་དང་ཆར་པ་དག་བྱུང་བ་ན་ནད་པས་གནས་མལ་རྟུལ་མ་ནུས་ནས་དེ་དག་མ་རུང་བར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལྔ་པོ་འདི་དག་ལ་བཅོལ་བར་མི་བྱ་སྟེ། ངོ་ཚ་མེད་པ་དང ། ནད་དང་བཅས་པ་དང ། རྒས་པ་འཁོགས་ཤིང་ཉམ་ཆུང་བ་དང ། ན་བ་སྦྱོར་མི་བཟོད་པ་དང །
7.16b
རྫོགས་པར་མ་བསྙེན་པ་ཐམས་ཅད་ལའོ།། །།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་བཞི་པ། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ཁྲི་གཅིག་ལ་དགེ་སློང་གཉིས་མཆིས་ན་དེ་གང་དག་གིས་བྲུབ་པར་བགྱི། གང་ཕྱིས་ལངས་པས་སོ། །གཉིས་ཀ་དུས་གཅིག་ཏུ་ལངས་ན་གཞོན་པས་སོ། །གཉི་ག་གཞོན་ན་གཉིས་ག་བྲུབ་པར་བྱའོ། །སློབ་དཔོན་དང་མཁན་པོ་དག་འཆག་ཏུ་དོང་བ་ན་དགེ་སློང་ལྷན་ཅིག་གནས་པ་དང ། ཉེ་གནས་གཙུག་ལག་ཁང་ན་འཁོད་པ་ན་དེ་དག་ཆུ་མེད་པ་ནས་ཨུཏྤ་ལ་བཞིན་དུ་དགེ་བའི་ཆོས་རྣམས་ཀྱིས་མི་འཕེལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ལྷན་ཅིག་གནས་པ་དང ། ཉེ་གནས་དག་གིས་སློབ་དཔོན་དང ། མཁན་པོ་དག་གི་ཕྱི་བཞིན་འགྲོ་བར་བྱའོ། །སློབ་དཔོན་དང ། མཁན་པོ་དག་སྟན་དག་ཁྱེར་ཏེ་འདོང་ཞིང་ལྷན་ཅིག་གནས་པ་དང ། ཉེ་གནས་དག་ལག་པ་བརྐྱང་སྟེ་འགྲོ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ལྷན་ཅིག་གནས་པ་དང ། ཉེ་གནས་དག་གིས་སློབ་དཔོན་དང ། མཁན་པོ་དག་གི་སྟན་དག་ཁྱེར་ཏེ་འགྲོ་བར་བྱའོ། །སློབ་དཔོན་དང་མཁན་པོ་དེ་དག་འཆགས་ན་ཕྱག་དར་བྱེད་པ་ན་ལྷན་ཅིག་གནས་པ་དང ། ཉེ་གནས་དག་ལག་པ་བརྐྱང་སྟེ་འཁོད་ནས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་གནས་པ་དང ། ཉེ་གནས་དག་གིས་ཕྱགས་མ་བླངས་ཏེ། སློབ་དཔོན་དང ། མཁན་པོ་དག་སྙིང་ལས་ཆུང་ངུར་བྱའོ། །མཁར་ལན་བྱེད་པར་བསྐོས་ན་ནི་ལྟུང་བ་མེད་དོ། །སློབ་དཔོན་དང ། མཁན་པོ་དག་གོས་དག་འཚེམ་པ་ན་ལྷན་ཅིག་གནས་པ་དང ། ཉེ་གནས་དག་སྙིང་ལས་ཆུང་ངུར་འཁོད་ནས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་གནས་པ་དང ། ཉེ་གནས་དག་གིས་ཁབ་བླང་ཞིང ། སློབ་དཔོན་དང །
7.17a
མཁན་པོ་དག་སྙིང་ལས་ཆུང་ངུར་བྱའོ། །ཚེམ་འདྲུབ་པར་བསྐོས་ན་ནི་ལྟུང་བ་མེད་དོ། །ལྷན་ཅིག་གནས་པ་དང ། ཉེ་གནས་དག་གིས་སློབ་དཔོན་དང ། མཁན་པོ་དག་གི་ལུང་མནོས་ཏེ་དེ་དག་ཉིད་ཀྱི་མདུན་ན་གློག་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁ་ཏོན་སློབ་པ་དག་གིས་ལུང་མནོས་ནས་ཐོས་པའི་ཉེན་ཀོར་སྤངས་ཏེ་སྣང་བའི་ཉེ་འཁོར་དུ་འདུག་ནས་ལུང་ཕོག་ལ་བཀླག་པར་བྱའོ། །དགེ་སློང་སྤོང་བ་པ་དག་གིས་གདམས་ངག་མནོས་ནས་མཐའ་གཅིག་ཏུ་སོང་སྟེ་ཡིད་ལ་བྱ་བ་བསྐྱེད་པར་བྱའོ། །ལྷན་ཅིག་གནས་པ་དང ། ཉེ་གནས་དེ་དག་ལས་སུ་བསྐོས་པར་འགྲོ་བ་ན་དེ་དག་སློབ་དཔོན་དང ། མཁན་པོ་དག་ལ་ཞུས་ཏེ་སོང་བ་ན། དེར་སོང་བ་དེ་དག་ལ་ལས་གཞན་བྱུང་ནས་དེ་དག་ཡང་ཕྱིར་འོང་ཞིང་ཞུ་བར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེར་དོང་བ་རྣམས་ལ་ལས་གཞན་བྱུང་ན་དེ་དག་གིས་ཡང་དང་ཡང་དུ་ཕྱིར་འོངས་ཏེ་ཞུ་བར་མི་བྱ་བར་དེ་ཉིད་དུ་ལས་བྱ་སྟེ། དེ་དག་གིས་སྔར་ཞུས་པ་དེ་ཉིད་ཀྱིས་ཐམས་ཅད་ཞུས་པ་ཡིན་ནོ། །དེ་དག་གིས་དེར་སྟན་དག་ཁྱེར་བ་ཕྱིར་ཁྱེར་ཏེ་མི་འོང་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་སྟན་ཁྱེར་ཏེ་འོང་བར་བྱའོ། །དེ་དག་གིས་ཆེས་སྔར་སྟན་དག་ཁྱེར་ཏེ་དོང་བ་དང ། སློབ་དཔོན་དང ། མཁན་པོ་དག་ལ་གང་གིས་དེ་དག་མི་འགྲོ་བ་དེ་འདྲ་བའི་རྐྱེན་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་སློབ་དཔོན་དང་མཁན་པོ་དག་ལ་འཆག་ཏུ་འགྲོ་འམ་མི་འགྲོ་ཞེས་ཞུ་བར་བྱ་ཞིང་གལ་ཏེ་འགྲོའོ་ཞེས་ཟེར་ན་སྟན་དག་བསྐུར་བར་བྱའོ། །གལ་ཏེ་མི་འགྲོ་ཞེས་ཟེར་ན་སྟན་དག་བསྐུར་བར་མི་བྱའོ། །ཁྱིམ་བདག་གཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གཤོས་ལ་སྤྱན་དྲངས་པ་ན། གཞོན་ནུ་ཞིག་དགེ་བའི་ཕྱོགས་ལ་ཤིན་དུ་བརྩོན་ནས་དེས་བསམས་པ། དེང་བདག་བསོད་སྙོམས་ལ་འཇུག་མི་དགོས་པས་ཇི་སྲིད་དུ་གདུགས་ཚོད་ལ་བབ་པར་མ་གྱུར་པ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱའོ་སྙམ་ནས། དེ་སྟན་ཁྱེར་ཏེ་ཕྱི་རོལ་དུ་སོང་བ་དང ། དགེ་སློང་རྣམས་དུས་སྔ་མ་ཚོགས་སུ་གཙུག་ལག་ཁང་གི་སྒོ་བཅད་དེ་དོང
7.17b
ངོ ། །དེས་ཀྱང་དུས་ཤེས་པར་བྱས་ཏེ་འོངས་པ་དང ། ཇི་ཙམ་ན་གཙུག་ལག་ཁང་གི་སྒོ་བཅད་པ་མཐོང་ནས་དེས་བསམས་པ། བདག་ཟན་བཅད་པ་ནི་བླའི་བདག་ལྟུང་བ་དང་བཅས་ན་མི་རུང་ངོ་སྙམ་ནས་དེ་ཟན་བཅད་པ་བྱས་པ་དང ། དེའི་ལུས་ལ་ཇི་སྲིད་དུ་མདངས་ཡོད་པ་དེ་སྲིད་དུ་དེས་དགེ་བའི་ཕྱོགས་ལ་ཏྲོན་བྱས་སོ། །གང་གི་ཚེ་ལུས་ལས་མདངས་ཡལ་བ་དེའི་ཚེ་ན་གློས་ཕབ་སྟེ་ཉལ་བ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་གལ་ཏེ་ཟན་གཞན་གྱི་ཡིན་ཞེས་ཏེ་ལྟོ་ཡང་གཞན་གྱི་ཡིན་སྙམ་འམ། ཅི་ན་ཁྱེད་ཅི་ཙམ་གྱིས་དགེ་བའི་ཕྱོགས་ལ་ཏྲོན་བྱེད་ཀྱང་མི་ནུས་པ་དེ་ཙམ་ཟ་འམ། སུས་ཟོས། ཁྱོད་ཀྱིས་མ་ཟོས་སམ། མ་ཟོས་སོ། །ཅིའི་ཕྱིར། དེ་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་ཀྱིས་དུས་སྔ་མ་ཚོགས་སུ་ཁྱིམ་གཞན་དུ་འཇུག་པར་མི་བྱ་བར་དུས་ཤེས་པར་བྱས་ཏེ་གཎ་ཌཱི་བརྡུངས་ནས་འཇུག་པར་བྱའོ། །སློབ་དཔོན་དང ། མཁན་པོ་དག་གིས་ཀྱང་རང་རང་གི་འཁོར་ལ་བལྟ་བར་བྱའོ། །བློ་བུར་དུ་འོངས་པ་འགའ་ཞིག་ཡོད་ན་དེ་ནི་དགེ་འདུན་གྱི་གནས་བརྟན་གྱིས་བལྟ་བར་བྱའོ། །གལ་ཏེ་དགེ་སློང་སྒོ་བཅད་པར་འོངས་ན་དེས་སྟན་རྩིག་པའི་དྲུང་ངམ་ཤིང་ལྗོན་པའི་དྲུང་དུ་བཞག་སྟེ་འགྲོ་བར་བྱའོ། །དགེ་སློང་གིས་གྱ་ཚོམ་དུ་ཟན་གཅད་པར་མི་བྱའོ། །དགེ་སློང་གིས་གྱ་ཚོམ་དུ་ཟན་གཅོད་པར་བྱེད་ན་འགལ་ཚབས་ཅན་དུ་འགྱུར་རོ། །བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་འོངས་ཏེ། དེ་དག་སྟན་དག་ལ་འདུག་འདུག་ནས་དེ་ཉིད་དུ་བོར་ཏེ་དོང་ནས། དེ་དག་སུས་ཀྱང་མ་བྲུབས་པས་དེ་ཉིད་དུ་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གང་གིས་མཐོང་བ་དེས་བྲུབ་པར་བྱའོ། །དགེ་སློང་རྒན་པོ་འཁོགས་པ་ཉམ་ཆུང་བ་དང ། ནད་པ་སྦྱོར་མི་བཟོད་པ་དག་གིས་དེ་དག་བླ་གབ་མེད་པར་བཞག་པ་མཐོང་ཞིང་དེ་དག་གིས་འབྲུབ་པར་མི་ནུས་ནས། བཅོམ་ལྡན་འདས་ཀྱིས་བཀའ་སྩལ
7.18a
པ། དེ་དག་གིས་དགེ་བསྐོས་ལ་བརྗོད་པར་བྱ་ཞིང ། དེས་ཀྱང་གུས་པར་བྱ་སྟེ་བྲུབ་པར་བྱའོ། །དགེ་སློང་རྣམས་ཀྱིས་གནས་མལ་དག་བླ་གབ་མེད་པར་བཏིང་ནས་དགེ་སློང་གཅིག་པུ་ཞིག་ལ་བཅོལ་ནས་བསོད་སྙོམས་ལ་ཞུགས་ཤིང་གཞན་གྱིས་ཀྱང་དེ་ཉིད་ལ་བཅོལ། གཞན་གྱིས་ཀྱང་དེ་ཉིད་ལ་བཅོལ་ཏེ་བསོད་སྙོམས་ལ་ཞུགས་པ་དང ། རླུང་དང་ཆར་བྱུང་སྟེ་དེས་བྲུབ་པར་མ་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་མང་པོ་དག་གིས་དགེ་སློང་གཅིག་ལ་བཅོལ་བར་མི་བྱའོ། །གལ་ཏེ་དེ་ལྟ་བུའི་རྐྱེན་བྱུང་ན་དེས་གཎ་ཌཱི་བརྡུང་བར་བྱ་ཞིང་དེ་ན་དགེ་སློང་གང་དག་འཁོད་པ་དེ་དག་གིས་གུས་པར་བྱ་སྟེ་བྲུབ་པར་བྱའོ། །དེ་དག་གིས་ཀྱང་གཎ་ཌཱི་ཐོས་ནས་གུས་པས་འགྲོ་བར་བྱའོ། །ནགས་ཀྱི་ནང་ན་གཙུག་ལག་ཁང་འདུག་པ་ལ་མེ་ཤོར་ནས་མེས་གྲོང་དང ། གྲོང་ཁྱེར་དང ། རྒྱལ་པོའི་ཕོ་བྲང་དང ། ཡུལ་འཁོར་ཡང་ཚིག་ལ་ཐུག་།སྤྱོད་ཡུལ་དང་སྤྱོད་ཡུལ་གྱི་ལམ་དང ། འཆག་ས་དང ། དག་ར་དང ། སྒོ་ཁང་དང ། གཙུག་ལག་ཁང་ཡང་ཚིག་ལ་ཐུག་པ་ན། དགེ་སློང་རྣམས་ཀྱིས་རང་རང་གི་ལྷུང་བཟེད་དང་ཆོས་གོས་དག་ནི་ཕྱུང ། དགེ་འདུན་གྱི་གནས་མལ་དག་ནི་ཚིག་ནས་ཁྱིམ་བདག་འོངས་ཏེ་དགེ་སློང་རྣམས་ལ་དྲིས་པ། འཕགས་པ་དག་ཅི་དག་མ་ཚིག་གམ། ཅི་ཡང་མ་ཚིག་གོ། །དགེ་འདུན་གྱི་གནས་མལ་དག་ག་རེ། ཚིག་གོ། །ཅི་ཡང་མ་ཚིག་པ་དེ། དེ་འདྲ་འམ། ཁོ་བོ་ཅག་གི་ཅི་ཡང་མ་ཚིག་གོ། །དེས་སྨྲས་པ། ཀྱེ་མའོ་དགེ་འདུན་གྱི་གནས་མལ་ཙམ་འབྱིན་ཀྱང་མ་ཕོད་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་མལ་ཡང་དབྱུང་བར་བྱའོ། །དེ་དག་དགེ་འདུན་གྱི་གནས་མལ་འབྱིན་པ་ན་དེ་དག་གི་གང་ཟག་གི་གནས་མལ་དང ། ལྷུང་བཟེད་དང ། ཆོས་གོས་དག་ཚིག་ནས། དེ་དག་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ
7.18b
སྩལ་པ། གང་ཟག་ནི་ཕོངས་པར་འགྱུར་ལ། དགེ་འདུན་ནི་མི་འགྱུར་བས་ཇེ་དང་པོར་གང་ཟག་གི་ལྷུང་བཟེད་དང ། ཆོས་གོས་དབྱུང་བར་བྱ་ཞིང་དེའི་འོག་ཏུ་དགེ་འདུན་གྱི་དབྱུང་བར་བྱའོ། །དེ་དག་ཕྱུང་བ་ན་མ་བྱིན་པ་ལེན་པ་དག་གིས་བརྐུས་ནས། བཅོམ་ལྡན་འདས་ཀྱིས་བཀའ་སྩལ་པ། དེར་སྲུང་མ་དགེ་སློང་གཞག་པར་བྱའོ། །དེ་དག་མཐུ་དང་ལྡན་པ་འཇོག་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། མཐུ་ཆུང་ངུ་གཞག་པར་བྱའོ། །དེ་དག་མེ་མི་བཟོད་པར་འཇུག་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་མེ་མི་བཟོད་པ་ཡིན་ན་འཇུག་པར་མི་བྱ་སྟེ། གལ་ཏེ་ཚིག་ན་ཡང་དེ་ལ་འགྱོད་པར་མི་བྱའོ། །སེར་ཆེ་བའི་དབུས་ན་གཙུག་ལག་ཁང་འདུག་ཅིང ། སྟེང་གི་རི་ཁ་ནས་ཆར་པའི་རྒྱུན་སྦོམ་པོ་བབ་པ་ན། གཙུག་ལག་ཁང་དུ་ཆུ་བྱུང་ཞིང་གྲོང་དང ། གྲོང་ཁྱེར་དང ། རྒྱལ་པོའི་ཕོ་བྲང་དང ། ཡུལ་འཁོར་ཡང་ཁྱེར་ལ་ཐུག་།སྤྱོད་ཡུལ་དང་སྤྱོད་ཡུལ་གྱི་ལམ་དང ། དག་ར་དང ། སྒོ་ཁང་དང ། གཙུག་ལག་ཁང་ཡང་ཁྱེར་ལ་ཐུག་པ་ན། དགེ་སློང་རྣམས་ཀྱིས་རང་རང་གི་ལྷུང་བཟེད་དང་ཆོས་གོས་དག་ནི་ཕྱུང ། དགེ་འདུན་གྱི་གནས་མལ་དག་ནི་ཁྱེར་ནས། ཁྱིམ་བདག་འོངས་ནས་དགེ་སློང་རྣམས་ལ་དྲིས་པ། འཕགས་པ་དག་ཅི་དག་མ་ཁྱེར་རམ། ཅི་ཡང་མ་ཁྱེར་རོ། །དགེ་འདུན་གྱི་གནས་མལ་དག་ག་རེ། ཁྱེར་རོ། །ཅི་ཡང་མ་ཁྱེར་བ་དེ་དེ་འདྲ་འམ། ཁོ་བོ་ཅག་གི་ཅི་ཡང་མ་ཁྱེར་རོ། །དེས་སྨྲས་པ། ཀྱེ་མའོ་དགེ་འདུན་གྱི་གནས་མལ་ཙམ་འབྱིན་ཀྱང་མ་ཕོད་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་མལ་ཡང་དབྱུང་བར་བྱའོ། །དེ་དག་དགེ་འདུན་གྱི་གནས་མལ་འབྱིན་པ་ན་དེ་དག་གི་གང་ཟག་གི་གནས་མལ་དང ། ལྷུང་བཟེད་དང ། ཆོས་གོས་དག་ཁྱེར་ནས་དེ་དག་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ
7.19a
པ་དང ། བཅོམ་ལྡན་འདས་ཀྱིས་བཀའ་སྩལ་པ། གང་ཟག་ནི་ཕོངས་པར་འགྱུར་ལ། དགེ་འདུན་ནི་མི་འགྱུར་བས་ཇེ་དང་པོར་གང་ཟག་གི་ལྷུང་བཟེད་དང ། ཆོས་གོས་དབྱུང་བར་བྱ་ཞིང ། དེའི་འོག་ཏུ་དགེ་འདུན་གྱི་དབྱུང་བར་བྱའོ། །དེ་དག་ཕྱུང་བ་ན་མ་བྱིན་པར་ལེན་པ་དག་གིས་བརྐུས་ནས། བཅོམ་ལྡན་འདས་ཀྱིས་བཀའ་སྩལ་པ། དེར་སྲུང་མ་དགེ་སློང་གཞག་པར་བྱའོ། །དེ་དག་མཐུ་དང་ལྡན་པ་འཇོག་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། མཐུ་ཆུང་ངུ་གཞག་པར་བྱའོ། །དེ་དག་ཆུ་མི་བཟོད་པར་འཇུག་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཆུ་མི་བཟོད་པ་ཡིན་ན་འཇུག་པར་མི་བྱ་སྟེ། གལ་ཏེ་ཁྱེར་ན་ཡང་དེ་ལ་འགྱོད་པར་མི་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གནས་མལ་གྱི་ལྟུང་བྱེད་དེ་བཅུ་བཞི་པ་རྫོགས་སྷོ།། ་་་་།། བར་སྡོམ་ལ། ལྷོ་ལམ་དང་ནི་མ་བོར་དང ། །མ་དྲིས་འདོར་དང་མཐུས་འདོར་དང ། །ཁྲོན་པ་དང་ནི་བླང་བ་དང ། །དག་ར་དང་ནི་འཆག་ས་དང ། །ལྕི་བ་གཞག་པ་ཐ་མ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ལྷོ་ལམ་ནས་དགེ་སློང་རྒན་པ་དང ། གཞོན་པ་གཉིས་ཤིག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འོངས་ནས། རྒན་ཤོས་ཀྱི་གཙུག་ལག་ཁང་ནི་གནས་མལ་དང་བཅས་པ་ཞིག་ཏུ་བསྐོས། གཞོན་པ་ཤོས་ཀྱི་གཙུག་ལག་ཁང་ནི་གནས་མལ་མེད་པ་ཞིག་ཏུ་བསྐོས་པ་དང ། གཞོན་པ་ཤོས་དེ་སྒྲུབ་ཕོད་པ་ཞིག་ཡིན་པས་དེས་རྩཝ་མང་པོ་དག་བླངས་ནས་པུས་མོ་ནུབ་ཙམ་གྱི་གདིང་བ་བཤམས་སོ། །རྒན་པ་དེས་བསམས་པ། གཞོན་ནུ་དེའི་གཙུག་ལག་ཁང་ཇི་ལྟ་བུ་ཞིག་ཏུ་བསྐོས་པ་ཇེ་བལྟས་འགྲོའོ་སྙམ་ནས་དེ་དེར་སོང་བ་དང ། ཇི་ཙམ་ན་གདིང་བ་བཟང་པོ་བཤམས་པ་མཐོང་ནས་དེས་བསམས་པ། བདག་ཇི་སྲིད་དུ་གནས་མལ་ཕྱིར་གཏོད་པར་བྱེད་པ་དེ་སྲིད
7.19b
དུ་སང་འགྲོ་བ་འཕྱིས་པར་འགྱུར་གྱིས་འདི་ཉིད་དུ་འདུག་གོ་སྙམ་ནས། དེས་གནས་མལ་དང་བཅས་པའི་གཙུག་ལག་ཁང་དེ་དགེ་སློང་གནས་མལ་འབོག་པ་ལ་ཕྱིར་གཏད་ནས། དེ་གཉིས་གཙུག་ལག་ཁང་དེར་མཚན་མོ་གནས་ནས་ནང་པར་སྔར་ལངས་ཏེ་དོང་ངོ ། །ཕྱོགས་དེས་སྣུམ་ཞིང་དངར་བ་ཡིན་པས་རྩཝ་བཏིང་བ་དག་ལ་སྲིལ་དག་ཆགས་ནས་གཙུག་ལག་ཁང་དེའི་ཕྱི་ནང་བཅས་པ་ཐམས་ཅད་སྲིལ་གྱིས་ཁྱབ་པར་གྱུར་ཏོ། །དེའི་ཚེ་ན་ཁྱིམ་བདག་གཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། དགེ་སློང་གི་དགེ་འདུན་ནི་བཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པ་དང ། ལྷ་རྣམས་ལ་ཆོས་སྟོན་པར་བཞེད་པ་དང ། ནད་པ་ལ་ལྟ་བར་བཞེད་པ་དང ། གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་པའོ། །དོན་འདིར་ནི་བཅོམ་ལྡན་འདས་གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་པར་མཛད་དོ། །དེ་ནས་བཅོམ་ལྡན་འདས་ཀྱིས
7.20a
དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ལྡེ་མིག་བསྣམས་ཏེ་ཀུན་དགའི་ར་བ་ནས་ཀུན་དགའི་ར་བར་གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང ། གོལ་བར་གཤེགས་ཤིང་མཐར་གྱིས་གཤེགས་པ་ན། གཙུག་ལག་ཁང་དེ་ག་ལ་བ་དེར་གཤེགས་པ་དང ། བཅོམ་ལྡན་འདས་ཀྱིས་གཙུག་ལག་ཁང་དེ་སྲིལ་དག་གིས་ཕྱི་ནང་ཐམས་ཅད་ཁྱབ་པར་གཟིགས་སོ། །གཟིགས་ནས་ཀྱང་ཨེ་མ་ཞེས་གསུངས་ཤིང་སྨད་ནས་འདི་སྙམ་དུ་དགོངས་ཏེ། བྲམ་ཟེ་དང་ཁྱིམ་བདག་དད་པ་ཅན་དག་གིས་ལྤགས་པ་དང ། ཤ་དང ། ཁྲག་དག་བཙིར་ཅིང་བཙིར་ཅིང་སྦྱིན་པ་དག་སྦྱིན། བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང ། སོ་སོར་མི་རྟོག་པར་ཡོངས་སུ་ལོངས་སྤྱོད་དོ་སྙམ་དུ་དགོངས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་ཅི་ནས་ཀྱང་སྲིལ་དག་ལོགས་ཤིག་ཏུ་འགྱུར་ཞིང ། ས་དག་ཀྱང་ལོགས་ཤིག་ཏུ་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱའོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་ཅི་ནས་ཀྱང་སྲིལ་དག་ཀྱང་ལོགས་ཤིག་ཏུ་འགྱུར་ཞིང་ས་དག་ཀྱང་ལོགས་ཤིག་ཏུ་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་བཅོམ་ལྡན་འདས་ཀྱིས་འཁོར་ལོ་དང ། བཀྲ་ཤིས་དང ། གཡུང་དྲུང་གི་ལྕགས་ཀྱུ་དག་དང་ལྡན་པའི་ཕྱག་དྲ་བར་འབྲེལ་པ། བསོད་ནམས་བརྒྱ་ཕྲག་དུ་མ་ལས་འཁྲུངས་པ་གཉིས་ཀྱིས་སྲིལ་དེ་དག་ལེགས་པར་བསྡུས་ཏེ་བསིལ་བའི་ཕྱོགས་སུ་གཞག་པ་མཛད་དོ། །དེ་ནས་བཅོམ་ལྡན་འདས་ཀྱིས་གཙུག་ལག་ཁང་དེ་ཆག་ཆག་བཏབ་སྟེ་ཕྱག་དར་མཛད་ནས་ཉལ་ཉིལ་གཙུག་ལག་ཁང་གི་ཕྱི་རོལ་དུ་བོར་ཏེ་ཕྱག་དང་ཞབས་གཉིས་བསིལ་ནས་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་དགེ་སློང་བསོད་སྙོམས་སྒྲུབ་པས་བསོད་སྙོམས་བླངས་ནས་བཅོམ་ལྡན་འདས་ག་ལ་བ་དེར་སོང་ངོ ། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་བསོད་སྙོམས་སྒྲུབ་པའི་དགེ་སློང་ལ་དགེ་སློང་ཇི་ལྟ་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བ་མཛད་པ་ཡིན་པས་བཅོམ་ལྡན་འདས་ཀྱིས་དགེ་སློང་བསོད་སྙོམས་སྒྲུབ་པ་ལ་དགེ་སློང་ཇི་ལྟ་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ། ཞེས་སོ་སོར་ཀུན་དགའ་བར
7.20b
མཛད་པ་དང ། དེས་གསོལ་པ། བཙུན་པ་ཟས་ཏེ་པོར་བསོད་ཅིང་དགེ་སློང་གི་དགེ་འདུན་ཚིམ་པར་བགྱིས་སོ། །དེ་ནས་བཅོམ་ལྡན་འདས་ཞལ་ཟས་ཀྱི་བྱ་བ་མཛད་ནས། གཙུག་ལག་ཁང་གི་སླད་རོལ་དུ་ཞབས་གཉིས་བསིལ་ཏེ། ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་བཅོམ་ལྡན་འདས་ཕྱི་དྲོ་ནང་དུ་ཡང་དག་འཇོག་ལས་བཞེངས་ནས། དགེ་སློང་གི་དགེ་འདུན་གྱི་གོང་དུ་གདན་བཤམ་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམ་ལ་བཀའ་སྩལ་པ། དགེ་སློང་དག་འདི་ན་ངས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཤེས་ནས་ལྡེ་མིག་ཁྱེར་ཏེ་ཀུན་དགའི་ར་བ་ནས་ཀུན་དགའི་ར་བར་གཙུགས་ལག་ཁང་ནས་གཙུགས་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང ། གོལ་བར་སོང་ནས་མཐར་གྱིས་འགྲོ་བ་ན་གཙུག་ལག་ཁང་ཞིག་ག་ལ་བ་དེར་ཕྱིན་ནས་ངས་གཙུག་ལག་ཁང་དེ་སྲིལ་དག་གིས་ཕྱི་ནང་ཐམས་ཅད་ཁྱབ་པར་མཐོང་ངོ ། །མཐོང་ནས་ཀྱང ། ེ་མའོ་ཞེས་བྱས་ཏེ་སྨད་ནས་འདི་སྙམ་དུ་བྲམ་ཟེ་དང་ཁྱིམ་བདག་དད་པ་ཅན་དག་གིས་ལྤག་པ་དང ། ཤ་དང ། ཁྲག་དག་བཙིར་ཅིང་བཙིར་ཅིང་སྦྱིན་པ་དག་སྦྱིན་བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང ། སོ་སོར་མི་རྟོག་པར་ཡོངས་སུ་ལོངས་སྤྱོད་དོ་སྙམ་དུ་དགོངས་ཀྱིས། དགེ་སློང་དག་ཁྱེད་ཀྱིས་དད་པས་སྦྱིན་པར་བྱ་བ་ལ་དྲོད་རན་པར་ཡོངས་སུ་ལོངས་སྤྱད་པ་དང ། སྤང་ཞིང་ཡོངས་སུ་ལོངས་སྤྱད་པ་དང ། དུས་སུ་ཡོངས་སུ་ལོངས་སྤྱད་པ་དང ། བརྟགས་ཅིང་ཡོངས་སུ་ལོངས་སྤྱད་པ་དང ། ཁད་ཀྱིས་ཡོངས་སུ་ལོངས་སྤྱད་ན་ལེགས་སོ། ་་་་།བར་སྡོམ་ལ། དྲོད་རན་པ་དང་སྤང་བ་དང ། །དེ་བཞིན་དུས་དང་བརྟག་པ་དང ། །ཁད་ཀྱིས་ཡོངས་སུ་སྤྱད་པ་ཡིན། །དེ་ནས་བཅོམ་ལྡན་འདས་ཀྱིས་དྲོད་རན་པ་དང ། སྤང་བ་དང ། དུས་དང ། བརྟག་པ་དང ། ཁད་ཀྱིས་ཡོངས་སུ་ལོངས་སྤྱོད་པའི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས
7.21a
ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ། འདིང་དུ་བཅུག་ནས་མ་བསྡུས་སམ་སྡུད་དུ་མ་བཅུག་པར་དེ་ནས་སོང་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་རབ་ཏུ་མང་པོ་དག་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་རི་བྲགས་ཤིག་ཏུ་ཕྱིན་ནས། དེ་ན་དེ་དག་ཁྱིམ་བདག་གི་གན་དུ་སོང་སྟེ། ཁྱིམ་བདག་ཁོ་བོ་ཅག་ལ་གནས་གཡོར་ཅིག་ཅེས་གནས་བརྙས་པ་དང ། ཁྱིམ་བདག་གིས་སྨྲས་པ། དམ་ཚིག་གིས་གཡར་བར་བགྱི་སྟེ། གལ་ཏེ་བདག་གི་བསོད་སྙོམས་གསོལ་ཏེ་གཤེགས་ན་གཡར་རོ། །དགེ་སློང་རྣམས་ཀྱིས་སྨྲས་པ། ཁྱིམ་བདག་ཁོ་བོ་ཅག་ནི་དོན་འཐུན་ལ་རག་ལས་པ་ཡིན་པས། གལ་ཏེ་དོན་འཐུན་སྡོད་ན་བཟའ་བར་བྱའོ། །ཁྱིམ་བདག་འདི་ན་ཁྲི་འམ། ཁྲིའུ་ལྟ་ཡོད་དམ། འཕགས་པ་དག་མ་མཆིས་སོ། །དགེ་སློང་དེ་དག་ལ་ཁྱིམ་པ་དང ། དགེ་ཚུལ་མང་དུ་ཡོད་པས་དེ་དག་གིས་རྩཝ་མང་པོ་བླངས་ཏེ་པུས་མོ་ནུབ་ཙམ་གྱི་གདིང་བ་བཤམས་སོ། །དོན་འཐུན་ནམ་མ་ནངས་པ་ཉིད་དུ་འཕགས་ནས། དགེ་སློང་དེ་དག་གིས་ཀྱང་གདིང་བ་མ་བོར་བར་དོང་ངོ ། །ཁྱིམ་བདག་གིས་བསམས་པ། གལ་ཏེ་འཕགས་པ་དག་བཞུགས་ན་དེ་དག་གི་གདུགས་ཚོད་སྟ་གོན་བྱས་ཇེ་བལྟའོ་སྙམ་ནས་དེ་སོང་བ་དང ། ཇི་ཙམ་ན་དགེ་སློང་དེ་དག་ནམ་མ་ནངས་པ་ཁོ་ནར་དོང་བ་མཐོང་ངོ ། །ཁྱིམ་བདག་དེ་ཆུང་མ་དང་བཅས་པས་གདིང་བ་དེ་དག་འདོར་བ་ན་སྔ་དྲོ་རིལ་གྱིས་ཡོལ་བར་གྱུར་ཏོ། །དགེ་སློང་རབ་ཏུ་མང་པོ་གཞན་དག་དོན་འཐུན་དང་ལྷན་ཅིག་ལྗོངས་རྒྱུར་དོང་བ་ན་རི་བྲགས་དེ་ཉིད་དུ་ཕྱིན་ནས། དེ་ན་དེ་དག་ཁྱིམ་བདག་གི་གན་དུ་སོང་སྟེ་ཁྱིམ་བདག་ཁོ་བོ་ཅག་ལ་གནས་གཡོར་ཅིག་ཅེས་གནས་བརྙས་པ་དང ། ཁྱིམ་བདག་གིས་སྨྲས་པ། འཕགས་པ་དག་དམ་ཚིག་གིས་གཡར་བར་བགྱི་སྟེ། གལ་ཏེ་ཁྱེད་ཅག་རན་གྱི་གདིང་བ་མི་འདིང་ན
7.21b
གཡར་བར་བགྱིའོ། །ཁྱིམ་བདག་འདི་ན་གང་དུ་ཁོ་བོ་ཅག་ཉལ་བར་བྱ་བའི་ཁྲི་འམ། ཁྲིའུ་ལྟ་ཡོད་དམ། འཕགས་པ་དག་མ་མཆིས་སོ། །ཁྱིམ་བདག་ས་སྒྲེ་བོ་ལ་ཇི་ལྟར་ཉལ་བར་བྱ། འཕགས་པ་དག་ཁྱེད་ཅག་ཉིད་ཀྱིས་ཚངས་པ་མཚུངས་པར་སྤྱོད་པ་དག་ལྷགས་པར་གྱུར་ནས། དེ་དག་གིས་རན་གྱི་གདིང་བ་བཏིང་ནས་མ་བོར་བར་དོང་ནས་བདག་མཆིས་བྲང་དང་བཅས་པ་དེ་འདོར་བ་ན་སྔ་དྲོ་རིལ་གྱིས་ཡོལ་བར་གྱུར་ཏོ། །དགེ་སློང་དེ་དག་ས་སྒྲེ་བོ་ལ་མཚན་མོ་འདའ་བར་བྱས་ནས་ནང་པར་སྔར་ལངས་ཏེ་དོང་ངོ ། །དེ་དག་མཐར་གྱིས་རྒྱུ་ཞིང་དོང་བ་ན་མཉན་ཡོད་དུ་ཕྱིན་ནས། དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཇི་ལྟར་བདེ་བ་བརྒྱུས། ས་སྒྲེ་བོ་ལ་མཚན་ཐོག་ཐག་འགྲེ་ལྡོག་པས་འདའ་བ་བྱས་སོ། །ཁྱོད་ཅག་རི་བྲགས་གང་དུ་བཞག་།ག་གེ་མོ་ཞིག་ཏུའོ། །ཁྱིམ་བདག་གང་གི་སྡུམ་པར། ཆེ་གེ་མོ་ཞིག་གིའོ། །དེ་ན་དགེ་སློང་ཁ་ཅིག་གིས་སྨྲས་པ། ཁོ་བོ་ཅག་ནི་ཁྱིམ་བདག་དེའི་སྡུམ་པར་གདིང་བ་ལ་ཉལ་ཏེ་འོངས་སོ། །ཁྱོད་ཅག་གིས་གདིང་བ་དེ་གང་དུ་བོར། དེ་ཉིད་དུ་བོར་རོ། །དེའི་ཕྱིར་ཁྱིམ་བདག་དེ་སྨོད་པར་བྱེད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་གཞན་ནས་ཀྱང་གདིང་བ་དོར་བར་བྱའོ། །བཅོམ་ལྡན་འདས་ཀྱིས་ཁྱིམ་གཞན་ནས་ཀྱང་གདིང་བ་དོར་བར་བྱའོ། །ཞེས་བཀའ་སྩལ་ནས། དགེ་སློང་རབ་ཏུ་མང་པོ་དག་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་རི་བྲགས་ཤིག་ཏུ་ཕྱིན་ཏོ། །རི་བྲགས་དེ་ན་ཁྱིམ་བདག་ཅིག་གིས་དགེ་སྦྱོང་དང ། བྲམ་ཟེ་བློ་བུར་དུ་ལྷགས་པ་རྣམས་ཀྱི་དོན་དུ་ཐག་རིང་པོ་ནས་རྩཝ་མང་པོ་དག་བླངས་ཏེ་གདིང་བ་བཤམས་སོ། །དགེ་སློང་དེ་དག་ཁྱིམ་བདག་དེའི་གན་དུ་སོང་སྟེ། ཁྱིམ་བདག་ཁོ་བོ་ཅག་ལ་གནས་གཡོར་ཅིག་ཅེས་གནས་བརྙས་པ་དང ། ཁྱིམ་བདག་དེས་སྨྲས་པ། འཕགས་པ་དག་བདག་གིས་དགེ་སྦྱོང་དང ། བྲམ་ཟེ་བློ་བུར་དུ་ལྷགས་པ་རྣམས
7.22a
ཀྱི་དོན་དུ་ཐག་རིང་པོ་ནས་རྩཝ་མང་པོ་བླངས་ཏེ་གདིང་བ་འདི་བཤམས་ཀྱིས་འདིར་གཟིམས་ཤིག་།དེ་དག་དེར་ཉལ་ནས་ནམ་མ་ནངས་པ་ཁོ་ནར་ཁྱིམ་བདག་ལ་མ་དྲིས་པར་གདིང་བ་བོར་ཏེ་དོང་ངོ ། །ཁྱིམ་བདག་དེ་ནང་པར་སྔར་ལངས་ནས། དེ་བོར་ཏེ་དོང་བ་མཐོང་ནས་ཁྱིམ་བདག་དེས་བསམས་པ། ལྟར་འགྲོའོ། །གལ་ཏེ་ཕྱོགས་གཙང་མར་བོར་བར་གྱུར་ན་ཡང་བླང་ངོ ། །སྙམ་ནས་དེ་ལྟར་སོང་བ་དང ། ཇི་ཙམ་ན་ཕྱོགས་མི་གཙང་བར་བོར་བ་མཐོང་ནས་དེས་དེ་མ་བླངས་སོ། །དགེ་སློང་རབ་ཏུ་མང་པོ་གཞན་དག་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་རི་བྲགས་དེ་ཉིད་དུ་ཕྱིན་ནས། དེ་དག་ཁྱིམ་བདག་དེའི་གན་དུ་སོང་སྟེ། ཁྱིམ་བདག་ཁོ་བོ་ཅག་ལ་གནས་གཡོར་ཅིག་ཅེས་གནས་བརྙས་པ་དང ། ཁྱིམ་བདག་དེས་སྨྲས་པ། འཕགས་པ་དག་བཞུགས་སུ་གསོལ། ཁྱིམ་བདག་འདི་ན་ཁྲི་འམ། ཁྲིའུ་དག་ཡོད་དམ། འཕགས་པ་དག་མ་མཆིས་སོ། །ཁྱིམ་བདག་ས་སྒྲེ་བོ་འདི་ལ་ཇི་ལྟར་ཉལ་བར་བྱ། འཕགས་པ་དག་བདག་གིས་དགེ་སྦྱོངས་དང་བྲམ་ཟེ་བློ་བུར་དུ་ལྷག་པ་རྣམས་ཀྱི་དོན་དུ་ཐག་རིང་པོ་ནས་རྩཝ་མང་པོ་བླངས་ཏེ་གདིང་བ་བཤམས་པར་གྱུར་པ་ལས། ཁྱེད་ཅག་ཉིད་ཀྱི་ཚངས་པ་མཚུངས་པར་སྤྱོད་པ་དག་ལྷགས་པར་གྱུར་ཏེ། དེ་དག་དེར་ཉལ་ནས་ནམ་མ་ནངས་པ་ཁོ་ནར་བདག་ལ་མ་དྲིས་པར་གདིང་བ་དེ་དག་ཕྱོག་མི་གཙང་བར་བོར་ཏེ་དོང་ངོ ། །དེ་དག་དེར་ས་སྒྲེ་བོ་ལ་ཉལ་ཏེ་དོང་ངོ ། །དེ་དག་མཐར་གྱིས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ནས། དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ་ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། དེ་དག་གིས་སྨྲས་པ། ཇི་ལྟར་བདེ་བར་བརྒྱུས། ས་སྒྲེ་བོ་ལ་མཚན་ཐོག་ཐག་འགྲེས་ལྡོགས་ཏེ་ནམ
7.22b
ནངས་སོ། །ཁྱེད་ཅག་རི་བྲགས་གང་དུ་བཞག་།ག་གེ་མོ་ཞིག་ཏུའོ། །ཁྱིམ་བདག་གང་གི་སྡུམ་པར། ཆེ་གེ་མོ་ཞིག་གིའོ། །དེ་ན་དགེ་སློང་ཁ་ཅིག་གིས་སྨྲས་པ། ཁོ་བོ་ཅག་ནི་ཁྱིམ་བདག་དེའི་སྡུམ་པར་གདིང་བ་ལ་ཉལ་ཏེ་འོངས་སོ། །ཁྱེད་ཅག་གིས་གདིང་བ་དེ་གར་བཞག་།ཕྱི་རོལ་དུ་བོར་རོ། །དེའི་ཕྱིར་ཁྱིམ་བདག་དེ་སྨོད་དོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་འདུག་པ་ལ་དྲི་བར་བྱ་སྟེ། གལ་ཏེ་འོར་ཅིག་ཅེས་ཟེར་ན་དོར་བར་བྱའོ། །གལ་ཏེ་མ་དོར་ཅིག་ཅེས་ཟེར་ན་དོར་བར་མི་བྱའོ། །རི་བྲགས་ཤིག་ན་གཙུག་ལག་ཁང་གནས་མལ་མེད་པ་ཞིག་ཡོད་པ་དེར། དགེ་སློང་རྣམས་ཀྱིས་དགེ་སློང་བློ་བུར་དུ་ལྷགས་པ་རྣམས་ཀྱིས། དོན་དུ་ཐག་རིང་པོ་ནས་རྩཝ་མང་པོ་དག་བླངས་ཏེ་གདིང་བ་བཤམས་སོ། །དགེ་སློང་རབ་ཏུ་མང་པོ་དག་དོན་མཐུན་དང་ལྷན་ཅིག་ལྗོངས་རྒྱུ་ཞིང་འདོང་བ་ན་རི་བྲགས་དེར་ཕྱིན་ནས། དེ་དག་གཙུག་ལག་ཁང་དེར་ཞུགས་ནས་དེ་དག་གིས། དགེ་སློང་རྣམས་ལ་དྲིས་པ། ཚེ་དང་ལྡན་པ་དག་འདི་ན་གནས་མལ་ཅུང་ཟད་ཡོད་དམ། དེ་དག་གིས་སྨྲས་པ། ཡོད་དེ་འདི་ལྟར་ཁོ་བོ་ཅག་གིས། དགེ་སློང་བློ་བུར་དུ་ལྷགས་པ་རྣམས་ཀྱི་དོན་དུ། ཐག་རིང་པོ་ནས་རྩཝ་མངས་པོ་བླང་ཏེ་གདིང་བ་བཤམས་ཀྱིས་འདིར་ཉོལ་ཅིག་།དེ་དག་དེར་ཉལ་ནས་ནང་པར་སྔར་ལངས་ཏེ་གདིང་བ་དེ་བོར་བར་བརྩམས་པ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་གདིང་བ་འདི་མ་དོར་ཅིག་།ཁོ་བོ་ཅག་གིས་ཚངས་པ་མཚུངས་པར་སྤྱོད་པ་བློ་བུར་དུ་ལྷགས་པ་རྣམས་ཀྱི་དོན་དུ་ཐག་རིང་པོ
7.23a
ནས་རྩཝ་མང་པོ་བླངས་ཏེ་བཏིང་བ་ཡིན་ནོ། །དེ་དག་གིས་སྨྲས་པ། ཚེ་དང་ལྡན་པ་དག་ཁྱེད་ཅག་གིས་རེ་ཤིག་བདག་ཉིད་ལྟུང་བ་དང་བཅས་པར་བྱས་སོ། །ཁོ་བོ་ཅག་གིས་ཇི་ལྟར་བདག་ཉིད་ལྟུང་བ་དང་བཅས་པར་བྱས། དེ་དག་གིས་དེ་དག་སྤྱོས་ཏེ་གདིང་བ་དེ་དག་མཐུས་བོར་ནས་དོང་ངོ ། །དགེ་སློང་རབ་ཏུ་མང་པོ་གཞན་དག་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་གཙུག་ལག་ཁང་དེ་ཉིད་དུ་ཕྱིན་ནས་དེ་དག་གིས་དགེ་སློང་དེ་དག་ལ་གནས་མལ་བརྙས་པ་དང ། དགེ་སློང་རྣམས་ཀྱིས་དགེ་སློང་དེ་དག་ལ་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་གནས་མལ་མེད་པ་ཡིན་ནམ། ཁོ་བོ་ཅག་གིས་ཚངས་པ་མཚུངས་པར་སྤྱོད་པ་བློ་བུར་དུ་ལྷགས་པ་རྣམས་ཀྱི་དོན་དུ་ཐག་རིང་པོ་ནས་རྩཝ་མང་པོ་དག་བླངས་ཏེ་གདིང་བ་བཤམས་པར་གྱུར་པ་ལས་ཚངས་པ་མཚུངས་པར་སྤྱོད་པ་གཞན་དག་ཅིག་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་གཙུག་ལག་ཁང་འདིར་ལྷགས་ཏེ་དེ་དག་དེ་ལ་ཉལ་ནས་ནང་པར་སྔར་ལངས་ཏེ་གདིང་བ་དེ་བོར་བར་བརྩམས་པ་དང ། ཁོ་བོ་ཅག་གིས་མ་དོར་ཅིག་ཅེས་བྱས་ན། དེ་དག་གིས་ཁོ་བོ་ཅག་སྤྱོས་ཏེ་མཐུས་བོར་ནས་དོང་ངོ ། །དེ་དག་ཀྱང་དེར་ས་སྒྲེ་བོ་ལ་ཉལ་ནས་ནང་པར་སྔར་ལངས་ཏེ་དོང་ངོ ། །དེ་དག་མཐར་གྱིས་ལྗོངས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ནས་དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། དེ་དག་གིས་སྨྲས་པ། ཇི་ལྟར་བདེ་བར་བརྒྱུས། མཚན་མོ་ཐོག་ཐག་ས་སྒྲེ་བོ་ལ་འགྲེས་ལྡོགས་ཏེ་ནམ་ནངས་སོ། །ཚེ་དང་ལྡན་པ་དག་རི་བྲགས་གང་དུ་ཞག་།གཙུགས་ལགས་ཁང་ག་གེ་མོ་ཞིགས་ཏུའོ། །དེ་ན་དགེ་སློང་ཁ་ཅིག་གིས་སྨྲས་པ། ཁོ་བོ་ཅག་ནི་གཙུགས་ལགས་ཁང་དེར་གདིང་བ་ལ་ཉལ་ཏེ་འོངས་སོ། །ཁྱེད་ཅག་གིས་གདིང་བ་དེ་གར་བཞག་།ཁོ་བོ་ཅག་གིས་རྒན་ཞུགས་དེ་དག་སྨྲས་བཞིན་དུ་མཐུས་ཕྱི་རོལ་དུ་བོར་རོ། །དེའི་ཕྱིར་ཚངས་པ་མཚུངས་པར་སྤྱོད་པ་དེ་དག་སྨོད་པར་བྱེད་དོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ
7.23b
དོར་བར་མི་བྱ་བར་དགེ་སློང་འཁོད་པ་དག་ལ་དྲི་བར་བྱའོ། །དགེ་སློང་རབ་ཏུ་མང་པོ་དག་དོན་འཐུན་དང་ལྷན་ཅིག་ལྗོངས་རྒྱུ་ཞིང་འོངས་པ་ན་ཁྲོན་པའི་དྲུང་ཞིག་ཏུ་མཚན་མོ་ཞག་ནས་དེ་དག་གིས་རྩཝ་མང་པོ་དག་ཀྱང་བླངས་ཏེ་རྩཝའི་གདིང་བ་བཤམས་སོ། །དེ་དག་དང་ཧ་ཅང་ཐག་མི་རིང་བ་ན་བྲམ་ཟེ་ཞིག་ཀྱང་མཚན་མོ་ཞག་གོ། །དགེ་སློང་དག་དོན་མཐུན་དང་བཅས་ཏེ་ནང་པར་སྔར་ལངས་ཏེ་དོང་བ་དང ། དོན་འཐུན་ཕྱིར་འགྲོ་བ་ཡང་འོངས་སོ། །བྲམ་ཟེ་དེ་དོན་འཐུན་དེ་ལ་དོན་བསྒྲུབས་ནས་དེ་དོན་འཐུན་དེ་ཉིད་དང་ལྷན་ཅིག་ཕྱིར་ལོག་པ་དང ། དོན་འཐུན་དེ་ཡང་ཁྲོན་པའི་དྲུང་དེ་ཉིད་དུ་གདིང་བ་ཇི་ལྟར་བཤམས་པ་དག་ལ་མཚན་མོ་ཉལ་ལོ། །དོན་མཐུན་དེ་དང་གཅེར་བུ་པ་དག་ལྷན་ཅིག་འོངས་པ་དེ་དག་གདིང་བ་གང་ལ་དགེ་སློང་དག་ཉལ་ཉལ་བའི་གདིང་བ་དེ་ཉིད་ལ་ཉལ་བ་དང ། དེ་ན་གཅེར་བུ་པ་གཅིག་གིས་སྨྲས་པ། ཤེས་པ་ཅན་ཇི་ཞིག་གིས་ཟིན་ནོ། །གཅེར་བུ་པ་གཞན་ཞིག་གིས་སྨྲས་པ། ཁྱོད་ཀྱིས་ཆང་གི་ཚིགས་མ་མང་དུ་ཟོས་པས་ཁྱོད་འདོད་པའི་རྣམ་པར་རྟོག་པས་ཟིན་ནོ། །དེས་གདིང་བ་དེ་ལ་བལྟས་པ་དང ། ཇི་ཙམ་ན་སྲིལ་དག་མཐོང་ནས་དེས་སྨྲས་པ། གདིང་བ་འདི་ལ་སུ་ཉལ་བར་གྱུར། དེ་དག་དང་ཧ་ཅང་ཐག་མི་རིང་བ་ན་བྲམ་ཟེ་ཉལ་བ་དེས་དེ་སྨྲ་བ་ཐོས་ནས་དེས་སྨྲས་པ། ཤཱཀྱའི་བུའི་དགེ་སྦྱོང་དག་གདིང་བ་འདི་ལ་ཉལ་བར་གྱུར་ཏོ། །དེ་དག་གིས་སྨྲས་པ། ཤེས་ལྡན་དག་ཤཱཀྱའི་བུའི་དགེ་སྦྱོང་དག་འཇིག་རྟེན་ལ་བདག་ཉིད་མཁས་པར་བགྲངས་པར་བྱེད་ན། འདི་ལྟར་དགོན་པར་གདིང་བ་དོར་བར་བྱ་བ་དེ་ཡང་མི་ཤེས་སོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགོན་པར་ཡང་རྩཝའི་གདིང་བ་དོར་བར་བྱའོ། །བཅོམ་ལྡན་འདས་ཀྱིས་དགོན་པར་ཡང་རྩཝའི་གདིང་བ་དོར་བར་བྱའོ་ཞེས་བཀའ་སྩལ་ནས། དགེ་སློང་རབ་ཏུ་མང་པོ་དག་དོན་འཐུན་དང་ལྷན་ཅིག་ལྗོངས་རྒྱུ་ཞིང་འདོང་བ་ན་དགོན་པའི་གནས་ཤིག་ཏུ་ཞག་པ་དང་དོན་འཐུན་དེ་ནམ་མ་ནངས་པ་ཉིད་དུ་འཕགས་ནས། དགེ་སློང་དེ་དག་ཇི་སྲིད་དུ་གདིང་བ་འདོར་བར་བྱེད་པ
7.24a
དེ་སྲིད་དུ་དོན་འཐུན་ཐལ་ནས། དེ་དག་ཕྱི་བཞིན་འབྲང་ཞིང་འདོང་བ་ན་ཆོམ་རྐུན་པ་དག་གིས་བཅོམ་མོ། །དེ་དག་མཐར་གྱིས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ནས་དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། ཁོ་བོ་ཅག་ཆོམ་རྐུན་པ་དག་གིས་བཅོམ་མོ། །གང་གིས་ཇི་ལྟར་གྱུར། དེ་དག་གིས་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ཀྱི་ཐམས་ཅད་དུ་དོར་བར་མི་བྱ་བར་འདི་ལྟར་གློངས་ཏེ་འགྲོ་བར་བྱའོ། །དགེ་སློང་དག་ཚོན་རྩིའི་ལས་བྱེད་པ་ན་དག་ར་དག་ཏུ་རྩཝ་དག་བཀྲམ་སྟེ་གོས་དག་སྐེམས་པར་བྱེད་ཅིང་དེ་དག་རྩཝ་དེ་དག་འདོར་བར་མི་བྱེད་ནས་དེར་སྲིལ་དག་བྱུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྩཝ་དག་དོར་བར་བྱའོ། །དགེ་སློང་གཞན་དག་ཚོན་རྩིའི་ལས་བྱེད་པར་འདོད་ནས་དེ་དག་གིས་སྨྲས་པ། ཚེ་དང་ལྡན་པ་དག་རྩཝ་འདི་དག་མ་དོར་ཅིག་དང་ཁོ་བོ་ཅག་གིས་ཀྱང་འདིར་གོས་དག་བསྐམས་པར་བྱའོ། །དེ་དག་གིས་དེ་དག་ལ་མི་སྟེར་ནས། བཅོམ་ལྡན་འདས་ཀྱིས་བཀའ་སྩལ་པ། སྦྱིན་པར་བྱའོ། །དེ་དག་གིས་དེ་དང་དེ་དག་ཏུ་གོས་དག་བསྐམས་ནས་ཁོ་བོ་ཅག་གིས་མ་བཏིང་ངོ་ཞེས་རྩཝ་དེ་དག་འདོར་བར་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་རྩཝ་འདོར་རམ་མི་འདོར་ཞེས་དྲི་བར་བྱ་ཞིང ། གལ་ཏེ་འདོར་རོ་ཞེས་ཟེར་ན་སྦྱིན་པར་བྱའོ། །གལ་ཏེ་མི་འདོར་རོ་ཞེས་ཟེར་ན་སྦྱིན་པར་མི་བྱའོ། །དགེ་སློང་དག་འཆག་ས་དག་ཏུ་འཆགས་པ་ན་དེ་ན་ས་རྩུབ་པས་དེ་དག་གི་རྐང་མཐིལ་ཚ་ནས། བཅོམ་ལྡན་འདས་ཀྱིས་བཀའ་སྩལ་པ། དེར་རྩཝ་དག་གདིང་བར་བྱའོ། །རྩཝ་དག་བཏིང་བ་དང་དེར་སྲིལ་དག་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། དོར་བར་བྱའོ། །དེ་དག་ཉི་མ་རེ་རེ་ཞིང་འདོར་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཉི་མ་རེ་རེ་ཞིང་དོར་བར་མི་བྱ་བར་འདི་ལྟར་དུས་དང་དུས་སུ་སོ་སོར་བརྟག་པར་བྱའོ། །གལ་ཏེ་ཐམས་ཅད་ཀྱི་ཐམས་ཅད
7.24b
དུ་འདོར་ན་དེའི་ཚེ་བསྡུས་ཏེ་འདོར་བར་བྱའོ། །དགེ་སློང་དག་འཆག་ས་དག་ཏུ་རྩཝའི་ཆུན་པོ་དག་ས་ལ་འཇོག་པར་བྱེད་པ་ན་དེར་སྲིལ་དག་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། ཐག་པས་བཅིངས་ནས་ཤིང་ལྗོན་པ་དག་ལ་སྤྱངས་ཏེ་གཞགས་པར་བྱའོ། །དགེ་སློང་དག་ལྕི་བ་དག་ས་ལ་འཇོག་པར་བྱེད་པ་ན་དེ་དག་ཏུ་སྲིལ་དག་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། གྱོ་མོར་གཞགས་པར་བྱའོ། །དེ་ནས་བཅོམ་ལྡན་འདས་ཀྱིས་བསླབས་པ་འདོད་པ་དང ། བསླབས་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འབྲེལ་བའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ་ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་གཙུགས་ལགས་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ་འདིང་དུ་བཅུག་ནས་མ་བསྡུས་སམ། བསྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་དེ་ནས་སོང་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །དགེ་འདུན་གྱི་ཞེས་བྱ་བ་ནི། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གཙུགས་ལགས་ཁང་དུ་ཞེས་བྱ་བ་ནི་གང་དུ་སྤྱོད་ལམ་བཞི་པོ་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་བྱར་རུང་བར་རོ། །རྩཝའི་གདིང་བ་ཞེས་བྱ་བ་ནི་རྩཝ་དག་གོ། །ལོ་མའི་གདིང་བ་ཞེས་བྱ་བ་ནི་ལོ་མ་དག་གོ། །བཏིང་ངམ་ཞེས་བྱ་བ་ནི་བདག་ཉིད་ཀྱིས་སོ། །འདིང་དུ་བཅུག་ནས་ཞེས་བྱ་བ་ནི་གཞན་ནོ། །མ་བསྡུས་སམ་ཞེས་བྱ་བ་ནི་བདག་ཉིད་ཀྱིས་སོ། །བསྡུད་དུ་མ་བཅུགས་གམ་ཞེས་བྱ་བ་ནི་གཞན་ནོ། །དགེ་སློང་འཁོད་པ་ལ་ཞེས་བྱ་བ་ནི་དེ་ན་དགེ་སློང་གང་ཡོད་པ་ལའོ། །མ་བཅོལ་བར་ཞེས་བྱ་བ་ནི་མ་གཏད་པར་རོ། །དེ་ནས་སོང་ན་ཞེས་བྱ་བ་ནི་ཉེན་ཀོར་སྤངས་ནའོ། །སངས་རྒྱས
7.25a
བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གདིང་བའི་ཉེན་ཀོར་གང་ལགས་ཉེ་བ་འཁོར་ངས་བྲམ་ཟེ་གྲོ་བཞིན་སྐྱེས་ལ་ཨ་མྲའི་སྡོང་པོ་ཤིན་དུ་མེ་ཏོག་ཕུན་སུམ་ཚོགས་པ། ཡལ་གའི་ཚོགས་ཕུན་སུམ་ཚོགས་པ་འདོམ་བདུན་གྱིས་བར་དུ་ཆོད་པའི་ཨ་མྲའི་སྡོང་པོ་བདུན་པོ་གང་དག་ཡིན་པ་དེ་དག་ལ་འདོམ་བཞི་བཅུ་རྩ་དགུ་ཡོད་པར་བསྟན་པ་དེ་ནི་གདིང་བའི་ཉེན་ཀོར་ཡིན་ནོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞགས་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོགས་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། །དགེ་སློང་གི་དགེ་འདུན་གྱི་གརྩུགས་ལགས་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ། འདིང་དུ་བཅུགས་ནས་མ་བསྡུས་སམ། སྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་དེ་ནས་སོང་ན་ཇི་སྲིད་དུ་ཉེན་ཀོར་མ་སྤངས་ཀྱི་བར་དུ་ཉེས་བྱས་སུ་འགྱུར་ལ། ཉེན་ཀོར་སྤངས་ན་ལྟུང་བྱེད་དུ་འགྱུར་རོ། །གལ་ཏེ་ལམ་ཀར་བདག་གིས་དགེ་འདུན་གྱི་གཙུགས་ལགས་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངོ་སྙམས་དུ་དྲན་ཞིང ། གལ་ཏེ་དེ་འདི་སྙམ་དུ་བདག་གི་ཚངས་པ་མཚུངས་པར་སྤྱོད་པ་མཁས་པ་དག་སྡུད་པར་འགྱུར་རོ། །སྙམ་ནས་དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ། ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །གལ་ཏེ་ལམ་ཀར་དགེ་སློང་དེར་འགྲོ་བ་མཐོང་ཞིང་གལ་ཏེ་དེ་འདི་སྙམ་དུ་འདིས་སྡུད་པར་འགྱུར་རོ་སྙམ་ན། དེ་ལ་འདི་སྐད་ཅེས་ཚེ་དང་ལྡན
7.25b
པ་ཁོ་བོས་དགེ་འདུན་གྱི་གཙུག་ལག་ཁང་གི་ཕྱོགས་ག་གེ་མོ་ཞིག་ཏུ་རྩཝའི་གདིང་བ་འམ། ལོ་མའི་གདིང་བ་བཏིང་བ་དེ་སྡུས་ཤིག་ཅེས་བརྗོད་པར་བྱ་ཞིང ། དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ་ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །དགེ་སློང་དེས་ཀྱང་དགེ་སློང་དེ་ལ་ཁས་བླངས་ནས་གུས་པར་བྱས་ཏེ་བསྡུ་བར་བྱའོ། །གལ་ཏེ་སྡུད་པར་མི་བྱེད་ན་འགལ་ཚབ་ཅན་དུ་འགྱུར་རོ། །གལ་ཏེ་དེར་སོན་ནས་བདག་གིས་དགེ་འདུན་གྱི་གཙུག་ལགས་ཁང་དུ་རྩཝའི་གདིང་བ་འམ་ལོ་མའི་གདིང་བ་བཏིང་ངོ་སྙམ་དུ་དྲན་ཞིང ། གལ་ཏེ་དེ་འདི་སྙམ་དུ་བདག་གིས་ཚངས་པ་མཚུངས་པར་སྤྱོད་པ་མཁས་པ་དག་སྡུད་པར་འགྱུར་རོ་སྙམ་ན། དགེ་སློང་དེས་ཕྱིན་ཅད་དེ་ལྟར་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ། ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །གལ་ཏེ་དེར་སོན་ནས་དགེ་སློང་དེར་འགྲོ་བ་མཐོང་ཞིང་གལ་ཏེ་འདི་སྙམ་དུ་འདིས་སྡུད་པར་འགྱུར་རོ་སྙམ་ན། དེ་ལ་འདི་སྐད་ཅེས་ཚེ་དང་ལྡན་པ་ཁོ་བོས་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་བ་དེ་བསྡུས་ཤིག་ཅེས་བརྗོད་པར་བྱ་ཞིང ། དགེ་སློང་དེས་ཕྱིན་ཅད་དེ་ལྟ་བུ་མི་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ། ལྟུང་བ་དེ་ཡང་ཆོས་བཞིན་དུ་ཕྱིར་བྱའོ། །དགེ་སློང་དེས་ཀྱང་དགེ་སློང་དེ་ལ་ཁས་བླངས་ནས་གུས་པར་བྱས་ཏེ་བསྡུད་པར་བྱའོ། །གལ་ཏེ་བསྡུད་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་གིས་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ་འདིང་དུ་བཅུག་ནས་མ་བསྡུས་སམ། བསྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་གཙུག་ལག་ཁང་དུ་འདིར་བདག་གིས་སེམས་མཉམ་པར་མ་བཞག་པ་མཉམ་པར་གཞག་གོ་སྙམ་པ་འམ། སེམས་མཉམ་པར་བཞག་པ་རྣམ་པར་གྲོལ་བར་བྱའོ་སྙམ་པས་ནང་དུ་ཡང་དག་འཇོག་གི་ཕྱིར་འཇུག་པར་བྱེད་ཅིང ། དེ་ཏིང་ངེ་འཛིན་དེ་ལས་མཚན་མོའི་ཐུན་དང་པོ་འམ་ཐུན་ཕྱེད་ན་ལྡང་བར་བྱེད་ན་གལ་ཏེ་ཕན་ཕུན་དུ་མ་གྱུར་ན་ཉེས་བྱས་སུ་འགྱུར་ལ་གལ་ཏེ་ཕན་ཕུན་དུ་གྱུར་ན་ལྟུང་བྱེད་དུ
7.26a
འགྱུར་རོ། །དགེ་སློང་གིས་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ་འདིང་དུ་བཅུག་ནས་མ་བསྡུས་སམ། བསྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་གཙུག་ལག་ཁང་དུ་འདིར་བདག་གིས་སེམས་མཉམ་པར་མ་བཞག་པ་མཉམ་པར་གཞག་གོ་སྙམ་པ་འམ། སེམས་མཉམ་པར་བཞག་པ་རྣམ་པར་གྲོལ་བར་བྱའོ་སྙམ་པས་ནང་དུ་ཡང་དག་འཇོག་གི་ཕྱིར་འཇུག་པར་བྱེད་ཅིང ། དེ་ཏིང་ངེ་འཛིན་དེ་ལས་མཚན་མོའི་གུང་ཐུན་ནམ། ཐུན་ཐ་མ་འམ། སྐྱ་རེངས་མ་ཤར་བ་འམ། སྐྱ་རེངས་ཤར་བ་འམ། ཉི་མ་མ་ཤར་བ་འམ། ཉི་མ་ཤར་བ་འམ། ཉི་མའི་བརྒྱད་ཆ་ཤར་བ་འམ། ཉི་མའི་བཞི་ཆ་ཤར་བ་འམ། ཕྱེད་མ་ཡོལ་བ་འམ། ཕྱེད་ཡོལ་བ་འམ། ཉི་མའི་བཞི་ཆ་ལུས་པ་འམ། ཉི་མའི་བརྒྱད་ཆ་ལུས་པ་འམ། ཉི་མ་མ་ནུབ་པ་འམ། ཉི་མ་ནུབ་པ་འམ། རྒྱུ་སྐར་དག་མ་ཤར་བ་འམ། རྒྱུ་སྐར་དག་ཤར་བ་ན་ལྡང་བར་བྱེད་ན། གལ་ཏེ་ཕན་ཕུན་དུ་མ་གྱུར་ན་ཉེས་བྱས་སུ་འགྱུར་ལ། གལ་ཏེ་ཕན་ཕུན་དུ་གྱུར་ན་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གདིང་བའི་ཕན་ཕུན་དུ་མཆིས། ཉེ་བ་འཁོར་གཉིས་ཏེ། རླུང་གི་ཕན་ཕུན་དང ། སྲིལ་གྱི་ཕན་ཕུན་ནོ། །རླུང་གི་ཕན་ཕུན་གང་ཞེ་ན། རིམ་པ་གཅིག་ནས་རིམ་པ་གཉིས་པའི་བར་དུ་བཟློག་པར་གྱུར་པའོ། །སྲིལ་གྱི་ཕན་ཕུན་གང་ཞེ་ན། རིམ་པ་གཅིག་ནས་རིམ་པ་གཉིས་ཀྱི་བར་དུ་ཕན་ཕུན་དུ་གྱུར་པའོ། །ས་གཞི་རྡོ་བའི་གཞི་ཅན་དང ། བྱེ་མའི་གཞི་ཅན་གང་དུ་ཉེས་དམིགས་དེ་ལྟ་བུ་མི་འབྱུང་བ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གདིང་བའི་ལྟུང་བྱེད་དེ་བཅཝ་ལྔ་པ་རྫོགས་སྷོ།། ་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤོག་།ལྗོངས་རྒྱུར་འདོང་དང
7.26b
དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང་ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཞེས་སྤྲོ་བར་བྱས་པ་དང ། དེ་དག་གིས་སློབ་དཔོན་དང ། མཁན་པོ་དག་ལ་ཞུས་པ། མཁན་པོ་བདག་ཅག་ལྗོངས་རྒྱུར་མཆིའོ། །སུ་དང་ལྷན་ཅིག་ཏུ། བཙུན་པ་འཆར་ཀ་དང་ངོ ། །ཚེ་དང་ལྡན་པ་དག་དེ་ནི་གནས་ངན་ལེན་ཀུན་དུ་སྤྱོད་པ་ཡིན་པས་ཁྱེད་ལ་ཐོ་འཚམ་པར་འགྱུར་རོ། །མཁན་པོ་བཙུན་པ་འཆར་ཀ་ནི་བདག་ཅག་གི་ཕ་མ་ལྟ་བུར་རྣམ་པར་གནས་པ་ལགས་པས་ཅིའི་སླད་དུ་དེ་བདག་ཅག་ལ་ཐོ་འཚམ་པར་འགྱུར་ཞེས་དེ་དག་གིས་དེ་དག་གི་ཚིག་ཚིག་མ་ཡིན་པར་བྱས་ཏེ་དེ་དང་ལྷན་ཅིག་ལྗོངས་རྒྱུར་འཕགས་སོ། །འཆར་ཀས་གང་གི་ཚེ་ཕྱི་རོལ་གྱི་མཚམས་འདས་པ་དེའི་ཚེ་ན་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་གནས་མ་བཅས་པར་ལྗོངས་རྒྱུར་འདོང་བར་བྱེད། ཚུར་ཤོག་གནས་ཆོས་ཤིག་ཅེས་དེས་དེ་དག་མདུན་དུ་ཙོག་པུར་འདུག་ཏུ་བཅུག་སྟེ་གནས་འཆར་བཅུག་གོ། །དེས་དེ་དག་ལ་ལ་ལ་གཏུར་བུ་གཏད་ལ་ལ་ལ་ལྷུང་བཟེད་ཀྱི་སྣོད་གཏད། ལ་ལ་ལ་བར་བུར་སྣོད་གཏད། ལ་ལ་ལ་ཕོར་བུ་གཏད། ལ་ལ་ལ་རིལ་བ་སྤྱི་བླུགས་གཏད་ནས། དེ་ལག་པ་གཉིས་བརྐྱང་སྟེ། རྔུལ་གཟན་ལས་གཞན་མེད་པར་འཇིག་རྟེན་ལ་ཐོ་འཚམ་ཞིང་འགྲོ་བ་ན། དེ་དག་རི་བྲགས་ཤིག་ཏུ་ཕྱིན་ནས་དེ་དག་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན། དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། དེ་དག་གིས་ཐོས་ནས་སྨྲས་པ། སློབ་དཔོན་གཙུག་ལག་ཁང་དུ་གཎ་ཌཱི་བརྡུངས་ཀྱིས་བཞུད་དོ། །འཆར་ཀས་སྨྲས་པ། ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང་བདག་ཅག་ངལ་བ་དག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །སློབ་དཔོན་རྙེད་པའི་གཎ་ཌཱི་མ་ལགས་སམ། དེ་ཡིན་ན་བདག་ཅག་མཚམས་སུ་ཕྱིན་ན་འཐོབ་བོ། །
7.27a
སློབ་དཔོན་ནི་གྲགས་པ་བསོད་ནམས་ཆེ་བ་ལགས་པས་འཐོབ་ཀྱི་བདག་ཅག་སུས་སྩོལ་བར་འགྱུར། དེང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་དག་དོང་བ་དང་ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས། དགེ་སློང་རྣམས་ཀྱིས་སྨྲས་པ་ཚེ་དང་ལྡན་པ་དག་གནས་མལ་ནོས་ཤིག་།དེ་དག་གིས་སྨྲས་པ། བདག་ཅག་ལས་ཆེས་རྒན་པ་ཡང་ཡོད་དོ། །སུ་ཡིན། སློབ་དཔོན་འཆར་ཀའོ། །དེའི་ཡང་ནོས་ཤིག་།དེ་དག་གིས་གནས་མལ་མནོས་སོ། །ཚེ་དང་ལྡན་པ་འཆར་ཀ་ཡང་དེ་ན་འདུ་འཛིའི་གཏམ་གྱིས་འདུག་སྟེ། རི་བྲགས་འདི་སུའི། གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་ཀྱང་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ་སྙམ་ནས་དེ་དག་གིས་གཅིག་ལ་གཅིག་ཞུས་ཏེ། ཚེ་དང་ལྡན་པ་འཆར་ཀའི་མལ་བཤམས་ནས་རྐང་པའི་ཆུ་དང་རྐང་པ་བཀྲུ་བ་མཐའ་གཅིག་ཏུ་བཞག་སྟེ། རྐང་པ་གཉིས་བཀྲུས་ནས་མེ་ཁང་དུ་ཞུགས་ཏེ་ཉལ་ལོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག་འདུག་ནས། གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ། ཚེ་དང་ལྡན་པ་དག་ཚེ་དང་ལྡན་པ་དག་ཅེས་བོད་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འཆར་ཀ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། འཆར་ཀས་སྨྲས་པ། འདི་ན་ཁོ་བོའི་གཞོན་ནུ་དག་ཅིག་འཁོད་ན་དེ་དག་ལས་འགའ་ཞིག་ན་བར་མ་གྱུར་ཏམ། དེ་དག་གིས་དེ་ཐོས་ནས་སྨྲས་པ། སློབ་དཔོན་མ་འབོད་ཅིག་།གནས་ཁང་འོ་ནིར་གཟིམས་མལ་བཤམས་ཏེ། ཞབས་ཀྱི་ཆབ་དང ། ཞབས་བཀྲུ་བ་ཡང་བཞག་གིས་དེར་གཟིམས་ཤིག་།འཆར་ཀས་སྨྲས་པ། ཚེ་དང་ལྡན་པ་དག་ཁྱེད་ཀྱིས་སུ་ལ་ཞུས་ཏེ་རྐང་པ་དག་བཀྲུས། སློབ་དཔོན་ཡུན་རིང་དུ
7.27b
ཐོགས་པར་གྱུར་ནས་གཅིག་ལ་གཅིག་ཞུས་ཏེ་སུག་པ་དག་བཀྲུས་སོ། །འཆར་ཀས་སྤྱོས་ཏེ་སྨྲས་པ། གཙུག་ལག་ཁང་ནས་ཕྱིར་བྱུང་ལ། གང་འདི་ལྟར་གུས་པ་མེད་པ་དང ། རྗེ་ས་མེད་པ་དག་ལ་གནས་སྦྱིན་པར་བྱེད་པ་དེའི་གན་དུ་སོང་ལ་གནས་ཆོས་ཤིག་ཅེས་དེས་དེ་དག་གཙུག་ལག་ཁང་ནས་ཕྱི་རོལ་དུ་བསྐྲད་དོ། །དེ་དག་དེ་ན་མཚན་ཐོག་ཐག་བླ་གབ་མེད་པར་ལྷགས་པས་ཉེན་པར་གྱུར་ཏོ། །དེ་དག་ནངས་པར་སྔར་ལངས་ཏེ་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང ། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱོད་ཀྱིས་བདག་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །ཇི་ལྟ་བདེ་བར་བརྒྱུས། ཇི་ལྟར་བདེ་བར་བརྒྱུས་བདག་ཅག་སློབ་དཔོན་འཆར་ཀས་མཚན་ཐོག་ཐག་ལྷགས་པས་ཐོ་བཙམས་སོ། །ཅིའི་ཕྱིར། དེ་དག་གིས་སྐབས་དེ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་གཙུག་ལག་ཁང་ནས་དགེ་སློང་སྐྲོད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་འཆར་ཀ་ལ་སྨྲས་པ། འཆར་ཀ་ཁྱོད་དགེ་འདུན་གྱི་གཙུག་ལག་ཁང་ནས་དགེ་སློང་སྐྲོད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར
7.28a
སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་དགེ་འདུན་གྱི་གཙུག་ལག་ཁང་ནས་དགེ་སློང་སྐྲོད་དམ་སྐྲོད་དུ་འཇུད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་སའི་གཙུག་ལག་ཁང་ཞིག་ཡོད་པ་དེ་ན་དགེ་སློང་ནད་པ་ཞིག་འདུག་ནས། ཇི་ཙམ་ན་སྤྲིན་ཁ་དོག་ལྔ་པ་འདུས་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་སྤྲིན་ཁ་དོག་ལྔ་པ་འདུས་པས་གཙུག་ལག་ཁང་རྡིབ་པར་འགྱུར་སྲིད་ཀྱིས་ཕྱིར་བྱུང་ཤིག་།ཁོ་བོ་རང་འབྱུང་མི་ནུས་སོ། །དགེ་སློང་རྣམས་འགྱོད་པས་མ་ཕྱུང་ནས་ཆར་བབ་སྟེ་གཙུག་ལག་ཁང་རྡིབ་ནས་དེས་དགེ་སློང་དེ་ནོན་ཏེ་དུས་ལ་བབ་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་དགེ་འདུན་གྱི་གཙུག་ལག་ཁང་ནས་དགེ་སློང་སྐྲོད་དམ་སྐྲོད་དུ་འཇུག་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །ཁྲོས་འཁྲུགས་རྔམ
7.28b
པར་གྱུར་ཏེ། ཡི་མ་རངས་ནས་ཤེས་བྱ་བ་ནི་ཁྲོས་ཤིང་ཁྲོ་བའི་ཟིལ་གྱིས་ནོན་ནས་སོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གཙུག་ལག་ཁང་ནས་ཤེས་བྱ་བ་ནི་གང་དུ་སྤྱོད་ལམ་བཞི་པོ་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དག་བྱར་རུང་བ་ནས་སོ། །དགེ་སློང་ཞེས་བྱ་བ་ནི་ཆོས་འདི་པའོ། །སྐྲོད་དམ་ཞེས་བྱ་བ་ནི་བདག་ཉིད་ཀྱིས་སོ། །སྐྲོད་དུ་འཇུད་ན་ཞེས་བྱ་བ་ནི་གཞན་ནོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་དུ་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་དགེ་འདུན་གྱི་གཙུག་ལག་ཁང་ནས་དགེ་སློང་སྐྲོད་དམ་སྐྲོད་དུ་འཇུད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྐྲོད་པའི་ལྟུང་བྱེད་དེ་བཅུ་དྲུག་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤོག་།ལྗོངས་རྒྱུར་འདོངས་དང་དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་འབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ་ཞེས་སྤྲོ་བར་བྱས་པ་དང ། དེ་དག་གིས་སློབ་དཔོན་དང ། མཁན་པོ་དག་ལ་ཞུས་པ
7.28c
#་མཁན་པོ་བདག་ཅག་ལྗོངས་རྒྱུར་མཆིའོ། །སུ་དང་ལྷན་ཅིག་ཏུ། བཙུན་པ་འཆར་ཀ་དང་ངོ ། །ཚེ་དང་ལྡན་པ་དག་དེ་ནི་གནས་ངན་ལེན་ཀུན་དུ་སྤྱོད་པ་ཡིན་པས་ཁྱེད་ལ་ཐོ་འཚམ་པར་འགྱུར་རོ། །མཁན་པོ་བཙུན་པ་འཆར་ཀ་ནི་བདག་ཅག་གི་ཕ་མ་ལྟ་བུར་རྣམ་པར་གནས་པ་ལགས་པས་ཅིའི་སླད་དུ་དེ་བདག་ཅག་ལ་ཐོ་འཚམ་པར་འགྱུར་ཞེས་དེ་དག་གིས་དེ་དག་གི་ཚིག་ཚིག་མ་ཡིན་པར་བྱས་ཏེ། དེ་དང་ལྷན་ཅིག་ལྗོངས་རྒྱུར་འཕགས་སོ། །འཆར་ཀས་གང་གི་ཚེ་ཕྱི་རོལ་གྱི་མཚམས་འདས་པ་དེའི་ཚེ་ན་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་གནས་མ་བཅས་པར་ལྗོངས་རྒྱུར་འདོང་བར་བྱེད། ཚུར་ཤོག་གནས་ཆོས་ཤིག་ཅེས་དེས་དེ་དག་མདུན་དུ་ཙོག་པུར་འདུག་ཏུ་བཅུག་སྟེ་གནས་འཆར་བཅུག་གོ། །དེས་དེ་དག་ལ་ལ་ལ་གཏུར་བུ་གཏད། ལ་ལ་ལ་ལྷུང་བཟེད་ཀྱི་སྣོད་གཏད། ལ་ལ་ལ་བར་བུར་གཏད། ལ་ལ་ལ་ཕོར་བུ་གཏད། ལ་ལ་ལ་རིལ་བ་སྤྱི་བླུགས་གཏད་ནས་དེ་ལག་པ་གཉིས་བརྐྱང་སྟེ། རྔུལ་གཟན་ལས་གཞན་མེད་པར་འཇིག་རྟེན་ལ་ཐོ་འཚམ་ཞིང་འགྲོ་བ་ན་དེ་དག་རི་བྲགས་ཤིག་ཏུ་ཕྱིན་ནས་དེ་དག་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན་དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། དེ་དག་གིས་ཐོས་ནས་སྨྲས་པ། སློབ་དཔོན་གཙུག་ལག་ཁང་དུ་གཎ་ཌཱི་བརྡུངས་ཀྱིས་བཞུད་དོ། །འཆར་ཀས་སྨྲས་པ། ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང་བདག་ཅག་ངལ་བ་དག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །སློབ་དཔོན་རྙེད་པའི་གཎ་ཌཱི་མ་ལགས་སམ། དེ་ཡིན་ན་བདག་ཅག་མཚམས་སུ་ཕྱིན་ན་འཐོབ་བོ། །སློབ་དཔོན་ནི་གྲགས་པ་བསོད་ནམས་ཆེ་བ་ལགས་པས་ཐོབ་ཀྱི་བདག་ཅག་ལ་སུས་སྩོལ་བར་འགྱུར། དེང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་དག་དོང་བ་དང་ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་གནས་མལ་ནོས་ཤིག་།དེ་དག་གིས་སྨྲས་པ།
7.28d
#་བདག་ཅག་ལས་ཆེས་རྒན་པ་ཡང་ཡོད་དོ། །སུ་ཡིན། སློབ་དཔོན་འཆར་ཀའོ། །དེའི་ཡང་ནོས་ཤིག་།དེ་དག་གིས་གནས་མལ་མནོས་སོ། །ཚེ་དང་ལྡན་པ་འཆར་ཀ་ཡང་དེ་ན་འདུ་འཛིའི་གཏམ་གྱིས་འདུག་སྟེ། རི་བྲགས་འདི་སུའི་གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་ཀྱང་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ་སྙམ་ནས་དེ་དག་གིས་གཅིག་ལ་གཅིག་ཞུས་ཏེ། ཚེ་དང་ལྡན་པ་འཆར་ཀའི་མལ་བཤམས་ནས་རྐང་པའི་ཆུ་དང ། རྐང་པ་བསྐུ་བ་མཐའ་གཅིག་ཏུ་བཞག་སྟེ། རྐང་པ་གཉིས་བཀྲུས་ནས་མེ་ཁང་དུ་ཞུགས་ཏེ་ཉལ་ལོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག་འདུག་ནས། གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ་ཚེ་དང་ལྡན་པ་དག་ཚེ་དང་ལྡན་པ་དག་ཅེས་བོད་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲ་བ། ཚེ་དང་ལྡན་པ་འཆར་ཀ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད་འཆར་ཀས་སྨྲས་པ། འདི་ན་ཁོ་བོའི་གཞོན་ནུ་དག་ཅིག་འཁོད་ན་དེ་དག་ལས་འགའ་ཞིག་ན་བར་མ་གྱུར་ཏམ། དེ་དག་གིས་དེ་ཐོས་ནས་སྨྲས་པ། སློབ་དཔོན་མ་འབོད་ཅིག་།གནས་ཁང་འོ་ནིར་གཟིམས་མལ་བཤམས་ཏེ། ཞབས་ཀྱི་ཆབ་དང ། ཞབས་བསྐུ་བ་ཡང་བཞག་གིས་དེར་གཟིམས་ཤིག་།འཆར་ཀས་སྨྲས་པ། ཚེ་དང་ལྡན་པ་དག་ཁྱེད་ཀྱིས་སུ་ལ་ཞུས་ཏེ་རྐང་པ་དག་བཀྲུས། སློབ་དཔོན་ཡུན་རིང་དུ་ཐོགས་པར་གྱུར་ནས་གཅིག་ལ་གཅིག་ཞུས་ཏེ་སུག་པ་དག་བཀྲུས་སོ། །འཆར་ཀས་སྤྱོས་ཏེ་སྨྲས་པ། ཁོ་བོ་ཁྱེད་དང་ལྷན་ཅིག་བྱ་བ་ཅུང་ཞིག་ཡོད་ཀྱིས་སྒོ་ཕྱེ་ཤིག་།དེ་དག་གིས་སྒོ་མ་ཕྱེ་བ་དང ། དེས་སྤྱོས་ཏེ་སྒོ་གླེགས་ལ་རྡོག་པས་བརྡབས་ནས་དེས་མེ་ཁང་ཐམས་ཅད་འགུལ་བར་གྱུར་ཏོ། །དེ་དག་སྐྲག་ནས་བསམས་པ། འདི་སྟོབས་དང་ལྡན་པ་ཡིན་པས་དགེ་འདུན་གྱི་གཙུག་ལག་ཁང་རྡིབ་པར་གྱུར་ན་མི་རུང་གིས་སྒོ་དབྱེའོ་སྙམ་ནས་དེ་དག་གིས་སྒོ
7.29a
ཕྱེ་བ་དང ། དེ་ནང་དུ་ཞུགས་ནས་དེ་དག་གི་དབུས་སུ་བསྒྱེལ་ཏེ། དེས་དེ་དག་ཁ་ཅིག་ལ་ནི་གྲུ་མོས་བསྣུན་ཁ་ཅིག་ལ་ནི་པུས་མོས་བསྣུན་ནས་དེ་དག་གིས་སྨྲས་པ། སློབ་དཔོན་བདག་ཅག་གནད་དོ། །བདག་ཅག་གནད་དོ། །འཆར་ཀས་སྨྲས་པ། སུ་ལ་གནོད་པ་དེ་འགྲོ་བར་འགྱུར་རོ། །དེ་དག་གིས་གཅིག་ལ་གཅིག་སྨྲས་པ། ཚེ་དང་ལྡན་པ་དག་འདི་ནི་སྟོབས་དང་ལྡན་པ་ཡིན་པས་འདིས་བདག་ཅག་ཐམས་ཅད་ཀྱི་ཐམས་ཅད་དུ་སྲོག་དང་བྲལ་བར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་ཕྱིར་འབྱུང་བར་བྱའོ་ཞེས་དེ་དག་ཕྱིར་བྱུང་ངོ ། །དེ་དག་དེ་ན་མཚན་ཐོག་ཏག་བླ་གབ་མེད་པ་ན་ལྷགས་པས་ཉེན་པར་གྱུར་ཏོ། །དེ་དག་ནང་པར་སྔར་ལངས་ཏེ་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང ། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱོད་ཀྱིས་བདག་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཇི་ལྟར་བདེ་བར་བརྒྱུས། བདག་ཅག་སློབ་དཔོན་འཆར་ཀས་མཚན་ཐོག་ཐག་ལྷགས་པས་ཐོ་བཙམས་སོ། །ཅིའི་ཕྱིར། དེ་དག་གིས་སྐབས་དེ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་གཙུག་ལག་ཁང་ན་དགེ་སློང་དག་སྔ་ན་འཁོད་པར་ཤེས་བཞིན་དུ་ཕྱིས་འོངས་ནས་སུ་ལ་གནོད་པ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་ཏེ་ཕྱིས་གནོན་བྱེད་ཅིང་སྟན་ལ་ཉལ་བ་དང་འདུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ
7.29b
མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ཀྱིས་དགེ་འདུན་གྱི་གཙུག་ལག་ཁང་ན་དགེ་སློང་དག་སྔ་ན་འཁོད་པར་ཤེས་བཞིན་དུ་ཕྱིས་འོངས་ནས་སུ་ལ་གནོད་པ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་ཏེ་ཕྱིས་གནོན་བྱས་ནས་སྟན་ལ་ཉལ་ལམ་འདུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་གཙུག་ལག་ཁང་ན་དགེ་སློང་དག་སྔ་ན་འཁོད་པར་ཤེས་བཞིན་དུ་ཕྱིས་འོངས་ནས་སུ་ལ་གནོད་པ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་ཏེ་ཕྱིས་གནོན་བྱས་ནས་སྟན་ལ་ཉལ་ལམ་འདུག་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གཙུག་ལག་ཁང་ན་ཞེས་བྱ་བ་ནི་གང་དུ་སྤྱོད་ལམ་བཞི་པོ་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དག་བྱར་རུང་བ་ནའོ། །དགེ་སློང་དག་ཅེས་བྱ་བ་ནི་ཆོས་འདི་པ་དག་གོ། །སྔ་ན་འཁོད་པ་ཞེས་བྱ་བ་ནི་སྔ་ན་གནས་པར་རོ། །ཤེས་བཞིན་དུ་ཞེས་བྱ་བ་ནི་དེ་རང་གིས་རིག་པར་གྱུར་པ་འམ། གཞན་དག་གིས་བསྟན་པས་སོ། །ཕྱིས་འོངས་ནས་ཤེས་བྱ་བ་ནི་དེའི་འོག་ཏུ་འོངས་ནས་སོ། །སུ་ལ་གནོད་པ་ཞེས་བྱ་བ་ནི་སུ་བདེ་བ་ལ་རེག་པར་མི་འགྱུར་བའོ། །དེ་འགྲོ་བར་འགྱུར་བ་ཞེས་བྱ་བ་ནི་དེ་དེ་ནས་གཞན་དུ་འགྲོ་བར་འགྱུར་བའོ། །
7.30a
དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ། །ཕྱིས་གནོན་བྱས་ནས་ཤེས་བྱ་བ་ནི་གནོད་པས་ཟིལ་གྱིས་མནན་ནས་སོ། །སྟན་ལ་ཞེས་བྱ་བ་ནི་གནས་མལ་ལའོ། །ཉལ་ན་ཞེས་བྱ་བ་ནི་ལུས་བསྙལ་ནའོ། །འདུག་ན་ཞེས་བྱ་བ་ནི་ཀུབ་ཚོས་བཞག་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་གཙུག་ལག་ཁང་ན་དགེ་སློང་དག་སྔ་ན་འཁོད་པར་ཤེས་བཞིན་དུ་ཕྱིས་འོངས་ནས་སུ་ལ་གནོད་པ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་ཏེ་ཕྱིས་གནོན་བྱས་ནས་སྟན་ལ་ཉལ་ལམ་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ།། ་་་་་།།བར་སྡོམ་ལ། ངན་དང་བསོད་དང་གྲང་དྲོ་དང ། །ཆོལ་ཟངས་དང་ནི་བཀྲུས་སྨན་དང ། །རྣལ་འབྱོར་འཐུན་དང་ཁ་ཏོན་དང ། །འཇིགས་དང་བཅས་དང་འཇིགས་མེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤོག་།ལྗོངས་རྒྱུར་འདོང་དང་དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ་རྙེད་པ་ཡང་བསྒྲུབ་པར་བྱ་ཞིང་ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་འབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ་ཞེས་སྤྲོ་བར་བྱས་པ་དང ། དེ་དག་གིས་སློབ་དཔོན་དང ། མཁན་པོ་དག་ལ་ཞུས་པ། མཁན་པོ་བདག་ཅག་ལྗོངས་རྒྱུར་མཆིའོ། །སུ་དང་ལྷན་ཅིག་ཏུ། བཙུན་པ་འཆར་ཀ་དང་ངོ ། །ཚེ་དང་ལྡན་པ་དག་དེ་ནི་གནས་ངན་ལེན་ཀུན་ཏུ་སྤྱོད་པ་ཡིན་པས་ཁྱེད་ལ་ཐོ་འཚམ
7.30b
པར་འགྱུར་རོ། །མཁན་པོ་བཙུན་པ་འཆར་ཀ་ནི་བདག་ཅག་གི་ཕ་མ་ལྟ་བུར་རྣམ་པར་གནས་པ་ལགས་པས་ཅིའི་སླད་དུ་བདག་ཅག་ལ་ཐོ་འཚམ་པར་འགྱུར་ཞེས་དེ་དག་གིས་དེ་དག་གི་ཚིག་ཚིག་མ་ཡིན་པར་བྱས་ཏེ་དེ་དང་ལྷན་ཅིག་ལྗོངས་རྒྱུར་འཕགས་སོ། །འཆར་ཀས་གང་གི་ཚེ་ཕྱི་རོལ་གྱི་མཚམས་འདས་པ་དེའི་ཚེ་ན་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་གནས་མ་བཅས་པར་ལྗོངས་རྒྱུར་འདོང་བར་བྱེད། ཚུར་ཤོག་གནས་ཆོས་ཤིག་ཅེས་དེས་དེ་དག་མདུན་དུ་ཙོག་པུར་འདུག་ཏུ་བཅུག་སྟེ་གནས་འཆར་བཅུག་གོ། །དེས་དེ་དག་ལ་ལ་ལ་གཏུར་བུ་གཏད། ལ་ལ་ལ་ལྷུང་བཟེད་ཀྱི་སྣོད་གཏད། ལ་ལ་ལ་བར་བུར་སྣོད་གཏད། ལ་ལ་ལ་ཕོར་བུ་གཏད། ལ་ལ་ལ་རིལ་བ་སྤྱི་བླུགས་གཏད་ནས་དེ་ལག་པ་གཉིས་བརྐྱང་སྟེ་རྔུལ་གཟན་ལས་གཞན་མེད་པར་འཇིག་རྟེན་ལ་ཐོ་འཚམ་ཞིང་འགྲོ་བ་ན་དེ་དག་རི་བྲགས་ཤིག་ཏུ་ཕྱིན་ནས། དེ་དག་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན་དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། དེ་དག་གིས་ཐོས་ནས་སྨྲས་པ། སློབ་དཔོན་གཙུག་ལག་ཁང་དུ་གཎ་ཌཱི་བརྡུངས་ཀྱིས་བཞུད་དོ། །འཆར་ཀས་སྨྲས་པ། ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང ། བདག་ཅག་ངལ་བ་དག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །སློབ་དཔོན་རྙེད་པའི་གཎ་ཌཱི་མ་ལགས་སམ་དེ་ཡིན་ན་བདག་ཅག་མཚམས་སུ་ཕྱིན་ན་འཐོབ་བོ། །སློབ་དཔོན་ནི་གྲགས་པ་བསོད་ནམས་ཆེ་བ་ལགས་པས་འཐོབ་ཀྱི་བདག་ཅག་སུས་སྩོལ་བར་འགྱུར། དེང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་དག་དོང་བ་དང་ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་གནས་མལ་ནོས་ཤིག་།དེ་དག་གིས་སྨྲས་པ། བདག་ཅག་ལས་ཆེས་རྒན་པ་ཡང་ཡོད་དོ། །སུ་ཡིན། སློབ་དཔོན་འཆར་ཀའོ། །དེའི་ཡང་ནོས་ཤིག་དེ་དག་གིས་གནས་མལ་མནོས་སོ། །ཚེ་དང་ལྡན་པ་འཆར་ཀ་ཡང་དེ་ན་འདུ་འཛིའི་གཏམ་གྱིས་འདུག
7.31a
སྟེ་རི་བྲགས་འདི་སུའི། གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་ཀྱང་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ་སྙམ་ནས་དེ་དག་གིས་གཅིག་ལ་གཅིག་ཞུས་ཏེ། ཚེ་དང་ལྡན་པ་འཆར་ཀའི་མལ་བཤམས་ནས། རྐང་པའི་ཆུ་དང ། རྐང་པ་བསྐུ་བ་མཐའ་གཅིག་ཏུ་བཞག་སྟེ། གཅིག་ལ་གཅིག་སྨྲས་པ། ཚེ་དང་ལྡན་པ་དག་དེང་བདག་ཅག་གིས་ཁ་ཟས་ངན་པ་དག་ཟོས་པས་ཁ་ཏོན་མི་ནུས་ཀྱིས་རེ་ཤིག་ཡིད་ལ་བྱེད་པ་བསྐྱེད་པར་བྱའོ་ཞེས་དེ་དག་དཔོང་སའི་ཁང་པར་ཞུགས་ནས་སྐྱིལ་མོ་ཀྲུང་བཅས་ཏེ་བསམ་གཏན་བྱ་བར་བརྩམས་སོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག་འདུག་ནས་གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ། ཚེ་དང་ལྡན་པ་དག་ཚེ་དང་ལྡན་པ་དག་ཅེས་བོད་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འཆར་ཀ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། འཆར་ཀས་སྨྲས་པ། འདི་ན་ཁོ་བོའི་གཞོན་ནུ་དག་ཅིག་འཁོད་ན་དེ་དག་ལས་འགའ་ཞིག་ན་བར་མ་གྱུར་ཏམ། དེ་དག་གིས་དེ་ཐོས་ནས་སྨྲས་པ། སློབ་དཔོན་མ་འབོད་ཅིག་།གནས་ཁང་འོ་ནིར་གཟིམས་མལ་བཤམས་ཏེ། ཞབས་ཀྱི་ཆབ་དང ། ཞབ་བསྐུ་བ་ཡང་བཞག་གིས་དེར་གཟིམས་ཤིག་།བདག་ཅག་དེང་ཁ་ཟས་ངན་པ་དག་འཚལ་བས་ཁ་ཏོན་རྔོ་མི་ཐོག་ནས་རེ་ཤིག་དཔོང་སའི་ཁང་པ་འདིར་བསམ་གཏན་བགྱིད་དོ། །འཆར་ཀས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་མི་ཀློག་པ་ལ་ཤེས་རབ་མེད་དོ་ཞེས་མ་གསུངས་སམ། ཚུར་ཤེག་ཁ་ཏོན་གྱིས་ཤིག་ཅེས་དེས་དེ་དག་ཟུང་དུ་ལྷན་ཅིག་བཞག་སྟེ། མཚན་ཐོག་ཏག་ཁ་ཏོན་བྱེད་དུ་བཅུག་གོ། །དེ་དག་ནང་པར་སྔར
7.31b
ལངས་ཏེ་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང ། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱོད་ཀྱིས་བདག་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། ཇི་ལྟ་བདེ་བར་བརྒྱུས་སམ། ཇི་ལྟར་བདེ་བར་བརྒྱུས། བདག་ཅག་སློབ་དཔོན་འཆར་ཀས་མཚན་ཐོག་ཐག་ཐོ་བཙམས་སོ། །ཇི་ལྟར་ཐོ་བཙམས། དེ་དག་གིས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཆེད་དུ་བསམས་ཏེ་དགེ་སློང་རྣམས་ལ་ཐོ་འཚམ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ།། ་་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་ལྔ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་།ལྗོངས་རྒྱུར་འདོང་དང་དེར་བདག་ཅག་གིས་རྒོལ་བ་དག་ཀྱང་ཚར་བཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ་ཞེས་སྤྲོ་བར་བྱས་པ་དང ། དེ་དག་གིས་སློབ་དཔོན་དང ། མཁན་པོ་དག་ལ་ཞུས་པ། མཁན་པོ་བདག་ཅག་ལྗོངས་རྒྱུར་མཆིའོ། །སུ་དང་ལྷན་ཅིག་ཏུ། བཙུན་པ་འཆར་ཀ་དང
7.32a
ངོ ། །ཚེ་དང་ལྡན་པ་དག་དེ་ནི་གནས་ངན་ལེན་ཀུན་དུ་སྤྱོད་པ་ཡིན་པས་ཁྱེད་ལ་ཐོ་འཚམ་པར་འགྱུར་རོ། །མཁན་པོ་བཙུན་པ་འཆར་ཀ་ནི་བདག་ཅག་གི་ཕ་མ་ལྟ་བུར་རྣམ་པར་གནས་པ་ལགས་པས་ཅིའི་སླད་དུ་བདག་ཅག་ལ་ཐོ་འཚམ་པར་འགྱུར་ཞེས་དེ་དག་གིས་དེ་དག་གི་ཚིག་ཚིག་མ་ཡིན་པར་བྱས་ཏེ་དེ་དང་ལྷན་ཅིག་ལྗོངས་རྒྱུར་འཕགས་སོ། །འཆར་ཀས་གང་གི་ཚེ་ཕྱི་རོལ་གྱི་མཚམས་འདས་པ་དེའི་ཚེ་ན་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་གནས་མ་བཅས་པར་ལྗོངས་རྒྱུར་འདོང་བར་བྱེད། ཚུར་ཤེག་གནས་ཆོས་ཤིག་ཅེས་དེས་དེ་དག་མདུན་དུ་ཙོག་པུར་འདུག་ཏུ་བཅུག་སྟེ་གནས་འཆར་བཅུག་གོ། །དེས་དེ་དག་ལ་ལ་ལ་གཏུར་བུ་གཏད། ལ་ལ་ལ་ལྷུང་བཟེད་ཀྱི་སྣོད་གཏད། ལ་ལ་ལ་བར་བུར་སྣོད་གཏད། ལ་ལ་ལ་ཕོར་བུ་གཏད། ལ་ལ་ལ་རིལ་བ་སྤྱི་བླུགས་གཏད་ནས། དེ་ལག་པ་གཉིས་བརྐྱང་སྟེ། རྔུལ་གཟན་ལས་གཞན་མེད་པར་འཇིག་རྟེན་ལ་ཐོ་འཚམ་ཞིང་འགྲོ་བ་ན། དེ་དག་རི་བྲགས་ཤིག་ཏུ་ཕྱིན་ནས་དེ་དག་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན་དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། དེ་དག་གིས་ཐོས་ནས་སྨྲས་པ། སློབ་དཔོན་གཙུག་ལག་ཁང་དུ་གཎ་ཌཱི་བརྡུངས་ཀྱིས་བཞུད་དོ། །འཆར་ཀས་སྨྲས་པ། ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང་བདག་ཅག་ངལ་བ་དག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །སློབ་དཔོན་རྙེད་པའི་གཎ་ཌཱི་མ་ལགས་སམ། དེ་ཡིན་ན་བདག་ཅག་མཚམས་སུ་ཕྱིན་ན་ཐོབ་བོ། །སློབ་དཔོན་ནི་གྲགས་པ་བསོད་ནམས་ཆེ་བ་ལགས་པས་འཐོབ་ཀྱི་བདག་ཅག་སུས་སྩོལ་བར་འགྱུར། དེང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་དག་དོང་བ་དང་ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་གནས་མལ་ནོས་ཤིག་།དེ་དག་གིས་སྨྲས་པ། བདག་ཅག་ལས་ཆེས་རྒན་པ་ཡང་ཡོད་དོ། །སུ་ཡིན། སློབ་དཔོན་འཆར་ཀའོ། །དེའི་ཡང་ནོས་ཤིག་།དེ་དག་གིས
7.32b
གནས་མལ་མནོས་སོ། །ཚེ་དང་ལྡན་པ་འཆར་ཀ་ཡང་དེ་ན་འདུ་འཛིའི་གཏམ་གྱིས་འདུག་སྟེ་རི་བྲགས་འདི་སུའི། གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་ཀྱང་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ་སྙམ་ནས་དེ་དག་གིས་གཅིག་ལ་གཅིག་ཞུས་ཏེ། ཚེ་དང་ལྡན་པ་འཆར་ཀའི་མལ་བཤམས་ནས། རྐང་པའི་ཆུ་དང ། རྐང་པ་བསྐུ་བ་མཐའ་གཅིག་ཏུ་བཞག་སྟེ་གཅིག་ལ་གཅིག་སྨྲས་པ། ཚེ་དང་ལྡན་པ་དེང་བདག་ཅག་གིས་ཁ་ཟས་བསོད་པ་དག་ཟོས་པས་རེ་ཤིག་ཟུང་གིས་ལྷན་ཅིག་ཁ་ཏོན་བྱའོ་ཞེས་དེ་དག་གིས་ཟུང་གིས་ཁ་ཏོན་བྱ་བར་བརྩམས་སོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་སུ་འདུག་འདུག་ནས་གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ་དེ་དག་ལ་དྲིས་པ། ཚེ་དང་ལྡན་པ་དག་ཅི་བྱེད། སློབ་དཔོན་བདག་ཅག་གིས་དེང་ཁ་ཟས་བསོད་པ་དག་འཚལ་བས་རེ་ཤིག་ཟུང་གིས་ཁ་ཏོན་བགྱིད་དོ། །འཆར་ཀས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་བསམ་གཏན་མི་བྱེད་པ་ལ་ཤེས་རབ་མེད་དོ་ཞེས་མ་གསུངས་སམ། ཚུར་ཤོག་བསམ་གཏན་གྱིས་ཤིག་ཅེས་དེས་དེ་དག་དཔོང་སའི་ཁང་པར་བཙུད་དེ་སྐྱིལ་མོ་དཀྲུང་འཆར་བཅུག་ནས་མཚན་ཐོག་ཏག་བསྲིལ་ཏོ། །དེ་དག་ནང་པར་སྔར་ལངས་ཏེ་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང ། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱོད་ཀྱིས་བདག་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཇི་ལྟར་བདེ
7.33a
བར་བརྒྱུས། བདག་ཅག་སློབ་དཔོན་འཆར་ཀས་མཚན་ཐོག་ཐག་ཐོ་བཙམས་སོ། །ཇི་ལྟར་ཐོ་བཙམས། དེ་དག་གིས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཆེད་དུ་བསམས་ཏེ་དགེ་སློང་རྣམས་ལ་ཐོ་འཚམ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་།ལྗོངས་རྒྱུར་འདོང་དང་དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གིས་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ་ཞེས་སྤྲོ་བར་བྱས་པ་དང ། དེ་དག་གིས་སློབ་དཔོན་དང ། མཁན་པོ་དག་ལ་ཞུས་པ། མཁན་པོ་བདག་ཅག་ལྗོངས་རྒྱུར་མཆིའོ། །སུ་དང་ལྷན་ཅིག་ཏུ། བཙུན་པ་འཆར་ཀ་དང་ངོ ། །ཚེ་དང་ལྡན་པ་དག་དེ་ནི་གནས་ངན་ལེན་ཀུན་དུ་སྤྱོད་པ་ཡིན་པས་ཁྱེད་ལ་ཐོ་འཚམ་པར་འགྱུར་རོ། །མཁན་པོ་བཙུན་པ་འཆར་ཀ་ནི་བདག་ཅག་གི་ཕ་མ་ལྟ་བུར་རྣམ་པར་གནས་པ་ལགས་པས་ཅིའི་སླད་དུ་བདག་ཅག་ལ་ཐོ་འཚམ་པར་འགྱུར་ཞེས་དེ་དག་གིས་དེ་དག་གི་ཚིག་ཚིག་མ་ཡིན་པར་བྱས་ཏེ་དེ་དང་ལྷན་ཅིག་ལྗོངས་རྒྱུར་འཕགས་སོ། །འཆར་ཀས་གང་གི་ཚེ་ཕྱི་རོལ་གྱི་མཚམས་འདས་པའི་ཚེ་ན་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་གནས་མ་བཅས་པར་ལྗོངས་རྒྱུར་འདོང་བར་བྱེད་ཚུར་ཤོག་གནས་ཆོས་ཤིག་ཅེས་དེས་དེ་དག་མདུན་དུ་ཙོག་པུར་འདུག་ཏུ་བཅུག་སྟེ་གནས་འཆར་བཅུག་གོ། །
7.33b
དེས་དེ་དག་ལ་ལ་ལ་གཏུར་བུ་གཏད། ལ་ལ་ལ་ལྷུང་བཟེད་ཀྱི་སྣོད་གཏད། ལ་ལ་ལ་བར་བུར་སྣོད་གཏད། ལ་ལ་ལ་ཕོར་བུ་གཏད། ལ་ལ་ལ་རིལ་བ་སྤྱི་བླུགས་གཏད་ནས། དེ་ལག་པ་གཉིས་བརྐྱང་སྟེ་རྔུལ་གཟན་ལས་གཞན་མེད་པར་འཇིག་རྟེན་ལ་ཐོ་འཚམ་ཞིང་འགྲོ་བ་ན་དེ་དག་རི་བྲགས་ཤིག་ཏུ་ཕྱིན་ནས་དེ་དག་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན། དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། དེ་དག་གིས་ཐོས་ནས་སྨྲས་པ། སློབ་དཔོན་གཙུག་ལག་ཁང་དུ་གཎ་ཌཱི་བརྡུངས་ཀྱིས་བཞུད་དོ། །འཆར་ཀས་སྨྲས་པ། ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང་བདག་ཅག་ངལ་བ་དག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །སློབ་དཔོན་རྙེད་པའི་གཎ་ཌཱི་མ་ལགས་སམ། དེ་ཡིན་ན་བདག་ཅག་མཚམས་སུ་ཕྱིན་ན་འཐོབ་བོ། །སློབ་དཔོན་ནི་གྲགས་པ་བསོད་ནམས་ཆེ་བ་ལགས་པས་ཐོབ་ཀྱི་བདག་ཅག་ལ་སུས་སྩོལ་བར་འགྱུར། དེང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་དག་དོང་བ་དང ། ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་གནས་མལ་ནོས་ཤིག་དེ་དག་གིས་སྨྲས་པ་བདག་ཅག་ལས་ཆེས་རྒན་པ་ཡང་ཡོད་དོ། །སུ་ཡིན། སློབ་དཔོན་འཆར་ཀའོ། །དེའི་ཡང་ནོས་ཤིག་དེ་དག་གིས་གནས་མལ་མནོས་སོ། །ཚེ་དང་ལྡན་པ་འཆར་ཀ་ཡང་དེ་ན་འདུ་འཛིའི་གཏམ་གྱིས་འདུག་སྟེ་རི་བྲགས་འདི་སུའི། གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་ཀྱང་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ། །སྙམ་ནས་དེ་དག་གིས་གཅིག་ལ་གཅིག་ཞུས་ཏེ། ཚེ་དང་ལྡན་པ་འཆར་ཀའི་མལ་བཤམས་ནས། རྐང་པའི་ཆུ་དང ། རྐང་པ་བསྐུ་བ་མཐའ་གཅིག་ཏུ་བཞག་སྟེ་གཅིག་ལ་གཅིག་སྨྲས་པ།
7.34a
ཚེ་དང་ལྡན་པ་དག་ད་ལྟར་གྲང་བའི་དུས་ལ་བབ་ཀྱིས་བདག་ཅག་མེ་ཁང་དུ་ཞུགས་ཏེ་ཉལ་ལོ་ཞེས་དེ་དག་མེ་ཁང་དུ་ཞུགས་ཏེ་ཉལ་ལོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག་འདུག་ནས་གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ་ཚེ་དང་ལྡན་པ་དག་ཅེས་བོད་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འཆར་ཀ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། འཆར་ཀས་སྨྲས་པ། འདི་ན་ཁོ་བོའི་གཞོན་ནུ་དག་ཅིག་འཁོད་ན་དེ་དག་ལས་འགའ་ཞིག་ན་བར་མ་གྱུར་ཏམ། དེ་དག་གིས་དེ་ཐོས་ནས་སྨྲས་པ། སློབ་དཔོན་མ་འབོད་ཅིག་།གནས་ཁང་འོ་ནིར་གཟིམས་མལ་བཤམས་ཏེ་ཞབས་ཀྱི་ཆབ་དང ། ཞབས་བསྐུ་བ་ཡང་བཞག་གིས་དེར་གཟིམས་ཤིག་།བདག་ཅག་ད་ལྟར་གྲང་བའི་དུས་ལ་བབ་པས་མེ་ཁང་དུ་ཞུགས་ཏེ་མཆིས་ཉལ་ལོ། །ཚེ་དང་ལྡན་པ་དག་ཁྱེད་ཅག་གལ་ཏེ་ཁྲག་ནད་དམ། མཁྲིས་ནད་གཡོས་པར་གྱུར་ན་ཁོ་བོས་ཡུན་དེ་སྲིད་དུ་ཁྱེད་ཀྱི་ནད་གཡོག་བྱེད་པར་ག་ལ་ནུས་ཕྱིར་བྱུང་ཤིག་ཅེས་དེས་དེ་དག་བླ་གབ་མེད་པར་བཏོན་ཏེ་ཆུ་གྲང་མོས་བཏབ་ནས་མཚན་ཐོག་ཏག་བསིལ་ཡབ་ཀྱིས་གཡབས་སོ། །དེ་དག་གིས་མཚན་མོའི་ནམ་ནངས་ནས་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང ། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱེད་ཀྱིས་ཁོ་བོ་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཇི་ལྟར་བདེ་བར་བརྒྱུས། བདག་ཅག་སློབ་དཔོན་འཆར་ཀས་མཚན་ཐོག་ཐག་ཐོ་བཙམ་སོ། །ཇི་ལྟར་ཐོ་བཙམས། དེ་དག་གིས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཆེད་དུ
7.34b
བསམས་ཏེ་དགེ་སློང་རྣམས་ལ་ཐོ་འཚམ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤོག་།ལྗོངས་རྒྱུར་འདོང་དང ། དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ་ཞེས་སྤྲོ་བར་བྱས་པ་དང ། དེ་དག་གིས་སློབ་དཔོན་དང ། མཁན་པོ་དག་ལ་ཞུས་པ། མཁན་པོ་བདག་ཅག་ལྗོངས་རྒྱུར་མཆིའོ། །སུ་དང་ལྷན་ཅིག་ཏུ། བཙུན་པ་འཆར་ཀ་དང་ངོ ། །ཚེ་དང་ལྡན་པ་དག་དེ་ནི་གནས་ངན་ལེན་ཀུན་དུ་སྤྱོད་པ་ཡིན་པས་ཁྱེད་ལ་ཐོ་འཚམ་པར་འགྱུར་རོ། །མཁན་པོ་བཙུན་པ་འཆར་ཀ་ནི་བདག་ཅག་གི་ཕ་མ་ལྟ་བུར་རྣམ་པར་གནས་པ་ལགས་པས་ཅིའི་སླད་དུ་བདག་ཅག་ལ་ཐོ་འཚམ་པར་འགྱུར་ཞེས་དེ་དག་གིས་དེ་དག་གི་ཚིག་ཚིག་མ་ཡིན་པར་བྱས་ཏེ་དེ་དང་ལྷན་ཅིག་ལྗོངས་རྒྱུར་འཕགས་སོ། །འཆར་ཀས་གང་གི་ཚེ་ཕྱི་རོལ་གྱི་མཚམས་འདས་པ་དེའི་ཚེ་ན་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་གནས་མ་བཅས་པར་ལྗོངས་རྒྱུར་འདོང་བར་བྱེད། ཚུར་ཤོག་གནས་ཆོས་ཤིག་ཅེས་དེས་དེ་དག་མདུན་དུ་ཙོག་པུར་འདུག་ཏུ་བཅུག་སྟེ་གནས་འཆར་བཅུག་གོ། །དེས་དེ་དག་ལ་ལ་ལ་གཏུར་བུ་གཏད། ལ་ལ་ལ་ལྷུང་བཟེད་ཀྱི་སྣོད་གཏད། ལ་ལ་ལ་བར་བུར་སྣོད་གཏད། ལ་ལ་ལ་ཕོར་བུ་གཏད། ལ་ལ་ལ་རིལ་བ་སྤྱི་བླུགས་གཏད་ནས། དེ་ལག་པ་གཉིས་བརྐྱང་སྟེ། རྔུལ་གཟན་ལས་གཞན་མེད་པར
7.35a
འཇིག་རྟེན་ལ་ཐོ་འཚམ་ཞིང་འགྲོ་བ་ན། དེ་དག་རི་བྲགས་ཤིག་ཏུ་ཕྱིན་ནས་དེ་དག་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན་དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། དེ་དག་གིས་ཐོས་ནས་སྨྲས་པ། སློབ་དཔོན་གཙུག་ལག་ཁང་དུ་གཎ་ཌཱི་བརྡུངས་ཀྱིས་བཞུད་དོ། །འཆར་ཀས་སྨྲས་པ། ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང་བདག་ཅག་ངལ་བ་དག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །སློབ་དཔོན་རྙེད་པའི་གཎ་ཌཱི་མ་ལགས་སམ། དེ་ཡིན་ན་བདག་ཅག་མཚམས་སུ་ཕྱིན་ན་འཐོབ་བོ། །སློབ་དཔོན་ནི་གྲགས་པ་བསོད་ནམས་ཆེ་བ་ལགས་པས་འཐོབ་ཀྱི་བདག་ཅག་ལ་སུས་སྩོལ་བར་འགྱུར། དེང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་དག་དོང་བ་དང་ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་གནས་མལ་ནོས་ཤིག་།དེ་དག་གིས་སྨྲས་པ། བདག་ཅག་ལས་ཆེས་རྒན་པ་ཡང་ཡོད་དོ། །སུ་ཡིན། སློབ་དཔོན་འཆར་ཀའོ། །དེའི་ཡང་ནོས་ཤིག་།དེ་དག་གིས་གནས་མལ་མནོས་སོ། །ཚེ་དང་ལྡན་པ་འཆར་ཀ་ཡང་དེ་ན་འདུ་འཛིའི་གཏམ་གྱིས་འདུག་སྟེ་རི་བྲགས་འདི་སུའི། གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ་སྙམ་ནས། དེ་དག་གིས་གཅིག་ལ་གཅིག་ཞུས་ཏེ་ཚེ་དང་ལྡན་པ་འཆར་ཀའི་མལ་བཤམས་ནས་རྐང་པའི་ཆུ་དང ། རྐང་པ་བསྐུ་བ་མཐའ་གཅིག་ཏུ་བཞག་སྟེ་གཅིག་ལ་གཅིག་སྨྲས་པ། ཚེ་དང་ལྡན་པ་དག་ད་ལྟར་དྲོ་བའི་དུས་ལ་བབ་ཀྱིས་བདག་ཅག་དཔོང་སའི་ཁང་པར་ཞུགས་ཏེ་ཉལ་ལོ་ཞེས་དེ་དག་དཔོང་སའི་ཁང་པར་ཞུགས་ཏེ་ཉལ་ལོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག
7.35b
འདུག་ནས་གང་གི་ཚེ་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་མ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ་ཚེ་དང་ལྡན་པ་དག་ཚེ་དང་ལྡན་པ་དག་ཅེས་བོད་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འཆར་ཀ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། འཆར་ཀས་སྨྲས་པ། འདི་ན་ཁོ་བོའི་གཞོན་ནུ་དག་གཅིག་འཁོད་ན་དེ་དག་ལས་འགའ་ཞིག་ན་བར་མ་གྱུར་ཏམ། དེ་དག་གིས་དེ་ཐོས་ནས་སྨྲས་པ། སློབ་དཔོན་མ་འབོད་ཅིག་།གནས་ཁང་འོ་ནིར་གཟིམས་མལ་བཤམས་ཏེ་ཞབས་ཀྱི་ཆབ་དང ། ཞབས་བསྐུ་བ་ཡང་བཞག་གིས་དེར་གཟིམས་ཤིག་།བདག་ཅག་ད་ལྟར་དྲོ་བའི་དུས་ལ་བབ་པས་དཔོང་སའི་ཁང་པར་ཞུགས་ཏེ་ཉལ་ལོ། །ཚེ་དང་ལྡན་པ་དག་ཁྱེད་ཅག་གལ་ཏེ་རླུང་འམ། བད་ཀན་གཡོས་པར་གྱུར་ན་ཁོ་བོས་ཡུན་དེ་སྲིད་དུ་ཁྱེད་ཀྱི་ནད་གཡོག་བྱེད་པར་ག་ལ་ནུས། བྱིབས་ཤིག་ཅེས་དེས་དེ་དག་ནང་དུ་བཙུད་ནས་སྐར་ཁུང་དག་བཅད་དེ་མེ་སྦར་ནས་སྒོ་བཅད་དེ་ལ་བ་ཇི་སྙེད་ཡོད་པ་དག་གིས་དཀྲིས་ཏེ་སྟེང་དུ་མནན་ནས་འདུག་གོ། །དེ་དག་གིས་མཚན་མོའི་ནམ་ནངས་ནས་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང ། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱེད་ཀྱིས་བདག་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཇི་ལྟར་བདེ་བར་བརྒྱུས། བདག་ཅག་སློབ་དཔོན་འཆར་ཀས་མཚན་ཐོག་ཐག་ཐོ་བཙམས་སོ། །ཇི་ལྟར་ཐོ་བཙམས། དེ་དག་གིས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཆེད་དུ་བསམས་ཏེ་དགེ་སློང་རྣམས་ལ་ཐོ་འཚམ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་དུ་ཅུང་ཟད
7.36a
དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤོག་།ལྗོངས་རྒྱུར་འདོང་དང་དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང་ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ་ཞེས་སྤྲོ་བར་བྱས་པ་དང ། དེ་གང་གི་ཚེ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་ཏུ་སྤྱོད་པ་ཡིན་ནོ་ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་གཅིག་ལྗོངས་རྒྱུར་འགྲོ་བར་སྤྲོ་བ་མེད་ནས། དེ་གཅིག་པུ་ལྗོངས་རྒྱུར་སོང་བ་ན་རི་བྲགས་ཀྱི་གཙུག་ལག་ཁང་ཞིག་ཏུ་ཕྱིན་ཏོ། །གཙུག་ལག་ཁང་དེ་ན་བཤང་བའི་སྐྱབས་ཀྱང་མེད། ་གཅི་བའི་སྐྱབ་ཀྱང་མེད་དེ་དེ་ན་དགེ་སློང་དག་གིས་གྱོ་མོ་དག་བཞག་སྟེ། དེར་བཤང་བ་དང་གཅི་བ་དག་བྱས་ནས་འདོར་བར་བྱེད་དོ། །འཆར་ཀ་གཙུག་ལག་ཁང་དེར་ཞུགས་པ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་ཏུ་སྤྱོད་པ་ཡིན་ནོ་ཞེས་བྱ་བར་དེ་ཤེས་ནས་དགེ་སློང་འགས་ཀྱང་དེ་མཁོས་སུ་མ་ཕབ་པ་དང ། དེས་བསམས་པ། ལྷུང་བཟེད་ནག་པོ་ཅན་འདི་དག་མི་དགའ་བར་བྱའོ་སྙམ་ནས་དེ་གཙུག་ལག་ཁང་དེའི་སྟེང་དུ་འཛེགས་པ་དང ། ཇི་ཙམ་ན་དེས་དེ་ན་གྱོ་མོ་དག་བཞག་པ་མཐོང་ནས། དེས་སྨྲས་པ། ཅི་གཙུག་ལག་ཁང་འདི་ཆོས་ཐམས་ཅད་ཡིན་ནམ་ཞེས་གྱོ་མོ་དེ་དག་རྐང་པའི་མཐེ་བོས་བཟུང་སྟེ་ཕྱི་རོལ་དུ་བོར་རོ། །དགེ་སློང་དག་མཚན་མོ་ལངས་པ་དང་ཇི་ཙམ་ན་གྱོ་མོ་དག་མི་སྣང་ནས་དེ་དག་གིས་ཝའི་ཁར་བཤང་བ་དང ། གཅི་བ་བྱས་སོ། །དེ་ནས་མཚན་མོའི
7.36b
ནམ་ལངས་པ་ན་བྲམ་ཟེ་དང ། ཁྱིམ་བདག་དད་པ་ཅན་དག་ལྷགས་པ་དང ། དེས་དེ་དག་ལ་སྨྲས་པ། ཤེས་ལྡན་དག་ཇི་ལྟར་ལྷུང་བཟེད་ནག་པོ་ཅན་གནས་ངན་ལེན་ཀུན་ཏུ་སྤྱོད་པ་དག་གིས་གཙུག་ལག་ཁང་ཐམས་ཅད་བཤང་བ་དང ། གཅི་བས་མ་རུང་བར་བྱས་པ་ལ་ལྟོས་ཤེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་།ལྗོངས་རྒྱུར་འདོང་དང་དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང་ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ། །ཞེས་སྤྲོ་བར་བྱས་པ་དང ། དེ་གང་གི་ཚེ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ་ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་ཅིག་ལྗོངས་རྒྱུར་འགྲོ་བར་སྤྲོ་བ་མེད་ནས་དེ་གཅིག་པུ་ལྗོངས་རྒྱུར་སོང་བ་ན་རི་བྲགས་ཀྱི་གཙུག་ལག་ཁང་ཞིག་དུ་ཕྱིན་ཏོ། །འཆར་ཀ་གཙུག་ལག་ཁང་དེར་ཞུགས་པ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་ཏུ་སྤྱོད་པ་ཡིན་ནོ་ཞེས་བྱ་བར་དེ་ཤེས་ནས་དགེ་སློང་འགས་ཀྱང་དེ་མཁོས་སུ་མ་ཕབ་པ་དང ། དེས་བསམས་པ། ལྷུང་བཟེད་ནག་པོ་ཅན་འདི་དག་མི་དགའ་བར་བྱའོ་སྙམ་ནས་དེས་བཀྲུ་སྨན་གྱི་རིལ་དུ་ཟོས་ནས་མེ་ཁང་དུ་ཞུགས་ཏེ་འདུག་པ་ན་དེར་དེས་འཁྲུ་བར་བརྩམས་སོ། །བཅོམ་ལྡན་འདས་ཀྱིས་ནད་པ་དུས་གསུམ་དུ་ལྟ་བར་བྱའོ་ཞེས་བཀའ་སྩལ་པས། དགེ་སློང་གནས
7.37a
བརྟན་གནས་བརྟན་དག་དེའི་ནད་འདྲིར་ལྷགས་ནས། དེ་དག་གིས་དེ་ལ་དྲིས་པ། ཚེ་དང་ལྡན་པ་རུང་ངམ། དེས་སྨྲས་པ། རུང་ངོ ། །གནས་བརྟན་དག་ཡུད་ཙམ་ཞིག་འཁོད་ནས་འདོང་བར་བརྩམས་པ་དང ། དེས་སྨྲས་པ། གནས་བརྟན་དག་རེ་ཤིག་ཡུད་ཙམ་ཞིག་གཞེས་ཤིག་།དེ་དག་གིས་ཡུད་ཙམ་ཞིག་འཁོད་ནས་དོང་བར་བརྩམས་པ་དང ། དེས་ཡང་སྨྲས་པ། གནས་བརྟན་དག་ད་དུང་ཡང་ཡུད་ཙམ་ཞིག་གཞེས་ཤིག་།ཚེ་དང་ལྡན་པ་ཆེད་དུ་བསམས་ཏེ་ཐོ་འཚམ་པར་མི་བྱེད་དམ། ལྷུང་བཟེད་ནག་པོ་ཅན་ཁྱེད་དེ་ལྟར་མི་དགའ་བར་བྱའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་ལྗོངས་རྒྱུར་འདོང་དང ། དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ་ཞེས་སྤྲོ་བར་བྱས་པ་དང ། དེ་གང་གི་ཚེ་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ། །ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་ཅིག་ལྗོངས་རྒྱུར་འགྲོ་བར་སྤྲོ་བ་མེད་ནས་དེ་གཅིག་པུ་ལྗོངས་རྒྱུར་སོང་བ་ན་རི་བྲགས་ཀྱི་གཙུག་ལག་ཁང་ཞིག་ཏུ་ཕྱིན་ཏོ། །གཙུག་ལག་ཁང་དེ་ན་དགེ་སློང་སྤོང་བ་པ་ཤ་སྟག་འཁོད་དོ། །འཆར་ཀ་གཙུག་ལག་ཁང་དེར་ཞུགས་པ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ་ཞེས་བྱ་བར
7.37b
དེ་ཤེས་ནས། དགེ་སློང་འགས་ཀྱང་དེ་མཁོས་སུ་མ་ཕབ་པ་དང ། དེས་བསམས་པ། ལྷུང་བཟེད་ནག་པོ་ཅན་འདི་དག་མི་དགའ་བར་བྱའོ་སྙམ་ཞིང་གཙུག་ལག་ཁང་དེ་ཡང་ཕྱེད་བྱས་ཟིན་པར་འདུག་ནས་ཚེ་དང་ལྡན་པ་འཆར་ཀ་ཁྱིམ་བདག་དེའི་གན་དུ་སོང་སྟེ་ཕྱིན་ནས་སྨྲས་པ། ཁྱིམ་བདག་ཅིའི་ཕྱིར་གཙུག་ལག་ཁང་ཟིན་པར་མི་བྱེད། བཅོམ་ལྡན་འདས་ཀྱིས་ཀྱང ། མྱུར་བར་དགེ་ལ་འཇུག་བྱ་ཞིང ། །སྡིག་ལས་སེམས་ཀྱང་བཟློག་པར་བྱ། །བསོད་ནམས་བུལ་བར་བྱེད་གྱུར་ན། །ཡིད་ནི་སྡིག་ལ་དགའ་བར་འགྱུར། །ཞེས་མ་གསུངས་སམ། འཕགས་པ་བདག་ལ་ཀཱར་ཥཱ་པ་ན་དག་ནི་མཆིས་ན་གླ་མི་དག་མ་མཆིས་སོ། །ཁྱིམ་བདག་བཅོམ་ལྡན་འདས་ཀྱིས་དགེ་སློང་དག་གིས་མཁར་ལན་བྱའོ་ཞེས་མ་གསུངས་སམ། གལ་ཏེ་འཕགས་པས་ཁར་ལན་བགྱིད་དུ་སྩལ་ན་ལེགས་སོ། །འཆར་ཀས་གཙུག་ལག་ཁང་དུ་སོང་སྟེ་གཎ་ཌཱི་བརྡུངས་སོ། །བཅོམ་ལྡན་འདས་ཀྱིས་གཎ་ཌཱི་བསུ་བར་བྱའོ་ཞེས་བསྔགས་པས་དགེ་སློང་རྣམས་ཀྱིས་གཎ་ཌཱི་བསུ་བ་དང ། ཇི་ཙམ་ན་ཚེ་དང་ལྡན་པ་འཆར་ཀས་སོ་ཕག་དག་གདེག་པར་བརྩམས་པ་མཐོང་ནས་དགེ་སློང་དག་གིས་ཀྱང་སོ་ཕག་དག་གདེག་པར་བརྩམས་སོ། །འཆར་ཀས་དགེ་སློང་དེ་དག་ཉིན་ཐོག་ཐག་སོ་ཕག་དག་སྐྱེད་དུ་བཅུག་པ་དང ། དེ་དག་གིས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་སྔོན་ནི་རྣལ་འབྱོར་དང་འཐུན་པར་གྱུར་ན། ད་ནི་མཁར་ལན་དང་འཐུན་པར་གྱུར་གྱིས་མཉན་ཡོད་དུ་འདོང་ངོ་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཁོ་བོ་ཅག་ཁྱེད་མཐོང་བར་ནི་དགའི་འོངས་པར་ནི་མི་དགའོ། །གཙུག་ལག་ཁང་དེ་རྣལ་འབྱོར་དང་འཐུན་པ་ཡིན་ན་ཁྱེད་ཅག་ཅིའི་ཕྱིར་གཙུག་ལག་ཁང་དེ་བོར་ཏེ་འདིར་འོངས། ཚེ་དང་ལྡན་པ་དག་གཙུག་ལག་ཁང་དེ་སྔོན་ནི་རྣལ་འབྱོར་དང་འཐུན་པར་གྱུར་ན་ད་ནི་མཁར་ལན་དང་འཐུན་པར་གྱུར་ཏོ། །ཇི་ལྟར་གྱུར། ཚེ་དང་ལྡན་པ
7.38a
འཆར་ཀ་དེར་འོངས་ནས་མཁར་ལན་ཕྱུང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་ལྗོངས་རྒྱུར་འདོང་དང ། དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ་ཞེས་སྤྲོ་བར་བྱས་པ་དང ། དེ་གང་གི་ཚེ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་ཏུ་སྤྱོད་པ་ཡིན་ནོ་ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་ཅིག་ལྗོངས་རྒྱུར་འགྲོ་བར་སྤྲོ་བ་མེད་ནས་དེ་ཅིག་པུ་ལྗོངས་རྒྱུར་སོང་བ་ན་རི་བྲགས་ཀྱི་གཙུག་ལག་ཁང་ཞིག་ཏུ་ཕྱིན་ཏོ། །གཙུག་ལག་ཁང་དེ་ན་དགེ་སློང་ཁ་ཏོན་པ་ཤ་སྟག་འཁོད་དོ། །འཆར་ཀ་གཙུག་ལག་ཁང་དེར་ཞུགས་པ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་ཏུ་སྤྱོད་པ་ཡིན་ནོ་ཞེས་བྱ་བར་དེ་ཤེས་ནས་དགེ་སློང་འགས་ཀྱང་དེ་མཁོས་སུ་མ་ཕབ་པ་དང ། དེས་བསམས་པ་དང ། ལྷུང་བཟེད་ནག་པོ་ཅན་འདི་དག་མི་དགའ་བར་བྱའོ་སྙམ་ཞིང་གཙུག་ལག་ཁང་དེ་ཡང་ཕྱེད་བྱས་ཟིན་པར་འདུག་ནས་ཚེ་དང་ལྡན་པ་འཆར་ཀ་ཁྱིམ་བདག་དེའི་གན་དུ་སོང་སྟེ་ཕྱིན་ནས་སྨྲས་པ། ཁྱིམ་བདག་ཅིའི་ཕྱིར་གཙུག་ལག་ཁང་ཟིན་པར་མི་བྱེད། བཅོམ་ལྡན་འདས་ཀྱིས་ཀྱང ། མྱུར་བར་དགེ་ལ་འཇུག་བྱ་ཞིང ། །སྡིག་ལས་སེམས་ཀྱང་བཟློག་པར
7.38b
བྱ། །བསོད་ནམས་བུལ་བར་བྱེད་གྱུར་ན། །ཡིད་ནི་སྡིག་ལ་དགའ་བར་འགྱུར། །ཞེས་མ་གསུངས་སམ། འཕགས་པ་བདག་ལ་ཀཱར་ཥཱ་པ་ན་དག་ནི་མཆིས་ན་གླ་མི་དག་མ་མཆིས་སོ། །ཁྱིམ་བདག་བཅོམ་ལྡན་འདས་ཀྱིས་དགེ་སློང་དག་གིས་མཁར་ལན་བྱའོ་ཞེས་མ་གསུངས་སམ། གལ་ཏེ་འཕགས་པས་མཁར་ལན་བགྱིད་དུ་སྩལ་ན་ལེགས་སོ། །འཆར་ཀས་གཙུག་ལག་ཁང་དུ་སོང་སྟེ་གཎ་ཌཱི་བརྡུངས་སོ། །བཅོམ་ལྡན་འདས་ཀྱིས་གཎ་ཌཱི་བསུ་བར་བྱའོ་ཞེས་གསུངས་པས་དགེ་སློང་རྣམས་ཀྱིས་གཎ་ཌཱི་བསུ་བ་དང ། ཇི་ཙམ་ན་ཚེ་དང་ལྡན་པ་འཆར་ཀས་སོ་ཕག་དག་གདེག་པར་བརྩམས་པ་མཐོང་ནས་དགེ་སློང་དག་གིས་ཀྱང་སོ་ཕག་དག་གདེག་པར་བརྩམས་སོ། །འཆར་ཀས་དགེ་སློང་དེ་དག་ཉིན་ཐོག་ཐག་སོ་ཕག་དག་སྐྱེད་དུ་བཅུག་པ་དང ། དེ་དག་གིས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་སྔོན་ནི་ཁ་ཏོན་དང་འཐུན་པར་གྱུར་ན་ད་ནི་མཁར་ལན་དང་འཐུན་པར་གྱུར་གྱིས་མཉན་ཡོད་དུ་འདོང་ངོ་ཞེས་དེ་དག་མཉན་ཡོད་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཁོ་བོ་ཅག་ཁྱེད་ཅག་མཐོང་བར་ནི་དགའི་འོང་བར་ནི་མི་དགའོ། །གཙུག་ལག་ཁང་དེ་ཁ་ཏོན་དང་འཐུན་པ་ཡིན་ན་ཁྱེད་ཅག་ཅིའི་ཕྱིར་གཙུག་ལག་ཁང་དེ་བོར་ཏེ་འདིར་འོངས། ཚེ་དང་ལྡན་པ་དག་གཙུག་ལག་ཁང་དེ་སྔོན་ནི་ཁ་ཏོན་དང་འཐུན་པར་གྱུར་ན་ད་ནི་མཁར་ལན་དང་འཐུན་པར་གྱུར་ཏོ། །ཇི་ལྟར་གྱུར། ཚེ་དང་ལྡན་པ་འཆར་ཀ་དེར་འོངས་ནས་མཁར་ལན་ཕྱུང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་ལྗོངས་རྒྱུར་འདོང་དང ། དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག
7.39a
པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ་ཞེས་སྤྲོ་བར་བྱས་པ་དང ། དེ་གང་གི་ཚེ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ་ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་ཅིག་ལྗོངས་རྒྱུར་འགྲོ་བར་སྤྲོ་བ་མེད་ནས་དེ་གཅིག་པུ་ལྗོངས་རྒྱུར་སོང་བ་ན་རི་བྲགས་ཀྱི་གཙུག་ལག་ཁང་ཞིག་ཏུ་ཕྱིན་ཏོ། །གཙུག་ལག་ཁང་དེ་ཆོམ་རྐུན་པས་འཇིག་པ་དང་བཅས་པ་ཡིན་ནོ། །འཆར་ཀ་གཙུག་ལག་ཁང་དེར་ཞུགས་པ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ་ཞེས་བྱ་བར་དེ་ཤེས་ནས་དགེ་སློང་འགས་ཀྱང་དེ་མཁོས་སུ་མ་ཕབ་པ་དང ། དེས་བསམས་པ། ལྷུང་བཟེད་ནག་པོ་ཅན་འདི་དག་མི་དགའ་བར་བྱའོ་སྙམ་ནས་དེས་སྒོ་ཕྱེ་སྟེ་སྒོ་ཁང་དུ་འདུག་པ་དང ། དགེ་བསྐོས་ཀྱིས་སྨྲས་པ། བཙུན་པ་འཆར་ཀ་ཁོ་བོ་སྒོ་གཅོད་པར་བྱེད་ཀྱིས་ཁྱོད་ཕྱོགས་འདིར་འདུག་ཤིག་འཆར་ཀས་སྨྲས་པ། ཁྱོད་རང་གི་གནས་ཁང་གི་སྒོ་ལེགས་པར་ཆོད་ལ་འདུག་ཤིག་ཅེས་དེས་སྒོ་གཅོད་དུ་མ་སྟེར་ཏོ། །དགེ་སློང་དེ་དག་འཇིགས་པ་དང་བཅས་པར་གཙུག་ལག་ཁང་གི་སྒོ་མ་བཅད་པས་མཚན་ཐོག་ཐག་ཏྲོན་བྱེད་བྱེད་ནས་མཚན་མོའི་ནམ་ནངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་ལྗོངས་རྒྱུར་འདོང་དང ། དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང །
7.39b
ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ་ཞེས་སྤྲོ་བར་བྱས་པ་དང ། དེ་གང་གི་ཚེ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ་ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་ཅིག་ལྗོངས་རྒྱུར་འགྲོ་བར་སྤྲོ་བ་མེད་ནས། དེ་ཅིག་པུ་ལྗོངས་རྒྱུར་སོང་བ་ན་རི་བྲགས་ཀྱི་གཙུག་ལག་ཁང་ཞིག་ཏུ་ཕྱིན་ཏོ། །གཙུག་ལག་ཁང་དེ་ནི་འཇིགས་པ་མེད་པ་ཡིན་ནོ། །འཆར་ཀ་གཙུག་ལག་ཁང་དེར་ཞུགས་པ་ན་དགེ་སློང་རྣམས་ཀྱིས་འདི་གནས་ངན་ལེན་ཀུན་དུ་སྤྱོད་པ་ཡིན་ནོ་ཞེས་བྱ་བར་དེ་ཤེས་ནས་དགེ་སློང་འགས་ཀྱང་དེ་མཁོས་སུ་མ་ཕབ་པ་དང ། དེས་བསམས་པ། ལྷུང་བཟེད་ནག་པོ་ཅན་འདི་དག་མི་དགའ་བར་བྱའོ་སྙམ་ཞིང་གཙུག་ལག་ཁང་དེ་ཡང་འཇིགས་པ་མེད་པ་ཡིན་པས་དེ་ན་དགེ་སློང་དག་ཕྱི་རོལ་དུ་བཤང་བ་དང ། གཅི་བ་བྱེད་དུ་འདོང་ནས་འཆར་ཀས་སྒོ་བཅད་དེ་སྒོ་ཁང་དུ་མལ་བཤམས་ནས་ཉལ་ལོ། །དགེ་སློང་དག་མཚན་མོ་བཤང་བ་དང ། གཅི་བ་དག་བྱེད་དུ་འདོང་འདོང་ནས་སྨྲས་པ། ཚེ་དང་ལྡན་པ་འཆར་ཀ་ཁོ་བོ་ཅག་ཕྱི་རོལ་ཏུ་འདོང་གིས་ཁྱོད་ཕྱོགས་འདིར་ཉོལ་ཅིག་།འཆར་ཀས་སྨྲས་པ། ཁྱེད་ཅག་རང་རང་གི་གནས་ཁང་གི་གློ་ཕུག་ལ་ཕྱི་རོལ་དུ་དེང་ཤིག་།དགེ་སློང་དེ་དག་བཤང་བ་དང ། གཅི་བ་བདོ་བས་ཁ་ཅིག་གིས་ནི་ཁྱམས་སུ་བཤང་བ་དང ། གཅི་བ་བྱས། ཁ་ཅིག་གིས་ནི་རྫིང་དྲུང་དུ་བཤང་བ་དང ། གཅི་བ་བྱས་སོ། །དེ་ནས་མཚན་མོའི་ནམ་ནངས་པ་ན་བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་ལྷགས་པ་དང ། འཆར་ཀས་དེ་དག་ལ་སྨྲས་པ། ཤེས་ལྡན་དག་ཇི་ལྟར་ལྷུང་བཟེད་ནག་པོ་ཅན་གནས་ངན་ལེན་ཀུན་དུ་སྤྱོད་པ་འདི་དག་གིས་གཙུག་ལག་ཁང་ཐམས་ཅད་བཤང་བ་དང ། གཅི་བས་མ་རུང་བར་བྱས་པ་ལ་ལྟོས་ཤེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་དག་གཞན་ཡང་དྲུག་པོ
7.40a
འདི་དག་ནི་བསྐོ་བར་མི་བྱ་སྟེ། དྲུག་གང་ཞེ་ན། སྒོ་ཁང་དང ། ཐེམ་སྐས་ཀྱི་གཞི་དང ། ཁྱམས་དང ། དཔོང་སའི་ཁང་པ་དང ། མེ་ཁང་དང ། བཀད་སའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཕྱིས་གནོན་གྱི་ལྟུང་བྱེད་དེ་བཅུ་བདུན་པ་རྫོགས་སྷོ།། ་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་ཉེ་དགས་དགེ་སློང་གསར་བུ་གསར་བུ་དག་ལ་ཚེ་དང་ལྡན་པ་དག་ཚུར་ཤེག་ལྗོངས་རྒྱུར་འདོང་དང ། དེར་བདག་ཅག་གིས་རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱ། རྙེད་པ་ཡང་བསྒྲུབ་པར་བྱ་ཞིང ། ཁྱེད་ཅག་ཀྱང་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུང་དབོག་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བས་བྲེལ་བ་མེད་པར་བྱའོ། །ཁྱེད་ཅག་ན་བ་དག་གི་ནད་གཡོག་ཀྱང་བྱའོ་ཞེས་སྤྲོ་བར་བྱས་པ་དང ། དེ་གང་གི་ཚེ་ན་དགེ་སློང་རྣམས་ཀྱིས་འདི་གནས་ངན་ལེན་དུ་སྤྱོད་པ་ཡིན་ནོ་ཞེས་བྱ་བར་ཤེས་པར་གྱུར་པ་དེའི་ཚེ་ན་འགའ་ཡང་དེ་དང་ལྷན་ཅིག་ལྗོངས་རྒྱུར་འགྲོ་བར་སྤྲོ་བ་མེད་དོ། །བསོད་སྙོམས་པ་ཞིག་གིས་སྨྲས་པ། བཙུན་པ་ཉེ་དགའ་ཁོ་བོ་ཁྱོད་དང་ལྷན་ཅིག་ལྗོངས་རྒྱུར་འགྲོའོ། །དགེ་སློང་རྣམས་ཀྱིས་བསོད་སྙོམས་པ་དེ་ལ་སྨྲས་པ། བསོད་སྙོམས་པ་དེ་ནི་གནས་ངན་ལེན་ཀུན་དུ་སྤྱོད་པ་ཡིན་པས་ཁྱོད་ལ་ཐོ་འཚམ་པར་འགྱུར་རོ། །བསོད་སྙོམས་པས་སྨྲས་པ། ཁོ་བོ་ནི་ལོ་འདས་པ་ཡིན་པས་ཁོ་བོ་དེ་ལ་གནས་བཅའ་བ་དང ། ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བའི་རག་ལུས་པ་ཅུང་ཟད་ཀྱང་མེད་པས་དེས་ཁོ་བོ་ལ་ཅི་བྱར་ཡོད་ཅེས་དེས་དགེ་སློང་དེ་དག་གི་ཚིག་ཚིག་མ་ཡིན་པར་བྱས་ཏེ་དེ་དང་ལྷན་ཅིག་ལྗོངས་རྒྱུར་སོང་ངོ ། །ཉེ་དགས་གང་གི་ཚེ་ཕྱི་རོལ་གྱི་མཚམས་འདས་པ་དེའི་ཚེ་ན་སྨྲས་པ། བསོད་སྙོམས་པ་གཏུར་བུ་འདི་རེ་ཤིག་ཁྱེར་ཅིག་།བཙུན་པ་ཉེ་དགའ་ཅི་ཁྱོད་ཀྱིས་སངས
7.40b
རྒྱས་དང ། ཆོས་དང ། དགེ་འདུན་མ་མཐོང་ངམ། ཡོ་བྱད་དོན་མེད་པ་འདིས་ཅི་བྱ། ཉེ་དགས་སྨྲས་པ། བསོད་སྙོམས་པ་ཁྱོད་རེ་ཤིག་མི་ཁྱེར་བ་ནི་ཡུས་ན། ཅི་ཁྱོད་ཁོ་བོ་བས་ཀྱང་མཁས་པ་ཡིན་སྙམ་འམ། ཅི་ན་ཁྱོད་ཁོ་བོ་ལ་དེ་སྐད་ཟེར། བསོད་སྙོམས་པས་སྨྲས་པ། མཁས་པ་མ་ཡིན་ཡང་རིགས་པ་ཙམ་སྨྲའོ། །ཉེ་དགས་བསམས་པ། བསོད་སྙོམས་པ་འདི་མི་དགའ་བར་བྱའོ་སྙམ་ནས། དེ་གཉིས་མཐར་གྱིས་ལྗོངས་རྒྱུ་ཞིང་འགྲོ་བ་ན་དེ་གཉིས་རི་བྲགས་ཤིག་ཏུ་ཕྱིན་ནས། དེ་གཉིས་དེར་ཁྲོན་པ་ཞིག་གི་དྲུང་དུ་ངལ་སོ་བར་བྱེད་པ་ན་དེ་ན་རི་བྲགས་ཀྱི་གཙུག་ལག་ཁང་ཞིག་ཡོད་པ་དེར་གཎ་ཌཱི་བརྡུངས་པ་དང ། བསོད་སྙོམས་པ་དེས་ཐོས་ནས་སྨྲས་པ། བཙུན་པ་ཉེ་དགའ་གཙུག་ལག་ཁང་དུ་གཎ་ཌཱི་བརྡུངས་ཀྱིས་འདོང་ངོ ། །ཉེ་དགས་སྨྲས་པ། བསོད་སྙོམས་པ་ལྷུང་བཟེད་ནག་པོ་ཅན་ལས་མེད་པ་དག་གིས་ལས་ཀྱི་གཎ་ཌཱི་བརྡུངས་ཤིང་བདག་ཅག་གིས་ལས་བྱ་དགོས་པར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །བཙུན་པ་ཉེ་དགའ་རྙེད་པའི་གཎ་ཌཱི་མ་ཡིན་ནམ། བསོད་སྙོམས་པ་དེ་ཡིན་ན་བདག་ཅག་མཚམས་སུ་ཕྱིན་ན་འཐོབ་བོ། །བཙུན་པ་ཉེ་དགའ་ནི་གྲགས་པ་བསོད་ནམས་ཆེ་བ་ཡིན་པས་འཐོབ་ཀྱི། ཁོ་བོ་སུས་བྱིན་པར་འགྱུར། བསོད་སྙོམས་པ་སོང་ལ་གལ་ཏེ་རྙེད་པ་ཡོད་ན་ཁོ་བོའི་ཡང་ནོས་ཤིག་།དེ་སོང་བ་དང་ཇི་ཙམ་ན་དེར་གནས་མལ་གྱི་གཎ་ཌཱི་བརྡུངས་ནས་དགེ་སློང་རྣམས་ཀྱིས་སྨྲས་པ། བསོད་སྙོམས་པ་གནས་མལ་ནོས་ཤིག་།དེས་སྨྲས་པ། ཁོ་བོ་ལས་ཆེས་རྒན་པ་ཡང་ཡོད་དོ། །སུ་ཡིན། བཙུན་པ་ཉེ་དགའོ། །དེའི་ཡང་ནོས་ཤིག་།དེས་གནས་མལ་མནོས་སོ། །ཚེ་དང་ལྡན་པ་ཉེ་དགའ་ཡང་དེ་ན་འདུ་འཛིའི་གཏམ་གྱིས་འདུག་སྟེ། རི་བྲགས་འདི་སུའི། གཙུག་ལག་ཁང་འདི་སུའི། ལྷ་ཁང་འདི་སུའི། བསྐྱེད་མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །བསོད་སྙོམས
7.41a
པས་ཀྱང་བསམས་པ། བཙུན་པ་ཉེ་དགའ་ཡུན་རིང་དུ་ཐོགས་པར་འགྱུར་རོ། །སྙམ་ནས། དེས་ཁང་ཐོག་ཏུ་དེའི་མལ་བཤམས་ནས་རྐང་པའི་ཆུ་དང ། རྐང་པ་བསྐུ་བ་མཐའ་གཅིག་ཏུ་བཞག་སྟེ། གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས་འོག་ཁང་དུ་མལ་བཤམས་པར་ཞུགས་ཏེ་ཉལ་ལོ། །ཚེ་དང་ལྡན་པ་ཉེ་དགའ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག་འདུག་ནས་གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ། བསོད་སྙོམས་པ་བསོད་སྙོམས་པ་ཞེས་བོད་པར་བརྩམས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཉེ་དགའ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། ཉེ་དགས་སྨྲས་པ། འདི་ན་ཁོ་བོའི་གྲོགས་པོ་བསོད་སྙོམས་པ་ཞིག་འདུག་ན། དེ་ན་བར་མ་གྱུར་ཏམ། བསོད་སྙོམས་པས་དེ་ཐོས་ནས་སྨྲས་པ། བཙུན་པ་ཉེ་དགའ་མ་འབོད་ཅིག་།ཁོ་བོས་ཁྱེད་ཀྱི་མལ་ཁང་ཐོག་ཏུ་བཤམས་ཏེ་རྐང་པའི་ཆུ་དང ། རྐང་པ་བསྐུ་བ་ཡང་མཐའ་གཅིག་ཏུ་བཞག་གིས་དེར་སོང་ལ་ཉོལ་ཅིག་།ཉེ་དགས་སྨྲས་པ། བསོད་སྙོམས་པ་འཐམ་པ་ཆུང་ཞིག་ཡོད་ཀྱིས་ཇེ་སྒོ་ཕྱེ་ཤིག་།བཙུན་པ་ཉེ་དགའ་ཁོ་བོ་ཆད་ཀྱིས་སང་འཐམ་མོ། །བསོད་སྙོམས་པ་ཁོ་བོ་ཁྱོད་དང་ཇི་སྲིད་མཚན་ཐོག་ཐག་ཟད་པར་འགྱུར་བ་དེ་སྲིད་དུ་འཐམ་པར་བྱའོ། །བཙུན་པ་ཉེ་དགའ་ཁོ་བོ་ཆད་ཀྱིས་ཁྱོད་ལ་སྒོ་མི་དབྱེའོ། །ཉེ་དགའ་ཁང་ཐོག་ཏུ་འཛེགས་ནས་རྐང་པ་གཉིས་བཀྲུས་ཏེ་གནས་ཁང་དུ་ཞུགས་ནས་བསོད་སྙོམས་པ་ཞེས་བོས་པ་དང ། བསོད་སྙོམས་པས་བཙུན་པ་ཉེ་དགའ་ཅི་ཟེར་ཞེས་བྱས་སོ། །ཉེ་དགའ་སྒྲ་ལ་མཁས་པས་དེས་བསོད་སྙོམས་པའི་དཔྲལ་བའི་ཐད་ཀར་ཁྲི་རྐང་གཏད་དེ་ཅི་ནས་ཀྱང་ཁྲི་རྐང་གིས་ཁང་ཐོག་བརྟོལ་ནས་བསོད་སྙོམས་པ་དེའི་དཔྲལ་བར་འབབ་པར་འགྱུར་བ་དེ་ལྟར་ཤུགས་དྲག་པོས་མནན་པ་དང ། དེས་བསོད་སྙོམས་པ་དེའི་དཔྲལ་བར་ཕོག་སྟེ་དཔྲལ་བ་ཞོམ་མོ། །བསོད་སྙོམས་པས་སྨྲས་པ། བཙུན་པ་ཉེ་དགའ་ཁོ་བོ་གནང་ངོ ། །ཁོ་བོ་གནང་ངོ ། །ཀཝའེ་བསོད་སྙོམས་པ་ཅི་ཟེར། བསོད་སྙོམས་པས་བསམས་པ།
7.41b
གལ་ཏེ་སྐད་ཕྱུང་ན་འདིས་རྒན་རིམས་ཀྱིས་བདག་གི་ཁྲི་ཡང་ཕྲོགས་པར་འགྱུར་རོ། །སྙམ་ནས་དེ་ཅང་མི་སྨྲ་བར་འདུག་གོ། །དེ་ནང་པར་སྔར་ལངས་ཏེ་སྨྲས་པ། བཙུན་པ་ཉེ་དགའ་ཕྱག་འཚལ་ལོ། །ཁོ་བོ་འགྲོའོ། །བསོད་སྙོམས་པ་གར་འགྲོ། མཉན་ཡོད་དུའོ། །བསོད་སྙོམས་པ་སྡོད་ཅིག་དང ། ཁོ་བོས་ཁྱོད་ན་བའི་ནད་གཡོག་བྱའོ། །བཙུན་པ་ཉེ་དགའ་ཁྱོད་ཀྱིས་ཁོ་བོ་མི་ན་བ་ཡང་ན་བར་བྱས་པས་ན་བའི་ནད་གཡོག་བྱས་རེ་སྐན་ཞེས་དེ་མཉན་ཡོད་དུ་སོང་བ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་བསོད་སྙོམས་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། བཙུན་པ་ཉེ་དགས་བདག་གི་དཔྲལ་བ་བཅོམ་མོ། །ཇི་ལྟར་བཅོམ། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བར་ཁྲི་འམ་ཁྲིའུ་རྩ་བ་འབྱུང་བ་ལ་ཤེས་བཞིན་དུ་ལྗིད་ཀྱིས་ཕབ་སྟེ་འདུག་པ་དང་ཉལ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་དགའ་ལ་སྨྲས་པ། ཉེ་དགའ་ཁྱོད་དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བར་ཁྲི་འམ་ཁྲིའུ་རྩ་བ་འབྱུང་བ་ལ་ཤེས་བཞིན་དུ་ལྗིད་ཀྱིས་ཕབ་སྟེ་འདུག་པ་དང་ཉལ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས
7.42a
དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བར་ཁྲི་འམ་ཁྲིའུ་རྩ་བ་འབྱུང་བ་ལ་ཤེས་བཞིན་དུ་ལྗིད་ཀྱིས་ཕབ་སྟེ་འདུག་གམ་ཉལ་ན་ལྟུང་བྱེད་དོ། །ཡང་དགེ་སློང་གང་ཤེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གཙུག་ལག་ཁང་གི་ཞེས་བྱ་བ་ནི་གང་དུ་སྤྱོད་ལམ་བཞི་པོ་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དག་བྱར་རུང་བར་རོ། །སྟེང་གི་ནམ་མཁའ་ལ་ཞེས་བྱ་བ་ནི་ཁང་སྟེང་གི་ནམ་མཁའ་ལའོ། །ཐོག་བོར་བར་ཞེས་བྱ་བ་ནི་རྩཝའི་ཐོག་གམ། ལོ་མའི་ཐོག་བོར་བར་རོ། །ཁྲི་ཞེས་བྱ་བ་ནི་ཁྲི་ཉིད་དོ། །ཁྲིའུ་ཞེས་བྱ་བ་ཡང་ཁྲིའུ་ཉིད་དོ། །རྩ་བ་འབྱུང་བ་ལ་ཞེས་བྱ་བ་ནི་རྐང་པ་འབྱུང་བ་ལའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་བརྗོད་པས་སོ། །ལྗིད་ཀྱིས་ཕབ་སྟེ་ཞེས་བྱ་བ་ནི་མཐུས་མནན་ཏེའོ། །འདུག་གམ་ཞེས་བྱ་བ་ནི་རྐུབ་ཚོས་འཇོག་པར་བྱེད་པའོ། །ཉལ་ན་ཞེས་བྱ་བ་ནི་ལུས་བསྙལ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང་ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བར་ཁྲི་འམ། ཁྲིའུ་རྩ་བ་འབྱུང་བ་ལ་ཤེས་བཞིན་དུ་ལྗིད་ཀྱིས་ཕབ་སྟེ་འདུག་གམ། ཉལ་ན་ཐམས་ཅད
7.42b
དུ་ལྟུང་བྱེད་དུ་འགྱུར་རོ། །སྤང་ལེབ་ཀྱིས་གཡོགས་པ་དང ། སྤང་ལེབ་ཆུང་ངུས་གཡོགས་པ་དང ། ཤིང་ལེབ་ཀྱིས་གཡོགས་པ་དང ། ཤིང་ལེབ་འབུར་ཅན་གྱིས་གཡོགས་པ་དང ། བྱིན་གྱིས་གཞོལ་བ་ལ་ནི་ལྟུང་བ་མེད་དོ། །རྐང་རྟེན་བཙུག་པ་དང ། བཀན་པ་བྱས་པ་ལ་ཡང་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྩ་བ་འབྱུང་བ་ལ་འདུག་པའི་ལྟུང་བྱེད་དེ་བཅཝ་བརྒྱད་པ་རྫོགས་སྷོ།། ་་་་།། སངས་རྒྱས་བཅོམ་ལྡན་འདས་ཀཽ་ཤམྦི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འདུན་པ་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩཝ་དང ། ལྕི་བ་དང་ས་ལ་འདེབས་པར་བྱེད། འདེབས་སུ་འཇུག་པར་བྱེད་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འདུན་པ་ཁྱོད་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩ་དང ། ལྕི་བ་དང ། ས་ལ་མ་འདེབས་ཤིག་།འདེབས་སུ་མ་འཇུག་ཅིག་།འདུན་པས་སྨྲས་པ། ཁོ་བོ་ལ་འགའ་ཞིག་གིས་བགྲངས་ཏེ་གཏད་དམ་ཅི། ཤར་གྱི་རྒྱ་མཚོ་ཆེན་པོར་འདོང་ན་ཅི་ཉེས། ལྷོ་དང་ནུབ་དང་བྱང་གི་རྒྱ་མཚོ་ཆེན་པོར་འདོང་ན་ཅི་ཉེས། འབབ་ཆུ་དང ། མཚོ་དང ། ལྟིང་ཀ་དག་ཏུ་འདོང་ན་ཅི་ཉེས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩཝ་དང ། ལྕི་བ་དང ། ས་ལ་འདེབས་པ་དང ། འདེབས་སུ་འཇུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འདུན་པ་ལ་སྨྲས་པ། འདུན་པ་ཁྱོད་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩཝ་དང ། ལྕི་བ་དང ། ས་ལ་འདེབས་པ་དང ། འདེབས་སུ་འཇུད་པར་བྱེད་པ
7.43a
བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩཝ་འམ། ལྕི་བ་འམ། ས་ལ་འདེབས་སམ། འདེབས་སུ་འཇུད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འདུན་པ་འམ། གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་བརྗོད་པས་སོ། །སྲོག་ཆགས་དང་བཅས་པ་ཞེས་བྱ་བ་ལ་སྲོག་ཆག་དང་བཅས་པ་ནི་གཞི་ཏེ་གང་དག་མིག་གིས་མཐོང་བར་འགྱུར་བ་དང་གང་དག་ཆུ་ཚགས་ཀྱིས་ཟིན་པར་འགྱུར་བའོ། །ཆུས་ཞེས་བྱ་བ་ནི་ཆུ་ཉིད་ཀྱིས་སོ། །རྩཝ་ཞེས་བྱ་བ་ནི་རྩཝ་ཉིད་དོ། །ལྕི་བ་ཞེས་བྱ་བ་ཡང་ལྕི་བ་ཉིད་དོ། །ས་ལ་ཞེས་བྱ་བ་ཡང་ས་ཉིད་ལའོ། །འདེབས་སམ་ཞེས་བྱ་བ་ནི་རང་གིས་སོ། །འདེབས་སུ་འཇུད་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དག་ངན་སོང་དང ། ངན་འགྲོ་དང ། ལོག་པར་ལྟུང་བ་དག་བསྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་ཏུ་ལྟུང་བ་དེ་མ་བཤགས་ཤིང་སོ་སོ་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་རྩཝ་འམ། ལྕི་བ་འམ། ས་ལ་འདེབས་སམ། འདེབས་སུ་འཇུད་ན་ལྟུང་བྱེད་དུ་འགྱུར་རོ། །དགེ་སློང་གིས་སྲོག་ཆགས་དང་བཅས་པའི་ཆུ་ལ་ཡིད་གཉིས་ཟ་བས་རྩཝ་འམ། ལྕི་བ་འམ།
7.43b
ས་ལ་འདེབས་སམ། འདེབས་སུ་འཇུད་ན་ལྟུང་བྱེད་དུ་འགྱུར་རོ། །དགེ་སློང་གིས་སྲོག་ཆགས་མེད་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་རྩཝ་འམ། ལྕི་བ་འམ། ས་ལ་འདེབས་སམ། འདེབས་སུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་སྲོག་ཆགས་མེད་པའི་ཆུ་ལ་ཡིད་གཉིས་ཟ་བས་རྩཝ་འམ། ལྕི་བ་འམ། ས་ལ་འདེབས་སམ། འདེབས་སུ་འཇུག་ན་ཉེས་བྱས་སུ་འགྱུར་རོ། །དགེ་སློང་གིས་སྲོག་ཆགས་དང་བཅས་པའི་ཡུར་པོ་ཆེ་འབེབས་པར་བྱེད་ན་སྲོག་ཆགས་ཇི་སྙེད་དུས་བྱེད་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །སྲོག་ཆགས་ཇི་སྙེད་དུས་མི་བྱེད་པ་དེ་སྙེད་ཀྱི་ཉེས་བྱས་སུ་འགྱུར་རོ། །དགེ་སློང་གིས་སྲོག་ཆགས་དང་བཅས་པའི་ཡུར་པོ་ཆེ་གཅོད་པར་བྱེད་ན་སྲོག་ཆགས་ཇི་སྙེད་དུས་བྱེད་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །སྲོག་ཆགས་ཇི་སྙེད་དུས་མི་བྱེད་པ་དེ་སྙེད་ཀྱི་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྲོག་ཆགས་དང་བཅས་པ་ལ་སྤྱོད་པའི་ལྟུང་བྱེད་དེ་བཅུ་དགུ་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་ཀཽ་ཤམྦི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གཞན་གྱིས་བྱེད་ཏུ་བཅུག་པའི་གཙུག་ལག་ཁང་དག་ན་གནས་ཤིང་དེ་དག་དེ་དག་ན་གནས་པ་ན་དགའ་བོ་ཉེ་དགའ་ལྟོས་ཤིག་།གཙུག་ལག་ཁང་འདི་ནི་གྱོང་གྲུགས་སུ་གྱུར་པ་ཡིན་ནོ། །འདི་ནི་གས་པ་ཡིན་ནོ། །འདི་ནི་མཚམས་ཉམས་པ་ཡིན་ནོ། །འདི་ནི་ངོས་ཉམས་པ་ཡིན་ནོ། །འདི་ནི་མ་མོའི་ཁྱིམ་འདྲ་བ་ཡིན་ནོ། །ཞེས་འཕྱ་བར་བྱེད་པ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་རེ་ཤིག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང་ཁྱེད་ཅག་གིས་རྡོ་ཡང་སྒྲེང་བར་མི་ནུས་ལ་འོན་ཀྱང་འཕྱ་བར་བྱེད་དོ། །དེ་སྐད་ཅེས་སྨྲས་པ་དང ། དེ་དག་ང་རྒྱལ་གྱིས་ཁེངས་པར་གྱུར་ནས་ཕན་ཚུན་སྨྲས་པར་བརྩམས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་གིས་བདག་ཅག་ལ་ཁྱེད་ཅག་རེ་ཤིག་གཞན་གྱིས་བྱེད་ཏུ་བཅུག་པའི
7.44a
གཙུག་ལག་ཁང་དག་ན་གནས་ཤིང་ཁྱེད་ཅག་གིས་རྡོ་ཡང་སྒྲེང་བར་མི་ནུས་ལ་འོན་ཀྱང་འཕྱ་བར་བྱེད་དོ་ཞེས་ཧ་ཅང་ཟིལ་གྱི་མནན་གྱིས་ཚུར་ཤིག་བདག་ཅག་གིས་སྔོན་ལྷུང་བཟེད་ནག་པོ་ཅན་གང་གིས་ཀྱང་བྱེད་དུ་མ་བཅུག་པའི་གཙུག་ལག་ཁང་ཅི་འདྲ་བའི་གཙུག་ལག་ཁང་བྱེད་དུ་གཞུག་གོ། །གལ་ཏེ་བདག་ཅག་ཐམས་ཅད་ལག་གི་བླ་ལ་བརྩོན་པར་གྱུར་ན་ལྷུང་བཟེད་ནག་པོ་ཅན་དག་རྟག་པ་ཁོ་ནར་བདག་ཅག་ལ་སྐབས་ཚོལ་བས་དེ་དག་གིས་དྲུག་སྡེ་དག་ཐམས་ཅད་ལག་གི་བླ་ལ་ཞུགས་སོ་ཞེས་སྐབས་རྙེད་པར་འགྱུར་ལ། བདག་ཅག་གི་སློངས་མོའི་ཁྱིམ་གང་དག་ཡིན་པ་དེ་དག་ཏུ་ཡང་བྲེལ་བ་དག་གི་སྐྱོན་བརྗོད་ནས་རྗེས་སུ་འཇུག་པར་བྱེད་པར་འགྱུར་གྱི་བདག་ཅག་གིས་བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་གང་ཡིན་པ་དེའི་གན་དུ་བདག་ཅག་དོང་ལ་སྤྲོ་བ་བསྐྱེད་པར་བྱ་གོར་མ་ཆག་ན། དེའི་ཕྱིར་བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་པར་ནུས་པ་གང་ཡིན་པ། བདག་ཅག་གི་ནང་ན་ཚེ་དང་ལྡན་པ་འདུན་པ་མཁས་པ། སྤྱོད་པ་གསལ་བ། ཁབ་གཞུགས་པར་གཏུན་བུ་འཇུད་ནུས་པ་ཡིན་གྱིས་བདག་ཅག་དེའི་གན་དུ་དོང་ལ་སྤྲོ་བ་བསྐྱེད་པར་བྱའོ། །ཞེས་དེ་དག་འདུན་པའི་གན་དུ་དོང་སྟེ་སྨྲས་པ། ཚེ་དང་ལྡན་པ་འདུན་པ་ལྷུང་བཟེད་ནག་པོ་ཅན་འདི་དག་གིས་བདག་ཅག་ལ་རེ་ཤིག་གཞན་གྱིས་བྱེད་ཏུ་བཅུག་པའི་གཙུག་ལག་ཁང་དག་ན་གནས་ཤིང་ཁྱེད་ཅག་གིས་རྡོ་ཡང་སྒྲེང་བར་མི་ནུས་ལ་འོན་ཀྱང་འཕྱ་བར་བྱེད་དོ། །ཞེས་ཧ་ཅང་ཟིལ་གྱིས་མནན་ནས་ཁོ་བོ་ཅག་འདི་སྙམ་དུ་སེམས་ཏེ། ལྷུང་བཟེད་ནག་པོ་ཅན་འདི་དག་གིས་བདག་ཅག་ལ་ཁྱེད་ཅག་རེ་ཤིག་གཞན་གྱིས་བྱེད་དུ་བཅུག་པའི་གཙུག་ལག་ཁང་དག་ན་གནས་ཤིང་ཁྱེད་ཅག་གིས་རྡོ་ཡང་སྒྲེང་བར་མི་ནུས་ལ་འོན་ཀྱང་འཕྱ་བར་བྱེད་དོ་ཞེས་ཧ་ཅང་ཟིལ་གྱིས་མནན་གྱིས་ཚུར་ཤེག་བདག་ཅག་གིས་སྔོན་ལྷུང་བཟེད་ནག་པོ་ཅན་གང་དག་གིས་ཀྱང་བྱེད་དུ་མ་ཅུག་པའི་གཙུག་ལག་ཁང་ཅི་འདྲ་བ་དེ་འདྲ་བའི་གཙུག་ལག་ཁང་བྱེད་དུ་གཞུག་གོ། །
7.44b
གལ་ཏེ་བདག་ཅག་ཐམས་ཅད་ལག་གི་བླ་ལ་བརྩོན་པར་གྱུར་ན་ལྷུང་བཟེད་ནག་པོ་ཅན་དག་རྟག་པ་ཁོ་ནར་བདག་ཅག་ལ་སྐབས་ཚོལ་བས་དེ་དག་གིས་དྲུག་སྡེ་དག་ཐམས་ཅད་ལག་གི་བླ་ལ་ཞུགས་སོ། །ཞེས་སྐབས་རྙེད་པར་ཡང་འགྱུར་ལ། བདག་ཅག་གི་སློངས་མོའི་ཁྱིམ་གང་དག་ཡིན་པ་དེ་དག་ཏུ་ཡང་བྲེལ་བ་དག་གི་སྐྱོན་བརྗོད་ནས་རྗེས་སུ་འཇུག་པར་བྱེད་པར་འགྱུར་གྱིས། བདག་ཅག་གིས་བདག་གི་ནང་ན་མཁས་པ། སྤྱོད་པ་གསལ་བ། ཁབ་གཞུགས་པར་གཏུན་བུ་འཇུད་ནུས་པ་གང་ཡིན་པ་དེའི་གན་དུ་བདག་ཅག་དོང་ལ་སྤྲོ་བ་བསྐྱེད་པར་བྱ་གོར་མ་ཆག་ན། དེའི་ཕྱིར་བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་གང་ཡིན། བདག་ཅག་གི་ནང་ན་ཚེ་དང་ལྡན་པ་འདུན་པ་མཁས་པ། སྤྱོད་པ་གསལ་བ། ཁབ་གཞུག་པར་གཏུན་བུ་འཇུད་ནུས་པ་ཡིན་གྱིས་བདག་ཅག་དེའི་གན་ཏུ་དོང་ལ་སྤྲོ་བ་བསྐྱེད་པར་བྱའོ་སྙམ་ནས། བདག་ཅག་གིས་ཚེ་དང་ལྡན་པ་གཙུག་ལག་ཁང་གི་ཕྱིར་སྤྲོ་བར་བྱ་ཞིང་ཁྱོད་ལ་གསོལ་བ་འདེབས་ཀྱིས་ལྷུང་བཟེད་ནག་པོ་ཅན་དག་ཡན་ལག་འདིས་ཟིལ་གྱིས་ནོན་པར་གྱིས་ཤིག་།འདུན་པས་སྨྲས་པ། ཐབས་ཡིན་གྱིས་དེ་ལྟར་བྱའོ། །དེ་དག་ཡིད་དགའ་ནས་དོང་ངོ ། །ཚེ་དང་ལྡན་པ་འདུན་པ་ཡང་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས་གཙུག་ལག་ཁང་དུ་ཞུགས་ཏེ་འདུག་ནས་ཐབས་ཅི་ཡོད་ན་དེས་དགེ་འདུན་གྱི་གཙུག་ལག་ཁང་འགྲུབ་པར་འགྱུར་སྙམ་དུ་སེམས་པ་ལ་ཞུགས་སོ། །དེས་སུ་ཞིག་སུ་ལ་མངོན་པར་དད་སྙམ་དུ་རྣམ་པར་དཔྱད་པར་བརྩམས་པ་དང ། དེ་འདི་སྙམ་དུ་སེམས་ཏེ། རེ་ཤིག་འཇིག་རྟེན་ལྷ་དང་བཅས་པ་ནི་བཅོམ་ལྡན་འདས་ལ་མངོན་པར་དད་པ་ཡིན། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཀུན་ཤེས་ཀཽ་ཎྜི་ནྱ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་འོད་སྲུང་ཆེན་པོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཤཱ་རིའི་བུ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་མ་འགགས་པ་ལ།
7.45a
ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་རྟ་ཐུལ་དང ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་བཟང་ལྡན་དང ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་རླངས་པ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་མིང་ཆེན་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་གང་པོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་དྲི་མ་མེད་པ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་བ་ལང་བདག་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཀུན་དགའ་བོ་ལ། ཁྱིམ་ཆེ་གེ་མོ་ཞིག་ནི་བཅོམ་ལྡན་འདས་ཀྱི་གཅུང་སྲུའི་སྲས་ཚེ་དང་ལྡན་པ་མཛེས་དགའ་ལ། ཁྱིམ་ཆེ་གེ་མོ་ཞིག་ནི་བཅོམ་ལྡན་འདས་ཀྱི་སྲས་ཚེ་དང་ལྡན་པ་སྒྲ་གཅན་ཟིན་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་གྱད་བུ་ནོར་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་དགའ་བོ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ཉེ་དགའ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་འགྲོ་མགྱོགས་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་འཆར་ཀ་ལ། ཁྱིམ་ཆེ་གེ་མོ་ཞིག་ནི་ཚེ་དང་ལྡན་པ་ནབ་སོ་ལ་མངོན་པར་དད་པ་ཡིན་པས་དེའི་ཕྱིར་དེ་དག་སྦྱོར་དུ་གཞུག་ཏུ་ནི་མི་ནུས་ཀྱིས། འདི་ལྟར་ཀཽ་ཤམྦི་ན་བྲམ་ཟེ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ་ཞིག་འདུག་ན་དེ་ནི་སེར་སྣ་ཅན། མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་འཛིན་པ་ཡིན་ལ། དེ་ལ་དབྱིག་དང ། གསེར་མང་པོ་བདོག་པས་གལ་ཏེ་དེ་རྗེས་སུ་འཇུག་པར་བྱེད་ནུས་ན་དགེ་འདུན་གྱི་གཙུག་ལག་ཁང་འགྲུབ་པར་འགྱུར་རོ། །སྙམ་ནས། དེ་དེ་ལྟར་སེམས་པ་ལ་ཞུགས་པས་ཚེགས་ཆེན་པོས་ནམ་ནངས་པར་བྱས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཀཽ་ཤམ་བིར་བསོད་སྙོམས་ལ་ཞུགས་སོ། །ཁྱིམ་གཉིས་སམ་གསུམ་དུ་བསོད་སྙོམས་བརྒྱུས་ནས་ཕྱེ་ཉུང་ཤས་ཤིག་ཁྱེར་ཏེ་བྲམ་ཟེ་དེའི་ཁྱིམ་དུ་འཇུག་པར་བརྩམས་པ་དང ། སྒོ་བས་འཕགས་པ་སྡོད་ཅིག་།མ་འཇུག་ཤིག་ཅེས་བགགས་སོ། །དེས་སྨྲས་པ། བཞིན་བཟངས་བཅོམ་ལྡན་འདས་ཀྱིས་ཁོ་བོ་ཅག་གི་སྤྱོད་ཡུལ་མ་ཡིན་པ་ནི་རྣམ་པ་ལྔ་གསུངས་ཏེ།
7.45b
རོལ་མོ་མཁན་གྱི་གནས་དང ། འཇུད་འཐུན་མའི་གནས་དང ། ཆང་པའི་གནས་དང ། གདོལ་པའི་གནས་དང ། རྒྱལ་པོའི་ཕོ་བྲང་ཡིན་ན་ཅི་ཁྱིམ་འདི་རོལ་མོ་མཁན་གྱི་གནས་ཡིན་ནམ། འོན་ཏེ་འཇུད་འཐུན་མའི་གནས་སམ། ཆང་པའི་གནས་སམ། གདོལ་པའི་གནས་སམ། རྒྱལ་པོའི་ཕོ་བྲང་ཡིན་ནམ་ཅི་ན་དེའི་ཕྱིར་ཁོ་བོ་འགོག་པར་བྱེད། སྒོ་བས་སྨྲས་པ། འཕགས་པ་ཁྱོད་མང་དུ་བཀྱོན་པར་གྱུར་མོད་ཀྱི་འདི་ནི་རོལ་མོ་མཁན་གྱི་གནས་ཀྱང་མ་ལགས། འཇུད་འཐུན་མའི་གནས་དང ། ཆང་པའི་གནས་དང ། གདོལ་པའི་གནས་དང ། རྒྱལ་པོའི་ཕོ་བྲང་ཡང་མ་ལགས་ཏེ། འདི་ལྟར་འདི་ནི་བྲམ་ཟེ་ཆེ་གེ་མོ་ཞིག་གི་ཁྱིམ་ལགས་སོ། །འདུན་པས་བསམས་པ། གང་དུ་རེ་ཤིག་ངོ་ཕྲད་པ་ཡང་མེད་པ་དེར་གཞན་ཅི་ཞིག་ཡོད་པར་འགྱུར་སྙམས་ནས། དེ་དེ་ལྟར་སྒོར་བགགས་ཏེ་སེམས་ཁོངས་སུ་ཆུད་ཅིང་འདུག་པ་ན་ཁྱིམ་བདག་ཅིག་གི་བུ་བྱུང་བ་དེར་བཅུ་གཉིས་འདུས་པའི་དགའ་འདུན་གར་དང ། གླུ་དང་སིལ་སྙན་གྱིས་ཞུགས་པ་དང ། སྒོ་བ་དེས་དེ་དག་ལ་ཏེ་པོར་བརྟག་པར་བརྩམས་ཏེ། སྒོ་ལ་མི་ལྟ་བའི་ཚེ་ཚེ་དང་ལྡན་པ་འདུན་པས་འཇུག་པ་ཐོབ་སྟེ་ཞུགས་ནས་དེའི་སྤྱོད་ལམ་གྱིས་འདོད་ཆགས་དང་བྲལ་བའི་ས་སྦྱོང་བར་བྱེད་པ་དེ་བྲམ་ཟེ་དེས་མཐོང་ནས་སྨྲས་པ། བཙུན་པ་འདུན་པ་བྱོན་པ་ལེགས་སོ། །གདན་འདི་ལ་བཞུགས་ཤིག་།འདུན་པ་དོན་ཡོད་པས་འདུག་པ་དང ། གཏམ་གྱི་སྐབས་མ་རྙེད་ནས་འདུན་པས་སྨྲས་པ། བྲམ་ཟེ་ཁོ་བོས་བསོད་སྙོམས་ཀྱི་ཕྱེ་ཉུང་ཤས་ཅིག་རྙེད་པ་འདི་འཚག་ཏུ་ཆུག་སྟེ་བྱིན་ཅིག་།བྲམ་ཟེས་བུ་མོ་ལ་བསྒོ་བ། བུ་མོ་འཕགས་པའི་བསོད་སྙོམས་ཀྱི་ཕྱེ་ཚོགས་ཏེ་ཕུལ་ཅིག་།བུ་མོ་དེས་བཙག་པར་བརྩམས་པ་དང ། ཚེ་དང་ལྡན་པ་འདུན་པས་ཕྱེ་ལ་བརྟག་པར་བརྩམས་སོ། །བྲམ་ཟེས་སྨྲས་པ། འཕགས་པ་ཅི་རྟོག་།སྲོག་ཆགས་སོ། །གལ་ཏེ་མཆིས་ན་ཇི་ལྟར་བགྱི། བཟའ་བར་མི་བྱའོ། །གལ་ཏེ་གསོལ་བར་གྱུར་ན་ནོངས་པ་ཅི་མཆིས། བྲམ་ཟེ་བཅོམ་ལྡན་འདས་ཀྱིས་སྲོག
7.46a
གཅོད་པ་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལུས་ཞིག་སྟེ་ཤི་བའི་འོག་ཏུ་ངན་སོང་དང ། ངན་འགྲོ་དང ། ལོག་པར་ལྟུང་བ་དང ། སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཞིང ། གལ་ཏེ་འདི་ལྟ་བུ་ཉིད་དུ་མི་རྣམས་དང་སྐལ་བ་མཉམ་པར་འོང་ན་ཡང་ཚེ་ཐུང་བར་འགྱུར་རོ་ཞེས་གསུངས་སོ་ཞེས་བྱ་བ་ལ་སོགས་པ་མི་དགེ་བ་བཅུ་དང ། དགེ་བ་བཅུའི་ལས་ཀྱི་ལམ་དག་རྒྱས་པར་བརྗོད་པ་དང ། བྲམ་ཟེ་དེ་མངོན་པར་དད་པར་གྱུར་ནས་རང་ཉིད་ཀྱིས་བཟའ་བ་དང་བཅའ་བ་གཙང་ཞིང་བསོད་པས་སྣོད་བཀང་སྟེ་སྨྲས་པ། འཕགས་པ་ཐུགས་བརྩེ་བའི་སླད་དུ་འདི་བཞེས་སུ་གསོལ། ཚེ་དང་ལྡན་པ་འདུན་པས་བསམས་པ། གལ་ཏེ་བླངས་པར་གྱུར་ན་འདི་ལྟ་སྟེ། དཔེར་ན་ཤིང་ལས་བྱས་པའི་སྣོད་དུ་བསྐོ་བ་དང་འདྲ་བར་བདག་གི་དང་པོ་འདི་ཉིད་ཐ་མར་འགྱུར་རོ། །སྙམ་དུ་རིག་ནས་སྨྲས་པ། བྲམ་ཟེ་ཁོ་བོས་བསོད་སྙོམས་ཀྱི་ཕྱེ་ཉུང་ཤས་ཤིག་རྙེད་པ་འདི་ཉིད་ཡོངས་སུ་ལོངས་སྤྱད་པར་བྱའི་དད་པས་སྦྱིན་པར་བྱ་བ་བླངས་ཏེ་དོར་དུ་ག་ལ་རུང ། བྲམ་ཟེ་སྨྲས་པ། འཕགས་པ་བདག་ཅག་བྲམ་ཟེ་རྣམས་ཀྱི་ཀུན་ཏུ་སྤྱོད་པ་ནི་གལ་ཏེ་ངན་པ་རྙེད་ནས་བཟང་པོ་རྙེད་པར་གྱུར་ན་ངན་པ་སྤོངས་ཏེ་བཟང་པོ་ཡོངས་སུ་ལོངས་སྤྱོད་པར་བགྱིད་པ་ལགས་ན་དེ་ཁྱེད་ཅག་ལ་ཅི་ནོངས། བྲམ་ཟེ་ཁོ་བོ་ཅག་ནི་བསླབ་པའི་གཞི་ཡང་དག་པར་བླངས་པ་ཡིན་ལ། ཁྱེད་ཅག་བྲམ་ཟེ་དག་ནི་བསླབ་པའི་གཞི་ཡང་དག་པར་བླངས་པ་མ་ཡིན་པས་ཁྱེད་ཅག་བྲམ་ཟེ་དག་ནི་ཅི་དགར་འཇུག་པར་བྱེད་པ་ཡིན་ནོ། །ཁོ་བོ་ཅག་ལ་ནི་བཅོམ་ལྡན་འདས་ཀྱིས་འཕགས་པའི་རིགས་བཞི་བཀའ་སྩལ་ཏེ། བཞི་གང་ཞེ་ན། ཆོས་གོས་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། བསོད་སྙོམས་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། གནས་མལ་གང་ཡང་རུང་བས་ཆོག་ཤེས་པ་འཕགས་པའི་རིགས་དང ། སྤོང་བ་ལ་དགའ་བ་དང་སྒོམ་པ་ལ་དགའ་བ་འཕགས་པའི་རིགས
7.46b
སོ། །བྲམ་ཟེ་དེ་ཤིན་དུ་མངོན་པར་དད་པར་གྱུར་ནས་སྨྲས་པ། འཕགས་པ་འདི་ནི་ཁྱོད་ཀྱི་ཁབ་ལགས་ཀྱིས་དུས་དང་དུས་སུ་གཤེགས་སུ་གསོལ། བྲམ་ཟེ་ཁྱོད་ཀྱི་སྒོ་བ་འདི་ནི་གཤིན་རྗེའི་དབྱུག་པ་དང་འདྲ་བ་ཡིན་པས་སུ་ཡང་འཇུག་ཏུ་མི་སྟེར་གྱིས་ལེགས་པར་སྒོ་བ་གྱིས་ཤིག་དང ། དེས་ན་ཁོ་བོ་ལ་འགོག་པར་མི་བྱེད་དོ། །བྲམ་ཟེས་སྒོ་བ་བཀུག་སྟེ་ལེགས་པར་སྒོ་བ། ཀཝའེ་ནང་རྗེ་ཁྱིམ་འདི་འཕགས་པ་འདུན་པའི་ཡིན་གྱིས་ཁྱོད་ཀྱིས་མ་བགགས་ཤིག་།ནང་མི་ལ་ཡང་སྒོ་བ། ཁྱེད་ཅག་གིས་འཕགས་པ་འདུན་པ་ལ་མི་གུས་པར་མི་བྱའོ། །ཚེ་དང་ལྡན་པ་འདུན་པས་བསམས་པ། བྲམ་ཟེ་འདི་ནི་མངོན་པར་དད་པར་གྱུར་ན། འོན་ཀྱང་གལ་ཏེ་འདིར་ལྷུང་བཟེད་ནག་པོ་ཅན་འཇུག་པར་གྱུར་ན་དེས་འདི་ཅི་ནས་ཀྱང་འཁྲུག་པར་བྱེད་པར་འགྱུར་བས་ཐབས་ཀྱི་རྣམ་པ་ཞིག་བྱའོ་སྙམ་ནས་འདུན་པས་སྒོ་བ་དེ་ལ་སྨྲས་པ། ཀཝའི་ནང་རྗེ་ཁྱོད་ཀྱིས་བྲམ་ཟེ་དེ་ཇི་ལྟར་ཁོ་བོ་ལ་མངོན་པར་དད་པར་གྱུར་པ་མཐོང་ངམ། འཕགས་པ་མཐོང་ངོ ། །དེས་ཁོ་བོ་འབའ་ཞིག་འདིར་འཇུག་ཏུ་གནང་གིས་ལྷུང་བཟེད་ནག་པོ་ཅན་གཞན་སུ་ཡང་འཇུག་ཏུ་མ་གཞུག་ཤིག་།གལ་ཏེ་འདིར་ལྷུང་བཟེད་ནག་པོ་ཅན་འགའ་ཞིག་འཇུག་ཏུ་བཅུག་ན་ཁོ་བོས་ཁྱོད་ལ་ཁྲིམས་ཆེན་པོ་འཆར་གཞུག་པར་བྱའོ། །འཕགས་པ་ཤིན་དུ་བག་ཡངས་སུ་བཞུད་ཅིག་།ཁྱོད་ཉིད་ཀྱང་རེ་ཤིག་དེའུ་མ་ཆུད་པ་ལགས་ན་ལྷུང་བཟེད་ནག་པོ་ཅན་གཞན་འཇུག་པར་འགྱུར་བ་ལྟ་སྨོས་ཀྱང་ཅི་འཚལ། ཚེ་དང་ལྡན་པ་འདུན་པ་ཡིད་བདེ་བ་སྐྱེས་ཏེ་སོང་ནས་དེ་དུས་དང་དུས་སུ་བྲམ་ཟེ་དེའི་ཁྱིམ་དུ་འགྲོ་བར་བྱེད་དོ། །བྲམ་ཟེས་ཀྱང་དེ་ཁོ་ན་བཞིན་དུ་ཡང་དང་ཡང་དུ་སྟོབས་པར་བྱེད་པ་ན་ཚེ་དང་ལྡན་པ་འདུན་པས་དང་དུ་ལེན་པར་མི་བྱེད་པར་སྦྱིན་པ་དང་ལྡན་པའི་ཆོས་བསྟན་པ་འབའ་ཞིག་བྱས་ཤིང་འགྲོ་བར་བྱེད་དོ།། ་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་དྲུག་པ། ཇི་ཙམ་དུས་གཞན་ཞིག་ན་ཚེ་དང་ལྡན་པ་འདུན་པས་བྲམ་ཟེ་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གི་བསྔགས་པ་བརྗོད་ཅིང་དེ་དག
7.47a
རྒྱ་ཆེར་ལེགས་པར་བཤད་པ་དང ། བྲམ་ཟེས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་འགའ་ཞིག་བགྱིའོ། །བྲམ་ཟེ་དེ་བཞིན་གྱིས་ཤིག་།འཕགས་པ་ཅི་ཞིག་བགྱི། དགེ་འདུན་གྱི་གཙུག་ལག་ཁང་བྱེད་དུ་ཆུག་ཤིག་།བྲམ་ཟེས་བསམས་པ། བདག་གིས་འཕགས་པ་འདུན་པ་ལ་རྣམ་པ་དུ་མར་བསྟབས་ན་འདིར་ལན་འགའ་ཡང་དང་དུ་མ་བླངས་སྟེ་ད་དང་དུ་བླངས་པ་གང་ཡིན་པ་འདི་ཡང་དགེ་འདུན་གྱི་ཕྱིར་རོ་སྙམ་ནས་དེ་ངོ་མཚར་སྐྱེས་ཏེ་སྨྲས་པ། བཙུན་པ་བདག་ལ་ཀཱར་ཤཱ་པ་ན་དག་ནི་མཆིས་ན་བསོད་ནམས་ཀྱི་གྲོགས་མ་མཆིས་སོ། །ཁོ་བོས་ཁྱོད་ཀྱི་བསོད་ནམས་ཀྱི་གྲོགས་བྱས་འདི་ལྟར་ཁྱོད་ཀྱིས་ཁོ་བོ་དགེ་འདུན་གྱིས་ལག་གི་བླར་སྐོར་ཆུག་ཤིག་ཁྱིམ་བདག་དེ་གཙུག་ལག་ཁང་དུ་སོང་སྟེ་རྒན་པའི་མཐའ་ལོགས་སུ་འདུག་ནས་སྨྲས་པ། འཕགས་པ་དག་འཕགས་པ་འདུན་པ་འདི་བདག་གི་གཙུག་ལག་ཁང་བགྱིད་དུ་སྩོལ་བར་འཚལ་ན་དེའི་སླད་དུ་འཕགས་པའི་དགེ་འདུན་གྱིས་བདག་ལ་ཐུགས་བརྩེ་བའི་སླད་ཏུ་འཕགས་པ་འདུན་པ་བདག་གི་གཙུག་ལག་ཁང་བགྱིད་པའི་ལག་གི་སླར་བསྐོར་གསོལ། དེ་ན་དགེ་འདུན་གྱི་ནང་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་པ་དེས་བསམས་པ། དྲུག་སྡེ་དག་ལས་སུ་ལ་བསྐོས་ན་ཡང་དགེ་སློང་དག་ལ་ཐོ་འཚམ་པར་བྱེད་ན་གལ་ཏེ་ལག་གི་བླར་བསྐོས་པར་གྱུར་ན་རྒྱ་ཆེར་དགེ་སློང་རྣམས་ལ་ཐོ་འཚམ་པར་འགྱུར་རོ་སྙམ་ནས་ཚེ་དང་ལྡན་པ་ཤཱ་རིའི་བུས་འདུན་པ་ལ་སྨྲས་པ། ཚེ་དང་ལྡན་པ་འདུན་པ་གང་གི་ཚེ་ཁོ་བོས་རྒྱལ་བྱེད་ཀྱི་ཚལ་རྩིག་ཏུ་བཅུག་པ་དེའི་ཚེ་ན་ཡང་ཁོ་བོ་སུས་ཀྱང་ལག་གི་བླར་མ་བསྐོས་སོ། །གང་གི་ཚེ་ཚེ་དང་ལྡན་པ་སྐུལ་བྱེད་ཆེན་པོས་གདངས་ཅན་གྱི་ཀུན་དགའ་ར་བ་རྩིག་ཏུ་བཅུག་པ་དེའི་ཚེ་ན་ཡང་དེ་སུས་ཀྱང་ལག་གི་བླར་མ་བསྐོས་སོ། །ཁྱོད་ཀྱང་གལ་ཏེ་གཙུག་ལག་ཁང་བྱེད་དུ་འཇུད་པར་འདོད་ན་མ་བསྐོས་པ་ཉིད་དུ་བྱེད་དུ་ཆུག་ཤིག་།ཚེ་དང་ལྡན་པ་འདུན་པས་བསམས་པ། ལྷུང་བཟེད་ནག་པོ་ཅན་དག་བདག་ཅག་མཐོང་བར་ཡང་མི་དགའ་ན་ལག་གི་བླར་བསྐོར་སྟེར
7.47b
བར་ལྟ་ག་ལ་འགྱུར་སྙམ་ནས། དེ་བྲམ་ཟེ་དེའི་གན་དུ་སོང་སྟེ། ཀཱར་ཥཱ་པ་ཎ་དག་བླངས་ནས་སོ་ཕག་མཁན་དག་གི་གན་དུ་སོང་སྟེ་སྨྲས་པ། བཞིན་བཟངས་དག་ཁྱེད་ཀྱིས་ཉི་མ་གཅིག་ཁོ་ནས་གཙུག་ལག་ཁང་སུམ་རྩེག་གི་སོ་ཕག་སྦྱིན་པར་ནུས་སམ། དེ་དག་གིས་སྨྲས་པ། འཕགས་པ་ཀཱར་ཥཱ་པ་ན་དག་སྩོལ་ཅིག་དང་ལོག་སྟེ་དབུལ་བར་བགྱིའོ། །དེས་དེ་དག་ལ་ཀཱར་ཥཱ་པ་ཎ་དག་བྱིན་ནོ་འདུན་པ་ཕྱ་མཁན་དག་གི་གན་དུ་སོང་སྟེ་སྨྲས་པ། བཞིན་བཟངས་དག་ཁྱེད་ཀྱིས་ཉི་མ་གཅིག་ཁོ་ནས་གཙུག་ལག་ཁང་སུམ་རྩེག་ཟིན་པར་ནུས་སམ། འཕགས་པ་ཀཱར་ཥཱ་པ་ཎ་དག་སྩོལ་ཅིག་དང་ལོག་སྟེ་ལེགས་པར་བགྱིའོ། །དེས་དེ་དག་ལ་ཀཱར་ཥཱ་པ་ཎ་དག་བྱིན་ནོ། །འདུན་པ་ཤིང་མཁན་དག་གི་གན་དུ་སོང་སྟེ་སྨྲས་པ། བཞིན་བཟངས་དག་ཁྱེད་ཀྱིས་ཉི་མ་གཅིག་ཁོ་ནས་གཙུག་ལག་ཁང་སུམ་རྩེག་གི་ཤིང་དག་འཇོག་ནུས་སམ། འཕགས་པ་ཀཱར་ཥཱ་པ་ན་དག་སྩོལ་ཅིག་དང་ལོག་སྟེ་གཞོག་པར་བགྱིའོ། །དེས་དེ་དག་ལ་ཀཱར་ཥཱ་པ་ཎ་དག་བྱིན་ནོ། །འདུན་པ་ཞལ་ཞལ་མཁན་དག་གི་གན་དུ་སོང་སྟེ་སྨྲས་པ། བཞིན་བཟངས་དག་ཁྱེད་ཀྱིས་ཉི་མ་གཅིག་ཁོ་ནས་གཙུག་ལག་ཁང་སུམ་རྩེག་ཞལ་ཞལ་སྐུད་ནུས་སམ། འཕགས་པ་ཀཱར་ཥཱ་པ་ཎ་དག་སྩོལ་ཅིག་དང་ལོག་སྟེ་བསྐུ་བར་བགྱིའོ། །དེས་དེ་དག་ལ་ཀཱར་ཥཱ་པ་ཎ་དག་བྱིན་ནོ། །འདུན་པ་རི་མོ་མཁན་དག་གི་གན་དུ་སོང་སྟེ་སྨྲས་པ། བཞིན་བཟངས་དག་ཁྱེད་ཀྱིས་ཉི་མ་གཅིག་ཁོ་ནས་གཙུག་ལག་ཁང་སུམ་རྩེག་རི་མོ་བྲི་བར་ནུས་སམ། འཕགས་པ་ཀཱར་ཥཱ་པ་ཎ་དག་སྩོལ་ཅིག་དང ། ལོག་སྟེ་བྲི་བར་བགྱིའོ། །དེས་དེ་དག་ལ་ཀཱར་ཥཱ་པ་ཎ་དག་བྱིན་ནོ། །འདུན་པ་གླ་མིའི་སྲངས་དག་ཏུ་སོང་སྟེ། གླ་མི་མང་པོ་བཀུག་ནས་གཙུག་ལག་ཁང་དུ་འོངས་ཏེ། དེས་ཉི་མ་གཅིག་ཁོ་ནས་གཙུག་ལག་ཁང་སུམ་རྩེག་ཟིན་པར་བྱས་སོ། །དེས་དེ་ལ་སྒོའི་སྦུབས་ཀྱི་གནས་དང ། གཏན་པའི་གནས་དང ། སྐར་ཁུང་དང ། ཆུ་ཁུང་གི་གནས་དག་ཀྱང་མ
7.48a
བཞག་པར་དེ་བཞིན་ཁོ་ནར་སྦྱང་འདྲ་བར་བརྩིགས་སོ། །དེ་བྲམ་ཟེ་དེའི་གན་དུ་སོང་སྟེ་སྨྲས་པ། བྲམ་ཟེ་ཁྱོད་ཀྱི་གཙུག་ལག་ཁང་ཟིན་གྱིས་ཚུར་ཤོག་།དགེ་འདུན་ལ་ཕུལ་ཅིག་།བྲམ་ཟེས་སྨྲས་པ། འཕགས་པ་དེང་བདག་གིས་ཞལ་ཟས་སྟ་གོན་མ་བགྱིས་ཀྱིས་སང་བདག་གིས་ཞལ་ཟས་སྟ་གོན་བགྱིས་ཏེ་མཆིའོ། །བཅོམ་ལྡན་འདས་ཀྱིས་དགོངས་པ། གཙུག་ལག་ཁང་འདི་དེང་ཉིད་དུ་རྡིབ་པར་འགྱུར་ཏེ། གལ་ཏེ་ཡོངས་སུ་མ་སྤྱད་པ་ཁོ་ནར་རྡིབ་པར་གྱུར་ན་བྲམ་ཟེ་འདི་ཁྲག་ཚ་བ་སྐྱུག་ཏེ་དུས་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་འདི་སྐད་ཅེས་ངས་དགེ་སློང་དག་ཁྱེད་དགེ་བ་མ་སྤྱོམས་པ་དང ། སྡིག་པ་བཤགས་པར་གྱིས་ཤིག་ཅེས་བསྟན་མོད་ཀྱི་འོན་ཀྱང་ཁྱེད་ཅག་ལས་གང་གིས་གནས་པ་གང་གིས་སྙོམས་པར་འཇུག་པ་ཐོབ་པ་དེས་གནས་པ་དེའི་སྙོམས་པར་འཇུག་པ་དེས་བྲམ་ཟེ་དེའི་གཙུག་ལག་ཁང་དུ་མཚན་མོའི་ཐུན་དང་པོ་འདའ་བར་གྱིས་ཤིག་ཅེས་བསྒོས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་བཀའ་སྩལ་པ། དེས་དགེ་སློང་དག་ཁྱེད་དགེ་བ་མི་སྤྱོམས་པ་དང ། སྡིག་པ་བཤགས་པར་གྱིས་ཤིག་ཅེས་བསྟན་མོད་ཀྱི་འོན་ཀྱང་ཁྱེད་ཅག་ལས་གང་གིས་གནས་པ་གང་གིས་སྙོམས་པར་འཇུག་པ་ཐོབ་པ་དེས་གནས་པ་དེའི་སྙོམས་པར་འཇུག་པ་དེས་བྲམ་ཟེ་འདིའི་གཙུག་ལག་ཁང་དུ་མཚན་མོའི་ཐུན་དང་པོ་འདའ་བར་གྱིས་ཤིག་ཅེས་བྱུང་ངོ ། །དགེ་སློང་དེ་དག་གིས་ཚེ་དང་ལྡན་པ་ཀུན་དགའ་བོ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལས་མཉན་ནས་གང་གིས་གནས་པ་གང་གིས་སྙོམས་པར་འཇུག་པ་ཐོབ་པ་དེས་གནས་པའི་སྙོམས་པར་འཇུག་པ་དེས་བྲམ་ཟེ་དེའི་གཙུག་ལག་ཁང་དུ་མཚན་མོའི་ཐུན་དང་པོ་འདའ་བར་བྱས་སོ། །དེ་ནས་བཅོམ་ལྡན་འདས་མཚན་མོའི་གུང་ཐུན་ལ་དེར་གཤེགས་ནས་བཅོམ་ལྡན་འདས་ཀྱིས་འཇིག་རྟེན་པའི
7.48b
ཐུགས་བསྐྱེད་པ་མཛད་དོ། །སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཉིད་ནི་གལ་ཏེ་འཇིག་རྟེན་པའི་ཐུགས་སྐྱེད་པར་མཛད་ན་ནི་ཐ་ན་སྲོག་ཆགས་གྲོག་སྦུར་གྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་ལ། ཇི་སྟེ་འཇིག་རྟེན་ལས་འདས་པའི་ཐུགས་བསྐྱེད་པར་མཛད་ན་ནི་རང་སངས་རྒྱས་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་མི་ཤེས་ན་ཉན་ཐོས་ལ་སོགས་པས་ལྟ་སྨོས་ཀྱང་ཅི་དགོས། དེ་ནས་ཚངས་པ་དང ། བརྒྱ་བྱིན་ལ་སོགས་པ་ལྷ་རྣམས་འདི་སྙམ་དུ་སེམས་ཏེ། ཅིའི་སླད་དུ་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་སྙམ་པ་དང ། བཅོམ་ལྡན་འདས་བྲམ་ཟེ་དེའི་གཙུག་ལག་ཁང་དུ་མཚན་མོའི་གུང་ཐུན་ལ་ལྷ་རྣམས་ལ་ཆོས་སྟོན་པར་བཞེད་པར་མཐོང་ངོ ། །དེ་ནས་བརྒྱ་བྱིན་དང ། ཚངས་པ་ལ་སོགས་པ་ལྷ་རྣམས་ཀྱིས་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་ནས་འདི་ལྟ་སྟེ། དཔེར་ན་སྐྱེས་བུའི་ལག་པ་བསྐུམ་པ་ལས་རྐྱོང་བར་བྱེད་པ་འམ། བརྐྱང་བ་ལས་སྐུམ་པར་བྱེད་པ་དེ་བཞིན་དུ་ཚངས་པ་དང ། བརྒྱ་བྱིན་ལ་སོགས་པ་ལྷ་རྣམས་ལྷའི་འཇིག་རྟེན་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །བཅོམ་ལྡན་འདས་ཀྱིས་ཀྱང་དེ་དག་ལ་ཆོས་བསྟན་པ་མཛད་ནས་དེ་དག་གིས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་དེ་ཉིད་དུ་མི་སྣང་བར་གྱུར་ཏོ། །བཅོམ་ལྡན་འདས་ཀྱང་དེར་མཚན་མོའི་གུང་ཐུན་འདའ་བར་མཛད་ནས་གཤེགས་སོ། །མཚན་མོའི་ཐུན་ཐ་མ་ལ་སྤྲིན་ཁ་དོག་ལྔ་པ་འདུས་ནས་དེས་གཙུག་ལག་ཁང་དེར་ཇི་ཙམ་དུ་དཔེར་ན་སྦྱང་ཆུས་གང་བར་གྱུར་པ་བཞིན་དུ་ཆུས་གང་བར་གྱུར་པ་དེ་ཙམ་གྱི་ཆར་ཕབ་ནས་ཆུ་དེས་ཅི་ནས་ཀྱང་གཙུག་ལག་ཁང་དེ་ཐམས་ཅད་རྡིབ་པར་གྱུར་པ་དེ་ཙམ་དུ་བངས་པར་གྱུར་ཏོ། །དྲུག་སྡེ་དག་གིས་དེ་ལྟར་གཙུག་ལག་ཁང་དེ་ཐམས་ཅད་རྡིབ་པར་གྱུར་ཏོ་ཞེས་ཐོས་སོ་ཐོས་ནས་ཀྱང
7.49a
དེ་དག་སྐྲག་སྟེ་བྲོས་སོ། །བྲམ་ཟེ་དེས་ཀྱང་ཕྱི་དེ་ཉིན་པར་བཅའ་བ་དང་བཟའ་བ་གཙང་ཞིང་བསོད་པས་ཤིང་རྟ་བཀང་སྟེ་གཙུག་ལག་ཁང་དུ་འོངས་ནས་དེས་དགེ་སློང་རྣམས་ལ་དྲིས་པ། འཕགས་པ་དག་བདག་གི་གཙུག་ལག་ཁང་དེ་གང་ལགས། དེ་ན་རྒན་ཞུགས་དྲུག་སྡེ་དག་དང་ཁོན་ཡོད་པ་ཞིག་འདུག་པས་སྨྲས་པ། བྲམ་ཟེ་ཁྱེད་ཀྱི་གཙུག་ལག་ཁང་དེ་ནི་རྔ་མོ་སྒྱེལ་བ་བཞིན་དུ་འདུག་པ་འདི་ཡིན་གྱིས། ཅི་ནས་ཀྱང་སྒོ་སྐྱེས་ཀྱིས་དཔྲལ་བ་མི་བཅོམ་པ་དེ་ལྟར་བག་གྱིས་ལ་འདིར་ཞུགས་ཤིག་།བྲམ་ཟེ་དེས་སྨྲས་པ། བདག་གིས་གཙུག་ལག་ཁང་ལ་ནོར་གྱི་ཕུང་པོ་འདི་སྙེད་ཅིག་ཡོངས་སུ་བཏང་ན་གཙུག་ལག་ཁང་དེ་ཡང་ཡོངས་སུ་མ་སྤྱད་པ་ཁོ་ནར་རྡིབ་པོ་ཞེས་རིགས་ནས་བརྒྱལ་ཏེ་ས་ལ་འགྱེལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་བྲམ་ཟེ་དེ་ལ་འདི་སྐད་ཅེས་ལྷ་དང་མི་མང་པོ་དག་གིས་དེ་བཞིན་གཤེགས་པ་ལ་བསྔོས་ཏེ། གཙུག་ལག་ཁང་དག་བྱེད་དུ་བཅུག་པ་དེ་དག་ནི་དེ་བཞིན་གཤེགས་པས་ཡོངས་སུ་མ་སྤྱད་ཀྱིས། ཁྱོད་ཀྱི་གཙུག་ལག་ཁང་གང་ཡིན་པ་འདི་ནི་དགེ་སློང་གནས་བརྟན་གནས་བརྟན་དག་གིས་མཚན་མོའི་ཐུན་དང་པོ་ལ་ཡོངས་སུ་སྤྱད་ཅིང ། བཅོམ་ལྡན་འདས་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་དང་བཅས་པས་ཀྱང་མཚན་མོའི་གུང་ཐུན་ལ་ཡོངས་སུ་སྤྱད་པས་ཁྱོད་ཀྱིས་ནི་རྙེད་པ་ལེག་པར་རྙེད་དོ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་བྲམ་ཟེ་དེ་ག་ལ་བ་དེར་སོང་སྟེ་ཕྱིན་ནས་བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་བཅོམ་ལྡན་འདས་ཀྱིས་བཀའ་སྩལ་པ། ལྷ་དང་མི་མང་པོ་དག་གིས་དེ་བཞིན་གཤེགས་པ་ལ་བསྔོས་ཏེ་གཙུག་ལག་ཁང་དག་བྱེད་དུ་བཅུག་པ་དེ་དག་ནི་དེ་བཞིན་གཤེགས་པས་ཡོངས་སུ་མ་སྤྱད་ཀྱིས། ཁྱོད་ཀྱི་གཙུག་ལག་ཁང་འདི་ནི་དགེ་སློང་གནས་བརྟན་གནས་བརྟན་དག་གིས་མཚན་མོའི་ཐུན་དང
7.49b
པོ་ལ་ཡོངས་སུ་སྤྱད་ཅིང ། བཅོམ་ལྡན་འདས་དང་བརྒྱ་བྱིན་དང ། ཚངས་པ་ལ་སོགས་པ་ལྷ་རྣམས་དང་བཅས་པས་ཀྱང་མཚན་མོའི་གུང་ཐུན་ལ་ཡོངས་སུ་སྤྱད་པས་ཁྱོད་ཀྱིས་ནི་རྙེད་པ་ལེགས་པར་རྙེད་དོ་ཞེས་བྱུང་ངོ ། །བཙུན་པ་ཀུན་དགའ་བོ་བདག་གིས་གཙུག་ལག་ཁང་བཅོམ་ལྡན་འདས་ཀྱིས་ཡོངས་སུ་སྤྱད་དམ། བྲམ་ཟེ་ཡོངས་སུ་སྤྱད་དོ། །བཙུན་པ་ཀུན་དགའ་བོ་གལ་ཏེ་བདག་གི་གཙུག་ལག་ཁང་བཅོམ་ལྡན་འདས་ཀྱིས་ཡོངས་སུ་སྤྱད་ན་བདག་བཅོམ་ལྡན་འདས་ཀྱི་སླད་དུ་གདུགས་རེ་རེ་ཞིང་གཙུག་ལག་ཁང་འདི་ལྟ་བུ་ཤ་སྟག་བགྱིད་དུ་སྩོལ་བར་ཡང་སྤྲོའོ། །བདག་གིས་དགེ་བའི་བཤེས་གཉེན་དེ་དག་གར་མཆིས། དྲུག་སྡེ་དག་གིས་བྲམ་ཟེ་དེ་དེ་ལྟར་བདག་ཅག་འདྲིའོ་ཞེས་ཐོས་སོ། །ཐོས་ནས་ཀྱང་མྱུར་བ་མྱུར་བར་ལྷགས་པ་དང ། བྲམ་ཟེ་དེས་དེ་དག་ལ་རས་ཡུག་ཆེན་སར་པ་རེ་རེ་བསྐོན་ཅིང་ཡོ་བྱད་ཐམས་ཅད་ཀྱིས་ཀྱང་བསྟབས་སོ། །དགེ་སློང་རྣམས་ཀྱིས་དེ་དག་ལ་དྲུག་སྡེ་དག་གིས་གཙུག་ལག་ཁང་འདི་འདྲ་བ་བྱེད་དུ་བཅུག་གོ་ཞེས་སྨྲས་པ་དང ། དྲུག་སྡེ་དག་གིས་སྨྲས་པ། ཁོ་བོ་ཅག་གིས་དེ་ལྟར་བྲམ་ཟེ་དེའི་ནོར་དེ་སྙེད་ཆུད་ཟོས་པར་གྱུར་དུ་ཟིན་ཀྱང་འོན་ཀྱང་དེས་ཁོ་བོ་ཅག་ལ་རས་ཡུག་ཆེན་སར་པ་རེ་རེ་བསྐོན་ཅིང་ཡོ་བྱད་ཐམས་ཅད་ཀྱིས་ཀྱང་བསྟབས་པར་གྱུར་པ་དེ་ལྟར་ཁོ་བོ་ཅག་གིས་བྲམ་ཟེ་དེ་མངོན་པར་དད་པར་བྱས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་ཉིད་ཀྱིས་རློམ་པར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག
7.50a
ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་མཛེས་སོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབས་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གཙུག་ལག་ཁང་ཆེན་པོ་ཞིག་རྩིག་ཏུ་འཇུད་ན་སྒོའི་སྦུབས་དང ། གཏན་པ་དང་སྣང་བའི་གནས་ཇི་ཙམ་པའི་འདུ་ཤེས་ཀྱིས་ས་བརྟག་པ་ནས་བཟུང་སྟེ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ། གསུམ་བརྩིགས་པར་བྱའོ། །དེ་ལས་ལྷག་པར་རྩིག་ན་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པས་སོ། །གཙུག་ལག་ཁང་ཞེས་བྱ་བ་ནི་གང་དུ་སྤྱོད་ལམ་བཞི་པོ་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དག་བྱར་རུང་བའོ། །ཆེན་པོ་ཞེས་བྱ་བ་ནི་ཆེན་པོ་གཉིས་ཏེ། སྦྱིན་པར་བྱ་བ་ལས་དང ། ཚད་ལས་ཏེ་དོན་འདིར་ནི་གཉིས་ག་ཡིན་པར་དགོངས་སོ། །རྩིག་ཏུ་འཇུད་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །སྒོའི་སྦུབས་དང་གཏན་པ་ཞེས་བྱ་བ་ནི་སྒོའི་སྦུབས་དང ། གཏན་པ་གཞུག་པར་བྱའོ། །སྣང་བའི་གནས་ཇི་ཙམ་པའི་འདུ་ཤེས་ཀྱི་ཤེས་བྱ་བ་ནི་སྐར་ཁུང་དག་དང་ཆུ་ཁུང་གི་གནས་ཇི་ཙམ་གདོད་པར་བྱ་བའི་འདུ་ཤེས་ཀྱིས་སོ། །ས་བརྟག་པ་ནས་བཟུང་སྟེ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ། གསུམ་ཞེས་བྱ་བ་ལ། ཕ་གུའི་རིམ་པ་ཞེས་བྱ་བ་ནི་ཕ་གུ་རྩེག་མའོ། །འཇིམ་པ་དང་བཅས་པ་ཞེས་བྱ་བ་ནི་ས་འཇིམ་པ་དང་ཅེས་པའོ། །རྩིག་པར་བྱའོ་ཞེས་བྱ་བ་ནི་གཞག་པར་བྱའོ། །དེ་ལས་ལྷག་པར་བརྩིགས་ན་ཞེས་བྱ་བ་ནི་དེ་ལས་ལྷག་པར་འཇོག་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང་ངན་འགྲོ
7.50b
དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཕ་གུའི་རིམ་པ་གཉིས་སམ། གསུམ་ལས་ལྷགས་པར་རྩིགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །རྡོ་འབའ་ཤིག་གམ། སོ་ཕག་གམ། ཐམས་ཅད་ཤིང་ལས་བྱས་པ་འམ། སྦྱིན་བདག་ན་རེ་བྱས་ནས་བལྟའོ། །ཟིན་ནས་བལྟའོ་ཞེས་ཟེར་བ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་འདུན་པ་ལག་གི་བླར་བསྒོ་བར་བགྱིས་པ་བཟློག་པ་ལ་གཟིགས། དགེ་སློང་དག་ད་ལྟར་དུ་མ་ཟད་དེ་འདི་ལྟར་འདས་པའི་དུས་ན་ཡང་འདིས་དེ་བྱའི་རྒྱལ་པོར་དབང་བསྐུར་བར་བྱས་པ་བཟློག་སྟེ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་གངས་ཀྱི་སེར་ཀ་ན་བྱའི་ཚོགས་ཆེན་པོ་འཁོད་པ་དེ་དག་གིས་བྱའི་རྒྱལ་པོ་དུས་ལ་བབ་ནས་དེ་དག་ཅིག་ལ་གཅིག་གནོད་པར་བྱེད་པར་བརྩམས་པ་དང ། དེ་དག་གིས་སྨྲས་པ། ཤེས་ལྡན་དག་བདག་ཅག་གིས་བདག་ཅག་གི་ནང་ན་གང་བདག་ཅག་ལ་ཆད་པས་གཅོད་པ་དང ། ཕན་འདོག་པར་ནུས་པ་འགའ་ཞིག་བྱའི་རྒྱལ་པོར་དབང་བསྐུར་བར་བྱ་ན་བདག་ཅག་གིས་གང་ཞིག་བྱའི་རྒྱལ་པོར་དབང་བསྐུར་བར་བྱ། དེ་ན་ཧ་ཅང་ཐག་མི་རིང་བ་ཞིག་ན་འུག་པ་རྒན་པོ་ཞིག་འདུག་ནས་དེ་དག་གིས་སྨྲས་པ། འུག་པ་རྒན་པོ་འདིས་བྱའི་རྒྱལ་པོར་དབང་བསྐུར་བར་བྱའོ། །དེ་དང་ཧ་ཅང་ཐག་མི་རིང་བ་ཞིག་ན་ནེ་ཙོ་རྒན་པོ་ཞིག་འདུག་ནས། དེ་དག་གིས་སྨྲས་པ། རེ་ཤིག་ནེ་ཙོ་རྒན་པོ་འདི་ལ་ཡང་དྲི་བར་བྱའོ་ཞེས་དེ་དག་དེའི་གན་དུ་སོང་སྟེ་དྲིས་པ་དང ། ནེ་ཙོ་རྒན་པོ་དེས་ཚིགས་སུ་བཅད་པ་སྨྲས་པ། བྱ་རྣམས་འུག་པ་དབང་བསྐུར་དུ། །བདག་ནི་མོས་པ་མ་ཡིན་ཏེ། །མ་ཁྲོས་པ་ཡི་བཞིན་ལ་ལྟོས། །
7.51a
ཁྲོས་ན་ཇི་ལྟ་བྱེད་པར་འགྱུར། །དེ་དག་གིས་དེ་དབང་མ་བསྐུར་བར་ནེ་རྩོ་རྒན་པོ་དེ་ཉིད་བྱའི་རྒྱལ་པོར་དབང་བསྐུར་ཏོ། །དགེ་སློང་དག་དེའི་ཚེ་དེའི་དུས་ན་ནེ་རྩོ་རྒན་པོ་གང་ཡིན་པ་དེ་ནི་ཤཱ་རིའི་བུ་འདི་ཡིན་ནོ། །དེའི་ཚེ་དེའི་དུས་ན་འུག་པ་རྒན་པོ་གང་ཡིན་པ་དེ་ནི་འདུན་པ་འདི་ཉིད་ཡིན་ཏེ། དེའི་ཚེ་ན་ཡང་འདིས་དེ་བྱའི་རྒྱལ་པོར་དབང་བསྐུར་བར་བྱས་པ་བཟློགས་ལ་ད་ལྟར་ཡང་འདིས་དེ་ལག་གིས་བླར་བསྐོ་བར་བྱས་པ་བཟློག་གོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཙུག་ལག་ཁང་གི་ལྟུང་བྱེད་དེ་ཉི་ཤུ་པ་རྫོགས་སྷོ།། ་་་་་་།། སྡོམ་ལ། མ་བསྐོས་ཉི་མ་ནུབ་པ་དང ། །ཟས་དང་ཆོས་གོས་གཉིས་དག་དང ། །དོན་འཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། ་་ ། བར་སྡོམ་ལ། དགའ་བྱེད་བསྟན་པའི་མདོའ་སྡེ་དང ། །དྲུག་སྡེ་ལམ་མདོ་བྱི་རོ་དང ། །མཛོད་གསུམ་འཕགས་འཚོངས་འདུ་ཤེས་མེད། །འཚོ་བྱད་རྟའ་དང་སྨོན་ལམ་མོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་མ་འཕགས་མ་ཉན་ཐོས་ཆེན་མོ་གནས་བརྟན་མོ་གནས་བརྟན་མོ་འདི་ལྟ་བུ་འདི་དག་མཉན་ཡོད་དུ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་པར་ཁས་བླངས་ཏེ་འདི་ལྟ་སྟེ་སྐུལ་བྱེད་མ་དང ། མིན་ད་དང ། མ་ད་དང ། པ་ཋད་ཙ་ར་དང ། འབྲོག་གནས་དང ། བདེ་བ་དང ། ཟླ་བ་དང ། གཽ་ཏ་མའི་སྐེམ་མོ་དང ། ུཏྤ་ལའི་མདོག་དང ། དགེ་སློང་མ་སྐྱེས་དགུའི་བདག་མོ་ཆེན་མོ་གཽ་ཏ་མཱི་དང ། དེ་དག་དང་གཞན་ཡང་དགེ་སློང་མ་ཉན་ཐོས་ཆེན་མོ་གནས་བརྟན་མོ་གནས་བརྟན་མོ་དག་།མཉན་ཡོད་དུ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་པར་ཁས་བླངས་སོ། །དེ་ནས་སྐྱེས་དགུའི་བདག་མོ་གཽ་ཏ་མའི་འཁོར་དགེ་སློང་མ་ལྔ་བརྒྱ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས།
7.51b
བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེས་དགུའི་བདག་མོ་ཆེན་མོ་གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ་ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱིས་དུས་ཡིན་གྱིས་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེས་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང ། རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་སྐྱེས་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི་ད་རྒན་པོ་རྒས་པ་དགོག་ཏུ་གྱུར་པ་ཡིན་པས་འཁོར་བཞི་པོ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དག་ལ་སྟོན་ན་ངལ་བར་འགྱུར་གྱིས། དགེ་སློང་དག་དེ་ལྟ་བས་ན་དེང་ཕྱིན་ཆད་དགེ་སློང་གནས་བརྟན་གནས་བརྟན་རྣམས་ཀྱིས་རེས་ཀྱིས་དགེ་སློང་མ་ལ་སྟོན་ཅིག་།དེའི་ཚེ་ན་དགེ་སློང་གནས་བརྟན་གནས་བརྟན་རྣམས་རེས་ཀྱིས་དགེ་སློང་མ་རྣམས་ལ་སྟོན་པར་བྱེད་དོ། །ཚེ་དང་ལྡན་པ་དགའ་བྱེད་ནི་རེས་བབ་པ་ན་དགེ་སློང་མ་རྣམས་ལ་སྟོན་པར་མི་བཏུབ་བོ། །དེ་ནས་སྐྱེས་དགུའི་བདག་མོ་ཆེན་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེས་དགུའི་བདག་མོ་ཆེན་མོ་གཽ་ཏ་མཱི་ལ
7.52a
ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱིས་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེས་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང ། རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱི་སྐྱེས་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་གནས་བརྟན་གང་དག་དགེ་སློང་མ་ལ་རེས་ཀྱིས་སྟོན་པར་བྱེད། བཙུན་པ་དགེ་སློང་གནས་བརྟན་གནས་བརྟན་དག་ཕལ་ཆེར་དགེ་སློང་མ་ལ་རེས་ཀྱིས་སྟོན་པར་བགྱིད་དེ། ཚེ་དང་ལྡན་པ་དགའ་བྱེད་ནི་རེས་བབ་ཀྱང་དགེ་སློང་མ་ལ་སྟོན་པར་མི་འཚལ་ལོ། །དེའི་ཚེ་ན་ཚེ་དང་ལྡན་པ་དགའ་བྱེད་འཁོར་དེ་ཉིད་ན་འདུག་ཅིང་མཐུན་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བྱེད་ལ་བཀའ་སྩལ་པ། ་དགའ་བྱེད་ཁྱོད་ཀྱིས་དགེ་སློང་མ་ལ་ཐོམས་ཤིག་།དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག་།དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག་།དེ་ཅིའི་ཕྱིར་ཞེ་ན། དགའ་བྱེད་དགེ་སློང་མ་ལ་ང་འམ། ཁྱོད་ཀྱིས་གཏམ་ཀྱང་རུང་ཞིང ། དགེ་སློང་མ་ལ་ང་འམ། ཁྱོད་ཀྱིས་རྗེས་སུ་བསྟན་ཀྱང་རུང་ལ། དགེ་སློང་མ་རྣམས་ལ་ང་འམ། ཁྱོད་ཀྱིས་ཆོས་དང་ལྡན་པའི་གཏམ་བྱར་ཡང་རུང་བའི་ཕྱིར་རོ། །ཚེ་དང་ལྡན་པ་དགའ་བྱེད་ཀྱིས་ཅང་མ་སྨྲས་པའི་བཅོམ་ལྡན་འདས་ལས་དང་དུ་བླངས་སོ། །དེ་ནས་ཚེ་དང་ལྡན་པ་དགའ་བྱེད
7.52b
ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་དགའ་བྱེད་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་ནས་མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ། །དེ་ནས་ཚེ་དང་ལྡན་པ་དགའ་བྱེད་ཕྱེམ་བྲེད་ནང་དུ་ཡང་དག་འཇོག་ལས་ལངས་ནས་སྣམ་སྦྱར་ཐོག་ཏེ་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ག་ལ་བ་དེར་སོང་ངོ ། །དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཚེ་དང་ལྡན་པ་དགའ་བྱེད་ཀྱི་ཕྱིར་བསྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་དགའ་བྱེད་ཚུར་གཤེགས། བཙུན་པ་དགའ་བྱེད་བྱོན་པ་ལེགས་སོ། །བཙུན་པ་དགའ་བྱེད་གདན་བཤམས་པ་ཉིད་ལ་བཞུགས་སུ་གསོལ། ཚེ་དང་ལྡན་པ་དགའ་བྱེད་སྟན་བཤམས་པ་ཉིད་ལ་འདུག་གོ། །དེ་ནས་དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་ཕྱག་འཚལ་ཏེ་མཐའ་ཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཚེ་དང་ལྡན་པ་དགའ་བྱེད་ཀྱིས་དགེ་སློང་མ་དེ་དག་ལ་འདི་སྐད་ཅེས་སྨྲས་སོ། །སྲིང་མོ་དག་ཁྱེད་ཅག་རྣམ་པར་སེལ་བ་ཡོངས་སུ་དྲིས་ཤིག་དང ། ཆོས་དང་ལྡན་པའི་གཏམ་བརྗོད་པར་བྱའོ། །དེ་ལ་ཁྱེད་ཀྱིས་ཀུན་ཤེས་པ་དག་གིས་ཀྱང་ཀུན་ཤེས་སོ་ཞེས་བརྗོད་པར་གྱིས་ཤིག་།ཀུན་མི་ཤེས་པ་དག་གིས་ཀྱང་ཀུན་མི་ཤེས་སོ་ཞེས་བརྗོད་པར་གྱིས་ཤིག་།གང་གིས་སྨྲས་པ་གང་གིས་དོན་ཀུན་ཤེས་པ་དེས་ནི་དེ་ཁོ་ན་བཞིན་དུ་ཟུང་ཤིག་།གང་གིས་སྨྲས་པ་གང་གིས་དོན་ཀུན་མི་ཤེས
7.53a
པ་དེས་ནི་བདག་ཉིད་ལ་བཙུན་པ་དགའ་བྱེད་སྨྲས་པ་འདིའི་དོན་ཅི་ལགས། འདི་ཇི་ལྟ་བུ་ལགས་ཤེས་ཡོངས་སུ་དྲིས་ཤིག་།བཙུན་པ་དགའ་བྱེད་གང་གི་སླད་དུ་བཙུན་པ་དགའ་བྱེད་ཀྱིས་དེ་སྐད་ཅེས་སྲིང་མོ་དག་ཁྱེད་ཅག་རྣམ་པར་སེལ་བ་དྲིས་ཤིག་དང་ཆོས་དང་ལྡན་པའི་གཏམ་བརྗོད་པར་བྱའོ། །དེ་ལ་ཁྱེད་ཀྱིས་ཀུན་ཤེས་པ་དག་གིས་ཀྱང་ཀུན་ཤེས་སོ་ཞེས་བརྗོད་པར་གྱིས་ཤིག་།ཀུན་མི་ཤེས་པ་དག་གིས་ཀྱང་ཀུན་མི་ཤེས་སོ་ཞེས་བརྗོད་པར་གྱིས་ཤིག་།གང་གིས་སྨྲས་པ་གང་གིས་དོན་ཀུན་ཤེས་པ་དེས་ནི་དེ་ཁོ་ན་བཞིན་དུ་ཟུང་ཤིག་།གང་གིས་སྨྲས་པ་གང་གིས་དོན་ཀུན་མི་ཤེས་པ་དེས་ནི་བདག་ཉིད་ལ་བཙུན་པ་དགའ་བྱེད་སྨྲས་པ་འདིའི་དོན་ཅི་ལགས་འདི་ཇི་ལྟ་བུ་ལགས་ཞེས་ཡོངས་སུ་དྲིས་ཤིག་ཅེས་བཀའ་སྩལ་པ་དེ་ཉིད་ཀྱིས་བདག་ཅག་གློ་བ་དགའ་ཞིང་རངས་པར་གྱུར་ཏོ། །བཙུན་པ་དགའ་བྱེད་ཆོས་གསུངས་ཤིག་དང་བདག་ཅག་གིས་ཀུན་འཚལ་བ་དག་གིས་ཀྱང་ཀུན་འཚལ་ཏོ་ཞེས་བརྗོད་པར་བགྱིའོ། །ཀུན་མ་འཚལ་བ་དག་གིས་ཀྱང་ཀུན་མ་འཚལ་ཏོ་ཞེས་བརྗོད་པར་བགྱིའོ། །གང་གིས་སྨྲས་པ་གང་གིས་དོན་ཀུན་འཚལ་བ་དེས་ནི་དེ་ཁོ་ན་བཞིན་དུ་གཟུངས་བར་བགྱིའོ། །གང་གིས་སྨྲས་པ་གང་གིས་དོན་ཀུན་མ་འཚལ་བ་དེས་ནི་བཙུན་པ་དགའ་བྱེད་ཉིད་ལ་བཙུན་པ་དགའ་བྱེད་སྨྲས་པ་འདིའི་དོན་ཅི་ལགས་འདི་ཇི་ལྟ་བུ་ལགས་ཤེས་ཡོངས་སུ་དྲི་བར་བགྱིའོ། །སྲིང་མོ་དག་ཁྱེད་ཀྱིས་ནང་གི་སྐྱེ་མཆེད་མིག་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །སྲིང་མོ་དག་ཁྱེད་ཀྱིས་ནང་གིས་སྐྱེ་མཆེད་རྣ་བ་དང ། སྣ་དང ། ལྕེ་དང ། ལུས་དང ། ཡིད་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་བདག
7.53b
ཅག་གིས་སེམས་ཀྱང་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་ཕྱི་རོལ་གྱི་སྐྱེ་མཆེད་གཟུགས་དག་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །སྲིང་མོ་དག་ཁྱེད་ཀྱིས་ཕྱི་རོལ་གྱི་སྐྱེ་མཆེད་སྒྲ་དག་དང ། དྲི་དག་དང ། རོ་དག་དང ། རེག་བྱ་དག་དང ། ཆོས་དག་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་སླད་རོལ་གྱི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང ། བདག་ཅག་གིས་སེམས་ཀྱང་ཇི་ལྟར་སླད་རོལ་གྱི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་ཕྱི་རོལ་གྱི་སྐྱེ་མཆེད་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བའི་མིག་གི་རྣམ་པར་ཤེས་པ་དེ་ལ་འདི་ནི་བདག་གིའོ། །འདི་ནི་བདག་གོ་འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །སྲིང་མོ་དག་ཁྱེད་ཀྱིས་རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་བའི་ཡིད་ཀྱི་རྣམ་པར་ཤེས་པ་དེ་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག
7.54a
གིས་དང་པོ་ཉིད་ནས་ཇི་ལྟར་རྣམ་པར་ཤེས་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང ། བདག་ཅག་གིས་སེམས་ཀྱང་ཇི་ལྟར་རྣམ་པར་ཤེས་པ་ཡི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་རྣམ་པར་ཤེས་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པའི་མིག་གི་འདུས་ཏེ་རེག་པ་དེ་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །སྲིང་མོ་དག་ཁྱེད་ཀྱི་རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་ཞིང ། གསུམ་འདུས་པ་ལས་རེག་པའི་ཡིད་ཀྱི་འདུས་ཏེ་རེག་པ་དེ་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །དེ་ཅིའི་ཕྱིར་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་རེག་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་བདག་ཅག་གིས་སེམས་ཀྱང་ཇི་ལྟར་རེག་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་རེག་པའི་ཚོག་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང ། གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བའི་མིག་གི་འདུས་ཏེ་རེག་པ་ལས་བྱུང་བའི་ཚོར་བ་དེ་ལ་འདི་ནི་བདག་གིའོ། །འདི་ནི་བདག་གོ། །
7.54b
འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །སྲིང་མོ་དག་ཁྱེད་ཀྱིས་རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བའི་ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་དེ་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་ཚོར་བའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་བདག་ཅག་གིས་སེམས་ཀྱང་ཇི་ལྟར་ཚོར་བའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་རེག་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང ། གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པའི་མིག་གི་འདུས་ཏེ་རེག་པ་ལས་བྱུང་བའི་སྲེད་པ་དེ་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །སྲིང་མོ་དག་ཁྱེད་ཀྱིས་རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་ཞིང ། གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པའི་ཡིད་ཀྱི་འདུས་ཏེ་རེག་པ་ལས་བྱུང་བའི་སྲིད་པ་དེ་ལ་འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་སྲིད་པའི
7.55a
ཚོགས་དྲུག་པོ་འདི་དག་ནི་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང ། བདག་ཅག་གིས་སེམས་ཀྱང་ཇི་ལྟར་སྲེད་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་སྲེད་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་འདི་ལྟ་སྟེ་དཔེར་ན་འབྲུ་མར་དང ། མར་མེའི་སྙིང་པོ་ལ་བརྟེན་ནས་འབྲུ་མར་གྱི་མར་མེ་འབར་བར་འགྱུར་ཞིང ། འབྲུ་མར་གྱི་མར་མེ་དེའི་འབྲུ་མར་ཡང་མི་རྟག་པ་ཡིན། མར་མེའི་སྙིང་པོ་དང ། མེ་ལྕེ་དང་སྣོད་ཀྱང་མི་རྟག་པ་ཡིན་ན། སྲིང་མོ་དག་གང་འདི་སྐད་ཅེས་དེའི་འབྲུ་མར་མེད་པ་དང་མར་མེའི་སྙིང་པོ་དང ། མེ་ལྕེ་དང ། སྣོད་མེད་ན་ཡང་དེ་ལ་བརྟེན་པའི་སྣང་བ་གང་ཡིན་པ་དེ་རྟག་པ། བརྟན་པ་ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་དུ་གནས་པར་འགྱུར་རོ་ཞེས་ཟེར་ན། དེ་སྐད་ཟེར་བ་དེ་ཡང་དག་པར་སྨྲས་པ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་འདི་ལྟར་འབྲུ་མར་གྱི་མར་མེ་དེའི་འབྲུ་མར་ཡང་མི་རྟག་པ་ལགས། མར་མེའི་སྙིང་པོ་དང ། མེ་ལྕེ་དང ། སྣོད་ཀྱང་མི་རྟག་པ་ལགས་ལ། དེའི་འབྲུ་མར་མ་མཆིས་ཤིང ། ཞུན་མར་གྱི་སྙིང་པོ་དང ། མེ་ལྕེ་དང ། སྣོད་མ་མཆིས་ན་དེ་ལ་བརྟེན་པའི་སྣང་བ་གང་ལགས་པ་དེ་ཐམས་ཅད་དུ་མི་འབྱུང་བའི་སླད་དུའོ། །སྲིང་མོ་དག་དེ་བཞིན་དུ་ནང་གི་སྐྱེ་མཆེད་དྲུག་པོ་མི་རྟག་པ་འདི་དག་ལ་གང་འདི་སྐད་ཅེས་ནང་གི་སྐྱེ་མཆེད་དྲུག་པོ་མི་རྟག་པ་འདི་དག་ལ་བརྟེན་ནས་བདེ་བ་དང ། ཡིད་བདེ་བ་སྐྱེད་པ་གང་ཡིན་པ་དེ་རྟག་པ། བརྟན་པ་ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་དུ་གནས་པར་འགྱུར་རོ། །ཞེས་ཟེར་ན་དེ་སྐད་ཅེས་ཟེར་བ་དེ་ཡང་དག་པར་སྨྲ་བ་ཡིན་ནམ་བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་མི་རྟག་པ
7.55b
དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང ། བདག་ཅག་གིས་སེམས་ཀྱང་ཇི་ལྟར་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེས་པར་འགྱུར་ཞིང ། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང ། ཉེ་བར་ཞི་བར་འགྱུར་བ་དང ། བསིལ་བར་འགྱུར་བ་དང ། ནུབ་པར་འགྱུར་བ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་མི་རྟག་ཅིང་ཆོས་དེ་དང་དེ་དག་སྐྱེ་བས་ཆོས་དེ་དང་དེ་དག་སྐྱེ་བར་འགྱུར་ཞིང ། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང ། ཉེ་བར་ཞི་བར་འགྱུར་བ་དང ། བསིལ་བར་འགྱུར་བ་དང ། ནུབ་པར་འགྱུར་བ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་འདི་ལྟ་སྟེ་དཔེར་ན་ཤིང་ལྗོན་པ་ཆེན་པོ་རྩ་བ་དང་ལྡན་པ། སྡོང་པོ་དང་ལྡན་པ། སྙིང་པོ་དང་ལྡན་པ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་དང་ལྡན་པའི་རྩ་བ་ཡང་མི་རྟག་པ་ཡིན། སྡོང་པོ་དང ། སྙིང་པོ་དང ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་ཡང་མི་རྟག་པ་ཡིན་ན་སྲིང་མོ་དག་གང་འདི་སྐད་ཅེས་དེའི་རྩ་བ་མེད་པ་དང ། སྡོང་པོ་དང ། སྙིང་པོ་དང ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་མེད་ན་ཡང་དེ་ལ་བརྟེན་པའི་གྲིབ་མ་གང་ཡིན་པ་དེ་རྟག་པ། བརྟན་པ་ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་གནས་པར་འགྱུར་རོ་ཞེས་ཟེར་ན། དེ་སྐད་ཟེར་བ་དེ་ཡང་དག་པར་སྨྲ་བ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་འདི་ལྟར་ཞུགས་ཤིང་ལྗོན་པ་ཆེན་པོ་རྩ་བ་དང་ལྡན་པ། སྡོང་པོ་དང་ལྡན་པ། སྙིང་པོ་དང་ལྡན་པ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་དང་ལྡན་པ། དེའི་རྩ་བ་ཡང་མི་རྟག་པ་ལགས། སྡོང་པོ་དང ། སྙིང་པོ་དང ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་ཡང་མི་རྟག་པ་ལགས་ལ། དེའི་རྩ་བ་མ་མཆིས་ཤིང ། སྡོང་པོ་དང ། སྙིང་པོ་དང ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་མ་མཆིས་ན། དེ་ལ་བརྟེན་པའི་གྲིབ་མ་གང་ལགས་པ་དེ་ཐམས་ཅད་ཀྱི་ཐམས་ཅད་དུ་མི་འབྱུང་བའི
7.56a
སླད་དུའོ། །སྲིང་མོ་དག་དེ་བཞིན་དུ་ཕྱི་རོལ་གྱི་སྐྱེ་མཆེད་དྲུག་པོ་མི་རྟག་པ་འདི་དག་ལ་གང་འདི་སྐད་ཅེས་ཕྱི་རོལ་གྱི་སྐྱེ་མཆེད་དྲུག་པོ་མི་རྟག་པ་འདི་དག་ལ་བརྟེན་ནས་བདེ་བ་དང ། ཡིད་བདེ་བ་སྐྱེས་པ་གང་ཡིན་པ་དེ་རྟག་པ། བརྟན་པ། ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་དུ་གནས་པར་འགྱུར་རོ་ཞེས་ཟེར་ན་དེ་སྐད་ཟེར་བ་དེ་ཡང་དག་པར་སྨྲ་བ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་སླད་རོལ་གྱི་སྐྱེ་མཆེད་དྲུག་པོ་འདི་དག་མི་རྟག་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པའི་ལྟ་བ་བཞིན་དུ་མཐོང་ཞིང ། བདག་ཅག་གི་སེམས་ཀྱང་ཇི་ལྟར་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེ་བར་འགྱུར་ཞིང ། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང ། ཉེ་བར་ཞི་བར་འགྱུར་བ་དང ། བསིལ་བར་འགྱུར་བ་དང ། ནུབ་པར་འགྱུར་བ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་ཕྱི་རོལ་གྱི་སྐྱེ་མཆེད་དྲུག་པོ་འདི་དག་མི་རྟག་ཅིང་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེ་བར་འགྱུར་ཞིང ། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང ། ཉེ་བར་ཞི་བར་འགྱུར་བ་དང ། བསིལ་བར་འགྱུར་བ་དང ། ནུབ་པར་འགྱུར་བ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་འདི་ན་སྐྱེ་བུ་མཁས་པ་དག་དཔེ་སྨྲས་པ་དོན་ཀུན་ཤེས་པར་འགྱུར་བས་དེའི་ཕྱིར་རེ་ཤིག་དཔེ་ཉོན་ཅིག་།སྲིང་མོ་དག་འདི་ལྟ་སྟེ་དཔེར་ན་བ་ལང་གསོད་པ་འམ། བ་ལང་གསོད་པའི་སློབ་མ་མཁས་པ་ཞིག་གིས་བ་ལང་བཤའ་བའི་གྲི་རྣོན་པོས་བ་ལང་བསད་དེ་དེའི་ནང་གི་ཤའི་ཚོགས་ཀྱང་མ་ཉམས་ཕྱི་རོལ་གྱི་ལྤགས་པའི་ཚོགས་ཀྱང་མ་ཉམས་པར་བར་གྱི་ཆུ་རྒྱུས་དང ། བར་གྱི་གློ་བ་དང ། བར་གྱི་མཆིན་པ་དང ། བར་གྱི་རྩ་རྒྱུན་གང་ཡིན་པ་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་བརྡུང་བར་བྱེད། ཀུན་དུ་བསྙལ་བར་བྱེད་ཅིང་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་བརྡུང །
7.56b
ཀུན་དུ་བསྙལ་ཏེ་ཡང་བ་ལང་གི་ཀོ་བས་གཡོགས་པར་གྱུར་པ་དེ་ལ་སྲིང་མོ་དག་གང་འདི་སྐད་ཅེས་བ་ལང་ཀོ་བ་དང་ལྡན་པ་ཡིན་གྱི་བྲལ་བ་མ་ཡིན་ནོ་ཞེས་ཟེར་ན་དེ་སྐད་ཟེར་བ་དེ་ཡང་དག་པར་སྨྲ་བ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་འདི་ལྟར་བ་ལང་འགུམས་པ་འམ། བ་ལང་འགུམས་པའི་སློབ་མ་མཁས་པས་བ་ལང་འགུམས་པའི་གྲི་རྣོན་པོས་བ་ལང་བཀུམ་སྟེ་ནང་གི་ཤའི་ཚོགས་ཀྱང་མ་ཉམས་སླད་རོལ་གྱི་ལྤག་པའི་ཚོགས་ཀྱང་མ་ཉམས་པར་བར་གྱི་ཆུ་རྒྱུས་དང ། བར་གྱི་གློ་བ་དང ། བར་གྱི་མཆིན་པ་དང ། བར་གྱི་རྩ་རྒྱུན་གང་ལགས་པ་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་བརྡུང་བར་བགྱིད། ཀུན་དུ་བསྙལ་བར་བགྱིད་ཅིང་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་བརྡུངས། ཀུན་དུ་བསྙལ་ཏེ་ཡང་བ་ལང་གི་ཀོ་བས་གཡོགས་པར་གྱུར་པ་དེ་ནི་བཙུན་པ་དགའ་བྱེད་བ་ལང་ཀོ་བ་དང་ལྡན་པ་མ་ལགས་ཀྱིས་བྲལ་བ་ལགས་པའི་སླད་དུའོ། །སྲིང་མོ་དག་དེ་ལྟར་ཇི་ཙམ་དུ་དོན་རྣམ་པར་རིག་པར་བྱ་བའི་ཕྱིར་དཔེ་དེ་བྱས་ཏེ། འདི་ལ་དོན་ནི་འདི་ཡིན་པར་བལྟ་བར་བྱ་སྟེ། སྲིང་མོ་དག་བ་ལང་ཞེས་བྱ་བ་དེ་ནི་ལུས་གཟུགས་ཅན་རགས་པ་འབྱུང་བ་ཆེན་པོ་བཞི་ལས་གྱུར་པ། ཕ་མའི་མི་གཙང་བ་མེར་མེར་པོ་ལས་བྱུང་བ། འབྲས་ཆན་དང་ཟན་དྲོན་གྱིས་ཉེ་བར་བསགས་པ། རྟག་ཏུ་བྱུག་པ་དང ། ཁྲུས་དང ། མཉེ་བ་དང ། འབྱེ་བ་དང ། རྣམ་པར་འཐོར་བ་དང ། རྣམ་པར་འཇིག་པའི་ཆོས་ཅན་གང་ཡིན་པའི་ཚིག་བླ་དགས་ཡིན་ནོ། །ནང་གི་ཤའི་ཚོགས་ཤེས་བྱ་བ་དེ་ནི་ནང་གི་སྐྱེ་མཆེད་དྲུག་པོ་དག་གི་ཚིག་བླ་དགས་ཡིན་ནོ། །ཕྱི་རོལ་གྱི་ལྤགས་པའི་ཚོགས་ཤེས་བྱ་བ་དེ་ནི་ཕྱི་རོལ་གྱི་སྐྱེ་མཆེད་དྲུག་པོ་དག་གི་ཚིག་བླ་དགས་ཡིན་ནོ། །བར་གྱི་ཆུ་རྒྱུས་དང ། བར་གྱི་གློ་བ་དང ། བར་གྱི་མཆིན་པ་དང ། བར་གྱི་རྩ་རྒྱུན་ཞེས་བྱ་བ་དེ་ནི་དགའ་བའི་འདོད་ཆགས་ཀྱི་ཚིག་བླ་དགས་ཡིན་ནོ། །བ་ལང་གསོད་པ་འམ། བ་ལང་གསོད་པའི་སློབ་མ་མཁས་པ་ཞེས་བྱ་བ་དེ་ནི་འཕགས་པའི་ཉན
7.57a
ཐོས་ཐོས་པ་དང་ལྡན་པའི་ཚིགས་བླ་དགས་ཡིན་ནོ། །གྲི་ཞེས་བྱ་བ་དེ་ནི་ཤེས་རབ་ཀྱི་མཚོན་གྱི་ཚིགས་བླ་དགས་ཡིན་ནོ། །སྲིང་མོ་དག་འཕགས་པའི་ཉན་ཐོས་ཐོས་པ་དང་ལྡན་པས་ཤེས་རབ་ཀྱི་མཚོན་གྱིས་ཀུན་དུ་སྦྱོར་བ་དང ། འཆིང་བ་དང ། བག་ལ་ཉལ་བ་དང ། ཉེ་བའི་ཉོན་མོངས་པ་དང ། ཀུན་ནས་དཀྲིས་པ་ཐམས་ཅད་ཀུན་དུ་གཅོད་པར་བྱེད། ཀུན་དུ་འདྲལ་བར་བྱེད། ཀུན་དུ་བརྡུངས་བར་བྱེད། ཀུན་དུ་བསྙལ་བར་བྱེད་དོ། །སྲིང་མོ་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤངས་པའི་ཕྱིར་ཆགས་པར་འགྱུར་བའི་ཆོས་རྣམས་ལ་བདག་གི་སེམས་གང་ཡིན་པ་ཆགས་པར་མི་འགྱུར་བ་དང ། ཞེ་སྡང་སྤངས་པའི་ཕྱིར་ཞེ་སྡང་བར་འགྱུར་བའི་ཆོས་རྣམས་ལ་བདག་གི་སེམས་གང་ཡིན་པ་ཞེ་སྡང་བར་མི་འགྱུར་བ་དང ། གཏི་མུག་སྤངས་པའི་ཕྱིར་རྨོངས་པར་འགྱུར་བའི་ཆོས་རྣམས་ལ་བདག་གི་སེམས་གང་ཡིན་པ་རྨོངས་པར་མི་འགྱུར་བ་དེ་ལྟར་བསླབ་པར་བྱའོ། །སྲིང་མོ་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། ཉེ་བར་ལེན་པའི་ཕུང་པོ་ལྔ་པོ་དག་ལ་འབྱུང་བ་དང་འཇིག་པར་རྗེས་སུ་ལྟ་ཞིང་གནས་པར་བྱའོ། །རེག་པའི་སྐྱེ་མཆེད་དྲུག་པོ་དག་ལ་ཀུན་འབྱུང་བ་དང་ནུབ་པར་འགྱུར་བར་རྗེས་སུ་ལྟ་ཞིང་གནས་པར་བྱའོ། །དྲན་པ་ཉེ་བར་གཞག་པ་བཞི་པོ་དག་ལ་སེམས་ཉེ་བར་བཞག་ཅིང་གནས་པར་བྱའོ། །དྲན་པ་ཉེ་བར་གཞག་པ་བཞི་པོ་དག་ལ་སེམས་ལེགས་པར་ཉེ་བར་བཞག་ཅིང་གནས་ན་བྱང་ཆུབ་ཀྱི་ཡན་ལག་བདུན་པོ་དག་ཀུན་དུ་བསྟེན་པར་བྱ། གོམ་པར་བྱ། ལན་མང་དུ་བྱའོ། །ཞེས་དེ་ལྟར་བསླབ་པར་བྱའོ། །སྲིང་མོ་དག་ཁྱེད་ཀྱིས་བྱང་ཆུབ་ཀྱི་ཡན་ལག་བདུན་པོ་དག་ཀུན་དུ་བསྟེན་པའི་རྒྱུ་དང ། གོམས་པར་བྱས་པའི་རྒྱུ་དང ། ལན་མང་དུ་བྱས་པའི་རྒྱུ་དང་ལེགས་པར་ཡིད་ལ་བྱས་པའི་རྒྱུས་འདོད་པའི་ཟག་པ་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བ་དང ། སྲིད་པའི་ཟག་པ་དང་མ་རིག་པའི་ཟག་པ་ལས་སེམས་འདོད་ཆགས་དང་བྲལ
7.57b
ཞིང་རྣམ་པར་གྲོལ་བར་འགྱུར་རོ། །སྲིང་མོ་དག་ཁྱེད་ཅག་རྣམ་པར་གྲོལ་བ་དག་ལ་བདག་ཅག་སྐྱེ་བ་ནི་ཟད། ཚངས་པར་སྤྱོད་པ་ནི་སྤྱད། བྱ་བ་ནི་བྱས་སྲིད་པ་འདི་ལས་གཞན་ནི་མི་ཤེས་སོ་ཞེས་རྣམ་པར་གྲོལ་བའི་ཤེས་པ་དང་མཐོང་བ་སྐྱེ་བར་འགྱུར་གྱིས། སྲིང་མོ་དག་ཁྱེད་ཀྱིས་དེ་ལྟར་བསླབ་པར་བྱའོ། །དེ་ནས་ཚེ་དང་ལྡན་པ་དགའ་བྱེད་དགེ་སློང་མ་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ་ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱི་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབ་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་དེ་ནས་བཅོམ་ལྡན་འདས་ཀྱི་སྐྱེ་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་རིགས་ཀྱི་བུ་དགའ་བྱེད་ཀྱི་དགེ་སློང་མ་ལྔ་བརྒྱ་པོ་དག་ལ་ལེགས་པར་གཏམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་མ་ཐོབ་ཀྱང་འདིའི་ཚེ་དུས་བྱེད་པར་གྱུར་ན་ངས་དེ་དག་ཀུན་དུ་སྦྱོར་བ་གང་དང་ལྡན་པས་ཡང་འཇིག་རྟེན་འདིར་འོང་བར་འགྱུར
7.58a
བའི་ཀུན་དུ་སྦྱོར་བ་གཅིག་མ་སྤངས་པར་ཡང་དག་པར་རྗེས་སུ་མ་མཐོང་བ་ལ་ལྟོས། དགེ་སློང་དག་འདི་ལྟ་སྟེ་དཔེར་ན་ཟླ་བ་ཡར་གྱི་ངོ་དེ་ཉིད་ཀྱི་ཚེས་བཅུ་བཞི་ལ་བབ་པ་ན་མི་དག་ཟླ་བ་ལ་ཉ་འམ། ཉ་མ་ཡིན་ཞེས་གཉིས་སུ་འབྱེད་པར་བྱེད་དེ། འདི་ལྟར་ཉ་མ་ཡིན་པའི་ཕྱིར་མཐར་ཐུག་པ་ཉིད་དུ་མ་གྱུར་པ་དེ་བཞིན་དུ་རིགས་ཀྱི་བུ་དགའ་བྱེད་ཀྱིས་དགེ་སློང་མ་ལྔ་བརྒྱ་པོ་དག་ལ་ལེགས་པར་གཏམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་མ་ཐོབ་ཀྱང་འདིའི་ཚེ་དུས་བྱེད་པར་གྱུར་ན། ངས་དེ་དག་ཀུན་སྦྱོར་བ་གང་དང་ལྡན་པས་ཡང་འཇིག་རྟེན་འདིར་འོང་བར་འགྱུར་བའི་ཀུན་དུ་སྦྱོར་བ་གཅིག་མ་སྤངས་པར་ཡང་དག་པར་རྗེས་སུ་མ་མཐོང་ངོ ། །དེ་ལྟར་དེ་ནས་བཅོམ་ལྡན་འདས་ཀྱིས་དགེ་སློང་མ་ལྔ་བརྒྱ་པོ་དག་ཕྱིར་མི་འོང་བ་ཉིད་དུ་ལུང་བསྟན་ཏོ། །དེ་ནས་བཅོམ་ལྡན་འདས་ཀྱིས་ཡང་ལན་གཉིས་སུ་ཚེ་དང་ལྡན་པ་དགའ་བྱེད་ལ་བཀའ་སྩལ་པ། དགའ་བྱེད་ཁྱོད་ཀྱིས་དགེ་སློང་མ་ལ་འདོམས་ཤིག་།དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག་།དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག་།དེ་ཅིའི་ཕྱིར་ཞེ་ན། དགའ་བྱེད་དགེ་སློང་མ་ལ་ང་འམ། ཁྱོད་ཀྱིས་གཏམས་ཀྱང་རུང་ཞིང་དགེ་སློང་མ་ལ་ང་འམ། ཁྱོད་ཀྱིས་རྗེས་སུ་བསྟན་ཀྱང་རུང་ལ། དགེ་སློང་མ་རྣམས་ལ་ང་འམ། ཁྱོད་ཀྱིས་ཆོས་དང་ལྡན་པའི་གཏམ་བྱར་ཡང་རུང་བའི་ཕྱིར་རོ། །ཚེ་དང་ལྡན་པ་དགའ་བྱེད་ཀྱིས་ཅང་མི་སྨྲ་བས་བཅོམ་ལྡན་འདས་ལས་དང་དུ་བླངས་སོ། །དེ་ནས་ཚེ་དང་ལྡན་པ་དགའ་བྱེད་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་དགའ་བྱེད་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེས་མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི
7.58b
བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ། །དེ་ནས་ཚེ་དང་ལྡན་པ་དགའ་བྱེད་ཕྱེམ་ཕྲེད་ནང་དུ་ཡང་དག་འཇོག་ལས་ལངས་ནས་སྣམ་སྦྱར་ཐོགས་ཏེ་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ག་ལ་བ་དེར་སོང་ངོ ། །དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ཚེ་དང་ལྡན་པ་དགའ་བྱེད་ཀྱི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་དགའ་བྱེད་ཚུར་གཤེགས། བཙུན་པ་དགའ་བྱེད་བྱོན་པ་ལེགས་སོ། །བཙུན་པ་དགའ་བྱེད་གདན་བཤམས་པ་ཉིད་ལ་བཞུགས་སུ་གསོལ། ཚེ་དང་ལྡན་པ་དགའ་བྱེད་སྟན་བཤམས་པ་ཉིད་ལ་འདུག་གོ། །དེ་ནས་དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཚེ་དང་ལྡན་པ་དགའ་བྱེད་དགེ་སློང་མ་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་འཁོར་དགེ་སློང་མ་ལྔ་བརྒྱ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །
7.59a
རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱིས་སོང་ཤིག་ཅེས་བསྐལ་བར་མཛད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་རིགས་ཀྱི་བུ་དགའ་བྱེད་ཀྱིས་དགེ་སློང་མ་ལྔ་བརྒྱ་པོ་དག་ལ་ལེགས་པར་གདམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་ཐོབ་སྟེ། འདིའི་ཚེ་དུས་བྱེད་པར་གྱུར་ན་དེ་དག་གིས་ལམ་གདགས་སུ་མེད་དེ་འདི་སྡུག་བསྔལ་གྱི་མཐར་གྱུར་པ་ལ་ལྟོས། དགེ་སློང་དག་འདི་ལྟ་སྟེ་དཔེར་ན་ཟླ་བ་ཡར་གྱི་ངོ་དེ་ཉིད་ཀྱི་ཚེས་བཅཝ་ལྔ་ལ་བབ་པ་ན་མི་དག་ཟླ་བ་ཉ་འམ། ཉ་མ་ཡིན་ཞེས་གཉིས་སུ་འབྱེད་པར་མི་བྱེད་དེ། འདི་ལྟར་ཉ་ཡིན་པའི་ཕྱིར་མཐར་ཐུག་པ་ཉིད་དུ་གྱུར་པ་དེ་བཞིན་དུ་རིགས་ཀྱི་བུ་དགའ་བྱེད་ཀྱིས་དགེ་སློང་མ་ལྔ་བརྒྱ་པོ་དག་ལ་ལེགས་པར་གདམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་ཐོབ་སྟེ་འདིའི་ཚེ་དུས་བྱེད་པར་གྱུར་ན་དེ་དག་གིས་ལམ་གདགས་སུ་མེད་དེ། འདི་ཉིད་སྡུག་བསྔལ་གྱི་མཐར་གྱུར་པ་ཡིན་ནོ། །དེ་ལྟར་དེ་ན་བཅོམ་ལྡན་འདས་ཀྱིས་དགེ་སློང་མ་ལྔ་བརྒྱ་པོ་དག་མཆོག་ཉིད་དུ་ལུང་བསྟན་ཏོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གནས་བརྟན་གནས་བརྟན་དག་གི་རེས་ཀྱིས་དགེ་སློང་མ་ལ་བསྟན་པར་བྱའོ། །ཞེས་བཀའ་སྩལ་ནས། དགེ་སློང་དྲུག
7.59b
སྡེ་དག་ལ་སྟོན་པའི་རེས་བབ་པ་ན་དེ་དག་ཇི་ཙམ་བསྟན་ནས། དེ་དག་དང་ལྷན་ཅིག་ཐོ་འཚམ་པར་བྱེད། ཀུན་དུ་རྩེ་བར་བྱེད། ཀུན་དུ་ཅ་ཅོ་འདོན་པར་བྱེད། གཞོགས་སྟེག་དང ། ཕྱར་གཡེང་དང ། ལུས་སྒྱུར་བར་བྱེད་དེ། དེ་ན་གང་དག་བདག་གིར་བྱེད་པ་དེ་དག་ནི་དེ་དག་དང་ལྷན་ཅིག་ཐོ་འཚམ་པར་བྱེད། ཀུན་དུ་རྩེ་བར་བྱེད། ཀུན་དུ་ཅ་ཅོ་འདོན་པར་བྱེད། གཞོག་སྟེག་དང ། ཕྱར་གཡེང་དང ། ལུས་སྒྱུར་བར་བྱེད་དོ། །གང་དག་བདག་གིར་མི་བྱེད་པ་དེ་དག་ནི་འཆག་ས་དག་དང ། དག་ར་དག་དང་སྒོ་ཁང་དག་ན་གནས་ངན་ལེན་ཀུན་དུ་སྤྱོད་པ་འདི་ལྟ་བུ་དག་བདག་ཅག་ལ་ཀུན་ཏུ་སྟོན་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དྲུག་སྡེ་དག་དགེ་སློང་མའི་སྟོན་པར་མི་བྱའོ། །དེ་ལྟར་བཅོམ་ལྡན་འདས་ཀྱིས་དྲུག་སྡེ་དག་དགེ་སློང་མའི་སྟོན་པར་བསྐོ་བར་མི་བྱའོ་ཞེས་བཀའ་སྩལ་ནས། དེ་དག་གཅིག་གིས་གཅིག་བསྐོས་ཏེ་དགེ་སློང་མ་ལ་སྟོན་པར་བྱེད་པ་ན་ཉེས་དམིགས་དེ་ཉིད་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། མ་བསྐོས་པར་དགེ་སློང་མ་ལ་བསྟན་པར་མི་བྱའོ། །དེ་དག་གིས་མཚམས་ཀྱི་ཕྱི་རོལ་དུ་དོང་སྟེ་གཅིག་གིས་གཅིག་བསྐོས་ནས་དགེ་སློང་མ་ལ་སྟོན་པར་བྱེད་པ་ན་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ཕྱི་རོལ་དུ་བསྐོས་པས་དགེ་སློང་མ་ལ་བསྟན་པར་མི་བྱའོ། །དེ་དག་གིས་མཚམས་ཀྱི་ནང་དགེ་སློང་ནད་པ་རྣམས་ཀྱི་འདུན་པ་བླངས་ཏེ་ལྷག་མ་རྣམས་བྲེལ་བར་བྱས་ནས་གཅིག་གིས་གཅིག་བསྐོས་ཏེ་དགེ་སློང་མ་ལ་སྟོན་པར་བྱེད་པ་ན་ཉེས་དམིགས་དེ་ཉིད་དུ་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ནང་དུ་དགེ་སློང་ནད་པ་རྣམས་ཀྱིས་འདུན་པ་བླང་ཏེ་ལྷག་མ་རྣམས་བྲེལ་བར་བྱེད་ནས་གཅིག་གིས་གཅིག་བསྐོས་ཏེ་དགེ་སློང་མ་ལ་བསྟན་པར་མི་བྱ་བར་འདི་ལྟར་གསོ་སྦྱོང་བཅཝ་ལྔ་པ་དེ་ཉིད་ཀྱི་ཚེ་དགེ
7.60a
འདུན་ཐམས་ཅད་འདུག་ཅིང་འཐུན་པར་གྱུར་པ་ན་དགེ་སློང་མའི་སྟོན་པ་བསྐོ་བར་བྱའོ། །འདི་ལྟར་བསྐོ་བར་བྱ་སྟེ། ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་སློང་མའི་སྟོན་པར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་སློང་མའི་སྟོན་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོས་ཏེ་དགེ་སློང་མིང་འདི་ཞེས་བགྱི་བ་འདི་དགེ་སློང་མ་ལ་སྟོན་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་སློང་མའི་སྟོན་པར་སྤྲོ་ནས་དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོས་ཏེ། དགེ་སློང་མིང་འདི་ཞེས་བགྱི་བ་འདི་དགེ་སློང་མ་ལ་སྟོན་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོས་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །བཅོམ་ལྡན་འདས་ཀྱིས་དགེ་སློང་མའི་སྟོན་པ་བསྐོ་བར་བྱའོ། །ཞེས་བཀའ་སྩལ་ནས་དེ་དག་བུས་པ་ཡང་རུང་རྨོངས་པ་ཡང་རུང ། མི་གསལ་བ་ཡང་རུང ། མི་མཁས་པ་ཡང་རུང་སྟེ་བྱེ་བྲག་མེད་པར་སྐོ་བར་བྱེད་ནས་དེ་དག་རེ་ཤིག་བདག་ཉིད་མ་དུལ་བས་གཞན་འདུལ་བར་འགྱུར་བ་དེ་ནི་གནས་མེད་པ་དང ། བདག་ཉིད་མ་ཞི་བས་གཞན་ཞི་བར་བྱེད་པ་དེ་ནི་གནས་མེད་པ་དང ། བདག་ཉིད་འདམ་ལས་མ་རྒལ་བས་གཞན་འདམ་ལས་སྒྲོལ་བར་བྱེད་པ་དེ་ནི་གནས་མེད་པ་དང ། དེ་དག་རེ་ཤིག་བདག་ཉིད་ཡོངས་སུ་མྱ་ངན་ལས་མ་འདས་པས
7.60b
གཞན་ཡོངས་སུ་མྱ་ངན་ལས་འདས་པར་བྱེད་པ་དེ་ཡང་གནས་མེད་པས་བཅོམ་ལྡན་འདས་ཀྱིས་བཀའ་སྩལ་པ། ཆོས་ལྔ་དང་ལྡན་པ་དགེ་སློང་མའི་སྟོན་པར་བསྐོ་བར་བྱ་སྟེ། ལྔ་གང་ཞེ་ན། ཚུལ་ཁྲིམས་དང་ལྡན་པ་དང ། མང་དུ་ཐོས་པ་དང ། གནས་བརྟན་རྒྱལ་ཚབ་ལྟ་བུ་དང ། གྲོང་ཁྱེར་པའི་སྐད་དང་ལྡན་པ་དང ། དེར་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང ། གལ་ཏེ་སུན་ཕྱུང་ན་ཡང་དེས་ལྟུང་བ་དེ་ཆོས་བཞིན་དུ་ཕྱིར་བྱས་པའོ། །ཇི་ལྟར་ཚུལ་ཁྲིམས་དང་ལྡན་པ་ཡིན་ཞེ་ན། ཕམ་པར་འགྱུར་བ་བཞི་པོ་དག་ལས་གང་ཡང་རུང་བའི་ལྟུང་བ་མ་བྱུང་བ་སྟེ། དེ་ལྟར་ཚུལ་ཁྲིམས་དང་ལྡན་པ་ཡིན་ནོ། །ཇི་ལྟར་མང་དུ་ཐོས་པ་ཡིན་ཞེ་ན། དེས་སོ་སོར་ཐར་པའི་མདོ་གདོན་པ་རྒྱ་ཆེར་ཐོན་པ་དང ། ལོབས་པ་སྟེ་དེ་ལྟར་མང་དུ་ཐོས་པ་ཡིན་ནོ། །ཇི་ལྟར་གནས་བརྟན་རྒྱལ་ཚབ་ལྟ་བུ་ཡིན་ཞེ་ན། རྫོགས་པར་བསྙེན་ནས་ལོ་ཉི་ཤུ་འམ་ལྷག་པ་སྟེ་དེ་ལྟར་གནས་བརྟན་རྒྱལ་ཚབ་ལྟ་བུ་ཡིན་ནོ། །ཇི་ལྟར་གྲོང་ཁྱེར་པའི་སྐད་དང་ལྡན་པ་ཡིན་ཞེ་ན། ཕོ་བྲང་འཁོར་ནི་གྲོང་ཁྱེར་ཞེས་བྱ་སྟེ། དེའི་སྐད་དང་ལྡན་པ་སྟེ་དེ་ལྟར་གྲོང་ཁྱེར་པའི་སྐད་དང་ལྡན་པ་ཡིན་ནོ། །ཇི་ལྟར་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་བ་ཡིན་ཞེས་ན། དེས་དགེ་སློང་མའི་ལུས་ལ་ལུས་ཉེ་བར་གཞལ་བ་མ་བྱས་པ་སྟེ། དེ་ལྟར་ན་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་བ་ཡིན་ཏེ། ཆོས་ལྔ་པོ་དེ་དག་དང་ལྡན་པ་དགེ་སློང་མའི་སྟོན་པར་བསྐོ་བར་བྱའོ། །བཅོམ་ལྡན་འདས་ཀྱིས་ཆོས་ལྔ་དང་ལྡན་པ་དགེ་སློང་མའི་སྟོན་པར་བསྐོ་བར་བྱའོ། །ཞེས་བཀའ་སྩལ་ནས། དགེ་སློང་དྲུག་སྡེ་དག་མ་བསྐོས་པ་ཁོ་ནར་དགེ་སློང་མ་ལ་སྟོན་པར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་མ་བསྐོས་པ་ཁོ་ནར་དགེ་སློང་མ་ལ་སྟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ
7.61a
བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། །སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་སྨྲས་པ། དགེ་སློང་དག་ངས་མ་བསྐོས་པར་དགེ་སློང་མ་ལ་བསྟན་པར་མི་བྱའོ་ཞེས་གསུངས་ན། ཁྱེད་མ་བསྐོས་པ་ཁོ་ནར་དགེ་སློང་མ་ལ་སྟོན་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ། ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱིས་མ་བསྐོས་པར་དགེ་སློང་མ་ལ་སྟོན་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེའི་བུ་བཙས་སོ་ཅོག་དུས་བྱེད་ནས་དུས་ཞིག་ན་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ནས་བྲམ་ཟེ་དེ་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་པ་དང ། དེ་དང་ཧ་ཅང་ཐག་མི་རིང་བ་ན་བུད་མེད་རྒན་མོ་ཞིག་འདུག་པ་དེས་དེ་མཐོང་ནས་དེས་སྨྲས་པ། བྲམ་ཟེ་ཅིའི་སླད་དུ་ཁྱོད་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་བཞུགས། བྲམ་ཟེས་སྨྲས་པ། ཁོ་བོའི་བུ་བཙས་སོ་ཅོག་དུས་བྱེད་དེ།
7.61b
ད་ཡང་ཁོ་བོའི་ཆུང་མ་ལ་སེམས་ཅན་ཞུགས་པར་གྱུར་པས་བུ་གཞན་བཙའ་བར་འགྱུར་བ་གང་ཡིན་པ་དེ་ཡང་དུས་བྱེད་པར་འགྱུར་བས་མྱ་ངན་མང་པོ་བྱིན་ཏེ་འགྲོ་བར་འགྱུར་རོ། །རྒན་མོས་སྨྲས་པ། གང་གི་ཚེ་ཁྱོད་ཀྱི་བཙུན་མོ་བཙའ་བར་འགྱུར་བ་དེའི་ཚེ་ན་ཁོ་མོ་སྦྲོན་ཅིག་།དེ་ནས་དུས་གཞན་ཞིག་ན་དེའི་ཆུང་མ་བཙའ་བའི་དུས་ལ་བབ་ནས། བྲམ་ཟེ་དེས་བུད་མེད་རྒན་མོ་དེ་བོས་ནས་དེ་ཡང་འོངས་སོ། །ཇི་ཙམ་ན་བཙས་པ་དང་དེ་ལས་ཁྱེའུ་ཞིག་བྱུང་ནས་བུད་མེད་རྒན་མོ་དེས་ཁྱེའུ་དེ་ཁྲུས་བྱས་ཏེ་རས་དཀར་པོས་དཀྲིས་ནས། དེའི་ཁ་ཞུན་མར་གྱིས་བཀང་སྟེ་བུ་མོ་ཞིག་གི་ལག་དུ་བྱིན་ནས། དེས་བུ་མོ་ལ་སྨྲས་པ། བུ་མོ་ཁྱེའུ་འདི་ལམ་པོ་ཆེའི་བཞི་མདོར་ཟུང་ལ་གལ་ཏེ་དགེ་སྦྱོང་ངམ། བྲམ་ཟེ་འགའ་སྣང་ན་དེ་ལ་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚོལ་ལ། དེ་ལ་འདི་སྐད་ཅེས། ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ་ཞེས་གྱིས་ཤིག་།ཉི་མ་ནུབ་པ་ན་གལ་ཏེ་གསོན་ན་ཁྱེར་ཏེ་ཤོག་ཤིག་།གལ་ཏེ་དུས་བྱེད་ན་དེ་ཉིད་དུ་འོར་ཅིག་།བུ་མོ་དེ་གྲིམས་པ། སྒྲུབ་ཕོད་པ་ཡིན་པས་དེས་ཁྱེའུ་དེ་ཁྱེར་ནས་ལམ་པོ་ཆེའི་བཞི་མདོར་སོང་སྟེ་འདུག་གོ། །མུ་སྟེགས་ཅན་དག་གི་ཀུན་དུ་སྤྱོད་པ་ནི་ནང་པར་སྔར་ལངས་ཏེ། ཆུ་ངོགས་སུ་རེག་པའི་ཕྱིར་འགྲོ་བ་ཡིན་པས་མུ་སྟེགས་ཅན་ཆུ་ངོགས་སུ་རེག་པའི་ཕྱིར་འདོང་བ་དག་དེར་ལྷགས་ནས། བུ་མོ་དེས་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚལ་ཏེ། སྨྲས་པ། འཕགས་པ་དག་ཁྱེའུ་འདི། འཕགས་པ་དག་གི་ཞབས་ལ་ཕྱག་འཚལ་ལོ། །དེ་དག་གིས་སྨྲས་པ། ཡུན་རིང་དུ་འཚོ་བར་གྱུར་ཅིག་།ཚེ་རིང་དུ་སྐྱང་བར་གྱུར་ཅིག་།ཕ་མ་གཉིས་གྱིས་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག་།དགེ་སློང་གནས་བརྟན་གནས་བརྟན་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་སྟེ་མཉན་ཡོད་དུ་བསོད་སྙོམས་ལ་ཞུགས་པ་དང ། བུ་མོ་དེས་རྗེ་ས་དང་བཅས། གུས་པ་དང་བཅས་པས་གནས་བརྟན་གནས་བརྟན་གྱི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་ཁྱེའུ་འདི་འཕགས་པ་དག་གི
7.62a
ཞབས་ལ་ཕྱག་འཚལ་ལོ། །གནས་བརྟན་གནས་བརྟན་དག་གིས་སྨྲས་པ། ཡུན་རིང་དུ་འཚོ་བར་གྱུར་ཅིག་།ཚེ་རིང་དུ་སྐྱོང་བར་གྱུར་ཅིག་།ཕ་མ་གཉིས་ཀྱི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག་།བུ་མོ་དེས་ཁྱེའུ་དེ་རྒྱལ་བྱེད་ཀྱི་ཚལ་གྱི་ལམ་ཀར་ཁྱེར་བ་དང ། བཅོམ་ལྡན་འདས་ཀྱང་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་མཉན་ཡོད་དུ་བསོད་སྙོམས་ལ་གཤེགས་ནས་བུ་མོ་དེས་རྒྱ་ཆེར་རྗེ་ས་དང་བཅས། གུས་པ་དང་བཅས་པས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་གསོལ་པ། བཅོམ་ལྡན་འདས་ཁྱེའུ་འདི་བཅོམ་ལྡན་འདས་ཀྱི་ཞབས་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཡུན་རིང་དུ་འཚོ་བར་གྱུར་ཅིག་།ཚེ་རིང་དུ་སྐྱོང་བར་གྱུར་ཅིག་།ཕ་མ་གཉིས་ཀྱི་ཆོས་དང་ལྡན་པའི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག་།བུ་མོ་དེས་ཉི་མ་ནུབ་ཁར་བལྟས་ན་དེ་གསོན་པར་མཐོང་ནས་དེས་དེ་ཁྱེར་ཏེ་ཁྱིམ་དུ་འོངས་པ་དང ། དེ་དག་གིས་བུ་མོ་དེ་ལ་དྲིས་པ། ཁྱེའུ་གསོན་ནམ། བུ་མོས་སྨྲས་པ། གསོན་ནོ། །དེ་དག་གིས་སྨྲས་པ། ཁྱོད་ཀྱིས་གང་དུ་བཟུང ། ལམ་པོ་ཆེ་ག་གེ་མོ་ཞིག་ཏུ་འོ། །དེ་དག་གིས་སྨྲས་པ། ཁྱེའུའི་མིང་ཅིར་གདགས། ཁྱེའུ་འདི་ལམ་པོ་ཆེར་བཟུང་བས་འདིའི་མིང་ལམ་ཆེན་པོ་ཞེས་གདགས་སོ་ཞེས་དེའི་མིང་ལམ་ཆེན་པོ་ཞེས་བཏགས་སོ། །ཁྱེའུ་ལམ་ཆེན་པ་དེ་བསྲིངས་བསྐྱེད་ཆེན་པོར་གྱུར་ཏོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ན་ཡི་གེ་དང ། གྲངས་དང ། རྩིས་དང ། ལག་རྩིས་དང ། དབྱུང་བ་དང ། གཞུག་པ་དང ། གཞག་པ་དང ། འབྱེད་པ་དང ། ཀློག་པའི་ཕ་རོལ་དུ་སོན་ཅིང ། དེའི་ཚེ་ན་བྲམ་ཟེའི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ཀུན་དུ་སྤྱོད་པ་དང་ཐལ་བ་བླང་བ་དང ། བྱ་མ་བུམ་བླང་བ་དང ། ས་བླང་བ་དང ། ལག་སྟངས་དང ། ཐོར་ཚུགས་དང ། རབ་བསྔགས་བྱ་བ་དང ། ཀྱེ་ཞེས་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང །
7.62b
སྲིད་སྲུངས་གི་རིག་བྱེད་དང ། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུད་པ་དང ། ཀློག་པ་དང ། ཀློག་ཏུ་འཇུད་པ་དང ། སྦྱིན་པ་དང ། ལེན་པ་ལ་མཁས་པའི་བྲམ་ཟེ་རིག་བྱེད་དང ། རིག་བྱེད་ཀྱི་ཡན་ལག་གི་ཕ་རོལ་དུ་སོན་པ་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེའི་ཚེ་ན་བྲམ་ཟེ་ལམ་ཆེན་པ་དེས་བྲམ་ཟེའི་ཁྱེའུ་ལྔ་བརྒྱ་ཙམ་དག་བྲམ་ཟེའི་གསང་ཚིག་དག་འདོན་དུ་བཅུག་གོ། །ཇི་ཙམ་དུས་གཞན་ཞིག་ན་ཡང་བྲམ་ཟེ་དེ་ཆུང་མ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས་དེ་བཙའ་བའི་དུས་ལ་བབ་པའི་ཚེ་བྲམ་ཟེ་དེས་བུད་མེད་རྒན་མོ་དེ་བོས་ཏེ་དེ་ཡང་འོངས་སོ། །ཇི་ཙམ་ན་བཙས་པ་དང ། དེ་ལས་ཁྱེའུ་ཞིག་བྱུང་ནས་བུད་མེད་རྒན་མོ་དེས་ཁྱེའུ་དེ་ཁྲུས་བྱས་ཏེ་རས་དཀར་པོས་དཀྲིས་ནས་དེའི་ཁ་ཞུན་མར་གྱིས་བཀང་སྟེ། བུ་མོ་ཞིག་གི་ལག་ཏུ་བྱིན་ནས་དེས་བུ་མོ་དེ་ལ་སྨྲས་པ་བུ་མོ་ཁྱེའུ་འདི་ལམ་པོ་ཆེའི་གཞི་མདོར་ཟུང་ལ་གལ་ཏེ་དགེ་སྦྱོང་ངམ། བྲམ་ཟེ་འགའ་སྣང་ན་དེ་ལ་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚོལ་ལ་དེ་ལ་འདི་སྐད་ཅེས་ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ་ཞེས་གྱིས་ཤིག་།ཉི་མ་ནུབ་པ་ན་གལ་ཏེ་གསོན་ན་ཁྱེར་ཏེ་ཤོག་ཤིག་།གལ་ཏེ་དུས་བྱེད་ན་དེ་ཉིད་དུ་འོར་ཅིག་།བུ་མོ་དེ་བླུན་མོ་ལེ་ལོ་ཅན་ཡིན་པས་དེས་ཁྱེའུ་དེ་ཁྱེར་ནས་ལམ་ཕྲན་དུ་སོང་སྟེ་འདུག་གོ། །མུ་སྟེགས་ཅན་དག་གི་ཀུན་དུ་སྤྱོད་པ་ནི་ནང་པར་སྔར་ལངས་ཏེ། ཆུ་ངོགས་སུ་རེག་པའི་ཕྱིར་འགྲོ་བ་ཡིན་པས་མུ་སྟེགས་ཅན་ཆུ་ངོགས་སུ་རེག་པའི། ཕྱིར་འདོང་བ་དག་དེར་ལྷགས་ནས་བུ་མོ་དེས་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ། །དེ་དག་གིས་སྨྲས་པ། ཡུན་རིང་དུ་འཚོ་བར་གྱུར་ཅིག་།ཚེ་རིང་དུ་སྐྱོང་བར་གྱུར་ཅིག་།ཕ་མ་གཉིས་ཀྱི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག་།བུ་མོ་དེས་ཉི་མ་ནུབ་ཁར་བལྟས་ན
7.63a
དེ་གསོན་པ་མཐོང་ནས་དེས་དེ་ཁྱེར་ཏེ་ཁྱིམ་དུ་འོངས་པ་དང ། དེ་དག་གིས་བུ་མོ་དེ་ལ་དྲིས་པ། ཁྱེའུ་གསོན་ནམ། བུ་མོས་སྨྲས་པ། གསོན་ནོ། །དེ་དག་གིས་སྨྲས་པ། ཁྱོད་ཀྱིས་གང་དུ་བཟུང ། ལམ་ཕྲན་ག་གེ་མོ་ཞིག་ཏུའོ། །དེ་དག་གིས་སྨྲས་པ། ཁྱེའུའི་མིང་ཅིར་གདགས། ཁྱེའུ་འདི་ལམ་ཕྲན་དུ་བཟུང་བས་འདིའི་མིང་ལམ་ཕྲན་པ་ཞེས་གདགས་སོ་ཞེས་དེའི་མིང་ལམ་ཕྲན་པ་ཞེས་བཏགས་སོ། །ཁྱེའུ་ལམ་ཕྲན་པ་དེ་བསྲིངས་བསྐྱེད་དེ་ཆེན་པོར་གྱུར་ཏོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ན་ཡི་གེ་ལ་བཅུག་ན་དེས་སིད་ཅེས་བརྗོད་ན་དྷཾ`་བརྗོད་པར་བྱེད་ལ། དྷཾ`་ཞེས་བརྗོད་ན་སིད་བརྗོད་པར་བྱེད་ནས། དེའི་སློབ་དཔོན་དེས་བྲམ་ཟེ་ལ་སྨྲས་པ། བྲམ་ཟེ་ཁོ་བོས་བྲམ་ཟེའི་ཁྱེའུ་མང་པོ་གཞན་དག་ཀྱང་ཀློག་ཏུ་གཞུག་དགོས་པས་ཁོ་བོ་ལམ་ཕྲན་པ་ཀློག་ཏུ་འཇུད་མི་ནུས་སོ། །ལམ་ཆེན་པ་ནི་ཉུང་ངུ་བརྗོད་པས་མང་པོ་འཛིན་པར་ནུས་ན་ལམ་ཕྲན་པ་འདི་ནི་སིད་ཅེས་བརྗོད་ན་དྷཾ`་བརྗེད་པར་བྱེད་ལ། དྷཾ`་བརྗོད་ན་སིད་བརྗེད་པར་བྱེད་དོ། །བྲམ་ཟེས་བསམས་པ། བྲམ་ཟེ་ཐམས་ཅད་ཡི་གེ་དང་འབྲུ་ལ་མཁས་པ་མ་ཡིན་ཏེ། འདི་རིག་བྱེད་ཀྱི་བྲམ་ཟེར་འགྱུར་རོ་སྙམ་ནས་དེས་ཀློག་མཁན་ལ་རིག་བྱེད་ཀློག་པར་ཕུལ་བ་དང ། དེས་\ུ0f00་བརྗོད་ན་བྷུ་བརྗོད་པར་བྱེད་ལ། བྷུ་ཞེས་བརྗོད་ན་\ུ0f00་བརྗེད་པར་བྱེད་ནས་ཀློགས་མཁན་གྱིས་བྲམ་ཟེ་ལ་སྨྲས་པ། བྲམ་ཟེ་ཁོ་བོས་བྲམ་ཟེའི་ཁྱེའུ་མང་པོ་གཞན་དག་ཀྱང་ཀློག་ཏུ་གཞུག་དགོས་པས་ཁོ་བོ་ལམ་ཕྲན་པ་ཀློག་ཏུ་འཇུད་མི་ནུས་སོ། །ལམ་ཆེན་པ་ནི་ཉུང་ངུ་བརྗོད་པས་མང་པོ་འཛིན་པར་ནུས་ན། ལམ་ཕྲན་པ་འདི་ནི་\ུ0f00་ཞེས་བརྗོད་ན་བྷུ་བརྗོད་པར་བྱེད་ལ། བྷུ་ཞེས་བརྗོད་ན་\ུ0f00་བརྗེད་པར་བྱེད་དོ། །བྲམ་ཟེས་བསམས་པ། བྲམ་ཟེ་ཐམས་ཅད་རིག་བྱེད་ཀློག་པ་མ་ཡིན་ཏེ། མཁས་ཀྱང་རུང ། གཙང་ཡང་རུང་མི་གཙང་ཡང་རུང་སྟེ། བྲམ་ཟེ་གང་ཡིན་པ་དེ་ཉིད་ལྷ་ཡིན་པས་འདི་ནི་རིགས་བྲམ་ཟེ་ཁོ་ནར་འགྱུར་སྙམ་མོ་དེ་བུལ་བ་མཆོག་ཏུ་བུལ་བ་ཆུང་བ་མཆོག་ཏུ་ཆུང་བ་ཡིན་པས་དེའི་མིང་ལམ་ཆུང་བ་ལམ་ཆུང་བ་ཞེས་བྱ་བར་གྱུར་ཏོ། །བྲམ་ཟེ་དེ་གང་དུ་ཅུང་ཟད་ཅི་ལ་མགྲོན་དུ་བོས
7.63b
པར་ལམ་ཆུང་བ་དེ་ཁྲིད་དེ་འགྲོའོ། །དུས་གཞན་ཞིག་ན་བྲམ་ཟེ་དེ་ན་བར་གྱུར་ནས་དེ་རྩ་བ་དང ། སྡོང་བུ་དང་འདབ་མ་དང་མེ་ཏོག་དང ། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ཉམས་པ་ཉིད་དུ་གྱུར་ནས་དེ་ལམ་ཆེན་པ་བོས་ཏེ་སྨྲས་པ་བུ་ཁོ་བོ་འདས་ནས་ཁྱོད་ནི་མྱ་ངན་བྱ་མི་དགོས་ཀྱིས་ཁྱོད་ཀྱི་ནུ་བོ་ལམ་ཆུང་བ་འདི་ལ་ཁྱོད་ཀྱིས་མཁོ་བ་བསྟབས་པར་གྱིས་ཤིག་ཅེས་སྨྲས་ནས། བསགས་པ་ཀུན་གྱི་མཐའ་ཟད་ཅིང ། །མཐོན་པོ་རྣམས་ནི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དེ་དུས་ཀྱི་ཆོས་དང་ལྡན་པར་གྱུར་ཏོ། །དེ་གཉིས་ཀྱིས་གོས་སྔོན་པོ་དང ། སེར་པོ་དང་དམར་པོ་དང ། དཀར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ། དེའི་འོག་ཏུ་མྱ་ངན་བསང་བ་བྱས་ཏེ་འཁོད་དོ།། ་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་བདུན་པ། བྲམ་ཟེ་ལམ་ཆེན་པ་དེ་མཉན་ཡོད་དང ། རྒྱལ་བྱེད་ཀྱི་ཚལ་གྱི་བར་ན་གནས་ཀྱི་ཤིང་ལྗོན་པ་ཞིག་ཡོད་པ་དེའི་དྲུང་ན་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་ཀློག་ཏུ་འཇུད་ཅིང་འདུག་གོ། །ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་གཉིས་ཀྱིས་འདུལ་བའི་བྱ་བ་བྱས་ནས་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ཏོ། །མཉན་ཡོད་ན་སྐྱེ་བོ་ཕལ་པོ་ཆེའི་ཚོགས་ཀྱིས་འཕགས་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་བ་ན་མཉན་ཡོད་དུ་ཕྱིན་ཏོ་ཞེས་ཐོས་སོ། །ཐོས་ནས་ཀྱང་སྲོག་ཆགས་བརྒྱ་ཕྲག་དུ་མ་དག་ཕྱིར་འབྱུང་བར་བརྩམས་པ་དང ། ལམ་ཆེན་པས་དེ་དག་ཕྱིར་འབྱུང་བར་མཐོང་ནས་སྨྲས་པ། ཤེས་ལྡན་དག་གར་འདོང ། དེ་དག་གིས་སྨྲས་པ། འཕགས་པ་ཤཱ་རིའི་བུ་དང ། མཽད་གལ་གྱི་བུ་གཉིས་ཀོ་ས་ལ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ཏེ་དེ་གཉིས་ལྟར་འདོང་ངོ ། །ལམ་ཆེན་པས་སྨྲས་པ། དེ་གཉིས་ནི་རིགས་མཆོག་སྤངས་ཏེ་རིགས་གཉིས་པ་དགེ་སྦྱོང་གཽ་ཏ་མའི་གན་དུ་རབ་ཏུ་བྱུང་བ་ཡིན་པས་དེ་གཉིས་མཐོང་བས་ཅི་བྱ། དེ་ན་བྲམ་ཟེའི་ཁྱེའུ་དད་པ་ཅན་ཞིག་འདུག་པ་དེས་སྨྲས་པ། མཁན་པོ་དེ་སྐད་མ་གསུང་ཤིག་།དེ་གཉིས་ནི་བདག་ཉིད་ཆེན་པོ།
7.64a
ལགས་པས་གལ་ཏེ་མཁན་པོས་དེ་གཉིས་ལས་ཆོས་གསན་པར་གྱུར་ན་མཁན་པོའི་ཐུགས་མངོན་པར་དད་པར་འགྱུར་བ་གང་ལགས་པ་དེ་ལྟ་བུའི་གནས་མཆིས་སོ། །ལམ་ཆེན་པས་བསམས་པ། བརྟག་པར་བྱས། རེ་ཤིག་གང་གི་ཚེ་བྲམ་ཟེའི་ཁྱེའུ་དག་མི་ཀློག་པར་འགྱུར་བ་དེའི་ཚེ་བདག་ཀྱང་འགྲོ་བར་བྱའོ་སྙམ་མོ། །བྲམ་ཟེའི་ཁྱེའུ་དེ་དག་གི་ཀུན་དུ་སྤྱོད་པ་ནི་གང་གི་ཚེ་མི་ཀློག་པ་དེའི་ཚེ་ན་ལན་འགའ་ནི་གྲོང་ཁྱེར་ལྟར་འདོང་བར་བྱེད། ལན་འགའ་ནི་ཡམ་སྲེག་ཤིང་ཐུར་འདོང་བར་བྱེད་པས་དུས་གཞན་ཞིག་ན་དེ་དག་མི་ཀློག་པར་གྱུར་ནས་དེ་དག་ཡམ་སྲེག་ཤིང་ཐུར་དོང་བ་དང ། ལམ་ཆེན་པ་དེ་ཡང་རྒྱལ་བྱེད་གྱིས་ཚལ་ག་ལ་བ་དེར་སོང་ངོ ། །དགེ་སློང་ཞིག་རྒྱལ་བྱེད་ཀྱི་ཚལ་གྱི་སྒོ་ན་ཤིང་ལྗོན་པའི་དྲུང་ན་འཆག་ཅིང་འདུག་པ་དེ་བྲམ་ཟེ་དེས་ཐག་རིང་པོ་ཁོ་ན་ནས་མཐོང་ནས་དེའི་གན་དུ་སོང་སྟེ་སྨྲས་པ། ཀྱེ་དགེ་སློང་སངས་རྒྱས་ཀྱི་བཀའ་ཅུང་ཞིག་སྨྲོས་ཤིག་།དགེ་སློང་དེས་བསམས་པ། བྲམ་ཟེ་འདི་ནི་རྒོལ་བ་ཡིན་པས་འདི་ལ་བྱུང་རྒྱལ་དུ་སྨྲ་བར་མི་ནུས་སོ། །སྙམ་ནས། དེས་བྲམ་ཟེ་དེ་ལ་དགེ་བ་བཅུའི་ལས་ཀྱི་ལམ་དང ། མི་དགེ་བ་བཅུའི་ལས་ཀྱི་ལམ་རྒྱ་ཆེར་བསྟན་ཏོ། །བྲམ་ཟེས་སྨྲས་པ། ཀྱེ་དགེ་སློང་ཁོ་བོ་ཡང་བྱ་བ་ཡོངས་སུ་ཉམས་ལ། ཁྱོད་ཀྱང་དགེ་བའི་ཕྱོགས་ཡོངས་སུ་ཉམས་ན་མ་ལེགས་ཀྱི་ཁོ་བོ་འགྲོས། ཕྱིས་ཀྱང་འོང་ངོ་ཞེས་སྨྲས་ཏེ་སོང་ངོ ། །དུས་གཞན་ཞིག་ན་ཡང་བྲམ་ཟེའི་ཁྱེའུ་དེ་དག་མི་ཀློག་པར་གྱུར་ནས་དེ་དག་ཡམ་སྲེག་ཤིང་ཐུར་དོང་བ་དང ། ལམ་ཆེན་པ་ཡང་གཅིག་པུ་རྒྱལ་བྱེད་ཀྱི་ཚལ་དུ་སོང་ངོ ། །དགེ་སློང་དེས་བྲམ་ཟེ་དེ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་དེས་བསམས་པ། དེའི་ཚེ་ན་བདག་གིས་བྲམ་ཟེ་འདི་ལ་དགེ་བ་བཅུའི་ལས་ཀྱི་ལམ་དང ། མི་དགེ་བ་བཅུའི་ལས་ཀྱི་ལམ་རྒྱ་ཆེར་བསྟན་གྱིས་ད་ནི་བདག་གིས་འདི་ལ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང ། ལུགས་ལས་བཟློག་པ་རྒྱ་ཆེར་བསྟན་པར་བྱའོ་སྙམ་མོ། །བྲམ་ཟེ་དེ་དགེ་སློང་དེ་ག་ལ་བ་དེར་སོང་སྟེ་ཕྱིན་ནས་དགེ་སློང་དེའི་རྐང་པ་གཉིས་ལ་མགོ་བོས་ཕྱག
7.64b
འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་དགེ་སློང་དེས་བྲམ་ཟེ་དེ་ལ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང ། ལུགས་ལས་བཟློག་པ་རྒྱ་ཆེར་བསྟན་ཏོ། །བྲམ་ཟེ་དེ་མངོན་པར་དད་པར་གྱུར་ནས་སྨྲས་པ། དགེ་སློང་བདག་རབ་ཏུ་དབྱུང་དུ་གསོལ། དགེ་སློང་དེས་བསམས་པ། བྲམ་ཟེ་འདི་ནི་རྒོལ་བ་ཡིན་པས་རབ་ཏུ་ཕྱུང་ན་བསྟན་པ་ལ་གཅེས་པ་བྱེད་པར་འགྱུར་གྱིས་རབ་ཏུ་དབྱུང་ངོ་སྙམ་ནས་དེས་སྨྲས་པ། བྲམ་ཟེ་དེ་ལྟར་གྱིས་ཤིག་།བྲམ་ཟེས་སྨྲས་པ། ཀྱེ་དགེ་སློང་བདག་ནི་བྲམ་ཟེ་གྲགས་པ་ཅན་ལགས་པས་བདག་གིས་འདི་ཉིད་དུ་རབ་ཏུ་འབྱུང་བའི་རྔོ་མི་ཐོག་ན་ལྗོངས་སུ་བཞུད་དོ། །དེ་ལྟར་གྱིས་ཤིག་།དགེ་སློང་དེས་བྲམ་ཟེ་དེ་ལྗོངས་སུ་ཁྲིད་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟངས་དགེ་སློང་གི་ལས་ནི་གཉིས་ཏེ། བསམ་གཏན་དང ། ཀློག་པ་ཡིན་ན་ཁྱོད་བསམ་གཏན་དང ། ཀློག་པ་གང་འདོད། ལམ་ཆེན་པས་སྨྲས་པ། མཁན་པོ་གཉིས་ཀ་ཡང་བགྱི་སྟེ། གདུགས་ལ་ནི་བཀླག་པར་བགྱི། དགུང་ལ་ནི་བསམ་གཏན་བགྱིའོ། །བུ་དེ་བཞིན་གྱིས་ཤིག་།དེ་ནས་ཚེ་དང་ལྡན་པ་ལམ་ཆེན་པས་ཉིན་མོ་བཀླག་པ་དང་ཁ་ཏོན་བྱས་པས་སྡེ་སྣོད་གསུམ་པོ་དག་ལྷོགས་པར་གྱུར་ཏེ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །མཚན་མོ་བསམ་གཏན་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང ། རྣམ་པར་འཐོར་བ་དང ། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ། བསྒྲུབས་ནས་བདག
7.65a
གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆག་དང་བྲལ་བ་བོང་བ་དང་གསེར་དུ་མཉམ་པ་ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབ་དྲལ་བར་གྱུར་ཅིང་རིག་པ་དང ། མངོན་པར་ཤེས་པ་དང་སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ་དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང་མངོན་དུ་སྨྲ་བར་བྱ་བར་གྱུར་ཏོ། །གང་གི་ཚེ་ཚེ་དང་ལྡན་པ་ལམ་ཆེན་པ་རབ་ཏུ་བྱུང་བ་དེའི་ཚེ་ན་ལམ་ཆུང་བའི་ལོངས་སྤྱོད་སྲབས་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་ནས་དེས་ཚེགས་ཆེན་པོས་འཚོ་བ་སྦྱར་བར་བརྩམས་སོ། །དེ་ནས་ཚེ་དང་ལྡན་པ་ལམ་ཆེན་པ་འདི་སྙམ་དུ་སེམས་ཏེ། བདག་གིས་ཐོས་པས་ཐོབ་པར་བྱ་བ་གང་ཡིན་པ་དེ་བདག་གིས་ཐོབ་ཀྱི་བདག་མཉན་ཡོད་དུ་སོང་ལ་བཅོམ་ལྡན་འདས་ལ་བསྙེན་བཀུར་བྱའོ་སྙམ་མོ། །དེ་ནས་ཚེ་དང་ལྡན་པ་ལམ་ཆེན་པ་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ། །མཉན་ཡོད་ན་སྐྱེ་བོ་ཕལ་པོ་ཆེའི་ཚོགས་ཀྱིས་འཕགས་པ་ལམ་ཆེན་པ་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ་ཞེས་ཐོས་སོ། །ཐོས་ནས་ཀྱང་སྐྱེས་བོ་ཕལ་པོ་ཆེའི་ཚོགས་ཕྱིར་འབྱུང་བར་བརྩམས་པ་ལམ་ཆུང་བས་མཐོང་ནས་དེས་དྲིས་པ་ཤེས་ལྡན་དག་གར་འདོང་དེ་དག་གིས་སྨྲས་པ། འཕགས་པ་ལམ་ཆེན་པ་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུར་གཤེགས་པ་ན་མཉན་ཡོད་དུ་བྱོན་ཏེ་དེ་ལྟར་འདོང་ངོ ། །ལམ་ཆུང་པས་བསམས་པ། དེ་འདི་དག་གི་ཕུ་ནུ་ཡང་མ་ཡིན། ཉེ་དུ་ཡང་མ་ཡིན་ཡང་འདི་དག་དེ་ལྟར་འདོང་ན་དེ་བདག་གི་ཕུ་བོ་ཡིན་ན་བདག་ཅིའི་ཕྱིར་དེ་ལྟར་མི་འགྲོ་སྙམ་ནས་ལམ་ཆུང་པ་ཡང་འཕགས་པ་ལམ་ཆེན་པ་བལྟ་བའི་ཕྱིར་སོང་ངོ ། །ཚེ་དང་ལྡན་པ་ལམ་ཆེན་པས་དེ་མཐོང་ནས་སྨྲས་པ་ལམ་པ་འཚོ་འམ།
7.65b
འཕགས་པ་འཚོ་འོ། །ཇི་ལྟར་འཚོ་དས་སྨྲས་པ་འཕགས་པ་ཚེགས་ཆེན་པོས་སོ་ཚེ་དང་ལྡན་པ་ལམ་ཆེན་པས་སྨྲས་པ་ཇི་ལྟར་རབ་ཏུ་མི་འབྱུང་ངམ་ལམ་ཆུང་བས་སྨྲས་པ། འཕགས་པ་བདག་ནི་བུལ་བ་མཆོག་ཏུ་བུལ་བ་ཆུང་བ་མཆོག་ཏུ་ཆུང་བ་ལགས་ན་བདག་བཅོམ་ལྡན་འདས་ཀྱི་བསྟན་པ་ལ་རབ་ཏུ་འབྱུང་བར་འགྱུར་རམ་ཚེ་དང་ལྡན་པ་ལམ་ཆེན་པས་དེ་ལ་དགེ་བའི་རྩ་བ་ཅུང་ཟད་ཡོད་དམ་ཞེས་བལྟས་ན་ཡོད་པར་མཐོང་ངོ ། །སུ་ལ་རག་ལས་སྙམས་ན་བདག་ཉིད་ལ་རག་ལས་པར་མཐོང་ནས་དེས་སྨྲས་པ། ལམ་པ་ཐུབ་པའི་དབང་པོའི་གསུངས་རབ་འདི་ལ་ནི་རིགས་གཅེས་པ་མ་ཡིན་རུས་གཅེས་པ་མ་ཡིན། ཐོས་པ་གཅེས་པ་མ་ཡིན་གྱི་ཐུབ་པའི་དབང་པོའི་གསུངས་རབ་འདི་ལ་ནི་སྒྲུབ་པ་གཅེས་པ་ཡིན་གྱིས་གལ་ཏེ་འདོད་ན་རབ་ཏུ་བྱུང་ཤིག་།འཕགས་པ་རབ་ཏུ་འབྱུང་ངོ ། །ཚེ་དང་ལྡན་པ་ལམ་ཆེན་པས་ལམ་ཆུང་བ་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་དེས་དེ་ཀློག་ཏུ་བཞུགས་པར་བརྩམས་པ་དང ། ལུས་ངག་ཡིད་ཀྱིས་སྡིག་པ་མི་བྱ་ཞིང ། །འཇིག་རྟེན་ཀུན་ལ་ཡོངས་འཛིན་འདོད་བྲལ་བ། །དྲན་དང་ལྡན་ཞིང་ཤེས་བཞིན་ཅན་གྱིས་ནི། །གནོད་ལྡན་སྡུག་བསྔལ་གང་ཡིན་བསྙེན་མི་བྱ། །ཞེས་བྱ་བའི་ཚིགས་སུ་བཅད་པ་འདི་ཟླ་བ་གསུམ་གྱིས་ཀྱང་ལོབས་པར་མ་གྱུར་ཏོ། །བ་ལང་རྫི་དང་ཕྱུགས་རྫི་གཞན་དག་གིས་ཐོས་ནས་ལོབས་པར་གྱུར་པ་དང ། དེ་རྗེ་ས་དང་བཅས། གུས་པ་དང་བཅས་པས་དེ་དག་གི་གན་དུ་སོང་སྟེ་དྲིས་པ་དང ། དེ་དག་གིས་དེ་ལ་བསྟན་ཏོ། །ཇི་ལྟར་སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་ཉན་ཐོས་རྣམས་ཀྱི་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་དབྱར་ཉེ་བར་བསྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཉ་ལའོ། །ཉན་ཐོས་ཆེན་པོ་རྣམས་ལ་ཡང་དེ་བཞིན་ནོ། །དེ་ལ་གང་དག་དབྱར་ཟླ་འབྲིང་པོ་ཉ་ལ་དབྱར་ཉེ་བར་བསྒྲུབ་པའི་ཚེ་གདམས་ངག་མནོས་ཏེ། གྲོང་དང ། གྲོང་རྡལ་དང ། ཡུལ
7.66a
འཁོར་དང ། རྒྱལ་པོའི་ཕོ་བྲང་དག་ཏུ་དབྱར་གནས་པར་ཁས་ལེན་པ་དེ་དག་ནི་སྟོན་ཟླ་འབྲིང་པོའི་ཟླ་བ་ཉ་ལ་ལྷགས་ནས་ཇི་ལྟར་ཐོབ་པ་ནི་བརྗོད་པར་བྱེད། མ་ཐོབ་པ་ནི་ཐོབ་པར་བྱ་བའི་ཕྱིར་འོག་ཏུ་འདྲི་བར་བྱེད་པས་ཚེ་དང་ལྡན་པ་ལམ་ཆེན་པའི་ལྷན་ཅིག་གནས་པ་དང ། ཉེ་གནས་གང་དག་ལྗོངས་སུ་དབྱར་གནས་པར་ཁས་བླངས་པ་དེ་དག་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ལྷུང་བཟེད་དང་ཆོས་གོས་ཐོགས་སྟེ། ཚེ་དང་ལྡན་པ་ལམ་ཆེན་པོ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་ལམ་ཆེན་པའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་ཁོད་ནས་དེ་དག་ཁ་ཅིག་ནི་ཇི་ལྟར་ཐོབ་པ་བརྗོད་པར་བྱེད་དོ། །ཁ་ཅིག་ནི་མདོ་སྡེ་དང ། འདུལ་བ་དང ། ཆོས་མངོན་པ་དག་གི་ཁ་ཏོན་དག་དང་ཡོངས་སུ་དྲི་བ་དག་ཚོལ་བར་བྱེད་དོ། །དེ་ན་གང་དག་བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་དེ་དག་དྲུག་སྡེ་དག་ལ་བསྟེན་པར་བྱེད། སྙེན་པར་བྱེད། བསྙེན་བཀུར་བྱེད་པས་ཚེ་དང་ལྡན་པ་ལམ་པ་ཡང་དྲུག་སྡེ་དག་ལ་སྟེན་པར་བྱེད། སྙེན་པར་བྱེད། བསྙེན་བཀུར་བྱེད་པ་ན་ཉེ་དགས་ཚེ་དང་ལྡན་པ་ལམ་པ་ལ་སྨྲས་པ། ལམ་པ་ཁྱོད་ཀྱི་མཁན་པོ་གཅིག་པ་འདི་དག་ཀྱང་མཁན་པོ་ལས་ཁ་ཏོན་དག་དང་ཡོངས་སུ་དྲི་བ་དག་ཚོལ་བར་བྱེད་ཀྱིས་ཁྱེད་ཀྱང་སོང་ལ་རེ་ཤིག་མཁན་པོ་ལས་ཁ་ཏོན་དག་དང་ཡོངས་སུ་དྲི་བ་དག་ཚོལ་ཅིག་།ལམ་པས་སྨྲས་པ། བདག་གིས་ཅི་ཡང་མ་ཀླགས་ཏེ། ཟླ་བ་གསུམ་གྱིས་ཚིགས་སུ་བཅད་པ་གཅིག་ཀླགས་ན་དེ་ཡང་མ་ལོབས་པས་བདག་གིས་ཁ་ཏོན་དག་དང་ཡོངས་སུ་དྲི་བ་དག་ཇི་ལྟར་བཙལ། ཉེ་དགས་སྨྲས་པ། བཅོམ་ལྡན་འདས་ཀྱིས་གསང་ཚིག་གི་དྲི་མ་ནི་མི་ཀློག་པ་ཡིན་ནོ་ཞེས་མ་གསུངས་སམ། རེ་ཤིག་ལྷོགས་ཤིག་དང་ཚིགས་སུ་བཅད་པ་ཅིའི་ཕྱིར་ལོབས་པར་མི་འགྱུར། ཚོལ་ཅིག་དང ། ལམ་པ་སོང་སྟེ་སྨྲས་པ། མཁན་པོ་དག་བདག་ལ་རེ་ཤིག་ཁ་ཏོན་དག་སྩོལ་ཅིག་།ཚེ་དང་ལྡན་པ་ལམ་ཆེན་པས་བསམས་པ། ཅི་འདི་རེ་ཤིག་རང་གི་བློས་གསོལ་བར་བྱེད་དམ། འོན་ཏེ་གཞན་གྱིས་བཏང་སྙམ
7.66b
དུ་བསམས་ན། དེ་གཞན་གྱིས་བཏང་བར་མཐོང་ནས་ཚེ་དང་ལྡན་པ་ལམ་ཆེན་པས་བསམས་པ། ཅི་འདི་རེ་ཤིག་སྨད་པས་གདུལ་བ་ཡིན་ནམ། འོན་ཏེ་བསྟོད་པས་འདུལ་བ་ཡིན་སྙམ་དུ་བསམས་ན། སྨད་པས་གདུལ་བ་ཡིན་པར་མཐོང་ནས་དེས་དེའི་གཉའ་བ་ནས་བཟུང་སྟེ། རྒྱལ་བྱེད་ཀྱི་ཚལ་གྱི་ཕྱི་རོལ་དུ་བསྐྲད་ནས་སྨྲས་པ། ཁྱོད་ནི་རེ་ཤིག་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ན་ཁྱོད་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ་ཅི་བྱ། འདི་ཉིད་ན་འདུག་ཤིག་།ལམ་པ་ད་ནི་བདག་དགེ་སྦྱོང་ཡང་མ་ཡིན། བྲམ་ཟེ་ཡང་མ་ཡིན་ནོ་སྙམ་ནས་དེས་ངུ་བར་བརྩམས་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ལམ་པ་རྒྱལ་བྱེད་ཀྱི་ཚལ་གྱི་ཕྱི་རོལ་ན་ངུ་བ་གཟིགས་སོ། །དེ་ནས་བཅོམ་ལྡན་འདས་ཐུགས་རྗེ་ཆེན་པོས་བསྐུལ་བ་ན་ཚེ་དང་ལྡན་པ་ལམ་པ་ག་ལ་བ་དེར་གཤེགས་ཏེ་བྱོན་ནས་ཚེ་དང་ལྡན་པ་ལམ་པ་ལ་འདི་སྐད་ཅེས་བཀའ་སྩལ་ཏོ། །ལམ་པ་ཁྱོད་ཅིའི་ཕྱིར་རྒྱལ་བྱེད་ཀྱི་ཚལ་གྱི་ཕྱི་རོལ་ན་ངུ ། ལམ་པས་གསོལ་པ། བཅོམ་ལྡན་འདས་བདག་མཁན་པོས་གཉའ་བ་ནས་བཟུང་སྟེ། རྒྱལ་བྱེད་ཀྱི་ཚལ་གྱི་སླད་རོལ་དུ་བསྐྲད་ནས་ཁྱོད་ནི་རེ་ཤིག་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ན། ཁྱོད་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ་ཅི་བྱ། འདི་ཉིད་ན་འདུག་ཤིག་ཅེས་མཆི་བས་ད་ནི་བདག་དགེ་སྦྱོང་ཡང་མ་ལགས། བྲམ་ཟེ་ཡང་མ་ལགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས། དེའི་ཚེ་ཚིགས་སུ་བཅད་པ་བཀའ་སྩལ་པ། བྱིས་པས་བསྟོད་པ་གང་ཡིན་དང ། །མཁས་པས་སྨོད་པ་གང་ཡིན་པ། །འདིར་ནི་མཁས་སྨོད་མཆོག་ཡིན་གྱི། །བྱིས་པས་བསྟོད་པ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། བུ་ཁྱོད་ཀྱི་མཁན་པོ་ནི་བསྐལ་པ་གྲངས་མེད་པ་གསུམ་གྱིས་བྱ་དཀའ་བ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ཏེ་ཐུབ་པའི་དབང་པོའི་གསུང་རབ་འདི་ཡང་དག་པར་བསྒྲུབས་པ་མ་ཡིན་གྱི། ངས་ནི་བསྐལ་པ་གྲངས་མེད་པ་གསུམ་གྱིས་བྱ་དཀའ་བ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ཏེ་ཐུབ་པའི་དབང་པོའི་གསུང་རབ་འདི་ཡང་དག་པར་བསྒྲུབས་པ་ཡིན་ན་ཁྱོད་དེ
7.67a
བཞིན་གཤེགས་པ་ལས་ཀློག་ནུས་སམ། བཙུན་པ་བདག་ནི་བུལ་བ། མཆོག་ཏུ་བུལ་བ། ཆུང་བ། མཆོག་ཏུ་ཆུང་བ་ལགས་སོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་བཀའ་སྩལ་པ། གང་གིས་བྱིས་པ་བྱིས་ཉིད་རིག་།དེ་ལ་དེས་ན་དེ་མཁས་ཡིན། །བྱིས་པ་མཁས་པར་རློམ་བྱེད་པ། །དེ་འདིར་ཤིན་ཏུ་བྱིས་པ་ཡིན། །སངས་རྒྱས་བཅོམ་ལྡན་འདས་རྣམས་ཚིག་རེ་རེ་ནས་ཆོས་འདོན་པར་མཛད་པ་ནི་གནས་མ་ཡིན་སྐབས་མ་ཡིན་ཏེ། དེ་ནི་གནས་མེད་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ལམ་པ་ཀློག་ཏུ་ཆུག་ཤིག་།ཚེ་དང་ལྡན་པ་ཀུན་དགའ་བོས་ལམ་པ་ཀློག་ཏུ་གཞུག་པར་བརྩམས་པ་དང ། དེས་ཀློག་མ་ནུས་ནས། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བདག་གིས་རེ་ཤིག་སྟོན་པ་ལ་ཡང་བསྙེན་བཀུར་བགྱི་འཚལ་ཐོས་པ་ཡང་གཟུང་འཚལ་ཚོགས་དག་ཀྱང་ཀློག་ཏུ་སྩལ་འཚལ་བྲམ་ཟེ་དང་ཁྱིམ་བདག་མཆིས་ཤིང་ལྷགས་པ་རྣམས་ལ་ཡང་ཆོས་བསྟན་པར་བགྱི་འཚལ་བས་བདག་གིས་ལམ་པ་ཀློག་ཏུ་སྩལ་བའི་རྔོ་མི་ཐོག་གོ། །བཅོམ་ལྡན་འདས་ཀྱིས་དེ་ལ་རྡུལ་སྤང་ངོ་དྲི་མ་སྤང་ངོ་ཞེས་བྱ་བའི་ཚིག་གཉིས་སྩལ་ན། དེས་ཚིག་དེ་གཉིས་མ་ཟིན་ནས་བཅོམ་ལྡན་འདས་ཀྱིས་འདིའི་ལས་སྦྱང་བར་བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ལམ་པ་ལ་བཀའ་སྩལ་པ། ལམ་པ་ཁྱོད་ཀྱིས་དགེ་སློང་རྣམས་ཀྱི་མཆིལ་ལྷམ་དང ། ལྷམ་སྒྲོག་གུ་ཅན་དག་འཕྱི་ནུས་སམ། བཙུན་པ་རྔོ་ཐོག་གོ་སོང་ལ་དགེ་སློང་རྣམས་ཀྱི་མཆིལ་ལྷམ་དང ། ལྷམ་སྒྲོག་གུ་ཅན་དག་ཕྱིས་ཤིག་དེས་དགེ་སློང་རྣམས་ཀྱི་མཆིལ་ལྷམ་དང ། ལྷམ་སྒྲོག་གུ་ཅན་དག་ཕྱི་བར་བརྩམས་པ་དང ། དགེ་སློང་རྣམས་ཀྱིས་དེ་ལ་མི་སྟེར་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལམ་པ་མཆིལ་ལྷམ་དང ། ལྷམ་སྒྲོག་གུ་ཅན་དག་འཕྱིར་ཆུག་ཤིག་།དེ་ཅིའི་ཕྱིར་ཞེ་ན། འདིའི་ལས་སྦྱང་བར་བྱ་བའི་ཕྱིར་རོ། །འདི་ལ་ཚིག་གཉིས་ཀྱི་ཁ་དོན་དག་ཀྱང་རྗེས་སུ་སློབས་ཤིག་།ལམ་པས་དགེ་སློང་རྣམས་ཀྱིས
7.67b
མཆིལ་ལྷམ་དང ། ལྷམ་སྒྲོག་གུ་ཅན་དག་འཕྱི་བ་ན་དགེ་སློང་རྣམས་ཀྱིས་དེ་ལ་རྡུལ་སྤང་ངོ ། །དྲི་མ་སྤང་ངོ་ཞེས་བྱ་བའི་ཁ་ཏོན་གཉིས་པོ་དག་ཀྱང་བསླབས་ནས། ལམ་པས་དུས་གཞན་ཞིག་ན་ཁ་ཏོན་གཉིས་པོ་དེ་ཡང་ལོབས་པར་གྱུར་ཏོ། །དེ་ནས་ཚེ་དང་ལྡན་པ་ལམ་པ་མཚན་མོའི་ནམ་ནངས་པའི་ཚེ་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་རྡུལ་སྤང་ངོ ། །དྲི་མ་སྤང་ངོ་ཞེས་བཀའ་སྩལ་པ་གང་ཡིན་པ་དེ་ཅི་བཅོམ་ལྡན་འདས་ཀྱིས་ནང་གི་རྡུལ་ལས་དགོངས་ཏེ་བཀའ་སྩལ་ཏམ། འོན་ཏེ་ཕྱི་རོལ་གྱི་རྡུལ་ལས་དགོངས་ཏེ་བཀའ་སྩལ་སྙམ་མོ། །དེ་དེ་ལྟར་སེམས་པ་ན་དེའི་ཚེ་དེ་ལ་སྔོན་མ་ཐོས་པའི་ཚིགས་སུ་བཅད་པ་གསུམ་པོ་འདི་དག་བློ་ལ་སྣང་བར་གྱུར་ཏོ། །རྡུལ་འདིར་འདོད་ཆགས་དེ་ནི་ས་རྡུལ་མིན། །རྡུལ་ནི་འདོད་ཆགས་མིང་སྟེ་རྡུལ་གྱི་མིན། །མཁས་པ་གང་གིས་རྡུལ་དེ་རྣམ་སྤང་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །རྡུལ་འདིར་ཞེ་སྡང་དེ་ནི་ས་རྡུལ་མིན། །རྡུལ་ནི་ཞེ་སྡང་མིང་སྟེ་རྡུལ་གྱི་མིན། །མཁས་པ་གང་གིས་རྡུལ་དེ་རྣམ་སྤང་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །རྡུལ་འདིར་གཏི་མུག་དེ་ནི་ས་རྡུལ་མིན། །རྡུལ་ནི་གཏི་མུག་མིང་སྟེ་རྡུལ་གྱི་མིན། །མཁས་པ་གང་གིས་རྡུལ་དེ་རྣམ་སྤང་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །དེས་སྤྲོ་བ་དང ། འབད་པ་དང ། བརྩལ་བ་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང ། རྣམ་པར་འཐོར་བ་དང ། རྣམ་པར་འཇིག་པའི་ཆོས་ཉིད་ཀྱི་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤང་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་སུ་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ
7.68a
ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །ཚེ་དང་ལྡན་པ་ལམ་པ་སྐྱིལ་མོ་དཀྲུང་གིས་འདུག་པ་ཚེ་དང་ལྡན་པ་ལམ་ཆེན་པས་མཐོང་ནས་དགྲ་བཅོམ་པ་དག་ནི་མ་བསམས་པར་ཤེས་པ་དང ། མཐོང་བ་མི་འཇུག་པས་ཚེ་དང་ལྡན་པ་ལམ་ཆེན་པས་ལག་པ་གཉིས་ཀྱིས་ཚེ་དང་ལྡན་པ་ལམ་པ་བཟུང་སྟེ་སྨྲས་པ། ལམ་པ་རེ་ཤིག་ཁ་ཏོན་དག་གྱིས་ཤིག་དང་དེའི་འོག་ཏུ་བསམ་གཏན་པར་འགྱུར་རོ། །ཚེ་དང་ལྡན་པ་ལམ་པས་གླང་པོ་ཆེའི་སྣ་འདྲ་བའི་ལག་པ་བརྐྱང་བ་དང ། ཚེ་དང་ལྡན་པ་ལམ་ཆེན་པས་རྒྱབ་ཏུ་རྣམ་པར་བལྟས་ནས་མཐོང་སྟེ། དེས་སྨྲས་པ། ཚེ་དང་ལྡན་པ་ལམ་པ་ཁྱོད་ཀྱིས་ཡོན་ཏན་གྱི་ཚོགས་དེ་ལྟ་བུ་དག་རྟོགས་སམ། རྟོགས་སོ། །ཐམས་ཅད་དུ་བཅོམ་ལྡན་འདས་ཀྱིས་ལམ་ཆུང་བ་རབ་ཏུ་ཕྱུང་ངོ་ཞེས་སྒྲ་གྲགས་ནས། རྒྱལ་པོའི་ཁབ་ན་འཚོ་བྱད་གཞོན་ནུས་གསོས་ཀྱིས་བཅོམ་ལྡན་འདས་ཀྱིས་ལམ་ཆུང་བ་རབ་ཏུ་ཕྱུང་ངོ་ཞེས་ཐོས་ནས་དེས་བསམས་པ། གལ་ཏེ་བཅོམ་ལྡན་འདས་རྒྱལ་པོའི་ཁབ་ཏུ་གཤེགས་པར་གྱུར་ན་བཙུན་པ་ལམ་པ་མ་གཏོགས་པ། སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་ཏེ་གདུགས་ཚོད་གསོལ་ལོ་སྙམ་མོ། །གཞན་མུ་སྟེགས་ཅན་དག་ཤེས་ལྡན་དག་དགེ་སྦྱོང་གཽ་ཏ་མ་འདི་སྐད་ཅེས་ངའི་ཆོས་ནི་ཟབ་པ། ཟབ་པར་སྣང་བ། མཐོང་བར་དཀའ་བ། རྟོགས་པར་དཀའ་བ་བརྟག་མི་ནུས་པ། རྟོག་གེའི་སྤྱོད་ཡུལ་མ་ཡིན་པ།
7.68b
ཞིབ་མོ་བརྟགས་པ། མཁས་པ་མཛངས་པས་རིག་པར་བྱ་བ་ཡིན་ནོ་ཞེས་ཟེར་ན་འདི་ལྟར་ལམ་ཆུང་བ་ལ་སོགས་པ་བུལ་བ། མཆོག་ཏུ་བུལ་བ། ཆུང་བ། མཆོག་ཏུ་ཆུང་བ་དག་ཀྱང་རབ་ཏུ་འབྱིན་པར་བྱེད་ན་དེའི་ཆོས་ཇི་ལྟར་ཟབ་པ་ཡིན་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །བཅོམ་ལྡན་འདས་ཀྱིས་ཉན་ཐོས་ཆེན་པོ་རི་རབ་དང་འདྲ་བ་ལ་སྐྱེ་བོ་ཕལ་པོ་ཆེའི་ཚོགས་ཀྱིས་སྨྲས་པ། མི་དགེ་བ་སྐྱེད་པར་བྱེད་ཀྱིས་འདིའི་ཡོན་ཏན་བསྒྲག་པར་བྱའོ་སྙམ་དུ་དགོངས་ནས། དེ་ན་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ལམ་པ་ལ་དེ་བཞིན་གཤེགས་པའི་ཞལ་ནས་ཁྱོད་ཀྱིས་དགེ་སློང་མ་ལ་སྟོན་ཅིག་ཅེས་བཀའ་སྩལ་ཏོ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་སྨྲས་པ། ཚེ་དང་ལྡན་པ་ལམ་པ་བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་དགེ་སློང་མ་ལ་སྟོན་ཅིག་ཅེས་བྱུང་ངོ ། །ཚེ་དང་ལྡན་པ་ལམ་པས་བསམས་པ། བཅོམ་ལྡན་འདས་ཀྱིས་ཅིའི་སླད་དུ་དགེ་སློང་གནས་བརྟན་གནས་བརྟན་དག་བཞག་སྟེ་བདག་ལ་བཀའ་སྩལ་སྙམ་ནས། དེས་བཅོམ་ལྡན་འདས་བདག་གི་ཡོན་ཏན་བསྒྲག་པར་བཞེད་པར་རིག་ནས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་ནས་སྨྲས་པ། བཙུན་པ་ཀུན་དགའ་བོ་བཅོམ་ལྡན་འདས་ཀྱིས་བཀའ་སྩལ་པ་བཞིན་འཚལ་ལོ། །དགེ་སློང་མ་གསོ་སྦྱོང་འབུལ་བ་གཉིས་རྒྱལ་བྱེད་ཀྱི་ཚལ་དུ་འོངས་ཏེ། དེ་གཉིས་ཀྱིས་སྨྲས་པ། བདག་ཅག་དགེ་སློང་མའི་སྟོན་པ་སུ་བསྐོས། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ལམ་པའོ། །ཅི་ལགས་འཕགས་པ་ལམ་ཆེན་པ་འམ། ཚེ་དང་ལྡན་པ་ལམ་པའོ། །དེ་གཉིས་ཀྱིས་སྨྲས་པ། ཕུ་ནུ་མོ་ཇི་ལྟར་བུད་མེད་ཀྱི་ཡུལ་བརྙས་པ་ལ་ལྟོས། དེས་ཟླ་བ་གསུམ་གྱིས་ཚིགས་སུ་བཅད་པ་གཅིག་ཀླགས་ན་དེ་ཡང་མ་ལོབས་པ་ཡིན་ལ། དགེ་སློང་མ་རྣམས་ནི་སྡེ་སྣོད་གཉིས་པ་དང ། སྡེ་སྣོད་གསུམ་པ་ཆོས་སྒྲོག་པ། རིག་པ་དང ། གྲོལ་བའི་སྤོབས་པ
7.69a
ཅན་དག་ཡིན་ན། དེས་དགེ་སློང་མ་ལ་སྟོན་པར་འགྱུར་ལོ། །ཇི་ལྟར་བྱེད་པ་བལྟས་འདོང་ངོ་ཞེས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྨྲས་པ། བཙུན་པ་ལམ་པ་དགོངས་སུ་གསོལ། རྒྱལ་པོའི་ཀུན་དགའ་ར་བའི་དགེ་སློང་མའི་དགེ་འདུན་འཐུན་པ་རྒྱལ་བྱེད་ཀྱི་ཚལ་གྱི་དགེ་སློང་གི་དགེ་འདུན་འཐུན་པའི་ཞབས་ལ་མགོ་བོས་ཕྱག་འཚལ་ལོ། །གནོད་པ་ཉུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་བ་འམ། སྟོབས་དང་ལྡན་ནམ། བདེ་འམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ་ཞེས་སྙུན་གསོལ་ལོ། །ཟླ་བ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་གསོལ་ལོ། །འདུན་པ་དང་གསོ་སྦྱོང་བགྱི་བར་གསོལ་བ་འདེབས་སོ། །གསོལ་བ་ཡང་མཁྱེན་པར་གསོལ་ལོ། །ཐབས་ཡིན་ནོ། །དེ་གཉིས་ཀྱིས་སྨྲས་པ། ཐབས་ཡིན་ནོ། །ཞེས་བྱ་བ་ཙམ་ཡང་ཤེས་པ་ལྟ་ཞེས་དེ་གཉིས་དབྱར་ཁང་དུ་དོང་བ་དང ། དགེ་སློང་མ་རྣམས་ཀྱིས་མཐོང་ནས་སྨྲས་པ། བདག་ཅག་དགེ་སློང་མའི་སྟོན་པ་སུ་བྱོན། དེ་གཉིས་ཀྱིས་སྨྲས་པ། འཕགས་པ་ལམ་པའོ། །ཅི་འཕགས་པ་ལམ་ཆེན་པ་འམ། འཕགས་པ་ལམ་ཆེན་པ་མ་ཡིན་གྱི་འདི་ལྟར་ལམ་པའོ། །དེ་དག་གིས་སྨྲས་པ། ཕུ་ནུ་མོ་དག་ཇི་ལྟར་བུད་མེད་ཀྱི་ཡུལ་བརྙས་པ་ལ་ལྟོས་དེ་ཟླ་བ་གསུམ་གྱིས་ཚིགས་སུ་བཅད་པ་གཅིག་ཀླགས་ན་དེ་ཡང་མ་ལོབས་པ་ཡིན་ལ། དགེ་སློང་མ་རྣམས་ནི་སྡེ་སྣོད་གཉིས་པ་དང ། སྡེ་སྣོད་གསུམ་པ། ཆོས་སྒྲོག་པ། རིགས་པ་དང ། གྲོལ་བའི་སྤོབས་པ་ཅན་དག་ཡིན་ན། དེས་ཇི་ལྟར་དགེ་སློང་མ་ལ་སྟོན་པར་འགྱུར། བདག་ཅག་ཇི་ལྟར་བཅོམ་ལྡན་འདས་ཀྱིས་ཟིལ་གྱིས་མནན་པ་ལྟར་ནི་ཡ་མཚན་ཅན་དགུ་བཅུ་རྩ་དྲུག་པོ་དག་གིས་ཀྱང་བུད་མེད་ཀྱི་ཡུལ་འགའ་ཡང་ཟིལ་གྱིས་མ་མནན་ཏོ། །དགེ་སློང་མ་བཅུ་གཉིས་སྡེ་དག་གིས་དེ་ལྟར་འཕགས་པ་ལམ་པ་དགེ་སློང་མའི་སྟོན་པར་འོང་ངོ་ཞེས་ཐོས་ནས་དེ་དག་གིས་སྨྲས་པ། ཕུ་ནུ་མོ་དག་བདག་ཅག་གིས་ཅི་ནས་ཀྱང་ཕྱིན་ཆད་ཐོས་པ་ཉུང་ངུ
7.69b
འགའ་ཡང་དགེ་སློང་མ་ལ་སྟོན་པར་མི་འགྱུར་བ་དེ་ལྟར་བུ་ཟན་མོའི་བུ་དེ་མི་དགའ་བར་བྱའོ་ཞེས་དེ་དག་གིས་སྨྲས་པ། ཕུ་ནུ་མོ་དག་བདག་ཅག་ལས་མི་མོ་དྲུག་གིས་ནི་ཡལ་ག་ཁྲུ་བཅུ་གཉིས་པ་དག་ལས་སེང་གེའི་ཁྲི་ཤོམས་ཤིག་།མི་མོ་དྲུག་གིས་ནི་མཉན་ཡོད་དུ་ཞུགས་ལ་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་དུ་སྐྱེ་བོ་ཕལ་པོ་ཆེའི་ཚོགས་ལ་སང་བདག་ཅག་དགེ་སློང་མའི་སྟོན་པ་ཉན་ཐོས་ཆེན་པོ་འདི་འདྲ་བ་ཞིག་བྱོན་པར་འགྱུར་གྱིས་ཁྱེད་ཅག་ལས་གང་གིས་དེར་བདེན་པ་དག་མཐོང་བར་མ་གྱུར་པ། དེས་ཡུན་རིང་པོར་འཁོར་བར་འཁོར་བར་བྱ་དགོས་པར་འགྱུར་རོ། །ཞེས་སྒྲོགས་ཤིག་།དེ་དག་ལས་མི་མོ་དྲུག་གིས་ནི་ཡལ་ག་ཁྲུ་བཅུ་གཉིས་པ་དག་ལས་སེང་གེའི་ཁྲི་བཤམས་སོ། །མི་མོ་དྲུག་གིས་ནི་མཉན་ཡོད་དུ་ཞུགས་ཏེ་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ཏུ་སྐྱེ་བོ་ཕལ་པོ་ཆེའི་ཚོགས་ལ་སང་བདག་ཅག་དགེ་སློང་མའི་སྟོན་པ་ཉན་ཐོས་ཆེན་པོ་འདི་འདྲ་བ་ཞིག་བྱོན་པར་འགྱུར་གྱིས་ཁྱེད་ཅག་ལས་གང་གིས་དེར་བདེན་པ་དག་མཐོང་བར་མ་གྱུར་པ་དེས་ཡུན་རིང་པོར་འཁོར་བར་འཁོར་བར་བྱ་དགོས་པར་འགྱུར་རོ། །ཞེས་བསྒྲགས་པ་དང ། སྲོག་ཆགས་འབུམ་ཕྲག་དུ་མ་དག་ཁ་གཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེར་འདུས་པར་གྱུར་ཏོ། །དེ་ནས་ཚེ་དང་ལྡན་པ་ལམ་པ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོགས་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ། །དེ་ནས་ཚེ་དང་ལྡན་པ་ལམ་པ་ཕྱེམ་བྲེད་ནང་དུ་ཡང་དག་འཇོག་ལས་ལངས་ཏེ་སྣམ་སྦྱར་ཐོགས་ནས་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ག་ལ་བ་དེར་སོང་ངོ ། །སྐྱེ་བོ་ཕལ་པོ་ཆེའི་ཚོགས་ཀྱིས
7.70a
དེ་མཐོང་ནས་དེ་དག་གིས་སྨྲས་པ། དགེ་སློང་མའི་སྟོན་པ་དེ་གང་ཡིན། ཅི་དགེ་སྦྱོང་སྔ་མ་ཡིན་ནམ། འོན་ཏེ་ཕྱི་བཞིན་འབྲང་བའི་དགེ་སྦྱོང་ཡིན། དེ་དག་གིས་སྨྲས་པ། ཁྱེད་ཀྱིས་ཕྱི་བཞིན་འབྲང་བའི་དགེ་སྦྱོང་འགའ་ཞིག་དགེ་སློང་མ་ལ་སྟོན་པར་བྱེད་ཅེས་ཐོས་སམ། དགེ་སྦྱོང་སྔ་མ་འདི་ཉིད་དགེ་སློང་མའི་སྟོན་པ་ཡིན་ནོ། །དེ་དག་གིས་སྨྲས་པ། འདི་ཟླ་བ་གསུམ་གྱིས་ཚིགས་སུ་བཅད་པ་གཅིག་ཀླགས་ན་དེ་ཡང་མ་ལོབས་པ་ཡིན་ན། དེས་དགེ་སློང་མ་སྡེ་སྣོད་གཉིས་པ་དང ། སྡེ་སྣོད་གསུམ་པ། ཆོས་སྒྲོག་པ། རིགས་པ་དང ། གྲོལ་བའི་སྤོབས་པ་ཅན་དག་ལ་ཇི་ལྟར་སྟོན་པར་འགྱུར། དགེ་སྦྱོང་མ་སྒྲེ་བྱི་མོ་འདི་དག་གིས་བདག་ཅག་བྲིད་པར་གྱུར་གྱིས་ཚུར་ཤེག་འདོང་ངོ ། །གཞན་དག་གིས་སྨྲས་པ། ཇི་ལྟ་བྱེད་པ་ཡང་བལྟས་རེ་ཤིག་སྡོད་ཅིག་།དེ་ནས་ཚེ་དང་ལྡན་པ་ལམ་པ་འཁོར་དེའི་ནང་དུ་ཞུགས་ནས་སེང་གེའི་ཁྲི་ག་ལ་བ་དེར་སོང་བ་དང ། ཇི་ཙམ་ན་ཡལ་ག་ཁྲུ་བཅུ་གཉིས་པ་དག་ལས་སེང་གེའི་ཁྲི་བཤམས་པ་མཐོང་ནས་དེས་བསམས་པ། ཅི་རེ་ཤིག་དད་པར་གྱུར་པ་དག་གིས་བཤམས་པ་ཡིན་ནམ། འོན་ཏེ་ཐོ་འཚམ་པའི་བསམ་པ་ཅན་དག་གིས་བཤམས་པ་ཡིན་སྙམ་ན། ཇི་ཙམ་ན་ཐོ་འཚམ་པའི་བསམ་པ་ཅན་དག་གིས་བཤམས་པར་མཐོང་ངོ ། །དེ་ནས་ཚེ་དང་ལྡན་པ་ལམ་པས་གླང་པོ་ཆེའི་སྣ་ལྟ་བུའི་ལག་པ་བརྐྱང་སྟེ་སེང་གེའི་ཁྲི་དེ་ཇི་ལྟར་གནས་སུ་བཞག་པ་དེ་ལྟར་མནན་ནས་ཚེ་དང་ལྡན་པ་ལམ་པ་ཅི་ནས་ཀྱང་ཁ་ཅིག་གིས་མཐོང ། ཁ་ཅིག་གིས་མ་མཐོང་བ་དེ་ལྟར་སེང་གེའི་ཁྲི་ལ་འདུག་གོ། །དེ་ནས་ཚེ་དང་ལྡན་པ་ལམ་པ་ཏིང་ངེ་འཛིན་འདི་ལྟ་བུ་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་རང་གི་སྟན་ལས་མི་སྣང་བར་གྱུར་ཅིང ། ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ཏེ། སྤྱོད་ལམ་བཞི་པོ་འདི་ལྟ་སྟེ། འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་འཇུག་སྟེ། ཚེ་དང་ལྡན་པ་ལམ་པ་མེའི་ཁམས་ལ་ཡང་སྙོམས་པར་ཞུགས་པའི་ལུས་ལས་འོད་ཟེར་སྣ་ཚོགས་འདི་ལྟ་སྟེ་སྔོན་པོ་དག་དང ། སེར་པོ་དག་དང ། དམར་པོ་དག་དང ། དཀར་པོ་དག་དང །
7.70b
བཙོད་ཀ་དག་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ངོ ། །ཆོ་འཕྲུལ་ཟུང་དག་ཀྱང་རྣམ་པར་སྟོན་ཏེ། ལུས་ཀྱི་སྨད་ནས་མེ་འབར་ཞིང་ལུས་ཀྱི་སྟོད་ནས་ཆུ་གྲང་མོའི་རྒྱུན་དག་འབྱིན་པར་བྱེད་དོ། །ལུས་ཀྱི་སྟོད་ནས་མེ་འབར་ཞིང་ལུས་ཀྱི་སྨད་ནས་ཆུ་གྲང་མོའི་རྒྱུན་དག་འབྱིན་པར་བྱེད་དོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་དང ། ནུབ་དང ། བྱང་ཕྱོགས་སུ་ཡང་དེ་བཞིན་ཏེ། དེ་ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ཏེ་འཁོར་གྱི་གོང་དུ་སེང་གེའི་ཁྲི་བཤམས་པ་ཉིད་ལ་འདུག་གོ། །འདུག་ནས་ཚེ་དང་ལྡན་པ་ལམ་པས་དགེ་སློང་མ་རྣམས་ལ་སྨྲས་པ། སྲིང་མོ་དག་ཁོ་བོས་ཟླ་བ་གསུམ་གྱིས་ཚིགས་སུ་བཅད་པ་གཅིག་བཟུང་སྟེ། ཁོ་བོ་ཚིགས་སུ་བཅད་པ་དེ་ཉིན་མཚན་བདུན་གྱི་བར་དུ་ཚིག་གཞན་དག་དང ། ཡི་གེ་གཞན་དག་དང ། ཚིག་དང་ཡི་གེ་གཞན་དག་གིས་དོན་རྣམ་པར་འབྱེད་པར་སྤྲོའོ། །སྲིང་མོ་དག་དེ་ལ་ལུས་ཤེས་བྱ་བས་ནི་བཅོམ་ལྡན་འདས་ཀྱིས་ལུས་ཀྱིས་ཉེས་པར་སྤྱོད་པ་གསུམ་མི་བྱ་བ་བསྟན་ཏོ། །ངག་ཅེས་བྱ་བས་ནི་བཅོམ་ལྡན་འདས་ཀྱིས་ངག་གིས་ཉེས་པར་སྤྱོད་པ་བཞི་མི་བྱ་བ་བསྟན་ཏོ། །ཡིད་ཀྱིས་ཤེས་བྱ་བས་ནི་བཅོམ་ལྡན་འདས་ཀྱིས་ཡིད་ཀྱིས་ཉེས་པར་སྤྱོད་པ་གསུམ་མི་བྱ་བ་བསྟན་ཏོ། །སྡིག་པ་མི་བྱ་ཞིང་ཞེས་བྱ་བས་ནི་བཅོམ་ལྡན་འདས་ཀྱིས་སྡིག་པ་ཐམས་ཅད་མི་བྱ་སྟེ་ཞེས་བྱ་བ་བསྟན་ཏོ། །འཇིག་རྟེན་ཀུན་ལ་ཞེས་བྱ་བས་ནི་བཅོམ་ལྡན་འདས་ཀྱིས་ཉེ་བར་ལེན་པའི་ཕུང་པོ་ཐམས་ཅད་བསྟན་ཏོ། །ཡོངས་འཛིན་ཞེས་བྱ་བས་ནི་བཅོམ་ལྡན་འདས་ཀྱིས་ཡོངས་འཛིན་རྣམ་པ་གསུམ་བསྟན་ཏེ། འདོད་ཆགས་ཀྱི་ཡོངས་འཛིན་དང ། ཞེ་སྡང་གི་ཡོངས་འཛིན་དང ། གཏི་མུག་གི་ཡོངས་འཛིན་ཏོ། །ཚེ་དང་ལྡན་པ་ལམ་པས་ཇི་ཙམ་གྱིས་ཚིགས་སུ་བཅད་པ་ཕྱེད་ཀྱི་དོན་ཀྱང་རྣམ་པར་ཕྱེ་བ་དེ་ཙམ་གྱིས་སྲོག་ཆགས་ཁྲི་ཉིས་སྟོང་གིས་བདེན་པ་དག་མཐོང་སྟེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི
7.71a
ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ཕལ་ཆེར་ནི་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་བཀོད་དོ། །དེ་ནས་ཚེ་དང་ལྡན་པ་ལམ་པས་འཁོར་དེ་དག་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་བཀོད་ནས་སྟན་ལས་ལངས་ཏེ་སོང་ངོ ། །དགེ་སློང་དག་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འཁོད་པ་དེ་དག་གིས་ཚེ་དང་ལྡན་པ་ལམ་པ་ཐག་རིང་པོ་ཁོ་ན་ནས་འོང་བ་མཐོང་ནས་དེ་དག་གིས་སྨྲས་པ། ཚེ་དང་ལྡན་པ་དག་ཚེ་དང་ལྡན་པ་ལམ་པས་དེང་སྐྱེ་བོ་ཕལ་པོ་ཆེའི་ཚོགས་མངོན་པར་མ་དད་པར་གྱུར་པར་བྱས་གོར་མ་ཆག་ན། མངོན་སུམ་དུ་མི་དགའ་བ་བརྗོད་པ་ནི་སྡུག་བསྔལ་བ་ཡིན་པས་ཕྱི་བཞིན་འབྲང་བའི་དགེ་སྦྱོང་ལ་དྲིའོ་ཞེས་དེ་དག་གིས་དེའི་ཕྱི་བཞིན་འབྲང་བའི་དགེ་སྦྱོང་ལ་སྨྲས་པ། ཚེ་དང་ལྡན་པ་དེང་ཚེ་དང་ལྡན་པ་ལམ་པས་སྐྱེ་བོ་ཕལ་པོ་ཆེའི་ཚོགས་ཇི་སྙེད་ཅིག་མངོན་པར་མ་དད་པར་བྱས་དེས་སྨྲས་པ། སུས་མ་དད་པ་བྱས་བཅོམ་ལྡན་འདས་ཀྱིས་བཱ་རཱ་ཎ་སཱི་དྲང་སྲོང་སྨྲ་བ་རི་དགས་སུ་ཀྱི་ནགས་སུ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ཅེས་གང་ཐོས་པ་དེ་དེང་ཚེ་དང་ལྡན་པ་ལམ་པས་རྗེས་སུ་བསྐོར་ཏོ། །དེ་དག་གིས་སྨྲས་པ། ཇི་ལྟར་གྱུར། དེས་སྨྲས་པ། ཚེ་དང་ལྡན་པ་ལམ་པས་ཇི་ཙམ་གྱིས་ཚིགས་སུ་བཅད་པ་ཕྱེད་ཀྱི་དོན་ཀྱང་རྣམ་པར་ཕྱེ་བ་དེ་རྩམ་གྱིས་སྲོག་ཆགས་ཁྲི་ཉིས་སྟོང་གིས་བདེན་པ་དག་མཐོང་སྟེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད
7.71b
སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ཕལ་ཆེར་ནི་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་བཀོད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་སེམས་སྒྱུར་བ་ལ་མཁས་པ་རྣམས་ཀྱི་ནང་ན་འདི་ལྟ་སྟེ། ལམ་པ་འདི་ནི་མཆོག་ཡིན་ནོ། །དེ་ལྟ་བས་ན་ཆོས་འདི་ལྟ་བུ་དང་ལྡན་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤེས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱིས་མ་བསྐོས་པར་དགེ་སློང་མ་ལ་སྟོན་ན་ཆོས་འདི་ལྟ་བུ་དང་ལྡན་པ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱིས་ཤེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིས་སོ། །མ་བསྐོས་པར་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །དགེ་སློང་མ་ཞེས་བྱ་བ་ནི་ཆོས་འདི་པ་ལའོ། །སྟོན་ན་ཞེས་བྱ་བ་ནི་ལྷག་པའི་ཚུལ་ཁྲིམས་དང ། ལྷག་པའི་སེམས་དང ། ལྷག་པའི་ཤེས་རབ་བོ། །ཆོས་འདི་ལྟ་བུ་དང་ལྡན་པ་མ་གཏོགས་ཏེ་ཞེས་བྱ་བ་ནི་ཆོས་འདི་ལྟ་བུ་དང་ལྡན་པ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །
7.72a
གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དགེ་འདུན་གྱིས་བསྐོས་ཀྱང་མཚམས་ཀྱི་ཕྱི་རོལ་ཏུ་བསྐོས་ཤིང་མཚམས་ཀྱི་ནང་དུ་མ་བསྐོས་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཀྱང་གསོ་སྦྱོང་བཅཝ་ལྔ་པ་དེ་ཉིད་ལ་མ་བསྐོས་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ་དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཀྱང་དགེ་འདུན་ཐམས་ཅད་འདུག་ཅིང་མཐུན་པ་མ་ཡིན་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ཀྱང་ཚུལ་ཁྲིམས་དང་ལྡན་པ་མ་ཡིན་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། ་གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ་དེ་ཡང་ཚུལ་ཁྲིམས་དང་ལྡན་པ་ཡིན་ཡང་མང་དུ་ཐོས་པ་མ་ཡིན་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན
7.72b
ཞིང་མང་དུ་ཐོས་པ་ཡིན་ཡང་གནས་བརྟན་རྒྱལ་ཚབ་ལྟ་བུ་མ་ཡིན་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང ། མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ། གནས་བརྟན་རྒྱལ་ཚབ་ལྟ་བུ་ཡིན་ཡང་གྲོང་ཁྱེར་པའི་སྐད་དང་ལྡན་པ་མ་ཡིན་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ་གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་ཡང་འདི་ལྟར་དེས་དགེ་སློང་མ་ལ་ལུས་ཀྱིས་རེག་པས་སུན་ཕྱུང་བར་གྱུར་ཅིང་དེས་ལྟུང་བ་དེ་ཡང་ཆོས་བཞིན་དུ་ཕྱིར་མ་བྱས་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་པ་ཡིན་ལ། གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་ལ། དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང ། གལ་ཏེ་སུན་ཕྱུང་བར་གྱུར་ན་ཡང་དེས་ལྟུང་བ་དེ་ཡང་ཆོས་བཞིན་དུ་ཕྱིར་བྱས་པ་ཡིན་ཡང་ཕམ་པར་འགྱུར་བའི་ཆོས་བརྒྱད་པོ་དག་རྒྱ་ཆེར་བརྗོད་པར་མི་ནུས་ན་གང་དག་སྐོ་བར་བྱེད་པ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས
7.73a
ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང ། དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ་གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་ལ་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང ། གལ་ཏེ་སུན་ཕྱུང་བར་གྱུར་ན་ཡང་དེས་ལྟུང་བ་དེ་ཡང་ཆོས་བཞིན་དུ་ཕྱིར་བྱས་ལ་ཕམ་པར་འགྱུར་བའི་ཆོས་བརྒྱད་པོ་དག་རྒྱ་ཆེར་བརྗོད་པར་ནུས་ཀྱང་ལྕི་བའི་ཆོས་བརྒྱད་པོ་དག་རྒྱ་ཆེར་བརྗོད་པར་མི་ནུས་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ་གསོ་སྦྱོང་བཅཝ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་འཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ་གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་པ་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང ། གལ་ཏེ་སུན་ཕྱུང་བར་གྱུར་ན་ཡང་དེས་ལྟུང་བ་ཡང་ཆོས་བཞིན་དུ་ཕྱིར་བྱས་ལ་ཕམ་པར་འགྱུར་བའི་ཆོས་བརྒྱད་པོ་དག་རྒྱ་ཆེར་བརྗོད་ནུས་ཤིང་ལྕི་བའི་ཆོས་བརྒྱད་པོ་དག་ཀྱང་རྒྱ་ཆེར་བརྗོད་ནུས་ན། གང་དག་སྐོ་བར་བྱེད་པ་དེ་དག་ལ་ལྟུང་བ་མེད་ལ། དེ་བསྐོས་པ་དེས་དགེ་སློང་མ་ལ་སྟོན་ན་ཡང་ལྟུང་བ་མེད་དོ། །དགེ་སློང་མ་ལ་སྟོན་པ་ཕྱི་མ་ནི་སྲིང་མོ་དག་ཅི་ཁྱེད་ཅག་དགེ་སློང་མའི་དགེ་འདུན་ཚོགས་སམ། ཡོངས་སུ་དག་གམ། འཐུན་ནམ། ཁ་ན་མ་ཐོ་བ་མེད་དམ། ཁྱེད་ཅག་ལ་དགེ་འདུན་གྱིས་མ་བསྐོས་པའི་གང་ཟག་འགའ་ཞིག་སྟོན་པར་མི་བྱེད་དམ། ཁྱེད་ཅག་ལ་སྟོན་པའི་གང་ཟག་ནི་འགའ་ཞིག་དགེ་འདུན་ལས་འོང་ངོ ། །ཁྱེད་ཅག་ལ་དགེ་སློང་འགའ་ཡང་སྟོན་པར་མི་སྤྲོའོ། །ཁྱེད་ཅག་གི་གདམས་ངག་དང་རྗེས་སུ་བསྟན་པ་ནི་དགེ་འདུན་ལས་སོ། །སྲིང་མོ་དག་གིས་བག་ཡོད་པར་སྒྲུབས་ཤིག་ཅེས་བྱ་བ་དེ་སྟོན་ནུས་པའོ། །སངས་རྒྱས་བཅོམ་ལྡན་འདས་ལ་དགེ་སློང
7.73b
རྣམས་ཀྱིས་ཞུས་པ། བཙུན་པ་དགེ་སློང་མ་བཅུ་གཉིས་སྡེ་དག་གིས་ཚེ་དང་ལྡན་པ་ལམ་པ་ལ་གནོད་པར་བགྱིའོ་སྙམ་པ་ལས་ཕན་པ་ཉིད་བགྱིས་པ་ལ་གཟིགས། དགེ་སློང་ད་ལྟར་འབའ་ཤིག་ཏུ་མ་ཟད་ཀྱི། འདི་ལྟར་འདས་པའི་དུས་ན་ཡང་དེ་དག་གིས་དེ་ལ་གནོད་པར་བྱའོ་སྙམ་པ་ལས་ཕན་པ་ཉིད་བྱས་པར་གྱུར་ཏེ། དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཞིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་བཙས་སོ། །འདོད་པ་འདི་དག་ནི་ལན་ཚཝ་དང་འདྲ་སྟེ། ཇི་ལྟ་ཇི་ལྟར་བསྟེན་པ་དེ་ལྟ་དེ་ལྟར་སྐོམ་པར་འགྱུར་བས་དེ་ཡང་དང་ཡང་དུ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་ཇི་ཙམ་ནས་བུ་བཅུ་གཉིས་བཙས་ནས་དེས་དེ་དག་ཁྱིམ་འབུབས་སུ་བཅུག་གོ། །དུས་གཞན་ཞིག་ན་དེའི་ཆུང་མ་དུས་ལ་བབ་ནས་བྲམ་ཟེ་དེ་ཡང་རྒས་པའི་གནས་སྐབས་སུ་མྱ་ངན་གྱིས་ནོན་པས་མིག་གཉིས་མདོངས་པར་གྱུར་ཏོ། །དེའི་མནའ་མ་བཅུ་གཉིས་པོ་དེ་དག་ཉེས་པར་སྤྱོད་པ་ཤ་སྟག་ཡིན་ཏེ། གང་གི་ཚེ་དེ་དག་གི་ཁྱིམ་ཐབ་དག་ཕྱི་རོལ་དུ་དོང་བ་དེའི་ཚེ་ན་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་པར་བྱེད་དོ། །བྲམ་ཟེ་དེ་སྒྲ་ལ་མཁས་པས་དེས་འདི་ནི་བདག་གི་བུ་རྣམས་ཀྱི་སྒྲ་ཡིན་ནོ། །འདི་ནི་སྐྱེས་པ་གཞན་དག་གི་སྒྲ་ཡིན་ནོ། །ཞེས་བྱ་བར་ཤེས་པས་དེས་སྐྱེས་པ་གཞན་དག་གི་སྒྲ་ཐོས་ནས་མནའ་མ་རྣམས་བསྡིགས་པ་དང ། དེ་དག་གིས་བསམས་པ། བྲམ་ཟེ་འདི་བདག་ཅག་ལ་གནོད་པའི་ཕྱིར་ཞུགས་པ་ཡིན་གྱིས་བཟའ་ནར་བྱའོ་སྙམ་ནས། དེ་དག་གིས་དེ་ལ་འབྲས་ཆེན་རྩུབ་པོ་དང ། རྩབས་བསྐོལ་བ་བྱིན་ནོ། །བྲམ་ཟེ་དེས་བུ་རྣམས་ལ་སྨྲས་པ། བུ་དག་ཁོ་བོ་མནའ་མ་འདི་དག་གིས་འབྲས་ཆན་རྩུབ་པོ་དང ། རྩབས་བསྐོལ་བ་བྱིན་ནོ། །དེ་དག་གིས་ཆུང་མ་དག་ལ་སྨྲས་པ། ཁྱེད་ཅག་གིས་ཅིའི་ཕྱིར་ཡབ་ལ་འབྲས་ཆན་རྩུབ་པོ་དང ། རྩབས་བསྐོལ་བ་གསོལ། དེ་དག་གིས་སྨྲས་པ། ཡབ་ཀྱི་བསོད་ནམས་དག་པས་ཏེ། དེའི་དོན་དུ་སྣོད་དུ་འབྲས་ས
7.74a
ལུ་ཐུག་པོ་ཆེ་དག་སྩལ་ན་འབྲས་ཆན་རྩུབ་པོར་འགྱུར་ཞིང ། ཆབ་ཞོ་སྩལ་ན་རྩབས་བསྐོལ་བར་འགྱུར་རོ། །ཅིའི་ཕྱིར་དེ་དག་དེ་ལྟར་འགྱུར། དེ་དག་གིས་སྨྲས་པ། གལ་ཏེ་ཁྱེད་ཅག་ཐུགས་མི་ཆེས་ན་བདག་ཅག་གིས་ཁྱེད་ཀྱི་མངོན་སུམ་དུ་བགྱིའོ། །དེ་དག་གིས་གཅིག་ལ་གཅིག་སྨྲས་པ། བདག་ཅག་གིས་ཁྱིམ་ཐབ་དག་ལ་དམ་བཅས་པའི་སྐབས་དེ་གྲུབ་པར་བྱ་དགོས་སོ་ཞེས་དེ་དག་གིས་རྫ་མཁན་བོས་ཏེ་སྨྲས་པ། བཞིན་བཟངས་ཁྱོད་ཀྱིས་རྫེའུ་ཁ་གཅིག་ལ་ནང་གཉིས་ཡོད་པ་བྱེད་ནུས་སམ། དེས་སྨྲས་པ། ནུས་སོ་ཞེས་དེས་རྫེའུ་ཁ་གཅིག་ལ་ནང་གཉིས་ཡོད་པ་བྱས་སོ། །དེ་དག་གིས་རྫེའུའི་ནང་གཅིག་ཏུ་འབྲས་རྩུབ་པོ་དག་བླུགས་ལ། ནང་གཅིག་ཏུ་ནི་འབྲས་ས་ལུ་ཐུག་པོ་ཆེ་དག་བླུགས་སོ། །རྫེའུ་གཅིག་ཤོས་ཀྱི་ནང་གཅིག་ཏུ་ནི་ཞོ་བླུགས་ལ། ནང་གཅིག་ཏུ་རྩབ་མོ་བླུགས་ཏེ་གཡོས་བྱས་ནས་ཁྱིམ་ཐབ་དག་ལ་སྨྲས་པ། རྗེའི་སྲས་དག་ཅི་ལགས་ཇེ་དང་པོར་ཡབ་བཤོས་གསོལ་ལམ། འོན་ཏེ་རྗེའི་སྲས་དག་གསོལ། དེ་དག་གིས་སྨྲས་པ། ཇེ་དང་པོར་ཡབ་བཤོས་གསོལ་ལ། དེའི་འོག་ཏུ་ཁོ་བོ་ཅག་བྱིན་ཅིག་།དེ་དག་གིས་དེ་དག་གི་མདུན་དུ་རྫེའུའི་ནང་གཅིག་ཕྱེ་སྟེ། འབྲས་ཆན་རྩུབ་པོ་བཅུས་ཤིང་རྫེའུ་གཅིག་ཤོས་ཀྱི་ནང་གཅིག་ཕྱེ་སྟེ་རྩབ་མོ་བསྐོལ་བ་བཅུ་ནས་གྱོས་པོ་ལ་བྱིན་ནོ། །དེའི་འོག་ཏུ་རྫེའུའི་ནང་གཅིག་ཕྱེ་སྟེ་འབྲས་ས་ལུ་ཐུག་པོ་ཆེའི་ཆན་བཅུས་ཤིང་རྫེའུ་གཅིག་ཤོས་ཀྱི་ནང་གཅིག་ཕྱེ་སྟེ་ཞོའི་ཚོད་མ་བཅུས་ནས་ཁྱིམ་ཐབ་རྣམས་ལ་བྱིན་ནོ། །བུ་རྣམས་ཀྱིས་ཕ་ལ་སྨྲས་པ། ཡབ་ཁྱོད་ཀྱི་བསོད་ནམས་དག་པས་ཏེ། བདག་ཅག་གི་མངོན་སུམ་ཁོ་ནར་རྫེའུ་གཅིག་གི་ནང་དུ་འབྲས་ས་ལུ་ཐུག་པོ་ཆེ་དག་སྩལ་ཅིང་རྫེའུ་གཅིག་ཤོས་ཀྱི་ནང་དུ་ཆབ་ཞོ་སྩལ་ཏེ་གཡོས་བགྱིད་དུ་སྩལ་ན། ཁྱོད་ཀྱི་ཞལ་དུ་ནི་འབྲས་ཆན་རྩུབ་པོ་དང ། རྩབས་བསྐོལ་བ་མཆི་ལ། བདག་ཅག་གི་གཡར་དུ་ནི་འབྲས་ས་ལུ་ཐུག་པོ་ཆེའི་ཆན་དང ། ཆབ་ཞོའི་ཚོད་མ་མཆི་བས་བུད་མེད་དག་གིས་མ་ནོང་སོ། །བྲམ་ཟེས་བསམས་པ། ཁོ་བོས་ལག་པས་བཅལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན་ཅིའི་ཕྱིར་ཁོ་བོའི་བསོད་ནམས་དག
7.74b
ཟད་པར་གྱུར་སྙམ་ནས། དེས་དེ་དག་གིས་མ་ཚོར་བར་ལྐོག་ཏུ་དེ་དག་གི་ཚང་མང་དུ་སོང་སྟེ་ལག་ནོམ་གྱིས་བཙལ་བ་དང ། རྫེའུ་ཁ་གཅིག་ལ་ནང་གཉིས་ཡོད་པ་དག་ལག་པས་ཟིན་ནས་དེས་དེ་དག་གཞན་དུ་སྦས་ཏེ། བུ་དག་འོངས་ཤིང་ལྷག་པ་ན་བུ་དག་ཁོ་བོའི་བསོད་ནམས་དག་ཟད་པ་ལ་ལྟོས་ཤེས་རྫེའུ་དེ་དག་བསྟན་ནས་ཚིགས་སུ་བཅད་པ་སྨྲས་པ། བུ་རྣམས་གཞན་གྱི་ཁྱིམ་དག་ན། །རྫེའུ་གཅིག་ལ་ནི་ཁ་གཅིག་ཡོད། །བདག་ཅག་སྐལ་བ་མེད་རྣམས་ཀྱི། །རྫེའུ་ནང་གཉིས་ལ་འང་ཁ་གཅིག་ཡོད། །དེ་དག་གིས་ཆུང་མ་དེ་དག་ཏེ་པོར་བརྡེགས་པ་དང ། དེ་དག་གིས་བསམས་པ། བྲམ་ཟེ་འདི་བདག་ཅག་ལ་གནོད་པའི་ཕྱིར་ཞུགས་པ་ཡིན་གྱིས། བདག་ཅག་གིས་འདི་གསད་པར་བྱའོ་སྙམ་ནས་ཕྱོགས་དེར་སྦྲུལ་ཁས་སྡིགས་པ་ཞིག་འོངས་ནས་དེ་དག་གིས་དེ་ལ་དྲིས་པ། བཞིན་བཟང་སྦྲུལ་ཡོད་དམ། དེས་སྨྲས་པ། སྦྲུལ་ཇི་ལྟ་བུ་འདོད་ཅི་ཤི་བ་འམ། འོན་ཏེ་གསོན་པོ། དེ་དག་གིས་སྨྲས་པ། ཤི་བའོ། །དེས་བསམས་པ། འདི་དག་ལ་སྦྲུལ་ཤི་བས་ཅི་བྱ་སྟེ། འདི་དག་བྲམ་ཟེ་འདི་གསོད་པར་འདོད་གོར་མ་ཆག་སྙམ་མོ། །ཆོས་ཉིད་ཀྱིས་ན་སྦྲུལ་ཁྲོས་པའི་དུག་ནི་མགོ་དང་མཇུག་མའི་གནས་གཉིས་སུ་འཕོ་བས་དེས་སྦྲུལ་ནག་པོ་ཁྲོས་པར་བྱས་ཏེ་མགོ་དང་མཇུག་མ་བཅད་ནས་རྐེད་པའི་ཆ་དེ་དག་ལ་བྱིན་ནོ། །དེ་དག་གིས་ཕོ་ཤའི་ཁུ་ཤ་བྱས་ཏེ་བྲམ་ཟེ་དེ་ལ་སྨྲས་པ། ཡབ་ཕོ་ཤའི་ཁུ་ཤ་གསོལ་ལམ། བྲམ་ཟེ་དེས་བསམས་པ། ཅིའི་ཕྱིར་འདི་དག་གིས་བདག་ལ་ཕོ་ཤའི་ཁུ་ཤ་ལྡུད་པར་འགྱུར་ཏེ། དུག་ཅུང་ཞིག་སྦྱིན་འདོད་གོར་མ་ཆག་སྙམ་ནས། དེས་བསམས་པ། ཇི་ལྟར་ཤི་ཡང་བླས་བཏུང་ངོ་སྙམ་ནས་དེ་དག་གིས་དེ་ལ་སྦྲུལ་གྱི་ཕོ་ཤའི་ཁུ་ཤ་བླུད་ནས་དེས་དེ་འཐུངས་པ་དང ། དེའི་རླངས་པས་ལིང་ཐོག་ཕྱིད་ནས་བྲམ་ཟེ་དེས་མིག་མཐོང་བར་གྱུར་ཏོ། །དེས་བསམས་པ། ཅི་ནས་ཀྱང་རྣོན་དུ་གཞུག་པའི་ཐབས་བྱའོ་སྙམ་ནས་དེས་ས་ལ་བསྒྱེལ་ཏེ་ཉལ་ནས་སྨྲས་པ། ཁོ་བོ་ཤི་ལ་ཐུག་གོ་ཁོ་བོ་ཤི་ལ་ཐུག་གོ་དེ་དག་གིས་བསམས་པ། མྱུར་དུ་ཤི་བར་གྱུར་ཅིག་སྙམ་ནས་སྨྲས་པ། ཡབ་ཡང་གསོལ་ཅིག་དང་ཁྱོད་སོས་པར་འགྱུར་རོ། །དེས་སྨྲས་པ། བཏུང་ངོ་དེ་དག
7.75a
གིས་དེ་ལ་ཡང་སྦྲུལ་གྱི་ཕོ་ཤའི་ཁུ་ཤ་བླུད་ནས་དེས་ཡང་འཐུངས་པ་དང ། དེའི་རླངས་པས་དེའི་ལིང་ཐོག་རྒྱ་ཆེར་ཕྱིད་དོ། །དེའི་མིག་གིས་སྔ་མ་བཞིན་གསལ་བར་མཐོང་ནས་དེ་ཅང་མི་སྨྲ་བར་འདུག་གོ། །མནའ་མ་དེ་དག་སྔོན་བྲམ་ཟེ་མདོངས་པར་གྱུར་པའི་གནས་སྐབས་ན་དེ་ཁྱད་དུ་བསད་དེ་བག་མེད་པར་སྤྱོད་པ་དེ་བཞིན་དུ་ཡང་སྤྱད་པར་བརྩམས་པ་དང ། བྲམ་ཟེ་དེ་དབྱུག་པ་ཐོགས་ཏེ་ལངས་ནས་སྨྲས་པ། ཁྱེད་ཇི་སྙམ་དུ་སེམས། ད་ལྟར་ཁོ་བོ་མི་མཐོང་སྙམ་འམ། ད་ཁོ་བོའི་མིག་སྦྲུལ་གྱི་ཕོ་ཤའི་ཁུ་ཤའི་རླངས་པས་ཕོག་པས་ལིང་ཐོག་ཐམས་ཅད་ཕྱིད་དེ་སྔོན་གྱི་གནས་སྐབས་བཞིན་དུ་ཐམས་ཅད་གསལ་བར་མཐོང་གིས་བུ་མོ་དག་ཕྱིན་ཆད་བག་ཡོད་པར་སྤྱོད་ཅིག་།དགེ་སློང་དག་དེའི་ཚེ་དེའི་དུས་ན་བྲམ་ཟེ་གང་ཡིན་པ་དེ་ནི་ལམ་པ་འདི་ཉིད་ཡིན་ནོ། །དེའི་ཚེ་དེའི་དུས་ན་མནའ་མ་བཅུ་གཉིས་པོ་གང་ཡིན་པ་དེ་ནི་དགེ་སློང་མ་བཅུ་གཉིས་སྡེ་འདི་དག་ཡིན་ཏེ། དེའི་ཚེ་ན་ཡང་འདི་དག་གིས་དེ་ལ་གནོད་པ་བྱའོ་སྙམ་པ་ལས་ཕན་པ་ཉིད་བྱས་པར་གྱུར་ཏོ། །ཡང་སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཚེ་དང་ལྡན་པ་ལམ་པ་གདམས་ངག་ཅུང་ཞིག་གིས་གདམས་པ་མཛད་པས་འཁོར་བའི་དགོན་པ་ནས་ཕྱུང་སྟེ་ཤིན་དུ་མཐུར་ཐག་པ་གྲུབ་པ་དང་བདེ་བ་བླ་ན་མ་མཆིས་པའི་མྱ་ངན་ལས་འདས་པ་ལ་གཞག་པ་མཛད་པ་ལ་གཟིགས། དགེ་སློང་དག་ད་ལྟར་དུ་མ་ཟད་དེ་འདི་ལྟར་འདས་པའི་དུས་ན་ཡང་ངས་འདི་གདམས་ངག་ཅུང་ཞིག་གིས་གཏམ་པས་དབང་ཕྱུག་གི་བདག་པོ་ཆེན་པོ་ལ་བཞག་པར་གྱུར་ཏེ། དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་ཁྱིམ་བདག་ཕྱུག་པ་ནོར་མང་ལ་ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་བྱུང་ནས་དེས་ཆུང་མ་ལ་སྨྲས་པ། བཟང་མོ་བདག་ཅག་ལ་བུ་ལོན་འཕྲོག་པ་ནོར་འཕྲོག་པ་བྱུང་གིས
7.75b
ཁོ་བོ་ཟོང་ཐོགས་ཏེ་རྒྱ་མཚོ་ཆེན་པོར་འཇུག་དུ་འགྲོའོ། །རྗེའི་སྲས་དེ་བཞིན་མཛོད་ཅིག་།ཁྱིམ་བདག་དེས་བསམས་པ། གལ་ཏེ་ཆུང་མ་འདི་ལ་ཀཱར་ཤཱ་པ་ཎ་མང་པོ་དག་གཏད་པར་གྱུར་ན་སྐྱེས་པ་གཞན་དང་ལྷན་ཅིག་འགྱུར་བ་སྟེན་པར་འགྱུར་རོ་སྙམ་ནས་དེས་དེ་ལ་ཀཱར་ཥཱ་པ་ཎ་ཉུང་ཟད་ཅིག་བྱིན་ནོ། །རི་བྲག་དེ་ན་ཚོང་དཔོན་ཞིག་འདུག་པ་དེ་ཁྱིམ་བདག་དེའི་ཆུང་པོ་གྲོགས་ཡིན་པས་ཁྱིམ་བདག་དེས་ཚོང་དཔོན་དེའི་ལག་ཏུ་ཀཱར་ཥཱ་པ་ཎ་མང་པོ་དག་གཏམས་ནས་སྨྲས་པ། གལ་ཏེ་ཁོ་བོའི་ཆུང་མ་གོས་དང་ཟས་ཡོངས་སུ་ཉམས་པར་གྱུར་ན། ཁྱོད་ཀྱིས་ཟས་དང་གོས་ཀྱིས་དེ་ལ་མཁོ་བ་བསྟབས་པར་གྱིས་ཤིག་ཅེས་སྨྲས་ནས། དེ་ཟོང་ཐོགས་ཏེ་རྒྱ་མཚོ་ཆེན་པོར་ཞུགས་པ་དང་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ཆུང་མ་དེས་ཁྱེའུ་དེ་ཉེ་དུའི་སྟོབས་དང་ལག་སྟོབས་ཀྱིས་བསྙོད་ཅིང་གསོས་ཏེ། བསྐྱེད་པ་དང ། ཁྱེའུ་དེས་མ་ལ་དྲིས་པ། མ་བདག་གི་ཕ་དང་མེས་པོ་དག་གིས་ལས་ཅི་ཞིག་བྱས་པར་གྱུར། མས་བསམས་པ། གལ་ཏེ་འདི་ལ་རྒྱ་མཚོ་ཆེན་པོར་གྲུ་བོ་ཆེ་སྤྱོད་པར་གྱུར་ཏོ་ཞེས་བྱས་ན་འདི་ཡང་རྒྱ་མཚོ་ཆེན་པོར་འཇུག་པར་འགྱུར་ཞིང་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་དེས་སྨྲས་པ། བུ་ཁྱོད་ཀྱི་ཕ་དང་མེས་པོ་དག་འདི་ཉིད་ན་ཚོང་པ་བྱེད་པར་གྱུར་ཏོ། །མ་ཀཱར་ཥ་པ་ཎ་དག་བྱིན་ཅིག་དང་བདག་གིས་ཀྱང་འདི་ཉིད་དུ་ཚོང་བྱའོ། །བུ་ཁོ་མོ་ལ་ཀཱར་ཥ་པ་ཎ་དག་ག་ལ་ཡོད། ཁོ་མོས་ཁྱོད་ཀྱང་ཉེ་དུའི་སྟོབས་དང་ལག་སྟོབས་གྱིས་བསྙོད་ཅིང་གསོས་ཏེ་བསྐྱེད་པ་ཡིན་པས་ཁོ་མོ་ལ་ཀཱར་ཥ་པ་ཎ་དག་གི་འབྱོར་པ་ཡོད་རེ་སྐན། འདི་ལྟར་ཚོང་དཔོན་འདི་ཁྱོད་ཀྱི་ཕའི་ཆུང་པོ་གྲོགས་ཡིན་གྱིས་འདི་ལས་ཀཱར་ཥཱ་པ་ཎ་དག་ལོང་ལ་ལས་གྱིས་ཤིག་།ཁྱེའུ་དེ་ཚོང་དཔོན་དེའི་གན་དུ་སོང་བ་དང ། ཚོང་དཔོན་དེ་ཡང་མི་གཞན་ཞིག་གིས་ལན་གསུམ་གྱི་བར་དུ་ཚོང་ལ་དོར་བྱས་པས་དེ་དེ་ལ་ནན་ཐུར་བྱེད་ཅིང་འདུག་པ་ན་དེའི་ཁྱིམ་ནས་བུ་མོ་མངག་གཞུག་མས་ཕྱག་དར་གྱི་སྟེང་དུ་བྱི་བའི་རོ་ཞིག་བཞག་སྟེ་ཕྱིར་ཕྱུང་ནས
7.76a
དོར་བར་བརྩམས་པ་དང ། ཚོང་དཔོན་དེས་མི་དེ་ལ་སྨྲས་པ། མི་གང་ནུས་པ་ཡིན་ན་དེས་བྱི་བའི་རོ་འདིས་ཀྱང་བདག་ཉིད་འཛིན་པར་ནུས་སོ། །ཁྱེའུ་དེས་དེ་ཐོས་ནས་བསམས་པ། ཚོང་དཔོན་འདི་ནི་བདག་ཉིད་ཆེན་པོ་ཡིན་པས་འདི་བྱུང་རྒྱལ་དུ་སྨྲ་བར་མི་བྱེད་པས་བྱི་བའི་རོ་འདིས་བདག་ཉིད་འཛིན་པར་ནུས་གོར་མ་ཆག་སྙམ་ནས། ཁྱེའུ་དེ་བུ་མོ་མངག་གཞུག་མ་དེའི་ཕྱི་བཞིན་སོང་སོང་སྟེ། བུ་མོ་མངག་གཞུག་མ་དེས་ཕྱག་དར་བོར་བ་དང ། ཁྱེའུ་དེས་བྱི་བའི་རོ་དེ་བླངས་ནས་ཚོང་དུས་སུ་སོང་ངོ ། །དེ་ན་ཚོང་ཁང་ན་བྱི་ལ་ཞིག་བཏགས་ཤིང་འདུག་ནས་ཁྱེའུ་དེས་བྱི་བའི་རོ་དེ་བྱི་ལ་དེ་ལ་བསྟན་པ་དང ། དེས་དེ་མཐོང་ནས་མཆོང་བར་བརྩམས་པ་དང ། ཚོང་པ་དེས་ཁྱེའུ་ལ་སྨྲས་པ། བྱི་བའི་རོ་ནི་བྱི་ལ་འདི་ལ་བྱིན་ཅིག་།ཁྱེའུས་སྨྲས་པ། འདི་རིན་མེད་པར་ཇི་ལྟར་སྦྱིན། རིན་བྱིན་ཅིག་དང་སྦྱིན་ནོ། །ཚོང་པ་དེས་ཁྱེའུ་དེ་ལ་སྲན་མ་དག་གིས་སྙིམ་པ་བཀང་སྟེ་བྱིན་ནོ། །ཁྱེའུས་བསམས་པ། གལ་ཏེ་བདག་གིས་འདི་འཆོས་པར་གྱུར་ན་གཞི་ཆད་པར་འགྱུར་རོ་སྙམ་ནས་ཁྱེའུ་དེས་སྲན་མ་དེ་དག་སླང་ལ་བརྔོས་ནས་ཆུ་གྲང་མོས་རིལ་བ་བཀང་སྟེ་རི་བྲགས་སུ་སོང་ནས་ཕྱོགས་གང་དུ་ཤིང་ཐུན་དག་ངལ་སོ་བར་འགྱུར་བའི་ཕྱོགས་དེར་སོང་སྟེ་བསྡད་པ་དང ། ཤིང་ཐུན་དག་ལྷགས་ནས་ཁྱེའུ་དེས་དེ་དག་ལ་སྨྲས་པ། ཞང་པོ་དག་ཤིང་ཁུར་ཞོག་ལ་ཡིད་ཙམ་ཞིག་ངལ་སོ་ཤིག་།དེ་ནས་ཤིང་ཐུན་དེ་དག་གིས་ཤིང་ཁུར་དག་བཞག་པ་དང ། ཁྱེའུ་དེས་དེ་དག་ལ་སྲན་མ་ཉུང་ཟད་ཉུང་ཟད་བྱིན་ཞིང་ཆུ་གྲང་མོ་ཡང་འཐུང་དུ་བཅུག་གོ། །ཤིང་ཐུན་རྣམས་ཀྱིས་སྨྲས་པ། ཚ་བོ་ཁྱོད་གར་འགྲོ། ཤིང་ཐུར་འགྲོའོ། །ཁོ་བོ་ཅག་ཇི་ཙམ་དུ་སྔར་དོང་ན་ཡང་ད་འཁོར་བ་ཡིན་ན། ཁྱོད་ད་སོང་ན་ནམ་ཞིག་འཁོར་བར་འགྱུར་ཞེས་དེ་དག་གིས་དེ་ལ་ཤིང་རེ་རེ་བྱིན་ནོ། །ཤིང་རེ་རེ་པོ་དེ་དག་གིས་ཁྱེའུ་དེའི་ཤིང་ཁུར་ལོངས་ནས་དེས་དེ་ཁྱེར་ཏེ་ཕྱིར་ལོག་གོ། །དེས་དེ་དག་བཙོངས་ཏེ་སྲན་མ་དག་ཉོས་ནས་དེ་དག་བརྔོས་ཏེ་ཆུ་གྲངས་མོས་བུམ་པ་བཀང་ནས་ཡང་ཕྱོགས་དེ་ཉིད་དུ་སོང་སྟེ་བསྡད་པ་དང ། ཤིང་ཐུན་དེ་དག་ཀྱང་ལྷགས་ནས་དེས་དེ་དག་ལ་སྨྲས་པ། ཞང་པོ་དག་ཤིང་ཁུར་ཞོག་ལ་ཡིད་ཙམ་ཞིག་ངལ་སོས་ཤིག་།
7.76b
དེ་ནས་ཤིང་ཐུན་དེ་དག་གིས་ཤིང་ཁུར་དག་བཞག་པ་དང ། ཁྱེའུ་དེ་ཡང་དེ་དག་ལ་སྲན་མ་དག་གིས་བགོ་བཤའ་བྱས་ཤིང་ཆུ་གྲང་མོས་ངོམས་པར་བྱས་པ་དང ། དེ་དག་གིས་སྨྲས་པ། ཚ་བོ་ཁྱོད་ཉིན་གཅིག་བཞིན་དུ་སྲན་མ་དང་ཆུ་ཐོགས་ལ་འདི་ཉིད་དུ་སྡོད་ཅིག་དང ། ཁོ་བོ་ཅག་གིས་ཁྱོད་ལ་ཤིང་ཁུར་གྱི་གོང་ཤིང་ཁྱེར་ཏེ་འོང་ངོ ། །ཁྱེའུ་དེས་ཉི་མ་རེ་རེ་ཞིང་དེ་བཞིན་བྱ་བར་བརྩམས་ནས་དེས་དེ་དག་ལ་སྨྲས་པ། ཞང་པོ་དག་ཁྱེད་ཅག་ཤིང་ཁུར་དག་ཚོང་འདུས་སུ་མ་ཁྱེར་བར་ཁོ་བོའི་སྡུམ་པར་ཞོག་ཤིག་དང ། ཁོ་བོས་ཁྱེད་ཅག་ལ་རིན་བསྡོམས་ཏེ་སྦྱིན་ནོ། །དེ་དག་གིས་ཤིང་ཁུར་དག་དེའི་ཁྱིམ་དུ་བཞག་གོ། །དུས་གཞན་ཞིག་ན་ཉི་མ་བདུན་དུ་ཡུལ་ངན་བྱུང་ནས་ཁྱེའུ་དེས་ཤིང་དེ་དག་བཙོངས་པ་དང ། དེས་ཁེ་སྤོགས་མང་པོ་གྲུབ་བོ། །དེ་ནས་ཁྱེའུ་དེས་བསམས་པ། ཚོང་པ་རྣམས་ཀྱི་ནང་ན་འདི་ལྟ་སྟེ། ཤིང་ཚོང་བ་འདི་ནི་ཐ་ཆད་ཡིན་ཏེ། འདི་ལྟར་ཙན་དན་གྱིས་འཚོ་ན་ཡང་ཤིང་གིས་འཚོ་བ་ཁོ་ནར་ཟད་པས། བདག་གིས་བཟའ་བཅའི་ཟོང་དགྲམ་པར་བྱའོ་སྙམ་ནས། དེས་བཟའ་བཅའི་ཟོང་བཀྲམ་ཞིང་དེ་ཆོས་དང་རིགས་པས་ཚོང་བྱེད་པས་དེས་དེར་ཡང་ཁེ་སྤོགས་མང་པོ་གྲུབ་པར་གྱུར་ཏོ། །དེས་ཡང་བསམས་པ། ཚོང་པ་རྣམས་ཀྱི་ནང་ན་འདི་ལྟ་སྟེ། བཟའ་བཅའ་འཚོང་བ་འདི་ནི་ཐ་ཆད་ཡིན་གྱིས་བདག་གིས་སྤོས་འཚོང་གི་ཟོང་དགྲམ་པར་བྱའོ་སྙམ་ནས་དེས་སྤོས་འཚོང་གི་ཟོང་བཀྲམ་ཞིང་དེ་ཆོས་དང་རིགས་པས་ཚོང་བྱེད་པས་དེས་དེར་ཡང་ཁེ་སྤོགས་མང་པོ་གྲུབ་པར་གྱུར་ཏོ། །དེས་ཡང་བསམས་པ། ཚོང་པ་རྣམས་ཀྱི་ནང་ན་འདི་ལྟ་སྟེ། སྤོས་འཚོང་འདི་ནི་ཐ་ཆད་ཡིན་གྱིས་བདག་གིས་ཟོང་དགྲམ་པར་བྱའོ་སྙམ་ནས་དེས་དབྱིག་གི་ཟོང་བཀྲམ་ཞིང་དེ་ཆོས་དང་རིགས་པས་ཚོང་བྱེད་པས་དེས་དབྱིག་ཚོངས་པ་ཐམས་ཅད་ཟིལ་གྱིས་མནན་ནས་དེའི་མིང་བྱི་དབྱིག་པ་བྱི་དབྱིག་པ་ཞེས་བྱ་བར་གྱུར་ཏོ། །དབྱིག་ཚོངས་པ་དེ་དག་གིས་སྨྲས་པ། བྱི་དབྱིག་པ་འདིས་བདག་ཅག་ཐམས་ཅད་ཟིལ་གྱིས་མནན་གྱིས། ཅི་ནས་ཀྱང་འདི་རྒྱ་མཚོ་ཆེན་པོར་འཇུག་ཅིང་དེར་ཚུལ་མ་ཡིན་པས་སྡུག་བསྔལ་བར་འགྱུར་བ་དེ་ལྟར་ང་རྒྱལ་བསྐྱེད་པར
7.77a
བྱའོ་སྙམ་ནས། དེ་དང་ཧ་ཅང་ཐག་མི་རིང་བར་འཁོད་དེ་ལོང་གཏམ་སྨྲ་བས་འཁོད་ཅིང ། ཤེས་ལྡན་དག་འདི་ལྟ་སྟེ་དཔེར་ན་མི་གླང་པོ་ཆེའི་གཉར་ཞོན་ནས་རྟའི་རྒྱབ་ཏུ་ཞོན་པ་དང ། རྟའི་རྒྱབ་ཏུ་ཞོན་ནས་ཁྱོགས་སྤྱིལ་ལ་ཞོན་པ་དང ། ཁྱོགས་སྤྱིལ་ལ་ཞོན་ནས་རྐང་པས་འགྲོ་བ་དེ་བཞིན་དུ་བྱི་དབྱིག་པ་འདི་ཡང་ཕ་མེས་དག་རྒྱ་མཚོ་ཆེན་པོར་གྲུ་བོ་ཆེ་སྤྱོད་ཅིང་འགྲོ་བར་གྱུར་པ་ལས་འདི་ད་ལྟར་དབྱིག་ཚོངས་ཉིད་ཀྱིས་ཚེགས་ཆེན་པོས་འཚོ་བ་སྦྱོར་བར་བྱེད་དོ། །ཞེས་སྨྲས་པ་དང ། བྱི་དབྱིག་པས་ཐོས་ནས་དེས་སྨྲས་པ། ཤེས་ལྡན་དག་ཅི་ཟེར། ཁྱོད་ཀྱི་ཕ་མེས་དག་རྒྱ་མཚོ་ཆེན་པོར་གྲུ་བོ་ཆེ་སྤྱོད་ཅིང་འགྲོ་བར་གྱུར་པ་ལས་དེང་སང་དེ་དག་ཤི་ནས་ཁྱོད་དབྱིག་ཚོངས་ཙམ་གྱིས་ཚེགས་ཆེན་པོས་འཚོ་བ་སྦྱོར་བར་བྱེད་དོ། །བྱི་དབྱིག་པ་ཁྱིམ་དུ་སོང་སྟེ་མ་ལ་དྲིས་པ། མ་ཁོ་བོའི་ཕ་མེས་དག་རྒྱ་མཚོ་ཆེན་པོར་གྲུ་བོ་ཆེ་སྤྱོད་པར་གྱུར་པ་བདེན་ནམ། མས་བསམས་པ། འདིས་འགའ་ཞིག་ལས་ཐོས་པར་གྱུར་གོར་མ་ཆག་གིས་བདག་གིས་འདི་ལ་བརྫུན་གྱི་ཚིག་སྨྲ་བ་ནི་བདག་གི་ཚུལ་དང་འཐུན་པ་མ་ཡིན་ནོ་སྙམ་ནས་དེས་སྨྲས་པ། བུ་བདེན་ནོ། །བྱི་དབྱིག་པས་སྨྲས་པ། མ་བདག་ཀྱང་རྒྱ་མཚོ་ཆེན་པོར་འཇུག་གིས་གནོང་ཤིག་།མས་སྨྲས་པ། བུ་འདི་ཉིད་དུ་འདུག་ཤིག་།བྱི་དབྱིག་པས་ཡང་དང་ཡང་དུ་འགྲོའོ་ཞེས་སྨྲས་པ་དང ། མས་དེ་དུས་ཀྱིས་འཆུ་བར་ཤེས་ནས་གནང་ངོ ། །བྱི་དབྱིག་པས་སྲང་ཆེན་པོར་ཚོང་པའི་ཚོགས་རྣམས་ལ་ཁྱེད་ཅག་ལས་གང་དེད་དཔོན་བྱི་དབྱིག་པ་དང ། ལྷན་ཅིག་ཤོ་གམ་མེད་པ་དང ། ལ་གཅན་མེད་པ་དང ། གྲུ་བཙས་མེད་པར་རྒྱ་མཚོ་ཆེན་པོར་འཇུག་པར་སྤྲོ་བ་དེས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་གྱིས་ཤིག་ཅེས་དྲིལ་བསྒྲག་པ་བྱས་སོ། །དེ་ནས་ཚོང་པ་ལྔ་བརྒྱ་ཙམ་གྱིས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། །དེ་ནས་དེད་དཔོན་བྱི་དབྱིག་པས་དགེ་མཚན་དང ། བཀྲ་ཤིས་དང ། དགེ་བར་འགྱུར་བ་བྱས་ཏེ་ཤིང་རྟ་དག་དང ། ཁུར་དག་དང ། སྤྱད་དག་དང ། གླེ་བ་དག་དང ། རྔ་མོ་དག་དང ། བ་གླང་དག་དང ། བོང་བུ་དག་ལས་ཟོང་མང་པོ་བཀལ་ཏེ་ཚོང་པ་དེ་དག་དང་ལྷན་ཅིག་རྒྱ་མཚོ་ཆེན
7.77b
པོར་འཕགས་སོ། །དེ་ན་དེ་ལ་མི་ལྔ་ཡོད་དེ། སྡུད་པར་བྱེད་པ་དང ། ཚར་གཅོད་པར་བྱེད་པ་དང ། བྱི་དོར་པ་དང ། ཆུ་ཕྱགས་པ་དང ། རླུང་ཡོར་ཐོགས་པའོ། །སྡུད་པར་བྱེད་པ་གང་ཞེ་ན། དེ་ན་བཟའ་བ་དང ། བཏུང་བ་སྦྱོར་བ་གང་ཡིན་པའོ། །ཚར་གཅོད་པར་བྱེད་པ་གང་ཞེ་ན། དེ་ན་རྩོད་པ་བྱུང་ངོ་ཅོག་ཉེ་བར་ཞི་བར་བྱེད་པ་གང་ཡིན་པའོ། །བྱི་དོར་བྱ་བ་གང་ཞེ་ན། དེ་ན་གྲུ་འཆོས་པར་བྱེད་པ་གང་ཡིན་པའོ། །ཆུ་ཕྱགས་པ་གང་ཞེ་ན། དེ་ན་ཆུ་འཕྱག་པར་བྱེད་པ་གང་ཡིན་པའོ། །རླུང་ཡོར་ཐོགས་པ་གང་ཞེ་ན། དེ་ན་རྒྱུ་སྐར་དག་ལ་རྣམ་པར་ལྟ་བར་བྱེད་པ་གང་ཡིན་པའོ། །དེ་མཐར་གྱིས་རྒྱ་མཚོའི་འགྲམ་དུ་ཕྱིན་པ་དང ། ཚོང་པ་དེ་དག་གིས་རྒྱ་མཚོ་ཆེན་པོ་མཐོང་ནས་སྐྲག་སྟེ་གྲུ་བོ་ཆེར་འཇུག་པར་མི་སྤྲོ་ནས། དེད་དཔོན་བྱི་དབྱིག་པས་རླུང་ཡོར་ཐོགས་པ་ལ་སྨྲས་པ། ཀཝའི་ནང་རྗེ་རྒྱ་མཚོ་ཆེན་པོའི་བསྔགས་པ་ཇི་ལྟ་བ་བཞིན་དུ་སྒྲོགས་ཤིག་།དེ་ནས་རླུང་ཡོར་ཐོགས་པས་བསྒྲག་པར་བརྩམས་པ། འཛམ་བུའི་གླིང་པའི་ཚོང་པ་ཤེས་ལྡན་དག་ཉོན་ཅིག་།རྒྱ་མཚོ་ཆེན་པོ་འདི་ན་རིན་པོ་ཆེ་ཆེན་པོ་ཆེ་བ་འདི་ལྟ་བུ་འདི་ལྟ་སྟེ། ནོར་བུ་དག་དང ། མུ་ཏིག་དང ། བཻ་དཱུརྱ་དང ། མན་ཤེལ་དཀར་པོ་དང ། བྱི་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་པ་དག་ཡོད་ཀྱིས་ཁྱེད་ཅག་ལས་གང་རིན་པོ་ཆེ་དེ་ལྟ་བུ་དག་གིས་བདག་ཉིད་དང ། ཕ་མ་དང ། བུ་དང ། ཆུང་མ་དང ། བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་དག་ལེགས་པར་བདེ་བས་ཚིམ་པར་བྱ་བ་དང ། དུས་དང་དུས་སུ་དགེ་སྦྱོང་དང ། བྲམ་ཟེ་དག་ལ་མཐོན་པོར་འགྲོ་བ་དང ། སྐལ་བ་ཅན་དུ་འགྱུར་བ་དང ། རྣམ་པར་སྨིན་པ་བདེ་བ་དང ། ཕྱི་མ་ལ་མཐོ་རིས་སུ་འགྲོ་བའི་ཡོན་འབུལ་བར་འདོད་པ་དེ་རྒྱ་མཚོ་ཆེན་པོར་ཞུགས་ཤིག་།འཇིག་རྟེན་ནི་འབྱོར་པ་འདོད་པས་སྐྱེ་བོ་ཕལ་པོ་ཆེའི་ཚོགས་གྲུ་བོ་ཆེར་ཞུགས་པ་དང ། དེས་དེ་དག་གྲུ་བོ་ཆེས་མི་བཟོད་པར་གྱུར་ནས་དེད་དཔོན་བྱི་དབྱིག་པས་བསམས་པ། ད་བདག་གིས་ཕྱིར་བྱུང་ཤིག་ཅེས་ཇི་སྐད་སྨྲ་བར་བྱ་སྙམ་ནས་དེས་རླུང་ཡོར་ཐོགས་པ་ལ་སྨྲས་པ། ཀཝའི་ནང་རྗེ་རྒྱ་མཚོ་ཆེན་པོའི
7.78a
བསྔགས་པ་མ་ཡིན་པ་ཇི་ལྟ་བ་བཞིན་དུ་སྒྲོགས་ཤིག་།དེ་ནས་རླུང་ཡོར་ཐོགས་པས་བསྒྲག་པར་བརྩམས་པ། འཛམ་བུའི་གླིང་པའི་ཚོང་པ་ཤེས་ལྡན་དག་ཉོན་ཅིག་།རྒྱ་མཚོ་ཆེན་པོ་འདི་ན་འཇིགས་པ་ཆེན་པོ་ཆེ་བ་འདི་ལྟ་བུ་འདི་ལྟ་སྟེ། ཉ་ཆེན་གྱི་འཇིགས་པ་དང ། ཉ་ཆེན་མིད་ཀྱི་འཇིགས་པ་དང ། ཉ་ཆེན་མིད་པ་མིད་ཀྱི་འཇིགས་པ་དང ། ཆུ་རླབས་ཀྱི་འཇིགས་པ་དང ། དབའ་གློང་གི་འཇིགས་པ་དང ། ཆུ་སྲིན་ཀུམ་བྷི་རའི་འཇིགས་པ་དང ། ཆུ་སྲིན་བྱིས་པ་གསོད་ཀྱི་འཇིགས་པ་དང ། ཆུའི་ནང་ནས་བྱུང་བའི་རི་དག་ལ་ཐུག་པའི་འཇིགས་པ་དང ། རླུང་ནག་པོའི་འཇིགས་པ་དག་ཡོད་ཅིང ། འདིར་ཆོམ་རྐུན་པ་ནོར་འཕྲོག་པ་སྔོན་པོ་དང ། དཀར་པོ་དག་ཀྱང་འོང་བར་འགྱུར་ཏེ། དེ་དག་གིས་ཁྱེད་ཅག་ཐམས་ཅད་ཀྱི་ཐམས་ཅད་དུ་སྲོག་དང་འབྲལ་བར་བྱེད་པར་འགྱུར་གྱིས་ཁྱེད་ཅག་ལས་གང་བདག་ཉིད་དང ། ཕ་མ་དང ། བུ་དང ། ཆུང་མ་དང ། བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་སྡུག་པ་དག་ཡོངས་སུ་གཏོང་བར་མི་འདོད་པ་དེ་རྒྱ་མཚོ་ཆེན་པོར་མ་འཇུག་ཤིག་།འཇིག་རྟེན་ནི་དཔའ་བོ་ཉུང་ལ་སྔར་མ་མང་བས་སྐྱེ་བོ་ཕལ་པོ་ཆེའི་ཚོགས་ཕྱིར་བྱུང་བ་དང ། དེས་དེ་དག་གྲུས་བཟོད་པར་གྱུར་ནས་དེའི་འོག་ཏུ་རླུང་ཡོར་ཐོགས་པས་སྒྲ་ལན་གསུམ་བསྒྲག་པ་བྱས་ཏེ། དེའི་འོག་ཏུ་ཉག་ཐག་གཅིག་བཀྲོལ་ཞིང་གཉིས་པ་དང ། གསུམ་པའི་བར་དུ་བཀྲོལ་ནས་དེས་གྲུས་བོ་ཆེ་རླུང་ཡོར་ཆེན་པོ་ཐོགས་པས་ལེགས་པར་བཟུང་བ། རླུང་གི་ཤུགས་སྟོབས་དང་ལྡན་པས་བསྐྱོད་པ། སྤྲིན་ཆེན་པོ་བཞིན་དུ་སོང་སྟེ་རྗེས་སུ་འཐུན་པའི་རླུང་གིས་ཕུལ་ནས་ཇི་ཙམ་ན་རིན་པོ་ཆེའི་གླིང་དུ་ཕྱིན་ཏོ། །དེ་ནས་རླུང་ཡོར་ཐོགས་པས་སྒྲ་བསྒྲག་པར་བརྩམས་པ། འཛམ་བུའི་གླིང་པའི་ཚོང་པ་ཤེས་ལྡན་དག་ཉོན་ཅིག་།རིན་པོ་ཆེའི་གླིང་འདི་ཉིད་ན་ནོར་བུ་མཆིང་བུ་རིན་པོ་ཆེ་འདྲ་བ་དག་ཀྱང་ཡོད་ཀྱིས་ཁྱེད་ཀྱིས་དེ་དག་ཉེ་བར་བརྟག་ཅིང་བརྟག་ཅིང་ཕྱིས་ཁྱེད་ཅག་འཛམ་བུ་གླིང་དུ་སོན་པ་ན་འགྱོད་པར་མི་འགྱུར་བ་དེ་ལྟར་རིན་པོ་ཆེ་དག་ལོང་ཤིག་རིན་པོ་ཆེའི་གླིང་འདི་ཉིད
7.78b
ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་དག་ཡོད་དེ། དེ་དག་གིས་སྐྱེས་པ་དག་ཅི་ནས་ཀྱང་འདི་ཉིད་དུ་ཚུལ་མ་ཡིན་པས་སྡུག་བསྔལ་བར་འགྱུར་བ་དེ་ལྟ་དེ་ལྟར་ཐོ་འཚམ་པར་འགྱུར་གྱིས་ཁྱེད་ཀྱིས་དེ་དག་བསྙེན་པར་མི་བྱའོ། །རིན་པོ་ཆེའི་གླིང་འདི་ཉིད་ན་མྱོས་པར་འགྱུར་བའི་འབྲས་བུ་དག་ཡོད་དེ། གང་གིས་དེ་དག་ཟོས་པ་ཞག་བདུན་དུ་བརྒྱལ་ཞིང་འདུག་པར་འགྱུར་བས་ཁྱེད་ཀྱིས་དེ་དག་བཟའ་བར་མི་བྱའོ། །རིན་པོ་ཆེའི་གླིང་འདི་ཉིད་ན་མི་མ་ཡིན་པ་དག་འཁོད་དེ་དེ་དག་ཞག་བདུན་ལས་ལྷག་པར་ཁྱེད་འཁོད་པར་མི་བཟོད་པས་ཞག་བདུན་འདས་ནས་རླུང་གང་གིས་འདི་ལྟ་སྟེ། གྲུ་བོ་ཆེ་བྱ་བ་མ་བྱས་པར་ཁྱེར་བར་འགྱུར་བ་དེ་ལྟ་བུ་གཏོང་བར་འགྱུར་བས་ཁྱེད་ཀྱིས་དེ་ལ་ཡང་མ་ཐུག་པར་བྱའོ། །ཚོང་པ་དེ་དག་གིས་དེ་ཐོས་ནས་སེམས་བསྡུས་ཤིང་བག་ཡོད་པར་འཁོད་དེ། དེ་དག་གིས་རིན་པོ་ཆེ་དག་ཉེ་བར་བརྟགས་ཤིང་བརྟགས་ཤིང་གྲུ་བོ་ཆེ་དེ་འདི་ལྟ་སྟེ། དཔེར་ན་ཏིལ་དང ། འབྲས་ཐུག་པོ་ཆེ་དང ། རྒྱ་ཤུག་དང ། རྒྱ་སྲན་དག་བཞིན་དུ་བཀང་སྟེ་རིན་པོ་ཆེའི་གླིང་ནས་འཕགས་ནས་རྗེས་སུ་འཐུན་པའི་རླུང་གིས་བདས་ཏེ། འཛམ་བུའི་གླིང་དུ་ཕྱིན་པར་གྱུར་ཏོ། །དེ་བཞིན་དུ་ལན་བདུན་གྱི་བར་དུ་གྲུ་བོ་ཆེ་ལེགས་པར་གྲུབ་སྟེ་འཛམ་བུའི་གླིང་དུ་འོངས་སོ། །དེ་ནས་དེད་དཔོན་བྱི་དབྱིག་པ་ལ་མས་སྨྲས་པ། བུ་ཁྱིམ་ཕུབ་ཤིག་།དེས་སྨྲས་པ། མ་ཅི་བུ་ལོན་པ་དག་བཅད་ནས་དེའི་འོག་ཏུ་ཁྱིམ་དབུབ་པར་བྱའོ། །མས་དེ་ལ་སྨྲས་པ། བུ་ཁྱོད་ཀྱི་ཕས་ཀྱང་བུ་ལོན་པ་ཡོད་པར་མ་བྱས་མེས་པོས་ཀྱང་མ་བྱས་ན་ཁྱོད་ལ་བུ་ལོན་པ་ག་ལས་བྱུང ། དེས་སྨྲས་པ། མ་ཁོ་བོ་ཉིད་ཤེས་སོ་ཞེས་དེས་རིན་པོ་ཆེ་བཞི་ལས་བྱས་པའི་བྱི་བ་བཞི་བྱེད་དུ་བཅུག་ནས། སྤྲོག་མ་གསེར་གྱིས་བཀང་སྟེ་བྱི་བ་བཞི་པོ་དེ་དག་སྤྲོག་མའི་ཕྱོགས་བཞིར་བཞག་ནས་ཚོང་དཔོན་དེའི་གན་དུ་སོང་ངོ ། །ཚོང་དཔོན་དེ་ཡང་དེ་ཉིད་ཀྱི་བསྔགས་པ་བརྗོད་ཅིང་འདུག་སྟེ་ཤེས་ལྡན་དག་དེད་དཔོན་བྱི་དབྱིག་པ་དེས་རྩཝ་འམ། བོང་བ་འམ། གང་དང་གང་བླང་པ་དེ་དང་དེ་དག་ཐམས་ཅད་གསེར་དུ་འགྱུར་ཏེ། ཇི་ཙམ་དུ་དེ་བསོད་ནམས་དང་ལྡན་ཞིང་དབང་ཆེ་བར་གྲགས་པ་ལ་ལྟོས་ཤེས་དེའི་བསྔགས་པ་བརྗོད་ཅིང་འདུག་གོ། །དེ་དེ
7.79a
ལྟར་དེའི་བསྔགས་པ་བརྗོད་པའི་གཏམ་ཟེར་ཞིང་འདུག་པ་ན་སྒོ་བ་དེའི་གན་དུ་སོང་སྟེ་དེད་དཔོན་བྱི་དབྱིག་པ་སྒོ་ན་སྡོད་ཅིང་མཆིས་སོ་ཞེས་བརྗོད་པ་དང ། ཚོང་དཔོན་གྱིས་སྨྲས་པ། དེད་དཔོན་བྱི་དབྱིག་པ་འཇུག་ཏུ་ཆུག་ཤིག་།སུ་ཞིག་དེད་དཔོན་བྱི་དབྱིག་པ་བཟློག་པར་བྱེད། དེ་ནས་དེད་དཔོན་བྱི་དབྱིག་པ་ནང་དུ་ཞུགས་ནས་དེས་ཚོང་དཔོན་དེ་ལ་སྨྲས་པ། ཚོང་དཔོན་འདི་ནི་གཞི་ལགས། འདི་ནི་ཁེ་སྤོགས་ལགས་ཀྱིས་བཞེས་ཤིག་།ཚོང་དཔོན་གྱིས་སྨྲས་པ། དེད་དཔོན་ཁོ་བོས་ཁྱོད་ལ་ཆུང་ཟད་ཀྱང་བྱིན་པར་མི་དྲན་ནོ། །དེད་དཔོན་གྱིས་སྨྲས་པ། བདག་གིས་ཁྱོད་དྲན་པར་བྱའོ་ཞེས་དེས་དྲན་པར་བྱས་པ་དང ། ཚོང་དཔོན་གྱིས་དྲིས་པ། ཁྱོད་སུའི་བུ་ཡིན། ཁྱིམ་བདག་ཆེ་གེ་མོ་ཞིག་གིའོ། །ཚོང་དཔོན་གྱིས་སྨྲས་པ། འོ་ན་ཁྱོད་ཁོ་བོའི་ཆུང་པོ་གྲོགས་ཀྱི་བུ་ཡིན་ཏེ། ཁྱོད་ཀྱི་ཕ་འགྲོ་བ་ན་ཁོ་བོའི་ལག་ཏུ་ཀཱར་ཥཱ་པ་ན་མང་པོ་དག་གཏམ་པས་ཁོ་བོ་ཉིད་ཀྱིས་ཁྱོད་ལ་སྦྱིན་པར་བྱ་བ་ཡིན་ནོ་ཞེས་ཚོང་དཔོན་དེས་གསེར་གྱི་རིལ་བ་ཆུས་བཀང་བའི་མཆོད་ཡོན་གྱིས་བསུ་ནས་བུ་མོ་ཐུ་མོ་རྒྱན་ཐམས་ཅད་ཀྱིས་བརྒྱན་ཏེ་དེད་དཔོན་བྱི་དབྱིག་པའི་ཆུང་མར་བྱིན་ནོ། །དགེ་སློང་དག་དེའི་ཚེ་དེའི་དུས་ན་ཚོང་དཔོན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་དེད་དཔོན་བྱི་དབྱིག་པ་གང་ཡིན་པ་དེ་ནི་ལམ་པ་འདི་ཡིན་ཏེ། དེའི་ཚེ་ཡང་ངས་འདི་ལ་གདམས་ངག་ཅུང་ཞིག་གིས་གཏམས་པས་དབང་ཕྱུག་གི་བདག་པོ་ཆེན་པོ་ལ་བཞག་པར་གྱུར་ལ། ད་ལྟར་ཡང་ངས་འདི་ལ་གདམས་ངག་ཅུང་ཞིག་གིས་གཏམས་པས་འཁོར་བའི་དགོན་པ་ནས་ཕྱུང་སྟེ་ཤིན་དུ་མཐར་ཐུག་པ་གྲུབ་པ་དང་བདེ་བ་བླ་ན་མེད་པའི་མྱ་ངན་ལས་འདས་པ་ལ་བཞག་གོ། ་་་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་བརྒྱད་པ། སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་ལམ་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ལམ་པ་ཉིད་ཀྱིས་ལས་ཚོགས་རྙེད་པ་རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ
7.79b
བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ལམ་པ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་གི་འཁོར་ཉི་ཁྲི་དང་བཱ་རཱ་ཎ་སཱི་ན་ཉེ་བར་བརྟེན་ཅིང་བཞུགས་སོ། །དེའི་གསུང་རབ་ལ་ལམ་པ་འདི་དགེ་སློང་སྡེ་སྣོད་གསུམ་པར་གྱུར་ཏེ། དེས་ཆོས་ཀྱི་སེར་སྣས་འགའ་ལ་ཡང་ཚིག་བཞི་པའི་ཚིགས་སུ་བཅད་པ་ཡང་མ་བསྟན་ཏོ། །ཡང་རི་བྲགས་ཤིག་ན་ཕག་འཚོང་ཞིག་འདུག་སྟེ། ཆུ་ཀླུང་གི་ཕ་རོལ་དང་ཚུ་རོལ་གྱི་རི་བྲགས་དེར་དུས་སྟོན་བྱུང་ནས་ཕག་འཚོང་དེས་བསམས་པ། གལ་ཏེ་ཕག་དག་བསད་དུ་ནི་ཤ་དེ་སྙེད་ཉོ་བར་མི་འགྱུར་བས་གསོན་པོ་ཉིད་དུ་བཀུར་བར་བྱ་ཞིང་དེར་ཕྲལ་ལ་བསད་ཅིང་བསད་ཅིང་བཙོང་བར་བྱའོ་སྙམ་ནས་དེས་ཕག་མང་པོ་དག་གཅིག་ལ་གཅིག་སྦྲེལ་ཏེ་གྲུར་བཙུད་ནས་འཕགས་པ་དང ། དེ་དག་གིས་གྲུ་དེ་སྐྱོད་པ་ན་བུབ་པར་གྱུར་ནས་དེ་དག་དེར་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ཕག་འཚོང་དེ་ཡང་རྒྱུན་ཕྱོགས་སུ་ཁྱེར་བ་ན་ཆུ་ཀླུང་དེའི་འགྲམ་ན་རང་སངས་རྒྱས་ལྔ་བརྒྱ་ཙམ་འཁོད་ནས་དེ་དག་ལས་རང་སངས་རྒྱས་གཅིག་ཅིག་ཆུའི་དོན་དུ་ཆུ་འགྲམ་དུ་སོང་བ་དང ། དེས་དེ་མཐོང་ནས་དེས་བསམས་པ།
7.80a
ཅི་འདི་རེ་ཤིག་ཤི་བ་ཡིན་ནམ། འོན་ཏེ་གསོན་པ་ཡིན་སྙམ་ནས་དེས་གླང་པོ་ཆེའི་སྣ་འདྲ་བའི་ལག་པ་བརྐྱང་སྟེ་དེ་ཕྱུང་ནས་བྱེ་མ་བདལ་ཏེ་དེར་ཁ་སྦུབ་ཏུ་བཞག་ནས་སོང་ངོ ། །དེའི་རྒྱུན་ཐམས་ཅད་ནས་ཆུ་ཟགས་ནས་དེས་འདུ་ཤེས་ཕྱིར་རྙེད་དེ་ལངས་པ་དང ། མིའི་རྗེས་མཐོང་ནས་དེ་དེའི་རྗེས་བཞིན་དུ་སོང་བ་དང ། ཇི་ཙམ་ན་རང་སངས་རྒྱས་ལྔ་བརྒྱ་མཐོང་ནས་དེས་དེ་དག་ལ་ལོ་མ་དང ། འབྲས་བུ་དང ། སོ་ཤིང་གིས་བསྙེན་བཀུར་བྱ་བར་བརྩམ་པ་དང ། དེ་དག་གིས་དེ་ལ་ལྷུང་བཟེད་ཀྱི་ལྷག་མ་བྱིན་ནོ། །གང་གི་ཚེ་རང་སངས་རྒྱས་དེ་དག་སྐྱིལ་མོ་དཀྲུང་བཅས་ཏེ་བསམ་གཏན་བྱེད་པ་དེའི་ཚེ་ན་དེ་ཡང་མཐའ་གཅིག་ཏུ་འདུག་ནས་སྐྱིལ་མོ་དཀྲུང་བཅས་ཏེ་བསམ་གཏན་བྱེད་དོ། །དེས་དེར་འདུ་ཤེས་མེད་པའི་སྙོམ་པར་འཇུག་པ་བསྐྱེད་ནས་འདུ་ཤེས་མེད་པའི་སེམས་ཅན་ལྷ་རྣམས་ཀྱི་ནང་དུ་སྐྱེས་སོ། །དགེ་སློང་དག་དེའི་ཚེ་དེའི་དུས་ན་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་དགེ་སློང་སྡེ་སྣོད་གསུམ་དང་ལྡན་པར་གྱུར་པ་གང་ཡིན་པ་དང ། ཕག་འཚོང་དུ་གྱུར་པ་གང་ཡིན་པ་དེ་ནི་དགེ་སློང་ལམ་པ་འདི་ཡིན་ཏེ། འདིས་ཆོས་ཀྱི་སེར་སྣས་འགའ་ལ་ཡང་ཚིགས་བཞི་ཚིག་སུ་བཅད་པ་ཡང་མ་བསྟན་པ་གང་ཡིན་པ་དང ། ཕག་དག་བསད་པ་གང་ཡིན་པ་དང ། འདུ་ཤེས་མེད་པའི་སེམས་ཅན་རྣམས་ཀྱི་ནང་ནས་འདིར་སྐྱེས་པ་གང་ཡིན་པའི་ལས་དེའི་རྣམ་པར་སྨིན་པས་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བར་གྱུར་ཏོ། །དགེ་སློང་དག་དེ་ལྟར་ན་གདམས་ངག་མེད་པ་ལ་ཉེས་དམིགས་འདི་དང་གཞན་དག་ཀྱང་ཡོད་དེ་དེ་ལྟ་བས་ན་དགེ་སློང་གིས་གདམས་ངག་མེད་པར་བསམ་གཏན་མི་བྱའོ། །བསམ་གཏན་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་མཉན་ཡོད་དུ་ཅི་དགྱེས་པར་བཞུགས་ནས་རྒྱལ་པོའི་ཁབ་ག་ལ་བ་དེར་གཤེགས་ཏེ་མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་འཚོ་བྱེད་གཞོན་ནུས་གསོས་ཀྱིས་བཅོམ་ལྡན་འདས་མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ
7.80b
བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཤེས་ཐོས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་དུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་འཚོ་བྱེད་གཞོན་ནུས་གསོས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུས་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་འཇུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་འཚོ་བྱེད་གཞོན་ནུས་གསོས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་གཅིག་ཏུ་གདུགས་ཚོད་གསོལ་བར་ཅི་གནང ། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང ། བཟོད་པར་དཀའ་བ་ཡིན་པས་འཚོ་བྱེད་གཞོན་ནུས་གསོས་ཀྱིས་སངས་རྒྱས་བཅོམ་ལྡན་འདས་ལ་བཙུན་པ་ལམ་པ་མ་གཏོགས་སོ་ཞེས་གསོལ་མ་ནུས་སོ། །བཅོམ་ལྡན་འདས་ཀྱིས་ཅང་མི་གསུང་བས་འཚོ་བྱེད་གཞོན་ནུས་གསོས་ལ་གནང་ངོ ། །དེ་ནས་འཚོ་བྱེད་གཞོན་ནུས་གསོས་ཀྱིས་བཅོམ་ལྡན་འདས་ཀྱིས་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང ། རྗེས་སུ་ཡི་རང་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ནས། ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་ཕྱག་འཚལ་ཏེ་མཐའ་ཅིག་ཏུ་འདུག་གོ། །མཐའ་ཅིག་ཏུ་འདུག་ནས་འཚོ་བྱེད་གཞོན་ནུས་གསོས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ
7.81a
མཁྱེན་པར་མཛོད་ཅིག་།བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་བདག་གི་སྡུམ་པར་གདུགས་ཚོད་ལ་སྤྱན་དྲུངས་ཏེ་བཙུན་པ་ལམ་པ་ནི་མ་གཏོགས་སོ། །འཚོ་བྱེད་ཁྱོད་ཀྱི་དགེ་བའི་ཆོས་རྣམས་ཇི་ལྟར་འཕེལ་བར་གྱུར་ཅིག་།དེ་ནས་འཚོ་བྱེད་གཞོན་ནུས་གསོས་ཀྱིས་ཚེ་དང་ལྡན་པ་ཀུན་དགའ་བོས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ངོ ། །དེ་ནས་ཚེ་དང་ལྡན་པ་ཀུན་དགའ་བོས་འཚོ་བྱེད་གཞོན་ནུས་གསོས་སོང་ནས་རིང་པོ་མ་ལོན་པར་རིག་ནས། ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ལམ་པ་མཁྱེན་པར་མཛོད་ཅིག་།འཚོ་བྱེད་གཞོན་ནུས་གསོས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཏེ་ཚེ་དང་ལྡན་པ་ལམ་པ་གཅིག་པུ་མ་གཏོགས་སོ། །བཙུན་པ་ཀུན་དགའ་བོ་དེའི་དགེ་བའི་ཆོས་རྣམས་ཇི་ལྟར་ཕེལ་བར་གྱུར་ཅིག་།དེ་ནས་འཚོ་བྱེད་གཞོན་ནུས་གསོས་ཀྱིས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་པར་སྔར་ལངས་ཏེ་གདན་དག་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་འཚོ་བྱེད་གཞོན་ནུས་གསོས་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ལམ་པའི་བྱུག་རིས་ཞོག་ཞིག་འཚོ་བྱད་གཞོན་ནུས་གསོས་ཀྱི་གསེར་གྱི་རིལ་བ་བྷྲིང་ག་ར་ཐོགས་ཏེ་རྒན་པའི་མཐའ་ལོགས་སུ་བསྡད་པ་དང
7.81b
བཅོམ་ལྡན་འདས་ཀྱིས་ཆབ་ཀྱི་རྒྱུན་མ་བཞེས་སོ། །འཚོ་བྱེད་གཞོན་ནུས་གསོས་ཀྱིས་གསོལ་པ། ཅིའི་སླད་དུ་བཅོམ་ལྡན་འདས་ཆབ་ཀྱི་རྒྱུན་བཞེས་པར་མི་མཛད། བཅོམ་ལྡན་འདས་ཀྱིས་བཀའ་སྩལ་པ། ད་དུང་དགེ་སློང་གི་དགེ་འདུན་མ་འཚོགས་སོ། །འཚོ་བྱེད་གཞོན་ནུས་གསོས་ཀྱིས་གསོལ་པ། བཅོམ་ལྡན་འདས་གང་མ་མཆིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ལམ་པའོ། །འཚོ་བྱེད་གཞོན་ནུས་གསོས་ཀྱིས་གསོལ་པ། བཅོམ་ལྡན་འདས་དེ་བདག་གིས་གཡར་མ་དྲངས་སོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་འཚོ་བྱེད་ཁྱོད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་མ་དྲངས་སམ། བཅོམ་ལྡན་འདས་སྤྱན་དྲངས་སོ། །འོ་ན་ཅི་ལམ་པ་དགེ་འདུན་ལས་ཕྱི་རོལ་དུ་གྱུར་པ་ཡིན་ནམ། བཅོམ་ལྡན་འདས་མ་ལགས་སོ། །སོང་ལ་དེ་བོས་ཤིག་འཚོ་བྱེད་གཞོན་ནུས་གསོས་ཀྱིས་བསམས་པ་འདི་ལྟར་བདག་གིས་བཅོམ་ལྡན་འདས་ཀྱི་བཀས་བོད་པར་ནི་བྱ་མོད་ཀྱི་དེ་ལ་གུས་པར་བྱས་ཏེ་བྲིམ་པར་ནི་མི་བྱའོ་སྙམ་ནས་དེས་མངག་པ་བཏང་སྟེ་སོང་ལ་དེ་བོས་ཤིག་ཅེས་བསྒོའོ། །ཚེ་དང་ལྡན་པ་ལམ་པ་ཡང་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་དགེ་སློང་སྟོང་ཉི་བརྒྱ་ལྔ་བཅུ་སྤྲུལ་ཏེ་འདུག་གོ། །མངག་པ་དེ་སོང་སྟེ་ལམ་པ་ལམ་པ་ཞེས་བོས་པ་དང ། དགེ་སློང་དུ་མ་དག་གིས་ཨང་ཞེས་ལན་བཏབ་བོ། །མི་དེ་འོངས་ཏེ་འཚོ་བྱེད་གཞོན་ནུས་གསོས་ལ་སྨྲས་པ། བདག་དེར་མཆིས་ཏེ་ལམ་པ་ལམ་པ་ཞེས་བོས་ན་འོད་མའི་ཚལ་ཀ་ལན་ད་ཀའི་གནས་ན་སྔར་དགེ་སློང་དག་གིས་གང་ཞིང་འཁོད་པ་དེ་ཁོ་ན་བཞིན་དུ་དགེ་སློང་དག་གིས་གང་ཞིང་འཁོད་ནས་དགེ་སློང་དུ་མ་དག་གིས་ཨང་ཞེས་ལན་བཏབ་ན་དེ་དག་ལས་གང་བྱོན་འཚོ་བྱེད་གཞོན་ནུས་གསོས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སོང་ཤིག་སོང་ལ་ལམ་པ་ཡང་དག་པ་གང་ཡིན་པ་དེ་ཤོག་ཤིག་ཅེས་གྱིས་ཤིག་།དེ་སོང་སྟེ་སྨྲས་པ། ལམ་པ་ཡང་དག་པ་གང་ལགས་པ་དེ་གཤེགས་སུ་གསོལ། དེ་ནས་ཚེ་དང་ལྡན་པ་ལམ
7.82a
པས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས་དེར་སོང་སྟེ་རང་གི་བྱུག་རིས་སུ་འདུག་པ་དང ། འཚོ་བྱེད་གཞོན་ནུས་གསོས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བྲིམ་པར་བརྩམས་ནས་ཚེ་དང་ལྡན་པ་ལམ་པ་ལ་གུས་པར་མ་བྱས་པར་བྲིམས་སོ། །བཅོམ་ལྡན་འདས་ཀྱིས་དགོངས་པ། ཉན་ཐོས་ཆེན་པོ་རི་རབ་དང་འདྲ་བ་ལ་འཚོ་བྱེད་གཞོན་ནུས་གསོས་ཀྱིས་སྨས་པ་ལེན་པར་བྱེད་ཀྱིས། འདིའི་ཡོན་ཏན་བསྒྲག་པར་བྱའོ་སྙམ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱིས་ལྷུང་བཟེད་ལེན་པ་ཡིན་ན་བཅོམ་ལྡན་འདས་ཀྱིས་དེ་ལ་མ་སྩལ་ཏོ། །ཆོས་ཉིད་ཀྱིས་ན་ཇི་སྲིད་དུ་བཅོམ་ལྡན་འདས་ཀྱིས་ལྷུང་བཟེད་བླང་བར་མ་གྱུར་གྱི་བར་དུ་དགེ་སློང་གནས་བརྟན་དག་གི་ལྷུང་བཟེད་དག་ལེན་པར་མི་བྱེད་དོ། །ཚེ་དང་ལྡན་པ་ལམ་པས་བསམས་པ། ཅིའི་ཕྱིར་བཅོམ་ལྡན་འདས་དང་དགེ་སློང་གནས་བརྟན་གནས་བརྟན་དག་ལྷུང་བཟེད་དག་ལེན་པར་མི་བྱེད་སྙམ་ན། བདག་ཉིད་ཀྱི་ཡོན་ཏན་བསྒྲག་པའི་ཕྱིར་རོ་སྙམ་དུ་རིག་ནས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་ནས། ཚེ་དང་ལྡན་པ་ལམ་པས་སྟན་ཕྱེད་ལས་འཕགས་པར་བྱས་ཏེ་གླང་པོ་ཆེའི་སྣ་ལྟ་བུའི་ལག་པ་བརྐྱང་ནས་བཅོམ་ལྡན་འདས་ཀྱི་ལྷུང་བཟེད་བླངས་པ་དང ། འཚོ་བྱེད་གཞོན་ནུས་གསོས་རྒན་པའི་མཐའ་ལོགས་ན་འདུག་པས་མཐོང་ནས་དེས་བསམས་པ། རྫུ་འཕྲུལ་གྱི་ཆོ་འཕྲུལ་རྣམ་པར་སྟོན་པ་འདི་གནས་བརྟན་གང་ཡིན་སྙམ་ནས་དེ་ལྷུང་བཟེད་ཀྱི་རྗེས་བཞིན་སོང་བ་དང ། ཅི་ཙམ་ན་ཚེ་དང་ལྡན་པ་ལམ་པ་ཡིན་པར་མཐོང་ངོ ། །མཐོང་ནས་དེ་བརྒྱལ་ཏེ་ས་ལ་བསྒྱེལ་བ་དང ། ཆུས་གདབ་པས་སྲོག་ཕྱིར་ལོན་ནས་ཚེ་དང་ལྡན་པ་ལམ་པའི་རྐང་པ་གཉིས་ལ་གཏུགས་ཏེ་བཟོད་པ་གསོལ་ཅིང་ཚིགས་སུ་བཅད་པས་སྨྲས་པ། ཙན་དན་རྟག་ཏུ་བསིལ་ངད་ཡོན་ཏན་ལྡན། །ུཏྤལ་རྟག་ཏུ་དྲི་བདའ་དྲི་མེད་གསར། །རྟག་གསལ་དག་པའི་བཻ་དཱུརྱ་འོད་བཞིན། །བྱིས་པའི་སྐྱེ་བོའི་སྡིག་པ་རྟག་ཏུ་ནི། །མཚུངས་མེད་གོར་མའི་རི་མོ་རྟག་པ་བཞིན། །འཕགས་པའི་སྐྱེ་བོ་རྟག་ཏུ་ཐུགས་རྗེ་མངའ། །
7.82b
དགྲ་བཅོམ་དག་གི་བཟོད་པ་བརྟན་པ་ལགས། །ཚེ་དང་ལྡན་པ་ལམ་པས་སྨྲས་པ། འཚོ་བྱེད་བཟོད་དོ། །བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་སོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་འཚོ་བྱེད་གཞོན་ནུས་གསོས་ཀྱིས་གང་གི་ཚེ་ཚེ་དང་ལྡན་པ་ལམ་པའི་ཡོན་ཏན་དག་མངོན་པར་མ་འཚལ་བ་དེའི་ཚེ་ན་གུས་པ་མ་ལགས་པ་ལ་བརྩོན་ཞིང ། གང་གི་ཚེ་ཡོན་ཏན་དག་མངོན་པར་འཚལ་བ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་བགྱིད་པ་ལ་གཟིགས། ་དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་དེས་གང་གི་ཚེ་འདིའི་ཡོན་ཏན་དག་མངོན་པར་མི་ཤེས་པ་དེའི་ཚེ་ན་གུས་པ་མ་ཡིན་པ་ལ་བརྩོན་ཞིང་གང་གི་ཚེ་ཡོན་ཏན་དག་མངོན་པར་ཤེས་པ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་གྱུར་ཏེ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་བྱང་ལམ་ནས་དེད་དཔོན་ཞིག་གིས་ཟོང་རྟ་ལྔ་བརྒྱ་བདས་ཏེ་ཡུལ་དབུས་སུ་ཕྱིན་ཏོ། །དེའི་རྒོད་མའི་མངལ་དུ་རྟ་ཅང་ཤེས་ཞུགས་ནས་དེ་གང་གི་ཉི་མ་ལ་ཞུགས་པ་དེ་ཉིད་ཀྱི་ཉི་མ་ནས་བཟུང་སྟེ་རྟ་དེ་དག་ཕྱིན་ཆད་སྐད་འབྱིན་པར་མི་བྱེད་ནས་དེད་དཔོན་གྱིས་བསམས་པ། བདག་གི་རྟ་རྣམས་ལ་ནད་འགའ་ཞིག་བྱུང་འམ། ཅི་ན་དེས་རྟ་འདི་དག་སྐད་འབྱིན་པར་མི་བྱེད་སྙམ་མོ། །དུས་གཞན་ཞིག་ན་རྒོད་མ་དེ་འབྲངས་པ་ལས་རྟེའུ་ཕོ་ཞིག་བྱུང་ནས་དེ་གང་གི་ཉི་མ་ལ་བྱུང་བ་དེ་ཉིད་ཀྱི་ཉི་མ་ནས་བཟུང་སྟེ་རྟ་དེ་དག་ཕྱིན་ཆད་སྣ་སྒྲ་འབྱིན་པར་ཡང་མི་བརྩོན་ནས་དེད་དཔོན་གྱིས་བསམས་པ། རྟེའུ་སེམས་ཅན་སྐལ་ཆད་འདི་བྱུང་བས་འདིའི་ཉེས་པས་བདག་གི་རྟ་རྣམས་ལ་ནད་བྱུང་བར་གྱུར་ཏོ་སྙམ་ནས་དེས་རྒོད་མ་དེ་རྟག་ཏུ་ཞོན་ཞིང་དེ་ལ་རྩཝ་དང་ཆས་ཀྱང་སྦྱིན་པར་མི་བྱེད་དོ། །དེ་མཐར་གྱིས་མཆོད་གྱུར་ཅེས་བྱ་བའི་གནས་སུ་ཕྱིན་པ་དང ། དེར་དེ་དབྱར་གྱི་ནམ་ལ་བབ་ནས་དེས་བསམས་པ། གལ་ཏེ་ང་སོང་བར་གྱུར་ན་རྟ་རྣམས་ཀྱི་རྨིག་པ་འདྲུལ་བར་འགྱུར་བས་ཟོང་དུ་མི་རུང་བར་འགྱུར་གྱིས་དབྱར་གྱི་ནམ་ལ་འདི་ཉིད་དུ་འདུག་པར་བྱའོ་སྙམ་ནས
7.83a
དེ་དབྱར་གྱི་ནམ་ལ་དེ་ཉིད་དུ་འདུག་པ་དང ། དེ་ན་གནས་པའི་བཟོ་བོ་དག་གིས་དེ་ལ་རང་རང་གི་བཟོ་དག་གིས་བསྙེན་བཀུར་བྱས་སོ། །དེ་འགྲོ་བའི་དུས་ཀྱི་ཚེ་བཟོ་བོ་དག་ལྷགས་པ་དང ། དེས་དེ་དག་ལ་བགོ་བཤའ་དག་བྱས་སོ། །དེ་ན་རྫ་མཁན་ཅིག་ཅིག་འདུག་པ་དེས་ཀྱང་དེ་ལ་བཟོས་བསྙེན་བཀུར་བྱས་པས་དེ་ལ་ཆུང་མས་སྨྲས་པ། རྗེའི་སྲས་དེད་དཔོན་དེ་མཆིས་བཞུད་ལ་ཅུང་ཞིག་སློངས་ཤིག་།རྫ་མཁན་དེས་དེད་དཔོན་འཕགས་པའི་མདུན་དུ་འཇིམ་པའི་གོང་བུ་ཐོགས་ཏེ་བསྡད་པ་དང ། དེད་དཔོན་དེས་དེ་མཐོང་ནས་དེ་ལ་སྨྲས་པ། ཀཝའི་ནང་རྗེ་ཁྱོད་ཧ་ཅང་འཕྱིས་ཏེ་འོངས་པས་ངའི་བན་ཐམས་ཅད་བྱས་སོ། །དེད་དཔོན་དེ་རྟེའུ་དེ་ལ་བཀྲ་མི་ཤིས་པའི་བློ་སྐྱེས་པས་དེད་དཔོན་དེས་རྫ་མཁན་དེ་ལ་སྨྲས་པ། འདི་ལྟར་ཁོ་བོ་ལ་རྟེའུ་གཅིག་ཡོད་ཀྱི་གལ་ཏེ་འདོད་ན་ཁྲིད་དེ་སོང་ཤིག་།རྫ་མཁན་གྱིས་སྨྲས་པ། མ་ནོངས་སོ། །བདག་ནི་རྫ་མ་བགྱིད་པར་འགྱུར་ལ། འདིས་ཀྱང་གཅོག་པར་འགྱུར་རོ། །དེ་ནས་རྟེའུ་དེས་རྫ་མཁན་དེའི་རྐང་པ་གཉིས་ལ་ལྕེས་བལྡག་པར་བརྩམས་པ་དང ། རྫ་མཁན་དེ་རྟེའུ་དེ་ལ་རྗེས་སུ་ཆགས་པ་སྐྱེས་ནས་དེས་དེ་ཁྲིད་དེ་ཁྱིམ་དུ་སོང་ངོ ། །དེ་ལ་ཆུང་མས་སྨྲས་པ། རྗེའི་སྲས་ཁྱོད་ཀྱིས་དེ་ལས་ཅུང་ཟད་ཐོབ་བམ། རྟེའུ་འདི་ཐོབ་བོ། །མ་ནོངས་སོ། །ཁྱོད་ནི་རྫ་མ་བྱེད་པར་འགྱུར་ལ་འདིས་ཀྱང་གཅོག་པར་འགྱུར་རོ། །རྟེའུ་དེ་ཆུང་མའི་རྐང་པ་གཉིས་ལ་ཡང་ལྕེས་བལྡག་པར་བརྩམས་པ་དང ། ཆུང་མ་དེ་ཡང་རྟེའུ་དེ་ལ་རྗེས་སུ་ཆགས་པ་སྐྱེས་སོ། །རྟེའུ་དེ་རྫ་མ་སོ་བཏང་བ་དང་མ་བཏང་བ་དག་གི་ནང་དུ་འགྲོ་བ་ན་རྫ་མ་འགའ་ཡང་མི་གཅོག་ནས་རྫ་མཁན་དེས་ཆུང་མ་ལ་སྨྲས་པ། རྟེའུ་བཟང་པོ་ཞིག་སྟེ་ཤེས་བཞིན་དུ་འགྲོ་བར་བྱེད་དོ། །དུས་གཞན་ཞིག་ན་རྫ་མཁན་དེ་སྒྲོ་བ་ཐོགས་ཏེ་ས་ལེན་དུ་སོང་བ་དང ། རྟེའུ་དེ་ཡང་དེའི་ཕྱི་བཞིན་ཐོག་ཐག་འབྲང་ཞིང་འོངས་སོ། །རྫ་མཁན་དེས་སས་སྒྲོ་བ་བཀང་བ་དང ། རྟེའུ་དེས་རྒྱབ་བཟེད་ནས། རྫ་མཁན་དེས་སའི་སྒྲོ་བ་དེ་རྟེའུ་དེའི་རྒྱབ་ཏུ་བཀལ་ནས་དེས་དེ་ཁྲིད་དེ་ཁྱིམ་དུ་འོངས་ནས་རྫ་མཁན་དེས་ཆུང་མ་ལ་སྨྲས་པ། བཟང་མོ་རྟེའུ་བཟང་པོ་ཞིག་སྟེ། ཁོ་བོས་ཕྱིན་ཆད་ས་བསྐུར་དགོས་པར་མི་འགྱུར་རོ། །ཁོ་བོས་དེར་ས་དགལ་བར
7.83b
བྱས་ཁྱོད་ཀྱིས་འདིར་ཕོག་ཤིག་ཆུང་མ་དེ་ལེགས་སོ་ཞེས་རྟེའུ་དེ་ལ་ཕུབ་མ་དང་སྲན་ཕུབ་དག་བྱིན་ནོ། །དེའི་ཚེ་ན་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང ། འཐབ་པ་དང ། འཁྲུག་ལོང་དང ། ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང་ནད་དང་བྲལ་བ། ས་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ་ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །དེའི་རྟ་ཅང་ཤེས་དུས་ལ་བབ་ནས་ཉི་འོག་གི་རྒྱལ་པོ་རྣམས་ཀྱིས་རྒྱལ་པོ་ཚངས་བྱིན་གྱི་རྟ་ཅང་ཤེས་དུས་ལ་བབ་པོ་ཞེས་ཐོས་པ་དང ། དེ་དག་གིས་དེ་ལ་ཡང་ན་ནི་སྒྱུ་དཔྱ་འཇོལ་ཅིག་།ཡང་ན་ནི་བཱ་རཱ་ཎ་སཱིའི་ཕྱི་རོལ་གྱི་བསྐྱེད་མོས་ཚལ་དུ་མ་འབྱུང་ཤིག་།དེ་ལྟ་མི་བྱེད་ན་གཉའ་བ་ནས་བཏགས་ཏེ་བཀྲིའོ་ཞེས་ཕྲིན་སྤྲིང་ངོ ། །རྒྱལ་པོ་ཚངས་བྱིན་དེ་དག་ལ་སྒྱུ་དཔྱ་འཇལ་བར་ཡང་མི་བྱེད། འཇིགས་པས་ཕྱི་རོལ་གྱི་བསྐྱེད་མོས་ཚལ་དུ་ཡང་འབྱུང་བར་མི་བྱེད་ཅིང་འདུག་གོ། །དེད་དཔོན་དེ་ཡང་མཐར་གྱིས་བཱ་རཱ་ཎ་སཱིར་ཕྱིན་པ་དང ། རྒྱལ་པོ་ཚངས་བྱིན་གྱིས་བྱང་ལམ་ནས་དེད་དཔོན་ཞིག་གིས་ཟོང་རྟ་ལྔ་བརྒྱ་དེད་དེ་བཱ་རཱ་ཎ་སཱིར་ཕྱིན་ཅེས་ཐོས་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་ངས་ཡུན་ཇི་སྲིད་ཅིག་ཏུ་འདིར་ཞུགས་ཏེ་འདུག་པར་བྱ། དེང་ལ་རྟ་ཅང་ཤེས་ཚོལ་ཅིག་།དེ་དག་དེད་དཔོན་དེའི་གན་དུ་དོང་སྟེ་དེ་དག་གིས་རྟ་དེ་དག་མཐོང་ནས་གཅིག་ལ་གཅིག་སྨྲས་པ། ཤེས་ལྡན་དག་རྟ་འདི་དག་ནི་རྟ་ཅང་ཤེས་ཀྱིས་བཏུལ་བ་ཤ་སྟག་ཡིན་ན་འདི་ན་རྟ་ཅང་ཤེས་ནི་འགའ་ཡང་མི་སྣང་ངོ ། །དེ་དག་གིས་རྒོད་མ་དེ་མཐོང་ནས་སྨྲས་པ། ཤེས་ལྡན་དག་རྒོད་མ་འདི་ལས་རྟ་ཅང་ཤེས་འབྲངས་ན་དེ་ནི་མི་སྣང་ངོ ། །དེ་དག་དེད་དཔོན་གྱི་གན་དུ་སོང་སྟེ་དྲིས་པ། དེད་དཔོན་ཁྱོད་ཀྱིས་རྟ་འགའ་ཞིག་བཙོངས་པ་འམ། གཞན་ལ་བྱིན་པ་ཡོད་དམ། དེད་དཔོན་གྱིས་སྨྲས་པ། བཙོངས་པ་ནི་འགའ་ཡང་མེད་དེ། འདི་ལྟར་ཁོ་བོས་མཆོད་གྱུར་གྱི་གནས་སུ་རྟེའུ་ཞིག་བཀྲ་མི་ཤིས་སོ་སྙམ་ནས་རྫ་མཁན་ཞིག་ལ་བྱིན་པ་ནི་ཡོད་དོ། །དེ་དག་གི་ཅིག
7.84a
ལ་གཅིག་སྨྲས་པ། ཤེས་ལྡན་དག་དེད་དཔོན་འདི་ནི་བླུན་པོ་ཞིག་ཡིན་ཏེ། སྙིང་པོ་གང་ཡིན་པ་བོར་ནས་སྙིགས་མ་དག་དེད་དེ་འདིར་འོངས་སོ། །དེ་དག་གིས་རྒྱལ་པོ་ལ་ཞུས་ཏེ་མཆོད་གྱུར་དུ་དོང་ནས་དེ་དག་རྫ་མཁན་དེའི་དྲུང་དུ་དོང་སྟེ་དྲིས་པ། ཁྱོད་ལ་རྟེའུ་འདིས་ཅི་བྱ། རྫ་མཁན་གྱིས་སྨྲས་པ། འདི་ཁོ་བོའི་ས་དགལ་ལོ། །དེ་དག་གིས་སྨྲས་པ། ཁོ་བོ་ཅག་གིས་ཁྱོད་ལ་བོང་བུ་སྦྱིན་གྱིས་ཁྱོད་ཀྱིས་ཁོ་བོ་ཅག་ལ་འདི་བྱིན་ཅིག་།རྫ་མཁན་གྱིས་སྨྲས་པ། ཁོ་བོ་ལ་འདི་ཉིད་མཁོའོ། །དེ་དག་གིས་སྨྲས་པ། གླང་བཞི་དང་ལྡན་པའི་ཤིང་རྟ་སྦྱིན་ནོ། །རྫ་མཁན་གྱིས་སྨྲས་པ། ཁོ་བོ་ལ་འདི་ཉིད་མཁོའོ། །དེ་དག་གིས་སྨྲས་པ། ཁྱོད་དེང་གྲོས་གྱིས་ཤིག་དང་ཁོ་བོ་ཅག་སང་ཡང་འོང་ངོ་ཞེས་ཟེར་ཏེ་དོང་ངོ ། །ཆོས་ཉིད་ཀྱིས་ན་འཇིག་རྟེན་གནས་པ་ཆགས་ནས་རིང་པོ་མ་ལོན་པའི་ཚེ་ན་དུད་འགྲོ་དག་ཀྱང་སྨྲ་ཤེས་པ་ཡིན་པས་རྟེའུ་དེས་རྫ་མཁན་དེ་ལ་སྨྲས་པ། དེ་དག་ཅི་འདོད། ཁྱོད་འདོད་དོ། །ཅིའི་ཕྱིར་སྦྱིན་པར་མི་བྱེད། ཅི་ཁྱོད་ཀྱི་སྙིང་ལམ་ན་ཁོ་བོ་ཇི་སྲིད་འཚོའི་བར་དུ་ཁྱོད་ཀྱི་ས་ཁལ་བྱེད་ཅིང་ཕུབ་མ་དང་སྲན་ཕུབ་ཟ་སྙམ་འམ་ཁོ་བོས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་བཀུར་བར་བྱ་ཞིང་གསེར་གྱི་སྣོད་ནས་བཟང་ཆལ་ཟིལ་དངར་གྱིས་བཅིན་པ་དག་བཟའ་བར་བྱ་དགོས་སོ། །དེ་དག་རྟེའུ་ཞེས་ཟེར་ན་དེ་དག་ལ་རྟ་ཅང་ཤེས་ཞེས་ཟེར་དུ་ངོ་ཚ་འམ་ཅི་ཞེས་བརྗོད་པར་བྱའོ། །གལ་ཏེ་རིན་གྱི་ཕྱིར་བྱིན་ཅིག་ཅེས་ཟེར་ན་དེ་དག་ལ་ཡང་ན་གསེར་འབུམ་བྱིན་ཅིག་།ཡང་ན་འདིའི་བརླ་གཡས་པས་གསེར་ཇི་ཙམ་འདྲེན་ནུས་པ་དེ་ཙམ་བྱིན་ཅིག་ཅེས་བརྗོད་པར་བྱའོ། །ཕྱི་དེ་ཉིན་པར་དེ་དག་འོངས་ཏེ་རྫ་མཁན་ལ་དྲིས་པ། ཀཝའི་ནང་རྗེ་ཁྱོད་ཀྱིས་གྲོས་བྱས་སམ། གྲོས་བྱས་སོ། །འོ་ན་རྟེའུ་འདི་བྱིན་ཅིག་ཁྱེད་རྟ་ཅང་ཤེས་ཞེས་ཟེར་དུ་ངོ་ཚ་འམ་ཅི། དེ་དག་གིས་བསམས་པ། གླེན་པ་འདིས་འདི་རྟ་ཅང་ཤེས་ཡིན་ནམ་མ་ཡིན་ཅི་ཤེས་ཏེ། འདི་ལྟར་རྟ་འདི་ཉིད་བྱས་པ་བཟོ་བ་ཡིན་པས་འདི་ཉིད་ཀྱིས་འདི་ལ་སྨྲས་པར་གྱུར་གོར་མ་ཆག་སྙམ་ནས་དེ་དག་གིས་སྨྲས་པ། རྟ་ཅང་ཤེས་ཡིན་ཡང་རུང ། རྟེའུ་ཡིན་ཡང་རུང་གིས་རིན་གྱི་ཕྱིར་བྱིན་ཅིག་།རྫ་མཁན་གྱིས་སྨྲས་པ། ཡང་ན་གསེར་འབུམ་བྱིན་ཅིག་།
7.84b
ཡང་ན་འདིའི་རླ་གཡས་པས་གསེར་ཇི་ཙམ་འདྲེན་ནུས་པ་དེ་ཙམ་བྱིན་ཅིག་།དེ་དག་གིས་བསམས་པ། འདི་མཐུ་དང་ལྡན་པ་ཡིན་པས་ཆོས་མང་པོ་དག་འདྲེན་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་སྨྲས་པ། གསེར་འབུམ་སྦྱིན་ནོ། །དེ་དག་གིས་རྒྱལ་པོ་ཚངས་སྦྱིན་ལ་གསེར་འབུམ་གྱིས་རྟ་ཅང་ཤེས་ཁུགས་སོ་ཞེས་སྤྲིང་བ་དང ། རྒྱལ་པོ་ཚངས་པས་བྱིན་གྱིས་དེ་དག་ལ་རིན་ཇི་ཙམ་གྱིས་ཁུག་པ་དེ་ཙམ་གྱིས་ལོང་ཤིག་ཅེས་སྤྲིང་ངོ ། །དེ་དག་གིས་གསེར་འབུམ་གྱིས་བླངས་ནས་དེ་དག་རྟ་ཅང་ཤེས་དེ་ཁྲིད་དེ་བཱ་རཱ་ཎ་སཱིར་ལྷགས་ནས་དེ་དག་གིས་དེ་རྟ་བྲེས་ཀྱི་དང་པོར་བཏགས་ཏེ་དེ་ལ་རྩཝ་དང་ཆས་བྱིན་ན་དེ་དེ་མི་ཟ་ནས་རྒྱལ་པོས་སྨྲས་པ། ཁྱེད་ཀྱི་རྟ་ཅང་ཤེས་ནད་པ་ཞིག་ཁྲིད་དེ་འོངས་སམ། ཅི་དེ་དག་གིས་སྨྲས་པ། འདི་བྲོ་འཚལ་བ་མ་ལགས་ཏེ། འདི་ལྟར་ཇེ་འདི་ལ་རྨའོ་ཞེས་དེ་ནས་འདུལ་སྦྱོང་བས་ཚིགས་སུ་བཅད་པ་སྨྲས་པ། མགྱོགས་འགྲོ་གང་ཚེ་རན་ཆས་ཆུ་མེད་པའི། །རྫ་མཁན་བྲེས་ན་མགོ་སྐམས་རུས་ལྤགས་ཙམ། །རང་སོས་གཏུབས་པའི་རྩཝ་དག་ཟ་བ་སོམས། །དེ་ཚེ་མང་པོས་ཁྱོད་ལ་བསམས་མ་གྱུར། །འདི་ན་མགྱོགས་པ་སྟོང་གི་ཐོག་འདྲེན་ཅིང ། །རྒྱལ་པོས་ཆིབས་རན་མཆོག་དག་ཉེར་བསྟབས་པ། །ཅིའི་ཕྱིར་མི་ཟ་དྲིས་པ་བདག་ལ་སྨྲོས། །དེ་ནས་རབ་མགྱོགས་དྲང་པོ་བརྟན་ལྡན་པ། །མི་བཟོད་འཁྲུགས་བཅས་མགྱོགས་འགྲོ་མཆོག་གིས་ནི། །དེ་ལས་ཉེར་ཞི་ལེགས་པར་བསམས་བྱས་ནས། །འདུལ་སྦྱོང་བློ་ལྡན་མི་མཆོག་དེ་ལ་སྨྲས། །འདིར་ཁྱོད་ཁོ་བོའི་ཡོན་ཏན་དེ་ཉིད་ཤེས། །ཁོ་བོ་ཇི་བཞིན་ཁྱོད་ཀྱིས་མ་རིགས་མིན། །མཁས་པས་བརྙས་ན་ས་སྟེང་མི་རྒྱུ་ཞིང ། །ཁོ་བོ་འདིར་ནི་མྱུར་དུ་ཤི་ཡང་བླ། །སྐྱེ་བོ་ངན་པས་ཡུན་རིང་བརྙས་གྱུར་ཀྱང ། །གལ་ཏེ་ཡོན་ཏན་ཁྱོད་ལྡན་དེ་བརྙས་མིན། །སྐྱེ་བོ་མཛངས་པས་སྐད་ཅིག་བརྙས་གྱུར་ན། །ཞི་བ་གལ་ཏེ་ཡོན་ཏན་དེ་བརྙས་ཡིན། །འདུལ་སྦྱོང་བས་རྒྱལ་པོ་ལ་སྨྲས་པ། ལྷ་འདི་ནི་བྲོ་འཚལ་བ་མ་ལགས་ཀྱི་འདི་ལྟར་རིམ་པ་མ་བགྱིས་པས་དེའི་སླད་དུ་འདི་རན་དང་ཆས་མི་འཚལ་ལོ། །འདིའི་རིམ་པ་ཇི་ལྟར་བྱ། ལྷ་ཤུལ་དཔག་ཚད་ཕྱེད་དང་གསུམ་ཚུན་ཆད་མཛེས་པར་བགྱི་ཞིང་གྲོང་ཁྱེར་ཡང
7.85a
མཛེས་པར་བགྱི། རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་དཔུང་གི་ཚོགས་ཡན་ལག་བཞི་དང་བཅས་པས་བསུ་བར་བགྱི། ཕྱོགས་གང་དུ་བཞག་པའི་ཕྱོགས་དེ་ཟངས་མའི་གླེགས་བུ་དག་གིས་གཡོག་པར་བགྱི། རྒྱལ་པོའི་སྲས་བུ་ཐུ་བོས་མགོའི་སྟེང་དུ་གདུགས་སྲོགས་ཤིང་བརྒྱ་པ་གཟུང་བར་བགྱི། རྒྱལ་པོའི་སྲས་མོ་ཐུ་མོས་རྔ་ཡབ་གསེར་ཅན་ནོར་བུས་སྤྲས་པས་སྦྲང་མ་དག་བསྐྱབ་པར་བགྱི། རྒྱལ་པོའི་བཙུན་མོ་དམ་པས་གསེར་གྱི་སྣོད་ནས་ཟིལ་དངར་གྱིས་བཅིན་པའི་བཟང་ཆས་ཀྱི་ཟས་བསྟབས་པར་བགྱི། རྒྱལ་པོའི་བློན་པོ་དམ་པས་གསེར་གྱི་ཆོལ་ཟངས་ཀྱིས་རྟུག་པ་དོར་བར་བགྱིའོ། །རྒྱལ་པོས་སྨྲས་པ། དེ་ལྟ་ན་འདི་རྒྱལ་པོ་ཡིན་གྱི་ང་རྒྱལ་པོ་མ་ཡིན་ནོ། །འདུལ་སྦྱོང་བས་སྨྲས་པ། ལྷ་འདི་ལ་དུས་ཐམས་ཅད་དུ་བསྙེན་བཀུར་དེ་ལྟར་བགྱི་མི་འཚལ་ཏེ། འདི་ལྟར་དགུང་བདུན་གྱི་བར་དུ་བགྱིའོ། །དགུང་བདུན་འདས་ནས་བཀའ་ཉན་པར་འགྱུར་རོ། །འདས་པ་གང་ལགས་པ་དེ་ད་བགྱི་བར་མི་སྤྱོད་ཀྱང་ལྷག་མ་གང་ལགས་པ་དེ་མཛད་དུ་གསོལ། རྒྱལ་པོས་ཕྱོགས་གང་དུ་གཞག་པའི་ཕྱོགས་དེ་ཟངས་མའི་གླེགས་བུ་དག་གིས་ཀྱང་གཡོགས། རྒྱལ་པོའི་བུ་ཐུ་བོ་ཡང་མགོའི་སྟེང་དུ་གདུགས་སྲོག་ཤིང་བརྒྱ་པ་འཛིན་ཏུ་བཅུག་།རྒྱལ་པོའི་བུ་མོ་ཐུ་མོ་ཡང་རྔ་ཡབ་གསེར་ཅན་ནོར་བུས་སྤྲས་པས་སྦྲང་མ་དག་སྐྱོབ་ཏུ་བཅུག་།རྒྱལ་པོའི་བཙུན་མོ་དམ་པ་ཡང་གསེར་གྱི་སྣོད་ནས་ཟིལ་དངར་གྱིས་བཅིན་པའི་བཟང་ཆས་ཀྱི་ཟས་སྟོབས་སུ་བཅུག་།རྒྱལ་པོའི་བློན་པོ་དམ་པ་ཡང་གསེར་གྱི་ཆོལ་ཟངས་ཀྱིས་རྟུག་པ་འདོར་དུ་བཅུག་གོ། །ས་བདག་འདུལ་སྦྱོང་བཅས་པ་དེ་ལ་ཆགས། །ཤིན་ཏུ་དྲི་ཞིམ་བྱུག་པ་མཆོག་འཆང་ཞིང ། །ས་བདག་བཙུན་མོ་ཟིལ་དངར་བཟང་ཆས་ཀྱིས། །སྣོད་བཀང་མགྱོགས་འགྲོ་མཆོག་ཕྱིར་འཛིན་པར་བྱེད། །རྒྱལ་པོ་བསྐྱེད་མོས་ཚལ་གྱི་སར་འགྲོ་བར་འདོད་པ་ལ་རྟ་ཅང་ཤེས་ཕུལ་བ་དང ། དེས་རྒྱབ་སྨད་ནས་རྒྱལ་པོས་འདུལ་སྦྱོང་བ་ལ་སྨྲས་པ། འདི་རྒྱབ་མི་ན་འམ། དེས་སྨྲས་པ། ལྷ་བྲོ་མི་འཚལ་ཏེ། འདི་ལྟར་རྒྱལ་པོ་བཅིབས་དཀའ་བར་འགྱུར་སྙམ་ནས་དེའི་སླད་དུ་འདིས་རྒྱབ་སྨད་དོ། །རྒྱལ་པོས་ཞོན་ཏེ་སོང་བ་དང ། དེ་འགྲོ་བ་ན་ཆུ་བྱུང་ནས་དེ་དེ་ལ་མི་རྒལ་བ་དང ། རྒྱལ་པོས་འདུལ་སྦྱོང་བ་ལ་སྨྲས་པ།
7.85b
འདི་མི་འཇིགས་སམ། ལྷ་མི་འཇིགས་ཏེ་འདི་ལྟར་རྔ་མའི་ཆབ་ཀྱིས་རྒྱལ་པོ་གཤེར་བར་གྱུར་ན་མི་རུང་ངོ་སྙམ་པས་དེའི་སླད་དུ་རྒལ་བར་མི་བགྱིད་དོ། །རྒྱལ་པོས་དེའི་རྔ་མ་གསེར་གྱི་སྦུབས་སུ་བཅུག་པ་དང་དེ་དེ་ལས་རྒལ་ཏོ། །རྒྱལ་པོ་དེ་སྐྱེད་མོས་ཚལ་དུ་སོང་སྟེ་བག་མེད་པར་འདུག་པ་དང ། ཉི་འོག་གི་རྒྱལ་པོ་དག་གིས་རྒྱལ་པོ་ཚངས་བྱིན་བསྐྱེད་མོས་ཚལ་དུ་སོང་ངོ་ཞེས་ཐོས་ནས། དེ་དག་ལྷགས་ནས་གྲོང་ཁྱེར་གྱི་སྒོ་དག་བཟུངས་ངོ ། །རྒྱལ་པོ་ཚངས་བྱིན་གྱིས་ཉི་འོག་གི་རྒྱལ་པོ་དག་གིས་གྲོང་ཁྱེར་གྱི་སྒོ་དག་བཟུང་ངོ་ཞེས་ཐོས་ནས་དེ་རྟ་ཅང་ཤེས་ལ་ཞོན་པ་དང ། བཱ་རཱ་ཎ་སཱི་དང་བསྐྱེད་མོས་ཚལ་གྱི་བར་དུ་རྫིང་བུ་ཚངས་ལྡན་ཞེས་བྱ་བ་ཨུཏ་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོས་ཁེབས་པ་ཞིག་གིས་ཆོད་ནས་རྟ་ཅང་ཤེས་ཀྱིས་བསམས་པ། རྒྱལ་པོ་རྒྱལ་རིགས་སྤྱི་བོར་དབང་བསྐུར་བ། གནོད་པ་དང ། ཉམ་ང་བ་དང ། ཕོངས་པར་གྱུར་པ་བདག་གིས་ཡལ་བར་དོར་བ་ཅི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། རྟ་ཅང་ཤེས་དེས་པད་མའི་འདབ་མ་དག་གི་སྟེང་དུ་རྐང་པ་བཞག་སྟེ་སྒེའུ་ཅུང་ནས་བཱ་རཱ་ཎ་སཱིར་ཞུགས་པ་དང ། རྒྱལ་པོ་དགའ་ནས་བློན་པོ་རྣམས་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྲོག་ཕྱུང་བ་དེ་ལ་ཅི་སྦྱིན། ལྷ་རྒྱལ་སྲིད་ཀྱི་ཕྱེད་དོ། །རྒྱལ་པོས་སྨྲས་པ། འདི་ནི་དུད་འགྲོ་ཡིན་པས་འདི་ལ་རྒྱལ་སྲིད་ཀྱི་ཕྱེད་ཀྱིས་ཅི་བྱ་སྟེ། འདི་ལྟར་འདི་ལས་རྟེན་ཏེ་ཞག་བདུན་དུ་སྦྱིན་པ་དག་སྦྱིན། བསོད་ནམས་དག་བྱ་ཞིང་དུས་མ་ཡིན་པར་ཀུ་མུ་དའི་དུས་སྟོན་བྱའོ་སྙམ་ནས། རྒྱལ་པོ་དེ་ལས་རྟེན་ཏེ་ཞག་བདུན་དུ་སྦྱིན་པ་དག་སྦྱིན་པ་དང ། བསོད་ནམས་དག་བྱ་བར་བརྩམས་ཤིང་ཞག་བདུན་དུ་དུས་མ་ཡིན་པར་ཀུ་མུ་དའི་དུས་སྟོན་དག་བྱས་པ་དང ། དེད་དཔོན་དེས་མི་དག་ལ་དྲིས་པ། ཤེས་ལྡན་དག་ཅིའི་ཕྱིར་དུས་མ་ཡིན་པར་ཀུ་མུ་དའི་དུས་སྟོན་འདི་བྱུང་བར་གྱུར། དེ་དག་གིས་དེ་ལ་སྨྲས་པ། རྒྱལ་པོས་མཆོད་གྱུར་ཅེས་བྱ་བའི་གནས་དེ་ནས་རྫ་མཁན་ཞིག་ལས་གསེར་འབུམ་གྱིས་རྟ་ཅང་ཤེས་ཉོས་ཏེ་འདིར་འོངས་ནས་དེས་རྒྱལ་པོ་འདིའི་སྲོག་ཕྱུང་ནས། རྒྱལ་པོས་དེ་ལས་རྟེན་ཏེ་ཞག་བདུན་དུ་སྦྱིན་པ་དག་སྦྱིན། བསོད་ནམས་དག་བྱེད་ཅིང་དུས་མ
7.86a
ཡིན་པར་ཀུ་མུ་དའི་དུས་སྟོན་བྱས་སོ། །དེད་དཔོན་གྱིས་བསམས་པ། མ་ལ་རྟེའུ་དེ་ཅང་ཤེས་སུ་མ་གྱུར་ཏམ་ཇེ་སོང་ལ་དེ་བལྟའོ་སྙམ་ནས་དེའི་གན་དུ་སོང་བ་དང ། རྟ་ཅང་ཤེས་དེས་སྨྲས་པ། ཀཝའི་ནང་རྗེ་ཁྱོད་ཀྱིས་རྟ་ལྔ་བརྒྱ་པོ་དག་གིས་ཅི་ཐོབ། གསེར་འབུམ་མོ། །ཁོ་བོ་ཅིག་པུས་ཀྱང་རྫ་མཁན་དེ་ལ་གསེར་འབུམ་བྱིན་ནོ། །དེ་བརྒྱལ་ཏེ་ས་ལ་འགྱེལ་ནས་ཆུ་གདབ་པས་སྲོག་ཕྱིར་རྙེད་ནས་རྟ་ཅང་ཤེས་ཀྱི་རྐང་པ་གཉིས་ལ་གཏུགས་ཏེ་བཟོད་པ་གསོལ་ཏོ། །དགེ་སློང་དག་དེའི་ཚེ་དེའི་དུས་ན་དེད་དཔོན་གང་ཡིན་པ་དེ་ནི་འཚོ་བྱེད་གཞོན་ནུས་གསོས་འདི་ཉིད་ཡིན་ནོ། །དེའི་ཚེ་དེའི་དུས་ན་རྟ་ཅང་ཤེས་གང་ཡིན་པ་དེ་ནི་ལམ་པ་འདི་ཉིད་ཡིན་ཏེ། དེའི་ཚེ་ཡང་དེས་གང་གི་ཚེ་དེའི་ཡོན་ཏན་དག་མངོན་པར་མི་ཤེས་པ་དེའི་ཚེ་ན་དེ་ལ་གུས་པ་མ་ཡིན་པ་ལ་ཞུགས་པར་གྱུར་ལ། གང་གི་ཚེ་དེའི་ཡོན་ཏན་དག་མངོན་པར་ཤེས་པར་གྱུར་པ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་གྱུར་ལ། ད་ལྟར་ཡང་དེས་གང་གི་ཚེ་འདིའི་ཡོན་ཏན་དག་མངོན་པར་མི་ཤེས་པ་དེའི་ཚེ་ན་འདི་ལ་གུས་པ་མ་ཡིན་པ་ལ་ཞུགས་ལ། གང་གི་ཚེ་ཡོན་ཏན་དག་མངོན་པར་ཤེས་པར་གྱུར་པ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་བྱེད་དོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་ལམ་པས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་ལུང་བསྟན། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །གང་དུ་སྨོན་ལམ་བཏབ། དགེ་སློང་དག་སྔོན་བྱུང་བ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་འདི་རབ་ཏུ་བྱུང་བར་གྱུར་པ་ན་གང་ལས་རབ་ཏུ་བྱུང་བའི་མཁན་པོ་དེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་ལུང་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས
7.86b
པའི་སངས་རྒྱས་ཡོན་ཏན་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ། ཡང་དག་པར་རྫོགས་པའི་སངས་རྒྱས་འོད་སྲུང་གིས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པ་ཤཱཀྱའི་སེང་གེ་ཤཱཀྱའི་རྒྱལ་པོའི་གཙོ་བོ་དེས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང ། འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མ་བསྐོས་པར
7.87a
སྟོན་པའི་ལྟུང་བྱེད་དེ་ཉི་ཤུ་གཅིག་པ་རྫོགས་སྷོ།། ་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགའ་བྱེད་ཁྱོད་ཀྱིས་དགེ་སློང་མ་ལ་འདོམས་ཤིག་།དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག་།དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག་ཅེས་བཀའ་སྩལ་ནས། དེ་ནས་ཨུཏྤལའི་མདོག་འཁོར་དགེ་སློང་མ་ལྔ་བརྒྱ་ཚེ་དང་ལྡན་པ་དགའ་བྱེད་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །ཚེ་དང་ལྡན་པ་དགའ་བྱེད་ཀྱིས་བསམས་པ། བུད་མེད་ཀྱི་ཡུལ་ནི་ཤེས་རབ་ཆུང་བ་ཡིན་ནོ་སྙམ་ནས་དེས་དེ་ལ་དོན་དང ། ཚིག་དང ། ཡི་གེ་མདོར་འདུས་པ་འདུས་པ་དག་གིས་ཆོས་བསྟན་ཏོ། །དེ་ཤེས་རབ་ཅན་ཡིན་པས་གོང་ནས་གོང་དུ་འདྲི་བར་བྱེད་ནས་ཚེ་དང་ལྡན་པ་དགའ་བྱེད་ཀྱིས་ལན་བཏབ་ཅིང ། དེས་དེ་ལ་ཇི་ཙམ་ན་ཉི་མ་ནུབ་པའི་དུས་ལ་བབ་པ་དེ་ཙམ་གྱི་བར་དུ་ཆོས་བསྟན་ནས་དེ་དག་གིས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ཏེ་དོང་བ་དང ། ཇི་ཙམ་ན་མཉན་ཡོད་ཀྱི་སྒོ་དག་བཅད་པར་གྱུར་ནས་དགེ་སློང་མ་རྣམས་ཀྱིས་སྒོ་བཙལ་བ་དང ། སྒོ་བས་སྨྲས་པ། སྒོ་བཅད་ལགས་སོ། །དེ་དག་གིས་སྨྲས་པ། ཕྱེ་ཤིག་།ལྡེ་མིག་དག་རྒྱལ་པོའི་ཕོ་བྲང་དུ་འཚལ་ཏོ། །དེ་དག་གིས་བསམས་པ། འདི་ཉིད་དུ་འཁོད་དོ་སྙམ་ནས་མཉན་ཡོད་དང་ཧ་ཅང་མི་རིང་བ་ན་ཀུན་དགའ་ར་བ་ཞིག་འདུག་པ་དེར་དེ་དག་དོང་ངོ ། །བཅོམ་ལྡན་འདས་ཀྱིས་ཤིང་ལྗོན་པ་ཡང་རྒན་རིམས་ཀྱིས་བསྐོ་བར་བྱའོ་ཞེས་བཀའ་སྩལ་པས་དེ་དག་གིས་ཤིང་ལྗོན་པ་དག་རྒན་རིམས་ཀྱིས་བསྐོ་བར་བརྩམ་པ་དང ། དེ་ན་དེ་དག་ཤིང་ལྗོན་པ་དག་སྒོ་བ་རྣམས་ལ་ཨ་ཡྱེ་ཨ་ཡྱ་ཧ་ཌེ་ཨ་ག་ཨེ་ཨ་ག་ཧ་ཌེ་ཞེས་འབོད་པའི་སྒྲ་མཐོན་པོ་དང ། སྒྲ་ཆེན་པོ་བྱུང་ངོ ། །གཡོན་ཅན་ལྔ་བརྒྱ་ཙམ་མཉན་ཡོད་འཇོམ་པར་འདོད་པ་དག་ལྷགས་པ
7.87b
དེ་དག་གིས་སྒྲ་མཐོན་པོ་དང ། སྒྲ་ཆེན་པོ་དེ་ཐོས་ནས། དེ་དག་གིས་སྨྲས་པ། ཤེས་ལྡན་དག་མཉན་ཡོད་ན་རེ་ཤིག་སྡོད་ཅིག་།ཤེས་ལྡན་དག་རྗེ་བཙུན་མོའི་འཁོར་གྱིས་མ་ཐོས་པར་འདི་དག་གཞོམ་པར་བྱའོ། །ུཏྤ་ལའི་མདོག་གིས་བསམས་པ། མི་མཛེས་པ་འགའ་ཞིག་རིམས་པར་མི་འགྱུར་རམ་སྙམ་ན། ཇི་ཙམ་ན་འཇོམས་པར་འདོད་པའི་གཡོན་ཅན་ལྔ་བརྒྱ་ཙམ་པོ་དེ་དག་མཐོང་ནས་དེས་འཕགས་སྐྱེས་པོའི་དཔུང་སྤྲུལ་ཏེ་རྔ་པ་ཏ་ཧ་བརྡུངས་པ་དང ། དེ་དག་གིས་སྨྲས་པ། ཤེས་ལྡན་དག་བདག་ཅག་འཕགས་སྐྱེས་པོའི་དཔུང་གིས་བསྐོར་ཏེ་བདག་ཅག་ཟིན་པར་གྱུར་ན་མི་རུང་གིས་འབྲོས་པར་བྱའོ་ཞེས་དེ་ལྟར་རིག་ནས་དེ་དག་བྲོས་སོ། །ུཏྤ་ལའི་མདོག་གིས་དགེ་སློང་མ་དེ་དག་ལ་སྨྲས་པ། ཕུ་ནུ་མོ་དག་གཡོན་ཅན་འཇོམ་པར་འདོད་པ་ལྔ་བརྒྱ་ཙམ་འདིར་ལྷགས་ནས་ཁོ་མོས་དེ་དག་བསྡིགས་ནས་བྲོས་ཀྱིས། ཁད་ཀྱི་དལ་བུ་དལ་བུས་ལག་བརྡས་སྒོ་ཕྱེ་ཤིག་།དེ་དག་ནང་པར་སྔར་ལངས་ཏེ་མཉན་ཡོད་དུ་ཞུགས་པ་དང ། བྲམ་ཟེ་དང ། ཁྱིམ་བདག་གིས་མཐོང་ནས་དེ་དག་གིས་སྨྲས་པ། ཤཱཀྱའི་བུའི་དགེ་སྦྱོང་རྣམས་ཀྱིས་ཆོས་འདྲེ་བ་དང ། ལྷག་པར་འདྲེ་ཞིང་ཚངས་པར་སྤྱད་པ་སྤྱོད་པར་བྱེད་པ་བཟང་ངོ ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཉི་མ་ནུབ་པའི་དུས་ཀྱི་བར་དུ་དགེ་སློང་མ་ལ་སྟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བྱེད་ལ་སྨྲས་པ། དགའ་བྱེད་ཁྱོད་ཉི་མ་ནུབ་པའི་དུས་ཀྱི་བར་དུ་དགེ་སློང་མ་ལ་སྟོན་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ
7.88a
དང་མི་སྦྱོར་བ་དང ། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང ། སྦྱོར་བ་དང་བརྟགས་ཏེ་སྤྱོད་པའི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་དགེ་འདུན་གྱིས་བསྐོས་ཀྱང་ཉི་མ་ནུབ་པའི་དུས་ཀྱི་བར་དུ་དགེ་སློང་མ་ལ་སྟོན་ན་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིས་སོ། །བསྐོས་ཀྱང་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །ཉི་མ་ནུབ་པའི་དུས་ཀྱི་བར་དུ་ཞེས་བྱ་བ་ནི་ཉི་མ་ནུབ་པའི་དུས་ལ་བབ་པར་རོ། །དགེ་སློང་མ་ཞེས་བྱ་བ་ནི་ཆོས་འདི་པ་ལའོ། །སྟོན་ན་ཞེས་བྱ་བ་ནི་ལྷག་པའི་ཚུལ་ཁྲིམས་དང ། ལྷག་པའི་སེམས་དང ། ལྷག་པའི་ཤེས་རབ་བོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གི་ཉི་མ་ནུབ་པ་ལ་ཉི་མ་ནུབ་པར་འདུ་ཤེས་པས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་གི་ཉི་མ་ནུབ་པ་ལ་ཡིད་གཉིས་ཟ་བས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཉི་མ་མ་ནུབ་པ་ལ་ཉི་མ་ནུབ་པར་འདུ་ཤེས་པས་དགེ་སློང་མ་ལ་སྟོན་ན་ཉེས་བྱས་སུ་འགྱུར་རོ། །དགེ་སློང་གི་ཉི་མ་མ་ནུབ་པ་ལ་ཡིད་གཉིས་ཟ་བས་དགེ་སློང་མ་ལ་སྟོན་ན་ཉེས་བྱས་སུ་འགྱུར་རོ། །མཚན་ཐོག་ཐག་ཆོས་ཉན་པར་གྱུར་པ་དང ། གཙུག་ལག་ཁང་གི་སྒོ་དྲུང་དུ་སྟོན་པ་དང ། སྒོ་མ་བཅད་པར་འདུག་པ་དང ། གྲོང་ཁྱེར་གྱི་ནང་ན
7.88b
གཙུག་ལག་ཁང་འམ། དབྱར་ཁང་འདུག་པ་དང ། ཁྱིམ་གཞན་དུ་སོང་སྟེ་སྟོན་པ་ལ་ལྟུང་བ་མེད་དོ། ལས་དང་པོ་པ་དང ། སྨྱོས་པ་དང ། སེམས་འཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཨུཏྤ་ལའི་མདོག་གིས་དགེ་སློང་མ་ལྔ་བརྒྱ་གཡོན་ཅན་གྱི་འཇིག་པ་ལས་ཡོངས་སུ་བསྐྱབས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་འདིས་དོན་འཐུན་མང་པོ་སེང་གེའི་འཇིགས་པ་ལས་ཡོངས་སུ་བསྐྱབས་པར་གྱུར་ཏེ་དེ་ཉོན་ཅིག་དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཞིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེས་ཆུང་མ་ལ་སྨྲས་པ། བཟང་མོ་ཁོ་བོ་ཟོང་ཐོག་ཏེ་ཡུལ་གཞན་དུ་འགྲོའོ། །ཆུང་མས་སྨྲས་པ། རྗེའི་སྲས་བདག་ཀྱང་མཆིའོ། །ཁྱིམ་བདག་གིས་སྨྲས་པ། ལམ་དུ་ཁྱོད་ཀྱི་གཡོག་སུས་བྱེད་པར་འགྱུར། ཁྱོད་འདི་ཉིད་དུ་འདུག་ཤིག་ཆུང་མས་བདག་མི་ཁྲིད་དོ་སྙམ་ནས་ངུ་བར་བརྩམས་པ་དང ། ཞོ་ཤས་འཚོ་བ་དག་གིས་ཁྱིམ་བདག་ལ་དྲིས་པ། ཇོ་བོས་ཅིའི་སླད་དུ་འདི་ངུར་སྩལ། ཁྱིམ་བདག་གིས་སྨྲས་པ། མི་ཁྲིད་དོ་སྙམ་ནས་སོ། །དེ་དག་གིས་སྨྲས་པ། ཅིའི་སླད་དུ་མི་བཀྲི། ཁྱིམ་བདག་གིས་སྨྲས་པ། དེར་འདིའི་གཡོག་སུ་བྱེད་པར་འགྱུར། དེ་དག་གིས་སྨྲས་པ། དེར་བདག་ཅག་གིས་འདིའི་གཡོག་བགྱིའོ། །ཁྱིམ་བདག་དེས་དེ་ཁྲིད་དེ་སོང་ནས་དོན་མཐུན་དེ་དག་དགོན་པའི་ལམ་ཞིག་ཏུ་མཚན་མོ་བཏབ་པ་དང ། དོན་འཐུན་དེ་དག་ལམ་གྱིས་དུབ་པས་ཉལ་ནས། ཁྱིམ་བདག་གི་ཆུང་མ་དེ་མེལ་ཚེ་བྱེད་དོ། །ཇི་ཙམ་ན་དེར་སེང་གེ་འོང་ནས་དེས་མགལ་དུམ་ཐོགས་ཏེ་དེ་བསྡིགས་པ་དང་བྲོས་པར་གྱུར་ནས་ལྷས་ཚིགས་སུ་བཅད་པ་སྨྲས་པ། གང་ཕྱིར་བྱ་བ་ཐམས་ཅད་ལ། །སྐྱེས་པ་འབའ་ཤིག
7.89a
མཁས་པ་མིན། །དེ་དང་དེ་ལ་བུད་མེད་ཀྱང ། །ཟིན་ལ་མཁས་པ་ཉིད་དུ་འགྱུར། །དགེ་སློང་དག་དེའི་ཚེ་དེའི་དུས་ན་ཁྱིམ་བདག་གི་ཆུང་མ་གང་ཡིན་པ་དེ་ནི་ཨུཏྤ་ལའི་མདོག་འདི་ཉིད་ཡིན་ལ། དེའི་ཚེ་དེའི་དུས་ན་དོན་འཐུན་ལྔ་བརྒྱ་གང་ཡིན་པ་དེ་དག་ནི་དགེ་སློང་མ་ལྔ་བརྒྱ་འདི་དག་ཡིན་ཏེ། དེའི་ཚེ་ཡང་འདིས་དོན་འཐུན་མང་པོ་སེང་གེའི་འཇིགས་པ་ལས་ཡོངས་སུ་བསྐྱབས་པར་གྱུར་ལ། ད་ལྟར་ཡང་འདིས་དགེ་སློང་མ་ལྔ་བརྒྱ་གཡོན་ཅན་གྱི་འཇིགས་པ་ལས་ཡོངས་སུ་བསྐྱབ་སོ། །ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་དེ་ཉི་ཤུ་གཉིས་པ་རྫོགས་སྷོ།། ་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགའ་བྱེད་ཁྱོད་ཀྱིས་དགེ་སློང་མ་ལ་ཐོམས་ཤིག་དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག་དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག་ཅེས་བཀའ་སྩལ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང་ཚེ་དང་ལྡན་པ་དགའ་བྱེད་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །ཚེ་དང་ལྡན་པ་དགའ་བྱེད་ཀྱིས་དེ་ལ་དོན་དང ། ཚིག་དང ། ཡི་གེ་ཟབ་པ་ཟབ་པ་དག་གིས་ཆོས་བསྟན་ཏོ། །བུད་མེད་ཀྱི་ཡུལ་ནི་ཤེས་རབ་འཆལ་བའི་ཕྱིར་བརྡ་མི་ཕྲད་ཅིང་འཇིགས་པའི་ཕྱིར་འདྲི་མི་ནུས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཚེ་དང་ལྡན་པ་དགའ་བྱེད་ཀྱིས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་འདི་སྐད་ཅེས་གསོལ་ཏོ། །བཙུན་པ་འཕགས་པ་དགའ་བྱེད་ཀྱིས་དགེ་སློང་མ་རྣམས་ལ་དོན་དང ། ཚིག་དང ། ཡི་གེ་ཟབ་པ་ཟབ་པ་དག་གིས་ཆོས
7.89b
བསྟན་ན། བུད་མེད་ཀྱི་ཡུལ་ནི་ཤེས་རབ་འཆལ་པའི་སླད་དུ་བརྡ་མི་མཇལ་ཅིང ། འཇིགས་པའི་སླད་དུ་འདྲི་བའི་རྔོ་མི་ཐོག་སྟེ། བཅོམ་ལྡན་འདས་ཀྱིས་སྦྱིན་པ་ནི་མི་འཇིགས་པའི་རྒྱུ་ལགས་སོ་ཞེས་བཀའ་སྩལ་ན། གལ་ཏེ་བཅོམ་ལྡན་འདས་ཀྱིས་གནང་ན་དགེ་སློང་མ་རྣམས་ཀྱིས་དགེ་སློང་རྣམས་ལ་ཀུན་དགའ་བར་འགྱུར་བ་དག་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་ན་གནང་གིས་དགེ་སློང་མ་རྣམས་ཀྱིས་དགེ་སློང་རྣམས་ལ་ཀུན་དགའ་བར་འགྱུར་བ་དག་བྱའོ། །བཅོམ་ལྡན་འདས་ཀྱིས་དགེ་སློང་མ་རྣམས་ཀྱིས་དགེ་སློང་རྣམས་ལ་ཀུན་དགའ་བར་འགྱུར་བ་དག་བྱའོ་ཞེས་བཀའ་སྩལ་ནས། དེ་དག་གིས་ཇི་ལྟར་བྱ་བ་དག་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། བཅའ་བ་ལྔ་པོ་རྩ་བ་དང་སྡོང་བུ་དང་འདབ་མ་དང ། མེ་ཏོག་དང ། འབྲས་བུ་དག་དང ། བཟའ་བ་ལྔ་པོ་འབྲས་ཆེན་དང ། ཟན་དྲོན་དང ། འདའ་གུ་དང ། ཤ་དང ། སྣུམ་ཁུར་དག་དང ། ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། ཤུར་བུ་དང ། ལྕག་པོད་དང ། ཤུར་བུ་ཕྲིང་བུ་དང ། རྒྱ་ཅང་དག་གིས་བྱའོ། །དགེ་སློང་མ་ཞིག་གིས་འོ་ཐུག་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་བ་དང ། དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ། །སྙམ་ནས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །ཉེ་དགས་དགེ་སློང་མ་དེ་མཐོང་ནས་དེ་ལ་དྲིས་པ། ཁྱེར་ཏེ་འོངས་པ་འདི་ཅི་འོ་ཐུག་གོ། །སུ་ལ་བླུད། འཕགས་པ་དགའ་བྱེད་དོ། །གལ་ཏེ་ཉེ་དགས་ཀྱང་འོ་ཐུག་རྙེད་པར་འགྱུར་ན་རྟག་པ་ཁོ་ནར་དགེ་སློང་མ་ལ་སྟོན་པར་འགྱུར་རོ། །དེ་བཞིན་དུ་དགེ་སློང་མ་ཁ་ཅིག་གིས་ནི་ཞོ་ཐུག་ཁྱེར་ཏེ་འོངས། ཁ་ཅིག་གིས་ནི་ཧཝགས་ཀྱི་ལ་དུ་ཁྱེར་ཏེ་འོངས་པ་དང ། ཉེ་དགས
7.90a
སྨྲས་པ། ཁོ་བོ་ཀོ་ཚེ་དང་ལྡན་པ་དགའ་བྱེད་ཆོས་བཟང་པོའི་ཆོས་ཀྱིས་དགེ་སློང་མ་ལ་སྟོན་སྙམ་གྱི། ཁོ་བོ་ཀོ་ཚེ་དང་ལྡན་པ་དགའ་བྱེད་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་སྙམ་མི་སེམས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ལ་འདི་སྐད་ཅེས་དགེ་སློང་དག་ཟས་ཆུང་ཟད་ཙམ་གྱི་ཕྱིར་དགེ་སློང་མ་རྣམས་ལ་སྟོན་པར་བྱེད་ཅེས་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་སྨྲས་པ། ཉེ་དགའ་ཁྱོད་དགེ་སློང་རྣམས་ལ་འདི་སྐད་ཅེས་དགེ་སློང་དག་ནི་ཟས་ཆུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་ལ་འདི་སྐད་ཅེས་དགེ་སློང་དག་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་རྣམས་ལ
7.90b
ཞེས་བྱ་བ་ནི་ཆོས་འདི་པ་རྣམས་ལའོ། །འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ་དགེ་སློང་དག་ཅེས་བྱ་བ་ནི་ཆོས་འདི་པ་དག་གོ། །ཟས་ཅུང་ཟད་ཙམ་གྱི་ཕྱིར་ཞེས་བྱ་བ་ནི་བཅའ་བ་ལྔ་དང ། བཟའ་བ་ལྔའི་ཕྱིར་རོ། །དགེ་སློང་མ་ལ་ཞེས་བྱ་བ་ནི་ཆོས་འདི་པ་ལའོ། །སྟོན་ཏོ་ཞེས་ཟེར་ན་ཞེས་བྱ་བ་ནི་ལྷག་པའི་ཚུལ་ཁྲིམས་དང ། ལྷག་པའི་སེམས་དང ། ལྷག་པའི་ཤེས་རབ་བོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་བསྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཙམ་དགེ་སློང་རྣམས་ལ་འདི་སྐད་ཅེས་དགེ་སློང་དག་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཟས་ཆུང་ཟད་ཙམ་གྱི་ཕྱིར་དགེ་སློང་མ་ལ་སྟོན་པ་བདེན་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཟས་ཅུང་ཟད་རྩམ་གྱི་ཕྱིར་སྟོན་པའི་ལྟུང་བྱེད་དེ་ཉི་ཤུ་གསུམ་པ་རྫོགས་སྷོ།། ་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཚོངས་དཔོན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྒས་པའི་གནས་སྐབས་སུ་ཉེ་དུ་ཟད་པར་གྱུར་ཅིང་ནོར་ཟད་པ་དང ། ལོངས་སྤྱོད་ཟད་པར་གྱུར་ནས་དེས་ཆུང་མ་ལ་སྨྲས་པ། བཟང་མོ་ཁོ་བོས་ད་ནོར་བསྒྲུབ་པར་མི་ནུས་ཀྱིས་ཁོ་བོ་རབ་ཏུ་འབྱུང་དུ་འགྲོའོ། །ཆུང་མས་སྨྲས་པ། རྗེའི་སྲས་བདག་ཀྱང་རབ་ཏུ་འབྱུང་ངོ ། །དེ་ལྟར་གྱིས་ཤིག་ཅེས་དེས་ཆུང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་གན་དུ་ཁྲིད་དེ་སྨྲས་པ། འཕགས་མ་བདག་གི་མཆིས་འབྲང་འདི་ལེགས་པར་གསུངས་པའི
7.91a
ཆོས་འདུལ་བ་ལ་རབ་ཏུ་འབྱུང་བར་འཚལ་ན་འཕགས་མས་འདི་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། སྐྱེ་དགུའི་བདག་མོ་ཆེན་མོ་གཽ་ཏ་མཱིས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་སོ། །དེས་ཚོང་དཔོན་ལ་སྨྲས་པ། རྗེའི་སྲས་བུད་མེད་ཀྱི་ཡུལ་ནི་སྲིད་པ་སྤྱད་པ་ལགས་ཀྱིས་དུས་དང་དུས་སུ་སྤྱོན་ཅིག་།ཚོང་དཔོན་དེ་ཡང་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་རབ་ཏུ་བྱུང་ངོ ། །མཉན་ཡོད་པའི་ཚོང་དཔོན་རབ་ཏུ་བྱུང་ངོ་ཞེས་དེ་གྲགས་ཤིང་བསོད་ནམས་ཆེ་བས་དེས་དེའི་ཆོས་གོས་དང ། བསོད་སྙོམས་དང ། གནས་མལ་དང ། ན་བའི་རྐྱེན་དང ། སྨན་གྱི་ཡོ་བྱད་དག་གྲུབ་བོ། །དེ་དུས་གཞན་ཞིག་ན་སྣམ་སྦྱར་དམར་སེར་གྱོན་ཏེ་དགེ་སློང་མ་དེའི་དབྱར་ཁང་དུ་སོང་བ་དང ། དགེ་སློང་མ་དེས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ། མདུན་དུ་འདུག་ནས་དེས་དེའི་སྣམ་སྦྱར་དེ་ལ་ཡང་དང་ཡང་དུ་རྟོག་ནས་དགེ་སློང་དེས་སྨྲས་པ། སྲིང་མོ་སྣམ་སྦྱར་འདི་འདོད་དམ། དེས་སྨྲས་པ། ལྷའི་གནས་ཀྱི་ལྷག་མ་བཞིན་དུའོ། །དེས་བསམས་པ། བདག་གི་འདི་ལ་སྣམ་སྦྱར་འདི་སྦྱིན་པར་བྱ་ཞིང་བདག་གིས་སྣམ་སྦྱར་གཞན་བཙེམ་པར་བྱའོ། །སྙམ་ནས་དེས་དེ་ལ་སྣམ་སྦྱར་དེ་བྱིན་ཏེ་སོང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ལྗོང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་སྒོའོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར
7.91b
ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། ་མཛེས་པ་འཁོར་མཛེས་པ་དང་ལྡན་པ། ་ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུག་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ་ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོངས་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐག་བཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱི་ཤིན་དུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ
7.92a
པོ་ལྟར་དྲེགས་པ་དང་བྲལ་བ། སྐྱེ་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟངས་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་ཏུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ་ཀུན་ཤེས་ཀཽཎྜི་ནྱ་དང ། རླངས་པ་དང ། མིང་ཆེན་དང ། མ་འགགས་པ་དང ། ཤཱ་རིའི་བུ་དང ། མཽད་གལ་གྱི་བུ་ཆེན་པོ་དང ། འོད་སྲུང་དང ། ཀུན་དགའ་བོ་དང ། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང ། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ་ཀོ་ས་ལ་དག་ཏུ་ལྗོངས་རྒྱུར་གཤེགས་སོ། །ཆོས་ཉིད་ཀྱིས་ན་སངས་རྒྱས་བཅོམ་ལྡན་འདས་དག་ལྗོངས་རྒྱུར་གཤེགས་པ་ན་འགའ་ཞིག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུ་བར་མི་འགྱུར་རམ་སྙམ་པས་སྐུ་ཐམས་ཅད་ཀྱིས་གཡས་ཕྱོགས་ནས་གླང་པོ་ཆེའི་ལྟ་སྟངས་ཀྱིས་རྣམ་པར་གཟིགས་པ་ཡིན་པས་བཅོམ་ལྡན་འདས་ཀྱིས་དགེ་སློང་དེ་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ་བ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་དབྱར་གནས་པ་དག་གིས་ཆོས་གོས་ཀྱི་རྙེད་པ་མ་གྲུབ་བམ། བཅོམ་ལྡན་འདས་གྲུབ་བོ། །ཀུན་དགའ་བོ་འོ་ན་ཅིའི་ཕྱིར་དགེ་སློང་འདི་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ། ཚེ་དང་ལྡན་པ་ཀུན་དགའ་བོས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་གོས་དག་སྦྱིན་ནམ། བཙུན་པ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་མ་ཉེ་དུ་མ་ཡིན་པ་ནི་འདི་སྙམ་དུ་འདིའི་ཆོས་གོས་གསུམ་ཚང་འམ། འོན་ཏེ་མ་ཚང་སྙམ་དུ་མི་སེམས་པར་འདི་ལྟར་ཐོབ་བོ་ཅོག་ལེན་པར་བྱེད་ཀྱི་ཉེ་དུ་ལ
7.92b
ནི་བྱིན་ཡང་ལེན་པར་མི་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོག་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་དགེ་སློང་མ་ཉེ་དུ་མ་ཡིན་པ་ལ་གོས་སྦྱིན་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམས་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་གོས་སྦྱིན་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །དགེ་སློང་མ་ཞེས་བྱ་བ་ཡང་ཆོས་འདི་པའོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུག་ལས་བརྟེན་པའི་བདུན་པ་ཚུན་ཆད་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ནོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་དག་ལས་གང་ཡང་རུང་བའོ། །སྦྱིན་ན་ཞེས་བྱ་བ་ནི་བསླང་མི་དགོས་པར་རོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ
7.93a
ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་བསྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་བྱིན་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་བྱིན་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་གོས་བྱིན་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་ཡིད་གཉིས་ཟ་བས་གོས་བྱིན་ན་ཉེས་བྱས་སུ་འགྱུར་རོ། །བོར་བརླག་བྱུང་བ་ལ་སྦྱིན་པ་དང ། ལེགས་པར་སྨྲ་བ་ལ་སྦྱིན་པ་དང ། དགེ་སློང་མའི་དགེ་འདུན་ལ་གོས་ཀྱི་སྦྱིན་པ་སྦྱིན་པ་དང ། རྫོགས་པར་བསྙེན་པར་བྱེད་པ་ལ་སྦྱིན་པ་དང ། རིན་གྱི་ཕྱིར་སྦྱིན་པ་དང ། བརྗེ་བའི་ཕྱིར་སྦྱིན་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གོས་སྦྱིན་པའི་ལྟུང་བྱེད་དེ་ཉི་ཤུ་བཞི་པ་རྫོགས་སྷོ།། ་་་་་་།།འདུལ་བ་རྣམ་པར་འབྱེད་པ། བམ་པོ་བཞི་བཅུ་དགུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་མ་སྦེད་མའི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་ནས། དེས་རས་ཡུག་ཆེན་ཅིག་རྙེད་པ་དང་དེ་སུ་ཞིག་བདག་གི་ཆོས་གོས་ཚེམ་པར་འགྱུར་སྙམ་དུ་སེམས་ཁོངས་སུ་ཆུད་ཅིང་འདུག་པ་ན། དགེ་སློང་མ་རྣམས་ཀྱིས་དེ་ལ་སྨྲས་པ། སྦེད་མ་ཁྱོད་ཅིའི་ཕྱིར་སེམས་ཁོངས་སུ་ཆུད་ཅིང་འདུག་།ཕུ་ནུ་མོ་དག་ཁོ་མོ་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་ནས་ཁོ་མོས་རས་ཡུག་ཆེན་ཞིག་རྙེད་ན། ཁོ་མོའི་ཆོས་གོས་སུ་འབྲུབ་པར་འགྱུར་མི་ཤེས་སོ། །སྦེད་མ་ཁྱོད་གསེར་གྱི་སྣོད་ཀྱིས་སློངས་མོ་ལ་རྒྱུ་འམ། ཁྱོད་ཀྱི་དགེ་སློང་འཕགས་པ་འཆར་ཀ་རབ་དུ་བཤེས་པ་ཡིན་ནོ། །སྦེད་མས་སྨྲས་པ། དེས་ཁོ་མོའི་ཆོས་གོས་དྲུབས་པར་མི་འགྱུར་རོ། །
7.93b
ཁྱོད་ཀྱིས་དེ་ལ་ལན་འགའ་བཅོལ་བ་ཡོད་དམ། ལན་འགའ་ཡང་བཅོལ་བ་མེད་དོ། །ཅི་ཁྱོད་ཆུ་སྒྲ་གྲགས་པས་ལྷམ་འབུད་དམ། སོང་ལ་ཆོལ་ཅིག་དང་འདྲུབ་པར་འགྱུར་རོ། །སྦེད་མ་འཆར་ཀའི་གན་དུ་སོང་སྟེ། དེའི་རྐང་པ་གཉིས་ལ་མགོ་བོས་ཕྱག་འཚལ་ནས་མདུན་དུ་འདུག་པ་དང ། ཚེ་དང་ལྡན་པ་འཆར་ཀས་དེའི་རས་ཡུག་ཆེན་མཐོང་ནས་དེ་ལ་སྨྲས་པ། སྦེད་མ་གང་ལ་རས་ཡུག་ཆེན་འདི་ལྟ་བུ་ཡོད་པ་དེས་རས་སར་པ་ལས་སྣམ་སྦྱར་ཉི་རིམ་བྱས་ཏེ་སྙིང་ལས་ཆུང་ངུ་དགེ་བའི་ཕྱོགས་ལ་ཏྲོན་བྱས་པར་འགྱུར་རོ། །སྦེད་མས་སྨྲས་པ། འཕགས་པ་བདག་ཁྱོད་ལ་རས་ཡུག་ཆེན་མི་འབུལ་བ་ནི་མ་ལགས་ན་འདི་ལྟར་བདག་གི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པས་ཁྱོད་ཀྱིས་བདག་གི་སྣམ་སྦྱར་ཚེམས་ཏེ་སྩོལ་ཅིག་།འཆར་ཀས་བསམ་པ། གལ་ཏེ་རེ་ཤིག་བཙེམ་པར་བྱར་ཡང་བཅུ་གཉིས་སྡེ་དག་ལས་གང་དང་གང་དག་ལ་ཆོས་གོས་བཙེམ་པར་བྱ་བ་བྱུང་བར་གྱུར་པ་དེ་དག་ཐམས་ཅད་ཀྱང་བདག་གི་གན་དུ་ཁྱེར་ཏེ་འོང་བས་དེ་སྙེད་ཅིག་བཙེམ་པར་ཡང་ཇི་ལྟར་ནུས། གལ་ཏེ་མི་བཙེམ་བར་ཚེག་པའི་གཡར་ཚུལ་ཀྱང་མི་གཏེར་བར་འགྱུར་བས་འདི་ལྟར་ཅི་ནས་ཀྱང་ཤིང་གི་སྣོད་དུ་བསྐོལ་བ་བཞིན་དུ་དང་པོ་གང་ཡིན་པ་དེ་ཉིད་ཐ་མར་འགྱུར་བ་དེ་ལྟར་བཙེམ་པར་བྱའོ་སྙམ་ནས་དེས་དེ་ལ་སྨྲས་པ། ཞོག་ལ་སོང་ཤིག་།སྦེད་མས་བཞག་སྟེ་སོང་བ་དང ། དྲུག་སྡེ་དག་དེར་དོང་ནས་དེ་དག་གིས་རས་ཡུག་ཆེན་དེ་མཐོང་ནས་སྨྲས་པ། བཙུན་པ་འཆར་ཀ་རས་ཡུག་ཆེན་འདི་སུའི། ལས་བདག་གིར་བྱ་བ་དེའིའོ། །གང་གི་སྦེད་མའིའོ། །འོ་ན་འཁོད་དེ་ཅི་རུང་བཙེམ་པར་བྱའོ། །དེ་ལྟར་གྱིས་ཤིག་།དེ་དག་གིས་རས་ཡུག་ཆེན་དེ་བརྒྱངས་ཏེ་དྲས་ཤིང་དྲུབས་ནས་འཆར་ཀས་སྣམ་སྦྱར་དེ་དང་ཚོན་སྣ་ལྔའི་སྐུད་པ་ཁྱེར་ཏེ་འཆག་དུ་སོང་ནས། དེས་དེར་སོང་སྟེ་སྣམ་སྦྱར་དེ་ལ་ཚོན་སྣ་ལྔའི་སྐུད་པས་བདག་ཉིད་སྦེད་མའི་མགུལ་ནས་འཁྱུད་དེ་འདུག་པ་ཞིག་སྐུད་རིས་སུ་བཙེམ་ནས་དེ་གཙུག་ལག་ཁང་དུ་འོངས་ཏེ་སྣམ་སྦྱར་དེ་བལྟབ་ནས་ཆོས་གོས་ཀྱི་གདང་ལ་བཀལ་ཏེ་བཞག་པ་དང ། སྦེད་མ་ཡང་འོངས་ནས་འཆར་ཀས
7.94a
སྨྲས་པ། སྦེད་མ་ཁོ་བོས་ཀྱང་སྣམ་སྦྱར་བཙེམ་ནས་ཁྱོད་ཀྱང་འོངས་སོ། །དེས་སྣམ་སྦྱར་དེ་བལྟབ་བཞིན་དུ་སྦེད་མའི་ཕྲག་པ་ལ་བཀལ་ཏེ་སྨྲས་པ། རེ་ཤིག་ཇི་སྲིད་དུ་ཚོན་གྱིས་མ་བཅལ་བ་དེ་སྲིད་དུ་མ་དབྱེ་ཤིག་།ལྟུང་བ་དང་བཅས་པར་གྱུར་ཏ་རེ། སྦེད་མས་སྣམ་སྦྱར་དེ་དེ་བཞིན་བལྟབ་བཞིན་ཁོ་ནར་དབྱར་ཁང་དུ་འཕགས་པ་དང ། དེ་ལ་དགེ་སློང་མ་ཁྲིམས་ཟླས་སྨྲས་པ། སྦེད་མ་འཕགས་པ་འཆར་ཀས་སྣམ་སྦྱར་ཇི་ལྟར་བཙེམ་པ་བལྟས་འོན་ཅིག་།སྦེད་མས་དེ་ལ་སྨྲས་པ། འཕགས་པ་འཆར་ཀ་ན་རེ་རེ་ཤིག་ཇི་སྲིད་དུ་ཚོན་གྱིས་མ་བཅས་པ་དེ་སྲིད་དུ་མ་དབྱེ་ཤིག་།ལྟུང་བ་དང་བཅས་པར་གྱུར་ཏ་རེ་ཞེས་ཟེར་རོ་ཞེས་ལྟར་མ་བསྟེར་རོ། །སྦེད་མ་དབྱར་ཁང་དུ་སོང་བ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། སྦེད་མ་འཕགས་པ་འཆར་ཀས་སྣམ་སྦྱར་ཇི་ལྟར་བཙེམ་པ་བལྟས་འོན་ཅིག་།སྦེད་མས་སྨྲས་པ། འཕགས་པ་འཆར་ཀ་ན་རེ་རེ་ཤིག་ཇི་སྲིད་དུ་ཚོན་གྱིས་མ་བཅལ་བ་དེ་སྲིད་དུ་མ་དབྱེ་ཤིག་།ལྟུང་བ་དང་བཅས་པར་གྱུར་ཏ་རེ་ཞེས་ཟེར་རོ། །དགེ་སློང་མ་གྲོགས་མོ་དག་གིས་འདི་ལ་ལྟུང་བར་འགྱུར་བ་ཅི་ཡོད་ཅེས་དེའི་རྒྱབ་ལོགས་སུ་འདུག་སྟེ་སྣམ་སྦྱར་ཧུར་ཅེས་ཕྲོགས་ནས་ཕྱེ་སྟེ་བལྟས་པ་དང ། དགེ་སློང་མ་རྣམས་ཀྱིས་དེ་ལ་ཚོན་སྣ་ལྔའི་སྐུད་པས་འཆར་ཀ་སྦེད་མའི་མགུལ་ནས་འཁྱུད་དེ་འདུག་པ་སྐུད་རིས་སུ་བཙེམ་པ་མཐོང་ནས་རྟ་གད་ཀྱིས་བཏབ་སྟེ་སྨྲས་པ། སྦེད་མ་ཁྱོད་ལ་འཕགས་པ་འཆར་ཀས་ཡུན་རིང་མོ་ཞིག་གིས་གཟོད་འཁྱུད་དོ། །སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཐོས་ནས་དེས་སྨྲས་པ། ནུ་མོ་དག་ཁྱེད་མགོ་ཕྱི་ཞིང་མཆན་ཁུང་སྤུན་པ་ཡིན་ན་ཅི་རྒོད། དེ་དག་གིས་སྨྲས་པ། འཕགས་མ་ཇི་ལྟ་ཇི་ལྟར་འཕགས་པ་འཆར་ཀས་མི་མཛེས་པ་བགྱིས་པ་ལ་གཟིགས། ནུ་མོ་དག་དྲུག་སྡེ་གནས་ངན་ལེན་ཀུན་དུ་སྤྱོད་པ་དག་གིས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འཇིག་པར་བྱེད་དོ་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །
7.94b
དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་དགེ་སློང་མ་ཉེ་དུ་མ་ཡིན་པའི་གོས་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པའི་གོས་བྱེད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པའི་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཀོ་ཏམ་པའི་གོས་དང ། ཉི་འོག་གི་གོས་དག་ལས་གང་ཡང་རུང་བའོ། །བྱེད་ན་ཞེས་བྱ་བ་ནི་འཚེམ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ་གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས
7.95a
ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་གོས་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཡིད་གཉིས་ཟ་བས་གོས་བྱེད་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གོས་བྱེད་པའི་ལྟུང་བྱེད་དེ་ཉི་ཤུ་ལྔ་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུས་ཏེ་འགྲོ་ན་ཡང་འགྲོ་བར་ཆས་པའི་རྙེད་པ་བསྒྲུབ་པར་བྱེད། འོང་ན་ཡང་བློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང ། སྐྱེ་བོ་མང་པོ་དགའ་བ་དང ། ཡིད་དུ་འོངས་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང ། གང་ནས་ཀྱང་མི་འོང་བས་རྙེད་པ་འཐོབ་པ་དང ། སྐྱེ་བོ་མང་པོ་དགའ་བ་དང ། ཡིད་དུ་འོང་བར་ག་ལ་འགྱུར་གྱིས། ཡུ་བུ་ཅག་ཀྱང་འདོང་ངོ ། །གང་དུ་འདོང ། ལྗོངས་རྒྱུར་འདོང་ངོ ། །ཇེ་སྲིང་མོ་དག་བལྟའོ་ཞེས་དེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་དག་དགེ་སློང་མའི་དབྱར་ཁང་དུ་དོང་སྟེ་བཅུ་གཉིས་སྡེ་དག་གི་གན་དུ་སོང་ནས་སྨྲས་པ། སྲིང་མོ་དག་ཁྱེད་ཅག་བལྟས་ཀྱིས་ཁོ་བོ་ཅག་ལྗོངས་རྒྱུར་འདོང་ངོ ། །དེ་དག་ངུས་པ་དང ། དྲུག་སྡེ་དག་གིས་སྨྲས་པ། སྲིང་མོ་དག་ངུར་ཅི་ཡོད། གལ་ཏེ་ཁྱེད་ཅག་ལྗོངས་རྒྱུར་བཞུད་ན་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ། །དྲུག་སྡེ་དག་གིས་སྨྲས་པ། སྲིང་མོ་དག་བཅོམ་ལྡན་འདས་འཁོར
7.95b
སྟོང་ཉིས་བརྒྱ་ལྔ་བཅུ་དང་བཞུགས་ན་ཁྱེད་ཅག་བདག་ཅག་ལ་རྒྱལ་བྱེད་ཀྱི་ཚལ་སྟོང་པར་འགྱུར་རོ་ཞེས་ཟེར་རམ། དེ་དག་གིས་སྨྲས་པ། ལྷུང་བཟེད་ནག་པོ་ཅན་དག་བདག་ཅག་མཐོང་བར་ཡང་མི་དགའ་ན་མཆི་བ་དང ། སྟན་འདིང་བ་དང ། ཆོས་སྟོན་པར་ལྟ་ག་ལ་འགྱུར། ཉེ་དགས་སྨྲས་པ། སྲིང་མོ་དག་འོ་ན་ལྷན་ཅིག་འདོང་ངོ ། །སྦོམ་དགའ་མོས་སྨྲས་པ། དགེ་སློང་མ་དག་དགེ་སློང་རྣམས་དང་ལྷན་ཅིག་མཆིར་རུང་འམ། ཉེ་དགས་སྨྲས་པ། ལེགས་པར་རུང་ངོ་ཤིན་ཏུ་རུང་ངོ་གང་དུ་བཀག་སུས་བཀག་ལམ་རྒྱག་མང་པོ་དག་སྟ་གོན་གྱིས་ཤིག་།དེ་དག་གིས་ལམ་རྒྱག་མང་པོ་དག་སྟ་གོན་བྱས་སོ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་དག་མཉན་ཡོད་དུ་བསོད་སྙོམས་བརྒྱུས་ནས་དགེ་སློང་མའི་དབྱར་ཁང་དུ་དོང་བ་དང ། དེ་དག་ལ་བཅུ་གཉིས་སྡེ་དག་གིས་སྨྲས་པ། ཇོ་བོ་ཅག་ཇེ་ཞལ་ཚུལ་གསོལ་ཅིག་།དེ་དག་གིས་གཡར་ཚུས་བྱས་པ་ན་དེ་དག་གིས་ལམ་རྒྱགས་སྦྱར་བ་ཐམས་ཅད་ཟོས་ནས་དེ་དག་གིས་སྨྲས་པ། སྲིང་མོ་དག་ཁྱེད་ཀྱིས་ལམ་རྒྱགས་ཇི་སྙེད་སྟ་གོན་བྱས་པ་བསྟ་འོན་ཅིག་།དེ་དག་གིས་སྨྲས་པ། ཁྱེད་ཀྱིས་གསོལ་བ་དེ་དག་ལགས་སོ། །དྲུག་སྡེ་དག་གིས་སྨྲས་པ། ལམ་རྒྱག་དེ་ཙམ་གྱིས་ལྗོངས་རྒྱུར་ཇི་ལྟར་ནུས། འདི་ལྟར་ལམ་ཀར་ལྷག་པར་བཀྲེས་པར་འགྱུར་གྱིས་ལམ་རྒྱགས་མང་དུ་སྟ་གོན་གྱིས་ཤིག་།དེ་དག་གིས་ལམ་རྒྱག་མང་པོ་དག་སྟ་གོན་བྱས་ཏེ་དྲུག་སྡེ་དག་དང་ལྷན་ཅིག་ལྗོངས་རྒྱུར་འཕགས་སོ། །བསོད་སྙོམས་པ་ཞིག་ཀྱང་དེ་དག་དང་ལྷན་ཅིག་ལྗོངས་རྒྱུར་འཕགས་པ་དང་དགེ་སློང་རྣམས་ཀྱིས་དེ་ལ་སྨྲས་པ། བསོད་སྙོམས་པ་འདི་དག་ནི་གནས་ངན་ལེན་ཀུན་དུ་སྤྱོད་པ་ཡིན་གྱིས་ཁྱོད་འདི་དག་དང་ལྷན་ཅིག་ལྗོངས་རྒྱུར་མ་འགྲོ་ཤིག་།ཁྱོད་ལ་ཐོ་འཚམ་པར་འགྱུར་རོ། །བསོད་སྙོམས་པས་སྨྲས་པ། ཁོ་བོ་ལ་འདོད་པ་ཡིན་པས་འདི་དག་ལ་ལུང་མནོད་པ་དང ། ཀླག་པ་དང ། ཁ་ཏོན་དང ། ཡོངས་སུ་དྲི་བ་དང ། རྣལ་འབྱོར་དང ། ཡིད་ལ་བྱ་བ་འགའ་ཡང་རག་མ་ལས་པས་འདི་དག་གིས་ཁོ་བོ་ལ་ཐོ་བརྩམ་དུ་ཅི་ཡོད་ཅེས་དེས་དེ་དག་གིས་ཚིག
7.96a
ཚིག་མ་ཡིན་པར་བྱས་ཏེ་དྲུག་སྡེ་དག་དང་ལྷན་ཅིག་ལྗོངས་རྒྱུར་འཕགས་སོ། །དེ་དག་གིས། གང་གི་ཚེ་མཚམས་ཀྱི་ཕྱི་རོལ་ཏུ་སོན་པ་དེའི་ཚེ་ན་སྨས་པ། དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་འཁོད་པར་བྱ། ཚུར་ཤེག་བདག་ཅག་རང་རང་གི་སྤྱོད་ལམ་གྱིས་འཁོད་པར་བྱའོ་ཞེས་དང་པོར་དགའ་བོ་འདུག་ནས་དེའི་འོག་ཏུ་དགའ་མོ་འདུག་།དེའི་འོག་ཏུ་དགའ་བོའི་ལྷན་ཅིག་གནས་པ་འདུག་།དེའི་འོག་ཏུ་དགའ་མོའི་ལྷན་ཅིག་གནས་པ་འདུག་།དེའི་འོག་དུ་དགའ་བོའི་དགེ་ཚུལ་འདུག་།དེའི་འོག་ཏུ་དགའ་མོའི་དགེ་ཚུལ་འདུག་གོ། །དེ་བཞིན་དུ་ཉེ་དགའ་དང ། གཙུག་དགའ་མོ་ལ་སོགས་པ་ཡང་སྤེལ་མར་བཀོད་དེ་དོང་ངོ ། །དོན་མཐུན་དེ་དང་བྲམ་ཟེ་ཞིག་འགྲོ་བ་དེས་དེ་དག་མཐོང་ནས་དེས་སྨྲས་པ། འདི་ནི་དགེ་སྦྱོང་ཡིན། དེའི་ཆུང་མ་ནི་འདི་ཡིན། དེའི་བུ་ནི་འདི་ཡིན། དེའི་མནའ་མ་ནི་འདི་ཡིན། དེའི་ཚ་བོ་འདི་ཡིན། དེའི་ཚ་བོའི་ཆུང་མ་ནི་འདི་ཡིན་པར་ཤེས་སོ། །ཉེ་དགས་ཐོས་ནས་དེས་སྨྲས་པ། བཀྲེན་པ་ཁྱོད་ཀྱི་གཉའ་བ་རྡོག་པས་མནན་ནས་འདི་ནི་ཁོ་བོའི་ཆུང་མ་ཡིན། འདི་ནི་ཁོའི་བུ་ཡིན། འདི་ནི་ཁོའི་མནའ་མ་ཡིན། འདི་ནི་ཁོ་བོའི་ཚ་བོ་ཡིན། འདི་ནི་ཁོ་བོའི་ཚ་བོའི་ཆུང་མ་ཡིན། བསོད་སྙོམས་པ་དེས་བསམ་པ་བདག་ཤི་བ་ནི་བླའི་གནས་ངན་ལེན་ཀུན་ཏུ་སྤྱོད་པ་འདི་དག་དང་ལྷན་ཅིག་ལྗོངས་རྒྱུར་འགྲོ་བ་ནི་མི་རུང་ངོ་སྙམ་ནས་དེ་ཕྱིར་ལོག་སྟེ་རྒྱལ་བྱེད་ཀྱི་ཚལ་དུ་སོང་བ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། བསོད་སྙོམས་པ་ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། དྲུག་སྡེ་གནས་ངན་ལེན་ཀུན་དུ་སྤྱོད་པ་དག་གིས་འདྲུམ་པ་ལྟུང་བས་བཅོམ་ལྡན་འདས་ཀྱི་བསྟན་པ་འཇིག་པར་བྱེད་དོ། །ཅི་བྱས། དེས་སྐབས་དེ་དགེ་སློང་རྣམས་ལ་རྒྱས་པར་རྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར
7.96b
བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ་ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་འཐུན་དང་ལྷན་ཅིག་མཐམས་ནས་འགྲོན་ལམ་དུ་འཇུག་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་མ་རབ་ཏུ་མང་པོ་དག་རྒྱལ་པོའི་ཁབ་ཏུ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་པར་ཁས་བླངས་ནས་དེ་དག་དབྱར་གྱི་ཟླ་བ་གསུམ་པོ་དག་འདས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འཕགས་ནས་དེ་དག་གིས་མཉན་ཡོད
7.97a
དུ་འགྲོ་བའི་དོན་འཐུན་བཙལ་བར་བརྩམ་པ་དང ། ཇི་ཙམ་དག་དགེ་སློང་དང་བཅས་པའི་དོན་འཐུན་མཐོང་ནས་སྨྲས་པ། ཕུ་ནུ་མོ་དག་དོན་འཐུན་འདི་ནི་དགེ་སློང་དང་བཅེས་པ་ཡིན་གྱིས། དགེ་སློང་མེད་པའི་དོན་འཐུན་གཞན་བཙལ་བར་བྱའོ། །ཞེས་དེ་དག་གིས་དགེ་སློང་མེད་པའི་དོན་འཐུན་གཞན་བཙལ་བར་བརྩམས་པ་དང ། ཇི་ཙམ་ན་དགེ་སློང་མེད་པའི་དོན་འཐུན་མ་རྙེད་ནས་དེ་དག་གིས་སྨྲས་པ། ཕུ་ནུ་མོ་དག་བདག་ཅག་གིས་ཤིན་ཏུ་ཡུན་རིང་པོར་བསྡད་ན་ཡང་དགེ་སློང་མེད་པའི་དོན་འཐུན་མ་རྙེད་ཀྱིས་དོན་འཐུན་འདི་ཉིད་དང་མགོ་སྣང་ཙམ་གྱིས་འདོང་བར་བྱའོ། །ཞེས་དེ་དག་དོན་འཐུན་དེ་དང་ལྷན་ཅིག་མགོ་སྣང་ཙམ་གྱིས་འཕགས་སོ། །དོན་འཐུན་དེ་ཤིན་དུ་རིངས་པར་སོང་ནས་དེ་དག་ཕྱི་བཞིན་འབྲང་ཞིང་འགྲོ་བ་ན་ཆོམ་རྐུན་པ་དག་གིས་བཅོམ་ནས་དེ་དག་མཐར་གྱིས་མཉན་ཡོད་དུ་ཕྱིན་ཏེ་དགེ་སློང་མའི་དབྱར་ཁང་དུ་དོང་བ་དང་དགེ་སློང་མ་རྣམས་ཀྱིས་མཐོང་ནས་སྨྲས་པ། ཕུ་ནུ་མོ་དག་ཇི་ལྟ་བདེ་བར་བརྒྱུས་སམ། ཇི་ལྟར་བདེ་བར་བརྒྱུས། བདག་ཅག་ཆོམ་རྐུན་པ་དག་གིས་བཅོམ་མོ། །ཕུ་ནུ་མོ་དག་ཇི་ལྟར་བདག་ཅག་བཅོམ་ལྡན་འདས་ཀྱིས་ཡོངས་སུ་བཏང་བ་དེ་ལྟར་ནི་ཡ་མཚན་ཅན་དགུ་བཅུ་རྩ་དྲུག་པོ་དག་གིས་ཀྱང་བུད་མེད་ཀྱི་ཡུལ་འགའ་ཡང་ཡོངས་སུ་མ་གཏུང་ངོ ། །ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དུས་མ་གཏོགས་སོ། །དགེ་སློང་དག་དོན་འཐུན་དང་ལྷན་ཅིག་ལྗོངས་རྒྱུར་འདོང་བ་ན་དེ་དག་བསོད་སྙོམས་ཀྱིས་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ
7.97b
གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ་ལམ་རྒྱགས་བསྐུར་བར་བྱའོ། །བཅོམ་ལྡན་འདས་ཀྱིས་ལམ་རྒྱགས་བསྐུར་བར་བྱའོ་ཞེས་བཀའ་སྩལ་ནས་དེ་དག་གིས་སུ་བསྐུར་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རྩེ་རྒོད་ཀྱིས་བསྐུར་བར་བྱའོ། །རྩེ་རྒོད་མེད་ན་རྩེ་རྒོད་མོས་བསྐུར་བར་བྱའོ། །རྩེ་རྒོད་མོ་མེད་ན་དགེ་ཚུལ་གྱིས་བསྐུར་བར་བྱའོ། །དགེ་ཚུལ་མེད་ན་དགེ་ཚུལ་མས་བསྐུར་བར་བྱའོ། །དགེ་ཚུལ་མ་མེད་ན་དགེ་སློང་རྣམས་ཀྱིས་དགེ་སློང་མའི་ལམ་རྒྱགས་བསྐུར་བར་བྱ་ཞིང ། དགེ་སློང་མ་རྣམས་ཀྱིས་དགེ་སློང་རྣམས་ཀྱི་ལམ་རྒྱགས་བསྐུར་བར་བྱ་སྟེ། དགེ་སློང་རྣམས་ཀྱིས་དགེ་སློང་མ་རྣམས་ཀྱི་བྱིན་ལེན་བསྟབས་པར་བྱ་ཞིང ། དགེ་སློང་མ་རྣམས་ཀྱིས་དགེ་སློང་རྣམས་ཀྱི་བྱིན་ལེན་བསྟབས་པར་བྱའོ། །དགེ་སློང་དག་ལྗོངས་རྒྱུ་ཞིང་འདོང་བ་ན་ན་བར་གྱུར་ནས་དགེ་སློང་མ་དག་གིས་དེ་དག་བོར་ཏེ་དོང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་ཀྱང་དགེ་སློང་དག་བསྐུར་བར་བྱའོ། །དགེ་སློང་མ་དག་རྐང་པ་ལོགས་ནས་འཛིན་ཅིང་དགེ་སློང་དག་མགོ་ལོགས་ནས་འཛིན་པ་ན་དགེ་སློང་མ་དག་འདོད་ཆགས་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་རྐང་པ་ལོགས་ནས་གཟུང་བར་བྱ་ཞིང ། དགེ་སློང་མ་དག་གིས་མགོ་ལོགས་ནས་བཟུང་བར་བྱའོ། །དེ་དག་གྲོང་དུ་ཕྱིན་ནས་ཐམས་ཅད་སྡོད་པ་ན། དེ་དག་བསོད་སྙོམས་ཀྱིས་ཕོངས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ཀྱིས་བསྡད་པར་མི་བྱ་བར་དེ་ན་བའི་སྨན་དང་ཟན་ལེགས་པར་སྦྱར་ཏེ་དགེ་སློང་གཅིག་བཞག་ནས་ལྷག་མ་རྣམས་འདོང་བར་བྱའོ། །དགེ་སློང་མ་རྣམས་ལ་ཡང་དེ་བཞིན་དུ་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ
7.98a
ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམས་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་འཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ལམ་དོན་འཐུན་གྱིས་བགྲོད་པར་བྱ་བ་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ན་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མའི་དོན་འཐུན་དང་ལྷན་ཅིག་ཅེས་བྱ་བ་ནི་ཆོས་འདི་པའོ། །འཐམས་ནས་ཞེས་བྱ་བ་ནི་བརྡའ་བྱས་ནས་སོ། །འགྲོན་ལམ་དུ་ཞེས་བྱ་བ་ནི་དགོན་པའི་ལམ་དུའོ། །འཇུག་ན་ཞེས་བྱ་བ་ནི་འགྲོ་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤག་ཤིངས་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་དུས་ནི་འདི་ཡིན་ཏེ་ལམ་དོན་འཐུན་གྱིས་བགྲོད་པར་བྱ་བ་ཞེས་བྱ་བ་ནི་དོན་འཐུན་མེད་པར་བགྲོད་མི་ནུས་པའོ། །དོགས་པ་དང་བཅས་པར་གྲགས་པ་ཞེས་བྱ་བ་ནི་ཆོམ་རྐུན་པ་དང་གཡོན་ཅན་གྱིས་འཇིགས་པར་གྲགས་པའོ། །འཇིག་པ་དང་བཅས་པར་གྲགས་པ་ཞེས་བྱ་བ་ནི་སེང་གེ་དང ། སྟག་དང ། གུང་གིས་འཇིགས་པར་གྲགས་པའོ། །འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ན་ཞེས་བྱ་བ་ནི་ཤ་སྦྲང་དང ། སྦྲང་བུ་མཆུ་རིངས་དང །
7.98b
རླུང་དང ། ཉི་མ་དང ། སྡིག་སྦྲུལ་གྱི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ནའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་མའི་དོན་འཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་རོ། །རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲོང་ནས་དགོན་པའི་འགྲོན་ལམ་དུ་འཇུགས་ན་གྲོང་རྒྱང་གྲགས་ཀྱིས་བར་དུ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་འཐུན་དང་ལྷན་ཅིག་འཐམས་ནས་དགོན་པ་ནས་གྲོང་གི་འགྲོན་ལམ་དུ་འཇུགས་ན་གྲོང་རྒྱང་གྲགས་ཀྱིས་བར་དུ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མ་དང་ལྷན་ཅིག་འགྲོན་ལམ་དུ་འཇུགས་པའི་ལྟུང་བྱེད་དེ་ཉི་ཤུ་དྲུག་པ་རྫོགས་སྷོ།། ་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུངས་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུ་ཏེ། འགྲོན་ན་ཡང་འགྲོ་བར་ཆས་པས་བརྙེད་པ་བསྒྲུབས་པར་བྱེད། འོང་ན་ཡང་བློ་བུར་དུ་འོངས་པའི་བརྙེད་པ་བསྒྲུབས་པར་བྱེད་ཅིང ། སྐྱེ་བོ་མང་པོ་དག་དགའ་བ་དང ། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང ། གང་ནས་ཀྱང་མི་འོང་བས་རྙེད་པ་ཐོབ་པ་དང ། སྐྱེ་བོ་མང་པོ་དག་དགའ་བ་དང ། ཡིད་དུ་འོང་བར་ག་ལ་འགྱུར་གྱིས་ཡུ་བུ་ཅག་ཀྱང་འདོང་ངོ ། །གང་དུ་འདོང ། ལྗོངས་རྒྱུར་འདོང་ངོ ། །
7.99a
ཇེ་སྲིང་མོ་དག་བལྟའོ་ཞེས་དེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་དག་དགེ་སློང་མའི་དབྱར་ཁང་དུ་དོང་སྟེ་བཅུ་གཉིས་སྡེ་དག་གི་གན་དུ་དོང་ནས་སྨྲས་པ། སྲིང་མོ་དག་ཁྱེད་ཅག་བལྟས་ཀྱིས་ཁོ་བོ་ཅག་ལྗོངས་རྒྱུར་འདོང་ངོ ། །དེ་དག་ངུས་པ་དང ། དྲུག་སྡེ་དག་གིས་སྨྲས་པ། སྲིང་མོ་དག་ངུར་ཅི་ཡོད། གལ་ཏེ་ཁྱེད་ཅག་ལྗོངས་རྒྱུར་བཞུད་ན་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ། །དྲུག་སྡེ་དག་གིས་སྨྲས་པ་སྲིང་མོ་དག་བཅོམ་ལྡན་འདས་འཁོར་སྟོང་ཉིས་བརྒྱ་ལྔ་བཅུ་དང་བཞུགས་ན། ཁྱེད་ཅག་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ། །ཞེས་ཟེར་རམ་དེ་དག་གིས་སྨྲས་པ། ལྷུང་བཟེད་ནག་པོ་ཅན་དག་བདག་ཅག་མཐོང་བར་ཡང་མི་དགའ་ན། མཆིས་པ་དང་སྟན་གདིང་བ་དང ། ཆོས་སྟོན་པར་ལྟ་ག་ལ་འགྱུར་ཉེ་དགས་སྨྲས་པ། སྲིང་མོ་དག་འོ་ན་ལྷན་ཅིག་འདོང་ངོ་དེ་དག་གིས་སྨྲས་པ། བཅོམ་ལྡན་འདས་ཀྱིས་དགེ་སློང་དགེ་སློང་མའི་དོན་འཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་དུས་མ་གཏོགས་ཏེ་ལྟུང་བྱེད་དོ་ཞེས་བསླབ་པའི་གཞི་བཅའ་བ་མ་མཛད་དམ། ཉེ་དགས་སྨྲས་པ། དེ་ནི་སྐམ་སའི་ལམ་དུ་བཅའ་བ་མཛད་པས་བདག་ཅག་གྲུའི་ལམ་དུ་འདོང་ངོ ། །སྦོམ་དགའ་མོས་སྨྲས་པ། དགེ་སློང་མ་དག་དགེ་སློང་དག་དང་ལྷན་ཅིག་གྲུའི་ལམ་དུ་མཆིར་རུང་ངམ། ཉེ་དགས་སྨྲས་པ། ལེགས་པར་རུང་ངོ ། །ཤིན་ཏུ་རུང་ངོ ། །གང་དུ་བཀག་།སུས་བཀག་།ལམ་རྒྱགས་མང་པོ་དག་སྟ་གོན་གྱིས་ཤིག་།དེ་དག་གིས་ལམ་རྒྱགས་མང་པོ་དག་ལྟ་གོན་བྱས་སོ། །དྲུག་སྡེ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་དག་མཉན་ཡོད་དུ་བསོད་སྙོམས་བརྒྱུས་ནས་དགེ་སློང་མའི་དབྱར་ཁང་དུ་དོང་བ་དང ། དེ་དག་ལ་བཅུ་གཉིས་སྡེ་དག་གིས་སྨྲས་པ། ཇོ་བོ་ཅག་ཇེ་ཞལ་ཚུལ་གསོལ་ཅིག་།དེ་དག་གིས་གཡར་ཚུས་བྱས་པ་ན་དེ་དག་གིས་ལམ་རྒྱགས་སྦྱར་བ་ཐམས་ཅད་ཟོས་ནས། དེ་དག་གིས་སྨྲས་པ། སྲིང་མོ་དག་ཁྱེད་ཀྱིས་ལམ་རྒྱགས་ཇི་སྙེད་སྟ་གོན་བྱས་པ་བལྟས་འོན་ཅིག་།དེ་དག་གིས་སྨྲས་པ། ཁྱེད་ཀྱིས་གསོལ་པ་དེ་དག་ལགས་སོ། །
7.99b
དྲུག་སྡེ་དག་གིས་སྨྲས་པ། ལམ་རྒྱགས་དེ་ཙམ་གྱིས་ལྗོངས་རྒྱུར་ཇི་ལྟར་ནུས། འདི་ལྟར་ལམ་ཀར་ལྷགས་པར་བཀྲེས་པར་འགྱུར་གྱིས་ལམ་རྒྱགས་མང་དུ་སྟ་གོན་གྱིས་ཤིག་།དེ་དག་གིས་ལམ་རྒྱགས་མང་པོ་དག་སྟ་གོན་བྱས་ཏེ་དྲུག་སྡེ་དག་དང་ལྷན་ཅིག་ལྗོངས་རྒྱུར་འཕགས་སོ། །བསོད་སྙོམས་པ་ཞིག་ཀྱང་དེ་དག་དང་ལྗོངས་རྒྱུར་འཕགས་པ་དང ། དགེ་སློང་རྣམས་ཀྱིས་དེ་ལ་སྨྲས་པ། བསོད་སྙོམས་པ་འདི་དག་ནི་གནས་ངན་ལེན་ཀུན་དུ་སྤྱོད་པ་ཡིན་གྱིས་འདི་དག་དང་ལྷན་ཅིག་ལྗོངས་རྒྱུར་མ་འགྲོ་ཤིག་།ཁྱོད་ལ་ཐོ་འཚམས་པར་འགྱུར་རོ། །བསོད་སྙོམས་པས་སྨྲས་པ། ཁོ་བོ་ལོ་འདས་པ་ཡིན་པས་འདི་དག་ལ་ལུང་མནོད་པ་དང ། ཀླག་པ་དང ། ཁ་ཏོན་དང ། ཡོངས་སུ་དྲི་བ་དང ། རྣལ་འབྱོར་དང ། ཡིད་ལ་བྱ་བ་འགའ་ཡང་རག་མ་ལུས་པས་འདི་དག་གིས་ཁོ་བོ་ལ་ཐོ་བརྩམ་དུ་ཅི་ཡོད་ཅེས་དེས། དེ་དག་གི་ཚིག་ཚིག་མ་ཡིན་པར་བྱས་ཏེ། དྲུག་སྡེ་དག་དང་ལྷན་ཅིག་གྲུར་འཇུགས་ཏུ་འཕགས་སོ། །དེ་དག་གིས་གང་གི་ཚེ་མཚམས་ཀྱི་ཕྱི་རོལ་དུ་སོན་པ་དེའི་ཚེ་ན་སྨྲས་པ། དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་འཁོད་པར་བྱ། ཚུར་གཤེགས་བདག་ཅག་རང་རང་གི་སྤྱོད་ལམ་གྱིས་འཁོད་པར་བྱའོ། །ཞེས་དང་པོར་དགའ་བོས་འདུག་ནས། དེའི་འོག་ཏུ་དགའ་མོ་འདུག་།དེའི་འོག་ཏུ་དགའ་བོའི་ལྷན་ཅིག་གནས་པ་འདུག་།དེའི་འོག་ཏུ་དགའ་མོ་ཡི་ལྷན་ཅིག་གནས་པ་འདུག་།དེའི་འོག་ཏུ་དགའ་བོའི་དགེ་ཚུལ་འདུག་།དེའི་འོག་ཏུ་དགའ་མོའི་དགེ་ཚུལ་མ་འདུག་།དེ་བཞིན་དུ་ཉེ་དགའ་དང ། གརྩུགས་དགའ་མོ་ལ་སོགས་པ་ཡང་སྤེལ་མར་བཀོད་དེ་དོང་ངོ ། །དོན་འཐུན་དེ་དང་བྲམ་ཟེ་ཞིག་ལྷན་ཅིག་འགྲོ་བ་དེས་དེ་དག་མཐོང་ནས་དེས་སྨྲས་པ། འདི་ནི་དགེ་སྦྱོང་ཡིན་དེའི་ཆུང་མ་ནི་འདི་ཡིན་དེའི་བུ་ནི་འདི་ཡིན་དེའི་མནའ་མ་ནི་འདི་ཡིན། དེའི་ཚ་བོ་ནི་འདི་ཡིན། དེའི
7.100a
ཚ་བོའི་ཆུང་མ་ནི་འདི་ཡིན་པར་ཤེས་སོ། །ཉེས་དགས་ཐོས་ནས་དེས་སྨྲས་པ། བཀྲེན་པ་ཁྱོད་ཀྱི་གཉའ་བ་རྡོག་པས་མནན་ནས་འདི་ནི་ཁོ་བོའི་ཆུང་མ་ཡིན། འདི་ནི་ཁོ་བོའི་བུ་ཡིན། འདི་ནི་ཁོ་བོའི་མནའ་མ་ཡིན། འདི་ནི་ཁོ་བོའི་ཚ་བོ་ཡིན། འདི་ནི་ཁོ་བོའི་ཚ་བོའི་ཆུང་མ་ཡིན་ནོ། །བསོད་སྙོམ་པ་དེས་བསམ་པ་བདག་ཤི་བ་ནི་བླའི་གནས་ངན་ལེན་ཀུན་དུ་སྤྱོད་པ་འདི་དག་དང་ལྷན་ཅིག་གྲུར་ཞུགས་ཏེ་འགྲོ་བ་ནི་མི་རུང་ངོ་སྙམ་ནས། དེ་ཕྱིར་ལོག་སྟེ་རྒྱལ་བྱེད་ཀྱི་ཚལ་དུ་སོང་བ་དང ། དགེ་སློང་རྣམས་ཀྱིས་དེ་མཐོང་ནས་སྨྲས་པ། བསོད་སྙོམས་པ་ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། དྲུག་སྡེ་གནས་ངན་ལེན་ཀུན་དུ་སྤྱོད་པ་དག་གིས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འཇིག་པར་བྱེད་དོ། །ཅི་བྱས་དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམ་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར
7.100b
བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོ་འམ། ཐུར་དུ་འགྲོ་ན་ལྟུང་བྱེད་དོ་ཞེས། བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབས་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཁྱིམ་བདག་གཅིག་གིས་ཆུ་ཀླུང་གནས་ཅན་གྱིས་ཕ་རོལ་ཐི་བ་ཅན་གྱི་ཀུན་དགའ་ར་བར་དགེ་འདུན་གྱི་ཕྱིར་གཙུག་ལག་ཁང་བྱེད་དུ་བཅུག་ནས། དེས་གཙུག་ལག་ཁང་དེ་དབུལ་བའི་ཕྱིར་གཉིས་ཀའི་དགེ་འདུན་སྤྱན་དྲངས་སོ། །དགེ་སློང་མ་ཞིག་དགེ་བའི་ཕྱོགས་ལ་བརྩོན་པར་གྱུར་པ་དེས་བསམ་པ། དེང་བདག་གིས་བསོད་སྙོམས་ལ་བརྒྱུས་མི་དགོས་པས་ཇི་སྲིད་དུ་གདུགས་ཚོད་ལ་ཉེ་བར་མ་གྱུར་པ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱ་ཞིང ། དེའི་འོག་ཏུ་དུས་ཤེས་པར་བྱས་ཏེ་འགྲོའོ་སྙམ་ནས་དེས་ཇི་སྲིད་དུ་གདུགས་ཚོད་ལ་ཉེ་བར་མ་གྱུར་པ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱས་ནས། དེའི་འོག་ཏུ་དུས་ཤེས་པར་བྱས་ཏེ་ཆུ་ཀླུང་གི་འགྲམ་དུ་སོང་བ་དང ། ཇི་ཙམ་ན་དགེ་སློང་དག་གྲུར་ཞུགས་ནས་གྲུ་པས་སྨྲས་པ། འཕགས་མ་གྲུར་ཞུགས་ཤིག་།བཞིན་བཟངས་ཇེ་སོང་ཤིག་དང ། གྲུ་གཞན་བཀང་བ་ན་འགྲོའོ། །གྲུ་པ་དེས་ཡང་དང་ཡང་དུ་འོངས་ཏེ་སྨྲས་པ། འཕགས་མ་གྲུར་ཞུགས་ཤིག་།དེས་ཀྱང་སྨྲས་པ། བཞིན་བཟངས་ཇེ་སོང་ཤིག་དང ། གྲུ་གཞན་བཀང་བ་ན་འགྲོའོ། །གྲུ་པ་དེ་སོང་ནས་ཆུ་ཀླུང་གི་ཕ་རོལ་ཏུ་གྲུ་ཕུར་པ་ལ་བརྟོད་དེ། སྐྱེ་བོ་ཕལ་པོ་ཆེའི་ཚོགས་ཀྱི་ནང་དུ་ཞུགས་ཤིང་འདུག་གོ། །དགེ་སློང་མ་དེས་ཡང་དང་ཡང་དུ་བོས་པ་དང ། གྲུ་པ་དེས་ཚིག་ཀྱང་མ་སྟེར་ནས་དེ་དེ་ན་སྡོད་སྡོད་ནས་ཇི་ཙམ་ན་གདུགས་ཚོད་ཡོལ་ནས། དེའི་འོག་ཏུ་དབྱར་ཁང་དུ་ཕྱིར་ལོག་སྟེ་དེ་ཇི་སྲིད་དུ་ལུས་ལས་
7.101a
མདང་མ་ཡལ་བ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱས་ནས། གང་གི་ཚེ་ལུས་ལས་མདངས་ཡལ་བ་དེའི་ཚེ་ན་གློས་ཕབ་སྟེ་ཉལ་བ་དང ། དགེ་སློང་མ་རྣམས་ལྷགས་ཏེ་དེ་ལ་སྨྲས་པ། འཕགས་མ་གལ་ཏེ་ཟས་གཞན་གྱི་ཡིན་ཞེས་ཏེ་ལྟོ་ཡང་གཞན་གྱི་ཡིན་སྙམ་མམ་ཅི་བྱས། ཇི་ཙམ་གྱིས་གློས་ཕབ་སྟེ་ཉལ་བར་གྱུར་པ་དེ་ཙམ་གྱིས་ཟས་ཟོས་སོ། །སུ་ཟོས་ཁྱོད་ཀྱིས་སོ་ཁོ་མོས་མ་ཟོས་སོ། །འོ་ན་ཅིའི་ཕྱིར་གློས་ཕབ་སྟེ་ཉལ། དེས་སྐབས་དེ་རྒྱས་པར་དགེ་སློང་མ་རྣམས་ལ་བརྗོད་ནས་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་ཐད་ཀར་ཕ་རོལ་དུ་འགྲོ་བ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབས་པ་ལ་གུས་པ་དང ། བསླབས་པ་ལ་ཡོ་བྱད་བསྙུངས་པའི་སྔགས་པ་བརྗོད་ནས། དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམས་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོ་འམ། ཐུར་དུ་འགྲོ་ན་ཐད་ཀར་ཕ་རོལ་དུ་འགྲོ་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མའི་དོན་འཐུན་དང་ལྷན་གཅིག་ཅེས་བྱ་བ་ནི་ཆོས་འདི་པའིའོ། །འཐམས་ནས་ཞེས་བྱ་བ་ནི་བརྡ་བྱས་ནས་སོ། །གྲུ་གཅིག་ཏུ་ཞེས་བྱ་བ་ནི་ཤོ་གམ་གཅིག་པ་དང ། ལ་གཅན་གཅིག་པ་དང ། གྲུ་བཙས་གཅིག་པར་རོ། །འཇུག་ཅིང་ཞེས་བྱ་བ་ནི་ཞོན་ཞིང་ངོ ། །གྱེན་དུ་འགྲོ་འམ་ཞེས་བྱ་བ་ནི་རྒྱུན་ལས་བཟློག་ཕྱོགས་སུ་འགྲོ་བའོ། །ཐུར་དུ་འགྲོ་ན་ཞེས་བྱ་བ་ནི་རྒྱུན
7.101b
ཕྱོགས་སུ་འགྲོ་ནའོ། །ཐད་ཀར་ཕ་རོལ་དུ་འགྲོ་བ་མ་གཏོགས་ཏེ་ཞེས་བྱ་བ་ནི་ཐད་ཀར་ཕ་རོལ་དུ་འགྲོ་བ་བཞག་སྟེའོ། །ལྟུང་བྱེད་དོ་ཞེས་བྱ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོགས་པར་ལྟུང་བ་དག་ཏུ་བསྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང ། སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོ་འམ། ཐུར་དུ་འགྲོ་ན་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་འཐུན་དང་ལྷན་ཅིག་འཐམས་ནས་གྲོངས་ནས་དགོན་པར་གྲུ་གཅིག་ཏུ་འཇུག་ཅིང་གྱེན་དུ་འགྲོ་འམ། ཐུར་དུ་འགྲོ་ན་གྲོང་རྒྱང་གྲགས་ཀྱིས་བར་དུ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་འཐུན་དང་ལྷན་གཅིག་འཐམས་ནས་དགོན་པ་ནས་གྲོང་དུ་གྲུ་གཅིག་ཏུ་འཇུག་ཅིང་གྱེན་དུ་འགྲོ་འམ། ཐུར་དུ་འགྲོ་ན་གྲོང་རྒྱང་གྲགས་ཀྱིས་བར་དུ་མ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །ཡོ་བ་ལས་བཟུངས་པ་དང ། གཏིབ་ཆད་པ་ལས་བཟུར་བ་དང ། དབའ་ལོངས་ལས་བཟུར་བ་དང ། རུ་སྐྱ་ཆགས་པ་དང ། གདོས་པ་ཆགས་པ་དང ། རུ་སྐྱ་འཛིན་པ་མི་ཉན་པ་ལ་ལྟུང་བ་མེད་དོ། །འགྲམ་གཉིས་ན་བར་ཆད་བརྒྱད་པོ་དག་ལས་གང་ཡང་རུང་བ་ཉེ་བར་གནས་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མ་དང་ལྷན་ཅིག་གྲུར་འཇུགས་པའི་ལྟུང་བྱེད་དེ་ཉི་ཤུ་བདུན་པ་རྫོགས་སྷོ།། ་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན
7.102a
རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ། ཞུགས་ནས་མཐར་གྱིས་མཉན་ཡོད་དུ་བསོད་སྙོམས་ལ་རྒྱུ་བ་ན་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་ངོ ། །ཁྱིམ་བདག་གི་ཆུང་མ་སྦེད་མས་ཚེ་དང་ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་ཚེ་དང་ལྡན་པ་འཆར་ཀའི་ཕྱིར་སྟན་ཤོམས་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་འཆར་ཀ་ཚུར་སྤྱོན་བཙུན་པ་འཆར་ཀ་བྱོན་པ་ལེགས་སོ། །བཙུན་པ་འཆར་ཀ་གདན་བཤམས་པ་ཉིད་ལ་བཞུགས་ཤིག་།ཚེ་དང་ལྡན་པ་འཆར་ཀ་ཁ་ནང་དུ་བལྟས་ཏེ་འདུག་གོ། །ཁྱིམ་བདག་གི་ཆུང་མ་སྦེད་མ་ཡང་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་ཁ་ཕྱིར་བལྟས་ཏེ་འདུག་གོ། །འཆར་ཀས་དེ་ལ་ཇི་ཙམ་པ་དེ་ཙམ་གྱིས་ཆོས་བསྟན་ནས་སྔོན་བགད་པ་དང ། ཙེས་པ་དང ། དགའ་བ་བྱས་པ་དང ། དགའ་མགུར་སྤྱད་པ་དག་དྲན་པར་བྱ་བར་བརྩམས་ཏེ། སྦེད་མ་ཁྱོད་ཀྱིས་བདག་ཅག་གཉིས་བསྐྱེད་མོས་ཚལ་དང ། འདུན་ས་དང ། ལྷའི་གནས་ག་གེ་མོ་ཞིག་ཏུ་བཅའ་བ་འདི་དང་འདི་ལྟ་བུ་འཆོས་པ་དང ། བཟའ་བ་འདི་དང་འདི་ལྟ་བུ་འཆོས་པ་དང ། བཟའ་བ་འདི་དང་འདི་ལྟ་བུ་ཟོས་པ་དང ། བཏུང་བ་འདི་དང་འདི་ལྟ་བུ་འཐུང་བ་དང ། གནས་མལ་འདི་དང་འདི་ལྟ་བུ་བཤམས་པ་དང ། འབྲུ་མར་གྱི་མར་མེ་འདི་དང་འདི་ལྟ་བུ་བཙུགས་ཤིང་དེར་བདག་ཅག་གཉིས་ཀྱིས་འདི་དང་འདི་ལྟ་བུ་བྱས་པ་དྲན་ནམ། སྦེད་མས་སྨྲས་པ་དྲན་ནོ། །བསོད་སྙོམས་པ་ཞིག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་སྟེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཐར་གྱིས་མཉན་ཡོད་དུ་བསོད་སྙོམས་ལ་རྒྱུ་བ་ན་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་བ་དང་ཁྱིམ་བདག་གི་ཆུང་མ་སྦེད་མས་དེ་མཐོང་ནས་དེས་བསམས་པ་གལ་ཏེ་ལངས་སྟེ།
7.102b
བསོད་སྙོམས་ཕུལ་བར་གྱུར་ན་བཙུན་པ་འཆར་ཀའི་གཏམ་སྤངས་པར་འགྱུར་རོ་སྙམ་ནས་དེས་ལག་པས་སོང་ཤིག་ཅེས་བརྡ་བྱས་སོ། །འཆར་ཀས་སྦེད་མ་ལག་བརྡ་བྱེད་པ་མཐོང་ནས་དེས་སྨྲས་པ། སྦེད་མ་ཁྱོད་ཁོ་བོ་འདུག་བཞིན་དུ་མདུན་དུ་སྐྱེས་པ་གཞན་དང་ལྷན་ཅིག་ལག་བརྡ་བྱེད་དམ་སྦེད་མས་སྨྲས་པ། འཕགས་པ་བདག་སྐྱེས་པ་གཞན་དང་ལག་བརྡ་མི་བགྱིད་དེ། འདི་ལྟར་བསོད་སྙོམས་པ་ཞིག་མཆིས་ནས་བདག་གིས་བསམ་པ་གལ་ཏེ་ལངས་ཏེ། བསོད་སྙོམས་ཕུལ་བར་གྱུར་ན་འཕགས་པའི་བཀའ་མཆིད་སྤངས་པར་འགྱུར་རོ་སྙམ་ནས་བདག་གིས་དེ་ལ་མཆིས་ཤིག་ཅེས་ལགས་བརྡ་བགྱིས་སོ། །འཆར་ཀས་སྨྲས་པ་སྦེད་མས་ཁྱོད་ཀྱི་སྙིང་ལམ་ན་ཁོ་བོས་ཁྱོད་ལ་འཕགས་པའི་བདེན་པ་བཞིའི་གཏམ་བྱས་སྙམ་འམ། ཅི་འདི་ལྟར་ཁོ་བོས་ལག་པས་བཅལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན་ཁྱོད་ཀྱིས་སྦྱིན་པ་དག་བྱིན་ཞིང་བསོད་ནམས་དག་བྱེད་ཀྱང་མི་ནུས་སམ། སྦེད་མས་བསོད་སྙོམས་པ་དེ་བོས་ཏེ་བཅའ་བ་དང ། བཟའ་བ་གཙང་ཞིང་བསོད་པ་དག་གིས་ལྷུང་བཟེད་བཀང་སྟེ་བྱིན་ནས་དེས་དེ་ཁྱེར་ཏེ་སོང་ངོ ། །ཚེ་དང་ལྡན་པ་འཆར་ཀ་ཟས་ཀྱི་བྱ་བ་བྱས་ཏེ་གཙུག་ལག་ཁང་དུ་སོང་བ་དང ། བསོད་སྙོམས་པ་དེས་བསམས་པ། བཙུན་པ་འཆར་ཀ་ལ་གཏམ་བྱ་ཞིང་ཐོས་ནས་མཆོག་ཏུ་དགའ་བ་བསྐྱེད་པར་བྱའོ་སྙམ་ནས་དེས་དེ་ལ་སྨྲས་པ། བཙུན་པ་འཆར་ཀ་མཆོག་ཏུ་དགའ་བ་སྐྱེད་ཅིག་།དེང་དོན་གྱིས་ན་བདག་གིས་ཁྱོད་ཀྱི་བསོད་སྙོམས་ཟོས་སོ། །བསོད་སྙོམས་པ་ཤེས་ཏེ་དེས་དང་པོར་ཁྱོད་བོས་སྙམ་འམ། ཅི་དེས་ཁྱོད་སོང་ཤིག་ཅེས་ལག་བརྡ་བྱས་ནས་ཁོ་བོས་དེའི་འོག་ཏུ་དེའི་ཕྱིར་འབོད་དུ་བཅུག་གོ། །ཅི་བྱིན་བཅའ་བ་དང་བཟའ་བ་གཙང་ཞིང་བསོད་པས་ལྷུང་བཟེད་བཀང་སྟེ་བྱིན་ཏེ་བཙུན་པ་འཆར་ཀ་དེ་ནི་ཁྱོད་ཀྱི་ཡིན་ནོ། །དེའི་ཚེ་ན་བཙུན་པ་འཆར་ཀ་དེ་ཉིད་ན་འདུག་པར་གྱུར་ཏམ་འདུག་གོ། །ཁྱོད་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ཏུ་རུང་ངམ་རུང་ཡང་སྲིད་མི་རུང་ཡང་སྲིད་དེ་ཁོ་བོ་དེ་ལྟར་འདུག་གོ། །
7.103a
བསོད་སྙོམས་པ་ཁྱོད་ཀྱི་དེང་དེ་ལྟར་ཁོ་བོའི་བསོད་སྙོམས་ཟོས་ཤིང་གལ་ཏེ་མི་བཟོད་ན་ཁོ་བོ་ལས་བརྟེན་བསླབས་པའི་གཞི་འཆར་ཆུག་ཤིག་།ཅི་དེ་ཁོ་བོས་ཡལ་བར་བོར་དུ་རེ་འམ་ཞེས་ཟེར་བའི་སྐབས་དེ་དགེ་སློང་རྣམས་ལ་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ་འཆར་ཀ་ཁྱོད་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་པར་བྱེད་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབས་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ་ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །བུད་མེད་ཀྱི་ཡུལ་དང་ཞེས་བྱ་བ་ནི་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་སྤྲོད་པ་ལས་བྱུང་བའི་ཆོས་སྟེན་ནུས་པ་དང་ངོ ། །ལྷན་ཅིག་ཅེས་བྱ་བ་ནི་དེ་དང་ལྷན་ཅིག་གོ། །གཅིག་པུ་ཅིག་དང་ཞེས་བྱ་བ་ནི་དེ
7.103b
དེ་དང་ངོ་དབེན་པ་ཞེས་བྱ་བ་ནི་གང་ན་བུད་མེད་དང་སྐྱེ་པ་དང་མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ཞེས་བྱ་བ་ནི་ལྔས་བསྐྱབས་པ་ན་སྟེ། རྩིག་པས་བསྐྱབས་པ་དང ། རིབ་མས་བསྐྱབས་པ་དང ། ཡོལ་བས་བསྐྱབས་པ་དང ། ཐིབས་པོས་བསྐྱབས་པ་དང ། མཚན་མོས་སྐྱབས་པ་ནའོ། །སྟན་ལ་ཞེས་བྱ་བ་ནི་གཞི་ལའོ། །འདུག་ན་ཞེས་བྱ་བ་ནི་འདོམ་གང་གི་ནང་དུ་རྐུབ་ཚོས་འཇོག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་གིས་ཇི་ཙམ་ཅུང་ཟད་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །སྒོ་ཁང་ན་འདུག་པ་དང་སྨན་འཐག་ཏུ་འཇུད་པ་དང་སྒོ་མ་བཅད་པར་འདུག་པ་དང ། གཞན་དག་འཇུག་ཅིང་གཞན་དག་འབྱུང་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཅིག་པུ་འདུག་པའི་ལྟུང་བྱེད་དེ་ཉི་ཤུ་བརྒྱད་པ་རྫོགས་སྷོ།། ་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་སྦེད་མ་རབ་ཏུ་བྱུང་ནས་དེ་དགེ་བསྐོས་བྱེད་པ་ན་དགེ་སློང་མ་རྣམས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བསོད་སྙོམས་ལ་དོང་བ་ན་སྦེད་མ་གཙུག་ལག་ཁང་ན་ཕྱག་དར་བྱེད་ཅིང་འདུག་གོ། །ཚེ་དང་ལྡན་པ་འཆར་ཀ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོག་ཏེ་མཉན་ཡོད་དུ་བསོད་སྙོམས་ལ་ཞུགས་ནས། མཉན་ཡོད་དུ་བསོད་སྙོམས་ལ་རྒྱུ་བ་ན་དགེ་སློང་མའི་དབྱར་ཁང་ག་ལ་བ་དེར་སོང་ངོ ། །སྦེད་མ་དགེ་སློང་མའི་དབྱར་ཁང་ན་ཕྱག་དར་བྱེད་ཅིང་འདུག་པ་དེས་ཚེ་དང་ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་སྟེ་མཐོང་ནས་ཀྱང་འདི་སྐད་ཅེས་སྨྲས་སོ། །འཕགས་པ་འཆར་ཀ་བྱོན་པ་ལེགས་སོ་བྱོན་པ་ལེགས་སོ་ཞེས་དེས
7.104a
ཕྱག་མ་ཕྱོགས་ཅིག་ཏུ་བཞག་ནས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་མདུན་དུ་འགྲེང་ངོ ། །འཆར་ཀས་དེ་ལ་ཇི་ཙམ་པ་དེ་ཙམ་གྱིས་ཆོས་བསྟན་ནས་སྔོན་བགད་པ་དང་རྩེ་བ་དང ། དགའ་བ་བྱེད་པ་དང་དགའ་མགུར་སྤྱད་པ་དག་དྲན་པར་བརྩམས་སྟེ་སྦེད་མ་ཁྱོད་ཀྱིས་བདག་ཅག་སྐྱེད་མོས་ཚལ་དང ། འདུན་ས་དང་ལྷའི་གནས་ག་གེ་མོ་ཞིག་ཏུ་བཅའ་བ་འདི་དང་འདི་ལྟ་བུ་འཆོས་པ་དང་བཟའ་བ་འདི་དང་འདི་ལྟ་བུ་ཟོས་པ་དང ། བཏུང་བ་འདི་དང་འདི་ལྟ་བུ་འཐུང་བ་དང་གནས་མལ་འདི་དང་འདི་ལྟ་བུ་བཤམས་པ་དང་འབྲུ་མར་གྱི་མར་མེ་འདི་དང་འདི་ལྟ་བུ་བཙུགས་ཤིང་དེར་བདག་ཅག་གཉིས་ཀྱིས་འདི་དང་འདི་ལྟ་བུ་བྱས་པ་དྲན་ནམ། སྦེད་མས་སྨྲས་པ་དྲན་ནོ། །དེ་ནས་དགེ་སློང་མ་རྒན་མོ་ནད་མ་ཞིག་འདུག་ནས་དེས་བསམ་པ། འདི་གཉིས་ཅིའི་ཕྱིར་ན་བག་མར་བླངས་པ་ཚུན་ཆད་ཀྱང་གཅིག་ལ་གཅིག་བརྗོད་པར་བྱེད་སྙམ་མོ་སྦེད་མས་སྨྲས་པ། འཕགས་པ་ད་བཞུད་ཅིག་དགེ་སློང་མ་དག་མཆི་བར་འགྱུར་ཞིང་དབྱར་ཁང་ཕྱག་དར་མ་བགྱིས་པར་མཆིས་པས་དགེ་སློང་མ་དག་སྨོད་པར་འགྱུར་རོ་ཞེས་དེས་ཕྱག་མ་བླངས་པ་དང་འཆར་ཀ་སོང་ངོ ། །སྦེད་མས་གཙུག་ལགས་ཁང་ཕྱག་དར་བྱ་བར་བརྩམས་པ་དང ། དགེ་སློང་མ་དེ་དག་ཀྱང་ལྷག་ནས་དེ་དག་གིས་སྨྲས་པ། སྦེད་མ་ཁྱོད་ཀྱིས་ཅི་བྱས་ན་དབྱར་ཁང་འདི་དེ་ཁོ་ན་བཞིན་དུ་ཕྱག་དར་དང་བཅས་པར་འདུག་།སྦེད་མས་སྨྲས་པ་ཕུ་ནུ་མོ་དག་གང་ཚུན་ཆད་ནས་ཁྱེད་ཅག་བསོད་སྙོམས་ལ་དོང་བ་དེ་ཚུན་ཆད་ནས་ཁོ་མོ་མ་འདུག་གོ། །དགེ་སློང་མ་རྒན་མོ་ནད་མ་དེས་ཐོས་ནས་དེས་དགེ་སློང་མ་རྣམས་ལ་སྨྲས་པ། གང་ཚུན་ཆད་ཁྱེད་ཅག་བསོད་སྙོམས་ལ་དོང་བ་དེ་ཚུན་ཆད་ནས་སྦེད་མ་མ་འདུག་པ་དེ་ནི་བདེན་ཏེ། འདི་ལྟར་འཕགས་པ་འཆར་ཀ་བྱོན་པར་གྱུར་ནས་འདི་དེ་དང་ལྷན་ཅིག་འགྲེང་ཞིང ། མ་བག་མར་བླངས་པ་མཚུན་བཅད་ཀྱང་གཅིག་གིས་གཅིག་ལ་བརྗོད་དོ། །དགེ་སློང་མ་དེ་དག་གིས་སྦེད་མ་ལ་དྲིས་པ་སྦེད་མ་ཁྱོད་ཀྱིས་དེ་ལྟར་བྱས་པ་བདེན་ནམ། ཕུ་ནུ་མོ་དག་བདེན་ནོ། །དགེ་སློང་མ་དེ་དག་ཅིའི་ཕྱིར་དགེ་སློང་དགེ་སློང་མ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འགྲེང་བར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད་ཁ་ཟེར
7.104b
བར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་དགེ་སློང་མ་དང་ལྷན་གཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུས་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་དང་ཞེས་བྱ་བ་ནི་ཆོས་འདི་པ་དང་ངོ ། །ལྷན་ཅིག་ཅེས་བྱ་བ་ནི་དེ་དེ་དང་ལྷན་གཅིག་གོ། །གཅིག་པུ་གཅིག་དང་ཞེས་བྱ་བ་དེ་ནི་དེ་དེ་དང་ངོ ། །དབེན་པ་ཞེས་བྱ་བ་ནི་གང་ན་སྐྱེས་པ་དང ། བུད་མེད་དང་མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ན་ཞེས་བྱ་བ་ནི་ལྔས་བསྐྱབས་པ་ན་སྟེ། རྩིག་པས་སྐྱབས་པ་དང་རིབ་མས་སྐྱབས་པ་དང
7.105a
ཡོལ་བས་བསྐྱབས་པ་དང ། ཐིབས་པོས་བསྐྱབས་པ་དང ། མཚན་མོས་བསྐྱབས་པ་ནའོ། །འགྲེང་ན་ཞེས་བྱ་བ་ནི་འདོམ་གང་གི་ནང་དུ་འགྲེང་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང་ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ་དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་ན་ཐམས་ཅད་དུ་ལྟུང་བྱེད་དུ་འགྱུར་རོ། །སྒོ་ཁང་དུ་འགྲེང་བ་དང ། སྨན་ཐག་ཏུ་འཛུད་པ་དང་སྒོ་མ་བཅད་པར་འགྲེང་བ་དང ། གཞན་དག་འཇུག་ཅིང་གཞན་དག་འབྱུང་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཅིག་པུ་འགྲེང་བའི་ལྟུང་བྱེད་དེ་ཉི་ཤུ་དགུ་པ་རྫོགས་སྷོ།། ་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱིས་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འོད་སྲུངས་ཆེན་པོ་མཉན་ཡོད་ན། ཤར་གྱི་ཀུན་དགའ་ར་བ་ན་རི་དགས་འཛིན་གྱི་མའི་ཁང་བཟངས་ན་འདུག་གོ། །དེ་ནས་ཚེ་དང་ལྡན་པ་འོད་སྲུངས་ཆེན་པོ་ཕྱེམ་བྲེད་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་སྟེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུངས་ད་ལྟར་ཁྱོད་ནི་རྒན་པོ་རྒས་པ་དགོག
7.105b
ཏུ་གྱུར་པ་ཡིན་ལ་ངའི་སྨད་གཡོགས་ཤ་ནའི་གོས་ཕྱག་དར་ཁྲོད་དག་ནི་ལྕིས། འོད་སྲུངས་ཁྱོད་དགེ་འདུན་གྱི་གཙུག་ལག་ཁང་དུ་ཤོག་ལ་གང་ཟག་གིས་མགྲོན་དུ་བོས་པ་དག་བདག་གིར་གྱིས་ཤིག་།ཁྱིམ་བདག་གིས་གོས་མཚོན་གྱིས་དྲས་པ་དག་ཀྱང་ཁ་དོག་ངན་པར་གྱིས་ལ་ཆོང་ཤིག་།ཚེ་དང་ལྡན་པ་འོད་སྲུངས་ཆེན་པོས་མི་སྨྲས་པ་བཅོམ་ལྡན་འདས་ལས་མཉན་ཏོ། །དེ་ནས་ཚེ་དང་ལྡན་པ་འོད་སྲུང་ཆེན་པོས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་སྟེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ངོ ། །དེའི་ཚེ་ན་མཉན་ཡོད་ན་ཁྱིམ་བདག་ཅིག་འདུག་པ་དེ་ལ་ཡུན་རིང་པོ་ནས་སྨོན་པ་འདི་ལྟ་བུ་སྐྱེས་ཏེ། ཀྱེ་མ་བདག་གིས་གནས་བརྟན་འོད་སྲུངས་ཆེན་པོ་ལྷ་དང་མིས་མཆོད་པ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན་ཅི་མ་རུང་སྙམ་ནས། ཁྱིམ་བདག་དེས་བཅོམ་ལྡན་འདས་ཀྱིས་འཕགས་པ་འོད་སྲུང་ཆེན་པོ་དགེ་འདུན་ལ་གཏད་པ་ཐོས་སོ། །ཐོས་ནས་ཀྱང་ཚེ་དང་ལྡན་པ་འོད་སྲུངས་ཆེན་པོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་འོད་སྲུངས་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་འོད་སྲུངས་ཆེན་པོ་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་ཁྱིམ་བདག་དེ་འདི་སྙམ་དུ་སེམས་ཏེ། གལ་ཏེ་བདག་གིས་འཕགས་པ་འོད་སྲུངས་ཆེན་པོ་ཉག་ཅིག
7.106a
ཁྱིམ་གཞན་དུ་སྤྱན་དྲངས་པར་གྱུར་ན་མི་གནང་བར་འགྱུར་བ་དེ་ལྟ་བུའི་གནས་ཡོད་པར་འགྱུར་གྱིས་བདག་གིས་དེ་བདག་ཉིད་དང་བཞི་སྤྱན་དྲང་ངོ་སྙམ་མོ། །དེ་ནས་ཁྱིམ་བདག་དེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས་ཚེ་དང་ལྡན་པ་འོད་སྲུངས་ཆེན་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་འོད་སྲུངས་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་འོད་སྲུངས་ཆེན་པོས་སང་བདག་གི་སྡུམ་པར་བདག་ཉིད་དང་བཞི་གདུགས་ཚོད་གསོལ་བར་ཅི་གནང་ཚེ་དང་ལྡན་པ་འོད་སྲུངས་ཆེན་པོས་ཁྱིམ་བདག་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཁྱིམ་བདག་དེས་ཚེ་དང་ལྡན་པ་འོད་སྲུངས་ཆེན་པོ་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་འོད་སྲུངས་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་རང་གི་སྡུམ་པ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཁོ་བོ་ལ་ཡུན་རིང་པོ་ནས་སྨོན་པ་འདི་ལྟ་བུ་སྐྱེས་ཏེ། ཀྱེ་མ་བདག་གིས་གནས་བརྟན་འོད་སྲུངས་ཆེན་པོ་ལྷ་དང་མིས་མཆོད་པ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན་ཅི་མ་རུང་སྙམས་ནས། ཁོ་བོས་དེ་བདག་ཉིད་དང་བཞི་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ན་དེས་ཀྱང་ཅང་མི་གསུངས་བས་གནང་གིས་ཞལ་ཟས་བསོད་པ་མང་པོ་དག་སྟ་གོན་གྱིས་ཤིག་།ཁྱིམ་བདག་གི་ཆུང་མ་དེས་ཁྱིམ་བདག་ལས་མཉན་ནས་ཁ་ཟས་གྲངས་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོ་བག་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་ནས། ཁྱིམ་བདག་དེ་ནང་པར་སྔར་ལངས་ཏེ་བསམས་པ། གལ་ཏེ་འོག་གི་ས་གཞིར་གདན་བཤམས་ན་ནི་སློངས་མོ་པ་དག་འདོང་བ་ན་ལང་ལོང་བྱེད་པར་འགྱུར་ལ། གལ་ཏེ་སྟེང་གི་ས་གཞིར་གདན་བཤམས་ན་ནི་དེར་སྦྲང་བུ་དག་གིས་འཁྲུག་ལོང་བྱེད་པར་འགྱུར་བས་བར་གྱི་ས་གཞིར་གདན་བཤམ་པར་བྱའོ། །སྙམ་ནས་དེས་བར་གྱི་ས་གཞིར་སྟན་བཤམས་ནས་ཚེ་དང་ལྡན་པ་འོད་སྲུངས་ཆེན་པོ་ལ་མངག
7.106b
པས་བཙུན་པ་འོད་སྲུངས་ཆེན་པོ་གདུགས་ཚོད་གཡར་དགོངས་འཚལ་ན་ད་དེའི་དུས་ལ་བབ་པར་དགོངས་སུ་གསོལ་ཞེས་བསྐུལ་ཏོ། །བཅོམ་ལྡན་འདས་ཀྱིས་གང་གི་ངོར་མགྲོན་དུ་བོས་པ་དེས་དུས་སྔར་དེར་འགྲོ་བར་བྱའོ་ཞེས་བཀའ་སྩལ་པས། དེ་ནས་ཚེ་དང་ལྡན་པ་འོད་སྲུངས་ཆེན་པོ་དུས་སྔ་བ་ཁོ་ནར་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཁྱིམ་བདག་དེའི་སྡུམ་པ་ག་ལ་བ་དེར་སོང་སྟེ་ཕྱིན་ནས་བར་གྱི་ས་གཞིར་འཛེག་སྟན་བཤམ་པ་ཉིད་ལ་འདུག་གོ། །དེ་ནས་ཁྱིམ་བདག་དེས་ཚེ་དང་ལྡན་པ་འོད་སྲུངས་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་འོད་སྲུངས་ཆེན་པོ་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཛུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །དེ་ནས་དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་ཏེ་འདི་སྐད་ཅེས་སྨྲས་སོ། །མཚན་བཟང་ཨ་རོག་ཁྱ་བསོད་སྙོམས་བྱིན་ཅིག་།ཁྱིམ་བདག་དེས་སྨྲས་པ། འཕགས་མ་དེང་འཕགས་པ་འོད་སྲུངས་ཆེན་པོ་ལྷ་དང་མིས་མཆོད་པ་བདག་གི་སྡུམ་པར་སྤྱན་དྲངས་ཏེ་ཞལ་ཟས་སྟ་གོན་བགྱིས་པས་རེ་ཤིག་ཅུང་བྲེལ་གྱིས་བཞུད་ཅིག་སྦོམས་དགའ་མོས་སྨྲས་པ། དེ་ནི་གཞན་མུ་སྟེགས་ཅན་ལས་རབ་ཏུ་བྱུང་བ། བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ལ། ཁོ་མོ་ནི་ཤཱཀྱ་མོ་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ་རིག་པ་དང་གྲོལ་བའི་སྤོབ་པ་ཅན་ཡིན་ན་དེའི་ཟན་སྦྱོར་ཞིང་ཁོ་མོ་ལ་བསོད་སྙོམས་མི་སྟེར་མོད་ཚེ་དང་ལྡན་པ་འོད་བསྲུང་ཆེན་པོས་དེ་ཐོས་ཏེ། ཐོས་ནས་ཀྱང་བསམས་པ་དེ་ལ་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་ནས་དེས་མགུལ
7.107a
བསལ་བའི་སྒྲ་ཕྱུང་བ་དང ། ཚེ་དང་ལྡན་པ་འོད་སྲུངས་ཆེན་པོ་དབྱིག་གི་གདངས་དང་ལྡན་པ་ཡིན་པས་དེའི་སྒྲས་ཁྱིམ་ཐམས་ཅད་གང་བར་གྱུར་ཏོ། །སྦོམ་དགའ་མོས་དེའི་སྒྲ་ཐོས་ནས་སྨྲས་པ་ཀླུའི་མིང་ཅན་འདི་ཉིད་ན་བཞུགས་སོ། །ཁྱིམ་བདག་དེས་ཐོས་ནས་སྨྲས་པ་ད་གཟོད་ཁོ་ན་དེ་ནི་གཞན་མུ་སྟེགས་ཅན་ལས་རབ་ཏུ་བྱུང་བ་བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ལ་ཞེས་ཟེར་ཞིང ། ད་ནི་ཀླུའི་མིང་ཅན་ཞེས་ཟེར་རོ་ཞེས་དེ་གཤེ་ཞིང་བར་གྱི་གཞི་ནས་འབབ་པར་བརྩམས་པ་དང ། སྦོམ་དགའ་མོས་དེ་འབབ་པའི་སྒྲ་ཐརིགས་ཐརིག་ཟེར་བ་ཐོས་ནས་དེས་བསམས་པ། ཁྱིམ་བདག་འདི་ཤུགས་འདི་ལྟ་བུས་འབབ་པ་ལས་ན་བདག་ལ་གནོད་པ་བྱེད་པར་འགྱུར་གོར་མ་ཆག་སྙམ་ནས། དེས་ཤིང་ང་དཔུང་ཆད་བརྫེས་ཏེ་འབྲོས་པར་བརྩམས་པ་དང ། ཁྱིམ་བདག་དེས་སྨྲས་པ། དགེ་སྦྱོང་མ་མགོ་རེག་མོ་མ་འབྲོས་པར་སྡོད་ཅིག་ཅི་འབྲོས། ཁྱོད་ཀྱིས་ཁོ་བོའི་ཁྱིམ་དུ་འཇུག་པར་མི་བྱའོ། །སྦོམ་དགའ་མོས་སྨྲས་པ། ཁྱོད་ཀྱི་ཁྱིམ་རྟུག་ཁུང་དང་བཙོན་རར་གྱུར་ཅིག་།ཁྱོད་ཀྱི་ཁྱིམ་དུ་གདོལ་པ་དག་འཇུག་པར་གྱུར་ཅིག་།ཁོ་མོ་ཅག་གིས་རྒྱལ་པོ་ལས་བཙུན་མོའི་འཁོར་གྱིས་ཡོངས་སུ་སྤང་བ་ཐོབ་པས། ཁོ་མོས་ལ་ཇི་རྩམ་དུ་རེག་པར་བྱེད་པ་དེ་རྩམ་དུ་ཁོ་མོས་ཁྱོད་ཀྱི་ལག་པ་གཉིས་ཁྲིགས་མ་ནས་གཅོད་དུ་གཞུག་གོ། །ཁྱིམ་བདག་དེས་སྨྲས་པ། དགེ་སྦྱོང་མ་མགོ་རེག་མོ་དགེ་སློང་མ་གནས་བརྟན་མོ་གནས་བརྟན་མོ་དག་གིས་རྒྱལ་པོ་ལས། བཙུན་མོའི་འཁོར་གྱིས་ཡོངས་སུ་སྤང་བ་ཐོབ་པ་ཡིན་གྱིས་གནས་ངན་ལེན་ཀུན་དུ་སྤྱོད་པ་ཁྱོད་ཀྱིས་མ་ཐོབ་བོ། །དེ་ནས་ཁྱིམ་བདག་དེ་ཕྱིར་ལོག་ནས་ཚེ་དང་ལྡན་པ་འོད་སྲུངས་ཆེན་པོ་ལ་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབ་པར་བྱེད་དོ། །རྣམ་གྲངས་དུ་མས་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་ཚེ་དང་ལྡན་པ་འོད་སྲུང་ཆེན་པོ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ
7.107b
ཚེ་དང་ལྡན་པ་འོད་སྲུང་ཆེན་པོའི་མདུན་དུ་ཆོས་ཉན་པའི་ཕྱིར་འདུག་གོ། །དེ་ནས་ཚེ་དང་ལྡན་པ་འོད་སྲུངས་ཆེན་པོ་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་བསྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུངས་ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་བདག་དེང་ཁོ་ན་དགེ་འདུན་ལ་གཏད་པར་གྱུར་ན་བདག་དེང་ཁོ་ན་གཞན་མུ་སྟེགས་ཅན་ལས་རབ་ཏུ་བྱུང་བ། བུལ་བ་མཆོགས་ཏུ་བུལ་བ་ཆུང་བ། མཆོག་ཏུ་ཆུང་བ་ཞེས་བགྱི་བར་ཡང་གྱུར། བདག་དེང་ཁོ་ན་ཀླུའི་མིང་ཅན་ཞེས་བགྱི་བར་ཡང་གྱུར་ཏེ། བཙུན་པ་བདག་ནི་ཡུན་རིང་པོ་ནས་དགོན་པ་པ་ལགས་ཤིང ། དགོན་པ་པ་ཉིད་ཀྱི་བསྔགས་པ་ཡང་བརྗོད། བསོད་བསྙོམས་པ་ལགས་ཤིང་བསོད་བསྙོམས་པ་ཉིད་ཀྱི་བསྔགས་པ་ཡང་བརྗོད། ཕྱག་དར་ཁྲོད་པ་ལགས་ཤིང་ཕྱག་དར་ཁྲོད་པ་ཉིད་ཀྱི་བསྔགས་པ་ཡང་བརྗོད་པ་ལགས་སོ། །འོད་སྲུངས་ཁྱོད་ཀྱིས་དོན་གྱི་དབང་དུ་ཞིག་ཡང་དག་པར་མཐོང་ན་དགོན་པ་པ་ཡིན་ཞིང་དགོན་པ་པ་ཉིད་ཀྱི་བསྔག་པ་ཡང་བརྗོད། བསོད་སྙོམས་པ་ཡིན་ཞིང་བསོད་སྙོམས་པ་ཉིད་ཀྱི་བསྔགས་པ་ཡང་བརྗོད། ཕྱག་དར་ཁྲོད་པ་ཡིན་ཞིང་ཕྱག་དར་ཁྲོད་པ་ཉིད་ཀྱི་བསྔག་པ་ཡང་བརྗོད། བཙུན་པ་གཉིས་ཏེ་བདག་ཉིད་ཚེ་འདི་ལ་བདེ་བར་གནས་པའི་སླད་དུ་དང ། སླད་མའི་སྐྱེ་བོ་དག་ལ་སྣང་བ་བགྱིས་པར་འགྱུར་བའི་སླད་དུ་སྟེ། དགེ་སློང་གནས་བརྟན་རྒྱལ་ཚབ་ལྟའ
7.108a
བུ་རབ་ཏུ་བྱུང་ནས་ཡུན་རིང་དུ་ལགས་པ། ཚངས་པར་སྤྱོད་པ་མངོན་པར་སྤྱད་པ། སྟོན་པས་བསྔགས་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་བཀུར་བ་གང་དག་འདས་པར་གྱུར་པ་དེ་དག་ཡུན་རིང་པོ་ནས་དགོན་པ་པར་གྱུར་ཅིང་དགོན་པ་པ་ཉིད་ཀྱི་བསྔགས་པ་ཡང་བརྗོད། བསོད་སྙོམས་པར་གྱུར་ཅིང་བསོད་སྙོམས་པ་ཉིད་ཀྱི་བསྔགས་པ་ཡང་བརྗོད། ཕྱག་དར་ཁྲོད་པར་གྱུར་ཅིང་ཕྱག་དར་ཁྲོད་པ་ཉིད་ཀྱི་བསྔགས་པ་ཡང་བརྗོད་པར་གྱུར་པ་དེ་དག་ཐོས་ནས་དེ་ལྟ་དེ་ལྟར་སྒྲུབ་པར་འགྱུར་ཞིང་དེ་དག་ལ་ཡུན་རིང་པོའི་དོན་དང་སྨན་པ་དང ། བདེ་བར་འགྱུར་རོ། །འོད་སྲུང་ཁྱོད་ཡུན་རིང་པོ་ནས་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང ། བདེ་བའི་ཕྱིར་ཞུགས་པ་ལེགས་སོ་ལེགས་སོ། །འོད་སྲུང་གང་ལ་ལ་ཞིག་སྦྱངས་པའི་ཡོན་ཏན་དེ་དག་གི་བསྔགས་པ་མ་ཡིན་པ་བརྗོད་པར་བྱེད་པ་དེ་ནི་ངའི་བསྔགས་པ་མ་ཡིན་པ་རྗོད་པར་བྱེད་པ་ཡིན་ལ། གང་ལ་ལ་ཞིག་སྦྱངས་པའི་ཡོན་ཏན་དེ་དག་གི་བསྔགས་པ་བརྗོད་པར་བྱེད་པ་དེ་ནི་ངའི་བསྔགས་པ་བརྗོད་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ངས་ཡུན་རིང་པོ་ནས་སྦྱངས་པའི་ཡོན་ཏན་དེ་དག་བསྟོད་ཅིང་བཀུར་ལ་བསྔགས་ཤིང་རབ་ཏུ་བསྔགས་པའི་ཕྱིར་རོ། །འོད་སྲུང་དེ་ལྟ་བས་ན་ཁྱོད་ནི་དགོན་པ་པ་ཡིན་ཞིང་དགོན་པ་པ་ཉིད་ཀྱི་བསྔགས་པ་བརྗོད་པ་དང ། བསོད་སྙོམས་པ་ཡིན་ཞིང ། བསོད་སྙོམས་པ་ཉིད་ཀྱི་བསྔགས་པ་རྗོད་པ་དང ། ཕྱག་དར་ཁྲོད་པ་ཡིན་ཞིག་ཕྱག་དར་ཁྲོད་པ་ཉིད་ཀྱི་བསྔགས་པ་བརྗོད་པ་ཡིན་ཏེ། འོད་བསྲུང་ཁྱོད་ཀྱིས་དེ་ལྟར་བསླབ་པར་བྱའོ། །འདི་ནི་རེ་ཤིག་བྱུང་བ་ཡིན་ཏེ་སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ།། ་་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཕོངས་པ་དང་བཅས་པའི་དུས་བྱུང་ནས་བྲམ་ཟེ་དང ། ཁྱིམ་བདག་དད་པ་ཅན་དག་གིས་དགེ
7.108b
སློང་གནས་བརྟན་གནས་བརྟན་དག་གི་བསོད་སྙོམས་སྦྱར་ཏོ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་དག་བཅུ་གཉིས་སྡེ་དག་གི་གན་དུ་དོང་བ་དང ། དེ་དག་གིས་སྨྲས་པ། འཕགས་པ་དག་བཞུགས་ལ་ཞལ་ཚུས་གསོལ་ཅིག་།སུས་སྦྱིན་པར་འགྱུར། དེ་དག་གིས་སྨྲས་པ། བདག་ཅག་གིས་གསོལ་ལོ། །སང་སུས་སྦྱིན་པར་འགྱུར། བདག་ཅག་གིས་གསོལ་ལོ། །དྲུག་སྡེ་དག་གིས་སྨྲས་པ། སྲིང་མོ་དག་དེ་ཙམ་གྱིས་ཁོ་བོ་ཅག་འཚོ་བར་མི་ནུས་ཀྱི་འདི་ལྟར། བྲམ་ཟེ་དང་ཁྱིམ་བདག་དད་པ་ཅན་གང་དག་གིས་དགེ་སློང་གནས་བརྟན་གནས་བརྟན་དག་གི་བསོད་སྙོམས་སྦྱར་བ་དེ་དག་གལ་ཏེ་ཁྱེད་ཀྱིས་ཁོ་བོ་ཅག་གི་ཕྱིར་སྦྱོར་དུ་བཅུག་ན་དེ་ལྟ་ན་ཁོ་བོ་ཅག་འཚོ་བར་ནུས་སོ། །སྦོམ་དགའ་མོས་སྨྲས་པ་འཕགས་པ་དག་དེ་ལྟར་བགྱིར་རུང་ངམ། དྲུག་སྡེ་དག་གིས་སྨྲས་པ། ཅི་ཁོ་བོ་ཅག་ལྟོགས་ཏེ་འཆི་བར་བྱ་འམ། ལེགས་པར་རུང་ངོ ། །ཤིན་ཏུ་རུང་ངོ ། །གང་དུ་བཀག་།སུས་བཀག་།དེ་ནས་དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་ཁྱིམ་གང་དུ་ཚེ་དང་ལྡན་པ་ཀུན་ཤེས་ཀཽཎྜི་ནྱའི་བསོད་སྙོམས་སྦྱར་བའི་ཁྱིམ་དེར་སོང་སྟེ་འདི་སྐད་ཅེས་སྨྲས་སོ། །ཁྱེད་ཀྱིས་སུའི་བསོད་སྙོམས་སྦྱར། དེ་དག་གིས་སྨྲས་པ། འཕགས་པ་ཀུན་ཤེས་ཀཽཎྜི་ནྱའི་འོ། །སྦོམ་དགའ་མོས་སྨྲས་པ། ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་གང་ཡིན་པ་དེའི་བསོད་སྙོམས་སྦྱོར་ན་དེ་ལྟ་ན་ཁྱེད་ལ་བསོད་ནམས་ཆེ་བར་འགྱུར་རོ། །དེ་དག་གིས་སྨྲས་པ། འཕགས་མ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་དེ་གང་ལགས། སྦོམ་དགའ་མོས་སྨྲས་པ། འཕགས
7.109a
པ་དགའ་བོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་ཡིན་ནོ། །དེ་དག་གིས་སྨྲས་པ། དེ་ལྟར་བགྱིའོ་ཞེས་དེ་དག་གིས་འཕགས་པ་ཀུན་ཤེས་ཀཽཎྜི་ནྱའི་བསོད་སྙོམས་སྦྱར་བ་གང་ཡིན་པ་དེ་དགའ་བོའི་ཕྱིར་སྦྱོར་དུ་བཅུག་གོ། །དེ་བཞིན་དུ་གང་དག་གི་དགེ་སློང་གནས་བརྟན་གནས་བརྟན་དག་གི་བསོད་སྙོམས་སྦྱར་བ་དེ་དག་ཐམས་ཅད་དྲུག་སྡེ་དག་གི་ཕྱིར་སྦྱོར་དུ་བཅུག་གོ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་དོང་བ་དང ། དེ་དག་ལྷུང་བཟེད་སྣོད་ཁས་བཏགས་པའི་བསོད་སྙོམས་དག་གིས་འོངས་པ་དགེ་སློང་རྣམས་ཀྱིས་མཐོང་ནས་སྨྲས་པ། ཨེ་མའོ་དྲུག་སྡེ་དག་གིས་ལྷུང་བཟེད་སྣོད་དག་ཁས་བཏགས་སོ། །དྲུག་སྡེ་དག་གིས་སྨྲས་པ། གང་དག་གིས་བདག་ཅག་གི་ཕྱིར་བསོད་སྙོམས་དག་སྦྱོར་དུ་བཅུག་པའི་སྲིང་མོ་དག་ནད་མེད་པར་གྱུར་ཅིག་།དགེ་སློང་རྣམས་ཀྱིས་སྨྲས་པ། ཁྱེད་ཅག་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟར་རུང་ངམ། དྲུག་སྡེ་དག་གིས་སྨྲས་པ། རུང་ཡང་སྲིད། མི་རུང་ཡང་སྲིད་དེ་ཅི་ཁོ་བོ་ཅག་ལྟོགས་ཏེ་འཆི་བར་བྱ་འམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མས་སྦྱོར་དུ་བཅུག་པའི་ཟས་ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི
7.109b
ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེ་ལས་ཀྱི་མཐའ་གཉིས་བྱེད་དུ་འཛུད་དེ་ཚོང་དང ། ཞིང་ལས་ཀྱི་མཐའོ། །དེས་དགོན་པར་ཞིང་རྨོས་ནས་ས་བོན་བཏབ་སྟེ་ཞིང་དེའི་དྲུང་དུ་སྤྱིལ་བུ་བྱས་ནས་ཟོང་ཐོགས་ཏེ་ཡུལ་གཞན་དུ་སོང་ངོ ། །བསོད་སྙོམས་པ་ཞིག་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས་དེས་དེར་བྱུལ་ན་ཞིང་དེའི་དྲུང་ན་སྤྱིལ་བུ་མཐོང་ནས་དེས་བསམས་པ། ཕྱོགས་འདི་གོ་སྐབས་དབེན་པ་ཡིན་གྱི་འདི་ཉིད་དུ་འདུག་པར་བྱའོ་སྙམ་ནས། དེས་དེ་ཉིད་དུ་འདུག་པར་བརྩམས་ཏེ་མཉན་ཡོད་དུ་བསོད་སྙོམས་བརྒྱུས་ནས་དེ་ཉིད་དུ་གནས་འཆའོ། །དེར་མིའི་དྲིས་རི་དགས་དང་བྱ་འགའ་ཡང་མི་འོང་ཞིང་དེར་ལྷས་ཀྱང་དུས་དང་དུས་སུ་ཆར་གྱི་རྒྱུན་ལེགས་པར་ཕབ་པས་ཞིང་དེ་ཤིན་དུ་ཕུན་སུམ་ཚོགས་པར་གྱུར་ཏོ། །ཁྱིམ་བདག་དེ་ཡང་དོན་ལེགས་པར་གྲུབ་སྟེ་བཀྲ་ཤིས་ཤིང་བདེ་བར་འོངས་སོ། །དེ་ནས་ཁྱིམ་བདག་དེས་རྫས་སྦས་ནས་ཁྲུས་བྱས་ཏེ་ཟན་ཟོས་པ་དང་ཆུང་མས་སྨྲས་པ། རྗེའི་སྲས་ཁྱོད་ཀྱིས་དགོན་པའི་ཞིང་དེ་ལ་ས་བོན་བཏབ་ནས་ཡུལ་གཞན་དུ་བཞུད་ན་གལ་ཏེ་ས་བོན་གྱི་སྐྱིན་པ་ཙམ་གྲུབ་པར་གྱུར་ཏམ་རྗེ
7.110a
གཟིགས་ཤིག་།ཁྱིམ་བདག་དེ་དེར་སོང་བ་དང་ཇི་ཙམ་ན་ཞིང་དེ་ལོ་ཐོག་ཤིན་ཏུ་ཕུན་སུམ་ཚོགས་པ་མཐོང་ནས་དེས་བསམས་པ། བདག་གིས་འདིར་རིབ་མ་ཡང་མ་བྱེད། སྲུངས་མའི་མི་འགའ་ཡང་མ་བཞག་པར་ཞིང་འདི་ལོ་ཐོགས་ཕུན་སུམ་ཚོགས་པར་གྱུར་པ་འདི་ལ་རྒྱུ་ཅི་ཡོད་སྙམ་ནས། དེས་དེར་བྱུལ་བ་དང་མིའི་རྗེས་མཐོང་ནས་དེ་རྗེས་བཞིན་དུ་སྤྱིལ་བུ་དེར་སོང་བ་དང ། ཇི་ཙམ་ན་དགེ་སློང་བསོད་སྙོམས་པ་ཞིག་སྐྱིལ་མོ་ཀྲུང་གིས་འདུག་པ་མཐོང་ནས་དེས་བསམས་པ། འདིའི་མཐུས་ཞིང་འདི་ཤིན་ཏུ་ལོ་ཐོགས་ཕུན་སུམ་ཚོགས་པར་གྱུར་ཏོ་སྙམ་ནས་དེས་སྨྲས་པ། འཕགས་པ་སྤྱིལ་བུ་འདི་ན་བཞུགས་སམ། དེས་སྨྲས་པ། ཁྱིམ་བདག་ཡིན་ནོ། །ཁྱིམ་བདག་གིས་སྨྲས་པ། འཕགས་པ་ཞིང་འདི་བདག་གི་ལགས་ཀྱིས་འཕགས་པས་མེ་ཏོག་དང ། འབྲས་བུ་དང ། ཚེམ་ཤིང་དག་ཅི་བདེར་ལོངས་སྤྱད་དུ་གསོལ། འཕགས་པས་སང་བདག་གི་སྡུམ་པར་བསོད་སྙོམས་གསོལ་བར་ཅི་གནང ། ཁྱིམ་བདག་ཁོ་བོ་ནི་བསོད་སྙོམས་པ་ཡིན་པས་བསོད་སྙོམས་འབའ་ཤིག་ལ་རྒྱུའོ་ཞེས་དེས་དེའི་དང་དུ་མ་བླངས་ནས་ཁྱིམ་བདག་དེས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་འདི་སྐད་ཅེས་སྨྲས་སོ། །བཟང་མོ་བང་བ་སྟ་གོན་གྱིས་ཤིག་།ཞིང་དེ་ལས་ལོ་ཐོག་ཤིན་ཏུ་ཕུན་སུམ་ཚོགས་པར་གྱུར་ཏོ། །ཆུང་མས་བསམས་པ་འདི་བདག་ལ། ཀུ་རེ་ཟེར་རོ་སྙམ་ནས་དེས་སྨྲས་པ། རྗེའི་སྲས་ཁྱོད་ཀྱིས་དེར་རིབ་མ་ཡང་མ་བགྱིས། སྲུངས་མའི་མི་འགའ་ཡང་མ་བཞག་ན་བདག་ལ། ཀུ་རེ་བགྱིར་ཅི་མཆིས། ཁྱིམ་བདག་གིས་སྨྲས་པ། བཟང་མོ་ཅི་ཁོ་བོ་ཁྱོད་ལ། ཀུ་རེ་བྱེད་སྙམ་འམ་འདི་ལྟར་ཡིད་ཆེས་པར་གྱིས་ཤིག་།ཞིང་དེའི་ལོ་ཐོགས་ཤིན་དུ་ཕུན་སུམ་ཚོགས་པར་གྱུར་ཏོ། །ཆུང་མས་སྨྲས་པ། ཅིའི་སླད་དུ། ཁྱིམ་བདག་གིས་སྨྲས་པ། ཁོ་བོ་ཞིང་དེའི་དྲུང་དུ་སྤྱིལ་བུ་བྱས་ཏེ་སྤྱིལ་བུ་དེར་དགེ་སློང་བསོད་སྙོམས་པ་ཞིག་འདུག་པས་དེའི་མཐུས་ཞིང་དེ་ཤིན་ཏུ་ལོ་ཐོག་ཕུན་སུམ་ཚོགས
7.110b
པར་གྱུར་ཏོ། །ཆུང་མས་སྨྲས་པ། འོ་ན་ཁྱོད་ཀྱིས་ཅིའི་སླད་དུ་དེ་སང་བསོད་སྙོམས་ལ་སྤྱན་མ་དྲངས། ཁྱིམ་བདག་གིས་སྨྲས་པ། ཁོ་བོས་དེ་སྤྱན་དྲངས་ན་བསོད་སྙོམས་པ་དེའི་ཞལ་ནས་ཁྱིམ་བདག་ཁོ་བོ་ནི་བསོད་སྙོམས་པ་ཡིན་པས་བསོད་སྙོམས་འབའ་ཤིག་ལ་རྒྱུའོ་ཞེས་དེས་དང་དུ་མ་བླངས་སོ། །ཆུང་མས་སྨྲས་པ། དེ་དག་ནི་ཞབས་ལ་ཕྱག་འཚལ་ཏེ་སྤྱན་དྲང་བ་ལགས་སོ། །ཁྱིམ་བདག་གིས་སྨྲས་པ། འོ་ན་ཁྱོད་ཀྱིས་ཞལ་ཟས་སྟ་གོན་གྱིས་ཤིག་དང་ཁོ་བོ་དེར་སོང་ལ་ཞབས་ལ་ཕྱག་འཚལ་ཏེ་སྤྱན་དྲངས་བར་བྱའོ་ཞེས་དེ་སོང་སྟེ་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྨྲས་པ། འཕགས་པ་སང་བདག་གི་སྡུམ་པར་བསོད་སྙོམས་གསོལ་བར་ཅི་གནང ། བསོད་སྙོམས་པ་དེས་སྨྲས་པ། ཁྱིམ་བདག་ཁོ་བོ་ནི་བསོད་སྙོམས་འབའ་ཞིག་ལ་རྒྱུའོ། །ཁྱིམ་བདག་གིས་སྨྲས་པ། འཕགས་པ་ཁྱོད་ཀྱིས་བདག་གི་སྡུམ་པར་བསོད་སྙོམས་མི་གསོལ་དུ་མི་རུང་ངོ ། །བསོད་སྙོམས་པ་དེས་ཁྱིམ་བདག་དེ་དུས་ཀྱིས་འཆུ་བར་ཤེས་ནས་ཅང་མི་སྨྲ་བས་དང་དུ་བླངས་སོ། །ཁྱིམ་བདག་དེས་བསོད་སྙོམས་པ་དེས་ཅང་མི་སྨྲ་བས་དང་དུ་བླངས་པར་རིག་ནས་རྐང་པ་ལ་ཕྱག་འཚལ་ཏེ་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཁོ་བོས་བསོད་སྙོམས་པ་དེ་སང་གདུགས་ཚོད་ལ་སྤྱན་དྲངས་ན་དེས་ཀྱང་ཅི་མི་སྨྲ་བས་དང་དུ་བླངས་ཀྱིས་ཞལ་ཟས་གཙང་ཞིང་བསོད་པ་དག་སྟ་གོན་གྱིས་ཤིག་།ཁྱིམ་བདག་གི་ཆུང་མ་དེས་ཁ་ཟས་གྲང་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོད་བག་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་སོ། །དགེ་སློང་བསོད་སྙོམས་པ་དག་བསོད་སྙོམས་ལ་འཇུག་པར་བརྩམས་པ་དང ། བསོད་སྙོམས་པ་གཞན་ཞིག་བསོད་སྙོམས་པ་དེའི་གན་དུ་སོང་སྟེ་སྨྲས་པ། བསོད་སྙོམས་པ་ཚུར་ཤོག་བསོད་སྙོམས་ལ་འདོང་ངོ ། །དེས་སྨྲས་པ། ཁོ་བོ་ཁྱིམ་བདག་གཅིག་གིས་མགྲོན་དུ་བོས་པས་དུས་ཤེས་པར་བྱས་ཏེ་འགྲོས་ཁྱོད་སོང་ཤིག་།དེས་སྨྲས་པ། བསོད་སྙོམས་པ་རྙེད་པ་དང་ལྡན་ཞིང་བསོད་སྙོམས་པ་བསོད
7.111a
ནམས་ཆེན་པོར་གྱུར་གྱིས་ཟས་ཀྱི་ཚོད་ཤེས་པར་གྱིས་ཤིག་།ཁོ་བོས་ཀྱང་དེ་ལ་དུས་ཤེས་པར་བྱའོ། །དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་ཏེ་སྨྲས་པ། མཚན་བཟང་ཨ་རོག་ཁྱ་བསོད་སྙོམས་བྱིན་ཅིག་།ཁྱིམ་བདག་གི་ཆུང་མས་སྨྲས་པ། འཕགས་མ་བདག་གིས་བསོད་སྙོམས་པ་ཞིག་སྤྱན་དྲངས་པ་དེ་འཕྱིས་ཏེ་ཟན་བཅད་པར་གྱུར་ན་མི་རུང་བས་བདག་བྲེལ་གྱིས་རེ་ཤིག་བཞུད་ཅིག་།སྦོམ་དགའ་མོས་སྨྲས་པ། གལ་ཏེ་ཁོ་མོས་བསོད་སྙོམས་པ་དེ་ཁྲིད་དེ་འོང་ན་ཁྱོད་ཀྱིས་ཁོ་མོ་བསོད་སྙོམས་སྦྱིན་ནམ། དེས་སྨྲས་པ་གསོལ་ལོ། །ཕྱི་བཞིན་འབྲང་བའི་དགེ་སྦྱོང་མ་འདི་ལ་སུས་སྦྱིན་པར་འགྱུར། བདག་གིས་གསོལ་ལོ། །གཙུག་ལག་ཁང་སྲུང་བ་དག་སུས་སྦྱིན་པར་འགྱུར། བདག་གིས་གསོལ་ལོ། །སྦོམ་དགའ་མོས་བསམས་པ། བསོད་སྙོམས་པ་དག་གིས་བསོད་སྙོམས་བརྒྱུས་ནས་ད་ཙམ་ཕྱིར་འབྱུང་བས་གང་ད་གཟོད་འཇུག་པ་དེ་བསོད་སྙོམས་པ་དེ་ཡིན་ནོ་སྙམ་ནས་དེ་གྲོང་ཁྱེར་གྱི་སྒོར་སོང་སྟེ་བསྡད་དོ། །བསོད་སྙོམས་པ་དེས་ཀྱང་བསམས་པ། དེང་བདག་གིས་བསོད་སྙོམས་ལ་རྒྱུ་མི་དགོས་པས་དགེ་བའི་ཕྱོགས་ལ་ཏྲོན་བྱ་ཞིང་དུས་ཤེས་པར་བྱས་ཏེ། འགྲོ་སྙམ་ནས་དེས་དུས་ཤེས་པར་བྱས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་འཇུག་པར་བརྩམས་པ་དང་དེ་སྦོམ་དགའ་མོས་མཐོང་ནས་བསམས་པ། བསོད་སྙོམས་པ་དེ་འདི་ཡིན་ནོ་སྙམ་ནས་དེས་དེ་ལ་དྲིས་པ། འཕགས་པ་སྡུམ་པ་ག་གེ་མོ་ཞིག་ཏུ་སྤྱན་མ་དྲངས་སམ། སྲིང་མོ་གཡར་དྲངས་སོ། །འཕགས་པ་བདག་གིས་ཁྱིམ་དེར་ཁྱོད་ཀྱི་བསྔགས་པ་བརྗོད་དོ། །དེས་སྨྲས་པ། སྲིང་མོ་ཅི་ཁོ་བོས་ཁྱོད་ལ་ཁོ་བོའི་བསྔགས་པ་བརྗོད་ཅིག་ཅེས་བྱས་སམ། འཕགས་པ་བཀའ་མ་སྩལ་ཏོ། །བསོད་སྙོམས་པ་དེས་བསམས་པ། འདི་ནི་དགེ་སློང་མས་སྦྱོར་དུ་བཅུག་པའི་ཟས་ཡིན་པར་གྱུར་གྱིས་བདག་གིས་ཟན་བཅད་པ་ནི་བླའི་བདག
7.111b
ལྟུང་བ་དང་བཅས་པར་གྱུར་ན་མི་རུང་ངོ་སྙམ་ནས་དེ་ཕྱིར་ལྡོག་པར་བརྩམས་པ་དང ། སྦོམ་དགའ་མོས་སྨྲས་པ། འཕགས་པ་བདག་གིས་ཁྱོད་ཀྱི་གདུང་ཡང་མ་འཚལ། མཚན་ཡང་མ་འཚལ་བས་བདག་གིས་ཁྱོད་ཀྱི་བསྔགས་པ་བརྗོད་རེ་སྐན། བསོད་སྙོམས་པས་སྨྲས་པ། སྲིང་མོ་གལ་ཏེ་ཁྱོད་ཀྱི་ཚིག་སྔ་མ་བདེན་ན་ནི་ཕྱི་མ་བརྫུན་ལ། གལ་ཏེ་ཕྱི་མ་བདེན་ན་ནི་སྔ་མ་བརྫུན་ནོ་ཞེས་དེ་ཕྱིར་ལོག་སྟེ་སྤྱིལ་བུ་དེ་ཉིད་དུ་སོང་ནས་དེ་ཇི་སྲིད་དུ་ལུས་ལས་མདངས་མ་ཡལ་བ་དེ་སྲིད་དུ་དགེ་བའི་ཕྱོགས་ལ་ཏྲོན་བྱས་ནས། གང་གི་ཚེ་ལུས་ལས་མདངས་ཡལ་བ་དེའི་ཚེ་ན་གློས་ཕབ་སྟེ་ཉལ་བ་དང་བསོད་སྙོམས་པ་གཞན་དག་གིས་དེ་ལ་སྨྲས་པ། གལ་ཏེ་ཟས་གཞན་གྱི་ཡིན་ཞེས་དེ་ལྟོ་ཡང་གཞན་གྱི་ལྟོ་ཡིན་སྙམ་འམ། ཅི་བྱས། ཅི་ཙམ་གྱིས་དགེ་བའི་ཕྱོགས་ལ་ཏྲོན་བྱེད་ཀྱང་མི་ནུས་པ་དེ་ཙམ་གྱི་ཟས་ཟོས་སོ། །སུས་ཟོས། ཁྱོད་ཀྱིས་ཟོས་སོ། །ཁོ་བོས་མ་ཟོས་སོ། །འོ་ན་ཅིའི་ཕྱིར་གློས་ཕབ་སྟེ་ཉལ། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སྔར་ཁྱིམ་དུ་བོས་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་ན་སྔར་ཁྱིམ་དུ་བོས་པ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་རིག་པ་འམ། གཞན་གྱིས་བརྗོད་པས་སོ། །དགེ་སློང་མས་ཤེས་བྱ་བ་ནི་ཆོས་འདི་པས་སོ། །སྦྱོར་དུ་བཅུག་པའི
7.112a
ཞེས་བྱ་བ་ནི་སྦྱོར་དུ་བཅུག་པ་གཉིས་ཏེ། ཚུལ་ཁྲིམས་ཀྱིས་སྦྱོར་དུ་བཅུག་པ་དང ། ཐོས་པས་སྦྱོར་དུ་བཅུག་པའོ། །ཟས་ཤེས་བྱ་བ་ནི་བཅའ་བ་ལྔ་དང ། བཟའ་བ་ལྔའོ། །ཟ་ན་ཞེས་བྱ་བ་ནི་མགུལ་དུ་མིད་ནའོ། །སྔར་ཁྱིམ་དུ་བོས་པ་མ་གཏོགས་ཏེ་ཞེས་བྱ་བ་ནི་སྔར་ཁྱིམ་དུ་མགྲོན་དུ་བོས་པ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། འདི་ལྟ་སྟེ། དགེ་སློང་རབ་ཏུ་མང་པོ་དག་ཁྱིམ་གཞན་དུ་མགྲོན་དུ་བོས་པར་གྱུར་པ་ན་དེར་དགེ་སློང་མ་འོངས་ཏེ་མགྲོན་དྲིས་པ། ཁྱོད་ཅག་གིས་དགེ་སློང་གང་དག་མགྲོན་དུ་བོས། ཆེ་གེ་མོ་དང་ཆེ་གེ་མོ་ལ་སོགས་པ་དག་གོ། །ཟན་ཇི་ལྟ་བུ་དག་སྦྱིན། སུམ་ཕེལ་གྱི་ཟན་དག་གོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་གཙང་ཕྱེ་སྦྱིན་པར་བྱའོ། །ཞུན་མར་ཇི་ལྟ་བུ་སྦྱིན། རའི་ཞུན་མར་སྦྱིན་ནོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་བ་མར་སྦྱིན་པར་བྱའོ། །ལན་ཚཝ་ཇི་ལྟ་བུ་སྦྱིན། འགྱུར་བྱེད་ཀྱི་ལན་ཚཝའོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་རྒྱམ་ཚཝ་དང ། བ་ཚཝ་དང ། རྒྱ་མཚོའི་ཚཝ་སྦྱིན་པར་བྱའོ། །བཏུང་བ་ཇི་ལྟ་བུ་བླུད་རྩབ་མོའོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་དར་བ་བླུད་པར་བྱའོ། །ཟན་སྤག་པ་ཇི་ལྟ་བུ་སྦྱིན། ཚཝ་དང་སྦྱར་བའི་ལྡུམ་མོ། །མི་རུང་སྟེ།
7.112b
དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་ཚོག་པ་དང ། བཙོས་པ་དང ། ཞོ་ཐུག་བླུད་པར་བྱའོ། །ཁུར་བ་ཇི་ལྟ་བུ་སྦྱིན། མོ་སྲན་གྲེའུའི་ཁུར་བའོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་ཧཝགས་ཀྱི་ཁུར་བ་དང ། མོན་ཁུར་དང ། བོག་རན་སྦྱིན་པར་བྱའོ། །མོན་ཁུར་སྤག་པ་ཇི་ལྟ་བུ་སྦྱིན། ཚཝ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུག་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་བརྔོ་ཤ་དང ། སྲེག་ཤ་དང ། ཤ་རྣམ་པ་མང་པོ་སྦྱིན་པར་བྱའོ། །སྐོམ་ཇི་ལྟ་བུ་བླུད། བུ་རམ་ཆབ་བོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་ཧཝགས་ཆབ་དང ། ལི་ཁ་རའི་ཆབ་དང ། དྲོ་འཇམ་བླུད་པར་བྱའོ། །འབྲས་ཆན་ཇི་ལྟ་བུ་སྦྱིན། འབྲས་ཆན་རྩུབ་པོ་དང ། ཀོ་དྲ་བའི་ཆན་ནོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་འབྲས་ས་ལུའི་ཆན་སྦྱིན་པར་བྱའོ། །སྲན་ཚོད་ཅི་ལྟ་བུ་བླུད། མོན་སྲན་གྲེའུའི་སྲན་ཚོད་དོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས་དེ་དག་ལ་མོན་སྲན་སྡེའུའི་སྲན་ཚོད་བླུད་པར་བྱའོ། །བྱ་ན་ཇི་ལྟ་བུ་སྦྱིན། སྔོ་ཚོད་དོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དག་ཡིན་པས། དེ་དག་ལ་ཤ་རྣམ་པ་སྣ་ཚོགས་དང ། ཧཝགས་ཚོད་དང་ཞོ་དང ། འོ་ཚན་བླུད་པར་བྱའོ། །ཞེས་སྦྱོར་དུ་བཅུག་ནས། དགེ་སློང་གིས་གལ་ཏེ་ཤེས་བཞིན་དུ་ཟོས་ན་ལྟུང་བྱེད་དུ་འགྱུར་རོ། །རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང །
7.113a
དགྲ་བཅོམ་པ་དག་ཡིན་པས་བདེན་ན་ལྟུང་བ་མེད་དོ། །འདི་ལྟ་སྟེ་དགེ་སློང་རབ་ཏུ་མང་པོ་དག་ཁྱིམ་གཞན་དུ་མགྲོན་དུ་བོས་པར་གྱུར་པ་ན་དེར་དགེ་སློང་མ་འོངས་ཏེ་དྲིས་པ། ཁྱེད་ཅག་གིས་དགེ་སློང་གང་དག་འགྲོན་དུ་བོས། ཆེ་གེ་མོ་དང་ཆེ་གེ་མོ་ལ་སོགས་པ་དག་གོ། །ཟན་ཇི་ལྟ་བུ་དག་སྦྱིན། སུམ་ཕེལ་གྱི་ཟན་དག་གོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་གཙང་ཕྱེ་སྦྱིན་པར་བྱའོ། །ཞུན་མར་ཇི་ལྟ་བུ་སྦྱིན། རའི་ཞུན་མར་སྦྱིན་ནོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་བ་མར་སྦྱིན་པར་བྱའོ། །ལན་ཚཝ་ཇི་ལྟ་བུ་སྦྱིན། འགྱུར་བྱེད་ཀྱིས་ལན་ཚཝའོ། །མི་རུང་སྟེ་དགེ་སློང་དེ་དག་ནི་མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས། དེ་དག་ལ་རྒྱམ་ཚཝ་དང ། བ་ཚཝ་དང ། རྒྱའ་མཚོའི་ཚཝ་སྦྱིན་པར་བྱའོ། །བཏུང་བ་ཇི་ལྟ་བུ་བླུད། རྩབ་མོའིའོ། །མི་རུང་སྟེ། དགེ་སློང་དེ་དག་ནི་མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་དར་བ་བླུད་པར་བྱའོ། །ཟན་སྤག་པ་ཇི་ལྟ་བུ་སྦྱིན། ཚཝ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་ཚོག་པ་དང ། བཙོས་པ་དང ། ཞོ་ཐུག་བླུད་པར་བྱའོ། །ཁུར་བ་ཇི་ལྟ་བུ་སྦྱིན། མོན་སྲན་གྲེའུའི་ཁུར་བའོ། །མི་རུང་སྟེ། དགེ་སློང་དེ་དག་ནི་མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་ཧཝགས་ཀྱི་ཁུར་བ་དང ། མོན་ཁུར་དང ། བོག་རན་སྦྱིན་པར་བྱའོ། །མོན་ཁུར་སྤག་པ་ཇི་ལྟ་བུ་སྦྱིན། ཚཝ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་བརྔོ་ཤ་དང ། སྲེག་ཤ་དང ། ཤ་རྣམ་པ་མང་པོ་སྦྱིན་པར་བྱའོ། །སྐོམ་ཅི་ལྟ་བུ་བླུད།
7.113b
བུ་རམ་ཆབ་བོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་ཧཝགས་ཆབ་དང ། ལི་ཁ་རའི་ཆབ་དང ། དྲོ་འཇམ་བླུད་པར་བྱའོ། །འབྲས་ཆན་ཇི་ལྟ་བུ་སྦྱིན། འབྲས་ཆན་རྩུབ་པོ་དང ། ཀོ་དྲ་བའི་ཆན་ནོ། །མི་རུང་སྟེ། དགེ་སློང་དེ་དག་ནི་མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་མཛིན་པ་དག་ཡིན་པས་དེ་དག་ལ་འབྲས་ས་ལུའི་ཆན་སྦྱིན་པར་བྱའོ། །སྲན་ཚོད་ཇི་ལྟ་བུ་བླུད། མོན་སྲན་གྲེའུའི་སྲན་ཚོད་དོ། །མི་རུང་སྟེ། དགེ་སློང་དེ་དག་ནི་མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པས་དེ་དག་ལ་མོན་སྲན་སྡེའུའི་སྲན་ཚོད་བླུད་པར་བྱའོ། །བྱན་ཇི་ལྟ་བུ་སྦྱིན། སྔོ་ཚོད་དོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང ། འདུལ་བ་འཛིན་པ་པ་དང ། མ་མོ་མཛིན་པ་དག་ཡིན་པས་དེ་དག་ལ་ཤ་རྣམ་པ་སྣ་ཚོགས་དང་ཧཝགས་ཚོད་དང ། ཞོ་དང ། འོ་ཚན་བླུད་པར་བྱའོ་ཞེས་སྦྱོར་དུ་བཅུག་ནས། དགེ་སློང་གིས་གལ་ཏེ་དེ་ཤེས་བཞིན་དུ་ཟོས་ན་ལྟུང་བྱེད་དུ་འགྱུར་རོ། །མདོའ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དག་ཡིན་པ་བདེན་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མས་སྦྱོར་དུ་བཅུག་པ་ཟ་བའི་ལྟུང་བྱེད་དེ་སུམ་བཅུ་པ་རྫོགས་སྷོ།། ་་་་་་།། སྡོམ་ལ། ཡང་ཡང་དང་ནི་འདུག་གནས་གཅིག་།ཕྱེད་དང་བཅའ་དང་སྟོབས་པ་དང ། །འདུས་དང་དུས་མིན་གསོག་འཇོག་དང ། །ཁ་ནས་མིད་དང་བསོད་པ་ཉིད། ། སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ཀྱི་ཀུན་དུ་སྤྱོད་པ་ནི་དུས་སུ་སེམས་ཅན་དམྱལ་བ་རྒྱུ་བ་དང ། དུད་འགྲོ་རྒྱུ་བ་དང ། ཡི་དག་རྒྱུ་བ་དང ། ལྷ་རྒྱུ་བ་དང ། མི་རྒྱུར་འགྲོ་བ་ཡིན་པས་དེ་གཉིས་ཀྱིས་དེ་དག་ཏུ་བརྒྱུས་ནས་འཛམ་བུའི
7.114a
གླིང་དུ་འོངས་ཏེ་འཁོར་བཞི་པོ་དག་ལ་སེམས་ཅན་དམྱལ་བ་པའི་སེམས་ཅན་རྣམས་ཀྱི་དབྱུང་བ་དང ། གཏུབ་པ་དང ། གཅད་པ་དང ། གཤེག་པ་ལ་སོགས་པའི་སྡུག་བསྔལ་དང ། དུད་འགྲོ་རྣམས་གཅིག་ལ་གཅིག་ཟ་བ་ལ་སོགས་པའི་སྡུག་བསྔལ་དང ། ཡི་དགས་རྣམས་ཀྱི་བཀྲེས་པ་དང ། སྐོམ་པ་ལ་སོགས་པའི་སྡུག་བསྔལ་དང ། ལྷ་རྣམས་ཀྱི་འཆི་འཕོ་དང ། ལྟུང་བ་དང ། རྣམ་པར་འཐོར་བ་དང ། རྣམ་པར་འཇིག་པ་ལ་སོགས་པའི་སྡུག་བསྔལ་དང ། མི་རྣམས་ཀྱི་ཚོལ་བ་དང ། ཆགས་པ་ལ་སོགས་པའི་སྡུག་བསྔལ་གང་དག་ཡིན་པ་དེ་དག་བརྗོད་པར་བྱེད་པས་གང་ལ་ལའི་ལྷན་ཅིག་གནས་པ་དང ། ཉེ་གནས་ཚངས་པར་སྤྱོད་པ་ལ་མངོན་པར་མི་དགའ་བ་དེ་དག་དེས་ཁྲིད་དེ་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ག་ལ་བ་དེར་སོང་སྟེ། ཕྱིན་ནས་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ལ་ཡང་དག་པར་འདོམས་སུ་འཆོལ་བར་བྱེད། ཡང་དག་པར་རྗེས་སུ་སྟོན་དུ་འཆོལ་བར་བྱེད་ཅིང ། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ཀྱང་དེ་ལ་ཡང་དག་པར་འདོམས་པར་བྱེད། ཡང་དག་པར་རྗེས་སུ་སྟོན་པར་བྱེད་དོ། །ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ཀྱིས་ཡང་དག་པར་གཏམས་ཤིང ། ཡང་དག་པར་རྗེས་སུ་བསྟན་པ་ན་དེ་དག་ཚངས་པར་སྤྱོད་པ་ལ་མངོན་པར་དགའ་ཞིང་གོང་དུ་ཁྱད་པར་ཡང་རྟོགས་པར་བྱེད་དོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་འཁོར་བཞི་པོ་དག་གིས་ཀུན་དུ་བསྐོར་ཅིང་འཁོད་དོ། །དེ་ནས་བཅོམ་ལྡན་འདས་ཀྱི་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་གིས་དགེ་སློང་ཤཱ་རིའི་བུ་དང ། མཽད་གལ་གྱི་བུ་གཉིས་འཁོར་བཞི་པོ་དག་གིས་ཀུན་དུ་བསྐོར་ཅིང་འཁོད་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ
7.114b
གཉིས་ཀྱི་ཀུན་དུ་སྤྱོད་པ་ནི་དུས་དང་དུས་སུ་སེམས་ཅན་དམྱལ་བ་རྒྱུ་བ་དང ། དུད་འགྲོ་རྒྱུ་བ་དང ། ཡི་དགས་རྒྱུ་བ་དང ། ལྷ་རྒྱུ་བ་དང ། མི་རྒྱུར་མཆི་བ་ལགས་པས། དེ་གཉིས་ཀྱིས་དེ་དག་ཏུ་བརྒྱུས་ནས་འཛམ་བུའི་གླིང་དུ་མཆིས་ཏེ་འཁོར་བཞི་པོ་དག་ལ་སེམས་ཅན་དམྱལ་བ་པའི་སེམས་ཅན་རྣམས་ཀྱི་དབྱུང་བ་དང ། གཏུབ་པ་དང ། གཅད་པ་དང ། གཤེག་པ་ལ་སོགས་པའི་སྡུག་སྔལ་དང ། དུད་འགྲོ་རྣམས་ཀྱི་གཅིག་ལ་གཅིག་འཚལ་བ་ལ་སོགས་པའི་སྡུག་བསྔལ་དང ། ཡི་དགས་རྣམས་ཀྱི་བཀྲེས་པ་དང ། སྐོམ་པ་ལ་སོགས་པའི་སྡུག་བསྔལ་དང ། ལྷ་རྣམས་ཀྱི་འཆི་འཕོ་དང ། ལྟུང་བ་དང ། རྣམ་པར་འཐོར་བ་དང ། རྣམ་པར་འཇིག་པ་ལ་སོགས་པའི་སྡུག་སྔལ་དང ། མི་རྣམས་ཀྱི་ཚོལ་བ་དང ། ཆག་པ་ལ་སོགས་པའི་སྡུག་བསྔལ་གང་དག་ལགས་པ་དེ་དག་བརྗོད་པར་བགྱིད་པས་གང་ལ་ལའི་ལྷན་ཅིག་གནས་པ་དང ། ཉེ་གནས་ཚངས་པར་སྤྱོད་པ་ལ་མངོན་པར་མི་དགའ་བ་དེ་དག་དེས་ཁྲིད་དེ་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ག་ལ་བ་དེར་མཆིས་ཏེ། མཆིས་ནས་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ལ་ཡང་དག་པར་འདོམས་སུ་འཆོལ་བར་བགྱིད། ཡང་དག་པར་རྗེས་སུ་སྟོན་དུ་འཆོལ་བར་བགྱིད་ཅིང་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ཀྱང་དེ་དག་ལ་ཡང་དག་པར་འདོམས་པར་བགྱིད་ཡང་དག་པར་རྗེས་སུ་སྟོན་པར་བགྱིད་དོ། །ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ཀྱིས་ཡང་དག་པར་བཏམས་ཤིང ། ཡང་དག་པར་རྗེས་སུ་བསྟན་པ་ན་དེ་དག་ཚངས་པར་སྤྱོད་པ་ལ་མངོན་པར་དགའ་ཞིང་གོང་དུ་ཁྱད་པར་ཡང་རྟོག་པར་བགྱིད་དེ། བཙུན་པ་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་འཁོར་བཞི་པོ་དག་གིས་ཀུན་དུ་བསྐོར་ཅིང་མཆིས་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་ཐམས་ཅད་དུ་དགེ་སློང
7.115a
ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་དང ། ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ལྟ་བུ་དག་མི་འབྱུང་བས་དེའི་ཕྱིར་སྒོ་ཁང་དུ་ཆ་ལྔ་པའི་འཁོར་ལོ་བྲི་བར་རྗེས་སུ་གནང་ངོ ། །བཅོམ་ལྡན་འདས་ཀྱིས་སྒོ་ཁང་དུ་ཆ་ལྔ་པའི་འཁོར་ལོ་བྲི་བར་བྱའོ། །ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ལྟར་བྲི་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། འགྲོ་བ་ལྔ་པོ་སེམས་ཅན་དམྱལ་བའི་འགྲོ་བ་དང ། དུད་འགྲོའི་འགྲོ་བ་དང ། ཡི་དགས་ཀྱི་འགྲོ་བ་དང ། ལྷའི་འགྲོ་བ་དང ། མིའི་འགྲོ་བ་བྲི་བར་བྱའོ། །དགེ་སློང་རྣམས་ཀྱིས་གང་དུ་གང་བྲི་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། མཐར་སེམས་ཅན་དམྱལ་བ་དང ། དུད་འགྲོ་དང ། ཡི་དག་ཀྱིས་འགྲོ་བ་བྲི་བར་བྱའོ། །ཤར་གྱི་ལུས་འཕགས་དང ། ནུབ་ཀྱི་བ་ལང་སྤྱོད་དང ། བྱང་གི་སྒྲ་མི་སྙན་དང ། འཛམ་བུའི་གླིང་ཡང་བྲི་བར་བྱའོ། །དབུས་སུ་འདོད་ཆགས་དང ། ཞེ་སྡང་དང ། གཏི་མུག་དག་བྲི་བར་བྱའོ། །སངས་རྒྱས་ཀྱི་སྐུ་གཟུགས་མྱ་ངན་ལས་འདས་པའི་དཀྱིལ་འཁོར་དཀར་པོ་སྟོན་པར་བྲི་བར་བྱའོ། །བརྫུས་ཏེ་སྐྱེས་པའི་སེམས་ཅན་ཟོ་ཆུན་རྒྱུད་མའི་ཚུལ་གྱིས་འཆི་འཕོ་བ་དང་སྐྱེ་བ་དག་ཀྱང་བྲི་བར་བྱའོ། །ཁོར་ར་ཁོར་ཡུག་ཏུ་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགསུ་འབྱུང་བ་དང་ལུགས་ལས་བཟློག་པ་དག་བྲི་བར་བྱ་ཞིང་ཐམས་ཅད་མི་རྟག་པས་བཟུང་བར་བྲི་བར་བྱའོ། །ཚིགསུ་བཅད་པ་གཉིས་པོ། བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་བྲི་བར་བྱའོ། །བཅོམ་ལྡན་འདས་ཀྱིས་སྒོ་ཁང་དུ་ཆ་ལྔ་པའི་འཁོར་ལོ་བྲི་བར་བྱའོ། །ཞེས་བཀའ་སྩལ་ནས། དགེ་སློང་རྣམས་ཀྱིས་སྒོ་ཁང་དུ་ཆ་ལྔ་པའི་འཁོར་ལོ་འབྲིར་བཅུག་པ་དང ། བྲམ་ཟེ་དང ། ཁྱིམ་བདག
7.115b
དག་ལྷགས་ནས་འཕགས་པ་དག་བྲིས་པ་འདི་ཅི་ལགས་ཤེས་འདྲི་བ་ན། དེ་དག་གིས་ཁོ་བོ་ཅག་གིས་ཀྱང་མི་ཤེས་སོ་ཞེས་སྨྲས་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེར་བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་དེ་སྟོན་པར་འགྱུར་བའི་དགེ་སློང་བསྐོ་བར་བྱའོ། །བཅོམ་ལྡན་འདས་ཀྱིས་དགེ་སློང་བསྐོ་བར་བྱའོ་ཞེས་བཀའ་སྩལ་ནས། དེ་དག་བྱེ་བྲག་མེད་པར་བྱིས་པ་ཡང་རུང ། རྨོངས་པ་ཡང་རུང ། མི་གསལ་བ་ཡང་རུང ། མི་མཁས་པ་ཡང་རུང་བ་ལས་བསྐོ་བར་བྱེད་ནས་དེ་དག་བདག་ཉིད་ཀྱིས་ཀྱང་མི་ཤེས་ན་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་སྟོན་པར་འགྱུར་བ་ལྟ་ག་ལ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ནུས་པ་ལས་བསྐོ་བར་བྱའོ། །རྒྱལ་པོའི་ཁབ་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་བྱུང་ནས་དེས་ཆུང་མ་ལ་སྨྲས་པ། བཟང་མོ་བདག་ཅག་ནོར་འཕྲོག་པ། ལོང་སྤྱོད་འཕྲོག་པ་བྱུང་གིས་ཁོ་བོ་ཟོང་ཐོགས་ཏེ་རྒྱ་མཚོ་ཆེན་པོར་འཇུག་གོ། །རྗེའི་སྲས་དེ་ལྟར་མཛོད་ཅིག་།དེ་ཟོང་ཐོགས་ཏེ་རྒྱ་མཚོ་ཆེན་པོར་ཞུགས་པ་དང ། དེ་དེ་ཉིད་དུ་ཚུལ་མ་ཡིན་པར་སྡུག་བསྔལ་བར་གྱུར་ཏོ། །ཆུང་མ་དེས་ཁྱེའུ་དེ་ཉེ་དུའི་སྟོབས་དང ། ལག་སྟོབས་ཀྱིས་བསྙོད་ཅིང་གསོས་ཏེ་བསྐྱེད་ནས་དེས་དེ་ཡི་གེ་དང ། ཡིག་འབྲུ་དག་སློབ་ཏུ་བཅུག་ནས་དེས་འཇིག་རྟེན་གྱི་གཏམ་རྒྱུད་ལ་ཤིན་དུ་མཁས་པར་གྱུར་ཏོ། །ཁྱེའུ་དེ་ནེའུ་ལྡངས་དང་ལྷན་ཅིག་འོད་མའི་ཚལ་དུ་སོང་སྟེ་གཙུག་ལག་ཁང་དུ་ཞུགས་པ་དང ། དེས་སྒོ་ཁང་ན་ཆ་ལྔ་པའི་འཁོར་ལོ་བྲིས་པ་མཐོང་ནས་དེས་དགེ་སློང་ལ་དྲིས་པ། འཕགས་པ་བྲིས་པ་འདི་ཅི་ལགས། དགེ་སློང་དེས་སྨྲས་པ། བཞིན་བཟང་འདི་དག་ནི་འགྲོ་བ་ལྔ་སྟེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། ལྷ་དང ། མི་དག་གོ། །དེས་ཡང་དྲིས་པ། འཕགས་པ་འདི་དག་གིས་ལས་ཅི་བགྱིས་ན་ལས་དེའི་རྣམ་པར་སྨིན་པས་སེམས་ཅན་དམྱལ་བ་དག་ཏུ་སྐྱེས
7.116a
ཤིང་དེས་ད་ལྟར་དབྱུང་བ་དང ། གཏུབ་པ་དང ། གཅད་པ་དང ། གཤེག་པ་ལ་སོགས་པའི་སྡུག་བསྔལ་ཉམས་སུ་མྱོང་བར་གྱུར། བཞིན་བཟངས་འདི་དག་གིས་མི་དགེ་བ་བཅུའི་ལས་ཀྱི་ལམ་དག་ཆེར་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་སེམས་ཅན་དམྱལ་བ་རྣམས་སུ་སྐྱེ་ཤིང ། དེ་ད་ལྟར་དབྱུང་བ་དང ། གཏུབ་པ་དང ། གཅད་པ་དང ། གཤེག་པ་ལ་སོགས་པའི་བསྡུག་བསྔལ་དག་ཉམས་སུ་མྱོང་བར་གྱུར་ཏོ། །འཕགས་པ་འདི་དག་གིས་ཀྱང་ལས་ཅི་བགྱིས་ན་ལས་དེའི་རྣམ་པར་སྨིན་པས་དུད་འགྲོ་རྣམས་སུ་སྐྱེ་ཤིང་དེས་ད་ལྟར་གཅིག་ལ་གཅིག་འཚལ་བ་ལ་སོགས་པའི་སྡུག་བསྔལ་དག་ཉམ་སུ་མྱོང་བར་གྱུར། བཞིན་བཟང་འདི་དག་གིས་ནི་མི་དགེ་བ་བཅུའི་ལས་ཀྱི་ལམ་དག་ཆེས་སྲབ་པ་དང ། ཆེས་ཆུང་བ་དག་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་དུད་འགྲོ་རྣམས་སུ་སྐྱེ་ཤིང ། དེ་ད་ལྟར་གཅིག་ལ་གཅིག་ཟ་བའི་སྡུག་བསྔལ་དག་ཉམ་སུ་མྱོང་བར་གྱུར་ཏོ། །འཕགས་པ་འདི་དག་གིས་ཀྱང་ལས་ཅི་བགྱི་ན་ལས་དེའི་རྣམ་པར་སྨིན་པས་ཡི་དགས་རྣམས་སུ་སྐྱེ་ཤིང་དེས་ད་ལྟར་བཀྲེས་པ་དང ། སྐོམ་པ་ལ་སོགས་པའི་སྡུག་བསྔལ་དག་ཉམས་སུ་མྱོང་བར་གྱུར། བཞིན་བཟང་འདི་དག་གིས་ནི་སེར་སྣ་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་ཡི་དགས་རྣམས་སུ་སྐྱེ་ཤིང ། དེས་ད་ལྟར་བཀྲེས་པ་དང ། སྐོམ་པ་ལ་སོགས་པའི་སྡུག་བསྔལ་དག་ཉམ་སུ་མྱོང་བར་གྱུར་ཏོ། །འཕགས་པ་འོ་ན་འདི་དག་གིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ལྷ་རྣམས་སུ་སྐྱེ་ཤིང་དེས་ད་ལྟར་ལྷའི་བདེ་བ་དག་ཉམས་སུ་མྱོང་བར་གྱུར། བཞིན་བཟང་འདི་དག་གིས་ནི་དགེ་བ་བཅུའི་ལས་ཀྱི་ལམ་ཆེར་ཀུན་དུ་རྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་ལྷ་རྣམས་སུ་སྐྱེ་ཤིང་དེས་ད་ལྟར་ལྷའི་བདེ་བ་དག་མྱོང་བར་གྱུར་ཏོ། །འཕགས་པ་འདི་དག་གིས་ལས་ཅི་བགྱིས་ན་ལས་དེའི་རྣམ་པར
7.116b
སྨིན་པས་མི་རྣམས་སུ་སྐྱེ་ཤིང་དེས་ད་ལྟར་བདེ་བ་ཆུང་ངུ་ཉམས་སུ་མྱོང་བར་གྱུར། བཞིན་བཟང་འདི་དག་གིས་ནི་དགེ་བ་བཅུའི་ལས་ཀྱི་ལམ་ཆུང་ངུ་ཀུན་དུ་རྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་མི་རྣམས་སུ་སྐྱེ་ཤིང ། དེས་ད་ལྟར་བདེ་བ་ཆུང་ངུ་ཉམ་སུ་མྱོང་བར་གྱུར་ཏོ། །འཕགས་པ་འདི་ལ་བདག་འགྲོ་བ་གསུམ་པོ་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནི་མི་འཚལ་ལོ། །འགྲོ་བ་གཉིས་པོ་ལྷ་དང ། མི་གཉིས་ནི་འཚལ་ལོ། །འཕགས་པ་བདག་གིས་ལས་ཅི་བགྱིས་ན་དེས་བདག་ལྷར་སྐྱེ་བར་འགྱུར་བ་མཆིས་སམ། བཞིན་བཟང་ཡོད་དོ། །གང་ལགས། བཞིན་བཟངས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ལ་ཚངས་པར་སྤྱད་པ་སྤྱོད་ཅིག་དང ། གལ་ཏེ་ཚེ་འདི་ཉིད་ལ་ཀུན་ཤེས་པ་རྟོགས་པར་གྱུར་ན་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ཡིན་ནོ། །གལ་ཏེ་ཀུན་དུ་སྦྱོར་བ་ལྷག་མ་དང་བཅས་པས་དུས་བྱེད་པར་གྱུར་ན་ཁྱོད་ལྷ་རྣམས་སུ་སྐྱེ་བར་འགྱུར་རོ། །འཕགས་པ་ཡུན་ཇི་སྲིད་དུ། བཞིན་བཟངས་ཇི་སྲིད་འཚོའི་བར་དུའོ། །དེ་ནི་རྔོ་མི་ཐོག་ན་ཐབས་གཞན་འགའ་མཆིས་སམ་ཡོད་དོ། །གང་ལགས། བཞིན་བཟང་བཅོམ་ལྡན་འདས་ཀྱི་སྤྱན་སྔར་སྔར་ཚངས་པར་སྤྱོད་པའི་གཞི་དག་ལོང་ཤིག་།འཕགས་པ་ཡུན་ཇི་སྲིད་དུ། བཞིན་བཟངས་ཇི་སྲིད་འཚོའི་བར་དུའོ། །འཕགས་པ་དེ་ཡང་རྔོ་མི་ཐོག་ན་ཐབས་གཞན་ཅི་མཆིས་ཡོད་དོ། །གང་ལགས། བཞིན་བཟངས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིག་དང ། ལྷ་རྣམས་སུ་སྐྱེ་བར་འགྱུར་རོ། །འཕགས་པ་ཀཱར་ཥཱ་པ་ཎ་དུ་ཙམ་དག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་བྱེད་པར་འགྱུར། བཞིན་བཟངས་ཀཱར་ཥཱ་པ་ཎ་ལྔ་བརྒྱས་སོ། །འཕགས་པ་དེ་ནི་རྔོ་ཐོག་གོ་ཞེས་དེས་དགེ་སློང་དེའི་རྐང་པ་ལ་ཕྱག་འཚལ་ཏེ་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་མ་ལ་འདི་སྐད་ཅེས་སྨྲས་སོ། །ཡུམ་བདག་དེང་འོད་མའི་ཚལ་དུ་མཆིས་ནས་བདག་གིས་དེ་ན་ཆ་ལྔ་པའི་འཁོར་ལོ་བྲིས་པ་མཐོང་སྟེ། དེ་ན་འགྲོ་བ་ལྔ་པོ་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང །
7.117a
ལྷ་དང ། མི་དག་བྲིས་ན། ཡུམ་ཁྱོད་ངན་བུ་ལྷ་རྣམས་སུ་སྐྱེ་བར་བཞེད་དམ། བུ་ཁོ་མོ་སེམས་ཅན་ཐམས་ཅད་ལྷ་རྣམས་སུ་སྐྱེ་བ་ཡང་འདོད་ན་ཁྱོད་ལྟ་སྨོས་ཀྱང་ཅི་དགོས། ཡུམ་ཁྱོད་ཀྱིས་བདག་ལ་ཀཱར་ཥཱ་པ་ཎ་ལྔ་བརྒྱ་སྩོལ་ཅིག་དང་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ། །བུ་ཁྱོད་ཀྱང་ཁོ་མོས་ཉེ་དུའི་སྟོབས་དང་ལག་སྟོབས་ཀྱིས་བསྙོད་ཅིང་གསོས་ཏེ་བསྐྱེད་པ་ཡིན་པས་ཁོ་མོ་ལ་ཀཱར་ཥཱ་པ་ཎ་ལྔ་བརྒྱའི་འབྱོར་བ་ག་ལ་ཡོད། ཡུམ་བདག་གླ་རྔན་གྱི་སླད་དུ་ལས་བགྱིད་དུ་མཆིའོ། །བུ་ཁྱོད་ནི་ཤིན་དུ་གཞོན་པ་ཡིན་པས་ཁྱོད་ཀྱིས་གླ་རྔན་གྱི་ཕྱིར་ལས་བྱེད་པར་མི་ནུས་སོ། །ཡུམ་རྔོ་ཐོག་གིས་མཆིའོ། །དེས་དེ་དུས་ཀྱིས་འཆུ་བར་ཤེས་ཏེ་གནང་ནས་ཁྱེའུ་དེ་གླ་མིའི་སྲང་དུ་སོང་སྟེ་བསྡད་པ་དང ། བྲམ་ཟེ་དང་ཁྱིམ་བདག་གིས་གླ་མི་གཞན་དག་ཁྲིད་ན་དེ་འགས་ཀྱང་མ་ཁྲིད་ནས་དེས་དེར་ཉི་མ་ནུབ་པར་བྱས་ནས་ནམ་སྲོས་པ་དང་ཁྱིམ་དུ་འོངས་སོ། །མས་དེ་མཐོང་ནས་དྲིས་པ། བུ་ཁྱོད་ཀྱིས་དེང་གླ་རྔན་གྱི་ཕྱིར་ལས་བྱས་སམ། ཁྱེའུས་སྨྲས་པ། ཡུམ་བདག་སུས་ཀྱང་མ་ཁྲིད་དོ། །བུ་གླ་མི་དག་ནི་འདི་མི་འདྲ་སྟེ། གླ་མི་དག་ནི་སྐྲ་ཡེགས་ཤིང་གོས་དྲི་མ་ཅན་དག་གྱོན་ནས་གླ་མིའི་སྲང་དུ་སོང་སྟེ་སྡོད་ཀྱིས་ཁྱོད་ཀྱང་གལ་ཏེ་གླ་རྔན་གྱི་ཕྱིར་ལས་བྱེད་པར་འདོད་ན་སྐྲ་ཡོགས་པར་གྱིས་ལ། གོས་དྲི་མ་ཅན་དག་གྱོན་ཏེ་གླ་མིའི་སྲང་དུ་སོང་ལ་སྡོད་ཅིག་།དེས་ཕྱི་དེ་ཉིན་པར་སྐྲ་ཡེགས་པར་བྱས་ཤིང་གོས་དྲི་མ་ཅན་དག་གྱོན་ནས་གླ་མིའི་སྲང་དུ་སོང་སྟེ་བསྡད་པ་དང ། ཚོང་དཔོན་ཞིག་ཁྱིམ་རྩིག་པར་བྱེད་པ་དེ་གླ་མི་དག་གི་ཕྱིར་གླ་མིའི་སྲང་དུ་འོངས་ནས། དེས་གླ་མི་གཞན་དག་ཁྲིད་དེ་ཁྱེའུ་དེ་མ་ཁྲིད་པ་དང ། ཁྱེའུས་སྨྲས་པ། ཡབ་བདག་གིས་ཀྱང་གླ་རྔན་གྱི་སླད་དུ་ལས་བགྱིའོ། །ཚོང་དཔོན་གྱིས་སྨྲས་པ། བུ་ཁྱོད་ཤིན་དུ་གཞོན་པས་ཁྱོད་ཀྱིས་གླ་རྔན་གྱི་ཕྱིར་ལས་བྱེད་པར་མི་ནུས་སོ། །ཁྱེའུས་སྨྲས་པ། ཅི་ཁྱོད་ཀྱིས་བདག་ལ་དང་པོར་གླ་རྔན་སྩོལ་ཏམ། ཚོང་དཔོན་གྱིས་སྨྲས་པ། མཇུག་ཏུ་གླང་རྔན་སྦྱིན་ནོ། །ཁྱེའུས
7.117b
སྨྲས་པ། བདག་གིས་ཇེ་དེང་ལས་བགྱིའི་གལ་ཏེ་མཉེས་པར་གྱུར་ན་གླ་རྔན་སྩོལ་ཅིག་།ཚོང་དཔོན་དེས་ཁྱེའུ་དེ་ཁྲིད་ནས་ཁྱེའུ་དེས་ཚོང་དཔོན་དེའི་ཁྱིམ་དུ་གླ་རྔན་གྱི་ཕྱིར་ལས་བྱ་བར་བརྩམས་སོ། །གླ་མི་གཞན་དག་གཡོས་ལས་བྱེད་པ་ན་ཁྱེའུ་དེ་མྱུར་བ་མྱུར་བར་ལས་བྱེད་ནས་དེ་དག་གིས་དེ་ལ་སྨྲས་པ། ཚ་བོ་ཁྱོད་ཅིའི་ཕྱིར་གཡོས་ལས་མི་བྱེད། ཁྱེའུས་སྨྲས་པ། ཞང་པོ་དག་ཁོ་བོ་སྔོན་ཉེས་པར་སྤྱད་པས་དབུལ་པོའི་ཁྱིམ་དག་ཏུ་སྐྱེས་ཤིང་དེས་ད་ལྟར་གླ་རྔན་གྱིས་ཕྱིར་ལས་བྱེད་པ་ཡིན་ན། གལ་ཏེ་ད་གཡོས་ལས་བྱས་པར་གྱུར་ན་འདི་ནས་ཤི་འཕོས་པ་དག་གི་འགྲོ་བ་ཇི་ལྟར་འགྱུར། དེ་དག་གིས་སྨྲས་པ། ཚ་བོ་ཁྱོད་གསར་དུ་དུལ་བ་ཡིན་པས་ཐམས་ཅད་ཀྱི་ཐ་ན་ལས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །ཁྱེའུ་དེ་འཇིག་རྟེན་པའི་གཏམ་རྒྱུད་ལ་མཁས་པ་ཡིན་པས་དེས་གླ་མི་དེ་དག་ལ་གཏམ་རྒྱུད་སྨྲ་ཤིང་མྱུར་བ་མྱུར་བར་སོང་བ་དང ། གླ་མི་དེ་དག་ཀྱང་གཏམ་རྒྱུད་མི་ཐོས་ཀྱིས་དོགས་ནས་དེའི་ཕྱི་བཞིན་མྱུར་བ་མྱུར་བར་ལྷགས་ནས་དེའི་ཉིན་མོ་གླ་མི་དེ་དག་གིས་ལས་མང་དུ་བྱས་སོ། །ཁྱིམ་བདག་གི་ཀུན་དུ་སྤྱོད་པ་ནི། ཕྱེམ་རེད་ཀྱི་དུས་ཀྱི་ལས་ཀྱི་མཐའ་དག་ལ་སོ་སོར་རྟོགས་པ་ཡིན་པས་ཚོང་དཔོན་དེ། རྒོངས་ཀར་འོངས་ཏེ་ལས་ཀྱི་མཐའ་དག་ལ་སོ་སོ་བརྟགས་པ་དང ། ཅི་ཙམ་ན་དེ་ཉིས་གྱུར་གྱུར་ལས་བྱས་པར་མཐོང་ནས་དེས་ལག་དཔོན་གྱི་མི་ལ་དྲིས་པ། ཅི་ཁྱོད་ཀྱིས་གླ་མི་གཞན་དག་ཀྱང་བཀུག་གམ། དེས་སྨྲས་པ་མ་བཀུག་གོ། །ཚོང་དཔོན་གྱིས་སྨྲས་པ། འོ་ན་ཅིའི་ཕྱིར་དེང་ལས་མང་དུ་ཟིན། དེས་སྨྲས་པ། ཁྱིམ་བདག་གི་བུ་འདི་ནད་མེད་པར་གྱུར་ཅིག་།འདི་འཇིག་རྟེན་གྱི་གཏམ་རྒྱུད་ལ་མཁས་པས། འདི་འཇིག་རྟེན་གྱི་གཏམ་རྒྱུད་ཟེར་ཞིང་མྱུར་བ་མྱུར་བར་ལས་བྱེད་པ་ན་གླ་མི་གཞན་དག་ཀྱང་གཏམ་རྒྱུད་མི་ཐོས་ཀྱིས་དོགས་པས་མྱུར་བ་མྱུར་བར་འདིའི་ཕྱི་བཞིན་འདོང་ཞིང་ལས་བྱེད་པས་དེས་ན་དེང་ལས་མང་དུ་ཟིན་ཏོ། །ཚོང་དཔོན་དེས་ཁྱེའུ་དེ་ལ་གླ་རྔན་ཉིས་སྒྱུར་སྦྱིན་པར
7.118a
བརྩམས་པ་དང ། ཁྱེའུས་སྨྲས་པ། ཅི་ལགས་བདག་ལ་གདུགས་གཉིས་ཀྱི་གླ་རྔན་གཅིག་ཅར་སྩལ་ཏམ། མ་ཡིན་ཏེ། འདི་ལྟར་ཁོ་བོ་ཁྱོད་ལ་དགའ་བས་བྱ་དགའ་སྦྱིན་ནོ། །ཁྱེའུས་སྨྲས་པ། གལ་ཏེ་ཁྱོད་བདག་ལ་དགྱེས་ན་ཇི་སྲིད་དུ་བདག་ཁྱོད་ཀྱི་སྡུམ་པ་ན་སུག་ལས་འཚལ་བ་དེ་སྲིད་དུ་བདག་གི་གླ་རྔན་ཁྱོད་ཀྱི་ཕྱག་ཏུ་གཞག་ཏུ་གསོལ། ཚོང་དཔོན་གྱིས་སྨྲས་པ། དེ་ལྟར་གྱིས་ཤིག་།གང་གི་ཚེ་དེའི་ཁྱིམ་ཟིན་པ་དེའི་ཚེ་ན་ཁྱེའུ་དེའི་གླ་རྔན་བརྩིས་ན་ཀཱར་ཥཱ་པ་ཎ་ལྔ་བརྒྱར་མ་ཆོག་ནས་ཁྱེའུ་དེས་ངུ་བར་བརྩམས་པ་དང ། ཚོང་དཔོན་དེས་སྨྲས་པ། བུ་ཅི་ངུ ། ཁོ་བོས་བྲིད་པར་མ་གྱུར་ཏམ། ཡབ་ཁྱོད་བདག་ཉིད་ཆེན་པོ་ལགས་པས་ཁྱོད་ཀྱིས་བདག་ག་ལ་བྲིད་དེ། འདི་ལྟར་བདག་གིས་ཀཱར་ཥཱ་པ་ཎ་ལྔ་བརྒྱའི་ཆེད་དུ་གླ་རྔན་གྱི་སླད་དུ་ལས་བགྱིས་ཤིང ། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཏེ། བདག་ལྷ་རྣམས་ཀྱི་ནང་དུ་སྐྱེ་བར་བགྱིའོ་སྙམ་ན། དེ་དག་མ་འཚལ་བས་ཡང་བདག་གིས་གཞན་དུ་གླ་རྔན་གྱི་སླད་དུ་ལས་བགྱི་འཚལ་བར་འགྱུར་རོ། །ཚོང་དཔོན་དེ་དད་པ་ཅན་ཞིག་ཡིན་པས་དེས་སྨྲས་པ། བུ་ཁོ་བོས་ཁ་བསྐང་བར་བྱའོ། །ཡབ་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་བ་སྙམ། བུ་ཁྱོད་བཅོམ་ལྡན་འདས་ལ་མངོན་པར་དད་དམ། མངོན་པར་དད་དོ། །སོང་ལ་བཅོམ་ལྡན་འདས་ལ་ཞུས་ཞིག་།ཁྱེའུ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་གི་བུ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀཱར་ཥཱ་པ་ཎ་ལྔ་བརྒྱའི་ཆེད་དུ་གླ་རྔན་གྱི་ཆེད་དུ་ཚོང་དཔོན་ཆེ་གེ་ཞིག་གི་སུག་ལས་བགྱིས་ན་དེ་དག་མ་འཚལ་ནས་ཚོང་དཔོན་དེས་དེའི་ཁ་སྐོང་བར་བགྱིད་ན་བླང་བར་བགྱི་འམ། བཞིན་བཟངས་ཚོང་དཔོན་དེ་དད་པ་ཅན་ཡིན་གྱིས་ལོང་ཤིག་།བཅོམ་ལྡན་འདས་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་ལགས་པ་སྙམ། སྐྱེ་བར་འགྱུར་རོ། །ཁྱེའུ་དེས་བཅོམ་ལྡན་འདས་ཀྱི་ཞབས
7.118b
གཉིས་ལ་མགོ་བོས་ཕྱག་འཚལ་ཏེ་སོང་ངོ ། །དེ་ནས་ཁྱིམ་བདག་གི་བུ་དེས་ཚོང་དཔོན་དེ་ལས་ཀཱར་ཥཱ་པ་ཎ་ལྔ་བརྒྱ་མནོས་ཏེ་མའི་གན་དུ་སོང་ནས་སྨྲས་པ། ཡུམ་ཀཱར་ཥཱ་པ་ཎ་ལྔ་བརྒྱ་པོ་འདི་དག་གིས་ཞལ་ཟས་སྟ་གོན་མཛོད་ཅིག་དང་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ། །བུ་ཁོ་མོ་ལ་སྣོད་སྤྱད་འགའ་ཡང་མེད་ཅིང ། མི་བླས་དང ། གནས་མལ་འགའ་ཡང་མེད་ཀྱིས་ཚོང་དཔོན་དེ་ཉིད་སྣོད་སྤྱད་དང ། མི་བླས་དང ། གནས་མལ་མང་བ་ཡིན་ལ་དད་པ་ཅན་ཡིན་གྱིས་སོང་ལ་དེ་ཉིད་ལ་གྱིས་ཤིག་།ཁྱེའུ་དེ་ཚོང་དཔོན་དེའི་གན་དུ་སོང་སྟེ་སྨྲས་པ། ཡབ་བདག་གི་སྡུམ་པ་ན་སྣོད་སྤྱད་དང ། མི་བླས་དང ། གནས་མལ་ཅུང་ཟད་ཀྱང་མ་མཆིས་ཀྱིས་ཁྱོད་ཉིད་ཀྱིས་ཞལ་ཟས་སྟ་གོན་མཛོད་ཅིག་དང་བདག་མཆིས་ནས་རང་གི་སུག་པ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ། །ཚོང་དཔོན་དེ་དད་པ་ཅན་ཡིན་པས་དེས་བསམས་པ། བདག་གི་ཁྱིམ་གསར་དུ་བརྩིགས་པ་དེར་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་གསོལ་བར་གྱུར་ན་ལེགས་སོ་སྙམ་ནས་དེས་སྨྲས་པ། བུ་ཞོག་སྟེ་སོང་ལ་སངས་རྒྱས་ལ་སོགས་པ་དགེ་སློང་གི་དགེ་འདུན་སང་གདུགས་ཚོད་ལ་སྤྱན་དྲོངས་ཤིག་དང་ཁོ་བོས་ཞལ་ཟས་སྟ་གོན་བྱའོ། །དེ་ནས་ཁྱིམ་བདག་གི་བུ་དེས་ཚོང་དཔོན་དེའི་ལག་ཏུ་ཀཱར་ཥཱ་པ་ཎ་ལྔ་བརྒྱ་གཏད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་རྒན་པའི་མཐའ་ལོགས་སུ་འདུག་ནས་གསོལ་པ། བཅོམ་ལྡན་འདས་སང་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་ལ་སྤྱན་འདྲེན་ཏོ། །བཅོམ་ལྡན་འདས་ཀྱིས་ཁྱིམ་བདག་གི་བུ་དེ་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་གི་བུ་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ངོ ། །ཚོང་དཔོན་དེས་ཀྱང་དེ་ཉིད་ཀྱི་མཚན་མོ་ཞལ་ཟས་སྟ་གོན
7.119a
བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཚོང་དཔོན་དེའི་ཁྱིམ་ག་ལ་བ་དེར་གཤེགས་སོ། །དྲུག་སྡེ་དག་གིས་དྲིས་པ། སུའི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས། ཁྱིམ་བདག་གི་བུ་ཆེ་གེ་མོ་ཞིག་གིའོ། །དྲུག་སྡེ་དག་གིས་སྨྲས་པ། དེ་ནི་གླ་མི་ཡིན་པས་ཅི་ཞིག་སྦྱིན་པར་འགྱུར། ཁྱིམ་དུ་འགྲོ་བའི་ཁྱིམ་དག་ཏུ་དོང་ལ་གཡར་ཚུས་བཟས་འདོང་ངོ་ཞེས་དེ་དག་ཁྱིམ་དུ་འགྲོ་བའི་ཁྱིམ་དག་ཏུ་དོང་བ་དང ། དེ་དག་གིས་སྨྲས་པ། འཕགས་པ་དག་གདན་ཆུད་གསོལ་ཅིག་།དེ་ལྟར་བྱའོ། །ཞེས་དེ་དག་གིས་ཁྱེའུ་ཚུས་ཟོས་སོ། །དེ་ནས་བཅོམ་ལྡན་འདས་ཚོང་དཔོན་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དྲུག་སྡེ་དག་ཀྱང་ཁྱིམ་དུ་འགྲོ་བའི་ཁྱིམ་དག་ཏུ་ཁྱེའུ་ཚུས་ཟོས་ནས་དེ་ཉིད་དུ་དོང་སྟེ་འཁོད་དོ། །དེ་ནས་ཁྱིམ་བདག་གི་བུ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །དེ་དེ་ན་རྒྱུ་བ་ན་དྲུག་སྡེ་དག་གུས་པར་བྱས་ཏེ་མི་ཟ་བ་མཐོང་ངོ ། །མཐོང་ནས་ཀྱང་བཅོམ་ལྡན་འདས་ཀྱི་སྤྱན་སྔར་འདུག་སྟེ་གསོལ་པ། བཅོམ་ལྡན་འདས་འདི་ན་འཕགས་པ་ཁ་ཅིག་གུས་པར་བགྱིས་ཏེ་མི་འཚལ་ན་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་ལགས་པ་སྙམ། བཅོམ་ལྡན་འདས་ཀྱིས་བཀའ་སྩལ་པ། བཞིན་བཟང་རེ་ཤིག་གནས་མལ་གྱི་ལོངས་སྤྱོད་ཀྱིས་ཀྱང་ཁྱོད་ལྷ་རྣམས་ཀྱི་ནང་དུ
7.119b
སྐྱེ་བར་འགྱུར་ན་ཁ་ཟས་ཀྱི་ལོངས་སྤྱོད་ཀྱིས་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཁྱིམ་བདག་གི་བུ་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་རྒྱལ་པོའི་ཁབ་ཏུ་ལྷགས་ནས་རྒྱལ་པོའི་ཁབ་ཏུ་དུས་སྟོན་བྱུང་བས་ཚོང་ཅུང་ཟད་ཀྱང་མ་རྙེད་ནས་དེ་ན་ཚོང་པ་དགེ་སློང་གི་རྒྱུས་ཤེས་པ་ཞིག་འདུག་པ་དེས་སྨྲས་པ། ཤེས་ལྡན་དག་ཤེས་པར་གྱིས་ཤིག་།ཁྱིམ་གང་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་གསོལ་བའི་ཁྱིམ་དེ་ན་གོར་མ་ཆག་པར་བཟའ་བ་དང་བཏུང་བ་ལྷག་པའི་ཆོས་ཅུང་ཟད་ཡོད་ཀྱི་དེར་དོང་ལ་རིན་གྱིས་བཙལ་ལོ། །དེ་དག་གིས་སྨྲས་པ་དང ། ཚོང་དཔོན་ཆེ་གེ་མོ་ཞིག་གི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་གསོལ་ཏོ་ཞེས་ཐོས་ནས་དེ་དག་ཟོང་ཐོགས་ཏེ་དེར་དོང་ནས་སྨྲས་པ། ཚོང་དཔོན་བདག་ཅག་ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་རྒྱལ་པོའི་ཁབ་ཏུ་ལྷགས་ནས་རྒྱལ་པོའི་ཁབ་ཏུ་དུས་སྟོན་བྱུང་བས་ཚོང་ཅུང་ཟད་ཀྱང་མ་རྙེད་ནས་བདག་ཅག་ལྟོག་པར་གྱུར་ན་ཁྱོད་ཀྱི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་དག་གསོལ་བས་བཟའ་བ་དང་བཏུང་བ་ལྷག་པའི་ཆོས་ཅུང་ཟད་ཡོད་ན་རིན་གྱི་ཕྱིར་བྱིན་ཅིག་།ཚོང་དཔོན་གྱིས་སྨྲས་པ། བཞིན་བཟངས་དག་ཇེ་ལྟའོ་ཞེས་དེ་ཁྱིམ་བདག་གི་བུ་དེའི་གན་དུ་སོང་སྟེ་སྨྲས་པ། བུ་ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་རྒྱལ་པོའི་ཁབ་ཏུ་ལྷགས་ནས་རྒྱལ་པོའི་ཁབ་ཏུ་དུས་སྟོན་བྱུང་བས་ཚོང་ཅུང་ཟད་ཀྱང་མ་རྙེད་ནས་དེ་དག་ལྟོགས་པར་གྱུར་ཏེ་རིམ་གྱིས་བཟའ་བ་དང་བཏུང་བ་ཚོལ་དུ་འདིར
7.120a
ལྷགས་ཀྱིས་ལྷག་པའི་ཆོས་མང་དུ་ཡོད་ན་རིན་གྱི་ཕྱིར་བྱིན་ཅིག་།ཁྱེའུས་སྨྲས་པ། ཡབ་བདག་རིན་གྱི་སླད་དུ་མི་སྩོལ་གྱི་སྦྱིན་པའི་ཆོས་ཀྱི་སླད་དུ་དེ་བཞིན་དུ་སྩོལ་གྱིས་དེ་དག་མཆིས་སུ་སྩོལ་ཅིག་།ཚོང་དཔོན་དེས་ཚོང་པ་དེ་དག་འདུག་ཏུ་བཅུག་པ་དང ། ཁྱེའུ་དེས་བཟའ་བ་དང་བཏུང་བས་དེ་དག་ཚིམ་པར་བྱས་སོ། །ཚོང་པ་དེ་དག་ལུས་ཚིམ་པས་ཆེད་དུ་བརྗོད་པ་འདི་སྐད་ཅེས་ཆེད་དུ་བརྗོད་དོ། །ཚོང་དཔོན་གང་གི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིང་བདག་ཅག་ཚོང་པ་ལྔ་བརྒྱ་ཡང་བཟའ་བ་དང་བཏུང་བས་ཚིམ་པར་བྱས་པའི་ཚོང་དཔོན་དེ་ནི་རྙེད་པ་དག་ལེགས་པར་རྙེད་དོ། །ཚོང་དཔོན་དེས་སྨྲས་པ། བཞིན་བཟངས་དག་འདི་ནི་ཁོ་བོའི་ཟས་མ་ཡིན་ཏེ། ཁྱིམ་བདག་གི་བུ་འདིའི་ཟས་ཡིན་ནོ། །དེ་དག་གིས་དྲིས་པ། འདི་ཁྱིམ་བདག་གང་གི་བུ་ཡིན། ཚོང་དཔོན་གྱིས་སྨྲས་པ། ཁྱིམ་བདག་ཆེ་གེ་མོ་ཞིག་གིའོ། །དེ་དག་གི་དེད་དཔོན་གྱིས་སྨྲས་པ། འོ་ན་འདི་བདག་གི་ཆུང་པོ་གྲོགས་ཀྱི་བུ་ཡིན་ནོ། །གཞན་དག་གིས་སྨྲས་པ། དེ་ལྟ་ན་འདི་བདག་ཅག་གི་ཞང་པོ་ཡིན་ནོ། །གཞན་དག་གིས་ཀྱང་སྨྲས་པ། དེ་ལྟ་ན་འདི་བདག་ཅག་གི་ཚ་བོ་ཡིན་ནོ། །དེད་དཔོན་དེས་སྨྲས་པ། མང་པོ་དག་གིས་ནི་གཅིག་དབྱུང་བར་ནུས་ལ་གཅིག་གིས་ནི་མང་པོ་དག་དབྱུང་བར་མི་ནུས་སོ་ཞེས་དེས་གཞི་བཏིང་སྟེ་རིན་པོ་ཆེ་བཞག་ནས་སྨྲས་པ། ཤེས་ལྡན་དག་གང་གིས་ཅི་ཡོངས་སུ་བཏང་བ་དེས་དེ་གཞི་འདིར་ཞོག་ཤིག་།དེར་ལ་ལས་ནི་རིན་པོ་ཆེ་གཅིག་བཞག་།ལ་ལས་ནི་གཉིས་བཞག་།ལ་ལས་ནི་མང་པོ་དག་བཞག་སྟེ། དེ་ལྟར་དེར་རིན་པོ་ཆེའི་ཕུང་པོ་རྣམ་པར་བཞག་ནས་དེད་དཔོན་གྱིས་ཁྱེའུ་དེ་ལ་སྨྲས་པ། བུ་ལོང་ཤིག་ཁྱེའུ་སྨྲས་པ། ཤེས་ལྡན་དག་བདག་གིས་རིན་གྱི་ཕྱིར་མ་བྱིན་ནོ། །དེད་དཔོན་གྱིས་སྨྲས་པ། ཁོ་བོ་ཅག་ཁྱོད་ལ་རིན་སྦྱིན་པ་མ་ཡིན་ཏེ། འདི་ལྟར་རིན་པོ་ཆེ་གཅིག་གིས་ཀྱང་ཟས་འདི་ལྟ་བུ་བརྒྱ་རྙེད་འགྲུབ་པས་འདི་ལྟར་ཁོ་བོ་ཅག་ཁྱོད་ལ་དགའ་བས་དགའ་བའི་དབང་དུ་བྱས་པ་བྱའོ། །ཁྱེའུས་སྨྲས་པ། བདག་ལྷ་རྣམས་ཀྱི་ནང་དུ་སྐྱེ
7.120b
བར་མི་འགྱུར་བ་སྙམ། ཁྱོད་བཅོམ་ལྡན་འདས་ལ་མངོན་པར་དད་དམ། མངོན་པར་དད་དོ། །སོང་ལ་བཅོམ་ལྡན་འདས་ལ་ཞུས་ཤིག་།དེ་ནས་ཁྱེའུ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་གི་བུ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ན་བདག་གིས་ཚོང་པ་ལྔ་བརྒྱ་ཙམ་ལ་བཟའ་བ་དང་བཏུང་བ་སྩལ་ནས་དེ་དག་བདག་ལ་དགའ་བའི་དབང་དུ་བགྱིས་པ་བགྱིད་ན་བདག་གིས་བླང་བར་བགྱི་འམ། བཞིན་བཟངས་ལོང་ཤིག་།བཅོམ་ལྡན་འདས་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་ལགས་པ་སྙམ། བཅོམ་ལྡན་འདས་ཀྱིས་བཀའ་སྩལ་པ། བུ་དེ་ནི་མེ་ཏོག་ཡིན་གྱི་ལོང་ཤིག་།འབྲས་བུ་གཞན་འབྱུང་བར་འགྱུར་རོ། །ཁྱེའུ་དེས་རིན་པོ་ཆེ་དེ་དག་བླངས་སོ། །རྒྱལ་པོའི་ཁབ་ན་ཚོང་དཔོན་བུ་མེད་པ་ཞིག་དུས་ལ་བབ་ནས་ནོར་ཅན་དག་དང ། ཚོང་དཔོན་དག་དང ། དེད་དཔོན་དག་འདུས་ཏེ་སྨྲས་པ། ཤེས་ལྡན་དག་བདག་ཅག་གིས་གང་ཞིག་གྲོང་ཁྱེར་གྱི་ཚོང་དཔོན་དུ་དབང་བསྐུར་བར་བྱ། བདག་ཅག་གི་ནང་ན་སེམས་ཅན་གང་བསོད་ནམས་ཆེ་བར་གྲགས་པའོ། །དེ་དག་གིས་སྨྲས་པ། བདག་ཅག་གིས་ཇི་ལྟར་ཤེས་པར་བྱ། དེ་དག་གིས་སྨྲས་པ། ས་བོན་ཁ་དོག་སྣ་ཚོགས་དག་རྫ་མ་སོ་བཏང་བའི་ནང་དུ་བླུགས་ཤིང་གང་གིས་ཁ་དོག་གཅིག་པ་ཤ་སྟག་ཟིན་པར་འགྱུར་བ་དེ་བདག་ཅག་གིས་ཚོང་དཔོན་དུ་དབང་བསྐུར་བར་བྱའོ། །དེ་དག་གིས་ས་བོན་ཁ་དོག་སྣ་ཚོགས་དག་རྫ་མ་སོ་བཏང་བའི་ནང་དུ་བླུགས་ཏེ། དེ་དག་གིས་གཟུང་བར་བརྩམས་པ་དང ། གཞན་ཐམས་ཅད་ཀྱིས་ནི་ས་བོན་ཁ་དོག་སྣ་ཚོགས་དག་ཟིན། ཁྱིམ་བདག་གི་བུ་དེས་ནི་ས་བོན་ཁ་དོག་གཅིག་པ་ཤ་སྟག་ཟིན་ནས་དེ་དག་གིས་སྨྲས་པ། བདག་ཅག་གིས་གླ་མི་ཚོང་དཔོན་དུ་དབང་བསྐུར་བར་ཇི་ལྟར་བྱ་ཞེས་དེ་དག་གིས་ལན་གསུམ་གྱི་བར་དུ་དེ་ལྟར་བྱས་པ་དང ། གཞན་ཐམས་ཅད་ཀྱིས་ནི་ས་བོན་ཁ་དོག་སྣ་ཚོགས་དག་ཟིན།
7.121a
ཁྱིམ་བདག་གི་བུ་དེས་ནི་ས་བོན་ཁ་དོག་གཅིག་པ་ཤ་སྟག་ཟིན་ནས་དེ་དག་གིས་སྨྲས་པ། ཤེས་ལྡན་དག་མི་མ་ཡིན་པ་དག་གིས་ཆེ་བཞི་ཕྱེས་ཁྱིམ་བདག་གི་བུ་འདི་ཉིད་ཚོང་དཔོན་དུ་དབང་བསྐུར་བར་བྱའོ་ཞེས་དེ་དག་གིས་ཁྱེའུ་དེ་གྲོང་ཁྱེར་གྱི་ཚོང་དཔོན་དུ་དབང་བསྐུར་ཏོ། །ཚོང་དཔོན་དེས་བསམས་པ། སེམས་ཅན་འདི་ནི་བསོད་ནམས་དང་དབང་ཆེ་བར་གྲགས་པ་ཡིན་གྱིས་འདི་ལ་གཅམ་གསག་བྱའོ་སྙམ་ནས་ཚོང་དཔོན་དེས་ཀྱང་རང་གི་བུ་མོ་རྒྱན་ཐམས་ཅད་ཀྱིས་བརྒྱན་ཏེ་གྲོང་ཁྱེར་གྱི་ཚོང་དཔོན་དེའི་ཆུང་མར་བྱིན་ནས་དེའི་ཁྱིམ་ནོར་མང་ཞིང་ལོངས་སྤྱོད་དག་གིས་འཕྲལ་ལ་མངོན་པར་མཐོ་བར་གྱུར་ནས་དེའི་མིང་འཕྲལ་ལ་མཐོ་འཕྲལ་ལ་མཐོ་ཞེས་བྱ་བར་གྱུར་ཏོ་དེ་ནས་ཚོང་དཔོན་འཕྲལ་ལ་མཐོ་འདི་སྙམ་དུ་སེམས་ཏེ། བདག་གི་ཁྱིམ་ན་དཔལ་གྱི་འབྱོར་པ་ཕུན་སུམ་ཚོགས་པ་གང་ཡིན་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་ལ་བརྟེན་ནས་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་ཏེ་གདུགས་ཚོད་གསོལ་བ་ལས་གྱུར་པ་ཡིན་ནོ་སྙམ་ནས། དེ་ནས་ཚོང་དཔོན་འཕྲལ་ལ་མཐོས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ཚོང་དཔོན་འཕྲལ་ལ་མཐོ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཚོང་དཔོན་འཕྲལ་ལ་མཐོས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
7.121b
བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་གཅིག་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཚོང་དཔོན་འཕྲལ་ལ་མཐོ་ལ་ཅང་མི་གསུང་བས་གནང་ངོ ། །དེ་ནས་ཚོང་དཔོན་འཕྲལ་ལ་མཐོས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚོང་དཔོན་འཕྲལ་ལ་མཐོས་ཀྱིས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཚོང་དཔོན་འཕྲལ་ལ་མཐོས་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཚོང་དཔོན་འཕྲལ་ལ་མཐོས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ཏེ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ། ཁྱོ་ཤུག་གཉིས་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །བཅོམ་ལྡན་འདས་ཀྱིས་ཚོང་དཔོན་འཕྲལ་ལ་མཐོས་ཁྱོ་ཤུག་གཉིས་ཀྱི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ
7.122a
ཆུད་ནས་ཅི་ནས་ཀྱང་ཚོང་དཔོན་འཕྲལ་ལ་མཐོས་ཁྱོ་ཤུག་གཉིས་ཀྱིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས་མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས་དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོའ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་གློ་བ་ཐག་པ་ནས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཚོང་དཔོན་འཕྲལ་ལ་མཐོས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད།
7.122b
ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ།། ་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་གཅིག་པ། དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་ཅི་དགྱེས་པར་བཞུགས་ནས་ཡངས་པ་ཅན་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་སོ། །དེ་ནས་བཅོམ་ལྡན་འདས་སྤོང་བྱེད་དག་ཏུ་ལྗོངས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེག་པའི་ཁང་བཟང་ན་བཞུགས་སོ། །ཁྱིམ་བདག་དྲག་ཤུལ་ཅན་གྱིས་བཅོམ་ལྡན་འདས་སྤོང་བྱེད་དག་ཏུ་ལྗོངས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་ན་སྤྲེའུ་རྫིང་གི་འགྲམ་དུ་ཁང་པ་བརྩེགས་པའི་ཁང་བཟང་ན་བཞུགས་སོ་ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཁྱིམ་བདག་དྲག་ཤུལ་ཅན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་གཅིག
7.123a
གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་དྲག་ཤུལ་ཅན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་སྟེ། དེས་ཞོ་ཤས་འཚོ་བ་རྣམས་ལ་སྨྲས་པ། ཤེས་ལྡན་དག་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཡོངས་སུ་མཉེལ་ཅིང ། གཤེགས་ཀྱིས་ཞལ་ཟས་གཙང་ཞིང་བསོད་པ་མང་པོ་དག་སྟ་གོན་གྱིས་ཤིག་།དེ་དག་གིས་ཞལ་ཟས་གཙང་ཞིང་བསོད་པ་མང་པོ་དག་སྟ་གོན་བྱས་སོ། །དེ་ནས་ཁྱིམ་བདག་དྲག་ཤུལ་ཅན་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཁྱིམ་དུ་འགྲོ་བའི་ཁྱིམ་དག་ཏུ་འདོང ། དེ་ལྟར་བྱའོ། །དེ་དག་གིས་བསོད་སྙོམས་པ་ཞིག་མཐོང་ནས་སྨྲས་པ། ཚུར་ཤོག་ཁྱིམ་དུ་འགྲོ་བའི་ཁྱིམ་དུ་འདོང་ངོ་ཞེས་དེ་ཁྲིད་ནས་དེ་དག་ཆེས་སྔར་ཡངས་པ་ཅན་དུ་ཞུགས་ནས་ཁྱིམ་དུ་འགྲོ་བའི་ཁྱིམ་དག་ཏུ་དོང་བ་དང ། དེ་དག་གིས་སྨྲས་པ། འཕགས་པ་དག་ཞལ་ཚུས་གསོལ་ཅིག་།དྲུག་སྡེ་དག་གིས་སྨྲས་པ། ཁོ་བོ་ཅག་མགྲོན་དུ་བོས་སོ། །སུས། ཁྱིམ་བདག་དྲག་ཤུལ་ཅན་གྱིས་སོ། །དེ་དག་གིས་སྨྲས་པ། འཕགས་པ་དག་འོ་ན་ཨ་མྲའི་ཁུར་བ་དག་གསོལ་ཅིག་།དེ་ལྟར་བྱའོ་ཞེས་དེ་དག་གིས་ཨ་མྲའི་ཁུར་བ་དག་ཟོས་སོ། །བསོད་སྙོམས་པ་དེ་མི་ཟ་ནས་དེ་དག་གིས་སྨྲས་པ། འཕགས་པ་ཁྱོད་ཀྱང་ཨ་མྲའི་ཁུར་བ་དག་གསོལ་ཅིག་།དེས་སྨྲས་པ། ཁོ་བོ་སྟན་གཅིག་པ་ཡིན་ནོ། །དེ་དག་གིས་སྨྲས་པའོ། །འོ་ན་སྣོམས་ཏེ་བཞུད་ལ་དེ་ཉིད་དུ་གསོལ་ཅིག་།དེས་ལྷུང་བཟེད་ཆུང་ངུ་བཀང་སྟེ་དེར་སོང་བ་དང ། དགེ་སློང་གི་དགེ་འདུན་ནི་བཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན
7.123b
འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་པར་འཇོག་པར་བཞེད་པ་དང ། ལྷ་རྣམས་ལ་ཆོས་སྟོན་པར་བཞེད་པ་དང ། ནད་པ་ལ་ལྟ་བར་བཞེད་པ་དང ། གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པ་མཛད་དོ། །དེ་ནས་ཁྱིམ་བདག་དྲག་ཤུལ་ཅན་གྱིས་དགེ་སློང་གི་དགེ་འདུན་བདེ་བར་འཁོད་པར་རིག་ནས་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །དེ་ནས་ཁྱིམ་བདག་དྲག་ཤུལ་ཅན་བསོད་སྙོམས་པ་དེའི་མདུན་དུ་འདུག་པ་དང ། བསོད་སྙོམས་པ་དེས་བསམས་པ། ཁྱིམ་བདག་ལ་འདི་ལྟར་འདིས་ཨ་མྲའི་ཁུར་བ་ཟོས་སོ་ཞེས་བྱ་བ་དེ་ལྟར་རིག་པར་གྱུར་གྱིས། ཇི་སྲིད་དུ་འདིས་བདག་ལ་ཀླན་ཀ་མ་རྙེད་པ་དེ་སྲིད་དུ་བདག་གིས་འདི་ལ་བརྗོད་པར་བྱའོ་སྙམ་ནས་དེས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་སྨྲས་སོ། །ཁྱིམ་བདག་བདག་འབའ་ཤིག་ཨ་མྲའི་ཁུར་བ་ཟོས་པར་མ་ཟད་ཀྱི་དྲུག་སྡེ་འདི་དག་གིས་ཀྱང་ཨ་མྲའི་ཁུར་བ་དག་ཟོས་སོ། །ཁྱིམ་བདག་གིས་སྨྲས་པ། འཕགས་པ་ཅིའི་ཕྱིར་དེ་སྐད་ཅེས་བདག་འབའ་ཤིག་གིས་ཨ་མྲའི་ཁུར་བ་དག་ཟོས་པར་མ་ཟད་ཀྱི་དྲུག་སྡེ་འདི་དག་གིས་ཀྱང་ཨ་མྲའི་ཁུར་བ་དག་ཟོས་སོ་ཞེས་ཟེར་ཞེས་དེས་སྤྱོས་ཏེ་སྨྲས་པ། འཕགས་པ་ཅི་ཁོ་བོ་ལ་ཨ་མྲའི་ཁུར་བ་དག་མེད་སྙམ་འམ། དེས་ཞོ་ཤས་འཚོ་བ་དག་ལ་སྨྲས་པ། ཤེས་ལྡན་དག་ཨ་མྲའི་ཁུར་བ་དག་གི་སྤྲོག་མ་དག་ཕྱེ་ཤིག་།དེ་དག་གིས་ཕྱེའོ། །དེ་ནས་དགེ་སློང་བསོད་སྙོམས་སྒྲུབ་པས་བསོད་སྙོམས་བླངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ
7.124a
གཅིག་ཏུ་འདུག་གོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་བསོད་སྙོམས་སྒྲུབ་པའི་དགེ་སློང་ལ་དགེ་སློང་ཇི་ལྟ་ཟས་བསོད་དམ་དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་འདིས་སོ་སོར་ཀུན་དགའ་བར་མཛད་པ་ཡིན་པས་བཅོམ་ལྡན་འདས་ཀྱིས་དགེ་སློང་བསོད་སྙོམས་སྒྲུབ་པ་ལ་དགེ་སློང་ཇི་ལྟ་ཟས་བསོད་དམ་དགེ་སློང་གི་དགེ་འདུན་ཚིམ་པར་བྱས་སམ། ཞེས་སོ་སོར་ཀུན་དགའ་བར་མཛད་པ་དང ། དེས་གསོལ་པ། བཙུན་པ་ཏེ་པོར་ཟས་བསོད་ཅིང་དགེ་སློང་གི་དགེ་འདུན་ཚིམ་པར་ནི་བགྱིས་ན། འདི་ལྟར་ཁྱིམ་བདག་དྲག་ཤུལ་ཅན་གྱིས་དགེ་སློང་གི་དགེ་འདུན་སྤྱོས་སོ། །དོན་གང་ལ། དེས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱིམ་བདག་དྲག་ཤུལ་ཅན་གྱིས་དགེ་སློང་གི་དགེ་འདུན་གནས་སུ་སྤྱོས་སོ། །དེ་ནས་བཅོམ་ལྡན་འདས་ཞལ་ཟས་ཀྱི་བྱ་བ་མཛད་ནས་གཙུག་ལག་ཁང་གི་སླད་རོལ་དུ་ཞབས་གཉིས་བསིལ་ཏེ་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་བཅོམ་ལྡན་འདས་ནང་དུ་ཡང་དག་འཇོག་ལས་བཞེངས་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་སྨྲས་པ། དགེ་སློང་དག་ཁྱེད་ཡང་ཡང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བའི་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།
7.124b
དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་ཡང་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་སོ། །དགེ་སློང་ན་བ་ཞིག་སྨན་པའི་གནས་སུ་སོང་བ་དང ། དེས་དེ་མཐོང་ནས་སྨྲས་པ། བཞིན་བཟང་ཁོ་བོ་ལ་སྨན་སྟོན་ཅིག་།འཕགས་པ་ཇེ་ཞལ་ཚུས་གསོལ་ཅིག་།བཞིན་བཟང་བཅོམ་ལྡན་འདས་ཀྱིས་མ་གནང་ངོ ། །འཕགས་པ་དེ་ཁྱོད་ཀྱི་སྨན་ལགས་ཏེ། གཞན་དུ་ན་ཁྱོད་ཀྱིས་འཚོ་བར་མི་སྤྱོད་དོ། །བཞིན་བཟང་བཅོམ་ལྡན་འདས་ཀྱིས་བསླབ་པའི་གཞི་བཅའ་བར་མཛད་དོ། །འཕགས་པ་ཁྱོད་ཀྱི་སྟོན་པ་ཐུགས་རྗེ་ཅན་ལགས་པས་དེ་ཉིད་རྐྱེན་དུ་མཛད་ནས་གནང་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ན་བའི་དུས་མ་གཏོགས་སོ། །དགེ་སློང་དག་མཆོད་རྟེན་གྱི་ལས་དང་དགེ་འདུན་གྱི་ལས་དག་བྱས་པ་ན་དེ་དག་བཀྲེས་ནས་གློས་ཕབ་སྟེ་ཉལ་ཞིང་དགེ་བའི་ཕྱོགས་ལ་ཏྲོན་བྱེད་པར་མི་ནུས་པ་ན་བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་ལྷགས་ནས་དེ་དག་གིས་སྨྲས་པ། འཕགས་པ་དག་བསྟན་པ་ལ་གཅིག་ཏུ་བརྩོན་པར་བགྱི་བ་ལགས་ན། ཅིའི་སླད་དུ་གློས་ཕབ་སྟེ་གཟིམས་ཤིང་དགེ་བའི་ཕྱོགས་ལ་ཏྲོན་མི་མཛད། བཞིན་བཟང་དག་ཁོ་བོ་ཅག་བཀྲེས་སོ། །འཕགས་པ་དག་ཞལ་ཚུས་གསོལ་ཅིག་།བཞིན་བཟངས་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ། །ཞེས་ཟེར
7.125a
བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལས་ཀྱི་དུས་མ་གཏོགས་སོ། །དགེ་སློང་གཞན་དག་ལམ་དུ་ཞུགས་པ་ན་བཀྲེས་པར་གྱུར་ནས་གློས་ཕབ་སྟེ་ཉལ་ཞིང་དགེ་བའི་ཕྱོགས་ལ་ཏྲོན་བྱེད་པར་མི་ནུས་པ་ན་བྲམ་ཟེ་དང་ཁྱིམ་བདག་དད་པ་ཅན་དག་ལྷགས་ནས་དེ་དག་གིས་སྨྲས་པ། འཕགས་པ་དག་བསྟན་པ་ལ་གཅིག་ཏུ་བརྩོན་པར་བགྱི་བ་ལགས་ན་ཅིའི་སླད་དུ་གློས་ཕབ་སྟེ་གཟིམས་ཤིང་དགེ་བའི་ཕྱོགས་ལ་ཏྲོན་མི་མཛད། བཞིན་བཟངས་དག་ཁོ་བོ་ཅག་བཀྲེས་སོ། །འཕགས་པ་དག་ཞལ་ཚུས་གསོལ་ཅིག་།བཞིན་བཟངས་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལམ་གྱི་དུས་མ་གཏོགས་སོ། །དེ་ནས་བཅོམ་ལྡན་འདས་ཡངས་པ་ཅན་དུ་ཅི་དགྱེས་པར་བཞུགས་ནས་མཉན་ཡོད་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེའི་ཀུན་དུ་སྤྱོད་པ་ནི་ཚེས་བརྒྱད་དང ། བཅུ་བཞི་ལ་བསྙེན་གནས་ལ་གནས་ཤིང་ཇི་སྲིད་དུ་དགེ་འདུན་བཀྲབས་པ་དག་ཟན་མ་ཟོས་པ་དེ་སྲིད་དུ་བདག་ཉིད་ཟན་ཟ་བར་མི་བྱེད་དོ། །ཁྱིམ་བདག་གཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གཤེགས་སོ། །ཁྱིམ་བདག་དེས་གཙུག་ལག་ཁང་དུ་མི་མངགས་ཏེ་སོང་ལ་དགེ་སློང་དག་སྤྱན་དྲོངས་ཤིག་དང་གདུགས་ཚོད་གསོལ་ལོ། །མི་དེ་གཙུག་ལག་ཁང་དུ་སོང་བ་དང ། ཇི་ཙམ་ན་དགེ་སློང་གཅིག་ཀྱང་མི་སྣང་ནས་དེ་ཕྱིར་ལོག་སྟེ་སྨྲས་པ། ཁྱིམ་བདག་དེ་ན་དགེ་སློང་མེད་དེ་བདག་གིས་གཅིག་ཀྱང་མ་མཐོང་ངོ ། །ཁྱིམ་བདག་དེས་སྨྲས་པ།
7.125b
སོང་ལ་གང་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་པ་དེ་ནས་དགེ་སློང་དག་སྤྱན་དྲོངས་ཤིག་དང་གདུགས་ཚོད་གསོལ་ལོ། །མི་དེ་དེར་སོང་བ་དང ། ཇི་ཙམ་ན་དགེ་སློང་དག་ཟན་ཟོས་ཏེ་ཕྱིར་བྱུང་བ་མཐོང་ནས་དེས་སྨྲས་པ། འཕགས་པ་དག་ཚུར་གཤེགས་ཁྱིམ་བདག་ཆེ་གེ་མོ་ཞིག་གི་སྡུམ་པར་གདུགས་ཚོད་གསོལ་བར་ཅི་གནང ། དགེ་སློང་རྣམས་ཀྱིས་སྨྲས་པ། ཁོ་བོ་ཅག་ཟན་ཟོས་ཟིན་ནོ། །མི་དེ་སོང་སྟེ་ཁྱིམ་བདག་དེ་ལ་སྨྲས་པ། ཁྱིམ་བདག་དགེ་སློང་དག་གི་ཞལ་ནས་ཁོ་བོ་ཅག་ཟན་ཟོས་ཟིན་ཏོ་ཞེས་བྱུང་ངོ ། །ཀཝའི་ནང་རྗེ་སོང་ལ་ཁྱིམ་བདག་གི་མཆིད་ནས་ཚུར་སྤྱོན་གདུགས་ཚོད་གསོལ་དང་རས་ཡུག་ཆེན་འབུལ་ལོ་ཞེས་བྱོས་ཤིག་།དེ་སོང་སྟེ་སྨྲས་པ། འཕགས་པ་དག་ཁྱིམ་བདག་གི་མཆིད་ནས་ཚུར་གཤེགས་གདུགས་ཚོད་གསོལ་དང་རས་ཡུག་ཆེན་འབུལ་ལོ་ཞེས་མཆིའོ། །དགེ་སློང་རྣམས་ཀྱིས་སྨྲས་པ། ཁོ་བོ་ཅག་གིས་སྤངས་སོ། །མི་དེ་སོང་སྟེ་ཁྱིམ་བདག་ལ་སྨྲས་པ། ཁྱིམ་བདག་དགེ་སློང་རྣམས་ཀྱི་ཞལ་ནས་བདག་ཅག་གིས་སྤངས་སོ་ཞེས་བྱུང་ངོ ། །ཁྱིམ་བདག་དེས་བདག་གིས་བཀྲབས་པའི་དགེ་འདུན་གྱིས་བཤོས་མ་གསོལ་ཏོ་ཞེས་ཟན་བཅད་པ་བསྒྲུབས་པ་དང ། དེའི་ངོས་ཀྱི་ཁྱིམ་ཚེས་དག་ཤཱཀྱའི་བུའི་དགེ་སྦྱོང་འདི་དག་གོས་བྱིན་ན་འང་ལོངས་སྤྱོད་པར་མི་བཏུབ་པས་ཁྱིམ་བདག་འདིས་དགེ་སློང་དག་གིས་ཟན་མ་ཟོས་པའི་ཕྱིར་ཟས་བཅད་པ་བྱས་སོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གོས་སྦྱིན་པའི་ཚེའི་དུས་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ
7.126a
སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་ཡང་ཟ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་སོ། །ལས་དུས་སོ། །ལམ་དུས་སོ། །གོས་སྦྱིན་པའི་ཚེ་དུས་ཏེ། དེ་ལ་དེ་ནི་དུས་ཡིན་ནོ། །ཡང་ཡང་ཟ་ན་ཞེས་བྱ་བ་ནི་ཡང་དང་ཡང་དུ་ཟ་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་དུས་ནི་འདི་ཡིན་ཏེ། ན་བ་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་ཟས་གཅིག་གིས་འཚོ་བར་མི་ནུས་ནའོ། །ལས་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་གིས་དགེ་འདུན་གྱི་འམ། མཆོད་རྟེན་གྱི་ལས་དེ་ལས་ཐ་ན་ཕྱག་དར་རེ་ལྡེ་ཙམ་བྱས་སམ། དཀྱིལ་འཁོར་བ་མལ་ཙམ་བྱས་ནའོ། །ལམ་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་དཔག་ཚད་ཕྱེད་དུ་སོང་ངམ། དེའི་ཕྱེད་དུ་སོང་སྟེ་ཕྱིར་ལོག་ནའོ། །གོས་སྦྱིན་པའི་ཚེ་དུས་ཏེ་ཞེས་བྱ་བ་ནི་རས་ཡུག་ཕྲན་ནམ། རས་ཡུག་ཆེན་ཐོབ་ནའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གོས་དང་བཅས་པ་དང ། གོས་མེད་པ་དང ། གོས་དང་བཅས་ཤིང་གོས་ཀྱི་རིན་དང་ཡང་བཅས་པ་དང ། གོས་མེད་ཅིང་གོས་ཀྱི་རིན་ཡང་མེད་པ་ལས་ཏེ། དེ་ལ་དགེ་སློང་གོས་དང་བཅས་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཡང་ཁས་བླང་བར་བྱ་ཞིང་གཉི་ག་ཡང་བཟའ་བར་བྱ་སྟེ། དེ་ཁེས་ལེན་པ་ལ་ཡང་ལྟུང་བ་མེད་ལ་ཟ་བ་ལ་ཡང་ལྟུང་བ་མེད་དོ། །དགེ་སློང་གོས་དང་བཅས་པ་མགྲོན་དུ་བོས་ཤིང་དེ་གོས་མེད་པ་གཞན
7.126b
དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་དང་བཅས་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་གཞན་དུ་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་དང་བཅས་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ལ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད
7.127a
པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་དང་བཅས་ཤིང་གོས་ཀྱི་རིན་དང་ཡང་བཅས་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་ལ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་དང་ཡང་བཅས་ཤིང་གོས་ཀྱི་རིན་དང་ཡང་བཅས་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་དང་བཅས་ཤིང་གོས་ཀྱི་རིན་དང་བཅས་པར་མགྲོན་དུ་བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་དང་བཅས་ཤིང་གོས་ཀྱི་རིན་དང་ཡང་བཅས་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ
7.127b
ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་བོས་ཤིང ། དེ་གོས་དང་བཅས་ཤིང་གོས་ཀྱི་རིན་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་ཟ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཡང་ཡང་ཟ་བའི་ལྟུང་བྱེད་དེ་སུམ་བཅུ་རྩ་གཅིག་པ་རྫོགས་སོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲགས་ཤིག་ན་ཁྱིམ་བདག་གཅིག་འདུག་པ་དེས་ཕྱོགས་བཞིའི་དགེ་སྦྱོང་དང ། བྲམ་ཟེ་རྣམས་ཀྱི་དོན་དུ་འདུག་གནས་བྱེད་དུ་བཅུག་སྟེ། དེ་འདུག་གནས་དེ་ན་ཕྱོགས་བཞིའི་དགེ་སྦྱོང་དང ། བྲམ་ཟེ་གང་འདུག་པ་དེ་ལ་བསོད་སྙོམས་ཀྱིས་མཁོ་བ
7.128a
སྟོབས་པར་བྱེད་དོ། །གང་གི་ཚེ་བཅོམ་ལྡན་འདས་ཀྱིས་མཉན་ཡོད་དུ་ཆོ་འཕྲུལ་ཆེན་པོ་རྣམ་པར་བསྟན་ཏེ། གཞན་མུ་སྟེགས་ཅན་དག་ཚར་བཅད་ཅིང་ལྷ་དང་མི་རྣམས་ཀུན་དུ་དགའ་བར་མཛད། སྐྱེ་བོ་མཛངས་པ་དག་གི་སྙིང་དག་རངས་པར་མཛད་པ་དེའི་ཚེ་ན་གཞན་མུ་སྟེགས་ཅན་དག་མཐའ་འཁོབ་དག་ན་རྟེན་ཅིང་གནས་སོ། །དུས་གཞན་ཞིག་ན་གཅེར་བུ་པ་དྲུག་བཅུ་རི་བྲགས་དེར་ལྷགས་ནས་དེ་དག་ཁྱིམ་བདག་དེའི་གན་དུ་དོང་སྟེ་འདི་སྐད་ཅེས་སྨྲས་སོ། །བཞིན་བཟང་ཆོས་ཐོབ་པར་གྱུར་ཅིག་།ཆོས་ཐོབ་པར་གྱུར་ཅིག་།ཁྱིམ་བདག་དེས་སྨྲས་པ། ཤེས་ལྡན་དག་རབ་ཏུ་བྱུང་བ་ཡིན་ནམ་ཅི། རབ་ཏུ་བྱུང་བ་དག་ཡིན་ནོ། །ཁྱིམ་བདག་གིས་སྨྲས་པ། མ་ནོངས་སྟེ་བདག་གིས་ཕྱོགས་བཞིའི་དགེ་སྦྱོང་དང ། བྲམ་ཟེ་རྣམས་ཀྱི་དོན་དུ་འདུག་གནས་བགྱིད་དུ་སྩལ་བ་དེར་བཞུགས་ཤིག་དང་བདག་གིས་ཁྱེད་ཅག་ལ་བསོད་སྙོམས་ཀྱིས་མཁོ་བ་བསྟབས་པར་བགྱིའོ། །དེ་དག་གིས་དེར་གནས་པར་བརྩམས་ནས་ཁྱིམ་བདག་དེ་དེ་དག་ལ་བསོད་སྙོམས་ཀྱིས་མཁོ་བ་སྟོབས་པར་བྱེད་དོ། །མཉན་ཡོད་ན་ཁྱིམ་བདག་དད་པ་ཅན་ཞིག་འདུག་པ་དེ་ཟོང་ཐོགས་ཏེ་རི་བྲགས་དེར་འོངས་ནས་དེ་ཁྱིམ་བདག་དེའི་ཚོང་ཁང་དུ་ཞུགས་ནས་ཁྱིམ་བདག་དེ་དེ་དང་ལྷན་ཅིག་པ་ཤེས་པར་གྱུར་ཏོ། །ཁྱིམ་བདག་དེས་གཅེར་བུ་པ་དེ་དག་ལ་བྲིམ་པར་བརྩམས་ནས་དེས་ཁྱིམ་བདག་དེའི་གན་དུ་མི་མངགས་ཏེ་གྲོགས་པོ་ཚུར་ཤོག་དང་སྦྱིན་གནས་དག་ལ་བྲིམ་པར་བྱའོ་ཞེས་སྦྲན་པ་དང ། ཁྱིམ་བདག་དེ་དད་པ་ཅན་ཡིན་པས་དེས་བསམས་པ། བཅོམ་ལྡན་འདས་ཀྱི་ཉན་ཐོས་དག་ཡིན་གོར་མ་ཆག་གིས་སོང་ལ་བལྟའོ་སྙམ་ནས། དེ་དེར་སོང་བ་དང ། ཇི་ཙམ་ན་གཅེར་བུ་པ་ངོ་ཚ་དང་ཁྲེལ་བོར་བ་ཤ་སྟག་ཡིན་པར་མཐོང་ནས་མངོན་སུམ་དུ་མི་སྙན་པ་བརྗོད་པ་ནི་སྡུག་བསྔལ་བ་ཡིན་པས་དེ་ཅང་མི་སྨྲ་བར་འདུག་གོ། །གཅེར་བུ་པ་དག་གིས་ཟན་ཟོས་ཏེ་སོང་ནས་ཁྱིམ་བདག་དེས་དེ་ལ་སྨྲས་པ། གྲོགས་པོ་ས་བོན་བཟང་ཞིང་ཞིང་ས་བཟང་ངམ་དེས་སྨྲས་པ། གྲོགས་པོ་ས་བོན་བཟང་ན། ཞིང་ནི་གཅེར་བུ་པ་ངོ་ཚ་དང་ཁྲེལ་བོར་བ་སྡིག་པའི་ལྟ་བ་ཅན་དགོན་དུང་ཚཝ་རྒོ་ཅན་ཐ་ཆད་སྡིག་པ་ཅན་གྱི་ས་གཞི་ཤ་སྟག་ཡིན་ནོ། །ཁྱིམ་བདག་གིས་སྨྲས
7.128b
པ། གྲོགས་པོ་ཞིང་བཟང་པོ་གཞན་འགའ་ཡོད་དམ། དེས་སྨྲས་པ། ཡོད་དེ། བཅོམ་ལྡན་འདས་ཀྱི་ཉན་ཐོས་དག་གོ། །ཁྱིམ་བདག་གིས་སྨྲས་པ། གལ་ཏེ་དེ་དག་འདིར་བྱོན་ན་བདག་གིས་དེ་དག་ལ་བསོད་སྙོམས་ཀྱིས་མཁོ་བ་བསྟབས་པར་བྱའོ། །ཁྱིམ་བདག་དེ་ཟོང་བསྒྱུར་ཏེ་རིན་བླངས་ནས་མཉན་ཡོད་དུ་ཕྱིན་པ་དང ། དེས་ཟོང་དག་ཚོང་ཁང་དུ་མཁོས་སུ་ཕབ་ནས་རྒྱལ་བྱེད་ཀྱི་ཚལ་དུ་སོང་ངོ ། །དྲུག་སྡེ་དག་གི་ཀུན་ཏུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང ། ཁྱིམ་བདག་འོངས་ཤིང་ལྷག་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་སྒྲགས་པར་བྱའོ། །སྙམ་པས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས། ཚེ་དང་ལྡན་པ་ཉེ་དགའ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །ཉེ་དགས་ཁྱིམ་བདག་དེ་ཐག་རིང་པོ་ཁོ་ན་ནས་མཐོང་ནས་སྨྲས་པ། ཁྱིམ་བདག་འོངས་པ་ལེགས་སོ་འོངས་པ་ལེགས་སོ། །ཁྱོད་གང་ནས་ཟླ་བ་བཞིན་དུ་ཡུན་རིང་མོ་རིང་མོ་ནས་འཁོད་ཅིང་འོངས། དེས་སྨྲས་པ། འཕགས་པ་རི་བྲགས་ག་གེ་མོ་ཞིག་ན། ཁྱིམ་བདག་ཆེ་གེ་མོ་ཞིག་མཆིས་པ་དེས་ཕྱོགས་བཞིའི་དགེ་སྦྱོང་དང ། བྲམ་ཟེ་རྣམས་ཀྱི་དོན་དུ་འདུག་གནས་བགྱིད་དུ་སྩལ་ནས་དེ་བཅོམ་ལྡན་འདས་ཀྱི་ཉན་ཐོས་དག་མཐོང་བར་འཚལ་ལོ། །ཉེ་དགས་བསམས་པ། གལ་ཏེ་ལྷུང་བཟེད་ནག་པོ་ཅན་འགའ་ཞིག་གིས་ཐོས་པར་གྱུར་ན། དེ་ཤིན་དུ་མྱུར་བར་དེར་འགྲོ་བར་འགྱུར་བས་བདག་གིས་ཁྱིམ་བདག་འདི་སྨད་ན་ལྷུང་བཟེད་ནག་པོ་ཅན་འགའ་ལ་ཡང་བརྗོད་པར་མི་འགྱུར་རོ་སྙམས་ནས་དེས་ཁྱིམ་བདག་དེ་ལ་སྨྲས་པ། ཁྱོད་ཀྱི་སྙིང་ལམ་ན་ཁོ་བོ་ཅག་ཟན་སུས་སྦྱིན་པར་འགྱུར། གོས་སུས་སྦྱིན་པར་འགྱུར་སྙམས་པ་ལས་གཞན་པ་བསམ་གཏན་ནམ། ཀླག་པ་འགའ་ཡང་མི་སེམས་སྙམ་འམ། ཁྱིམ་བདག་དེས་བསམས་པ། འདོད་པའི་བདག་ཉིད་ཅན་གང་དག་ཡིན་པ
7.129a
དེ་དག་གི་ནང་ན་ཉེ་དགའ་ལས་ལྷག་པ་མེད་ན་འདིས་ཀྱང་རེ་ཤིག་བདག་སྨད་པར་གྱུར་ན། གལ་ཏེ་བདག་གིས་དགེ་སློང་རང་བཞིན་དུ་གནས་པ་གཞན་དག་ལ་བརྗོད་པར་གྱུར་ན་དེ་དག་གིས་བདག་རྒྱ་ཆེར་སྨད་པར་འགྱུར་རོ་སྙམ་ནས་དེ་ཅང་མི་སྨྲ་བར་འདུག་གོ། །ཉེ་དགས་ཀྱང་ཁྱིམ་བདག་དེ་སྨད་ནས་དྲུག་སྡེ་དག་གི་གན་དུ་སོང་སྟེ་སྨྲས་པ། ཚེ་དང་ལྡན་པ་དག་བདག་ཅག་གིས་ཡུན་ཇི་སྲིད་ཀྱིས་ཕོངས་པ་སྤོང་བར་བྱ། དེ་དག་གིས་སྨྲས་པ། ཁྱོད་ཀྱི་ཐོས་པ་ཅུང་ཞིག་ཡོད་དམ། ཡོད་དེ་རི་བྲགས་ག་གེ་མོ་ཞིག་ན་ཁྱིམ་བདག་ཆེ་གེ་མོ་ཞིག་འདུག་པ་དེས་ཕྱོག་བཞིའི་དགེ་སྦྱོང་དང ། བྲམ་ཟེ་རྣམས་ཀྱི་དོན་དུ་འདུག་གནས་བྱེད་དུ་བཅུག་ནས། དེ་ན་གང་དག་འདུག་པ་དེ་དག་ལ་དེ་ཆོས་གོས་དང ། བསོད་སྙོམས་གྱིས་མཁོ་བ་སྟོབས་པར་བྱེད་ཀྱིས་དེར་འདོང་ངོ ། །དེ་དག་གིས་སྨྲས་པ། ཅི་ཐམས་ཅད་འདོང་ངམ། ཉེ་དགས་སྨྲས་པ། མི་དྲུག་ཁོ་ན་འདོང་ངོ ། །དེ་ལྟར་བྱའོ་ཞེས་དེ་དག་རི་བྲགས་ག་ལ་བ་དེར་རྒྱུ་ཞིང་དོང་ངོ ། །གཅེར་བུ་པ་དེ་དག་གིས་སྨྲས་པ། ཤེས་པ་ཅན་དག་སྤྱོད་ཡུལ་རྗེས་སུ་འཇུག་པར་བྱས་འདོང་ངོ ། །ཞེས་དེ་དག་གིས་འདུག་གནས་དེར་སྲུངས་མ་གཅེར་བུ་པ་གཅིག་བཞག་སྟེ་གཞན་དུ་དོང་ངོ ། །དྲུག་སྡེ་དག་ཀྱང་མཐར་གྱིས་རྒྱུ་ཞིང་འདོང་བ་ན་རི་བྲགས་དེར་ཕྱིན་ནས་དེ་དག་ཁྱིམ་བདག་དེའི་གན་དུ་དོང་སྟེ་སྨྲས་པ། ཁྱིམ་བདག་ཨ་རོག་ཁྱ་ཨ་རོག་ཁྱ། ཁྱིམ་བདག་གིས་སྨྲས་པ། ཁྱེད་ཅག་སུ་ཡིན། བཅོམ་ལྡན་འདས་ཀྱི་ཉན་ཐོས་དག་གོ། །ཁྱིམ་བདག་གིས་སྨྲས་པ། མ་ནོངས་ཏེ་བདག་ཅག་ཀྱང་བཅོམ་ལྡན་འདས་ཀྱི་ཉན་ཐོས་དག་མཐོང་བར་འཚལ་ན་ཁྱེད་ཅག་ཀྱང་བྱོན་ཏོ། །འཕགས་པ་དག་བདག་གིས་ཕྱོག་བཞིའི་དགེ་སྦྱོང་དང ། བྲམ་ཟེ་རྣམས་ཀྱི་དོན་དུ་འདུག་གནས་བགྱིད་དུ་སྩལ་བ་དེར་བཞུགས་ཤིག་དང་བདག་གིས་ཁྱེད་ཅག་ལ་བསོད་སྙོམས་ཀྱིས
7.129b
མཁོ་བ་བསྟབས་པར་བགྱིའོ། །དྲུག་སྡེ་དག་གིས་སྨྲས་པ། གནས་མལ་ཁྲི་འམ། ཁྲིའུ་ཅུང་ཟད་ཡོད་དམ། ཁྱིམ་བདག་གིས་སྨྲས་པ། མ་མཆིས་སོ། །དྲུག་སྡེ་དག་གིས་སྨྲས་པ། ཁྱིམ་བདག་ཁོ་བོ་ཅག་ས་ལ་གནས་མལ་འཆའ་བར་མི་བྱེད་དོ། །ཁྱིམ་བདག་དེས་དེར་གནས་མལ་བཙལ་ནས་ཁྲི་དང་ཁྲིའུ་དག་འདུག་གནས་དེར་བསྐུར་རོ། །གཅེར་བུ་པ་དེས་སྨྲས་པ། ཀྱེ་ཤཱཀྱའི་བུའི་དགེ་སྦྱོང་དག་འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་ན་ཁྱེད་ཅག་འདིར་གར་འཇུག་།དྲུག་སྡེ་དག་གིས་སྨྲས་པ། ཀཝའི་ཤེས་པ་ཅན་ཅི་ཟེར། འདི་ཁོ་བོ་ཅག་གི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་ནོ་ཞེས་མ་ཟེར་ཅིག་།གལ་ཏེ་འདུག་ན་ནི་འདུག་ཏུ་ཟད། གལ་ཏེ་མི་འདུག་ན་ཁྱོད་ལ་མཚམས་ཆེན་པོ་གཅད་པར་བྱའོ། །གཅེར་བུ་པ་དེས་བསམས་པ། འདི་དག་ནི་མི་དྲུག་ཡོད་ལ། བདག་ནི་གཅིག་པུ་ཡིན་པས་བདག་གིས་འདི་དག་ལ་ཅི་ཡང་བྱ་བར་མི་ནུས་པས་འདི་དག་གིས་བདག་ལ་གནོད་པ་བྱས་པར་གྱུར་ན་མི་རུང་ངོ་སྙམ་ནས་དེ་སྐྲག་སྟེ་བྲོས་སོ། །དྲུག་སྡེ་དག་ཉི་མ་རེ་རེ་ཞིང་ཁྱིམ་བདག་དེའི་ཁྱིམ་དུ་དོང་སྟེ་ཟ་བར་བྱེད་དོ། །དུས་གཞན་ཞིག་ན་ཁྱིམ་བདག་དེ་ལ་རི་བྲགས་གཞན་ཞིག་ཏུ་བྱ་བ་ཅུང་ཞིག་བྱུང་ནས་དེས་དྲུག་སྡེ་དག་ལ་སྨྲས་པ། འཕགས་པ་དག་བདག་ལ་རི་བྲགས་གཞན་ཞིག་ཏུ་བགྱི་བ་ཅུང་ཞིག་བྱུང་སྟེ་བདག་དེར་མཆི་ཡིས་ཁྱེད་ཅག་བདག་གི་སྡུམ་པ་ན་ཇི་ལྟར་གསོལ་བ་དེ་བཞིན་དུ་བདག་སླར་མཆིས་ཀྱི་བར་དུ་གསོལ་ཅིག་།དྲུག་སྡེ་དག་གིས་སྨྲས་པ། དེ་ལྟར་བྱའོ། །ཁྱིམ་བདག་དེས་ནང་མི་ལ་སྨྲས་པ། ཁྱོད་ཀྱིས་འཕགས་པ་དག་ལ་ཇི་ལྟར་བསྙེན་བཀུར་བྱས་པ་དེ་བཞིན་དུ་ཁོ་བོ་ཕྱིར་འོངས་ཀྱི་བར་དུ་ཡང་གྱིས་ཤིག་།དེ་རི་བྲགས་དེར་སོང་བ་དང་དྲུག་སྡེ་དག་ཉི་མ་རེ་རེ་ཞིང་དེར་དོང་སྟེ་དེ་བཞིན་དུ་ཟ་བར་བྱེད་པ་ན་དེ་དག་གིས་སྨྲས་པ། དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ
7.130a
གྱིས་འཁོད་པར་བྱ། རང་གིས་སྤྱོད་ལམ་བསྟན་པར་བྱའོ། །དེ་ལྟར་བྱའོ་ཞེས་དེ་དག་གིས་སྨས་པ། དགའ་བོ་ཉེ་དགའ་བུད་མེད་འདིའི་མིག་དག་དང ། རྣ་བ་དག་དང ། སོ་དག་དང ། མཆུ་དག་དང ། ནུ་མ་དག་དང ། རྐེད་པ་དག་དང ། བརླ་དག་དང་རྐང་པ་དག་མཛེས་པ་ལ་ལྟོས་ཤིག་།ལྟོས་ཤིག་།བུད་མེད་དེ་ངོ་ཚ་ནས་གནས་ཁང་དུ་ཞུགས་ཏེ་འདུག་གོ། །ཁྱིམ་བདག་དེ་ཡང་རི་བྲགས་དེ་ནས་འོངས་ནས་དེས་ནང་མི་ལ་དྲིས་པ། ཁྱོད་ཀྱིས་སྦྱིན་གནས་དག་བྱོན་ནས་དེ་བཞིན་དུ་གསོལ་གཏམ། དེས་སྨྲས་པ། འདི་འདྲ་བའི་སྦྱིན་གནས་དག་ནི་འགའ་ཡང་མ་མཆིས་ཀྱང་མི་དོང་འོ། །བདག་གིས་དྭི་དག་དང ། རོལ་མོ་མཁན་དག་དང ། ནལ་གྱི་བུ་དག་ལས་ཀྱང་སྔོན་ལན་འགའ་ཡང་མ་ཐོས་པའི་ཚིག་དག་ཁྱོད་ཀྱི་སྦྱིན་གནས་དག་ལས་ཐོས་སོ། །ཁྱིམ་བདག་དེས་བསམས་པ། བུད་མེད་ཀྱི་ཡུལ་དག་ནི་སྐྱེས་པ་ལ་སེམས་པ་ཡིན་པས་གཅེར་བུ་པ་སྒྲེན་མོ་དག་ཞུགས་པ། དེ་དག་མཐོང་བ་ན་ཆགས་པར་འགྱུར་གྱི། བཅོམ་ལྡན་འདས་ཀྱི་ཉན་ཐོས་ཤམ་ཐབས་ལེགས་པར་བགོས་པ། ཆོས་གོས་ལེགས་པར་བགོས་པ་དེ་དག་ལ་འདི་མི་དགའོ་སྙམ་ནས་དེས་དེ་ལ་སྨྲས་པ། ཁྱོད་གཅེར་བུ་ལ་སྒྲེན་མོ་དག་ལ་དགའི། བཅོམ་ལྡན་འདས་ཀྱི་ཉན་ཐོས་ཤམས་ཐབས་ལེགས་པར་བགོས་པ། ཆོས་གོས་ལེགས་པར་བགོས་པ་དག་ལ་ཁྱོད་དགའ་བར་ག་ལ་འགྱུར། ཆུང་མས་སྨྲས་པ། རྗེའི་སྲས་གལ་ཏེ་ཁྱོད་བདག་ལ་ཐུག་མི་ཆེས་ན་བདག་གིས་ཁྱོད་ཀྱི་མངོན་སུམ་དུ་འགྱུར་བར་བགྱིའོ། །ཁྱིམ་བདག་གིས་བསམས་པ། ཇེ་བགམ་པར་བྱའོ་སྙམ་ནས་དེ་ཉི་མ་ཉུང་ཤས་ཤིག་འདུག་ནས་དྲུག་སྡེ་དག་ལ་སྨྲས་པ། འཕགས་པ་དག་ཡང་བདག་ལ་རི་བྲགས་དེར་བགྱི་བ་ཅུང་ཞིག་བྱུང་སྟེ། བདག་དེར་མཆི་ཡིས་ཁྱེད་ཅག་བདག་གིས་སྡུམ་པ་ན་ཇི་ལྟར་གསོལ་བ་དེ་བཞིན་དུ་བདག་སླར་མཆིས་ཀྱི་བར་དུ་གསོལ་ཅིག་།དྲུག་སྡེ་དག་གིས་སྨྲས་པ། དེ་ལྟར་བྱའོ། །ཁྱིམ་བདག་དེ་ཡང་གནས་ཁང་དུ་ཞུགས་ཏེ་འདུག་པ་དང ། དྲུག་སྡེ་དག་ཀྱང་དེ་བཞིན་དུ་དེའི་ཁྱིམ་དུ་ཞུགས
7.130b
ཏེ་ཁོད་ནས། དེ་དག་ལ་དེའི་ཆུང་མ་དེས་བྲིམ་པར་བརྩམས་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བུད་མེད་འདིའི་མིག་དག་དང ། རྣ་བ་དག་དང ། སོ་དག་དང ། མཆུ་དག་དང ། ནུ་མ་དག་དང ། རྐེད་པ་དག་དང ། བརླ་དག་དང ། རྐང་པ་དག་མཛེས་པ་ལ་ལྟོས་ཤིག་ལྟོས་ཤིག་།ཁྱིམ་བདག་དེས་དེ་ཐོས་ནས་བསམས་པ། བདག་གིས་འཕྲལ་ཁོ་ན་ལ་འདི་དག་གི་བསོད་སྙོམས་གཅད་པ་ནི་བདག་གི་ཚུལ་དང་འཐུན་པ་མ་ཡིན་གྱིས་ཐབས་ཀྱི་རྣམ་པ་ཞིག་བྱའོ། །སྙམ་ནས་དེས་དེའི་ཉིན་མོ་ཁུར་བ་གཅིག་ཕྲི་བ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་སྤྱོད་ཡུལ་ཚིག་གོ་ཞེས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་མུ་ལྟོ་བ་དག་ལ་ཁུར་བ་གཅིག་སྦྱིན་པར་བྱ་བ་དེ་དེང་ཕྱིན་ཅད་སྦྱིན་དུ་མེད་དོ། །དེ་ཕྱི་དེ་ཉིན་པར་ཁུར་བ་གཉིས་པ་ཕྲི་བ་དང ། དེ་དག་གིས་སྨྲས་པ། དགའ་བོ་ཉེ་དགའ་སྤྱོད་ཡུལ་ཚིག་གོ་ཞེས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་ཁུར་བ་གཞན་གཅིག་ལྷུང་བཟེད་ཀྱི་འོག་གཞིར་དོར་བ་དེ་ཡང་དེང་ཕྱིན་ཅད་དོར་དུ་མེད་དོ། །དེ་བཞིན་དུ་རིམ་གྱིས་ཇི་ཙམ་ན་འབྲས་ཆན་རྩུབ་པོ་དང ། རྩབ་མོ་བསྐོལ་བ་དག་སྦྱིན་པར་བརྩམས་པ་དང ། དེ་དག་གིས་སྨྲས་པ། དགའ་བོ་ཉེ་དགའ་སྤྱོད་ཡུལ་ཚིག་གོ། །ཡང་སྨྲས་པ། འདིར་ཇི་ལྟར་ཚིག་།བདག་ཅག་སྒོ་འཕར་བརྒྱ་སྙེད་འདས་ཀྱང་ལྟོ་ཁེངས་པ་བསྒྲུབས་པར་དཀའ་ན། ད་ལྟར་འདི་ན་བདག་ཅག་གྲིབ་མ་བསིལ་བ་དག་ལ་འཁོད་དུ་ཡོད་ན་འབྲས་ཆན་རྩུབ་པོ་དང ། རྩབས་བསྐོལ་བ་ཡང་མི་འདོད་དམ། གཅེར་བུ་པ་དེས་ཀྱང་འཁོར་འཁོར་ནས་གཅེར་བུ་པ་དེ་དག་མཐོང་ནས་སྨྲས་པ། ཤེས་པ་ཅན་དག་བདག་ཅག་གི་སྤྱོད་ཡུལ་ཕྲོགས་ཀྱིས་ཕྱིར་ཁུག་ཤིག་།དེ་དག་གིས་སྨྲས་པ། ཁྱོད་འདུག་གནས་བོར་ཏེ་འདིར་གར་འོང ། དེས་སྨྲས་པ། ཁོ་བོ་དེ་ནས་བསྐྲད་དོ། །སུས་ཤཱཀྱའི་བུའི་དགེ་སྦྱོང་དག་གིས་སོ། །དེ་དག་གིས་སྨྲས་པ། ཤཱཀྱའི་བུའི་དགེ་སྦྱོང་ཇི་སྙེད་ལྷག་དེས་སྨྲས་པ་མི་དྲུག་གོ། །དེ་དག་གིས་སྨྲས
7.131a
པ་བདག་ཅག་མི་དྲུག་བཅུ་ཡོད་ན་དེ་དག་ཤིན་དུ་བརྡེགས་ཏེ་བསྐྲད་པར་མི་ནུས་སམ། ཚུར་ཤེག་འདོང་ངོ ། །བདག་ཅག་གིས་ཤེས་པ་ཅན་རེམ་ཤིག་ཅེས་བརྗོད་པ་ན་དྲུག་སྡེ་རེ་རེ་ལ་བདག་ཅག་མི་བཅུ་བཅུ་རུབ་སྟེ་ཤིན་དུ་བརྡེག་པར་བྱའོ། །དེ་དག་གིས་སྨྲས་པ། ཇེ་ཁྱིམ་བདག་ལ་དྲི་བར་བྱ་སྙམ། དེ་ལྟར་བྱའོ་ཞེས་དེ་དག་ཁྱིམ་བདག་གི་གན་དུ་དོང་སྟེ་སྨྲས་པ། ཁྱིམ་བདག་ཁྱོད་ཀྱི་འདུག་གནས་སུ་ལ་ཕུལ། སུ་ལ་ཡང་མ་ཕུལ་ཏེ། འདི་ལྟར་གང་དེ་ན་འདུག་པ་དེ་ལ་བདག་བསོད་སྙོམས་ཀྱིས་མཁོ་བ་སྟོབས་པར་བྱེད་དོ། །དེ་དག་གིས་སྨྲས་པ། ཁྱིམ་བདག་ནི་རེ་ཤིག་དབུས་ན་གནས་པ་ཡིན་ནོ་ཞེས་དེ་དག་འདུག་གནས་སུ་དོང་ནས་དྲུག་སྡེ་དག་ལ་སྨྲས་པ། ཀཝའི་ཤཱཀྱའི་བུའི་དགེ་སྦྱོང་དག་ཁྱེད་གང་ནས་ལྷགས་ཏེ་འདིར་འཁོད། འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་གྱིས་ཕྱིར་བྱུང་ཤིག་།གལ་ཏེ་བྱུང་ན་ནི་བྱུང་དུ་ཟད། མི་བྱུང་ན་ཁོ་བོ་ཅག་གི་ཁྱེད་ལ་མཚམ་ཆེན་པོ་གཅད་པར་བྱའོ། །དྲུག་སྡེ་དག་གིས་སྨྲས་པ། ཀཝའི་གཅེར་བུ་པ་སྒྲེ་བྱི་དག་ཅི་ཟེར། འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་གྱིས་ཕྱིར་བྱུང་ཤིག་ཅེས་མ་ཟེར་ཅིག་།གལ་ཏེ་འཁོད་ན་ནི་འཁོད་དུ་ཟད། གལ་ཏེ་མི་འཁོད་ན་ཁོ་བོ་ཅག་གིས་ཁྱེད་ལ་འཚམ་ཆེན་པོ་གཅད་པར་བྱའོ། །གཅེར་བུ་པ་དག་གིས་ཤེས་པ་ཅན་རེམ་ཤིག་ཅེས་སྨྲས་ནས་དྲུག་སྡེ་རེ་རེ་ལ་གཅེར་བུ་པ་བཅུ་བཅུ་རུབ་སྟེ། དེ་དག་གིས་བརྡེག་པར་བརྩམས་པ་དང ། དྲུག་སྡེ་དག་གིས་སྨྲས་པ་དང ། དགའ་བོ་ཉེ་དགའ་ཚང་པ་མཚུངས་པར་སྤྱོད་པ་དག་གིས་སྨད་པར་གྱུར་ན་མི་རུང་གིས་མིག་དག་དང ། རྣ་བ་དག་སྲུངས་ཤིག་ཅེས་དེ་དག་གིས་སྨྲས་པ། སྒྲེ་བྱི་དག་ཕོད་ཡང་དག་ན་ཕྱོགས་འདིར་སྣུན་ཅིག་ཅེས་རྐུབ་ཚོས་ལ་སོག་པ་བསྟན་ཏེ་དེ་དག་བརྡེག་ཏུ་བཅུག་གོ། །གང་གི་ཚེ་གཅེར་པུ་པ་དག་ངལ་བར་གྱུར་ཅིང་རྡེག་མི་ནུས་པ་དེའི་ཚེ་ན་དྲུག་སྡེ་དག་གིས་ཚེ་དང་ལྡན་པ་དག་ཤིན་ཏུ་རེམ་ཤིག་ཅེས་དྲུག་སྡེ་རེ་རེས་ཀྱང་ལག་ངར་བརྐྱང་པས་ཀྱང་གཅེར་བུ་པ་ལྔ་ལྔ་ས་ལ་བརྡབས་ཤིང ། ལག་ངར་བསྐུམས་པས་ཀྱང་གཅེར
7.131b
བུ་པ་ལྔ་ལྔ་ས་ལ་བརྡབས་ནས་དེ་དག་ཤིན་དུ་བརྡེག་པར་བརྩམས་ཏེ་སྨྲས་པ། དགའ་བོ་ཉེ་དགའ་ཕམ་པར་འགྱུར་བའི་ལྟུང་བ་བྱུང་བར་གྱུར་ན་མི་རུང་གིས་རྩ་བའི་ལྟུང་བ་སྲུངས་ཤིག་ཅེས་དྲུག་སྡེ་དག་གིས་དེ་དག་རྒྱ་ལྕག་དག་དང་ཁུ་ཚུར་དག་དང་རྡོག་པ་དག་དང ། ལྕུག་མ་དག་གིས་ཤིན་དུ་གཏལ་ཅིང་བྲིམ་ནས། དེ་དག་གིས་གཅེར་བུ་པ་དག་རྡེག་བཞིན་དུ་འདུག་གནས་ཀྱིས་ནང་ནས་ཕྱི་རོལ་ཏུ་འཛིངས་ཏེ་བྱུང་བ་དང ། བྲམ་ཟེ་དང ། ཁྱིམ་བདག་དག་གིས་དེ་དག་མཐོང་ནས་དེ་དག་གིས་སྨྲས་པ། ཤེས་ལྡན་དག་ལྟོས་ཤིག་ལྟོས་ཤིག་དགེ་སྦྱོང་གཡུལ་འགྱེད་པས་ཆར་འབབས་པར་འགྱུར་རོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་སྤྱོད་ཡུལ་ཚིག་ཅིང་མེ་མདག་ཞི་བར་མ་གྱུར་གྱི་ཚུར་ཤིག་མཉན་ཡོད་དུ་འདོང་ངོ་ལྷོ་ནས་འཇིག་རྟེན་རྒྱང་པན་པའི་རྒོལ་བ་འཆར་ཀ་ཞེས་བྱ་བ་མཉན་ཡོད་དུ་འོངས་ནས་དེ་འགྱེད་འདོད་པའི་འགྱེད་པའི་ཡོ་བྱད་ཀྱི་ཕྱིར་ཚེ་དང་ལྡན་པ་ཀུན་ཤེས་ཀཽཎྜི་ནྱའི་དྲུང་དུ་སོང་ཏེ་སྨྲས་པ། ཀྱེ་དགེ་སློང་ཁོ་བོས་བླ་མ་ལས་ཡི་གེ་ཉུང་ཤས་ཤིག་བླང་ཏེ་དེའི་ཕྱིར་ཁོ་བོ་ཁྱོད་དང་ལྷན་ཅིག་གཏམ་རྣམ་པར་གཏན་ལ་དབབ་པ་བྱེད་པར་འདོད་དོ། །ཚེ་དང་ལྡན་པ་ཀུན་ཤེས་ཀཽཎྜི་ནྱས་སྨྲས་པ། བྲམ་ཟེ་ཁོ་བོ་ཁྱོད་དང་འགྱེད་པར་མི་འདོད་ཀྱིས་སོང་ཤིག་།དེ་ནས་འཇིག་རྟེན་རྒྱང་པན་པ་དེ་ཚེ་དང་ལྡན་པ་རྟ་ཐུལ་དང ། བཟང་ལྡན་དང ། རླངས་པ་དང ། མིང་ཆེན་དང ། གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟངས་ག་ལ་བ་དེར་སོང་ཏེ་དེ་དག་ལ་སྨྲས་པ། ཀྱེ་དགེ་སློང་ཁོ་བོས་བླ་མ་ལས་ཡི་གེ་ཉུང་ཤས་ཤིག་བླངས་ཏེ་དེའི་ཕྱིར་ཁོ་བོ་ཁྱོད་དང་ལྷན་ཅིག་གཏམ་རྣམ་པར་གཏན་ལ་དབབ་པར་བྱེད་པར་འདོད་དོ། །དེ་དག་གིས་སྨྲས་པ། བྲམ་ཟེ་ཁོ་བོ་ཅག་ཁྱོད་དང་འགྱེད་པར་མི་འདོད་ཀྱིས་སོང་ཤིག་།དེ་ནས་འཇིག་རྟེན་རྒྱང་པན་པ་དེ་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཀྱེ་དགེ་སློང་ཁོ་བོས་བླ་མ་ལས་ཡི་གེ་ཉུང་ཤེས་ཤིག་བླངས་ཏེ་དེའི་ཕྱིར་ཁོ་བོས་ཁྱོད་དང་ལྷན་ཅིག་གཏམ་རྣམ་པར་གཏན་ལ་དབབ་པ་བྱེད་པར་འདོད་དོ། །ཚེ་དང་ལྡན་པ་ཤ་རིའི་བུས་འདི་ལ་དགེ་བའི་རྩ་བ་དག
7.132a
ཅུང་ཟད་ཡོད་དམ་སྙམ་དུ་བསམས་ན་ཡོད་པར་མཐོང་ངོ ། །སུ་ལ་རག་ལས་སྙམ་ན། བདག་ཉིད་ལ་རག་ལས་པར་མཐོང་ངོ ། །འགྱེད་པས་འདུལ་བ་ཡིན་ནམ་སྙམ་ན། ཡིན་པར་མཐོང་ངོ ། །ཡུན་ཇི་སྲིད་ཀྱིས་འདུལ་བར་འགྱུར་སྙམ་ན། ཞག་བདུན་འདས་ནས་འདུལ་བར་འགྱུར་བར་མཐོང་ནས་ཚེ་དང་ལྡན་པ་ཤཱ་རིའི་བུས་སྨྲས་པ། བྲམ་ཟེ་ཚུར་ཤོག་དེ་ལྟར་བྱའོ་ཞེས་དེ་ཉི་མ་དང་པོ་ལ་འགྱེད་པ་ལྷག་མ་དང་བཅས་པར་བཏང་ངོ ། །ཕྱི་དེ་ཉིན་པར་ཡང་འགྱེད་པ་ལྷག་མ་དང་བཅས་པར་བཏང་ངོ ། །དེ་བཞིན་དུ་ཉི་མ་བདུན་པའི་བར་དུ་ཡང་འགྱེད་པ་ལྷག་མ་དང་བཅས་པར་བཏང་ངོ ། །ཐམས་ཅད་དུ་ལྷོ་ལམ་ནས་འཇིག་རྟེན་རྒྱང་པན་པའི་རྒོལ་བ་འཆར་ཀ་ཞེས་བྱ་བ་འོངས་ནས། དེ་དང་འཕགས་པ་ཤཱ་རིའི་བུ་གཉིས་ཉི་མ་བདུན་པ་དེང་གི་བར་དུ་བཀྱེ་ན། ཅིག་གིས་ཀྱང་ཚར་མ་བཅོད་ལ་གཉིས་པས་ཀྱང་ཚར་མ་ཆོད་དོ་ཞེས་སྒྲ་གྲགས་ནས་སྲོགས་ཆགས་འབུམ་ཕྲག་དུ་མ་དག་ཁ་ཅིག་ནི་ལྟད་མོ་སྐྱེས་པ་དང ། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེར་འདུས་པར་གྱུར་ནས་ཚེ་དང་ལྡན་པ་ཤཱ་རིའི་བུ་བསམས་པ། བདག་འགྱེད་པས་འདུལ་བ་དག་འདུས་སམ་སྙམ་ན། འདུས་པར་མཐོང་ནས་ཚེ་དང་ལྡན་པ་ཤཱ་རིའི་བུས་འཇིག་རྟེན་རྒྱང་པན་པ་དེ་ཕམ་པར་བྱས་ཤིང་རྡུག་པར་བྱས་ཏེ་འགྱེད་པ་ལྷག་མ་མ་ལུས་པར་བཏང་ནས་འཇིག་རྟེན་རྒྱང་པན་པ་ཀུན་དུ་རྒྱུ་འཆར་ཀ་ཚར་བཅད་པ་དང ། དེ་ཡང་དད་པར་གྱུར་ནས་སྨྲས་པ། བཙུན་པ་ཤཱ་རིའི་བུ་བདག་གིས་བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་ན་བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །ཚེ་དང་ལྡན་པ་ཤཱ་རིའི་བུས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་སོ། །དེ་དེ་ལྟར་རབ་ཏུ་ཕྱུང་ནས་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ་ཚང་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན
7.132b
སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚང་པར་སྤྱོད་པ་སྤྱད་དོ་བྱ་བ་བྱས་སོ་སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུར་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང ། བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་འཁོར་དེ་ཚེ་དང་ལྡན་པ་ཤཱ་རིའི་བུས་འདི་ལྟ་བུའི་རྒོལ་བ་ཚར་བཅད་དོ་ཞེས་ཡ་མཚན་སྐྱེས་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་འཁོར་དེའི་བསམས་པ་དང ། བག་ལ་ཉལ་བ་དང ། ཁམས་དང ། རང་བཞིན་ཤེས་ནས་འདི་ལྟར་སྲོགས་ཆགས་འབུམ་ཕྲག་དུ་མ་དག་གིས་བདེན་པ་དག་མཐོང་ཞིང་ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱས་ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་ཏེ་ཉོན་མོང་པ་ཐམས་ཅད་སྤངས་སྟེ་དགྲ་བཅོམ་པ་ཉིད་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་བཞག་གོ། །ཚེ་དང་ལྡན་པ་ཤཱ་རིའི་བུས་འཇིག་རྟེན་རྒྱང་པན་པ་འཆར་ཀ་སྔ་དྲོ་ཚར་བཅད་ནས་ཕྱི་དྲོ་དྲུག་སྡེ་དག་མཉན་ཡོད་དུ་ལྷགས་ནས། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཁྱོད་ཅག་ག་ལས་འོང ། ཚེ་དང་ལྡན་པ་ཤཱ་རིའི་བུས་ལྷོ་ལམ་ནས་འཇིག་རྟེན་རྒྱང་པན་པའི་རྒོལ་བ་བྲམ་ཟེ་ཀུན་ཏུ་རྒྱུ་འཆར་ཀ་ཞེས་བྱ་བ་འགྱེད་འདོད་ཅིང་འགྱེད་པའི་ཡོ་བྱད་ཀྱི་ཕྱིར་འོངས་པ་ཚར་བཅད་དེ་གཡུལ་ལས་རྣམ་པར་རྒྱལ་ལོ། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་འདི་ལྟར་ཚེ
7.133a
དང་ལྡན་པ་ཤཱ་རིའི་བུས་ཚོགས་ཅན་གཉིས་པ། ཆོས་ཀྱིས་དམག་དཔོན། ཆོས་ཀྱིས་འཁོར་ལོ་རྗེས་སུ་བསྐོར་བས་རྒོལ་བ་གཅིག་ཚར་བཅད་པ་འདི་ངོ་ཚར་ཅི་ཆེ། གལ་ཏེ་ཚེ་དང་ལྡན་པ་ཤཱ་རིའི་བུས་ཚར་བཅད་པར་མ་གྱུར་ན་ཡང ། བཅོམ་ལྡན་འདས་སླད་ན་བཞུགས་པས་དེ་ངོ་མཚར་མི་ཆེའི། ཁོ་བོ་ཅག་མི་དྲུག་གིས་གཅེར་བུ་པ་དྲུག་བཅུ་ཚར་བཅད་པ་ངོ་མཚར་ཆེའོ། །རིག་པའི་གནས་གང་ལ། དབྱུག་པའི་རིགས་པས་ལུས་ལ་ཆོས་བཤད་པས་སོ། །ཅི་འཚོ་འམ་འོན་ཏེ་ཤི། དེའི་ཚེ་ན་ནི་འཚོ་ན་ད་རྩམ་འཚོ་འམ་ཤི་གཏོལ་མེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་ཉིད་ཀྱིས་རློམས་པར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབ་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང
7.133b
དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་སླབ་པའི་གཞི་འདི་ལྟར་གདོན་པར་བྱ་སྟེ། འདུག་གནས་གཅིག་ཏུ་ཞག་ལོན་པའི་དགེ་སློང་གིས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པར་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཁྱིམ་བདག་དེ་ཟོང་ཐོགས་ཏེ་རི་བྲགས་དེ་ཉིད་དུ་ཕྱིན་ནས་དེ་ཁྱིམ་བདག་དེའི་ཚོང་ཁང་དུ་ཞུགས་པ་དང ། ཁྱིམ་བདག་གིས་གཅེར་བུ་པ་དག་ལ་བྲིམ་པར་བརྩམས་ནས་དེས་ཁྱིམ་བདག་དེའི་གན་དུ་མི་མངགས་ཏེ། གྲོགས་པོ་སྦྱིན་གནས་དག་ལ་སྦྱིན་པར་བྱས་ཚུར་ཤོག་ཅེས་སྦྲན་པ་དང ། ཁྱིམ་བདག་དེ་དད་པ་ཅན་ཡིན་པས། དེས་བསམས་པ། བཅོམ་ལྡན་འདས་ཀྱི་ཉན་ཐོས་དག་ཡིན་གོར་མ་ཆག་གིས་སོང་ལ་བལྟའོ་སྙམ་ནས་དེ་དེར་སོང་བ་དང ། ཇི་ཙམ་ན་གཅེར་བུ་པ་ངོ་ཚ་དང་ཁྲེལ་བོར་བ་དག་ཅིག་ཡིན་པར་མཐོང་ནས་མངོན་སུམ་དུ་མི་སྙན་རྗོད་པ་ནི་སྡུག་བསྔལ་བ་ཡིན་པས་དེ་ཅང་མི་སྨྲ་བར་འདུག་གོ། །དེ་དག་ཟོས་ཏེ་དོང་བ་དང ། ཁྱིམ་བདག་གིས་དེ་ལ་སྨྲས་པ། གྲོགས་པོ་ཞིང་བཟང་ཞིང་ས་བོན་བཟང་ངམ། ཁྱིམ་བདག་དེས་སྨྲས་པ། གྲོགས་པོ་ས་བོན་ནི་བཟང་ན་ཞིང་ནི་གཅེར་བུ་པ་ངོ་ཚ་དང་ཁྲེལ་བོར་བ་སྡིག་པའི་ལྟ་བ་ཅན་དགོན་དུང་ཚཝ་སྒོ་ཅན་ཐ་ཆད་སྡིག་པ་ཅན་གྱི་ས་གཞི་ཤ་སྟག་ཡིན་ནོ། །ཁྱིམ་བདག་དེས་སྨྲས་པ། གྲོགས་པོ་ཞིང་ཆེས་བཟང་བ་གཞན་ཡོད་དམ།
7.133c
#་དེས་སྨྲས་པ། ཡོད་དེ་བཅོམ་ལྡན་འདས་ཀྱིས་ཉན་ཐོས་དག་གོ། །ཁྱིམ་བདག་གིས་སྨྲས་པ། གྲོགས་པོ་དེ་དག་གི་མིང་ཡང་མ་སྨོས་ཤིག་།དེས་སྨྲས་པ་ཅི་དེ་དག་འདིར་ལྷགས་པར་གྱུར་ཏམ་ལྷགས་སོ། །གང་དག་དྲུག་སྡེ་དག་གོ། །དེ་དག་གིས་རེ་ཤིག་ཅི་བྱས། འདི་དང་འདི་ལྟའོ། །དེས་སྨྲས་པ། གྲོགས་པོ་ཁྱོད་ཀྱིས་རྒྱ་མཚོ་ཆེན་པོ་ནས་ནོར་བུ་མཆིང་བུ་དག་བླངས་སོ། །ཁྱིམ་བདག་གིས་སྨྲས་པ། བཅོམ་ལྡན་འདས་ཀྱི་ཉན་ཐོས་བཟང་པོ་གཞན་དག་ཀྱང་ཡོད་དམ། ཡོད་དེ་གལ་ཏེ་ཁྱོད་ཀྱིས་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་དང ། ནམ་གྲུ་དང ། མ་འགག་པ་ལ་སོགས་པ་བཅོམ་ལྡན་འདས་ཀྱི་ཉན་ཐོས་ཆེན་པོ་གཞན་དག་མཐོང་བར་འགྱུར་ན། ཁྱོད་མངོན་པར་དད་པར་འགྱུར་བ་དེ་ལྟ་བུའི་གནས་ཡོད་དོ། །ཁྱིམ་བདག་གིས་སྨྲས་པ། གལ་ཏེ་དེ་དག་འདིར་བྱོན་པར་གྱུར་ན་བདག་གིས་དེ་དག་ལ་བསོད་སྙོམས་ཀྱིས་མཁོ་བ་བསྟབས་པར་བྱའོ། །ཁྱིམ་བདག་དེས་བསམས་པ། ད་ནི་བདག་སོང་ལ་བཅོམ་ལྡན་འདས་ལ་གསོལ་བར་བྱའོ། །སྙམ་ནས་ཁྱིམ་བདག་དེས་ཟོང་བསྒྱུར་རིན་བླངས་ནས་མཉན་ཡོད་ག་ལ་བ་དེར་སོང་སྟེ་མཐར་གྱིས་མཉན་ཡོད་དུ་ཕྱིན་ཏོ། །དེ་ནས་ཁྱིམ་བདག་དེས་ཟོང་ཚོང་ཁང་དུ་སྦས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་དེས་འདི་སྐད་ཅེས་གསོལ་ཏོ། །བཙུན་པ་རི་བྲགས་ག་གེ་མོ་ཞིག་ན་ཁྱིམ་བདག་ཆེ་གེ་མོ་ཞིག་མཆིས་པ་དེ་ཕྱོགས་བཞིའི་དགེ་སྦྱོང་དང་བྲམ་ཟེ་རྣམས་ཀྱིས་སླད་དུ་འདུག་གནས་བགྱིད་དུ་སྩལ་ཏེ། དེ་དེ་ན་གང་གནས་པ་དེ་ལ་བསོད་སྙོམས་ཀྱིས་མཁོ་བ་བསྟོབས་པར་བགྱིད་ཅིང་དེ་བཅོམ་ལྡན་འདས་ཀྱི་ཉན་ཐོས་དག་མཐོང་བར་འཚལ་ན། བཅོམ་ལྡན་འདས་ཀྱིས་དེ་ལ་ཐུགས་བརྩེ
7.133d
#་བའི་སླད་དུ་དེར་དགེ་སློང་དག་ཅིག་བཀའ་སྩལ་ན་ལེགས་སོ། །བཅོམ་ལྡན་འདས་ཀྱིས་ཁྱིམ་བདག་དེ་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱིས་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་གང་གིས་ཁྱིམ་བདག་དེ་འཁོར་དང་བཅས་པ་དང ། རི་བྲགས་དེ་ན་གནས་པའི་སྐྱེ་བོའི་ཚོགས་དག་འདུལ་བར་འགྱུར་སྙམ་དུ་དགོངས་ན། དགེ་སློང་ཤཱ་རིའི་བུས་འདུལ་བར་གཟིགས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཁྱོད་ཀྱིས་རི་བྲགས་ག་གེ་མོ་ཞིག་ན་ཁྱིམ་བདག་ཆེ་གེ་མོ་འཁོར་དང་བཅས་པ་དང ། རི་བྲགས་ན་གནས་པའི་སྐྱེ་བོའི་ཚོགས་ལ་སོམ་ཤིག་།ཚེ་དང་ལྡན་པ་ཤཱ་རིའི་བུས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འཁོར་ལྔ་བརྒྱ་དང་རི་བྲགས་དེ་ག་ལ་བ་དེ་ལོགས་སུ་ལྗོངས་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་རི་བྲགས་དེར་ཕྱིན་ནས་ཁྱིམ་བདག་དེའི་འདུག་གནས་སུ་ཞུགས་སོ། །ཁྱིམ་བདག་དེས་བཙུན་པ་ཤཱ་རིའི་བུ་འཁོར་ལྔ་བརྒྱ་དང་རི་བྲགས་འདིར་འོངས་ཏེ་བདག་གི་འདུག་གནས་སུ་ཞུགས་སོ་ཞེས་ཐོས་སོ། །ཐོས་ནས་ཀྱང་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཛུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད། རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས
7.134a
ཅང་མི་སྨྲའོ། །དེ་ནས་ཁྱིམ་བདག་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་ཚེ་དང་ལྡན་པ་ཤཱ་རིའི་བུ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུས་སང་བདག་གིས་སྡུམ་པར་དགེ་སློང་གི་དགེ་འདུན་དང་གདུགས་ཚོད་གསོལ་བར་ཅི་གནང ། ཚེ་དང་ལྡན་པ་ཤཱ་རིའི་བུས་ཁྱིམ་བདག་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཁྱིམ་བདག་དེས་ཚེ་དང་ལྡན་པ་ཤཱ་རིའི་བུས་ཅང་མི་སྨྲ་བ་དང་དུ་བླང་བར་རིགས་ནས་ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ། ཚེ་དང་ལྡན་པ་ཤཱ་རིའི་བུའི་དྲུང་ནས་སོང་ངོ ། །དེ་ནས་ཁྱིམ་བདག་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་གོན་བྱས་ནས། ནང་པར་སྔར་ལངས་ཏེ་སྟན་བཤམས་ནས་ཆུ་ར་བཞག་སྟེ། ཚེ་དང་ལྡན་པ་ཤཱ་རིའི་བུ་ལ་མངག་པས་བཙུན་པ་ཤཱ་རིའི་བུ་གདུགས་ཚོད་གཡར་དགོངས་འཚལ་ན་བཙུན་པ་ཤཱ་རིའི་བུས་ད་དེའི་དུས་ལ་བབ་པར་དགོངས་སུ་གསོལ་ཞེས་བསྐུལ་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་དེའི་ཁྱིམ་ག་ལ་བ་དེར་སོང་སྟེ་ཕྱིན་ནས་དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་ནས་ཁྱིམ་བདག་དེས་ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་བདེ་བར་འདུག་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ཏེ། ཚེ་དང་ལྡན་པ་ཤཱ་རིའི་བུ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཚེ་དང་ལྡན་པ་ཤཱ་རིའི་བུའི་མདུན་དུ་ཆོས་མཉན་པའི་ཕྱིར་འདུག་གོ། །འདུག་ནས་ཁྱིམ་བདག་དེས་ཚེ
7.134b
དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཆོས་བསྟན་དུ་གསོལ། ཁྱིམ་བདག་དེའི་ཕྱིར་ཁྱོད་ཀྱིས་ས་ཕྱོགས་གོ་སྐབས་ཡངས་པར་སྟན་འདིང་དུ་ཆུག་ལ་རི་བྲགས་འདིར་སྐྱེ་བོ་ཕལ་པོ་ཆེའི་ཚོགས་ལ་སང་འཕགས་པ་ཤཱ་རིའི་བུ་ཆོས་སྟོན་པར་འགྱུར་གྱིས་ཁྱེད་ཅག་ལས་གང་ཆོས་ཉན་པར་འདོད་པ་དེ་ཤོག་ཤིག་ཅེས་དྲིལ་བསྒྲག་པ་བྱེད་དུ་ཆུག་ཤིག་།ཚེ་དང་ལྡན་པ་ཤཱ་རིའི་བུ་ཡོན་བཤད་པ་བྱས་ནས་སྟན་ལས་ལངས་ཏེ་སོང་ངོ ། །ཁྱིམ་བདག་དེ་རི་བྲགས་དེ་ན་གཙོ་བོར་གྲགས་པ་ཡིན་པས་དེས་ས་ཕྱོགས་གོ་བསྐབས་ཡངས་པར་སྟན་ཤོམ་དུ་བཅུག་ནས་རི་བྲགས་དེར་སྐྱེ་བོ་ཕལ་པོ་ཆེའི་ཚོགས་ལ་སང་འཕགས་པ་ཤཱ་རིའི་བུ་ཆོས་སྟོན་པར་འགྱུར་གྱིས་ཁྱེད་ཅག་ལས་གང་ཆོས་ཉན་པར་འདོད་པ་དེ་ཤོག་ཤིག་།ཁྱེད་ཅག་ལས་གང་གིས་དེར་བདེན་པ་དག་མཐོང་བར་མ་གྱུར་པ་དེས་འཁོར་བར་ཡུན་རིང་དུ་འཁོར་བར་བྱ་དགོས་སོ་ཞེས་དྲིལ་བསྒྲག་པ་བྱེད་དུ་གཅུག་གོ། །དེ་ནས་ཚེ་དང་ལྡན་པ་ཤཱ་རིའི་བུ་ཕྱོགས་དེར་སོང་དེ་དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་པ་དང ། སྲོག་ཆགས་འབུམ་ཕྲག་དུ་མ་དག་ཀྱང་ཁ་ཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་འདུག་པར་གྱུར་ནས། ཚེ་དང་ལྡན་པ་ཤཱ་རིའི་བུས་འཁོར་དེའི་བསམས་པ་དང ། བག་ལ་ཉལ་དང ། ཁམས་དང ། རང་བཞིན་ཤེས་ནས་འདི་ལྟར་ཁྱིམ་བདག་དེ་འཁོར་དང་བཅས་པ་དང ། སྲོག་ཆགས་ཁྲི་ཉིས་སྟོང་གིས་བདེན་པ་དག་མཐོང་ཞིང་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱས། ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་སྐྱེད། ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ
7.135a
སེམས་སྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པ་དེ་ལྟར་ཆོས་བསྟན་པ་བྱས་ཏེ། འཁོར་དེ་ལས་ཕེལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་རྣམ་པར་བཞག་གོ། །ཚེ་དང་ལྡན་པ་ཤཱ་རིའི་བུས་ཧ་ཅང་ཡུན་རིང་དུ་ཆོས་བསྟན་པས་གདུགས་ཚོད་ཡོལ་ཞིང་རླུང་གིས་དེའི་རྒྱབ་ན་བར་གྱུར་ནས་ཁྱིམ་བདག་དེས་སྨྲས་པ། བཙུན་པ་ཤཱ་རིའི་བུ་དེའི་སླད་དུ་བདག་གི་འདུག་གནས་སུ་བཞུགས་ཤིག་དང་བདག་གིས་ཁྱོད་ལ་བསོད་སྙོམས་ཀྱིས་མཁོ་བ་བསྟབས་པར་བགྱིའོ། །ཁྱིམ་བདག་ཁྱོད་ཉིད་ལ་བརྟེན་ནས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་ཀྱིས་འགྲོའོ། །དེ་ནས་ཚེ་དང་ལྡན་པ་ཤཱ་རིའི་བུ་ན་བཞིན་དུ་ཟན་བཅད་དེ་རི་བྲགས་དེ་ནས་མཉན་ཡོད་ག་ལ་བ་དེ་ལོགས་སུ་རྒྱུ་ཞིང་སོང་སྟེ་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས། དགེ་སློང་རྣམས་ཀྱིས་ཚེ་དང་ལྡན་པ་ཤཱ་རིའི་བུའི་ལྷན་ཅིག་གནས་པ་དང ། ཉེ་གནས་དག་ལ་དྲིས་པ། ཚེ་དང་ལྡན་པ་དག་ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཅུང་ཞིག་བདེ་བར་ཡང་བརྒྱུས། ཅུང་ཞིག་སྡུག་བསྔལ་བར་ཡང་བརྒྱུས་སོ། །ཅི་ཞིག་བདེ་བར་བརྒྱུས། མཁན་པོས་གདུལ་བར་བྱ་བ་འདི་སྙེད་ཅིག་མཛད་པ་གང་ཡིན་པ་དེ་ནི་བདེ་བར་བརྒྱུས་པ་ཡིན་ནོ། །ཅི་ཞིག་སྡུག་བསྔལ་བར་བརྒྱུས། མཁན་པོ་བསྙུང་བཞིན་དུ་གདུགས་ཚོད་བཅད་དེ་རི་བྲགས་དེ་ནས་བཞུད་པ་གང་ཡིན་པ་དེ་ནི་སྡུག་བསྔལ་བར་བརྒྱུས་པ་ཡིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ན་བ་མ་གཏོགས་ཏེ། ་དགེ་སློང་གིས་པུས་འཁྱུད་བཅང་བར་རྗེས་སུ་གནང་ངོ ། །དེ་ནས་བཅོམ་ལྡན་འདས་ཀྱིས་བསླབས་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིས་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི
7.135b
བཅས་པ་ཡིན་ལ་འདི་ནི་གནང་བ་ཡིན་ཏེ། ་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འདུག་གནས་གཅིག་དུ་ཞག་ལོན་པའི་དགེ་སློང་མི་ན་བས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པ་ཟ་ན་ལྟུང་བྱེད་དོ། །འདུག་གནས་གཅིག་དུ་ཞག་ལོན་པའི་ཞེས་བྱ་བ་ནི་མུ་སྟེགས་ཅན་གྱི་འདུག་གནས་སུ་ཞག་ལོན་པའི་འོ། །དགེ་སློང་ཞེས་བྱ་བ་ནི་ཆོས་འདི་པའོ། །མི་ན་བ་ཞེས་བྱ་བ་ནི་ན་བ་མ་གཏོགས་པས་སོ། །བསོད་སྙོམས་གཅིག་བཟའ་བར་བྱའོ་ཞེས་བྱ་བ་ནི་ཟན་ལན་ཅིག་གོ། །དེ་ལས་ལྷག་པ་ཟ་ན་ཞེས་བྱ་བ་ནི་དེ་ལས་མང་དུ་ཟ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་བསྲེགས་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེར་གནས་ཤིང་དེར་ཟ་ན་དེར་གནས་པ་ལ་ཉེས་བྱས་སུ་འགྱུར་ལ། དེར་ཟ་བ་ལ་ལྟུང་བྱེད་དུ་འགྱུར་རོ། །དེར་གནས་ཤིང་གཞན་དུ་ཟ་ན། དེར་གནས་པ་ལ་ཉེས་བྱས་སུ་འགྱུར་ལ། གཞན་དུ་ཟ་བ་ལ་ལྟུང་བ་མེད་དོ། །གཞན་དུ་གནས་ཤིང་དེར་ཟ་ན་གཞན་དུ་གནས་པ་ལ་ལྟུང་བ་མེད་ལ། དེར་ཟ་བ་ལ་ལྟུང་བྱེད་དུ་འགྱུར་རོ། །གཞན་དུ་གནས་ཤིང་གཞན་དུ་ཟ་ན་གཉིས་ཀ་ལ་ལྟུང་བ་མེད་དོ། །ཚོགས་ཀྱི་དང ། ཉེ་དུའི་དང ། སྦྱིན་བདག་ན་རེ་དེ་ཉིད་དུ་འདུག་ཤིག་ཅེས་ཟེར་བ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འདུག་གནས་གཅིག་ཏུ་ཟ་བའི་ལྟུང་བྱེད་དེ་སུམ་བཅུ་རྩ་གཉིས་པ་རྫོགས་སྷོ།། ་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་གཉིས་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བྱང་ལམ་ནས
7.136a
དོན་འཐུན་དག་མཉན་ཡོད་དུ་ལྷག་པ་ན་དྲུག་སྡེ་དག་གིས་དེ་ཐོས་ནས་སྨྲས་པ། ་དགའ་བོ་ཉེ་དགའ་བདག་ཅག་གིས་བྱང་ལམ་ནས་དོན་འཐུན་དག་མཉན་ཡོད་དུ་ལྷགས་ཤེས་ཐོས་ཀྱིས་གལ་ཏེ་ན་ཅུང་ཟད་བསྒྲུབ་པར་ནུས་ཀྱང་སྲིད་ཀྱིས་འདོང་ངོ ། །གལ་ཏེ་བསོད་སྙོམས་ཟོ་ཤིག་ཅེས་ཟེར་ན་ལྟོ་གང་བས་ཆོག་གོ་ཞེས་རྗོད་པར་བྱའོ། །གལ་ཏེ་གོས་ལོང་ཤིག་ཅེས་ཟེར་ན་བླང་བར་བྱའོ་ཞེས་དེ་དག་དོང་སྟེ་སྨྲས་པ། བཞིན་བཟང་དག་འཁོད་ཅིག་དང་ཆོས་བསྟན་པར་བྱའོ། །དེ་དག་གིས་རྐང་པ་ལ་ཕྱག་འཚལ་ཏེ། མདུན་དུ་ཆོས་མཉན་པའི་ཕྱིར་འཁོད་པ་དང ། དེ་དག་གིས་དེ་དག་ལ་ཆོས་བསྟན་ནས་དེ་དག་གིས་སྨྲས་པ། འཕགས་པ་དག་འདི་ཉིད་དུ་བསོད་སྙོམས་གསོལ་ཅིག་།བཞིན་བཟང་དག་ལྟོ་གང་བས་ཆོག་གོ། །དྲུག་སྡེ་དག་ཡང་དང་ཡང་དུ་འོངས་ཏེ་ཆོས་བསྟན་པ་དང ། དོན་འཐུན་དག་གིས་ཀྱང་ཡང་དང་ཡང་དུ་སྨྲས་པ། འཕགས་པ་དག་འདི་ཉིད་དུ་བསོད་སྙོམས་གསོལ་ཅིག་།དྲུག་སྡེ་དག་གིས་ཀྱང་ཡང་དང་ཡང་དུ་སྨྲས་པ། བཞིན་བཟང་དག་ལྟོ་གང་བས་ཆོག་གོ། །དུས་གཞན་ཞིག་ན་དོན་འཐུན་དག་གིས་སྨྲས་པ། ཤེས་ལྡན་དག་འདི་ན་གླང་དག་གི་རྩཝ་མེད་ཀྱིས་རེ་ཤིག་རི་བྲགས་གཞན་ཞིག་ཏུ་འདོང་ལ་གླང་དག་གཟན་ཞིང་འཁོད་པར་བྱ་སྟེ། ཇི་ཙམ་ན་ཟོང་བསྒྱུར་ཏེ་འགྲོ་བ་ན་མཉན་ཡོད་དུ་འདོང་བར་བྱའོ་ཞེས་དེ་དག་གིས་གླང་དག་དེད་ནས་རི་བྲགས་ཞིག་ཏུ་གླང་དག་གཟོན་དུ་དོང་ངོ ། །དྲུག་སྡེ་དག་ཀྱང་ནང་པར་སྔར་ལངས་ཏེ་ཆོས་སྟོན་དུ་དོང་བ་དང ། ཇི་ཙམ་ན་དོན་འཐུན་དེ་དག་མི་སྣང་ནས་དེ་དག་སེམས་ཁོངས་སུ་ཆུད་ཅིང་འཁོད་པ་དང ། ཇི་ཙམ་ན་དེར་མི་ཞིག་འོངས་ཏེ་སྨྲས་པ། འཕགས་པ་དག་ཅིའི་སླད་དུ་སེམས་ཁོངས་སུ་ཆུད་ཅིང་བཞུགས། དྲུག་སྡེ་དག་གིས་སྨྲས་པ། བཞིན་བཟང་ཕྱོགས་འདི་ན་ཁོ་བོ་ཅག་གི་མཛའ་བོ་དོན་འཐུན་དག་ཅིག་འཁོད་འཁོད་ན་དེ་དག་གིས་ཁོ་བོ་ཅག་ལ་མ་ལྟས་པ་ཁོ་ནར་དོང་ངོ ། །དེས་སྨྲས་པ། འཕགས་པ་དག་དེ་དག་ནི་ཐམས་ཅད་ཀྱིས་ཐམས་ཅད་དུ་མཆིས་པ་མ་ལགས་ཏེ། འདི་ལྟར་དེ་དག་གིས་གླང་དག་གི་རན་མ་མཆིས་ནས་དེ་དག་རི་བྲགས་ཤིག་ན་གླང་དག་གསོན་ཅིང་མཆིས་ཏེ་སླར་ཡང་འདིར་མཆིས་པར་འགྱུར་རོ། །
7.136b
བཞིན་བཟང་ནད་མེད་པར་གྱུར་ཅིག་ཅེས་དྲུག་སྡེ་དག་རི་བྲགས་དེར་འོང་བ་དང ། ཇི་ཙམ་ན་དེ་དག་གིས་དོན་འཐུན་དེ་དག་ཐག་རིང་པོ་ཁོ་ན་ནས་ཚིགས་སུ་བཅད་པ་དག་སྨྲས་པ། རྩུབ་པའི་རི་ལ་འགྲོ་མི་བྱ། །སོང་ནའང་ཡུན་རིང་གནས་མི་བྱ། །རྩུབ་པའི་རི་དག་ཇི་བཞིན་དུ། །རི་ལ་འཁོད་པའང་དེ་བཞིན་ནོ། །རི་ལ་འཁོད་པ་དང་པོར་ནི། །གསེར་དག་བདར་བ་ཇི་བཞིན་ཏེ། །མི་ལ་འཚེ་བ་རྣམ་བརྟགས་ན། །རི་དག་ཇི་ལྟ་དེ་བཞིན་ནོ། །དོན་འཐུན་དེ་དག་གིས་ཐོས་ནས་སྨྲས་པ། འཕགས་པ་དག་ཁྱེད་ཅག་ཅི་བཀྱོན། བཞིན་བཟང་དག་ཁྱེད་ཅག་ཁོ་བོ་ཅག་གི་མཛའ་བོ་དག་ཡིན་པས་ཁོ་བོ་ཅག་གིས་དགེ་བའི་ཕྱོགས་དག་ཡོངས་སུ་ཉམས་པར་བྱས་ཏེ་ཁྱེད་ཅག་ལ་ཆོས་བསྟན་ན། ཁྱེད་ཅག་ཁོ་བོ་ཅག་ལ་མ་བལྟས་པ་ཁོ་ནར་འདིར་དོང་ངོ ། །འཕགས་པ་དག་བདག་ཅག་ཐམས་ཅད་ཀྱི་ཐམས་ཅད་དུ་འདིར་མཆིས་པ་མ་ལགས་ཏེ་འདི་ལྟར་དེ་ན་བདག་ཅག་གི་གླང་དག་གི་རན་མ་མཆིས་པས་དེའི་སླད་དུ་བདག་ཅག་འདི་ན་གླང་དག་གསོན་ཅིང་མཆིས་ཏེ། ཇི་རྩམ་ན་ཟོང་དག་བསྒྱུར་ཏེ་མཆི་བ་ན་བདག་སླར་ཡང་མཉན་ཡོད་དུ་མཆིའོ། །བཞིན་བཟང་དག་འཁོད་ཅིག་དང་ཆོས་བསྟན་པར་བྱའོ། །དེ་དག་གིས་དྲུག་སྡེ་དག་གི་རྐང་པ་ལ་ཕྱག་འཚལ་ཏེ་སྟན་ཆེས་དམའ་བ་དག་བླངས་ནས་མདུན་དུ་ཆོས་མཉན་པའི་ཕྱིར་འཁོད་པ་དང ། དྲུག་སྡེ་དག་གིས་དེ་དག་ལ་ཆོས་བསྟན་ནས་དེ་དག་གིས་སྨྲས་པ་འཕགས་པ་དག་འདི་ཉིད་དུ་བསོད་སྙོམས་གསོལ་ཅིག་།བཞིན་བཟང་དག་ལྟོ་གང་བས་ཆོག་གོ། །དེད་དཔོན་གྱིས་སྨྲས་པ། ཤེས་ལྡན་དག་འཕགས་པ་དག་ཡང་དང་ཡང་དུ་ལྟོ་གང་བས་ཆོག་གོ་ཞེས་གསུང་བ་ལས་ན་འདི་དག་ལ་ན་བཟའ་མི་མངའ་གོར་མ་ཆག་གིས་འདི་དག་ལ་ན་བཟའ་དབུལ་བར་བྱའོ། །དེ་ལྟར་བགྱིའོ། །ཞེས་དེ་དག་གིས་དྲུག་སྡེ་དག་ལ་ལ་བ་སྲིན་བུའི་མདོག་ལྟ་བུ་རེ་རེ་བསྐོན་ཏོ་དེ་ནས་དྲུག་སྡེ་དག་གིས་སྨྲས་པ། བཞིན་བཟང་དག་ཁྱེད་ཅག་ཡང་དང་ཡང་དུ་བསོད་སྙོམས་ཟོ་ཤིག་ཅེས་ཟེར་ན་བསོད་སྙོམས་ཇི་ལྟ་བུ་སྦྱིན་པ
7.137a
བལྟས་འོན་ཅིག་།དྲུག་སྡེ་དག་ལས་གཅིག་གིས་ཐབ་སྣོད་ལྟ་བུ་བཟེད་ནས་འདིར་ལུགས་ཤིག་ཅེས་སྨྲས་པ་དང ། དོན་འཐུན་དེ་དག་གིས་བསམས་པ། སྣོད་འདི་རེ་ཆེ་ཞིག་སྟེ་འདི་བཀང་བས་འདི་དག་ཐམས་ཅད་ཀྱི་ལྟོ་ཁེངས་པའི་བསོད་སྙོམས་འབྱུང་བར་འགྱུར་རོ། །སྙམས་ནས་དེ་དག་གིས་ལམ་རྒྱག་ལམ་སྣོད་དེ་བཀང་སྟེ་ཕུལ་ལོ། །དྲུག་སྡེ་གཞན་གྱིས་ཀྱང་དེ་བཞིན་དུ་མཐར་གྱིས་རེ་རེ་ནས་ཐབ་སྣོད་ལྟ་བུ་རེ་རེ་བཟེད་པ་དང ། ཇི་ཙམ་ན་དོན་འཐུན་དེ་དག་གིས་ལམ་རྒྱག་ལས་ཐབ་སྣོད་ལྟ་བུའི་སྣོད་དྲུག་བཀང་སྟེ་ཕུལ་བ་དང ། དོན་འཐུན་དེ་དག་གི་ལམ་རྒྱག་ཐམས་ཅད་ཟད་པར་གྱུར་ནས་དེ་དག་གིས་སྨྲས་པ། འཕགས་པ་དག་བདག་ཅག་གིས་འདིར་ཤུལ་རྒྱགས་ཉུང་ཤས་ཤིག་འཚལ་ཏེ་མཆིས་པ་དེ་དག་ཐམས་ཅད་བས་ཀྱིས་བདག་ཅག་གིས་མི་འདི་ཀཱར་ཥཱ་པ་ཎ་དག་བསྐུར་ཏེ་འཕགས་པ་དག་དང་ཐབས་གཅིག་མཉན་ཡོད་དུ་གཏང་གིས་འཕགས་པ་དག་གིས་བདག་ཅག་གི་ཤུལ་རྒྱགས་དག་འཇོལ་ཏེ་སྩོལ་ལ་བསེལ་བ་དང་བཅས་ཏེ་གཏང་དུ་གསོལ། བཞིན་བཟང་དག་དེ་ལྟར་བྱའོ། །དོན་འཐུན་དེ་དག་གིས་དྲུག་སྡེ་དག་གི་ཕྱི་བཞིན་མི་ཞིག་ཀཱར་ཥཱ་པ་ཎ་དག་བསྐུར་ཏེ་བཏང་བ་དང ། དྲུག་སྡེ་དག་གཙུག་ལག་ཁང་དུ་སོང་སྟེ་མི་དེ་ལ་སྨྲས་པ། བཞིན་བཟང་ཇེ་ལས་འདི་གྱིས་ཤིག་།དེས་དེ་བྱས་ནས་དྲུག་སྡེ་དག་གིས་ཡང་སྨྲས་པ། བཞིན་བཟང་ལས་གཞན་འདི་ཡང་གྱིས་ཤིག་།དེས་དེ་ཡང་བྱས་པ་དང ། དྲུག་སྡེ་དག་གིས་མི་དེ་རིང་ཞིག་བཀོལ་བཀོལ་ནས་ཇི་ཙམ་ན་ཉི་མ་ཡོལ་བར་གྱུར་པ་དང ། དེའི་འོག་ཏུ་བཏང་སྟེ་སྨྲས་པ། ད་ཉོས་ལ་སོང་ཤིག་།མི་དེ་རང་གིས་ལམ་རྒྱགས་དག་ཉོས་ཏེ་འཕགས་པ་དང ། མཉན་ཡོད་ཀྱི་ཉེན་ཀོར་ཐིབས་པོར་སོན་པ་ན་ཆོམ་རྐུན་པ་དག་གིས་བཅོམ་ནས་དེ་ཅིག་པུ་དོན་འཐུན་དག་གི་ནང་དུ་སོང་ངོ ། །དོན་འཐུན་དག་གིས་མཐོང་ནས་སྨྲས་པ། ཁྱོད་ཀྱིས་ཅི་ཁྱེར་ཏེ་འོངས། དེས་སྨྲས་པ། ཅི་ཡང་མ་འོངས་སོ། །ཅིའི་ཕྱིར་ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས
7.137b
པ། འཕགས་པ་དག་གིས་ཁྱོད་ཀྱི་བསེལ་བ་མ་བཏང་ངམ། དེས་སྨྲས་པ། ཤེས་ལྡན་དག་དོན་གྱིས་ན་དེ་དག་ཉིད་ཀྱིས་བཅོམ་མོ། །དེ་དག་གིས་སྨྲས་པ། ཇི་ལྟར་གྱུར་དེས་སྨྲས་པ། དེ་དག་གིས་ཁོ་བོ་ལས་ཤ་སྟག་བྱེད་དུ་བཅུག་ནས་ཇི་ཙམ་ན་ཉི་མ་ཡོལ་བར་གྱུར་པ་དང་དེའི་འོག་ཏུ་བཏང་སྟེ་ད་ཉོས་ལ་སོང་ཤིག་ཅེས་ཟེར་ནས། ཁོ་བོ་རང་གིས་ལམ་རྒྱགས་དག་ཉོས་ཏེ་འཕགས་པ་དང་མཉན་ཡོད་ཀྱི་ཉེན་ཀོར་ཐིབས་པོར་སོན་པ་ན་ཆོམ་རྐུན་པ་དག་གིས་བཅོམ་མོ། །དེ་དག་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ་འདི་ལྟར་ཕན་པ་བྱའོ་ཞེས་ཟེར་ལ་གནོད་པ་ཁོ་ན་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་གཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་གཡས་ཞར་མ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །བུ་མོ་དེའི་ན་ཟླ་གཞན་ཐམས་ཅད་བག་མར་བཏང་ན་བུ་མོ་དེ་གཡས་ཞར་ཡིན་པའི་ཕྱིར་སློང་བ་འགའ་ཡང་མ་འོངས་སོ། །མཉན་ཡོད་ན་ཁྱིམ་བདག་གཞན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེའི་ཆུང་མ་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་ཆུང་མ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །ཁྱིམ་བདག་དེ་ཡང་སྐུར་པ་གདབ་པར་འགྱུར་བའི་ལས་དག་གིས་ཆུང་མ་གསོད་པ་ཆུང་མ་གསོད་པ་ཞེས་བྱ་བའི་མིང་དུ་གྱུར་ཏོ། །ཁྱིམ་བདག་དེ་ཡང་བུ་མོ་བསླངས་པ་དང་མི་སྟེར་ཅིང ། ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང ། མི་སྦྱིན་ནོ་ཞེས་ཀྱང་ཟེར་རོ། །
7.138a
ཁྱིམ་བདག་དེས་ཡུགས་ས་མོ་དག་བསླངས་པ་དང ། ཡུགས་ས་མོ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་བཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེ་རྣམ་པ་ཐམས་ཅད་དུ་ཡི་ཆད་ནས་རང་ཉིད་ཀྱིས་ཁྱིམ་གྱི་སོ་ཚིས་དག་བྱ་བར་བརྩམས་པ་དང ། དུས་གཞན་ཞིག་ན་ཁྱིམ་བདག་དེའི་ཆུང་པོ་གྲོགས་ཤིག་འོངས་ནས་དེས་ཁྱིམ་བདག་དེ་མཐོང་ནས་དྲིས་པ། ཁྱོད་ཅི་བྱེད་ཁྱིམ་བདག་གིས་སྨྲས་པ། ཁྱིམ་གྱི་སོ་ཚིས་དག་བྱེད་དོ། །དེས་སྨྲས་པ་ཁྱོད་ཅིའི་ཕྱིར་རང་ཉིད་ཀྱིས་ཁྱིམ་གྱི་སོ་ཚིས་དག་བྱེད། ཁྱིམ་བདག་གིས་སྨྲས་པ། ཁོ་བོས་ཆུང་མ་གཅིག་བླངས་པ་དང་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །དེས་སྨྲས་པ། གཞན་དག་ཅིའི་ཕྱིར་མི་སློང ། ཁྱིམ་བདག་གིས་སྨྲས་པ། བསླངས་ན་མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང ། མི་སྦྱིན་ནོ་ཞེས་ཟེར་རོ། །དེས་སྨྲས་པ། ཡུགས་ས་མོ་དག་ཅིའི་ཕྱིར་མི་སློང ། ཁྱིམ་བདག་གིས་སྨྲས་པ། བསླངས་ཏེ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་བཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །དེས་སྨྲས་པ། གཡས་ཞར་མ་ཅིའི་ཕྱིར་མི་སློང ། མི་སྟེར་རོ། །སོང་ལ་སློངས་ཤིག་དང ། དེ་དག་བུ་མོས་ཡོངས་སུ་དུབ་པ་ཡིན་པས་སྟེར་བར་འགྱུར་རོ། །ཁྱིམ་བདག་དེ་གཡས་ཞར་མའི་ཕའི་ཁྱིམ་དུ་སོང་སྟེ་བདེ་ལེགས་བདེ་ལེགས་ཤེས་སྨྲས་པ་དང ། དེ་དག་གིས་སྨྲས་པ་ཅི་སློང ། དེས་སྨྲས་པ། བུ་མོའི་སློངས་མོ་སློང་ངོ ། །བུ་མོ་གང་གཡས་ཞར་མའོ། །དེ་དག་དེས་ཡོངས་སུ་སྐྱོ་བ་ཡིན་པས་སྨྲས་པ། སྦྱིན་ནོ། །དེས་སྨྲས་པ། ནམ་བག་མར་གཏང ། ཉི་མ་མང་གེ་མོ་ཞིག་ལའོ། །དེས་དེ་ལྟར་གྱིས་ཤིག་ཅེས་སྨྲས་ཏེ་སོང་ངོ ། །དེའི་ཆུང་པོ་གྲོགས་དེ་ཡང་འགྱོད་པ་སྐྱེས་ཏེ། བདག་གི་གྲོགས་པོ་ལ་གཡས་ཞར་མ་སློངས་ཤིག་ཅེས
7.138b
བསྐུལ་བ་དེ་དག་ནི་བདག་གིས་མ་ལེགས་པ་ཞིག་བྱས་ཏེ། དེ་མཚན་ངན་པ་ཡིན་པས་དེས་གྲོགས་པོ་བསད་པར་གྱུར་ན་མི་རུང་ངོ་སྙམ་ནས་དེ་ཁྱིམ་བདག་དེའི་གན་དུ་སོང་སྟེ་སྨྲས་པ། ཁྱོད་ཀྱིས་གཡས་ཞར་མ་ཐོབ་བམ། ཁྱིམ་བདག་གིས་སྨྲས་པ། ཐོབ་བོ། །དེས་ཚིགས་སུ་བཅད་པ་དག་སྨྲས་པ། རྒྱ་སྐྱེགས་ཤིང་གི་སོ་ཤིང་དང ། །ནུབ་དུ་སྔས་བསྟན་ཉལ་བ་དང ། །ཤིན་ཏུ་གཉིད་ཆེ་ཞོ་འཐུང་དང ། །ཆུང་མ་གཡས་ཞར་ལེན་བྱེད་ན། །ཞི་བ་འང་གནས་ནས་ཉམས་པར་འགྱུར། །འགོག་ལ་འགོག་བྱེད་བབ་པ་དང ། །རྡོ་ལ་ཅག་ནི་བབ་པ་ལྟར། །ཁྱོད་ཀྱང་ཆུང་མ་གསོད་བྱེད་ལ། །དེ་ཡང་གཡས་ཞར་ཡིན་པས་ན། །ཁྱེད་གཉིས་གང་རྒྱལ་གང་ཕམ་བལྟའོ། །གྲོགས་པོ་བུ་མོ་དེ་མཚན་ངན་པ་ཡིན་པས་ཁྱོད་དུས་བྱེད་པར་གྱུར་ན་མི་རུང་གིས་དེ་འོར་ལ་ཁོ་བོའི་སྲིང་མོ་ཡུགས་ས་མོ་ཞིག་ཡོད་པ་དེ་ལོང་ཤིག་།ཁྱིམ་བདག་དེས་སྨྲས་པ། གྲོགས་པོ་དོར་བར་མི་ནུས་ཏེ། འོན་ཀྱང་འདི་ལ་ཐབ་ཀྱི་རྣམ་པ་ཞིག་བྱའོ། །གཡས་ཞར་མའི་མ་དེས་ཀྱང་བག་རྫངས་སྟ་གོན་བྱ་བར་བརྩམས་སོ། །ཁྱིམ་དེ་དྲུག་སྡེ་དག་གི་ཁྱིམ་དུ་འགྲོ་བའི་ཁྱིམ་ཡིན་པས་དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང ། ཇི་ཙམ་ན་ཁུར་བ་དག་སྲེག་པ་མཐོང་ནས་དེ་དག་གིས་སྨྲས་པ། སྲིང་མོ་དུས་སྟོན་ལ་བབ་ཏུ་ཉེ་འམ་ཅི། དེས་སྨྲས་པ། འཕགས་པ་དག་ཁྱེད་ཀྱི་ལྕམ་མོ་བག་མར་མཆི་བ་ལ་ཐུགས་ནས་དེའི་བག་རྫངས་སྟ་གོན་བགྱིད་དོ། །དྲུག་སྡེ་དག་གིས་སྨྲས་པ། སྲིང་མོ་ཁོ་བོ་ཅག་གིས་ཅུང་ཟད་མི་ཐོབ་བམ། འཕགས་པ་དག་ཁྱེད་ཅག་ལ་སུ་ཞིག་གིས་དབུལ་འཚལ་འདི་ཁྱེད་ཉིད་ཀྱི་ལགས་སོ། །དྲུག་སྡེ་དག་གིས་སྨྲས་པ། སྲིང་མོ་རེ་ཤིག་ཕུགས་ན་ཡོད་པ་གཞན་ཐམས་ཅད་ལྟ་ཞོག་ཤིག་།ད་འཕྲལ་དུ་ཅི་སྦྱིན་པ་བལྟས་འོན་ཅིག་།དེས་བག་བརྐྱང་སྟེ་དེ་དག་གིས་ལྷུང་བཟེད་ཐམས་ཅད་ཁུར་བ་དག་གིས་བཀང་ནས་དྲུག་སྡེ་དག་གིས་དེའི་ཁ་ཟས་ཐམས་ཅད་བསྡུས་ཏེ་དོང་ངོ ། །ཇི་ཙམ་ན་ཁྱིམ་བདག
7.139a
དེ་འོངས་པ་དང ། ཆུང་མས་སྨྲས་པ། རྗེའི་སྲས་སྦྱིན་གནས་དག་བྱོན་པར་གྱུར་ནས་དེ་དག་གིས་ཁ་ཟས་ཐམས་ཅད་བཞེས་ཀྱིས་བཞུད་ལ། ཁྱོག་དེ་ལ་བག་རྫངས་སྟ་གོན་བྱེད་ཀྱི་བར་དུ་རེ་ཤིག་ཉི་མ་ཉུང་ཤས་ཤིག་སྡོད་ཅིག་ཅེས་གསུངས་ཤིག་།ཁྱིམ་བདག་གིས་སྨྲས་པ། བཟང་མོ་དེས་སྡོད་པར་མི་ནུས་ཀྱིས་ཇེ་བུ་མོ་བག་མར་གཏང་བར་གྱིས་ཤིག་དང་ཕྱིས་ཉེ་དུ་དག་ཟན་སྦྱིན་པར་བྱའོ། །ཆུང་མས་སྨྲས་པ། རྗེའི་སྲས་དེ་ནི་ཆུང་མ་གསོད་པ་ལགས་པས་དེ་ལ་གཞན་སུས་ཀྱང་བུ་མོ་སྩལ་བར་མི་འགྱུར་གྱིས་བཞུད་ཅིག་དང་སྡོད་པར་འགྱུར་རོ། །ཁྱིམ་བདག་དེ་དེའི་གན་དུ་སོང་སྟེ་སྨྲས་པ། བུ་བདག་ཅག་གིས་ཁ་ཟས་དག་སྟ་གོན་བྱས་པར་འགྱུར་བ་གང་ཡིན་པ་དེ་སྦྱིན་གནས་དག་གིས་བཞེས་ཀྱིས། ད་ཉེ་དུ་དག་གི་ཕྱིར་ཁ་ཟས་སྟ་གོན་བྱེད་ཀྱི་བར་དུ་ཉི་མ་ཉུང་ཤས་ཤིག་སྡོད་ཅིག་།དེས་སྨྲས་པ། ཁོ་བོ་མི་སྡོད་དེ་གལ་ཏེ་ཉི་མ་དེ་ཉིད་ལ་བག་མ་རྫོངས་ཞིང་སྦྱིན་ན་བག་མར་བླང་ངོ ། །གལ་ཏེ་མི་སྦྱིན་ན་ཁོ་བོ་ཆུང་མ་གཞན་ལེན་གྱིས་ཁྱོད་ཀྱི་བུ་མོ་དོར་བར་བྱའོ། །ཁྱིམ་བདག་དེ་ཆུང་མའི་གན་དུ་སོང་སྟེ་སྨྲས་པ། བཟང་མོ་ཁྱོ་ག་དེ་ན་རེ་གལ་ཏེ་ཉི་མ་དེ་ཉིད་ལ་བག་མ་རྫོངས་ཞིང་སྦྱིན་ན་བག་མར་བླངས་བར་བྱའོ། །གལ་ཏེ་མི་སྦྱིན་ན་ཁོ་བོ་ཆུང་མ་གཞན་ལེན་གྱིས་ཁྱོད་ཀྱི་བུ་མོ་དོར་བར་བྱའོ་ཞེས་ཟེར་རོ། །ཆུང་མས་སྨྲས་པ། རྗེའི་སྲས་དེ་ཆུང་མ་གསོད་པ་ལགས་པས་གཞན་སུ་ཞིག་གིས་དེ་ལ་བུ་མོ་སྩོལ་བར་འགྱུར་ཞེས་དེས་བག་རྫངས་སྟ་གོན་བྱ་བར་བརྩམས་སོ། །ཁྱོ་ག་དེས་ཀྱང་གྲོགས་པོའི་སྲིང་མོ་ཡུགས་ས་མོ་དེ་བླངས་སོ། །གཡས་ཞར་མའི་མ་དེས་ཀྱང་ཁ་ཟས་སྟ་གོན་བྱས་ནས་ཡང་ཁྱིམ་བདག་དེ་ལ་སྨྲས་པ། རྗེའི་སྲས་ད་ཁྱོ་ག་དེའི་གན་དུ་བཞུད་ལ་བག་མ་ལེན་དུ་ཤོག་ཤིག་ཅེས་གསུངས་ཤིག་།ཁྱིམ་བདག་དེ་དེའི་གན་དུ་སོང་སྟེ་སྨྲས་པ། བུ་ད་བག་མ་ལེན་དུ་ཤོག་ཤིག་།དེས་སྨྲས་པ། ཁྱེད་ཀྱིས་ཉི་མ་དེ་ལས་ཡོལ་བར་བྱས་པས་ད་ཁོ་བོ་མི་ལེན་ཏོ། །ཁྱིམ་བདག
7.139b
དེས་ཁྱོ་ག་དེ་བཟུང་སྟེ་རྒྱལ་པོའི་ཕོ་བྲང་དུ་འོ་དོད་བོས་ནས་ཤགས་ལ་བཀུག་པ་དང ། ཁྱོ་ག་དེས་ཁྱིམ་བདག་དེ་ཕམ་པར་བྱས་སོ། །གཡས་ཞར་མའི་མ་དེ་བདག་གི་བུ་མོ་མ་ལོམ་མོ་ཞེས་ངུ་ཞིང་འདུག་པ་དང ། དེའི་ངོས་ཀྱི་སྡུམ་ཚེས་དག་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་བུ་མོ་བྱིན་ཟིན་པའི་བར་ཆད་བྱེད་དོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་རབ་ཏུ་མང་པོ་དག་ཁྱིམ་རྣམས་སུ་དོང་བ་ལས་གལ་ཏེ་དེ་དག་ལ་བྲམ་ཟེ་དང ། ཁྱིམ་བདག་དད་པ་ཅན་དག་གིས་ཕྱེ་དག་དང ། ཁུར་བ་དག་དུས་ཀྱིས་སྟོབས་པར་གྱུར་ལ། འདོད་ན་དགེ་སློང་དེ་དག་གིས་ལྷུང་བཟེད་གང་བ་གཉིས་སམ། གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །ལྷུང་བཟེད་གང་བ་གཉིས་སམ། གསུམ་བླངས་ནས
7.140a
ཕྱི་རོལ་ཀུན་དགའ་ར་བར་དོང་ལ་དགེ་སློང་འཁོད་པ་རྣམས་ལ་འང་བགོ་བཤའ་བྱ། བདག་ཅག་ཀྱང་བཟའ་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །དགེ་སློང་ཞེས་བྱ་བ་ནི་དྲུག་སྡེ་དག་གོ། །རབ་ཏུ་མང་པོ་དག་ཅེས་བྱ་བ་ནི་གཉིས་ལས་ལྷག་པ་ནི་རབ་ཏུ་མང་པོ་དག་གོ། །ཁྱིམ་རྣམས་སུ་ཞེས་བྱ་བ་ནི་བྲམ་ཟེ་དང ། ཁྱིམ་བདག་དག་གི་ཁྱིམ་རྣམས་སུའོ། །དོང་བ་ལས་ཞེས་བྱ་བ་ནི་སོང་བ་ལས་སོ། །གལ་ཏེ་དེ་དག་ལ་ཞེས་བྱ་བ་ནི་དགེ་སློང་དེ་དག་ལའོ། །བྲམ་ཟེ་དང ། ཁྱིམ་བདག་དད་པ་ཅན་དག་གིས་ཤེས་བྱ་བ་ལ། དད་པ་ཅན་ཞེས་བྱ་བ་ནི་སངས་རྒྱས་ལ་མངོན་པར་དད་པ་དང ། ཆོས་དང་དགེ་འདུན་ལ་མངོན་པར་དད་པ་དང ། སངས་རྒྱས་ལ་བསྐྱབས་སུ་སོང་བ་དང ། ཆོས་དང་དགེ་འདུན་ལ་སྐྱབས་སུ་སོང་བ་དག་གོ། །ཕྱེ་དག་ཅེས་བྱ་བ་ནི་ཕྱེ་དང ། འདེའ་གུ་དག་གོ། །ཁུར་བ་དག་ཅེས་བྱ་བ་ནི་བག་ཚོས་དག་གོ། །དུས་ཀྱིས་སྟོབས་པར་གྱུར་ལ་ཞེས་བྱ་བ་ནི་ཡང་དང་ཡང་དུ་སྟོབས་པར་གྱུར་པའོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེ་དག་གིས་ཤེས་བྱ་བ་ནི་དགེ་སློང་གང་ཡིན་པ་དག་གིས་སོ། །ལྷུང་བཟེད་གང་བ་གཉིས་སམ། གསུམ་བླང་བར་བྱའོ་ཞེས་བྱ་བ་ལ། ལྷུང་བཟེད་ནི་གསུམ་ཏེ། ཆེན་པོ་དང ། འབྲིང་དང ། ཆུང་ངུའོ། །དེ་ལ་ཆེན་པོ་ནི་གང་དུ་འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་དོ་བཙོས་པ་སྲན་ཚོད་དང་བཅས། ཚོད་མ་དང་བཅས་པ་བླུགས་ན་ཁའི་ཆའི་མཐའ་ཁོ་ན་ནས་མཐེ་བོའི་ལྟོ་གང་གིས་མི་རེག་པའོ། །ཆུང་ངུ་ནི་གང་དུ་འབྲས་ཐུག་པོ་མ་ག་དྷཱའི་བྲེ་ཆུང་གང་བཙོས་པ་སྲན་ཚོད་དང་བཅས། ཚོད་མ་དང་བཅས་པ་བླུགས་ན་ཁའི་ཆའི་མཐའ་ཁོ་ན་ནས་མཐེ་བོའི་ལྟོ་གང་གིས་མི་རེག་པའོ། །འབྲིང་དེ་གཉིས་ཀྱི་བར་རོ། །དེ་ལས་ལྷག་པར་ལེན་ན་ཞེས་བྱ་བ་ནི་དེ་ལས་མང་དུའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས། ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད།
7.140b
འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །ལྷུང་བཟེད་གང་བ་གཉིས་སམ་གསུམ་བླང་ནས་ཕྱི་རོལ་ཀུན་དགའ་ར་བར་དོང་ལ། དགེ་སློང་འཁོད་པ་རྣམས་ལ་ཡང་བགོ་བཤའ་བྱ་ཞེས་བྱ་བ་ནི་ཁྱིམ་གྱི་ཕྱི་རོལ་གཙུག་ལག་ཁང་དུ་དོང་ལ་དེ་ན་དགེ་སློང་གང་དག་འཁོད་པ་རྣམས་ལ་ཡང་སྦྱིན་པར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ལྷུང་བཟེད་ཆེན་པོ་གསུམ་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ལྷུང་བཟེད་ཆེན་པོ་གཉིས་དང ། འབྲིང་གཅིག་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ལྷུང་བཟེད་ཆེན་པོ་གཉིས་དང ། ཆུང་ངུ་ཅིག་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ལྷུང་བཟེད་འབྲིང་གཉིས་དང་ཆེན་པོ་གཅིག་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ཇི་ཙམ་དུ་བྲེའུ་ཆུང་ཕྱེད་དང་ལྔ་ལས་ལྷག་པའི་བསོད་སྙོམ་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །སྦྱིན་བདག་གིས་ཅི་བདེར་བྱས་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལྷུང་བཟེད་དོ་གསུམ་ཙམ་ལས་ལྷག་པར་ལེན་པའི་ལྟུང་བྱེད་དེ་སུམ་བཅུ་རྩ་གསུམ་པ་རྫོགས་སྷོ།། ་་་་་།། བར་སྡོམ་ལ། སྟན་གཅིག་དང་ནི་ཆུ་བཞིན་སྤོང ། །འབགས་དང་ཟས་ཡོད་རུང་བ་དང ། །ཐོང་ཤིག་ལྷག་པོར་ཐུག་པ་དང ། །སྐྱོ་མའི་སྡེ་ཚན་བསྡུས་པ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི
7.141a
སྟན་གཅིག་པའི་ཟས་ཟ་སྟེ། ང་སྟན་གཅིག་པའི་ཟས་ཟ་བ་ན། སྙིང་ལས་ཆུང་ངུར་འཚོ་ཞིང ། གནོད་པ་ཉུང་བ་དང ། ཉམ་ང་བ་ཆུང་བ་དང ། བསྐྱོད་པ་ཡང་བ་དང ། འཚོ་བ་དང ། སྟོབས་དང་ལྡན་པ་དང ། བདེ་བ་དང ། ཁ་ན་མ་ཐོ་བ་མེད་པ་དང ། བདེ་བ་ལ་རེག་པར་གནས་པར་འཚོའོ། །དགེ་སློང་དག་ཁྱེད་ཀྱང་ཚུར་ཤེག་ལ་སྟན་ཅིག་པའི་ཟས་ཟོ་ཤིག་དང ། ཁྱེད་ཀྱང་སྟན་ཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང ། གནོད་པ་ཉུང་བ་དང ། ཉམ་ང་བ་ཆུང་བ་དང ། བསྐྱོད་པ་ཡང་བ་དང ། འཚོ་བ་དང ། སྟོབས་དང་ལྡན་པ་དང ། བདེ་བ་དང ། ཁ་ན་མ་ཐོ་བ་མེད་པ་དང ། བདེ་བ་ལ་རེག་པར་གནས་པར་འཚོ་བར་འགྱུར་རོ། །དགེ་སློང་རྣམས་སྟན་ཅིག་པའི་ཟས་ཟ་བར་བྱེད་དེ། དེ་དག་སྟན་ཅིག་པའི་ཟས་ཟ་བ་ན་སློབ་དཔོན་མཐོང་ན་ཡང་ལྡང་བར་བྱེད། མཁན་པོ་དང ། བླ་མ་དང ། བླ་མ་ལྟ་བུ་མཐོང་ན་ཡང་ལྡང་བར་བྱེད་པས་དེ་དག་བདག་ཅག་གིས་སྤངས་སོ་ཞེས་ཟ་བར་མི་བྱེད་པས་དེ་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཀུན་དགའ་བོ་ངས་དགེ་སློང་དག་ང་ནི་སྟན་ཅིག་པའི་ཟས་ཟ་སྟེ། ང་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང ། གནོད་པ་ཉུང་བ་དང ། ཉམ་ང་བ་ཆུང་བ་དང ། སྐྱོད་པ་ཡང་བ་དང ། འཚོ་བ་དང ། སྟོབས་དང་ལྡན་པ་དང ། བདེ་བ་དང ། ཁ་ན་མ་ཐོ་བ་མེད་པ་དང ། བདེ་བ་ལ་རེག་པར་གནས་པར་འཚོའོ། །དགེ་སློང་དག་ཁྱེད་ཀྱང་ཚུར་ཤོག་ལ་སྟན་ཅིག་པའི་ཟས་ཟོ་ཤིག་དང ། ཁྱེད་ཀྱང་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་གནོད་པ་ཉུང་བ་དང ། ཉམ་ང་བ་ཆུང་བ་དང ། བསྐྱོད་པ་ཡང་བ་དང ། འཚོ་བ་དང ། སྟོབས་དང་ལྡན་པ་དང ། བདེ་བ་དང ། ཁ་ན་མ་ཐོ་བ་མེད་པ་དང ། བདེ་བ་ལ་རེག་པར་གནས་པར་འཚོ་བར་འགྱུར་རོ། །ཞེས་བྱས་ན། གང་གིས་ད་ལྟར་དགེ་སློང་དག་རིད་པ་དང ། ཉམ་ཆུང་བ་དང་རྐེ་བ
7.141b
དང ། སྐམ་པ་དང ། ལུས་མ་ཐོབ་པར་གྱུར་པའི་རྒྱུ་ནི་གང་ཡིན་རྐྱེན་ནི་གང་ཡིན། བཙུན་པ་བཅོམ་ལྡན་འདས་ཀྱིས་དགེ་སློང་དག་ང་ནི་སྟན་གཅིག་པའི་ཟས་ཟ་སྟེ། བསྟན་གཅིག་པའི་ཟས་ཟ་བ་ན་སྙིང་ལས་ཆུང་ངུ་འཚོ་ཞིང་གནོད་པ་ཉུང་བ་དང་ཉམ་ང་བ་ཆུང་བ་དང ། བསྐྱོད་པ་ཡང་བ་དང ། འཚོ་བ་དང ། སྟོབས་དང་ལྡན་པ་དང ། བདེ་བ་དང ། ཁ་ན་མ་ཐོ་བ་མེད་པ་དང ། བདེ་བ་ལ་རེག་པར་གནས་པར་འཚོའོ། །དགེ་སློང་དག་ཁྱེད་ཀྱང་ཚུར་ཤེག་ལ་སྟན་གཅིག་པའི་ཟས་ཟོ་ཤིག་དང ། ཁྱེད་ཀྱང་སྟན་ཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་གནོད་པ་ཉུང་བ་དང ། ཉམ་ང་བ་ཆུང་བ་དང ། བསྐྱོད་པ་ཡང་བ་དང ། འཚོ་བ་དང ། སྟོབས་དང་ལྡན་པ་དང ། བདེ་བ་དང ། ཁ་ན་མ་ཐོ་བ་མེད་པ་དང ། བདེ་བ་ལ་རེག་པར་གནས་པར་འཚོ་བར་འགྱུར་རོ་ཞེས་བཀའ་སྩལ་ནས། དགེ་སློང་རྣམས་སྟན་ཅིག་པའི་འཚལ་མ་འཚལ་བར་བགྱིད་དེ། དེ་དག་སྟན་གཅིག་པའི་འཚལ་མ་འཚལ་བ་ན། སློབ་དཔོན་མཐོང་བ་ན་ཡང་ལྡང་བར་བགྱིད། མཁན་པོ་དང ། བླ་མ་དང ། བླ་མ་ལྟ་བུ་མཐོང་ན་ཡང་ལྡང་བར་བགྱིད་པ་དེ་དག་བདག་ཅག་གིས་སྤངས་སོ་ཞེས་འཚལ་བར་མི་བགྱིད་པས་དེ་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཏེ། བཙུན་པ་གང་གིས་ད་ལྟར་དགེ་སློང་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དེ་ལྟ་བས་ན་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང ། ཟས་བརྩམས་པས་སློབ་དཔོན་དང ། མཁན་པོ་དང ། བླ་མ་དང ། བླ་མ་ལྟ་བུ་མཐོང་ན་ལྡང་བར་མི་བྱའོ། །བཅོམ་ལྡན་འདས་ཀྱིས་མ་སྤངས་པས། ཇི་ཙམ་གྱིས་ཆོག་པ། བཟའ་བར་བྱ་ཞིང ། ཟས་བརྩམས་པས་སློབ་དཔོན་དང ། མཁན་པོ་དང ། བླ་མ་དང ། བླ་མ་ལྟ་བུ་མཐོང་ན་ལྡང་བར་མི་བྱའོ། །ཞེས་བཀའ་སྩལ་ནས་དེ་དག་ཆུ་བཞིན་དུ་སྤངས་པས་ལོ་མ་དང ། སྲན་ཚོད་དང ། ལྡམ་ལྡུམ་དང ། སྐམ་ཚོད་ཀྱིས་ཀྱང་སྤོང་བར་བྱེད་ཅིང ། དེ་དག་བདག་ཅག་གིས་སྤངས་སོ་ཞེས་ཟ་བར་མི
7.142a
བྱེད་པས་དེ་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཀུན་དགའ་བོ་ངས་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང ། ཟས་བརྩམས་པས་སློབ་དཔོན་དང ། མཁན་པོ་དང ། བླ་མ་དང ། བླ་མ་ལྟ་བུ་མཐོང་ན་ལྡང་བར་མི་བྱའོ། །ཞེས་བྱས་ན་གང་གིས་ད་ལྟར་དགེ་སློང་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་བཅོམ་ལྡན་འདས་ཀྱིས་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང ། ཟས་བརྩམས་པས་སློབ་དཔོན་དང ། མཁན་པོ་དང ། བླ་མ་དང ། བླ་མ་ལྟ་བུ་མཐོང་ན་ལྡང་བར་མི་བྱའོ་ཞེས་བཀའ་སྩལ་ནས། དེ་དག་ཆབ་བཞིན་དུ་སྤངས་པས་ལོ་མ་དང ། སྲན་ཚོད་དང ། ལྡམ་ལྡུམ་དང ། སྐམས་ཚོད་ཀྱིས་ཀྱང་སྤོང་བར་བགྱིད་ཅིང་དེ་དག་བདག་ཅག་གིས་སྤངས་སོ་ཞེས་འཚལ་བར་མི་བགྱིད་པས་དེ་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཏེ། བཙུན་པ་གང་གིས་ད་ལྟར་དགེ་སློང་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དེ་ལྟ་བས་ན། བཅའ་བ་ལྔ་པོ་དག་གིས་ནི་སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་ཏེ། བཅའ་བ་ལྔ་པོ་གང་དག་གིས་སྤངས་པར་མི་འགྱུར་ཞེ་ན། བཅའ་བར་བྱ་བ་རྩ་བ་དང ། སྡོང་བུ་དང ། འདབ་མ་དང ། མེ་ཏོག་དང ། འབྲས་བུ་དག་སྟེ། བཅའ་བ་ལྔ་པོ་དེ་དག་གིས་ནི་སྤངས་པར་མི་འགྱུར་རོ། །བཟའ་བ་ལྔ་པོ་གང་དག་གིས་སྤངས་པར་འགྱུར་བ་དག་གང་ཞེ་ན། བཟའ་བར་བྱ་བ་འབྲས་ཆན་དང ། ཟན་དྲོན་དང ། ཤ་དང ། སྣུམ་ཁུར་དང ། འདེའ་གུ་དག་སྟེ། བཟའ་བ་ལྔ་པོ་དེ་དག་གིས་ནི་སྤངས་པར་འགྱུར་རོ། །བཅའ་བ
7.142b
ལྔ་པོ་དག་འཆོས་ནས་ནི་བཟའ་བ་ལྔ་པོ་དག་བཟའ་བར་བྱའི། བཟའ་བ་ལྔ་པོ་དག་ཟོས་ནས་ནི་བཅའ་བ་ལྔ་པོ་དག་བཅའ་བར་མི་བྱའོ། །དགེ་སློང་གིས་བཟའ་བ་ལྔ་པོ་དག་ཟོས་ནས་བཅའ་བ་ལྔ་པོ་དག་འཆའ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་བཅའ་བ་ལྔ་པོ་དག་གིས་ནི་སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་རོ་ཞེས་བཀའ་སྩལ་ནས་དེ་དག་དེས་འབགས་པའི་ལག་པ་དག་དང ། དེས་གོས་པའི་ལྷུང་བཟེད་དག་གིས་བདག་ཅག་གིས་སྤངས་སོ་ཞེས་ཟ་བར་མི་བྱེད་པས་དེ་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨས་པ། ཀུན་དགའ་བོ་ངས་བཅའ་བ་ལྔ་པོ་དག་གིས་ནི་སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་རོ་ཞེས་བྱས་ནས། གང་དག་གིས་ད་ལྟར་དགེ་སློང་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་པའི་རྒྱུ་ནི་གང་ཡིན། སྐྱེན་ནི་གང་ཡིན། བཙུན་པ་བཅོམ་ལྡན་འདས་ཀྱིས་བཅའ་བ་ལྔ་པོ་དག་གིས་ནི་སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་རོ་ཞེས་བཀའ་སྩལ་ནས་དེ་དག་དེས་འབགས་པའི་སུག་པ་དག་དང ། དེས་གོས་པའི་ལྷུང་བཟེད་དག་གིས་བདག་ཅག་གིས་སྤངས་སོ་ཞེས་འཚལ་བར་མི་བགྱིད་པས་དེ་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཏེ། བཙུན་པ་གང་གིས་ད་ལྟར་དགེ་སློང་དག་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དེ་ལྟ་བས་ན་རྒྱུ་ལྔས་ནི་སྤངས་པར་བརྗོད་པར་བྱ་ཞིང ། རྒྱུ་ལྔས་ནི་མ་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས་སྤངས་པར་བརྗོད་པར་བྱ་ཞེ་ན། ཟས་ཡོད་པ་དང ། ཟས་སྟོབས་པ་ཡོད་པ་དང །
7.143a
ཟས་བརྩམ་པ་ཡོད་པ་དང ། ཟས་སྤངས་པ་ཡོད་པ་དང ། སྤྱོད་ལམ་ལས་ཉམས་པས་སོ། །ཇི་ལྟར་ཟས་ཡོད་པས་ཤེ་ན། བཅའ་བ་ལྔ་པོ་དང ། བཟའ་བ་ལྔ་པོ་དག་ཡོད་པས་ཏེ། དེ་ལྟར་ཟས་ཡོད་པས་སོ། །ཇི་ལྟར་ཟས་སྟོབས་པ་ཡོད་པས་ཤེ་ན། བུད་མེད་དམ། སྐྱེས་པ་འམ། མ་ནིང་ཡོད་པས་ཏེ། དེ་ལྟར་ཟས་སྟོབས་པ་ཡོད་པས་སོ། །ཇི་ལྟར་ཟས་བརྩམས་པ་ཡོད་པས་ཤེ་ན། བཅའ་བ་ལྔ་པོ་དང ། བཟའ་བ་ལྔ་པོ་དག་ཀུན་དུ་བརྩམས་པ་ཡོད་པས་ཏེ། དེ་ལྟར་ཟས་བརྩམས་པ་ཡོད་པས་སོ། །ཇི་ལྟར་ཟས་སྤངས་པ་ཡོད་པས་ཤེ་ན། བཅའ་བ་ལྔ་པོ་དང ། བཟའ་བ་ལྔ་པོ་དག་སྤངས་པ་ཡོད་པས་ཏེ། དེ་ལྟར་ཟས་སྤངས་པ་ཡོད་པས་སོ། །ཇི་ལྟར་སྤྱོད་ལམ་ལས་ཉམ་པས་ཤེ་ན། སྟན་གང་ལ་འདུག་པར་གྱུར་པའི་སྟན་དེ་ལས་ལངས་པར་གྱུར་པ་སྟེ། དེ་ལྟར་སྤྱོད་ལམ་ལས་ཉམས་པས་ཏེ། རྒྱུ་ལྔ་པོ་དེ་དག་གིས་ནི་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས། མ་སྤངས་པར་བརྗོད་པར་བྱ་ཞེ་ན། ཟས་མེད་པ་དང ། ཟས་སྟོབས་པ་མེད་པ་དང ། ཟས་བརྩམས་པ་མེད་པ་དང ། ཟས་སྤངས་པ་མེད་པ་དང ། སྤྱོད་ལམ་ལས་མ་ཉམས་པས་སོ། །ཇི་ལྟར་ཟས་མེད་པས་ཤེ་ན། བཅའ་བ་ལྔ་པོ་དང ། བཟའ་བ་ལྔ་པོ་དག་མེད་པས་སྟེ། དེ་ལྟར་ཟས་མེད་པས་སོ། །ཇི་ལྟར་ཟས་སྟོབས་པ་མེད་པས་ཤེ་ན། བུད་མེད་དམ། སྐྱེས་པ་འམ། མ་ནིང་མེད་པས་ཏེ། དེ་ལྟར་ཟས་སྟོབས་པ་མེད་པས་སོ། །ཇི་ལྟར་ཟས་བརྩམས་པ་མེད་པས་ཤེ་ན། བཅའ་བ་ལྔ་པོ་དག་དང ། བཟའ་བ་ལྔ་པོ་དག་ཀུན་ཏུ་བརྩམས་པ་མེད་པས་སྟེ། དེ་ལྟར་ཟས་བརྩམས་པ་མེད་པས་སོ། །ཇི་ལྟར་ཟས་སྤངས་པ་མེད་པས་ཤེ་ན། བཅའ་བ་ལྔ་པོ་དག་དང ། བཟའ་བ་ལྔ་པོ་དག་སྤངས་པ་མེད་པས་ཏེ། དེ་ལྟར་ཟས་སྤངས་པ་མེད་པས་སོ། །ཇི་ལྟར་སྤྱོད་ལམ་ལས་མ་ཉམས་པས་ཤེ་ན། སྟན་གང་ལ་འདུག་པར་གྱུར་པའི་སྟན་དེ་ལས་ལངས་པར་མ་གྱུར་པས་ཏེ། དེ་ལྟར་སྤྱོད་ལམ་ལས་མ་ཉམས་པས་ཏེ། རྒྱུ་ལྔ་པོ་དེ་དག་གིས་ནི་མ
7.143b
སྤངས་པར་བརྗོད་པར་བྱའོ། །གཞན་ཡང་རྒྱུ་ལྔས་ནི་སྤངས་པར་བརྗོད་པར་བྱ་ཞིང ། རྒྱུ་ལྔས་ནི་མ་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས་སྤངས་པར་བརྗོད་པར་བྱ་ཞེ་ན། རུང་བས་སྤངས་བར་བྱེད་པ་དང ། གསོག་འཇོག་མ་བྱས་པས་སྤངས་བར་བྱེད་པ་དང ། གསོག་འཇོག་མ་བྱས་པ་དང ། འདྲེས་པས་སྤངས་བར་བྱེད་པ་དང ། སྤྱོད་ལམ་ལས་ཉམས་པས་ཏེ། རྒྱུ་ལྔ་པོ་དེ་དག་གིས་སྤངས་བར་བརྗོད་པར་བྱའོ། །རྒྱུ་ལྔ་པོ་གང་དག་གིས་མ་སྤངས་པར་བརྗོད་པར་བྱ་ཞེ་ན། མི་རུང་བས་སྤངས་བར་བྱེད་པ་དང ། མི་རུང་བ་དང་འདྲེས་པས་སྤངས་བར་བྱེད་པ་དང ། གསོག་འཇོག་བྱས་པས་སྤངས་བར་བྱེད་པ་དང ། གསོག་འཇོག་བྱས་པ་དང་འདྲེས་པས་སྤངས་བར་བྱེད་པ་དང ། སྤྱོད་ལམ་ལས་མ་ཉམས་པས་ཏེ། རྒྱུ་ལྔ་པོ་དེ་དག་གིས་ནི་མ་སྤངས་པར་བརྗོད་པར་བྱའོ། །གཞན་ཡང་ཚིག་ལྷག་མ་མེད་པ་ལྔས་ནི་སྤངས་པར་བརྗོད་པར་བྱ་ཞིང ། ཚིག་ལྷག་མ་དང་བཅས་པ་ལྔས་ནི་མ་སྤངས་པར་བརྗོད་པར་བྱའོ། །ཚིག་ལྷག་མ་མེད་པ་ལྔ་གང་ཞེ་ན། ཐོང་ཤིག་ཅེས་བྱ་བ་དང ། བྱིན་ཅིག་ཅེས་བྱ་བ་དང ། སོང་ཤིག་ཅེས་བྱ་བ་དང ། ཟོས་ཟིན་ཏོ་ཞེས་བྱ་བ་དང ། ཆོག་གོ་ཞེས་བྱ་བ་སྟེ། ཚིག་ལྷག་མ་མེད་པ་ལྔ་པོ་དེ་དག་གིས་ནི་སྤངས་པར་བརྗོད་པར་བྱའོ། །ཚིག་ལྷག་མ་དང་བཅས་པ་ལྔ་གང་ཞེ་ན། རེ་ཤིག་ཐོང་ཤིག་ཅེས་བྱ་བ་དང ། རེ་ཤིག་བྱིན་ཅིག་ཅེས་བྱ་བ་དང ། རེ་ཤིག་སོང་ཤིག་ཅེས་བྱ་བ་དང ། རེ་ཤིག་ཟོས་ཟིན་ཏོ་ཞེས་བྱ་བ་དང ། རེ་ཤིག་ཆོག་གོ་ཞེས་བྱ་བ་སྟེ། ཚིག་ལྷག་མ་དང་བཅས་པ་ལྔ་པོ་དེ་དག་གིས་ནི་མ་སྤངས་པར་བརྗོད་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་སྤངས་པས་བཟའ་བར་མི་བྱའོ་ཞེས་བཀའ་སྩལ་ནས་དྲུག་སྡེ་དག་སྤངས་པས་ཀྱང་ཟ་བར་བྱེད། མ་སྤངས་པས་ཀྱང་ཟ་བར་བྱེད་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་སྤངས་པས་བཟའ་བར་མི་བྱའོ། །ཞེས་བཀའ་སྩལ་ན་ཅིའི་ཕྱིར་དགེ་སློང་དག་སྤངས་པས་ཀྱང་ཟ་བར་བྱེད། མ་སྤངས་པས་ཀྱང་ཟ་བར་བྱེད་ཅེས
7.144a
སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་སྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་ཏུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་སྨྲས་པ། དགེ་སློང་དག་ངས་དགེ་སློང་གིས་སྤངས་པས་བཟའ་བར་མི་བྱའོ་ཞེས་བཀའ་སྩལ་ན་ཁྱེད་སྤངས་པས་ཀྱང་ཟ་བར་བྱེད། མ་སྤངས་པས་ཀྱང་ཟ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་ཟོས་ཟིན་ཅིང་སྤངས་པ་ལས་བཅའ་བ་འམ། བཟའ་བ་འཆའ་འམ་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དགེ་སློང་ནད་པ་རབ་ཏུ་མང་པོ་དག་གི་ནད་གཡོག་རབ་ཏུ་མང་པོ་དག་ཡོད་པ་དེ་དག་གིས་བདག
7.144b
ཉིད་ཟོས་ནས་ནད་པ་རྣམས་ཀྱི་ལྟོ་ཁེངས་པའི་བསོད་སྙོམས་དག་མནོས་པ་དང ། དགེ་སློང་ནད་པ་རྣམས་ཀྱིས་ཟ་བར་མ་ནུས་ཤིང ། དགེ་སློང་ནད་གཡོག་གིས་ཀྱང་བདག་ཅག་སྤངས་སོ་ཞེས་ཟ་བར་མི་བྱེད། ཀུན་དགའ་ར་བ་པ་དང ། དགེ་ཚུལ་དག་ཀྱང་མེད་ནས་དེ་དག་གིས་ཀུན་དགའ་ར་བའི་ནང་དུ་ཟས་ཀྱི་ཕུང་པོ་ཆེན་པོ་རྣམ་པར་བཞག་པ་དང ། དེར་བྱ་རོག་དག་ཟ་བ་ན་བྱ་རོག་གིས་སྒྲ་འབྱིན་པ་ཆེན་པོ་བྱུང་བར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཀུན་དགའ་ར་བའི་ནང་ན་བྱ་རོག་གིས་སྒྲ་འབྱིན་པ་ཆེན་པོ་བྱུང་བར་གྱུར་པ་འདི་ཅི་ལས་གྱུར། བཙུན་པ་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སྡུམ་པ་གཞན་དུ་གདུགས་ཚོད་ལ་སྤྱན་དྲངས་ནས། དགེ་སློང་བྲོ་འཚལ་བ་རབ་ཏུ་མང་པོ་དག་གི་བྲོ་གཡོག་རབ་ཏུ་མང་པོ་དག་མཆིས་པ་དེ་དག་གིས་བདག་ཉིད་འཚལ་ནས་བྲོ་འཚལ་བ་རྣམས་ཀྱི་གཡར་བལྟམ་པའི་བསོད་སྙོམས་དག་མནོས་པ་དང ། དགེ་སློང་བྲོ་འཚལ་བ་རྣམས་ཀྱིས་འཚལ་བར་རྔོ་མ་ཐོག་ཅིང་དགེ་སློང་བྲོ་གཡོག་དག་གིས་ཀྱང་བདག་ཅག་གིས་སྤངས་སོ་ཞེས་འཚལ་བར་མི་བགྱིད། ཀུན་དགའ་ར་བ་པ་དང ། དགེ་ཚུལ་དག་ཀྱང་མ་མཆིས་ནས། དེ་དག་གིས་ཀུན་དགའ་ར་བའི་ནང་དུ་ཟས་ཀྱི་ཕུང་པོ་ཆེན་པོ་རྣམ་པར་བཞག་པ་དང ། དེར་བྱ་རོག་དག་འཚལ་བ་ན་བྱ་རོག་གིས་སྒྲ་འབྱིན་པ་ཆེན་པོ་བྱུང་བར་གྱུར་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངས་དགེ་སློང་རྣམས་བདེ་བ་ལ་རེག་པར་གནས་པར་བྱ་བའི་ཕྱིར་དང ། སྦྱིན་པ་པོ་རྣམས་ཀྱི་སྦྱིན་པར་བྱ་བའི་ཆོས་ཡོངས་སུ་ལོངས་སྤྱད་པར་བྱ་བའི་ཕྱིར་ལྷག་པོར་གནང་བར་བྱའོ་སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ལྷག་པོར་བྱས་ཏེ་བཟའ་བར་རྗེས་སུ་གནང་ངོ ། །བཅོམ་ལྡན་འདས་ཀྱིས་ལྷག་པོར་བྱས་ཏེ་བཟའ་བར་རྗེས
7.145a
སུ་གནང་ངོ་ཞེས་བཀའ་སྩལ་ནས། དགེ་སློང་རྣམས་ཀྱིས་ལྷག་པོར་ཇི་ལྟར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཟས་ཟོས་ཟིན་ཅིང་སྤངས་ཏེ། ཡོངས་སུ་རྫོགས་ཤིང་མཐར་ཐུག་པར་བྱས་པ་གང་ཡང་རུང་བ་ཞིག་གིས་བཅའ་བ་འམ། བཟའ་བ་རྙེད་ཅིང་ཟ་བར་འདོད་ན་དགེ་སློང་དེས་ལག་པ་གཉིས་སྐན་ཏེ་བྱིན་ལེན་བྱས་ལ་དགེ་སློང་ཟས་ཟོས་ཟིན་ཅིང་མ་སྤངས་ལ་སྤྱོད་ལམ་ལས་མ་ཉམས་པ་གང་ཡིན་པ་འམ། དགེ་སློང་ཟས་ཟོས་ཟིན་ཅིང་སྤངས་ལ་སྤྱོད་ལམ་ལས་མ་ཉམས་པ་གང་ཡིན་པ་དེའི་མདུན་དུ་ཙོག་པུར་འདུག་སྟེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་འཚལ་མ་འཚལ་ལགས་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱིས་པ་ལས་བཅའ་བ་དང་བཟའ་བ་རྙེད་ཅིང་འཚལ་བར་འཚལ་ན་ལྷག་པོར་བགྱིས་ཏེ་བདག་ལ་སྩལ་དུ་གསོལ། །དེས་ཁམས་གཉིས་སམ། གསུམ་ཟོས་ནས་འདི་སྐད་ཅེས་ཁྱོད་ཀྱིར་གྱུར་གྱིས་བཞུད་ཅིག་ཅེས་བརྗོད་པར་བྱའོ། །དེ་ལ་དགེ་སློང་ཟས་ཟོས་ཟིན་ཅིང་མ་སྤངས་ལ་སྤྱོད་ལམ་ལས་མ་ཉམས་པ་གང་ཡིན་པ་དེ་ནི་བདག་ཉིད་ཀྱིས་ཁམ་གཉིས་སམ། གསུམ་ཟོས་ནས་ལྷགས་པོར་བྱའོ། །དེ་ལ་དགེ་སློང་ཟས་ཟོས་ཟིན་ཅིང་སྤངས་ལ་སྤྱོད་ལམ་ལས་མ་ཉམས་པ་གང་ཡིན་པ་དེས་ནི་བཟའ་བར་མི་བྱ་བར་ལག་པར་བྱིན་ནས་ཁྱོད་ཀྱིར་གྱུར་གྱིས་བཞུད་ཅིག་ཅེས་བརྗོད་པར་བྱ་བས་ལྷག་པོར་བྱའོ། །གལ་ཏེ་ཟ་ན་འགལ་ཚབས་ཅན་དུ་འགྱུར་རོ། །རྒྱུ་ལྔས་ལྷག་པོར་མ་བྱས་པར་བརྗོད་པར་བྱ་སྟེ། ལྔ་གང་ཞེ་ན། མཚམས་ཀྱི་ཕྱི་རོལ་དུ་དང ། མི་ཐོབ་པའི་ཕྱོགས་སུ་དང ། རྒྱབ་ནས་དང ། གློ་ནས་དང ། སྤྱོད་ལམ་ལས་ཉམས་པ་བྱེད་དུ་འཛུད་པ་སྟེ། རྒྱུ་ལྔ་པོ་དེ་དག་གིས་ནི་ལྷག་པོར་མ་བྱས་པར་བརྗོད་པར་བྱའོ། །རྒྱུ་ལྔས་ནི་ལྷག་པོར་བྱས་པར་བརྗོད་པར་བྱ་སྟེ། ལྔ་གང་ཞེ་ན། མཚམས་ཀྱི་ཕྱི་རོལ་མ་ཡིན་པར་དང །
7.145b
འཐོབ་པའི་ཕྱོགས་སུ་དང ། རྒྱབ་མ་ཡིན་པ་ནས་དང ། གློ་མ་ཡིན་པ་ནས་དང ། སྤྱོད་ལམ་ལས་མ་ཉམས་པ་བྱེད་དུ་འཛུད་པ་སྟེ། རྒྱུ་ལྔ་པོ་དེ་དག་གིས་ནི་ལྷག་བོར་བྱས་པར་བརྗོད་པར་བྱའོ། །གཞན་ཡང་རྒྱུ་ལྔས་ནི་ལྷག་བོར་མ་བྱས་པར་བརྗོད་པར་བྱ་སྟེ། ལྔ་གང་ཞེ་ན། མཚམས་ཀྱི་ཕྱི་རོལ་དུ་དང ། མི་ཐོབ་པའི་ཕྱོགས་སུ་དང ། ལྷུང་བཟེད་ཀྱི་གཞིར་དང ། ཐུ་བར་དང ། སྤྱོད་ལམ་ལས་ཉམས་པ་བྱེད་དུ་འཛུད་པ་སྟེ། རྒྱུ་ལྔ་པོ་དེ་དག་གིས་ནི་ལྷག་བོར་མ་བྱས་པར་བརྗོད་པར་བྱའོ། །རྒྱུ་ལྔས་ནི་ལྷག་བོར་བྱས་པར་བརྗོད་པར་བྱ་སྟེ། ལྔ་གང་ཞེ་ན། མཚམས་ཀྱི་ཕྱི་རོལ་མ་ཡིན་པར་དང ། འཐོབ་པའི་ཕྱོགས་སུ་དང ། ལྷུང་བཟེད་ཀྱི་གཞི་མ་ཡིན་པར་དང ། ཐུ་བར་མ་ཡིན་པ་དང་སྤྱོད་ལམ་ལས་མ་ཉམས་པ་བྱེད་དུ་འཛུད་པ་སྟེ། རྒྱུ་ལྔ་པོ་དེ་དག་གིས་ནི་ལྷག་བོར་བྱས་པར་བརྗོད་པར་བྱའོ། །གཅིག་གིས་ལྷག་བོར་བྱས་པ་མང་པོ་དག་གིས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བས་ཉུང་བའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་ཟོས་ཟིན་ཅིང་སྤངས་པ་ལས་ལྷག་བོར་མ་བྱས་པར་བཅའ་བ་འམ། བཟའ་བ་འཆའ་འམ། ཟ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །ཟས་ཟོས་ཟིན་ཅིང་སྤངས་པ་ལས་ཞེས་བྱ་བ་ནི་ཡོངས་སུ་རྫོགས་ཤིང་མཐར་ཐུག་པར་བྱས་པ་ལས་སོ། །ལྷག་བོར་མ་བྱས་པར་ཞེས་བྱ་བ་ནི་ལྷག་མར་མ་བྱས་ཤིང་མ་བོར་ཡོངས་སུ་མ་གཏང་བར་རོ། །བཅའ་བ་འམ། བཟའ་བ་ཞེས་བྱ་བ་ནི་བཅའ་བ་ལྔ་པོ་དང ། བཟའ
7.146a
བ་ལྔ་པོ་དག་གོ། །འཆའ་བ་འམ། ཟ་ན་ཞེས་བྱ་བ་ནི་མགུལ་དུ་མིད་ན་འོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་སྤངས་པ་ལ་སྤངས་པར་འདུ་ཤེས་པས་ལྷག་བོར་མ་བྱས་པར་བཅའ་བ་འམ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་སྤངས་པ་ལ་ཡིད་གཉིས་ཟ་བས་ལྷག་བོར་མ་བྱས་པར་བཅའ་བ་འམ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་མ་སྤངས་པ་ལ་སྤངས་པར་འདུ་ཤེས་པས་ལྷག་བོར་མ་བྱས་པར་བཅའ་བ་འམ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །དགེ་སློང་གིས་མ་སྤངས་པ་ལ་ཡིད་གཉིས་ཟ་བས་ལྷག་བོར་མ་བྱས་པར་བཅའ་བའམ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ཐུག་པ་ཇི་ལྟ་བུ་སྤངས་པར་བགྱི་འཚལ་ཉེ་བ་འཁོར་གང་ལ་ཁ་གཟར་གྱེན་དུ་འགྲེང་བའོ། །བཙུན་པ་སྐྱོ་མ་ཇི་ལྟ་བུ་སྤངས་པར་བགྱི་འཚལ། ཉེ་བ་འཁོར་གང་ལ་སོར་མོ་ལྔ་མངོན་པའོ། །ཉེ་བ་འཁོར་མགུལ་དུ་བཏུང་བ་ལ་ནི་སྤངས་པ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྟན་གཅིག་པའི་ཟས་ཀྱི་ལྟུང་བྱེད་དེ་སུམ་བཅུ་རྩ་བཞི་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད
7.146b
པར་བྱེད་དོ། །དེ་རྒས་པའི་གནས་སྐབས་སུ་ཉེ་དུ་ཟད་པ་དང ། ནོར་ཟད་པ་དང ། ལོངས་སྤྱོད་ཟད་པར་གྱུར་ནས་དེས་ཆུང་མ་ལ་སྨྲས་པ། བཟང་མོ་ཁོ་བོས་རྒས་པའི་གནས་སྐབས་སུ་ནོར་བསྒྲུབ་པར་མི་ནུས་ཀྱིས་རབ་ཏུ་འབྱུང་དུ་འགྲོ་འོ། །རྗེའི་སྲས་དེ་བཞིན་མཛོད་ཅིག་།དེ་རྒྱལ་བྱེད་ཀྱི་ཚལ་དུ་སོང་སྟེ། དགེ་སློང་གི་གན་དུ་སོང་སྟེ་ཕྱིན་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་རབ་ཏུ་འབྱུང་གིས་རབ་ཏུ་དབྱུང་དུ་གསོལ། དེས་སྨྲས་པ། བཞིན་བཟང་ཁོ་བོ་རབ་ཏུ་བྱུང་ནས་གསར་བུ་ཡིན་པས་ཁོ་བོས་རབ་ཏུ་འབྱིན་དུ་མི་རུང་ངོ ། །དེས་སྨྲས་པ། འཕགས་པ་བདག་དང་པོ་ཁོ་ནར་ཁྱོད་ཀྱི་གན་དུ་མཆིས་པས་ཁྱོད་ཀྱིས་བདག་དགེ་སློང་འགའ་ཞིག་ལ་གཏད་དུ་གསོལ། དགེ་སློང་དེའི་མཁན་པོ་སྤོང་བ་པ་དགོན་པ་ན་བསམ་གཏན་བྱེད་པ་ཞིག་ཡོད་ནས་དེས་དེ་ཁྲིད་དེ་མཁན་པོའི་གན་དུ་སོང་ནས་སྨྲས་པ། མཁན་པོ་རིགས་ཀྱི་བུ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་འཚལ་ན་མཁན་པོ་ཐུགས་བརྩེ་བའི་སླད་དུ་འདི་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། མཁན་པོས་སྨྲས་པ། བཅོམ་ལྡན་འདས་ཀྱིས་དགེ་སློང་དག་ཤིན་པའི་གནས་སུ་གཏུང་བ་ནི་བླའི་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་ནས་འདོམས་པར་མི་བྱེད། རྗེས་སུ་སྟོན་པར་མི་བྱེད་པ་ནི་མི་རུང་ངོ་ཞེས་བཀའ་སྩལ་ཏོ། །དེས་སྨྲས་པ། མཁན་པོ་རབ་ཏུ་འབྱུང་བ་དང་རྫོགས་པར་བསྙེན་པ་འབའ་ཤིག་མཛོད་ཅིག་དང་བདག་གིས་འདི་ཀློག་པ་དང ། སློབ་ཏུ་སྩལ་ཏོ། །དགེ་སློང་དེས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟངས་འདི་ཁྱོད་ཀྱི་སློབ་དཔོན་ཡིན་པས་ཀློག་པ་དང ། སླབ་ཏུ་འཇུད་པར་འགྱུར་གྱིས་ཀུན་དུ་སྤྱད་པ་གང་ཡིན་པ་དེ་འདི་ལ་དྲིས་ཏེ་གྱིས་ཤིག་།དེས་དེ་ཀློག་པ་དང ། སློབ་ཏུ་འཛུད་པ་ན་རྒན་ཞུགས་དེ་བརྗེད་ངས་པས་ཡང་དང་ཡང་དུ་ལྟུང་བ་འབྱིན་ནས། དེས་དེ་མདུན་དུ་ཙོག་པུར་འདུག་ཏུ་བཅུག་སྟེ་ལྟུང་བ་འཆགས་སུ་འཛུད་པར་བྱེད་དོ། །རྒན་ཞུགས་དེས
7.147a
བསམ་པ། བདག་གི་སློབ་དཔོན་འདིས་བདག་རྟག་ཏུ་མདུན་དུ་ཙོག་པུར་འདུག་ཏུ་བཅུག་སྟེ་ལྟུང་བ་འཆགས་སུ་འཛུད་པས། བདག་གིས་ཀྱང་འདི་མདུན་དུ་ཙོག་པུར་འདུག་ཏུ་བཅུག་སྟེ་ལྟུང་བ་འཆགས་སུ་གཞུགས་པའི་ཐབས་ཅི་ཡོད་སྙམ་མོ། །ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གཤེགས་ཏེ། བཅོམ་ལྡན་འདས་ཀྱིས་གདུགས་ཚོད་གསོལ་ནས་ཁྱིམ་བདག་དེ་ལ་ཆོས་བསྟན་པར་བརྩམས་སོ། །དགེ་སློང་དེས་རྒན་ཞུགས་དེ་ལ་སྨྲས་པ། རྒན་ཞུགས་ཚུར་ཤོག་།ཁྱིམ་དུ་འགྲོ་བའི་ཁྱིམ་དག་ལྟར་འདོང་ངོ ། །དེ་གཉིས་ཁྱིམ་དུ་འགྲོ་བའི་ཁྱིམ་དག་ཏུ་དོང་བ་དང ། དེ་དག་གིས་སྨྲས་པ། འཕགས་པ་གཉིས་གདུགས་ཚོད་གསོལ་ཅིག་།ཁྱིམ་བདག་ཁོ་བོ་ཅག་གཉིས་ཟན་ཟོས་ཟིན་ཏོ། །དེས་སྨྲས་པ། སྣོམས་ཏེ་བཞུད་ལ་ལྷག་བོར་མཛོད་དེ་གསོལ་ཅིག་།དེས་རྒན་ཞུགས་ཀྱི་གདོང་དུ་བལྟས་ཏེ་སྨྲས་པ། རྒན་ཞུགས་འདོད་དམ་འཚལ་ལོ། །དེ་གཉིས་ཀྱིས་བྱིན་ལེན་བྱས་ཏེ་དོང་ནས་རྒྱལ་བྱེད་ཀྱི་ཚལ་དུ་ཕྱིན་པ་དང ། དགེ་སློང་དེས་སྨྲས་པ། རྒན་ཞུགས་ཁྱོད་ཆུ་འཚག་གམ། འོན་ཏེ་གཙུག་ལག་ཁང་དུ་སོང་སྟེ་ལྷག་བོར་བྱེད་དུ་འཛུད། རྒན་ཞུགས་ཀྱིས་སྨྲས་པ། ལྷག་བོར་བགྱིད་དུ་སྩལ་ཏོ། །དགེ་སློང་དེས་ཆུ་བཙག་པར་བརྩམ་པ་དང ། རྒན་ཞུགས་ཀྱིས་བསོད་སྙོམས་ཁྱེར་ཏེ་གཙུག་ལག་ཁང་དུ་ཞུགས་ནས། དེས་བདག་ཉིད་ཀྱིས་བསོད་སྙོམས་ལ་ལྷག་བོར་བྱེད་དུ་བཅུག་ཅིང་དེའི་བསོད་སྙོམས་ལ་ལྷག་བོར་བྱེད་དུ་མ་བཅུག་གོ། །དགེ་སློང་དེས་ཆུ་བཙགས་ཏེ། གཙུག་ལག་ཁང་དུ་ཞུགས་ནས་སྨྲས་པ་རྒན་ཞུགས་ལྷག་བོར་བྱེད་དུ་བཅུག་གམ། དེས་སྨྲས་པ། བགྱིད་དུ་སྩལ་ཏོ། །དགེ་སློང་དེས་འདུག་སྟེ་ཟོས་པ་དང ། རྒན་ཞུགས་ཀྱིས་སྨྲས་པ། སློབ་དཔོན་ཇེ་སྐབས་ཕྱེ་ཤིག་།ཕྱེའོ། །རྒན་ཞུགས་ཀྱིས་སྨྲས་པ། ཁྱོད་ལ་ལྟུང་བ་བྱུང་གིས། ཆོས་བཞིན་དུ་སླར
7.147b
མཛོད་ཅིག་།དེས་སྨྲས་པ། ལྟུང་བ་མ་མཐོང་ངོ ། །རྒན་ཞུགས་ཀྱིས་སྨྲས་པ། ཁྱོད་ཀྱིས་ལྷག་བོར་མ་བྱས་པའི་བཅའ་བ་དང་བཟའ་བ་ཟོས་སོ། །དེས་སྨྲས་པ། ཁོ་བོས་ཁྱོད་ལ་ལྷག་བོར་བྱེད་ཏུ་བཅུག་གམ་ཞེས་མ་དྲིས་སམ། རྒན་ཞུགས་ཀྱིས་སྨྲས་པ། བདག་གིས་བདག་ཉིད་ཀྱི་བགྱིད་དུ་སྩལ་ཏོ། །དེས་སྨྲས་པ། རྒན་ཞུགས་ཁོ་བོ་ལྟུང་བ་མི་འཆགས་ཀྱི་འདི་ལྟར་ཁྱོད་ཉིད་ལྟུང་བ་དང་བཅས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །ཞེས་དེས་དགེ་སློང་རྣམས་ལ་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་དགེ་སློང་ཟས་ཟོས་ཟིན་ཅིང་སྤངས་པ་ལ་སྐབས་ཚོལ་ཞིང་ཅི་ནས་ཀྱང་དགེ་སློང་འདི་ཉེས་པ་འབྱུང་བར་བྱའོ་སྙམ་པ་དེ་ཉིད་རྐྱེན་དུ་བྱས་ནས་ཚེ་དང་ལྡན་པ་འདི་ཆོ་ཤིག་།འདི་ཟོ་ཤིག་ཅེས་ལྷག་བོར་མ་བྱས་པའི་བཅའ་བ་དང་བཟའ་བ་དུས་ཀྱིས་སྟོབ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ་སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་སྨས་པ། དགེ་སློང་ཁྱོད་ཤེས་བཞིན་དུ་དགེ་སློང་ཟས་ཟོས་ཟིན་ཅིང་སྤངས་པ་ལ་སྐབས་ཚོལ་ཞིང་ཅི་ནས་ཀྱང་དགེ་སློང་འདི་ཉེས་པ་འབྱུང་བར་བྱའོ། །སྙམ་པ་དེ་ཉིད་རྐྱེན་ཏུ་བྱས་ནས་ཚེ་དང་ལྡན་པ་འདི་འཆོ་ཤིག་།འདི་ཟོ་ཤིག་ཅེས་ལྷག་བོར་མ་བྱས་པའི་བཅའ་བ་དང་བཟའ་བ་དུས་ཀྱིས་སྟོབས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན
7.148a
པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་དགེ་སློང་ཟས་ཟོས་ཟིན་ཅིང་སྤངས་པ་ལ་སྐབས་ཚོལ་ཞིང་ཅི་ནས་ཀྱང་དགེ་སློང་འདི་ཉེས་པ་འབྱུང་བར་བྱའོ་སྙམ་པ་དེ་ཉིད་རྐྱེན་དུ་བྱས་ནས། ཚེ་དང་ལྡན་པ་འདི་འཆོ་ཤིག་།འདི་ཟོ་ཤིག་ཅེས་ལྷག་བོར་མ་བྱས་པའི་བཅའ་བ་དང་བཟའ་བ་དུས་ཀྱིས་སྟོབས་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རེག་པ་འམ། གཞན་དག་གིས་བརྗོད་པས་སོ། །དགེ་སློང་ཞེས་བྱ་བ་ནི་ཆོས་འདི་པའོ། །ཟས་ཟོས་ཟིན་ཅིང་སྤངས་པའི་ཞེས་བྱ་བ་ནི་ཡོངས་སུ་རྫོགས་ཤིང་མཐར་ཐུག་པར་བྱེད་པ་ལའོ། །སྐབས་ཚོལ་ཞིང་ཞེས་བྱ་བ་ནི་ཀླན་ཀ་ཚོལ་ཞིང་ངོ ། །ཅི་ནས་ཀྱང་དགེ་སློང་འདི་ཉེས་པ་འབྱུང་བར་བྱའོ་སྙམས་པ་ཞེས་བྱ་བ་ནི་ཅི་ནས་ཀྱང་དགེ་སློང་འདི་ལྟུང་བ་དང་བཅས་པར་བྱས་པར་འགྱུར་རོ། །སྙམས་པའོ། །དེ་ཉིད་རྐྱེན་དུ་བྱས་ནས་ཞེས་བྱ་བ་ནི་གཞན་མ་ཡིན་པའོ། །ཚེ་དང་ལྡན་པ་འདི་འཆོ་ཤིག་།འདི་ཟོ་ཤིག་ཅེས་བྱ་བ་ནི་བཅའ་བ་དང་བཟའ་བའོ། །ལྷག་བོར་མ་བྱས་པའི་ཞེས་བྱ་བ་ནི་ལྷག་མར་མ་བྱས་ཤིང་མ་བོར་ཡོངས་སུ་མ་བཏང་བའོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་པོ་དང་བཟའ་བ་ལྔ་པོ་དག་གོ། །དུས་ཀྱིས་སྟོབས་ན་ཞེས་བྱ་བ་ནི་ཡང་དང་ཡང་དུ་སྟོབས་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང་ངན་འགྲོ་དང་ལོགས་པར
7.148b
ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ན་ཅུང་ཟད་ཤེས་བཞིན་དུ་དགེ་སློང་ཟས་ཟོས་ཟིན་ཅིང་སྤངས་པ་ལ་སྐབས་ཚོལ་ཞིང་ཅི་ནས་ཀྱང་དགེ་སློང་འདི་ཉེས་པ་འབྱུང་བར་བྱའོ་སྙམ་པ་དེ་ཉིད་རྐྱེན་དུ་བྱས་ནས་ཚེ་དང་ལྡན་པ་འདི་འཆོ་ཤིག་།འདི་ཟོ་ཤིག་ཅེས་ལྷག་བོར་མ་བྱས་པའི་བཅའ་བ་དང་བཟའ་བ་དུས་ཀྱིས་སྟོབས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེས་པ་ལ་ལྟུང་བ་མེད་དོ། །སྤངས་པ་ལ་སྟོབས་པའི་ལྟུང་བྱེད་དེ་སུམ་བཅུ་རྩ་ལྔ་པ་རྫོགས་སྷོ།། ་་་་་་།། འདུལ་བ་རྣམ་པར་འབྱེད་པ། བམ་བོ་ལྔ་བཅུ་རྩ་གསུམ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་ལྷས་བྱིན་དགེ་སློང་རབ་ཏུ་མང་པོ་དག་དང་ལྷན་ཅིག་ཀུན་དགའ་ར་བའི་ནང་ན་འདུས་ཤིང་ཟ་བ་ཟ་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཀུན་དགའ་ར་བའི་ནང་ན་འདུས་ཤིང་ཟ་བ་ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ལྷས་བྱིན་ལ་སྨྲས་པ། ལྷས་བྱིན་ཁྱོད་དགེ་སློང་རབ་ཏུ་མང་པོ་དག་དང་ལྷན་ཅིག་ཀུན་དགའ་ར་བའི་ནང་ན་འདུས་ཤིང་ཟ་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ
7.149a
འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འདུས་ཤིང་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་རབ་ཏུ་མང་པོ་ན་བ་དག་སྨན་པའི་གནས་སུ་དོང་སྟེ། དེ་དག་གིས་དེ་མཐོང་ནས་སྨྲས་པ། བཞིན་བཟངས་ཁོ་བོ་ཅག་ལ་ཇེ་སྨན་སྟོན་ཅིག་།དེས་སྨྲས་པ། འཕགས་པ་དག་ཞལ་ཚུས་གསོལ་ཅིག་།སུས་སྦྱིན་པར་འགྱུར། བདག་གིས་གསོལ་ལོ། །ཅི་དགེ་འདུན་ཐམས་ཅད་དམ། མ་ལགས་ཏེ་དགེ་སློང་བསྙུང་བ་ཇི་སྙེད་པ་དག་གོ། །བཞིན་བཟངས་བཅོམ་ལྡན་འདས་ཀྱིས་འདུས་ཤིང་ཟ་བ་ལ་བསླབ་པའི་གཞི་བཅའ་བ་མཛད་དོ། །འཕགས་པ་དག་ཁྱེད་ཀྱི་སྟོན་པ་ཐུགས་རྗེ་ཅན་ལགས་པས་དེ་ཉིད་རྐྱེན་དུ་མཛད་ནས་གནང་བར་འགྱུར་བ་དེ་ལྟ་བུའི་གནས་མཆིས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ན་བའི་དུས་མ་གཏོགས་སོ། །དགེ་སློང་དག་གིས་དགེ་འདུན་གྱི་དང ། མཆོད་རྟེན་གྱི་ལས་དག་བྱས་ནས། དེ་དག་བཀྲེས་པས་གློས་ཕབ་སྟེ་ཉལ་ཞིང་དགེ་བའི་ཕྱོགས་ལ་ཏྲོན་བྱེད་པར་མི་ནུས་པ་ན། བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་ལྷགས་ནས། དེ་དག་གིས་དྲིས་པ། འཕགས་པ་དག་བསྟན་པ་ལ་གཅིག་ཏུ་བརྩོན་པར་བགྱི་བ་ལགས་ན། ཅིའི་སླད་དུ་གློས་ཕབ
7.149b
སྟེ་གཟིམས་ཤིང་དགེ་བའི་ཕྱོགས་ལ་ཏྲོན་མི་མཛད། དེ་དག་གིས་སྨྲས་པ། ཁོ་བོ་ཅག་བཀྲེས་སོ། །ཅིའི་སླད་དུ་ཞལ་ཚུལ་མི་གསོལ། སུ་སྦྱིན་པར་འགྱུར། བདག་ཅག་གིས་གསོལ་ལོ། །ཅི་དགེ་འདུན་ཐམས་ཅད་གསོལ་ལམ། མ་ལགས་ཏེ་ཁྱེད་ཅག་ཁོ་ན་གསོལ་ལོ། །བཞིན་བཟངས་དག་བཅོམ་ལྡན་འདས་ཀྱིས་འདུས་ཤིང་ཟ་བ་ལ་བསླབ་པའི་གཞི་བཅའ་བ་མཛད་དོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལས་ཀྱི་དུས་མ་གཏོགས་སོ། །དགེ་སློང་དག་དོན་འཐུན་དང་ལྷན་ཅིག་འདྲོན་ལམ་དུ་འདོང་བ་ན་ཇི་ཙམ་ན་རི་བྲགས་ཤིག་དུ་ཕྱིན་ནས་དེ་དག་གིས་སྨྲས་པ། བཞིན་བཟང་དག་ཁོ་བོ་ཅག་རི་བྲགས་སུ་བསོད་སྙོམས་ལ་རྒྱུའི་བར་དུ་རེ་ཤིག་ཡུད་ཙམ་ཞིག་སྡོད་ཅིག་།དོན་འཐུན་དག་གིས་སྨྲས་པ། འཕགས་པ་དག་ཤུལ་འདི་ན་ཆོམ་རྐུན་པའི་འཇིགས་པ་མཆིས་ཀྱིས་ཚུར་གཤེགས་དང་བདག་ཅག་ཉིད་ཀྱིས་བསོད་སྙོམས་གསོལ་ལོ། །ཅི་ཅིག་གིས་ཐམས་ཅད་སྦྱིན་ནམ། མ་ལགས་ཏེ་ལ་ལས་བཞི་ལའོ། །ལ་ལས་ལྔ་ལའོ། །བཞིན་བཟངས་དག་བཅོམ་ལྡན་འདས་ཀྱིས་འདུས་ཤིང་ཟ་བ་ལ་བསླབ་པའི་གཞི་བཅའ་བ་མཛད་དོ་ཞེས་དགེ་སློང་དེ་དག་གིས་ཤས་ཆེར་ཟན་བཅད་པར་བྱས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལམ་གྱི་དུས་མ་གཏོགས་སོ། །དགེ་སློང་རབ་ཏུ་མང་པོ་དག་དོན་འཐུན་དང་ལྷན་ཅིག་གྲུར་ཞུགས་སྟེ་ལྗོང་རྒྱུར་འདོང་བ་ན་རི་བྲགས་ཞིག་ཏུ་ཕྱིན་ནས་དེ་དག་གིས་སྨྲས་པ། བཞིན་བཟང་དག་ཁོ་བོ་ཅག་རི་བྲགས་སུ་བསོད་སྙོམས་ལ་རྒྱུའི་བར་དུ་རེ་ཤིག་ཡུད་ཙམ་ཞིག་སྡོད་ཅིག་།དོན་འཐུན་དག་གིས་སྨྲས་པ། འཕགས་པ་དག་གྲུའི་ཤུལ་འདི་ན་ཆོམ་རྐུན་པའི་འཇིགས་པ་མཆིས་ཀྱིས་ཚུར་གཤེགས་དང་བདག་ཅག་ཉིད་ཀྱིས
7.150a
བསོད་སྙོམས་གསོལ་ལོ། །ཅི་གཅིག་གིས་ཐམས་ཅད་སྦྱིན་ནམ། མ་ལགས་ཏེ་ལ་ལས་བཞི་ལའོ། །ལ་ལས་ལྔ་ལའོ། །བཞིན་བཟང་དག་བཅོམ་ལྡན་འདས་ཀྱིས་འདུས་ཤིང་ཟ་བ་ལ་བསླབ་པའི་གཞི་བཅའ་བ་མཛད་དོ། །ཞེས་དགེ་སློང་དེ་དག་གིས་ཤས་ཆེར་ཟན་བཅད་པར་བྱས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གྲུར་ཞུགས་པའི་དུས་མ་གཏོགས་སོ། །བཅོམ་ལྡན་འདས་ཀྱིས་གཙུག་ཕུད་ཀྱི་དུས་སྟོན་དང ། དུས་སྟོན་ཆེན་པོ་དང ། ལོ་ལྔའི་དུས་སྟོན་བྱའོ་ཞེས་བཀའ་སྩལ་ནས། དེ་ན་དགེ་སློང་རྣམས་ཀྱི་འདུས་པ་ཆེན་པོ་བྱུང་བར་གྱུར་ནས་བྲམ་ཟེ་དང ། ཁྱིམ་བདག་དད་པ་ཅན་དག་གིས་དགེ་སློང་རྣམས་ལ་སྨྲས་པ། འཕགས་པ་དག་ཚུར་གཤེགས་གདུགས་ཚོད་གསོལ་ཅིག་།དགེ་སློང་རྣམས་ཀྱིས་སྨྲས་པ། ཅི་དགེ་འདུན་ཐམས་ཅད་གསོལ་ལམ། འཕགས་པ་དག་བདག་ཅག་ལ་དགེ་འདུན་ཐམས་ཅད་གསོལ་བའི་འབྱོར་པ་གང་ལགས་པ་དེ་ལྟ་བུ་ག་ལ་མཆིས་ཏེ། འདི་ལྟར་ལ་ལས་ཉི་ཤུ་གསོལ་ལོ། །ལ་ལས་སུམ་བཅུ་གསོལ་ལོ། །བཞིན་བཟང་དག་བཅོམ་ལྡན་འདས་ཀྱིས་འདུས་ཤིང་ཟ་བ་ལ་བསླབ་པའི་གཞི་བཅའ་བ་མཛད་དོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་འདུས་པ་ཆེན་པོའི་དུས་མ་གཏོགས་སོ། །གང་གི་ཚེ་རྒྱལ་པོ་གཟུགས་ཅན་སྙིང་པོས་བདེན་པ་དག་མ་མཐོང་བ་དེའི་ཚེ་ན་འོད་མའི་ཚལ་ཀུན་ཏུ་འཚོ་དག་ལ་ཕུལ་བར་གྱུར་ཏོ། །གང་གི་ཚེ་བདེན་པ་དག་མཐོང་བ་དེའི་ཚེ་འོད་མའི་ཚལ་ཀུན་ཏུ་འཚོ་དག་ལས་ཕྲོགས་ཏེ་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལ་ཕུལ་ལོ། །རྒྱལ་པོ་གཟུགས་ཅན་སྙིང་པོའི་ཞང་པོ་ཀུན་ཏུ་འཚོ་དག་གི་ནང་དུ་རབ་ཏུ་བྱུང
7.150b
ནས། རྒྱལ་པོས་སྨྲས་པ། འཕགས་པ་དག་འདི་བདག་གི་ཞང་པོ་ལགས་ཀྱིས་ཇི་སྲིད་དུ་འགྱུར་བ་སྟེན་པར་མི་བགྱིད་ཀྱི་བར་དུ་འདི་གཅིག་པུ་གཞག་ཏུ་གསོལ། གང་གི་ཚེ་འགྱུར་བ་སྟེན་པར་འགྱུར་བ་དེའི་ཚེ་ན་བདག་གིས་འདི་ཡང་བསྐྲད་པར་བགྱིའོ་ཞེས་རྒྱལ་པོ་གཟུགས་ཅན་སྙིངས་པོས་ཀུན་དུ་འཚོ་དེ་ལ་ཁ་ཟས་ཀྱི་མཁོ་བ་སྟོབས་པར་བྱེད་དོ། །དགེ་སློང་དག་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པ་དེ་དག་ཀུན་དུ་འཚོ་དེས་མཐོང་ནས་དེ་ཤིན་དུ་དང་བ་སྐྱེས་ཏེ། དེས་དགེ་སློང་རྣམས་ལ་སྨྲས་པ། བདག་གིས་ཀྱང་དགེ་སློང་རྣམས་ཀྱི་གདུགས་ཚོད་བགྱིའོ། །དེ་ལྟར་གྱིས་ཤིག་།ཅི་དགེ་འདུན་ཐམས་ཅད་ཀྱི་བྱེད་དམ། མ་ལགས་ཏེ་བདག་གིས་རྒྱལ་པོས་ཞལ་ཟས་ཀྱི་མཁོ་བ་སྟོབས་པར་བགྱིད་པ་ལྟར་བདག་ལ་དགེ་འདུན་ཐམས་ཅད་ཀྱི་གདུགས་ཚོད་བགྱི་བའི་འབྱོར་པ་གང་ལགས་པ་དེ་ལྟ་བུ་མ་མཆིས་ཏེ། འདི་ལྟར་དགེ་སློང་ཉི་ཤུ་འམ། ཉི་ཤུ་རྩ་ལྔའི་གདུགས་ཚོད་བགྱིའོ། །དགེ་སློང་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་འདུས་ཤིང་ཟ་བ་ལ་བསླབ་པའི་གཞི་བཅའ་བ་མཛད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སྦྱོང་གི་ཟས་ཀྱི་དུས་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འདུས་ཤིང་ཟ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་སོ། །ལས་དུས་སོ། །ལམ་དུས་སོ། །གྲུར་ཞུག་པ་དང་འདུས་པ་ཆེན་པོ་དང་དགེ་སྦྱོང་གི་ཟས་དུས་ཏེ་དེ་ལ་དེ་ནི་དུས་ཡིན་ནོ། །འདུས་ཤིང་ཟ་ན་ཞེས་བྱ་བ
7.151a
ནི་མི་འཐུན་པར་ཟ་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་དུས་ནི་འདི་ཡིན་ཏེ། ན་བ་དུས་སོ་ཞེས་བྱ་བ་ནི་འདི་ལྟ་སྟེ་དགེ་སློང་ན་བ་ཟས་གཅིག་གིས་འཚོ་བར་མི་ནུས་པའོ། །ལས་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་གི་དགེ་འདུན་གྱི་འམ་མཆོད་རྟེན་གྱི་ལས་ཐ་ན་ཕྱག་དར་རེ་ལྡེ་ཙམ་འམ། དཀྱིལ་འཁོར་བ་མལ་ཙམ་བྱས་པའོ། །ལམ་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་དཔག་ཚད་ཕྱེད་དུ་སོང་བ་འམ། དེའི་ཕྱེད་དུ་སོང་ཏེ་ཕྱིར་འོངས་པའོ། །གྲུར་ཞུགས་པ་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་གྲུར་ཞུགས་སྟེ། དཔག་ཚད་ཕྱེད་དུ་སོང་བ་འམ་དེའི་ཕྱེད་དུ་སོང་ཏེ་ཕྱིར་འོངས་པའོ། །འདུས་པ་ཆེན་པོ་དུས་སོ་ཞེས་བྱ་བ་ནི་སྤགས་པའོ། །དགེ་སྦྱོང་གི་ཟས་དུས་ཏེ་ཞེས་བྱ་བ་ནི་འདི་ལས་ཕྱི་རོལ་པའི་རབ་ཏུ་བྱུང་བ་དག་འཁོད་ན་དེ་ཡང་དགེ་སྦྱོང་ཞེས་བྱ་བའི་གྲངས་སུ་འགྲོའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་དེ་ལ་དེ་ནི་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་པས་འདུས་ཤིང་ཟ་བ་ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་མཚམས་ཀྱི་ནང་དུ་ཡིད་གཉིས་ཟ་བས་འདུས་ཤིང་ཟ་བ་ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་མཚམས་ཀྱི་ཕྱི་རོལ་དུ་མཚམས་ཀྱི་ནང་དུ་འདུ་ཤེས་པས་འདུས་ཤིང་ཟ་བ་ཟ་ན་ཉེས་བྱས་སུ་འགྱུར་རོ། །དགེ་སློང་གིས་མཚམས་ཀྱི་ཕྱི་རོལ་ཏུ་ཡིད་གཉིས་ཟ་བས་འདུས་ཤིང་ཟ་བ་ཟ་ན་ཉེས་བྱས་སུ་འགྱུར་རོ། །གནས་གཉིས་པོ་གཞིའི་གནས་དང ། ཁང་ཁྱིམ་གྱི་གནས་དེ་གཉིས་ཡོད་ན་དེ་ན་གང་དག་གཞིའི་གནས་སུ་ཟ་བ་དེ་དག་གིས་ཁང་ཁྱིམ་ནས་དགེ་སློང་དག་འོངས་སམ་ཞེས་དྲི་བར་བྱའོ། །
7.151b
མ་དྲིས་པར་ཟ་ན་ཉེས་བྱས་སུ་འགྱུར་རོ། །གང་དག་ཁང་ཁྱིམ་དུ་ཟ་བ་དེ་དག་གིས་ཀྱང་གཞིའི་གནས་ནས་དགེ་སློང་དག་འོངས་སམ་ཞེས་དྲི་བར་བྱའོ། །མ་དྲིས་པར་ཟ་ན་ལྟུང་བྱེད་དུ་འགྱུར་རོ། །གསུམ་ཟ་ཞིང་གཅིག་ལ་བྱེད་པ་དང ། གསུམ་རྫོགས་པར་བསྙེན་ཅིང་གཅིག་རྫོགས་པར་མ་བསྙེན་པ་དང ། ཟས་བྲིམ་པ་ཐ་ན་ལན་ཚཝ་ཚུམས་གང་ངམ། ལྡམ་ལྡུམ་སྲང་གཅིག་ཙམ་འོངས་པ་དང ། གནས་སོ་སོར་ངེས་པ་དང ། སྦྱིན་བདག་ན་རེ་གང་དག་འདི་ན་འཁོད་པ་དེ་དག་ལ་སྦྱིན་ནོ་ཞེས་ཟེར་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འདུས་ཤིང་ཟ་བའི་ལྟུང་བྱེད་དེ་སུམ་བཅུ་རྩ་དྲུག་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ཉེ་བར་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་རབ་དུ་ཕྱུང་ཞིང་རྫོགས་པར་བསྙེན་པར་བྱས་པ་དེའི་ཚེ་ན། དེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་བསྙོམས་ལ་བཞུགས་སོ། །བུད་མེད་ཀྱི་ཡུལ་ནི་སྲིད་པ་སྤྱད་པ་ཡིན་པས་བུད་མེད་ཀྱིས་དེ་དག་མཐོང་ནས་བྲང་བརྡུངས་ཏེ་སྨྲས་པ། འདི་དག་སྐྱེད་པ་གང་དག་གིས་འདི་དག་སྐྱེས་མ་ཐག་གི་ཁ་ལན་ཚཝས་འགེངས་པར་མ་ནུས་པ་དང ། བརླ་ཕྲག་ཏུ་ཁྲོན་པ་བཅུག་སྟེ་འབྲངས་པར་མི་ནུས་པ་དེ་དག་གིས་ཅི་ཐོབ། བཅུ་བདུན་སྡེ་དག་ཉམ་ང་བར་གྱུར་ནས་སྨྲས་པ། བདག་ཅག་གིས་ཟན་བཅད་པར་གྱུར་པ་ནི་བླའི་ཚིག་ངན་པ་རྣམ་པ་འདི་ལྟ་བུ་དག་ཐོས་པར་གྱུར་པ་ནི་མི་རུང་ངོ་ཞེས་དེ་དག་དེ་ཉིད་ནས་ཕྱིར་ལོག་སྟེ་དེ་དག་གིས་ཟན་བཅད་པ་བྱས་ནས། དེ་དག་གིས་ཇི་སྲིད་དུ་ལུས་ལ་མདངས་ཡོད་པ་དེ་སྲིད་དུ་དགེ་བའི་ཕྱོག་ལ་ཏྲོན་བྱས་ནས་གང་གི་ཚེ་ལུས་ལ་མདངས་ཡལ་བར་གྱུར་པ་དེའི་ཚེ་ན་གློས་ཕབ་སྟེ་ཉན་པ་དང་ཉེ་དགས་དེ་དག
7.152a
མཐོང་ནས་སྨྲས་པ། ཨེ་མའོ་བཅུ་བདུན་སྡེ་དག་ཅི་གལ་ཏེ་ཟས་གཞན་གྱི་ཡིན་ཞེས་ཏེ་ལྟོ་ཡང་གཞན་གྱི་ཡིན་སྙམ་འམ། ཅི་བྱས་ཇི་ཙམ་གྱི་དགེ་བའི་ཕྱོགས་ལ་ཏྲོན་བྱེད་ཀྱང་མི་ནུས་པ་དེ་ཙམ་གྱི་ཟས་ཟོས་སོ། །སུ་ཟོས། ཁྱོད་ཀྱིས་སོ། །ཁོ་བོ་ཅག་གིས་མ་ཟོས་སོ། །འོ་ན་ཅིའི་ཕྱིར་གློས་ཕབ་སྟེ་ཉལ། དེ་དག་གིས་སྐབས་དེ་རྒྱས་པར་བརྗོད་དོ། །གྲོངས་ཁྱེར་གྱི་སྒབས་མོ་ཅན་དག་ནི་སྐྱེད་མོས་ཚལ་ལ་དགའ་བས་དེ་དག་བཟའ་བ་དང ། བཏུང་བ་ཁྱེར་ཏེ་མཉན་ཡོད་ཀྱི་ཕྱི་རོལ་རྒྱལ་བྱེད་ཀྱི་ཚལ་དུ་དོང་ནས་འཆའ་བར་བྱེད། ཟ་བར་བྱེད་འཐུང་བར་བྱེད་པ་ན་བཅུ་བདུན་སྡེ་དག་གིས་དེ་དག་མཐོང་ནས་ལྟོ་བ་ཉུག་པར་བྱེད་ཅིང ། ཚིགས་སུ་བཅད་པ་དག་སྨྲས་པ། མགོན་པོ་ཁྱོད་ཀྱི་ལེགས་གསུངས་མང་པོ་དག་།རྒྱུ་དང་མི་རྒྱུའི་འཇིག་རྟེན་འདི་ན་སྤྱོད། །བཀྲེས་མཉམ་ལུས་ཀྱི་ཚོར་བ་མ་མཆིས་པ། །ཐུབ་པ་དེ་ནི་ཁྱོད་ཀྱི་ལེགས་གསུངས་མཆོག་།དེ་དག་གིས་སྨྲས་པ། འཕགས་པ་དག་གསོལ་ན་བཞེད་དམ། འདོད་དོ། །དེ་དག་གིས་བཅུ་བདུན་སྡེ་དག་ལ་བཟའ་བ་དང་བཏུང་བ་བྱིན་པ་དང ། དེ་དག་གིས་ལོངས་སྤྱད་ནས་དེ་དག་གིས་ཟུང་དུ་བསྡེབས་ཏེ་འཆག་ཅིང་ཁ་ཏོན་བྱ་བར་བརྩམས་པ་དང ། ཉེ་དགས་དེ་དག་ཁ་ཏོན་བྱེད་པ་མཐོང་ནས་སྨྲས་པ། ཀྱེ་མའོ་བཅུ་བདུན་སྡེ། དག་གིས་ཤིན་དུ་བརྩོན་འགྲུས་བརྩམས་སོ། །བཙུན་པ་ཉེ་དགའ་བཅོམ་ལྡན་འདས་ཀྱིས་བདེན་ཆོས་མངོན་པར་བརྗོད་པར་བྱེད་དོ། །སྦྱིན་པ་པོ་དང་སྦྱིན་བདག་གིས་ལེན་པ་པོ་ལ་ཟས་སྦྱིན་པ་ན་གནས་ལྔ་སྦྱིན་པར་བྱེད་དེ། ཚེ་སྦྱིན་པ་དང ། ཁ་དོག་སྦྱིན་པ་དང ། སྟོབས་སྦྱིན་པ་དང ། བདེ་བ་སྦྱིན་པ་དང ། སྤོབས་པ་སྦྱིན་པ་ནི་བདེ་བར་འགྱུར་རོ། །ཞེས་བཀའ་སྩལ་པ་ནི་ལེགས་པར་གསུངས་པ་ཡིན་ཏེ། ཟོས་ན་སྤོབས་པ་དང་ལྡན་པར་འགྱུར་གྱི་མ་ཟོས་ན་མི་འགྱུར་རོ། །ཁྱེད་ཀྱིས་ཟོས་སམ། ཟོས་སོ། །ཁྱེད་དུས་མ་ཡིན་པར་ཟར་རུང་ངམ། གལ་ཏེ་དུས་སུ་མ་རྙེད་ན་ཁོ་བོ་ཅག་གིས་ལྟོགས
7.152b
ཏེ་འཆི་བར་བྱ་འམ་ཅི། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དུས་མ་ཡིན་པར་བཅའ་བ་དང ། བཟའ་བ་ཟ་བར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གིས་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་བཅུ་བདུན་སྡེ་དག་ལ་སྨྲས་པ། དགེ་སློང་དག་ཁྱེད་དུས་མ་ཡིན་པར་བཅའ་བ་དང་བཟའ་བ་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དུས་མ་ཡིན་པར་བཅའ་བ་འམ། བཟའ་བ་འཆའ་འམ་ཟ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་བཅུ་བདུན་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དུས་མ་ཡིན་པར་ཞེས་བྱ་བ་ནི་དུས་མ་ཡིན་པ་གཉིས་ཏེ། སྐྱ་རེངས་མ་ཤར་བ་དང ། ཕྱེད་ཡོལ་བར་རོ། །བཅའ་བ་འམ། བཟའ་བ་ཞེས་བྱ་བ་ནི་བཅའ་བ་ལྔ་པོ་དང ། བཟའ་བ་ལྔ་པོ་དག་གོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ན་འོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན
7.153a
སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་ཏུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དུས་མ་ཡིན་པ་ལ་དུས་མ་ཡིན་པར་འདུ་ཤེས་པས་བཅའ་བ་དང ། བཟའ་བ་འཆའ་འམ་ཟ་ན་ལྟུང་བྱེད་ཏུ་འགྱུར་རོ། །དགེ་སློང་གིས་དུས་མ་ཡིན་པར་ཡིད་གཉིས་ཟ་བས་བཅའ་བ་དང ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་དུས་སུ་དུས་མ་ཡིན་པར་འདུ་ཤེས་པས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །དགེ་སློང་གིས་དུས་སུ་ཡིད་གཉིས་ཟ་བས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དུས་མ་ཡིན་པར་ཟ་བའི་ལྟུང་བྱེད་དེ་སུམ་བཅུ་རྩ་བདུན་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ནག་པོའི་ཀུན་ཏུ་སྤྱོད་པ་ནི་གྲོང་ངམ། གྲོང་རྡལ་གང་ན་ཉེ་བར་རྟེན་ཅིང་གནས་པ་ན། དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་གྲོང་ངམ། གྲོང་རྡལ་དེ་ཉིད་དུ་ལུས་ཤིན་ཏུ་བསྲུངས་པ་དང ། དབང་པོ་རྣམས་ཀྱི་ཤིན་ཏུ་བསྡམས་པ་དང ། དྲན་པ་ཤིན་ཏུ་ཉེ་བར་གཞག་པས་བསོད་སྙོམས་ལ་འཇུག་ཅིང ། གལ་ཏེ་འབྲས་ཆན་གཤེར་བ་རྙེད་ན་ནི་ལྷུང་བཟེད་ཀྱིས་ལེན་པར་བྱེད། གལ་ཏེ་འབྲས་ཆན་སྐམས་པོ་རྙེད་ན་ནི་ལྷུང་བཟེད་ཀྱི་སྣོད་ཀྱིས་ལེན་པར་བྱེད་དེ། དེ་གྲོང་ངམ། གྲོང་རྡལ་དེར་བསོད་སྙོམས་ལ་བརྒྱུས་ནས་གཙུག་ལག་ཁང་ཏུ་སོང་ཏེ། འབྲས་ཆན་གཤེར་བ་ནི་ཟ་བར་བྱེད། འབྲས་ཆན་སྐམ་པོ་ནི་བསྐམས་ནས་རྫ་མ་སོ་བཏང་བ་བཀང་སྟེ
7.153b
འཇོག་པར་བྱེད་ཅིང ། དེ་རླུང་ལྡང་བ་འམ། ཡུལ་ངན་འབྱུང་བ་འམ། ཆར་པ་འབབ་པ་འམ། ལྷགས་པ་འབྱུང་བ་གང་དག་བྱུང་བར་གྱུར་པ་ན། རླུང་ལངས་པ་འམ། ཡུལ་ངན་བྱུང་བ་འམ། ཆར་པ་འབབ་པ་འམ། ལྷགས་པ་བྱུང་བ་དེ་ལྟ་བུའི་ཚེ་འབྲས་ཆན་སྐམས་པོ་ཆུ་དྲོན་མོས་སྦངས་ཏེ་ཟོས་ནས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་ལ་སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་དོ། །སངས་རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་རྣམས་ཀྱི་ཆོས་ཉིད་ནི་འདུལ་བར་གྱུར་པའི་སྐྱེ་བོ་ལ་རྗེས་སུ་ཐུགས་བརྩེ་བས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང ། དུད་འགྲོ་རྒྱུ་བ་དང ། ཡི་དགས་རྒྱུ་བ་དང ། ལྷ་རྒྱུ་བ་དང ། ལྗོངས་རྒྱུ་བ་དང ། ཆུ་ཀླུང་རྒྱུ་བ་དང ། རི་རྒྱུ་བ་དང ། དུར་ཁྲོད་རྒྱུ་བ་དང ། གཙུག་ལག་ཁང་རྒྱུར་གཤེགས་པས་དོན་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་རྒྱུར་གཤེགས་པར་བཞེད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་གཙུག་ལག་ཁང་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ཏུ་གཙུག་ལག་ཁང་རྒྱུར་འགྲོ་བར་སྤྲོ་བ་དེ་ཆོས་གོས་དག་ལོང་ཤིག་ཅེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་གཙུག་ལག་ཁང་རྒྱུར་གཤེགས་ཀྱིས། ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་གཙུག་ལག་ཁང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་།དེ་ནས་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་གཙུག་ལག་ཁང་རྒྱུ་ཞིང་གཤེགས་པ་ན། ཚེ་དང་ལྡན་པ་ནག་པོའི་གཙུག་ལག་ཁང་ག་ལ་བ་དེར་གཤེགས་སོ། །དེའི་ཚེ་ན་ཚེ་དང་ལྡན་པ་ནག་པོའི་གཙུག་ལག་ཁང་ན
7.154a
འབྲས་ཆན་སྐམ་པོ་རབ་ཏུ་མང་པོ་དག་བཏིང་ཞིང་འདུག་གོ། །བཅོམ་ལྡན་འདས་ཀྱིས་ཚེ་དང་ལྡན་པ་ནག་པོའི་གཙུག་ལག་ཁང་ན་འབྲས་ཆན་སྐམས་པོ་རབ་དུ་མང་པོ་དག་བཏིང་ཞིང་འདུག་པ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འབྲས་ཆན་སྐམ་པོ་རབ་ཏུ་མང་པོ་བཏིང་བ་འདི་དག་སུའི། བཙུན་པ་ཚེ་དང་ལྡན་པ་ནག་པོའི་ཀུན་དུ་སྤྱོད་པ་ནི་གྲོང་ངམ། གྲོང་རྡལ་གང་ན་ཉེ་བར་རྟེན་ཅིང་གནས་པ་ན། དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་གྲོང་ངམ། གྲོང་རྡལ་དེ་ཉིད་དུ་ལུས་ཤིན་ཏུ་བསྲུངས་པ་དང ། དབང་པོ་རྣམས་ཀྱང་ཤིན་དུ་སྡམ་པ་དང ། དྲན་པ་ཤིན་དུ་ཉེ་བར་གཞག་པས་བསོད་བསྙོམ་ལ་འཇུག་ཅིང་གལ་ཏེ་འབྲས་ཆན་གཤེར་བ་རྙེད་ན་ནི་ལྷུང་བཟེད་ཀྱིས་ལེན་པར་བགྱིད། གལ་ཏེ་འབྲས་ཆན་སྐམ་པོ་རྙེད་ན་ནི་ལྷུང་བཟེད་ཀྱི་ནོད་ཀྱིས་ལེན་པར་བགྱིད་དེ། དེ་གྲོང་ངམ། གྲོང་རྡལ་དེར་བསོད་སྙོམས་ལ་བགྱི་ནས། གཙུག་ལག་ཁང་དུ་མཆིས་ཏེ་འབྲས་ཆན་གཤེར་བ་ནི་འཚལ་བར་བགྱིད། འབྲས་ཆན་སྐམ་པོ་ནི་རྫ་མ་སོ་བཏང་བ་བཀང་སྟེ་འཇོག་པར་བགྱིད་ཅིང ། དེ་བསེར་མ་ལྡང་བ་འམ། ཡུལ་ངན་འབྱུང་བ་འམ། དགུང་ཆར་འབབ་པ་འམ། དགུང་ལྷགས་འབྱུང་བ་གང་དག་བྱུང་བར་འགྱུར་བ་ན། བསེར་མ་ལངས་པ་འམ། ཡུལ་ངན་བྱུང་བ་འམ། དགུང་ཆར་བབ་པ་འམ། དགུང་ལྷགས་བྱུང་བ་དེ་ལྟ་བུའི་ཚེ་འབྲས་ཆན་སྐམས་པོ་ཆབ་དྲོན་མོས་སྦངས་ཏེ་འཚལ་ནས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་ལ་སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བགྱིད་དོ། །ཀུན་དགའ་བོ་དགེ་སློང་དག་གསོག་འཇོག་བྱས་པ་ཟ་འམ། བཙུན་པ་འཚལ་ལོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ་སངས
7.154b
རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ནག་པོ་ལ་སྨྲས་པ། ནག་པོ་ཁྱོད་བཅའ་བ་དང ། བཟའ་བ་གསོག་འཇོག་བྱས་པ་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང ། མི་སྦྱོར་བ་དང ། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང ། སྦྱོར་བ་དང ། བརྟགས་ཏེ་སྤྱོད་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བཅའ་བ་དང ། བཟའ་བ་གསོག་འཇོག་བྱས་པ་འཆའ་འམ། ཟ་ན་ལྟུང་བྱེད་དོ་ཡང་དགེ་སློང་གང་ཞེས་བྱ་བ་ནི་ཚེ་དང་ལྡན་པ་ནག་པོ་འམ། གཞན་ཡང་དེ་ལྟ་བུ་གང་ཡིན་པའོ། །བཅའ་བ་དང ། བཟའ་བ་ཞེས་བྱ་བ་ནི་བཅའ་བ་ལྔ་པོ་དང ། བཟའ་བ་ལྔ་པོ་དག་གོ། །གསོག་འཇོག་བྱས་པ་ཞེས་བྱ་བ་ནི་གསོག་འཇོག་བྱས་པ་རྣམ་པ་གཉིས་ཏེ། སྔ་དྲོ་བྱིན་ལེན་བྱས་པ་ཕྱི་དྲོའི་བར་དུ་གསོག་འཇོག་བྱས་པ་དང ། ཕྱི་དྲོ་བྱིན་ལེན་བྱས་པ་ཐུན་ཚོད་ལས་ཡོལ་བར་གསོག་འཇོག་བྱས་པའོ། །འཆའ་འམ། ཟ་ན་ཞེས་བྱ་བ་ནི་མགུལ་དུ་མིད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་གསོག་འཇོག་བྱས་པ་ལ་གསོག་འཇོག་བྱས་པར་འདུ་ཤེས་པས་བཅའ་བ་དང ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་གསོག་འཇོག་བྱས་པ་ལ་ཡིད་གཉིས
7.155a
ཟ་བས་བཅའ་བ་འམ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་གསོག་འཇོག་མ་བྱས་པ་ལ་གསོག་འཇོག་བྱས་པར་འདུ་ཤེས་པས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །དགེ་སློང་གིས་གསོག་འཇོག་མ་བྱས་པ་ལ་ཡིད་གཉིས་ཟ་བས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །དགེ་སློང་གིས་ལྷུང་བཟེད་དང ། ལྷུང་བཟེད་ཆུང་ངུ་དང ། ཁ་གཟར་དང ། ཁར་ཕོར་དང ། ཚཝ་ཁུག་དང ། ལྷུང་བཟེད་ཀྱི་སྣོད་དང ། གོས་དང ། མན་ཤེལ་དང ། ཁྲི་དང ། ཁྲིའུ་དང ། ཁར་བ་དང ། བུམ་པ་དང ། རིལ་བ་དང ། ལྡེ་མིག་དང ། ལྡེ་མིག་ཀྱོག་པོ་གསོག་འཇོག་བྱས་པས་འབགས་པ་ཟ་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་གིས་གསོག་འཇོག་བྱས་པའི་ཁ་དང ། གསོག་འཇོག་བྱས་པའི་ལག་པ་དག་གིས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །དགེ་སློང་གིས་མེ་ཏོག་དང ། འབྲས་བུ་གསོག་འཇོག་བྱས་པ་དང ། དགེ་སློང་གིས་ཇི་རྩམ་དུ་གསོག་འཇོག་བྱས་པ་ཟ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་གིས་ཁ་མ་བཀྲུས་པར་སྐོམ་འཐུང་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གསོག་འཇོག་གི་ལྟུང་བྱེད་དེ་སུམ་བཅུ་རྩ་བརྒྱད་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ནག་པོ་ཆེན་པོ་ནི་ཐམས་ཅད་དུར་ཁྲོད་པ་དང་ལྡན་པ་ཡིན་ཏེ། དེའི་ལྷུང་བཟེད་ཀྱང་དུར་ཁྲོད་པ་ཡིན། ཆོས་གོས་ཀྱང་དུར་ཁྲོད་པ་ཡིན། བསོད་སྙོམས་ཀྱང་དུར་ཁྲོད་པ་ཡིན། གནས་མལ་ཡང་དུར་ཁྲོད་པ་ཡིན་ནོ། །ཇི་ལྟར་ལྷུང་བཟེད་དུར་ཁྲོད་པ་ཡིན་ཞེ་ན། འདི་ལྟ་སྟེ། ཉེ་དུ་དག་གིས་ཤི་ཞིང་དུས་ལ་བབ་པའི་རྫེའུ་དུར་ཁྲོད་དུ་འདོར་བར་བྱེད་པ་དེ་ཚེ་དང་ལྡན་པ་ནག་པོ་ཆེན་པོས་གྱོ
7.155b
མོ་ཁ་བཞོགས་ཏེ་བསྲེགས་ནས་ལྷུང་བཟེད་དུ་བྱིན་གྱིས་བརླབས་ཤིང་འཆང་བར་བྱེད་དེ། དེ་ལྟར་ལྷུང་བཟེད་དུར་ཁྲོད་པ་ཡིན་ནོ། །ཇི་ལྟར་ཆོས་གོས་དུར་ཁྲོད་པ་ཡིན་ཞེ་ན། འདི་ལྟ་སྟེ། ཉེ་དུ་དག་གིས་ཤི་ཤིང་དུས་ལ་བབ་པའི་གོས་དག་དུར་ཁྲོད་དུ་འདོར་བར་བྱེད་པ་དེ་དག་ཚེ་དང་ལྡན་པ་ནག་པོ་ཆེན་པོས་བཀྲུས་ཏེ་དྲུབ་ཤིང་ཁ་བསྒྱུར་ནས་ཆོས་གོས་སུ་བྱིན་གྱིས་བརླབས་ཤིང་འཆང་བར་བྱེད་དེ། དེ་ལྟར་ཆོས་གོས་དུར་ཁྲོད་པ་ཡིན་ནོ། །ཇི་ལྟར་བསོད་སྙོམས་དུར་ཁྲོད་པ་ཡིན་ཞེ་ན། འདི་ལྟ་སྟེ་ཉེ་དུ་དག་གིས་ཤི་ཤིང་དུས་ལ་བབ་པའི་ཟས་ལྔ་དུར་ཁྲོད་དུ་འདོར་བར་བྱེད་པ་དེ་དག་ཚེ་དང་ལྡན་པ་ནག་པོ་ཆེན་པོས་བླང་ཤིང་ཟ་བར་བྱེད་དེ། དེ་ལྟར་བསོད་སྙོམས་དུར་ཁྲོད་པ་ཡིན་ནོ། །ཇི་ལྟར་གནས་མལ་དུར་ཁྲོད་པ་ཡིན་ཞེ་ན། འདི་ལྟ་སྟེ། ཚེ་དང་ལྡན་པ་ནག་པོ་ཆེན་པོ་དུར་ཁྲོད་ན་གནས་པར་བྱེད་དེ། དེ་ལྟར་གནས་མལ་དུར་ཁྲོད་པ་ཡིན་ནོ། །གང་གི་ཚེ་སྐྱེ་འོ་ཕལ་པོ་ཆེ་ལ་མི་ངས་བྱུང་བ་དེའི་ཚེ་ན་ཚེ་དང་ལྡན་པ་ནག་པོ་ཆེན་པོ་ཚོ་བ་དང ། ལྤགས་པ་དང ། ཤ་དང ། ཁྲག་རྒྱས་པར་གྱུར་ཅིང་དེ་ཡང་དང་ཡང་དུ་གྲོང་དུ་བསོད་སྙོམས་ལ་འཇུག་པར་མི་བྱེད་ལ། གང་གི་ཚེ་སྐྱེ་འོ་ཕེལ་པོ་ཆེ་ལ་མི་ངས་མ་བྱུང་བ་དེའི་ཚེ་ན་ཚེ་དང་ལྡན་པ་ནག་པོ་ཆེན་པོ་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཅིང ། དེ་ཡང་དང་ཡང་དུ་གྲོང་དུ་བསོད་སྙོམས་ལ་འཇུག་པར་བྱེད་དོ། །སྒོ་བ་དེ་མཚན་མར་བཟུང་ནས། འཕགས་པ་ནག་པོ་ཆེན་པོ་འདི། གང་གི་ཚེ་སྐྱེའོ་ཕལ་པོ་ཆེ་ལ་མི་ངས་བྱུང་བ་དེའི་ཚེ་ན་ཚོར་བ་དང ། ལྤགས་པ་དང ། ཤ་དང ། ཁྲག་རྒྱས་པར་གྱུར་ཅིང་འདི་ཡང་དང་ཡང་དུ་གྲོང་དུ་བསོད་སྙོམས་ལ་འཇུག་པར་མི་བྱེད་ལ། གང་གི་ཚེ་སྐྱེ་བོ་ཕལ་པོ་ཆེ་ལ་མི་ངས་མ་བྱུང་བ་དེའི་ཚེ་ན་འཕགས་པ་ནག་པོ་ཆེན་པོ་འདི་རིད་པ་དང ། ཉམ་ཆུང་བ་དང ། རྐེ་བ་དང ། སྐམ་པ་དང ། ལུས་མ་ཐོབ་པར་གྱུར་ཅིང་འདི་ཡང་དང་ཡང་དུ་གྲོང་དུ་བསོད་སྙོམས་ལ་འཇུག་པར་བྱེད་པ་ལས་ན་འཕགས་པ
7.156a
ནག་པོ་ཆེན་པོ་འདི་མི་ཤ་མི་ཟ་འམ་སྙམ་མོ། །ཐམས་ཅད་དུ་ཡང་འཕགས་པ་ནག་པོ་ཆེན་པོ་མི་ཤ་ཟའོ་ཞེས་སྒྲ་གྲགས་སོ། །མཉན་ཡོད་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་མོ་ཞིག་བྱུང་ནས་སྲིངས་ཤིང་བསྐྱེད་དེ་ཆེན་མོར་གྱུར་ཏོ། །དུས་གཞན་ཞིག་ན་བྲམ་ཟེ་དེ་དུས་ལ་བབ་ནས་ཉེ་དུ་རྣམས་ཀྱིས་གོས་སྔོན་པོ་དང ། སེར་པོ་དང ། དམར་པོ་དང ། དཀར་པོ་དག་གིས་ཁྱོགས་སྤྱིལ་བརྒྱན་ནས་དུར་ཁྲོད་དུ་ཁྱེར་ཏེ། བསྲེགས་ཤིང་དོང་ནས་དེའི་ཆུང་མ་དང ། བུ་མོ་གཉིས་མཐའ་ཅིག་ཏུ་དོང་སྟེ་བསྡད་པ་དང ། ཚེ་དང་ལྡན་པ་ནག་པོ་ཆེན་པོ་དེའི་གདོང་དུ་ལྟ་ཞིང་སྡོད་དོ། །བུ་མོ་དེས་འཕགས་པ་ནག་པོ་ཆེན་པོ་དེའི་གདོང་དུ་ལྟ་ཞིང་སྡོད་པ་མཐོང་ངོ ། །མཐོང་ནས་ཀྱང་མ་ལ་སྨྲས་པ། ཡུམ་འཕགས་པ་ནག་པོ་ཆེན་པོ་འདི་བྱ་རོག་མོ་ཞར་མ་བཞིན་དུ་ངེས་པར་རྟོག་ཅིང་སྡོད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེའི་བུ་མོ་ཞིག་སྨྲས་པ་དང ། ཉེ་བར་སྨྲས་པར་གྱུར་ཏེ། དེས་ཉན་ཐོས་ཆེན་པོ་རི་རབ་དང་འདྲ་བ་ལ་ངག་གིས་ལས་རྩུབ་པོ་སྨྲས་པས་བྲམ་ཟེའི་བུ་མོ་དེ་ཚེ་རབས་ལྔ་བརྒྱར་བྱ་རོག་མོ་ཞར་མར་འགྱུར་རོ། །ཐམས་ཅད་དུ་བཅོམ་ལྡན་འདས་ཀྱིས་བྲམ་ཟེའི་བུ་མོ་དེ་ཚེ་རབས་ལྔ་བརྒྱར་བྱ་རོག་མོ་ཞར་མར་འགྱུར་རོ་ཞེས་ལུངས་བསྟན་ཏོ། །ཞེས་སྒྲའ་གྲགས་སོ། །བྲམ་ཟེ་མོ་དེས་བཅོམ་ལྡན་འདས་ཀྱིས་བདག་གི་བུ་མོ་ཚེ་རབ་ལྔ་བརྒྱར་བྱ་རོག་མོ་ཞར་མར་འགྱུར་བར་ལུངས་སྟན་ཏོ་ཞེས་ཐོས་སོ། །དེ་ནས་བྲམ་ཟེ་མོ་དེས་བུ་མོ་དེ་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བུ་མོ་འདི་ལ་བཟོད་པ་མཛད་དུ་གསོལ། འདིས་རབ་ཏུ་སྡང་བའི་སེམས་ཀྱིས་ངག་གི་ལས་རྩུབ་པོ་མ་སྨྲས་སོ། །
7.156b
བྲམ་ཟེ་མོ་ཅི་ངས་འགའ་ཞིག་ལ་མནའ་འདོར་བར་བྱ་འམ། གལ་ཏེ་བུ་མོ་འདིས་རབ་ཏུ་སྡང་བའི་སེམས་ཀྱིས་ངག་གི་ལས་རྩུབ་པོ་སྨྲས་པར་གྱུར་ན་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བ་དེ་ལྟ་བུའི་གནས་ཡོད་པར་འགྱུར་རོ། །མཉན་ཡོད་ན་བྲམ་ཟེའི་ཁྱེའུ་དག་གིས་འཕགས་པ་ནག་པོ་ཆེན་པོ་མི་ཤ་ཟའོ། །ཞེས་ཐོས་ནས་དེ་དག་གིས་སྨྲས་པ། ཤེས་ལྡན་དག་ཅི་ཡང་དག་པ་ཡིན་ནམ། འོན་ཏེ་དེ་ཡང་དག་པ་མ་ཡིན་པ་བདག་ཅག་གིས་འཕགས་པ་ནག་པོ་ཆེན་པོ་བགམ་པར་བྱས། བདག་ཅག་ལས་ཅིག་ཤི་བའི་ཆ་ལུགས་སུ་བྱས་པ་དེ་བདག་ཅག་གིས་དུར་ཁྲོད་དུ་བཀུར་བར་བྱའོ། །བདག་ཅག་ལས་གང་ཞིག་ཤི་བའི་ཆ་ལུགས་སུ་བྱ། ཁྱོད་ཤི་བའི་ཆ་ལུགས་སུ་གྱིས་ཤིག་།དེས་སྨྲས་པ་ཁོ་བོ་མི་ཟོས་སམ་དེ་དག་གིས་སྨྲས་པ། ཁོ་བོ་ཅག་གིས་ཁྱོད་བསྲུངས་བར་བྱའོ། །དེས་ཤི་བའི་ཆ་ལུགས་སུ་བྱས་པ་དང ། དེ་དག་གིས་དེ་ཡང་བ་དང ། འབྲུ་མར་གྱིས་བསྐུས་སྟེ་ཁྱོགས་སྤྱིལ་དུ་བཞག་ནས་མཉན་ཡོད་ནས་ཕྱིར་འབྱུང་བར་བརྩམས་པ་དང ། ཚེ་དང་ལྡན་པ་ནག་པོ་ཆེན་པོ་ཡང་མཉན་ཡོད་དུ་བསོད་སྙོམས་ལ་ཞུགས་ཏེ་དེས་དེ་མཐོང་ནས་བསམས་པ། བདག་དགང་དཀའ་བ་འདིའི་དོན་དུ་གྲོང་དུ་བསོད་སྙོམས་ལ་ཞུགས་ཏེ་ཅི་རུང་ཕྱིར་ལོག་ལ་ཟས་ལྔ་པོ་འདི་དག་ཉིད་བཟའ་བར་བྱའོ། །སྙམ་ནས་དེ་ཕྱིར་ལོག་གོ། །བྲམ་ཟེའི་ཁྱེའུ་དེས་དེ་དག་ལ་སྨྲས་པ། ཤེས་ལྡན་དག་འཕགས་པ་ནག་པོ་ཆེན་པོ་འདི་ཕྱིར་ལོག་པས་ཁོ་བོ་ཟོས་པར་མི་འགྱུར་རམ། དེ་དག་གིས་སྨྲས་པ། ཁོ་བོ་ཅག་འཁོད་བཞིན་དུ་ཇི་ལྟར་ཟ་བར་འགྱུར། དེ་དག་གི་དེ་དུར་ཁྲོད་དུ་བོར་ཏེ་མཐའ་གཅིག་ཏུ་དོང་ནས་ཚང་ཚིང་དང་ལྷབ་ལྷུབ་དག་གི་ནང་དུ་མགོ་བསྲིངས་ཏེ་བསྡད་དོ། །དེར་ཝ་ཞིག་གིས་བགྲོད་པར་བརྩམས་པ་དང ། ཚེ་དང་ལྡན་པ་ནག་པོ་ཆེན་པོས་བསམས་པ། ཝས་ཟས་ལྔ་པོ་དག་ཟོས་ཤིང་བདག་གི་ཟན་ཆད་པར་གྱུར་ན་མི་རུང་ངོ་སྙམས་དུ་རིག་ནས་དེས་མྱུར་བ་མྱུར་བར་འགྲོ་བར་བརྩམས་པ་དང ། བྲམ་ཟེའི་ཁྱེའུ་དེ་སྐྲག་སྟེ་ཁོ་བོ་ཟོས་ཁོ་བོ་ཟོས་ཞེས་ངུ་བར་བརྩམས་སོ། །བྲམ་ཟེའི་ཁྱེའུ་དེ་དག་དབྱུག་པ
7.157a
ཐོགས་ཏེ་མྱུར་བ་མྱུར་བར་དོང་ནས་དེ་དག་གིས་སྨྲས་པ། འཕགས་པ་དྲང་སྲོང་གི་རྒྱལ་མཚན་ཐོགས་ཤིང་སྡིག་པའི་ལས་རྩུབ་པོ་འདི་དང་འདི་ལྟ་བུ་ལྷག་པར་སྤྱོད་དམ། དེས་སྨྲས་པ། ཅི་བྱས་མི་ཤ་ཟའོ། །བཞིན་བཟང་དག་ཅི་ཁྱེད་ཀྱིས་ཁོ་བོ་མཚོན་ཐོགས་ཏེ་ཤ་གཅོད་ཅིང་ཟ་བ་མཐོང་ངམ། དེ་དག་གིས་སྨྲས་པ། འོ་ན་ཅིའི་སླད་དུ་མྱུར་བ་མྱུར་བར་བྱོན། བཞིན་བཟང་དག་ཁོ་བོ་ལ་བློ་སྐྱེས་པ། ཝ་འདིས་ཟས་ལྔ་པོ་དག་ཟོས་ཤིང་བདག་གི་ཟན་ཆད་པར་གྱུར་ན་མི་རུང་ངོ་སྙམ་དུ་རིག་ནས་མྱུར་བ་མྱུར་བར་འོངས་སོ། །འཕགས་པ་ཟས་ལྔ་པོ་དག་གསོལ་ལམ། མི་ཤ་གསོལ་ནི་མ་འཚལ་གྱིས་འདི་ལྟར་ཐམས་ཅད་དུ་འཕགས་པ་ནག་པོ་ཆེན་པོ་མི་ཤ་གསོལ་ཞེས་སྒྲ་གྲག་པར་གྱུར་ཏོ་ཞེས་ཟེས་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་འདི་སྙམས་དུ་དགོངས་ཏེ། ཉེས་དམིགས་གང་ཅུང་ཟད་བྱུང་བ་དེ་ནི་དགེ་སློང་དག་བྱིན་ལེན་བྱེད་དུ་མ་བཅུག་པར་ཟ་བ་ལས་གྱུར་པ་ཡིན་པས་དེ་ལྟ་བས་ན་དགེ་སློང་རྣམས་ཀྱིས་བྱིན་ལེན་བྱེད་དུ་བཅུག་སྟེ་ཟ་ན་དེ་ཉིད་དཔང་པོར་འགྱུར་རོ། །སྙམས་དུ་དགོངས་ནས་བཀའ་སྩལ་པ། དེ་ལྟ་བས་ན་དགེ་སློང་རྣམས་ཀྱིས་བྱིན་ལེན་བྱེད་དུ་བཅུག་སྟེ་བཟའ་བར་བྱའོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་བྱིན་ལེན་བྱེད་དུ་བཅུག་སྟེ་བཟའ་བར་བྱའོ་ཞེས་བཀའ་སྩལ་ནས། དེ་དག་གིས་བྱིན་ལེན་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་ནི་རྣམ་པ་ལྔ་སྟེ། ལྔ་གང་ཞེ་ན། ལུས་ཀྱིས་ལུས་སུ་དང ། ལུས་དང་འབྲེལ་བས་ལུས་སུ་དང ། ལུས་ཀྱིས་ལུས་དང་འབྲེལ་བར་དང ། ལུས་དང་འབྲེལ་བས་ལུས་དང་འབྲེལ་བར་དང ། གཞག་པའི་ཆོ་ག་ཉིད་ནི་ལྔ་པའོ། །ཇི་ལྟར་ལུས་ཀྱིས་ལུས་སུ་ཞེ་ན། ལུས་ཀྱིས་སྦྱིན་པར་བྱེད་ཅིང་ལུས་སུ་ལེན་པར་བྱེད་པ་སྟེ། དེ་ལྟར་ལུས་ཀྱིས་ལུས་སུའོ། །ཇི་ལྟར་ལུས་དང་འབྲེལ་བས་ལུས་སུ་ཞེ་ན། ལྷུང་བཟེད་ཀྱིས་སྦྱིན་པར་བྱེད་ཅིང་ལུས
7.157b
སུ་ལེན་པར་བྱེད་པ་སྟེ། དེ་ལྟར་ལུས་དང་འབྲེལ་བས་ལུས་སུའོ། །ཇི་ལྟར་ལུས་ཀྱིས་ལུས་དང་འབྲེལ་བར་ཞེ་ན། ལུས་ཀྱིས་སྦྱིན་པར་བྱེད་ཅིང་ལྷུང་བཟེད་དུ་ལེན་པར་བྱེད་པ་སྟེ། དེ་ལྟར་ལུས་ཀྱིས་ལུས་དང་འབྲེལ་བར་རོ། །ཇི་ལྟར་ལུས་དང་འབྲེལ་བས་ལུས་དང་འབྲེལ་བར་ཞེ་ན། ལྷུང་བཟེད་ཀྱིས་སྦྱིན་པར་བྱེད་ཅིང་ལྷུང་བཟེད་དུ་ལེན་པར་བྱེད་པ་སྟེ། དེ་ལྟར་ལུས་དང་འབྲེལ་བས་ལུས་དང་འབྲེལ་བར་རོ། །ཇི་ལྟར་གཞག་པའི་ཆོ་ག་ཉིད་ནི་ལྔ་པ་ཡིན་ཞེ་ན། དགེ་སློང་དག་སྨད་པ་ཞེས་བྱ་བའི་ཡུལ་གྱི་མི་དག་ཡོད་དེ། དེ་དག་མ་ཡང་སྨོད་པར་བྱེད། ཕ་ཡང་སྨོད་པར་བྱེད། ཕུ་ནུ་དང་བུ་སྲིང་ཡང་སྨོད་པར་བྱེད་དེ། དགེ་སློང་གང་དེར་འགྲོ་བ་དེས་དཀྱིལ་འཁོར་བྱས་ཏེ་འདིར་ཞོག་ཤིག་ཅེས་བརྗོད་པར་བྱ་ཞིང ། དེ་དག་གིས་དེར་གང་བཞག་པ་དེ་བྱིན་ལེན་བྱེད་པར་བརྗོད་པར་བྱ་ཞིང ། བྱང་གི་སྒྲ་མི་སྙན་གྱི་དུས་བྱིན་གྱིས་བརླབས་ཏེ་བཟའ་བར་བྱ་ཞིང་འདི་ལ་འགྱོད་པར་མི་བྱ་སྟེ། དེ་ལྟར་གཞགས་པའི་ཆོ་ག་ཉིད་ནི་ལྔ་པ་ཡིན་ནོ། །བྲམ་ཟེ་དང ། ཁྱིམ་བདག་དད་པ་ཅན་དག་གིས་དགེ་སློང་རྣམས་ལ་མེ་ཏོག་དག་འབུལ་བར་བྱེད་པ་ན་དགེ་སློང་རྣམས་དེ་དག་མི་ལེན་ནས་དེ་དག་གིས་སྨྲས་པ། འཕགས་པ་དག་གང་གི་ཚེ་བཅོམ་ལྡན་འདས་འཇིག་རྟེན་དུ་མ་གཤེགས་པ་དེའི་ཚེ་ན་ནི་གཞན་མུ་སྟེགས་ཅན་དག་སྦྱིན་གནས་ལགས་མོད། ད་ནི་བཅོམ་ལྡན་འདས་འཇིག་རྟེན་དུ་གཤེགས་པས་ཁྱེད་ཅག་སྦྱིན་གནས་ལགས་ན། གལ་ཏེ་ཁྱེད་ཅག་མི་བཞེས་ན་ཅི་བདག་ཅག་དགེ་བའི་ཤུལ་རྒྱགས་དང་བྲལ་བ་དག་གིས་འཇིག་རྟེན་འདི་ནས་འཇིག་རྟེན་ཕ་རོལ་ཏུ་མཆི་བར་བགྱི་འམ་བཞེས་ཤིག་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་ཀྱང་རུང་བར་བྱས་ཏེ་བཟའ་བར་བྱའོ། །དེ་དག་གིས་རུང་བ་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རུང་བ་ནི་རྣམ་པ་ལྔ་སྟེ། ལྔ་གང་ཞེ་ན། མིས་རུང
7.158a
བ་དང ། མཚོན་གྱིས་རུང་བ་དང ། སེན་མོས་རུང་བ་དང ། རྙིངས་པས་རུང་བ་དང ། ནེ་ཙོས་རྨ་ཕྱུང་བས་རུང་བ་ཉིད་ནི་ལྔ་པའོ། །གཞན་ཡང་རུང་བ་ལྔ་སྟེ། ལྔ་གང་ཞེ་ན། ཕྱུང་བ་དང ། གཤེགས་པ་དང ། བཅད་པ་དང ། ཕུག་པ་དང ། ས་བོན་གྱི་ཆོས་མེད་པ་ཉིད་ནི་ལྔ་པའོ། །བཅོམ་ལྡན་འདས་ཀྱིས་ཤིང་ཏོག་དག་བྱིན་ལེན་བྱེད་དུ་བཅུག་སྟེ་བཟའ་བར་བྱའོ་ཞེས་བཀའ་སྩལ་ནས་དེ་དག་གིས་བྱིན་ལེན་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ལག་པ་བཀན་པར་བྱིན་ལེན་ལྔ་སྟེ། ལྔ་གང་ཞེ་ན། མན་ཤེ་དང ། ཁྲི་དང ། ཁྲིའུ་དང ། ཐུ་བ་དང ། ལྷུང་བཟེད་ཀྱི་གཞི་ཉིད་ནི་ལྔ་པའོ། །དགེ་སློང་རྣམས་ཤིང་ཏོག་དག་རེ་རེ་ནས་རུང་བར་བྱེད་དུ་འཇུག་པས་ཡུན་རིང་ཏུ་ཐོགས་ནས་བཅོམ་ལྡན་འདས་ཀྱིས་བཀའ་སྩལ་པ། ཕུང་པོ་བྱས་ཏེ་མེས་གནས་གཉིས་སམ། གསུམ་དུ་རེག་པར་བྱས་ན་ཐམས་ཅད་དུ་རུང་བར་འགྱུར་རོ། །མཚོན་དང ། སེན་མོས་ནི་རེ་རེ་ནས་སོ། །ཁྱིམ་པ་རྣམས་ཤིང་ཏོག་དག་མི་སྙོམས་པར་འདྲིམས་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་དག་འདྲིམ་དུ་གཞུག་པར་བྱའོ། །དགེ་ཚུལ་དག་ཀྱང་མི་སྙོམས་པར་འདྲིམ་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་ལགས་པ་དག་བསྙལ་ཏེ་བྱིན་ལེན་བྱས་ནས་བྲིམ་པར་བྱའོ། །འོན་ཀྱང་མ་སྙོམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བྲིམ་པར་བྱ་བ་གཅེས་པ་དང ། བར་མ་དང ། ཐ་མ་དག་སོ་སོར་བྱའོ། །གང་དག་འདྲིམ་པར་བྱེད་པ་དེ་དག་གིས་ཕྱིས་ཐམས་ཅད་ཀྱིས་ཐ་ཆད་དག་ཐོབ་ནས་བཅོམ་ལྡན་འདས་ཀྱིས་བཀའ་སྩལ་པ། འདྲིམ་པར་བྱེད་པའི་སྐལ་བ་ནི་མཁན་པོ་དང ། སློབ་དཔོན་དག་གིས་མནོད་པར་བྱའོ་དེ་དག་གིས་བཟང་པོ་དག་ཐོབ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་གི་དྲུང་ན་འདུག་པ་དག་གིས་མནོད་པར་བྱའོ། །དེ་དག་ལངས་ཤིང་ལངས་ཤིང་རབ་ཏུ་མང་པོ་དག་གི་སྐལ་བ་དག་བྱིན་ལེན་བྱེད་དུ་འཇུག་ནས་བཅོམ་ལྡན་འདས་ཀྱིས་བཀའ
7.158b
སྩལ་པ། སྟན་ལས་མ་འཕགས་པས་ཇི་རྩམ་ནུས་པ་དེ་ཙམ་དག་བྱིན་ལེན་བྱེད་དུ་གཞུག་གོ། །འདྲིམ་པ་ན་དེ་དག་ཡང་བྱིན་ལེན་བྱེད་དུ་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། སྟན་ལས་མ་འཕགས་པས་གང་དག་ལེན་ནུས་པ་དེ་དག་ནི་བྱིན་ལེན་བྱེད་དུ་བཅུག་ཟིན་པར་བརྗོད་པར་བྱའོ། །སྟན་ལས་མ་འཕགས་པས་གང་དག་ལེན་མི་ནུས་པ་དེ་དག་ནི་ཡང་བྱིན་ལེན་བྱེད་དུ་གཞུག་པར་བྱའོ། །ཁྱིམ་བདག་ན་རེ་འཕགས་པ་དག་བདག་ཅག་གིས་ཀྱང་བྲིམ་པར་བགྱིའོ། །ཞེས་ཟེར་བ་ན་དགེ་སློང་དག་མི་བཏུབ་ནས་བཅོམ་ལྡན་འདས་ཀྱིས་བཀའ་སྩལ་པ། འབྲིམ་དུ་གཞུག་པར་བྱའོ། །དེ་དག་དང་པོར་འཛིན་ཅིང་དགེ་སློང་དག་ཕྱིས་འཛིན་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དང་པོར་གཟུང་བར་བྱ་ཞིང་ཕྱིས་ཁྱིམ་བདག་གིས་གཟུང་བར་བྱའོ། །དགེ་སློང་རྣམས་དགེ་སློང་དག་ལས་བླངས་པ་གང་དག་ཡིན་པ་དེ་དག་ཡང་བྱིན་ལེན་བྱེད་དུ་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལས་བླང་པ་གང་དག་ཡིན་པ་དེ་དག་གི་བྱིན་ལེན་ནི་དེ་ཉིད་ཡིན་ནོ། །ཁྱིམ་པ་དག་ལས་བླངས་པ་གང་དག་ཡིན་པ་དེ་དག་ནི་བྱིན་ལེན་བྱེད་དུ་གཞུག་གོ། །གཏོང་བ་ན་དང་པོར་ཁྱིམ་པ་དག་གིས་གཏོང་ཞིང་ཕྱིས་དགེ་སློང་དག་གིས་གཏོང་བར་བྱེད་ནས། དགེ་སློང་རྣམས་དེ་དག་གསོག་འཇོག་བྱས་པ་ཡིན་ནོ་ཞེས་འདོར་བར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དང་པོར་དགེ་སློང་དག་གིས་གཏང་བར་བྱ་ཞིང་ཕྱིས་ཁྱིམ་པ་དག་གིས་གཏང་བར་བྱ་སྟེ། ཕྱི་དེ་ཉིན་པར་དགེ་འདུན་ལ་བྲིམ་པར་བྱའོ། །བྲམ་ཟེ་དང ། ཁྱིམ་བདག་དད་པ་ཅན་དག་གིས་དགེ་འདུན་ལ་ཞུན་མར་གྱི་བུམ་པ་དང ། འབྲུ་མར་གྱི་བུམ་པ་དང ། སྦྲང་རྩིའི་བུམ་པ་དང ། བུ་རམ་གྱི་དབུ་བའི་བུམ་པ་དག་འབུལ་བ་ན་དགེ་སློང་དག་མི་ལེན་ནས་བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་དགེ་འདུན་ལ་བྲིམ་པར་བྱའོ། །དེ་དག་གིས་ཆོས་གོས་དག་སྣུམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ།
7.159a
བར་དུ་རྩཝ་འམ་ལོ་མ་དག་བཅུག་སྟེ་བྲིམ་པར་བྱའོ། །དེ་དག་བཟུང་སྟེ་འགྲེང་བ་ན་ངལ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གཞག་པར་བྱའོ། །དེ་དག་གིས་གཞག་པ་དང་འདྲིལ་ནས་བཅོམ་ལྡན་འདས་ཀྱིས་བཀའ་སྩལ་པ། འོག་གཞི་ལ་གཞག་པར་བྱའོ། །དེ་དག་གིས་དེ་དག་ཟོས་ནས་དེ་དག་ཉིད་ལ་ཕྱིར་སྦྱིན་ནས་དེ་དག་གིས་སྨྲས་པ། འཕགས་པ་དག་ཞུན་མར་དང ། འབྲུ་མར་དང ། སྦྲང་རྩི་དང ། བུ་རམ་གྱི་དབུ་བ་དག་ཕུལ་ན་བུམ་པ་དག་མ་ཕུལ་ལམ་ཅི། བུམ་པ་དག་ཀྱང་ཁྱེད་ཉིད་སྣོམས་ཤིག་།དེ་དག་གིས་མནོས་ཏེ་འདུག་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་དག་ཆུའི་རྫིངས་བུ་ཟབ་མོའི་ནང་དུ་ཞག་བདུན་ནམ། བརྒྱད་གཞུགས་པར་བྱ་ཞིང ། གང་གི་ཚེ་ཉ་འམ། རུས་སྦལ་ལམ། སྦལ་པ་འམ། ཆུ་སྲིན་བྱིས་པ་གསོད་དམ། ཉ་ཁྱི་བདག་གིས་མ་ལུས་པར་ལྡོགས་པར་གྱུར་པ་དེའི་ཚེ་ན་རུང་བའི་ཁང་པར་བཅུག་སྟེ་སྤྱད་པར་བྱའོ། །བཅོམ་ལྡན་འདས་ཀྱིས་བྱིན་ལེན་བྱེད་དུ་བཅུག་སྟེ་བཟའ་བར་བྱའོ། །ཞེས་བཀའ་སྩལ་ནས། དེ་དག་གིས་ཇི་ལྟར་བྱིན་ལེན་བྱེད་དུ་བཅུག་པ་དང ། ཇི་ལྟར་བྱིན་ལེན་བྱེད་དུ་མ་བཅུག་པ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རྣམ་པ་ལྔས་ནི་བྱིན་ལེན་བྱེད་དུ་མ་བཅུག་པར་བརྗོད་པར་བྱ་ལ། རྣམ་པ་ལྔས་ནི་བྱིན་ལེན་བྱེད་དུ་བཅུག་པར་བརྗོད་པར་བྱའོ། །རྣམ་པ་ལྔ་པོ་གང་དག་གིས་བྱིན་ལེན་བྱེད་དུ་མ་བཅུག་པར་བརྗོད་པར་བྱ་ཞེ་ན། མཚམས་ཀྱི་ཕྱི་རོལ་ན་འདུག་པས་དང ། མི་འཐོབ་པའི་ཕྱོགས་ནས་དང ། གློ་ནས་དང ། རྒྱབ་ནས་དང ། ལག་པ་ཁས་ཕུབ་པས་བྱིན་ལེན་བྱེད་དུ་འཇུག་པ་སྟེ། རྣམ་པ་ལྔ་པོ་དེ་དག་གིས་ནི་བྱིན་ལེན་བྱེད་དུ་མ་བཅུག་པར་རྗོད་པར་བྱའོ། །རྣམ་པ་ལྔ་པོ་གང་དག་གིས་བྱིན་ལེན་བྱེད་དུ་བཅུག་པར་བརྗོད་པར་བྱ་ཞེ་ན། མཚམས་ཀྱི་ཕྱི་རོལ་མ་ཡིན་པ་ན་འདུག་པས་དང ། མི་འཐོབ་པའི་ཕྱོགས་མ་ཡིན་པ་ནས་དང ། གློ་མ་ཡིན་པ་ནས་དང ། རྒྱབ་མ་ཡིན་པ་ནས་དང ། ལག་པ་ཁས་ཕུབ་པ་མ་ཡིན་པས་བྱིན་ལེན་བྱེད་དུ་འཇུད་པ་སྟེ། རྣམ་པ་ལྔ་པོ
7.159b
དེ་དག་གིས་ནི་བྱིན་ལེན་བྱེད་དུ་བཅུག་པར་བརྗོད་པར་བྱའོ། །བཅོམ་ལྡན་འདས་ཀྱིས་བྱིན་ལེན་བྱེད་དུ་བཅུག་སྟེ་བཟའ་བར་བྱའོ་ཞེས་བཀའ་སྩལ་ནས། དྲུག་སྡེ་དག་བྱིན་ལེན་བྱེད་དུ་བཅུག་པ་དང ། བྱིན་ལེན་བྱེད་དུ་མ་བཅུག་པ་ཡང་ཟ་བར་བྱེད་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་བྱིན་ལེན་བྱེད་དུ་བཅུག་སྟེ་བཟའ་བར་བྱའོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་བྱིན་ལེན་བྱེད་དུ་བཅུག་པ་དང ། བྱིན་ལེན་བྱེད་དུ་མ་བཅུག་པ་ཡང་ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ངས་བྱིན་ལེན་བྱེད་དུ་བཅུག་སྟེ་བཟའ་བར་བྱའོ་ཞེས་བཀའ་སྩལ་ན། ཁྱེད་བྱིན་ལེན་བྱེད་དུ་བཅུག་པ་དང ། བྱིན་ལེན་བྱེད་དུ་མ་བཅུག་པ་ཡང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས། དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མ་བྱིན་པར་ཁ་ནས་མིད
7.160a
པའི་ཟས་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །དགེ་སློང་དགོན་པ་པ་དགོན་པ་ན་གནས་པ་རྣམས་ལ་ཆུ་དང་སོ་ཤིང་གི་བྱིན་ལེན་སྟོབས་པ་མེད་ནས་དེ་དག་གིས་དགོན་པའི་གནས་མལ་དག་བོར་ཏེ་གྲོང་མཐའི་གནས་མལ་དག་ཏུ་ཞུགས་སོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཀུན་དགའ་བོ་ཅིའི་ཕྱིར་དགེ་སློང་དགོན་པ་པ་དག་གིས་དགོན་པའི་གནས་མལ་དག་བོར་ཏེ་གྲོང་མཐའི་གནས་མལ་དག་ཏུ་ཞུགས། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་མ་བྱིན་པར་ཁ་ནས་མིད་པའི་ཟས་ཟ་ན་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་པས་དགེ་སློང་དགོན་པ་པ་དགོན་པ་ན་གནས་པ་རྣམས་ལ་ཆབ་དང ། སོ་ཤིང་གི་བྱིན་ལེན་སྟོབ་པ་མ་མཆིས་ནས་དེ་དག་གིས་དགོན་པའི་གནས་མལ་དག་བོར་ཏེ་གྲོང་མཐའི་གནས་མལ་དག་ཏུ་ཞུགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཆུ་དང་སོ་ཤིང་མ་གཏོགས་སོ། །གླང་པོ་ཆེ་ཅང་ཤེས་དང ། སྤྲེའུ་ཅང་ཤེས་དང ། དོམ་ཅང་ཤེས་དག་ཡོད་ནས་དེ་དག་གིས་དགེ་སློང་རྣམས་ལ་ཤིང་ཏོག་དག་འབུལ་བ་ན་དགེ་སློང་རྣམས་འགྱོད་པས་དེ་དག་མི་ལེན་ནས་བཅོམ་ལྡན་འདས་ཀྱིས་བཀའ་སྩལ་པ། གང་ལ་ལེན་པ་ཡོད་པ་དེ་ལ་སྟོབས་པ་ཡང་ཡོད་པས་དེ་ལྟ་བས་ན་དེ་དག་གིས་བསྟབས་པ་ནི་བྱིན་ལེན་བྱས་པར་བརྗོད་པར་བྱ་སྟེ། དེ་ལ་འགྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ
7.160b
སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མ་བྱིན་པར་ཁ་ནས་མིད་པའི་ཟས་ཟ་ན་ཆུ་དང་སོ་ཤིང་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །མ་བྱིན་པར་ཞེས་བྱ་བ་ནི་དེ་ལ་སྐྱེས་པ་འམ། བུད་མེད་དམ། མ་ནིང་གང་གིས་ཀྱང་མ་བྱིན་པར་རོ། །ཁ་ནས་མིད་པའི་ཟས་ཤེས་བྱ་བ་ནི་བཅའ་བ་ལྔ་པོ་དང ། བཟའ་བ་ལྔ་པོ་དག་གོ། །ཟ་ན་ཞེས་བྱ་བ་ནི་མགུལ་དུ་མིད་ནའོ། །ཆུ་དང་སོ་ཤིང་མ་གཏོགས་ཏེ་ཞེས་བྱ་བ་ནི་ཆུ་དང་སོ་ཤིང་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་བྱིན་ལེན་མ་བྱས་པ་ལ་བྱིན་ལེན་མ་བྱས་པར་འདུ་ཤེས་པས་བཅའ་བ་དང ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་བྱིན་ལེན་མ་བྱས་པ་ལ་ཡིད་གཉིས་ཟ་བས་བཅའ་བ་དང ། བཟའ་བ་འཆའ་འམ། ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་བྱིན་ལེན་བྱས་པ་ལ་བྱིན་ལེན་མ་བྱས་པར་འདུ་ཤེས་པས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །དགེ་སློང་གིས་བྱིན་ལེན་བྱས་པ་ལ་ཡིད་གཉིས་ཟ་བས་བཅའ་བ་དང ། བཟའ་བ་འཆའ་འམ། ཟ་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་ནག་པོ་ཆེན་པོས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས་ཐམས་ཅད་དུར་ཁྲོད་པ་དང་ལྡན་ཞིང
7.161a
ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས་ཤིང་དགྲ་བཅོམ་པ་ཉིད་ཐོབ་ནས་ཡང་དག་པ་མ་ལགས་པས་སྐུར་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱིས་བུ་ནག་པོ་ཆེན་པོ་ཉིད་ཀྱིས་ལས་ཚོགས་རྙེད་པ་རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ནག་པོ་ཆེན་པོ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱི་ན་རང་སངས་རྒྱས་བླ་མ་ཞེས་བྱ་བ་ཞིག་ཉེ་བར་རྟེན་ཅིང་གནས་པ་དེ་ལྷའི་ཚོགས་འབུམ་ཕྲགས་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ་དུར་ཁྲོད་ཆེན་པོའི་དབུས་ནས་བཱ་རཱ་ཎ་སཱིར་བསོད་བསྙོམས་ལ་ཞུགས་སོ། །དུར་ཁྲོད་ཆེན་པོ་དེ་ན་གནོད་སྦྱིན་གདུག་པ་ཞིག་འདུག་པ་དེ་དེ་ན་མི་རོ་མྱགས་པ་ཟའོ། །གང་གི་ཚེ་རང་སངས་རྒྱས་བླ་མ་དུར་ཁྲོད་ཆེན་པོ་དེར་ཕྱིན་པ་དེའི་ཚེ་ན་གནོད་སྦྱིན་གདུག་པ་དེ་ལྷའི་མཐུས་དུར་ཁྲོད་ཆེན་པོ་དེ་ནས་བྲོས་པ་དང་དེའི་མི་རོ་མྱགས་པ་དེ་དག་ཝ་ལ་སོགས་པས་ཟོས་ནས་གནོད་སྦྱིན་གདུག་པ་དེས་བསམས་པ། རབ་ཏུ་བྱུང་བ་འདི་བདག་གི་ལྟོའི་བགེགས་སུ་གྱུར་གྱིས་བདག་གིས་འདི་ལ་བསྙེན་བཀུར་མ་ཡིན་པ་བྱའོ། །སྙམས་ནས་དེས་དེའི་ལྷུང་བཟེད་དུ་མིའི་ལག་པ་བཅུག་པ་དང ། བཱ་རཱ་ཎ་སཱིར་ཐམས་ཅད་དུ་རབ་ཏུ་བྱུང་བ་དེ་མི་ཤ་ཟའོ་ཞེས་སྒྲ་གྲགས་པར་གྱུར་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ་གནོད་སྦྱིན་གདུག་པ་ཉོན
7.161b
མོངས་པ་འདི་ཧ་ཅང་སྨྲས་པ་དང ། ཉམ་པར་གྱུར་ན་མི་རུང་གིས་འདི་ལ་ལག་ནས་དྲངས་པ་སྦྱིན་ནོ་སྙམས་ནས་དེ་དེ་ལ་སྙིང་བཙེའ་བའི་ཕྱིར་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང་ཆར་ཕབ་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེས་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་གནོད་སྦྱིན་གདུགས་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། བདག་གིས་ཁྱོད་ལ་ཡང་དག་པ་མ་ལགས་པའི་སྔགས་པ་མ་ལགས་པ་བརྗོད་དོ། །བཱ་རཱ་ཎ་སཱི་ཐམས་ཅད་དུ་ཡང་རབ་ཏུ་བྱུང་བ་དེ་མི་ཤ་མི་ཟའི་འདིས་དེ་ལ་ཡང་དག་པ་མ་ཡིན་པའི་མི་བསྔགས་པ་བརྗོད་དོ་ཞེས་སྒྲ་གྲགས་པར་གྱུར་ཏོ། །རང་སངས་རྒྱས་དེ་གནོད་སྦྱིན་གདུག་པ་དེ་ལ་རྗེས་སུ་སྙིངས་བཙེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་གནོད་སྦྱིན་གདུག་པ་དེས་དེའི་ལྷུང་བཟེད་ནས་མིའི་ལག་པ་ས་ལ་བོར་ཏེ་རྐང་པ་གཉིས་ལ་ཕྱག་འཚལ་ནས་སྨོན་ལམ་འདི་སྐད་ཅེས་བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་ཙ་བ་འདིས་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་འབྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་གནོད་སྦྱིན་གདུག་པ་གང་ཡིན་པ་དེ་ནི་ནག་པོ་ཆེན་པོ་འདི་ཡིན་ཏེ། དེས་རང་སངས་རྒྱས་ལ་ཡང་དག་པ་མ་ཡིན་པས་སྐུར་པ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ཚེ་རབས་མང་པོ་དག་དུ་སེམས་ཅན་དམྱལ་བ་རྣམས་སུ་གདུངས་ནས་ལས་དེ་ཉིད་ཀྱི་ལྷག་མས་ཚེ་རབ་ལྔ་བརྒྱར་ཡང་དག་པ་མ་ཡིན་པས
7.162a
སྐུར་ནས། ད་ལྟར་དགྲ་བཅོམ་པ་ཐོབ་ཀྱང་ཡང་དག་པ་མ་ཡིན་པས་བསྐུར་ཏོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ནི་ངའི་དྲུང་དུ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཤིང་འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །འདི་དུར་ཁྲོད་དེ་ན་གནས་གནས་པ་གང་ཡིན་པ་དེའི་བག་ཆགས་ཀྱིས་ད་ལྟར་ཡང་ཐམས་ཅད་དུར་ཁྲོད་པ་དང་ལྡན་པར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན། ལས་ཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེས་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། ་་།བར་སྡོམ་ལ། ཐམས་ཅད་དུར་ཁྲོད་ལྡན་པ་དང ། །སྒོ་བ་དང་ནི་བུ་མོ་དང ། །བྲམ་ཟེས་བགམས་དང་བྱིན་ལེན་ལྔ། །ཤིང་ཏོག་ལ་སོགས་གཞན་ལྔ་དང ། །ཆུ་དང་སོ་ཤིང་གནང་བ་དང ། །གླང་ཆེན་སྤྲེའུ་དོམ་དང་ནི། །སྔོན་གྱི་ཚུལ་དང་སྦྱར་བ་ཡིན། །བྱིན་ལེན་མ་བྱས་པར་ཟ་བའི་ལྟུང་བྱེད་དེ་སུམ་བཅུ་རྩ་དགུ་པ་རྫོགས་སྷོ།། ་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་བཞི་པ། སངས་རྒྱས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །ཤཱཀྱ་མིང་ཆེན་གྱིས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ་ཞེས་ཐོས་སོ། །ཐོས་ནས་ཀྱང་སེར་སྐྱའི་གནས་ནས་བྱུང་ནས།
7.162b
བཅོམ་ལྡན་འདས་ག་ལ་བ་དེར་སོང་ཏེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཤཱཀྱ་མིང་ཆེན་ལ་ཆོས་དང་ལྡན་པའི་བཀའ་མཆིད་ཀྱི་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུངས་ངོ ། །དེ་ནས་ཤཱཀྱ་མིང་ཆེན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་གཅིག་ཏུ་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཤཱཀྱ་མིང་ཆེན་ལ་ཅང་མི་གསུངས་བས་གནང་ངོ ། །དེ་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས་རང་གི་ཁྱིམ་ག་ལ་བ་དེར་སོང་ཏེ་ཕྱིན་ནས་ཞོ་ཤས་འཚོ་བ་དག་ལ་སྨྲས་པ། ཤེས་ལྡན་དག་བཅོམ་ལྡན་འདས་དང་དགེ་སློང་གི་དགེ་འདུན་ཤུལ་གྱིས་མཉེལ་ཏེ་གཤེགས་ཀྱིས་གདུགས་ཚོད་སྔ་རབ་ཏུ་ཞལ་ཟས་བསོད་པ་སྟ་གོན་གྱིས་ཤིག་དྲུག་སྡེ་དག་ནང་པར་སྔར་ལངས་ཏེ་སྨྲས་པ། དགའ་བོ་ཉེ་དགའ་ཇེ་ཁྱིམ་དུ་འགྲོ་བའི་ཁྱིམ་དག་བལྟས་འདོང་ངོ ། །དེ་ལྟར་བྱའོ་ཞེས་དེ་དག་ཁྱིམ་དུ་འགྲོ་བའི་ཁྱིམ་དག་ཏུ་དོང་བ་དང་དེ་དག་གིས་སྨྲས་པ། འཕགས་པ་དག་འདི་ཉིད་དུ་གདུགས་ཚོད་གསོལ་ཅིག་།དྲུག་སྡེ་དག་གིས་སྨྲས་པ། ཁོ་བོ་ཅག་མགྲོན་དུ་བོས་སོ་སུས། ཤཱཀྱ་མིང་ཆེན་གྱིས་སོ། །འོ་ན་སང་གདུགས་ཚོད་གསོལ་ཅིག་།དེ་ལྟར་བྱའོ་དེ་ནས་ཤཱཀྱ་མིང་ཆེན་ནང་པར་སྔར་ལངས་ཏེ་གདན་བཤམས་ནས་ཆུ
7.163a
ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང ། དགེ་སློང་གི་དགེ་འདུན་གྱིས་མདུན་དུ་བདར་ནས་ཤཱཀྱ་མིང་ཆེན་གྱི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམ་པ་ཉིད་ལ་བཞུགས་སོ། །དེ་ནས་ཤཱཀྱ་མིང་ཆེན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ཏེ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་བླངས་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་ཤཱཀྱ་མིང་ཆེན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་ཤཱཀྱ་མིང་ཆེན་རེ་ཤིག་བཅོམ་ལྡན་འདས་ཀྱི་སླད་བཞིན་དུ་ཞམ་རིང་དུ་སོང་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་ལོག་སྟེ། དེ་སྟེང་གི་ཁང་བཟངས་ཀྱི་གཞིར་གཏོགས་པ་ན་སྟོང་པ་རྗེས་སུ་དྲན་པ་སྒོམ་པར་བྱེད་དོ། །
7.163b
ཞོ་ཤས་འཚོ་བ་དག་གིས་ཀྱང་དེའི་གནས་མལ་དག་བརྟུལ་ཅིང་ཁ་ཟས་དག་བསྡུས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་གདུགས་ཚོད་ལ་བབ་པས་ཟན་ཆད་པར་གྱུར་ན་མི་རུང་གིས་འདོང་ངོ་ཞེས་དེ་དག་གིས་ཁྱིམ་དུ་འགྲོ་བའི་ཁྱིམ་དག་ཏུ་ཟན་དྲུག་བཅུ་སྦྱོར་དུ་བཅུག་ནས་ཤཱཀྱ་མིང་ཆེན་གྱི་ཁྱིམ་དུ་དོང་བ་དང ། ཇི་ཙམ་ན་དེ་ན་ཁ་ཟས་སྟ་གོན་བྱས་པ་ཡང་མེད། གནས་མལ་བཤམས་པ་ཡང་མེད་པར་མཐོང་ནས་དྲུག་སྡེ་དག་གིས་ཞོ་ཤས་འཚོ་བ་དེ་དག་ལ་སྨྲས་པ། ཤེས་ལྡན་དག་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་ནས་སྙིང་ལས་ཆུང་ངུར་འཁོད་ཅིང་གདུག་ཚོད་ཀྱང་སྟ་གོན་མི་བྱེད་གནས་མལ་ཡང་ཤོམ་པར་མི་བྱེད་ན་ཇི་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་གདུགས་ཚོད་གཅོད་པར་བྱེད་དམ། དེ་དག་གིས་སྨྲས་པ། འཕགས་པ་དག་ཁྱེད་ཅག་མནལ་བར་གྱུར་ཏམ་ཅི། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཏེ་གཤེགས་ལགས་སོ་དྲུག་སྡེ་དག་གིས་སྨྲས་པ། ཁོ་བོ་ཅག་གི་ཟན་གཅད་པར་བྱ་འམ། དེ་དག་གིས་སྨྲས་པ། འཕགས་པ་དག་བདག་ཅག་གིས་ཤཱཀྱ་མིང་ཆེན་ལ་སྦྲན་གྱི་བར་དུ་རེ་ཤིག་ཡུད་ཙམ་ཞིག་གཞེས་ཞེས་དེ་དག་དོང་སྟེ་ཤཱཀྱ་མིང་ཆེན་ལ་སྨྲས་པ། འཕགས་པ་དྲུག་སྡེ་དག་ད་གཟོད་མཆིས་ཏེ་འཚལ་མ་སློང་ངོ ། །ཤཱཀྱ་མིང་ཆེན་གྱིས་སྨྲས་པ། དེང་ལ་ལྷགས་རོལ་ཅུང་ཟད་ཅི་ཡོད་པ་དེ་བྱིན་ཅིག་།དེ་དག་དོང་སྟེ་སྨྲས་པ། འཕགས་པ་དག་བཞུགས་ལ་གསོལ་ཅིག་ཅེས་དེ་དག་གིས་བྲིམ་པར་བཙམ་པ་དང ། དྲུག་སྡེ་དག་གིས་སྨྲས་པ། ཤཱཀྱ་མིང་ཆེན་གྱིས་ཁ་ཤིན་དུ་ཆེན་པོས་བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་གཅིག་གདུགས་ཚོད་གསོལ་བར་ཅི་གནང་ཞེས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲང་ནས། གལ་ཏེ་ཟན་འདི་འདྲ་བས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་དུ་རུང་ན་ནི་ཉེ་དགས་ཀྱང་ཉི་མ་རེ་རེ་ཞིང་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་འདྲེན་པར་འགྱུར་རོ། །འདི་ལྟར་བཀྲེན་པ་འདི་ལ་ཅི
7.164a
བདོག་གིས་དེང་ལ་ཁྱིམ་བདག་ཆེ་གེ་མོའི་ཁྱིམ་ནས་འོ་མ་ལོང་ཤིག་།ཆེ་གེ་མོའི་ཁྱིམ་ནས་ཞོ་ལོང་ཤིག་།ཆེ་གེ་མོའི་ཁྱིམ་ནས་མར་ལོང་ཤིག་།ཆེ་གེ་མོའི་ཁྱིམ་ནས་ཉ་ཤ་ལོང་ཤིག་།ཆེ་གེ་མོའི་ཁྱིམ་ནས་ཤ་ལོང་ཤིག་།ཆེ་གེ་མོའི་ཁྱིམ་ནས་ཤ་སྐམ་དག་ལོང་ཤིག་།ཅེས་དེ་དག་གིས་བདག་ཉིད་ཀྱི་ཕྱིར་ཟས་བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བསླངས་ཏེ་དེར་ཟོས་ནས་དོང་སྟེ་གཙུག་ལག་དུ་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཀྱིས་གང་དུ་ཟན་ཟོས་དེ་ཉིད་དུའོ། །ཁྱེད་ཅག་དེ་ན་མ་མཐོང་ངོ ། །དྲུག་སྡེ་དག་གིས་སྨྲས་པ། ཁོ་བོ་ཅག་ཕྱིས་ལྷགས་སོ་ཁྱེད་ཅག་གིས་ཟན་ཇི་ལྟ་བུ་ཟོས། དྲུག་སྡེ་དག་གིས་སྨྲས་པ། འོ་མ་དང་ཞོ་དང ། མར་དང་ཉ་ཤ་དང ། ཤ་དང་ཤ་སྐམ་དག་གོ། །དགེ་སློང་རྣམས་ཀྱིས་སྨྲས་པ། ཁོ་བོ་ཅག་གིས་ཟས་དེ་ལྟ་བུ་མ་ཐོབ་བོ། །དྲུག་སྡེ་དག་གིས་སྨྲས་པ། བཀྲེན་པ་དེ་ལ་ཟས་དེ་ལྟ་བུ་ག་ལ་ཡོད། ཁོ་བོ་ཅག་གིས་ཁྱིམ་དུ་འགྲོ་བའི་ཁྱིམ་དག་ནས་བླངས་ཏེ་དེར་ཟོས་སོ། །ཁྱེད་ཅག་བདག་ཉིད་ཀྱི་ཕྱིར་ཟས་བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བསླང་ཏེ་ཟར་རུང་ངམ། རུང་ཡང་སྲིད་མི་རུང་ཡང་སྲིད་དེ་ཅི་ཁོ་བོ་ཅག་གིས་ལྟོགས་ཏེ་འཆིས་བར་བྱ་འམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བདག་ཉིད་ཀྱི་ཕྱིར་ཟས་བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བསླངས་ཏེ་འཆའ་བ་དང ། ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ངས་དགེ་སློང་རྣམས་ཀྱིས་ཟས་བསོད་པ་གང་དག་གསུང་པ་འདི་ལྟ་སྟེ། འོ་མ་དང ། ཞོ་དང ། མར་དང ། ཉ་ཤ་དང ། ཤ་དང ། ཤ་སྐམ་དག་སྟེ། ཁྱེད་ཀྱིས་བདག་ཉིད་ཀྱི་ཕྱིར་ཟས
7.164b
བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བསླངས་ཏེ་ཟོས་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བཅོམ་ལྡན་འདས་ཀྱིས་དགེ་སློང་རྣམས་ཀྱི་ཟས་བསོད་པ་གང་དག་གསུངས་པ་འདི་ལྟ་སྟེ། འོ་མ་དང ། ཞོ་དང ། མར་དང ། ཉ་ཤ་དང ། ཤ་དང ། ཤ་སྐམ་དག་སྟེ། ཡང་དགེ་སློང་དག་བདག་ཉིད་ཀྱི་ཕྱིར་ཟས་བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བླངས་ཏེ་འཆའ་འམ། ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ན་བ་ཞིག་གིས་སྨན་པ་ལ་དྲིས་པ། བཞིན་བཟངས་ཇེ་ཁོ་བོ་ལ་སྨན་སྟོན་ཅིག་།འཕགས་པ་འོ་མ་གསོལ་ཅིག་།བཞིན་བཟང་ཁོ་བོ་ལ་འོ་མ་སུས་སྦྱིན་པར་གྱུར ། འཕགས་པ་ཁྱིམ་དག་ནས་སློང་ཤིག་།བཞིན་བཟང་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ། །འཕགས་པ་ཁྱོད་ཀྱི་སྟོན་པ་ཐུག་རྗེ་ཅན་ལགས་པས་དེ་ཉིད་རྐྱེན་དུ་མཛད་ནས་གནང་བར་གྱུར་པ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ། །ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ན་བའི་དུས་མ་གཏོགས་སོ། །དེ་བཞིན་དུ་དགེ་སློང་གཞན་ལ་འོ་མ་དང ། ཞོ་དང ། མར་དང ། ཉ་ཤ་དང ། ཤ་དང ། ཤ་སྐམ་དག་ཁྱིམ་དག་ནས་སློང་དུ་གནང་བའི་བར་དུ་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་བསླབས་པ་འདོད་པ་དང ། བསླབ
7.165a
པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང ། དེའི་ཤས་ཆེ་བ་དང ། དེ་དང་འཚམས་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བཅོམ་ལྡན་འདས་ཀྱིས་དགེ་སློང་རྣམས་ཀྱི་ཟས་བསོད་པ་གང་དག་གསུངས་པ་འདི་ལྟ་སྟེ། འོ་མ་དང ། ཞོ་དང ། མར་དང ། ཉ་ཤ་དང ། ཤ་དང ། ཤ་སྐམ་དག་སྟེ། ཡང་དགེ་སློང་གང་མི་ན་བར་བདག་ཉིད་ཀྱི་ཕྱིར་ཟས་བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བསླང་ཏེ་འཆའ་འམ་ཟ་ན་ལྟུང་བྱེད་དོ། །བཅོམ་ལྡན་འདས་ཀྱིས་ཤེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །དགེ་སློང་རྣམས་ཀྱི་ཞེས་བྱ་བ་ནི་ཆོས་འདི་པ་རྣམས་ཀྱིའོ། །ཟས་བསོད་པ་གང་དག་བསོད་པ་ཞེས་བྱ་བ་ནི་རབ་ཏུ་བསྟན་པའོ་འདི་ལྟ་སྟེ། འོ་མ་དང ། ཞོ་དང ། མར་དང ། ཉ་ཤ་དང ། ཤ་དང ། ཤ་སྐམ་དག་སྟེ་ཞེས་བྱ་བ་ནི་ཟས་བསོད་པ་དག་གོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །མི་ན་བར་ཞེས་བྱ་བ་ནི་ན་བ་མ་གཏོགས་པར་རོ། །བདག་ཉིད་ཀྱི་ཕྱིར་ཞེས་བྱ་བ་ནི་བདག་ཉིད་ལ་བསྔོས་ཏེའོ། །ཟས་བསོད་པ་དེ་ལྟ་བུ་དག་ཅེས་བྱ་བ་ནི་འོ་མ་དང ། ཞོ་དང ། མར་དང ། ཉ་ཤ་དང ། ཤ་དང ། ཤ་སྐམ་དག་གོ། །གཞན་གྱི་ཁྱིམ་དག་ནས་ཤེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་དག་ནས་སོ། །བསླངས་ཏེ་ཞེས་བྱ་བ་ནི་གསོལ་ཏེའོ། །འཆའ་འམ་ཟ་ན་ཞེས་བྱ་བ་ནི་མགུལ་ཏུ་མིད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་བསྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན
7.165b
དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་མི་ན་བས་སློང་ཞིང་མི་ན་བས་ཟ་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་མི་ན་བས་སློང་ཞིང་ན་བས་ཟ་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བ་མེད་དོ། །དགེ་སློང་གིས་ན་བས་སློང་ཞིང་མི་ན་བས་ཟ་ན་དེ་སློང་བ་ལ་ལྟུང་བ་མེད་ལ་ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ན་བས་སློང་ཞིང་ན་བས་ཟ་ན་གཉིས་ཀ་ལ་ལྟུང་བ་མེད་དོ། །དགེ་སློང་བསོད་སྙོམས་ལ་རྒྱུ་ཞིང་ཁྱིམ་དག་ཏུ་འགྲོ་བ་ན་བུད་མེད་ཀྱི་ཡུལ་ཟས་ཐོགས་ཏེ་ཕྱིར་འབྱུང་བའི་ཚེ་དགེ་སློང་ཅང་མི་སྨྲ་བར་སྡོད་པ་ན། བུད་མེད་ཀྱི་ཡུལ་ན་རེ་འཕགས་པ་ཅི་བཞེད་ཅེས་འདྲི་ན་བསྟབ་པར་བརྗོད་པར་བྱ་སྟེ། ཇི་འདོད་པ་དེ་བསླང་བར་བྱ་བ་ལ་ལྟུང་བ་མེད་དོ། །སྦྱིན་བདག་གིས་ཅི་བདེར་བྱས་པ་ལ་ལྟུང་བ་མེད་དོ། །ཞོ་སྦྱིན་པ་ན་ཆུར་ཁུ་དང ། དར་བ་སློང་བ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། འཚོར་བ་དག་གིས་ཉེན་པ་ལ་ལྟུང་བ་མེད་དོ། །བསོད་པ་སློང་བའི་ལྟུང་བྱེད་དེ་བཞི་བཅུ་པ་རྫོགས་སྷོ།། ་་་་་།། སྡོམ་ལ། སྲོག་ཆགས་བཅས་དང་ཉལ་སར་འདུག་།འགྲེང་དང་གཅེར་བུ་དམག་དང་ནི། །ཞག་གཉིས་བཤམས་བཀྲུག་འགྲོ་བ་དང ། །རྡེག་དང་གཟས་དང་གནས་ངན་ལེན། ། སངས་རྒྱས་བཅོམ་ལྡན་འདས། ཀཽ་ཤམྦི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འདུན་པ་ཤེས་བཞིན་དུ་སྲོགས་ཆགས་དང་བཅས་པའི་ཆུ་ལ་མ་སྤྱོད་ཅིག་།དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འདུན་པ་ཁྱོད་ཤེས་བཞིན་དུ་སྲོགས་ཆགས་དང་བཅས་པའི་ཆུ་ལ་མ་སྤྱོད་ཅིག་།དེས་སྨྲས་པ། ཁོ་བོ་ལ་འགའ་ཞིགས་གིས་བསྒྲངས་ཏེ་གཏད་དམ་ཅི་ཤར་གྱི་རྒྱ་མཚོ་ཆེན་པོར་ཅིའི་ཕྱིར་མི་འགྲོ། ལྷོ་དང་ནུབ་དང ། བྱང་གི་རྒྱ་མཚོའ་ཆེན་པོར་ཅིའི་ཕྱིར་མི
7.166a
འགྲོ། འབབ་ཆུ་དང ། མཚོའ་དང ། ལྟེང་ཀ་དག་ཏུ་ཅིའི་ཕྱིར་མི་འགྲོ་ཞེས་ཟེར་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འདུན་པ་ལ་སྨྲས་པ། འདུན་པ་ཁྱོད་ཤེས་བཞིན་དུ་སྲོགས་ཆགས་དང་བཅས་པའི་ཆུ་ལ་སྤྱོད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམས་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འདུན་པ་འམ། གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་རྗོད་པས་སོ། །སྲོག་ཆགས་དང་བཅས་པའི་ཞེས་བྱ་བ་ནི་སྲོག་ཆགས་དང་བཅས་པ་ནི་རྣམ་པ་གཉིས་ཏེ། གང་དག་མིག་སྔར་སྣང་བར་གྱུར་པ་དང ། གང་དག་ཆུ་ཚགས་ཀྱིས
7.166b
ཟིན་པར་གྱུར་པའོ། །ཆུ་ལ་སྤྱོད་ན་ཞེས་བྱ་བ་ནི་ཆུའི་སྤྱད་པ་གཉིས་སུ་སྟེ། ནང་གི་དང་ཕྱི་རོལ་གྱིས་སོ། །ནང་གིར་སྤྱད་པ་ནི་ཁྲུས་བྱེད་པ་དང ། འཐུང་བ་དང་སོ་ཤིང་འདོར་བ་དང ། ལག་པ་དང་རྐང་པ་དག་འཁྲུས་པའོ། །ཕྱི་རོལ་གྱིར་སྤྱད་པ་ནི་ལྷུང་བཟེད་འཁྲུ་བ་དང ། ལྷུང་བཟེད་ཆུང་ངུ་འཁྲུ་བ་དང ། ཆོས་གོས་དག་འཁྲུ་བ་དང ། མཚོན་གྱིས་ལས་བྱེད་པ་དང ། གཙུག་ལག་ཁང་དུ་ཆགས་ཆགས་འདེབས་པ་དང ། ཞལ་ཞལ་སྐུད་པ་དང ། ལྕི་བ་གསར་པའི་བྱུག་པས་ཉུང་པའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་བསྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་བསྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་སྤྱོད་ན་ལྟུང་བྱེད་དུ་འགྱུར་རོ། །དགེ་སློང་གིས་སྲོག་ཆགས་དང་བཅས་པའི་ཆུ་ལ་ཡིད་གཉིས་ཟ་བས་སྤྱོད་ན་ལྟུང་བྱེད་དུ་འགྱུར་རོ། །དགེ་སློང་གིས་སྲོག་ཆགས་མེད་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་སྤྱོད་ན་ཉེས་བྱས་སུ་འགྱུར་རོ། །དགེ་སློང་གིས་སྲོགས་ཆགས་མེད་པའི་ཆུ་ལ་ཡིད་གཉིས་ཟ་བས་སྤྱོད་ན་ཉེས་བྱས་སུ་འགྱུར་རོ། །དགེ་སློང་གིས་སྲོགས་ཆགས་དང་བཅས་པའི་ཞུན་མར་དང ། འབྲུ་མར་དང ། སྦྲང་རྩི་དང ། བུ་རམ་གྱི་དབུ་བ་དང ། འོ་མ་དང ། ཞོ་དང ། མར་ཟ་ན་ལྟུང་བྱེད་དུ་འགྱུར་རོ། །དགེ་སློང་གིས་སྲོགས་ཆགས་དང་བཅས་པའི་ཚཝ་དང ། འབྲུའི་ཚཝ་དང ། ཞོ་ག་ཆུ་དང ། རྩབ་མོ་འཐུང་ན་ལྟུང་བྱེད་དུ་འགྱུར་རོ། །དགེ་སློང་གིས་སྲོགས་ཆགས་དང་བཅས་པའི་ཤིང
7.167a
ཐོག་ད་འཆའ་ན་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་དེ་བཞི་བཅུ་རྩ་གཅིག་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་གྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འཆར་ཀ་བསམས་པའི་ནོར་བུའི་རིགས་པ་ཤེས་ཏེ། སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་བསྙོམས་ལ་ཞུགས་སོ། །མཉན་ཡོད་ན་སྤོས་འཚོང་གི་ཁྱེའུ་ཆུང་མ་བླངས་ནས་རིང་པོ་མ་ལོན་པ་ཞིག་འདུག་པ་དེས་ཟོང་བཀྲམ་པ་ན་བདག་ཆུང་མ་དང་ལྷན་ཅིག་དགའ་འགུར་སྤྱོད་དུ་འགྲོའོ་སྙམ་པའི་ཚུལ་བཞིན་མ་ཡིན་པ་ཡིད་ལ་བྱེད་པ་སྐྱེས་ནས་དེས་ཟོང་ཕྱིར་བསྡུ་བར་བརྩམ་པ་དང ། ཚེ་དང་ལྡན་པ་འཆར་ཀས་དེ་མཐོང་ནས་བསམ་པ་དེ་ལྟར་ཚོང་པ་གཞན་དག་ཟོང་འགྲེམས་པར་བྱེད་ན་སྤོས་འཚོང་གི་ཁྱེའུ་འདི་ཟོང་སྡུད་པར་བྱེད་པ་ཅིའི་ཕྱིར་སྙམས་ནས་དེས་ཡང་བསམ་པ་དང ། འདི་ཆུང་མ་བླངས་ནས་རིང་པོ་མ་ལོན་པས་འདི་ཆུང་མ་དང་ལྷན་ཅིག་དགའ་མགུར་སྤྱོད་པར་འདོད་དོ་སྙམ་དུ་ཤེས་ནས་དེར་བདག་སོང་ལ་རེ་བ་མེད་པར་བྱའོ་སྙམས་ནས་དེ་དང་པོར་དེ་ཡི་ཁྱིམ་དུ་སོང་ཏེ་སྟན་ལ་འདུག་ནས་འདི་སྐད་ཅེས་སྨྲས་སོ། །བུ་མོ་ཚུར་ཤོག་འདུག་ཤིག་དང་ཆོས་བསྟན་པར་བྱའོ། །བུ་མོ་དེས་དེའི་རྐང་པ་ལ་ཕྱག་འཚལ་ཏེ་མདུན་དུ་ཆོས་མཉན་པའི་ཕྱིར་འདུག་པ་དང ། དེས་དེ་ལ་ཆོས་བསྟན་པར་བཙམས་སོ། །ཇི་ཙམ་ན་སྤོས་འཚོང་གི་ཁྱེའུ་དེ་འོངས་ནས་དེས་ཆུང་མ་ལ་སྨྲས་པ། འཕགས་པ་འཆར་ཀ་ལ་བསོད་སྙོམས་ཕུལ་ལ་བཞུད་དུ་གསོལ་ཅིག་།ཚེ་དང་ལྡན་པ་འཆར་ཀས་སྨྲས་པ། བཞིན་བཟང་ཁོ་བོས་བདག་ཉིད་ཀྱི་དགེ་བའི་ཕྱོགས་ཡོངས་སུ་ཉམས་པར་བྱས་སྟེ་འོངས་ནས་ཆོས་སྟོན་པར་བྱེད་ཁྱོད་ཆོས་ཉན་མི་འདོད་དམ་འདུག་ལ་ཆོས་ཉོན་ཅིག་ཅེས་དེས་དེ་ནན་གྱིས་འདུག་ཏུ་བཅུག་སྟེ། དེས་ཇི་ཙམ་གྱིས་དེའི་ཀུན་ནས་དཀྲིས་པ་དང་བྲལ་བ་དེ་ཙམ་དུ་ཆོས་བསྟན་པ་དང །
7.167b
དེ་ཤཱཀྱའི་བུའི་དགེ་སྦྱོང་རྣམས་ཀྱིས་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་རང་གི་ཆུང་མ་ལ་ཡང་དབང་མེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ་སྟན་ལ་འདུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ་སྟན་ལ་འདུག་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབས་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ་སྟན་ལ་འདུག་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་བརྗོད་པས་སོ། །ཉལ་པོ་བྱེད་པར་ཤོམ་པའི་ཞེས
7.168a
བྱ་བ་ནི་བུད་མེད་ནི་སྐྱེས་པའི་ཉལ་པོ་བྱ་བ་ཡིན་ལ་སྐྱེས་པ་ནི་བུད་མེད་ཀྱི་ཉལ་པོ་བྱ་བ་ཡིན་ནོ། །ཁྱིམ་དུ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་དུའོ། །ཕྱིས་གནོན་བྱས་ཏེ་ཞེས་བྱ་བ་ནི་ཕྱིས་ཞུགས་ཏེའོ། །སྟན་ལ་ཞེས་བྱ་བ་ནི་གཞི་ལའོ། །འདུག་ན་ཞེས་བྱ་བ་ནི་འདོམ་གང་གི་ནང་དུ་རྐུབ་ཙོས་བཞག་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང་ལོགས་པར་ལྟུང་བ་དག་ཏུ་སྲེག་པར་བྱེད་འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ་སྟན་ལ་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཉལ་པོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་དེ་བཞི་བཅུ་རྩ་གཉིས་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱིས་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འཆར་ཀ་བསམ་པའི་ནོར་བུའི་རིགས་པ་ཤེས་ཏེ། དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོག་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །མཉན་ཡོད་ན་སྤོས་འཚོངས་གི་ཁྱེའུ་ཆུང་མ་བླངས་ནས་རིངས་པོ་མ་ལོན་པ་ཞིག་འདུག་པ་དེས་ཟོང་བཀྲམ་པ་ན་བདག་ཆུང་མ་དང་ལྷན་ཅིག་དགའ་མགུར་སྤྱོད་དུ་འགྲོའོ་སྙམས་པའི་ཚུལ་བཞིན་མ་ཡིན་པ་ཡིད་ལ་བྱེད་པ་སྐྱེས་ནས་དེས་ཟོང་ཕྱིར་བསྡུས་པར་བརྩམ་པ་དང ། ཚེ་དང་ལྡན་པ་འཆར་ཀས་དེ་མཐོང་ནས་བསམ་པ། ད་ལྟར་འཚོང་པ་གཞན་དག་ཟོང་འགྲེམས་པར་བྱེད་ན་སྤོས་འཚོང་གི་ཁྱེའུ་འདི་ཟོང་སྡུད་པར་བྱེད་པ་ཅིའི་ཕྱིར་སྙམས་ནས་དེས་ཡང་བསམས་པ་དང ། འདི་ཆུང་མ་བླངས་ནས་རིང་པོ་མ་ལོན་པ
7.168b
འདི་ཆུང་མ་དང་ལྷན་ཅིག་དགའ་མགུར་སྤྱོད་པར་འདོད་དོ། །སྙམས་དུ་ཤེས་ནས་དེ་བདག་སོང་ལ་བལྟའོ་སྙམ་ནས་དེ་དང་པོར་དེའི་ཁྱིམ་དུ་སོང་སྟེ། སྒོ་གླེགས་ཀྱི་རྒྱབ་ན་མགོ་སྲིང་ཞིང་འགྲེང་ངོ ། །དེའི་འོག་ཏུ་སྤོས་འཚོང་གིས་ཁྱེའུ་དེ་འོངས་ནས་དེས་འཆུང་མ་ཁྲིད་དེ་གནས་ཁང་དུ་ཞུགས་པ་དང ། བུ་མོ་དེས་འཆར་ཀ་དབེན་པ་ན་འགྲེང་བ་མཐོང་ནས་དེས་ཁྱོ་ལ་སྨྲས་པ། རྗེའི་སྲས་འཕགས་པ་འཆར་ཀ་སྒོ་གླེགས་ཀྱི་རྒྱབ་ན་འགྲེང་ངོ ། །སྤོས་འཚོང་གི་ཁྱེའུ་སྨྲས་པ། འཕགས་པ་འཆར་ཀ་གཙུག་ལག་ཁང་ན་བསམས་གཏན་དང་རྣམ་པར་འཐར་པ་དང ། ཏིང་ངེ་འཛིན་ལ་སྙོམས་པར་འཇུགས་པའི་བདེ་བ་དག་ཉམས་སུ་མྱོང་ཞིང་འགྲེང་ངོ་ཞེས་དེས་ཆུང་མ་ལ་དགའ་མགུར་སྤྱད་ནས་གང་གི་ཚེ་དེའི་ཀུན་ནས་བཀྲིས་པ་དང་བྲལ་བར་གྱུར་པ་དེའི་ཚེ་ན་དེས་འཆར་ཀ་མཐོང་བ་དང ། དེ་ཤཱཀྱ་བུའི་དགེ་སྦྱོང་རྣམས་ཀྱིས་དགེ་སྦྱོང་གི་ཚུལ་ནི་ཚིགས་གོ་བྲམ་ཟེའི་ཚུལ་ནི་ཚིགས་སྟེ། འདི་ལྟར་རང་གིས་ཆུང་མ་ལ་དབང་མེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་ཉལ་པོ་བྱེད་པར་ཤོམས་པས་ཁྱིམ་དུ་དབེན་པ་སྐྱབ་ཡོད་པར་འགྲེང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་བསྐྱབས་ཡོད་པར་འགྲེང་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ
7.169a
མ་ཡིན་པ་རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བའི་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱིས་བསླབས་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་བསྐྱབས་ཡོད་པར་འགྲེང་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ་ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་བརྗོད་པས་སོ། །ཉལ་པོ་བྱེད་པར་ཤོམ་པའི་ཞེས་བྱ་བ་ནི་བུད་མེད་ནི་སྐྱེས་པའི་ཉལ་པོ་བྱ་བ་ཡིན་ལ་སྐྱེས་པ་ནི་བུད་མེད་ཀྱིས་ཉལ་པོ་བྱ་བ་ཡིན་ནོ། །ཁྱིམ་དུ་ཞེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་དུའོ། །དབེན་པ་ཞེས་བྱ་བ་ནི་གང་ན་བུད་མེད་དང་སྐྱེས་པ་དང ། མ་ནིང་གཞན་འགའ་ཡང་མེད་པའོ། །སྐྱབས་ཡོད་པར་ཞེས་བྱ་བ་ནི་ལྔས་བསྐྱབས་པར་ཏེ་རྩིགས་པས་བསྐྱབས་པ་དང ། རིབ་མས་བསྐྱབས་པ་དང ། ཡོལ་བས་བསྐྱབས་པ་དང ། ཐིབས་པོས་བསྐྱབས་པ་དང ། མཚན་མོས་བསྐྱབས་པར་རོ། །འགྲེང་ན་ཞེས་བྱ་བ་ནི་འདོམ་གང་དུ་འགྲེང་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོགས་པར་ལྟ་བ་དག་ཏུ་བསྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་བསྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབ
7.169b
ཡོད་པར་འགྲེང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། འཚོར་བ་དག་གིས་ཉེན་པ་ལ་ལྟུང་བ་མེད་དོ། །ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་དེ་བཞི་བཅུ་རྩ་གསུམ་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཏེ། དེ་ནས་རྒྱལ་པོའི་ཁབ་པའི་ཚོང་པ་རབ་ཏུ་མང་པོ་དག་བཅོམ་ལྡན་འདས་ག་ལ་བ་དེར་དོང་ཏེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་རྒྱལ་པོའི་ཁབ་པའི་ཚོང་པ་རབ་ཏུ་མང་པོ་དག་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་རྒྱལ་པོའི་ཁབ་པའི་ཚོང་པ་རབ་ཏུ་མང་པོ་དག་གིས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས། བཅོམ་ལྡན་འདས་ཀྱི་ཞབས་གཉིས་ལ་མགོའ་བོས་ཕྱག་འཚལ་ཏེ། ་བཅོམ་ལྡན་འདས་ཀྱི་སྤྱན་སྔ་ནས་དོང་ནས་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་ཏེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཚེ་དང་ལྡན་པ་ཀུན་དགའ་བོ་རྒྱལ་པོའི་ཁབ་པའི་འཚོང་པ་རབ་ཏུ་མང་པོ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ
7.170a
གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་རྒྱལ་པོའི་ཁབ་པའི་ཚོངས་པ་རབ་ཏུ་མང་པོ་དག་སྟན་ལས་ལངས་ཏེ་བླ་གོས་ཕྲགས་པ་གཅིག་ཏུ་བྱས་ནས་ཚེ་དང་ལྡན་པ་ཀུན་དགའ་བོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་གང་དུ་གཤེགས་པར་འགྱུར། ཤེས་ལྡན་དག་སངས་རྒྱས་བཅོམ་ལྡན་འདས་ལ་ཞུས་ཤིག་།བཙུན་པ་ཀུན་དགའ་བོ་སངས་རྒྱས་བཅོམ་ལྡན་འདས་ནི་བསྙེན་པར་དཀའ་བ་དང ། བཟོད་པར་དཀའ་བ་ལགས་པས་བདག་ཅག་གིས་སངས་རྒྱས་བཅོམ་ལྡན་འདས་ལ་ཞུ་བའི་རྔོ་མི་ཐོག་གོ། །ཤེས་ལྡན་དག་ཁོ་བོ་ལ་ཡང་སངས་རྒྱས་བཅོམ་ལྡན་འདས་ལ་སྙེན་པར་བཀའ་བ་དང ། བཟོད་པར་བཀའ་བ་ཉིད་ཡིན་པས་ཁོ་བོ་སངས་རྒྱས་བཅོམ་ལྡན་འདས་ལ་ཞུ་བར་མི་ནུས་སོ། །བཙུན་པ་ཀུན་དགའ་བོ་གལ་ཏེ་བཙུན་པ་ཀུན་དགའ་བོ་ལ་ཡང་སངས་རྒྱས་བཅོམ་ལྡན་འདས་བསྙེན་པར་དཀའ་བ་དང ། བཟོད་པར་དཀའ་བ་ལགས་པས་བཙུན་པ་ཀུན་དགའ་བོས་ཀྱང་སངས་རྒྱས་བཅོམ་ལྡན་འདས་ལ་ཞུས་པར་མི་སྤྱོད་ན། བཙུན་པ་ཀུན་དགའ་བོས་མཚན་མ་འམ། བཀའ་མཆིད་ཀྱིས་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་ཕྱོགས་ག་གེ་མོར་གཤེགས་པར་འགྱུར་བར་ཇི་ལྟར་མཁྱེན། མཚན་མས་ནི་ཇི་ལྟར་མཁྱེན་བཀའ་མཆིད་ཀྱིས་ནི་ཇི་ལྟར་མཁྱེན། ཤེས་ལྡན་དག་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་ཕྱོགས་གང་དུ་གཤེགས་པར་བཞེད་པའི་ཕྱོགས་དེ་ལོགས་སུ་བཅོམ་ལྡན་འདས་ཞལ་གཟིགས་ཤིང་བཞུགས་ལ་དེ་དག་གི་བསྔགས་པ་ཡང་བརྗོད་པར་མཛད་དོ། །བཙུན་པ་ཀུན་དགའ་བོས་བཅོམ་ལྡན་འདས་ཞལ་གཟིགས་ཤིང་བཞུགས། མི་གང་དག
7.170b
གི་བསྔགས་པ་ཡང་རྗོད་པར་མཛད། ཤེས་ལྡན་དག་བཅོམ་ལྡན་འདས་ཀོ་ས་ལར་ཞལ་གཟིགས་ཤིང་བཞུགས་ལ། མཉན་ཡོད་པའི་མི་དག་གི་བསྔགས་པ་ཡང་བརྗོད་པར་མཛད་དོ། །དེ་དག་གིས་ཚེ་དང་ལྡན་པ་ཀུན་དགའ་བོས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་དོང་ནས་དེ་དག་གིས་བསམ་པ། བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་མཉན་ཡོད་དུ་གཤེགས་པར་འགྱུར་རོ། །སྙམས་ནས་དེ་དག་གིས་མཉན་ཡོད་དུ་འདོང་བའི་ཟོང་སྟ་གོན་བྱས་སོ། །དེ་ནས་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ཏེ་དབྱར་གྱི་ཟླ་བ་གསུམ་པོ་དག་འདས་ནས། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་།དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང ། དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས། བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་།དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང ། དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོའོ། །རྒྱལ་པོའི་ཁབ་པའི་འཚོང་པ་དག་གིས་ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་ཚེ་དང་ལྡན་པ་དག་།དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང ། དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི
7.171a
ལས་གྱིས་ཤིག་ཅེས་བསྒོ་བ་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་རྒྱལ་པོའི་ཁབ་པའི་འཚོངས་པ་རབ་ཏུ་མང་པོ་དག་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་རྒྱལ་པོའི་ཁབ་པའི་ཚོངས་པ་རབ་ཏུ་མང་པོ་དག་སྟན་ལས་ལངས་ཏེ། བླ་གོས་ཕྲགས་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་རྒྱལ་པོའི་ཁབ་ནས་མཉན་ཡོད་ཀྱི་བར་ཇི་ཙམ་བར་བདག་ཅག་ལས་ན་བཟའ་དང་བསོད་སྙོམས་དང ། གནས་མལ་དང ། སྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། བཅོམ་ལྡན་འདས་ཀྱིས་རྒྱལ་པོའི་ཁབ་པའི་ཚོང་པ་རབ་ཏུ་མང་པོ་དག་ལ་ཅང་མི་གསུང་བས་གནང་ངོ ། །དེ་ནས་རྒྱལ་པོའི་ཁབ་པའི་འཚོངས་པ་རབ་ཏུ་མང་པོ་དག་གིས། བཅོམ་ལྡན་འདས་ཀྱིས་ཅང་མི་གསུངས་པས་གནང་བར་རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེ་ནས་རྒྱལ་པོའི་ཁབ་པའི་ཚོང་པ་རབ་ཏུ་མང་པོ་དག་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས
7.171b
ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་རྒྱལ་པོའི་ཁབ་པའི་ཚོང་པ་རབ་ཏུ་མང་པོ་དག་གིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བཅོམ་ལྡན་འདས་ཤུལ་དག་ཏུ་ཇི་ཙམ་དུ་གཤེགས། ཤེས་ལྡན་དག་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ཙམ་དུའོ། །བཙུན་པ་ཀུན་དགའ་བོ་འཁོར་ལོས་སྒྱུར་བའི་རྒྱལ་པོ་ཇི་ཙམ་དུ་མཆིས། ཤེས་ལྡན་དག་འཁོར་ལོ་སྒྱུར་བའི་རྒྱལ་པོ་ནི་ལམ་དག་ཏུ་རྒྱང་དྲག་བཅུར་འགྲོའོ། །དེ་དག་གིས་རྒྱང་གྲགས་བཅུ་བཅུར་བཅོམ་ལྡན་འདས་དགེ་སློང་གི་དགེ་འདུན་དང་བཅས་པའི་ཚོག་དག་བཤམས་ཤིང་དེ་དག་གིས་ཞལ་ཟས་གྲངས་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོད་བག་གང་དག་ཡིན་པ་དེ་དག་ནི་ཉི་མ་རེ་རེ་ཞིང་སྟ་གོན་བྱེད་དོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ་ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ་ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླངས་པོ་ཆེའི་ཕྲུག་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ།
7.172a
ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་བསྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མི་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་ཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་དུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ་སྤྲིན་ལྟར་ཆུ་དང་བཅས་པ་གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེའ་བྱད་བཟངས་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷགས་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། ཀུན་ཤེས་ཀཽཎྜི་ནྱ་དང ། རྟ་ཐུལ་དང ། བཟངས་ལྡན་དང ། རླངས་པ་དང ། མིང་ཆེན་དང ། གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟངས་ལ་སོགས་པ་ཉན་ཐོས་ཆེན་པོ་དེ་དག་དང ། གཞན་ཡང་དགེ་སློང་གི་དགེ་འདུན་རབ་ཏུ་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ་མཉན་ཡོད་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་སོ། །
7.172b
དོན་འཐུན་དེ་དང་ཤེས་པ་ཅན་ཞིག་ལྷན་གཅིག་འགྲོ་བ་དེ་འཕོང་པའི་དུས་ལ་བབ་ཅིང་བཀྲེས་པས་ཉམ་ཐག་པར་གྱུར་ནས། དེས་བསམས་པ། བདག་གང་གིས་བཀྲེས་པས་ཉམ་ཐགས་པར་མི་འགྱུར་བའི་ཐབས་ཅི་ཡོད་སྙམས་ནས་དེས་ཡང་བསམས་པ། ཤཱཀྱའི་བུའི་དགེ་སྦྱོང་རྣམས་ལ་སྐྱབས་བཙལ་ན་དེས་བདག་བདེ་བར་ལམ་དུ་འགྲོ་བར་འགྱུར་རོ། །སྙམ་དུ་རིག་ནས་དེ་དགེ་སློང་རྣམས་ཀྱི་གན་དུ་སོང་སྟེ་སྨྲས་པ། ཁྱེད་ཅག་གི་སྟོན་པ་ནི་བཟང་པོ་ལ་མོས་པ་ཡིན་སྟེ། དེ་གསེར་གྱི་གཤོལ་གྱིས་ཞིང་རྨོ་བས་དེས་ཁྱེད་ཅག་ལ་ཟས་རོ་བརྒྱ་པ་དང ། གོས་འབུམ་རི་བ་དང ། ཁང་པ་བརྩེགས་པ་ལྔ་བརྒྱ་པ་ཡང་རྗེས་སུ་གནང་བས་ཁྱེད་ཅག་ནི་རེ་ཤིག་ཚེ་འདི་ཉིད་ལ་ཡང་བདེ་བ་ལ་རེག་པར་གནས་ལ་འདི་ནས་ཤི་འཕོས་པ་རྣམས་ཀྱང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཁོ་བོ་ཅག་གི་སྟོན་པ་ནི་ངན་པ་ལ་མོས་པ་ཡིན་ཏེ། དེ་ཏིལ་གྱི་ཚིགས་མའི་གཤོལ་གྱིས་ཞིང་རྨོ་བས་དེས་ཁོ་བོ་ཅག་ལ་གཅེར་བུ་དང ། སྒྲེ་བྱི་དང་སྦྲང་ཟན་དང ། ཡུལ་རྒྱུ་བ་དང ། ས་ལ་ཉལ་བ་ལས་གཞན་རྗེས་སུ་མ་གནང་བས་ཁོ་བོ་ཅག་ནི་རེ་ཤིག་ཚེ་འདི་ཉིད་ལ་ཡང་བསྡུག་བསྔལ་ལ་རེག་པར་གནས་ཤིང་འདི་ནས་ཤི་འཕོས་པ་རྣམས་ཀྱང ། སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དགེ་སློང་རྣམས་ཀྱིས་བསམས་པ། ཤེས་པ་ཅན་འདི་དད་པར་གྱུར་ཏོ་སྙམས་ནས་དེ་དག་གིས་དེ་ལ་སྨྲས་པ། ཤེས་པ་ཅན་ཇི་ལྟར་འཚོལ། དཀའ་བས་སོ། །དགེ་སློང་རྣམས་ཀྱི་ལྷུང་བཟེད་ཀྱི་ལྷགས་མ་འདོད་དམ། ཤེས་པ་ཅན་དེས་བསམས་པ། གལ་ཏེ་དགེ་སློང་རྣམས་ཀྱི་ལྷུང་བཟེད་ཀྱི་ལྷག་མ་མ་ཟོས་ན་ལྟོགས་ཏེ་མཆིས་པར་འགྱུར་རོ་སྙམས་ནས་དེས་སྨྲས་པ་འཚལ་ལོ། །དགེ་སློང་རྣམས་ཀྱིས་སྨྲས་པ། ཤེས་པ་ཅན་དགེ་སློང་རྣམས་ཟན་ཟ་བའི་མིག་ལམ་དུ་འདུག་ཤིག་དང ། དགེ་སློང་རྣམས་ཁྱོད་ལ་ལྷུང་བཟེད་ཀྱི་ལྷག་མ་སྦྱིན་པར་འགྱུར་རོ། །ཤེས་པ་ཅན་དེ་དགེ་སློང་རྣམས་ཟན་ཟ་བའི
7.173a
མིག་ལམ་དུ་འདུག་པ་དང ། དགེ་སློང་རྣམས་ཀྱིས་དེ་ལ་ལྷུང་བཟེད་ཀྱི་ལྷག་མ་བྱིན་ནས་དེའི་སློང་ཕོར་ཁུར་བས་བྱུར་བུར་བྱས་སོ། །དེ་སློང་ཕོར་ཁུར་བས་བྱུར་བུར་བྱས་པ་ཐོགས་ཏེ་ཕྱིར་བྱུང་བ་དེད་དཔོན་གྱིས་མཐོང་ནས་དེས་སྨྲས་པ། ཤེས་པ་ཅན་ཁྱོད་ལ་ཁུར་བ་སུས་བྱིན་དེས་སྨྲས་པ། ཁྱོད་ཀྱི་ཡོན་གནས་ནི་དགེ་སློང་དེ་དག་ཡིན་ལ་དེ་དག་གི་ཡོན་གནས་ནི་ཁོ་བོ་ཡིན་པས་ཁོ་བོ་ལ་དེ་དག་གིས་ཕུལ་ལོ། །དེད་དཔོན་གྱིས་སྨྲས་པ། ཤེས་པ་ཅན་དགེ་སློང་རྣམས་ཀྱིས་ཁྱོད་ལ་སྙིང་རྗེ་བས་བྱིན་ན་ཁྱོད་དེ་སྐད་ཅེས་དེ་དག་གི་ཡོན་གནས་ཁོ་བོ་ཡིན་ནོ་ཞེས་ཟེར་རམ། གལ་ཏེ་བཅོམ་ལྡན་འདས་ཀྱིས་གསན་པར་གྱུར་ན། བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་མཛད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །དེས་སྨྲས་པ་དེད་དཔོན་མད་ཀྱང་བཞད་གད་བགྱིས་སོ། །ལམ་དེ་ནས་དོན་འཐུན་ཚུར་འོང་བ་དག་ཅིག་ལྷགས་ནས་དོན་འཐུན་དེ་དང་ལྷན་ཅིག་ཤེས་པ་ཅན་ཞིག་འོང་བ་དེས་དེ་མཐོང་ནས་སྨྲས་པ། ཤེས་པ་ཅན་ཉོད་པ་ཉོད་དམ་དེས་སྨྲས་པ། ཉོད་དོ་གང་ནས་དེས་སྨྲས་པ། ཁྱིམ་བདག་སྒྲེ་བྱི་འདི་དག་ཁོ་བོ་ལ་མཁོའ་བ་སྟོབས་པར་བྱེད་དོ། །དེས་སྨྲས་པ་ཤེས་པ་ཅན་ཁྱོད་ནི་བྱས་པ་མི་ཤེས་པ་ཡིན་ཏེ། འདི་དག་ཁྱོད་ཀྱི་ཁྱིམ་བདག་སྒྲེ་བྱི་དག་ཡིན་ནམ། འདི་དག་ལས་ནི་ལྔ་བརྒྱ་པའི་ཚོགས་དག་ཡོངས་སུ་མྱ་ངན་ལས་འདའ་བར་སྣང་གིས། ཁྱོད་ཀྱིས་ཤེས་པ་ཅན་ནི་གཅིག་འགའ་ཡང་ཡོངས་སུ་མྱ་ངན་ལས་འདའ་བར་མཐོང་ངམ་ཞེས་དེས་ཚིགས་སུ་བཅད་པ་དག་སྨྲས་པ། ངན་པ་ཅི་ཕྱིར་ས་ལ་འབྱིང་མི་བྱེད། །ཅི་ཕྱིར་ལྕེ་ཡང་ཚལ་པ་བརྒྱར་མི་འགས། །ཁྱོད་ཀྱི་ལུས་ལ་ཅི་ཕྱིར་གསང་བ་དག་།རྡོ་རྗེའི་སེར་བ་མདུང་ཐུང་མདའ་མི་འཕེན། །ཇི་ལྟར་སེང་གེའི་ལྷག་མ་ཟ་བའི་ཝ། །སེང་གེ་ཉིད་ལ་གསོད་པར་འདོད་པ་ལྟར། །དེ་བཞིན་ཁྱོད་ཀྱང་སྟོབས་བཅུའི་ཁྱོས་ཟ་ཞིང ། །སྟོབས་བཅུ་ཉིད་ལ་སྨོད་བྱེད་མ་འཕགས་པ། །གང་དུ་གང་ལ
7.173b
ཉེ་བར་བརྟེན་བྱས་ན། །མི་ངན་འདི་འདྲས་འཚོ་བ་འཐོབ་པ་ལས། །དེ་ནས་ངེས་པར་མཛའ་བཤེས་དགྲ་རྣམས་ལ། །མཉམ་མཛད་བློ་ལྡན་ཐམས་ཅད་མཁྱེན་པ་ཡིན། །མི་རྣམས་གང་དག་བྱས་པ་མི་ཤེས་པ། །དེ་དག་ཁྱི་བས་ཤིན་དུ་ངན་པར་བསམ། །ཁྱི་ཡང་མི་ལ་བྱས་པ་ཤེས་སྣང་ན། །སྦྲུལ་འདྲའི་མི་དག་དུག་ནི་གཏོང་བར་བྱེད། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབས་པའི་གཞི་འཆའ་བར་ནི་མི་མཛད་དོ། །དེ་ནས་བཅོམ་ལྡན་འདས་ཀོ་ས་ལ་དག་དུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ཏོ། །མཉན་ཡོད་ན་སྐྱེད་མོས་ཚལ་ཞིག་ན་ཡུགས་ས་མོ་ལྔ་བརྒྱ་ཙམ་དོག་པ་མཁལ་ཞིང་འཁོད་པ་དེ་དག་གིས། སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་གཟུགས་ཅན་བརྒྱན་ཅིང་གསལ་བ། གཟུགས་ཅན་ལྟ་བུ་ཆོས་དང་ལྡན་པ། གསེར་ཕྱེས་བཏབ་པའི་མི་ལྟ་བུ། གསེར་གྱི་སྣོད་ན་འདུག་པའི་མར་མེ་ལྟ་བུ། གསེར་གྱི་རི་བོ་འགྲོ་བ་ལྟ་བུ། རིན་པོ་ཆེ་སྣ་ཚོགས་ཀྱིས་སྤྲས་པའི་གསེར་གྱི་མཆོད་རྟེན་ལྟ་བུ། གྲགས་པ་དང ། གསལ་བ་དང ། མི་བསྙེངས་པ་དང ། དྲི་མ་མེད་པ་དང ། རྣམ་པར་དག་པའི་བློ་དང་ལྡན་པ་མཐོང་ངོ ། །མཐོང་ནས་ཀྱང་འདི་ལྟ་སྟེ། དགེ་བའི་རྩ་བ་བསགས་པའི་རྒྱུ་ལས་བྱུང་བའི་སེམས་ཅན་གྱིས་དང་པོར་སངས་རྒྱས་མཐོང་བ་ན་སེམས་ཉམས་བདེ་བ་སྐྱེད་པར་བྱེད་པ་དེ་ལྟར་ནི་ལོ་བཅུ་གཉིས་སུ་ཞི་གནས་ཀྱིས་སེམས་གོམ་པར་བྱས་པ་དང ། དབུལ་པོས་གཏེར་མཐོང་བ་དང ། བུ་མེད་པས་བུ་ཐོབ་པ་དང ། རྒྱལ་སྲིད་ལ་མངོན་པར་དགའ་བ་རྒྱལ་སྲིད་ལ་དབང་བསྐུར་བ་ཡང་སེམས་ཉམས་བདེ་བ་བསྐྱེད་པར་མི་བྱེད་པས་དེ་དག་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ཀྱིས་དེ་དག་གི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཐུགས་སུ་ཆུད་ནས
7.174a
ཅི་ནས་ཀྱང་དེ་དག་གིས་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོའ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེ་དག་གིས་བདེན་པ་དག་མཐོང་ནས་གསོལ་པ། བཙུན་པ་བཅོམ་ལྡན་འདས་ཀྱིས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོའ་ནི་བསྐམས། རུས་པའི་རི་བོ་དག་ལས་ནི་བསྒྲལ། ངན་སོང་གིས་སྒོ་དག་ནི་བཀུམ། མཐོའ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོགས་མ་མ་མཆིས་པའི་དུས་ནས་བསགས་པའི་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིས། བདག་ཅག་དགེ་སྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་སྐྱབས་སུ་མཆིའོ། །དེ་དག་གིས་བསམས་པ། གལ་ཏེ་བཅོམ་ལྡན་འདས་མཉན་ཡོད་དུ་གཤེགས་པར་གྱུར་ན་དེར་བདག་ཅག་གིས་སྐབས་ཀྱང་མི་རྙེད་ཀྱིས་བདག་ཅག་གིས་འདི་ཉིད་དུ་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་སང་གདུགས་ཚོད་ལ་སྤྱན་དྲང་ངོ་སྙམ་ནས་དེ་ནས་རིགས་ཀྱི་བུ་མོ་དེ་དག་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས
7.174b
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་དགེ་སློང་གི་དགེ་འདུན་དང་ཐབས་གཅིག་ཏུ་བདག་ཅག་གི་གདུགས་འཚོད་གསོལ་བར་ཅི་གནང ། བཅོམ་ལྡན་འདས་ཀྱིས་རིགས་ཀྱི་བུ་མོ་དེ་དག་ལ་ཅང་མི་གསུང་བས་གནང་ངོ ། །དེ་ནས་རིགས་ཀྱི་བུ་མོ་དེ་དག་གིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་དོང་ནས་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་རིགས་ཀྱི་བུ་མོ་དེ་དག་གིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བདག་ཅག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་གདུགས་ཚོད་ལ་སྤྱན་དྲང་ན་བཙུན་པ་ཀུན་དགའ་བོ་ཀཱར་ཥཱ་པ་ཎ་ཇི་ཙམ་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་གདུགས་ཚོད་འཚལ་བར་འགྱུར། ཚེ་དང་ལྡན་པ་ཀུན་དགའ་བོས་སྨྲས་པ། ཀཱར་ཥཱ་པ་ཎ་ལྔ་བརྒྱས་སོ། །དེ་དག་གིས་ཀཱར་ཥཱ་པ་ཎ་རེ་རེ་བསྡུས་ཏེ་སྨྲས་པ། བཙུན་པ་ཀུན་དགའ་བོས་བདག་ཅག་ལ་སྣོད་སྤྱད་དང་མི་བླས་དང ། གནས་མལ་གྱིས་འབྱོར་པ་མ་མཆིས་ན་ཁྱོད་ཀྱིས་ཞལ་ཟས་སྟ་གོན་མཛོད་གཅིག་དང་བདག་ཅག་མཆིས་ཏེ་བྲིམ་པར་བགྱིའོ། །ཀཱར་ཥཱ་པ་ཎ་དག་ཞོག་ཤིག་།དེ་དག་གིས་ཀཱར་ཥཱ་པ་ཎ་དག་མཐའ་གཅིག་ཏུ་བཞག་སྟེ་དོང་ངོ་།། ་་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་ལྔ་པ། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་ཕྱིན་ཅེས་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ
7.175a
བདག་མགོན་མེད་ཟས་སྦྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཁྱིམ་བདག་མགོན་མེད་ཟས་སྦྱིན་སྟན་ལས་ལངས་ཏེ། བླ་གོས་ཕྲགས་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་བསྡུམ་པར་དགེ་སློང་གི་དགེ་འདུན་དང་ཐབས་གཅིག་གདུགས་ཚོད་གསོལ་བར་ཅི་གནང ། ཁྱིམ་བདག་ང་དེའི་དང་པོར་ཁྱིམ་བདག་མོ་ལྔ་བརྒྱས་སྤྱན་དྲངས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་སྟེ། ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་ནས་ཕྱིན་པ་དང ། ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེས་ཀཱར་ཥཱ་པ་ཎ་དེ་དག་མཐོང་ནས་སྨྲས་པ། བཙུན་པ་ཀུན་དགའ་བོ་ཀཱར་ཥཱ་པ་ཎ་འདི་དག་སུའི་ལགས། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མོ་ལྔ་བརྒྱ་ཙམ་གྱི་བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དེ་དག་གིས་ཀཱར་ཥཱ་པ་ཎ་འདི་དག་བཞག་གིས་ཁྱོད་ཀྱིས་འདི་དག་དང་བདག་ཉིད་ཀྱི་ཀཱར་ཥཱ་པ་ཎ་གཞན་དག་བསྲེས་ཏེ་ཞལ་ཟས་བསོད་པ་སྟ་གོན་གྱིས་ལ་འདིར་སྐུར་ཅིག་།དེས་ཀཱར་ཥཱ་པ་ཎ་དེ་དག་ཁྱེར་ཏེ་སོང་ནས་དེས་ཀཱར་ཥཱ་པ་ཎ་དེ་དག་དང་བདག་ཉིད་ཀྱི་ཀཱར་ཥཱ་པ་ཎ་གཞན་དག་བསྲེས་ཏེ་ཞལ་ཟས་བསོད་པ་སྟ་གོན་བྱས་ནས་རྒྱལ་བྱེད་ཀྱི་ཚལ་དུ་བསྐུར་རོ། །
7.175b
ཚེ་དང་ལྡན་པ་ཀུན་དགའ་བོས་དེ་དག་ལ་ཞལ་ཟས་སྟ་གོན་བྱས་ཀྱིས་ཚུར་གཤེགས་ལ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བྲིམས་ཤིག་ཅེས་སྤྲིངས་པ་དང ། དེ་དག་ལྷགས་ཏེ་སྨྲས་པ། བཙུན་པ་ཀུན་དགའ་བོ་ཁྱོད་བདག་ཅག་གི་དགེ་བའི་བཤེས་གཉེན་ལགས་ཀྱིས་ཚུར་སྤྱོན་ཁྱོད་ཀྱིས་ཀྱང་བྲིམ་དུ་གསོལ། ཚེ་དང་ལྡན་པ་ཀུན་དགའ་བོས་བྲིམས་པར་བཙམ་པ་དང ། དེར་གཅེར་བུ་མ་གཉིས་ཤིག་འོངས་ཏེ། དེ་གཉིས་ཀྱིས་ཁྱིམ་བདག་མོ་དེ་དག་ལ་ཟས་བསླངས་པ་ན་དེ་དག་གིས་སྨྲས་པ་ཟས་འདི་ནི་རྒྱལ་བུ་འདིའི་ཡིན་ནོ། །གཅེར་བུ་མ་དེ་གཉིས་ཀྱིས་ཚེ་དང་ལྡན་པ་ཀུན་དགའ་བོ་ལ་རྒྱལ་བུ་བདག་ཅག་གཉིས་ནི་སྡུག་བསྔལ་བ་ལགས་ཀྱིས་བདག་ཅག་གཉིས་ལ་ཟས་སྩོལ་ཅིག་ཅེས་ཟས་བསླངས་པ་དང ། ཚེ་དང་ལྡན་པ་ཀུན་དགའ་བོས་སྨྲས་པ། འདུག་ཤིག་དང་སྦྱིན་ནོ། །དེ་གཉིས་འདུག་གོ། །དེ་ན་ཅིག་ནི་རྒན་མོ་ཞིག་ཡིན། གཅིག་ཤོས་ནི་གཞོན་ནུ་མ་ཞིག་ཡིན་ནོ། །ཚེ་དང་ལྡན་པ་ཀུན་དགའ་བོས་མ་བསམས་པར་བྲིམས་པ་དང ། རྒན་མོ་དེ་ལ་ནི་ཁུར་བ་གཅིག་བྱིན་གཞོན་ནུ་མ་དེ་ལ་ནི་ཁུར་བ་གཉིས་བྱིན་ནོ། །རྒན་མོ་དེས་ཁུར་བ་གཅིག་པོ་དེ་ཟོས་ནས་དེས་གཞོན་ནུ་མ་ལ་སྨྲས་པ། ཁྱོད་གྱིས་ཁུར་བ་དུ་ཐོབ་དེས་སྨྲས་པ། གཉིས་ཐོབ་བོ་རྒན་མོས་སྨྲས་པ། རྒྱལ་བུ་དེས་ཁོ་མོ་ལ་ནི་ཁུར་བ་གཅིག་བྱིན་ལ། ཁྱོད་ལ་གཉིས་བྱིན་པ་ལས་ན་རྒྱལ་བུ་དེས་ཁྱོད་དོན་དུ་གཉེར་གྱིས་སྟ་གོན་གྱིས་ཤིག་།གཞོན་ནུ་མས་སྨྲས་པ། དེས་བཙུན་མོའི་འཁོར་རྒྱས་པ་སྤངས་ཏེ་རབ་ཏུ་བྱུང་བས་དྲི་མའི་རྫབ་ཅན་ཁོ་མོ་ལྟ་བུ་དོན་དུ་གཉེར་བར་ག་ལ་འགྱུར་རྒན་མོས་སྨྲས་པ། སྐྱེས་པ་དག་ལ་བུད་མེད་སྣ་ཚོགས་དག་ལ་བུད་མེད་ཀྱི་འདུན་པ་ཡོད་པས་རྒྱལ་བུ་འདིས་ཁྱོད་དོན་དུ་གཉེར་གྱིས་སྟ་གོན་གྱིས་ཤིག་།དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་གཅེར་བུ་པ་དང ། གཅེར་བུ་མ་ཀུན་དུ་རྒྱུ་དང ། ཀུན་དུ་རྒྱུ་མོ་ལ་རང་གི་ལག་ནས་བཅའ་བ་དང་བཟའ་བ་སྦྱིན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ
7.176a
ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཀུན་དགའ་བོ་ཁྱོད་གཅེར་བུ་པ་དང ། གཅེར་བུ་མ་ཀུན་ཏུ་རྒྱུ་དང་ཀུན་དུ་རྒྱུ་མོ་ལ་རང་གི་ལག་ནས་བཅའ་བ་དང་བཟའ་བ་སྦྱིན་པར་བྱེད་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བཙོན་པ་དང་མི་སྦྱོར་བ་དང་མི་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང་སྦྱོར་བ་དང ། བརྟགས་ཏེ་སྤྱོད་པའི་སྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འདི་ལྟར་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གཅེར་བུ་པ་འམ། གཅེར་བུ་མ་ཀུན་ཏུ་རྒྱུ་འམ། ཀུན་ཏུ་རྒྱུ་མོ་ལ་རང་གིས་ལག་ནས་བཅའ་བ་དང ། བཟའ་བ་སྦྱིན་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །གཅེར་བུ་པ་འམ་གཅེར་བུ་མ་ཀུན་དུ་རྒྱུ་འམ། ཀུན་དུ་རྒྱུ་མོ་ལ་རང་གི་ལག་ནས་ཤེས་བྱ་བ་ནི་ལག་པས་ལག་པར་རོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །སྦྱིན་ན་ཞེས་བྱ་བ་ནི་བསབ་མི་དགོས་པར་རོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོགས་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་བསྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི
7.176b
ཙམ་ཅུང་ཟད་གཅེར་བུ་པ་འམ། གཅེར་བུ་མ་ཀུན་དུ་རྒྱུ་འམ། ཀུན་ཏུ་རྒྱུ་མོ་ལ་རང་གི་ལག་ནས་བཅའ་བ་དང ། བཟའ་བ་སྦྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཉེ་དུ་དང ། ནད་པ་དང ། སྡིག་པ་ཅན་གྱི་ལྟ་བའི་རྣམ་པ་ལས་དབྲལ་བར་འདོད་པ་ཡིན་ན་ལྟུང་བ་མེད་དོ། །དུམ་བུར་བྱས་ཏེ་སྦྱིན་པ་དང ། གཞན་སྦྱིན་དུ་འཇུག་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཅེར་བུ་པ་ལ་སྦྱིན་པའི་ལྟུང་བྱེད་བཞི་བཅུ་རྩ་བཞི་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རི་བྲགས་པ་ཞིག་ལོགས་ནས་དེར་རུ་པ་གཅིག་བཏང་བ་དང་དེ་བཅོམ་ཞིང་རབ་ཏུ་བཅོམ་སྟེ་ཕྱིར་འོངས་སོ། །རུ་པ་གཉིས་པ་དང ། གསུམ་པ་བཏང་བ་དང་དེ་ཡང་བཅོམ་བཞིན་རབ་ཏུ་བཅོམ་སྟེ་ཕྱིར་འོངས་ནས་བློན་པོ་རྣམས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷ་རི་བྲགས་པའི་དཔུང་ནི་སྐྱེས། ལྷའི་དཔུང་ནི་ཉམས་པས་གལ་ཏེ་ལྷ་ཉིད་དེར་རང་མ་གཤེགས་ན་རི་བྲགས་པ་ཕེབས་དཀའ་བར་འགྱུར་ན་ལྷས་རང་ཉིད་དེར་གཤེགས་པར་མཛད་དུ་གསོལ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ངའི་ཡུལ་ན་མཚོན་གྱིས་འཚོའ་བ་གང་དག་འཁོད་པ་དེ་དག་ཐམས་ཅད་འདོང་བར་བྱའོ། །གང་མི་འགྲོ་བ་དེས་ཆད་པར་ཀཱར་ཥཱ་པ་ཎ་ལྔ་བརྒྱ་དབུལ་བར་བྱའོ། །ཞེས་དྲིལ་བསྒྲགས་པ་བྱེད་དུ་བཅུག་སྟེ། རྒྱལ་པོའི་དཔུང་གི་ཚོགས་ཡན་ལག་བཞི་པ་འཕགས་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་གསུས་པོ་ཆེའི་དཔུང་གི་ཚོགས་ཡན་ལག་བཞི་པ་ཅི་འདྲ་བལྟས་འདོང་ངོ་ཞེས་དེ་དག་ལམ་ཀར་དོང་སྟེ་འཁོད་པ་དང ། ཇི་ཙམ་གླང་པོ་ཆེ་པའི་ཚོགས་འོངས་ནས་དྲུག་སྡེ་དག་གིས་དེ་དག་ལ་སྨྲས་པ། ཤེས་ལྡན་དག་གར་འདོང་འཕགས་པ
7.177a
དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རི་བྲགས་པ་ཞིག་ལོག་པར་དེ་འབེབས་སུ་མཆིའོ། །བཀྲེན་པ་དག་གླང་པོ་ཆེ་འདི་ལྟ་བུ་དག་གིས་རི་བྲགས་པ་ཕེབས་པར་འགྱུར་རམ་ཁྱོད་ཀྱི་གླངས་པོ་ཆེ་འདི་དག་ནི་ཕག་འདྲ་ལ། རི་བྲགས་པའི་གླང་པོ་ཆེ་དག་ནི་རི་བོ་བརྩེགས་པ་འདྲ་བས་ཁྱེད་ཅག་ཕར་འགྲོ་བ་ཡོད་ཀྱང་ཕྱིར་ལྡོགས་པ་མེད་ཀྱིས་ཕྱིར་དེང་ལ་ཕ་མ་དག་ལ་ཏིལ་གྱི་ཆུ་བྱིན་ལ་གཟོད་དེང་ཤིག་།དེ་དག་མཐའ་གཅིག་ཏུ་དོང་སྟེ་སེམས་ཁོངས་སུ་ཆུད་ཅིང་འཁོད་དོ་དེ་ནས་རྟ་པའི་ཚོགས་འོངས་ནས་དྲུག་སྡེ་དག་གིས་དེ་དག་ལ་སྨྲས་པ། ཤེས་ལྡན་དག་གར་འདོང་འཕགས་པ་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རི་བྲག་པ་ཞིག་ལོགས་པ་དེ་འབེབས་སུ་མཆིའོ། །བཀྲེན་པ་དག་རྟ་འདི་ལྟ་བུ་དག་གིས་རི་བྲག་པ་ཕེབས་པར་འགྱུར་རམ། ཁྱེད་ཀྱི་རྟ་འདི་དག་ནི་བོང་བུ་འདྲ་ལ། རི་བྲག་པའི་རྟ་དག་ནི་གླང་པོ་ཆེའི་ཕྲུག་གུ་འདྲ་བས་ཁྱེད་ཅག་ཕར་འགྲོ་བ་ཡོད་ཀྱང་ཕྱིར་ལྡོག་པ་མེད་ཀྱིས་ཕྱིར་དེང་ལ་ཕ་མ་དག་ལ་ཏིལ་གྱི་ཆུ་བྱིན་ལ་གཟོད་དེང་ཤིག་།དེ་དག་མཐའ་གཅིག་ཏུ་དོང་སྟེ་སེམས་ཁོངས་སུ་ཆུད་ཅིང་འཁོད་དོ། །དེ་ནས་ཤིང་རྟ་པའི་ཚོགས་འོངས་ནས་དྲུག་སྡེ་དག་གིས་དེ་དག་ལ་སྨྲས་པ། ཤེས་ལྡན་དག་གར་འདོང ། འཕགས་པ་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རི་བྲག་པ་ཞིག་ལོགས་པ་དེ་འབེབས་སུ་མཆིའོ། །བཀྲེན་པ་དག་ཤིང་རྟ་འདི་ལྟ་བུ་དག་གིས་རི་བྲག་པ་ཕེབས་པར་འགྱུར་རམ། ཁྱོད་ཀྱི་ཤིང་རྟ་འདི་དག་ནི་ཤིང་རྟ་ཞིག་པ་འདྲ་ལ། རི་བྲག་པའི་ཤིང་རྟ་དག་ནི་གཞལ་མེད་ཁང་འདྲ་བས་ཁྱེད་ཅག་ཕར་འགྲོ་བ་ཡོད་ཀྱང་ཕྱིར་ལྡོག་པ་མེད་ཀྱིས་ཕྱིར་དེང་ལ་ཕ་མ་དག་ལ་ཏིལ་གྱི་ཆུ་བྱིན་ལ་གཟོད་དེང་ཤིག་།དེ་དག་མཐའ་གཅིག་ཏུ་དོང་སྟེ་སེམས་ཁོངས་སུ་ཆུད་ཅིང་འཁོད་དོ། །དེ་ནས་དཔུང་བུ་ཆུང་གི་ཚོགས་འོངས་ནས་དྲུག་སྡེ་དག་གིས་དེ་དག་ལ་སྨྲས་པ། ཤེས་ལྡན་དག་གར་འདོང ། འཕགས་པ་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རི་བྲག་པ
7.177b
ཞིག་ལོགས་པ་དེ་འབེབས་སུ་མཆིའོ། །བཀྲེན་པ་དག་མི་འདི་ལྟ་བུ་དག་གིས་རི་བྲག་པ་ཕེབས་པར་འགྱུར་རམ། ཁྱེད་ཀྱི་མི་འདི་དག་ནི་རྩཝ་མི་འདྲ་ལ། རི་བྲག་པའི་མི་དག་ནི་གནོད་སྦྱིན་གདུག་པ་འདྲ་བས་ཁྱེད་ཅག་ཕར་འགྲོ་བ་ཡོད་ཀྱང་ཕྱིར་ལྡོགས་པ་མེད་ཀྱིས་ཕྱིར་དེང་ལ་ཕ་མ་དག་ལ་ཏིལ་གྱི་ཆུ་བྱིན་ལ་གཟོད་དེང་ཤིག་།དེ་དག་མཐའ་གཅིག་ཏུ་དོང་སྟེ་སེམས་ཁོངས་སུ་ཆུད་ཅིང་འཁོད་དོ། །ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འོངས་ནས་དེས་སྨྲས་པ། ཁྱེད་ཅག་ཅིའི་ཕྱིར་མི་འོངས་བར་མཐའ་གཅིག་ཏུ་དོང་སྟེ་སེམས་ཁོངས་སུ་ཆུད་ཅིང་འཁོད། དེ་དག་གིས་སྨྲས་པ། ལྷ་བདག་ཅག་རྒྱལ་བར་ག་ལ་འགྱུར། འདི་ལྟར་དགེ་སྦྱོང་མགོ་རེག་རས་ཡུག་ཆེན་གླེག་པ་འཚལ་བ་འདི་དག་མི་མཆི་དགུ་མཆིའོ། །གང་དག་འཕགས་པ་དྲུག་སྡེ་དག་གོ། །ཤེས་ལྡན་དག་དེ་དག་ནི་དགེ་སྦྱོང་ཧྲལ་པོ་དག་ཡིན་པས་དེ་དག་གིས་སྨྲས་པས་ཁྱེད་ལ་ཅི་གནོད་དེང་ཤིག་།ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། འདི་དག་ཡང་དང་ཡང་དུ་བདག་ལ་ཐོ་འཚམ་པར་འགྱུར་རོ། །སྙམས་དུ་རིགས་ནས་མི་ཞིག་ལ་སྨྲས་པ། ཀཝའི་ནང་རྗེ་ཚུར་ཤོག་།བཅོམ་ལྡན་འདས་ག་ལ་བ་དེར་སོང་ལ་ངའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་གནོད་པ་ཉུང་ངམ། ཉམས་ང་བ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་ལྡན་ནམ། བདེ་བ་ལ་རེག་པར་གནས་སམ་ཁ་ན་མ་ཐོ་བ་མ་མཆིས་སམ། ཞེས་སྙུན་གསོལ་ལ་འདི་སྐད་ཅེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་མཆིད་ནས་བཙུན་པ་འཕགས་པ་འདི་དག་དམག་ཆས་པ་ལ་ལྟར་མཆིས་ན། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་དག་དམག་ཆས་པ་ལ་ལྟར་མཆིས་པར་མི་འགྱུར་བར་དྲན་པར་བགྱི་བ་ཆུང་ཞིག་བཅའ་བ་མཛད་ན་ལེགས་སོ་ཞེས་གསོལ་ཅིག་།མི་དེས་ལྷ་བཀའ་བཞིན
7.178a
འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་མི་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་གནོད་པ་ཉུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་བདེ་བ་ལ་རེག་པར་གནས་སམ། ཁ་ན་མ་མཐོའ་བ་མ་མཆིས་སམ་ཞེས་སྙུན་གསོལ་ལོ། །ཀཝའི་ནང་རྗེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང་ཁྱེད་བདེ་བར་གྱུར་ཅིག་།བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་མཆིད་ནས། བཙུན་པ་འཕགས་པ་འདི་དག་དམག་ཆས་པ་ལ་ལྟར་མཆི་ན། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་དག་དམག་ཆས་པ་ལ་ལྟར་མཆི་བར་མི་འགྱུར་བར་དྲན་པར་བགྱི་བ་ཆུང་ཞིག་བཅའ་བ་མཛད་ན་ལེགས་སོ་ཞེས་མཆིས་སོ། །བཅོམ་ལྡན་འདས་ཀྱིས་མི་དེ་ལ་ཅང་མི་གསུང་བས་གནང་ངོ ། །དེ་ནས་མི་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱོད་དམག་ཆས་པ་ལ་ལྟར་འགྲོ་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས
7.178b
ཀྱིས་དགེ་སྦྱོང་གི་ཚུལ་མ་ཡིན་པ་རུང་བ་མ་ཡིན་པ་རྗེས་སུ་འཐུན་པ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དམག་ཆས་པ་ལ་ལྟར་འགྲོ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དམག་ཅེས་བྱ་བ་ལ་དམག་ནི་ཡན་ལག་གཅིག་པ་ཡང་ཡོད། ཡན་ལག་གཉིས་པ་ཡང་ཡོད། ཡན་ལག་གསུམ་པ་ཡང་ཡོད། ཡན་ལག་བཞི་པ་ཡང་ཡོད། དམག་ཡན་ལག་གཅིག་པ་གང་ཞེ་ན། གླང་པོ་ཆེ་པའི་ཚོགས་སོ། །དམག་ཡན་ལག་གཉིས་པ་གང་ཞེ་ན། གླང་པོ་ཆེ་པའི་ཚོགས་དང ། རྟ་པའི་ཚོགས་སོ། །དམག་ཡན་ལག་གསུམ་པ་གང་ཞེ་ན། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་སོ། །དམག་ཡན་ལག་བཞི་པ་གང་ཞེ་ན། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་སོ། །ཆས་པ་ལ་ཞེས་བྱ་བ་ནི་གཡུལ་འགྱེད་པར་མངོན་པར་དགའ་བ་ལའོ། །ལྟར་འགྲོ་ན་ཞེས་བྱ་བ་ནི་འགྲོ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོགས་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང
7.179a
ཇི་ཙམ་ཅུང་ཟད་དམག་ཆས་པ་ལ་ལྟར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་བསོད་སྙོམས་ལ་ཞུགས་པ་ན་དམག་འགྲོ་བ་དང ། གཙུག་ལག་ཁང་ལམ་ཀ་ན་འདུག་པ་དང ། དམགས་གཙུག་ལག་ཁང་དུ་འོངས་པ་དང ། རྒྱལ་པོ་དང་བཙུན་མོ་དང ། གཞོན་ནུ་དང་ཞང་བློན་དང ། ཁྲོམ་གྱི་རུ་སྣ་དང ། གྲོངས་རྡལ་གྱི་མི་དང ། ལྗོངས་ཀྱི་མིས་བཀུག་པ་ལ་ལྟུང་བ་མེད་དོ། །བར་ཆད་བརྒྱད་པོ་དག་ལས་བར་ཆད་གང་ཡང་རུང་བ་ཉེ་བར་གནས་པར་གྱུར་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དམག་ལ་ལྟ་བའི་ལྟུང་བྱེད་དེ་བཞི་བཅུ་རྩ་ལྔ་པ་རྫོགས་སྷོ།། ་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲག་པ་དེ་དེ་ལྟ་ན་ཡང་མ་ཕེབས་ནས་རྒྱལ་པོས་དེ་ཉིད་དུ་ཕྲུ་མ་བཏབས་ཏེ་འདུག་པ་དང་བློན་པོ་རྣམས་ཀྱིས་སྨྲས་པ། ལྷ་ཁྱིམ་བདག་མགོན་མེད་ཟས་སྦྱིན་ནི་བསོད་ནམས་ཀྱི་རྣམ་པར་སྨིན་པ་ཅན་དབང་ཆེ་བར་གྲགས་པ་ལགས་པས་གལ་ཏེ་དེ་མཆིས་པར་གྱུར་ན་དེའི་མཐུས་རི་བྲག་པ་འདི་ཕེབས་པར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་གདའོ། །རྒྱལ་པོས་ཁྱིམ་བདག་མགོན་མེད་ཟས་སྦྱིན་ལ་ཁྱིམ་བདག་མཐོང་བར་འདོད་དོ་ཞེས་ཡི་གེ་སྤྲིང་བ་དང ། ཁྱིམ་བདག་མགོན་མེད་ཟས་སྦྱིན་དེར་འོངས་སོ། །དེ་ལྟ་ན་ཡང་རི་བྲག་པ་དེ་མ་ཕེབས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཁྱིམ་བདག་མགོན་མེད་ཟས་སྦྱིན་ལ་སྨྲས་པ། ཁྱིམ་བདག་ཁྱེའུ་དག་མི་དྲན་ནམ། ལྷ་ཁྱེའུ་དག་ནི་མི་དྲན་ཏེ། འདི་ལྟར་འཕགས་པ་དག་མཐོང་བར་འཚལ་ལོ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་དགེ་འདུན་ལ་འཕགས་པ་དག་མཐོང་བར་འཚལ་ལོ་ཞེས་ཡི་གེ་སྤྲིངས་པ་དང ། དགེ་སྐོས་ཀྱིས་དགེ་འདུན་གྱི་དབུས་སུ་ཡི་གེ་བླགས་ཏེ། གང་དེར་འགྲོ་བར་སྤྲོ་བ་དེས་ཚུལ་ཤིང་ལོང་ཤིག
7.179b
ཅེས་ཚུལ་ཤིང་བྲིམས་པ་དང ། དགེ་སློང་གནས་བརྟན་གནས་བརྟན་དག་གིས་སྨྲས་པ། ཁོ་བོ་ཅག་གིས་རྒན་པོ་སྦྱོར་མི་བཟོད་པ་དག་ཡིན་པས་དེར་འགྲོ་ནི་མི་ནུས་སོ། །དགེ་སློང་གསར་བུ་གསར་བུ་དག་གིས་སྨྲས་པ། དེར་ཆོས་བསྟན་པར་བྱ་དགོས་ན་བདག་ཅག་ནི་ཐོས་པ་ཉུང་བ་ཡིན་པས་ཆོས་སྟོན་པར་ནི་མི་ནུས་ན་དེར་མཆིས་བྲིམས་པར་བྱ་འམ་ཅི་བདག་ཅག་ཀྱང་དེར་འགྲོ་མི་ནུས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཇི་སྲིད་དུ་བཅོམ་ལྡན་འདས་བཞུགས་ཤིང་བདག་ཅག་གསོན་པ་དེ་སྲིད་དུ་བསྟན་པ་གནས་ལ། བཅོམ་ལྡན་འདས་ཡོངས་སུ་མྱ་ངན་ལས་འདས་ཤིང་བདག་ཅག་དུས་ལ་བབ་ན་བསྟན་པ་ནུབ་པར་བརྗོད་པར་བྱ་སྟེ། ཇི་སྲིད་དུ་བདག་ཅག་གསོན་པ་དེ་སྲིད་དུ་བསྟན་པ་ལ་གཅེས་པ་བསྐྱེད་པར་བྱས་ཚུལ་ཤིང་བླང་ངོ་ཞེས་དེ་དག་གིས་ཚུལ་ཤིང་བླང་ཏེ། དེར་དོང་ནས་རྒྱལ་པོ་ལ་ཆོས་བསྟན་པས་རྒྱལ་པོ་མངོན་པར་དད་པར་བྱས་སོ། །བཙུན་མོ་དང་གཞོན་ནུ་དག་དང ། ཞང་བློན་དང ། ཁྲོམ་གྱི་རུ་སྣ་དག་ལ་ཡང་ཆོས་བསྟན་པས་སྐྱེ་བོ་ཕལ་པོ་ཆེའི་ཚོགས་མངོན་པར་དད་པར་བྱས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་སྨྲས་པ། རི་བྲག་པ་བསྐོར་དུ་འདོང་ངོ་ཞེས་དེ་དག་འཕགས་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་གནས་པར་བྱ། རང་གི་སྤྱོད་ལམ་གྱིས་གནས་པར་བྱས། གསུས་པོ་ཆེའི་དམགས་ཅི་འདྲ་བ་ལྟར་འདོང་ངོ་ཞེས་དེ་དག་ལམ་ཀར་དོང་སྟེ་འཁོད་པ་དང ། ཇི་ཙམ་ན་གླང་པོ་ཆེ་པའི་ཚོགས་འོངས་ནས་དེ་དག་གིས་སྨྲས་པ། འཕགས་པ་དག་ཤུལ་ཕྱེ་ཤིག་ཤུལ་ཕྱེ་ཤིག་ཅི་བྱ། གླང་པོ་ཆེའི་ཚོགས་མཆིས་སོ། །བཀྲེན་པ་དག་འདི་འདྲ་བ་དག་གླང་པོ་ཆེ་ཡིན་ནམ། ཕག་པ་དག་འདྲའོ་ཞེས་དེ་དག་གིས་དེ་དག་གི་མཆེའ་བ་དག་ནས་བཟུང་སྟེ། མཐའ་གཅིག་ཏུ་བོར་རོ། །ཇི་ཙམ་ན་རྟ་པའི་ཚོགས་འོངས་ནས་དེ་དག་གིས་སྨྲས་པ། འཕགས་པ་དག་ཤུལ་ཕྱེ་ཤིག་ཤུལ་ཕྱེ་ཤིག་ཅི་བྱ་རྟ་པའི་ཚོགས་མཆིའོ། །བཀྲེན་པ་དག་འདི་འདྲ་བ་དག་རྟ་ཡིན
7.180a
ནམ་བོང་བུ་དག་འདྲའོ་ཞེས་དེ་དག་གིས་དེ་དག་གི་མཇུག་མ་དག་ནས་བཟུང་སྟེ་མཐའ་གཅིག་ཏུ་བོར་རོ། །ཇི་ཙམ་ན་ཤིང་རྟ་པའི་ཚོགས་འོངས་ནས་དེ་དག་གིས་སྨྲས་པ། འཕགས་པ་དག་ཤུལ་ཕྱེ་ཤིག་ཤུལ་ཕྱེ་ཤིག་ཅི་བྱ་ཤིང་རྟ་པའི་ཚོགས་མཆིའོ། །བཀྲེན་པ་དག་འདི་འདྲ་བ་དག་ཤིང་རྟ་ཡིན་ནམ། ཤིང་རྟ་ཞིགས་པ་དག་འདྲའོ་ཞེས་དེ་དག་གིས་དེ་དག་གི་སྲོག་ཤིང་དག་ནས་བཟུང་སྟེ་མཐའ་གཅིག་ཏུ་བོར་རོ། །ཇི་ཙམ་ན་དཔུང་བུ་ཆུང་གི་ཚོགས་འོངས་ནས་དེ་དག་གིས་སྨྲས་པ། འཕགས་པ་དག་ཤུལ་ཕྱེ་ཤིག་ཤུལ་ཕྱེ་ཤིག་ཅི་བྱ། དཔུང་བུ་ཆུང་གི་ཚོགས་མཆིའོ། །བཀྲེན་པ་དག་འདི་འདྲ་བ་དག་མི་ཡིན་ནམ། རྩཝ་མི་དག་འདྲའོ་ཞེས་དེ་དག་གིས་དེ་དག་གི་གཉའ་བ་དག་ནས་བཟུང་སྟེ་མཐའ་གཅིག་ཏུ་བོར་ནས་དེ་དག་སེམས་ཁོངས་སུ་ཆུད་ཅིང་འཁོད་དོ། །ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འོངས་ནས་དེས་སྨྲས་པ། ཤེས་ལྡན་དག་ཅིའི་ཕྱིར་ཁྱེད་ཅག་མི་འདོང་བར་སེམས་ཁོངས་སུ་ཆུད་ཅིང་འཁོད་ལྷ་བདག་ཅག་རྒྱལ་བར་ག་ལ་འགྱུར། འདི་ལྟར་དགེ་སྦྱོང་མགོ་རེག་རས་ཡུག་ཆེན་གླེག་པ་འཚལ་བ་འདི་དག་མི་མཆིས་དགུ་མཆིའོ། །གང་དག་འཕགས་པ་དྲུག་སྡེ་དག་གོ། །ཤེས་ལྡན་དག་འདི་དག་ནི་དགེ་སྦྱོང་ཧྲལ་པོ་དག་ཡིན་པས་དེ་དག་གིས་སྨྲས་པས་ཁྱེད་ལ་ཅི་གནོད་དེང་ཤིག་།ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། འདི་དག་བདག་ལ་ཡང་དང་ཡང་དུ་ཐོ་འཚམ་པར་འགྱུར་རོ་སྙམ་དུ་རིག་ནས་མི་ཞིག་ལ་སྨྲས་པ། ཀཝའི་ནང་རྗེ་ཚུར་ཤོག་།བཅོམ་ལྡན་འདས་ག་ལ་བ་དེར་སོང་ལ་ངའི་ཚིག་གིས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་གནོད་པ་ཉུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་བདེ་བ་ལ་རེག་པར་གནས་སམ། ཁ་ན་མ་ཐོ་བ་མ་མཆིས་སམ་ཞེས་སྙུན་གསོལ་ལ། འདི་སྐད་ཅེས་བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་མཆིད་ནས་བཙུན་པ་འཕགས་པ་འདི་དག་དམག་ཆས་པ་ལ་ལྟར་མཆིས་ནས་ཤིན་ཏུ་ཡུན་རིང་པོར་དམག་གི་ནང་ན་གནས་ན་ཀྱེ་མ
7.180b
བཅོམ་ལྡན་འདས་ཀྱིས་ཐུགས་བརྩེའ་བའི་སླད་དུ་གང་གིས་འཕགས་པ་དག་དམག་ཆས་པ་ལ་ལྟར་མཆིས་ནས་ཤིན་ཏུ་ཡུན་རིང་པོར་དམག་གི་ནང་ན་གནས་པར་མི་འགྱུར་བར། བཅོམ་ལྡན་འདས་ཀྱིས་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ཞེས་གསོལ་གཅིག་།མི་དེས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས། བཅོམ་ལྡན་འདས་ག་ལ་བ་དེར་སོང་ཏེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་མི་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ཉམ་ང་བ་ཉུང་ངམ། གནོད་པ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་ལྡན་ནམ་བདེ་བ་ལ་རེག་པར་གནས་སམ། ཁ་ན་མ་མཐོའ་བ་མ་མཆིས་སམ་ཞེས་སྙུན་གསོལ་ལོ། །ཀཝའི་ནང་རྗེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང་ཁྱོད་བདེ་བར་གྱུར་ཅིག་།བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་མཆིད་ནས་བཙུན་པ་འཕགས་པ་འདི་དག་དམག་ཆས་པ་ལ་ལྟར་མཆིས་ནས་ཤིན་ཏུ་ཡུན་རིང་པོར་དམག་གི་ནང་ན་གནས་ན། ཀྱེ་མ་བཅོམ་ལྡན་འདས་ཀྱིས་ཐུག་བརྩེ་བའི་སླད་དུ་གང་གིས་འཕགས་པ་དག་དམག་ཆས་པ་ལ་ལྟར་མཆིས་ནས་ཤིན་ཏུ་ཡུན་རིང་པོར་དམག་གི་ནང་ན་གནས་པར་མི་འགྱུར་བར། བཅོམ་ལྡན་འདས་ཀྱིས་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ཞེས་མཆིའོ། །བཅོམ་ལྡན་འདས་ཀྱིས་མི་དེ་ལ་ཅང་མི་གསུངས་བས་གནང་ངོ ། །དེ་ནས་མི་དེས་བཅོམ་ལྡན་འདས་ཀྱིས་ཅང་མི་གསུངས་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་དེ་ནས་བཅོམ་ལྡན
7.181a
འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་དམག་ཆས་པ་ལ་ལྟར་སོང་ནས་ཤིན་ཏུ་ཡུན་རིང་པོར་དམག་གི་ནང་ན་གནས་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབས་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། དགེ་སློང་ལ་དམག་ཆས་པ་ལ་ལྟར་འགྲོ་བ་དེ་ལྟ་བུའི་རྐྱེན་ཞིག་བྱུང་ན་དགེ་སློང་དེས་དམག་དེའི་ནང་དུ་ཞག་གཉིས་ཚུན་ཆད་གནས་པར་བྱའོ། །དེ་ལས་ལྷག་པར་གནས་ན་ལྟུང་བྱེད་དོ། །དགེ་སློང་ལ་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པ་ལའོ། །དམག་ཅེས་བྱ་བ་ལ་དམག་ནི་ཡན་ལག་གཅིག་པ་ཡང་ཡོད། ཡན་ལག་གཉིས་པ་ཡང་ཡོད། ཡན་ལག་གསུམ་པ་ཡང་ཡོད། ཡན་ལག་བཞི་པ་ཡང་ཡོད་དོ། །དམག་ཡན་ལག་གཅིག་པ་གང་ཞེ་ན། གླང་པོ་ཆེ་པའི་ཚོགས་སོ། །དམག་ཡན་ལག་གཉིས་པ་གང་ཞེ་ན། གླང་པོ་ཆེ་པའི་ཚོགས་དང་རྟ་པའི་ཚོགས་སོ། །དམག་ཡན་ལག་གསུམ་པ་གང་ཞེ་ན།
7.181b
གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་སོ། །དམག་ཡན་ལག་བཞི་པ་གང་ཞེ་ན། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་སོ། །ཆས་པ་ལ་ཞེས་བྱ་བ་ནི་གཡུལ་འགྱེད་པར་མངོན་པར་དགའ་བ་ལའོ། །ལྟར་འགྲོ་བ་ཞེས་བྱ་བ་ནི་རྒྱུ་གང་གིས་སོ། །དེ་ལྟ་བུའི་རྐྱེན་ཞིག་བྱུང་ན་ཞེས་བྱ་བ་ནི་རྒྱལ་པོ་དང ། བཙུན་མོ་དང་གཞོན་ནུ་དང ། ཞང་བློན་དང་ཁྲོམ་གྱི་རུ་སྣ་དང་གྲོངས་རྡལ་གྱི་མི་དང་ལྗོངས་ཀྱི་མིས་བཀུག་ནའོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །དམག་དེའི་ནང་དུ་ཞེས་བྱ་བ་ནི་དམག་ཆས་པ་དེའི་ནང་དུའོ། །ཞག་གཉིས་ཚུན་ཅད་གནས་པར་བྱའོ་ཞེས་བྱ་བ་ནི་ཞག་གཉིས་ཀྱི་མཐའ་ཚུན་ཅད་གནས་པར་བྱ་བའོ། །དེ་ལས་ལྷག་པར་གནས་ན་ཞེས་བྱ་བ་ནི་དེ་ལས་འདས་པར་གནས་ནའོ། །ལྟུང་བྱེད་དོ་ཞེས་བྱ་བ་ནི། སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང་ངན་འགྲོ་དང ། ལོག་པར་ལྟུང་བ་དག་ཏུ་འཚོད་པར་བྱེད། སྲེག་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་དུ་ཅུང་ཟད་ཞག་གཉིས་ལས་ལྷག་པར་དམག་གི་ནང་ན་གནས་ན་ཐམས་ཅད་དུ་ལྟུང་བྱེད་དུ་འགྱུར་རོ། །རྒྱལ་པོ་དང་བཙུན་མོ་དང་གཞོན་ནུ་དང ། ཞང་བློན་དང ། ཁྲོམ་གྱི་རུ་སྣ་དང ། གྲོངས་རྡལ་གྱི་མི་དང ། ལྗོངས་ཀྱི་མི་ན་རེ་འདུག་ཤིག་ཅེས་ཟེར་བ་ལ་ལྟུང་བ་མེད་དོ། །བར་ཆད་བརྒྱད་པོ་དག་ལས་བར་ཆད་གང་ཡང་རུང་བས་ཉེ་བར་གནས་པར་འགྱུར་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དམག་གི་ནང་ན་གནས་པའི་ལྟུང་བྱེད་དེ་བཞི
7.182a
བཅུ་རྩ་དྲུག་པ་རྫོགས་སྷོ།། ་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲག་པ་དེ་དེ་ལྟ་ན་ཡང་མ་ཕེབས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཁྱིམ་བདག་མགོན་མེད་ཟས་སྦྱིན་ལ་སྨྲས་པ། ཁྱིམ་བདག་ཁྱེའུ་དག་མི་དྲན་ནམ། ལྷ་ཁྱེའུ་དག་ནི་མི་དྲན་ཏེ་འདི་ལྟར་འཕགས་པ་དག་མཐོང་བར་འཚལ་ལོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་དགེ་སློང་གི་དགེ་འདུན་ལ་འཕགས་པ་དག་མཐོང་བར་འཚལ་ལོ། །ཞེས་ཡི་གེ་སྤྲིང་བ་དང་དགེ་སྐོས་ཀྱིས་དགེ་འདུན་གྱི་དབུས་སུ་ཡི་གེ་བླགས་ཏེ། གང་དེར་འགྲོ་བར་སྤྲོ་བ་དེས་ཚུལ་ཤིང་ལོང་ཤིག་ཅེས་ཚུལ་ཤིང་བྲིམས་པ་དང ། དགེ་སློང་གནས་བརྟན་གནས་བརྟན་དག་གིས་སྨྲས་པ། ཁོ་བོ་ཅག་ནི་རྒན་པོ་སྦྱོར་མི་བཟོད་པ་དག་ཡིན་པས་དེར་འགྲོ་མི་ནུས་སོ། །དགེ་སློང་གསར་བུ་གསར་བུ་དག་གིས་སྨྲས་པ། དེར་ཆོས་བསྟན་པར་བྱ་དགོས་ན་བདག་ཅག་ནི་ཐོས་པ་ཉུང་བ་ཡིན་པས་ཆོས་སྟོན་པར་ནི་མི་ནུས་ན་དེར་ཆུ་བྲིམ་བར་བྱ་འམ་ཅི་བདག་ཅག་ཀྱང་དེར་འགྲོ་མི་ནུས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཇི་སྲིད་དུ་བཅོམ་ལྡན་འདས་བཞུགས་ཤིང་བདག་ཅག་གསོན་པ་དེ་སྲིད་དུ་བསྟན་པ་གནས་ལ། བཅོམ་ལྡན་འདས་ཡོངས་སུ་མྱ་ངན་ལས་འདས་ཤིང་བདག་ཅག་དུས་ལ་བབ་ན་བསྟན་པ་ནུབ་པར་བརྗོད་པར་བྱ་སྟེ། ཇི་སྲིད་དུ་བདག་ཅག་གསོན་པ་དེ་སྲིད་དུ་བསྟན་པ་ལ་གཅེས་པ་བསྐྱེད་པར་བྱས་ཚུལ་ཤིང་བླང་ངོ་ཞེས་དེ་དག་གིས་ཚུལ་ཤིང་བླང་ཏེ་དེར་དོང་ནས་རྒྱལ་པོ་ལ་ཆོས་བསྟན་པས་རྒྱལ་པོ་མངོན་པར་དད་པར་བྱས་སོ། །བཙུན་མོ་དང་གཞོན་ནུ་དག་དང ། ཞང་བློན་དང ། ཁྲོམ་གྱི་རུ་སྣ་དག་ལ་ཡང་ཆོས་བསྟན་པས་སྐྱེས་བོ་ཕལ་པོ་ཆེའི་ཚོགས་མངོན་པར་དད་པར་བྱས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་སྨྲས་པ། དེང་ལ་གཡུལ་ཤོམས་ཤིག་དང་རི་བྲགས་པ་བསྐོར་བར་བྱའོ། །དེ་དག་གིས་གཡུལ་ཤམས་པར་བཙམས་པ་དང ། དྲུག་སྡེ་དག་གིས་སྨྲས་པ།
7.182b
དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་གནས་པར་བྱ། རང་གི་སྤྱོད་ལམ་གྱིས་གནས་པར་བྱས་གསུས་པོ་ཆེའི་རྒྱལ་མཚན་གྱི་མཆོག་དང ། དཔུང་གི་མཆོག་དང ། གཡུལ་བཀོད་ཅིང་བཤམས་པའི་དམག་ལ་ལྟ་བ་ཉམས་སུ་མྱོང་བར་བྱས་འདོང་ངོ་ཞེས་དེ་དག་གླང་པོ་ཆེ་པའི་ཚོགས་ཀྱི་གན་དུ་དོང་སྟེ་དྲིས་པ་ཤེས་ལྡན་དག་ཅི་བྱེད་དེ་དག་གིས་སྨྲས་པ། འཕགས་པ་དག་བཀོད་པ་ཤོམ་མོ། །དྲུག་སྡེ་དག་གིས་སྨྲས་པ། བཀྲེན་པ་དག་གླང་པོ་ཆེ་བཅོས་མ་འདི་ལྟ་བུ་དག་ཕྱོགས་འདིར་འཇོག་གམ་འདི་སོལ་ཅིག་ཅེས་དེ་དག་གིས་དེ་དག་གི་མཆེ་བ་དག་ནས་གཟུང་སྟེ་མཐའ་གཅིག་ཏུ་བོར་རོ། །དེ་དག་རྟ་པའི་ཚོགས་ཀྱི་གན་དུ་དོང་ཏེ་དྲིས་པ། ཤེས་ལྡན་དག་ཅི་བྱེད། དེ་དག་གིས་སྨྲས་པ། འཕགས་པ་དག་བཀོད་པ་ཤོམ་མོ་དྲུག་སྡེ་དག་གིས་སྨྲས་པ། བཀྲེན་པ་དག་རྟ་ཐེང་པོ་འདི་ལྟ་བུ་དག་ཕྱོགས་འདིར་འཇོག་གམ་འདི་སོལ་ཅིག་ཅེས་དེ་དག་གིས་དེ་དག་གི་མཇུག་མ་དག་ནས་བཟུང་སྟེ་མཐའ་གཅིག་ཏུ་བོར་རོ། །དེ་དག་ཤིང་རྟ་པའི་ཚོགས་ཀྱི་གན་དུ་དོང་སྟེ་དྲིས་པ། ཤེས་ལྡན་དག་ཅི་བྱེད། དེ་དག་གིས་སྨྲས་པ། འཕགས་པ་དག་བཀོད་པ་ཤོམ་མོ་དྲུག་སྡེ་དག་གིས་སྨྲས་པ། བཀྲེན་པ་དག་ཤིང་རྟ་ཞིག་པ་འདི་ལྟ་བུ་དག་ཕྱོགས་འདིར་འཇོག་གམ་འདི་སོལ་ཅིག་ཅེས་དེ་དག་གིས་དེ་དག་གི་སྲོག་ཤིང་དག་ནས་བཟུང་སྟེ་མཐའ་གཅིག་ཏུ་བོར་རོ། །དེ་དག་དཔུང་བུ་ཆུང་གི་ཚོགས་ཀྱི་གན་དུ་སོང་སྟེ་དྲིས་པ། ཤེས་ལྡན་དག་ཅི་བྱེད་དེ་དག་གིས་སྨྲས་པ། འཕགས་པ་དག་བཀོད་པ་ཤོམ་མོ་དྲུག་སྡེ་དག་གིས་སྨྲས་པ། བཀྲེན་པ་དག་མི་ཞར་བ་འདི་ལྟ་བུ་དག་ཕྱོགས་འདིར་འཇོག་གམ། འདི་སོལ་ཅིག་ཅེས་དེ་དག་གིས་དེ་དག་གི་གཉའ་བ་དག་ནས་བཟུང་སྟེ་མཐའ་གཅིག་ཏུ་བོར་རོ། །དྲུག་སྡེ་དག་དེ་དག་གི་མདུན་ལོགས་སུ་རི་བྲགས་པ་དང་ཧ་ཅང་ཐག་མི་རིང་བར་འཁོད་དེ་བླག་ཆོར་གྱིས་སྒྲ་ཕྱུང་བ་དང ། དེ་དག་གིས་བསམ་པ་རི་བྲག་པ་དག་རྫོང་ནས་རླུག་ཏེ་བྱུང་ངོ་སྙམ་དུ་རིག
7.183a
ནས་སྐྲག་ཅིང་སྔངས་ཏེ་འབྲོས་པར་བརྩམས་པ་དང ། དྲུག་སྡེ་དག་མྱུར་བ་མྱུར་བར་དོང་སྟེ། ཁྲོམ་གྱི་རུ་སྣའི་མདུན་དུ་འཁོད་ནས་སྨྲས་པ། ཤེས་ལྡན་དག་ཅིའི་ཕྱིར་འབྲོས། དེ་དག་གིས་སྨྲས་པ་འཕགས་པ་དག་རི་བྲག་པ་དག་བརྫོང་ནས་རླུགས་ཏེ་བྱུང་ངོ ། །དྲུག་སྡེ་དག་གིས་སྨྲས་པ། བཀྲེན་པ་དག་དེ་ནི་ཁོ་བོ་ཅག་གིས་ཀུ་རེ་ཅུང་ཞིག་བྱས་པ་ཡིན་ཏེ། གལ་ཏེ་རི་བྲག་པ་དག་གིས་ཁྱེད་ཅག་དེ་ལྟར་བྲེད་པར་ཤེས་ཤིང་རིག་པར་གྱུར་ན་ནང་པར་སྔ་བ་ཁོ་ནར་ཡང་ཁྱེད་ཅག་གཉའ་བ་དག་ནས་བརྟགས་ཏེ་རི་བྲགས་སུ་ཁྲིད་པར་འགྱུར་གྱིས་མ་འཇིགས་པར་ཕྱིར་ལོག་ཤིག་།དེ་དག་ཕྱོགས་གཅིག་ཏུ་དོང་སྟེ་སེམས་ཁོང་སུ་ཆུད་ཅིང་འཁོད་དོ། །ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འོངས་ནས་དེས་སྨྲས་པ། ཤེས་ལྡན་དག་ཁྱེད་ཀྱིས་ད་དུང་ཡང་གཡུལ་གྱི་བཀོད་པ་མ་བཤམས་སམ་དེ་དག་གིས་སྨྲས་པ། ལྷ་བདག་ཅག་རྒྱལ་བར་ག་ལ་འགྱུར། འདི་ལྟར་དགེ་སྦྱོང་མགོ་རེག་རས་ཡུག་ཆེན་གླེགས་པ་འཚལ་བ་འདི་དག་མཆིས་ནས་བདག་ཅག་ལ་ཐོ་འཚམས་ཞིང་མི་མཆི་དགུ་མཆིའོ། །རྒྱལ་པོས་སྨྲས་པ། དགེ་སྦྱོང་གང་དག་འཕགས་པ་དྲུག་སྡེ་དག་གོ། །ཤེས་ལྡན་དག་འདི་དག་ནི་དགེ་སྦྱོང་ཧྲལ་པོ་དག་ཡིན་པས་དེ་དག་གིས་སྨྲས་པ་ཁྱེད་ལ་ཅི་གནོད། དེང་ལ་གཡུལ་གྱི་བཀོད་པ་ཤོམ་ཤིག་།ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། འདི་དག་བདག་ལ་ཡང་དང་ཡང་དུ་ཐོ་འཚམ་པར་འགྱུར་རོ་སྙམ་དུ་རིག་ནས་མི་ཞིག་ལ་སྨྲས་པ། ཀཝའི་ནང་རྗེ་ཚུར་ཤོག་བཅོམ་ལྡན་འདས་ག་ལ་བ་དེར་སོང་ལ་ངའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་གནོད་པ་ཉུང་ངམ། ཉམ་ང་བ་ཆུང་ངམ་སྐྱོད་པ་ཡང་ངམ། འཚོ་འམ་སྟོབས་དང་བདེ་བ་ལ་རེག་པར་གནས་སམ་ཁ་ན་མ་ཐོ་བ་མ་མཆིས་སམ་ཞེས་སྙུན་གསོལ་ལ་འདི་སྐད་ཅེས་བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་མཆིད་ནས་བཙུན་པ་འཕགས
7.183b
པ་འདི་དག་ཤིན་ཏུ་ཡུན་རིང་པོར་དམག་གི་ནང་ན་གནས་པའི་ཚེ་ཡང་བཤམས་པ་འཁྲུག་ཏུ་མཆི་ཞིང་རྒྱལ་མཚན་གྱི་མཆོག་དང ། དཔུང་གི་མཆོག་དང་གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བགྱིད་ན། ཀྱེ་མ་བཅོམ་ལྡན་འདས་ཀྱིས་ཐུག་བརྩེ་བའི་སླད་དུ་གང་གིས་འཕགས་པ་དག་ཤིན་ཏུ་ཡུན་རིང་པོར་དམག་གི་ནང་ན་གནས་པའི་ཚེ་ཡང་བཤམས་པ་འཁྲུགས་ཏུ་མི་མཆི་ཞིང ། རྒྱལ་མཚན་གྱི་མཆོག་དང་དཔུང་གི་མཆོག་དང ། གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བགྱིད་པར་མི་འགྱུར་བར་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ཞེས་མཆིའོ་ཞེས་གསོལ་ཅིག་།མི་དེས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་མི་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་གནོད་པ་ཉུང་ངམ་ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་འམ་སྟོབས་དང་བདེ་བ་ལ་རེག་པར་གནས་སམ། ཁ་ན་མ་ཐོ་བ་མ་མཆིས་སམ་ཞེས་སྙུན་གསོལ་ལོ། །ཀཝའི་ནང་རྗེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང་ཁྱེད་བདེ་བར་གྱུར་ཅིག་།བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་མཆིད་ནས་འཕགས་པ་འདི་དག་ཤིན་ཏུ་ཡུན་རིང་པོར་དམག་གི་ནང་ན་གནས་པའི་ཚེ་ཡང་བཤམས་པ་འཁྲུག་ཏུ་མཆིས་ཞིང ། རྒྱལ་མཚན་གྱི་མཆོག་དང་དཔུང་གི་མཆོག་དང་གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བགྱིད་ན། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་འདི་དག་ཤིན་ཏུ་ཡུན་རིང་པོར་དམག
7.184a
གི་ནང་ན་གནས་པའི་ཚེ་ཡང་བཤམས་པ་འཁྲུག་དུ་མི་མཆི་ཞིང་རྒྱལ་མཚན་གྱི་མཆོག་དང ། དཔུང་གི་མཆོག་དང ། གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བགྱིད་པར་མི་འགྱུར་བར་དྲན་པར་བགྱིས་པ་ཅུང་ཞིག་བཅའ་བ་མཛད་ན་ལེགས་སོ་ཞེས་མཆིའོ། །བཅོམ་ལྡན་འདས་ཀྱིས་མི་དེ་ལ་ཅང་མི་གསུངས་བས་གནང་ངོ ། །དེ་ནས་མི་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་དམག་གི་ནང་ན་གནས་པའི་ཚེ་བཤམས་པ་འཁྲུགས་ཏུ་འགྲོ་ཞིང ། རྒྱལ་མཚན་གྱི་མཆོག་དང ། དཔུང་གི་མཆོག་དང ། གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཞག
7.184b
གཉིས་དམག་དེའི་ནང་ན་གནས་པའི་ཚེ་ཡང་གལ་ཏེ་བཤམས་པ་འཁྲུག་ཏུ་འགྲོ་འམ་རྒྱལ་མཚན་གྱི་མཆོག་གམ། དཔུང་གི་མཆོག་གམ་གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བྱེད་ན་ལྟུང་བྱེད་དོ། །དགེ་སློང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ་ཞག་གཉིས་ཤེས་བྱ་བ་ནི་ཞག་གཉིས་ཚུན་ཆད་དོ། །དམག་ཅེས་བྱ་བ་ལ་དམག་ནི་ཡན་ལག་གཅིག་པ་ཡང་ཡོད། ཡན་ལག་གཉིས་པ་ཡང་ཡོད། ཡན་ལག་གསུམ་པ་ཡང་ཡོད། ཡན་ལག་བཞི་པ་ཡང་ཡོད་དོ། །དམག་ཡན་ལག་གཅིག་པ་གང་ཞེ་ན། གླང་པོ་ཆེ་པའི་ཚོགས་སོ། །དམག་ཡན་ལག་གཉིས་པ་གང་ཞེ་ན། གླང་པོ་ཆེ་པའི་ཚོགས་དང་རྟ་པའི་ཚོགས་སོ། །དམག་ཡན་ལག་གསུམ་པ་གང་ཞེ་ན། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་སོ། །དམག་ཡན་ལག་བཞི་པ་གང་ཞེ་ན། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་སོ། །དེའི་ནང་ན་གནས་པའི་ཚེ་ཡང་ཞེས་བྱ་བ་ནི་འདུག་པའི་ཚེ་ཡང་ངོ ། །གལ་ཏེ་བཤམས་པ་འཁྲུག་ཏུ་འགྲོ་འམ་ཞེས་བྱ་བ་ནི་གཡུལ་ལ་ཆས་པ་འཁྲུག་ཏུ་འགྲོ་བའོ། །རྒྱལ་མཚན་གྱི་མཆོག་ཅེས་བྱ་བ་ནི་རྒྱལ་མཚན་རྣམ་པ་བཞི་སྟེ་ཁྱུ་མཆོག་གི་རྒྱལ་མཚན་དང ། ཆུ་སྲིན་གྱི་རྒྱལ་མཚན་དང ། སེང་གེའི་རྒྱལ་མཚན་དང ། ཀླུའི་རྒྱལ་མཚན་ནོ། །དཔུང་གི་མཆོག་ཅེས་བྱ་བ་ནི་དཔུང་གི་ཚོགས་ཡན་ལག་བཞི་པ་སྟེ་གླང་པོ་ཆེ་པའི་ཚོགས་དང ། རྟ་པའི་ཚོགས་དང་ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་སོ། །གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བྱེད་ན་ཞེས་བྱ་བ་ལ་བཤམས་པ་ནི་རྣམ་པ་བཞི་སྟེ། འབྲུའི་ཁ་ལྟ་བུ་དང་ཤིང་རྟའི་དབྱིབས་ལྟ་བུ་དང ། ཟླ་གམ་གྱི་རྣམ་པ་ལྟ་བུ་དང་ནམ་མཁའ་ལྡིང་གི་འདབ་མ་ལྟ་བུའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ
7.185a
ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་གླང་པོ་ཆེ་གོ་སྐོན་པའི་བཤམས་པ་འཁྲུག་པར་བྱེད་ན་ལྟུང་བྱེད་དུ་འགྱུར་རོ། །གོ་མ་བསྐོན་པའི་བཤམས་པ་འཁྲུག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་རྟ་གོ་བསྐོན་པའི་བཤམས་པ་འཁྲུག་པར་བྱེད་ན་ལྟུང་བྱེད་དུ་འགྱུར་རོ། །གོ་མ་བསྐོན་པའི་བཤམས་པ་འཁྲུག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཤིང་རྟ་བཅས་པའི་བཤམས་པ་འཁྲུག་པར་བྱེད་ན་ལྟུང་བྱེད་དུ་འགྱུར་རོ། །མ་བཅས་པའི་བཤམས་པ་འཁྲུག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་དཔུང་བུ་ཆུང་གོ་བསྐོན་པའི་བཤམས་པ་འཁྲུག་པར་བྱེད་ན་ལྟུང་བྱེད་དུ་འགྱུར་རོ། །གོ་མ་བསྐོན་པའི་བཤམས་པ་འཁྲུག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་བཤམས་པ་འཁྲུག་དུ་འགྲོ་ན་ལྟུང་བྱེད་དུ་འགྱུར་རོ། །རྒྱལ་མཚན་གྱི་མཆོག་དང ། དཔུང་གི་མཆོག་དང ། གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བྱེད་པའི་ལྟུང་བྱེད་ཀྱང་དེ་བཞིན་ནོ། །བར་ཆད་བརྒྱད་པོ་དག་ལས་བར་ཆད་གང་ཡང་རུང་བ་ཉེ་བར་གནས་པར་གྱུར་པ་ལ་ལྟུང་བ་མེད་དོ། །ལས་དང་པོ་པ་དང་སྨྱོས་པ་དང ། སེམས་འཁྲུག་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །དཔུང་གི་ཡན་ལག་ཉམས་སུ་མྱོང་བར་བྱེད་པའི་ལྟུང་བྱེད་དེ་བཞི་བཅུ་རྩ་བདུན་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བར་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་དེ་དག་དྲུག་སྡེ་དག་ལ་སྟེན་པར་བྱེད་བསྙེན་པར་བྱེད་བསྙེན་བཀུར་བྱེད་དོ་དེ་ནས་འཆར་ཀས་སྨྲས་པ་བཅུ་བདུན་སྡེ་དག་ཚུར་ཤེག་།འདི་དང་འདི་གྱིས་ཤིག་།དེ་དག་གིས་སྨྲས་པ་ཅི་ཁྱོད་ཁོ་བོ་ཅག་གི་སློབ་དཔོན
7.185b
ཡིན་ནམ་མཁན་པོ་ཡིན་མི་བྱེད་དོ། །དེས་གླེན་པ་དག་ཁྱེད་གཞན་ཅི་ཞིག་བྱེད་ཅེས་དེ་དག་ལས་གཅིག་བརྡེགས་པ་དང ། དེ་དག་ཐམས་ཅད་ཀྱིས་བདག་ཅག་བརྡེགས་སོ། །བདག་ཅག་བརྡེགས་སོ་ཞེས་ཕྱིས་གན་དུ་འགྱེལ་ཏེ་ངུ་བར་བརྩམས་སོ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འཆར་ཀ་ཅིའི་ཕྱིར་གཞོན་ནུ་དག་ལ་བརྡེག་པར་བྱེད་འཆར་ཀས་སྨྲས་པ། ཚེ་དང་ལྡན་པ་དག་ཁོ་བོས་གཅིག་བརྡེག་པ་དང་ཐམས་ཅད་ས་ལ་འགྱེལ་ཏེ་ངུའོ། །དགེ་སློང་རྣམས་ཀྱིས་བཅུ་བདུན་སྡེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་ལས་གཅིག་བརྡེག་ན་ཅིའི་ཕྱིར་ཐམས་ཅད་ས་ལ་འགྱེལ་ཏེ་ངུ ། དེ་དག་གིས་སྨྲས་པ། གལ་ཏེ་མ་ངུས་ན་ཐམས་ཅད་བརྡེགས་པར་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་འཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་ལ་རྡེག་པར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་ཁྲོས་འཁྲུག་བརྔམ་པར་གྱུར་ཏེ་ཡིད་མ་རངས་ནས་དགེ་སློང་ལ་བརྡེགས་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་ཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ
7.186a
མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་འཁྲུག་བརྔམ་པར་གྱུར་ཏེ་ཡིད་མ་རངས་ནས་དགེ་སློང་ལ་རྡེགས་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་ཤེས་བྱ་བ་ནི་ཁྲོས་ཤིང་ཁྲོ་བའི་ཟིལ་གྱིས་ནོན་ནས་སོ། །དགེ་སློང་ལ་ཞེས་བྱ་བ་ནི་ཆོས་འདི་པ་ལའོ། །རྡེག་ན་ཞེས་བྱ་བ་ནི་རྡེག་པར་བྱེད་ནའོ་ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང་ལོགས་པར་ལྟུང་བ་དག་ཏུ་སྲེག་པར་བྱེད་འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན་ནང་གིས་ཟིན་པ་དང ། ཕྱི་རོལ་དུ་འཕངས་པ་དང་དེ་གཉིས་ག་དང་ལྡན་པས་སོ་ཇི་ལྟར་ནང་གིས་ཟིན་པས་ཤེ་ན་དགེ་སློང་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་ལ་སོར་མོ་གཅིག་གིས་རྡེག་པར་བྱེད་ན་ལྟུང་བྱེད་དུ་འགྱུར་རོ། །སོར་མོ་གཉིས་དང་གསུམ་དང་བཞི་དང ། སོར་མོ་ལྔས་རྡེག་པར་བྱེད་ན་ལྟུང་བྱེད་ལྔར་འགྱུར་རོ། །ཁུ་ཚུར་དང་གྲུ་མོ་དང་ཕྲག་པ་དང ། མགོ་དང་གློ་དང ། རྒྱབ་དང་རྐེད་པ་དང ། བརླ་དང་པུས་མོ་དང ། རྗེ་ངར་དང ། ཐ་ན་རྐང་པའི་མཐེ་བོས་རྡེག་པར་བྱེད་ན་ལྟུང་བྱེད་དུ་འགྱུར་ཏེ། དེ་ལྟར་ནང་གིས་ཟིན་པས་སོ་ཇི་ལྟར་ཕྱི་རོལ་དུ་འཕངས་པས་ཤེ་ན། དགེ་སློང་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་ལ་མདས་འཕེན་པར་བྱེད་ན་ལྟུང་བྱེད་དུ་འགྱུར་རོ། །མདས་ཇི་ལྟ་བ་དེ་བཞིན་དུ་ལྕགས་མདའ་དང ། མདའ་ཕྱེད་ལྕག་ལས་བྱས་པ་དང ། མདེའུ་སྟེའུ་ཀ་མ་དང ། མདེའུ་བེའུ་སོ་ལྟ་བུ་དང ། མདེའུ་ཟུར་བཞི་མ་དང ། མདེའུ་ཀ་ར་བི་རའི་འདབ་མ་ལྟ་བུ་དང ། མདེའུ་བྱེའུ་སྙིམ་མ་དང ། འཁོར་ལོ་དང ། རྡོ་རྗེ་རྩེ་གཅིག་དང ། མདའ་བོ་ཆེ་དང ། མཚོན་རྩེ
7.186b
གཅིག་པ་དང ། རྒྱ་ཤུག་གི་ཚིགས་གུ་དང ། ཐ་ན་ཡུངས་ཀར་སྤར་གང་འཕེན་པར་བྱེད་ན་ཡུངས་ཀར་ཇི་སྙེད་ལུས་ལ་ཕོགས་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །ཡུངས་ཀར་ཇི་སྙེད་ལུས་ལ་མ་ཕོག་པ་དེ་སྙེད་ཀྱིས་ཉེས་བྱས་སུ་འགྱུར་ཏེ་དེ་ལྟར་ཕྱི་རོལ་ཏུ་འཕངས་པས་སོ། །ཇི་ལྟར་དེ་གཉིས་ག་དང་ལྡན་པས་ཤེ་ན་དགེ་སློང་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་ལ་རལ་གྲིས་འདེབས་ན་ལྟུང་བྱེད་དུ་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་ཤང་ལང་དང ། རལ་གྲི་སོ་གཅིག་པ་དང ། རལ་གྲི་སོ་གཉིས་པ་དང ། མདུང་དང་འཕངས་མདུང་དང ། ཆུ་གྲི་དང་རྩའི་ཉག་མ་དང་ཐ་ན་ཕྱགས་མས་རྡེགས་པར་བྱེད་ན་ཉག་མ་ཇི་སྙེད་ལུས་ལ་ཕོག་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །ཉག་མ་ཇི་སྙེད་ལུས་ལ་མ་ཕོག་པ་དེ་སྙེད་ཀྱིས་ཉེས་བྱས་སུ་འགྱུར་ཏེ། དེ་ལྟར་གཉིས་ག་དང་ལྡན་པས་སོ་བརྣངས་པ་དང ། ཐལ་ཅག་གིས་རིག་སྔགས་སྒྲུབས་པར་བྱེད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྡེགས་པའི་ལྟུང་བྱེད་དེ་བཞི་བཅུ་རྩ་བརྒྱད་པ་རྫོགས་སྷོ།། ་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱིས་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱེད་པ་དེའི་ཚེ་ན་དེ་དག་དྲུག་སྡེ་དག་ལ་བསྟེན་པར་བྱེད་བསྙེན་པར་བྱེད་བསྙེན་བཀུར་བྱེད་དོ། །དེ་ནས་འཆར་ཀས་སྨྲས་པ། བཅུ་བདུན་སྡེ་དག་ཚུར་ཤེག་འདི་དང་འདི་གྱིས་ཤིག་དེ་དག་གིས་སྨྲས་པ། ཅི་ཁྱོད་ཁོ་བོ་ཅག་གི་སློབ་དཔོན་ཡིན་ནམ་མཁན་པོ་ཡིན་མི་བྱེད་དོ། །དེས་གླེན་པ་དག་ཁྱེད་གཞན་ཅི་ཞིག་བྱེད་ཅེས་དེ་དག་ལས་གཅིག་ལ་བརྡེག་པར་གཟས་པ་དང ། དེ་དག་ཐམས་ཅད་ཀྱིས་བདག་ཅག་ལ་བརྡེག་པར་གཟས་སོ། །བདག་ཅག་ལ་བརྡེགས་པར
7.187a
གཟས་སོ་ཞེས་ཕྱིས་གན་དུ་འགྱེལ་ཏེ་ངུ་བར་བརྩམས་སོ། །དགེ་སློང་རྣམས་ཀྱིས་སྨྲས་པ་ཚེ་དང་ལྡན་པ་འཆར་ཀ་ཅིའི་ཕྱིར་གཞོན་ནུ་དག་ལ་བརྡེག་པར་གཟས་འཆར་ཀས་སྨྲས་པ། ཚེ་དང་ལྡན་པ་དག་ཁོ་བོས་གཅིག་ལ་བརྡེག་པར་གཟས་པ་དང་ཐམས་ཅད་ས་ལ་འགྱེལ་ཏེ་ངུའོ་དགེ་སློང་རྣམས་ཀྱིས་བཅུ་བདུན་སྡེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་ལས་གཅིག་ལ་བརྡེག་པར་གཟས་ན་ཅིའི་ཕྱིར་ཐམས་ཅད་ས་ལ་འགྱེལ་ཏེ་ངུ་དེ་དག་གིས་སྨྲས་པ། གལ་ཏེ་མ་ངུས་ན་གང་ལ་ཅི་བརྡེགས་གཏོལ་མེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་དགེ་སློང་ལ་བརྡེག་པར་གཟས་པར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམ་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་དགེ་སློང་ལ་བརྡེག་པར་གཟས་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སློང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམ་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན
7.187b
པར་བྱ་སྟེ། ཡང་དགེ་སློང་གང་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་དགེ་སློང་ལ་བརྡེག་པར་གཟས་ན་མཐའ་ན་ཐལ་མོས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་ཤེས་བྱ་བ་ནི་ཁྲོས་ཤིང་ཁྲོ་བའི་ཟིལ་གྱིས་ནོན་ནས་སོ། །དགེ་སློང་ལ་ཞེས་བྱ་བ་ནི་ཆོས་འདི་པ་ལའོ། །བརྡེགས་པར་གཟས་ན་ཞེས་བྱ་བ་ནི་བརྡེག་པར་བཤམ་ནའོ། །མཐའ་ན་ཐལ་མོས་ཀྱང་རུང་སྟེ་ཞེས་བྱ་བ་ནི་ཐ་ན་ཐལ་ལྕག་ཙམ་གཟས་ཀྱང་རུང་ཏེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ནང་གིས་ཟིན་པ་དང ། ཕྱི་རོལ་དུ་འཕངས་པ་དང ། དེ་གཉིས་ག་དང་ལྡན་པས་སོ། །ཇི་ལྟར་ནང་གིས་ཟིན་པས་ཤེས་ན། དགེ་སློང་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་དགེ་སློང་ལ་སོར་མོ་གཅིག་གིས་བརྡེགས་པར་གཟས་ན་ལྟུང་བྱེད་དུ་འགྱུར་རོ། །སོར་མོ་གཉིས་དང ། གསུམ་དང ། བཞི་དང ། སོར་མོ་ལྔས་བརྡེག་པར་གཟས་ན་ལྟུང་བྱེད་ལྔར་འགྱུར་རོ། །ཁུ་ཚུར་དང ། གྲུ་མོ་དང་ཕྲག་པ་དང ། མགོ་དང ། གློ་དང ། རྒྱབ་དང ། རྐེད་པ་དང ། བརླ་དང ། པུ་མོ་དང ། རྗེ་ངར་དང ། ཐ་ན་རྐང་པའི་ཐལ་མོས་བརྡེག་པར་གཟས་ན་ལྟུང་བྱེད་དུ་འགྱུར་ཏེ། དེ་ལྟར་ན་ནང་གིས་ཟིན་པས་སོ། །ཇི་ལྟར་ཕྱི་རོལ་དུ་འཕངས་པས་ཤེ་ན། དགེ་སློང་ཁྲོས་འཁྲུགས་རྔམ་པར་གྱུར་ཏེ་ཡིད་དག་མ་རངས་ནས་དགེ་སློང་ལ་མདའ་འཕེན་པ་གཟའ་བར་བྱེད་ན་ལྟུང་བྱེད་དུ་འགྱུར་རོ། །མདའ་འཕེན་པ་གཟོའ
7.188a
བ་ཇི་ལྟ་བ་དེ་བཞིན་དུ་ལྕགས་མདའ་དང ། མདའ་ཕྱེད་ལྕགས་ལས་བྱས་པ་དང ། མདེའུ་སྟེའུ་ཀ་མ་དང ། མདེའུ་བེའུ་སོ་ལྟ་བུ་དང ། མདེའུ་ཟུར་བཞི་མ་དང ། མདེའུ་ཀ་ར་བི་རའི་འདབ་མ་ལྟ་བུ་དང ། མདེའུ་བྱེའུ་སྙིང་མ་དང ། འཁོར་ལོ་དང ། རྡོ་རྗེ་རྩེ་གཅིག་དང ། མདའ་བོ་ཆེ་དང ། མཚོན་རྩེ་གཅིག་དང ། རྒྱ་ཤུག་གི་ཚིག་གུ་དང ། ཐ་ན་ཡུངས་ཀར་སྤར་གང་གཟས་པར་བྱེད་ན་ཡུངས་ཀར་ཇི་སྙེད་གཟས་པ་དེ་སྙེད་ཀྱི་ལྟུང་བྱེད་དུ་འགྱུར་ཏེ། དེ་ལྟར་ཕྱི་རོལ་དུ་འཕང་པས་སོ། །ཇི་ལྟར་དེ་གཉིས་ག་དང་ལྡན་པས་ཤེ་ན། དགེ་སློང་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་དགེ་སློང་ལ་རལ་གྲིས་གདབ་པར་གཟས་པར་བྱེད་ན་ལྟུང་བྱེད་དུ་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་ཤང་ལང་དང ། རལ་གྲི་སོ་གཅིག་པ་དང ། རལ་གྲི་སོ་གཉིས་པ་དང ། མདུང་དང་འཕངས་མདུང་དང ། ཆུ་གྲི་དང་རྩཝའི་ཉག་མ་དང ། ཐ་ན་ཕྱགས་མས་བརྡེགས་པ་གཟའ་བར་བྱེད་ན་ཉག་མ་ཇི་སྙེད་གཟས་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །ཕྱགས་མས་ཇི་ལྟ་བ་བཞིན་དུ་ཐུར་མའི་ཆགས་པ་དང ། ཐག་པའི་ཆུན་པོས་བརྡེག་པ་གཟས་པ་ཡང་དེ་བཞིན་ཏེ། དེ་ལྟར་གཉིས་ག་དང་ལྡན་པས་སོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཟས་པའི་ལྟུང་བྱེད་དེ་བཞི་བཅུ་རྩ་དགུ་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགའ་བོ་ལ་ལྷན་གཅིག་གནས་པའི་དགེ་སློང་ཆོས་ཤེས་བྱ་བ་ངོ་ཚ་ཤེས་པ་འགྱོད་པ་དང་ལྡན་པ་བསྡམས་པ། བསླབས་པ་འདོད་པ་ཞིག་ཡོད་པ་དེས་དེ་ཇི་སྲིད་དུ་གནས་ངན་ལེན་ཀུན་དུ་སྤྱོད་པར་མི་ཤེས་པ་དེ་སྲིད་དུ་དེ་དང་ལྷན་གཅིག་གནས་སོ། །གང་གི་ཚེ་དེས་དེ་གནས་ངན་ལེན་ཀུན་དུ་སྤྱོད་པར་ཤེས་པ་དེའི་ཚེ་ན་དེ་རང་བཞིན་དུ་གནས་པའི་དགེ་སློང་རྣམ་དང་ལྷན་ཅིག་གནས་པར་བརྩམས་ཏེ་བཅོམ་ལྡན་འདས
7.188b
ཀྱི་བཀའ་ལུང་གིས་དུས་གསུམ་དུ་རྐང་པ་ལ་ཕྱག་འཚལ་དུ་འགྲོ་བ་འབའ་ཤིག་བྱེད་དོ། །དེ་དེའི་གན་དུ་སོང་སྟེ་མཁན་པོ་གདུགས་ལ་སྤྱོད་དུ་མཆིའོ་ཞེས་ཞུས་པ་དང ། ཉེ་དགས་ཐོས་ནས་སྨྲས་པ། བུ་ཆོས་ཁོ་བོ་ཡི་སྟན་ཡང་ཁྱེར་ལ་སོང་ཤིག་།ཅི་སློབ་དཔོན་ཡང་གདུགས་ལ་སྤྱོད་དུ་བཞུད་དམ། གླེན་པ་ཁྱོད་ཀྱིས་ཁོ་བོ་ལ་སོ་སོར་བརྟག་གམ། ཁོ་བོས་མི་ཤེས་པའི་རྣལ་འབྱོར་སྤྱོད་པའི་ས་གང་ཡོད། བདག་སློབ་དཔོན་ལ་སོ་སོར་རྟོགས་པར་མི་བགྱིད་དེ། འདི་ལྟར་ཅི་སློབ་དཔོན་ཡང་གདུགས་ལ་སྤྱོད་དུ་བཞུད་དམ་ཞེས་ཞུ་བར་བྱས་ཏེ་གདན་འཚལ་ཏེ་མཆིའོ། །དེས་དེའི་སྟན་ཁྱེར་ཏེ་ཉིན་མོ་སྤྱོད་དུ་སོང་ནས། དེས་དེའི་སྟན་དེ་ཤིང་ལྗོན་པའི་དྲུང་དུ་བཞག་སྟེ་དབེན་པའི་ཕྱོགས་སུ་འདུག་ནས་ཡིད་ལ་བྱེད་པ་བསྐྱེད་པར་བརྩམས་སོ། །དེའི་འོག་དུ་ཉེ་དགའ་འོངས་ནས་ཆོས་ཀྱིས་ཐགས་རིང་པོ་ཁོ་ན་ནས་དེ་མཐོང་ནས་སྨྲས་པ། སློབ་དཔོན་གདན་ཤིང་ལྗོན་པའི་དྲུང་དུ་བཞག་གིས་དེར་བཞུད་ལ་བཞུགས་ཤིག་།ཉེ་དགའ་དེར་སོང་ནས་མགོ་གཡོགས་ཏེ་འདུག་པ་དང ། དེས་དེར་མོས་པ་མ་རྙེད་ནས་སྟན་ལས་ལངས་ཏེ་ཕྱོགས་བཞིར་རྣམ་པར་བལྟ་བར་བརྩམས་པ་དང ། ཇི་ཙམ་ན་བུ་མོ་ཞིགས་རྒྱལ་བྱེད་ཀྱི་ཚལ་གྱི་རིབ་མ་འདྲལ་བ་མཐོང་བ་ནས་དེས་ཆོས་ལ་ཆོས་རིབ་མ་འདྲལ་བར་བྱེད་དོ་ཞེས་བོས་པ་དང ། ཆོས་ཀྱིས་དེ་ལ་སྨྲས་པ་སློབ་དཔོན་རྒྱལ་བྱེད་གྱི་ཚལ་གྱི་མདོ་དགོངས་ཤིག་གླེན་པ་ཁྱོད་མདོའ་སྡེའི་མཐའ་ལ་རྟོན་པར་གྱུར་ཏམ། བཅོམ་ལྡན་འདས་ཀྱིས་དགེ་འདུན་གྱི་རྩཝ་ཡང་ཡལ་བར་མི་འདོར་རོ་ཞེས་མ་གསུངས་སམ་ཁོ་བོ་རང་ཉིད་སོང་ལ་བཟློག་པར་བྱའོ་སློབ་དཔོན་ཉིད་མཁྱེན་ནོ་ཉེ་དགའ་སོང་སྟེ་སྨྲས་པ། བུ་མོ་ཁྱོད་ཅིའི་ཕྱིར་རྒྱལ་བྱེད་ཀྱི་ཚལ་གྱི་རིབ་མ་འདྲལ་བར་བྱེད་བུ་མོ་དེས་འཛུམ་ཕྱུང་བ་དང ། ཉེ་དགའ་དེའི་ཡན་ལག་དང་ཉིང་ལག་དག་ནས་མནམས་ཏེ་འོ་བྱས་ནས་དེ་ཆོས་ཀྱི་གན་དུ་སོང་སྟེ་དྲིས་པ་བུ་ཆོས་ཁྱོད་ཀྱིས་ཅུང་ཟད་མཐོང་ངམ་སློབ་དཔོན་གཞུགས་པ་འཛུད་པ་འབའ་ཤིག་མ་གཏོགས་པ
7.189a
གཞན་ཐམས་ཅད་མཐོང་ངོ ། །བུ་ཆོས་སུ་ལ་ཡང་མ་ཟེར་ཅིག་སློབ་དཔོན་ཇི་སྲིད་དུ་རང་བཞིན་དུ་གནས་པའི་དགེ་སློང་མ་མཐོང་བ་དེ་སྲིད་ཀྱི་བར་དུ་སུ་ལ་ཡང་མི་མཆིའོ་ཉེ་དགས་སྨྲས་པ། ཁོ་བོས་ཁྱོད་ཀྱི་མཁན་པོའི་གནས་ངན་ལེན་གྱི་ལྟུང་བ་འཆབ་པར་བྱེད་ན་ཁྱོད་ཁོ་བོའི་འཆབ་པར་མི་བྱེད་དམ་ཆོས་ཀྱིས་སྨྲས་པ། སློབ་དཔོན་ཁྱོད་འཆབ་པར་མཛད་ཀྱང་བདག་ནི་འཆབ་པར་མི་བགྱིད་དོ་ཞེས་ཟེར་བའི་སྐབས་དེ་དགེ་སློང་རྣམས་ལ་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་དགེ་སློང་གི་གནས་ངན་ལེན་གྱི་ལྟུང་བ་འཆབ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་དགའ་ལ་སྨྲས་པ། ཉེས་དགའ་ཁྱོད་ཤེས་བཞིན་དུ་དགེ་སློང་གི་གནས་ངན་ལེན་གྱི་ལྟུང་བ་འཆབ་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ་ཡང་དགེ་སློང་གང་ཤེས་བཞིན་དུ་དགེ་སློང་གི་གནས་ངན་ལེན་གྱི་ལྟུང་བ་འཆབ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱ
7.189b
ཡི་བུ་ཉེས་དགའ་འམ་གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པ་འམ། གཞན་དག་གིས་བརྗོད་པས་སོ་དགེ་སློང་གི་ཞེས་བྱ་བ་ནི་ཆོས་འདི་པའོ། །གནས་ངན་ལེན་གྱི་ལྟུང་བ་ཞེས་བྱ་བ་ནི་གནས་ངན་ལེན་གཉིས་ཏེ་ཕམ་པར་འགྱུར་བ་ཀུན་ནས་སློང་བ་དང ། དགེ་འདུན་ལྷག་མ་ཀུན་ནས་སློང་བའོ་ཅིའི་ཕྱིར་དེ་དག་གནས་ངན་ལེན་ཅེས་བྱ་ཞེ་ན་ངོ་བོ་ཉིད་དང་ཀུན་ནས་སློང་བ་ལས་སོ། །འཆབ་ན་ཞེས་བྱ་བ་ནི་མཁྱུད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད་འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ་དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་བཅབ་པའི་སེམས་བསྐྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་བཅབ་པའི་སེམས་སྐྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ་སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་བཅབ་པའི་སེམས་སྐྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ་སྐྱ་རེང་ཤར་ན་ཡང་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་བཅབ་པའི་སེམས་སྐྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ་སྐྱ་རེང་ཤར་ན་ཡང་ཉེས་བྱས་ཉིད་དུ་འགྱུར་རོ། །དགེ་སློང་གིས་དགེ་སློང་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་བཅབ་པའི་སེམས་སྐྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ་སྐྱ་རེང་ཤར་ན་ཡང་ཉེས་བྱས་ཉིད་དུ་འགྱུར་རོ། །བདག་ལ་གཞི་འདིས་བདེ་བ
7.190a
ལ་མི་རེག་པ་དང ། ་དགེ་སྦྱོང་གི་ཚུལ་དང་ཚངས་པར་སྤྱོད་པའི་བར་ཆད་དུ་འགྱུར་ན་ལྟུང་བ་མེད་དོ། །བདག་ལ་གཞི་འདིས་དགེ་འདུན་དབྱེ་བ་དང ། ་དགེ་འདུན་འཁྲུགས་པ་དང ། ་དགེ་འདུན་གཉིས་སུ་འགྱུར་བ་དང ། ་དགེ་འདུན་ཐ་དད་པར་འགྱུར་ན་ལྟུང་བ་མེད་དོ། །ལས་དང་པོ་པ་དང་སྨྱོས་པ་དང ། སེམས་འཁྲུགས་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །གནས་ངན་ལེན་འཆབ་པའི་ལྟུང་བྱེད་དེ་ལྔ་བཅུ་པ་རྫོགས་སྷོ།། །།འདུལ་བ་རྣམ་པར་འབྱེད་པ། ། བམ་པོ་ལྔ་བཅུ་རྩ་དྲུག་པ། ་་་་་་སྡོམ་ལ། བདེ་དང་མེ་དང་འདུན་པ་དང ། །རྫོགས་པར་མ་བསྙེན་ཆོས་དང་སྨྲས། །དགེ་ཚུལ་ཁ་དོག་བསྒྱུར་བ་དང ། །རིན་པོ་ཆེ་དང་ཚ་བའི་དུས། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགའ་བོ་ལ་ལྷན་གཅིག་གནས་པ་དགེ་སློང་ཆོས་ཤེས་བྱ་བ་ངོ་ཚ་ཤེས་པ་འགྱོད་པ་དང་ལྡན་པ་བསྡམས་པ་བསླབ་པ་འདོད་པ་ཞིག་ཡོད་པ་དེས་ཇི་སྲིད་དུ་དེ་གནས་ངན་ལེན་ཀུན་དུ་སྤྱོད་པར་མི་ཤེས་པ་དེ་སྲིད་དུ་དེ་དང་ལྷན་ཅིག་གནས་སོ། །གང་གི་ཚེ་དེས་དེ་གནས་ངན་ལེན་ཀུན་དུ་སྤྱོད་པར་ཤེས་པ་དེའི་ཚེ་ན་དེ་རང་བཞིན་དུ་གནས་པའི་དགེ་སློང་རྣམས་དང་ལྷན་གཅིགས་གནས་པར་བརྩམས་ཏེ། ་བཅོམ་ལྡན་འདས་ཀྱིས་བཀའ་ལུང་གིས་དུས་གསུམ་དུ་རྐང་པ་ལ་ཕྱག་འཚལ་དུ་འགྲོ་བ་འབའ་ཤིག་བྱེད་དོ། །ཉེ་དགས་དགའ་བོ་ལ་སྨྲས་པ། ་སློབ་དཔོན་ཆོས་འདིས་ཁོ་བོ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་མདུན་དུ་ཐོའ་བརྩམས་པ་ལ་ལྟོས་ཁོ་བོས་ཀྱང་འདི་ལ་ངེས་པར་གནོད་པ་ཅུང་ཞིག་བྱའོ། །དགའ་བོས་སྨྲས་པ་དགེ་སློང་འདི་ནི་ངོ་ཚ་ཤེས་པ་འགྱོད་པ་དང་ལྡན་པ། བསྡམས་པ་བསླབ་པ་འདོད་པ་ཡིན་པས་ཁྱོད་ཀྱིས་འདི་ལ་གནོད་པ་ཅི་ཞིག་བྱར་ཡོད། ངེས་པར་འདིའི་ཟན་གཅད་པར་བྱའོ། །དེ་ནི་ནུས་སོ་ཁྱིམ་བདག་ཅིག་གིས་དགའ་བོ་དང་ཉེ་དགའ་གཉིས་ཟན་ལ་མགྲོན་དུ་བོས་པ་དང་ཉེ་དགས
7.190b
བསམས་པ། ་དེང་ཆོས་འདིའི་ཟན་བཅད་པར་བྱའོ་སྙམ་མོ་ཆོས་དགའ་བོའི་གན་དུ་སོང་སྟེ་སྨྲས་པ། ་མཁན་པོ་བདག་བསོད་སྙོམས་ལ་མཆིའ་བ་ཞུས་སོ། །དགའ་བོས་སྨྲས་པ་ཆོས་ཁོ་བོ་ཅག་དེང་ཁྱིམ་བདག་ཅིག་གིས་ཟན་ལ་མགྲོན་དུ་བོས་ཀྱིས་ཚུར་ཤོག་ལ་འདི་ཉིད་དུ་ཟན་ཟོ་ཤིག་།ཆོས་ཀྱིས་སྨྲས་པ་བདག་མཁན་པོ་དང་ལྷན་གཅིག་སྔོན་ཅད་མགྲོན་དུ་བོས་པ་འགའ་མཆིས་སམ་ཉེས་དགས་སྨྲས་པ་ཆོས་ཁོ་བོས་གཞན་ཐོས་ལ་གཞན་མཐོང་སྟེ། ་ཁོ་བོས་ཀོ་ཁྱོད་ངོ་ཚ་ཤེས་པ་འགྱོད་པ་དང་ལྡན་པ་བསྡམས་པ་བསླབས་པ་འདོད་པ་ཡིན་པར་ཤེས་ན་ཁྱོད་མཁན་པོས་མི་དད་པའི་དངོས་པོ་ཡང་དག་པར་འཛིན་དུ་བཅུག་གམ། ་ཅི་ན་གང་གིས་ཕྱིར་མཁན་པོའི་ཆོས་དང་ལྡན་པའི་ཚིག་གཅོད་པར་བྱེད། བཅོམ་ལྡན་འདས་ཀྱིས་འདུལ་བ་ལས་སློབ་དཔོན་དང་མཁན་པོས་བསྒོ་བ་ན་ཁས་བླང་བར་བྱའོ། །ཁས་མི་ལེན་ན་ཉེས་བྱས་སུ་འགྱུར་རོ་ཞེས་མ་གསུངས་སམ་དེ་དགེ་སློང་རབ་ཏུ་གྲགས་པས་སྨད་པས་ཅང་མི་སྨྲ་བར་འདུག་ནས། དེས་སྨྲས་པ་ལྷུང་བཟེད་དང་ཆུ་ཚགས་བླངས་ཏེ་མཆིའོ། །དགའ་བོས་སྨྲས་པ་དེར་ལྷུང་བཟེད་དང་ཆུ་ཚགས་ཀྱིས་ཅི་བྱ། ་དེར་སྣོད་བཀྲུས་པ་ལས་ཆུ་བརྩགས་པ་དག་འཐོབ་ཀྱིས་ཚུར་ཤོག་འདོང་ངོ ། །ཆོས་དེ་གཉིས་དང་ལྷན་གཅིག་འཕགས་པ་དང་བསོད་སྙོམས་པ་ཞིག་གིས་མཐོང་ནས་དེས་སྨྲས་པ། ་ཆོས་གར་འགྲོ་མགྲོན་དུ་བོས་པར་འགྲོའོ། །ཟས་ཀྱི་ཚོད་ཤེས་པར་གྱིས་ཤིག་།ཆོས་ཀྱིས་སྨྲས་པ་ཟན་ཟ་བར་འགྱུར་རམ། ་འོན་ཏེ་ཟན་བཅད་པར་འགྱུར་གཏོལ་མེད་དོ་དེ་དེ་གཉིས་དང་ལྷན་གཅིག་མཉན་ཡོད་དུ་ཞུགས་པ་དང་དེ་གཉིས་སྲང་དུ་དོང་སྟེ་ཚོངས་ཁང་དུ་འཁོད་ནས་ཉེ་དགའ་ཁྱིམ་བདག་དེའི་ཁྱིམ་དུ་སོང་སྟེ་ཟན་ཟོས་ནས་ཕྱིར་འོངས་སོ། །དེའི་འོག་ཏུ་དགའ་བོ་ཡང་ཁྱིམ་བདག་དེའི་ཁྱིམ་དུ་སོང་སྟེ་ཟན་ཟ་ཞིང་འདུག་གོ་ཆོས་ཀྱིས་ཉེ་དགའ་ལ་སྨྲས་པ་སློབ་དཔོན་གདུགས་ཚོད་ལ་བབ་ཀྱིས་བཞུད་དོ་ཉེ་དགས་སྨྲས་པ། དེར་ཐམས་ཅད་སྟ་གོན་བྱས་ཟིན་པས་དེར་སོང་སྟེ་བཟའ་བ་ལས་གཞན་པའི་བྱ་བ་ཅི་ཡང
7.191a
མེད་ཀྱིས་གདུགས་འཚོད་གྱིས་ཁ་ཁོ་ནར་འདོང་ངོ ། །ཆོས་ལངས་ཏེ་རྐང་པ་གཉིས་ཀྱིས་གྲིབ་ཚོད་གཞལ་བར་བརྩམས་པ་དང་ཉེས་དགས་སྨྲས་པ། གླེན་པ་ཁྱོད་ཁོ་བོ་ཅག་གི་བསླབ་པ་ལ་ཅུང་ཟད་ཡིད་མི་ཆེས་སམ། ་ཅི་ཁྱོད་ཀྱིས་སྙིང་ལམ་ན་ཁོ་བོ་ཅག་དུས་མ་ཡིན་པར་ཟ་བར་འགྱུར་སྙམ་འམ། ་ཁོ་བོ་ལ་ཁྱོད་དང་ལྷན་གཅིག་སྨྲ་བ་འམ་འདུག་པ་བདེ་བ་མ་ཡིན་གྱི་འདི་ལྟར་ཁོ་བོ་གཅིག་པུ་ཁོ་ན་སྨྲ་འམ་འདུག་ནས་བདེས་ཁྱོད་སོང་ཤིག་ཆོས་ཀྱི་བསམས་པ། གལ་ཏེ་བདག་གིས་ལྷུང་བཟེད་དང་ཆུ་ཚགས་ཁྱེར་ཏེ་འོངས་པར་གྱུར་ན་བདག་བསོད་སྙོམས་ལ་རྒྱུ་བར་འགྱུར་བ་ཞིག་ན་ད་ནི་ཅི་བྱར་ཡང་མེད་དོ་སྙམ་ནས་དེ་གཙུག་ལག་ཁང་དུ་སོང་སྟེ། ་ཇི་སྲིད་དུ་དེའི་ལུས་ལ་མདངས་ཡོད་པ་དེ་སྲིད་དུ་དགེ་བའི་ཕྱོགས་ལ་ཏྲོན་བྱས་ནས། ་གང་གི་ཚེ་དེའི་ལུས་ལས་མདངས་ཡལ་བ་དེའི་ཚེ་ན་གློས་ཕབ་སྟེ་ཉལ་བ་དང ། ་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཆོས་གལ་ཏེ་ཟན་གཞན་གྱིས་ཡིན་ཞེས་ཏེ་ལྟོ་ཡང་གཞན་གྱི་ཡིན་ནམ། ་ཅི་ན་ཇི་ཙམ་གྱིས་དགེ་བའི་ཕྱོགས་ལ་ཏྲོན་བྱེད་ཀྱང་མི་ནུས་པ་དེ་ཙམ་གྱིས་ཟན་ཟོས་ཆོས་ཀྱིས་སྨྲས་པ། ་སུས་ཟོས་ཁྱོད་ཀྱིས་མ་ཟོས་སམ། ་མ་ཟོས་སོ་ཅིའི་ཕྱིར་དེས་སྐབས་དེ་རྒྱས་པར་བརྗོད་པ་དང་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཆེད་དུ་བསམ་སྟེ་དགེ་སློང་ཟན་གཅོད་དུ་འཇུད་ཅེས་སྨོད་པར་བྱེད་ཕྱར་ཀ་གཏོང་བར་བྱེད། ་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ་གླེང་གཞི་འདི་དང ། ་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། ་སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་སྨྲས་པ། ་ཉེ་དགའ་ཁྱོད་གླེན་ཀ་ཚོལ་ཞིང་ཅི་ནས་ཀྱང་དགེ་སློང་འདི་ལ་གླན
7.191b
ཀ་བཙལ་བར་འགྱུར་རོ་སྙམ་པ་དེ་ཉིད་རྐྱེན་དུ་བྱས་སྟེ་དགེ་སློང་ལ་འདི་སྐད་ཅེས་ཚེ་དང་ལྡན་པ་ཚུར་ཤོག་ཁྱིམ་དག་ཏུ་འདོང་དང་དེར་ཁྱོད་ལ་བཅའ་བ་དང ། ་བཟའ་བ་ཇི་ཙམ་འདོད་པ་སྦྱིན་དུ་གཞུག་གོ་ཞེས་སྨྲས་ནས་ཁྱོད་ཀྱི་དེ་ལ་སྦྱིན་དུ་མ་བཅུག་པར་དེའི་འོག་དུ་འདི་སྐད་ཅེས་ཚེ་དང་ལྡན་པ་ཁོ་བོ་ལ་ཁྱོད་དང་ལྷན་གཅིག་སྨྲས་པ་འམ་འདུག་པ་བདེ་བ་མ་ཡིན་གྱིས་འདི་ལྟར་ཁོ་བོ་གཅིག་པུ་ཁོ་ན་སྨྲས་འམ་འདུག་ན་བདེས་ཁྱོད་སོང་ཤིག་ཅེས་ཟེར་ཞིང་ཟན་གཅོད་དུ་འཇུག་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། ་རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། ་དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིག་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ་ཡང་དགེ་སློང་གང་གླན་ཀ་ཚོལ་ཞིང་ཅི་ནས་ཀྱང་དགེ་སློང་འདི་ལ་གླན་ཀ་བཙལ་བར་འགྱུར་རོ་སྙམ་པ་དེ་ཉིད་རྐྱེན་དུ་བྱས་ཏེ། ་དགེ་སློང་ལ་འདི་སྐད་ཅེས་ཚེ་དང་ལྡན་པ་ཚུར་ཤོག་ཁྱིམ་དག་དུ་འདོང་དང་དེར་ཁྱོད་ལ་བཅའ་བ་དང་བཟའ་བ་བསོད་པ་ཇི་ཙམ་འདོད་པ་སྦྱིན་དུ་གཞུག་གོ་ཞེས་སྨྲས་ནས། ་དེས་དེ་ལ་སྦྱིན་དུ་མ་བཅུག་པར་དེའི་འོག་ཏུ་འདི་སྐད་ཅེས་ཚེ་དང་ལྡན་པ་ཁོ་བོ་ལ་ཁྱོད་དང་ལྷན་ཅིག་སྨྲ་བ་འམ་འདུག་པ་བདེ་བ་མ་ཡིན་གྱི་འདི་ལྟར་ཁོ་བོ་ཅིག་པུ་ཁོ་ན་སྨྲ་འམ་འདུག་ན་བདེས་ཁྱོད་སོང་ཤིག་ཅེས་ཟེར་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །གླན་ཀ་ཚོལ་ཞིང་ཅི་ནས་ཀྱང་དགེ་སློང་འདི་ལ་གླན་ཀ་བཙལ་བར
7.192a
་ འགྱུར་རོ་སྙམས་པ་ཞེས་བྱ་བ་ནི་ཅི་ནས་ཀྱང་དགེ་སློང་འདིའི་ཟན་གཅོད་དུ་བཅུག་པར་འགྱུར་རོ་སྙམས་པའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ། །དགེ་སློང་ལ་ཞེས་བྱ་བ་ནི་ཆོས་འདི་པ་ལའོ། །འདི་སྐད་ཅེས་ཤེས་བྱ་བ་ནི་འདི་སྐད་ཅེས་སྨྲས་ནས་སོ། །ཚེ་དང་ལྡན་པ་ཚུར་ཤོག་ཁྱིམ་དག་ཏུ་འདོང་དང་ཞེས་བྱ་བ་ནི་བྲམ་ཟེ་དང ། ་ཁྱིམ་བདག་གི་ཁྱིམ་དག་ཏུའོ། །དེར་ཁྱོད་ལ་བཅའ་བ་དང ། བཟའ་བ་བསོད་པ་ཞེས་བྱ་བ་ནི་བཅའ་བ་ལྔ་དང ། བཟའ་བ་ལྔའོ། །ཇི་ཙམ་འདོད་པ་སྦྱིན་དུ་གཞུག་གོ་ཞེས་སྨྲ་ནས་ཤེས་བྱ་བ་ནི་ཅི་ཙམ་གྱིས་ཆོག་པར་རོ། །དེས་དེ་ལ་སྦྱིན་དུ་མ་བཅུག་པར་དེའི་འོག་ཏུ་འདི་སྐད་ཅེས་ཚེ་དང་ལྡན་པ་ཁོ་བོ་ལ་ཁྱོད་དང་ལྷན་ཅིག་སྨྲ་བ་འམ་འདུག་པ་བདེ་བ་མ་ཡིན་གྱིས་འདི་ལྟར་ཁོ་བོ་གཅིག་པུ་ཁོ་ན་སྨྲ་འམ། འདུག་ན་བདེས་ཁྱོད་སོང་ཤིག་ཅེས་ཟེར་ན་ཞེས་བྱ་བ་ནི་དེ་སྐད་ཅེས་ཟེར་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ་ཡི་དགས་ངན་སོང་དང ། ་ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད་འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་དགེ་སློང་གིས་ཇི་ཙམ་ཅུང་ཟད་ཆེད་དུ་བསམས་སྟེ་དགེ་སློང་གི་ཟན་གཅོད་དུ་འཇུད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ནད་པའི་བྱེད་དུ་འཇུད་པ་དང་སྨན་པས་བསྟན་པ་བྱེད་དུ་འཇུད་པ་ལ་ལྟུང་བ་མེད་དོ། །ལས་དང་པོ་པ་དང་སྨྱོས་པ་དང ། སེམས་འཁྲུགས་པ་དང ། ་ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཟན་གཅོད་དུ་འཇུད་པའི་ལྟུང་བྱེད་དེ་ལྔ་བཅུ་རྩ་གཅིག་པ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱིས་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་མཉན་ཡོད་པའི་ཚོང་པ་རབ་ཏུ་མང་པོ་དག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན
7.192b
འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་མཉན་ཡོད་པའི་ཚོང་པ་རབ་ཏུ་མང་པོ་དག་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ་ཡང་དག་པར་གཟེང་བསྟོད་པར་མཛད། ་ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་མཉན་ཡོད་པའི་ཚོང་པ་རབ་ཏུ་མང་པོ་དག་གིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་བཅོམ་ལྡན་འདས་ཀྱིས་ཞབས་གཉིས་ལ་མགོ་བོས་ཕྱག་འཚལ་ཏེ། ་བཅོམ་ལྡན་འདས་ཀྱི་སྤྱན་སྔ་ནས་དོང་ནས་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཚེ་དང་ལྡན་པ་ཀུན་དགའ་བོས་མཉན་ཡོད་པའི་ཚོང་པ་རབ་ཏུ་མང་པོ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ་ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་བསྟོད་པར་བྱེད། ་ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ་ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ་ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་མཉན་ཡོད་པའི་ཚོང་པ་རབ་ཏུ་མང་པོ་དག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་ཚེ་དང་ལྡན་པ་ཀུན་དགའ་བོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་གང་དུ་གཤེགས་པར་འགྱུར། ཤེས་ལྡན་དག་སངས་རྒྱས་བཅོམ་ལྡན་འདས་ལ་ཞུས་ཤིག་།བཙུན་པ་ཀུན་དགའ་བོ་སངས
7.193a
རྒྱས་བཅོམ་ལྡན་འདས་ནི་བསྙེན་པར་དཀའ་བ་དང ། ་བཟོད་པར་དཀའ་བ་ལགས་པས་བདག་ཅག་གིས་སངས་རྒྱས་བཅོམ་ལྡན་འདས་ལ་ཞུ་བའི་རྔོ་མི་ཐོག་གོ། །ཤེས་ལྡན་དག་ཁོ་བོ་ལ་ཡང་སངས་རྒྱས་བཅོམ་ལྡན་འདས་བསྙེན་པར་དཀའ་བ་དང་བཟོད་པར་དཀའ་བ་ཉིད་ཡིན་པས་ཁོ་བོས་ཀྱང་སངས་རྒྱས་བཅོམ་ལྡན་འདས་ལ་ཞུ་བར་མི་ནུས་སོ། །བཙུན་པ་ཀུན་དགའ་བོ་གལ་ཏེ་བཙུན་པ་ཀུན་དགའ་བོ་ལ་ཡང་སངས་རྒྱས་བཅོམ་ལྡན་འདས་ནི་བསྙེན་པར་དཀའ་བ་དང ། ་བཟོད་པར་དཀའ་བ་ལགས་པས་བཙུན་པ་ཀུན་དགའ་བོས་ཀྱང་སངས་རྒྱས་བཅོམ་ལྡན་འདས་ལ་ཞུ་བར་མི་སྤྱོད་ན་བཙུན་པ་ཀུན་དགའ་བོས་མཚན་མ་འམ། བཀའ་མཆིད་ཀྱིས་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་ཕྱོགས་ག་གེ་མོར་གཤེགས་པར་འགྱུར་བར་ཇི་ལྟར་མཁྱེན་མཚན་མས་ནི་ཇི་ལྟར་བཀའ་མཆིད་ཀྱིས་ནི་ཇི་ལྟར་མཁྱེན། ་ཤེས་ལྡན་དག་བཅོམ་ལྡན་འདས་དབྱར་གནས་པར་ཞལ་གྱིས་བཞེས་པའི་ཕྱོགས་གང་དུ་གཤེགས་པར་བཞེད་པའི་ཕྱོགས་དེ་ལོགས་སུ་བཅོམ་ལྡན་འདས་ཞལ་གཟིགས་ཤིང་བཞུགས་ལ་དེ་དག་གིས་སྔགས་པ་ཡང་བརྗོད་པར་མཛད་དོ། །བཙུན་པ་ཀུན་དགའ་བོ་བཅོམ་ལྡན་འདས་ཞལ་གར་གཟིགས་ཤིང་བཞུགས། མི་གང་དག་གིས་བསྔགས་པ་ཡང་བརྗོད་པར་མཛད། ་ཤེས་ལྡན་དག་བཅོམ་ལྡན་འདས་མ་ག་དྷར་ཞལ་གཟིགས་ཤིང་བཞུགས་ལ་རྒྱལ་པོའི་ཁབ་པའི་མི་དག་གི་བསྔགས་པ་ཡང་བརྗོད་པར་མཛད་དོ། །དེ་དག་གིས་ཚེ་དང་ལྡན་པ་ཀུན་དགའ་བོས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་དོང་ནས་དེ་དག་གིས་བསམས་པ། ་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ནས་རྒྱལ་པོའི་ཁབ་ཏུ་གཤེགས་པར་འགྱུར་རོ་སྙམས་ནས་དེ་དག་གིས་རྒྱལ་པོའི་ཁབ་ཏུ་འདོང་བའི་ཟོང་སྟ་གོན་བྱས་སོ། །དེ་ནས་བཅོམ་ལྡན་འདས་དབྱར་གནས་པར་ཞལ་གྱིས་བཞེས་ཏེ་དབྱར་གྱིས་ཟླ་བ་གསུམ་པོ་དག
7.193b
འདས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ་ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་མ་ག་དྷ་དག་ཏུ་ལྗོང་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་མ་ག་དྷ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ཞིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་དེ་བཞིན་གཤེགས་པ་མ་ག་དྷ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་མ་ག་དྷ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་ཀྱི་ཤིག་ཅེས་བསྒོའོ། །མཉན་ཡོད་པའི་ཚོང་པ་དག་གིས་ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་ཚེ་དང་ལྡན་པ་དག་དེ་བཞིན་གཤེགས་པ་མ་ག་དྷ་དག་ཏུ་ལྗོངས་རྒྱུར་གཤེགས་ཀྱིས་ཁྱོད་ཅག་ལས་གང་དེ་བཞིན་གཤེགས་པ་དང་ཐབས་གཅིག་མ་ག་དྷ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་ཀྱིས་ཤིག་ཅེས་བསྒོ་བ་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་དེར་སོང་ཏེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་མཉན་ཡོད་པའི་ཚོང་པ་རབ་ཏུ་མང་པོ་དག་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ་ཡང་དག་པར་གཟེང་བསྟོད་པར་མཛད། ་ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ་ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་མཉན་ཡོད་པའི་ཚོང་པ་རབ་ཏུ་མང་པོ་དག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ
7.194a
བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་མཉན་ཡོད་ནས་རྒྱལ་པོའི་ཁབ་ཀྱི་བར་ཇི་ཙམ་པར་བདག་ཅག་ལས་ན་བཟའ་དང་བསོད་བསྙོམས་དང ། ་གནས་མལ་དང ། སྙུང་བའི་རྐྱེན་དང་སྨན་གྱི་ཡོ་བྱད་དག་བཞེས་པར་ཅི་གནང ། ་བཅོམ་ལྡན་འདས་ཀྱིས་མཉན་ཡོད་པའི་ཚོང་པ་རབ་ཏུ་མང་པོ་དག་ལ་ཅང་མི་གསུང་བས་གནང་ངོ ། །དེ་ནས་མཉན་ཡོད་པའི་ཚོང་པ་རབ་ཏུ་མང་པོ་དག་གིས་བཅོམ་ལྡན་འདས་ཀྱིས་ཅང་མི་གསུངས་བས་གནང་བར་རིག་ནས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེ་ནས་མཉན་ཡོད་པའི་ཚོང་པ་རབ་ཏུ་མང་པོ་དག་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་མཉན་ཡོད་པའི་ཚོང་པ་རབ་ཏུ་མང་པོ་དག་གིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བཅོམ་ལྡན་འདས་ཤུལ་དག་ཏུ་ཇི་ཙམ་དུ་གཤེགས། ་ཤེས་ལྡན་དག་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ཙམ་དུའོ། །བཙུན་པ་ཀུན་དགའ་བོ་འཁོར་ལོས་སྒྱུར་བའི་རྒྱལ་པོས་ཇི་ཙམ་དུ་མཆིས། ་ཤེས་ལྡན་དག་འཁོར་ལོས་སྒྱུར་བའི་རྒྱལ་པོ་ནི་ལམ་དག་ཏུ་རྒྱང་གྲགས་བཅུར་འགྲོའོ། །དེ་དག་གིས་རྒྱང་གྲགས་བཅུ་བཅུར་བཅོམ་ལྡན་འདས་དགེ་སློང་གི་དགེ་འདུན་དང་བཅས་པའི་ཚོགས་དག་བཤམས་ཤིང་དེ་དག་གིས་ཞལ་ཟས་གྲངས་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། ་དྲོད་བག་གང་དག་ཡིན་པ་དེ་དག་ནི་ཉི་མ་རེ་རེ་ཞིང་སྟ་གོན་བྱེད་དོ་དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ་ཞི་བ་འཁོར་ཞི་བ་དང་ལྡན་པ་གྲོལ་བ་འཁོར་གྲོལ་བ་དང་ལྡན་པ་དབུགས
7.194b
ཕྱིན་པ་འཁོར་དབུག་ཕྱིན་པ་དང་ལྡན་པ་ཐུལ་བ་འཁོར་ཐུལ་བ་དང་ལྡན་པ་དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། ་འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ་མཛེས་པ་འཁོར་མཛེས་པ་དང་ལྡན་པ་ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ་གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོག་ཀྱིས་ཡོངས་སུ་བསྐོར་བ། ་སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ་ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ་ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། ་བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། ་སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ་ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། ་དེད་དཔོན་ལྟར་ཚོངས་པའི་ཚོགས་ཀྱིས་ཡོངས་སུ་བསྐོར་བ། ་ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། ་མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བའི་རྒྱལ་པོ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བཟླའ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ་ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ་ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། ་འཕགས་སྐྱེ་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། ་མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ་ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ་ཐག་བཟངས་རིས་ལྟར་ལྷ་མ་ཡིན་གྱི་ཚོག་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ་ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། ་དབང་པོ་རྣམས་ཤིན་དུལ་བ། ་སྤྱོད
7.195a
ལམ་དང་སྤྱོད་པ་མ་འཁྲུགས་པ་ཆུ་གཏེར་ལྟར་ཏིང་ངེ་བ། ་སྤྲིན་ལྟར་ཆུ་དང་བཅས་པ། ་གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། ་འོད་འདོམ་གང་གིས་གཟུགས་ཅན་བརྒྱན་པ། ་ཉི་མ་སྟོང་བས་ལྷག་པའི་འོད་དང་ལྡན་པ། ་རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། ་སྟོབས་བཅུ་དང ། མི་འཇིགས་པ་བཞི་དང་མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ་ཐུགས་རྗེ་ཆེན་པོ་དང་ལྡན་པ། ་ཀུན་ཤེས་ཀཽཎྜི་ནྱ་དང ། ་རྟ་ཐུལ་དང ། ་བཟང་ལྡན་དང ། རླང་པ་དང ། ་མིང་ཆེན་དང ། ་གྲགས་པ་དང ། ་གང་པོ་དང ། དྲི་མེད་དང ། བ་ལང་བདག་དང ། ལག་བཟངས་ལ་སོགས་པ་ཉན་ཐོས་ཆེན་པོ་དེ་དག་དང ། ་གཞན་ཡང་དགེ་སློང་གི་དགེ་འདུན་རབ་ཏུ་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ་རྒྱལ་པོའི་ཁབ་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་སོ། །ཚེ་དང་ལྡན་པ་ཀུན་དགའ་བོ་དོན་འཐུན་དུ་སོང་བ་དང ། ་ཇི་ཙམ་ན་ལམ་ཁ་བྲག་མཐོང་ནས་དེས་བཅོམ་ལྡན་འདས་མ་གཤེགས་ཀྱི་བར་དུ་དེར་བསྡད་དོ། །བཅོམ་ལྡན་འདས་གཤེགས་ནས་བཅོམ་ལྡན་འདས་ཀྱིས་བཀའ་སྩལ་པ། ་ཀུན་དགའ་བོ་ཁྱོད་ཅི་སྡོད། ་བཙུན་པ་འདི་ནི་ཤུལ་ཁ་བྲགས་ལགས་ཏེ། ་ཤུལ་འདི་ནི་དྲང་ལ་སེང་གེའི་འཇིགས་པ་དང་བཅས་པ་ལགས། ་ཤུལ་འདི་ནི་འཁྱོག་ལ་བདེ་བ་ལགས་ན་ཤུལ་གང་ནས་མཆི་བར་བགྱི། ཀུན་དགའ་བོ་ལམ་དྲང་པོ་ནས་སོང་ཤིག་དང ། ་དེ་བཞིན་གཤེགས་པ་ནི་སེང་གེའི་འཇིགས་པ་དང་བྲལ་བ་ཡིན་ནོ། །དེ་ནས་བཅོམ་ལྡན་འདས་ཤུལ་དྲང་པོ་ནས་གཤེགས་པར་བརྩམས་ནས་ཇི་ཙམ་ན་ལམ་དེ་ན་རི་བྲགས་ཤིག་ཡོད་པ་དེར་བྱོན་པ་དང ། ་རི་བྲགས་དེ་ནས་བྱིས་པ་ཁྱེའུ་གཉིས་ཤིག་ལམ་ཀར་འོངས་ཏེ་རྩེ་ཞིང་འདུག་གོ། །དེ་ན་གཅིག་གི་ལག་ན་ནི་རྔ་པ་ཊ་ཧ་ཐོགས། ་ཅིག་ཤོས་ཀྱི་ལག་ན་ནི་གཞུ་ཐོགས་སོ། །དེ་གཉིས་ཀྱིས་བཅོམ་ལྡན་འདས་མཐོང་ནས་འདི་སྐད
7.195b
ཅེས་གསོལ་ཏོ། །བཅོམ་ལྡན་འདས་ཚུར་གཤེགས་སུ་གསོལ། ་བཅོམ་ལྡན་འདས་བྱོན་པ་ལེགས་སོ། །བཅོམ་ལྡན་འདས་འཇིགས་པ་དང་བཅས་པའི་ཤུལ་དུ་གར་གཤེགས། ་འོན་ཀྱང་བཅོམ་ལྡན་འདས་མི་བསྙིངས་སུ་གསོལ། བདག་ཅག་གཉིས་ཀྱིས་བཅོམ་ལྡན་འདས་ཀྱི་བསེལ་བགྱིའོ། །དེ་ན་དད་པ་སྐྱེས་པ་གཅིག་གིས་ནི་རྔ་པ་ཊ་ཧ་བརྡུངས་སོ། ་དད་པ་སྐྱེས་པ་ཅིག་ཤོས་ཀྱིས་ནི་གཞུ་བརྡུངས་ཏེ། ་དེ་གཉིས་བཅོམ་ལྡན་འདས་ཀྱི་མདུན་དུ་འགྲོ་བར་བརྩམས་པ་དང ། བཅོམ་ལྡན་འདས་འདི་སྙམ་དུ་དགོངས་ཏེ། ་ཁྱེའུ་འདི་གཉིས་ཀྱི་དགེ་བའི་རྩ་བ་དག་སྐྱེད་དོ་སྙམ་དུ་རིག་ནས་བཅོམ་ལྡན་འདས་ཀྱིས་ཁྱེའུ་དེ་གཉིས་ལ་འདི་སྐད་ཅེས་བཀའ་སྩལ་ཏོ། །ཁྱེའུ་གཉིས་ཕྱིར་ལོག་ཤིག་།དེ་བཞིན་གཤེགས་པ་ནི་སེང་གེའི་འཇིགས་པ་བྲལ་བ་ཡིན་ནོ། །དེ་གཉིས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་བ་དང ། ་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་ན་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང ། ་སེར་པོ་དང ། ་དམར་པོ་དང ། དཀར་པོ་དང ། ་བཙོད་ཀ་དང ། ་ཤེལ་དང ། ་དངུལ་གྱི་ཁ་དོག་ལྟ་བུ་དག་བྱུང་ནས་ཁ་ཅིག་ནི་འོག་ལོགས་སུ་འདོང ། ་ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང ། ་ཐིག་ནག་དང ། ་བསྡུས་འཇོམས་དང ། ་ངུ་འབོད་དང ། ་ངུ་འབོད་ཆེན་པོ་དང ། ་ཚ་བ་དང ། ་རབ་ཏུ་ཚ་བ་དང ། མནར་མེད་པ་དང ། ་ཆུ་བུར་ཅན་དང ། ་ཆུ་བུར་རྡོལ་དང ། ་སོ་ཐམས་ཐམས་དང ། ་ཀྱི་ཧུད་ཟེར་དང ། ་ཨ་ཆུ་ཟེར་དང ། ུད་པལ་ལྟར་གས་པ་དང ། ་པད་མ་ལྟར་གས་པ་དང ། ་པད་མ་ལྟར་གས་པ་ཆེན་པོར་དོང་སྟེ། ་སེམས་ཅན་དམྱལ་བ་ཚ་བ་གང་དག་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་དག་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དེ་དག་གི་གནོད་པའི་བྱེ་བྲག་གང་དག་རྒྱུན་གཅོད་པར་བྱེད་ཅིང་དེ་དག་འདི
7.196a
སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། ་འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏང་བར་མཛད་དེ། ་དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། ་གཞན་དུ་སྐྱེས་པ་ཡང་མ་ཡིན་ཏེ། ་འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ། སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་འདོང་བ་དེ་དག་ནི་རྒྱལ་ཆེན་བཞི་པ་དང ། ་སུམ་བཅུ་རྩ་གསུམ་པ་དང ། འཐབ་བྲལ་དང ། ་དགའ་ལྡན་དང ། ་འཕྲུལ་དགའ་དང ། ་གཞན་འཕྲུལ་དབང་བྱེད་དང ། ་ཚངས་རིས་དང ། ་ཚངས་པའི་མདུན་ན་འདོན་དང ། ཚངས་ཆེན་དང ། ་འོད་ཆུང་དང ། ་ཚད་མེད་འོད་དང ། ་འོད་གསལ་དང ། ་དགེ་ཆུང་དང ། ་ཚད་མེད་དགེ་དང ། དགེ་རྒྱས་དང ། ་སྤྲིན་མེད་དང ། ་བསོད་ནམས་སྐྱེས་དང ། ་འབྲས་བུ་ཆེ་དང ། ་མི་ཆེ་དང ། ་མི་གདུང་དང ། ་གྱ་ནོམ་སྣང་དང ། ་ཤིན་ཏུ་མཐོང་དང ། ་འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང ། ་སྡུག་བསྔལ་བ་དང ། ་སྟོང་པ་དང ། ་བདག་མེད་པ་ཞེས་བྱ་བའི་སྒྲ་སྒྲོག་པར་བྱེད་ཅིང་ཚིགས་སུ་བཅད་པ་གཉིས་པོ། ་བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར་ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི
7.196b
སླད་བཞིན་སླད་བཞིན་དུ་རྗེས་སུ་འདོང་སྟེ། ་དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། ་སེམས་ཅན་དམྱལ་བར་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། ་དུད་འགྲོར་སྐྱེ་བ་ལུང་སྟོན་པར་བཞེད་ན་ནི་ལོང་བུར་ནུབ་པར་འགྱུར། ་ཡི་དགས་སུ་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། ་མིར་སྐྱེ་བ་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། ་སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། ་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ་ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། ་རང་སངས་རྒྱས་ཀྱིས་བྱང་ཆུབ་ལུང་སྟོན་པར་བཞེད་ན་ནི་མཛོད་པུར་ནུབ་པར་འགྱུར། ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་སྤུར་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒྲོས་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བདལ་བར་གྱུར་པ་ཇི་བཞིན་ནོ། །ཡང་ཚིགས་སུ་བཅད་པ་སྨྲས་པ། ་རྒོད་བྲལ་ཞུམ་དང
7.197a
རྒྱགས་པ་རབ་སྤངས་པ། །སངས་རྒྱས་འགྲོ་བ་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་སྟོན་པ་རང་བློས་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང ། །དམ་པ་དགེ་བ་དག་གིས་བསྩལ་དུ་གསོལ། །ཚཝ་ཆུའི་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་རྣམས་བློ་བུར་འཛུམ་མི་སྟོན། །བརྟན་རྣམས་ཇི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས། ་རྐྱེན་མ་མཆིས་པར་འཛུམ་པ་མི་མཛད་ན། ་བཙུན་པ་འཛུམ་པ་མཛད་པའི་རྒྱུ་ནི་གང་ལགས། ་རྐྱེན་ནི་གང་ལགས། ་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། ་ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་ཁྱོད་ཀྱིས་གང་དག་གིས་དེ་བཞིན་གཤེགས་པའི་བསེལ་བྱས་པའི་བྱིས་པ་ཁྱེའུ་གཉིས་མཐོང་ངམ། ་བཙུན་པ་མཐོང་ངོ ། །ཀུན་དགའ་བོ་ཁྱེའུ་དེ་གཉིས་ནི་དགེ་བའི་རྩ་བ་འདི་དང ། ལེགས་པར་སྤྱད་པ་འདིས་བསྐལ་པ་བཅུ་གསུམ་དུ་ལོག་པར་ལྟུང་བར་འགྲོ་བར་མི་འགྱུར་ཞིང ། ་དེ་གཉིས་ལྷ་དང་མི་རྣམས་སུ་ཉིང་མཚམས་སྦྱོར་ཅིང་འཁོར་ནས་སྲིད་པ་ཐ་མ་དང ། ་གནས་ཐ་མ་དང ། ་གཟུགས་ཐ་མ་དང ། ་ལུས་ཐ་མ་ཐོབ་པ་ན་ལས་དེ་ཉིད་དང ། ་དགེ་བའི་རྩ་བ་དེ་ཉིད་དང ། ་ལེགས་པར་སྤྱད་པ་དེ་ཉིད་ཀྱིས་རབ་ཏུ་བྱུང་ནས་རང་བྱང་ཆུབ་མངོན་དུ་བྱེད་པར་འགྱུར་ཏེ། ་གཅིག་ནི་རང་སངས་རྒྱས་རྔ་སྒྲ་ཞེས་བྱ་བར་འགྱུར། ་ཅིག་ཤོས་ནི་རང་སངས་རྒྱས་མི་འཇིགས་སྦྱིན་ཞེས་བྱ་བར་འགྱུར་རོ། །དེ་ནས་བཅོམ་ལྡན་འདས་གྲོང་ཁྱེར་མེད་པའི་དགོན་པའི་གནས་ཤིག་ཏུ་མཚན་མོ་གནས་པར
7.197b
ཞལ་གྱིས་བཞེས་སོ། །བཅོམ་ལྡན་འདས་ཀྱིས་ཤིང་ལྗོན་པ་ཡང་རྒན་རིམས་ཀྱིས་བསྐོར་བར་བྱའོ་ཞེས་བཀའ་སྩལ་པས་དྲུག་སྡེ་དག་གིས་ཤིང་ལྗོན་པ་ཁོང་སྟོང་ཞིག་ཐོབ་ནས་དེ་དག་གང་བ་དག་གིས་ཤིང་ལྗོན་པ་ཁོང་སྟོང་དེ་ལ་མེ་བཏང་བ་དང ། ཤིང་ལྗོན་པ་ཁོང་སྟོང་དེ་ལ་སྦྲུལ་དུག་མྱུར་དུ་ཁྱབ་པར་བྱེད་པ་ཞིག་གནས་པ་དེ་དུ་བས་བཀྲུག་ནས་སྟེང་གི་ཡལ་ག་ལ་འཛེགས་ཏེ་འཕྱང་ཞིང་འདུག་གོ། །དྲུག་སྡེ་དག་གིས་དེ་འཕྱང་ཞིང་འདུག་པ་མཐོང་ནས། དེ་དག་གིས་སྨྲས་པ། ་བྱུང་ངོ་བྱུང་ངོ ། །དོན་འཐུན་གྱིས་དེ་ཐོས་ནས་བསམ་པ། ་སེང་གེ་བྱུང་ངོ་སྙམ་ནས་དོན་འཐུན་སྐྲག་སྟེ་ཕྱོགས་བཞིར་བྲོས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཅིའི་ཕྱིར་དོན་འཐུན་འདི་ཕྱོགས་བཞིར་བྲོས། ་བཙུན་པ་བཅོམ་ལྡན་འདས་ཀྱིས་ཞུགས་ཤིང་ལྗོན་པ་ཡང་རྒན་རིམས་ཀྱིས་བསྐོར་བར་བྱའོ། །ཞེས་བཀའ་སྩལ་པས་དྲུག་སྡེ་དག་གིས་ཞུགས་ཤིང་ལྗོན་པ་ཁོང་སྟོང་ཞིག་ཐོབ་ནས་དེ་དག་གྲང་བ་དག་གིས་ཞུགས་ཤིང་ལྗོན་པ་ཁོང་སྟོང་དེ་ལ་ཞུགས་བཏང་བ་དང ། ་ཞུགས་ཤིང་ལྗོན་པ་ཁོང་སྟོང་དེ་ལ་སྦྲུལ་དུག་མྱུར་དུ་ཁྱབ་པར་བགྱིད་པ་ཞིག་གནས་པ་དེ་དུ་བས་དཀྲུགས་ནས་སྟེང་གི་ཡལ་ག་ལ་འཛེགས་ཏེ་འཕྱང་ཞིང་མཆིས་མ་དྲུག་སྡེ་དག་གིས་མཐོང་ནས་དེ་དག་གིས་བྱུང་ངོ་བྱུང་ངོ་ཞེས་བགྱིས་པ་དང ། ་དོན་འཐུན་གྱིས་དེ་ཐོས་ནས་ཅི་སེང་གེ་བྱུང་ངོ་སྙམ་ནས་དོན་འཐུན་སྐྲག་སྟེ་ཕྱོགས་བཞིར་བྲོས་སོ། །བཅོམ་ལྡན་འདས་ཀྱིས་བཀའ་སྩལ་པ། ་ཀུན་དགའ་བོ་སོང་ལ་དོན་འཐུན་ལ་དེ་བཞིན་གཤེགས་པ་ནི་སེང་གེའི་འཇིགས་པ་དང་བྲལ་བ་ཡིན་གྱིས་ཕྱིར་ལོགས་ཤིག་ཅེས་སྒོ་ཤིག་ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དོན་འཐུན་གྱི་གན་དུ་སོང་སྟེ་ཤེས་ལྡན་དག་དེ་བཞིན་གཤེགས་པ་ནི་སེང་གེའི་འཇིགས་པ་དང་བྲལ་བ་ཡིན་གྱིས་ཕྱིར་ལོག་ཤིག་ཅེས་སྨྲས་ནས་དེ་ཕྱིར་ལོག་པར་གྱུར་ཏོ། །དགེ་སློང་རྣམས་ཀྱིས་བཅོམ་ལྡན་འདས་ལ་ཞུས་པ།
7.198a
བཙུན་པ་དྲུག་སྡེ་དག་གིས་དོན་འཐུན་སྐྲགས་པར་བགྱིས་ཏེ། ཕྱོགས་བཞིར་བྲོས་པ་བཅོམ་ལྡན་འདས་ཀྱིས་དབུགས་ཕྱུང་བ་ལ་གཟིགས། དགེ་སློང་དག་ད་ལྟར་དུ་མ་ཟད་དེ་འདི་ལྟར་འདས་པའི་དུས་ན་ཡང་འདི་དག་གིས་རི་དག་ཀྱི་ཚོགས་ཆེན་པོ་སྐྲག་པར་བྱས་ཏེ་ཕྱོགས་བཞིར་བྲོས་པ་ངས་དབུགས་ཕྱུང་ཏེ་དེ་ཉོན་ཅིག་དགེ་སློང་དག་སྔོན་བྱུང་བ་འདས་པའི་དུས་ན་མཚེའུ་ཞིག་གི་འགྲམ་ན་ཤིང་བིལ་བའི་ཚལ་དེ་ན་རི་བོང་དྲུག་ཅིག་གནས་སོ། །ཤིང་བིལ་བའི་ཚལ་དེ་ནས་ཤིང་བིལ་བ་ཞིག་མཚེའུའི་ནང་དུ་རྡིབ་པ་ན་སྒྲ་ཅལ་ཅེས་ཟེར་བ་བྱུང་ངོ ། །རི་བོང་དྲུག་པོ་དེ་དག་གིས་སྒྲ་དེ་ཐོས་ནས་དེ་དག་ལུས་ཆུང་བས་སྐྲག་སྟེ་འབྲོས་པར་བརྩམས་སོ། །དེ་དག་འབྲོས་པ་ཝ་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་རི་བོང་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་ཝ་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་སྦྲེ་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་ཝ་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་སྦྲེ་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་རི་དགས་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། སྦྲེ་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ་དེ་ནས་རི་དགས་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་ཕག་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་རི་དགས་དག་གིས་སྨྲས་པ། ཅལ་ཅལ་ཟེར་བ་བྱུང་ངོ ། །དེ་ནས་ཕག་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་མ་ཧེ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་འབྲོས། ཕག་དག་གིས་སྨྲས་པ། ཅལ་ཅལ་ཟེར་བ་བྱུང་ངོ ། །དེ་ནས་མ་ཧེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་བསེ་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། མ་ཧེ་དག་གིས་སྨྲས་པ། ཅལ་ཅལ་ཟེར་བ་བྱུང་ངོ ། །དེ་ནས་བསེ་དེ་དག་གིས
7.198b
ཀྱང་འབྲོས་པར་བརྩམས་སོ། །དེ་དག་འབྲོས་པ་གླང་པོ་ཆེ་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་བསེ་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་གླང་པོ་ཆེ་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་དོམ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་འབྲོས་གླང་པོ་ཆེ་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་དོམ་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་དྲེད་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་དོམ་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་དྲེད་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་གུང་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་དྲེད་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་གུང་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་སྟག་དག་གིས་མཐོང་ནས་དེ་དག་གིས་སྨྲས་པ། ་ཤེས་ལྡན་དག་ཅིའི་ཕྱིར་འབྲོས། ་གུང་དག་གིས་སྨྲས་པ། ཅལ་ཅལ་ཟེར་བ་བྱུང་ངོ ། །དེ་ནས་སྟག་དེ་དག་གིས་ཀྱང་འབྲོས་པར་བརྩམས་སོ། །དེ་དག་འབྲོས་པ་སེང་གེ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་འབྲོས། ་སྟག་དག་གིས་སྨྲས་པ། ་ཅལ་ཅལ་ཟེར་བ་བྱུང་ངོ ། །དེ་ནས་སེང་གེ་དེ་དག་གིས་ཀྱང་འབྲོས་པར་བརྩམས་སོ། །ཇི་ཙམ་ན་རི་དྲུང་དང་ཉེ་བ་ཞིག་ན་སེང་གེ་རལ་པ་ཅན་ཅོད་པན་ལྟ་བུ་དང་ལྡན་པ་ཞིག་འདུག་པ་དེས་སེང་གེ་དེ་དག་འབྲོས་པ་མཐོང་ནས་དེས་སྨྲས་པ། ་ཤེས་ལྡན་དག་ཁྱེད་ཅག་ཐམས་ཅད་ནི་སྡེར་མོའི་སྟོབས་ཅན་དང ། ་མཆེ་བའི་སྟོབས་ཅན་ཤ་སྟག་ཡིན་ན་ཅིའི་ཕྱིར་འབྲོས། ་སེང་གེ་དེ་དག་གིས་སྨྲས་པ། ཅལ་ཅལ་ཟེར་བ་བྱུང་ངོ ། །ཤེས་ལྡན་དག་ཅལ་ཅལ་ཟེར་བ་དེ་ག་ལས་བྱུང ། བདག་གིས་ཀྱང་ཅལ་ཅལ་ཟེར་བ་ག་ལས་བྱུང་མི་ཤེས་སོ། །སེང་གེ་དེས་སྨྲས་པ། ་ཤེས་ལྡན་དག་མ་འབྲོས་ཤིག་དང་ཅལ་ཅལ་ཟེར་བ་ག
7.199a
ལས་བྱུང་བ་བརྟག་པར་བྱའོ་ཞེས་དེས་སྟག་དག་ལ་སྨྲས་པ། ་ཁྱེད་ཅག་ལ་སུས་སྨྲས། སྟག་དག་གིས་སྨྲས་པ། ་གུང་དག་གིས་སོ། །དེས་གུང་དག་ལ་སྨྲས་པ། ཁྱེད་ཅག་ལ་སུས་སྨྲས། ་གུང་དག་གིས་སྨྲས་པ། དྲེད་དག་གིས་སོ། །དེས་དྲེད་དག་ལ་སྨྲས་པ། ་ཁྱེད་ཅག་ལ་སུས་སྨྲས། ་དྲེད་དག་གིས་སྨྲས་པ། ་དོམ་དག་གིས་སོ། །དེས་དོམ་དག་ལ་སྨྲས་པ། ་ཁྱེད་ཅག་ལ་སུས་སྨྲས། ་དོམ་དག་གིས་སྨྲས་པ། ་གླང་པོ་ཆེ་དག་གིས་སོ། །དེས་གླང་པོ་ཆེ་དག་ལ་སྨྲས་པ། ཁྱེད་ཅག་ལ་སུས་སྨྲས། ་གླང་པོ་ཆེ་དག་གིས་སྨྲས་པ། ་བསེ་དག་གིས་སོ། །དེས་བསེ་དག་ལ་སྨྲས་པ། ་ཁྱེད་ཅག་ལ་སུས་སྨྲས། ་བསེ་དག་གིས་སྨྲས་པ། མ་ཧེ་དག་གིས་སོ། །དེས་མ་ཧེ་དག་ལ་སྨྲས་པ། ་ཁྱེད་ཅག་ལ་སུས་སྨྲས། ་མ་ཧེ་དག་གིས་སྨྲས་པ། ་ཕག་དག་གིས་སོ། །དེས་ཕག་དག་ལ་སྨྲས་པ། ་ཁྱེད་ཅག་ལ་སུས་སྨྲས། ་ཕག་དག་གིས་སྨྲས་པ། ་རི་དགས་དག་གིས་སོ། །དེས་རི་དགས་དག་ལ་སྨྲས་པ། ཁྱེད་ཅག་ལ་སུས་སྨྲས། རི་དགས་དག་གིས་སྨྲས་པ། སྦྲེ་དག་གིས་སོ། །དེས་སྦྲེ་དག་ལ་སྨྲས་པ། ་ཁྱེད་ཅག་ལ་སུས་སྨྲས། ་སྦྲེ་དག་གིས་སྨྲས་པ། ་ཝ་དག་གིས་སོ། །དེས་ཝ་དག་ལ་སྨྲས་པ། ་ཁྱེད་ཅག་ལ་སུས་སྨྲས། ཝ་དག་གིས་སྨྲས་པ། ་རི་བོང་དག་གིས་སོ། །དེས་རི་བོང་དག་ལ་སྨྲས་པ། ་ཁྱེད་ཅག་ལ་སུས་སྨྲས། རི་བོང་དག་གིས་སྨྲས་པ། ་བདག་ཅག་གིས་འཇིགས་པ་དེ་མངོན་སུམ་དུ་མཐོང་གིས་ཚུར་ཤོག་དང་ཅལ་ཅལ་ཟེར་བ་དེ་ག་ལས་བྱུང་བ་བསྟན་པར་བྱའོ་ཞེས་དེ་དག་གིས་སེང་གེ་དེ་ཁྲིད་དེ་ཤིང་བིལ་བའི་ཚལ་དེ་བསྟན་ནས་ཅལ་ཅལ་ཟེར་བ་དེ་འདི་ནས་བྱུང་ངོ་ཞེས་སྨྲས་པ་དང ། ཇི་ཙམ་ན་ཤིང་བིལ་བའི་ཚལ་དེ་ནས་ཡང་བིལ་བ་ཞིག་མཚེའུ་དེའི་ནང་དུ་རྡིབ་པ་ན་སྒྲ་ཅལ་ཅེས་ཟེར་བ་བྱུང་ནས་སེང་གེ་དེས་སྨྲས་པ། ་ཤེས་ལྡན་དག་འདི་ནི་ཅལ་བ་ཡིན་གྱིས་མ་འཇིགས་ཤིག་ཅེས་ཐམས་ཅད་དབུགས་ཕྱུང་བ་དང་ལྷས་ཚིགས་སུ་བཅད་པས་སྨྲས་པ། ་རབ་ཏུ་གྲགས་པས་འགྲོ་མི་བྱ། །
7.199b
བདག་ཉིད་ཀྱིས་ནི་མངོན་སུམ་བྱ། །བིལ་བ་རྡིབ་པས་ནགས་ཚལ་ནི། །རྐང་བཞི་མེད་པར་བྱས་ལ་ལྟོས། །དགེ་སློང་དག་དེའི་ཚེ་དེའི་དུས་ན་སེང་གེ་རལ་པ་ཅན་ཅོད་པན་ལྟ་བུ་དང་ལྡན་པ་གང་གིས་རི་དགས་ཀྱི་ཚོགས་ཆེན་པོ་སྐྲག་པ་ཕྱོགས་བཞིར་བྲོས་པ་དག་དབུགས་ཕྱུང་བར་གྱུར་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་རི་བོང་དྲུག་པོ་གང་དག་གིས་རི་དགས་ཀྱི་ཚོགས་ཆེན་པོ་སྐྲག་པར་བྱས་པ་དེ་དག་ནི་དྲུག་སྡེ་དག་ཡིན་ཏེ། ་དགེ་སློང་དག་དེ་ལྟར་འདས་པའི་དུས་ན་ཡང་འདི་དག་གིས་རི་དགས་ཀྱི་ཚོགས་ཆེན་པོ་སྐྲག་པར་བྱས་ཏེ་ཕྱོགས་བཞིར་བྲོས་པ་ངས་དབུགས་ཕྱུང་ལ་ད་ལྟར་ཡང་འདི་དག་གིས་དོན་འཐུན་སྐྲག་པར་བྱས་ཏེ་ཕྱོགས་བཞིར་བྲོས་པ་ངས་དབུགས་ཕྱུང་ངོ ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ་ཀུན་དགའ་བོ་སོང་ལ་དོན་འཐུན་ལ་ཁྱེད་ཅག་ལས་གང་ཡང་དོན་འཐུན་གྱི་མདུན་དུ་མ་འགྲོ་ཤིག་།དེ་བཞིན་གཤེགས་པ་ཉིད་དོན་འཐུན་གྱི་མདུན་དུ་གཤེགས་སོ་ཞེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དོན་འཐུན་གྱི་གན་དུ་སོང་ཏེ་སྨྲས་པ། ་ཤེས་ལྡན་དག་དེ་བཞིན་གཤེགས་པས་བཀའ་སྩལ་པ། ་ཁྱེད་ཅག་ལས་གང་ཡང་དོན་འཐུན་གྱི་མདུན་དུ་མ་འགྲོ་ཤིག་།དེ་བཞིན་གཤེགས་པ་ཉིད་དོན་འཐུན་གྱི་མདུན་དུ་གཤེགས་སོ་ཞེས་བྱུང་ངོ་ཞེས་བསྒོའོ། །དེ་ནས་དེ་བཞིན་གཤེགས་པ་ཉིད་དོན་འཐུན་གྱི་མདུན་དུ་གཤེགས་པ་དང ། ་ཇི་ཙམ་ན་སེང་གེ་རལ་པ་ཅན་ཅོད་པན་ལྟ་བུ་དང་ལྡན་པ་ཞིག་རྔམ་སྟེ་བཅོམ་ལྡན་འདས་ཀྱི་སྤྱན་སྔར་འདོར་ཅིང་བྱུང་བ་དང ། ་བཅོམ་ལྡན་འདས་ཀྱིས་ཕྱག་གཡས་པའི་མཐིལ་དུ་སེང་གེ་རལ་པ་ཅན་ཅོད་པན་ལྟ་བུ་དང་ལྡན་པ་ལྔ་སྤྲུལ་པ་མཛད་ནས་དེས་དེ་དག་གི་དྲི་ཚོར་ནས་སྐྲག་སྟེ
7.200a
འབྲོས་པར་བརྩམས་པ་དང ། ་བཅོམ་ལྡན་འདས་ཀྱིས་ཕྱོགས་བཞིར་མེ་སྤྲུལ་པ་མཛད་དོ། །སེང་གེ་དེས་ཕྱོགས་བཞིར་འབར། ་རབ་ཏུ་འབར། ་ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ཅིང་འབར་བར་མཐོང་ཞིང་བཅོམ་ལྡན་འདས་ཉིད་ཀྱི་ཞབས་ཀྱི་དྲུང་འབའ་ཤིག་ན་ཞི་བར་མཐོང་ནས་དེས་བཅོམ་ལྡན་འདས་ཀྱི་ཞབས་གཉིས་ལ་གཏུགས་པ་དང ། ་བཅོམ་ལྡན་འདས་ཀྱི་ཕྱག་འཁོར་ལོ་དང ། ་བཀྲ་ཤིས་དང ། ་གཡུང་དྲུང་དང ། ་དྲ་བས་འབྲེལ་བ། ་བསོད་ནམས་བརྒྱ་ཕྲག་དུ་མ་ལས་འཁྲུངས་པ། ་འཇིགས་པ་རྣམས་དབུགས་འབྱིན་པར་མཛད་པས་མགོ་ལ་བྱུགས་ཏེ་བཀའ་སྩལ་པ། ་བཞིན་བཟང་ཁྱོད་སྔོན་གྱི་ཉེས་པར་སྤྱད་པ་དང་ལྡན་པས་དུད་འགྲོའི་སྐྱེ་གནས་སུ་སྐྱེས་ཏེ། ཁྱོད་ད་ལྟར་དྲག་ཤུལ་ཅན་ལག་པ་དམར་བསྣུན་པ་དང་རབ་ཏུ་སྣུན་པ་ལ་ཞུགས་པ། ་གཞན་གྱི་སྲོག་འཕྲོག་པ། ་གཞན་གྱི་སྲོག་གཅོད་པས་འཚོ་བར་བྱེད་པ་ཡིན་པས་ཁྱོད་འདི་ནས་ཤི་འཕོས་པའི་འགྲོ་བ་ནི་ཅིར་འགྱུར། ་སྐྱེ་བ་ནི་ཅིར་འགྱུར། ་ཚེ་ཕྱི་མ་ནི་ཅིར་འགྱུར། ་བཞིན་བཟང་འདི་ལྟར་འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་ཚིག་གསུམ་གྱི་ཆོས་བསྟན་ནས་བཞིན་བཟང་ཁྱོད་ང་ལ་སེམས་མངོན་པར་དད་པར་གྱིས་ཤིག་དང ། ་དེས་དུད་འགྲོའི་སྐྱེ་གནས་ཀྱི་འདོད་ཆགས་དང་བྲལ་བར་འགྱུར་རོ་ཞེས་བཀའ་སྩལ་ཏོ། །དགེ་སློང་དག་སེང་གེ་དེ་ལ་རེག་པར་བྱེད་པ་ན་དེ་སྒྲ་འབྱིན་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ་དགེ་སློང་དག་ཁྱེད་སེང་གེ་ལ་མ་རེག་ཤིག་།དེ་ཅིའི་ཕྱིར་ཞེ་ན། ་དགེ་སློང་དག་སེང་གེ་ནི་བཟོད་པར་དཀའ་བ་དང ། ་བསྙེན་པར་དཀའ་བ་ཡིན་པའི་ཕྱིར་རོ། །དགེ་སློང་དག་དེ་ལྟ་བས་ན་དགེ་སློང་གིས་སེང་གེ་ལ་རེག་པར་མི་བྱའོ། །དགེ་སློང་སེང་གེ་ལ་རེག་པར་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་རི་དགས་ཀྱི་རྒྱལ་པོ་སེང་གེ་དེ་འདི་སྙམ་དུ་སེམས
7.200b
ཏེ། གང་གི་ཕྱིར་བདག་གིས་བཅོམ་ལྡན་འདས་ཀྱི་སྤྱན་སྔར་ཚིག་གསུམ་གྱི་ཆོས་ཐོས་ནས་ཟས་ཟ་བར་བྱེད་པ་ནི་བདག་གི་ཚུལ་དང་འཐུན་པ་མ་ཡིན་ནོ་སྙམ་ནས་དེ་ཟས་མི་ཟ་བ་ལ་ཞུགས་སོ། །དུད་འགྲོའི་སྐྱེ་གནས་སུ་སྐྱེས་པ་རྣམས་ཀྱི་མེ་ནི་རྣོ་བ་ཡིན་པས་དེ་བཀྲེས་པས་ཉམ་དམས་པ་ན་བཅོམ་ལྡན་འདས་ལ་སེམས་མངོན་པར་དད་པར་བྱས་ནས་དུས་ལ་བབ་པ་དང ། ་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུ་འམ། ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། ་གང་ནས་ཤི་འཕོས་པ་དང ། ་གང་དུ་སྐྱེས་པ་དང ། ་ལས་གང་གིས་སྐྱེས་པའོ། །དེ་དུད་འགྲོ་རྣམས་ཀྱི་ནང་ནས་ཤི་འཕོས་པ་དང ། རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པ་དང ། བཅོམ་ལྡན་འདས་ལ་སེམས་མངོན་པར་དད་པར་བྱས་པས་སྐྱེས་པར་མཐོང་ངོ ། །དེ་ནས་སྔོན་སེང་གེ་ལྷའི་བུ་དེ་འདི་སྙམ་དུ་སེམས་ཏེ། ་གང་གི་ཕྱིར་བདག་ཡོངས་སུ་གནས་པ་བསྟེན་ཏེ་བཅོམ་ལྡན་འདས་ལ་བལྟ་བ་དང ། ་བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་འཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་སྔོན་སེང་གེ་ལྷའི་བུ་རྣ་ཆ་གདུབ་འཁོར་གཡོ་ཞིང་དྲི་མ་མེད་པ་ཐོགས་ཏེ། ་དོ་ཤལ་དང ། ་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང ། ་པད་མ་དང ། ་ཀུ་མུ་ད་དང ། ་པད་མ་དཀར་པོ་དག་གིས་ཐུ་བ་བཀང་སྟེ། ་ཁ་དོག་ཤིན་དུ་འདས་པས་མཚན་མོ་ལ་བབ་པ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ། ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང ། འདི་ལྟར་སྔོན་སེང་གེ་ལྷའི་བུའི་ཁ་དོག་གི་མཐུས་གྲོང་མེད་པའི་དགོན་པའི་གནས་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྔོན་སེང་གེ་ལྷའི་བུའི་བསམ་པ་དང ། བག་ལ་ཉལ
7.201a
དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་སྔོན་སེང་གེ་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། ་མས་ཀྱང་མ་བགྱིས། ་རྒྱལ་པོས་ཀྱང་མ་བགྱིས། ་ལྷ་རྣམས་ཀྱིས་ཀྱང་མ་བགྱིས། ་སྔོན་གྱི་ཕ་མེས་དག་གིས་ཀྱང་མ་བགྱིས། ་དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། ་མཛའ་བཤེས་དང ། ་རྩ་ལག་གི་ཚོགས་ཀྱི་ཀྱང་མ་བགྱིས་ཏེ། ་ཁྲག་དང ། མཆི་མའི་རྒྱ་མཚོ་ནི་བསྐམས། ་རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། ་མཐོ་རིས་དང་ཐར་པའི་སྒོ་དག་ནི་ཕྱེ། ་སེམས་ཅན་དམྱལ་བ་དང ། ་དུད་འགྲོ་དང ། ་ཡི་དགས་དག་ནས་ནི་རྐང་པ་ཕྱུང ། ་ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ་ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་དུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་འགྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུང་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང ། །དེ་ནས་སྔོན་སེང་གེ་ལྷའི་བུ
7.201b
ཚོང་པ་ཁེ་སྤོགས་རྙེད་པ་ལྟ་བུ་དང ། ་ཞིང་པ་ལོ་ཐོག་འབྱོར་པ་ལྟ་བུ་དང ། ་དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང ། ་ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ་ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ ། །དགེ་སློང་དག་ནམ་གྱི་ཆ་སྟོད་དང ། ་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པ་དེ་དག་གིས་བཅོམ་ལྡན་འདས་ཀྱི་སྤྱན་སྔར་སྣང་བ་རྒྱ་ཆེན་པོས་ཁྱབ་པར་གྱུར་པ་མཐོང་ངོ ། །མཐོང་ནས་ཐེ་ཚོམ་ཟ་བའི་ཡིད་ཀྱིས་མཚན་མོ་ནམ་ནངས་པ་དང་བཅོམ་ལྡན་འདས་ལ་ཞུས་པ། ་བཅོམ་ལྡན་འདས་ཅི་ལགས། ་མདང་སུམ་མི་མཇེད་ཀྱི་བདག་པོ་ཚངས་པ་འམ། ་ལྷའི་དབང་པོ་བརྒྱ་བྱིན་ནམ། ་འཇིག་རྟེན་སྐྱོང་བ་བཞི་འམ། ་ལྷའི་བུ་འབྱོར་པ་ཆེ་བ་མཐུ་ཆེ་བ་གཞན་ཞིག་བཅོམ་ལྡན་འདས་ལ་བལྟ་བའི་སླད་དུ་ཉེ་བར་མཆིས་སམ། ་བཅོམ་ལྡན་འདས་ཀྱིས་བཀའ་སྩལ་པ། ་དགེ་སློང་དག་མི་མཇེད་ཀྱི་བདག་པོ་ཚངས་པ་ང་ལ་བལྟ་བའི་ཕྱིར་ཉེ་བར་འོངས་པ་ཡང་མ་ཡིན། ་ལྷའི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ཡང་མ་ཡིན། ་ལྷའི་བུ་འབྱོར་པ་ཆེ་བ། ་མཐུ་ཆེ་བ་གཞན་ཡང་མ་ཡིན་ཏེ། ་དགེ་སློང་དག་འདི་ལྟར་ཁྱེད་ཀྱིས་ངས་རི་དགས་ཀྱི་རྒྱལ་པོ་སེང་གེ་གང་ལ་ཚིགས་གསུམ་གྱི་ཆོས་བསྟན་པ་དེ་མཐོང་ངམ་བཅོམ་ལྡན་འདས་མཐོང་ངོ ། །དགེ་སློང་དག་དེ་དེ་ནས་ཤི་འཕོས་ཏེ་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་ནས་དེ་མདང་སུམ་ངའི་གན་དུ་འོངས་ཏེ། ་ངས་དེ་ལ་ཆོས་བསྟན་ནས་དེས་བདེན་པ་མཐོང་སྟེ་རང་གི་གནས་སུ་སོང་ངོ ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། ་བཙུན་པ་སྔོན་སེང་གེ་ལྷའི་བུས་ལས་ཅི་བགྱིས་ན་ལས་དེའི་རྣམ་པར་སྨིན་པས་སེང་གེ་རྣམས་ཀྱི་ནང་དུ་སྐྱེས་པར་གྱུར། ་ལས་ཅི་བགྱིས་ན་ལས་དེའི་རྣམ་པར་སྨིན་པས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པར་གྱུར། ་ལས་ཅི་བགྱིས་ན་ལས་དེའི
7.202a
རྣམ་པར་སྨིན་པས་བདེན་པ་མཐོང་ནས་རང་གི་གནས་སུ་མཆིས། ་བཅོམ་ལྡན་འདས་ཀྱིས་བཀའ་སྩལ་པ། ་དགེ་སློང་དག་སྔོན་སེང་གེ་ལྷའི་བུ་ཉིད་ཀྱིས་ལས་ཚོགས་རྙེད་པ། ་རྐྱེན་ཡོངས་སུ་བསྒྱུར་བ། ་འོད་པ་བཞིན་དུ་ཉེ་བར་གནས་པ། ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་སྔོན་སེང་གེ་ལྷའི་བུས་ལས་བྱས་ཤིང་བསགས་པ་གཞན་སུ་ཞིག་གིས་ཉམས་སུ་མྱོང་བར་འགྱུར། ་དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ་ཆུའི་ཁམས་ལ་མི་འགྱུར། ་མེའི་ཁམས་ལ་མི་འགྱུར། ་རླུང་གི་ཁམས་ལ་མི་འགྱུར་ཏེ། ་འདི་ལྟར་ལས་དགེ་བ་དང ། ་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ་ཁམས་དང་སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། ་བདེ་བར་གཤེགས་པ། ་འཇིག་རྟེན་མཁྱེན་པ། ་སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། ་དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་འཇིག་རྟེན་དུ་བྱུང་བར་མ་གྱུར་པ་དེའི་ཚེ་བཱ་རཱ་ཎ་སཱི་ན་བྲམ་ཟེ་འཁོར་ཤིན་དུ་མང་བ། ་རིག་བྱེད་དང ། ་རིག་བྱེད་ཀྱི་ཡན་ལག་གི་ཕ་རོལ་དུ་སོན་པ། ་ཡུལ་ཐ་དད་པ་ན་གནས་པའི་བྲམ་ཟེ་རྣམས་ཀྱི་སྟོན་པར་གྱུར་པ་ཞིག་འདུག་པ་དེ་འཇིག་རྟེན་ཐམས་ཅད་ཀྱིས་ཤིན་དུ་བཀུར་སྟིར་བྱས།
7.202b
བླ་མར་བྱས། ་རྗེད་པར་བྱས། ་མཆོད་པར་བྱས་སོ། །གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་འཇིག་རྟེན་དུ་བྱུང་བར་གྱུར་པ་དེའི་ཚེ་ན་དེ་ལ་ཕྱིན་ཅད་འགའ་ཡང་བཀུར་སྟིར་མི་བྱེད། ་བླ་མར་མི་བྱེད། ་རྗེད་པར་མི་བྱེད། ་མཆོད་པར་མི་བྱེད་དོ། །ཡང་དག་པར་རྫོགས་པའི་སངས་རྒྱས་འོད་སྲུང་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཆོས་སྟོན་པར་མཛད་པ་ན་བྲམ་ཟེ་འཁོར་ཤིན་དུ་མང་པོ་དེ་ཕྱོགས་དེ་ནས་སོང་བ་དང ། ་བྲམ་ཟེ་དེས་ཡང་དག་པར་རྫོགས་པའི་སངས་རྒྱས་འོད་སྲུང་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཆོས་སྟོན་པ་མཐོང་ངོ ། །མཐོང་ནས་ཀྱང་སྨྲས་པ། ་དགེ་སྦྱོང་འདི་ནི་སེང་གེ་བཞིན་དུ་འཇིགས་པ་མེད་པ་དང ། ་བག་ཚ་བ་མེད་པར་འཁོར་ལ་ཆོས་སྟོན་པར་བྱེད་ལ། ་ཉན་ཐོས་འདི་དག་ནི་རི་དགས་ཕྲ་མོ་དག་བཞིན་དུ་ཆོས་ཉན་པར་བྱེད་དོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས་དེ་གསན་ཏོ། །གསན་ནས་ཀྱང་བྲམ་ཟེ་དེ་ལ་བཀའ་སྩལ་པ། ་བྲམ་ཟེ་ཁྱོད་ཀྱིས་ངག་གི་ལས་རྩུབ་པོ་སྨྲས་ཀྱིས། ་ཉེས་པ་ཉེས་པའི་སྒོ་ནས་ཤོགས་ཤིག་དང ། དེ་ལྟ་ན་ཁྱོད་ཀྱི་ལས་དེ་སྲབ་པ་ཉིད་དང ། ་ཡོངས་སུ་ཟད་པ་དང ། ་ཡོངས་སུ་མཐར་ཐུག་པར་འགྱུར་རོ། །བྲམ་ཟེ་དེས་ཉེས་པ་ཉེས་པའི་སྒོ་ནས་བཤགས་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྱབས་སུ་འགྲོ་བ་དང་བསླབ་པའི་གཞི་དག་བླངས་སོ། །དགེ་སློང་དག་དེའི་ཚེ་དེའི་དུས་ན་གང་གི་ཡང་དག་པར་རྫོགས་པའི་སངས་རྒྱས་འོད་སྲུང་ལ་སེང་གེ་ཞེས་བརྗོད་པས་ཀུན་དུ་སྤྱད་པ་གང་ཡིན་པ་དེ་ནི་སྔོན་སེང་གེ་ལྷའི་བུ་འདི་ཉིད་ཡིན་ཏེ། ་དེའི་ཚེ་འདི་ཡང་དག་པར་རྫོགས་པའི་སངས་རྒྱས་འོད་སྲུང་ལ་སེང་གེ་ཞེས་བརྗོད་པས་ཀུན་ཏུ་སྤྱད་པའི་ལས་དེའི་རྣམ་པར་སྨིན་པས་ཚེ་རབས་ལྔ་བརྒྱར་སེང་གེ་རྣམས་ཀྱི་ནང་དུ་སྐྱེས་པར་གྱུར་ནས་ད་ལྟར་གྱི་བར་དུ་ཡང་སེང་གེ་རྣམས་ཀྱི་ནང་དུ་ཡང་སྐྱེས་པར་གྱུར་ཏོ། །འདིས་ང་ལ་སེམས་མངོན་པར་དད་པར་བྱས་པའི་ལས་དེའི་རྣམ་པར་སྨིན་པས་ནི་ཤི་ཞིང་དུས་ལ་བབ་ནས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་སོ། །འདིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན
7.203a
སྔར་སྐྱབས་སུ་འགྲོ་བ་དང ། ་བསླབ་པའི་གཞི་དག་བླངས་པའི་ལས་དེའི་རྣམ་པར་སྨིན་པས་ནི་ངའི་སྤྱན་སྔར་བདེན་པ་དག་མཐོང་ཞིང་དེས་བདེན་པ་དག་མཐོང་ནས་རང་གི་གནས་སུ་ཕྱིན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ་ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང ། ་འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། ་དགེ་སློང་དག་ཁྱོད་ཀྱིས་དེ་ལྟར་བསླབ་པར་བྱའོ། །དེ་ནས་བཅོམ་ལྡན་འདས་མ་ག་དྷ་དག་ཏུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་དུས་ན་དྲུག་སྡེ་དག་གིས་མེས་གཞན་ལ་གཏོང་བས་རྩེ་བར་བྱེད་ཅིང ། ་ཟླ་བ་ཡང་བྱེད། ་ཉི་མ་ཡང་བྱེད། ་མགལ་མེའི་འཁོར་ལོ་ཡང་བྱེད་ནས་གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་མེས་གཞན་ལ་གཏོང་བས་རྩེ་བར་བྱེད། ་ཟླ་བ་ཡང་བྱེད། ་ཉི་མ་ཡང་བྱེད། མགལ་མེའི་འཁོར་ལོ་ཡང་བྱེད་དེ། ་བྱིས་པ་ཁྱེའུ་འདི་དག་ཀྱང་མེས་གཞན་ལ་གཏོང་བས་རྩེ་བར་བྱེད་ཅིང ། ་ཟླ་བ་ཡང་བྱེད། ་ཉི་མ་ཡང་བྱེད། ་མགལ་མེའི་འཁོར་ལོ་ཡང་བྱེད་ན། ་ཤེས་ལྡན་དག་བྱིས་པ་ཁྱེའུ་འདི་དག་དང ། ཤཱཀྱའི་བུའི་དགེ་སྦྱོང་འདི་དག་ལ་བྱེ་བྲག་ནི་ཅི་ཡོད། ་བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ་ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ་གླེང་གཞི་འདི་དང ། ་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ
7.203b
ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་མེས་གཞན་ལ་གཏོང་བས་རྩེ་བར་བྱེད་ཅིང ། ་ཟླ་བ་ཡང་བྱེད། ་ཉི་མ་ཡང་བྱེད། ་མགལ་མེའི་འཁོར་ལོ་ཡང་བྱེད་པ་བདེན་ནམ། ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། ་རྗེས་སུ་འཐུན་པ་མ་ཡིན་པ། ་རུང་བ་མ་ཡིན་པ། ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། ་དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ་ཡང་དགེ་སློང་གང་མེ་ལ་རེག་གམ། ་རེག་དུ་འཇུད་ན་ལྟུང་བྱེད་དོ། །ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །དགེ་སློང་དག་ཕྱིན་ཅད་དེ་བཞིན་གཤེགས་པའི་དབུ་སྐྲ་དང་སེན་མོའི་མཆོད་རྟེན་དག་ལ་བདུག་སྤོས་ཀྱང་གསོལ་བར་མི་བྱེད། ་མར་མེ་ཡང་སྦར་བར་མི་བྱེད། ་སློབ་དཔོན་དང ། མཁན་པོ་དག་ལ་ཡང་ཆུ་དྲོན་འབུལ་བར་མི་བྱེད། ་ལྷུང་བཟེད་ཀྱི་ལས་ཀྱང་མི་བྱེད། ཚོན་གྱི་ལས་ཀྱང་མི་བྱེད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཀུན་དགའ་བོ་ཅིའི་ཕྱིར་དགེ་སློང་དག་ཕྱིན་ཅད་དེ་བཞིན་གཤེགས་པའི་དབུ་སྐྲ་དང་སེན་མོའི་མཆོད་རྟེན་དག་ལ་བདུག་སྤོས་ཀྱང་གསོལ་བར་མི་བྱེད། ་མར་མེ་ཡང་སྦར་བར་མི་བྱེད། ་སློབ་དཔོན་དང་མཁན་པོ་དག་ལ་ཡང་ཆུ་དྲོན་འབུལ་བར་མི་བྱེད། ་
7.204a
ལྷུང་བཟེད་ཀྱི་ལས་ཀྱང་མི་བྱེད། ་ཚོན་གྱི་ལས་ཀྱང་མི་བྱེད། ་བཙུན་པ་བཅོམ་ལྡན་འདས་ཀྱིས་འདི་ལྟར་ཡང་དགེ་སློང་གང་མེ་ལ་རེག་གམ་རེག་ཏུ་འཇུད་ན་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་པས་དགེ་སློང་དེ་དག་སླན་ཅད་དེ་བཞིན་གཤེགས་པའི་དབུ་སྐྲ་དང ། ་སེན་མོའི་མཆོད་རྟེན་དག་ལ་བདུག་སྤོས་ཀྱང་གསོལ་བར་མི་བགྱིད། ་མར་མེ་ཡང་སྦར་བར་མི་བགྱིད། སློབ་དཔོན་དང་མཁན་པོ་དག་ལ་ཡང་ཆབ་དྲོན་འབུལ་བར་མི་བགྱིད། ་ལྷུང་བཟེད་ཀྱི་ལས་ཀྱང་མི་བགྱིད། ་ཚོན་གྱི་ལས་ཀྱང་མི་བགྱིད་དོ། །ཀུན་དགའ་བོ་དེ་ལྟ་བས་ན་དུས་བྱིན་གྱིས་བརླབ་པར་བྱའོ། །བཅོམ་ལྡན་འདས་ཀྱིས་དུས་བྱིན་གྱིས་བརླབ་པར་བྱའོ་ཞེས་བཀའ་སྩལ་ནས། ་དེ་དག་གིས་ཇི་ལྟར་དུས་བྱིན་གྱིས་བརླབ་པར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ་སྟོན་པ་དང ། ་ཆོས་དང ། ་དགེ་འདུན་དང ། ་སློབ་དཔོན་དང ། ་མཁན་པོ་དང ། ་ཚངས་པ་མཚུངས་པར་སྤྱོད་པ་རྣམས་ཀྱི་ཆོས་དང་ལྡན་པའི་བྱ་བའི་དོན་ཉིད་ཀྱིས་དུས་བྱིན་གྱིས་བརླབ་པར་བྱའོ། །དགེ་སློང་དག་ལྷུང་བཟེད་ཀྱི་ལས་དང ། ་ཚོན་གྱི་ལས་དག་བྱེད་པ་ན་ཡང་དང་ཡང་དུ་བརྗེད་ངས་པས་མེ་ལ་རེག་ནས་དེ་དག་འགྱོད་པ་སྐྱེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། ་བཅོམ་ལྡན་འདས་ཀྱིས་བཀའ་སྩལ་པ། དུས་ཡུན་རིང་དུ་བྱིན་གྱིས་བརླབ་པར་བྱའོ། །དགེ་སློང་ཞིག་ན་ཞིང་རླུང་ནད་ཅན་དུ་གྱུར་ནས་དེ་སྨན་པའི་གན་དུ་སོང་སྟེ་དྲིས་པ། ་བཞིན་བཟང་ཁོ་བོ་ལ་སྨན་སྟོན་ཅིག་།འཕགས་པ་ཞུགས་བསྟེན་ཅིག་།བཞིན་བཟང་བཅོམ་ལྡན་འདས་ཀྱིས་བསླབ་པའི་གཞི་བཅའ་བར་མཛད་དོ། །འཕགས་པ་ཁྱོད་ཀྱི་སྟོན་པ་ནི་ཐུགས་རྗེ་ཅན་ལགས་པས་འདི་ལྟར་དེ་ཉིད་རྐྱེན་དུ་མཛད་ནས་རྗེས་སུ་གནང་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས། བཅོམ་ལྡན་འདས་ལ་གསོལ་པ་དང ། ་བཅོམ་ལྡན་འདས་ཀྱིས་བཀའ
7.204b
སྩལ་པ། ་དེ་ལྟ་བས་ན་ན་བའི་དུས་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། ་བསླབ་པ་ལ་གུས་པ་དང ། ་བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། ་དེའི་ཤས་ཆེ་བ་དང ། ་དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། ་འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱའ་སྟེ། ་ཡང་དགེ་སློང་གང་མི་ན་བར་བདག་ཉིད་ཀྱི་ཕྱིར་མེ་ལ་རེག་གམ། ་རེག་ཏུ་འཇུད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །མི་ན་བར་ཞེས་བྱ་བ་ནི་ན་བ་བཞག་ཏེའོ། །བདག་ཉིད་ཀྱི་ཕྱིར་ཞེས་བྱ་བ་ནི་བདག་ཉིད་ཀྱི་ཆེད་དུའོ། །མེ་ལ་རེག་གམ་ཞེས་བྱ་བ་ནི་བདག་ཉིད་ཀྱིས་སོ། །རེག་དུ་འཇུད་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། ་དུད་འགྲོ་དང ། ་ཡི་དགས་ངན་སོང་དང ། ་ངན་འགྲོ་དང ། ་ལོག་པར་ལྟུང་བ་དག་ཏུ་སྲེག་པར་བྱེད། ་འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་དགེ་སློང་གིས་མེས་གཞན་ལ་གཏོང་བས་རྩེ་བར་བྱེད་ན་ལྟུང་བྱེད་དུ་འགྱུར་རོ། །ཟླ་བ་བྱེད་ན་ལྟུང་བྱེད་དུ་འགྱུར་རོ། །ཉི་མ་བྱེད་ན་ལྟུང་བྱེད་དུ་འགྱུར་རོ། །མགལ་མེའི་འཁོར་ལོ་བྱེད་ན་ལྟུང་བྱེད་དུ་འགྱུར་རོ། །དགེ་སློང་མེ་སྦར་བར་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབས་པར་སྦར་བར་བྱེད་ན་ལྟུང་བྱེད་དུ་འགྱུར་རོ། །དགེ་སློང་མེ་གསོད་པར་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབས་པར་གསོད་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་བུད་ཤིང་སྐུལ་བར་བྱེད་དམ། བུད་ཤིང་འདྲེན་པར་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན
7.205a
གྱིས་མ་བརླབས་པར་བུད་ཤིང་སྐུལ་བར་བྱེད་དམ། འདྲེན་པར་བྱེད་ན་ལྟུང་བྱེད་དུ་འགྱུར་རོ། །དགེ་སློང་མདག་མ་སྤུང་བར་བྱེད་དམ། མདག་མ་འདྲུ་བར་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབས་པར་མདག་མ་སྤུང་བར་བྱེད་དམ། འདྲུ་བར་བྱེད་ན་ལྟུང་བྱེད་དུ་འགྱུར་རོ། །དགེ་སློང་མེ་མ་མུར་སྤུང་བར་བྱེད་དམ། འདྲུ་བར་བྱེད་ན་དེས་དུས་བྱིན་གྱིས་བརླབས་པར་བྱའོ། །དུས་བྱིན་གྱིས་མ་བརླབ་པར་མེ་མ་མུར་སྤུང་བར་བྱེད་དམ། འདྲུ་བར་བྱེད་ན་ཉེས་བྱས་སུ་འགྱུར་རོ། །དགེ་སློང་མེར་སྐྲ་དང ། སྤུ་དང ། རུས་པ་དང ། སེན་མོ་དག་འཇུད་ན་ཉེས་བྱས་སུ་འགྱུར་རོ། །དགེ་སློང་མེར་མཆིལ་མ་དང ། སྣབས་དང ། སྐྱུགས་པ་དང ། རླུགས་པ་དག་འཇུད་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མེ་ལ་རེག་པའི་ལྟུང་བྱེད་དེ་ལྔ་བཅུ་རྩ་གཉིས་པ་རྫོགས་སྷོ།། ་་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་བདུན་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་པ་དང ། ཚེ་དང་ལྡན་པ་འདུན་པ་ནི་ཀཽ་ཤམྦིར་སོང་སྟེ་ཡིད་དལ་དུ་འདུག་པ་དང ། འགྲོ་མགྱོགས་དང ། ནབ་སོ་གཉིས་དུས་ལ་བབ་པ་དང ། དགའ་བོ་དང ། ཉེ་དགའ་གཉིས་ནི་དགེ་འདུན་གྱི་ནང་ན་གནས་པ་དེའི་ཚེ་ན་བཅུ་བདུན་སྡེ་དག་གདུག་པ་དང ། ཕ་རོལ་གནོན་པར་གྱུར་ཅིང ། མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་ཡང་ཡིན་པས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བརྩམས་ཏེ། ཇི་ལྟར་དགའ་བོ་དང ། ཉེ་དགའ་གཉིས་ཀྱི་ཐོ་བཙམས་པ་ལྟར་ཡང་གཞན་དག་གིས་ཐོ་མ་བཙམས་ལ། ཇི་ལྟར་ཉེ་དགས་ཐོ་བརྩམས་པ་ལྟར
7.205b
ཡང་དགའ་བོས་ཐོ་མ་བརྩམས་ཀྱིས་ཚུར་ཤོག་།དེ་གནས་ནས་དབྱུངས་བའི་ལས་བྱའོ། །དེ་ན་གཅིག་གིས་སྨྲས་པ། ཕུ་ནུ་བོ་དག་དེའི་ཕུ་ནུ་བོ་དགའ་བོ་རྩོད་པ་ལ་མཁས་པས་བདག་ཅག་གིས་ཉེ་དགའ་གནས་ནས་དབྱུང་བའི་ལས་བྱ་བར་མི་ནུས་སོ། །དེ་བྲེལ་བ་སྐྱེད་པར་བྱའོ་ཞེས་དེ་དག་དགའ་བོའི་གན་དུ་སོང་སྟེ་སྨྲས་པ། གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ། གནས་བརྟན་གྱིས་ཆོས་གོས་དག་དྲི་མ་ཅན་དུ་གྱུར་ཏོ། །བུ་དག་ཁོ་བོ་རྒས་པར་གྱུར་པས་དགེ་སློང་ལྷན་ཅིག་གནས་པ་དང ། ཉེ་གནས་དག་གིས་ཀྱང་རྒས་པའི་ཕྱིར་བརྙས་ཏེ་ཕྱིན་ཆད་ཆོས་གོས་ཀྱི་ལས་བྱེད་དུ་མི་བཏུབ་བོ། །བདག་ཅག་གིས་གནས་བརྟན་གྱི་ཆོས་གོས་དག་བཀྲུ་བར་བགྱི་ཡིས་ཆོས་གོས་དག་ཚུར་སྩོལ། དགའ་བོས་བཅུ་བདུན་སྡེ་དག་ལ་ཆོས་གོས་དག་བྱིན་ནོ། །དེ་དག་གིས་ཡང་སྨྲས་པ། གནས་བརྟན་ཆོས་གོས་དག་གཅིག་ཅར་བཀྲུས་ཆོས་གོས་ཐམས་ཅད་ཚུར་སྩོལ། དགའ་བོ་བརྙང་རྙིང་དག་གྱོན་ཏེ་ཆོས་གོས་ཐམས་ཅད་བཅུ་བདུན་སྡེ་དག་ལ་བྱིན་ནོ། །བཅུ་བདུན་སྡེ་དག་གིས་ཆོས་གོས་དེ་དག་འགྱུར་བྱེད་ཀྱིས་བཙལ་ནས་གནས་མལ་བཤམས་ཏེ། གཎ་ཌཱི་བརྡུངས་ནས་དགའ་བོའི་གན་དུ་སོང་ཏེ་སྨྲས་པ། གནས་བརྟན་དགེ་འདུན་གྱི་བྱ་བ་ཅུང་ཞིག་མཆིས་ཏེ། གཎ་ཌཱི་བརྡུངས་ཀྱིས་ཚུར་སྤྱོན། དགའ་བོས་སྨྲས་པ། བུ་དག་ཁོ་བོ་འདི་འདྲ་བའི་གནས་སྐབས་ཀྱིས་དགེ་འདུན་གྱི་ནང་དུ་ཇི་ལྟར་འགྲོ་བར་བྱ། དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་འབུལ་ལོ། །དེ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་དགེ་སློང་གླེང་བ་པོ་རྒན་པའི་མཐའ་ལོགས་སུ་འདུག་སྟེ་ཉེ་དགའ་ལ་སྨྲས་པ། བཙུན་པ་ཉེ་དགའ་ཁྱོད་ཀྱིས་བཅུ་བདུན་སྡེ་དག་གི་ལྟོ་དྲལ་ཏེ་རྒྱུ་མ་དག་གིས་རྒྱལ་བྱེད་ཀྱི་ཚལ་བསྐོར་བར་བྱའོ་ཞེས་བྱ་བ་དེ་ལྟ་བུའི་ཚིག་སྨྲས་པ་གང་ཡིན་པ་དེ་དྲན་ནམ།
7.206a
ཚེ་དང་ལྡན་པ་དག་རྨ་སོས་པ་དག་དྲལ་ཏེ་ཅི་བྱ། དེ་ནི་འདས་པའི་དོན་ཡིན་ནོ། །དེ་དག་གིས་སྨྲས་པ། བཅོམ་ལྡན་འདས་ཀྱིས་འདས་པའི་དུས་ཁོ་ན་ལས་བརྩམས་ཏེ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ་ཞེས་དེ་དག་གིས་ཉེ་དགའ་ལ་གྱ་ཙོམ་དུ་ནན་གྱིས་གནས་ནས་དབྱུང་བའི་ལས་བྱས་སོ། །ཉེ་དགའ་གནས་ནས་དབྱུང་བའི་ལས་བྱས་ནས་ཕུ་བོ་དགའ་བོའི་གན་དུ་སོང་སྟེ་ངུ་བར་བརྩམས་པ་དང ། དགའ་བོས་སྨྲས་པ། ཉེ་དགའ་ཅིའི་ཕྱིར་ངུ ། ཉེ་དགས་སྨྲས་པ། ལྷུང་བཟེད་ནག་པོ་ཅན་དག་གིས་ཁོ་བོ་གནས་ནས་དབྱུང་བའི་ལས་བྱས་སོ། །དགའ་བོས་སྨྲས་པ། གང་དག་གིས་ཁོ་བོའི་ནུ་བོ་གནས་ནས་དབྱུང་བའི་ལས་བྱས་པ་དེ་དག་གྲོང་དང ། གྲོང་ཁྱེར་དང ། ལྗོངས་དང ། ཁམས་གསུམ་ནས་གནས་ནས་ཕྱུང་བར་གྱུར་ཅིག་།འོན་ཀྱང་གནས་ནས་དབྱུང་བའི་ལས་བྱས་པ་རྣམས་ལ། གྲོང་དང ། གྲོང་ཁྱེར་མེད་དམ་ཅི་སྡོད་ཅིག་དང་བཟོད་པ་གསོལ་བར་བྱའོ། །འདི་ལྟར་དེ་དག་གིས་མི་མཐུན་པ་ཁོ་ནར་ལས་བྱས་སོ། །གང་ཞིག་དེར་མ་འདུས། ཁོ་བོའོ། །སློབ་དཔོན་གྱིས་དེར་འདུན་པ་ཕུལ་ལོ། །ཅི་ཁོ་བོས་བདག་གི་ནུ་བོ་གནས་ནས་དབྱུང་བའི་ལས་བྱེད་པར་ཤེས་སམ། ཁོ་བོ་དགེ་འདུན་གྱི་བྱ་བ་དེ་ལྟ་བུ་ལ་འདུན་པ་མི་འབུལ་གྱིས་ཁོ་བོས་འདུན་པ་མ་ཕུལ་ལོ། །ཁོ་བོས་འདུན་པ་ཉེས་པར་ཕུལ་ལོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་བྱ་བ་ཆོས་དང་ལྡན་པ་ལ་དགེ་སློང་ལ་འདུན་པ་ཕུལ་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་སྤོང་བའི་ཆོས་སུ་བྱེད་ཅིང་འདི་སྐད་ཅེས་དགེ་སློང་འདུན་པ་ཕྱིར་བྱིན་ཅིག་ཁྱོད་ལ་མི་སྦྱིན་ནོ་ཞེས་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས
7.206b
ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགའ་བོ་ལ་སྨྲས་པ། དགའ་བོ་ཁྱོད་དགེ་འདུན་གྱི་བྱ་བ་ཆོས་དང་ལྡན་པ་ལ་དགེ་སློང་ལ་འདུན་པ་ཕུལ་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་སྤོང་བའི་ཆོས་སུ་བྱེད་ཅིང་འདི་སྐད་ཅེས་དགེ་སློང་འདུན་པ་ཕྱིར་བྱིན་ཅིག་།ཁྱོད་ལ་མི་སྦྱིན་ནོ་ཞེས་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་བྱ་བ་ཆོས་དང་ལྡན་པ་ལ་དགེ་སློང་ལ་འདུན་པ་ཕུལ་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་སྤོང་བའི་ཆོས་སུ་བྱེད་ཅིང་འདི་སྐད་ཅེས་དགེ་སློང་འདུན་པ་ཕྱིར་བྱིན་ཅིག་།ཁྱོད་ལ་མི་སྦྱིན་ནོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་དགའ་བོ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །བྱ་བ་ཆོས་དང་ལྡན་པ་ལ་ཞེས་བྱ་བ་ནི་ལས་ཆོས་དང་ལྡན་པ་ལའོ། །དགེ་སློང་ལ་ཞེས་བྱ་བ་ནི་ཆོས་འདི་པ་ལའོ། །འདུན་པ་ཕུལ་ནས་ཞེས་བྱ་བ་ནི་འདུན་པ་བྱིན་ནས་སོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་ཤེས་བྱ་བ་ནི་ཁྲོས་ཤིང་ཁྲོ་བའི་ཟིལ་གྱིས་ནོན་ནས་སོ། །སྤོང་བའི་ཆོས་སུ་བྱེད་ཅིང་ཞེས་བྱ་བ་ནི་བསྙོན་པའི་ཆོས་སུ་བྱེད་ཅིང་ངོ ། །
7.207a
འདི་སྐད་ཅེས་ཤེས་བྱ་བ་ནི་འདི་སྐད་ཅེས་ཟེར་ནའོ། །དགེ་སློང་འདུན་པ་ཕྱིར་བྱིན་ཅིག་།ཁྱོད་ལ་མི་སྦྱིན་ནོ་ཞེས་ཟེར་ན་ཞེས་བྱ་བ་ནི་འདི་སྐད་ཅེས་ཟེར་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམ་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་བྱ་བ་ཆོས་དང་ལྡན་པ་ལ་དགེ་སློང་ལ་འདུན་པ་ཕུལ་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས་སྤོང་བའི་ཆོས་སུ་བྱེད་ཅིང་འདི་སྐད་ཅེས་དགེ་སློང་འདུན་པ་ཕྱིར་བྱིན་ཅིག་།ཁྱོད་ལ་མི་སྦྱིན་ནོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འདུན་པ་ཕྱིར་སྒྱུར་བའི་ལྟུང་བྱེད་དེ་ལྔ་བཅུ་རྩ་གསུམ་པ་རྫོགས་སྷོ།། ་་་་་་།། བར་སྡོམ་ལ། ཆོས་ཉན་པ་དང་སྒྲ་ཅན་ཟིན། །ན་དང་དགེ་སློང་སྡིག་ཅན་ལ། །དོན་འཐུན་གཉིས་སུ་བྱས་པ་དང ། །མདུན་དུ་བཏུད་དང་དགེ་ཚུལ་ལོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་ལྷགས་ནས་དགེ་སློང་རྣམས་ལ་སྨྲས་པ། འཕགས་པ་དག་ཆོས་བསྟན་དུ་གསོལ། དགེ་སློང་རྣམས་ཀྱིས་སྨྲས་པ། བཞིན་བཟང་དག་བཅོམ་ལྡན་འདས་ཀྱི་སྤྱན་སྔར་དེང་ཤིག་དང ། བཅོམ་ལྡན་འདས་ཁྱེད་ཅག་ལ་ཆོས་སྟོན་པར་མཛད་དོ། །དེ་དག་གིས་སྨྲས་པ། འཕགས་པ་དག་སྟོན་པ་ཉག་ཅིག་ཏུ་བས་པས་རེ་ཤིག་ལྷ་རྣམས་ལ་ཆོས་སྟོན་པར་མཛད་དམ།
7.207b
འོན་ཏེ་ཀླུ་རྣམས་ལ་འམ། གནོད་སྦྱིན་རྣམས་ལ་འམ། མི་རྣམས་ལ་ཆོས་སྟོན་པར་མཛད་སུས་འཚལ་གྱིས། ཁྱེད་ཅག་གིས་ཀྱང་ཆོས་བསྟན་དུ་གསོལ། བཞིན་བཟང་དག་བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་རྣམས་ཀྱིས་ཀྱང་ཆོས་བསྟན་པར་བྱ་བར་གནང་ངོ ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཀྱང་ཆོས་བསྟན་པར་བྱའོ་ཞེས་བཀའ་སྩལ་ནས། དེ་དག་ཉིན་མོ་ཆོས་སྟོན་པར་བྱེད་དོ། །དེ་ན་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ནི་ཉིན་མོ་ཆོས་མཉན་ནས་མཚན་མོ་རྩོལ་བའི་འབྲས་བུས་འཚོ་བ་རྣམས་ལ་ཤེས་ལྡན་དག་འཕགས་པ་དག་ཆོས་སྙན་པ་སྙན་པ་སྟོན་པར་མཛད་ཅིང་སྦྲང་རྩི་བྱེད་པའི་སྦྲང་བུ་བཞིན་དུ་ཆོས་སྦྲང་རྩི་ལྟ་བུ་སྟོན་ཅིང་སྟོབ་པར་མཛད་དོ། །ཞེས་བརྗོད་པར་བྱེད་དོ། །རྩོལ་བའི་འབྲས་བུས་འཚོ་བ་དག་གིས་སྨྲས་པ། ཁྱེད་ཅག་ལས་གང་དག་ཆོས་ཉན་པ་དེ་དག་གི་སངས་རྒྱས་འབྱུང་བ་ནི་འབྲས་བུ་དང་བཅས་པ་ཡིན་ནོ། །འོ་ན་ཁྱོད་ཅག་ཀྱང་ཅིའི་ཕྱིར་ཆོས་ཉན་པར་མི་བྱེད། ཁྱེད་ཅག་ནི་བསོད་ནམས་ཀྱི་འབྲས་བུས་འཚོ་བ་དག་ཡིན་པས་ཉིན་མོ་ཆོས་ཉན་པར་བྱེད་ཀྱི། ཁོ་བོ་ཅག་ནི་རྩོལ་བའི་འབྲས་བུས་འཚོ་བ་དག་ཡིན་པས་གལ་ཏེ་ཉིན་མོ་ལས་དག་མ་བྱས་ན་ལྟོགས་ཏེ་འཆི་བར་འགྱུར། གལ་ཏེ་འཕགས་པ་དག་མཚན་མོ་ཆོས་སྟོན་པར་འགྱུར་ན་དེ་ལྟ་ན་བདག་ཅག་གིས་ཀྱང་ཆོས་མཉན་པར་བྱའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མཚན་མོ་ཆོས་བསྟན་པར་བྱའོ། །དེ་དག་མཚན་མོ་ཐམས་ཅད་ཁོ་ནར་ཆོས་སྟོན་པར་བྱེད་ཅིང་དེ་དག་ངལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། མཚན་ཐམས་ཅད་ཁོ་ནར
7.208a
ཆོས་བསྟན་པར་མི་བྱའོ། །དེ་དག་ནམ་ཕྱེད་ཀྱིས་བར་དུ་ཆོས་སྟོན་པར་བྱེད་པ་ན་དེ་ལྟ་ན་ཡང་ངལ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཚེས་བརྒྱད་དང ། ཚེས་བཅུ་བཞི་ལ་ཆོས་བསྟན་པར་བྱའོ། །དེ་དག་ཚེས་བརྒྱད་དང ། ཚེས་བཅུ་བཞི་ལ་ཆོས་སྟོན་པར་བྱེད་པ་ན་བསོད་སྙོམས་པ་ཞིག་གཙུག་ལག་ཁང་དུ་ཆོས་ཉན་དུ་འོངས་ནས་དགེ་སློང་རྣམས་ཀྱིས་ནམ་ཕྱེད་ཀྱི་བར་དུ་ཆོས་བསྟན་པ་དང ། བསོད་སྙོམས་པ་དེས་བསམ་པ། ད་ནི་འགྲོ་བའི་དུས་མ་ཡིན་གྱིས་འདི་ཉིད་དུ་འདུག་པར་བྱའོ་ཞེས་དེ་མཐའ་གཅིག་ཏུ་སོང་ནས་སྐྱིལ་མོ་ཀྲུང་བཅས་ཏེ་འདུག་གོ། །དེར་ལྷགས་པའི་ཁྱིམ་པ་དེ་དག་ཀྱང་དེ་ཉིད་དུ་ཉལ་ནས། དགེ་བསྐོས་ཀྱིས་མར་མེ་བསད་པར་བརྩམས་པ་དང ། དེ་དག་གིས་སྨྲས་པ། འཕགས་པ་ཞུགས་མར་མ་དགུམ་ཞིག་དང་བདག་ཅག་གིས་འབྲུ་མར་དབུལ་ལོ། །དགེ་བསྐོས་ཀྱིས་མར་མེ་གསོས་ཏེ་སོང་ནས་ཁྱིམ་པ་དེ་དག་དེ་ན་འཁོད་ཅིང་དེ་དག་གིས་སྨྲས་པ། འཕགས་པ་ཆེ་གེ་མོ་ཞིག་གིས་ནི་ཆོས་སྙན་པ་སྙན་པ་དག་བསྟན་ཏོ། །འཕགས་པ་ཆེ་གེ་མོ་ཞིག་གིས་ནི་ཆོས་ཆེས་སྙན་པ་སྙན་པ་དག་བསྟན་ཏོ་ཞེས་ཟེར་རོ། །དེ་ན་དགེ་སློང་རྒན་ཞུགས་བརྗེད་ངས་པ་ཞིག་ཉལ་བ་དེས་རྨི་ལམ་ན་སྔོན་གྱི་རྙིང་པ་དང་ལྷན་ཅིག་ཉལ་བར་རྨི་ནས་དེས་ཅི་དང་ཅི་དག་ཅིག་བརྡོལ་བར་བརྩམས་པ་དང ། ཁྱིམ་པ་དེ་དག་གིས་སྨྲས་པ། ཤེས་ལྡན་དག་ཁྱིམ་པ་ཅི་དང་ཅི་དག་བརྡོལ་བ་འདི་སུ་ཡིན་ཞེས་དེ་དག་གིས་དེ་བསྐྱོད་པར་བརྩམས་པ་དང ། ཇི་ཙམ་ན་རྒན་ཞུགས་དེ་ཕྱིས་གན་དུ་ཉལ་ཞིང་ཅི་དང་ཅི་དག་བརྡོལ་བ་མཐོང་ནས་དེ་དག་གིས་སྨྲས་པ། ཤེས་ལྡན་དག་རྒན་པོ་རྣམས་ཀྱིས་གནས་སྐབས་ཀྱང་རེ་ཤིག་འདི་འདྲ་ན་འདི་དག་ནི་རབ་དུ་བྱུང་བ་གཞོན་ནུ་དག་ཡིན་པས་འདི་དག་གི་གནས་སྐབས་ཇི་ལྟ་བུར་འགྱུར་ཞེས་མ་དད་པ་གོ་བར་བྱེད་དོ། །བསོད་སྙོམས་པ་དེ་ནང་པར་སྔར་ལངས་ཏེ་དགོན་པའི་གནས
7.208b
སུ་སོང་བ་དང ། དགེ་སློང་སྤོང་བ་པ་དག་གིས་དེ་མཐོང་ནས་སྨྲས་པ། ཚེ་དང་ལྡན་པ་ཇི་ལྟ་ཚངས་པ་མཚུངས་པར་སྤྱོད་པ་དག་གིས་ཆོས་སྙན་པ་སྙན་པ་དག་བསྟན་ཅིང་སྐྱེ་བོ་ཕལ་པོ་ཆེའི་ཚོགས་མངོན་པར་དད་པར་བྱས་སམ། དེས་སྨྲས་པ། ཚངས་པ་མཚུངས་པར་སྤྱོད་པ་དག་གིས་ཆོས་སྙན་པ་སྙན་པ་དག་བསྟན་པས་སྐྱེ་བོ་ཕལ་པོ་ཆེའི་ཚོགས་ཏེ་པོར་མངོན་པར་དད་པར་བྱས་སོ། །རྒན་ཞུགས་ཤིག་གིས་ནི་སྐྱེ་བོ་ཕལ་པོ་ཆེའི་ཚོགས་མངོན་པར་མ་དད་པར་བྱས་སོ། །ཇི་ལྟར་གྱུར། དེས་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་རྣམས་རྫོགས་པར་མ་བསྙེན་པ་དང་ལྷན་ཅིག་ཉལ་བར་བྱེད་པ་དང ། སྣང་བ་ལ་ཉལ་བར་བྱེད་པ་ལས་གྱུར་ཏོ་སྙམ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་གང་ཟག་རྫོགས་པར་མ་བསྙེན་པ་དང་ལྷན་ཅིག་ཉལ་བར་མི་བྱ་ཞིང་སྣང་བ་ལ་ཡང་ཉལ་བར་མི་བྱའོ། །ཉལ་བར་བྱེད་ན་འགལ་ཚབས་ཅན་དུ་འགྱུར་རོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །ཚེ་དང་ལྡན་པ་ཤཱ་རིའི་བུ་ལ་དགེ་ཚུལ་སྒྲ་ཅན་ཟིན་དང ། སྐུལ་བྱེད་ཅེས་བྱ་བ་གཉིས་ཡོད་དེ། དགེ་སློང་བློ་བུར་དུ་འོངས་པ་ཞིག་འོངས་པ་ན་ཚེ་དང་ལྡན་པ་སྒྲ་ཅན་ཟིན་ཉིན་མོ་སྤྱོད་དུ་སོང་བའི་གཙུག་ལག་ཁང་དུ་དགེ་སློང་བློ་བུར་དུ་འོངས་པ་དེའི་གཙུག་ལག་ཁང་དུ་བསྐོས་ནས་དགེ་སློང་དེས་ཚེ་དང་ལྡན་པ་སྒྲ་ཅན་ཟིན་གྱི་ལྷུང་བཟེད་དང་ཆོས་གོས་ཕྱི་རོལ་དུ་ཕྱུང་སྟེ་མཐའ་གཅིག་ཏུ་བཞག་གོ། །ཚེ་དང་ལྡན་པ་སྒྲ་ཅན་ཟིན་ཉིན་མོ་སྤྱོད་པ་ནས་ཕྱིར་འོངས་པ་དང ། ཇི་ཙམ་ན་རང་གི་ལྷུང་བཟེད་དང ། ཆོས་གོས་ཕྱི་རོལ་དུ་ཕྱུང་སྟེ་མཐའ་ཅིག་ཏུ་བཞག་པ་མཐོང་ནས་དེ་སེམས་ཁོངས་སུ་ཆུད་ཅིང་འདུག་གོ། །ཇི་ཙམ་ན་དགེ་ཚུལ་སྐུལ་བྱེད་འོངས་ནས་དེས
7.209a
སྨྲས་པ། ཚེ་དང་ལྡན་པ་སྒྲ་ཅན་ཟིན་ཅིའི་ཕྱིར་སེམས་ཁོངས་སུ་ཆུད་ཅིང་འདུག་སྒྲ་ཅན་ཟིན་གྱིས་སྨྲས་པ། ཁོ་བོ་ཉིན་མོ་སྤྱོད་དུ་སོང་བའི་གཙུག་ལག་ཁང་དགེ་སློང་བློ་བུར་དུ་འོངས་པའི་གཙུག་ལག་ཁང་དུ་བསྐོས་ནས་དེས་ཁོ་བོའི་ལྷུང་བཟེད་དང ། ཆོས་གོས་ཕྱི་རོལ་དུ་ཕྱུང་སྟེ་མཐའ་ཅིག་ཏུ་བཞག་ན་སྤྲིན་ཁ་དོག་ལྔ་པ་འདུས་པས་ཁོ་བོ་དང་མལ་གང་དུ་བཤམ་པར་བྱ་བ་མི་ཤེས་སོ། །སྐུལ་བྱེད་ཀྱི་སྨྲས་པ། ཚེ་དང་ལྡན་པ་སྒྲ་ཅན་ཟིན་ཅིའི་ཕྱིར་སེམས་ཁོངས་སུ་ཆུད་ཅིང་འདུག་ཏུ་ཡོད། གར་ཡང་རུང་བར་ཉོལ་ཅིག་།སྒྲ་ཅན་ཟིན་གྱིས་སྨྲས་པ། ཚེ་དང་ལྡན་པ་སྐུལ་བྱེད་ཁྱོད་ནི་རྫུ་ཕྲུལ་ཆེ་བ་དང་མཐུ་ཆེ་བ་ཡིན་པས་ལོ་མ་ཡིན་པའི་སྤྱིལ་བུ་སྤྲུལ་ཏེ་མལ་འཆའ་བར་བྱེད་མོད་ཁོ་བོས་ཇི་ལྟར་བྱ། དེའི་ཚེ་ན་བྲམ་ཟེ་དང ། ཁྱིམ་བདག་དད་པ་ཅན་དག་གིས་བཅོམ་ལྡན་འདས་ཀྱི་སྣམ་ཕྱི་སྤོས་ཀྱི་བྱུག་པས་སྐུས་ནས། ཚེ་དང་ལྡན་པ་སྒྲ་ཅན་ཟིན་གྱིས་བསམས་པ། སངས་རྒྱས་བཅོམ་ལྡན་འདས་རྣམས་ལ་དུས་མ་ཡིན་པར་བཤང་བ་མཛད་པར་འགྱུར་བ་གང་ཡིན་པ་དེ་ནི་གནས་མེད་ཅིང་སྐབས་མ་ཡིན་གྱིས་སོང་ལ་དེར་ཉལ་བར་བྱའོ་སྙམ་ནས་དེ་དེར་སོང་སྟེ་སྣམ་ཕྱི་སའི་ཞབས་རྟེན་ལ་མགོ་བཞག་སྟེ་ཉལ་ལོ། །དེའི་མཚན་མོ་སྤྲིན་ཁ་དོག་ལྔ་པ་འདུས་ནས་དེས་ཆར་འབབ་པར་བརྩམས་པ་དང ། སྣམ་ཕྱི་ས་དེ་དང་ཧ་ཅང་ཐག་མི་རིང་བ་ན་སྦྲུལ་དུག་མྱུར་དུ་ཁྱབ་པར་བྱེད་པའི་གཙོ་བོ་ཞིག་གི་ཚང་འདུག་པ་དེར་ཆར་བབ་པའི་ཆུས་གང་ནས་སྦྲུལ་དུག་མྱུར་དུ་ཁྱབ་པར་བྱེད་པའི་གཙོ་བོ་དེ་བཅོམ་ལྡན་འདས་ཀྱིས་སྣམ་ཕྱི་ས་ག་ལ་བ་དེར་འཕགས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཉིད་ཅན་ཡིན་པས་བཅོམ་ལྡན་འདས་ཀྱིས་དགོངས་པ། གལ་ཏེ་སྦྲུལ་དུག་མྱུར་དུ་ཁྱབ་པར་བྱེད་པའི་གཙོ་བོ་དེས་སྒྲ་ཅན་ཟིན་རྙེད་པར་གྱུར་ན་མིང་གི་ལྷག་མ་ཙམ་ལས་པར་བྱེད་པར་འགྱུར་ཏེ། ཤཱཀྱ་ང་རྒྱལ་ཅན་དག་གལ་ཏེ་གཞོན་ནུ་སྒྲ་ཅན་ཟིན་བཟང་པོ་རབ་ཏུ་བྱུང་བར་མ་གྱུར་ན། རྒྱལ་པོ་དངོས་བརྩམ་པར་འགྱུར་བ་ཞིག་ན། དེ་རབ་དུ་བྱུང་ནས་མགོན་མེད་པའི་བྱ་བས་དུས་ལ་བབ་བོ
7.209b
ཞེས་མ་དད་པ་གོ་བར་བྱེད་པར་འགྱུར་བར་ཐུགས་སུ་ཆུད་ནས་གླང་པོ་ཆེའི་སྣ་འདྲ་བའི་ཕྱག་རྐྱང་ཏེ་སྒྲ་ཅན་ཟིན་བླངས་ནས་ཉིད་ཀྱི་གཟིམས་མལ་དུ་བསྙལ་ཏེ་བཞག་གོ། །སངས་རྒྱས་བཅོམ་ལྡན་འདས་རྣམས་གང་ཟག་རྫོགས་པར་མ་བསྙེན་པ་དང་ལྷན་ཅིག་གནས་གཅིག་ན་གཟིམས་པར་འགྱུར་བ་ནི་གནས་མ་ཡིན་ཞིང་སྐབས་མེད་པས་བཅོམ་ལྡན་འདས་ཀྱིས་དགུང་ལ་འཆག་པ་དང་བཞུགས་པ་གཉིས་ཀྱིས་ཤས་ཆེར་མཚན་མོ་འདའ་བར་མཛད་དོ། །དགེ་སློང་གནས་བརྟན་གནས་བརྟན་དག་ནང་པར་སྔར་ལངས་ཏེ་བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་འཚལ་དུ་འོངས་པ་དང ། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་གལ་ཏེ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་ན་དེའི་ཚེ་དགེ་སློང་མ་འོངས་པ་རྣམས་ལ་ནི་གཞེས་པར་མཛད་ལ། དགེ་སློང་འོངས་པ་རྣམས་ནི། ཕྱིར་གཏོང་བར་མི་མཛད་པས་ཚེ་དང་ལྡན་པ་སྐུལ་བྱེད་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་དུ་སོང་བ་དང ། ཇི་ཙམ་ན་ཚེ་དང་ལྡན་པ་སྒྲ་ཅན་ཟིན་བཅོམ་ལྡན་འདས་ཀྱི་གཟིམས་མལ་ན་ཉལ་བ་མཐོང་ངོ ། །མཐོང་ནས་ཀྱང་སེ་གོལ་གྱི་སྒྲས་ཚེ་དང་ལྡན་པ་སྒྲ་ཅན་ཟིན་སད་པར་བྱས་ཏེ་སྨྲས་པ། ཚེ་དང་ལྡན་པ་སྒྲ་ཅན་ཟིན་ཁྱོད་གང་དུ་ཉལ། དེ་སད་པ་དང་ཇི་ཙམ་ན་བདག་ཉིད་བཅོམ་ལྡན་འདས་ཀྱིས་གཟིམས་མལ་ན་ཉལ་བར་མཐོང་ནས་དེ་མྱུར་བ་མྱུར་བ་ཁོ་ནར་ལངས་ཏེ་བཅོམ་ལྡན་འདས་ཀྱིས་གཟིམས་མལ་ནས་བབས་པ་དང ། སྐུལ་བྱེད་ཀྱི་སྨྲས་པ། ཚེ་དང་ལྡན་པ་སྒྲ་ཅན་ཟིན་གལ་ཏེ་ཁྱོད་ལ་བཅོམ་ལྡན་འདས་ཀྱིས་མ་དགོངས་སུ་ཟིན་ན་སྦྲུལ་དུག་མྱུར་དུ་ཁྱབ་པར་བྱེད་པའི་གཙོ་བོས་ཁྱོད་མིང་གི་ལྷག་མ་ཙམ་ལས་པར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་ཚུལ་འདི་དག་ལ་ནི་མ་ཡང་མེད། ཕ་ཡང་མེད། བྱམས་པ་དང་མཛའ་བཤེས་ཀྱི་ཚོགས་གཞན་འགའ་ཡང་མེད་དེ། ཚངས་པ་མཚུངས་པར་སྤྱོད་པ་ཁྱེད་ཅག་འབའ་ཤིག་ཏུ་ཟད་ཅིང
7.210a
འདི་དག་ནི་དགྲ་བཅོམ་པའི་སྒོ་ལྔ་དང་ལྡན་པ་དག་ཡིན་ཏེ། གལ་ཏེ་ཁྱེད་ཅག་གིས་འདི་དག་ཡོངས་སུ་སྐྱོང་བར་མི་བྱེད་ན་གཞན་སུ་ཞིག་བྱེད་པར་འགྱུར། དགེ་སློང་དག་དེ་ལྟ་བས་ན་གང་ཟག་རྫོགས་པར་མ་བསྙེན་པ་དང་ལྷན་ཅིག་ནུབ་གཉིས་ཚུན་ཅད་གནས་གཅིག་ཏུ་ཉལ་བར་རྗེས་སུ་གནང་ངོ ། །དགེ་སློང་ཞིག་ལ་འཁྲུ་བའི་ནད་བྱུང་ནས་དེ་མུན་པའི་ནང་དུ་བཤང་བ་བྱེད་པ་ན་རྐང་པ་གཉིས་ལ་གོས་ནས་རྐང་པ་གཉིས་བརྐྱང་སྟེ་ཉལ་བ་དང ། དེའི་གན་དུ་ནང་པར་སྔར་དགེ་སློང་ལྷན་གཅིག་གནས་པ་དང ། ཉེ་གནས་དག་འོངས་ནས་དེ་དག་གིས་དྲིས་པ། མཁན་པོ་ཐུགས་བདེ་འམ། དེས་སྨྲས་པ། མི་བདེའོ། །ཇི་ལྟར་མི་བདེ། དེས་སྐབས་དེ་རྒྱས་པར་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སྣང་བ་བྱའོ། །སྣང་བ་བྱས་པ་དང ། དེ་འགྱོད་པས་མི་ཉལ་ནས་ཉེས་དམིགས་དེ་ཉིད་དུ་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཉལ་བར་བྱ་སྟེ། འདི་ལ་འགྱོད་པར་མི་བྱའོ། །དགེ་སློང་ནད་གཡོག་དག་འགྱོད་པས་མི་ཉལ་བ་ན་དེ་དག་ན་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཀྱང་ཉལ་བར་བྱའོ། །དེར་བྱིན་ལེན་སྟོབས་པས་བྱ་བ་བྱུང་ནས་བཅོམ་ལྡན་འདས་ཀྱིས་བཀའ་སྩལ་པ། རྫོགས་པར་མ་བསྙེན་པས་ཀྱང་དེར་ཉལ་བར་བྱའོ། །དེ་དག་ནུབ་གཉིས་འདས་ནས་ཕྱིར་འབྱིན་པར་བྱེད་པ་ན་ནད་པ་ལ་གནོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ནུབ་གསུམ་པ་ལ་ཡང་ཉལ་བར་བྱའོ། །ནད་པ་འགྱོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། འདི་ལ་འགྱོད་པར་མི་བྱ་བར་ཉལ་བར་བྱའོ། །ནད་གཡོག་དག་འགྱོད་པས་མི་ཉལ་ནས་བཅོམ་ལྡན་འདས་ཀྱིས་བཀའ་སྩལ་པ། ཉལ་བར་བྱ་སྟེ། འདི་ལ་འགྱོད་པར་མི་བྱའོ། །དགེ་སློང་གནས་བརྟན་དག་ན་བར་གྱུར་ནས་དེ་དག་ལངས་ཤིང་རང་ཉིད་ཀྱིས་བྱིན་ལེན་བྱས་ཏེ་ཟ་བར་མི་ནུས་ནས་བཅོམ་ལྡན་འདས་ཀྱིས་བཀའ
7.210b
སྩལ་པ། དེ་དག་གི་ནད་གཡོག་དག་གིས་ལག་བརྙེལ་ཏེ་བྱིན་ལེན་བྱས་ནས་ལྷན་གཅིག་འདུག་སྟེ་བཟའ་བར་བྱའོ། །དེ་དག་གི་ནད་གཡོག་དག་གཞོན་པ་ཡིན་ན་ཡང་དེ་དག་གིས་ཀྱང་དེ་བཞིན་དུ་བཟའ་བར་བྱའོ། །རྫོགས་པར་སྙེན་པ་དག་མེད་ནས་བཅོམ་ལྡན་འདས་ཀྱིས་བཀའ་སྩལ་པ། རྫོགས་པར་མ་བསྙེན་པས་བཟའ་བར་བྱའོ། །ཇི་ལྟར་རྒན་པ་རྣམས་ལ་གསར་བུ་རྣམས་དང ། རྫོགས་པར་མ་བསྙེན་པ་རྣམས་ནད་གཡོག་བྱེད་པ་དེ་བཞིན་དུ་རྒན་པ་རྣམས་ཀྱིས་ཀྱང་གསར་བུ་རྣམས་དང་རྫོགས་པར་མ་བསྙེན་པ་རྣམས་ཀྱི་ནད་གཡོག་བྱའོ། །ཟླ་བའི་སྣང་བ་དང ། ཉི་མའི་སྣང་བ་བྱུང་ནས་དགེ་སློང་དག་འགྱོད་པས་ཉལ་བར་མི་བྱེད་ནས་བཅོམ་ལྡན་འདས་ཀྱིས་དེ་དག་ནི་ཐ་སྙད་དུ་བྱ་བ་མ་ཡིན་པས་ཉལ་བར་བྱ་སྟེ། འདི་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་གང་ཟག་རྫོགས་པར་མ་བསྙེན་པ་དང་ལྷན་གཅིག་ནུབ་གཉིས་ལས་ལྷག་པར་གནས་ཅིག་ཏུ་ཉལ་བར་མི་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་གང་ཟག་རྫོགས་པར་མ་བསྙེན་པ་དེ་དག་གཙུག་ལག་ཁང་ནས་ཕྱིར་ཕྱུང་ནས་ཆོམ་རྐུན་པ་དག་དང ། གཡོན་ཅན་དག་དང ། སེང་གེ་དག་དང ། སྟག་དག་དང ། གུང་དག་གིས་བགྲོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་གཙུག་ལག་ཁང་ནས་ཕྱིར་འབྱུང་བར་མི་བྱའོ། །དགེ་སློང་རྣམས་ཀྱིས་དེ་དག་ཁྱམས་ནས་ཕྱིར་ཕྱུང་བ་དང ། བཅོམ་ལྡན་འདས་ཀྱིས་བཀའ་སྩལ་པ། ཁྱམས་ནས་ཕྱིར་དབྱུང་བར་མི་བྱ་བར་འདི་ལྟར་ཉེན་ཀོར་དུ་སྤང་བར་བྱའོ། །དགེ་སློང་ཞིག་ལ་དགེ་ཚུལ་ཞིག་ཡོད་དེ་གཙུག་ལག་ཁང་དེར་དགེ་སློང་སྡིག་ཅན་འོངས་ནས་དེས་དགེ་ཚུལ་དེ་ལ་སྨྲས་པ། དགེ་ཚུལ་ཁྱོད་གང་དུ་ཉལ། དེས་སྨྲས་པ། སྒོ་གང་འདིར་རོ། །དགེ་ཚུལ་དེའི་མཁན་པོ་དེས་ཐོས་ནས་དེས་དགེ་ཚུལ་དེ་ལ་དྲིས་པ། ཁྱོད་སྨྲས་པ་དེ་ཅི་དེས་སྨྲས་པ། འདི་བདག་ལ་ཁྱོད་གང་དུ་ཉལ་ཞེས་འདྲིའོ། །མཁན་པོ་དེས་དགེ་ཚུལ་དེ་བདག་ཉིད་ཀྱི
7.211a
གནས་ཁང་དུ་བསྙལ་ནས། མཁན་པོ་དེས་ཀྱང་འཆག་པ་དང ། འདུག་པ་དག་གིས་མཚན་མོ་འདའ་བར་བྱས་སོ། །དེ་ནང་པར་སྔར་ལངས་ནས་དགེ་སློང་ལྷན་ཅིག་གནས་པ་དང ། ཉེ་གནས་དག་འོངས་ཏེ་དྲིས་པ། མཁན་པོ་ཐུགས་བདེ་འམ། དེས་སྨྲས་པ། མི་བདེའོ། །ཅིའི་སླད་དུ། དེས་སྐབས་དེ་རྒྱས་པར་བརྗོད་པ་དང ། དེ་དག་གིས་སྨྲས་པ། མཁན་པོ་བཅོམ་ལྡན་འདས་ཀྱིས་སྐྱེས་བུ་དམ་པ་ནི་གཉིས་ཏེ། གང་ཁུར་མ་བླངས་པ་ལེན་པར་མི་བྱེད་པ་དང ། གང་ཁུར་བླངས་པ་མཐར་ཕྱིན་པར་བྱེད་པའོ་ཞེས་བཀའ་སྩལ་པས་ཁུར་བླངས་པ་འདི་མཐར་ཕྱིན་པར་བགྱི་འཚལ་ལོ་ཞེས་ཟེར་བའི་སྐབས་དེ་དགེ་སློང་རྣམས་ཀྱི་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གནས་པར་ཁས་མ་བླངས་པ་རྣམས་ཀྱི་ནང་དུ་དགེ་སློང་སྡིག་ཅན་འོངས་ཤིང་དགེ་སློང་སྡིག་ཅན་དེ་རེ་ཤིག་སྐྲོད་པར་ནུས་ན་དེ་སྐྲད་པར་བྱའོ། །གལ་ཏེ་སྐྲོད་པར་མི་ནུས་ན་དགེ་ཚུལ་ཁྲིད་དེ་གཙུག་ལག་ཁང་གཞན་དུ་འགྲོ་བར་བྱའོ། །གལ་ཏེ་གནས་པར་ཁས་བླངས་པ་རྣམས་ཀྱི་ནང་དུ་དགེ་སློང་སྡིག་ཅན་འོངས་ཤིང་དགེ་སློང་སྡིག་ཅན་དེ་སྐྲོད་པར་ནུས་ན་དེས་སྐྲད་པར་བྱའོ། །གལ་ཏེ་སྐྲོད་པར་མི་ནུས་ན་དགེ་ཚུལ་དགེ་སློང་མཛའ་བོའི་གན་དུ་བཞག་པར་བྱའོ། །གལ་ཏེ་དགེ་སློང་མཛའ་བོ་མེད་ན་གནས་ཅིག་ཏུ་ལྷན་ཅིག་ཟླ་བ་གསུམ་འདའ་བར་བྱའོ། །དགག་དབྱེ་བྱས་ནས་གལ་ཏེ་དགེ་སློང་སྡིག་ཅན་དེ་སྐྲོད་པར་ནུས་ན་དེ་སྐྲད་པར་བྱའོ། །གལ་ཏེ་མི་ནུས་ན་དགེ་ཚུལ་ཁྲིད་དེ་གཙུག་ལག་ཁང་གཞན་དུ་འགྲོ་བར་བྱའོ། །དགེ་སློང་དག་ལམ་དུ་འདོང་བ་ན་དེ་ན་དགེ་ཚུལ་ཡང་འདོང་ནས་དགེ་སློང་རྣམས་ཀྱིས་དགེ་ཚུལ་དེ་དག་ནུབ་གཉིས་འདས་ཤིང་དོན་འཐུན་གྱི་ཕྱི་རོལ་དུ་འབྱིན་པར་བྱེད་པ་ན་དེ་དག་ཆོམ་རྐུན་པ་དག་དང ། གཡོན་ཅན་དག་དང ། སེང་གེ་དག་དང ། སྟག་དག་དང ། གུང་དག་གིས་བགྲོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ
7.211b
པ། ཕྱི་རོལ་དུ་དབྱུང་བར་མི་བྱ་བར་འདི་ལྟར་དོན་འཐུན་གཉིས་སུ་བྱའོ། །དོན་འཐུན་གཉིས་སུ་བྱས་པ་དང ། དེ་དག་དཔུང་ཆུངས་བས་ཆོམ་རྐུན་པ་དག་དང ། གཡོན་ཅན་དག་དང ། སེང་གེ་དག་དང ། སྟག་དག་དང ། གུང་དག་གི་བགྲོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དོན་འཐུན་དཔུང་ཆུང་ན་གཉིས་སུ་མི་བྱ་བར་དགེ་སློང་རྣམས་ཀྱིས་མི་ཉལ་བར་ཏྲོན་བྱའོ། །དགེ་སློང་རྣམས་མཚན་ཐམས་ཅད་དུ་མི་ཉལ་བར་ཏྲོན་བྱེད་པ་ན་ངལ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། མཚན་ཐམས་ཅད་དུ་ཏྲོན་མི་བྱ་བར་ཐུན་གསུམ་འམ། གཉིས་སམ། གཅིག་གམ། ཐ་ན་སྐྱ་རེང་འཆར་ཀར་ཏྲོན་བྱའོ། །དེ་ལྟ་ན་ཡང་ངལ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཉལ་བར་བྱ་སྟེ་འདི་ལ་འགྱོད་པར་མི་བྱའོ། །དགེ་སློང་རྣམས་ཀྱིས་དགེ་ཚུལ་དག་ལམ་ཀར་རྗེས་སུ་བོར་ཏེ་དོང་བ་ན་དེ་དག་ཆོམ་རྐུན་པ་དག་དང ། གཡོན་ཅན་དག་དང ། སེང་གེ་དག་དང ། སྟག་དག་དང ། གུང་དག་གིས་བགྲོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། མདུན་དུ་བཏུང་སྟེ་འགྲོ་བར་བྱའོ། །དགེ་ཚུལ་དེ་དག་ནང་པར་སྔ་བ་ཁོ་ནར་བཀྲེས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་གཡར་ཚུས་སྦྱིན་པར་བྱའོ། །དགེ་ཚུལ་དེ་དག་དྲོ་ཀར་ཡང་ཟན་སློང་ནས་དགེ་སློང་རྣམས་ཀྱིས་ཁྱེད་ཅག་ད་ནང་གཡར་ཚུས་བྱིན་ཟིན་ན་ད་ཡང་སློང་ངམ་ཅི་ཞེས་ཟེར་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་དག་ནི་མེའི་ཁམས་ཆེ་བ་ཡིན་གྱིས་དེ་དག་ལ་དྲོ་ཀར་ཡང་ཟན་སྦྱིན་པར་བྱའོ། །ཉེ་དགའ་ལ་དགེ་ཚུལ་ཚེར་མ་དང ། ཆེན་པོ་པ་ཞེས་བྱ་བ་གཉིས་ཡོད་དེ། དེ་དེ་གཉིས་དང་ལྷན་ཅིག་ནུབ་གཉིས་ལས་ལྷག་པར་གནས་ཅིག་ཏུ་ཉལ་བར་བྱེད་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཉེ་དགའ་བཅོམ་ལྡན་འདས་ཀྱིས་དགེ་སློང་གིས་གང་ཟག་རྫོགས་པར་མ་བསྙེན་པ་དང ། ལྷན་གཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་བར་མི་བྱའོ་ཞེས་བཀའ་སྩལ་གྱིས་ཁྱོད་གང
7.212a
ཟག་རྫོགས་པར་མ་བསྙེན་པ་དང་ལྷན་གཅིག་ནུབ་གཉིས་ལས་ལྷག་པར་གནས་གཅིག་ཏུ་མ་ཉལ་ཅིག་།ཉེ་དགས་སྨྲས་པ། གང་ལ་ནུབ་གཉིས་རུང་བ་དེ་ལ་ནུབ་གསུམ་པ་ཡང་རུང་མོད། ནུབ་གསུམ་པས་ཆང་འཐུངས་སམ། ཀུན་དོང་ཟོས་སམ་ཅི་ཉེས། དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་གང་ཟག་རྫོགས་པར་མ་བསྙེན་པ་དང་ལྷན་ཅིག་ནུབ་གཉིས་ལས་ལྷག་པར་གནས་ཅིག་ཏུ་ཉལ་བར་མི་བྱའོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་ཆེད་དུ་བསམས་ཏེ་ནུབ་གཉིས་ལས་ལྷག་པར་འདའ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་སྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་སྨྲས་པ། ཉེ་དགའ་ངས་དགེ་སློང་གིས་གང་ཟག་རྫོགས་པར་མ་བསྙེན་པ་དང་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་བར་མི་བྱའོ་ཞེས་གསུངས་ན། ཁྱོད་ཆེད་དུ་བསམས་ཏེ་ནུབ་གཉིས་ལས་ལྷག་པར་འདའ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །
7.212b
ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གང་ཟག་རྫོགས་པར་མ་བསྙེན་པ་དང་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའམ། གཞན་ཡང་དེ་ལྟ་བུ་གང་ཡིན་པའོ། །གང་ཟག་རྫོགས་པར་མ་བསྙེན་པ་དང་ལྷན་ཅིག་ཅེས་བྱ་བ་ལ། རྫོགས་པར་བསྙེན་པ་ནི་གཉིས་ཏེ། དགེ་སློང་དང ། དགེ་སློང་མའོ། །དེ་ལས་གཞན་པ་ནི་རྫོགས་པར་མ་སྙེན་པའོ། །ནུབ་གཉིས་ལས་ལྷག་པར་ཞེས་བྱ་བ་ནི་ནུབ་གཉིས་ལས་འདས་པར་རོ། །གནས་གཅིག་ཏུ་ཉལ་ན་ཞེས་བྱ་བ་ནི་གནས་བཞི་པོ་ཐམས་ཅད་གཡོགས་ཤིང་ཐམས་ཅད་བསྐོར་བ་དང ། ཐམས་ཅད་གཡོགས་ཤིང་ཕལ་ཆེར་བསྐོར་བ་དང ། ཕལ་ཆེར་གཡོགས་ཤིང་ཐམས་ཅད་བསྐོར་བ་དང ། ཕལ་ཆེར་གཡོགས་ཤིང་ཕལ་ཆེར་བསྐོར་བ་དག་ཏུ་ཉལ་བས་སྐྱ་རེང་འཆར་བར་བྱེད་ནའོ། །ཐམས་ཅད་གཡོགས་ཤིང་ཐམས་ཅད་བསྐོར་བ་ནི་གནས་ཁང་ངམ། འཁོར་གྱི་ཁྱམས་སམ། ཁང་པ་བརྩེགས་པ་དག་གོ། །ཐམས་ཅད་གཡོགས་ཤིང་ཕལ་ཆེར་བསྐོར་བ་ནི་སྒོ་བཅུ་པ་དང ། སྒོ་བཅུ་གཉིས་པ་དག་གོ། །ཕལ་ཆེར་གཡོགས་ཤིང་ཐམས་ཅད་བསྐོར་བ་ནི་ཁྱམ་ངོས་བཞི་པ་དག་གོ། །ཕལ་ཆེར་གཡོགས་ཤིང་ཕལ་ཆེར་བསྐོར་བ་ནི་ཁྱམས་ངོས་གསུམ་པ་དང ། འཁོར་གྱི་ཁྱམས་དག་གོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་གང་ཟག་རྫོགས་པར་མ་བསྙེན་པ་རྫོགས་པར་མ་བསྙེན་པར་འདུ་ཤེས་ཤིང་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་ན་ལྟུང་བྱེད་དུ་འགྱུར་རོ། །
7.213a
གང་ཟག་རྫོགས་པར་མ་བསྙེན་པ་ལ་ཡིད་གཉིས་ཟ་བས་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་ན་ལྟུང་བྱེད་དུ་འགྱུར་རོ། །དགེ་སློང་གིས་གང་ཟག་རྫོགས་པར་བསྙེན་པ་ལ་རྫོགས་པར་མ་བསྙེན་པར་འདུ་ཤེས་པས་ལྷན་ཅིག་ནུབ་གཉིས་ལས་ལྷག་པར་གནས་ཅིག་ཏུ་ཉལ་ན་ཉེས་བྱས་སུ་འགྱུར་རོ། །རྫོགས་པར་བསྙེན་པ་ལ་ཡིད་གཉིས་ཟ་བས་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྫོགས་པར་མ་བསྙེན་པ་དང་ལྷན་ཅིག་ཉལ་བའི་ལྟུང་བྱེད་དེ་ལྔ་བཅུ་རྩ་བཞི་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་སྔོན་བོང་རྫི་དགེ་སློང་འཆི་ལྟས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུང་བ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པ་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་རོ། །དགེ་སློང་རབ་ཏུ་མང་པོ་དག་གིས་སྔོན་བོང་རྫི་དགེ་སློང་འཆི་ལྟས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་བ་ཐོས་ནས་དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་སྔོན་བོང་རྫི་དགེ་སློང་འཆི་ལྟས་དང ། གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ། །འདི་སྐད་ཅེས་བསྒོ
7.213b
བར་བྱ་སྟེ། ཚེ་དང་ལྡན་པ་འཆི་ལྟས་ཁྱོད་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བརྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ ། །འཆི་ལྟས་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས། འཆི་ལྟས་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འཆི་ལྟས་ལ་ཚེ་དང་ལྡན་པ་འཆི་ལྟས་ཁྱོད་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ ། །འཆི་ལྟས་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་འཆི་ལྟས་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བཞམས་ཏེ་བསྒོའོ། །དགེ་སློང་རབ་ཏུ་མང་པོ་དག་གིས་དེ་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད
7.214a
ཀྱིས་སྔོན་བོང་རྫི་དགེ་སློང་འཆི་ལྟས་དང ། གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །འདི་ལྟར་བསྒོ་བར་བྱ་སྟེ་གནས་མལ་བཤམས་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་མཆི་ནས། འདི་ལ་དགེ་སློང་རབ་དུ་མང་པོས་བཞམས་ཏེ་བསྒོ་ན་འདི་ལ་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ནས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་འཆི་ལྟས་ལ་འཆི་ལྟས་ཁྱོད་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུངས་ངོ ། །འཆི་ལྟས་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲང་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས། འཆི་ལྟས་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི
7.214b
ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་མཆི་ནས། འདི་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ན། འདི་ལ་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་རྫུན་པའོ་ཞེས་རྗེས་སུ་ཐ་སྙད་དུ་འདོགས་ཏེ། དེའི་སླད་དུ་དགེ་འདུན་གྱིས་དགེ་སློང་འཆི་ལྟས་ལ་འཆི་ལྟས་ཁྱོད་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ ། །འཆི་ལྟས་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ་དེ་དག་བསྟེན་ན་བར་དུ་གཅོད་པར་འགྱུར་གྱིས། འཆི་ལྟས་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་དགེ་སློང་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུང་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང
7.215a
མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོའོ། །གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱོད་ཀྱིས་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་དང ། གཞན་ཡང་དེ་ལྟ་བུ་གང་ཡིན་པ་ལ་སྨད་པའི་ལས་བྱའོ། །འདི་ལྟར་བྱ་སྟེ་གནས་མལ་བཤམས་པ་བྱས་ནས། གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམ་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་འཆི་ནས། འདི་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ན་འདི་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ཏེ། འདི་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་ན། འདི་ལ་གསོལ་བ་དང་བཞིའི་ལས་ཀྱི་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད
7.215b
བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་སྨད་པའི་ལས་བགྱི་སྟེ། ཇི་སྲིད་དུ་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐམས་ཅད་ཀྱི་ཐམས་ཅད་དང ། རྣམ་པ་ཐམས་ཅད་ཀྱི་ཐམས་ཅད་དུ་མི་གཏོང་བ་དེ་སྲིད་དུ་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི་ཞིང་དཔེར་ན་གདོལ་བུ་བཞིན་དུ་སྨད་པར་བགྱི་ཞིང་མཆོག་ཏུ་སྨད་པར་བགྱིའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུང་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་འཆི་ནས། འདི་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ན་འདི་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ཏེ། འདི་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་ན་འདི་ལ་གསོལ་བ་དང་བཞིའི་ལས་ཀྱིས་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་རྫུན་པའོ་ཞེས་རྗེས་སུ་ཐ་སྙད་འདོགས་ན། དེའི་སླད་དུ་དགེ་འདུན་གྱིས་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་སྨད་པའི་ལས་བགྱི་སྟེ། ཇི་སྲིད་དུ་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ
7.216a
འདི་ལྟ་བུ་འདི་ཐམས་ཅད་ཀྱི་ཐམས་ཅད་དང ། རྣམ་པ་ཐམས་ཅད་ཀྱི་ཐམས་ཅད་དུ་མི་གཏོང་བ་དེ་སྲིད་དུ་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི་ཞིང་དཔེར་ན་གདོལ་བུ་བཞིན་དུ་སྨད་པར་བགྱི་ཞིང་མཆོག་ཏུ་སྨད་པར་བགྱི་ན། ཚེ་དང་ལྡན་པ་གང་དག་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་སྨད་པའི་ལས་བགྱི་ཞིང་ཇི་སྲིད་དུ་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐམས་ཅད་ཀྱི་ཐམས་ཅད་དང ། རྣམ་པ་ཐམས་ཅད་ཀྱི་ཐམས་ཅད་དུ་མི་གཏོང་བ་དེ་སྲིད་དུ་གཏམ་འདྲེ་བར་མི་བགྱི་ཕེབས་པར་སྨྲ་བར་མི་བགྱི་ཞིང་དཔེར་ན་གདོལ་བུ་བཞིན་དུ་སྨད་པར་བགྱི་ཞིང་མཆོག་ཏུ་སྨད་པར་བགྱི་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འཆིས་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་སྨད་པའི་ཕྲིན་ལས་མཛད་ཅིང་ཇི་སྲིད་དུ་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐམས་ཅད་ཀྱི་ཐམས་ཅད་དང ། རྣམ་པ་ཐམས་ཅད་ཀྱི་ཐམས་ཅད་དུ་མི་གཏོང་བ་དེ་སྲིད་དུ་གཏམ་འདྲེ་བར་མི་བགྱི་ཕེབ་པར་སྨྲས་བར་མི་བགྱི་ཞིང་དཔེར་ན་གདོལ་བུ་བཞིན་དུ་སྨད་པར་བགྱིས་ཤིང་མཆོག་ཏུ་སྨད་པར་བགྱི་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་སྨད་པའི་ལས་བྱས་ཞིང་ཇི་སྲིད་དུ་དགེ་སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་དེ་ལྟ་བུ་དེ་ཐམས་ཅད་ཀྱི་ཐམས་ཅད་དང ། རྣམ་པ་ཐམས་ཅད་ཀྱི་ཐམས་ཅད་དུ་མི་གཏོང་བ་དེ་སྲིད་དུ་གཏམ་འདྲེ་བར་མི་བྱ། ཕེབས་པར་སྨྲ་བར་མི་བྱ་ཞིང་དཔེར་ན་གདོལ་བུ་བཞིན་དུ་སྨད་པར་བྱས་ཤིང་མཆོག་ཏུ་སྨད་པར་བྱས་སོ། །དགེ་སློང་དེ་དག་གིས་དགེ
7.216b
སློང་འཆི་ལྟས་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་སྨད་པའི་ལས་བྱས་ཤིང་ཇི་སྲིད་དུ་སྡིག་པ་ཅན་གྱི་ལྟ་བའི་རྣམ་པ་དེ་ལྟ་བུ་དེ་ཐམས་ཅད་ཀྱི་ཐམས་ཅད་དང ། རྣམ་པ་ཐམས་ཅད་ཀྱི་ཐམས་ཅད་དུ་མི་གཏོང་བ་དེ་སྲིད་དུ་གཏམ་འདྲེ་བར་མི་བྱ། ཕེབས་པར་སྨྲ་བར་མི་བྱ་ཞིང་དཔེར་ན་གདོལ་བུ་བཞིན་དུ་སྨད་པར་བྱས་ཤིང་མཆོག་ཏུ་སྨད་པར་བྱས་ཀྱང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་འཆི་ལྟས་ལ་རྨས་པ། འཆི་ལྟས་ཁྱོད་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ་དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས
7.217a
བསྟན་པ་བདག་གིས་ཤེས་སོ་ཞེས་ཟེར་ན། དགེ་སློང་དེ་ལ་དགེ་སློང་རྣམས་ཀྱི་འདི་སྐད་ཅེས་ཚེ་དང་ལྡན་པ་ཁྱོད་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུང་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་བཀུར་པ་མ་འདེབས་ཤིག་།བཅོམ་ལྡན་འདས་ལ་བཀུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ ། །ཚེ་དང་ལྡན་པ་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་ཚེ་དང་ལྡན་པ་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆི་ལྟས་སམ། གཞན་ཡང་དེ་ལྟ་བུ་གང་ཡིན་པའོ། །འདི་སྐད་ཅེས་ཤེས་བྱ་བ་ནི་འདི་སྐད་ཅེས་ཟེར་ནའོ། །ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་ཞེས་བྱ་བ་ལ། བར་དུ་གཅོད་པའི་ཆོས་ཤེས་བྱ་བ་ནི་ཕམ་པར་འགྱུར་བའི་ཆོས་བཞི་དང ། དགེ་འདུན་ལྷག་མའི་ཆོས་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་གང་དག་བཅོམ་ལྡན་འདས་ཀྱིས་གསུངས་པ་དག་གོ། །དེ་དག་བསྟེན་ཀྱང་ཞེས་བྱ་བ་ནི་དེ་དག་ལྷག་པར་སྤྱད
7.217b
ཀྱང་ངོ ། །བར་དུ་གཅོད་པར་མི་འགྱུར་ཏེ་ཞེས་བྱ་བ་ནི་དེས་དགེ་སྦྱོང་གི་ཚུལ་གྱི་བར་དུ་གཅོད་པར་མི་འགྱུར་ཏེ་ཞེས་ཟེར་བའོ། །དེ་ལྟར་བཅོམ་ལྡན་འདས་ཀྱིས་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འོ། །ཆོས་ཞེས་བྱ་བ་ནི་སངས་རྒྱས་ཀྱིས་གསུངས་པ་དང ། ཉན་ཐོས་ཀྱིས་བཤད་པའོ། །བསྟན་པ་ཞེས་བྱ་བ་ནི་རབ་ཏུ་བསྟན་པའོ། །བདག་གིས་ཤེས་སོ་ཞེས་ཟེར་ན་ཞེས་བྱ་བ་ནི་བདག་གིས་ཀུན་ཤེས་སོ་ཞེས་ཟེར་ནའོ། །དགེ་སློང་དེ་ལ་ཞེས་བྱ་བ་ནི་འཆི་ལྟས་ལའོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་ཤེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ། །གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བའི་རྣམ་པ་དེ་ཡོངས་སུ་གཏོང་ནའོ། །དེ་ལྟ་ན་ལེགས་ཤེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ། །ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་དུ་སྔར་བསྟན་པ་ལྟར་བསྒོ་བར་བྱ་བ་སྟེ། ཡང་དག་པར་བསྒོ་བ་དེ་ནི་དེ་ཡིན། ཡང་དག་པར་བསྟན་པ་དེ་ནི་དེ་ཡིན་ནོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་ངམ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུང་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཇི་ཙམ་ཅུང་ཟད་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བརྟེན་ཀྱང་བར་དུ་གཅོད་པར་མི་འགྱུར་ཏེ།
7.218a
དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་བྱས་སུ་འགྱུར་རོ། །གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གསོལ་བ་བྱེད་པ་ན་ཉེས་བྱས་སུ་འགྱུར་རོ། །ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་བྱས་སུ་འགྱུར་རོ། །ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་བྱས་སུ་འགྱུར་རོ། །ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་གལ་ཏེ་མི་འཐུན་པ་དང་ཆོས་མ་ཡིན་པས་སྒོ་བར་བྱེད་ན་ལྟུང་བ་མེད་དོ། །མི་འཐུན་པ་དང་ཆོས་ཀྱིས་སྒོ་བར་བྱེད་ན་ལྟུང་བ་མེད་དོ། །འཐུན་པ་དང་ཆོས་ལྟར་བཅོས་པས་སྒོ་བར་བྱེད་ན་ལྟུང་བ་མེད་དོ། །མི་འཐུན་པ་དང་ཆོས་མ་ཡིན་པ་ལྟར་བཅོས་པས་སྒོ་བར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་སྒོ་བར་མི་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟར་འཐུན་པས་སྒོ་བར་བྱེད་ན་རྫོགས་པར་བརྗོད་པ་ན་ལྟུང་བྱེད་དུ་འགྱུར་རོ། །དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་དག་བདག་ལ་ལྟུང་བྱེད་ཀྱི་ལྟུང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་བརྗོད་ན་དེ་ཕྱིན་ཅད་ནས་དེས་འཆབ་པའི་ཉེས་པ་འབྱུང་བར་འགྱུར་རོ། །དེ་བས་ན་དགེ་སློང་གིས་ཇི་ཙམ་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་བྱེད
7.218b
ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལྟ་བའི་རྣམ་པ་མི་གཏོང་བའི་ལྟུང་བྱེད་དེ་ལྔ་བཅུ་རྩ་ལྔ་པ་རྫོགས་སྷོ།། ་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །འཆི་ལྟས་དེ་གནས་ནས་དབྱུང་བའི་ལས་བྱས་པ་ན་ངུ་ཞིང་ཉེ་དགའི་གན་དུ་སོང་བ་དང ། ཉེ་དགས་སྨྲས་པ། འཆི་ལྟས་ཁྱོད་ཅིའི་ཕྱིར་ངུ ། འཆི་ལྟས་ཀྱི་སྨྲས་པ། ལྷུང་བཟེད་ནག་པོ་ཅན་དག་གིས་ཁོ་བོ་གནས་ནས་དབྱུང་བའི་ལས་བྱས་སོ། །ཉེ་དགས་སྨྲས་པ། གང་དག་གིས་འཆི་ལྟས་གནས་ནས་དབྱུང་བའི་ལས་བྱས་པ་དེ་དག་གྲོང་དང ། གྲོང་ཁྱེར་དང ། ལྗོངས་དང ། ཁམས་གསུམ་ནས་གནས་ནས་ཕྱུང་བར་གྱུར་ཅིག་།འོན་ཀྱང་གནས་ནས་དབྱུང་བའི་ལས་བྱས་པ་རྣམས་ལ་གྲོང་ངམ། གྲོང་རྡལ་དག་མེད་དམ་ཅི། སྡོད་ལ་བཟོད་པ་གསོལ་ཅིག་ཅེས་ཉེ་དགས་འཆི་ལྟས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲས་བར་བྱེད། ཀུན་དུ་གནས་པར་བྱེད། ཀུན་དུ་ལོངས་སྤྱོད་པར་བྱེད་ཅིང་དེ་དང་ལྷན་ཅིག་གནས་ཅིག་ཏུ་ཉལ་བར་བྱེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་དེ་སྐད་ཟེར་བའི་གང་ཟག་ཆོས་བཞིན་དུ་མ་བྱས་པ་སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་དང་གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་ཏུ་གནས་པར་བྱེད། ཀུན་དུ་ལོངས་སྤྱོད་པར་བྱེད་ཅིང་དེ་དང་ལྷན་ཅིག་གནས་ཅིག་ཏུ་ཉལ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས
7.219a
བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཤེས་བཞིན་དུ་དེ་སྐད་ཟེར་བའི་གང་ཟག་ཆོས་བཞིན་མ་བྱས་པ་སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་དང་གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་དུ་གནས་པར་བྱེད། ཀུན་དུ་ལོངས་སྤྱོད་པར་བྱེད་ཅིང་དེ་དང་ལྷན་ཅིག་གནས་ཅིག་ཏུ་ཉལ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུངས་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་དེ་སྐད་ཟེར་བའི་གང་ཟག་ཆོས་བཞིན་མ་བྱས་པ་སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་དང་གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་དུ་གནས་པར་བྱེད། ཀུན་དུ་ལོངས་སྤྱོད་པར་བྱེད་ཅིང་དེ་དང་ལྷན་ཅིག་གནས་ཅིག་ཏུ་ཉལ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་བརྗོད་པས་སོ། །དེ་སྐད་ཟེར་བའི་གང་ཟག་ཅེས་བྱ་བ་ནི་འཆི་ལྟས་སོ། །ཆོས་བཞིན་མ་བྱས་པ་ཞེས་བྱ་བ་ནི་ཆོས་དང་འཐུན་པར་མ་བྱས་པའོ། །སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་ཞེས་བྱ་བ་ནི་ལྟ་བའི་རྣམ་པ་གང་ཡིན་པ་དེའོ། །གཏམ་འདྲེ་བར་བྱེད་ཅེས་བྱ་བ་ནི་ལུང་དབོག་པ་སྦྱིན་པར་བྱེད་པའོ། །ཕེབས་པར་སྨྲ་བར་བྱེད་ཅེས་བྱ་བ་ནི་དམིགས་ཀྱིས་འདྲི་བ་སྦྱིན་པར་བྱེད
7.219b
པའོ། །ཀུན་དུ་གནས་པར་བྱེད་ཅེས་བྱ་བ་ནི་གནས་སྦྱིན་པར་བྱེད་པའོ། །ཀུན་དུ་ལོངས་སྤྱོད་པར་བྱེད་ཅིང་ཞེས་བྱ་བ་ནི་དེ་ལས་བསྙེན་བཀུར་བདག་གིར་བྱེད་ཅིང་ངོ ། །དེ་དང་ལྷན་ཅིག་གནས་གཅིག་ཏུ་ཉལ་ན་ཞེས་བྱ་བ་ནི་གནས་བཞི་པོ་ཐམས་ཅད་གཡོགས་ཤིང་ཐམས་ཅད་བསྐོར་བ་དང ། ཐམས་ཅད་གཡོགས་ཤིང་ཕལ་ཆེར་བསྐོར་བ་དང ། ཕལ་ཆེར་གཡོགས་ཤིང་ཐམས་ཅད་བསྐོར་བ་དང ། ཕལ་ཆེར་གཡོགས་ཤིང་ཕལ་ཆེར་བསྐོར་བ་དག་དུ་ཉལ་བས་སྐྱ་རེང་འཆར་བར་བྱེད་ནའོ། །གནས་ཐམས་ཅད་གཡོགས་ཤིང་ཐམས་ཅད་བསྐོར་བ་ནི་གནས་ཁང་དང ། འཁོར་གྱི་ཁྱམས་དང ། ཁང་པ་བརྩེགས་པ་དག་གོ། །ཐམས་ཅད་གཡོགས་ཤིང་ཕལ་ཆེར་བསྐོར་བ་ནི་སྒོ་བཅུ་པ་དང ། སྒོ་བཅུ་གཉིས་པ་དག་གོ། །ཕལ་ཆེར་གཡོགས་ཤིང་ཐམས་ཅད་བསྐོར་བ་ནི་ཁྱམས་ངོས་བཞི་པ་དག་གོ། །ཕལ་ཆེར་གཡོགས་ཤིང་ཕལ་ཆེར་བསྐོར་བ་ནི་ཁྱམས་ངོས་གསུམ་པ་དང ། འཁོར་གྱི་ཁྱམས་དག་གོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཤེས་བཞིན་དུ་དེ་སྐད་ཟེར་བའི་གང་ཟག་ཆོས་བཞིན་མ་བྱས་པ་སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་དང་གཏམ་འདྲེ་བར་བྱེད་ན་ལྟུང་བྱེད་དུ་འགྱུར་རོ། །ཕེབས་པར་སྨྲ་བར་བྱེད་ན་ལྟུང་བྱེད་དུ་འགྱུར་རོ། །ཀུན་དུ་གནས་པར་བྱེད་ན་ལྟུང་བྱེད་དུ་འགྱུར་རོ། །ཀུན་དུ་ལོངས་སྤྱོད་པར་བྱེད་ན་ལྟུང་བྱེད་དུ་འགྱུར་རོ། །དེ་དང་ལྷན་ཅིག་གནས་བཞི་པོ་དག་དུ་ཉལ་བས་སྐྱ་རེང་འཆར་བར་བྱེད་ན་ལྟུང་བྱེད་དུ་འགྱུར་རོ། །ན་བར་གྱུར་པ་དང ། སྡིག་པ་ཅན་གྱི་ལྟ་བའི་རྣམ་པ་དེ་དང་དབྲལ་བར་འདོད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་ཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྤངས་པའི
7.220a
རྗེས་སུ་ཕྱོགས་པའི་ལྟུང་བྱེད་དེ་ལྔ་བཅུ་རྩ་དྲུག་པ་རྫོགས་སྷོ།། ་་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་བརྒྱད་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཉེ་དགའ་ལ་དགེ་ཚུལ་ཚེར་མ་དང ། ཆེན་པོ་པ་ཞེས་བྱ་བ་གཉིས་ཤིག་ཡོད་དེ། འདོད་ཆགས་དང་བྲལ་བ་མེད་པ་ན་དགེ་སློང་རྣམས་དེ་གཉིས་དང་ལྷན་ཅིག་གཞོག་སྟེག་བྱེད། འཕྱར་གཡེང་བྱེད། ཐོ་འཚམ་པར་བྱེད། ཀུན་དུ་རྩེ་བར་བྱེད། ཅ་ཅོ་འདོན་པར་བྱེད། རྒོད་པ་དང ། དྲེགས་པ་དང ། ལུས་སྒྱུར་བར་བྱེད་དོ། །ཕྱིས་དེ་དག་གིས་བསྡམ་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་བསྡམ་པ་བྱས། བཤགས་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་བཤགས་པ་བྱས་ཏེ། སྤྲོ་བར་བྱེད། འབད་པར་བྱེད། རྩོལ་བར་བྱེད་པ་དག་གིས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཤིང་རྫུ་འཕྲུལ་ཡང་མངོན་པར་བསྒྲུབས་སོ། །དུས་གཞན་ཞིག་ན་དགེ་ཚུལ་ཚེར་མ་དང ། ཆེན་པོ་པ་གཉིས་མེ་ཏོག་དག་ཐུ་ཞིང་འཁོད་པ་ན་ནམ་མཁའ་ལས་དགེ་སློང་དག་ཅིག་རྫུ་འཕྲུལ་གྱིས་འདོང་བ་མཐོང་ནས་དེ་གཉིས་ཀྱིས་སྨྲས་པ། ཁྱེད་ཅག་སུ་དག་ཡིན། དེ་དག་གིས་སྨྲས་པ། ཁོ་བོ་ཅག་མིང་འདི་ཞེས་བྱ་བ་དག་ཡིན་ནོ། །དེ་གཉིས་ཀྱིས་སྨྲས་པ། ཁྱེད་ཅག་གིས་ཁོ་བོ་ཅག་གཉིས་དང་ལྷན་ཅིག་འདི་དང་འདི་ལྟ་བྱས་སོ། །དེ་དག་གིས་སྨྲས་པ། དེ་ལྟ་ཡིན་མོད་ཀྱི། འོན་ཀྱང་ཁོ་བོ་ཅག་གིས་བསྡམ་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་བསྡམ་པ་བྱས། བཤགས་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་བཤགས་པར་བྱས་སྤྲོ་བར་བྱེད། འབད་པར་བྱེད། རྩོལ་བར་བྱེད་པ་དག་གིས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཤིང་རྫུ་འཕྲུལ་ཡང་མངོན་པར་བསྒྲུབས་སོ། །དེ་ན་དགེ་ཚུལ་ཚེར་མ་དང ། ཆེན་པོ་པ་གཉིས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས
7.220b
གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་ཚུལ་ཚེར་མ་དང ། ཆེན་པོ་པ་དང ། གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ། །འདི་སྐད་ཅེས་བསྒོ་བར་བྱ་སྟེ། ཚེར་མ་དང ། ཆེན་པོ་པ་ཁྱེད་གཉིས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། འདི་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ ། །ཚེར་མ་དང ། ཆེན་པོ་པ་འདོད་པ་བར་དུ་གཅོད་པ་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་ཚེར་མ་དང ། ཆེན་པོ་པ་ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་དགེ་ཚུལ་ཚེར་མ་དང ། ཆེན་པོ་པ་གཉིས་ལ་ཚེར་མ་དང ། ཆེན་པོ་པ་ཁྱེད་གཉིས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་དེ་སྐད་ཅེས་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུངས་ངོ ། །ཚེར་མ་དང ། ཆེན་པོ་པ་འདོད་པ་བར་དུ་གཅོད་པ་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱི་ཚེར་མ་དང །
7.221a
ཆེན་པོ་པ་ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བཞམས་སྟེ་བསྒོའོ། །དགེ་སློང་རབ་ཏུ་མང་པོ་དག་གིས་དགེ་ཚུལ་ཚེར་མ་དང ། ཆེན་པོ་པ་ལ་བཞམས་ཏེ་བསྒོ་ན། དེ་གཉིས་ལ་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱི་དགེ་ཚུལ་ཚེར་མ་དང ། ཆེན་པོ་པ་དང ། གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱི་སྒོ་བར་བྱའོ། །འདི་ལྟར་བསྒོ་བར་བྱ་སྟེ། གནས་མལ་བཤམས་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་དགེ་ཚུལ་ཚེར་མ་དང ། ཆེན་པོ་པ་གཉིས་ཐོས་པའི་ཉེན་ཀོར་ནས་སྤངས་ཏེ་མཐོང་བའི་ཉེན་ཀོར་དུ་བཞག་ནས་དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་ཚུལ་ཚེར་མ་དང ། ཆེན་པོ་པ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་མཆི་ནས་འདི་གཉིས་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ན་འདི་གཉིས་ལ་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱིས་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་ཚུལ་ཚེར་མ་དང ། ཆེན་པོ་པ་ལ་ཚེར་མ་དང །
7.221b
ཆེན་པོ་པ་ཁྱེད་གཉིས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་དེ་སྐད་ཅེས་མ་ཟེར་ཅིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ ། །ཚེར་མ་དང ། ཆེན་པོ་པ་འདོད་པ་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་ཚེར་མ་དང ། ཆེན་པོ་པ་ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱི་བསྒོ་བ་མཛད་དོ། །འདི་ནི་གསོལ་བའོ། །དེའི་འོག་ཏུ་དགེ་སློང་གཅིག་གིས་དེ་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་གསོལ་བ་མཛད་ལགས་ཀྱིས། ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་སྐད་སྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་ལས་བྱའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་ཚུལ་ཚེར་མ་དང ། ཆེན་པོ་པ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་མཆི་ནས་འདི་གཉིས་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ན། འདི་གཉིས་ལ་བཞམས་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ནས་དེའི་སླད་དུ་དགེ་འདུན་གྱི་དགེ་ཚུལ
7.222a
ཚེར་མ་དང ། ཆེན་པོ་པ་ལ་ཚེར་མ་དང ། ཆེན་པོ་པ་ཁྱེད་གཉིས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་བསྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུངས་ངོ ། །ཚེར་མ་དང ། ཆེན་པོ་པ་འདོད་པ་བར་དུ་གཅོད་པ་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་ཚེར་མ་དང ། ཆེན་པོ་པ་ཁྱོད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་དགེ་ཚུལ་ཚེར་མ་དང ། ཆེན་པོ་པ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུངས་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོའོ། །དེའི་འོག་ཏུ་དགེ་སློང་ཅིག་གིས་དེ་གཉིས་ལ་ཁྱེད་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་ལས་བརྗོད་པ་དང་པོ་ཡང་མཛད་ལགས་ཀྱིས་ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་ལས་བརྗོད་པ་གཉིས་པ་བྱའོ། །ལས་རྗོད་པ་གཉིས་པ་བྱས་ནས་ཀྱང་དེའི་འོག་ཏུ་དགེ་སློང་གཅིག་གིས་དེ་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་ལས་བརྗོད་པ་གཉིས་པ་ཡང་མཛད་ལགས་ཀྱིས་ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་ལས་རྗོད་པ་གསུམ་པ
7.222b
བྱའོ། །ལས་བརྗོད་པ་གསུམ་པ་བྱས་ནས་ཀྱང་དེའི་འོག་ཏུ་དགེ་སློང་གཅིག་གིས་དེ་གཉིས་ལ་ཁྱེད་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་ལས་བརྗོད་པ་གསུམ་པ་ཡང་མཛད་ལགས་ཀྱིས། ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་འཇུག་བསྡུ་བ་བྱ་སྟེ། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་ཚུལ་ཚེར་མ་དང ། ཆེན་པོ་པ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུངས་བས་དེ་དེ་བཞིན་དུ་འཛིན་ཏོ་ཞེས་བརྗོད་པར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ཀྱི་ལྟར་མཉན་ནས་དགེ་ཚུལ་ཚེར་མ་དང ། ཆེན་པོ་པ་ལ་གསོལ་བ་དང་བཞིའི་ལས་ཀྱིས་བསྒོའོ། །དགེ་སློང་རྣམས་ཀྱིས་དགེ་ཚུལ་ཚེར་མ་དང ། ཆེན་པོ་པ་ལ་གསོལ་བ་དང་བཞིའི་ལས་ཀྱིས་བསྒོ་ན། དེ་གཉིས་ལ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་ཚུལ་ཚེར་མ་དང ། ཆེན་པོ་པ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་དང ། གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྙིལ་བའི་ལས་བྱའོ། །འདི་ལྟར་བྱ་སྟེ། གནས་མལ་བཤམས་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་དགེ་ཚུལ་ཚེར་མ་དང ། ཆེན་པོ་པ་གཉིས་ཐོས་པའི་ཉེན་ཀོར་ནས་སྤངས་ཏེ་མཐོང་བའི་ཉིན་ཀོར་དུ་བཞག་ནས་དེའི་འོག་ཏུ་དགེ་སློང་ཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན
7.223a
པ་རྣམས་གསན་དུ་གསོལ། དགེ་ཚུལ་ཚེར་མ་དང ། ཆེན་པོ་པ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་འཆི་ནས་འདི་གཉིས་ལ་དགེ་སློང་རབ་ཏུ་མང་པོས་བཞམས་ཏེ་བསྒོ་ན་འདི་གཉིས་ལ་དགེ་སློང་རབ་ཏུ་མང་པོས་བཞམ་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱི་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ནས་འདི་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་ན། འདི་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱི་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་དུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ། །ཞེས་རྗེས་སུ་ཐ་སྙད་འདོགས་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་ཚུལ་ཚེར་མ་དང ། ཆེན་པོ་པ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་དེང་ཕྱིན་ཅད་དགེ་ཚུལ་ཁྱེད་གཉིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག་།ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་ཕྱི་བཞིན་དུ་ཡང་མ་འགྲོ་ཤིག་།དགེ་སློང་རྣམས་དང་དགེ་ཚུལ་ལྷན་ཅིག་ནུབ་གཉིས་ཚུན་ཆད་གནས་ཅིག་དུ་ཉལ་དུ་དབང་བ་གང་ཡིན་པ་དེ་ཡང་དེང་ཕྱིན་ཆད་ཁྱེད་ལ་མེད་དེ། མི་གཏི་མུག་ཅན་ཁྱེད་གཉིས་བསྙིལ་གྱིས་གཞན་དུ་སོང་ཤིག་ཅེས་བསྙིལ་པའི་ཕྲིན་ལས་མཛད་དོ། །འདི་ནི་གསོལ་བའོ། །དེའི་འོག་ཏུ་དགེ་སློང་གཅིག་གིས་དེ་གཉིས་ལ་ཁྱེད་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་གསོལ་བ་མཛད་ལགས་ཀྱི་ཁྱེད་གཉིས་སྡིག་པ་ཅན་གྱི
7.223b
ལྟ་བའི་རྣམ་པ་འདི་ལྟ་བུ་ནི་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་དུ་ལས་བྱའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་ཚུལ་ཚེར་མ་དང ། ཆེན་པོ་པ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་ཅག་གིས་ཤེས་སོ་ཞེས་འཆི་ནས་འདི་གཉིས་ལ་དགེ་སློང་རབ་དུ་མང་པོས་བཞམ་ཏེ་བསྒོ་ནས་འདི་གཉིས་ལ་བཞམ་ཏེ་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ནས་འདི་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་ན། འདི་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱི་བསྒོ་ཡང་སྡིག་པ་ཅན་གྱི་ལྟ་བའི་རྣམ་པ་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ཏེ། དེའི་སླད་དུ་དགེ་འདུན་གྱིས་དགེ་ཚུལ་ཚེར་མ་དང ། ཆེན་པོ་པ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་ཚེར་མ་དང་ཆེན་པོ་པ་ཁྱེད་གཉིས་དེང་ཕྱིན་ཆད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག་།ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་དུ་ཡང་མ་འགྲོ་ཤིག་།དགེ་སློང་རྣམས་དང་དགེ་ཚུལ་ལྷན་ཅིག་ནུབ་གཉིས་ཚུན་ཆད་གནས་གཅིག་ཏུ་ཉལ་དུ་དབང་བ་གང་ཡིན་པ་དེ་ཡང་དེར་ཕྱིན་ཆད་ཁྱེད་ལ་མེད་དེ། མི་གཏི་མུག་ཅན་ཁྱེད་གཉིས་བསྙིལ་གྱི་གཞན་དུ་སོང་ཤིག་ཅེས་བསྙིལ་བའི་ཕྲིན་ལས་མཛད་ན། ཚེ་དང་ལྡན་པ་གང་དག་དགེ་ཚུལ་ཚེར་མ་དང ། ཆེན་པོ་པ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་ལ་བསྙིལ་བའི་ཕྲིན་ལས་མཛད་པར་བཟོད་པ་དེ་དག་ནི་ཅང་མ་གསུངས་ཤིག་།
7.224a
གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོའོ། །དེའི་འོག་ཏུ་དགེ་སློང་ཅིག་གིས་དེ་གཉིས་ལ་ཁྱེད་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་གྱུར་པ་ལས་ལས་བརྗོད་པ་དང་པོ་ཡང་མཛད་ལགས་ཀྱིས། ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་ལས་བརྗོད་པ་གཉིས་པ་བྱའོ། །ལས་བརྗོད་པ་གཉིས་པ་བྱས་ནས་ཀྱང་དེའི་འོག་དུ་དགེ་སློང་གཅིག་གིས་དེ་གཉིས་ལ་ཁྱེད་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་ལས་བརྗོད་པ་གཉིས་པ་ཡང་མཛད་ལགས་ཀྱིས། ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་ལས་བརྗོད་པ་གསུམ་པ་བྱའོ། །ལས་བརྗོད་པ་གསུམ་པ་བྱས་ནས་ཀྱང་དེའི་འོག་ཏུ་དགེ་སློང་གཅིག་གིས་དེ་གཉིས་ལ་ཁྱེད་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་མཛད་པར་འགྱུར་བ་ལས་ལས་བརྗོད་པ་གསུམ་པ་ཡང་མཛད་ལགས་ཀྱིས། ཁྱེད་གཉིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དེའི་འོག་ཏུ་འཇུག་བསྡུ་བ་བྱ་སྟེ། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་ཚུལ་ཚེར་མ་དང ། ཆེན་པོ་པ་ལ་གསོལ་བ་དང་བཞིའི་ལས་ཀྱིས་བསྙིལ་བའི་ཕྲིན་ལས་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བརྗོད་པར་བྱའོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་ཚུལ་ཚེར་མ་དང ། ཆེན་པོ་པ་ལ་གསོལ་བ་དང་བཞིའི་ལས་ཀྱི་བསྙིལ་བའི་ལས་བྱས་སོ། །དེ་གཉིས་བསྙིལ་བའི་ལས་བྱས་པ་ན་ངུ་ཞིང་ཉེ་དགའི་གན་དུ་དོང་བ་དང ། ཉེ་དགས་སྨྲས་པ།
7.224b
ཚེར་མ་དང ། ཆེན་པོ་པ་ཁྱེད་གཉིས་ཅིའི་ཕྱིར་ངུ ། དེ་གཉིས་ཀྱིས་སྨྲས་པ། ལྷུང་བཟེད་ནག་པོ་ཅན་དག་གིས་བདག་ཅག་གཉིས་བསྙིལ་བའི་ལས་བྱས་སོ། །ཉེ་དགས་སྨྲས་པ། གང་དག་གིས་ཁྱེད་གཉིས་བསྙིལ་བའི་ལས་བྱས་པ་དེ་དག་གྲོང་དང ། གྲོང་ཁྱེར་དང ། ལྗོངས་དང ། ཁམས་གསུམ་ནས་བསྙིལ་བར་གྱུར་ཅིག་འོན་ཀྱང་བསྙིལ་བའི་ལས་བྱས་པ་དག་ལ་གྲོང་དང ། གྲོང་ཁྱེར་དག་མེད་དམ་ཅི། སྡོད་ལ་བཟོད་པ་གསོལ་ཅིག་ཅེས་དེས་དེ་གཉིས་ཉེ་བར་འཇོག་པར་བྱེད། ཉེ་བར་བསྟེན་པར་བྱེད་ཅིང་དེ་གཉིས་དང་ལྷན་ཅིག་གནས་གཅིག་ཏུ་ཉལ་བར་བྱེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་དག་ཉེ་བར་འཇོག་པར་བྱེད། ཉེ་བར་བསྟེན་པར་བྱེད་ཅིང་དེ་དག་དང་ལྷན་ཅིག་གནས་གཅིག་ཏུ་ཉལ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་སྨྲས་པ། ཉེ་དགའ་ཁྱོད་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་དག་ཉེ་བར་འཇོག་པར་བྱེད། ཉེ་བར་སྟེན་པར་བྱེད་ཅིང་དེ་དག་དང་ལྷན་ཅིག་གནས་གཅིག་ཏུ་ཉལ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ
7.225a
བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་ཚུལ་ཞིག་ཀྱང་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་སྟེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་ན་དགེ་ཚུལ་དེ་ལ་དགེ་སློང་རྣམས་ཀྱིས་འདི་སྐད་ཅེས་དགེ་ཚུལ་ཁྱོད་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག་།བཅོམ་ལྡན་འདས་ལ་བསྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་འདི་སྐད་མི་གསུང་ངོ ། །ཚེ་དང་ལྡན་པ་དགེ་ཚུལ་འདོད་པ་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་དགེ་ཚུལ་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་ཚུལ་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་ཚུལ་དེ་ལ་དགེ་སློང་རྣམས་ཀྱིས་དེང་ཕྱིན་ཆད་དགེ་ཚུལ་ཁྱོད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག་།ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་ཕྱི་བཞིན་དུ་ཡང་མ་འགྲོ་ཞིག་།དགེ་སློང་རྣམས་དང་དགེ་ཚུལ་ལྷན
7.225b
ཅིག་ནུབ་གཉིས་ཚུན་ཆད་གནས་ཅིག་ཏུ་ཉལ་དུ་དབང་བ་གང་ཡིན་པ་དེ་ཡང་དེང་ཕྱིན་ཆད་ཁྱོད་ལ་མེད་དེ། མི་གཏི་མུག་ཅན་ཁྱོད་བསྙིལ་གྱིས་གཞན་དུ་སོང་ཤིག་ཅེས་བསྒོ་བར་བྱའོ། །ཡང་དགེ་སློང་གང་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་ཉེ་བར་འཇོག་པར་བྱེད་དམ་ཉེ་བར་བསྟེན་པར་བྱེད་དམ། དེ་དང་ལྷན་ཅིག་གནས་གཅིག་ཏུ་ཉལ་ན་ལྟུང་བྱེད་དོ། །དགེ་ཚུལ་ཞིག་ཀྱང་ཞེས་བྱ་བ་ནི་ཚེར་མ་དང ། ཆེན་པོ་པ་འམ། གཞན་ཡང་དེ་ལྟ་བུ་གང་ཡིན་པའོ། །འདི་སྐད་ཅེས་ཤེས་བྱ་བ་ནི་འདི་སྐད་ཅེས་ཟེར་ནའོ། །ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་ཞེས་བྱ་བ་ལ། འདོད་པ་དག་ཅེས་བྱ་བ་ནི་འདོད་པའི་ཡོན་ཏན་ལྔ་པོ་དག་གོ། །དེ་དག་བསྟེན་ཀྱང་ཞེས་བྱ་བ་ནི་དེ་དག་ལྷག་པར་སྤྱད་ཀྱང་ངོ ། །བར་དུ་གཅོད་པར་མི་འགྱུར་ཏེ་ཞེས་བྱ་བ་ནི་དགེ་སྦྱོང་གི་ཚུལ་གྱི་བར་དུ་གཅོད་པར་མི་འགྱུར་ཏེ་ཞེས་ཟེར་བའོ། །དེ་ལྟར་བཅོམ་ལྡན་འདས་ཀྱིས་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིའོ། །ཆོས་ཤེས་བྱ་བ་ནི་སངས་རྒྱས་ཀྱིས་གསུངས་པ་འམ། ཉན་ཐོས་ཀྱིས་བཤད་པའོ། །བསྟན་པ་ཞེས་བྱ་བ་ནི་རབ་ཏུ་བསྟན་པའོ། །བདག་གིས་ཤེས་སོ་ཞེས་ཟེར་ན་ཞེས་བྱ་བ་ནི་བདག་གིས་ཀུན་ཤེས་སོ་ཞེས་ཟེར་ནའོ། །དགེ་ཚུལ་དེ་ལ་ཞེས་བྱ་བ་ནི་ཚེར་མ་དང ། ཆེན་པོ་པ་ལའོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་ཤེས་བྱ་བ་ནི་བཞམས་ཏེ་བསྒོ་བ་ཇི་ལྟར་སྔར་བསྟན་པ་ལྟར་བསྒོ་བར་བྱའོ། །དགེ་ཚུལ་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ། །གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བའི་རྣམ་པ་དེ་ཡོངས་སུ་གཏོང་ནའོ། །དེ་ལྟ་ན་ལེགས་ཤེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ། །ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱི་བསྒོ་བ་ཇི་ལྟར་སྔར་བསྟན་པ་ལྟར་བསྒོ་བར
7.226a
བྱ་བ་སྟེ། ཡང་དག་པར་བསྒོ་བ་དེ་ནི་དེ་ཡིན་ནོ། །ཡང་དག་པར་བསྟན་པ་དེ་ནི་དེ་ཡིན་ནོ། །དགེ་ཚུལ་དེ་ལ་ཞེས་བྱ་བ་ནི་ཚེར་མ་དང ། ཆེན་པོ་པ་ལའོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་སོ། །དེང་ཕྱིན་ཆད་དགེ་ཚུལ་ཁྱོད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག་།ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་དུ་ཡང་མ་འགྲོ་ཤིག་དགེ་སློང་རྣམས་དང་དགེ་ཚུལ་ལྷན་ཅིག་ནུབ་གཉིས་ཚུན་ཆད་གནས་གཅིག་ཏུ་ཉལ་དུ་དབང་བ་གང་ཡིན་པ་དེ་ཡང་དེང་ཕྱིན་ཆད་ཁྱོད་ལ་མེད་དེ། མི་གཏི་མུག་ཅན་ཁྱོད་བསྙིལ་གྱིས། གཞན་དུ་སོང་ཤིག་ཅེས་བསྒོ་བར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱི་བསྙིལ་བར་བྱ་བ་ཇི་སྐད་སྔར་བསྟན་པ་ལྟར་བསྒོ་བར་བྱའོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འོ། །གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་དེ་རང་ཉིད་ཀྱིས་རིག་པར་གྱུར་པ་འམ། གཞན་དག་གིས་བརྗོད་པས་སོ། །དེ་ལྟར་བསྙིལ་བའི་དགེ་ཚུལ་ཞེས་བྱ་བ་ནི་ཚེར་མ་དང ། ཆེན་པོ་པ་ཇི་ལྟ་བར་རོ། །ཉེ་བར་འཇོག་པར་བྱེད་ཅེས་བྱ་བ་ནི་གནས་སྦྱིན་པར་བྱེད་པའོ། །ཉེ་བར་བསྟེན་པར་བྱེད་ཅེས་བྱ་བ་ནི་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ལུངས་འབོག་པ་དང ། ཀླག་པ་དང ། ཁ་ཏོན་དང ། དམིགས་ཀྱི་དྲི་བ་སྦྱིན་པས་སོ། །དེ་དང་ལྷན་ཅིག་གནས་ཅིག་ཏུ་ཉལ་ན་ཞེས་བྱ་བ་ནི་གནས་བཞི་པོ་ཐམས་ཅད་གཡོགས་ཤིང་ཐམས་ཅད་བསྐོར་བ་དང ། ཐམས་ཅད་གཡོགས་ཤིང་ཕལ་ཆེར་བསྐོར་བ་དང ། ཕལ་ཆེར་གཡོག་ཤིང་ཐམས་ཅད་བསྐོར་བ་དང ། ཕལ་ཆེར་གཡོག་ཤིང་ཕལ་ཆེར་བསྐོར་བ་དག་དུ་ཉལ་བས་སྐྱ་རེང་འཆར་བར་བྱེད་ནའོ། །གནས་ཐམས་ཅད་གཡོག་ཤིང་ཐམས་ཅད་བསྐོར་བ་ནི་གནས་ཁང་དང ། འཁོར་གྱི་ཁྱམས་དང ། ཁང་པ་བརྩེགས་པ་དག་གོ། །ཐམས་ཅད་གཡོགས་ཤིང་ཕལ་ཆེར་བསྐོར་བ་ནི་བསྒོ
7.226b
བཅུ་པ་དང ། བསྒོ་བཅུ་གཉིས་པ་དག་གོ། །ཕལ་ཆེར་གཡོགས་ཤིང་ཐམས་ཅད་བསྐོར་བ་ནི་ཁྱམས་ངོས་བཞི་པ་དག་གོ། །ཕལ་ཆེར་གཡོགས་ཤིང་ཕལ་ཆེར་བསྐོར་བ་ནི་ཁྱམས་ངོས་གསུམ་པ་དང ། འཁོར་གྱི་ཁྱམས་དག་གོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་ཉེ་བར་འཇོག་པར་བྱེད་ན་ལྟུང་བྱེད་དུ་འགྱུར་རོ། །ཉེ་བར་བསྟེན་པར་བྱེད་ན་ལྟུང་བྱེད་དུ་འགྱུར་རོ། །དེ་དང་ལྷན་ཅིག་གནས་གཅིག་ཏུ་ཉལ་ན་ལྟུང་བྱེད་དུ་འགྱུར་རོ། །ན་བ་དང ། སྡིག་པ་ཅན་གྱི་ལྟ་བའི་རྣམ་པ་དེ་དང་ཕྲལ་བར་འདོད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསྙིལ་བ་བསྡུད་པའི་ལྟུང་བྱེད་དེ་ལྔ་བཅུ་རྩ་བདུན་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་ཀླུའི་རྒྱལ་པོ་རི་བོ་དང ། ཡིད་འོང་ཞེས་བྱ་བ་གཉིས་ཤིག་གནས་པ་དེ་གཉིས་ཀྱི་མཐུས་རྒྱལ་པོའི་ཁབ་ཀྱི་ཆུ་དྲོན་ལྔ་བརྒྱ་དང ། འབབ་ཆུ་དག་དང ། མཚོ་དག་དང ། ལྟེང་ཀ་དག་ཏུ་ལྷས་དུས་དང་དུས་སུ་ཆུའི་རྒྱུན་ལེགས་པར་འབེབ་ཤིང་ལོ་ཐོག་ཀྱང་ཤིན་དུ་ཕུན་སུམ་ཚོགས་པར་གྱུར་ཏོ། །གང་གི་ཚེ་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་བཏུལ་བ་དེའི་ཚེ་ན་དེ་གཉིས་ཚེས་བརྒྱད་དང ། བཅུ་བཞི་དང ། ཚེས་བཅཝ་ལྔ་ལ་རི་རབ་ཀྱི་བང་རིམ་དུ་འོངས་ཏེ། བཅོམ་ལྡན་འདས་ལ་བསྙེན་བཀུར་བྱེད་དོ། །དེ་ནས་ཀླུའི་རྒྱལ་པོ་རི་བོ་དང ། ཡིད་འོང་གཉིས་འདི་སྙམ་དུ་སེམས་ཏེ། ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ཚེས་བརྒྱད་དང ། ཚེས་བཅུ་བཞི་དང ། བཅཝ་ལྔ་ལ
7.227a
རི་རབ་ཀྱི་བང་རིམ་དུ་འོངས་ཏེ། བཅོམ་ལྡན་འདས་ལ་བསྙེན་བཀུར་བྱེད་ན་བདག་ཅག་གཉིས་འདི་ན་འཁོད་པས་བཅོམ་ལྡན་འདས་ལ་སྙེན་བཀུར་མ་བྱས་ཀྱིས། བཅོམ་ལྡན་འདས་ལ་སྙེན་བཀུར་བྱེད་དུ་འདོང་ངོ་སྙམ་མོ། །དེ་ནས་ཀླུའི་རྒྱལ་པོ་རི་བོ་དང ། ཡིད་འོང་གཉིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་རི་བོ་དང ། ཡིད་འོང་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་དོ། །གང་གི་ཚེ་བཅོམ་ལྡན་འདས་ཀྱིས་དེ་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་པ་དེའི་ཚེ་ན་དེ་གཉིས་ལུས་དང་ལོངས་སྤྱོད་དག་གིས་ཤིན་དུ་མངོན་པར་མཐོ་བར་གྱུར་ཏོ། །གང་གི་ཚེ་དེ་གཉིས་ལུས་དང་ལོངས་སྤྱོད་དག་གིས་ཤིན་ཏུ་མངོན་པར་མཐོ་བར་གྱུར་པ་དེའི་ཚེ་ན་དེ་གཉིས་ཀྱི་བསམ་པ། རྒྱ་མཚོ་ཆེན་པོར་འཇུག་ཏུ་འདོང་ངོ་སྙམ་ནས། དེ་གཉིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འཁོད་དོ། །མཐའ་ཅིག་ཏུ་འཁོད་ནས་བཅོམ་ལྡན་འདས་ལ་ཀླུའི་རྒྱལ་པོ་རི་བོ་དང ། ཡིད་འོང་གཉིས་ཀྱི་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གང་གི་ཚེ་བདག་ཅག་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་པ་དེའི་ཚེ་ན་བདག་ཅག་གཉིས་ལུས་དང་ལོངས་སྤྱོད་དག་གིས་ཤིན་དུ་མངོན་པར་མཐོ་བར་གྱུར་པས་གལ་ཏེ་བཅོམ་ལྡན་འདས་ཀྱིས་གནང་ན་བདག་ཅག་གཉིས་རྒྱ་ཚོ་ཆེན་པོར་འཇུག་ཏུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་ཁྱེད་གཉིས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་ཡུལ་ན་གནས་པ་དག་ཡིན་པས་ན་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཞུས་ཤིག་།དེ་གཉིས་ཀྱིས་བསམས་པ། དོན་གྱིས་ན་བཅོམ་ལྡན་འདས་ཀྱིས་བདག་ཅག་གཉིས་རྒྱ་མཚོ་ཆེན་པོར་འཇུག་ཏུ་འགྲོར་མ་གནང་ངོ་སྙམ་མོ། །དེ་གཉིས་གང་གི་ཚེ་མཚན་མོ་བཅོམ་ལྡན་འདས་ལ
7.227b
བསྙེན་བཀུར་བྱེད་པ་དེའི་ཚེ་ན་ནི་གཞལ་མེད་ཁང་པའི་ཆ་ལུགས་ཀྱི་བསྙེན་བཀུར་བྱེད་ཅིང ། གང་གི་ཚེ་ཉིན་མོ་བཅོམ་ལྡན་འདས་ལ་སྙེན་བཀུར་བྱེད་པ་དེའི་ཚེ་ན་ནི་ཁྱིམ་བདག་གི་ཆ་ལུགས་ཀྱི་སྙེན་བཀུར་བྱེད་དོ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་འོད་མའི་ཚལ་ཀ་ལན་ད་ཀའི་གནས་ག་ལ་བ་དེར་སོང་ངོ ། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་རྒྱལ་པོ་དེ་ལ་ཀར་བསྡད་དེ་མི་དག་པའི་མཐའ་ཅན་ཞིག་ལ་སྨྲས་པ། ཀཝའི་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་པ་ལྟོས་ཤིག་།མི་དག་པའི་ཐ་ཅན་དེས་ལྷ་བཀའ་བཞིན་འཚལ་ཞེས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུག་ཅན་སྙིང་པོ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་བ་དང ། ཇི་ཙམ་ན་ཁྱིམ་བདག་གཉིས་ཤིག་བཅོམ་ལྡན་འདས་ལ་སྙེན་བཀུར་བྱེད་པ་མཐོང་ངོ ། །མཐོང་ནས་ཀྱང་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ་ཁྱིམ་བདག་གཉིས་ཤིག་བཅོམ་ལྡན་འདས་ལ་སྙེན་བཀུར་བགྱིད་དེ། དེ་གཉིས་ལྷའི་ཡུལ་ན་གནས་པ་དག་ལགས་གོར་མ་བཀུམ་མོ། །རྒྱལ་པོས་བསམ་པ། ཁྱིམ་བདག་དེ་གཉིས་བདག་གི་ཡུལ་ན་གནས་པ་ཡིན་པས་དེ་གཉིས་ཀྱིས་བདག་མཐོང་ན་མངོན་དུ་ལྡང་བར་འགྱུར་གྲངས་སྙམས་ནས་དེ་བཅོམ་ལྡན་འདས་ག་ལ་བ་དེར་སོང་ངོ ། །ཀླུའི་རྒྱལ་པོ་རི་བོ་དང ། ཡིད་འོང་གཉིས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་དེ་གཉིས་ཀྱི་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས་རེ་ཤིག་དམ་པའི་ཆོས་ལ་བསྙེན་བཀུར་བགྱི་འམ། འོན་ཏེ་རྒྱལ་པོ་ལ་བསྙེན་བཀུར་བགྱི། ཀླུའི་རྒྱལ་པོ་གཉིས་རེ་ཤིག་དམ་པའི་ཆོས་ལ་བསྙེན་བཀུར་གྱིས་ཤིག་།སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དེ་དགྲ་བཅོམ་པ་དག་ཀྱང་ཆོས་བླ་མར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང
7.228a
བ་འདི་ལ་ཚིགས་སུ་བཅད་པ་དག་བཀའ་སྩལ་པ། སངས་རྒྱས་གང་དག་འདས་པ་དང ། །སངས་རྒྱས་གང་དག་མ་བྱོན་དང ། །སངས་རྒྱས་མྱ་ངན་སེལ་མཛད་པ། །ད་ལྟར་མང་པོ་གང་བཞུགས་དག་།ཐམས་ཅད་དམ་པའི་ཆོས་ལ་ནི། །གུས་པར་གནས་གྱུར་གནས་འགྱུར་ཞིང ། །དེ་བཞིན་གུས་པར་གནས་མཛད་དེ། །དེ་ནི་སངས་རྒྱས་ཆོས་ཉིད་ཡིན། །དེ་ཕྱིར་བདག་ལ་ལེགས་འདོད་ཅིང ། །བདག་ཉིད་ཆེན་པོ་མངོན་འདོད་པས། །སངས་རྒྱས་བསྟན་པ་དྲན་བྱེད་ན། །འདི་ལ་དམ་ཆོས་གུས་པར་བྱ། །དེ་གཉིས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་མངོན་དུ་ལྡང་བ་མ་བྱས་པ་དང ། རྒྱལ་པོ་ཁྲོས་ཏེ་བསམས་པ། ཁྱིམ་བདག་འདི་གཉིས་བདག་གི་ཡུལ་ན་གནས་པ་དག་ཡིན་ན་བདག་ལ་མངོན་དུ་ལྡང་བ་མི་བྱེད་དོ་སྙམ་ནས། དེས་བཅོམ་ལྡན་འདས་ཀྱིས་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་ཅད་པ་དག་བཀའ་སྩལ་པ། རབ་ཏུ་དང་སེམས་མེད་པ་དང ། །ཞེ་སྡང་ཅན་དང་འཁྲུགས་པ་ཡིས། །ཡང་དག་རྫོགས་སངས་བསྟན་པ་ཡི། །དམ་ཆོས་ཀུན་ཤེས་བྱ་མི་ནུས། །གང་གིས་ཉེས་རྩོམ་བརྟུལ་བྱས་ཤིང ། །རབ་དང་མེད་པའི་སེམས་བསལ་ཏེ། །ཀུན་ནས་མནར་སེམས་འདིར་སྤོང་བ། །དེས་ནི་ལེགས་གསུང་ཤེས་པར་གྱུར། །རྒྱལ་པོས་བསམས་པ། ཁྱིམ་བདག་འདི་གཉིས་ལ་བརྟེན་ནས་བཅོམ་ལྡན་འདས་ཀྱིས་ཆོས་མཉན་པ་ཡང་རྒྱུན་དགུམ་མོ་སྙམ་མོ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱིས་སྤྱན་སྔ་ནས་སོང་ནས་དེས་འོད་མའི་ཚལ་ནས་ཕྱིར་བྱུང་བ་ན་ཞོ་ཤེས་འཚོ་བ་རྣམས་ལ་བསྒོ་བ། གང་གི
7.228b
ཚེ་ཁྱིམ་བདག་འདི་གཉིས་བཅོམ་ལྡན་འདས་ཀྱིས་སྤྱན་སྔ་ནས་ཕྱིར་བྱུང་བར་གྱུར་པ་དེའི་ཚེ་ན་འདི་སྐད་ཅེས་རྒྱལ་པོའི་ཞལ་ནས་ཁྱེད་གཉིས་ངའི་ཡུལ་ན་མ་འདུག་ཤིག་ཅེས་བྱུང་ངོ་ཞེས་གྱིས་ཤིག་ཅེས་སྨྲས་ཏེ་རྒྱལ་པོ་སོང་ངོ ། །ཞོ་ཤས་འཚོ་བ་དག་གིས་ལྷ་བཀའ་བཞིན་འཚལ། ཞེས་རྒྱལ་པོ་ལས་མཉན་ནས་དེ་ཉིད་དུ་བསྡད་པ་དང ། ཀླུའི་རྒྱལ་པོ་རི་བོ་དང ། ཡིད་འོང་གཉིས་བཅོམ་ལྡན་འདས་ཀྱིས་ཞབས་ལ་ཕྱག་འཚལ་ཏེ། བཅོམ་ལྡན་འདས་ཀྱིས་སྤྱན་སྔ་ནས་ཕྱིར་བྱུང་ནས་དེ་གཉིས་འོད་མའི་ཚལ་ནས་ཕྱིར་བྱུང་བ་ན་རྒྱལ་པོའི་ཞོ་ཤས་འཚོ་བ་དག་གིས་སྨྲས་པ། ཁྱིམ་བདག་གཉིས་རྒྱལ་པོའི་ཞལ་ནས་ཁྱོད་གཉིས་ངའི་ཡུལ་ན་མ་འདུག་ཅིག་ཅེས་བྱུང་ངོ ། །དེ་སྐད་ཅེས་སྨྲས་པ་དང ། ཀླུའི་རྒྱལ་པོ་རི་བོ་དང་ཡིད་འོང་གཉིས་ཀྱིས་བསམས་པ། བདག་ཅག་གཉིས་ཡུན་རིང་པོ་ནས་སྨོན་པ་གང་ཡིན་པ་དེ་ཚེགས་ཆུང་ངུས་གྲུབ་བོ་སྙམ་དུ་རིག་ནས་དེ་ཉིད་དུ་ཆུའི་འོད་པ་ཆེན་པོ་ཀུན་ཏུ་རབ་དུ་བསྐྱེད་ནས་ངམ་གྲོག་ཆུང་ངུ་དག་ཏུ་ཞུགས་སོ། །ངམ་གྲོག་ཆུང་ངུ་དག་ནས་ངམ་གྲོག་ཆེན་པོ་དག་དུ་ཞུགས་སོ། །ངམ་གྲོག་ཆེན་པོ་དག་ནས་ཆུ་ཀླུང་ཆུང་ངུ་དག་དུ་ཞུགས་སྷོ། །ཆུ་ཀླུང་ཆུང་ངུ་དག་ནས་ཆུ་ཀླུང་ཆེན་པོ་དག་ཏུ་ཞུགས་སོ། །ཆུ་ཀླུང་ཆེན་པོ་ནས་རྒྱ་མཚོ་ཆེན་པོར་ཞུགས་ཏེ། གང་གི་ཚེ་དེ་གཉིས་རྒྱ་མཚོ་ཆེན་པོར་ཞུགས་པ་དེའི་ཚེ་ན་ལུས་དང་ལོངས་སྤྱོད་དག་གིས་ཆོས་ཤིན་དུ་མངོན་པར་མཐོ་བར་གྱུར་ཏོ། །གང་གི་ཚེ་དེ་གཉིས་རྒྱ་མཚོ་ཆེན་པོར་ཞུགས་པ་དེའི་ཚེ་ན་རྒྱལ་པོའི་ཁབ་ཀྱིས་ཆུ་དྲོན་ལྔ་བརྒྱ་པོ་དག་ཀྱང་བསྐམ་པར་བརྩམས། འབབ་ཆུ་དག་དང ། མཚོ་དག་དང ། ལྡེང་ཀ་དག་དུ་ཡང་ལྷས་དུས་དང་དུས་སུ་ཆུའི་རྒྱུན་ལེགས་པར་འབེབས་པར་མི་བྱེད། ལོ་ཐོག་དག་ཀྱང་ཤིན་ཏུ་རྒུད་པར་གྱུར་ནས་རྒྱལ་པོས་བསམས་པ། རྒྱལ་པོའི་ཁབ་འདི་ན་ཀླུའི་རྒྱལ་པོ་རི་བོ་དང ། ཡིད་འོང་ཞེས་བྱ་བ་གཉིས་ཤིག་གནས་པ་དེ་གཉིས་ཀྱི་མཐུས་རྒྱལ་པོའི་ཁབ་ཀྱི་ཆུ་དྲོན་ལྔ་བརྒྱ་དང ། འབབ་ཆུ་དག་དང ། མཚོ་དག་དང ། ལྟིང་ཀ་དག་ཏུ་ལྷས་དུས་དང་དུས་སུ་ཆུའི་རྒྱུན་ལེགས་པར་འབེབས་ཤིང་ལོ་ཐོག་ཀྱང་ཤིན་དུ་ཕུན་སུམ་ཚོག་པར་གྱུར་ན། ད་ལྟར་རྒྱལ་པོའི
7.229a
ཁབ་ཀྱི་ཆུ་དྲོན་ལྔ་བརྒྱ་པོ་དེ་དག་ཀྱང་བསྐམ་པར་བརྩམས། འབབ་ཆུ་དག་དང་མཚོ་དག་དང ། ལྟེང་ཀ་དག་ཏུ་ཡང་ལྷས་དུས་དང་དུས་སུ་ཆུའི་རྒྱུན་ལེགས་པར་མི་འབེབས། ལོ་ཐོག་དག་ཀྱང་ཤིན་དུ་རྒུད་པར་གྱུར་པ་ལས་ན་ཀླུའི་རྒྱལ་པོ་རི་བོ་དང ། ཡིད་འོང་གཉིས་ཉམས་པ་འམ། ཤི་བ་འམ། འབྲོས་པ་འམ། སྦྲུལ་ཁས་སྡིགས་པས་བཟུང་བ་འམ་གཅིག་ཏུ་མ་གྱུར་ཏམ། འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་ལ་བླ་ན་མེད་པའི་མངའ་བརྙེས་པ་ཡིན་ཀྱིས་སངས་རྒྱས་བཅོམ་ལྡན་འདས་ལ་ཞུར་འགྲོའོ་སྙམ་མོ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོའི་ཁབ་འདི་ན་ཀླུའི་རྒྱལ་པོ་རི་བོ་དང ། ཡིད་འོང་ཞེས་བགྱི་བ་གཉིས་ཤིག་གནས་པ་དེ་གཉིས་ཀྱི་མཐུས་རྒྱལ་པོའི་ཁབ་ཀྱི་ཆབ་དྲོན་ལྔ་བརྒྱ་དང ། འབབ་ཆུ་དག་དང ། མཚོ་དག་དང ། ལྟེང་ཀ་དག་ཏུ་ལྷས་དུས་དང་དུས་སུ་ཆབ་ཀྱི་རྒྱུན་ལེགས་པར་འབེབས་ཤིང་ལོ་ཐོག་དག་ཀྱང་ཤིན་དུ་ཕུན་སུམ་ཚོགས་པར་གྱུར་ན། ད་ལྟར་རྒྱལ་པོའི་ཁབ་ཀྱི་ཆབ་དྲོན་ལྔ་བརྒྱ་པོ་དག་ཀྱང་བསྐམ་པར་བརྩམས། འབབ་ཆུ་དག་དང ། མཚོ་དག་དང ། ལྟེང་ཀ་དག་ཏུ་ཡང་ལྷས་དུས་དང་དུས་སུ་ཆབ་ཀྱི་རྒྱུན་ལེགས་པར་མི་འབེབས། ལོ་ཐོགས་དག་ཀྱང་ཤིན་དུ་རྒུད་པར་གྱུར་པ་ལས་ན་ཀླུའི་རྒྱལ་པོ་རི་བོ་དང ། ཡིད་འོང་གཉིས་ཉམས་པ་འམ། གུམ་པ་འམ། བྲོས་པ་འམ། སྦྲུལ་ཁས་སྡིགས་པས་བཟུང་བ་འམ་གཅིག་ཏུ་མ་གྱུར་ཏམ། རྒྱལ་པོ་ཆེན་པོ་ཀླུའི་རྒྱལ་པོ་རི་བོ་དང ། ཡིད་འོང་གཉིས་ནི་ཉམས་པར་ཡང་མ་གྱུར། ཤི་བར་ཡང་མ་གྱུར། བྲོས་པར་ཡང་མ་གྱུར། སྦྲུལ་ཁས་སྡིགས་པས་བཟུང་བར་ཡང་མ་གྱུར་
7.229b
འདི་ལྟར་ཁྱོད་ཉིད་ཀྱིས་བསྐྲད་དོ། །བཙུན་པ་བདག་གིས་ཀླུའི་རྒྱལ་པོ་རི་བོ་དང ། ཡིད་འོང་གཉིས་མཐོང་བར་ཡང་མི་དྲན་ན་བསྐྲད་པར་ལྟ་ག་ལ་འགྱུར། རྒྱལ་པོ་ཆེན་པོ་ངས་ཁྱོད་དྲན་པར་བྱའོ། །བཙུན་པ་བཅོམ་ལྡན་འདས་ཀྱིས་དྲན་པར་མཛད་དུ་གསོལ། རྒྱལ་པོ་ཆེན་པོ་དེའི་ཚེ་ཁྱོད་ཀྱི་ཁྱིམ་བདག་དེ་གཉིས་ལ་ཇི་སྐད་སྨྲས། བཙུན་པ་བདག་གིས་ཞོ་ཤས་འཚོ་བ་དག་ལ་གང་གི་ཚེ་ཁྱིམ་བདག་འདི་གཉིས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་བར་གྱུར་པ་དེའི་ཚེ་ན་འདི་སྐད་ཅེས་རྒྱལ་པོའི་ཞལ་ནས་ཁྱེད་གཉིས་ངའི་ཡུལ་ན་མ་འདུག་ཤིག་ཅེས་བྱུང་ངོ་ཞེས་གྱིས་ཤིག་ཅེས་མཆིད་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱིམ་བདག་དེ་གཉིས་ནི་ཀླུའི་རྒྱལ་པོ་རི་བོ་དང་ཡིད་འོང་གཉིས་ཡིན་ནོ། །རྒྱལ་པོས་གསོལ་པ། བཙུན་པ་དེའི་ཚེ་དེ་གཉིས་གང་དུ་མཆིས། རྒྱ་མཚོ་ཆེན་པོར་ཞུགས་སོ། །རྒྱལ་པོས་གསོལ་པ། བཙུན་པ་བཅོམ་ལྡན་འདས་དེ་ལྟ་ན་བདག་གི་ཡུལ་མ་རུང་བས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱི་ཡུལ་མ་རུང་བར་མི་འགྱུར་ཏེ། འདི་ལྟར་ཁྱོད་ཀྱིས་དེ་གཉིས་ལ་བཟོད་པ་གསོལ་བར་བྱའོ། །རྒྱལ་པོས་གསོལ་པ། བཙུན་པ་དེ་གཉིས་ནི་རྒྱ་མཚོ་ཆེན་པོར་ཞུགས་ལ་བདག་ནི་འདི་ན་མཆིས་ན་བདག་གིས་ཇི་ལྟར་དེ་གཉིས་ལ་བཟོད་པ་གསོལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་གཉིས་ཚེས་བརྒྱད་དང ། ཚེས་བཅུ་བཞི་དང ། བཅཝ་ལྔ་ལ་ངའི་རྐང་པ་ལ་ཕྱག་འཚལ་དུ་འདིར་འོང་གིས་ཁྱོད་ཀྱང་ཚེས་བརྒྱད་དང ། ཚེས་བཅུ་བཞི་དང ། བཅཝ་ལྔ་ལ་འདིར་ཤོག་ཤིག་དང་ངས་ཁྱོད་ལ་དེ་གཉིས་བསྟན་པར་བྱའི་ཁྱོད་གྱིས་བཟོད་པ་གསོལ་ཅིག་།བཙུན་པ་ཅི་ལགས། བདག་གིས་དེ་གཉིས་ཀྱིས་རྐང་པ་གཉིས་ལ་གཏུག་པར་བགྱི་འམ། རྒྱལ་པོ་ཆེན་པོ་རྐང་པ་གཉིས་ལ་གཏུག་པར་མི་བྱ་སྟེ། འདི་ལྟར་མི་མ་རབས་དག་གི་རྐང་པ་ལ་ཕྱག་འཚལ་བ་གང་ཡིན་པ་དེ་ནི་མི་གཙོ་བོ་དག་གི་ལག་པ་ནས་བཟུང་བ་ཡིན་གྱིས་ཁྱོད་ཀྱི་ལག་པ་གཡས་པ་རྐྱོང་ལ་ཀླུའི་དབང་པོ་གཉིས་བཟོད་པ་མཛོད་ཅིག་ཅེས་བཟོད་པ་གསོལ་ཅིག་།
7.230a
དེ་ནས་དུས་གཞན་ཞིག་ན་ཀླུའི་རྒྱལ་པོ་རི་བོ་དང ། ཡིད་འོང་གཉིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེའི་ཚེ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་བརྡའ་མཛད་དོ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ལག་པ་གཡས་པ་བརྐྱང་སྟེ་སྨྲས་པ། ཀླུའི་དབང་པོ་གཉིས་བཟོད་པ་མཛོད་ཅིག་།དེ་གཉིས་ཀྱི་སྨྲས་པ། རྒྱལ་པོ་ཆེན་པོ་བཟོད་པར་བགྱིའོ། །ཀླུའི་དབང་པོ་གཉིས་གལ་ཏེ་བཟོད་ན་བདག་གི་ཡུལ་དུ་ཚུར་སྤྱོན་ཅིག་།དེ་གཉིས་ཀྱིས་སྨྲས་པ། རྒྱལ་པོ་ཆེན་པོ་གང་གི་ཚེ་བདག་ཅག་གཉིས་རྒྱ་མཚོ་ཆེན་པོར་ཞུགས་པ་དེའི་ཚེ་ན་ལུས་དང་ལོངས་སྤྱོད་དག་གིས་ཆེས་ཤིན་དུ་མངོན་པར་མཐོ་བར་གྱུར་པས་ད་གལ་ཏེ་བདག་ཅག་གཉིས་འདིར་མཆི་བར་གྱུར་ན་འདིར་བདག་ཅག་གཉིས་ཀྱི་གོ་སྐབས་ཉིད་ཀྱང་མ་མཆིས་པར་འགྱུར་རོ། །རྒྱལ་པོས་སྨྲས་པ། ཀླུའི་དབང་པོ་གཉིས་དེ་ལྟ་ན་བདག་གི་ཡུལ་མ་རུང་དུ་བས་སོ། །དེ་གཉིས་ཀྱིས་སྨྲས་པ། རྒྱལ་པོ་ཆེན་པོ་ཁྱོད་ཀྱི་ཡུལ་མ་རུང་བར་མི་འགྱུར་ཏེ། འདི་ལྟར་ཁྱོད་ཀྱིས་ལྷ་ཁང་གཉིས་རྩིག་ཏུ་སྩོལ་ལ་གཅིག་ནི་རི་བོའི་སླད་དུ། ཅིག་ཤོས་ནི་ཡིད་འོང་གི་སླད་དུ་རྩིག་དུ་སྩོལ་ཅིག་དང་དེར་བདག་ཅག་གཉིས་ཀྱི་ཞོ་ཤས་འཚོ་བ་དག་གཞག་པར་བགྱིའོ། །ཟླ་བ་དྲུག་དྲུག་ཅིང་དུས་སྟོན་བགྱིད་དུ་སྩལ་ཅིག་དང་དེར་བདག་ཅག་གཉིས་ཀྱང་རང་ཉིད་མཆིས་ནས་གཡར་སྔར་བྲིམ་པར་བགྱིའོ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ལྷ་ཁང་གཉིས་རྩིག་ཏུ་བཅུག་སྟེ། གཅིག་ནི་རི་བོའི་ཕྱིར། ཅིག་ཤོས་ནི་ཡིད་འོང་གི་ཕྱིར་རྩིག་དུ་བཅུག་ནས་ཟླ་བ་དྲུག་དྲུག་ཅིང་དུས་སྟོན་བྱེད་དུ་བཅུག་གོ། །གང་གི་ཚེ་དེར་དུས་སྟོན་བྱུང་བ་དེའི་ཚེ་ན་གྲོང
7.230b
ཁྱེར་ཆེན་པོ་དྲུག་པོ་དག་ནས་སྐྱེ་བོ་ཕལ་པོ་ཆེའི་ཚོགས་དག་ལྷགས་ཏེ་འདུག་ཅིང་འཐུན་པར་གྱུར་ཏོ། །དེ་ནས་དུས་གཞན་ཞིག་ན་རྒྱལ་པོའི་ཁབ་ན་ཀླུའི་རྒྱལ་པོ་རི་བོ་དང ། ཡིད་འོང་གཉིས་ཀྱི་དུས་སྟོན་ལ་བབ་པ་དང ། ལྷོ་ལམ་ནས་གར་མཁན་ཞིག་ཀྱང་རྒྱལ་པོའི་ཁབ་ཏུ་འོངས་ནས་དེས་བསམ་པ། གང་གི་སྐྱེ་བོ་ཕལ་པོ་ཆེའི་ཚོགས་ཀྱང་མངོན་པར་དགའ་བར་འགྱུར་ཞིང་རྙེད་པ་མང་པོ་ཡང་འགྲུབ་པར་འགྱུར་བའི་ཐབས་ཅི་ཡོད་སྙམས་ནས་དེས་ཡང་བསམ་པ། གལ་ཏེ་སྐྱེས་བུ་གཙོ་བོའི་བསྔགས་པ་བརྗོད་ན་དེ་ལྟ་ན་སྐྱེ་བོ་ཕལ་པོ་ཆེའི་ཚོགས་ཀྱང་མངོན་པར་དགའ་བར་འགྱུར་ཞིང་རྙེད་པ་མང་པོ་ཡང་འགྲུབ་པར་འགྱུར་རོ་སྙམ་མོ། །དེའི་ཚེ་ན་སྐྱེ་བོ་ཕལ་པོ་ཆེའི་ཚོགས་ཕལ་ཆེར་བཅོམ་ལྡན་འདས་ལ་མངོན་པར་དད་པར་གྱུར་ནས་གར་མཁན་དེས་བསམས་པ། རེ་ཤིག་ལྷ་དང་བཅས་པའི་འཇིག་རྟེན་འདི་ནི་བཅོམ་ལྡན་འདས་ལ་མངོན་པར་དད་པ་ཡིན་པས་སངས་རྒྱས་བཅོམ་ལྡན་འདས་ཀྱིས་བསྔགས་པ་བརྗོད་ན་སྐྱེ་བོ་ཕལ་པོ་ཆེའི་ཚོགས་ཀྱང་མངོན་པར་དགའ་བར་འགྱུར་ཞིང་རྙེད་པ་མང་པོ་ཡང་འགྲུབ་པར་འགྱུར་བས་བདག་གིས་སངས་རྒྱས་བཅོམ་ལྡན་འདས་ཀྱི་བསྔགས་པ་བརྗོད་པར་བྱའོ། །སྙམ་ནས་དེ་དགའ་བོའི་གན་དུ་སོང་སྟེ་སྨྲས་པ། འཕགས་པ་གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པས་གཟིགས་པ་ལྔ་པོ་རིགས་དང ། རུས་དང ། ཡུལ་དང ། དུས་དང ། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལན་གསུམ་ཡོངས་སུ་སྦྱང་བ་བགྱིད་དུ་སྩལ་ཏེ། གླང་པོ་ཆེར་སྣང་བ་བསྒྱུར་ནས་ཤེས་བཞིན་དུ་ཡུམ་གྱི་ལྷུམས་སུ་ཞུགས་པ་དེའི་ཚེ་ན་ས་ཆེན་པོ་འདི་ཤིན་དུ་གཡོས་པར་གྱུར་ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ལགས་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ
7.231a
པར་གྱུར་ནས། སེམས་ཅན་གང་དག་དེར་སྐྱེས་པ་དག་གིས་རང་གིས་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་འཚལ་བར་གྱུར་པ་དང ། གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་ཟླ་བ་བཅུ་འདས་ནས་ཡུམ་གྱི་ལྷུམས་ནས་བལྟམ་པ་དེའི་ཚེ་ཡང་ས་ཆེན་པོ་ཤིན་དུ་གཡོས་པར་གྱུར་ཅིང ། འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་ཕྲུལ་ཆེ་བ་འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས་སེམས་ཅན་གང་དག་དེར་སྐྱེས་པ་དག་གིས་རང་གིས་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཞེས་འཚལ་བར་གྱུར་པ་དང ། གང་གི་གདུགས་ལ་བཅོམ་ལྡན་འདས་བྱང་ཆུབ་སེམས་དཔའ་བལྟམ་པར་གྱུར་པ་དེའི་གདུགས་ལ་རྒྱལ་པོ་ཆེན་པོ་བཞི་དག་གིས་བུ་ཡང་བཙས་པར་གྱུར་ཏེ། མཉན་ཡོད་ན་རྒྱལ་པོ་ཆེན་པོ་རྩིབས་ཀྱིས་འཕུར་ཚངས་བྱིན་གྱི་བུ་བཙས་ནས་དེ་འདི་སྙམ་དུས་སེམས་ཏེ། བདག་གི་བུ་བཙས་པ་ན་འཇིག་རྟེན་གསལ་བ་གསལ་བ་ལྟར་སྣང་བས་གཞོན་ནུ་འདིའི་མིང་གསལ་རྒྱལ་དུ་གདགས་སོ་སྙམ་ནས་བུ་དེའི་མིང་གསལ་རྒྱལ་ཞེས་བགྱི་བར་བཏགས་པ་དང ། རྒྱལ་པོའི་ཁབ་ན་རྒྱལ་པོ་པད་མ་ཆེན་པོའི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་ཉི་མའི་གཟུགས་ཤར་བ་ལྟར་སྣང་ཞིང་འདི་བཙུན་མོ་གཟུགས་ཅན་གྱི་བུ་ཡིན་པས་གཞོན་ནུ་འདིའི་མིང་གཟུགས་ཅན་སྙིང་པོར་གདགས་སོ་སྙམས་ནས་བུ་དེའི་མིང་གཟུགས་ཅན་སྙིང་པོ་ཞེས་བགྱི་བར་བཏགས་པ་དང །
7.231b
ཀཽ་ཤམྦཱི་ན་རྒྱལ་པོ་ཆེན་པོ་དམག་བརྒྱ་པའི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་ཉི་མ་ཤར་བ་ལྟར་སྣང་བར་གྱུར་པས་གཞོན་ནུ་འདིའི་མིང་ཤར་བར་གདགས་སོ་སྙམ་ནས་བུ་དེའི་མིང་ཤར་བ་ཞེས་བགྱི་བར་བཏགས་པ་དང ། འཕགས་རྒྱལ་ན་རྒྱལ་པོ་ཆེན་པོ་མུ་ཁྱུད་མཐའ་ཡས་ཀྱི་བུ་བཙས་ནས་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་རབ་ཏུ་སྣང་བར་གྱུར་པས་བུ་འདིའི་མིང་རབ་སྣང་ཞེས་བྱ་བར་གདགས་སོ། །སྙམ་ནས་བུ་དེའི་མིང་རབ་སྣང་ཞེས་བགྱི་བར་བཏགས་པ་དང ། གང་གི་ཚེ་གདུགས་ལ་བཅོམ་ལྡན་འདས་བྱང་ཆུབ་སེམས་དཔའ་བལྟམ་པ་དེ་ཉིད་ཀྱི་གདུགས་ལ་ཤཱཀྱ་གཞོན་ནུ་བཟང་ལྡན་ལ་སོགས་པ་ལྔ་བརྒྱ་དང ། བསྙེན་བཀུར་བ་འདུན་བྱེད་ལ་སོགས་པ་ལྔ་བརྒྱ་ཡང་བཙས། རྟ་རྒོད་མ་ལྔ་བརྒྱ་ལས་ཀྱང་རྟེའུ་བསྔགས་ལྡན་ལ་སོགས་པ་ལྔ་བརྒྱ་འབྲངས་ལྷ་རྣམས་ཀྱི་ཀྱང་གཏེར་ལྔ་བརྒྱ་ཉེ་བར་བསྟན་པ་དང ། བཅོམ་ལྡན་འདས་བྱང་ཆུབ་སེམས་དཔའ་དེ་བྲམ་ཟེས་བལྟས་པ་དང ། མཚན་མཁན་དག་གིས་ལུང་བསྟན་པ། གལ་ཏེ་གཞོན་ནུ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་བསྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ། ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམ་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །
7.232a
གལ་ཏེ་སྐྲ་དང་ཁ་སྤུ་བྲེག་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིན་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ་ཞེས་ལུང་བསྟན་པ་དང ། གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་འཇིག་རྟེན་དུ་བྱུང་བ་དེའི་ཚེ་ན་ཐམས་ཅད་དུ་གངས་རིའི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་སྟེ། དེ་བྲམ་ཟེས་ལྟས་པ་དང ། མཚན་མཁན་དག་གིས་དེ་སྐད་ལུང་བསྟན་ཏོ་ཞེས་སྒྲ་གྲགས་པར་གྱུར་པ་དང ། ཉི་འོག་གི་ཁམས་ཀྱི་རྒྱལ་པོ་དག་གིས་ཀྱང་གང་རིའི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམ་ཀྱི་གཞོན་ནུ་འགྱུར་སྟེ། དེ་བྲམ་ཟེས་བལྟས་པ་དང ། མཚན་མཁན་དག་གིས་དེ་སྐད་ལུང་བསྟན་ཏོ་ཞེས་ཐོས་པ་དང ། ཐོས་ནས་ཀྱང་ཉི་འོག་གི་ཁམས་ཀྱི་རྒྱལ་པོ་དེ་དག་འདི་སྙམ་དུ་སེམས་ཏེ། དེ་ནས་གཞོན་ནུ་བསྟེན་ན་དུས་སུ་འབྲས་བུ་སྟེར་བར་འགྱུར་བས་གང་བསྟེན་ན་གཞོན་ནུ་བསྟེན་པར་འགྱུར་སྙམ་ནས་དེ་དག་གིས་བསམས་པ། རྒྱལ་པོ་ཟས་གཙང་བསྟེན་པར་བྱ་སྟེ་དེ་བསྟེན་ན་གཞོན་ནུ་བསྟེན་པར་འགྱུར་རོ་སྙམ་ནས་དེ་དག་གིས་རྒྱལ་པོ་ཟས་གཙང་བསྟེན་པར་བརྩམས་ཏེ། དུས་དང་འཐུན་པའི་དུས་སུ་ཕོ་ཉ་དང་དཀོར་སྒྲོམ་དག་གཏོང་ཞིང་བཀུར་བར་བགྱིད་པ་དང ། དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བདག་གི་བུ་བཙས་པ་ན་དོན་ཐམས་ཅད་དང་ལས་ཀྱི་མཐའ་ཐམས་ཅད་གྲུབ་པས་དེའི་ཕྱིར་གཞོན་ནུ་འདིའི་མིང་དོན་ཐམས་ཅད་གྲུབ་པ་ཞེས་བྱ་བར་གདགས་སོ་སྙམ་ནས་དེའི་མཚན་དོན་ཐམས་ཅད་གྲུབ་པ་ཞེས་བགྱི་བར་གསོལ་པ་དང ། ཤཱཀྱ་རྣམས་ཀྱི་ལྷ་གནོད་སྦྱིན་ཤཱཀྱ་སྤེལ་བ་ཞེས་བྱ་བ་ལ་ཕྱག་འཚལ་དུ་ཁྲིད་པ་ན་ཤཱཀྱ་དེ་ཐུབ་ཅིང་དེས་ཕྱག་བྱས་པས་ཤཱཀྱ་ཐུབ་པ་ཞེས་བགྱི་བ་དང ། ལྷའི་ཡང་ལྷ་ཞེས་བགྱི་བར་མཚན་གསོལ་བ་དང ། གང་གི་ཚེ
7.232b
བཅོམ་ལྡན་འདས་བྱང་ཆུབ་སེམས་དཔའ་སྐུ་ཆེན་པོར་འཁྲུངས་པའི་ཚེ་རིག་པའི་གནས་ཐམས་ཅད་ཀྱི་མཐར་བྱོན་ཅིང་གཞོན་ནུ་རོལ་པའི་ནང་ན་རོལ་པར་གྱུར་པ་དང ། རྒན་པོ་དང ། ནད་པ་དང ། ཤི་བ་གཟིགས་ནས་ཐུགས་བྱུང་སྟེ། ནགས་ཀྱི་ནང་དུ་གཤེགས་ཏེ་ལོ་དྲུག་དུ་དཀའ་བ་སྤྱད་པ་དང ། དེའི་ཚེ་རྒྱལ་པོ་ཟས་གཙང་དང ། ཤཱཀྱ་ལེགས་པར་རབ་རྟོགས་ཀྱི་བཀའ་མཆིད་གསོལ་བའི་མི་ཉིས་བརྒྱ་ལྔ་བཅུ་ཉིས་བརྒྱ་ལྔ་བཅུ་བཀྱེ་སྟེ། དེ་དག་གིས་ཉི་མ་རེ་རེ་ཞིང་བཅོམ་ལྡན་འདས་བྱང་ཆུབ་སེམས་དཔའི་བཀའ་མཆིད་འཚལ་ཏེ་མཆི་བ་དང ། གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་ལོ་དྲུག་དུ་དཀའ་བ་སྤྱད་དེ། དཀའ་བ་སྤྱད་པ་ཅི་ཡང་མེད་པར་རིག་ནས་ཅི་བདེར་དབུགས་རྔུབ་པར་མཛད། ཅི་བདེར་དབུགས་འབྱིན་པར་མཛད་ཅིང་འབྲས་ཆན་དང ། ཟན་དྲོན་ལ་སོགས་པ་ཞལ་ཟས་རྒྱ་ཆེན་པོ་དག་ཀྱང་གསོལ་བར་མཛད། ཞུན་མར་དང ། འབྲུ་མར་དག་གིས་སྐུ་དག་ཀྱང་སྐུད་པར་མཛད་ཅིང་ཆབ་དྲོན་པོས་ཀྱང་སྐུ་བསིལ་བར་མཛད་པ་དང ། གྲོང་སྡེ་འདོང་དུ་གཤེགས་ནས་གྲོང་བའི་བུ་མོ་དགའ་མོ་དང ། དགའ་སྟོབས་མ་གཉིས་ལས་ཀྱང་ལན་བཅུ་དྲུག་བཟླས་པའི་འོ་མ་སྦྲང་རྩི་དང་བསྲེས་པ་གསོལ་ཏེ། ཀླུའི་རྒྱལ་པོ་ནག་པོས་མངོན་པར་བསྟོད་པ་ན་རྩཝ་བཀྲ་ཤིས་འཚོང་བ་ལས་རྩཝ་གསེར་གྱི་མདོག་ལྟ་བུ་དག་བཞེས་ནས་བྱང་ཆུབ་ཀྱི་གཞི་ག་ལ་བ་དེར་གཤེགས་ཏེ་བྱོན་ནས་ཉིད་ཀྱིས་རྩཝ་མ་འཁྲུགས་པའི་གདན་བཤམས་ནས། སྐྱིལ་མོ་དཀྲུང་བཅས་ཏེ་སྐུ་དྲང་པོར་བསྲངས་ནས་དྲན་པ་ཕྱོགས་པར་བཞག་སྟེ་བཞུགས་ནས། ཇི་སྲིད་ཟག་མེད་མ་ཐོབ་པར། །དེ་སྲིད་སྐྱིལ་དཀྲུང་གཞིག་མི་བྱ་ཞེས་ཐུགས་བསྐྱེད་ཅིང་གསུང་བརྗོད་པ་དང ། གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང ། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་རྫོགས་པར་སངས་རྒྱས་པ་རྒྱ་ཆེར་བསྟན་དུ་གསོལ།
7.233a
དགའ་བོས་སྨྲས་པ། དེས་ཁྱོད་ལ་ཅི་བྱ། གར་མཁན་གྱིས་སྨྲས་པ། འཕགས་པ་གར་ཐབས་སྦྱར་བར་བགྱིའོ། །དགའ་བོས་སྨྲས་པ། བཀྲེན་པ་ཁྱོད་ཁོ་བོ་ཅག་གིས་སྟོན་པ་ལྟར་འཆོས་སམ། མི་སྨྲས་ཕར་སོང་ཤིག་།དེ་ནས་གར་མཁན་དེ་ཉེ་དགའི་གན་དུ་སོང་ཏེ་དེ་སྐད་དྲིས་ནས་དེས་ཀྱང་དེ་སྐད་ལན་བཏབ་བོ། །དེ་ནས་འགྲོ་མགྱོགས་དང ། ནབ་སོ་དང ། འདུན་པ་དང ། འཆར་ཀ་དག་གིས་གན་དུ་རིམ་གྱིས་སོང་སྟེ་དེ་སྐད་དྲིས་ན། དེ་དག་ཐམས་ཅད་ཀྱིས་ཀྱང་སོ་སོ་ནས་དེ་སྐད་ལན་བཏབ་སྟེ་མ་བསྟན་ཏོ། །དེ་ནས་གར་མཁན་དེ་དགེ་སློང་མ་བཅུ་གཉིས་སྡེ་དག་གི་གན་དུ་སོང་སྟེ་དང་པོར་དགེ་སློང་མ་སྦོམ་དགའ་མོ་ལ་དེ་སྐད་ཅེས་དྲིས་པ་དང ། སྦོམ་དགའ་མོས་སྨྲས་པ། དེས་ཁྱོད་ལ་ཅི་བྱ། གར་མཁན་གྱིས་སྨྲས་པ། གར་ཐབས་སྦྱར་བར་བགྱིའོ། །ཁོ་མོ་ལ་བཅའ་བའི་རིན་སྦྱིན་ནམ་གསོལ་ལོ། །སྦོམ་དགའ་མོ་དེ་མང་དུ་ཐོས་པ། སྡེ་སྣོད་གསུམ་དང་ལྡན་པ། རིགས་པ་དང་གྲོལ་བའི་སྤོབས་པ་ཅན་ཡིན་པས་དེས་དེ་ལ་གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པས་གཟིགས་པ་ལྔ་པོ་རིགས་དང ། རུས་དང ། ཡུལ་དང ། དུས་དང ། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལན་གསུམ་ཡོངས་སུ་སྦྱང་བ་བྱེད་དུ་བཅུག་ཏེ་གླང་པོ་ཆེར་སྣང་བ་བསྒྱུར་ནས་ཤེས་བཞིན་དུ་ཡུམ་གྱི་ལྷུམས་སུ་བཞུགས་པ་དེའི་ཚེ་ན་ས་ཆེན་པོ་ཤིན་དུ་གཡོས་པར་གྱུར་ཅིང་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས། སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །
7.233b
ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་པ་ནས་གང་གི་ཚེ་བཅོམ་ལྡན་འདས་ཀྱི་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང ། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་རྫོགས་པར་སངས་རྒྱས་པའི་བར་དག་མངོན་པར་འབྱུང་བའི་མདོ་ལས་རྒྱ་ཆེར་ཇི་སྐད་གསུངས་པ་བཞིན་ཐམས་ཅད་རྒྱས་པར་བསྟན་ཏོ། །དེ་ནས་གར་མཁན་དེས་གར་ཐབས་སྦྱར་ནས་ཡང་བསམ་པ། བདག་གིས་འདིས་སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་རྣམས་ནི་དད་པ་སྤེལ་བར་ནུས་ན་གང་གིས་མ་དད་པ་དག་ཀྱང་དད་པ་སྐྱེ་བར་འགྱུར་བའི་ཐབས་ཅི་ཡོད་སྙམ་ནས། དེ་དགེ་སློང་དྲུག་སྡེ་དག་ལ་སྙིང་ན་བས་གླན་ཀ་ཚོལ་ཞིང་དེ་དག་གི་ཕྱི་བཞིན་ཕྱི་བཞིན་རྗེས་སུ་འབྲང་ཞིང་སོང་བ་དང ། ཇི་ཙམ་ན་ཚེ་དང་ལྡན་པ་འདུན་པ་ཟས་ཟོས་ཟིན་ཞིང་སྤངས་པས་བཅའ་བ་དང ། བཟའ་བ་བསོད་པ་ཞིག་རྙེད་ཅིང་དེ་ཟ་བར་འདོད་ནས་དེས་ལག་པ་གཉིས་བསྙལ་ཏེ་བཅའ་བ་དང ། བཟའ་བ་བསོད་པ་དེ་བྱིན་ལེན་བྱས་ནས་ཚེ་དང་ལྡན་པ་འཆར་ཀ་ཟན་ཟ་བ་ན་འདུན་པས་དེའི་མདུན་དུ་ཙོག་པུར་འདུག་སྟེ་སྨྲས་པ། བཙུན་པ་འཆར་ཀ་དགོངས་སུ་གསོལ། བདག་དགེ་སློང་འདུན་པ་ཞེས་བགྱི་བ་འཚལ་མ་འཚལ་ལགས་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱིས་པ་ལས་བཅའ་བ་དང ། བཟའ་བ་རྙེད་ཅིང་འཚལ་བར་འཚལ་ན་ལྷག་བོར་བགྱི་ཏེ་བདག་ལ་སྩལ་དུ་གསོལ། འཆར་ཀས་དེ་ལས་ཁམ་གཉིས་སམ་གསུམ་ཟོས་ནས་ཁྱོད་ཀྱིར་གྱུར་གྱིས་བཞུད་ཅིག་།ཅེས་སྨྲས་པ་གར་མཁན་དེས་མཐོང་ནས་དེས་བསམས་པ། བདག་གིས་འདིས་མ་དད་པ་དག་ཀྱང་དད་པར་འགྱུར་བར་ནུས་སོ་སྙམ་ནས་དེ་ནས་ཕྱིར་སོང་ངོ་།། ་་་་་་་།།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་དགུ་པ། དེ་ནས་གར་མཁན་དེས་རྒྱལ་པོའི་ཁབ་ཏུ་ཀླུའི་རྒྱལ་པོ་རི་བོ་དང ། ཡིད་འོང
7.234a
གཉིས་ཀྱི་དུས་སྟོན་བརྩམས་པ་དེའི་ཉིན་མོ་བླ་རེ་བྲེས་ཏེ་རྫ་རྔ་ཆེན་པོ་བརྡུངས་པ་དང ། སྐྱེ་བོ་ཕལ་པོ་ཆེའི་ཚོགས་དེར་ལྷག་ཏེ་འདུག་ཅིང་འཐུན་པར་གྱུར་པའི་ཚེ་དེས་གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱིས་གནས་ན་བཞུགས་པས་གཟིགས་པ་ལྔ་པོ་རིགས་དང ། རུས་དང ། ཡུལ་དང ། དུས་དང ། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལན་གསུམ་ཡོངས་སུ་སྦྱང་བ་བྱེད་དུ་བཅུག་སྟེ། གླང་པོ་ཆེར་སྣང་བ་བསྒྱུར་ནས་ཤེས་བཞིན་དུ་ཡུམ་གྱི་ལྷུམས་སུ་ཞུགས་པ་དེའི་ཚེ་ན་ས་ཆེན་པོ་ཤིན་དུ་གཡོས་པར་གྱུར་ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ་འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས། སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་པ་ནས། གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང ། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་རྫོགས་པར་སངས་རྒྱས་པའི་བར་དག་མངོན་པར་འགྱུར་བའི་མདོ་ལས་རྒྱ་ཆེར་ཇི་སྐད་གསུངས་པ་དང་འདྲ་བར་དེ་ལྟར་བཅོས་པ་ཐམས་ཅད་གར་ཐབས་སུ་རྒྱ་ཆེར་སྦྱར་ཏེ་གར་བྱེད་པ་དང ། སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་དག་དད་པ་མངོན་པར་འཕེལ་བར་གྱུར་ནས་ཨེ་མའོ་གར་བྱས་སོ། །ེ་མའོ་གར་བྱས་སོ་ཞེས་ཟེར་ཞིང་གར
7.234b
མཁན་དེས་ཀྱང་རྙེད་པ་མང་པོ་གྲུབ་པར་གྱུར་ཏོ། །དེ་ནས་གར་མཁན་དེས་ཡང་བསམས་པ། བདག་གིས་སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་དག་ནི་དད་པ་མངོན་པར་འཕེལ་བར་བྱས་ཟིན་གྱིས། ད་ནི་མ་དད་པ་དག་ཀྱང་དད་པར་འགྱུར་བར་བྱའོ་སྙམ་ནས་དེའི་འོག་དུ་གར་མཁན་གཅིག་གིས་འཆར་ཀའི་ཆ་ལུགས་སུ་བྱས་ཤིང་གར་མཁན་ཅིག་ཤོས་ཀྱིས་འདུན་པའི་ཆ་ལུགས་སུ་བྱས་ཏེ་དེས་ཁམ་ཕོར་ཐལ་བས་བཀང་ནས་སྟེང་དུ་བུ་རམ་གྱི་དུམ་བུ་གཉིས་སམ་གསུམ་བཞག་སྟེ་འཆར་ཀའི་ཆ་ལུགས་ཅན་ཟན་ཟ་བའི་མདུན་དུ་ཙོག་པུར་འདུག་སྟེ་སྨྲས་པ་བཙུན་པ་འཆར་ཀ་དགོངས་སུ་གསོལ། བདག་དགེ་སློང་འདུན་པ་ཞེས་བགྱི་བ་འཚལ་མ་འཚལ་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱི་བ་ལས་བཅའ་བ་དང ། བཟའ་བ་རྙེད་ཅིང་འཚལ་བར་འཚལ་ན་ལྷག་བོར་བགྱིས་ཏེ་བདག་ལ་སྩལ་དུ་གསོལ། འཆར་ཀའི་ཆ་ལུགས་ཅན་དེས་དེ་ནས་བུ་རམ་གྱི་དུམ་བུ་གཉིས་སམ་གསུམ་པོ་དག་བླངས་ཏེ་ཟོས་ནས་ཁམ་ཕོར་གྱི་ཐལ་བ་འདུན་པའི་ཆ་ལུགས་ཅན་གྱིས་མགོའི་སྟེང་དུ་གཏོར་ཏེ་ཁྱོད་ཀྱིར་གྱུར་གྱིས་བཞུད་ཅིག་ཅེས་སྨྲས་པ་དང ། སྐྱེ་བོ་ཕལ་པོ་ཆེའི་ཚོགས་ཐམས་ཅད་གྱིས་ཧ་ཧ་ཞེས་གད་མོའི་སྒྲ་ཆེན་པོ་ཕྱུང་སྟེ། མ་དད་པ་དག་ཀྱང་དད་པ་མངོན་པར་འཕེལ་བར་གྱུར་ནས་ཨེ་མའོ་སྨྱོན་ཐབས་བྱས་སོ། །ེ་མའོ་སྨྱོན་ཐབས་བྱས་སོ་ཞེས་ཟེར་ཞིང་གར་མཁན་དེས་ཀྱང་རྙེད་པ་མང་པོ་གྲུབ་པར་གྱུར་ཏོ། །དེ་ན་སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་དག་ནི་ཤེས་ལྡན་དག་ལྟོས་ཤིག་།གར་མཁན་འདིས་གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པས་གཟིགས་པ་ལྔ་པོ་རིགས་དང ། རུས་དང་ཡུལ་དང ། དུས་དང ། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལན་གསུམ་ཡོངས་སུ་སྦྱང་བ་བྱེད་ཏུ་བཅུག་ཏེ་གླང་པོ་ཆེར་སྣང་བ་བསྒྱུར་ནས་ཤེས་བཞིན་དུ་ཡུམ་གྱི་ལྷུམས་སུ་ཞུགས་པ་དེའི་ཚེ་ན་ས་ཆེན་པོ་ཤིན་དུ་གཡོས་པར
7.235a
གྱུར་ཅིང་འཇིགས་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས་སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་པ་ནས། གང་གི་ཚེ་བཅོམ་ལྡན་འདས་ཀྱི་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང ། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་རྫོགས་པར་སངས་རྒྱས་པའི་བར་དག་མངོན་པར་འབྱུང་བའི་མདོ་ལས་རྒྱ་ཆེར་ཇི་སྐད་གསུངས་པ་དང་འདྲ་བར་དེ་ལྟར་བཅོས་པ་ཐམས་ཅད་གར་ཐབས་སུ་རྒྱ་ཆེར་སྦྱར་ཏེ་གར་བྱས་སོ་ཞེས་ཟེར་ཞིང་དད་པ་མངོན་པར་འཕེལ་བར་གྱུར་ཏོ། །སྐྱེ་བོ་ཕལ་པོ་ཆེའི་ཚོགས་མ་དད་པ་དག་ཀྱང་ཤེས་ལྡན་དག་ལྟོས་ཤིག་།གར་མཁན་འདིས་དགེ་སྦྱོང་ཧྲལ་པོ་དྲུག་སྡེ་དག་མི་བྱེད་དགུ་བྱེད་པ་དེ་ལྟར་བཅོས་པ་ཐམས་ཅད་སྨྱོན་ཐབས་སུ་རྒྱ་ཆེར་སྦྱར་ཏེ་བཞད་གད་བྱེད་དོ་ཞེས་དད་པ་མངོན་པར་འཕེལ་བར་གྱུར་ཏོ། །ཇི་ཙམ་ན་མཐར་གྱིས་དྲུག་སྡེ་དག་གིས་གར་མཁན་དེས་བདག་ཅག་ལྟར་བཅོས་ཤེས་གྲག་གོ་ཞེས་ཐོས་ནས་དེ་དག་གིས་སྨྲས་པ། བདག་ཅག་གིས་གར་མཁན་དེ་མི་དགའ་བར་བྱས་སྲིང་མོ་དག་གི་གན་དུ་གྲོས་བྱེད་དུ་འདོང་ངོ་ཞེས་དེ་དག་དགེ་སློང་མ་བཅུ་གཉིས་སྡེ་དག་གི་གན་དུ་དོང་ནས་སྨྲས་པ། སྲིང་མོ་དག་བདག་ཅག་གིས་བཅོམ་ལྡན་འདས་བྱང་ཆུབ་སེམས་དཔའི་སྤྱོད་པ་ལ་འཇུག་པ་ན་སྒྲ་མི་སྙན་ཞེས་བྱ་བའི་གར་ཐབས་བྱས་པ་གང་ཡིན་པ་དེ་ལས་ཅུང་ཟད་ཅི་དྲན་པ་བགྲོའོ་ཞེས་དེ་རྣམས་དེ་དག་དང་ལྷན་ཅིག་།སྐྱེད་མོས་ཚལ
7.235b
དུ་དོང་སྟེ་བགྲོ་བར་བརྩམས་པ་དང ། ཇི་ཙམ་ན་ཅུང་ཟད་ཀྱང་མ་བརྗེད་ནས་དེ་དག་གིས་རྒྱལ་པོའི་ཕོ་བྲང་ནས་རྒྱན་དང་ཆ་ལུག་བླངས་ཏེ་གར་མཁན་དེ་དང་ཧ་ཅང་ཐག་མི་རིང་བར་བླ་རེ་བྲེས་ནས་ཉེ་དགའ་མགོ་རས་ཀྱིས་དཀྲིས་ཏེ་རྫ་རྔ་ཆེན་པོ་བརྡུངས་པ་དང ། གར་ལ་ལྟ་བ་དང་དེའི་ནང་ནས་སྐྱེ་བོ་ཕལ་པོ་ཆེའི་ཚོགས་ཕྱིར་བྱུང་སྟེ་དེར་ལྷགས་སོ། །གར་མཁན་དེ་ཡང་དེར་སོང་བ་དང ། ཇི་ཙམ་ན་ལྷའི་གར་ཐབས་ལྟ་བུ་མཐོང་ནས་དེས་བསམས་པ། འདི་དག་ལྷ་དག་གར་བྱེད་པ་ཡིན་ནམ། འོན་ཏེ་ཀླུ་དག་གམ། འོན་ཏེ་གནོད་སྦྱིན་དག་གམ། དྲི་ཟ་དག་གམ། མི་འམ་ཅི་དག་གམ། ལྟོ་འཕྱེ་ཆེན་པོ་དག་གར་བྱེད་པ་ཡིན་སྙམ་དུ་རིག་ནས་ཡ་མཚན་སྐྱེས་པར་གྱུར་ཏོ། །དྲུག་སྡེ་དག་གིས་ཀྱང་གར་བྱས་ནས་ཆ་བྱད་བརྟུལ་ཏེ་དོང་བ་དང ། གར་མཁན་དེས་བསམས་པ། འདི་དག་སུ་ཞིག་ཡིན་སྙམ་ནས་དེ་དག་གི་ཕྱི་བཞིན་འབྲང་ཞིང་སོང་བ་དང ། ཇི་ཙམ་ན་དེ་དག་འོད་མའི་ཚལ་དུ་ཞུགས་ནས་གར་མཁན་དེས་སྐོར་བསྡད་པ་དང ། ཇི་ཙམ་ན་འཆར་ཀ་རྣ་བ་བབ་ལས་བསྐུས་བཞིན་དུ་སྒོར་བྱུང་ནས་གར་མཁན་དེས་དེ་ལ་སྨྲས་པ། འཕགས་པ་གར་དེ་ཁྱོད་ཀྱིས་བགྱིས་སམ། འཆར་ཀས་སྨྲས་པ། ཁོ་བོ་ཅག་གིས་ཁྱོད་དེ་ལྟར་མི་དགའ་བར་བྱའོ། །བཀྲེན་པ་ཁྱོད་ཁོ་བོ་ཅག་ཁོ་ནའི་སྒྱུ་རྩལ་གྱིས་ཉེ་བར་འཚོ་ལ། ཁོ་བོ་ཅག་ཉིད་ལྟར་འཆོས་པས་ཁྱོད་གང་དང་གང་དུ་གར་བྱེད་པ་དེ་དང་དེར་ཁོ་བོ་ཅག་དོང་ལ་ཁྱོད་ལ་ཐོ་བརྩམ་པར་བྱས་སོ། །ཁོ་བོ་ཅག་གིས་རྫ་རྔ་ཆེན་པོ་དང་ཆ་སྤྱད་གཞན་ཡང་ཅི་ཡང་བཀུར་མི་དགོས་པར་འོང་ངོ ། །གར་མཁན་དེས་སྨྲས་པ། འཕགས་པ་དེ་ནི་བདག་ཅག་གིས་འཚོ་བ་ལགས་ཀྱིས་བཟོད་པ་མཛོད་ཅིག་།འཆར་ཀས་སྨྲས་པ། གལ་ཏེ་ཁྱོད་ཀྱི་རྙེད་པ་ཅི་རྙེད་པ་དེ་དག་ཐམས་ཅད་ཁོ་བོ་ཅག་ལ་བྱིན་ན་བཟོད་པར་བྱའོ། །དེས་བསམས་པ། འདི་དག་ཡང་དང་ཡང་དུ་ཐོ་འཚམ་པར་འགྱུར་གྱིས་སྦྱིན་ནོ་སྙམ་ནས་དེས་རྙེད་པ་ཐམས་ཅད་དེ་དག་ལ་བྱིན་ནས་སེམས་ཁོངས་སུ་ཆུད་ཅིང་འདུག་གོ། །ཇི་ཙམ་ན་དེའི་ཆུང་པོ་གྲོགས
7.236a
འོངས་ནས་དེས་དེ་ལ་དྲིས་པ། གྲོགས་པོ་ཁྱོད་ཅིའི་ཕྱིར་སེམས་ཁོངས་སུ་ཆུད་ཅིང་འདུག་།དེས་སྨྲས་པ། ཁོ་བོ་ཆད་པས་བཅད་དོ། །སུས། ཤཱཀྱའི་བུའི་དགེ་སྦྱོང་དག་གིས་སོ་ཅིའི་ཕྱིར། དེས་སྐབས་དེ་རྒྱས་པར་རྗོད་པ་དང ། དེ་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་གར་མཁན་དག་ལ་ཡང་ཆད་པས་གཅོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་མི་མཛེས་པ་དེ་ལྟ་བུ་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཉེས་དམིག་གང་ཅུང་ཟད་བྱུང་བ་དེ་ནི་དགེ་སློང་དག་ཁྱིམ་པའི་གོས་གྱོན་པ་ལས་གྱུར་པས་དེའི་ཕྱིར་དགེ་སློང་གིས་ཁྱིམ་པའི་གོས་བགོ་བར་མི་བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲང་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ངའི་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ
7.236b
ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱི་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གོས་སར་པ་ཞིག་རྙེད་ན་ཁ་བསྒྱུར་བ་གསུམ་པོ་སྔོན་པོ་འམ། དམར་པོ་འམ། ངུར་སྨྲིག་ལས་གང་ཡང་རུང་བར་ཁ་བསྒྱུར་བར་བྱའོ། །གལ་ཏེ་དགེ་སློང་གིས་གོས་སར་པ་ཁ་བསྒྱུར་བ་གསུམ་པོ་སྔོན་པོ་འམ། དམར་པོ་འམ། ངུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་སྤྱོད་ན་ལྟུང་བྱེད་དོ། །དེ་ལ་དགེ་སློང་གིས་ཞེས་བྱ་བ་ནི་དྲུག་སྡེས་སོ། །གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། དུ་གུ་ལའི་གོས་དང ། ཀོ་ཏམ་པའི་གོས་དང ། རས་བལ་གྱི་གོས་དང ། ཉི་འོག་གི་གོས་ལས་གང་ཡང་རུང་བའོ། །སར་པ་ཞིག་ཅེས་བྱ་བ་ནི་སར་པ་གཉིས་ཏེ་གསར་པས་སར་པ་དང ། རྙེད་པས་གསར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །རྙེད་ན་ཞེས་བྱ་བ་ནི་གཞན་ལས་སོ། །ཁ་བསྒྱུར་བ་གསུམ་པོ་སྔོན་པོ་འམ། དམར་པོ་འམ། ངུར་སྨྲིག་ལས་གང་ཡང་རུང་བ་ཞེས་བྱ་བ་ལ། སྔོན་པོ་ཞེས་བྱ་བ་ནི་རམས་སོ། །དམར་པོ་ཞེས་བྱ་བ་ནི་བཙག་གོ། །ངུར་སྨྲིག་ཅེས་བྱ་བ་ནི་ཤིང་ཤུན་ནོ། །ཁ་བསྒྱུར་བར་བྱའོ་ཞེས་བྱ་བ་ནི་ཁ་དོག་ངན་པར་བྱ་བའོ། །གལ་ཏེ་དགེ་སློང་གིས་གོས་སར་པ་ཁ་སྒྱུར་བ་གསུམ་པོ་སྔོན་པོ་འམ། དམར་པོ་འམ། ངུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་སྤྱོད་ན་ཞེས་བྱ་བ་ནི་གྱོན་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་གོས་སར་པ་ཞིག་རྙེད་ན་ཐ་ན་ལྷུང་བཟེད་ཀྱི་ཁ་གཡོགས་ཀྱང་རུང་སྟེ། ཁ་བསྒྱུར་བ་གསུམ་པོ་སྔོན་པོ་འམ། དམར་པོ་འམ། ངུར་སྨྲིག་ལས་གང་ཡང་རུང་བར་ཁ་བསྒྱུར་བར་བྱའོ། །གལ་ཏེ་དགེ་སློང་གིས་གོས་སར་པ་ཁ་བསྒྱུར
7.237a
བ་གསུམ་པོ་སྔོན་པོ་འམ། དམར་པོ་འམ། ངུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་སྤྱོད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁ་མ་བསྒྱུར་བའི་གོས་གྱོན་པའི་ལྟུང་བྱེད་དེ་ལྔ་བཅུ་རྩ་བརྒྱད་པ་རྫོགས་སོ།། ་་་་་་་།། བར་སྡོམ་ལ་བྱ་རྒོད་ཕུང་པོ་འཕོང་དང་ནི། །རོལ་མོ་ལིད་ཙ་ཆེན་པོ་དང ། །སིལ་སྙན་རི་དགས་འཛིན་མ་ཡི། །སྡེ་ཚན་ཡང་དག་བསྡུས་པ་ཡིན། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང ། ཆོས་གོས་བསྣམས་ཏེ། བྱ་རྒོད་ཀྱི་ཕུང་པོའི་རི་ལས་བབས་ནས་སླད་བཞིན་འབྲང་བའི་དགེ་སྦྱོང་ཚེ་དང་ལྡན་པ་ཀུན་དགའ་བོ་དང་རྒྱལ་པོའི་ཁབ་ཏུ་བསོད་སྙོམས་ལ་གཤེགས་པ་དང ། བཅོམ་ལྡན་འདས་ཀྱིས་བསྐལ་པ་དང་པོའི་མི་རྣམས་ཀྱིས་གཏེར་སྦས་པ་ལྷས་ཆར་ཕབ་པས་ཕྱོགས་དེར་ཆུའི་འོད་པ་བབ་ཅིང་དེ་ཡང་ལམ་ལམ་ལམ་འབར་ཞིང་འདུག་པ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བཅོམ་ལྡན་འདས་སྦྲུལ་དུག་དྲག་པོ་ལགས་སོ། །ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱ་བ་ཡིན་ནོ། །བདེ་བར་གཤེགས་པ་སྦྲུལ་དུག་དྲག་པོ་ལགས་སོ། །དེ་ན་ཧ་ཅང་ཐག་མི་རིང་བ་ན་མི་འབྲས་བུ་དང་རྩ་བ་ཐུ་བ་ཞིག་འདུག་པ་དེས་དེ་ཐོས་ནས་དེས་བསམས་པ། བདག་གིས་སྦྲུལ་དུག་མྱུར་དུ་ཁྱབ་པར་བྱེད་པ་ནི་མཐོང་ན་སྦྲུལ་དུག་དྲག་པོ་ནི་མ་མཐོང་བས། ཤཱཀྱའི་བུའི་དགེ་སྦྱོང་རྣམས་ཀྱི་སྦྲུལ་དུག་དྲག་པོ་ཅི་འདྲ། བདག་ཀྱང་ཕྱོགས་འདིར་ཉིན་མཚན་དུ་རྒྱུ་བས་བདག་སྦྲུལ་དུག་དྲག་པོས་ཟིན་པར་གྱུར་ན་མི་རུང་གིས་ཇི་ལྟར་འགྲོའོ་སྙམ་ནས་དེ་དེར་སོང་བ་དང ། ཇི་ཙམ་ན་གཏེར་ཞིག་ལམ་ལམ་ལམ་འབར་ཞིང་འདུག་པ་མཐོང་ནས་དེས་བསམས་པ། ཤཱཀྱའི་བུའི་དགེ་སྦྱོང་རྣམས་ཀྱི་སྦྲུལ་དུག་དྲག་པོ་ནི་མཛེས་པ་ཡིན་ནོ། །ཤཱཀྱའི་བུའི་དགེ་སྦྱོང་རྣམས
7.237b
ཀྱི་སྦྲུལ་དུག་དྲག་པོ་ནི་ཤིན་དུ་བཟང་བ་ཡིན་ཏེ། འདི་ལྟར་སྦྲུལ་དུག་དྲག་པོ་འདི་ལྟ་བུས་ནི་ཕ་དང་མ་སྡུག་པ་ཡང་ཟིན་ཀྱང་སླའོ། །བུ་དང ། ཆུང་མ་དང ། བྲན་མོ་དང ། ལས་མི་དང ། ཞོ་ཤས་འཚོ་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་སྡུག་པ་ཡང་ཟིན་ཀྱང་བླའོ་སྙམས་ནས་མི་དེས་གཏེར་དེ་ལོ་མའི་ཆུན་པོ་དག་གིས་གཡོག་ཏེ། ཁད་ཀྱིས་ཁད་ཀྱིས་རིམ་གྱིས་རང་གི་ཁྱིམ་དུ་བསྐྱས་སོ། །གང་གི་ཚེ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་སྡིག་པའི་གྲོགས་པོ་ལྷ་སྦྱིན་གྱིས་ཉེ་བར་བསྐོར་བས་ཕ་ཆོས་དང་ལྡན་པ་ཆོས་ཀྱིས་རྒྱལ་པོ་གཟུགས་ཅན་སྙིང་པོ་སྲོག་དང་ཕྲལ་ཏེ། རང་ཉིད་ཅོད་པན་བཅིངས་ནས་རྒྱལ་སྲིད་ཀྱི་དབང་ཕྱུག་གི་བདག་པོར་བཞག་པ་དེའི་ཚེ་ན་དེས་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་སོང་ལ་གང་ལ་འདུ་བ་ནི་ཅི་ཡོད། འགོད་པ་ནི་ཅི་ཡོད། གང་ནི་ཅི་ཞིག་གིས་འཚོ་བར་བྱེད་པ་དག་ལྟོས་ཤིག་།དེ་ནས་ཞོ་ཤས་འཚོ་བའི་མི་དེ་དག་གིས་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལས་མཉན་ནས། རྒྱལ་པོའི་ཞོ་ཤས་འཚོ་བའི་མི་དེ་དག་གིས་ཕྱོགས་སུ་བྱུལ་བ་ན་མི་དེ་ཁྱིམ་གྱི་འབྱོར་པ་དག་བྱེད་པ་མཐོང་ནས་དེ་དག་གིས་དེ་ལ་སྨྲས་པ། ཀྱེ་ནང་རྗེ་དབུལ་པོ་རྩ་བ་དང་འབྲས་བུ་ཐུ་བ་རྩ་བ་དང་འབྲས་བུ་དག་བཙོངས་ཤིང་འཚོ་བ་དག་སྦྱོར་བར་བྱེད་པ་ཡིན་ན་ཁྱོད་ཀྱི་ཁྱིམ་གྱིས་འབྱོར་པ་འདི་ག་ལས་འོང ། ཁྱོད་ཀྱིས་གཏེར་མ་རྙེད་དམ། དེས་སྨྲས་པ། བདག་གིས་གཏེར་མ་རྙེད་དེ། བདག་ཉིད་ལ་འབྱོར་པ་འདི་ལྟ་བུ་དག་ཡོད་མོད་ཀྱིས་སྔན་ཆད་ནི་རྒྱལ་པོ་ཆོས་དང་མི་ལྡན་པ་བྱུང་བ་དེའི་ཕྱིར་བདག་གིས་མ་ཕྱུང་ངོ ། །ད་ནི་རྒྱལ་པོ་ཆོས་དང་ལྡན་པ་བྱུང་བས། དེའི་ཕྱིར་བདག་གིས་ཁྱིམ་གྱི་འབྱོར་པ་བྱེད་དེ་རྒྱལ་པོ་གཟུགས་ཅན་སྙིང་པོ་ལ་ཕོ་བྲང་འཁོར་དང་ལྗོངས་ཀྱི་མི་དག་རྗེས་སུ་དགའ་བར་ཟད་ཀྱི་དེ་ཆོས་དང་ལྡན་པ་མ་ཡིན་ནོ། །རྒྱལ་པོ་མ་སྐྱེས་དགྲ་ལ་ནི་ཕོ་བྲང་འཁོར་དང་ལྗོངས་ཀྱི
7.238a
མི་དག་རྗེས་སུ་མི་དགའ་ཡང་དེ་ཆོས་དང་ལྡན་པའི་རྒྱལ་པོ་ཡིན་ནོ། །དེ་དག་གིས་སྨྲས་པ། ཀྱེ་ནང་རྗེ་རྒྱལ་པོ་གཟུགས་ཅན་སྙིང་པོ་ཆོས་དང་ལྡན་པ་མ་ཡིན་ན་གང་ཆོས་དང་ལྡན་པ་དེ་ཆོས་དང་ལྡན་པ་མ་ཡིན་པར་གྱུར་ལ། ཕ་གསོད་པ་གང་ཡིན་པ་དེ་ཆོས་དང་ལྡན་པར་གྱུར་ཏམ། ཁྱོད་ཀྱིས་ཁོ་བོ་ཅག་སུ་ཡིན་ཤེས་སམ། དེས་སྨྲས་པ། ཤེས་ཏེ་རྒྱལ་པོའི་ཞོ་ཤས་འཚོ་བ་དག་ཡིན་པས་ཁྱེད་ཀྱི་མིག་གིས་རྒྱལ་པོ་མཐོང་ངོ ། །དེ་དག་གིས་སྨྲས་པ། ཀྱེ་ནང་རྗེ་ཁོ་བོ་ཅག་བརྫུན་གྱིས་མ་བསླུ་ཤིག་།ཁྱོད་ཀྱིས་གཏེར་རྙེད་ཀྱི་ཕྱེད་ནི་ཁྱེད་ཁྱེར་ལ་ཕྱེད་ནི་ཁོ་བོ་ཅག་ལ་བྱིན་ཅིག་།དེས་སྨྲས་པ། ཁོ་བོས་གཏེར་མ་རྙེད་དེ། འདི་ནི་ཁོ་བོ་ཉིད་ཀྱི་ཡིན་མོད་ཀྱི་འོན་ཀྱང་སུམ་ཆ་སྦྱིན་གྱི་ཁ་རོག་པར་དེངས་ཤིག་།དེ་དག་གིས་དེ་སྤྱོས་ཏེ་ལག་པ་གཉིས་ཕྱིང་ཀ་ལོག་ཏུ་བཅིངས་ནས་གཉའ་ཟུངས་རྒྱུད་མོས་རྒྱལ་པོའི་དྲུང་དུ་ཁྲིད་དེ་སྨྲས་པ། ལྷ་མི་འདིས་གཏེར་རྙེད་དོ། །རྒྱལ་པོས་སྨྲས་པ། ཀཝའི་ནང་རྗེ་ང་སུ་ཡིན་ཤེས་སམ། ལྷ་འཚལ་ཏེ་འཇིག་རྟེན་སྐྱོང་བ་བཞི་ནི་འཇིག་རྟེན་སྐྱོང་བར་བགྱིད་པ་ལགས། ཁྱོད་ནི་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་འཇིག་རྟེན་སྐྱོང་བ་ལྔ་པ་ལགས་ཏེ་སྐྱེ་དགུ་སྐྱོང་བར་མཛད་པ་ལགས་སོ། །ཀཝའི་ནང་རྗེ་ཁྱོད་ཀྱིས་གཏེར་རྙེད་ཀྱི་ང་ལ་བརྫུན་གྱི་མ་བསླུ་བར་བདེན་པ་སྨྲོས་ལ་ཕྱེད་ནི་ཁྱོད་ཁྱེར་ཅིག་།ཕྱེད་ནི་ང་ལ་བྱིན་ཅིག་།ལྷ་བདག་གིས་གཏེར་མ་རྙེད་དོ། །ཀཝའི་ནང་རྗེ་ཁྱོད་ཀྱིས་གཏེར་རྙེད་ཀྱིས་སུམ་ཆ་ང་ལ་བྱིན་ཅིག་།ལྷ་བདག་གིས་གཏེར་མ་རྙེད་དོ། །རྒྱལ་པོ་ཁྲོས་ཏེ་བློན་པོ་རྣམས་ལ་སྨྲས་པ། ཤེས་ལྡན་དག་གང་གི་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་བཀའ་ལན་གསུམ་གྱི་བར་དུ་བཅག་པ་དེ་ལ་ཆད་པ་ཅི་ཡོད། དེ་དག་གིས་སྨྲས་པ། ལྷ་དགུམ་པ་ལ་ཐུག་པའི་ཆད་པ་མཆིས་སོ། །རྒྱལ་པོས་སྨྲས་པ། ཤེས་ལྡན་དག་ངས་མི་འདི་ཡོངས་སུ་བཏང་གིས། འདིའི་ཉེ་དུ་རྣམས་ཀྱང་ཕྱག་སྦལ་དུ་ཆུག་ལ། འདིའི་ནོར་ཐམས་ཅད་ཀྱང་རྒྱལ་པོའི་ཕོ་བྲང་དུ་ཕུལ་ཅིག་།དེ་ནས་བློན་པོ་རྣམས་ཀྱི་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷར་བྱུང་བའི
7.238b
རྒྱལ་པོ་མ་སྐྱེས་དགྲ་ལས་མཉན་ནས་མི་དེའི་ཉེ་དུ་རྣམས་ཀྱང་བཙོན་རར་བཅུག་།དེའི་ནོར་ཐམས་ཅད་ཀྱང་རྒྱལ་པོའི་ཕོ་བྲང་དུ་ཕུལ། མི་དེ་ཉིད་ཀྱང་མི་གོས་སྔོན་པོ་གྱོན་པ་ལག་ན་རལ་གྲི་ཐོགས་པ་དག་གིས་ཀར་བི་རའི་མེ་ཏོག་དམར་པོ་དག་གིས་མགྲིན་པ་བཅིངས་ཏེ་གསད་སར་ཁྲིད་པ་དང ། མི་དེ་བྱུང་རྒྱལ་དུ་སྨྲས་པ། ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བཅོམ་ལྡན་འདས་སྦྲུལ་དུག་དྲག་པོ་ལགས་སོ། །ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ་བདེ་བར་གཤེགས་པ་སྦྲུལ་དུག་དྲག་པོ་ལགས་སོ། །རྒྱལ་པོ་དེའི་ཆོས་ཉིད་ནི་གསད་པར་བྱ་བའི་མི་གང་གཞན་དྲིས་པ་ལ་ལན་གཞན་འདེབས་པར་བྱེད་དེ། ཇི་སྲིད་དུ་རྒྱལ་པོ་ལ་མ་ཞུས་ཀྱི་བར་དུ་རེ་ཤིག་གསོད་པར་མི་བྱེད་པས་བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་མི་དེ་གཞན་དྲིས་ན་ལན་གཞན་འདེབས་པར་བགྱིད་དོ། །རྒྱལ་པོས་སྨྲས་པ། ཁྲིད་དེ་ཤོག་ཤིག་།བློན་པོ་རྣམས་ཀྱིས་ཁྲིད་དེ་སོང་ནས། རྒྱལ་པོས་དྲིས་པ། ཀཝའི་ནང་རྗེ་ཁྱོད་ཅི་ཟེར། དེས་སྨྲས་པ། ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བཅོམ་ལྡན་འདས་སྦྲུལ་དུག་དྲག་པོ་ལགས་སོ། །ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བདེ་བར་གཤེགས་པ་སྦྲུལ་དུག་དྲག་པོ་ལགས་སོ། །རྒྱལ་པོས་སྨྲས་པ། ཀཝའི་ནང་རྗེ་སྨྲས་པ་དེའི་དོན་ཅི། ལྷ་རྗེ་མི་འཇིགས་པ་སྩལ་དུ་གསོལ། བྱིན་ནོ། །དེས་སྐབས་དེ་རྒྱས་པར་བརྗོད་ནས་འདི་སྐད་ཅེས་ཀྱང་སྨྲས་སོ། །གལ་ཏེ་སྦྲུལ་དུག་མྱུར་དུ་ཁྱབ་པར་བགྱིད་པས་བདག་ཟིན་པར་གྱུར་ན་བདག་གཅིག་པུ་དུས་ལ་བབ་པར་འགྱུར་བ་ཞིག་ན། སྦྲུལ་དུག་དྲག་པོས་བདག་ཟིན་པས་དེའི་སླད་དུ་བདག་དང ། ཉེ་དུ་དང ། ནོར་ཐམས་ཅད་ཀྱང་ཚུལ་མ་ལགས་པས་སྡུག་བསྔལ་བར་གྱུར་ཏོ། །དེའི་ཚེ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་དད་པ་ཐོབ་ནས་རིང་པོ་མ་ལོན་པས་དེས་སྨྲས་པ། ཀཝའི་ནང་རྗེ་ཁྱོད་བཅོམ་ལྡན་འདས་ལ་མངོན་པར་དད་དམ། ལྷ་མངོན་པར་དད་དོ། །དེ་ནས་ལུས་འཕགས
7.239a
མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་མཆི་མས་བརྣངས་པར་གྱུར་ནས། དེས་སྨྲས་པ། ཀཝའི་ནང་རྗེ་དེ་ཁྱོད་ཀྱིས་ཡིན་གྱི་སོང་ཤིག་།དེ་ནས་རྒྱལ་པོས་ཞོ་ཤས་འཚོ་བ་རྣམས་ལ་བསྒོ་བ། མི་འདིའི་ཉེ་དུ་རྣམས་ཀྱང་ཐོང་ལ་འདིའི་ནོར་ཐམས་ཅད་ཀྱང་ཕྱིར་བྱིན་ཅིག་།ཞོ་ཤས་འཚོ་བ་རྣམས་ཀྱིས་དེའི་ཉེ་དུ་རྣམས་ཀྱང་བཏང ། དེའི་ནོར་ཐམས་ཅད་ཀྱང་ཕྱིར་བྱིན་ནོ། །དེ་ནས་མི་དེ་འདི་སྙམ་དུ་སེམས་ཏེ། བདག་གི་ཁྱིམ་ན་དཔལ་དང་བསྐལ་བ་བཟང་པོ་ཕུན་སུམ་ཚོགས་པ་གང་ཅུང་ཟད་ཅི་ཡོད་པ་དེ་ཐམས་ཅད་བཅོམ་ལྡན་འདས་ལ་བརྟེན་པ་ཡིན་པས་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་ཏེ་གདུགས་ཚོད་གསོལ་ལོ་སྙམ་ནས། དེ་ནས་མི་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་གྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་མི་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་མི་དེ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབ་ཅིག་དུ་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་མི་དེ་ལ་ཅང་མི་གསུང་བས་གནང་ངོ ། །དེ་ནས་མི་དེས་བཅོམ་ལྡན་འདས་ཀྱི་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས
7.239b
ཀྱི་སྤྱན་སྔ་ནས་སོང་ངོ ། །དེ་ནས་མི་དེས་དེ་ཉིད་ཀྱི་མཚན་མོ་བཅའ་བ་དང ། བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཞིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་མི་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་མི་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་བསྟབས་ཤིང་ཚིམ་པར་བྱས་ནས་བཅོམ་ལྡན་འདས་གདུགས་ཚོད་གསོལ་ཞིང་ཕྱག་བཅབས་ཏེ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་དེ་ནས་བཅོམ་ལྡན་འདས་ཀྱིས་མི་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་པས། འདི་ལྟར་མི་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱིས་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་བཅོམ་ལྡན་འདས་ཀྱི་བདག་ལ་གང་མཛད་པ་འདི་ལྟ་བུ་འདི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ
7.240a
བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། ཡི་དགས་དང ། དུད་འགྲོ་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ཐོབ་སྟེ་བཙུན་པ་བདག་ནི་མངོན་པར་ཞུགས་པ་ལགས། བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིས། བདག་དགེ་བསྙེན་དུ་བཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་གློ་བ་ཐག་པ་ནས་དད་པས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་མི་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན་ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །འདི་ནི་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །ཚེ་དང་ལྡན་པ་འཆར་ཀས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང ། ཇི་ཙམ་ན་དེས་བསོད་སྙོམས་བརྒྱུས་ནས་འཕོང་གི་དཔོང་ས་མཐོང་ནས་དེ་དེར་ཞུགས་པ་དང ། འཕོང་གི་སློབ་དཔོན་ནི་མེད། ཁྱེའུ་དག་འཁོད་ནས་དེས་དྲིས་པ། ཁྱེའུ་དག་ཅི་བྱེད། དེ་དག་གིས་སྨྲས་པ། འཕགས་པ་འཕོང་སློབ་བོ། །འཆར་ཀས་སྨྲས་པ། བུ་དག་ལེགས
7.240b
ཏེ་ཁྱེད་ཅག་གིས་སྒྱུ་རྩལ་མཆོག་ལས་རྒལ་ཏོ། །བུ་དག་བལྟས་གཡོན་འཕོངས་དང ། གཡས་འཕོངས་དང ། གོམ་སྟབས་དང ། འཛིན་སྟབས་དང ། ཞགས་པ་གདབ་པ་དང ། མདའ་བོ་ཆེ་འཕང་བ་དང ། གཅད་པ་དང ། དྲལ་བ་དང ། དབུག་པ་དང ། རྡོ་རྗེ་རྩེ་གཅིག་པ་དང ། མཚོན་རྩེ་གཅིག་འཕང་བ་གྱིས་ཤིག་།དེ་དག་གིས་གཡོན་འཕོངས་དང ། གཡས་འཕོངས་དང ། གོམ་སྟབས་དང ། འཛིན་སྟབས་དང ། ཞགས་པ་གདབ་པ་དང ། མདའ་བོ་ཆེ་འཕང་བ་དང ། གཅད་པ་དང ། དྲལ་བ་དང ། དབུག་པ་དང ། རྡོ་རྗེ་རྩེ་གཅིག་པ་དང ། མཚོན་རྩེ་གཅིག་འཕང་བར་བརྩམས་པ་དང ། འཆར་ཀ་ལག་པ་གཉིས་འདྲིལ་བར་བྱེད། བཞིན་བསྒྱུར་བར་བྱེད་ནས་དེ་དག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད། ཞལ་སྒྱུར་བར་མཛད། འཆར་ཀས་སྨྲས་པ། ད་དུང་ཁྱེད་ཅག་གི་སློབ་དཔོན་གྱིས་ཀྱང་མི་ཤེས་ན། ཁྱེད་ཅག་གིས་ལྟ་ཤེས་པར་འགྱུར་རེ་སྐན། དེ་དག་གིས་སྨྲས་པ། འཕགས་པ་འདི་ལ་ཅུང་ཟད་མཁྱེན་པ་མངའ་འམ། འཆར་ཀས་སྨྲས་པ། ཁྱེའུ་དག་སའི་སྟེང་ན་གང་ཁོ་བོས་མི་ཤེས་པའི་ལས་ཀྱི་གནས་དང ། བཟོའི་གནས་དེ་གང་ཡིན། དེ་དག་གིས་སྨྲས་པ། ་འཕགས་པ་གཡར་སྔ་བྲིམ་གྱིས་གཡོན་འཕོངས་དང ། གཡས་འཕོང་དང ། གོམ་སྟབས་དང ། འཛིན་སྟབས་དང ། ཞགས་པ་གདབ་པ་དང ། མདའ་བོ་ཆེ་འཕང་བ་དང ། གཅད་པ་དང ། དྲལ་བ་དང ། དབུག་པ་དང ། རྡོ་རྗེ་རྩེ་གཅིག་པ་དང ། མཚོན་རྩེ་གཅིག་པ་འཕང་བ་མཛད་དུ་གསོལ། འཆར་ཀས་གཡོན་འཕོང་དང ། གཡས་འཕོང་དང ། གོམ་སྟབས་དང ། འཛིན་སྟབས་དང ། ཞགས་པ་གདབ་པ་དང ། མདའ་བོ་ཆེ་འཕང་བ་སུས་ཀྱང་བྱེད་མི་ནུས་པ་བྱས་ཤིང་རྐེད་ཆིངས་ཀྱིས་བཅིངས་ཏེ་ཕུབ་ཟླུམ་ཐོགས་ནས་གཅད་པ་དང ། དྲལ་བ་དང ། དབུག་པ་ཡང་བྱས་པ་དང ། དེ་དག་ཡ་མཚན་སྐྱེས་ནས་སྨྲས་པ་དང ། འཕགས་པ་ལེགས་སོ་ལེགས་སོ། །འཆར་ཀས་སྨྲས་པ། ཁྱེའུ་དག་བཟོའི་གནས་དེ་ལྟར་བསླབ་པར་བྱ་བ་འམ། ཡང་ན་སློབ་དཔོན་གཞན
7.241a
བཙལ་བར་བྱའི་འབྲས་བུ་མེད་པའི་སྦུན་པ་ཕྱིར་ཞིང་འཁོད་དེ་ཅི་རུང་ཞེས་སྨྲས་ཏེ་སོང་ངོ ། །ཇི་ཙམ་ན་དེ་དག་གི་སློབ་དཔོན་འོངས་ནས་དེས་སྨྲས་པ། ཁྱེའུ་དག་འཁོད་དེ་ཅི་རུང ། གཡོན་འཕོངས་དང ། གཡས་འཕོངས་དང ། གོམ་སྟབས་དང ། འཛིན་སྟབས་དང ། ཞགས་པ་གདབ་པ་དང ། མདའ་བོ་ཆེ་འཕང་བ་དང ། གཅད་པ་དང ། དྲལ་བ་དང ། དབུག་པ་དང ། རྡོ་རྗེ་རྩེ་གཅིག་དང ། མཚོན་རྩེ་གཅིག་འཕངས་བ་གྱིས་ཤིག་།དེ་དག་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་ཅིང་སྨྲས་པ། སློབ་དཔོན་ཡང་ད་དུང་ཅི་ཡང་མི་མཁྱེན་ན་བདག་ཅག་གིས་ལྟ་འཚལ་བར་འགྱུར་རེ་སྐན། སློབ་དཔོན་གྱིས་སྨྲས་པ། ཁྱེའུ་དག་སྔོན་མ་བྱུང་བའི་རྣམ་པར་འགྱུར་བ་འདི་ལྟ་བུ་བྱུང་ན་འགའ་ཞིག་འདིར་འོངས་པར་མ་གྱུར་ཏམ། དེ་དག་གིས་སྨྲས་པ། མཆིས་སོ། །སུ། འཕགས་པ་འཆར་ཀ་སྟེ། དེས་གཡོན་འཕོངས་དང ། གཡས་འཕོང་དང ། གོམ་སྟབས་དང ། འཛིན་སྟབས་དང ། ཞགས་པ་གདབ་པ་དང ། མདའ་བོ་ཆེ་འཕང་བ་དང ། གཅད་པ་དང ། དྲལ་བ་དང ། དབུག་པ་དང ། རྡོ་རྗེ་རྩེ་གཅིག་དང ། མཚོན་རྩེ་གཅིག་འཕང་བ་སུས་ཀྱང་བགྱི་བར་རྔོ་མི་ཐོག་པ་དེ་ལྟ་བུ་བགྱིས་སོ། །དེས་དེ་དག་ལ་སྨྲས་པ། བྱང་ཆུབ་སེམས་དཔའ་འཕོང་གི་དཔོང་ས་གང་དུ་འཕོང་བསླབ་པ་དེའི་དྲུང་དུ་དེས་ཀྱང་བསླབས་སོ། །གལ་ཏེ་དེ་རབ་ཏུ་བྱུང་བར་མ་གྱུར་ན་འཛམ་བུའི་གླིང་མཐའ་དག་ཏུ་འཕོང་གི་སློབ་དཔོན་གྱི་མཆོག་ཏུ་འགྱུར་རོ། །འོན་ཀྱང་ཁོ་བོས་ཅི་ཤེས་པ་དེ་ཇེ་ཁོ་བོ་ལས་སློབས་ལ། ལྷག་མ་གཞན་ལས་སློབ་ཤིག་།སློབ་དཔོན་དེས་བསམ་པ། དེ་ཡང་དང་ཡང་དུ་བདག་ལ་ཐོ་འཚམ་པར་འགྱུར་གྱིས་དེ་བལྟར་འགྲོའོ་སྙམ་ནས། དེ་འཆར་ཀའི་གན་དུ་སོང་སྟེ་སྨྲས་པ། འཕགས་པ་འཆར་ཀ་བདག་ཅག་གི་འཕོང་གི་དཔོང་སར་བྱོན་པར་གྱུར་ཏམ། འཆར་ཀས་སྨྲས་པ་སོན་ཏོ། །འཕགས་པས་ཁྱེའུ་དག་ཅུང་ཟད་ཚར་བཀུམ་འམ། འཆར་ཀས་སྨྲས་པ། ཚར་བཅད་དོ། །དེས་སྨྲས་པ། འཕགས་པ་དེ་ནི་བདག་གི་འཚོ་བ་ལགས་ཀྱིས་ཁྱེའུ་དག་ཚར་མ་དགུམ་ཤིག་།བཀྲེན་པ་ཁྱོད་ཁོ་བོ་ཅག་གི
7.241b
སྒྱུ་རྩལ་གྱིས་འཚོ་ལ། ཁོ་བོ་ཅག་ལ་བཅའ་བའི་རིན་ཅུང་ཟད་ཀྱང་མི་སྦྱིན་ནམ། དེས་སྨྲས་པ། འཕགས་པ་བདག་ནི་དབུལ་པོ་ལགས་སོ། །འཆར་ཀས་སྨྲས་པ། བཀྲེན་པ་གལ་ཏེ་མི་སྦྱིན་ན་ཡང་དང་ཡང་དུ་ཁོ་བོ་སོང་ལ་ཚར་གཅད་པར་བྱའོ། །དེས་བསམས་པ། འདི་ལ་བཅའ་བའི་རིན་མ་བྱིན་ན་ཡང་དང་ཡང་དུ་སོང་ཏེ་ཁྱེའུ་དག་ཚར་གཅོད་པར་འགྱུར་རོ་སྙམ་ནས། དེ་འཕོང་གི་ཡོ་བྱད་ཐམས་ཅད་བཙོངས་ཏེ་དེ་ལ་བཅའ་བའི་རིན་བྱིན་ནས་སེམས་ཁོངསུ་ཆུད་ཅིང་འདུག་གོ། །ཇི་ཙམ་ན་དེའི་ཆུང་པོ་གྲོགས་འོང་ནས་དེས་དྲིས་པ། གྲོགས་པོ་ཅིའི་ཕྱིར་སེམས་ཁོངས་སུ་ཆུད་ཅིང་འདུག་།དེས་སྨྲས་པ། ཁོ་བོ་ཆད་པས་བཅད་དོ། །སུས་ཤཱཀྱའི་བུའི་དགེ་སྦྱོང་དག་གིས་སོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང ། དེས་ཤཱཀྱའི་བུའི་དགེ་སྦྱོང་རྣམས་ཀྱིས་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་འཕོང་གི་སློབ་དཔོན་དག་ཀྱང་ཆད་པས་གཅོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །འདི་ཡང་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་འཆའ་བར་ནི་མི་མཛད་དོ། ་་།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །ཚེ་དང་ལྡན་པ་འཆར་ཀས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་སྟེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང ། ཇི་ཙམ་ན་དེས་བསོད་སྙོམས་བརྒྱུས་ནས་རོལ་མོའི་དཔོང་ས་མཐོང་ནས་དེ་དེར་ཞུགས་པ་དང ། རོལ་མོའི་སློབ་དཔོན་ནི་མེད། ཁྱེའུ་དག་འཁོད་ནས་དེས་དྲིས་པ། ཁྱེའུ་དག་ཅི་བྱེད། དེ་དག་གིས་སྨྲས་པ། འཕགས་པ་རོལ་མོ་སློབ་བོ། །འཆར་ཀས་སྨྲས་པ། བུ་དག་ལེགས་ཏེ་ཁྱེད་ཅག་གིས་སྒྱུ་རྩལ་མཆོག་ལས་རྒལ་ཏོ། །བུ་དག་བལྟས་དྲུག་ལྡན་དང ། དྲང་སྲོང་པ་དང ། ས་འཛིན་པ་དང ། བློ་གསལ་དང ། འཁོར་ཉན་དང ། བར་མ་པ་དང ། ཀེ་ཤི་ཀ་གྱིས་ཤིག་།དེ་དག་གིས་དྲུག་ལྡན་དང ། དྲང་སྲོང་པ་དང །
7.242a
ས་འཛིན་པ་དང ། བློ་གསལ་དང ། འཁོར་ཉན་དང ། བར་མ་པ་དང ། ཀེ་ཤི་ཀ་བྱ་བར་བརྩམས་པ་དང ། འཆར་ཀ་ལག་པ་གཉིས་འདྲིལ་བར་བྱེད། བཞིན་བསྒྱུར་བར་བྱས་ནས་དེ་དག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད། ཞལ་སྒྱུར་བར་མཛད། འཆར་ཀས་སྨྲས་པ། ད་དུང་ཁྱེད་ཅག་གི་སློབ་དཔོན་གྱིས་ཀྱང་མ་ཤེས་ན་ཁྱེད་ཅག་གིས་ལྟ་ཤེས་པར་འགྱུར་རེ་སྐན། དེ་དག་གིས་སྨྲས་པ། འཕགས་པ་འདི་ལ་ཅུང་ཟད་མཁྱེན་པ་མངའ་འམ། འཆར་ཀས་སྨྲས་པ། ཁྱེའུ་དག་སའི་སྟེང་ན་གང་ཁོ་བོས་མི་ཤེས་པའི་བཟོའི་གནས་དང ། ལས་ཀྱི་གནས་དེ་གང་ཡིན། དེ་དག་གིས་སྨྲས་པ། འཕགས་པ་གཡར་སྔ་བྲིམ་གྱིས་དྲུག་ལྡན་དང ། དྲང་སྲོང་པ་དང ། ས་འཛིན་པ་དང ། བློ་གསལ་དང ། འཁོར་ཉན་དང ། བར་མ་དང ། ཀེ་ཤི་ཀ་མཛོད་ཅིག་།འཆར་ཀས་དྲུག་ལྡན་དང ། དྲང་སྲོང་པ་དང ། ས་འཛིན་པ་དང ། བློ་གསལ་དང ། འཁོར་ཉན་དང ། བར་མ་པ་དང ། ཀེ་ཤི་ཀ་སུས་ཀྱང་བྱ་བར་མི་ནུས་པ་བྱས་པ་དང ། དེ་དག་ཡ་མཚན་སྐྱེས་ནས་སྨྲས་པ། འཕགས་པ་ལེགས་སོ་ལེགས་སོ། །འཆར་ཀས་སྨྲས་པ། ཁྱེའུ་དག་བཟོའི་གནས་དེ་ལྟར་བསླབ་པར་བྱ་བ་འམ། ཡང་ན་སློབ་དཔོན་གཞན་བཙལ་བར་བྱའི་འབྲས་བུ་མེད་པའི་སྦུན་པ་འཕྱར་ཞིང་འཁོད་དེ་ཅི་རུང་ཞེས་སྨྲས་ཏེ་སོང་ངོ ། །ཇི་ཙམ་ན་དེ་དག་གི་སློབ་དཔོན་འོང་ནས་དེས་སྨྲས་པ། ཁྱེའུ་དག་འཁོད་དེ་ཅི་རུང་དྲུག་ལྡན་དང ། དྲང་སྲོང་པ་དང ། ས་འཛིན་པ་དང ། བློ་གསལ་དང ། འཁོར་ཉན་དང ། བར་མ་པ་དང ། ཀེ་ཤི་ཀ་གྱིས་ཤིག་།དེ་དག་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་ཅིང་སྨྲས་པ། སློབ་དཔོན་ཡང་ད་དུང་ཅི་ཡང་མི་མཁྱེན་ན་བདག་ཅག་གིས་ལྟ་འཚལ་བར་འགྱུར་རེ་སྐན། སློབ་དཔོན་གྱིས་སྨྲས་པ། ཁྱེའུ་དག་སྔོན་མ་བྱུང་བའི་རྣམ་པར་འགྱུར་བ་འདི་ལྟ་བུ་བྱུང་ན་འགའ་ཞིག་འདིར་འོང་བར་མ་གྱུར་ཏམ། དེ་དག་གིས་སྨྲས་པ། མཆིས་སོ། །སུ། འཕགས་པ་འཆར་ཀ་སྟེ། དེས་གླུ་དང་གར་སུས་ཀྱང་བརྗོད་པར་རྔོ་མི་ཐོག་པ་དེ་ལྟ་བུ་བགྱིས་སོ། །དེས་དེ་དག་ལ་སྨྲས་པ།
7.242b
བྱང་ཆུབ་སེམས་དཔའ་རོལ་མོའི་དཔོང་ས་གང་དུ་རོལ་མོ་བསླབས་པ་དེའི་དྲུང་དུ་དེས་ཀྱང་བསླབས་ཏེ། གལ་ཏེ་དེ་རབ་ཏུ་བྱུང་བར་མ་གྱུར་ན་འཛམ་བུའི་གླིང་མཐའ་དག་ཏུ་རོལ་མོ་མཁན་གྱི་སློབ་དཔོན་གྱི་མཆོག་ཏུ་འགྱུར་རོ། །འོན་ཀྱང་ཁོ་བོས་ཅི་ཤེས་པ་དེ་ཇེ་ཁོ་བོ་ལས་སློབས་ལ་ལྷག་མ་གཞན་ལས་སློབས་ཤིག་།སློབ་དཔོན་དེས་བསམ་པ། དེ་ཡང་དང་ཡང་དུ་བདག་ལ་ཐོ་འཚམ་པར་འགྱུར་གྱིས་དེ་ལྟར་འགྲོའོ་སྙམ་ནས་དེ་འཆར་ཀའི་གན་དུ་སོང་ཏེ་སྨྲས་པ། འཕགས་པ་འཆར་ཀ་བདག་ཅག་གི་རོལ་མོའི་དཔོང་སར་བྱོན་པར་གྱུར་ཏམ། འཆར་ཀས་སྨྲས་པ། སོན་ཏོ། །འཕགས་པས་ཁྱེའུ་དག་ཅུང་ཟད་ཚར་བཀུམ་འམ། འཆར་ཀས་སྨྲས་པ། ཚར་བཅད་དོ། །དེས་སྨྲས་པ། འཕགས་པ་དེ་ནི་བདག་གི་འཚོ་བ་ལགས་ཀྱིས་ཁྱེའུ་དག་ཚར་མ་དགུམ་ཤིག་།བཀྲེན་པ་ཁྱོད་ཁོ་བོ་ཅག་གིས་སྒྱུ་རྩལ་གྱིས་འཚོ་ལ། ཁོ་བོ་ཅག་ལ་བཅའ་བའི་རིན་ཅུང་ཟད་ཀྱང་མི་སྦྱིན་ནམ། དེས་སྨྲས་པ། འཕགས་པ་བདག་ནི་དབུལ་པོ་ལགས་སོ། །འཆར་ཀས་སྨྲས་པ། བཀྲེན་པ་གལ་ཏེ་མི་སྦྱིན་ན་ཡང་དང་ཡང་དུ་ཁོ་བོ་སོང་ལ་ཚར་གཅད་པར་བྱའོ། །དེས་བསམ་པ། འདི་ལ་བཅའ་བའི་རིན་མ་བྱིན་ན་ཡང་དང་ཡང་དུ་སོང་ཏེ་ཁྱེའུ་དག་ཚར་གཅོད་པར་འགྱུར་རོ་སྙམ་ནས། དེས་རོལ་མོའི་ཡོ་བྱད་ཐམས་ཅད་བཙོངས་ཏེ་དེ་ལ་བཅའ་བའི་རིན་བྱིན་ནས་སེམས་ཁོངས་སུ་ཆུད་ཅིང་འདུག་གོ། །ཇི་ཙམ་ན་དེའི་ཆུང་པོ་གྲོགས་འོངས་ནས་དེས་དྲིས་པ། གྲོགས་པོ་ཅིའི་ཕྱིར་སེམས་ཁོངས་སུ་ཆུད་ཅིང་འདུག་།དེས་སྨྲས་པ། ཁོ་བོ་ཆད་པས་བཅད་དོ། །སུས། ཤཱཀྱའི་བུའི་དགེ་སྦྱོང་དག་གིས་སོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང ། དེ་ཤཱཀྱའི་བུའི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་རོལ་མོ་མཁན་གྱི་སློབ་དཔོན་དག་ཀྱང་ཆད་པས་གཅོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །འདི་ཡང་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་འཆའ་བར་ནི་མི་མཛད་དོ། །
7.243a
དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་ཅི་དགྱེས་པར་བཞུགས་ནས་ཡངས་པ་ཅན་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ་མཐར་གྱིས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །ཉེ་དགའ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་པ་དང ། ལིད་ཙ་བིའི་ཁྱེའུ་རབ་ཏུ་མང་པོ་དག་ཀྱང་ཡངས་པ་ཅན་ནས་བྱུང་སྟེ། ཡངས་པ་ཅན་གྱི་ཕྱི་རོལ་དུ་རྒྱན་ཐམས་ཅད་ཕྱོགས་གཅིག་ཏུ་བཞག་སྟེ་རྩེ་བར་བརྩམས་སོ། །ཉེ་དགས་དེ་མཐོང་ནས་དེས་དེ་གནོད་སྦྱིན་གྱི་ནོར་ཡིན་ནོ་ཞེས་རྒྱན་དེ་དག་ཐམས་ཅད་ཁྱེར་ཏེ་སོང་བ་དང ། ཡངས་པ་ཅན་གྱི་ལིད་ཙ་བིའི་ཁྱེའུ་དེ་དག་གིས་ཉེ་དགའ་ལ་ལས་ནི་ལག་པ་ནས་བཟུང ། ལ་ལས་ནི་རྐང་པ་ནས་བཟུང ། ལ་ལས་ནི་ཆོས་གོས་ནས་བཟུང་སྟེ་འཕགས་པ་ཅིའི་ཕྱིར་ཁོ་བོ་ཅག་གི་རྒྱན་འཕྲོག་པར་བྱེད་ཅེས་ཟེར་རོ། །ལིད་ཙ་བི་ཆེན་པོས་ཡང་པ་ཅན་གྱི་ལིད་ཙ་བིའི་ཁྱེའུ་དག་གིས་ཉེ་དགའ་བཟུང་སྟེ་ཐོ་འཚམ་པ་མཐོང་ནས། དེས་སྨྲས་པ། ཁྱེའུ་དག་ཅིའི་ཕྱིར་འཕགས་པ་ཉེ་དགའ་ལ་ཐོ་འཚམ་པར་བྱེད། དེ་དག་གིས་སྨྲས་པ། འདིས་བདག་ཅག་གི་རྒྱན་དག་ཕྲོགས་སོ། །དེས་སྨྲས་པ། འཕགས་པ་ཉེ་དགའ་ཅིའི་སླད་དུ་ཁྱེའུ་དག་གིས་རྒྱན་འཕྲོག་པར་མཛད། ཉེ་དགས་སྨྲས་པ། ཁོ་བོ་གནོད་སྦྱིན་གྱི་ནོར་འདི་རྙེད་དོ། །དེས་སྨྲས་པ། འདི་འདྲ་བ་གནོད་སྦྱིན་གྱི་ནོར་ལགས་རེ་སྐན། གཞོན་ནུ་དག་གིས་རྒྱན་ལགས་ཀྱིས་མ་འཕྲོག་པར་འོར་ཅིག་།ཉེ་དགས་དེ་བོར་ཏེ་རྡུལ་གྱིས་གོས་པའི་ཆོས་གོས་དག་གིས་གཙུག་ལག་ཁང་དུ་སོང་བ་དང ། དགེ་སྦྱོང་རྣམས་ཀྱིས་དེ་ལ་སྨྲས་པ། བཙུན་པ་ཉེ་དགའ་ཅིའི་ཕྱིར་རྡུལ་གྱི་ཚོགས་ཀྱིས་གོས། ཉེ་དགས་སྨྲས་པ། ལིད་ཙ་བི་ཆེན་པོ་ནད་མེད་པར་གྱུར་ཅིག་།ཁོ་བོས་གནོད་སྦྱིན་གྱི་ནོར་ཐོབ་པ་དེས་འདོར་དུ་བཅུག་གོ། །འདི་ཡང་རེ་ཤིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཤིག་འདུལ་བ་ལ་ཉན་ཐོས་རྣམས་ཀྱི་བསླབ
7.243b
པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་སོ། །ལམ་གྱི་བར་ན་ཡངས་པ་ཅན་གྱི་ལིད་ཙ་བི་རྣམས་ཀྱིས་སྐྱེད་མོས་ཚལ་དག་ཡོང་ནས་དེ་དག་གིས་སྨྲས་པ། དགའ་བོ་ཉེ་དགའ་བཅོམ་ལྡན་འདས་ཀྱིས་ཡངས་པ་ཅན་གྱིས་ལིད་ཙ་བི་དག་གིས་དཔེ་སུམ་བཅུ་རྩ་གསུམ་པའི་ལྷ་རྣམས་ལས་བླངས་གྱི་དེ་དག་གིས་སྐྱེད་མོས་ཚལ་དག་ཅི་འདྲ་བ་བལྟས་འདོང་ངོ་ཞེས་དེ་དག་དེར་ཞུགས་པ་དང ། ཇི་ཙམ་ན་དེ་ན་ཡོ་བྱད་རྣམ་པ་སྣ་ཚོགས་འདི་ལྟ་སྟེ། ཁྲུས་ཀྱི་ཚལ་དག་དང ། སོ་ཕག་དག་དང ། བསྐུ་བ་དག་དང ། ཕྲག་སྤྱད་དག་དང ། ས་གར་དག་དང ། སྐྱུ་རུ་ར་དག་དང ། མགོ་བཀྲུ་བ་དག་དང ། པི་བང་དང ། འོད་མ་དང ། མ་ཧ་ཏི་དང ། བལ་ལ་རི་དང ། སུ་གྷོ་ཤ་ཀ་དག་བཞག་པ་དག་མཐོང་ནས་དེ་དག་གིས་སྨྲས་པ། དགའ་བོ་ཉེ་དགའ་ཇེ་དང་པོར་ཁྲུས་བྱ་འམ། འོན་སྟེ་གླུ་བླང་ཞིང་བྲོ་རྡུང་བར་བྱ། དེ་དག་གིས་སྨྲས་པ། བདག་ཅག་གིས་ཡུན་རིང་པོ་ནས་གླུ་བླངས་ཤིང་བྲོ་རྡུངས་ཀྱིས་ཇེ་གླུ་བླང་ཞིང་བྲོ་བརྡུང་བར་བྱའོ་ཞེས་དེ་དག་གིས་གླུ་བླང་ཞིང་བྲོ་རྡུང་བར་བརྩམས་སོ། །རྒྱལ་པོ་ཟས་གཙང་གི་སྐྱེད་མོས་ཚལ་དུ་སྤྱད་པའི་རོལ་མོའི་སྒྲ་གང་ཡིན་པ་དེ་ནི་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གཡུལ་ངོར་སྤྱད་པའི་རོལ་མོའི་སྒྲ་ཡིན་པས་དེ་དག་གིས་རོལ་མོའི་སྒྲ་དབྱུང་བར་བརྩམས་པ་དང ། ཡངས་པ་ཅན་གྱི་ལིད་ཙ་བི་དག་གིས་ཐོས་སོ། །ཐོས་ནས་དེ་དག་དངངས་ཏེ་སྨྲས་པ། ཤེས་ལྡན་དག་ཕ་གསོད་པས་མ་སྦྲན་པར་དམག་དྲངས་ཏེ་འོངས་སོ་ཞེས་དེ་དག་གོ་བགོས་ཏེ་ཕྱིར་འབྱུང་བར་བརྩམས་སོ། །དྲུག་སྡེ་དག་ཀྱང་སྐྱེད་མོས་ཚལ་དེ་ནས་ཕྱིར་བྱུང་བ་དང ། དེ་དག་གིས་ཡང་པ་ཅན་གྱི་ལིད་ཙ་བི་དག་གོ་བགོས་ཏེ་ཕྱིར་བྱུང་བ་མཐོང་ནས་དྲུག་སྡེ་དག་གིས་དེ་དག་ལ་དྲིས་པ། ཤེས་ལྡན་དག་གར་འདོང ། དེ་དག་གིས་སྨྲས་པ། འདིར་ཕ་གསོད
7.244a
པ་འོངས་པས་དེ་དང་གཡུལ་དགྱེ་བའི་ཕྱིར་སུར་འདོང་ངོ ། །དེ་ག་ལ་འདུག་།དེ་དག་གིས་སྨྲས་པ། འདིར་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གཡུལ་ངོར་སྤྱད་པའི་རོལ་མོའི་སྒྲ་བྱུང་ངོ ། །ཤེས་ལྡན་དག་དེ་ནི་ཁོ་བོ་ཅག་གིས་བཞད་གད་བྱས་པ་ཡིན་ན་ཁྱེད་ཅག་དེ་ལྟར་བྲེད་ངས་སམ། དེ་དག་གིས་སྨྲས་པ། འཕགས་པ་དག་ཁྱེད་ཀྱི་རོལ་མོའི་སྒྲའི་ཡོ་བྱད་དེ་དག་སྒྲ་ཕྱུང་ངམ། དྲུག་སྡེ་དག་གིས་སྨྲས་པ། ཁོ་བོ་ཅག་གིས་སྒྲ་ཕྱུང་ངོ ། །དེ་དག་གིས་སྨྲས་པ། འཕགས་པ་དག་ཡངས་པ་ཅན་གྱི་ལིད་ཙ་བི་དག་སྔངས་པས་ཁྱེད་ལ་གནོད་པ་བྱེད་ན་མི་རུང་གིས་སླར་ལོག་ཤིག་།དེ་དག་ཕྱིར་ལོགས་པ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་ཇི་སྟེ་ཕྱིར་ལོག་།དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཁོ་བོ་ཅག་དེའུ་གསད་དོ། །སུས། ཡངས་པ་ཅན་གྱི་ལིད་ཙ་བི་དག་གིས་སོ། །ཅིའི་ཕྱིར། དེ་དག་གིས་སྐབས་དེ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་མི་མཛེས་པ་དེ་ལྟ་བུ་དེ་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སློང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས
7.244b
བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རིན་པོ་ཆེ་འམ། རིན་པོ་ཆེར་སྨོས་པ་རང་གིས་ལག་གིས་ལེན་ཏམ་ལེན་དུ་འཇུད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་དེ་ལྟར་བཅའ་བར་མཛད་དོ། །དེ་ནས་བཅོམ་ལྡན་འདས་ཡངས་པ་ཅན་དུ་ཅི་དགྱེས་པར་བཞུགས་ནས་མཉན་ཡོད་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ནས་མཐར་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་ཤར་གྱི་ཀུན་དགའ་ར་བ་ན་རི་དགས་འཛིན་གྱི་མའི་ཁང་བཟང་ན་བཞུགས་སོ། །རི་དགས་འཛིན་གྱི་མ་ས་གས་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་བདག་གི་ཁང་བཟང་ན་བཞུགས་ཞེས་ཐོས་སོ། །ཐོས་ནས་ཀྱང་རྒྱན་ཐམས་ཅད་ཀྱིས་བརྒྱན་ཏེ་མཉན་ཡོད་ནས་བྱུང་ནས་བཅོམ་ལྡན་འདས་ག་ལ་བ་དེར་སོང་ངོ ། །དེ་ངོ་ཚ་དང་ལྡན་པ་ཡིན་པས་དེས་རྒྱན་བཀྲོལ་ཏེ། ཐུམ་པོར་བཅིངས་ནས་བུ་མོའི་ལག་དུ་བྱིན་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེ་ན་ཧ་ཅང་ཐག་མི་རིང་བ་ན་སྣ་མའི་ཡལ་ག་མེ་ཏོག་རྒྱས་པ་ཞིག་འདུག་ནས་བུ་མོ་དེས་དེ་མཐོང་ནས་བསམས་པ། འདི་ལས་མེ་ཏོག་དག་བཏོགས་ཏེ་བཅོམ་ལྡན་འདས་ལ་མེ་ཏོག་སིལ་མ་དག་གིས་གཏོར་གྱིས་འཐོག་ཏུ་འགྲོའོ་སྙམ་ནས་དེས་རྒྱན་དེ་མཐའ་གཅིག་ཏུ་བཞག་སྟེ་སྣ་མའི་ཡལ་ག་དེ་ལས
7.245a
མེ་ཏོག་དག་བཏོགས་ནས་བཅོམ་ལྡན་འདས་ལ་མེ་ཏོག་སིལ་མ་དག་གིས་གཏོར་ཏེ་མཐའ་གཅིག་ཏུ་འདུག་གོ། །བཅོམ་ལྡན་འདས་ཀྱིས་དེ་ལ་ཡུན་རིང་དུ་ཆོས་བསྟན་ནས་དེས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་སོང་བ་དང ། རྒྱན་ཀྱིས་ཐུམ་པོ་དེ་དེ་ཉིད་དུ་བརྗེད་དེ་ལུས་སོ། །ཚེ་དང་ལྡན་པ་ཀུན་དགའ་བོས་དེས་རྒྱན་དེ་བོར་ཏེ་སོང་བ་མཐོང་ནས་དེས་བསམས་པ། འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱིས་འདི་ཉིད་རྐྱེན་དུ་མཛད་དེ་གནང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས། དེ་ནས་ཚེ་དང་ལྡན་པ་ཀུན་དགའ་བོས་རྒྱན་དེ་སྦེད་དུ་བཅུག་ནས་བཅོམ་ལྡན་འདས་ག་ལ་བ་དེར་སོང་ཏེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་རི་དགས་འཛིན་གྱི་མ་ས་གས་རྒྱན་བསྐྱུད་དེ་དེ་མཆིས་ནས་བདག་ལ་བློ་སྐྱེས་པ། འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱི་འདི་ཉིད་རྐྱེན་དུ་མཛད་དེ་གནང་བར་འགྱུར་བ་གང་ལག་པ་དེ་ལྟ་བུའི་གནས་མཆིས་པར་འགྱུར་རོ་སྙམ་ནས་བདག་གིས་རྒྱན་དེ་སྦེད་དུ་སྩལ་ཏོ། །ཀུན་དགའ་བོ་འདི་ལྟར་ངས་གནང་བར་འགྱུར་བ་གང་ཡིན་པ་དེ་ཁྱོད་ཀྱིས་ཤེས་པ་ལེགས་སོ་ལེགས་སོ། །ཀུན་དགའ་བོ་དེ་ལྟ་བས་ན་ཀུན་དགའི་ར་བར་གཏོགས་པ་ན་འདུག་པ་འམ། གནས་ཁང་དུ་གཏོགས་པ་ན་འདུག་པ་མ་གཏོགས་སོ། །བུད་མེད་ཀྱིས་ཡུལ་ནི་རྒྱན་ལ་ཉེ་བར་སྤྱོད་པ་ཡིན་པས་ས་གས་ཕྱི་དེ་ཉིན་པར་རྒྱན་དེ་དྲན་ནས། དེས་བུ་མོ་དེ་ལ་སྨྲས་པ། བུ་མོ་རྒྱན་ག་རེ། བུ་མོས་སྨྲས་པ། ཇོ་མོ་དེ་ཉིད་དུ་བསྐྱུད་དོ། །དེས་སྨྲས་པ། སོང་ལ་ལོང་ཤིག་།དེའི་བུ་དག་གིས་དེ་ཐོས་ནས་དེ་དག་གིས་སྨྲས་པ། ཡུམ་མཛོད་ཁང་དུ་བཞག་པར་མཁྱེན་ནམ། ཅི་ག་ལས་བླངས་ཏེ་མཆི་བར་འགྱུར། ས་གས་བུ་རྣམས
7.245b
ལ་སྨྲས་པ། བུ་དག་ཁོ་མོ་ནི་ནོར་ཆུད་མི་ཟ་བ་ཡིན་ནོ། །དེ་ནས་བུ་མོ་དེ་ཚེ་དང་ལྡན་པ་ཀུན་དགའ་བོའི་གན་དུ་སོང་བ་དང ། ཚེ་དང་ལྡན་པ་ཀུན་དགའ་བོས་སྨྲས་པ། བུ་མོ་ཅི་ལ་འོངས། བུ་མོས་སྨྲས་པ། འཕགས་པ་ཇོ་མོའི་རྒྱན་བསྐྱུད་དོ། །ཚེ་དང་ལྡན་པ་ཀུན་དགའ་བོས་སྨྲས་པ། འདི་ན་འདུག་གིས་ཁྱེར་ཏེ་སོང་ཤིག་།བུ་མོ་དེས་དེ་ཁྱེར་ཏེ་སོང་ནས་ས་ག་ལ་སྨྲས་པ། ཇོ་མོ་རྒྱན་དེ་འཚལ་ཏེ་མཆིས་པ་འདི་ལགས་སོ། །ས་གས་བུ་རྣམས་ལ་སྨྲས་པ། བུ་དག་རྒྱན་དེ་ཁྱེར་ཏེ་འོངས་པ་འདི་ཡིན་ཏེ། ཁོ་མོས་ཁོ་མོ་ནི་ནོར་ཆུད་མི་ཟ་བ་ཡིན་ནོ་ཞེས་མ་སྨྲས་སམ། བུ་དེ་དག་གིས་བུ་མོ་དེ་ལ་དྲིས་པ། བུ་མོ་འཕགས་པ་གང་གིས་སྦེད་དུ་བཅུག་པར་གྱུར། བུ་མོ་འཕགས་པ་གང་གིས་སྦེད་དུ་བཅུག་པར་གྱུར། བུ་མོས་སྨྲས་པ། འཕགས་པ་ཀུན་དགའ་བོས་སོ། །དེ་དག་གིས་སྨྲས་པ། འཕགས་པ་ཀུན་དགའ་བོས་གཟིགས་པས་དེས་ན་ཐོབ་པར་ཟད་ཀྱི་གལ་ཏེ་དྲུག་སྡེ་དག་གིས་མཐོང་བར་གྱུར་དུ་ཟིན་ན་དེ་དག་གིས་བཅའ་བའི་རིན་དུ་བྱིན་གྱིས་བརླབས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །དེ་དག་གིས་ད་བདག་ཅག་གིས་མ་འདི་ནོར་ཆུད་ཟ་བ་ཡིན་ནམ་མ་ཡིན་པ་བརྟགས་ན་ཤེས་པར་འགྱུར་རོ། །སྙམ་ནས་དེ་དག་གིས་མའི་སོར་གདུབ་རྒྱ་བླངས་ཏེ། ཁྲོན་པའི་ནང་དུ་བཅུག་པ་དང ། ས་གས་བུ་མོ་མངག་གཞུག་མ་ལ་སྨྲས་པ། བུ་མོ་ཆུ་ཆུས་ཤིག་དང་ཁྲུས་བྱའོ། །བུ་མོ་དེས་ཆུ་བཅུ་བར་བརྩམས་པ་དང་དེའི་བུམ་པའི་ནང་དུ་སོར་གདུབ་རྒྱ་དེ་ཆུད་ནས་ས་ག་ཁྲུས་བྱེད་པ་ན་སོར་གདུབ་རྒྱ་དེ་པང་པར་ལྷུང་ནས་ས་གས་བུ་རྣམས་ལ་བསྟན་ཏེ་སྨྲས་པ། བུ་དག་ཁོ་མོས་ཁོ་མོ་ནི་ནོར་ཆུད་མི་ཟ་བ་ཡིན་ནོ་ཞེས་མ་སྨྲས་སམ། ཡང་དེ་དག་གིས་སོར་གདུབ་རྒྱ་དེ་ཆུ་ཀླུང་གནས་ཅན་གྱི་ནང་དུ་འཕངས་པ་དང་དེ་ཉ་བོ་ཆེས་མིད་ནས་ཉ་བོ་ཆེ་དེ་ཉ་བ་དག་གིས་རྒྱ་མོས
7.246a
བཅུས་ཏེ་ཕྱུང་ངོ ། །ས་གའི་བུ་མོ་མངག་གཞུག་མ་ཉ་ཤའི་ཕྱིར་ཚོང་དུས་སུ་སོང་ནས་དེས་ཉ་པ་ལས་ཉ་བོ་ཆེ་དེ་ཉོས་ཏེ་བཤས་པ་དང ། ཇི་ཙམ་ན་དེའི་ལྟོ་ནས་སོར་གདུབ་རྒྱ་དེ་བྱུང་བ་མཐོང་ནས་དེས་ས་ག་ལ་སྨྲས་པ། ཇོ་མོ་སོར་གདུབ་རྒྱ་དེ་འདི་ལགས་སོ། །ས་གས་བུ་རྣམས་ལ་དེ་བསྟན་ཏེ་སྨྲས་པ། བུ་དག་ཁོ་མོས་ཁོ་མོ་ནི་ནོར་ཆུད་མི་ཟ་བ་ཡིན་ནོ་ཞེས་མ་སྨྲས་སམ། བུ་དེ་དག་གིས་སྨྲས་པ། ཡུམ་ནོར་ཆུད་མི་ཟ་བ་ལགས་སམ་མ་ལགས་པ་ད་དུང་ཡང་བརྟག་པར་བགྱིའོ་ཞེས་དེ་དག་གིས་དེའི་ད་ནི་ར་དག་གིས་སྲེ་མོ་ལྟ་བུའི་རྐྱལ་བུ་བཀང་ཏེ་ལམ་པོ་ཆེའི་བཞི་མདོར་བོར་བ་དང ། སྐྱེ་བོ་ཕལ་པོ་ཆེ་དེ་ནས་འགྲོ་བས་མཐོང་ནས་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ་ཞེས་ཡོངས་སུ་སྤངས་ཏེ་འགྲོ་ཞིང་འགའ་ཡང་ལེན་པར་མི་བྱེད་ནས་དེ་དག་གིས་སྨྲས་པ། འདི་ན་སྲེ་མོ་ལྟ་བུའི་རྐྱལ་བུ་དི་ན་ར་དག་གིས་གང་བ་འདུག་ན་མི་ལེན་ཏམ། དེ་དག་གིས་སྨྲས་པ། འདི་ནི་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་གྱི་སྲེ་མོ་ལྟ་བུའི་རྐྱལ་བུ་དི་ན་ར་དག་གིས་གང་བ་མ་ཡིན་གྱིས་མི་ལེན་ཏོ། །དེ་ནས་བུ་དེ་དག་ལྷགས་ཏེ་མ་ལ་སྨྲས་པ། ཡུམ་ཁྱོད་ནི་ནོར་ཆུད་མི་ཟ་བ་ལགས་མད་དོ། །ཐམས་ཅད་དུ་ཡང་རི་དགས་འཛིན་གྱི་མ་ས་ག་ནི་ནོར་ཆུད་མི་ཟ་བ་ཡིན་བདེན་ནོ་ཞེས་སྒྲ་གྲགས་པར་གྱུར་ཏོ། །དགེ་སློང་གིས་ཀུན་དགའི་ར་བར་གཏོགས་པར་སྲེ་མོ་ལྟ་བུའི་རྐྱལ་བུ་དི་ན་ར་དག་གིས་གང་བ་ཞིག་ལྷུང་བ་མཐོང་ནས་ཕྱོགས་དེར་མི་ཞིག་འོངས་པ་དང ། དགེ་སློང་དེས་མི་དེ་ལ་སྨྲས་པ། ཀྱེ་ནང་རྗེ་སྲེ་མོ་ལྟ་བུའི་རྐྱལ་བུ་འདི་ཁྱོད་ཀྱི་མ་ཡིན་ནམ། འཕགས་པ་ལགས་སོ། །ཁྱེར་ཏེ་སོང་ཤིག་།དེས་དེ་ཁྱེར་ཏེ་མྱུར་བ་མྱུར་བར་སོང་བ་དང ། མི་གཞན་ཞིག་མགོ་རྡུལ་གྱིས་གང་སྟེ་ངུ་ཞིང་འོང་ནས་དེས་སྨྲས་པ། འཕགས་པ་ཁྱོད་ཀྱིས་སྲེ་མོ་ལྟ་བུའི་རྐྱལ་བུ་ཞིག་གཟིགས་སམ། དགེ་སློང་དེས་སྨྲས་པ། མི་ཞིག་གིས་ཁྱེར་ཏེ་སོང་ངོ ། །དེས་སྲེ་མོ་ལྟ་བུའི་རྐྱལ་བུ་དེ་མ་རྙེད་པ་ན་སྨྱོས་ཤིང་སེམས་འཁྲུགས་པས་དེ་དང་དེར་ཚོལ་བ་ན་ཚུལ་མ་ཡིན་པས་སྡུག་བསྔལ་བར་གྱུར་པའི
7.246b
སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་གྱ་ཙོམ་དུ་སྨྲ་བར་མི་བྱ་བར་དེ་ལ་སྲེ་མོ་ལྟ་བུའི་རྐྱལ་བུ་ཅི་འདྲ་བ་ཞིག་།སྲང་དུ་པ་ཞིག་ཅེས་དྲི་བར་བྱའོ། །གལ་ཏེ་རྟགས་ལ་བབ་པར་སྨྲ་ན་སྦྱིན་པར་བྱའོ། །གལ་ཏེ་རྟགས་ལ་མ་བབ་པར་སྨྲ་ན་སྦྱིན་པར་མི་བྱའོ། །དེ་དག་གིས་དེར་བོར་ཏེ་དོང་བ་ན་དེ་གཞན་དག་གིས་བརྐུས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་བོར་ཏེ་འདོང་བར་མི་བྱ་བར་འགྲོ་བའི་ལམ་ལོགས་སུ་ས་འམ་ལོ་མའི་ཚོགས་དག་གིས་གཡོགས་པར་བྱའོ། །དེ་དག་གིས་དེ་ཡལ་བ་ཁོ་ནར་བོར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ཡལ་བར་དོར་བར་མི་བྱ་བར་ཞག་བདུན་ནམ་བརྒྱད་དུ་དེར་སོང་སྟེ་བསྡད་པར་བྱའོ། །གལ་ཏེ་བདག་པོ་འོངས་ཤིང་རྟགས་ལ་བབ་པ་སྨྲ་ན་སྦྱིན་པར་བྱའོ། །གལ་ཏེ་མ་འོངས་ན་དེའི་འོག་ཏུ་དགེ་འདུན་གྱི་མཛོད་དུ་བཅུག་སྟེ་གཞག་པར་བྱའོ། །གལ་ཏེ་བདག་པོ་ཟླ་བ་དྲུག་འདས་ནས་འོངས་ཤིང་རྟགས་ལ་བབ་པར་སྨྲ་ན་སྦྱིན་པར་བྱའོ། །གལ་ཏེ་མ་འོངས་ན་དེའི་འོག་ཏུ་དངོས་པོ་བརྟན་པོར་བཙོངས་ཏེ་གཞག་པར་བྱའོ། །གལ་ཏེ་དེའི་ཚེ་བདག་པོ་འོངས་པར་གྱུར་ན་དེ་ལ་དེ་དངོས་པོ་འདིར་བརྩོངས་ཀྱིས་རྗེས་སུ་ཡིད་རང་བར་གྱིས་ཤིག་ཅེས་བརྗོད་པར་བྱའོ། །གལ་ཏེ་རྗེས་སུ་ཡི་རང་ན་དེ་ལྟ་ན་ལེགས། གལ་ཏེ་རྗེས་སུ་ཡི་རང་བར་མི་བྱེད་ན་སྦྱིན་པར་བྱའོ། །གལ་ཏེ་སྐྱེད་སློང་ན་ཁོ་བོ་ཅག་གིས་ཡོངས་སུ་བསྐྱངས་པ་གང་ཡིན་པ་དེ་ཉིད་དྲིན་ཆེ་བར་མི་སེམས་སམ། ཁྱེར་ཏེ་སོང་ཤིག་ཅེས་བརྗོད་པར་བྱའོ། །དེ་ལྟ་བས་ན་ཀུན་དགའི་ར་བར་གཏོགས་པ་ན་འདུག་པ་འམ། གནས་ཁང་དུ་གཏོགས་པ་ན་འདུག་པ་མ་གཏོགས་སོ། །
7.247a
དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རིན་པོ་ཆེ་འམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ་ལེན་དུ་འཇུད་ན་ཀུན་དགའི་ར་བར་གཏོགས་པ་ན་འདུག་པ་འམ་གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ལྟུང་བྱེད་དོ། །དགེ་སློང་གིས་ཀུན་དགའི་ར་བར་གཏོགས་པ་འམ། གནས་ཁང་དུ་གཏོགས་པ་ན་རིན་པོ་ཆེ་འམ། རིན་པོ་ཆེར་སྨོས་པ་འདུག་པ་ལ་འདི་སུའི་ཡིན་པ་དེ་ལེན་པར་འགྱུར་གྲང་སྙམ་པ་དེ་ལྟ་བུའི་སེམས་ཀྱིས་བླངས་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ་གཞན་ཡང་དེ་ལྟ་བུ་གང་ཡིན་པའོ། །རིན་པོ་ཆེ་འམ་ཞེས་བྱ་བ་ལ། རིན་པོ་ཆེ་ཞེས་བྱ་བ་ནི་ནོར་བུ་དང་མུ་ཏིག་དང ། བཻ་དཱུརྱ་དང ། མན་ཤེལ་དཀར་པོ་དང ། བྱི་རུ་དང ། གསེར་དང ། དངུལ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་པའོ། །རིན་པོ་ཆེར་སྨོས་པ་ཞེས་བྱ་བ་ལ། རིན་པོ་ཆེར་སྨོས་པ་ཞེས་བྱ་བ་ནི་གཡུལ་ངོར་སྤྱད་པའི་མཚོན་ཅ་ཐམས་ཅད་དང ། རོལ་མོར་སྤྱད་པའི་ཡོ་བྱད་ཐམས་ཅད་དོ། །རང་གི་ལག་གིས་ཤེས་བྱ་བ་ནི་ལག་པས་ལག་པར་རོ། །ལེན་ཏམ་ཞེས་བྱ་བ་ནི་བདག་ཉིད་ཀྱིས་སོ། །ལེན་དུ་འཇུད་ན་ཞེས་བྱ་བ་ནི་གཞན་ནོ། །ཀུན་དགའི་ར་བར་གཏོགས་པ་ན་འདུག་པ་ཞེས་བྱ་བ་ནི་ཀུན་དགའི་ར་བའི་ཕྱི་རོལ་ནའོ། །གནས་ཁང་དུ་གཏོགས་པ་ན་འདུག་པ་ཞེས་བྱ་བ་ནི་ཀུན་དགའི་ར་བའི་ནང་ནའོ། །མ་གཏོགས་ཏེ་ཞེས་བྱ་བ་ནི་ཀུན་དགའི་ར་བར་གཏོགས་པ་ན་འདུག་པ་འམ། གནས་ཁང་དུ་གཏོགས་པ་ན་འདུག་པ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང །
7.247b
དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དགེ་སློང་གིས་བྱ་བ་ནི་ཆོས་འདི་པས་སོ། །ཀུན་དགའི་ར་བར་གཏོགས་པ་དང ། གནས་ཁང་དུ་གཏོགས་པ་ན་རིན་པོ་ཆེ་འམ། རིན་པོ་ཆེར་སྨོས་པ་འདུག་པ་ལ་འདི་སུའི་ཡིན་པ་དེ་ལེན་པར་འགྱུར་གྲང་སྙམ་པ་དེ་ལྟ་བུའི་སེམས་ཀྱིས་བླངས་པར་བྱ་སྟེ། དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ལ། དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། བར་སྡོམ་ལ། ནོར་བུ་མགུལ་རྒྱན་པི་བང་དང ། །དུང་དང་གཞུ་དང་མདའ་དང་ནི། །སྐུ་གཟུགས་སྐུ་གདུང་བཅས་པ་དང ། །སྔོན་གྱི་ཚུལ་ནི་ཐ་མ་ཡིན། །དགེ་སློང་གིས་ནོར་བུ་ལེན་ན་བདར་བ་ལེན་ན་ལྟུང་བྱེད་དུ་འགྱུར་ལ། མ་བདར་བ་ལེན་ན་ཉེས་བྱས་སུ་འགྱུར་རོ། །ནོར་བུ་ཇི་ལྟ་བ་བཞིན་དུ་མུ་ཏིག་དང ། བཻ་དཱུརྱ་དང ། མན་ཤེལ་དཀར་པོ་དང ། བྱི་རུ་དང ། དངུལ་དང ། གསེར་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་པ་དག་ཀྱང་དེ་བཞིན་ནོ། །ཐ་ན་ནོར་བུ་མཆིང་བུ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་མགུལ་རྒྱན་ལེན་ན་ལྟུང་བྱེད་དུ་འགྱུར་རོ། །མགུལ་རྒྱན་ཇི་ལྟ་བ་བཞིན་དུ་གདུ་བུ་རྒྱན་ཅན་དང ། དཔུང་རྒྱན་དང ། དོ་ཤལ་དང ། སེ་མོ་དོ་ཡང་དེ་བཞིན་ནོ། །ཐ་ན་སོག་མའི་ཕྲེང་བ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་པི་བང་ལེན་ན་རྒྱུད་དང་བཅས་པ་ལེན་ན་ལྟུང་བྱེད་དུ་འགྱུར་ལ། རྒྱུད་མེད་པ་ལེན་ན་ཉེས་བྱས་སུ་འགྱུར་རོ། །པི་བང་ཇི་ལྟ་བ་དེ་བཞིན་དུ་འོད་མ་དང ། བལ་ལ་རི་དང ། མ་ཧ་ཏི་དང ། སུ་གྷོ་ཤ་ཀ་ཡང་དེ་བཞིན་ནོ། །ཐ་ན་མཆུ་སྦྲང་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་དུང་ལེན་ན་སྒྲ་འབྱིན་པ་ལེན་ན་ལྟུང་བྱེད་དུ་འགྱུར་ལ། སྒྲ་མི་འབྱིན་པ་ལེན་ན་ཉེས་བྱས་སུ་འགྱུར་རོ། །
7.248a
དུང་ཇི་ལྟ་བ་བཞིན་དུ་རྔ་བོ་ཆེ་དང ། རྔ་པ་ཊ་ཧ་དང ། རྫ་རྔ་ཡང་དེ་བཞིན་ནོ། །ཐ་ན་རྫ་རྔ་ཁ་ཅིག་པ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་གཞུ་ལེན་ན་རྒྱུད་དང་བཅས་པ་ལེན་ན་ལྟུང་བྱེད་དུ་འགྱུར་ལ། རྒྱུད་མེད་པ་ལེན་ན་ཉེས་བྱས་སུ་འགྱུར་རོ། །གཞུ་ཇི་ལྟ་བ་བཞིན་དུ་རལ་གྲི་དང ། རལ་གྲི་ཁྱོག་པོ་དང ། རལ་གྲི་སོ་གཉིས་དང ། མདུང་དང ། འཕང་མདུང་དང ། ཅགས་ཀྱོ་ཡང་དེ་བཞིན་ནོ། །ཐ་ན་གཞུའུ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་མདའ་ལེན་ན་མདེའུ་དང་བཅས་པ་ལེན་ན་ལྟུང་བྱེད་དུ་འགྱུར་ལ། མདེའུ་མེད་པ་ལེན་ན་ཉེས་བྱས་སུ་འགྱུར་རོ། །མདའ་ཇི་ལྟ་བ་བཞིན་དུ་ལྕགས་མདའ་དང ། མདའ་ཕྱེད་ལྕགས་ལས་བྱས་པ་ཡང་དེ་བཞིན་ནོ། །ཐ་ན་མདའ་ལྟར་བཅོས་པ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་སྐུ་གཟུགས་ལེན་ན་སྐུ་གདུང་དང་བཅས་པ་ལེན་ན་ལྟུང་བྱེད་དུ་འགྱུར་ལ། སྐུ་གདུང་མེད་པ་ལེན་ན་ཉེས་བྱས་སུ་འགྱུར་རོ། །སྟོན་པའི་འདུ་ཤེས་ཉེ་བར་བཞག་སྟེ་ལེན་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རི་དགས་འཛིན་གྱིས་མ་ས་གས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ནོར་ཆབ་མི་འཚལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རི་དགས་འཛིན་གྱི་མ་ས་ག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འགྱུར་བ་དག་བྱས་ཤིང་བསགས་པས་རི་དགས་འཛིན་གྱི་མ་ས་ག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས
7.248b
པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱིས། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེས་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་ངོ ། །གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དེའི་ཚེ་ན་རྒྱལ་པོ་ཀྲི་ཀི་ཞེས་བྱ་བ་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང ། འཐབ་པ་དང ། འཁྲུགས་ལོང་དང ། ནང་འཁྲུགས་རབ་ཏུ་ཞི་བ། ཆོམ་རྐུན་དང ། མུ་གེ་དང ། ནད་དང་བྲལ་བ། སཱ་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་འཇུད་པ། ཆོས་དང་ལྡན་པ། ཆོས་ཀྱི་རྒྱལ་པོ་ཆོས་ཀྱི་རྒྱལ་སྲིད་བྱེད་དུ་འཇུག་པས་རིན་པོ་ཆེ་སྣ་བཞི་ལས་བྱས
7.249a
པའི་མཆོད་རྟེན་རྒྱར་དཔག་ཚད་གཅིག་པ། འཕང་དུ་དཔག་ཚད་ཕྱེད་པ་བྱེད་དུ་བཅུག་གོ། །དེ་ན་བུད་མེད་རྒན་མོ་སྐྱབས་སུ་འགྲོ་བ་དང ། བསླབ་པའི་གཞི་བླངས་པ་གཅིག་ཅིག་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བསྙེན་བཀུར་བྱེད་ཅིང་འདུག་གོ། །དེ་ནས་རྒྱལ་པོ་ཀྲི་ཀི་དཔྱིད་ཀྱི་དུས་ཀྱི་ཚེ་ཤིང་ལྗོན་པ་མེ་ཏོག་ཁ་བྱེ་ཞིང་འབྲས་བུ་རྒྱས་པ། ངང་པ་དང ། ཁྲུང་ཁྲུང་དང ། རྨ་བྱ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ཤང་ཤང་ཏེའུ་སྒྲ་འབྱིན་པའི་ཚལ་གསེབ་དག་ཏུ། བཙུན་མོའི་འཁོར་དང་ལྷན་ཅིག་སྐྱེད་མོས་ཚལ་གྱི་སར་བྱུང་ནས་རྒྱལ་པོ་དེ་མྱུར་བ་མྱུར་བར་ཡང་བཱ་རཱ་ཎ་སཱིར་ཞུགས་སོ། །བཙུན་མོའི་འཁོར་གྱིས་སྣ་མའི་ཡལ་ག་དག་ལ་མུ་ཏིག་གི་ཆུན་པོ་དཔྱངས་ཏེ་ཁྲུས་བྱ་བར་བརྩམས་པ་དང ། དེས་རྒྱལ་པོ་མྱུར་བ་མྱུར་བར་བཱ་རཱ་ཎ་སཱིར་ཞུགས་པ་ཐོས་ནས་དེ་ཡང་བརྟད་པ་དང་བཅས་པས་མུ་ཏིག་གི་ཆུན་པོ་བརྗེད་དེ་བོར་ནས་བཱ་རཱ་ཎ་སཱིར་ཞུགས་སོ། །བུད་མེད་རྒན་མོ་དེས་མུ་ཏིག་གི་ཆུན་པོ་དེ་མཐོང་ནས། དེས་མུ་ཏིག་གི་ཆུན་པོ་དེ་སྨྱུག་མ་ལ་བཏགས་ཏེ་བཞག་གོ། །བུད་མེད་ཀྱི་ཡུལ་ནི་རྒྱན་ལ་ཉེ་བར་སྤྱོད་པ་ཡིན་པས་དེས་ཕྱི་དེ་ཉིན་པར་རྒྱན་དེ་དྲན་ནས། དེས་རྒྱལ་པོ་ལ་གསོལ་པ་དང ། རྒྱལ་པོས་ཞོ་ཤས་འཚོ་བ་དག་དེར་བཏང་ནས་དེ་དག་གིས་མུ་ཏིག་གི་ཆུན་པོ་སྨྱུག་མ་ལ་བཏགས་པ་དེ་མཐོང་བ་དང ། དེ་དག་གིས་བུད་མེད་རྒན་མོ་དེ་ལ་དྲིས་པ། མུ་ཏིག་གི་ཆུན་པོ་འདི་སུས་སྨྱུག་མ་ལ་བཏགས་ཏེ་བཞག་རྒན་མོས་སྨྲས་པ། ཁོ་མོས་སོ། །དེ་དག་གིས་མུ་ཏིག་གི་ཆུན་པོ་དེ་རྒྱལ་པོ་ལ་ཕུལ་བ་དང ། རྒྱལ་པོས་ཞོ་ཤས་འཚོ་བ་དག་ལ་སྨྲས་པ། ཁྱོད་ཅག་གིས་དེ་ག་ལས་རྙེད་དེ་དག་གིས་སྨྲས་པ།
7.249b
བུད་མེད་རྒན་མོ་ཞིག་གིས་སྨྱུག་མ་ལ་བཏགས་ཏེ་བཞག་པ་དེ་ནས་བདག་གིས་རྙེད་དོ། །རྒྱལ་པོས་སྨྲས་པ། བུད་མེད་རྒན་མོ་དེ་བོས་ཤིག་།དེ་དག་གིས་དེ་བོས་ཏེ་སྨྲས་པ། ལྷ་བུད་མེད་རྒན་མོ་དེ་འདི་ལགས་སོ། །རྒྱལ་པོས་སྨྲས་པ། ཁྱོད་ཀྱི་མུ་ཏིག་གི་ཆུན་པོ་འདི་སྨྱུག་མ་ལ་བཏགས་ཏེ་བཞགས་པ་བདེན་ནམ། རྒན་མོས་སྨྲས་པ། ལྷ་མད་དོ། །རྒྱལ་པོས་སྨྲས་པ། ཁྱོད་དེ་ལ་འདོད་པ་མ་སྐྱེས་སམ། རྒན་མོས་སྨྲས་པ། ལྷ་བདག་གིས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔ་ནས་སྐྱབས་སུ་མཆི་བ་དང་བསླབ་པའི་གཞི་དག་བླང་བས་བདག་གཞན་གྱི་རྫས་ལ་འདོད་པའི་ཆོས་སྐྱེད་པར་ག་ལ་འགྱུར། རྒྱལ་པོ་དགའ་ནས་དེས་དེ་ལ་མུ་ཏིག་གི་ཆུན་པོ་དེ་ཉིད་བྱ་དགར་བྱིན་ཏེ་ཁྱོད་ཀྱིར་གྱུར་གྱི་སོང་ཤིག་ཅེས་སྨྲས་སོ། །རྒན་མོ་དེས་མུ་ཏིག་གི་ཆུན་པོ་དེ་ཁྱེར་ཏེ་བཙོངས་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་མཆོད་པ་དང ། བསྙེན་བཀུར་བྱས་ཏེ་ཞབས་གཉིས་ལ་གཏུགས་ནས་སྨོན་ལམ་འདི་སྐད་ཅེས་བདག་དགེ་བའི་རྩ་བ་འདིས་ནོར་ཆུད་མི་ཟ་བར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་བུད་མེད་རྒན་མོ་གང་ཡིན་པ་དེ་ནི་རི་དགས་འཛིན་གྱི་མ་ས་ག་འདི་ཉིད་ཡིན་ཏེ། འདིས་དེའི་ཚེ་སྨོན་ལམ་དེ་ལྟར་བཏབ་པའི་ལས་དེའི་རྣམ་པར་སྨིན་པས་ནོར་ཆུད་མི་ཟ་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང ། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་བཙལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །བླངས་པའི་གཞིར་གཏོགས་པའི་ལྟུང་བྱེད་དེ་ལྔ་བཅུ་རྩ་དགུ་པ་རྫོགས་སྷོ།། ་་་་།།
7.250a
འདུལ་བ་རྣམ་པར་འབྱེད་པ། བམ་པོ་དྲུག་བཅུ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་ཆུ་དྲོན་གསུམ་ཡོད་པ་གཅིག་ཏུ་ནི་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཁྲུས་བྱེད། གཉིས་པར་ནི་བཙུན་མོའི་འཁོར་ཁྲུས་བྱེད། གསུམ་པར་ནི་གྲོངས་རྡལ་གྱི་མི་དང་ཡུལ་གྱི་མི་དག་ཁྲུས་བྱེད་དོ། །མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བསམས་པ། བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་རྣམ་པ་དུ་མའི་སྒོ་ནས་ཡོ་བྱད་ཐམས་ཅད་ཀྱིས་བསྟབས་ན་ཁྲུས་ཀྱིས་མ་བསྟབ་ཀྱིས་བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཁྲུས་ཀྱི་བསྟབས་པར་བྱའོ་སྙམ་དུ་རིག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོའི་ཁབ་འདི་ན་ཆབ་དྲོན་གསུམ་མཆིས་པ་གཅིག་ཏུ་ནི་བདག་ཁྲུས་བགྱིད། གཉིས་པར་ནི་མཆིས་འབྲང་གི་འཁོར་ཁྲུས་བགྱིད་གསུམ་པར་ནི་གྲོངས་རྡལ་གྱི་མི་དང་ཡུལ་མི་དག་ཁྲུས་བགྱིད་ན་བཙུན་པ་གང་དུ་བདག་ཁྲུས་བགྱིད་པ་དེར་འཕགས་པ་དག་ཀྱང་ཁྲུས་མཛད་ཅིང་གང་གི་ཚེ་འཕགས་པ་དག་ཁྲུས་མཛད་པ་དེའི་ཚེ་ན་བདག་སྡོད་པར་བགྱིད་ལ། གང་གི་ཚེ་བདག་ཁྲུས་བགྱིད་པ་དེའི་ཚེ་ཡང་འཕགས་པ་བདག་གིས་གཞེས་པར་མཛད་དུ་གསོལ། གང་དུ་མཆིས་འབྲང་གི་འཁོར་ཁྲུས་བགྱིད་པ་དེར་ཡང་འཕགས་མ་དག་ཁྲུས་མཛད་ཅིང ། གང་གི་ཚེ་འཕགས་མ་དག་ཁྲུས་མཛད་པ་དེའི་ཚེ་ཡང་མཆིས་འབྲང་གིས་འཁོར་སྡོད་པར་བགྱིད་ལ་གང་གི་ཚེ་མཆིས་བྲང་གི་འཁོར་ཁྲུས་བགྱིད་པ་དེའི་ཚེ་ཡང་འཕགས་མ་དག་གིས་གཞེས་པར་མཛད་དུ་གསོལ། བཅོམ་ལྡན་འདས་ཀྱིས་མ་ག་དྷར་བྱུང་བའི་རྒྱལ་པོ་བཟོ་སྦྱང
7.250b
གཟུགས་ཅན་སྙིང་པོ་ལ་ཅང་མི་གསུངས་བས་གནང་ངོ ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ཀྱིས་ཅང་མི་གསུངས་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དྲུག་སྡེ་དག་ལ་བློ་སྐྱེས་པ་དགའ་བོ་ཉེ་དགའ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་དད་པ་དང་ལྡན་པ་ནི་ཡིན་ན་དད་པ་ཇི་ལྟ་བུ་དང་ལྡན་པ་བལྟས་ཁྲུས་བྱེད་དུ་འདོང་ངོ་ཞེས་དེ་དག་དེར་ཁྲུས་བྱེད་དུ་དོང་ནས། དེ་དག་གིས་སྨྲས་པ་དགའ་བོ་ཉེ་དགའ་གལ་ཏེ་བདག་ཅག་ཐམས་ཅད་ཅིག་ཅར་ཁྲུས་བྱས་ན་མྱུར་དུ་ཟིན་པར་འགྱུར་གྱིས་གཉིས་ཀྱིས་ཁྲུས་བྱ་ཞིང་བཞིས་གྲོགས་བྱའོ། །དེའི་འོག་ཏུ་གཉིས་ཀྱིས་ཁྲུས་བྱ་ཞིང་བཞིས་གྲོགས་བྱའོ། །དེའི་འོག་ཏུ་ཡང་གཉིས་ཀྱིས་ཁྲུས་བྱ་ཞིང་བཞིས་གྲོགས་བྱའོ། །དེ་ལྟར་བྱའོ་ཞེས་དེ་དག་ལས་གཉིས་ཀྱིས་ཁྲུས་བྱ་བར་བརྩམ་ཏེ་བཞི་གྲོགས་བྱེད་ཅིང་འདུག་གོ། །དེའི་ཚེ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་དེར་ཁྲུས་བྱེད་དུ་འཕགས་ནས་དེས་མི་གསངས་ལ་གཏོགས་པ་ལ་སྨྲས་པ། ཀཝའེ་ནང་རྗེ་སོང་ལ་ད་ལྟར་སུས་ཁྲུས་བྱེད་ལྟོས་ཤིག་མི་དེས་ལྷ་བཀའ་བཞིན་འཚལ་ཞེས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལས་མཉན་ནས་དེར་སོང་སྟེ་བལྟས་ན་ཇི་ཙམ་ན་དྲུག་སྡེ་དག་ཁྲུས་བྱས་པ་མཐོང་ནས་དེ་རྒྱལ་པོའི་གན་དུ་སོང་སྟེ་སྨྲས་པ། ལྷ་འཕགས་པ་དྲུག་སྡེ་དག་ཁྲུས་བགྱིད་དོ་རྒྱལ་པོས་སྨྲས་པ། ཁྲིའུ་ཚུགས་ཤིག་དང་བསྡད་པར་བྱའོ། །དེས་ཁྲིའུ་བཙུགས་ནས་རྒྱལ་པོ་བསྡད་པ་དང ། ཇི་ཙམ་ན་ཡུན་རིང་ཤིག་ལོན་ནས་རྒྱལ་པོས་ཡང་མི་གསང་ལ་གཏོགས་པ་ལ་སྨྲས་པ། ཀཝའེ་ནང་རྗེ་སོང་ལ་ད་ལྟར་སུ་ཁྲུས་བྱེད་ལྟོས་ཤིག་མི་དེས་ལྷ་བཀའ་སྩལ་པ་བཞིན་འཚལ་ཞེས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལས་མཉན་ནས་དེར་སོང་སྟེ་བལྟས་ན་ཇི་ཙམ་ན་ཡང་དྲུག་སྡེ་དག་ཁྲུས་བྱེད་པ་མཐོང་ནས་དེ་རྒྱལ་པོའི་གན་དུ་སོང་སྟེ་སྨྲས་པ། ལྷ་འཕགས་པ་དྲུག་སྡེ་དེ་དག་ཉིད་ཁྲུས་བགྱིད་དོ། །རྒྱལ་པོ་ཡང་ཁྲིའུ་བཙུག་པ་དེ་ཉིད་ལ་བསྡད་པ་དང ། ཇི་ཙམ་ན་ཡུན་རིང
7.251a
ཞིག་ལོན་ནས་ཡང་རྒྱལ་པོས་མི་གསང་ལ་གཏོགས་པ་ལ་སྨྲས་པ། ཀཝའེ་ནང་རྗེ་སོང་ལ་ད་ལྟར་སུ་ཁྲུས་བྱེད་ལྟོས་ཤིག་མི་དེས་ལྷ་བཀའ་བཞིན་འཚལ་ཞེས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལས་མཉན་ནས་དེར་སོང་སྟེ་བལྟས་ན། ཇི་ཙམ་ན་ད་དུང་ཡང་དྲུག་སྡེ་དག་ཁྲུས་བྱེད་པ་མཐོང་ནས་དེའི་རྒྱལ་པོའི་གན་དུ་སོང་སྟེ་སྨྲས་པ། ལྷ་ད་དུང་ཡང་འཕགས་པ་དྲུག་སྡེ་དེ་དག་ཉིད་ཁྲུས་བགྱིད་དོ་རྒྱལ་པོས་སྨྲས་པ། ཤེས་ལྡན་དག་འོ་ན་ནི་དེ་དག་ཡུན་རིང་པོར་ང་ལ་ཐོ་འཚམས་པར་བྱེད་ཀྱི་ཆུ་འོན་གཅིག་དང་དབང་བསྐུར་བའི་ཁྲུས་ཀྱིས་ཁྲུས་བྱའོ། །དེ་དག་གིས་ཆུ་བླངས་ནས་རྒྱལ་པོས་དེ་ཉིད་དུ་དབང་བསྐུར་བའི་ཁྲུས་ཀྱིས་ཁྲུས་བྱས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱིས་ཞབས་གཉིས་ལ་མགོ་བོས་ཕྱག་འཚལ་ཏེ། ཆོས་མཉན་པ་མ་མཉན་པ་ཁོ་ནར་བཅོམ་ལྡན་འདས་ཀྱིས་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོས་ཅིའི་ཕྱིར་རྒྱལ་པོ་གཟུགས་ཅན་སྙིང་པོ་ཆོས་མཉན་པ་མ་མཉན་པར་སོང ། བཙུན་པ་རྒྱལ་པོ་གཟུགས་ཅན་སྙིང་པོ་འདི་དྲུག་སྡེ་དག་གིས་ཐོ་བརྩམས་སོ། །ཅིའི་ཕྱིར་དེས་སྐབས་དེ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཁྲུས་བྱེད་པ་ལས་གྱུར་པས་དེའི་ཕྱིར་དགེ་སློང་རྣམ་ཀྱིས་ཁྲུས་མི་བྱའོ་སྙམ་དུ་དགོངས་ནས་བཀའ་སྩལ་པ། དེ་ལྟ་བས་ན་དགེ་སློང་རྣམས་ཀྱིས་ཁྲུས་མི་བྱའོ་བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཁྲུས་མི་བྱའོ་ཞེས་བཀའ་སྩལ་ནས། དགེ་སློང་དག་ཕྱིན་ཆད་ཁྲུས་མི་བྱེད་པས་དེ་དག་དྲི་མའི་རྫབ་ཀྱིས་གོས་པའི་ལུས་དྲི་ང་བར་གྱུར་ནས་བྲམ་ཟེ་དང་ཁྱིམ་བདག་གིས་སྨྲས་པ། འཕགས་པ་དག་དྲི་ང་བ་འདི་སུ་ལགས། དགེ་སློང་རྣམས་ཀྱིས་སྨྲས་པ་ཁོ་བོ་ཅག་གོ། །འཕགས་པ་དག་ཅིའི་སླད་དུ་ཁྲུས་མི་མཛད། བཅོམ་ལྡན་འདས་ཀྱིས་མ་གནང་ངོ་ཅི་ཁྱེད་ཅག་དྲི་མའི་རྫབ་འཆང་བས་དག་པར་འགྱུར་རམ་ཞེས་ཟེར་བའི་སྐབས་དེ་དགེ
7.251b
སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཟླ་བ་ཕྱེད་ཕྱེད་ཅིང་ཁྲུས་བྱ་བར་གནང་ངོ ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་བྱའོ་ཞེས་བཀའ་སྩལ་ནས་སོ་ཀའི་དུས་ལ་བབ་པ་དང ། དགེ་སློང་དག་ཚ་བས་སྙོམས་ནས་དེ་དག་སྐྱ་བོ་བསེང་བསེང་པོར་གྱུར་ཅིང་རིད་པ་དང ། ཉམ་ཆུང་བ་དང ། རྐེ་བ་དང་ལུས་མ་ཐོབ་པར་གྱུར་ནས་བྲམ་ཟེ་དང་ཁྱིམ་བདག་དད་པ་ཅན་དག་གིས་སྨྲས་པ་འཕགས་པ་དག་ཅིའི་སླད་དུ་ཁྱེད་སྐྱ་བོ་བསེང་བསེང་པོར་གྱུར་ཅིང་རིད་པ་དང ། ཉམ་ཆུང་བ་དང ། རྐེ་བ་དང་ལུས་མ་ཐོབ་པར་གྱུར། དགེ་སློང་རྣམས་ཀྱིས་སྨྲས་པ། ཚ་བས་སྙོམས་མོ། །ཅིའི་སླད་དུ་ཁྲུས་མི་མཛད། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཚ་བའི་དུས་མ་གཏོགས་སོ། །དགེ་སློང་དག་ན་བར་གྱུར་ནས་དེ་དག་སྨན་པའི་གན་དུ་དོང་སྟེ་དྲིས་པ། བཞིན་བཟངས་ཁོ་བོ་ཅག་ན་ན་ཁོ་བོ་ཅག་ལ་སྨན་སྟོན་ཅིག་།དེས་སྨྲས་པ། འཕགས་པ་དག་གདུགས་རེ་རེ་ཞིང་ཁྲུས་སྟེན་ཅིག་དང་དེས་སོས་པར་འགྱུར་རོ། །བཞིན་བཟངས་བཅོམ་ལྡན་འདས་ཀྱིས་མ་གནང་ངོ ། །འཕགས་པ་དག་ཁྱེད་ཀྱིས་སྟོན་པ་ཐུག་རྗེས་དང་ལྡན་པས་དེ་ཉིད་རྐྱེན་དུ་མཛད་ནས་གནང་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ན་བའི་དུས་མ་གཏོགས་སོ། །དགེ་སློང་དག་གིས་དགེ་འདུན་དང་མཆོད་རྟེན་གྱི་ལས་དག་བྱས་ནས་དེ་དག་འཇིམ་རྫབ་ཀྱིས་གོས་ཤིང་འབགས་བཞིན་དུ་འཁོད་ནས་བྲམ་ཟེ་དང་ཁྱིམ་བདག་དད་པ་ཅན་དག་འོངས་ཏེ་དྲིས་པ། འཕགས་པ་དག་ཅིའི་སླད་དུ་ཁྱེད་ཅག་འཇིམ་རྫབ་ཀྱིས་གོས་ཤིང་འབགས་བཞིན་དུ་འཁོད་ཁྲུས་མཛད་ན་ཅི་ནོང །
7.252a
བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལས་ཀྱི་དུས་མ་གཏོགས་སོ། །དགེ་སློང་དག་ལམ་དུ་སོང་ཞིང་འོངས་པར་གྱུར་པ་ན་དེ་དག་ལུས་ངལ་བས་གློས་ཕབ་སྟེ་ཉལ་བ་ན་བྲམ་ཟེ་དང་ཁྱིམ་བདག་དད་པ་ཅན་དག་འོངས་ཏེ་དྲིས་པ། འཕགས་པ་དག་བསྟན་པ་ལ་གཅིག་ཏུ་བརྩལ་བར་བགྱི་བ་ལགས་ན་ཅིའི་སླད་དུ་གློས་ཕབ་སྟེ་གཟིམས་ཤིང་དགེ་བའི་ཕྱོགས་ལ་ཏྲོན་མི་མཛད་དགེ་སློང་རྣམས་ཀྱིས་སྨྲས་པ། ཁོ་བོ་ཅག་ལམ་དུ་སོང་ཞིང་འོངས་པས་ཚ་བས་སྙོམས་ནས་གློས་ཕབ་ཏེ་ཉལ་ཞིང་དགེ་བའི་ཕྱོགས་ལ་ཏྲོན་བྱེད་མི་ནུས་པར་གྱུར་ཏོ་ཁྲུས་མཛད་ན་ཅི་ནོངས། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། ་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལམ་གྱི་དུས་མ་གཏོགས་སོ། །རླུང་བྱུང་ནས་དགེ་སློང་དག་རྡུལ་གྱིས་རྡུལ་ཅན་དུ་གྱུར་ནས་དེ་དག་དེ་ཁོ་ན་བཞིན་དུ་འཁོད་པ་ན་བྲམ་ཟེ་དང་ཁྱིམ་བདག་དད་པ་ཅན་དག་འོངས་ཏེ་དེ་དག་གིས་མཐོང་ནས་དྲིས་པ། འཕགས་པ་དག་ཅིའི་སླད་དུ་རྡུལ་གྱིས་གོས་ཤིང་བཞུགས་ཁྲུས་མཛད་ན་ཅི་ནོངས། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རླུང་གི་དུས་མ་གཏོགས་སོ། །ཆར་བབ་ནས་དགེ་སློང་དག་མངོན་པར་ལྡར་ནས་དེ་དག་དེ་ཁོ་ན་བཞིན་དུ་འཁོད་པ་དང་བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་འོངས་ཏེ་དྲིས་པ། འཕགས་པ་དག་ཅིའི་སླད་དུ་ཆར་གྱིས་མངོན་པར་ལྡར་ཅིང་བཞུགས། ཁྲུས་མཛད་ན་ཅི་ནོངས། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱི
7.252b
བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཆར་གྱི་དུས་མ་གཏོགས་སོ། །རྫི་ཆར་བྱུང་ནས་དགེ་སློང་དག་ལུས་ཁྲ་བོར་གྱུར་ནས་དེ་དག་དེ་ཁོ་ན་བཞིན་དུ་འཁོད་པ་དང ། བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་དུ་འོངས་ཏེ་དྲིས་པ། འཕགས་པ་དག་ཅིའི་སླད་དུ་ལུས་ཁྲ་བོར་གྱུར་ཅིང་བཞུགས་ཁྲུས་མཛད་ན་ཅི་ནོངས། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྫི་ཆར་གྱི་དུས་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབས་པ་འདོད་པ་དང ། བསླབ་པ་ལ་གུས་པ་དང་བསླབ་པ་ལ་ཡོ་བྱད་བསྙུང་པའི་སྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང་དེའི་ཤས་ཆེ་བ་དང ། དེ་དང་འཚམས་པའི་ཆོས་དང་ལྡན་པའི་བཀའ་མཆིད་མཛད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ་ངའི་ཉན་ཐོས་རྣམས་ཀྱིས་འདུལ་བ་ལ་བསླབས་པའི་གཞི་འདི་ལྟར་གདོན་པར་བྱ་སྟེ། བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་བྱ་བར་གསུངས་པ་དེ་ལས་འདུམས་པར་བྱེད་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ་སོ་ཀ་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང ། དབྱར་རྣམས་ཀྱིས་དང་པོ་དང་ཟླ་བ་ཕྱེད་དང་གསུམ་པོ་འདི་དག་ནི་ཚ་བའི་དུས་སོ་ལྷག་མ་ནི་ན་བ་དུས་སོ་ལས་དུས་སོ་ལམ་དུས་སོ། །རླུང་དུས་སོ་ཆར་དུས་སོ། །རྫི་ཆར་དུས་སྟེ། དེ་ལ་དེ་ནི་དུས་ཡིན་ནོ། །བཅོམ་ལྡན་འདས་ཀྱིས་ཤེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །ཟླ་བ་ཕྱེད་ཕྱེད་ཅིང་ཁྲུས་བྱ་བར་གསུང་པ་ཞེས་བྱ་བ་ནི་ཟླ་བ་ངོ་ཕྱེད་ཕྱེད་ལའོ། །དེ་ལས་འདུམས་པར་བྱེད་ན་ཞེས་བྱ་བ་ནི་ཟླ་བ་ཕྱེད་ལས་འདུམས་པར་བྱེད་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་ཏེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས
7.253a
ངན་སོང་དང ། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབས་པར་བྱེད་པ་སྟེ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་དུས་ནི་འདི་ཡིན་ཏེ། སོ་ཀ་རྣམས་ཀྱི་ཟླ་བ་ལྷགས་མ་ཕྱེད་དང་གཉིས་དང ། དབྱར་རྣམས་ཀྱི་དང་པོ་དང་ཟླ་བ་ཕྱེད་དང་གསུམ་པོ་འདི་དག་ནི་ཚ་བའི་དུས་སོ་ཞེས་བྱ་བ་ལ་སོ་ཀ་རྣམས་ཀྱིས་ཟླ་བ་ལྷག་མ་ཕྱེད་དང་གཉིས་ཤེས་བྱ་བ་ནི་ཟླ་བ་ཕྱེད་དང་གཉིས་ན་དབྱར་ཉེ་བར་སྒྲུབ་པ་འབྱུང་བར་འགྱུར་བ་སྟེ། དབྱར་ཟླ་ར་བ་ཚེས་ནས་དབྱར་ཟླ་འབྲིང་པོ་ཉའི་བར་གྱི་ཟླ་བ་ཕྱེད་དང་གཉིས་སོ། །དབྱར་རྣམས་ཀྱི་དང་པོ་ཞེས་བྱ་བ་ནི་གནས་པར་ཁས་བླངས་པ་རྣམས་ཀྱི་དང་པོ་ཟླ་བ་གཅིག་སྟེ། དབྱར་ཟླ་འབྲིང་པོ་ཚེས་བཅུ་དྲུག་ནས་དབྱར་ཟླ་ཐ་ཆུངས་ཉའི་བར་གྱི་ཟླ་བ་གཅིག་གོ། །ལྷག་མ་ནི་ན་བ་དུས་སོ་ཞེས་བྱ་བ་ནི་འདི་ལྟ་སྟེ་དགེ་སློང་ན་བ་ཁྲུས་མ་བྱས་པར་འཚོ་བར་མི་ནུས་ནའོ། །ལས་དུས་སོ་ཞེས་བྱ་བ་ནི་འདི་ལྟ་སྟེ་དགེ་སློང་གིས་དགེ་འདུན་གྱི་འམ་མཆོད་རྟེན་གྱི་ལས་ཐ་ན་རེ་སྡེ་ཙམ་ཞིག་ཕྱགས་སམ། དཀྱིལ་འཁོར་བ་མལ་ཙམ་ཞིག་བྱུག་པ་ནའོ། །ལམ་དུས་སོ་ཞེས་བྱ་བ་ནི་འདི་ལྟ་སྟེ་དགེ་སློང་དཔག་ཚད་གཅིག་ཏུ་སོང་ངམ་དཔག་ཚད་ཕྱེད་དུ་སོང་སྟེ་ཕྱིར་འོངས་ནའོ། །རླུང་དུས་སོ་ཞེས་བྱ་བ་ནི་ཐ་ན་རླུང་གིས་གོས་ཀྱིས་གྲཝ་བསྒུལ་བར་གྱུར་ནའོ། །ཆར་དུས་སོ་ཞེས་བྱ་བ་ནི་འདི་ལྟ་སྟེ་ཐ་ན་ལུས་ལ་ཆར་གྱི་ཐིག་པ་གཉིས་སམ་གསུམ་བབ་པར་གྱུར་ནའོ། །རྫི་ཆར་དུས་སོ་ཞེས་བྱ་བ་ནི་འདི་ལྟ་སྟེ་ཐ་ན་རྫི་ཆར་གྱིས་གོས་ཀྱི་མཐའ་བསྒུལ་བར་གྱུར་ཅིང་ལུས་ལ་ཆར་པའི་ཐིགས་པ་གཉིས་སམ་གསུམ་བབ་པར་གྱུར་ནའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དབང་བསྐུར་བའི་ཁྲུས་ཀྱིས་ཁྲུས་བྱེད་ན་དེ་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་རླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི
7.253b
བར་དུ་ཉེས་བྱས་སུ་འགྱུར་ལ་ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་འཇུག་པའི་ཁྲུས་ཀྱིས་ཁྲུས་བྱེད་ན་དེས་དུས་བྱིན་གྱིས་བརླབས་པར་བྱའོ། །དུས་བྱིན་གྱིས་མ་བརླབས་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱིས་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་དབང་བསྐུར་བའི་ཁྲུས་ཀྱིས་ཁྲུས་བྱས་ནས་འཇུག་པའི་ཁྲུས་ཀྱིས་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱིས་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་འཇུག་པའི་ཁྲུས་ཀྱིས་ཁྲུས་བྱས་ནས་དབང་སྐུར་བའི་ཁྲུས་ཀྱིས་ཁྲུས་བྱེད་ན་དེས་དུས་བྱིན་གྱིས་བརླབས་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་གྲང་མོས་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་དྲོན་མོས་ཁྲུས་བྱེད་ན་དེས་དུས་བྱིན་གྱིས་བརླབས་པར་བྱའོ། །དུས་བྱིན་གྱིས་མ་བརླབས་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་གྲང་མོས་ཁྲུས་བྱས་ནས་ཆུ་དྲོན་མོས་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་དྲོན་མོས་ཁྲུས་བྱས་ནས་ཆུ་གྲང་མོས་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི
7.254a
སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་ཀླུང་དལ་གྱི་འབབ་པར་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་ཀླུང་དྲག་ཏུ་འབབ་པར་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་ཀླུང་དལ་གྱིས་འབབ་པར་ཁྲུས་བྱས་ནས་ཆུ་ཀླུང་དྲག་ཏུ་འབབ་པར་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱིས་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཆུ་ཀླུང་དྲག་ཏུ་འབབ་པར་ཁྲུས་བྱས་ནས་ཆུ་ཀླུང་དལ་གྱིས་འབབ་པར་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །དུས་བྱིན་གྱིས་མ་བརླབ་པར་ཁྲུས་བྱེད་ན་ཇི་སྲིད་དུ་ཆུས་ལྟེ་བར་མ་སོན་གྱི་བར་དུ་ཉེས་བྱས་སུ་འགྱུར་ལ། ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ། །དགེ་སློང་དག་ཆུ་ཀླུང་རྒལ་བ་ན་དེ་དག་འགྱོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། འདི་ལ་འགྱོད་པར་མི་བྱ་བར་གལ་ཏེ་ཁྲུས་བྱེད་པར་འདོད་ན་དུས་བྱིན་གྱིས་བརླབ་ཏེ་ཁྲུས་བྱའོ། །དགེ་སློང་དག་བསྐམ་སའོ་སྙམ་ནས་ཆུར་ཞུགས་པ་དང་དེ་དག་དེར་ལྟུང་ཞིང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། འདི་ལ་འགྱོད་པར་མི་བྱ་བར་གལ་ཏེ་ཁྲུས་བྱེད་པར་འདོད་ན་དུས་བྱིན་གྱིས་བརླབ་ཏེ་ཁྲུས་བྱའོ། །དེ་བཞིན་དུ་དགེ་སློང་དག་འཆགས་ས་ན་ཡེང་པས་ཆུར་ལྟུང་བ་དང ། བརྒྱལ་བ་ལ་ཆུས་བཏབ་པ་ན་དེ་དག་འགྱོད་པར
7.254b
གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། འདི་ལ་འགྱོད་པར་མི་བྱ་བར་གལ་ཏེ་ཁྲུས་བྱེད་པར་འདོད་ན་དུས་བྱིན་གྱིས་བརླབ་ཏེ་ཁྲུས་བྱའོ། །ལས་དང་པོ་པ་དང་སྨྱོས་པ་དང ། སེམས་འཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁྲུས་བྱེད་པའི་ལྟུང་བྱེད་དེ་དྲུག་བཅུ་པ་རྫོགས་སྷོ།། ་་་་་།། སྡོམ་ལ་དུད་འགྲོ་འགྱོད་པ་སོར་མོ་དང ། །རྩེ་དང་ལྷན་གཅིག་སྔངས་བྱེད་དང ། །སྦེད་དང་རྡེང་མེད་གཞི་མེད་དང ། །སྐྱེས་པ་མེད་པར་ལམ་འགྲོ་བའོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འཆར་ཀ་སྔ་དྲོ་ཤམས་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེར་བསོད་སྙོམས་བརྒྱུས་ཏེ་འཕོང་གི་དཔོང་ས་མཐོང་ནས་དེས་དེར་ཞུགས་པ་དང ། འཕོང་གི་སློབ་དཔོན་ནི་མེད་ཁྱེའུ་དག་འཁོད་ནས་དེས་ཁྱེའུ་དག་ལ་དྲིས་པ། ཁྱེའུ་དག་ཅི་བྱེད་དེ་དག་གིས་སྨྲས་པ། འཕགས་པ་འཕོང་སློབ་བོ་འཆར་ཀས་སྨྲས་པ། བུ་དག་ལེགས་ཏེ་ཁྱོད་ཀྱིས་སྒྱུ་རྩལ་མཆོག་ལ་རྒལ་ཏོ་བལྟས་གཡོན་འཕོངས་དང ། གཡས་འཕོང་དང་མདའ་ལྔ་འཕང་བ་བྱོས་ཤིག་།དེ་དག་གིས་གཡོན་འཕོང་དང ། གཡས་འཕོང་དང ། མདའ་ལྔ་འཕང་བར་བྱ་བར་བཙམ་པ་དང ། དེ་ལག་པ་གཉིས་འདྲིལ་བར་བྱེད་བཞིན་སྒྱུར་བར་བྱེད་དོ། །དེ་དག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད། ཞལ་སྒྱུར་བར་མཛད། འཆར་ཀས་སྨྲས་པ། ད་དུང་ཁྱེད་ཅག་གི་སློབ་དཔོན་གྱིས་ཀྱང་མི་ཤེས་ན་ཁྱེད་ཅག་གིས་ལྟ་ཤེས་པར་འགྱུར་རེ་སྐན། དེ་དག་གིས་སྨྲས་པ། འཕགས་པ་འདི་ལ་མཁྱེན་པ་ཅུང་ཟད་མངའ་འམ། འཆར་ཀས་སྨྲས་པ། སའི་སྟེང་ན་ཁོ་བོས་མི་ཤེས་པའི་བཟོའི་གནས་དང་ལས་ཀྱི་གནས་གང་ཡོད་དེ་དག་གིས་སྨྲས་པ། འཕགས་པ་གཡར་སྔ་བྲིམ་གྱིས་གཡོན་འཕོང
7.255a
དང་གཡས་འཕོང་དང ། མདའ་ལྔ་འཕང་བ་མཛད་དུ་གསོལ། འཆར་ཀས་སྨྲས་པ་གཞུ་འོན་གཅིག་དེ་དག་གིས་གཞུ་ཕུལ་བ་དང ། འཆར་ཀས་སྨྲས་པ། གཞུ་འདི་ནི་རས་བལ་གྱི་གཞུ་འདྲ་ལ་གཞུ་གཞན་འོན་གཅིག་།དེ་དག་གིས་གཞུ་གཉིས་པ་དང ། གསུམ་པ་ཕུལ་བ་དང་འཆར་ཀས་སྨྲས་པ། གཞུ་འདི་དག་ཀྱང་རས་བལ་གྱིས་གཞུ་འདྲས་ཁྱེད་ཀྱིས་སློབ་དཔོན་གྱི་གཞུ་འོན་ཅིག་དེ་དག་གིས་སློབ་དཔོན་གྱི་གཞུ་ཕུལ་བ་དང་འཆར་ཀས་སྨྲས་པ། འདི་ཡང་ཚོད་ཡོད་པ་ཞིག་གོ་ཞེས་དེས་གཞུ་དེ་རས་བལ་གྱིས་གཞུ་བཞིན་དུ་བདུངས་ཏེ་རྒྱུད་སྒྲ་སྦྲེངས་པ་དང ། སྟེང་གི་ནམ་མཁའ་ལ་བྱ་རོག་གི་ཚོགས་རྒྱུ་བར་བརྩམས་ནས་འཆར་ཀས་སྨྲས་པ། ཇི་ལྟ་རྗེ་བྱ་རོག་འདིའི་རྐུབ་ཏུ་བསྣུན་ལ་ཁར་དབྱུང་བར་བྱ་འམ། འོན་ཏེ་ཁར་བསྣུན་ལ་རྐུབ་ཏུ་དབྱུང་བར་བྱ་དེ་དག་གིས་སྨྲས་པ། འཕགས་པ་རྐུབ་ཏུ་བསྣུན་ལ་ཁར་དབྱུང་དུ་གསོལ། འཆར་ཀས་ཤར་ཕྱོགས་ཀྱི་སྟེང་གི་ནམ་མཁའ་ལ་མདའ་ཅིག་འཕངས་ཤིང་ལྷོ་དང་ནུབ་དང ། བྱང་ཕྱོགས་ཀྱིས་སྟེང་གི་ནམ་མཁའ་ལ་ཡང་མདའ་རེ་རེ་འཕང་བ་དང ། བྱ་རོག་དེས་ཁ་གྱེན་དུ་ཕྱོགས་ཏེ་འགྲོ་བར་བརྩམས་ནས། འཆར་ཀས་དེའི་ཕྱི་བཞིན་མདའ་གཅིག་འཕངས་པས་རྐུབ་ཏུ་བསྣུན་ཏེ་ཁར་ཕྱུངས་ནས་བྱ་རོག་དེ་ས་ལ་ལྷུང་བ་དང ། དེ་དག་ཡ་མཚན་སྐྱེས་ནས་སེམས་ཁོངསུ་ཆུད་ཅིང་འཁོད་དོ། །འཆར་ཀས་སྨྲས་པ། བུ་དག་བཟོ་འདི་ལྟར་བསླབ་པར་བྱ་བ་འམ་ཡང་ན་སློབ་དཔོན་གཞན་བཙལ་བར་བྱའི་འབྲས་བུ་མེད་པའི་སྦུན་པ་ཕྱར་ཞིང་འཁོད་དེ་ཅི་རུང་ཞེས་སྨྲས་ཏེ་སོང་ངོ ། །དེ་དག་སེམས་ཁོང་དུ་ཆུད་ཅིང་འཁོད་པ་དང་ཇི་ཙམ་ན་དེ་དག་གི་སློབ་དཔོན་འོངས་ནས་དེས་སྨྲས་པ། ཁྱེའུ་དག་ཅིའི་ཕྱིར་སེམས་ཁོངསུ་ཆུད་ཅིང་འཁོད་གཡོན་འཕོངས་དང ། གཡས་འཕོངས་དང ། མདའ་ལྔ་འཕང་བ་བྱོས་ཤིག་དེ་དག་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་པ་དང་སློབ་དཔོན་གྱིས་སྨྲས་པ། ཁྱེའུ་དག་སྔོན་མ་བྱུང
7.255b
བའི་རྣམ་པར་འགྱུར་བ་འདི་ལྟ་བུ་བྱུང་ན་འདིར་འགའ་ཞིག་འོང་བར་མ་གྱུར་ཏམ་མཆིས་སོ། །སུ་འཕགས་པ་འཆར་ཀའོ་དེས་ཅི་བྱས། མདའ་ལྔ་འཕང་བ་བགྱི་ནས་བྱ་རོག་འདིའི་རྐུབ་ཏུ་བསྣུན་ནས་ཁར་ཕྱུང་ངོ ། །དེས་སྨྲས་པ་ཁྱེའུ་དག་བྱང་ཆུབ་སེམས་དཔའ་འཕོང་གི་དཔོང་ས་གང་དུ་འཕོང་བསླབས་པར་གྱུར་པ་དེར་དེས་ཀྱང་བསླབ་ཏེ་གལ་ཏེ་དེ་རབ་ཏུ་བྱུང་བར་མ་གྱུར་ན་འཛམ་བུའི་གླིང་མཐའ་དག་ཏུ་འཕོང་གི་སློབ་དཔོན་གྱི་མཆོག་ཏུ་འགྱུར་རོ། །འོན་ཀྱང་ཁོ་བོས་ཅི་ཤེས་པ་རེ་ཤིག་ཁོ་བོ་ལས་སློབས་ལ་ལྷག་མ་གཞན་ལས་སློབས་ཤིག་།དེས་བསམ་པ་དེ་ཡང་དང་ཡང་དུ་བདག་ལ་ཐོ་འཚམ་པར་འགྱུར་བས་བདག་གིས་དེ་མི་དགའ་བར་བྱའོ་སྙམ་ནས་དེས་ཁྱེའུ་དེ་དག་ལ་སྨྲས་པ། ཁྱེའུ་དག་ཁྱེད་ཅག་ཕྱོགས་དང་ཕྱོགས་འཚམས་རྣམ་སུ་བཙུན་པ་འཆར་ཀའི་སྒྲའི་ཚོགས་སྙན་པ་རྒྱ་ཆེན་པོ་གྲག་པར་འདོད་དམ་དེ་དག་སྨྲས་པ། འཚལ་ལོ་དེས་སྨྲས་པ། གང་གི་ཚེ་འཕགས་པ་འཆར་ཀ་བསོད་སྙོམས་ལ་ཞུགས་པ་དེའི་ཚེ་ན་ཁྱེད་ཀྱིས་བྱ་རོག་གི་རོ་འདི་སྨྱུགས་མ་རིང་པོའི་རྩེ་མོ་ལ་ཐོགས་ཏེ་དེའི་ཕྱི་བཞིན་ཕྱི་བཞིན་རྗེས་སུ་སོང་ལ་མི་འོ་ཅོག་ལ་འདི་སྐད་ཅེས་འཕགས་པ་འཆར་ཀས་མདའ་ལྔ་འཕང་བ་འདི་ལྟ་བུ་བྱས་ཏེ་བྱ་རོག་འདིའི་རྐུབ་ཏུ་བསྣུན་ནས་ཁར་ཕྱུང་བ་ལ་ལྟོས་ཤིག་ཅེས་སྒྲོགས་ལ། གལ་ཏེ་ཕྱིར་ལོགས་ཤིག་ཅེས་ཟེར་ན་ཡང་མ་ལོགས་ཤིག་།ཕྱི་དེ་ཉིན་པར་ཚེ་དང་ལྡན་པ་འཆར་ཀ་སྔ་དྲོ་ཤམས་ཐབས་བགོས། ལྷུང་བཟེད་དང་ཆོས་གོས་ཐོགས་སྟེ་མཉན་ཡོད་དུ་བསོད་སྙོམས་ལ་ཞུགས་པ་དང ། ཁྱེའུ་དེ་དག་གིས་དེ་མཐོང་ནས་དེ་དག་གིས། བྱ་རོག་གི་རོ་དེ་སྨྱུགས་མ་རིང་པོའི་རྩེ་མོ་ལ་བཏགས་ཏེ། ཚེ་དང་ལྡན་པ་འཆར་ཀའི་ཕྱི་བཞིན་ཕྱི་བཞིན་རྗེས་སུ་སོང་ནས་མི་འོ་ཅོག་ལ་འདི་སྐད་ཅེས་འཕགས་པ་འཆར་ཀས་མདའ་ལྔ་འཕང་བ་འདི་ལྟ་བུ་བྱས་པས་བྱ་རོག་འདིའི་རྐུབ་ཏུ་བསྣུན་ནས་ཁར་ཕྱུང་བ་ལ་ལྟོས་ཤེས་བསྒྲག་པ་དང ། འཆར་ཀས་དེ་དག་མཐོང་ནས་དེས་སྨྲས་པ། ཁྱེའུ་དག་ཅིའི་ཕྱིར
7.256a
་ ཁོ་བོ་ལ་ཐོ་འཚམ་པར་བྱེད་ཕྱིར་ལོགས་ཤིག་།འོན་ཀྱང་དེ་དག་ཕྱིར་མ་ལོག་ན་ཡང་དེ་སྐད་སྒྲོག་པར་བྱེད་ནས་བྲམ་ཟེ་དང་ཁྱིམ་བདག་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་སྲོག་གཅོད་པར་བྱེད་པ་སྟེ། སྲོག་གཅོད་པ་ལས་མ་ལོག་།མ་སྤངས། སོ་སོར་མ་སྤངས་པ་ཡིན་ནོ། །ཤེས་ལྡན་དག་ཤཱཀྱའི་བུའི་དགེ་སྦྱོང་སེམས་ཅན་གང་གི་ལྤགས་པ་ཡང་དགོས་པར་མི་རུང ། ཤ་དང ། རྒྱུས་པ་དང ། རུས་པ་ཡང་དགོས་པར་མི་རུང་བ་འདི་ལྟ་བུ་ཡང་གསོད་པར་བྱེད་པ་ལ་ལྟོས། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་འཆར་ཀ་ལ་རྨས་པ། འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བསམས་བཞིན་དུ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་གསོད་ན་ལྟུང་བྱེད་དོ། །
7.256b
ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་ནས་སོ། །དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ཤེས་བྱ་བ་ནི་བྱ་རོག་གམ། གཞན་ཡང་དེ་ལྟ་བུ་གང་ཡིན་པའོ། །གསོད་ན་ཞེས་བྱ་བ་ནི་དེའི་སྲོག་གཅོད་པར་བྱེད་ནའོ། །ལྟུང་བྱེད་དོ། །ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་དུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤག་ཤིང་སོ་སོར་མ་བཤག་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། བར་སྡོམ་ལ། བདག་ཉིད་ཀྱིས་ནི་ཟིན་པ་དང ། །ཕྱི་རོལ་དུ་ནི་འཕངས་པ་དང ། །གཉི་ག་དང་ནི་ལྡན་པའི། །སྡེ་ཚན་ཡང་དག་བསྡུས་པ་ཡིན། །ཇི་ལྟར་བདག་ཉིད་ཀྱིས་ཟིན་པས་ཞེ་ན། དགེ་སློང་གིས་དུད་འགྲོའི་སྐྱེ་གནས་སུ་གཏོགས་པའི་སེམས་ཅན་ལ་བསད་པའི་སེམས་ཀྱིས་འདི་ལྟར་བརྩམས་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཅིག་གིས་སྣུན་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་བྱས་སུ་འགྱུར་རོ། །སོར་མོ་གཅིག་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཉིས་ཀྱིས་སམ་གསུམ་གྱིས་སམ། བཞིས་སམ། ལྔས་སམ། ཁུ་ཚུར་གྱིས་སམ། གྲུ་མོས་སམ། ཕྲག་པས་སམ། མགོ་བོས་སམ། གློས་སམ། རྐེད་པས་སམ། བརླས་སམ། པུས་མོས་སམ། རྗེ་ངར་གྱིས་སམ། ལོང་བུས་སམ། རྐང་མཐིལ་གྱིས་སམ། ཐ་ན་རྐང་པའི་མཐེ་བོས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་མ་ཡིན་ཡང ། དེས་དེའི་འོག་དུ་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི
7.257a
འོག་དུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་བྱས་སུ་འགྱུར་ཏེ། དེ་ལྟར་བདག་ཉིད་ཀྱིས་ཟིན་པས་སོ། །ཇི་ལྟར་ཕྱི་རོལ་དུ་འཕངས་པས་ཤེས་ན། དགེ་སློང་གིས་དུད་འགྲོའི་སྐྱེ་གནས་སུ་གཏོགས་པའི་སེམས་ཅན་ལ་བསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་མདས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་བྱས་སུ་འགྱུར་རོ། །མདས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ལྕགས་མདས་སམ། མདའ་ཕྱེད་ལྕགས་ལས་བྱས་པས་སམ། སྟེའུ་ཀ་མས་སམ། མདེའུ་བེའུ་སོ་ལྟ་བུས་སམ། མདེའུ་ཟུར་བཞི་མས་སམ། མདེའུ་ཀ་ར་བི་རའི་ལོ་མ་ལྟ་བུས་སམ། མདེའུ་བྱེའུ་སྙིང་མས་སམ། འཁོར་ལོས་སམ། རྡོ་རྗེ་རྩེ་གཅིག་པས་སམ། མདའ་བོ་ཆེས་སམ། མཚོན་རྩེ་གཅིག་པས་སམ། ཐ་ན་རྒྱ་ཤུག་གི་འབྲས་བུས་སྣུན་པར་བྱེད་ཅིང ། དེ་ཡང་རྩོམ་པ་དེས་དུས་བྱེད་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་བྱས་སུ་འགྱུར་རོ། །དེ་ལྟར་ཕྱི་རོལ་ཏུ་འཕངས་པས་སོ། །ཇི་ལྟར་དེ་གཉི་ག་དང་ལྡན་པས་ཤེ་ན། དགེ་སློང་གིས་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ལ་བསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་།སྙམ་པས་རལ་གྲིས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས
7.257b
ཉེས་བྱས་སུ་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཤང་ལང་གིས་སམ། རལ་གྲི་སོ་ཅིག་པས་སམ། རལ་གྲི་སོ་གཉིས་པས་སམ། མདུང་གིས་སམ། འཕང་མདུང་གིས་སམ། ཁྱོ་བ་ཁ་བྲག་གིས་སམ། ཚ་ལྕག་གིས་སམ། ཐ་ན་རྩཝ་མདས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་དུ་ན་དགེ་སློང་ལ་ལྟུང་བྱེད་དུ་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་བྱས་སུ་འགྱུར་ཏེ། དེ་ལྟར་གཉི་ག་དང་ལྡན་པས་སོ། །ལས་དང་པོ་པ་དང ། སྨྱོས་པ་དང ། སེམས་འཁྲུག་པ་དང ། ཚོར་བ་དག་གི་ཉེན་པ་ལ་ལྟུང་བ་མེད་དོ། །དུད་འགྲོ་གསོད་པའི་ལྟུང་བྱེད་དེ་དྲུག་བཅུ་རྩ་གཅིག་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་དེ་དག་དྲུག་སྡེ་དག་ལ་སྟེན་པར་བྱེད། སྙེན་པར་བྱེད་བསྙེན་བཀུར་བྱེད་དོ། །དེ་ནས་ཚེ་དང་ལྡན་པ་འཆར་ཀས་བཅུ་བདུན་སྡེ་དག་ལ་སྨྲས་པ། བཅུ་བདུན་སྡེ་དག་ཚུར་ཤོག་།འདི་དང་འདི་གྱིས་ཤིག་།དེ་དག་གིས་སྨྲས་པ། ཁྱོད་ཁོ་བོ་ཅག་གིས་སློབ་དཔོན་ཡིན་ནམ། མཁན་པོ་ཡིན་ནམ་ཅི་མི་བྱེད་དོ། །འཆར་ཀས་སྨྲས་པ། གླེན་པ་དག་འོ་ན་གཞན་ཅི་བྱེད་ཅེས་དེས་གཉའ་བ་དག་ནས་བཟུང་སྟེ་ཕྱི་རོལ་དུ་བསྐྲད་དོ། །དེ་དག་གིས་སྨྲས་པ། ཚེ་དང་ལྡན་པ་དག་དྲུག་སྡེ་དག་གིས་གང་ཅུང་ཟད་བརྙས་པར་གྱུར་པ་དེ་དག་ཐམས་ཅད་ནི་བདག་ཅག་ཐོས་པ་ཉུང་བ་ལས་གྱུར་པ་ཡིན་གྱིས་ཇེ་ཐོས་པ་འཛིན་དུ་འདོད་དང་དེས་ན་ཕྱིན་ཅད་དྲུག་སྡེ་དག་ལ་ཅུང་ཟད་ཀྱང་དྲི་མི་དགོས་པར་འགྱུར་རོ། །ཞེས་དེ་དག་དགེ་སློང་ཞིག་གི་གན་དུ་དོང་སྟེ་སྨྲས་པ་བཙུན་པ་བདག་ཅག་ཀློག་ཏུ་སྩོལ་ཅིག་།དེས་དེ་དག་ལ་ཐབས་ཡིན་ནོ
7.258a
ཞེས་སྨྲས་ནས། དེ་དག་གིས་དེའི་གན་དུ་ཀླག་པར་བརྩམས་སོ། །ཉེ་དགས་སྨྲས་པ། བཙུན་པ་འཆར་ཀ་བཅུ་བདུན་སྡེ་དག་དེ་བར་བདག་ཅག་ལ་སྟེན་པར་མི་བྱེད། སྙེན་པར་མི་བྱེད། བསྙེན་བཀུར་མི་བྱེད་དོ། །འཆར་ཀས་སྨྲས་པ། ཁོ་བོས་དེ་དག་བསྐྲད་ནས་ད་ལྟར་ཐོས་པ་འཛིན་པར་བརྩམས་སོ། །བཙུན་པ་འཆར་ཀ་ཁྱོད་ཀྱིས་བདག་ཅག་གིས་སྦྲུལ་ཉལ་བ་ལྕག་གིས་གཞུས་སོ། །ཇི་སྲིད་དུ་གླེན་པ་དེ་དག་ཐོས་པ་ཉུང་བ་དེ་སྲིད་དུ་དེ་དག་བདག་ཅག་ལ་སྟེན་པར་བྱེད། སྙེན་པར་བྱེད། བསྙེན་བཀུར་བྱེད་ཀྱིས། གང་གི་ཚེ་དེ་དག་ཐོས་པ་མང་པོར་གྱུར་ཅིང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དང ། གདུག་ཅིང་ཕ་རོལ་གནོན་པར་གྱུར་པ་དེའི་ཚེ་ན་དེ་དག་བདག་ཅག་ལ་གནོད་པ་བྱ་བར་སེམས་པར་འགྱུར་རོ། །འཆར་ཀས་སྨྲས་པ། ཁོ་བོས་དེ་དག་ཅི་ནས་ཀྱང་ཐོས་པ་འཛིན་པར་མི་འགྱུར་བ་དང ། ཐོས་པ་བཟུང་བ་ལས་ཀྱང་ཡོངས་སུ་ཉམས་པར་འགྱུར་བ་དེ་ལྟར་བྱའོ་ཞེས་དེ་དག་གིས་གན་དུ་སོང་སྟེ་འདི་སྐད་ཅེས་སྨྲས་སོ། །ཀྱེ་བཅུ་བདུན་སྡེ་དག་ཤིན་དུ་བརྩོན་འགྲུས་བརྩམས་སམ། དེ་དག་གིས་སྨྲས་པ། བརྩམས་སོ། །བརྩོན་འགྲུས་ཀྱིས་ཅི་བྱ། ཐོས་པ་བཟུང་ངོ ། །ཐོས་པ་བཟུང་བས་ཅིར་འགྱུར། མང་དུ་ཐོས་པར་འགྱུར་རོ། །མང་དུ་ཐོས་པས་ཅིར་འགྱུར། དབང་པོ་ཡོངས་སུ་སྨིན་པར་འགྱུར་རོ། །དབང་པོ་ཡོངས་སུ་སྨིན་པས་ཅིར་འགྱུར། ངེས་པ་ལ་འཇུག་པ་དང ། ཟག་པ་ཟད་པར་འགྱུར་རོ། །ཁྱེད་ངེས་པ་ལ་འཇུག་པ་དང ། ཟག་པ་ཟད་པར་འགྱུར་རེ་སྐན། བཙུན་པ་འཆར་ཀ་ཁོ་བོ་ཅག་མཚམས་མེད་པའི་ལས་དག་བྱས་པ་འམ། དགེ་བའི་རྩ་བ་ཆད་པ་ཡིན་ནམ་ཅི། ཁྱེད་ཅག་འཚམས་མེད་པའི་ལས་དག་བྱས་པ་ཡང་མ་ཡིན། དགེ་བའི་རྩ་བ་ཆད་པ་ཡང་མ་ཡིན་མོད་ཀྱི་འོན་ཀྱང་ཁྱེད་ཀྱིས་བཅོམ་ལྡན་འདས་ཀྱིས་ཡང་དགེ་སློང་གང་གང་ཟག་ལོ་ཉི་ཤུ་མ་ལོན་པ་དག་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ཡང་རྫོགས་པར་བསྙེན་པར་མི་འགྱུར་ལ། དགེ་སློང་དེ་དག་ཀྱང་སྨད་པར
7.258b
འགྱུར་རོ། །ཞེས་གསུངས་པ་མ་ཐོས་སམ། ཁྱེད་ཅག་ལོ་ཉི་ཤུ་མ་ལོན་པར་རྫོགས་པར་བསྙེན་པས་ཁྱོད་ཅག་ངེས་པ་ལ་འཇུག་པ་དང ། ཟག་པ་ཟད་པར་འགྱུར་རེ་སྐན། དེ་དག་གིས་དེ་ཐོས་ནས་སེམས་ཁོངས་སུ་ཆུད་ཅིང་འཁོད་པ་དང ། དེ་དག་གི་སློབ་དཔོན་འོངས་ནས་དེས་སྨྲས་པ། གཞོན་ནུ་དག་ཅིའི་ཕྱིར་སེམས་ཁོངས་སུ་ཆུད་ཅིང་འཁོད། ཚུར་ཤོག་ལ་ཐོས་པ་ཟུང་ཤིག་།དེ་དག་གིས་སྨྲས་པ། སློབ་དཔོན་ཐོས་པ་བཟུང་བས་ཅིར་འགྱུར། མང་དུ་ཐོས་པར་འགྱུར་རོ། །མང་དུ་ཐོས་པས་ཅིར་འགྱུར། དབང་པོ་ཡོངས་སུ་སྨིན་པར་འགྱུར་རོ། །དབང་པོ་ཡོངས་སུ་སྨིན་པས་ཅིར་འགྱུར། ངེས་པ་ལ་འཇུག་པ་དང ། ཟག་པ་ཟད་པར་འགྱུར་རོ། །དེ་དག་གིས་སྨྲས་པ། སློབ་དཔོན་བདག་ཅག་ངེས་པ་ལ་འཇུག་པ་དང ། ཟག་པ་ཟད་པར་འགྱུར་རེ་སྐན། ཁྱེད་ཅག་མཚམས་མེད་པའི་ལས་དག་བྱས་པ་དང ། དགེ་བའི་རྩ་བ་ཆད་པ་ཡིན་ནམ་ཅི། དེ་དག་གིས་སྨྲས་པ། སློབ་དཔོན་བདག་ཅག་མཚམས་མ་མཆིས་པའི་ལས་དག་བགྱིས་པ་ཡང་མ་ལགས། དགེ་བའི་རྩ་བ་ཆད་པ་ཡང་མ་ལགས་མོད་ཀྱི། འོན་ཀྱང་བཅོམ་ལྡན་འདས་ཀྱིས་ཡང་དགེ་སློང་གང་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ཡང་རྫོགས་པར་བསྙེན་པར་མི་འགྱུར་ལ། དགེ་སློང་དེ་དག་ཀྱང་སྨད་པར་འགྱུར་རོ། །ཞེས་གསུངས་པས་བདག་ཅག་ལོ་ཉི་ཤུ་མ་ལོན་པར་རྫོགས་པར་བསྙེན་པས་བདག་ཅག་ངེས་པ་ལ་འཇུག་པ་དང ། ཟག་པ་ཟད་པར་འགྱུར་རེ་སྐན། དེས་སྨྲས་པ། ཁྱེད་ཀྱིས་དེ་ནི་ཐོས་ན་བཅོམ་ལྡན་འདས་ཀྱིས་ལས་དང་པོ་པ་ལ་ལྟུང་བ་མེད་དོ་ཞེས་གསུངས་པ་དེ་མ་ཐོས་སམ། ཁྱེད་ཅག་ལས་དང་པོ་པ་ཡིན་པས་རྫོགས་པར་བསྙེན་པར་གྱུར་ཀྱིས་ཚུར་ཤེག་ལ་ལུང་ནོས་ཤིག་།གཞན་ཡང་འདི་ལྟར་ཁྱེད་སུས་འགྱོད་པ་བསྐྱེད། བཙུན་པ་འཆར་ཀས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བསམས་བཞིན་དུ་དགེ་སློང་ལ་འགྱོད་པ་སྐྱེད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད།
7.259a
ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་བསམས་བཞིན་དུ་དགེ་སློང་ལ་འགྱོད་པ་སྐྱེད་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲང་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་ཏེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བསམས་བཞིན་དུ་ཅི་ནས་ཀྱང་དགེ་སློང་འདི་ཡིད་ཙམ་ཞིག་ཀྱང་བདེ་བ་ལ་མི་རེག་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་དགེ་སློང་ལ་འགྱོད་པ་སྐྱེད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་ནས་སོ། །ཅི་ནས་ཀྱང་དགེ་སློང་འདི་ཡིད་ཙམ་ཞིག་ཀྱང་བདེ་བ་ལ་མི་རེག་པར་བྱའོ་སྙམ་པ་ཞེས་བྱ་བ་ནི་ཐ་ན་ཡིད་ཙམ་ཞིག་ཀྱང་ཡིད་མི་དགའ་བར་བྱའོ་སྙམ་པའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ། །དགེ་སློང་ལ་ཞེས་བྱ་བ་ནི་ཆོས་འདི་པ་ལའོ། །འགྱོད་པ་སྐྱེད་ན་ཞེས་བྱ་བ་ནི་སེམས་ལ་ཅུང་ཟད་འགྱོད་པ་དང ། རྣམ་པར་འགྱོད་པ་དང ། རབ་ཏུ་འགྱོད་པ
7.259b
སྐྱེད་ནའོ། །ལྟུང་བྱེད་དོ། །ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་རྒྱལ་པོ་དང ། ནོར་ཅན་དང ། ཚོང་དཔོན་དང ། དེད་དཔོན་ཆེ་གེ་མོ་ཞིག་དྲན་ནམ་ཞེས་དྲིས་ཏེ། མི་དྲན་ནོ་ཞེས་ཟེར་ནས་དེ་ནི་དུས་སྔ་བ་ཡིན་གྱི་ཚེ་དང་ལྡན་པ་ནི་དུས་འཕྱི་བ་ཡིན་པས་ཚེ་དང་ལྡན་པ་རྫོགས་པར་མ་བསྙེན་ཅིང་ཉེས་པར་རྫོགས་པར་བསྙེན་པས་ཡང་རྫོགས་པར་བསྙེན་པར་བྱ་དགོས་སོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་ཟླ་བ་གཟས་ཟིན་པ་དང ། ཉི་མ་གཟས་ཟིན་པ་ཆེ་གེ་མོ་ཞིག་དྲན་ནམ་ཞེས་དྲིས་ཏེ། མི་དྲན་ནོ་ཞེས་ཟེར་ནས་དེ་ནི་དུས་སྔ་བ་ཡིན་གྱིས་ཚེ་དང་ལྡན་པ་ནི་དུས་འཕྱི་བ་ཡིན་པས་ཚེ་དང་ལྡན་པ་རྫོགས་པར་མ་བསྙེན་ཅིང་ཉེས་པར་རྫོགས་པར་བསྙེན་པས་ཡང་རྫོགས་པར་བསྙེན་པར་བྱ་དགོས་སོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ལོ་ལེགས་པ་དང ། ལོ་ཉེས་པ་ཆེ་གེ་མོ་ཞིག་དྲན་ནམ་ཞེས་དྲིས་ཏེ། མི་དྲན་ནོ་ཞེས་ཟེར་ན་དེ་ནི་དུས་སྔ་བ་ཡིན་གྱི་ཚེ་དང་ལྡན་པ་ནི་དུས་འཕྱི་བ་ཡིན་པས་ཚེ་དང་ལྡན་པ་རྫོགས་པར་མ་བསྙེན་ཅིང་ཉེས་པར་རྫོགས་པར་བསྙེན་པས་ཡང་རྫོགས་པར་བསྙེན་པར་བྱ་དགོས་སོ་ཞེས་སྨྲས་ན། དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང
7.260a
ལ་འགྱོད་པ་བསྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་གནས་གང་དུ་རྫོགས་པར་བསྙེན་ཅེས་དྲིས་ཏེ། ག་གེ་མོ་ཞིག་ཏུའོ་ཞེས་ཟེར་ནས་གནས་དེ་ནི་མཚམས་མ་བཅད་པ་དང ། དཀྱིལ་འཁོར་བར་བློ་འཐུན་པར་མ་བྱས་པ་ཡིན་པས་ཚེ་དང་ལྡན་པ་རྫོགས་པར་མ་བསྙེན་ཅིང་ཉེས་པར་རྫོགས་པར་བསྙེན་པས་ཡང་རྫོགས་པར་བསྙེན་པར་བྱ་དགོས་སོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པའི་མཁན་པོ་ནི་གང་ཡིན། སློབ་དཔོན་ནི་གང་ཡིན་ཞེས་དྲིས་ཏེ་མཁན་པོ་ནི་ཆེ་གེ་མོ་ཞིག་ཡིན། སློབ་དཔོན་ནི་ཆེ་གེ་མོ་ཞིག་ཡིན་ནོ་ཞེས་ཟེར་ནས། དེ་གཉིས་ནི་ཚུལ་ཁྲིམས་འཆལ་བ་ཡིན་པས་ཚེ་དང་ལྡན་པ་རྫོགས་པར་མ་བསྙེན་ཅིང་ཉེས་པར་རྫོགས་པར་བསྙེན་པས་ཡང་རྫོགས་པར་བསྙེན་པར་བྱ་དགོས་སོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཕྱོགས་ག་གེ་མོ་ཞིག་ཏུ་འགྲོ་འམ་ཞེས་དྲིས་སྟེ། འགྲོའོ་ཞེས་ཟེར་ནས་དེ་ནི་གཅན་སྒོ་ཡིན་པས་ཚེ་དང་ལྡན་པ་ཕམ་པར་འགྱུར་བའི་ལྟུང་བ་བྱུང་ངོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་སློབ་དཔོན་དང ། མཁན་པོ་དག་གི་ཆོས་གོས་དག་བླངས་སམ་ཞེས་དྲིས་ཏེ་བླངས་སོ་ཞེས་ཟེར་ནས་ཚེ་དང་ལྡན་པས་རྐུ་སེམས་ཀྱིས་བླངས་པས་ཚེ་དང་ལྡན་པ་ཕམ་པར་འགྱུར་བའི་ལྟུང་བ་བྱུང་ངོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་འགྱོད་པ་སྐྱེད་པའི་བསམ་པས་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་དགེ་འདུན་གྱི་ནང་དུ་འདུ་བྱེད་ཐམས་ཅད་ནི་མི་རྟག་པ། ཆོས་ཐམས་ཅད
7.260b
ནི་བདག་མེད་པ་མྱ་ངན་ལས་འདས་པ་ནི་ཞི་བའོ། །ཞེས་སྨྲས་སམ་ཞེས་དྲིས་ཏེ། སྨྲས་སོ་ཞེས་ཟེར་ནས་ཚེ་དང་ལྡན་པ་མིའི་ཆོས་བླ་མ་སྨྲས་པས་ཚེ་དང་ལྡན་པ་ཕམ་པར་འགྱུར་བའི་ལྟུང་བ་བྱུང་ངོ་ཞེས་སྨྲས་ན་དགེ་སློང་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དོན་གཞན་དང ། འདུལ་བའི་ཡོ་བྱད་ཀྱིས་ནི་ལྟུང་བ་མེད་དོ། །ཇི་ལྟར་དོན་གཞན་གྱིས་ཞེ་ན་འདི་ལྟ་སྟེ། དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་རྒྱལ་པོ་དང ། ནོར་ཅན་དང་ཚོང་དཔོན་དང ། དེད་དཔོན་ཆེ་གེ་མོ་ཞིག་དྲན་ནམ་ཞེས་དྲིས་ཏེ། མི་དྲན་ནོ་ཞེས་ཟེར་ན་དེ་ནི་དུས་སྔ་བ་ཡིན་པས་ཚེ་དང་ལྡན་པས་མི་དྲན་ཏེ་ཚེ་དང་ལྡན་པ་ལེགས་པར་རྫོགས་པར་བསྙེན་ཏོ་ཞེས་སྨྲས་ན་ལྟུང་བ་མེད་དོ། །འདི་ལྟ་སྟེ་དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་ཟླ་བ་གཟས་ཟིན་པ་དང ། ཉི་མ་གཟས་ཟིན་པ་ཆེ་གེ་མོ་ཞིག་དྲན་ནམ་ཞེས་དྲིས་ཏེ་མི་དྲན་ནོ་ཞེས་ཟེར་ནས་དེ་ནི་དུས་སྔ་བ་ཡིན་པས་ཚེ་དང་ལྡན་པས་མི་དྲན་ཚེ་དང་ལྡན་པ་ལེགས་པར་རྫོགས་པར་བསྙེན་ཏོ་ཞེས་སྨྲས་ན་ལྟུང་བ་མེད་དོ། །འདི་ལྟ་སྟེ་དགེ་སློང་གིས་དགེ་སློང་གི་གན་དུ་སོང་ཏེ་འདི་སྐད་ཅེས་ཚེ་དང་ལྡན་པས་ལོ་ལེགས་པ་དང ། ལོ་ཉེས་པ་ཆེ་གེ་མོ་ཞིག་དྲན་ནམ་ཞེས་དྲིས་ཏེ། མི་དྲན་ནོ་ཞེས་ཟེར་ནས་དེ་ནི་དུས་སྔ་བ་ཡིན་པས་ཚེ་དང་ལྡན་པ་མི་དྲན་ཏེ་ཚེ་དང་ལྡན་པ་ལེགས་པར་རྫོགས་པར་བསྙེན་ཏོ་ཞེས་སྨྲས་ན་ལྟུང་བ་མེད་དེ། དེ་ལྟར་དོན་གཞན་གྱིས་སོ། །ཇི་ལྟར་འདུལ་བའི་ཡོ་བྱད་ཀྱིས་ཞེ་ན། འདི་ལྟ་སྟེ། དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་གནས་གང་དུ་རྫོགས་པར་བསྙེན་ཅེས་དྲིས་ཏེ། ག་གེ་མོ་ཞིག་ཏུའོ་ཞེས་ཟེར་ནས་གནས་དེ་ནི་མཚམས་བཅད་པ་དང ། དཀྱིལ་འཁོར་བར་བློ་འཐུན་པར་བྱས་པ་ཡིན་པས་ཚེ་དང་ལྡན་པ་ལེགས་པར་རྫོགས་པར་བསྙེན་ཏོ་ཞེས་སྨྲས་ན་ལྟུང་བ་མེད་དོ། །འདི་ལྟ་སྟེ། དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པའི་མཁན་པོ་ནི་གང་ཡིན་སློབ་དཔོན་ནི་གང་ཡིན་ཞེས་དྲིས་ཏེ་མཁན་པོ་ནི་ཆེ་གེ་མོ་ཞིག་ཡིན། སློབ་དཔོན་ནི་ཆེ་གེ་མོ་ཞིག་ཡིན
7.261a
ཞེས་ཟེར་ནས་དེ་གཉིས་ནི་དགེ་སློང་ཚུལ་ཁྲིམས་དང་ལྡན་པ་ཡིན་པས་དེ་གཉིས་ལ་བསྙེན་བཀུར་བྱས་ན་ཁྱོད་ལ་བསོད་ནམས་མང་དུ་སྐྱེ་ཞིང་ཚེ་དང་ལྡན་པ་ལེགས་པར་རྫོགས་པར་བསྙེན་པ་ཡིན་ནོ་ཞེས་སྨྲས་ན་ལྟུང་བ་མེད་དོ། །འདི་ལྟ་སྟེ། དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་མཁན་པོ་དང ། སློབ་དཔོན་དག་གི་ཆོས་གོས་དག་བླངས་སམ་ཞེས་དྲིས་ཏེ་བླངས་སོ་ཞེས་ཟེར་ནས། རྐུ་སེམས་ཀྱིས་མ་ལེན་ཅིག་།ཕམ་པར་འགྱུར་བའི་ལྟུང་བ་མ་བྱུང་བར་གྱིས་ཤིག་ཅེས་སྨྲས་ན་ལྟུང་བ་མེད་དོ། །འདི་ལྟ་སྟེ། དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཕྱོགས་ག་གེ་མོ་ཞིག་ཏུ་འགྲོ་འམ་ཞེས་དྲིས་ཏེ། འགྲོའོ་ཞེས་ཟེར་ནས་ཚེ་དང་ལྡན་པ་ཕྱོགས་དེ་ནི་གཅན་སྒོ་ཡིན་གྱིས་ཕྱོགས་དེར་མ་འགྲོ་ཤིག་།ཁྱོད་ཚངས་པ་མཚུངས་པར་སྤྱོད་པ་མཁས་པ་རྣམས་མི་དོགས་པའི་གནས་ལ་དོགས་པར་འགྱུར་བར་མ་བྱེད་ཅིག་།མི་རྟོག་པའི་གནས་ལ་རྟོག་པར་འགྱུར་བར་མ་བྱེད་ཅིག་ཅེས་སྨྲས་ན་ལྟུང་བ་མེད་དོ། །འདི་ལྟ་སྟེ། དགེ་སློང་གིས་དགེ་སློང་གི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པས་དགེ་འདུན་གྱི་ནང་དུ་འདུ་བྱེད་ཐམས་ཅད་ནི་མི་རྟག་པ། ཆོས་ཐམས་ཅད་ནི་བདག་མེད་པ། མྱ་ངན་ལས་འདས་པ་ནི་ཞི་བའོ་ཞེས་སྨྲས་སམ་ཞེས་དྲིས་ཏེ། སྨྲས་སོ། །ཞེས་ཟེར་ནས་མིའི་ཆོས་བླ་མ་མ་སྨྲ་ཤིག་།ཕམ་པར་འགྱུར་བའི་ལྟུང་བ་མ་བྱུང་བར་གྱིས་ཤིག་ཅེས་སྨྲས་ན་ལྟུང་བ་མེད་དོ། །དེ་ལྟར་འདུལ་བའི་ཡོ་བྱད་ཀྱིས་སོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འགྱོད་པ་སྐྱེད་པའི་ལྟུང་བྱེད་དེ་དྲུག་བཅུ་རྩ་གཉིས་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན
7.261b
པར་བྱས་པ་དེའི་ཚེ་ན་བཅུ་བདུན་སྡེ་དག་གལ་ཏེ་ཅིག་ལ་ལས་སུ་བསྒོ་བ་བབ་པ་ན་ཡང་དེ་དག་ཐམས་ཅད་བསྡོངས་ཏེ་བྱེད་དོ། །ཅི་ཙམ་དུས་གཞན་ཞིག་ན་གཙུག་ལག་ཁང་དེར་མཚན་ཐོག་ཐག་ཏུ་ཆོས་མཉན་པ་བྱུང་ནས་དེར་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །ཕྱི་དེ་ཉིན་པར་དགེ་འདུན་གྱི་བསྲོ་གང་དུ་ཆོས་མཉན་པ་བྱུང་ནས་དེར་ཡང་དེ་དག་ཐམས་ཅད་ཀྱིས་བསྡོམས་ཏེ་ཏྲོན་བྱས་སོ། །དེའི་ཕྱི་དེ་ཉིན་པར་བཅུ་བདུན་སྡེ་ལས་ཅིག་ལ་དགེ་བསྐོས་བབ་ནས་དེའི་ཉིན་མོ་ཡང་ཐམས་ཅད་ཀྱིས་གཙུག་ལག་ཁང་བརྒྱན་ཏེ་འཁོད་དོ། །དེ་ནས་དགེ་བསྐོས་ཏྲོན་བྱེད་པའི་ཚེ་བཅུ་བདུན་སྡེ་ལས་ཅིག་ལ་བློ་བྱུང་བ་བདག་ནི་ཆད་ཀྱིས་ཉལ་ལོ། །མི་བཅུ་དྲུག་གིས་ཅིའི་ཕྱིར་ཏྲོན་མི་ནུས་སྙམ་མོ། །དེ་དེ་བཞིན་དུ་རེ་རེ་ལ་ཡང་བློ་དེ་ལྟ་བུ་བྱུང་ནས་གཞན་བཅུ་དྲུག་པོ་ཐམས་ཅད་སོ་སོར་ཉལ་དུ་དོང་ངོ ། །དགེ་བསྐོས་དེ་འབའ་ཤིག་གཅིག་པུས་མཚན་ཐོག་ཐག་ལས་བྱས་ཏེ་མཚན་མོ་ནམ་ནངས་པ་དང་མར་མེའི་ཀོང་བུ་དག་བསྡུས། སྒོ་དག་ཕྱེ། གཙུག་ལག་ཁང་ཆག་ཆག་བཏབ་བྱུག་པ་བྱས་ཏེ་དུས་ཤེས་པར་བྱས་ནས་སྟན་བཤམས་ཤིང་མཆོད་རྟེན་གྱི་འཁོར་སར་བདུག་སྤོས་བྲིམས་ཏེ་གཙུག་ལག་ཁང་གི་སྟེང་དུ་འགྲེང་ནས་གཎ་ཌཱི་བརྡུང་བར་བརྩམས་སོ། །དེ་ནས་བཅུ་དྲུག་པོ་དེ་གཎ་ཌཱི་འི་སྒྲས་སད་ནས་རང་རང་གིས་གནས་ཁང་དག་ནས་ལྷུང་བཟེད་ཐོགས་ཏེ་བྱུང་བ་དང ། དེ་དག་གིས་དགེ་བསྐོས་དེ་གཅིག་པུ་ཕར་རྒྱུག་ཚུར་རྒྱུག་ཅིང་འདུག་པ་མཐོང་ནས། དེ་དག་གིས་ཕན་ཚུན་སྨྲས་པ། ཚེ་དང་ལྡན་པ་དག་འདི་ཅིག་པུ་ཕར་རྒྱུག་ཚུར་རྒྱུག་ཅིང་འདུག་ན་ཡུ་བུ་ཅག་ལས་སུས་ཀྱང་འདིའི་གྲོགས་མ་བྱས་སམ། གཅིག་གིས་སྨྲས་པ། ཁོ་བོ་ལ་བློ་བྱུང་བ། བདག་ནི་ཆད་ཀྱིས་ཉལ་ལོ། །མི་བཅུ་དྲུག་གིས་ཅིའི་ཕྱིར་ཏྲོན་མི་ནུས་སྙམ་མོ། །དེ་བཞིན་དུ་གཞན་ཡང་དེ་སྐད་ཟེར། གཞན་དག་ཀྱང་དེ་སྐད་ཟེར་ཏེ། ཐམས་ཅད་ཀྱིས་དེ་སྐད་སྨྲས་སོ། །དེ་ནས་བཅུ་དྲུག་པོ་དག་གིས་སྨྲས་པ། ཚེ་དང་ལྡན་པ་དག་འདི་བདག་ཅག་གིས་འཕྲལ་གྱི་བྱ་བ་ཐམ་ཅད་ལ་ཐོག་མར་འགྲོ་བ་ཡིན་ན། བདག་ཅག་གི་འདིའི་གྲོགས
7.262a
མ་བྱས་པ་ནི་ཡུ་བུ་ཅག་གིས་མ་ལེགས་པ་བྱས་ཏེ་འདི་བདག་ཅག་ལ་གཤེ་བར་འགྱུར་གྱིས་ཟན་ཟོས་མ་ཐག་ཏུ་བཟོད་པ་གསོལ་བར་བྱའོ་ཞེས་དེ་དག་གིས་ཟན་ཟོས་ནས་བཟོད་པ་གསོལ་བར་བརྩམས་ཏེ། གཞོན་པ་རྣམས་ཀྱིས་ནི་དེའི་རྐང་པ་གཉིས་ལ་གཏུག་།རྒན་པ་རྣམས་ཀྱིས་ནི་མགུལ་ནས་འཁྱུད་དེ་ཚེ་དང་ལྡན་པ་བཟོད་པ་གསོལ་ལོ་ཞེས་བྱས་ན་དེ་ཅང་མི་སྨྲ་བ་ཉིད་དུ་འདུག་གོ་དེ་དང་ཆེས་བཤེས་པ་ཅིག་ཡོད་པ་དེས་ག་ག་ཚིལ་བྱས་པ་དང་དེས་རྒོད་པར་བརྩམས་ཏེ་བཟོད་དོ་ཞེས་ཀྱང་ཟེར་རོ། །དེ་དག་གིས་བསམས་པ། དེ་ནི་ཐབས་ལེགས་པ་ཡིན་ནོ་སྙམ་ནས་གཞན་གྱིས་ཀྱང་ག་ག་ཚིལ་བྱས་ཤིང་དེ་བཞིན་དུ་ཐམས་ཅད་ཀྱི་བར་གྱི་ག་ག་ཚིལ་བྱས་པ་དང ། དེ་རླུང་གྱེན་དུ་འཆུག་ཏེ་དུས་ལ་བབ་བོ། །དེ་དག་རྟད་ཅིང་མྱ་ངན་བྱ་བར་བརྩམས་པ་དང ། དགེ་སློང་རྣམས་ཀྱིས་སྨྲས་པ། ཀྱེ་བཅུ་བདུན་སྡེ་དག་ཅིའི་ཕྱིར་བརྟད་ཅིང་མྱ་ངན་བྱེད། དེ་དག་གིས་སྨྲས་པ། བདག་ཅག་སྔོན་ནི་བཅུ་བདུན་སྡེར་གྱུར་ན་ད་ནི་བཅུ་དྲུག་སྡེར་གྱུར་ཏེ། ཚང་པ་མཚུངས་པར་སྤྱོད་པ་ཡིད་དུ་འོང་བ་དང་བྲལ་ཞིང་ཕམ་པར་གྱུར་པའི་ལྟུང་བ་བྱུང་ངོ ། །དགེ་སློང་དེ་དག་གིས་མ་ལེགས་སོ་ཞེས་སྨྲས་ཏེ་དོང་ངོ ། །བཅུ་དྲུག་པོ་དེ་དག་ཀྱང་མཐའ་གཅིག་ཏུ་དོང་སྟེ་སེམས་ཁོངསུ་ཆུད་ཅིང་འཁོད་པ་དགེ་སློང་གཞན་དག་གིས་མཐོང་ནས་དགེ་སློང་དེ་དག་གིས་སྤྱོ་བར་བརྩམས་ཏེ། ཚེ་དང་ལྡན་པ་བཅུ་བདུན་སྡེ་འདི་དག་ནི་སོག་མའི་མེ་བཞིན་དུ་སྐད་ཅིག་གིས་འབར་ཞིང་སྐད་ཅིག་གིས་ཤི་བར་གྱུར་ཏེ། ཡིད་ཙམ་ཞིག་གིས་རྒོད་བག་བྱེད་ཅིང ། ཡིད་ཙམ་ཞིག་གིས་སེམས་ཁོངས་སུ་ཆུད་ཅིང་འཁོད་དོ་ཞེས་ཟེར་རོ། །དེ་དག་མྱ་ངན་གྱི་མེས་ཡིད་གདུངས་པས་ཡོངས་སུ་སྤྱོས་ཀྱང་ཅང་མི་སྨྲ་བར་སེམས་ཁོངས་སུ་ཆུད་ཅིང་འཁོད་དོ། །དེ་དག་སེམས་ཁོངས་སུ་ཆུད་ཅིང་འཁོད་པ་འཆར་ཀས་མཐོང་ནས་དེས་སྨྲས་པ། བཅུ་བདུན་སྡེ་དག་ཅིའི་ཕྱིར་སེམས་ཁོངས་སུ་ཆུད་ཅིང་འཁོད་དེ་དག་གིས་སྨྲས་པ། ཁོ་བོ་ཅག་ད་དུང་ཡང་བཅུ་བདུན་སྡེ་ཡིན་སྙམ་འམ། ཅིའི་ཕྱིར་མ་ཡིན། དེ་དག་གིས་སྐབས་དེ་རྒྱས
7.262b
པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་ལ་སོར་མོས་ག་ག་ཚིལ་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་བཅུ་བདུན་སྡེ་དག་ལ་སྨྲས་པ། དགེ་སློང་དག་ཁྱེད་སོར་མོས་ག་ག་ཚིལ་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་དུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། སོར་མོས་ག་ག་ཚིལ་བྱེད་ན་ལྟུང་བྱེད་དོ། །སོར་མོས་ག་ག་ཚིལ་བྱེད་ན་ཞེས་བྱ་བ་ནི་སོར་མོས་ག་ག་ཚིལ་བྱ་བའི་བསམ་པས་ལུས་ཀྱིས་ལས་དང ། ལུས་ཀྱིས་སྤྱོད་པ་དང ། ལུས་ཀྱི་གཡོ་བ་གང་ཡིན་པ་བྱེད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང་ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད་ཚོད་པར་བྱེད་ལྟུང་བར་བྱེད་པའོ་གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ་དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་ལ་སོར་མོ་གཅིག་གིས་ག
7.263a
ག་ཚིལ་བྱེད་ན་ལྟུང་བྱེད་དུ་འགྱུར་རོ། །སོར་མོ་གཉིས་དང ། གསུམ་དང ། བཞི་དང ། ལྔས་ག་ག་ཚིལ་བྱེད་ན་ཡང་ལྟུང་བྱེད་དུ་འགྱུར་རོ། །ཁུ་ཚུར་དང ། གྲུ་མོ་དང ། ཕྲག་པ་དང ། མགོ་དང ། གློ་དང ། རྒྱབ་དང ། རྐེད་པ་དང ། བརླ་དང ། བྱིན་པ་དང ། ཐ་ན་རྐང་པའི་མཐེ་བོས་ག་ག་ཚིལ་བྱེད་ན་ཡང་ལྟུང་བྱེད་དུ་འགྱུར་རོ། །རྨ་སྟོན་པ་དང ། སྦྲང་བུ་དང ། འབྲུམ་བུ་དང ། སྨེ་བ་དང ། སྤུའི་ཚངས་སྟོན་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ག་ག་ཚིལ་བྱེད་པའི་ལྟུང་བྱེད་དེ་དྲུག་བཅུ་རྩ་གསུམ་པ་རྫོགས་སོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅུ་བདུན་སྡེ་དག་ལས་ཚེ་དང་ལྡན་པ་ཉེ་བ་འཁོར་གྱིས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་པ་དེའི་ཚེ་ན་དེས་བསམས་པ། བདག་གི་ཚངས་པ་མཚུངས་པར་སྤྱོད་པ་འདི་དག་ལ་དགེ་བའི་རྩ་བ་ཅུང་ཟད་ཡོད་དམ་སྙམ་ན་དེས་ཡོད་པར་མཐོང་ངོ ། །སུ་ལ་རག་ལས་སྙམ་ན་བདག་ཉིད་ལ་རག་ལས་པར་མཐོང་ནས་དེ་བཅུ་དྲུག་པོ་གཞན་དག་གདུལ་བ་ལ་ལྟོས་པས་དེ་དག་གི་ཕྱི་བཞིན་ཕྱི་བཞིན་རྗེས་སུ་འབྲང་བ་ན་དེ་དག་གིས་སྨྲས་པ། ཚེ་དང་ལྡན་པ་དག་ཆུ་ཀླུང་གནས་ཅན་གྱི་ངོགས་སུ་ཆུའི་དོན་དུ་འདོང་ཞིང་དེར་ཁྲུས་ཀྱང་བྱའོ་ཞེས་དེ་དག་ཆུ་ཚགས་དང ། ཆུ་བུམ་ཐོགས་ཏེ་ཆུ་ཀླུང་གནས་ཅན་ག་ལ་བ་དེར་དོང་ནས། དེ་དག་སྨྲས་པ། ཚེ་དང་ལྡན་པ་དག་ཇི་ལྟ་ཇེ་ཁྲུས་བྱ་འམ། འོན་ཏེ་ཆུ་བཙག་པར་བྱ། དེ་དག་གིས་སྨྲས་པ། ཇེ་ཆུ་བཙག་པར་བྱ་སྟེ། དེའི་འོག་ཏུ་ཁྲུས་བྱའོ། །ཞེས་དེ་དག་གིས་ཆུ་བཙག་ནས་གོས་དག་མཐའ་གཅིག་ཏུ་ཕུད་དེ་ཁྲུས་བྱ་བར་བརྩམས་ནས་ཆུར་ཞུགས་ཏེ་དེ་དག་སྟེང་དུ་འབྱུང་བར་ཡང་བྱེད། འོག་ཏུ་ནུབ་པར་ཡང་བྱེད། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བར་ཡང་བྱེད། ཕ་རོལ་གྱི་འགྲམ་ནས་ཚུ་རོལ་གྱི་འགྲམ་དུ་འོང་བར་ཡང་བྱེད། རྒྱུན་ཕྱོགས་སུ
7.263b
འགྲོ་བར་ཡང་བྱེད། རྒྱུན་ལས་ཟློག་ཕྱོགས་སུ་འགྲོ་བར་ཡང་བྱེད། ཆུ་ལ་རྔ་བོ་ཆེའི་སྒྲ་འབྱིན་པར་ཡང་བྱེད། རྫ་རྔ་ཁ་གཅིག་པའི་སྒྲ་འབྱིན་པར་ཡང་བྱེད། ཆུ་ལ་གསེག་མ་འཁྲབ་པ་དང ། འཕེན་པར་ཡང་བྱེད། ཆུ་ལ་ཁོར་ཡུག་དང་རྡོ་རྗེ་ལྟ་བུ་ཡང་བྱེད། ཆུ་ལ་ཁྲོན་པ་དང ། དབའ་ཀློང་དང ། ཆུ་སྲུབས་འདྲེན་པ་ཡང་བྱེད། ཆུ་ལ་རྒོད་བག་དང ། ཕྱར་གཡེང་དང ། ལུས་སྒྱུར་བ་དག་ཀྱང་བྱེད་དོ། །ཚེ་དང་ལྡན་པ་ཉེ་བ་འཁོར་ཡང་ཤེས་བཞིན་དུ་ཁྲུས་བྱས་ཏེ་ཆུ་ཀླུང་གནས་ཅན་རྒལ་ནས་ཆོས་གོས་དག་བགོས་ཏེ་སྡོད་དོ། །དེའི་ཚེ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་བཙུན་མོ་ཕྲེང་ལྡན་མ་དང་ལྷན་ཅིག་འདུག་པས་ཇི་ཙམ་ན་བཅུ་བདུན་སྡེ་དག་ཆུ་ལ་རྩེ་བས་རྩེ་བ་མཐོང་ངོ ། །མཐོང་ནས་ཀྱང་དེས་བཙུན་མོ་ཕྲེང་ལྡན་མ་ལ་སྨྲས་པ། ཕྲེང་ལྡན་མ་ཡོན་གནས་དག་གི་མཛེས་པ་ལ་ལྟོས་ཤིག་ལྟོས་ཤིག་།ཕྲེང་ལྡན་མས་སྨྲས་པ། ལྷ་དེ་ནི་ངོ་མཚར་མི་ཆེ་སྟེ། ལང་ཚོ་གསར་དུ་གྱུར་ནས་ཚངས་པར་སྤྱད་པ་སྤྱོད་པ་ལགས་ཀྱི། ལྷ་བགྲེས་པའི་གནས་སྐབས་སུ་གྱུར་ཀྱང་ད་དུང་ཐུགས་མ་བྱུང་བ་ངོ་མཚར་ཆེ་ལགས་སོ། །རྒྱལ་པོ་སྐྱེངས་ནས་ཅང་མི་སྨྲ་བར་འདུག་གོ། །ཚེ་དང་ལྡན་པ་ཉེ་བ་འཁོར་གྱིས་ལ་ལ་ཞིག་མི་དགའ་བར་སེམས་དཔའ་མ་གྱུར་ཏམ་སྙམ་དུ་བསམས་ན། དེ་ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་མི་དགའ་བར་སེམས་པ་མཐོང་ངོ ། །མཐོང་ནས་ཀྱང་དེས་དེ་དག་ལ་སྨྲས་པ། ཚེ་དང་ལྡན་པ་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་མི་དགའ་བར་སེམས་ཀྱིས་བྱུང་ཤིག་དང་དེ་དགའ་བར་བྱའོ། །དེ་ནས་དེ་དག་བྱུང་སྟེ་གོས་དག་གྱོན་པ་ན་ཚེ་དང་ལྡན་པ་ཉེ་བ་འཁོར་མོས་པ་ལས་བྱུང་བའི་ཏིང་ངེ་འཛིན་ལ་སྙོམས་པར་ཞུགས་ནས། འདི་ལྟར་དེ་དག་ཐམས་ཅད་ཆུ་ཚགས་དང་ཆུ་བུམ་དང་བཅས་ཏེ་སྟེང་གི་ནམ་མཁའ་ལ་ངང་པའི་རྒྱལ་པོ་འདབ་མ་བརྐྱང་བ་ལྟར་འཕགས་ཏེ་དོང་ངོ ། །དེ་དག་སྟེང་གི་ནམ་མཁའ་ལ་འདོང་བའི་གྲིབ་མ་ཀོ་ས་ལར་བྱུང་བའི
7.264a
རྒྱལ་པོ་གསལ་རྒྱལ་གྱི་སྟེང་གི་ཁང་བཟངས་ཀྱི་གཞིར་བབ་ནས་བཙུན་མོ་ཕྲེང་ལྡན་མས་དེ་དག་སྟེང་གི་ནམ་མཁའ་ལ་ངང་པའི་རྒྱལ་པོ་འདབ་མ་བརྐྱང་བ་ལྟར་འཕགས་ཏེ་འདོང་བ་མཐོང་ནས་དེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷ་ཡོན་གནས་དག་གི་མཛེས་པ་ལ་གཟིགས་ཤིག་གཟིགས་ཤིག་།རྒྱལ་པོས་སྨྲས་པ། ཕྲེང་ལྡན་མ་དགྲ་བཅོམ་པ་ཟག་པ་ཟད་པ་དག་ཆུ་ལ་ཕྱར་གཡེང་གིས་རྩེ་བར་འགྱུར་བ་དེ་ནི་གནས་མ་ཡིན་སྐབས་མ་ཡིན་ཏེ། དེ་ནི་གནས་མེད་དོ། །ཕྲེང་ལྡན་མས་སྨྲས་པ། ལྷས་དེ་ནི་གསན་ན་བཅོམ་ལྡན་འདས་ཀྱིས་འདི་ན་ངས་དགེ་སློང་འདུག་པ་ན་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་པར་མཐོང་ལ། དེ་ཉིད་ལངས་པ་ན་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་བར་ཡང་མཐོང་ངོ ། །དགེ་སློང་དག་དེ་ལྟ་བས་ན་སེམས་ནི་གློག་དང་འདྲ་ལ། ཏིང་ངེ་འཛིན་ནི་རྡོ་རྗེ་དང་འདྲ་བས་ཉོན་མོངས་པ་རྣམས་ནི་ཡེ་ཤེས་ཀྱིས་འཇོམས་སོ་ཞེས་གསུངས་པ་དེ་མ་གསན་ཏམ། རྒྱལ་པོ་ཐོས་པ་ཉུང་བས་དེ་ཅང་མི་སྨྲ་བར་འདུག་གོ། །ཕྲེང་ལྡན་མས་ཀྱང་བསམས་པ། དགྲ་བཅོམ་པ་ཟག་པ་ཟད་པ་དག་ཆུ་ལ་ཕྱར་གཡེང་གིས་རྩེ་བ་དེ་ནི་གནས་མ་ཡིན་སྐབས་མ་ཡིན་ཏེ། དེ་ནི་གནས་མེད་དོ་སྙམ་ནས། དེ་ནས་བཙུན་མོ་ཕྲེང་ལྡན་མས་མི་ཞིག་ལ་སྨྲས་པ། ཀྱེ་ནང་རྗེ་ཁྱོད་ཚུར་ཤོག་།བཅོམ་ལྡན་འདས་ག་ལ་བ་དེར་སོང་ལ་ཕྱིན་པ་དང ། ཁོ་མོའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚོལ་ལ། འདི་སྐད་ཅེས་བཙུན་མོ་ཕྲེང་ལྡན་མའི་མཆིད་ནས། བཙུན་པ་འཕགས་པ་འདི་དག་ཆབ་ལ་ཕྱར་གཡེང་གིས་རྩེ་བར་བགྱིད་པས་རྒྱལ་པོ་གློ་བ་མི་དགའ་བར་སེམས་ན། ཀྱེ་མ་བཅོམ་ལྡན་འདས་ཀྱིས་གང་གིས་འཕགས་པ་དག་ཆབ་ལ་ཕྱར་གཡེང་གིས་རྩེ་བར་མི་འགྱུར་བ་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ཞེས་མཆིའོ་ཞེས་གསོལ་ཅིག་།མི་དེས་ཇོ་མོ་བཀའ་བཞིན་འཚལ་ཞེས་བཙུན་མོ་ཕྲེང་ལྡན་མ་ལས་མཉན་ནས
7.264b
བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འདུག་གོ། །མཐའ་ཅིག་ཏུ་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཙུན་མོ་ཕྲེང་ལྡན་མ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ལོ། །བཙུན་མོ་ཕྲེང་ལྡན་མ་དང ། ཁྱོད་བདེ་བར་གྱུར་ཅིག་།བཙུན་པ་བཙུན་མོ་ཕྲེང་ལྡན་མའི་མཆིད་ནས་འཕགས་པ་འདི་དག་ཆབ་ལ་ཕྱར་གཡེང་གིས་རྩེ་བར་བགྱིད་པས་རྒྱལ་པོ་གློ་བ་མི་དགའ་བར་སེམས་ན། ཀྱེ་མ་བཅོམ་ལྡན་འདས་ཀྱིས་གང་གིས་འཕགས་པ་དག་ཆབ་ལ་ཕྱར་གཡེང་གིས་རྩེ་བར་མི་འགྱུར་བའི་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ཞེས་མཆིའོ། །བཅོམ་ལྡན་འདས་ཀྱིས་མི་དེ་ལ་ཅང་མི་གསུང་བས་གནང་ངོ ། །དེ་ནས་མི་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་བཅུ་བདུན་སྡེ་དག་ལ་སྨྲས་པ། དགེ་སློང་དག་ཁྱེད་ཆུ་ལ་ཕྱར་གཡེང་གིས་རྩེ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ
7.265a
སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཆུ་ལ་རྩེ་ན་ལྟུང་བྱེད་དོ། །ཆུ་ལ་རྩེ་ན་ཞེས་བྱ་བ་ནི་ཆུ་ལ་རྩེ་བའི་བསམ་པས་ལུས་ཀྱི་ལས་དང ། ལུས་ཀྱི་སྤྱོད་པ་དང ། ལུས་ཀྱི་གཡོ་བ་བྱེད་ནའོ། །ལྟུང་བྱེད་དོ། །ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གཞི་དགུ་ལས་ཏེ། རྩེ་བར་བྱའོ། །རྩེར་གཞུག་པར་བྱའོ། །རྩེད་མོ་བྱའོ། །རྩེད་མོ་བྱེད་དུ་གཞུག་གོ། །དགའ་བར་བྱའོ། །དགའ་བར་བྱེད་དུ་གཞུག་གོ། །རྒོད་བག་བྱའོ། །འཕྱར་གཡེང་བྱའོ། །ལུས་བསྒྱུར་བར་བྱའོ་སྙམ་པའི་བསམ་པས་སོ། །དེ་ལ་ཇི་ལྟར་རྩེ་བར་བྱའོ་སྙམ་པའི་བསམ་པས་ཤེ་ན། དགེ་སློང་གིས་ཆུ་ལ་རྩེ་བའི་བསམ་པས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། ཆོས་གོས་གྱོན་པར་བྱེད། འགྲོ་བར་བྱེད་ཅིང་ཆོས་གོས་དག་བཞག་ནས་ཁྲུས་རས་གྱོན་པར་བྱེད། ཆུར་འཇུག་པར་བྱེད་ཅིང་འོག་ཏུ་ནུབ་པར་བྱེད་པ་ན་ལྟུང་བྱེད་དུ་འགྱུར་རོ། །སྟེང་དུ་འབྱུང་བར་བྱེད་ན་ལྟུང་བྱེད་དུ་འགྱུར་རོ། །སིམ་པར་འདོད་པའི་བསམ་པས་ནི་ལྟུང་བ་མེད་དོ། །ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བར་བྱེད་ན་ལྟུང་བྱེད་དུ་འགྱུར་རོ། །ཕ་རོལ་གྱི་འགྲམ་ནས་ཚུ་རོལ་གྱི་འགྲམ་དུ་འོང་ན་ལྟུང་བྱེད་དུ་འགྱུར་རོ། །རྒལ་བའི་བསམས་པས་ནི་ལྟུང་བ་མེད་དོ། །རྒྱུན་ཕྱོགས་སུ་རྩོལ་ན་ལྟུང་བྱེད་དུ་འགྱུར་རོ། །རྒྱུན་ལས་ཟློག་ཕྱོགས་སུ་རྩོལ་ན་ལྟུང་བྱེད་དུ་འགྱུར་རོ། །སློབ་པའི་བསམ་པས་ནི་ལྟུང་བ་མེད་དོ། །ཆུ་ལ་རྔ་བོ་ཆེ་རྡུང་ངམ། ཆུ་ལ་རྫ་རྔ་ཁ་གཅིག་པ་རྡུང་ངམ། ཆུ་ལ་གསེག་མ་འཁྲབ་བམ།
7.265b
ཆུ་ལ་ཁོར་ཡུག་བྱེད་དམ། ཆུ་ལ་རྡོ་རྗེ་བྱེད་དམ། ཆུ་ལ་ཆུ་སྲུབས་འདྲེན་ན་ལྟུང་བྱེད་དུ་འགྱུར་རོ། །ཐ་ན་ཆུ་ལ་བམ་ཏོལ་གྱིས་རྡེག་ན་ཉེས་བྱས་སུ་འགྱུར་རོ། །དགེ་སློང་གིས་བུམ་པ་དང ། ཕྲུ་བ་དང ། རིལ་བ་དང ། ཁམ་ཕོར་དུ་ཆུ་ལ་རྔ་བོ་ཆེ་རྡུང་བར་བྱེད་དམ། ཆུ་ལ་རྫ་རྔ་ཁ་གཅིག་པ་རྡུང་བར་བྱེད་དམ། ཐ་ན་བམ་ཏོལ་གྱིས་རྡེག་ན་ཉེས་བྱས་སུ་འགྱུར་རོ། །དགེ་སློང་གིས་སྲན་ཚོད་དང ། འུ་ཤ་དང ། ཐང་ཚ་བར་ཆུ་ལ་རྔ་བོ་ཆེ་རྡུང་བར་བྱེད་དམ། རྫ་རྔ་ཁ་གཅིག་པ་རྡུང་བར་བྱེད་དམ། ཐ་ན་བམ་ཏོལ་གྱིས་རྡེག་ན་ཉེས་བྱས་སུ་འགྱུར་རོ། །གྲངས་པར་འདོད་པའི་བསམ་པས་ནི་ལྟུང་བ་མེད་དོ། །དེ་ལྟར་རྩེ་བར་བྱའོ་སྙམ་པའི་བསམ་པས་སོ། །རྩེར་གཞུག་གོ་སྙམ་པའི་བསམ་པ་ལ་སོགས་པ་ལྷག་མ་རྣམས་ལ་ཡང་དེ་བཞིན་ནོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཆུ་ལ་རྩེ་བའི་ལྟུང་བྱེད་དེ་དྲུག་བཅུ་རྩ་བཞི་པ་རྫོགས་སོ།། ་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མ་འགགས་པས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཤིང་དེས་རྣམ་པར་གྲོལ་བའི་བདེ་བ་ཉམས་སུ་མྱོང་བའི་ཚེ་དེ་འདི་སྙམ་དུ་སེམས་ཏེ། བཅོམ་ལྡན་འདས་དེ་ནི་བདག་ལ་ཕན་པ་མཛད་པ་ཡིན་ནོ། །བདེ་བར་གཤེགས་པ་དེ་ནི་བདག་ལ་ལེགས་པ་མཛད་པ་ཡིན་ཏེ། འདི་ལྟར་བཅོམ་ལྡན་འདས་དེ་ནི་བདག་གི་སྡུག་བསྔལ་གྱི་ཆོས་མང་པོ་སེལ་བར་མཛད་པ། བཅོམ་ལྡན་འདས་དེ་ནི་བདག་གི་བདེ་བའི་ཆོས་མང་པོ་སྒྲུབ་པར་མཛད་པ། བཅོམ་ལྡན་འདས་དེ་ནི་བདག་གི་སྡིག་པ་མི་དགེ་བའི་ཆོས་མང་པོ་སེལ་བར་མཛད་པ། བཅོམ་ལྡན་འདས་དེ་ནི་བདག་གི་དགེ་བའི་ཆོས་མང་པོ་སྒྲུབ་པར་མཛད་པ་ཡིན་ན
7.266a
བདག་གིས་དེ་ལ་ཇི་ཞིག་བྱས་ན་བདག་གིས་བཅོམ་ལྡན་འདས་ལ་ལན་བྱས་པ་དང ། ཉེ་བར་བྱས་པ་དང ། རབ་ཏུ་བྱས་པར་འགྱུར་སྙམ་ནས། ཡང་དེ་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་རྣམས་དཀའ་བ་མཛད་པ་བརྒྱ་སྟོང་དུ་མ་དག་གིས་བསྐལ་པ་གྲངས་མེད་པ་གསུམ་གྱིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་པ་གང་ཡིན་པ་དེ་དག་ཐམས་ཅད་ནི་སེམས་ཅན་གྱི་དོན་གྱི་ཕྱིར་ཡིན་པས་བདག་གིས་ཀྱང་གདུལ་བའི་བྱ་བ་ཅུང་ཞིག་བྱའོ་སྙམ་མོ། །དེ་ནས་ཚེ་དང་ལྡན་པ་མ་འགགས་པ་ཕྱེམ་བྲེད་ན་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མ་འགགས་པས་འདི་སྐད་ཅེས་གསོལ་ཏོ། །བཙུན་པ་བདག་ལྗོངས་རྒྱུར་མཆི་བར་འཚལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མ་འགགས་པའི་སེམས་ཐུགས་ཀྱིས་མཁྱེན་ནས་ཚེ་དང་ལྡན་པ་མ་འགགས་པ་ལ་འདི་སྐད་ཅེས་བཀའ་སྩལ་ཏོ། །མ་འགགས་པ་ཁྱོད་སོང་ལ་སེམས་ཅན་མ་རྒལ་བ་རྣམས་ནི་སྒྲོལ་ཅིག་།མ་གྲོལ་བ་རྣམས་ནི་ཁྲོལ་ཅིག་།དབུགས་མ་ཕྱིན་པ་རྣམས་ནི་དབུགས་ཕྱུང་ཤིག་།ཡོངས་སུ་མྱ་ངན་ལས་མ་འདས་པ་རྣམས་ནི་ཡོངས་སུ་མྱ་ངན་ལས་ཟློས་ཤིག་།དེ་ནས་ཚེ་དང་ལྡན་པ་མ་འགགས་པས་བཅོམ་ལྡན་འདས་ཀྱི་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་མ་འགགས་པ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ
7.266b
ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱོད་པའི་གནས་མལ་མཁོས་སུ་ཕབ་ནས་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུར་སོང་ངོ ། །རི་བྲགས་ཤིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་གཉིས་དང ། བུ་མོ་གཅིག་ཡོད་ནས་དེས་བུ་དེ་གཉིས་ཀྱི་ཁྱིམ་ཕུབ་ཅིང་བུ་མོ་དེ་ཡང་བག་མར་བཏང་ངོ ། །དུས་གཞན་ཞིག་ན་ཁྱིམ་བདག་དེ་ཡང་དུས་ལ་བབ། དེའི་བུ་མོ་དེ་ཡང་ཁྱོ་ཤི་བར་གྱུར་ནས་མིང་པོ་གཉིས་ཀྱི་ཁྱིམ་དུ་གནས་པར་བརྩམས་ཤིང་དེ་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་པར་བྱེད་དོ། །རི་བྲགས་དེ་ན་དེའི་མིང་པོ་དེ་གཉིས་གཙོ་བོར་གྲགས་པ་ཡིན་ཏེ། གང་གི་ཚེ་དེ་གཉིས་འགའ་ཞིག་དང་ལྷན་ཅིག་འཐབ་པ་དེའི་ཚེ་ན་འཐབ་ཟླ་དེ་ན་རེ་ཁྱོད་གཉིས་ཀྱང་སྨྲ་འམ། ཁྱེད་གཉིས་ཀྱི་སྲིང་མོ་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་དོ་ཞེས་ཟེར་རོ། །དེ་གཉིས་དོང་སྟེ་སྲིང་མོ་ལ་སྨྲས་པ། སྲིང་མོ་ཁོ་བོ་ཅག་གཉིས་མི་དང་འཐབ་པ་ན་དེ་ན་རེ་ཁྱེད་གཉིས་ཀྱང་སྨྲ་འམ། ཁྱོད་གཉིས་ཀྱི་སྲིང་མོ་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་པར་བྱེད་དོ་ཞེས་ཟེར་རོ། །སྲིང་མོས་སྨྲས་པ། མིང་པོ་གཉིས་བདག་ནི་ཚུལ་ཁྲིམས་དང་ལྡན་པ་ལགས་ན་སྐྱེ་བོ་བརྫུན་མ་དག་བདག་ལ་སྐུར་པ་མཆིའོ། །དུས་གཞན་ཞིག་ན་དེ་ལ་སེམས་ཅན་ཞུགས་པར་གྱུར་ཏེ་མངལ་ན་གནས་པའི་མཚན་མ་དག་ཀྱང་བྱུང་ནས་མིང་པོ་གཉིས་ཀྱིས་དེ་ལ་སྨྲས་པ། སྲིང་མོ་ཁྱོད་ན་རེ་བདག་ནི་ཚུལ་ཁྲིམས་དང་ལྡན་པ་ལགས་ན་སྐྱེ་བོ་བརྫུན་མ་དག་སྐུར་པ་མཆིའོ་ཞེས་ཟེར་ན་འདི་ག་ལས་བྱུང ། སྲིང་མོས་སྨྲས་པ། མིང་པོ་གཉིས་འདི་ནི་སེམས་ཅན་སྤྱི་རྡོལ་ཅན་ཞིག་ནན་གྱིས་བདག་གི་མངལ་དུ་ཞུགས་པ་ལགས་སོ། །དུས་གཞན་ཞིག་ན་དེ་བཙས་པ་ལས་ཁྱེའུ་ཞིག་བྱུང་ནས་དེའི་ཉེ་དུ་དག་འདུས་ཤིང་ལྷགས་ཏེ་ཁྱེའུ་འདིའི་མིང་ཅིར་གདགས་ཤེས་དེའི་མིང
7.267a
འདོགས་པར་བྱེད་པ་ན་དེ་དག་འདི་སྙམ་དུ་སེམས་ཏེ། ཁྱེའུ་འདི་མ་བཙས་པ་ཁོ་ན་ནས་མས་སྤྱི་རྡོལ་ཅན་ཞེས་བྱ་བའི་ཚིག་ཀུན་དུ་བརྗོད་པས་ཁྱེའུ་འདིའི་མིང་སྤྱི་རྡོལ་ཅན་དུ་གདགས་སོ་ཞེས་ཁྱེའུ་དེའི་མིང་སྤྱི་རྡོལ་ཅན་ཞེས་བྱ་བར་བཏགས་སོ། །དེའི་མ་ཡང་སྤྱི་རྡོལ་ཅན་གྱི་མ་ཞེས་བྱ་བའི་མིང་དུ་གྱུར་ནས། མིང་པོ་གཉིས་ཀྱིས་དེ་གནས་གཞན་དུ་བཞག་གོ། །ཚེ་དང་ལྡན་པ་མ་འགགས་པ་ལྗོངས་རྒྱུ་ཞིང་འགྲོ་བ་ན་རི་བྲགས་དེར་ཕྱིན་ནས་དེས་དེར་བསྟི་གནས་བརྙས་པ་དང ། ཁྱེའུ་དག་ཅིག་རྩེ་ཞིང་འཁོད་པ་དེ་དག་གིས་དེ་ལ་སྨྲས་པ། འཕགས་པ་སྤྱི་རྡོལ་ཅན་གྱི་མ་ལ་བསྟི་གནས་གཡོར་ཅིག་དང ། དེ་ཁྱོད་ལ་བསྟི་གནས་འབུལ་བར་འགྱུར་རོ། །དགྲ་བཅོམ་པ་རྣམས་ཀྱི་ཆོས་ཉིད་ནི་མ་བསམས་པར་ཤེས་པ་དང་མཐོང་བ་མི་འཇུག་པས་དེ་དེར་སོང་སྟེ་བསྟི་གནས་བརྙས་པ་དང ། དེས་དེ་ལ་བསྟི་གནས་ཕུལ་ཏེ་སྟན་བཤམས་ནས་འདིར་བཞུགས་ཤིག་ཅེས་སྨྲས་སོ། །དེ་དེར་འདུག་པ་དང་དེས་དེའི་རྐང་པ་བཀྲུ་བའི་ཆུ་ཁྱེར་ཏེ་འོངས་ནས་སྨྲས་པ། འཕགས་པ་ཞབས་བཀྲུ་བར་བགྱིའོ། །ཚེ་དང་ལྡན་པ་མ་འགགས་པས་སྨྲས་པ། ཁོ་བོ་ནི་བུད་མེད་ཀྱིས་རྐང་པ་མི་འཁྲུའོ། །དེས་བསམས་པ། རབ་ཏུ་བྱུང་བ་དག་ལ་འདི་ལྟ་བུའི་བརྟུལ་ཞུགས་ཡང་དག་པར་བླངས་པ་ཡོད་དོ་སྙམ་ནས་དེས་དེའི་རྐང་པ་བསྐུ་བ་ཁྱེར་ཏེ་འོངས་ནས་སྨྲས་པ། འཕགས་པ་ཞབས་བསྐུ་བར་བགྱིའོ། །ཚེ་དང་ལྡན་པ་མ་འགགས་པས་སྨྲས་པ། ཁོ་བོ་ནི་བུད་མེད་ཀྱིས་རྐང་པ་མི་སྐུད་དོ། །དེས་བསམས་པ། རབ་ཏུ་བྱུང་བ་དག་ལ་འདི་ལྟ་བུའི་བརྟུལ་ཞུགས་ཡང་དག་པར་བླངས་པ་ཡོད་དོ་སྙམ་ནས། དེས་ཟན་ཁྱེར་ཏེ་འོངས་ནས་སྨྲས་པ། འཕགས་པ་བཤོས་གསོལ་ཅིག་།ཚེ་དང་ལྡན་པ་མ་འགགས་པས་སྨྲས་པ། ཁོ་བོ་ནི་དུས་མ་ཡིན་པར་མི་ཟའོ། །དེས་བསམས་པ། རབ་ཏུ་བྱུང་བ་དག་ལ་བརྟུལ་ཞུགས་འདི་ལྟ་བུ་ཡང་དག་པར་བླངས་པ་ཡོད་དོ་སྙམ་ནས།
7.267b
དེས་དེའི་མལ་བཤམས་པ་དང ། ཚེ་དང་ལྡན་པ་མ་འགགས་པ་མལ་དེར་སྐྱིལ་མོ་ཀྲུང་བཅས་ནས་ལུས་དྲང་པོར་བསྲང་སྟེ་དྲན་པ་མངོན་དུ་ཕྱོགས་པར་བཞག་ནས་འདུག་གོ། །དེ་དེའི་གན་དུ་འོངས་ཏེ། བུད་མེད་ཀྱི་གཡོ་དག་དང ། བུད་མེད་ཀྱི་གྱ་གྱུ་དག་དང ། བུད་མེད་ཀྱི་ཡ་ཡོ་དག་དང ། བུད་མེད་ཀྱི་སྒྱུ་གང་དག་ཡིན་པ་དེ་དག་ཉེ་བར་བསྟན་པར་བརྩམས་པ་དང ། ཚེ་དང་ལྡན་པ་མ་འགགས་པ་དབང་པོ་དག་འབེབས་པར་བྱེད་དོ། །དེས་བསམས་པ། འདི་ཆད་པས་རེ་ཤིག་ཉལ་དུ་བཅུག་སྟེ་ནམ་ཕྱེད་ན་འགྲོ་བར་བྱའོ་སྙམ་ནས། དེ་ནམ་ཕྱེད་ན་སོང་སྟེ་དེ་བཞིན་དུ་བུད་མེད་ཀྱི་གཡོ་དག་དང ། བུད་མེད་ཀྱི་གྱ་གྱུ་དག་དང ། བུད་མེད་ཀྱི་ཡ་ཡོ་དག་དང ། བུད་མེད་ཀྱི་སྒྱུ་གང་དག་ཡིན་པ་དེ་དག་བསྟན་པར་བརྩམས་པ་དང ། ཚེ་དང་ལྡན་པ་མ་འགགས་པ་དབང་པོ་དག་འབེབས་པར་བྱེད་དོ། །དེས་བསམས་པ། སྐྱེས་བུ་འདི་ལྟ་བུ་དང་ནི་ཤིན་དུ་ཐག་རིང་དུ་སོང་ཡང་ལྷན་ཅིག་དགའ་མགུར་སྤྱད་པར་བྱ་བ་ཡིན་ན་གང་གིས་འདི་བདག་གི་དབང་དུ་འགྱུར་བའི་ཐབས་ཅི་ཡོད་སྙམ་ནས། དེས་བསམས་པ། བུད་མེད་ཀྱི་ཡུལ་གྱི་རེག་པ་ནི་དུག་ཡིན་པས་བདག་གིས་འཁྱུད་ན་འདི་བདག་གི་དབང་དུ་འགྱུར་རོ། །སྙམ་ནས་དེས་འཁྱུད་པར་བརྩམས་པ་དང ། ཚེ་དང་ལྡན་པ་མ་འགགས་པ་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་བུད་མེད་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་ཚེ་དང་ལྡན་པ་མ་འགགས་པའི་རྐང་པ་གཉིས་ཀྱི་དྲུང་དུ་སྒྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་སུག་པ་ནས་དྲང་བ་སྩལ་དུ་གསོལ། ཚེ་དང་ལྡན་པ་མ་འགགས་པ་བུད་མེད་དེ་ལ་རྗེས་སུ
7.268a
སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་བུད་མེད་དེས་ཚེ་དང་ལྡན་པ་མ་འགགས་པའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྟན་ཤིན་དུ་དམའ་བ་ཞིག་བླངས་ནས་ཆོས་མཉན་པའི་ཕྱིར་དེའི་མདུན་དུ་འདུག་གོ། །ཚེ་དང་ལྡན་པ་མ་འགགས་པས་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོངས་སུ་ཆུད་ནས་གང་ཐོས་ནས་བུད་མེད་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་བྱས་སོ། །དེས་བདེན་པ་མཐོང་ནས་སྨྲས་པ། བཙུན་པ་མ་འགགས་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་དག་གིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་སྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང ། ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་ནས་ནི་རྐང་པ་ཕྱུང ། ལྷ་དང ། མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་མ་འགགས་པ་བདག་ནི་མངོན་པར་ཞུགས་པ་ལགས་སོ། །བཙུན་པ་མ་འགགས་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་མ་འགགས་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན
7.268b
ལ་སྐྱབས་སུ་མཆིས། བདག་དགེ་བསྙེན་མར་གཟུང་དུ་གསོལ། དེང་སླན་ཅད་ཇི་སྲིད་འཚོའི་བར་དུ་གློ་བ་ཐག་པ་ནས་སྐྱབས་སུ་མཆིའོ། །བཙུན་པ་མ་འགགས་པ་དེའི་སླད་དུ་སང་འདི་ཉིད་དུ་གདུགས་ཚོད་གསོལ་བར་ཅི་གནང ། སྲིང་མོ་དམ་ཚིག་གིས་བཟའ་བར་བྱ་སྟེ། གལ་ཏེ་སྒོ་བཅད་དེ་སྦྱིན་པར་བྱེད་ན་བཟའོ། །དེས་སྨྲས་པ། ཆབ་སྒོ་བཀུམ་སྟེ་གསོལ་ལོ། །དེས་དེ་ཉིད་ཀྱི་མཚན་མོ་ཁ་ཟས་སྟ་གོན་བྱས་ནས་ནང་པར་སྔར་ལངས་ཏེ་སྟན་བཤམས་ནས་སྒོ་བཅད་དེ་གདུགས་ཚོད་ལ་བབ་པ་དང ། ཚེ་དང་ལྡན་པ་མ་འགགས་པ་བདེ་བར་འདུག་པར་རིག་ནས་བཅའ་བ་དང་གཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་བསྟབས་ཤིང་ཚིམ་པར་བྱས་ནས། ཚེ་དང་ལྡན་པ་མ་འགགས་པ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཚེ་དང་ལྡན་པ་མ་འགགས་པའི་མདུན་དུ་ཆོས་མཉན་པའི་ཕྱིར་འདུག་གོ། །དེའི་ཚེ་ན་དེའི་མིང་པོ་གཉིས་མི་ཞིག་དང་ལྷན་ཅིག་ཐབ་མོ་བྱུང་བ་ན་མི་དེ་ན་རེ་ཁྱེད་གཉིས་ཀྱི་སྨྲ་འམ། ཁྱེད་གཉིས་ཀྱི་སྲིང་མོ་ཡ་ཚན་ཅན་སྣ་ཚོགས་དང་ལྡན་པའི་མཆོད་སྦྱིན་བྱེད་པས་ཤཱཀྱའི་བུའི་དགེ་སྦྱོང་ཡང་མ་བཏང་སྟེ། ཤཱཀྱའི་བུའི་དགེ་སྦྱོང་ཁར་ཙང་ཞུགས་ན་ད་དུང་ཡང་མ་བྱུང་ངོ་ཞེས་ཟེར་རོ། །དེ་གཉིས་ཀྱིས་བསམས་པ། བདག་ཅག་གཉིས་གང་ཅུང་ཟད་མིས་བརྙས་པར་གྱུར་པ་དེ་ཐམས་ཅད་ནི་འདིའི་ལེ་ལན་ཡིན་གྱིས་དེ་གསད་དུ་འདོང་ངོ་སྙམ་ནས་རལ་གྲི་ཤུབས་ནས་ཕྱུང་སྟེ་དེའི་ཁྱིམ་ག་ལ་བ་དེ་ལོགས་སུ་ཕྱོགས་ཏེ་བརྒྱུགས་པ་དང ། སྲོག་ཆགས་བརྒྱ་སྟོང་ཕྲག་དུ་མ་དག་ཀྱང་ཁ་ཅིག་ནི་ལྟད་མོ་བསྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེ་གཉིས་ཀྱི་ཕྱི་བཞིན་ཕྱི་བཞིན་དུ་རྗེས་སུ་འབྲང་ངོ ། །དེ་ནས་ཚེ་དང་ལྡན་པ་མ་འགགས་པས་སྨྲས་པ། སྲིང་མོ་ཁོ
7.269a
བོ་ཕྱིར་འབྱུང་གིས་ཁྱོད་ཀྱིས་སྒོ་ཆོད་ཅིག་།དེ་ཕྱིར་ཕྱུང་བ་དང་དེས་སྒོ་བཅད་དོ། །དེ་ནས་ཚེ་དང་ལྡན་པ་མ་འགགས་པས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་དེ་གཉིས་ཤིང་ལྗོན་པ་རྩ་བ་ནས་བཅད་པ་བཞིན་དུ་ཚེ་དང་ལྡན་པ་མ་འགགས་པའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་ཅག་གི་སུག་པ་ནས་དྲང་བ་སྩལ་དུ་གསོལ། ཚེ་དང་ལྡན་པ་མ་འགགས་པ་དེ་གཉིས་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་དེ་གཉིས་ཀྱིས་ཚེ་དང་ལྡན་པ་མ་འགགས་པའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཚེ་དང་ལྡན་པ་མ་འགགས་པས་འཁོར་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་སྲོག་ཆགས་ཉི་ཁྲིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དང ། ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས། ཁ་ཅིག་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་ནི་རང་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད་པར་གྱུར་པ་དེ་ལྟར་ཆོས་བསྟན་པར་བྱས་ཏེ་འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་གྱུར་ཏོ། །དེ་ནས་ཚེ་དང་ལྡན
7.269b
པ་མ་འགགས་པས་འཁོར་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ནས་རི་བྲགས་གཞན་ཞིག་ག་ལ་བ་དེ་ལོགས་སུ་སོང་ངོ ། །རི་བྲགས་དེ་དང་ཧ་ཅང་མི་རིང་བ་ན་སྐྱེད་མོས་ཚལ་ཞིག་ཡོད་པ་དེར་མཚན་མོ་གནས་པར་ཁས་བླངས་ནས་དེ་སྐྱིལ་མོ་ཀྲུང་བཅས་ཏེ་འདུག་གོ། །ཆོམ་རྐུན་པ་རི་བྲགས་འཇོམ་པར་འདོད་པ་ལྔ་བརྒྱ་ཙམ་ཞིག་ཀྱང ། སྐྱེད་མོས་ཚལ་དེར་ཞུགས་ནས་དེ་ན་ཆོམ་རྐུན་པ་གཅིག་གིས་ཚེ་དང་ལྡན་པ་མ་འགགས་པ་སྡོང་དུམ་ཡིན་ནོ་སྙམ་ནས། དེའི་སྟེང་དུ་མདའ་དག་བཞག་སྟེ་ཆོམ་རྐུན་པ་དེས་མདའ་དག་ཕྱིར་བླང་བར་བརྩམས་པ་དང ། ཚེ་དང་ལྡན་པ་མ་འགགས་པས་སྨྲས་པ། བཞིན་བཟང་རྣ་སྦྲང་ཆོས་གོས་ལ་ཐོགས་ཀྱིས། ཆོས་གོས་རལ་བར་མི་འགྱུར་བར་དལ་བུས་ལོང་ཤིག་།དེས་སྨྲས་པ། ཁྱོད་སུ་ཞིག་།དགེ་སྦྱོང་ངོ ། །གང་དག་གིས། ཤཱཀྱའི་བུའི་དགེ་སྦྱོང་དག་གིའོ། །དེས་སྨྲས་པ། ཤེས་ལྡན་དག་བདག་ཅག་གིས་བཀྲ་མི་ཤིས་པ་མཐོང་གིས་གསད་པར་བྱའོ། །དེ་ན་དམག་དཔོན་གང་ཡིན་པ་དེ་ཚེ་དང་ལྡན་པ་མ་འགགས་པ་སྔོན་ཁྱིམ་ན་གནས་པའི་བྲན་དུ་གྱུར་ཅིང ། ཚེ་དང་ལྡན་པ་མ་འགགས་པས་འཕོང་གི་དཔོང་ས་གང་དུ་བསླབས་པ་དེར་དེས་ཀྱང་བསླབས་ཤིང་དེ་བཅད་པ་ལ་མཁས་པར་གྱུར་ཏོ། །གང་གི་ཚེ་ཚེ་དང་ལྡན་པ་མ་འགགས་པ་རབ་ཏུ་བྱུང་བ་དེའི་ཚེ་ན་དེ་ཡང་ཆོམ་རྐུན་པའི་ནང་དུ་ཞུགས་ཏེ། ཆོམ་རྐུན་པ་ལྔ་བརྒྱའི་དམག་དཔོན་དུ་གྱུར་པས་དེས་སྐད་ལས་ཚེ་དང་ལྡན་པ་མ་འགགས་པ་ངོ་ཤེས་ནས་དེས་སྨྲས་པ། འཕགས་པ་མ་འགགས་པ་མ་ལགས་སམ། བཞིན་བཟངས་སྐྱེ་བོ་དག་གིས་དེ་ལྟར་ཤེས་སོ། །དེས་སྨྲས་པ། ཤེས་ལྡན་དག་འདི་མ་བསད་ཅིག་།འདི་ནི་མི་སྐལ་པ་བཟང་པོ་རབ་ཏུ་བྱུང་བ་ཡིན་ཏེ། འདིའི་མིང་གིས་ཚོང་པ་དག་རྒྱ་མཚོ་ཆེན་པོ་ནས་ཀྱང་གྲུ་བོ་ཆེ་ལེགས་པར་གྲུབ་སྟེ་འོང་ངོ ། །ཇི་ལྟར་ཤེས
7.270a
གལ་ཏེ་བདག་ཅག་གིས་དོ་མོད་ཅི་ཡང་མི་ཐོབ་ན་དེའི་འོག་ཏུ་གཟོད་གསད་པར་བྱའི་ཐོབ་ན་གསད་པར་མི་བྱས་རེ་ཤིག་སྡོད་ཅིག་ཅེས་དེ་དག་གིས་དེའི་སྲུངས་མ་ཆོམ་རྐུན་པ་མི་བཞི་བཞག་སྟེ། འདི་བྲོས་པར་གྱུར་ཏ་རེ་ཞེས་བསྒོ་ནས་དེ་དག་འཇོམས་པར་འདོད་པས་རི་བྲགས་དེར་ཞུགས་སོ། །ཚེ་དང་ལྡན་པ་མ་འགགས་པས་སྲུང་མ་བཞི་པོ་དེ་དག་ལ་སྨྲས་པ། བཞིན་བཟངས་དག་རེ་ཤིག་གོ་ཕུད་ཅིག་།དེ་དག་གིས་སྨྲས་པ། ཁྱོད་འབྲོས་པར་འགྱུར་རོ། །ཁྱོད་ཅག་མི་བཞི་འཁོད་ན་ཁོ་བོ་ཇི་ལྟར་འབྲོས་པར་འགྱུར། དེ་དག་གིས་གོ་ཕུད་དེ་འཁོད་པ་དང ། ཚེ་དང་ལྡན་པ་མ་འགགས་པས་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་དེ་དག་གིས་སྟན་དེ་ཉིད་ལ་འདུག་བཞིན་དུ་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་གིས་བདེན་པ་མཐོང་ནས་སྨྲས་པ། བཙུན་པ་བདག་ཅག་གིས་དགེ་བའི་བཤེས་གཉེན་བཙུན་པ་ལ་བརྟེན་ནས་བཙུན་པས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱི་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས
7.270b
པའི་འབྲས་བུ་ནི་ཐོབ་སྟེ། བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་ནི་མངོན་པར་ཞུགས་པ་ལགས་ཏེ། བཙུན་པ་བདག་ཅག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །འཕགས་པ་བདག་ཅག་གི་གྲོགས་གཞན་དེ་དག་གིས་ཀྱང་ཆོས་འདི་ལྟ་བུ་དག་འཐོབ་པར་འགྱུར་རམ། ཁྱེད་ཅག་ལས་ཤས་ཆེར་རྟེན་པ་ཐམས་ཅད་ཀྱིས་འཐོབ་པར་འགྱུར་རོ། །ཚེ་དང་ལྡན་པ་མ་འགགས་པས་ཅི་ནས་ཀྱང་རི་བྲགས་དེ་ན་ཁྱི་གཅིག་ཀྱང་བསད་པར་མ་གྱུར་པ་དེ་ལྟ་བུ་བྱིན་གྱིས་བརླབས་ནས་ཆོམ་རྐུན་པ་དེ་དག་གིས་ལས་བྱས་ཏེ་ཕྱིར་ལྷགས་ནས། དེ་དག་གིས་མི་བཞི་པོ་དག་ལ་སྨྲས་པ། རབ་ཏུ་བྱུང་བ་དེ་ག་རེ། དེས་ཅི་བྱ། ཁོ་བོ་ཅག་གིས་ལས་བྱས་ཏེ། ལྷགས་པས་དེ་ལ་བསྙེན་བཀུར་བྱའོ། །ཚེ་དང་ལྡན་པ་མ་འགགས་པས་དེ་དག་ལ་སྨྲས་པ། བཞིན་བཟངས་དག་གོ་ཕུད་ལ་འཁོད་ཅིག་དང་ཁྱེད་ལ་ཆོས་བསྟན་པར་བྱའོ། །འཕགས་པ་བདག་ཅག་འཛིན་པ་མི་མཆི་འམ། མི་འོང་ངོ་དེ་དག་གིས་གོ་ཕུད་དེ། ཚེ་དང་ལྡན་པ་མ་འགགས་པའི་མདུན་དུ་ཆོས་མཉན་པའི་ཕྱིར་འཁོད་པ་དང ། ཚེ་དང་ལྡན་པ་མ་འགགས་པས་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་དེ་དག་གིས་སྟན་དེ་ཉིད་ལ་འདུག་བཞིན་དུ་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་གིས་བདེན་པ་མཐོང་ནས་སྨྲས་པ། བཙུན་པ་བདག་ཅག་གིས་དགེ་བའི་བཤེས་གཉེན་བཙུན་པ་ལ་བརྟེན་ནས་བཙུན་པས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས
7.271a
ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་བཅོམ་ལྡན་འདས་དང་ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །འཕགས་པ་བདག་ཅག་གིས་ད་ནི་གཞན་གྱི་ཏིལ་གྱི་ཕུབ་མ་ཙམ་ཡང་མ་བྱིན་པར་ལེན་པའི་རྔོ་མི་ཐོག་པས་རྫས་འདིས་ཅི་བགྱི། བཞིན་བཟངས་དག་དེ་ཉིད་དུ་དེང་ལ་ཞོག་ཤིག་།འཕགས་པ་བདག་ཅག་འཛིན་པ་མི་མཆི་འམ། ཅི་ཁྱེད་ཀྱིས་དེར་ཁྱི་ཅིག་ཙམ་ཡང་སད་པར་གྱུར་ཏམ། དེང་ལ་དེ་ཉིད་དུ་ཞོག་ཤིག་།དེ་དག་གིས་དེར་དོང་སྟེ་རྫས་དེ་དག་ཕྱིར་བཞག་གོ། །དེ་ནས་ཚེ་དང་ལྡན་པ་མ་འགགས་པ་ལ་མངོན་པར་དད་པའི་ལྷ་གང་ཡིན་པ་དེས་རི་བྲགས་དེར་སྨྲས་པ། ཁྱེད་མ་བཅོམ་པ་གང་ཡིན་པ་དེ་ཐམས་ཅད་ནི་འཕགས་པ་མ་འགགས་པའི་མཐུ་ཡིན་ཏེ། འཕགས་པ་མ་འགགས་པ་སྐྱེད་མོས་ཚལ་འདི་ན་བཞུགས་ཀྱིས་དེང་ལ་ཆོས་ཉོན་ཅིག་།དེ་ནས་སྲོག་ཆགས་བརྒྱ་ཕྲག་དུ་མ
7.271b
དག་ཁ་ཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན། དེ་ནས་ཕྱིར་འཐོན་ནས། འཕགས་པ་མ་འགགས་པ་ག་ལ་བ་དེར་དོང་སྟེ་ཕྱིན་ནས། འཕགས་པ་མ་འགགས་པའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཆོས་མཉན་པའི་ཕྱིར་འཕགས་པ་མ་འགགས་པའི་མདུན་དུ་འཁོད་དོ། །ཚེ་དང་ལྡན་པ་མ་འགགས་པས་འཁོར་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་སྲོག་ཆགས་ཁྲི་ཉི་སྟོང་གིས་སྟན་དེ་ཉིད་ལ་འདུག་བཞིན་དུ་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱས་པ་དང ། ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས། ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད་པ་དེ་ལྟར་ཆོས་བསྟན་པ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་གྱུར་ཏོ། །དེ་ནས་རིགས་ཀྱི་བུ་ལྔ་བརྒྱ་པོ་དེ་དག་གིས་ཚེ་དང་ལྡན་པ་མ་འགགས་པ་ལ་འདི་སྐད་ཅེས་སྨྲས་སོ། །བཙུན་པ་མ་འགགས་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་ན་བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །བཞིན་བཟངས་དག་ཚུར་ཤོག་དང ། བཅོམ་ལྡན་འདས་ཀྱིས་ཁྱེད་རབ་ཏུ་འབྱིན་པ་དང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་པར་མཛད་པར་འགྱུར་རོ། །དེ་ནས་ཚེ་དང་ལྡན་པ་མ་འགགས་པས་རིགས་ཀྱི་བུ་ལྔ་བརྒྱ་པོ་དེ་དག་ཁྲིད་ནས
7.272a
བཅོམ་ལྡན་འདས་ག་ལ་བ་དེར་སོང་ངོ ། །དེའི་ཚེ་ན་བཅོམ་ལྡན་འདས་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཆོས་སྟོན་པར་མཛད་དོ། །བཅོམ་ལྡན་འདས་ཀྱིས་ཚེ་དང་ལྡན་པ་མ་འགགས་པ་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་མ་འགགས་པ་ཐག་རིང་པོ་ཁོ་ན་ནས་འོང་བ་མཐོང་ངམ། བཙུན་པ་མཐོང་ངོ ། །དགེ་སློང་དག་མ་འགགས་པ་འདི་དེ་བཞིན་གཤེགས་པ་ལ་སྐྱེས་དང་བཅས་ཤིང་འོང་སྟེ། དེ་བཞིན་གཤེགས་པའི་སྐྱེས་ནི་འདི་ལྟར་གདུལ་བ་ལས་གཞན་པ་དེ་ལྟ་བུ་མེད་དོ། །དེ་ནས་ཚེ་དང་ལྡན་པ་མ་འགགས་པ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མ་འགགས་པས་འདི་སྐད་ཅེས་གསོལ་ཏོ། །བཙུན་པ་རིགས་ཀྱི་བུ་ལྔ་བརྒྱ་པོ་འདི་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཚལ་ན་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་དག་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་གིས་རབ་ཏུ་ཕྱུང་ཞིང་དགེ་སློང་དག་ཚུར་ཤོག་།ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང ། དེ་དག་བཅོམ་ལྡན་འདས་ཀྱི་བཀའི་འཇུག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང ། ལག་པ་ལྷུང་བཟེད་དང་བྱ་མ་བུམ་གྱིས་བྲེལ་བ་དང ། དགེ་སློང་རྫོགས་པར་བསྙེན་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །
7.272b
མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་བཅོམ་ལྡན་འདས་ཀྱིས་དེ་དག་ལ་གདམས་ངག་སྩལ་ཏེ། །གཅིག་པུ་དབེན་པ་བག་ཡོད་པ་རྟུལ་བ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དགེ་སློང་རྣམས་ཀྱིས་ཚེ་དང་ལྡན་པ་མ་འགགས་པ་ལ་དྲིས་པ། ཚེ་དང་ལྡན་པ་མ་འགགས་པ་ཇི་ལྟར་བདེ་བར་བརྒྱུས་སམ། ཚེ་དང་ལྡན་པ་དག་ཅུང་ཟད་བདེ་བར་ཡང་བརྒྱུས། ཅུང་ཟད་སྡུག་བསྔལ་བར་བརྒྱུས་སོ། །ཇི་ལྟར་བདེ་བར་བརྒྱུས། ཇི་ལྟར་སྡུག་བསྔལ་བར་བརྒྱུས། འདི་ལྟར་རེ་ཤིག་གདུལ་བའི་བྱ་བ་བྱས་པ་གང་ཡིན་པ་དེ་ནི་བདེ་བར་བརྒྱུས་པ་ཡིན་ནོ། །ཧད་པོར་དེའུ་བསད་པ་དེ་ནི་སྡུག་བསྔལ་བར་བརྒྱུས་པ་ཡིན་ནོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན
7.273a
པ་མ་འགགས་པ་ཁྱོད་བུད་མེད་ཀྱི་ཡུལ་དང་ལྷན་ཅིག་གནས་གཅིག་ཏུ་ཉལ་དུ་རུང་ངམ། གང་གི་ཕྱིར་མི་རུང་བ་དེ་ཉིད་ཀྱི་ཕྱིར་ཉེས་དམིགས་བྱུང་བར་གྱུར་ཏོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བུད་མེད་ཀྱི་ཡུལ་དང་ལྷན་ཅིག་གནས་གཅིག་ཏུ་ཉལ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་མ་འགགས་པ་ལ་རྨས་པ། མ་འགགས་པ་ཁྱོད་བུད་མེད་ཀྱི་ཡུལ་དང་ལྷན་ཅིག་གནས་གཅིག་ཏུ་ཉལ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང ། མི་སྦྱོར་བ་དང ། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང ། སྦྱོར་བ་དང ། བརྟགས་ཏེ་སྤྱོད་པའི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གནས་གཅིག་ཏུ་ཉལ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པ་ལའོ། །བུད་མེད་ཀྱི་ཡུལ་དང་ཞེས་བྱ་བ་ནི་བུད་མེད་དམ་གཞོན་ནུ་མ་མི་ཚངས་པར་སྤྱོད་པ་སྤྲོད་པ་ལས་བྱུང་བའི་ཆོས་སྟེན་ནུས་པ་དང་ངོ ། །ལྷན་ཅིག
7.273b
ཅེས་བྱ་བ་ནི་དེ་དང་དེའོ། །གནས་གཅིག་ཏུ་ཞེས་བྱ་བ་ནི་གནས་བཞི་པོ་ཐམས་ཅད་གཡོགས་ཤིང་བསྐོར་བ་དང ། ཐམས་ཅད་གཡོགས་ཤིང་ཕལ་ཆེར་བསྐོར་བ་དང ། ཕལ་ཆེར་གཡོགས་ཤིང་ཐམས་ཅད་བསྐོར་བ་དང ། ཕལ་ཆེར་གཡོགས་ཤིང་ཕལ་ཆེར་བསྐོར་བ་དག་ཏུའོ། །གནས་ཐམས་ཅད་གཡོགས་ཤིང་ཐམས་ཅད་བསྐོར་བ་ནི་གནས་ཁང་དང ། འཁོར་གྱི་ཁྱམས་དང ། ཁང་པ་རྩེགས་པ་དག་གོ། །ཐམས་ཅད་གཡོགས་ཤིང་ཕལ་ཆེར་བསྐོར་བ་ནི་སྒོ་བཅུ་པ་དང་སྒོ་བཅུ་གཉིས་པ་དག་གོ། །ཕལ་ཆེར་གཡོགས་ཤིང་ཐམས་ཅད་བསྐོར་བ་ནི་ཁྱམས་ངོས་བཞི་པ་དག་གོ། །ཕལ་ཆེར་གཡོགས་ཤིང་ཕལ་ཆེར་བསྐོར་བ་ནི་ཁྱམས་ངོས་གསུམ་པ་དང ། འཁོར་གྱི་ཁྱམས་དག་གོ། །ཉལ་ན་ཞེས་བྱ་བ་ནི་མཚན་མོ་གློས་ཕབ་སྟེ་ཉལ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ། །ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་བར་ཁང་ན་ཉལ་ཞིང་བུད་མེད་ཀྱི་ཡུལ་འོག་ཁང་ན་ཉལ་ན་དགེ་སློང་དེས་སྐས་བསྡུ་བར་བྱ་བ་འམ། སྒོ་གཏན་པས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྐས་སྡུད་པར་མི་བྱེད་དམ། སྒོ་གཏན་པས་གཅོད་པར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་སྟེང་ཁང་ན་ཉལ་ཞིང་བུད་མེད་ཀྱི་ཡུལ་བར་ཁང་ན་ཉལ་ན་དགེ་སློང་དེས་སྐས་བསྡུ་བར་བྱ་བ་འམ། སྒོ་གཏན་པས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྐས་སྡུད་པར་མི་བྱེད་དམ། སྒོ་གཏན་པས་གཅོད་པར
7.274a
མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ནས་ལྟུང་བྱེད་དུ་འགྱུར་རོ། །དགེ་སློང་བར་ཁང་ན་ཉལ་ཞིང་བུད་མེད་ཀྱི་ཡུལ་སྟེང་ཁང་ན་ཉལ་ན་དགེ་སློང་དེས་སྐས་བསྡུ་བར་བྱ་བ་འམ། སྒོ་གཏན་པས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྐས་སྡུད་པར་མི་བྱེད་དམ། སྒོ་གཏན་པས་གཅོད་པར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་འོག་ཁང་ན་ཉལ་ཞིང་བུད་མེད་ཀྱི་ཡུལ་བར་ཁང་ན་ཉལ་ན་དགེ་སློང་དེས་སྐས་བསྡུ་བར་བྱ་བ་འམ། སྒོ་གཏན་པས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྐས་བསྡུད་པར་མི་བྱེད་དམ། སྒོ་གཏན་པས་གཅོད་པར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་གནས་ཁང་ན་ཉལ་ཞིང་བུད་མེད་ཀྱི་ཡུལ་ཁྱམས་ན་ཉལ་ན་དགེ་སློང་དེས་སྒོ་གཏན་པས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྒོ་གཏན་པས་གཅོད་པར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན། ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་ཁྱམས་ན་ཉལ་ཞིང་བུད་མེད་ཀྱི་ཡུལ་གནས་ཁང་ན་ཉལ་ན་དགེ་སློང་དེས་སྒོ་ཕྱི་རོལ་ནས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྒོ་ཕྱི་རོལ་ནས་གཅོད་པར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་སྒོ་ཁང་ན་ཉལ་ཞིང་བུད་མེད་ཀྱི་ཡུལ་བང་རིམ་ན་ཉལ་ན། དགེ་སློང་དེས་སྒོ་ནང་ནས་གཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྒོ་ནང་ནས་གཅོད་པར་མི་བྱེད་དམ། སྲུང་བ
7.274b
དགེ་སློང་འཇོག་པར་མི་བྱེད་ན་ཇི་སྲིད་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །དགེ་སློང་བང་རིམ་དུ་ཉལ་ཞིང་བུད་མེད་ཀྱི་ཡུལ་སྒོ་ཁང་ན་ཉལ་ན་དགེ་སློང་དེས་སྒོ་ཕྱི་རོལ་ནས་བཅད་པར་བྱ་བ་འམ། སྲུང་བ་དགེ་སློང་གཞག་པར་བྱའོ། །སྒོ་ཕྱི་རོལ་ནས་གཅོད་པར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ལྟུང་བྱེད་དུ་འགྱུར་རོ། །ཁྱིམ་ཐབ་ཀྱིས་བསྲུངས་ན་ལྟུང་བ་མེད་དོ། །དགེ་སློང་བ་ལང་གི་ལྷས་སམ། ཕྱུགས་ལྷས་སུ་ཉལ་ན་དགེ་སློང་དེས་ཕྱོགས་དེ་རེ་ལྡེ་དག་གམ། སེག་དག་གམ། ཡོལ་བ་དག་གིས་བསྐོར་བར་བྱ་བ་འམ། སྲུང་བ་དགེ་སློང་གཞག་པར་བྱའོ། །ཕྱོགས་དེ་རེ་ལྡེ་དག་གམ། སེག་དག་གམ། ཡོལ་བ་དག་གིས་བསྐོར་བར་མི་བྱེད་དམ། སྲུང་བ་དགེ་སློང་འཇོག་པར་མི་བྱེད་ན་ཇི་སྲིད་དུ་སྐྱ་རེང་མ་ཤར་གྱི་བར་དུ་ཉེས་བྱས་སུ་འགྱུར་ལ། སྐྱ་རེང་ཤར་ན་ཡང་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་མ་འགགས་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས་ཏེ། དེས་གདུལ་བའི་བྱ་བ་དེ་སྙེད་བགྱིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་མ་འགགས་པ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་མ་འགགས་པ་ཉིད་ཀྱིས་ལས་བྱས་ཤིང་བསགས
7.275a
པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང ། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་བ་ན་འདི་དེའི་བསྟན་པ་ལ་རབ་ཏུ་བྱུང་བར་གྱུར་ནས་རི་བྲགས་ཤིག་ན་གཙུག་ལག་ཁང་ཞིག་ཡོད་པ་དེ་ན་འདི་ཞལ་ཏ་བྱེད་པར་གྱུར་ཅིང ། དེ་ལྷན་ཅིག་གནས་པ་དང ། ཉེ་གནས་ཀྱང་ལྔ་བརྒྱ་ཡོད། རི་བྲགས་དེ་ན་གནས་པའི་སྐྱེ་བོའི་ཚོགས་ཀྱང་ཕལ་ཆེར་དེ་ལ་མངོན་པར་དད་དོ། །དུས་གཞན་ཞིག་ན་དེ་ན་བར་གྱུར་ནས། དེ་ལ་ལྷན་ཅིག་གནས་པ་དང ། ཉེ་གནས་དག་གིས་དྲིས་པ། མཁན་པོ་ཁྱོད་ཀྱིས་ཡོན་ཏན་གྱི་ཚོགས་འགའ་ཞིག་ཐོབ་པ་མཆིས་སམ། དེས་སྨྲས་པ། འགའ་ཡང་མེད་དོ། །མཁན་པོས་སྨོན་ལམ་ཇི་ལྟར་བཏབ། ཁོ་བོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག
7.275b
པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ངེས་པར་སྐལ་བ་དང་ལྡན་པ་ཉིད་དུ་ལུང་བསྟན་པ་དེའི་གསུང་རབ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་པར་གྱུར་ཅིག་ཅེས་སྨོན་ལམ་བཏབ་བོ། །དེ་དག་གིས་སྨྲས་པ། བདག་ཅག་ཀྱང་མཁན་པོ་ལ་བརྟེན་ཏེ་བཅོམ་ལྡན་འདས་དེའི་གསུང་རབ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིད་པར་གྱུར་ཅིག་།རི་བྲགས་དེ་ན་གནས་པའི་སྐྱེ་བོའི་ཚོགས་དེས་དེ་ལྟར་འཕགས་པ་ནའོ་ཞེས་ཐོས་ནས་དེ་དག་དེའི་གན་དུ་སོང་སྟེ་དྲིས་པ། འཕགས་པས་ཡོན་ཏན་གྱི་ཚོགས་འགའ་ཞིག་ཐོབ་པ་མཆིས་སམ། འགའ་ཡང་མེད་དོ། །འཕགས་པས་སྨོན་ལམ་ཇི་ལྟར་བཏབ། ཁོ་བོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ངེས་པར་སྐལ་བ་དང་ལྡན་པ་ཉིད་དུ་ལུང་བསྟན་པ་དེའི་གསུང་རབ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག་ཅེས་སྨོན་ལམ་བཏབ་བོ། །དེ་དག་གིས་སྨྲས་པ། བདག་ཅག་ཀྱང་འཕགས་པ་ལ་བརྟེན་ཏེ་བཅོམ་ལྡན་འདས་དེའི་གསུང་རབ་ལ་བདེན་པ་དག་མཐོང་བར་གྱུར་ཅིག་།དགེ་སློང་དག་དེའི་ཚེ
7.276a
དེའི་དུས་ན་དགེ་སློང་ཞལ་ཏ་བྱེད་པར་གྱུར་པ་གང་ཡིན་པ་དེ་ནི་མ་འགགས་པ་འདི་ཡིན་ཏེ། འདིས་དེར་ཆོས་དང་ལྡན་པས་ཞལ་ཏ་བྱས་པའི་ལས་དེའི་རྣམ་པར་སྨིན་པས་ནི་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་སོ། །དེའི་ཚེ་དེའི་དུས་ན་དེའི་ལྷན་ཅིག་གནས་པ་དང ། ཉེ་གནས་ལྔ་བརྒྱ་པོ་གང་དག་ཡིན་པ་དེ་དག་ནི་དགེ་སློང་ལྔ་བརྒྱ་པོ་འདི་དག་ཡིན་ཏེ། འདི་དག་གིས་དེར་སྨོན་ལམ་དེ་སྐད་བཏབ་པའི་དབང་གིས་ད་ལྟར་མ་འགགས་པ་ལ་བརྟེན་ཏེ་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །དེའི་ཚེ་དེའི་དུས་ན་རི་བྲགས་དེ་ན་གནས་པའི་སྐྱེ་བོའི་ཚོགས་གང་དག་ཡིན་པ་དེ་དག་ནི་ད་ལྟར་རི་བྲགས་ན་གནས་པའི་སྐྱེ་བོའི་ཚོགས་འདི་དག་ཡིན་ཏེ། འདི་དག་གིས་དེར་སྨོན་ལམ་དེ་སྐད་བཏབ་པའི་དབང་གིས་ད་ལྟར་མ་འགགས་པ་ལ་བརྟེན་ཏེ་ངའི་གསུང་རབ་ལ་བདེན་པ་དག་མཐོང་བར་གྱུར་ཏོ། །བཙུན་པ་ཚེ་དང་ལྡན་པ་མ་འགགས་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ལྷའི་མིག་དང་ལྡན་པར་གྱུར། དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་བཞི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ལྡན་པ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཁོར་བ་འཇིག་ཅེས་བྱ་བ་འཇིག་རྟེན་དུ་བྱུང་སྟེ། དེས་སངས་རྒྱས་ཀྱི་མཛད་པ་མཐའ་དག་མཛད་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་ནས་རྒྱལ་པོ་མཛེས་པས་དེའི་མཆོད་རྟེན་རིན་པོ་ཆེ་སྣ་བཞི་ལས་བྱས་པ། རྒྱར་དཔག་ཚད་གཅིག་པ། འཕང་དུ་དཔག་ཚད་ཕྱེད
7.276b
པ་བྱེད་དུ་བཅུག་ནས་དེས་དེ་ལ་དུས་སྟོན་བྱ་བ་ཡང་བཤམས་སོ། །དེར་དུས་སྟོན་ལ་བབ་པ་ན་ཆོམ་རྐུན་པ་འཇོམས་པར་འདོད་པ་ལྔ་བརྒྱ་དེར་ལྷགས་ནས་དེ་ན་ཆོམ་རྐུན་པའི་དམག་དཔོན་གྱི་ལྷམ་རལ་ནས་དེ་དང་ཧ་ཅང་མི་རིང་བ་ན་དྲི་གཙང་ཁང་འདུག་པ་དེ་ན་མར་མེ་ཚོད་དུ་མི་གསལ་བར་འབར་བ་ཆོམ་རྐུན་པའི་དམག་དཔོན་དེས་མཐོང་ནས་དེ་དྲི་གཙང་ཁང་དེར་ཞུགས་ཏེ་ལྷམ་དྲུབ་པར་བརྩམས་པ་ན་མར་མེའི་འོད་ཚོད་དུ་མི་གསལ་བར་འབར་ནས་དེས་མར་མེའི་སྙིང་པོ་བསྐུལ་བ་དང ། མར་མེ་དེ་ཤིན་དུ་འོད་གསལ་བར་འབར་བར་གྱུར་ནས། ཇི་ཙམ་ན་དེས་སྐུ་གཟུགས་མཐོང་ངོ ། །མཐོང་ནས་ཀྱང་དེ་ཤིན་དུ་དད་པ་སྐྱེས་ནས་དེས་དབྱིག་གིས་མཆོད་པ་བྱས་ཏེ། བདག་གིས་དགེ་བའི་རྩ་བ་འདི་བདག་ལྷའི་མིག་དང་ལྡན་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་དེའི་ཚེ་དེའི་དུས་ན་ཆོམ་རྐུན་པའི་དམག་དཔོན་གང་ཡིན་པ་དེ་ནི་དགེ་སློང་མ་འགགས་པ་འདི་ཡིན་ཏེ། འདིས་མར་མེའི་སྙིང་པོ་བསྐུལ་ཅིང་སེམས་དད་པ་བསྐྱེད་པའི་ལས་དེའི་རྣམ་པར་སྨིན་པས་ལྷའི་མིག་དང་ལྡན་པར་གྱུར་ཏོ། །བཙུན་པ་ཚེ་དང་ལྡན་པ་མ་འགགས་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ལྷའི་མིག་ཅན་རྣམས་ཀྱི་མཆོག་ཏུ་བསྟན། དགེ་སློང་དག་དེ་ཡང་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ་དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས
7.277a
དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ལྷའི་མིག་ཅན་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ངེས་པ་ཉིད་དུ་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང ། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ལྷའི་མིག་ཅན་རྣམས་ཀྱིས་མཆོག་ཏུ་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ལྷའི་མིག་ཅན་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ལྷའི་མིག་ཅན་རྣམས་ཀྱི་མཆོག་ཏུ
7.277b
བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་དེ་ལྟར་ཁྱོད་ཀྱིས་བསླབ་པར་བྱའོ། །བུད་མེད་དང་ལྷན་ཅིག་ཉལ་བའི་ལྟུང་བྱེད་དེ་དྲུག་བཅུ་རྩ་ལྔ་པ་རྫོགས་སོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་དེ་དག་དྲུག་སྡེ་དག་ལ་སྟེན་པར་བྱེད། བསྙེན་པར་བྱེད། བསྙེན་བཀུར་བྱེད་དོ། །དེ་ནས་འཆར་ཀས་དེ་དག་ལ་སྨྲས་པ། བཅུ་བདུན་སྡེ་དག་ཚུར་ཤོག་འདི་དང་འདི་གྱིས་ཤིག་།དེ་དག་གིས་སྨྲས་པ། ཁྱོད་ཁོ་བོ་ཅག་གི་སློབ་དཔོན་ནམ། མཁན་པོ་ཡིན་ནམ་ཅི། མི་བྱེད་དོ། །འཆར་ཀས་སྨྲས་པ། གླེན་པ་དག་འོ་ན་གཞན་ཅི་བྱེད་ཅེས་དེས་དེ་དག་གཉའ་བ་དག་ནས་བཟུང་སྟེ་བསྐྲད་དོ། །དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་དྲུག་སྡེ་དག་གིས་གང་ཅུང་ཟད་བརྙས་པར་གྱུར་པ་དེ་དག་ཐམས་ཅད་ནི་བདག་ཅག་ཐོས་པ་ཉུང་བ་ལས་གྱུར་པ་ཡིན་གྱིས་བདག་ཅག་ཐོས་པ་འཛིན་དུ་འདོང་དང ། དེས་ན་ཕྱིན་ཅད་དྲུག་སྡེ་དག་ལ་ཅུང་ཟད་ཀྱང་དྲི་བར་མི་བྱའོ། །ཞེས་དེ་དག་དགེ་སློང་ཞིག་གི་གན་དུ་དོང་སྟེ་སྨྲས་པ། བཙུན་པ་བདག་ཅག་ཀློག་ཏུ་སྩོལ་ཅིག ། དེས་དེ་དག་ལ་ཐབས་ཡིན་ནོ་ཞེས་སྨྲས་ནས་དེ་དག་གིས་དེ་ལས་ཀླག་པར་བརྩམས་སོ། །ཉེ་དགས་སྨྲས་པ།
7.278a
བཙུན་པ་འཆར་ཀ་བཅུ་བདུན་སྡེ་དག་དེ་བར་བདག་ཅག་ལ་སྟེན་པར་མི་བྱེད། བསྙེན་པར་མི་བྱེད། བསྙེན་བཀུར་མི་བྱེད་དོ། །འཆར་ཀས་སྨྲས་པ། དེ་དག་ཁོ་བོས་བསྐྲད་ནས་ཐོས་པ་འཛིན་པར་བརྩམས་སོ། །བཙུན་པ་འཆར་ཀ་ཁྱོད་ཀྱིས་བདག་ཅག་གི་སྦྲུལ་ཉལ་བ་ལྕག་གིས་གཞུས་སོ། །ཇི་སྲིད་དུ་གླེན་པ་དེ་དག་ཐོས་པ་ཉུང་བར་གྱུར་པ་དེ་སྲིད་དུ་དེ་དག་བདག་ཅག་ལ་སྟེན་པར་བྱེད། བསྙེན་པར་བྱེད། བསྙེན་བཀུར་བྱེད་ཀྱི། གང་གི་ཚེ་དེ་དག་མང་དུ་ཐོས་པར་གྱུར་ཅིང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་དང ། གདུག་ཅིང་ཕ་རོལ་གནོན་པར་གྱུར་པ་དེའི་ཚེ་ན་དེ་དག་བདག་ཅག་ལ་གནོད་པ་བྱ་བར་སེམས་པར་འགྱུར་རོ། །འཆར་ཀས་སྨྲས་པ། ཁོ་བོས་ཅི་ནས་ཀྱང་དེ་དག་གིས་རྟོགས་པར་མི་འགྱུར་ཞིང ། རྟོགས་པ་ལས་ཀྱང་ཡོངས་སུ་ཉམས་པར་འགྱུར་བ་དེ་ལྟར་བྱའོ། །བཅུ་བདུན་སྡེ་དག་མེ་ཁང་དུ་མར་མེ་བཙུགས་ཏེ་ཁ་ཏོན་བྱ་བར་བརྩམས་པ་དང ། ཇི་ཙམ་ན་ཚེ་དང་ལྡན་པ་འཆར་ཀ་ལ་བ་ཞིག་སྤུ་ཕྱིར་བསྟན་ཏེ་གྱོན་ནས་མེ་ཁང་དུ་ཞུགས་ཏེ་མར་མེ་བསད་ནས་འབྱུང་པོའོ་འབྱུང་པོའོ། །ཞེས་སྨྲས་པ་དང ། དེ་དག་སྔངས་ཤིང་སྐྲག་ནས་མེ་ཁང་ནས་ཕྱིར་བྱུང་སྟེ་མཐའ་གཅིག་ཏུ་འཁོད་དོ། །དེ་དག་སློབ་དཔོན་གྱིས་མཐོང་ནས་དེས་སྨྲས་པ། གཞོན་ནུ་དག་ཅིའི་ཕྱིར་ཁ་ཏོན་མི་བྱེད་པར་ཁ་རོག་སྟེ་འཁོད། དེ་དག་གིས་སྨྲས་པ། སློབ་དཔོན་བདག་ཅག་མི་མ་ལགས་པས་གཙེས་སོ། །དེས་བསམས་པ། རྒྱལ་བྱེད་ཀྱི་ཚལ་གནོད་སྦྱིན་གོས་སྔོན་པོ་གྱོན་པ་ལྔ་བརྒྱས་རྟག་ཏུ་མི་སྟོང་བས་འདི་ན་མི་མ་ཡིན་པ་ཡོད་རེ་སྐན། ལྷུང་བཟེད་ནག་པོ་ཅན་གནས་ངན་ལེན་ཀུན་དུ་སྤྱོད་པ་འགའ་ཞིག་གིས་འདི་དག་བསྡིགས་སོ་སྙམ་ནས། དེས་སྨྲས་པ། གཞོན་ནུ་དག་ཁྱོད་ཅག་མི་མ་ཡིན་པ་དེ་འཛིན་པར་འདོད་དམ། དེ་དག་གིས་སྨྲས་པ། འཚལ་ལོ། །དེས་སྨྲས་པ། གཞོན་ནུ
7.278b
དག་མེ་ཁང་གི་གྲཝ་བཞིར་མར་མེ་བཙུགས་ཏེ་རྫ་མས་ཁོབ་ལ་དབུས་སུ་མར་མེ་བཙུགས་ཏེ་ཁ་ཏོན་གྱིས་ཤིག་དང ། གལ་ཏེ་དེ་འོངས་ཏེ་དབུས་ཀྱི་མར་མེ་བསད་ནས་འབྱུང་པོའོ་འབྱུང་པོའོ་ཞེས་ཟེར་བ་ན་སྒོ་ཆོད་ལ་མེ་ཁང་གི་གྲཝ་བཞིའི་མར་མེ་ཕྱེ་ལ་ཟུང་ཤིག་།དེ་དག་གིས་དེ་ལྟར་བྱས་པ་དང་ཇི་ཙམ་ན་ཚེ་དང་ལྡན་པ་འཆར་ཀ་ལ་བ་ཞིག་སྤུ་ཕྱིར་བསྟན་ཏེ་གྱོན་ནས་མེ་ཁང་དུ་ཞུགས་ཏེ་དབུས་ཀྱི་མར་མེ་བསད་ནས་འབྱུང་པོའོ་འབྱུང་པོའོ། །ཞེས་སྨྲས་པ། དེ་དག་གིས་སྒོ་བཅད་ནས་མེ་ཁང་གི་གྲཝ་བཞིའི་མར་མེ་ཕྱེ་སྟེ་བཟུང་ནས་བརྡེག་པར་བརྩམས་པ་དང ། དེས་སྨྲས་པ། འཆར་ཀའོ་འཆར་ཀའོ། །དེ་དག་གིས་སྨྲས་པ། ཁྱོད་ཀྱི་སྙིང་ལམ་ན་འཆར་ཀ་ཁོ་བོ་ཅག་གི་གྲོགས་ཡིན་པས་དེ་ཡིན་ནོ་ཞེས་བྱས་ན་བཏང་བར་འགྱུར་སྙམ་འམ། ཤི་དྲོད་ཀྱིས་མ་བཟུང་གི་བར་དུ་མི་གཏོང་ངོ ། །དེ་དག་གིས་སྨྲས་པ། ཚེ་དང་ལྡན་པ་དག་མི་མ་ཡིན་པ་ནི་ཤིན་དུ་ཆེན་པོ་ཞིག་བསད་ཀྱང་ཉེས་པ་སྦོམ་པོར་འགྱུར་བར་ཟད་པས་བདག་ཅག་གིས་ལྟུང་བ་མཐོལ་ཞིང་བཤགས་པར་བྱས། ཏེ་པོར་བརྡེག་གོ་ཞེས་དེ་དག་གིས་ཏེ་པོར་གཏལ་གཏལ་ཏེ་བཏང་ནས། འཆར་ཀ་འཕྱེས་འཁྲུད་དེ་རང་གི་གནས་སུ་ཕྱིན་ནས། དེ་ཕྱི་དེ་ཉིན་པར་ལུས་དག་འབྲུ་མར་གྱིས་བསྐུ་མཉེ་བྱས་ནས་ཁྲི་ལ་ཉལ་ཞིང་འདུག་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འཆར་ཀ་ཁྱོད་ཅི་ཉེས། འཆར་ཀས་སྨྲས་པ། ཚེ་དང་ལྡན་པ་དག་ཁོ་བོས་ཀུ་རེ་ཅུང་ཞིག་བྱས་ན་ཉེས་དམིགས་འདི་ལྟ་བུ་བྱུང་བར་གྱུར་ཏོ། །ཅི་བྱས། དེས་སྐབས་དེ་རྒྱས་པར་བརྗོད་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཁྱོད་དགེ་སློང་ལ་སྔངས་པར་བྱེད་དུ་རུང་ངམ། གང་གི་ཕྱིར་མི་རུང་བ་དེ་ཉིད་ཀྱི་ཕྱིར་ཉེས་དམིགས་འདི་ལྟ་བུ་བྱུང་བར་གྱུར་ཏོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་ལ་སྔངས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ
7.279a
དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་དགེ་སློང་ལ་སྔངས་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་ལ་སྔངས་པར་བྱེད་དམ། སྔངས་པར་བྱེད་དུ་འཛུད་ན་ཐ་ན་བཞད་གད་བྱ་བར་བསམས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་ལ་ཞེས་བྱ་བ་ཆོས་འདི་པ་ལའོ། །སྔངས་པར་བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །སྔངས་པར་བྱེད་དུ་འཛུད་ན་ཞེས་བྱ་བ་ནི་གཞན་ནོ། །ཐ་ན་བཞད་གད་བྱ་བར་བསམས་ཀྱང་རུང་སྟེ་ཞེས་བྱ་བ་ནི་ཐ་ན་ཀུ་རེ་བྱ་བར་བསམས་ཀྱང་རུང་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི
7.279b
སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་ལ་སྡངས་པར་བྱ་བའི་བསམ་པས་འདི་ལྟ་སྟེ་དཔེར་ན་ཡི་དགས་དང ། ཤ་ཟ་དང ། གྲུལ་བུམ་དང ། ལུས་སྲུལ་པོ་གཟུགས་ལ་བ་ནག་པོ་དང ། སོལ་བ་དང ། ཀ་བ་ཚིག་པ་ལྟ་བུ་གཟུགས་ཡིད་དུ་མི་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ་ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ་དཔེར་ན་ཡི་དགས་དང ། ཤ་ཟ་དང ། གྲུལ་བུམ་དང ། ལུས་སྲུལ་པོ་སྒྲ་སེང་གེ་དང ། སྟག་དང ། གུང་དང ། མཚའ་དང ། གཟིག་དང ། ཝའི་སྐད་ལྟ་བུ་སྒྲ་ཡིད་དུ་མི་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ། །ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ། དཔེར་ན་ཡི་དགས་དང ། ཤ་ཟ་དང ། གྲུལ་བུམ་དང ། ལུས་སྲུལ་པོ་དྲི་བཤང་བ་དང ། གཅི་བ་དང ། ར་དང ། རའི་ཟེ་བའི་དྲི་ལྟ་བུ་དྲི་ཡིད་དུ་མི་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ་ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ་དཔེར་ན་ཡི་དགས་དང ། ཤ་ཟ་དང ། གྲུལ་བུམ་དང ། ལུས་སྲུལ་པོ་རེག་པ་སེག་དང ། རེ་ལྡེ་དང ། ཕྱར་བའི་རེག་པ
7.280a
ལྟ་བུ་རེག་པ་ཡིད་དུ་མི་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ་ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ་དཔེར་ན་ལྷ་དང ། ཀླུ་དང ། དྲི་ཟ་དང ། གནོད་སྦྱིན་དང ། མི་འམ་ཅི་དང ། ལྟོ་འཕྱེ་ཆེན་པོ་གཟུགས་རྒྱལ་པོ་དང ། བློན་པོ་ཆེན་པོ་དང ། བྲམ་ཟེ་དང ། ཁྱིམ་བདག་དང ། ནོར་ཅན་དང ། ཚོང་དཔོན་དང ། དེད་དཔོན་ལྟ་བུ་གཟུགས་ཡིད་དུ་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ་ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ། དཔེར་ན་ལྷ་དང ། ཀླུ་དང ། དྲི་ཟ་དང ། གནོད་སྦྱིན་དང ། མི་འམ་ཅི་དང ། ལྟོ་འཕྱེ་ཆེན་པོ་སྒྲ་པི་བང་དང ། འོད་མ་དང ། པ་ལ་རི་དང ། མ་ཧ་ཏི་དང ། སུ་གྷོ་ཤ་ཀའི་སྒྲ་ལྟ་བུ་ཡིད་དུ་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ། །ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ་དཔེར་ན། ལྷ་དང ། ཀླུ་དང ། དྲི་ཟ་དང ། གནོད་སྦྱིན་དང ། མི་འམ་ཅི་དང ། ལྟོ་འཕྱེ་ཆེན་པོ་དྲི་ཨ་ག་རུ་དང ། ཙན་དན་དང ། གུར་གུམ་དང ། ཏ་མ་ལའི་ལོ་མའི་དྲི་ལྟ་བུ་དྲི་ཡིད་དུ་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད
7.280b
པར་འགྱུར་རོ་ཞེས་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་ལ་སྔངས་པར་བྱ་བའི་བསམ་པས་འདི་ལྟ་སྟེ། དཔེར་ན་ལྷ་དང ། ཀླུ་དང ། དྲི་ཟ་དང ། གནོད་སྦྱིན་དང ། མི་འམ་ཅི་དང ། ལྟོ་འཕྱེ་ཆེན་པོ་རེག་པ་དར་དང ། རས་ཡུག་ཆེན་དང ། བེའུ་རས་དང ། དར་ལ་དང ། དུ་གུ་ལའི་རས་དང ། ཀོ་ཏམ་པའི་རས་ཀྱི་རེག་པ་ལྟ་བུ་རེག་པ་ཡིད་དུ་འོང་བ་དག་ཡོད་དེ། དེ་དག་གིས་ཁྱོད་ཁྲིད་པར་འགྱུར། དེ་དག་གིས་ཁྱོད་གསོད་པར་འགྱུར། དེ་དག་གིས་ཁྱོད་སྲོག་དང་བྲལ་བར་བྱེད་པར་འགྱུར་རོ་ཞེས་ཉེ་བར་སྒྲུབ་པར་བྱེད་ན། དགེ་སློང་འཇིགས་པ་སྐྱེས་ཀྱང་རུང་མ་སྐྱེས་ཀྱང་རུང་དགེ་སློང་ལ་ཉེས་བྱས་སུ་འགྱུར་རོ། །སྐྱོ་བར་བྱ་བའི་ཆེད་དུ་སེམས་ཅན་དམྱལ་བའི་གཏམ་དང ། དུད་འགྲོའི་གཏམ་དང ། ཡི་དགས་ཀྱི་གཏམ་དང ། ལྷའི་གཏམ་དང ། མིའི་གཏམ་ཟེར་བ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྔངས་པར་བྱེད་པའི་ལྟུང་བྱེད་དེ་དྲུག་བཅུ་རྩ་དྲུག་པ་རྫོགས་སྷོ།། ་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་གཉིས་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བར་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་དེ་དག་དྲུག་སྡེ་དག་ལ་བསྟེན་པར་བྱེད། བསྙེན་པར་བྱེད། བསྙེན་བཀུར་བྱེད་དོ། །ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ནི་གཤེགས་སོ། །དྲུག་སྡེ་དག
7.281a
དང་བཅུ་བདུན་སྡེ་དག་ཕྱི་བཞིན་འབྲང་ཞིང་འདོང་ངོ ། །དེ་ན་ལམ་ག་ན་རྫིང་བུ་ཆུས་གང་བ་ཞིག་འདུག་ནས་དྲུག་སྡེ་དག་གིས་བཅུ་བདུན་སྡེ་དག་ལ་སྨྲས་པ། བཅུ་བདུན་སྡེ་དག་ཀྱེ་མ་ཁྱེད་ཅག་དང་ཁོ་བོ་ཅག་ལྷན་ཅིག་ཤིན་དུ་འགྲན་པ་ཡིན་ན་ཚུར་ཤེག་ཡུ་བུ་ཅག་ཆུའི་ནང་དུ་གང་ཡུན་རིང་དུ་ནུབ་ཅིང་འདུག་ཕོད་པ་ལྟའོ། །དེ་དག་གིས་སྨྲས་པ། དེ་ལྟར་བྱའོ་ཞེས་དེ་དག་ཐམས་ཅད་ཆུར་ཞུགས་པ་དང ། ཉེ་དགའ་ཆུ་ནས་བྱུང་སྟེ་དེས་བཅུ་བདུན་སྡེ་དག་གི་གོས་དག་ས་འབུས་པ་ཞིག་གི་འོག་ཏུ་སྦས་སྟེ་བཞག་པ་དང ། དྲུག་སྡེ་དག་མྱུར་བ་མྱུར་བར་རྫིང་བུ་ནས་བྱུང་སྟེ་གོས་དག་གྱོན་ནས་དོང་ངོ ། །བཅུ་བདུན་སྡེ་དག་ཆུའི་སྟེང་དུ་བྱུང་བ་དང ། དྲུག་སྡེ་དག་མི་སྣང་ནས་དེ་དག་གིས་བདག་ཅག་ཕམ་པར་བྱས་ན་མི་རུང་ངོ་ཞེས་དེ་དག་ཡང་ཆུའི་འོག་ཏུ་ཞུགས་སོ། །དེ་དག་ཡང་དང་ཡང་དུ་སྟེང་དུ་བྱུང་སྟེ་བལྟས་ན་དྲུག་སྡེ་དག་མི་སྣང་ནས། དེ་དག་ད་དུང་ཡང་ཆུའི་འོག་ན་འདུག་གོ་སྙམ་ནས་དེ་དག་གིས་སྨྲས་པ། ཚེ་དང་ལྡན་པ་དག་དྲུག་སྡེ་དག་གིས་གོས་དག་སྦས་ཏེ་འདོང་ངོ་ཞེས་བགྲོས་པ་དང ། ཇི་ཙམ་ན་གོས་གཅིག་ཀྱང་མི་སྣང་ནས་དེ་དག་གིས་སྨྲས་པ། ཚེ་དང་ལྡན་པ་དག་དེ་དག་གིས་བདག་ཅག་ཐོ་བརྩམས་སོ་ཞེས་དེ་དག་རྫིང་བུ་ནས་བྱུང་སྟེ་མཐའ་གཅིག་ན་འཁོད་དོ། །ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འདོང་བ་ན་རྒྱལ་བྱེད་ཀྱི་ཚལ་དུ་ཕྱིན་པ་དང ། ཇི་ཙམ་ན་རྒྱལ་བྱེད་ཀྱི་ཚལ་སྟོང་པར་མཐོང་ནས་དེ་གཉིས་ཀྱིས་སྨྲས་པ། སངས་རྒྱས་ལ་སོགས་པ་དགེ་སློང་གི་དགེ་འདུན་གར་གཤེགས། ཁྱིམ་བདག་ཅིག་གིས་སྤྱན་དྲངས་སོ། །དེ་གཉིས་ཀྱིས་སྨྲས་པ། སྐོལ་ཅག་གཉིས་ཀྱང་དེར་བཞུད་ལ་བསོད་སྙོམས་གསོལ་ལོ་ཞེས་དེ་གཉིས་དོང་བ་དང ། ཇི་ཙམ་ན་ཚེ་དང་ལྡན་པ་ཤཱ་རིའི་བུས་བཅུ་བདུན་སྡེ་དག་རྫིང་བུའི་འགྲམ་ན་རྩེ་ཞིང་འདུག་པ་མཐོང་ངོ ། །མཐོང་ནས་ཀྱང་ཚེ་དང་ལྡན་པ
7.281b
་ མཽད་གལ་གྱི་བུ་ཆེན་པོ་ལ་སྨྲས་པ། སློབ་མ་རྣམས་ཀྱི་འབྱོར་པ་ལ་གཟིགས། ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ། བདག་གི་མཆིད་མི་ཉན་པས་བདག་གིས་ཇི་ལྟར་བགྱི། ཚེ་དང་ལྡན་པ་མཽད་གལ་གྱི་བུ་ཆེན་པོས་བཅུ་བདུན་སྡེ་དག་ལ་སྨྲས་པ། གཞོན་ནུ་དག་གདུགས་ཚོད་ཡོལ་ན་མི་རུང་གིས་ཆུ་རྒོལ་ཅིག་དང་འདོང་ངོ ། །དེ་དག་གིས་སྨྲས་པ། མཁན་པོ་དྲུག་སྡེ་དག་གིས་བདག་ཅག་གི་རད་པ་དག་སྦས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཅི་ཁྱེར་ཏེ་དོང་འམ་འོན་ཏེ་འདི་ཉིད་དུ་སྦས་ཏེ་བཞག་སྙམ་དུ་བསམས་ན། དེས་ཇི་ཙམ་ན་དེ་ཉིད་དུ་སྦས་ཏེ་བཞག་པར་མཐོང་ནས་དེས་བླངས་ཏེ་དེ་དག་ལ་བྱིན་ནོ། །བཅུ་བདུན་སྡེ་དག་གོས་དག་གྱོན་ཏེ་དེར་དོང་བ་དང ། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་གཉིས་ཀྱིས་དགེ་སློང་དག་བཤུགས་པ་ན་བཅུ་བདུན་སྡེ་དག་ཀྱང་དགེ་སློང་དག་འཆུགས་པར་བྱེད་ནས། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ནི་གདུལ་བའི་བྱ་བ་བྱས་ཏེ་འོངས་པ་ཡིན་པས་དེ་གཉིས་ཀྱིས་རེ་ཤིག་དགེ་སློང་དག་བཤུགས་པ་ནི་རིགས་ཀྱི། ཁྱེད་ཅག་གིས་ཅི་ཞིག་བྱས་ན་ད་འདིར་ལྷགས་ཏེ་དགེ་སློང་དག་འཆུགས་པར་བྱེད། དེ་དག་གིས་སྨྲས་པ། ཚེ་དང་ལྡན་པ་དག་གལ་ཏེ་ཁོ་བོ་ཅག་ལ་མཁན་པོས་མ་དགོངས་སུ་ཟིན་ན་ཁོ་བོ་ཅག་གིས་ཟན་གཅད་པར་བྱས་པར་འགྱུར་རོ། །ཅིའི་ཕྱིར། དེ་དག་གིས་སྐབས་དེ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་གི་གོས་དག་སྦེད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན
7.282a
བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་སྨྲས་པ། དགེ་སློང་དག་ཁྱེད་དགེ་སློང་དག་གི་གོས་དག་སྦེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་ངམ། དགེ་སློང་མ་འམ། དགེ་སློབ་མ་འམ། དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། གོས་སམ་དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་སྦེད་དམ། སྦེད་དུ་འཇུད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ཞིག་གིས་དགེ་སློང་ཞིག་གི་ལག་ཏུ་གོས་དག་བཏམས་ནས་འཇིགས་པ་བྱུང་བ་དང ། དགེ་སློང་དེས་རང་གི་གོས་དག་ནི་སྦས། དགེ་སློང་དེའི་གོས་དག་ནི་མ་སྦས་པ་དང ། དེ་དག་མ་བྱིན་པར་ལེན་པ་དག་གིས་ཕྲོགས་ནས་དགེ་སློང་དེ་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེའི་ཤས་ཆེ་བ་དང ། དེ་དང་འཐུན་པ
7.282b
དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ་ཡང་དགེ་སློང་གང་དགེ་སློང་ངམ། དགེ་སློང་མ་འམ། དགེ་སློབ་མ་འམ། དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་སྦེད་དམ་སྦེད་དུ་འཛུད་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་ངམ། ་དགེ་སློང་མ་འམ། ་དགེ་སློབ་མ་འམ། དགེ་ཚུལ་ལམ། དགེ་ཚུལ་མའི་ཞེས་བྱ་བ་ནི་ཆོས་འདི་པའིའོ། །ལྷུང་བཟེད་ཅེས་བྱ་བ་ནི་ལྷུང་བཟེད་ཉིད་དོ། །གོས་ཤེས་བྱ་བ་ནི་བདུན་པོ་དག་ལས་གང་ཡང་རུང་བའོ། །དྲ་བ་ཞེས་བྱ་བ་ནི་ལྷུང་བཟེད་ཀྱི་སྣོད་དོ། །ཕོར་བུ་ཞེས་བྱ་བ་ནི་ཁམ་ཕོར་རོ། །སྐ་རགས་ཅེས་བྱ་བ་ནི་ཤུར་བུ་དང ། ཅག་པོད་དང ། རྒྱ་ཅང་དང ། ཤུར་བུ་ཕྲེའུ་འོ། །དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཞེས་བྱ་བ་ནི་དེ་དག་ལས་གཞན་པ་གང་ཡང་རུང་བའོ། །སྦེད་དམ་ཞེས་བྱ་བ་ནི་བདག་ཉིད་ཀྱིས་སོ། །སྦེད་དུ་འཛུད་ན་ཞེས་བྱ་བ་ནི་གཞན་ནོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་ངམ། དགེ་སློང་མ་འམ། དགེ་སློབ་མ་འམ།
7.283a
དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་སྦེད་དམ། སྦེད་དུ་མཛུད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྦེད་པའི་ལྟུང་བྱེད་དེ་དྲུག་བཅུ་རྩ་བདུན་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་ཚེ་དང་ལྡན་པ་འདུན་པ་ནི་ཀཽ་ཤམྦིར་སོང་སྟེ་སྙིང་ལས་ཆུང་ངུར་འདུག་འགྲོ་མགྱོགས་དང ། ནབ་སོ་གཉིས་ནི་དུས་ལ་བབ། དགའ་བོ་དང ། ཉེ་དགའ་གཉིས་ནི་དགེ་འདུན་གྱི་ནང་ན་འཁོད་པ་དེའི་ཚེ་ན་ཚེ་དང་ལྡན་པ་ཉེ་དགའ་རྒས་པར་གྱུར་ནས་དེ་ལ་ལྷན་ཅིག་གནས་པ་དང ། ཉེ་གནས་འགའ་ཡང་མི་ཉན་པས་དེའི་ཆོས་གོས་དག་དྲི་མ་ཅན་དུ་གྱུར་ཀྱང་དེས་འཁྲུ་བ་དང ། ཁ་བསྒྱུར་བར་མི་ནུས་ནས། དེ་ལ་བློ་བྱུང་བ། ཐབས་ཤིག་བྱའོ་སྙམ་ནས་དེས་ཆོས་གོས་དེ་དག་ལྷན་ཅིག་གནས་པ་དང ། ཉེ་གནས་དག་ལ། ལ་ལ་ལ་སྣམ་སྦྱར་བྱིན། ལ་ལ་ལ་བླ་གོས་བྱིན། ལ་ལ་ལ་མཐང་གོས་བྱིན་ནོ། །དེ་དག་གིས་སྨྲས་པ། མཁན་པོ་ཅི་འདི་དག་བཀྲུས་ཤིང་ཁ་བསྒྱུར་ཏེ་སླར་དབུལ་ལམ། དེས་སྨྲས་པ། བུ་དག་ཁོ་བོ་རྒས་པས་འདི་དག་ཁྱེད་ཉིད་ཀྱི་ཡིན་ནོ། །དེ་དག་གིས་རང་གི་སྲེད་པས་ཆོས་གོས་དེ་དག་ལེགས་པར་བཀྲུས་ཤིང་ལེགས་པར་ཁ་བསྒྱུར་བ་བྱས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག
7.283b
ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་སྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཚེ་དང་ལྡན་པ་དག་དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ཀོ་ས་ལ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོའོ། །དེ་དག་གིས་དེ་སྐད་བསྒོ་བ་ཐོས་ནས་ཆོས་གོས་དེ་དག་ཁྱེར་ཏེ་དགེ་སློང་ཞིག་གི་གན་དུ་དོང་ནས་སྨྲས་པ། བཙུན་པ་བདག་ཅག་གི་ཆོས་གོས་འདི་དག་རེ་ཤིག་ཁྱོད་ལ་གཏམས་སོ། །བདག་ཅག་ནི་བཅོམ་ལྡན་འདས་དང་ཐབས་གཅིག་ལྗོངས་རྒྱུར་འགྲོའོ། །དེས་སྨྲས་པ། ཅི་ཁྱེད་ཀྱི་མཁན་པོ་ཡང་འགྲོ་འམ། དེ་དག་གིས་སྨྲས་པ། མི་འགྲོའོ། །དེས་སྨྲས་པ། དེང་ལ་དེ་ཉིད་ལ་ཐོམས་ཤིག་།ཁོ་བོ་ལ་འཁོར་འབྱེད་པར་བྱེད་དོ། །ཞེས་ཟེར་དང་མི་རུང་ངོ ། །དེ་དང་ཉེ་དགའི་གན་དུ་སོང་སྟེ་སྨྲས་པ། མཁན་པོ་ཆོས་གོས་འདི་དག་རེ་ཤིག་མཁན་པོའི་གན་དུ་གཏམས་སོ། །བདག་ཅག་ནི་བཅོམ་ལྡན་འདས་དང་ཐབས་གཅིག་ལྗོངས་རྒྱུར་མཆིའོ། །ཉེ་དགས་སྨྲས་པ། ཚེ་དང་ལྡན་པ་དག་ཁོ་བོ་ནི་དགེ་སློང་ཚུལ་ཁྲིམས་དང་ལྡན་པ་རྩཝས་བཅིངས་ན་ཡང་དུས་བྱེད་པར་འགྱུར་བ་ཡིན་པས་ཁོ་བོ་འཇོག་པར་མི་སྤྲོས་དགེ་སློང་མཛའ་བོ་གཞན་འགའ་ཞིག་གི་ལག་ཏུ་ཐོམས་ཤིག་།དེ་དག་གིས་སྨྲས་པ། མཁན་པོ་བདག་ཅག་ལ་མཁན་པོ་ལས་ཆེས་ལྷག་པའི་དགེ་སློང་མཛའ་བོ་སུ་ཞིག་མཆིས། མཁན་པོ་ཉིད་ཀྱི་ཕྱག་དུ་གཞག་གོ། །ཉེ་དགས་སྨྲས་པ། གལ་ཏེ་དེ་ལྟ་ན་མཚན་མ་ལེགས་པར་ཐོབ་ལ་ཞོག་ཤིག་དང་ཕྱིར་ལྷགས་ནས་རང་རང་གིས་བླང་སླ་བར་འགྱུར་རོ། །དེ་དག་གིས་ཆོས་གོས་དེར་བཞག་ནས་དང་ཐབས་གཅིག་ལྗོངས་རྒྱུར་དོང་ངོ ། །ཉེ་དགས་གཏུར་བུ་གཅིག་ནས་སྣམ་སྦྱར་ཞིག་ཕྱུང་སྟེ་ཇི་ཙམ་གྱིས་ཤིན་དུ་དྲི་མ་ཅན་དུ་གྱུར་པ་དེ་ཙམ་དུ་གྱོན་གྱོན་ནས་གཏུར་བུ་དེ་ཉིད་ཀྱི
7.284a
ནང་དུ་ཕྱིར་བཅུག་གོ། །དེ་བཞིན་དུ་གཏུར་བུ་གཅིག་ནས་བླ་གོས་ཕྱུང་སྟེ་གྱོན་ཞིང་དེ་བཞིན་དུ་ཆོས་གོས་ཐམས་ཅད་སྤྱད་ནས་ཇི་ཙམ་ན་ཤིན་དུ་དྲི་མ་ཅན་དུ་གྱུར་པ་དང ། དེས་དེ་དག་སྔ་མ་ཁོ་ན་བཞིན་དུ་བཅིངས་ཏེ་བཞག་གོ། །ཇི་ཙམ་ན་བཅོམ་ལྡན་འདས་ལྗོངས་རྒྱུས་ནས་མཉན་ཡོད་དུ་གཤེགས་པ་དང ། ཁྱིམ་བདག་ཅིག་གིས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ལྗོངས་བརྒྱུས་ནས་མཉན་ཡོད་དུ་བྱོན་ཅེས་ཐོས་ནས། དེས་སངས་རྒྱས་ལ་སོགས་པ་དགེ་སློང་གི་དགེ་འདུན་གློ་བུར་དུ་གཤེགས་པ་རྣམས་གདུགས་ཚོད་ལ་སྤྱན་དྲངས་སོ། །དེ་དག་གིས་བསམས་པ། ལམ་གྱི་ཆོས་གོས་དག་བཞག་སྟེ། ཆོས་གོས་གཞན་དག་གྱོན་ལ་འདོང་ངོ་སྙམ་ནས་དེ་དག་ཉེ་དགའི་གན་དུ་དོང་སྟེ་ཆོས་གོས་གཏམས་པ་དག་ཕྱུང་སྟེ་བལྟས་པ་དང ། དྲི་མ་ཅན་དུ་གྱུར་པས་ངོ་མ་ཤེས་ནས་དེ་དག་གིས་སྨྲས་པ། མཁན་པོ་བདག་ཅག་གི་ཆོས་གོས་དེ་དག་འདི་དག་ལགས་སམ། ཉེ་དགས་སྨྲས་པ། ཚེ་དང་ལྡན་པ་དག་ཁོ་བོས་ཁྱེད་ལ་ཁོ་བོ་ནི་དགེ་སློང་ཚུལ་ཁྲིམས་དང་ལྡན་པ་ཡིན་པ་རྩཝས་བཅིངས་ན་ཡང་དུས་བྱེད་པར་འགྱུར་གྱིས། མཚན་མ་ལེགས་པར་ཐོབ་ལ་ཞོག་ཤིག་དང་ཕྱིར་ལྷགས་པ་ན་རང་རང་གིས་བླང་སླ་བར་འགྱུར་རོ། །ཞེས་མ་སྨྲས་སམ། ཇི་ཙམ་ན་དགེ་སློང་ཅིག་གིས་རང་གི་ཆོས་གོས་སྲུབས་ལས་ངོ་ཤེས་ནས་དེས་སྨྲས་པ། ཚེ་དང་ལྡན་པ་དག་ཆོས་གོས་འདི་དག་ནི་ཁོ་བོའི་ཡིན་ན་མཁན་པོས་སྤྱད་དོ། །ཉེ་དགས་སྨྲས་པ། བཀྲེན་པ་དག་ཁྱེད་ཅག་དེ་ལྟར་མི་དགའ་བར་བྱའོ། །དེ་དག་གིས་སྨྲས་པ། ཚེ་དང་ལྡན་པ་དག་འདི་དག་པས་ནི་ལམ་གྱི་ཆོས་གོས་དག་ཆེས་བཟང་གི་དེ་དག་གྱོན་ཏེ་འདོང་ངོ་ཞེས་དེ་དག་ལམ་གྱི་ཆོས་གོས་དག་གྱོན་ཏེ་དེར་དོང་བ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་གིས་ཆོས་གོས་དག་ཅིག་གཏམས་ཏེ་བཞག་ན་ཅིའི་ཕྱིར་ལམ་གྱི་ཆོས་གོས་དག
7.284b
གྱོན་ཏེ་འོངས། དེ་དག་གིས་སྨྲས་པ། གཏམས་ཏེ་བཞག་གོ། །འོ་ན་ཅིའི་ཕྱིར་དེ་དག་གྱོན། དེ་དག་གིས་སྐབས་དེ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་ལ་ཆོས་གོས་བྱིན་ནས་དེའི་འོག་ཏུ་རྡེང་མེད་པར་སྤྱོད་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་ཉེ་དགའ་ལ་རྨས་པ། ཉེ་དགའ་ཁྱོད་དགེ་སློང་ལ་ཆོས་གོས་བྱིན་ནས་དེའི་འོག་ཏུ་རྡེང་མེད་པར་སྤྱོད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་ལ་གོས་བྱིན་ནས་དེའི་འོག་ཏུ་རྡེང་མེད་པར་སྤྱོད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་ལ་ཞེས་བྱ་བ་ནི་ཆོས་འདི་པ་ལའོ། །གོས་ཤེས་བྱ་བ་ནི་སྣམ་སྦྱར་དང ། བླ་གོས་དང ། མཐང་གོས་དང་གསུམ་ལས་གང་ཡང་རུང་བའོ། །བྱིན་ནས་ཞེས་བྱ
7.285a
བ་ནི་བླང་བ་མེད་པར་བྱིན་ནས་སོ། །དེའི་འོག་ཏུ་ཞེས་བྱ་བ་ནི་དུས་གཞན་དུའོ། །རྡེང་མེད་པར་ཞེས་བྱ་བ་ནི་མ་བླངས་པར་རོ། །སྤྱོད་ན་ཞེས་བྱ་བ་ནི་གྱོན་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་ལ་གོས་བྱིན་ནས་དེ་འོག་ཏུ་རྡེང་མེད་པར་སྤྱོད་ན་ཐམས་ཅད་དུ་ལྟུང་བྱེད་དུ་འགྱུར་རོ་དགའ་བ་དང ། གཅུགས་པ་དང ། ཡིད་དུ་འོང་བ་ཡིན་ཞིང་ཐོས་ནས་མཆོག་ཏུ་དགའ་བ་བསྐྱེད་པར་འགྱུར་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བྱིན་པས་ཉེ་བར་འཚོ་བའི་ལྟུང་བྱེད་དེ་དྲུག་བཅུ་རྩ་བརྒྱད་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ཚེ་དང་ལྡན་པ་གྱད་བུ་ནོར་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་འདུག་སྟེ། དེ་དང་ཧ་ཅང་མི་རིང་བ་ན་རྫིང་བུ་རྡོ་རྩིགས་ཅན་ཞེས་བྱ་བ་འདུག་པ་དེའི་འགྲམ་ན་ཚེ་དང་ལྡན་པ་གྱད་བུ་ནོར་ཉིན་མོ་གནས་པར་བྱེད་དོ། །གང་གི་ཚེ་ཨུཏྤ་ལའི་མདོག་དགེ་བའི་བཤེས་གཉེན་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བརྟེན་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་དགྲ་བཅོམ་པ་རྣམ་པར་རྒྱལ་བར་བྱ་བ་ལས་རྣམ་པར་རྒྱལ་བར་གྱུར་པ་དེའི་ཚེ་ན་དེ་ཤེས་ནས་དང་བ་དང་ལྡན་པས་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ལ་ཡང་དང་ཡང་དུ་བལྟ་བའི་ཕྱིར་འགྲོ་ཞིང་ལྷག་པར་ཡང་ཚེ་དང་ལྡན་པ་གྱད་བུ་ནོར་ལ་འདི་འདི་ལྟར་དགྲ་བཅོམ་པ་རྣམ་པར་ཐར་པ་བརྒྱད་ལ
7.285b
བསམ་གཏན་པར་གྱུར་ཀྱང་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་ལ་སྙོམས་པར་འཇུག་པའི་བདེ་བ་དག་སྤངས་ཏེ་དགེ་འདུན་གྱི་ཆོས་དང་ལྡན་པའི་ཞལ་ཏའི་ལས་དག་ལ་བརྩོན་པར་གྱུར་པ་ནི་དཀའ་བ་བྱེད་པ་ཡིན་ནོ་སྙམ་ནས་ཡང་དང་ཡང་དུ་དེ་ལྟ་བའི་ཕྱིར་འགྲོའོ། །དེ་དུས་གཞན་ཞིག་ན་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་ནས། ཚེ་དང་ལྡན་པ་གྱེད་བུ་ནོར་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་གྱད་བུ་ནོར་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེའི་ཚེ་ན་དགེ་སློང་མཛའ་བོ་དང ། ས་ལསྐྱེས་གཉིས་ཀྱིས་ཕྱག་དར་ཁྲོད་ཅིག་རྙེད་ཅིང་དེ་གཉིས་ཚེ་དང་ལྡན་པ་གྱད་བུ་ནོར་དང་ཚེ་རབས་ཚེ་རབས་སུ་ཁོན་བྱུང་སྟེ་རྟག་ཏུ་ཀླན་ཀ་ཚོལ་བ་ལ་བརྩོན་པ་ཡིན་པས་མཛའ་བོས་སྨྲས་པ། ས་ལསྐྱེས་ཕྱག་དར་ཁྲོད་རྙེད་པ་འདི་གང་དུ་འཁྲུར་གཞུག་ས་ལསྐྱེས་ཀྱིས་སྨྲས་པ། རྫིང་བུ་རྡོ་རྩིགས་ཅན་ནི་རྒྱུན་ལུགས་ཉུང་ཞིང་ཉེན་ཀོར་གཙང་བ་ཡིན་པས་དེར་འདོང་ངོ ། །དེ་གཉིས་ཕྱག་དར་ཁྲོད་ཁྱེར་ཏེ་རྫིང་བུ་རྡོ་རྩིགས་ཅན་དུ་དོང་ནས་དེ་གཉིས་ཀྱིས་ཕྱག་དར་ཁྲོད་དེར་འཁྲུར་བཅུག་ནས་ཉི་མ་ལ་བཏིང་སྟེ་འཁོད་དོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་གྱི་ཆོས་གོས་ཀྱི་གྲཝ་རླུང་གིས་བསྐྱོད་ནས་དགེ་སློང་མ་ཨུཏྤ་ལའི་མདོག་གི་མགོ་ལ་རེག་གོ། །དེ་མཛའ་བོས་མཐོང་ནས་དེས་སྨྲས་པ། ས་ལསྐྱེས་གྱད་བུ་ནོར་འདི་ལ་དགེ་སློང་མ་ཨུཏྤ་ལའི་མདོག་དང་ལྷན་ཅིག་ལུས་ཀྱིས་རེག་པའི་དགེ་འདུན་ལྷག་མ་བྱུང་གིས་འདོང་ལ་དགེ་སློང་རྣམས་ལ་བརྗོད་པར་བྱའོ། །ས་ལསྐྱེས་ཀྱིས་སྨྲས་པ། ཚེ་དང་ལྡན་པ་མཛའ་བོ་དེའི་ཚེ་ཡང་རེ་ཤིག་བདག་ཅག་གཉིས་གནས་ནས་དབྱུང་བའི་ལས་བྱས་ན་ཅི་ད་ཡང་གནས་ནས་དབྱུང་བའི་ལས་བྱེད་དུ་འཛུད་པར་འདོད་དམ། མཛའ་བོས་སྨྲས་པ། ཚེ་དང་ལྡན་པ་ས་ལསྐྱེས་དེའི་ཚེ་ན་ནི་ཡང་དག་པ་མ་ཡིན་པས་ཡིན་གྱི། ད་ནི་ཡང་དག་པས་ཡིན་ཏེ། བཅོམ་ལྡན་འདས་ཀྱིས་ལན་བུ་ཞེས་བྱ་བ་ནི་སྐྲ་དག་དང
7.286a
དེ་དང་འབྲེལ་བའི་གོས་ཡིན་ནོ་ཞེས་མ་གསུངས་སམ། ཚེ་དང་ལྡན་པ་འདི་ལ་བརྫུན་དུ་སྨྲ་བ་ག་ལ་ཡོད་ཀྱིས་ཚུར་ཤོག་འདོང་ལ་དགེ་སློང་རྣམས་ལ་བརྗོད་པར་བྱའོ། །ས་ལསྐྱེས་དེ་མཛའ་བོས་བསླུས་པ་ན་བཏུབ་པར་གྱུར་ནས། དེ་གཉིས་གཙུག་ལག་ཁང་དུ་དོང་སྟེ་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་འདི་ལྟར་བདག་ཅག་གཉིས་ཀྱིས་ཚེ་དང་ལྡན་པ་གྱད་བུ་ནོར་ལ་དགེ་སློང་མ་ཨུཏྤ་ལའི་མདོག་དང་ལྷན་ཅིག་ལུས་ཀྱིས་རེག་པའི་དགེ་འདུན་ལྷག་མ་བྱུང་བ་མཐོང་སྟེ། འདི་ལ་བདག་ཅག་གཉིས་གང་གི་དད་པ་འམ། ཡིད་ཆེས་པས་འགྲོ་བར་བྱ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་གཉིས་ཅི་ཁྱེད་གཉིས་ལྷ་དང་མི་རྣམས་གཅིག་ཏུ་ཡོངས་སུ་བཏང་ཞིང་སེམས་ཅན་དམྱལ་བ་དང ། ཡི་དགས་དང ། དུད་འགྲོ་རྣམས་སུ་གཅིག་ཏུ་གནས་སམ། ཅི་ན་དགེ་སློང་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་རྣམ་པར་སྟོན་པ་དེ་ལ་ཁྱེད་གཉིས་གཞི་མེད་པའི་དགེ་འདུན་ལྷག་མའི་ཆོས་ཀྱིས་སྐུར་པ་འདེབས་པར་བྱེད། དེ་གཉིས་ཀྱིས་སྨྲས་པ། ཚེ་དང་ལྡན་པ་དག་དེ་ནི་བདག་ཅག་གཉིས་ཀྱིས་མ་ཉེས་ཀྱི་འདི་ལྟར་བདག་ཅག་གཉིས་ཀྱི་མིག་དག་གིས་མཐོང་བས་མིག་དབྱུང་བར་བྱ་གྲང ། བཅོམ་ལྡན་འདས་ཀྱིས་དེ་གཉིས་ལ་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་དོན་ཅི་ལ་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེང་བར་གྱིས་ཤིག་བརྟག་པར་གྱིས་ཤིག་ཅེས་བཀའ་སྩལ་པས། དགེ་སློང་རྣམས་ཀྱིས་དེ་གཉིས་ལ་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། ཁྱེད་གཉིས་ཅིའི་ཕྱིར་དེར་སོན་པས་དེར་མཐོང་ཞེས་ལེགས་པར་རབ་ཏུ་གླེངས་ཤིང་བརྟགས་སོ། །དགེ་སློང་རབ་ཏུ་མང་པོ་དག་གིས་ལེགས་པར་རབ་ཏུ་གླེངས་ཤིང་བརྟགས་པ་ན། དེ་གཉིས་ཀྱིས་སྨྲས་པ། ཚེ་དང་ལྡན་པ་དག་ཚེ་དང་ལྡན་པ་གྱད་བུ་ནོར་ལ་དགེ་སློང་མ་ཨུཏྤ་ལའི་མདོག་དང་ལྷན
7.286b
ཅིག་ལུས་ཀྱིས་རེག་པའི་དགེ་འདུན་ལྷག་མ་མ་བྱུང་སྟེ་འདི་ལྟར་བདག་ཅག་གཉིས་ཀྱིས་ཚེ་དང་ལྡན་པ་གྱད་བུ་ནོར་ལ་འདུན་པས་སྨྲས། ཞེ་སྡང་དང ། གཏི་མུག་དང ། འཇིགས་པས་སྨྲས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་དག་པ་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་ཀྱིས་སྐུར་པ་འདེབས་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་མཛའ་བོ་དང ། ས་ལསྐྱེས་གཉིས་ལ་རྨས་པ། དགེ་སློང་དག་ཁྱེད་གཉིས་ཁྲོས་ཤིང་ཞེ་སྡང་བར་གྱུར་ནས་དགེ་སློང་དག་པ་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་ཀྱིས་སྐུར་པ་འདེབས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས་དགེ་སློང་དག་པ་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་ཀྱིས་སྐུར་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་མཛའ
7.287a
བོ་འམ། ས་ལསྐྱེས་སམ། གཞན་ཡང་དེ་ལྟ་བུ་གང་ཡིན་པའོ། །ཁྲོས་ཤིང་ཞེས་བྱ་བ་ནི་འཁྲུགས་ཤིང་ངོ ། །ཞེ་སྡང་བར་གྱུར་ནས་ཞེས་བྱ་བ་ནི་ཡིད་མི་དགའ་བར་གྱུར་ནས་ཏེ། འཁྲུགས་པ་མ་གསལ་བར་རོ། །དགེ་སློང་དག་པ་ཞེས་བྱ་བ་ནི་ཚེ་དང་ལྡན་པ་གྱད་བུ་ནོར་རམ། གཞན་ཡང་དེ་ལྟ་བུ་གང་ཡིན་པའོ། །ལྟུང་བ་མེད་པ་ལ་ཞེས་བྱ་བ་ནི་གཞི་དེའི་ལྟུང་བ་མེད་པ་ལའོ། །གཞི་མེད་པར་ཞེས་བྱ་བ་ནི་གཞི་གསུམ་པོ་མཐོང་བའི་གཞི་དང ། ཐོས་པའི་གཞི་དང ། དོགས་པའི་གཞི་མེད་པར་རོ། །དགེ་འདུན་ལྷག་མའི་ཆོས་ཀྱིས་ཞེས་བྱ་བ་ནི་བཅུ་གསུམ་པོ་གང་ཡང་རུང་བ་སྟེ། དེ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་ཡིན་ནོ། །སྐུར་ན་ཞེས་བྱ་བ་ནི་སྐུར་པ་འདེབས་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གང་ཟག་དག་པ་ལ་སྐུར་པ་འདེབས་པ་ལ་གཞི་བཅུས་ནི་ལྟུང་བར་འགྱུར་ལ། གཞི་ལྔས་ནི་ལྟུང་བར་མི་འགྱུར་རོ། །ཇི་ལྟར་གཞི་བཅུས་ལྟུང་བར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པར་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་ལྟུང་བྱེད་དུ་འགྱུར་རོ། །དེས་ཐོས་ལ་དེ་ཡང་བརྗོད་པ་དང ། དེ་དོགས་ལ་དེ་ཡང་བརྗེད་བཞིན་དུ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་ལྟུང་བྱེད་དུ་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་དོགས
7.287b
པ་ན་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་ན་བརྗོད་དོ་ཅོག་ལྟུང་བྱེད་དུ་འགྱུར་ཏེ། དེ་ལྟར་གཞི་བཅུས་ལྟུང་བྱེད་དུ་འགྱུར་རོ། །ཇི་ལྟར་གཞི་ལྔས་ལྟུང་བར་མི་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ ། །ཐོས་སོ། །དོགས་སོ་ཞེས་ཟེར་ན་ལྟུང་བར་མི་འགྱུར་རོ། །དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་ཐོས་ཏེ་དེ་ཡང་བརྗེད་དོ། །བདག་དོགས་ཏེ་དེ་ཡང་བརྗེད་དོ། །ཞེས་ཟེར་ན་ལྟུང་བར་མི་འགྱུར་ཏེ། དེ་ལྟར་གཞི་ལྔས་ལྟུང་བར་མི་འགྱུར་རོ། །ཇི་ལྟར་གང་ཟག་དག་པ་ལ་སྐུར་པ་འདེབས་པ་ལ་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་བ་དེ་བཞིན་དུ་གང་ཟག་དག་པ་མ་དག་པ་ལྟར་བཅོས་པ་ལ་སྐུར་པ་འདེབས་པ་ལ་ཡང་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་རོ། །གང་ཟག་མ་དག་པ་ལ་སྐུར་པ་འདེབས་པ་ལ་ནི་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གཞི་བཅུ་གཅིག་གིས་ལྟུང་བར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་ལྟུང་བྱེད་དུ་འགྱུར་རོ། །དེས་མཐོང་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང
7.288a
མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ། །ཞེས་ཟེར་ན་བརྗོད་དོ་ཅོག་ལྟུང་བྱེད་དུ་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་ན་བརྗོད་དོ་ཅོག་ལྟུང་བྱེད་དུ་འགྱུར་ཏེ། དེ་ལྟར་གཞི་བཅུ་གཅིག་གིས་ལྟུང་བར་འགྱུར་རོ། །ཇི་ལྟར་གཞི་དྲུག་གིས་ལྟུང་བ་མེད་པར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ ། །ཐོས་སོ་དོགས་སོ་ཞེས་ཟེར་ན་ལྟུང་བར་མི་འགྱུར་རོ། །དེས་མཐོང་ལ་དེ་ཡང་བརྗེད་པ་དང ། དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ། །ཞེས་ཟེར་ན་ལྟུང་བར་མི་འགྱུར་ཏེ། དེ་ལྟར་གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གང་ཟག་མ་དག་པ་ལ་སྐུར་པ་འདེབས་པ་ལ་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་བ་དེ་བཞིན་དུ་གང་ཟག་མ་དག་པ་དག་པ་ལྟར་བཅོས་པ་ལ་སྐུར་པ་འདེབས་པ་ལ་ཡང་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །དྲིལ་བསྒྲགས་པ་ལ་ནི་ལྟུང་བ་མེད་དོ། །ངོས་ལ་རི་མོར་བྲིས་པ་ཕན་ཅད་ལ་ཡང་ལྟུང་བ་མེད་དེ། ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས་ཅད་ཀྱིས་ཀྱང་ཤེས་སོ་སྙམ་ནའོ། །ལས་དང་པོ་པ་དང ། སྨྱོས་པ་དང་སེམས་འཁྲུགས
7.288b
་ པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྐུར་པ་འདེབས་པའི་ལྟུང་བྱེད་དེ་དྲུག་བཅུ་རྩ་དགུ་པ་རྫོགས་སྷོ།། ་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རྒྱལ་པོའི་ཁབ་ན་ཐ་ག་པ་སྤྱི་ཅེར་ཞེས་བྱ་བ་ཞིག་འདུག་པ་དེས་མཉན་ཡོད་པའི་ཐ་ག་པ་ཞིག་གི་བུ་མོ་བག་མར་བླང་ནས་དེ་བུ་མོ་དེ་ལ་ཡང་དང་ཡང་དུ་ཁུ་ཚུར་དང་ཐལ་ལྕག་གིས་རྡེག་པར་བྱེད་དོ། །དེའི་སྡུམ་ཚེས་བུད་མེད་རྒན་མོ་ཞིག་འདུག་ནས་བུ་མོ་དེ་བུད་མེད་རྒན་མོ་དེའི་གན་དུ་སོང་སྟེ་སྨྲས་པ། ཡུམ་བདག་ལ་ཁྱིམ་ཐབ་འདི་ཡང་དང་ཡང་དུ་ཁུ་ཚུར་དང་ཐལ་ལྕག་དག་གིས་རྡེག་པར་བགྱིད་པས་བདག་འབྲོས་སོ། །རྒན་མོས་སྨྲས་པ། བུ་མོ་ཁྱོད་ལ་ཇི་སྲིད་དུ་བུ་མ་བཙས་པ་དེ་སྲིད་དུ་ཁྱོད་ལ་ཁྱིམ་ཐབ་འདི་རྡེག་པར་བྱེད་ཀྱི་གང་གི་ཚེ་ཁྱོད་ལ་བུ་བཙས་པར་གྱུར་པ་དེའི་ཚེ་ན་འདི་ཁྱོད་ལ་བྱམས་པར་འགྱུར་གྱིས་མ་འབྲོས་པར་སྡོད་ཅིག་དང་ཁོ་མོས་བཟློག་པར་བྱའོ་ཞེས་བུད་མེད་རྒན་མོ་དེས་ཐ་ག་པ་སྤྱི་ཅེར་ལ་སྨྲས་པ། བུ་ཁྱོད་བུ་མོ་འདི་ལ་ཡང་དང་ཡང་དུ་ཁུ་ཚུར་དང་ཐལ་ལྕག་དག་གིས་རྡེག་པས་འདི་འབྲོས་པར་གྱུར་ན་མི་རུང་གིས་ཕྱིན་ཅད་མ་རྡེག་ཤིག་ཐ་ག་པ་དེ་དེ་ལྟར་བུད་མེད་རྒན་མོ་དེས་བཟློག་ཀྱང་མ་བཏུབ་སྟེ་ཕྱིན་ཅད་ཡང་དང་ཡང་དུ་བུ་མོ་དེ་ལ་ཁུ་ཚུར་དང་ཐལ་ལྕག་དག་གིས་རྡེག་པར་བྱེད་དོ། །དེ་ནས་དུས་གཞན་ཞིག་ན་ཐ་ག་པ་དེ་ཚོང་ཁང་དུ་ཆང་འཐུངས་ཏེ་ར་རོ་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་དེས་བུ་མོ་དེ་ཤིན་དུ་བརྡེག་པ་དང ། བུ་མོ་དེས་བསམས་པ། བདག་བུ་བཙས་པར་མ་གྱུར་གྱི་བར་སྐབས་སུ་འདིས་བསད་པར་གྱུར་ན་མི་རུང་གིས་བདག་ལ་བུ་མེད་ཀྱང་བླས་བདག་བྲོས་ཏེ་འགྲོའོ་སྙམ་ནས། བུ་མོ་དེས་ཐ་ག་པ་དེ་གཉིད་ལོག་པར་རིག་ནས་སྒོ་དང་པོ་ཕྱེ་བ་ཁོ་ན་ནས་བྱུང་སྟེ་བྲོས་སོ། །དགེ་སློང་ཞིག་རྒྱལ་པོའི་ཁབ་ཏུ་དབྱར་གནས་པར་ཁས་བླངས་ནས་མཉན་ཡོད་དུ་བཅོམ་ལྡན་འདས་ཀྱི
7.289a
ཞབས་ལ་ཕྱག་འཚལ་དུ་འཕགས་པ། དེ་ཡང་སྒོ་དང་པོ་ཕྱེ་བ་ཁོ་ན་ནས་བྱུང་སྟེ་སོང་བ་དང ། བུ་མོ་དེས་དགེ་སློང་དེ་མཐོང་ནས་དེས་སྨྲས་པ། འཕགས་པ་གར་བཞུད། དགེ་སློང་དེས་སྨྲས་པ། སྲིང་མོ་མཉན་ཡོད་དུ་འགྲོའོ། །བུ་མོ་དེས་སྨྲས་པ། བདག་ཀྱང་མཉན་ཡོད་དུ་མཆིས། བདག་འཕགས་པ་དང་ལྷན་ཅིག་འགྲོགས་ཏེ་མཆིའོ། །དེ་ལྟར་གྱིས་ཤིག་།བུ་མོ་དེ་དགེ་སློང་དེ་དང་ལྷན་ཅིག་འགྲོགས་ཏེ་འགྲོ་བར་བརྩམས་སོ། །ཇི་ཙམ་ན་ཐ་ག་པ་སྤྱི་ཅེར་ར་རོ་བ་སངས་ཏེ་སད་ནས་བུ་མོ་དེ་མི་སྣང་ནས་དེ་བུད་མེད་རྒན་མོའི་གན་དུ་སོང་སྟེ་དྲིས་པ། ཡུམ་བུ་མོ་དེ་མི་སྣང་ངོ ། །རྒན་མོས་སྨྲས་པ། བུ་ཁོ་མོས་དང་པོ་ཉིད་ནས་ཁྱོད་ལ་དེ་བྲོས་པར་གྱུར་ན་མི་རུང་གིས་མ་རྡེག་ཤིག་ཅེས་མ་བྱས་སམ། དེ་བྲོས་ཏེ་སོང་བ་སྙམ་གྱིས་སྒོ་བ་ལ་དྲིས་ཤིག་།ཐ་ག་པ་དེ་སོང་སྟེ་སྒོ་བ་ལ་དྲིས་པ། ཀྱེ་ནང་རྗེ་སྒོ་འདི་ནས་བུ་མོ་ཞིག་ཕྱིར་བྱུང་ངམ། སྒོ་བས་སྨྲས་པ། སྒོ་དང་པོ་ཕྱེ་བ་ཁོ་ན་ནས་བྱུང་སྟེ་སོང་ངོ ། །ཐ་ག་པ་དེ་ར་བ་ལ་འཛེགས་ཏེ་ཕྱི་བཞིན་བལྟས་པ་དང ། ཇི་ཙམ་ན་ཐག་རིང་པོ་ཁོ་ན་ནས་སོང་བ་མཐོང་ནས་དེ་མྱུར་བ་མྱུར་བར་བབས་ཏེ་བསྙགས་པ་དང ། ཇི་ཙམ་ན་དགེ་སློང་ཞིག་དང་ལྷན་ཅིག་འགྲོ་བ་མཐོང་ནས། དེས་བསམས་པ། བདག་ནི་གཅིག་པུ་ཡིན་ལ། འདི་གཉིས་ནི་གཉིས་ཡིན་པས་གལ་ཏེ་དེ་གཟུང་ན་འདི་གཉིས་ལོག་སྟེ་བདག་བརྡེགས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། གང་གི་ཚེ་གྲོགས་རྙེད་པར་གྱུར་པ་དེའི་ཚེ་ན་གཟུང་བར་བྱའོ་སྙམ་ནས། དེ་དེ་གཉིས་ཀྱི་ཕྱི་བཞིན་འབྲང་ཞིང་སོང་བ་དང ། ཇི་ཙམ་ན་རི་བྲགས་ཤིག་ཏུ་ཕྱིན་ནས། རི་བྲགས་དེ་ན་ཐ་ག་པ་ལྔ་བརྒྱ་ཙམ་འཁོད་ནས་ཐ་ག་པ་སྤྱི་ཅེར་སོང་སྟེ་སྨྲས་པ། ཤེས་ལྡན་དག་ཁྱེད་ཁོ་བོའི་ཉེ་དུ་ཡིན་ན་ཁོ་བོའི་ཆུང་མ་ཤཱཀྱའི་བུའི་དགེ་སྦྱོང་གིས་ཕྲོགས་ཀྱི་དེ་ལ་གྲོགས་གྱིས་ཤིག
7.289b
ཅེས་ར་མདའ་ཟློག་དུ་བཅུག་གོ། །ཐ་ག་པ་དག་ནི་ཡོངས་སུ་མི་རྟོག་པ་ཡིན་པས་དེ་དག་གིས་ཐག་ཟངས་ལྔ་བརྒྱ་ཙམ་ཐོགས་ཏེ་རི་བྲགས་ནས་ཕྱིར་བྱུང་ནས་དེ་དག་གིས་དགེ་སློང་དེ་ཤིན་དུ་བརྡེགས་ཏེ་ལྷུང་བཟེད་ཀྱང་བཅག་།ཕོར་བུ་དང ། ཁར་བ་ཡང་བཅག་།ཆོས་གོས་དག་ཀྱང་དྲལ་ནས་ཤིའོ་སྙམ་དུ་བསམས་ཏེ་བོར་རོ། །བུ་མོ་དེས་དགེ་སློང་དེ་ལ་སྨྲས་པ། འཕགས་པ་ཁྱེད་ཅག་གིས་རྒྱལ་པོ་ལས་གཞོན་ནུའི་ཡོངས་སུ་སྤངས་པ་ཐོབ་པ་ལགས་ཀྱིས། རྒྱལ་པོའི་གན་དུ་བཞུད་དེ་གསུངས་ལ། འདི་དག་གི་ལག་པ་དང་རྐང་པ་དག་གཅོད་དུ་གསོལ་ཅིག་།དེ་དག་སྐྲག་ནས་དགེ་སློང་དེ་ལ་བཟོད་པ་གསོལ་བར་བརྩམས་ཏེ་སྨྲས་པ། འཕགས་པ་བདག་ཅག་ལ་བཟོད་པ་མཛད་དུ་གསོལ། དགེ་སློང་གི་སྙིང་ནི་མར་དང་འདྲ་བས་དེས་སྨྲས་པ། བཟོད་པར་བྱའོ། །བུ་མོ་དེས་སྨྲས་པ། གལ་ཏེ་འཕགས་པས་བཟོད་ཀྱང་བདག་གིས་མི་བཟོད་དོ། །དེ་དག་གིས་བུ་མོ་དེ་ལ་སྨྲས་པ། སྲིང་མོ་ཁྱོད་བདག་ཅག་གི་ཉེ་དུ་ཡིན་པས་ཁྱོད་ཀྱིས་ཀྱང་བཟོད་པར་གྱིས་ཤིག་།བུ་མོ་དེས་སྨྲས་པ། ཁྱེད་ཅག་ལ་ནི་བཟོད་ན་ཐ་ག་པ་སྤྱི་ཅེར་འདི་ལ་མི་བཟོད་དེ། བདག་གིས་འདིའི་ལག་པ་དང་རྐང་པ་དག་གཅད་པར་བྱའོ། །དེ་དག་གིས་སྨྲས་པ། འདི་ལ་ཡང་བཟོད་པར་གྱིས་ཤིག་།བུ་མོ་དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ཕྱིན་ཅད་བདག་ལ་མི་རྡེག་ན་བཟོད་དོ། །ཐ་ག་པ་དེས་སྨྲས་པ། ཕྱིན་ཅད་མི་རྡེག་གོ། །བུ་མོ་དེས་སྨྲས་པ། གལ་ཏེ་དེ་ལྟར་ན་བཟོད་པར་བྱའོ། །དགེ་སློང་དེ་མཐར་གྱིས་མཉན་ཡོད་དུ་ཕྱིན་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། ཁོ་བོ་ཐ་ག་པ་དག་གིས་ཧད་པོར་སྲོག་དང་དེའུ་ཕྲལ་ལོ། །ཅིའི་ཕྱིར།
7.290a
དེས་སྐབས་དེ་རྒྱས་པར་བརྗོད་པ་དང ། དགེ་སློང་རྣམས་ཀྱིས་སྨྲས་པ། ཁྱོད་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོར་རུང་ངམ། གང་གི་ཕྱིར་མི་རུང་བ་དེ་ཉིད་ཀྱི་ཕྱིར་ཉེས་དམིགས་འདི་ལྟ་བུ་བྱུང་ངོ ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །ཡང
7.290b
དགེ་སློང་གང་ཞེས་བྱ་བ་ནི་ཆོས་འདི་པ་འམ་གཞན་ཡང་དེ་ལྟ་བུ་གང་ཡིན་པའོ། །སྐྱེས་པ་མེད་པར་ཞེས་བྱ་བ་ནི་དེ་དང་དེའོ། །བུད་མེད་དང་ལྷན་ཅིག་ཅེས་བྱ་བ་ནི་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་འཁྲིགས་པའི་ཆོས་སྟེན་ནུས་པ་དང་ངོ ། །འགྲོན་ལམ་དུ་འགྲོ་ན་ཞེས་བྱ་བ་ནི་དགོན་པའི་ལམ་དུ་འགྲོ་ནའོ། །ཐ་ན་གྲོང་བར་དུ་ཡང་རུང་སྟེ་ཞེས་བྱ་བ་ནི་ཐ་ན་རྒྱང་གྲགས་ཀྱི་བར་དུ་ཡང་རུང་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །རྒྱང་གྲགས་ཀྱིས་བར་དུ་ཆོད་པའི་གྲོང་བདུན་ལས་གྲོང་ནས་དགོན་པར་འགྲོ་ན་རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་ལ། རྒྱང་གྲགས་རེ་རེར་ནི་ལྟུང་བྱེད་དུ་འགྱུར་རོ། །དགོན་པ་ནས་གྲོང་དུ་འགྲོ་ན་ཡང་རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་ལ། རྒྱང་གྲགས་རེ་རེར་ནི་ལྟུང་བྱེད་དུ་འགྱུར་རོ། །བུད་མེད་བསེལ་བྱེད་དུ་འཛུད་པ་དང ། ལམ་ནོར་བ་བུད་མེད་ཀྱིས་ལམ་དུ་འཛུད་པ་དང ། འགྲོ་མི་ནུས་པ་བུད་མེད་ཀྱིས་ཁྲིད་པ་ལ་ནི་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བུད་མེད་དང་ལྷན་ཅིག་འགྲོ་བའི་ལྟུང་བྱེད་དེ་བདུན་བཅུ་པ་རྫོགས་སྷོ།། ་་་་་་་།། སྡོམ་ལ། རྐུ་དང
7.291a
ཉི་ཤུ་མ་ལོན་དང ། །རྐོ་དང་མགྲོན་དང་བསླབ་པ་དང ། །འཐབ་དང་མི་སྨྲ་འགྲོ་བ་དང ། །མི་གུས་ཆང་འཐུང་དུས་མིན་པའོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་སུ་དབྱར་གནས་པར་ཁས་བླངས་སོ། །དེ་ནས་དགེ་སློང་དེས་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ལྷུང་བཟེད་དང་ཆོས་གོས་ཐོགས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འཕགས་ནས་མཉན་ཡོད་དུ་འགྲོ་བའི་དོན་འཐུན་བཙལ་བ་དང ། དེས་ཚོང་པ་ཤོ་གམ་འདྲལ་བ་དག་མཐོང་ནས་དེས་སྨྲས་པ། ཤེས་ལྡན་དག་གར་འདོང ། དེ་དག་གིས་སྨྲས་པ། འཕགས་པ་མཉན་ཡོད་དུ་མཆིའོ། །དེས་སྨྲས་པ། ཤེས་ལྡན་དག་ཁོ་བོ་ཡང་ཁྱེད་དང་ལྷན་ཅིག་མཉན་ཡོད་དུ་འགྲོའོ། །དེ་དག་གིས་སྨྲས་པ། འཕགས་པ་དེ་ལྟར་མཛོད་ཅིག་།དེ་དག་གིས་ཐབས་ཡིན་ནོ་ཞེས་བྱས་ནས་འགྱོད་པ་སྐྱེས་ཏེ་དེ་དག་གིས་སྨྲས་པ། འཕགས་པ་བདག་ཅག་ནི་ཚོང་པ་ཤོ་གམ་འདྲལ་བ་དག་ལགས་པས་དུས་སུ་ཡང་མཆི། དུས་མ་ལགས་པར་ཡང་མཆི། ཤུལ་དུ་ཡང་མཆི། ཤུལ་གོལ་བར་ཡང་མཆི་བས་ཁྱོད་ཀྱིས་བདག་ཅག་དང་ལྷན་ཅིག་བཞུད་མི་སྤྱོད་དོ། །དེས་སྨྲས་པ། ཅི་ཁྱེད་ཅག་སྟོང་པར་འདོང་ངམ། འོན་ཏེ་ཁུར་དག་གིས་འདོང ། དེ་དག་གིས་སྨྲས་པ། ཁུར་དག་གིས་མཆིའོ། །དེས་སྨྲས་པ། ཁྱེད་ཅག་ཁུར་དག་གིས་འདོང་ན་ཁོ་བོ་སྟོང་པར་འགྲོ་བ་ཅིའི་ཕྱིར་ཁྱེད་ཀྱི་ཕྱི་བཞིན་འགྲོ་མི་ནུས། དེ་དག་གིས་སྨྲས་པ། གལ་ཏེ་སྤྱོད་ན་བཞུད་ཀྱིས་ཕྱོགས་འདིར་བཞུད་ལ་བདག་ཅག་མ་མཆིས་ཀྱི་བར་དུ་གཞེས་ཤིག་།དེ་དེར་སོང་སྟེ་བསྡད་པ་དང །
7.291b
ཇི་ཙམ་ན་ཚོང་པ་ཤོ་གམ་འདྲལ་བ་དེ་དག་འོངས་ནས་དེ་དེ་དག་དང་ལྷན་ཅིག་འཕགས་སོ། །ཇི་ཙམ་ན་རི་བྲགས་ཤིག་ཏུ་ཤོ་གམ་གྱི་གནས་སུ་ཕྱིན་པ་དང ། ཚོང་པ་ཤོ་གམ་འདྲལ་བ་དེ་དག་ཤོ་གམ་གཅོད་པ་དག་གིས་འཇིགས་པས་ལམ་གོལ་བ་ནས་འགྲོ་བར་བརྩམས་པ་དང ། དགེ་སློང་དེ་ཡང་མདུན་དུ་སོང་ངོ ། །དེ་དག་ལམ་གོལ་བ་ནས་འདོང་བ་ན་དེ་དག་ཤོ་གམ་པ་དག་གིས་མཐོང་ནས། དེ་དག་གིས་སྨྲས་པ། ཀཝའི་ཚོང་པ་ཤོ་གམ་འདྲལ་བ་དག་གར་འདོང ། དེ་དག་གིས་དགེ་སློང་དེ་མདུན་དུ་འགྲོ་བ་མཐོང་ནས། དེ་དག་གིས་སྨྲས་པ། ཤེས་ལྡན་དག་ཚོང་པ་ཤོ་གམ་འདྲལ་བ་འདི་དག་གིས་མ་ཉེས་ཀྱི་ཤཱཀྱའི་བུའི་དགེ་སྦྱོང་མདུན་དུ་འགྲོ་བ་འདིས་ཉེས་ཀྱིས་འདི་བསད་པར་བྱའོ་ཞེས་དེ་དག་གིས་དགེ་སློང་དེ་ཤིན་ཏུ་བརྡེགས་ཏེ་ལྷུང་བཟེད་ཀྱང་བཅག་།ཕོར་བུ་དང ། ཁར་བ་དག་ཀྱང་བཅག་།ཆོས་གོས་དག་ཀྱང་དྲལ་ཏེ་ཤིའོ་སྙམ་ནས་བོར་རོ། །ཚོང་པ་ཤོ་གམ་འདྲལ་བ་དེ་དག་གིས་དགེ་སློང་དེ་ལ་སྨྲས་པ། འཕགས་པ་ཁྱེད་ཀྱིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པ་ལགས་ཀྱིས་རྒྱལ་པོའི་གན་དུ་བཞུད་དེ་གསུངས་ལ། ཤོ་གམ་པ་འདི་དག་གི་ལག་པ་དང་རྐང་པ་དག་གཅོད་དུ་སྩོལ་ཅིག་།ཤོ་གམ་པ་དེ་དག་སྐྲག་ནས་དགེ་སློང་དེ་ལ་བཟོད་པ་གསོལ་བར་བརྩམས་ཏེ་སྨྲས་པ། འཕགས་པ་བདག་ཅག་ལ་བཟོད་པ་མཛད་དུ་གསོལ། དགེ་སློང་གི་སེམས་ནི་མར་དང་འདྲ་བས་དེས་སྨྲས་པ། བཟོད་དོ། །ཚོང་པ་ཤོ་གམ་འདྲལ་བ་དག་གིས་སྨྲས་པ། གལ་ཏེ་འཕགས་པས་བཟོད་ཀྱང་བདག་ཅག་གིས་མི་བཟོད་དོ། །ཤོ་གམ་པ་དག་གིས་སྨྲས་པ། ཁྱེད་ཀྱང་བཟོད་པར་གྱིས་ཤིག་།ཤོ་གམ་འདྲལ་བ་དག་གིས་སྨྲས་པ། དམ་ཚིག་གིས་བཟོད་པར་བྱ་སྟེ། ཁྱེད་ཅག་ཤོ་གམ་པ་ཇི་སྙེད་པ་དག་གིས་ཁོ་བོ་ཅག་ཚོང་པ་ཇི་སྙེད་པ་དག་ཤོ་གམ་འཇལ
7.292a
དུ་མི་འཇུག་ན་ཁོ་བོ་ཅག་གིས་ཀྱང་བཟོད་པར་བྱའོ། །ཤོ་གམ་པ་དེ་དག་གིས་ཚོང་པ་དེ་དག་ལ་གནང་ངོ ། །དགེ་སློང་དེ་ཡང་མཐར་གྱིས་མཉན་ཡོད་དུ་ཕྱིན་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། ཁོ་བོ་ཤོ་གམ་པ་དག་གིས་ཧད་པོར་དེའུ་བསད་དོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང ། དགེ་སློང་རྣམས་ཀྱིས་སྨྲས་པ། ཁྱོད་དོན་འཐུན་རྐུན་མ་དང་ལྷན་ཅིག་མགྲོན་ལམ་དུ་འགྲོར་རུང་ངམ། གང་གི་ཕྱིར་མི་རུང་བ་དེ་ཉིད་ཀྱི་ཕྱིར་ཉེས་དམིགས་འདི་ལྟ་བུ་དག་བྱུང་བར་གྱུར་ཏོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དོན་འཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོའོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་དོན་འཐུན་རྐུན་མ་དང་ལྷན་ཅིག་འདྲོན་ལམ་དུ་འགྲོ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ
7.292b
ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དོན་འཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པ་འམ། གཞན་ཡང་དེ་ལྟ་བུ་གང་ཡིན་པའོ། །དོན་འཐུན་རྐུན་མ་དང་ལྷན་ཅིག་ཅེས་བྱ་བ་ལ། རྐུན་མ་ཞེས་བྱ་བ་ནི་ཆོམ་རྐུན་པ་དང་གྲོང་འཇོམས་པར་བྱེད་པ་དག་དང ། ཚོང་པ་ཤོ་གམ་འདྲལ་བ་དག་གོ། །འགྲོན་ལམ་དུ་འགྲོ་ན་ཞེས་བྱ་བ་ནི་དགོན་པའི་ལམ་དུ་འགྲོ་ནའོ། །ཐ་ན་གྲོང་བར་དུ་ཡང་རུང་སྟེ་ཞེས་བྱ་བ་ནི་ཐ་ན་རྒྱང་གྲགས་ཀྱི་བར་དུ་ཡང་རུང་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དོན་འཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །གྲོང་བདུན་པོ་རྒྱང་གྲགས་ཀྱིས་བར་དུ་ཆོད་པ་དག་ལས་དགེ་སློང་གྲོང་ནས་དགོན་པར་འགྲོ་ན་རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་ལ། རྒྱང་གྲགས་རེ་རེར་ནི་ལྟུང་བྱེད་དུ་འགྱུར་རོ། །དགོན་པ་ནས་གྲོང་དུ་འགྲོ་ན་ཡང་རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་ལ། རྒྱང་གྲགས་རེ་རེར་ནི་ལྟུང་བྱེད་དུ་འགྱུར་རོ། །རྐུན་མ་བསེལ་བྱེད་དུ་འཇུད་པ་དང ། ལམ་ནོར་བ་རྐུན་མས་ལམ་དུ་འཛུད་པ་དང །
7.293a
འགྲོ་མི་ནུས་པ་རྐུན་མས་ཁྲིད་དུ་འཛུད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྐུན་མ་དང་ལྷན་ཅིག་འགྲོ་བའི་ལྟུང་བྱེད་དེ་བདུན་བཅུ་རྩ་གཅིག་པ་རྫོགས་སྷོ།། ་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་དེ་དག་མཚན་མོའི་ཐོ་རངས་ཀྱི་དུས་ཀྱི་ཚེ་བཀྲེས་པའི་ཉམས་ཆུང་བས་ཡོངས་སུ་གཟིར་ནས་ངུའོ། །བཅོམ་ལྡན་འདས་ཀྱིས་མཚན་མོའི་ཐོ་རངས་ཀྱི་དུས་ཀྱི་ཚེ་ཀུན་དགའ་ར་བའི་ནང་ན་བྱིས་པ་ཁྱེའུ་རབ་ཏུ་མང་པོ་དག་ངུ་བའི་སྒྲ་གསན་ཏོ། །གསན་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ་ཀུན་དགའ་བོ་མཚན་མོའི་ཐོ་རངས་ཀྱི་དུས་ཀྱི་ཚེ་ཀུན་དགའ་ར་བའི་ནང་ན་བྱིས་པ་ཁྱེའུ་རབ་ཏུ་མང་པོ་ངུ་བ་འདི་དག་སུ། བཙུན་པ་འདི་དག་ནི་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བགྱིས་པ་དེ་དག་མཚན་མོའི་ཐོ་རས་ཀྱི་དུས་ཀྱི་ཚེ་བཀྲེས་པའི་ཉམ་ཆུང་བས་ཡོངས་སུ་གཟིར་ཏེ་ངུ་བ་ལགས་སོ། །ཀུན་དགའ་བོ་དགེ་སློང་དག་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་དམ། བཙུན་པ་བགྱིད་དོ། །ཀུན་དགའ་བོ་གང་ཟག་ལོ་ཉི་ཤུ་མ་ལོན་པས་ནི་གྲང་བ་དང ། ཚ་བ་དང ། བཀྲེས་པ་དང ། སྐོམ་པ་དང ། རླུང་དང ། ཉི་མ་དང ། ཤ་སྦྲང་དང ། སྦྲང་བུ་མཆུ་རིངས་དང ། སྡིགས་སྦྲུལ་དག་གིས་རེག་པ་དག་དང ། གཞན་ལས་ཚིག་གི་ལམ་ངན་པ་སྨྲས་པ་དང ། ངན་པ་འོངས
7.293b
པ་དག་དང ། ལུས་ཀྱི་ཚོར་བ་སྡུག་བསྔལ་མི་བཟད་པ། རྩུབ་པ། ཚ་བ། ཡིད་དུ་མི་འོང་བ་སྲོག་འཕྲོག་པར་བྱེད་པ་བྱུང་ངོ་ཅོག་དག་མི་བཟོད་ཅིང ། ཟག་པ་དག་ལ་ཅི་མི་སྙམ་པར་བྱ་བ་ཡང་མི་བཟོད་ཅིང་དང་དུ་ལེན་མི་ནུས་པའི་རང་བཞིན་ཅན་ཡིན་ནོ། །གང་ཟག་ལོ་ཉི་ཤུ་ལོན་པས་ནི་གྲང་བ་དང ། ཚ་བ་དང ། བཀྲེས་པ་དང ། སྐོམ་པ་དང ། རླུང་དང ། ཉི་མ་དང ། ཤ་སྦྲང་དང ། སྦྲང་བུ་མཆུ་རིངས་དང ། སྡིག་སྦྲུལ་གྱི་རེག་པ་དག་དང ། གཞན་ལས་ཚིག་གི་ལམ་ངན་པ་སྨྲས་པ་དང ། ངན་པ་འོངས་པ་དག་དང ། ལུས་ཀྱི་ཚོར་བ་སྡུག་བསྔལ་མི་བཟད་པ་དང ། རྩུབ་པ། ཚ་བ། ཡིད་དུ་མི་འོང་བ་སྲོག་འཕྲོག་པར་བྱེད་པ་བྱུང་ངོ་ཅོག་བཟོད་ཅིང་ཟག་པ་དག་ལ་ཅི་མི་སྙམ་པར་བྱ་བ་ཡང་བཟོད་ཅིང་དང་དུ་ལེན་ནུས་པའི་རང་བཞིན་ཅན་ཡིན་ནོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་རྨས་པ། མཽད་གལ་གྱི་བུ་ཁྱོད་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང ། མི་སྦྱོར་བ་དང ། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང ། སྦྱོར་བ་དང ། བརྟགས་ཏེ་སྤྱོད་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ
7.294a
པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་ལྟུང་བྱེད་དོ། །གང་ཟག་དེ་ཡང་རྫོགས་པར་བསྙེན་པར་མི་འགྱུར་ལ། དགེ་སློང་དེ་དག་ཀྱང་སྨད་པར་འགྱུར་ཏེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པ་འམ། གཞན་ཡང་དེ་ལྟ་བུ་གང་ཡིན་པའོ། །གང་ཟག་ཅེས་བྱ་བ་ནི་དགེ་སློང་དུ་བྱ་བ་གང་ཡིན་པ་དེའོ། །ལོ་ཉི་ཤུ་མ་ལོན་པ་ཞེས་བྱ་བ་ནི་ལོ་ཉི་ཤུར་མ་ལོན་པའོ། །དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །གང་ཟག་དེ་ཡང་རྫོགས་པར་བསྙེན་པར་མི་འགྱུར་ལ་ཞེས་བྱ་བ་ནི་གང་ཟག་གང་ཡིན་པ་དེའོ། །དགེ་སློང་དེ་དག་ཀྱང་སྨད་པར་འགྱུར་ཏེ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་དེ་དག་གོ། །དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ལོ་ཉི་ཤུ་མ་ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན། དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་རྫོགས་པར་མ་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ཡང་མ་ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས
7.294b
ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ཤེས་ཤིང་དྲན་ལ་ཡིད་གཉིས་མི་ཟ་སྟེ་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་རྫོགས་པར་མ་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །ལོ་ཉི་ཤུ་མ་ལོན་ལ་ལོ་ཉི་ཤུ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ལོ་ཉི་ཤུ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ལ་དེའི་མོད་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཆགས་ཤིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །ལོ་ཉི་ཤུ་མ་ལོན་ལ་ལོ་ཉི་ཤུ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱི་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ཤེས་ཤིང་དྲན་ལ་ཡིད་གཉིས་མི་ཟ་སྟེ་བདག་ལོ་ཉི་ཤུ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ལ་དེའི་མོད་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཆགས་ཤིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །ལོ་ཉི་ཤུ་མ་ལོན་ལ་དེས་མི་ཤེས། མི་དྲན། ཡིད་གཉིས་མི་ཟ་ཞིང་དེ་ལ་དགེ་སློང་རྣམས་ཀྱིས་མ་དྲིས་སམ། དྲིས་ཀྱང་ལན་མི་འདེབས་པ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི
7.295a
དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ལ་དེའི་མོད་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཆགས་ཤིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ལོན་ལ་ལོ་ཉི་ཤུ་མ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ལོན་ལ་ལོ་ཉི་ཤུ་མ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་བདག་གིས་ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ཡང་ལོན་ལ་ལོ་ཉི་ཤུ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་བདག་ལོ་ཉི་ཤུ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ
7.295b
མི་འགྱུར་རོ། །ལོ་ཉི་ཤུ་ཡང་ལོན་ལ་ལོ་ཉི་ཤུ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་བདག་ཤེས་ཤིང་དྲན་ལ་ཡིད་གཉིས་མི་ཟ་སྟེ་བདག་ལོ་ཉི་ཤུ་ལོན་ནོ་ཞེས་ཟེར་བ་ན། དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །ལོ་ཉི་ཤུ་ལོན་ལ་དེས་མི་ཤེས། མི་དྲན། ཡིད་གཉིས་མི་ཟ་ཞིང་དེ་ལ་དགེ་སློང་རྣམས་ཀྱིས་མ་དྲིས་སམ། དྲིས་ཀྱང་ལན་མི་འདེབས་པ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །དེ་ལ་གང་ཟག་དང་པོ་གཉིས་པོ་གང་དག་ཡིན་པ་དེ་དག་ནི་དང་པོ་འཁྲུགས་པ་ཡིན་པས་དང་པོ་ཉིད་ནས་རྫོགས་པར་མ་བསྙེན་པ་ཡིན་ཏེ། གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་དག་ཡིན་ནོ། །དེ་ལ་གང་ཟག་ལོ་ཉི་ཤུ་མ་ལོན་ལ་ལོ་ཉི་ཤུ་ལོན་པར་འདུ་ཤེས་པ་རྫོགས་པར་བསྙེན་པ་གང་ཡིན་པ་དེའི་ཉེ་དུ་དག་འོངས་ཤིང་ལྷགས་ནས་མིང་འདི་ཞེས་བྱ་བ་དེ་རྫོགས་པར་བསྙེན་ཏམ། ཞེས་འདྲི་ཞིང་དེ་ནི་ལོ་ཉི་ཤུ་མ་ལོན་ནོ་ཞེས་ཟེར་ན་དེའི་མངལ་ན་གནས་པའི་ཟླ་བ་དང ། ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བ་འམ། ཡང་ན་རྫོགས་པར་བསྙེན་པར་བྱའོ། །
7.296a
ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །དེ་ལ་གང་ཟག་ལོ་བཅུ་དགུ་ལོན་ན་རྫོགས་པར་བསྙེན་པ་གང་ཡིན་པ་དེས་གལ་ཏེ་ལོ་མ་ཚང་བའི་དྲན་པ་རྙེད་པར་གྱུར་ན་དེས་མངལ་ན་གནས་པའི་ཟླ་བ་དག་དང་ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བ་འམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །གལ་ཏེ་ལོ་གཅིག་གི་དྲན་པ་རྙེད་ན་དེ་ལྟར་རྫོགས་པར་བསྙེན་པ་ནི་ལེགས་པར་རྫོགས་པར་བསྙེན་པ་ཡིན་ཏེ། འདི་ལྟར་གང་ཟག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་པ་ནི་དཀོན་པའི་ཕྱིར་རོ། །དེ་ལ་གང་ཟག་ལོ་བཅཝ་བརྒྱད་ལོན་ན་རྫོགས་པར་བསྙེན་པ་གང་ཡིན་པ་དེས་གལ་ཏེ་ལོ་མ་ཚང་བའི་དྲན་པ་རྙེད་པར་གྱུར་ན་དེས་ས་སྤོ་བར་བྱ་བ་འམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །གལ་ཏེ་ལོ་གཅིག་གི་དྲན་པ་རྙེད་པར་གྱུར་ན་དེས་མངལ་ན་གནས
7.296b
པའི་ཟླ་བ་དག་དང ། ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བ་འམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །གལ་ཏེ་ལོ་གཉིས་ཀྱི་དྲན་པ་རྙེད་པར་གྱུར་ན་དེ་ལྟར་རྫོགས་པར་བསྙེན་པ་ནི་ལེགས་པར་རྫོགས་པར་བསྙེན་པ་ཡིན་ཏེ། འདི་ལྟར་གང་ཟག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་པ་ནི་དཀོན་པའི་ཕྱིར་རོ། །དེ་ལ་གང་ཟག་ལོ་ཉི་ཤུ་མ་ལོན་ལ་དེས་མི་ཤེས། མི་དྲན། ཡིད་གཉིས་ཟ་ཞིང་རྫོགས་པར་བསྙེན་པ་གང་ཡིན་པ་དེ་ལ་ནི་ཤེས་པར་བྱ། དྲན་པར་བྱ། ཡིད་གཉིས་སྤང་བར་བྱ་སྟེ། གང་གི་ཚེ་དེས་ཤེས་པ་དང ། དྲན་པ་དང ། ཡིད་གཉིས་སྤངས་པར་གྱུར་པ་ན། དེའི་མངལ་ན་གནས་པའི་ཟླ་བ་དག་དང ། ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བ་འམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །
7.297a
དེ་ལ་གང་ཟག་ལོ་ཉི་ཤུ་ལོན་ལ། ལོ་ཉི་ཤུ་མ་ལོན་པར་འདུ་ཤེས་པས་རྫོགས་པར་བསྙེན་པ་གང་ཡིན་པ་དེ་ནི་དང་པོ་ཉིད་ནས་ལེགས་པར་རྫོགས་པར་བསྙེན་པ་ཡིན་ནོ། །དེ་ལ་གང་ཟག་ལོ་ཉི་ཤུ་ལོན་ལ་ལོ་ཉི་ཤུ་ལོན་པར་འདུ་ཤེས་པས་རྫོགས་པར་བསྙེན་པ་གང་ཡིན་པ་དེ་ཡང་དང་པོ་ཉིད་ནས་ལེགས་པར་རྫོགས་པར་བསྙེན་པ་ཡིན་ནོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མ་ལོན་པར་རྫོགས་པར་བསྙེན་པར་བྱེད་པའི་ལྟུང་བྱེད་དེ་བདུན་བཅུ་རྩ་གཉིས་པ་རྫོགས་སྷོ།། ་་་་།།ཞཝ་དམར་ཅོད་པན་འཛིན་པ་བཞི་པ་སྤྱན་སྔ་ཐམས་ཅད་མཁྱེན་པའི་སྤྱན་སྔར་གཏུགས་ཏེ། དགེ་བའི་བཤེས་གཉེན་སྟོད་ལུང་པ་ཆེན་པོའི་ཐུགས་དམ་དང་བསྟུན་ནས་དག་པར་བྱས་པའོ།། ་་་།།
8.1a
(ཉ)་༄#། !་།འདུལ་བ་ལུང་བཞུགས་སོ། །[(黃)་律師戒行經第八部]
8.1b
འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་གསུམ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དྲུག་སྡེ་དག་རང་གི་ལག་གིས་ས་རྐོ་བར་བྱེད། རྐོར་འཛུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཛུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཛུད་པར་བྱེད་ནས། གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་རང་གི་ལག་གིས་ས་རྐོ་བར་བྱེད། རྐོར་འཛུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཛུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཛུད་པར་བྱེད་དེ། བྲམ་ཟེ་དང ། ཁྱིམ་བདག་དག་ཀྱང་རང་གི་ལག་གིས་ས་རྐོ་བར་བྱེད། རྐོར་འཛུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཛུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཛུད་པར་བྱེད་ན། ཤེས་ལྡན་དག་ཤཱཀྱའི་བུའི་དགེ་སྦྱོང
8.2a
འདི་དག་དང ། བྲམ་ཟེ་དང ། ཁྱིམ་བདག་དག་ལ་བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་རང་གི་ལག་གིས་ས་རྐོ་བར་བྱེད། རྐོར་འཛུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཛུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཛུད་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རང་གི་ལག་གིས་ས་རྐོ་འམ། རྐོར་འཛུད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །རང་གི་ལག་གིས་ཤེས་བྱ་བ་ནི་ལག་ནས་ལག་པས་སོ། །ས་ཞེས་བྱ་བ་ནི་ས་གཉིས་ཏེ། རང་བཞིན་ཅན་དང ། རང་བཞིན་ཅན་མ་ཡིན་པའོ། །རང་བཞིན་ཅན་ཞེས་བྱ་བ་ནི་ཆར་ཆུ་ཞོད་ན་ཟླ་བ་གསུམ་གྱིས་ས་འཐས་པར་གྱུར་པའོ། །ཆར་ཆུ་མ་ཞོད་ན་ཟླ་བ
8.2b
དྲུག་གིས་ས་འཐས་པར་གྱུར་པའོ། །རང་བཞིན་ཅན་མ་ཡིན་པ་ནི་དེ་ལས་གཞན་པའོ། །རྐོ་འམ་ཞེས་བྱ་བ་ནི་བདག་ཉིད་ཀྱིས་སོ། །རྐོར་འཛུད་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ས་རྐོ་ན་རང་བཞིན་ཅན་རྐོ་ན་ལྟུང་བྱེད་དུ་འགྱུར་ལ། རང་བཞིན་ཅན་མ་ཡིན་པ་རྐོ་ན་ཉེས་བྱས་སུ་འགྱུར་རོ། །དགེ་སློང་ས་ཞག་འགོགས་ན་སྲ་བ་འགོགས་པ་ན་ལྟུང་བྱེད་དུ་འགྱུར་ལ། གྲུགས་པ་འགོགས་ན་ཉེས་བྱས་སུ་འགྱུར་རོ། །དགེ་སློང་ས་ལ་ཕུར་པ་འདེབས་ན་ལྟུང་བྱེད་དུ་འགྱུར་ལ། ས་ལས་ཕུར་པ་འབྱིན་ན་ཉེས་བྱས་སུ་འགྱུར་རོ། །དགེ་སློང་ས་ལ་རི་མོ་འདྲེན་ན་ཉེས་བྱས་སུ་འགྱུར་རོ། །ཤོད་དགོད་པའི་བསམ་པ་ལ་ནི་ལྟུང་བ་མེད་དོ། །དགེ་སློང་ས་དང་འབྱར་བའི་ལྕི་བ་འགོགས་ན་ཉེས་བྱས་སུ་འགྱུར་ལ། ལྕི་བ་འབའ་ཤིག་འགོགས་པ་ལ་ནི་ལྟུང་བ་མེད་དོ། །དགེ་སློང་ངོགས་རྟིབ་པར་བྱེད་ན་སྲ་བ་རྟིབ་པར་བྱེད་ན་ལྟུང་བྱེད་དུ་འགྱུར་ལ། གྲུགས་པ་རྟིབ་པར་བྱེད་ན་ཉེས་བྱས་སུ་འགྱུར་རོ། །དགེ་སློང་འདམ་སྐྱོད་པར་བྱེད་ན་ཉེས་བྱས་སུ་འགྱུར་རོ། །དགེ་སློང་འདམ་དང་འབྲེལ་བའི་ཕྲུ་བ་དང ། བུམ་པ་དང ། རིལ་བ་འདེགས་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པ་འཇིག་པར་བྱེད་ན་སྲ་བ་འཇིག་པར་བྱེད་ན་ལྟུང་བྱེད་དུ་འགྱུར་ལ། གྲུགས་པ་འཇིག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པའི་སྐྱོང་ནུལ་འགོགས་པར་བྱེད་ན་སྲ་བ་འགོགས་པར་བྱེད་ན་ལྟུང་བྱེད་དུ་འགྱུར་ལ། གྲུགས་པ་འགོགས་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པ་ལ་ཕུར་པ་འདེབས་ན་ལྟུང་བྱེད་དུ་འགྱུར་ལ། རྩིག་པ་ལས་ཕུར་པ་འབྱིན་ན་ཉེས་བྱས་སུ་འགྱུར་རོ། །དགེ་སློང་རྩིག་པ་དང་འབྱར་བའི་ལྕི་བ་འགོགས་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པ་ལ་རི་མོ་འདྲེན་པར་བྱེད་ན་ཉེས་བྱས་སུ
8.3a
འགྱུར་རོ། །ཤོད་དགོད་པའི་བསམ་པ་ལ་ནི་ལྟུང་བ་མེད་དོ། །དགེ་སློང་རྩིག་པ་ལས་ཚཝ་རྒོ་འབྲུལ་བར་བྱེད་ན་ཉེས་བྱས་སུ་འགྱུར་རོ། །དགེ་སློང་རྡོ་བ་ཅན་གྱི་ས་རྐོ་བར་བྱེད་ན། གལ་ཏེ་ས་ཆེས་མང་ལ་རྡོ་བ་ཆེས་ཆུང་ན་ལྟུང་བྱེད་དུ་འགྱུར་རོ། །གལ་ཏེ་རྡོ་བ་ཆེས་མང་ལ་ས་ཆེས་ཉུང་ན་ཉེས་བྱས་སུ་འགྱུར་རོ། །རྡོ་བ་འབའ་ཤིག་སྐྱོད་པར་བྱེད་པ་ལ་ནི་ལྟུང་བ་མེད་དོ། །དགེ་སློང་བྱེ་མ་ཅན་གྱི་ས་རྐོ་བར་བྱེད་ན། གལ་ཏེ་ས་ཆེས་མང་ལ་བྱེ་མ་ཆེས་ཉུང་ན་ལྟུང་བྱེད་དུ་འགྱུར་རོ། །གལ་ཏེ་བྱེ་མ་ཆེས་མང་ལ་ས་ཆེས་ཉུང་ན་ཉེས་བྱས་སུ་འགྱུར་རོ། །བྱེ་མ་འབའ་ཤིག་རྐོ་བ་ལ་ནི་ལྟུང་བ་མེད་དོ། །དགེ་སློང་ལག་གི་བླས་རྒྱུ་སྐར་གྱི་སྦྱོར་བས་རུང་བར་བྱེད་པ་མེད་ན་ཐུར་མ་སོར་བཞི་ཙམ་ས་ལ་འཛུགས་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ས་རྐོ་བའི་ལྟུང་བྱེད་དེ་བདུན་བཅུ་རྩ་གསུམ་པ་རྫོགས་སོ།། ་་་་་་་་་་་།། སངས་རྒྱས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །ཤཱཀྱ་མིང་ཆེན་གྱིས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་ཤེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན། ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲང་ངོ་སྙམ་མོ། །དེ་ནས་ཤཱཀྱ་མིང་ཆེན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཤཱཀྱ་མིང་ཆེན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན
8.3b
པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཤཱཀྱ་མིང་ཆེན་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། བཅོམ་ལྡན་འདས་ཀྱིས་ཤཱཀྱ་མིང་ཆེན་ལ་ཅང་མི་གསུང་བས་གནང་ངོ ། །དེ་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས་དེས་བསྙུང་བའི་རུང་བའི་ཁང་པ་རྩིག་ཏུ་བཅུག་ཅིང ། བསྙུང་བའི་སྨན་ཡང་འཇོག་ཏུ་བཅུག་།བདེ་བའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་པ་དང ། འཚོ་བའི་བར་དུ་བཅང་བ་དང ། རྩ་བའི་སྨན་དང ། སྡོང་བུའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དག་ཀྱང་འཇོག་ཏུ་བཅུག་།ཞུན་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག་།འབྲུ་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག་པ་དག་དང ། མ་ཧེ་མོ་དག་དང ། ར་བཞོན་དག་ཀྱང་འཇོག་ཏུ་བཅུག་།ཡོ་བྱད་ཐམས་ཅད་ཀྱང་འཇོག་ཏུ་བཅུག་།སྨན་པ་དང་སྙུན་གཡོག་དག་ཀྱང་འཇོག་ཏུ་བཅུག་སྟེ། དགེ་སློང་དག་ལ་ཡང་ཡོ་བྱད་ཐམས་ཅད་ཀྱིས་བསྟབས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཅའ་བ་དང ། བཟའ་བྱ་འདི་ལྟ་བུ་རྙེད་ཀྱིས་ཐབས་ཤིག་བྱའོ་ཞེས་དེ་དག་གིས་སྨན་པ་ལ་དྲིས་པ། བཞིན་བཟངས་ཁོ་བོ་ཅག་ལ་ནད་ཅི་ཡོད་པ་ཇེ་ལྟོས་ཤིག་།སྨན་པས་བསམས་པ། འདི་དག་ནི་དགེ་སྦྱོང་ཧྲལ་པོ་དག་ཡིན་པས་ཟ་འདོད་ཀྱིས་འདི་དག་དང་འཐུན་པར་སྨྲ་བར་བྱའོ་སྙམ་ནས་དེས་དེ་དག་ལ་སྨྲས་པ། འཕགས་པ་དག་ཁྱེད་ཅག་ནི་ཤུལ་གྱིས་དུབ་པ་དག་ལགས་པས་ཇེ
8.4a
སྐུར་སྣུམ་བག་གསོལ་ལ་དེའི་འོག་ཏུ་བསྐ་བ་གསོལ་ཅིག་།དེ་དག་གིས་སྨྲས་པ། དགའ་བོ་ཉེ་དགའ་འདི་ནི་སྨན་པ་ཆེན་པོ་ནད་དང ། ནད་ཀྱི་གཞི་དང ། ཁམས་ལ་མཁས་པ་རྒྱལ་པོ་ལ་མཁོ་བ་ཡིན་ཏེ། གལ་ཏེ་བདག་ཅག་ཐམས་ཅད་ཀྱིས་དུས་གཅིག་ཏུ་དེ་ལྟར་བྱ་བར་བརྩམས་ན་མྱུར་དུ་ཟིན་པར་འགྱུར་གྱིས་ཇེ་དང་པོར་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ། །དེའི་འོག་ཏུ་ཡང་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ། །དེའི་འོག་ཏུ་ཡང་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ། །དེ་ལྟར་བྱའོ་ཞེས་དེ་དག་ལས་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཅི་ཙམ་ན་ཟླ་བ་གཅིག་འདས་སོ། །དེའི་འོག་ཏུ་གཞན་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཟླ་བ་གཉིས་པ་འདས་སོ། །དེའི་འོག་ཏུ་ཡང་གཞན་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཟླ་བ་གསུམ་པ་འདས་སོ། །ཟླ་བ་བཞི་པ་ལ་ཐམས་ཅད་འདུས་ཏེ་བཟའ་བར་བརྩམས་ནས་ཟླ་བ་བཞི་འདས་པ་དང་ཤཱཀྱ་མིང་ཆེན་གྱིས་བཅོམ་ལྡན་འདས་གཤེགས་སྟོན་ལ་སྤྱན་དྲངས་པ་དང་ཉེ་དགས་ཕྱག་ཚང་ལ་འཕྲིན་སྤྲིང་སྟེ། བཞིན་བཟངས་དེང་ཁོ་བོ་ལ་ཁུ་ཤ་དང ། ཁུ་བ་དང ། ཤ་ཚོད་དག་གྱིས་ཤིག་ཅེས་སྤྲིང་ངོ ། །ཕྱག་ཚང་གིས་སྨྲས་པ། འཕགས་པ་དགུང་ཟླ་བཞི་འདས་ཏེ་ཤཱཀྱ་མིང་ཆེན་གྱིས་བཅོམ་ལྡན་འདས་གཤེགས་སྟོན་ལ་སྤྱན་དྲངས་ན། ཁྱེད་ཀྱི་བྱ་བ་ད་དུང་ཡང་མ་རྫོགས་སམ། ཉེ་དགས་སྨྲས་པ། བཀྲེན་པ་ཤཱཀྱ་མིང་ཆེན་ཁ་ཤིན་ཏུ་ཆེན་པོས་སངས་རྒྱས་ལ་སོགས་པ་དགེ་སློང་གི་དགེ་འདུན་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་འདྲེན་ན། གལ་ཏེ་སྤྱན་དྲང་བ་འདི་ལྟ་བུས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲང་དུ་རུང་ན་ནི་ཉེ་དགས་ཀྱང་སངས་རྒྱས་ལ་སོགས་པ་དགེ་སློང་གི་དགེ་འདུན་ཇི་སྲིད་འཚོའི་བར་དུ་སྤྱན་འདྲེན་པར་སྤྲོའོ། །དེས་སྨྲས་པ། ཁྱེད་ཅག་ཟླ་བ་བཞིར་ཤ་དང་ཁུ་བ་ཤ་སྟག་ཟོས་པར་གྱུར་ཀྱང་འོན་ཀྱང་ཁྱེད་ཅག་སྨོད་པར་བྱེད་ན། གནས་བརྟན་གནས་བརྟན་གང་དག་གིས་ཟླ་བ་བཞིར་ཨ་རུ་ར་འབྲུ་གཅིག་ཀྱང་མ་གསོལ་བ་དེ་དག་ནི་ཤིན་ཏུ་དཀའ་བ་བྱེད་པ་ཡིན་ནོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ
8.4b
སློང་དག་ཧ་ཅང་སློང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ། །དགེ་སློང་དག་སྔོན་བྱུང་བ་འདས་པའི་དུས་ན་གྲོང་མེད་པའི་དགོན་པའི་གནས་ཤིག་ན་དྲང་སྲོང་ཞིག་འདུག་སྟེ། དེའི་བསྟི་གནས་དེ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་ནོ། །དེའི་བསྟི་གནས་དེ་དང་ཧ་ཅང་མི་རིང་བ་ན་རྫིང་ཆེན་པོ་ཞིག་ཡོད་པ་དེ་ན་ཀླུ་གཞོན་ནུ་ཞིག་འདུག་གོ། །གང་གི་ཚེ་དྲང་སྲོང་དེ་སྐྱིལ་མོ་དཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་རྫིང་ཆེན་པོ་དེ་ནས་བྱུང་ནས་ལུས་ཀྱིས་དྲང་སྲོང་དེའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ། །གང་གི་ཚེ་དྲང་སྲོང་དེ་ལངས་པར་གྱུར་པ་དེའི་ཚེ་ན་ཀླུ་གཞོན་ནུ་དེས་དྲང་སྲོང་དེའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང ། རྣ་ཆ་གདུབ་འཁོར་དང ། ཕྲེང་བ་རྒྱུ་སྣ་ཚོགས་ཀྱི་རྒྱན་དང ། བྱུག་པས་བརྒྱན་པར་གྱུར་ཏེ་ཐལ་མོ་སྦྱར་ནས་མདུན་དུ་འདུག་སྟེ། དྲང་སྲོང་དེ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ། །དྲང་སྲོང་དེ་ཀླུ་གཞོན་ནུ་དེའི་ལུས་ཀྱི་རེག་པས་སྐྱ་བོ་བསེང་བསེང་པོར་གྱུར་ཅིང་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་གྱུར་ཏོ། །དུས་གཞན་ཞིག་ན་དྲང་སྲོང་གཞན་ཞིག་ལྗོངས་རྒྱུ་ཞིང་འགྲོ་བ་ན་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་སྨྲས་པ། ཀྱེ་དྲང་སྲོང་ཁྱོད་ཀྱི་བསྟི་གནས་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་ན་ཁྱོད་ཅིའི་ཕྱིར་སྐྱ་བོ་བསེང་བསེང་པོར་གྱུར་ཅིང་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་གྱུར། དེས་སྨྲས་པ། དེ་དེ་བཞིན་ཏེ། ཁོ་བོའི་བསྟི་གནས་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་འཁོར་ཕུན་སུམ་ཚོགས་པ་ཡིན་མོད་ཀྱི། འོན་ཀྱང་འདི་ན་ཉེས་དམིགས་ཀྱང་ཡོད་དོ། །འདི་ན་ཉེས་དམིགས་ཅི་ཡོད། །དེས་སྨྲས་པ། རྫིང་ཆེན་པོ་འདི་ན་ཀླུ་གཞོན་ནུ་ཞིག་འདུག་སྟེ། གང་གི་ཚེ་ཁོ་བོ་སྐྱིལ་མོ་དཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་རྫིང་ཆེན་པོ་དེ་ནས་བྱུང་ནས་ལུས་ཀྱིས་ཁོ་བོའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས
8.5a
ཀ་ཆེན་པོ་བྱས་ཏེ་འདུག་གོ། །གང་གི་ཚེ་ཁོ་བོ་ལངས་པར་གྱུར་པ་དེའི་ཚེ་ན་དེས་ཁོ་བོའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང ། རྣ་ཆ་གདུབ་འཁོར་དང ། ཕྲེང་བ་རྒྱུ་སྣ་ཚོགས་ཀྱི་རྒྱན་དང ། བྱུག་པས་བརྒྱན་པར་གྱུར་ཏེ། ཐལ་མོ་སྦྱར་ནས་མདུན་དུ་འདུག་སྟེ་ཁོ་བོ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དེ། དེའི་ལུས་ཀྱི་རེག་པས་ཁོ་བོ་སྐྱ་བོ་བསེང་བསེང་པོར་གྱུར་ཅིང་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་གྱུར་ཏོ། །དེས་སྨྲས་པ། ཁྱོད་ཀླུ་གཞོན་ནུ་དེ་ཕྱིན་ཅད་འོང་བར་མི་འགྱུར་བར་འདོད་དམ། དེས་སྨྲས་པ། འདོད་དོ། །དེས་སྨྲས་པ། གང་གི་ཚེ་ཀླུ་གཞོན་ནུ་དེ་ཁྱོད་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་པ་དེའི་ཚེ་ན་དེའི་མགོ་ལ་ནོར་བུ་འདུག་པ་དེ་སློངས་ཤིག་དང་ཀླུ་རྣམས་ནི་སེར་སྣ་ཅན་ཡིན་པས་མི་སྟེར་བས་ཕྱིན་ཅད་འོང་བར་མི་འགྱུར་རོ། །དུས་གཞན་ཞིག་ན་དྲང་སྲོང་དེ་སྐྱིལ་མོ་དཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་དེ་བཞིན་དུ་རྫིང་ཆེན་པོ་དེ་ནས་བྱུང་ནས་ལུས་ཀྱིས་དྲང་སྲོང་དེའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ། །གང་གི་ཚེ་དྲང་སྲོང་དེ་ལངས་པར་གྱུར་པ་དེའི་ཚེ་ན་ཀླུ་གཞོན་ནུ་དེས་དྲང་སྲོང་དེའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང ། རྣ་ཆ་གདུབ་འཁོར་དང ། ཕྲེང་བ་རྒྱུ་སྣ་ཚོགས་ཀྱི་རྒྱན་དང་བྱུག་པས་བརྒྱན་པར་གྱུར་ཏེ་ཐལ་མོ་སྦྱར་ནས་འདུན་དུ་འདུག་སྟེ་དྲང་སྲོང་དེ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་པ་ན་དྲང་སྲོང་དེས་དེ་ལ་སྨྲས་པ། ཀླུ་གཞོན་ནུ་ཁྱོད་ཀྱི་མགོ་ལ་འདུག་པའི་ནོར་བུ་གང་ཡིན་པ་དེ་ཁོ་བོ་ལ་བྱིན་ཅིག་།དེས་སྨྲས་པ། ཕ་མ་དག་ལ་དྲི་བར་བྱའོ། །དྲང་སྲོང་གིས་སྨྲས་པ། དེ་ལྟར་གྱིས་ཤིག་།ཀླུ་གཞོན་ནུ་དེས་ཕ་མ་གཉིས་ལ་དྲིས་པ། ཡབ་ཡུམ་གཉིས་དྲང་སྲོང་བདག་གི་ནོར་བུ་སློང་ན་དེ་ལ་སྩལ་བར་བགྱི་འམ། དེ་གཉིས་ཀྱིས་སྨྲས་པ། ནོར་བུ་འདིའི་མཐུས་བདག་ཅག་གིས་ཟས་དང ། སྐོམ་དང ། སྤོས་དང ། ཕྲེང་བ་རྒྱུ་དང ། རྒྱན་དག་རྙེད་པ་ཡིན་གྱིས་མ་སྦྱིན་ཅིག་།དེ་ནས་ཀླུ་གཞོན་ནུ་དེ་རྫིང་དེ་ནས་བྱུང་སྟེ་དྲང་སྲོང་དེའི་མདུན་དུ་འདུག་པ་དང་དྲང་སྲོང་དེས་དེ་ལ་སྨྲས་པ། ཀླུ་གཞོན་ནུ་ཁྱོད་ཀྱི་མགོ་ལ་འདུག་པའི་ནོར་བུ་གང་ཡིན་པ་དེ་ཁོ་བོ་ལ་བྱིན་ཅིག་།དེ་ནས་ཀླུ་གཞོན་ནུ་དེས་ཚིགས་སུ་བཅད་པ་དག་སྨྲས་པ། བཟའ་དང་བཏུང་དང་དེ་བཞིན་བགོ
8.5b
བ་དག་།ནོར་བུ་འདི་ཡི་མཐུ་ལས་འགྲུབ་འགྱུར་བས། །དེ་ཕྱིར་ཁྱོད་ལ་ནོར་བུ་འདི་མི་སྦྱིན། །ཧ་ཅང་སློང་བས་ཞེ་སྡང་གནས་སུ་གྱུར། །ཧ་ཅང་སློང་བས་བདག་ལ་སྡིགས་བྱེད་པ། །རལ་གྲི་རྡོ་དང་འབྲུ་མར་བདར་བ་བཞིན། །གལ་ཏེ་ཁྱོད་གནས་ཕྱིན་ཅད་བདག་འོང་ན། །བདག་གི་གླད་པར་རྡོ་བས་སྣུན་གྱིས་ཤིག་།ཅེས་སྨྲས་ཏེ་མི་སྣང་བའི་ལམ་ན་འདུག་གོ། །དགེ་སློང་དག་རེ་ཤིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཧ་ཅང་བསླངས་པ་ན་མི་སྣང་བའི་ལམ་ན་འཁོད་ན་མི་དག་ལྟ་སྨོས་ཀྱང་ཅི་དགོས། དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ། །དགེ་སློང་དག་གཞན་ཡང་སྔོན་བྱུང་བ་འདས་པའི་དུས་ན་གྲོང་མེད་པའི་དགོན་པའི་གནས་ཤིག་ན་དྲང་སྲོང་ཞིག་འདུག་སྟེ། དེའི་བསྟི་གནས་དེ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་ནོ། །དེ་ན་བྱ་མང་པོ་དག་གནས་པ་དེ་དག་དེར་སྒྲ་འབྱིན་ཏེ། བསམ་གཏན་དག་གི་ཚེར་མ་ནི་སྒྲ་ཡིན་པས་དྲང་སྲོང་དེས་བྱ་མང་པོ་དག་གི་སྒྲ་དེས་སེམས་རྩེ་གཅིག་པ་ཉིད་མ་ཐོབ་བོ། །དེ་ནས་དྲང་སྲོང་གཞན་ཞིག་ལྗོངས་རྒྱུ་ཞིང་འགྲོ་བ་ན་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་སྨྲས་པ། ཀྱེ་དྲང་སྲོང་ཁྱོད་ཀྱི་བསྟི་གནས་འདི་ནི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་བཟང་བ་ཡིན་ན་ཁྱོད་ཀྱིས་འདིར་སེམས་རྩེ་གཅིག་པ་ཉིད་ཐོབ་བམ། དེས་སྨྲས་པ། དེ་དེ་བཞིན་ཏེ། ཁོ་བོའི་བསྟི་གནས་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་བཟང་བ་ཡིན་ན་འོན་ཀྱང་འདི་ན་ཉེས་དམིགས་ཀྱང་ཡོད་དོ། །དེས་སྨྲས་པ། འདི་ན་ཉེས་དམིགས་ཅི་ཡོད། དེས་སྨྲས་པ། འདི་ན་བྱ་མང་པོ་དག་གནས་པ་དེ་དག་འདིར་སྒྲ་འབྱིན་པར་བྱེད་དེ། བསམ་གཏན་དག་གི་ཚེར་མ་ནི་སྒྲ་ཡིན་པས་བདག་གིས་བྱ་མང་པོ་དག་གི་སྒྲ་དེས་སེམས་རྩེ་གཅིག་པ་ཉིད་མ་ཐོབ་བོ། །དེས་སྨྲས་པ། ཁྱོད་བྱ་དེ་དག་ཕྱིན་ཅད་འདིར་མི་འོང་བར་འདོད་དམ། དེས་སྨྲས་པ། འདོད་དོ། །དེས་སྨྲས་པ། ཚེས་ཉི་ཤུ་དགུའི་མཚན་མོ་རྩཝའི་མེ་སྒྲོན་སྤོར་ལ་ཤིང་ལྗོན་པ་དག་གི་དྲུང་དུ་སོང་སྟེ་འདི་སྐད་ཅེས་སྒོ་ང་དག་བཟའོ། །
8.6a
ཕྲུ་གུ་དག་བཟའོ་ཞེས་སྨྲོས་ཤིག་དང ། ཕྱིན་ཆད་འོང་བར་མི་འགྱུར་རོ། །དེས་དེ་ལྟར་བྱ་བར་བརྩམས་པ་དང་བྱ་དེ་དག་གིས་བསམས་པ། དྲང་སྲོང་འདི་སྨྱོས་པར་གྱུར་ཏམ་ཅི་སྙམ་ནས། བྱ་དེ་དག་གིས་ཕྲུ་གུ་དག་འདབ་མ་སྐྱེས་པར་གྱུར་པ་དང་དེ་དག་དོང་སྟེ། ཕྱིན་ཆད་མི་འོང་ཞིང་ཇི་ཙམ་ན་མཐར་གྱིས་ཐམས་ཅད་མི་སྣང་བའི་ལམ་ན་འཁོད་དོ། །དགེ་སློང་དག་རེ་ཤིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཧ་ཅང་བསླངས་པ་ན་མི་སྣང་བའི་ལམ་ན་འཁོད་ན་མི་རྣམས་ལྟ་སྨོས་ཀྱང་ཅི་དགོས། དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ། །ཧ་ཅང་སློང་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཟླ་བ་བཞིར་མགྲོན་དུ་བོས་པ་བདག་གིར་བྱས་ནས་དེ་ལས་ལྷག་པར་བདག་གིར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དེ་ནས་བཅོམ་ལྡན་འདས་སེར་སྐྱའི་གནས་སུ་ཅི་དགྱེས་པར་བཞུགས་ནས་རྒྱལ་པོའི་ཁབ་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ།
8.6b
མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་དུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་དུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཤེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། ཤཱཀྱ་མིང་ཆེན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ཏེ། བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན། ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲང་ངོ་སྙམ་མོ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང །
8.7a
བཅོམ་ལྡན་འདས་ཀྱིས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས་དེས་བསྙུང་བའི་རུང་བའི་ཁང་པ་རྩིག་ཏུ་བཅུག་ཅིང་བསྙུང་བའི་སྨན་ཡང་འཇོག་ཏུ་བཅུག་།བདེ་བའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་པ་དང ། འཚོའི་བར་དུ་བཅང་བ་དང ། རྩ་བའི་སྨན་དང ། སྡོང་བུའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དག་ཀྱང་འཇོག་ཏུ་བཅུག་།ཞུན་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག་།འབྲུ་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག་།བ་དག་དང ། མ་ཧེ་མོ་དག་དང ། ར་བཞོན་དག་ཀྱང་འཇོག་ཏུ་བཅུག་།ཡོ་བྱད་ཐམས་ཅད་ཀྱང་འཇོག་ཏུ་བཅུག་།སྨན་པ་དང ། སྙུན་གཡོག་དག་ཀྱང་འཇོག་ཏུ་བཅུག་གོ། །ཚེ་དང་ལྡན་པ་པི་ལིན་དའི་བུའི་སྲིང་མོའི་ཁྱོས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཤེས་ཐོས་སོ། །ཐོས་ནས་ཀྱང་འདི་སྙམ་དུ་སེམས་ཏེ། ཤཱཀྱ་མིང་ཆེན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ཏེ། བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན། ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ངོ་སྙམ་མོ། །དེ་ནས་བྲམ་ཟེ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་བྲམ་ཟེ་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང
8.7b
དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་བྲམ་ཟེ་དེ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། བྲམ་ཟེ་དེའི་དང་པོར་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་སྤྱན་དྲངས་སོ། །བྲམ་ཟེ་དེས་བསམས་པ། འཕགས་པ་པི་ལིན་དའི་བུ་བདག་གི་ཉེ་དུ་ཡིན་པས་དེ་སྤྱན་དྲངས་ན་གནང་བར་འགྱུར་གྲང་སྙམ་ནས། དེ་ཚེ་དང་ལྡན་པ་པི་ལིན་དའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་པི་ལིན་དའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་པི་ལིན་དའི་བུ་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཛུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་བྲམ་ཟེ་དེ་སྟན་ལས་ལངས་ཏེ་ཚེ་དང་ལྡན་པ་པི་ལིན་དའི་བུ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པས་དགུང་ཟླ་བཞིར་བདག་གི་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་པི་ལིན་དའི་བུས་སྨྲས་པ། བཅོམ་ལྡན་འདས་ལ་ཞུའོ། །དེ་ནས་ཚེ་དང་ལྡན་པ་པི་ལིན་དའི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན
8.8a
འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གི་དམག་པ་བདག་ག་ལ་བ་དེར་མཆིས་ནས་དེ་བདག་ལ་འཕགས་པས་དགུང་ཟླ་བཞིར་བདག་གི་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང་ཞེས་མཆི་ན། དེ་ལ་མཆིད་ཀྱིས་འཚལ་ལམ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སོ་སོར་མགྲོན་དུ་བོས་པ་མ་གཏོགས་ཏེ། དགེ་སློང་གིས་སོ་སོར་མགྲོན་དུ་བོས་པ་བདག་གིར་བྱའོ། །དགེ་སློང་གཞན་དག་ཕྱིས་ལྷགས་པ་དེ་དག་གིས་བསམས་པ། བདག་ཅག་རྒྱལ་པོས་མགྲོན་དུ་མ་བོས་ཀྱིས་བསོད་སྙོམས་ལ་འཇུག་པར་བྱའོ་སྙམ་དུ་རིག་ནས་དེ་དག་བསོད་སྙོམས་ལ་ཞུགས་པ་དང ། མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས་དེ་དག་བསོད་སྙོམས་ལ་རྒྱུ་བ་མཐོང་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས། དེ་དག་གིས་སྨྲས་པ། ལྷ་འདི་དག་སླད་ཀྱིས་མཆིས་པས་འདི་དག་གི་གློ་བ་ལ་དགེ་སློང་གང་དག་བཅོམ་ལྡན་འདས་དང་ཐབས་གཅིག་ལྷགས་པ་དེ་དག་རྒྱལ་པོས་མགྲོན་དུ་བོས་ཀྱི། བདག་ཅག་ཕྱིས་ལྷགས་པ་དག་རྒྱལ་པོས་མགྲོན་དུ་མ་བོས་སོ་སྙམ་དུ་རིག་ནས་བསོད་སྙོམས་ལ་ཞུགས་སོ། །རྒྱལ་པོས་སྨྲས་པ། དེ་ལྟ་བས་ན་འཕགས་པ་དག་ཡང་དང་ཡང་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཡང་དང་ཡང་མགྲོན་དུ་བོས་པ་མ་གཏོགས་ཏེ། དགེ་སློང་གིས་ཡང་དང་ཡང་མགྲོན་དུ་བོས་པ་བདག་གིར་བྱའོ། །དགེ་སློང་དག་གིས་བསམས་པ། རྒྱལ་པོ་གཟུགས་ཅན་སྙིང་པོ་ནི་བྱ་བ་མང་བ་དང ། བྱེད་པ་མང་བ་ཡིན་ལ། བདག་ཅག་ནི་བྱ་བ་ཉུང་བ་དང ། བྱེད་པ་ཉུང་བ་ཡིན་གྱིས་བདག་ཅག་བསོད་སྙོམས་ལ་འཇུག་པར་བྱའོ་སྙམ་དུ་རིག་ནས་དེ་དག་བསོད་སྙོམས་ལ་ཞུགས་པ་དང ། མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས། དེ་དག་བསོད་སྙོམས་ལ་རྒྱུ་བ
8.8b
མཐོང་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས། དེ་དག་གིས་སྐབས་དེ་རྒྱས་པར་བརྗོད་པ་དང ། རྒྱལ་པོས་སྨྲས་པ། དེ་ལྟ་བས་ན་འཕགས་པ་དག་དུས་ཀྱིས་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དུས་ཀྱིས་མགྲོན་དུ་བོས་པ་མ་གཏོགས་ཏེ། དགེ་སློང་གིས་དུས་ཀྱིས་མགྲོན་དུ་བོས་པ་བདག་གིར་བྱའོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་གཤེགས་སྟོན་ལ་སྤྱན་དྲངས་ནས་ཕྱི་དེ་ཉིན་པར་དགེ་སློང་རབ་ཏུ་མང་པོ་དག་བསོད་སྙོམས་ལ་ཞུགས་པ་དང ། མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས་དེ་དག་བསོད་སྙོམས་ལ་རྒྱུ་བ་མཐོང་ནས། དེས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས། དེ་དག་གིས་སྐབས་དེ་རྒྱས་པར་བརྗོད་པ་དང ། རྒྱལ་པོས་སྨྲས་པ། དེ་ལྟ་བས་ན་འཕགས་པ་དག་རྟག་ཏུ་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྟག་ཏུ་མགྲོན་དུ་བོས་པ་མ་གཏོགས་ཏེ། དགེ་སློང་གིས་རྟག་ཏུ་མགྲོན་དུ་བོས་པ་བདག་གིར་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ་
8.9a
ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །ཟླ་བ་བཞིར་ཞེས་བྱ་བ་ནི་ཟླ་བ་བཞི་ཚུན་ཆད་དུའོ། །མགྲོན་དུ་བོས་པ་ཞེས་བྱ་བ་ནི་བསྟབས་པའོ། །བདག་གིར་བྱའོ་ཞེས་བྱ་བ་ནི་ཁས་བླང་བར་བྱ་བའོ། །དེ་ལས་ལྷག་པར་བདག་གིར་བྱེད་ན་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །སོ་སོར་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་སོ་སོར་ཐ་དད་པར་མགྲོན་དུ་བོས་པའོ། །ཡང་དང་ཡང་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་ཡང་དང་ཡང་མགྲོན་དུ་བོས་པའོ། །དུས་ཀྱིས་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་ནན་གྱིས་མགྲོན་དུ་བོས་པའོ། །རྟག་ཏུ་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་གཏན་དུ་མགྲོན་དུ་བོས་པའོ། །མ་གཏོགས་ཏེ་ཞེས་བྱ་བ་ནི་བཞག་སྟེའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཟླ་བ་བཞིར་མགྲོན་དུ་བོས་པ་ལས་ལྷག་པར་བདག་གིར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་གིས་ངན་པ་ལ་མགྲོན་དུ་བོས་པ་ན་བསོད་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་བསོད་པ་ལ་མགྲོན་དུ་བོས་པ་ན་ངན་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ཡང་ཉེས་བྱས་ཉིད་དུ་འགྱུར་རོ། །དགེ་སློང་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་ཟས་ཁྱེར་ཏེ་འོང་ན་དགེ་སློང་གིས་སྲིང་མོ་ཆོག་གོ། །མི་འདོད་དོ་ཞེས་བརྗོད་པར་བྱ་སྟེ། གལ་ཏེ
8.9b
བུད་མེད་ཀྱི་ཡུལ་ན་རེ་འཕགས་པ་ཅི་ཞིག་བཞེད་ཅེས་ཟེར་ན་བསྟབས་པ་བརྗོད་པར་བྱ་སྟེ། གང་འདོད་པ་དེ་བསླང་བར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དེ་བདུན་བཅུ་རྩ་བཞི་པ་རྫོགས་སོ།། ་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འཆའ་བར་མཛད་པ་དེའི་ཚེ་ན་གཉི་གའི་དགེ་འདུན་སྡུད་པར་མཛད་པས་འདི་ཡང་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་བཅའ་བ་མཛད་པ་ཡིན་ན་འདི་ལ་གཉི་གའི་དགེ་འདུན་བསྡུ་བ་མ་མཛད་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་ཞིག་དགེ་སློང་མ་རྣམས་ཀྱི་ནང་དུ་ཐོང་ལ་འདི་སྐད་ཅེས་སྲིང་མོ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་ཤིག་ཅེས་གྱིས་ཤིག་ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་བསྒོ་བ། ཚེ་དང་ལྡན་པ་ལམ་པ་ཁྱོད་བཞུད་ལ་དགེ་སློང་མ་རྣམས་ལ་སྲིང་མོ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས
8.10a
ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་ཤིག་།ཚེ་དང་ལྡན་པ་ལམ་པས་བཙུན་པ་ཀུན་དགའ་བོ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལས་མཉན་ནས་དགེ་སློང་མའི་དབྱར་ཁང་ག་ལ་བ་དེར་སོང་བ་དང ། ཇི་ཙམ་ན་དྲུག་སྡེ་དག་གིས་དེ་མཐོང་ནས་དེ་དག་གིས་དྲིས་པ། ཚེ་དང་ལྡན་པ་ལམ་པ་ཁྱོད་གར་འགྲོ། ཚེ་དང་ལྡན་པ་ལམ་པས་བསམས་པ། འདི་དག་གིས་ཀྱང་མ་ཐོས་པ་འདྲས་འདི་དག་ལ་ཡང་བརྗོད་པར་བྱའོ་སྙམ་ནས་དེས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་ཀྱང་བསླབ་པ་འདི་ལ་བསླབ་པར་བྱའོ། །དེ་དག་གིས་སྨྲས་པ། བདག་ཅག་དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ། ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་དེ་དག་གིས་བྱིས་པ་དང ། རྨོངས་པ་དང ། མི་གསལ་བ་དང ། མི་མཁས་པ་ཞེས་བྱ་བ་དག་གིས་ཁུར་བསླང་ངོ ། །ཚེ་དང་ལྡན་པ་ལམ་པ་དེ་ནས་སོང་སྟེ་འགྲོ་བ་ན་དགེ་སློང་མ་བཅུ་གཉིས་སྡེ་དག་གིས་མཐོང་ནས་དེ་དག་གིས་དེ་ལ་སྨྲས་པ། བཙུན་པ་ལམ་པ་གར་བཞུད། དེས་སྨྲས་པ། སྲིང་མོ་དག་ཤེས་པར་གྱིས་ཤིག་།བཅོམ
8.10b
ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་ཀྱང་བསླབ་པ་འདི་ལ་བསླབ་པར་བྱའོ། །དེ་དག་གིས་སྨྲས་པ། བདག་ཅག་དགེ་སློང་མ་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་བྱིས་པ་དང ། རྨོངས་པ་དང ། མི་གསལ་བ་དང ། མི་མཁས་པ་ཞེས་བྱ་བ་དག་གིས་ཁུར་བསླང་སྟེ་དོང་ངོ ། །ཚེ་དང་ལྡན་པ་ལམ་པས་བསམས་པ། བདག་ལ་གནས་ངན་ལེན་ཀུན་དུ་སྤྱོད་པ་འདི་དག་ལ་བརྗོད་པས་ཅི་བྱ། ད་ནི་སོང་ལ་སྐྱེ་དགུའི་བདག་མོ་ཆེན་མོ་གཽ་ཏ་མཱི་མ་གཏོགས་པ་གཞན་འགའ་ལ་ཡང་བརྗོད་པར་མི་བྱའོ་སྙམ་ནས་དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེར་སོང་སྟེ་ཕྱིན་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །གཽ་ཏ་མཱི་ཤེས་པར་གྱིས་ཤིག་།བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ། །སྐྱེ་དགུའི་བདག་མོ་ཆེན་མོས་སྨྲས་པ། བཙུན་པ་ལམ་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དེ། དགེ
8.11a
སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་པ་གང་ལགས་པ་དེ་བདག་མགོ་དང ། ངག་དང ། ཡིད་ཀྱིས་ཀྱང་ནོད་དོ། །བཙུན་པ་ལམ་པ་འདི་ལྟ་སྟེ། དཔེར་བགྱི་ན་རྒྱལ་རིགས་ཀྱི་ཕྱུགས་ཅུང་དག་གམ། བྲམ་ཟེའི་ཕྱུགས་ཅུང་དག་གམ། རྗེའུ་རིགས་ཀྱི་ཕྱུགས་ཅུང་དག་གམ། དམངས་རིགས་ཀྱི་ཕྱུགས་ཅུང་ལེགས་པར་ཁྲུས་བགྱིས་པ། བྱུག་པས་ལེགས་པར་བྱུགས་པ། སྐྲ་དང་སེན་མོ་ལེགས་པར་བཅོས་པ། རད་པ་དཀར་པོ་འཚལ་བ་དག་གིས་ཨུད་པ་ལའི་ཕྲེང་བ་འམ། ཙམ་པ་ཀའི་ཕྲེང་བ་འམ། བར་ཤི་ཀའི་ཕྲེང་བ་འམ། ཨ་ཏི་མུག་ཏ་ཀའི་ཕྲེང་བ་འགའ་ཞིག་སྩལ་བར་གྱུར་ན་དེ་ཡིད་དགའ་བས་སུག་པ་གཉིས་ཀྱིས་བླངས་ཏེ་ཡན་ལག་གི་དམ་པ་མགོ་ལ་གདགས་པར་བགྱི་བ་དེ་བཞིན་དུ། བཙུན་པ་ལམ་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང ། དུས་ཀྱིས་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་པ་གང་ལགས་པ་དེ་ཡང་བདག་མགོ་དང ། ངག་དང ། ཡིད་ཀྱིས་ཀྱང་ནོད་དོ། །ཚེ་དང་ལྡན་པ་ལམ་པས་བསྒོ་སྟེ་ཕྱིར་འོངས་པ་དང ། ཚེ་དང་ལྡན་པ་ཀུན་དགའ་བོས་དེ་མཐོང་ནས་དྲིས་པ། ཚེ་དང་ལྡན་པ་ལམ་པ་ཁྱོད་ཀྱིས་དགེ་སློང་མ་རྣམས་ལ་བསྒོ་འམ། དེས་སྨྲས་པ། བསྒོ་སྟེ། འདི་ལྟར་བྱིས་པ་དང ། རྨོངས་པ་དང ། མི་གསལ་བ་དང ། མི་མཁས་པ་ཞེས་བྱ་བ་དག་གིས་ཁུར་བསླང་ངོ ། །སུས། དྲུག་སྡེ་དག་གིས་སོ། །ཅིའི་ཕྱིར། དེས
8.11b
སྐབས་དེ་རྒྱས་པར་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་རྣམས་ཀྱིས་ཚེ་དང་ལྡན་པ་དག་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས་བདག་ཅག་དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་རྣམས་ཀྱིས་ཚེ་དང་ལྡན་པ་དག་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས་བདག་ཅག་དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན
8.12a
པར་བྱ་སྟེ། ཡང་དགེ་སློང་གང་དགེ་སློང་རྣམས་ཀྱིས་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས་བདག་དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དོ། །དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ། །དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་ཡང་དྲི་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་ཞེས་བྱ་བ་ནི་བསླབ་པ་གང་ཡིན་པ་དེ་ལའོ། །དེ་དག་ལ་ཞེས་བྱ་བ་ནི་དགེ་སློང་དེ་དག་ལའོ། །འདི་སྐད་ཅེས་ཤེས་བྱ་བ་ནི་འདི་སྐད་ཅེས་ཟེར་ནའོ། །དགེ་སློང་མདོ་སྡེ་འཛིན་པ་ཞེས་བྱ་བ་ནི་མདོ་སྡེ་མཐའ་དག་འཛིན་པ་གང་དག་ཡིན་པ་རྣམས་སོ། །འདུལ་བ་འཛིན་པ་ཞེས་བྱ་བ་ནི་འདུལ་བ་མཐའ་དག་འཛིན་པ་གང་དག་ཡིན་པ་རྣམས་སོ། །མ་མོ་འཛིན་པ་རྣམས་ལ་འདྲིའི་བར་དུ་ཞེས་བྱ་བ་ནི་མ་མོ་མཐའ་དག་འཛིན་པ་གང་དག་ཡིན་པ་རྣམས་ལའོ། །བྱིས་པ་ཞེས་བྱ་བ་ལ། བྱིས་པ་ཞེས་བྱ་བ་ནི་ཉེས་པར་བསམ་པ་སེམས་པ་དང ། ཉེས་པར་སྨྲ་བ་རྗོད་པ་དང ། ཉེས་པར་བྱ་བའི་ལས་བྱེད་པའོ། །རྨོངས་པ་ཞེས་བྱ་བ་ལ། རྨོངས་པ་ཞེས་བྱ་བ་ནི་མདོ་སྡེ་འཛིན་པ་མ་ཡིན་པ་དང ། འདུལ་བ་འཛིན་པ་མ་ཡིན་པ་དང ། མ་མོ་འཛིན་པ་མ་ཡིན་པའོ། །མི་གསལ་བ་ཞེས་བྱ་བ་ལ། མི་གསལ་བ་ཞེས་བྱ་བ་ནི་མདོ་སྡེ་ལ་མི་གསལ་བ་དང ། འདུལ་བ་ལ་མི་གསལ་བ་དང ། མ་མོ་ལ་མི་གསལ་བའོ། །མི་མཁས་པ་ཞེས་བྱ་བ་ལ། མི་མཁས་པ་ཞེས་བྱ་བ་ནི་མདོ་སྡེ་ལ་མི་མཁས་པ་དང ། འདུལ་བ་ལ་མི་མཁས་པ་དང ། མ་མོ་ལ་མི་མཁས་པའོ། །
8.12b
ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ཞེས་བྱ་བ་ནི་དེ་སྐད་ཅེས་ཟེར་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ། །དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་ཡང་དྲི་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་རྣམས་ཀྱིས་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ། །ཞེས་བསྒོ་བ་ན་དེ་དག་ལ་འདི་སྐད་ཅེས། བདག་དགེ་སློང་མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ཐམས་ཅད་ལྟུང་བྱེད་དུ་འགྱུར་རོ། །བྱིས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །རྨོངས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །མི་གསལ་བ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །ཡང་དག་པ་ཁོ་ནར་བྱིས་པ་དང ། རྨོངས་པ་དང ། མི་གསལ་བ་དང ། མི་མཁས་པ་ཡིན་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པ་ལ་ཉེ་བར་འཇོག་པ་སྤང་བའི་ལྟུང་བྱེད་དེ་བདུན
8.13a
བཅུ་རྩ་ལྔ་པ་རྫོགས་སྷོ།། ་་་་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས། ཚེ་དང་ལྡན་པ་འདུན་པ་ནི་ཀཽ་ཤམྦིར་སོང་སྟེ་སྙིང་ལས་ཆུང་ངུར་འདུག་།འགྲོ་མགྱོགས་དང ། ནབ་སོ་གཉིས་ནི་དུས་ལ་བབ། དགའ་བོ་དང ། ཉེ་དགའ་གཉིས་ནི་དགེ་འདུན་གྱི་ནང་ན་འདུག་པ་དེའི་ཚེ་ན་བཅུ་བདུན་སྡེའི་ཚོགས་དག་གདུག་ཅིང་ཕ་རོལ་གནོན་པ་དང ། མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པར་གྱུར་ནས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བརྩམས་ཏེ། ཇི་ལྟར་དགའ་བོ་དང་ཉེ་དགའ་གཉིས་ཀྱིས་ཐོ་བརྩམས་པ་ལྟར་ཡང་གཞན་གྱིས་མ་བརྩམས་ལ། ཇི་ལྟར་ཉེ་དགས་ཐོ་བརྩམས་པ་ལྟར་ཡང་དགའ་བོས་མ་བརྩམས་ཀྱིས་དེ་གནས་ནས་དབྱུང་བའི་ལས་བྱའོ། །དེ་དག་གིས་སྨྲས་པ། འདིའི་ཕུ་བོ་རྩོད་པ་ལ་མཁས་པ་ཡིན་གྱིས་ཚུར་ཤེག་།ཇེ་གྲོས་བྱའོ་ཞེས་དེ་དག་དཔོང་སའི་ཁང་པར་ཞུགས་ཏེ་སྒོ་བཅད་ནས་གྲོས་བྱ་བར་བརྩམས་པ་དང ། ཉེ་དགའ་སྐར་ཁུང་ན་ཉན་ཅིང་དེས་དེ་དག་བསྡིགས་ཏེ། ཀྱེ་མ་བཅུ་བདུན་སྡེ་དག་ཅིའི་གྲོས་བྱེད། ཁོ་བོའི་ཚངས་པ་མཚུངས་པར་སྤྱོད་པ་ཁ་ཅིག་ནི་ཡོངས་སུ་མྱ་ངན་ལས་འདས། ཁ་ཅིག་ནི་སྙིང་ལས་ཆུང་ངུ་ཁོ་ནར་འདུག་།ཁ་ཅིག་ནི་དུས་ལ་བབ་པས་ད་འདི་གནས་ནས་དབྱུང་བའི་ལས་བྱའོ་སྙམ་དུ་སེམས་སམ་ཅི། ཁྱེད་ཀྱིས་ད་ཁོ་བོ་ཅག་ཟིལ་གྱིས་མནན་ཏེ་འཁོད་སྙམ་འམ། ཁོ་བོ་ཅག་གིས་ཀྱང་ཁྱེད་ལ་མཚམས་ཆེན་པོ་གཅད་པར་བྱའོ། །ཁྱེད་ཀྱིས། གླང་པོའི་ཐག་པ་ཉི་མ་དང ། །རླུང་གིས་ཡོངས་སུ་བསྐམས་གྱུར་ཅིང ། །གླང་པོའི་གཉའ་ནས་ལྷུང་གྱུར་ཀྱང ། །ལུག་ནི་ལྔ་བརྒྱས་དྲང་བར་བྱ། །ཞེས་བྱ་བ་མ་ཐོས་སམ་ཞེས་བསྡིགས་པ་དང ། དེ་དག་གིས་བསམས་པ། འདིས་བདག་ཅག་གྲོས་བྱེད་པ་འཕྲིགས་ཀྱིས་གཞན་དུ་འདོང་ངོ་ཞེས་དེ་དག་མེ་ཁང་དུ་ཞུགས་ཏེ་གྲོས་བྱ་བར་བརྩམས་པ་དང ། ཉེ་དགའ་ཡང་དེར་འཇབ་ཅིང་འོངས་ཏེ་ཉན་ཅིང་དེས་དེར་ཡང་དེ་བཞིན
8.13b
དུ་བསྡིགས་སོ། །དེ་དག་སྟེང་ཁང་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་བར་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་བར་ཁང་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་འོག་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་གནས་ཁང་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་ཁྱམས་སུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་ཁྱམས་སུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་གནས་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་སྒོ་ཁང་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་བང་རིམ་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་བང་རིམ་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་སྒོ་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་འཆག་སར་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་སྤན་སྤུན་དག་གི་ནང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་སྤན་སྤུན་དག་གི་ནང་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་འཆག་སར་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་དགོན་པར་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་ཚང་ཚིང་དག་གི་ནང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་ཚང་ཚིང་དག་གི་ནང་དུ་འཁོད་དེ་གྲོས་བྱ་བར་བརྩམས་པ་དང ། ཉེ་དགའ་དགོན་པར་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་ལམ་ནས་འདོང་ཞིང་གྲོས་བྱ་བར་བརྩམས་པ་དང ། ཉེ་དགའ་ཕྱི་བཞིན་སོང་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་ནས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་འདི་གནས་ནས་དབྱུང་བའི་ལས་བྱ་བར་མི་ནུས་ཀྱིས་འདི་ལ་བཟོད་པ་གསོལ་བར་བྱའོ་ཞེས་དེ་དག་གིས་དེ་ལ་སྨྲས་པ། བཙུན་པ་ཉེ་དགའ་བདག་ཅག་ལ་བཟོད་པར་མཛོད་ཅིག་།ཉེ་དགས་སྨྲས་པ། བཟོད་པར་བྱའོ། །དེ་དག་གིས་དེ་ལ་དྲིས་པ། ཁྱོད་ཀྱིས་ཁོ་བོ་ཅག་གྲོས་བྱེད་པ་ཇི་ལྟར་ཤེས། ཉེ་དགས་སྨྲས་པ། གང་གི་ཚེ་ཁྱེད་ཅག་དཔོང་སའི་ཁང་པར་ཞུགས་ཏེ་གྲོས
8.14a
བྱེད་པ་དེའི་ཚེ་ན་ཁོ་བོས་སྐར་ཁུང་ནས་མཉན་ཏོ། །གང་གི་ཚེ་ཁྱེད་ཅག་མེ་ཁང་དུ་ཞུགས་ཏེ་གྲོས་བྱེད་པ་དེའི་ཚེ་ན་ཁོ་བོས་བཞབས་ཏེ་མཉན་ཏོ། །གང་གི་ཚེ་ཁྱེད་ཅག་སྟེང་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་བར་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་བར་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་འོག་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་གནས་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་ཁྱམས་སུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་ཁྱམས་སུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་གནས་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་སྒོ་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་བང་རིམ་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་བང་རིམ་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་སྒོ་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་འཆག་སར་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་སྤན་སྤུན་དག་གི་ནང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་སྤན་སྤུན་དག་གི་ནང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་འཆག་སར་འདུག་སྟེ་མཉན་ཏོ། །གང་གི་ཚེ་ཁྱེད་ཅག་དགོན་པར་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་ཚང་ཚིང་དག་གི་ནང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་ཚང་ཚིང་དག་གི་ནང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་དགོན་པར་འདུག་སྟེ་མཉན་ཏོ། །གང་གི་ཚེ་ཁྱེད་ཅག་ལམ་ནས་འདོང་ཞིང་གྲོས་བྱེད་པ་དེའི་ཚེ་ན་ཁོ་བོས་ཕྱི་བཞིན་སོང་སྟེ་མཉན་ཏོ། །དེ་དག་གིས་སྨྲས་པ། ཁྱོད་ཉན་རྣས་འདུག་ཏུ་རུང་ངམ། ཉེ་དགས་སྨྲས་པ། གལ་ཏེ་ཁོ་བོ་ཁྱེད་ཅག་གྲོས་བྱེད་པའི་ཚེ་ཉན་རྣས་འདུག་པར་མ་གྱུར་དུ་ཟིན་ན་ཁྱེད་ཅག་གིས་ཁོ་བོ་གནས་ནས་དབྱུང་བའི་ལས་བྱས་པར་གྱུར་ཏོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་འཐབ་པར་གྱུར། མཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ། དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་ཅང་མི་སྨྲ་བར་ཉན་རྣས་འདུག་པར
8.14b
བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་ཉེ་དགའ་ལ་རྨས་པ། ཉེ་དགའ་ཁྱོད་དགེ་སློང་རྣམས་འཐབ་པར་གྱུར། འཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་ཅང་མི་སྨྲ་བར་ཉན་རྣས་འདུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་འཐབ་པར་གྱུར། འཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་ཏུ་བྱས་ཏེ་ཅང་མི་སྨྲ་བར་ཉན་རྣས་འདུག་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་རྣམས་ཤེས་བྱ་བ་ནི་ཆོས་འདི་པ་རྣམས
8.15a
སོ། །འཐབ་པར་གྱུར། འཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་ཞེས་བྱ་བ་ནི་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལའོ། །དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་ཞེས་བྱ་བ་ནི་དེ་ལྟ་བུའི་བསམ་པས་གཉེན་པོས་དེ་ལྟ་དེ་ལྟར་ཕ་རོལ་གནན་པར་བྱའོ་སྙམ་པའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ། །ཅང་མི་སྨྲ་བར་ཉན་རྣས་འདུག་ན་ཞེས་བྱ་བ་ནི་ཅང་མི་སྨྲ་བར་རྣ་གཏོད་པས་འདུག་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དག་སྟེང་ཁང་ན་གྲོས་བྱེད་ཅིང་དགེ་སློང་ཡང་འཛེག་ན་དགེ་སློང་དེས་རྟིང་སྒྲ་འམ། སེ་གོལ་གྱི་སྒྲ་འམ། མགུལ་བསལ་བའི་སྒྲ་བྱའོ། །རྟིང་སྒྲ་འམ། སེ་གོལ་གྱི་སྒྲ་འམ། མགུལ་བསལ་བའི་སྒྲ་མི་བྱེད་ན་ཇི་སྲིད་དུ་སྒྲ་ཐོས་ཤིང་དོན་མ་གོའི་བར་དུ་དགེ་སློང་ལ་ཉེས་བྱས་སུ་འགྱུར་ལ། སྒྲའི་དོན་གོ་ན་ལྟུང་བྱེད་དུ་འགྱུར་རོ། །དགེ་སློང་དག་བར་ཁང་དང ། འོག་ཁང་དང ། གནས་ཁང་དང ། ཁྱམས་དང ། སྒོ་ཁང་དང ། བང་རིམ་དང ། འཆག་ས་དང ། དགོན་པ་དང ། ལམ་ནས་འགྲོ་ཞིང་གྲོས་བྱེད་ལ། དགེ་སློང་ཡང་ཕྱི་བཞིན་འགྲོ་ན་དགེ་སློང་དེས་རྟིང་སྒྲ་འམ། སེ་གོལ་གྱི་སྒྲ་འམ། མགུལ་བསལ་བའི་སྒྲ་བྱའོ། །རྟིང་སྒྲ་འམ། སེ་གོལ་གྱི་སྒྲ་འམ། མགུལ་བསལ་བའི་སྒྲ་མི་བྱེད་ན་ཇི་སྲིད་དུ་སྒྲ་ཐོས་ལ་དོན་མ་གོའི་བར་དུ་དགེ་སློང་ལ་ཉེས་བྱས་སུ་འགྱུར་ལ། སྒྲའི་དོན་གོ་ན་ལྟུང་བྱེད་དུ་འགྱུར་རོ། །ནང་དང་བཅས་པ་མ་ཡིན་པ་དང ། གྱ་ཙོམ་དུ་འཇུག་པ་དང ། མཉན་ནས་ཉེ་བར་ཞི་བར་བྱའོ་སྙམ་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང །
8.15b
སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཉན་རྣ་ལས་གྱུར་པའི་ལྟུང་བྱེད་དེ་བདུན་བཅུ་རྩ་དྲུག་པ་རྫོགས་སྷོ།། ་་་་་་་་་་་་་་འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་བཞི་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས། ཚེ་དང་ལྡན་པ་འདུན་པ་ནི་ཀཽ་ཤམྦིར་སོང་སྟེ་སྙིང་ལས་ཆུང་ངུར་འདུག་།འགྲོ་མགྱོགས་དང ། ནབ་སོ་གཉིས་ནི་དུས་ལ་བབ། དགའ་བོ་དང ། ཉེ་དགའ་གཉིས་ནི་དགེ་འདུན་གྱི་ནང་ན་འདུག་པ་དེའི་ཚེ་ན་བཅུ་བདུན་སྡེའི་ཚོགས་དག་གདུག་ཅིང་ཕ་རོལ་གནོན་པ་དང ། མདོ་སྡེ་འཛིན་པ་དང ། འདུལ་བ་འཛིན་པ་དང ། མ་མོ་འཛིན་པར་གྱུར་ནས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བརྩམས་ཏེ། ཇི་ལྟར་དགའ་བོ་དང་ཉེ་དགའ་གཉིས་ཀྱིས་ཐོ་བརྩམས་པ་ལྟར་ཡང་གཞན་གྱིས་མ་བརྩམས་ལ། ཇི་ལྟར་ཉེ་དགས་ཐོ་བརྩམས་པ་ལྟར་ཡང་དགའ་བོས་མ་བརྩམས་ཀྱིས་དེ་གནས་ནས་དབྱུང་བའི་ལས་བྱའོ། །དེ་ན་ཁ་ཅིག་གིས་སྨྲས་པ། འདིའི་ཕུ་བོ་དགའ་བོ་རྩོད་པ་ལ་མཁས་པ་ཡིན་པས་བདག་ཅག་གིས་འདི་གནས་ནས་དབྱུང་བའི་ལས་བྱ་བར་མི་ནུས་སོ། །ཁ་ཅིག་གིས་སྨྲས་པ། གཅིག་སྨྲ་བ་ན་གཉིས་ཀྱིས་མཉན་པར་མི་བྱ་བར་ཚོགས་སྨྲ་ན་ཚོགས་ནི་རྒྱལ་པོ་དང་འདྲ་བས་གལ་ཏེ་དེ་ཅུང་ཟད་སྨྲ་བར་གྱུར་ན་དེའི་ཚེ་གནས་ནས་དབྱུང་བའི་ལས་བྱའོ་ཞེས་དེ་དག་གིས་གནས་མལ་བཤམས་ནས། གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན། གླེང་བ་པོ་རྒན་པའི་མཐའ་ལོགས་སུ་འདུག་སྟེ་སྨྲས་པ། བཙུན་པ་ཉེ་དགའ་ཁྱོད་ཀྱིས་བཅུ་བདུན་སྡེའི་ཚོགས་དག་གི་ལྟོ་དྲལ་ཏེ་རྒྱུ་མ་དག་གིས་རྒྱལ་བྱེད་ཀྱི་ཚལ་བསྐོར
8.16a
བར་བྱའོ་ཞེས་བྱ་བ་དེ་ལྟ་བུའི་ཚིག་སྨྲས་པ་གང་ཡིན་པ་དེ་དྲན་ནམ། ཉེ་དགས་སྨྲས་པ། ཚེ་དང་ལྡན་པ་དག་དེ་ནི་དོན་འདས་པ་ཡིན་ན་རྨ་སོས་པ་གླེངས་ཏེ་ཅི་བྱ། དེ་དག་གིས་སྨྲས་པ། བཅོམ་ལྡན་འདས་ནི་འདས་པའི་དོན་ཁོ་ན་ལ་བརྟེན་ཏེ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མཛད་དོ། །དགའ་བོས་ཕྱིར་བཟློག་པར་བརྩམས་པ་དང ། དེ་དག་གིས་སྨྲས་པ། གང་གཅིག་ཕྱིར་ཟློག་པར་བྱེད་པ་དེ་ཡང་གནས་ནས་དབྱུང་བའི་ལས་བྱའོ། །དགའ་བོས་བསམས་པ། འདི་དག་གི་བྱེད་སྟངས་ལས་ན་བདག་ལ་ཡང་གནས་ནས་འབྱིན་པའི་ལས་བྱེད་པར་འགྱུར་ན་མ་ལེགས་པར་འགྱུར་རོ་སྙམ་ནས། དེ་དགུན་གྱི་དུས་ལ་བབ་པས་ལ་བ་ཞིག་གྱོན་ཏེ་དེས་ལ་བ་དེ་རྩིག་དྲུང་དུ་བསླང་སྟེ་བཞག་ནས་ཅང་མི་སྨྲ་བར་སྟན་ལས་ལངས་ཏེ་སོང་ངོ ། །དེ་དག་གིས་སྨྲས་པ། ཚེ་དང་ལྡན་པ་དག་འདོད་པ་སྨྲོས་ཤིག་ཅེས་དེ་དག་གིས་གྱ་ཙོམ་དུ་ཉེ་དགའ་གནས་ནས་དབྱུང་བའི་ལས་བྱས་སོ། །དེ་གནས་ནས་དབྱུང་བའི་ལས་བྱས་པ་ན་ངུ་ཞིང་ཕུ་བོའི་གན་དུ་སོང་བ་དང ། དགའ་བོས་སྨྲས་པ། ཉེ་དགའ་ཅིའི་ཕྱིར་ངུ ། ལྷུང་བཟེད་ནག་པོ་ཅན་དག་གིས་བདག་གནས་ནས་དབྱུང་བའི་ལས་བྱས་སོ། །དགའ་བོས་སྨྲས་པ། གང་དག་གིས་ཁོ་བོའི་ནུ་བོ་གནས་ནས་དབྱུང་བའི་ལས་བྱས་པ་དེ་དག་གྲོང་དང ། གྲོང་ཁྱེར་དང ། ཁམས་གསུམ་ནས་གནས་ནས་ཕྱུང་བར་གྱུར་ཅིག་།འོན་ཀྱང་གནས་ནས་དབྱུང་བའི་ལས་བྱས་པ་དག་ལ་གྲོང་དང ། གྲོང་ཁྱེར་མེད་དམ་ཅི། སྡོད་ལ་ཕྱིས་བཟོད་པ་གསོལ་ཅིག་།འདི་ལྟར་དེ་དག་གིས་མི་མཐུན་པ་ཁོ་ནར་ལས་བྱས་སོ། །སུ་ཞིག་དེར་མ་འོངས། དགའ་བོས་སྨྲས་པ། ཁོ་བོའོ། །བདག་གིས་དེ་ན་རྒན་པའི་མཐའ་ལོགས་ན་སློབ་དཔོན་གྱི་སྒྲ་ཐོས་སོ། །དགའ་བོས་སྨྲས་པ། གང་གི་ཚེ་དེ་དག་ན་རེ་གང་གཅིག་ཕྱིར་ཟློག་པར་བྱེད་པ་དེ་ཡང་གནས་ནས་དབྱུང་བའི་ལས་བྱའོ་ཞེས་ཟེར་བ་དེའི་ཚེ་ན་ཁོ་བོས་བསམས་པ། འདི་དག་གི་བྱེད་སྟངས་ལས་ན་བདག་ལ་ཡང་གནས་ནས་འབྱིན་པའི་ལས་བྱེད་པར་འགྱུར་ན་མ་ལེགས་པར་འགྱུར་རོ་སྙམ་ནས། ཁོ་བོ་དགུན་གྱི་དུས་ལ་བབ་པས་ལ་བ་ཞིག་གྱོན་ཏེ་ཁོ་བོས་ལ་བ་དེ
8.16b
རྩིག་དྲུང་དུ་བསླང་སྟེ་བཞག་ནས་ཅང་མི་སྨྲ་བར་སྟན་ལས་ལངས་ཏེ་སོང་ངོ ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་དགའ་བོ་ལ་རྨས་པ། དགའ་བོ་ཁྱོད་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ནད་ངན་ཅན་དག་འཁོད་པ་དེ་དག་གིས་ཡུན་རིང་དུ་འདུག་པར་མི་ནུས་པ་ན་དགེ་སློང་ནད་གཡོག་དག
8.17a
གིས་ཀྱང་ནད་པ་དག་གི་བྱ་བ་ཉམས་པར་བྱེད། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ། །བཅོམ་ལྡན་འདས་ཀྱིས་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ་ཞེས་བཀའ་སྩལ་ནས་དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང ། ཆོས་གོས་བཞག་ནས་ཇི་ཙམ་ན་དེར་མེ་ཤོར་ནས་དགེ་སློང་དེས་དེར་འགྲོ་བར་བརྩམས་ཏེ་དེ་ལམ་གྱི་ཕྱེད་དུ་ཕྱིན་པ་དང ། བདག་གིས་དགེ་སློང་འདུག་པ་ལ་མ་སྨྲས་སོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ་ཇི་སྲིད་དུ་དགེ་སློང་འདུག་པ་ལ་སྨྲ་བར་བྱེད་པ་དེ་སྲིད་དུ་དེའི་ལྷུང་བཟེད་དང་ཆོས་གོས་ཚིག་ནས་དེ་དེར་སོང་བ་དང་ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི། གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ་ཞེས་ཟེར་ཞིང་དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །
8.17b
ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་དགའ་བོ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཞེས་བྱ་བ་ནི་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་བྱུང་བ་ནའོ། །ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་ཞེས་བྱ་བ་ནི་ཐོས་པའི་ཉེན་ཀོར་ལས་འདས་ཏེ་འགྲོ་ཞིང་ངོ ། །དགེ་སློང་འདུག་པ་ལ་མི་སྨྲ་ན་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཇི་ཙམ་ཅུང་ཟད་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན་ཇི་སྲིད་ཐོས་པའི་ཉེན་ཀོར་ལས་མ་འདས་ཀྱི་བར་དུ་ཉེས་བྱས་སུ་འགྱུར་ལ། ཐོས་པའི་ཉེན་ཀོར་ལས་འདས་ན་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མི་སྨྲ་བར་འགྲོ་བའི་ལྟུང་བྱེད་དེ་བདུན་བཅུ་རྩ་བདུན་པ་རྫོགས་སོ།། ་་་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་གླང་ཆེན་ལྷས་ཀྱི་བདག་པོའི་བུ་ནག་པ་དགེ་སློང་རབ་ཏུ་མང་པོ་དག་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པའི་བསྟན་པའོ་ཤེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་འཐུན་པར་གྱུར་པ་ན་གཅིག་པུས
8.18a
དགེ་འདུན་ཟློག་པར་བྱེད། གཅིག་པུས་དགེ་འདུན་མི་མཐུན་པར་བྱེད་ཅིང ། རྩོད་པ་བཟུང་སྟེ་རྩོད་ཅིང ། འདུག་ལ་གཏམ་གྱི་མཇུག་སྡོད་པར་མི་བྱེད། གུས་པར་མི་བྱེད། རྗེ་ས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རབ་ཏུ་མང་པོ་དག་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་འཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད། གཅིག་པུས་དགེ་འདུན་མི་མཐུན་པར་བྱེད་ཅིང ། རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད། གུས་པར་མི་བྱེད། རྗེ་ས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་ཤེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་གླང་ཆེན་ལྷས་ཀྱི་བདག་པོའི་བུ་ནག་པ་ལ་རྨས་པ། དགེ་སློང་ཁྱོད་དགེ་སློང་རབ་ཏུ་མང་པོ་དག་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་འཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད། གཅིག་པུས་དགེ་འདུན་མི་མཐུན་པར་བྱེད་ཅིང་རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད། གུས་པར་མི་བྱེད། རྗེ་ས་མི་བྱེད་ཅིང ། ཕྱིར་སྨྲ་བར་བྱའོ་སྙམ་དུ་སེམས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ
8.18b
གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གུས་པར་མི་བྱེད་ན་ལྟུང་བྱེད་དོ། །གུས་པར་མི་བྱེད་ན་ཞེས་བྱ་བ་ནི་གཉིས་ཀ་ལ་གུས་པར་མི་བྱེད་ན་སྟེ། དགེ་འདུན་ལ་དང ། གང་ཟག་ལའོ། །དེ་ལ་དགེ་འདུན་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དང ། དགེ་འདུན་གྱི་ཐ་སྙད་པའོ། །གང་ཟག་ནི་མཁན་པོ་དང ། སློབ་དཔོན་དག་གོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དགེ་འདུན་གྱིས་འདུག་ཤིག་ཅེས་བསྒོ་བ་ན་མི་འདུག་ན་ལྟུང་བྱེད་དུ་འགྱུར་རོ། །མ་འདུག་ཤིག་ཅེས་བསྒོ་བ་ན་འདུག་ན་ལྟུང་བྱེད་དུ་འགྱུར་རོ། །སོང་ཤིག་ཅེས་བསྒོ་བ་ན་མི་འགྲོ་ན་ལྟུང་བྱེད་དུ་འགྱུར་རོ། །མ་འགྲོ་ཤིག་ཅེས་བསྒོ་བ་ན་འགྲོ་ན་ལྟུང་བྱེད་དུ་འགྱུར་རོ། །གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དུ་འགྱུར་རོ། །གནས་མལ་མ་ལེན་ཅིག་ཅེས་བསྒོ་བ་ན་ལེན་ན་ལྟུང་བྱེད་དུ་འགྱུར་རོ། །གཙུག་ལག་ཁང་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དུ་འགྱུར་རོ། །གཙུག་ལག་ཁང་མ་ལེན་ཅིག་ཅེས་བསྒོ་བ་ན་ལེན་ན་ལྟུང་བྱེད་དུ་འགྱུར་རོ། །སྨྲོས་ཤིག་ཅེས་བསྒོ་བ་ན་མི་སྨྲ་ན་ལྟུང་བྱེད་དུ་འགྱུར་རོ། །མ་སྨྲ་ཤིག་ཅེས་བསྒོ་བ་ན་སྨྲ་ན་ལྟུང་བྱེད་དུ་འགྱུར་རོ། །ཆོས་དང་ལྡན་པར་ཤད་ཀྱིས་སྦྱང་བ་སྦྱིན་པར་བྱེད་ན་ལྟུང་བ་མེད་དོ། །དགེ་འདུན་གྱི་ཐ་སྙད་པས་བསྒོ་བ་ལ་ཡང་དེ་བཞིན་དུ་སྦྱར་རོ། །དགེ་སློང་མཁན་པོས་འདུག་ཤིག་ཅེས་བསྒོ་བ་ན་མི་འདུག་ན་ཉེས་བྱས་སུ་འགྱུར་རོ། །མ་འདུག་ཤིག་ཅེས
8.19a
བསྒོ་བ་ན་འདུག་ན་ཉེས་བྱས་སུ་འགྱུར་རོ། །སོང་ཤིག་ཅེས་བསྒོ་བ་ན་མི་འགྲོ་ན་ཉེས་བྱས་སུ་འགྱུར་རོ། །མ་འགྲོ་ཤིག་ཅེས་བསྒོ་བ་ན་འགྲོ་ན་ཉེས་བྱས་སུ་འགྱུར་རོ། །གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སུ་འགྱུར་རོ། །གནས་མལ་མ་ལེན་ཅིག་ཅེས་བསྒོ་བ་ན་ལེན་ན་ཉེས་བྱས་སུ་འགྱུར་རོ། །གཙུག་ལག་ཁང་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སུ་འགྱུར་རོ། །གཙུག་ལག་ཁང་མ་ལེན་ཅིག་ཅེས་བསྒོ་བ་ན་ལེན་ན་ཉེས་བྱས་སུ་འགྱུར་རོ། །སྨྲོས་ཤིག་ཅེས་བསྒོ་བ་ན་མི་སྨྲ་ན་ཉེས་བྱས་སུ་འགྱུར་རོ། །མ་སྨྲ་ཤིག་ཅེས་བསྒོ་བ་ན་སྨྲ་ན་ཉེས་བྱས་སུ་འགྱུར་རོ། །ཆོས་དང་ལྡན་པར་ཤད་ཀྱིས་སྦྱང་བ་སྦྱིན་པར་བྱེད་ན་ལྟུང་བ་མེད་དོ། །སློབ་དཔོན་རྣམས་ཀྱིས་བསྒོ་བ་ལ་ཡང་དེ་བཞིན་དུ་སྦྱར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མ་གུས་པའི་ཚུལ་གྱི་ལྟུང་བྱེད་དེ་བདུན་བཅུ་རྩ་བརྒྱད་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཆུ་སྲིན་བྱིས་པ་གསོད་ཀྱི་རི་ལ་ཁྱིམ་བདག་རྟོགས་ལྡན་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བཙས་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །ཁྱིམ་བདག་དེས་བསམས་པ། བདག་གིས་བུ་མོ་འདི་གཟུགས་ཀྱི་ཕྱིར་ཡང་མི་སྦྱིན། བཟོའི་ཕྱིར་ཡང་མི་སྦྱིན་གྱི་བདག་དང་རིགས་དང ། ནོར་གྱིས་འདྲ་བ་འམ། ལྷག་པ་གང་ཡིན་པ་ལ་བདག་གིས་བུ་མོ་འདི་སྦྱིན་ནོ་སྙམ་མོ། །དེས་མཉན་ཡོད་ན་ཁྱིམ་བདག་མགོན་མེད་ཟས་སྦྱིན་ཞེས་བྱ
8.19b
བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེ་བདག་དང་རིགས་དང ། ནོར་གྱིས་མཉམ་ཞིང་ནོར་གྱི་རྣམ་པས་ཆེས་ལྷག་པ་ཡིན་ནོ་ཞེས་ཐོས་ནས་དེས་བུ་མོ་དེ་མཉན་ཡོད་དུ་ཁྱིམ་བདག་མགོན་མེད་ཟས་སྦྱིན་གྱི་བུ་ལ་བྱིན་ནོ། །ཁྱིམ་བདག་མགོན་མེད་ཟས་སྦྱིན་གྱིས་ཀྱང་དཔལ་གྱི་འབྱོར་པས་བུའི་ཆུང་མར་བླངས་སོ། །ཁྱིམ་བདག་རྟོགས་ལྡན་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པའི་ཆུང་མ་ལ་སེམས་ཅན་ཞུགས་པར་གྱུར་ནས་དེ་ལ་གང་གི་ཉིན་མོ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉིན་མོ་ཁྱིམ་བདག་རྟོགས་ལྡན་ལ་གནོད་པ་བརྒྱ་དག་བྱུང་བར་གྱུར་ཏོ། །མངལ་ན་གནས་པ་དེ་ཇི་ལྟ་ཇི་ལྟར་སྐྱེས་པར་གྱུར་པ་དེ་ལྟ་དེ་ལྟར་ཁྱིམ་བདག་རྟོགས་ལྡན་ལ་ཡང་དང་ཡང་དུ་རྒྱ་ཆེར་གནོད་པ་བརྒྱ་དག་བྱུང་བར་གྱུར་ཏོ། །ཁྱིམ་བདག་རྟོགས་ལྡན་གྱིས་བསམས་པ། བདག་སྐྱེད་མོས་ཚལ་དུ་སོང་སྟེ་འདུག་གོ་སྙམ་ནས། དེས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་གལ་ཏེ་ཁོ་བོ་ལ་གནོད་པ་ཆེན་པོ་ཞིག་བྱུང་བར་གྱུར་ན་སྦྲོན་ཅིག་།ཇི་སྟེ་མ་བྱུང་ན་མ་སྦྲོན་ཅིག་ཅེས་བསྒོ་ནས་དེ་སྐྱེད་མོས་ཚལ་དུ་སོང་སྟེ་འདུག་གོ། །དེ་ནས་དུས་གཞན་ཞིག་ན་དེའི་ཆུང་མ་བཙས་པ་ལས་ཁྱེའུ་ཞིག་བྱུང་ནས་དེ་གང་གི་ཉི་མ་ལ་བྱུང་བ་དེ་ཉིད་ཀྱི་ཉིན་མོ་ཁྱིམ་བདག་རྟོགས་ལྡན་ལ་གནོད་པ་སྟོང་དག་བྱུང་བར་གྱུར་ཏོ། །དེ་ནས་མི་ཞིག་རིངས་པ་རིངས་པར་ཁྱིམ་བདག་རྟོགས་ལྡན་ག་ལ་བ་དེར་སོང་བ་དང ། ཁྱིམ་བདག་རྟོགས་ལྡན་གྱིས་མི་དེ་ཐག་རིང་པོ་ཁོ་ན་ནས་རིངས་པ་རིངས་པར་འོང་བ་མཐོང་ནས་དེས་བསམས་པ། བདག་ལ་གནོད་པ་ཆེན་པོ་ཞིག་བྱུང་བར་གྱུར་གོར་མ་ཆག་སྙམ་ནས་དེས་མི་དེ་ལ་སྨྲས་པ། ཀཝའི་ནང་རྗེ་ཅིའི་ཕྱིར་འདི་ལྟར་རིངས་པ་རིངས་པར་འོང ། མི་དེས་སྨྲས་པ། ཁྱོད་ཀྱི་སྲས་བལྟམ་གྱིས་དགྱེས་པ་སྐྱེད་ཅིག་།རྟོགས་ལྡན་གྱིས་སྨྲས་པ། ཀཝའི་ནང་རྗེ་ཁོ་བོའི
8.20a
བུས་གནོད་པ་བརྒྱ་ཕྲག་མང་པོ་བསྐྱེད་མོད་ཀྱི་འོན་ཀྱང་བུ་འོངས་པ་ལེགས་སོ། །དེའི་ཉེ་དུ་དག་འདུས་ཤིང་ལྷགས་ནས་ཁྱེའུ་འདིའི་མིང་ཅིར་གདགས་སྙམ་ནས་དེ་དག་འདི་སྙམ་དུ་སེམས་ཏེ། ཁྱེའུ་འདི་ལ་ཕས་འོངས་པ་ལེགས་སོ་ཞེས་བྱ་བའི་ཚིག་བརྗོད་པས་ཁྱེའུ་འདིའི་མིང་ལེགས་འོངས་ཤེས་གདགས་སོ་ཞེས་དེའི་མིང་ལེགས་འོངས་ཤེས་བྱ་བར་བཏགས་སོ། །ལེགས་འོངས་ཇི་ལྟ་ཇི་ལྟར་སྐྱེས་པར་གྱུར་པ་དེ་ལྟ་དེ་ལྟར་ཁྱིམ་བདག་རྟོགས་ལྡན་གྱི་ཁྱིམ་ན་ནོར་དང ། འབྲུ་དང ། དབྱིག་དང ། གསེར་དང ། བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དག་ཡོངས་སུ་ཟད་པར་གྱུར་ཏོ། །དེ་ནས་དུས་གཞན་ཞིག་ན་ཁྱིམ་བདག་རྟོགས་ལྡན་ཡང་དུས་ལ་བབ་ཅིང་དེའི་ཆུང་མ་ཡང་དུས་ལ་བབ། དེའི་ཁྱིམ་ཡང་མེས་ཚིག་།བང་མཛོད་ཀྱི་རྣམ་པ་དང ། ཞིང་གི་རྣམ་པ་དང ། ནོར་གྱི་རྣམ་པ་དང ། འབྲུའི་རྣམ་པ་ཐམས་ཅད་ཀྱང་མེས་ཚིག་གོ། །གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་དོང་བ་དག་ཀྱང་དེ་ན་ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར། ཁ་ཅིག་ནི་ཟོང་ཟོང་མ་ཡིན་པར་གྱུར། ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར། ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ། །ཉེ་དུ་དག་ཀྱང་ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དག་ཀྱང་ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །ཁྱིམ་བདག་རྟོགས་ལྡན་གྱི་སྔོན་གྱི་བྲན་མོ་རྒན་མོ་གཅིག་པུ་ཞིག་ལེགས་འོངས་ཀྱི་བསྙེན་བཀུར་བྱེད་ཅིང་འདུག་པ་དེས་ལེགས་འོངས་ཁྱེའུའི་གྲཝར་ཡི་གེ་དང་ཡིག་འབྲུ་སློབ་ཏུ་ཕུལ་ལོ། །རྒན་མོ་དེས་བསམས་པ། ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཡོངས་སུ་ཟད་ཅིང་མཐར་ཐུག་པར་གྱུར་ན་གང་གི་བསོད་ནམས་མེད་པས་དེ་ལྟར་གྱུར་པ་ཅི་བདག་གི་འམ་འོན་ཏེ་ལེགས་འོངས་ཀྱི་བསོད་ནམས་མེད་པས་དེ་ལྟར་གྱུར་པ་བལྟའོ། །སྙམ་ནས་ཇི་ཙམ་ན་དེས་ལེགས་འོངས་ཀྱི་མིང་གིས་ཕྲུ་རྟོག་བཙུགས་པ་དང་དེ་ཆུད་ཟོས་པར་གྱུར་ཅིང ། བདག་གི་མིང
8.20b
གིས་ཕྲུ་རྟོག་བཙུགས་པ་དང་དེ་ཚོས་པར་གྱུར་ནས་དེས་བསམས་པ། འདི་ནི་སེམས་ཅན་སྐལ་ཆད་ཅིག་ཡིན་པས་འདིའི་ལེ་ལན་གྱིས་ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཚུལ་མ་ཡིན་པས་ཆུད་ཟོས་པར་གྱུར་པས་བདག་ཀྱང་འདིའི་ལེ་ལན་གྱིས་ཚུལ་མ་ཡིན་པས་སྡུག་བསྔལ་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གོར་མ་ཆག་ན་འདི་ལ་ཇི་ལྟར་བྱ་སྙམ་ནས་དེས་བསམས་པ། འབྲོས་སོ་སྙམ་ནས་རྒན་མོ་དེས་ཀྱང་དེ་ན་གཅེས་པ་ཅུང་ཟད་ཅི་ཡོད་པ་དེ་དག་ཁྱེར་ཏེ་བྲོས་སོ། །ཁྱིམ་སྟོང་པ་དེར་ཁྱི་དག་ཞུགས་ནས་ཟས་ཟོས་ཏེ་འཐབ་པར་བརྩམས་པ་དང ། མི་གཡོན་ཅན་ཞིག་ཕྱོགས་དེ་ནས་འགྲོ་བ་དེས་ཁྱིམ་དེ་ནས་ཁྱི་དག་འཐབ་པའི་སྒྲ་ཐོས་ནས་དེས་བསམས་པ། ཁྱིམ་བདག་རྟོགས་ལྡན་གྱི་ཁྱིམ་སྟོང་པར་གྱུར་ཏམ་ཅི་ན་འདི་ལྟར་འདི་ན་ཁྱི་དག་འཐབ་ཅིང་འཁོད། བདག་གིས་ཇེ་བལྟའོ་སྙམ་ནས་དེ་དེར་ཞུགས་པ་དང ། ཇི་ཙམ་ན་ཁྱི་རྐུན་ཕལ་པོ་ཆེ་དག་འཐབ་ཅིང་འདུག་གི་མི་ནི་འགའ་ཡང་མེད་དེ་སྟོང་པར་མཐོང་ནས་དེས་དེ་ནས་ལྷག་རོལ་གྱི་ལྷག་མ་ཅུང་ཟད་ཅི་ཡོད་པ་དེ་དག་ཁྱེར་ཏེ་སོང་ངོ ། །དེའི་འོག་ཏུ་ལེགས་འོངས་ཟན་བཟའོ་སྙམ་ནས་ཁྱེའུའི་གྲཝ་ནས་འོངས་ཏེ་དེ་དེར་ཞུགས་པ་དང ། ཇི་ཙམ་ན་སྟོང་པར་མཐོང་ནས་དེས་མ་མ་མ་མ་ཞེས་བོས་ན་འགའ་ཡང་ལན་འདེབས་པ་མེད་ནས་དེ་དང་ཧ་ཅང་ཐག་མི་རིང་བ་ན་ཉེ་དུའི་ཁྱིམ་ཞིག་ཡོད་པ་དེར་ཞུགས་པ་དང ། ཇི་ཙམ་ན་དེར་ཡང་ཁྱིམ་མི་དག་ཐབ་མོ་བྱུང་བར་གྱུར་ཏོ། །གང་གི་ཚེ་དེ་དག་ཐབ་མོ་ཞི་བར་གྱུར་པ་དེའི་ཚེ་ན་གཅིག་ལ་གཅིག་སྨྲས་པ། ཤེས་ལྡན་དག་བདག་གིས་སྔན་ཆད་ཁྱོད་མཐོང་ན་སྙིང་དུ་སྡུག་ན་དེང་བདག་གིས་ཁྱོད་མཐོང་ན་ཁྱོད་བསད་དོ་སྙམ་དུ་སེམས་སོ། །གཞན་དག་ཀྱང་གཅིག་ལ་གཅིག་དེ་སྐད་ཟེར་ནས་དེ་དག་གིས་བསམས་པ། འདིར་གཞན་འགའ་ཞིག་མ་འོངས་སམ་བལྟའོ་སྙམ་ནས་དེ་དག་གིས་བལྟས་ན་ཇི་ཙམ་ན་ལེགས་འོངས་དེར་འོངས་པ་མཐོང་ནས་དེ་དག་གིས་སྨྲས་པ། ཤེས་ལྡན་དག་འདི་ནི་ལེགས་འོངས་མ་ཡིན་གྱི
8.21a
ཉེས་འོངས་ཡིན་ཏེ། འདིའི་ལེ་ལན་གྱིས་བདག་ཅག་ཐབ་མོ་བྱུང་བར་གྱུར་ཏོ་ཞེས་དེ་དག་གིས་བསྐྲད་དེ་དེ་གཞན་དུ་སོང་བ་དང ། དེར་ཡང་དེ་དག་དེ་བཞིན་དུ་གྱུར་ནས་དེ་དག་གིས་ཀྱང་དེ་སྐད་སྨྲས་ཏེ་དེ་བསྐྲད་དེ་བཏང་ངོ ། །དེ་མུ་ལྟོ་བ་དག་གི་ནང་དུ་ཞུགས་པ་དང ། ཇི་ཙམ་ན་མུ་ལྟོ་བ་དེ་དག་ཀྱང་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་ནས་དེ་དག་གིས་སྨྲས་པ། ཤེས་ལྡན་དག་བདག་ཅག་སྔོན་ཆད་གང་དུ་ཞུགས་པ་དེར་ལག་པ་གང་བ་དང ། སྤྲང་ཕོར་གང་བར་གྱུར་ཏེ་ཕྱིར་འོང་ན། དེང་བདག་ཅག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་པ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། བདག་ཅག་གི་ནང་དུ་སེམས་ཅན་སྐལ་ཆད་འགའ་ཞིག་ཞུགས་པས་དེས་ན་བདག་ཅག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་སོ། །ཡང་དེ་དག་གིས་སྨྲས་པ། བརྟག་པར་བྱས་བདག་ཅག་ཁ་གཉིས་སུ་བཅད་དེ་འཇུག་པར་བྱའོ་ཞེས་དེ་དག་གིས་ཁ་གཉིས་སུ་བཅད་དེ་ཞུགས་པ་དང ། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཁ་གཉིས་སུ་བཅད་དེ་ཞུགས་པ་དང ། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཡང་ཁ་གཉིས་སུ་བཅད་དེ་ཞུགས་པ་དང ། ཡང་དེ་ལྟར་གྱུར་ཏོ། །དེ་དག་གིས་ཀྱང་ཡང་དང་ཡང་དུ་ཁ་གཉིས་སུ་བཅད་དེ་ཞུགས་པ་དང ། དེ་ལྟ་དེ་ལྟར་གྱུར་ནས་ཇི་ཙམ་ན་ལེགས་འོངས་དང་མུ་ལྟོ་བ་གཞན་ཅིག་དང་གཉིས་ལྷན་ཅིག་ཞུགས་པ་ཡང་སོ་སོར་བྱེ་བ་དང་ལེགས་འོངས་ནི་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་འོངས་ལ་གཞན་ཐམས་ཅད་ལག་པ་གང་བ་དང ། སྤྲང་ཕོར་གང་བར་གྱུར་ཏེ་འོངས་ནས་དེ་དག་གིས་སྨྲས་པ། སེམས་ཅན་སྐལ་ཆད་འདི་བདག་ཅག་གི་ནང་དུ་ཞུགས་པས་དེས་ན་བདག་ཅག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ལྷགས་སོ་ཞེས་དེ་དག་གིས་ལེགས་འོངས་ཤིན་ཏུ་བརྡེགས་ཏེ་བསྐྲད་དོ། །མཉན་ཡོད་ན་ཁྱིམ་བདག
8.21b
རྟོགས་ལྡན་གྱི་ཆུང་པོ་གྲོགས་ཁྱིམ་བདག་གཅིག་འདུག་པ་དེ་ཟོང་ཐོགས་ཏེ་ཆུ་སྲིན་བྱིས་པ་གསོད་ཀྱི་རིར་ཕྱིན་ནས་ཁྱིམ་བདག་དེས་ལེགས་འོངས་ལག་ན་སྤྲང་ཕོར་ཐོགས་ཏེ་སྲང་དུ་སོང་བ་མཐོང་ནས་དེས་བཞིན་གཟུགས་ལས་དེ་ངོ་ཤེས་ནས་དེས་དེ་ལ་སྨྲས་པ། བུ་ཁྱོད་ཁྱིམ་བདག་རྟོགས་ལྡན་གྱི་བུ་མ་ཡིན་ནམ། ལེགས་འོངས་ཀྱིས་སྨྲས་པ་ཡིན་ནོ། །དེས་སྨྲས་པ། ཁྱོད་ཀྱི་ཕ་མ་གཉིས་གར་སོང ། ལེགས་འོངས་ཀྱིས་སྨྲས་པ། དུས་ལ་བབ་བོ། །དེས་སྨྲས་པ། དེའི་ཁྱིམ་དང ། བང་མཛོད་ཀྱི་རྣམ་པ་དང ། ཞིང་གི་རྣམ་པ་དང ། ནོར་གྱི་རྣམ་པ་དང ། འབྲུའི་རྣམ་པ་དག་ག་རེ། ལེགས་འོངས་ཀྱིས་སྨྲས་པ། ཐམས་ཅད་མེས་ཚིག་གོ། །དེས་སྨྲས་པ། གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་དོང་བ་དག་གར་དོང ། ལེགས་འོངས་ཀྱིས་སྨྲས་པ། ཁ་ཅིག་ནི་རྒྱ་མཚོ་ཆན་པོར་གྲུ་བོ་ཆེ་ཞིག་པར་གྱུར། ཁ་ཅིག་ནི་ཟོང་ཟོང་མ་ཡིན་པར་གྱུར། ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར། ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ། །དེས་སྨྲས་པ། ཉེ་དུ་དག་གར་དོང ། ལེགས་འོངས་ཀྱིས་སྨྲས་པ། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །དེས་སྨྲས་པ། བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དག་གར་དོང ། ལེགས་འོངས་ཀྱིས་སྨྲས་པ། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །ཁྱིམ་བདག་དེས་དེ་ཐོས་ནས་མཆི་མས་བརྣངས་ཏེ་འདུག་ནས་དེས་སྨྲས་པ། བུ་ཁོ་བོ་དང་ལྷན་ཅིག་མཉན་ཡོད་དུ་འདོང་ངོ ། །ལེགས་འོངས་ཀྱིས་སྨྲས་པ། ཕ་བདག་དེར་སོང་ན་ཅིར་འགྱུར། དེས་སྨྲས་པ། བུ་དེ་ན་ཁྱིམ་བདག་མགོན་མེད་ཟས་སྦྱིན་འདུག་པ་དེའི་བུས་ཁྱོད་ཀྱི་སྲིང་མོ་ཆུང་མར་བླངས་པས་ཁྱོད་དེར་སོང་ན་སྲིང་མོ་དེ་ཁྱོད་ལ་མཁོ་བ་སྟོབས་པར་འགྱུར་རོ། །ལེགས་འོངས་ཀྱིས་སྨྲས་པ། ཕ་འགྲོའོ། །ཁྱིམ་བདག་དེས་ལེགས་འོངས་ལ་ཀར་ཤ་པ་ཎ་གཉིས་བྱིན་ཏེ་སྨྲས་པ། བུ་ཁོ་བོ་ཟོང་སྒྱུར་གྱི་བར་དུ་ཁྱོད་རེ་ཤིག་འདི་གཉིས་ཟ་ཞིང་སྡོད་ཅིག་།ལེགས་འོངས་ཀྱིས་ཀར
8.22a
ཤ་པ་ཎ་དེ་གཉིས་གོས་ཀྱི་གྲཝར་ཕུར་ཏེ་བཞག་པ་དང ། དེས་ལས་ཀྱི་རྣམ་པར་སྨིན་པས་དེ་གཉིས་ཀྱང་བརྗེད་པར་གྱུར་ཏོ། །ཁྱིམ་བདག་དེས་ཟོང་བསྒྱུར་ཏེ་རིན་བླངས་ནས་ལེགས་འོངས་ཁྲིད་དེ་འཕགས་པ་དང ། ལེགས་འོངས་ཀྱང་དེ་དང་ལྷན་ཅིག་འཕགས་སོ། །ཇི་ཙམ་ན་དོན་འཐུན་དེ་དག་འཐབ་པར་བརྩམས་ཤིང་གླང་དག་ཀྱང་འཐབ་པར་བརྩོམས་ནས་དེ་དག་གིས་སྨྲས་པ། ཤེས་ལྡན་དག་བདག་ཅག་སྔན་ཅད་གཅིག་གིས་གཅིག་མཐོང་ན་སྙིང་དུ་སྡུག་ན་དེང་བདག་ཅག་གཅིག་གིས་གཅིག་མཐོང་ན་འཐབ་པར་བརྩམས་ཤིང་གླང་དག་ཀྱང་གཅིག་གིས་གཅིག་མཐོང་ན་འཐབ་པར་རྩོམ་པ་ལས་ན། མ་ལ་འདིར་ཉེས་འོངས་དེ་མ་འོངས་སམ་ཞེས་བལྟས་པ་དང ། ཇི་ཙམ་ན་དེ་དག་གིས་ལེགས་འོངས་དེར་འོངས་པ་མཐོང་ནས་དེ་དག་གིས་སྨྲས་པ་ཤེས་ལྡན་དག་འདི་ནི་ལེགས་འོངས་མ་ཡིན་གྱི་ཉེས་འོངས་ཡིན་ཏེ། འདིའི་ལེ་ལན་གྱིས་བདག་ཅག་འཐབ་པར་བརྩམས་ཤིང ། གླང་དག་ཀྱང་འཐབ་པར་རྩོམ་མོ་ཞེས་དེ་དག་གིས་དེ་བསྐྲད་པར་བརྩམས་པ་དང ། ཁྱིམ་བདག་དེས་སྨྲས་པ། ཤེས་ལྡན་དག་འདི་ནི་ཁོ་བོའི་ཆུང་པོ་གྲོགས་ཀྱི་བུ་ཡིན་གྱིས་འདི་མ་བསྐྲད་ཅིག་།དེ་དག་གིས་སྨྲས་པ། ཁྱིམ་བདག་ཁྱོད་ནི་དོན་འཐུན་ལ་དབང་བ་ཡིན་མོད་ཀྱི། བདག་ཅག་འདི་དང་ལྷན་ཅིག་འགྲོ་མི་ཕོད་དེ། གལ་ཏེ་འདི་འགྲོ་ན་བདག་ཅག་མི་འགྲོའོ། །ཁྱིམ་བདག་དེས་ལེགས་འོངས་ལ་སྨྲས་པ། བུ་ཁྱོད་ཕྱི་བཞིན་འབྲང་ཞིང་ཤོག་ཤིག་དང ། ཁོ་བོས་ཁྱོད་ཀྱི་ཕྱིར་ཟན་གཞག་པར་བྱའོ། །ལེགས་འོངས་ཕྱི་བཞིན་འབྲང་ཞིང་འོང་བ་ན་ཁྱིམ་བདག་དེས་ཀྱང་དེའི་དོན་དུ་ཟན་འཇོག་པར་བྱེད་ཅིང་ཁ་ཅིག་ནི་ས་གཞི་ལ་སས་གཡོགས་ཏེ་འཇོག་པར་བྱེད། ཁ་ཅིག་ནི་ཤིང་ལྗོན་པའི་ཡལ་ག་དག་ལ་ལོ་མ་དག་གིས་གཡོགས་ཏེ་འཇོག་པར་བྱེད་དོ། །དེའི་ཟན་གང་དག་ས་གཞི་ལ་སས་གཡོགས་ཏེ་བཞག་པ་དེ་དག་ནི་ཝ་དག་གིས་ཟོས། གང་དག་ཤིང་ལྗོན་པའི་ཡལ་ག་དག་ལ་ལོ་མ་དག་གིས་གཡོགས་ཏེ་བཞག་པ་དེ་དག་ནི་བྱ་དག་དང་སྤྲེའུ་དག་གིས་ཟོས་ནས་ལེགས་འོངས་ཀྱིས་ཅུང་ཟད་ནི་ཐོབ། ཕལ་ཆེར་མི་ཐོབ་ནས་དེ་ཤིན་དུ་ཉམ་ང
8.22b
བས་འཚོ་ཞིང་འགྲོའོ། །སྲིད་པ་ཐ་མ་པའི་སེམས་ཅན་ཟག་པ་ཟད་པ་མ་ཐོབ་པར་བར་མ་དོར་རྒྱུན་ཆད་ཅིང་དུས་བྱེད་པར་འགྱུར་བ་ནི་གནས་མ་ཡིན་སྐབས་མ་ཡིན་ཏེ། དེ་ནི་གནས་མེད་པས་ལེགས་འོངས་མཐར་གྱིས་མཉན་ཡོད་དུ་ཕྱིན་ནས། མཉན་ཡོད་ཀྱི་ཕྱི་རོལ་ཁྲོན་པའི་ཁ་ན་ངལ་སོ་ཞིང་འདུག་གོ། །ལེགས་འོངས་ཀྱི་སྲིང་མོ་ཁྱིམ་བདག་མགོན་མེད་ཟས་སྦྱིན་གྱི་མནའ་མ་བྱེད་པ་དེའི་བུ་མོ་མངག་གཞུག་མ་ཆུ་བུམ་ཐོགས་ཏེ་ཁྲོན་པ་དེའི་དྲུང་དུ་ཆུ་ཆུར་སོང་བ་དང ། དེས་ལེགས་འོངས་བཞིན་གཟུགས་ལ་ངོ་ཤེས་ནས་དེས་དེ་ལ་སྨྲས་པ། ཇོ་ཅོ་ཁྱོད་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ལེགས་འོངས་མ་ལགས་སམ། སྲིང་མོ་ཡིན་ནོ། །ཇོ་ཅོ་ཁྱོད་ཀྱི་ཡབ་ཡུམ་གཉིས་གར་བཞུད། དུས་ལ་བབ་བོ། །དེའི་ཁྱིམ་དང ། བང་མཛོད་ཀྱི་རྣམ་པ་དང ། ཞིང་གི་རྣམ་པ་དང ། ནོར་གྱི་རྣམ་པ་དང ། འབྲུའི་རྣམ་པ་དག་གར་མཆིས། ཐམས་ཅད་མེས་ཚིག་གོ། །གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་མཆིས་པ་དག་གར་མཆིས། ཁ་ཅིག་ནི་རྒྱ་མཚོ་ཆ[ེ]ན་པོར་གྲུ་བོ་ཆེ་ཞིག་པར་གྱུར། ཁ་ཅིག་ནི་ཟོང་ཟོང་མ་ཡིན་པར་གྱུར། ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར། ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ། །ཉེ་དུ་དག་གར་མཆིས། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དག་གར་མཆིས། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །བུ་མོ་དེས་དེ་ཐོས་ནས་དེ་མཆི་མས་བརྣངས་ཏེ་འདུག་ནས་དེས་ལེགས་འོངས་ལ་སྨྲས་པ། ཇོ་བོ་བདག་གིས་ཁྱོད་ཀྱི་ལྕམ་མོ་ལ་སྦྲན་གྱི་བར་དུ་རེ་ཤིག་འདི་ཉིད་ན་གཞེས་ཤིག་ཅེས་སྨྲས་ཏེ་བུ་མོ་དེ་སོང་ནས་ཇོ་མོ་ལ་སྨྲས་པ། ཇོ་མོ་ཁྱོད་ཀྱི་དྲལ་པོ་བྱོན་ནོ། །དེས་སྨྲས་པ། ཟོང་ཇི་ལྟ་བུས་བྱོན། བུ་མོས་སྨྲས་པ། ཇོ་མོ་ཁར་བ་དང ། རལ་རུལ་དང ། སྤྲང་ཕོར་གྱིས་བྱོན་ནོ། །དེས་བུ་མོ་དེའི་ལག་ཏུ་གོས་དག་དང ། ཀར་ཤ་པ་ཎ་དག་བསྐུར་ནས་སྨྲས་པ། ཇོ་ཅོ་ལ་འདི་སྐད་ཅེས་སྔ
8.23a
མ་འདི་ཙམ་ཇེ་གསོལ་ཞིང་མནོབས་ཤིག་དང་སླད་ཀྱིས་གལ་ཏེ་དབོན་པོ་དག་དང ། དབོན་མོ་དག་དང་མཇལ་བར་གྱུར་ན་དེ་དག་ཀར་ཤ་པ་ཎ་ཇི་སྙེད་ཅིག་འབུལ་བར་འགྱུར་བས་ཁྱོད་ཉེ་དུ་དག་གིས་གློ་བས་བས་པར་མི་འགྱུར་རོ་ཞེས་གྱིས་ཤིག་།བུ་མོ་དེ་དེར་སོང་སྟེ་ལེགས་འོངས་ལ་གོས་དག་དང ། ཀར་ཤ་པ་ཎ་དག་ཕུལ་ནས་སྨྲས་པ། ཇོ་ཅོ་ལྕམ་གྱི་མཆིད་ནས་སྔ་མ་འདི་ཙམ་ཇེ་གསོལ་ཞིང་མནོབས་ཤིག་དང་སླད་ཀྱིས་གལ་ཏེ་དབོན་པོ་དག་དང ། དབོན་མོ་དག་དང་མཇལ་བར་གྱུར་ན། དེ་དག་ཀར་ཤ་པ་ཎ་ཇི་སྙེད་ཅིག་འབུལ་བར་འགྱུར་བས་ཁྱོད་ཉེ་དུ་དག་གིས་གློ་བས་བས་པར་མི་འགྱུར་རོ་ཞེས་མཆིའོ་ཞེས་སྨྲས་ཏེ་སོང་ངོ ། །ལེགས་འོངས་ཀྱིས་བསམས་པ། ཁྱིམ་བདག་མགོན་མེད་ཟས་སྦྱིན་ནི་ཉེ་དུའི་འཁོར་རྒྱ་ཆེ་བ་ཡིན་ལ། བདག་ཀྱང་སྔོན་ཉེ་དུའི་འཁོར་རྒྱ་ཆེ་བ་ཡིན་པས་ད་དེར་སོང་ན་དེ་དག་བདག་ལ་གཏམ་འདྲི་བས་རིང་དུ་ཐོགས་པར་འགྱུར་ཞིང་དེས་བདག་ལྟོགས་ཏེ་འཆི་བར་འགྱུར་གྱིས་ཇེ་གཡར་སུས་བཟའ་ཞིང་འགྲངས་ནས་དེར་སོང་སྟེ། ཉེ་དུའི་ཚོགས་དག་ལ་བདེ་བར་སོ་སོར་ཀུན་དགའ་བར་བྱའོ་སྙམ་ནས་དེ་ཆང་པའི་ཁྱིམ་དུ་སོང་སྟེ། དེས་ཇི་ཙམ་གྱིས་ར་རོ་བར་འགྱུར་བ་དེ་ཙམ་གྱི་ཆང་སར་པ་འཐུངས་ནས་དེ་ར་རོ་སྟེ་སྐྱེད་མོས་ཚལ་དུ་སོང་ནས་ཉལ་ལོ། །མཉན་ཡོད་ན་སྐྱེད་མོས་ཚལ་འཇོམས་པའི་མི་དག་སྐྱེད་མོས་ཚལ་ཉུག་པར་བྱེད་ཅིང ། དེ་དག་གིས་གལ་ཏེ་མི་གཉིད་ལོག་པ་མཐོང་ན་དེ་རྐང་པས་སྒུལ་བར་བྱེད་ཅིང་གལ་ཏེ་སད་ན་ནི་དེ་ལ་འདི་སྐད་ཅེས་ཀྱེ་ནང་རྗེ་ཁྱོད་ཀྱིས་མཉན་ཡོད་ན་སྐྱེད་མོས་ཚལ་འཇོམས་པའི་མི་དག་སྐྱེད་མོས་ཚལ་ཉུག་པར་བྱེད་ཅིང་དེ་དག་མི་གཉིད་ལོག་པ་འཇོམས་པར་བྱེད་དོ་ཞེས་མ་ཐོས་སམ། ལོངས་ལ་སོང་ཤིག་ཅེས་ཟེར་རོ། །གལ་ཏེ་མ་སད་ན་ནི་བཅོམ་སྟེ་འདོང་བར་བྱེད་པས་སྐྱེད་མོས་ཚལ་འཇོམས་པའི་མི་དེ་དག་དེར་ལྷགས་ཏེ། ལེགས་འོངས་ཉལ་བ་མཐོང་ནས་དེ་དག་གིས་དེ་རྐང་པས་བསྒུལ་ན་མ་སད་ནས་ཇི་ཙམ་ན་དེ་དག་གིས་དེ་བཅོམ་སྟེ་དོང་ངོ ། །ཇི་ཙམ་ན་ལེགས་འོངས་སད་པ་དང་བདག་ཉིད་བཅོམ་པར་མཐོང་ནས་དེས་རལ་རུལ་དེ་དག་ཉིད་གྱོན་ཏེ་འདུག་གོ། །
8.23b
དེའི་སྲིང་མོས་བསམས་པ། ཅིའི་ཕྱིར་བདག་གི་མིང་པོ་དེ་ཡུན་རིང་དུ་ཐོགས་སྙམ་ནས་དེས་བུ་མོ་མངག་གཞུག་མ་མངགས་ཏེ་ལྟར་བཏང་བ་དང་དེ་དེར་སོང་སྟེ་བལྟས་ན་ཇི་ཙམ་ན་བཅོམ་པར་མཐོང་ནས། བུ་མོ་དེ་སོང་སྟེ་ཇོ་མོ་ལ་སྨྲས་པ། ཇོ་མོ་ཇོ་ཅོ་བཅོམ་སྟེ་སྔོན་གྱི་ཆ་ལུགས་ཉིད་ཀྱིས་བཞུགས་སོ། །སྲིང་མོས་བསམས་པ། དེ་ནི་སེམས་ཅན་སྐལ་ཆད་ཅིག་ཡིན་པས་དེའི་ལེ་ལན་གྱིས་ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཚུལ་མ་ཡིན་པས་ཆུད་ཟོས་པར་གྱུར་པས་ད་གལ་ཏེ་བདག་གིས་དེ་འདིར་བཅུག་པར་གྱུར་ན་བདག་གི་གྱོས་པོའི་ཁྱིམ་ཡང་དེའི་ལེ་ལན་གྱིས་ཚུལ་མ་ཡིན་པས་སྡུག་བསྔལ་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་དེས་དེ་ཡལ་བར་བོར་རོ། །ལེགས་འོངས་ཀྱིས་ཀྱང་ལས་ཀྱི་སྒྲིབ་པས་དེ་བརྗེད་ནས་དེ་མུ་ལྟོ་བ་དག་གི་ནང་དུ་ཞུགས་པ་དང ། ཇི་ཙམ་ན་མུ་ལྟོ་བ་དེ་དག་ཀྱང་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་ནས་དེ་དག་གིས་སྨྲས་པ། ཤེས་ལྡན་དག་བདག་ཅག་སྔོན་ཅད་གར་ཞུགས་པ་དེར་ལག་པ་གང་བ་དང ། སྤྲང་ཕོར་གང་བར་གྱུར་ཏེ་ཕྱིར་འོང་ན་དེང་བདག་ཅག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་པ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། བདག་ཅག་གི་ནང་དུ་སེམས་ཅན་སྐལ་ཆད་འགའ་ཞིག་ཞུགས་པས་དེས་ན་བདག་ཅག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་སོ། །ཡང་དེ་དག་གིས་སྨྲས་པ། བརྟག་པར་བྱས་བདག་ཅག་ཁའི་གཉིས་སུ་བཅད་དེ་འཇུག་པར་བྱའོ་ཞེས་དེ་དག་གིས་ཁ་གཉིས་སུ་བཅད་དེ་ཞུགས་པ་དང ། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཁ་གཉིས་སུ་བཅད་དེ་ཞུགས་པ་དང ། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཡང་ཁ་གཉིས་སུ་བཅད་དེ་ཞུགས་པ་དང་ཡང་དེ་ལྟར་གྱུར་ཏོ། །དེ་དག་གིས་ཀྱང་ཡང་དང་ཡང་དུ་ཁ་གཉིས་སུ་བཅད་དེ་ཞུགས་པ་དང ། དེ་ལྟ་དེ
8.24a
ལྟར་གྱུར་ནས་ཇི་ཙམ་ན་ལེགས་འོངས་དང་མུ་ལྟོ་བ་གཞན་ཅིག་དང་གཉིས་ལྷན་ཅིག་ཞུགས་པ་ཡང་སོ་སོར་བྱེ་བ་དང ། ལེགས་འོངས་ནི་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་འོངས་ལ། གཞན་ཐམས་ཅད་ལག་པ་གང་བ་དང ། སྤྲང་ཕོར་གང་བར་གྱུར་ཏེ་འོངས་ནས་དེ་དག་གིས་སྨྲས་པ། སེམས་ཅན་སྐལ་ཆད་འདི་བདག་ཅག་གི་ནང་དུ་ཞུགས་པས་དེས་ན་བདག་ཅག་ལག་པ་སྟོང་པ་དང ། སྤྲང་ཕོར་སྟོང་པར་གྱུར་ཏེ་ལྷགས་སོ་ཞེས་དེ་དག་གིས་ལེགས་འོངས་ཤིན་ཏུ་བརྡེགས་ཏེ་སྤྲང་ཕོར་གྱིས་དེའི་གླད་པ་བཅོམ་ནས་ཉེས་འོངས་ཁྱོད་ཕར་སོང་ཤིག་ཅེས་སྨྲས་ཏེ་བསྐྲད་དོ། །ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དེས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་ཇི་སྲིད་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་མ་གསོལ་གྱི་བར་དུ་མུ་ལྟོ་བ་འགའ་ཡང་འཇུག་ཏུ་མ་གཞུག་ཤིག་།དེ་དག་ལ་ཕྱིས་སྦྱིན་པར་བྱའོ། །དེ་ན་མུ་ལྟོ་བས་འཇུག་པར་བརྩམས་པ་ན་སྒོ་བས་དེ་དག་ཕྱིར་བཟློག་པ་དང ། དེ་དག་གིས་སྨྲས་པ། ཀྱེ་ནང་རྗེ་ཁོ་བོ་ཅག་གི་མིང་གིས་ཁྱིམ་བདག་བཟང་བྱིན་གྱི་མིང་མགོན་མེད་ཟས་སྦྱིན་ཞེས་བྱ་བར་གྲགས་པ་ཡིན་ན་ཅིའི་ཕྱིར་ཁྱོད་ཁོ་བོ་ཅག་ཕྱིར་ཟློག་པར་བྱེད། ཡང་དེ་དག་གིས་སྨྲས་པ། ཤེས་ལྡན་དག་བདག་ཅག་གི་ནང་དུ་ཡང་ཉེས་འོངས་དེ་ཞུགས་པར་མ་གྱུར་ཏམ་ལྟོས་ཤིག་ཅེས་དེ་དག་གིས་བལྟས་པ་དང ། ཇི་ཙམ་ན་དེ་དག་གིས་ལེགས་འོངས་དེར་ཞུགས་པ་མཐོང་ནས་དེ་དག་གིས་སྨྲས་པ། ཉེས་འོངས་དེ་འདི་ཡིན་ནོ་ཞེས་དེ་དག་གིས་ལེགས་འོངས་ཤིན་དུ་བརྡེགས་ཏེ་སྤྲང་ཕོར་གྱིས་དེའི་གླད་པ་བཅོམ་ནས་དེ་དག་གིས་ལག་པ་དང ། རྐང་པ་དག་ནས་བཟུང་སྟེ་ཁྲིད་ནས་ཕྱག་དར་གྱི་ཕུང་པོའི་སྟེང་དུ་བཞག་སྟེ་ཉེས་འོངས་ཁྱོད་འདིར་འདུག་ཤིག་ཅེས་སྨྲས་པ་དང ། ལེགས་འོངས་ཕྱག་དར་གྱི་ཕུང་པོ་དེའི་སྟེང་ན་ངུ་ཞིང་འདུག་གོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་ཁྱིམ་བདག་མགོན་མེད་ཟས་སྦྱིན་གྱི་གནས
8.24b
ས་ག་ལ་བ་དེ་ལོགས་སུ་གཤེགས་པ་དང ། བཅོམ་ལྡན་འདས་ཀྱིས་ལེགས་འོངས་ཕྱག་དར་གྱི་ཕུང་པོའི་སྟེང་ན་གླད་པ་ཞོམ་ནས་ཁྲག་འཛག་ཅིང་ངུ་ཞིང་འདུག་པ་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ལྟར་སྲིད་པ་ཐ་མ་པའི་སེམས་ཅན་ཡང་གནས་སྐབས་འདི་ལྟ་བུར་གྱུར་པས་སྲིད་པ་དག་གིས་ངོམས་པར་བྱ་ཞིང་སྲིད་པའི་ཡོ་བྱད་དག་གིས་ཀྱང་ངོམས་པར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པར་བྱའོ། །དེ་ནས་བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་གྱི་གནས་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །ཚེ་དང་ལྡན་པ་ཀུན་དགའ་བོས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པ་བརྗེད་དོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཉིད་ཅན་ཡིན་པས་བཅོམ་ལྡན་འདས་ཀྱིས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པ་མཛད་དོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྷུང་བཟེད་ཀྱི་ཕམ་ཕབས་བླང་བར་བརྩམས་པ་དང ། ཇི་ཙམ་ན་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱིས་བདག་ལ་ལེགས་འོངས་ལ་ལྷུང་བཟེད་ཀྱི་ལྷག་མ་ཞོག་ཤིག་ཅེས
8.25a
བཀའ་སྩལ་པ་བརྗིད་པ་དྲན་ནས་དེས་ངུ་བར་བརྩམས་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཅིའི་ཕྱིར་ངུ ། བཙུན་པ་བདག་གིས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པ་བསྐྱུད་དེ་བདག་གིས་བཅོམ་ལྡན་འདས་ཀྱི་བཀའ་བཅག་གོ། །ཀུན་དགའ་བོ་ཁྱོད་ཀྱིས་ངའི་བཀའ་བཅག་པ་མ་ཡིན་གྱིས་འདི་ལྟར་ལེགས་འོངས་ཉིད་ཀྱི་ལས་ཀྱི་སྒྲིབ་པས་ཁྱོད་ཀྱིས་དེ་ལ་ལྷུང་བཟེད་ཀྱི་ལྷག་མ་གཞག་པ་བརྗེད་པར་གྱུར་ཏོ། །ཀུན་དགའ་བོ་ཁྱོད་སོང་ལ་ལེགས་འོངས་བོས་ཤིག་།དེ་སོང་སྟེ་ལེགས་འོངས་ལེགས་འོངས་ཤེས་བོས་པ་དང ། དུ་མ་དག་གིས་ཨང་ཞེས་ལན་བཏབ་ཅིང ། དེ་དག་གིས་བསམས་པ། དེང་བཅོམ་ལྡན་འདས་འཇིག་རྟེན་གསུམ་གྱི་བླ་མས་གང་ལ་དགོངས་སྙམ་མོ། །ཚེ་དང་ལྡན་པ་ཀུན་དགའ་བོ་ཕྱིར་ལོག་སྟེ་གསོལ་པ། བཙུན་པ་བདག་གིས་ལེགས་འོངས་ལེགས་འོངས་ཤེས་བོས་ན་དུ་མ་དག་གིས་ཨང་ཞེས་ལན་བཏབ་ན་གང་མཆི་བར་བགྱི། ཀུན་དགའ་བོ་སོང་ལ་འདི་སྐད་ཅེས་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ལེགས་འོངས་གང་ཡིན་པ་དེ་ཚུར་ཤོག་ཅེས་བོས་ཤིག་།ཚེ་དང་ལྡན་པ་ཀུན་དགའ་བོ་སོང་སྟེ་དེ་སྐད་བོས་པ་དང ། ལེགས་འོངས་ཀྱིས་བདག་གི་མིང་དྲན་ནས་དེས་ཚིགས་སུ་བཅད་པ་དག་སྨྲས་པ། ལེགས་འོངས་སྒྲ་འདི་བསྐྱུད་གྱུར་ན། །ག་ལས་འདིར་ནི་མཆིས་པར་གྱུར། །ངེས་པར་མ་ལེགས་ཟད་གྱུར་ཅིང ། །ལེགས་པར་བྱུང་བར་གྱུར་ཡང་དག་།གང་དག་ཁྱོད་ལ་སྐྱབས་མཆིས་པ། །དེ་དག་མགོན་ནི་ཀུན་མཁྱེན་ལགས། །གང་དག་ཁྱོད་ཀྱི་གསུང་དགའ་དང ། །འཕགས་པ་དེ་དག་ལེགས་འོངས་ལགས། །བདག་ནི་སྐལ་དང་བྲལ་བ་སྟེ། །རྩ་ལག་ཀུན་གྱིས་སྤངས་གྱུར་ཅིང ། །བརྩེ་གནས་དྲག་པོའི་གནས་ཐོབ་པ། །མྱ་ངན་ཟུག་རྔུས་གཟིར་བ་ལགས། །ཚེ་དང་ལྡན་པ་ཀུན་དགའ་བོས་དེ་ཁྲིད་དེ་ཞུགས་ནས་གསོལ་པ། བཙུན་པ་ལེགས་འོངས་དེ་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བུ་ཁྱོད་བཅོམ་ལྡན་འདས་ཀྱི་ལྷུང་བཟེད་ཀྱི་ཕམ་ཕབས་ཟ་འམ། བཅོམ་ལྡན་འདས་འཚལ་ལོ། །བཅོམ་ལྡན་འདས་ཀྱིས་དེ་ལ་ལྷུང་བཟེད་ཀྱི་ཕམ་ཕབས་སྩལ་བ་དང །
8.25b
ཇི་ཙམ་ན་དེས་ཉུང་ངུར་མཐོང་ནས་དེས་བསམས་པ། བདག་ལ་བཅོམ་ལྡན་འདས་འཇིག་རྟེན་གསུམ་གྱི་བླ་མས་བརྒྱ་ལམ་ན་དགོངས་སུ་ཟིན་ཀྱང་ལྷུང་བཟེད་ཀྱི་ཕམ་ཕབས་ཆུང་ངུ་ཞིག་བཞག་གོ་སྙམ་མོ། །བཅོམ་ལྡན་འདས་ཀྱིས་དེའི་སེམས་ཐུགས་ཀྱིས་མཁྱེན་ནས་བཀའ་སྩལ་པ། བུ་ལེགས་འོངས་གལ་ཏེ་ཁྱོད་རི་རབ་ཙམ་གྱི་ཁམ་དག་དང་རྒྱ་མཚོ་ཆ[ེ]ན་པོ་ཙམ་གྱི་ལྟོས་ཟ་བར་བྱེད་ན་ཡང་ཇི་སྲིད་དུ་ཁྱོད་ཚིམ་པར་མ་གྱུར་པ་དེ་སྲིད་དུ་དེ་བཞིན་གཤེགས་པའི་ལྷུང་བཟེད་ཀྱི་ཕམ་ཕབས་ཟད་པར་མི་འགྱུར་རོ། །དེས་བཅོམ་ལྡན་འདས་ཀྱི་ལྷུང་བཟེད་ཀྱི་ཕམ་ཕབས་ཟོས་པ་དང་དེ་ཚིམ་པར་གྱུར་ནས་དེས་བཅོམ་ལྡན་འདས་ཀྱི་ཞལ་དུ་བལྟ་བར་བརྩམས་པ་དང ། བཅོམ་ལྡན་འདས་ཀྱིས་བཀའ་སྩལ་པ། བུ་ལེགས་འོངས་ཚིམ་འམ། བཅོམ་ལྡན་འདས་ཚིམ་མོ། །ཁམ་ཐ་མ་ལོང་ཤིག་དང་མི་སྣང་བར་འགྱུར་རོ། །དེས་དེ་བླངས་ནས་མི་སྣང་བར་གྱུར་ཏོ། །ཁྱིམ་བདག་མགོན་མེད་ཟས་སྦྱིན་གྱིས་གསོལ་པ། བཅོམ་ལྡན་འདས་འདི་སུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ཡིན་ནོ། །བཅོམ་ལྡན་འདས་འོ་ན་བདག་གི་ཆུང་པོ་གྲོགས་ཀྱི་བུ་ལགས་སོ། །ཁྱིམ་བདག་དེ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་པ་དང ། སྲིད་པ་ཐ་མ་པའི་སེམས་ཅན་དེ་བཅོམ་ལྡན་འདས་ཀྱི་སླད་བཞིན་སླད་བཞིན་རྗེས་སུ་འབྲང་ཞིང་སོང་ནས་བཅོམ་ལྡན་འདས་གཙུག་ལག་ཁང་དུ་གཤེགས་ཏེ་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་པ་དང ། ལེགས་འོངས་ཀྱང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །བཅོམ་ལྡན་འདས་ཀྱིས་དེའི་ལས་སྦྱང་བར་བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ལེགས་འོངས་ལ་བཀའ་སྩལ་པ། ལེགས་འོངས་ཁྱོད་ལ་ཀར་ཤ་པ་ཎ་དག་ཡོད་དམ། བཅོམ་ལྡན་འདས་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། བུ་གོས་ཀྱི་གྲར
8.26a
ལྟོས་ཤིག་།དེས་བལྟས་པ་དང ། ཇི་ཙམ་ན་ཀར་ཤ་པ་ཎ་གཉིས་ཡོད་པ་མཐོང་ནས་དེས་གསོལ་པ། བཅོམ་ལྡན་འདས་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། བུ་སོང་ལ་ཀུན་དགའ་ར་བ་པ་རྒྱལ་བུ་དུམ་པའི་གན་ནས་ཨུཏྤལ་སྔོན་པོ་དག་ཁྱེར་ཏེ་ཤོག་ཤིག་།དེས་བཅོམ་ལྡན་འདས་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཀུན་དགའ་ར་བ་པ་རྒྱལ་བུ་དུམ་པ་ག་ལ་བ་དེར་སོང་བ་དང ། རྒྱལ་བུ་དུམ་པས་དེ་ཐག་རིང་པོ་ཁོ་ན་ནས་འོང་བ་མཐོང་ནས་དེས་བསམས་པ། ཉེས་འོངས་འདི་ག་ཤེད་ནས་འདིར་འོངས་པས་བདག་ལ་གནོད་པ་འབྱུང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །སྙམ་ནས་དེས་སྨྲས་པ། ཉེས་འོངས་ཀུན་དགའི་ར་བར་མ་འཇུག་ཤིག་།ལེགས་འོངས་ཀྱིས་ཚིགས་སུ་བཅད་པ་སྨྲས་པ། བདག་ནི་ཨུཏྤལ་མི་སྒྲུབ་སྟེ། །པད་མ་བདག་ལ་དགོས་པ་མེད། །ཁོ་བོ་ཀུན་མཁྱེན་གྲགས་ལྡན་པ། །ཐུབ་པའི་དབང་པོའི་ཕོ་ཉ་ཡིན། །དུམ་པས་ཚིགས་སུ་བཅད་པ་སྨྲས་པ། གལ་ཏེ་ཐུབ་པ་ཞི་བདག་ཉིད། །ལྷ་མི་རྣམས་ཀྱི་མཆོད་གནས་ཀྱི། །མཆོད་པའི་གནས་ཀྱིས་ཆེས་མཆོད་པའི། །ཕོ་ཉ་ལགས་ན་ཚུར་གཤེགས་སྤྱོན། །དུམ་པས་སྨྲས་པ། ཁྱོད་སངས་རྒྱས་ཀྱི་ཕོ་ཉ་ཡིན་ནམ། ལེགས་འོངས་ཀྱིས་སྨྲས་པ། ཁོ་བོ་སངས་རྒྱས་ཀྱི་ཕོ་ཉ་ཡིན་ནོ། །དོན་ཅིའི་ཕྱིར་འོངས། ཨུཏྤལ་དག་གི་ཕྱིར་འོངས་སོ། །སོང་ལ་ཇི་སྙེད་འདོད་པ་དེ་སྙེད་ཁྱེར་ཏེ་སོང་ཤིག་།ལེགས་འོངས་ཀྱིས་ཨུཏྤལ་སྔོན་པོ་དག་གི་ཁུར་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་བ་དང ། བཅོམ་ལྡན་འདས་ཀྱིས་བཀའ་སྩལ་པ། ལེགས་འོངས་དགེ་སློང་རྣམས་ལ་བྲིམས་ཤིག་།ལེགས་འོངས་ཀྱིས་དགེ་སློང་རྣམས་ལ་ཨུཏྤལ་སྔོན་པོ་དག་བྲིམ་པར་བརྩམ་པ་དང ། དགེ་སློང་དག་མི་ལེན་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དྲི་ཞིམ་པོ་ཐམས་ཅད་ནི་མིག་ལ་ཕན་ཞིང་འདིའི་ལས་སྦྱང་བར་ཡང་བྱས་ལོང་ཤིག་།དགེ་སློང་རྣམས་ཀྱིས་མེ་ཏོག་དེ་དག་བླངས་སོ། །ལེགས་འོངས་ཀྱི་སྔོན་ཟད་པར་སྔོན་པོའི་སྐྱེ་མཆེད་བསྐྱེད་པས
8.26b
དེ་རྒན་པའི་མཐའ་ལོགས་ན་འདུག་པས་དགེ་སློང་རྣམས་ཀྱི་ལག་ན་ཨུཏྤལ་སྔོན་པོ་དག་ཐོགས་པ་དེ་དག་མཐོང་ངོ ། །མཐོང་ནས་ཀྱང་ཟད་པར་སྔོན་པོའི་སྐྱེ་མཆེད་མངོན་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ལེགས་འོངས་ཁྱོད་ཅིའི་ཕྱིར་རབ་ཏུ་མི་འབྱུང་བཅོམ་ལྡན་འདས་བདག་རབ་ཏུ་འབྱུང་ངོ ། །བཅོམ་ལྡན་འདས་ཀྱིས་དེ་རབ་ཏུ་ཕྱུང་རྫོགས་པར་བསྙེན་པར་མཛད་ནས་བཅོམ་ལྡན་འདས་ཀྱིས་དེ་ལ་གདམས་ངག་སྩལ་ཏོ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པར་བག་ཡོད་པ་རྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ལེགས་འོངས་ཀྱིས་དགྲ་བཅོམ་པ་ཉིད་ཐོབ་ནས་རྣམ་པར་གྲོལ་བའི་དགའ་བ་དང་བདེ་བ་ཉམས་སུ་མྱོང་བ་ན་དེའི་ཚེ་ཚིགས་སུ་བཅད་པ་དག་སྨྲས་པ། དཔའ་བོ་དེ་ཉིད་གཟིགས་པ་ཡིས། །ཐབས་ཀྱི་ཞགས་པས་བདག་བཅིངས་ཏེ། །གླང་ཆེན་རྒས་པ་འདམ་ཕྱུང་ལྟར། །ཐུགས་རྗེས་སྡུག་བསྔལ་འདམ་ནས་ཕྱུང ། །བདག་ནི་སྔན་ཅད་ལེགས་འོངས་གྱུར། །དེ་ཡི་འོག་ཏུ་ཉེས་འོངས་ལགས། །
8.27a
ད་ནི་ཐུབ་དབང་ཁྱོད་གསུང་གིས། །གསལ་བར་ལེགས་འོངས་ཉིད་དུ་གྱུར། །ཀུན་མཁྱེན་ལྕགས་འདྲ་བདག་གིས་ནི། །ཁྱོད་ཀྱི་གསུང་མཆོག་ཐོས་གྱུར་ནས། །ད་ནི་གསེར་དང་འདྲ་བ་ཡི། །ཟག་པ་མེད་པའི་ལུས་ཀྱང་ཐོབ། །རིན་ཆེན་ལ་སོགས་འཐོབ་པ་དང ། །མཐོ་རིས་ཐར་པ་འཚལ་བ་ཡིས། །རྟག་ཏུ་ཕན་པ་བཞེད་པ་ཡི། །དགེ་བཤེས་བསྟེན་པར་བགྱི་བ་བཟང་།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་ལྔ་པ། གང་གི་ཚེ་ཚེ་དང་ལྡན་པ་ལེགས་འོངས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དེའི་ཚེ་ན་གཞན་མུ་སྟེགས་ཅན་དག་ཤེས་ལྡན་དག་དགེ་སྦྱོང་གཽ་ཏ་མ་ན་རེ་ངའི་བསྟན་པ་ནི་ཀུན་དུ་མཛེས་པ་ཡིན་ནོ། །ཞེས་ཟེར་ན། འདི་ལྟར་ཉེས་འོངས་ལ་སོགས་པ་མུ་ལྟོ་བ་དག་ཀྱང་རབ་ཏུ་འབྱིན་པར་བྱེད་ན་དེའི་བསྟན་པ་ཇི་ལྟར་ཀུན་དུ་མཛེས་པ་ཡིན་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ནས། བཅོམ་ལྡན་འདས་ཀྱིས་དགོངས་པ། ཉན་ཐོས་ཆེན་པོ་རི་རབ་ལྟ་བུ་ལ་སྐྱེ་བོ་ཕལ་པོ་ཆེའི་ཚོགས་དག་སྨས་པ་སྐྱེད་པར་བྱེད་པས་འདིའི་ཡོན་ཏན་བསྒྲག་པར་བྱ་ན་གང་དུ་བྱ་གང་དུ་སྐྱེས་ཤིང་གང་དུ་རྡིབ་པ་དེ་ཉིད་དུ་བྱའོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དེ་བཞིན་གཤེགས་པ་ངན་སྤོང་གི་བུ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ངན་སྤོང་གི་བུ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་སྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ཏུ་ངན་སྤོང་གི་བུ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དེ་ནས་བཅོམ་ལྡན་འདས་དུལ་བ་འཁོར
8.27b
དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་བཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་དུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར
8.28a
དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་སྐུ་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། ཀུན་ཤེས་ཀཽཎྜི་ནྱ་དང ། རྟ་ཐུལ་དང ། བཟང་ལྡན་དང ། རླངས་པ་དང ། མིང་ཆེན་དང ། གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟངས་ལ་སོགས་པ་ཉན་ཐོས་ཆེན་པོ་དེ་དག་དང ། གཞན་ཡང་དགེ་སློང་གི་དགེ་འདུན་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ་ངན་སྤོང་གི་བུ་དག་ཏུ་ཆུ་སྲིན་བྱིས་པ་གསོད་ཀྱི་རི་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་པ་ན་ཆུ་སྲིན་བྱིས་པ་གསོད་ཀྱི་རིར་བྱོན་ནས་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་ན་བཞུགས་སོ། །ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་གིས་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུ་ཞིང་གཤེགས་པ་ན། ཆུ་སྲིན་བྱིས་པ་གསོད་ཀྱི་རིར་བྱོན་ནས། ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་ན་བཞུགས་ཤེས་ཐོས་སོ། །ཐོས་ནས་ཀྱང་ཚོགས་ནས་ཚོགས་སུ། བྱིངས་ནས་བྱིངས་སུ་འདུས་ཤིང་ལྷགས་ཏེ་ཆུ་སྲིན་བྱིས་པ་གསོད་ཀྱི་རི་ནས་བྱུང་སྟེ། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར
8.28b
མཛད་ནས་ཅང་མི་གསུང་ངོ ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་ཅག་གི་སྡུམ་པར་གདུགས་ཚོད་གསོལ་བར་ཅི་གནང་བཅོམ་ལྡན་འདས་ཀྱིས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་དེ་ཉིད་ཀྱི་མཚན་མོ་བཅའ་བ་དང ། བཟའ་བ་གཙང་ཞིང་བསོད་པ་དག་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ཤིང་ཆུ་ར་བཞག་ནས་བཅོམ་ལྡན་འདས་ལ་སྤྱན་འདྲེན་གྱིས། བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས། ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་དང ། དགེ་སློང་གི་དགེ་འདུན་བདེ་བར་བཞུགས་པར་རིག་ནས། བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས
8.29a
བཅོམ་ལྡན་འདས་གདུགས་ཚོད་གསོལ་ཞིང་ཕྱག་བཅབས་ལྷུང་བཟེད་བཞག་པར་རིག་ནས་སྟན་ཆེས་དམའ་བ་དག་བླངས་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །འཁོད་ནས་བཅོམ་ལྡན་འདས་ལ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་ཀླུ་གདུག་པ་དང ། གནོད་སྦྱིན་གདུག་པ་སོག་མ་མེད་དང ། འབྲོག་གནས་ལ་སོགས་པ་དེ་དང་དེ་དག་ཀྱང་བཏུལ་ན། བཙུན་པ་ཀླུ་ཨ་མྲའི་ཆུ་ངོགས་པ་འདི་ཡུན་རིང་པོ་ནས་བདག་ཅག་ཁོན་མ་མཆིས་པ་རྣམས་ལ་ཁོན་དུ་འཛིན། མི་འགྲན་པ་རྣམས་ལ་འགྲན་ཚོལ། མི་འཁུ་བ་རྣམས་ལ་འཁུ་བར་བགྱིད་ཅིང་ལོ་ཐོག་འཁྲུངས་སོ་འཚལ་མ་རུང་བར་བགྱིད་ན་ཀྱེ་མ་བཅོམ་ལྡན་འདས་ཀྱིས་རྗེས་སུ་ཐུགས་བརྩེ་བའི་སླད་དུ་ཀླུ་ཨ་མྲའི་ཆུ་ངོགས་པ་འདི་གདུལ་དུ་གསོལ། བཅོམ་ལྡན་འདས་ཀྱིས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ ། །དེ་ནས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་བཅོམ་ལྡན་འདས་གཙུག་ལག་ཁང་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱེད་ཅག་ལས་གང་ཀླུ་ཨ་མྲའི་ཆུ་ངོགས་པ་འདུལ་བར་སྤྲོ་བ་དེས་ཚུལ་ཤིང་ལོང་ཤིག་ཅེས་བསྒོ་ལ་དགེ་འདུན་ལ་ཚུལ་ཤིང་བྲིམས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས
8.29b
བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཁྱེད་ཅག་ལས་གང་ཀླུ་ཨ་མྲའི་ཆུ་ངོགས་པ་འདུལ་བར་སྤྲོ་བ་དེས་ཚུལ་ཤིང་ལོང་ཤིག་ཅེས་བསྒོ་སྟེ་དགེ་འདུན་ལ་ཚུལ་ཤིང་བྲིམ་པར་བརྩམས་པ་དང ། བཅོམ་ལྡན་འདས་ཀྱིས་ཚུལ་ཤིང་མ་བཞེས་ནས་དགེ་སློང་གནས་བརྟན་གནས་བརྟན་དག་གིས་བསམས་པ། བཅོམ་ལྡན་འདས་ཀྱིས་ཅིའི་སླད་དུ་ཚུལ་ཤིང་མ་བཞེས་སྙམ་དུ་བསམས་ན། ཚེ་དང་ལྡན་པ་ལེགས་འོངས་ཀྱི་ཡོན་ཏན་བསྒྲག་པར་བཞེད་པར་རིག་ནས་དེ་དག་གིས་ཀྱང་ཚུལ་ཤིང་མ་བླངས་སོ། །ཚེ་དང་ལྡན་པ་ལེགས་འོངས་ཀྱིས་བསམས་པ། བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་དག་གིས་ཅིའི་སླད་དུ་ཚུལ་ཤིང་མ་བཞེས་སྙམ་དུ་བསམས་ན། བདག་གི་ཡོན་ཏན་བསྒྲག་པར་བཞེད་པས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་ནས་དེས་སྟན་ཕྱེད་ལས་འཕགས་ཏེ་གླང་པོ་ཆེའི་སྣ་ལྟ་བུའི་ལག་པ་བརྐྱང་ནས་ཚུལ་ཤིང་བླངས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་གནས་བརྟན་གང་གིས་ཚུལ་ཤིང་བླངས། བཙུན་པ་ཚེ་དང་ལྡན་པ་ལེགས་འོངས་ཀྱིས་བླངས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སོང་ལ་དགེ་སློང་ལེགས་འོངས་ལ་འདི་སྐད་ཅེས་དེ་ནི་ཀླུ་གདུག་པ་ཡིན་གྱིས་ཁྱོད་ཀྱིས་ལུས་ཀྱི་དབང་པོ་བསྲུང་བར་བྱའོ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་ལེགས་འོངས་ལ་སྨྲས་པ། ཚེ་དང་ལྡན་པ་ལེགས་འོངས་བཅོམ་ལྡན་འདས་ཀྱིས་བཀའ་སྩལ་པ། དེ་ནི་ཀླུ་གདུག་པ་ཡིན་གྱིས་ཁྱོད་ཀྱིས་ལུས་ཀྱི་དབང་པོ་བསྲུང་བར་བྱའོ་ཞེས་བྱུང་ངོ ། །ཚེ་དང་ལྡན་པ་ལེགས་འོངས་ཀྱིས་སྨྲས་པ། བཙུན་པ་ཀུན་དགའ་བོ་སྟོན་པའི་བཀའ་མཉན་པས་བཀའ་བཞིན་འཚལ། གཞན་དུ་ན་ཀླུ་ཨ་མྲའི་ཆུ་ངོགས་པ་ལྟ་བུ་ཤ་སྟག་གིས་འཛམ་བུའི་གླིང་འདི་ལྟ་སྟེ་དཔེར་ན་བུ་རམ་ཤིང་གི་ཚལ་ལམ། འདམ་བུའི་ཚལ་ལམ། འོད་མའི་ཚལ་བཞིན་དུ་གང་བར་གྱུར་ཀྱང་དེ་དག་གིས་བདག་གི་སྤུའི་རྩེ་མོ་ཙམ་ཡང་གཡོ་བར་མི་ནུས
8.30a
ན་ལུས་ཀྱི་དབང་པོ་འགག་པར་ལྟ་ག་ལ་ནུས་ཏེ། འདི་ལྟར་བདག་གིས་བཅོམ་ལྡན་འདས་ཀྱི་སྤྱན་སྔར་རྫུ་འཕྲུལ་གྱི་རྐང་པ་བཞི་པོ་དག་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པའི་ཕྱིར་རོ། །དེ་ནས་ཚེ་དང་ལྡན་པ་ལེགས་འོངས་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཆུ་སྲིན་བྱིས་པ་གསོད་ཀྱི་རིར་བསོད་སྙོམས་ལ་ཞུགས་སོ། །ཆུ་སྲིན་བྱིས་པ་གསོད་ཀྱི་རིར་བསོད་སྙོམས་བརྒྱུས་ནས་ཀླུ་ཨ་མྲའི་ཆུ་ངོགས་པའི་གནས་ག་ལ་བ་དེར་སོང་བ་དང ། ཀླུ་ཨ་མྲའི་ཆུ་ངོགས་པས་ཚེ་དང་ལྡན་པ་ལེགས་འོངས་ཐག་རིང་པོ་ཁོ་ན་ནས་འོང་བ་མཐོང་ངོ ། །མཐོང་ནས་ཀྱང་དེས་བསམས་པ། དགེ་སྦྱོང་འདིས་བདག་ཤི་བར་གཏམ་ཐོས་སམ་ཅི་ན་བདག་གི་གནས་སུ་འོང ། རེ་ཤིག་འདི་ནི་གློ་བུར་བ་ཡིན་གྱིས་འོང་དུ་ཆུག་ཤིག་སྙམ་མོ། །དེ་ནས་ཚེ་དང་ལྡན་པ་ལེགས་འོངས་ཀྱིས་ཆུ་ཚགས་དང་ལྷུང་བཟེད་མཐའ་གཅིག་ཏུ་བཞག་སྟེ། སྣམ་སྦྱར་སྤྲུགས་ནས་རྐང་པ་གཉིས་བཀྲུས་ཤིང་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱ་བར་བརྩམས་སོ། །དེ་ནས་ཚེ་དང་ལྡན་པ་ལེགས་འོངས་ཀྱིས་ཟས་ཀྱི་བྱ་བ་བྱས་ནས་བསམས་པ། ཀླུ་གདུག་པ་ནི་འཁྲུག་པར་མ་བྱས་ན་དུལ་བའི་གནས་སུ་མི་རུང་བས་འདི་ནི་ཀླུ་གདུག་པ་ཡིན་པས་འཁྲུག་པར་བྱའོ་སྙམ་ནས་དེས་ལྷུང་བཟེད་བཀྲུས་ཏེ་ལྷུང་བཟེད་ཀྱི་ཁྲུད་མའི་ཆུ་དེ་དེའི་རྫིང་དེར་བླུགས་པ་དང ། ཀླུ་ཨ་མྲའི་ཆུ་ངོགས་པ་དེ་འཁྲུགས་ནས། དེས་བསམས་པ་བདག་གིས་དགེ་སྦྱོང་འདི་འོང་བ་དང་ཟ་བ་ཡང་ཡལ་བར་བོར་ན་བདག་ལ་བརྙས་ཏེ་བདག་གི་གནས་སུ་ཁྲུད་མའི་ཆུ་ལྡུགས་པར་བྱེད་པས་དགེ་སྦྱོང་འདི་ནི་ཉེ་བར་མ་ཞི་བ་ཞིག་ཡིན་ནོ་སྙམ་ནས་དེ་ཁྲོས་ཏེ་སྟེང་གི་ནམ་མཁའ་ལ་མངོན་པར་འཕགས་ནས་འབྲུག་སྒྲ་ཆེན་པོ་ཕྱུང་སྟེ། ཚེ་དང་ལྡན་པ་ལེགས་འོངས་ཀྱི་སྟེང་དུ་རྡོ་རྗེ་རྩེ་གཅིག་པ་དང ། འཁོར་ལོ་དང ། མདའ་བོ་ཆེ་དང ། མཚོན་རྩེ་གཅིག་པ་ལ་སོགས་པ་མཚོན་ཆ་སྣ་ཚོགས་དབབ་པར་བརྩམས་པ་དང ། ཚེ་དང་ལྡན་པ་ལེགས་འོངས་བྱམས་པའི་ཏིང་ངེ་འཛིན་ལ་ཞུགས་པས་མཚོན་ཆ་དེ་དག་ལྷའི་མེ་ཏོག་ཨུཏྤལ་དང ། པད་མ་དང །
8.30b
ཀུ་མུ་ད་དང ། པད་མ་དཀར་པོ་དག་ཏུ་གྱུར་ཏེ། ཚེ་དང་ལྡན་པ་ལེགས་འོངས་ཀྱི་ལུས་ལ་འབབ་བོ། །ཀླུ་ཨ་མྲའི་ཆུ་ངོགས་པས་མེ་མདག་གི་ཆར་དབབ་པར་བརྩམས་པ་དང ། ཚེ་དང་ལྡན་པ་ལེགས་འོངས་བྱམས་པའི་ཏིང་ངེ་འཛིན་ལ་ཞུགས་པས་མེ་མདག་དེ་དག་ལྷའི་མེ་ཏོག་མན་ད་ར་ཀ་ནི་དག་ཏུ་གྱུར་ཏེ། ཚེ་དང་ལྡན་པ་ལེགས་འོངས་ཀྱི་ལུས་ལ་འབབ་བོ། །ཀླུ་ཨ་མྲའི་ཆུ་ངོགས་པས་ཕྱག་དར་གྱི་ཆར་དབབ་པར་བརྩམས་པ་དང ། ཚེ་དང་ལྡན་པ་ལེགས་འོངས་བྱམས་པའི་ཏིང་ངེ་འཛིན་ལ་ཞུགས་པས་ཕྱག་དར་དེ་དག་ལྷའི་ཨ་ག་རུའི་ཕྱེ་མ་དག་དང ། ཙན་དན་གྱི་ཕྱེ་མ་དག་དང ། རྒྱ་སྤོས་ཀྱི་ཕྱེ་མ་དག་དང ། ཏ་མ་ལའི་ལོ་མའི་ཕྱེ་མ་དག་ཏུ་གྱུར་ཏེ། ཚེ་དང་ལྡན་པ་ལེགས་འོངས་ཀྱི་ལུས་ལ་འབབ་བོ། །ཀླུ་ཨ་མྲའི་ཆུ་ངོགས་པས་ཁྲོ་བའི་མཐུས་དུ་བ་གཏུལ་བ་དང ། ཚེ་དང་ལྡན་པ་ལེགས་འོངས་ཀྱིས་ཀྱང་རྫུ་འཕྲུལ་གྱི་མཐུས་དུ་བ་གཏུལ་ཏོ། །ཀླུ་ཨ་མྲའི་ཆུ་ངོགས་པས་ཁྲོ་བའི་མཐུས་མེ་སྦར་བ་དང ། ཚེ་དང་ལྡན་པ་ལེགས་འོངས་མེའི་ཁམས་ལ་སྙོམས་པར་ཞུགས་སོ། །དེ་ན་ཀླུ་ཨ་མྲའི་ཆུ་ངོགས་པའི་ཁྲོ་བའི་མཐུ་དང ། ཚེ་དང་ལྡན་པ་ལེགས་འོངས་ཀྱི་རྫུ་འཕྲུལ་གྱི་མཐུས་སྣང་བ་ཆེན་པོ་བྱུང་བར་གྱུར་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། ཤེས་ལྡན་དག་འདི་ནི་བཅོམ་ལྡན་འདས་ཀླུ་ཨ་མྲའི་ཆུ་ངོགས་པ་འདུལ་བར་མཛད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་ནང་ན་འདི་ལྟ་སྟེ། དགེ་སློང་ལེགས་འོངས་འདི་མཆོག་ཡིན་ནོ། །གང་གི་ཚེ་ཀླུ་ཨ་མྲའི་ཆུ་ངོགས་པ་མཚོན་ཐམས་ཅད་ཟད་པར་གྱུར་པ་དེའི་ཚེ་ན་དེས་འབྲོས་པར་བརྩམས་པ་དང ། ཚེ་དང་ལྡན་པ་ལེགས་འོངས་ཀྱིས་ཀུན་དུ་མེ་མངོན་པར་སྤྲུལ་ནས་ཀླུ་ཨ་མྲའི་ཆུ་ངོགས་པས་ཚེ་དང་ལྡན་པ་ལེགས་འོངས་ཀྱི་རྐང་པའི་དྲུང་འབའ་ཤིག་ཞི་བར་མཐོང་བ་མ་གཏོགས་པར་ཐམས་ཅད་ཀུན་དུ་འབར། རབ་ཏུ་འབར། ཀུན་དུ་རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པར་མཐོང་ནས་དེ་ཚེ་དང་ལྡན་པ་ལེགས་འོངས་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལེགས་འོངས་ལ་འདི་སྐད་ཅེས་སྨྲས་སོ། །
8.31a
བཙུན་པ་ལེགས་འོངས་ཅིའི་སླད་དུ་བདག་ལ་ཐོ་འཚམ་པར་མཛད། རྒ་བའི་ཆོས་ཅན་ཁོ་བོ་ཁྱོད་ལ་ཐོ་འཚམ་པ་མ་ཡིན་གྱི་ཁྱོད་ཁོ་བོ་ལ་ཐོ་མཚམ་སྟེ། གལ་ཏེ་ཁོ་བོས་ཡོན་ཏན་གྱི་ཚོགས་འདི་ལྟ་བུ་ཐོབ་པར་མ་གྱུར་དུ་ཟིན་ན་ཁྱོད་ཀྱིས་དེང་ཁོ་བོ་མིང་ལས་ལྷག་མ་མ་ལུས་པར་བྱེད་པར་འགྱུར་རོ། །དེས་སྨྲས་པ། བཙུན་པ་ལེགས་འོངས་བདག་གིས་ཅི་བགྱི་བ་བཀའ་སྩལ་དུ་གསོལ། བཞིན་བཟངས་ཚུར་ཤོག་།བཅོམ་ལྡན་འདས་ཀྱི་སྤྱན་སྔར་སོང་ལ་སྐྱབས་སུ་འགྲོ་བ་དང ། བསླབ་པའི་གཞི་དག་ལོང་ཤིག་དེ་ནས་ཚེ་དང་ལྡན་པ་ལེགས་འོངས་ཀྱིས་ཀླུ་ཨ་མྲའི་ཆུ་ངོགས་པ་ལྷུང་བཟེད་དུ་བཅུག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ལེགས་འོངས་ཀྱིས་འདི་སྐད་ཅེས་གསོལ་ཏོ། །བཙུན་པ་ཀླུ་ཨ་མྲའི་ཆུ་ངོགས་པ་དེ་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཞིན་བཟངས་ཁྱོད་རེ་ཤིག་སྔོན་གྱི་ཉེས་པར་སྤྱད་པས་ད་ལྟར་དུད་འགྲོའི་སྐྱེ་གནས་ངན་པར་སྐྱེས་ཤིང་དྲག་ཤུལ་ཅན་ལག་པ་དམར་བ། སྣུན་པ་དང་རབ་ཏུ་སྣུན་པ་ལ་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཛུད་པ། གཞན་གྱི་སྲོག་གཅོད་པས་འཚོ་བར་བྱེད་པ་ཡིན་པས། ཁྱོད་འདི་ནས་ཤི་འཕོས་པའི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། བཅོམ་ལྡན་འདས་བདག་གིས་ཇི་ལྟར་བགྱི་བ་བཀའ་སྩལ་དུ་གསོལ། བཞིན་བཟངས་ཁྱོད་ཚུར་ཤོག་ལ་ངའི་སྤྱན་སྔར་སྐྱབས་སུ་འགྲོ་བ་དང ། བསླབ་པའི་གཞི་དག་ལོང་ལ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་མི་འཇིགས་པ་བྱིན་ཅིག་།བཙུན་པ་བདག་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང ། བསླབ་པའི་གཞི་དག་ལེན་ཅིང ། དེང་སླན་ཅད་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་མི་འཇིགས་པ་སྩོལ་ཏོ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང ། ཁྱིམ་བདག་རྣམས་བྱ་མོ་ལབ་མང་པོ་ཐོགས་ནས་བཅོམ་ལྡན་འདས་ག་ལ་བ
8.31b
དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང ། ཁྱིམ་བདག་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་ཀླུ་ཨ་མྲའི་ཆུ་ངོགས་པ་བཏུལ་ཏམ། བཅོམ་ལྡན་འདས་ཀྱིས་བཀའ་སྩལ་པ། ངས་ཀླུ་ཨ་མྲའི་ཆུ་ངོགས་པ་མ་བཏུལ་ཏེ་དགེ་སློང་ལེགས་འོངས་ཀྱིས་ཀླུ་ཨ་མྲའི་ཆུ་ངོགས་པ་བཏུལ་ཏོ། །བཙུན་པ་ལེགས་འོངས་གང་གིས་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ལེགས་འོངས་ཀྱིས་སོ། །དེ་ན་ཁ་ཅིག་གིས་སྨྲས་པ། བདག་ཅག་གི་ཕུ་ནུ་བོའི་བུ་ཡིན་ནོ། །ཁ་ཅིག་གིས་སྨྲས་པ། བདག་ཅག་གི་ཚ་བོ་ཡིན་ནོ། །ཁ་ཅིག་གིས་སྨྲས་པ། བདག་ཅག་གི་ཞང་པོ་ཡིན་ནོ། །ཁ་ཅིག་གིས་སྨྲས་པ། བདག་ཅག་གི་ཆུང་པོ་གྲོགས་ཀྱི་བུ་ཡིན་ནོ་ཞེས་དེ་དག་གིས་དེ་ལ་བྱ་མོ་ལབ་མང་པོ་ཕུལ་ལོ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་བཙུན་པ་ལེགས་འོངས་ལས་བརྟེན་ཏེ་གུང་བདུན་དུ་བདག་ཅག་གི་མཆོད་པའི་དབང་དུ་བགྱིས་པའི་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །ཆུ་སྲིན་བྱིས་པ་གསོད་ཀྱི་རི་ལ་ཁྱིམ་བདག་རྟོགས་ལྡན་གྱི་ཆུང་པོ་གྲོགས་བྲམ་ཟེ་སྦྲུལ་ཁས་སྡིགས་པ་ཞིག་འདུག་པ་དེ་ཀླུ་ཨ་མྲའི་ཆུ་ངོགས་པའི་འཇིགས་པས་བྲོས་ཏེ་མཉན་ཡོད་དུ་སོང་བ་དེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་གླང་པོ་ཆེའི་ཆང་པའི་བླར་བསྐོས་ཏེ་བཞག་གོ། །དེ་བྱ་བ
8.32a
ཞིག་གི་ཕྱིར་ཆུ་སྲིན་བྱིས་པ་གསོད་ཀྱི་རིར་ཕྱིན་པ་དང ། དེས་ཇི་ལྟར་ཁྱིམ་བདག་རྟོགས་ལྡན་གྱི་བུ་བཙུན་པ་ལེགས་འོངས་ཀྱིས་ཀླུ་ཨ་མྲའི་ཆུ་ངོགས་པ་བཏུལ་བ་ཐོས་སོ། །ཐོས་ནས་ཀྱང་ཚེ་དང་ལྡན་པ་ལེགས་འོངས་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལེགས་འོངས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ལེགས་འོངས་ལ་བྲམ་ཟེ་དེས་འདི་སྐད་ཅེས་སྨྲས་སོ། །བཙུན་པ་ལེགས་འོངས་ཀྱིས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། བྲམ་ཟེ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་ཁོ་བོ་ལས་བརྟེན་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ཞག་བདུན་དུ་མཆོད་པའི་དབང་དུ་བྱས་པའི་གདུགས་ཚོད་ལ་སྤྱན་དྲངས་ཀྱིས་མི་འཚལ་ལོ། །བྲམ་ཟེས་སྨྲས་པ། གལ་ཏེ་ཁྱོད་ཀྱིས་ད་མི་གནང་ན་གང་གི་ཚེ་ཁྱོད་མཉན་ཡོད་དུ་བྱོན་པར་གྱུར་པ་དེའི་ཚེ་ན་ཁྱོད་ཀྱིས་དང་པོ་ཁོ་ནར་བདག་གི་བསོད་སྙོམས་གསོལ་པ་མཛོད་ཅིག་ཚེ་དང་ལྡན་པ་ལེགས་འོངས་ཀྱིས་དེ་ལྟར་བྱའོ་ཞེས་སྨྲས་ནས་དེ་ལངས་ཏེ་སོང་ངོ ། །དེ་ནས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རིར་ཅི་དགྱེས་པར་བཞུགས་ནས་མཉན་ཡོད་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ། མཐར་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས། མཉན་ཡོད་ན་རྒྱལ་བྱེད་ཀྱི་ཚལ་བདག་གི་ཀུན་དགའ་ར་བ་ན་བཞུགས་ཤེས་ཐོས་སོ། །ཐོས་ནས་ཀྱང་མཉན་ཡོད་ནས་བྱུང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད་ཡང་དག་པར་འཛིན་དུ་འཛུད་པར་མཛད། ཡང
8.32b
དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཁྱིམ་བདག་མགོན་མེད་ཟས་སྦྱིན་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །བྲམ་ཟེ་སྦྲུལ་ཁས་སྡིགས་པ་དེས་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཤེས་ཐོས་སོ། །ཐོས་ནས་ཀྱང་ཚེ་དང་ལྡན་པ་ལེགས་འོངས་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ལེགས་འོངས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ལེགས་འོངས་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་བྲམ་ཟེ་དེ་སྟན་ལས་ལངས་ཏེ་ཚེ་དང་ལྡན་པ་ལེགས་འོངས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་ལེགས་འོངས་ལ་འདི་སྐད་ཅེས་སྨྲས་སོ། །བཙུན་པ་ལེགས་འོངས་ཀྱིས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་བྲམ་ཟེ་བཅོམ་ལྡན་འདས་ལ་ཞུའོ། །དེ་ནས་བཅོམ
8.33a
ལྡན་འདས་ལ་ཚེ་དང་ལྡན་པ་ལེགས་འོངས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྲམ་ཟེ་དེ་བདག་གི་གན་དུ་མཆིས་ཏེ་བདག་སང་སྡུམ་པ་གཞན་དུ་འཚལ་མ་ལ་གཡར་འདྲེན་ན་མཆིད་ཀྱིས་འཚལ་ལམ། བཅོམ་ལྡན་འདས་ཀྱིས་བཀའ་སྩལ་པ། སྔར་མགྲོན་དུ་བོས་པས་བདག་གིར་བྱའོ། །ཚེ་དང་ལྡན་པ་ལེགས་འོངས་ཀྱིས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་བྲམ་ཟེ་དེས་ཚེ་དང་ལྡན་པ་ལེགས་འོངས་ཀྱིས་ཅང་མི་སྨྲ་བར་དང་དུ་བླངས་པར་རིག་ནས། ཚེ་དང་ལྡན་པ་ལེགས་འོངས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་ལེགས་འོངས་ཀྱི་དྲུང་ནས་སོང་ངོ ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱེད་དུ་བཅུག་ནས། ནང་པར་སྔར་ལངས་ཏེ་གདན་བཤམས་ཤིང་ཆུ་ར་བཞག་ནས། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང ། དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་མགོན་མེད་ཟས་སྦྱིན་གྱི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བྲམ་ཟེ་དེས་ཀྱང་ཚེ་དང་ལྡན་པ་ལེགས་འོངས་ཀྱི་ཁ་ཟས་བསོད་པ་སྟ་གོན་བྱས་སོ། །དེ་ནས་ཚེ་དང་ལྡན་པ་ལེགས་འོངས་ཀྱང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ནས་བྲམ་ཟེ་དེའི་བཀད་ས་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ། །དེ་ནས་བྲམ་ཟེ་དེས་ཚེ་དང་ལྡན་པ་ལེགས་འོངས་བདེ་བར་འདུག་པར་རིག་ནས་ཚེ་དང་ལྡན་པ་ལེགས་འོངས་ཁ་ཟས་བསོད་པས་ཚིམ་པར་བྱས་སོ། །བྲམ་ཟེ་དེས་བསམས་པ། བཙུན་པ་ལེགས་འོངས་ཀྱིས་ཁ་ཟས་བསོད་པ་ཟོས་པས་འཇུ་བར་མི་ནུས་སོ་སྙམ་དུ་རིག་ནས། ཚེ་དང་ལྡན་པ་ལེགས་འོངས་ལ་འདི་སྐད་ཅེས་སྨྲས་སོ། །བཙུན་པ་ལེགས་འོངས་སང་ནན་གསོལ་ལམ
8.33b
དེས་སྨྲས་པ། འཐུང་ངོ ། །བྲམ་ཟེ་དེས་གླང་པོ་ཆེའི་ཆང་གི་ནང་དུ་མཛུབ་མོ་བཅུག་སྟེ་སྐོམ་གྱི་ནང་དུ་ཀྲོག་ཀྲོག་དཀྲུགས་ཏེ། ཚེ་དང་ལྡན་པ་ལེགས་འོངས་ལ་ཕུལ་ལོ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས་ཚེ་དང་ལྡན་པ་ལེགས་འོངས་ཀྱིས་དེ་འཐུངས་ཏེ་ཡོན་བཤད་པ་བྱས་ནས་སྟན་ལས་ལངས་ཏེ་སོང་ངོ ། །དེ་མཉན་ཡོད་ཀྱི་སྲང་རེ་ལྡེས་གཡོགས་པ་ལས་ཐལ་ནས་ཉི་མའི་འོད་གཟེར་དག་གིས་ལུས་ལ་ཕོག་པ་དང ། ར་རོ་ནས་དེ་ཆང་གིས་མྱོས་པའི་ཤུགས་ཀྱིས་ས་ལ་སྒྱེལ་ཏོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཉིད་ཅན་ཡིན་པས་བཅོམ་ལྡན་འདས་ཀྱིས་དེར་ལོ་མ་མ་ཡིན་པའི་སྤྱིལ་བུ་ཞིག་སྤྲུལ་པ་མཛད་དེ་བཀབ་བོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཛུད་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཡོན་བཤད་པ་མཛད་དེ་གདན་ལས་བཞེངས་ཏེ་གཤེགས་ནས་ཕྱོགས་དེར་བྱོན་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་བཏུལ་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་གང་གིས་ཀླུ་ཨ་མྲའི་ཆུ་ངོགས་པ་བཏུལ་བའི་དགེ་སློང་ལེགས་འོངས་ཤེས་བྱ་བ་དེ་ཡིན་ན།
8.34a
དགེ་སློང་དག་ཇི་སྙམ་དུ་སེམས། དགེ་སློང་ལེགས་འོངས་འདིས་ད་ལྟར་སྦྲུལ་ཕྲུག་ཀྱང་ཐུལ་བར་ནུས་སམ། བཙུན་པ་རྔོ་མི་ཐོག་གོ། །དགེ་སློང་དག་དེ་ལྟར་ན་ཉེས་དམིགས་འདི་དང་གཞན་དག་ཀྱང་མྱོས་པར་འགྱུར་བ་འཐུང་བ་ལས་འབྱུང་བས་དགེ་སློང་དག་ང་ལ་སྟོན་པའོ་ཞེས་ཟེར་བ་དག་གིས་མྱོས་པར་འགྱུར་བ་ཐ་ན་རྩཝའི་རྩེ་མོས་ཀྱང་བཏུང་བར་མི་བྱ་ཞིང་བླུད་པར་ཡང་མི་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ལེགས་འོངས་སད་པར་མཛད་ནས་བཀའ་སྩལ་པ། ལེགས་འོངས་ཅིའི་ཕྱིར་འདི་ལྟར་གྱུར། བཅོམ་ལྡན་འདས་མ་བསམས་སོ། །བདེ་བར་གཤེགས་པ་མ་བསམས་སོ། །དེ་ནས་བཅོམ་ལྡན་འདས་གཙུག་ལག་ཁང་དུ་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འབྲུའི་ཆང་དང ། བཅོས་པའི་ཆང་མྱོས་པར་འགྱུར་བ་འཐུང་ན་ལྟུང་བྱེད་དོ། །འབྲུའི་ཆང་ཞེས་བྱ་བ་ནི་ཆན་གྱི་བཏུང་བ་དང ། ཕྱེའི་བཏུང་བ་དང ། ཕབས་ཀྱི་བཏུང་བའོ། །བཅོས་པའི་ཆང་ཞེས་བྱ་བ་ནི་རྩ་བའི་བཏུང་བ་དང ། སྡོང་བུའི་བཏུང་བ་དང ། འདབ་མའི་བཏུང་བ་དང ། མེ་ཏོག་གི་བཏུང་བ་དང ། འབྲས་བུའི་བཏུང་བའོ། །དེ་གཉིས་ག་བསྲེས་པ་ནི་འབྲུའི་ཆང་དང་བཅོས་པའི་ཆང་ཞེས་བྱ་བའོ། །དེ་འཐུང་ན་ཞེས་བྱ་བ་ནི་མགུལ་དུ་མིད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །
8.34b
དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མྱོས་པར་འགྱུར་བའི་ཁ་དོག་དང་ལྡན་པ་དང ། མྱོས་པར་འགྱུར་བའི་དྲི་དང་ལྡན་པ་དང ། མྱོས་པར་འགྱུར་བའི་རོ་དང་ལྡན་པ་དང ། མྱོས་པར་འགྱུར་བའི་མྱང་བ་དང་ལྡན་པ་འཐུང་ན། འཐུངས་ནས་མྱོས་པར་འགྱུར་ན་ལྟུང་བྱེད་དུ་འགྱུར་ལ། འཐུངས་ནས་མྱོས་པར་མི་འགྱུར་ན་ཉེས་བྱས་སུ་འགྱུར་རོ། །དགེ་སློང་མྱོས་པར་འགྱུར་བའི་ཁ་དོག་དང་ལྡན་པ་དང ། མྱོས་པར་འགྱུར་བའི་དྲི་དང་ལྡན་པ་དང ། མྱོས་པར་འགྱུར་བའི་རོ་དང་ལྡན་པ་འཐུང་ན། འཐུངས་ནས་མྱོས་པར་འགྱུར་ན་ལྟུང་བྱེད་དུ་འགྱུར་ལ། འཐུངས་ནས་མྱོས་པར་མི་འགྱུར་ན་ཉེས་བྱས་སུ་འགྱུར་རོ། །དགེ་སློང་མྱོས་པར་འགྱུར་བའི་ཁ་དོག་དང་ལྡན་པ་དང ། མྱོས་པར་འགྱུར་བའི་དྲི་དང་ལྡན་པ་འཐུངས་ན། འཐུངས་ནས་མྱོས་པར་འགྱུར་ན་ལྟུང་བྱེད་དུ་འགྱུར་ལ། འཐུངས་ནས་མྱོས་པར་མི་འགྱུར་ན་ཉེས་བྱས་སུ་འགྱུར་རོ། །མྱོས་པར་འགྱུར་བའི་ཁ་དོག་འབའ་ཤིག་མ་འདྲེས་པ་དང་ལྡན་པ་འཐུང་བ་ལ་ནི་ལྟུང་བ་མེད་དེ་དེ་ཡང་ཚཝ་ཉིད་དུ་གྱུར་པའོ། །དགེ་སློང་འབྲུའི་ཆང་འཐུང་ན་ལྟུང་བྱེད་དུ་འགྱུར་རོ། །བཅོས་པའི་ཆང་འཐུང་ན་ལྟུང་བྱེད་དུ་འགྱུར་རོ། །འབྲུའི་ཆང་དང་བཅོས་པའི་ཆང་འཐུང་ན་ལྟུང་བྱེད་དུ་འགྱུར་རོ། །དགེ་སློང་འབྲུའི་ཆང་གི་ནུ་རྩི་འཐུང་ན་ལྟུང་བྱེད་དུ་འགྱུར་རོ། །དགེ་སློང་སྦང་མ་ཟ་ན་ལྟུང་བྱེད་དུ་འགྱུར་རོ། །དགེ་སློང་ཚིགས་མ་ཟ་ན་ལྟུང་བྱེད་དུ་འགྱུར་རོ། །དགེ་སློང་ཕབས་ཀྱི་ཆང་བུ་ཟ་ན་ཉེས་བྱས་སུ་འགྱུར་རོ། །དགེ་སློང་མེ་ཏོག་དང་འབྲས་བུ་མྱོས་པར་འགྱུར་བ་དག་ཟ་ན་ཉེས་བྱས་སུ་འགྱུར་རོ། །བསྐོལ་བ་འཐུང་བ་དང ། ཁའི་ནད་ཡོད་པ་ལ་སྨན་པའི་ལུང་གིས་ཁུར་བར་སྲེལ་བ་དང ། ལུས་དག་སྐུད་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ལེགས་འོངས་ཀྱིས
8.35a
ལས་ཅི་བགྱིས་ན་ལས་དེའི་རྣམ་པར་སྨིན་པས་ཕྱུག་པ། ནོར་མང་ལ་ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་བགྱིས་ན་ལས་དེའི་རྣམ་པར་སྨིན་པས་མུ་ལྟོ་བ་རྣམས་ཀྱི་ནང་དུ་ཞུགས་ཤིང་ཉེས་འོངས་ཤེས་བགྱི་བའི་མིང་དུ་གྱུར། ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ལེགས་འོངས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ལེགས་འོངས་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་འདུག་པ་དེ་འཁོར་དང་བཅས་ཏེ་སྐྱེད་མོས་ཚལ་གྱི་སར་བྱུང་ངོ ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །རང་སངས་རྒྱས་ན་བ་ཞིག་རི་བྲགས་དེར་བསོད་སྙོམས་ལ་ཞུགས་པ་དང ། ཁྱིམ་བདག་དེས་རང་སངས་རྒྱས་དེ་ཐག་རིང་པོ་ཁོ་ན་ནས་མཐོང་ནས། དེས་ཞོ་ཤས་འཚོ་བ་རྣམས་ལ་བསྒོ་བ།
8.35b
ཤེས་ལྡན་དག་རབ་ཏུ་བྱུང་བ་འདི་སྐྲོད་ཅིག་།དེ་དག་ལས་འགའ་ཡང་རང་སངས་རྒྱས་དེ་སྐྲོད་པར་སྤྲོ་བ་མེད་ནས་ཁྱིམ་བདག་དེས་སྤྱོས་ཏེ་སྟན་ལས་ལངས་ནས་རང་ཉིད་ཀྱིས་རང་སངས་རྒྱས་དེའི་གཉའ་བ་ནས་བཟུང་སྟེ་བསྐྲད་ནས་སྨྲས་པ། ཉེས་འོངས་མུ་ལྟོ་བ་རྣམས་ཀྱི་ནང་དུ་ཞུགས་ཤིག་ཅེས་ཕུལ་བ་དང ། དེ་ཕྱག་དར་གྱི་ཕུང་པོའི་ནང་དུ་སྒྱེལ་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། ཁྱིམ་བདག་ཉོན་མོངས་པ་འདི་ཧ་ཅང་སྨྲས་པ་དང ། ཉམས་པར་གྱུར་ན་མི་རུང་གིས་འདི་ལ་ལག་ནས་དྲང་བ་སྦྱིན་ནོ་སྙམ་ནས། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཁྱིམ་བདག་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་ཁྱིམ་བདག་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །ཁྱིམ་བདག་དེས་དེ་ལ་མཆོད་པ་བྱས། རྐང་པ་གཉིས་ལ་མགོ་བོས་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་འཐུན་པར་མི་འགྱུར་བར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་ཞིང ། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་ཁྱིམ་བདག་གང་ཡིན་པ་དེ་ནི་ལེགས་འོངས་འདི་ཡིན་ཏེ། འདིས་རང་སངས་རྒྱས་དེ་ལ་མཆོད་པ་བྱས་ནས་སྨོན་ལམ་བཏབ་པ་གང
8.36a
ཡིན་པའི་ལས་དེའི་རྣམ་པར་སྨིན་པས་ནི་ད་ལྟར་ཕྱུག་ལ་ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །གནོད་པ་བྱས་པ་དང་ཉེས་འོངས་ཤེས་བརྗོད་པ་གང་ཡིན་པའི་ལས་དེའི་རྣམ་པར་སྨིན་པས་ནི་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས་ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མུ་ལྟོ་བ་ཉིད་ཀྱིས་འཕྱན་པར་གྱུར་ཅིང་ཉེས་འོངས་ཤེས་བྱ་བར་གྱུར་ཏེ། ད་ལྟར་གྱི་བར་དུ་ཡང་མུ་ལྟོ་བ་རྣམས་ཀྱི་ནང་དུ་ཞུགས་ཤིང་ཉེས་འོངས་ཞེས་བྱ་བའི་མིང་དུ་གྱུར་ཏོ། །བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་འཐུན་པར་མི་འགྱུར་བར་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང ། ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ནི་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང ། འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །བཙུན་པ་ཚེ་དང་ལྡན་པ་ལེགས་འོངས་ཀྱིས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན། དེ་ཡང་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར
8.36b
རྫོགས་པའི་སངས་རྒྱས་འོད་སྲུང་གིས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང ། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་སྨོན་ལམ་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ
8.37a
ཡང་འདྲེས་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །མྱོས་པར་འགྱུར་བ་འཐུང་བའི་ལྟུང་བྱེད་དེ་བདུན་བཅུ་རྩ་དགུ་པ་རྫོགས་སྷོ།། ་་་་་་་་་་་་།། བར་སྡོམ་ལ། ཞི་བ་རལ་པ་ནོར་བུ་དང ། །སྨན་པ་དགེ་འདུན་ལྟོ་དང་སྐས། །ཟ་དང་ཉེས་གྱུར་གཏུམ་མོ་དང ། །གཞོན་ནུ་ལྷུང་བཟེད་སྟོབས་རྣམས་སོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲགས་ཤིག་ན་བྲམ་ཟེ་ཞིག་འདུག་པ་དེས་མཉན་ཡོད་པའི་བུ་མོ་ཞིག་བག་མར་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་ཞིག་བྱུང་ནས་དེ་སྲིངས་ཤིང་བསྐྱེད་དེ་ཆེན་མོར་གྱུར་ཏོ། །བྲམ་ཟེ་དེ་ལ་རེ་ཤིག་མཉན་ཡོད་དུ་བྱ་བ་ཞིག་བྱུང་ནས་དེས་ཤིང་རྟ་བཅས་ཏེ་འཕགས་པ་དང ། བུ་མོ་དེས་མཐོང་ནས་དེས་སྨྲས་པ། ཡབ་གར་བཞུད། བྲམ་ཟེས་སྨྲས་པ། བུ་མོ་མཉན་ཡོད་དུའོ། །བུ་མོས་སྨྲས་པ། ཡབ་བདག་ཀྱང་མཆིའོ། །བྲམ་ཟེས་སྨྲས་པ། བུ་མོ་ཁྱོད་ད་མཆོག་ཐོབ་པ་ཡིན་པས་ཁྱོད་ཀྱི་ལག་པ་འམ་རྐང་པ་ལ་འགའ་ཞིག་གིས་རེག་པར་གྱུར་ན། བདག་ཅག་ལ་མི་སྙན་པར་འགྱུར་གྱིས་ཁྱོད་འདི་ཉིད་ན་འདུག་ཤིག་།བུ་མོ་དེས་ངུ་བར་བརྩམ་པ་དང ། བྲམ་ཟེ་མོས་སྨྲས་པ། བུ་མོ་ཅིའི་ཕྱིར་ངུ ། བུ་མོས་སྨྲས་པ། ཡབ་མཉན་ཡོད་དུ་བཞུད་ན་བདག་དེར་ཁྲིད་པར་མི་བཞེད་དོ། །བྲམ་ཟེ་མོས་སྨྲས་པ། རྗེའི་སྲས་བུ་མོ་ཡང་ཁྲིད་ཅིག་དང་ཉེ་དུ་དག་མཐོང་བར་འགྱུར་རོ། །བྲམ་ཟེས་སྨྲས་པ། བུ་མོ་ད་མཆོག་ཐོབ་པར་འགྱུར་བས་འདིའི་ལག་པ་འམ། རྐང་པ་ལ་འགའ་ཞིག་གིས་རེག་པར་གྱུར་ན་བདག་ཅག་ལ་མི་སྙན་པར་འགྱུར་གྱིས་འདི་ཉིད་དུ་ཞོག་ཤིག་།བྲམ་ཟེ་མོས་སྨྲས་པ། རྗེའི་སྲས་དང་ཐབས་གཅིག་མཆིས་ན་ལེགས་པར་སྦས
8.37b
པ་དང ། ལེགས་པར་བསྲུངས་པར་འགྱུར་རོ། །བྲམ་ཟེ་དེས་བུ་མོ་དེ་ཤིང་རྟར་བཅུག་སྟེ་འཕགས་པ་དང ། བུ་མོ་དེ་ལྟད་མོའི་རང་བཞིན་ཅན་ཡིན་པས་ཕ་ལ་དྲིས་པ། ཡབ་འདི་སུའི་ཀུན་དགའ་ར་བ་ལགས། འདི་སུའི་རྫིང་བུ་ལགས། འདི་སུའི་ལྷ་ཁང་ལགས། འདི་སུའི་སྐྱེད་མོས་ཚལ་ལགས། འདི་སུའི་ཁྲོན་པ་ལགས། འདི་སུའི་གཙུག་ལག་ཁང་ལགས། བྲམ་ཟེས་སྨྲས་པ། བུ་མོ་འདི་ནི་ཤཱཀྱའི་བུའི་དགེ་སྦྱོང་རྣམས་ཀྱི་བསྟི་གནས་ཡིན་ནོ། །བུ་མོས་སྨྲས་པ། ཡབ་ལྟར་མཆིའོ། །བྲམ་ཟེས་སྨྲས་པ། བུ་མོ་བསྟི་གནས་འདི་ན་རིགས་སྣ་ཚོགས་དང ། རུས་སྣ་ཚོགས་ལས་རབ་ཏུ་བྱུང་བ་དག་འཁོད་པས་ཁྱོད་ཀྱི་ལག་པ་འམ། རྐང་པ་ལ་འགའ་ཞིག་གིས་རེག་པར་གྱུར་ན་བདག་ཅག་ལ་མི་སྙན་པར་འགྱུར་གྱིས་ཚུར་ཤོག་འདོང་ངོ་ཞེས་དེ་འཕགས་པ་དང ། ཇི་ཙམ་ན་གྲོང་བར་དེ་ཉིད་ནས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་གཙུག་ལག་ཁང་ལྟ་འདོད་པ་དག་མཉན་ཡོད་ཀྱི་ཕྱི་རོལ་དུ་བྱུང་བ་དེ་དག་གིས་བྲམ་ཟེ་དེ་མཐོང་ནས་དེ་དག་གིས་སྨྲས་པ། སྣམ་ཟུངས་བྱོན་པ་ལེགས་སོ་བྱོན་པ་ལེགས་སོ། །ཁྱོད་ཡུན་རིང་མོ་རིང་མོ་ཞིག་གིས་གར་བཞུད། བྲམ་ཟེས་སྨྲས་པ། ཁོ་བོ་ཁྱོད་ཅག་ཉིད་ལྟར་འོངས་ན་ཁྱོད་ཅག་གར་འདོང ། རྒྱལ་བྱེད་ཀྱི་ཚལ་དུ་གཙུག་ལག་ཁང་ལྟར་མཆིའོ། །སྲུ་ཅག་ཚ་མོ་འདི་ཡང་ཁྲིད་དེ་དེང་ལ། འདི་ལ་ཡང་གཙུག་ལག་ཁང་སྟོན་ཅིག་།བུ་མོ་དེ་ཡང་དེ་དག་དང་ལྷན་ཅིག་རྒྱལ་བྱེད་ཀྱི་ཚལ་དུ་སོང་ངོ ། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲགས་པར་བྱའོ་སྙམ་པས་དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས། ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །དྲུག་སྡེ་དག་གིས་གྲོང་ཁྱེར་ཆེན་པོ་དྲུག་པོ་དག་ན་འཁོད་པའི་མི་རྣམས་འདི་ལྟ་སྟེ།
8.38a
རིགས་ལས་སམ། རུས་ལས་སམ། རྒྱུད་ལས་སམ། མིང་ལས་སམ། གཟུགས་ལས་སམ། བཟོ་ལས་སམ། འཚོ་བ་ལས་མི་ཤེས་པ་འམ། མ་མཐོང་བ་འམ། མ་ཐོས་པ་འམ། མ་རིག་པ་འམ། རྣམ་པར་མི་ཤེས་པ་འགའ་ཡང་མེད་པས་ཚེ་དང་ལྡན་པ་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་འདི་སྐད་ཅེས་སྨྲས་སོ། །ཆེ་གེ་མོའི་མ། ཆེ་གེ་མོའི་ཆུང་མ། ཆེ་གེ་མོའི་མནའ་མ། ཆེ་གེ་མོའི་བུ་མོ། ཆེ་གེ་མོའི་སྲིང་མོ་འོངས་པ་ལེགས་སོ་འོངས་པ་ལེགས་སོ། །ཁྱེད་ཅག་ཅིའི་ཕྱིར་ཡུན་རིང་མོ་རིང་མོ་ནས་ཟླ་བ་ལྟར་རྒྱུ་བར་བྱེད། དེ་དག་གིས་སྨྲས་པ། བཙུན་པ་འཆར་ཀ་བཅོམ་ལྡན་འདས་ཀྱིས་མི་ཁོམ་པ་བརྒྱད་ནི་གང་ཟག་གི་ཚངས་པར་སྤྱད་པའི་དུས་མ་ལགས་སོ་ཞེས་ལེགས་པར་གསུངས་ན། བདག་ཅག་ནི་འདི་ལྟ་སྟེ། ཁྱིམ་གྱི་འདུ་འཛི་དང་ལྡན་པས་མི་ཁོམ་པ་དགུ་པ་ལགས་སོ། །འཆར་ཀས་སྨྲས་པ། སྲིང་མོ་དག་ཁྱེད་ཀྱིས་འགའ་ཞིག་གིས་འདི་སྐད་ཅེས། དུག་ཅན་ལ་སོགས་རྒྱལ་པོ་ཡིས། །བྱ་བ་དག་ནི་མ་བྱས་པར། །དེ་དག་ཉིད་དང་བྱ་བ་རྣམས། །ཞིག་པ་ཉིད་དུ་གྱུར་པ་ཡིན། །བྱ་བ་དེ་དག་ཉིད་ཀྱང་ནི། །ཡོངས་སུ་རྫོགས་པར་མ་གྱུར་པར། །འཇིག་རྟེན་དགྲ་བོ་འཆི་བདག་དེ། །འོང་བ་ཉིད་དུ་འགྱུར་བ་ཡིན། །ཞེས་སྨྲས་པ་མ་ཐོས་སམ། དེ་དག་གིས་སྨྲས་པ། བཙུན་པ་འཆར་ཀ་དེའི་སླད་དུ་བདག་ཅག་སྐྱེད་མོས་ཚལ་དུ་མཆིས་ཏེ་རྒྱལ་བྱེད་ཀྱི་ཚལ་དུ་འཇུག་པ་དང ། གཙུག་ལག་ཁང་བལྟ་བ་དང ། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་བའི་སླད་དུ་མཆིས་པ་ལགས་སོ། །འཆར་ཀས་སྨྲས་པ། སྲིང་མོ་དག་གལ་ཏེ་ཁྱེད་ཅག་དེའི་ཕྱིར་འོངས་ན་བཅོམ་ལྡན་འདས་ཀྱིས་ཀྱང་སྙིང་པོ་མེད་པའི་ལུས་ལས་སྙིང་པོ་བླང་བར་བྱའོ་ཞེས་གསུངས་པས་ལེགས་སོ་ལེགས་སོ། །སྲིང་མོ་དག་དེ་ནི་མཇལ་གྱིས་འདི་ལྟར་ལྟད་མོ་ཇི་ལྟར་བལྟ་བ་དྲི་བར་བྱའོ། །སྲིང་མོ་དག་ཁྱེད་ཅག་གང་དུ་འཇུག་པར་བྱེད། བཙུན་པ་འཆར་ཀ་བདག་ཅག་ཀུན་དགའི
8.38b
ར་བར་འཇུག་ཅིང་གཙུག་ལག་ཁང་བལྟ་བར་འཚལ་ལོ། །སྲིང་མོ་དག་བཅོམ་ལྡན་འདས་ཀྱིས་མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་དག་ལ་གོམ་འདོར་ན། །འཛམ་བུ་ཆུ་བོ་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་གསུངས་པས་དེ་ཡང་ལེགས་སོ། །སྲིང་མོ་དག་ཁྱེད་ཀྱིས་གང་ཁྱེད་ཅག་ལ་གཙུག་ལག་ཁང་སྟོན་པར་བྱེད་པའི་དགེ་སློང་འགའ་ཞིག་བཙལ་ཏམ། འཕགས་པ་ཅི་བདག་ཅག་སྒྲོན་མ་སུག་པ་ན་ཐོགས་བཞིན་དུ་ཞུགས་གཞན་དུ་འཚོལ་ལམ། བཙུན་པ་འཆར་ཀ་སྤངས་ཏེ་དགེ་སློང་གཞན་ག་ལ་ཚོལ། ཁྱོད་བས་གཞན་ཁྱད་པར་དུ་འཕགས་པ་སུ་ཞིག་མཆིས་ཀྱིས་ཁྱོད་ཉིད་ཀྱིས་བསྟན་དུ་གསོལ། དེ་ནས་ཚེ་དང་ལྡན་པ་འཆར་ཀ་འདི་སྙམ་དུ་སེམས་ཏེ། གལ་ཏེ་འདི་དག་གཙུག་ལག་ཁང་བསྟན་པར་བྱ་ན་ནི་བདག་གི་དགེ་བའི་ཕྱོགས་ཡོངས་སུ་ཉམས་པར་ཡང་འགྱུར། གལ་ཏེ་བསྟན་པར་མི་བྱ་ན་ནི་ཚིག་པའི་བསོད་སྙོམས་ཀྱང་སྟེར་བར་མི་འགྱུར་ལ། བཅོམ་ལྡན་འདས་ཀྱིས་ཀྱང་མ་དད་པ་རྣམས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་གཞུག་པར་བྱ། གདུལ་བར་བྱ། གཟུང་བར་བྱ། རབ་ཏུ་དགོད་པར་བྱའོ་ཞེས་གསུངས་པས་དེའི་ཕྱིར་འདི་དག་དགེ་བ་ལ་ངེས་པར་སྦྱར་བར་བྱས། རྣམ་པ་ཐམས་ཅད་དུ་བསྟན་པར་བྱའོ་སྙམ་དུ་རིག་ནས་དེས་མེ་ཏོག་དང ། བདུག་སྤོས་ལ་སོགས་པ་མཆོད་པ་སྣ་ཚོགས་ཐོགས་ཏེ་པོག་ཕོར་ལག་ཏུ་བླངས་ནས་གོ་རིམས་ཇི་ལྟ་བ་བཞིན་དུ་བསྟན་པར་བརྩམས་ཏེ། སྲིང་མོ་དག་འདི་ནི་བཅོམ་ལྡན་འདས་ཀྱི་དྲི་གཙང་ཁང་སྟེ། གང་དུ་བཅོམ་ལྡན་འདས་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་ཉམ་ང་བ་དང་མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། གང་ནི་ངན་སོང་གི་འདམ་ནས་བསླང་སྟེ་མཐོ་རིས་དང ། ཐར་པ་དང་འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས
8.39a
པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། དགེ་བའི་རྩ་བ་དག་བསྐྱེད་པ་གང་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་ཅིང་འདི་ལྟར། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པ་འང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །ཞེས་བྱ་བ་འཇུག་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུའི་སྟོབས་དང་ལྡན་པ། མི་འཇིགས་པ་བཞིས་བསྙེངས་པ་མི་མངའ་བ། ཁྱུ་མཆོག་རླབས་པོ་ཆེའི་གནས་སུ་དམ་འཆའ་བ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་པ་གང་ཡིན་པ་དེའི་ཡིན་གྱིས་འདིའི་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་ཀུན་ཤེས་ཀཽཎྜི་ནྱའི་གཙུག་ལག་ཁང་སྟེ། བཅོམ་ལྡན་འདས་ཀྱིས་འཇིག་རྟེན་མི་ཤེས་པའི་མུན་པ་དང ། འདྲེན་པ་མེད་པ་དང ། ཡོངས་སུ་འདྲེན་པ་མེད་པ་ན་དེའི་དང་པོར་ཡེ་ཤེས་ཀྱི་མིག་སྨན་གྱི་ཐུར་མས་གང་གི་ཆོས་ཀྱི་མིག་རྣམ་པར་སྦྱངས་པ་བཅོམ་ལྡན་འདས་ཀྱིས་གནས་བརྟན་རྣམས་དང ། རྒྱལ་ཚབ་ལྟ་བུ་རྣམས་དང ། ཡུན་རིང་པོ་ནས་རབ་ཏུ་བྱུང་བ་རྣམས་དང ། ཚངས་པར་སྤྱོད་པ་མངོན་པར་སྤྱོད་པ་རྣམས་དང ། སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་ལུང་བསྟན་པ་གང་ཡིན་པ་གང་གི་རྒྱུད་ལ་དེའི་དང་པོར་བཅོམ་ལྡན་འདས་ཀྱིས་འཇིག་རྟེན་དུ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་བསྐོར་མི་ནུས་པ་ཆོས
8.39b
དང་ལྡན་པའི་ཆོས་ཀྱི་འཁོར་ལོ་སྐྱེ་བོ་མང་པོའི་དོན་དང ། སྐྱེ་བོ་མང་པོ་ལ་ཕན་པ་དང ། བདེ་བ་དང་འཇིག་རྟེན་ལ་རྗེས་སུ་ཐུགས་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང་བདེ་བའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བ་དེའི་ཡིན་གྱིས། འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་འོད་སྲུང་ཆེན་པོའི་གཙུག་ལག་ཁང་སྟེ། བྲམ་ཟེ་ཤིང་སཱ་ལ་ཆེན་པོ་ལྟ་བུ་རྨོན་པ་དོར་སྟོང་དུ་གཅིག་གིས་མ་ཆོག་པ་སྤངས་ཏེ་རབ་ཏུ་བྱུང་བ། དབྱིག་བྱེ་བ་ཕྲག་དྲུག་བཅུ་དང་ལྡན་པ། གསེར་གྱི་ནས་བང་ཆུང་བརྒྱད་བཅུ་བདོག་པ། བྲན་གྱི་གྲོང་བཅཝ་བརྒྱད་བདོག་པ། སྦྱོར་བའི་གྲོང་བཅུ་དྲུག་བདོག་པ། སེར་སྐྱ་བཟང་མོ་ལུས་གསེར་བས་ལྷག་པ་དང་ལྡན་པ་མཆིལ་མའི་ཐལ་བ་སྨིན་པ་ལྟར་སྤངས་ཏེ་མཚན་མོའི་ཐུན་ཐ་མ་ལ་རས་སྦྱར་མའི་སྣམ་སྦྱར་རིན་ཐང་འབུམ་རི་བ་ཐོགས་ཏེ་འཇིག་རྟེན་ན་དགྲ་བཅོམ་པ་གང་དག་བཞུགས་པ་དེ་དག་གི་ཕྱིར་རབ་ཏུ་བྱུང་བ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་བསྐྱེད་པའི་ཕྱིར་ནགས་ན་བརྟེན་པ་གང་ཡིན་པ་གང་མཐོང་ན་སྤོས་ཀྱི་གླང་པོ་ཆེ་དག་ཀྱང་རྒྱགས་པ་དང་བྲལ་བར་འགྱུར་བ། གང་གིས་བུ་མངས་ཀྱི་མཆོད་རྟེན་དུ་སྟོན་པར་ཁས་བླངས་ནས་དགེ་སློང་གི་སྡོམ་པ་ཐོབ་པ། བཅོམ་ལྡན་འདས་ཀྱིས་ཀྱང་དགེ་སློང་དག་ངའི་ཉན་ཐོས་ཀྱི་དགེ་སློང་འདོད་པ་ཆུང་བ། ཆོག་ཤེས་པ། སྦྱངས་པའི་ཡོན་ཏན་སྨྲ་བ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟ་སྟེ་དགེ་སློང་འོད་སྲུང་ཆེན་པོའོ་ཞེས་གསུངས་ཤིང་བཅོམ་ལྡན་འདས་ཀྱིས་རྗེས་སུ་བསྔགས་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་ཤཱ་རིའི་བུའི་གཙུག་ལག་ཁང་སྟེ། མཆོག་ཐོབ་པའི་བུ་གང་ཡིན་པ། གང་ལོ་བརྒྱད་གཉིས་སུ་དབང་པོའི་བརྡ་སྤྲོད་པ་བླགས་པ། རྒོལ་བ་ཐམས་ཅད་ཚར་བཅད་པ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་བཅོམ་ལྡན་འདས་ཀྱིས་ཤེས་རབ་ཆེན་པོ་རྣམས་དང ། སྤོབས་པ་ཆེན་པོ་རྣམས་ཀྱི་མཆོག་ཏུ་བསྟན་པ་གང་ཡིན་པ། བཅོམ་ལྡན་འདས་ཀྱིས་འཇིག་རྟེན་ཐམས་ཅད་གང་གི་ཆ་བཅུ་དྲུག་པར་བཞག་ཅིང་བཅོམ་ལྡན་འདས་ཀྱིས།
8.40a
དེ་བཞིན་གཤེགས་པ་མ་གཏོགས་པར། །འཇིག་རྟེན་ཀུན་གྱི་ཤེས་རབ་གང ། །ཤཱ་རིའི་བུའི་ཤེས་རབ་ཀྱི། །བཅུ་དྲུག་ཆར་ཡང་མི་ཆོག་གོ། །གལ་ཏེ་ལྷར་བཅས་འཇིག་རྟེན་འདི། །ཤཱ་རིའི་བུ་དང་མཉམ་གྱུར་པས། །དེ་བཞིན་གཤེགས་པའི་ཤེས་རབ་ཀྱི། །བཅུ་དྲུག་ཆར་ཡང་མི་ཆོག་གོ། །ཞེས་གསུངས་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་མཽད་གལ་གྱི་བུ་ཆེན་པོའི་གཙུག་ལག་ཁང་སྟེ། མདུན་ན་འདོན་གྱི་བུ་ཅོད་པན་མེད་པའི་རྒྱལ་སྲིད་སྤངས་ཏེ་རབ་ཏུ་བྱུང་བ་གང་ཡིན་པ་གང་གིས་ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བྱེད་རྐང་པ་གཡས་པའི་ཐེ་བོས་ལན་གསུམ་དུ་བསྒུལ། ཀུན་དུ་བསྒུལ་ཀུན་དུ་རབ་ཏུ་བསྒུལ་བ་གང་གི་རྫུ་འཕྲུལ་གྱིས་བཅོམ་ལྡན་འདས་འཇིག་རྟེན་གྱི་ཁམས་འོད་ཟེར་ཅན་དུ་ཉིན་མཚན་བདུན་གྱིས་གཤེགས་པ། བཅོམ་ལྡན་འདས་ཀྱིས་རྫུ་འཕྲུལ་ཆེན་པོ་རྣམས་དང ། མཐུ་ཆེན་པོ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་མ་འགགས་པའི་གཙུག་ལག་ཁང་སྟེ། མི་སྐལ་བ་བཟང་པོ་ལས་རབ་ཏུ་བྱུང་བ་གང་ཡིན་པ་བཅོམ་ལྡན་འདས་ཀྱི་ཡབ་ཀྱི་མཆེད་ཀྱི་སྲས་གང་གི་མིང་ཡང་དག་པར་བསྒྲགས་པས་ཚོང་པ་དག་རྒྱ་མཚོ་ཆེན་པོ་ནས་བཞོན་པའི་སྣོད་ལེགས་པར་གྲུབ་ཅིང་འོང་བར་འགྱུར་བ་བཅོམ་ལྡན་འདས་ཀྱིས་ལྷའི་མིག་ཅན་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་ཀུན་དགའ་བོའི་གཙུག་ལག་ཁང་སྟེ་ཡུན་རིང་པོ་ནས་བཅོམ་ལྡན་འདས་ཀྱི་བསྙེན་བཀུར་བ་གང་ཡིན་པ་བཅོམ་ལྡན་འདས་ཀྱི་ཞམ་རིང་ན་ཉེ་བར་སྤྱོད་པ། སྟོན་པས་ཡང་དག་པར་བསྔགས་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་ཡང་དག་པར་བཀུར་བ་གང་ཡིན་པ་བཅོམ་ལྡན་འདས་ཀྱི་ཡབ་ཀྱི་མཆེད་ཀྱི་སྲས་ལས་རབ་ཏུ་བྱུང་བ་བཅོམ་ལྡན་འདས་ཀྱིས་མང་དུ་ཐོས་པ་རྣམས་དང ། ཐོས་པ་འཛིན་པ་རྣམས་དང ། ཐོས་པ་བསགས་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང
8.40b
ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་མཛེས་དགའི་གཙུག་ལག་ཁང་སྟེ། བཅོམ་ལྡན་འདས་ཀྱི་གཅུང་པོ་སྲུའི་སྲས་ལས་རབ་ཏུ་བྱུང་བ་གལ་ཏེ་རབ་ཏུ་མ་བྱུང་ན་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་བ། བཅོམ་ལྡན་འདས་ཀྱིས་དབང་པོ་དག་གི་སྒོ་བསྡམས་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་སྒྲ་ཅན་ཟིན་གྱི་གཙུག་ལག་ཁང་སྟེ། བཅོམ་ལྡན་འདས་ཀྱི་སྲས་ལས་རབ་ཏུ་བྱུང་བ། གལ་ཏེ་རབ་ཏུ་མ་བྱུང་ན་མཐུ་དང་ལྡན་པའི་རྒྱལ་པོར་འགྱུར་བ་གང་ཡིན་པ་གང་རབ་ཏུ་བྱུང་ན་རྒྱལ་པོ་མང་པོས་བཀུར་གྱི་རྒྱུད་གཅིག་ནས་གཅིག་ཏུ་རྒྱུད་པ་ཡང་དག་པར་རྒྱུན་ཆད་པ། བཅོམ་ལྡན་འདས་ཀྱིས་བསླབ་པ་འདོད་པ་རྣམས་དང ། བསླབ་པ་ལ་གུས་པ་རྣམས་དང ། བསླབ་པ་ལ་ཡོ་བྱད་བསྙུངས་པ་ཐོབ་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག་།འདི་ནི་ཚེ་དང་ལྡན་པ་དགའ་བོའི་གཙུག་ལག་ཁང་ངོ ། །འདི་ནི་ཉེ་དགའི་འོ། །འདི་ནི་འདུན་པའིའོ། །འདི་ནི་འགྲོ་མགྱོགས་ཀྱིའོ། །འདི་ནི་ནབ་སོའིའོ། །འདི་ནི་ཁོ་བོའི་གཙུག་ལག་ཁང་ངོ ། །ཅི་འདི་ཡང་ལྟ་བར་བྱེད་དམ། འཕགས་པ་ཅི་བདག་ཅག་གིས་གཙུག་ལག་ཁང་ཐམས་ཅད་བལྟས་ནས། གདོད་འཕགས་པ་འཆར་ཀའི་གཙུག་ལག་ཁང་བལྟ་བར་མི་བགྱི་འམ། བདག་ཅག་གིས་འཕགས་པ་འཆར་ཀའི་གཙུག་ལག་ཁང་འདི་ད་ཤིན་དུ་བལྟ་བར་བགྱིའོ། །སྲིང་མོ་དག་དེ་བཞིན་གྱིས་ཤིག་།ཚེ་དང་ལྡན་པ་འཆར་ཀ་དེ་འདོད་ཆགས་སྤྱད་པ་ཡིན་པས་དེའི་གཙུག་ལག་ཁང་ནས་ས་གཞི་མོན་སྲན་གྲེའུའི་ཕྱེ་མས་བསྐུས་པ་དང ། རྩིག་པ་བཀྲ་ཞིང་ཉེ་བར་བཀྲ་བ་དང ། མལ་སྟན་བེའུ་ཕྲུག་གི་སྙིང་པོ་ཅན་བཤམས་པ་དང ། བུམ་པ་བཏུང་བས་བཀང་བ་བཅུ་སྣོད་དང་བཅས་པ་བཞག་པ་དང ། སྐོན་པའི་ནང་ན་བཅའ་བ་སྣ་ཚོགས་ཀྱིས་གང་བ་དག་ཡོད་དོ། །ཚེ་དང་ལྡན་པ་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་རང་གི་གཙུག་ལག་ཁང་དུ་འོངས་པ་རྣམས་ལ་སྨྲས་པ། སྲིང་མོ་དག་ཅི་ཇེ་ཁྱེའུ་སུས་བྱ་འམ། འོན་ཏེ་བཏུང་བ་འཐུང་འཕགས་པ་ཅི་ཆུ་ཀླུང་ཟློག་ཕྱོགས་སུ་འབབ་བམ། བདག་ཅག་གིས་འཕགས་པ་ལ་གསོལ
8.41a
བར་བགྱི་བ་གང་ལགས་པ་དེ་ཉིད་འཕགས་པས་བདག་ཅག་ལ་སྩོལ་ཏམ། འདི་ལྟར་བདག་ཅག་ལ་གང་དཀོན་པ་དེ་སྩོལ་ཅིག་།སྲིང་མོ་དག་ཁྱེད་ཅག་ལ་ཅི་ཞིག་དཀོན། འཕགས་པ་ཆོས་མཉན་པའོ། །སྲིང་མོ་དག་བཅོམ་ལྡན་འདས་ཀྱིས་གནས་དྲུག་པོ་དག་འཇིག་རྟེན་དུ་བྱུང་བ་ནི་ངོ་མཚར་རྨད་དུ་བྱུང་བ་ཡིན་ཏེ། དྲུག་པོ་དེ་དག་གང་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང ། དེ་བཞིན་གཤེགས་པས་གསུངས་པའི་ཆོས་འདུལ་བ་དང་མི་ཉིད་དང ། དབུས་པའི་གནས་སུ་སྐྱེ་བ་དང ། དབང་པོ་མ་ཚང་བ་མེད་པ་དང ། དགེ་བའི་ཆོས་ལ་འདུན་པའོ་ཞེས་ལེགས་པར་གསུངས་པས་དེའི་ཕྱིར་ཁྱེད་ཅག་དགེ་བའི་ཆོས་ལ་འདུན་པ་སྐྱེས་པ་འདི་ནི་སངས་རྒྱས་འབྱུང་བ་དང་འདྲ་སྟེ་ལེགས་སོ་ལེགས་སོ། །སྲིང་མོ་དག་འཁོད་ཅིག་དང་ཁོ་བོས་ཁྱེད་ལ་ཆོས་བསྟན་པར་བྱའོ། །དེ་དག་གིས་དེའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འཁོད་པ་དང ། དེས་དེ་དག་ལ་ཆོས་བསྟན་པར་བརྩམས་སོ།། ་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་དྲུག་པ། བུ་མོ་དེ་ཡང་ལྟད་མོའི་རང་བཞིན་ཅན་ཡིན་པས་རི་མོ་ལྟ་ཞིང་གཞན་དུ་སོང་ངོ ། །དེ་དག་གིས་ཀྱང་ཆོས་མཉན་ནས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་གཙུག་ལག་ཁང་ནས་བྱུང་ངོ ། །བུ་མོ་དེས་གཞན་དག་བྱུང་བ་མ་ཚོར་ནས་སྒོ་ཁང་དེ་ཉིད་ན་རི་མོ་ལྟ་ཞིང་འདུག་གོ། །ཚེ་དང་ལྡན་པ་འཆར་ཀས་དེ་དག་བསྐྱལ་ནས་གཙུག་ལག་ཁང་དུ་འཇུག་པར་བརྩམས་པ་དང ། དེས་བུ་མོ་དེ་སྒོ་ཁང་ན་འདུག་པ་མཐོང་ནས་དེས་དེ་ལ་སྨྲས་པ། བུ་མོ་ཁྱོད་མ་སོང་ངམ། དེས་འཛུམ་ཕྱུང་བ་དང་འཆར་ཀས་དེ་ལ་འོ་བྱས་ཏེ་ཡན་ལག་དང་ཉིང་ལག་དག་མནམས་ཀུན་དུ་མནམས་སོ། །བུ་མོ་དེ་ངུ་ཞིང་ཕྱིར་བྱུང་ནས་ཕའི་གན་དུ་སོང་སྟེ་སྨྲས་པ། ཡབ་བདག་དགེ་སྦྱོང་འཆར་ཀས་གཞོན་ནུ་མ་དང་བྲལ་བར་བགྱིས་སོ། །བྲམ་ཟེ་དེས་བསམས་པ། གལ་ཏེ་ད་ཅུང་ཟད་སྨྲར་ནི་བདག
8.41b
གཅིག་པུ་ཡིན་ལ། འདི་དག་ནི་མང་བས་བདག་ལ་གནོད་པ་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། གང་དུ་གྲོགས་རྙེད་པར་གྱུར་པ་ན་ར་མདའ་བ་བཟློག་པར་བྱའོ་སྙམ་མོ། །རྒྱལ་བྱེད་ཀྱི་ཚལ་དང་མཉན་ཡོད་ཀྱི་བར་ན་གནས་ཀྱི་ཤིང་ལྗོན་པ་ཞིག་ཡོད་པ་དེའི་དྲུང་ན་བྲམ་ཟེ་ཞིག་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་ཀློག་དུ་འཇུག་ཅིང་འདུག་ནས། བྲམ་ཟེ་དེས་དེ་དག་ལ་སྨྲས་པ། ཤེས་ལྡན་དག་དགེ་སྦྱོང་འཆར་ཀས་ཁོ་བོའི་བུ་མོ་གཞོན་ནུ་མ་དང་བྲལ་བར་བྱས་ཀྱིས་ཁྱེད་ཅག་ཁོ་བོའི་ཚངས་པ་མཚུངས་པར་སྤྱོད་པ་ཡིན་གྱིས་གྲོགས་གྱིས་ཤིག་།བྲམ་ཟེ་དག་ནི་ཡོངས་སུ་མི་རྟོག་པ་ཡིན་པས་དེ་དག་དབྱུག་པ་དག་ཐོགས་ཏེ་དེར་དོང་ངོ ། །ཚེ་དང་ལྡན་པ་འཆར་ཀ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེ་དེ་དག་གིས་བཟུང་ཞིང་བཀྲི་བར་བརྩམས་པ་དང ། དེ་དག་གིས་དེ་བསྒུལ་བར་ཡང་མ་ནུས་སོ། །བཅོམ་ལྡན་འདས་ཀྱིས་གདུལ་བའི་དུས་མཁྱེན་ནས་དེའི་སྟོབས་དབྲི་བར་མཛད་པ་དང ། དེ་དག་གིས་ཚེ་དང་ལྡན་པ་འཆར་ཀ་ཕར་དྲངས་ཚུར་དྲངས་ཏེ་ཁྲིད་དོ། །ཚེ་དང་ལྡན་པ་འཆར་ཀས་བསམས་པ། བཅོམ་ལྡན་འདས་ཀྱིས་བདག་གནོད་པ་དང ། ཉམ་ང་བ་དང ། མི་བདེ་བ་བྱུང་བ་ལ་མི་དགོངས་སམ་སྙམ་པ་དང ། བཅོམ་ལྡན་འདས་ཀྱིས་དགོངས་པ་འདི་ལ་གདམས་པའི་ཐ་མ་ནི་འདི་ཡིན་པས་ཁྲིད་ཀྱང་བླའོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་གཉིད་ལོག་ཅིང་འདུག་པ་སེ་གོལ་གྱི་སྒྲས་སད་པར་མཛད་ནས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་གྱ་ཚོམ་དུ་མི་བྱ་བར་ལེགས་པར་བརྟག་པར་བྱའོ། །ཞེས་གོ་བར་མཛད་དོ། །བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་གཉིད་ལོག་ཅིང་འདུག་པ་ལན་གཉིས་ལན་གསུམ་དུ་སེ་གོལ་གྱི་སྒྲས་སད་པར་མཛད་ནས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་གྱ་ཙོམ་དུ་མི་བྱ་བར་ལེགས་པར
8.42a
བརྟག་པར་བྱའོ་ཞེས་གོ་བར་མཛད་དོ། །བྲམ་ཟེ་དེ་དག་གིས་ཀྱང་ཚེ་དང་ལྡན་པ་འཆར་ཀ་རྒྱལ་པོའི་ཕོ་བྲང་གི་སྒོར་ཁྲིད་དོ། །དེ་ནས་རྒྱལ་པོའི་ཕོ་བྲང་གི་སྒོ་ན་སྐྱེ་བོ་ཕལ་པོ་ཆེའི་ཚོགས་དག་བྲམ་ཟེ་རྣམས་ཀྱིས་དགེ་སྦྱོང་འཆར་ཀ་བཟུང་སྟེ་རྒྱལ་པོའི་སྒོར་ཁྲིད་དེ་འོངས་སོ་ཞེས་སྒྲ་མཐོན་པོ་དང ། སྒྲ་ཆེན་པོ་འབྱིན་ཏོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་གཉིད་ལོག་པ་སྐྱེ་བོ་ཕལ་པོ་ཆེའི་སྒྲ་དེས་སད་ནས། དེས་ཞོ་ཤས་འཚོ་བ་དག་ལ་སྨྲས་པ། ཤེས་ལྡན་དག་ཅིའི་ཕྱིར་སྐྱེ་བོ་ཕལ་པོ་ཆེའི་ཚོགས་འདི་དག་སྒྲ་མཐོན་པོ་དང ། སྒྲ་ཆེན་པོ་འབྱིན་པར་བྱེད། དེ་དག་གིས་སྨྲས་པ། ལྷ་བཙུན་པ་འཆར་ཀ་དང ། བྲམ་ཟེའི་བུ་མོ་ཞིག་དང ། བྲམ་ཟེ་ཞིག་དང ། བྲམ་ཟེའི་ཁྱེའུ་ལྔ་བརྒྱ་ཙམ་རྒྱལ་པོའི་ཕོ་བྲང་གི་ཆབ་སྒོ་ན་བླག་ཅོར་མཆི་ཞིང་མཆིས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། བཅོམ་ལྡན་འདས་ཀྱིས་འདི་ལས་དགོངས་ནས་བདག་ལ་རྒྱལ་པོ་ཆེན་པོ་ཁྱོད་ཀྱིས་གྱ་ཙོམ་དུ་མི་བྱ་བར་ལེགས་པར་བརྟག་པར་བྱའོ་ཞེས་བཀའ་སྩལ་ཏོ་སྙམ་དུ་རིག་གོ། །མཉན་ཡོད་ན་ཆོས་ཉིད་ཀྱིས་གང་གི་ཚེ་རྩོད་པ་ཆེན་པོ་བྱུང་བ་དེའི་ཚེ་ན་རྔ་བོ་ཆེ་རྡུང་ཞིང་དུང་སྒྲིལ་མ་ཡང་འབུད་པར་བྱེད་པས་རྒྱལ་པོ་གསལ་རྒྱལ་གྱིས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་རྔ་བོ་ཆེ་ཡང་རྡུངས་ཤིག་།དུང་སྒྲིལ་མ་ཡང་བུས་ཤིག་།དེ་དག་གིས་རྔ་བོ་ཆེ་བརྡུངས་ཤིང་དུང་སྒྲིལ་མ་བུས་པ་དང ། རྒྱལ་པོ་དང་བཅས་པའི་འཁོར་འདུས་པར་གྱུར་ཏོ། །རྒྱལ་པོས་སྨྲས་པ་བྲམ་ཟེ་དེ་དང་བཙུན་པ་འཆར་ཀ་ནང་དུ་ཐོང་ཤིག་།དེ་གཉིས་ནང་དུ་འོངས་པ་དང་རྒྱལ་པོས་བྲམ་ཟེ་དེ་ལ་སྨྲས་པ། བྲམ་ཟེ་ཁྱེད་ཅི་ཟེར། ལྷ་དགེ་སྦྱོང་འཆར་ཀས་བདག་གི་བུ་མོ་གཞོན་ནུ་མ་དང་བྲལ་བར་བགྱིས་སོ། །རྒྱལ་པོས་སྨྲས་པ། བཙུན་པ་འཆར་ཀ་བྲམ་ཟེ་འདི་དེ་སྐད་མཆི་ན་ཁྱོད་ཅི་གསུང ། ལྷ་བདག་གིས་དེ་ལ་སྡིག་པའི་ལས་མ་བགྱིས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ཇི་ལྟར་དཔྱད་པར་བྱ་བློན་པོ་རྣམས་ཀྱིས་སྨྲས་པ། ལྷ་བཅོམ་ལྡན་འདས
8.42b
ཀྱིས་ཁྱོད་ཉིད་སྤོབས་པ་ཅན་རྣམས་ཀྱི་མཆོག་ཏུ་བསྟན་པ་ལགས་པས་ལྷ་ཉིད་ཀྱི་ཞལ་མཆུ་འདི་དགུམ་དུ་གསོལ། རྒྱལ་པོས་སྨྲས་པ། ཤེས་ལྡན་དག་འདི་ལ་ཇི་ལྟར་ཤེས་པར་བྱ། མིག་གི་རྣམ་པར་ཤེས་པས་ནི་གཟུགས་དག་མཐོང་མོད། བཙུན་མོའི་འཁོར་གྱིས་ནི་བུ་མོ་བརྟག་མོད། བུ་མོ་དེ་བཙུན་མོའི་འཁོར་གྱི་ནང་དུ་ཐོང་ལ་རྟོག་ཏུ་ཆུག་ཤིག་།དེ་དག་གིས་བུ་མོ་དེ་བཙུན་མོའི་འཁོར་གྱི་ནང་དུ་བཏང་བ་དང ། བཙུན་མོ་ཕྲེང་ལྡན་མས་བུ་མོ་དེ་པང་བར་བསྙལ་ཏེ་སྨྲས་པ། བུ་མོ་བདེན་པར་སྨྲོས་ཤིག་།གལ་ཏེ་ཁྱོད་བཙུན་པ་འཆར་ཀས་གཞོན་ནུ་མ་དང་བྲལ་བར་བྱས་ན་ཡང་དེ་ནི་བྲམ་ཟེ་མདུན་ན་འདོན་གྱི་བུ་ལས་རབ་ཏུ་བྱུང་བ་ཡིན་པས་ཁྱོད་ཀྱི་ཁྱིམ་ཐབ་ཀྱི་ཐབ་རིར་འབབ་པར་འགྱུར་རོ། །འོན་ཏེ་ཁྱོད་ཕྱུགས་ཅུང་མ་སྨྲས་པ་ཚུལ་ཁྲིམས་དང་ལྡན་པ་ཡིན་ན་ནི་དགེ་སློང་ལ་ཡང་དག་པ་མ་ཡིན་པས་སྐུར་ན་སེམས་ཅན་དམྱལ་བ་ཆེན་པོར་འགྲོ་བར་འགྱུར་རོ། །བུ་མོ་དེས་སྨྲས་པ། ཇོ་མོ་བདག་དེས་གཞོན་ནུ་མ་དང་བྲལ་བར་མ་བགྱིས་ཏེ། འདི་ལྟར་དེས་འོ་བགྱིས་ཤིང་ཡན་ལག་དང་ཉིང་ལག་དག་མནམས། ཀུན་དུ་མནམས་སོ། །བཙུན་མོ་ཕྲེང་ལྡན་མས་སྨྲས་པ། བུ་མོ་ཁྱོད་ཀྱིས་དོན་དེ་ཙམ་ཞིག་ལ་རྒྱལ་པོ་དང་བཅས་པའི་འཁོར་ཀུན་ཏུ་དཀྲུགས་སོ། །ཅི་ཕ་དག་ཀྱང་བུ་མོ་དག་ལ་འོ་བྱེད་ཅིང་ཡན་ལག་དང་ཉིང་ལག་དག་ལ་ནོམ། ཀུན་དུ་མི་ནོམ་མམ། དེ་ནས་བུད་མེད་རྒན་མོ་རྣམས་ཀྱིས་བུ་མོ་དེ་བརྟགས་ན་ཇི་ཙམ་ན་ཕྱུགས་ཆུང་མ་ཉམས་པར་གྱུར་ནས། དེ་དག་གིས་རྒྱལ་པོ་ལ་སྨྲས་པ། ལྷ་བུ་མོ་འདི་ཕྱུགས་ཆུང་མ་ཉམས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ལ་གང་ཡུས། བློན་པོ་རྣམས་ཀྱིས་སྨྲས་པ། ལྷ་བཙུན་པ་འཆར་ཀ་ཡུས་སོ། །རྒྱལ་པོས་སྨྲས་པ། ཤེས་ལྡན་དག་དེང་ལ་བྲམ་ཟེ་འདི་རྒྱ་སྐྱེགས་ཀྱི་ཁང་པར་ཆུག་ལ་མེས་སྲེགས་ཤིག་།བུ་མོ་དེ་ཡང་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག་།བྲམ་ཟེའི་ཁྱེའུ་ལྔ་བརྒྱ་པོ་དེ་དག་ཀྱང་ལག་པ་དང་རྐང་པ་དག་ཆོད་ཅིག་།ཚེ་དང་ལྡན་པ་འཆར་ཀས་སྨྲས་པ།
8.43a
ལྷ་དེ་གལ་ཏེ་བདག་ལས་བརྟེན་ཏེ་སེམས་ཅན་དེ་སྙེད་ཅིག་ཆབ་སྩལ་བར་གྱུར་ན། དོན་གྱིས་ལྷས་བདག་བཅོམ་ལྡན་འདས་ཀྱི་བསྟན་པ་ལས་ཕྱུང་ལགས་སོ། །རྒྱལ་པོས་སྨྲས་པ། ཤེས་ལྡན་དག་འོ་ན་དེང་ལ་བྲམ་ཟེའི་ཁྱེའུ་ལྔ་བརྒྱ་པོ་དེ་དག་ཐོང་ལ། བྲམ་ཟེ་འདི་ནི་རྒྱ་སྐྱེགས་ཀྱི་ཁང་པར་ཆུག་ལ་མེས་སྲེགས་ཤིག་།བུ་མོ་དེ་ཡང་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག་།ཚེ་དང་ལྡན་པ་འཆར་ཀས་སྨྲས་པ། ལྷ་གལ་ཏེ་བདག་ལས་བརྟེན་ཏེ་ཐ་ན་གྲོག་མ་ཕྲ་མོ་འགའ་ཞིག་ལ་གནོད་པར་གྱུར་ན་ཡང ། དོན་གྱིས་ལྷས་བདག་བཅོམ་ལྡན་འདས་ཀྱི་བསྟན་པ་ལས་ཕྱུང་བ་ཁོ་ན་ལགས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་བཅོམ་ལྡན་འདས་ཀྱི་ཉན་ཐོས་འདོད་ཆགས་དང་མ་བྲལ་ན་ཡང་སོ་སོར་རྟོག་པའི་སྟོབས་ལ་ལྟོས། གལ་ཏེ་བྲམ་ཟེ་དག་གིས་བཙུན་པ་འཆར་ཀ་ཐུབ་པར་གྱུར་ན་ནི་རྡོ་གཅིག་གིས་ཀྱང་བསད་པར་འགྱུར་རོ། །ཤེས་ལྡན་དག་དེང་ལ་ཐམས་ཅད་ཁྱེ་ཤིག་།དེ་དག་བཀྱེ་ནས་གྱེས། རྔ་བརྡུངས་ཤིང་ཡོལ་བས་བཅད་པ་དང་སྐྱེ་བོ་ཕལ་པོ་ཆེའི་ཚོགས་དག་སོ་སོར་གྱེས་སོ། །རྒྱལ་པོ་དང་བཙུན་མོ་ཕྲེང་ལྡན་མ་དང ། ཚེ་དང་ལྡན་པ་འཆར་ཀ་གསུམ་འདུག་པ་ན། རྒྱལ་པོས་བཙུན་མོ་ཕྲེང་ལྡན་མ་ལ་སྨྲས་པ། ཕྲེང་ལྡན་མ་བཙུན་པ་འཆར་ཀས་ཇི་ལྟ་བུའི་ཕུན་ཕུན་བྱས་པས་རྒྱལ་པོ་དང་བཅས་པའི་འཁོར་ཀུན་དུ་དཀྲུགས་པ་ལ་ལྟོས། བཙུན་མོ་ཕྲེང་ལྡན་མས་ཚེ་དང་ལྡན་པ་འཆར་ཀ་ལ་སྨྲས་པ། བཙུན་པ་འཆར་ཀ་ཁྱོད་བས་སླད་ཀྱིས་རབ་ཏུ་བྱུང་བ་དགེ་སློང་མ་ཨུཏྤ་ལའི་མདོག་དང ། དགེ་ཚུལ་མ་སྐུལ་བྱེད་དང ། དགེ་ཚུལ་མ་ཙི་རི་ཀ་དང ། གཞན་ཡང་མང་པོ་གང་ལགས་པ་དེ་དག་ཐམས་ཅད་ཀྱིས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས་ན། ཁྱོད་ཀྱིས་ནི་རྒྱལ་པོ་དང་བཅས་པའི་འཁོར་གྱི་ནང་དུ་མི་མཛེས་པ་འདི་ལྟ་བུ་བགྱིས་པར་གྱུར་ཀྱང་ད་དུང་སྐྱོ་བ་མི་མངའ་འམ། ཚེ་དང་ལྡན་པ་འཆར་ཀས་སྨྲས་པ། ཕྲེང་ལྡན་མ་ད་ཕྱིན་ཆད་འཁོར་བར་འཁོར་བ་ན་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བ་དེ་ལྟར་བྱའོ། །ཞེས
8.43b
སྨྲས་ནས་དེ་སྟན་ལས་ལངས་ཏེ་སོང་ངོ ། །དེ་ངོ་ཚ་བས་བཅོམ་ལྡན་འདས་དང་ཕྲད་པར་མ་ནུས་ནས། ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །མཁན་པོ་ཇི་ལྟར་བདག་འཁོར་བར་འཁོར་བ་ན་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བ་དེ་ལྟར་བདག་ལ་ཆོས་བསྟན་དུ་གསོལ། ཚེ་དང་ལྡན་པ་ཤཱ་རིའི་བུས་བསམས་པ། ལྟུང་བ་ལྷག་མ་མེད་པ་བྱུང་བར་མ་གྱུར་ཏམ་སྙམ་ན། ཇི་ཙམ་ན་དེས་ལྷག་མ་ཡོད་པར་མཐོང་ནས། དེས་དེ་བཤགས་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་འཆགས་སུ་བཅུག་།བསྡམ་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་སྡོམ་དུ་བཅུག་ནས། དེས་དེ་ལ་འདི་དང་འདི་ལྟར་ཡིད་ལ་གྱིས་ལ་བག་ཡོད་པས་སྒྲུབས་ཤིག་ཅེས་གདམས་ངག་བྱིན་ནོ། །དེ་ནས་ཚེ་དང་ལྡན་པ་འཆར་ཀ་གཅིག་པུ་དབེན་པ་བག་ཡོད་པ། རྟུན་པ་དང་ལྡན་པ། བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང་མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱི་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་འཆར་ཀ་དགྲ་བཅོམ་པ་ཉིད་ཐོབ་ཅིང་རྣམ་པར་གྲོལ་བའི་དགའ་བ་དང་བདེ་བ་ཉམས་སུ་མྱོང་བ་ན་འདི་སྙམ་དུ་སེམས་ཏེ། བཅོམ་ལྡན
8.44a
འདས་ནི་བདག་ལ་ཕན་པ་མཛད་པ། བདེ་བར་གཤེགས་པ་ནི་བདག་ལ་ལེགས་པར་མཛད་པ་སྟེ། འདི་ལྟར་བཅོམ་ལྡན་འདས་དེ་ནི་བདག་གི་སྡུག་བསྔལ་གྱི་ཆོས་མང་པོ་དག་སེལ་བར་མཛད་པ། བཅོམ་ལྡན་འདས་དེ་ནི་བདག་གི་བདེ་བའི་ཆོས་མང་པོ་དག་སྒྲུབ་པར་མཛད་པ། བཅོམ་ལྡན་འདས་དེ་ནི་བདག་གི་སྡིག་པ་མི་དགེ་བའི་ཆོས་རྣམ་པ་དུ་མ་དག་སེལ་བར་མཛད་པ། བཅོམ་ལྡན་འདས་དེ་ནི་བདག་གི་དགེ་བའི་ཆོས་རྣམ་པ་དུ་མ་དག་སྒྲུབ་པར་མཛད་པ་ལགས་ན། བདག་གིས་ཅི་ཞིག་བྱས་ན་དེས་བདག་གིས་བཅོམ་ལྡན་འདས་ལ་ལན་བྱས་པ་དང ། ཉེ་བར་བྱས་པ་དང ། རབ་ཏུ་བྱས་པར་འགྱུར་སྙམ་ནས། དེས་ཡང་བསམས་པ། སངས་རྒྱས་བཅོམ་ལྡན་འདས་རྣམས་དཀའ་བ་མཛད་པ་བརྒྱ་སྟོང་དུ་མ་དག་གིས་བསྐལ་པ་གྲངས་མེད་པ་གསུམ་གྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་པ་གང་ཡིན་པ་དེ་དག་ཐམས་ཅད་ནི་སེམས་ཅན་ལ་ཕན་པའི་ཕྱིར་ཡིན་པས་བདག་གིས་ཀྱང་སེམས་ཅན་ལ་ཕན་པ་བྱའོ་སྙམ་མོ། །དེས་བསམས་པ། བཅོམ་ལྡན་འདས་ཀྱིས་ཁྱིམ་པ་དད་པར་བྱེད་པ་རྣམས་ཀྱི་མཆོག་ཏུ་བསྟན་པ་འགའ་ཡོད་དམ་སྙམ་ན། དེས་ཇི་ཙམ་ན་མེད་པར་མཐོང་ངོ ། །སུ་ལ་ལྟོས་སྙམ་ན་བདག་ཉིད་ལ་ལྟོས་པར་མཐོང་ནས། ལེགས་ཀྱིས་བདག་གིས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་མོ། །གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞི་བ་ལ་དད་པ། ཞི་བ་ལ་བསྙེན་བཀུར་བྱེད་པ་ཞིག་འདུག་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས་དེ་དེའི་གན་དུ་སོང་བ་དང ། བྲམ་ཟེ་དེས་ཀྱང་ཞི་བ་ལ་བསྙེན་བཀུར་བྱས་ནས། ཀྱེ་བྲམ་ཟེ་བྲམ་ཟེ་ཞེས་བྲམ་ཟེ་ཚོལ་བར་བྱེད་དོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོ་བྲམ་ཟེ་ཡིན་ནོ། །དེས་སྨྲས་པ། བྲམ་ཟེ་ནི་ཐོར་ཚུགས་ཅན་ཡིན་གྱི་ཁྱོད་ནི་དགེ་སྦྱོང་མགོ་རེག་ཡིན་ནོ། །ཚེ་དང་ལྡན་པ་འཆར་ཀས་སྨྲས་པ། འདི་ལྟར་ཁོ་བོ་བྲམ་ཟེ་ཡིན་ཞིང ། ཁོ་བོའི་སྟོན་པ་ཡང
8.44b
བྲམ་ཟེའི་མཆོག་ཡིན་ན་ཁྱོད་ཞི་བ་འདི་ལ་མངོན་པར་དད་དམ། དེས་སྨྲས་པ། མངོན་པར་དད་དོ། །ཚེ་དང་ལྡན་པ་འཆར་ཀས་སྨྲས་པ། ཀཝའི་ཞི་བ་སྨྲོས་ཤིག་།ཇི་ལྟར་ཁོ་བོ་བྲམ་ཟེ་ཡིན་ཞིང་ཁོ་བོའི་སྟོན་པ་ཡང་བྲམ་ཟེའི་མཆོག་ཡིན་ནམ། ཞི་བས་སྨྲས་པ། འཕགས་པ་འཆར་ཀ་དེ་དེ་བཞིན་ཏེ། ཁྱོད་ནི་བྲམ་ཟེ་ལགས་ཤིང་ཁྱོད་ཀྱི་སྟོན་པ་ཡང་བྲམ་ཟེའི་མཆོག་ལགས་སོ། །བྲམ་ཟེ་དེས་བསམས་པ། བདག་གིས་ཡུན་རིང་པོ་ནས་ཞི་བ་ལ་བསྙེན་བཀུར་བྱས་ན་འདིས་ལན་འགའ་རྨི་ལམ་དུ་ཡང་མ་བསྟན་ན། བཙུན་པ་འཆར་ཀས་སྨྲས་ན་ཚིག་སྨྲ་བར་བྱེད་པས་ཀྱེ་མ་བཙུན་པ་འཆར་ཀ་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་ནོ་སྙམ་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།ཚེ་དང་ལྡན་པ་འཆར་ཀ་དེ་ཉིད་དུ་འདུག་སྟེ་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང །
8.45a
ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། །དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ། །ཞེས་སྨྲས་ཏེ་དང་དུ་མ་བླངས་སོ། །དེ་ནས་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་དང་པོ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞི་བ་ལ་དད་པ། ཞི་བ་ལ་བསྙེན་བཀུར་བྱེད་པ་ཞིག་འདུག་ནས་ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས་དེ་དེའི་གན་དུ་སོང་བ་དང ། བྲམ་ཟེ་དེས་ཀྱང་ཞི་བ་ལ་བསྙེན་བཀུར་བྱས་ནས། ཀྱེ་བྲམ་ཟེ་བྲམ་ཟེ་ཞེས་བྲམ་ཟེ་ཚོལ་བར་བྱེད་དོ། །ཚེ་དང་ལྡན་པ་འཆར་ཀས་སྨྲས་པ་ཁོ་བོ་བྲམ་ཟེ་ཡིན་ནོ། །དེས་སྨྲས་པ། མགོ་རེག་འདི་ལྟ་བུ་བྲམ་ཟེ་ག་ལ་ཡིན། ཚེ་དང་ལྡན་པ་འཆར་ཀས་སྨྲས་པ། བྲམ་ཟེ་ཇི་ལྟ་བུ་ཡིན། དེས་སྨྲས་པ། བྲམ་ཟེ་ནི་རལ་པ་ཅན་ཡིན་ནོ། །ཚེ་དང་ལྡན་པ་འཆར་ཀས་རལ་པ་ཅན་དུ་སྤྲུལ་པ་དང ། ཇི་ཙམ་ན་བྲམ་ཟེ་དེ་ངོ་མཚར་སྐྱེས་ནས། དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།
8.45b
ཚེ་དང་ལྡན་པ་འཆར་ཀ་དེར་འདུག་སྟེ་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས་ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་འཆར་ཀ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད
8.46a
དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ། །ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་གཉིས་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན་མཉན་ཡོད་ན་བྲམ་ཟེ་སེར་སྣ་ཅན་ཞིག་འདུག་པ་དེའི་ཆུང་མ་ནོར་བུ་ལ་དགའ་ནས་ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀ་ནོར་བུ་མཁན་གྱི་ཆ་ལུགས་སུ་བྱས་ཏེ་དེའི་ཁྱིམ་དུ་སོང་ནས་ནོར་བུ་སུ་ཉོ་ནོར་བུ་སུ་ཉོ་ཞེས་བྱས་པ་དང ། བྲམ་ཟེ་མོ་དེས་ཐོས་ནས་དེས་སྨྲས་པ། ནོར་བུ་དག་རིན་ཇི་ཙམ་དུ་འཚོང ། ཚེ་དང་ལྡན་པ་འཆར་ཀས་སྨྲས་པ། ནོར་བུ་འདི་དག་རིན་ཆེ་མོད་ཀྱི་འོན་ཀྱང་རིན་ཆུང་ངུའི་ཕྱིར་སྦྱིན་ནོ་ཞེས་ཚེ་དང་ལྡན་པ་འཆར་ཀས་ནོར་བུ་མཁན་གྱི་ཆ་ལུགས་མི་སྣང་བར་བྱས་ཏེ་རང་གི་ཆ་ལུགས་ཀྱིས་འདུག་པ་དང ། བྲམ་ཟེ་དེ་ངོ་མཚར་སྐྱེས་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་འདིར་བྱོན། ཁྱོད་ཉིད་གདུལ་བའི་དོན་ཏུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།ཚེ་དང་ལྡན་པ་འཆར་ཀས་དེར་འདུག་སྟེ་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས་ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ
8.46b
འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང ། ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ། །ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་གསུམ་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ནད་པ་ཞིག་འདུག་པ་དེ་སྨན་པ་དག་གིས་སྨན་ཁ་བ་དང ། ཚ་བ་དང་བསྐ་བ་དག་གིས་ཡིད་བྱུང་ནས་དེས་སྒོ་བ་ལ་ཁྱོད་ཀྱིས་སྨན་པ་འགའ་ཡང་ནང་དུ་མ་བཏང་ཤིག་ཅེས་བསྒོ་ནས། ཚེ་དང་ལྡན་པ་འཆར
8.47a
ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀ་སྨན་པའི་ཆ་ལུགས་སུ་བྱས་ཏེ་བྲམ་ཟེ་དེའི་ཁྱིམ་སྒོར་སྨན་པ་འོངས་སོ་ཞེས་བྱས་ཏེ་བསྡད་པ་དང ། སྒོ་བས་སྨྲས་པ། ཁོ་བོ་ལ་བྲམ་ཟེས་ཁྱོད་ཀྱིས་སྨན་པ་འགའ་ཡང་ནང་དུ་མ་བཏང་ཤིག་ཅེས་བསྒོ་སྟེ་ཁོ་བོ་དེ་ཉིད་ཀྱི་ཕྱིར་བཞག་གོ། །ཚེ་དང་ལྡན་པ་འཆར་ཀས་སྨྲས་པ། ཁྱོད་སོང་ལ་བྲམ་ཟེ་ལ་སྨན་པ་འོངས་ཏེ་དེ་ན་རེ་སྨན་ཡང་མི་སྦྱིན། བྱ་དགའ་ཡང་མི་སློང་བར་གསང་སྔགས་དག་གིས་སོས་པར་བྱའོ་ཞེས་ཟེར་རོ་ཞེས་བྱོས་ཤིག་།སྒོ་བ་སོང་སྟེ་བྲམ་ཟེ་དེ་ལ་དེ་སྐད་རྒྱས་པར་བརྗོད་པ་དང ། དེས་སྨྲས་པ། ནང་དུ་ཐོང་ཤིག་།ཚེ་དང་ལྡན་པ་འཆར་ཀ་ནང་དུ་ཞུགས་ནས་དེས་གསང་སྔགས་དག་གིས་དེ་སོས་པར་བྱས་ནས་ཚེ་དང་ལྡན་པ་འཆར་ཀས་སྨན་པའི་ཆ་ལུགས་མི་སྣང་བར་བྱས་ཏེ་རང་གི་ཆ་ལུགས་ཀྱིས་འདུག་པ་དང ། བྲམ་ཟེ་དེ་ངོ་མཚར་སྐྱེས་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་འདིར་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།ཚེ་དང་ལྡན་པ་འཆར་ཀ་དེར་འདུག་སྟེ་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས་ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ
8.47b
བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང་བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བཞི་པ་གཉིས་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། སེར་སྣ་ཅན་མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་དུ་འཛིན་པ་ཞིག་འདུག་པ་དེ་སྒོ་དྲུང་ན་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཛུད་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀས་གདུལ་བ་ལ་ལྟོས་པས་ཡང་དང་ཡང་དུ་དེར་བསོད་སྙོམས་ལ་ཞུགས་ན།
8.48a
དེས་དེར་ལན་འགའ་ཡང་བསོད་སྙོམས་མ་ཐོབ་ནས། དེ་དེ་ནས་ཕྱིར་བྱུང་བ་བྲམ་ཟེ་དེས་མཐོང་ནས། དེས་སྨྲས་པ། ཀྱེ་དགེ་སྦྱོང་ཁྱོད་ཡང་དང་ཡང་དུ་དེར་འཇུག་ན་རྙེད་པ་ཅུང་ཟད་ཡོད་དམ། ཚེ་དང་ལྡན་པ་འཆར་ཀས་དེའི་དད་པའི་ནོར་ལས་བསམས་ཏེ་སྨྲས་པ། བྲམ་ཟེ་ཁྱོད་ཉིད་ལ་ཡང་མེད་ན་ཅི་ཞིག་སྦྱིན་པར་བྱེད། བྲམ་ཟེ་དེས་སྤྱོས་ཏེ་སྨྲས་པ། དགེ་སྦྱོང་ཁྱོད་ཁྱིམ་མི་དང་བཅས་པ་ཐམས་ཅད་ལ་སྦྱིན་པར་བྱའོ། །ཚེ་དང་ལྡན་པ་འཆར་ཀས་ཐབས་ཡིན་ནོ་ཞེས་སྨྲས་ཏེ་སོང་ངོ ། །དེ་ན་བྲམ་ཟེའི་ཁྱེའུ་དགེ་སློང་གི་རྒྱུས་ཤེས་པ་ཞིག་གིས་བྲམ་ཟེ་དེ་ལ་སྨྲས་པ། མཁན་པོས་དེ་དག་གི་ཐབས་ཡིན་ནོ་ཞེས་བགྱི་བ་དེའི་དོན་ཅི་ལགས་མཁྱེན་ཏམ། དེས་སྨྲས་པ། མི་ཤེས་སོ། །སྐོལ་གྱིས་དང་དུ་བླངས་སོ་ཞེས་སྨྲས་པ་གང་ལགས་པ་དེའི་དོན་ནི་དེ་དག་གི་ཐབས་ཡིན་ནོ་ཞེས་སྨྲས་པ་དེ་ལགས་སོ། །དེས་ཡང་སྨྲས་པ། མཁན་པོས་དེ་དག་གི་ཁྱིམ་མི་དང་བཅས་པ་ཐམས་ཅད་ཅེས་བགྱི་བ་དེའི་དོན་ཅི་ལགས་མཁྱེན་ཏམ། དེས་སྨྲས་པ། མི་ཤེས་སོ། །དེ་དག་གི་ཁྱིམ་མི་དང་བཅས་པ་ཐམས་ཅད་ཅེས་བགྱི་བ་ནི་རྒྱལ་རིགས་དགེ་སྦྱོང་གཽ་ཏ་མ་འཁོར་སྟོང་ཉིས་བརྒྱ་ལྔ་བཅུ་དང་བཅས་པ་ལགས་ཏེ། དེ་ལྟར་ན་མཁན་པོས་དོན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་པར་གྱུར་ཏོ། །བྲམ་ཟེ་དེས་སྨྲས་པ། ཁོ་བོས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན་གང་གི་ཕྱིར་དགེ་སྦྱོང་མགོ་རེག་དག་ལ་སྦྱིན་པར་བྱེད། དེས་སྨྲས་པ། དགེ་སྦྱོང་དེས་དེང་མཁན་པོའི་མཚན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་མཁན་པོའི་སྡུམ་པར་སྤྱན་འདྲེན་པར་བགྱིད་དོ། །བྲམ་ཟེས་སྨྲས་པ། ཅིའི་ཕྱིར་དེ་དེ་ལྟར་བྱེད། དེས་སྨྲས་པ། མཁན་པོ་གལ་ཏེ་བདག་ལ་ཐུགས་མི་ཆེས་ན་བྲམ་ཟེའི་ཁྱེའུ་ཞིག་རྟོག་ཏུ་གཏང་དུ་གསོལ་དེས་བྲམ་ཟེའི་ཁྱེའུ་ཞིག་རྟོག་ཏུ་བཏང་བ་དང ། ཇི་ཙམ་ན་ཚེ་དང་ལྡན་པ་འཆར་ཀས་སངས་རྒྱས་ལ་སོགས་པ་དགེ་སློང་གི་དགེ་འདུན་ཚོགས་པ་ན་རྒན་པའི་མཐའ་ལོགས་སུ་འདུག་སྟེ། བྲམ་ཟེ་ཆེ་གེ་མོ་ཞིག་སངས་རྒྱས་ལ་སོགས་པ་དགེ་སློང་གི་དགེ
8.48b
འདུན་ཁྱིམ་གཞན་དུ་གདུགས་ཚོད་ལ་སྤྱན་འདྲེན་ནོ་ཞེས་བྲམ་ཟེ་དེའི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་པ་དེས་ཐོས་སོ། །བྲམ་ཟེའི་ཁྱེའུ་དེས་དེ་ཐོས་ནས་ཕྱིར་འོངས་ཏེ་བྲམ་ཟེ་དེ་ལ་སྨྲས་པ། མཁན་པོ་དེ་བཞིན་ཏེ། བཙུན་པ་འཆར་ཀས་མཁན་པོའི་མཚན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་མཁན་པོའི་སྡུམ་པར་སྤྱན་དྲངས་ཀྱིས་ཞལ་ཟས་སྟ་གོན་བགྱིད་དུ་སྩོལ་ཅིག་།དེས་སྨྲས་པ། ཁོ་བོས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན། གང་གི་ཕྱིར་དགེ་སྦྱོང་མགོ་རེག་དག་ལ་སྦྱིན་པར་བྱེད། དེ་དག་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་ཟ་བར་འགྱུར་གྲང ། ཇི་ཙམ་དེ་ནང་པར་ལངས་པ་དང ། དགེ་སློང་ཆུའི་གཙང་སྦྱོར་དག་བྲམ་ཟེ་དེའི་ཁྱིམ་དུ་ལྷགས་ཏེ་སྨྲས་པ། བྲམ་ཟེ་ཆུ་གང་དུ་གཞག་པར་བྱ། བྲམ་ཟེ་དེས་སྨྲས་པ། ཁྱིམ་བདག་མགོན་མེད་ཟས་སྦྱིན་གྱི་སྡུམ་པར་རོ། །དེ་བཞིན་དུ་བཤོས་ཀྱི་གཙང་སྦྱོར་དག་ལྷགས་ཏེ་སྨྲས་པ། བྲམ་ཟེ་ཞལ་ཟས་གང་དུ་བརྟག་པར་བྱ། བྲམ་ཟེ་དེས་སྨྲས་པ། ཁྱིམ་བདག་མགོན་མེད་ཟས་སྦྱིན་གྱི་སྡུམ་པར་རོ། །བཅོམ་ལྡན་འདས་ཀྱིས་གང་གི་ངོར་མགྲོན་དུ་བོས་པ་དེས་དུས་སྔར་འགྲོ་བར་བྱ་ཞིང་མ་ཟིན་པ་དག་ཟིན་པར་བྱའོ་ཞེས་བཀའ་སྩལ་པས། ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་འཕགས་པ་དང ། ཁྱིམ་བདག་མགོན་མེད་ཟས་སྦྱིན་གྱིས་ལམ་ཀར་དེ་མཐོང་ནས་སྨྲས་པ། བཙུན་པ་འཆར་ཀ་གར་བཞུད། དེས་སྨྲས་པ། བྲམ་ཟེ་ཞིག་གིས་བདག་ལས་བརྟེན་ཏེ་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པས་དེར་འགྲོའོ། །ཁྱིམ་བདག་གིས་སྨྲས་པ། བྲམ་ཟེ་དེ་ནི་མ་དད་པ་ལགས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་གདུགས་ཚོད་བཅད་པར་གྱུར་ན་མི་རུང་གིས་བདག་ཀྱང་མཆིའོ། །དེ་གཉིས་དེར་དོང་བ་དང ། ཇི་ཙམ་ན་བྲམ་ཟེ་དེ་སྙིང་ལས་ཆུང་ངུར་འདུག་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་ལ་སྨྲས་པ། བྲམ་ཟེ་ཁྱོད་ཀྱིས་སངས་རྒྱས་ལ་སོགས་པ་དགེ་སློང་གི་དགེ
8.49a
འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ན་ཅིའི་ཕྱིར་སྙིང་ལས་ཆུང་ངུར་འདུག་།ཞལ་ཟས་སྟ་གོན་བྱེད་ན་ཅི་ཉེས། བྲམ་ཟེ་དེས་སྨྲས་པ། ཁོ་བོས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན། དགེ་སྦྱོང་མགོ་རེག་དག་ལ་སྦྱིན་པར་བྱེད། ཁྱོད་བདག་གི་ཁྱིམ་དུ་ཟན་ཟོ་ཅིག་།ཁྱིམ་བདག་གིས་སྨྲས་པ། བྲམ་ཟེ་ཅི་ཁོ་བོ་ལ་འབྱོར་པ་མེད་སྙམ་འམ། ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཇི་སྲིད་འཚོའི་བར་དུ་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་གིས་བསྙེན་བཀུར་བྱེད་པར་ཡང་སྤྲོ་མོད་ཀྱི་འོན་ཀྱང་ཁོ་བོ་ཁྱོད་ལ་ཕན་གདགས་པའི་ཕྱིར་སྨྲས། ཁྱེད་སྙིང་ལས་ཆུང་ངུར་མ་འདུག་པར་ཞལ་ཟས་སྟ་གོན་གྱིས་ཤིག་།འདི་ལྟར་སངས་རྒྱས་ལ་སོགས་པ་དགེ་སློང་གི་དགེ་འདུན་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང ། བཙུན་མོ་ཕྲེང་ལྡན་མ་དང ། རྒྱལ་རིགས་དབྱར་ཚུལ་མ་དང ། བླ་མཁྱེན་དྲང་སྲོང་བྱིན་དང ། རྙིང་པ་དང་ཁོ་བོ་དང ། གཞན་ཡང་བྲམ་ཟེ་དང ། ཁྱིམ་བདག་རྒྱ་ཆེ་དགུ་དག་གིས་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་བྱས་པ་ཡིན་པས་གལ་ཏེ་ཁྱོད་ལ་བརྟེན་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་བཅད་པར་གྱུར་ན། ཁྱོད་ལ་རྒྱལ་པོ་གདོན་མི་ཟ་བར་གནོད་པ་བྱེད་པར་འགྱུར་ཞིང་ཁྱོད་ཕྱག་སྦལ་དུ་བཅུག་པས་འཆི་དགོས་པར་འགྱུར་བ་གང་ཡིན་པ་དེ་ལྟ་བུའི་གནས་ཀྱང་ཡོད་པར་འགྱུར་རོ། །བྲམ་ཟེ་དེ་སྐྲག་སྟེ་བསམས་པ། དེ་ལྟར་འགྱུར་རོ་སྙམ་ནས་དེས་སྨྲས་པ། ཁྱིམ་བདག་བདག་གིས་ཞལ་ཟས་སྟ་གོན་མ་བྱས་ན་ད་ཇི་ལྟར་བྱ། ཁྱིམ་བདག་གིས་སྨྲས་པ། བྲམ་ཟེ་མཉན་ཡོད་ན་གང་ཉོ་བས་མི་རྙེད་པའི་རྫས་དེ་ལྟ་བུ་མེད་ཀྱིས་ཀར་ཤ་པ་ཎ་དག་འོན་ཅིག་དང་ཁོ་བོས་ཞལ་ཟས་སྟ་གོན་བྱའོ། །བྲམ་ཟེས་སྨྲས་པ། ཁྱིམ་བདག་ཀར་ཤ་པ་ཎ་ཇི་སྙེད་དག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་གདུགས་ཚོད་འབྱོར་པར་འགྱུར། ཁྱིམ་བདག་གིས་སྨྲས་པ། ཀར་ཥཱ་པ་ཎ་ལྔ་བརྒྱས་སོ། །བྲམ་ཟེ་དེས་ཁྱིམ་བདག་ལ་ཀཱར་ཥཱ་པ་ཎ་ལྔ་བརྒྱ་ཕུལ་ནས།
8.49b
ཁྱིམ་བདག་མགོན་མེད་ཟས་སྦྱིན་གྱིས་དེ་དག་གི་སྟེང་དུ་ཀར་ཤ་པ་ཎ་གཞན་དག་གིས་ཀྱང་བསྣན་ཏེ་ཞལ་ཟས་སྟ་གོན་བྱས་སོ། །བྲམ་ཟེ་དེས་སྨྲས་པ། ཁྱིམ་བདག་བདག་ལ་སང་སྡེར་དག་ཀྱང་མི་བདོག་གོ། །ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། བྲམ་ཟེ་ཁྱོད་སང་སྡེར་དག་གིས་མ་འཚེར་བར་སྙིང་ལས་ཆུང་ངུར་འདུག་ཤིག་དང ། དེ་དག་དྲང་སྲོང་གི་སྣོད་དང་བཅས་ཏེ་གཤེགས་པར་འགྱུར་རོ། །དེ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གཤེགས་ཏེ་བཞུགས་ནས་དགེ་སློང་རྣམས་ཀྱིས་ལྷུང་བཟེད་དག་བྱི་དོར་བྱས་པ་བྲམ་ཟེ་དེས་མཐོང་ནས་དེས་བསམས་པ། རེ་ཤིག་སྣོད་དག་ཀྱང་བདག་གིས་བྱི་དོར་བྱ་མི་དགོས་སོ་སྙམ་ནས་དེ་མངོན་པར་དད་པར་གྱུར་ཏེ། ཚེ་དང་ལྡན་པ་འཆར་ཀ་ལ་སྨྲས་པ། བཙུན་པ་འཆར་ཀ་ཁྱོད་བདག་གི་དགེ་བའི་བཤེས་གཉེན་ལགས་ཀྱིས་ཁྱོད་ཀྱིས་ཀྱང་བྲིམ་པ་མཛོད་ལ་སླད་ཀྱིས་བཤོས་གསོལ་ཅིག་།སངས་རྒྱས་ལ་སོགས་པ་དགེ་སློང་གི་དགེ་འདུན་གསོལ་ནས་བཅོམ་ལྡན་འདས་ཀྱིས་ཡོན་བཤད་པ་མཛད་དེ་གདན་ལས་བཞེངས་ཏེ་གཤེགས་སོ། །དེ་ནས་བྲམ་ཟེ་དེས་སྨྲས་པ། བཙུན་པ་འཆར་ཀ་ད་ཁྱོད་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།དེ་འདུག་པ་དང་བྲམ་ཟེ་དེས་ཟས་བྲིམས་ཏེ་དེས་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས་དགེ་སྦྱོང་དང ། བྲམ་ཟེ་དག་གིས
8.50a
ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ། །ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་ལྔ་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེའི་ཆུང་མ་གཟུགས་བཟང་བ། བལྟ་ན་སྡུག་པ་མཛེས་པ་ཡིན་ནས་དེ་དེ་ལ་ཤིན་དུ་ལྷག་པར་ཆགས་པས་ཁྱིམ་དུ་འགའ་ཡང་འཇུག་ཏུ་མི་སྟེར་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེ་བྲམ་ཟེ་དེའི་ཁྱིམ་དུ་སོང་བ་དང ། ཇི་ཙམ་ན་བྲམ་ཟེ་དེ་གཅིན་གཅི་ཞིང་འདུག་པས་ཚེ་དང་ལྡན་པ་འཆར་ཀ་མཐོང་ནས་དེས་སྨྲས་པ། དགེ་སྦྱོང་མ
8.50b
འཇུག་པར་སྡོད་ཅིག་།ཚེ་དང་ལྡན་པ་འཆར་ཀས་འདི་ལྟར་བྲམ་ཟེའི་གཅིན་གྱི་རྒྱུན་མི་འཆད་པ་དེ་ལྟར་བྱིན་གྱིས་བརླབས་ནས། ཚེ་དང་ལྡན་པ་འཆར་ཀ་ནང་དུ་ཞུགས་ཏེ་བྲམ་ཟེ་དེའི་ཆུང་མ་དེ་ཡང་འདི་ལྟར་དེའི་ལྟོ་ན་ནང་གྲོལ་གང་དག་ཡོད་པ་དེ་དག་ཐམས་ཅད་ཕྱི་རོལ་ནས་སྣང་བ་དེ་ལྟར་བྱིན་གྱིས་བརླབས་ནས་ཚེ་དང་ལྡན་པ་འཆར་ཀ་ཕྱིར་བྱུང་བ་དང ། བྲམ་ཟེ་དེས་སྨྲས་པ། བཙུན་པ་འཆར་ཀ་ཁྱོད་ཀྱིས་བདག་གི་མཆིས་བྲང་གཟིགས་སམ། དེས་སྨྲས་པ། མཐོང་ངོ ། །ཅི་འདྲ་ཁྱོད་ཀྱིས་ཇི་ལྟར་མཐོང་བར་གྱུར་པ་དེ་འདྲའོ། །དེ་ཞུགས་ཏེ་བལྟས་ན་དེ་ལྟར་མི་སྡུག་པར་མཐོང་ནས་དེས་དེ་ལ་སྨྲས་པ། བྲམ་ཟེ་མོ་ཁྱོད་ཀྱིས་བཙུན་པ་འཆར་ཀ་ལ་ཅུང་ཞིག་མ་སྨྲས་སམ། དེས་སྨྲས་པ། ཅུང་ཟད་ཀྱང་མ་སྨྲས་ཏེ། འདི་ལྟར་དེས་བདག་སྤྱོས་ཏེ་དམོད་མོ་བགྱིས་ཀྱིས་བཞུད་ལ་དེ་ལ་བཟོད་པ་གསོལ་ཅིག་།དེ་སོང་སྟེ་སྨྲས་པ། བཙུན་པ་འཆར་ཀ་བདག་གི་མཆིས་བྲང་ལ་བཟོད་པ་མཛད་དུ་གསོལ། ཚེ་དང་ལྡན་པ་འཆར་ཀས་སྨྲས་པ། བཟོད་པར་བྱའོ། །དེས་དེ་སྔོན་ཇི་ལྟ་བ་བཞིན་དུ་གྱུར་པ་དང ། བྲམ་ཟེ་དེ་དད་པར་གྱུར་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་ཏུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།ཚེ་དང་ལྡན་པ་འཆར་ཀ་དེར་འདུག་སྟེ་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ
8.51a
རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང ། ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་དྲུག་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེའི་ཆུང་མ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། བྲམ་ཟེ་དེ་མེ་ཏོག་དང ། ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང ། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེ་བྲམ་ཟེའི་ཁྱིམ་དུ་སོང་བ་དང་དེའི་ཆུང་མ་དེས་ཚེ་དང་ལྡན་པ་འཆར་ཀ་སྒོ་ཁང་དུ་མཐོང་ནས་དེ་ནང་དུ་ཞུགས་པ་དང ། ཚེ་དང་ལྡན་པ་འཆར་ཀ་ཡང་ཁྱིམ་གྱི་ནང་དུ་ཞུགས་སོ། །དེ་གནས་ཁང་དུ
8.51b
ཞུགས་པ་དང ། ཚེ་དང་ལྡན་པ་འཆར་ཀ་ཡང་དེའི་ཕྱི་བཞིན་གནས་ཁང་དུ་ཞུགས་སོ། །དེ་གནས་ཁང་ནས་ཕྱིར་བྱུང་སྟེ་སྐས་ལས་ཁང་སྟེང་དུ་འཛེག་པར་བརྩམས་པ་དང ། ཚེ་དང་ལྡན་པ་འཆར་ཀས་ཀྱང་དེའི་ཕྱི་བཞིན་སྐས་ལས་ཁང་སྟེང་དུ་འཛེག་པར་བརྩམས་སོ། །དེས་སྐས་ཕུལ་བ་དང ། ཚེ་དང་ལྡན་པ་འཆར་ཀ་ས་ལ་སྒྱེལ་ནས་དེ་འགོག་པ་ལ་སྙོམས་པར་ཞུགས་པ་དང ། དེས་བསམས་པ། མ་ཤི་འམ་སྙམ་ནས་དེ་བབས་ཏེ་བསླང་བར་བརྩམས་ན་འགུལ་བར་ཡང་མ་ནུས་སོ། །བྲམ་ཟེ་འོངས་ནས་དྲིས་པ། འདི་ཅི་ཡིན། བྲམ་ཟེ་མོས་རྒྱས་པར་བརྗོད་པ་དང ། དེས་སྨྲས་པ། ཁྱོད་ཀྱིས་འདི་དེ་ལྟར་ཕུལ་བ་ནི་མ་ལེགས་པ་བྱས་ཏེ། འདི་ནི་བྲམ་ཟེ་མདུན་ན་འདོན་གྱི་བུ་ལས་རབ་ཏུ་བྱུང་བ། རྒྱལ་པོ་གསལ་རྒྱལ་གྱི་ཆུང་པོ་གྲོགས། བཙུན་མོ་ཕྲེང་ལྡན་མའི་སློབ་དཔོན་ཡིན་ཏེ། འདི་དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་བདག་ཅག་རྒྱལ་པོས་ཕྱག་སྦལ་དུ་བཅུག་པས་འཆི་བར་བྱ་དགོས་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །བྲམ་ཟེ་མོས་ཚེ་དང་ལྡན་པ་འཆར་ཀའི་རྐང་པ་གཉིས་ལ་གཏུགས་ཏེ། འཕགས་པ་ཁྱོད་ཀྱིས་མི་མཁྱེན་པ་དང ། མི་གཟིགས་པ་དང ། མི་རིག་པ་དང ། རྣམ་པར་མི་མཁྱེན་པ་ཅི་ཡང་མ་མཆིས་ཀྱིས་བཟོད་པར་གསོལ་ཞེས་བཟོད་པ་གསོལ་བ་དང ། ཚེ་དང་ལྡན་པ་འཆར་ཀ་ལངས་ཏེ་སྨྲས་པ། བཟོད་པར་བྱའོ། །བྲམ་ཟེ་དེ་ངོ་མཚར་སྐྱེས་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག་།ཚེ་དང་ལྡན་པ་འཆར་ཀས་དེར་འདུག་སྟེ་ཟས་ཀྱི་བྱ་བ་བྱས་པ་དང ། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས་ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ
8.52a
འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ་ཞེས་སྨྲས་ཏེ་དང་དུ་མ་བླངས་སོ། །དེ་ནས་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བདུན་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེའི་ཆུང་མ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། བྲམ་ཟེ་དེ་མེ་ཏོག་དང ། ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང ། ཚེ་དང་ལྡན་པ་འཆར
8.52b
ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེ་བྲམ་ཟེ་དེའི་ཁྱིམ་དུ་སོང་བ་དང ། བྲམ་ཟེ་མོ་དེ་གཟུགས་ཀྱི་རྒྱགས་པ་དང ། ལང་ཚོའི་རྒྱགས་པ་དང ། རིགས་ཀྱི་རྒྱགས་པ་དང ། དབང་ཕྱུག་གི་རྒྱགས་པས་རྒྱགས་ནས་ཚིག་ཀྱང་མི་སྟེར་རོ། །ཚེ་དང་ལྡན་པ་འཆར་ཀས་དེའི་སྔོན་གྱི་ལས་ཟད་པ་ལས་བསམས་ནས་ཚིགས་སུ་བཅད་པ་སྨྲས་པ། སྲིང་མོ་རྙིང་པ་ཟ་བྱེད་ཅིང ། །སར་པ་ཆུང་ཟད་སྐྱེད་མི་བྱེད། །བག་མེད་བརྒྱན་པ་མཐོང་ནས་ནི། །མཆི་མས་བརྣངས་པའི་བཞིན་གྱིས་ངུ ། །ཞེས་སྨྲས་ཏེ་སོང་ངོ ། །བྲམ་ཟེ་མོ་དེ་འདིས་བདག་སྤྱོས་སོ་ཞེས་གཤེ་ཞིང་དེས་གོས་དྲི་མ་ཅན་གྱོན་ཏེ་ཁྲི་ཞིགས་པའི་སྟེང་དུ་ཉལ་ཏེ་འདུག་གོ། །བྲམ་ཟེ་དེ་འོངས་པ་དང ། དེས་དེ་མཐོང་ནས་སྨྲས་པ། བྲམ་ཟེ་མོ་འདི་ཅི་ཉེས། བྲམ་ཟེ་མོས་གཤེས་ཏེ་སྨྲས་པ། གལ་ཏེ་ཁྱོད་ལ་གང་སྒོ་ན་འགྲེང་བའི་མི་གཅིག་ལ་ཡང་བཟའ་བ་དང ། བགོ་བ་སྦྱིན་པའི་འབྱོར་པ་མེད་ན་ཁྱོད་ལ་ཁྱིམ་མི་མོ་བླངས་པས་ཅི་བྱ། དགེ་སྦྱོང་འཆར་ཀ་གང་ཡིན་པ་དེས་ཁོ་མོ་སྤྱོས་སོ། །བྲམ་ཟེས་སྨྲས་པ། བཟང་མོ་དེ་ནི་བྲམ་ཟེ་མདུན་ན་འདོན་གྱི་བུ་ལས་རབ་ཏུ་བྱུང་བ་ཡིན་གྱིས་དེ་ལ་བཟོད་པར་གྱིས་ཤིག་།བྲམ་ཟེ་མོས་སྨྲས་པ། གལ་ཏེ་དེ་གསོན་ན་ཁོ་མོ་མི་གསོན་ནོ། །བྲམ་ཟེས་སྨྲས་པ། བཟང་མོ་དེ་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཆུང་པོ་གྲོགས། བཙུན་མོ་ཕྲེང་ལྡན་མའི་སློབ་དཔོན་ཡིན་ཏེ། དེ་དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་གལ་ཏེ་བདག་གིས་དེ་ལ་སྡུག་བསྔལ་ཅུང་ཟད་བསྐྱེད་པར་གྱུར་ན། བདག་ཅག་རྒྱལ་པོས་ཕྱག་སྦལ་དུ་བཅུག་པས་འཆི་བར་བྱ་དགོས་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་བཟོད་པར་གྱིས་ཤིག་།བྲམ་ཟེ་མོས་སྨྲས་པ། བྲམ་ཟེ་མང་དུ་སྨྲས་ཏེ་ཅི་རུང ། གལ་ཏེ་དེ་གསོན་ན་ཁོ་མོ་མི་གསོན་ནོ། །འདོད་པ་སྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་བྲམ་ཟེ་དེ་རལ་གྲི་མཆན་དུ་བཅུག་སྟེ། འཕགས་པ་དང ། ཚེ་དང་ལྡན་པ་འཆར་ཀས་ཐག་རིང་པོ་ཁོ་ན་ནས་དེ་མཐོང་ན། དེ་སེམས་ཇི་ལྟ་བུས་འོང་སྙམ་ན། ཇི་ཙམ་ན་གསོད་པའི་སེམས་ཀྱིས་འོང་བར་མཐོང་ནས། ཚེ་དང་ལྡན་པ་འཆར་ཀས་ལོ་མ་མ
8.53a
ཡིན་པའི་སྤྱིལ་བུ་མངོན་པར་སྤྲུལ་ནས་དེར་ཞུགས་ཏེ་འདུག་གོ། །བྲམ་ཟེ་དེས་སྨྲས་པ། བཙུན་པ་འཆར་ཀ་སྒོ་ཕྱེ་ཤིག་།ཚེ་དང་ལྡན་པ་འཆར་ཀས་སྨྲས་པ། ཁྱོད་སྐྱེས་བཟང་པོས་འོངས་པར་གྱུར་ན། ཁོ་བོས་ཅིའི་ཕྱིར་སྒོ་མི་དབྱེ། རལ་གྲི་བོར་ཅིག་།བྲམ་ཟེས་བསམས་པ། བགགས་ཏེ་གསད་དོ་སྙམ་ནས་དེས་རལ་གྲི་བོར་རོ། །ཚེ་དང་ལྡན་པ་འཆར་ཀས་སྨྲས་པ། སྡིག་པའི་སེམས་དེ་ཡང་བོར་ཅིག་།བྲམ་ཟེ་དེས་བསམས་པ། འདི་ནི་བདག་ཉིད་ཆེན་པོ་ཞིག་སྟེ། བདག་གི་སེམས་ཀྱང་ཤེས་སོ་སྙམ་ནས་དེ་མངོན་པར་དད་པར་གྱུར་པ་དང ། ཚེ་དང་ལྡན་པ་འཆར་ཀས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས་དེ་བཞིན་དུ་འདུག་གོ། །བྲམ་ཟེ་དེས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་པ་དང ། ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན
8.53b
པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་བྲམ་ཟེ་དེས་སྨྲས་པ། བཙུན་པ་འཆར་ཀ་ཁྱོད་བདག་གི་སྡུམ་པར་བྱོན་ཏམ། སོན་ཏོ། །བཙུན་པ་འཆར་ཀས་བདག་གི་བྲམ་ཟེ་མོ་ལ་ཇི་སྐད་བཀའ་སྩལ། ཚེ་དང་ལྡན་པ་འཆར་ཀས་སྨྲས་པ། ཁོ་བོས་དེ་ལ་འདི་སྐད་ཅེས། སྲིང་མོ་རྙིང་པ་ཟ་བྱེད་ཅིང ། །སར་པ་ཅུང་ཟད་སྐྱེད་མི་བྱེད། །བག་མེད་བརྒྱན་པ་མཐོང་ནས་ནི། །མཆི་མས་བརྣངས་པའི་བཞིན་གྱིས་ངུ ། །ཞེས་སྨྲས་སོ། །བཙུན་པ་ཚིགས་སུ་བཅད་པ་དེའི་དོན་ཅི་ལགས། བྲམ་ཟེ་སྔོན་བྱུང་བ་འདས་པའི་དུས་ན་རི་བྲགས་ཤིག་ཏུ་དུས་སྟོན་བྱུང་ནས། དེ་ན་ཁྱིམ་བདག་གི་ཆུང་མ་རབ་ཏུ་མང་པོ་དག་རང་གི་རྒྱན་དག་གིས་བརྒྱན་ཏེ་སྐྱེད་མོས་ཚལ་གྱི་སར་དོང་བ་དེ་དག་གྲོང་སྤྲང་མོ་ཞིག་གིས་མཐོང་ནས་དེ་བདག་ཉིད་རྒུད་པའི་མྱ་ངན་བྱེད་དོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །རང་སངས་རྒྱས་ཤིག་དེ་ལ་ཕན་གདགས་པའི་ཕྱིར་ཕྱོགས་དེར་སོང་བ་དང ། དེའི་ལུས་མཛེས་པ་དང ། སེམས་མཛེས་པ་གྲོང་སྤྲང་མོ་དེས་མཐོང་ནས་དེས་སྤྲང་ཟན་ཅུང་ཟད་ཅིག་རྙེད་པ་དང ། དེས་བསམས་པ། བདག་གིས་སྦྱིན་གནས་འདི་ལྟ་བུ་ལ་མཆོད་པ་མ་བྱས་པས་དེས་ན་གནས་སྐབས་འདི་ལྟ་བུར་གྱུར་གོར་མ་ཆག་གིས། གལ་ཏེ་བཅོམ་ལྡན་འདས་འདི་བདག་ལས་བསོད་སྙོམས་ཅུང་ཟད་ལེན་པར་འགྱུར་ན་བདག་གིས་འདི་ལ་དབུལ་བར་བྱའོ་སྙམ་མོ། །རང་སངས་རྒྱས་དེས་དེ་ལ་སྙིང་བརྩེ་བའི་ཕྱིར་ལྷུང་བཟེད་བཟེད་པ་དང ། དེས་དེ་ལ་ཕུལ་ལོ། །རང་སངས་རྒྱས་དེ་དེ་ལ་སྙིང་བརྩེ་བས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང །
8.54a
གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས། དེས་སྨོན་ལམ་འདི་སྐད་ཅེས་བདག་ལས་འདིའི་རྣམ་པར་སྨིན་པས་ནམ་ཡང་སྡུག་བསྔལ་བར་མ་གྱུར་ཅིག་ཅེས་བཏབ་བོ། །བྲམ་ཟེ་དེའི་ཚེ་དེའི་དུས་ན་གྲོང་སྤྲང་མོ་གང་ཡིན་པ་དེ་ནི་ཁྱོད་ཀྱི་ཆུང་མ་དེ་ཡིན་ཏེ། དེས་རང་སངས་རྒྱས་ལ་མཆོད་པ་བྱས་པའི་ལས་དེའི་རྣམ་པར་སྨིན་པས་ད་ལྟར་འདི་ལྟ་བུར་སྐྱེས་ཏེ་ཁོ་བོས་དེའི་ལས་ཀྱི་རྣམ་པར་སྨིན་པ་དེ་ཟད་པ་ལས་བསམས་ནས་འདི་སྐད་ཅེས། སྲིང་མོ་རྙིང་པ་ཟད་བྱེད་ཅིང ། །སར་པ་ཅུང་ཟད་སྐྱེད་མི་བྱེད། །བག་མེད་བརྒྱན་པ་མཐོང་ནས་ནི། །མཆི་མས་བརྣངས་པའི་བཞིན་གྱིས་ངུ ། །ཞེས་སྨྲས་སོ། །བཙུན་པ་འཆར་ཀས་དོན་གྱིས་ན་བདག་གི་མཆིས་བྲང་ལ་བསྐུལ་བ་མཛད་དོ། །བཙུན་པ་འཆར་ཀས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀས་ཅང་མི་སྨྲ་བས་དང་དུ་བླངས་པར་རིག་ནས་སོང་ངོ ། །བྲམ་ཟེ་མོ་དེ་ཡང་འགྱོད་པ་སྐྱེས་ཏེ་བདག་གིས་བྲམ་ཟེ་འཆར་ཀ་སོད་ཅིག་ཅེས་མངགས་པ་ནི་མ་ལེགས་པ་བྱས་ཏེ་བྲམ་ཟེ་དེས་བཙུན་པ་འཆར་ཀ་བསད་པར་མ་གྱུར་ཏམ་སྙམ་མོ། །བྲམ་ཟེ་དེ་འོངས་པ་དང་ཆུང་མས་སྨྲས་པ། རྗེའི་སྲས་ཁྱོད་ཀྱིས་བཙུན་པ་འཆར་ཀ་མ་བཀྲོངས་སམ། བྲམ་ཟེས་སྨྲས་པ། དེ་ནི་བདག་ཉིད་ཆེན་པོ་ཡིན་པས་སུ་ཞིག་གིས་བཀྲོངས་པར་ནུས། ཆུང་མས་སྨྲས་པ། འོ་ན་ཁྱོད་ཀྱིས་དེ་སྤྱན་མ་དྲངས་སམ། བྲམ་ཟེས་སྨྲས་པ། ཁོ་བོས་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཀྱིས་ཞལ་ཟས་སྟ་གོན་གྱིས་ཤིག་།བྲམ་ཟེ་མོ་དེས་ཞལ་ཟས་གྲང་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོད་བག་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་སོ། །ཚེ་དང་ལྡན་པ་འཆར་ཀ་ཡང་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ཏེ་བྲམ་ཟེ་དེའི་ཁྱིམ་ག་ལ་བ་དེར་སོང་ནས་ཕྱིན་པ་དང ། སྟན
8.54b
བཤམས་པ་ཉིད་ལ་འདུག་གོ། །དེ་ནས་བྲམ་ཟེ་དེ་ཆུང་མ་དང་བཅས་པས་ཚེ་དང་ལྡན་པ་འཆར་ཀ་བདེ་བར་འདུག་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་འཆར་ཀ་ཟན་ཟོས་ཤིང ། ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་པ་དང ། ཚེ་དང་ལྡན་པ་འཆར་ཀས་བྲམ་ཟེ་མོ་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་མོ་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས
8.55a
དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང ། གནས་མལ་དང་བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བརྒྱད་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། སེར་སྣ་ཅན་མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་དུ་འཛིན་པ་ཞིག་འདུག་པ་དེས་རི་བྲགས་ཤིག་ཏུ་ཞིང་བླས་ཀྱི་མཐའ་རྨོར་བཅུག་ནས། དེས་བང་བ་དག་རྒྱས་བཏབ་སྟེ་ཆུང་མ་ལ་ལྟོ་རྒྱགས་ཙམ་བྱིན་ནས་རི་བྲགས་དེར་སོང་སྟེ་རང་གིས་ཞལ་ཏ་བྱས་ནས་ཞིང་བླས་ཀྱི་མཐའ་དག་བྱེད་དུ་འཛུད་དོ། །ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེས་བསོད་སྙོམས་བརྒྱུས་ཏེ། བྲམ་ཟེ་དེའི་ཁྱིམ་དུ་སོང་ནས་དེས་སྨྲས་པ། བྲམ་ཟེ་མོ་ལྷུང་བཟེད་ཀྱི་ཆུ་བསླང་ངོ ། །དེས་དེ་ལ་འབྲས་ཅན་ཕུལ་བ་དང ། ཕྲུ་བ་དེ་དེ་བཞིན་དུ་གང་བར་འདུག་གོ། །བྲམ་ཟེ་མོས་སྨྲས་པ། འཕགས་པ་བདག་གི་ཁྱིམ་ཐབ་སེར་སྣ་ཅན། མིག་ཕྲ་བ་བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་དུ་འཛིན་པ་ལགས་ཀྱིས་སླན་ཆད་མ་བྱོན་ཅིག་།ཚེ་དང་ལྡན་པ་འཆར་ཀས་སྨྲས་པ། ཐབས་ཡིན་གྱིས་སང་ཁོ་བོ་བདག་ཉིད་དང་གཉིས་འོང་ངོ ། །ཚེ་དང་ལྡན་པ་འཆར་ཀ་ཕྱི་དེ་ཉིན་པར་བདག་ཉིད་དང་གཉིས་དེར་སོང་བ་དང ། དེས་དེ་ལ་དེ་བཞིན་དུ་འབྲས་ཅན་ཕུལ་ལོ། །དེ་བཞིན་དུ་བདག་ཉིད་དང་དྲུག
8.55b
བཅུའི་བར་དུ་ཉིན་རེ་ལན་རེ་སོང་སྟེ་བྲམ་ཟེའི་ཁྱིམ་དེར་བསོད་སྙོམས་ཟོས་པ་དང ། ངོས་ཀྱི་སྡུམ་ཚེས་དག་ཤེས་ལྡན་དག་ལྟོས་ཤིག་།བྲམ་ཟེ་དེས་ལག་པས་བཅལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན། དེ་དག་བྲམ་ཟེ་མོ་དེས་ཤཱཀྱའི་བུའི་དགེ་སྦྱོང་དག་དང་ལྷན་ཅིག་ཟ་བར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །བྲམ་ཟེའི་ཁྱེའུ་ཞིག་བྱ་བ་འགའ་ཞིག་ལ་མཉན་ཡོད་ནས་རི་བྲགས་དེར་སོང་བ་དང ། བྲམ་ཟེ་དེས་བྲམ་ཟེའི་ཁྱེའུ་དེ་ཐག་རིང་པོ་ཁོ་ན་ནས་མཐོང་ནས་དེས་བྲམ་ཟེའི་ཁྱེའུ་དེ་ལ་དྲིས་པ། བྲམ་ཟེའི་ཁྱེའུ་ཁྱོད་ག་ལས་འདིར་འོངས་དེས་སྨྲས་པ། མཉན་ཡོད་ནས་སོ། །ཁྱོད་ཀྱིས་ཁོ་བོའི་ཁྱིམ་གྱི་གཏམ་ཐོས་སམ། ཐོས་ཏེ། མཉན་ཡོད་ན་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་དང་པོ་ལགས་སོ། །མཁན་པོའི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་གཉིས་པ་ལགས་ཏེ། ཤཱཀྱའི་བུའི་དགེ་སྦྱོང་དྲུག་བཅུ་ཉིན་རེ་ལན་རེ་མཆིས་ཏེ་བསོད་སྙོམས་འཚལ་ལོ། །བྲམ་ཟེ་དེས་བསམས་པ། འདིས་ཁོ་བོ་སེར་སྣ་ཅན་ལ་ཐོ་འཚམ་པར་བྱེད་ཀྱིས་གཞན་ལ་ཡང་དྲི་བར་བྱའོ་སྙམ་ནས། དེ་ལམ་གར་སོང་སྟེ་བསྡད་པ་དང ། ཇི་ཙམ་ན་བྲམ་ཟེའི་ཁྱེའུ་གཞན་ཞིག་བྱ་བ་འགའ་ཞིག་ལ་མཉན་ཡོད་ནས་རི་བྲགས་དེར་སོང་བ་དང ། བྲམ་ཟེ་དེས་བྲམ་ཟེའི་ཁྱེའུ་དེ་ཐག་རིང་པོ་ཁོ་ན་ནས་མཐོང་ནས། དེས་བྲམ་ཟེའི་ཁྱེའུ་དེ་ལ་དྲིས་པ། བྲམ་ཟེའི་ཁྱེའུ་ཁྱོད་ག་ལས་འདིར་འོངས། དེས་སྨྲས་པ། མཉན་ཡོད་ནས་སོ། །ཁྱོད་ཀྱིས་ཁོ་བོའི་ཁྱིམ་གྱི་གཏམ་ཐོས་སམ། ཐོས་ཏེ། མཉན་ཡོད་ན་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་དང་པོ་ལགས་སོ། །མཁན་པོའི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་གཉིས་པ་ལགས་ཏེ། ཤཱཀྱའི་བུའི་དགེ་སྦྱོང་དྲུག་བཅུ་ཉིན་རེ་ལན་རེ་མཆིས་ཏེ། བསོད་སྙོམས་འཚལ་ལོ། །བྲམ་ཟེ་དེས་བསམས་པ། དེ་དང་འདི་འཐུན་པས་དེ་ལྟར་གྱུར་གྱིས་བྲམ་ཟེ་མོ་དེས་ལོངས་སྤྱོད་དག་ཟོས་པར་གྱུར་ན་མི་རུང
8.56a
གིས་འགྲོའོ་སྙམ་མོ། །དེ་ནས་བྲམ་ཟེ་དེ་ཕྱིར་འོངས་ཏེ་བྲམ་ཟེ་མོ་དེ་ལ་སྨྲས་པ། བྲམ་ཟེ་མོ་ངན་པ་ཁོ་བོས་ལག་པས་གཞལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན། ཁྱོད་དེ་དག་ཤཱཀྱའི་བུའི་དགེ་སྦྱོང་དག་དང་ལྷན་ཅིག་ཟ་བར་བྱེད་དམ། ཁྱོད་ཀྱིས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན། དགེ་སྦྱོང་མགོ་རེག་དེ་དག་ལ་སྦྱིན་པར་བྱེད་ཅེས་དེས་དེ་བརྡེག་པར་བརྩམས་པ་དང ། དེས་སྨྲས་པ། བྲམ་ཟེ་ཁྱོད་ཀྱིས་ཁོ་མོ་ལ་གཏད་པའི་བང་བ་དག་ཁོ་མོས་རྒྱ་ཉམས་པར་བྱས་སམ། ཅི་ཇེ་སོ་སོར་རྟོགས་ཤིག་།བྲམ་ཟེ་དེས་བང་བ་དག་སོ་སོར་བརྟགས་པ་དང ། ཇི་ཙམ་ན་དེ་བཞིན་དུ་རྒྱ་མ་ཉམས་པར་འདུག་པ་དག་མཐོང་ནས། དེས་ཆུང་མ་ལ་སྨྲས་པ། ཁྱོད་ཀྱིས་ཟས་དེ་སྙེད་ག་ལས་རྙེད། དེས་སྨྲས་པ། བདག་གི་ཕྲུ་བ་འདིར་འབྲས་ཅན་དང ། སྲན་ཚོད་བཙོས་ན་འབྲས་ཆན་དེས་དགེ་སློང་དྲུག་བཅུ་དང་བདག་ཀྱང་འདྲངས་པར་གྱུར་ཏོ། །བྲམ་ཟེ་དེས་སྨྲས་པ། ཅིའི་ཕྱིར་དེ་ལྟར་གྱུར། དེས་སྨྲས་པ། བདག་གིས་ཁྱོད་ཀྱི་མངོན་སུམ་དུ་འགྱུར་བར་བྱའོ་ཞེས་དེས་ཕྱི་དེ་ཉིན་པར་ཚེ་དང་ལྡན་པ་འཆར་ཀ་བདག་ཉིད་དང་དྲུག་བཅུ་དེར་འོངས་པ་ལ་དེ་བཞིན་དུ་བསོད་སྙོམས་ཕུལ་ནས་དེས་སྨྲས་པ། བྲམ་ཟེ་ཁྱོད་ཀྱིས་མཐོང་ངམ། བྲམ་ཟེ་དེ་མངོན་པར་དད་པར་གྱུར་ནས། དེས་སྨྲས་པ། བཙུན་པ་འཆར་ཀས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། བྲམ་ཟེ་ཅི་འདི་འདྲ་བས་སམ། འོན་ཏེ་ཟས་ཡང་དག་པས་མགྲོན་དུ་འབོད། བཤོས་ཡང་དག་པས་སྤྱན་འདྲེན་ཏོ། །ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་ཏེ་སོང་ངོ ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀས་ཅང་མི་སྨྲ་བར་དང་དུ་བླངས་པར་རིག་ནས། དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་སོ། །ཚེ་དང་ལྡན་པ་འཆར་ཀ་ཡང་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བྲམ་ཟེའི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད
8.56b
ལ་འདུག་གོ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀ་བདེ་བར་འདུག་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་འཆར་ཀ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་གོ། །ཚེ་དང་ལྡན་པ་འཆར་ཀས་དེའི་བསམ་པ་དང་བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ
8.57a
མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང ། ན་བཟའ་དང་གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་དགུ་པ་གཉི་ག་ནས་བཏུལ་ཅིང་བཞག་གོ། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་བདུན་པ། ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དེའི་ཆུང་མ་དེ་གཏུམ་པ། བརླང་བ། རྩུབ་པ། རྒྱ་བ། གཤེ་བ། སྤྱོ་བ་ཞིག་ཡིན་པས་རྟག་ཏུ་ངོས་ཀྱི་སྡུམ་ཚེས་དག་དང་ལྷན་ཅིག་ཐབ་ཀྲོལ་བྱེད་ནས། དེའི་མིང་གཏུམ་མོ་གཏུམ་མོ་ཞེས་བྱ་བར་གྱུར་ཏོ། །དུས་གཞན་ཞིག་ན་མཉན་ཡོད་དུ་དུས་སྟོན་བྱུང་ནས་བྲམ་ཟེ་དེས་བུ་ལ་སྨྲས་པ། བུ་ཁྱོད་ཀྱི་མ་འདི་གཏུམ་པས་གཞན་དག་དང་ལྷན་ཅིག་འཐབ་ཀྲོལ་བྱེད་པས་བདག་ཅག་ཁྲི་མོན་དུ་བཅུག་པས་འཆི་བར་བྱ་དགོས་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། རེ་ཤིག་དུས་སྟོན་ཐལ་གྱི་བར་དུ་རི་བྲགས་གཞན་དུ་འདོང་ཞིང་འཁོད་ལ་དེའི་འོག་ཏུ་ཕྱིར་འོང་བར་བྱས། ཁྱོད་སོང་ལ་མ་ལ་དྲིས་ཤིག་།བུ་དེས་མ་ལ་སྨྲས་པ། ཡུམ་བདག་བགྱི་བ་ཆུང་ཞིག་གི་སླད་དུ་རི་བྲགས་ག་གེ་མོ་ཞིག་ཏུ་མཆིའོ། །གཏུམ་མོས་སྨྲས་པ། གང་དུ་ཁོ་མོའི་དང་པོའི་གོས་སོང་བ་དེར་སོང་ཤིག་།བྲམ་ཟེས་ཀྱང་སྨྲས་པ། ཁོ་བོ་ཡང་འགྲོའོ། །གཏུམ་མོས་སྨྲས་པ། གང་ནས་ཡང་ཕྱིར་མི་འོང་བ་དེར་སོང་ཤིག་།དེ་གཉིས་དོང་བ་དང ། གཏུམ་མོས་བུ་མོ་མངག་གཞུག་མ་ལ་སྨྲས་པ། བུ་མོ་ཁུར་སླང་ཚུགས་ཤིག་དང ། ཇེ་སྣོག་ཟན་བྱའོ། །
8.57b
དེས་ཁུར་སླང་བཙུགས་ཏེ་ཁུར་བ་དག་བྱ་བར་བརྩམས་པ་དང ། ཚེ་དང་ལྡན་པ་འཆར་ཀས་བསམས་པ། གཏུམ་མོ་དེ་གདུལ་བའི་དུས་ཡིན་ནོ་སྙམ་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཐར་གྱིས་བསོད་སྙོམས་ལ་རྒྱུ་བ་ན་གཏུམ་མོའི་ཁྱིམ་དུ་འཇུག་པར་བརྩམས་པ་དང ། དེ་འཇུག་པ་གཏུམ་མོས་མཐོང་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་དགེ་སྦྱོང་འདི་བསྐྲོད་ཅིག་།དེས་བསྐྲད་པ་དང་ཚེ་དང་ལྡན་པ་འཆར་ཀ་ཆེས་དང་པོར་ནང་དུ་ཞུགས་ཤིང་བུ་མོ་མངག་གཞུག་མ་ཕྱིས་ཞུགས་སོ། །དེ་གཏུམ་མོས་ཡང་མཐོང་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱོད་ཀྱིས་དགེ་སྦྱོང་འདི་མ་བསྐྲད་དམ། དེས་སྨྲས་པ། བསྐྲད་དོ། །འོ་ན་འདི་ག་ལས་ཞུགས། ཡང་སྐྲོད་ལ་སྒོ་ཆོད་ཅིག་།དེས་དེ་བསྐྲད་དེ་སྒོ་བཅད་ནས་ཞུགས་པ་དང ། ཚེ་དང་ལྡན་པ་འཆར་ཀ་ཆེས་དང་པོར་ཞུགས་སོ། །དེ་གཏུམ་མོས་ཡང་མཐོང་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱོད་ཀྱིས་དགེ་སྦྱོང་འདི་བསྐྲད་དེ་སྒོ་མ་བཅད་དམ། དེས་སྨྲས་པ། བསྐྲད་དེ་སྒོ་བཅད་དོ། །འོ་ན་འདི་གང་ནས་ཞུགས། དེ་ནས་གཏུམ་མོས་སྨྲས་པ། དགེ་སྦྱོང་ཅི་སློང ། ཚེ་དང་ལྡན་པ་འཆར་ཀས་སྨྲས་པ། ཁུར་བའོ། །གཏུམ་མོས་སྨྲས་པ། ཁྱོད་བུ་ཐུ་བོར་གྱུར་ཏེ་འོངས་ན་ཁྱོད་ལ་ཁུར་བ་ཅིའི་ཕྱིར་མི་སྦྱིན། ཚེ་དང་ལྡན་པ་འཆར་ཀས་བུ་ཐུ་བོར་སྤྲུལ་ཏེ་འོངས་པ་དང ། གཏུམ་མོས་སྨྲས་པ། གལ་ཏེ་ལག་པ་དང་རྐང་པ་དག་སེར་པོར་བྱས་ཀྱང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་ལག་པ་དང་རྐང་པ་དག་སེར་པོར་སྤྲུལ་པ་དང ། གཏུམ་མོས་སྨྲས་པ། གལ་ཏེ་མིག་གཉིས་ཁར་ཕོར་ལྟ་བུར་ལྟ་ན་ཡང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་མིག་གཉིས་ཁར་ཕོར་ལྟ་བུར་སྤྲུལ་པ་དང ། གཏུམ་མོས་སྨྲས་པ། གལ་ཏེ་ནམ་མཁའ་ལ་དྲིལ་བུ་བཞིན་དུ་ཁྲ་ལ་ལ་འཁྲོལ་ཞིང་འདུག་ན་ཡང་ཁྱོད་ལ་ཁུར་བ་མི་སྦྱིན་ནོ། །
8.58a
ཚེ་དང་ལྡན་པ་འཆར་ཀས་ནམ་མཁའ་ལ་དྲིལ་བུ་བཞིན་དུ་ཁྲ་ལ་ལ་འཁྲོལ་ཞིང་འདུག་པ་དང ། གཏུམ་མོས་སྨྲས་པ། གལ་ཏེ་ཁྱོད་ཕྱེད་ཕྱེད་དུ་དུམ་བུ་གཉིས་སུ་གས་ཀྱང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་བདག་ཉིད་ཕྱེད་ཕྱེད་དུ་དུམ་བུ་གཉིས་སུ་གས་པར་སྤྲུལ་ཏེ་ས་ལ་སྒྱེལ་བ་དང ། བུ་མོ་མངག་གཞུག་མས་སྨྲས་པ། ཇོ་མོ་ཁྱོད་ཀྱིས་གདུང་བར་བགྱིད་པ་མང་པོ་དག་བསྒྲུབས་པ་དེ་དག་གི་ནང་ན་འདི་ནི་ཆེས་གདུང་བར་བགྱིད་པ་ལགས་ཏེ། དགེ་སྦྱོང་འདི་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཆུང་པོ་གྲོགས། བཙུན་མོ་ཕྲེང་ལྡན་མའི་སློབ་དཔོན་ལགས་པས། བདག་ནི་ཤིན་ཏུ་ཐག་རིང་པོར་མཆིས་ཀྱང་བྲན་མོ་ཉིད་དུ་བས་ཀྱི། ཇོ་མོས་ནི་གསེར་གྱི་ཆུ་བུམ་གྱིས་རྒྱལ་པོའི་ཕོ་བྲང་དུ་ཆབ་བཅུ་འཚལ་བར་འགྱུར་རོ། །གཏུམ་མོ་སྐྲག་ཏེ་བསམས་པ། དེ་ལྟར་འགྱུར་རོ་སྙམ་ནས་དེས་སྨྲས་པ། བུ་མོ་དོང་རྐོས་ཤིག་དང་སྦའོ་ཞེས་དེས་དོང་རྐོས་ཏེ་སྦ་བར་བརྩམས་པ་དང ། ཚེ་དང་ལྡན་པ་འཆར་ཀ་འགོག་པ་ལ་སྙོམས་པར་ཞུགས་ནས་དེས་བསྒུལ་བར་ཡང་མ་ནུས་སོ། །དེ་ནས་གཏུམ་མོས་ཚེ་དང་ལྡན་པ་འཆར་ཀའི་རྐང་པ་གཉིས་ལ་གཏུགས་ཏེ་སྨྲས་པ། འཕགས་པ་ཁྱོད་ཀྱིས་མི་མཁྱེན་པ་དང ། མ་གཟིགས་པ་དང ། མ་རིག་པ་དང ། རྣམ་པར་མི་མཁྱེན་པ་ཅི་ཡང་མ་མཆིས་ཀྱིས་བདག་ལ་བཟོད་པ་མཛོད་ཅིག་དང་ཁྱོད་ལ་ཁུར་བ་གསོལ་ལོ། །ཚེ་དང་ལྡན་པ་འཆར་ཀ་ལངས་ཏེ་ཆ་ལུགས་ཐ་མལ་པ་བསྟན་པ་དང ། གཏུམ་མོས་བསམས་པ། འདི་ལ་ཁུར་བ་སྦྱིན་ནོ་ཞེས་ཁས་བླངས་ན། ཁུར་བ་འདི་དག་ནི་ཧ་ཅང་ཆེ་ཆེས་པས་ཕངས་ཀྱིས་འདིའི་ཕྱིར་ཁུར་བ་ཆུང་ངུ་གཞན་ཞིག་བྱའོ་སྙམ་ནས། དེས་ཁུར་བ་ཆུང་ངུ་ཞིག་སྲེག་པར་བརྩམས་པ་དང ། ཁུར་བ་དེས་ཁུར་བསླང་ཐམས་ཅད་ཡོག་པར་གྱུར་ནས། གཏུམ་མོས་བསམས་པ། བདག་གིས་ཁུར་བ་འདི་མི་སྦྱིན་པར་ཁུར་བ་སྔ་མ་ལས་གཅིག་སྦྱིན་ནོ་སྙམ་ནས། དེས་ཁུར་བ་གཅིག་དྲང་བར་བརྩམས་པ་དང ། ཇི་ཙམ་ན་ཁུར་བ་ཐམས་ཅད་འོངས་ནས་གཏུམ་མོས་སྨྲས་པ། ཅི་འཕགས
8.58b
པ་ཁུར་བ་ཐམས་ཅད་བཞེད་དམ། ཚེ་དང་ལྡན་པ་འཆར་ཀས་སྨྲས་པ། འདོད་དོ། །གཏུམ་མོས་སྨྲས་པ། བཞེས་སུ་གསོལ། ཚེ་དང་ལྡན་པ་འཆར་ཀས་སྨྲས་པ། སྲིང་མོ་གལ་ཏེ་ཡོངས་སུ་བཏང་ན། ཁྱིམ་བདག་མགོན་མེད་ཟས་སྦྱིན་གྱིས་དེང་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཀྱིས་དེར་དོང་ལ་རང་གི་ལག་ནས་བྲིམས་ཤིག་།གཏུམ་མོས་སྨྲས་པ། འཕགས་པ་དག་གཏུམ་མོ་ཞེས་ཐམས་ཅད་དུ་རིག་པས་བདག་དེར་འཇུག་ཏུ་ག་ལ་ཆུད། ཚེ་དང་ལྡན་པ་འཆར་ཀས་སྨྲས་པ། སྲིང་མོ་ཁོ་བོས་ཁྱོད་འཇུག་ཏུ་གཞུག་གོ། །དེ་ནས་གཏུམ་མོས་ཁུར་བ་དེ་དག་ཐོགས་ཏེ་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་འཇུག་པར་བརྩམས་པ་དང ། སྒོ་བས་སྨྲས་པ། གཏུམ་མོ་དོན་ཅིའི་ཕྱིར་འདིར་འོངས་མ་འཇུག་ཤིག་།ཚེ་དང་ལྡན་པ་འཆར་ཀས་སྨྲས་པ། བཞིན་བཟངས་འཇུག་ཏུ་ཆུག་ཤིག་།སྒོ་བས་གཏུམ་མོ་ནང་དུ་བཏང་བ་དང ། དེས་སངས་རྒྱས་ལ་སོགས་པ་དགེ་སློང་གི་དགེ་འདུན་མང་པོ་མཐོང་ནས་ཁུར་བ་དེ་དག་གཏུབ་པར་བརྩམས་པ་དང ། ཚེ་དང་ལྡན་པ་འཆར་ཀས་སྨྲས་པ། མ་གཏུབ་པར་རངས་པར་བྲིམས་ཤིག་།གཏུམ་མོས་སྨྲས་པ། ཁྱེད་པར་མི་འགྱུར་རོ། །ཚེ་དང་ལྡན་པ་འཆར་ཀས་སྨྲས་པ། བྲིམས་ཤིག་དང་ཁྱེད་པར་འགྱུར་རོ་ཞེས་དེས་འདི་ལྟར་སངས་རྒྱས་ལ་སོགས་པ་དགེ་སློང་གི་དགེ་འདུན་ཐམས་ཅད་ལ་ཁྱེད་པའི་ཕྱི་ན་ལྷག་ཀྱང་བྱུང་བ་དེ་ལྟར་བྱིན་གྱིས་བརླབས་སོ། །གཏུམ་མོས་སངས་རྒྱས་ལ་སོགས་པ་དགེ་སློང་གི་དགེ་འདུན་ཐམས་ཅད་ལ་ཁུར་བས་ཁྱེད་པར་བྲིམས་ཏེ་གསོལ་ནས། བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་སོ། །གཏུམ་མོས་སྨྲས་པ། བཙུན་པ་འཆར་ཀ་ཁྱོད་བདག་གི་དགེ་བའི་བཤེས་གཉེན་ལགས་ཀྱིས་ཚུར་གཤེགས། བདག་གི་སྡུམ་པར་བཞུད་ལ་ཁྱོད་དེར་གདུགས་ཚོད་གསོལ་ཅིག་།ཚེ་དང་ལྡན་པ་འཆར་ཀ་གཏུམ་མོའི་ཁྱིམ་དུ་སོང་བ་དང ། གཏུམ་མོས་ཚེ་དང་ལྡན་པ་འཆར་ཀ་ལ་ཟན་བྱིན་ནས་གཏུམ་མོ་ཚེ་དང་ལྡན་པ་འཆར་ཀའི་མདུན་དུ་ཆོས
8.59a
མཉན་པའི་ཕྱིར་འདུག་པ་དང ། ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་གཏུམ་མོ་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་སྟེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་ཚེ་དང་ལྡན་པ་འཆར་ཀས་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ ། །དེ་ནས་གཏུམ་མོས་རང་གི་ཁྱིམ་ཕྱག་དར
8.59b
ལེགས་པར་བྱས། ཆག་ཆག་ལེགས་པར་བཏབ། བྱུག་པས་ལེགས་པར་བྱུགས་ཏེ་མེ་ཏོག་དག་དགྲམ་པར་བྱས་ནས་སྤྱོད་ལམ་ཞི་བས་འདུག་གོ། །བྲམ་ཟེ་དེ་ཡང་དུས་སྟོན་ཐལ་ནས་ཕྱིར་འོངས་ཏེ་སྐྱེད་མོས་ཚལ་དུ་བསྡད་ནས་དེས་བུ་ལ་སྨྲས་པ། བུ་ཁྱོད་སོང་ལ་ཁྱོད་ཀྱི་མ་ཁྲི་མོན་གང་དུ་བཅུག་ཅིང་འདུག་པ་ལྟོས་ཤིག་དང་དབྱུང་བར་བྱའོ། །བུ་དེ་ཁྱིམ་དུ་སོང་བ་དང་གཏུམ་མོས་ཐག་རིང་མོ་ཁོ་ན་ནས་བུ་མཐོང་ནས་དེས་སྨྲས་པ། བུ་འོངས་པ་ལེགས་སོ་འོངས་པ་ལེགས་སོ། །ཚུར་ཤོག་ངལ་སོས་ཤིག་།ཁྱོད་ཀྱི་ཕ་དེ་འོངས་སམ། བུས་སྨྲས་པ། མཆིས་ཏེ། སྐྱེད་མོས་ཚལ་ན་སྡོད་ཅིང་མཆིས་སོ། །བུ་དེ་ཟན་ཟོས་ནས་ཕའི་གན་དུ་སོང་བ་དང་ཕས་དྲིས་པ། བུ་ཁྱིམ་བདེ་འམ་བུས་སྨྲས་པ། ཡབ་ཡུམ་གྱི་སྤྱོད་ལམ་དེ་ལྟ་བུ་ནི་སྔོན་ལན་འགའ་ཡང་མ་མཐོང་སྟེ། འདི་ལྟར་སྤྱོད་ལམ་ཞི་བས་མཆིས་སོ། །བྲམ་ཟེ་དེ་ཁྱིམ་དུ་ཞུགས་པ་དང་གཏུམ་མོས་ཐག་རིང་པོ་ཁོ་ན་ནས་མཐོང་ནས་དེས་སྨྲས་པ། རྗེའི་སྲས་བྱོན་པ་ལེགས་སོ་བྱོན་པ་ལེགས་སོ། །བཞུགས་སུ་གསོལ། དེ་འདུག་ནས་བསམས་པ། བྱེ་བྲག་འདི་ལྟ་བུ་ནི་སྔོན་མ་བྱུང་ཅི་ལས་གྱུར་སྙམ་ནས། དེས་ཚིགས་སུ་བཅད་པ་སྨྲས་པ། འདི་ལྟར་སྔོན་དང་མི་འདྲ་བར། །ལོག་པ་ཉིད་དུ་ཁྱོད་སྣང་ན། །ཁྱོད་ནི་སྨྱོ་བྱེད་ལྡན་གྱུར་ཏམ། །འོན་ཏེ་མྱོས་པར་གྱུར་ཏམ་ཅི། །གཏུམ་མོས་ཚིགས་སུ་བཅད་པ་སྨྲས་པ། ཇོ་བོ་བདག་ནི་སྨྱོས་པ་མིན། །མྱོས་པར་གྱུར་པ་འང་མ་ལགས་ཏེ། །བདག་གིས་སངས་རྒྱས་བསྟན་པ་ལ། །འཕགས་པའི་བདེན་པ་མཐོང་བར་བགྱིས། །རྗེའི་སྲས་བདག་ལ་འཕགས་པ་འཆར་ཀས་འདི་ལྟར་བདག་སླན་ཆད་འཁོར་བ་ན་འཁོར་བའི་ཚེ་ཉོན་མོངས་པ་དེ་ལྟ་བུ་དག་ཀུན་ཏུ་སྤྱོད་པར་མི་འགྱུར་བ་དེ་ལྟར་ཆོས་བསྟན་པ་མཛད་དོ། །བྲམ་ཟེ་དེ་ངོ་མཚར་སྐྱེས་ཏེ་བསམས་པ། བདག་གིས་བརྡེག་པ་དང ། བཅིང་བ་དང ། སྨད་པས་ཐུལ་བར་མ་ནུས་པ་གང་ཡིན་པ་དེ་བཙུན་པ་འཆར་ཀས་ཆོས་བསྟན་པས་བཏུལ་བས་གང་གི་ཕྱིར་ཆོས་བསྟན་པས་འདི་བཏུལ་བ་ནི་འཕགས་པ་འཆར་ཀས་བདག་ལ་ཕན་པ་མང་དུ་མཛད་དོ། །འཕགས་པ་འཆར་ཀས་བདག་ལ་ལེགས་པ་མང་དུ་མཛད་ཀྱིས།
8.60a
བདག་སོང་ལ་འཕགས་པ་འཆར་ཀ་སང་ཁྱིམ་གཞན་དུ་གདུགས་ཚོད་ལ་སྤྱན་དྲང་ངོ་སྙམ་ནས། དེ་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཛུད་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་སྨྲའོ། །དེ་ནས་བྲམ་ཟེ་དེ་སྟན་ལས་ལངས་ཏེ་ཚེ་དང་ལྡན་པ་འཆར་ཀ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །བཙུན་པ་འཆར་ཀས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀས་ཅང་མི་སྨྲ་བས་དང་དུ་བླངས་པར་རིག་ནས། ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ངོ ། །དེ་ནས་བྲམ་ཟེ་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་སོ། །ཚེ་དང་ལྡན་པ་འཆར་ཀ་ཡང་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བྲམ་ཟེ་དེའི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀ་བདེ་བར་འདུག་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་འཆར་ཀ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཚེ་དང
8.60b
ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་གོ། །ཚེ་དང་ལྡན་པ་འཆར་ཀས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང །
8.61a
ན་བཟའ་དང ། གནས་མལ་དང་བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ་ཞེས་སྨྲས་ཏེ་དང་དུ་མ་བླངས་སོ། །བྲམ་ཟེ་དེས་སྨྲས་པ། གལ་ཏེ་བཙུན་པ་འཆར་ཀས་དང་དུ་མི་བཞེས་ན་བདག་གིས་དྲང་སྲོང་གི་གདན་བཤམ་པར་བགྱི་ཡིས། བཙུན་པ་འཆར་ཀ་གཤེགས་ཏེ་ལོངས་སྤྱད་པར་གསོལ། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །ཚེ་དང་ལྡན་པ་འཆར་ཀས་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བཅུ་པ་གཉི་ག་ནས་བཏུལ་ཅིང་བཞག་གོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་གཞོན་ནུ་དགའ་འདུན་ལྔ་བརྒྱ་ཙམ་ཆུང་མ་དང་བཅས་པ་དག་བཅའ་བ་དང་བཟའ་བ་དང ། དྲི་དང་ཕྲེང་བ་རྒྱུ་མང་པོ་ཐོགས་ཏེ་རྩེ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དང ། ཚེ་དང་ལྡན་པ་འཆར་ཀས་བསམས་པ། འདི་དག་གདུལ་བའི་དུས་ཡིན་ནོ་སྙམ་ནས། དེ་དེ་དག་གི་གན་དུ་སོང་བ་དང ། དེ་དག་གིས་སྨྲས་པ། བཙུན་པ་འཆར་ཀ་ཁྱོད་བྲམ་ཟེ་མདུན་ན་འདོན་གྱི་བུ་ཡིན་ན་ཅིའི་ཕྱིར་ཤཱཀྱའི་བུའི་དགེ་སྦྱོང་འདི་དག་ཐམས་ཅད་ཟ་བ་དག་གི་ནང་དུ་རབ་ཏུ་བྱུང ། ཚེ་དང་ལྡན་པ་འཆར་ཀས་འདི་ལྟར་དེ་དག་གི་ཕྲེང་བ་གང་དག་ཡིན་པ་དེ་དག་ནི་ཀུན་དོང་གི་ཕྲེང་བར་གྱུར། ཁུར་བ་གང་དག་ཡིན་པ་དེ་དག་ནི་བ་ལང་གི་ཀོ་བར་གྱུར། ཤ་གང་དག་ཡིན་པ་དེ་དག་ནི་བ་ལང་གི་ཤར་གྱུར། བཏུང་བ་གང་དག་ཡིན་པ་དེ་དག་ནི་ཆང་དུ་གྱུར་པ་དེ་ལྟར་བྱིན་གྱིས་བརླབས་ནས། ཚེ་དང་ལྡན་པ་འཆར་ཀས་དེ་དག་ལ་ལྷུང་བཟེད་བསྟན་ཏེ་སྨྲས་པ། ཤེས་ལྡན་དག
8.61b
ལྟོས་ཤིག་།ཁོ་བོའི་ལྷུང་བཟེད་ན་སྐུན་འདོང་དང ། བ་ལང་གི་ཀོ་བ་དང ། བ་ལང་གི་ཤ་དང ། ཆང་ཡོད་སྙམ་འམ། ཅི་ཁྱེད་ཅག་ནི་མགོ་ལ་ཡང་སྐུན་འདོང་གི་ཕྲེང་བ་ཐོགས། ཟས་སུ་ཡང་བ་ལང་གི་ཀོ་བ་དང་བ་ལང་གི་ཤ་ཟ་བཏུང་བར་ཡང་ཆང་འཐུང་བས་ཁྱེད་ཅག་ཐམས་ཅད་ཟ་བ་ཡིན་ནོ། །དེ་དག་གིས་གཅིག་ལ་གཅིག་བལྟས་ན་ཇི་ཙམ་ན་བདག་ཅག་ཐམས་ཅད་ཀྱི་མགོ་ལ་སྐུན་འདོང་གི་ཕྲེང་བ་ཐོགས་པ་དང ། ཁུར་བ་ཐམས་ཅད་བ་ལང་གི་ཀོ་བར་གྱུར་པ་དང ། ཤ་ཐམས་ཅད་བ་ལང་གི་ཤར་གྱུར་པ་དང ། བཏུང་བ་ཐམས་ཅད་ཆང་དུ་གྱུར་པར་མཐོང་ནས། དེ་དག་གིས་སྨྲས་པ། འཕགས་པ་འཆར་ཀ་ཁྱོད་ཀྱིས་བདག་ཅག་ལ་དམོད་པ་བོར་གྱིས་བདག་ཅག་ལ་བཟོད་པ་མཛད་དུ་གསོལ། ཚེ་དང་ལྡན་པ་འཆར་ཀས་སྨྲས་པ། བཟོད་པར་བྱའོ། །དེ་ནས་དེ་དག་སྔ་མཁོ་བཞིན་དུ་གྱུར་པ་དང ། དེ་དག་ངོ་མཚར་སྐྱེས་ནས་དེ་དག་གིས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཅག་ཉིད་གདུལ་བའི་དོན་དུ་འོངས་ཀྱིས་འཁོད་ཅིག་དང་ཆོས་བསྟན་པར་བྱའོ། །དེ་དག་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འཁོད་པ་དང ། ཚེ་དང་ལྡན་པ་འཆར་ཀས་དེ་དག་ཆུང་མ་དང་བཅས་པའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་དག་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེ་དག་གིས་བདེན་པ་མཐོང་ནས་སྨྲས་པ། བཙུན་པ་བདག་ཅག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་རྣམས་ཀྱིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང
8.62a
མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མིའི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་ནི་མངོན་པར་ཞུགས་པ་ལགས་ཏེ། བཙུན་པ་བདག་ཅག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་ཅག་གི་བསོད་སྙོམས་དང ། ན་བཟའ་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་བཞེས་པར་ཅི་གནང ། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་པ་བྱ་དགོས་སོ། །ཞེས་སྨྲས་ཏེ་དང་དུ་མ་བླངས་སོ། །བྲམ་ཟེ་དེ་དག་གིས་སྨྲས་པ། གལ་ཏེ་བཙུན་པ་འཆར་ཀས་དང་དུ་མི་བཞེས་ན་བདག་ཅག་གིས་དྲང་སྲོང་གི་གདན་བཤམ་པར་བགྱིས། བཙུན་པ་འཆར་ཀ་གཤེགས་ཏེ་ལོངས་སྤྱད་པར་གསོལ། ཚེ་དང་ལྡན་པ་འཆར་ཀས་བྲམ་ཟེ་དེ་དག་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཚེ་དང་ལྡན་པ་འཆར་ཀས་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་ལྔ་བརྒྱ་ལྷག་ཙམ་གཉི་ག་ནས་བཏུལ་ཞིང་བཞག་གོ། །
8.62b
དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་ཁྱིམ་དད་པར་བྱེད་པ་རྣམས་ཀྱི་ནང་ན་མཆོག་ནི་འདི་ལྟ་སྟེ། དགེ་སློང་འཆར་ཀ་ནག་པོ་འདི་ཡིན་ནོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན་མཉན་ཡོད་ན་བྲམ་ཟེ་ཞིག་གསང་སྔགས་དག་གིས་མི་མ་ཡིན་པ་དབང་དུ་བྱས་ནས་ཤིང་རྟ་བཅས་ཏེ་འདྲེན་དུ་འཛུད་པར་བྱེད་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས་ཚེ་དང་ལྡན་པ་འཆར་ཀ་བྲམ་ཟེ་དེ་གདུལ་བའི་ཕྱིར་འཕགས་པ་དང ། ཇི་ཙམ་ན་བྲམ་ཟེ་དེ་གསང་སྔགས་དག་གིས་མི་མ་ཡིན་པ་དབང་དུ་བྱས་ནས་ཤིང་རྟ་བཅས་ཏེ་འདྲེན་དུ་བཅུག་ནས་མཉན་ཡོད་ཀྱི་ཕ་རོལ་དུ་སོང་བ་ན། བྲམ་ཟེ་དེ་ཤིང་རྟ་ལས་བབས་ནས་གཅིན་གཅི་བར་བརྩམས་པ་དང ། ཚེ་དང་ལྡན་པ་འཆར་ཀས་འདི་ལྟར་བྲམ་ཟེ་དེའི་གཅིན་རྒྱུན་མི་འཆད་པ་དེ་ལྟར་བྱིན་གྱིས་བརླབས་ནས་ཚེ་དང་ལྡན་པ་འཆར་ཀས་གསང་སྔགས་ཀྱི་ཕུར་བུ་ཕྱུང་བ་དང་མི་མ་ཡིན་པ་དེ་བྲོས་ཏེ་སོང་ངོ ། །ཇི་ཙམ་ན་བྲམ་ཟེ་དེ་ལངས་པ་དང་མི་མ་ཡིན་པ་བྲོས་པར་མཐོང་ནས་དེས་སྨྲས་པ། སུས་ཁོ་བོའི་མི་མ་ཡིན་པའི་ཕུར་བུ་ཕྱུང ། ཚེ་དང་ལྡན་པ་འཆར་ཀས་སྨྲས་པ། ཁོ་བོས་སོ། །ཅིའི་ཕྱིར་ཁྱོད་བྲམ་ཟེར་གྱུར་ནས་མི་མ་ཡིན་པ་སྤྱོད་དམ། དེས་སྨྲས་པ། སུ་ཞིག་བདག་གི་བསྙེན་བཀུར་བྱེད་པར་འགྱུར། ཚེ་དང་ལྡན་པ་འཆར་ཀས་དེ་ལ་ལྷུང་བཟེད་བསྟན་ནས་སྨྲས་པ། འདི་ཁྱོད་ཀྱི་བསྙེན་བཀུར་བྱེད་པར་འགྱུར་རོ། །དེས་སྨྲས་པ། འདིས་ཅི་འགྲུབ་པར་འགྱུར། ཚེ་དང་ལྡན་པ་འཆར་ཀས་སྨྲས་པ། གང་སེམས་པ་དང ། གང་འདོད་པ་དེ་དག་ཐམས་ཅད་འགྲུབ་པར་འགྱུར་རོ། །ཇི་ཙམ་ན་བྲམ་ཟེ་དེ་གང་སེམས་པ་དང ། གང་འདོད་པ་དེ་དག་ཐམས་ཅད་ལྷུང་བཟེད་དེ་ལས་གྲུབ་པར་གྱུར་པ་དང ། བྲམ་ཟེ་དེ་ངོ་མཚར་སྐྱེས་ཏེ་དེས་སྨྲས་པ། བཙུན་པ་འཆར་ཀ་ཅིའི་སླད་དུ་འདི་ལྟར་འགྱུར། ཚེ་དང་ལྡན་པ་འཆར་ཀས་སྨྲས་པ། ཁོ་བོས་ལྷུང་བཟེད་ཀྱི་རིག
8.63a
པ་ཤེས་སོ། །དེས་སྨྲས་པ། བཙུན་པ་འཆར་ཀ་ལྷུང་བཟེད་ཀྱི་རིག་པ་དེ་བདག་ལ་སྩོལ་ཅིག་།ཚེ་དང་ལྡན་པ་འཆར་ཀས་ཚིགས་སུ་བཅད་པ་སྨྲས་པ། རིག་པ་སུ་ལ་འང་སྦྱིན་མི་བྱ། །རིག་དང་བཅས་ཏེ་འཆི་བར་བྱ། །རིག་པ་རིག་དང་གུས་པ་དང ། །ནོར་གྱི་ཕྱིར་ནི་སྦྱིན་པར་བྱ། །བྲམ་ཟེས་སྨྲས་པ། བདག་ཁྱོད་ལ་གུས་པར་བགྱིད་དོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོ་ཁྱིམ་པ་ལས་བསྙེན་བཀུར་བདག་གིར་མི་བྱེད་ཀྱི་ཁོ་བོ་ནི་རབ་ཏུ་བྱུང་བ་ལས་བསྙེན་བཀུར་བདག་གིར་བྱེད་དོ། །དེས་སྨྲས་པ། བདག་རབ་ཏུ་འབྱུང་ངོ ། །ཚེ་དང་ལྡན་པ་འཆར་ཀས་སྨྲས་པ། རབ་ཏུ་ཕྱུང་ཤིག་ཅེས་དེས་དེ་རབ་ཏུ་ཕྱུང་རྫོགས་པར་བསྙེན་པར་བྱས་ཏེ་གདམས་ངག་བྱིན་ནོ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་སོ། །གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུར་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང་མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང་མངོན་ཏུ་སྨྲ་བར་བྱ་བར་གྱུར་ཏོ། །ཚེ་དང་ལྡན་པ
8.63b
འཆར་ཀས་བསམས་པ། གང་གདུལ་བའི་དུས་ཡིན་སྙམ་ན་ཡུལ་མིའི་གྱད་གཅིག་གིས་ཡུལ་དག་ཏུ་གྱད་རྣམས་བརྡབས་ནས་མཉན་ཡོད་དུ་འོངས་ཏེ། མཉན་ཡོད་ན་སྒོ་ཁར་རྐང་པ་བརྐྱང་སྟེ་འདུག་ཅིང་དེ་གང་ལ་ལ་འོང་བ་དེ་ལ་འདི་སྐད་ཅེས་ཡང་ན་ནི་ཁོ་བོ་ལ་སྟོབས་རྒོལ་ཅིག་།ཡང་ན་ནི་ཁོ་བོའི་རླིག་བར་དུ་སོང་ཤིག་ཅེས་ཟེར་རོ། །དེ་ན་སྐྱེ་བོ་ཕལ་པོ་ཆེའི་ཚོགས་འདུ་བ་དག་ལས་འགའ་ཡང་དེ་ལ་སྟོབས་ཀྱང་མི་རྒོལ་དེའི་རླིག་བར་དུ་ཡང་མི་འགྲོའོ། །ཚེ་དང་ལྡན་པ་འཆར་ཀས་བསམས་པ། གྱད་དེ་གདུལ་བའི་དུས་ཡིན་ནོ་སྙམ་ནས་ཚེ་དང་ལྡན་པ་འཆར་ཀ་ཕྱོགས་དེར་སོང་སྟེ་སྨྲས་པ། འདི་སུ་ཞིག་ཡིན། སྐྱེ་བོ་ཕལ་པོ་ཆེའི་ཚོགས་ཀྱིས་སྨྲས་པ། གྱད་འདིའི་མཆིད་ནས་འདི་སྐད་ཅེས་ཡང་ན་ནི་ཁོ་བོ་ལ་སྟོབས་རྒོལ་ཅིག་།ཡང་ན་ནི་ཁོ་བོའི་རླིག་བར་དུ་སོང་ཤིག་ཅེས་མཆིའོ། །ཚེ་དང་ལྡན་པ་འཆར་ཀས་དེ་ལ་སྨྲས་པ། ཅི་ཇེ་ཁོ་བོ་དང་ལྷན་ཅིག་སྟོབས་བྱ་འམ། འོན་ཏེ་ཁོ་བོས་བརྡབས་པའི་གྱད་གསུམ་པོ་གང་དག་ཡིན་པ་དེ་དག་དང་ལྷན་ཅིག་སྟོབས་འགྱེད། དེས་སྨྲས་པ། ཁྱོད་ཀྱིས་བརྡབས་པའི་གྱད་གསུམ་པོ་གང་དག་ཡིན་པ་དེ་དག་དང་ལྷན་ཅིག་སྟོབས་བྱའོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོས་འདོད་ཆགས་ཀྱི་གྱད་བརྡབས། ཞེ་སྡང་གི་གྱད་བརྡབས། གཏི་མུག་གི་གྱད་བརྡབས་ཀྱིས་ཁྱོད་དེ་དག་དང་ལྷན་ཅིག་སྟོབས་ཁྱེ་ཤིག་ཅེས་ཚེ་དང་ལྡན་པ་འཆར་ཀས་དེ་བཏུལ་ནས་དེས་དེ་རབ་ཏུ་ཕྱུང་རྫོགས་པར་བསྙེན་པར་བྱས་ཏེ་གདམས་ངག་བྱིན་ནོ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་སོ། །གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ
8.64a
ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ་ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །གཏུམ་མོ་དེས་བུའི་ཆུང་མ་བླངས་ནས་དུས་གཞན་ཞིག་ན་གཏུམ་མོ་ཡང་དུས་ལ་བབ། དེའི་ཁྱིམ་ཐབ་ཀྱང་དུས་ལ་བབ་བོ། །གཏུམ་མོའི་བུ་དེ་ཁ་ཏོན་གྱི་ཞོར་ལ་ཡུལ་གཞན་དུ་སོང་ངོ ། །གཏུམ་མོའི་མནའ་མ་དེ་གོས་དང་ཟས་བཟང་ཞིང་ཞིམ་པ་ལ་ལོངས་སྤྱོད་སྤྱོད་པས་ཉོན་མོངས་པ་དག་གིས་གདུངས་པར་གྱུར་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་སོང་ལ་སྐྱེས་པ་ལུས་བརྟན་པ། མཁྲང་བ་དམ་པ་འགའ་ཅི་སྣང་ཚོལ་ཅིག་དང་དེ་དང་ལྷན་ཅིག་དགའ་མགུར་སྤྱད་པར་བྱའོ། །བུ་མོ་མངག་གཞུག་མས་སྨྲས་པ། ཇོ་མོ་ཁྱོད་ཀྱི་གྱོས་པོ་དང་སྒྱུག་མོ་གཉིས་ནི་བདེན་པ་མཐོང་བ་ལགས་ན། ཁྱོད་དྲང་སྲོང་གི་ཁྱིམ་འདི་ལྟ་བུར་བྱོན་ན་ཉེས་པར་སྤྱོད་པ་དེ་ལྟ་བུ་ཇི་ལྟར་བགྱིར་རུང ། དྲང་སྲོང་གི་ཁྱིམ་གྱི་མི་སྙན་པ་སྐྱེད་པར་མཛད་དམ་ཅི། དེས་སྨྲས་པ། ཀཝའི་ཁྱོད་ལ་བསམ་པ་དེས་ཅི་བྱ། ཇེ་སོང་ལ་ཁྲིད་དེ་ཤོག་ཤིག་།གལ་ཏེ་ཁྲིད་དེ་མ་འོངས་ན་ཁྱོད་ལ་མཚམས་ཆེན་པོ་གཅད་པར་བྱའོ། །བུ་མོས་བསམས་པ། བུ་ཟན་མའི་བུ་མོ་འདིས་དྲང་སྲོང་གི་ཁྱིམ་བཙོག་གིས་དགང་བར་ཆད་དེ། བདག་ལ་དཀའ་བ་མེད་ཀྱིས་དགུག་གོ་སྙམ་ནས། དེ་སྲང་དུ་སོང་བ་དང ། དེས་དེ་ན་ཆོམ་རྐུན་པའི་དམག་དཔོན་ལུས་བརྟན་པ། མཁྲང་བ་དམ་པ་ཞིག་མཐོང་ནས། དེས་དེ་ལ་སྨྲས་པ། ཀྱེ་བཙུན་པོ་ཁྱོད་ཁོ་མོའི་ཇོ་མོ་དང་ལྷན་ཅིག་དགའ་མགུར་སྤྱོད་ཕོད་དམ་དེས་སྨྲས་པ། ཕོད་དོ། །དེས་དེ་ཁྲིད་དེ་ཇོ་མོ་དང་སྤྲད་ནས་དེ་དེ་དང་ལྷན་ཅིག
8.64b
དགའ་མགུར་སྤྱོད་པར་བྱེད་དོ། །ཚེ་དང་ལྡན་པ་འཆར་ཀ་དེར་དུས་དང་དུས་སུ་འགྲོ་བས་དེ་མཐོང་ནས། ཚེ་དང་ལྡན་པ་འཆར་ཀས་བསམས་པ། བུད་མེད་ཀྱི་ཡུལ་འདི་ནི་འདོད་ཆགས་སྤྱོད་པ་ཞིག་ཡིན་ནོ་སྙམ་ནས། དེས་དེ་ལ་འདོད་ཆགས་ཀྱི་བསྔགས་པ་མ་ཡིན་པ་བརྗོད་དོ། །དེས་བསམས་པ། འཕགས་པ་འཆར་ཀ་ནི་གཞན་གྱི་སེམས་ཤེས་པ་ལ་མཁས་པ་ཡིན་པས་དེས་བདག་འཕྲིགས་ཀྱིས། གལ་ཏེ་དེ་མ་བསད་ན་དེས་བདག་གི་ཁྱིམ་ཐབ་ལ་བྱས་ཤིང་དེ་བདག་ལ་གནོད་པ་བྱེད་པར་འགྱུར་དུ་འོང་གིས་བདག་གིས་དེ་བསད་དོ་སྙམ་ནས་དེས་ཆོམ་རྐུན་པའི་དམག་དཔོན་ལ་སྨྲས་པ། འཕགས་པ་འཆར་ཀ་ནི་གཞན་གྱི་སེམས་ཤེས་པ་ལ་མཁས་པ་ཡིན་པས། དེས་བདག་ཅག་འཕྲིགས་ཀྱིས་གལ་ཏེ་དེ་མ་བསད་ན་བདག་གི་ཁྱིམ་ཐབ་ལ་བྱས་ཤིང་དེ་བདག་ཅག་ལ་གནོད་པ་བྱེད་པར་འགྱུར་དུ་འོང་གིས་ཁྱོད་ཀྱིས་དེ་སོད་ཅིག་།ཆོམ་རྐུན་པའི་དམག་དཔོན་གྱིས་སྨྲས་པ། ཁོ་བོ་དེ་མི་གསོད་དེ། དེ་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ནི་ཆུང་པོ་གྲོགས། བཙུན་མོ་ཕྲེང་ལྡན་མའི་ནི་སློབ་དཔོན་ཡིན་གྱིས་ཁོ་བོས་དེ་བསད་པར་གྱུར་ན་ཁོ་བོ་རྒྱལ་པོས་རྒྱ་སྐྱེགས་ཀྱི་ཁང་པར་བཅུག་སྟེ། སྲེགས་པས་འཆི་བར་བྱ་དགོས་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །དེས་སྨྲས་པ། གལ་ཏེ་ཁྱོད་དེ་གསོད་ན་དེ་ལྟ་ན་ལེགས། གལ་ཏེ་མི་གསོད་ན་ཁྱོད་ཕྱིན་ཆད་ཁོ་མོའི་ཁྱིམ་དུ་འཇུག་པར་མི་བྱའོ། །འདོད་པ་སྟེན་པ་དག་གིས་ནི་སྡིག་པའི་ཆོས་མི་བྱ་བ་ཅི་ཡང་མེད་པས་ཆོམ་རྐུན་པའི་དམག་དཔོན་དེས་སྨྲས་པ། གལ་ཏེ་དེ་གཞན་གྱི་སེམས་ཤེས་པ་ལ་མཁས་པ་ཡིན་ན་ཁོ་བོས་ཇི་ལྟར་གསད་པར་བྱ། དེས་སྨྲས་པ། ཐབས་ཀྱི་རྣམ་པ་ཞིག་བྱའོ་ཞེས་དེས་དུས་མ་ཡིན་པར་ཚེ་དང་ལྡན་པ་འཆར་ཀའི་གན་དུ་མངག་པ་བཏང་སྟེ། བཙུན་པ་འཆར་ཀ་བདག་བྲོ་འཚལ་བར་གྱུར་ན་ཁྱོད་ཀྱིས་བདག་གཟིགས་པར་ཅི་གནང་ཞེས་སྤྲིང་ངོ ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས་ཚེ་དང་ལྡན་པ་འཆར་ཀ་ཡང་དུས་མ་ཡིན་པར་ཞུགས་ཏེ་དེ་ལ་ཆོས་བསྟན་པ་བྱས་ནས་དེ་ཕྱིར
8.65a
འབྱུང་བར་བརྩམས་པ་དང ། དེས་སྨྲས་པ། འཕགས་པ་བདག་ཁྱོད་མཐོང་ན་གློ་བ་དགའ་བས་ཡུད་ཙམ་ཞིག་བཞུགས་སུ་གསོལ་ཞེས་དེས་ཚེ་དང་ལྡན་པ་འཆར་ཀ་ཇི་སྲིད་ཀྱིས་ཤིན་ཏུ་ནམ་སྲོས་པར་གྱུར་པ་དེ་སྲིད་དུ་བཟུང་ནས་ཆོམ་རྐུན་པའི་དམག་དཔོན་ཡང་རལ་གྲི་ཤུབས་ནས་ཕྱུང་སྟེ་སྒོ་ན་སྡོད་དོ། །དེ་ནས་ཚེ་དང་ལྡན་པ་འཆར་ཀ་ཕྱིར་བྱུང་བ་དང ། ཆོམ་རྐུན་པའི་དམག་དཔོན་སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེས་ཚེ་དང་ལྡན་པ་འཆར་ཀའི་མགོ་དྲུང་བ་ནས་བཅད་དེ་ས་ལ་བསྒྱེལ་ཏོ། །དེ་འཕགས་པ་གསོད་ཅིང་འདུག་པ་བུད་མེད་རྒན་མོ་ཞིག་གིས་མཐོང་ནས་སྨྲས་པ། གཟུ་ལུམས་བྱེད་པ་འདི་སུ་ཞིག་ཡིན། ཆོམ་རྐུན་པའི་དམག་དཔོན་གྱིས་སྨྲས་པ། སུ་ལ་ཡང་མ་ཟེར་ཅིག་ཁོ་བོས་ཁྱོད་ཀྱང་འདིའི་གནས་སྐབས་ལྟ་བུར་བྱས་པར་གྱུར་ཏ་རེ། དེ་སྐྲག་ནས་འཕྲལ་དུ་སྨྲ་མ་ཕོད་དེ་བདག་ཉིད་ཆེན་པོ་འདིའི་རྗེས་གཅོད་པ་འགའ་ཞིག་ཕྱིས་འོང་གྲང་སྙམ་ནས་དེ་ཉིད་ན་ཅང་མི་སྨྲ་བར་འདུག་གོ། །སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེ་གཉིས་ཀྱིས་ཚེ་དང་ལྡན་པ་འཆར་ཀའི་ལུས་དེ་ཕྱག་དར་གྱི་ཕུང་པོ་ཞིག་དུ་སྦས་ཏེ་བཞག་གོ། །དེའི་ཉིན་མོ་གསོ་སྦྱོང་གི་ཞལ་ཏ་བ་རྒན་པའི་མཐའ་ལོགས་སུ་འདུག་སྟེ་སྨྲས་པ། འགའ་ཞིག་གིས་བཙུན་པ་འཆར་ཀའི་འདུན་པ་བླངས་སམ། བཙུན་པ་འཆར་ཀ་མེད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་དད་པར་བྱེད་པ་རྣམས་ཀྱི་མཆོག་དེ་བསད་ཀྱིས་ཆོས་གོས་དག་ལོང་ཤིག་དང་དེའི་ལུས་ལ་མཆོད་པ་བྱའོ། །བཅོམ་ལྡན་འདས་འཕགས་པ་དང་ཇི་ཙམ་ན་མཉན་ཡོད་ཀྱི་སྒོ་ཆོད་ནས་བཅོམ་ལྡན་འདས་ཀྱིས་གསེར་གྱི་འོད་ལྟ་བུའི་འོད་བཏང་བ་མཛད་པ་དང ། དེས་མཉན་ཡོད་ཐམས་ཅད་གསེར་བཙོ་མའི་འོད་ལྟ་བུས་སྣང་བར་གྱུར་ཏོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། ཅིའི་ཕྱིར་མཉན་ཡོད་ཐམས་ཅད་གསེར་བཙོ་མའི་འོད་ལྟ་བུས་སྣང་བར་གྱུར་སྙམ་ནས་དེས་ཡང་བསམས་པ། བཅོམ་ལྡན་འདས་གཤེགས་པར་བཞེད་གོར་མ་ཆག
8.65b
སྙམ་ནས་དེ་བཙུན་མོའི་འཁོར་དང་བཅས་པས་མཉན་ཡོད་ཀྱི་ལྡེ་མིག་ཁྱེར་ཏེ་སྒོ་ཕྱེ་བ་དང་བཅོམ་ལྡན་འདས་མཉན་ཡོད་དུ་གཤེགས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། ཅིའི་ཕྱིར་བཅོམ་ལྡན་འདས་དུས་མ་ཡིན་པར་མཉན་ཡོད་དུ་གཤེགས་སྙམ་ན། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང ། བཟོད་པར་དཀའ་བ་ཡིན་པས་དེས་སངས་རྒྱས་བཅོམ་ལྡན་འདས་ལ་ཞུ་བར་མ་ནུས་སོ། །བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་མདུན་དུ་གཤེགས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་བཙུན་མོའི་འཁོར་དང་བཅས་པ་བཅོམ་ལྡན་འདས་ཀྱི་སླད་བཞིན་སླད་བཞིན་དུ་རྗེས་སུ་འབྲང་ཞིང་སོང་བ་དང ། ཇི་ཙམ་ན་ཕྱག་དར་གྱི་ཕུང་པོའི་ཕྱོགས་དེར་བྱོན་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་ཁྱིམ་དད་པར་བྱེད་པ་རྣམས་ཀྱི་མཆོག་དེ་འདིར་སྦས་ཀྱིས་ཕྱུང་ཤིག་།དེ་ཕྱུང་བ་དང་དེ་ན་གང་དག་ཚེ་དང་ལྡན་པ་འཆར་ཀ་ལ་བརྟེན་ནས་འཕགས་པའི་བདེན་པ་དག་མཐོང་བ་དེ་དག་གིས་གསོལ་པ། འདི་བདག་ཅག་གི་དགེ་བའི་བཤེས་གཉེན་ལགས་ན་བཅོམ་ལྡན་འདས་ཀྱིས་བདག་ཅག་འདིའི་ལུས་ལ་མཆོད་པ་བགྱིད་པར་ཅི་གནང ། བཅོམ་ལྡན་འདས་ཀྱིས་མ་གནང་ངོ ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་གསོལ་པ། འདི་བདག་གི་ཆུང་པོ་གྲོགས་ལགས་ན། བཅོམ་ལྡན་འདས་ཀྱིས་བདག་འདིའི་ལུས་ལ་མཆོད་པ་བགྱིད་པར་ཅི་གནང ། བཅོམ་ལྡན་འདས་ཀྱིས་མ་གནང་ངོ ། །བཙུན་མོ་ཕྲེང་ལྡན་མས་གསོལ་པ། འདི་བདག་གི་སློབ་དཔོན་ལགས་ན་བཅོམ་ལྡན་འདས་ཀྱིས་བདག་འདིའི་ལུས་ལ་མཆོད་པ་བགྱིད་པར་ཅི་གནང ། བཅོམ་ལྡན་འདས་ཀྱིས་གནང་ངོ ། །དེ་ནས་བཙུན་མོ་ཕྲེང་ལྡན་མས་ཚེ་དང་ལྡན་པ་འཆར་ཀའི་ལུས་དེ་ས་དཀར་གྱིས་དྲིལ་ཕྱི་བྱེད་དུ་བཅུག་ནས་སྤོས་ཆུས་འཁྲུར་བཅུག་སྟེ། རས་ཁ་དོག་སྣ་ཚོགས་དག་གིས་ཁྱོགས་སྤྱིལ་བརྒྱན་ནས་དེར་བཅུག་སྟེ་བཞག་གོ། །དེ་ནས་བཅོམ་ལྡན་འདས
8.66a
ཉན་ཐོས་ཀྱི་དགེ་འདུན་དང་བཅས་པ་མདུན་དུ་གཤེགས་ནས་རྒྱལ་པོ་བཙུན་མོའི་འཁོར་དང་བཅས་པ་དེའི་ཕྱི་བཞིན་ཕྱི་བཞིན་དུ་རྗེས་སུ་འབྲང་ཞིང་སོང་སྟེ། ས་ཕྱོགས་གོ་སྐབས་ཡངས་པ་ཞིག་ཏུ་བཞག་ནས། བཙུན་མོ་ཕྲེང་ལྡན་མས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ་རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་རྒྱལ་མཚན་དང ། བ་དན་བསྒྲེང་ཞིང་དྲི་དང ། ཕྲེང་བ་རྒྱུ་དང་བདུག་སྤོས་དང ། ཕྱེ་མ་དང ། སིལ་སྙན་དག་གིས་མཆོད་པ་བྱས་རྐང་པ་གཉིས་ལ་ཕྱག་འཚལ་ནས་བཅོམ་ལྡན་འདས་ཀྱིས་ཡོན་བཤད་པ་མཛད་དེ་གཤེགས་སོ། །དེ་ནས་བཅོམ་ལྡན་འདས་གཙུག་ལག་ཁང་དུ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཉེས་དམིགས་འདི་དང་གཞན་དག་ཀྱང་དགེ་སློང་དག་དུས་མ་ཡིན་པར་གྲོང་དུ་འཇུག་པ་ལས་གྱུར་པས་དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དུས་མ་ཡིན་པར་གྲོང་དུ་འཇུག་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ནད་ངན་ཅན་དག་འཁོད་པ་དག་གིས་ཡུན་རིང་དུ་འདུག་པར་མི་ནུས་པ་ནས་དགེ་སློང་ནད་གཡོག་དག་གིས་ཀྱང་ནད་པ་དག་གི་བྱ་བ་ཉམས་པར་བྱེད། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ། །བཅོམ་ལྡན་འདས་ཀྱིས་དགེ་སློང་འདུག་པ་ལ་སྨྲ་བར་བྱའོ་ཞེས་བཀའ་སྩལ་ནས། དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས་ཇི་ཙམ་ན་དེར་མེ་ཤོར
8.66b
ནས་དགེ་སློང་དེས་དེར་འགྲོ་བར་བརྩམས་ཏེ་དེ་ལམ་གྱི་ཕྱེད་དུ་སོན་པ་དང ། བདག་གིས་དགེ་སློང་འདུག་པ་ལ་མ་སྨྲས་སོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ། ཇི་སྲིད་དུ་དགེ་སློང་འདུག་པ་ལ་སྨྲ་བར་བྱེད་པ་དེ་སྲིད་དུ་དེའི་ལྷུང་བཟེད་དང་ཆོས་གོས་ཚིག་ནས་དེས་དེར་སོང་བ་དང ། ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་ཁྱོད་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི་གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ་ཞེས་ཟེར་ཞིང ། དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང་བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང་དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དུས་མ་ཡིན་པར་གྲོང་དུ་འཇུག་ཅིང་དགེ་སློང་འདུག་པ་ལ་མི་སྨྲ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པ་འམ། གཞན་ཡང་དེ་ལྟ་བུ་གང་ཡིན་པའོ། །དུས་མ་ཡིན་པར་ཞེས་བྱ་བ་ནི་དུས་མ་ཡིན་པ་གཉིས་སུ་སྟེ། སྐྱ་རེང་མ་ཤར་བ་དང་ཕྱེད་ཡོལ་བར་རོ། །གྲོང་དུ་ཞེས་བྱ་བ་ནི་གང་ན་སྲང་དང ། བཞི་མདོ་དང་སུམ་མདོ་དག་ཡོད་པར་རོ། །འཇུག་ཅིང་ཞེས་བྱ་བ་ནི་འགྲོ་ཞིང་ངོ ། །དགེ་སློང་འདུག་པ་ལ་མི་སྨྲ་ན་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ
8.67a
པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དུས་མ་ཡིན་པ་ལ་དུས་མ་ཡིན་པར་འདུ་ཤེས་པས་གྲོང་དུ་འཇུག་ན་ལྟུང་བྱེད་དུ་འགྱུར་རོ། །དུས་མ་ཡིན་པ་ལ་ཡིད་གཉིས་ཟ་བས་གྲོང་དུ་འཇུག་ན་ལྟུང་བྱེད་དུ་འགྱུར་རོ། །དུས་ལ་དུས་མ་ཡིན་པར་འདུ་ཤེས་པས་གྲོང་དུ་འཇུག་ན་ཉེས་བྱས་སུ་འགྱུར་རོ། །དུས་ལ་ཡིད་གཉིས་ཟ་བས་གྲོང་དུ་འཇུག་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བཙུན་མོ་ཕྲེང་ལྡན་མས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷས་དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་སྩལ། དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་སྩལ་ཅིང ། འཕགས་པ་འཆར་ཀ་ལྷའི་ནི་ཆུང་པོ་གྲོགས་ལགས། བདག་གི་ནི་སློབ་དཔོན་ལགས་ཏེ། དགེ་སློང་རབ་ཏུ་གྲགས་པ་དེ་ལྟ་བུ་ཡང་བཙན་ཐོང་དུ་བཀུམ་ན་དགེ་སློང་རབ་ཏུ་མ་གྲགས་པ་གཞན་དག་ལ་བཀའ་མཆིད་ཀྱང་རྨེད་པར་འགྱུར། ལྷས་འཕགས་པ་འཆར་ཀ་དེ་སུས་འགུམས་སུ་སྩལ་བ་དང་སུས་བཀུམ་པ་བཀས་རྨ་བར་ཅི་གནང ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་དེང་ལ་འཕགས་པ་འཆར་ཀ་དེ་སུས་གསོད་དུ་བཅུག་པ་དང ། སུས་བསད་པ་སྨྲོས་ཤིག་།དེ་དག་དེ་རྨེད་ཅིང་ཕྱོགས་དེར་དོང་བ་དང ། དེ་དག་གིས་དེ་ན་བུད་མེད་རྒན་མོ་དེ་མཐོང་ཞིང་དེས་ནི་དེ་དག་མ་མཐོང་བ་ན་བུད་མེད་རྒན་མོ་དེས་བྱུང་རྒྱལ་དུ་སྨྲས་པ། ཕྱོགས་འདིར་ཁྱིམ་དད་པར་བྱེད་པ་རྣམས་ཀྱི་མཆོག་དེ་སྦས་པ་ནི་དེ་དང་དེ་དག་གིས་བསད་དོ། །དེ་དག་གིས་དེ་ཐོས་ནས་སྨྲས་པ་རྒན་མོ་ཅི་ཟེར། རྒན་མོ་དེས་སྨྲས་པ། ཅང་མི་ཟེར་རོ། །དེ་དག་གིས་དེ་བཟུང་སྟེ་བསྡིགས་ནས་དེ་སུས་བསད་སྨྲོས་ཤིག་ཅེས་བྱས་པ་དང ། དེས་སྨྲས་པ། བྲམ་ཟེའི་བུ་མོ་འདིས་གསོད་དུ་བཅུག་གོ། །ཆོམ་རྐུན་པའི་དམག་དཔོན་འདིས་བསད་དོ། །དེ་དག་གིས་ཀྱང་བསྡིགས་ཏེ་ཅི་དེ་གཉིས་ཁོ་ནར་ཟད་དམ་ཞེས་སྨྲས་པ་དང ། དེས་སྨྲས་པ། གཞན་ཡང་གཡོན་ཅན་ལྔ་བརྒྱ་ཡོད
8.67b
དོ། །རྒྱལ་པོའི་མི་དེ་དག་གིས་བྲམ་ཟེའི་བུ་མོ་དེ་དང་ཆོམ་རྐུན་པའི་དམག་དཔོན་དེ་དང ། གཡོན་ཅན་ལྔ་བརྒྱ་པོ་དེ་དག་བཟུང་སྟེ་རྒྱལ་པོ་ལ་ཕུལ་ནས་སྨྲས་པ། ལྷ་འཕགས་པ་འཆར་ཀ་ནི་བྲམ་ཟེའི་བུ་མོ་འདིས་འགུམས་སུ་སྩལ་ཏེ། ཆོམ་རྐུན་པའི་དམག་དཔོན་འདིས་བཀུམ་མོ། །གཡོན་ཅན་ལྔ་བརྒྱ་པོ་འདི་དག་གི་དམག་དཔོན་ནི་འདི་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེང་ལ་བྲམ་ཟེའི་བུ་མོ་འདི་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག་།ཆོམ་རྐུན་པའི་དམག་དཔོན་འདི་ནི་རྒྱ་སྐྱེགས་ཀྱི་ཁང་པར་ཆུག་ལ་སྲེགས་ཤིག་།གཡོན་ཅན་ལྔ་བརྒྱ་པོ་འདི་དག་ནི་ལག་པ་དང་རྐང་པ་དག་ཆོད་ཅིག་།དེ་དག་གིས་བྲམ་ཟེའི་བུ་མོ་དེ་ནི་རྟེའུ་དམུ་རྒོད་ཀྱི་རྐང་པ་གཉིས་ལ་བཏགས་སོ། །ཆོམ་རྐུན་པའི་དམག་དཔོན་དེ་ནི་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །གཡོན་ཅན་ལྔ་བརྒྱ་པོ་དེ་དག་ནི་ལག་པ་དང་རྐང་པ་དག་བཅད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན་དེའི་རྣམ་པར་སྨིན་པས་སྡང་བ་མ་མཆིས་པ་དང ། གནོད་པ་མ་བགྱིས་བཞིན་དུ་དེ་གཉིས་ཀྱིས་བཀུམ་པར་གྱུར་ཅིང་དེ་གཉིས་ཀྱང་བཀུམ་པར་གྱུར། གཡོན་ཅན་ལྔ་བརྒྱ་པོ་དག་ཀྱང་ལག་པ་དང་རྐང་པ་དག་བཀུམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས
8.68a
ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་བྱེད་དུ་བཅུག་པའི་ཚེ་ཉམ་ང་བ་དང་བཅས་པའི་དུས་བྱུང་བ་ན་མུ་སྟེགས་ཅན་དག་གིས་ལོ་བཅུ་གཉིས་སུ་ཐན་པ་འབྱུང་ངོ་ཞེས་ལུང་བསྟན་ནས། རྒྱལ་པོ་ཚངས་བྱིན་གྱིས་དྲིལ་བསྒྲག་པ་བྱེད་དུ་བཅུག་སྟེ། གང་ལ་ལོ་བཅུ་གཉིས་ཀྱི་ཟན་ཡོད་པ་དེ་ནི་འདུག་ཤིག་།གང་ལ་མེད་པ་དེ་ནི་སོང་ཤིག་ཅེས་བསྒོའོ། །དེའི་མདུན་ན་འདོན་དེ་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་བཀློག་ཏུ་འཛུད་པ་དེ་ལ་བྲམ་ཟེའི་ཁྱེའུ་དེ་དག་གིས་སྨྲས་པ། མཁན་པོ་བདག་ཅག་ལ་ལོ་བཅུ་གཉིས་ཀྱི་འཚལ་མ་མ་མཆིས་ཀྱིས་བདག་ཅག་མཆིའོ། །དེས་སྨྲས་པ། བུ་དག་འཁོད་ཅིག་དང་ཁོ་བོས་ཁྱེད་ལ་མཁོ་བ་བསྟབས་པར་བྱའོ། །རྒྱལ་པོ་ཚངས་བྱིན་གྱི་རྨི་ལམ་ན་བདག་གི་རྒྱུ་མ་དག་གིས་གྲོང་ཁྱེར་ཐམས་ཅད་དཀྲིས་པར་མཐོང་ངོ ། །མཐོང་ནས་ཀྱང་དེ་གཞི་འདིས་བདག་རྒྱལ་སྲིད་ལས་ཉམས་པ་འམ། ཚེའི་བར་ཆད་འབྱུང་བ་འམ་གཅིག་ཏུ་མི་འགྱུར་གྲང་སྙམ་དུ་འཇིགས་པ་སྐྱེས་པར་གྱུར་ནས་དེས་རྨི་ལམ་དེ་མདུན་ན་འདོན་དེ་ལ་བཟླས་པ་དང ། མདུན་ན་འདོན་དེས་བསམས་པ། ལྷས་རྨི་ལམ་བཟང་པོ་ཞིག་གཟིགས་མོད་ཀྱི་འོན་ཀྱང་བྲམ་ཟེའི་ཁྱེའུ་དག་གི་རྙེད་པའི་བར་ཆད་དུ་གྱུར་ན་མི་རུང་གིས་ངན་པར་བསྙད་པར་བྱའོ་སྙམ་ནས། དེས་རྒྱལ་པོ་ལ་སྨྲས་པ། ལྷས་རྨི་ལམ་ངན་པ་ཞིག་གཟིགས་པས་གཞི་འདིས་རྒྱལ་སྲིད་ལས་ཉམས་པ་འམ། སྐུ་ཚེའི་བར་ཆད་འབྱུང་བ་འམ་ཅིག་ཏུ་འགྱུར་རོ། །རྒྱལ་པོས་སྨྲས་པ། འདི་ལ་ཅི་ཞིག་བྱ། དེས་སྨྲས་པ། ལྷ་བ་ལང་གི་མཆོད་སྦྱིན་སྩལ་བར་བགྱིའོ། །རྒྱལ་པོས་སྨྲས་པ། དེ་ལྟར་བྱའོ། །དེས་བ་ལང་སྟོང་ཕྲག་དུ་མ་དག་བསོགས་པ་དང ། རྒྱལ་པོ་ཕྱིར་བྱུང་ནས་རྒྱལ་པོས་བ་ལང་དེ་དག་མཐོང་བ་དང་བ་ལང་དེ་དག་གིས་བ་ལང་གི་འུ་སྒྲ་ཆེན་པོ་ཕྱུང་ངོ ། །རྒྱལ་པོས་དེ་དག་མཐོང་ཞིང་ཐོས་ནས་དེ་སྙིང་རྗེ་སྐྱེས་ཏེ་མདུན་ན་འདོན་ལ་སྨྲས་པ། འདི་དག་ཐམས་ཅད་གསད་པར་བྱ་འམ། མདུན་ན་འདོན་གྱིས་བསམས་པ། རྒྱལ་པོ་འདི་དག་ཐམས་ཅད་བསད་པར་མི་འདོད་དོ་སྙམ་ནས་དེས་སྨྲས
8.68b
པ། ལྷ་ཐམས་ཅད་དགུམ་པར་མི་བགྱིའོ། །དེའི་ཚེ་ན་རྔ་བྲན་ཞིག་རྔ་བྲན་མོ་ཞིག་ལ་རྒྱབ་རྒལ་བྱེད་ནས་མདུན་ན་འདོན་གྱིས་སྨྲས་པ། ལྷ་རྔ་བྲན་དང་རྔ་བྲན་མོ་འདི་གཉིས་དགུམ་པར་བགྱིའོ། །བྲམ་ཟེའི་ཁྱེའུ་དེ་དག་གིས་ཀྱང་ལག་པ་བརྐྱང་སྟེ་འདི་གཉིས་ལགས་སོ་ཞེས་བསྟན་ནས་དེ་གཉིས་བཤས་པ་ན་སེམས་གཡོས་པ། བདག་ཅག་གཉིས་སྡང་བ་མེད་པ་དང ། གནོད་པ་མ་བྱས་བཞིན་དུ་བསད་པ་གང་ཡིན་པ་དེ་ཐམས་ཅད་ནི་མདུན་ན་འདོན་འདི་དང་བྲམ་ཟེའི་བུ་ལྔ་བརྒྱ་པོ་འདི་དག་གི་ལེ་ལན་ཡིན་གྱིས་བདག་ཅག་གཉིས་གང་དང་གང་དུ་སྐྱེས་པ་ན་བདག་ཅག་གཉིས་ཀྱིས་མདུན་ན་འདོན་འདི་སྡང་བ་མེད་པ་དང་གནོད་པ་མ་བྱས་བཞིན་དུ་གསོད་པ་དང ། བྲམ་ཟེའི་ཁྱེའུ་ལྔ་བརྒྱ་པོ་འདི་དག་ཀྱང་ལག་པ་དང་རྐང་པ་དག་གཅོད་དུ་འཛུད་པར་གྱུར་ཅིག་ཅེས་སྙམ་དུ་དམ་བཅས་སོ། །དགེ་སློང་དག་དེའི་ཚེ་དེའི་དུས་ན་རྒྱལ་པོ་ཚངས་བྱིན་གང་ཡིན་པ་དེ་ནི་ད་ལྟར་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡིན་ནོ། །དེའི་ཚེ་དེའི་དུས་ན་རྒྱལ་པོ་ཚངས་བྱིན་གྱི་བཙུན་མོ་གང་ཡིན་པ་དེ་ནི་ད་ལྟར་བཙུན་མོ་ཕྲེང་ལྡན་མ་ཡིན་ནོ། །དེའི་ཚེ་དེའི་དུས་ན་མདུན་ན་འདོན་གང་ཡིན་པ་དེ་ནི་ད་ལྟར་དགེ་སློང་འཆར་ཀ་ཡིན་ནོ། །དེའི་ཚེ་དེའི་དུས་ན་བྲམ་ཟེའི་ཁྱེའུ་ལྔ་བརྒྱ་པོ་གང་དག་ཡིན་པ་དེ་དག་ནི་ད་ལྟར་གཡོན་ཅན་ལྔ་བརྒྱ་པོ་དག་ཡིན་ནོ། །དེའི་ཚེ་དེའི་དུས་ན་རྔ་བྲན་གང་ཡིན་པ་དེ་ནི་ད་ལྟར་ཆོམ་རྐུན་པའི་དམག་དཔོན་ཡིན་ནོ། །དེའི་ཚེ་དེའི་དུས་ན་རྔ་བྲན་མོ་གང་ཡིན་པ་དེ་ནི་ད་ལྟར་བྲམ་ཟེའི་བུ་མོ་ཡིན་ཏེ། མདུན་ན་འདོན་དེ་དང་བྲམ་ཟེའི་ཁྱེའུ་ལྔ་བརྒྱ་པོ་དེ་དག་གིས་རྔ་བྲན་དང ། རྔ་བྲན་མོ་དེ་གཉིས་སྡང་བ་མེད་པ་དང ། གནོད་པ་མ་བྱས་བཞིན་དུ་གསོད་དུ་བཅུག་པའི་ལས་དེའི་རྣམ་པར་སྨིན་པས་ད་ལྟར་ཡང་ཆོམ་རྐུན་པའི་དམག་དཔོན་འདི་དང ། བྲམ་ཟེའི་བུ་མོ་འདི་གཉིས་ཀྱིས་འཆར་ཀ་དང ། གཡོན་ཅན་ལྔ་བརྒྱ་པོ་དག་སྡང་བ་མེད་པ་དང ། གནོད་པ་མ་བྱས་བཞིན་དུ་གསོད་དུ་བཅུག་གོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ་ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས།
8.69a
ལས་ཅི་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་མཚོན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་འཆར་ཀ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ་འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་འཆར་ཀ་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་འཇིག་རྟེན་དུ་བྱུང་ངོ ། །ཇི་ཙམ་ན་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དགས་དང ། བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང ། བྱ་མང་པོ་དག་དྲུངས་དབྱུང་བའི་ཕྱིར་དང ། ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང ། སྙི་དང་རྙོང་མང་པོ་དག་འཛུགས་པར་བྱེད་དོ། །དེའི་རྔོན་སྤྱད་དང ། སྙི་དང་རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཤིག་ལྗོངས་རྒྱུ་ཞིང་སོང་བ་ན་རི་བྲགས
8.69b
དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས་རི་བྲགས་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས། དེ་རི་བྲགས་ནས་བྱུང་སྟེ་འདི་ནི་ཞི་བའོ་འདི་ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས་ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ་ལག་པ་གཉིས་བསྙལ་ནས་ཁ་བཀྲུས་ཏེ་ལྷུང་བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས་རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང་དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ནས་རྔོན་པ་དེ་ནང་པར་སྔར་ལངས་ཏེ་མཚེའུ་དེ་ག་ལ་བ་དེར་སོང་ནས་དེས་རྔོན་སྤྱད་དང ། སྙི་དང ། རྙོང་དེ་དག་བྱུལ་བར་བརྩམས་པ་དང ། རི་དགས་གཅིག་ཀྱང་མ་མཐོང་ནས་དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང་སྙི་དང་རྙོང་འདི་དག་དོན་ཡོད་པ་ཡིན་ན། གང་གི་ཕྱིར་དེར་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང ། མིའི་རྗེས་མཐོང་ནས་དེ་རྗེས་དེའི་ཕྱི་བཞིན་དུ་སོང་བ་དང ། རང་སངས་རྒྱས་སྤྱོད་ལམ་ཞི་བས་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས། གལ་ཏེ་བདག་གིས་འདིའི་སྲོག་བཅད་པར་མ་བྱས་ན་འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས་རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས་སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི
8.70a
དབྱིབས་འདྲ་བར་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་ཏུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང་ཉམས་པར་གྱུར་ན་མི་རུང་གིས་ད་འདི་ལ་ལག་ནས་དྲང་བ་ཞིག་བྱའོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ། རྨ་ལྷན་གྱིས་ཀླན་ནས་སྨྲས་པ། འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པས་ཀླན་པར་མཛད་ན། དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས་དེའི་ཕྱིར་ད་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ་ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས། དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་རྒྱལ་མཚན་དང ། བ་དན་དག་བསྒྲེང
8.70b
ཞིང་དྲི་དང ། ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། སིལ་སྙན་དག་གིས་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་འཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྔོན་པ་གང་ཡིན་པ་དེ་ནི་འཆར་ཀ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱིས་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས་ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མཚེའུ་འགྲམ་དེ་ཉིད་དུ་རི་དགས་སུ་སྐྱེས་ཤིང་མཚོན་གྱིས་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་དེ་མཚོན་གྱིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན་ལས་དེའི་རྣམ་པར་སྨིན་པས་འདི་དུས་ལ་བབ་པའི་ལུས་ཕྱག་དར་གྱི་ཕུང་པོར་སྦས་པ་དང ། འདིས་སྟོན་པ་མཉེས་པར་བགྱིས་ཤིང་ཐུགས་བྱུང་བར་མ་བགྱིས་པ་དང ། འདི་དུས་ལ་བབ་པའི་ལུས་ལ་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང ། རྒྱལ་པོའི་བཙུན་མོ་འཁོར་དང་བཅས་པས་ལུས་ཀྱི་མཆོད་པ་བགྱིས་པ་དེ་ལྟ་བུའི་ཡོན་ཏན་གྱི་ཚོགས་ཐོབ་པར་འགྱུར། དགེ་སློང་དག་འཆར་ཀ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ་འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་འཆར་ཀ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ་
8.71a
ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ་བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །གངས་ཀྱི་སུལ་ཞིག་ན་རང་སངས་རྒྱས་ལྔ་བརྒྱ་གནས་ཏེ། དེ་ན་རང་སངས་རྒྱས་གཅིག་ཅིག་ན་བར་གྱུར་ནས་གཞན་དག་གིས་དེ་ལ་སྨྲས་པ། ཁྱོད་བཞུད་ལ་སྨན་པ་ལ་རྨོས་ཏེ་ཆོ་ག་མཛོད་ཅིག་།དེ་རི་བྲགས་གཞན་ཞིག་ཏུ་སོང་ནས་མཚན་མོ་རྫ་མཁན་གྱི་ར་བ་ཞིག་ཏུ་གནས་པར་ཁས་བླངས་པ་དང ། དེ་མཚན་མོ་ན་བར་གྱུར་ནས་དུས་ལ་བབ་བོ། །རྫ་མཁན་དེས་དེ་མཐོང་ནས་དེས་བསམས་པ། རབ་ཏུ་བྱུང་བ་འདི་རྫ་སོ་བཏང་བ་དང་མ་བཏང་བ་དག་གི་ནང་དུ་དུས་ལ་བབ་པས་འཇིག་རྟེན་ནི་གཙང་སྦྲ་འདོད་པ་ཡིན་པས་གལ་ཏེ་སྐྱེ་བོ་དག་གིས་ཚོར་བར་གྱུར་ན་འགའ་ཡང་སྣོད་ཉོ་བར་མི་འགྱུར་རོ་སྙམ་ནས་དེས་རང་སངས་རྒྱས་ཀྱི་ལུས་དེ་ཕྱག་དར་གྱི་ཕུང་པོ་ཞིག་ཏུ་སྦས་ཏེ་བཞག་གོ། །རང་སངས་རྒྱས་གཞན་དག་གིས་བསམས་པ། བདག་ཅག་གི་ཚངས་པ་མཚུངས་པར་སྤྱོད་པ་དེ་གར་སོང་སྙམ་ནས་བལྟས་པ་དང ། ཇི་ཙམ་ན་ཡོངས་སུ་མྱ་ངན་ལས་འདས་པར་མཐོང་ནས་དེ་དག་གིས་དེ་ཉིད་ནས་སྤོས་ཀྱི་ཤིང་དག་སྟེང་གི་ནམ་མཁའ་ལས་ཁྱེར་ཏེ་འོངས་ནས་རྫ་མཁན་གྱི་ར་བར་བབས་པ་དང ། རྫ་མཁན་གྱིས་དེ་དག་མཐོང་ནས་དེས་སྨྲས་པ། འཕགས་པ་དག་གར་གཤེགས། དེ་དག་གིས་སྨྲས་པ། ཚངས་པ་མཚུངས་པར་སྤྱོད་པ་ལ་མཆོད་པ་བྱེད་དུའོ། །རྫ་མཁན་གྱིས་སྨྲས་པ། འདིས་ཀྱང་ཁྱོད་ཀྱི་ཡོན་ཏན་གྱི་ཚོགས་ལྟ་བུ་དག་ཐོབ་བམ། དེ་དག་གིས་སྨྲས་པ། ཐོབ་བོ། །རྫ་མཁན་གྱིས་སྨྲས་པ།
8.71b
བདག་གིས་འདི་ལ་བཀུར་སྟི་མ་ལགས་པ་བགྱིས་པས་ད་བཀུར་སྟི་བགྱི་བའི་བར་དུ་ཡུད་ཙམ་ཞིག་གཞེས་སུ་གསོལ། དེ་སོང་སྟེ་རྒྱལ་པོ་ལ་སྨྲས་པ། ལྷ་བདག་གི་ར་བར་རབ་ཏུ་བྱུང་བ་བརྟུལ་ཞུགས་གྲུབ་པ་ཞིག་དུས་ལ་བབ་ཀྱིས་ལྷས་དེ་ལ་བཀུར་སྟི་མཛད་དུ་གསོལ། རྒྱལ་པོ་བཙུན་མོའི་འཁོར་དང་བཅས་པ་ཕྱིར་བྱུང་ནས་དེས་རང་སངས་རྒྱས་ཀྱི་ལུས་དེ་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ་རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་རྒྱལ་མཚན་དང ། བ་དན་བསྒྲེང་ཞིང་དྲི་དང ། ཕྲེང་བ་རྒྱུ་དང་བདུག་སྤོས་དང ། ཕྱེ་མ་དང ། སིལ་སྙན་དག་གིས་མཆོད་པ་བྱས་སོ། །རྫ་མཁན་དེས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་འཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་བྱེད་པར་མི་འགྱུར་བ་དང ། བདག་དུས་ལ་བབ་པའི་ལུས་ལ་ཡང་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང ། རྒྱལ་པོའི་བཙུན་མོའི་འཁོར་དང་བཅས་པ་མཆོད་པ་མཛད་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་རྫ་མཁན་གང་ཡིན་པ་དེ་ནི་ད་ལྟར་དགེ་སློང་འཆར་ཀ་འདི་ཡིན་ཏེ། འདིས་དེའི་ཚེ་རང་སངས་རྒྱས་དེ་དུས་ལ་བབ་པའི་ལུས་དེ་ཕྱག་དར་གྱི་ཕུང་པོར་སྦས་པའི་ལས་དེའི་རྣམ་པར་སྨིན་པས་ནི་ད་ལྟར་འདི་དུས་ལ་བབ་པའི་ལུས་ཕྱག་དར་གྱི་ཕུང་པོར་སྦས་སོ། །འདིས་དེའི་ཚེ་རང་སངས་རྒྱས་ཀྱི་ལུས་དེ་ལ་མཆོད་པ་བྱས་ཏེ་སྨོན་ལམ་དེ་སྐད་བཏབ་པའི་ལས་དེའི་རྣམ་པར་སྨིན་པས་ནི་ད་ལྟར་འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་ཏེ་འདི་དུས་ལ་བབ་པའི་ལུས་ལ་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང ། རྒྱལ་པོའི་བཙུན་མོ་འཁོར་དང་བཅས་པས་ལུས་ཀྱི་མཆོད་པ་བྱས
8.72a
པར་གྱུར་ཏོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ཁྱིམ་དད་པར་བགྱིད་པ་རྣམས་ཀྱི་མཆོག་ཏུ་བསྟན། དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ཀྱང་ཡོན་ཏན་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས
8.72b
ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང ། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དུས་མ་ཡིན་པར་འགྲོ་བའི་ལྟུང་བྱེད་དེ་བརྒྱད་བཅུ་པ་རྫོགས་སྷོ།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་བརྒྱད་པ། སྡོམ་ལ། ཟས་བཅས་སྐྱ་རེང་ད་གདོད་དང ། །ཁབ་རལ་དང་ནི་ཁྲི་རྐང་དང ། །བདལ་དང་གདིང་བ་གཡན་པ་དང ། །རས་ཆེན་བདེ་གཤེགས་ཆོས་གོས་སོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེའི་ཁྱིམ་དུ་ཉེ་དགའ་དུས་དང་དུས་སུ་འགྲོ་ཞིང་དེས་དེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་གོ། །དུས་གཞན་ཞིག་ན་དེས་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གི་བསྔགས་པ་རྒྱ་ཆེར་བརྗོད་པ་དང ། དེས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་ཅུང་ཟད་བགྱིའོ། །ཉེ་དགས་སྨྲས་པ། ལེགས་ཀྱིས་དེ་བཞིན་གྱིས་ཤིག་ཅི་ཞིག་བྱེད། སངས་རྒྱས་ལ་སོགས་པ་དགེ་སློང་གི
8.73a
དགེ་འདུན་གདུགས་ཚོད་གསོལ་ལོ། །ཁྱིམ་བདག་ཁྱོད་ཀྱིས་སེམས་རྒྱ་ཆེན་པོ་བསྐྱེད་ཀྱིས་གདུགས་ཚོད་གསོལ་ཅིག་།འཕགས་པ་ཁྱོད་ཀྱིས་བདག་གི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་བདག་གི་སྡུམ་པར་གདུགས་ཚོད་ལ་སྤྱན་དྲང་བའི་རིགས་སོ། །དེས་དང་དུ་བླངས་སོ། །དེ་ནས་ཚེ་དང་ལྡན་པ་ཉེ་དགས་ཁྱིམ་བདག་དེ་ལ་ཨ་རོག་ཁྱ་ཞེས་བྱས་ཏེ་སོང་ནས་དེ་གཙུག་ལག་ཁང་དུ་སོང་སྟེ། དེས་ཁྱིམ་བདག་དེའི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཉེ་དགས་ཁྱིམ་བདག་དེ་མ་དད་པ་ཡིན་ན་ཁྱོད་ཀྱིས་ཇི་ལྟར་རྗེས་སུ་འཇུག་པར་བྱས། ཉེ་དགས་སྨྲས་པ། ཚེ་དང་ལྡན་པ་དག་ཉེ་དགའ་ལ་དེ་ཙམ་ཡང་མི་གནས་སམ། རྗེས་སུ་འཇུག་པར་བྱས་པ་འབའ་ཞིག་ཏུ་མ་ཟད་ཀྱི་སྐྱབས་སུ་འགྲོ་བ་དང ། བསླབ་པའི་གཞི་དག་ལ་ཡང་བཞག་གོ། །དགེ་སློང་རྣམས་ཀྱིས་སྨྲས་པ། ལེགས་པར་བྱས་ཀྱིས་འདོང་ལ་བཟའ་བར་བྱའོ། །ཆོས་ཉིད་ཀྱིས་ན་གང་གི་ངོར་དགེ་སློང་གི་དགེ་འདུན་སྤྱན་དྲངས་པ་དེ་དུས་སྔར་འགྲོ་བ་ཡིན་པས་ཚེ་དང་ལྡན་པ་ཉེ་དགའ་དུས་སྔར་དེར་སོང་ནས་དེས་ཁྱིམ་བདག་དེ་ལ་སྨྲས་པ། ཁྱིམ་བདག་ཁོ་བོ་ཁྱིམ་དུ་འགྲོ་བའི་ཁྱིམ་དག་ལྟའི་བར་དུ་ཁྱོད་རེ་ཤིག་ཞལ་ཟས་སྟ་གོན་གྱིས་ཤིག་།ཁོ་བོ་མ་འོངས་ཀྱི་བར་དུ་ཡང་ཁྱོད་ཀྱིས་རེ་ཤིག་བྲིམ་པར་མི་བྱའོ་ཞེས་སྨྲས་ཏེ་སོང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱིམ་བདག་དེ་རྒྱུས་མི་ཤེས་པ་ཡིན་པས་དེས་སྤྱན་འདྲེན་གཏོང་བར་མི་བྱེད་ཀྱིས་དུས་སྔར་ཤེག་ཤིག་དང་འདོང་ངོ་ཞེས་སྒོ་ཞིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་བསྒོ་བ་དང ། དགེ་སློང་རྣམས་ཆས་ཏེ་ལྷགས་སོ། །དེ་ནས་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་དེའི་ཁྱིམ་ག་ལ་བ
8.73b
དེར་གཤེགས་ཏེ་སྒོ་དྲུང་ན་གཞེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཁྱིམ་བདག་དེ་ལ་སངས་རྒྱས་ལ་སོགས་པ་དགེ་སློང་གི་དགེ་འདུན་སྒོ་དྲུང་ན་གཞེས་ཀྱིས་ཅི་བདེ་གྱིས་ཤིག་ཅེས་སྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ནང་དུ་སོང་སྟེ། ཁྱིམ་བདག་དེ་ལ་ཁྱིམ་བདག་སངས་རྒྱས་ལ་སོགས་པ་དགེ་སློང་གི་དགེ་འདུན་སྒོ་དྲུང་ན་གཞེས་ཀྱིས་ཅི་བདེ་གྱིས་ཤིག་།ཁྱིམ་བདག་གིས་སྨྲས་པ། འཕགས་པ་བདག་གིས་ཁྱེད་ཅག་གི་ཅི་བདེ་ཅི་ལགས་ནི་མ་འཚལ་གྱི། འདི་ལྟར་ཁྱེད་ཅག་ཁོ་ནའི་སླད་དུ་གདན་དག་བཤམས་ཀྱིས་བཞུགས་སུ་གསོལ། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཁྱིམ་བདག་དེའི་མཆིད་ནས་བདག་གིས་ཁྱེད་ཅག་གི་ཅི་བདེ་ཅི་ལགས་ནི་མ་འཚལ་གྱི། འདི་ལྟར་ཁྱེད་ཅག་ཁོ་ནའི་སླད་དུ་གདན་བཤམས་ཀྱིས་བཞུགས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་སྐད་ཟེར་ན་ཁྱེད་ཅག་ཁོ་ནའི་ཕྱིར་སྟན་དག་བཤམས་པས་ཅི་བདེ་བྱས་པར་བརྗོད་པར་བྱ་སྟེ། འདུག་པར་བྱ་ཞིང་འདི་ལ་འགྱོད་པར་མི་བྱའོ། །སངས་རྒྱས་ལ་སོགས་པ་དགེ་སློང་གི་དགེ་འདུན་བཞུགས་པ་དང་ཇི་ཙམ་ན་གདུགས་ཚོད་ལ་བབ་ཏུ་ཉེ་བས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཁྱིམ་བདག་ལ་གདུགས་ཚོད་ལ་བབ་ཏུ་ཉེ་བས་ཞལ་ཟས་བྲིམས་ཤིག་།ཟས་འདིས་ཁྱོད་ལ་ཅི་ཞིག་བྱ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་བསྒོ་བ་དང ། དེས་སྨྲས་པ། འཕགས་པ་ཉེ་དགའ་མཆིས་སམ། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མ་འོངས་སོ། །དེས་སྨྲས་པ། འཕགས་པ་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་ཁྱིམ་བདག་དེའི་མཆིད་ནས་ཉེ་དགའ་མཆིས་སམ་ཞེས་མཆི་ནས
8.74a
བདག་གིས་མ་མཆིས་སོ་ཞེས་བགྱིས་པ་དང ། དེའི་མཆིད་ནས་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་ཡུད་ཙམ་ཞིག་གཞེས་ནས་ཡང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཁྱིམ་བདག་ལ་གདུགས་ཚོད་ལ་བབ་ཀྱིས་ཞལ་ཟས་བྲིམས་ཤིག་།ཟས་རུལ་བར་གྱུར་པ་འདིས་ཁྱོད་ལ་ཅི་བྱ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་བསྒོ་བ་དང ། དེས་སྨྲས་པ། འཕགས་པ་ཉེ་དགའ་མཆིས་སམ། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མ་འོངས་སོ། །དེས་སྨྲས་པ། འཕགས་པ་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་ཁྱིམ་བདག་དེའི་མཆིད་ནས་ཉེ་དགའ་མཆིས་སམ་ཞེས་མཆིས་ནས། བདག་གིས་མ་མཆིས་སོ་ཞེས་བགྱིས་པ་དང ། དེའི་མཆིད་ནས་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་སོང་ལ་ཁྱིམ་བདག་ལ་ཉེ་དགའ་འོངས་པར་མ་གྱུར་ན་ཟན་སྦྱིན་པར་མི་བྱེད་དམ་ཞེས་གྱིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་དེ་སྐད་སྨྲས་པ་དང ། དེས་སྨྲས་པ། འཕགས་པ་མི་གསོལ་ལོ། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་མི་གསོལ་ལོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་བཀའ་སྩལ་པ། གཞན་དབང་ཐམས་ཅད་སྡུག་བསྔལ་ཏེ། །བདག་དབང་ཐམས་ཅད་བདེ་བ་ཡིན། །ཐུན་མོང་དག་གིས་གནོད་བྱེད་དེ། །འབྲེལ་པ་ཤིན་ཏུ་འདའ་བར་དཀའ། །ཇི་ཙམ་ན་གདུགས་ཚོད་ཀྱི་མཐའ་ལ་བབ་པ་ན་ཉེ་དགའ་འོངས་ནས་དེས་སྨྲས་པ། ཁྱིམ་བདག་མི་འབྲིམ་པར་ཅི་སྡོད། དེས་སྨྲས་པ། འཕགས་པ་ཁྱོད་ཀྱི་ཞལ་ནས་ཁོ་བོ་མ་འོངས་ཀྱི་བར་དུ་རེ་ཤིག་བྲིམ་པར་མི་བྱའོ་ཞེས་བྱུང་ལ་ད་འདི་སྐད་ཅེས་གསུང་ངམ། ཉེ་དགའ་ཤགས
8.74b
མེད་ནས་ཅང་མི་སྨྲ་བར་འདུག་གོ། །དེ་ནས་ཁྱིམ་བདག་དེས་བྲིམ་པར་བརྩམས་པ་དང ། ཇི་ཙམ་ན་གདུགས་ཚོད་ཡོལ་ནས་དགེ་སློང་ཁ་ཅིག་གིས་ནི་ཟན་ཐོབ་ནས་ཟན་བཅད་པ་བྱས། ཁ་ཅིག་གིས་ནི་ཟན་མ་ཐོབ་པ་ཁོ་ནར་ཟན་བཅད་པ་བྱས་ནས་བཅོམ་ལྡན་འདས་ཀྱིས་ཡོན་བཤད་པ་མཛད་དེ་གཤེགས་སོ། །ཉེ་དགའ་ངོ་ཚ་བར་གྱུར་པའི་སྙིང་གིས་དེ་ཉིད་དུ་འདུག་གོ། །དེའི་ཉིན་མོ་གསོ་སྦྱོང་གི་ཞལ་ཏ་པ་རྒན་པའི་མཐའ་ལོགས་སུ་འདུག་སྟེ། དགེ་སློང་རྣམས་ལ་ཡང་དག་པར་བསྒོ་ཞིང་སྨྲས་པ། བཙུན་པ་ཉེ་དགའ་མ་མཆིས་སམ། འགའ་ཞིག་གིས་དེའི་འདུན་པ་བླངས་སམ། དགེ་སློང་རྣམས་ཀྱིས་སྨྲས་པ། དེ་མ་འོངས་ཏེ་སུས་ཀྱང་དེའི་འདུན་པ་ཡང་མ་བླངས་སོ། །དགེ་སློང་གཞན་དག་གིས་སྨྲས་པ། ཚེ་དང་ལྡན་པ་དག་ཉེ་དགས་བདག་ཅག་སྔ་དྲོ་ཟང་ཟིང་གི་ཆེད་ལ་ཆེས་ཐོ་བཙམས་ལ། ད་ནི་ཆོས་ཀྱི་ཆེད་ལ་ཐོ་འཚམ་པར་བྱེད་དོ། །དགེ་སློང་དོན་ཆུང་ངུ་དག་ཅིའི་ཕྱིར་དགེ་སློང་དག་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང ། ཕྱི་དྲོ་ཁྱིམ་དག་ཏུ་རྒྱུ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང ། ཕྱི་དྲོ་ཁྱིམ་དག་ཏུ་རྒྱུ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག
8.75a
པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང ། ཕྱི་དྲོ་ཁྱིམ་དག་ཏུ་རྒྱུ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ནད་ངན་ཅན་དག་འཁོད་པ་དག་གིས་ཡུན་རིང་དུ་འདུག་མི་ནུས་ནས་དགེ་སློང་ནད་གཡོག་རྣམས་ཀྱིས་ནད་པའི་བྱ་བ་ཉམས་པར་བྱེད་ཅིང ། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་འདུག་པ་ལ་བསྒོ་བར་བྱའོ། །བཅོམ་ལྡན་འདས་ཀྱིས་ཁྱིམ་པ་འདུག་པ་ལ་བསྒོ་བར་བྱའོ། །ཞེས་བཀའ་སྩལ་ནས། དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས་ཇི་ཙམ་ན་དེར་མེ་ཤོར་ནས། དགེ་སློང་དེས་དེར་འགྲོ་བར་བརྩམས་ཏེ། དེ་ལམ་གྱི་ཕྱེད་དུ་སོན་པ་དང ། བདག་གིས་ཁྱིམ་པ་འདུག་པ་ལ་མ་བསྒོའོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ། ཇི་སྲིད་དུ་ཁྱིམ་པ་འདུག་པ་ལ་བསྒོ་བར་བྱེད་པ་དེ་སྲིད་དུ་དེའི་ལྷུང་བཟེད་དང ། ཆོས་གོས་ཚིག་ནས་དེ་དེར་སོང་བ་དང་ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི། གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ། །ཞེས་ཟེར་ཞིང་དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ
8.75b
ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་ཕྱི་དྲོ་ཁྱིམ་དག་ཏུ་རྒྱུ་ཞིང་ཁྱིམ་པ་འདུག་པ་ལ་མི་སྒོ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །ཟས་དང་བཅས་པའི་ཞེས་བྱ་བ་ནི་མགྲོན་དུ་བོས་པ་དང་བཅས་པའི་འོ། །ཁྱིམ་དུ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་དུའོ། །མགྲོན་དུ་བོས་ནས་ཤེས་བྱ་བ་ནི་བསོད་སྙོམས་ཀྱི་ཕྱིར་རོ། །སྔ་དྲོ་ཞེས་བྱ་བ་ནི་སྔ་དྲོ་ཉིད་དེ་ཁྱིམ་གཉིས་ལས་ལྷག་པར་རྒྱུ་ནའོ། །ཕྱི་དྲོ་ཞེས་བྱ་བ་ནི་ཕྱི་དྲོ་ཉིད་དེ་ཁྱིམ་གསུམ་ལས་ལྷག་པར་རྒྱུ་ནའོ། །ཁྱིམ་དག་ཏུ་ཞེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་དག་ཏུའོ། །རྒྱུ་ཞིང་ཞེས་བྱ་བ་ནི་འགྲོ་ཞིང་ངོ ། །ཁྱིམ་པ་འདུག་པ་ལ་མི་སྒོ་ན་ཞེས་བྱ་བ་ནི་དེ་ན་ཁྱིམ་པ་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང་ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན། དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཇི་ཙམ་ཅུང་ཟད་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་ཁྱིམ་གཉིས་ལས་ལྷག་པར་རྒྱུ་ཞིང་ཕྱི་དྲོ་ཡང་ཁྱིམ་གསུམ་ལས་ལྷག་པར་རྒྱུ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེའི་ངོར་མགྲོན་དུ་བོས་པ་མ་ཡིན་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང་སེམས་འཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གྲོང་རྒྱུ་བའི་ལྟུང་བྱེད་དེ་བརྒྱད་བཅུ་རྩ་གཅིག་པ་རྫོགས་སྷོ།། ་་་་་་་་་།།
8.76a
སྒོ་གཏན་གྱི་བསླབ་པའི་གཞིའི་བར་སྡོམ་ལ། དགའ་བོ་ཉེ་དགའ་ཞག་བདུན་དང ། །བཟང་བྱིན་སྡུམས་བྱེད་ཚུལ་ཁྲིམས་དང ། །ནག་པོ་ཚིགས་བཅད་འཆར་ཀ་དང ། །བཅུ་དང་བསླབ་གཞིའི་རིམ་པ་དང ། །གྲོང་ཁྱེར་གཉིས་དང་གཡུལ་གཞི་དང ། །ལྷ་མོ་ཁར་ཕོར་འཕྱང་བ་དང ། །སྔོ་བསངས་རྒྱལ་སྲིད་པོག་ཀ་ན། །མ་ལ་ཁར་བ་བྱིན་པ་དང ། །ལྷམ་གྱི་དབང་ཕྱུག་མཉན་ཡོད་དང ། །སྔོན་གྱི་ཚུལ་དང་ནོར་བཟངས་དང ། །དྲང་སྲོང་རྣམས་དང་གཙུག་ལག་ཁང ། །མགུ་བྱེད་དང་ནི་གཟུངས་བྱེད་དང ། །སྟོང་ཐུབ་དང་ནི་འབྲོག་གནས་དང ། །ལག་བརྒྱུད་དང་ནི་སྔོ་བསངས་ཅན། །མི་གདུང་རྣམས་སུ་སྐྱེས་པ་དང ། །དཔའ་ཆེན་དང་ནི་སྒུར་མཆོག་དང ། །དཔེ་མེད་མ་དང་ལྕགས་མགར་དང ། །སིང་ག་ལ་དང་ཤར་པ་དང ། །སྙན་སྨྲ་དང་ནི་ཚིག་པ་དང ། །སྒུར་དང་ཐོས་པ་འཛིན་པ་དང ། །བྲན་མོ་དང་ནི་བྲམ་ཟེ་མོ། །མགུ་བྱེད་དཔལ་ལྡན་གྱུར་པ་དང ། །ཤཱ་རིའི་བུ་ནི་ཞུགས་པ་དག་།སྒོ་གཏན་ཡང་དག་བསྡུས་པ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགོན་པ་དང་ཤིང་དྲུང་དང ། ཁྱིམ་གྱིས་སྟོང་པ་དང ། རི་སུལ་དང ། རི་ཕུག་དང་རྩཝ་སྤྱིལ་དང ། བླ་གབ་མེད་པ་དང ། དུར་ཁྲོད་དང ། ནགས་ཁྲོད་དང ། རི་དྲུང་དང ། བས་མཐའི་གནས་མལ་འདི་དག་ཏུ་བསམ་གཏན་གྱིས་ཤིག་།དགེ་སློང་དག་བག་ཡོད་པར་བསྒྲུབས་ལ་ཕྱིས་འགྱོད་པར་མི་འགྱུར་བར་གྱིས་ཤིག་།འདི་ནི་ངའི་གདམ་ངག་དང་རྗེས་སུ་བསྟན་པ་ཡིན་ནོ། །བཅོམ་ལྡན་འདས་ཀྱིས་དགེ་སློང་རྣམས་ལ་དེ་སྐད་ཅེས་བཀའ་སྩལ་ནས། དགེ་སློང་རྣམས་དགོན་པ་དང ། ཤིང་དྲུང་དང ། ཁྱིམ་གྱིས་སྟོང་པ་དང ། རི་སུལ་དང་རི་ཕུག་དང ། རྩཝ་སྤྱིལ་དང ། བླ་གབ་མེད་པ་དང ། དུར་ཁྲོད་དང ། ནགས་ཁྲོད་དང ། རི་དྲུང་དང ། བས་མཐའི་གནས་མལ་དག་ཏུ་ཞུགས་ཏེ། ཁ་ཅིག་ནི་རི་རབ་ཀྱི་བང་རིམ་ན་བསམ་གཏན་བྱེད། ཁ་ཅིག་ནི་གསེར་གྱི་རི་བདུན་པོ་དག་ལ། ཁ་ཅིག་ནི་མཚོ་ཆེན་པོ་མ་དྲོས་པ་ན། ཁ་ཅིག་ནི་རྫིང་བུ་དལ་གྱིས
8.76b
འབབ་པ་ན། ཁ་ཅིག་ནི་རྣལ་འབྱོར་པའི་སྐྱེ་བོ་དང་རྗེས་སུ་མཐུན་པའི་གྲོང་དང ། གྲོང་རྡལ་དང ། ཡུལ་དང་ཡུལ་འཁོར་དང ། རྒྱལ་པོའི་ཕོ་བྲང་གི་ཕྱོགས་དེ་དང་དེ་དག་ན་བསམ་གཏན་བྱེད་དོ། །རིའི་རྒྱལ་པོ་རི་རབ་དཔག་ཚད་བརྒྱད་ཁྲི་ནི་ཆུའི་ནང་དུ་ནུབ། དཔག་ཚད་བརྒྱད་ཁྲི་ནི་ཆུ་ལས་མངོན་པར་འཕགས་ཏེ་དེ་ལ་དཔག་ཚད་འབུམ་དྲུག་ཁྲི་ཡོད་དོ། །རིའི་རྒྱལ་པོ་རི་རབ་ཀྱི་ངོས་རེ་རེ་ལ་དཔག་ཚད་བརྒྱད་ཁྲི་བརྒྱད་ཁྲི་ཡོད་དེ། དེ་དག་ལ་དཔག་ཚད་སུམ་འབུམ་ཉི་ཁྲི་ཡོད་དོ། །རིའི་རྒྱལ་པོ་རི་རབ་རིན་པོ་ཆེ་སྣ་བཞི་ལས་བྱས་པ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། དེར་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་སྐྱེས་ནས་དེ་གཉིས་ཀྱི་ལུས་ཀྱིས་དེ་ལན་གསུམ་དཀྲིས་ཏེ་འཁོད་ཅིང་བསྐལ་པར་གནས་པ་ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་ནོ། །དེ་གཉིས་འདི་སྙམ་དུ་སེམས་ཏེ། བདག་ཅག་གཉིས་ཀྱི་བསོད་ནམས་ཀྱི་གནས་འདི་བྱུང་ངོ་སྙམ་ནས་དེ་གཉིས་སེར་སྣས་ཀུན་ནས་དཀྲིས་པས་ཉིན་མོ་ལན་གསུམ་མི་མཐུན་པའི་རླུང་གཏོང་སྟེ། དེས་རི་རབ་ཀྱི་བང་རིམ་ལ་གནས་པའི་རི་དགས་དང ། བྱ་མང་པོ་དག་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དེ་ན་དགེ་སློང་གང་དག་རི་རབ་ཀྱི་བང་རིམ་ན་བསམ་གཏན་བྱེད་པ་དེ་དག་ཀྱང་མི་མཐུན་པའི་རླུང་དེས་སྐྱ་བོ་བསེང་བསེང་པོར་གྱུར་ཅིང ། རིད་པ་དང་ཉམ་ཆུང་བ་དང ། རྐེ་བ་དང་ལུས་མ་ཐོབ་པར་གྱུར་ནས་དེ་དག་དབྱར་གྱི་ཟླ་བ་གསུམ་པོ་དག་འདས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་ལྷགས་པ་དང ། དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཁྱེད་ཅག་ག་ལས་འདིར་འོངས། ཁྱེད་ཅག་དབྱར་གང་དུ་གནས་པར་ཁས་བླངས། དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་རི་རབ་ཀྱི་བང་རིམ་ནས་འདིར་འོངས་སོ། །བདག་ཅག་རི་རབ་ཀྱི་བང་རིམ་དུ་དབྱར་གནས་པར་ཁས་བླངས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་ཕྱིར་སྐྱ་བོ་བསེང་བསེང་པོར་གྱུར་ཅིང །
8.77a
རིད་པ་དང་ཉམ་ཆུང་བ་དང ། རྐེ་བ་དང་ལུས་མ་ཐོབ་པར་གྱུར། དེ་དག་གིས་སྨྲས་པ་ཚེ་དང་ལྡན་པ་དག་རི་རབ་ཀྱི་བང་རིམ་དུ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་སྐྱེས་ནས་དེ་གཉིས་ཀྱི་ལུས་ཀྱིས་དེ་ལན་གསུམ་དཀྲིས་ཏེ་འཁོད་ཅིང་བསྐལ་པར་གནས་པ། ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་ནོ། །དེ་གཉིས་འདི་སྙམ་དུ་སེམས་ཏེ། བདག་ཅག་གཉིས་ཀྱི་བསོད་ནམས་ཀྱི་གནས་འདི་བྱུང་ངོ་སྙམ་ནས་དེ་གཉིས་སེར་སྣས་ཀུན་ནས་དཀྲིས་པས་ཉིན་མོ་ལན་གསུམ་མི་མཐུན་པའི་རླུང་གཏོང་སྟེ། དེས་རི་རབ་ཀྱི་བང་རིམ་ལ་གནས་པའི་རི་དགས་དང ། བྱ་མང་པོ་དག་ཚུལ་མ་ཡིན་པས་སྡུག་བསྔལ་བར་གྱུར་ཏོ། །བདག་ཅག་ཀྱང་མི་མཐུན་པའི་རླུང་དེས་སྐྱ་བོ་བསེང་བསེང་པོར་གྱུར་ཅིང ། རིད་པ་དང་ཉམ་ཆུང་བ་དང ། རྐེ་བ་དང་ལུས་མ་ཐོབ་པར་གྱུར་ཏོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཀྱིས་དེ་གཉིས་གདུལ་བར་མི་ནུས་སམ། དེ་དག་གིས་སྨྲས་པ། ཚེ་དང་ལྡན་པ་དག་རེ་ཤིག་དེ་གཉིས་བདག་ཅག་གིས་གདུལ་བ་མ་ཡིན་ནོ། །འོ་ན་སུས་གདུལ་བ་ཡིན། ཉན་ཐོས་ཆེན་པོས་གདུལ་བ་ཡིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགོངས་པ། དེ་གཉིས་གང་གིས་གདུལ་བ་ཡིན་སྙམ་ན། དགེ་སློང་མཽད་གལ་གྱི་བུ་ཆེན་པོས་གདུལ་བ་ཡིན་པར་གཟིགས་ཤིང་མཁྱེན་ནས། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་རི་རབ་ཀྱི་བང་རིམ་ན་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ལ་སོམས་ཤིག་།ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་མཉན་ཡོད་ནས་མི་སྣང་བར་གྱུར་ཅིང ། རི་རབ་ཀྱི་བང་རིམ་དུ་སོན་པར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་སོ། །དེའི་ཚེ་ན་ཀླུའི་རྒྱལ་པོ་དགའ་བོ་དང་ཉེ་དགའ
8.77b
གཉིས་གཉིད་ལོག་པར་གྱུར་ནས་དེས་སེ་གོལ་གྱིས་སད་པར་བྱ་བར་བརྩམས་ན་དེ་གཉིས་མ་སད་དོ། །དེས་དེ་གཉིས་ཀྱི་སྟེང་དུ་བཅག་པར་བརྩམས་ན་དེ་ལྟ་ན་ཡང་དེ་གཉིས་མ་སད་དོ། །དེས་དེ་གཉིས་ཀྱི་ལྟོར་ཞུགས་ཏེ་སྤྲིན་ཆེན་བཞིན་དུ་འབྲུག་བསྒྲགས་པར་བརྩམས་ན་དེ་ལྟ་ན་ཡང་དེ་གཉིས་མ་སད་དོ། །དེས་ཀླུ་ཆེན་པོའི་ལུས་ཀྱིས་རིའི་རྒྱལ་པོ་རི་རབ་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་པ་དང ། དེ་གཉིས་ཁུར་ལྕི་བས་མནན་པས་སད་དེ་ཇི་ཙམ་ན་ཀླུ་ཆེན་པོ་ཞིག་གིས་བདག་ཅག་གཉིས་མནན་པར་མཐོང་ནས་དེ་གཉིས་ཀྱིས་བསམས་པ། ཀླུ་རྫུ་འཕྲུལ་ཆེན་པོ་ཞིག་བྱུང་སྟེ་བདག་ཅག་གཉིས་གནས་འདི་ནས་ཉམས་པར་གྱུར་གྱིས་བྲོས་ཏེ་འདོང་ངོ་སྙམ་དུ་རིག་ནས་སྐྲག་སྟེ། བྲམ་ཟེའི་ཁྱེའུའི་ཁ་དོག་ཏུ་བདག་ཉིད་མངོན་པར་སྤྲུལ་ནས་འབྲོས་པར་བརྩམས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས་དེ་གཉིས་ཀྱི་མདུན་དུ་འདུག་སྟེ་སྨྲས་པ། ཀླུའི་དབང་པོ་གཉིས་གར་འདོང ། དེ་གཉིས་ཀྱིས་སྨྲས་པ། ཀླུ་རྫུ་འཕྲུལ་ཆེན་པོ་ཞིག་བྱུང་སྟེ། བདག་ཅག་གཉིས་འདི་ནས་ཉམས་པར་གྱུར་གྱིས་འབྲོས་སུ་འགྲོའོ། །དེས་སྨྲས་པ། ཚུར་ཤོག་ཀླུ་དེ་ཅི་འདྲ་བ་བལྟའོ། །དེ་གཉིས་དེ་དང་ལྷན་ཅིག་ཕྱིར་ལོག་པ་དང ། ཇི་ཙམ་ན་མི་སྣང་ནས་དེ་གཉིས་ཀྱིས་སྨྲས་པ། འཕགས་པས་བདག་ཅག་གཉིས་ལ་ཀུ་རེ་མ་བགྱིས་སམ། དེས་སྨྲས་པ། དེ་ཡིན་ནོ་འོ་ན་བདག་ཅག་གཉིས་ཀྱིས་ནོངས་པ་ཅི་བགྱིས། རྒ་བའི་ཆོས་ཅན་ཁྱེད་གཉིས་ཀྱིས་སངས་རྒྱས་ཀྱི་ཕོ་ཉ་འོངས་པ་ལ་མ་བསམས་སོ། །འཕགས་པ་ཁྱོད་སངས་རྒྱས་ཀྱི་ཕོ་ཉ་ལགས་སམ། སངས་རྒྱས་ཀྱི་ཕོ་ཉ་ཡིན་ནོ། །འཕགས་པ་གལ་ཏེ་ཁྱོད་སངས་རྒྱས་ཀྱི་ཕོ་ཉ་ལགས་ན་བདག་ཅག་གཉིས་ཀྱིས་ཅི་བགྱི་བ་སྩལ་དུ་གསོལ། ཚུར་ཤོག་བཅོམ་ལྡན་འདས་ཀྱི་སྤྱན་སྔ་ཁོ་ནར་འདོང་ངོ ། །འཕགས་པ་མ་ནོངས་ཏེ་དེ་བཞིན་བགྱིས་བཞུད་དོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས
8.78a
ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གང་གི་སླད་དུ་བདག་ལ་བཀའ་སྩལ་པའི་ཀླུའི་རྒྱལ་པོ་དགའ་བོ་དང་ཉེ་དགའ་དེ་གཉིས་ནི་འདི་ལགས་སོ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་ལ་འདི་སྐད་ཅེས་བཀའ་སྩལ་ཏོ། །ཀླུའི་དབང་པོ་ཁྱེད་གཉིས་སྔོན་གྱི་ཉེས་པར་སྤྱད་པས་ཀླུའི་སྐྱེ་གནས་ངན་པར་སྐྱེས་ཤིང་ཁྱེད་གཉིས་ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང ། རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོགས་པ། གཞན་གྱི་སྲོག་བཅད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱེད་གཉིས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེ་གཉིས་ཀྱིས་གསོལ་པ། བཅོམ་ལྡན་འདས་བདག་ཅག་གཉིས་ཀྱིས་ཅི་ཞིག་བགྱི་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་གཉིས་ཚུལ་ཤོག་ངའི་དྲུང་དུ་སྐྱབས་སུ་འགྲོ་བ་དང ། བསླབ་པའི་གཞི་དག་ལོང་ལ་རི་རབ་ཀྱི་བང་རིམ་ལ་གནས་པའི་རི་དགས་དང ། བྱ་རྣམས་ལ་མི་འཇིགས་པ་བྱིན་ཅིག་།དེ་གཉིས་ཀྱིས་གསོལ་པ། བཙུན་པ་བདག་ཅག་གཉིས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང ། བསླབ་པའི་གཞི་དག་ལེན་ཅིང་རི་རབ་ཀྱི་བང་རིམ་ལ་གནས་པའི་རི་དགས་དང ། བྱ་རྣམས་ལ་མི་འཇིགས་པ་སྩོལ་ཏོ། །དེ་གཉིས་ཀྱིས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་འགྲོ་བ་དང ། བསླབ་པའི་གཞི་དག་བླངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ཀླུའི་ནང་དུ་སྐྱེས། ལས་ཅི་བགྱིས་ན་དེས་རིན་པོ་ཆེ་སྣ་བཞི་ལས་བགྱིས་པའི་གནས་མངོན་པར་གྲུབ་ཅིང་ལྷའི་བདུད་རྩིའི་ཟས་དང
8.78b
སྦྲང་རྩིའི་ཆང་གི་བཏུང་བ་དང ། རེ་རེ་ལ་ཡང་འཁོར་ཉིས་སྟོང་ལྔ་བརྒྱ་དང་ལྡན་པར་གྱུར། ལས་ཅི་བགྱིས་ན་དེས་ན་བསྐལ་པར་གནས་པ་ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་རྔོ་མི་ཐོག་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་གཉིས་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང ། བསགས་པས་འདི་གཉིས་ཀྱིས་ལས་བྱས་ཤིང ། བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང ། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་ཚེ་ན་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཀྲི་ཀི་ཞེས་བྱ་བ་རྒྱལ་སྲིད་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང ། འཐབ་པ་དང ། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་བྲལ་བ། སཱ་ལུ་དང་བུ་རམ་ཤིང་གི་ཕྲེང་བ་དང ། བ་ལང་དང
8.79a
མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །རྒྱལ་པོ་ཀྲི་ཀིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་ཤེས་ཐོས་སོ། །ཐོས་ནས་ཀྱང་རྒྱལ་པོའི་འབྱོར་པ་ཆེན་པོ་དང ། རྒྱལ་པོའི་མཐུ་ཆེན་པོས་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་སོང་སྟེ། རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་ཀུན་དུ་འགྲོ་བ་ལྟར་བཟང་བ་མཐོང་ངོ ། །མཐོང་མ་དག་ཏུ་རྒྱལ་པོ་ཀྲི་ཀི་བཅོམ་ལྡན་འདས་འོད་སྲུང་ལ་ཤིན་ཏུ་དད་པ་སྐྱེས་ནས་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀིའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཐུགས་སུ་ཆུད་ནས་གང་ཐོས་ན། རྒྱལ་པོ་ཀྲི་ཀིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ
8.79b
རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་འགྱུར། །ཤིན་དུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །ཤེས་སྨྲས་ཏེ་སྟན་ལས་ལངས་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལན་གསུམ་བསྐོར་བ་བྱས་ཏེ་ཞབས་གཉིས་ལ་མགོ་བོས་ཕྱག་འཚལ་ནས་སོང་ངོ ། །གང་གི་ཚེ་རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བདེན་པ་དག་མཐོང་བ་དེའི་ཚེ་ན་དེ་དོན་གྱི་གནས་སུ་འདུག་སྟེ། བློན་པོ་དང་གྲོང་ཁྱེར་པ་དང ། ཡུལ་མི་རྣམས་ལ་སྨྲས་པ། ཀཝའི་བློན་པོ་དང ། གྲོང་ཁྱེར་པ་དང ། ཡུལ་མི་དག་ཉོན་ཅིག་།ངས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བདེན་པ་དག་མཐོང་བས་ད་ངས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་མི་ནུས་ཀྱིས་དེའི་ཕྱིར་ཁྱེད་ཀྱིས་གཞོན་ནུ་ལེགས་སྐྱེས་རྒྱལ་སྲིད་ཀྱི་དབང་ཕྱུག་གི་བདག་པོར་ཞོག་ཤིག་།ང་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྲ་དང ། ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས
8.80a
ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་ལ་བློན་པོའི་མཆོག་དགའ་བོ་དང ། ཉེ་དགའ་ཞེས་བྱ་བ་གཉིས་ཤིག་ཡོད་པ་དེ་གཉིས་ཀྱིས་དེའི་རྐང་པ་གཉིས་ལ་གཏུགས་ཏེ་སྨྲས་པ། ལྷས་མཚན་མ་ཙམ་འབའ་ཞིག་མཛོད་ཅིག་དང་བདག་ཅག་གཉིས་ཀྱིས་ཆོས་ཀྱིས་ལྷའི་རྒྱལ་སྲིད་བགྱིད་དུ་སྩལ་ཏོ། །རྒྱལ་པོས་སྨྲས་པ། གལ་ཏེ་དེ་ལྟ་ན་བྱེད་དུ་ཆུག་ཤིག་།དེ་གཉིས་ཀྱིས་ཇི་སྲིད་པ་དེ་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང ། དེ་གཉིས་ཀྱི་ཉེ་དུ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བ་དེ་དག་དེ་གཉིས་ཀྱི་གན་དུ་འོངས་ཏེ་སྨྲས་པ། ཚེ་དང་ལྡན་པ་གཉིས་ཆོས་ཀྱིས་རྒྱལ་སྲིད་བྱེད་དུ་ཆུག་ཤིག་།ཆོས་དང་ཆོས་མ་ཡིན་པས་བྱེད་དུ་མ་གཞུག་ཤིག་།སེམས་ཅན་དམྱལ་བ་ལ་གཞོལ་བར་མ་བྱེད་ཅིག་།དེ་གཉིས་ཀྱིས་དེ་དག་ལས་ཐོས་ནས་ཇི་སྲིད་པ་དེ་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང ། དེ་དག་ཡང་དེ་གཉིས་ཀྱི་གན་དུ་འོངས་ཏེ་སྨྲས་པ། ཚེ་དང་ལྡན་པ་གཉིས་ཆོས་ཀྱིས་རྒྱལ་སྲིད་བྱེད་དུ་ཆུག་ཤིག་།ཆོས་དང་ཆོས་མ་ཡིན་པས་བྱེད་དུ་མ་གཞུག་ཤིག་།སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག་།དེ་གཉིས་ཀྱིས་སྨྲས་པ། འཕགས་པ་དག་བདག་ཅག་བློན་པོ་དག་ནི་རྒྱལ་སྲིད་བགྱིད་དུ་སྩོལ་བ་གསང་ཚིག་འཐུན་པས་འཚོ་བ་ལགས་པས་གཅིག་ཏུ་ཆོས་ཀྱིས་རྒྱལ་སྲིད་བགྱིད་དུ་སྩོལ་བའི་རྔོ་མི་ཐོག་སྟེ། ངེས་པར་ཁོ་ནར་ཁྱད་པར་ཅན་མ་ལགས་པ་དག་ནི་ཚར་བཅད་པར་བགྱི་ཞིང་ཁྱད་པར་ཅན་དག་ནི་ཡོངས་སུ་བསྐྱང་བར་བགྱི་འཚལ་ལོ། །དེ་དག་གིས་སྨྲས་པ། གལ་ཏེ་དེ་ལྟ་ན་ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་ཆུག་ལ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ལ། དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་བྱིན་ཅིག་།
8.80b
དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་བྱིན་ཅིག་དང ། དེས་ཁྱོད་གཉིས་ལ་ཡུན་རིང་པོའི་དོན་དང ། ཕན་པ་དང་བདེ་བར་འགྱུར་རོ། །དེ་གཉིས་ཀྱིས་སྨྲས་པ། འཕགས་པ་དག་མ་ནོངས་ཀྱིས་དེ་བཞིན་བགྱིའོ་ཞེས་དེ་གཉིས་ཀྱིས་ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ཞིང ། དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་བྱིན། དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་བྱིན་ནོ། །དགེ་སློང་དག་དེའི་ཚེ་དེའི་དུས་ན་རྒྱལ་པོ་ཀྲི་ཀིའི་བློན་པོའི་མཆོག་དགའ་བོ་དང ། ཉེ་དགའ་ཞེས་བྱ་བ་དེ་གཉིས་ནི་ད་ལྟར་ཀླུའི་རྒྱལ་པོ་དགའ་བོ་དང ། ཉེ་དགའ་འདི་གཉིས་ཡིན་ཏེ། དེ་གཉིས་ཀྱིས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་པ་གང་ཡིན་པ་དེས་ནི་ཀླུ་རྣམས་ཀྱི་ནང་དུ་སྐྱེས་སོ། །ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་བ་གང་ཡིན་པ་དེས་ནི་རིན་པོ་ཆེ་སྣ་བཞི་ལས་བྱས་པའི་གནས་མངོན་པར་གྲུབ་ཅིང་ལྷའི་བདུད་བརྩིའི་ཟས་དང ། སྦྲང་རྩིའི་ཆང་གི་བཏུང་བ་དང ། རེ་རེ་ལ་ཡང་འཁོར་ཉིས་སྟོང་ལྔ་བརྒྱ་དང་ལྡན་པར་གྱུར་ཏེ། དགེ་སློང་རྣམས་ལ་གཞོན་ནུའི་ཡོངས་སུ་སྤང་བ་བྱིན་པ་དང ། དགེ་སློང་མ་རྣམས་ལ་བཙུན་མོའི་འཁོར་གྱི་ཡོངས་སུ་སྤང་བ་བྱིན་པ་གང་ཡིན་པ་དེས་ནི་བསྐལ་པར་གནས་པ། ས་འཛིན་པ་འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ
8.81a
རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་པ་དེའི་ཚེ་ན་དེ་གཉིས་ཚེས་བརྒྱད་དང ། ཚེས་བཅུ་བཞི་དང ། ཚེས་བཅཝ་ལྔ་ལ་རི་རབ་ཀྱི་བང་རིམ་དུ་འོངས་ནས་བཅོམ་ལྡན་འདས་ལ་བསྙེན་བཀུར་བྱེད་དོ། །དེ་གཉིས་གང་གི་ཚེ་མཚན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་ནི་གཞལ་མེད་ཁང་པའི་ཆ་ལུགས་ཀྱིས་བསྙེན་བཀུར་བྱེད་ཅིང ། གང་གི་ཚེ་ཉིན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་ནི་ཁྱིམ་བདག་གི་ཆ་ལུགས་ཀྱིས་བསྙེན་བཀུར་བྱེད་དོ། །དུས་གཞན་ཞིག་ན་དེ་གཉིས་ཉིན་མོ་ཁྱིམ་བདག་གི་ཆ་ལུགས་ཀྱིས་བཅོམ་ལྡན་འདས་ཀྱི་སྤྱན་སྔར་སོང་ངོ ། །ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་རྒྱལ་བྱེད་ཀྱི་ཚལ་ག་ལ་བ་དེར་སོང་ངོ ། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་རྒྱལ་པོ་དེ་གང་གི་ཚེ་བཅོམ་ལྡན་འདས་ཀྱི་སྤྱན་སྔར་འགྲོ་བ་དེའི་ཚེ་ན་བདག་བཅོམ་ལྡན་འདས་ཀྱི་སྤྱན་སྔར་སོང་བ་ན་འགའ་ཞིག་བདག་ལ་མངོན་སུམ་དུ་ལྡང་བར་མི་འགྱུར་བ་མེད་གྲང་སྙམ་ནས་མི་དག་པའི་མཐའ་ཅན་གཏོང་བར་བྱེད་པ་ཡིན་པས་དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རྒྱལ་བྱེད་ཀྱི་ཚལ་གྱི་སྒོར་བསྡད་དེ་མི་དག་པའི་མཐའ་ཅན་ཞིག་ལ་སྨྲས་པ། ཀཝའི་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་པ་ལྟོས་ཤིག་།མི་དག་པའི་མཐའ་ཅན་དེས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་བ་དང ། ཇི་ཙམ་ན་ཁྱིམ་བདག་གཉིས་ཤིག་བཅོམ་ལྡན་འདས་ལ་བསྙེན་བཀུར་བྱེད་པ་མཐོང་ངོ ། །མཐོང་ནས་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་གསོལ་ཏོ། །ལྷ་ཁྱིམ་བདག་གཉིས་ཤིག་བཅོམ་ལྡན་འདས་ལ་བསྙེན་བཀུར་བགྱིད་དེ་དེ་གཉིས་ལྷའི་ཡུལ་ན་གནས་པ་དག་ལགས་གོར་མ་བཀུམ་མོ། །རྒྱལ་པོས་བསམས་པ། ཁྱིམ་བདག་དེ་གཉིས
8.81b
བདག་གི་ཡུལ་ན་གནས་པ་ཡིན་པས་དེ་གཉིས་ཀྱིས་བདག་མཐོང་ན་མངོན་དུ་ལྡང་བར་འགྱུར་གྲང་སྙམ་ནས་དེ་བཅོམ་ལྡན་འདས་ག་ལ་བ་དེར་སོང་ངོ ། །ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་དེ་གཉིས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས་རེ་ཤིག་དམ་པའི་ཆོས་ལ་བསྙེན་བཀུར་བགྱི་འམ། འོན་ཏེ་རྒྱལ་པོ་ལ་བསྙེན་བཀུར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་གཉིས་རེ་ཤིག་དམ་པའི་ཆོས་ལ་བསྙེན་བཀུར་གྱིས་ཤིག་།སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དེ་དགྲ་བཅོམ་པ་དག་ཀྱང་ཆོས་བླ་མར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་དག་བཀའ་སྩལ་པ། སངས་རྒྱས་གང་དག་འདས་པ་དང ། །སངས་རྒྱས་གང་དག་མ་བྱོན་དང ། །སངས་རྒྱས་མྱ་ངན་སེལ་མཛད་པ། །ད་ལྟར་མང་པོ་གང་བཞུགས་དག་།ཐམས་ཅད་དམ་པའི་ཆོས་ལ་ནི། །གུས་པར་གནས་གྱུར་གནས་འགྱུར་ཞིང ། །དེ་བཞིན་གུས་པར་གནས་མཛད་དེ། །དེ་ནི་སངས་རྒྱས་ཆོས་ཉིད་ཡིན། །དེ་ཕྱིར་བདག་ལ་ལེགས་འདོད་ཅིང ། །བདག་ཉིད་ཆེན་པོ་མངོན་འདོད་པ། །སངས་རྒྱས་བསྟན་པ་དྲན་བྱེད་ན། །འདི་ལ་དམ་ཆོས་གུས་པར་བྱ། །དེ་གཉིས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་མངོན་དུ་ལྡང་བར་མ་བྱས་པ་དང ། རྒྱལ་པོ་ཁྲོས་ཏེ་བསམས་པ། ཁྱིམ་བདག་འདི་གཉིས་བདག་གི་ཡུལ་ན་གནས་པ་དག་ཡིན་ན་བདག་ལ་མངོན་དུ་ལྡང་བར་མི་བྱེད་དོ་སྙམ་ནས་དེ་ཁྲོ་བས་ཀུན་ནས་དཀྲིས་བཞིན་དུ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །བཅོམ་ལྡན་འདས་ཀྱིས་འདི་ཁྲོ་བས་ཀུན་ནས་དཀྲིས་སོ་སྙམ་ནས་བཀའ་མཆིད་གཞན་དག་མཛད་པར་བརྩམས་ཏེ་ཆོས་སྟོན་པར་མི་མཛད་པ་དང ། དེས་གསོལ་པ། བཅོམ་ལྡན་འདས་ཆོས་བསྟན་དུ་གསོལ། །བདེ་བར་གཤེགས་པ་ཆོས་བསྟན་དུ་གསོལ། །
8.82a
དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚིགས་སུ་བཅད་པ་དག་བཀའ་སྩལ་པ། རབ་ཏུ་དང་སེམས་མེད་པ་དང ། །ཞེ་སྡང་ཅན་དང་འཁྲུགས་པ་ཡིས། །ཡང་དག་རྫོགས་སངས་བསྟན་པ་ཡི། །དམ་ཆོས་ཀུན་ཤེས་བྱ་མི་ནུས། །གང་གིས་ཉེས་རྩོམ་བཏུལ་བྱས་ཤིང ། །རབ་དང་མེད་པའི་སེམས་བསལ་ཏེ། །ཀུན་ནས་མནར་སེམས་འདི་སྤོང་བ། །དེས་ནི་ལེགས་གསུངས་ཤེས་པར་འགྱུར། །རྒྱལ་པོ་རྒྱ་ཆེར་དེ་གཉིས་ལ་ཁྲོས་ཏེ་བསམས་པ། འདི་གཉིས་ལ་བརྟེན་ནས་བཅོམ་ལྡན་འདས་ཀྱིས་ཆོས་མཉན་པ་ཡང་རྒྱུན་བཀུམ་མོ་སྙམ་དུ་རིག་ནས་སྡོད་ཅིག་ཅེས་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་སོང་ངོ ། །གང་གི་ཚེ་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ཉིན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་དེ་གཉིས་ཀྱི་ཞོ་ཤས་འཚོ་བ་དག་གིས་རི་རབ་ཀྱི་བང་རིམ་ནས་མཉན་ཡོད་ཀྱི་བར་གྱི་ལམ་ཇི་སྲིད་པའི་ལམ་གྱི་ངོས་གཉིས་སུ་རྩིག་པ་དངར་ཏེ་འཁོད་པར་བྱེད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བསྒོ་བ། ཤེས་ལྡན་དག་གང་གི་ཚེ་ཁྱིམ་བདག་འདི་གཉིས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་བར་གྱུར་པ་དེའི་ཚེ་ན་འདི་གཉིས་ཀྱི་མགོ་བོ་དྲུང་པ་ནས་ཆོད་ལ་ས་ལ་སྒྱེལ་བར་གྱིས་ཤིག་།ཚིག་དེ་སྐད་ཅེས་སྨྲས་པ། ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ཀྱི་ཞོ་ཤས་འཚོ་བ་དག་གིས་ཐོས་སོ། །ཐོས་ནས་ཀྱང་དེ་དག་འཁྲུགས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་སྟེང་དུ་རྡོ་རྗེ་རྩེ་གཅིག་པ་དང ། འཁོར་ལོ་དང་མདའ་བོ་ཆེ་དང ། མཚོན་རྩེ་གཅིག་པ་ལ་སོགས་པའི་མཚོན་དག་འཕང་བར་བརྩམས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འཁོར་དང་བཅས་པ་དང ། མཉན་ཡོད་ན་གནས་པའི་སྐྱེ་བོའི་ཚོགས་ལ་སོམས་ཤིག་།ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ
8.82b
བཞིན་འཚལ་ཞེས་བཅོམ་ལྡན་འདས་ལས་བཀའ་མཉན་ནས། བྱམས་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལ་སྙོམས་པར་ཞུགས་པའི་བྱེ་བྲག་གིས་རྡོ་རྗེ་རྩེ་གཅིག་པ་དང ། འཁོར་ལོ་དང ། མདའ་བོ་ཆེ་དང ། མཚོན་རྩེ་གཅིག་ལ་སོགས་པའི་མཚོན་དེ་དག་ལྷའི་མེ་ཏོག་ཨུཏྤ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོ་དང ། མན་དཱ་ར་བ་དག་ཏུ་གྱུར་ཏེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་སྟེང་དུ་འབབ་པར་བརྩམས་སོ། །དེ་ལྷའི་མེ་ཏོག་ཨུཏྤ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོ་དང ། མན་དཱ་ར་བ་དག་གིས་གང་བཞིན་དུ་ཁྱིམ་དུ་ཞུགས་ནས་དེས་བཙུན་མོའི་འཁོར་དང ། གཞོན་ནུ་དང་བློན་པོ་དང་ཁྲོམ་གྱི་རུ་སྣ་དང ། གྲོང་རྡལ་གྱི་མི་དང ། ཡུལ་མི་དང ། བྲམ་ཟེ་དག་ལ་སྨྲས་པ། ཤེས་ལྡན་དག་ང་རྒྱལ་བྱེད་ཀྱི་ཚལ་དུ་ཞུགས་ཚུན་ཆད་ནས་ལྷའི་མེ་ཏོག་ཨུཏྤ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོ་དང ། མན་དཱ་ར་བ་དག་གིས་གང་བཞིན་དུ་ཁྱིམ་དུ་ཞུགས་པ་འདི་ཅི་ཡིན་སུ་ཡི་མཐུ་ཡིན། དེ་ན་གང་དག་སྙན་པ་དང་འཇམ་པར་སྨྲ་བ་ལ་མཁས་པ་དེ་དག་གིས་སྨྲས་པ། ལྷ་གཞན་སུ་ཞིག་གིས་འདི་འཚལ་བར་འགྱུར། འདི་གཞན་སུ་ཞིག་གི་མཐུ་ལགས། འདི་ལྟར་ལྷ་ཉིད་ཆོས་ཀྱིས་རྒྱལ་སྲིད་བགྱིད་དུ་སྩོལ་བས་འདི་ལྷ་ཉིད་ཀྱི་མཐུ་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེ་བདེན་ཏེ། ང་ཆོས་ཀྱིས་རྒྱལ་སྲིད་བྱེད་དུ་འཇུག་པས་འདི་གོར་མ་ཆག་པར་ངའི་མཐུ་ཡིན་ནོ། །བཙུན་མོའི་འཁོར་གྱིས་སྨྲས་པ། བདག་ཅག་ལྷ་ལས་གཞན་པའི་སྐྱེས་པའི་གན་དུ་མི་མཆི་ཞིང་བདག་པོ་ལས་མི་འཕྱོ་བས་འདི་ནི་བདག་ཅག་གི་མཐུ་ལགས་སོ། །གཞོན་ནུ་རྣམས་ཀྱིས་སྨྲས་པ། བདག་ཅག་ཡབ་ཡུམ་ལ་གུས་ཤིང་སྲི་ཞུ་ཆེ་བས་འདི་ནི་བདག་ཅག་གི་མཐུ་ལགས་སོ། །བློན་པོ་རྣམས་ཀྱིས་སྨྲས་པ། བདག་ཅག་ཆོས་ཀྱིས་ལྷའི་རྒྱལ་སྲིད་བགྱིད་དུ་སྩོལ་བས་འདི་ནི་བདག་ཅག་གི་མཐུ་ལགས་སོ། །ཁྲོམ་གྱི་རུ་སྣ་དག་གིས་སྨྲས་པ། བདག་ཅག་ལྷའི་བཀའ་ཆོས་དང་ལྡན་པར་སྒྲུབ་པར་བགྱིད་པས་འདི་ནི་བདག་ཅག་གི་མཐུ་ལགས་སོ། །གྲོང་རྡལ་གྱི་མི་དང་ཡུལ་གྱི་མི་དག་གིས་སྨྲས་པ།
8.83a
བདག་ཅག་ལྷ་ལ་ཆོས་དང་ལྡན་པར་དཔྱ་འབུལ་བས་འདི་ནི་བདག་ཅག་གི་མཐུ་ལགས་སོ། །རྒྱལ་པོས་བསམས་པ། འདི་དག་སོ་སོ་ནས་བདག་ཅག་གི་མཐུའོ། །བདག་གི་མཐུའོ་ཞེས་ཟེར་ན་སུའི་མཐུ་ཡིན་པ་མི་ཤེས་ཀྱིས། འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་ལ་བླ་ན་མེད་པའི་མངའ་བརྙེས་པ་ཡིན་གྱིས་སངས་རྒྱས་བཅོམ་ལྡན་འདས་ལ་ཞུར་འགྲོའོ་སྙམ་དུ་རིག་ནས་ལྷའི་མེ་ཏོག་ཨུཏྤ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོ་དང ། མན་དཱ་ར་བ་དེ་དག་གིས་ཐུ་བ་བཀང་ནས་བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ནི་ཁྱོད་ཀྱི་མཐུ་ཡང་མ་ཡིན། བཙུན་མོའི་འཁོར་གྱི་ཡང་མ་ཡིན། གཞོན་ནུ་རྣམས་ཀྱི་ཡང་མ་ཡིན། བློན་པོ་རྣམས་ཀྱི་ཡང་མ་ཡིན། ཁྲོམ་གྱི་རུ་སྣའི་ཡང་མ་ཡིན། གྲོང་རྡལ་གྱི་མི་དང ། ལྗོངས་ཀྱི་མི་རྣམས་ཀྱི་ཡང་མ་ཡིན། བྲམ་ཟེ་རྣམས་ཀྱི་ཡང་མ་ཡིན་ཏེ། འདི་ལྟར་དེ་ནི་དགེ་སློང་མཽད་གལ་གྱི་བུ་ཆེན་པོའི་མཐུ་ཡིན་ཏེ། གལ་ཏེ་དགེ་སློང་མཽད་གལ་གྱི་བུ་ཆེན་པོས་ཁྱོད་བཙུན་མོའི་འཁོར་དང ། གཞོན་ནུ་དང ། བློན་པོ་དང་གྲོང་རྡལ་གྱི་མི་དང ། ཡུལ་གྱི་མི་དང་བཅས་པ་ལ་མ་བསམས་སུ་ཟིན་ན་དེང་ཉིད་དུ་མཉན་ཡོད་སྤྱོད་ཡུལ་དུ་མི་འགྱུར་བ་ཞིག་ན། དེ་ནི་དགེ་སློང་མཽད་གལ་གྱི་བུ་དེས་ཁྱོད་བཙུན་མོའི་འཁོར་དང ། གཞོན་ནུ་དང ། བློན་པོ་དང ། གྲོང་རྡལ་གྱི་མི་དང ། ཡུལ་མི་དང་བཅས་པ་ལ་བསམས་པའི་མཐུ་ཡིན་གྱིས་དེ་ལ་སེམས་མངོན་པར་དད་པར་གྱིས་ཤིག་།རྒྱལ་པོས་གསོལ་པ། བཅོམ་ལྡན་འདས་དེ་ལྟར་དགེ་སློང་མཽད་གལ་གྱི་བུའི་མཐུ་ལགས་ཤིང་བཅོམ་ལྡན་འདས་ཀྱི་ཡང་མ་ལགས་ཉན་ཐོས་ཆེན་པོ་གཞན་དག་གིས་ཡང་མ་ལགས་པར་ཇི་ལྟར་འཚལ་བར་བགྱི། རྒྱལ་པོ་ཆེན་པོ་དེ་ནི་ངའི་མཐུ་ཡང་མ་ཡིན།
8.83b
ཉན་ཐོས་ཆེན་པོ་གཞན་དག་གི་ཡང་མ་ཡིན་ཏེ། འདི་ལྟར་དེ་ནི་དགེ་སློང་མཽད་གལ་གྱི་བུའི་མཐུ་ཡིན་ནོ། །གལ་ཏེ་ཁྱོད་སོམ་ཉི་དང་ཡིད་གཉིས་ཟ་ན་ལྷའི་མེ་ཏོག་ཨུཏྤ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོ་དང ། མན་དཱ་ར་བ་འདི་དག་ས་ལ་འོར་ཅིག་།དེས་དེ་དག་ས་ལ་བོར་བ་དང ། རྡོ་རྗེ་རྩེ་གཅིག་པ་དང ། འཁོར་ལོ་དང ། མདའ་བོ་ཆེ་དང ། མཚོན་རྩེ་གཅིག་ལ་སོགས་པའི་མཚོན་ཤ་སྟག་ཏུ་གྱུར་ཏོ། །དེས་དེ་དག་མཐོང་ནས་ཉམ་ང་བར་གྱུར་ཏེ་གསོལ་པ། བཅོམ་ལྡན་འདས་འདི་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ལ་རབ་ཏུ་སྡང་བའི་སེམས་བསྐྱེད་པས་དེ་ལས་འདི་བྱུང་ངོ ། །རྒྱལ་པོས་གསོལ་པ། བཙུན་པ་བདག་གིས་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་མཐོང་བར་ཡང་མི་དྲན་ན་རབ་ཏུ་སྡང་བའི་སེམས་བསྐྱེད་པར་ལྟ་ག་ལ་འགྱུར། རྒྱལ་པོ་ཆེན་པོ་ངས་ཁྱོད་ལ་དྲན་པར་བྱའོ། །བཙུན་པ་བཅོམ་ལྡན་འདས་ཀྱིས་དྲན་པར་མཛད་དུ་གསོལ། །རྒྱལ་པོ་ཆེན་པོ་ཁྱོད་ཀྱིས་ངའི་མདུན་དུ་ཁྱིམ་བདག་གཉིས་ཤིག་ཆོས་ཉན་པ་གང་ཡིན་པ་དེ་གཉིས་ཀྱིས་ཁྱོད་ལ་མངོན་དུ་ལྡང་བ་མ་བྱས་པ་དེ་དྲན་ནམ། བཅོམ་ལྡན་འདས་དེ་དྲན་ནོ། །རྒྱལ་པོ་ཆེན་པོ་ཁྱིམ་བདག་དེ་གཉིས་ནི་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ཡིན་ནོ། །དེས་གསོལ་པ། བཅོམ་ལྡན་འདས་དེ་གཉིས་འཁྲུགས་པར་མ་གྱུར་ཏམ། རྒྱལ་པོ་ཆེན་པོ་དེ་གཉིས་ནི་འཁྲུགས་པར་མ་གྱུར་ཏེ། དེ་གཉིས་ཀྱི་ཞོ་ཤས་འཚོ་བ་དག་འཁྲུགས་པར་གྱུར་ཏོ། །བཅོམ་ལྡན་འདས་བདག་གིས་དེ་གཉིས་ལ་ཇི་ལྟར་བསྒྲུབ་པར་བགྱི། རྒྱལ་པོ་ཆེན་པོ་བཟོད་པ་གསོལ་བར་བྱའོ། །བཅོམ་ལྡན་འདས་དེ་གཉིས་ནི་རི་རབ་ཀྱི་བང་རིམ་ན་མཆིས་ལ། བདག་ནི་འདི་ན་མཆིས་ན་བདག་གིས་ཇི་ལྟར་དེ་གཉིས་ལ་བཟོད་པ་གསོལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་གཉིས་ཚེས་བརྒྱད་དང ། ཚེས་བཅུ་བཞི་དང ། ཚེས་བཅཝ་ལྔ་ལ་ངའི་རྐང་པ་ལ་ཕྱག་འཚལ
8.84a
དུ་འདིར་འོང་གིས་ཁྱོད་ཀྱང་ཚེས་བརྒྱད་དང ། བཅུ་བཞི་དང ། ཚེས་བཅཝ་ལྔ་ལ་འདིར་ཤོག་ཤིག་དང་ངས་ཁྱོད་ལ་དེ་གཉིས་བསྟན་པར་བྱའི་ཁྱོད་ཀྱིས་བཟོད་པ་གསོལ་ཅིག་།དེས་གསོལ་པ། བཙུན་པ་ཅི་ལགས་བདག་གིས་དེ་གཉིས་ཀྱི་རྐང་པ་གཉིས་ལ་གཏུག་པར་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་དེ་གཉིས་ཀྱི་རྐང་པ་གཉིས་ལ་གཏུག་པར་མི་བྱ་སྟེ། འདི་ལྟར་མི་མ་རབས་དག་གི་རྐང་པ་ལ་ཕྱག་འཚལ་བ་གང་ཡིན་པ་དེ་ནི་མི་གཙོ་བོ་དག་གིས་ལག་པ་ནས་བཟུང་བ་ཡིན་གྱིས་ཁྱོད་ཀྱིས་ལག་པ་གཡས་པ་རྐྱོང་ལ་ཀླུའི་དབང་པོ་གཉིས་བཟོད་པ་མཛོད་ཅིག་ཅེས་བཟོད་པ་གསོལ་ཅིག་དང་དེ་གཉིས་བཟོད་པར་འགྱུར་རོ། །དེས་གསོལ་པ། བཙུན་པ་མ་ནོངས་ཏེ་དེ་བཞིན་དུ་བགྱིའོ་ཞེས་གསོལ་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ངོ ། །ཇི་ཙམ་དུས་གཞན་ཞིག་ན་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་རི་རབ་ཀྱི་བང་རིམ་དུ་འོངས་ནས་བདག་ཉིད་ཁྱིམ་བདག་གི་ཆ་ལུགས་སུ་མངོན་པར་སྤྲུལ་ཏེ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་དེ་ལ་བརྡ་མཛད་དོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་ལག་པ་གཡས་པ་བརྐྱང་སྟེ་སྨྲས་པ། ཀླུའི་དབང་པོ་གཉིས་བཟོད་པ་མཛོད་ཅིག་།དེ་གཉིས་ཀྱིས་སྨྲས་པ། རྒྱལ་པོ་ཆེན་པོ་བཟོད་པར་བགྱིའོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་ལ་བཟོད་པ་གསོལ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས
8.84b
གསོལ་ཏོ། །བདག་གིས་འཕགས་པ་མཽད་གལ་གྱི་བུ་ཆེན་པོ་ལ་མཆོད་པའི་སླད་དུ་བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་བདག་གི་སྡུམ་པར་དགུང་བདུན་གྱི་བར་དུ་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཅང་མི་གསུང་བས་གནང་ངོ ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ནས་དེས་བློན་པོ་རྣམས་ལ་བསྒོ་བ་ཤེས་ལྡན་དག་ངས་འཕགས་པ་མཽད་གལ་གྱི་བུ་ཆེན་པོ་མཆོད་པའི་ཕྱིར་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཞག་བདུན་དུ་གདུགས་ཚོད་ལ་སྤྱན་དྲངས་ཀྱིས་ཁྱེད་ཀྱིས་གྲོང་ཁྱེར་མཛེས་པར་གྱིས་ལ་གདུགས་ཚོད་སྟ་གོན་གྱིས་ཤིག་།རྒྱལ་པོ་རྣམས་ནི་ཚིག་གིས་འགྲུབ་པ་ཡིན་ལ། ལྷ་རྣམས་ནི་སེམས་ཀྱིས་འགྲུབ་པ་ཡིན། རྣལ་འབྱོར་པ་རྣམས་ནི་སེམས་བསྐྱེད་པ་ཙམ་གྱིས་ཐམས་ཅད་འགྲུབ་པ་ཡིན་པས་བློན་པོ་རྣམས་ཀྱིས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་རྒྱལ་བྱེད་ཀྱི་ཚལ་དང་མཉན་ཡོད་ཀྱི་བར་གྱི་ལམ་ཇི་སྲིད་པ་དག་མཆོག་ཏུ་མཛེས་པར་བྱས་ཤིང་མཉན་ཡོད་ཀྱང་རྡོ་བ་དང་གསེག་མ་དང ། གྱོ་མོ་མེད་པར་རྣམ་པར་གནས་པར་བྱས་ཏེ། ཙན་དན་གྱི་ཆུས་ཆག་ཆག་བཏབ་ཅིང་བདུག་སྤོས་དྲི་ཞིམ་པོའི་སྣོད་ཉེ་བར་བཞག་སྟེ་དར་གྱི་ཆུན་པོའི་ཚོགས་དཔྱངས་ཤིང་རྒྱལ་མཚན་དང ། བ་དན་བསྒྲེང་སྟེ་མེ་ཏོག་སྣ་ཚོགས་བཀྲམ་ཞིང་ལྷ་རྣམས་ཀྱི་ལྷའི་མདུན་ས་ཆོས་བཟངས་ལྟར་ཉམས་དགའ་བར་བྱས་སོ། །ཞལ་ཟས་ཀྱང་ཁ་དོག་དང ། དྲི་དང་རོ་ཕུན་སུམ་ཚོགས་པ་དང་ལྡན་པ། སྐྱུ་རུམ་སྣ་ཚོགས་དང་བཅས་པ། སྤྱན་གཟིགས་སྣ་ཚོགས་ཀྱིས་མཛེས་པར་བྱས་པ་བཤམས་ནས་འབྱོར་པ་དེ་ལྟ་བུ་འདིས་ཉི་མ་རེ་རེ་ཞིང་སངས་རྒྱས་ལ་སོགས་པ་དགེ་སློང་གི་དགེ་འདུན་རྒྱལ་པོའི་ཕོ་བྲང་དུ་གདུགས་ཚོད་གསོལ་ཏོ། །དེ་ན་མཚན་མོ་ཁུར་བ་འཚོད་པ་དག་ཏུ་མེ་ཤོར་ནས་དེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གླང་པོ་ཆེ་ཡན་ལག
8.85a
མཆོག་དང་ལྡན་པ་མང་པོ་དག་ཚིག་པར་གྱུར་ཏོ། །དེ་ནས་གདུགས་ཚོད་ཞག་བདུན་ཐལ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཉན་ཡོད་དུ་དྲིལ་བསྒྲག་པ་བྱེད་དུ་བཅུག་ནས་མཉན་ཡོད་དུ་སུས་ཀྱང་མཚན་མོ་མེ་སྦར་བར་མི་བྱའོ། །གང་མེ་སྦར་བར་བྱེད་ན་དེ་ཀཱར་ཤ་པ་ཎ་དྲུག་བཅུའི་ཆད་པས་བཅད་པར་བྱ་བ་འམ། ཕྱག་སྦལ་དུ་བཅུག་སྟེ་འཆི་བར་བྱ་དགོས་སོ་ཞེས་བསྒོའོ། །དེའི་ཚེ་ན་མཉན་ཡོད་ན་ཁྱིམ་བདག་བཟང་བྱིན་ཞེས་བྱ་བ་ཕྱུག་པ། ནོར་མང་བ་ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་ཏུ་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་བཟང་བྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཁྱིམ་བདག་བཟང་བྱིན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཁྱིམ་བདག་བཟང་བྱིན་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་བཟང་བྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག
8.85b
འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཁྱིམ་བདག་བཟང་བྱིན་གྱིས་དེ་ཉིད་ཀྱི་མཚན་མོ་བཅའ་བ་དང ། བཟའ་བ་གཙང་ཞིང་བསོད་པ་སྟ་གོན་བྱས་ཏེ་ནང་པར་སྔར་ལངས་ནས་གདན་དག་བཤམས་ཏེ་ཆུ་ར་བཞག་ནས། བཅོམ་ལྡན་འདས་ལ་སྤྱན་འདྲེན་གྱིས་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་བཟང་བྱིན་གྱི་ཁྱིམ་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་བཟང་བྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཟའ་བ་དང་བཅའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང ། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །བཅོམ་ལྡན་འདས་ཀྱིས་དེའི་བསམ་པ་དང ། བག་ལ་ཉལ་དང ། ཁམས་དང་རང་བཞིན་ཐུགས་སུ་ཆུད་ནས་འདི་ལྟར་ཁྱིམ་བདག་བཟང་བྱིན་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས།
8.86a
དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་དང་དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །བཅོམ་ལྡན་འདས་ཀྱིས་ཆོས་བསྟན་པ་མཛད་ནས་གཤེགས་སོ། །ཁྱིམ་བདག་བཟང་བྱིན་ཆུང་མ་དང་བཅས་པས་གང་གི་ཉིན་མོ་བདེན་པ་མཐོང་བར་བྱས་པ་དེའི་ཉིན་མོ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཁྱིམ་བདག་བཟང་བྱིན་གྱིས་ཀྱང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ནས་བཅོམ་ལྡན་འདས་ཀྱིས་ཁྱིམ་བདག་བཟང་བྱིན་ཆུང་མ་དང་བཅས་པ་ལ་གང་ཐོས་ནས་དེ་གཉིས་ཀྱིས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཤིང་རྫུ་འཕྲུལ་ཡང་མངོན་པར་བསྒྲུབས་པར་གྱུར་པ་དེ་ལྟར་ཆོས་བསྟན་པ་མཛད་དོ། །གང་གི་ཉིན་མོ་ཁྱིམ་བདག་བཟང་བྱིན་ཆུང་མ་དང་བཅས་པས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཤིང་རྫུ་འཕྲུལ་མངོན་པར་བསྒྲུབས་པ་དེའི་ཉིན་མོ་དེའི་ཆུང་མ་ལ་བུ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ་མཛེས་པ། གསལ་བ་གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ་ལག་པ་རིང་བ། དཔྲལ་བའི་དབྱེས་ཆེ་བ
8.86b
སྨིན་མ་འཇར་བ། སྣའི་བཟངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་ཡི་མིང་ཅིར་གདགས་ཤེས་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། གང་གི་ཕྱིར་ཁྱེའུ་འདིའི་ཕ་མ་གཉིས་ཀྱིས་ཉི་མ་གང་ལ་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཤིང་རྫུ་འཕྲུལ་མངོན་པར་བསྒྲུབས་པར་གྱུར་པའི་ཉི་མ་དེ་ལ་བཙས་པས་དེའི་ཕྱིར་ཁྱེའུའི་མིང་རྫུ་འཕྲུལ་ལེན་ཅེས་བྱའོ་ཞེས་དེའི་མིང་རྫུ་འཕྲུལ་ལེན་ཅེས་བྱ་བར་བཏགས་སོ། །ཁྱེའུ་རྫུ་འཕྲུལ་ལེན་པ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དེ་དག་གིས་འོ་མ་དང་ཞོ་དང་མར་དང་ཞུན་མར་དང་མར་གྱི་ཉིང་ཁུ་དང་གཞན་ཡང་ཡོ་བྱད་ཀྱི་བྱེ་བྲག་གཙོ་བོ། གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང ། གྲངས་དང་རྩིས་དང་ལག་རྩིས་དང་དབྱུང་བ་དང ། གཞུག་པ་དང ། བཞག་པ་ལ་ཉེ་བར་ཞུགས་ནས་དེ་ཡི་གེའི་མཐར་ཕྱིན་ཅིང ། འབྱེད་པ་དང་ཀློག་པ་དང ། མཁས་པ་དང་སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །དེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་བཙུན་མོའི་འཁོར་གྱི་དྲུང་དུ་སོང་བ་དང ། དེའི་བཙུན་མོའི་འཁོར་གྱིས་སྟེང་གི་ཁང་བཟངས་ཀྱི་གཞིར་གཏོགས་པ་ནས་དེ་ལ་མེ་ཏོག་གི་ཕྲེང་བ་འཕངས་སོ། །འཇིག་རྟེན་ནི་མཛའ་བཤེས་དང ། དགྲ་བོ་དང་ཐ་མལ་པ་ཡིན་པས་ཇི་ཙམ་ན་གཞན་དག་གིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷ་གཞོན་ནུ་རྫུ་འཕྲུལ་ལེན་ནི་ལྷའི་བཙུན་མོའི་འཁོར་དོན་དུ་གཉེར་རོ། །རྒྱལ་པོ་དག་ནི་མི་རྟོག་པར་བྱེད་པས་དེས་བློན་པོ་རྣམས་ལ་བསྒོ་བ། ཤེས་ལྡན་དག་ངས་ཁྱིམ་བདག་བཟང་བྱིན་གྱི་བུ་གཞོན་ནུ་རྫུ་འཕྲུལ་ལེན་ཡོངས་སུ་བཏང་ངོ ། །
8.87a
བློན་པོ་རྣམས་ཀྱིས་དེ་ཀ་ར་བི་རའི་མེ་ཏོག་གི་ཕྲེང་བས་མགུལ་པ་བཅིངས་ཏེ་གོས་སྔོན་པོ་གྱོན་པའི་མི་དག་བསྐྲི་ནས་གྲོང་ཁྱེར་གྱི་དབུས་ནས་ཕྱིར་བྱུང་སྟེ་བསད་སར་ཕྱིན་ནས་གསོད་དུ་བཅུག་གོ། །མཉན་ཡོད་ཀྱི་སྐྱེ་བོའི་ཚོགས་དང ། ཡུལ་ཐ་དད་པ་ནས་ལྷགས་པའི་མི་དག་གིས་རྒྱལ་པོ་སྡིག་ཅན་འདི་ནི་མ་བརྟགས་པར་བྱེད་པ་ངན་པ་ཡིན་ཏེ། དེས་ཁྱིམ་བདག་གི་བུ་གཞོན་ནུ་རྫུ་འཕྲུལ་ལེན་ཁོན་མེད་པ། འགྲན་མི་ཚོལ་བ། མི་འཁུ་བ་བསད་དོ་ཞེས་བརྗོད་དོ། །དེ་བཞིན་དུ་བཙུན་མོའི་འཁོར་དང ། གཞོན་ནུ་དང ། བློན་པོ་རྣམས་ཀྱིས་ཀྱང་ངན་པ་དེས་ཁྱིམ་བདག་གི་བུ་གཞོན་ནུ་རྫུ་འཕྲུལ་ལེན་ཁོན་མེད་པ། འགྲན་མི་ཚོལ་བ། མི་འཁུ་བ་བསད་པ་ནི་ལེགས་པ་མ་བྱས་སོ། །ཤིན་དུ་མ་བྱས་སོ་ཞེས་བརྗོད་དོ། །ཁྱིམ་བདག་བཟང་བྱིན་གྱིས་བསམས་པ། བདག་གིས་བདོག་ཅིང་བདག་དབང་བ་སུ་ལ་ཡང་ཡོངས་སུ་མ་བཏང་བ་གང་ཡིན་པ་དེ་ཐམས་ཅད་ནི་གཞོན་ནུ་རྫུ་འཕྲུལ་ལེན་ལ་བལྟོས་པ་ཡིན་ན་དེ་ནི་སྔོན་གྱི་ལས་ཀྱི་ཉེས་པས་རྒྱལ་པོས་མ་བརྟགས་པར་ལྔ་པ་ཉིད་དུ་བསྒྲུབས་པས་ད་སུའི་ཕྱིར་བཅད་པར་བྱ་སྟེ། དམན་པ་དང ། མགོན་མེད་པ་དང ། བཀྲེན་པ་དང ། སྡུག་ཕོངས་པ་དག་ལ་ཡོངས་སུ་གཏང་བར་བྱའོ་སྙམ་ནས་དེ་ཀཱར་ཥ་པཱ་ཎ་གཅིག་ཅིག་ཟོང་གི་རྒྱུར་བཞག་ནས་ནོར་གྱི་རྣམ་པ་གཞན་ཐམས་ཅད་དམན་པ་དང ། མགོན་མེད་པ་དང ། བཀྲེན་པ་དང ། སྡུག་ཕོངས་པ་དག་ལ་ཡོངས་སུ་བཏང་ངོ ། །དེས་ཀར་ཥ་པཱ་ཎ་གཅིག་པོ་དེས་ཟོང་ཉོས་ཤིང་བཙོངས་པས་དེས་ཀཱར་ཥ་པཱ་ཎ་བཞི་རྙེད་ནས་དེས་ཀཱར་ཥ་པཱ་ཎ་གཅིག་གིས་ནི་བཅོམ་ལྡན་འདས་ཀྱི་དྲི་གཙང་ཁང་སྤོས་ཀྱི་བྱུག་པས་བྱུགས་སོ། །གཉིས་པས་ནི་གཡོག་འཁོར་གྱི་ཟན་སྦྱར་ཏོ། །གསུམ་པས་ནི་དགེ་འདུན་གྱི་ཕྱིར་དགེ་སློང་ལ་ཆོས་སྟོན་བྱིན་ཏོ། །བཞི་པ་ནི་ཟོང་གི་རྒྱུར་བཞག་གོ། །དེའི་ལོངས་སྤྱོད་སྲབས་པའི་ཕྱིར་སྦྱིན་པ་ངན་པ་དག་ཀྱང་སྦྱིན་པར་བྱེད། མཆོག་ཏུ་ངན་པ་དག་ཀྱང་སྦྱིན་པར་བྱེད་པས་དེའི་མིང་ངན་པ་བཟང་བྱིན་ཞེས་བྱ་བར་གྱུར་ཏོ། །དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས།
8.87b
བཅོམ་ལྡན་འདས་ཀྱིས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཇི་ལྟར་ཁྱོད་ཀྱི་ཁྱིམ་ན་སྦྱིན་པ་དག་བྱིན་ནམ། བསོད་ནམས་བྱེད་དམ། བཙུན་པ་དེ་བཞིན་ཏེ། བདག་གི་སྡུམ་པ་ན་སྦྱིན་པ་དག་ཀྱང་སྩོལ་ཅིང་བསོད་ནམས་དག་ཀྱང་བགྱིད་ན། དེ་དག་ནི་ངན་པ་དག་དང་མཆོག་ཏུ་ངན་པ་དག་ལགས་སོ། །ཁྱིམ་བདག་སྦྱིན་པ་ངན་པ་འམ། བཟང་པོ་སྦྱིན་ཡང་རུང་སྟེ། དེ་གཉིས་ཀ་ལོངས་སྤྱོད་ཀྱི་རྣམ་པར་སྨིན་པ་ཅན་ཡིན་ནོ། །ཁྱིམ་བདག་སྦྱིན་པ་ངན་པ་འམ། བཟང་པོ་སྦྱིན་ཡང་རུང་སྟེ། དེ་ཡང་དད་པས་མ་ཡིན། གུས་པས་མ་ཡིན། རང་གི་ལག་ནས་མ་ཡིན། དུས་སུ་མ་ཡིན། གནོད་པ་མེད་པ་མ་ཡིན། གང་གི་ཚེ་དེའི་རྣམ་པར་སྨིན་པ་སོ་སོར་མྱོང་བར་འགྱུར་བ་དེའི་ཚེ་ན་དེའི་སེམས་ཁྱིམ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། ཟས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། གོས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། གནས་མལ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། བཞོན་པའི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། གཟུགས་དང་སྒྲ་དང་དྲི་དང་རོ་དང་རེག་བྱ་རྒྱ་ཆེན་པོ་དག་ལ་འཇུག་པར་མི་འགྱུར་ཏེ། ཁྱིམ་བདག་སྦྱིན་པ་དེ་ལྟ་བུ་བྱིན་པའི་འབྲས་བུ་རྣམ་པར་སྨིན་པ་ནི་དེ་ལྟ་བུར་འདོད་པར་བྱའོ། །ཁྱིམ་བདག་སྦྱིན་པ་ངན་པ་འམ། བཟང་པོ་སྦྱིན་ཡང་རུང་སྟེ། དེ་ཡང་དད་པས་ཡིན། གུས་པས་ཡིན། རང་གི་ལག་ནས་ཡིན། དུས་སུ་ཡིན། གནོད་པ་མེད་པ་ཡིན་ན། གང་གི་ཚེ་དེའི་རྣམ་པར་སྨིན་པ་སོ་སོར་མྱོང་བར་འགྱུར་བ་དེའི་ཚེ་ན་དེའི་སེམས་ཁྱིམ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། ཟས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། གོས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། གནས་མལ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། བཞོན་པའི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། གཟུགས་དང་སྒྲ་དང་དྲི་དང་རོ་དང་རེག་བྱ་རྒྱ་ཆེན་པོ་དག་ལ་འཇུག་པར་འགྱུར་ཏེ། ཁྱིམ་བདག་སྦྱིན་པ་དེ་ལྟ་བུ་བྱིན་པའི་འབྲས་བུ་རྣམ་པར་སྨིན་པ་ནི་དེ་ལྟ་བུར་འདོད་པར་བྱའོ།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་དགུ་པ། ཁྱིམ་བདག
8.88a
སྔོན་བྱུང་བ་བྲམ་ཟེ་དུས་དཔོག་ཅེས་བྱ་བ་ཤིང་སཱ་ལ་ཆེན་པོ་ལྟ་བུ་ཞིག་བྱུང་བར་གྱུར་ཏེ། དེས་བྲམ་ཟེ་རྣམས་ལ་སྦྱིན་པ་འདི་ལྟ་བུ་འདི་བྱིན་ཏེ་གླང་པོ་ཆེ་གསེར་གྱིས་བརྒྱན་པ། གསེར་གྱིས་མཛེས་པར་བྱས་པ། གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །རྟ་གསེར་གྱིས་བརྒྱན་པ། གསེར་གྱིས་མཛེས་པར་བྱས་པ། གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཤིང་རྟ་རྣམ་བཞི་གསེར་ལས་བྱས་པ་དང ། དངུལ་ལས་བྱས་པ་དང ། བཻ་དཱུརྱ་ལས་བྱས་པ་དང ། ཤེལ་ལས་བྱས་པ་དང ། སེང་གེའི་ལྤགས་པས་གཡོགས་པ་དང ། སྟག་ལྤགས་ཀྱིས་གཡོགས་པ་དང ། གུང་ལྤགས་ཀྱིས་གཡོགས་པ་དང ། ར་མོ་ནིག་གིས་བཀབ་པ། རྣམ་པར་རྒྱལ་བྱེད་ཡིད་དུ་འོང་བ་དང་ལྡན་པའི་ཤིང་རྟ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཁང་པ་བརྩེགས་པ་རྣམ་བཞི་གསེར་ལས་བྱས་པ་དང ། དངུལ་ལས་བྱས་པ་དང ། བཻ་དཱུརྱ་ལས་བྱས་པ་དང ། ཤེལ་ལས་བྱས་པའི་ཁང་པ་བརྩེགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཁྲི་རྣམ་བཞི་གསེར་ལས་བྱས་པ་དང ། དངུལ་ལས་བྱས་པ་དང ། བཻ་དཱུརྱ་ལས་བྱས་པ་དང ། ཤེལ་ལས་བྱས་པ། ཤུར་བུས་བླས་པ། སྟན་སྦྱར་མ་བཏིང་བ། སྟན་ནང་ཚངས་ཅན་བཏིང་བ། སྟན་ཁྲ་བོ་བཏིང་བ། སྟན་ཆེན་པོ་བཏིང་བ། སྟན་བཟང་པོ་བཏིང་བ། སུ་མཚན་གྱི་གོས་ཀྱི་སྟེང་གཡོགས་བཏིང་བ། སྟེང་ནས་བགོ་བའི་གོས་དང་བཅས་པ། གཉིས་སུ་རྒྱབ་རྟེན་དམར་པོ་བཞག་པའི་ཁྲི་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །གསེར་གྱི་སྣོད་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །དངུལ་གྱི་སྣོད་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །གསེར་གྱི་སྣོད་དངུལ་ཕྱེས་གང་བ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །དངུལ་གྱི་སྣོད་གསེར་ཕྱེས་གང་བ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །རས་ཟུང
8.88b
རྣམ་བཞི་ཀ་ཤི་ཀའི་རས་ཕྲན་དང ། ཟར་མའི་རས་ཕྲན་དང ། དུ་གུ་ལའི་རས་ཕྲན་དང ། ཀོ་ཏམ་པའི་རས་ཕྲན་ཟུང་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །བ་གསེར་གྱི་རཝ་ཅན་རྨིག་པ་དངུལ་ལས་བྱས་པ་བེའུ་འཐུན་པ་དང་བཅས་པ་ཁར་བའི་ཟེ་བ་ཅན། རས་བཅོས་བུ་ཕྲུགས་ཀྱིས་གཡོགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །བུ་མོ་གསེར་གྱི་དཔུང་རྒྱན་ཅན་མགུལ་རྒྱན་དང་བཅས་པ། རྒྱན་བཟང་པོས་བརྒྱན་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཟས་དང་སྐོམ་དང་བཅའ་བ་དང་བཟའ་བ་དང་བལྡག་པ་དང ། བཞིབ་པ་གཞན་ལྟ་སྨོས་ཀྱང་ཅི་དགོས་ཏེ། བྲམ་ཟེ་རྣམས་ལ་སྦྱིན་པར་དེ་ལྟ་བུ་དེ་བྱིན་ནོ། །ཁྱིམ་བདག་བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་སོ་སོའི་སྐྱེ་བོ་འཛམ་བུའི་ཚལ་དུ་འོངས་པ་གཅིག་ལ་ཟན་བཟའ་བ་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང །
8.89a
གང་གིས་རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་ཏུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་གཅིག་ཕྱིར་འོང་བ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ
8.89b
དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང །
8.90a
གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་བརྒྱ་ཟན་བྱིན་པ་དང ། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང །
8.90b
གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་བརྒྱ་ཟན་བྱིན་པ་དང ། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང ། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་བརྩིག་ཏུ་བཅུག་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་བརྒྱ་ཟན་བྱིན་པ་དང ། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང ། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང ། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང ། སྟན་ནང་ཚངས་ཅན་དང ། ལ་བ་དང་སྔས་དང ། གོར་བུ་དག་ཕུལ་བ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང །
8.91a
གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་བརྒྱ་ཟན་བྱིན་པ་དང ། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང ། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང ། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང ། སྟན་ནང་ཚངས་ཅན་དང ། ལ་བ་དང་སྔས་དང ། གོར་བུ་དག་ཕུལ་བ་དང ། གང་གིས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་དང་འཐུན་པའི་མཆོད་སྦྱིན་འབུལ་བ་དང ། སངས་རྒྱས་ལ་སྐྱབས་སུ་འགྲོ་བ་དང ། ཆོས་ལ་སྐྱབས་སུ་འགྲོ་བ་དང ། དགེ་འདུན་ལ་སྐྱབས་སུ་འགྲོ་བ་དང ། བསླབ་པའི་གཞི་དག་ལེན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་བརྒྱ་ཟན་བྱིན་པ་དང ། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང ། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང ། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ།
8.91b
ཁྲི་དང་ཁྲིའུ་དང ། སྟན་དང ། སྟན་ནང་ཚངས་ཅན་དང ། ལ་བ་དང་སྔས་དང ། གོས་བུ་དག་ཕུལ་བ་དང་གང་གིས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་དང་འཐུན་པའི་མཆོད་སྦྱིན་ཕུལ་བ་དང ། གང་སངས་རྒྱས་ལ་སྐྱབས་སུ་འགྲོ་བ་དང ། ཆོས་ལ་སྐྱབས་སུ་འགྲོ་བ་དང ། དགེ་འདུན་ལ་སྐྱབས་སུ་འགྲོ་བ་དང ། བསླབ་པའི་གཞི་དག་ལེན་པ་དང ། གང་གིས་སེམས་ཅན་སྲོག་ཆགས་འབྱུང་པོ་ཐམས་ཅད་ལ་བྱམས་པའི་སེམས་བསྒོམ་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །ཁྱིམ་བདག་བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང ། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ལན་ཅིག་ཕྱིར་འོང་བ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང ། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང ། གང་གིས་དགྲ་བཅོམ་པ་བརྒྱ་ཟན་བྱིན་པ་དང ། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང ། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང ། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང ། སྟན་དང་སྟན་ནང་ཚངས་ཅན་དང ། ལ་བ་དང་སྔས་དང ། གོར་བུ་དག་ཕུལ་བ་དང ། གང་གིས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་དང་འཐུན་པའི་མཆོད་སྦྱིན་ཕུལ་བ་དང ། གང་སངས་རྒྱས་ལ་སྐྱབས་སུ་འགྲོ་བ་དང ། ཆོས་ལ་སྐྱབས་སུ་འགྲོ་བ་དང ། དགེ་འདུན་ལ་སྐྱབས་སུ་འགྲོ་བ་དང ། བསླབ་པའི་གཞི་དག་ལེན་པ་དང ། གང་གིས
8.92a
སེམས་ཅན་སྲོག་ཆགས་འབྱུང་པོ་ཐམས་ཅད་ལ་བྱམས་པའི་སེམས་སྒོམ་པ་དང ། གང་འདུ་བྱེད་ཐམས་ཅད་ལ་མི་རྟག་པར་རྗེས་སུ་ལྟ་ཞིང་གནས་པ་དང ། ཟད་པར་རྗེས་སུ་ལྟ། འདོད་ཆགས་དང་བྲལ་བར་རྗེས་སུ་ལྟ། འགོག་པར་རྗེས་སུ་ལྟ། སྤོང་བར་རྗེས་སུ་ལྟ་ཞིང་གནས་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །ཁྱིམ་བདག་དེ་ལྟ་བས་ན་ཁྱོད་ཀྱིས་འདི་ལྟར་འདུ་བྱེད་ཐམས་ཅད་ལ་མི་རྟག་པར་རྗེས་སུ་ལྟ་ཞིང་གནས་པར་བྱེད་པ་དང་ཟད་པར་རྗེས་སུ་ལྟ། འདོད་ཆགས་དང་བྲལ་བར་རྗེས་སུ་ལྟ། འགོག་པར་རྗེས་སུ་ལྟ། སྤོང་བར་རྗེས་སུ་ལྟ་ཞིང་གནས་པར་བྱའོ། །ཞེས་བསླབ་པར་བྱ་སྟེ། ཁྱིམ་བདག་ཁྱོད་ཀྱིས་དེ་ལྟར་བསླབ་པར་བྱའོ། །དེ་ནས་ཁྱིམ་བདག་ངན་པ་བཟང་བྱིན་གྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་པ་དང་རྗེས་སུ་ཡི་རང་བར་བྱས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་དུས་གཞན་ཞིག་ན་རང་གི་ཁྱིམ་ན་མཚན་མོ་མར་མེ་སྦར་ཏེ་སངས་རྒྱས་ཀྱི་བཀའ་ཀློག་པ་ན་རྒྱལ་པོའི་ཞོ་ཤས་འཚོ་བ་གྲོང་ཁྱེར་ཉུལ་བ་དག་གིས་སྒོ་གཏན་གྱི་བུ་གུ་ནས་དེ་མཐོང་ནས། དེ་དག་གིས་དེ་ལ་སྨྲས་པ། ཁྱིམ་བདག་རྒྱལ་པོས་དྲིལ་བསྒྲགས་པ་བྱེད་དུ་བཅུག་སྟེ་མཉན་ཡོད་དུ་སུས་ཀྱང་མཚན་མོ་མེ་སྦར་བར་མི་བྱའོ། །གང་སྦར་བར་བྱེད་པ་དེ་ཀཱར་ཥ་པཱ་ཎ་དྲུག་བཅུའི་ཆད་པས་བཅད་པར་བྱ་བ་འམ། ཕྱག་སྦལ་དུ་བཅུག་སྟེ་འཆི་བར་བྱའོ་ཞེས་བཀའ་བཏགས་ན་ཁྱོད་ཀྱིས་ཅིའི་ཕྱིར་མཚན་མོ་མེ་སྦར། དེས་སྨྲས་པ། ཤེས་ལྡན་དག་འདི་ནི་མེ་མ་ཡིན་ཏེ་མར་མེ་ཡིན་ནོ། །ཁྱིམ་བདག་ཅི་འདིས་མེའི་བྱ་བ་བྱེད་མི་ནུས་སམ། ཡང་ན་ནི་ཀཱར་ཥ་པཱ་ཎ་དྲུག་བཅུ་ཕུལ་ཅིག་།ཡང་ན་ནི་ཕྱག་སྦལ་ན་འདུག་ཤིག་།ཤེས་ལྡན་དག་ཁོ་བོ་ལ་ཀཱར་ཥ་པཱ་ཎ་དྲུག་བཅུའི་འབྱོར་པ་ག་ལ་ཡོད། ཕྱག་སྦལ་དུ་འདུག་གོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཕྱག་སྦལ་ནི་རིམ་པ་གསུམ་ཡོད་དེ། མི་གཙོ་བོ་གང་དག་ཡིན་པ་དེ་དག་ནི་སྟེང་རིམ་དུ་འཇོག་པར་བྱེད། མི་བར་མ་གང་དག་ཡིན་པ་དེ་དག་ནི་བར་དུ་འཇོག་པར་བྱེད། མི་ངན་པ་གང་དག་ཡིན་པ
8.92b
དེ་དག་ནི་གཏིང་དུ་འཇོག་པར་བྱེད་པས་དེ་མི་གཙོ་བོ་ཡིན་པའི་ཕྱིར་དེ་དག་གིས་སྟེང་རིམ་དུ་བཞག་གོ། །དེ་ནས་རྒྱལ་པོ་ཆེན་པོ་བཞི་མཚན་མོའི་ཐུན་དང་པོ་ལ་ཁྱིམ་བདག་ངན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་འཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་།དེས་སྨྲས་པ། ཉེ་དབང་དག་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ། །ཅིའི་ཕྱིར་ཀཱར་ཥ་པཱ་ཎ་དྲུག་བཅུའི་ཕྱིར་ཏེ་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ། །ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་།ཁྱོད་ཀྱི་ཁྱིམ་འམ། ཆུའི་གནས་གང་དག་དབྱིག་དང ། གསེར་གྱིས་དགང་བར་བྱ། ཉེ་དབང་དག་ཁྱེད་སྙིང་ལས་ཆུང་ངུར་གྱིས་ཤིག་དང ། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ། །དེ་དག་ཆོས་མཉན་པའི་ཕྱིར་དེའི་མདུན་དུ་འདུག་པ་ན་དེ་དག་གི་ལུས་འདི་འདྲ་སྟེ། འདི་ལྟ་སྟེ་དཔེར་ན་མེའི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཚན་མོའི་ཐུན་དང་པོ་ལ་ཕྱག་སྦལ་ན་མེའི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་མཐོང་ངོ ། །དེ་ནས་ལྷའི་དབང་པོ། བརྒྱ་བྱིན་མཚན་མོའི་གུང་ཐུན་ལ་ཁྱིམ་བདག་ངན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་འཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་།དེས་སྨྲས་པ། ཀཽ་ཤི་ཀ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ། །ཅིའི་ཕྱིར། ཀཱར་ཥ་པཱ་ཎ་དྲུག་བཅུའི་ཕྱིར་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ། །
8.93a
ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་།ཁྱོད་ཀྱི་ཁྱིམ་འམ། ཆུའི་གནས་གང་དག་དབྱིག་དང ། གསེར་གྱིས་དགང་བར་བྱ། ཀཽ་ཤི་ཀ་ཁྱོད་སྙིང་ལས་ཆུང་ངུར་གྱིས་ཤིག་དང་བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ། །དེ་ཆོས་མཉན་པའི་ཕྱིར་དེའི་མདུན་དུ་འདུག་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་འདྲའོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཚན་མོའི་གུང་ཐུན་ལ་ཕྱག་སྦལ་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ་རབ་ཏུ་འབར་བ། ཀུན་དུ་རབ་ཏུ་འབར་བ་མེ་ལྕེ་གཅིག་ཏུ་གྱུར་ཅིང་སྲེག་པ་མཐོང་ངོ ། །དེ་ནས་མི་མཇེད་ཀྱི་བདག་པོ་ཚངས་པ་མཚན་མོའི་ཐུན་ཐ་མ་ལ་ཁྱིམ་བདག་ངན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་འཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་།དེས་སྨྲས་པ། ཚངས་པ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ། །ཅིའི་ཕྱིར། ཀཱར་ཥ་པཱ་ཎ་དྲུག་བཅུའི་ཕྱིར་ཏེ། ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ། །ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་།ཁྱོད་ཀྱི་ཁྱིམ་འམ། ཆུའི་གནས་གང་དག་དབྱིག་དང ། གསེར་གྱིས་དགང་བར་བྱ། ཚངས་པ་ཁྱོད་སྙིང་ལས་ཆུང་ངུར་གྱིས་ཤིག་དང ། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ། །དེ་ཆོས་མཉན་པའི་ཕྱིར་དེའི་མདུན་དུ་འདུག་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་ན་མེའི་ཕུང་པོ་ཆེན་པོ
8.93b
སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་བས་ཀྱང་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་འདྲའོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཚན་མོའི་འཐུན་ཐ་མ་ལ་ཕྱག་སྦལ་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་བས་ཀྱང་ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་མཐོང་ངོ ། །མཐོང་ནས་ཀྱང་ཕྱག་སྦལ་སྲུང་བའི་མི་མངག་པས་བཀུག་སྟེ་སྨྲས་པ། ཀཝའི་ནང་རྗེ་ངས་དྲིལ་བུ་སྒྲག་པ་བྱེད་དུ་བཅུག་སྟེ་མཉན་ཡོད་དུ་སུས་ཀྱང་མཚན་མོ་མེ་སྦར་བར་མི་བྱའོ་ཞེས་བསྒོ་ན། ང་ཉིད་ཀྱི་ཕྱག་སྦལ་ན་མདང་མཚན་མོ་ཐོག་ཐག་མེའི་ཕུང་པོ་ཆེན་པོ་སྦར་བ་དེ་ཅིའི་ཕྱིར། དེས་སྨྲས་པ། ལྷ་སུས་ཀྱང་མཚན་མོ་ཕྱག་སྦལ་དུ་ཞུགས་མེ་སྦར་ཏེ། ལྷས་དེར་ཅི་ཞིག་གཟིགས་མ་འཚལ་ཏོ། །རྒྱལ་པོས་ཞོ་ཤས་འཚོ་བ་རྣམས་ལ་བསྒོ་བ་ཤེས་ལྡན་དག་དེང་ལ་ཅི་བདེན་ནམ་བརྫུན་པ་ཕྱག་སྦལ་རྟོགས་ཤིག་།དེ་དག་དོང་སྟེ་ཕྱག་སྦལ་བརྟགས་ན་ཐལ་བ་ཡང་མི་སྣང་ནས། དེ་དག་ཕྱིར་ལོག་སྟེ་རྒྱལ་པོ་ལ་སྨྲས་པ། ལྷ་བདག་ཅག་གིས་ཕྱག་སྦལ་བརྟགས་ན་ཐལ་བ་ཡང་མི་གདའོ། །རྒྱལ་པོས་ཕྱག་སྦལ་སྲུང་བའི་མི་ལ་སྨྲས་པ། ཀཝའི་ནང་རྗེ་དེ་ན་མི་གཙོ་བོ་གང་འདུག་།ལྷ་ཁྱིམ་བདག་ངན་པ་བཟང་བྱིན་མཆིས་སོ། །དེ་བོས་ཤིག་།དེས་ལྷ་བཀའ་བཞིན་འཚལ་ཞེས་དེ་བོས་པ་དང ། རྒྱལ་པོས་དེ་ལ་སྨྲས་པ། ཁྱིམ་བདག་ངས་དྲིལ་བསྒྲགས་པ་བྱེད་དུ་བཅུག་སྟེ་སུས་ཀྱང་མཉན་ཡོད་ཏུ་མཚན་མོ་མེ་སྦར་བར་མི་བྱའོ་ཞེས་བསྒོ་ན་ཁྱོད་ཀྱིས་ཅིའི་ཕྱིར།
8.94a
ཕྱག་སྦལ་དུ་མཚན་ཐོག་ཏག་མེ་སྦར། དེས་སྨྲས་པ། ལྷ་བདག་གིས་ཡུད་ཙམ་ཡང་ཞུགས་མ་བལྟམ་ན་མཚན་ཐོག་ཏག་ལྟ་ཅི་སྨོས། ཁྱིམ་བདག་ང་ཉིད་ཀྱིས་མཚན་མོའི་ཐུན་དང་པོ་ལ་མེའི་ཕུང་པོ་ཆེན་པོ་བཞི་འབར་བ་རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་དང ། མཚན་མོའི་གུང་ཐུན་ལ་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ་རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དང་མཚན་མོའི་ཐུན་ཐ་མ་ལ་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ་རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཀྱང་ཆེས་འཕགས་པ་དང ། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་མཐོང་བཞིན་དུ་ཁྱོད་ན་རེ་དེ་སྐད་ཅེས་བདག་གིས་ཡུད་ཙམ་ཡང་མེ་མ་སྦར་ན་མཚན་ཐོག་ཏག་ལྟ་ཅི་སྨོས་ཤེས་ཟེར་ན་དེ་ཅི་ཡིན། ལྷ་དེ་ནི་མད་དེ། བདག་གིས་ནི་མཚན་མོ་ཞུགས་མ་སྦར་མོད་ཀྱི་འདི་ལྟར་མདང་མཚན་མོའི་ཐུན་དང་པོ་ལ་རྒྱལ་པོ་ཆེན་པོ་བཞི་བདག་ག་ལ་བ་དེར་མཆིས་ཏེ་ཕྱིན་ནས་བདག་ལ་འདི་སྐད་ཅེས་ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་འཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་ཅེས་མཆིས་ནས། བདག་གིས་དེ་དག་ལ་འདི་སྐད་ཅེས་ཉེ་དབང་དག་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ་ཞེས་བགྱིས་པ་དང ། དེ་དག་བདག་ལ་འདི་སྐད་ཅེས་ཅིའི་ཕྱིར་ཞེས་མཆིས་ནས་བདག་གིས་དེ་ལ་འདི་སྐད་ཅེས་ཀཱར་ཥ་པཱ་ཎ་དྲུག་བཅུའི་ཕྱིར་ཏེ། ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ། །ཞེས་བགྱིས་ན། དེ་དག་བདག་ལ་འདི་སྐད་ཅེས་ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་ཁྱོད་ཀྱི་ཁྱིམ་འམ། ཆུའི་གནས་གང་དག་དབྱིག་དང ། གསེར་གྱིས་དགང་བར་བྱ་ཞེས་མཆིས་ནས། བདག་གིས་དེ་དག་ལ་འདི
8.94b
སྐད་ཅེས་ཉེ་དབང་དག་སྙིང་ལས་ཆུང་ངུར་གྱིས་ཤིག་།བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ་ཞེས་བགྱིས་པ་དང ། དེ་དག་ཆོས་མཉན་པའི་སླད་དུ་བདག་གི་མདུན་དུ་མཆིས་པ་ན། དེ་དག་གི་ལུས་འདི་འདྲ་སྟེ། འདི་ལྟ་སྟེ་དཔེར་བགྱི་ན་ཞུགས་ཀྱི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །དེ་ནས་མཚན་མོའི་གུང་ཐུན་ལ་ལྷའི་དབང་པོ་བརྒྱ་བྱིན་བདག་ག་ལ་བ་དེར་མཆིས་ཏེ་ཕྱིན་ནས། བདག་ལ་འདི་སྐད་ཅེས་ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་འཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་ཅེས་མཆིས་ནས། བདག་གིས་དེ་ལ་འདི་སྐད་ཅེས་ཀཽ་ཤི་ཀ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ་ཞེས་བགྱིས་པ་དང ། དེ་བདག་ལ་འདི་སྐད་ཅེས་ཅིའི་ཕྱིར་ཞེས་མཆི་ནས། བདག་གིས་དེ་ལ་འདི་སྐད་ཅེས་ཀཱར་ཥ་པཱ་ཎ་དྲུག་བཅུའི་ཕྱིར་ཏེ་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ་ཞེས་བགྱིས་ན། དེ་བདག་ལ་འདི་སྐད་ཅེས་ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་དང ། ཁྱོད་ཀྱི་ཁྱིམ་འམ། ཆུའི་གནས་གང་དག་དབྱིག་དང་གསེར་གྱིས་དགང་བར་བྱ་ཞེས་མཆི་ནས། བདག་གིས་དེ་ལ་འདི་སྐད་ཅེས་ཀཽ་ཤི་ཀ་ཁྱོད་སྙིང་ལས་ཆུང་ངུར་གྱིས་ཤིག་དང ། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ་ཞེས་བགྱིས་པ་དང ། དེ་ཆོས་མཉན་པའི་སླད་དུ་བདག་གི་མདུན་དུ་མཆིས་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་བགྱི་ན་ཞུགས་ཀྱི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་ཞུགས་ཀྱི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །དེ་ནས་མཚན་མོའི་ཐུན་ཐ་མ་ལ་མི་མཇེད་ཀྱི་བདག་པོ་ཚངས་པ་བདག་ག་ལ་བ་དེར་མཆིས་ཏེ། ཕྱིན་ནས་བདག་ལ་འདི་སྐད་ཅེས་ཁྱིམ་བདག་ཁྱོད་ཕྱག་སྦལ་ན། འདུག་པ་ཚུལ་དང
8.95a
འཐུན་པ་མ་ཡིན་ན། ཅིའི་ཕྱིར་ཁྱོད་ཕྱག་སྦལ་ན་འདུག་ཅེས་མཆིས་ནས། བདག་གིས་དེ་ལ་འདི་སྐད་ཅེས་ཚངས་པ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ་ཞེས་བགྱིས་པ་དང ། དེ་བདག་ལ་འདི་སྐད་ཅེས་ཅིའི་ཕྱིར་ཞེས་མཆིས་ནས། བདག་གིས་དེ་ལ་འདི་སྐད་ཅེས་ཀཱར་ཥ་པཱ་ཎ་དྲུག་བཅུའི་ཕྱིར་ཏེ་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ་ཞེས་བགྱིས་ན། དེ་བདག་ལ་འདི་སྐད་ཅེས་ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་།ཁྱོད་ཀྱི་ཁྱིམ་འམ་ཆུའི་གནས་གང་དག་དབྱིག་དང ། གསེར་གྱིས་དགང་བར་བྱ་ཞེས་མཆི་ནས། བདག་གིས་དེ་ལ་འདི་སྐད་ཅེས་ཚངས་པ་ཁྱོད་སྙིང་ལས་ཆུང་ངུར་གྱིས་ཤིག་དང ། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ་ཞེས་བགྱིས་པ་དང ། དེ་ཆོས་མཉན་པའི་སླད་དུ་བདག་གི་མདུན་དུ་མཆིས་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་བགྱི་ན་ཞུགས་ཀྱི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང ། ཆེས་གྱ་ནོམ་པའི་ཞུགས་ཀྱི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་བས་ཀྱང་ཆེས་འཕགས་པ་དང ། ཆེས་གྱ་ནོམ་པའི་ཞུགས་ཀྱི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །རྒྱལ་པོས་སྨྲས་པ། ཁྱིམ་བདག་གལ་ཏེ་དེ་ལྟ་ན་ངས་ཀྱང་ཁྱོད་ལ་དམ་པ་སྦྱིན་གྱིས་ཅི་འདོད་པ་སྨྲོས་ཤིག་།དེས་སྨྲས་པ། ལྷ་གལ་ཏེ་ཁྱོད་བདག་ལ་ཐུགས་དད་ན་བདག་དགུང་ལ་ཞུགས་མར་གྱི་འོད་ལ་སངས་རྒྱས་ཀྱི་བཀའ་ཀློག་པར་འཚལ་ལོ། །རྒྱལ་པོས་སྨྲས་པ། ཁྱིམ་བདག་ཁྱོད་འབའ་ཞིག་ལ་གནང་བར་མ་ཟད་ཀྱི་འདི་ལྟར་ཁྱོད་ཉིད་ལ་བརྟེན་ནས། གཞན་གང་དག་མཚན་མོ་མེ་མར་གྱི་འོད་ལ་སངས་རྒྱས་ཀྱི་བཀའ་ཀློག་པར་འདོད་པ་ཐམས་ཅད་ལ་ཡང་གནང་ངོ ། །དེ་ནས་ཁྱིམ་བདག་ངན་པ་བཟང་བྱིན་རྒྱལ་པོས་བཏང་བས་དགའ་མགུ་རབ་ཏུ་དགའ་སྟེ་རྒྱལ་པོའི
8.95b
དྲུང་ནས་སོང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་རྒྱལ་བྱེད་ཀྱི་ཚལ་དུ་སོང་ངོ ། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་དེས་རྒྱལ་བྱེད་ཀྱི་ཚལ་གྱི་སྒོར་བསྡད་དེ་མི་དག་པའི་མཐའ་ཅན་ཞིག་ལ་སྨྲས་པ། ཀཝའི་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་པ་ལྟོས་ཤིག་།མི་དག་པའི་མཐའ་ཅན་དེས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་བ་དང ། ཇི་ཙམ་ན་ཁྱིམ་བདག་ངན་པ་བཟང་བྱིན་བཅོམ་ལྡན་འདས་ལ་བསྙེན་བཀུར་བྱེད་པ་མཐོང་ངོ ། །མཐོང་ནས་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་ཁྱིམ་བདག་ངན་པ་བཟང་བྱིན་བཅོམ་ལྡན་འདས་ལ་བསྙེན་བཀུར་བགྱིད་ཅིང་མཆིས་སོ། །རྒྱལ་པོས་བསམས་པ། ཁྱིམ་བདག་དེ་བདག་གི་ཡུལ་ན་གནས་པ་ཡིན་པས་དེས་བདག་མཐོང་ན་མངོན་དུ་ལྡང་བར་འགྱུར་གྲང་སྙམ་ནས། དེ་བཅོམ་ལྡན་འདས་ག་ལ་བ་དེར་སོང་ངོ ། །ཁྱིམ་བདག་ངན་པ་བཟང་བྱིན་གྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས། རེ་ཤིག་དམ་པའི་ཆོས་ལ་བསྙེན་བཀུར་བགྱི་འམ། འོན་ཏེ་རྒྱལ་པོ་ལ་བསྙེན་བཀུར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རེ་ཤིག་དམ་པའི་ཆོས་ལ་བསྙེན་བཀུར་གྱིས་ཤིག་།སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དེ་དགྲ་བཅོམ་པ་དག་ཀྱང་ཆོས་བླ་མར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་དག་བཀའ་སྩལ་པ། སངས་རྒྱས་གང་དག་འདས་པ་དང ། །སངས་རྒྱས་གང་དག་མ་བྱོན་དང ། །སངས་རྒྱས་མྱ་ངན་སེལ་མཛད་པ། །ད་ལྟར་མང
8.96a
པོ་གང་བཞུགས་དག་།ཐམས་ཅད་དམ་པའི་ཆོས་ལ་ནི། །གུས་པར་གནས་གྱུར་གནས་འགྱུར་ཞིང ། །དེ་བཞིན་གུས་པར་གནས་མཛད་དེ། །དེ་ནི་སངས་རྒྱས་ཆོས་ཉིད་ཡིན། །དེ་ཕྱིར་བདག་ལ་ལེགས་འདོད་ཅིང ། །བདག་ཉིད་ཆེན་པོ་མངོན་འདོད་པས། །སངས་རྒྱས་བསྟན་པ་དྲན་བྱེད་ན། །འདི་ལ་དམ་ཆོས་གུས་པར་བྱ། །ཁྱིམ་བདག་ངན་པ་བཟང་བྱིན་གྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་མངོན་དུ་ལྡང་བ་མ་བྱས་པ་དང ། རྒྱལ་པོ་ཁྲོས་ཏེ་བསམས་པ། ཁྱིམ་བདག་འདི་བདག་གི་ཡུལ་ན་གནས་པ་ཡིན་ན་བདག་ལ་མངོན་དུ་ལྡང་བ་མི་བྱེད་དོ་སྙམ་ནས། དེ་ཁྲོ་བས་ཀུན་ནས་དཀྲིས་བཞིན་དུ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །བཅོམ་ལྡན་འདས་ཀྱིས་འདི་ཁྲོ་བས་ཀུན་ནས་དཀྲིས་སོ་སྙམ་དུ་མཁྱེན་ནས། བཀའ་མཆིད་གཞན་དག་མཛད་པར་བརྩམས་ཏེ་ཆོས་སྟོན་པར་མི་མཛད་པ་དང ། དེས་གསོལ་པ། བཅོམ་ལྡན་འདས་ཆོས་བསྟན་དུ་གསོལ། བདེ་བར་གཤེགས་པ་ཆོས་བསྟན་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་དེ་ལ་ཚིགས་སུ་བཅད་པ་དག་བཀའ་སྩལ་པ། རབ་ཏུ་དད་སེམས་མེད་པ་དང ། །ཞེ་སྡང་ཅན་དང་འཁྲུགས་པ་ཡིས། །ཡང་དག་རྫོགས་སངས་བསྟན་པ་ཡི། །དམ་ཆོས་ཀུན་ཤེས་བྱ་མི་ནུས། །གང་གིས་ཉེས་རྩོམ་བཏུལ་བྱས་ཤིང ། །རབ་དང་མེད་པའི་སེམས་བསལ་ཏེ། །ཀུན་ནས་མནར་སེམས་འདིར་སྤོང་བ། །དེས་ནི་ལེགས་གསུངས་ཤེས་པར་འགྱུར། །རྒྱལ་པོས་བསམས་པ། ཁྱིམ་བདག་འདི་ལ་བརྟེན་ནས་བཅོམ་ལྡན་འདས་ཀྱིས་ཆོས་མཉན་པ་ཡང་རྒྱུན་བཀུམ་མོ་སྙམ་ནས། དེ་ལ་རྒྱ་ཆེར་ཁྲོ་བའི་སེམས་སྐྱེས་ཏེ་སྡོད་ཅིག་ཅེས་བྱས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བསྒོ་བ། ཤེས་ལྡན་དག་གང་གི་ཚེ་ཁྱིམ་བདག་ངན་པ་བཟང་བྱིན་བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་བ་དེའི་ཚེ་དེ་ལ་ཁྱོད་ངའི་ཡུལ་ན་མ་འདུག་ཤིག་ཅེས་བསྒོ་ཤིག་།དེ་ནས་ལྷ་གང
8.96b
ཁྱིམ་བདག་ངན་པ་བཟང་བྱིན་ལ་མངོན་པར་དད་པ་དེས་སྲོག་ཆགས་ཏྲེ་མ་བུ་ཀ་དང ། ཏྲཻ་ལ་ཏ་ཀ་མང་པོ་དག་བཏང་ནས་དེ་དག་གིས་རྒྱལ་པོ་དེ་ཀུན་ནས་བསྐོར་ཏེ་ཟིན་པ་ན་དེ་ཉམ་ང་བས་རང་གི་ཁྱིམ་དུ་ཕྱིན་ཅིང་དེར་བཙུན་མོའི་འཁོར་དང ། གཞོན་ནུ་དང ། བློན་པོ་དང་ཁྲོམ་གྱི་རུ་སྣ་དང ། གླང་པོ་ཆེ་དང ། རྟ་དག་ཀྱང་ཀུན་ནས་བསྐོར་ཅིང་ཟིན་པར་གྱུར། མཉན་ཡོད་ན་གནས་པའི་སྐྱེ་བོའི་ཚོགས་ཐམས་ཅད་ཀྱང་ཀུན་ནས་བསྐོར་ཅིང་ཟིན་པར་གྱུར་ཏོ། །དེ་ནས་རྒྱལ་པོ་སྐྲག་སྟེ་མྱུར་བ་མྱུར་བར་གླང་པོ་ཆེ་ལ་ཞོན་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཙུན་པ་རེ་ཤིག་དེའི་ཚེ་ཡང་ཀླུའི་རྒྱལ་པོ་དགའ་བོ་དང ། ཉེ་དགའ་གཉིས། འཁྲུགས་པར་གྱུར་ན་ད་སུ་ཞིག་འཁྲུགས་ལགས། རྒྱལ་པོ་ཆེན་པོ་ཇི་ལྟར་གྱུར། བཅོམ་ལྡན་འདས་བདག་སྲོག་ཆགས་ཏྲེ་མ་བུ་ཀ་དང ། ཏྲཻ་ལ་ཏ་ཀ་དག་གིས་ཀུན་ནས་སྐོར་ཅིང་ཟིན་པར་གྱུར། མཆིས་འབྲང་གི་འཁོར་དང ། གཞོན་ནུ་དང ། བློན་པོ་དང ། ཁྲོམ་གྱི་རུ་སྣ་དང ། གླང་པོ་ཆེ་དང ། རྟ་དག་ཀྱང་ཀུན་ནས་བསྐོར་ཅིང་ཟིན་པར་གྱུར། མཉན་ཡོད་ན་གནས་པའི་སྐྱེ་བོའི་ཚོགས་ཐམས་ཅད་ཀྱང་ཀུན་ནས་སྐོར་ཅིང་ཟིན་པར་གྱུར་ཏོ། །རྒྱལ་པོ་ཆེན་པོ་ཁྱོད་ཀྱིས་ཁྱིམ་བདག་ངན་པ་བཟང་བྱིན་ལ་རབ་ཏུ་སྡང་བའི་སེམས་བསྐྱེད་དོ། །བཅོམ་ལྡན་འདས་ཅི་ལགས་ཁྱིམ་བདག་དེ་འཁྲུགས་པར་གྱུར་ཏམ། རྒྱལ་པོ་ཆེན་པོ་དེ་ནི་ཕྱིར་མི་འོང་བ་ཡིན་པས་འཁྲུགས་པ་སྐྱེད་པར་མི་བྱེད་དེ། འདི་ལྟར་ལྷ་གང་དེ་ལ་མངོན་པར་དད་པ་དེ་འཁྲུགས་པར་གྱུར་ཏོ། །བཅོམ་ལྡན་འདས་བདག་གིས་དེ་ལ་ཇི་ལྟར་བསྒྲུབ་པར་བགྱི། རྒྱལ་པོ་ཆེན་པོ་ཁྱོད་ཀྱིས་དེ་ལ་བཟོད་པ་གསོལ་བར་བྱའོ། །བཅོམ་ལྡན་འདས་ཅི་ལགས་བདག་གིས་དེའི་རྐང་པ་གཉིས་ལ་གཏུགས་པར་བགྱི་འམ། རྒྱལ་པོ་ཆེན་པོ་རྐང་པ་གཉིས་ལ་གཏུག་པར་མི་བྱ་སྟེ། འདི་ལྟར་མི་མ་རབས་དག་གི་རྐང་པ་ལ་ཕྱག་འཚལ་བ་གང་ཡིན་པ་དེ་ནི་མི་གཙོ་བོ་དག་གིས་ལག་པ་ནས་བཟུང་བ་ཡིན་གྱིས།
8.97a
ཁྱོད་ཀྱིས་ལག་པ་གཡས་པ་རྐྱོང་ལ་ཁྱིམ་བདག་བཟོད་པར་གྱིས་ཤིག་ཅེས་བཟོད་པ་གསོལ་ཅིག་དང་དེས་བཟོད་པར་འགྱུར་རོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་པ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །མཉན་ཡོད་ན་ཁྱིམ་བདག་སྡུམས་བྱེད་དང ། ཚུལ་ཁྲིམས་ཚོང་དཔོན་ཞེས་བྱ་བ་གཉིས་ཤིག་ཡོད་དོ། །དེ་ན་བཏམས་པ་སྲུང་བ་རྣམས་ལ་ནི་སྡུམས་བྱེད་དྲང་པོ་ཡིན། གཅིག་པུས་ཆེ་བཞི་འབྱེད་པ་རྣམས་ལ་ནི་ཚུལ་ཁྲིམས་ཚོང་དཔོན་དྲང་པོ་ཡིན་ལ། དེ་ཡང་ངོ་ཚ་དང་ལྡན་པས་བཤང་བའི་སར་ཐག་རིང་དུ་འགྲོ་བ་ཡིན་ནོ། །མཉན་ཡོད་ན་སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ཆོམ་རྐུན་པ་དག་འཁོད་པ་དེ་དག་གི་ཀུན་ཏུ་སྤྱོད་པ་ནི་དགག་དབྱེ་བྱས་མ་ཐག་ཏུ་འདུས་ནས་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན་དེས་བཙལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་ལས་གཅིག་གིས་སྨྲས་པ། ཤེས་ལྡན་དག་ཁྱིམ་བདག་སྡུམས་བྱེད་འདི་བཏམས་པ་འཛིན་པ་ཡིན་པས་འདི་ལ་བརྒལ་ཞིང་བརྟག་པར་བྱའོ། །གཞན་དག་གིས་སྨྲས་པ། མ་ཉེས་ཀྱིས་དེ་བཞིན་བྱ་སྟེ། འདི་ལྟར་ཁྱིམ་བདག་ཚུལ་ཁྲིམས་ཚོང་དཔོན་འདི་གཅིག་པུས་ཆེ་བཞི་འབྱེད་པ་རྣམས་ལ་དྲང་བ་ཡིན་ལ། དེ་ཡང་ངོ་ཚ་དང་ལྡན་པས་བཤང་བའི་སར་ཐག་རིང་དུ་འགྲོ་བས་དེ་བཟུང་སྟེ་བསྡིགས་ན་དེས་ཆེ་བཞི་འབྱེད་པར་འགྱུར་རོ་ཞེས་དེ་དག་གིས་དེའི་བྱ་ར་བྱས་ཏེ། དེ་བཤང་བའི་སར་སོང་བ་བཟུང་ནས་བསྡིགས་ཏེ་སྨྲས་པ། ཁྱིམ་བདག་ཁྱོད་གསོན་ནམ་འཆི། དེས་སྨྲས་པ། ཤེས་ལྡན་དག་ཁྱེད་ཀྱིས་ཇི་ལྟར་བསམས་པའོ། །དེ་དག་གིས་སྨྲས་པ། ཁྱིམ་བདག་གལ་ཏེ་དེ་ལྟ་ན་ཁོ་བོ་ཅག་ཁྱིམ་བདག་སྡུམས་བྱེད་ལ་ནོར་བརྒྱ་འམ་སྟོང་གིས་རྒོལ་ཞིང་རྟོག་གིས་ཁྱོད་ཀྱིས་ཆེ་བཞི་ཕྱེ་ཤིག་།དེས་སྨྲས་པ། ཤེས་ལྡན་དག་ཅི་ཡང་དག་པས་སམ། ཡང་དག་པ་མ་ཡིན་པས། ཁྱིམ་བདག་ཡང་དག་པ
8.97b
མ་ཡིན་པས་སོ། །ཤེས་ལྡན་དག་ཁོ་བོ་ཡང་དག་པ་མ་ཡིན་པས་ཆེ་བཞི་མི་འབྱེད་དེ། ཁོ་བོས་ཚེ་གཅིག་གི་སྡུག་བསྔལ་ལས་ཐར་བར་བྱ་བའི་དོན་དུ་ཚེ་རབས་མང་པོའི་སྡུག་བསྔལ་སྐྱེད་པར་མི་ནུས་སོ། །དེ་དག་གིས་སྨྲས་པ། ཁྱིམ་བདག་གལ་ཏེ་རེ་ཤིག་ཆེ་བཞི་འབྱེད་ན་དེ་ལྟ་ན་ལེགས། གལ་ཏེ་མི་འབྱེད་ན་ཁོ་བོ་ཅག་གིས་ཁྱོད་མགོ་དྲུང་པ་ནས་བཅད་དེ་ས་ལ་བསྒྱེལ་བར་བྱའོ། །དེས་ཚིགས་སུ་བཅད་པ་སྨྲས་པ། ཁོ་བོ་ཆོས་ལ་གནས་ན་མྱུར་དུ་ཤི་ཡང་བླ། །ཆོས་ལ་རྒྱབ་ཀྱིས་ཕྱོགས་ན་གསོན་པར་མ་གྱུར་ཅིག་།ཆོས་ལ་གནས་པ་སུམ་བཅུ་ལྷ་ཡི་བདེ་བ་སྤྱོད། །ཆོས་ལས་ཉམས་པ་མི་བཟད་འཇིགས་པའི་ངན་སོང་ལྟུང ། །དེ་ནས་སྟོན་ཟླ་ཐ་ཆུངས་ཀྱི་གཡོན་ཅན་དེ་དག་གིས་ཁྱིམ་བདག་དེའི་རྐང་པ་གཉིས་ལ་གཏུགས་ཏེ་སྨྲས་པ། ཁྱིམ་བདག་བདག་ཅག་ལ་མི་འཇིགས་པ་སྩོལ་ཅིག་།དེས་སྨྲས་པ་སྦྱིན་ནོ། །སྟོན་ཟླ་ཐ་ཆུངས་ཀྱི་གཡོན་ཅན་དེ་དག་གིས་དེའི་རྐང་པ་གཉིས་ལ་གཏུགས་ཏེ་དོང་ངོ ། །མཉན་ཡོད་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ནུ་བོ་རྒྱལ་བུ་ནག་པོ་ཞེས་བྱ་བ་གཟུགས་བཟང་བ་བལྟ་ན་སྡུག་པ་མཛེས་པ། དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་བ་ཞིག་འདུག་པ་དེ་ཡན་ལག་བརྒྱད་དང་ལྡན་པའི་གསོ་སྦྱོང་ལ་ཉེ་བར་གནས་པའི་གན་དུ་བདུད་ཀྱི་རིས་ཀྱི་ལྷ་མོ་ཞིག་འོངས་ཏེ། རིགས་པས་བསྐྱེད་པ་མ་ཡིན་པས་མགྲོན་དུ་གཉེར་བ་ནི་དེས་དེ་དང་དུ་མ་བླངས་སོ། །ཇི་ཙམ་དུས་གཞན་ཞིག་ན་ཁྱིམ་བདག་ངན་པ་བཟང་བྱིན་དང ། ཁྱིམ་བདག་སྡུམས་བྱེད་དང ། ཁྱིམ་བདག་ཚུལ་ཁྲིམས་ཚོང་དཔོན་དང ། རྒྱལ་བུ་ནག་པོ་རྣམས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་རྒྱལ་པོའི་འབྱོར་པ་ཆེན་པོ་དང ། རྒྱལ་པོའི་མཐུ་ཆེན་པོས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ
8.98a
གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁྱིམ་བདག་ངན་པ་བཟང་བྱིན་ནི་འདི་ཡིན་ནོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟན་ལས་ལངས་ཏེ་ལག་པ་གཡས་པ་བརྐྱང་ནས་སྨྲས་པ། ཁྱིམ་བདག་བཟོད་པ་མཛོད་ཅིག་།ཁྱིམ་བདག་གིས་སྨྲས་པ་ལྷ་བཟོད་པར་འཚལ་ལོ། །དེ་ནས་བཅོམ་ལྡན་འདས་ལ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཙུན་པ་བདག་ནི་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ལགས་ན་བདག་གིས་བདག་གི་ཡུལ་ན་གནས་པའི་འབངས་ལ་བཟོད་པ་གསོལ་བ་གང་ལགས་པ་དེ་ངོ་མཚར་མི་ཆེ་འམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རྗེ་དཔོན་གྱིས་བཟོད་པ་གསོལ་བ་ངོ་མཚར་ཆེའོ། །དེ་ནས་བཅོམ་ལྡན་འདས་ལ་ཁྱིམ་བདག་ངན་པ་བཟང་བྱིན་གྱིས་འདི་སྐད་ཅེས་གསོལ་ཏོ། །བཙུན་པ་བདག་ལ་ཀཱར་ཥ་པཱ་ཎ་གཅིག་མཆིས་པ་དེས་བདག་གིས་ཟོང་མཇལ་ཅིང་བཙོངས་ནས་དེ་ལས་ཀཱར་ཥ་པཱ་ཎ་བཞི་གྲུབ་ཅིང་དེ་དག་ལས་གཅིག་གིས་ནི་བཅོམ་ལྡན་འདས་ཀྱི་དྲི་གཙང་ཁང་དུ་སྤོས་ཀྱི་བྱུག་པས་བྱུགས། གཉིས་པ་ནི་དགེ་འདུན་གྱི་སླད་དུ་དགེ་སློང་མཆོད་སྟོན་སྩལ། གསུམ་པས་ནི་གཡོག་འཁོར་གྱི་འཚོ་བ་སྦྱར། བཞི་པ་ནི་ཟོང་གི་རིན་དུ་བཞག་སྟེ། བཙུན་པ་བདག་ནི་ནོར་མ་མཆིས་པའི་སྦྱིན་པ་གང་ལགས་པ་དེ་ངོ་མཚར་མི་ཆེ་འམ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ནོར་མེད་པའི་སྦྱིན་པ་ངོ་མཚར་ཆེའོ། །དེ་ནས་བཅོམ་ལྡན་འདས་ལ་ཁྱིམ་བདག་ཚུལ་ཁྲིམས་ཚོང་དཔོན་གྱིས་འདི་སྐད་ཅེས་གསོལ་ཏོ། །བཙུན་པ་བདག་སླད་རོལ་དུ་མཆིས་པ་དང ། སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བཟུང་ནས་བསྡིགས་ཏེ། དེ་དག་བདག་ལ་འདི་སྐད་ཅེས་ཁྱིམ་བདག་ཅི་ཁྱོད་གསོན་ནམ་འཆི་ཞེས་མཆི་ནས་བདག་གིས་དེ་དག་ལ་འདི་སྐད་ཅེས་ཤེས་ལྡན་དག་ཁྱེད་ཀྱིས་ཇི་ལྟར་བསམས་པའོ་ཞེས་བགྱིས་པ་དང ། དེ་དག་བདག་ལ་འདི་སྐད་ཅེས་ཁྱིམ་བདག་གལ་ཏེ་དེ་ལྟ་ན་ཁོ་བོ་ཅག་ཁྱིམ་བདག་སྡུམས་བྱེད་ལ་ནོར་བརྒྱ་འམ། སྟོང་གིས་རྒོལ་ཞིང་རྟོག་གིས་ཁྱོད་ཀྱིས་ཆེ་བཞི་ཕྱེ་ཤིག་ཅེས་མཆི་ནས། བདག་གིས་དེ་དག་ལ་འདི་སྐད་ཅེས་ཤེས་ལྡན་དག་ཅི་ཡང་དག་པས་སམ། ཡང་དག་པ་མ་ཡིན་པས་ཤེས་བགྱིས་ན། དེ་དག་བདག་ལ་འདི་སྐད་ཅེས་ཁྱིམ་བདག་ཡང་དག་པ་མ་ཡིན་པས་སོ་ཞེས་མཆི་ནས། བདག་གིས་དེ་དག་ལ་འདི་སྐད་ཅེས་ཤེས་ལྡན་དག་ཁོ་བོ་ཡང་དག་པ་མ་ཡིན་པས་ཆེ་བཞི་མི་འབྱེད་དེ། ཁོ་བོས་ཚེ་གཅིག་གི་སྡུག་བསྔལ
8.98b
ལས་ཐར་བར་བྱ་བའི་དོན་དུ་ཚེ་རབས་མང་པོའི་སྡུག་བསྔལ་བསྐྱེད་པར་མི་ནུས་སོ་ཞེས་བགྱིས་པ་དང ། དེ་དག་བདག་ལ་འདི་སྐད་ཅེས་ཁྱིམ་བདག་གལ་ཏེ་རེ་ཤིག་ཆེ་བཞི་འབྱེད་ན་དེ་ལྟ་ན་ལེགས། གལ་ཏེ་མི་འབྱེད་ན་ཁོ་བོ་ཅག་གིས་ཁྱོད་མགོ་དྲུང་པ་ནས་བཅད་དེ་ས་ལ་བསྒྱེལ་བར་བྱའོ་ཞེས་མཆི་ནས། བདག་གིས་ཚིགས་སུ་བཅད་པ་འདི་སྐད་ཅེས། ཁོ་བོ་ཆོས་ལ་གནས་ན་མྱུར་དུ་ཤི་ཡང་བླ། །ཆོས་ལ་རྒྱབ་ཀྱིས་ཕྱོགས་ན་གསོན་པར་མ་གྱུར་ཅིག་།ཆོས་ལ་གནས་པ་སུམ་བཅུ་ལྷ་ཡི་བདེ་བ་སྤྱོད། །ཆོས་ལས་ཉམས་པ་མི་བཟད་འཇིགས་པའི་ངན་སོང་ལྟུང ། །ཞེས་སྨྲས་པ་དང ། དེ་དག་གིས་བདག་གི་རྐང་པ་གཉིས་ལ་གཏུགས་ཏེ། བདག་ལ་འདི་སྐད་ཅེས་ཁྱིམ་བདག་བདག་ཅག་ལ་མི་འཇིགས་པ་སྩོལ་ཅིག་ཅེས་མཆི་ནས། བདག་གིས་དེ་དག་ལ་འདི་སྐད་ཅེས་སྦྱིན་ནོ་ཞེས་བགྱིས་ཏེ། བཙུན་པ་བདག་ཕོངས་པར་གྱུར་པས་ཀྱང་ཆོས་ཡོངས་སུ་མ་བཏང་སྟེ། བདག་གིས་ཕོངས་པར་གྱུར་པ་ན་ཆོས་སྤྱད་པ་ངོ་མཚར་མི་ཆེ་འམ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཕོངས་པར་གྱུར་པ་ན་ཆོས་སྤྱད་པ་ངོ་མཚར་ཆེའོ། །དེ་ནས་བཅོམ་ལྡན་འདས་ལ་རྒྱལ་བུ་ནག་པོས་འདི་སྐད་ཅེས་གསོལ་ཏོ། །བཙུན་པ་བདག་ཡན་ལག་བརྒྱད་དང་ལྡན་པའི་གསོ་སྦྱོང་ལ་ཉེ་བར་གནས་པའི་གན་དུ་བདུད་ཀྱི་རིས་ཀྱི་ལྷ་མོ་ཞིག་མཆིས་ནས་རིགས་པས་བསྐྱེད་པ་མ་ལགས་པས་མགྲོན་དུ་གཉེར་བ་ན་བདག་གིས་དེ་དང་དུ་མ་བླངས་ཏེ། བཅོམ་ལྡན་འདས་བདག་ནོར་མང་ལ་འདོད་པ་དག་ལས་དབེན་པ་དེ་ངོ་མཚར་མི་ཆེ་འམ། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ་ནོར་མང་ལ་འདོད་པ་དག་ལས་དབེན་པ་ངོ་མཚར་ཆེའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་བཀའ་སྩལ་པ། རྗེ་དཔོན་བཟོད་གསོལ་ནོར་མེད་སྦྱིན་པ་དང ། །ཕོངས་པར་གྱུར་པ་ཆོས་སྤྱོད་བྱེད་པ་དང ། །ནོར་མང་འདོད་པ་དག་ལས་དབེན་བྱེད་པ། །བཞི་པོ་དེ་དག་ཤིན་ཏུ་བྱ་དཀའ་ཡིན། །དེ་ནས་ཁྱིམ་བདག་ངན་པ་བཟང་བྱིན་དང ། ཁྱིམ་བདག་སྡུམས་བྱེད་དང ། ཁྱིམ་བདག་ཚུལ་ཁྲིམས་ཚོང་དཔོན་དང ། རྒྱལ་བུ་ནག་པོ་རྣམས་ཀྱིས་བཅོམ་ལྡན་འདས་ལ་ཆོས་མངོན་པ་དང ། འདུལ་བ་མངོན་པའི་ཞུ་བ་ཞུས་ནས། བཅོམ་ལྡན་འདས་ཀྱིས་དེ་དག་ལ་གོང་ནས་གོང་དུ
8.99a
བཀའ་ལན་སྩལ་པ་དང ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་དེ་དག་གི་གདོང་དུ་ལྟ་ཞིང་འདུག་སྟེ། དེས་ཡུད་ཙམ་ཞིག་ཆོས་དང་ལྡན་པའི་གཏམ་མཉན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། སྟན་ལས་ལངས་ནས་སོང་སྟེ། དེ་བཙུན་མོའི་འཁོར་གྱི་ནང་དུ་ཞུགས་ནས་བཙུན་མོ་ཕྲེང་ལྡན་མ་ལ་སྨྲས་པ། ཕྲེང་ལྡན་མ་དེང་ཁྱིམ་བདག་ངན་པ་བཟང་བྱིན་དང ། ཁྱིམ་བདག་སྡུམས་བྱེད་དང ། ཁྱིམ་བདག་ཚུལ་ཁྲིམས་ཚོང་དཔོན་དང ། རྒྱལ་བུ་ནག་པོ་རྣམས་ཀྱིས་བཅོམ་ལྡན་འདས་ལ་ཆོས་མངོན་པ་དང ། འདུལ་བ་མངོན་པའི་ཞུ་བ་ཞུས་ནས། བཅོམ་ལྡན་འདས་ཀྱིས་ཀྱང་དེ་དག་ལ་གོང་ནས་གོང་དུ་ལན་བཀའ་སྩལ་པ་དང ། ང་ཡང་དེ་དག་གི་གདོང་དུ་ལྟ་ཞིང་ཁ་རོག་པར་འདུག་འདུག་ནས་ལངས་ཏེ་སོང་ངོ ། །ཕྲེང་ལྡན་མས་སྨྲས་པ། ལྷ་ཁྱོད་ཀྱིས་ཀྱང་ཅིའི་སླད་དུ་བཅོམ་ལྡན་འདས་ལ་མ་ཞུས། ཕྲེང་ལྡན་མ་ང་ནི་ཐོས་པ་ཉུང་བ་ཡིན་ལ། དེ་དག་ནི་ཐོས་པ་མང་བ་ཡིན་པས་ངས་ཅི་ཞིག་ཞུར་ཡོད། ལྷ་ཁྱོད་ཀྱང་ཅིའི་སླད་དུ་སངས་རྒྱས་ཀྱི་བཀའ་གློག་པར་མི་མཛད། ཕྲེང་ལྡན་མ་ང་རྒྱལ་པོའི་བྱ་བ་དང ། རྒྱལ་པོའི་བྱེད་པ་དག་ལ་རྟག་ཏུ་བྲེལ་བས་ཇི་ལྟར་ཀློག་།གལ་ཏེ་ཁྱོད་འགའ་ཞིག་ལས་སངས་རྒྱས་ཀྱི་བཀའ་ཀློག་ན་ངས་མཚན་མོ་ཁྱོད་ལས་ཀླག་པར་བྱའོ། །ལྷ་དེ་ལྟར་བགྱིའོ། །རྒྱལ་པོས་བཙུན་མོ་རྒྱལ་རིགས་དབྱར་ཚུལ་མ་ལ་སྨྲས་པ། ཁྱོད་སུ་ལས་ཀློག་།དེས་སྨྲས་པ། ལྷ་འཕགས་པ་ཤཱ་རིའི་བུ་ལས་སོ། །བཙུན་མོ་ཕྲེང་ལྡན་མ་ལ་སྨྲས་པ། ཁྱོད་སུ་ལས་ཀློག་།དེས་སྨྲས་པ། ལྷ་འཕགས་པ་འཆར་ཀ་ལས་སོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་རྒྱལ་རིགས་དབྱར་ཚུལ་མ་འཕགས་པ་ལས་སངས་རྒྱས་ཀྱི་བཀའ་ཀློག་པར་འཚལ་ན། ཀློག་ཏུ་སྩལ་བར་གསོལ། དེས་སྨྲས་པ། ལྷ་བཅོམ་ལྡན་འདས་ལ་ཞུའོ་ཞེས་དེ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ
8.99b
ནས་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་སྐད་ཅེས་རྒྱལ་རིགས་དབྱར་ཚུལ་མ་ཀློག་ཏུ་སྩོལ་ཅིག་ཅེས་མཆི་ན། བདག་གིས་དེ་ལ་ཇི་སྐད་བརྗོད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཀློག་ཏུ་ཆུག་ཤིག་།ཚེ་དང་ལྡན་པ་ཤཱ་རིའི་བུས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ལྷ་ཀློག་ཏུ་སྩལ་ཏོ་ཞེས་ཁས་བླངས་སོ། །རྒྱལ་པོས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཕྱིན་ནས་ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །འཕགས་པ་ཕྲེང་ལྡན་མ་འཕགས་པ་ལས་སངས་རྒྱས་ཀྱི་བཀའ་ཀློག་པར་འཚལ་ན་ཀློག་ཏུ་སྩལ་པར་གསོལ། དེས་སྨྲས་པ། ལྷ་བཅོམ་ལྡན་འདས་ལ་ཞུའོ་ཞེས་དེ་ནས་ཚེ་དང་ལྡན་པ་འཆར་ཀས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་འཆར་ཀས་འདི་སྐད་ཅེས་གསོལ་ཏོ། །བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་སྐད་ཅེས་ཕྲེང་ལྡན་མ་ཀློག་ཏུ་སྩོལ་ཅིག་ཅེས་མཆི་ན། བདག་གིས་དེ་ལ་ཇི་སྐད་བརྗོད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་ཀློག་ཏུ་ཆུག་ཤིག་།ཚེ་དང་ལྡན་པ་འཆར་ཀས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ལྷ་ཀློག་ཏུ་སྩོལ་ཏོ་ཞེས་ཁས་བླངས་ནས། རྒྱལ་པོས་དེའི་རྐང་པ་གཉིས་ལ་ཕྱག་འཚལ་ཏེ་སོང་ངོ་།། ་་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་བཅུ་པ། ཚེ་དང་ལྡན་པ་ཤཱ་རིའི་བུ་ནི་དུས་ཤེས་པ་དང ། དུས་རིག་པ་ཡིན་པས་དེ་དུས་སུ་སོང་ནས་རྒྱལ་རིགས་དབྱར་ཚུལ་མ་ཀློག་ཏུ་འཇུག་གི་དུས་མ་ཡིན་པར་མི་འགྲོའོ། །ཚེ་དང་ལྡན་པ་འཆར་ཀ་ནི་དུས་མི་ཤེས་པ་དང ། དུས་མི་རིག་པ་ཡིན་པས་དུས་སུ་ཡང་སོང་སྟེ་ཕྲེང་ལྡན་མ་ཀློག་ཏུ་འཇུག་ལ། དུས་མ
8.100a
ཡིན་པར་ཡང་འགྲོའོ། །ཇི་ཙམ་དུས་གཞན་ཞིག་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་རི་བྲགས་གཞན་ཞིག་ཏུ་བྱ་བ་ཅུང་ཞིག་བྱུང་ནས་དེ་མཚན་མོ་ཉིད་དུ་ལངས་ཏེ་དེར་འཕགས་པ་དང ། ཚེ་དང་ལྡན་པ་འཆར་ཀ་གླང་པོ་ཆེའི་སྒྲ་དང ། རྟའི་སྒྲ་དང ། དུང་གི་སྒྲས་སད་ནས་དེས་བསམས་པ། བཙུན་མོ་ཕྲེང་ལྡན་མ་ལ་བཟླས་པ་སྦྱིན་དུ་འགྲོའོ་སྙམ་ནས། དེ་རྒྱལ་པོའི་ཕོ་བྲང་གི་སྒོར་སོང་བ་དང་སྒོ་བས་སྨྲས་པ། འཕགས་པ་དུས་མ་ལགས་པར་རྒྱལ་པོའི་ཕོ་བྲང་དུ་མ་འཇུག་པར་རེ་ཤིག་གཞེས་ལ་སླད་ཀྱིས་ཞུགས་ཤིག་།དེ་ཁྲོས་ཏེ་སྨྲས་པ། བཀྲེན་པ་ཇི་སྲིད་དུ་གསུས་པོ་ཆེ་འདི་གསོན་པ་དེ་སྲིད་དུ་ཁོ་བོ་འདིར་དུས་སུ་ཡང་འཇུག་ལ། དུས་མ་ཡིན་པར་ཡང་འཇུག་གོ། །འདི་ཤི་ན་འདིར་གདོལ་པ་དག་དང་ཆོམ་རྐུན་པ་དག་འཇུག་པར་འགྱུར་ཞིང་འདི་མི་གཙང་བའི་ར་བ་དང ། བཙོན་ར་དང་ཝ་ལམ་ཅན་དུ་འགྱུར་རོ། །སྒོ་བ་སྐྲག་ནས་ཅང་མི་སྨྲ་བར་འདུག་པ་དང ། ཚེ་དང་ལྡན་པ་འཆར་ཀ་ནང་དུ་ཞུགས་པ་ན་བཙུན་མོ་ཕྲེང་ལྡན་མ་གཉིད་ལོག་ཅིང་འདུག་ནས་དེས་སེ་གོལ་གྱི་སྒྲས་དེ་བསླང་བ་དང ། དེས་དེའི་རྐང་པ་ལ་ཕྱག་འཚལ་ཏེ་མདུན་དུ་འདུག་གོ། །བཙུན་མོ་ཕྲེང་ལྡན་མ་བཙུན་མོའི་འཁོར་ལ་འོས་པའི་གོས་དག་གྱོན་པས་ཚེ་དང་ལྡན་པ་འཆར་ཀ་དབང་པོ་རྣམས་བསྡུས་ཏེ་འདུག་པ་དང ། བཙུན་མོ་ཕྲེང་ལྡན་མས་བསམས་པ། ཅིའི་ཕྱིར་འཕགས་པ་འཆར་ཀ་དབང་པོ་རྣམས་བསྡུས་ཏེ་འདུག་སྙམ་ནས་དེས་ཡང་བསམས་པ། བདག་གིས་བཙུན་མོའི་འཁོར་ལ་འོས་པའི་གོས་དག་གྱོན་པས་དེའི་ཕྱིར་འཕགས་པ་འཆར་ཀ་དབང་པོ་རྣམས་བསྡུས་ཏེ་འདུག་གོ་སྙམ་དུ་རིག་ནས། དེ་གནས་ཁང་དུ་ཞུགས་ཏེ་གོས་སྟུག་པོ་དག་གྱོན་ནས་ཕྱིར་བྱུང་བ་དང ། ཚེ་དང་ལྡན་པ་འཆར་ཀས་དེ་ལ་བཟླས་པ་བྱིན། ལུང་གཞན་ཡང་ཕོག་པ་དང ། བཙུན་མོ་ཕྲེང་ལྡན་མས་སྨྲས་པ། འཕགས་པ་ཅི་ལགས་དེང་དགེ་འདུན་སྤྱན་དྲངས་སམ། འོན་ཏེ་བསོད་སྙོམས་མཛད། དེས་སྨྲས་པ། བསོད་སྙོམས་བགྱིད་དོ། །བཙུན་མོ་ཕྲེང་ལྡན་མས་སྨྲས་པ། འཕགས་པ་གལ་ཏེ་བསོད་སྙོམས་མཛད་ན་བདག་ལས་ལྷག་པར
8.100b
བསོད་པ་འབུལ་བ་སུ་ཞིག་མཆིས་ཏེ། བདག་ཉིད་ཀྱིས་འབུལ་ལོ་ཞེས་དེས་བཅའ་བ་དང་བཟའ་བ་གཙང་ཞིང་བསོད་པས་ལྷུང་བཟེད་བཀང་སྟེ་དེ་དེ་ལ་ཕུལ་ལོ། །ཚེ་དང་ལྡན་པ་འཆར་ཀས་དེ་བླངས་ཏེ་ཕྱིར་བྱུང་བ་དང ། ཚེ་དང་ལྡན་པ་ཤཱ་རིའི་བུ་ནང་དུ་འཇུག་པ་དང་ཕྲད་ནས་དེས་སྨྲས་པ། དོན་ཉུང་ངུ་ཁྱོད་ཀྱིས་བརྩོན་འགྲུས་འདི་ལྟ་བུས་ཟག་པ་ཟད་པར་བྱས་སམ། ཅི་ན་ཁྱོད་ད་གཟོད་འོང་ཁོ་བོས་ནི་བཟླས་པ་བྱིན་ནས་ལུང་གཞན་ཡང་ཕོག་སྟེ། ཁོ་བོས་བཅའ་བ་དང་བཟའ་བ་གཙང་ཞིང་བསོད་པས་ལྷུང་བཟེད་གང་བ་འདི་ཡང་ཐོབ་བོ། །ཚེ་དང་ལྡན་པ་ཤཱ་རིའི་བུས་སྨྲས་པ། དེའི་ཕྱིར་ཁྱོད་དྲུག་སྡེ་ཡིན་ནོ། །དགེ་སློང་དོན་ཉུང་ངུ་དག་གིས་ཐོས་ནས་ཅིའི་ཕྱིར་དགེ་སློང་དག་ནམ་མ་ནངས། སྐྱ་རེང་མ་ཤར་རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ཏམ། སྒོ་གཏན་གྱི་ཉེན་ཀོར་ལས་འདའ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་ཁྱོད་ནམ་མ་ནངས། སྐྱ་རེང་མ་ཤར། རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་བ་བདེན་ནམ། བཙུན་པ་མད་དོ་སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཅིའི་ཕྱིར་ཞེ་ན། དགེ་སློང་དག་རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུ་པོ་འདི་དག་ཡོད་པའི་ཕྱིར་ཏེ། བཅུ་གང་ཞེ་ན། དགེ་སློང་དག་འདི་ལ་རྒྱལ་པོ་བཙུན་མོ་དང་ལྷན་ཅིག་འདུག་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ལ། དེ་ནས་བཙུན་མོས་དགེ་སློང་མཐོང་ནས་འཛུམ་འབྱིན་པར་བྱེད་ན་དེ་ལ་རྒྱལ་པོ་འདི་སྙམ་དུ་འདི་ལྟར་བཙུན་མོས་དགེ་སློང་མཐོང་ནས་འཛུམ་འབྱིན་པར་བྱེད་པ་ལས་ན་དགེ་སློང་གིས་དབེན
8.101a
པར་སྡིག་པའི་ལས་འགའ་ཞིག་བྱ་བར་སེམས་པར་མི་འགྱུར་རམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་དང་པོ་ཡིན་ནོ། །གཞན་ཡང་རྒྱལ་པོ་བཙུན་མོའི་གན་དུ་སོང་བ་བརྗེད་དམ། སྦྲུམ་པ་བཙུན་མོའི་འཁོར་གྱི་ནང་དུ་ཞུགས་པར་གྱུར་ལ། དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན། དེ་ལ་རྒྱལ་པོ་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་གཉིས་པ་ཡིན་ནོ། །གཞན་ཡང་རྒྱལ་པོའི་ཕོ་བྲང་ནས་རིན་པོ་ཆེ་འམ། རིན་པོ་ཆེར་སྨོན་པ་སྟོར་བར་གྱུར་ལ་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ལ་རྒྱལ་པོ་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་གསུམ་པ་ཡིན་ནོ། །གཞན་ཡང་རྒྱལ་པོའི་ཕོ་བྲང་ནས་གསང་ཚིག་ཕྱི་རོལ་དུ་འཕེལ་བར་གྱུར་ལ་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ལ་རྒྱལ་པོ་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བཞི་པ་ཡིན་ནོ། །གཞན་ཡང་རྒྱལ་པོ་གཞོན་ནུ་རྣམས་ལ་གསོད་པར་སེམས་ལ། དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་དུ་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་ལྔ་པ་ཡིན་ནོ། །གཞན་ཡང་གཞོན་ནུ་རྣམས་རྒྱལ་པོ་གསོད་པར་སེམས་ཤིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་དྲུག་པ་ཡིན་ནོ། །གཞན་ཡང་རྒྱལ་པོས་བློན་པོ་མཐོན་པོ་དག་གནས་དམའ་བར་འཇོག་པར་བྱེད་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ། དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི
8.101b
རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བདུན་པ་ཡིན་ནོ། །གཞན་ཡང་རྒྱལ་པོས་བློན་པོ་དམའ་བ་དག་གནས་མཐོན་པོར་འཇོག་པར་བྱེད་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བརྒྱད་པ་ཡིན་ནོ། །གཞན་ཡང་རྒྱལ་པོ་དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང་དཔུང་བུ་ཆུང་གི་ཚོགས་གོ་སྐོན་ཏེ་ལྗོངས་དག་ཏུ་འགྲོ་བ་དང་ལྡོག་པར་བྱེད་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་དགུ་པ་ཡིན་ནོ། །གཞན་ཡང་རྒྱལ་པོ་མ་ཕེབས་པ་འབེབས་པར་བྱེད་ཅིང་ཕེབས་པ་གནས་པར་བྱེད་ལ། ཐོབ་རྒྱལ་དུ་བསྒྲགས་ནས་དེའི་འོག་ཏུ་ཆད་པ་ཆེན་པོས་རྗེས་སུ་རྟོན་པར་བྱེད་ཅིང ། དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བཅུ་པ་ཡིན་ནོ། །དགེ་སློང་དག་དེ་ལྟར་ན་རྒྱལ་པོའི་ཕོ་བྲང་དུ་འགྲོ་བ་ནི་གླང་པོ་ཆེའི་གནོད་པ་དང ། རྟའི་གནོད་པ་དང ། ཤིང་རྟའི་གནོད་པ་དང ། དཔུང་བུ་ཆུང་གི་གནོད་པ་འབྱུང་བར་འགྱུར་ཏེ། དགེ་སློང་དག་རྒྱལ་པོའི་ཕོ་བྲང་དུ་འགྲོ་བ་ནི་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ། དགེ་སྦྱོང་གི་ཚུལ་དང་མི་མཐུན་པ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ནམ་མ་ནངས་སྐྱ
8.102a
རེང་མ་ཤར། རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ་སྒོ་གཏན་གྱི་ཉེན་ཀོར་ལས་འདའ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་འཛམ་བུའི་གླིང་ན་གྲོང་ཁྱེར་ཆེན་པོ་རྒྱལ་པོའི་ཁབ་དང ། སྒྲ་སྒྲོགས་ཞེས་བྱ་བ་གཉིས་ཡོད་དེ། གང་གི་ཚེ་རྒྱལ་པོའི་ཁབ་རྒུད་པ་དེའི་ཚེ་ན་ནི་སྒྲ་སྒྲོགས་འབྱོར་པར་འགྱུར་ལ། གང་གི་ཚེ་སྒྲ་སྒྲོགས་རྒུད་པ་དེའི་ཚེ་ན་ནི་རྒྱལ་པོའི་ཁབས་འབྱོར་པར་འགྱུར་རོ། །གྲོང་ཁྱེར་ཆེན་པོ་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ན་ཞེས་བྱ་བས་རྒྱལ་སྲིད་འབྱོར་པ་རྒྱས་པ་བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་དང་ཕྱི་སྒྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང ། ནད་དང་བྲལ་བ། སཱ་ལུ་དང་བུ་རམ་ཤིང་གི་ཕྲེང་བ་དང་བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ་ཆོས་དང་ལྡན་པ། ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །དེ་ན་ཤིང་ལྗོན་པ་དག་ཀྱང་རྟག་ཏུ་མེ་ཏོག་དང་འབྲས་བུ་འཆགས་པ་ཡིན་ཞིང ། ལྷས་ཀྱང་དུས་དང་དུས་སུ་ཆར་གྱི་རྒྱུན་ལེགས་པར་འབེབས་པས་ལོ་ཏོག་ཤིན་ཏུ་ཕུན་སུམ་ཚོགས་པར་གྱུར་ཏོ། །དེ་ལ་བཙུན་མོ་ཟླ་འོད་ཅེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་པ་དང ། བུ་རྒྱལ་ཚབ་གཙུག་ཕུད་ཅན་ཞེས་བྱ་བ་དང་བློན་པོའི་མཆོག་ཧེ་རུ་ཀ་དང་བྷེ་རུ་ཀ་ཞེས་བྱ་བ་གཉིས་ཡོད་དོ། །གྲོང་ཁྱེར་རྒྱལ་པོའི་ཁབ་ན་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་དང ། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང ། ནད་དང་བྲལ་བ། སཱ་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །དེ་ན་ཡང་ཤིང་ལྗོན་པ་དག་ཀྱང་རྟག་ཏུ་མེ་ཏོག་དང ། འབྲས་བུ་འཆགས་ཤིང་ལྷས་ཀྱང་དུས་དང ། དུས་སུ་ཆར་གྱི་རྒྱུན་ལེགས་པར་འབེབས་པས་ལོ་ཏོག
8.102b
ཤིན་དུ་ཕུན་སུམ་ཚོགས་པར་གྱུར་ཏོ། །དེ་ལ་བཙུན་མོ་ལུས་འཕགས་མ་ཞེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ་ཡན་ལག་དང་ཉིང་ལག་ཐམས་ཅད་དང་ལྡན་པ་དང ། བུ་རྒྱལ་ཚབ་མ་སྐྱེས་དགྲ་ཞེས་བྱ་བ་དང ། བློན་པོའི་མཆོག་མ་ག་དྷའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་ཚུལ་ཞེས་བྱ་བ་ཡོད་དོ། །ཇི་ཙམ་དུས་གཞན་ཞིག་ན་རྒྱལ་པོའི་ཁབ་ནས་ཚོང་པ་དག་ཟོང་ཐོགས་ཏེ་ཡུལ་གཞན་དུ་འཕགས་ནས་དེ་དག་མཐར་གྱིས་གྲོང་དང ། གྲོང་རྡལ་དང་ཡུལ་འཁོར་དང ། རྒྱལ་པོའི་ཕོ་བྲང་དག་ཏུ་ཚོང་འདུས་དག་ལ་རྣམ་པར་ལྟ་བ་ན་གྲོང་ཁྱེར་ཆེན་པོ་སྒྲ་སྒྲོགས་སུ་ཕྱིན་ཏོ། །ཇི་ཙམ་ན་རྒྱལ་པོ་ཨུ་ཏྲ་ཡ་ན་བློན་པོའི་ཚོགས་ཀྱིས་ཡོངས་སུ་བསྐོར་ཏེ་དོན་གྱི་གནས་ན་འདུག་པ་ན་ཚོང་པ་དེ་དག་སྐྱེས་ཐོགས་ཏེ་རྒྱལ་པོ་ཨུ་ཏྲ་ཡ་ནའི་གན་དུ་སོང་བ་དང ། རྒྱལ་པོ་ཨུ་ཏྲ་ཡ་ནས་དེ་དག་ལ་འོངས་པ་ལེགས་ཞེས་བྱ་བའི་ཚིག་གིས་ཀུན་ཏུ་སྤྱད་ནས་གནས་ཇི་ལྟ་བ་བཞིན་དུ་འཁོད་དོ། །རྒྱལ་པོ་ཨུ་ཏྲ་ཡ་ནས་དེ་དག་མཐོང་ནས་བློན་པོ་རྣམས་ལ་སྨྲས་པ། ཤེས་ལྡན་དག་ཡུལ་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང ། མི་མང་པོས་གང་བ་འདི་ལྟ་བུ་དང ། ཤིང་ལྗོན་པ་རྟག་ཏུ་མེ་ཏོག་དང ། འབྲས་བུ་འཆགས་པ་འདི་ལྟ་བུ་དང ། ལྷས་དུས་དང་དུས་སུ་ཆར་གྱི་རྒྱུན་ལེགས་པར་འབེབས་ཤིང་ལོ་ཏོག་ཤིན་དུ་ཕུན་སུམ་ཚོགས་པ་དང་ལྡན་པའི་རྒྱལ་པོ་གཞན་འགའ་ཞིག་ཡོད་དམ། ཚོང་པ་དེ་དག་གིས་སྨྲས་པ། ལྷ་མཆིས་ཏེ། ཤར་གྱི་ཡུལ་ན་གྲོང་ཁྱེར་རྒྱལ་པོའི་ཁབ་ཅེས་བགྱི་བ་དེ་ན་རྒྱལ་པོ་གཟུགས་ཅན་སྙིང་པོ་ཞེས་བགྱི་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང ། མི་མང་པོས་གང་བ་བགྱིད་དུ་སྩོལ་བ་དེ་ན་ཡང་ཤིང་ལྗོན་པ་དག་ཀྱང་རྟག་ཏུ་མེ་ཏོག་དང ། འབྲས་བུ་འཆགས་ཤིང ། ལྷས་ཀྱང་དུས་དང་དུས་སུ་ཆར་གྱི་རྒྱུན་ལེགས་པར་འབེབས་པས་ལོ་ཏོག་ཤིན་ཏུ་ཕུན་སུམ་ཚོགས་པ་ལགས་སོ། །རྒྱལ་པོ་ཨུ་ཏྲ་ཡ་ནས་ཐོས་ནས་དེ་ལ་རྗེས་སུ་ཆགས་པ་སྐྱེས་ནས་དེས་སྨྲས་པ། ཤེས་ལྡན་དག་རྒྱལ་པོ་དེའི་ཡུལ་ན་ཅི་ཞིག་དཀོན་བློན་པོ་རྣམས་ཀྱིས་སྨྲས་པ། ལྷ་ནི་རིན་པོ་ཆེའི་མངའ་བདག་ལགས་ལ། རྒྱལ་པོ་དེ་ནི་གོས་ཀྱི་བདག་པོ་ལགས་པས་དེ་ལ་རིན་པོ་ཆེ་དག་དཀོན་ནོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་རིན་པོ་ཆེ་རྟོག་པ་དག་བོས
8.103a
ཤིག་ཅེས་རྒྱལ་པོས་རིན་པོ་ཆེ་དག་བརྟགས་ཤིང་བརྟགས་ཤིང་སྒྲོམ་བཀང་ནས་ཚོང་པ་དེ་དག་གི་ལག་ཏུ་སྐྱེས་སུ་བསྐུར་ཞིང་ཕྲིན་ཡིག་ཀྱང ། ཤེད་འཐུན་དགྱེས་པ་ཁྱོད་བདག་གིས་མ་མཐོང་བའི་གྲོགས་ལགས་ཀྱིས། གལ་ཏེ་གྲོང་ཁྱེར་སྒྲ་སྒྲོགས་སུ་ཁྱོད་ལ་བགྱི་བ་ཅུང་ཟད་མཆིས་ན་བདག་ལ་ཕྲིན་ཡིག་སྐུར་ཅིག་དང་ཐམས་ཅད་བསྒྲུབ་བོ་ཞེས་བྲིས་ཏེ་བསྐུར་རོ། །དེ་ནས་ཚོང་པ་དེ་དག་གིས་སྐྱེས་དང ། ཕྲིན་ཡིག་དང་ཟོང་རིན་ཁྱེར་ཏེ་རྒྱལ་པོའི་ཁབ་དུ་འཕགས་ནས་མཐར་གྱིས་རྒྱལ་པོའི་ཁབ་ཏུ་ཕྱིན་ཏོ། །དེ་ནས་ལམ་གྱིས་དུབ་པའི་ངལ་བསོས་ནས་རིན་པོ་ཆེའི་སྒྲོམ་དང ། ཕྲིན་ཡིག་དེ་དག་ཁྱེར་ཏེ། རྒྱལ་པོ་གཟུགས་ཅན་སྙིང་པོའི་གན་དུ་དོང་ནས་རྐང་པ་གཉིས་ལ་གཏུགས་ཏེ། སྒྲོམ་དང་ཕྲིན་ཡིག་དག་ཕུལ་ནས་སྨྲས་པ། ལྷ་གྲོང་ཁྱེར་སྒྲ་སྒྲོགས་ནས་རྒྱལ་པོ་ཨུ་ཏྲ་ཡ་ན་ཞེས་བགྱི་བ་དེས་ལྷ་ལ་སྐྱེས་དང་ཕྲིན་ཡིག་འདི་དག་བསྐུར་རོ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་བླགས་ཏེ་སྨྲས་པ། ཤེས་ལྡན་དག་རྒྱལ་པོ་དེའི་ཡུལ་ན་ཅི་ཞིག་དཀོན། བློན་པོ་རྣམས་ཀྱིས་སྨྲས་པ། ལྷ་ནི་གོས་ཀྱི་མངའ་བདག་ལགས་ལ། རྒྱལ་པོ་དེ་ནི་རིན་པོ་ཆེའི་བདག་པོ་ལགས་པས་དེ་ལ་གོས་དག་དཀོན་ནོ། །དེ་ནས་རྒྱལ་པོ་གཟུགས་ཅན་སྙིང་པོས་གོས་རིན་པོ་ཆེ་དག་གིས་སྒྲོམ་བཀང་སྟེ་སྐྱེས་སུ་བསྐུར་ཞིང ། ཕྲིན་ཡིག་ཀྱང་ཤེད་འཐུན་དགྱེས་པ་ཁྱོད་ཀྱིས་ཕྲིན་ཡིག་སྤྲིང་པ་དེས་མཇལ་ཏེ་ཁྱོད་ཀྱང་བདག་གིས་མ་མཐོང་བའི་གྲོགས་ལགས་ཀྱིས་རྒྱལ་པོའི་ཁབ་ཏུ་ཁྱོད་ལ་ཡང་བགྱི་བ་ཅུང་ཟད་མཆིས་ན་བདག་ལ་ཕྲིན་ཡིག་སྤྲིང་ཤིག་དང ། ཐམས་ཅད་བསྒྲུབ་བོ་ཞེས་བྲིས་ཏེ་བློན་པོ་རྣམས་ལ་བསྒོ་བ། སྐྱེས་དང་ཕྲིན་ཡིག་འདི་དག་ཁྱེར་ལ་ཕོ་ཉ་དག་ལས་སྐུར་ཅིག་།བློན་པོ་རྣམས་ཀྱིས་ཕོ་ཉ་དག་ལས་བསྐུར་བ་དང་དེ་དག་གིས་སྐྱེས་དང་ཕྲིན་ཡིག་དེ་དག་ཁྱེར་ཏེ། སྒྲ་སྒྲོགས་སུ་འཕགས་ནས་མཐར་གྱིས་སྒྲ་སྒྲོགས་སུ་ཕྱིན་ཏོ། །དེ་ནས་ལམ་གྱིས་དུབ་པའི་ངལ་བསོས་ཏེ་གོས་ཀྱི་སྒྲོམ་དང་ཕྲིན་ཡིག་དེ་དག་ཁྱེར་ནས་རྒྱལ་པོ་ཨུ་ཏྲ་ཡ་ནའི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྒྲོམ་དང་ཕྲིན་ཡིག་དག་ཕུལ་ཏེ་སྨྲས་པ། ལྷ་རྒྱལ་པོ་གཟུགས་ཅན་སྙིང་པོས་ལྷ་ལ་སྐྱེས་འདི་དང་ཕྲིན་འདི་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག
8.103b
བླགས་ཏེ་སྨྲས་པ། ཤེས་ལྡན་དག་རྒྱལ་པོ་དེའི་ཆུ་ཞེང་ཅི་འདྲ། དེ་དག་གིས་སྨྲས་པ། ལྷའི་ཅི་འདྲ་བ་ཁོ་ན་ལྟ་བུའོ། །བློན་པོ་རྣམས་ཀྱིས་སྨྲས་པ། ལྷ་དེ་ལྟ་བུ་ལགས་མོད་ཀྱི་འོན་ཀྱང་རྒྱལ་པོ་དེ་རང་གིས་མཚོན་འདེབས་པ། ཉེན་འཁོར་གྱི་མཁར་གྱི་རྒྱལ་པོ་རྣམས་དང་ལྷན་ཅིག་རང་གིས་གཡུལ་འགྱེད་ཅིང་གཡུལ་འགྱེད་དུ་སྩོལ་བ་ལགས་སོ། །རྒྱལ་པོ་ཨུ་ཏྲ་ཡ་ན་ལ་ནོར་བུའི་ཁྲབ་ཡན་ལག་ལྔ་པོ་དུས་ཚིགས་སུ་རེག་པ་བདེ་བ་དང ། གཅད་དཀའ་བ་དང ། དབུག་དཀའ་བ་དང ། དུག་འཇིལ་བ་དང ། སྣང་བའི་བདག་ཉིད་དང་ལྡན་པ་ཞིག་ཡོད་ནས། རྒྱལ་པོ་ཨུ་ཏྲ་ཡ་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་དེ་གལ་ཏེ་རང་གིས་མཚོན་འདེབས་པ། ཉེན་ཀོར་གྱི་མཁར་གྱི་རྒྱལ་པོ་རྣམས་དང་ལྷན་ཅིག་གཡུལ་འགྱེད་ཅིང་འགྱེད་དུ་འཛུད་པ་ཡིན་ན་དེ་ལ་ནོར་བུའི་ཁྲབ་འདི་བསྐུར་གྱིས་ཕོ་ཉ་དག་སྟ་གོན་གྱིས་ཤིག་།དེ་དག་གིས་ཕོ་ཉ་དག་སྟ་གོན་བྱས་ནས། རྒྱལ་པོ་ཨུ་ཏྲ་ཡ་ནས་རིན་པོ་ཆེའི་ཁྲབ་དེ་དང་ཕྲིན་ཡིག་ཀྱང་འདི་སྐད་ཅེས་ཤེད་འཐུན་དགྱེས་པ་ཁྱོད་ལ་བདག་གིས་ནོར་བུའི་ཁྲབ་འདི་སྐྱེས་སུ་བསྐུར་ཏེ། འདི་ཡང་ཡོན་ཏན་ལྔ་པོ་དུས་ཚིགས་སུ་རེག་པ་བདེ་བ་དང ། གཅད་དཀའ་བ་དང ། དབུག་དཀའ་བ་དང ། དུག་འཇིལ་བ་དང ། སྣང་བའི་བདག་ཉིད་དང་ལྡན་པ་ལགས་ཀྱིས་ཁྱོད་ཀྱིས་འདི་བདག་དང་རྐྱེན་པས་རང་ཉིད་ཀྱིས་བཅང་བར་བགྱི་ཞིང་སུ་ལ་ཡང་སྩལ་བར་མི་བགྱིའོ་ཞེས་བྲིས་ཏེ་བསྐུར་རོ། །ཕོ་ཉ་རྣམས་ཀྱིས་སྐྱེས་དེ་དང་ཕྲིན་ཡིག་ཁྱེར་ཏེ་རྒྱལ་པོའི་ཁབ་དུ་འཕགས་ནས་མཐར་གྱིས་རྒྱལ་པོའི་ཁབ་ཏུ་ཕྱིན་ཏོ། །དེ་ནས་ལམ་གྱིས་དུབ་པའི་ངལ་བསོས་ནས་ནོར་བུའི་ཁྲབ་དེ་དང་ཕྲིན་ཡིག་ཁྱེར་ཏེ། རྒྱལ་པོ་གཟུགས་ཅན་སྙིང་པོའི་གན་དུ་དོང་ནས་རྐང་པ་གཉིས་ལ་གཏུགས་ཏེ་ནོར་བུའི་ཁྲབ་དང ། ཕྲིན་ཡིག་ཕུལ་ནས་སྨྲས་པ། ལྷ་རྒྱལ་པོ་ཨུ་ཏྲ་ཡ་ནས་ལྷ་ལ་སྐྱེས་འདི་དང་ཕྲིན་ཡིག་འདི་བསྐུར་རོ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་བླགས་ཏེ་ནོར་བུའི་ཁྲབ་དེ་མཐོང་ནས་མཆོག་ཏུ་ཡ་མཚན་སྐྱེས་ཏེ། བློན་པོ་རྣམས་ལ་སྨྲས་པ། ཤེས་ལྡན་དག་རིན་པོ་ཆེ་རྟོག་པ་དག་བོས་ཤིག་།དེ་དག་གིས་རིན་པོ་ཆེ་རྟོག་པ་དག་བོས་ནས་རྒྱལ་པོས་སྨྲས་པ། ཤེས་ལྡན་དག་རིན་པོ་ཆེ་འདིའི
8.104a
རིན་ཐང་ཆོད་ཅིག་།རིན་པོ་ཆེ་རྟོག་པ་དག་གིས་ནོར་བུའི་ཁྲབ་དང་ལྡན་པའི་རིན་པོ་ཆེ་རེ་རེ་ནས་བརྟག་པར་བརྩམས་ན་རིན་པོ་ཆེ་རེ་རེ་ཡང་རིན་ཐང་མེད་པར་མཐོང་ནས། དེ་དག་གིས་རྒྱལ་པོ་ལ་སྨྲས་པ། ལྷ་འདི་ལ་ནོར་བུ་རིན་པོ་ཆེ་རེ་རེ་ཡང་རིན་ཐང་མ་མཆིས་པ་ལགས་སོ། །ཆོས་ཉིད་ཀྱིས་ན་རིན་པོ་ཆེ་གང་གིས་རིན་ཐང་གདབ་པར་མི་ནུས་པ་དེའི་རིན་ཐང་བྱེ་བར་འདེབས་སོ། །རྒྱལ་པོ་གཟུགས་ཅན་སྙིང་པོས་རིན་པོ་ཆེ་དག་བགྲངས་ནས། བདག་གིས་དེ་ལ་སྐྱེས་ལན་ཅི་ཞིག་བསྐུར་བར་བྱ་སྙམ་དུ་ཉམ་ང་བར་གྱུར་ནས་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་ཨུ་ཏྲ་ཡ་ནས་ང་ལ་སྐྱེས་འདི་ལྟ་བུ་བསྐུར་ན་ངས་དེ་ལ་སྐྱེས་ལན་ཅི་ཞིག་བསྐུར་བར་བྱ། མ་ག་དྷའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་ཚུལ་གྱིས་སྨྲས་པ། ལྷ་ཁྱོད་ཀྱི་ཡུལ་དུ་ཡང་འཇིག་རྟེན་གསུམ་ལས་ཆེས་ཁྱད་པར་དུ་འཕགས་པའི་རིན་པོ་ཆེ་བྱུང་བ་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལགས་ཀྱིས། ཁྱོད་ཀྱིས་ཀྱང་རས་ལ་སངས་རྒྱས་ཀྱི་སྐུ་གཟུགས་འབྲིར་སྩོལ་ལ་སྐྱེས་ལན་དུ་བསྐུར་བར་གསོལ། རྒྱལ་པོས་སྨྲས་པ། གལ་ཏེ་དེ་ལྟ་ན་བཅོམ་ལྡན་འདས་ལ་ཞུའོ་ཞེས་དེ་ནས་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་གྲོང་ཁྱེར་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ན་ཞེས་བགྱི་བ་བདག་གིས་མ་མཐོང་བའི་གྲོགས་ཤིག་མཆིས་པ་དེས་བདག་ལ་ནོར་བུའི་ཁྲབ་ཡན་ལག་ལྔ་དང་ལྡན་པ་ཞིག་སྐྱེས་སུ་བསྐུར་ཏེ། དེའི་སླད་དུ་གལ་ཏེ་བཅོམ་ལྡན་འདས་ཀྱིས་གནང་ན་བདག་གིས་ཀྱང་རས་ལ་བཅོམ་ལྡན་འདས་ཀྱི་སྐུ་གཟུགས་འབྲིར་སྩལ་ཏེ་དེ་ལ་སྐྱེས་ལན་དུ་བསྐུར་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གནང་གིས་སྐུར་ཅིག་།ཁྱོད་ཀྱི་སེམས་སྐྱེས་པ་བཟང་སྟེ། རྒྱལ་པོ་ཨུ་ཏྲ་ཡ་ནས་མཐོང་མ་ཐག་ཁོ་ནར་དད
8.104b
པ་སྐྱེ་བར་འགྱུར་ཞིང་བདེན་པ་མཐོང་བར་བྱེད་པར་འགྱུར་རོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེས་ཡུལ་ཐམས་ཅད་ན་གནས་པའི་རི་མོ་མཁན་དག་བཀུག་སྟེ་སྨྲས་པ། ཤེས་ལྡན་དག་བཅོམ་ལྡན་འདས་ཀྱི་སྐུ་གཟུགས་རས་ལ་བྲིས་ཤིག་།དེ་དག་གིས་སྨྲས་པ། ལྷ་བྲི་བར་འཚལ་ལོ། །དེ་དག་གིས་བཅོམ་ལྡན་འདས་ཀྱི་མཚན་མ་གཟུང་བར་བརྩམས་པ་དང ། སངས་རྒྱས་བཅོམ་ལྡན་འདས་རྣམས་ནི་བལྟ་བས་ཆོག་མི་ཤེས་པ་ཡིན་པས་དེ་དག་གིས་བཅོམ་ལྡན་འདས་ཀྱི་མཚན་མ་གཟུང་བར་མ་ནུས་ནས་དེ་དག་ཡི་ཆད་དེ་རྒྱལ་པོའི་གན་དུ་སོང་ནས་སྨྲས་པ། ལྷ་བདག་ཅག་གིས་བཅོམ་ལྡན་འདས་ཀྱི་མཚན་མ་གཟུང་བར་རྔོ་མ་ཐོག་སྟེ། གལ་ཏེ་ལྷས་བཅོམ་ལྡན་འདས་ཕོ་བྲང་གཞན་དུ་སྤྱན་དྲངས་ཏེ་གདུགས་ཚོད་གསོལ་ན། དེ་ལྟ་ན་བདག་ཅག་གིས་བཅོམ་ལྡན་འདས་ཀྱི་མཚན་མ་གཟུང་བར་རྔོ་ཐོག་གོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཕོ་བྲང་གཞན་དུ་སྤྱན་དྲངས་ཀྱང་སངས་རྒྱས་བཅོམ་ལྡན་འདས་རྣམས་ནི་བལྟ་བས་ཆོག་མི་ཤེས་པ་ཡིན་པས་འདི་ལྟར་དེ་དག་གིས་བཅོམ་ལྡན་འདས་ཀྱི་སྐུ་མཐོང་བ་ན་དེ་དང་དེ་ལ་བལྟ་བས་ངོམས་པར་མ་གྱུར་ནས། དེ་ལྟ་ན་ཡང་བཅོམ་ལྡན་འདས་ཀྱི་མཚན་མ་གཟུང་བར་མ་ནུས་ནས་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རི་མོ་མཁན་རྣམས་ཀྱིས་དེ་བཞིན་གཤེགས་པའི་མཚན་མ་གཟུང་བར་མི་ནུས་ཀྱི་ཡི་ཆད་པར་མ་བྱེད་པར་རས་དེ་འོན་ཅིག་དང་ངས་གྲིབ་མ་གཏང་བར་བྱའོ། །རྒྱལ་པོས་རས་ཕུལ་བ་དང ། བཅོམ་ལྡན་འདས་ཀྱིས་དེར་གྲིབ་མ་བཏང་སྟེ་རི་མོ་མཁན་རྣམས་ལ་བཀའ་སྩལ་པ། ཤེས་ལྡན་དག་གྲིབ་མ་འདིར་ཚོན་སྣ་ཚོགས་ཀྱིས་ཁོང་ཤིག་།རྒྱལ་པོ་ལ་ཡང་བཀའ་སྩལ་པ། རྒྱལ་པོ་ཆེན་པོ་སྐུ་གཟུགས་བྱས་ཟིན་ནས་འོག་ཏུ་སྐྱབས་སུ་འགྲོ་བ་དང ། བསླབ་པའི་གཞི་དག་དང ། རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང ། ལུགས་ལས་བཟློག་པ་དག་བྲི་བར་བར་བྱའོ། །སྟེང་དུ་ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི
8.105a
ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་དག་བྲི་བར་བྱའོ། །ཕོ་ཉ་དག་ལ་ཡང་ཕྲིན་དུ་ས་ཕྱོགས་གོ་སྐབས་ཡངས་པར་བཀུར་སྟི་ཆེན་པོས་སྐུ་གཟུགས་དབྱེ་བར་བྱ་སྟེ། གལ་ཏེ་འདི་ཅི་ཡིན་ཞེས་འདྲི་ན། འདི་ནི་འཇིག་རྟེན་གསུམ་ལས་ཆེས་ཁྱད་པར་དུ་འཕགས་པ་སངས་རྒྱས་བཅོམ་ལྡན་འདས་ཀྱི་སྐུ་གཟུགས་ཡིན་ནོ། །ཞེས་བརྗོད་པར་བྱའོ། །གལ་ཏེ་འོག་ཏུ་བྲིས་པ་འདི་ཅི་ཡིན་ཞེས་འདྲི་ན་འདི་ནི་ཁས་ལེན་པའོ། །འདི་ནི་བསླབ་པའི་གཞི་དག་གོ། །འདི་ནི་འཇིག་རྟེན་གྱི་འབྱུང་བ་དང་ལྡོག་པའོ་ཞེས་བརྗོད་པར་བྱའོ་གལ་ཏེ་སྟེང་དུ་བྲིས་པ་འདི་ཅི་ཡིན་ཞེས་འདྲི་ན་འདི་ནི་མངོན་པར་སྤྲོ་བར་བྱ་བའོ་ཞེས་བརྗོད་པར་བྱའོ་ཞེས་སྒོ་ཞིག་།རྒྱལ་པོས་ཐམས་ཅད་བྲིས་ཤིང་འབྲིར་བཅུག་ནས་དྲི་སྣ་ཚོགས་ཀྱིས་བསྒོས་ཏེ་ལེགས་པར་དྲིལ་ནས་གསེར་གྱི་དོང་བུར་བཅུག་སྟེ། གསེར་གྱི་དོང་བུ་ཡང་དངུལ་གྱི་དོང་བུར་བཅུག་།དངུལ་གྱི་དོང་བུ་ཡང་ཟངས་ཀྱི་དོང་བུར་བཅུག་།ཟངས་ཀྱི་དོང་བུ་ཡང་དྲི་སྣ་ཚོགས་ཀྱིས་བསྒོས་པའི་གོས་དག་གིས་དཀྲིས་ཏེ། གླང་པོ་ཆེའི་རྒྱབ་ཏུ་བཀལ་ནས་གྲོང་ཁྱེར་མཛེས་པ་དང ། ལམ་མཛེས་པ་ཆེན་པོས་གྲོང་ཁྱེར་ནས་ཕྱུང་སྟེ། རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་འདི་སྐད་ཅེས་ཤེད་འཐུན་དགྱེས་པ་ཁྱོད་ལ་བདག་གིས་འཇིག་རྟེན་གསུམ་ལས་ཆེས་ཁྱད་པར་དུ་འཕགས་པའི་སྐྱེས་འདི་བསྐུར་གྱིས་ཁྱོད་ཀྱིས་འདི་དཔག་ཚད་ཕྱེད་དང་གསུམ་དུ་གྲོང་ཁྱེར་མཛེས་པ་དང ། ལམ་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ་ས་ཕྱོགས་གོ་སྐབས་ཡངས་པར་མཆོད་པ་དང་བཀུར་སྟི་ཆེན་པོ་བྱས་ཏེ་དབྱེ་བར་བྱའོ། །དེས་ན་ཁྱོད་ཀྱིས་བསོད་ནམས་ཆེན་པོ་འཐོབ་པར་འགྱུར་རོ་ཞེས་བྲིས་ཏེ་བསྐུར་རོ་ཕོ་ཉ་རྣམས་ལ་ཡང་ཁྱེད་ཀྱིས་འདི་དང་འདི་སྐད་ཅེས་བརྗོད་པར་བྱའོ་ཞེས་བསྒོ་ནས། དེ་དག་གིས་སྐུ་གཟུགས་དང་ཕྲིན་ཡིག་དེ་ཁྱེར་ཏེ་སྒྲ་སྒྲོགས་སུ་འཕགས་སོ། །དེ་དག་མཐར་གྱིས་སྒྲ་སྒྲོགས་ཀྱི་འདབ་ཏུ་ཕྱིན་ནས་དེ་དག་གིས་ལམ་གར་བསྡད་དེ་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་བསྐུར་རོ། །རྒྱལ་པོ་ཨུ་ཏྲ་ཡ
8.105b
ནས་ཕྲིན་ཡིག་བླགས་ནས་ཁྲོ་བས་ཀུན་ནས་དཀྲིས་པར་གྱུར་ཏེ། བློན་པོ་རྣམས་ལ་སྨྲས་པ། ཤེས་ལྡན་དག་དེས་ང་ལ་ཕྲིན་ཡིག་འདི་སྐད་སྤྲིང་བ་ལ་ཉོན་ཅིག་།དེས་ང་ལ་སྐྱེས་ཇི་ལྟ་བུ་ཞིག་བསྐུར་ན་དེའི་ཕྱིར་ངས་དཔག་ཚད་ཕྱེད་དང་གསུམ་དུ་གྲོང་ཁྱེར་མཛེས་པ་དང ། ལམ་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱའོ་ཞེས་ཟེར། དཔུང་གི་ཚོགས་ཡན་ལག་བཞི་པ་སྟ་གོན་གྱིས་ཤིག་དང་ད་སོང་ལ་དེའི་ཡུལ་འཁོར་གཞོམ་པར་བྱའོ། །བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་དེ་ནི་བདག་ཉིད་ཆེན་པོ་ཞིག་ལགས་ཤེས་གདའ་བས་དེས་ལྷའི་ཞལ་སྔར་སྐྱེས་ངན་ངོན་ཞིག་བསྐུར་བར་རྔོ་མི་ཐོག་པས་ཇེ་བརྟག་པར་བགྱིས་ཏེ། གལ་ཏེ་ལྷའི་ཐུགས་མཉེས་ན་དེ་ལྟ་ན་ལེགས། གལ་ཏེ་མ་མཉེས་ན་བདག་ཅག་གིས་དེ་ལ་དུས་འཚལ་བར་བགྱིའོ། །དེ་དག་གིས་དཔག་ཚད་ཕྱེད་དང་གསུམ་ཚུན་ཆད་དུ་ལམ་མཛེས་པ་བྱེད་དུ་བཅུག་སྟེ། གྲོང་ཁྱེར་སྒྲ་སྒྲོགས་ཀྱང་རྡོ་བ་དང ། གསེག་མ་དང ། གྱོ་མོ་མེད་པར་རྣམ་པར་གཞག་ནས་ཙན་དན་གྱི་ཆུས་ཆག་ཆག་བཏབ་ཅིང་བདུག་སྤོས་དྲི་ཞིམ་པོའི་སྣོད་དག་དངར་ཏེ་དར་གྱི་ཆུན་པོའི་ཕྲེང་བ་དཔྱངས་ཤིང ། གདུགས་དང ། རྒྱལ་མཚན་བསྒྲེང་སྟེ། མེ་ཏོག་སྣ་ཚོགས་བཀྲམ་ཞིང་ལྷའི་སྐྱེད་མོས་ཚལ་དགའ་བའི་ཚལ་ཞེས་བྱ་བ་ལྟར་དགའ་བར་འགྱུར་བར་བྱས་ནས་རྒྱལ་པོ་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་ནས་གྲོང་ཁྱེར་གྱི་ནང་དུ་འཇུག་ཏུ་བཅུག་གོ། །དེ་ནས་སྲོག་ཆགས་བྱེ་བ་འབུམ་ཕྲག་དུ་མ་དག་ཀྱང་དེར་འདུས་པར་གྱུར། ནམ་མཁའི་དཀྱིལ་དུ་ཡང་ལྷ་འབུམ་ཕྲག་དུ་མ་དག་འདུས་པར་གྱུར་ནས་ས་ཕྱོགས་གོ་སྐབས་ཡངས་པར་དེ་དག་གི་ནང་དུ་མཆོད་པ་ཆེན་པོ་བྱས་ཏེ་སྐུ་གཟུགས་དེ་ཕྱེ་བ་དང ། ཡུལ་དབུས་ནས་ཚོངས་པ་མང་པོ་ཟོང་ཐོགས་ཏེ་གྲོང་ཁྱེར་སྒྲ་སྒྲོགས་སུ་ལྷགས་པ་དེ་དག་གིས་སངས་རྒྱས་ཀྱི་སྐུ་གཟུགས་དེ་མཐོང་ནས་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་ཐམས་ཅད་ཀྱིས་སྐད་ཅིག་ཏུ་སྒྲ་ཕྱུང་ངོ ། །རྒྱལ་པོ་ཨུ་ཏྲ་ཡ་ནས་སངས་རྒྱས་ཤེས་བྱ་བའི་སྒྲ་སྔོན་མ་ཐོས་པ་ཐོས་ནས་སྤུའི་ཁུང་བུ་ཐམས
8.106a
ཅད་ཟིང་ཞེས་བྱེད་པར་གྱུར་ནས་ཡ་མཚན་སྐྱེས་ཏེ་ཡུན་རིང་མོ་ཞིག་ཏུ་མིག་ཚུགས་སུ་བརྟགས་ནས་སྨྲས་པ། ཤེས་ལྡན་དག་སངས་རྒྱས་ཤེས་བྱ་བ་དེ་སུ་ཡིན། དེ་དག་གིས་སྨྲས་པ། ལྷ་ཡུལ་དབུས་ན་གངས་ཀྱི་རི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟ་པའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་སྟེ། དེ་བྲམ་ཟེ་ལྟས་པ་དང་མཚན་མཁན་དག་གིས་གལ་ཏེ་གཞོན་ནུ་དེ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ། ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་འཚེ་བ་མེད་ཅིང་མཚོན་གྱིས་བདའ་བ་མེད་ལ་ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ་ཞེས་ལུང་བསྟན་ཏེ། ལྷ་འདི་ནི་དེའི་སྐུ་གཟུགས་ལགས་སོ། །རྒྱལ་པོ་རྒྱ་ཆེར་ཡིད་དགའ་ནས་སྨྲས་པ། ཤེས་ལྡན་དག་དེ་ནི་ཤེས་ཀྱིས་འདི་དྲིའོ། །འོག་ཏུ་བྲིས་པ་འདི་ཅི་ཡིན། ལྷ་འདི་ནི་ཁས་ལེན་པ་ལགས་སོ། །འདི་ནི་བསླབ་པའི་གཞི་དག་ལགས་སོ། །འདི་ནི་འཇིག་རྟེན་གྱི་འབྱུང་བ་དང་ལྡོག་པ་དག་ལགས་སོ། །ཤེས་ལྡན་དག་དེ་ཡང་ཤེས་ཀྱིས་འདི་དྲིའོ། །སྟེང་དུ་བྲིས་པ་འདི་ཅི་ཡིན། ལྷ་འདི་ནི་མངོན་པར་སྤྲོ་བར
8.106b
བགྱི་བ་ལགས་སོ། །རྒྱལ་པོ་ཨུ་ཏྲ་ཡ་ནས་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང ། ལུགས་ལས་བཟློག་པ་ཡང་བཟླས་པ་ཡང་བཟླས་ནས་ལེགས་པར་གཟུང་བ་བྱས་ཏེ། མཚན་མོ་ནམ་ནངས་པའི་ཚེ་དོན་ཐམས་ཅད་དང་ལས་ཀྱི་མཐའ་ཐམས་ཅད་བག་ཡངས་སུ་བྱས་ཏེ་འདུག་ནས་སྐྱིལ་མོ་དཀྲུང་བཅས་ཏེ་ལུས་དྲང་པོར་བསྲང་ནས་དྲན་པ་ཕྱོགས་པར་བཞག་སྟེ། རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང ། ལུགས་ལས་བཟློག་པ་ལ་རྣམ་པར་ལྟ་བར་བྱེད་དེ། འདི་ལྟ་སྟེ་འདི་ཡོད་པས་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འབྱུང་བར་འགྱུར་རོ། །འདི་ལྟ་སྟེ་འདི་མེད་པས་འདི་མི་འབྱུང་ལ། འདི་མ་སྐྱེས་པའི་ཕྱིར་འདི་མི་སྐྱེ་བ་སྟེ། འདི་ལྟ་སྟེ་མ་རིག་པ་འགགས་པས་འདུ་བྱེད་རྣམས་འགག་།འདུ་བྱེད་རྣམས་འགགས་པས་རྣམ་པར་ཤེས་པ་འགག་།རྣམ་པར་ཤེས་པ་འགགས་པས་མིང་དང་གཟུགས་འགག་།མིང་དང་གཟུགས་འགགས་པས་སྐྱེ་མཆེད་དྲུག་འགག་།སྐྱེ་མཆེད་དྲུག་འགགས་པས་རེག་པ་འགག་།རེག་པ་འགགས་པས་ཚོར་བ་འགག་།ཚོར་བ་འགགས་པས་སྲེད་པ་འགག་།སྲེད་པ་འགགས་པས་ལེན་པ་འགག་།ལེན་པ་འགགས་པས་སྲིད་པ་འགག་།སྲིད་པ་འགགས་པས་སྐྱེ་བ་འགག་།སྐྱེ་བ་འགགས་པས་རྒ་ཤི་དང ། མྱ་ངན་དང་སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང་འཁྲུག་པ་རྣམས
8.107a
འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འགག་པར་འགྱུར་རོ་ཞེས་རྣམ་པར་ལྟ་བར་བྱེད་དེ། དེས་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་ལུགས་ལས་བཟློག་པ་ལ་རྣམ་པར་ལྟ་བ་ན་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེས་བདེན་པ་མཐོང་ནས་ཚིགས་སུ་བཅད་པ་སྨྲས་པ། རིང་ན་བཞུགས་པའི་སངས་རྒྱས་ཀྱིས། །ཤེས་རབ་ཀྱི་མིག་རྣམ་པར་སྦྱངས། །གང་ལ་དེ་འདྲའི་གསོས་མངའ་བ། །སྨན་པའི་མཆོག་ལ་ཕྱག་འཚལ་ལོ། །དེས་ཤེས་ནས་དད་པ་དང་ལྡན་པས་རྒྱལ་པོ་གཟུགས་ཅན་སྙིང་པོ་ལ་ཕྲིན་ཡིག་འདི་སྐད་ཅེས་ཤེད་འཐུན་དགྱེས་པ་ཁྱོད་ལ་བརྟེན་ནས་བདག་གིས་སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བྱས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒལ། ངན་སོང་གི་སྒོ་དག་ནི་བཅད། མཐོ་རིས་དང་ཐར་པའི་སྒོ་དག་ནི་ཕྱེ། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་མངོན་སུམ་དུ་བྱས་ཏེ། བདག་དགེ་སློང་མཐོང་བར་འདོད་ཀྱིས་ཁྱོད་ཀྱིས་དགེ་སློང་འགའ་ཞིག་གཏང་བའི་རིགས་སོ་ཞེས་བྲིས་ཏེ་སྤྲིང་ངོ ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་དེ་བླགས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཨུ་ཏྲ་ཡ་ནས་བདེན་པ་དག་མཐོང་ནས་དེས་བདག་ལ་ཕྲིན་ཡིག་བསྐུར་ཏེ། དགེ་སློང་མཐོང་བར་འཚལ་གྱིས་དགེ་སློང་འགའ་ཞིག་གཏང་བའི་རིགས་སོ་ཞེས་མཆི་ན། དེའི་སླད་དུ་འདི་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་དགོངས་པ། རྒྱལ་པོ་ཨུ་ཏྲ་ཡ་ན་འཁོར་དང་བཅས་པ་དང་གྲོང་ཁྱེར་སྒྲ་སྒྲོགས
8.107b
ན་གནས་པའི་སྐྱེ་བོའི་ཚོགས་དགེ་སློང་གང་གིས་གདུལ་བ་ཡིན་སྙམ་དུ་དགོངས་ན་དགེ་སློང་ཀཱ་ཏྱཱ་ཡ་ན་ཆེན་པོའི་གདུལ་བ་ཡིན་པར་གཟིགས་ནས། བཅོམ་ལྡན་འདས་ཀྱིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་བཀའ་སྩལ་པ། ཀཱ་ཏྱཱ་ཡ་ན་གྲོང་ཁྱེར་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ན་འཁོར་དང་བཅས་པ་དང ། སྒྲ་སྒྲོགས་ན་གནས་པའི་སྐྱེ་བོའི་ཚོགས་ལ་སོམས་ཤིག་།ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང་ཆོས་གོས་ཐོགས་ནས་འཁོར་ལྔ་བརྒྱ་དང་གྲོང་ཁྱེར་སྒྲ་སྒྲོགས་ག་ལ་བ་དེར་དོང་ངོ ། །རྒྱལ་པོ་གཟུགས་ཅན་སྙིང་པོས་ཀྱང་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་ཤེད་འཐུན་དགྱེས་པ་ཁྱོད་ཀྱི་ཕྱིར་བདག་གིས་དགེ་སློང་སྟོན་པ་དང་འདྲ་བ་འདི་འཁོར་ལྔ་བརྒྱ་དང་བཏང་གིས་ཁྱོད་ཀྱིས་དཔག་ཚད་ཕྱེད་དང་གསུམ་དུ་ལམ་མཛེས་པ་དང ། གྲོང་ཁྱེར་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ། གྲོང་ཁྱེར་གྱི་ཕྱི་རོལ་དུ་གཙུག་ལག་ཁང་ལྔ་བརྒྱ་བྱེད་དུ་གཞུག་ཅིང་ཁྲི་དང ། ཁྲིའུ་དང ། སྟན་ནང་ཚངས་ཅན་དང ། ལ་བ་དང་སྔས་དང ། གོར་བུ་ལྔ་བརྒྱ་ཡང་སྦྱིན་པར་བྱ། བསོད་སྙོམས་ལྔ་བརྒྱ་ཡང་སྦྱོར་དུ་གཞུག་པར་བྱ་སྟེ། དེས་ན་ཁྱོད་ཀྱིས་བསོད་ནམས་ཆེན་པོ་འཐོབ་པར་འགྱུར་རོ་ཞེས་བྲིས་ཏེ་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག་བླགས་ནས་དགའ་བ་དང ། མཆོག་ཏུ་དགའ་བ་སྐྱེས་ཏེ་དེས་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱེད་དུ་བཅུག་ནས་བདག་ཉིད་དཔུང་གི་ཚོགས་ཡན་ལག་བཞི་པ་དང ། སྐྱེ་བོ་འབུམ་ཕྲག་དུ་མའི་འཁོར་དང་བཅས་པས་བསུ་ནས་བཀུར་སྟི་ཆེན་པོས་གྲོང
8.108a
ཁྱེར་སྒྲ་སྒྲོགས་སུ་འཇུག་ཏུ་བཅུག་ཅིང ། གྲོང་ཁྱེར་གྱི་ཕྱི་རོལ་དུ་གཙུག་ལག་ཁང་ལྔ་བརྒྱ་ཡང་བྱེད་དུ་བཅུག་།ཁྲི་དང་ཁྲིའུ་དང་སྟན་ནང་ཚངས་ཅན་དང ། ལ་བ་དང་སྔས་དང་གོར་བུ་ལྔ་བརྒྱ་ཡང་འབུལ་དུ་བཅུག་།བསོད་སྙོམས་ལྔ་བརྒྱ་ཡང་སྦྱོར་དུ་བཅུག་སྟེ། ས་ཕྱོགས་གོ་སྐབས་ཡངས་པར་སྟན་ཤོམ་དུ་བཅུག་གོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །སྲོག་ཆགས་འབུམ་ཕྲག་དུ་མ་དག་ཀྱང་ཁ་ཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེར་འདུས་པར་གྱུར་ཏོ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་འཁོར་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས་སྲོག་ཆགས་འབུམ་ཕྲག་དུ་མ་དག་གིས་གང་ཐོས་ནས་ཁྱད་པར་ཆེན་པོ་རྟོགས་པར་གྱུར་པ་དེ་ལྟ་བུའི་ཆོས་བསྟན་པ་བྱས་ཏེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ཕལ་ཆེར་ནི་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་བཀོད་དོ། །གྲོང་ཁྱེར་སྒྲ་སྒྲོགས་ན་ཁྱིམ་བདག་རྒྱལ་དང ། སྐར་རྒྱལ་ཞེས་བྱ་བ་གཉིས་ཤིག་འཁོད་པ་དེ་གཉིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་ཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཁྱིམ་བདག་རྒྱལ་དང ། སྐར་རྒྱལ་གཉིས་ཀྱིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་ཀཱ་ཏྱཱ་ཡ་ན་ཆེན་པོ་བདག་ཅག་གཉིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན
8.108b
པའི་དགེ་སློང་གི་དངོས་པོ་དང ། བདག་ཅག་གཉིས་ཀྱིས་འཕགས་པ་ཀཱ་ཏྱཱ་ཡ་ན་ཆེན་པོའི་དྲུང་དུ་ཚངས་པར་སྤྱོད་པ་སྤྱད་པ་འཐོབ་འམ། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་གཉིས་རབ་ཏུ་ཕྱུང་རྫོགས་པར་བསྙེན་པར་བྱས་ཏེ་གདམ་ངག་དང་རྗེས་སུ་བསྟན་པ་བྱིན་ནས་དེ་གཉིས་ཀྱིས་སྤྲོ་བ་དང ། འབད་པ་དང ། བརྩལ་བ་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ་འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང་རྣམ་པར་འཐོར་བ་དང་རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང་མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་གཉིས་ཀྱིས་འབར་བ་དང ། གསལ་བ་དང ། ཆར་འབབ་པ་དང ། གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་གཉིས་ཀྱི་ཉེ་དུ་དག་གིས་ལུས་ལ་ལུས་ཀྱི་མཆོད་པ་བྱས་ནས་མཆོད་རྟེན་གཉིས་བྱེད་དུ་བཅུག་སྟེ་གཅིག་ནི་རྒྱལ་གྱིའོ། །གཅིག་ཤོས་ནི་སྐར་རྒྱལ་གྱིའོ། །རྒྱལ་པོ་ཨུ་ཏྲ་ཡ་ན་ཉིན་རེ་ཉིན་རེ་ཞིང་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་དྲུང་དུ་སོང་ནས་ཆོས་མཉན་ཏེ་བཙུན་མོའི་འཁོར
8.109a
ལ་འཕགས་པ་ཀཱ་ཏྱཱ་ཡ་ན་ཆེན་པོ་ཆོས་དངར་བ་དངར་བ་སྟོན་པར་བྱེད་དེ། སྦྲང་བུ་སྦྲང་རྩི་འབྱིན་པ་བཞིན་ནོ་ཞེས་རྗོད་པར་བྱེད་དོ། །དེ་དག་གིས་སྨྲས་པ། ལྷ་སངས་རྒྱས་འབྱུང་བ་ནི་འབྲས་བུ་དང་བཅས་པ་ལགས་སོ། །ཇི་ལྟར་གང་གི་སླད་དུ་ཁྱོད་ཆོས་གསན་པས་སོ། །གལ་ཏེ་དེ་ལྟ་ན་ཁྱེད་ཅག་ཀྱང་ཅིའི་ཕྱིར་ཆོས་མི་ཉན། ལྷ་བདག་ཅག་ནི་ངོ་ཚ་དང་ལྡན་པ་ལགས་པས་ཇི་ལྟར་དེར་མཆིས་ཏེ་ཆོས་མཉན་པར་བགྱི། གལ་ཏེ་འཕགས་པ་ཀཱ་ཏྱཱ་ཡ་ན་ཆེན་པོ་འདི་ཉིད་དུ་མཆིས་ཏེ་ཆོས་སྟོན་པར་བགྱིད་ན་དེ་ལྟ་ན་བདག་ཅག་ཀྱང་ཆོས་ཉན་ཏོ། །རྒྱལ་པོ་ཨུ་ཏྲ་ཡ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་སྨྲས་པ། འཕགས་པ་བཙུན་མོའི་འཁོར་ཆོས་ཉན་པར་འཚལ་ལོ། །དེས་སྨྲས་པ། རྒྱལ་པོ་ཆེན་པོ་དགེ་སློང་དག་ནི་བཙུན་མོའི་འཁོར་གྱི་ནང་དུ་ཞུགས་ཤིང་ཆོས་མི་སྟོན་ཏོ། །བཅོམ་ལྡན་འདས་ཀྱིས་བཙུན་མོའི་འཁོར་གྱི་ནང་དུ་འཇུག་པ་བཀག་གོ། །འཕགས་པ་འོ་ན་སུ་ཞིག་བཙུན་མོའི་འཁོར་ལ་ཆོས་སྟོན་པར་བགྱིད། རྒྱལ་པོ་ཆེན་པོ་དགེ་སློང་མའོ། །རྒྱལ་པོ་ཨུ་ཏྲ་ཡ་ནས་རྒྱལ་པོ་གཟུགས་ཅན་སྙིང་པོ་ལ་ཕྲིན་ཡིག་འདི་སྐད་ཅེས་ཤེད་འཐུན་དགྱེས་པ་བདག་གི་བཙུན་མོའི་འཁོར་ཆོས་ཉན་པར་འཚལ་ན་དེའི་སླད་དུ་དགེ་སློང་མ་འགའ་ཞིག་གཏང་བའི་རིགས་སོ་ཞེས་བྲིས་ཏེ་བསྐུར་རོ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་དེ་བླགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཨུ་ཏྲ་ཡ་ནས་ཕྲིན་ཡིག་སྤྲིང་སྟེ་བཙུན་མོའི་འཁོར་ཆོས་ཉན་པར་འཚལ་གྱིས་དེའི་སླད་དུ་དགེ་སློང་མ་འགའ་ཞིག་གཏང་བའི་རིགས་སོ་ཞེས་མཆི་ན་དེའི་སླད་དུ་འདི་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་དགོངས་པ། རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་གྱི་བུད་མེད་དང་གྲོང་ཁྱེར་སྒྲ་སྒྲོགས་ན་གནས་པའི་བུད་མེད་རྣམས་དགེ་སློང་མ་གང་གིས་གདུལ་བ་ཡིན་སྙམ་དུ་དགོངས་ན། དགེ་སློང་མ་རི་མའི་གདུལ་བ་ཡིན་པར་གཟིགས་ནས
8.109b
དེ་ནས་བཅོམ་ལྡན་འདས་ཀྱིས་དགེ་སློང་མ་རི་མ་ལ་བཀའ་སྩལ་པ། རི་མ་གྲོང་ཁྱེར་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་གྱི་བུད་མེད་དང ། སྒྲ་སྒྲོགས་ན་གནས་པའི་བུད་མེད་རྣམས་ལ་སོམས་ཤིག་།དགེ་སློང་མ་རི་མས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་དགེ་སློང་མ་རི་མ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་དུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང་ཆོས་གོས་ཐོགས་ནས་འཁོར་ལྔ་བརྒྱ་དང་གྲོང་ཁྱེར་སྒྲ་སྒྲོགས་ག་ལ་བ་དེར་སོང་ངོ ། །རྒྱལ་པོ་གཟུགས་ཅན་སྙིང་པོས་ཀྱང་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་འདི་སྐད་ཅེས་ཤེད་འཐུན་དགྱེས་པ་ཁྱོད་ཀྱི་ཕྱིར་བདག་གིས་ཉན་ཐོས་མ་ཆེན་མོ་སྟོན་པས་བསྔགས་པ་འདི་འཁོར་ལྔ་བརྒྱ་དང་གཏང་གིས་ཁྱོད་ཀྱིས་ཀྱང་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ། གྲོང་ཁྱེར་གྱི་ནང་དུ་དབྱར་ཁང་ལྔ་བརྒྱ་ཡང་བྱེད་དུ་གཞུག་པར་བྱ། ཁྲི་དང་ཁྲིའུ་དང ། སྟན་ནང་ཚངས་ཅན་དང ། ལ་བ་དང་སྔས་དང ། གོར་བུ་ལྔ་བརྒྱ་ཡང་འབུལ་བར་བྱ། བསོད་སྙོམས་ལྔ་བརྒྱ་ཡང་སྦྱོར་དུ་གཞུག་པར་བྱ་སྟེ། དེས་ན་ཁྱོད་ཀྱིས་བསོད་ནམས་ཆེན་པོ་འཐོབ་པར་འགྱུར་རོ་ཞེས་བྲིས་ཏེ་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག་དེ་བླགས་ནས་དགའ་བ་དང་མཆོག་ཏུ་དགའ་བ་སྐྱེས་ཏེ། དེས་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱེད་དུ་བཅུག་ནས་བདག་ཉིད་དཔུང་གི་ཚོགས་ཡན་ལག་བཞི་པ་དང ། སྐྱེ་བོ་འབུམ་ཕྲག་དུ་མའི་འཁོར་དང་བཅས་པས་བསུ་ནས་བཀུར་སྟི་ཆེན་པོས་གྲོང་ཁྱེར་དུ་འཇུག་ཏུ་བཅུག་ཅིང ། གྲོང་ཁྱེར་གྱི་ནང་དུ་དབྱར་ཁང་ལྔ་བརྒྱ་བྱེད་དུ་བཅུག་སྟེ། ཁྲི་དང་ཁྲིའུ་དང ། སྟན་ནང་ཚངས་ཅན་དང་ལ་བ་དང་སྔས་དང་གོར་བུ་ལྔ་བརྒྱ་ཡང་འབུལ་དུ
8.110a
བཅུག་།བསོད་སྙོམས་ལྔ་བརྒྱ་ཡང་སྦྱོར་དུ་བཅུག་གོ། །དགེ་སློང་མ་རི་མ་ཉིན་རེ་ཞིང་རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་དང ། གྲོང་ཁྱེར་སྒྲ་སྒྲོགས་ན་གནས་པའི་བུད་མེད་རྣམས་ཀྱི་ནང་དུ་ཞུགས་ཏེ་ཆོས་སྟོན་པར་བྱེད་དོ། །རྒྱལ་པོ་ཨུ་ཏྲ་ཡ་ན་ནི་པི་བང་མཁས་པ་ཡིན་ལ། བཙུན་མོ་ཟླ་འོད་ནི་གར་མཁས་པ་ཡིན་པས་ཇི་ཙམ་དུ་དུས་གཞན་ཞིག་ན་རྒྱལ་པོ་ཨུ་ཏྲ་ཡ་ནས་པི་བང་སྦྲིངས་ཏེ་བཙུན་མོ་ཟླ་འོད་གར་བྱེད་དོ། །དེས་དེ་གར་བྱེད་པ་ན་ཆུད་ཟ་བའི་མཚན་མ་མཐོང་ནས་དེས་དེ་ལ་མགོ་འཇུག་ཏུ་བརྟགས་ཏེ་བསམས་ན་ཞག་བདུན་འདས་ན་འདི་དུས་བྱེད་པར་འགྱུར་རོ་སྙམ་ནས་དེའི་ལག་ནས་པི་བང་ཤོར་ཏེ་ས་ལ་ལྷུང་བ་དང ། བཙུན་མོ་ཟླ་འོད་ཀྱིས་སྨྲས་པ། ལྷ་བདག་གིས་གར་མ་ལེགས་སམ་ཅི་ནོངས། ཟླ་འོད་ཁྱོད་ཀྱིས་གར་མ་ལེགས་པ་མ་ཡིན་ཏེ། འདི་ལྟར་ངས་ཁྱོད་གར་བྱེད་པ་ན་ཆུད་ཟ་བའི་མཚན་མ་མཐོང་བས་ཉི་མ་བདུན་པ་ལ་ཁྱོད་དུས་བྱེད་པར་འགྱུར་རོ། །བཙུན་མོ་ཟླ་འོད་ཀྱིས་རྒྱལ་པོའི་རྐང་པ་གཉིས་ལ་གཏུགས་ཏེ་སྨྲས་པ། ལྷ་གལ་ཏེ་དེ་ལྟར་ན་བདག་གིས་ལྷ་ལ་བསྙེན་བཀུར་ནི་བགྱིས་ལགས་ན། གལ་ཏེ་ལྷས་གནང་ན་བདག་རབ་ཏུ་འབྱུང་ངོ ། །རྒྱལ་པོས་སྨྲས་པ། ཟླ་འོད་དུས་ཡིན་གྱིས་གནང་ངོ ། །གལ་ཏེ་ཁྱོད་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་ན་ནི་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ཡིན་ནོ། །གལ་ཏེ་ཀུན་ཏུ་སྦྱོར་བ་ལྷག་མ་དང་བཅས་པས་དུས་བྱས་ཏེ་ལྷ་རྣམས་ཀྱི་ནང་དུ་སྐྱེས་པར་གྱུར་ན་ནི་ཁྱོད་ལྷར་གྱུར་པས་ང་ལ་བལྟ་བར་བྱའོ། །དེས་སྨྲས་པ། ལྷ་བཀའ་བཞིན་འཚལ། རྒྱལ་པོ་ཨུ་ཏྲ་ཡ་ནས་བཙུན་མོ་ཟླ་འོད་དགེ་སློང་མ་རི་མ་ལ་གཏད་དེ་སྨྲས་པ། འཕགས་མ་བཙུན་མོ་ཟླ་འོད་ལེགས་པར་གསུངས་པའི་ཆོས་འདུལ་བ་ལ་རབ་དུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཚལ་གྱིས་དེའི་སླད་དུ་འཕགས་མས་འདི་རབ་ཏུ་འབྱུང་བ་དང ། རྫོགས་པར་སྙེན་པར་མཛད་པའི་རིགས་སོ། །དགེ་སློང་མ་རི་མས་སྨྲས་པ། དེ་ལྟར་བགྱིའོ་ཞེས་དེས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་སོ། །དགེ་སློང་མ་རི་མས་བསམས་པས། དེ་ལ་འཆི་བའི་འདུ་ཤེས་སྒོམས་ཤིག་ཅེས་གདམ་ངག་བྱིན་ནོ། །བཙུན་མོ་ཟླ་འོད་ཀྱིས་འཆི
8.110b
བའི་འདུ་ཤེས་བསྒོམ་པར་བརྩམས་ནས་དེ་ཉི་མ་བདུན་པ་ལ་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུ་འམ་ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང ། གང་དུ་སྐྱེས་པ་དང ། ལས་གང་གིས་སྐྱེས་པའོ། །ལྷའི་བུ་མོ་ཟླ་འོད་ཀྱིས་བསམས་པ། བདག་གང་ནས་ཤི་འཕོས་སྙམ་ན། མི་རྣམས་ཀྱི་ནང་ནས་ཤི་འཕོས་པ་དང ། གང་དུ་སྐྱེས་སྙམ་ན་རྒྱལ་ཆེན་བཞི་པའི་ནང་དུ་སྐྱེས་པ་དང ། ལས་གང་གིས་སྐྱེས་སྙམ་ན་བཅོམ་ལྡན་འདས་ཀྱི་བསྟན་པ་ལ་ཚངས་པར་སྤྱོད་པ་སྤྱད་པ་ཉིད་ཀྱིས་སྐྱེས་པར་མཐོང་ངོ ། །དེ་ནས་ལྷའི་བུ་མོ་ཟླ་འོད་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟེན་ཏེ་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་འཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་ལྷའི་བུ་མོ་ཟླ་འོད་རྣ་ཆ་གདུབ་འཁོར་གཡོ་ཞིང་དྲི་མ་མེད་པ་ཐོགས་ཏེ་དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོ་དག་གིས་ཐུ་བ་བཀང་སྟེ་ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང ། འདི་ལྟར་ལྷའི་བུ་མོ་ཟླ་འོད་ཀྱི་ཁ་དོག་གི་མཐུས་འོད་མའི་ཚལ་ཀ་ལན་ད་ཀའི་གནས་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷའི་བུ་མོ་ཟླ་འོད་ཀྱི་བསམ་པ་དང་བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་ལྷའི་བུ་མོ་ཟླ་འོད་ཀྱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ
8.111a
ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་མང་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་དུ་རྣམ་དག་ཁྱོད་རྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང ། །དེ་ནས་ལྷའི་བུ་མོ་ཟླ་འོད་ཚོང་པ་ཁེ་སྤོགས་རྙེད་པ་ལྟ་བུ་དང ། ཞིང་པ་ལོ་ཏོག་འབྱོར་པ་ལྟ་བུ་དང ། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང ། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ་ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ ། །དེ་འདི་སྙམ་དུ་སེམས་ཏེ། བདག་གིས་རྒྱལ་པོ་ཨུ་ཏྲ་ཡ་ན་ལ་ཁས་བླངས་པས་ད་དེ་བལྟ་བའི་དུས་ཡིན་ནོ། །སྙམ་ནས། དེ་ནས་ལྷའི་བུ་མོ་ཟླ་འོད་རྒྱལ་པོ་ཨུ་ཏྲ་ཡ་ན་ག་ལ་བ་དེར་སོང་ངོ ། །དེའི་ཚེ་ན་རྒྱལ་པོ་ཨུ་ཏྲ་ཡ་ན་གཅིག་པུ་སྟེང་གི་ཁང་བཟངས་ཀྱི་གཞིར་གཏོགས་པ་ན་ཉལ་ཞིང་འདུག་ནས་དེས་དེ་སྣང་བ་རྒྱ་ཆེན་པོས་ཁྱབ་པར་བྱས
8.111b
ཏེ་སེ་གོལ་གྱི་སྒྲས་བསླང་བ་དང ། དེ་གཉིད་ཀྱིས་ནོན་པའི་མིག་དང་རྣམ་པར་ཤེས་པ་མི་གསལ་བས་སྨྲས་པ། ཁྱོད་སུ་དེས་སྨྲས་པ། བདག་ཟླ་འོད་དོ། །རྒྱལ་པོས་སྨྲས་པ། ཚུར་ཤོག་དགའ་མགུར་སྤྱད་པར་བྱའོ། །དེས་སྨྲས་པ་ལྷ་བདག་ཤི་ཞིང་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཏེ། གལ་ཏེ་བདག་དང་ལྷན་ཅིག་མཇལ་བཞེད་ན་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ཞིག་དང ། གལ་ཏེ་ཚེ་འདི་ཉིད་ལ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་མཛད་ན་ནི་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ལགས་སོ། །གལ་ཏེ་ཀུན་དུ་སྦྱོར་བ་ལྷག་མ་དང་བཅས་པས་དུས་བགྱིས་ཏེ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པར་གྱུར་ན་ནི་དེར་ཁྱོད་བདག་དང་མཇལ་བར་འགྱུར་རོ་ཞེས་སྨྲས་ཏེ་དེ་ཉིད་དུ་མི་སྣང་བར་གྱུར་ཏོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་གཅིག་པ། རྒྱལ་པོ་ཨུ་ཏྲ་ཡ་ནས་མཚན་ཐོག་ཏག་ཏུ་རབ་ཏུ་འབྱུང་བ་རྗེས་སུ་བསམས་ནས་ནང་པར་སྔར་ལངས་ཏེ་བློན་པོ་རྣམས་ལ་སྨྲས་པ། ཤེས་ལྡན་དག་བཙུན་མོ་ཟླ་འོད་ག་ལ་འདུག་ལྟོས་ཤིག་།དེ་དག་གིས་སྨྲས་པ། ལྷ་དུས་ལ་བབ་བོ། །རྒྱལ་པོ་ཨུ་ཏྲ་ཡ་ནས་བསམས་པ། གང་གི་ཕྱིར་བདག་ལ་ལྷ་མོས་བསྐུལ་ནས་བདག་ཁྱིམ་པ་ཁྱིམ་གྱི་ནང་ན་གནས་ཤིང་སོགས་འཇོག་གི་ལོངས་སྤྱོད་དང་འདོད་པ་ལ་ཡོངས་སུ་སྤྱོད་པ་ནི་བདག་གི་ཚུལ་དང་འཐུན་པ་མ་ཡིན་གྱིས། བདག་གིས་གཞོན་ནུ་གཙུག་ཕུད་ཅན་རྒྱལ་སྲིད་ལ་དབང་བསྐུར་ཏེ་བདག་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་དག་བགོས་ཏེ། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་སྙམ་ནས། དེས་བློན་པོའི་མཆོག་ཧེ་རུ་ཀ་དང ། བྷི་རུ་ཀ་གཉིས་མངག་པས་བོས་ཏེ་སྨྲས་པ། ཤེས་ལྡན་གཉིས་བུ་གཞོན་ནུ་གཙུག་ཕུད་ཅན་ང་ལ་ཅི་འདྲ་བ་དེ་ཁོ་ན་བཞིན་དུ་ཁྱེད་གཉིས་ལ་ཡང་དེ་འདྲ་བ་ཡིན་གྱིས་ཁྱེད་གཉིས་ཀྱིས་དེ་གནོད་པ་ལས་བཟློག་པར་བྱ་ཞིང་ཕན་པ་ལ་ངེས་པར་སྦྱར་བར་གྱིས་ཤིག་།ང་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངོ ། །དེ་གཉིས་ཀྱིས་ཐོས་ནས་མཆི་མས་བརྣངས་ཏེ་འཁོད་དོ། །རྒྱལ་པོས་གཞོན་ནུ་གཙུག་ཕུད་ཅན་ལ་སྨྲས་པ། བུ་ཁྱོད་ཇི་ལྟ་ངའི་ཚིག་མཉན་པ་དང་བྱ་བར
8.112a
སེམས་པ་དེ་བཞིན་དུ། ཁྱོད་ཀྱིས་བློན་པོའི་མཆོག་ཧེ་རུ་ཀ་དང་བྷི་རུ་ཀ་འདི་གཉིས་ཀྱི་ཚིག་མཉན་པ་དང་བྱ་བར་སོམས་ཤིག་།ང་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངོ ། །དེས་ཀྱང་ཐོས་ནས་མཆི་མས་བརྣངས་ཏེ་འདུག་གོ། །དེ་ནས་རྒྱལ་པོ་ཨུ་ཏྲ་ཡ་ནས་གྲོང་ཁྱེར་སྒྲ་སྒྲོགས་སུ་དྲིལ་བསྒྲག་པ་བྱེད་དུ་བཅུག་སྟེ། གྲོང་ཁྱེར་སྒྲ་སྒྲོགས་ན་གནས་པ་དག་དང ། ཕོ་བྲང་འཁོར་གྱི་མི་དག་དང ། ཡུལ་ཐ་དད་པ་ནས་ལྷག་པའི་སྐྱེ་བོའི་ཚོགས་རྣམས་ལ་ཤེས་ལྡན་དག་ཉོན་ཅིག་།ང་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་གིས་ངས་རྒྱལ་སྲིད་བྱེད་དུ་བཅུག་པ་ན་གང་ལ་གནོད་པ་ཅུང་ཟད་ཅི་བྱས་པ་དེ་བཟོད་པར་གྱིས་ཤིག་ཅེས་བསྒོའོ། །གྲོང་ཁྱེར་སྒྲ་སྒྲོགས་ན་གནས་པ་རྣམས་དང ། ཕོ་བྲང་འཁོར་གྱི་མི་རྣམས་དང ། ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་རྣམས་རྒྱལ་པོ་ལ་རྗེས་སུ་ཆགས་པ་ཡིན་པས་དེ་དག་གིས་ཐོས་ནས་ཐམས་ཅད་མཆི་མས་བརྣངས་ཏེ་འཁོད་དོ། །དེ་ནས་རྒྱལ་པོ་ཨུ་ཏྲ་ཡ་ནས་གཞོན་ནུ་གཙུག་ཕུད་ཅན་རྒྱལ་སྲིད་ལ་བཞག་ནས་རྩ་ལག་གི་སྐྱེ་བོ་རྣམས་ལ་བཟོད་པ་གསོལ་ཏེ། དགེ་སྦྱོང་དང ། བྲམ་ཟེ་དང ། བཀྲེན་པ་དང ། སྡུག་ཕོངས་པ་རྣམས་ལ་སྦྱིན་པ་དག་བྱིན། བསོད་ནམས་དག་བྱས་ཏེ་མི་བསྙེན་བཀུར་བ་ཅིག་དང ། རྒྱལ་པོའི་ཁབ་ལོགས་སུ་ཕྱོགས་ཏེ་འཕགས་སོ། །དེ་ནས་རྒྱལ་པོ་གཙུག་ཕུད་ཅན་བཙུན་མོའི་འཁོར་དང ། གཞོན་ནུ་དང ། བློན་པོ་དང ། ཕོ་བྲང་འཁོར་གྱི་མི་དང་བཅས་པ་དང ། གཞན་ཡང་ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་རྣམས་ཕྱི་བཞིན་ཕྱི་བཞིན་དུ་འབྲང་སྟེ། སྲོག་ཆགས་འབུམ་ཕྲག་དུ་མ་དག་གིས་བསྐྱལ་བཞིན་དུ་གྲོང་ཁྱེར་སྒྲ་སྒྲོགས་ནས་ཕྱིར་བྱུང་སྟེ། སྐྱེད་མོས་ཚལ་ཤིང་ལྗོན་པའི་ཚལ་སྣ་ཚོགས་ཀྱིས་བརྒྱན་པ། མེ་ཏོག་དང་འབྲས་བུ་དང ། ཆུ་རྒྱུན་སྣ་ཚོགས་དང་ལྡན་པ། ངང་པ་དང ། ཁྲུང་ཁྲུང་དང ། རྨ་བྱ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ཤང་ཤང་ཏེའུ་སྒྲ་འབྱིན་པ་ཞིག་ཏུ་ཡུད་ཙམ་ཞིག་བསྡད་ནས་གྲོང་ཁྱེར་སྒྲ་སྒྲོགས་ལོགས་སུ་རྣམ་པར་བལྟས་ཏེ་རྒྱལ་པོ་གཙུག་ཕུད་ཅན་ལ་སྨྲས་པ། བུ་ངས་ཆོས
8.112b
ཀྱི་རྒྱལ་སྲིད་བྱེད་དུ་བཅུག་པས་དེའི་ཕྱིར་སྲོག་ཆགས་འབུམ་ཕྲག་འདི་སྙེད་ངའི་ཕྱི་བཞིན་དུ་འབྲང་བར་གྱུར་གྱིས། ཁྱོད་ཀྱིས་ཀྱང་ཆོས་ཀྱིས་རྒྱལ་སྲིད་བྱེད་དུ་གཞུག་པར་བྱའོ། །སྐྱེ་བོའི་ཚོགས་དེ་ལ་ཡང་བག་ཕབ་སྟེ་སྨྲས་པ། ཤེས་ལྡན་དག་ངས་ཁྱེད་ཀྱི་རྒྱལ་པོར་འདི་བསྐོས་ཀྱིས་ཕྱིར་དེང་ལ་བདེ་བར་སྒྲུབས་ཤིག་ཅེས་སྨྲས་ཏེ་སོང་ངོ ། །རྒྱལ་པོ་གཙུག་ཕུད་ཅན་བཙུན་མོའི་འཁོར་དང ། གཞོན་ནུ་དང ། བློན་པོ་དང་ཕོ་བྲང་འཁོར་གྱི་མི་དང་བཅས་པ་དང་ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་རྣམས་མཆི་མས་དཀྲུགས་པའི་མིག་གིས་ཡུད་ཙམ་ཡུད་ཙམ་ཕྱི་བཞིན་རྟོག་ཅིང་རྟོག་ཅིང་གྲོང་ཁྱེར་སྒྲ་སྒྲོགས་སུ་ཕྱིར་ལོག་གོ། །དེ་ནས་རྒྱལ་པོ་ཨུ་ཏྲ་ཡ་ན་མཐར་གྱིས་གྲོང་ཁྱེར་རྒྱལ་པོའི་ཁབ་ཏུ་ཕྱིན་ནས་དེས་སྐྱེད་མོས་ཚལ་དུ་བསྡད་དེ། མི་དེ་ལ་སྨྲས་པ། ཀཝའི་ནང་རྗེ་རྒྱལ་པོ་གཟུགས་ཅན་སྙིང་པོའི་གན་དུ་སོང་ལ་རྒྱལ་པོ་ཨུ་ཏྲ་ཡ་ན་སྐྱེད་མོས་ཚལ་ན་སྡོད་དོ་ཞེས་སྦྲོན་ཅིག་།མི་དེ་སོང་སྟེ་རྒྱལ་པོ་གཟུགས་ཅན་སྙིང་པོ་ལ་ལྷ་རྒྱལ་པོ་ཨུ་ཏྲ་ཡ་ན་སྐྱེད་མོས་ཚལ་ན་སྡོད་དོ་ཞེས་སྦྲན་ཏོ། །དེས་ཐོས་ནས་འཕྲལ་ཁོ་ན་ལ་ལངས་ཏེ་ཞོ་ཤས་འཚོ་བ་རྣམས་ལ་སྨྲས་པ། ཤེས་ལྡན་དག་རྒྱལ་པོ་དེ་དཔུང་ཆེན་པོ་དང་ལྡན་པ་ཡིན་ན་དེས་མ་སྦྲན་པ་ཁོ་ནར་འོངས་པ་ཁྱེད་ཅག་སུས་ཀྱང་མ་ཤེས་སོ། །དེས་སྨྲས་པ། ལྷ་དེ་ལ་དཔུང་ག་ལ་མཆིས་ཏེ་དཔོན་གཡོག་གཉིས་པུ་ཞིག་མཆིས་སོ། །རྒྱལ་པོ་གཟུགས་ཅན་སྙིང་པོས་བསམས་པ། གང་གི་ཕྱིར་བདག་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་བགྱིས་ན་དེ་བཞིན་དུ་གྲོང་ཁྱེར་དུ་གཞུག་པ་ནི་བདག་གི་ཚུལ་དང་འཐུན་པ་མ་ཡིན་གྱིས། བདག་གིས་བཀུར་སྟི་ཆེན་པོས་འཇུག་ཏུ་གཞུག་གོ་སྙམ་དུ་རིག་ནས། ལམ་མཛེས་པ་དང་གྲོང་ཁྱེར་མཛེས་པར་བྱེད་དུ་བཅུག་ནས་དཔུང་གི་ཚོགས་ཡན་ལག་བཞི་པས་བསུའོ། །དེ་ནས་གཉའ་བ་སྤྲད་དེ་གླང་པོ་ཆེའི་རྒྱབ་ཏུ་ཞོན་ནས་གྲོང་ཁྱེར་རྒྱལ་པོའི་ཁབ་ཏུ་བཅུག་སྟེ། སྤོས་སྣ་ཚོགས་དང་སྦྱར་བའི་ཆུས་ཁྲུས་བྱེད་དུ་བཅུག་ནས་རྒྱལ་པོ་ལ་འོས་པའི་གོས་དག་དང ། སྤོས་དང ། ཕྲེང་བ་རྒྱུ་དང ། བྱུག་པ་སྣ་ཚོགས་དག་གིས་ལེགས་པར་བརྒྱན་ནས་ཟན་བྱིན་ཏེ་ལམ་གྱིས་དུབ་པའི་ངལ་བསོས་ནས་སྨྲས་པ། ཤེད་འཐུན་དགྱེས་པས
8.113a
རྒྱལ་སྲིད་རྒྱས་པ་དང ། བཙུན་མོའི་འཁོར་དང ། གཞོན་ནུ་དང ། བློན་པོ་དང་ཕོ་བྲང་འཁོར་གྱི་མི་རྣམས་སྤངས་ཏེ་འདིར་ཅི་ལ་བྱོན། ས་གཞན་གྱི་རྒྱལ་པོ་འགའ་ཞིག་གིས་ཡུལ་འཁོར་གཞོམ་པར་བགྱིས་པ་འམ། གཞོན་ནུ་རྒྱལ་སྲིད་ལ་མངོན་པར་དགའ་བ་བློན་པོ་སྐྱོན་ཆགས་པས་བསླུས་པ་འགའ་ཞིག་གིས་བརྟུལ་བ་འམ་གཅིག་ཏུ་མ་གྱུར་ཏམ། དེས་སྨྲས་པ། ཤེད་འཐུན་དགྱེས་པ་དེ་ལྟར་མ་གྱུར་ཏེ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཚལ་ལོ། །རྒྱལ་པོ་གཟུགས་ཅན་སྙིང་པོས་ཐོས་ནས་ཡིད་དགའ་ཞིང་དགའ་སྟེ། རོ་སྟོད་བསྲང་ནས་ལག་པ་གཡས་པ་བརྐྱང་སྟེ། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ཀྱི་ལེགས་པར་གསུངས་པ་ཉིད་འདི་ལྟར་སྐྱེས་བུ་གཙོ་བོ་འདི་ལྟ་བུ་དག་གིས་རྒྱལ་སྲིད་རྒྱས་པ་དང ། བཙུན་མོའི་འཁོར་རྒྱས་པ་དང ། མཛའ་བཤེས་དང ། རྩ་ལག་གི་ཚོགས་རྒྱ་ཆེན་པོ་དང ། མཛོད་དང ། བང་བ་དང ། ཁྱིམ་རྒྱ་ཆེན་པོ་དག་སྤངས་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འདོད་པ་ངོ་མཚར་ཆེའོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་པ་སྨྲས་ནས་རྒྱལ་པོ་ཨུ་ཏྲ་ཡ་ན་ཁྲིད་དེ་བཅོམ་ལྡན་འདས་ག་ལ་བ་དེར་སོང་ངོ ། །དེའི་ཚེ་ན་བཅོམ་ལྡན་འདས་འཁོར་འབུམ་ཕྲག་དུ་མའི་གོང་ན་བཞུགས་ཤིང་ཆོས་སྟོན་པར་མཛད་དོ། །བཅོམ་ལྡན་འདས་ཀྱིས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་རྒྱལ་པོ་གཟུགས་ཅན་སྙིང་པོ་ཡིན་ཏེ། དེ་སྐྱེས་དང་བཅས་པས་ངའི་གན་དུ་འོང་ངོ ། །དེ་བཞིན་གཤེགས་པའི་སྐྱེས་ནི་འདི་ལྟ་སྟེ། གདུལ་བའི་སྐྱེས་ལྟ་བུ་གཞན་མེད་དོ་ཞེས་བཀའ་སྩལ་ནས་ཅང་མི་གསུང་བར་བཞུགས་སོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཨུ་ཏྲ་ཡ་ན་འདི་ལེགས་པར་གསུང
8.113b
པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཚལ་ན་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། བཅོམ་ལྡན་འདས་ཀྱིས་དེ་ལ་དགེ་སློང་ཚུར་ཤོག་ཅེས་པས་རབ་ཏུ་ཕྱུང་ཞིང ། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང ། དེ་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང ། སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང ། ལག་པ་ལྷུང་བཟེད་དང ། བྱ་མ་བུམ་གྱིས་འབྲེལ་པ་དང ། དགེ་སློང་རྫོགས་པར་བསྙེན་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་ཚེ་དང་ལྡན་པ་ཨུ་ཏྲ་ཡ་ན་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། རྒྱལ་པོའི་ཁབ་དུ་བསོད་སྙོམས་ལ་ཞུགས་སོ། །དེ་སྐྱེ་བོ་ཕལ་པོ་ཆེའི་ཚོགས་ཀྱིས་མཐོང་ནས་གྲོང་ཁྱེར་རྒྱལ་པོའི་ཁབ་ཐམས་ཅད་དུ་བཅོམ་ལྡན་འདས་ཀྱིས་རྒྱལ་པོ་ཨུ་ཏྲ་ཡ་ན་རབ་ཏུ་ཕྱུང་རྫོགས་པར་བསྙེན་པར་མཛད་ནས་དེ་བསོད་སྙོམས་ལ་རྒྱལ་པོའི་ཁབ་ཏུ་ཞུགས་སོ་ཞེས་དེ་ལྟ་བུའི་སྒྲ་སྒྲོགས་པར་གྱུར་ཏོ། །དེ་སྐད་ཐོས་ནས་སྲོག་ཆགས་འབུམ་ཕྲག་དུ་མ་དག་འདུས་པར་གྱུར་ཅིང ། ཁྱིམ་གྱི་ནང་ན་གནས་པའི་བུད་མེད་དག་ཀྱང་སྐར་ཁུང་དང ། སྐར་ཁུང་དྲ་བ་ཅན་དང ། ལན་ཀན་དག་གི་དྲུང་དུ་འཁོད་དེ་ལྟ་བར་བྱེད་དོ། །རྒྱལ་པོ་གཟུགས་ཅན་སྙིང་པོ་ལ་བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་ཨུ་ཏྲ་ཡ་ན་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ཏེ་སྲོག་ཆགས་འབུམ་ཕྲག་དུ་མ་དག་གིས་བསྐོར་ཅིང་མཆིས་སོ། །རྒྱལ་པོ་གཟུགས་ཅན་སྙིང་པོས་དེ་ཐོས་ནས་དགེ་སློང་ཨུ་ཏྲ་ཡ་ན་ག་ལ་བ་དེར་སོང་སྟེ་ཕྱིན་ནས་དགེ་སློང་ཨུ་ཏྲ་ཡ་ན་ལ་ཚིགས་སུ་བཅད་པ་འདི་སྐད་ཅེས་སྨྲས་སོ། །མི་དབང་གྲོང་ཁྱེར་སྟོང་དང་ནི། །སྒྲ་སྒྲོགས་ཀྱང་ནི་སྤྱད་བྱས་ནས། །བོར་བའི་བསོད་སྙོམས་ཚོལ་བྱེད་པ། །ཇི་ལྟ་ཡོངས་སུ་མི་གདུང་ངམ། །
8.114a
གསེར་དང་དེ་བཞིན་དངུལ་གྱི་སྣོད། །སྲང་ཚད་བརྒྱ་པ་སྤྱད་བྱས་ནས། །ས་ཡི་ལྷུང་བཟེད་སྤྱོད་བྱེད་པ། །ཇི་ལྟ་ཡོངས་སུ་མི་གདུང་ངམ། །ས་ལུའི་འབྲས་ཆན་གཙང་མ་དག་།ཤ་ཡིས་བརླན་པས་སྤྱད་བྱས་ནས། །ཟན་དྲོན་ཁེངས་པ་སྤྱོད་བྱེད་པ། །ཇི་ལྟ་ཡོངས་སུ་མི་གདུང་ངམ། །སྲིན་བལ་རས་བལ་ཟར་མ་དང ། །ཀོ་ཏམ་ཀ་ཤིའི་གོས་སྤངས་ནས། །ཕྱག་དར་ཁྲོད་དག་སྲེལ་བྱེད་པ། །ཇི་ལྟ་ཡོངས་སུ་མི་གདུང་ངམ། །རླུང་མེད་སྒོ་གཏན་བསྡམས་པ་ཡི། །ཁང་པ་བརྩེགས་པར་ཁྱོད་ཉལ་ནས། །ཤིང་ལྗོན་དྲུང་དུ་གནས་གྱུར་པ། །ཇི་ལྟ་ཡོངས་སུ་མི་གདུང་ངམ། །འཇམ་ཞིང་རས་བལ་འདྲ་བ་ཡི། །མལ་ཁྲི་དག་ལ་ཁྱོད་ཉལ་ནས། །རྩཝ་ཡི་སྟན་ལ་ཉལ་གྱུར་པ། །ཇི་ལྟ་ཡོངས་སུ་མི་གདུང་ངམ། །བཙུན་མོ་མཚུངས་པ་ཡིད་འོང་བ། །གུས་པར་ཉལ་ཅིང་སྙན་སྨྲས་པ། །དུ་མ་ཁྱོད་ཀྱིས་རྣམ་སྤངས་པ། །ཇི་ལྟ་ཡོངས་སུ་མི་གདུང་ངམ། །གླང་ཆེན་གཉའ་དང་ཤིང་རྟ་དང ། །རྟ་ཡི་བཞོན་པས་ཁྱོད་སོང་ནས། །རྐང་པས་ས་ལ་རྒྱུ་བྱེད་པ། །ཇི་ལྟ་ཡོངས་སུ་མི་གདུང་ངམ། །ནོར་མང་ལྡན་པའི་མཛོད་དང་ནི། །ཁང་པ་དག་ཀྱང་རྣམ་སྤངས་ཏེ། ཅི་ཡང་མེད་པ་ཐོབ་གྱུར་པ། །ཇི་ལྟ་ཡོངས་སུ་མི་གདུང་ངམ། །ུ་ཏྲ་ཡ་ནས་སྨྲས་པ། རྒྱལ་པོ་གལ་ཏེ་གདུལ་དཀའ་བ། །གཞན་གྱི་ཟས་ཀྱིས་འཚོ་བྱེད་ན། །མ་གྲུབ་པས་ནི་དེ་འདུལ་ཏེ། །གཉའ་ཤིང་བ་ལང་འདུལ་བ་བཞིན། །རྒྱལ་པོ་གཟུགས་ཅན་སྙིང་པོས་སྨྲས་པ། །རྒྱལ་པོ་ཁྱོད་ཡིད་མི་བདེ་འམ། །ཅི་ཕྱིར་དམན་པ་བཞིན་དུ་སྨྲ། །རྒྱལ་སྲིད་ཕྱེད་ནི་སྦྱིན་བྱ་ཡིས། །ཁྱོད་ནི་སྔོན་བཞིན་ལོངས་སྤྱོད་ཀྱིས། །རྒྱལ་པོ་ཁྱོད་ཡིད་མི་བདེ་འམ། །ཅི་ཕྱིར་དམན་པ་བཞིན་དུ་སྨྲ། །ཡིད་ཀྱིས་གང་དང་གང་འདོད་པའི། །ལོངས་སྤྱོད་རབ་མཆོག་སྦྱིན་པར་བྱ། །ུ་ཏྲ་ཡ་ནས་སྨྲས་པ། རྒྱལ་པོ་གང་ཞིག་འཇིག་རྟེན་ན། །ལུས་ཀྱི་ཆོས་རེག་བཀྲེན་པ་མེད། །དེ་ནི་ངེས་པར་ལྷ་ཉིད་དང ། །ཡང་ན་མྱ་ངན་འདའ་བར་འགྱུར། །མི་དབང་གང་ཞིག་ཆོས་སྤངས་ཞིང ། །འདི་ལ་ཆོས་མིན་དགའ་བྱེད་པ། །རྒྱལ་པོ་དེ་བཀྲེན་ཤེས་པར་བྱ། །མུན་ནས་མུན་པར་འགྲོ་བར་འགྱུར། །ཁྱོད་ལ་ཆོས་ནི་བསྟན་བྱ་ཡིས། །རྒྱལ་པོ་ཆེན་པོ་བདག་ལ་ཉོན། །ཆོས་ཐོས་འོག་ཏུ་རྒྱལ་པོ་ནི། །གང་དུ་འདོད་པར་འགྲོ་བར་འགྱུར། །ཡོན་ཏན་མེད་པའི་ལུས་ལ་ནི། །གཅིག་ཉིད་ཡོན་ཏན་ཆེན་པོ་སྟེ། །ཇི་ལྟ་ཇི་ལྟར་གཟུང
8.114b
བྱས་པ། །དེ་ལྟ་དེ་ལྟར་རྗེས་འཇུག་འགྱུར། །རྒྱལ་པོ་བཅུ་པའི་བཅུ་པོ་འདི། །སྐྱེས་བུའི་ཆེར་ནི་བརྗོད་པར་བྱ། །བུ་དང་ཆུང་མ་ནོར་དེ་ལ། །རྩེད་མོ་དགའ་བ་ཅི་ཞིག་ཡོད། །བུ་ཡིས་དགའ་བ་སྟོན་བྱེད་དེ། །ཆུང་མས་ཁེངས་པ་རྗོད་པར་བྱེད། །ཆོམ་རྐུན་ནོར་ནི་སྒྲུབ་བྱེད་དེ། །རྒྱལ་པོ་དག་ནི་བཅིངས་ལས་གྲོལ། །མཐར་བྱེད་པ་ལས་སྨན་དག་དང ། །ནོར་དང་ཉེ་དུས་སྐྱོབ་མི་ནུས། །རིག་སྔགས་ཀུན་དང་དཔུང་དག་དང ། །དཔའ་བརྟུལ་གྱིས་ཀྱང་བསྐྱོབ་ནུས་མིན། །འདི་ན་མཐུ་ཆེན་གནས་མཐོ་ལ། །གནས་པའི་ལྷ་ཚེ་རིང་པོ་ཡང ། །དེ་ཡང་ཚེ་ཟད་ཉམས་འགྱུར་བས། །འཆི་ལས་དེ་རིང་སུ་ཞིག་འཐར། །མཐུ་ཆེན་ནོར་ལྡན་གྲགས་འབར་བ། །རྒྱལ་སྲིད་བྱས་པ་ཁྱབ་འཇུག་དང ། །མུན་བྱེད་སྒྲ་ངན་སྐྱ་བསེང་བུ། །དེས་ཀྱང་འཆི་བ་བཟློག་མ་ནུས། །རྒྱལ་པོ་སྡོམ་བརྩོན་དཀའ་ཐུབ་དང ། །ལས་དང་བརྩོན་འགྲུས་རྟུལ་བ་དང ། །འཁོར་ཚོགས་རྒྱ་ཆེན་ནོར་དག་གིས། །འཆི་ལས་ཇི་ལྟར་ཐར་མི་ནུས། །བར་སྣང་རྒྱ་མཚོའི་ནང་དང་ནི། །རི་ཡི་སུལ་དུ་ཞུགས་པ་འམ། །གང་དུ་གནས་ན་འཆི་བདག་གིས། །མི་ཚུགས་འགྱུར་བའི་ས་ཕྱོགས་མེད། །བར་སྣང་རྒྱ་མཚོ་ཡི་ནང་དང་ནི། །རི་ཡི་སུལ་དུ་ཞུགས་པ་འམ། །གང་དུ་གནས་ན་ལས་རྣམས་ཀྱིས། །མི་ཚུགས་འགྱུར་བའི་ས་ཕྱོགས་མེད། །རུས་པ་ཐི་བའི་མདོག་འདྲ་བ། །བོར་ཞིང་ཕྱོགས་ཕྱོགས་རྣམ་འཐོར་བ། །གང་དང་གང་ཡིན་དེ་དག་ནི། །མཐོང་ན་འདི་ལ་སུ་ཞིག་དགའ། །ཐོད་པ་དུང་གི་མདོག་འདྲ་བ། །བོར་ཞིང་སྐུ་བ་ལྷུང་ལྟ་བུ། །གང་དང་གང་ཡིན་དེ་དག་ནི། །མཐོང་ན་འདི་ལ་སུ་ཞིག་དགའ། །རྒྱལ་པོ་ཚ་ན་སྒྲིབ་བྱེད་ཅིང ། །གྲང་ན་གཡོག་པར་བྱེད་པ་ཡི། །ཁྱོད་ཀྱི་བདག་ཉིད་ཅེས་བྱ་བ། །གང་ཡིན་དེ་ཡང་འཆི་བས་འཇོམས། །མི་ཡིས་ཇི་ཙམ་ཟས་ཟོས་ཤིང ། །གྱོན་ནམ་ཡང་ན་བྱིན་པ་དེ། །དེ་ཡི་རང་གིར་ཤེས་བྱ་སྟེ། །གཞན་ནི་བོར་ཏེ་འགྲོ་བར་འགྱུར། །མི་ཡི་རྐུན་པོས་མི་འཕྲོགས་དང ། །གཞན་དང་ཐུན་མོང་མ་ཡིན་པའི། །གཏེར་ནི་སྦྱིན་པ་འམ་ཡང་ན་ནི། །ལེགས་བྱས་གཞན་གྱིས་སྦ་བར་བྱ། །སྟག་གིས་རི་དགས་བསད་འདྲེན་ལྟར། །ན་རྒ་འཆི་བས་ཁྱོད་མྱུར་འདྲེན། །མཛའ་བཤེས་བློན་ཚོགས་ཀུན་འདུས་པ། །ཁྱོད་ཀྱི་ནད་ནི་སེལ་མི་ནུས། །དེ་ལ་སྤྱད་ལྷག་ནོར་འབྲུ་དང ། །གསེར་དངུལ་གང་དག་ཡོད་པ་ལ། །བུ
8.115a
དང་ཆུང་མ་འཁོར་བཅས་དག་།བགོ་སྐལ་ཉིད་དུ་སེམས་པར་བྱེད། །གལ་ཏེ་ཕ་ཤི་བུ་ལོན་ཆགས། །བུ་སྡུག་དེ་ལ་མེ་མི་ཁྱེར། །ཤི་ན་འཆི་བཞིན་མི་ངུ་ཞིང ། །བདག་གི་ཕ་འམ་རྗེར་མི་སྨྲ། །ཕྱུག་ཤེས་བདག་གི་ཕ་ཟེར་ཞིང ། །སྐྲ་བཤིག་མཆི་མའི་བཞིན་གྱིས་ངུ ། །མེ་ཡང་མདུན་དུ་ཁྱེར་བྱེད་ཅིང ། །ཀྱེ་མ་འདི་ནི་ལྷར་འགྱུར་ཟེར། །གོས་ཀྱིས་བཀབ་བཞིན་ཁྱེར་བྱེད་ཅིང ། །མེ་བཏང་དེ་ནས་སྲེག་པར་བྱེད། །ཉེ་དུ་ངུ་ཞིང་གོས་གཅིག་གིས། །དེ་སྲེགས་སྤངས་ཏེ་ལོངས་སྤྱོད་བྱེད། །དེ་གཅིག་སྐྱེ་ཞིང་སྐྱེ་ཚེ་གཅིག་།དེ་བཞིན་གཅིག་འཆི་འཆི་ཚེ་གཅིག་།སྐྱེ་འདིར་གཅིག་པུས་སྡུག་བསྔལ་མྱོང ། །འཁོར་བར་འགྱུར་ལ་གྲོག་མེད་དོ། །དེ་མཐོང་འདི་ལ་དམ་པ་རྣམས། །རབ་འབྱུང་ཁྱིམ་ན་འདུག་མི་བྱེད། །དེ་དག་ཆགས་པ་ཀུན་བྲལ་ནས། །ཕྱིན་ཆད་མངལ་ན་འཇུག་མི་འགྱུར། །དེ་ནས་རྒྱལ་པོ་གཟུགས་ཅན་སྙིང་པོ་དགེ་སློང་ཨུ་ཏྲ་ཡ་ནས་གོང་ནས་གོང་དུ་སྤོབས་པས་ལན་གླན་པས་ཅང་མི་སྨྲ་ཞིང་སྤོབས་པ་མེད་པར་གྱུར་ཏེ་སོང་ངོ ། །དེ་ནས་རྒྱལ་པོ་གཙུག་ཕུད་ཅན་གྱིས་རེ་ཤིག་ཇི་སྲིད་དུ་ཆོས་ཀྱི་རྒྱལ་སྲིད་བྱེད་དུ་བཅུག་ནས་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང ། དེ་ལ་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱིས་སྨྲས་པ། ལྷ་ཆོས་ཀྱིས་རྒྱལ་སྲིད་བགྱིད་དུ་སྩོལ་ལ། ཆོས་མ་ལགས་པས་བགྱིད་དུ་མ་སྩལ་ཅིག་།དེ་ཅིའི་སླད་དུ་ཞེ་ན། ལྷ་ཡུལ་གྱི་མི་དག་ནི་མེ་ཏོག་གི་ཤིང་ལྗོན་པ་དང ། འབྲས་བུའི་ཤིང་ལྗོན་པ་དག་དང་འདྲ་བའི་སླད་དུ་སྟེ། ལྷ་འདི་ལྟ་སྟེ། དཔེར་བགྱི་ན་མེ་ཏོག་གི་ཤིང་ལྗོན་པ་དང ། འབྲས་བུའི་ཤིང་ལྗོན་པ་དག་ནི་དུས་དང་དུས་སུ་ལེགས་པར་ཡོངས་སུ་བསྐྱངས་པ་ན་བར་ཆད་མ་མཆིས་པའི་སྦྱོར་བས་དུས་ཇི་ལྟ་བ་བཞིན་དུ་མེ་ཏོག་དང ། འབྲས་བུ་དག་འབྱིན་པར་བགྱིད་དོ། །ལྷ་དེ་བཞིན་དུ་ཡུལ་གྱི་མི་དག་ཀྱང་དུས་དང་དུས་སུ་ལེགས་པར་ཡོངས་སུ་བསྐྱངས་པ་ན་བར་ཆད་མ་མཆིས་པའི་སྦྱོར་བས་དུས་ཇི་ལྟ་བ་བཞིན་དུ་དཔྱ་དང་ལོ་ཐང་དག་འབུལ་བར་བགྱིད་དོ། །དེ་དེ་གཉིས་ཀྱིས་བཟློག་པ་ན་རེ་ཤིག་ཇི་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང ། དེ་ལ་དེ་གཉིས་ཀྱིས་ལན་གསུམ་གྱི་བར་དུ་ཡང་སྨྲས་ན
8.115b
སྲིད་པ་འཕོས་པ་དང་ལྡན་པས་བཟློག་ཀྱང་མི་སྡོད་དེ་དེ་ཁྲོས་ནས་བློན་པོ་གཞན་དག་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་བཀའ་ལན་གསུམ་གྱི་བར་དུ་ཡང་གཅོག་པ་དེའི་ཆད་པ་ཇི་ལྟ་བུ་ཡིན། དེ་ན་བློན་པོ་སྐྱོན་ཆགས་པ་ཁ་ཅིག་གིས་སྨྲས་པ། ལྷ་འདི་ལ་རྨ་ཅི་འཚལ་ཏེ། དེའི་ཆད་པ་ནི་དགུམ་པ་ལགས་སོ། །ཚིགས་སུ་བཅད་པ་དག་ཀྱང་སྨྲས་པ། བློན་པོ་སྐྱོན་ནི་ཆགས་པ་དང ། །འགུལ་བར་གྱུར་པའི་སོ་དང་ནི། །ཟས་ལ་སྐྱོན་ནི་ཆགས་པ་དག་།ཕྱུང་བ་འབའ་ཤིག་བདེ་བར་གྱུར། །བློན་པོ་བློ་དང་ལྡན་གྱུར་ཅིང ། །ཤེས་རབ་དང་ནི་འདུལ་ལ་མཁས། །མཛོད་ནས་གོ་འཕང་གནས་པ་ནི། །གང་གིས་མི་གསོད་དེ་གསོད་འགྱུར། །རྒྱལ་པོ་གཙུག་པུད་ཅན་གྱིས་སྨྲས་པ། ཤེས་ལྡན་དག་འདི་གཉིས་ནི་ངའི་ཡབ་ཀྱིས་བསྐོས་པ་ཡིན་པས་ང་འདི་གཉིས་གསོད་པར་མི་བྱེད་ཀྱིས། འདི་ལྟར་འདི་གཉིས་ཀྱིས་ངའི་མིག་སྔར་འདུག་པར་མི་བྱའོ། །ཞེས་དེ་གཉིས་ཀྱི་སྒོ་བཟློག་ནས་སྐྱོན་ཆགས་པ་གཞན་གཉིས་ཤིག་བློན་པོར་བསྐོས་པ་དང ། དེ་གཉིས་ཀྱིས་སྨྲས་པ། ལྷ་ཏིལ་མ་བརྡུངས་པ་དང ། མ་སྩལ་བ་དང ། མ་བསྲོས་པ་དང ། མ་བཙིར་བ་དག་གིས་ཏིལ་མར་མི་འབྱིན་ཏེ། མིའི་དབང་པོ་སྐྱེ་བོ་དག་ཀྱང་དེ་དང་འདྲའོ། །རྒྱལ་པོས་སྨྲས་པ། ཁྱེད་གཉིས་ཀྱིས་བྱས་པ་གང་ཡིན་པ་དེ་ནི་མཆོག་ཏུ་བརྩོན་པ་ཡིན་ནོ། །དེ་གཉིས་ཀྱིས་ཡུལ་གྱི་མི་དག་ལ་གནོད་པ་བྱ་བར་བརྩམས་སོ། །ཇི་ཙམ་དུས་གཞན་ཞིག་ན་ཚོང་པ་ཞིག་ཟོང་ཐོགས་ཏེ་གྲོང་ཁྱེར་སྒྲ་སྒྲོགས་ནས་རྒྱལ་པོའི་ཁབ་ཏུ་ཕྱིན་པ་དང ། ཚེ་དང་ལྡན་པ་ཨུ་ཏྲ་ཡ་ནས་དེ་མཐོང་ནས་ངོ་ཤེས་ཏེ་སྨྲས་པ། ཇི་ལྟ་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་ནད་མེད་དམ། །དེ་ལ་ཕས་ཀྱི་སྡོ་བ་འགའ་མེད་ཅིང ། །རང་གི་རྒྱལ་སྲིད་ཆོས་ཀྱིས་བྱེད་འཇུག་གམ། །དེས་སྨྲས་པ། ལྷ་དེ་བཞིན་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་བྲོ་མ་འཚལ། །དེ་ལ་ཕས་ཀྱི་སྡོ་བ་མ་མཆིས་ཏེ། །རྒྱལ་སྲིད་རྟག་ཏུ་ཆོས་མ་ལགས་པས་བགྱིད། །དེ་ནས་ཚེ་དང་ལྡན་པ་ཨུ་ཏྲ་ཡ་ནས་མཐར་གྱིས་དྲི་བར་བརྩམས་པས། དེ་ན་བློན་པོ་གང་ནི་གཙོ་བོ་ཡིན། །གང་ནི་གཙོ་བོ་མ་ཡིན།
8.116a
གང་གི་དབང་གིས་ནི་གཙུག་པུད་ཅན་ཡུལ་གྱི་མི་དག་ལ་གནོད་པ་བྱེད། དེས་སྨྲས་པ། ལྷ་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱི་སྒོ་ནི་བཟློག་།སྐྱོན་ཆགས་པ་གཞན་གཉིས་ཤིག་ནི་བློན་པོར་བསྐོས་ཏེ། དེ་གཉིས་ཀྱི་དབང་གིས་གཙུག་པུད་ཅན་ཡུལ་གྱི་མི་དག་ལ་གནོད་པ་བགྱིད་དོ། །ུ་ཏྲ་ཡ་ནས་སྨྲས་པ། ཀཝའི་ནང་རྗེ་ཁྱོད་སོང་ལ་སྒྲ་སྒྲོགས་ན་གནས་པའི་སྐྱེ་བོའི་ཚོགས་ལེགས་པར་དབུགས་ཕྱུང་ཤིག་དང ། ཡང་དེར་བཟློག་ཏུ་འོང་སྟེ། ང་ཉིད་ཀྱིས་གཙུག་པུད་ཅན་ཅི་ནས་ཀྱང་ཡུལ་གྱི་མི་རྣམས་ལ་གནོད་པ་མི་བྱེད་པ་དེ་ལྟར་གནོད་པ་ལས་བཟློག་པར་བྱ་ཞིང་ཕན་པ་ལ་ངེས་པར་སྦྱར་བར་བྱའོ། །ཚོང་པ་དེས་ཟོང་བསྒྱུར་ཏེ་ཟོང་རིན་ཁྱེར་ནས་འཕགས་ཏེ་མཐར་གྱིས་སྒྲ་སྒྲོགས་སུ་ཕྱིན་ནས་དེས་ཉེ་དུ་རྣམས་ལ་གསང་སྟེ་སྨྲས་པ། ཤེས་ལྡན་དག་ཁོ་བོས་ཟོང་ཐོགས་ཏེ་རྒྱལ་པོའི་ཁབ་ཏུ་སོན་ནས་ཁོ་བོས་དེར་རྒྱལ་པོ་བགྲེས་པོ་མཐོང་ནས། དེའི་ཞལ་ནས་ཀཝའི་ནང་རྗེ་ཁྱོད་སོང་ལ་སྒྲ་སྒྲོགས་ན་གནས་པའི་སྐྱེ་བོའི་ཚོགས་ལེགས་པར་དབུགས་ཕྱུང་ཤིག་དང་ང་ཡང་དེར་བཟློག་ཏུ་འོང་སྟེ། ང་ཉིད་ཀྱིས་གཙུག་ཕུད་ཅན་ཅི་ནས་ཀྱང་ཡུལ་གྱི་མི་རྣམས་ལ་གནོད་པ་མི་བྱེད་པ་དེ་ལྟར་གནོད་པ་ལས་བཟློག་པར་བྱ་ཞིང་ཕན་པ་ལ་ངེས་པར་སྦྱར་བར་བྱའོ་ཞེས་བྱུང་ངོ ། །དེ་དག་གིས་ཀྱང་གཞན་དག་ལ་བརྗོད་ཅིང་དེ་དག་གིས་ཀྱང་གཞན་དག་ལ་བརྗོད་པས་དེ་ལྟར་སྒྲ་དེ་རྣ་བ་གཅིག་ནས་གཅིག་ཏུ་བརྒྱུད་པས་བློན་པོ་སྐྱོན་ཆགས་པ་དེ་གཉིས་ཀྱི་རྣར་སོན་ནས་དེ་གཉིས་ཀྱིས་བསམས་པ། གལ་ཏེ་རྒྱལ་པོ་རྒན་པོ་འོང་བར་གྱུར་ན་དེས་གདོན་མི་ཟ་བར་ཧེ་རུ་ཀ་དང ། བྷི་རུ་ཀ་གཉིས་ཡང་བློན་པོའི་མཆོག་ཏུ་སྐོ་ཞིང་བདག་ཅག་གཉིས་ལ་གནོད་པ་བྱེད་པར་འགྱུར་གྱིས། དེའི་ཕྱིར་གང་གིས་དེ་ལམ་ཀར་གསོད་དུ་འཇུག་པར་འགྱུར་བའི་ཐབས་ཀྱི་རྣམ་པ་ཞིག་བྱའོ་སྙམ་ནས་དེ་གཉིས་ཀྱིས་རྒྱལ་པོ་གཙུག་པུད་ཅན་ལ་སྨྲས་པ། ལྷ་རྒྱལ་པོ་བགྲེས་པོ་བྱོན་པར་འགྱུར་རོ་ཞེས་གདའོ། །དེས་སྨྲས་པ། དེ་རབ་ཏུ་བྱུང་བས་དེ་ཅིའི་ཕྱིར་འདིར་འོང་བར་འགྱུར། དེ་གཉིས་ཀྱིས་སྨྲས་པ། ལྷ་གང་གིས་གདུགས་གཅིག་རྒྱལ་སྲིད་བགྱིད་དུ་སྩལ་བ་དེ་ནི་རྒྱལ་སྲིད་མ་མཆིས
8.116b
པས་དགའ་བར་ག་ལ་འགྱུར་ཏེ། དེ་ཡང་རྒྱལ་སྲིད་བགྱིད་དུ་སྩོལ་བར་འཚལ་ལོ། །གཙུག་པུད་ཅན་གྱིས་སྨྲས་པ། གལ་ཏེ་དེ་རྒྱལ་པོར་གྱུར་ན་ང་ཉིད་ཀྱིས་གཞོན་ནུ་བྱས་ཏེ། འདི་ལ་འགལ་བ་ཅི་ཡོད། དེ་གཉིས་ཀྱིས་སྨྲས་པ། ལྷ་དེ་ནི་ཚུལ་དང་འཐུན་པ་མ་ལགས་ཏེ་གཞོན་ནུ་དང ། བློན་པོ་དང ། ཕོ་བྲང་འཁོར་གྱི་མི་དང་ཡུལ་གྱི་མི་དག་གིས་ཐལ་མོ་སྟོང་དག་གིས་ཕྱག་བགྱིས་པས་རྒྱལ་སྲིད་བགྱིད་དུ་སྩལ་ནས་ཡང་ཇི་ལྟར་གཞོན་ནུའི་གནས་སུ་གནས་པར་མཛད་ཡུལ་ཡོངས་སུ་བཏང་བ་ནི་མི་སྡོ་ཡི་གཞོན་ནུའི་གནས་སུ་གནས་པ་ནི་མི་རུང་སྟེ། འདི་ལྟ་སྟེ་དཔེར་བགྱི་ན་མི་ཞིག་གླང་པོ་ཆེའི་གཉའ་བར་མཆིས་ནས་རྟའི་རྒྱབ་ཏུ་མཆི་བ་དང ། རྟའི་རྒྱབ་ཏུ་མཆིས་ནས་ཤིང་རྟས་མཆི་བ་དང ། ཤིང་རྟས་མཆིས་ནས་རྐང་པ་གཉིས་ཁོ་ནས་མཆི་བ་བཞིན་དུ། རྒྱལ་སྲིད་བགྱིད་དུ་སྩལ་ནས་ཡང་གཞོན་ནུའི་གནས་ན་གནས་པ་ཡང་དེ་དང་འདྲའོ། །དེ་གཉིས་ཀྱིས་བསླུས་ནས་དེས་སྨྲས་པ། འོ་ན་འདི་ལ་གང་རིགས། འདི་ལ་ཇི་ལྟར་བསྒྲུབ་པར་བྱ། དེ་གཉིས་ཀྱིས་སྨྲས་པ། ལྷ་དེ་འགུམས་སུ་སྩལ་བར་བགྱིའོ། །གལ་ཏེ་འགུམས་སུ་མ་སྩལ་གོར་མ་བཀུམ་པར་བློན་པོ་སྐྱོན་ཆགས་པ་དག་དང་བསྡོངས་ཏེ་ལྷ་ཉིད་འགྲོངས་པར་བགྱིད་དོ། །དེ་སྐད་ཅེས་སྨྲས་པ་དང ། དེ་བཞིན་གྱུར་ཅིང་ཉམས་ཏེ་ཡུད་ཙམ་ཞིག་ཅང་མི་སྨྲ་བར་འདུག་ནས་མཆི་མས་བརྣངས་པའི་སྙིང་གིས་སྙིང་རྗེ་བཞིན་ཞུམ་པ་དང ། ཐོགས་པའི་ཡིད་དག་གིས་སྨྲས་པ། ཤེས་ལྡན་གཉིས་ཇི་ལྟར་ཡབ་དགྲོངས་སུ་རུང ། དེ་གཉིས་ཀྱིས་སྨྲས་པ། ལྷས། ཕ་འམ་ཡང་ན་སྤུན་དག་གམ། །རང་ལས་སྐྱེས་པའི་བུ་ཡང་རུང ། །གལ་ཏེ་དགྲ་ཁྲོད་ཞུགས་གྱུར་ན། །ས་ཕུང་འཕེལ་བ་ཉིད་དུ་བྱ། །ཞེས་བགྱི་བ་མ་གསན་ཏམ། ཡང་སྨྲས་པ། ལྷས་གང་ལ་བུ་ཕོ་སྟོང་བདོག་ཅིང ། ཐམས་ཅད་གྲུ་གཅིག་ཞུགས་གྱུར་པ། །དེར་ནི་དགྲ་བོ་གཅིག་ཏུ་བྱུང ། །དེ་ཡི་དོན་དུ་དེ་ནུབ་བྱ། །ཞེས་བགྱི་བ་མ་གསན་ཏམ། ལྷས་གཞན་དག་ནས། ཁྱིམ་གྱི་ཕྱིར་ནི་གཅིག་གཏང་བྱ། །གྲོང་ཕྱིར་ཁྱིམ་ནི་གཏང་བར་བྱ། །ལྗོངས་ཕྱིར་གྲོང་ནི་གཏང་བྱ་སྟེ། །བདག་ཉིད་ཕྱིར་ནི་ས་གཏང་བྱ། །ཞེས་འབྱུང་བ་ཡང་མ་གསན་ཏམ། ལྷ་འདི་ལ་དགོངས་པར་བགྱི་བ་ཅི་ཡང་མ་མཆིས
8.117a
ཏེ། དེ་ནི་དགུམ་པར་བགྱི་ལགས་པས་འགུམས་སུ་སྩལ་བར་བགྱིའོ། །གལ་ཏེ་ལྷ་འདི་ལ་ཕྱི་ཤོལ་མཛད་ནས་ལྷ་ལ་རྗེས་སུ་ཆགས་པའི་གཞོན་ནུ་དང ། བློན་པོ་དང ། ཕོ་བྲང་འཁོར་གྱི་མི་དང་ཡུལ་གྱི་མི་གང་དག་ལགས་པ་དེ་དག་འཁྲུགས་པར་གྱུར་ན་གོར་མ་བཀུམ་པར་ལྷ་ལ་གནོད་པ་བགྱིད་པར་འགྱུར་རོ། །འདོད་པ་དག་ལ་བསྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་དེས་དེ་ལྟར་གྱིས་ཤིག་ཅེས་ཁས་བླངས་སོ། །དེ་ནས་བློན་པོ་སྐྱོན་ཆགས་པ་དེ་གཉིས་དགའ་བ་དང་མགུ་བ་དང་མཆོག་ཏུ་དགའ་བ་སྐྱེས་ནས་མི་གཤེད་མ་བ་དག་ལ་སྨྲས་པ། ཤེས་ལྡན་དག་དེང་ལ་རྒྱལ་པོ་རྒན་པོ་སོད་ཅིག་དང་ཁྱེད་ཅག་ལ་ལོངས་སྤྱོད་དག་གིས་བགོ་བཤའ་བྱའོ། །རྒྱལ་པོ་དེ་ལ་ཕོ་བྲང་འཁོར་གྱི་མི་དང་ཡུལ་མི་ཐམས་ཅད་རྗེས་སུ་ཆགས་པས་དེ་གསོད་པར་སྤྲོ་བ་འགའ་ཡང་མེད་དོ། །དེ་གཉིས་ཀྱིས་དེ་དག་ལ་ལན་གསུམ་གྱི་བར་དུ་ཡང་དབྱིག་དང ། གསེར་དང་གྲོང་སྦྱིན་པ་ལ་སོགས་པས་སྤྲོ་བར་བྱེད་ན་སྤྲོ་བ་འགའ་ཡང་མ་བྱུང་ནས། དེ་ནས་དེ་གཉིས་ཁྲོ་བས་ཀུན་ནས་དཀྲིས་པས་ཕྱག་སྦལ་སྲུང་བ་རྣམས་ལ་བསྒོ་བ། ཤེས་ལྡན་དག་དེང་ལ་མི་དེ་དག་བུ་དང ། ཆུང་མ་དང་རྩ་ལག་དང་མཛའ་ཤེས་དང ། ཉེ་དུའི་ཚོགས་དང་བཅས་པ་ཆིངས་ལ་ཆུག་ཤིག་།དེ་དག་གིས་ཐོས་ནས་སྐྲག་པར་གྱུར་ཏེ་སྨྲས་པ། ལྷ་ཉག་མི་བཞེས་སུ་གསོལ། བདག་ཅག་ནི་ཕྱག་རྗེད་བཀའ་ཉན་པ་དག་ལགས་ཀྱིས་མཆིའོ། །ཞེས་དེ་དག་གིས་རལ་གྲི་རྣོན་པོ་མཆན་དུ་བཅུག་སྟེ་འཕགས་སོ། །ཚེ་དང་ལྡན་པ་ཨུ་ཏྲ་ཡ་ན་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་པས་ལྷུང་བཟེད་དང་ཆོས་གོས་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གྲོང་ཁྱེར་སྒྲ་སྒྲོགས་སུ་ལྗོངས་རྒྱུ་ཞིང་མཆི་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཨུ་ཏྲ་ཡ་ན་སོང་ལ་ཁྱོད་ཀྱིས་ལས་བདག་གིར་བྱ་བ་ཡིད་ལ་བྱའོ། །དེ་ནས་ཚེ་དང་ལྡན་པ་ཨུ་ཏྲ་ཡ་ནས། བཅོམ་ལྡན་འདས་ཀྱི་ཞབས་གཉིས་ལ
8.117b
མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཚེ་དང་ལྡན་པ་ཨུ་ཏྲ་ཡ་ན་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོགས་པར་ཇི་ལྟར་ལོངས་སྤྱོད་པའི་གནས་མལ་མཁོས་སུ་ཕབ་སྟེ་ལྷུང་བཟེད་དང་ཆོས་གོས་ཐོགས་ནས་ལས་ཀྱི་སྟོབས་ཀྱིས་བདས་ཏེ་སོང་ངོ ། །ལས་ཀྱིས་རིང་དུ་འདྲེན་བྱེད་དེ། །རིང་ལས་ལས་ཀྱིས་འདྲེན་པར་བྱེད། །གང་དུ་ལས་རྣམས་སྨིན་འགྱུར་བ། །དེར་ནི་ལས་ཀྱིས་རབ་ཏུ་འདྲེན། །དེ་གྲོང་ཁྱེར་སྒྲ་སྒྲོགས་ག་ལ་བ་དེར་སོང་ནས་མཐར་གྱིས་རྒྱུ་ཞིང་འགྲོ་བ་ན་ལམ་ཀ་ན་རི་བྲགས་ཤིག་ཡོད་པ་དེར་བསོད་སྙོམས་ལ་ཞུགས་ནས་དེ་དེ་ནས་བསོད་སྙོམས་བརྒྱུས་ཏེ་སོང་བ་དང ། མི་གཤེད་མ་པ་དེ་དག་དང་ཕྲད་ནས་དེ་དག་གིས་དེ་མཐོང་ངོ ། །དེས་ཀྱང་དེ་དག་ངོ་ཤེས་ནས་དེ་དག་དང་ལྷན་ཅིག་སྐྱེད་མོས་ཚལ་ཞིག་ཏུ་མཚན་མོ་གནས་པར་ཁས་བླངས་ནས་དེས་དེ་དག་ལ་དྲི་བར་བརྩམས་པ། ཇི་ལྟ་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་ནད་མེད་དམ། །དེ་ལ་ཕས་ཀྱི་སྡོ་བ་འགའ་མེད་ཅིང ། །རང་གི་རྒྱལ་སྲིད་ཆོས་ཀྱིས་བྱེད་འཇུག་གམ། །དེ་དག་གིས་སྨྲས་པ། ལྷ་དེ་བཞིན་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་བྲོ་མ་འཚལ། །དེ་ལ་ཕས་ཀྱི་སྡོ་བ་མ་མཆིས་ཏེ། །རྒྱལ་སྲིད་རྟག་ཏུ་ཆོས་མ་ལགས་པས་བགྱིད། །མི་མཆོག་ཁྱོད་ཀྱི་ཚུལ་དང་འཐུན་པ་ཡི། །འཕགས་དངོས་མངོན་བརྟགས་གང་ལགས་ཁྱོད་ཀྱིས་མཛོད། །ཞི་བ་དེ་ཡི་ཚུལ་འཐུན་གང་ལགས་པ། །དེ་ནི་དེ་རིང་ཉེ་བར་གཟིགས་པར་འགྱུར། །ཚེ་དང་ལྡན་པ་ཨུ་ཏྲ་ཡ་ནས་སྨྲས་པ། ཤེས་ལྡན་དག་ཅི་དེང་དེར་འོང་བ་ལ་མངོན་པར་མི་དགའ་འམ། དེ་དག་གིས་སྨྲས་པ། ལྷ་མངོན་པར་མི་དགའོ། །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་མི་འགྲོས་ཕྱིར་ལྡོག་པར་བྱའོ། །དེ་དག་གིས་ཚིགས་སུ་བཅད་པ་སྨྲས་པ། སྐྱེས་བུ་དཔའ་ཁྱོད་སླར་ནི་གང་དུ་གཤེགས། །
8.118a
སྲས་ནི་ཁྱོད་གསོན་མངོན་པ་མི་དགའ་སྟེ། །བདག་ཅག་བྱུར་ངན་རྒྱལ་པོས་བསྐོས་རྣམས་ཀྱིས། །འདིར་ནི་ཁྱོད་དགྲོངས་སླད་དུ་མཆིད་ཀྱིས་འཚལ། །ཚེ་དང་ལྡན་པ་ཨུ་ཏྲ་ཡ་ནས་སྨྲས་པ། ཤེས་ལྡན་དག་ཁྱེད་ཅག་ང་གསོད་པའི་མི་གཤེད་མ་པ་དག་ཡིན་ནམ། ལྷ་བདག་ཅག་ཁྱོད་དགྲོངས་པའི་གཤེད་མ་པ་དག་ལགས་སོ། །ཚེ་དང་ལྡན་པ་ཨུ་ཏྲ་ཡ་ནས་བསམས་པ། བཅོམ་ལྡན་འདས་ཀྱིས་བདག་ལ་ཨུ་ཏྲ་ཡ་ན་སོང་ལ་ཁྱོད་ཀྱིས་ལས་བདག་གིར་བྱ་བ་ཡིད་ལ་བྱའོ་ཞེས་བཀའ་སྩལ་པ་གང་ཡིན་པ་དེ་ནི་འདི་ཡིན་པ་ལྟ་སྟེ། འཁོར་བ་ནི་རྣམ་པ་ཐམས་ཅད་དུ་ངན་པ་སྙིང་པོ་མེད་པ་འཇིག་པའི་ཆོས་ཅན་ཡིན་ནོ་སྙམ་དུ་རིག་ནས་དེ་དག་ལ་སྨྲས་པ། བཞིན་བཟངས་དག་ང་དོན་གང་གི་ཕྱིར་རབ་ཏུ་བྱུང་བའི་དོན་དེ་ངས་ད་དུང་མ་ཐོབ་ཀྱིས་རེ་ཤིག་ང་རང་གི་དོན་རྗེས་སུ་སྒྲུབ་ཀྱི་བར་དུ་ཡུད་ཙམ་ཞིག་སྡོད་ཅིག་།དེ་དག་གིས་ཕན་ཚུན་གྲོས་བྱས་ཏེ་སྨྲས་པ། ལྷ་དེ་ལྟར་མཛོད་ཅིག་།དེ་ནས་ཚེ་དང་ལྡན་པ་ཨུ་ཏྲ་ཡ་ན་ཤིང་ལྗོན་པ་ཞིག་གི་དྲུང་དུ་བརྟེན་ནས་བྲང་འགྲོའི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟར་སྐྱིལ་མོ་དཀྲུང་བཅས་ཏེ་སྤྱོད་ལམ་ཞི་བས་འདུག་གོ། །བཅོམ་ལྡན་འདས་ཀྱིས་མང་དུ་ཐོས་པ་ལ་ཕན་ཡོན་ལྔ་ཡོད་དེ། ཕུང་པོ་ལ་མཁས་པ་དང ། ཁམས་ལ་མཁས་པ་དང ། སྐྱེ་མཆེད་ལ་མཁས་པ་དང ། རྟེན་ཅིང་འབྲེལ་བར་འབྱུང་བ་ལ་མཁས་པ་དང ། དེའི་གདམ་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ་ཞེས་གསུངས་པས་དེས་བརྩོན་འགྲུས་བརྩམས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང་རྣམ་པར་འཐོར་བ་དང ། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་འདི་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི
8.118b
ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ཨུ་ཏྲ་ཡ་ནས་དགྲ་བཅོམ་པ་ཉིད་ཐོབ་ནས་རྣམ་པར་གྲོལ་བའི་དགའ་བ་དང་བདེ་བ་སོ་སོ་ཡང་དག་པར་རིག་པ་ན་དེའི་ཚེ་ཚིགས་སུ་བཅད་པ་སྨྲས་པ། དགེ་སློང་ཨུ་ཏྲ་ཡ་ན་ནི། །མདུད་པ་སྦྱོར་བ་ཟུག་རྔུ་དང ། །དེ་བཞིན་བསྒྲིབ་ལས་ཐར་གྱུར་ཀྱང ། །རྒྱལ་པོའི་ཆོས་ལས་དེང་མ་ཐར། །ཅེས་སྨྲས་ནས་མི་གཤེད་མ་དེ་དག་ལ་སྨྲས་པ། བཞིན་བཟངས་དག་ངས་ཐོབ་པར་བྱ་བ་གང་ཡིན་པ་དེ་ཐོབ་ཟིན་གྱིས་ད་ནི་ཁྱེད་ཅག་དོན་གང་གི་ཕྱིར་འོངས་པའི་དོན་དེ་ཐོབ་པར་བྱའོ། །དེ་དག་གིས་སྨྲས་པ། ལྷ་གལ་ཏེ་རྒྱལ་པོ་གཙུག་ཕུད་ཅན་བདག་ཅག་ལ་རྒྱལ་པོ་རྒན་པོས་འཆི་བའི་དུས་ཀྱི་ཚེ་ཅི་ཞིག་སྨྲས་ཤེས་རྨེད་ན། བདག་ཅག་གིས་དེ་ལ་ཇི་སྐད་བརྗོད་པར་བགྱི། བཞིན་བཟངས་དག་དེ་ལ་འདི་སྐད་ཅེས། རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །ཞེས་བརྗོད་པར་བྱའོ། །གཞན་ཡང་འདི་སྐད་ཅེས། ཁྱོད་ཀྱིས་མཚམས་མེད་པ་གཉིས་བྱས་ཏེ། ཕ་སྲོག་དང་ཕྲལ་བ་གང་ཡིན་པ་དང ། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ཡིན་པ་དེ་གཉིས་ཀྱིས་ཁྱོད་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བྱ་དགོས་ཀྱིས་སྡིག་པ་སྣ་ཚོགས་ལས་ཤོགས་ཤིག་དང ། དེ་ལྟ་ལས་བསྲབས་པ་ཉིད་དང ། ཡོངས་སུ་ཟད་པ་དང ། ཡོངས་སུ་མཐར་ཐུག་པར་འགྱུར་རོ་ཞེས་བརྗོད་པར་བྱའོ། །ཚེ་དང་ལྡན་པ་ཨུ་ཏྲ་ཡ་ནས་ཡང་བསམས་པ། སེམས་ཅན་དེ་སེམས་ཅན་དམྱལ་བ་ཆེན་པོ་ལས་གཞོལ་བར་གྱུར་ན་མི་རུང་གིས་རྫུ
8.119a
འཕྲུལ་གྱིས་འགྲོའོ་སྙམ་ནས། དེས་རྫུ་འཕྲུལ་གྱི་ཐབས་གང་དང་གང་ཡིན་བརྩམས་ན་དེའི་ལས་ཀྱིས་ནོན་པས་རྫུ་ཞེས་བྱ་བ་ཙམ་ཡང་སྣང་བར་མ་གྱུར་ན་རྫུ་འཕྲུལ་ལྟ་སྨོས་ཀྱང་ཅི་དགོས། དེ་ནས་མི་གཤེད་མ་པ་དེ་དག་ལས་མི་སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་གཅིག་གིས་རལ་གྲི་ཤུབས་ནས་ཕྱུང་སྟེ། དེའི་མགོ་དྲུང་པ་ནས་བཅད་ནས་ས་ལ་བསྒྱེལ་ཏོ། །དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་ན་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་གཟེར་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ནས་ཁ་ཅིག་ནི་འོག་ལོགས་སུ་དོང ། ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང ། ཐིག་ནག་དང ། བསྡུས་གཞོམ་དང ། ངུ་འབོད་དང ། ངུ་འབོད་ཆེན་པོ་དང ། ཚ་བ་དང ། རབ་ཏུ་ཚ་བ་དང ། མནར་མེད་པ་དང ། ཆུ་བུར་ཅན་དང ། ཆུ་བུར་རྡོལ་དང ། སོ་ཐམས་ཐམས་དང ། ཀྱི་ཧུད་ཟེར་དང ། ་ཅུ་ཟེར་དང ། ུཏྤལ་ལྟར་གས་པ་དང ། པད་མ་ལྟར་གས་པ་དང ། པད་མ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང་དག་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་དག་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ། ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན
8.119b
དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་འདོང་བ་དེ་དག་ནི་རྒྱལ་ཆེན་བཞི་པ་དང ། སུམ་བཅུ་རྩ་གསུམ་པ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་རིས་དང ། ཚངས་པའི་མདུན་ན་འདོན་དང ། ཚངས་ཆེན་དང ། འོད་ཆུང་དང་ཚད་མེད་འོད་དང ། འོད་གསལ་དང ། དགེ་ཆུང་དང ། ཚད་མེད་དགེ་དང ། དགེ་རྒྱས་དང་སྤྲིན་མེད་དང ། བསོད་ནམས་སྐྱེས་དང ། འབྲས་བུ་ཆེ་དང ། མི་ཆེ་བ་དང ། མི་གདུང་བ་དང ། གྱ་ནོམ་སྣང་དང ། ཤིན་ཏུ་མཐོང་དང ། འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཀྱི་སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་ལོང་བུར་ནུབ་པར་འགྱུར། ཡི་དགས་སུ་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར་མིར་སྐྱེ་བ་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར་འཁོར་ལོས་སྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི་ཕྱག་མཐིལ་གཡས་པར
8.120a
ནུབ་པར་འགྱུར། ལྷར་སྐྱེ་བ་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ཀྱི་མཐིལ་དུ་ནུབ་བོ་དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བརྡལ་བར་གྱུར་པ་ཅི་བཞིན་ནོ། །ཡང་ཚིགས་སུ་བཅད་པ་སྨྲས་པ། རྒོད་བྲལ་ཞུམ་དང་རྒྱགས་པ་རབ་སྤངས་པ། །སངས་རྒྱས་འགྲོ་བ་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པ། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟེན་པ་རང་བློས་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང ། །དམ་པ་དགེ་བ་དག་གིས་བསལ་དུ་གསོལ། །ཚཝ་ཆུ་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་རྣམས་གློ་བུར་འཛུམ་མི་སྟོན། །བརྟན་ནས་ཅི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ་དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཀུན་དགའ་བོ་འདི་ལྟར་དགེ་སློང་ཨུ་ཏྲ་ཡ་ན་ནི། །མདུད་པ་སྦྱོར་བ་ཟུག་རྔུ་དང ། །དེ་བཞིན་སྒྲིབ་ལས་ཐར་གྱུར་ཀྱང ། །རྒྱལ་པོའི་ཆོས་ལས་དེང་མ་ཐར། །ཀུན་དགའ་བོ་གྲོང་ཁྱེར་སྒྲ་སྒྲོགས་ན་གནས་པའི་རྒྱལ་པོ་གཙུག་པུད་ཅན་སྡིག་པའི་གྲོགས་པོས་བསྐོར་བས་དགེ་སློང་ཨུ་ཏྲ་ཡ་ན། དགྲ་བཅོམ་པ་ཉིད་ཐོབ་པ་སྲོག་དང་བྲལ་བར་བྱས་ཏེ། དེས་ཕ་དགྲ་བཅོམ་པ་སྲོག་དང་བྲལ་བར་བྱས་པས་ངེས་པར་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར
8.120b
རོ། །བཙུན་པ་ཚེ་དང་ལྡན་པ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་ཅིང་སྲོག་དང་བྲལ་བར་གྱུར་ཏམ། ཀུན་དགའ་བོ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་ཅིང་སྲོག་དང་བྲལ་བར་གྱུར་ཏོ། །ཚེ་དང་ལྡན་པ་ཀུན་དགའ་བོས་དེ་ཐོས་ནས་མཆི་མས་བརྣངས་ཏེ་འདུག་གོ། །དེ་ནས་གཤེད་མ་པ་མི་དེ་དག་གིས་ཚེ་དང་ལྡན་པ་ཨུ་ཏྲ་ཡ་ནའི་ལྷུང་བཟེད་དང ། ཆོས་གོས་དང་ཁར་གསིལ་ཁྱེར་ཏེ་གྲོང་ཁྱེར་སྒྲ་སྒྲོགས་སུ་ཕྱིན་ནས་དེ་དག་གིས་བློན་པོ་སྐྱོན་ཆགས་པ་དེ་གཉིས་ལ་སྨྲས་པ། རྒྱལ་པོ་རྒན་པོ་བསད་དོ། །དེ་གཉིས་ཀྱིས་ཐོས་ནས་དགའ་བ་དང་མཆོག་དུ་དགའ་བ་སྐྱེས་ཏེ་རྒྱལ་པོ་གཙུག་པུད་ཅན་ག་ལ་བ་དེར་དོང་ནས་སྨྲས་པ། ལྷ་དགྱེས་པ་སྐྱེད་ཅིག་།ད་ནི་ལྷའི་རྒྱལ་སྲིད་ལ་ཚེར་མ་མ་མཆིས་སོ། །ཇི་ལྟར་གྱུར་ལྷའི་དགྲ་གང་ལགས་པ་དེ་བཀུམ་མོ། །ངའི་དགྲ་གང་ཡིན། ལྷ་རྒྱལ་པོ་རྒན་པོའོ། །དེ་བསད་པ་ཇི་ལྟར་ཤེས། དེ་གཉིས་ཀྱིས་མི་གཤེད་མ་པ་དག་བསྟན་ཏེ་སྨྲས་པ། ལྷ་མི་འདི་དག་ནི་གཤེད་མ་པ་ལགས་ཏེ་འདི་དག་གིས་དེ་བཀུམ་མོ། །རྒྱལ་པོ་གཙུག་པུད་ཅན་གྱིས་དེ་དག་མཐོང་ནས་སྨྲས་པ། ཤེས་ལྡན་དག་རྒྱལ་པོ་རྒན་པོ་ལ་དབང་ཇི་ཙམ་ཡོད། ལྷ་དེ་ལ་དབང་ག་ལ་མཆིས་ཏེ་ལྷུང་བཟེད་དང ། ཆོས་གོས་དང་ཁར་གསིལ་འདི་ལགས་སོ། །རྒྱལ་པོ་གཙུག་པུད་ཅན་གྱིས་དེ་མཐོང་ནས་བརྒྱལ་ཏེ་ས་ལ་སྒྱེལ་ནས་ཆུས་བཏབ་སྟེ་དབུགས་ཕྱིར་བྱུང་ནས་སྨྲས་པ། ཤེས་ལྡན་དག་རྒྱལ་པོ་རྒན་པོས་འཆི་བའི་ཚེ་ཅི་སྨྲས། ལྷ་རྒྱལ་པོ་རྒན་པོ་སྲོག་དང་བྲལ་ཀར་འདི་སྐད་ཅེས། རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །ཞེས་མཆིའོ། །གཞན་ཡང་འདི་སྐད་ཅེས། ཁྱོད་ཀྱིས་མཚམས་མེད་པའི་ལས་གཉིས་བྱས་ཏེ། ཕ་སྲོག་དང་ཕྲལ་བ་གང་ཡིན་པ་དང ། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ཡིན་པ་དེས་ཁྱོད་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བྱ་དགོས་ཀྱིས་སྡིག་པ་སྡིག་པ་ལས་ཤོགས་ཤིག་དང ། དེ་ལྟ་ན་ལས་བསྲབས་པ་ཉིད་དང ། ཡོངས་སུ་ཟད་པ་དང ། ཡོངས་སུ་གཏུགས་པར་འགྱུར་རོ། །ཞེས་མཆིའོ། །དེ་མྱ་ངན་གྱི
8.121a
ཟུག་རྔུས་གཟིར་བས་འདམ་བུ་སྔོན་པོར་བརྔས་པ་བཞིན་དུ་རྙིས་པར་གྱུར་ནས། དེས་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་བོས་ཏེ་སྨྲས་པ། ཤེས་ལྡན་གཉིས་ཁྱེད་གཉིས་ཀྱིས་ང་ལས་དེ་ལྟ་བུ་བྱེད་པ་ལས་མ་བཟློག་གོ། །དེ་གཉིས་ཀྱིས་སྨྲས་པ། ལྷས་བདག་ཅག་གཉིས་སྤྱན་ལམ་དུ་མ་བཞག་ན་ཇི་ལྟར་བཟློག་པར་བགྱི། དེས་བློན་པོ་སྐྱོན་ཆགས་པ་དེ་གཉིས་མིག་ལམ་དུ་མི་སྣང་བར་བཞག་ནས་ཧེ་རུ་ཀ་དང ། བྷི་རུ་ཀ་གཉིས་ཕྱིར་བློན་པོའི་མཆོག་ཏུ་བསྐོས་པ་དང ། བློན་པོ་སྐྱོན་ཆགས་པ་དེ་གཉིས་ཀྱིས་གསང་སྟེ། ཚེ་དང་ལྡན་པ་རྒྱལ་དང ། སྐར་རྒྱལ་གྱི་མཆོད་རྟེན་གཉིས་ལ་ཁུང་བུ་གཉིས་བརྐོས་ནས་དེར་བྱི་ལའི་ཕྲུ་གུ་གཉིས་བཞག་སྟེ། དེ་གཉིས་ཀྱིས་ཉི་མ་རེ་རེ་ཞིང་ཤ་སྲི་རེ་རེ་བྱིན་ནས་འདི་སྐད་ཅེས་རྒྱལ་དང་སྐར་རྒྱལ་གཉིས་བདེན་པ་དང་བདེན་པའི་ཚིག་གང་གིས་ཁྱོད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ། དད་པས་སྦྱིན་པར་བྱ་བ་ཆུད་གསན་པས་བྱི་ལའི་སྐྱེ་གནས་ངན་པར་སྐྱེས་པའི་བདེན་པ་དང་བདེན་པའི་ཚིག་དེས་ཤ་སྲི་ལོང་ལ་རང་རང་གི་མཆོད་རྟེན་ལ་བསྐོར་བ་བགྱིས་ཏེ། རང་རང་གི་ཁུང་དུ་ཞུགས་ཤིག་ཅེས་སློབ་པར་བྱེད་དོ། །གང་གི་ཚེ་དེ་གཉིས་ལེགས་པར་ལོབས་པར་གྱུར་པ་དེའི་ཚེ་ན་བློན་པོ་སྐྱོན་ཆགས་པ་དེ་གཉིས་ཨུ་ཏྲ་ཡ་ནའི་བཙུན་མོའི་གན་དུ་སོང་སྟེ་སྨྲས་པ། ལྷ་མོ་ཁྱོད་ཀྱི་སྲས་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་གྱུར་ན་ཅིའི་སླད་དུ་ཁྱོད་བཏང་སྙོམས་མཛད། དེས་སྨྲས་པ། ཁྱོད་གཉིས་ཉིད་ཀྱིས་དེ་ལས་དེ་ལྟ་བུ་བྱེད་དུ་བཅུག་ན་ད་ཁོ་མོས་ཇི་ལྟར་བྱ། དེ་གཉིས་ཀྱིས་སྨྲས་པ། ལྷ་མོ་ཅི་གང་དུ་བུམ་པ་ལྷུང་བ་དེར་དཔྱང་ཐག་ཀྱང་ལྷུང་བར་བགྱི་འམ། དེས་སྨྲས་པ། དེ་ཤེས་ཏེ་རེ་ཤིག་དེའི་ཕ་བསད་པ་ནི་ཁོ་མོས་གསང་བར་བྱ་ན། དགྲ་བཅོམ་པ་བསད་པ་སུས་གསང་བར་འགྱུར། དེ་གཉིས་ཀྱིས་སྨྲས་པ། ལྷ་མོ་དགྲ་བཅོམ་པ་བསད་པ་བདག་ཅག་གཉིས་ཀྱིས་གསང་བར་བགྱིའོ། །དེས་སྨྲས་པ། གལ་ཏེ་དེ་ལྟ་ན་ལེགས་སོ་ཞེས་དེ་དེའི་གན་དུ་སོང་སྟེ་སྨྲས་པ། སྲས་ཅིའི་སླད་དུ་ཁྱོད་སྐྱ་བོ་བསེང་བསེང་པོ་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་གྱུར། དེས་སྨྲས་པ།
8.121b
ཡུམ་ཁྱོད་ཀྱང་དེ་སྐད་ཅེས་ཅིའི་ཕྱིར་ཁྱོད་སྐྱ་བོ་བསེང་བསེང་པོ་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་གྱུར་ཅེས་གསུང་ངམ། གང་གི་སླད་དུ་བདག་བློན་པོ་སྐྱོན་ཆགས་པ་གཉིས་ཀྱིས་བསླུས་པས་མཚམས་མེད་པའི་ལས་གཉིས་བགྱིས་ཏེ་ཡབ་སྲོག་དང་ཕྲལ་བ་གང་ལགས་པ་དང ། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ལགས་པ་དེས་བདག་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བགྱི་འཚལ་ན། བདག་ཇི་ལྟར་སྐྱ་བོ་བསེང་བསེང་པོ་རིད་པ་དང ། ཉམ་ཆུང་བ་དང ། རྐེ་བ་དང ། ལུས་མ་ཐོབ་པར་མི་འགྱུར་དུ་རུང ། དེས་སྨྲས་པ། སྲས་ཅི་མི་འཇིགས་པ་སྩོལ་ཅིག་དང ། གང་མེད་པ་དེ་བཀའ་མཆིད་བགྱིའོ། །དེས་སྨྲས་པ། ཡུམ་གསོལ་གྱིས་ཇི་ལྟར་ལགས་པ་གསུངས་ཤིག་།སྲས་དེ་ནི་ཁྱོད་ཀྱི་ཡབ་མ་ལགས་ཏེ། འདི་ལྟར་བདག་གིས་ཟླ་མཚན་བཀྲུ་བའི་སླད་དུ་སྐྱེས་པ་གཞན་དག་དང་ལྷན་གཅིག་དགའ་མགུར་སྤྱོད་པ་དེ་ལས་ཁྱོད་འཁྲུངས་སོ། །དེས་བསམས་པ། དེ་ལྟ་ན་ཕ་བསད་པར་མ་གྱུར་ཏོ་སྙམ་དུ་རིག་ནས་སྨྲས་པ། ཡུམ་གལ་ཏེ་དེ་ལྟ་ན་ཕ་བསད་པ་ནི་མ་མཆིས་ན་དགྲ་བཅོམ་པ་བསད་པ་མཆིས་པ་དེ་ཇི་ལྟར་མཐར་ཐུག་པར་བགྱི། དེས་སྨྲས་པ། སྲས་འདི་ལ་ཤེས་པ་ལ་མཁས་པ་དག་སྨྲ་བར་བགྱི་སྟེ། དེ་དག་གིས་དེ་མཐར་ཐུག་པར་བགྱིད་པར་འགྱུར་རོ། །ཞེས་སྨྲས་ཏེ་སོང་ནས། དེས་བློན་པོ་སྐྱོན་ཆགས་པ་དེ་གཉིས་བོས་ཏེ་སྨྲས་པ། ཁོ་མོས་དེའི་ཕ་བསད་པ་ནི་བསལ་ཟིན་གྱིས་ད་ཁྱོད་གཉིས་ཀྱིས་དགྲ་བཅོམ་པ་བསད་པ་སོལ་ཅིག་།རྒྱལ་པོ་གཙུག་པུད་ཅན་གྱིས་བློན་པོ་རྣམས་ལ་བསྒོ་བ། བློན་པོ་གང་དག་ཤེས་པ་ལ་མཁས་པ་ཐམས་ཅད་སྡུས་ཤིག་།དེ་དག་གིས་བློན་པོ་གང་དག་ཤེས་པ་ལ་མཁས་པ་ཐམས་ཅད་བསྡུས་པ་དང་བློན་པོ་སྐྱོན་ཆགས་པ་དེ་གཉིས་ཀྱང་དེར་འདུས་པར་གྱུར་ཏོ། །དེ་ནས་རྒྱལ་པོ་གཙུག་པུད་ཅན་གྱིས་དེ་དག་ལ་སྨྲས་པ། ཤེས་ལྡན་དག་ངས་དགྲ་བཅོམ་པ་བསད་པ་གང་ཡིན་པ་དེ་ཇི་ལྟར་མཐར་ཐུག་པར་བྱ། དེ་ན་རྒྱལ་པོས་ཉེ་བར་འཚོ་བའི་མི་ཐམས་ཅད་ཀྱིས་ནི་མི་མཐུན་པར་སྨྲ་བར་བརྩམས་ཏེ། དེ་ན་ཁ་ཅིག་གིས
8.122a
སྨྲས་པ། ལྷ་དེས་དགྲ་བཅོམ་པ་ཉིད་མངོན་སུམ་དུ་བགྱིས་པར་སུས་མཐོང ། ཁ་ཅིག་གིས་སྨྲས་པ། ལྷ་དགྲ་བཅོམ་པ་དག་ནི་ཐམས་ཅད་མཁྱེན་པ་དང་འདྲ་སྟེ་ནམ་མཁའ་ལ་མཆིའོ། །བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་འདི་ལ་ཐུགས་ངན་བགྱིར་ཅི་མཆིས། དེས་སྨྲས་པ། ཁྱེད་གཉིས་ཀྱང་དེ་སྐད་ཅེས་འདི་ལ་མྱ་ངན་བྱར་ཅི་ཡོད་ཟེར་རམ། ཁྱེད་གཉིས་ཉིད་ན་རེ་དགྲ་བཅོམ་པ་གསོད་དུ་བཅུག་གོ་ཞེས་མི་ཟེར་རམ། དེ་གཉིས་ཀྱིས་སྨྲས་པ། ལྷ་དགྲ་བཅོམ་པ་དག་མ་མཆིས་ན་དགྲ་བཅོམ་པ་དག་བཀུམ་པ་མཆིས་རེ་སྐན། དེས་སྨྲས་པ། ངས་མངོན་སུམ་ཁོ་ནར་དགྲ་བཅོམ་པ་རྒྱལ་དང ། སྐར་རྒྱལ་གཉིས་ཀྱིས་འབར་བ་དང ། གསལ་བ་དང ། ཆར་འབབ་པ་དང ། གློག་འབྱིན་པའི་ཆོ་འཕྲུལ་དག་བྱས་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་མཐོང་བཞིན་དུ་ཁྱེད་གཉིས་ཀྱིས་དེ་སྐད་ཅེས། དགྲ་བཅོམ་པ་དག་མེད་ན་དགྲ་བཅོམ་པ་བསད་པ་ཡོད་རེ་སྐན། ཞེས་ཟེར་རམ། དེ་གཉིས་ཀྱིས་སྨྲས་པ། ལྷ་ཇི་ལྟར་དེ་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་པས་སྦྱིན་པར་བགྱི་བ་ཆུད་གཟན་པས་བྱི་ལའི་སྐྱེ་གནས་ངན་པར་སྐྱེས་ཏེ། དེང་སང་ཉིད་དུ་ཡང་རང་རང་གི་མཆོད་རྟེན་ན་མཆིས་པ་ལྷའི་མངོན་སུམ་དུ་བགྱིའོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཚུར་ཤོག་དང་ཅི་ཡང་དག་པ་འམ། ཡང་དག་པ་མ་ཡིན་པ་ལྟར་འདོང་ངོ ། །གྲོང་ཁྱེར་སྒྲ་སྒྲོགས་ཐམས་ཅད་དུ་ཇི་ལྟར་རྒྱལ་དང ། སྐར་རྒྱལ་གཉིས་བྱི་ལའི་སྐྱེ་གནས་སུ་སྐྱེས་ཏེ་རང་རང་གི་མཆོད་རྟེན་ན་འདུག་ནས་རྒྱལ་པོ་ལྟར་སོང་ངོ་ཞེས་བྱ་བའི་སྒྲ་དེས་ཁྱབ་པར་གྱུར་ནས་སྲོག་ཆགས་འབུམ་ཕྲག་དུ་མ་དག་ལྟད་མོ་སྐྱེས་ནས་རྒྱལ་པོའི་ཕྱི་བཞིན་དུ་འབྲང་ངོ ། །དེ་ནས་བློན་པོ་སྐྱོན་ཆགས་པ་དེ་གཉིས་ཀྱིས་རྒྱལ་པོ་དང་བཅས་པའི་འཁོར་འབུམ་ཕྲག་དུ་མའི་མདུན་དུ་སྨྲས་པ། རྒྱལ་དང་སྐར་རྒྱལ་གཉིས་ཉོན་ཅིག་བདེན་པ་དང་བདེན་པའི་ཚིག་གང་གིས་ཁྱེད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་པས་སྦྱིན་པར་བྱ་བ་ཆུད་གཟན་པས་བྱི་ལའི་སྐྱེ་གནས་ངན་པར་སྐྱེས་ཏེ་རང་རང་གི་མཆོད་རྟེན་ན་འདུག་པའི་བདེན་པ་དང་བདེན་པའི་ཚིག་དེས་ཤ་སྲི་འདི་ལོང་ལ་རང
8.122b
རང་གི་མཆོད་རྟེན་ལ་བསྐོར་བ་བགྱིས་ཏེ་རང་རང་གི་ཁུང་དུ་ཞུགས་ཤིག་།དེ་སྐད་སྨྲས་པ་དང ། དེ་གཉིས་ཀྱིས་རང་རང་གི་ཁུང་ནས་བྱུང་སྟེ་ཤ་སྲི་བླངས་ནས་རང་རང་གི་མཆོད་རྟེན་ལ་བསྐོར་བ་བྱས་ནས་རང་རང་གི་ཁུང་དུ་ཞུགས་པ་སྲོག་ཆགས་འབུམ་ཕྲག་དུ་མ་དག་གིས་མཐོང་ནས། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་གཟིགས་སམ། དེས་སྨྲས་པ་མཐོང་ངོ ། །དེ་གཉིས་ཀྱིས་སྨྲས་པ། ལྷ་དེ་ལྟར་ན་འཇིག་རྟེན་ན་དགྲ་བཅོམ་པ་མ་མཆིས་ཏེ་དེ་ནི་སྐྱེ་བོའི་བཀའ་མཆིད་འབའ་ཞིག་ཏུ་བས་སོ། །དེ་ནས་རྒྱལ་པོ་དེ་ལ་འཇིག་རྟེན་དགྲ་བཅོམ་པ་དག་ཡོད་དོ་སྙམ་པའི་ལྟ་བ་ཡོད་པ་གང་ཡིན་པ་དེ་མེད་པར་གྱུར་ཏོ། །དེ་ན་གང་དག་མ་དད་པ་དེ་དག་ལ་ནི་མེད་པར་ལྟ་བ་སྐྱེས་པར་གྱུར་ཏོ། །གང་དག་བར་མར་གནས་པ་དེ་དག་ནི་ཡིད་གཉིས་ཟ་བར་གྱུར་ཏོ། །གང་དག་དད་པ་དེ་དག་ནི་གནོང་ཞིང་མི་དགའ་བ་དང ། མི་འཇིགས་པ་མེད་པར་གྱུར་ཏོ། །དེ་ནས་རྒྱལ་པོ་གཙུག་པུད་ཅན་གྱིས་བསམས་པ། གལ་ཏེ་འཇིག་རྟེན་ན་དགྲ་བཅོམ་པ་དག་མེད་ན་བདག་གིས་ཅིའི་ཕྱིར་འཕགས་པ་ཀཱ་ཏྱཱ་ཡ་ན་ཆེན་པོ་འཁོར་ལྔ་བརྒྱ་དང ། དགེ་སློང་མ་རི་མ་འཁོར་ལྔ་བརྒྱ་དང་ལྡན་པ་ལ་བསོད་སྙོམས་དབུལ་སྙམ་ནས་དེས་དགེ་སློང་རྣམས་དང ། དགེ་སློང་མ་རྣམས་ཀྱི་བསོད་སྙོམས་བཅད་ནས་དགེ་སློང་རྣམས་དང ། དགེ་སློང་མ་རྣམས་ཀྱང་གྲོང་ཁྱེར་སྒྲ་སྒྲོགས་ནས་དོང་ངོ ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དང ། དགེ་སློང་མ་རི་མ་ནི་གདུལ་བ་ལ་ལྟོས་པས་དེ་ཉིད་ན་འཁོད་དོ། །ཇི་ཙམ་དུས་གཞན་ཞིག་ན་རྒྱལ་པོ་གཙུག་པུད་ཅན་གྲོང་ཁྱེར་སྒྲ་སྒྲོགས་ནས་ཕྱིར་བྱུང་བ་ན་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གྲོང་ཁྱེར་སྒྲ་སྒྲོགས་སུ་བསོད་སྙོམས་ལ་ཞུགས་པ་དང ། དེས་རྒྱལ་པོ་མཐོང་ནས་འདི་མི་དགའ་བར་སེམས་པར་གྱུར་ན་མི་རུང་ངོ་སྙམ་ནས་མཐའ་གཅིག་ཏུ་སོང་སྟེ་སྡོད་དོ། །རྒྱལ་པོ་གཙུག་པུད་ཅན་གྱིས་དེ་མཐའ་གཅིག་ཏུ་སྡོད་པ་མཐོང་ངོ ། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་ཀཱ་ཏྱཱ་ཡ་ན་ཆེན་པོ་འདི་ང་མཐོང་ནས་མཐའ་གཅིག་ཏུ་སོང་སྟེ་སྡོད། དེའི་ཕྱི་བཞིན་བློན་པོའི
8.123a
མཆོག་ཧི་རུ་ཀ་དང ། བྷི་རུ་ཀ་གཉིས་འགྲོ་བ་དེ་གཉིས་ཀྱིས་སྨྲས་པ། ལྷ་འཕགས་པ་ཀཱ་ཏྱཱ་ཡ་ན་ཆེན་པོའི་ཐུགས་ལམ་ན་ལྷ་ག་ཤེད་དུ་གཟིགས་མོ་དང་དགེ་མཚན་ལ་གཤེགས་པས་མི་དགྱེས་པར་དགོངས་པར་གྱུར་ན་མི་རུང་ངོ་སྙམ་པ་དང ། ཚོན་གྱི་ལས་བགྱི་བ་དཀའ་བས་ཆོས་གོས་དག་རྡུལ་གྱིས་ཕོག་པར་གྱུར་ན་མི་རུང་ངོ་སྙམ་དུ་དགོངས་སོ། །རྒྱལ་པོ་ཅང་མི་སྨྲ་བར་སོང་ངོ ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་གྲོང་ཁྱེར་སྒྲ་སྒྲོགས་སུ་བསོད་སྙོམས་བརྒྱུས་ཏེ་བྱུང་བ་ན་རྒྱལ་པོ་གཙུག་པུད་ཅན་ནང་དུ་འཇུག་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དེ་བཞིན་དུ་མཐའ་གཅིག་ཏུ་སོང་སྟེ་སྡོད་དོ། །རྒྱལ་པོ་གཙུག་པུད་ཅན་གྱིས་དེ་མཐའ་གཅིག་ན་སྡོད་པ་མཐོང་ངོ ། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་འཕགས་པ་ཀཱ་ཏྱཱ་ཡ་ན་ཆེན་པོ་འདིས་སྔར་ང་མཐོང་ནས་མཐའ་གཅིག་ཏུ་སོང་སྟེ་སྡོད་པའི་རྒྱུ་ནི་དེ་ཡིན་ན་ད་ལྟར་ཡང་མཐའ་གཅིག་ཏུ་སོང་སྟེ་སྡོད་པའི་རྒྱུ་ཅི་ཡིན། དེའི་ཕྱི་བཞིན་བློན་པོ་སྐྱོན་ཆགས་པ་གཉིས་འགྲོ་བ་དེ་གཉིས་ཀྱིས་སྨྲས་པ། ལྷ་འདིའི་མཆིད་ནས་ཁོ་བོ་ཕ་གསོད་པ་འདིའི་རྡུལ་གྱིས་མི་རེག་པར་བྱའོ་ཞེས་མཆིའོ། །རྒྱལ་པོ་དེ་ནི་ཡོངས་སུ་མི་རྟོག་པ་ཡིན་པས་དེ་སྐད་ཐོས་ནས་ཁྲོ་བས་ཀུན་ནས་དཀྲིས་པར་གྱུར་ཏེ་འཁོར་ཐམས་ཅད་ལ་སྨྲས་པ། ཤེས་ལྡན་དག་ཁྱེད་ཅག་ལས་གང་དང་གང་ང་ལ་དགའ་བ་དེ་དང་དེས་དགེ་སྦྱོང་མགོ་རེག་འདིའི་སྟེང་དུ་ས་སྦར་མོ་རེ་རེས་གཏོར་ཅིག་།སྐྱེ་བོའི་ཚོགས་ཐམས་ཅད་ཀྱིས་ས་སྤར་མོ་རེ་རེ་གཏོར་ཏོ། །རྒྱལ་པོ་དེ་དཔུང་ཆེ་བ་ཡིན་པས་རེ་རེས་ས་སྦར་མོ་རེ་རེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་སྟེང་དུ་གཏོར་བ་དང ། དེའི་སྟེང་དུ་ས་ཕུང་ཆེན་པོ་རྣམ་པར་གནས་པར་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཀྱང་དེའི་དབུས་སུ་ལོ་མ་མ་ཡིན་པའི་སྤྱིལ་བུ་མངོན་པར་སྤྲུལ་ཏེ་འདུག་གོ། །དེ་དག་དེ་ལས་འཐོར་བ་ན་བ་ལང་རྫི་དང་ཕྱུགས་རྫི་དག་གིས་མཐོང་ནས་དེ་དག་སྨོད་བཞིན་དུ་མཐའ་འཁོར་ཞིང་སྡོད་པ་ན་བློན་པོའི་མཆོག་ཧི་རུ་ཀ་དང ། བྷི་རུ་ཀ་གཉིས་ཕྱི་བཞིན་འབྲང་ཞིང་འོང་བ་ཕྱོགས་དེར་ཕྱིན་ནས་དེ་གཉིས་ཀྱིས་དྲིས་པ། ཤེས་ལྡན་དག་འདི་ཅི་ཡིན། དེ་དག་གིས་སྨྲས་པ།
8.123b
རྒྱལ་པོ་ཐབ་ཀྲོལ་ཅན་ཕ་གསོད་པ་དེས་འཕགས་པ་ཀཱ་ཏྱཱ་ཡ་ན་ཆེན་པོ་ཉེས་པ་མེད་པ་གནོད་པ་མི་བྱེད་པ་སས་བཀབ་བོ། །དེ་གཉིས་མཆི་མས་བརྣངས་ཏེ་ངུ་བའི་བཞིན་གྱིས་བ་ལང་རྫི་དང་ཕྱུགས་རྫི་དག་དང་ལྷན་ཅིག་ས་ཕྱག་པར་བརྩམས་པ་དང ། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་བྱུང་ནས་དེ་གཉིས་ཀྱིས་རྐང་པ་གཉིས་ལ་གཏུགས་ཏེ་དྲིས་པ། འཕགས་པ་འདི་ཅི་ལགས། དེས་སྨྲས་པ། ལས་དག་ཡིན་མོད་གཞན་ཅི་ཞིག་འབྱུང་བར་འགྱུར།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་གཉིས་པ། དེ་གཉིས་ཀྱིས་སྨྲས་པ། འཕགས་པ་གཙུག་པུད་ཅན་སྐྱེ་བོ་ཕལ་པོ་ཆེ་དང་བཅས་པས་ལས་འདི་ལྟ་བུ་བགྱིས་པ་གང་ལགས་པ་དེའི་རྣམ་པར་སྨིན་པ་ཅིར་འགྱུར། དེས་སྨྲས་པ། དེང་ནས་ཉི་མ་བདུན་ན་གྲོང་ཁྱེར་སྒྲ་སྒྲོགས་སས་ནོན་པར་འགྱུར་རོ། །འཕགས་པ་རིམ་པ་ཇི་ལྟ་བུར་འགྱུར། ཚེ་དང་ལྡན་པ་གཉིས་རེ་ཤིག་ཉི་མ་དང་པོ་ལ་རླུང་མོ་ཆེ་བྱུང་ནས་གྲོང་ཁྱེར་སྒྲ་སྒྲོགས་རྡོ་བ་དང ། གསེག་མ་དང ། གྱོ་མོ་མེད་པར་རྣམ་པར་འཇོག་པར་འགྱུར་རོ། །ཉི་མ་གཉིས་པ་ལ་མེ་ཏོག་གི་ཆར་འབབ་པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་འཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་འཇུག་པར་འགྱུར་ཞིང ། དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་འབབ་པར་འགྱུར་རོ། །ཉི་མ་བདུན་པ་ལ་སའི་ཆར་འབབ་པར་འགྱུར་རོ། །དེ་གཉིས་ཀྱིས་སྨྲས་པ། འཕགས་པ་ཅི་ལགས། བདག་ཅག་གཉིས་ཀྱང་ལས་དེའི་ཆ་ཅན་ལགས་སམ། བཞིན་བཟངས་གཉིས་ཁྱེད་གཉིས་ནི་ལས་དེའི་ཆ་ཅན་མ་ཡིན་ནོ། །འཕགས་པ་གལ་ཏེ་དེ་ལྟ་ན་བདག་ཅག་གཉིས་ཀྱིས་གྲོང་ཁྱེར་འདི་ནས་ཇི་ལྟར་འབྱུང་བར་བགྱི། དེས་སྨྲས་པ། བཞིན་བཟངས་གཉིས་ཁྱེད་གཉིས་ཀྱིས་རང་གི་ཁྱིམ་ནས་ཆུ་ཀླུང་གི་བར་དུ་ཕུག་རྐོར
8.124a
ཆུག་ལ་ཁྱིམ་དྲུང་དུ་གྲུ་བཞག་སྟེ་སྡོད་ལ་གང་གི་ཚེ་རིན་པོ་ཆེའི་ཆར་འབབ་པ་དེའི་ཚེ་ན་རིན་པོ་ཆེ་དག་གིས་གྲུ་འགེངས་སུ་ཆུག་ལ་བྲོས་ཤིག་།དེ་གཉིས་ཀྱིས་དེའི་རྐང་པ་གཉིས་ལ་གཏུགས་ཏེ་གྲོང་ཁྱེར་སྒྲ་སྒྲོགས་སུ་ཞུགས་ནས་དེ་གཉིས་རྒྱལ་པོའི་གན་དུ་སོང་སྟེ་སྨྲས་པ། འཕགས་པ་ཀཱ་ཏྱཱ་ཡ་ན་ཆེན་པོ་ལ་ཅུང་ཞིག་བགྱིས་སམ། ཅི་ན་དོག་སས་བཀབ། དེས་སྨྲས་པ། ཤེས་ལྡན་གཉིས་དེ་གསོན་ནམ། ལྷ་གསོན་ནོ། །ཅི་ཟེར། ལྷ་དེ་འདི་སྐད་ཅེས་དེང་ནས་གདུགས་འདུན་ན་གྲོང་ཁྱེར་སྒྲ་སྒྲོགས་དོག་སས་ནོན་པར་འགྱུར་ཞེས་མཆིའོ། །རིམ་པ་ཇི་ལྟར་འགྱུར། དེ་གཉིས་ཀྱིས་སྨྲས་པ། ལྷ་དེ་འདི་སྐད་ཅེས་རེ་ཤིག་ཉི་མ་དང་པོ་ལ་རླུང་མོ་ཆེ་བྱུང་ནས་གྲོང་ཁྱེར་སྒྲ་སྒྲོགས་རྡོ་བ་དང ། གསེག་མ་དང ། གྱོ་མོ་མེད་པར་རྣམ་པར་འཇོག་པར་འགྱུར་རོ། །ཉི་མ་གཉིས་པ་ལ་མེ་ཏོག་གི་ཆར་འབབ་པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་འཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་འཇུག་པར་འགྱུར་ཞིང་དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་འབབ་པར་འགྱུར་རོ། །ཉི་མ་བདུན་པ་ལ་སའི་ཆར་འབབ་པར་འགྱུར་རོ་ཞེས་མཆིའོ། །བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་བྲམ་ཟེ་གང་ལ་སློངས་མོ་སྩལ་ནས་ཡང་བཅད་ན་དེ་ལེགས་པ་ཅི་ཞིག་སེམས་ཏོ། །ལྷས་དེ་འཁོར་ལྔ་བརྒྱ་དང་ལྡན་པ་ལ་བསོད་སྙོམས་སྩལ་ནས་བཅད་ཅིང་སས་ཀྱང་གཡོགས་པས་དེ་འདི་སྐད་མཆི་བ་ལས་གཞན་པ་ཆེས་ཤིས་པའི་ཚིག་སྨྲ་བར་ག་ལ་འགྱུར། རྒྱལ་པོ་གཙུག་པུད་ཅན་གྱིས་བསམས་པ། དེ་བདེན་ནོ་སྙམ་པ་དང ། བློན་པོའི་མཆོག་ཧི་རུ་ཀ་དང ། བྷི་རུ་ཀ་གཉིས་ཀྱིས་བཞིན་བསྒྱུར་ཅིང་ལག་པ་གཉིས་ཡོངས་སུ་དྲིལ་ཏེ་དོང་ངོ ། །དེ་ན་ཧི་རུ་ཀ་ལ་བུ་སྔོ་བསངས་ཤེས་བྱ་བ་ཁྱེའུ་ཞིག་ཡོད་ལ། བྷི་རུ་ཀ་ལ་ཡང་བུ་མོ་སྔོ་བསངས་ཅན་ཞེས་བྱ་བ་བུ་མོ་ཞིག་ཡོད་ནས། ཧི་རུ་ཀས་ཁྱེའུ་སྔོ་བསངས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་ཕུལ་ཏེ་སྨྲས་པ། འཕགས་པ
8.124b
གལ་ཏེ་འདི་ལ་དགེ་བའི་རྩ་བ་འགའ་ཞིག་མཆིས་ན་རབ་ཏུ་དབྱུང་དུ་གསོལ། གལ་ཏེ་མ་མཆིས་ན་འདི་ཁྱོད་ཉིད་ཀྱི་ཞབས་འབྲིང་བ་ལགས་སོ། །བྷི་རུ་ཀས་ཀྱང་བུ་མོ་སྔོ་བསངས་ཅན་དགེ་སློང་མ་རི་མ་ལ་ཕུལ་ཏེ་སྨྲས་པ། འཕགས་མ་གལ་ཏེ་འདི་ལ་དགེ་བའི་རྩ་བ་འགའ་ཞིག་མཆིས་ན་རབ་ཏུ་དབྱུང་དུ་གསོལ། གལ་ཏེ་མ་མཆིས་ན་ཀཽ་ཤམྦཱི་ན་ཁྱིམ་བདག་གདངས་ཅན་ཞེས་བགྱི་བ་བདག་གི་ཆུང་པོ་གྲོགས་ཤིག་མཆིས་པ་དེ་ལ་གཏད་དུ་གསོལ། དེས་ཁས་བླངས་སོ། །དེ་ནས་དགེ་སློང་མ་རི་མ་བུ་མོ་སྔོ་བསངས་ཅན་ཁྲིད་དེ་རྫུ་འཕྲུལ་གྱིས་གྲོང་ཁྱེར་སྒྲ་སྒྲོགས་ནས་སོང་ནས། དེས་བུ་མོ་དེ་ཀཽ་ཤམྦཱིར་ཁྱིམ་བདག་གདངས་ཅན་ལ་གཏད་ནས་ཕྲིན་ཇི་སྐད་སྤྲིང་བ་ཡང་བཟླས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ནི་དེ་ཉིད་དུ་འདུག་གོ། །བློན་པོའི་མཆོག་ཧི་རུ་ཀ་དང་བྷི་རུ་ཀ་གཉིས་ཀྱིས་ཁྱིམ་ནས་ཆུ་ཀླུང་གི་བར་དུ་ཕུག་རྐོར་བཅུག་སྟེ་ཁྱིམ་དྲུང་དུ་གྲུ་བཞག་ནས་བསྡད་དོ། །ཇི་ཙམ་ན་ཉི་མ་དེ་ལ་རླུང་མོ་ཆེ་བྱུང་ནས་དེས་གྲོང་ཁྱེར་སྒྲ་སྒྲོགས་དེ་རྡོ་བ་དང ། གསེག་མ་དང ། གྱོ་མོ་མེད་པར་རྣམ་པར་བཞག་གོ། །ཉི་མ་གཉིས་པ་ལ་མེ་ཏོག་གི་ཆར་འབབ་པ་དང ། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་རྒྱལ་པོ་ང་ལས་ནུ་ལ་དགུང་བདུན་དུ་དབྱིག་གི་ཆར་བབ་ཅེས་གདའ་བས་ལྷ་ལ་ཡང་མེ་ཏོག་གི་ཆར་འདི་བབ་པས་རིང་པོ་མི་ཐོགས་པར་གོས་ཀྱི་ཆར་འབབ་པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་བབ་པ་དང ། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་གོས་ཀྱི་ཆར་བབ་པས་རིང་པོ་མི་ཐོགས་པར་དངུལ་གྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་བབ་པ་དང ། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་དངུལ་གྱི་ཆར་འདི་བབ་པས་རིང་པོ་མི་ཐོགས་པར་གསེར་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་བབ་པ་དང ། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་གསེར་གྱི་ཆར་འདི་བབ་པས་རིང་པོ་མི་ཐོགས་པར་རིན་པོ་ཆེའི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་འཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་ཞུགས་ཤིང་དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་བབ་པ་དང ། བློན
8.125a
པོའི་མཆོག་ཧི་རུ་ཀ་དང ། བྷི་རུ་ཀ་གཉིས་ཀྱིས་རིན་པོ་ཆེ་དག་གིས་གྲུ་འགེངས་སུ་བཅུག་སྟེ་བྲོས་སོ། །དེ་ན་ཧི་རུ་ཀས་ཕྱོགས་གཞན་ཞིག་ཏུ་ཧི་རུ་ཀའི་རྩལ་ཞེས་བྱ་བའི་གྲོང་ཁྱེར་རྩིག་ཏུ་བཅུག་ནས། དེའི་མིང་ཧི་རུ་ཀའི་རྩལ་ཧི་རུ་ཀའི་རྩལ་ཅེས་བྱ་བར་གྱུར་ཏོ། །བྷི་རུ་ཀས་ཀྱང་ཕྱོགས་གཞན་ཞིག་ཏུ་བྷི་རུ་ཀའི་རྩལ་ཅེས་བྱ་བའི་གྲོང་ཁྱེར་རྩིག་ཏུ་བཅུག་ནས་དེའི་མིང་བྷི་རུ་ཀའི་རྩལ་བྷི་རུ་ཀའི་རྩལ་ཅེས་བྱ་བར་གྱུར་ཏོ། །ཉི་མ་བདུན་པ་ལ་སའི་ཆར་འབབ་པར་བརྩམས་པ་དང ། གྲོང་ཁྱེར་སྒྲ་སྒྲོགས་སུ་སྒྲ་མཐོན་པོ་དང ། སྒྲ་ཆེན་པོ་བྱུང་ནས་རྒྱལ་པོས་སྨྲས་པ། ཤེས་ལྡན་དག་སྒྲ་མཐོན་པོ་དང ། སྒྲ་ཆེན་པོ་དེ་ཅི་བློན་པོ་རྣམས་ཀྱིས་སྨྲས་པ། ལྷ་སའི་ཆར་བབ་པོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་བློན་པོའི་མཆོག་ཧི་རུ་ཀ་དང ། བྷི་རུ་ཀ་ག་ན་འདུག་ཚོལ་ཅིག་།དེ་དག་གིས་བཙལ་བར་བརྩམས་པ་དང ། ཇི་ཙམ་ན་དེ་གཉིས་བྲོས་པར་ཚོར་ནས། དེ་དག་གིས་རྒྱལ་པོ་ལ་སྨྲས་པ། ལྷ་དེ་གཉིས་བྲོས་ཏེ་མ་མཆིས་སོ། །དེ་ནས་རྒྱལ་པོ་གཙུག་པུད་ཅན་འབྲོས་པར་བརྩམས་པ་དང ། མི་མ་ཡིན་པ་དག་གིས་སྒོ་བཅད་དོ། །ཁྱེའུ་སྔོ་བསངས་ཀྱིས་སྨྲས་པ། འཕགས་པ་གྲོང་ཁྱེར་དུ་སྒྲ་མཐོན་པོ་དང་སྒྲ་ཆེན་པོ་བྱུང་བ་འདི་ཅི་ལགས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྨྲས་པ། བུ་སྐར་ཁུང་ནས་ཁར་ཕོར་ཕྱིར་ཕྱུང་ཤིག་།དེས་སྐར་ཁུང་ནས་ཁར་ཕོར་ཕྱིར་ཕྱུང་བ་དང་སས་ཕྱེད་ཙམ་གང་བར་གྱུར་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བསམས་པ། ད་དུང་སྤྱོད་ཡུལ་ལྷག་མ་དང་བཅས་པ་ཡིན་ནོ་སྙམ་མོ། །ཇི་ཙམ་ན་ཡང་ཁར་ཕོར་ཕྱི་རོལ་དུ་ཕྱུང་བ་དང་བྱུར་བུར་གང་བར་གྱུར་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བསམས་པ། ད་ནི་སྤྱོད་ཡུལ་མེད་པར་གྱུར་གྱིས་འགྲོའོ་སྙམ་མོ། །དེ་ནས་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་གང་ཡིན་པ་དེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ག་ལ་བ་དེར་སོང་སྟེ་ཕྱིན་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་ཀྱང་མཆི་སྟེ་འཕགས་པའི་བསྙེན་བཀུར་བགྱིའོ། །དེས་དང་དུ་བླངས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྔོ་བསངས་ལ་སྨྲས་པ། བུ་ཆོས་གོས་ཀྱི་གྲཝ་ནས་ཟུང་ཤིག་དང་འདོང་ངོ ། །དེས་ཆོས་གོས་ཀྱི་གྲཝ་ནས་བཟུང་བ་དང་དེས་ཁྱེའུ་སྔོ་བསངས་ཁྲིད་དེ་རྫུ་འཕྲུལ་གྱིས་སྟེང་གི་ནམ་མཁའ
8.125b
ལས་སོང་ངོ ། །སྒྲ་སྒྲོགས་ན་གཉུག་མར་གནས་པའི་ལྷ་མོ་ཡང་རང་གི་རྫུ་འཕྲུལ་གྱིས་དེའི་ཕྱི་བཞིན་སོང་བ་དང ། གྲོང་ཁྱེར་སྒྲ་སྒྲོགས་ཀྱང་སས་ནོན་པར་གྱུར་ཏོ། །དེ་དག་མཐར་གྱིས་ཁ་ར་བ་ན་ཞེས་བྱ་བའི་རི་བྲགས་སུ་ཕྱིན་ནས་དེ་དག་དེ་ན་གཡུལ་གྱི་གཞི་ན་འཁོད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཁྱེའུ་སྔོ་བསངས་གཡུལ་གྱི་གཞིར་བཞག་སྟེ་བསོད་སྙོམས་ལ་ཞུགས་པ་དང ། ལྷ་མོ་དེའི་མཐུས་གཡུལ་གྱི་གཞི་དེར་འབྲུ་འཕེལ་བར་གྱུར་ནས་དེ་ན་མི་གང་འདུག་པ་དེས་ཁྱེའུ་དེ་མཐོང་ནས་དེའི་གན་དུ་སོང་སྟེ་སྨྲས་པ། ཀྱེ་ཁྱེའུ་ཁྱོད་ཀྱི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ཏོ། །དེས་སྨྲས་པ། ཁོ་བོའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་པ་མ་ཡིན་ཏེ། འདི་ལྟར་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་འདིར་འོངས་ཏེ་ཕྱོགས་ག་གེ་མོ་ཞིག་ན་འདུག་པ་དེའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ཏོ། །དེ་དེའི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། ལྷ་མོ་བདག་གྲོང་དུ་མཆི་སྟེ་སླར་མཆིའི་བར་དུ་རེ་ཤིག་ལྡེ་མིག་དང ། ལྡེ་མིག་ཁྱོག་པོ་འདི་གཟུང་ཞིང་ཁྱོད་ཀྱིས་བདག་མ་ལགས་པ་གཞན་སུ་ལ་ཡང་མི་སྩལ་བར་གསོལ། དེས་བླངས་པ་དང ། མི་དེ་ཡང་རི་བྲགས་སུ་སོང་ནས་རི་བྲགས་ན་གནས་པའི་སྐྱེ་བོའི་ཚོགས་བསྡུས་ཏེ་སྨྲས་པ། ཤེས་ལྡན་དག་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་འདིར་འོངས་ཏེ་གཡུལ་གྱི་གཞི་ན་འདུག་པས་དེའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ནས་བདག་གིས་དེའི་ལག་ཏུ་ལྡེ་མིག་དང ། ལྡེ་མིག་ཁྱོག་པོ་བྱིན་ཏེ་བདག་གིས་དེ་ལ་བདག་གྲོང་དུ་མཆི་སྟེ་སླར་མཆིའི་བར་ལྡེ་མིག་དང ། ལྡེ་མིག་ཀྱོག་པོ་འདི་གཟུང་ཞིང་ཁྱོད་ཀྱིས་བདག་མ་གཏོགས་པ་གཞན་སུ་ལ་ཡང་སྩལ་བར་མི་བགྱིའོ་ཞེས་སྨྲས་ཀྱིས། དེའི་ཕྱིར་གྲོང་མི་རྣམས་ལ་གལ་ཏེ་བདག་གི་བུ་གཙོ་བོར་དབང་བསྐུར་ན་ཁོ་བོ་བདག་ཉིད་སྲོག་དང་འབྲལ་བར་གསོལ་བ་འདེབས་ཏེ། དེ་ལྟ་ན་ལྷ་མོ་བདག་ཅག་གི་གནས་ནས་གར་ཡང་འགྲོ་བར་མི་འགྱུར་བས་ཁྱེད་ཅག་ལོངས་སྤྱོད་དག་གིས་མངོན་པར་འཕེལ་བར་འགྱུར་ཞིང་ཡམས་ཀྱི་ནད་ཐམས་ཅད་ཀྱང་ཉེ་བར་ཞི་བར་འགྱུར་རོ། །དེ་དག་གིས་དེའི་བུ་གཙོ་བོར་དབང་བསྐུར
8.126a
ནས་དེས་ཀྱང་བདག་ཉིད་སྲོག་དང་བྲལ་བར་བྱས་སོ། །དེ་ནས་དེ་དག་གིས་གནས་དེ་ཐམས་ཅད་སྤོས་དང་མེ་ཏོག་གིས་མཛེས་པར་བྱས་ཤིང་གདུགས་དང་རྒྱལ་མཚན་གྱིས་བརྒྱན་ཏེ། གཏོར་མ་ཐོགས་ནས་ལྷ་མོ་དེ་ག་ལ་བ་དེར་དོང་སྟེ་ཕྱིན་ནས་རྐང་པ་གཉིས་ལ་གཏུགས་ཏེ་སྨྲས་པ། ལྷ་མོ་ཁྱོད་འདི་ཉིད་ན་བཞུགས་པར་གསོལ། །དེས་སྨྲས་པ། ཁོ་མོ་ནི་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསྙེན་བཀུར་བྱེད་པ་ཡིན་པས་འདི་ན་ཁོ་མོའི་གནས་མེད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྨྲས་པ། ལྷ་མོ་ཁྱོད་ཀྱིས་གང་ལས་ལྡེ་མིག་དང ། ལྡེ་མིག་ཁྱོག་པོ་བླངས་པ་སོམས་ཤིག་།དེས་བསམ་པ་ལ་ཞུགས་པ་དང ། ཇི་ཙམ་ན་མི་དེ་དུས་ལ་བབ་པར་མཐོང་ནས་དེས་གནས་དེ་ན་གནས་པའི་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཁོ་མོ་དམ་ཚིག་གིས་གནས་པར་བྱ་སྟེ། གལ་ཏེ་ཁོ་མོའི་གནས་གཞི་ཇི་ལྟ་བུ་བྱེད་དུ་འཇུག་པ་དེ་ལྟ་བུར་འཕགས་པའི་གནས་གཞི་ཡང་བྱེད་དུ་འཇུག་ན་ཁོ་མོ་འདུག་གོ། །དེ་དག་གིས་ཁས་བླངས་ནས། དེ་དག་གིས་ལྷ་མོ་དེའི་གནས་ཇི་ལྟ་བུ་བྱེད་དུ་བཅུག་པ་དེ་ལྟ་བུར་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་གནས་ཀྱང་བྱེད་དུ་བཅུག་གོ། །ལྷ་མོ་དེའི་གནས་སུ་མར་མེ་བཙུགས་པ་གང་ཡིན་པ་དེ་དེས་ཁྱེར་ཏེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་གནས་སུ་འཛུགས་པར་བྱེད་དོ། །དེ་མར་མེ་ཁྱེར་ཏེ་འགྲོ་བ་རྩིག་དྲུང་ན་འདུག་པའི་མི་ཞིག་གིས་མཐོང་ནས་དེས་བསམས་པ། ལྷ་མོ་འདི་འཕགས་པ་ཀཱ་ཏྱཱ་ཡ་ན་ཆེན་པོའི་གན་དུ་འདོང་བས་འགྲོའོ་སྙམ་པ་དང ། དེས་དེའི་སེམས་ཤེས་ནས་ཁྲོས་ཏེ་རི་བྲགས་འདི་ན་གནས་པའི་སྐྱེ་བོའི་ཚོགས་འདི་ནི་སྡིག་པའི་སེམས་ཀུན་དུ་སྤྱོད་པ་ཡིན་ཏེ། འཕགས་པ་ཀཱ་ཏྱཱ་ཡ་ན་ཆེན་པོ་འདོད་པའི་དྲི་ང་བ་མེད་པ་ལ་བརྫུན་གྱིས་བསྐུར་པ་འདེབས་པར་བྱེད་དོ་སྙམ་ནས། དེས་རི་བྲགས་དེར་མི་ངས་ཕྱུང་སྟེ་སྐྱེ་བོ་ཕལ་པོ་ཆེ་ཤི་བར་གྱུར་ནས་སྐྱེ་བོ་ཤི་བའི་རོ་ཕྱིར་འབྱིན་པ་ན་ཁྲི་དང་ཁྲི་དག་འདོམ་པར་གྱུར་ཏོ། །གནས་དེ་ན་གནས་པའི་སྐྱེ་བོའི་ཚོགས་ཀྱིས་ལྟས་པ་དག་བཀུག་སྟེ། དྲིས་པ། འདི་ཅི་ལས་གྱུར། དེ་དག་གིས་སྨྲས་པ། ལྷ་མོ་འཁྲུགས་སོ། །དེ་དག་གིས་དེ་ལ་བཟོད་པ་གསོལ་བར་བརྩམས་པ་དང ། དེས་སྨྲས་པ། ཁྱེད་ཅག་འཕགས
8.126b
པ་ཀཱ་ཏྱཱ་ཡ་ན་ཆེན་པོ་འདོད་པའི་དྲི་ང་བ་མེད་པ་ལ་བརྫུན་གྱིས་བསྐུར་བ་འདེབས་པར་བྱེད་དོ། །དེ་དག་གིས་ཡང་སྨྲས་པ། ལྷ་མོ་བཟོད་པ་མཛོད་ཅིག་དང་འགའ་ཡང་བསྙེན་བཀུར་མ་ལགས་པ་བགྱིད་པར་མི་འགྱུར་རོ། །དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ཁྱེད་ཅག་ཁོ་མོ་ལ་ཇི་ལྟར་བསྙེན་བཀུར་བྱེད་པ་དེ་ལྟར་འཕགས་པ་ཀཱ་ཏྱཱ་ཡ་ན་ཆེན་པོ་ལ་ཡང་བྱེད་ན་བཟོད་པར་བྱའོ། །དེ་དག་གིས་སྨྲས་པ། ལྷ་མོ་ཆེས་ཁྱད་པར་དུ་འཕགས་པར་བགྱིས་བཟོད་པར་མཛོད་ཅིག་།དེས་དེ་དག་ལ་བཟོད་པར་བྱས་སོ། །དེ་དག་གིས་ཀྱང་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་ཆེས་ཁྱད་པར་དུ་འཕགས་པའི་བསྙེན་བཀུར་བྱས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་ཉིད་དུ་དབྱར་གནས་པར་ཁས་བླངས་ནས་ཁྱེའུ་སྔོ་བསངས་ཁྲིད་དེ་ལྷ་མོ་ལ་སྨྲས་ནས་འཕགས་པ་དང ། ལྷ་མོས་སྨྲས་པ། འཕགས་པ་བདག་ལ་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་དེ་ལ་ཁར་ཕོར་བྱིན་ནས་དེས་དེ་ལ་ཁས་ཕུབ་སྟེ་མཆོད་རྟེན་དུ་བྱས་ནས་དུས་སྟོན་བྱེད་དུ་བཅུག་ནས། ཁར་ཕོར་གྱི་དུས་སྟོན་ཁར་ཕོར་གྱི་དུས་སྟོན་ཞེས་བྱ་བའི་མིང་དུ་གྱུར་ཏེ། དེང་སང་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་འཚལ་བར་བྱེད་དོ། །ཁྱེའུ་སྔོ་བསངས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ཆོས་གོས་ཀྱི་གྲཝ་ནས་འཇུས་ཏེ་དེ་འཕྱང་ཞིང་འགྲོ་བ་བ་ལང་རྫི་དང་ཕྱུགས་རྫི་དག་གིས་མཐོང་ནས། དེ་དག་གིས་འཕྱང་བ་པ་འཕྱང་བ་པ་ཞེས་བྱ་བའི་སྒྲ་ཆེན་པོ་ཕྱུང་བས་ཡུལ་དེའི་མི་རྣམས་ཀྱི་མིང་འཕྱང་བ་པ་འཕྱང་བ་པ་ཞེས་བྱ་བའི་མིང་དུ་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རི་བྲགས་ཞིག་ཏུ་ཕྱིན་ནས་དེར་ཁྱེའུ་སྔོ་བསངས་ཤིང་ལྗོན་པའི་དྲུང་དུ་བཞག་སྟེ་བསོད་སྙོམས་ལ་ཞུགས་སོ། །རི་བྲགས་དེ་ན་རྒྱལ་པོ་བུ་མེད་པར་དུས་ལ་བབ་ནས་ཕོ་བྲང་འཁོར་གྱི་མི་དང་བློན་པོ་དང ། ཡུལ་མི་དག་འདུས་ཏེ་སྨྲས་པ། ཤེས་ལྡན་དག་གང་ཞིག་རྒྱལ་པོར་དབང་བསྐུར་བར་བྱ། དེ་ན་ཁ་ཅིག་གིས་སྨྲས་པ། གང་བསོད་ནམས་དང་དབང་ཆེ་བར་གྲགས་པའོ། །ཁ་ཅིག་གིས་སྨྲས་པ། དེ་ཇི་ལྟར་ཤེས་པར་བྱ། ཁ་ཅིག་གིས་སྨྲས་པ། རྟོག་པ་དག་བསྐོ་བར་བྱའོ། །དེ་དག་གིས
8.127a
རྟོག་པ་དག་བསྐོས་ནས་དེ་དག་གིས་ཕན་ཚུན་བཙལ་བར་བརྩམས་པ་དང ། དེ་དག་གིས་ཁྱེའུ་དེ་ཤིང་ལྗོན་པའི་དྲུང་ན་གཉིད་ལོག་པ་མཐོང་ནས། དེ་དག་གིས་དེའི་མཚན་མ་གཟུང་བར་བརྩམས་པ་དང ། ཇི་ཙམ་ན་ཤིང་ལྗོན་པ་གཞན་དག་གི་གྲིབ་མ་ཤར་ཕྱོགས་སུ་གཞོལ་བ་དང ། ཤར་ཕྱོགས་སུ་འབབ་པ་དང ། ཤར་ཕྱོགས་སུ་བབ་པར་གྱུར་ན་ཤིང་ལྗོན་པ་དེའི་གྲིབ་མས་ཁྱེའུ་དེའི་ལུས་མི་གཏོང་བར་མཐོང་ངོ ། །མཐོང་ནས་ཀྱང་གྲོས་བྱ་བར་བརྩམས་པ། ཤེས་ལྡན་དག་ཁྱེའུ་འདི་བསོད་ནམས་དང་དབང་ཆེ་བར་གྲགས་པ་ཡིན་གྱིས་འདི་དབང་བསྐུར་བར་བྱའོ། །དེ་དག་གིས་དེ་སད་པར་བྱས་ཏེ་སྨྲས་པ། ཁྱེའུ་རྒྱལ་སྲིད་ལོང་ཤིག་།ཁྱེའུས་སྨྲས་པ། ཁོ་བོ་རྒྱལ་སྲིད་དོན་དུ་གཉེར་བ་མ་ཡིན་ཏེ། ཁོ་བོ་ནི་འཕགས་པ་ཀཱ་ཏྱཱ་ཡ་ན་ཆེན་པོའི་བསྙེན་བཀུར་བ་ཡིན་ནོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཐོས་ནས་ཅི་ཁྱེའུ་འདི་ལ་རྒྱལ་སྲིད་དུ་འགྱུར་བའི་ལས་དག་ཡོད་དམ་མེད་སྙམ་དུ་བསམས་ནས་ཡོད་པར་མཐོང་ནས་དེས་སྨྲས་པ། བུ་རྒྱལ་སྲིད་ལོང་ལ་འདི་ལྟར་ཁྱོད་ཀྱིས་ཆོས་ཀྱིས་བྱེད་དུ་ཆུག་ཤིག་།དེས་མནོས་ཏེ། དེ་དག་གིས་དེ་དབང་བསྐུར་ནས་ཁྱེའུ་སྔོ་བསངས་ཀྱིས་དེར་རྒྱལ་སྲིད་བྱེད་དུ་བཅུག་པས་སྔོ་བསངས་ཀྱི་རྒྱལ་སྲིད་སྔོ་བསངས་ཀྱི་རྒྱལ་སྲིད་ཅེས་བྱ་བའི་མིང་དུ་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཡུལ་བོག་ཀ་ནར་ཕྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་མ་བོག་ཀ་ནར་སྐྱེས་པ་དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་མཐོང་ནས་སྨྲས་པ། བུ་ཁྱོད་ཡུན་རིང་ཞིག་ལོན་ནས་མཐོང་ངོ ། །བུ་ཁྱོད་ཡུན་རིང་ཞིག་ལོན་ནས་མཐོང་ངོ ། །དེའི་ནུ་མ་གཉིས་ལས་ཀྱང་འོ་མའི་རྒྱུན་འཛག་གོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་ལ་ཡུམ་ཡུམ་ཞེས་བག་ཕབ་པ་དང ། དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཟན་བྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེའི་བསམ་པ་དང ། བག་ལ་ཉལ་བ་དང ། ཁམས་དང ། རང་བཞིན་ཁོང་དུ་ཆུད་ནས་གང་ཐོས་ནས། དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན
8.127b
པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པར་བྱས་སོ། །དེས་བདེན་པ་མཐོང་ནས་བཙུན་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། དཀའ་བ་བྱེད་པའི་མ་ལ་ནི། །བུ་ཕོ་བཟང་པོས་གང་བྱ་བ། །དེ་ནི་ཁྱོད་ཀྱིས་བདག་ལ་བགྱིས། །སེམས་ནི་མཐོ་རིས་གཞོལ་བར་གྱུར། །ངན་སོང་དག་ནས་ལེགས་ཕྱུང་ཞིང ། །ཁྱོད་ཀྱིས་མཐོ་རིས་ཐར་པ་ལ། །རབ་ཏུ་འབད་པས་བདག་བཞག་སྟེ། །ཁྱོད་ཀྱིས་དཀའ་བ་ལེགས་པར་མཛད། །ཚོང་པས་ཁེ་སྤོགས་རྙེད་པ་ལྟར། །མཐོ་རིས་རྙེད་པ་བདག་གིས་རྙེད། །དགེ་བའི་བཤེས་གཉེན་རྣམས་ལ་ནི། །ཉེ་བར་བརྟེན་པ་བཟང་བ་ལགས། དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བུ་མོ་བཟང་མོ་དེ་བདེན་པ་དག་ལ་བཞག་ནས་སྨྲས་པ། ཡུམ་བལྟས་ལགས་ཀྱིས་བདག་མཆིའོ། །དེས་སྨྲས་པ། བུ་གལ་ཏེ་དེ་ལྟ་ན་བདག་ལ་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་དེ་ལ་ཁར་བ་བྱིན་ནས་དེས་མཆོད་རྟེན་བྱས་ཏེ། དེར་བཙུགས་ནས་ཁར་བའི་མཆོད་རྟེན་ཁར་བའི་མཆོད་རྟེན་ཞེས་བྱ་བའི་མིང་དུ་གྱུར་ཏེ། དེང་སང་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་འཚལ་བར་བྱེད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཡུལ་དབུས་སུ་འགྲོ་འདོད་ནས་ཡུལ་སིན་དུར་ཕྱིན་པ་དང ། དེ་ནས་བྱང་ལམ་ན་གནས་པའི་ལྷ་མོ་གང་ཡིན་པ་དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བདག་ལ་ཡང་མཚན་མ་ཅུང
8.128a
ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་བསམས་པ། བཅོམ་ལྡན་འདས་ཀྱིས་ཡུལ་དབུས་སུ་ལྷམ་སྒྲོག་གུ་ཅན་བཅང་བར་མི་བྱའོ་ཞེས་བཀའ་སྩལ་པས་འདི་དེ་ལ་སྦྱིན་ནོ་སྙམ་ནས། དེས་ལྷམ་སྒྲོག་གུ་ཅན་དེ་དེ་ལ་བྱིན་པ་དང ། དེས་གནས་གཞི་བྱེད་དུ་བཅུག་སྟེ་དེར་བཞག་པ་དང ། ཁ་ཅིག་གིས་ནི་ལྷམ་གྱི་དབང་ཕྱུག་ཅེས་བྱ་བར་ཤེས་སོ། །ཁ་ཅིག་གིས་ལྷམ་གྱི་གཞི་ཞེས་བྱ་བར་ཤེས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་མཐར་གྱིས་མཉན་ཡོད་དུ་ཕྱིན་ནས་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དེས་སྨྲས་པ། ཚེ་དང་ལྡན་པ་དག་ཅུང་ཟད་བདེ་བར་ཡང་བརྒྱུས། ཅུང་ཟད་སྡུག་བསྔལ་བར་ཡང་བརྒྱུས་སོ། །དགེ་སློང་རྣམས་ཀྱིས་སྨྲས་པ། ཇི་ལྟར་བདེ་བར་བརྒྱུས། ཇི་ལྟར་སྡུག་བསྔལ་བར་བརྒྱུས། དེས་སྨྲས་པ། སེམས་ཅན་གྱི་བྱ་བ་བྱས་པ། གང་ཡིན་པ་དེ་དག་ནི་བདེ་བར་བརྒྱུས་པ་ཡིན་ནོ། །རྒྱལ་པོ་གཙུག་པུད་ཅན་དང ། གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་ཀྱིས་བདག་སས་མནན་པ་གང་ཡིན་པ་དང ། བློན་པོའི་མཆོག་ཧེ་རུ་ཀ་དང ། བྷེ་རུ་ཀ་གཉིས་ཚེགས་ཆེན་པོས་བྲོས་པ་གང་ཡིན་པ་དེ་ནི་སྡུག་བསྔལ་བར་བརྒྱུས་པ་ཡིན་ནོ། །དགེ་སློང་དོན་ཉུང་ངུ་དག་གིས་སྨད་དེ་སྨྲས་པ། དེ་ནི་ཕ་གསོད་པ་ཡིན་ཏེ། དེས་ཚེ་དང་ལྡན་པ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་པ་ཉེས་པ་མེད་པ་གནོད་པ་མི་བྱེད་པ་བསད་དེ། འདི་ནི་དེའི་མེ་ཏོག་ཙམ་ཡིན་གྱི་འབྲས་བུ་ནི་གཞན་འབྱུང་བར་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཨུ་ཏྲ་ཡ་ནས་ལས་ཅི་བགྱིས་ན་དེས་ཕྱུག་པ་ནོར་མང་ལ་ལོངས་སྤྱོད་ཆེ་བའི་ཁྱིམ་ཏུ་སྐྱེས་ཤིང ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་དུ་བགྱིས་ནས་མཚོན་གྱིས་བཀུམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཨུ་ཏྲ་ཡ་ན་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས
8.128b
ཤིང་བསགས་པས་ཨུ་ཏྲ་ཡ་ན་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་འབྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་དུ་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དགས་དང་བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང་བྱ་མང་པོ་དག་དྲུངས་དབྱུང་བའི་ཕྱིར་དང ། ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང ། སྙི་དང་རྙོང་མང་པོ་དག་འཛུགས་པར་བྱེད་དོ། །དེའི་རྔོན་སྤྱད་དང ། སྙི་དང་རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཤིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མོད་པ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས་དེ་རི་བྲགས་ནས་བྱུང་སྟེ། འདི་ནི་ཞི་བའོ། །འདི་ནི་ཞི་བའོ། །ཞེས་མཚེའུ་དེ་ག་ལ་བ་དེར་སོང་སྟེ། ཕྱིན་ནས་ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ། རྐང་པ་གཉིས་བཀྲུས་ནས་ལག་པ་གཉིས་བསྙལ
8.129a
ཏེ་ཆུ་བཙགས་ནས། ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ། ལག་པ་གཉིས་བསྙལ་ནས་ཁ་བཀྲུས་ཏེ་ལྷུང་བཟེད་དང ། ཆུ་ཚགས་གནས་ཇི་ལྟ་བ་བཞིན་དུ་བཞག་ནས། རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་དཀྲུང་བཅས་ཏེ་སྤྱོད་ལམ་ཞི་བར་འདུག་པ་དང ། དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ན་རྔོན་པ་དེ་ནང་པར་སྔར་ལངས་ཏེ་མཚེའུ་དེ་ག་ལ་བ་དེར་སོང་ནས། དེས་རྔོན་སྤྱད་དང ། སྙི་དང་རྙོང་དེ་དག་བྱུལ་བར་བརྩམས་པ་དང ། རི་དགས་གཅིག་ཀྱང་མ་མཐོང་ནས་དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང ། སྙི་དང་རྙོང་འདི་དག་དོན་ཡོད་པ་ཡིན་ན། གང་གི་ཕྱིར་དེར་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐེན་ཀོར་བྱུལ་བར་བརྩམས་པ་དང་མིའི་རྗེས་མཐོང་ནས། དེ་རྗེས་དེའི་ཕྱི་བཞིན་དུ་སོང་བ་དང ། རང་སངས་རྒྱས་སྤྱོད་ལམ་ཞི་བར་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས་གལ་ཏེ་བདག་གིས་འདིའི་སྲོག་གཅད་པ་མ་བྱས་ན་འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས་རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བ་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང ། ཉམས་པར་གྱུར་ན་མི་རུང་གིས། འདི་ལ་ལག་ནས་དྲང་བ་སྦྱིན་ནོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས
8.129b
དེའི་རྐང་པ་གཉིས་ཀྱི་དྲུང་དུ་སྒྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ། རྨ་ལྷན་གྱིས་ཀླན་ནས་སྨྲས་པ། འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པས་ཀླན་པར་མཛད་ན་དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས་དེའི་ཕྱིར་ད་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས་དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ་རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང ། རྒྱལ་མཚན་དང ། བ་དན་དག་བསྒྲེང་ཞིང་དྲི་དང ། ཕྲེང་བ་རྒྱུ་དང ། བདུག་སྤོས་དང ། ཕྱེ་མ་དང ། སིལ་སྙན་དག་གིས་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་དམ་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་འཐུན་པར་མི་འགྱུར་བར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ་ནོར་མང་བ། ལོངས་སྤྱོད་ཆེ་བར་སྐྱེ་ཞིང་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྔོན་པ་གང་ཡིན་པ་དེ་ནི་དགེ་སློང་ཨུ་ཏྲ་ཡ་ན་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག
8.130a
ཅན་གྱིས་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས་ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མཚེའུ་དེ་ཉིད་དུ་རི་དགས་སུ་གྱུར་ནས་མདའ་དུག་ཅན་གྱིས་གནད་དུ་བསྣུན་ཅིང་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་དེ་མཚོན་གྱིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ། ནོར་མང་བ། ལོངས་སྤྱོད་ཆེ་བར་སྐྱེས་ཤིང་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང ། འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་གཙུག་པུད་ཅན་དང ། གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་དང ། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ལས་ཅི་བགྱིས་ན་དེས་དོག་སས་ནོན་པར་གྱུར། བློན་པོའི་མཆོག་ཧེ་རུ་ཀ་དང ། བྷེ་རུ་ཀ་གཉིས་ཀྱིས་ལས་ཅི་ཞིག་བགྱིས་ན་བྲོས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་དག་ཉིད་ཀྱིས་ལས་བྱས་ཤིང ། བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར
8.130b
སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་ཁྱིམ་བདག་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་ཁྱེའུ་ཞིག་བྱུང་ངོ ། །ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་མོ་ཞིག་བྱུང་ནས། དེ་གཉིས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །བུ་མོ་དེ་དང་ན་མཉམ་པའི་བུ་མོ་དག་སློང་བ་འོངས་ན། བུ་མོ་དེ་ལ་སློང་བ་འགའ་ཡང་མ་འོངས་སོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བས། བས་མཐའི་གནས་མལ་ལ་དགའ་བ་བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་ན་རང་སངས་རྒྱས་ཤིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས་བུ་མོ་དེས་ཁྱིམ་ཕྱག་ནས་ཕྱག་དར་རིབ་མའི་སྟེང་ནས་བོར་བ་དེ་རང་སངས་རྒྱས་བསོད་སྙོམས་ལ་རྒྱུ་བ་དེའི་མགོ་ལ་ཕོག་གོ། །བུ་མོ་དེས་དེར་ཕོག་པ་མཐོང་ནས་འགྱོད་པའི་སེམས་ཀྱང་མ་སྐྱེས་ལ། སྟེས་དབང་གིས་དེ་ཉིད་ཀྱི་ཉིན་མོ་དེ་སློང་བ་འོངས་ནས་མིང་པོས་དེ་ལ་དྲིས་པ། དེང་ཁྱོད་ཀྱིས་ཅི་བྱས་ན་དེས་ན་ཁྱོད་སློང་བ་འོངས། དེས་སྨྲས་པ། བདག་གིས་དེང་རབ་ཏུ་བྱུང་བའི་སྟེང་དུ་ཕྱག་དར་བོར་རོ། །དེས་འཛུམ་ཕྱུང་བ་དང ། བུ་མོ་དེས་བུ་མོ་གཞན་དག་ལ་སྦྲན་ཅིང་དེས་ཀྱང་གཞན་དག་ལ་སྦྲན་ནས། འཇིག་རྟེན་ལ་བུ་མོ་གང་དང་གང་སློང་བ་མི་འོང་བ་དེས་རང་སངས་རྒྱས་ཀྱི་སྟེང་དུ་ཕྱག་དར་བོར་ན་དེ་ལ་སློང་བ་འོང་ངོ ། །ཞེས་སྡིག་པ་ཅན་གྱི་ལྟ་བའི་རྣམ་པ་དེ་ལྟ
8.131a
བུ་བྱུང་ངོ ། །བདག་ཉིད་ཆེན་པོ་རྣམས་ནི་བསྙེན་བཀུར་མ་ཡིན་པས་འཇིགས་པས་རང་སངས་རྒྱས་དེ་རི་བྲགས་དེ་ནས་སོང་བ་དང ། དྲང་སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱི་སྟིང་དུ་དོར་བར་བརྩམས་ནས་དེ་དག་ཀྱང་དོང་བ་དང ། ཕ་མ་དག་གི་སྟེང་དུ་བོར་བར་བརྩམས་སོ། །རི་བྲགས་དེ་ན་ཁྱིམ་བདག་དགེ་བའི་ཆོས་ཅན་གཉིས་ཤིག་འཁོད་པ་དེ་གཉིས་ཀྱིས་སྨྲས་པ། ཤེས་ལྡན་དག་དམ་པ་མ་ཡིན་པའི་ཆོས་འཕེལ་བ་འདི་བཟློག་པར་བྱའོ། །ཞེས་དེ་གཉིས་ཀྱིས་བཟློག་ཅིང་སྤངས་སོ། །དགེ་སློང་དག་དེའི་ཚེ་དེའི་དུས་ན་བུ་མོ་གང་གིས་རང་སངས་རྒྱས་ཀྱི་སྟེང་དུ་ཕྱག་དར་བོར་བ་དེ་ནི་རྒྱལ་པོ་གཙུག་པུད་ཅན་འདི་ཡིན་ནོ། །རི་བྲགས་དེ་ན་གནས་པའི་སྐྱེ་བོའི་ཚོགས་གང་ཡིན་པ་དེ་ནི་གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་འདི་དག་ཡིན་ཏེ། འདི་དག་གིས་རང་སངས་རྒྱས་དང ། དྲང་སྲོང་དང ། ཕ་མ་དག་གི་སྟེང་དུ་ཕྱག་དར་བོར་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་སས་ནོན་པར་གྱུར་ཏོ། །ཁྱིམ་བདག་གཉིས་ཀྱིས་བཟློག་པ་གང་ཡིན་པ་དེ་ནི་བློན་པོའི་མཆོག་ཧེ་རུ་ཀ་དང ། བྷེ་རུ་ཀ་གཉིས་ཡིན་ཏེ། ལས་དེའི་རྣམ་པར་སྨིན་པས་བྲོས་པར་གྱུར་ཏོ། །བུ་མོའི་མིང་པོ་གང་གིས་འཛུམ་ཕྱུང་བ་དེ་ནི་དགེ་སློང་ཀཱ་ཏྱཱ་ཡ་ན་ཆེན་པོ་ཡིན་ཏེ། དེས་འཛུམ་ཕྱུང་བ་གང་ཡིན་པའི་ལས་དེའི་རྣམ་པར་སྨིན་པས་སས་གཡོགས་ཏེ། གལ་ཏེ་དགེ་སློང་ཀཱ་ཏྱཱ་ཡ་ན་ཆེན་པོས་ཡོན་ཏན་གྱི་ཚོགས་འདི་ལྟ་བུ་རྟོགས་པར་མ་གྱུར་དུ་ཟིན་ན། དགེ་སློང་ཀཱ་ཏྱཱ་ཡ་ན་ཆེན་པོ་ཡང་སས་ནོན་ཅིང་ཚུལ་མ་ཡིན་པས་སྡུག་བསྔལ་བར་འགྱུར་རོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱོད་ཀྱིས་དེ་ལྟར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན
8.131b
དགའ་ར་བ་ན་བཞུགས་སོ། །ཀཽ་ཤམྦཱི་ན་ཁྱིམ་བདག་ནོར་བཟངས་ཤེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་འདུག་པ་དེའི་ཁྱིམ་རྒྱལ་པོ་ཤར་པའི་དྲུང་ན་འདུག་ཅིང་དེ་ནང་པར་སྔར་ལངས་ཏེ་ལས་ཀྱི་མཐའ་དག་ལ་རྟོག་ཏུ་འགྲོའོ། །དེ་དབྱིག་གི་གདངས་ཅན་ཡིན་པས་རྒྱལ་པོ་ཤར་པས་སྒྲའི་གདངས་ལས་དེ་ལ་གསེར་བཞག་པ་འབུམ་ཡོད་པར་ཤེས་སོ། །ཇི་ཙམ་དུས་གཞན་ཞིག་ན་རྒྱལ་པོ་ཤར་པ་དོན་གྱི་གནས་ན་འདུག་པས་བློན་པོ་རྣམས་ལ་སྨྲས་པ། ཤེས་ལྡན་དག་ཁྱིམ་བདག་ནོར་བཟངས་ཉི་མ་རེ་རེ་ཞིང་ནང་པར་སྔར་ལངས་ཏེ་རང་ཉིད་ལས་ཀྱི་མཐའ་དག་ལ་རྟོག་ཏུ་འགྲོ་སྟེ། འདི་ལ་གསེར་བཞག་པ་འབུམ་ཡོད་ཅེས་གྲག་ན་ཅིའི་ཕྱིར་བདག་ཉིད་ངལ་བར་བྱེད། བློན་པོ་རྣམས་ཀྱིས་སྨྲས་པ། ལྷ་འདི་ལ་གསེར་བཞག་པ་འབུམ་ག་ལ་མཆིས་ཏེ། གལ་ཏེ་འདི་ལ་གསེར་བཞག་པ་འབུམ་མཆིས་ན་ཅིའི་སླད་དུ་བདག་ཉིད་ངལ་བར་བགྱིད། རྒྱལ་པོས་སྨྲས་པ། ཤེས་ལྡན་དག་གལ་ཏེ་ཁྱེད་ཅག་ཡིད་མི་ཆེས་ན་ཁྱིམ་བདག་ནོར་བཟངས་བོས་ཤིག་དང་དྲིའོ། །དེ་དག་གིས་ཁྱིམ་བདག་ནོར་བཟངས་བོས་ནས་རྒྱལ་པོས་དྲིས་པ། ཁྱིམ་བདག་ཁྱོད་ལ་གསེར་བཞག་པ་འབུམ་ཡོད་དམ། ལྷ་མཆིས་ཏེ། གལ་ཏེ་བཞེད་ན་བཞེས་སུ་གསོལ། ཁྱིམ་བདག་ང་ནི་གསེར་དོན་དུ་གཉེར་བ་མ་ཡིན་གྱི། འདི་ལྟར་ངས་ཁྱོད་ལ་ཅི་ཡོད་དམ་མེད་ཅེས་དྲི་བར་ཟད་དོ། །ལྷ་མཆིས་ཏེ་ལྷས་ཇི་ལྟར་མཁྱེན་པ་དེ་ཞུའོ། །རྒྱལ་པོས་སྨྲས་པ། ཁྱིམ་བདག་ཁྱོད་དབྱིག་གི་གདངས་ཅན་ཡིན་པས་ངས་སྒྲའི་གདངས་ཤེས་སོ། །ཁྱིམ་བདག་ནོར་བཟངས་རྒྱལ་པོས་གདངས་ལས་ཤེས་པས་དེའི་མིང་ཁྱིམ་བདག་གདངས་ཅན་ཁྱིམ་བདག་གདངས་ཅན་ཞེས་བྱ་བར་གྱུར་ཏོ། །རྒྱལ་པོས་དེ་ལ་སྨྲས་པ། ཁྱིམ་བདག་ཁྱོད་ཕྱུག་པོར་གྱུར་པ་ཡིན་ན་ཅིའི་ཕྱིར་ཁྱོད་རང་གིས་ཞལ་ཏ་བྱས་ཏེ་ལས་ཀྱི་མཐའ་དག་བྱེད་དུ་འཇུག་།དེས་སྨྲས་པ། ལྷ་གལ་ཏེ་བདག་གིས་རང་གི་ཞལ་ཏ་བགྱིས་ཏེ་ལས་ཀྱི་མཐའ་བགྱིད་དུ་མ་སྩལ་ན། བདག་གི་ལོངས་སྤྱོད་དག་འཕེལ་ཞིང་རྒྱས་པ་དང ། ཡངས་པར་ཡང་མི་འགྱུར་ལ། ལྷས་ཀྱང་བདག་དབྱིག་གི་གདངས་ཅན་ལགས་པར་མཁྱེན་པར་མི་འགྱུར་རོ། །རྒྱལ་པོས་སྨྲས་པ། ཁྱིམ་བདག་ཁྱོད་ཅིའི་ཕྱིར་གླང་པོ་ཆེ་དང་རྟ་དག་གིས་མི་འགྲོ། ལྷ་བདག་ཁྱིམ་ཁོལ་ལགས་པས་གླང་པོ་ཆེ་དང་རྟ་དག་གིས་མཆི་བ་བདག་གི་ཚུལ་དང་འཐུན་པ་མ་ལགས
8.132a
སོ། །རྒྱལ་པོས་བསམས་པ། གྲོགས་འདི་ལྟ་བུས་རྒྱལ་སྲིད་བྱེད་དུ་གཞུག་པར་ནུས་ཀྱིས། འདི་བློན་པོ་ཁོ་ནར་གཞུག་གོ་སྙམ་དུ་རིག་ནས་སྨྲས་པ། ཁྱིམ་བདག་བློན་པོ་གྱིས་ཤིག་དང ། ལྷན་ཅིག་ཏུ་རྒྱལ་སྲིད་བྱེད་དུ་གཞུག་གོ། །དེས་སྨྲས་པ། ལྷ་དེ་སྐད་བཀའ་སྩལ་པ་མི་རིགས་ཏེ། བདག་ནི་ཁྱིམ་ཁོལ་ལགས་པས་བདག་ཞིང་ལས་ཀྱི་མཐའ་རྗེས་སུ་བསྒྲུབ་པར་རིགས་ཀྱི། བློན་པོར་མི་རིགས་སོ། །རྒྱལ་པོས་དེ་ལྟ་དེ་ལྟར་ནན་གྱིས་མནན་ན་ཅི་ནས་ཀྱང་གདོན་མི་ཟ་བར་ཁས་ལེན་པར་ཤེས་ཏེ། མནན་ནས་དེས་ཀྱང་ཁས་བླངས་སོ། །དེ་ནས་རྒྱལ་པོས་དེ་བློན་པོར་བཅུག་ནས་ཁྱིམ་བདག་གདངས་ཅན་གྱིས་ཆོས་དང ། རིགས་པས་རྒྱལ་པོའི་བྱ་བ་དང ། རྒྱལ་པོའི་བྱེད་པ་དག་བྱ་བར་བརྩམས་ནས། དེས་བློན་པོ་གཞན་ཐམས་ཅད་ཟིལ་གྱིས་མནན་པ་དང ། དེ་དག་ཕྲག་དོག་སྐྱེས་ཏེ་ཡིད་མི་བདེ་བར་གྱུར་ནས་འདུས་ཏེ་སྨྲས་པ། ཤེས་ལྡན་དག་བདག་ཅག་འདི་ལྟར་ཁྱིམ་བདག་གདངས་ཅན་གྱིས་ཟིལ་གྱིས་མནན་པར་གྱུར་ན་འདི་ལ་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། འདི་ལ་ཅིའི་ཕྱིར་བསྒྲུབ་ཏུ་མེད། འདི་ཇི་སྲིད་དུ་གཏན་དུ་གཏིང་ཚུགས་པར་མ་གྱུར་པ་དེ་སྲིད་དུ་འདི་ལ་རྒྱལ་པོས་ཆད་པས་གཅོད་དུ་བཞུག་པར་བྱའོ། །ཁ་ཅིག་གིས་སྨྲས་པ། མ་ཉེས་ཀྱིས་དེ་ལྟར་བྱའོ་ཞེས་དེ་དག་ཐམས་ཅད་འདུས་ཏེ་རྒྱལ་པོའི་གན་དུ་དོང་ནས་སྨྲས་པ། ལྷ་རྒྱལ་པོ་སུ་ལགས། དེས་སྨྲས་པ། ཁྱེད་ཅག་ག་ལས་ཐེ་ཚོམ་ཟ། རྒྱལ་པོ་ང་ཡིན་མོད་གཞན་སུ་ཞིག་ཡིན། དེ་དག་གིས་སྨྲས་པ། ལྷ་གདངས་ཅན་རྒྱལ་པོ་ལགས་ཀྱི་ཁྱོད་ནི་མ་ལགས་ཏེ། གལ་ཏེ་དེ་འཚལ་བར་གྱུར་ན་ལྷ་བཀྲོངས་ཏེ་རང་ཉིད་ཅོད་པན་བཅིངས་ནས་རྒྱལ་སྲིད་ཀྱི་དབང་ཕྱུག་གི་བདག་པོ་བགྱིད་དུ་སྩོལ་བར་འགྱུར་རོ། །རྒྱལ་པོས་སྨྲས་པ། ཤེས་ལྡན་དག་ཅིའི་ཕྱིར་དེ་དེ་ལྟར་འགྱུར་ཏེ། དེ་ནི་ཆོས་གཙོ་བོར་བྱེད་པ་ཡིན་པས་ཇི་ལྟར་དེ་ལྟར་བྱེད་པར་འགྱུར། དེ་དག་གིས་སྨྲས་པ། བདག་ཅག་གིས་ལྷའི་མངོན་སུམ་དུ་འགྱུར་བར་བགྱིའོ། །ཇི་ཙམ་དུས་གཞན་ཞིག་ན་ཁྱིམ་བདག་གདངས་ཅན་རྒྱལ་པོས་ཉེ་བར་འཚོ་བའི་རྒོལ་བ་དང ། ཕྱིར་རྒོལ་བ་དག་གིས་ཡོངས་སུ་བསྐོར་ཅིང་རྒྱལ
8.132b
པོའི་ཕོ་བྲང་དུ་ཞུགས་ནས། རྒྱལ་པོའི་ཕོ་བྲང་དུ་ཐམས་ཅད་སྐྱེ་བོའི་ཚོགས་ཀྱིས་གང་བར་དེས་རྒྱལ་པོའི་བྱ་བ་དང ། རྒྱལ་པོའི་བྱེད་པ་དག་བྱས་ནས་རྒྱལ་པོའི་ཕོ་བྲང་ནས་ཕྱིར་བྱུང་བ་དང ། རྒྱལ་པོས་ཉེ་བར་འཚོ་བ་སྔ་ན་འཁོད་པ་དག་ཀྱང་དེ་དང་ལྷན་ཅིག་ཕྱིར་བྱུང་སྟེ་རྒྱལ་པོའི་ཚོགས་མེད་པར་འདུག་པ་དང ། བློན་པོ་དེ་དག་གིས་རྒྱལ་པོ་ལ་སྨྲས་པ། ལྷ་གཟིགས་སམ། བདག་ཅག་གིས་གསོལ་པ་གང་ལགས་པ་དེ་ནི་འདི་ལགས་ཏེ། གལ་ཏེ་འདི་འཚལ་བར་གྱུར་ན་ལྷ་བཀྲོངས་ཏེ་རང་ཉིད་ཅོད་པན་བཅིངས་ནས་རྒྱས་སྲིད་ཀྱི་དབང་ཕྱུག་གི་བདག་པོ་བགྱིད་དུ་སྩོལ་བར་འགྱུར་རོ། །རྒྱལ་པོས་བསམས་པ། རེ་ཤིག་འདི་བརྟག་པར་བྱའོ་སྙམ་ནས། དེས་དེ་རྒྱུ་བ་དང་གནས་པ་ལས་བརྟག་པར་བརྩམས་པ་དང ། ཇི་ཙམ་ན་བྱང་ལམ་ནས་དེད་དཔོན་གྱིས་ཟོང་རྟ་དེད་དེ་ཀཽ་ཤམྦཱིར་ཕྱིན་ནས་རྒྱལ་པོས་གདངས་ཅན་ལ་བསྒོ་བ། གསེར་འབུམ་གྱིས་རྟ་དག་ཉོས་ཤིག་།དེས་གསེར་འབུམ་གྱིས་རྟ་དག་ཉོས་པ་དང ། རྒྱལ་པོས་གདངས་ཅན་ལ་བསྒོ་བ། འབུམ་གྱི་ཕྱེད་བྱིན་ལ་འདི་སྐད་ཅེས་བདག་གིས་འབུམ་ཚང་བར་བྱིན་ཟིན་ཏོ། །ཞེས་བྱོས་ཤིག་།དེས་སྨྲས་པ། ལྷ་དེ་མི་རིགས་ཏེ། གལ་ཏེ་དེ་ལྟར་བགྱིས་ན་སླན་ཅད་འདིར་ཆིབས་རྟ་འཚོང་བ་དང ། གཞན་འགའ་ཡང་མཆི་བར་མི་འགྱུར་གྱིས་འདི་ལྟར་ལྷའི་དཀོར་ལས་འབུམ་ཕྱེད་སྩོལ་ཅིག་དང་བདག་གིས་འབུམ་ཕྱེད་སྩལ་ཏོ། །རྒྱལ་པོས་སྨྲས་པ། ཁྱིམ་བདག་ངའི་ཚིག་དེ་བཞིན་སྨྲས་ན་འདི་ཅི་འགལ། དེས་སྨྲས་པ། ལྷ་བདག་གིས་ཚེ་གཅིག་གི་སྡུག་བསྔལ་གྱི་དོན་དུ་ཚེ་རབས་མང་པོའི་སྡུག་བསྔལ་སྐྱེད་པར་རྔོ་མི་ཐོག་གོ། །རྒྱལ་པོས་དེ་ལ་ལན་གསུམ་གྱི་བར་དུ་སྨྲས་ན་ཡང་དེ་མ་བཏུབ་ནས། དེ་ནས་རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་བཀའ་ལན་གསུམ་གྱི་བར་དུ་བཅག་པ་དེའི་ཆད་པ་ཅི་ཡིན། བློན་པོ་རྣམས་ཀྱིས་སྨྲས་པ། ལྷ་དེའི་ཆད་པ་ནི་དགུམ་པ་ལགས་སོ། །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ངས་ཁྱིམ་བདག་གདངས་ཅན་ཡོངས་སུ་བཏང་ངོ ། །བློན་པོ་རྣམས་ཀྱིས་མི་གཤེད
8.133a
མ་པ་དག་ལ་བསྒོ་བ། ཤེས་ལྡན་དག་ལྷས་བཀའ་སྩལ་པ། ཁྱིམ་བདག་གདངས་ཅན་སོད་ཅིག་ཅེས་བྱུང་ངོ ། །རྒྱལ་པོས་མི་གཤེད་མ་པ་དེ་དག་ལ་གསང་སྟེ་བསྒོ་བ། ཁྱེད་ཀྱིས་ཁྱིམ་བདག་གདངས་ཅན་གསད་པར་མི་བྱ་བར་འདི་ལྟར་བསྡིགས་པར་བྱའོ། །དེ་དག་གིས་དེའི་མགྲིན་པར་ཀ་ར་བི་རའི་ཕྲེང་བ་བཏགས་ཏེ་གྲོང་ཁྱེར་གྱི་དབུས་ནས་གསོད་སར་ཁྲིད་པ་དང ། དེའི་ཉེ་དུ་དག་དོང་སྟེ་སྨྲས་པ། ཁྱིམ་བདག་འདི་ལ་ལྷས་བཀའ་ཅི་སྩལ་པ་དེ་ལྟར་གྱིས་ལ་བདག་ཉིད་གསོད་དུ་མ་གཞུག་ཤིག་།དེས་སྨྲས་པ། ཁོ་བོས་ལྷའི་བཀའ་ཆོས་དང་ལྡན་པ་བཅག་གམ། ཅི་གལ་ཏེ་ལྷས་ཁོ་བོས་ཉེས་པ་མེད་པ་གནོད་པ་མི་བྱེད་པ་གསོད་ན་གསོད་དུ་ཟད། ཁོ་བོས་ཚེ་གཅིག་གི་སྡུག་བསྔལ་གྱི་ཕྱིར་ཚེ་རབས་མང་པོའི་སྡུག་བསྔལ་སྐྱེད་པར་མི་ནུས་སོ། །མི་གཤེད་མ་པ་དེ་དག་གིས་དེ་གསོད་སར་ཁྲིད་དེ་སྨྲས་པ། ཁྱིམ་བདག་ལྷས་བཀའ་ཅི་སྩལ་པ་དེ་ལྟར་གྱིས་ལ་བདག་ཉིད་གསོད་དུ་མ་གཞུག་ཤིག་།དེས་སྨྲས་པ། ཁོ་བོས་ལྷའི་བཀའ་ཆོས་དང་ལྡན་པ་བཅག་གམ་ཅི། གལ་ཏེ་ལྷས་ཁོ་བོ་ཉེས་པ་མེད་པ། གནོད་པ་མི་བྱེད་པ་གསོད་ན་གསོད་དུ་ཟད། ཁོ་བོས་ཚེ་གཅིག་གི་སྡུག་བསྔལ་གྱི་ཕྱིར་ཚེ་རབས་མང་པོའི་སྡུག་བསྔལ་སྐྱེད་པར་མི་ནུས་སོ། །མི་གཤེད་མ་པ་དེ་དག་གིས་དེ་རྒྱལ་པོའི་གན་དུ་ཁྲིད་དེ་སྨྲས་པ། ལྷ་ཁྱིམ་བདག་གདངས་ཅན་འདི་འདི་སྐད་མཆིའོ། །རྒྱལ་པོས་སྨྲས་པ། ཁྱིམ་བདག་ང་ཁྱོད་གསོད་པར་འདོད་པ་མ་ཡིན་ཏེ། འདི་ལྟར་བརྟག་པར་འདོད་དོ། །དེས་སྨྲས་པ། ལྷས་བདག་བརྟག་པའི་དགོངས་པས་གནས་སྐབས་འདི་ལྟ་བུ་སྩལ་ན། གལ་ཏེ་བཀྱོན་ན་ཇི་ལྟར་བགྱིས་པར་འགྱུར། འདི་ལྟར་གལ་ཏེ་ལྷ་བདག་ལ་དགྱེས་ན་བདག་སྦྱིན་པ་དག་སྩོལ་ཅིང ། བསོད་ནམས་དག་བགྱིད་པར་ཅི་གནང ། རྒྱལ་པོས་སྨྲས་པ། ཁྱིམ་བདག་གལ་ཏེ་དེ་ལྟ་ན་གནང་གིས་ཅི་དགར་སྦྱིན་པ་དག་བྱིན་ཅིག་།བསོད་ནམས་དག་གྱིས་ཤིག་།དེ་ནས་ཁྱིམ་བདག་གདངས་ཅན་གྱིས་སྦྱིན་པའི་ཁང་པ་རྩིག་ཏུ་བཅུག་སྟེ། སྦྱིན་པའི་ཞལ་ཏ་པ་མི་བསྐོ་ནས་སྨྲས་པ། ཤེས་ལྡན་དག་གལ་ཏེ
8.133b
འདིར་སྔོན་མ་བྱུང་བའི་རྟགས་དང ། ཆ་ལུགས་ཅན་གྱི་དགེ་སྦྱོང་ངམ། བྲམ་ཟེ་འམ། གཞན་དག་འོངས་པར་གྱུར་ན་ཁོ་བོ་ལ་སྦྲོན་ཅིག་།ཇི་ཙམ་ན་ལྷོ་ལམ་ནས་དྲང་སྲོང་ལྔ་བརྒྱ་ཙམ་ཡུལ་དབུས་སུ་འཕགས་པ་དེ་དག་མཐར་གྱིས་ལམ་དུ་འདོང་བ་ན་དགོན་པའི་ལམ་དུ་ཕྱིན་ནས་དེ་དག་དགོན་པའི་ནང་དུ་སོན་པ་ན་ཆུ་ཟད་ནས་དེ་དག་ཆུ་དང་བྲལ་བས་སྐོམ་གྱིས་གདུངས་ནས་དགོན་པའི་ལམ་དེར་ཕན་ཚུན་བྱུལ་བར་བརྩམས་པ་དང ། དེ་ཕན་ཚུན་ཉུལ་བ་དེ་དག་གིས་ཧ་ཅང་ཐག་མི་རིང་བ་ན་གསིང་མ་སྔོན་པོའི་ཕྱོགས་ན་ཤིང་ལྗོན་པ་ཞིག་མཐོང་ནས་དེ་ན་ཁ་ཅིག་གིས་སྨྲས་པ། ཤེས་ལྡན་དག་གསིང་མ་སྔོན་པོའི་ཕྱོགས་འདི་ན་ཤིང་ལྗོན་པ་ཞིག་སྣང་གིས་ཚུར་ཤེག་དང ། འདི་ན་ཆུ་ཡོད་པར་འགྱུར་གྱིས་ལྟར་འདོང་ངོ ། །གཞན་དག་གིས་སྨྲས་པ། ལེགས་ཀྱིས་དེ་བཞིན་བྱའོ་ཞེས་དེ་དག་དོང་བ་དང་ཅི་ཙམ་ན་ཆུ་མེད་པར་མཐོང་ནས་དེ་དག་གིས་གསོལ་བ་གདབ་པར་བརྩམས་ཏེ། ཤེས་ལྡན་དག་ས་ཕྱོགས་དང་ཤིང་ལྗོན་པ་འདི་ལྷ་འམ། ཀླུ་འམ། གནོད་སྦྱིན་ནམ། ནམ་མཁའ་ལྡིང་ངམ། དྲི་ཟ་འམ། མི་འམ་ཅི་འམ། ལྟོ་འཕྱེ་ཆེན་པོ་གང་གནས་པ་དེས་བདག་ཅག་དྲང་སྲོང་ལྔ་བརྒྱ་སྐོམ་གྱིས་གདུངས་པ་རྣམས་ལ་ཆུ་བྱིན་ཅིག་ཅེས་སྨྲས་སོ། །ཇི་ཙམ་ན་ཤིང་ལྗོན་པ་དེ་ལས་ལག་པ་རྒྱན་ཐམས་ཅད་ཀྱིས་བརྒྱན་པ་ཞིག་གསེར་གྱི་རིལ་བ་བྷྲིང་གར་ཐོགས་ཏེ་བྱུང་ནས་དྲང་སྲོང་རྣམས་ཀྱིས་སྙིམ་པ་བཟེད་དེ་ཆུ་བཏུང་བར་བརྩམས་ནས། ཇི་ཙམ་ན་མྱངས་ན་ཆུ་ཡན་ལག་བརྒྱད་དང་ལྡན་པ་ཡིན་ཏེ། བསིལ་བ་དང ། མངར་བ་དང ། ཡང་བ་དང ། འཇམ་པ་དང ། གསལ་བ་དང ། དྲི་ང་བ་མེད་པ་དང ། འཐུང་ན་མགུལ་ལ་མི་གནོད་པ་དང ། འཐུངས་པ་ན་ལྟོ་མི་ན་བ་ཡིན་ཏེ། དེ་དག་ཚིམ་པར་གྱུར་ནས་རིལ་བ་བཀང་སྟེ་ཤིས་པ་བརྗོད་ནས་འཕགས་ཏེ་དོང་བ་དང ། དེ་དག་ལ་བློ་སྐྱེས་པ། ཤེས་ལྡན་དག་བདག་ཅག་གིས་དེ་ལྟ་བུའི་ཡ་མཚན་མཐོང་ནས་དེ་ལ་ཁྱོད་སུ་ཡིན། ལས་གང་གིས་འདིར་སྐྱེས་ཤེས་མ་དྲིས་པ་ནི་བདག་ཅག་ཉམས་པ་ཡིན་གྱིས། ཚུར་ཤེག་ཕྱིར་ལོག་ལ་དྲིའོ་སྙམ་ནས་དེ་དག་ཐམས་ཅད་འདུས་ཏེ་ཕྱིར་ལོག་ནས་ཤིང་ལྗོན་པ་དེའི་དྲུང་དུ་འཁོད་དེ་སྨྲས་པ། ཤིང་ལྗོན་པ་དེ་ལ་ལྷ་འམ། ཀླུ་འམ། གནོད་སྦྱིན་ནམ་ནམ་མཁའ་ལྡིང་ངམ། དྲི་ཟ་འམ་མི་འམ
8.134a
ཅི་འམ། ལྟོ་འཕྱེ་ཆེན་པོ་གང་གནས་པ་གང་གིས་བདག་ཅག་དགོན་པའི་ལམ་དུ་སོང་བ། གནོད་པ་དང་ཉམ་ང་བ་མི་བདེ་བར་གྱུར་ཅིང་འཆི་བའི་དབང་དུ་གྱུར་པ་རྣམས་ལ་ཆུ་ཡན་ལག་བརྒྱད་དང་ལྡན་པས་ཚིམ་པར་བྱས་པ་དེས་བདག་གང་ཡིན་པ་དང ། ལས་གང་གིས་འདིར་སྐྱེས་པ་སྨྲོས་ཤིག་།ཇི་ཙམ་ན་ཤིང་ལྗོན་པ་དེ་ལས་ཚིག་བྱུང་བ། ཤེས་ལྡན་དག་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བ་ཡིན་པས་ཁོ་བོ་སུ་ཡིན་པ་དང ། ལས་གང་གིས་འདིར་སྐྱེས་པ་ཡིད་ཆེས་པར་མི་འགྱུར་བས་ཇི་ལྟར་སྨྲ་བར་བྱ། དྲང་སྲོང་རྣམས་ཀྱིས་སྨྲས་པ། ཀྱེ་བདག་ཅག་གིས་མངོན་སུམ་ཁོ་ནར་མཐོང་ན་ཇི་ལྟར་ཡིད་ཆེས་པར་མི་འགྱུར། ཐེ་ཚོམ་མ་ཟ་བར་སྨྲོས་ཤིག་།དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཉོན་ཅིག་དང ། ཁོ་བོ་གང་ཡིན་པ་དང ། ལས་གང་གིས་འདིར་སྐྱེས་པ་སྨྲ་བར་བྱའོ། །ཡུལ་ཀོ་ས་ལ་དག་ན་གྲོང་ཁྱེར་མཉན་ཡོད་ཅེས་བྱ་བ་དེ་ན་ཁྱིམ་བདག་མགོན་མེད་ཟས་སྦྱིན་ཞེས་བྱ་བ་འདུག་པ་དེའི་ཁྱིམ་དྲུང་ན་ཁོ་བོ་བཟང་མཁན་བྱེད་ཅིང་འདུག་འདུག་སྟེ། དེ་མགོན་མེད་པ་རྣམས་ལ་ཟས་སྦྱིན་པར་བྱེད་པས་ཡུལ་ཐ་དད་པ་ན་གནས་པའི་སློངས་མོ་བ་དག་ལྷགས་ཤིང་ལྷགས་ཤིང་ཁོ་བོ་ལ་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་གང་ཡིན་ཞེས་དྲིས་ནས། ཁོ་བོས་ལག་པ་གཡས་པ་བརྐྱང་སྟེ། དེ་དག་ལ་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་འདི་ཡིན་ནོ་ཞེས་སྨྲས་པ་དང ། དེ་དག་གིས་དེ་ནས་ལག་པ་གང་བ་དང ། སྣོད་གང་བ་དང ། འབྱོར་པ་ཐོབ་པ་དང ། རྙེད་པ་ཐོབ་ཅིང་འདོང་བ་དེ་དག་ཁོ་བོས་མཐོང་ངོ ། །མཐོང་ནས་མཆོག་ཏུ་དགའ་བ་སྐྱེད་པར་བྱེད་དེ། ཁོ་བོ་ལས་དེས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཤིང ། ཤིང་ལྗོན་པ་འདི་ལ་གནས་ཏེ། དེའི་ཕྱིར་ཁོ་བོའི་ལག་པ་གཡས་པ་ཤིན་ཏུ་ལྷམ་མེ། ལྷན་ནེ། ལྷང་ངེར་གྱུར་ཏོ། །དེ་དག་གིས་ཤིས་པ་བརྗོད་པས་བསྟོད་དེ་དོང་ངོ ། །ཇི་ཙམ་ན་ཕྱོགས་གཞན་ཞིག་ཏུ་ཕྱིན་ནས་བཟའ་བ་དང་བཏུང་བ་ཟད་དེ། དེ་དག་བཀྲེས་པས་གདུངས་ཤིང་སྐོམ་པས་གདུངས་ནས་ཀུན་དུ་བརྟག་པར་བརྩམས་པ་དང ། ཇི་ཙམ་ན་ཧ་ཅང་ཐག་མི་རིང་བ་ཞིག་ན་ཤིང་ལྗོན་པ་ཆེན་པོ་ལོ་མ་སྔོ་ཞིང་སྣུམ་པ་ཞིག་སྣང་ནས་དེ་དག་གིས་སྨྲས་པ། ཤེས་ལྡན་དག་ཤིང་ལྗོན་པ་ཆེན་པོ་ལོ་མ
8.134b
སྔོ་ཞིང་སྣུམ་པ་འདི་ལྟ་བུ་སྣང་སྟེ། སྔར་ཡང་བདག་ཅག་གིས་ཤིང་ལྗོན་པ་འདི་ལྟ་བུ་ཁོ་ནས་ཆུ་གྲུབ་ཀྱིས་འདིར་འདོང་དང་གལ་ཏེ་ན་ཆུང་ཟད་འགྲུབ་པར་འགྱུར་རོ། །ཞེས་དེ་དག་དེར་དོང་སྟེ་གསོལ་བ་གདབ་པར་བརྩམས་པ། ཤེས་ལྡན་དག་ས་ཕྱོགས་དང་ཤིང་ལྗོན་པ་འདི་ལ་ལྷ་འམ། ཀླུ་འམ། གནོད་སྦྱིན་ནམ། ནམ་མཁའ་ལྡིང་ངམ། དྲི་ཟ་འམ། མི་འམ་ཅི་འམ། ལྟོ་འཕྱེ་ཆེན་པོ་གང་གནས་པ་དེ་བདག་ཅག་དྲང་སྲོང་ལྔ་བརྒྱ་བཀྲེས་པས་གདུངས་པ་དང་སྐོམ་པས་གདུངས་པ་རྣམས་ལ་ཟས་དང་སྐོམ་བྱིན་ཅིག་ཅེས་སྨྲས་སོ། །ཇི་ཙམ་ན་ཤིང་ལྗོན་པ་དེ་ལས་ཚིག་བྱུང་བ། ཤེས་ལྡན་དག་དེང་ཤིག་དང་འདི་ནས་ཧ་ཅང་མི་རིང་བ་ན་རྫིང་བུ་ཞིག་ཡོད་པ་དེའི་འགྲམ་ན་ཤིང་ལྗོན་པ་ཞིག་ཡོད་པ་དེའི་དྲུང་ན་འབྲས་ཆན་གྱིས་བྲེ་བོ་གང་ཞིང་འདུག་པ་དེ་ལས་ཟོས་ཤིང་འཐུངས་ནས་བཟའ་བ་དང་བཏུང་བ་ཅི་འདོད་པ་ཁྱེར་ཅིག་།དེ་དག་དོང་བ་དང ། ཇི་ཙམ་ན་རྫིང་བུ་བྱ་ངང་པ་དང ། ཀ་རཎ་ཌ་ཀ་དང ། ངུར་པས་མཛེས་པར་བྱས་པ་ཞིག་འདུག་པ་དེའི་འགྲམ་ན་ཤིང་ལྗོན་པ་ཞིག་འདུག་པ་དེའི་དྲུང་ན་འབྲས་ཅན་ཚོད་མ་སྣ་ཚོགས་དང་བཅས་པས་གང་བ་ཞིག་འདུག་པ་མཐོང་ནས། དེ་དག་གིས་དེར་ཁྲུས་བྱས་ཏེ་ཟོས་ཤིང་ཆུ་མཐུངས་ནས་རིལ་བ་ཆུས་བཀང་སྟེ། བཟའ་བ་དང་བཏུང་བ་ཅི་འདོད་པ་ཁྱེར་ནས་ཤིས་པ་བརྗོད་དེ་དོང་བ་དང ། དེ་དག་ལ་བློ་སྐྱེས་པ། ཤེས་ལྡན་དག་བདག་ཅག་གིས་དེ་ལྟ་བུའི་ཡ་མཚན་མཐོང་ནས་དེ་ལ་ཁྱོད་སུ་ཡིན། ལས་གང་གིས་འདིར་སྐྱེས་ཤེས་མ་དྲིས་པ་ནི་བདག་ཅག་ཉམས་པ་ཡིན་གྱིས་ཚུར་ཤེག་ཕྱིར་ལོག་ལ་དྲིའོ། །སྙམ་ནས་དེ་དག་ཐམས་ཅད་འདུས་ཏེ་ཕྱིར་ལོག་ནས་ཤིང་ལྗོན་པ་དེའི་དྲུང་དུ་འཁོད་དེ་སྨྲས་པ། ཤིང་ལྗོན་པ་འདི་ལ་ལྷ་འམ། ཀླུ་འམ། གནོད་སྦྱིན་ནམ། ནམ་མཁའ་ལྡིང་ངམ། དྲི་ཟ་འམ། མི་འམ་ཅི་འམ། ལྟོ་འཕྱེ་ཆེན་པོ་གང་གནས་པ་གང་གིས་བདག་ཅག་དགོན་པའི་ལམ་དུ་སོང་བ་གནོད་པ་དང ། ཉམ་ང་བ་དང ། མི་བདེ་བར་གྱུར་ཅིང་འཆི་བའི་དབང་དུ་གྱུར་པ་རྣམས་ལ་ཆུ་ཡན་ལག་བརྒྱད་དང་ལྡན་པ་དང ། ཟས་ཀྱིས་ཚིམ་པར་བྱས་པ་དེས་བདག་གང་ཡིན་པ་དང ། ལས་གང་གིས་འདིར་སྐྱེས་པ་སྨྲོས་ཤིག་།ཇི་ཙམ་ན་ཤིང་ལྗོན་པ་དེ་ལས་ཚིག་བྱུང་བ། ཤེས་ལྡན་དག་འཛམ་བུའི་གླིང་པའི་མི་རྣམས་ནི་ཡིད
8.135a
ཆེས་པར་དཀའ་བ་ཡིན་པས་ཁོ་བོ་སུ་ཡིན་པ་དང ། ལས་གང་གིས་འདིར་སྐྱེས་པ་ཡིད་ཆེས་པར་མི་འགྱུར་བས་ཇི་ལྟར་སྨྲ་བར་བྱ། དྲང་སྲོང་རྣམས་ཀྱིས་སྨྲས་པ། ཀྱེ་བདག་ཅག་གིས་མངོན་སུམ་ཁོ་ནར་མཐོང་ན་ཇི་ལྟར་ཡིད་ཆེས་པར་མི་འགྱུར། ཐེ་ཚོམ་མ་ཟ་བར་སྨྲོས་ཤིག་།དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཉོན་ཅིག་དང་ཁོ་བོ་གང་ཡིན་པ་དང ། ལས་གང་གིས་འདིར་སྐྱེས་པ་སྨྲ་བར་བྱའོ། །ཡུལ་ཀོ་ས་ལ་དག་ན་གྲོང་ཁྱེར་མཉན་ཡོད་ཅེས་བྱ་བ་དེ་ན་ཁྱིམ་བདག་མགོན་མེད་ཟས་སྦྱིན་ཞེས་བྱ་བ་ཞིག་འདུག་པ་དེ་མགོན་མེད་པ་རྣམས་ལ་ཟས་སྦྱིན་པར་བྱེད་ནས་རི་བྲགས་ཤིག་ན་བྲམ་ཟེ་ཞིག་འདུག་པ་ལོངས་སྤྱོད་སྲབས་ནས་དེས་བསམ་པ། མཉན་ཡོད་ན་ཁྱིམ་བདག་མགོན་མེད་ཟས་སྦྱིན་འདུག་པ་དེ་མགོན་མེད་པ་རྣམས་ལ་ཟས་སྦྱིན་པར་བྱེད་ཀྱིས་དེའི་གན་དུ་སོང་ན་དེ་ལས་ཅུང་ཟད་འགྲུབ་པར་འགྱུར་རོ་སྙམ་ནས་དེ་དེའི་གན་དུ་སོང་བ་དང ། ཁྱིམ་བདག་མགོན་མེད་ཟས་སྦྱིན་ཡང་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་གསོལ་བར་འདོད་ནས་རྒྱལ་བྱེད་ཀྱི་ཚལ་དུ་འཕགས་པ་ན། དེས་དེ་མཐོང་ནས་སྨྲས་པ། ཁྱིམ་བདག་བདག་ལ་ཟས་ཀྱི་མགྲོན་གྱིས་ཤིག་།དེས་དེ་ལ་སྨྲས་པ། བྲམ་ཟེ་ཚུར་ཤོག་།རྒྱལ་བྱེད་ཀྱི་ཚལ་དུ་འདོང་ལ་དེར་ཟོ་ཤིག་།དེ་དེ་དང་ལྷན་ཅིག་འཕགས་པ་དང ། ཇི་ཙམ་ན་ཁྱིམ་བདག་མགོན་མེད་ཟས་སྦྱིན་གྱིས་ལམ་ཀར་ཞོའི་བུམ་པ་ཞིག་རྙེད་ནས་དེས་དེ་བྲམ་ཟེ་དེ་ལ་བྱིན་ནས་སྨྲས་པ། བྲམ་ཟེའི་ཞོའི་བུམ་པ་འདི་དགེ་འདུན་ལ་བྲིམས་ཤིག་།ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཞལ་ཟས་བསོད་པས་ཚིམ་པར་བྱས་པ་དང ། བྲམ་ཟེ་དེས་ཀྱང་ཞོའི་བུམ་པ་དེ་དགེ་འདུན་ལ་བྲིམས་སོ། །ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ནས་ཁྱིམ་པ་དག་ཟན་སྦྱིན་པར་བརྩམས་ཏེ། དེས་ཁྱིམ་པ་གཞན་དག་ལ་ནི་ཟས་བསོད་པ་བྱིན། བྲམ་ཟེ་དེ་ལ་ནི་ངན་པ་བྱིན་པ་དང ། དེས་དེ་ལ་སྨྲས་པ། ཁྱིམ་བདག་རབ་ཏུ་བྱུང་བ་རྣམས་ནི་བསླབ་པ་ཡང་དག་པར་བླངས་པ་ཡིན་པས་རེ་ཤིག་འདི་དག་ལ་ནི་བསོད་པ་སྦྱིན་པར་རིགས་ན། བདག་ཅག་ཁྱིམ་པ་བསླབ་པ་ཡང་དག་པར་མ་བླངས་པར
8.135b
འདྲ་ན་ཅིའི་ཕྱིར་ཁྱིམ་པ་གཞན་དག་ལ་ནི་ཟས་བསོད་པ་སྦྱིན་ལ་བདག་ལ་ནི་ཟས་ངན་པ་སྦྱིན། དེས་དེ་ལ་སྨྲས་པ། བྲམ་ཟེ་ཁྱིམ་པ་འདི་དག་ཀྱང་བསླབ་པ་ཡང་དག་པར་བླངས་པ་ཡིན་ཏེ། འདི་དག་གིས་ཀྱང་ཡན་ལག་བརྒྱད་དང་ལྡན་པའི་གསོ་སྦྱོང་བླངས་སོ། །དེས་དེ་ལ་སྨྲས་པ། ཁྱིམ་བདག་གལ་ཏེ་བདག་གིས་ཀྱང་ཡན་ལག་བརྒྱད་དང་ལྡན་པའི་གསོ་སྦྱོང་ལེན་ན་བདག་ལ་ཡང་ཟས་བསོད་པ་སྦྱིན་ནམ། དེས་དེ་ལ་སྨྲས་པ་སྦྱིན་ནོ། །དེས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་པ་དང ། དེ་ནས་ཁྱིམ་བདག་མགོན་མེད་ཟས་སྦྱིན་གྱིས་དེ་ཟས་བསོད་པས་ཚིམ་པར་བྱས་ནས་དེས་ཟོས་ཏེ་འཕགས་པ་དང ། ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། བྲམ་ཟེ་ཡུད་ཙམ་ཞིག་སྡོད་ཅིག་དང་སྐོམ་འོང་བར་འགྱུར་རོ། །དེས་སྐོམ་འཐུངས་ཏེ་སོང་བ་དང ། ཉི་མ་ནུབ་པའི་དུས་ལ་བབ་ནས་མཉན་ཡོད་དང་ཧ་ཅང་མི་རིང་བ་ན་རི་བྲག་ཤིག་ཡོད་པ་དེར་བྲམ་ཟེའི་ཁྱིམ་ཞིག་ཏུ་གནས་པ་དང ། བྲམ་ཟེ་དེས་དེ་ལ་སྨྲས་པ། བྲམ་ཟེ་ཟན་ཟོ་ཤིག་།དེས་སྨྲས་པ། ཁོ་བོས་ཟན་མི་ཟའོ། །དེས་སྨྲས་པ། ཅིའི་ཕྱིར། དེས་སྨྲས་པ། ཁོ་བོ་དགེ་སྦྱོང་གཽ་ཏ་མ་ལ་ཡན་ལག་བརྒྱད་དང་ལྡན་པའི་གསོ་སྦྱོང་བླངས་སོ། །དེས་དེ་ལ་སྨྲས་པ། བྲམ་ཟེ་གལ་ཏེ་རེ་ཤིག་ཟ་ན་དེ་ལྟ་ན་ལེགས། གལ་ཏེ་མི་ཟ་ན་ཁོ་བོའི་ཁྱིམ་དུ་གནས་པར་མི་བྱའོ། །དེས་དུས་མ་ཡིན་པར་ཟོས་ནས་གསོ་སྦྱོང་རལ་ལོ། །རི་བྲགས་ན་གནས་པའི་བྲམ་ཟེ་གང་ཡིན་པ་གང་གིས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ནས་དྲལ་བ་དེ་ནི་ཁོ་བོ་ཡིན་ཏེ། ཁོ་བོས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ཏེ། ཐམས་ཅད་མ་དྲལ་ན་ཁོ་བོ་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་བ་ཞིག་ན། ཁོ་བོས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ནས་དུས་མ་ཡིན་པར་ཟོས་ཏེ། གསོ་སྦྱོང་དྲལ་བས་ཁོ་བོ་རྒྱལ་ཆེན་བཞིའི་ལྷ་རྣམས་ཀྱི་ནང་དུ་སྐྱེས་ཏེ། ཤིང་ལྗོན་པ་འདི་ལ་གནས་ཤིང ། དེའི་ཕྱིར་ཁོ་བོ་ལ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་ལྷའི་བུ་རྫུ་འཕྲུལ་ཆེ་བ་མཐུ་ཆེ་བ་གསོ་སྦྱོང་རལ་ཞེས་བྱ་བར་ཤེས་སོ།། །།
8.136a
འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་གསུམ་པ། དྲང་སྲོང་དེ་དག་མཆོག་ཏུ་ངོ་མཚར་སྐྱེས་ཏེ་སྨྲས་པ། ཤེས་ལྡན་དག་བདག་ཅག་དྲང་སྲོང་རྣམས་ཀྱིས་དུས་འདི་སྲིད་དུ་བརྟུལ་ཞུགས་ལ་གནས་པས་ཀྱང་འདིའི་འབྲས་བུ་ཅིར་འགྱུར་མི་ཤེས་ན། ལྷའི་བུ་གསོ་སྦྱོང་རལ་འདིས་བྲམ་ཟེར་གྱུར་པ་ན་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ཤིང ། དེ་དྲལ་ན་ཡང་འདི་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཀྱིས། བདག་ཅག་ཀྱང་གང་དུ་འདིས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་པ་དེར་འདོང་ངོ ། །དེ་ལྟར་བྱའོ་ཞེས་དེ་དག་གིས་གྲོས་བྱས་ཏེ། མཉན་ཡོད་དུ་འཕགས་ནས་ཇི་ཙམ་ན་མཐར་གྱིས་ཀཽ་ཤམྦཱིར་ཕྱིན་པ་དང ། ཁྱིམ་བདག་གདངས་ཅན་གྱི་སྦྱིན་པའི་ཞལ་ཏ་བྱེད་པའི་མི་རྣམས་ཀྱིས་དེ་དག་མཐོང་ནས། དེ་དག་གིས་ཁྱིམ་བདག་གདངས་ཅན་ལ་སྦྲན་པ། ཁྱིམ་བདག་ཁྱོད་ཀྱིས་བདག་ཅག་ལ་བསྒོ་བ། སྔོན་མ་བྱུང་བའི་རྟགས་དང་ཆ་ལུགས་ཅན་དག་མཐོང་ན་ཁོ་བོ་ལ་སྦྲོན་ཅིག་ཅེས་བྱུང་བ་དེ་དག་ལྷགས་ཏེ་སྒོ་ན་སྡོད་དོ། །དེས་སྨྲས་པ། འཇུག་ཏུ་ཆུག་ཤིག་།དེ་དག་གིས་འཇུག་ཏུ་བཅུག་པ་དང ། ཁྱིམ་བདག་གདངས་ཅན་གྱིས་དེ་དག་མཐོང་ནས་དྲིས་པ། ཤེས་ལྡན་དག་ཁྱེད་ཅག་གང་ནས་འོངས། དེ་དག་གིས་སྨྲས་པ། ཁྱིམ་བདག་ལྷོ་ལམ་ནས་སོ། །དེས་སྨྲས་པ། ཤེས་ལྡན་དག་ཁྱེད་ཀྱིས་ལྷོ་ལམ་དུ་ངོ་མཚར་བ་མཐོང་བ་དང་ཐོས་པ་ཅི་ཡོད། དེ་དག་གིས་སྨྲས་པ། ཁྱིམ་བདག་རེ་ཤིག་བདག་ཅག་གིས་སྔར་མཐོང་བ་དང་ཐོས་པའི་ངོ་མཚར་གཞན་དག་ལྟ་ཞོག་གི། ཏེ་པོར་མཐོང་བ་དང་ཐོས་པའི་ངོ་མཚར་གང་ཡིན་པ་དག་སྨྲ་བར་བྱས་ཉོན་ཅིག་།དེས་སྨྲས་པ། ཤེས་ལྡན་དག་སྨྲོས་ཤིག་དང་ཁོ་བོ་ངོ་མཚར་དེ་དག་ཉན་ཏོ། །དེ་དག་གིས་ཁྱིམ་བདག་གདངས་ཅན་ལ་ཇི་ལྟར་གྱུར་པ་རྒྱས་པར་བརྗོད་པ་དང ། ཁྱིམ་བདག་གདངས་ཅན་གྱིས་ཐོས་ནས་མཆོག་ཏུ་ངོ་མཚར་སྐྱེས་ཏེ་དེ་དག་ཟན་བྱིན་ནས་སྨྲས་པ། ཤེས་ལྡན་དག་གང་དུ་འདེང ། དེ་དག་གིས་སྨྲས་པ། ཁྱིམ་བདག་མཉན་ཡོད་དུ་འདོང་ངོ ། །ཤེས་ལྡན་དག་དེ་ན་ཅི་ཡོད། ཁྱིམ་བདག་དེ་ན་ལྷའི་བུ་གསོ་སྦྱོང་རལ་གྱིས་གང་ལ་བརྟེན་ཏེ། ཡན་ལག་བརྒྱད་དང་ལྡན་པའི་གསོ་སྦྱོང་བླངས་པའི་ཁྱིམ་བདག་མགོན་མེད་ཟས་སྦྱིན་ཡོད་དོ། །དེས་སྨྲས་པ། ཤེས་ལྡན་དག
8.136b
གལ་ཏེ་དེ་ལྟ་ན་དེ་ཁོ་བོའི་ཡང་མ་མཐོང་བའི་གྲོགས་ཡིན་གྱིས་འདི་ཉིད་དུ་དབྱར་གྱི་མཚན་མོ་གྱིས་ལ་དབྱར་འདས་ནས་ཁོ་བོ་དང་ལྷན་ཅིག་འདོང་ངོ ། །དེ་དག་དེ་ཉིད་དུ་དབྱར་གྱི་མཚན་མོ་གནས་ཏེ། དབྱར་འདས་ནས་མཉན་ཡོད་དུ་འཕགས་པ་དང་ཁྱིམ་བདག་གདངས་ཅན་གྱིས་བད་སའི་རྒྱལ་པོ་ཤར་པ་ལ་སྨྲས་པ། ལྷ་བདག་མཉན་ཡོད་དུ་བགྱི་བ་ཅུང་ཞིག་མཆིས་ན། གལ་ཏེ་ལྷས་གནང་ན་དེར་མཆིའོ། །རྒྱལ་པོས་སྨྲས་པ། ཁྱིམ་བདག་གལ་ཏེ་དེ་ལྟ་ན་སོང་ལ་ཁྱོད་ཀྱིས་དོན་བསྒྲུབ་པ་བྱས་ནས་མྱུར་དུ་ཕྱིར་ཤོག་ཤིག་།དེ་རྒྱལ་པོས་གནང་ནས་དྲང་སྲོང་ལྔ་བརྒྱ་པོ་དེ་དག་དང་ལྷན་ཅིག་འཕགས་ཏེ་མཐར་གྱིས་མཉན་ཡོད་དུ་ཕྱིན་ནས་སྐྱེད་མོས་ཚལ་ན་སྡོད་ཅིང་འདུག་གོ། །ཁྱིམ་བདག་མགོན་མེད་ཟས་སྦྱིན་གྱིས་ཁྱིམ་བདག་གདངས་ཅན་འདིར་འོངས་ཏེ། སྐྱེད་མོས་ཚལ་ན་སྡོད་ཅིང་འདུག་གོ་ཞེས་ཐོས་སོ། །ཐོས་ནས་ཀྱང་དེས་བསམས་པ། བདག་གིས་ཁྱིམ་བདག་གདངས་ཅན་མ་ཚོར་བ་ཁོ་ནར་གནས་སུ་འཇུག་ཏུ་གཞུག་པ་ནི་བདག་གི་ཚུལ་དང་འཐུན་པ་མ་ཡིན་གྱིས། བཀུར་སྟི་ཆེན་པོས་འཇུག་ཏུ་གཞུག་གོ་སྙམ་ནས་དེས་དེ་བཀུར་སྟི་ཆེན་པོས་འཇུག་ཏུ་བཅུག་སྟེ་ལམ་གྱིས་དུབ་པའི་ངལ་བསོས་ནས་ཟན་བྱིན་ནོ། །དེ་ནས་དྲང་སྲོང་དེ་དག་ལྷགས་ནས་ཁྱིམ་བདག་མགོན་མེད་ཟས་སྦྱིན་གྱིས་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། ཤེས་ལྡན་དག་ཁྱེད་ཅག་ག་ལས་འོངས། འདིར་ཅི་ལ་འོངས། དེ་དག་གིས་སྨྲས་པ། ཁྱིམ་བདག་ཁྱོད་ཀྱིས་ལྷའི་བུ་གསོ་སྦྱོང་རལ་ལ་གང་བྱིན་པ་དེ་བདག་ཅག་ལ་ཡང་བྱིན་ཅིག་དེས་སྨྲས་པ། ཤེས་ལྡན་དག་མི་དྲན་ནོ། །ཁྱིམ་བདག་བདག་ཅག་གིས་ཁྱོད་ལ་དྲན་པར་བྱའོ། །ཤེས་ལྡན་དག་ལེགས་སོ། །དེ་དག་གིས་དྲན་པར་བྱས་ནས་དེས་སྨྲས་པ། ཤེས་ལྡན་དག་ཅི་ཁོ་བོ་ལས་ལེན་ནམ། འོན་ཏེ་བཅོམ་ལྡན་འདས་ལས་ལེན། ཁྱིམ་བདག་ཁྱོད་ཀྱིས་སུ་ལས་བླངས། ཤེས་ལྡན་དག་བཅོམ་ལྡན་འདས་ལས་སོ། །ཁྱིམ་བདག་གལ་ཏེ་དེ་ལྟ་ན་བདག་ཅག་ཀྱང་དེ་ཁོ་ན་ལས་ལེན་ཏོ། །ཤེས་ལྡན་དག་ལེགས་ཀྱིས་དེ་ལྟར་གྱིས་ཤིག་ཅེས་དེས་དེ་དག་ཁྲིད་དེ་བཅོམ་ལྡན་འདས་ག་ལ་བ་དེར་སོང་ངོ ། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་མདུན་ན་ཆོས་སྟོན་ཅིང་བཞུགས་སོ། །བཅོམ་ལྡན་འདས་ཀྱིས
8.137a
ཁྱིམ་བདག་མགོན་མེད་ཟས་སྦྱིན་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་བདག་མགོན་མེད་ཟས་སྦྱིན་ཐག་རིང་པོ་ཁོ་ན་ནས་འོང་བ་མཐོང་ངམ། བཙུན་པ་མཐོང་ངོ ། །དགེ་སློང་དག་ཁྱིམ་བདག་མགོན་མེད་ཟས་སྦྱིན་འདི་སྐྱེས་དང་བཅས་པས་འོང་སྟེ། དེ་བཞིན་གཤེགས་པའི་སྐྱེས་ནི་འདི་ལྟར་གདུལ་བའི་སྐྱེས་ལྟ་བུ་གཞན་མེད་དོ། །དེ་ནས་ཁྱིམ་བདག་མགོན་མེད་ཟས་སྦྱིན་དྲང་སྲོང་ལྔ་བརྒྱའི་འཁོར་དང་བཅས་པས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་འདི་སྐད་ཅེས་གསོལ་ཏོ། །བཙུན་པ་དྲང་སྲོང་ལྔ་བརྒྱ་པོ་འདི་དག་བཅོམ་ལྡན་འདས་ལས་ཡན་ལག་བརྒྱད་དང་ལྡན་པའི་གསོ་སྦྱོང་ལེན་པར་འཚལ་ན། དེའི་སླད་དུ་བཅོམ་ལྡན་འདས་ཀྱིས་འདི་དག་ཅི་ནས་ཀྱང་སངས་རྒྱས་དང ། ཆོས་དང ། དགེ་འདུན་ལ་སྐྱབས་སུ་མཆི་བ་དང ། དགེ་བསྙེན་ཉིད་དུ་འཚལ་བར་འགྱུར་བ་དེ་ལྟར་ཆོས་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་དྲང་སྲོང་ལྔ་བརྒྱ་པོ་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་དྲང་སྲོང་ལྔ་བརྒྱ་པོ་དེ་དག་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེ་དག་གིས་བདེན་པ་མཐོང་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་གསོལ་པ། བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང ། རྫོགས་པར་བསྙེན་པ་དགེ་སློང་གི་དངོས་པོ་འཐོབ་ཅིང་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་པས་རབ་ཏུ་ཕྱུང་ཞིང་དགེ་སློང་དག་ཚུར་ཤོག་།ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང ། དེ་དག་བཅོམ་ལྡན་འདས་ཀྱི་བཀའི་འཇུག་ཁོ་ནར་སྐྲ་བྱི་བ་དང ། སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང ། ལག་པ་ལྷུང་བཟེད་དང ། བྱ་མ་བུམ
8.137b
གྱིས་འབྲེལ་བ་དང ། དགེ་སློང་རྫོགས་པར་བསྙེན་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །བཅོམ་ལྡན་འདས་ཀྱིས་དེ་དག་ལ་གདམས་ངག་བྱིན་ནས་དེ་དག་གིས་སྤྲོ་བ་དང ། འབད་པ་དང ། བརྩལ་བ་དག་གིས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་བརྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཁྱིམ་བདག་གདངས་ཅན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་གདངས་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེང་སྟོད་པར་མཛད། ཡང་དག་པར་རབ་ཏུ་དགའ་བར་མཛད་ཅིང ། སངས་རྒྱས་བཅོམ་ལྡན་འདས་རྣམས་ཀྱི་དུས་སྔར་མཛད་པའི་ཆོས་དང་ལྡན་པའི་བཀའ་མཆིད་གང་ཡིན་པ་འདི་ལྟ་སྟེ། སྦྱིན་པའི་བཀའ་མཆིད་དང ། ཚུལ་ཁྲིམས་ཀྱི་བཀའ་མཆིད་དང ། མཐོ་རིས་ཀྱི་བཀའ་མཆིད་དང ། འདོད་པ་རྣམས་ཀྱི་རོ་མྱང་བའི་ཉེས་དམིགས་དང ། ཀུན་ནས་ཉོན་མོངས་པ་དང ། རྣམ་པར་བྱང་བ་དང ། ངེས་པར་འབྱུང་བ་དང ། རབ་ཏུ་དབེན་པའི་ཕན་ཡོན་དང ། རྣམ་པར་བྱང་བའི་ཕྱོགས་དང་འཐུན་པའི་ཆོས་དག་རྒྱ་ཆེར་སྟོན་པར་མཛད་དོ། །གང་གི་ཚེ་བཅོམ་ལྡན་འདས་ཀྱིས་དེ་སེམས་རངས་པ་དང ། སེམས་ཉམས་བདེ་བ་དང ། སེམས་དགའ་བ་དང ། སེམས
8.138a
ལ་སྒྲིབ་པ་མེད་པ་དང ། ཡང་དག་ཕུལ་གྱི་ཆོས་བསྟན་པ་ཀུན་ཤེས་པའི་སྐལ་བ་དང་ལྡན་ཞིང་མཐུ་ཡོད་པར་གཟིགས་པ་དེའི་ཚེ་ན་སངས་རྒྱས་བཅོམ་ལྡན་འདས་རྣམས་ཀྱིས་ཡང་དག་ཕུལ་གྱི་ཆོས་བསྟན་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་དང ། ཀུན་འབྱུང་བ་དང ། འགོག་པ་དང ། ལམ་དག་རྒྱ་ཆེར་སྟོན་པར་མཛད་དོ། །འདི་ལྟ་སྟེ་དཔེར་ན་གོས་དག་པ་ནག་ནོག་མེད་པ་ཁ་བསྒྱུར་དུ་རུང་བ། ཚོན་དུ་བཅུག་ན་ཚོན་ལེགས་པར་འཇེན་པར་འགྱུར་བ་དེ་བཞིན་དུ། ཁྱིམ་བདག་གདངས་ཅན་གྱིས་ཀྱང་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང ། ཀུན་འབྱུང་བ་དང ། འགོག་པ་དང ། ལམ་མངོན་པར་རྟོགས་པར་གྱུར་ཏོ། །དེ་ནས་ཁྱིམ་བདག་གདངས་ཅན་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་རྒལ་བ་དང ། ཐེ་ཚོམ་ལས་རྒལ་བ་དང ། སྟོན་པའི་བསྟན་པ་ལ་གཞན་གྱི་དྲིང་མི་འཇོག་པ་དང་གཞན་གྱིས་མི་བཀྲི་ཞིང་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས་བདག་དགེ་བསྙེན་དུ་གཟུང་དུ་གསོལ། དེང་སླན་ཅད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་མངོན་པར་དད་པས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་བཀའ་སྩལ་པ། ཁྱིམ་བདག་ཁྱོད་མིང་ཅི། བཙུན་པ་བདག་ནོར་བཟངས་ཤེས་བགྱི་བ་ལས་རྒྱལ་པོ་ཤར་པས་བདག་གདངས་ལས་འཚལ་བས་དེའི་སླད་དུ་བདག་སྐྱེ་བོ་དག་གིས་ཁྱིམ་བདག་གདངས་ཅན་ཞེས་བགྱི་བར་འཚལ་ཏོ། །བཅོམ་ལྡན་འདས་ཀཽ་ཤམྦཱིར་གཤེགས་པར་གསོལ། བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ཇི་སྲིད་འཚོའི་བར་དུ་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་གིས་བསྙེན་བཀུར་འཚལ་ལོ། །ཁྱིམ་བདག་ཀཽ་ཤམྦཱི་ན་གཙུག་ལག་ཁང་ཡོད
8.138b
དམ། བཙུན་པ་མ་མཆིས་སོ། །ཁྱིམ་བདག་དགེ་སློང་དག་ནི་གང་ན་གཙུག་ལག་ཁང་ཡོད་པ་དེར་བགྲོད་པ་དང ། འགྲོ་བ་དང ། གནས་པར་སེམས་སོ། །བཅོམ་ལྡན་འདས་གཤེགས་སུ་གསོལ་དང ། བདག་གིས་ཇི་ལྟར་ཀཽ་ཤམྦཱི་ན་གཙུག་ལག་ཁང་མཆིས་པར་འགྱུར་བ་དང ། དགེ་སློང་རྣམས་ཀྱང་བགྲོད་པ་དང ། མཆི་བ་དང ། གནས་པར་སེམས་པར་འགྱུར་བ་དེ་ལྟར་བགྱིའོ། །བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས། དེ་ལ་མཉན་ཡོད་ན་བྱ་བ་འམ། བྱེད་པ་ཅི་ཡོད་པ་ཐམས་ཅད་བྱས་ཤིང་བསྒྲུབས་ནས་ཡང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་གྲོགས་དགེ་སློང་འགའ་ཞིག་སྩོལ་ཅིག་དང་བདག་གིས་དེ་དང་ལྷན་ཅིག་བཅོམ་ལྡན་འདས་ཀྱི་སླད་དུ་གཙུག་ལག་ཁང་རྩིག་ཏུ་སྩལ་བར་བགྱིའོ། །བཅོམ་ལྡན་འདས་ཀྱིས་ཁྱིམ་བདག་གདངས་ཅན་འཁོར་དང་བཅས་པ་དང ། ཀཽ་ཤམྦཱི་ན་གནས་པའི་སྐྱེ་བོའི་ཚོགས་དག་དགེ་སློང་གང་གི་གདུལ་བ་ཡིན་སྙམ་དུ་དགོངས་ན་དགེ་སློང་སྐུལ་བྱེད་ཆེན་པོའི་གདུལ་བ་ཡིན་པར་གཟིགས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྐུལ་བྱེད་ཆེན་པོ་ལ་བཀའ་སྩལ་པ། སྐུལ་བྱེད་ཁྱིམ་བདག་གདངས་ཅན་འཁོར་དང་བཅས་པ་དང ། ཀཽ་ཤམྦཱི་ན་གནས་པའི་སྐྱེ་བོའི་ཚོགས་ལ་སོམས་ཤིག་།ཚེ་དང་ལྡན་པ་སྐུལ་བྱེད་ཆེན་པོས་བཅོམ་ལྡན་འདས་ལས་ཅང་མི་སྨྲ་བས་དང་དུ་བླངས་སོ། །དེ་ནས་ཚེ་དང་ལྡན་པ་སྐུལ་བྱེད་ཆེན་པོ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང ། ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་ཞུགས་སོ། །མཉན་ཡོད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང །
8.139a
ཆོས་གོས་ཐོགས་ནས་ཁྱིམ་བདག་གདངས་ཅན་དང་འགྲོགས་ཏེ། ཀཽ་ཤམྦཱི་ག་ལ་བ་དེ་ལོགས་སུ་སོང་ནས་མཐར་གྱིས་རྒྱུ་ཞིང་འགྲོ་བ་ན་ཀཽ་ཤམྦཱིར་ཕྱིན་ཏོ། །དེ་ནས་ཁྱིམ་བདག་གདངས་ཅན་ཀཽ་ཤམྦཱིར་མ་ཞུགས་པ་ཁོ་ནར་ཀུན་དགའ་ར་བ་ནས་ཀུན་དགའི་ར་བར་སྐྱེད་མོས་ཚལ་ནས་སྐྱེད་མོས་ཚལ་དུ། ཚལ་ནས་ཚལ་དུ་དང་གོལ་བར་སོང་སྟེ། གང་དུ་བདག་གིས་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྩིག་ཏུ་གཞུག་པའི་ས་ཕྱོགས་ཀཽ་ཤམྦཱི་ནས་ཧ་ཅང་ཡང་མི་རིང་ཧ་ཅང་ཡང་མི་ཉེ་བ་ཉིན་མོ་རྒྱུན་ལུགས་ཉུང་ཞིང་བླག་ཅོར་ཆུང་བ། མཚན་མོ་སྒྲ་ཆུང་ཞིང་འུར་སྒྲ་ཆུང་བ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱི་རེག་པ་ཉུང་བ་དེ་ལྟ་བུ་ཅི་ཡོད་ཅེས་བཙལ་ན། ཁྱིམ་བདག་གདངས་ཅན་གྱིས་རང་གི་ཀུན་དགའ་ར་བ་ཀཽ་ཤམྦཱི་ནས་ཧ་ཅང་ཡང་མི་རིང་ཧ་ཅང་ཡང་མི་ཉེ་བ་ཉིན་མོ་རྒྱུན་ལུགས་ཉུང་ཞིང་བླག་ཅོར་ཆུང་བ། མཚན་མོ་སྒྲ་ཆུང་ཞིང་འུར་སྒྲ་ཆུང་བ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱི་རེག་པ་ཉུང་བར་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། ས་ཕྱོགས་འདི་བཟང་གིས་འདིར་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྩིག་ཏུ་གཞུག་གོ་སྙམ་མོ། །དེ་ན་ཁྱིམ་བདག་གདངས་ཅན་དང ། ཚེ་དང་ལྡན་པ་སྐུལ་བྱེད་ཆེན་པོས། སྐྱེད་མོས་ཚལ་དེར་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྟ་བབས་མཐོན་པོ་དང་ལྡན་པ། སྐར་ཁུང་དང ། སྐར་ཁུང་ཟླུམ་པོ་དང ། ལན་ཀན་གྱིས་བརྒྱན་པ་རྩིག་ཏུ་བཅུག་གོ། །དེ་ནས་གཙུག་ལག་ཁང་བྱས་ཤིང་ཟིན་ནས་ཁྱིམ་བདག་གདངས་ཅན་གྱིས་ཚེ་དང་ལྡན་པ་སྐུལ་བྱེད་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བཅོམ་ལྡན་འདས་ཤུལ་དུ་གཤེགས་པའི་གཤེགས་རྒོངས་ཀྱི་ཚད་ཅི་ཙམ། ཁྱིམ་བདག་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་དང་འདྲའོ། །འཕགས་པ་འཁོར་ལོས་སྒྱུར་བའི་རྒྱལ་པོའི་ཇི་ཙམ། ཁྱིམ་བདག་འཁོར་ལོས་སྒྱུར་བའི་རྒྱལ་པོ་ལམ་དུ་འགྲོ་བའི་རྒོངས་མལ་ནི་རྒྱང་གྲགས་བཅུའོ། །ཁྱིམ་བདག་གདངས་ཅན་གྱིས་རྒྱང་གྲགས་བཅུ་བཅུར་གཤེགས་རྒོངས་ས་དག་ཤོམ་དུ་བཅུག་ནས་བཅོམ་ལྡན་འདས་ཀྱི་སྤྱན་སྔར་ཕོ་ཉ་བཏང་སྟེ།
8.139b
བཅོམ་ལྡན་འདས་ཀཽ་ཤམྦཱིར་གཤེགས་སུ་གསོལ། བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཇི་སྲིད་འཚོའི་བར་དུ་ན་བཟའ་དང ། བསོད་སྙོམས་དང ། གནས་མལ་དང ། བསྙུང་བའི་རྐྱེན་དང ། སྨན་གྱི་ཡོ་བྱད་དག་གིས་བསྙེན་བཀུར་བགྱིའོ་ཞེས་གསོལ་ཏོ། །ཕོ་ཉས་ཀྱང་བཅོམ་ལྡན་འདས་ཀྱི་སྤྱན་སྔར་སོང་སྟེ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་བཅོམ་ལྡན་འདས་བད་ས་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་བད་ས་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་བད་ས་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་བད་ས་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུག་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན
8.140a
ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་བཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་དུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པའི་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ་ཀུན་ཤེས་ཀཽཎྜི་ནྱ་དང ། རླངས་པ་དང ། མིང་ཅེན་དང ། མ་འགགས་པ་དང ། ཤཱ་རིའི་བུ་དང ། མཽད་གལ་གྱི་བུ་དང ། འོད་སྲུང་དང ། ཀུན་དགའ་བོ་དང ། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང ། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ། ཀཽ་ཤམྦཱི་ག་ལ་བ་དེར་རྒྱུ་ཞིང་གཤེགས་ནས་མཐར་གྱིས་རྒྱུ་ཞིང་གཤེགས་པ་ན་ཀཽ་ཤམྦཱིར་བྱོན་ཏོ། །དེ་ནས་ཁྱིམ་བདག་གདངས་ཅན་གྱིས་གཙུག་ལག་ཁང་ཡོ་བྱད་ཐམས་ཅད་དང་ལྡན་པ་དེ་བཅོམ་ལྡན་འདས་ཉན་ཐོས་ཀྱི
8.140b
དགེ་འདུན་དང་བཅས་པ་ལ་ཕུལ་ནས། འདི་ལྟར་གནས་བརྟན་དག་གིས་ཀྱང ། བཅོམ་ལྡན་འདས་ཀཽ་ཤམྦཱི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ་ཞེས་མདོ་སྡེའི་མཐའ་ཉེ་བར་སྦྱར་ཏོ། །དེ་ནས་ཁྱིམ་བདག་གདངས་ཅན་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་གཙུག་ལག་ཁང་ཕུལ་ནས་དགའ་བ་དང་མཆོག་ཏུ་དགའ་བ་སྐྱེས་ཏེ་རང་གི་ཁྱིམ་དུ་སོང་ངོ ། །དེ་ནས་ཚེ་དང་ལྡན་པ་སྐུལ་བྱེད་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་སྐུལ་བྱེད་ཆེན་པོས་འདི་སྐད་ཅེས་གསོལ་ཏོ། །བཙུན་པ་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ། རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གདགས་སུ་རུང་ངམ། བཅོམ་ལྡན་འདས་ཀྱིས་དེ་ལ་བཀའ་སྩལ་པ། སྐུལ་བྱེད་རུང་སྟེ། སྐུལ་བྱེད་བདུན་པོ་འདི་དག་ནི་གང་དག་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དག་ཡིན་ཏེ། བདུན་གང་ཞེ་ན། སྐུལ་བྱེད་འདི་ལ་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ།
8.141a
སྣང་བ་ཆེ་བ། རྒྱས་པ་ཆེ་བ་དང་པོ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་འཇུག་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གཉིས་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང ། ཁྲིའུ་དང ། སྟན་ནང་ཚངས་ཅན་དང ། ལ་བ་དང ། སྔས་དང ། གོར་བུ་དག་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་དུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གསུམ་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་རྗེས་སུ་འཐུན་པའི་མཆོད་སྦྱིན་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ། བཞི་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་གློ་བུར་དུ་འོངས་པ་དང་འགྲོ་བར་ཆས་པ་ལ་སྦྱིན་པ་སྦྱིན་པར
8.141b
བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་ལྔ་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་ནད་པ་དང་ནད་གཡོག་ལ་སྦྱིན་པ་སྦྱིན་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དྲུག་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པས་རླུང་ལངས་པ་འམ། ཡུལ་ངན་བྱུང་བ་འམ། ཆར་པ་བབ་པ་འམ། ལྷགས་པ་བྱུང་བ་གང་དག་ཡིན་པ་དེ་ལྟ་བུའི་རླུང་ལངས་པ་འམ། ཡུལ་ངན་བྱུང་བ་འམ། ཆར་བབ་པ་འམ། ལྷགས་པ་བྱུང་བའི་ཚེ་དགེ་འདུན་ལ་འབྲས་ཆན་དག་གམ། སྐྱོ་མ་དག་གམ། ཐུག་པའི་བཏུང་བ་དག་བསྐྱལ་ཏེ། འདིས་འཕགས་པ་འདི་དག་ལུས་མི་རླན་པ་དང ། ཆོས་གོས་མི་གཤེར་བ་དང ། ལོངས་སྤྱད་ན་བདེ་བ་ལ་རེག་པར་འགྱུར་རོ་སྙམ་པས་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་བདུན་པ་ཡིན་ནོ། །སྐུལ་བྱེད་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་བསོད་ནམས་སམ། བསོད་ནམས་ཀྱི་འབྲས་བུ་འམ།
8.142a
བསོད་ནམས་ཀྱི་འབྲས་བུ་རྣམ་པར་སྨིན་པ་འདི་ཙམ་མོ་ཞེས་བསོད་ནམས་ཀྱི་ཚད་གཟུང་བར་མི་ནུས་ཏེ། འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །སྐུལ་བྱེད་འདི་ལྟ་སྟེ་དཔེར་ན་གང་དུ་ཆུ་ཀླུང་ཆེན་པོ་ལྔ་པོ་འདི་ལྟ་སྟེ། གང་གཱ་དང ། ཡ་མུ་ན་དང ། ས་ར་ཡུ་དང ། གནས་ཅན་དང ། མ་ཧི་ཞེས་བྱ་བ་ཐ་མི་དད་པར་འབབ་པར་འགྱུར་བ་དེ་ལ་ནི་ཆུ་འམ། ཆུའི་བུམ་པ་འམ། ཆུའི་བུམ་པ་བརྒྱ་ཕྲག་གམ། ཆུའི་བུམ་པ་སྟོང་ཕྲག་གམ། ཆུའི་བུམ་པ་འབུམ་ཕྲག་འདི་སྙེད་ཡོད་དོ་ཞེས་ཆུའི་ཚད་གཟུང་བར་མི་ནུས་སོ། །སྐུལ་བྱེད་དེ་བཞིན་དུ་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་བསོད་ནམས་སམ། བསོད་ནམས་ཀྱི་འབྲས་བུ་འམ། བསོད་ནམས་ཀྱི་འབྲས་བུ་རྣམ་པར་སྨིན་པ་ཡང་འདི་ཙམ་མོ་ཞེས་བསོད་ནམས་ཀྱི་ཚད་གཟུང་བར་མི་ནུས་ཏེ། འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་སྐུལ་བྱེད་ཆེན་པོས་འདི་སྐད་ཅེས་གསོལ་ཏོ། །བཙུན་པ་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ལགས་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གདགས་སུ་རུང་ངམ། བཅོམ་ལྡན་འདས་ཀྱིས་བཀའ་སྩལ་པ། སྐུལ་བྱེད་རུང་སྟེ། སྐུལ་བྱེད་བདུན་པོ་འདི་དག་ནི་གང་དང་ལྡན་ན་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དག་ཡིན་ཏེ་བདུན་གང་ཞེ་ན། སྐུལ་བྱེད་འདི་ལ་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན
8.142b
གཤེགས་པ་འམ། དེ་བཞིན་གཤེགས་པའི་ཉན་ཐོས་གྲོང་ཚིགས་ག་གེ་མོ་ཞིག་ན་ཉེ་བར་བརྟེན་ཅིང་བཞུགས་པ་ཐོས་ཤིང་ཐོས་ནས་ཀྱང་དགའ་བ་དང ། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དང་པོ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དེ་ཉིད་དུ་ཚུར་གཤེགས་པར་རྩོལ་བར་ཐོས་ཤིང་ཐོས་ནས་ཀྱང་དགའ་བ་དང ། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གཉིས་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དེ་ཉིད་ཤུལ་དུ་ཞུགས་པ་ཐོས་ཤིང་ཐོས་ནས་ཀྱང་དགའ་བ་དང ། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན། རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གསུམ་པ་ཡིན་ནོ། །
8.143a
སྐུལ་བྱེད་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དེ་ཉིད་གྲོང་ཚིགས་དེ་ཉིད་དུ་བྱོན་པར་ཐོས་ཤིང་ཐོས་ནས་ཀྱང་དགའ་བ་དང ། མཆོག་ཏུ་དགའ་བ་རྒྱ་ཆེན་པོ་དེ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་བཞི་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དེ་ཉིད་ལ་བལྟ་བ་དང ། བསྙེན་བཀུར་བྱ་བའི་ཕྱིར་འགྲོ་ཞིང་མཐོང་ནས་ཀྱང་དགའ་བ་དང ། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་ལྔ་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དེ་ཉིད་ཀྱི་དྲུང་ནས་ཆོས་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་པ་ཉན་ཅིང་ཐོས་ནས་ཀྱང་དགའ་བ་དང ། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ།
8.143b
མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་དུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དྲུག་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པ་འམ་དེ་བཞིན་གཤེགས་པའི་ཉན་ཐོས་དེ་ཉིད་ཀྱི་དྲུང་ནས་ཆོས་ཐོས་ནས་སངས་རྒྱས་ལ་སྐྱབས་སུ་འགྲོ། ཆོས་དང་དགེ་འདུན་ལ་སྐྱབས་སུ་འགྲོ་ཞིང་བསླབ་པའི་གཞི་དག་ལེན་པར་བྱེད་པ་འདི་ནི་སྐུལ་བྱེད་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བ་འམ། གནས་པ་འམ། ཉལ་བ་འམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཤིག་མངོན་པར་འཕེལ་བ་དང ། བསོད་ནམས་འབའ་ཤིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་བདུན་པ་ཡིན་ནོ། །སྐུལ་བྱེད་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པའི་བསོད་ནམས་སམ། བསོད་ནམས་ཀྱི་འབྲས་བུ་འམ། བསོད་ནམས་ཀྱི་འབྲས་བུ་རྣམ་པར་སྨིན་པ་ནི་འདི་ཙམ་མོ་ཞེས་བསོད་ནམས་ཀྱི་ཚད་གཟུང་བར་མི་ནུས་ཏེ་འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །སྐུལ་བྱེད་འདི་ལྟ་སྟེ་དཔེར་ན་གང་དུ་ཆུ་ཀླུང་ཆེན་པོ་ལྔ་པོ་འདི་ལྟ་སྟེ་གང་གཱ་དང ། ཡ་མུ་ན་དང ། ས་ར་ཡུ་དང ། གནས་ཅན་དང ། མ་ཧི་ཞེས་བྱ་བ་ཐ་མི་དད་པར་འབབ་པར་འགྱུར་བ་དེ་ལ་ནི་ཆུ་འམ། ཆུའི་བུམ་པ་འམ། ཆུའི་བུམ་པ་བརྒྱ་ཕྲག་གམ། ཆུའི་བུམ་པ་སྟོང་ཕྲག་གམ། ཆུའི་བུམ་པ་འབུམ་ཕྲག་འདི་སྙེད་ཅིག་ཡོད་དོ། །ཞེས་ཆུའི་ཚད་གཟུང་བར་མི་ནུས་ཏེ། འདི་ལྟར་ཆུ་མང་བའི་ཕྱིར་ཆུའི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །སྐུལ་བྱེད་དེ་བཞིན་དུ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པའི་བསོད་ནམས་སམ།
8.144a
བསོད་ནམས་ཀྱི་འབྲས་བུ་འམ་བསོད་ནམས་ཀྱི་འབྲས་བུ་རྣམ་པར་སྨིན་པ་ཡང་འདི་ཙམ་མོ་ཞེས་ཚད་གཟུང་བར་མི་ནུས་ཏེ། འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །མི་དང་རི་དགས་ཚོགས་ཀྱིས་བསྟེན་པ་ཡི། །ཆུ་ཀླུང་ཐ་དད་འབབ་པར་གྱུར་པ་དག་།མཚོ་མཆོག་བཀྲ་ཤིས་གཙང་མ་ངོགས་བདེ་བ། །རིན་ཆེན་འབྱུང་གནས་རྒྱ་མཚོར་འབབ་པ་ལྟར། །དེ་བཞིན་བསོད་ནམས་རྒྱུན་ཀྱང་རྣམ་ཀུན་ཏུ། །སྦྱིན་བདག་གོས་སྦྱིན་ཟས་སྐོམ་སྦྱིན་པ་དང ། །མལ་ཆ་སྟན་དང་གདིང་སྦྱིན་མི་ལ་འབབ། །ཆུ་ཀླུང་ཆུ་འབབ་རྒྱ་མཚོར་ཇི་བཞིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་སྐུལ་བྱེད་ཆེན་པོ་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །དེ་ནས་ཁྱིམ་བདག་གདངས་ཅན་ནི་དད་པ་དང་ལྡན་ལ་དེའི་འཁོར་ནི་མ་དད་ནས་དེས་བསམས་པ། བདག་གི་འཁོར་འདི་མ་དད་ན་བདག་གི་གཙུག་ལག་ཁང་དུ་ཇི་ལྟར་སྤྱོད་པ་ཇེ་བརྟག་གོ་སྙམ་ནས་དེ་ཆ་ལུགས་མི་མངོན་པར་བྱས་ཏེ་ཤམ་ཐབས་དམའ་བར་བགོས་ནས་གཙུག་ལག་ཁང་དུ་སོང་སྟེ་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་འཇུག་པར་བརྩམས་པ་དང ། རྒན་ཞུགས་ཤིག་སྒོ་ཁང་ན་འདུག་ནས་དེས་དེའི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པར་བགྱིད་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། དེས་སྨྲས་པ། ཁྱིམ་བདག་གདངས་ཅན་གྱིའོ། །འཕགས་པ་ཅི་འདི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས་གཙུག་ལག་ཁང་ནི་ཇི་ལྟ་བུ། ཕོངས་པ་ནི་ཇི་ལྟ་བུ། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་ལ། གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འདི་ཕོངས་པ་ཡིན་ནོ། །ཇི་ལྟར་གྱུར། ཁྱིམ་བདག་དེ་ནི་དད་པ་དང་ལྡན་པ་ཡིན་ན་དེའི་འཁོར་མ་དད་པས་མཁོ་བ
8.144b
མི་སྟོབས་སོ། །འདི་ལྟར་ཁྱིམ་བདག་དེ་ལ་བུ་མོ་མངག་གཞུག་མ་མགུ་བྱེད་ཅེས་བྱ་བ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཞིག་ཡོད་ན། འོན་ཀྱང་དེའི་ཁྱིམ་དེ་ན་དབང་མེད་དེ། གལ་ཏེ་དེ་ལ་དབང་ཡོད་པར་གྱུར་ན་དེ་དགེ་སློང་རྣམས་ལ་མཁོ་བ་སྟོབས་པར་བྱེད་པས་འདི་གཙུག་ལག་ཁང་དུ་འགྱུར་རོ། །ཁྱིམ་བདག་གདངས་ཅན་གྱིས་བསམས་པ། ད་ལྟར་བདག་གསོན་པ་ཉིད་ན་ཡང་བདག་གི་གཙུག་ལག་ཁང་ན་དགེ་སློང་རྣམས་ཀྱི་གནས་སྐབས་འདི་འདྲ་ན་བདག་ཤི་ན་ཅི་འདྲ་བར་འགྱུར་སྙམ་དུ་རིག་ནས་དགེ་སློང་དེའི་རྐང་པ་ལ་ཕྱག་འཚལ་ཏེ། རང་གི་ཁྱིམ་དུ་སོང་ནས་ནང་མི་རྣམས་ལ་སྨྲས་པ། ཁྱེད་ཅག་ལས་གང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བྱེད་པར་སྤྲོ་བ་དེས་ཚུལ་ཤིང་ལོང་ཤིག་།དེའི་ཚེ་ན་མགུ་བྱེད་བུམ་པ་ཐོགས་ཏེ་ཆུ་བཅུ་བའི་ཕྱིར་ཕྱིར་བྱུང་བ་དང ། དེས་དེར་རས་མ་ཞིག་རྙེད་ནས། བཅོམ་ལྡན་འདས་ཀྱང་དེ་ལ་ཕན་གདགས་པའི་སླད་དུ་ཕྱོགས་དེར་གཤེགས་པ་དང ། དེས་བཅོམ་ལྡན་འདས་ལ་བརྟག་པར་བརྩམས་སོ། །བཅོམ་ལྡན་འདས་ཀྱིས་རྫུ་འཕྲུལ་གྱིས་ན་བཟའ་ཆོས་གོས་ཀྱི་གྲཝ་རྡོལ་བར་དེ་ལ་བསྟན་པ་དང ། དེས་བསམས་པ། གལ་ཏེ་བཅོམ་ལྡན་འདས་ཀྱིས་བདག་གི་རས་མ་འདི་བཞེས་སུ་གནང་ན་བདག་གིས་འདི་བཅོམ་ལྡན་འདས་ལ་དབུལ་ལོ་སྙམ་མོ། །བཅོམ་ལྡན་འདས་ཀྱིས་དེའི་སེམས་ཐུགས་ཀྱིས་མཁྱེན་ནས་བཀའ་སྩལ་པ། མགུ་བྱེད་གལ་ཏེ་ཁྱོད་ཀྱིས་ཡོངས་སུ་བཏང་ན་ཕུལ་ཅིག་།དེས་བཅོམ་ལྡན་འདས་ལ་སེམས་མངོན་པར་དད་པ་བྱས་ནས་གུས་པ་བསྐྱེད་དེ་ཕུལ་ལོ། །བཅོམ་ལྡན་འདས་ཀྱིས་དེ་དེ་ཉིད་ཀྱི་མདུན་དུ་ན་བཟའ་ཆོས་གོས་ཀྱི་གྲཝ་ཀླན་ཏེ་བཙེམས་པ་དང ། ཁ་དོག་མཐུན་པར་གྱུར་ཏོ། །དེ་དད་པ་སྐྱེས་པས་ཞབས་གཉིས་ལ་གཏུགས་ཏེ་སྨོན་ལམ་བཏབ་པ། དགེ་བའི་རྩ་བ་འདིས་བདག་བྲན་མོར་མ་གྱུར་ཅིག་།དབུལ་བར་མ་གྱུར་ཅིག་ཅེས་སྨྲས་ནས་བུམ་པ་ཆུས་བཀང་སྟེ་ཁྱིམ་དུ་སོང་ངོ ། །ཁྱིམ་བདག་གདངས་ཅན་གྱིས་ནང་མི་ལ་ཚུལ་ཤིང་བྲིམས་པ་དང ། མགུ་བྱེད་ཀྱིས་སྨྲས་པ།
8.145a
ཁྱིམ་བདག་འདི་ཅི་ལགས། གདངས་ཅན་གྱིས་སྨྲས་པ། མགུ་བྱེད་ཁྱེད་ཅག་ལས་གང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བྱེད་པར་སྤྲོ་བ་དེས་ཚུལ་ཤིང་ལོང་ཤིག་དང་ཁོ་བོ་ལ་ལོངས་སྤྱོད་རྒྱ་ཆེན་པོ་དག་ཡོད་དོ། །དེས་མྱུར་བ་མྱུར་བར་ཆུའི་བུམ་པ་བཞག་སྟེ་ཚུལ་ཤིང་བླངས་ནས་སྨྲས་པ། བདག་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བགྱིད་པར་སྤྲོ་སྟེ། བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཡོ་བྱད་ཐམས་ཅད་ཀྱིས་བསྙེན་བཀུར་བགྱི་ཡིས་ཁྱོད་ཐུགས་ལས་ཆུང་ངུར་མཛོད་ཅིག་ཅེས་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཡོ་བྱད་ཐམས་ཅད་ཀྱིས་བསྟབས་ཏེ་གུས་པར་བསྙེན་བཀུར་བྱ་བར་བརྩམས་སོ། །ཁྱིམ་བདག་གདངས་ཅན་གྱིས་ཡང་ཆ་ལུགས་མི་མངོན་པར་བྱས་ཏེ་ཤམ་ཐབས་དམའ་བར་བགོས་ནས་གཙུག་ལག་ཁང་དུ་སོང་སྟེ་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་འདུག་པར་བརྩམས་པ་དང ། ཡང་རྒན་ཞུགས་གཞན་ཞིག་སྒོ་ཁང་ན་འདུག་ནས་དེས་དེའི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པར་བགྱིད་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། དེས་སྨྲས་པ། ཁྱིམ་བདག་གདངས་ཅན་གྱིའོ། །འཕགས་པ་ཅི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས། གཙུག་ལག་ཁང་ནི་ཇི་ལྟ་བུ། ཕོངས་པ་ནི་ཇི་ལྟ་བུ་འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་ལ། གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འདི་སྔོན་ནི་ཕོངས་པར་གྱུར་པ་ལས་ད་ནི་གཙུག་ལག་ཁང་དུ་གྱུར་ཏོ། །ཇི་ལྟར་གྱུར། བཞིན་བཟངས་ཁྱིམ་བདག་གདངས་ཅན་ལ་བུ་མོ་མངག་གཞུག་མ་མགུ་བྱེད་ཅེས་བྱ་བ། དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཞིག་ཡོད་པ
8.145b
དེ་ཁྱིམ་བདག་དེས་འདིར་ལས་སུ་བསྐོས་ཏེ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཡོ་བྱད་ཐམས་ཅད་ཀྱིས་སྟོབས་ཤིག་ཅེས་བསྒོ་ནས། ་ད་ལྟར་དེ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་པས་དེས་ན་འདི་གཙུག་ལག་ཁང་ཡིན་ཏེ་ཕོངས་པ་མ་ཡིན་ནོ། །ཁྱིམ་བདག་གདངས་ཅན་གྱིས་ཐོས་ནས་དགའ་སྟེ་ཁྱིམ་དུ་སོང་ནས་དེས་བུ་མོ་མགུ་བྱེད་ཀྱི་ལག་ཏུ་ལྡེ་མིག་དང ། ལྡེ་མིག་ཀྱོག་པོ་གཏད་ནས་ནང་མི་རྣམས་ལ་སྨྲས་པ། ཁྱེད་ཅག་མགུ་བྱེད་ཀྱིས་ཅི་བྱིན་པ་དེས་གནས་པར་གྱིས་ཤིག་།ཀཽ་ཤམྦཱི་ན་གནས་པའི་སྐྱེ་བོའི་ཚོགས་རྣམས་ཀྱང་བསྡུས་ཏེ་སྨྲས་པ། ཤེས་ལྡན་དག་ཁོ་བོས་བུ་མོ་མགུ་བྱེད་འདི་བྲན་མོ་ལས་ཕྱུང་སྟེ་ཁྱིམ་གྱི་བདག་མོར་བཅུག་གོ་ཞེས་བསྒྲགས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཁྱིམ་བདག་གདངས་ཅན་རྒྱལ་པོ་ཤར་པས་གདངས་ལས་འཚལ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ་འདི་ལྟར་འདས་པའི་དུས་ན་ཡང་ཁྱིམ་བདག་གདངས་ཅན་འདི་རྒྱལ་པོ་ཤར་པས་གདངས་ལས་ཤེས་པར་གྱུར་ཏེ་དེ་ཉོན་ཅིག་།དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང ། འཐབ་པ་དང ། ཕྱི་དགྲ་དང ། ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང ། ནད་དང་བྲལ་བ། སཱ་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱིས་རྒྱལ་སྲིད་བྱེད་དུ་བཅུག་གོ། །ཇི་ཙམ་དུས་གཞན་ཞིག་ན་ལྟས་པ་དག་གིས་ལོ་བཅུ་གཉིས་སུ་ཆར་མི་འབབ་པར་ལུང་བསྟན་ནས་རྒྱལ་པོ་ཚངས་བྱིན་གྱིས་རང་གི་ཡུལ་དུ་དྲིལ་བསྒྲགས་པ་བྱེད་དུ་བཅུག་སྟེ་ཕྱོགས་སུ་བསྒོ་བ། ངའི་ཡུལ་ན་གནས་པ་དང ། ཕོ་བྲང་འཁོར་གྱི་མི་དག་ཉོན་ཅིག་།ལྟས་པ་དག་གིས་ལོ་བཅུ་གཉིས་སུ་ཆར
8.146a
མི་འབབ་པར་ལུང་བསྟན་གྱིས་དེའི་ཕྱིར་ཁྱེད་ཅག་ལས་གང་དག་ལ་ལོ་བཅུ་གཉིས་ཀྱི་ཟན་བདོག་པ་དེ་དག་གིས་ནི་འཁོད་པར་བྱའོ། །གང་དག་ལ་མི་བདོག་པ་དེ་དག་གིས་ནི་གཞན་དུ་འདོང་བར་བྱ་ཞིང་ལོ་བཅུ་གཉིས་འདས་ནས་ཕྱིར་འོང་བར་བྱའོ། །དེའི་ཚེ་ན་བཱ་རཱ་ཎ་སཱི་ན་ཁྱིམ་བདག་གཟུངས་བྱེད་ཅེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ་ཞིག་འདུག་པ་དེས་མཛོད་པ་བོས་ཏེ་སྨྲས་པ། ཀཝའི་ནང་རྗེ་མཛོད་པ་ཁོ་བོ་འཁོར་དང་བཅས་པའི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་ན་རང་སངས་རྒྱས་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཇེ་མཛོད་པ་ལ་སྨྲས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་བོས་ཏེ་སྨྲས་པ། ཀཝའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང ། རབ་ཏུ་བྱུང་བ་ལྔ་བརྒྱ་པོ་འདི་དག་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །ཁྱིམ་བདག་གཟུངས་བྱེད་ཀྱིས་རང་སངས་རྒྱས་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་དེར་འཁོད་དོ། །ཇི་ཙམ་ན་རང་སངས་རྒྱས་གཞན་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཀྱང་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཁྱེད་ལ་གསོལ་ལགས་ན། ཅིའི་སླད་དུ་ཡང་སྒྲུབ་པར་མཛད། ཁྱིམ་བདག་དེ་དག་ཀྱང་གཞན་ལ་ཁོ་བོ་ཅག་ཀྱང་གཞན་ནོ། །འཕགས་པ་དག་ཇེ་མཛོད་པ་ལ་སྨྲས་ཏེ་སླད་ཀྱིས་གསོལ་ལོ་ཞེས་དེས་མཛོད་པ
8.146b
བོས་ཏེ་སྨྲས་པ། ཀཝའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང ། རབ་ཏུ་བྱུང་བ་སྟོང་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །ཁྱིམ་བདག་གཟུངས་བྱེད་ཀྱིས་རང་སངས་རྒྱས་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་ཀྱང་དེར་འཁོད་དོ། །ཁྱིམ་བདག་གཟུངས་བྱེད་ཀྱིས་སྦྱིན་པའི་ཁང་པ་རྩིག་ཏུ་བཅུག་སྟེ། སྦྱིན་པའི་ཞལ་ཏ་པའི་མི་དག་དང་སྤྱན་འདྲེན་བསྐོས་ནས། སྤྱན་འདྲེན་དེས་ཉི་མ་རེ་རེ་ཞིང་སོང་སྟེ་གདུགས་ཚོད་ལ་འབོད་པར་བྱེད་དོ། །སྤྱན་འདྲེན་དེས་ཁྱི་ཞིག་གསོས་པ་དེ་ཉི་མ་རེ་རེ་ཞིང་སྤྱན་འདྲེན་དེ་དང་ལྷན་ཅིག་འགྲོ་བར་བྱེད་དོ། །ཇི་ཙམ་དུས་གཞན་ཞིག་ན་སྤྱན་འདྲེན་དེ་ལ་བྲེལ་བ་ཞིག་བྱུང་ནས། དེས་ཇེ་འདི་བསྒྲུབས་ཏེ་ཕྱིས་སྤྱན་དྲང་བར་བྱའོ་སྙམ་ནས་དེ་གཞན་དུ་སོང་བ་དང ། ཁྱི་དེས་དེ་མ་རྙེད་ནས་སྔོན་གོམས་པས་རང་སངས་རྒྱས་རྣམས་ཀྱི་གན་དུ་སོང་བ་དང ། དེར་ཡང་དེ་མ་མཐོང་ནས་དེས་སྐད་ཕྱུང་ངོ ། །རང་སངས་རྒྱས་དེ་དག་གི་དགེ་འདུན་གྱི་གནས་བརྟན་གང་ཡིན་པ་དེས་སྨྲས་པ། ཚེ་དང་ལྡན་པ་དག་སྤྱན་འདྲེན་དུས་ལས་ཡོལ་ནས་ཁྱི་འདིས་སྤྱན་དྲངས་ཀྱིས་ཚུར་སྤྱོན་བཞུད་དོ། །དེ་ལྟར་བགྱིའོ་ཞེས་དེ་དག་འཕགས་པ་དང ། སྤྱན་འདྲེན་འོངས་ཏེ་ཁྱི་དེས་དེ་མཐོང་ནས་སྐད་དབྱུང་བར་བརྩམས་པ་དང ། སྤྱན་འདྲེན་གྱིས་བསམས་པ། འདིས་འདི་དག་སྤྱན་དྲངས་པས་དེས་ན་བདག་ཉིད་ཆེན་པོ་འདི་དག་བྱོན་གོར་མ་ཆག་སྙམ་དུ་རིག་ནས་སྨྲས་པ། འཕགས་པ་དག་ཁྱེད་སུས་སྤྱན་དྲངས། དེ་དག་གིས་སྨྲས་པ། བཞིན་བཟངས་ཁྱི་འདིས་སོ། །དེས་སྨྲས་པ། འཕགས་པ་དག་མ་ནོངས་ཀྱིས་སླད་ཀྱིས་ཀྱང་གང་གི་ཚེ་བདག་ལ་བྲེལ་བ་འགའ་ཞིག་བྱུང་བ་དེའི་ཚེ་ན་འདི་ཉིད་ཁྱེད་སྤྱན་འདྲེན་པར་འགྱུར་གྱིས་ཁྱེད་ཅག་གཤེགས་སུ་གསོལ། དགེ་སློང་དག་དེའི་ཚེ་དེའི་དུས་ན་ཁྱིམ་བདག་གཟུངས་བྱེད་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་མཛོད་པ་གང་ཡིན་པ་དེ་ནི་ཁྱིམ་བདག་མགོན་མེད་ཟས་སྦྱིན་ཡིན་ནོ། །དེའི་ཚེ་དེའི་དུས་ན་སྤྱན་འདྲེན་གང་ཡིན་པ་དེ་ནི་བད་སའི་རྒྱལ་པོ་ཤར་པ་ཡིན་ནོ། །དེའི་ཚེ་དེའི་དུས་ན་ཁྱི་གང་ཡིན་པ་དེ་ནི་ཁྱིམ་བདག་གདངས་ཅན་ཡིན་ཏེ། ཁྱིམ་བདག་གདངས་ཅན
8.147a
འདི་དེའི་ཚེ་ཡང་རྒྱལ་པོ་ཤར་པས་གདངས་ལས་ཤེས་པར་གྱུར་ལ། དེ་ལྟར་ཡང་འདི་དེས་གདངས་ལས་ཤེས་སོ། །རྒྱལ་པོ་གཟུགས་ཅན་སྙིང་པོའི་གན་དུ་མི་སྟོང་ཐུབ་གཅིག་འོངས་ནས་རྒྱལ་པོས་དེ་ལ་སྨྲས་པ། ཀཝའི་ནང་རྗེ་ཁྱོད་སུ་ཡིན། དེས་སྨྲས་པ། ལྷ་བདག་སྟོང་ཐུབ་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་སྟོང་ཐུབ་ལ་འཚོ་བ་བྱིན་ཅིག་།དེ་དག་གིས་དེ་ལ་འཚོ་བ་བྱིན་ནོ། །གང་གི་ཚེ་བཅོམ་ལྡན་འདས་ཀྱིས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་མ་ག་དྷ་པའི་བྲམ་ཟེ་དང ། ཁྱིམ་བདག་འབུམ་ཕྲག་དུ་མ་དང་ལྷན་ཅིག་བདེན་པ་དག་ལ་བཞག་པ་དེའི་ཚེ་ན་དེས་རྒྱལ་པོའི་ཁབ་ཏུ་དྲིལ་བསྒྲགས་པ་བྱེད་དུ་བཅུག་སྟེ་བསྒོ་བ། རྒྱལ་པོའི་ཁབ་ན་གནས་པ་དང ། ཕོ་བྲང་འཁོར་གྱི་མི་དང ། ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་ཤེས་ལྡན་དག་ཉོན་ཅིག་།ངའི་ཡུལ་དུ་སུས་ཀྱང་རྐུན་པོ་མི་བྱའོ། །ངའི་ཡུལ་དུ་གང་རྐུན་པོ་བྱེད་པ་དེ་ངས་ཡུལ་མེད་པར་བྱ་ཞིང་བརྐུས་པ་རྣམས་ཀྱི་ནོར་ནི་ང་རང་གི་མཛོད་དང་བང་བ་ནས་སྦྱིན་ནོ་ཞེས་བསྒོའོ། །གང་གི་ཚེ་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོས་བཏུལ་བ་དེའི་ཚེ་ན་དེས་ཀྱང་མཉན་ཡོད་དུ་དྲིལ་བསྒྲགས་པ་བྱེད་དུ་བཅུག་སྟེ་བསྒོ་བ། ངའི་ཡུལ་དུ་སུས་ཀྱང་རྐུན་པོ་མི་བྱའོ། །ངའི་ཡུལ་དུ་གང་རྐུན་པོ་བྱེད་པ་དེ་ངས་གསད་པར་བྱ་ཞིང་བརྐུས་པ་རྣམས་ཀྱི་ནོར་ནི་ང་རང་གི་མཛོད་དང་བང་བ་ནས་སྦྱིན་ནོ་ཞེས་བསྒོའོ། །བར་དུ་ཡུལ་མ་ག་དྷ་ན་གནས་པའི་ཆོམ་རྐུན་པ་གང་དག་ཡིན་པ་དང ། ཡུལ་ཀོ་ས་ལ་ན་གནས་པའི་ཆོམ་རྐུན་པ་གང་དག་ཡིན་པ་དེ་དག་མཚམས་ཀྱི་བར་དུ་དོང་སྟེ་འཁོད་ཅིང་ཡུལ་མ་ག་དྷ་ནས་དོན་འཐུན་པ་གང་དག་འོང་བ་དེ་དག་ཀྱང་འཇོམས་པར་བྱེད། ཡུལ་ཀོ་ས་ལ་ནས་དོན་འཐུན་པ་གང་དག་འོང་བ་དེ་དག་ཀྱང་འཇོམས་པར་བྱེད་ནས་ཐམས་ཅད་དུ་ཡུལ་མ་ག་དྷ་ན་འཁོད་པའི་ཆོམ་རྐུན་པ་གང་དག་ཡིན་པ་དང ། ཡུལ་ཀོ་ས་ལ་ན་འཁོད་པའི་ཆོམ་རྐུན་པ་གང་དག་ཡིན་པ་དེ་དག་མཚམས་ཀྱི་བར་དུ་དོང་སྟེ་འཁོད་ཅིང་དོན་འཐུན་འཇོམས་པར་བྱེད་པས་དོན་འཐུན་འགྲོ་བ་དང་འོང་བ་རྒྱུན་ཆད་དེ། རྒྱལ་པོའི་དཔྱ་དང་ལོ་ཐང་མི་འདུའོ
8.147b
ཞེས་བྱ་བ་དེ་ལྟ་བུའི་སྒྲ་གྲགས་པར་གྱུར་ཏོ། །རྒྱལ་པོ་གཟུགས་ཅན་སྙིང་པོས་དེ་ཐོས་ནས་རུ་གཅིག་བཏང་ན་དེ་བཅོམ་ཞིང་རབ་ཏུ་བཅོམ་སྟེ་ཕྱིར་འོངས་སོ། །དེ་བཞིན་དུ་རུ་གཉིས་པ་དང ། རུ་གསུམ་པ་བཏང་ན་དེ་ཡང་བཅོམ་ཞིང་རབ་ཏུ་བཅོམ་སྟེ་ཕྱིར་འོངས་སོ། །ཇི་ཙམ་ན་ཡུལ་མ་ག་དྷ་ནས་དོན་འཐུན་ཡུལ་ཀོ་ས་ལར་འཕགས་པ་དེ་ཆོམ་རྐུན་པས་འཇིགས་པས་རྒྱལ་པོའི་ཁབ་ཏུ་ཞུགས་ཏེ་བསེལ་བ་ཚོལ་བར་བྱེད་ནས་བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་སྟོང་ཐུབ་འདི་ལྷའི་འཚོ་བས་འཚོ་ན་ཅིའི་སླད་དུ་དོན་འཐུན་གྱི་བསེལ་མི་བགྱིད། རྒྱལ་པོས་སྨྲས་པ། དེ་འགྲོ་ལ་རག་གིས་ཐོང་ཤིག་།བློན་པོ་རྣམས་ཀྱིས་དེ་བོས་ཏེ་སྨྲས་པ། ཀཝའི་ནང་རྗེ་ཁྱོད་རྒྱལ་པོའི་འཚོ་བས་འཚོ་ལ་ཅིའི་ཕྱིར་རྒྱལ་པོའི་བཀའ་བཞིན་མི་བྱེད། དེས་སྨྲས་པ། ཁྱེད་ཀྱིས་བསྒོ་བ་གང་ཞིག་ཁོ་བོས་མ་བྱས་ན་དེ་སྐད་དུ་སྤྱོ་བར་བྱེད། དེ་དག་གིས་སྨྲས་པ། དོན་འཐུན་འདི་ཡུལ་ཀོ་ས་ལར་འགྲོས་འདིའི་བསེལ་གྱིས་ཤིག་།དེས་སྨྲས་པ། མ་ཉེས་ཀྱིས་དེ་ལྟར་བྱའོ་ཞེས་དེས་མདའ་ལྔ་བརྒྱ་པའི་དོང་པ་གཉིས་ཐོགས་ཏེ་ཤིང་རྟར་ཞུགས་ནས་དོན་འཐུན་གྱི་མདུན་དུ་འཕགས་སོ། །ཆོམ་རྐུན་པ་རྣམས་ཀྱིས་དེ་དོན་འཐུན་གྱི་མདུན་ནས་འོང་བ་ཐག་རིང་པོ་ཁོ་ན་ནས་མཐོང་ནས། དེ་ལ་ཕོ་ཉ་བཏང་སྟེ་བསྒོ་བ། ཆོམ་རྐུན་པའི་དམག་དཔོན་ན་རེ་ཤིང་རྟ་ཕྱིར་ཟློག་ཤིག་།གནོད་པ་ཐོབ་པར་གྱུར་ཏ་རེ་ཞེས་ཟེར་རོ། །དེས་སྨྲས་པ། དཔའ་བོ་ལ་དཔའ་བོའི་ཡོངས་སུ་སྤང་བ་བྱིན་ཅིག་།ཆོམ་རྐུན་པའི་ཕོ་ཉས་སྨྲས་པ། ཅི་ཁྱོད་གཅིག་པུ་དཔའ་བོ་ཡིན་ནམ། ཁོ་བོ་ཅག་ཀྱང་དཔའ་བོ་ཡིན་གྱིས་ཕྱིར་ལོག་ཤིག་།དེ་ནས་ཕན་ཚུན་མདའ་ཁར་དགྱེ་བར་བརྩམས་ནས་དེས་ཆོམ་རྐུན་པའི་ཕོ་ཉའི་གནད་དུ་བསྣུན་ནས་དེ་ཕྱིར་ལོག་གོ། །དེ་བཞིན་དུ་ཆོམ་རྐུན་པ་གཉིས་དང ། བཞི་དང ། བརྒྱད་དང ། བཅུ་དྲུག་དང ། སུམ་བཅུ་རྩ་གཉིས་དང ། དྲུག་བཅུ་རྩ་བཞི་ནས་ཆོམ་རྐུན་པ་ལྔ་བརྒྱའི་བར་དག་ལྷགས་ནས་དེས་དེ་དག་གི་གནད་དུ་བསྣུན་ནས་དེ་དག་ཕྱིར་ལོག་གོ། །དེ་བཞིན་དུ་ཆོམ་རྐུན་པ་གཞན་ལྔ་བརྒྱ་ལྷགས་ནས་དེས་དེ་དག་ལ་སྨྲས་པ། ངས་ཁྱེད་ཀྱི་ཆོམ་རྐུན་པ་ལྔ་བརྒྱ་བསད
8.148a
ན་ཁྱེད་ཅག་ཀྱང་སྲོག་གིས་འགེབས་པར་མི་འདོད་དམ། ཕྱིར་ལོག་ཤིག་།ཆོམ་རྐུན་པ་རྣམས་ཀྱིས་སྨྲས་པ། ངེད་ཀྱི་གཅིག་ཀྱང་མ་སོད་ན་ཅིའི་ཕྱིར་ངེད་ཕྱིར་ལྡོག་ཁྱོད་ཀྱང་རུང་ངེད་ཀྱང་རུང་ངོ ། །དེས་སྨྲས་པ། གལ་ཏེ་ཁྱེད་ཅག་ཡིད་མི་ཆེས་ན་གང་དག་ངས་བསྣུན་པ་དེ་དག་གི་གོ་ཕུད་ཅིག་།དེ་དག་གིས་གོ་འབུད་པར་བརྩམས་པ་དང ། གང་གིས་ཇི་ལྟར་གོ་ཕུད་པ་དེ་དེ་ལྟར་དུས་ལ་བབ་ནས་ཆོམ་རྐུན་པ་དེ་དག་མི་འདི་ནི་གནོད་སྦྱིན་ཞིག་གོ་ཞེས་བྱེར་ཏེ་དོང་ངོ ། །སྟོང་ཐུབ་མཚམས་ཀྱི་བར་ན་འདུག་ཅིང་དེ་དོན་འཐུན་ཡུལ་ཀོ་ས་ལ་ནས་འོང་བ་གང་ཡིན་པ་དེའི་བསེལ་ཡང་བྱེད། ཡུལ་མ་ག་དྷ་ནས་འོང་བ་གང་ཡིན་པ་དེའི་བསེལ་ཡང་བྱེད་དོ། །དེས་བསམས་པ། བདག་གིས་ཅིའི་ཕྱིར་ཕར་འགྲོ་ཚུར་འགྲོ་བྱ་འདི་ཉིད་དུ་འདུག་པར་བྱའོ་སྙམ་ནས་དེས་དེར་ཁྱིམ་བརྩིགས་ཏེ་འདུག་ནས་དོན་འཐུན་གཉི་གའི་བསྟི་གནས་སུ་འང་གྱུར། དེ་འབྲོག་ན་གནས་པ་ཡིན་པས་འབྲོག་གནས་འབྲོག་གནས་ཤེས་བྱ་བའི་མིང་དུ་གྱུར་ཏོ།། ་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་བཞི་པ། འབྲོག་གནས་སུ་དོན་འཐུན་དག་ལྷགས་ནས་ཁ་ཅིག་གིས་ནི་འབྲས་བཙོང་བར་བརྩམས་སོ། །ཁ་ཅིག་གིས་ནི་ཕྱེ་བཙོང་བར་བརྩམས། ཁ་ཅིག་གིས་ནི་བེ་རེག་།ཁ་ཅིག་གིས་ནི་ཁུར་བ། ཁ་ཅིག་གིས་ནི་རིལ་བུ་བཙོང་བར་བརྩམས་སོ། །ཆང་འཚོང་དག་གིས་ཀྱང་ཆང་བཙོང་བར་བརྩམས་ཏེ། དེ་ཉིད་དུ་འཁོད་ནས་དེར་ཚོང་འདུས་ཆགས་པར་གྱུར་ཏོ། །འབྲོག་གནས་ཀྱིས་རྒྱལ་པོ་གཟུགས་ཅན་སྙིང་པོ་ལ་ཕྲིན་ཡིག་ལྷ་བདག་གིས་འདིར་ཚོང་འདུས་བཙུགས་ཀྱིས་ལྷས་འདིར་ཞལ་ཏ་པ་བཏང་བའི་རིགས་སོ་ཞེས་སྤྲིང་ངོ ། །རྒྱལ་པོས་བསམས་པ། གང་དུ་བདག་གི་རུ་གསུམ་བཅོམ་ཞིང་རབ་ཏུ་བཅོམ་ཞིང་འོངས་པ་དེར་དེས་ཚོང་འདུས་བཙུགས་པས་དེ་ནི་དེ་ཉིད་ཀྱིར་གྱུར་ཅིག་སྙམ་ནས་དེས་དེ་ལ་ཕྲིན་ཡིག་ངས་ཚོང་འདུས་དེ་ཁྱོད་ལ་བྱིན་གྱིས་དེར་དཔྱ་དང་ལོ་ཐང་ཅི་འདུ་བ་དེ་དག་ཁྱོད་ཉིད་ཅི་དགར་སྤྱོད་ཅིག་ཅེས་སྤྲིང་ངོ ། །འབྲོག་གནས་སུ་ཚོང་འདུས་བཙུགས་ནས་འབྲོག་གནས་འབྲོག་གནས་ཤེས
8.148b
བྱ་བའི་མིང་དུ་གྱུར་ཏོ། །འབྲོག་གནས་ན་གནས་པའི་སྐྱེ་བོའི་ཚོགས་རྣམས་ཀྱིས་བསམས་པ། ཤེས་ལྡན་དག་བདག་ཅག་གང་ཅུང་ཟད་བདེ་བར་གནས་པ་གང་ཡིན་པ་དེ་ཐམས་ཅད་འབྲོག་གནས་ཀྱི་མཐུ་ཡིན་པས་བདག་ཅག་གིས་འདི་ལ་ཕན་པ་ཅུང་ཟད་བྱ་གོར་མ་ཆག་གོ་སྙམ་མོ། །དེ་ན་ཁ་ཅིག་གིས་སྨྲས་པ། མ་ཉེས་ཀྱིས་དེ་བཞིན་བྱའོ། །ཅི་ཞིག་བྱ། དེ་ན་ཁ་ཅིག་གིས་སྨྲས་པ། བདག་ཅག་ལས་གང་སུ་ཡང་རུང་བ་བག་མ་གཏོང་བ་འམ། བག་མ་ལེན་པ་དེས་དེ་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་ཡང་བསྐོན་པར་བྱའོ། །མ་ཉེས་ཀྱིས་དེ་ལྟར་བྱའོ་ཞེས་དེ་དག་ལས་གང་བག་མ་གཏོང་བ་འམ། བག་མ་ལེན་པ་དེས་འབྲོག་གནས་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་སྐོན་པར་བྱེད་དོ། །ཇི་ཙམ་ན་མི་དབུལ་པོ་ཞིག་བག་མ་ལེན་དུ་ཉེ་ནས་དེ་འདི་སྙམ་དུ་སེམས་ཏེ། བདག་ལ་འབྲོག་གནས་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་བསྐོན་པའི་འབྱོར་པ་ག་ལ་ཡོད་ཀྱིས། འདི་ལྟར་བདག་གིས་བག་མ་དེ་བླངས་ནས་དང་པོ་ཁོ་ནར་འབྲོག་གནས་ལ་དགའ་མགུར་སྤྱོད་དུ་ཕུལ་ལ། དེས་དགའ་མགུར་སྤྱད་ནས་དེའི་འོག་ཏུ་བདག་གིས་སྤྱད་པར་བྱའོ་སྙམ་དུ་རིག་ནས། དེ་འབྲོག་གནས་ཀྱི་གན་དུ་སོང་སྟེ་མགོ་བོས་ཕྱག་འཚལ་ནས་སྨྲས་པ། གྲོང་དཔོན་བདག་བག་མ་ལེན་དུ་ཉེ་ན་བདག་ལ་ཁྱོད་འཁོར་དང་བཅས་པ་བཤོས་གསོལ་ཞིང་ན་བཟའ་ཕྲུགས་རེ་གསོལ་བའི་འབྱོར་པ་མ་མཆིས་ཀྱིས། འདི་ལྟར་བདག་གིས་བག་མ་དེ་བླངས་ནས་དང་པོ་ཁོ་ནར་ཁྱོད་ལ་དགའ་མགུར་སྤྱོད་དུ་འབུལ་གྱིས། ཁྱོད་ཀྱིས་དགའ་མགུར་སྤྱད་ནས་དེའི་འོག་ཏུ་བདག་གིས་སྤྱད་པར་བགྱིའོ། །འབྲོག་གནས་ཀྱིས་སྨྲས་པ། ཀྱེ་ནང་རྗེ་གང་ཡང་རུང་བ་བག་མ་ལེན་པ་འམ། བག་མ་གཏོང་བ་དེ་ཐམས་ཅད་ཀྱིས་ཁོ་བོ་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་བསྐོན་མི་དགོས་ཀྱིས་ཁྱོད་སོང་ལ་བག་ཡངས་སུ་བག་མ་ལོང་ཤིག་།གྲོང་དཔོན་དེ་ལྟ་ལགས་མོད་ཀྱི་འོན་ཀྱང་བདག་འདི་ལྟར་དགས་དང་དུ་བཞེས་ཅིག་།བུད་མེད་ཀྱི་ཡུལ་ནི་དབང་པོ་རྣམས་འཕྲོག་ཅིང་དོན་དུ་གཉེར་བར་འགྱུར་བ་ཡིན་པས་འབྲོག་གནས་ཀྱིས་དང་དུ་བླངས་སོ། །དེས་ཀྱང་བག་མ་བླངས་ནས་དང་པོ་ཁོ་ནར
8.149a
འབྲོག་གནས་ལ་ཕུལ་ནས་དེས་ཀྱང་དགའ་མགུར་སྤྱད་དོ། །འབྲོག་གནས་འདོད་པ་ལ་འདོད་ཆགས་ཀྱིས་ལྷག་པར་ཆགས་པས་མི་དེ་ལ་བྱམས་པར་བྱ་བར་བརྩམས་སོ། །གཞན་ཞིག་གིས་དེ་ལ་སྨྲས་པ། ཀྱེ་ནང་རྗེ་ཁྱོད་ལ་འབྲོག་གནས་ཏེ་པོར་བྱམས་པར་གྱུར་པ་འདི་ལ་རྒྱུ་ཅི་ཡོད། དེས་ཇི་ལྟར་གྱུར་པ་སྨྲས་པ་དང ། དེས་ཀྱང་དེ་བཞིན་བྱ་བར་བརྩམས་སོ། །གཞན་ཞིག་གིས་དེ་ལ་དྲིས་པ་དང ། དེས་ཀྱང་དེ་ལ་ཇི་ལྟར་གྱུར་པ་བརྗོད་པ་དང ། དེས་ཀྱང་དེ་བཞིན་བྱ་བར་བརྩམས་སོ། །གཞན་ཞིག་གིས་ཀྱང་དེ་ལ་དྲིས་པ་དང ། དེས་ཀྱང་དེ་ལ་ཇི་ལྟར་གྱུར་པ་བརྗོད་པ་ནས་དེས་ཀྱང་དེ་བཞིན་བྱ་བར་བརྩམས་ཏེ། དེ་ལྟ་བུའི་ཚུལ་གྱིས་དེ་ན་དམ་པ་མ་ཡིན་པའི་ཆོས་འཕེལ་བར་གྱུར་ཏོ། །འབྲོག་གནས་ཀྱིས་ཚོང་འདུས་དེར་ལྷ་ཁང་རྩིག་ཏུ་བཅུག་ནས་དེ་ན་གང་ཡང་རུང་བས་བག་མ་བླངས་པ་དེས་བུ་མོ་དེ་ལྷ་ཁང་དེ་བསྐོར་དུ་བཅུག་ནས་འབྲོག་གནས་ཀྱི་གན་དུ་གཏོང་ཞིང་འབྲོག་གནས་ཀྱིས་དེ་དང་པོར་དགའ་མགུར་སྤྱོད་པར་བྱེད་དོ། །ཇི་ཙམ་དུས་གཞན་ཞིག་ན་གཞོན་ནུ་མ་ཆེན་མོ་ཞིག་བག་མར་འགྲོར་ཉེ་ནས་དེས་བསམས་པ། བདག་ལ་ཡང་དང་པོར་འབྲོག་གནས་དགའ་མགུར་སྤྱོད་པར་འགྱུར་ཞིང་ཕྱིས་ཁྱིམ་ཐབ་སྤྱོད་པར་འགྱུར་ན་མི་རུང་གིས་ཅི་ནས་ཀྱང་འབྲོག་གནས་འདི་གསད་པར་འགྱུར་བ་དེ་ལྟ་བུའི་ཐབས་ཀྱི་རྣམ་པ་ཞིག་བྱའོ་སྙམ་ནས་དེས་ཇི་ཙམ་ནས་ཕྱོགས་ཤིག་ཏུ་སྐྱེ་བོ་ཕལ་པོ་ཆེའི་ཚོགས་འདུག་ཅིང་འཐུན་པར་གྱུར་པ་དེ་ལོགས་སུ་ཁ་བལྟས་ཏེ་སྒྲེན་མོར་བྱུང་ནས་གཅིན་རྒྱང་བྱས་པ་དང ། སྐྱེ་བོ་ཕལ་པོ་ཆེའི་ཚོགས་ཀྱིས་དེ་མཐོང་ནས་དེ་དག་མི་དགའ་བར་སེམས་པར་གྱུར་ཏེ་སྨྲས་པ། བུ་མོ་ངོ་ཚ་དང་ཁྲེལ་མེད་པ་སྐྱེ་བོ་ཕལ་པོ་ཆེའི་ཚོགས་ལ་མདུན་གྱིས་ཕྱོགས་ཏེ་སྒྲེན་མོར་བྱུང་ནས་གཅིན་རྒྱང་བྱེད་པ་འདི་སུའི་ཡིན། བུ་མོ་དེས་དེ་ཐོས་ནས་སྨྲས་པ། ཁྱེད་ཅག་ཀྱང་ཕོ་ཡིན་ནམ། འོ་ན་ངེད་ཅི་ཡིན། ཁྱེད་ཅག་ཕོ་མ་ཡིན་གྱི་འབྲོག་གནས་འབའ་ཤིག་ཕོ་ཡིན་པས་དེས་ཁྱེད་ཀྱི་ཆུང་མ་བླངས་སོ་ཅོག་དང་པོར་དགའ་མགུར་སྤྱད་དེ། ཁྱེད་ཅག་ཕྱིས་དེའི་མི་གཙང་བ་འཁྲུ་བར་བྱེད་དོ། །དེ་དག་གིས་སྨྲས་པ། ཤེས་ལྡན་དག་འདིས་བདག
8.149b
ཅག་གནས་སུ་སྤྱོས་ན། འདི་ལ་བདག་ཅག་གིས་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། འདི་ལ་གཞན་བསྒྲུབ་ཏུ་ཅི་ཡོད་འབྲོག་གནས་གསད་པར་བྱའོ། །གཞན་དག་གིས་སྨྲས་པ། དེ་ཇི་ལྟར་གསད་པར་བྱ་བ་དཔྱད་པར་བྱའོ་ཞེས་དེ་དག་དེ་ལྟར་གྲོས་བྱེད་པ་ན་ཁྱིམ་བདག་གཞན་ཞིག་གི་རྫིང་བུ་འབུལ་བ་ཉེ་བར་གྱུར་ནས། དེ་དག་གིས་སྨྲས་པ། ཤེས་ལྡན་དག་ཁྱིམ་བདག་ཆེ་གེ་མོ་ཞིག་གི་རྫིང་བུ་འབུལ་བ་ཉེ་བར་གྱུར་པས་དེར་དེ་མགྲོན་དུ་བོས་པའི་ཚེ་གསད་པར་བྱའོ། །ཇི་ཙམ་ན་ཁྱིམ་བདག་དེས་རྫིང་བུ་འབུལ་བའི་ཚེ་དེ་མགྲོན་དུ་བོས་པ་དང ། དེས་ཀྱང་དང་དུ་བླངས་སོ། །རྒྱལ་པོ་གཟུགས་ཅན་སྙིང་པོས་དྲིལ་བསྒྲག་པ་བྱེད་དུ་བཅུག་སྟེ། ཕྱོགས་སུ་བསྒོ་བ། ངའི་ཡུལ་དུ་དགེ་སློང་གང་ལ་ལ་ཞིག་འོང་བར་གྱུར་ན། དེ་གལ་ཏེ་ངའི་མཛོད་དང ། ཁྱིམ་ན་བཟའ་བ་དང་བཏུང་བ་ཡོད་ན་ཟན་སྦྱིན་པར་བྱའོ། །གལ་ཏེ་མེད་ན་སུས་མཐོང་བ་རང་གིས་བྱིན་ཅིག་དང་ཕྱིས་སྐྱིན་པ་ཉིས་གྱུར་ཏུ་སྦྱིན་ནོ་ཞེས་བཙིགས་ཡིག་ཏུ་ཡང་བྲིས་ཏེ་བཞག་གོ། །བར་དུ་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་མ་ག་དྷ་དག་ཏུ་ལྗོངས་རྒྱུ་ཞིང་འདོང་བ་ན་འབྲོག་གནས་སུ་ཕྱིན་ཏོ། །གྲོང་དཔོན་འབྲོག་གནས་ཀྱིས་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་མ་ག་དྷ་དག་ཏུ་ལྗོངས་རྒྱུ་ཞིང་འདོང་བ་ན་འབྲོག་གནས་སུ་ཕྱིན་ཅེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། རྒྱལ་པོ་གཟུགས་ཅན་སྙིང་པོ་དེ་བསོད་ནམས་དག་གིས་ངོམས་མི་མྱོང་བས་སྦྱིན་པ་དག་སྦྱིན་བསོད་ནམས་དག་བྱེད་ན། བདག་གིས་ཀྱང་ཅིའི་ཕྱིར་སྦྱིན་པ་དག་མི་སྦྱིན། བསོད་ནམས་དག་མི་བྱ་སྙམ་དུ་རིག་ནས་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ག་ལ་བ་དེར་སོང་སྟེ་ཕྱིན་ནས་རྐང་པ་གཉིས་ལ་མགོ་བོས་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེ་གཉིས་ཀྱིས་དེ་ལ་ཆོས་བསྟན་ནས། དེས་དེ་གཉིས་བསོད་སྙོམས་ལ་བོས་ཏེ་ཟན་བྱིན་ནོ། །ཁྱིམ་བདག་དེས་འབྲོག་གནས་གཡར་འདྲེན་གྱིས་བོས་པ་དང ། དེས་ཡོན་བཤད་པ་མ་མཉན་པ་ཁོ་ནར་རྫིང་བུ་འབུལ་བར་སོང་ངོ ། །འབྲོག་གནས་ན་གནས་པའི་སྐྱེ་བོའི་ཚོགས་ཀྱིས་ཀྱང་བརྡ་བྱས་མཚོན་ཐོགས་ནས་དེར་དོང་སྟེ། དེ་དག་གིས་འབྲོག་གནས
8.150a
རྫིང་བུར་ཞུགས་པ་དང ། སྐྲ་བཀྲུའོ་ཞེས་འགྱུར་བྱེད་ཚ་བ་མགོར་བླུགས་ནས་མིག་ཆུ་འཛག་པར་གྱུར་ཏེ་ཅུང་ཟད་ཀྱང་མི་མཐོང་བ་དང ། དེ་ནས་དེའི་སྟེང་དུ་འཁོར་ལོ་དང ། རྡོ་རྗེ་རྩེ་གཅིག་དང ། མདའ་བོ་ཆེ་དང ། མཚོན་རྩེ་གཅིག་པ་ལ་སོགས་པའི་མཚོན་དག་འཕང་བར་བརྩམས་ཏེ། ་དེ་གསད་པར་བཤམས་པ་ན་དེས་སྨྲས་པ། ཤེས་ལྡན་དག་ཁོ་བོས་ཁྱེད་ལ་ཉེས་པ་ཅི་བྱས། དེ་དག་གིས་སྨྲས་པ། ཁྱེད་ཀྱིས་ཁོ་བོ་ཅག་གི་བག་མ་དང་པོར་དགའ་མགུར་སྤྱད་ཅིང་ཕྱིས་ཁོ་བོ་ཅག་གིས་སྤྱད་དོ། །དེས་སྨྲས་པ། ཁྱེད་ཅག་ཉིད་ཀྱིས་དམ་པ་མ་ཡིན་པའི་ཆོས་འདི་ཕྱུང་བས་འདི་ལ་ཁོ་བོས་ཅི་ཉེས། མ་གསད་པར་ཐོང་ཤིག་།དེ་དག་གིས་དེ་དེ་ལྟར་ཤགས་འདེབས་བཞིན་དུ་གསད་པར་བརྩམས་པ་དང ། དེས་སྲོག་དང་འབྲལ་ཀར་གནད་འཆད་ཀ་དང་ཚིག་འགྲོལ་ཀར་སེམས་བསྐྱེད་དེ་སྨོན་ལམ་བཏབ་པ། བདག་གིས་འཕགས་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་ལྷ་དང་མིས་མཆོད་པ་གཉིས་ལ་བསོད་སྙོམས་ཕུལ་བའི་དགེ་བའི་རྩ་བ་དེས་བདག་གང་དུ་འདི་དག་གསོད་པར་འགྱུར་བ་དེར་སྐྱེ་བར་གྱུར་ཅིག་ཅེས་བཏབ་བོ། །ཆོས་ཉིད་ཀྱིས་ན་མར་འབྲི་བའི་དུས་ཀྱི་ཚེ་ན་སྨོན་ལམ་ལོག་པ་བཏབ་པ་དེ་ནི་མྱུར་དུ་འགྲུབ་པ་ཡིན་པས་དེས་སྨོན་ལམ་ལོག་པ་བཏབ་སྟེ། ཤི་ཞིང་དུས་ལ་བབ་ནས་གནོད་སྦྱིན་གདུག་པ་རྣམས་ཀྱི་ནང་དུ་སྐྱེས་སོ། །དེ་ནས་དེ་གནས་འདོད་པས་རྒྱལ་པོ་ཆེན་པོ་རྣམ་ཐོས་ཀྱི་བུའི་གན་དུ་སོང་སྟེ་སྨྲས་པ། བཟོད་ལྡན་བདག་ལ་གནས་སྩོལ་ཅིག་།དེས་སྨྲས་པ། འབྲོག་གནས་ཁྱེད་ཀྱི་གནས་འབྲོག་གནས་དེ་ཉིད་ཡིན་གྱིས་སོང་ཤིག་།དེ་འབྲོག་གནས་སུ་འོངས་ནས་མི་ངས་ཕྱུང་སྟེ་སྐྱེ་བོ་མང་པོ་ཤི་བར་གྱུར་ནས་ཁྲི་དང་ཁྲིར་འདོམ་པར་བྱས་སོ། །འབྲོག་གནས་ན་གནས་པའི་སྐྱེ་བོའི་ཚོགས་ཀྱིས་ལྟས་པ་དག་བཀུག་སྟེ་དྲིས་པ། ཤེས་ལྡན་དག་གང་གི་ཕྱིར་འདི་ལྟ་བུའི་ཡམས་བྱུང་བར་གྱུར་པ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། ཤེས་ལྡན་དག་ཁྱེད་ཀྱིས་འབྲོག་གནས་བསད་པ་གང་ཡིན་པ་དེས་སྨོན་ལམ་ལོག་པ་བཏབ་པས་གནོད་སྦྱིན་གདུག་པ་རྣམས་ཀྱི་ནང་དུ་སྐྱེས་ཏེ་དེས་འདི་ལྟ་བུའི་ཡམས་ཕྱུང་ངོ ། །
8.150b
དེ་དག་གིས་ཤིང་རྟ་དང་བཅས་ཏེ་འབྲོས་པར་བརྩམས་པ་དང ། དེས་ཀྱང་འཇིགས་པ་དང་འཇིགས་སུ་རུང་བ་ཆེན་པོར་བདག་ཉིད་མངོན་པར་སྤྲུལ་ནས་འབྲོག་གནས་ན་གནས་པའི་སྐྱེ་བོའི་ཚོགས་འབྲོས་པའི་མདུན་དུ་འདུག་སྟེ་སྨྲས་པ། ད་གར་འདོང་དེང་ཁྱེད་ཅག་ཐམས་ཅད་བཟའོ། །དེ་དག་ཀུན་དུ་སྐྲག་པར་གྱུར་ཏེ་སྨྲས་པ། གྲོང་དཔོན་བདག་ཅག་སྡིག་པ་བྱེད་པ་རྣམས་ལ་བཟོད་པ་མཛོད་ཅིག་།དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ང་ལ་ཉི་མ་རེ་རེ་ཞིང་མི་སྟོང་སྟོང་འབུལ་ན་བཟོད་དོ། །དེ་དག་གིས་སྨྲས་པ། གྲོང་དཔོན་གལ་ཏེ་ཁྱོད་ལ་ཉི་མ་རེ་རེ་ཞིང་མི་སྟོང་སྟོང་ཕུལ་ན་རིང་པོ་མི་ཐོགས་པར་འབྲོག་གནས་འདི་མི་སྣང་བར་འགྱུར་གྱིས་དངན་དུས་འདི་ཐོང་ལ་བདག་ཅག་ཕྱག་འཚལ་བ་རྣམས་ལ་བཟོད་པ་མཛོད་ཅིག་།དེས་སྨྲས་པ། ཤེས་ལྡན་དག་ཁོ་བོ་ཡུན་རིང་པོ་ནས་སྨོན་པ། ཀྱེ་མ་འབྲོག་གནས་འདི་མི་སྣང་བར་གྱུར་ཅིག་སྙམ་མོད་ཀྱི། འོན་ཀྱང་ཁོ་བོ་ལ་ཉི་མ་རེ་རེ་ཞིང་མི་ལྔ་བརྒྱ་ལྔ་བརྒྱ་ཕུལ་ཅིག་དང་བཟོད་པར་བྱའོ། །དེ་དག་གིས་ཡང་དེ་བཞིན་གསོལ་ནས་དེས་ཀྱང་མི་ཉིས་བརྒྱ་ལྔ་བཅུ་དང་བརྒྱའི་བར་དུ་ཕུལ་ཅིག་ཅེས་སྨྲས་སོ། །དེ་དག་གིས་སྨྲས་པ། གྲོང་དཔོན་དེ་ལྟ་ན་ཡང་བདག་ཅག་ཉམས་པར་གྱུར་གྱིས་མང་པོས་ཅི་བྱ། བདག་ཅག་གིས་ཁྱོད་ལ་ཉི་མ་རེ་རེ་ཞིང་བ་ལང་དྲུག་དང་ལྡན་པའི་ཤིང་རྟ་ཟས་ཀྱིས་བཀང་བ་དང ། དེ་ཁྲིད་པའི་མི་གཅིག་དབུལ་གྱིས་བཟོད་པ་མཛོད་ཅིག་།དེས་སྨྲས་པ། དེ་རུང་གིས་འདི་ལྟར་ཁྱེད་ཀྱིས་ངུ་བ་དག་གིས་དབུལ་བར་མི་བྱ་བར་བྲོ་དང ། གླུ་དང ། སིལ་སྙན་གྱི་སྒྲས་དབུལ་བར་བྱའོ། །དེ་དག་གིས་ཀྱང་ཁས་བླངས་སོ། །དེ་ནས་འབྲོག་གནས་ན་གནས་པའི་སྐྱེ་བོའི་ཚོགས་ཐམས་ཅད་འདུས་ཏེ་གྲོས་བྱ་བར་བརྩམས་པ། ཤེས་ལྡན་དག་གནོད་སྦྱིན་གྱིས་བདག་ཅག་གནས་སྐབས་དེ་ལྟར་བྱས་ན་འདི་ལ་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། རེས་ཀྱིས་རེས་ཀྱིས་དབུལ་བར་བྱའོ། །ཁ་ཅིག་གིས་སྨྲས་པ། གང་ལ་རེས་བབ་པར་གྱུར་པ་དེ་ལ་བརྗོད་པ་ན་འཁྲུག་པ་སྐྱེ་བར་འགྱུར་གྱིས། འདི་ལྟར་ཁྱིམ་བྱང་བྲིས་ཏེ་རྫ་མར་བཅུག་ལ་གང་གི་ཁྱིམ་བྱང་བྱུང་བ་དེ་འགྲོ་བར་བྱ་སྟེ། དེས་ཀྱང་མི་ཚལ་ཟ་དག་མི་གཏང་བར་བདག་ཉིད་འགྲོ་བར་བྱ་བ་འམ། བུ་གཏང་བར
8.151a
བྱའོ། །གང་ལ་བྲེལ་བ་བྱུང་སྟེ་མ་འདུས་པ་དེ་ལ་བབ་ན་དེའི་ཁྱིམ་དུ་ཁྱིམ་བྱང་དཔྱངས་ཏེ་བཞག་གོ། །དེའི་ཚེ་ན་འབྲོག་གནས་ན་ཁྱིམ་བདག་ཅིག་འདུག་པ་དེ་ལ་བུ་མེད་ནས་དེ་ཡུན་རིང་པོ་ནས་ཀྱེ་མ་བདག་ལ་བུ་ཡོད་པར་གྱུར་ཅིག་ཅེས་སྨོན་ནས་སྟེས་དབང་གིས་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཆུང་མ་དེ་བཙའ་བའི་དུས་ཀྱི་ཚེ་ཁྱིམ་བདག་དེ་བྱ་བ་ཞིག་ལ་ཕྱི་རོལ་དུ་བྱུང་བ་དང ། དེའི་ཉིན་མོ་དེ་ལ་གནོད་སྦྱིན་ལ་གཏོར་མ་སྦྱིན་པའི་ཁྱིམ་བྱང་བྱུང་ནས་དེའི་རེས་སྦྲོན་པར་བསྐོས་པའི་མི་དག་གིས་དེའི་ཁྱིམ་བྱང་སྒོར་དཔྱངས་ཏེ་བཞག་གོ། །སྐབས་དེར་ཆུང་མ་དེ་བཙས་པ་ལས་ཁྱེའུ་ཞིག་བྱུང་ངོ ། །ཇི་ཙམ་ན་ཁྱིམ་བདག་དེ་ཕྱིར་འོངས་པ་དང ། དེས་ཁྱིམ་དུ་འཇུག་ཀར་ཁྱིམ་བྱང་དེ་མཐོང་ནས་དེ་སྡུག་བསྔལ་ཞིང་ཡིད་མི་བདེ་བར་གྱུར་ཏེ། ཁྱིམ་དུ་ཞུགས་ནས་ཅང་མི་སྨྲ་བར་འདུག་གོ། །ཆུང་མས་དེ་ལ་སྨྲས་པ། རྗེའི་སྲས་དགྱེས་པ་སྐྱེད་ཅིག་།ཁྱོད་ཀྱི་སྲས་བལྟམ་མོ། །དེ་ལྟ་ན་ཡང་དེ་ཅང་མི་སྨྲ་བ་ཁོ་ནར་འདུག་གོ། །ཆུང་མས་དེ་ལ་ལན་གསུམ་གྱི་བར་དུ་དེ་སྐད་སྨྲས་ཀྱང་དེ་ཅང་མི་སྨྲ་བ་ཁོ་ནར་འདུག་ནས་ཡང་ཆུང་མས་སྨྲས་པ། རྗེའི་སྲས་ཁྱོད་ཡུན་རིང་པོ་ནས་ཀྱེ་མ་བདག་ལ་བུ་ཡོད་པར་གྱུར་ཅིག་ཅེས་སྨོན་པ་གང་ལགས་པ་དེ་ད་བཙས་ན་ཅིའི་སླད་དུ་ཅང་མི་གསུང་བར་བཞུགས། མཆོག་ཏུ་དགྱེས་པ་སྐྱེད་ཅིག་།དེས་སྨྲས་པ། བཟང་མོ་འདི་ནི་སྐྱེས་ན་ཁོ་བོ་ནི་མ་སྐྱེས་སོ། །རྗེའི་སྲས་ཅི་ནོངས། བཟང་མོ་གནོད་སྦྱིན་ལ་གཏོར་མ་དབུལ་བའི་ཕྱིར་ཁྱིམ་བྱང་འོངས་སོ། །རྗེའི་སྲས་གལ་ཏེ་དེ་ལྟ་ན་ཁྱོད་ཀྱི་སྲས་མཆི་བར་བས་མོད། སྐོལ་ཅག་ཡང་མཇལ་ན་ཁྱོད་ལ་སྲས་མཆིས་པར་འགྱུར་རོ། །བཟང་མོ་འདི་ནི་ཁྲག་གི་ཐིགས་པ་ཡིན་པས་འདི་ཇི་ལྟར་གཏང་བར་བྱ། རྗེའི་སྲས་ཚོགས་པས་ཁྲིམས་སུ་བགྱི་བ་རྣམ་པར་བཞག་པ་ལས་བདག་ཉིད་འགྲོ་བར་བྱ་བ་འམ། བུ་གཏང་བར་བྱའོ་ཞེས་མི་འབྱུང་ངམ། འདི་ཁྱོད་ཀྱི་སྲས་ལགས་པས་བདག་ཉིད་དང་མཉམ་པའི་སྡུག་པ་གཞན་མ་མཆིས་ཀྱིས་སྲས་འདི་ཐོང་ཤིག་།དེས་གལ་ཏེ་ཁྱོད་དགའ་ན་སོང་ཤིག་ཅེས་དང་དུ་བླངས་སོ། །དེ་ནས་ཁྱིམ་བདག་གི་ཆུང་མ་དེས་མཚན་མོའི་མིག་ལམ་ཆད་པ་དང ། མར་མེ་དང ། བདུག་སྤོས་དང ། ཕྲེང་བ
8.151b
རྒྱུ་དང ། མེ་ཏོག་དག་གིས་མཆོད་པ་བྱས་ནས་ཁ་ཤར་ཕྱོགས་སུ་བལྟས་ཏེ་གསོལ་བ་གདབ་པར་བརྩམས་པ། འཇིག་རྟེན་དགེ་དུལ་ཞི་བ་དང ། །དབང་ཐུལ་རྣམས་ཀྱིས་མི་སྟོང་བས། །བུ་ཡི་དོན་དུ་དེར་འདུད་ཀྱིས། །བདག་གི་བྱིས་པ་བསྐྱབ་ཏུ་གསོལ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང ། མ་གཟིགས་པ་དང ། མ་རིག་པ་དང ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ་སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། ་སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང ། ཉམ་ང་བ་དང ། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ནས་བསླང་སྟེ་མཐོ་རིས་དང ། ཐར་པ་དང ། འབྲས་བུ་ལ་གཞག
8.152a
པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་གོ། །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པ་འང་གདུལ་བའི་སྐྱེ་བོ་ལ། །རྟོག་པ་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ། ཁྱེའུ་དེ་ནི་སྔོན་གྱི་སངས་རྒྱས་རྣམས་ལ་བྱ་བ་ལྷག་པར་བྱས་པ་ཡིན་པས་དེ་ལ་ཕན་གདགས་པར་བྱ་ཞིང ། གནོད་སྦྱིན་འབྲོག་གནས་ཀྱང་གདུལ་བར་བྱའོ་སྙམ་དུ་རིག་ནས་མ་ག་དྷ་དག་ཏུ་ལྗོངས་རྒྱུ་ཞིང་གཤེགས་ནས་འབྲོག་གནས་སུ་བྱོན་ཏེ་གནོད་སྦྱིན་འབྲོག་གནས་ཀྱི་གནས་སུ་མཚན་མོ་གནས་པར་ཞལ་གྱིས་བཞེས་སོ། །དེའི་ཚེ་ན་གནོད་སྦྱིན་འབྲོག་གནས་གནོད་སྦྱིན་རྣམས་ཀྱི་གནོད་སྦྱིན་འདུ་བར་སོང་བར་གྱུར་ཏོ། །གནོད་སྦྱིན་བོང་བུ་བས་བཅོམ་ལྡན་འདས་གནོད་སྦྱིན་འབྲོག་གནས་ཀྱི་གནས་སུ་མཚན་མོ་གནས་པར་ཞལ་གྱིས་བཞེས་པ་མཐོང་ངོ ། །མཐོང་ནས་ཀྱང་གནོད་སྦྱིན་འབྲོག་གནས་ག་ལ་བ་དེར་སོང་སྟེ་ཕྱིན་ནས་གནོད་སྦྱིན་འབྲོག་གནས་ལ་འདི་སྐད་ཅེས་སྨྲས་སོ། །གྲོང་དཔོན་ཁྱོད་ཀྱི་གནས་སུ་བཅོམ་ལྡན་འདས་མཚན་མོ་གནས་པར་ཞལ་གྱིས་བཞེས་པ་གང་ཡིན་པ་དེ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །གྲོང་དཔོན་མིར་གྱུར་པ་ཡང་བདག་གི་གནས་སུ་མཚན་མོ་གནས་པར་ཁས་ལེན་ཏམ། གྲོང་དཔོན་དེ་དེ་བཞིན་ནོ། །དེ་དེ་བཞིན་ཏེ།
8.152b
འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །གྲོང་དཔོན་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནམ། འོན་ཏེ་མ་ཡིན་པ་ད་ཤེས་པར་བྱའོ། །དེ་ནས་གནོད་སྦྱིན་འབྲོག་གནས་ཀྱིས་གནོད་སྦྱིན་རྣམས་ཀྱི་གནོད་སྦྱིན་འདུ་བ་ཟིལ་གྱིས་མནན་ནས་རང་གི་གནས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག་།བཅོམ་ལྡན་འདས་ཀྱིས་འདི་ནི་གཞན་གྱིས་ཡོངས་སུ་བཟུང་བའོ་སྙམ་དུ་དགོངས་ནས་སླར་བྱུང་ངོ ། །དགེ་སྦྱོང་ཞུགས་ཤིག་།བཅོམ་ལྡན་འདས་རྒྱགས་པ་དང ། ང་རྒྱལ་ངེས་པར་བཅོམ་པའི་ཕྱིར་ཞུགས་སོ། །གནོད་སྦྱིན་འབྲོག་གནས་ཀྱིས་ལན་གཉིས་སུ་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག་།བཅོམ་ལྡན་འདས་ཀྱིས་འདི་ནི་གཞན་གྱིས་ཡོངས་སུ་བཟུང་བའོ་སྙམ་དུ་དགོངས་ནས་སླར་བྱུང་ངོ ། །དགེ་སྦྱོང་ཞུགས་ཤིག་།བཅོམ་ལྡན་འདས་རྒྱགས་པ་དང ། ང་རྒྱལ་ངེས་པར་བཅོམ་པའི་ཕྱིར་ཞུགས་སོ། །གནོད་སྦྱིན་འབྲོག་གནས་ཀྱིས་ལན་གསུམ་དུ་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག་།བཅོམ་ལྡན་འདས་ཀྱིས་འདི་ནི་གཞན་གྱིས་ཡོངས་སུ་བཟུང་བའོ་སྙམ་དུ་དགོངས་ནས་སླར་བྱུང་ངོ ། །དགེ་སྦྱོང་ཞུགས་ཤིག་།བཅོམ་ལྡན་འདས་རྒྱགས་པ་དང ། ང་རྒྱལ་ངེས་པར་བཅོམ་པའི་ཕྱིར་ཞུགས་སོ། །གནོད་སྦྱིན་འབྲོག་གནས་ཀྱིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག་།དེ་ནས་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །གྲོང་དཔོན་ཁྱོད་ཀྱིས་ང་ལན་གསུམ་གྱི་བར་དུ་གནས་སུ་སྤྱན་དྲངས་པས་ད་ནི་མི་འབྱུང་ངོ ། །དགེ་སྦྱོང་དེའི་ཕྱིར་ཁྱོད་ལ་དྲི་བ་དྲིས། དྲི་བ་ལན་གདབ་པ་དེས་གལ་ཏེ་ཁོ་བོའི་སེམས་རངས་པར་བྱེད་ན་དེ་ལྟ་ན་ལེགས། གལ་ཏེ་སེམས་རངས་པར་མི་བྱེད་ན་ཁྱོད་ཀྱི་སེམས་གཡེངས་པ་འམ། སྙིང་དགས་པ་འམ། ཁ་ནས་ཁྲག་ཚ་བ་སྐྱུག་པ་འམ། ལག་པ་གཉིས་ནས་བཟུང་སྟེ་ཆུ་ཀླུང་སྐལ་ལྡན་ཤིང་རྟའི་ཕ་རོལ་གྱི་འགྲམ་དུ་འཕང་བར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། གྲོང་དཔོན་ངས་འཇིག་རྟེན་ལྷ་དང
8.153a
བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ། ལྷ་དང་མི་དང་བཅས་པའི་ནང་ན་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སེམས་གཡེངས་པ་འམ། ཐུགས་དགས་པ་འམ། ཞལ་ནས་ཁྲག་ཚ་བ་བསྒྲལ་བ་འམ། ཕྱག་གཉིས་ནས་བཟུང་སྟེ་ཆུ་ཀླུང་སྐལ་ལྡན་ཤིང་རྟ་པའི་ཕ་རོལ་གྱི་འགྲམ་དུ་འཕེན་པ་ཡང་དག་པར་རྗེས་སུ་མ་མཐོང་གིས་གྲོང་དཔོན་འདི་ལྟར་ཅི་དང་ཅི་འདོད་པ་ཞུས་ཤིག་།དེ་ནས་འབྲོག་གནས་ཀྱིས་དེའི་ཚེ་ཚིགས་སུ་བཅད་པ་གསོལ་པ། ་་་་་་་་་་བར་སྡོམ་ལ། གང་དང་ཇི་ལྟར་དུ་དང་ནི། །གང་ཞིག་རྒལ་དང་ཅི་ཡིས་རྒལ། །འདི་ན་སྐྱེས་བུའི་ནོར་མཆོག་གང ། །ཅི་ཞིག་ལེགས་སྤྱད་བདེ་སྤྱོད་འགྱུར། །རོ་རྣམས་ནང་ན་མངར་མཆོག་ཅི། །ཇི་ལྟར་འཚོ་ན་འཚོ་མཆོག་བསྟན། །བཅོམ་ལྡན་འདས་ཀྱིས་བཀའ་སྩལ་པ། དད་པ་སྐྱེས་བུའི་ནོར་མཆོག་ཡིན། །ཆོས་ལ་ལེགས་སྤྱོད་བདེ་སྤྱོད་འགྱུར། །བདེན་པའི་རོ་རྣམས་མངར་མཆོག་ཡིན། །ཤེས་པས་འཚོ་ན་འཚོ་མཆོག་བསྟན། །གནོད་སྦྱིན་གྱིས་གསོལ་པ། ཇི་ལྟར་གྲགས་དང་ལྡན་པར་འགྱུར། །ལོངས་སྤྱོད་ལྡན་པར་ཇི་ལྟར་འགྱུར། །ཇི་ལྟར་སྙན་པ་ཐོབ་འགྱུར་ཞིང ། །མཛའ་བཤེས་ཇི་ལྟར་རྙེད་པར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་ཀྱིས་ནི་གྲགས་ལྡན་འགྱུར། །སྦྱིན་པས་ལོངས་སྤྱོད་ལྡན་པར་འགྱུར། །བདེན་པས་སྙན་པ་ཐོབ་འགྱུར་ཏེ། །སྙིང་རྗེས་མཛའ་བཤེས་རྙེད་པར་འགྱུར། །གནོད་སྦྱིན་གྱིས་གསོལ་པ། དུ་ཞིག་གིས་ནི་འཇིག་རྟེན་འབྱུང ། །དུ་ཡིས་འདྲིས་པ་ཐོབ་པར་འགྱུར། །དུ་ཞིག་གིས་ནི་འཇིག་རྟེན་བཀུར། །དུ་ཡིས་འཇིག་རྟེན་ཟིལ་གནོན་འགྱུར། །བཅོམ་ལྡན་འདས་ཀྱིས་བཀའ་སྩལ་པ། དྲུག་གིས་འཇིག་རྟེན་འབྱུང་འགྱུར་ཏེ། །དྲུག་གིས་འདྲིས་པ་ཐོབ་པར་འགྱུར། །དྲུག་གིས་འཇིག་རྟེན་བཀུར་འགྱུར་ཏེ། །དྲུག་གིས་འཇིག་རྟེན་ཟིལ་གནོན་འགྱུར། །གནོད་སྦྱིན་གྱིས་གསོལ་པ། གདུགས་མཚན་གཡེལ་བ་མ་མཆིས་པ། །གང་ཞིག་འོང་བ་འདི་ལས་རྒལ། །དམིགས་མེད་རྟེན་པ་མ་མཆིས་པ། །ཟབ་མོར་གང་ཞིག་འབྱེད་མི་འགྱུར། །བཅོམ་ལྡན་འདས་ཀྱིས་བཀའ་སྩལ་པ།
8.153b
རྣམ་ཀུན་ཚུལ་ཁྲིམས་ལྡན་པ་དང ། །ལེགས་མཉམ་བཞག་ཅིང་ཤེས་རབ་ལྡན། །ནང་དུ་སེམས་ཤིང་དྲན་ལྡན་པ། །ཤིན་ཏུ་རྒལ་དཀའ་འདི་ལས་རྒལ། །འདོད་པའི་འདུ་ཤེས་ཆགས་བྲལ་ཞིང ། །གཟུགས་ཀྱི་ཀུན་སྦྱོར་མཐར་གྱུར་པ། །དེ་ནི་དམིགས་མེད་རྟེན་མེད་པའི། །ཟབ་མོར་འབྱིང་བར་མི་འགྱུར་རོ། །གནོད་སྦྱིན་གྱིས་གསོལ་པ། ཅི་ཡིས་འོད་པ་རྒལ་བར་འགྱུར། །ཅི་ཞིག་གིས་ནི་རྒྱ་མཚོ་རྒལ། །ཅི་ཡིས་སྡུག་བསྔལ་སྤོང་བར་འགྱུར། །ཅི་ཞིག་གིས་ནི་ཡོངས་དག་འགྱུར། །བཅོམ་ལྡན་འདས་ཀྱིས་བཀའ་སྩལ་པ། དད་པས་འོད་པ་རྒལ་བར་འགྱུར། །བག་ཡོད་པས་ནི་རྒྱ་མཚོ་རྒལ། །བརྩོན་པས་སྡུག་བསྔལ་སྤོང་བར་འགྱུར། །ཤེས་རབ་ཀྱིས་ནི་ཡོངས་དག་འགྱུར། །བདེན་དུལ་གཏོང་བ་མ་གཏོགས་པའི། །ཆོས་གཞན་འབའ་ཞིག་ཡོད་དམ་ཞེས། །དགེ་སྦྱོང་བྲམ་ཟེ་སོ་སོ་ལ། །གཞན་དང་གཞན་དུ་ཁྱོད་དྲིས་ཤིག་།གནོད་སྦྱིན་གྱིས་གསོལ་པ། དགེ་སྦྱོང་བྲམ་ཟེ་སོ་སོ་ལ། །ཅི་སླད་བཞིན་དུ་བདག་འདྲི་བགྱིད། །འདི་ལྟར་དཔའ་ཆེན་ཁྱོད་ཀྱིས་ནི། །ཆོས་འདི་ལེགས་པར་རབ་ཏུ་བཤད། །ཀྱེ་མ་གནོད་སྦྱིན་བོང་བུ་པ། །གང་གིས་དེད་དཔོན་བླ་ན་མེད། །སངས་རྒྱས་བདག་ལ་བསྟན་གྱུར་པ། །ཁྱོད་ལ་ཁོ་བོ་བྱས་པ་བཟོ། །འདི་ནས་ཁོ་བོ་གྲོང་ནས་གྲོང ། །ཁྱིམ་ནས་ཁྱིམ་དུ་རྫོགས་སངས་དང ། །ཆོས་ཀྱི་ཆོས་ཉིད་བཟང་པོ་ལ། །འདུད་བཞིན་དུ་ནི་སྤྱད་པར་བྱ། །དེ་ནས་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །བཞིན་བཟངས་ཁྱོད་ཀྱིས་དགེ་སློང་ཤཱ་རིའི་བུ་དང ། མཽད་གལ་གྱི་བུ་གཉིས་ཟན་བྱིན་པས་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེ་བར་བྱ་བ་ལས་ཁྱོད་ཀྱིས་སྨོན་ལམ་ལོག་པ་བཏབ་པས་གནོད་སྦྱིན་གདུག་པ་རྣམས་ཀྱི་ནང་དུ་སྐྱེས་ཏེ། ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང་རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱོད་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེས་གསོལ་པ། བཅོམ་ལྡན་འདས་བདག་
8.154a
གིས་ཅི་བགྱི་བ་བཀའ་སྩལ་དུ་གསོལ། བཞིན་བཟངས་ཚུར་ཤོག་།ཁྱོད་ངའི་སྤྱན་སྔར་སྐྱབས་སུ་འགྲོ་བ་དང ། བསླབ་པའི་གཞི་དག་ལོང་ལ་འབྲོག་གནས་ན་གནས་པའི་སྐྱེ་བོའི་ཚོགས་ལ་མི་འཇིགས་པ་བྱིན་ཅིག་།བཙུན་པ་བདག་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང ། བསླབ་པའི་གཞི་དག་ལེན་ཅིང་དེང་སླན་ཅད་འབྲོག་གནས་ན་གནས་པའི་སྐྱེ་བོའི་ཚོགས་ལ་མི་འཇིགས་པ་སྩོལ་ཏོ། །དེས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་འགྲོ་བ་དང ། བསླབ་པའི་གཞི་དག་བླངས་ཏེ། དེས་བསླབ་པའི་གཞི་དག་བླངས་ནས་ཚིགས་སུ་བཅད་པ་སྨྲས་པ། ཀྱེ་མ་སྟོན་པ་བདག་དོན་ཏུ། །སྡུམ་པར་ཡང་དག་གཤེགས་གྱུར་ཏེ། །བདག་གིས་དེ་རིང་ཕྱི་མ་ཡི། །དོན་ནི་རབ་ཏུ་ཤེས་པར་གྱུར། །དེ་ནས་ཁྱིམ་བདག་དེས་བ་ལང་དྲུག་དང་ལྡན་པའི་ཤིང་རྟ་ཟས་ཀྱིས་བཀང་སྟེ་ཁྱེའུ་དེ་ཡང་ཤིང་རྟར་བཅུག་ནས་བྲོ་དང ། གླུ་དང་རོལ་མོའི་སྒྲས་གནོད་སྦྱིན་གྱི་དྲུང་དུ་འཕགས་པ་དང ། བྲམ་ཟེ་དང ། ཁྱིམ་བདག་ཁ་ཅིག་གིས་ཐོས་ནས་སྨྲས་པ། ཤེས་ལྡན་དག་བྲོ་དང ། གླུ་དང ། རོལ་མོའི་སྒྲ་འདི་ཅི་ཡིན། ཁ་ཅིག་གིས་སྨྲས་པ། ཁྱེད་ཀྱིས་མི་ཤེས་སམ། འདི་ནི་ཁྲག་གི་ཐིགས་པ་དེ་གནོད་སྦྱིན་གྱི་གན་དུ་ཁྱེར་བ་ཡིན་ནོ། །སྐྱེ་བོ་ཕལ་པོ་ཆེའི་ཚོགས་འདུས་ཏེ་སྨྲས་པ། ཤེས་ལྡན་དག་ཁྲག་གི་ཐིགས་པ་འདིས་གནོད་སྦྱིན་མི་མགུ་བས་གལ་ཏེ་འདི་མ་བཟློག་ན་གདོན་མི་ཟ་བར་གནོད་སྦྱིན་འཁྲུགས་པར་འགྱུར་ཞིང ། བདག་ཅག་ཐམས་ཅད་ལ་གནོད་པར་བྱེད་པར་འགྱུར་གྱིས། འདི་བཟློག་པར་བྱའོ་ཞེས་དེ་དག་གིས་དེ་བཟློག་པར་བརྩམས་པ་དང ། དེས་སྨྲས་པ། ཤེས་ལྡན་དག་ཚོགས་ཀྱིས་ཁྲིམས་སུ་བྱ་བ་བཅས་པ་ལས་བདག་ཉིད་འགྲོ་བར་བྱ་བ་འམ། བུ་གཏང་བར་བྱའི་ཞེས་འབྱུང་བས་འདི་ཁོ་བོའི་བུ་ཡིན་ན་ཅིའི་ཕྱིར་ཟློག་པར་བྱེད། མི་ལྡོག་པར་འགྲོའོ། །དེ་དག་ཅང་མི་སྨྲ་བར་འཁོད་དོ། །བཅོམ་ལྡན་འདས་ཀྱིས་བྲོ་དང ། གླུ་དང་རོལ་མོའི་སྒྲ་དེ་གསན་ཏོ། །གསན་ནས་ཀྱང་གནོད་སྦྱིན་འབྲོག་གནས་ལ་བཀའ་སྩལ་པ། གྲོང་དཔོན་བྲོ་དང ། གླུ་དང་རོལ་མོའི་སྒྲ་འདི་ཅི་ཡིན། བཙུན་པ་བདག་དམ་པ་མ་ལགས་པའི་ཆོས་སྡིག་པ་དེ་ལས་སླར་ལོག་ཀྱང་སྐྱེ་བོ་དག་གིས་ད་དུང་དེ་བཞིན་དུ་འཛིན་པར་བགྱིད་ན་ཇི་ལྟར་བསྒྲུབ་པར་བགྱི་མ་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། གྲོང
8.154b
དཔོན་འདི་ཅི་ཡིན། དེས་ཇི་ལྟར་གྱུར་པ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གྲོང་དཔོན་དེང་ཟས་དང ། སྐོམ་ལོང་ལ་མི་ཡང་མ་ལེན། གླང་ཡང་མ་ལེན་ཅིག་།དེས་བསམས་པ། འོངས་ཀྱང་རུང་གིས་བདག་གི་ཟན་ཐ་མ་འདི་བཅོམ་ལྡན་འདས་ལ་བསོད་སྙོམས་དབུལ་ལོ་སྙམ་མོ། །ཁྱིམ་བདག་དེས་ཁྱེའུ་དེ་ཤིང་རྟ་ནས་ཕྱུང་སྟེ་གནོད་སྦྱིན་ལ་བྱིན་ནོ། །གནོད་སྦྱིན་གྱིས་ཀྱང་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་ཀྱང་ཕ་ལ་སྩལ་ཏོ། །དེ་ནས་ཕས་གསོལ་པ། བཅོམ་ལྡན་འདས་ཁྱེའུ་འདི་མིང་ཅིར་གདགས་བཅོམ་ལྡན་འདས་ཀྱིས་ཚིགས་སུ་བཅད་པའི་དབྱངས་ཀྱིས་བཀའ་སྩལ་པ། བྱིས་པ་གང་ཚེ་གནོད་སྦྱིན་གྱི། །ལག་ནས་ང་ཡི་ལག་ཏུ་ཐོབ། །ང་ཡི་ལག་ནས་ཕ་ཡི་ལག་།དེ་ཡི་ཕྱིར་ན་ལག་བརྒྱུད་ཡིན། །དེའི་མིང་ལག་བརྒྱུད་ཅེས་བྱ་བར་བཏགས་སོ། །ཁྱིམ་བདག་དེས་དེ་ཁྱེར་ཏེ་འབྲོག་གནས་སུ་སོང་བ་དང ། སྐྱེ་བོའི་ཚོགས་ཀྱིས་མཐོང་ནས་སྨྲས་པ། ཤེས་ལྡན་དག་འདི་འདི་ལྟར་གྱུར་ཅིང ། ཁྲག་གི་ཐིགས་པ་དེ་ཁྱེར་ཏེ་འོངས་པ་ལས་ན། གོར་མ་ཆག་པར་འདིས་གནོད་སྦྱིན་འཁྲུགས་པར་བྱས་སོ། །དེས་སྨྲས་པ། ཤེས་ལྡན་དག་གནོད་སྦྱིན་ག་ལ་འཁྲུགས་ཏེ། བཅོམ་ལྡན་འདས་ཁྱེའུ་འདི་ལ་ཐུགས་བརྩེ་བའི་སླད་དུ་དེའི་གནས་སུ་མཚན་མོ་གནས་པར་ཞལ་གྱིས་བཞེས་ནས། བཅོམ་ལྡན་འདས་ཀྱིས་དེ་བཏུལ་ཏེ་སྐྱབས་སུ་འགྲོ་བ་དང་བསླབ་པའི་གཞི་དག་ལ་བཞག་ནས། དེས་འབྲོག་གནས་ན་གནས་པའི་སྐྱེ་བོའི་ཚོགས་ལ་མི་འཇིགས་པ་བྱིན་གྱིས་འཚེར་འགྲིབ་མེད་པར་གྱིས་ཤིག་།དེ་དག་ཤིན་ཏུ་དགའ་སྟེ་སྨྲས་པ། ཁྱེའུ་འདི་སྐྱེས་མ་ཐག་ཏུ་གནོད་སྦྱིན་འབྲོག་གནས་བཏུལ་བས་ཁྱེའུ་འདིའི་མིང་ལག་བརྒྱུད་འབྲོག་གནས་ཤེས་བྱའོ་ཞེས་དེའི་མིང་ལག་བརྒྱུད་འབྲོག་གནས་ཤེས་བྱ་བར་བཏགས་སོ། །དེ་ཆེན་པོར་གྱུར་ནས་ཡི་གེ་དང་ཡིག་འབྲུ་དག་དང ། སྒྱུ་རྩལ་གཞན་དག་ལ་ཡང་ཤིན་ཏུ་མཁས་པར་གྱུར་ཏོ། །གང་གི་ཚེ་སྔོ་བསངས་ཅན་མགོ་བསྒྱུར་རན་པར་གྱུར་པ་དེའི་ཚེ་ན་དེ་སློང་བ་རྒྱལ་པོ་དག་དང ། ནོར་ཅན་དག་དང ། ཚོང་དཔོན་དག་དང་དེད་དཔོན་དག་དང ། ཤཱཀྱ་དག་དང ། ཀྲོའུ་དྱ་དག་དང ། ལི་ཚ་བྱི་དག་དང ། གཞན་ཡང་མང་པོ་དག་ལྷགས་པར་གྱུར་ནས།
8.155a
ཁྱིམ་བདག་གདངས་ཅན་འདི་སྙམ་དུ་མང་པོ་དག་སྔོ་བསངས་ཅན་སློང་སྟེ། གང་དག་ལ་མ་བྱིན་པ་དེ་དག་བདག་གི་དགྲ་བོར་འགྱུར་རོ་སྙམ་ནས་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་གོ། །སྔོ་བསངས་ཅན་གྱིས་དེ་མཐོང་ནས་སྨྲས་པ། ཡབ་ཁྱོད་ཅིའི་སླད་དུ་ཕྱག་ལ་ཞལ་གཏད་དེ་སེམས་ཁོངས་སུ་ཆུད་ཅིང་བཞུགས། དེས་སྨྲས་པ། བུ་མོ་ཁྱོད་སློང་བ་རྒྱལ་པོ་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་དང ། ཤཱཀྱ་དག་དང ། ཀྲོའུ་དྱ་དག་དང ། ལི་ཙ་བི་དག་དང ། གཞན་ཡང་མང་པོ་དག་ལྷགས་པས་གང་དག་ལ་ཁྱོད་མ་བྱིན་པ་དེ་དག་ངའི་དགྲར་འགྱུར་ན། ཁོ་བོ་ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་མི་འདུག་ཏུ་རུང ། དེས་སྨྲས་པ། ཡབ་གལ་ཏེ་དེ་ལྟ་ན་མི་དགྱེས་པར་མ་མཛད་ཅིག་དང ། དེང་ནས་གདུགས་བདུན་ན་ངན་བུ་རང་གིས་གནས་བཙལ་བར་བགྱིའོ། །དེས་སྨྲས་པ། བུ་མོ་དེ་ལྟར་གྱིས་ཤིག་།འོན་ཀྱང་རེ་ཤིག་ལྷ་ལ་ཞུ་བར་བྱའོ་ཞེས་དེ་བད་སའི་རྒྱལ་པོ་ཤར་པའི་གན་དུ་སོང་སྟེ་སྨྲས་པ། ལྷ་དེང་ནས་གདུགས་བདུན་ན་སྔོ་བསངས་ཅན་རང་གིས་གནས་ཚོལ་བར་འགྱུར་གྱིས་ལྷས་གནང་བར་མཛོད་ཅིག་།རྒྱལ་པོས་བསམས་པ། དེས་ང་མ་གཏོགས་པ་གཞན་སུ་ཞིག་ལ་གནས་ཚོལ་བར་འགྱུར་སྙམ་ནས་གནང་ངོ ། །དེས་གནང་ནས་བློན་པོ་རྣམས་ལ་བསྒོ་བ། ཤེས་ལྡན་དག་གྲོང་ཁྱེར་མཛེས་པར་བྱེད་དུ་ཆུག་ལ། འདི་སྐད་ཅེས་དེང་ནས་ཉི་མ་བདུན་ནས་སྔོ་བསངས་ཅན་རང་གིས་གནས་ཚོལ་བར་འགྱུར་རོ་ཞེས་དྲིལ་སྒྲོགས་ཤིག་།བློན་པོ་རྣམས་ཀྱིས་གྲོང་ཁྱེར་དེ་རྡོ་བ་དང ། གསེག་མ་དང ། གྱོ་མོ་མེད་པར་རྣམ་པར་བཞག་ནས་ཙན་དན་གྱི་ཆུས་ཆག་ཆག་བཏབ་སྟེ། བདུག་སྤོས་དྲི་ཞིམ་པོའི་སྣོད་ཉེ་བར་བཞག་ནས་དར་གྱི་ཆུན་པོ་དཔྱངས་ཏེ། རྒྱལ་མཚན་དང ། བ་དན་བསྒྲེངས་ནས་མེ་ཏོག་སྣ་ཚོགས་བཀྲམ་སྟེ། ལྷའི་སྐྱེད་མོས་ཚལ་ལྟར
8.155b
དགའ་བར་འགྱུར་བར་བྱས་ནས་དྲིལ་བསྒྲག་པ་བྱེད་དུ་བཅུག་སྟེ། འདི་སྐད་ཅེས་ཀཽ་ཤམྦཱི་ན་གནས་པ་དང ། ཕོ་བྲང་འཁོར་གྱི་མི་དང ། ཡུལ་ཐ་དད་པ་དག་ནས་ལྷགས་པའི་སྐྱེ་བོའི་ཚོགས་ཤེས་ལྡན་དག་ཉོན་ཅིག་།དེང་ནས་ཉི་མ་བདུན་ན་སྔོ་བསངས་ཅན་རང་གིས་གནས་ཚོལ་བར་འགྱུར་གྱིས། དེའི་ཕྱིར་ཁྱེད་ཅག་གིས་འབྱོར་པ་ཇི་ལྟ་བ་བཞིན་དུ་འདུ་བར་བྱའོ་ཞེས་བསྒོའོ། །དེ་ནས་སྲོག་ཆགས་འབུམ་ཕྲག་དུ་མ་དག་འདུས་པར་གྱུར་པ་ན་ཉི་མ་བདུན་པ་ལ་སྔོ་བསངས་ཅན་རྒྱན་ཐམས་ཅད་ཀྱིས་ཀླུབས་ཏེ། ཤིང་རྟ་ལ་ཞོན་ནས་མེ་ཏོག་ཕྲེང་གི་ཆུན་པོ་ཐོགས་ཏེ་ཕྱིར་བྱུང་ནས་སྐྱེ་བོ་ཕལ་པོ་ཆེའི་ཚོགས་ལ་བརྟག་པར་བརྩམས་པ་དང ། བད་སའི་རྒྱལ་པོ་ཤར་པ་འདི་སྙམ་དུ། འདིས་གོར་མ་ཆག་པར་བདག་གི་སྟེང་དུ་མེ་ཏོག་ཕྲེང་གི་ཆུན་པོ་འཕེན་པར་འགྱུར་རོ་སྙམ་ནས། སེམས་བསྡུས་ཏེ་བག་ཡོད་པར་རྟོག་ཅིང་འདུག་གོ། །སྔོ་བསངས་ཅན་གྱིས་ཀུན་དུ་སྐྱེ་བོའི་ཚོགས་ལ་རྣམ་པར་བལྟས་ནས་དྲིས་པ། ཤེས་ལྡན་དག་གླང་པོ་ཆེའི་རྒྱབ་ཏུ་ཞོན་པ་འདི་དག་གང་གང་ཡིན། དེ་དག་གིས་སྨྲས་པ། འདི་ནི་རྒྱལ་པོ་གཟུགས་ཅན་སྙིང་པོའོ། །འདི་ནི་རྒྱལ་པོ་གསལ་རྒྱལ་ལོ། །འདི་ནི་རྒྱལ་པོ་ཚངས་བྱིན་ནོ། །འདི་ནི་བད་སའི་རྒྱལ་པོ་ཤར་པའོ། །དེ་བཞིན་དུ་ནོར་ཅན་དག་དང ། ཚོང་དཔོན་དག་དང ། དེད་དཔོན་དག་དང ། ཀྲོའུ་དྱ་དག་དང ། ཤཱཀྱ་དག་དང ། ལི་ཙ་བྱི་དག་དང ། གཞན་ཡང་མང་པོ་ཐམས་ཅད་སོ་སོར་དྲིས་ནས། དེའི་འོག་ཏུ་སྨྲས་པ། ཤེས་ལྡན་དག་ལག་བརྒྱུད་འབྲོག་གནས་ཤེས་བྱ་བ་གང་ཡིན་པ་བཅོམ་ལྡན་འདས་ཀྱིས་གནོད་སྦྱིན་ལས་ཐར་བར་བྱས་པ་དེ་འདིར་ཤོག་ཤིག་།སྐྱེ་བོའི་ཚོགས་ཀྱིས་སྨྲས་པ། དེ་མ་འོངས་སོ། །དེ་ཕྱོགས་གང་ན་འདུག་།ག་གེ་མོ་ཞིག་ནའོ། །དེས་དེའི་ཕྱོགས་སུ་ཁ་བལྟས་ཏེ། དེ་བདག་གི་ཁྱིམ་ཐབ་ཡིན་ནོ་ཞེས་མེ་ཏོག་ཕྲེང་གི་ཆུན་པོ་འཕངས་པ་དང ། རྒྱལ་པོ་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་དང ། ཀྲོའུ་དྱ་དག་དང ། ཤཱཀྱ་དག་དང ། ལི་ཙ་བི་དག་དང ། གཞན་ཡང་མང་པོ་འདུས་པ་དག་ཕྱིར་ཕྱོགས་ཏེ་རང་རང་གི་ཡུལ་དུ་དོང་ངོ ། །ཁྱིམ་བདག་གདངས་ཅན་བག་ཚ་ཞིང་ཡིད་མི་བདེ་ནས་སྔོ་བསངས་ཅན་ལ
8.156a
སྨྲས་པ། བུ་མོ་གལ་ཏེ་ཁྱོད་ཀྱིས་ལག་བརྒྱུད་བདམས་པས་ཁོ་བོ་ལ་རྒྱལ་པོ་དག་གནོད་པ་བྱེད་པར་གྱུར་ན་མི་རུང་གིས་མྱུར་དུ་སོང་ཤིག་།དེས་སྨྲས་པ། ཡབ་མ་ནོངས་ཀྱིས་དེ་བཞིན་བགྱིའོ། །ཁྱིམ་བདག་གདངས་ཅན་གྱིས་དེ་བཞོན་པ་བཟང་པོ་སྦྱར་ཏེ་རྒྱན་རྣམ་པ་སྣ་ཚོགས་ཀྱིས་བརྒྱན་ནས་འཁོར་དང་བཅས་ཏེ་འབྲོག་གནས་སུ་བཏང་ངོ ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང ། མ་གཟིགས་པ་དང ། མ་རིག་པ་དང ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས། སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ་ཡན་ལག་དྲུག་དང་ལྡན་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལ་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས། གང་ནི་ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང ། ཉམ་ང་བ་དང་མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ནས་བསླང་སྟེ
8.156b
མཐོ་རིས་དང ། ཐར་པ་དང་འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་གོ། །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པ་འང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ། གལ་ཏེ་ལག་བརྒྱུད་འབྲོག་གནས་ཀྱིས་བདེན་པ་མ་མཐོང་བར་སྔོ་བསངས་ཅན་མཐོང་བར་གྱུར་ན་བདེན་པ་དག་གི་སྣོད་དུ་མི་འགྱུར་གྱིས། དེ་ལ་ཕན་གདགས་པའི་ཕྱིར་འབྲོག་གནས་སུ་འགྲོའོ་སྙམ་དུ་རིག་ནས། མ་ག་དྷ་དག་ཏུ་ལྗོངས་རྒྱུ་ཞིང་གཤེགས་པ་ན་འབྲོག་གནས་སུ་བྱོན་ནས་འབྲོག་གནས་སུ་མཚན་མོ་བ་ལང་གི་ལམ་དུ་རྩཝ་བཏིང་བ་ལ་གནས་པར་ཞལ་གྱིས་བཞེས་སོ། །བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་བཅོམ་ལྡན་འདས་མཚན་མོ་བ་ལང་གི་ལམ་ན་རྩཝ་བཏིང་བ་ལ་གནས་པར་ཞལ་གྱིས་བཞེས་པ་མཐོང་ངོ ། །མཐོང་ནས་ཀྱང་མྱུར་བ་མྱུར་བར་ལག་བརྒྱུད་འབྲོག་གནས་ཀྱི་གན་དུ་དོང་སྟེ་སྨྲས་པ། ཁྱིམ་བདག་གང་གིས་ཁྱོད་གནོད་སྦྱིན་ལས་ཐར་བར་མཛད་པའི་བཅོམ་ལྡན་འདས་དེ་འབྲོག་གནས་སུ་བྱོན་ནས་མཚན་མོ་བ་ལང་གི་ལམ་ན་རྩཝ་བཏིང་བ་ལ་གནས་པར་ཞལ་གྱིས་བཞེས་སོ། །ལག་བརྒྱུད་འབྲོག་གནས་ཀྱིས་བསམས་པ། གལ་ཏེ་སང་འགྲོ་བར་བྱ་ན།
8.157a
བཅོམ་ལྡན་འདས་གཞན་དུ་གཤེགས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་ང་ཉིད་འགྲོའོ་སྙམ་དུ་རིག་ནས། མྱུར་བ་མྱུར་བར་འཕགས་པ་དང་ཇི་ཙམ་ན་སྒོ་ཆོད་དོ། །དེའི་སྐབས་སུ་སྔོ་བསངས་ཅན་ཡང་སྒོ་དྲུང་དུ་ཕྱིན་པ་དང ། དེས་ཀྱང་ནང་དུ་མ་ཆུད་དེ་སྒོ་དྲུང་དུ་མཚན་མོ་གནས་པར་ཁས་བླངས་སོ། །ནམ་ནངས་ནས་ལག་བརྒྱུད་འབྲོག་གནས་མྱུར་བ་མྱུར་བ་ཁོ་ནར་ཤིང་རྟ་ལ་ཞོན་ཏེ་འབྲོག་གནས་ནས་ཕྱིར་བྱུང་བ་དང ། སྔོ་བསངས་ཅན་ཡང་ཤིང་རྟ་ལ་ཞོན་ཏེ། ནང་དུ་འཇུག་པ་ན་ལག་བརྒྱུད་འབྲོག་གནས་ཀྱིས་སྨྲས་པ། ཤིང་རྟ་ཟུར་ཅིག་།སྔོ་བསངས་ཅན་གྱིས་ཀྱང་སྨྲས་པ། ཁྱོད་ཀྱི་ཤིང་རྟ་ཟུར་ཅིག་།དེས་ཀྱང་མ་བཟུར། གཅིག་ཤོས་ཀྱིས་ཀྱང་མ་བཟུར་ནས། སྔོ་བསངས་ཅན་གྱིས་བརྟགས་ཏེ་སྨྲས་པ། ཁྱོད་ལག་བརྒྱུད་འབྲོག་གནས་ཡིན་ནམ། དེས་སྨྲས་པ། ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །ལག་བརྒྱུད་འབྲོག་གནས་ཀྱིས་ཀྱང་སྨྲས་པ། ཁྱོད་ཀྱང་སྔོ་བསངས་ཅན་ཡིན་ནམ། དེས་ཀྱང་སྨྲས་པ། བདག་སྐྱེ་བོ་དག་གིས་དེ་ལྟར་ཤེས་སོ། །ལག་བརྒྱུད་འབྲོག་གནས་ཀྱིས་སྨྲས་པ། ཁོ་བོ་བཅོམ་ལྡན་འདས་ཀྱི་སྤྱན་སྔར་འགྲོས་ཤིང་རྟ་ཟུར་ཅིག་།ཁྱོད་ཀྱང་རེ་ཤིག་ཁྱིམ་དུ་སོང་ཤིག་།སྔོ་བསངས་ཅན་གྱིས་སྨྲས་པ། སྐྱེས་བུ་དམ་པའི་གན་དུ་སོང་ཤིག་ཅེས་སྔོ་བསངས་ཅན་གྱི་ཤིང་རྟ་མཐའ་གཅིག་ཏུ་བཟུར་ཏོ། །ལག་བརྒྱུད་འབྲོག་གནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་ཁྱིམ་བདག་གི་སོ་སོར་ཀུན་དགའ་བར་བྱ་བས། བཅོམ་ལྡན་འདས་ཇི་ལྟ་བདེ་བར་གཟིམས་སམ་ཞེས་སོ་སོར་ཀུན་དགའ་བར་བྱས་སོ། །དེ་ནས་བཅོམ་ལྡན་འདས་ཀྱིས་ལག་བརྒྱུད་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །ལག་བརྒྱུད་འཇིག་རྟེན་ན་གང་དག་བདེ་བར་ཉལ་བར་བྱེད་པ་དེ་དག་གི་ནང་ན་ང་ཡང་འགའ་ཞིག་ཡིན་ནོ། །བཙུན་པ་དོག་ས་སྲ་ཞིང་བ་ལང་གི་རྩིད་པའི་གཞི་ཅན་དུ་རས་སྲབ་མོའི་གདན་བཤམས་ཤིང་དགུན་སྨད་ཀྱི་དུས་ཀྱི་ཚེ་ཚེས་བརྒྱད་ཀྱི་བར་ལ་འོད་མ་འགས་པའི་བསེར་མ་དག་ལྡང་ལ། ཁྱོད་ཀྱི་ན་བཟའ་ངུར་སྨྲིག་འདི་དག་ནི་སྲབ་པས་སྐུ་ཡོངས་སུ
8.157b
གདུང་བར་བགྱིད་ཀྱང ། བཅོམ་ལྡན་འདས་དེ་སྐད་ཅེས་འཇིག་རྟེན་ན་གང་དག་བདེ་བར་ཉལ་བར་བྱེད་པ་དེ་དག་གི་ནང་ན་ང་ཡང་འགའ་ཞིག་ཡིན་ནོ་ཞེས་གསུང་ངམ། ལག་བརྒྱུད་དེའི་ཕྱིར་ཁྱོད་ཉིད་ལ་དྲིས། ཁྱོད་ཀྱིས་ཇི་ལྟར་བཟོད་པ་དེ་ལྟར་ལན་ཐོབ་ཤིག་།ལག་བརྒྱུད་འདི་ལྟ་སྟེ་དཔེར་ན་འདི་ན་ཁྱིམ་བདག་གམ། ཁྱིམ་བདག་གི་བུ་ཕྱུག་པ། ནོར་མང་བ། ལོངས་སྤྱོད་ཆེ་བ་འགའ་ཞིག་ཡོད་པར་གྱུར་ལ། དེའི་དོན་ཏུ་ཁང་བཟངས་རྩིག་ཏུ་བཅུག་ཅིང་ཁང་བཟངས་དེར་ཁང་པ་བརྩེགས་པ་རྩིག་ཏུ་བཅུག་ལ། ཁང་པ་བརྩེགས་པ་དེར་ཁྲི་ཤུར་བུས་བླས་པ་སྟན་སྦྱར་མ་བཏིང་བ། སྟན་ནང་ཚངས་ཅན་བཏིང་བ། སྟན་ཁྲ་བོ་བཏིང་བ། སྟན་ཆེན་པོ་བཏིང་བ། སྟན་བཟང་པོ་བཏིང་བ། སུམ་ཚན་གྱི་གོས་ཀྱི་སྟེང་གཡོགས་བཏིང་བ། སྟེང་ནས་བགོ་བའི་གོས་དང་བཅས་པ་གཉིས་སུ་རྒྱབ་རྟེན་དམར་པོ་བཞག་པ་བཤམས་ཤིང་ཏིལ་མར་གྱི་མར་མེ་མཚན་ཐུབ་བཙུགས་ནས་ཆུང་མ་ཡིད་དུ་འོང་བ་ཞིག་འདི་ལྟ་སྟེ། དགའ་མགུར་སྤྱད་པར་བྱ་བའི་ཕྱིར་ཉེ་བར་བཞག་ན་ལག་བརྒྱུད་འདི་ཇི་སྙམ་དུ་སེམས། མི་དེའི་མལ་བཅས་པ་བདེ་བ་འམ། སྡུག་བསྔལ་བ་ཡིན་སྙམ། བཙུན་པ་བདག་འདི་སྙམ་བགྱིད་དེ། འཇིག་རྟེན་ན་གང་དག་བདེ་བར་མཆིས་ཉལ་བ་དེ་དག་གི་ནང་ན་མི་དེ་འགའ་ཞིག་ལགས་སྙམ་བགྱིད་དོ། །ལག་བརྒྱུད་འདི་ཇི་སྙམ་དུ་སེམས། འདི་ལྟར་མི་དེ་ལྟ་བུའི་བདེ་བ་དང ། དེ་ལྟ་བུའི་ཡིད་དུ་འོང་བ་དང་ལྡན་པ་དེ་ལ་འདོད་པ་ལས་སྐྱེས་པའི་ཡོངས་སུ་གདུང་བ་དང ། ཞེ་སྡང་ལས་སྐྱེས་པ་དང ། གཏི་མུག་ལས་སྐྱེས་པའི་ཡོངས་སུ་གདུང་བ་དག་སྐྱེ་ཞིང་ཡོངས་སུ་གདུང་བ་དེ་དག་གིས་ཡོངས་སུ་གདུངས་པ་ན་མི་དེ་སྡུག་བསྔལ་བར་ཉལ་ཞིང་བདེ་བར་མི་ཉལ་བའི་འདོད་པ་ལས་སྐྱེས་པའི་ཡོངས་སུ་གདུང་བ་དང ། ཞེ་སྡང་དང ། གཏི་མུག་ལས་སྐྱེས་པའི་ཡོངས་སུ་གདུང་བ་དེ་དག་དེ་བཞིན་གཤེགས་པས་ཡོངས་སུ་མཁྱེན་ཅིང་རྩ་བ་ནས་བཅད་དེ་ཏ་ལའི་མགོ་བཞིན་དུ་མི་སྣང་བ་དང ། གཞི་མེད་པ་དང ། ཕྱིས་ཀྱང་མི་སྐྱེ་བའི་ཆོས་ཉིད་དུ་མཛད་པས་དེའི་ཕྱིར་ང་དེ་སྐད་ཅེས་འཇིག་རྟེན་ན་གང་དག་བདེ་བར་ཉལ་བ་དེ་དག་གི་ནང་ན་ཡང་འགའ་ཞིག་ཡིན་ནོ་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ
8.158a
ཚིགས་སུ་བཅད་པ་དག་བཀའ་སྩལ་པ། བྲམ་ཟེ་མྱ་ངན་ཡོངས་འདས་པ། །གང་ཞིག་འདོད་པས་མ་གོས་ཤིང ། །ཕུང་པོ་དག་ལས་རྣམ་གྲོལ་བ། །རྣམ་ཀུན་བདེ་བར་ཉལ་བ་ཡིན། །འདི་ལ་འདོད་པ་ཀུན་བཅད་ཅིང ། །སྙིང་གི་རིམས་ནད་བསལ་གྱུར་པ། །ཉེར་ཞི་ཞི་བ་ཐོབ་པ་ཡི། །སེམས་ཀྱིས་བདེ་བར་ཉལ་བ་ཡིན། །དེ་ནས་བཅོམ་ལྡན་འདས་ལག་བརྒྱུད་འབྲོག་གནས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་ཅིང་སངས་རྒྱས་བཅོམ་ལྡན་འདས་རྣམས་ཀྱི་དུས་སྔར་མཛད་པའི་ཆོས་དང་ལྡན་པའི་བཀའ་མཆིད་གང་ཡིན་པ་འདི་ལྟ་སྟེ། སྦྱིན་པའི་བཀའ་མཆིད་དང ། ཚུལ་ཁྲིམས་ཀྱི་བཀའ་མཆིད་དང ། མཐོ་རིས་ཀྱི་བཀའ་མཆིད་དང ། འདོད་པ་རྣམས་ཀྱི་རོ་མྱང་བའི་ཉེས་དམིགས་དང ། ཀུན་ནས་ཉོན་མོངས་པ་དང ། རྣམ་པར་བྱང་བ་དང ། ངེས་པར་འབྱུང་བ་དང ། རབ་ཏུ་དབེན་པའི་ཕན་ཡོན་དང ། རྣམ་པར་བྱང་བའི་ཕྱོགས་དང་འཐུན་པའི་ཆོས་དག་རྒྱ་ཆེར་སྟོན་པར་མཛད་དོ། །གང་གི་ཚེ་བཅོམ་ལྡན་འདས་ཀྱིས་དེ་སེམས་རངས་པ་དང ། སེམས་ཉམ་བདེ་བ་དང ། སེམས་དགའ་བ་དང ། སེམས་ལ་སྒྲིབ་པ་མེད་པ་དང ། ཡང་དག་ཕུལ་གྱི་ཆོས་བསྟན་པ་ཀུན་ཤེས་པའི་སྐལ་བ་དང་ལྡན་ཞིང་མཐུ་ཡོད་པར་གཟིགས་པ་དེའི་ཚེ་ན་སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བསྟན་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་དང ། ཀུན་འབྱུང་བ་དང ། འགོག་པ་དང ། ལམ་དག་རྒྱ་ཆེར་སྟོན་པར་མཛད་དོ། འདི་ལྟ་སྟེ་དཔེར་ན་གོས་དག་པ། ནག་ནོག་མེད་པ་ཁ་སྒྱུར་དུ་རུང་བ་ཚོན་དུ་བཅུག་ན། ཚོན་ལེགས་པར་འཇེན་པར་འགྱུར་བ་དེ་བཞིན་དུ་ལག་བརྒྱུད་འབྲོག་གནས་ཀྱིས་ཀྱང་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང ། ཀུན་འབྱུང་བ་དང ། འགོག་པ་དང་ལམ་མངོན་པར་རྟོགས་པར་གྱུར་ཏོ། །དེ་ནས་ལག་བརྒྱུད་འབྲོག་གནས་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་རྒལ་བ་དང ། ཐེ་ཙོམ་ལས་རྒལ་བ་དང ། སྟོན་པའི
8.158b
བསྟན་པ་ལ་གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་ཞིང་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཅད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་མངོན་པར་དད་པས་སྐྱབས་སུ་མཆིའོ། །དེ་ནས་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་བ་དང ། བསླབ་པའི་གཞི་དག་བླངས་ནས་ཕྱིར་མི་འོང་བའི་འབྲས་བུ་ཐོབ་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་དེང་ཁོ་ན་སྔོ་བསངས་ཅན་གྱིས་བཙལ་ཅིང་བདག་གིས་དེང་ཁོ་ན་ཕྱིར་མི་འོང་བའི་འབྲས་བུ་མངོན་སུམ་དུ་བགྱིས་ན་འདི་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལག་བརྒྱུད་སོང་ཤིག་།ཁྱོད་ཀྱི་བསླབ་པ་ནི་འདི་ཡིན་ནོ། །སྔོ་བསངས་ཅན་ཡང་ཇི་ལྟར་ཁས་བླངས་པ་བཞིན་ཟས་དང ། གོས་ཀྱིས་མཁོ་བ་སྟོབས་ཤིག་།དེ་ནི་འཇིག་རྟེན་གྱི་ཆོས་ཉིད་ཡིན་ནོ། །དེ་ནས་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་རང་གི་ཁྱིམ་དུ་སོང་ནས། དེས་སྔོ་བསངས་ཅན་ལ་སྨྲས་པ། ཁོ་བོ་དེང་ཁོ་ན་ཁྱོད་ཀྱིས་བཙལ་ན། ཁོ་བོས་ཀྱང་དེང་ཁོ་ན་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་བ་དང ། བསླབ་པའི་གཞི་དག་བླངས་ཤིང་ཕྱིར་མི་འོང་བའི་འབྲས་བུ་ཐོབ་པར་གྱུར་ཀྱིས། དེའི་ཕྱིར་གལ་ཏེ་ཁྱོད་འདོད་ན་ཕའི་ཁྱིམ་དུ་སོང་ཤིག་།གལ་ཏེ་མི་འདོད་ན་འདི་ཉིད་དུ་འདུག་ཤིག་དང་ཟས་དང་གོས་ཀྱིས་མཁོ་བ་བསྟབ་པར་བྱའོ། །དེས་བསམས་པ། གལ་ཏེ་སོང་བར་གྱུར་ན་སྐྱེ་བོ་དག་ལག་བརྒྱུད་ཀྱིས་འདི་བཀྲ་མི་ཤིས་པར་རིག་ནས་མ་བླངས་སོ་ཞེས་ཟེར་གྱིས། འདི་ནི་སངས་རྒྱས་ཀྱི་སྲས་ཡིན་པས་འདི་ཉིད་ལ་བསྙེན
8.159a
བཀུར་བྱེད་ཅིང་འདིར་འདུག་གོ་སྙམ་ནས། དེ་དེ་ཉིད་དུ་འདུག་གོ། །ལག་བརྒྱུད་འབྲོག་གནས་ཀྱིས་ཀྱང་ཡོ་བྱད་ཐམས་ཅད་དང་ལྡན་པའི་གཙུག་ལག་ཁང་རྩིག་ཏུ་བཅུག་སྟེ། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ནས་འདི་ལྟར་གནས་བརྟན་དག་གིས་ཀྱང་བཅོམ་ལྡན་འདས་འབྲོག་གནས་ན་འབྲོག་གི་ནགས་མཆོག་ན་བཞུགས་སོ་ཞེས་མདོ་སྡེའི་མཐའ་ཉེ་བར་སྦྱར་བ་བྱས་སོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་ལྔ་པ། དེ་ནས་དུས་གཞན་ཞིག་ན་ལག་བརྒྱུད་འབྲོག་གནས་ནད་ཀྱིས་བཏབ་སྟེ། སྡུག་བསྔལ་ཞིང་ནད་ཚབས་ཆེ་བར་གྱུར་ནས། དེ་ནས་ལག་བརྒྱུད་འབྲོག་གནས་ནད་དེ་ཉིད་ཀྱིས་དུས་ལ་བབ་བོ། །དེ་དུས་ལ་བབ་མ་ཐག་ཏུ་མི་གདུང་བའི་ལྷ་རིས་སུ་སྐྱེས་སོ། །དེ་ནས་ལྷའི་བུ་ལག་བརྒྱུད་འབྲོག་གནས་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟེན་ཏེ། བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་འཐུན་པ་མ་ཡིན་གྱི། བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་ལྷའི་བུ་ལག་བརྒྱུད་འབྲོག་གནས་འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམས་པ་ལས་བརྐྱང་བ་འམ། བརྐྱང་བ་ལས་བསྐུམས་པ་ཙམ་གྱིས་མི་གདུང་བའི་ལྷའི་རིས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འདུག་པ་དང ། འདི་ལྟར་ལྷའི་བུ་ལག་བརྒྱུད་འབྲོག་གནས་ཀྱི་ལུས་ས་ལ་མི་ཐོགས་ཤིང་ཐིམ་པར་གྱུར་ཏེ། འདི་ལྟ་སྟེ་དཔེར་ན་ཞུན་མར་རམ། འབྲུ་མར་བྱེ་མ་འམ། ཐལ་བའི་སྟེང་དུ་བླུགས་པ་མི་ཐོགས་ཤིང་ཐིམ་པར་འགྱུར་བ་བཞིན་ནོ། །དེ་ནས་བཅོམ་ལྡན་འདས་ཀྱིས་ལྷའི་བུ་ལག་བརྒྱུད་འབྲོག་གནས་ལ་བཀའ་སྩལ་པ། ལག་བརྒྱུད་རེ་ཤིག་ལུས་རགས་པར་མངོན་པར་སྤྲུལ་ལ་སའི་འདུ་ཤེས་བསྐྱེད་དེ། འདུག་པའི་མཚན་མ་ཡིད་ལ་གྱིས་ཤིག་།དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་ལུས་རགས་པར་མངོན་པར་སྤྲུལ་ཏེ་སའི་འདུ་ཤེས་བསྐྱེད་ཅིང་འདུག་པའི་མཚན་མ་ཡིད་ལ་བྱས་ནས་བཅོམ་ལྡན་འདས་ག་ལ
8.159b
བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང ། འདི་ལྟར་ལྷའི་བུ་ལག་བརྒྱུད་འབྲོག་གནས་ཀྱི་ཁ་དོག་གི་མཐུས་འབྲོག་གི་ནགས་མཆོག་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ལྷའི་བུ་ལག་བརྒྱུད་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་ཇི་ལྟར་ཁྱོད་སྔོན་མིར་གྱུར་པ་ན་ཆོས་གང་དག་བཏོན་ཅིང་ལོབས་པ་དེ་དག་ད་ལྟར་ལོབས་སམ། བཙུན་པ་བདག་སྔོན་མིར་གྱུར་པ་ན་ཆོས་གང་དག་བཏོན་ཅིང་ལོབས་པ་དེ་དག་ད་ལྟར་ཏེ་པོར་ལོབས་ཏེ། བཙུན་པ་བདག་སྔོན་མིར་གྱུར་པ་ན་ཆོས་གང་དག་བཏོན་ཅིང་མ་ལོབས་པ་དེ་དག་ཀྱང་ད་ལྟར་ལོབས་པར་གྱུར་ཏེ། འདི་ལྟར་བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་ནི་བདེ་བར་གྱུར་པས་མངོན་པར་བརྗོད་པར་བགྱིད་དོ། །ཇི་ལྟར་བཅོམ་ལྡན་འདས་འཛམ་བུའི་གླིང་ན་འཁོར་བཞི་པོ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་ཀྱིས་བསྐོར་ཅིང་བཞུགས་པ་ན། བཅོམ་ལྡན་འདས་བདག་ཅག་ལ་ཆོས་གང་དང་གང་སྟོན་པར་འགྱུར་བའི་ཆོས་དེ་དང་དེ་བདག་ཅག་གིས་མཉན་ནས་དེ་ལྟ་དེ་ལྟར་བསྒྲུབ་པར་བྱ་སྟེ། དེ་ནི་བདག་ཅག་ལ་ཡུན་རིང་པོའི་དོན་དང ། ཕན་པ་དང་བདེ་བར་འགྱུར་རོ་སྙམ་པ་དེ་བཞིན་དུ། བཙུན་པ་བདག་ཀྱང་མི་གདུང་བའི་ལྷའི་རིས་ན་མི་གདུང་བའི་རིས་ཀྱི་ལྷ་རྣམས་ཀྱིས་ཡོངས་སུ་བསྐོར་ཅིང་མཆིས་པ་ན། ལྷའི་བུ་ལག་བརྒྱུད་འབྲོག་གནས་བདག་ཅག་ལ་ཆོས་གང་དང་གང་སྟོན་པར་འགྱུར་བའི་ཆོས་དེ་དང་དེ་དག་བདག་ཅག་གིས་མཉན་ནས་དེ་ལྟ་དེ་ལྟར་བསྒྲུབ་པར་བྱ་སྟེ། དེ་ནི་བདག་ཅག་ལ་ཡུན་རིང་པོའི་དོན་དང་ཕན་པ་དང ། བདེ་བར་འགྱུར་རོ་སྙམ་དུ་སེམས་སོ། །ལག་བརྒྱུད་ཁྱོད་ཆོས་དུ་དག་གིས་མ་ངོམས་ཤིང་ཕྱིར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་པར་གྱུར། བཙུན་པ་བདག་ཆོས་གསུམ་གྱིས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་ཏེ། གསུམ་གང་ལགས་ཤེ་ན། བཙུན་པ་བདག་བཅོམ་ལྡན་འདས་ལ་ལྟ་བས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི
8.160a
རིས་སུ་སྐྱེས་སོ། །བཙུན་པ་བདག་ཆོས་མཉན་པས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་སོ། །བཙུན་པ་བདག་དགེ་འདུན་ལ་བསྙེན་བཀུར་བགྱི་བས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་སོ། །དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་དེའི་ཚེ་ཚིགས་སུ་བཅད་པ་དག་སྨྲས་པ། བདག་ནི་བཅོམ་ལྡན་བལྟ་བ་དང ། །དམ་ཆོས་ཉན་དང་དགེ་འདུན་ལ། །བསྙེན་བཀུར་བགྱིད་པས་ལན་འགའ་ཡང ། །ངོམས་ཤིང་ཕྱིར་སྤོང་མ་མྱོང་ངོ ། །འཕགས་པའི་ཆོས་རྣམས་ཡང་དག་བླངས། །སེར་སྣ་འདུལ་ལ་བརྩོན་གྱུར་ཅིང ། །ཆོས་གསུམ་ཆོག་མི་ཤེས་པ་ཡིས། །ལག་བརྒྱུད་མི་གདུང་སྐྱེས་པར་གྱུར། །དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་མཆི་བ་དང ། བསླབ་པའི་གཞི་དག་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་ང་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་ལས་ཡོངས་སུ་གྲོལ་ཞིང ། ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་ཐམས་ཅད་ལ་མངའ་བརྙེས་པ་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་པ་འདི་ལ་ངོ་མཚར་ཅི་ཆེ། ང་འདས་པའི་དུས་ན་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང
8.160b
སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང་འཁྲུག་པ་དག་ལས་ཡོངས་སུ་མ་གྲོལ་བས་ཀྱང་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་སྟེ་དེ་ཉོན་ཅིག་།དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་དེད་དཔོན་དཔའ་ཆེན་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་བྱུང་བར་གྱུར་ཏེ། དེ་དུས་གཞན་ཞིག་ན་ཚོང་པ་ལྔ་བརྒྱ་དང་ལྷན་ཅིག་དགོན་པའི་ལམ་དུ་ཞུགས་པ་དང ། ་ལམ་དེ་སྲིན་པོ་སྤུ་རལ་ཅན་གྱིས་བསྡིགས་ཤིང་བགགས་པར་གྱུར་ནས། དེད་དཔོན་དཔའ་ཆེན་དོན་འཐུན་གྱི་མདུན་དུ་འགྲོ་བར་བརྩམས་པ་དང ། ཇི་ཙམ་ན་སྲིན་པོ་སྤུ་རལ་ཅན་དེ་བྲམ་ཟེའི་ཆ་ལུགས་སུ་མངོན་པར་སྤྲུལ་ནས་ལམ་གར་འདུག་སྟེ། དེད་དཔོན་དཔའ་ཆེན་ལ་སྨྲས་པ། དེད་དཔོན་ལམ་འདི་སྲིན་པོ་སྤུ་རལ་ཅན་གྱིས་བསྡིགས་ཤིང་བགགས་ནས་ཁོ་བོ་ཡང་ཚེགས་ཆེན་པོས་འོངས་ཀྱིས་ལམ་གཞན་དུ་སོང་ཤིག་།དེས་སྨྲས་པ། བྲམ་ཟེ་སྙིང་ལས་ཆུང་ངུར་གྱིས་ཤིག་།དེས་ཁོ་བོ་ལ་བྱར་ཅི་ཡོད་འགྲོའོ། །དེ་སྐད་ཅེས་སྨྲས་པ་དང ། སྲིན་པོ་སྤུ་རལ་ཅན་དེ་འཁྲུགས་ནས་བཞིན་བསྒྱུར་ཏེ། ལག་པ་གཉིས་བརྐྱང་ནས་རལ་པ་ས་ལ་བླགས་ཏེ། མིག་དམར་པོ་བྱས་ནས་མིག་གཉིས་བགྲད་དེ་སྨྲས་པ། དེད་དཔོན་ཇེ་ཁོ་བོ་ལ་རྒོལ་ལ་ཕྱིས་སོང་ཤིག་།དེ་ནས་དེད་དཔོན་དཔའ་ཆེན་གྱིས་ཤིན་ཏུ་འཇིགས་སུ་རུང་བ་དེ་མཐོང་ནས་གཞུ་རྣ་དྲུང་དུ་ཐུག་པར་བཀང་སྟེ་མདའ་དག་འཕང་བར་བརྩམས་པ་དང ། དེ་དག་ཐམས་ཅད་རལ་པ་དག་ལ་ཐོགས་སོ། །གཞུ་འཕངས་པ་དང ། དེ་ཡང་ཐོགས་སོ། །དེ་བཞིན་དུ་ཤིང་དང་བོང་བ་ལ་སོགས་པ་དག་འཕངས་ན་དེ་དག་ཀྱང་རལ་པ་དག་ལ་ཐོགས་སོ། །དེ་ནས་ཚམ་ཚོམ་མེད་པར་མཐུས་བརྒལ་བ་དང ། ལུས་ཐམས་ཅད་རལ་པ་དག་ལ་ཐོགས་ནས་སྲིན་པོས་ཚིགས་སུ་བཅད་པ་སྨྲས་པ། ཁྱོད་ཀྱིས་ལག་གཉིས་རྐང་གཉིས་དང ། །ལྔ་པ་མགོ་ཡང་ཐོགས་གྱུར་ཅིང ། །ལུས་ཀྱང་ང་ཡི་ལུས་ལ་ཐོགས། །ཕྱི་ན་མ་ཐོགས་ཅི་ཞིག་ཡོད། །དེད་དཔོན་གྱིས་ཀྱང་ཚིགས་སུ
8.161a
བཅད་པ་དག་སྨྲས་པ། ང་ཡི་ལག་གཉིས་རྐང་གཉིས་དང ། །ལྔ་པ་མགོ་ཡང་ཐོགས་གྱུར་ཅིང ། །ལུས་ཀྱང་ཁྱོད་ཀྱི་ལུས་ལ་ཐོགས། །ཕྱི་ན་མ་ཐོགས་སེམས་ཡོད་དོ། །གསང་བ་ཇི་སྲིད་ཁོ་བོ་ཡི། །སེམས་དང་བརྩོན་འགྲུས་མ་ཉམས་པ། །དེ་སྲིད་ཁྱོད་དང་འགྱེད་བྱ་སྟེ། །བརྟན་བྱོས་ང་ལ་མི་གནོད་དོ། །སྲིན་པོས་ཀྱང་ཚིགས་སུ་བཅད་པ་དག་སྨྲས་པ། གང་གིས་བརྩོན་འགྲུས་འདི་འདྲ་བ། །དཔའ་ཆེན་ཁྱོད་ལ་ཕྱག་འཚལ་ལོ། །ཁྱོད་ཀྱི་བརྩོན་འགྲུས་འདི་འདྲ་བས། །སྡུག་བསྔལ་ཀུན་ལས་འབྲོས་པར་ནུས། །དཔའ་ཆེན་ཁྱོད་དང་འདྲ་བ་ཡི། །གང་ཟག་མེད་པར་བདག་གིས་ཤེས། །ཁྱོད་ཀྱི་མཐུ་ཡིས་ཚོང་པ་དག་།བདེ་ལེགས་སུ་ནི་འདོང་ལ་རག་།འབྱུང་པོ་ཀུན་ལ་སྙིང་བརྩེ་བ། །དེད་དཔོན་ཁྱོད་ལ་ཕྱག་འཚལ་ལོ། །ཁྱོད་ཀྱི་མཐུ་ཡིས་ཚོང་པ་དག་།ཞི་བ་ཉིད་དུ་འདོང་ལ་རག་།དེ་ལྟར་དེ་ན་དེད་དཔོན་དཔའ་ཆེན་གྱིས་སྲིན་པོ་སྤུ་རལ་ཅན་ལ་གང་ཐོས་ནས་སྲིན་པོ་སྤུ་རལ་ཅན་ལས་དྲི་མ་ཅན་དང་ཕྲལ་ཏེ་བརྟུལ་ཞུགས་ལྔ་པོ་དག་ལ་བཞག་པ་དེ་འདྲ་བའི་ཆོས་བསྟན་པ་བྱས་སོ། །དགེ་སློང་དག་དེའི་ཚེ་དེའི་དུས་ན་དེད་དཔོན་དཔའ་ཆེན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་སྲིན་པོ་སྤུ་རལ་ཅན་གང་ཡིན་པ་དེ་ནི་གནོད་སྦྱིན་འབྲོག་གནས་ཡིན་ཏེ། དེའི་ཚེ་ཡང་ངས་འདི་ལས་དྲི་མ་ཅན་དང་ཕྲལ་ཏེ་བརྟུལ་ཞུགས་ལྔ་ལ་བཞག་ལ། ད་ལྟར་ཡང་ངས་འདི་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་གོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལག་བརྒྱུད་འབྲོག་གནས་ཀྱི་ལས་ཅི་བགྱིས་ན་དེས་སྐྱེས་མ་ཐག་ཏུ་གནོད་སྦྱིན་གྱི་གཏོར་མར་སྩལ་ཅིང ། བཅོམ་ལྡན་འདས་དེ་ཐར་བར་བགྱི་བའི་སླད་དུ་བརྩོན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལག་བརྒྱུད་འབྲོག་གནས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ལག་བརྒྱུད་འབྲོག་གནས་ཀྱིས་ལས་བྱས་ཤིང
8.161b
བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་ཏེ། འདི་ལྟར་ལས་དགེ་བ་དང ། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང ། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་དགེ་བསྙེན་དུ་གྱུར་ཏོ། །རི་བྲགས་ཤིག་ན་རྒྱལ་པོ་ཞིག་འདུག་པ་དེ་ཤིན་ཏུ་བྱ་གག་ལ་དགའ་ནས་གང་ཡང་རུང་བ་ལ་རྒྱལ་པོའི་ཕོ་བྲང་དུ་བྱ་བ་ཅུང་ཟད་བྱུང་ན་དེ་སུག་ཏུ་བྱ་གག་ཐོགས་ཏེ་རྒྱལ་པོའི་གན་དུ་འགྲོའོ། །ཇི་ཙམ་དུས་གཞན་ཞིག་ན་དགེ་བསྙེན་དེ་ལ་རྒྱལ་པོའི་ཕོ་བྲང་དུ་བྱ་བ་ཅུང་ཞིག་བྱུང་ནས་དེ་དེ་བཞིན་སོང་བ་དང ། རྒྱལ་པོ་དེས་དེའི་དགོས་པ་མ་བསྒྲུབས་ནས་གཞན་དག་གིས་དེ་ལ་སྨྲས་པ། རྒྱལ་པོ་འདི་བྱ་གག་ལ་དགའ་བས་གལ་ཏེ་ཁྱོད་ལ་དགོས་པ་འགྲུབ་པ་དགོས་ན། དེ་ལ་བྱ་གག་ཕུལ་ཅིག་།དེས་རྒྱལ་པོ་ལ་བྱ་གག་གཅིག་ཕུལ་བ་དང ། རྒྱལ་པོས་དེ་ཕྱག་ཙང་གི་ཚང་མང་དུ་གཏད་ནས། དགེ་བསྙེན་དེའི་དགོས་པ་ཡང་བསྒྲུབས་སོ། །དགེ་བསྙེན་དེས་བསམས་པ། བདག་གིས་བྱ་གག་ཕུལ་བ་མ་ལེགས་པ་བྱས་ཀྱི་སོང་ལ་རིན་གྱིས་བླུའོ་སྙམ་ནས། དེས་ཕྱག་ཙང་གི་ལག་པར་རིན་བྱིན་ཏེ། བྱ་གག་ཐར་བར་བྱས་ནས་སྨོན་ལམ་བཏབ་པ། བདག་གིས་རྙེད་པ་འདོད་པའི་ཕྱིར་རྒྱལ་པོ་ལ་བྱ་གག་ཕུལ་བ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར་བདག་གིས
8.162a
བྱ་གག་ཕོངས་པར་གྱུར་པ་ཐར་བར་བྱས་པའི་དགེ་བའི་རྩ་བ་འདིས་བདག་ཕོངས་པར་གྱུར་པ་ཐར་བར་བྱ་བའི་ཕྱིར་བཅོམ་ལྡན་འདས་བརྩོན་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་དགེ་བསྙེན་གང་ཡིན་པ་དེ་ནི་ལག་བརྒྱུད་འབྲོག་གནས་འདི་ཡིན་ཏེ། དེས་རྙེད་པ་འདོད་པའི་ཕྱིར་རྒྱལ་པོ་ལ་བྱ་གག་ཕུལ་བ་གང་ཡིན་པའི་ལས་དེའི་རྣམ་པར་སྨིན་པས་གནོད་སྦྱིན་གྱི་གཏོར་མར་བྱིན་ནོ། །ཕྱིས་འགྱོད་པ་སྐྱེས་ནས་ཐར་བར་བྱས་ཤིང་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ང་འདི་ཐར་བར་བྱ་བའི་ཕྱིར་བརྩོན་པར་གྱུར་ཅིང་ངས་འདི་གནོད་སྦྱིན་ལས་ཐར་བར་བྱས་སོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལག་བརྒྱུད་འབྲོག་གནས་སྔོ་བསངས་ཅན་ལས་ཐར་བར་མཛད་ནས་ཕྱིར་མི་འོང་བའི་འབྲས་བུ་ལ་བཞག་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་ངས་འདི་གཟུགས་ཅན་མ་ལས་ཐར་བར་བྱས་ནས་མངོན་པར་ཤེས་པ་ལྔ་ལ་བཞག་སྟེ། དེ་ཉོན་ཅིག་།དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། འཐབ་མོ་དང ། འཐབ་པ་དང ། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང ། ནད་དང་བྲལ་བ། ས་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པའི་ཆོས་ཀྱི་རྒྱལ་པོས་ཆོས་ཀྱིས་རྒྱལ་སྲིད་བྱེད་དུ་བཅུག་གོ། །དེའི་མདུན་ན་འདོན་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས་དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་རྐང་ལག་དྲ་བས་འབྲེལ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན
8.162b
གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་འི་མིང་ཅིར་གདགས་ཤེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་རྐང་ལག་དྲ་བས་འབྲེལ་བ་དེའི་ཕྱིར་ཁྱེའུ་འི་མིང་རྐང་ལག་དྲ་བ་ཅན་ཞེས་བྱའོ་ཞེས་དེའི་མིང་རྐང་ལག་དྲ་བ་ཅན་ཞེས་བྱ་བར་བཏགས་སོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས་དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་རྐང་ལག་དྲ་བས་མ་འབྲེལ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱས་པར་བྱས་ནས་ཁྱེའུ་འི་མིང་ཅིར་གདགས་ཤེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་རྐང་ལག་དྲ་བས་འབྲེལ་བ་མེད་པ་དེའི་ཕྱིར་ཁྱེའུ་འི་མིང་རྐང་ལག་དྲ་བ་མེད་ཅེས་བྱའོ་ཞེས་དེའི་མིང་རྐང་ལག་དྲ་བ་མེད་ཅེས་བྱ་བར་བཏགས་སོ། །དེ་གཉིས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་ན་བུ་ཐུ་བོ་རྐང་ལག་དྲ་བ་ཅན་གྱིས་ཕ་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་འཇུག་པ་མཐོང་ནས། དེས་བསམས་པ། བདག་འདི་འདས་ནས་མདུན་ན་འདོན་དུ་གྱུར་ན་བདག་ཀྱང་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་འཇུག་པར་འགྱུར་ན། བདག་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་བཅུག་ནས་སེམས་ཅན་དམྱལ་བ་ལ་གཞོལ་བར་འགྱུར་ན་མི་རུང་གིས་རྣམ་པ་ཐམས་ཅད་དུ་རབ་ཏུ་འབྱུང་ངོ་སྙམ་ནས། དེ་ཕའི་གན་དུ་སོང་སྟེ་སྨྲས་པ། ཡབ་བདག་རབ་ཏུ་འབྱུང་བར་ཅི་གནང ། ཕས་སྨྲས་པ། བུ་གང་གི་ཕྱིར་མཆོད་སྦྱིན་སྦྱིན་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་མདུན་ན་འདོན་དེ་ཁྱོད་ཀྱི་ལག་མཐིལ་དུ་འོངས་ན་ཅིའི་ཕྱིར་རབ་ཏུ་འབྱུང་བར་བྱེད། དེས་ཚིགས་སུ་བཅད་པ་སྨྲས་པ། ནགས་ན་ཤིང་ཤུན་ཤུན་པའི་གོས་གྱོན་འབྲས་བུ་ཟ། །རི་དགས་གདུག་པ་རྣམས་དང་ལྷན་ཅིག་གནས་བླ་ཡི། །མཁས་པ་འཇིག་རྟེན་ཕ་རོལ་འཇིགས་པས་རྒྱལ་སྲིད་ཕྱིར། །གསད་དང་བཅིང་དང་བརྡེག་པའི་ལས་དག་བྱར་མི་རུང ། །ཕས་དེ་དུས་ཀྱིས་འཆི་བར་ཤེས་ནས་གནང
8.163a
བ་དང ། དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་ཏུ་བྱུང་ནས་དེས་སྤྲོ་བ་དང ། འབད་པ་དང ། བརྩལ་བ་བྱས་པས་མངོན་པར་ཤེས་པ་ལྔ་བསྐྱེད་པར་གྱུར་ཏོ། །བུ་གཉིས་པ་རྐང་ལག་དྲ་བ་མེད་ནི་གསང་ཚིག་གི་ཕྱིར་གསང་ཚིག་ཚོལ་དུ་ཡུལ་གཞན་དུ་སོང་ངོ ། ལྷོ་ལམ་ན་རི་བྲགས་ཤིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་མོ་ཞིག་བཙས་ནས། དེས་བསམས་པ། བདག་གིས་བུ་མོ་འདི་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། རིགས་བྱེད་བཞི་བླགས་པ་ལ་སྦྱིན་པར་བྱ་སྟེ། གང་གིས་བདག་གི་དྲུང་ནས་རིག་བྱེད་བཞི་བླགས་པ་དེ་ལ་བདག་གིས་བུ་མོ་འདི་སྦྱིན་ནོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་རྐང་ལག་དྲ་བ་མེད་དེ་ཕན་ཚུན་འཁོར་བ་ན་ལྷོ་ལམ་དུ་ཕྱིན་ནས་དེས་ཕྱོགས་གཞན་ཞིག་ཏུ་ལམ་གྱིས་དུབ་པ་ངལ་བསོས་ཏེ་ཐོས་པ་གཅིག་ནས་གཅིག་ཏུ་བརྒྱུད་པས་བྲམ་ཟེ་དེ་ཐོས་ནས་དེའི་གན་དུ་སོང་སྟེ། མངོན་དུ་སྨྲ་བ་བྱས་ནས་སྨྲས་པ་བདག་མཁན་པོའི་ཞབས་ལ་བསྙེན་བཀུར་བགྱིད་པར་འཚལ་ལོ། །ཅིའི་ཕྱིར། རིག་བྱེད་ཀླག་པའི་སླད་དུའོ། །བུ་དེ་བཞིན་གྱིས་ཤིག་།དེས་དེའི་གན་དུ་རིག་བྱེད་ཀླག་པར་བརྩམས་པ་དང ། དེ་སྤྱོད་པ་གསལ་བས་དེའི་དྲུང་ནས་དུས་ཅུང་ཟད་ཅིག་གིས་རིག་བྱེད་བཞི་ལྷོགས་སོ། །ལྷོགས་ནས་བྲམ་ཟེ་དེས་དེ་ལ་བུ་མོ་བྱིན་ནོ། །བྲམ་ཟེའི་ཁྱེའུ་དེ་དེ་དང་ལྷན་ཅིག་ཁང་ཏོག་ན་ཉལ་བའི་ཚེ་ཇི་ཙམ་ན་བུ་མོ་དེའི་བསིལ་ཡབ་ཤོད་དུ་ལྷུང་བ་དང ། དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་དེས་བླངས་པ་དང ། དེས་དེ་མཐོང་ནས་སྔངས་པར་གྱུར་ཏོ། །ཡང་མར་མེ་ཤི་ལ་ཐུག་པ་དང ། དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་དེ་གསོས་སོ། །དེ་ཡང་དེས་མཐོང་ནས་ཡང་རྒྱ་ཆེར་སྔངས་པར་གྱུར་ཏེ། དེ་དང་ལྷན་ཅིག་བག་ཡངས་སུ་དགའ་མགུར་སྤྱོད་པར་མི་བྱེད་དོ། །བུ་མོས་སྨྲས་པ། རྗེའི་སྲས་ཁྱོད་ཅིའི་ཕྱིར་བདག་མཐོང་ན་དབང་པོ་རྣམས་སྡུད་ཅིང་བདག་དང་ལྷན་ཅིག་བག་ཡངས་སུ་གཅུགས་པར་མི་བྱེད། ཁྱེའུས་སྨྲས་པ། ཁྱོད་ཀྱིས་འཆི་བདག་དང་ལྷན་ཅིག་གཅུགས
8.163b
པར་བྱེད་པ་འགའ་མཐོང་ངམ། བུ་མོས་སྨྲས་པ། རྗེའི་སྲས་མ་འཇིགས་ཤིག་དང ། ཁོ་མོ་ཁྱིམ་ཐབ་ལ་འཁུ་བའི་སེམས་མི་བསྐྱེད་དོ། །ཁྱེའུས་སྨྲས་པ། འདི་ལ་ཁོ་བོས་དུས་ཤེས་པར་བྱའོ། །བུ་མོ་དེ་སྐྱེངས་ནས་དེ་གཉིད་ལོག་པ་ལ་སྡོད་ཅིང་འདུག་གོ། །ཁྱེའུ་དེས་གཉིད་མ་ལོག་བཞིན་དུ་གཉིད་ལོག་པའི་ཆ་ལུགས་སུ་བྱས་ཏེ་འདུག་པ་དང ། བུ་མོ་དེས་དེ་གཉིད་ལོག་པར་རིག་ནས་གཟུགས་ཅན་མ་རྣམས་ཀྱི་ནང་དུ་སོང་ངོ ། །ཁྱེའུ་དེ་ཡང་དལ་བུས་ལངས་ཏེ་དེའི་རྗེས་བཞིན་དུ་སོང་བ་དང ། ཇི་ཙམ་གཟུགས་ཅན་མ་དེ་དག་ཐམས་ཅད་སྒྲེན་མོར་བྱུང་ཞིང་སྐྲ་བཤིག་སྟེ། འཇིགས་འཇིག་ལྟར་འདུག་པ་དག་མཐོང་ནས་དེ་ཤིན་ཏུ་སྔངས་ཤིང་སྐྲག་ནས་ཕྱིར་ལོག་གོ། །དེ་ཡང་དེའི་རྗེས་བཞིན་དུ་འོངས་པ་དང ། དེས་སྨྲས་པ། བཟང་མོ་ཁོ་བོ་འདུག་མི་ཕོད་ཀྱིས་འགྲོའོ། །དེས་དེ་གདོན་མི་ཟ་བར་དུས་ཀྱིས་འཆུ་བར་ཤེས་ནས་སྨྲས་པ། རྗེའི་སྲས་གལ་ཏེ་ངེས་པ་ཁོ་ནར་འགྲོ་འདོད་ན་སོང་ལ་སུ་ལ་ཡང་མ་ཟེར་ཅིག་།དེ་ཅང་མི་ཟེར་བར་བྲམ་ཟེ་དེའི་གན་དུ་སོང་སྟེ་སྨྲས་པ། མཁན་པོ་ཁྱོད་བལྟས་ཀྱིས་མཆིའོ། །དེས་སྨྲས་པ། བུ་གལ་ཏེ་དེ་ལྟ་ན་བུ་མོ་ཡང་ཁྲིད་ལ་སོང་ཤིག་།མཁན་པོ་བདག་དེ་ཉིད་ཀྱིས་འཇིགས་པས་མཆིའོ། །བུ་ཅིའི་ཕྱིར་ཁྱོད་དེས་འཇིགས། མཁན་པོ་དེ་གཟུགས་ཅན་མ་ལགས་སོ། །བུ་ཅིའི་ཕྱིར་དེ་དེ་ལྟར་འགྱུར། དེ་ཅང་མི་སྨྲ་བར་སོང་ངོ ། །བྲམ་ཟེ་དེས་བུ་མོ་ལ་སྨྲས་པ། བུ་མོ་ཁྱོད་ཁྱིམ་ཐབ་ཀྱང་རྗེས་སུ་མི་སྲུང་ངམ། ཡབ་དེ་ཇི་སྐད་མཆི། བུ་དེ་ན་རེ་ཁྱོད་གཟུགས་ཅན་མ་ཡིན་ཞེས་ཟེར་རོ། །ཡབ་བདག་གཟུགས་ཅན་མ་མ་ལགས་ཏེ། དེས་བདག་ལ་ཤོ་བེས་སྐུར་པ་བཏབ་སྟེ་མཆིས་སོ། །དེ་ཅང་མི་སྨྲ་བར་འདུག་གོ། །གཟུགས་ཅན་མ་དེ་ཡང་ཀུན་ནས་དཀྲིས་པ་དྲག་པོས་ཀུན་ནས་དཀྲིས་པར་གྱུར་ནས། རྐང་ལག་དང་མིག་བསྒྱུར་ཏེ་ལམ་གར་སོང་ནས། དེའི་མདུན་དུ་འདུག་སྟེ་སྨྲས་པ། བུ་ཟན་མའི་བུ་ཁྱོད་ལ་ཁོ་མོས་སུ་ལ་ཡང་མ་ཟེར་ཅིག་ཅེས་བྱས་ན། ཁྱོད་ཀྱིས་ཁོ་མོའི་ཕ་ཉིད་ལ་བྱས་ཀྱིས་ད་ནི་ཁྱོད་ལ་མཚམས་ཆེན་པོ་གཅད་པར་བྱའོ། །ཞེས་དེས་དེ་ལ་གནོད་པ་བྱ་བར་བརྩམས་པ་དང །
8.164a
དེ་སྐྲག་པས་སྒྲ་ཆེན་པོ་ཕྱུང་སྟེ་འཕགས་པ་རྐང་ལག་དྲ་བ་ཅན་ལ་ཕྱག་འཚལ་ལོ། །འཕགས་པ་རྐང་ལག་དྲ་བ་ཅན་ལ་ཕྱག་འཚལ་ལོ། །ཕྱག་འཚལ་ལོ་ཞེས་བརྗོད་པ་དང ། དེ་ནས་རྐང་ལག་དྲ་བ་ཅན་ལ་མངོན་པར་དགའ་བའི་ལྷ་མོ་གང་ཡིན་པ་དེ་མྱུར་བ་མྱུར་བར་སོང་སྟེ་རྐང་ལག་དྲ་བ་ཅན་ལ་སྨྲས་པ། འཕགས་པ་ཁྱོད་ཀྱི་གཅུང་པོ་གནོད་པ་དང ། ཉམ་ང་བ་དང ། མི་བདེ་བར་གྱུར་གྱིས་དེ་ལ་དགོངས་སུ་གསོལ། དེ་རྫུ་འཕྲུལ་གྱིས་དེའི་གན་དུ་སོང་སྟེ་སྨྲས་པ། བུ་མོ་འདི་ལ་གནོད་པ་མ་བྱེད་ཅིག་།འདི་ཁྱོད་ལ་ཅི་ཉེས་བདག་གིས་འདི་བཟློག་ན་འདིས་བདག་གི་ཕ་ལ་བདག་གཟུགས་ཅན་མ་ལགས་སོ་ཞེས་བགྱིས་ཀྱིས་བདག་གིས་འདི་བཟས་ཁྱོད་བཞུད་ཅིག་།དེས་སྨྲས་པ། སྲིང་མོ་འདི་ནི་བཀྲེན་པ་ཡིན་པས་འཁྲུག་པས་ཆོག་གིས་ཐོང་ཤིག་།དེས་སྨྲས་པ། འཕགས་པ་དམ་ཚིག་གིས་གཏང་བར་བགྱི་སྟེ། གལ་ཏེ་རབ་ཏུ་འབྱུང་ནའོ། །དེས་སྨྲས་པ། སྲིང་མོ་ཐོང་ཤིག་དང་རབ་ཏུ་དབྱུང་ངོ ། །དེས་དེ་བཏང་ནས་དེས་ཀྱང་དེ་རབ་ཏུ་ཕྱུང་སྟེ། གདམས་ངག་བྱིན་ནས་དེས་སྤྲོ་བ་དང ། འབད་པ་དང ། བཙལ་བ་བྱས་པས་མངོན་པར་ཤེས་པ་ལྔ་བསྒྲུབ་པར་གྱུར་ཏོ། །དགེ་སློང་དག་དེའི་ཚེ་དེའི་དུས་ན་མདུན་ན་འདོན་གྱི་བུ་ཐུ་བོ་རྐང་ལག་དྲ་བ་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་དེའི་ནུ་བོ་རྐང་ལག་དྲ་བ་མེད་གང་ཡིན་པ་དེ་ནི་ལག་བརྒྱུད་འབྲོག་གནས་འདི་ཡིན་ནོ། །དེའི་ཚེ་དེའི་དུས་ན་གཟུགས་ཅན་མ་གང་ཡིན་པ་དེ་ནི་སྔོ་བསངས་ཅན་འདི་ཡིན་ཏེ། ངས་དེའི་ཚེ་ཡང་ལག་བརྒྱུད་འབྲོག་གནས་འདི་གཟུགས་ཅན་མ་ལས་ཐར་བར་བྱས་ཏེ་མངོན་པར་ཤེས་པ་ལྔ་ལ་བཞག་ལ། ད་ལྟར་ཡང་ངས་འདི་སྔོ་བསངས་ཅན་ལས་ཐར་བར་བྱས་ཏེ་ཕྱིར་མི་འོང་བའི་འབྲས་བུ་ལ་བཞག་གོ། །གང་གི་ཚེ་ལག་བརྒྱུད་འབྲོག་གནས་དུས་ལ་བབ་པ་དེའི་ཚེ་ན་སྔོ་བསངས་ཅན་ཀཽ་ཤམྦཱིར་སོང་ནས། ཀཽ་ཤམྦཱི་བའི་སྐྱེ་བོའི་ཚོགས་བཀྱིས་གང་གི་ཉིན་མོ་སྔོ་བསངས་ཅན་གྱིས་ལག་བརྒྱུད་འབྲོག་གནས་བཙལ་བ་དེའི་ཉིན་མོ་ལག་བརྒྱུད་འབྲོག་གནས་ཀྱིས་ཕྱིར་མི་འོང་བའི་འབྲས་བུ་ཐོབ་པས་བུ་མོ་དེ་མ་སྨས་པ་ཁོ་ནར་འདིར་འོངས་སོ། །ཤེས་ཐོས་ནས་ཐོས་པ་གཅིག་ནས
8.164b
གཅིག་ཏུ་བརྒྱུད་པས་བད་སའི་རྒྱལ་པོ་ཤར་པས་ཐོས་པ་དང ། དེས་ཁྱིམ་བདག་གདངས་ཅན་བོས་ཏེ་སྨྲས་པ། ཁྱིམ་བདག་གང་གི་ཉིན་མོ་སྔོ་བསངས་ཅན་གྱིས་ལག་བརྒྱུད་འབྲོག་གནས་བཙལ་བ་དེའི་ཉིན་མོ་ལག་བརྒྱུད་འབྲོག་གནས་ཀྱིས་ཕྱིར་མི་འོང་བའི་འབྲས་བུ་ཐོབ་ནས་བུ་མོ་དེ་མ་སྨས་པ་ཁོ་ནར་འདིར་འོངས་ཤེས་གྲག་ན། ཅི་དེ་བདེན་ནམ། འོན་ཏེ་བརྫུན། དེས་སྨྲས་པ། ལྷ་མད་དོ། །གལ་ཏེ་དེ་ལྟ་ན་ཅིའི་ཕྱིར་ང་ལ་མི་སྦྱིན། ལྷ་གསོལ་ལོ། །རྒྱལ་པོས་བཙུན་མོའི་འཁོར་གྱི་ནང་དུ་བཅུག་སྟེ་བསྙེན་བཀུར་མ་ལྔ་བརྒྱ་ཡང་བྱིན། ཉི་མ་རེ་རེ་ཞིང་དྲི་དང་ཕྲེང་བ་རྒྱུའི་རིན་ཀཱར་ཥ་པཱ་ཎ་སྟོང་སྟོང་ཡང་བྱིན། ཁང་བཟངས་མེ་ཏོག་གི་སོ་ཞེས་བྱ་བ་ཡང་བྱིན་ནོ། །དེ་ལ་བུ་མོ་མངག་གཞུག་མ་སྒུར་མཆོག་ཅེས་བྱ་བ་ཞིག་ཡོད་པ་དེ་ཉི་མ་རེ་རེ་ཞིང་ཀཱར་ཥ་པཱ་ཎ་སྟོང་སྟོང་གིས་དྲི་དང་ཕྲེང་བ་རྒྱུ་དག་ཉོ་བར་བྱེད་དོ། །དེ་དུས་གཞན་ཞིག་ན་སྤོས་འཚོང་གི་ཁྱེའུ་ཞིག་དང་ལྷན་ཅིག་སྟེན་པར་གྱུར་ནས་དེས་ཀཱར་ཥ་པཱ་ཎ་ལྔ་བརྒྱས་ནི་དྲི་དང་མེ་ཏོག་ཕྲེང་བ་དག་ཉོ་བར་བྱེད། ལྔ་བརྒྱ་ནི་དེ་དང་ལྷན་ཅིག་ཟ་བར་བྱེད་དོ། །སྤོས་འཚོང་གི་ཁྱེའུ་དེ་དད་པ་ཅན་ཡིན་པས་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དེས་སྒུར་མཆོག་ལ་སྨྲས་པ། ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཀྱིས་ཁྱོད་ཀྱང་ཤོག་ལ་བྲིམས་ཤིག་།དེས་དེའི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་བར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ་སྤྱན་འདྲེན་བཏང་ནས། བཅོམ་ལྡན་འདས་ལ་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། སྤོས་འཚོང་གི་ཁྱེའུ་འི་བཀད་ས་ག་ལ་བ་དེར་གཤེགས་ནས། དགེ་སློང་གི་དགེ་འདུན་གྱི་གོང་དུ་གདན
8.165a
བཤམས་པ་ཉིད་ལ་བཞུགས་སོ། །དེ་ནས་སྤོས་འཚོང་གི་ཁྱེའུ་སྒུར་མཆོག་དང་བཅས་པས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། རང་གི་ལག་ནས་བཅའ་བ་དང ། བཟའ་བ་གཙང་ཞིང་བསོད་པས་ཚིམ་པར་བྱེད་སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིང་ཕྱག་བཅབས། ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །བཅོམ་ལྡན་འདས་ཀྱིས་སྒུར་མཆོག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་སྒུར་མཆོག་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ
8.165b
ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་དེ་གཉིས་ལ་ཆོས་བསྟན་པ་མཛད་ནས་གཤེགས་སོ། །སྒུར་མཆོག་གིས་སྤོས་འཚོང་གི་ཁྱེའུ་དེ་ལ་སྨྲས་པ། རྗེའི་སྲས་ད་ནི་བདག་གིས་གཞན་གྱི་ཏིལ་གྱི་ཕུབ་མ་ཡང་མ་བྱིན་པར་ལེན་པའི་རྔོ་མི་ཐོག་གིས་ཀཱར་ཥ་པཱ་ཎ་སྟོང་གི་ཡོ་བྱད་དག་སྩོལ་ཅིག་།དེས་སྨྲས་པ། མ་ཉེས་ཀྱིས་ཤེས་དེས་དེ་ལ་ཀཱར་ཥ་པཱ་ཎ་སྟོང་གི་ཡོ་བྱད་དག་བྱིན་ནོ། །དེས་དེ་ཁྱེར་ཏེ་སྔོ་བསངས་ཅན་གྱི་གན་དུ་སོང་བ་དང ། དེས་སྨྲས་པ། སྒུར་མཆོག་ཁྱོད་ཀྱིས་དེང་འདི་མགོ་ཕྱིར་བསྟན་ཏེ་ཉལ་བ་གང་ལས་ཐོབ། དེས་སྨྲས་པ། ཇོ་མོ་སྔོན་ནི་བདག་གིས་བརྐུས་ཀྱིས། ད་ནི་བདག་གི་སླན་ཅད་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བའི་ཡོན་ཏན་གྱི་རྣམ་པ་དེ་ལྟ་བུ་རྟོགས་སོ། །ཁྱོད་ཀྱིས་དེང་ཅི་བྱས། དེ་ཐོས་པ་འཛིན་པ་ཡིན་པས་སྐབས་དེ་རྒྱས་པར་སྨྲས་པ་དང ། དེས་སྨྲས་པ། སྒུར་མཆོག་ཁྱོད་ཀྱིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་ཁོ་མོ་ལ་སྨྲོས་ཤིག་།ཁྱོད་ཀྱི་ལས་ནི་དེ་ཡིན་ནོ། །དེ་ལྟར་བགྱིའོ། །དེ་ནས་སྒུར་མཆོག་གིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་དེ་ལ་བརྗོད་དོ། །བཅོམ་ལྡན་འདས་ཀྱིས་སྒུར་མཆོག་ལ་རྨས་པ། སྒུར་མཆོག་ཁྱོད་བཙུན་མོའི་འཁོར་ལ་ཆོས་སྟོན་ཏམ། བཅོམ་ལྡན་འདས་སྟོན་ཏོ། །ཇི་ལྟར་སྟོན། བཅོམ་ལྡན་འདས་བདག་ནི་འགྲེང་སྟེ་སྟོན་ལ། དེ་དག་ནི་མཆིས་ཏེ་ཉན་ཏོ། །བཀའ་སྩལ་པ། གལ་ཏེ་དེ་དག་སྒུར་མཆོག་ཆོས་སྟོན་ཅིག་ཅེས་ཟེར་ན་མི་བསྟན་ཏོ་ཞེས་བརྗོད་པར་བྱའོ། །ཅིའི་ཕྱིར་ཞེས་ཟེར་ན། འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱོད་པ་འབུམ་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་པ་ཡིན་ན། བདག
8.166a
ཁྱེད་ཅག་གུས་པ་མེད་པ། རྗེ་ས་མེད་པ། སྟན་ཆེས་མཐོན་པོ་ལ་འཁོད་པ་རྣམས་ལ་ག་ལ་སྟོན་ཅེས་བརྗོད་པར་བྱའོ། །ཇི་ཙམ་དུས་གཞན་ཞིག་ན་སྒུར་མཆོག་གིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་བཙུན་མོའི་འཁོར་གྱི་ནང་དུ་སོང་བ་དང ། དེ་དག་གིས་དེ་ལ་སྨྲས་པ། སྒུར་མཆོག་ཆོས་སྟོན་ཅིག་།དེས་སྨྲས་པ། མི་སྟོན་ཏོ། །ཅིའི་ཕྱིར་འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་འབུམ་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་ན། བདག་ཁྱེད་ཅག་གུས་པ་མེད་པ་དང ། རྗེ་ས་མེད་པ་སྟན་ཆེས་མཐོན་པོ་ལ་འཁོད་པ་རྣམས་ལ་ག་ལ་སྟོན། སྔོ་བསངས་ཅན་གྱིས་ཐོས་ནས་སེང་གེའི་ཁྲི་བཙུགས་སོ། །གཞན་དག་གིས་ཀྱང་སྟན་ནང་ཚངས་ཅན་བཏིང་ངོ ། །གཞན་དག་གིས་ཀྱང་བཏེག་སྟེ་དེར་བཞག་ནས། སྒུར་མཆོག་སེང་གེའི་ཁྲི་ལ་འདུག་སྟེ། དེ་དག་ལ་གང་ཐོས་ནས་སྔོ་བསངས་ཅན་ལ་སོགས་པ་བུད་མེད་ལྔ་བརྒྱས་ཁྱད་པར་ཆེན་པོ་རྟོགས་ཏེ། ཁ་ཅིག་གིས་ནི་རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་སྒུར་མཆོག་ལ་ཆོས་ཀྱི་རྒྱུ་ལས་བྱུང་བའི་དད་པ་སྐྱེས་ནས་དེ་དག་གིས་བད་སའི་རྒྱལ་པོ་ཤར་པ་ལ་སྨྲས་པ། ལྷ་བདག་ཅག་སངས་རྒྱས་མཐོང་བར་འཚལ་ལོ། །དེས་སྨྲས་པ། དེ་ལྟར་བྱ་སྟེ། བཅོམ་ལྡན་འདས་ཀྱི་སྤྱན་སྔར་ཇེ་འགྲོའོ་ཞེས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་བད་སའི་རྒྱལ་པོ་ཤར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་མཆིས་འབྲང་གི་འཁོར་བཅོམ་ལྡན་འདས་མཐོང་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བཙུན་མོའི་འཁོར་གྱི་ནང་དུ་མི་འཇུག་གོ། །དེས་སོང་སྟེ་དེ་དག་ལ
8.166b
སྨྲས་པ་དང ། སྔོ་བསངས་ཅན་གྱིས་སྨྲས་པ། ལྷ་གལ་ཏེ་བཅོམ་ལྡན་འདས་བཙུན་མོའི་འཁོར་གྱི་ནང་དུ་མི་གཤེགས་ན་ཁང་བཟངས་མེ་ཏོག་གི་སོ་ལ་སྐར་ཁུང་མང་པོ་དག་གདོད་ཅིང ། བདག་ཅག་སྐར་ཁུང་དག་ནས་བཅོམ་ལྡན་འདས་ལ་ལྟ་བར་ཅི་གནང ། རྒྱལ་པོས་ཁང་བཟངས་མེ་ཏོག་གི་སོ་ལ་སྐར་ཁུང་ལྔ་བརྒྱ་བཏོད་དོ། །གང་གི་ཚེ་བཅོམ་ལྡན་འདས་ཕྱོགས་དེར་གཤེགས་པ་དེའི་ཚེ་ན་བཙུན་མོའི་འཁོར་དེ་དག་གིས་བཅོམ་ལྡན་འདས་སྐར་ཁུང་ནས་མཐོང་ནས། མཆོད་པ་དང་བསྙེན་བཀུར་བྱེད་ཅིང་མེ་ཏོག་དག་དང ། སྤོས་དག་དང ། ན་བཟའ་དག་དང ། མེ་ཏོག་ཕྲེང་གི་ཆུན་པོ་དག་ཀྱང་འཐོར་བར་བྱེད་དོ། །སྣ་ཚོགས་གདུལ་ན་ཀུན་ཏུ་རྒྱུ་མ་དུ་ཞེས་བྱ་བ་དེ་ལ་ཆུང་མ་བུར་མ་ཞེས་བྱ་བ་ཞིག་ཡོད་པ་དེ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང ། ཉིང་ལག་ཐམས་ཅད་དང་ལྡན་པ་ཞིག་བཙས་ནས། དེའི་རུས་པ་དག་ཕྲ་ཞིང་ཤིན་ཏུ་ཕྲ་ལ་དཔེ་བྱ་བར་མི་ནུས་སོ། །དེའི་ཉེ་དུ་དག་འདུས་ཤིང་ལྷགས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོའི་མིང་ཅིར་གདགས་ཤེས་དེའི་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། བུ་མོ་འདི་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་ཞིང ། འདིའི་རུས་པ་དག་ཕྲ་ཞིང་ཤིན་ཏུ་ཕྲ་ལ་དཔེ་བྱ་བར་མི་ནུས་པས་བུ་མོ་འདི་ལ་དཔེ་མེད་པས་འདིའི་མིང་དཔེ་མེད་མ་ཞེས་བྱ་བར་གདགས་སོ་ཞེས་དེའི་མིང་དཔེ་མེད་མ་ཞེས་བྱ་བར་བཏགས་སོ། །དེ་བསྲིངས་ཤིང་བསྐྱེད་ནས་ཆེན་མོར་གྱུར་ཏོ། །མ་དུས་བསམས་པ། བདག་གི་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན། ཐོས་པའི་ཕྱིར་ཡང་མི་སྦྱིན་གྱི། བདག་གིས་གང་འདི་དང་གཟུགས་མཉམ་པ་འམ། ལྷག་པ་དེ་ལ་སྦྱིན་ནོ་སྙམ་མོ། །དེའི་སྐབས་སུ་བཅོམ་ལྡན་འདས་སྒྲ་མི་སྙན་དག་ཏུ་ལྗོངས་རྒྱུ་ཞིང་གཤེགས་པ་ན་སྣ་ཚོགས་གདུལ་དུ་བྱོན་ནས་སྣ་ཚོགས་གདུལ་ན་སྒྲ་མི་སྙན་གྱི་གྲོང་རྡལ་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་སྣ་ཚོགས
8.167a
གདུལ་དུ་བསོད་སྙོམས་ལ་ཞུགས་སོ། །སྣ་ཚོགས་གདུལ་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་མཛད་དེ། ཕྱི་མའི་ཟས་ཀྱི་བསོད་སྙོམས་ལས་སླར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ཤིང་ལྗོན་པ་ཞིག་གི་དྲུང་དུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་དཀྲུང་བཅས་ཏེ་བཞུགས་སོ། །དེའི་ཚེ་ན་ཀུན་ཏུ་རྒྱུ་མ་དུ་མེ་ཏོག་དང ། ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང ། ཀུན་ཏུ་རྒྱུ་མ་དུས་ཐག་རིང་པོ་ཁོ་ན་ནས་བཅོམ་ལྡན་འདས་ཤིང་ལྗོན་པ་ཞིག་གི་དྲུང་དུ་རྟེན་ཅིང་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་དཀྲུང་བཅས་ཏེ་བཞུགས་པ་མཛེས་པ། དང་བར་འགྱུར་བ། དབང་པོ་ཞི་བ། ཐུགས་ཞི་བ། མཆོག་ཏུ་སེམས་དུལ་བ། ཉེ་བར་ཞི་བ་དང་ལྡན་པ། གསེར་གྱི་མཆོད་སྡོང་ལྟར་འབར་བ་མཐོང་ངོ ། །མཐོང་ནས་ཀྱང་དགའ་བ་དང་མཆོག་ཏུ་དགའ་བ་སྐྱེས་ཏེ་བསམས་པ། དགེ་སྦྱོང་མཛེས་པ་དད་པར་བྱ་བ་འདི་ལྟ་བུ་འདི་ནི་འཛམ་བུའི་གླིང་མཐའ་དག་གི་བདག་པོར་འོས་པ་ཡིན་ན། དཔེ་མེད་མའི་བདག་པོར་ལྟ་སྨོས་ཀྱང་ཅི་དགོས་ཏེ། བདག་གིས་དམག་པ་རྙེད་དོ་སྙམ་དུ་རིག་ནས། རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག་།ངས་བུ་མོའི་དམག་པ་རྙེད་ཀྱིས་རྒྱན་བྱོས་ཤིག་དང་དཔེ་མེད་མ་སྦྱིན་ནོ། །དེས་སྨྲས་པ། སུ་ལ་སྦྱིན། དེས་སྨྲས་པ། དགེ་སྦྱོང་གཽ་ཏ་མ་ལའོ། །དེས་སྨྲས་པ། ཇི་ལྟར་འདོང་ངོ་ཞེས་དེ་མ་དུ་དང་ལྷན་ཅིག་འཕགས་པ་དང ། ལམ་གར་དེ་ལ་དྲན་པ་སྐྱེས་ནས་དེས་ཚིགས་སུ་བཅད་པ་སྨྲས་པ། ་བྲམ་ཟེ་བདག་གིས་དྲང་སྲོང་ཆེན་པོ་དེ། །སྣ་ཚོགས་གདུལ་དུ་བསོད་སྙོམས་ཞུགས་མཐོང་ནས། །དེས་མནན་ས་ཕྱོགས་མཐོན་པོ་དམར་འགྱུར་ཞིང ། །བཏེག་ན་དམའ་བ་འང་མཐོན་པོ་ཉིད་དུ་འགྱུར། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང ། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན
8.167b
སྟེན་པར་འགྱུར། །དེས་དཔེ་མེད་མ་གོས་དང་རྒྱན་དག་གིས་བརྒྱན་ཏེ་འཕགས་པ་དང ། བཅོམ་ལྡན་འདས་ཀྱང་ནགས་ཁྲོད་དེ་ནས་ནགས་ཁྲོད་གཞན་དུ་གཤེགས་སོ། །ཀུན་ཏུ་རྒྱུ་མ་དུས་བཅོམ་ལྡན་འདས་ཀྱི་གདན་རན་བཏིང་བ་མཐོང་ངོ ། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག་།འདི་ནི་བུ་མོའི་དམག་པའི་སྟན་རྩཝ་བཏིང་བ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པར་གྱུར་པའི་མལ་ནི་འཁྲུགས་པར་འགྱུར། །སྡང་བའི་མལ་ནི་གྱ་ཚོམ་བུར་མར་འགྱུར། །རྨོངས་པའི་མལ་ནི་རྐང་པའི་མཐར་འགྲོ་འགྱུར། །འདི་ནི་ཤིན་ཏུ་ཆགས་བྲལ་གནས་ཡིན་ཏེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང ། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ཡི་ཕྱིར་ཡང་འདོད་ཡོན་སྟེན་པར་འགྱུར། །ཀུན་ཏུ་རྒྱུ་མ་དུས་བཅོམ་ལྡན་འདས་ཀྱི་ཞབས་ཀྱི་རྗེས་དག་མཐོང་ངོ ། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པའི་རྗེས་དག་ཡིན་ནོ། །དེས་ཚིགས་སུ་བཅད་པ་སྨྲས་པ། སྐྱེས་བུ་ཆགས་པའི་རྗེས་ནི་གསལ་མི་འགྱུར། །ཞེ་སྡང་ལྡན་པའི་རྗེས་ནི་ཟབ་པ་ཡིན། །རྨོངས་པར་གྱུར་པའི་རྗེས་ནི་ནོགས་པར་འགྱུར། །ཤིན་ཏུ་ཆགས་བྲལ་རྗེས་ནི་འདི་འདྲ་སྟེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོགས་རང་གི་སྡུམ་པ་ཉིད་དུ་འདོང ། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་ཀྱིས་གསུང་བསལ་བའི་སྒྲ་མཛད་པ་དང ། ཀུན་ཏུ་རྒྱུ་མ་དུས་བཅོམ་ལྡན་འདས་ཀྱི་གསུང་བསལ་བའི་སྒྲ་ཐོས་སོ། །ཐོས་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་དམག་པའི་སྐད་བསལ་བའི་སྒྲ་གྲག་པ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པའི་མི་ཡི་སྐད་ནི་ངར་ངར་པོ། །སྡང་བའི་མི
8.168a
ཡི་སྐད་ནི་རྩུབ་པ་ཡིན། །རྨོངས་པའི་མི་ཡི་སྐད་ནི་འཁྲུགས་པར་འགྱུར། །ཚངས་པའི་རྔ་སྒྲ་འདི་ནི་སངས་རྒྱས་ཏེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང ། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་ཀྱིས་ཐག་རིང་པོ་ཁོ་ན་ནས་ཀུན་དུ་རྒྱུ་མ་དུ་ལ་གཟིགས་པ་དང ། ཀུན་དུ་རྒྱུ་མ་དུས་བཅོམ་ལྡན་འདས་གཟིགས་པ་མཐོང་ངོ ། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་དམག་པ་ལྟ་བ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པའི་མི་ནི་རིག་རིག་ལྟ་བར་བྱེད། །སྡང་བའི་མི་ནི་དུག་དྲག་སྦྲུལ་བཞིན་ལྟ། །རྨོངས་པའི་མི་ནི་མུན་ཁྲོད་རྟོག་བཞིན་ལྟ། །ཤིན་ཏུ་ཆགས་བྲལ་གཉའ་ཤིང་ཙམ་དུ་ལྟ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང ། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་འཆག་པར་མཛད་པ་དང ། ཀུན་དུ་རྒྱུ་མ་དུས་བཅོམ་ལྡན་འདས་འཆག་པ་མཐོང་ངོ ། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་དམག་པ་འཆག་པ་ཡིན་ནོ། །དེས་ཚིགས་སུ་བཅད་པ་སྨྲས་པ། ཇི་ལྟར་འདི་སྤྱན་ཇི་ལྟར་གཟིགས་པ་དང ། །ཇི་ལྟར་འདི་སྐུ་བརྟན་པར་གཤེགས་པ་དང ། །ཇི་ལྟར་འདི་ཡི་སྒྲོས་དང་ཞལ་དག་ནི། །རྡུལ་དང་བྲལ་བ་ཉིད་དུ་སྣང་བ་ལས། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང ། །དེས་ཀྱང་ཚིགས་སུ་བཅད་པ་དག་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །གནས་འཇོག་གསེར་མདོག་ཨོ་ཏ་ལ་དག་ཀྱང ། །བུ་ཡི་དོན་དུ་འདོད
8.168b
པས་རྨོངས་གྱུར་ཏེ། །འདི་ནི་ཆོས་བཞིན་ཕུལ་བས་ཐུབ་རྣམས་ཀྱིས། །རྟག་པར་རྒྱུན་དུ་བུ་དག་བསྐྱེད་པར་གྱུར། །དེ་ནས་ཀུན་དུ་རྒྱུ་མ་དུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གི་བུ་མོ་དམ་པ་གཟུགས་ལྡན་ཞིང ། །དར་བ་བརྒྱན་པ་འདོད་པ་དོན་གཉེར་བ། །ཁྱོད་ལ་འབུལ་བ་འདི་ལ་ཁྱོད་གཟིགས་ཤིང ། །མཁའ་ལ་དགུང་ཟླ་སྨིན་དྲུག་མཇལ་བ་ལྟར། །འདི་དང་ལྷན་ཅིག་ལེགས་པར་ཁྱོད་དགྱེས་མཛོད། །བཅོམ་ལྡན་འདས་ཀྱིས་དགོངས་པ། གལ་ཏེ་ངས་དཔེ་མེད་མ་ལ་རྗེས་སུ་ཆགས་པའི་ཚིག་བརྗོད་ན་དཔེ་མེད་མ་འདོད་ཆགས་ཀྱིས་གདུངས་ཏེ་དུས་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་བདག་གིས་འདི་ལ་ཁོང་ཁྲོ་བའི་ཚིག་བརྗོད་པར་བྱའོ་སྙམ་དུ་རིག་ནས་ཚིགས་སུ་བཅད་པ་བཀའ་སྩལ་པ། བྲམ་ཟེ་ང་ཡིས་བདུད་ཀྱི་བུ་མོ་ནི། །སྲེད་མ་དགའ་བྱེད་དེ་བཞིན་དགའ་མོ་དག་།ཕམ་བྱས་འདོད་པ་དག་ལ་ལན་འགའ་ཡང ། །ང་ཡིས་འདུན་པའི་སེམས་བསྐྱེད་མ་གྱུར་པས། །བཤང་དང་གཅི་བས་གང་བ་འདི་ལ་ནི། །རྐང་པས་རེག་པར་སྤྲོ་བ་འང་མི་སྐྱེད་དོ། །མ་དུས་ཚིགས་སུ་བཅད་པ་གསོལ་པ། བདག་གི་བུ་མོ་ཡན་ལག་ཉམས་གྱུར་ཅིང ། །འདོད་ལྡན་ཡོན་ཏན་བྲལ་བར་གཟིགས་སམ་ཅི། །ཇི་སླད་འདོད་སྤྱོད་ཡིད་འོང་གཟུགས་དག་ལ། འདུན་དྲག་བགྱིད་ལྟར་འདི་ལ་ཁྱོད་མི་མཛད། །བཅོམ་ལྡན་འདས་ཀྱིས་ཀྱང་ཚིགས་སུ་བཅད་པ་དག་བཀའ་སྩལ་པ། བྲམ་ཟེ་རྨོངས་པ་གང་ཞིག་ཡུལ་འདོད་པ། །དེ་ནི་ཁྱོད་ཀྱི་བུ་མོ་འདི་སྒྲུབ་ཅིང ། །ཡུལ་ལ་ཆགས་ཤིང་ཁྲོ་བར་ཞུགས་གྱུར་པ། །འདི་ལ་རབ་རྨོངས་སྐྱེ་བོ་ཆགས་བྲལ་མིན། །ང་ནི་སངས་རྒྱས་ཐུབ་གཙོ་མངའ་བདག་སྟེ། །ང་ཡིས་བྱང་ཆུབ་བླ་མེད་ཞི་བ་བརྙེས། །ཇི་ལྟར་པད་མ་ཆུས་མི་ཆགས་པ་ལྟར། །ཆགས་པ་མེད་པ་ཉིད་དུ་འཇིག་རྟེན་རྒྱུ། །ུཏྤལ་སྔོན་པོ་རྫབ་དང་ཆུ་ནང་ན། །རྫབ་དང་ཆུ་ཡིས་གོས་པ་མེད་པ་ལྟར། །བྲམ་ཟེ་དེ་བཞིན་ང་ཡིས་འཇིག་རྟེན་ན། །འདོད་པ་དག་ལ་རྣམ་གྲོལ་སེམས་ཀྱིས་སྤྱོད། །དེ་ནས་དཔེ་མེད་མ་བཅོམ་ལྡན་འདས་ཀྱིས་བཤང་བ་དང་གཅི་བ་ཞེས་བྱ་བའི་ཚིགས་གིས་ཀུན
8.169a
དུ་སྤྱད་པས་རངས་པ་དང་བྲལ་ཏེ། ཡིད་མི་བདེ་བར་གྱུར་ནས་དེའི་འདོད་ཆགས་ཀྱི་ཀུན་ནས་དཀྲིས་པ་གང་ཡིན་པ་དེ་མེད་པར་གྱུར་ཅིང ། ཞེ་སྡང་གི་ཀུན་ནས་དཀྲིས་པ་སྐྱེས་པས་རུས་པ་དག་སྦོམ་པོར་གྱུར་ཅིང ། མིག་གཉིས་ཀྱང་མཆིང་བུ་ལྟ་བུར་གྱུར་ཏོ། །དེའི་ཚེ་ན་རྒན་ཞུགས་ཤིག་བཅོམ་ལྡན་འདས་ཀྱི་སྣམ་ལོགས་ན་འདུག་པར་གྱུར་ཏོ། །དེ་ནས་བཅོམ་ལྡན་འདས་ལ་རྒན་ཞུགས་དེས་འདི་སྐད་ཅེས་གསོལ་ཏོ། །ཀུན་དུ་གཟིགས་པ་བུད་མེད་བླང་མཛད་དེ། །བཅོམ་ལྡན་དེ་ནི་བདག་ལ་སྩལ་དུ་གསོལ། །དཔའ་བོ་བདག་གིས་དྲེགས་པས་བརྒྱན་པ་འདི། །ཅི་ནས་རྗེས་སུ་འཐུན་པ་སྤྱད་པར་བགྱི། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་རྒན་ཞུགས་དེ་ལ་འདི་སྐད་ཅེས་བཀའ་སྩལ་ཏོ། །མི་གཏི་མུག་ཅན་ངའི་མདུན་ན་མ་འདུག་པར་ཕར་སོང་ཤིག་།དེ་ཁྲོས་ཏེ་ཚིགས་སུ་བཅད་པ་སྨྲས་པ། ཁྱོད་ཀྱི་ལྷུང་བཟེད་འདི་དང་ཆོས་གོས་འདི། །ཁར་བ་རིལ་བ་འདི་ཡང་ཟད་གྱུར་ཅིག་།བསླབ་པ་འདི་ཡང་ཇི་ལྟར་མ་མ་ཡི། །པང་པར་གཞོན་ནུ་འཛིན་ལྟར་རང་སྲེལ་ཅིག་།རྒན་ཞུགས་དེས་དེ་སྐད་ཅེས་སྨྲས་ནས་བསླབ་པ་ཕུལ་ཏེ་ཉམས་པའི་ཕྱིར་ཞུགས་ནས་ཀུན་ཏུ་རྒྱུ་མ་དུ་ག་ལ་བ་དེར་སོང་སྟེ་ཕྱིན་ནས་ཀུན་དུ་རྒྱུ་མ་དུ་ལ་འདི་སྐད་ཅེས་སྨྲས་སོ། །མ་དུ་དཔེ་མེད་མ་ཁོ་བོ་ལ་བྱིན་ཅིག་།དེས་ཁྲོས་ཏེ་སྨྲས་པ། རྒན་ཞུགས་ཁྱོད་ལ་བལྟ་བ་ཡང་མི་སྦྱིན་ན་རེག་པ་ལྟ་སྨོས་ཀྱང་ཅི་དགོས། དེ་སྐད་ཅེས་སྨྲས་པ་དང ། རྒན་ཞུགས་དེས་ཀུན་དུ་རྒྱུ་མ་དུ་ལ་འདི་ལྟ་བུའི་ཀུན་ནས་དཀྲིས་པ་སྐྱེས་ཏེ་དེས་ཁྲག་ཚ་བ་སྐྱུགས་ནས་དུས་ལ་བབ་སྟེ་སེམས་ཅན་དམྱལ་བ་རྣམས་སུ་སྐྱེས་སོ།། ་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་དྲུག་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་དཔེ་མེད་མ་བརྙེས་པ་ན་མ་བཞེས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་ངས་འདི་རྙེད་པ་ན་མ་བླངས་ཏེ་དེ་ཉོན་ཅིག་།དགེ་སློང་དག
8.169b
སྔོན་བྱུང་བ་རི་བྲགས་ཤིག་ན་ལྕགས་མགར་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །ལྕགས་མགར་དེས་བསམས་པ། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། འདི་ལྟར་གང་བདག་དང་བཟོས་མཉམ་པ་འམ་ལྷག་པ་དེ་ལ་བདག་གིས་འདི་སྦྱིན་པར་བྱའོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་ཞིག་སློངས་མོའི་དོན་དུ་དེའི་ཁྱིམ་དུ་ཞུགས་པ་དང ། བུ་མོ་དེས་ཟས་ཁྱེར་ཏེ་ཕྱིར་བྱུང་བ་ན་བྲམ་ཟེའི་ཁྱེའུ་དེས་མཐོང་ནས་སྨྲས་པ། བུ་མོ་ཁྱོད་འགའ་ཞིག་ལ་བྱིན་ནམ། འོན་ཏེ་མ་བྱིན། དེས་སྨྲས་པ། བདག་གི་ཕ་ཇི་སྐད་ཟེར་བ་དང་སྦྱར་ན་དེས་བདག་སུ་ལ་ཡང་སྦྱིན་པར་དཀའོ། །ཁྱོད་ཀྱི་ཕ་ཇི་སྐད་ཟེར། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། འདི་ལྟར་གང་བདག་དང་བཟོས་མཉམ་པ་འམ་ལྷག་པ་དེ་ལ་བདག་གིས་འདི་སྦྱིན་པར་བྱའོ་ཞེས་ཟེར་རོ། །ཁྱོད་ཀྱི་ཕ་བཟོ་ཇི་ལྟ་བུ་ཤེས། ཁབ་གང་ཆུའི་སྟེང་ན་འཕྱོ་བ་དེ་ལྟ་བུ་ཤེས་སོ། །བྲམ་ཟེའི་ཁྱེའུ་དེས་བསམས་པ། འདི་ལྟར་བདག་འདི་དོན་དུ་མི་གཉེར་མོད་ཀྱི་འདིའི་ང་རྒྱལ་བཅག་པར་བྱའོ་སྙམ་ནས། དེ་མཁས་པ་ཡིན་པས་དེས་བཟོའི་གནས་དང ། ལས་ཀྱི་གནས་དེ་དང་དེ་དག་ནས་ལྕགས་མགར་གྱི་མགར་སྤྱད་དག་བརྙས་ཏེ་ཁབ་གང་དག་ཆུའི་སྟེང་ན་འཕྱོ་བ་དེ་ལྟ་བུ་དག་བརྡུངས་ཤིང་ཁབ་སྦོམ་པོ་གཅིག་བརྡུངས་ནས་དེའི་མིག་ཏུ་ཁབ་ཕྲ་མོ་བདུན་བཅུག་ན་དེ་དང་ལྷན་ཅིག་ཆུའི་སྟེང་ན་འཕྱོ་བ་བརྡུངས་སོ། །དེས་དེ་དག་བརྡུངས་ནས་ལྕགས་མགར་དེའི་ཁྱིམ་དུ་འོངས་ཏེ་སྨྲས་པ། ཁབ་སུ་ཉོ་ཁབ་སུ་ཉོ་ཞེས་བྱས་པ་དང ། ་བུ་མོ་དེས་མཐོང་ནས་ཚིགས་སུ་བཅད་པ་སྨྲས་པ། གྲོགས
8.170a
པོ་ཁྱོད་ནི་སྨྱོས་པ་འམ། །འོན་ཏེ་སེམས་མེད་གྱུར་པ་ཡིན། །གང་ཕྱིར་ལྕགས་མགར་ཁྱིམ་དུ་ཁྱོད། །ཁབ་དག་འཚོང་དུ་འོངས་པར་གྱུར། །དེས་ཀྱང་ཚིགས་སུ་བཅད་པ་དག་སྨྲས་པ། བཟང་མོ་ཁོ་བོ་སྨྱོས་པ་མིན། །སེམས་མེད་གྱུར་པ་འང་མ་ཡིན་ཏེ། །ང་རྒྱལ་བཅག་པར་བྱ་བའི་ཕྱིར། །ཁོ་བོས་བཟོ་དག་ཉེ་བར་བསྒྲུབས། །གལ་ཏེ་ཁོ་བོའི་བཟོ་འདྲ་བ། །ཁྱོད་ཀྱི་ཕ་ཡིས་ཤེས་གྱུར་ན། །ཁྱོད་དང་ནོར་གྱི་རྣམ་པ་ནི། །མང་པོ་གཞན་ཡང་སྦྱིན་པར་གྱིས། །དེས་སྨྲས་པ། ཁྱོད་ཀྱིས་བཟོ་ཇི་ལྟ་བུ་ཤེས། ཁབ་གང་དག་ཆུའི་སྟེང་ན་འཕྱོ་བ་དེ་ལྟ་བུ་དག་ཤེས་སོ། །དེས་མ་ལ་སྦྲན་པ། ཡུམ་བཟོ་བོའི་བུ་ཞིག་མཆིས་སོ། །དེས་སྨྲས་པ། འཇུག་ཏུ་ཆུག་ཤིག་།དེས་འཇུག་ཏུ་བཅུག་པ་དང ། ལྕགས་མགར་གྱི་ཆུང་མས་སྨྲས་པ། ཁྱོད་བཟོ་ཇི་ལྟ་བུ་ཤེས། དེས་སྨྲས་པ་དང ། དེས་ཁྱིམ་ཐབ་ལ་སྦྲན་པ། རྗེའི་སྲས་བཟོ་བོའི་ཁྱེའུ་འདིས་བཟོ་འདི་ལྟ་བུ་འཚལ་ཏོ། །དེས་སྨྲས་པ། གལ་ཏེ་དེ་ལྟ་ན་ཆུ་འོན་ཅིག་དང་བལྟའོ། །དེས་ཆུས་སྣོད་བཀང་སྟེ་ཕུལ་བ་དང ། དེས་ཁབ་གཅིག་བཅུག་ན་དེ་འཕྱོ་བར་བརྩམས་སོ། །དེ་བཞིན་དུ་ཁབ་གཉིས་པ་དང ། གསུམ་པ་ནས་བདུན་པའི་བར་དུ་བཅུག་ན་དེ་ཡང་འཕྱོ་བར་བརྩམས་སོ། །དེས་ཁབ་སྦོམ་པོ་དེ་བཅུག་ན་དེ་ཡང་འཕྱོ་བར་བརྩམས་སོ། །ཡང་དེར་ཁབ་གཅིག་བཅུག་སྟེ་བཅུག་ན་དེ་ལྟ་ན་ཡང་འཕྱོ་བར་བརྩམས་སོ། །དེ་བཞིན་དུ་ཁབ་གཉིས་པ་དང ། གསུམ་པ་ནས་བདུན་པའི་བར་དག་བཅུག་སྟེ་བཅུག་ན་དེ་ལྟ་ན་ཡང་འཕྱོ་བར་བརྩམས་སོ། །ལྕགས་མགར་གྱིས་བསམས་པ། འདི་བདག་པས་བཟོ་ཆེས་ལྷག་པ་ཡིན་གྱིས་འདི་ལ་བུ་མོ་སྦྱིན་ནོ་སྙམ་དུ་རིག་ནས། བུ་མོ་དེ་རྒྱན་ཐམས་ཅད་ཀྱིས་ཀླུབས་ཏེ་ལག་པ་གཡོན་པས་བཟུང་ནས་ལག་པ་གཡས་པས་རིལ་བ་བྷྲིང་གར་ཐོགས་ཏེ་བྲམ་ཟེའི་ཁྱེའུ་དེའི་མདུན་དུ་འདུག་ནས་སྨྲས་པ། བྲམ་ཟེའི་ཁྱེའུ་ཁྱོད་ལ་ཁོ་བོས་བུ་མོ་འདི་ཆུང་མར་སྦྱིན་ནོ། །དེས་སྨྲས་པ། ཁོ་བོ་འདི་དོན་དུ་མི་གཉེར་ཏེ། འདི་ལྟར་ཁོ་བོས་ཁྱོད་ཀྱི་ང་རྒྱལ་གཅག་པར་བྱ་བའི་ཕྱིར་བཟོ་ཉེ་བར་བསྟན་ཏོ། །དགེ་སློང་དག་དེའི་ཚེ་དེའི་དུས་ན་བྲམ་ཟེའི་ཁྱེའུ་གང་ཡིན་པ་དེ་ནི་ང་ཉིད་ཡིན་ནོ། །
8.170b
དེའི་ཚེ་དེའི་དུས་ན་ལྕགས་མགར་གང་ཡིན་པ་དེ་ནི་ཀུན་དུ་རྒྱུ་མ་དུ་འདི་ཡིན་ནོ། །དེའི་ཚེ་དེའི་དུས་ན་ལྕགས་མགར་གྱི་ཆུང་མ་གང་ཡིན་པ་དེ་ནི་བུར་མ་འདི་ཡིན་ནོ། །དེའི་ཚེ་དེའི་དུས་ན་ལྕགས་མགར་གྱི་བུ་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། དེའི་དུས་ན་ཡང་ངས་དཔེ་མེད་མ་འདི་རྙེད་པ་ན་མ་བླངས་ལ་ད་ལྟར་ཡང་ངས་འདི་རྙེད་པ་ན་མ་བླངས་སོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒན་ཞུགས་འདི་དཔེ་མེད་མ་ལ་བརྟེན་ནས་ཚུལ་མ་ལགས་པས་སྡུག་བསྔལ་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་འདི་དཔེ་མེད་མ་ལ་བརྟེན་ནས་བཙུན་མོའི་འཁོར་དང་བཅས་པ་ཚུལ་མ་ཡིན་པས་སྡུག་བསྔལ་བར་གྱུར་ཏེ་དེ་ཉོན་ཅིག་།དགེ་སློང་དག་སྔོན་བྱུང་བ་རྒྱལ་པོའི་ཕོ་བྲང་སེང་གེ་ལྟ་བུ་ན་རྒྱལ་པོ་སེང་གེ་རལ་པ་ཅན་གྱིས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་དང ། ཕྱི་དགྲ་དང ། ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང་ནད་དང་བྲལ་བ། ས་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །དེའི་ཚེ་ན་རྒྱལ་པོའི་ཕོ་བྲང་སེང་གེ་ལྟ་བུ་ན་དེད་དཔོན་སེང་གེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ
8.171a
ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་དེ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་ཁྱིམ་ཐབ་ལ་སྨྲས་པ། རྗེའི་སྲས་མཁྱེན་པར་མཛོད་ཅིག་།བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་རོ། །དེ་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང ། ཁོ་བོ་དང་འཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་ལ་སྤྱོད་པ་དང ། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང ། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུ་འམ་མང་པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གཏོགས་པར་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚ་བ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་དང ། མངར་བ་དང ། ཚ་བ་དང ། བསྐ་བ་རྣམ་པར་སྤངས་པའི་ཟས་དག་དང ། དོ་ཤལ་དང ། སེ་མོ་དོ་དང ། རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུར་དང ། ཤོད་ཀྱིས་གཞིར་མི་འབབ་པ་དང ། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད
8.171b
དུ་རིམ་གྲོ་བྱེད་དུ་འཇུག་གོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་མིང་ཅིར་གདགས་ཤེས་མིང་འདོགས་པར་བྱེད་དོ། །དེའི་ཉེ་དུ་དག་གིས་སྨྲས་པ། གང་གི་ཕྱིར་ཁྱེའུ་འདི་དེད་དཔོན་སེང་གེའི་བུ་ཡིན་པ་དེའི་ཕྱིར་ཁྱེའུ་འདིའི་མིང་སིང་ག་ལ་ཞེས་བྱའོ། །ཞེས་དེའི་མིང་སིང་ག་ལ་ཞེས་བྱ་བར་བཏགས་སོ། །ཁྱེའུ་སིང་ག་ལ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེད་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང ། ཞོ་དང ། མར་དང་ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང ། གྲངས་དང་རྩིས་དང ། ལག་རྩིས་དང ། དབྱུང་བ་དང་གཞུག་པ་དང ། གཞག་པ་ལ་ཉེ་བར་ཞུགས་ནས། དེའི་ཡི་གེ་མཐར་ཕྱིན་ཅིང་འབྱེད་པ་དང ། ཀློག་པ་དང ། མཁས་པ་དང ། སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་རྟ་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །ཕས་དེའི་ཆུང་མའི་འཁོར་གསུམ་པོ་རབ་དང ། འབྲིང་དང ། ཐ་མ་དག་རྣམ་པར་བཞག་གོ། །འདུག་པའི་གནས་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ། །སྐྱེད་མོས་ཚལ་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ། །དེ་སྟེང་གི་ཁང་བཟངས་ཀྱི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །
8.172a
དེ་དུས་གཞན་ཞིག་ན་ཕ་ལ་སྨྲས་པ། ཡབ་བདག་རྒྱ་མཚོ་ཆེན་པོར་འཇུག་པར་ཅི་གནང ། དེས་སྨྲས་པ། བུ་རེ་ཤིག་ཁོ་བོ་ལ་ནོར་གྱི་རྣམ་པ་མང་དུ་ཡོད་དེ། གལ་ཏེ་ཁྱོད་ཏིལ་དང ། འབྲས་དང་རྒྱ་ཤུག་དང ། རྒྱ་སྲན་ལ་སོགས་པ་ལ་སྤྱོད་པ་བཞིན་དུ་རིན་པོ་ཆེ་དག་ལ་སྤྱོད་པར་བྱེད་ཀྱང་དེ་ལྟ་ན་ཡང་ཁོ་བོའི་ལོངས་སྤྱོད་སྲབས་པ་ཉིད་དང ། ཡོངས་སུ་ཟད་པ་དང ། ཡོངས་སུ་གཏུགས་པར་མི་འགྱུར་གྱིས། དེའི་ཕྱིར་ཇི་སྲིད་དུ་ཁོ་བོ་གསོན་པ་དེ་སྲིད་དུ་ཁྱོད་རྩེ་བར་གྱིས། དགའ་བར་གྱིས། དགའ་མགུར་སྤྱོད་པར་གྱིས་ལ་ཁོ་བོ་འདས་པ་དང་ནོར་བསྒྲུབ་པར་གྱིས་ཤིག་།དེས་ཡང་དང་ཡང་དུ་སྨྲས་པ། ཡབ་བདག་རྒྱ་མཚོ་ཆེན་པོར་འཇུག་པར་ཅི་གནང ། དེས་གདོན་མི་ཟ་བར་དུས་ཀྱིས་འཆི་བར་ཤེས་ནས་སྨྲས་པ། བུ་དེ་ལྟར་གྱིས་ཤིག་།འདི་ལྟར་ཁྱོད་ཀྱིས་འཇིགས་པ་དང ། འཇིགས་སུ་རུང་བ་དག་བཟོད་པར་བྱའོ། །དེས་རྒྱལ་པོའི་ཕོ་བྲང་སེང་གེ་ལྟ་བུར་དྲིལ་བསྒྲགས་པ་བྱེད་དུ་བཅུག་སྟེ། རྒྱལ་པོའི་ཕོ་བྲང་སེང་གེ་ལྟ་བུ་ན་གནས་པ་དང ། ཡུལ་ཐ་དད་པ་ནས་ལྷགས་པའི་ཚོང་པ་ཤེས་ལྡན་དག་ཉོན་ཅིག་།དེད་དཔོན་སིང་ག་ལ་རྒྱ་མཚོ་ཆེན་པོར་འཇུག་པར་འགྱུར་གྱིས། ཁྱེད་ཅག་ལས་གང་དེད་དཔོན་སིང་ག་ལ་དང་ལྷན་ཅིག་ཤོ་གམ་མེད་པ་དང ། ལ་ཅན་མེད་པ་དང ། གྲུ་བཙས་མེད་པར་རྒྱ་མཚོ་ཆེན་པོར་འཇུག་པར་འདོད་པ་དེས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་གྱིས་ཤིག་ཅེས་བསྒོའོ། །ཚོང་པ་ལྔ་བརྒྱས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། །དེ་ནས་དེད་དཔོན་སིང་ག་ལས་ཕ་མ་དང ། གཞན་ཡང་སྙིང་དུ་སྡུག་ཅིང་འབྲེལ་བའི་རྩ་ལག་དག་ལ་བལྟས་ནས་ཉི་མ་དང ། ཚེས་གྲངས་དང ། ཡུད་ཙམ་དང ། སྦྱོར་བས་དགེ་མཚན་དང ། བཀྲ་ཤིས་དང ། བདེ་ལེགས་སུ་འགྱུར་བ་བྱས་ནས། ཤིང་རྟ་དག་དང ། ཁུར་དག་དང ། གླེ་བ་དག་དང ། སྤྱད་དག་དང ། རྔ་མོ་དག་དང ། བ་ལང་དག་དང ། བོང་བུ་མང་པོ་དག་གིས་རྒྱ་མཚོ་ཆན་པོར་འགྲོ་བའི་ཟོང་ཁྱེར་ཏེ་ཚོང་པ་ལྔ་བརྒྱའི་འཁོར་དང་ལྷན་ཅིག་འཕགས་སོ། །དེ་མཐར་གྱིས་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དག་ཏུ་ཚོང་རྡལ་དག་ལ་རྣམ་པར་ལྟ་ཞིང་འགྲོ་བ་ན་རྒྱ
8.172b
མཚོ་ཆེན་པོའི་འགྲམ་དུ་ཕྱིན་ཏོ། །དེས་རྙིང་པ་ལྔ་བརྒྱས་གྲུ་སྦྱར་ནས་ཞོ་ཤས་འཚོ་བ་ལྔ་པོ་སྟོབས་པར་བྱེད་པ་དང ། སེལ་བར་བྱེད་པ་དང ། གྲུ་པ་དང ། རྐྱལ་ཆེན་པ་དང ། རླུང་ཡོར་ཐོགས་པ་དག་ཁྲིད་དེ་ལན་གསུམ་དྲིལ་བསྒྲགས་པ་བྱས་ཏེ་རྒྱ་མཚོ་ཆེན་པོར་འཇུག་པར་བརྩམས་སོ། །དེ་ནས་ཚོང་པ་དེ་དག་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་འདི་ལྟ་སྟེ། ཕན་ཚུན་བདེ་བ་ཉིད་ཀྱིས་ངེས་པར་རྒལ་བ་ཤེས་པར་དཀས། བདག་ཅག་ནོར་སྒྲུབ་པ་དག་གིས་སོ་སོ། སོ་སོ་དག་ནས་ཕོངས་པའི་དོན་དུ་ཆུར་རྐྱལ་པ་དག་ཐོགས་ཏེ་རྒྱ་མཚོ་ཆེན་པོར་འཇུག་པར་བྱས། བདག་ཅག་ལས་ཁ་ཅིག་གིས་ནི་ཤལ་མ་ལའི་སྤང་ལེབ་དག་བཀུར། ཁ་ཅིག་གིས་ནི་སྔས་ཤིང་བལ་ཅན་དག་བཀུར། ་ཁ་ཅིག་གིས་ནི་བསྐུ་བའི་གཟིངས་དག་བཀུར། ཁ་ཅིག་གིས་ནི་ར་རྐྱལ་དག་བཀུར་རོ་སྙམ་ནས། དེ་ནས་ནོར་སྒྲུབ་པ་དེ་དག་གིས་དེ་ལྟར་སོ་སོར་བརྟགས་ནས་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ། ཁ་ཅིག་གིས་ནི་ཤལ་མ་ལའི་སྤང་ལེབ་དག་།ཁ་ཅིག་གིས་ནི་སྔས་ཤིང་བལ་ཅན་དག་།ཁ་ཅིག་གིས་ནི་བསྐུ་བའི་གཟིངས་དག་།ཁ་ཅིག་གིས་ནི་ར་རྐྱལ་དག་ཁྱེར་ཏེ་རྒྱ་མཚོ་ཆེན་པོར་ཞུགས་སོ། །དེ་དག་རྒྱ་མཚོ་ཆེན་པོའི་ནང་དུ་དོང་བ་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་གོ། །དེ་དག་རྒྱ་མཚོའི་གྲུ་བཅག་པ་ན་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁྱེར་ཏེ་འོངས་པ་དག་ལ་ཞོན་ཏེ་འདི་ལྟ་སྟེ། ཁ་ཅིག་གིས་ནི་ཤལ་མ་ལའི་སྤང་ལེབ་དག་ལ་ཞོན། ཁ་ཅིག་གིས་ནི་སྔས་ཤིང་བལ་ཅན་དག་ལ་ཞོན། ཁ་ཅིག་གིས་ནི་བསྐུ་བའི་གཟིངས་དག་ལ་ཞོན། ཁ་ཅིག་ནི་ར་རྐྱལ་དག་ལ་ཞོན་ཏེ་ཆུའི་སྟེང་ན་འཕྱོའོ། །དེ་དག་གི་ལས་ཀྱི་རྣམ་པར་སྨིན་པས་བྱང་ཕྱོགས་ནས་རླུང་ལངས་ནས་དེས་དེ་དག་ལྷོ་ཕྱོགས་ཀྱི་འགྲམ་དུ་བདས་པ་དང ། ཟངས་གླིང་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་དག་འཁོད་པ་དེ་དག་ཚོང་པ་གྲུ་ཆག་པ་རྣམས་ལ་གཏམ་སྙན་པ་དང་དགའ་བའི་ཚུལ་གྱིས་སླུ་བར་བྱེད་དོ། །དེ་དག་ལ་རྒྱལ་མཚན་དགའ་བའི་གནས་དང་འཐུན་པ་དང ། ཕོངས་པའི་གནས་དང་འཐུན་པ་གཉིས་ཡོད་དེ། ཇི་ཙམ་ན་དགའ་བའི་གནས་དང་འཐུན་པའི་རྒྱལ་མཚན་གཡོ་བར
8.173a
བརྩམས་པ་དང ། དེ་དག་གིས་སྨྲས་པ། ཕུ་ནུ་མོ་དག་དགའ་བའི་གནས་དང་འཐུན་པའི་རྒྱལ་མཚན་གཡོས་པས་འཛམ་བུའི་གླིང་པའི་ཚོང་པ་དག་གི་རྒྱ་མཚོའི་གྲུ་ཆུ་སྲིན་ཉའི་རིགས་ཀྱིས་བཅག་སྟེ་འོང་གོར་མ་ཆག་གིས་བཙལ་ལོ་ཞེས་དེ་དག་གིས་རྒྱ་མཚོའི་འགྲམ་དུ་བཙལ་བར་བརྩམས་པ་དང ། ཇི་ཙམ་ན་སྐྱེ་བོ་ཕལ་པོ་ཆེའི་ཚོགས་ཆུར་རྐྱལ་བ་སྣ་ཚོགས་དག་གིས་རྐྱལ་ཞིང་འོང་བ་མཐོང་ངོ ། །མཐོང་ནས་ཀྱང་བདག་ཉིད་གཟུགས་བཟང་མོར་མངོན་པར་སྤྲུལ་ནས་རྒྱན་སྣ་ཚོགས་ཀྱིས་བརྒྱན་ཏེ། ལྷའི་གོས་དང ། ཕྲེང་བ་རྒྱུས་ཀླུབས་ནས་རྒྱ་མཚོའི་འགྲམ་ནས་བོད་པར་བརྩམས་པ། ་ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག་།བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག་།གནས་མ་མཆིས་པ་རྣམས་ཀྱི་གནས་མཛོད་ཅིག་།གླིང་མ་མཆིས་པ་རྣམས་ཀྱི་གླིང་མཛོད་ཅིག་།སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག་།སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག་།དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག་།འདི་དག་ནི་ཁྱེད་ཀྱི་ཟས་ཀྱི་གནས་དག་དང ། སྐོམ་གྱི་གནས་དག་དང ། གོས་ཀྱི་གནས་དག་དང ། གནས་མལ་གྱི་གནས་དག་དང ། ཀུན་དགའི་ར་བ་དགའ་བར་འགྱུར་བ་དག་དང ། ནགས་ཚལ་དགའ་བར་འགྱུར་བ་དག་དང ། རྫིང་བུ་དགའ་བར་འགྱུར་བ་དག་དང ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་བ་དག་ལགས་ཀྱིས། ཁྱེད་ཅག་ཚུར་སྤྱོན་བདག་ཅག་དང་ལྷན་ཅིག་རྩེ་བ་དང ། ་དགའ་བ་དང ། དགའ་མགུར་སྤྱོད་པར་མཛོད་ཅིག་།ཁྱེད་ཅག་ལས་འགའ་ཡང་ཤིན་དུ་མྱོས་པར་གྱུར་ཀྱང་ལྷོ་ལམ་དུ་འགྲོ་བར་མི་བྱའོ་ཞེས་ཟེར་རོ། །བཅོམ་ལྡན་འདས་ཀྱིས་དགེ་སློང་དག་ངས་འདི་ལྟ་སྟེ། སྐྱེས་པ་ལ་བུད་མེད་ཀྱི་གཟུགས་ཇི་ལྟར་ཆགས་པར་འགྱུར་བ་དང ། རྒྱགས་པར་འགྱུར་བ་དང ། འདོད་པར་འགྱུར་བ་དང ། སྡུག་པར་འགྱུར་བ་དང ། བྱམས་པར་འགྱུར་བ་དང ། རྔོད་པར་འགྱུར
8.173b
བ་དང ། བརྒྱལ་བར་འགྱུར་བ་དང ། འཆིང་བར་འགྱུར་བ་དང ། སྒྲུབ་པར་འགྱུར་བ་དང ། ་ཀུན་དུ་སྦྱར་བར་འགྱུར་བ་དེ་ལྟ་བུའི་གཟུགས་གཞན་ཅིག་ཀྱང་ཡང་དག་པར་རྗེས་སུ་མ་མཐོང་ངོ་ཞེས་གསུངས་པས། དེ་དག་སྲིན་མོ་དེ་དག་གིས་བརྔོད་པ་ན་རྒྱ་མཚོ་ཆེན་པོ་ལས་རྒལ་ཏེ་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དག་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དག་ལ་བསྟེན་པའི་རྒྱུ་ལས་བུ་དང་བུ་མོ་དག་ཀྱང་བྱུང་ངོ ། །དེ་ནས་དེད་དཔོན་སིང་ག་ལ་འདི་སྙམ་དུ་སེམས་ཏེ། ཅིའི་ཕྱིར་བུད་མེད་འདི་དག་ལྷོ་ལམ་ཤིན་དུ་སྲུང་བར་སེམས། བདག་བུད་མེད་འདི་དང་ལྷན་ཅིག་ཉལ་ཞིང་དེ་གཉིད་ལོག་པ་དང་མལ་དུ་ཞུགས་པར་རིག་ནས་ཁད་ཀྱིས་དལ་བུ་དལ་བུས་མལ་ཆེན་པོ་ལས་བབས་ཏེ། རལ་གྲི་རྣོན་པོ་མཆན་དུ་བཅུག་ནས་ལྷོ་ལམ་དུ་འགྲོའོ་སྙམ་མོ། །དེ་ནས་དེད་དཔོན་སིང་ག་ལ་བུད་མེད་གང་དང་ལྷན་ཅིག་ཉལ་བ་དེ་གཉིད་ལོག་ཅིང་མལ་དུ་ཞུགས་པར་རིག་ནས། ཁད་ཀྱིས་དལ་བུ་དལ་བུས་མལ་ཆེན་པོ་ནས་བབས་ཏེ། རལ་གྲི་རྣོན་པོ་མཆན་དུ་བཅུག་ནས་ལྷོ་ལམ་དུ་སོང་བ་དང ། དེས་དེ་ན་སྐྱེ་བོ་ཕལ་པོ་ཆེ་སྨྲེ་སྔགས་འདོན་པའི་སྒྲ་ཀྱི་ཧུད་ཕ། ཀྱི་ཧུད་མ། ཀྱི་ཧུད་ཕུ་ནུ། ཀྱི་ཧུད་བུ་སྲིང ། ཀྱི་ཧུད་འཛམ་བུའི་གླིང་དགའ་བར་འགྱུར་བ་སྣ་ཚོགས། འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་ཟེར་བ་ཐོས་སོ། །ཐོས་ནས་ཀྱང་དེ་འཇིགས་པ་དང ། སྐྲག་པ་དང་སྔངས་པ་དང ། སྤུ་ཟིང་ཞེས་བྱེད་པར་གྱུར་ཏོ། །དེ་ནས་དེད་དཔོན་སིང་ག་ལ་ཡུད་ཙམ་ཞིག་ཅང་མི་སྨྲ་བར་འདུག་སྟེ། འཇིགས་པ་དང ། སྐྲག་པ་དང ། སྔངས་པ་དང ། སྤུ་ཟིང་ཞེས་བྱེད་པ་དེ་དག་བསལ་ནས་ལྷོ་ལམ་དེ་ཉིད་དུ་སོང་བ་དང ། ་དེས་དེ་ན་ལྕགས་ཀྱི་གྲོང་ཁྱེར་ཆེན་པོ་ཕང་མཐོ་བ། ཐག་གྲུ་ཆེ་བ་ཞིག་མཐོང་ནས་དེས་གྲོང་ཁྱེར་དེ་ལ་སྒེའུ་ཆུང་འགའ་ཞིག་ཡོད་དམ་སྙམ་ནས་ཁོ་ར་ཁོར་ཡུག་ཏུ་བྱུལ་ན། དེས་གྲོང་ཁྱེར་དེའི་ཁོ་ར་ཁོར་ཡུག་ཏུ་བྱུལ་བ་ན་གྲོང་ཁྱེར་དེ་ལ་ཐ་ན་བྱི་ལ་འཛུལ་བ་ཙམ་གྱི་སྒེའུ་ཆུང་ཡང་མ་རྙེད་དོ། །དེའི་བྱང་ཕྱོགས་ཀྱི་ངོས་ན་ཤིང་ལྗོན་པ་ཤི་རི་ཤ་ཆེན་པོ་ཕང་མཐོ
8.174a
བ། ཐག་གྲུ་ཆེ་བ་དག་ཡོད་ནས། ་དེ་ཤིང་ལྗོན་པ་ཤི་རྀ་ཤ་ཆེན་པོ་ཕང་མཐོ་བ། ཐག་གྲུ་ཆེ་བ་དེ་ལ་འཛེགས་ཏེ་སྐྱེ་བོ་ཕལ་པོ་ཆེའི་ཚོགས་དེ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅིའི་ཕྱིར་ཀྱི་ཧུད་ཕ། ཀྱི་ཧུད་མ། ཀྱི་ཧུད་ཕུ་ནུ། ཀྱི་ཧུད་བུ་སྲིང ། ་ཀྱི་ཧུད་འཛམ་བུའི་གླིང་དགའ་བར་འགྱུར་བ་སྣ་ཚོགས། འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་ཤིན་ཏུ་སྨྲེ་སྔགས་འདོན་པར་བྱེད། དེ་དག་གིས་སྨྲས་པ། བཟོད་ལྡན་ཁོ་བོ་ཅག་ནི་འཛམ་བུའི་གླིང་པའི་ཚོང་པ་ནོར་སྒྲུབ་པ་རྒྱ་མཚོའི་གྲུ་བསྒྲུབས་ཏེ་རྒྱ་མཚོ་ཆེན་པོར་འཇུག་འདོད་ནས་ཁོ་བོ་ཅག་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་འདི་ལྟ་སྟེ། ཕན་ཚུན་བདེ་བ་ཉིད་ཀྱིས་ངེས་པར་རྒལ་བར་ཤེས་པར་དཀས་བདག་ཅག་ནོར་སྒྲུབ་པ་དག་གིས་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་དག་ཐོགས་ཏེ་རྒྱ་མཚོ་ཆེན་པོར་འཇུག་པར་བྱས། བདག་ཅག་ལས་ཁ་ཅིག་གིས་ནི་ཤལ་མ་ལའི་སྤང་ལེབ་དག་བཀུར། ཁ་ཅིག་གིས་ནི་སྔས་ཤིང་བལ་ཅན་དག་བཀུར། ཁ་ཅིག་གིས་ནི་བསྐུ་བའི་གཟིངས་དག་བཀུར། ཁ་ཅིག་གིས་ནི་ར་རྐྱལ་དག་བཀུར་རོ་སྙམ་ནས། དེ་ནས་ནོར་སྒྲུབ་པ་བདག་ཅག་གིས་དེ་ལྟར་སོ་སོར་བརྟགས་ནས། སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁ་ཅིག་གིས་ཤལ་མ་ལའི་སྤང་ལེབ་དག་།ཁ་ཅིག་གིས་ནི་སྔས་ཤིང་བལ་ཅན་དག་།ཁ་ཅིག་གིས་ནི་བསྐུ་བའི་གཟིངས་དག་།ཁ་ཅིག་གིས་ནི་ར་རྐྱལ་དག་ཁྱེར་ནས་རྒྱ་མཚོ་ཆེན་པོར་ཞུགས་སོ། །བདག་ཅག་རྒྱ་མཚོ་ཆེན་པོའི་ནང་དུ་དོང་བ་ན་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་གོ། །བདག་ཅག་རྒྱ་མཚོའི་གྲུ་བཅག་པ་ན་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁྱེར་ཏེ་འོངས་པ་དག་ལ་ཞོན་ཏེ་འདི་ལྟ་སྟེ། ཁ་ཅིག་ནི་ཤལ་མ་ལའི་སྤང་ལེབ་དག་ལ་ཞོན། ཁ་ཅིག་ནི་སྔས་ཤིང་བལ་ཅན་དག་ལ་ཞོན། ཁ་ཅིག་ནི་བསྐུ་བའི་གཟིངས་དག་ལ་ཞོན། ཁ་ཅིག་ནི་ར་རྐྱལ་དག་ལ་ཞོན་ཏེ་ཆུའི་སྟེང་ན་འཕྱོའོ། །བདག་ཅག་གི་ལས་ཀྱི་རྣམ་པར་སྨིན་པས་བྱང་ཕྱོགས་ནས་རླུང་ལངས་ནས་དེས་བདག་ཅག་ལྷོ་ཕྱོགས་ཀྱི་འགྲམ་དུ་བདས་པ་དང ། ཟངས་གླིང་འདི་ན་སྲིན་མོ་ཁྲུང
8.174b
ཁྲུང་གཞོན་ནུ་མ་ཞེས་བྱ་བ་འཁོད་པ་དེ་དག་བདག་ཅག་ཚོང་པ་གྲུ་ཆག་པ་རྣམས་ལ་གཏམ་སྙན་པ་དང་དགའ་བའི་ཚུལ་གྱིས་སླུ་བར་བྱེད་དོ། །དེ་དག་ལ་རྒྱལ་མཚན་དགའ་བའི་གནས་དང་འཐུན་པ་དང ། ཕོངས་པའི་གནས་དང་འཐུན་པ་གཉིས་ཡོད་དེ། ཇི་ཙམ་ན་དགའ་བའི་གནས་དང་འཐུན་པའི་རྒྱལ་མཚན་གཡོ་བར་བརྩམས་པ་དང ། དེ་དག་གིས་སྨྲས་པ། ཕུ་ནུ་མོ་དག་དགའ་བའི་གནས་དང་འཐུན་པའི་རྒྱལ་མཚན་གཡོས་པས་འཛམ་བུའི་གླིང་པའི་ཚོང་པ་དག་གི་རྒྱ་མཚོའི་གྲུ་ཆུ་སྲིན་ཉའི་རིགས་ཀྱིས་བཅག་སྟེ་འོང་གོར་མ་ཆག་གིས་བཙལ་ལོ་ཞེས་དེ་དག་གིས་རྒྱ་མཚོའི་འགྲམ་དུ་བཙལ་བར་བརྩམས་པ་དང ། ཇི་ཙམ་ན་བདག་ཅག་ཚོང་པ་ཕལ་པོ་ཆེའི་ཚོགས་ཆུར་རྐྱལ་བ་སྣ་ཚོགས་དག་གིས་རྐྱལ་ཞིང་འོང་བ་མཐོང་ངོ ། །མཐོང་ནས་ཀྱང་བདག་ཉིད་གཟུགས་བཟང་མོར་མངོན་པར་སྤྲུལ་ནས། རྒྱན་སྣ་ཚོགས་ཀྱིས་བརྒྱན་ཏེ། ལྷའི་གོས་དང ། ཕྲེང་བ་རྒྱུས་ཀླུབས་ནས་རྒྱ་མཚོའི་འགྲམ་ནས་བོད་པར་བརྩམས་པ། ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག་།བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག་།གནས་མ་མཆིས་པ་རྣམས་ཀྱི་གནས་མཛོད་ཅིག་།གླིང་མ་མཆིས་པ་རྣམས་ཀྱི་གླིང་མཛོད་ཅིག་།སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག་།སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག་།དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག་།འདི་དག་ནི་ཁྱེད་ཀྱི་ཟས་ཀྱི་གནས་དག་དང ། སྐོམ་གྱི་གནས་དག་དང ། གོས་ཀྱི་གནས་དག་དང ། གནས་མལ་གྱི་གནས་དག་དང ། ཀུན་དགའ་ར་བ་དགའ་བར་འགྱུར་བ་དག་དང ། ནགས་ཚལ་དགའ་བར་འགྱུར་བ་དག་དང ། རྫིང་བུ་དགའ་བར་འགྱུར་བ་དག་དང ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ལགས་ཀྱིས་ཁྱེད་ཅག་ཚུར་སྤྱོན་བདག་ཅག་དང་ལྷན་ཅིག་རྩེ་བ་དང ། དགའ་བ་དང ། དགའ་མགུར་སྤྱོད་པ་མཛོད་ཅིག་།ཁྱེད་ཅག་ལས་འགའ་ཡང་ཤིན་དུ་མྱོས་པར
8.175a
གྱུར་ཀྱང་ལྷོ་ལམ་དུ་འགྲོ་བར་མི་བྱའོ་ཞེས་ཟེར་རོ། །བདག་ཅག་སྲིན་མོ་དེ་དག་གིས་བརྔོད་པ་ན་རྒྱ་མཚོ་ཆན་པོ་ལས་རྒལ་ཏེ། དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །བདག་ཅག་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དག་ལ་བསྟེན་པའི་རྒྱུ་ལས་བུ་དང་བུ་མོ་དག་ཀྱང་བྱུང་ངོ ། །བུད་མེད་དེ་དག་བདག་ཅག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཇི་སྲིད་དུ་འཛམ་བུའི་གླིང་པའི་ཚོང་པ་མང་པོ་གཞན་དག་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་སྟེ་འོང་བར་མ་ཐོས་ཀྱི་བར་དུ་དེ་དག་བདག་ཅག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །གང་གི་ཚེ་དེ་དག་གིས་འཛམ་བུའི་གླིང་པའི་ཚོང་པ་རབ་ཏུ་མང་པོ་གཞན་དག་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་སྟེ་འོང་བར་ཐོས་པ་དེའི་ཚེ་ན་དེ་དག་བདག་ཅག་གི་གན་དུ་འོངས་ཤིང་བདག་ཅག་ལས་གཞན་དག་ཟོས་ནས། འདི་ལྟར་སྐྱེས་བུ་ཟ་བ་ན་སྐྲ་དང ། སྤུ་དང ། སེན་མོ་དང ། སོའི་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་ཟ་བར་བྱེད་ཅིང ། ་དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་བཞིན་དུ་ཁར་འཇུག་པར་བྱེད་དོ། །མ་ཟོས་པ་དེ་དག་གི་ལྷག་མ་ནི་ཁོ་བོ་ཅག་ཡིན་ཏེ། ལྕགས་ཀྱི་མཁར་ཆེན་པོ་འདིར་བཅུག་སྟེ། བཟོད་ལྡན་བུད་མེད་དེ་དག་ནི་སྲིན་མོ་ཡིན་གྱིས་བཟོད་ལྡན་ཁྱོད་ཀྱང་བདག་ཉིད་སྲུངས་ཤིག་།སིང་ག་ལས་སྨྲས་པ། ཤེས་ལྡན་དག་གང་གིས་ཁྱེད་ཅག་དང་ཁོ་བོ་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡོད་དམ། དེ་དག་གིས་སྨྲས་པ། བཟོད་ལྡན་ཁོ་བོ་ཅག་ལ་ནི་གང་གིས་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡང་མེད་དོ། །དེ་ཅིའི་ཕྱིར་ཞེ་ན། བདག་ཅག་གིས་གལ་ཏེ་འདི་སྙམ་དུ་ཀྱེ་མ་བདག་ཅག་ལྕགས་ཀྱི་གྲོང་ཁྱེར་འདིའི་འོག་བརྟོལ་ཏེ་འབྲོས་སོ་སྙམ་ན། དེ་འོག་ཉིས་འགྱུར་སུམ་འགྱུར་དུ་སྐྱེལ། གལ་ཏེ་འདི་སྙམ་དུ་ཀྱེ་མ་བདག་ཅག་ལྕགས
8.175b
ཀྱི་གྲོང་ཁྱེར་འདིའི་སྟེང་ནས་རྒལ་ཏེ་འབྲོས་སོ་སྙམ་ན། དེའི་སྟེང་ཉིས་འགྱུར་སུམ་འགྱུར་དུ་སྐྱེ་བའི་ཕྱིར་ཏེ། བཟོད་ལྡན་དེའི་ཕྱིར་ཁོ་བོ་ཅག་ལ་ནི་གང་གིས་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡང་མེད་དོ། །ཁྱེད་ཅག་ལ་ནི་གང་གིས་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་ཡོད་དོ། །ཤེས་ལྡན་དག་གང་གིས་ཁོ་བོ་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་དེ་གང་ཡིན། བཟོད་ལྡན་འདི་ན་བདག་ཅག་གིས་སྟེང་ན་ལྷ་དག་རྣམ་པར་རྒྱུ་བའི་སྒྲ་ཐོས་པ། ཀྱེ་འཛམ་བུའི་གླིང་པའི་ཚོང་པ་བྱིས་པ་དག་འདི་ཉིད་ཀྱི་གསོ་སྦྱོང་བཅཝ་ལྔ་པ་ལ་བྱང་ལམ་དུ་དེང་ཤིག་དང ། དེ་ན་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བ་མ་རྨོས་མ་བཏབ་པའི་འབྲས་ས་ལུའི་འབྲུ་ཟོས་ནས་བདེ་བ་དང ། ནད་མེད་པ་དང ། སྟོབས་དང་ལྡན་པ་དང ། དབང་པོ་ཚིམ་པས་རོ་སྟོད་བསྲང་སྟེ་ཕ་རོལ་དུ་སུ་འགྲོ། ཕ་རོལ་དུ་སུ་འགྲོ། སུ་ཞིག་ཕ་རོལ་དུ་བཀུར་བར་བྱ། སུ་ཞིག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་བྱ་ཞེས་ལན་གསུམ་ཆེད་དུ་བརྗོད་པ་ཆེད་དུ་རྗོད་པར་བྱེད་ཀྱིས། ཁྱེད་ཅག་དེའི་གན་དུ་སོང་ལ་འདི་སྐད་ཅེས་བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག་།བདག་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་ཅེས་བརྗོད་པར་བྱའོ་ཞེས་ཟེར་བ་ཐོས་ཀྱིས། བཟོད་ལྡན་གང་གིས་ཁྱེད་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་ནི་དེ་ཡིན་ནོ། །དེ་ནས་དེད་དཔོན་སིང་ག་ལ་སྐྱེ་བོ་ཕལ་པོ་ཆེའི་ཚོགས་ཀྱིས་སྨྲས་པའི་ཚིག་དེ་ལེགས་པར་ཤིན་དུ་བཟུང་སྟེ། ཀུན་ཆུབ་པར་བྱས་ནས་ཁད་ཀྱིས་དལ་བུ་དལ་བུས་ཤིང་ལྗོན་པ་ཤི་རི་ཤ་ཆེན་པོ་དེ་ལས་བབས་ནས་ཡང་མལ་དེ་ཉིད་དུ་སོང་ངོ ། །དེ་ནས་དེད་དཔོན་སིང་ག་ལས་བུད་མེད་གང་དང་ལྷན་ཅིག་ཉལ་བ་དེ་གཉིད་ལོག་ཅིང་མལ་དུ་ཞུགས་པར་རིག་ནས་ཁད་ཀྱིས་དལ་བུ་དལ་བུས་ཉལ་ལོ། །དེ་ནས་དེད་དཔོན་སིང་ག་ལ་ནང་པར་སྔར་ལངས་ཏེ་འཛམ
8.176a
བུའི་གླིང་པའི་ཚོང་པ་རབ་ཏུ་མང་པོ་ག་ལ་བ་དེར་སོང་སྟེ་ཕྱིན་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཚུར་ཤེག་།སྐྱེད་མོས་ཚལ་དབེན་པ་ཞིག་ཡོད་པ་དེར་ཁོ་བོ་ཁྱེད་ཅག་དང་ཕག་ཏུ་གསང་སྟེ་སྨྲ་བ་ཅུང་ཞིག་ཡོད་ཀྱིས་ཁྱེད་ཅག་ལས་གང་གིས་ཀྱང་ཤིན་ཏུ་མྱོས་པར་གྱུར་ན་ཡང་ཁྱེའུ་དང་བུ་མོ་དག་ཁྲིད་དེ་མ་འོང་ཤིག་།དེ་ནས་འཛམ་བུའི་གླིང་པའི་ཚོག་པ་རབ་ཏུ་མང་པོ་ནང་པར་སྔར་ལངས་ནས་སྐྱེད་མོས་ཚལ་དབེན་པ་ག་ལ་བ་དེར་སོང་ངོ ། །དེ་ནས་དེད་དཔོན་སིང་ག་ལས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་སྐྱེ་བོ་ཕལ་པོ་ཆེའི་ཚོགས་དེ་དང་བར་སྐབས་སུ་གཏམ་ཅི་བྱས་པ་དེ་དག་ཐམས་ཅད་རྒྱས་པར་བརྗོད་ནས་སྨྲས་པ། ཤེས་ལྡན་དག་འདི་དག་གི་ནི་བུད་མེད་མ་ཡིན་གྱི། འདི་དག་ནི་སྲིན་མོ་ཡིན་གྱིས་བདག་ཉིད་སྲུངས་ཤིག་།དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་དག་དེ་ཉིད་ཀྱི་གསོ་སྦྱོང་བཅཝ་ལྔ་པ་ལ་བྱང་ལམ་དུ་དོང་ངོ ། །དེའི་ཚེ་ན་རྟའི་རྒྱལ་པོ་སྤྲིན་གྱི་ཤུགས་ཅན་མ་རྨོས་མ་བཏབ་པའི་འབྲས་ས་ལུའི་འབྲུ་ཟ་ཞིང་འདུག་གོ། །ཚོང་པ་རྟག་པའི་རང་བཞིན་ཅན་ཞིག་གིས་རྟའི་རྒྱལ་པོ་སྤྲིན་གྱི་ཤུགས་ཅན་མ་རྨོས་མ་བཏབ་པའི་འབྲས་ས་ལུའི་འབྲུ་ཟ་ཞིང་འདུག་པ་མཐོང་ངོ ། །མཐོང་ནས་ཀྱང་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་འདི་སྐད་ཅེས་སྨྲས་སོ། །ཤེས་ལྡན་དག་རྟའི་རྒྱལ་པོ་སྤྲིན་གྱི་ཤུགས་ཅན་འདི་མ་རྨོས་མ་བཏབ་པའི་འབྲས་ས་ལུའི་འབྲུ་ཟ་ཞིང་འདུག་གིས་འདིའི་གན་དུ་སོང་ལ་འདི་སྐད་ཅེས་བདག་ཅག་ཕ་རོལ་ཏུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཤིག་།བདག་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་།ཅེས་བརྗོད་པར་བྱའོ། །དེ་ནས་དེད་དཔོན་སིང་ག་ལས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁོ་བོས་སྐྱེ་བོ་ཕལ་པོ་ཆེའི་ཚོགས་དེའི་སྨྲས་པའི་དོན་ཤེས་པས་ད་དུང་བདག་ཅག་རྟའི་རྒྱལ་པོ་སྤྲིན་གྱི་ཤུགས་ཅན་གྱི་གན་དུ་སོང་སྟེ། འདི་སྐད་ཅེས་བདག་ཅག་ཕ་རོལ་དུ་འགྲོའོ། །བདག་ཅག
8.176b
ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག་།བདག་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་ཅེས་བརྗོད་པར་བྱ་བའི་དུས་ལ་མ་བབ་བོ། །འདི་ལྟར་ཁོ་བོས་སྐྱེ་བོ་ཕལ་པོ་ཆེའི་ཚོགས་དེའི་སྨྲས་པའི་དོན་ཤེས་ཏེ། གང་གི་ཚེ་རྟའི་རྒྱལ་པོ་སྤྲིན་གྱི་ཤུགས་ཅན་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟོས་ནས་བདེ་བ་དང ། ནད་མེད་པ་དང ། སྟོབས་དང་ལྡན་པ་དང ། དབང་པོ་ཚིམ་པས་རོ་སྟོད་བསྲང་སྟེ། ཕ་རོལ་དུ་སུ་འགྲོ། ཕ་རོལ་དུ་སུ་འགྲོ། སུ་ཞིག་ཕ་རོལ་དུ་བཀུར་བར་བྱ། སུ་ཞིག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་བྱ་ཞེས་ལན་གསུམ་ཆེད་དུ་བརྗོད་པ་ཆེད་དུ་རྗོད་པར་བྱེད་པ་དེའི་ཚེ་ན་བདག་ཅག་རྟའི་རྒྱལ་པོ་སྤྲིན་གྱི་ཤུགས་ཅན་གྱི་གན་དུ་སོང་སྟེ། འདི་སྐད་ཅེས་བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཤིག་།བདག་ཅག་བདེ་ལེགས་དང ། བདེ་བ་དག་དུ་འཛམ་བུའི་གླིང་དུ་ཕྱིན་པར་གྱིས་ཤིག་ཅེས་བརྗོད་པར་བྱའོ། །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱི་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟོས་ནས་བདེ་བ་དང ། ནད་མེད་པ་དང ། སྟོབས་དང་ལྡན་པ་དང ། དབང་པོ་ཚིམ་པས་རོ་སྟོད་བསྲང་སྟེ། ཕ་རོལ་དུ་སུ་འགྲོ། ཕ་རོལ་དུ་སུ་འགྲོ། སུ་ཞིག་ཕ་རོལ་དུ་བཀུར་བར་བྱ། སུ་ཞིག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་བྱའོ། །ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་རྟའི་རྒྱལ་པོ་སྤྲིན་གྱི་ཤུགས་ཅན་ག་ལ་བ་དེར་དོང་སྟེ་ཕྱིན་ནས། བླ་གོས་ཕྲག་པ་གཅིག་ཏུ་བྱས་ཏེ་པུས་མོ་གཡས་པའི་ལྷ་ང་ས་ལ་བཙུགས་ཏེ་རྟའི་རྒྱལ་པོ་སྤྲིན་གྱི་ཤུགས་ཅན་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྟའི་རྒྱལ་པོ་སྤྲིན་གྱི་ཤུགས་ཅན་ལ་འདི་སྐད་ཅེས་སྨྲས་སོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག་།བདག་ཅག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་།དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་ཤེས་ལྡན་དག་བུད་མེད་དེ་དག་ཆེས་གཟུགས་བཟང་བ་དང །
8.177a
ཆེས་བལྟ་ན་སྡུག་པ་དང ། ཆེས་མཛེས་པར་བསྒྱུར་ནས་ཁྱེའུ་དང་བུ་མོ་དག་ཐོགས་ཏེ་འདི་སྐད་ཅེས་ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག་།བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག་།གནས་མ་མཆིས་པ་རྣམས་ཀྱི་གནས་མཛོད་ཅིག་།གླིང་མ་མཆིས་པ་རྣམས་ཀྱི་གླིང་མཛོད་ཅིག་།སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག་།སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག་།དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག་།འདི་དག་ནི་ཁྱེད་ཀྱི་ཟས་ཀྱི་གནས་དག་དང ། སྐོམ་གྱི་གནས་དག་དང ། གོས་ཀྱི་གནས་དག་དང ། གནས་མལ་གྱི་གནས་དག་དང ། ཀུན་དགའ་ར་བ་དགའ་བར་འགྱུར་བ་དག་དང ། ནགས་ཚལ་དགའ་བར་འགྱུར་བ་དག་དང ། རྫིང་བུ་དགའ་བར་འགྱུར་བ་དག་དང ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ལགས་ཀྱིས་ཚུར་སྤྱོན། ཁྱེད་ཅག་བདག་ཅག་དང་ལྷན་ཅིག་རྩེ་བ་དང ། དགའ་བ་དང ། དགའ་མགུར་སྤྱད་པ་མཛོད་ཅིག་།གལ་ཏེ་ཁྱེད་ཅག་ལས་སུ་ཡང་བདག་ཅག་དོན་དུ་མི་གཉེར་ན་རེ་ཤིག་རང་རང་གི་ཁྱེའུ་དང་བུ་མོ་འདི་དག་སྣོམས་ཏེ་བཞུད་ཅིག་ཅེས་ཟེར་བར་འགྱུར་གྱིས། དེ་ལ་ཁྱེད་ཅག་ལས་གང་དག་འདི་སྙམ་དུ་བདག་གི་ཆུང་མ་འམ། བུ་འམ་བུ་མོ་འམ། ཟས་ཀྱི་གནས་དག་འམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ་ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ་ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ཡིན་ནོ་སྙམ་དུ་སེམས་པ་དེ་དག་ནི་ངའི་གཤུལ
8.177b
ལམ་རྒྱབ་ཏུ་ཞོན་པར་གྱུར་ཏུ་ཟིན་ཀྱང་དེ་དག་ཤིང་ཏོག་སྨིན་པ་རྩེ་དག་ལས་འབྲུལ་བ་བཞིན་དུ་ལྟུང་བར་འགྱུར་ཞིང་བུད་མེད་དེ་དག་འོངས་ཤིང་འོངས་ཤིང་ཟ་བར་འགྱུར་ཏེ། འདི་ལྟར་སྐྱེས་བུ་ཟ་བ་ན་སྐྲ་དང ། སྤུ་དང་སེན་མོ་དང ། སོའི་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་ཟ་བར་འགྱུར་ལ། དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་པར་ཁར་འཇུག་པར་འགྱུར་རོ། །དེ་ལ་ཁྱེད་ཅག་ལས་གང་དག་འདི་སྙམ་དུ་བདག་གི་ཆུང་མ་འམ། བུ་འམ་བུ་མོ་འམ། ཟས་ཀྱི་གནས་དག་གམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ། མང་པོ་འདི་ལྟ་སྟེ། ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ཡིན་ནོ་སྙམ་དུ་མི་སེམས་པ་དེ་དག་ནི་ངའི་སྤུ་དག་ལ་འཇུས་པར་གྱུར་དུ་ཟིན་ཀྱང་དེ་དག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་རོ་ཞེས་ལེགས་པར་ཤིན་ཏུ་ཡང་དག་པར་བསྒོ། ཡང་དག་པར་བསྟན་ཏོ། །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་ལེགས་པར་ཤིན་ཏུ་ཡང་དག་པར་བསྒོ། ཡང་དག་པར་བསྟན་ནས་རྒྱབ་བཟེད་པ་དང ། དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་དེ་དག་ལས་ཁ་ཅིག་ནི་རྟའི་རྒྱལ་པོ་སྤྲིན་གྱི་ཤུགས་ཅན་གྱི་རྒྱབ་དུ་ཞོན། ཁ་ཅིག་ནི་གཤུལ་དུ་ཞོན། ཁ་ཅིག་ནི་སྤུ་དག་ལ་འཇུས་སོ། །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་མཐར་གྱིས་ལུས་ཀྱི་མཐུ་དང་སྟོབས་བསྐྱེད་ནས། དེའི་འོག་ཏུ་སྟེང་གི་ནམ་མཁའ་ལ་སོང་ངོ ། །སྲིན་མོ་དེ་དག་གི་ཕོངས་པའི་གནས་དང་འཐུན་པའི་རྒྱལ་མཚན་གཡོ་བར་བརྩམས་པ་དང ། དེ་དག་གིས་བསམས་པ། འདི་ལྟར་བདག་ཅག་གི་ཕོངས་པའི་གནས་དང་འཐུན་པའི
8.178a
རྒྱལ་མཚན་གཡོས་པ་ལས་ན་འཛམ་བུའི་གླིང་པའི་ཚོང་པ་རབ་ཏུ་མང་པོ་དག་བྱེར་བར་གྱུར་གོར་མ་ཆག་སྙམ་ནས། དེ་དག་དེ་ནས་ཆེས་གཟུགས་བཟང་བ་དང ། ཆེས་བལྟ་ན་སྡུག་པ་དང ། ཆེས་མཛེས་པར་བསྒྱུར་ནས། ཁྱེའུ་དང་བུ་མོ་དག་ཐོགས་ཏེ་འདི་སྐད་ཅེས་ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག་།བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག་།གནས་མ་མཆིས་པ་རྣམས་ཀྱི་གནས་མཛོད་ཅིག་།གླིང་མ་མཆིས་པ་རྣམས་ཀྱི་གླིང་མཛོད་ཅིག་།སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག་།སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག་།དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག་།འདི་དག་ནི་ཁྱོད་ཀྱི་ཟས་ཀྱི་གནས་དག་དང ། སྐོམ་གྱི་གནས་དག་དང ། གོས་ཀྱི་གནས་དག་དང ། གནས་མལ་གྱི་གནས་དག་དང ། ཀུན་དགའི་ར་བ་དགའ་བར་འགྱུར་བ་དག་དང ། ནགས་ཚལ་དགའ་བར་འགྱུར་བ་དག་དང ། ་རྫིང་བུ་དགའ་བར་འགྱུར་བ་དག་དང ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ་ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ལགས་ཀྱིས་ཚུར་སྤྱོན། ཁྱེད་ཅག་བདག་ཅག་དང་ལྷན་ཅིག་རྩེ་བ་དང ། དགའ་བ་དང ། དགའ་མགུར་སྤྱད་པ་མཛོད་ཅིག་།གལ་ཏེ་ཁྱེད་ཅག་ལས་སུ་ཡང་བདག་ཅག་དོན་དུ་མི་གཉེར་ན་རེ་ཤིག་རང་རང་གི་ཁྱེའུ་དང་བུ་མོ་འདི་དག་སྣོམས་ཏེ་བཞུད་ཅིག་ཅེས་ཟེར་རོ། །དེ་ལ་དེ་དག་ལས་གང་དག་འདི་སྙམ་དུ་བདག་གི་ཆུང་མ་འམ། བུ་འམ་བུ་མོ་འམ། ཟས་ཀྱི་གནས་དག་གམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། །ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང །
8.178b
བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ཡིན་ནོ་སྙམ་དུ་སེམས་པ་དེ་དག་ནི་དེའི་གཤུལ་ལམ་རྒྱབ་ཏུ་ཞོན་པར་གྱུར་དུ་ཟིན་ཀྱང་དེ་དག་ཤིང་ཏོག་སྨིན་པ་རྩེ་དག་ལས་འབྲུལ་བ་བཞིན་དུ་ལྷུང་བར་གྱུར་ཅིང་བུད་མེད་དེ་དག་འོངས་ཤིང་འོངས་ཤིང་ཟོས་པར་གྱུར་ཏེ། འདི་ལྟར་སྐྱེས་བུ་ཟ་བ་ན་སྐྲ་དང ། སྤུ་དང ། སེན་མོ་དང ། སོའི་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་ཟོས་པར་གྱུར་ལ། དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་པར་ཁར་བཅུག་པར་གྱུར་ཏོ། །དེ་ལ་དེ་དག་ལས་གང་དག་འདི་སྙམ་དུ་བདག་གི་ཆུང་མ་འམ། བུ་འམ་བུ་མོ་འམ། ཟས་ཀྱི་གནས་དག་འམ། སྐོམ་གྱི་གནས་དག་འམ། གོས་ཀྱི་གནས་དག་འམ། གནས་མལ་གྱི་གནས་དག་འམ། ཀུན་དགའི་ར་བ་དགའ་བར་འགྱུར་བ་དག་འམ། ་ནགས་ཚལ་དགའ་བར་འགྱུར་བ་དག་འམ། རྫིང་བུ་དགའ་བར་འགྱུར་བ་དག་འམ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། དངུལ་དག་དང ། གསེར་དག་དང ། རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་པ་དག་ཡིན་ནོ་སྙམ་དུ་མི་སེམས་པ་དེ་དག་ནི་དེའི་སྤུ་དག་ལ་འཇུས་པར་གྱུར་དུ་ཟིན་ཀྱང་དེ་དག་བདེ་ལེགས་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱུར་ཏོ། །དགེ་སློང་དག་དེ་བཞིན་དུ་ཁྱེད་ཅག་ལས་གང་དག་བདག་མིག་གོ། །བདག་གི་མིག་གོ། །བདག་རྣ་བའོ། །སྣའོ། །ལྕེའོ། །ལུས་སོ། །ཡིད་དོ། །བདག་གི་ཡིད་དོ། །བདག་གཟུགས་སོ། །བདག་གི་གཟུགས་སོ། །བདག་སྒྲའོ། །དྲིའོ། །རོའོ། །རེག་བྱའོ། །ཆོས་སོ། །བདག་གི་ཆོས་སོ། །བདག་སའི་ཁམས་སོ། །བདག་གི་སའི་ཁམས་སོ། །བདག་ཆུའི་ཁམས་སོ། །མེའི་ཁམས་སོ། །རླུང་གི་ཁམས་སོ། །ནམ་མཁའི་ཁམས་སོ། །རྣམ་པར་ཤེས་པའི་ཁམས་སོ། །བདག་གི་རྣམ་པར་ཤེས་པའི་ཁམས་སོ། །བདག་གཟུགས་ཀྱི་ཕུང་པོའོ། །བདག་གི་གཟུགས་ཀྱི་ཕུང་པོའོ། །བདག་ཚོར་བའི་ཕུང་པོའོ། །
8.179a
འདུ་ཤེས་ཀྱི་ཕུང་པོའོ། །འདུ་བྱེད་ཀྱི་ཕུང་པོའོ། །རྣམ་པར་ཤེས་པའི་ཕུང་པོའོ། །བདག་གི་རྣམ་པར་ཤེས་པའི་ཕུང་པོའོ་སྙམ་དུ་སེམས་པ་དེ་དག་ནི་སྲིན་མོ་རྣམས་ཀྱིས་ཚོང་པ་དག་སྡུག་བསྔལ་བར་འགྱུར་བ་ཇི་བཞིན་ནོ། །དགེ་སློང་དག་ཁྱེད་ཅག་ལས་གང་དག་བདག་མིག་གོ། །བདག་གི་མིག་གོ། །བདག་རྣ་བའོ། །སྣའོ། །ལྕེའོ། །ལུས་སོ། །ཡིད་དོ། །བདག་གི་ཡིད་དོ། །བདག་གཟུགས་སོ། །བདག་གི་གཟུགས་སོ། །བདག་སྒྲའོ། །དྲིའོ། །རོའོ། །རེག་བྱའོ། །ཆོས་སོ། །བདག་གི་ཆོས་སོ། །བདག་སའི་ཁམས་སོ། །བདག་གི་སའི་ཁམས་སོ། །བདག་ཆུའི་ཁམས་སོ། །མེའི་ཁམས་སོ། །རླུང་གི་ཁམས་སོ། །ནམ་མཁའི་ཁམས་སོ། །རྣམ་པར་ཤེས་པའི་ཁམས་སོ། །བདག་གི་རྣམ་པར་ཤེས་པའི་ཁམས་སོ། །བདག་གཟུགས་ཀྱི་ཕུང་པོའོ། །བདག་གི་གཟུགས་ཀྱི་ཕུང་པོའོ། །བདག་ཚོར་བའི་ཕུང་པོའོ། །འདུ་ཤེས་ཀྱི་ཕུང་པོའོ། །འདུ་བྱེད་ཀྱི་ཕུང་པོའོ། །རྣམ་པར་ཤེས་པའི་ཕུང་པོའོ། །བདག་གི་རྣམ་པར་ཤེས་པའི་ཕུང་པོའོ་སྙམ་དུ་མི་སེམས་པ་དེ་དག་ནི། སྤྲིན་ཤུགས་ཅན་གྱི་ཚོང་པ་དག་།བདེ་ལེགས་ཕ་རོལ་འགྲོ་བ་བཞིན། །མི་གང་བྱིས་པ་འདྲ་བ་དག་།སངས་རྒྱས་བསྟན་ལ་མ་དད་པ། །སྲིན་མོ་རྣམས་ཀྱིས་ཚོང་པ་དག་།སྡུག་བསྔལ་འགྱུར་བ་ཇི་བཞིན་ནོ། །མི་གང་ཤེས་རབ་ལྡན་པ་དག་།སངས་རྒྱས་བསྟན་ལ་དད་བྱེད་པ། །སྤྲིན་ཤུགས་ཅན་གྱི་ཚོང་པ་དག་།བདེ་ལེགས་ཕ་རོལ་འགྲོ་བ་བཞིན། །ཚོང་པ་དེ་དག་ཐམས་ཅད་རྟའི་རྒྱལ་པོ་སྤྲིན་གྱི་ཤུགས་ཅན་ལས་ལྷུང་ནས་སྲིན་མོ་དེ་དག་གིས་ཟོས་སོ། །དེད་དཔོན་སིང་ག་ལ་འབའ་ཤིག་བདེ་ལེགས་པ་དང ། བདེ་བ་དག་ཏུ་འཛམ་བུའི་གླིང་དུ་ཕྱིན་ཏོ།། ་་་་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་བདུན་པ། དེད་དཔོན་སིང་ག་ལའི་ཆུང་མ་སྲིན་མོ་དེ་ལ་སྲིན་མོ་གཞན་དག་གིས་སྨྲས་པ། ཁོ་མོ་ཅག་གིས་ནི་རང་རང་གི་ཁྱིམ་ཐབ་དག་ཟོས་ན་ཁྱོད་ཀྱིས་རང་གི་ཁྱིམ་ཐབ་བཏང་གིས་གལ་ཏེ་ཇེ་ཁྲིད་དེ་འོངས་ན་དེ་ལྟ་ན་ལེགས། གལ་ཏེ་མི་འོང་ན་ཁྱོད་ཉིད་བཟའ་བར་བྱའོ། །དེ་སྐྲག་ནས་སྨྲས་པ། གལ་ཏེ་ཁྱོད་ཅག་དེ་ལྟར
8.179b
དངན་དུས་བྱེད་ན་མི་རིངས་པར་སྡོད་ཅིག་དང་ཁྲིད་དེ་འོང་ངོ ། །དེ་དག་གིས་སྨྲས་པ། མ་ཉེས་ཀྱིས་དེ་བཞིན་གྱིས་ཤིག་།དེ་མཆོག་ཏུ་འཇིགས་སུ་རུང་བའི་གཟུགས་སུ་སྤྲུལ་ནས་མྱུར་བ་མྱུར་བ་ཁོ་ནར་སོང་སྟེ་དེད་དཔོན་སིང་ག་ལའི་མདུན་དུ་འདུག་པ་དང ། དེད་དཔོན་སིང་ག་ལས་རལ་གྲི་ཤུབས་ནས་ཕྱུང་སྟེ་བསྡིགས་པ་དང་དེ་སྐྲག་སྟེ་བྲོས་སོ། །ཇི་ཙམ་ན་ཡུལ་དབུས་ནས་དོན་འཐུན་འོངས་པ་དང ། སྲིན་མོ་དེས་དེད་དཔོན་གྱི་རྐང་པ་གཉིས་ལ་གཏུགས་ཏེ་སྨྲས་པ། དེད་དཔོན་བདག་ནི་ཟངས་གླིང་གི་རྒྱལ་པོའི་བུ་མོ་དེད་དཔོན་སིང་ག་ལའི་མཆིས་འབྲང་དུ་སྩལ་བ་ལགས་ན་རྒྱ་མཚོ་ཆན་པོའི་ནང་དུ་མཆིས་པའི་གྲུ་ཆུ་སྲིན་ཉའི་རིགས་ཀྱིས་བཅག་ནས་དེས་བདག་བཀྲ་མི་ཤིས་སོ་ཞེས་བོར་ན། དེའི་སླད་དུ་བདག་ལ་ཐུགས་བརྩེ་བས་བཟོད་པ་བགྱིད་དུ་སྩལ་བར་ཅི་གནང ། དེས་བཟོད་པ་བྱེད་དུ་གཞུག་གོ་ཞེས་དང་དུ་བླངས་སོ། །དེ་དེའི་གན་དུ་སོང་ནས་བག་དབབ་པའི་གཏམ་བརྗོད་པས་ཡུད་ཙམ་ཞིག་བསྡད་དེ་སྨྲས་པ། ཤེད་འཐུན་ཁྱོད་ཀྱིས་ཟངས་གླིང་གི་རྒྱལ་པོའི་བུ་མོ་བླངས་པ་དེ་གནས་མ་ཡིན་པར་ཡོངས་སུ་མ་དོར་བར་བཟོད་པ་གྱིས་ཤིག་།དེས་སྨྲས་པ། ཤེད་འཐུན་དེ་ནི་དེའི་རྒྱལ་པོའི་བུ་མོ་མ་ཡིན་ཏེ། ཟངས་གླིང་ནས་འོངས་པའི་སྲིན་མོ་ཡིན་ནོ། །འོ་ན་འདིར་ཇི་ལྟར་འོངས། དེས་ཇི་ལྟར་གྱུར་པ་བརྗོད་པ་དང་དེ་ཅང་མི་སྨྲ་བར་འདུག་གོ། །དེད་དཔོན་སིང་ག་ལ་མཐར་གྱིས་རང་གི་ཁྱིམ་དུ་ཕྱིན་པ་དང ། སྲིན་མོ་དེ་ཡང་བུ་ཐོགས་ཏེ་རྒྱལ་པོའི་ཕོ་བྲང་སེང་གེ་ལྟ་བུར་ཕྱིན་ནས་དེད་དཔོན་སིང་ག་ལའི་ཁྱིམ་གྱི་སྒོ་དྲུང་ན་སྡོད་དོ། །སྐྱེ་བོའི་ཚོགས་ཀྱིས་ཁྱེའུ་དེ་མཐོང་ནས་བཞིན་གཟུགས་ལས་ངོ་ཤེས་ནས་དེ་དག་གིས་སྨྲས་པ། ཤེས་ལྡན་དག་ཁྱེའུ་འདི་ནི་དེད་དཔོན་སིང་ག་ལའི་བུ་ཡིན་པར་ཤེས་སོ། །སྲིན་མོས་སྨྲས་པ། ཤེས་ལྡན་དག་ཁྱེད་ཀྱིས་ཤེས་ཏེ་འདི་ནི་དེའི་བུ་ཡིན་ནོ། །དེ་དག་གིས་སྨྲས་པ། སྲིང་མོ་ཁྱོད་ག་ལས་འོངས། ཁྱོད་སུའི་ཡིན། དེས་སྨྲས་པ། ཤེས་ལྡན་དག་བདག་ནི་ཟངས་གླིང་གི་རྒྱལ་པོའི་བུ་མོ་དེད་དཔོན་སིང་ག་ལའི་ཆུང་མར་བྱིན་པ་ཡིན་ན། དེ་རྒྱ་མཚོ་ཆེན་པོར་སོང་བའི་གྲུ་ཆུ
8.180a
སྲིན་ཉའི་རིགས་ཀྱིས་བཅག་ནས་དེས་བདག་བཀྲ་མི་ཤིས་སོ་ཞེས་གནས་མ་ཡིན་པར་བོར་ནས་འདིར་ཇི་ལྟ་ཞིག་ཏུ་ཕྱིན་ཏེ། བུ་ཆུང་ངུ་དང་བདག་ལ་དེད་དཔོན་སིང་ག་ལ་བཟོད་པ་བགྱིད་དུ་སྩལ་བའི་རིགས་སོ། །དེ་དག་གིས་དེའི་ཕ་མ་གཉིས་ལ་སྦྲན་པ་དང ། དེ་གཉིས་ཀྱིས་དེ་ལ་སྨྲས་པ། བུ་རྒྱལ་པོའི་བུ་མོ་དེ་མ་དོར་བར་བུ་ཆུང་ངུ་དང་ཉོན་མོངས་མ་འདི་ལ་བཟོད་པ་གྱིས་ཤིག་།ཡབ་ཡུམ་གཉིས་འདི་ནི་རྒྱལ་པོའི་བུ་མོ་མ་ལགས་ཏེ། འདི་ནི་ཟངས་གླིང་ནས་མཆིས་པའི་སྲིན་མོ་ལགས་སོ། །དེ་གཉིས་ཀྱིས་སྨྲས་པ། བུ་བུད་མེད་ལྟ་ཞིག་ཐམས་ཅད་ཀྱང་སྲིན་མོ་ཡིན་གྱིས་བཟོད་པ་གྱིས་ཤིག་།དེས་སྨྲས་པ། ཡབ་ཡུམ་གཉིས་གལ་ཏེ་ཁྱེད་ཅག་འདི་ལ་དགྱེས་ན་འདི་ཁྱིམ་དུ་སྲེལ་ཅིག་།བདག་ནི་གཞན་དུ་མཆིའོ། །དེ་གཉིས་ཀྱིས་སྨྲས་པ། བུ་ངེད་ཀྱིས་ཁྱེད་ཀྱི་དོན་དུ་འདི་ཤིན་དུ་སྲེལ་བ་ཡིན་ན། གལ་ཏེ་ཁྱོད་འདི་མི་འདོད་ན་ངེད་ཀྱིས་འདི་ཅིའི་ཕྱིར་མི་བསྐྲད་ཅེས་དེ་གཉིས་ཀྱིས་དེ་བསྐྲད་དོ། །དེ་ནས་སྲིན་མོ་དེ་རྒྱལ་པོ་སེང་གེ་རལ་པ་ཅན་གྱི་གན་དུ་སོང་བ་དང ། བློན་པོ་རྣམས་ཀྱིས་རྒྱལ་པོ་ལ་སྦྲན་པ། ལྷ་བུད་མེད་གཟུགས་འདི་ལྟ་བུ་ལང་ཚོ་ལ་བབ་པ་ཞིག་རྒྱལ་པོའི་ཆབ་སྒོ་ན་སྡོད་དོ། །རྒྱལ་པོས་སྨྲས་པ། བལྟས་འཇུག་ཏུ་ཆུག་ཤིག་།དེ་དག་གིས་དེ་འཇུག་ཏུ་བཅུག་གོ། །བུད་མེད་ཀྱི་གཟུགས་ནི་དབང་པོ་རྣམས་འཕྲོག་པ་ཡིན་པས་རྒྱལ་པོས་དེ་མཐོང་ནས་འདོད་ཆགས་ཀྱིས་གཟིར་བས་འོངས་པ་ལེགས་སོ་ཞེས་བྱ་བའི་ཀུན་ཏུ་སྤྱད་པས་དེ་ལ་ཀུན་ཏུ་སྤྱད་ནས་སྨྲས་པ། བཟང་མོ་ཁྱོད་ག་ལས་འདིར་འོངས། ཁྱོད་སུའི་ཡིན། དེས་རྐང་པ་གཉིས་ལ་གཏུགས་ཏེ་སྨྲས་པ། ལྷ་བདག་ནི་ཟངས་གླིང་གི་རྒྱལ་པོའི་བུ་མོ་དེད་དཔོན་སིང་ག་ལའི་མཆིས་འབྲང་དུ་སྩལ་བ་ལགས་ན། དེ་རྒྱ་མཚོ་ཆན་པོའི་ནང་དུ་མཆིས་པའི་གྲུ་ཆུ་སྲིན་ཉའི་རིགས་ཀྱིས་བཅག་ནས། དེས་བདག་བཀྲ་མི་ཤིས་སོ་ཞེས་གནས་མ་ལགས་པར་བོར་ཏེ། ཇི་ལྟ་ཞིག་ཏུ་འདིར་མཆིས་ན། ལྷས་བུ་ཆུང་ངུ་དང་བདག་ལ་དེད་དཔོན་སིང་ག་ལ་བཟོད་པ་བགྱིད་དུ་སྩལ་བར་ཅི་གནང ། རྒྱལ་པོས་དེའི་བག་ཕབ་ནས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་དེད་དཔོན་སིང་ག་ལ་བོས
8.180b
ཤིག་།དེ་དག་གིས་དེ་བོས་པ་དང ། རྒྱལ་པོས་དེ་ལ་སྨྲས་པ་དང ། སིང་ག་ལ་རྒྱལ་པོའི་བུ་མོ་འདི་མ་དོར་བར་བུ་ཆུང་ངུ་དང ། འདི་ལ་བཟོད་པ་གྱིས་ཤིག་།དེས་སྨྲས་པ། ལྷ་འདི་ནི་རྒྱལ་པོའི་བུ་མོ་མ་ལགས་ཏེ། འདི་ནི་ཟངས་གླིང་ནས་མཆིས་པའི་སྲིན་མོ་ལགས་སོ། །རྒྱལ་པོས་སྨྲས་པ། ་དེད་དཔོན་བུད་མེད་ལྟ་ཞིག་ཐམས་ཅད་ཀྱང་སྲིན་མོ་ཡིན་གྱིས་འདི་ལ་བཟོད་པ་གྱིས་ཤིག་།འོན་ཏེ་ཁྱོད་མི་འདོད་ན་ནི་ང་ལ་བྱིན་ཅིག་།དེས་སྨྲས་པ། ལྷ་འདི་ནི་སྲིན་མོ་ལགས་པས་བདག་མི་དབུལ་མི་ཟློག་གོ། །རྒྱལ་པོས་དེ་བཙུན་མོའི་འཁོར་གྱི་ནང་དུ་བཅུག་ནས་དེས་རྒྱལ་པོ་དབང་དུ་བྱས་སོ། །ཇི་ཙམ་དུས་གཞན་ཞིག་ན་དེས་རྒྱལ་པོ་བཙུན་མོའི་འཁོར་དང་བཅས་པ་གཉིད་ལོག་པར་བྱས་ནས་ཟངས་གླིང་དུ་སྲིན་མོ་དེ་དག་གི་ནང་དུ་སོང་སྟེ་སྨྲས་པ། ཕུ་ནུ་མོ་དག་ཁྱེད་ལ་དེད་དཔོན་སིང་ག་ལས་ཅི་བྱ། ཁོ་མོས་རྒྱལ་པོ་སེང་གེ་རལ་པ་ཅན་བཙུན་མོའི་འཁོར་དང་བཅས་པ་གཉིད་ལོག་པར་བྱས་ཀྱིས་ཚུར་ཤེག་དེ་བཟའ་བར་བྱའོ། །དེ་དག་གིས་རྐང་ལག་དང་མིག་བསྒྱུར་ཏེ་བདག་ཉིད་འཇིགས་པ་དང ། ་འཇིགས་སུ་རུང་བ་ཆེན་མོར་མངོན་པར་སྤྲུལ་ནས་མཚན་མོ་རྒྱལ་པོའི་ཕོ་བྲང་སེང་གེ་ལྟ་བུར་ལྷགས་ཏེ། དེ་དག་གིས་རྒྱལ་པོ་སེང་གེ་རལ་པ་ཅན་འཁོར་དང་བཅས་པ་ཟོས་སོ། །མཚན་མོ་ནམ་ནངས་པ་ན་རྒྱལ་པོའི་ཕོ་བྲང་གི་སྒོ་འབྱེད་པ་མེད་དེ། མ་ཕྱེད་པ་ན་རྒྱལ་པོའི་ཕོ་བྲང་གི་སྟེང་ནས་མི་རོ་ཟ་བའི་བྱ་མང་པོ་དག་རྒྱུ་བར་བརྩམས་སོ། །བློན་པོ་དང ། ཁྲོམ་གྱི་རུ་སྣ་དང ། གྲོང་རྡལ་གྱི་མི་དང ། ཡུལ་གྱི་མི་དག་ཀྱང་རྒྱལ་པོའི་ཕོ་བྲང་གི་སྒོ་ན་སྡོད་དོ། །རྒྱལ་པོའི་ཕོ་བྲང་སེང་གེ་ལྟ་བུ་ཀུན་ཏུ་སྒྲ་འདི་སྐད་ཅེས་རྒྱལ་པོའི་ཕོ་བྲང་གི་སྒོ་འབྱེད་པ་མེད་དེ། མ་ཕྱེད་པ་ན་རྒྱལ་པོའི་ཕོ་བྲང་གི་སྟེང་ནས་མི་རོ་ཟ་བའི་བྱ་མང་པོ་དག་རྒྱུ་ཞིང་བློན་པོ་དང ། ཁྲོམ་གྱི་རུ་སྣ་དང ། གྲོང་རྡལ་གྱི་མི་དང ། ཡུལ་གྱི་མི་དག་ཀྱང་རྒྱལ་པོའི་ཕོ་བྲང་གི་སྒོ་ན་སྡོད་ཅིང་འཁོད་དོ་ཞེས་བྱ་བ་དེ་ལྟ་བུ་གྲགས་པར་གྱུར་ཏོ། །དེད་དཔོན་སིང་ག་ལས་དེ་ཐོས་ནས་དེ་མྱུར་བ་མྱུར་བ་ཁོ་ནར་རལ་གྲི་མཆན་དུ་བཅུག་སྟེ་སོང་ནས་སྨྲས་པ། ཤེས་ལྡན་དག་སྲིན་མོ་དེས་རྒྱལ་པོ་ཟོས་ཀྱིས་ཐབས་སོམས་ཤིག་།བློན་པོ་རྣམས་ཀྱིས་སྨྲས་པ། འདི་ལ་ཇི་ལྟར་བསྒྲུབ
8.181a
པར་བྱ། ཡ་གད་འོན་ཅིག་དང་འཛེགས་ཏེ་བལྟ་བར་བྱའོ། །དེ་དག་གིས་ཁྱེར་ཏེ་འོངས་པ་དང ། དེད་དཔོན་སིང་ག་ལ་རལ་གྲི་ཐོགས་ཏེ་འཛེགས་ནས་དེས་དེ་དག་བསྡིགས་པ་དང ། སྲིན་མོ་དེ་དག་ཁ་ཅིག་ནི་མིའི་རྐང་ལག་དག་ཐོགས་ཏེ་བྱེར། ཁ་ཅིག་ནི་མགོ་དག་ཐོགས་ཏེ་བྱེར་རོ། །དེ་ནས་དེད་དཔོན་སིང་ག་ལས་རྒྱལ་པོའི་ཕོ་བྲང་གི་སྒོ་དག་ཕྱེ་ནས་བློན་པོ་རྣམས་ཀྱིས་རྒྱལ་པོའི་ཕོ་བྲང་བྱི་དོར་བྱས་ནས། ཕོ་བྲང་འཁོར་གྱི་མི་དང ། བློན་པོ་དང ། ཡུལ་མི་དག་སྡུས་ཏེ་སྨྲས་པ། ཤེས་ལྡན་དག་རྒྱལ་པོ་བཙུན་མོའི་འཁོར་དང་བཅས་པ་སྲིན་མོས་ཟོས་ཏེ་གཞོན་ནུ་ཡང་མེད་ན་སུ་ཞིག་རྒྱལ་པོར་དབང་བསྐུར་བར་བྱ། དེ་ན་ཁ་ཅིག་གིས་སྨྲས་པ། གང་སྙིང་སྟོབས་ཅན་ཤེས་རབ་དང་ལྡན་པའོ། །ཁ་ཅིག་གིས་སྨྲས་པ། དེད་དཔོན་སིང་ག་ལ་ལས་སྙིང་སྟོབས་ཅན་ཤེས་རབ་དང་ལྡན་པ་སུ་ཞིག་ཡོད་ཀྱི་དེད་དཔོན་སིང་ག་ལ་རྒྱལ་པོར་དབང་བསྐུར་བར་བྱའོ། །དེ་ལྟར་བྱའོ། །ཞེས་དེ་དག་གིས་དེད་དཔོན་སིང་ག་ལ་ལ་སྨྲས་པ། དེད་དཔོན་རྒྱལ་སྲིད་ལོང་ཤིག་།དེས་སྨྲས་པ། ཁོ་བོ་ནི་ཚོང་པའི་ཐ་སྙད་ཀྱིས་འཚོ་བ་ཡིན་པས་ཁོ་བོ་ལ་རྒྱལ་སྲིད་ཀྱིས་ཅི་བྱ། དེ་དག་གིས་སྨྲས་པ། དེད་དཔོན་གཞན་གྱིས་རྒྱལ་སྲིད་བྱེད་དུ་འཇུག་མི་ནུས་ཀྱིས་ལོང་ཤིག་།དེས་སྨྲས་པ། དམ་ཚིག་གིས་བླང་བར་བྱ་སྟེ། གལ་ཏེ་ཁྱེད་ཅག་ཁོ་བོའི་ཚིག་བཞིན་བྱེད་ནའོ། །དེ་དག་གིས་སྨྲས་པ། བྱེད་ཀྱིས་ལོང་ཤིག་།མ་ཉེས་སོ། །དེ་དག་གིས་གྲོང་ཁྱེར་མཛེས་པར་བྱས་ནས་དེད་དཔོན་སིང་ག་ལ་བཀུར་སྟི་ཆེན་པོས་རྒྱལ་སྲིད་ལ་དབང་བསྐུར་ཏོ། །རྒྱལ་པོ་སིང་ག་ལས་ཡུལ་ཐ་དད་པ་ན་གནས་པའི་རིག་སྔགས་སྨྲ་བ་དག་བོས་ཏེ་རིག་སྔགས་རྒྱ་ཆེར་སློབ་ཏུ་བཅུག་གོ། །དེ་བཞིན་དུ་ཡུལ་ཐ་དད་པ་ན་གནས་པའི་འཕོངས་གི་སློབ་དཔོན་དག་ཀྱང་བོས་ཏེ་རྒྱ་ཆེར་འཕོང་སློབ་ཏུ་བཅུག་ནས་བློན་པོ་རྣམས་ལ་བསྒོ་བ། ཤེས་ལྡན་དག་དཔུང་གི་ཚོགས་ཡན་ལག་བཞི་པ་གོ་སྐོན་ཅིག་།སྲིན་མོ་དེ་དག་ཟངས་གླིང་ནས་སྐྲོད་དུ་འདོང་ངོ ། །བློན་པོ་རྣམས་ཀྱིས་དཔུང་གི་ཚོགས་ཡན་ལག་བཞི་པ་གོ་བསྐོན་ནས་རྒྱལ་པོ་སིང་ག་ལས་དཔུང་གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང ། རྟ་པའི་ཚོགས་དང །
8.181b
ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གྲུར་བཙུད་དེ་ཟངས་གླིང་དུ་འཕགས་སོ། །མཐར་གྱིས་རྒྱ་མཚོའི་འགྲམ་དུ་ཕྱིན་པ་དང ། སྲིན་མོ་དེ་དག་གི་ཕོངས་པའི་གནས་དང་འཐུན་པའི་རྒྱལ་མཚན་གཡོ་བར་བརྩམས་ནས་དེ་དག་གིས་གྲོས་བྱ་བར་བརྩམས་པ། ཕུ་ནུ་མོ་དག་ཕོངས་པའི་གནས་དང་འཐུན་པའི་རྒྱལ་མཚན་གཡོས་པ་ལས་ན་འཛམ་བུའི་གླིང་པའི་མི་གཡུལ་འགྱེད་པར་འདོད་པ་དག་ལྷགས་གོར་མ་ཆག་གིས་བལྟའོ་ཞེས་དེ་དག་རྒྱ་མཚོའི་འགྲམ་དུ་དོང་བ་དང ། ཇི་ཙམ་ན་གྲུ་བོ་ཆེ་བ་དུ་མ་དག་རྒྱ་མཚོའི་འགྲམ་དུ་ཕྱིན་པ་མཐོང་ངོ ། །མཐོང་ནས་སྲིན་མོ་དེ་དག་གིས་ཀྱང་གཡུལ་བཤམས་པ་དང ། དེ་ནས་རིག་སྔགས་སྨྲ་བ་དག་གིས་རིག་སྔགས་དག་གིས་ཕབ་ནས་འཕོང་གི་སློབ་དཔོན་དག་གིས་ཕལ་ཆེར་བསད་དོ། །ལྷག་མ་རྣམས་ཀྱིས་རྒྱལ་པོ་སིང་ག་ལའི་རྐང་པ་གཉིས་ལ་གཏུགས་ཏེ་སྨྲས་པ། ལྷ་བཟོད་པར་གསོལ། དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ཁྱེད་ཅག་གི་གྲོང་ཁྱེར་འདི་ཕྱུང་སྟེ། གཞན་དུ་འདོང་ཞིང་ངའི་ཡུལ་དུ་གནོད་པ་འགའ་ཡང་མི་བྱེད་ན་བཟོད་དོ། །དེ་དག་གིས་སྨྲས་པ། དེ་ལྟར་བགྱིའོ། །མ་ཉེས་སོ། །དེ་དག་གིས་གྲོང་ཁྱེར་དེ་དག་ཕྱུང་ནས་གཞན་དུ་དོང་སྟེ་འཁོད་དོ། །རྒྱལ་པོ་སིང་ག་ལས་ཀྱང་དེར་གྲོང་ཁྱེར་བརྩིགས་ནས་རྒྱལ་པོ་སིང་ག་ལས་གནས་བཅས་པས་སིང་ག་ལའི་གླིང་སིང་ག་ལའི་གླིང་ཞེས་བྱ་བའི་མིང་དུ་གྱུར་ཏོ། །དགེ་སློང་དག་དེའི་ཚེ་དེའི་དུས་ན་དེད་དཔོན་སིང་ག་ལ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་རྒྱལ་པོ་སེང་གེ་རལ་པ་ཅན་གང་ཡིན་པ་དེ་ནི་རྒན་ཞུགས་འདི་ཉིད་ཡིན་ནོ། །དེའི་ཚེ་དེའི་དུས་ན་སྲིན་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། དེའི་ཚེ་ཡང་དཔེ་མེད་མ་འདིས་འདི་བཙུན་མོའི་འཁོར་དང་བཅས་པ་ཚུལ་མ་ཡིན་པས་སྡུག་བསྔལ་བར་བྱས་ལ། ད་ལྟར་ཡང་འདིས་འདི་ཚུལ་མ་ཡིན་པས་སྡུག་བསྔལ་བར་བྱས་སོ། །ཀུན་ཏུ་རྒྱུ་མ་དུས་དཔེ་མེད་མ་ཁྲིད་དེ་ཀཽ་ཤམྦཱིར་འོངས་ནས་སྐྱེད་མོས་ཚལ་ཞིག་ན་འདུག་གོ། །སྐྱེད་མོས་ཚལ་སྲུང་བའི་མིས་རྒྱལ་པོ་ཤར་པ་ལ་སྦྲན་པ། ལྷ་བུད་མེད་གཟུགས་བཟང་བ། བལྟ་ན་སྡུག་པ།
8.182a
མཛེས་པ་ཞིག་སྐྱེད་མོས་ཚལ་ན་མཆིས་ཏེ། དེ་ནི་ལྷ་ལ་འོས་པ་ལགས་སོ། །རྒྱལ་པོས་ཐོས་ནས་སྐྱེད་མོས་ཚལ་དུ་སོང་བ་དང་དེས་མཐོང་ངོ ། །བུད་མེད་ཀྱི་ཡུལ་ནི་དབང་པོ་རྣམས་འཕྲོག་པ་ཡིན་པས་མཐོང་མ་ཐག་ཏུ་ཆགས་པར་གྱུར་ནས། དེས་ཀུན་དུ་རྒྱུ་མ་དུ་ལ་སྨྲས་པ། མ་དུ་འདི་སུའི་བུ་མོ་ཡིན། ལྷ་བདག་གི་བུ་མོ་ལགས་སོ། །སུ་ལ་བྱིན། ལྷ་སུ་ཡང་མ་སྩལ་ཏོ། །ང་ལ་ཅིའི་ཕྱིར་མི་སྦྱིན། ལྷ་གསོལ་ལོ། །རྒྱལ་པོས་བག་མར་བླངས་ཏེ། བཙུན་མོའི་འཁོར་གྱི་ནང་དུ་བཅུག་ནས་དེ་ལ་ཁང་བཟངས་མེ་ཏོག་གི་སོའི་ཕྱེད་ཀྱང་བྱིན། བསྙེན་བཀུར་མ་ལྔ་བརྒྱ་ཡང་བྱིན། ཉི་མ་རེ་རེ་ཞིང་དྲི་དང ། ཕྲེང་བ་རྒྱུའི་རིན་ཀར་ཤ་པ་ཎ་ལྔ་བརྒྱ་ལྔ་བརྒྱ་ཡང་བྱིན་ནོ། །ཀུན་དུ་རྒྱུ་མ་དུ་ཡང་བློན་པོའི་མཆོག་ཏུ་བཅུག་གོ། །དེའི་ཚེ་ན་བད་སའི་རྒྱལ་པོ་ཤར་པ་ལ་བློན་པོའི་མཆོག་གསུམ་ཡོད་དེ། སྦྱོར་བ་འཛིན་དང ། གདངས་ཅན་དང ། མ་དུའོ། །ཇི་ཙམ་དུས་གཞན་ཞིག་ན་བད་སའི་རྒྱལ་པོ་ཤར་པའི་གན་དུ་མི་ཞིག་འོངས་ནས་རྒྱལ་པོས་དྲིས་པ། ཁྱོད་སུ་ཡིན། དེས་སྨྲས་པ། ལྷ་བདག་སྙན་སྨྲ་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་སྙན་སྨྲ་ལ་འཚོ་བ་བྱིན་ཅིག་།དེ་དག་གིས་དེ་ལ་འཚོ་བ་བྱིན་ནོ། །ཇི་ཙམ་ན་ཡང་རྒྱལ་པོའི་གན་དུ་མི་ཞིག་འོངས་ནས་རྒྱལ་པོས་དེ་ལ་དྲིས་པ། ཁྱོད་སུ་ཡིན། དེས་སྨྲས་པ། ལྷ་བདག་མི་སྙན་སྨྲ་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་མི་སྙན་སྨྲ་ལ་འཚོ་བ་བྱིན་ཅིག་།དེ་དག་གིས་སྨྲས་པ། ལྷ་གལ་ཏེ་ན་ལྷས་མི་སྙན་པ་གསན་པར་འགྱུར་ཡང་གདའ་བས་འདི་ལ་འཚོ་བ་མི་སྩལ་ཏོ། །རྒྱལ་པོས་སྨྲས་པ། ཤེས་ལྡན་དག་རྒྱལ་པོའི་བྱ་བ་དག་ནི་རྒྱ་ཆེས་བྱིན་ཅིག་།དེ་དག་གིས་དེ་ལ་ཡང་འཚོ་བ་བྱིན་ནོ། །ཇི་ཙམ་དུས་གཞན་ཞིག་ན་བད་སའི་རྒྱལ་པོ་ཤར་པ་བཙུན་མོ་སྔོ་བསངས་ཅན་དང ། དཔེ་མེད་མ་དང་ལྷན་ཅིག་འདུག་པ་ན་དེ་ན་རྒྱལ་པོ་སྦྲིད་པ་བྱུང་བ་དང ། སྔོ་བསངས་ཅན་གྱིས་སངས་རྒྱས་ལ་ཕྱག་འཚལ་ལོ་ཞེས་སྨྲས་པ་དང ། དཔེ་མེད་མས་ལྷ་ལ་ཕྱག་འཚལ་ལོ་ཞེས་བྱས་ཏེ་སྨྲས་པ། ལྷ་སྔོ
8.182b
བསངས་ཅན་ལྷའི་འཚལ་མ་འཚལ་ཞིང་དགེ་སྦྱོང་གཽ་ཏ་མ་ལ་ཕྱག་འཚལ་བ་ལ་གཟིགས། རྒྱལ་པོས་སྨྲས་པ། དཔེ་མེད་མ་འདི་ལ་ཉེས་པ་མེད་དེ། སྔོ་བསངས་ཅན་དགེ་བསྙེན་མ་ཡིན་པས་ལོས་ཀྱང་དགེ་སྦྱོང་གཽ་ཏ་མ་ལ་ཕྱག་འཚལ་མོད། དེ་ཅང་མི་སྨྲ་བར་འདུག་གོ། །དེས་བུ་མོ་མངག་གཞུག་མ་ལ་སྨྲས་པ། བུ་མོ་གང་གི་ཚེ་ལྷ་སྔོ་བསངས་ཅན་དང ། ཁོ་མོ་དང་ལྷན་ཅིག་དབེན་པ་ན་བཞུགས་པ་དེའི་ཚེ་ན་ཁྱོད་ཀྱིས་ཐེམ་སྐས་ནས་ཁར་ཕོར་རྦབ་ཏུ་ཐོང་ཤིག་།དེས་ཇོ་མོ་བཀའ་བཞིན་འཚལ་ཞེས་གང་གི་ཚེ་དེ་དག་ལྷན་ཅིག་འདུག་པ་དེའི་ཚེ་ན་ཐེམ་སྐས་ནས་ཁར་ཕོར་རྦབ་ཏུ་བཏང་བ་ན། སྔོ་བསངས་ཅན་གྱིས་སངས་རྒྱས་ལ་ཕྱག་འཚལ་ལོ་ཞེས་སྨྲས་པ་དང ། དཔེ་མེད་མས་ལྷ་ལ་ཕྱག་འཚལ་ལོ་ཞེས་བྱས་ཏེ་སྨྲས་པ། ལྷ་སྔོ་བསངས་ཅན་ལྷའི་འཚལ་མ་འཚལ་ཞིང་དགེ་སྦྱོང་གཽ་ཏ་མ་ལ་ཕྱག་འཚལ་བ་ལ་གཟིགས། རྒྱལ་པོས་སྨྲས་པ། དཔེ་མེད་མ་ཐོང་ཤིག་།ཉེས་རྩོམ་མ་བྱེད་ཅིག་།འདི་ལ་ཉེས་པ་མེད་དེ། སྔོ་བསངས་ཅན་དགེ་བསྙེན་མ་ཡིན་པས་ལོས་ཀྱང་དགེ་སྦྱོང་གཽ་ཏ་མ་ལ་ཕྱག་འཚལ། དེ་ཅང་མི་སྨྲ་བར་འདུག་གོ། །རྒྱལ་པོ་ཤར་པ་ཉི་མ་གཅིག་ནི་སྔོ་བསངས་ཅན་གྱི་གན་དུ་ཟན་ཟ་ལ། ཉི་མ་གཉིས་པ་ལ་ནི་དཔེ་མེད་མའི་གན་དུ་ཟན་ཟའོ། །དཔེ་མེད་མས་བྱ་པ་ལ་བསྒོ་བ། གང་གི་ཉིན་མོ་ལྷ་སྔོ་བསངས་ཅན་གྱི་གན་དུ་བཤོས་གསོལ་བའི་རེས་བབ་པ་དེའི་ཉིན་མོ་གོང་མ་སྲེག་གསོན་པོ་དབུལ་བར་བྱའོ། །བྱ་པས་གང་གི་ཉིན་མོ་རྒྱལ་པོ་སྔོ་བསངས་ཅན་གྱི་གན་དུ་ཟན་ཟ་བ་དེའི་ཉིན་མོ་རྒྱལ་པོ་ལ་གོང་མ་སྲེག་གསོན་པོ་ཕུལ་བ་དང ། ་རྒྱལ་པོས་སྨྲས་པ། དཔེ་མེད་མ་ལ་གཏོད་ཅིག་།དཔེ་མེད་མས་ཐོས་ནས་དེས་སྨྲས་པ། ལྷ་བདག་གི་རེས་མ་ལགས་ཏེ། སྔོ་བསངས་ཅན་གྱི་རེས་ལགས་སོ། །རྒྱལ་པོས་སྨྲས་པ། ཀཝའི་བྱ་པ་སོང་ལ་སྔོ་བསངས་ཅན་ལ་གཏོད་ཅིག་།དེས་སྔོ་བསངས་ཅན་ལ་ཕུལ་ཏེ་སྨྲས་པ། ལྷའི་དོན་དུ་གཡོས་མཛོད་ཅིག་།དེས་སྨྲས་པ། ཅི་ཁོ་མོ་བྱ་པ་མོ་འམ། ཁོ་མོ་སྲོག་གཅོད་པར་མི་བྱེད་ཀྱིས་སོང་ཤིག་།དེས་རྒྱལ་པོའི་གན་དུ་སོང་སྟེ་སྨྲས་པ། ལྷ་སྔོ་བསངས་ཅན་གྱི་མཆིད་ནས། ཅི་ཁོ་མོ་བྱ
8.183a
པ་མོ་འམ། ཁོ་མོ་སྲོག་གཅོད་པར་མི་བྱེད་ཀྱིས་སོང་ཞིག་ཅེས་མཆིའོ། །དཔེ་མེད་མས་ཐོས་ནས་སྨྲས་པ། ལྷ་གལ་ཏེ་དེ་ལ་དགེ་སྦྱོང་གཽ་ཏ་མའི་སླད་དུ་གཡོས་གྱིས་ཤིག་ཅེས་བགྱིས་ན་ནི་ད་ཙམ་འཁོར་དང་བཅས་ཏེ་གཡོས་བགྱིད་པར་འགྱུར་རོ། །རྒྱལ་པོས་བསམས་པ། དེ་ལྟར་འགྱུར་བ་སྙམ་ཞེས་དེས་མི་དེ་ལ་སྨྲས་པ། ཀཝའི་བྱ་པ་སོང་ལ་འདི་སྐད་ཅེས་བཅོམ་ལྡན་འདས་ཀྱི་ཕྱིར་གཡོས་གྱིས་ཤིག་ཅེས་བྱོས་ཤིག་།དེ་འཕགས་པ་དང ། དཔེ་མེད་མས་ལྐོག་ཏུ་སོད་ལ་ཕུལ་ཅིག་ཅེས་བསྒོ་ནས། དེས་བསད་དེ་སྔོ་བསངས་ཅན་ལ་ཕུལ་ནས་སྨྲས་པ། ལྷའི་ཞལ་ནས་བཅོམ་ལྡན་འདས་ཀྱི་ཕྱིར་གཡོས་གྱིས་ཤིག་ཅེས་བྱུང་ངོ ། །སྔོ་བསངས་ཅན་འཁོར་དང་བཅས་པས་གཡོས་བྱ་བར་བརྩམས་སོ། །བྱ་པས་སོང་སྟེ་རྒྱལ་པོ་ལ་སྨྲས་པ། ལྷ་སྔོ་བསངས་ཅན་འཁོར་དང་བཅས་པས་གཡོས་བགྱི་བར་བརྩམས་སོ། །དཔེ་མེད་མས་སྨྲས་པ། ལྷས་གསན་ཏམ། གལ་ཏེ་སྲོག་གཅོད་པར་མི་བགྱིད་ན་ནི་དགེ་སྦྱོང་གཽ་ཏ་མའི་སླད་དུ་ཡང་མི་བགྱིད་ལ། ལྷའི་སླད་དུ་ཡང་མི་བགྱིད་པའི་རིགས་ན། དགེ་སྦྱོང་གཽ་ཏ་མའི་སླད་དུ་ནི་བགྱིད་ལ། ལྷའི་སླད་དུ་ནི་མི་བགྱིད་པ་དེ་ཇི་ལྟ་བུ་ཞིག་།རྒྱལ་པོ་ཁྲོས་པར་གྱུར་ནས་གཞུ་བཀང་སྟེ་འཕགས་སོ། །འཇིག་རྟེན་ནི་མཛའ་བཤེས་དང ། དགྲ་བོ་དང་ཐ་མལ་པ་ཡིན་པས་ཁ་ཅིག་གིས་ནི་སྔོ་བསངས་ཅན་ལ་སྨྲས་པ། ལྷ་ཤིན་ཏུ་ཁྲོས་ནས་གཞུ་བཀང་སྟེ་འོང་གིས་ཐབས་སོམས་ཤིག་།དེས་རང་གི་འཁོར་ལ་སྨྲས་པ། ནུ་མོ་དག་ཁྱེད་ཅག་ཐམས་ཅད་བྱམས་པ་ལ་སྙོམས་པར་ཞུགས་ཤིག་།དེ་དག་ཐམས་ཅད་བྱམས་པ་ལ་སྙོམས་པར་ཞུགས་སོ། །རྒྱལ་པོས་གཞུ་རྣ་དྲུང་དུ་ཐུག་པར་བཀང་སྟེ་མདའ་འཕངས་པ་དང ། དེ་ལམ་ཕྱེད་དུ་ལྟུང་ངོ ། །མདའ་གཉིས་པ་འཕངས་པ་དང ། དེ་ཕྱིར་ལོག་སྟེ་རྒྱལ་པོའི་དྲུང་དུ་ལྟུང་ངོ ། །མདའ་གསུམ་པ་འཕང་བར་བརྩམས་པ་དང ། སྔོ་བསངས་ཅན་གྱིས་སྨྲས་པ། ལྷ་མ་འཕེན་ཅིག་།ཁྱོད་ཐམས་ཅད་ཀྱི་ཐམས་ཅད་དུ་མ་མཆིས་པར་འགྱུར་བ་མ་མཛད་ཅིག་།རྒྱལ་པོ་སྐྲག་སྟེ་སྨྲས་པ། ཁྱོད་ལྷ་མོ་འམ། ཀླུ་མོ་འམ། གནོད་སྦྱིན་མོ་འམ། དྲི་ཟ་མོ་འམ། ནམ་མཁའ་ལྡིང་མོ་འམ། མི་འམ་ཅི་མོ་འམ། ལྟོ་འཕྱེ
8.183b
ཆེན་མོ་འམ་སུ་ཡིན། དེས་སྨྲས་པ། ལྷ་བདག་ནི་ལྷ་མོ་ཡང་མ་ལགས། ཀླུ་མོ་ཡང་མ་ལགས། གནོད་སྦྱིན་མོ་ཡང་མ་ལགས། དྲི་ཟ་མོ་ཡང་མ་ལགས། མི་འམ་ཅི་ཡང་མ་ལགས། ལྟོ་འཕྱེ་ཆེན་མོ་ཡང་མ་ལགས་སོ། །འོ་ན་ཁྱོད་སུ་ཡིན། ལྷ་བདག་ནི་བཅོམ་ལྡན་འདས་ཀྱི་ཉན་ཐོས་མ་ཕྱིར་མི་འོང་བ་སྟེ། བདག་གིས་བཅོམ་ལྡན་འདས་ཀྱི་དྲུང་ནས་ཕྱིར་མི་འོང་བའི་འབྲས་བུ་མངོན་སུམ་དུ་བགྱིས་སོ། །བུད་མེད་ལྔ་བརྒྱ་པོ་འདི་དག་གིས་ཀྱང་བདེན་པ་དག་མཐོང་ངོ ། །རྒྱལ་པོ་མངོན་པར་དད་པར་གྱུར་ནས་སྨྲས་པ། ཁྱོད་ལ་དམ་པ་ཅི་ཞིག་སྦྱིན་པར་བྱ་བ་སྨྲོས་ཤིག་།དེས་སྨྲས་པ། གལ་ཏེ་ལྷ་བདག་ལ་མངོན་པར་དད་ན་གང་གི་ཚེ་ལྷ་བཙུན་མོའི་འཁོར་གྱི་ནང་དུ་གཤེགས་པ་དེའི་ཚེ་ན་བདག་ལ་སྲིང་མོའི་འདུ་ཤེས་ཉེ་བར་ཞོག་ཤིག་།རྒྱལ་པོས་སྨྲས་པ། མ་ཉེས་ཀྱིས་དེ་བཞིན་བྱའོ། །རྒྱལ་པོ་དེ་དཔེ་མེད་མ་དང་ལྷན་ཅིག་རྩེ་བ་དང ། དགའ་བ་དང ། དགའ་མགུར་སྤྱོད་པར་བྱེད་པ་ཉམས་སུ་མྱོང་བར་བྱེད་དོ། །སྔོ་བསངས་ཅན་ལ་ཆོས་ཀྱི་རྒྱུ་ལས་བྱུང་བའི་དད་པ་སྐྱེད་པར་བྱེད་ཅིང ། དེ་ལ་ལོ་ཏོག་སར་པ་དང ། འབྲས་བུ་སར་པ་དང ། དུས་ཚིགས་སར་པ་པ་གང་དག་འགྲུབ་པ་དེ་དག་ཀྱང་དང་པོ་ཁོ་ནར་སྔོ་བསངས་ཅན་ལ་འབུལ་བར་བྱེད་དོ། །བུད་མེད་ཀྱི་ཡུལ་ནི་ཕྲག་དོག་གི་རང་བཞིན་ཅན་ཡིན་པས་དཔེ་མེད་མས་བསམས་པ། རྒྱལ་པོ་འདི་བདག་དང་ལྷན་ཅིག་རྩེ་བ་དང ། དགའ་བ་དང ། དགའ་མགུར་སྤྱོད་པར་བྱེད་པ་ཉམས་སུ་མྱོང་བར་བྱེད་ལ། འདི་ལ་ལོ་ཏོག་སར་པ་དང ། འབྲས་བུ་སར་པ་དང ། དུས་ཚིགས་སར་པ་པ་གང་དག་འགྲུབ་པ་དེ་དག་ནི་དང་པོ་ཁོ་ནར་སྔོ་བསངས་ཅན་ལ་འབུལ་བར་བྱེད་པས་གང་གིས་སྔོ་བསངས་ཅན་འདི་གསད་པར་འགྱུར་བ་དེ་ལྟ་བུའི་ཐབས་ཀྱི་རྣམ་པ་ཞིག་བྱའོ་སྙམ་ནས། དེ་གསད་པའི་ཕྱིར་གླན་ཀ་ཚོལ་ཞིང་དེ་ལྷུར་ལེན་ཅིང་འདུག་གོ། །ཇི་ཙམ་དུས་གཞན་ཞིག་ན་བད་སའི་རྒྱལ་པོ་ཤར་པའི་རི་བྲགས་པ་ཞིག་ལོག་ནས། དེས་དེར་རུ་གཅིག་བཏང་ན་དེ་བཅོམ་ཞིང་རབ་ཏུ་བཅོམ་སྟེ་འོངས་སོ། །དེ་བཞིན་དུ་རུ་གཉིས་པ་དང ། གསུམ་པ་བཏང་ན་དེ་ཡང་བཅོམ་ཞིང་རབ་ཏུ་བཅོམ་སྟེ་འོངས་ནས། བློན་པོ་རྣམས་ཀྱིས་སྨྲས་པ། ལྷའི་དཔུང་ནི་ཉམས་ཤིང་རི་བྲགས་པའི་དཔུང་ནི
8.184a
སྐྱེས་ཏེ། གལ་ཏེ་ལྷ་རང་ཉིད་མ་གཤེགས་ན་དེ་ཕེབས་དཀའ་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ། །དེས་ཀཽ་ཤམྦཱིར་དྲིལ་བསྒྲག་པ་བྱེད་དུ་བཅུག་སྟེ། ངའི་ཡུལ་ན་གང་དག་མཚོན་ཆས་འཚོ་བ་ཇི་སྙེད་འཁོད་པ་དེ་དག་ཐམས་ཅད་ཀྱིས་འདོང་བར་བྱའོ་ཞེས་བསྒོ་སྟེ་དེ་ནས་འཕགས་སོ། །རྒྱལ་པོས་སྦྱོར་བ་འཛིན་ལ་སྨྲས་པ། ཁྱོད་སྔོ་བསངས་ཅན་ལ་མཁོ་བ་སྟོབས་ཤིང་འདི་ཉིད་ན་འདུག་ཤིག་།དེས་སྨྲས་པ། ལྷ་དེ་ལྟར་མི་རུང་སྟེ། བདག་ཀྱང་ལྷ་ཉིད་དང་ཐབས་གཅིག་མཆིའོ། །རྒྱལ་པོས་གདངས་ཅན་ལ་སྨྲས་པ། ཁྱོད་སྔོ་བསངས་ཅན་ལ་མཁོ་བ་སྟོབས་ཤིང་འདི་ཉིད་ན་འདུག་ཤིག་།དེས་ཀྱང་སྨྲས་པ། ལྷ་དེ་ལྟར་མི་རུང་སྟེ། བདག་ཀྱང་ལྷ་ཉིད་དང་ཐབས་གཅིག་མཆིའོ། །རྒྱལ་པོས་མ་དུ་བཞག་སྟེ་སྨྲས་པ། ཁྱོད་སྔོ་བསངས་ཅན་ལ་མཁོ་བ་སྟོབས་ཤིང་འདི་ཉིད་ན་འདུག་ཤིག་ཅེས་བསྒོ་སྟེ་འཕགས་པ་དང ། དེས་ཀྱང་ཕྱི་བཞིན་སྐྱེལ་བཞིན་དུ་ལྷ་དེ་ལྟར་མི་རུང་སྟེ། བདག་ཀྱང་ལྷ་ཉིད་དང་ཐབས་གཅིག་མཆིའོ་ཞེས་ལན་གསུམ་གྱི་བར་དུ་གསོལ་ཀྱང་རྒྱལ་པོས་མ་གནང་ནས་དེས་ཁས་བླངས་སོ། །མ་དུ་དཔེ་མེད་མའི་གན་དུ་སོང་བ་དང ། དེས་དྲིས་པ། ཡབ་ལྷས་འདིར་སུ་བཞག་།བདག་བཞག་གོ། །དེས་བསམས་པ། མ་ཉེས་ཀྱིས་གྲོགས་འདིས་ཁོན་གྱི་ཤ་གླན་པར་ནུས་སོ་སྙམ་དུ་རིག་ནས་སྨྲས་པ། ཡབ་སྔོ་བསངས་ཅན་བདག་གི་ཅིར་འོང་མཁྱེན་ཏམ། བུ་མོ་འཚལ་ཏེ་ཆེན་མའོ། །ཡབ་བུད་མེད་ཀྱི་ཡུལ་ལ་ཆོས་གང་ཤིན་ཏུ་གནོད་པ་མཁྱེན་ཏམ། བུ་མོ་འཚལ་ཏེ། ཕྲག་དོག་དང་སེར་སྣའོ། །ཡབ་གལ་ཏེ་དེ་ལྟ་ན་སྔོ་བསངས་ཅན་ཁུམ་ཤིག་།བུ་མོ་ཅི་བདག་ལ་མགོ་གཉིས་མཆིས་སམ། རྒྱལ་པོས་ལན་གསུམ་གྱི་བར་དུ་སྔོ་བསངས་ཅན་ལ་མཁོ་བ་སྟོབས་ཤིག་ཅེས་བཀའ་སྩལ་གྱི། ཁྱོད་ཀྱི་མིང་ཡང་མ་སྨོས་སོ། །དེས་སྨྲས་པ། ཡབ་ཁྱོད་འདི་ལྟར་གླེན་ནམ། བུ་མོའི་དོན་དུ་ཕ་ལ་ཅུང་ཟད་འཚོལ་བ་སུ་ཡོད་དེ། རྒྱུ་མེད་པར་ཡང་དེ་ལ་བྱམས་པར་བྱེད་དོ། །དེའི་ཕྱིར་གལ་ཏེ་ཇེ་དེ་གསོད་ན་དེ་ལྟ་ན་ལེགས། གལ་ཏེ་མི་གསོད་ན་ཁོ་མོས་ཁྱོད་སྔོན་གྱི་གནས་ཉིད་དུ་གཞག་པར་བྱའོ། །དེ་སྐྲག་སྟེ་བསམས་པ། རྒྱལ་པོ་དེ་བུད་མེད་ཀྱི་དབང་དུ་སོང
8.184b
བ་ཡིན་པས་དེ་ལྟར་འགྱུར་རོ་སྙམ་དུ་རིག་ནས། སྨྲས་པ། བུ་མོ་གྱི་ན་དེ་བཞིན་དུ་གསད་པར་མི་ནུས་ཏེ། འདི་ལྟར་ཐབས་ཀྱི་རྣམ་པ་ཞིག་བྱའོ། །དེས་སྨྲས་པ། མ་ཉེས་ཀྱིས་དེ་བཞིན་གྱིས་ཤིག་།དེས་སྔོ་བསངས་ཅན་ལ་སྨྲས་པ། ལྷ་མོ་ཅི་བགྱི་བཀའ་སྩོལ་ཅིག་།དེས་སྨྲས་པ། མ་དུ་བྱ་བ་ཅུང་ཟད་ཀྱང་མེད་དེ། འདི་ལྟར་བུ་མོ་འདི་དག་མཚན་མོ་མེ་མར་ལ་སངས་རྒྱས་ཀྱི་བཀའ་ཀློག་པས་དེར་གྲོ་བ་དང ། འབྲུ་མར་དང ། སྣག་ཚ་དང ། སྨྱུག་གུ་དང་ཤིང་བལ་དགོས་སོ། །དེས་སྨྲས་པ། ལྷ་མོ་མ་ནོངས་ཀྱིས་སྦྱོར་དུ་སྩལ་ཏོ་ཞེས་དེས་མང་པོ་སྦྱོར་དུ་བཅུག་སྟེ་ནང་དུ་བསྐྱས་ནས་སྒོ་ཁང་དུ་ཕུང་པོར་བཅེར་ཏེ་བཞག་གོ། །སྔོ་བསང་ཅན་གྱིས་སྨྲས་པ་མ་དུ་ཆོག་གིས་ཐོང་ཤིག་མ་དུས་སྨྲས་པ། ལྷ་མོ་འཇུག་སྩལ་ཏེ་སླན་ཆད་ཡང་དང་ཡང་དུ་འཇུག་ཏུ་མི་སྩལ་བར་བགྱིའོ་ཞེས་དེས་འཇུག་ཏུ་བཅུག་ནས་གྲོ་བའི་ཁུར་ཕྱི་མར་མེ་བཅུག་སྟེ་འཇུག་ཏུ་བཅུག་པ་དང ། མེ་འབར་བ་དེས་སྒོ་ཁང་ལ་མཆེད་ནས་ཀཽ་ཤམྦཱི་ན་གནས་པའི་སྐྱེ་བོའི་ཚོགས་ཀྱིས་མེ་གསོད་དུ་བརྒྱུགས་པ་དང ། མ་དུས་རལ་གྲི་ཤུབས་ནས་ཕྱུང་སྟེ། ཁྱེད་ཅག་ཅིའི་ཕྱིར་རྒྱལ་པོའི་བཙུན་མོའི་འཁོར་གྱི་ནང་དུ་འཇུག་པར་འདོད། སྡོད་ཅིག་ཅེས་སྐྱེ་བོའི་ཚོགས་ཕྱིར་བཟློག་པར་བརྩམས་སོ། །འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་གྱིས་སྨྲས་པ། ཁོ་བོས་སྒོ་ཁང་མེ་མཆེད་པ་འདི་འཁྲུལ་འཁོར་གྱིས་གནས་གཞན་དུ་སྤོ་བར་བྱའོ། །མ་དུས་དེ་ཡང་དེ་བཞིན་དུ་ཕྱིར་བཟློག་གོ། །སྔོ་བསངས་ཅན་རྫུ་འཕྲུལ་གྱིས་ནམ་མཁའ་ལ་གྱེན་དུ་འཕགས་ཏེ་སྨྲས་པ། ནུ་མོ་དག་བདག་ཅག་གིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་བདག་ཅག་གིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། བཅོམ་ལྡན་འདས་ཀྱིས་ཀྱང ། བར་སྣང་རྒྱ་མཚོའི་ནང་དང་ནི། །རི་ཡི་སུལ་དུ་ཞུགས་གྱུར་ཏམ། །གང་དུ་གནས་ན་ལས་རྣམས་ཀྱིས། །མི་ཚུགས་འགྱུར་བའི་ས་ཕྱོགས་མེད། །ཅེས་གསུངས་པས་བདག་ཅག་ལ་ལས་དེ་གཞོལ་བར་འགྱུར་རོ་ཞེས་སྨྲས་ནས་ཚིགས་སུ་བཅད་པ་སྨྲས་པ། བདག་གིས་རྩིག་ངོས་སྐར་ཁུང་ནས། །
8.185a
བཅོམ་ལྡན་འདས་ནི་མཐོང་འགྱུར་ཏེ། །སངས་རྒྱས་ཀྱི་ནི་བསྟན་པ་ལ། །བདེན་པ་དག་ནི་ཀུན་ཤེས་བྱས། །དེ་དག་ཕྱེ་མ་ལེབ་བཞིན་དུ་གྱེན་དུ་མཆོང་ཞིང་མཆོང་ཞིང་མེར་ལྷུང་བར་གྱུར་ཏོ། །དེ་ན་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ནི་ཚིག་གོ། །སྒུར་མཆོག་ནི་ཆུའི་སྟོར་ཁུང་ནས་བྲོས་སོ། །མ་དུས་བུད་མེད་ལྔ་བརྒྱ་པོ་དེ་དག་གི་རོ་དུར་ཁྲོད་དུ་བོར་ནས་རྒྱལ་པོའི་ཕོ་བྲང་ནང་དང་ཕྱི་རོལ་དང་བཅས་པའི་བྱི་དོར་བྱས་ཏེ། ཀཽ་ཤམྦི་ན་གནས་པ་དང ། ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་ངུ་བ་དག་བཟློག་གོ། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། ཀཽ་ཤམྦིར་བསོད་སྙོམས་ལ་ཞུགས་པ་དང ། དགེ་སློང་རབ་ཏུ་མང་པོ་དག་ཀཽ་ཤམྦིར་བསོད་སྙོམས་ལ་རྒྱུ་བས། བད་སའི་རྒྱལ་པོ་ཤར་པ་ལྗོངས་སུ་སོང་བའི་བཙུན་མོའི་འཁོར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཙམ་མེས་ཚིག་ཅེས་ཐོས་སོ། །ཐོས་ནས་ཀྱང་ཀཽ་ཤམྦིར་བསོད་སྙོམས་བརྒྱུས་ནས། ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། རྐང་པ་གཉིས་བཀྲུས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཅག་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་འཚལ་ལྷུང་བཟེད་དང་ཆོས་གོས་ཐོགས་ཏེ་ཀཽ་ཤམྦིར་བསོད་སྙོམས་ལ་ཞུགས་པ་ན། བཙུན་པ་བདག་ཅག་དགེ་སློང་རབ་ཏུ་མང་པོ་ཀཽ་ཤམྦིར་བསོད་སྙོམས་ལ་རྒྱུ་བ་དག་གིས་བད་སའི་རྒྱལ་པོ་ཤར་པ་ལྗོངས་སུ་མཆིས་པའི་མཆིས་བྲང་གི་འཁོར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཙམ་ཞུགས་ཀྱིས་དྲལ་ཅེས་ཐོས་སོ། །དགེ་སློང་དག་གང་གིས་བད་སའི་རྒྱལ་པོ་ཤར་པ་ལྗོངས་སུ་སོང་བའི་བཙུན་མོའི་འཁོར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཙམ་མེས་བསྲེགས་པའི་མི་གཏི་མུག་ཅན་དེས་བསོད་ནམས་མ་ཡིན་པ་མང་པོ་བསྐྱེད་དོ། །དགེ་སློང་དག་འདི་ལྟར་མི་གཏི་མུག་ཅན་དེས་བསོད་ནམས་མ་ཡིན་པ་མང་པོ་བསྐྱེད་མོད་ཀྱི། བུད་མེད་དེ་དག་ནི
8.185b
འབྲས་བུ་མེད་པར་དུས་ལ་བབ་པ་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་མོའི་འཁོར་དེ་ན་བུད་མེད་གང་དག་གིས་ཐ་མའི་ཆ་དང་འཐུན་པའི་ཀུན་དུ་སྦྱོར་བ་ལྔ་སྤངས་པས་རྫུས་ཏེ་སྐྱེ་ཞིང ། དེར་ཡོངས་སུ་མྱ་ངན་ལས་འདའ་བ་ཕྱིར་མི་འོང་བ་ཡང་འཇིག་རྟེན་འདིར་ཕྱིར་མི་ལྡོག་པའི་ཆོས་ཅན་དེ་ལྟ་བུའི་བུད་མེད་དག་བཙུན་མོའི་འཁོར་དེ་ན་ཡོད་པ་དང ། བཙུན་མོའི་འཁོར་དེ་ན་བུད་མེད་གང་དག་གིས་ཀུན་དུ་སྦྱོར་བ་གསུམ་སྤངས་པས་འདོད་ཆགས་དང་ཞེ་སྡང་དང ། གཏི་མུག་སྲབས་པའི་ཕྱིར་ལན་ཅིག་ཕྱིར་འོང་བ་ལན་ཅིག་འཇིག་རྟེན་འདིར་འོངས་ནས་སྡུག་བསྔལ་མཐར་བྱེད་པར་འགྱུར་བ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པ་དང ། བཙུན་མོའི་འཁོར་དེ་ན་བུད་མེད་གང་དག་གིས་ཀུན་དུ་སྦྱོར་བ་གསུམ་སྤངས་པས་རྒྱུན་དུ་ཞུགས་པ་ལོག་པར་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ལ་ངེས་པར་གཞོལ་བ་རེ་ལྟར་ཐོགས་ན་སྲིད་པ་ལན་བདུན་པ་ལན་བདུན་ལྷ་དང་མི་རྣམས་སུ་མཚམས་སྦྱར་ནས་སྡུག་བསྔལ་མཐར་བྱེད་པར་འགྱུར་བ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པ་དང ། བཙུན་མོའི་འཁོར་དེ་ན་བུད་མེད་གང་དག་རང་གི་སྲོག་གི་ཕྱིར་ཡང་བསླབ་པ་དག་ལས་འདའ་བར་མི་བྱེད་པ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པ་དང ། བཙུན་མོའི་འཁོར་དེ་ན་བུད་མེད་གང་དག་ང་ལ་སེམས་དད་པས་དུས་བྱས་ཤིང་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པའི་ཕྱིར་རོ། །དགེ་སློང་དག་ཚུར་ཤེག་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་པོ་དག་གི་རོ་ག་ལ་བ་དེར་འདོང་ངོ ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ཏོ། །དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་དག་དང་ཐབས་གཅིག་བུད་མེད་ལྔ་བརྒྱ་པོ་དེ་དག་གི་རོ་ག་ལ་བ་དེར་གཤེགས་ཏེ་བྱོན་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་བུད་མེད་ལྔ་བརྒྱའི་རོ་འདི་དག་ནི་གང་ལ་བད་སའི་རྒྱལ་པོ་ཤར་པ་ཆགས་པ་དང ། ཞེན་པ་དང །
8.186a
འཆུམས་པ་དང ། མདུད་པ་བོར་བ་དང ། བརྒྱལ་བ་དང ། ལྷག་པར་ཆགས་པ་དང ། ལྷག་པར་ཆགས་ཤིང་འདུག་པ་དག་ཡིན་ན། ད་ནི་འདི་དག་ལ་རྐང་པ་དག་གིས་རེག་པར་ཡང་སུ་ཞིག་བྱེད། ཚིགས་སུ་བཅད་པ་ཡང་བཀའ་སྩལ་པ། འཇིག་རྟེན་སྙིང་པོ་མེད་བྲེལ་ལ། །སྐལ་ལྡན་སུ་ཞིག་ལྟ་བར་བྱེད། །བྱིས་པ་ཉོན་མོངས་བཅིངས་གྱུར་ཅིང ། །མུན་པ་ཡོངས་སུ་བསྐོར་བ་དག་།དམ་པ་མིན་ལ་དམ་པར་ལྟ། །མཐོང་བ་རྣམས་ལ་ཅི་ཡང་མེད། །དགེ་སློང་དག་དེ་ལྟ་བས་ན་ཁྱེད་ཀྱིས་འདི་ལྟར་བསླབ་པར་བྱ་སྟེ། ཀ་བ་ཚིག་པ་གང་ཡིན་པ་ལ་ཡང་སེམས་རབ་ཏུ་སྡང་བར་མི་བྱ་ན། རྣམ་པར་ཤེས་པ་དང་བཅས་པའི་ལུས་ལ་ལྟ་སྨོས་ཀྱང་ཅི་དགོས་ཏེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཀཽ་ཤམྦི་ན་གནས་པ་དང ། ཕོ་བྲང་འཁོར་གྱི་མི་དག་འདུས་ཏེ་གྲོས་བྱ་བར་བརྩམས་པ། ཤེས་ལྡན་དག་རྒྱལ་པོ་ལ་གནོད་པ་འདི་ལྟ་བུ་བྱུང་ན་དེ་བདག་ཅག་ལས་གང་གིས་རྒྱལ་པོ་ལ་བརྗོད་པར་བྱ། དེ་ན་ཁ་ཅིག་གིས་སྨྲས་པ། མི་སྙན་སྨྲ་གང་ཡིན་པ་དེ་རྗོད་དུ་གཞུག་གིས་དེ་བོད་དོ། །གཞན་དག་གིས་སྨྲས་པ། མ་ཉེས་ཀྱིས་དེ་ལྟར་བྱའོ་ཞེས་དེ་དག་གིས་དེ་བོས་ཏེ་སྨྲས་པ། ལྷ་ལ་མི་སྙན་པ་འདི་གོ་རིམས་བཞིན་དུ་གསོལ་ཅིག་།དེས་སྨྲས་པ། དེའི་ཚེ་ཁྱེད་ཅག་ན་རེ་ཅིའི་ཕྱིར་མི་སྙན་སྨྲ་ལ་འཚོ་བ་སྦྱིན་པར་བྱ་ཞེས་ཟེར་ན། ད་དེའི་དུས་འདི་ཡིན་གྱིས་ཁྱེད་ཅག་ཉིད་ཀྱིས་གསོལ་ཅིག་།དེ་དག་གིས་སྨྲས་པ། དེའི་དོན་ཉིད་དུ་ཁྱོད་ལ་འཚོ་བ་བྱིན་པ་ཡིན་ན་གཞན་སུ་ཞིག་གསོལ་བར་བྱེད། ཁྱོད་ཀྱིས་གསོལ་ཅིག་།དེས་སྨྲས་པ། དམ་ཚིག་གིས་གསོལ་བར་བྱ་སྟེ། ཁོ་བོ་ཅི་ཟེར་བ་དེ་བཞིན་གྱིས་ཤིག་དང་གསོལ་བར་བྱའོ། །སྨྲོས་ཤིག་དང ། དེ་བཞིན་བྱའོ། །གོ་རིམས་འདི་ལྟར་གསོལ་བར་བྱ་སྟེ། ཁོ་བོ་ལ་གླང་པོ་ཆེ་ལྔ་བརྒྱ་དང ། བལ་ལང་མོ་ལྔ་བརྒྱ་དང ། རྟ་ལྔ་བརྒྱ་དང ། རྒོད་མ་ལྔ་བརྒྱ་དང ། གཞོན་ནུ་ལྔ་བརྒྱ་དང ། གཞོན་ནུ་མ་ལྔ་བརྒྱ་དང ། གསེར་འབུམ་དང ། རས་ལ་ཀཽ་ཤམྦིའི་གནས་དང ། ཁང་བཟངས་མེ་ཏོག་གི་སོ་དང ། ཇི་ལྟར་མ་དུས་གྲོ་བ་དང ། འབྲུ་མར་དང ། སྣག་ཚ་དང ། སྨྱུ་གུ་དང ། ཤིང་བལ
8.186b
བསྐྱས་ཤིང་གྲོ་བའི་ཁུར་ཕྱི་མའི་ནང་དུ་མེ་བཅུག་པ་དང ། ཇི་ལྟར་སྒོ་ཁང་ལ་མེ་མཆེད་པ་དང ། ཇི་ལྟར་ཀཽ་ཤམྦི་ན་གནས་པའི་སྐྱེ་བོའི་ཚོགས་ཀྱིས་མེ་གསོད་དུ་བརྒྱུགས་པ་ན་མ་དུས་རལ་གྲི་ཤུབས་ནས་ཕྱུང་སྟེ། ཕྱིར་བཟློག་པ་དང ། ཇི་ལྟར་འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་གྱིས་སྒོ་ཁང་ལ་མེ་མཆེད་པ་འཁྲུལ་འཁོར་གྱིས་གནས་གཞན་དུ་སྤོའོ་ཞེས་ཟེར་བ་ན་མ་དུས་དེ་བཞིན་དུ་ཕྱིར་བཟློག་པ་དང ། ཇི་ལྟར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཕྱེ་མ་ལེབ་བཞིན་དུ་གྱེན་དུ་འཆོང་ཞིང་འཆོང་ཞིང་མེར་ལྷུང་བ་དག་རི་མོར་བྲིས་ཏེ་བྱིན་ཅིག་།དེ་དག་གིས་སྨྲས་པ། དེ་ལྟར་བྱའོ་ཞེས་དེ་དག་གིས་དེ་ལ་གླང་པོ་ཆེ་ལྔ་བརྒྱ་དང ། བ་ལང་མོ་ལྔ་བརྒྱ་དང ། རྟ་ལྔ་བརྒྱ་དང ། རྒོད་མ་ལྔ་བརྒྱ་དང ། གཞོན་ནུ་ལྔ་བརྒྱ་དང ། གཞོན་ནུ་མ་ལྔ་བརྒྱ་དང ། གསེར་འབུམ་དང ། རས་ལ་ཀཽ་ཤམྦིའི་གནས་དང ། ཁང་བཟངས་མེ་ཏོག་གི་སོ་དང ། ཇི་ལྟར་མ་དུས་གྲོ་བ་དང ། འབྲུ་མར་དང ། སྣག་ཚ་དང ། སྨྱུ་གུ་དང ། ཤིང་བལ་བསྐྱས་ཤིང་གྲོ་བའི་ཁུར་ཕྱི་མའི་ནང་དུ་མེ་བཅུག་པ་དང ། ཇི་ལྟར་སྒོ་ཁང་ལ་མེ་མཆེད་པ་དང ། ཇི་ལྟར་ཀཽ་ཤམྦི་ན་གནས་པའི་སྐྱེ་བོའི་ཚོགས་ཀྱིས་མེ་གསོད་དུ་བརྒྱུགས་པ་ན་མ་དུས་རལ་གྲི་ཤུབས་ནས་ཕྱུང་སྟེ་ཕྱིར་བཟློག་པ་དང ། ཇི་ལྟར་འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་གྱིས་སྒོ་ཁང་ལ་མེ་མཆེད་པ་འཁྲུལ་འཁོར་གྱིས་གནས་གཞན་དུ་སྤོའོ་ཞེས་ཟེར་བ་ན་མ་དུས་དེ་བཞིན་དུ་ཕྱིར་བཟློག་པ་དང ། ཇི་ལྟར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཕྱེ་མ་ལེབ་བཞིན་དུ་གྱེན་དུ་འཆོང་ཞིང་འཆོང་ཞིང་མེར་ལྷུང་བ་དག་རི་མོར་བྲིས་ཏེ་བྱིན་ནོ། །དེ་ནས་མི་སྙན་སྨྲས་བློན་པོ་རྣམས་ལ་ཡི་གེ་སྤྲིང་སྟེ། རྒྱལ་པོ་ལ་གནོད་པ་འདི་ལྟ་བུ་བྱུང་བ་ཁོ་བོས་ཐབས་འདིས་བརྗོད་པར་བྱས། ཁྱེད་ཀྱིས་གྲོགས་གྱིས་ཤིག་ཅེས་བྱས་སོ། །དེས་དེ་དག་ལ་ཡི་གེ་སྤྲིང་ནས་དཔུང་གི་ཚོགས་ཡན་ལག་བཞི་པ་གོ་བསྐོན་ཏེ་ཕྱོགས་གཞན་ཞིག་ཏུ་སོང་ནས་དེར་བསྡད་དེ། རྒྱལ་པོ་ཤར་པ་ལ་ཕྲིན་ཡིག་འདི་སྐད་ཅེས་ལྷ་བདག་ནི་ཡུལ་ག་གེ་མོ་ཞིག་གི་རྒྱལ་པོ་སྟེ། བདག་གི་བུ་འཆི་བདག་གིས་ཕྲོགས་ནས་དེའི་ཕྱིར་བདག་དེ་དང་ལྷན་ཅིག་གཡུལ་སྤྲོད
8.187a
པར་བྱེད་དེ། གལ་ཏེ་རེ་ཤིག་གཡུལ་སྤྲད་པས་དེ་ཕམ་པར་ནུས་ན་དེ་ལྟ་ན་ལེགས། གལ་ཏེ་མ་ནུས་ན་གླང་པོ་ཆེ་ལྔ་བརྒྱ་དང ། བ་ལང་མོ་ལྔ་བརྒྱ་དང ། རྟ་ལྔ་བརྒྱ་དང ། རྒོད་མ་ལྔ་བརྒྱ་དང ། གཞོན་ནུ་ལྔ་བརྒྱ་དང ། གཞོན་ནུ་མ་ལྔ་བརྒྱ་དང ། གསེར་འབུམ་ཕུལ་ནས་བུ་བླངས་ཏེ་འོང་ངོ་ཞེས་བྲིས་ཏེ་བསྐུར་རོ། །རྒྱལ་པོ་ཤར་པའི་རི་བྲགས་པ་དེ་དཔུང་དང་ལྡན་པས་མ་ཕེབས་ནས། དེས་བློན་པོ་རྣམས་ལ་སྨྲས་པ་ཤེས་ལྡན་དག་རྒྱལ་པོ་དེ་འདི་ལྟར་བླུན་པ་ལ་ལྟོས། འཆི་བདག་གིས་བུ་ཕྲོགས་པ་ཕྱིར་ཁྲུགས་པར་ནུས་པ་འགའ་ཡང་ཡོད་རེ་སྐན། དེ་ནི་མཇལ་གྱིས་དེ་ལ་ཕྲིན་ཡིག་འདི་སྐད་ཅེས་ཁོ་བོའི་རི་བྲགས་པ་ཞིག་ལོག་པ་མ་ཕེབས་ཀྱིས་ཇེ་ཁོ་བོའི་གྲོགས་གྱིས་ཤིག་དང ། ཁོ་བོས་ཀྱང་ཕྱིས་ཁྱོད་ཀྱི་གྲོགས་བྱའོ་ཞེས་བྲིས་ཏེ་སྐུར་ཅིག་།བློན་པོ་རྣམས་ཀྱིས་དེ་ལ་ཕྲིན་ཡིག་དེ་སྐད་ཅེས་བྲིས་ཏེ་བསྐུར་བ་དང ། དེས་ཕྲིན་ཡིག་བླགས་ནས་བླགས་མ་ཐག་ཏུ་རི་བྲགས་དེར་འོངས་ནས་དེ་ཧ་ཅང་ཐག་མི་རིང་བ་ཞིག་ན་འདུག་པ་དང ། རི་བྲགས་པ་དག་གིས་ཐོས་ནས་བསམས་པ། བདག་ཅག་རྒྱལ་པོ་དག་གིས་ཕྱོགས་བཅུ་དག་ནས་བསྐོར་བར་ཆད་དེ། རྒྱལ་པོ་གཉིས་པ་འདི་ཡང་ཉེ་བར་འོངས་ཀྱིས་ཡུལ་ནི་རྣམ་པ་ཐམས་ཅད་དུ་ཕྱིར་འཐོབ་པར་ཡང་རུང་གི། སྲོག་ནི་ཕྱིར་འཐོབ་པར་མི་རུང་གིས་ཕྱིར་འབྱུང་ངོ་སྙམ་ནས། དེ་དག་རལ་གྲི་མགུལ་ནས་ཕོག་སྟེ་ཕྱིར་བྱུང་ནས། རྒྱལ་པོ་ཤར་པའི་རྐང་པ་གཉིས་ལ་གཏུགས་པ་དང ། རྒྱལ་པོ་ཤར་པས་དེ་དག་ལོ་ཐང་དང ། དཔྱ་འཇལ་དུ་བཅུག་གོ། །དེ་ནས་མི་སྙན་སྨྲ་རྒྱལ་པོའི་ཡོ་ལང་གིས་རྒྱལ་པོ་ཤར་པའི་གན་དུ་སོང་སྟེ་སྨྲས་པ། ལྷ་བདག་གི་བུ་འཆི་བདག་གིས་ཕྲོགས་ཏེ་ལྷས་བདག་གི་གྲོགས་གྱིས་ཤིག་དང ། བདག་དེ་དང་ལྷན་ཅིག་གཡུལ་སྤྲོད་པར་བྱེད་དོ། །གལ་ཏེ་རེ་ཤིག་གཡུལ་སྤྲད་པས་དེ་ཕམ་པར་ནུས་ན་དེ་ལྟ་ན་ལེགས། གལ་ཏེ་མ་ནུས་ན་དེ་ལ་གླང་པོ་ལྔ་བརྒྱ་དང ། བལ་ལང་མོ་ལྔ་བརྒྱ་དང ། རྟ་ལྔ་བརྒྱ་དང ། རྒོད་མ་ལྔ་བརྒྱ་དང ། གཞོན་ནུ་ལྔ་བརྒྱ་དང ། གཞོན་ནུ་མ་ལྔ་བརྒྱ་དང ། གསེར་འབུམ་ཕུལ་ཏེ་བླང་བར་བྱའོ། །རྒྱལ་པོ་ཤར་པས
8.187b
སྨྲས་པ། ཤེད་འཐུན་ཁྱོད་གླེན་པ་ཞིག་སྟེ། འཆི་བདག་ལས་ཕྱིར་ལེན་པར་ནུས་པ་འགའ་ཡང་ཡོད་རེ་སྐན། དེས་སྨྲས་པ། ལྷ་མི་ནུས་སམ། མི་ནུས་སོ། །གལ་ཏེ་དེ་ལྟ་ན་རི་མོ་འདི་ལྟོས་ཤིག་།དེས་རི་མོ་བརྐྱང་སྟེ། རྒྱལ་པོས་རི་མོ་བརྟགས་ནས་གནད་དུ་བསྣུན་པ་དང་འདྲ་བར་གདུང་བཞིན་དུ་སྨྲས་པ། ཀྱེ་ཇི་སྐད་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་མེས་ཚིག་ཅེས་ཟེར་རམ། དེས་ཅོད་པན་དང ། ཐོར་ཚུགས་ཕོག་སྟེ་ཚིགས་སུ་བཅད་པ་སྨྲས་པ། བདག་ནི་རྒྱལ་པོ་མ་ལགས་རྒྱལ་སྲིད་མིན། །ལྷ་ཁྱོད་ཞབས་འབྲིང་ཞབས་ཀྱིས་འཚོ་བ་སྟེ། །མི་སྙན་དོན་འདི་ཁྱོད་ལ་གསོལ་སླད་དུ། །བདག་འདིར་ཁྱོད་ཀྱི་ཞབས་ཀྱི་དྲུང་དུ་མཆིས། །རྒྱལ་པོ་ཤིན་ཏུ་བརྟགས་ནས་འདི་ནི་གྲོང་ཁྱེར་ཀཽ་ཤམྦིའོ། །འདི་ནི་རྒྱལ་པོའི་ཕོ་བྲང་ངོ ། །འདི་ནི་ཁང་བཟངས་མེ་ཏོག་གི་སོའོ། །འདི་ནི་མ་དུའོ། །འདི་ནི་གྲོ་བ་ལ་སོགས་པའི་སྦྱོར་བས་སྲེག་པའོ། །འདི་དག་ནི་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཕྱེ་མ་ལེབ་བཞིན་དུ་གྱེན་དུ་འཆོང་ཞིང་འཆོང་ཞིང་མེར་ལྷུང་བ་དག་གོ་ཞེས་རྣམ་པར་དཔྱོད་པར་བྱེད་དོ། །རྣམ་པར་དཔྱད་ནས་སྨྲས་པ། ཀཝའི་ནང་རྗེ་ཇི་སྐད་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་མེས་ཚིག་ཅེས་ཟེར་རམ། ལྷ་བདག་དེ་སྐད་མི་མཆིའོ། །འདི་ལྟར་ལྷ་ཉིད་དེ་སྐད་གསུང་ངོ ། །ཀཝའི་ནང་རྗེ་ཁྱོད་ཀྱིས་ང་ལ་ཐབས་ཀྱིས་གསོལ་བར་ཟད་ཀྱི་གཞན་དུ་ན་ངས་ཁྱོད་ཀྱི་མགོ་དྲུང་པ་ནས་བཅད་དེ། ས་ལ་བསྒྱེལ་བར་འགྱུར་རོ་ཞེས་སྨྲས་ནས། རྒྱལ་པོ་བརྒྱལ་ཏེ་ས་ལ་སྒྱེལ་ཏོ། །དེ་ནས་ཆུས་གདབ་པས་དབུགས་ཕྱིར་བྱུང་ནས་སྨྲས་པ། ཤེས་ལྡན་དག་དཔུང་གི་ཚོགས་ཡན་ལག་བཞི་པ་གོ་སྐོན་ཅིག་།ཀཽ་ཤམྦིར་འདོང་ངོ ། །བློན་པོ་རྣམས་ཀྱིས་དཔུང་གི་ཚོགས་ཡན་ལག་བཞི་པོ་གོ་བསྐོན་ནས་རྒྱལ་པོ་ཀཽ་ཤམྦིར་འཕགས་ཏེ་མཐར་གྱིས་ཀཽ་ཤམྦིར་ཕྱིན་པ་དང ། དེས་ཕོ་བྲང་འཁོར་གྱི་མི་རྣམས་ཀྱི་ནང་ན་ཆེས་རྒྱུས་མཁས་པ་ཐམས་ཅད་སྨྲས་སོ། །དེ་ནས་བློན་པོའི་མཆོག་སྦྱོར་བ་འཛིན་ལ་བསྒོ་བ། སྦྱོར་བ་འཛིན་སོང་ལ་མ་དུ་རྒྱ་སྐྱེགས་ཀྱི་ཁང་པར་ཆུག་ལ་སྲེགས་ཤིག་།དཔེ་མེད་མ་ཡང་རྟེའུ་མ་དུལ་བའི
8.188a
རྐང་པ་ལ་ཐོགས་ལ་འོར་ཅིག་།སྦྱོར་བ་འཛིན་གྱིས་མ་དུ་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །དེ་ནས་བསམས་པ། དཔེ་མེད་མ་ནི་གལ་ཏེ་རྒྱལ་པོས་བསམས་ནས་དཔེ་མེད་མ་འོན་ཅིག་ཅེས་ཟེར་ན་བདག་གིས་ཇི་ལྟར་བྱས། རེ་ཤིག་སྡོད་ཅིག་སྙམ་ནས་དེས་དཔེ་མེད་མ་ས་ཁང་དུ་བཅུག་སྟེ་བཞག་གོ། །རྒྱལ་པོ་ཉི་མ་བདུན་པ་ལ་མྱ་ངན་སངས་ནས་དེ་མྱ་ངན་སངས་པས་སྨྲས་པ། སྦྱོར་བ་འཛིན་དཔེ་མེད་མ་ག་རེ། དེས་ལྷ་བདག་གིས་རྟེའུ་མ་ཐུལ་བའི་རྐང་པ་ལ་བཏགས་ཏེ་བོར་རོ། །རྒྱལ་པོས་སྨྲས་པ། མ་ཉེས་སོ། །མ་དུས་ནི་སྔོ་བསངས་ཅན་བསད་ལ། ཁྱོད་ཀྱིས་ཀྱང་དཔེ་མེད་མ་བསད་ཀྱིས་ད་ང་རབ་ཏུ་འབྱུང་བར་བྱའོ། །སྦྱོར་བ་འཛིན་གྱིས་སྨྲས་པ། ལྷ་དེ་ཉིད་ཀྱི་སླད་དུ་བདག་གིས་དཔེ་མེད་མ་ས་ཁང་དུ་སྩལ་ཏེ་བཞག་གོ། །གལ་ཏེ་གསོན་ན་བལྟའོ། །དེས་དེ་ས་ཁང་ནས་ཕྱུང་བ་དང ། གནས་སྐབས་དེ་ཁོ་ན་བཞིན་དུ་ཉོན་མོངས་པ་ཅན་མ་ཡིན་པ་དང ། ལུས་མ་རྙིས་པར་འདུག་གོ། །རྒྱལ་པོས་མཐོང་ནས་བསམས་པ། ཇི་ལྟར་འདི་གནས་སྐབས་དེ་ཁོ་ན་བཞིན་དུ་ཉོན་མོངས་ཅན་མ་ཡིན་པ་དང ། ལུས་མ་རྙིས་པར་འདུག་ལ། ན་ཡང་མི་ན། ཟས་ཀྱང་མི་ཟ་བ་ལས་ན་གོར་མ་ཆག་པར་སྐྱེས་པ་གཞན་དང་ལྷན་ཅིག་དགའ་མགུར་སྤྱད་དོ་སྙམ་དུ་རིག་ནས་སྨྲས་པ། དཔེ་མེད་མ་ཁྱོད་ཀྱིས་འཁྲུལ་པ་བྱས་སོ། །དེས་སྨྲས་པ། ལྷ་སྡིག་པ་ཅི་ཞིག་།བདག་དེ་ལྟར་མི་བགྱིད་དོ། །ཅི་མངོན། ལྷ་ཁྱོད་བཅོམ་ལྡན་འདས་ལ་མངོན་པར་དད་དམ། རྒྱལ་པོས་སྨྲས་པ། དེ་ནི་མཇལ་ཏེ། ཁྱོད་དེའི་ཚེ་ན་ནི་དགེ་སྦྱོང་གཽ་ཏ་མ་ཞེས་ཟེར་ལ། ད་ནི་བཅོམ་ལྡན་འདས་ཞེས་ཟེར་མོད། འདི་ལྟར་ང་རོ་དང་འདྲ་བ་ཁྱོད་ཀྱི་ཕྱིར་བཅོམ་ལྡན་འདས་ལ་མི་ཞུའི། སྔོ་བསངས་ཅན་གྱི་དོན་དུ་བཅོམ་ལྡན་འདས་ལ་ཞུའོ་ཞེས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་བད་སའི་རྒྱལ་པོ་ཤར་པས་འདི་སྐད་ཅེས་གསོལ་ཏོ། །བཙུན་པ་སྔོ་བསངས་ཅན་ལ་སོགས་པ་བུད་མེད་ལྔ་བརྒྱས་ལས་ཅི་བགྱིས་ན། དེས་ཞུགས་ཀྱིས་གྲལ་ཅིང ། སྒུར་མཆོག་ནི
8.188b
ཆབ་ཀྱི་སྟོར་ཁུང་ནས་བྲོས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང ། འཐབ་པ་དང ། ཕྱི་དགྲ་དང ། ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང ། ནད་དང་བྲལ་བ། ས་ལུ་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ་དང ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་ན་རང་སངས་རྒྱས་ཞིག་ལྗོངས་རྒྱུ་ཞིང་འགྲོ་བ་ན་བཱ་རཱ་ཎ་སཱིར་ཕྱིན་ནས་དེ་སྐྱེད་མོས་ཚལ་ཞིག་ན་སྤྱིལ་བུ་ན་གནས་སོ། །རྒྱལ་པོ་ཚངས་བྱིན་གྱི་བཙུན་མོའི་འཁོར་ལྔ་བརྒྱ་སྐྱེད་མོས་ཚལ་དེར་བྱུང་ནས། བཙུན་མོའི་འཁོར་དེ་དག་རྩེད་མོའི་རྫིང་དུ་ཁྲུས་བྱས་ནས་གྲང་བས་སྦྲེབས་ནས། དེ་ན་བཙུན་མོ་དམ་པས་བུ་མོ་མངག་གཞུག་མ་ལ་སྨྲས་པ། བུ་མོ་ཤིན་དུ་གྲང་བས་སྦྲེབས་ཀྱིས་སོང་ལ། སྤྱིལ
8.189a
བུ་འདི་ལ་མེ་ཐོང་ཤིག་།དེས་སྒྲོན་མེ་སྦར་ཏེ་སོང་བ་དང ། རང་སངས་རྒྱས་དེ་མཐོང་ནས་དེས་བཙུན་མོའི་མཆོག་ལ་སྨྲས་པ། ལྷ་མོ་འདི་ན་རབ་ཏུ་བྱུང་བ་ཞིག་མཆིས་སོ། །དེས་སྨྲས་པ་རབ་ཏུ་བྱུང་བ་འདུག་ཀྱང་རུང ། གཞན་འདུག་ཀྱང་རུང་གིས་མེ་ཐོང་ཤིག་།དེས་མ་བཏང་བར་བྲོས་པ་དང ། དེ་ནས་བཙུན་མོའི་མཆོག་དེ་འཁྲུགས་ནས་དེ་རང་གིས་མེ་བཏང་བ་དང ། རང་སངས་རྒྱས་དེ་ཕྱིར་བྱུང་ངོ ། །བཙུན་མོའི་འཁོར་གཞན་དག་གིས་ཀྱང་ལྷ་མོ་ཁྱོད་ཀྱིས་ཞུགས་བཏང་བ་ལེགས་པ་བགྱིས་ཏེ་བདག་ཅག་ཐམས་ཅད་ཞུགས་འདེའོ་ཞེས་རྗེས་སུ་ཡི་རང་བ་བྱས་སོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། བཙུན་མོའི་འཁོར་ཉོན་མོངས་པ་འདི་དག་ཧ་ཅང་སྨས་པ་དང ། ཉམས་པར་གྱུར་ན་མི་རུང་གིས་འདི་དག་ལ་ལག་ནས་དྲང་བ་སྦྱིན་ནོ་སྙམ་ནས། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབ་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་བཙུན་མོའི་འཁོར་དེ་དག་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པའི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་ཅག་གི་སུག་པ་ནས་དྲང་པ་སྩལ་དུ་གསོལ། རང་སངས་རྒྱས་དེ་བཙུན་མོའི་འཁོར་དེ་དག་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་དག་གིས་དེ་ལ་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཅག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པར་བྱས་པ་གང་ཡིན་པའི་ལས་དེའི་ཆ་དང་འཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཅག་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང ། ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །རྒྱལ་པོ་ཆེན་པོ
8.189b
དེའི་ཚེ་དེའི་དུས་ན་རྒྱལ་པོ་ཚངས་བྱིན་གྱི་བཙུན་མོ་དམ་པ་གང་ཡིན་པ་དེ་ནི་སྔོ་བསངས་ཅན་འདི་ཡིན་ནོ། །དེའི་ཚེ་དེའི་དུས་ན་བུད་མེད་གཞན་བཞི་བརྒྱ་དགུ་བཅུ་རྩ་དགུ་པོ་གང་དག་ཡིན་པ་དེ་དག་ནི་བུད་མེད་བཞི་བརྒྱ་དགུ་བཅུ་རྩ་དགུ་པོ་འདི་དག་ཡིན་ནོ། །དེའི་ཚེ་དེའི་དུས་ན་བུ་མོ་མངག་གཞུག་མ་གང་ཡིན་པ་དེ་ནི་སྒུར་མཆོག་འདི་ཡིན་ནོ། །དེ་དག་གིས་རང་སངས་རྒྱས་ཀྱི་སྤྱིལ་བུ་བསྲེགས་ཤིང་རྗེས་སུ་ཡི་རང་བ་བྱས་པ་གང་ཡིན་པའི་ལས་དེའི་རྣམ་པར་སྨིན་པས་ལོ་མང་པོ་དག་ཏུ་སེམས་ཅན་དམྱལ་བ་ཆེན་པོ་རྣམས་སུ་བསྲེགས་ནས་ད་ལྟར་བདེན་པ་མཐོང་གི་བར་དུ་ཡང་མེས་ཚིག་པར་གྱུར་ཏོ། །སྒུར་མཆོག་མེ་གཏོང་དུ་མ་བཏུབས་པས་ནི་ད་ལྟར་ཆུའི་སྟོར་ཁུང་ནས་བྲོས་པར་གྱུར་ཏོ། །དེ་དག་གིས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ངའི་དྲུང་དུ་བདེན་པ་མཐོང་བར་བྱས་ཤིང ། དེ་དག་གིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །རྒྱལ་པོ་ཆེན་པོ་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །རྒྱལ་པོ་ཆེན་པོ་དེ་ལྟ་བས་ན་ལས་གཅིག་ཏུ་གནག་པ་རྣམས་དང ། འདྲེན་མ་རྣམས་སྤངས་ནས་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། རྒྱལ་པོ་ཆེན་པོ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ནས་བད་སའི་རྒྱལ་པོ་ཤར་པས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། ་་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་བརྒྱད་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྒུར
8.190a
མཆོག་གིས་ལས་ཅི་བགྱིས་ན་དེས་ན་སྒུར་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒུར་མཆོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། དེ་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང ། འཐབ་པ་དང ། ཕྱི་དགྲ་དང ། ནང་འཁྲུག་རབ་ཏུ་ཞི་བ། ཆོམ་རྐུན་དང ། མུ་གེ་དང་ནད་དང་བྲལ་བ། ས་ལུ་དང་བུ་རམ་ཤིང་གི་ཕྲེང་བ་དང་བ་ལང་དང་མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །ཇི་ཙམ་དུས་གཞན་ཞིག་ན་ལྟས་པ་དག་གིས་ལོ་བཅུ་གཉིས་སུ་ཆར་མི་འབབ་པར་ལུང་བསྟན་ནས། རྒྱལ་པོ་ཚངས་བྱིན་གྱིས་བཱ་རཱ་ཎ་སཱིར་དྲིལ་བསྒྲག་པ་བྱེད་དུ་བཅུག་སྟེ། འདི་སྐད་ཅེས་གང་ལ་ལོ་བཅུ་གཉིས་ཀྱི་ཟན་ཡོད་པ་དེས་ནི་གནས་པར་བྱའོ། །གང་ལ་མེད་པ་དེས་ནི་གཞན་དུ་འགྲོ་བར་བྱ་ཞིང་ལོ་བཅུ་གཉིས་འདས་ནས་ཕྱིར་ཡང་འོང་བར་བྱའོ་ཞེས་བསྒོའོ། །དེའི་ཚེ་བཱ་རཱ་ཎ་སཱི་ན་ཁྱིམ་བདག་གཟུངས་བྱེད་ཅེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་མཛོད་པ་བོས་ཏེ་སྨྲས་པ། ཀཝའི་ནང་རྗེ་མཛོད་པ
8.190b
ཁོ་བོ་འཁོར་དང་བཅས་པའི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ་བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་ན་རང་སངས་རྒྱས་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཇེ་མཛོད་པ་ལ་རྨས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་བོས་ཏེ་སྨྲས་པ་ཀཝའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང ། རབ་ཏུ་བྱུང་བ་ལྔ་བརྒྱ་པོ་འདི་དག་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །ཁྱིམ་བདག་གཟུངས་བྱེད་ཀྱིས་རང་སངས་རྒྱས་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་དེ་ཉིད་དུ་འཁོད་དོ། །ཇི་ཙམ་ན་རང་སངས་རྒྱས་གཞན་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཀྱང་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཁྱེད་ཅག་ལ་གསོལ་ལགས་ན་ཅིའི་སླད་དུ་ཡང་སྒྲུབ་པར་མཛད། ཁྱིམ་བདག་དེ་དག་ཀྱང་གཞན་ལ་ཁོ་བོ་ཅག་ཀྱང་གཞན་ནོ། །འཕགས་པ་དག་ཇེ་མཛོད་པ་ལ་རྨས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་བོས་ཏེ་སྨྲས་པ། ཀཝའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང ། རབ་ཏུ་བྱུང་བ་སྟོང་པོ་འདི་དག་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །དེས་རབ་ཏུ་བྱུང་བ་གཞན་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་ཀྱང་དེར་འཁོད་དོ། །དེས་སྦྱིན་པའི་ཁང་པ་རྩིག་ཏུ་བཅུག་སྟེ། དེས་སྦྱིན་པའི་ཞལ་ཏ་པའི་མི་དང་སྤྱན་འདྲེན་ཡང་བསྐོས
8.191a
སོ། །དེར་ཉི་མ་རེ་རེ་ཞིང་རང་སངས་རྒྱས་སྟོང་སྟོང་ཟན་ཟའོ། །དེ་ན་རང་སངས་རྒྱས་གཅིག་ན་བར་གྱུར་ནས་དེ་དེའི་ཉིན་མོ་མ་འོངས་པ་དང ། ཁྱིམ་བདག་གཟུངས་བྱེད་ལ་བུ་མོས་སྨྲས་པ། ་ཡབ་དེང་རབ་ཏུ་བྱུང་བ་གཅིག་མ་མཆིས་སོ། །དེས་སྨྲས་པ། བུ་མོ་ཇི་ལྟ་བུ་ཞིག་།དེས་རྒྱབ་བཏུད་དེ་སྨྲས་པ། ཡབ་འདི་ལྟ་བུ་ཞིག་གོ། །དགེ་སློང་དག་དེའི་ཚེ་དེའི་དུས་ན་ཁྱིམ་བདག་གཟུངས་བྱེད་ཀྱི་བུ་མོ་གང་ཡིན་པ་དེ་ནི་སྒུར་མཆོག་འདི་ཡིན་ཏེ། འདིས་རང་སངས་རྒྱས་ལ་ཐོ་བརྩམས་པ་གང་ཡིན་པའི་ལས་དེའི་རྣམ་པར་སྨིན་པས་སྒུར་བར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྒུར་མཆོག་གིས་ལས་ཅི་བགྱིས་ན་དེས་ན་ཐོས་པ་འཛིན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒུར་མཆོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་ཁྱིམ་བདག་གཟུངས་བྱེད་ཀྱི་སྦྱིན་གནས་རང་སངས་རྒྱས་སྟོང་པོ་དེ་དག་ཉིད་ཀྱི་དགེ་འདུན་གྱི་གནས་བརྟན་གང་ཡིན་པ་དེ་རླུང་ནད་ཅན་ཡིན་པས་དེ་ལག་པ་འདར་བས་ཟན་ཟ་བ་ན་ལྷུང་བཟེད་འགུལ་ནས་གཟུངས་བྱེད་ཀྱི་བུ་མོ་དེས་རང་གི་ལག་པ་ལས་གདུ་བུ་རྒྱན་ཅན་ཕུད་དེ་རང་སངས་རྒྱས་དེ་ལ་ཕུལ་ཏེ་སྨྲས་པ། འཕགས་པ་འདིའི་སྟེང་དུ་ལྷུང་བཟེད་བཞག་ཏུ་གསོལ། དེས་དེའི་སྟེང་དུ་ལྷུང་བཟེད་བཞག་པ་དང ། མི
8.191b
གཡོ་བ་ཉིད་དུ་འདུག་ནས། དེས་དེའི་རྐང་པ་གཉིས་ལ་གཏུགས་ཏེ་སྨོན་ལམ་བཏབ་པ། ཇི་ལྟར་ལྷུང་བཟེད་འདི་མི་གཡོ་བར་འདུག་པ་དེ་བཞིན་དུ་བདག་གི་རྒྱུད་ལ་ཆོས་གང་དག་ཞུགས་པ་དེ་དག་ཀྱང་མི་གཡོ་བ་ཉིད་དུ་གྱུར་ཅིག་ཅེས་བཏབ་བོ། །ལས་དེའི་རྣམ་པར་སྨིན་པས་འདི་ད་ལྟར་ཐོས་པ་འཛིན་པར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྒུར་མཆོག་གིས་ལས་ཅི་བགྱིས་ན་དེས་བྲན་མོར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒུར་མཆོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་དེ་ཉིད་ན་འདི་དབང་ཕྱུག་གི་དྲེགས་པས་རྒྱགས་པས་འཁོར་གྱི་མི་རྣམས་ལ་བྲན་གྱི་ཚིག་གིས་ཀུན་དུ་སྤྱད་པས་ལས་དེའི་རྣམ་པར་སྨིན་པས་ད་ལྟར་བྲན་མོར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དཔེ་མེད་མས་ལས་ཅི་བགྱིས་ན་དེས་གདུགས་བདུན་དུ་ཟན་མ་མཆིས་པར་ས་ཁང་དུ་སྩལ་ཅིང་ཉོན་མོངས་པ་ཅན་མ་ལགས་པ་དང ། ལུས་མ་རྙིས་པར་ཕྱུང་བར་གྱུར། ་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དཔེ་མེད་མ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར
8.192a
མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི་འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་རྒྱལ་རིགས་ཀྱི་བུ་མོ་ཞིག་དང ། བྲམ་ཟེའི་བུ་མོ་ཕན་ཚུན་བཤེས་པ་གཉིས་ཤིག་འཁོད་དོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་དུ་ན་རང་སངས་རྒྱས་ཤིག་ས་ཕྱོགས་ཞི་བ་ཞིག་ཏུ་མཚན་མོ་གནས་པར་ཁས་བླངས་ནས་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་པ་དང ། རྒྱལ་རིགས་ཀྱི་བུ་མོ་དེས་དེའི་ཉིན་མོ་དེ་ལ་བསོད་སྙོམས་བྱིན་ཏོ། །དེ་བཞིན་དུ་ཉི་མ་གཉིས་པ་དང ། གསུམ་པ་དང ། ཉིན་གཅིག་མི་ཆད་པར་ཡང་དེ་ལ་བསོད་སྙོམས་སྦྱིན་པར་བརྩམས་སོ། །རྒྱལ་རིགས་ཀྱི་བུ་མོ་དེ་དུས་གཞན་ཞིག་ན་བྲམ་ཟེའི་བུ་མོ་དེས་མགྲོན་དུ་བོས་ནས་དེའི་ཁྱིམ་དུ་སོང་བ་དང ། རང་སངས་རྒྱས་དེ་ཡང་བསོད་སྙོམས་ལ་རྒྱུ་ཞིང་རྒྱལ་རིགས་ཀྱི་བུ་མོ་དེའི་ཁྱིམ་དུ་ཞུགས་པ་ན་དེ་མེད་ནས། མཐར་གྱིས་བྲམ་ཟེའི་བུ་མོ་དེའི་ཁྱིམ་དུ་ཞུགས་པ་དང ། རྒྱལ་རིགས་ཀྱི་བུ་མོ་དེས་མཐོང་ནས་དེས་བྲམ་ཟེའི་བུ་མོ་དེ་ལ་སྨྲས་པ། བུ་མོ་འཕགས་པ་འདི་ལ་བསོད་སྙོམས་ཕུལ་ཅིག་།དེས་སྨྲས་པ། ཇི་སྲིད་དུ་ལྷ་དང ། བྲམ་ཟེ་དང ། སྙིང་དུ་སྡུག་ཅིང་འབྲེལ་བའི་རྩ་ལག་དག་ལ་མ་ཕུལ་གྱི་བར་དུ་དགེ་སྦྱོང་མགོ་རེག་འདི་ལ་ག་ལ་སྦྱིན། དེས་སྨྲས་པ། ནུ་མོ་གལ་ཏེ་དེ་ལྟ་ན་ཁོ་མོ་རེ་ཤིག་འདི་ལ་བསོད་སྙོམས་འབུལ་དུ་འགྲོས་ཕུལ་ནས་ཕྱིར་འོང་ངོ ། །དེས་སྨྲས་པ།
8.192b
ཆེ་གེ་གལ་ཏེ་དེ་ལྟ་ན་འདུག་ཤིག་དང ། བདག་གིས་འདི་ལ་བསོད་སྙོམས་དབུལ་ལོ། །དེས་དེ་ལ་བསོད་སྙོམས་ཕུལ་ནས་སྨོན་ལམ་ལོག་པ་བཏབ་སྟེ། བདག་གིས་དགེ་སྦྱོང་མགོ་རེག་འདི་ལ་བསོད་སྙོམས་ཕུལ་བ་གང་ཡིན་པ་འདི་དག་ལ་འཇིག་རྟེན་འདིར་ཡང་རྣམ་པར་སྨིན་པར་མ་གྱུར་ལ། འཇིག་རྟེན་ཕ་རོལ་དུ་ཡང་རྣམ་པར་སྨིན་པར་མ་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་བྲམ་ཟེའི་བུ་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། འདིས་རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་ལོག་པ་འདི་སྐད་ཅེས་བདག་གིས་དགེ་སྦྱོང་མགོ་རེག་འདི་ལ་བསོད་སྙོམས་ཕུལ་བ་གང་ཡིན་པ་འདི་འཇིག་རྟེན་འདིར་ཡང་རྣམ་པར་སྨིན་པར་མ་གྱུར་ལ། འཇིག་རྟེན་ཕ་རོལ་དུ་ཡང་རྣམ་པར་སྨིན་པར་མ་གྱུར་ཅིག་ཅེས་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་འདི་ཉི་མ་བདུན་དུ་ཟན་མེད་པར་ས་ཁང་དུ་བཅུག་ཅིང་ཉོན་མོངས་པ་ཅན་མ་ཡིན་པ་དང་ལུས་མ་རྙིས་པར་ཕྱུང་ངོ ། །དུས་གཞན་ཞིག་ན་མགུ་བྱེད་རྒས་པར་གྱུར་ནས་དེས་འཆི་བའི་དུས་ཀྱི་ཚེ་སྨོན་ལམ་བཏབ་པ། བདག་གིས་དགེ་སློང་གི་དགེ་འདུན་ལ་ཇི་སྲིད་འཚོའི་བར་དུ་བསྙེན་བཀུར་བྱས་པའི་དགེ་བའི་རྩ་བ་གང་ཡིན་པ་འདིས་བདག་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེ་ཞིང་སྔོ་བསངས་ཅན་གྱི་མཆུ་ཞེང་ཅི་འདྲ་བ་དེ་ལྟ་བུ་བདག་ཀྱང་གྱུར་ཏེ། བད་སའི་རྒྱལ་པོ་ཤར་པ་བདག་གི་ཁྱིམ་ཐབ་ཏུ་གྱུར་ཅིག་ཅེས་བཏབ་བོ། །དེ་ཤི་ཞིང་དུས་ལ་བབ་ནས་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེས་སོ། །གང་གི་ཉིན་མོ་སྐྱེས་པ་དེ་ཉིད་ཀྱི་ཉིན་མོ་ཁྱིམ་དེ་དཔལ་དག་གིས་སྣང་བར་གྱུར་ཏོ། །དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་བུ་མོ་གཟུགས་བཟང་བ། བལྟ་ན་སྡུག་པ་མཛེས་པ་ཞིག་བྱུང་ངོ ། །བྱུང་མ་ཐག་ཏུ་ཡང་དེས་ཕའི་ཁྱིམ་རྒྱ་ཆེར་དཔལ་དག་གིས་སྣང་བར་གྱུར་ཏོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཤེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། གང་གི་ཕྱིར་བུ་མོ་འདི་གང་གི་ཉིན་མོ་མའི་མངལ་དུ་ཞུགས་པ་དེ་ཉིད་ཀྱི་ཉིན་མོ་ཁྱིམ་དེ་དཔལ་དག་གིས
8.193a
སྣང་བར་གྱུར་ལ། བཙས་པ་ན་ཡང་འདིས་ཕའི་ཁྱིམ་རྒྱ་ཆེར་དཔལ་དག་གིས་སྣང་བར་གྱུར་པ་དེའི་ཕྱིར་བུ་མོ་འདིའི་མིང་དཔལ་ལྡན་དུ་གདགས་སོ་ཞེས་དེའི་མིང་དཔལ་ལྡན་ཞེས་བྱ་བར་བཏགས་སོ། །གང་གི་ཚེ་དེ་སྨྲ་ཤེས་པར་གྱུར་པ་དེའི་ཚེ་ན་དགེ་སློང་གང་དག་ཁྱིམ་དེར་བསོད་སྙོམས་ལ་ཞུགས་པ་དེ་དག་གི་གན་དུ་སོང་སྟེ། རྐང་པ་ལ་ཕྱག་འཚལ་ནས་སྙུན་གསོལ་བར་བྱེད་དོ། །ཇི་ཙམ་ན་ཚེ་དང་ལྡན་པ་ཀུན་དགའ་བོ་དེར་བསོད་སྙོམས་ལ་ཞུགས་པ་དང ། དེ་དེའི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། བཙུན་པ་ཀུན་དགའ་བོ་ཇི་ལྟར་བཅོམ་ལྡན་འདས་དང ། ་དགེ་སློང་གནས་བརྟན་གནས་བརྟན་ཆེ་གེ་མོ་དག་གནོད་པ་ཆུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་ལྡན་ནམ། བདེ་འམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ། དེས་སྨྲས་པ། སྲིང་མོ་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་ཆེ་གེ་མོ་དག་གནོད་པ་ཆུང ། ཉམ་ང་བ་ཉུང ། བསྐྱོད་པ་ཡང ། འཚོ་བ་སྟོབས་དང་ལྡན། བདེ། ཁ་ན་མ་ཐོ་བ་མེད། བདེ་བ་ལ་རེག་པར་གནས་སོ། །དེ་སྨྲས་པའི་ཚིག་ཐོས་ནས་ཁྱིམ་བདག་གདངས་ཅན་གྱི་ནང་མི་དག་མཆོག་ཏུ་ངོ་མཚར་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཨ་རོག་ཁྱ་ཞེས་བྱས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་གསོལ་པ། བཅོམ་ལྡན་འདས་ཁྱིམ་བདག་གདངས་ཅན་གྱི་བུ་མོ་བྱིས་པ་ཞིག་།བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་དག་ལ་སྙུན་གསོལ་ཞིང ། ཁྱིམ་བདག་གདངས་ཅན་གྱི་ནང་མི་དག་གིས་དེ་ཐོས་ནས་མཆོག་ཏུ་ངོ་མཚར་སྐྱེས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་བུ་མོ་དེ་མི་ཤེས་སམ། བཅོམ་ལྡན་འདས་མ་འཚལ་ཏོ། །ཀུན་དགའ་བོ་དེ་ནི་མགུ་བྱེད་ཡིན་ཏེ། སྨོན་ལམ་གྱི་དབང་གིས་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེས་ཏེ་ད་ལྟར་བུ་མོ་དཔལ་ལྡན་ཞེས་བྱའོ། །གང་གི
8.193b
ཚེ་དཔལ་ལྡན་ཆེན་མོར་གྱུར་པ་དེའི་ཚེ་ན་དེ་སློང་བ་རྒྱལ་པོ་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་དང ། ཀྲོའུ་དྱ་དག་དང ། ཤཱཀྱ་དག་དང ། ལི་ཙ་བི་དག་དང ། གཞན་ཡང་མང་པོ་དག་འོང་བར་བརྩམས་སོ། །ཁྱིམ་བདག་གདངས་ཅན་འདི་སྙམ་དུ་དཔལ་ལྡན་སློང་བ་མང་པོ་དག་འོང་སྟེ། གང་དག་ལ་མ་བྱིན་པ་དེ་དག་བདག་གི་དགྲར་འགྱུར་རོ་སྙམ་ནས། དེ་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་འདུག་གོ། །དཔལ་ལྡན་གྱིས་དེ་མཐོང་ནས་སྨྲས་པ། ཡབ་ཁྱོད་ཅིའི་སླད་དུ་ཕྱག་ལ་ཞལ་གཏད་དེ་སེམས་ཁོངས་སུ་ཆུད་ཅིང་བཞུགས། དེས་སྨྲས་པ། བུ་མོ་ཁྱོད་སློང་བ་རྒྱལ་པོ་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་དང ། ཀྲོའུ་དྱ་དག་དང ། ཤཱཀྱ་དག་དང ། ལི་ཙ་བི་དག་དང ། གཞན་ཡང་མང་པོ་དག་འོང་སྟེ། གང་དག་ལ་མ་བྱིན་པ་དེ་དག་བདག་གི་དགྲར་འགྱུར་ན། ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོངས་སུ་ཆུད་ཅིང་མི་འདུག་ཏུ་རུང ། དེས་སྨྲས་པ། ཡབ་ཐུགས་ངན་མ་མཛད་ཅིག་།བདག་གིས་ཁྱིམ་ཐབ་འཚལ་ལགས་སོ། །བུ་མོ་གང ། ཡབ་བད་སའི་རྒྱལ་པོ་ཤར་པའོ། །བུ་མོ་གལ་ཏེ་དེ་ལྟ་ན་ཇེ་གོ་རིམས་བྱའོ། །ཡབ་གོ་རིམས་ཇི་ལྟ་བུ་ལགས། བུ་མོ་ཁོ་བོས་བད་སའི་རྒྱལ་པོ་ཤར་པ་འདི་ཉིད་དུ་སྤྱན་དྲང་གིས། གང་གི་ཚེ་དེས་བཤོས་གསོལ་བ་དེའི་ཚེ་ན་ཁྱོད་སྟེང་གི་ཁང་བཟངས་ཀྱི་གཞི་ན་འདུག་པས་ཕོ་ལོང་འཕང་བར་བྱའོ། །ཡབ་མ་ནོངས་ཀྱིས་དེ་བཞིན་བགྱིའོ། །དེས་བད་སའི་རྒྱལ་པོ་ཤར་པ་ཁྱིམ་གཞན་དུ་མགྲོན་དུ་བོས་ཏེ་ཟན་ཟོས་པ་དང ། དཔལ་ལྡན་སྟེང་གི་ཁང་བཟངས་ཀྱི་གཞི་ན་འདུག་པས་ཕོ་ལོང་འཕངས་སོ། །རྒྱལ་པོས་སྟེང་དུ་བརྟག་པར་བརྩམས་པ་དང ། རྒྱལ་པོས་དེ་མཐོང་ནས་སྨྲས་པ། གདངས་ཅན་ཁྱོད་ན་རེ་སྔོ་བསངས་ཅན་དུས་ལ་བབ་ཅེས་ཟེར་ན་འདི་ན་འདུག་པ་འདི་མ་ཡིན་ནམ། ལྷ་འདི་ནི་སྔོ་བསངས་ཅན་མ་ལགས་སོ། །འོ་ན་འདི་ཅི་མིང ། ལྷ་འདི་ནི་སྔོ་བསངས་ཅན་གྱི་ནུ་མོ་དཔལ་ལྡན་ཞེས་བགྱིའོ། །ཅི་འགའ་ཞིག་ལ་བྱིན་ནམ། ལྷ་སུ་ལ་ཡང་མ་སྩལ་ཏོ། །གལ་ཏེ་དེ་ལྟ་ན་ང་ལ་ཅིའི་ཕྱིར་མི་སྦྱིན། ལྷ་གསོལ
8.194a
ལོ། །ཁྱིམ་བདག་གདངས་ཅན་གྱིས་བྱིན་ནས་བད་སའི་རྒྱལ་པོ་ཤར་པས་དཔལ་གྱི་འབྱོར་པས་བག་མར་བླངས་ཏེ་བཙུན་མོའི་འཁོར་གྱི་ནང་དུ་བཅུག་གོ། །དུས་གཞན་ཞིག་ན་དེས་རྒྱལ་པོ་ལ་སྨྲས་པ། ལྷ་བདག་དགེ་སློང་མཐོང་བར་འཚལ་ལོ། །རྒྱལ་པོས་སྨྲས་པ། ཁྱོད་འདོད་མོད་ཀྱི། དགེ་སློང་དག་རྒྱལ་པོའི་ཕོ་བྲང་དུ་མི་འཇུག་གོ། །ལྷ་དེ་ལྟ་ན་བདག་རྣམ་པ་ཐམས་ཅད་དུ་བཙོན་རར་སྩལ་དུ་བས་མོད། གལ་ཏེ་དགེ་སློང་མཐོང་བར་མི་གནང་ན། དེང་སླན་ཅད་འཚལ་མ་ཡང་མི་འཚལ། ཕྱག་ཀྱང་མི་འཚལ་ལོ། །དེས་ཟན་གཅད་པ་ལ་ཞུགས་པ་དང ། རྒྱལ་པོས་ཁྱིམ་བདག་གདངས་ཅན་ལ་སྨྲས་པ། ཁྱིམ་བདག་ཁྱོད་སོ་སོར་མི་རྟོག་གམ། ལྷ་ཅི་ལགས། དཔལ་ལྡན་ཟན་གཅད་པ་ལ་ཞུགས་སོ། །ལྷ་ཅིའི་སླད་དུ་དགེ་སློང་མཐོང་བར་འདོད་ན་དགེ་སློང་དག་རྒྱལ་པོའི་ཕོ་བྲང་དུ་མི་འཇུག་གོ། །ལྷ་འོ་ན་འདི་ལ་ཇི་ལྟར་བསྒྲུབ་པར་བགྱི། ཁྱིམ་བདག་དེའི་ཕྱིར་ཁྱོད་ཀྱིས་བདག་ཉིད་ཀྱི་མིང་གིས་ར་བར་དགེ་སློང་གི་དགེ་འདུན་སྤྱན་དྲོངས་ཏེ། བར་དུ་སྒོ་ཐོད་ལ་བཤོས་གསོལ་ཅིག་།ཁྱིམ་བདག་གདངས་ཅན་གྱི་ཁྱིམ་རྒྱལ་པོ་དང་འདབ་ཆགས་སུ་འདུག་པས་དེས་ར་བའི་བར་དུ་སྒོ་གཏོད་ནས་སའི་བྱི་དོར་བྱེད་དུ་བཅུག་གོ། །དེ་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་གདངས་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེང་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
8.194b
བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང ། བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ཀྱི་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་ཁྱིམ་བདག་གདངས་ཅན་གྱིས་དེ་ཉིད་ཀྱི་མཚན་མོ་བཟའ་བ་དང ། བཅའ་བ་གཙང་ཞིང་བསོད་པ་དག་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་པ་དང ། ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་ནི་ཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབསོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པ་དང ། ལྷ་རྣམས་ལ་ཆོས་སྟོན་པར་བཞེད་པ་དང ། ནད་པ་ལ་ལྟ་བར་བཞེད་པ་དང ། གནས་མལ་ལ་རྟོག་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དོ། །ཚེ་དང་ལྡན་པ་ཤཱ་རིའི་བུ་འཇུག་པ་ན་རྒྱལ་པོ་བཙུན་མོའི་འཁོར་དང་བཅས་པ་འདུག་ནས་དེའི་ཕྱིར་ལྡོག་པར་བརྩམས་པ་དང ། རྒྱལ་པོས་མཐོང་ནས་སྨྲས་པ། འཕགས་པ་ཤཱ་རིའི་བུ་གཤེགས་སུ་གསོལ། དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ་ཚེ་དང་ལྡན་པ་དག་བཞི་པོ་དག་གི་ཚིག་ནི་མི་གཅག་པ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང ། དགེ
8.195a
སློང་དགྲ་བཅོམ་པ་ཟག་པ་ཟད་པའི་ཚིག་དང ། དགེ་བསྐོས་ཀྱི་ཚིག་དང ། རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཚིག་ཡིན་གྱིས། ཚེ་དང་ལྡན་པ་དག་དྲན་པ་ཉེ་བར་ཞོག་ཤིག་དང་འཇུག་པར་བྱའོ་ཞེས་དེ་ཞུགས་ནས། དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་ནས་བཙུན་མོ་དཔལ་ལྡན་གྱིས་ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་བདེ་བར་འཁོད་པར་རིག་ནས། རང་གི་ལག་ནས་བཅའ་བ་དང ། བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་རང་གི་ལག་ནས་བཅའ་བ་དང ། བཟའ་བ་གཙང་ཞིང་བསོད་པས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ། ཆོས་མཉན་པའི་ཕྱིར་ཚེ་དང་ལྡན་པ་ཤཱ་རིའི་བུ་མདུན་དུ་འདུག་གོ། །དེ་ནས་ཚེ་དང་ལྡན་པ་ཤཱ་རིའི་བུ་བཙུན་མོ་དཔལ་ལྡན་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུག་པར་བྱེད། ཡང་དག་པར་གཟེང་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་འཇུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱེད་ན་དེས་བདེན་པ་དག་མ་མཐོང་ངོ ། །ཚེ་དང་ལྡན་པ་ཤཱ་རིའི་བུས་བསམས་པ། ཅི་འདི་ལ་དགེ་བའི་རྩ་བ་དག་ཡོད་དམ། འོན་ཏེ་མེད་སྙམ་ན། ཡོད་པར་མཐོང་ངོ ། །སུ་ལ་རག་ལས་སྙམ་ན། བདག་ཉིད་ལ་རག་ལས་པར་མཐོང་ནས། དེ་དེ་ལ་ཆོས་སྟོན་ཅིང་རྣམ་པར་དཔྱོད་པ་ན་ཉི་མ་ནུབ་པའི་དུས་ལ་བབ་ནས་དགེ་སློང་རྣམས་སྟན་ལས་ལངས་ཏེ་དོང་ངོ ། །ཚེ་དང་ལྡན་པ་ཤཱ་རིའི་བུས་བསམས་པ་འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱི། འདི་ཉིད་རྐྱེན་དུ་མཛད་ནས་གནང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །སྙམ་ནས། དེ་གདུལ་བ་ལ་ལྟོས་པས་དེ་ཉིད་དུ་འདུག་གོ། །ཚེ་དང་ལྡན་པ་ཤཱ་རིའི་བུས་བཙུན་མོ་དཔལ་ལྡན་གྱི་བསམ་པ་དང ། བག་ལ
8.195b
ཉལ་དང ། ཁམས་དང ། རང་བཞིན་ཁོང་དུ་ཆུད་ནས། གང་ཐོས་ནས་བཙུན་མོ་དཔལ་ལྡན་གྱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེས་བདེན་པ་མཐོང་ནས་སྨྲས་པ། འཕགས་པ་བདག་གིས་དགེ་བའི་བཤེས་གཉེན་འཕགས་པ་ཤཱ་རིའི་བུ་ལ་བརྟེན་ནས་འཕགས་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་དག་གིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་སྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། ་བཙུན་པ་བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་ཚེ་དང་ལྡན་པ་ཤཱ་རིའི་བུས་བཙུན་མོ་དཔལ་ལྡན་བདེན་པ་དག་ལ་བཞག་སྟེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི
8.196a
བུས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ་ལེགས་སོ། །བདུན་པོ་དག་གི་ཚིག་ནི་མི་གཅག་པ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང ། དགེ་སློང་དགྲ་བཅོམ་པ་ཟག་པ་ཟད་པའི་ཚིག་དང ། དགེ་འདུན་གྱི་གནས་བརྟན་གྱི་ཚིག་དང ། དགེ་བསྐོས་ཀྱི་ཚིག་དང ། མཁན་པོའི་ཚིག་དང ། སློབ་དཔོན་གྱི་ཚིག་དང ། རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཚིག་གོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ནམ་མ་ནངས། སྐྱ་རེང་མ་ཤར། རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀ་འམ། གཞན་ཡང་དེ་ལྟ་བུ་གང་ཡིན་པའོ། །ནམ་མ་ནངས་ཞེས་བྱ་བ་ནི་ནམ་ནངས་པར་མ་གྱུར་པའོ། །སྐྱ་རིང་ཞེས་བྱ་བ་ནི་སྐྱ་རིང་གསུམ་པོ་སྐྱ་རིང་དང་པོ་དང ། སྐྱ་རིང་བར་མ་དང ། སྐྱ་རིང་ཐ་མའོ། །དེ་ལ་སྐྱ་རིང་དང་པོ་ནི་སྔོན་པོར་སྣང་བའོ། །སྐྱ་རིང་བར་མ་ནི་སེར་པོར་སྣང་བའོ། །སྐྱ་རིང་ཐ་མ་ནི་དམར་པོར་སྣང་བ་སྟེ། འདིར་ནི་སྐྱ་རིང་ཐ་མ་ཡིན་པར་དགོངས་སོ། །མ་ཤར་ཅེས་བྱ་བ་ནི་མ་བྱུང་བའོ། །རིན་པོ་ཆེ་དག་ཅེས་བྱ་བ་ལ། རིན་པོ་ཆེ་དག་ཅེས་བྱ་བ་ནི་ནོར་བུ་དག་དང ། མུ་ཏིག་དག་དང ། བཻ་དཱུརྱ་དག་དང ། མན་ཤེལ་དཀར་པོ་དག་དང ། བྱི་རུ་དག་དང ། གསེར་དག་དང ། དངུལ་དག་དང །
8.196b
རྡོའི་སྙིང་པོ་དག་དང ། སྤུག་དག་དང ། དམར་པོ་དག་དང ། གཡས་སུ་འཁྱིལ་བ་དག་གོ། །རིན་པོ་ཆེར་སྨོས་པ་དག་ཅེས་བྱ་བ་ལ། རིན་པོ་ཆེར་སྨོས་པ་དག་ཅེས་བྱ་བ་ནི་གཡུལ་ངོར་སྤྱད་པའི་མཚོན་ཆ་ཐམས་ཅད་དང ། རོལ་མོར་སྤྱད་པའི་ཆ་སྤྱད་ཐམས་ཅད་དོ། །མ་བསྡུས་པ་ཞེས་བྱ་བ་ནི་མ་བརྟུལ་བར་རོ། །རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཞེས་བྱ་བ་ནི་འདི་ལྟ་སྟེ། བུད་མེད་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ལ། རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ནོ། །སྒོ་གཏན་ནམ་ཞེས་བྱ་བ་ནི་སྒོ་གཏན་རྣམ་པ་གསུམ་སྟེ། གྲོང་ཁྱེར་གྱི་སྒོ་གཏན་དང ། རྒྱལ་པོའི་ཕོ་བྲང་གི་སྒོ་གཏན་དང ། བཙུན་མོའི་འཁོར་གྱི་སྒོ་གཏན་ནོ། །སྒོ་གཏན་གྱི་ཉེན་ཀོར་ལས་ཤེས་བྱ་བ་ནི་དེའི་དྲུང་ལས་སོ། །འདའ་ན་ཞེས་བྱ་བ་ནི་འགྲོ་ནའོ། །དེ་འདྲ་བའི་རྐྱེན་མ་གཏོགས་ཏེ། ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ། །ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ནམ་མ་ནངས་པ་ལ་ནམ་མ་ནངས་པར་འདུ་ཤེས་པས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་མ་ནངས་པ་ལ་ཡིད་གཉིས་ཟ་བས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ནམ་མ་ནངས་པར་འདུ་ཤེས་པས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ་ནམ་ནངས་པ་ལ་ཡིད་གཉིས་ཟ་བས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །དགེ་སློང་གིས་ནམ་མ་ནངས་པ་ལ་ནམ་ནངས་པར་འདུ་ཤེས་པས་རྒྱལ་པོའི་ཕོ་བྲང་གི་སྒོ
8.197a
གཏན་ལས་འདའ་ན་ཉེས་བྱས་སུ་འགྱུར་རོ། །ནམ་མ་ནངས་པ་ལ་ཡིད་གཉིས་ཟ་བས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ནམ་མ་ནངས་པར་འདུ་ཤེས་པས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ཡིད་གཉིས་ཟ་བས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །དགེ་སློང་གིས་ནམ་མ་ནངས་པ་ལ་ནམ་མ་ནངས་པར་འདུ་ཤེས་པས་བཙུན་མོའི་འཁོར་གྱི་སྒོ་གཏན་ལས་འདའ་ན་ལྟུང་བྱེད་དུ་འགྱུར་རོ། །ནམ་མ་ནངས་པ་ལ་ཡིད་གཉིས་ཟ་བས་བཙུན་མོའི་འཁོར་གྱི་སྒོ་གཏན་ལས་འདའ་ན་ལྟུང་བྱེད་དུ་འགྱུར་རོ། །ནམ་ནངས་པ་ལ་ནམ་མ་ནངས་པར་འདུ་ཤེས་པས་བཙུན་མོའི་འཁོར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ཡིད་གཉིས་ཟ་བས་བཙུན་མོའི་འཁོར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །རྒྱལ་པོ་དང ། བཙུན་མོ་དང ། གཞོན་ནུ་དང ། བློན་པོ་དག་གིས་བོས་པ་དང ། བར་ཆད་བརྒྱད་པོ་རྒྱལ་པོ་དང་ཆོམ་རྐུན་དང ། མི་དང་མི་མ་ཡིན་པ་དང ། གདུག་པ་དང ། མེ་དང་ཆུ་དང་ཀླུ་དག་ཉེ་བར་གནས་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་དེ། བརྒྱད་བཅུ་རྩ་གཉིས་པ་རྫོགས་སོ།། ་་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་གདོན་པར་བྱའོ་ཞེས་བཀའ་སྩལ་པ་དང ། ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་དྲུག་སྡེ་དག་གུས་པར་བྱས་ཏེ། ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང་དགེ་སློང་རྣམས་ལ་ཡང་འདི་སྐད་ཅེས
8.197b
ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་ཅག་གིས་ད་གདོད་ཤེས་སོ་ཞེས་ཟེར་ནས་དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་གིས་སོ་སོར་ཐར་པའི་མདོ་གདོན་པ་འདོན་པ་ད་གདོད་ཐོས་སམ་ཅི་ན་གང་གི་ཕྱིར་དེ་སྐད་ཟེར། དེ་དག་གིས་སྨྲས་པ། ཚེ་དང་ལྡན་པ་དག་ཅི་ཁོ་བོ་ཅག་ལ་ལས་དེ་ཙམ་འབའ་ཞིག་ཏུ་ཟད་དམ། འདོད་པའི་རྣམ་པར་རྟོག་པ་ལ་ཡང་རྣམ་པར་བརྟག་དགོས་སོ། །གནོད་སེམས་ཀྱི་རྣམ་པར་རྟོག་པ་དང ། རྣམ་པར་འཚེ་བའི་རྣམ་པར་རྟོག་པ་ལ་ཡང་རྣམ་པར་བརྟག་དགོས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང ། དགེ་སློང་རྣམས་ལ་ཡང་འདི་སྐད་ཅེས། ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་ཅག་གིས་ད་གཟོད་ཤེས་སོ་ཞེས་ཟེར་ནས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན
8.198a
པར་མི་བྱེད་ཅིང ། དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་ཅག་གིས་ད་གདོད་ཤེས་སོ་ཞེས་ཟེར་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ལ། དེ་ལ་གལ་ཏེ་དགེ་སློང་རྣམས་ཀྱིས་ཀྱང་ཚེ་དང་ལྡན་པ་འདི་སྔོན་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ཤིང་ལན་མང་དུ་ལྟ་ཅི་སྨོས་ན། ཚེ་དང་ལྡན་པ་དེ་མི་ཤེས་པས་མི་འགྲོལ་བས་དེ་ལྟུང་བ་གང་བྱུང་བ་དེ་ཆོས་བཞིན་དུ་བྱེད་དུ་གཞུག་གི་སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་པས་ཚེ་དང་ལྡན་པ་ཁྱོད་ཀྱིས་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་དེ། ལེགས་པ་རྙེད་པ་མ་ཡིན་ནོ་ཞེས་འགྱོད་པར་བྱའོ། །ཚེ་དང་ལྡན་པ་དེ་ལ་འགྱོད་པར་བྱ་བ་ནི་དེ་ཡིན་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པ་ཞེས་བྱ་བ་ལ་སོ་སོར་ཐར་པ་ཞེས་བྱ་བ་ནི་ཕམ་པར་འགྱུར
8.198b
བའི་ཆོས་བཞི་དང ། དགེ་འདུན་ལྷག་མའི་ཆོས་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་གོ། །མདོ་གདོན་པ་ཞེས་བྱ་བ་ལ། མདོ་གདོན་པ་ཞེས་བྱ་བ་ནི་ཡང་དག་པར་སྦྱོར་བའོ། །འདོན་པའི་ཚེ་ཞེས་བྱ་བ་ནི་རབ་ཏུ་སྟོན་པའི་ཚེའོ། །འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ། །ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ལ་ཞེས་བྱ་བ་ནི་བཅོམ་ལྡན་འདས་ཀྱིས་གསུངས་པའི་ཆོས་འདི་ཡང་ངོ ། །དེ་ལ་གལ་ཏེ་དགེ་སློང་རྣམས་ཀྱིས་ཀྱང་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ཀྱིས་ཀྱང་ངོ ། །ཚེ་དང་ལྡན་པ་འདི་ཞེས་བྱ་བ་ནི་དགེ་སློང་གང་ཡིན་པ་འདིའོ། །སྔོན་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ཤིང་ཞེས་བྱ་བ་ནི་འདིས་སོ་སོར་ཐར་པ་ལན་གཉིས་སམ། གསུམ་ཐོས་པར་ཤེས་ཤིང་ངོ ། །ལན་མང་དུ་ལྟ་ཅི་སྨོས་ན་ཞེས་བྱ་བ་ནི་ལན་མང་དུ་འདུག་པར་ཤེས་པ་ལྟ་ཅི་སྨོས་ནའོ། །ཚེ་དང་ལྡན་པ་དེ་མི་ཤེས་པས་མི་འགྲོལ་བས་ཤེས་བྱ་བ་ནི་དེ་དེས་ལྟུང་བ་ལས་མི་འགྲོལ་བས་དེ་ལྟུང་བ་དང་བཅས་པ་ཉིད་ཡིན་པའོ། །དེ་ལ་ལྟུང་བ་གང་བྱུང་བ་ཞེས་བྱ་བ་ནི་ལྟུང་བྱེད་དོ། །དེ་ཆོས་བཞིན་དུ་བྱེད་དུ་གཞུག་ཅེས་བྱ་བ་ནི་འཆགས་སུ་གཞུག་པའོ། །སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་སྟེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་པས་ཚེ་དང་ལྡན་པ་ཁྱོད་ཀྱིས་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་དེ། ལེགས་པ་རྙེད་པ་མ་ཡིན་ནོ་ཞེས་འགྱོད་པར་བྱའོ་ཞེས་བྱ་བ་ནི་འགྱོད་དུ་གཞུག་པར་བྱའོ། །ཚེ་དང་ལྡན་པ་དེ་ལ་འགྱོད་པར་བྱ་བ་ནི་འདི་ཡིན་ཏེ་ཞེས་བྱ་བ་ནི་དེ་ལྟར་འགྱོད་པར་བྱའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང་ཡི་དགས་ངན་སོང་དང ། ངན་འགྲོ་དང །
8.199a
ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཕམ་པར་འགྱུར་བའི་ཆོས་བཞི་དང ། དགེ་འདུན་ལྷག་མའི་ཆོས་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བྱེད་ཀྱི་ཆོས་སུམ་བཅུ་དང ། ལྟུང་བྱེད་ཀྱི་ཆོས་དགུ་བཅུ་དང ། སོ་སོར་བཤགས་པར་བྱ་བའི་ཆོས་བཞི་དང ། བསླབ་པའི་ཆོས་མང་པོ་དང ། རྩོད་པ་ཞི་བར་བྱ་བའི་ཆོས་བདུན་པོ་དག་གདོན་པ་འདོན་པའི་ཚེ་གུས་པར་བྱས་ཏེ། ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང ། འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ། །ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལམ་གོལ་བར་རྒས་པར་གྱུར་ཅིང་ཡང་དག་པ་ཁོ་ནར་མི་ཤེས་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་དེ། བརྒྱད་བཅུ་རྩ་གསུམ་པ་རྫོགས་སོ།། ་་་་་་་་་་་་་།། འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་དགུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་གཅེར་བུ་པའི་ཉན་ཐོས་ཆོས་ཞེས་བྱ་བ་བ་སོ་མཁན་ཞིག་འདུག་པ་དེ་གཅེར་བུ་པ་དག་ལ་ཤིན་དུ་མངོན་པར་དད་དོ། །དེ་དུས་གཞན་ཞིག་ན་དགེ་སློང་བསོད་སྙོམས་པ་ཞིག་གིས་ཆོས་བསྟན་པས་བཏུལ་ནས། དེས་ཀྱང་དེ་ལས་སྐྱབས་སུ་འགྲོ་བ་དང ། བསླབ་པའི་གཞི་དག་བླངས་སོ། །ཡང་བསོད་སྙོམས་པ་དེས་དེ་ལ
8.199b
རྫས་ལས་བྱུང་བའི་བསོད་ནམས་བྱ་བའི་གཞི་བདུན་གྱི་བསྔགས་པ་རྒྱ་ཆེར་བརྗོད་པ་དང ། དེ་མངོན་པར་དད་པར་གྱུར་ནས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་ཅུང་ཟད་ཅིག་ཡང་དག་པར་བླགས་ཏེ་འཇུག་པར་བགྱིའོ། །བཞིན་བཟངས་ཅི་ཞིག་བྱེད། འཕགས་པ་དགེ་སློང་གི་དགེ་འདུན་ལ་རང་གིས་བཟོས་བསྙེན་བཀུར་བགྱིའོ། །མ་ཉེས་ཀྱིས་དེ་བཞིན་གྱིས་ཤིག་།བསོད་སྙོམས་པས་གཙུག་ལག་ཁང་དུ་སོང་སྟེ། དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་གིས་གཅེར་བུ་པའི་ཉན་ཐོས་ཆོས་ཤེས་བྱ་བ་བ་སོ་མཁན་དེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་ནས་དེ་དགེ་སློང་གི་དགེ་འདུན་ལ་རང་གི་བཟོས་བསྙེན་བཀུར་བྱེད་ཀྱིས་སུ་ཅི་འདོད་པ་དེས་དེ་བྱེད་དུ་ཆུག་ཤིག་།ཇི་ཙམ་ན་དགེ་སློང་ཞིག་ལ་ཁབ་རལ་མེད་ནས་དེ་དེའི་གན་དུ་སོང་སྟེ་སྨྲས་པ། བཞིན་བཟངས་ཁོ་བོ་ལ་ཁབ་རལ་མེད་ཀྱིས་དེ་གྱིས་ཤིག་།འཕགས་པ་ཇི་ལྟ་བུ་ཞིག་བགྱི། གང་བཟང་བའོ། །འཕགས་པ་བ་སོ་ལས་བགྱིས་པ་བཟང་ངོ ། །བཞིན་བཟངས་བ་སོ་ལས་བྱས་པ་གྱིས་ཤིག་།དེས་དེའི་ཁབ་རལ་བ་སོ་ལས་བྱས་པ་བྱས་ཏེ་བྱིན་ནོ། །དགེ་སློང་དེས་དེ་དགེ་སློང་རྣམས་ལ་བསྟན་པ་དང ། དགེ་སློང་གཞན་གྱིས་ཀྱང་དེ་ལྟ་བུ་བྱེད་དུ་བཅུག་ཅིང ། གཞན་གྱིས་ཀྱང་བྱེད་དུ་བཅུག་།གཞན་གྱིས་ཀྱང་བྱེད་དུ་བཅུག་པས་དེའི་བ་སོ་ཟད་པར་གྱུར་ཏོ། །དགེ་སློང་གཞན་ཞིག་ཀྱང་འོངས་ཏེ་སྨྲས་པ། བཞིན་བཟངས་ཁོ་བོའི་ཁབ་རལ་གྱིས་ཤིག་།འཕགས་པ་ཇི་ལྟ་བུ་ཞིག་བགྱི། གང་བཟང་བའོ། །འཕགས་པ་བ་སོ་ལས་བགྱིས་པ་བཟང་ན་བ་སོ་དེ་ནི་བས་སོ། །གལ་ཏེ་བཞེད་ན་རུས་པ་ལས་བགྱིས་པ་བགྱིའོ། །བཞིན་བཟངས་མ་ཉེས་ཀྱིས་གྱིས་ཤིག་།དེས་དེའི་ཁབ་རལ་རུས་པ་ལས་བྱས་པ་བྱས་ཏེ་བྱིན་ནོ། །དགེ་སློང་དེས་དེ་དགེ་སློང་རྣམས་ལ་བསྟན་པ་དང ། དགེ་སློང་གཞན་གྱིས་ཀྱང་དེ་ལྟ་བུ་བྱེད་དུ་བཅུག་ཅིང ། གཞན་གྱིས་ཀྱང་བྱེད་དུ་བཅུག་།
8.200a
གཞན་གྱིས་ཀྱང་བྱེད་དུ་བཅུག་པས་དེའི་རུས་པ་ཡང་ཟད་པར་གྱུར་ཏོ། །དགེ་སློང་གཞན་ཞིག་ཀྱང་འོངས་ཏེ་སྨྲས་པ། བཞིན་བཟངས་ཁོ་བོའི་ཁབ་རལ་གྱིས་ཤིག་།འཕགས་པ་ཇི་ལྟ་བུ་ཞིག་བགྱི། གང་བཟང་བའོ། །འཕགས་པ་བ་སོ་ལས་བགྱིས་པ་བཟང་ན་བ་སོ་དེ་ནི་བས་སོ། །བཞིན་བཟངས་གལ་ཏེ་དེ་ལྟ་ན་རུས་པ་ལས་བྱས་པ་གྱིས་ཤིག་།འཕགས་པ་རུས་པ་ཡང་བས་སོ། །གལ་ཏེ་བཞེད་ན་རཝ་ལས་བགྱིས་པ་བགྱིའོ། །བཞིན་བཟངས་མ་ཉེས་ཀྱིས་གྱིས་ཤིག་།དེས་དེའི་ཁབ་རལ་རཝ་ལས་བྱས་པ་བྱས་ཏེ་བྱིན་ནོ། །དགེ་སློང་དེས་དེ་དགེ་སློང་རྣམས་ལ་བསྟན་པ་དང ། དགེ་སློང་གཞན་གྱིས་ཀྱང་དེ་ལྟ་བུ་བྱེད་དུ་བཅུག་ཅིང ། གཞན་གྱིས་ཀྱང་དེ་ལྟ་བུ་བྱེད་དུ་བཅུག་།གཞན་གྱིས་ཀྱང་དེ་ལྟ་བུ་བྱེད་དུ་བཅུག་པས་དེའི་རཝ་ཡང་ཟད་པར་གྱུར་ཏོ། །དེ་རང་གི་ཟན་དང ། རང་གི་ཡོ་བྱད་དག་གིས་དགེ་སློང་རྣམས་ཀྱི་ལས་བྱེད་པ་ནི་དབུལ་པོར་གྱུར་ཏོ། །གཅེར་བུ་པ་དག་ཆོས་འདི་གང་གི་ཚེ་ཁོ་བོ་ཅག་ལ་མངོན་པར་དད་པར་གྱུར་པ་དེའི་ཚེ་ན་འདི་ཐམས་ཅད་ཕུན་སུམ་ཚོགས་པར་གྱུར་ན། འདི་ད་ལྟར་ཤཱཀྱའི་བུའི་དགེ་སྦྱོང་རྣམས་ལ་མངོན་པར་དད་པས་ཟན་ཡང་སློང་བར་བྱེད་དོ་ཞེས་འཕྱ་བ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་བ་སོ་ལས་བྱས་པ་དང ། རུས་པ་ལས་བྱས་པ་དང ། རཝ་ལས་བྱས་པའི་ཁབ་རལ་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང །
8.200b
མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་པ་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བ་སོ་འམ། རུས་པ་འམ། རཝའི་ཁབ་རལ་བྱེད་དུ་འཇུག་ན་བཅག་ནས་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །བ་སོ་འམ་ཞེས་བྱ་བ་ནི་བ་སོ་ཉིད་དོ། །རུས་པ་འམ་ཞེས་བྱ་བ་ཡང་རུས་པ་ཉིད་དོ། །རཝའི་ཞེས་བྱ་བ་ཡང་རཝ་ཉིད་ཀྱིའོ། །ཁབ་རལ་ཞེས་བྱ་བ་ནི་ཁབ་རལ་གཉིས་ཏེ། སྦུབ་བུ་ཅན་དང ། ཆང་པ་ལྟ་བུའོ། །དོན་འདི་ནི་གཉི་ག་ཡིན་པར་དགོངས་སོ། །བྱེད་དུ་འཇུག་ན་ཞེས་བྱ་བ་ནི་རང་གིས་སམ་གཞན་ནོ། །བཅག་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅག་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ། །ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་བ་སོ་འམ། རུས་པ་འམ། རཝའི་ཁབ་རལ་བྱེད་དམ། བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བཅག་གམ། ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པ་མ་ཡིན་པས་ཡང་བཤགས་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁབ་རལ་འཆོས་པའི་ལྟུང་བྱེད་དེ་བརྒྱད་བཅུ་རྩ་བཞི་པ་རྫོགས་སྷོ།། ་་་་་་་་་་་་།།
8.201a
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་ཞིག་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས་མཉན་ཡོད་དུ་ལམ་གྱིས་དུབ་པའི་ངལ་བསོས་ཏེ། རྒྱལ་བྱེད་ཀྱི་ཚལ་དུ་སོང་ནས་དེ་སྒོ་ཁང་དུ་འདུག་གོ། །དེ་ཁྲི་དམའ་བ་ཞིག་རྙེད་ནས་དེས་དེ་ཉིད་ཀྱི་མདུན་དུ་རྐང་པ་གཉིས་བཀྲུས་ནས་སྐྱིལ་མོ་དཀྲུང་བཅས་ཏེ་འདུག་གོ། །སོས་ཀའི་ཚ་བའི་དུས་ལ་བབ་པས་སྦྲུལ་དུག་མྱུར་དུ་ཁྱབ་པར་བྱེད་པ་ཚ་བས་གདུངས་པས་བསིལ་བ་འདོད་པ་ཞིག་ཕྱོགས་དེར་བསྐྱིལ་ཏེ་ཉལ་བ་དང ། ཇི་ཙམ་ན་དགེ་སློང་དེ་ལམ་གྱིས་དུབ་པས་ཡུར་བར་བརྩམས་ནས་དེའི་ལུས་ཡུད་ཙམ་ཡུད་ཙམ་ཞིང་མཆོག་པས་ཁྲི་ཡང་སྒྲ་ཙེག་ཙེག་ཟེར་རོ། །སྦྲུལ་དུག་མྱུར་དུ་ཁྱབ་པར་བྱེད་པ་དེས་བསམས་པ། འདི་བདག་ལ་འཚེའོ་སྙམ་ནས། དེས་གདེངས་ཀ་བྱས་ཏེ་འདུག་གོ། །ཇི་ཙམ་ན་ཡང་དེ་ལུས་མཆོག་ཅིང་ཁྲི་སྒྲ་ཙེག་ཙེག་ཟེར་ནས་དེས་དེའི་འཕྲལ་བར་བཟུང་སྟེ། སྤྱོད་ལམ་དེ་ཉིད་ཀྱིས་ཤི་ཞིང་དུས་ལ་བབ་ནས་སུམ་བཅུ་རྩ་གསུམ་པའི་ལྷའི་རིས་བཟང་པོ་རྣམས་ཀྱི་ནང་དུ་སྐྱེས་སོ། །དེའི་གན་དུ་ལྷའི་བུ་མོ་དག་ལྷགས་པ་དང ། དེས་སེ་གོལ་གྱི་སྒྲས་དེ་དག་ཕྱིར་བཟློག་ནས་དེ་དག་ལྷའི་དབང་པོ་བརྒྱ་བྱིན་གྱི་གན་དུ་སོང་སྟེ་སྨྲས་པ། ལྷ་འདི་ནི་ལྷའི་བུ་སྐྱེས་ནས་རིང་པོ་མ་ལགས་པ་ཞིག་སྐྱིལ་མོ་དཀྲུང་བཅས་ཏེ་མཆིས་ནས་བདག་ཅག་དེའི་དྲུང་དུ་མཆིས་པ་དང ། དེས་སེ་གོལ་གྱི་སྒྲས་བདག་ཅག་སླར་བཟློག་གོ། །བརྒྱ་བྱིན་གྱིས་སྨྲས་པ། ལྷ་མོ་དག་དེ་ནི་སྔོན་དགེ་སློང་ཡིན་གྱིས་དེའི་མདུན་དུ་མེ་ལོང་ཟུང་ཤིག་དང ། དྲན་པ་རྙེད་པར་འགྱུར་རོ། །དེ་དག་གིས་དེའི་མདུན་དུ་མེ་ལོང་བཟུང་བ་དང ། དེས་བདག་ཉིད་དཔུང་རྒྱན་དང ། རྣ་ཆ་གདུབ་ཀོར་དང ། ཕྲེང་བ་རྒྱུ་དང ། རྒྱན་སྣ་ཚོགས་ཀྱིས་བརྒྱན་པར་མཐོང་ནས་དྲན་པ་རྙེད་དོ། །དེ་ནས་དེས་དེ་དག་འདོད་པར་བརྩམས་པ་དང ། དེ་དག་གིས་སྨྲས་པ། བཟོད་ལྡན་བདག་ཅག་དེ་བཞིན་དུ
8.201b
བསྙེན་བཀུར་མི་བྱེད་དེ། གང་ལྷའི་དབང་པོ་བརྒྱ་བྱིན་ལ་ཕྱག་འཚལ་བ་དེ་ལ་བདག་ཅག་བསྙེན་བཀུར་བྱེད་དོ། །དེས་བསམས་པ། བདག་གིས་བཅོམ་ལྡན་འདས་འདོད་པའི་དྲི་ང་བ་མེད་པ་ལ་ཕྱག་བྱས་ནས་ད་ཇི་ལྟར་ལྷའི་དབང་པོ་བརྒྱ་བྱིན་འདོད་པའི་ལོངས་སྤྱོད་ཅན་ལ་ཕྱག་བྱ་སྙམ་དུ་རིག་ནས་སྨྲས་པ། སྲིང་མོ་དག་གང་གིས་ལྷའི་དབང་པོ་བརྒྱ་བྱིན་ལ་ཕྱག་འཚལ་བར་མི་བྱེད་པ་དེ་ལྟ་བུའི་ཐབས་འགའ་ཡོད་དམ། བཟོད་ལྡན་ཡོད་དེ། གང་ན་ལྷའི་དྲང་སྲོང་དག་ཚངས་པར་སྤྱད་པ་སྤྱོད་ཅིང་འཁོད་པ་དེ་དག་གི་ནང་དུ་གང་ཚངས་པར་སྤྱད་པ་སྤྱོད་པར་བྱེད་པ་དེ་ནི་ལྷའི་དབང་པོ་བརྒྱ་བྱིན་ལ་ཕྱག་མི་འཚལ་ཏེ། ལྷའི་དབང་པོ་བརྒྱ་བྱིན་ཉིད་དེ་ལ་ཕྱག་འཚལ་ལོ། །དེ་དེ་དག་གི་ནང་དུ་ཞུགས་པ་དང ། ལྷའི་དབང་པོ་བརྒྱ་བྱིན་གྱིས་ཇི་ལྟར་དེ་ལྷའི་དྲང་སྲོང་གི་ནང་དུ་ཞུགས་ཏེ་ཚངས་པར་སྤྱད་པ་སྤྱོད་པ་ཐོས་ནས་ལྷའི་དབང་པོ་བརྒྱ་བྱིན་དེའི་གན་དུ་སོང་སྟེ་ཕྱིན་ནས་རྐང་པ་ལ་ཕྱག་འཚལ་ཏེ་སོང་ངོ ། །དེ་ནས་སྔོན་དགེ་སློང་ལྷའི་བུ་དེ་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟེན་ཏེ། བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་འཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་སྔོན་དགེ་སློང་ལྷའི་བུ་རྣ་ཆ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ། དོ་ཤལ་དང ། སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང ། པད་མ་དང ། ཀུ་མུ་ཏ་དང ། པད་མ་དཀར་པོ་དག་གིས་ཐུ་བ་བཀང་སྟེ། ཁ་དོག་ཤིན་དུ་འདས་པས་མཚན་མོ་ལ་བབ་པ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང ། འདི་ལྟར་སྔོན་དགེ་སློང་ལྷའི་བུ་ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་སྔོན་དགེ་སློང་ལྷའི་བུས་བཅོམ་ལྡན་འདས་ལ་ཚིགས་སུ་བཅད་པའི
8.202a
དབྱངས་ཀྱིས་ཞུ་བ་ཞུས་པ། རྨོངས་པ་ཞེས་བགྱིའི་ཚལ་དེ་ནི། །ལྷ་མོའི་ཚོགས་ཀྱིས་ཀུན་སྒྲགས་ཤིང ། །ཤ་ཟ་མོ་བཞིན་ཡོངས་བསྐོར་ན། །ཇི་ལྟར་མཆི་མ་འབྱུང་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །དྲང་པོ་ཞེས་བྱའི་ལམ་དེ་ནས། །འཇིགས་མེད་ཕྱོགས་ཤེས་བྱ་བ་དེར། །སྒྲ་མེད་ཅེས་བྱའི་ཤིང་རྟ་ནི། །ཆོས་ཀྱི་རྟོག་པས་བསྐྱོད་གྱུར་པ། །དེ་ཡི་དམིགས་པ་ངོ་ཚ་ཤེས། །དྲན་པ་དེ་ཡི་འཁོར་ཡིན་ཏེ། །ཁ་ལོ་སྒྱུར་བ་ཤེས་རབ་ཡིན། །སྣ་འདྲེན་ཡང་དག་ལྟ་ཞེས་བྱ། །སྐྱེས་པ་འམ་བུད་མེད་གང་ལ་འང་རུང ། །བཞོན་པ་འདི་འདྲ་ཡོད་གྱུར་ཅིང ། །དེ་འདྲའི་བཞོན་པ་ཞོན་གྱུར་ན། །དེ་ནི་འཇིགས་མེད་ཕྱོགས་སུ་འགྲོ། །དེ་ནས་བཅོམ་ལྡན་འདས་ཀྱིས་སྔོན་དགེ་སློང་ལྷའི་བུའི་བསམ་པ་དང་བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་གང་ཐོས་ནས་དགེ་སློང་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས་མས་ཀྱང་མ་བགྱིས་རྒྱལ་པོས་ཀྱང་མ་བགྱིས་ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དགས་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །
8.202b
ཤིན་དུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་འཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་ན། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང ། །དེ་ནས་སྔོན་དགེ་སློང་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང ། ཞིང་པ་ལོ་ཏོག་འབྱོར་པ་ལྟ་བུ་དང ། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང ། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ ། །ཇི་ཙམ་ན་མཚན་མོ་ནམ་ནངས་ནས་ཁང་སྐྱོང་གིས་སྒོ་ཕྱེ་སྟེ་ཕྱགས་མ་ཐོགས་ནས་སྒོ་ཁང་ཕྱག་པར་བརྩམས་པ་དང ། དེ་སྐྱིལ་མོ་དཀྲུང་གིས་འདུག་པ་མཐོང་ནས་དེས་སྨྲས་པ། ཚེ་དང་ལྡན་པ་ལོངས་ཤིག་།ཅི་ཁྱོད་མདོ་སྡེར་བསམ་གཏན་བྱེད་པ་ཡིན་ནམ། དེ་ཚིག་མི་སྨྲ་ནས། དེས་དེའི་ལག་པ་གཉིས་ནས་བཟུང་སྟེ་བསྒུལ་བར་བརྩམས་པ་དང ། ཇི་ཙམ་ན་དུས་ལ་བབ་པར་མཐོང་ངོ ། །དེས་འདི་ཅི་ཞིག་གིས་དུས་ལ་བབ་ཅེས་བརྟག་པར་བརྩམས་པ་དང ། ཇི་ཙམ་ན་ཁྲི་འོག་ན་སྦྲུལ་དུག་མྱུར་དུ་ཁྱབ་པར་བྱེད་པ་འདུག་པ་མཐོང་ནས་དེ་སྔངས་ཏེ། དགེ་སློང་རྣམས་ཀྱི་གན་དུ་སོང་སྟེ་སྨྲས་པ། ཚེ་དང་ལྡན་པ་དག་དགེ་སློང་སྒོ་ཁང་དུ་ཉལ་བ་གང་ཡིན་པ་དེ་སྦྲུལ་དུག་མྱུར་དུ་ཁྱབ་པར་བྱེད་པས་བཟུང་སྟེ་དུས་ལ་བབ་བོ། །དགེ་སློང་རྣམས་ཀྱིས་དེ་དུར་ཁྲོད་དུ་བསྐྱལ་ཏེ་བསྲེགས་ནས་ཕྱིར་ལྷགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ
8.203a
དེ་ཐམས་ཅད་དགེ་སློང་དག་ཁྲི་དམའ་བ་ལ་མལ་འཆའ་ཞིང་དེའི་མདུན་དུ་རྐང་པ་གཉིས་འཁྲུས་པ་ལས་གྱུར་པ་ཡིན་ནོ། །སྙམ་དུ་དགོངས་ནས་བཀའ་སྩལ་པ། དེ་ལྟ་བས་ན་དགེ་སློང་གིས་ཁྲི་དམའ་བ་ལ་མལ་བཅའ་བར་མི་བྱ་ཞིང་ཁྲིའི་མདུན་དུ་རྐང་པ་གཉིས་བཀྲུ་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་ཁྲི་དམའ་བ་ལ་མལ་བཅའ་བར་མི་བྱ་ཞིང་ཁྲིའི་མདུན་དུ་རྐང་པ་གཉིས་བཀྲུ་བར་མི་བྱའོ་ཞེས་བཀའ་སྩལ་ནས་དགེ་སློང་གཞན་དག་ལ་མཆིལ་ལྷམ་མི་བདོག་པ་དེ་དག་ལ་གནོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་ལ་མཆིལ་ལྷམ་མི་བདོག་པ་དེ་དག་གིས་མགོ་ལོགས་དང་རྐང་པ་ལོགས་སུ་རྐང་པ་གཉིས་བཀྲུ་བར་བྱ་སྟེ་འདི་ལ་འགྱོད་པར་མི་བྱའོ། །དྲུག་སྡེ་དག་གིས་དགེ་སློང་ཁྲི་དམའ་བ་ལ་ཉལ་བ་སྦྲུལ་དུག་མྱུར་དུ་ཁྱབ་པར་བྱེད་པས་ཟིན་ཏེ་དུས་ལ་བབ་ནས་བཅོམ་ལྡན་འདས་ཀྱིས་དགེ་སློང་གིས་ཁྲི་དམའ་བ་ལ་མལ་བཅའ་བར་མི་བྱའོ། །ཞེས་བཀག་པ་ཐོས་ནས་དེ་དག་གིས་ཁྲི་རྐང་པ་ཁྲུ་བཅུ་གཉིས་པ་བཅས་ཏེ་ཡ་གད་མཐོན་པོ་བཙུགས་པ་དང ། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཅི་ཁྱེད་ཅག་བྱ་ར་བྱེད་དམ། དེ་དག་གིས་སྨྲས་པ། སུ་ཞིག་བྱ་ར་བྱེད། ཁྱེད་ཀྱིས་དགེ་སློང་སྦྲུལ་དུག་མྱུར་དུ་ཁྱབ་པར་བྱེད་པས་ཟིན་ཏེ་དུས་ལ་བབ་པ་མ་མཐོང་ངམ་ཅི། ཁྱེད་དྲུག་སྡེ་དག་ཀྱང་སྦྲུལ་དུག་མྱུར་དུ་ཁྱབ་པར་བྱེད་པས་བཟུང་སྟེ་དུས་ལ་བབ་ཅིང ། ཁོ་བོ་ཅག་ཤི་བའི་ཡོ་བྱད་དག་འགེད་པར་འདོད་དམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་བཟློག་པ་ན་དེ་དང ། དེ་སྐད་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན
8.203b
དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་རྣམས་ཀྱིས་བཟློག་པ་ན་དེ་དང་དེ་སྐད་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་དགེ་འདུན་གྱི་ཁྲི་འམ་ཁྲིའུ་བྱེད་དུ་འཇུག་ན་རྩ་བ་བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །ཚེ་དང་ལྡན་པ་འཆར་ཀ་ཚད་ལས་ཤིན་དུ་འདས་པ་ཡིན་པས་དེའི་པུས་མོ་གཉིས་ཀོ་སྐོ་ལ་རེག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་བུ་གར་གཞུག་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ
8.204a
སློང་གིས་དགེ་འདུན་གྱི་ཁྲི་འམ། ཁྲིའུ་བྱེད་དུ་འཇུག་ན་རྩ་བ་བུ་གར་གཞུག་པ་མ་གཏོགས་པར་བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཁྲི་འམ་ཞེས་བྱ་བ་ནི་ཁྲི་ཉིད་ཀྱིའོ། །ཁྲིའུ་ཞེས་བྱ་བ་ཡང་ཁྲིའུ་ཉིད་དོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ། གཞན་ནོ། །རྩ་བ་བུ་གར་གཞུག་པ་མ་གཏོགས་པར་ཞེས་བྱ་བ་ནི་རྩ་བ་བུ་གར་གཞུག་པ་བཞག་སྟེའོ། །བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ་ཞེས་བྱ་བ་ལ་བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་སོར་བརྒྱད་གང་དག་ཡིན་པ་དེ་ལ་ནི་ཚད་དང་ལྡན་པའི་ཁྲུ་གང་ངོ ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་ཁྲི་འམ། ཁྲིའུ་རྩ་བ་བུ་གར་གཞུག་པ་མ་གཏོགས་པར་བདེ་བར་གཤེགས་པའི་སོར་བརྒྱད་ཀྱི་ཚད་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱི་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་མ་བཤགས་པ་ཡིན་པས་ཡང་བཤགས་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁྲི་རྐང་འཆོས་པའི་ལྟུང་བྱེད་དེ་བརྒྱད་བཅུ་རྩ་ལྔ་པ་རྫོགས་སྷོ།། །།
8.204b
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཉེ་དགའ་གསར་བུ་ཡིན་པས་དེའི་ཁྲི་ཐོབ་བོ་ཅོག་ཆེས་རྒན་པས་ཕྲོགས་ཤིང་གནས་མལ་སྐོ་བའི་དུས་ལ་ཡང་བབ་ནས་དེས་བསམས་པ། གང་གིས་བདག་གི་ཁྲི་མི་ཕྲོགས་པའི་ཐབས་དེ་ལྟ་བུ་ཅི་ཡོད་སྙམ་པ་དང ། དེས་བྱ་བ་འགའ་ཞིག་གི་ཕྱིར་ཤིང་བལ་དག་ཀྱང་བླངས་ནས་དེ་ལ་བློ་སྐྱེས་པ། ཤིང་བལ་གྱིས་བདལ་ཏེ་བཞག་གོ་སྙམ་ནས་དེས་ཁྲིའི་སྟེང་དུ་ཤིང་བལ་བདལ་ཏེ་བཞག་གོ། །ཇི་ཙམ་ན་དགེ་སློང་ཆེས་རྒན་པ་ཞིག་འོངས་ནས་དེས་སྨྲས་པ། ཚེ་དང་ལྡན་པ་འདི་སུའི། ཉེ་དགས་སྨྲས་པ། ཁོ་བོའི་ཤིང་བལ་ལོ། །དེ་ནས་དགེ་སློང་ཞིག་འདུག་པ་དེས་སྨྲས་པ། ཉེ་དགའ་ཇི་སྐད་ཟེར་བ་དེ་བཞིན་ཏེ། ཤིང་བལ་ནི་ཉེ་དགའི་ཡིན་ནོ། །འདི་ལྟར་ཁྲི་ནི་དགེ་འདུན་གྱི་ཡིན་ནོ། །དེ་སྐད་ཅེས་སྨྲས་པ་དང ། ཉེ་དགའ་ཁྲོས་ནས་དེས་ཤིང་བལ་ཁྱེར་ཏེ་ཁྲི་དེའི་སྟེང་དུ་ཤིང་བལ་ཅུང་ཟད་ཅུང་ཟད་བདལ་ཏེ་བཞག་གོ། །དགེ་སློང་དེས་སོ་སོར་མ་བརྟགས་པ་ཉིད་དུ་དེར་ཉལ་ནས་མཚན་མོ་ནམ་ནངས་ཏེ་ལངས་པ་དང་གོས་ཐམས་ཅད་ཤིང་བལ་གྱིས་སྐྱ་བོར་གྱུར་ནས་དགེ་སློང་རྣམས་ཀྱིས་དེ་ལ་སྨྲས་པ། ཅི་ཁྱོད་གཡུལ་གྱི་གཞིར་ཉལ་ལམ། དེས་ཇི་ལྟར་གྱུར་པ་བརྗོད་པ་དང ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་ཁྲི་འམ། ཁྲིའུ་ལ་ཤིང་བལ་བདལ་ཏེ་འཇོག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་དགའ་ལ་རྨས་པ། ཉེ་དགའ་ཁྱོད་དགེ་འདུན་གྱི་ཁྲི་ལ་ཤིང་བལ་བདལ་ཏེ་འཇོག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན
8.205a
འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཁྲི་འམ་ཁྲིའུ་ལ་ཤིང་བལ་འདལ་ལམ། འདལ་དུ་འཇུག་ན་བསྡུས་ནས་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཁྲི་འམ་ཞེས་བྱ་བ་ནི་ཁྲི་ཉིད་དོ། །ཁྲིའུ་ལ་ཞེས་བྱ་བ་ཡང་ཁྲིའུ་ཉིད་ལའོ། །ཤིང་བལ་ཞེས་བྱ་བ་ནི་ལྔ་པོ་ཤལ་མ་ལིའི་དང ། ་ཀའི་དང ། ཀ་ཤའི་དང ། བུ་ཀའི་དང ། ེ་ར་ཀའི་ཤིང་བལ་དག་ལས་གང་ཡང་རུང་བའོ། །བདལ་ལམ་ཞེས་བྱ་བ་ནི་བདག་ཉིད་ཀྱིས་སོ། །བདལ་དུ་འཇུག་ན་ཞེས་བྱ་བ་ནི་གཞན་ནོ། །བསྡུས་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བསྡུས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་ཁྲི་འམ་ཁྲིའུ་ལ་ཤིང་བལ་འདལ་ལམ་འདལ་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བསྡུས་སམ་ཞེས་དྲི་བར་བྱའོ། །
8.205b
མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པ་མ་ཡིན་པས་ཡང་བཤགས་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཤིང་བལ་གྱིས་གོས་པར་བྱས་པའི་ལྟུང་བྱེད་དེ། བརྒྱད་བཅུ་རྩ་དྲུག་པ་རྫོགས་སྷོ།། །། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་གདིང་བ་བྱེད་དུ་གཞུག་གོ་ཞེས་བཀའ་སྩལ་ནས། དགེ་སློང་དག་ཚད་ལས་ཧ་ཅང་ལྷག་པ་བྱེད་དུ་འཇུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་གདིང་བ་བྱེད་དུ་གཞུག་གོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་ཚད་ལས་ཧ་ཅང་ལྷག་པར་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ངས་དགེ་སློང་གིས་གདིང་བ་བྱེད་དུ་གཞུག་གོ་ཞེས་བཀའ་སྩལ་ན། ཁྱེད་ཅག་ཚད་ལས་ཧ་ཅང་ལྷག་པར་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྤང་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི
8.206a
བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག་།དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། །ཞེང་དུ་མཐོ་ཕྱེད་དང་དོའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །ཚེ་དང་ལྡན་པ་འཆར་ཀ་ཚད་ལས་ཧ་ཅང་ལྷག་པས་དེའི་གདིང་བ་དེས་མི་ཆོག་ནས་དེས་གནས་མལ་སྲུང་བའི་ཕྱིར་རྐང་པའི་མཐའ་ལོགས་སུ་ལོ་མའི་ཆུན་པོ་དག་བཞག་གོ། །སངས་རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་རྣམས་ཀྱི་ཆོས་ཉིད་ནི་གདུལ་བར་གྱུར་པའི་སྐྱེ་བོ་ལ་རྗེས་སུ་ཐུགས་བརྩེ་བས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང ། དུད་འགྲོ་རྒྱུ་བ་དང ། ཡི་དགས་རྒྱུ་བ་དང ། ལྷ་རྒྱུ་བ་དང ། ལྗོངས་རྒྱུ་བ་དང ། ཆུ་ཀླུང་རྒྱུ་བ་དང ། རི་རྒྱུ་བ་དང ། དུར་ཁྲོད་རྒྱུ་བ་དང ། གཙུག་ལག་ཁང་རྒྱུར་གཤེགས་པས་དོན་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་རྒྱུར་གཤེགས་པར་བཞེད་ནས་བཅོམ་ལྡན་འདས་ཚེ་དང་ལྡན་པ་འཆར་ཀའི་གཙུག་ལག་ཁང་ག་ལ་བ་དེར་གཤེགས་སོ། །བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀའི་རྐང་པའི་མཐའ་ལོགས་ན་ལོ་མའི་ཆུན་པོ་དག་བཞག་པ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འདི་སུའི་མལ། བཙུན་པ་ཚེ་དང་ལྡན་པ་འཆར་ཀའི་འོ། །འོ་ན་ཅིའི་ཕྱིར་རྐང་པའི་མཐའ་ལོགས་སུ་ལོ་མའི་ཆུན་པོ་དག་བཞག་།བཙུན་པ་བཅོམ་ལྡན་འདས་ཀྱིས་དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག་།དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། ཞེང་དུ་མཐོ་ཕྱེད་དང་དོའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ
8.206b
བ་མཛད་ནས་ཚེ་དང་ལྡན་པ་འཆར་ཀ་ཚད་ལས་ཧ་ཅང་ལྷག་པས་དེའི་གདིང་བ་དེས་མི་འཚལ་ནས་དེས་གནས་མལ་སྲུང་བའི་སླད་དུ་སུག་པའི་མཐའ་ལོགས་སུ་ལོ་མའི་ཆུན་པོ་དག་བཞག་གོ། །ཀུན་དགའ་བོ་དེ་ལྟ་བས་ན་སྲིད་དུ་མཐོ་གང་གིས་སྲིངས་ཤིག་།དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་འཐུན་པ་དང ། དེའི་ཤས་ཆེ་བ་དང ། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ་དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག་།དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། །ཞེང་དུ་མཐོ་ཕྱེད་དང་དོའོ། །སྲིད་དུ་མཐོ་གང་གིས་སྲིངས་ཤིག་།དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །གདིང་བ་ཞེས་བྱ་བ་ནི་སྟེང་རིམ་དུ་གདིང་བའོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །ཚད་བཞིན་དུ་བྱེད་དུ་འཇུག་ཅེས་བྱ་བ་ནི་གདིང་བའི་ཚད་གང་ཡིན་པ་དེ་བཞིན་དུའོ། །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། ཞེང་དུ་མཐོ་ཕྱེད་དང་དོ་ཞེས་བྱ་བ་ལ་སྲིད་དུ་ཞེས་བྱ་བ་ནི་ཆུར་རོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་མཐོའི་མཐོ་དོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་གསུམ་མོ། །ཞེང་དུ་ཞེས་བྱ་བ་ནི་རྒྱར་རོ། །མཐོ་ཕྱེད་དང་དོ་ཞེས་བྱ་བ་ལ་བདེ་བར་གཤེགས་པའི་མཐོ་ཕྱེད་དང་དོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དོ་དང་སོར་དྲུག་གོ། །སྲིད་དུ་མཐོ་གང་གིས་སྲིངས་ཤིག་ཅེས་བྱ་བ་ནི་མི་ཆོག་ན་སྲིད་དུ་བདེ་བར་གཤེགས་པའི་མཐོ་གང་གིས་བསྲིང་བ་སྟེ། བདེ་བར་གཤེགས་པའི་མཐོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་ཕྱེད་དང
8.207a
དོ་སྟེ། དེས་ན་གདིང་བའི་སྲིད་ཀྱི་ཚད་ནི་ཚད་དང་ལྡན་པའི་ཁྲུ་ཕྱེད་དང་ལྔའོ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་པའི་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་གདིང་བའི་སྲིད་དུ་ཁྲུ་ཕྱེད་དང་ལྔ། ཞེང་དུ་ཁྲུ་དོ་དང་སོར་དྲུག་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱི་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་མ་བཤགས་པ་ཡིན་པས་ཡང་བཤགས་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གདིང་བ་ལས་གྱུར་པའི་ལྟུང་བྱེད་དེ་བརྒྱད་བཅུ་རྩ་བདུན་པ་རྫོགས་སྷོ།། ་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་གཡན་པ་དགབ་པ་བྱེད་དུ་གཞུག་གོ་ཞེས་བཀའ་སྩལ་པ། དགེ་སློང་དག་ཚད་ལས་ཧ་ཅང་ལྷག་པ་བྱེད་དུ་འཇུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་གཡན་པ་དགབ་པ་བྱེད་དུ་གཞུག་གོ་ཞེས་བཀའ་སྩལ་ནས། དགེ་སློང་དག་ཅིའི་ཕྱིར་ཚད་ལས་ཧ་ཅང་ལྷག་པ་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན
8.207b
བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ངས་དགེ་སློང་གིས་གཡན་པ་དགབ་པ་བྱེད་དུ་གཞུག་གོ་ཞེས་བཀའ་སྩལ་ན། ཁྱེད་ཅག་ཚད་ལས་ཧ་ཅང་ལྷག་པ་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གཡན་པ་དགབ་པ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག་།དེ་ལ་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི། ཞེང་དུ་མཐོ་དོའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །གཡན་པ་དགབ་པ་ཞེས་བྱ་བ་ནི་ན་བའི་གོས་སོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །ཚད་བཞིན་དུ་བྱེད་དུ་ཆུག་ཤིག་ཅེས་བྱ་བ་ནི་གཡན་པ་དགབ་པའི་ཚད་གང་ཡིན་པ་དེ་བཞིན་དུའོ། །དེ་ལ་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི། ཞེང་དུ་མཐོ་དོའོ་ཞེས་བྱ་བ་ལ། སྲིད་དུ་ཞེས་བྱ་བ་ནི་མཆུར་རོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་མཐོའི་མཐོ་བཞི་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དྲུག་གོ། །
8.208a
ཞེང་དུ་ཞེས་བྱ་བ་ནི་རྒྱར་རོ། །མཐོ་དོའོ་ཞེས་བྱ་བ་ལ། བདེ་བར་གཤེགས་པའི་མཐོ་དོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་གསུམ་མོ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་གཡན་པ་དགབ་པ་སྲིད་དུ་ཁྲུ་དྲུག་།ཞེང་དུ་ཁྲུ་གསུམ་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱི་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པ་མ་ཡིན་པས་ཡང་བཤགས་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཡན་པ་དགབ་པ་ལས་གྱུར་པའི་ལྟུང་བྱེད་དེ། བརྒྱད་བཅུ་རྩ་བརྒྱད་པ་རྫོགས་སྷོ།། ་་་་་་་་་་་་་།།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་དབྱར་གྱི་གོས་རས་ཆེན་བྱེད་དུ་གཞུག་གོ་ཞེས་བཀའ་སྩལ་ནས། དགེ་སློང་དག་ཧ་ཅང་ཚད་ལས་ལྷག་པ་བྱེད་དུ་འཇུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་དབྱར་གྱི་གོས་རས་ཆེན་བྱེད་དུ་གཞུག་གོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་ཧ་ཅང་ཚད་ལས་ལྷག་པ་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ
8.208b
དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་སྨྲས་པ། དགེ་སློང་དག་ངས་དགེ་སློང་གིས་དབྱར་གྱི་གོས་རས་ཆེན་བྱེད་དུ་གཞུག་གོ་ཞེས་བཀའ་སྩལ་ན་ཁྱེད་ཚད་ལས་ཧ་ཅང་ལྷག་པ་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང ། ཆོག་མི་ཤེས་པ་དང ། གསོ་དཀའ་བ་དང ། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། གསོ་སླ་བ་དང ། དགང་སླ་བ་དང ། ཕྲི་བ་དང ། ཡོ་བྱད་བསྙུངས་པ་དང ། སྦྱངས་པའི་ཡོན་ཏན་དང ། མཛེས་པ་དང ། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་དབྱར་གྱི་གོས་རས་ཆེན་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག་།དེ་ལ་དབྱར་གྱི་གོས་རས་ཆེན་གྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དྲུག་།ཞེང་དུ་མཐོ་ཕྱེད་དང་གསུམ་མོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཤེས་བྱ་བ་ནི་ཆོས་འདི་པས་སོ། །དབྱར་གྱི་གོས་རས་ཆེན་ཞེས་བྱ་བ་ནི་ཆར་པ་སྐྱོབ་པའི་གོས་སོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །ཚད་བཞིན་དུ་བྱེད་དུ་ཆུག་ཤིག་ཅེས་བྱ་བ་ནི་དབྱར་གྱི་གོས་རས་ཆེན་གྱི་ཚད་གང་ཡིན་པ་དེ་བཞིན་དུའོ། །དེ་ལ་དབྱར་གྱི་གོས་རས་ཆེན་གྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི
8.209a
མཐོའི་མཐོ་དྲུག་།ཞེང་དུ་མཐོ་ཕྱེད་དང་གསུམ་མོ་ཞེས་བྱ་བ་ལ་སྲིད་དུ་ཞེས་བྱ་བ་ནི་ཆུར་རོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་མཐོའི་མཐོ་དྲུག་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དགུའོ། །ཞེང་དུ་ཞེས་བྱ་བ་ནི་རྒྱར་རོ། །མཐོ་ཕྱེད་དང་གསུམ་མོ་ཞེས་བྱ་བ་ལ། བདེ་བར་གཤེགས་པའི་མཐོ་ཕྱེད་དང་གསུམ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་གསུམ་དང་སོར་བཅཝ་བརྒྱད་དོ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན། དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དབྱར་གྱི་གོས་རས་ཆེན་སྲིད་དུ་ཁྲུ་དགུ་དང ། ཞེང་དུ་ཁྲུ་གསུམ་དང་སོར་བཅཝ་བརྒྱད་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་མ་བཤགས་པ་ཡིན་པས་ཡང་བཤགས་པར་བྱའོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དབྱར་གྱི་རས་ཆེན་ལས་གྱུར་པའི་ལྟུང་བྱེད་དེ། བརྒྱད་བཅུ་རྩ་དགུ་པ་རྫོགས་སྷོ།། ་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའ་བཟང་མཁན་གྱི་གན་དུ་སོང་སྟེ། ཡུད་ཙམ་ཞིག་གཏམ་འདྲེ་བས་འདུག་ནས་སྨྲས་པ། བཞིན་བཟངས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་འཚེམ
8.209b
ནུས་སམ། དེས་སྨྲས་པ། འཕགས་པ་ཁྱོད་ལ་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་ཀྱིས་ཅི་བྱ། དེས་སྨྲས་པ། བཀྲེན་པ་ཁྱོད་ལ་འདིར་ཅི་འགོད། གལ་ཏེ་གླ་འདོད་ན་ཚེམས་ཤིག་།དེས་བསམས་པ། འདི་ཟེར་བ་མ་ཉེས་ཏེ། བདག་ལ་འདིར་ཅི་འགོད། བདག་ལ་གླ་དགོས་ཀྱིས་བཙེམ་མོ་སྙམ་དུ་རིག་ནས་སྨྲས་པ་འཕགས་པ་བཙེམ་མོ། །དེས་དེ་ལ་རས་དང་གླ་བྱིན་པ་དང ། དེས་དེ་བཙེམས་སོ། །ཉེ་དགའ་དེ་ལས་ཆུང་ཤིག་གྱོན་ཏེ་ལྷག་མ་ཕྲག་པས་ཁྱེར་ཏེ་འཕགས་པ་དང ། དེ་དགེ་སློང་ཞིག་གིས་མཐོང་ནས་དེས་སྨྲས་པ། གནས་བརྟན་གཏུར་བུ་གཟིགས་ཤིག་དང ། ངལ་སོར་གཞུག་གོ། །ཉེ་དགས་སྨྲས་པ། ཚེ་དང་ལྡན་པ་འདི་གཏུར་བུ་མ་ཡིན་ནོ། །འོ་ན་ཅི་ལགས། བདེ་བར་གཤེགས་པའི་ཆོས་གོས་སོ། །གནས་བརྟན་ཁྱོད་བདེ་བར་གཤེགས་པའི་ཆོས་གོས་གྱོན་དུ་རུང་ངམ། དགྲ་བོ་དག་གི་གཉའ་བ་རྡོག་པས་མནན་ན་རུང་ངོ ། །གནས་བརྟན་ལ་ཡང་དགྲ་བོ་དག་ཡོད་དམ། ཇེ་དང་པོར་ཁྱོད་ཁོ་བོའི་དགྲ་བོའི་ཐུ་བོ་ཡིན་ཏེ། དེས་ན་ཁོ་བོ་བདེ་བར་གཤེགས་པའི་ཆོས་གོས་གྱོན་པ་མི་བཟོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་འཆང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་འཐུན་པ་མ་ཡིན་པ་རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས
8.210a
ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །བཅོམ་ལྡན་འདས་ཀྱིས་ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་ན་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་པ་དང ། ཚེ་དང་ལྡན་པ་ཉེ་དགས་ལྷག་པ་བྱེད་དུ་བཅུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་ན་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་ན། ཅིའི་ཕྱིར་དགེ་སློང་དག་དེ་བས་ལྷག་པ་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་བཅས་པ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་གམ། བདེ་བར་གཤེགས་པའི་ཆོས་གོས་ལས་ལྷག་པ་བྱེད་དུ་འཇུག་ན་ལྟུང་བྱེད་དོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཅུ། ཞེང་དུ་མཐོ་དྲུག་སྟེ། དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །བདེ
8.210b
བར་གཤེགས་པ་ཞེས་བྱ་བ་ནི་སྟོན་པའོ། །དེའི་ཆོས་གོས་ཀྱི་ཚད་ཀྱི་ཞེས་བྱ་བ་ནི་བདེ་བར་གཤེགས་པའི་ཆོས་གོས་ཀྱི་ཚད་གང་ཡིན་པ་དེའི་འོ། །ཆོས་གོས་ཤེས་བྱ་བ་ནི་བདུན་པོ་བལ་གོས་དང ། ཤ་ནའི་གོས་དང ། ཟར་མའི་གོས་དང ། ཀོ་ཏམ་པའི་གོས་དང ། དུ་གུ་ལའི་གོས་དང ། རས་བལ་གྱི་གོས་དང ། ཉི་འོག་གི་གོས་དག་ལས་གང་ཡང་རུང་བའོ། །བྱེད་དུ་འཇུག་གམ་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །བདེ་བར་གཤེགས་པའི་ཆོས་གོས་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེའི་གོང་མའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོ་དང ། ཡི་དགས་ངན་སོང་དང ། ངན་འགྲོ་དང ། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཅུ། ཞེང་དུ་མཐོ་དྲུག་སྟེ། དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ་ཞེས་བྱ་བ་ལ། བདེ་བར་གཤེགས་པའི་མཐོ་བཅུ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་བཅཝ་ལྔའོ། །བདེ་བར་གཤེགས་པའི་མཐོ་དྲུག་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དགུའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་སམ། བདེ་བར་གཤེགས་པའི་ཆོས་གོས་ལས་ལྷག་པའི་ཆོས་གོས་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དེ་དགུ་བཅུ་པ་རྫོགས་སྷོ།། ་་་་་་་་་་་་་་།།ལྟུང་བྱེད་འབའ་ཤིག་ཏུ་འགྱུར་བ་རྣམས་རྫོགས་སྷོ།། ་་་་་་་་་་།།འདུལ་བ་རྣམ་པར་འབྱེད་པ། བམ་པོ་བརྒྱད་བཅུ་པ།
8.211a
སྡོམ་ལ། གྲོང་དང་ཁྱིམ་གཞན་ཉིད་དང་ནི། །སླབ་པ་རྣམས་དང་དགོན་པ་ནི། །སངས་རྒྱས་ཕན་པ་གསུང་བ་ཡིས། །སོ་སོར་བཤགས་པར་བྱ་བར་གསུངས། སངས་རྒྱས་བཅོམ་ལྡན་འདས་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྡོ་འཇོག་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། མིག་ཨུཏྤ་ལ་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེ་འབྲུའི་མདོག་འདྲ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཤེས་དེའི་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། གང་གི་ཕྱིར་བུ་མོ་འདི་མིག་ཨུཏྤ་ལ་དང་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེ་འབྲུའི་མདོག་འདྲ་བ་དེའི་ཕྱིར་བུ་མོ་འདིའི་མིང་ཨུཏྤ་ལའི་མདོག་ཅེས་བྱ་བར་གདགས་སོ་ཞེས་དེའི་མིང་ཨུཏྤ་ལའི་མདོག་ཅེས་བྱ་བར་བཏགས་སོ། །དེ་བསྲིངས་ཤིང་བསྐྱེད་ནས་ཆེན་མོར་གྱུར་ཏོ། །དེའི་ཕ་ལ་བུ་མེད་ནས་དེས་བསམས་པ། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན་གྱི། འདི་ལྟར་གང་བདག་གི་ཁྱིམ་ན་འདུག་པའི་དམག་པར་འདུག་པ་དེ་ལ་བདག་གིས་སྦྱིན་པར་བྱའོ་སྙམ་མོ། །རྡོ་འཇོག་ན་ཁྱིམ་བདག་གཞན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ
8.211b
མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེ་ཡང་རིགས་དང་འཐུན་པའི་མིང་བཏགས་ནས་དེས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དུས་གཞན་ཞིག་ན་དེའི་ཕ་མ་གཉིས་དུས་ལ་བབ་ནས། དེ་ཕན་ཚུན་འཁྱམ་པ་ན་སྟེས་དབང་གིས་ཁྱིམ་བདག་དེའི་ཁྱིམ་དུ་ཕྱིན་པ་དང ། ཁྱིམ་བདག་དེས་སྨྲས་པ། བུ་ཁྱོད་སུའི། ཁྱིམ་བདག་ཆེ་གེ་མོ་ཞིག་གིའོ། །བུ་ཁྱོད་ཀྱི་ཕ་ག་རེ། དུས་ལ་བབ་བོ། །བུ་ཁྱོད་ཀྱི་མ་ག་རེ། དེ་ཡང་དུས་ལ་བབ་བོ། །བུ་གལ་ཏེ་དེ་ལྟ་ན་ཁོ་བོས་ཁྱོད་ལ་བུ་མོ་སྦྱིན་གྱིས། ཁྱོད་ཁོ་བོའི་ཁྱིམ་ན་འདུག་པའི་དམག་པ་གྱིས་ཤིག་།ཡབ་མ་ནོངས་ཏེ་བདག་ཀྱང་ཕ་མ་གཉིས་དང་བྲལ་ནས་ཕན་ཚུན་འཁྱམ་ཞིང་ཡི་ཆད་པར་གྱུར་ན། ཁྱོད་དེ་སྐད་གསུང་བ་མ་ནོངས་ཀྱིས་དེ་བཞིན་བགྱིའོ། །ཁྱིམ་བདག་དེས་དེ་ལ་ཨུཏྤ་ལའི་མདོག་བྱིན་ནས་ཉི་མ་དང ། ཚེས་གྲངས་དང ། ཡུད་ཙམ་གྱི་སྦྱོར་བས་བག་མར་བཏང་ནས་ཁྱེའུ་དེས་ཀྱང་ཁྱིམ་དེར་འདུག་པར་བརྩམས་སོ། །ཇི་ཙམ་ན་དུས་གཞན་ཞིག་ན་ཨུཏྤ་ལའི་མདོག་གི་ཕ་དུས་ལ་བབ་ནས་དེའི་མ་ཅི་དགའ་མགུར་གནས་པ་དང ། རྒྱུ་བའི་སྦྱོར་བས་ཟས་དང་གོས་བཟང་པོ་དག་གིས་རྟས་པས་ཉོན་མོངས་པ་དག་གིས་གནོད་པར་བརྩམས་པ་དང ། དེས་བསམས་པ། གལ་ཏེ་བདག་གིས་འདིར་སྐྱེས་པ་གཞན་བཀུག་ན་བདག་གི་དམག་པ་འདིས་ཤེས་པར་འགྱུར་གྱིས། བདག་འདི་ཉིད་དང་ལྷན་ཅིག་རྩེ་བར་བྱ་བ་དང ། དགའ་བ་དང ། དགའ་མགུར་སྤྱད་པ་ཉམས་སུ་མྱོང་བར་བྱའོ་སྙམ་ནས་དེས་དེ་ལ་མཚན་མ་བསྟན་ཏོ། །བུད་མེད་ཀྱི་ཡུལ་ནི་དབང་པོ་དག་འཕྲོག་ཅིང་དོན་དུ་གཉེར་འདོད་པར་འགྱུར་བ་ཡིན་པས་དེས་དེ་ལ་བརྟགས་པར་གྱུར་ཏོ། །ཡང་དེས་དེ་ལ་མཚན་མ་བསྟན་པ་དང ། དེ་དེ་དང་ལྷན་ཅིག་སྟེན་པར་གྱུར་ཏོ། །དེའི་ཚེ་ན་ཨུཏྤ་ལའི་མདོག་ལ་སེམས་ཅན་ཞུགས་པར་གྱུར་ཅིང ། དེ་བཙའ་བའི་དུས་ལ་བབ་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་སོང
8.212a
ལ་ཡུམ་བོས་ཤིག་།དེ་སོང་བ་དང་ཇི་ཙམ་ན་དེ་དམག་པ་དང་ལྷན་ཅིག་དབེན་པ་ན་འདུག་པ་མཐོང་ནས་དེས་ཡུད་ཙམ་ཞིག་རྟོག་ཅིང་དེར་བསྡད་པ་དང ། ཇི་ཙམ་ན་དེ་ཕྱིར་བྱུང་ནས་དེས་སྨྲས་པ། ཨུཏྤ་ལའི་མདོག་ཁྱོད་ལ་འབོད་ཀྱིས་བཞུད་དོ། །དེ་དེར་སོང་བ་དང ། ཇི་ཙམ་ན་བུ་མོ་ཞིག་བཙས་ནས་ཨུཏྤ་ལའི་མདོག་གིས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱོད་ཅི་ཐོགས། དེས་སྨྲས་པ། ཁྱོད་ཀྱི་ཡུམ་དང་ཁྱིམ་ཐབ་ནད་མེད་པར་གྱུར་ཅིག་།དེས་སྨྲས་པ། དེས་ཅི་ཉེས། དེས་ཇི་ལྟར་གྱུར་པ་བརྗོད་པ་དང ། དེས་སྨྲས་པ་བུ་མོ་ཁྱོད་ཁོ་མོའི་མ་དང་ཁྱིམ་ཐབ་ལ་སྐུར་པ་འདེབས་སམ། དེས་སྨྲས་པ། ཇོ་མོ་ཁྱོད་ཐུགས་མི་ཆེས་ན། བདག་གིས་ཁྱོད་ཀྱི་མངོན་སུམ་དུ་འགྱུར་བར་བགྱིའོ་ཞེས་དེ་དེ་གཉིས་ཀྱི་སྐབས་བཙལ་བ་དེ་ལྷུར་ལེན་ཅིང་འདུག་པ་དང ། ཇི་ཙམ་ན་དེ་གཉིས་དབེན་པར་འདུག་པར་གྱུར་ནས་དེས་མྱུར་བ་མྱུར་བར་སོང་སྟེ། ཨུཏྤ་ལའི་མདོག་ལ་སྨྲས་པ། ཚུར་སྤྱོན་ད་གཟིགས་ཤིག་།དེ་ཡང་མྱུར་བ་མྱུར་བར་སོང་སྟེ་བལྟས་པ་དང ། དེ་གཉིས་སྟེན་པར་མཐོང་ནས། ཨུཏྤ་ལའི་མདོག་གིས་བསམས་པ། སྐལ་ཆད་མ་འདིས་རྡོ་འཇོག་ན་སྐྱེས་པ་གཞན་མ་མཐོང་ངམ་ཅི་ན། གང་གི་ཕྱིར་དམག་པ་དང་ལྷན་ཅིག་སྟེན་པར་བྱེད། སྐལ་ཆད་པ་འདིས་ཀྱང་རྡོ་འཇོག་ན་བུད་མེད་གཞན་མ་མཐོང་ངམ་ཅི་ན། གང་གི་ཕྱིར་སྒྱུག་མོ་དང་ལྷན་ཅིག་སྟེན་པར་བྱེད་སྙམ་དུ་རིག་ནས་མི་བཟོད་པ་སྐྱེས་ནས་དེས་ཁྱིམ་ཐབ་ལ་སྐལ་ཆད་པ་ཁྱོད་ད་ཕྱིན་ཆད་འདི་དང་ལྷན་ཅིག་དགའ་མགུར་སྤྱོད་ཅིག་ཅེས་བུ་མོ་དེ་ཕའི་གན་དུ་འཕངས་པ་དང ། དེ་ཕའི་ལུས་ལས་འདྲིལ་ནས་སྒོའི་ཐེམ་པར་ལྷུང་སྟེ་གླད་པ་ཞོམ་མོ། །ུཏྤ་ལའི་མདོག་མགོ་གཡོགས་ཏེ་ཁྱིམ་ནས་བྱུང་བ་དང ། ཇི་ཙམ་ན་དོན་འཐུན་བཅོམ་བརླག་ཏུ་འཕགས་པ་མཐོང་ནས། དེ་དེ་དང་ལྷན་ཅིག་འཕགས་པ་དང ། དེད་དཔོན་གྱིས་མཐོང་ནས། དེ་དེའི་གཟུགས་དང་ལང་ཚོ་མཛེས་པ་ལ་ཆགས་ནས། དེས་སྨྲས་པ། སྲུ་ཁྱོད་སུའི། དེད་དཔོན་ཁོ་མོ་གང་ཁོ་མོ་ལ་ཟས་དང་གོས་སྦྱིན་པ་དེའི་འོ། །དེད་དཔོན་དེས་དེ་ཆུང་མར་བྱས་ནས་དོན་འཐུན་མཐར་གྱིས་བཅོམ་བརླག་ཏུ་ཕྱིན་པ་དང ། དེས་དེ་ཉིད་དུ་བཞག་གོ། །དེ་དེ་ནས་དེད
8.212b
དཔོན་དེས་ཟོང་བསྒྱུར་ནས་ཟོང་གི་རིན་ཁྱེར་ཏེ་ཕྱིར་རྡོ་འཇོག་ཏུ་འོངས་པ་དང ། དེ་ན་ཚོང་པ་དེ་དག་ཕན་ཚུན་ཁྱིམ་གཞན་དུ་མགྲོན་དུ་བོས་ཏེ་སྟོན་མོ་བྱེད་པ་ན། དེད་དཔོན་དེས་འགའ་ཡང་ཟན་མ་བྱིན་ནས་ཚོང་པ་དག་གིས་སྨྲས་པ། དེད་དཔོན་ཁྱོད་ཀྱིས་འགའ་ཡང་གཡར་དྲངས་ཏེ་འཚལ་མ་མ་སྩལ་ཏོ། །དེས་སྨྲས་པ། ཁྱེད་ཅག་ནི་ཁྱིམ་མི་མོ་དག་བདོག་པས་དེས་ན་སྟོན་མོ་བྱེད་མོད། ཁོ་བོ་ལ་ནི་གང་བསྙེན་བཀུར་བྱེད་པ་འགའ་ཡང་མེད་པས་ཁོ་བོས་ཇི་ལྟར་ཟན་སྦྱིན། དེ་དག་གིས་སྨྲས་པ། གལ་ཏེ་དེ་ལྟ་ན་ཅིའི་སླད་དུ་བུ་མོ་མི་ཚོལ། དེས་སྨྲས་པ། ཁོ་བོའི་ཆུང་མ་དང་འདྲ་བའི་བུ་མོ་འགའ་ཞིག་ཡོད་ན་དེ་བག་མར་བླང་ངོ ། །དེ་དག་གིས་སྨྲས་པ། ཇེ་ཁྱོད་ཀྱི་བཙུན་མོ་ཅི་འདྲ་བལྟས་གསུངས་ཤིག་།དེས་ཨུཏྤ་ལའི་མདོག་གི་གཟུགས་དང ། ལང་ཚོ་མཛེས་པ་བརྗོད་པ་དང ། དེ་དག་གིས་སྨྲས་པ། དེད་དཔོན་དེ་ནི་བུད་མེད་རིན་པོ་ཆེ་ཞིག་སྟེ། འོན་ཀྱང་དེ་ལྟ་བུ་གཞན་འགའ་མཆིས་ཀྱང་གངས་བཙལ་ལོ་ཞེས་དེ་དག་གིས་བཙལ་བར་བརྩམས་པ་དང ། ཇི་ཙམ་ན་ཨུཏྤ་ལའི་མདོག་ཉིད་ཀྱི་བུ་མོ་དེ་དེ་འདྲ་བར་མཐོང་ནས་དེ་དག་གིས་བུ་མོ་སློང་ངོ་ཞེས་དེ་བསླངས་པ་དང ། དེ་དག་གིས་སྨྲས་པ། སུའི་ཕྱིར། དེད་དཔོན་ཆེ་གེ་མོ་ཞིག་ཡོད་པ་དེའི་ཕྱིར་རོ། །ཤེས་ལྡན་དག་བདག་ཅག་གིས་ནི་སྦྱིན་ལ་རག་ན། འདི་ལྟར་ཁྱེད་ལ་སྐྱོན་ཡོད་དེ་ཁྱེད་ཀྱིས་བག་མ་བླངས་ནས་བོར་ཏེ་འདོང་ངོ ། །མི་དོར་རོ། །གལ་ཏེ་དེ་ལྟ་ན་སྦྱིན་ནོ་དེ་དག་གིས་དེ་བསླངས་ནས་དེད་དཔོན་གྱིས་བག་མར་བླངས་སོ། །དེ་ནས་ཚོང་པ་དེ་དག་གིས་ཟོང་བསྒྱུར་ཏེ་ཟོང་རིན་ཁྱེར་ནས་ཡང་བཅོམ་བརླག་ཏུ་འཕགས་པ་དང ། ཇི་ཙམ་ན་མཐར་གྱིས་བཅོམ་བརླག་དང་ཧ་ཅང་མི་རིང་བ་ན་རི་བྲགས་ཤིག་ཡོད་པ་དེར་ཕྱིན་ཏོ། །དེད་དཔོན་དེས་ཟོང་དེ་དང་བུ་མོ་དེ་རི་བྲགས་དེར་བཞག་ནས་ཉུང་ཤས་ཤིག་དང་བཅོམ་བརླག་ཏུ་སོང་བ་དང ། ུཏྤ་ལའི་མདོག་གིས་བྱོན་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ།
8.213a
དེད་དཔོན་བདེ་བར་བྱོན་ཏམ། དེས་སྨྲས་པ། བཟང་མོ་ག་ལ་བདེ་བར་འོངས། ཁོ་བོ་བཅོམ་མོ། །རྗེའི་སྲས་ཁྱོད་གསོན་པོར་བྱོན་པ་དགྱེས་མོད། ནོར་ལྟ་སླད་ཀྱིས་ཀྱང་མཆིས་པར་འགྱུར་རོ། །དེ་དུས་ཅུང་ཟད་ཅིག་འདུག་ནས་སྨྲས་པ། བཟང་མོ་ཁོ་བོ་བཅོམ་པའི་རྫས་ཚོལ་དུ་འགྲོའོ། །དེས་སྨྲས་པ། མ་ནོངས་ཀྱིས་བཞུད་ཅིག་།དེ་སོང་མ་ཐག་ཁོ་ནར་དེའི་ཤེད་འཐུན་འོངས་ཏེ། ཨུཏྤ་ལའི་མདོག་ལ་དྲིས་པ། དེད་དཔོན་གར་སོང་དེས་སྨྲས་པ་བཅོམ་པའི་རྫས་ཚོལ་དུ་སོང་ངོ ། །དེ་གང་དུ་སུས་བཅོམ། བདག་ཀྱང་མི་ཤེས་ཏེ་དེ་ན་རེ་ཁོ་བོ་བཅོམ་གྱིས། བཅོམ་པའི་རྫས་ཚོལ་དུ་འགྲོའོ་ཞེས་ཟེར་རོ། །དེས་སྨྲས་པ། དེ་ད་ལྟར་ཇི་ལྟར་ཕུན་སུམ་ཚོགས་ཤིང་འོངས་པ་དེ་ལྟར་སྔོན་ལན་འགའ་ཡང་ཕུན་སུམ་ཚོགས་ཤིང་མ་འོངས་པས་དེས་ཁྱོད་བྲིད་དོ། །ཤེད་འཐུན་གཏམ་བྱོས་ཤིག་།གཏམ་གཞན་ཅི་ཞིག་བྱ། དེས་རྡོ་འཇོག་ནས་ས་འཛིན་མ་འདི་ལྟ་བུ་ཞིག་ཁྲིད་དེ་འོངས་པས་ཁྱོད་དེའི་རྐང་པ་གཉིས་འཁྲུ་བར་ཡང་མི་རུང་ངོ ། །ཤེད་འཐུན་དེ་བདེན་ནམ། བདེན་ནོ། །དེས་སྡོད་ཅིག་ཅེས་བྱས་ཏེ་ཅང་མི་སྨྲ་བར་འདུག་གོ། །ཇི་ཙམ་ན་དེད་དཔོན་དེ་འོངས་ནས་དེས་བརྙས་ཐབས་སྔོན་དུ་བཏང་སྟེ་སྨྲས་པ། རྗེའི་སྲས་ཁྱོད་ཀྱིས་བཅོམ་པའི་རྫས་བཙལ་ཏམ། བཟང་མོ་བཙལ་ཏོ། །རྗེའི་སྲས་ཁྱོད་ཀྱིས་ཁོ་མོ་བྲིད་དེ། ཁྱོད་གང་དུ་སུས་ཀྱང་མ་བཅོམ་གྱི། ཁོ་མོས་ཇི་ལྟར་ཁྱོད་ཀྱིས་རྡོ་འཇོག་ནས་ས་འཛིན་མ་ཞིག་ཁྲིད་དེ་འོངས་ཤེས་ཐོས་ཀྱིས་དེ་འདི་ཉིད་དུ་ཁྲིད་དེ་སྤྱོན་ཅིག་།གང་གི་གནས་གཉིས་སུ་འགོད་པར་འགྱུར་བ་དེའི་ལོངས་སྤྱོད་དག་ནི་སྲབས་པ་ཉིད་དང ། ཡོངས་སུ་ཟད་པ་དང ། ཡོངས་སུ་མཐར་ཐུག་པར་འགྱུར་རོ། །བཟང་མོ་གལ་ཏེ་དེ་ལྟ་ཡིན་དུ་ཟིན་ཀྱང་ཁྱོད་ཀྱིས་གང་གི་ཁྱིམ་ན་ཆུང་མ་གཉིས་ཡོད་པ་དེས་ལན་འགའ་ཡང་སྐྱོ་མ་གྲང་མོ་མི་འཐུངས་ཤིང་འཐབ་མོ་དང ། འཚང་འདྲུ་བ་དང ། རྩོད་པ་དང ། འགྱེད་པར་འགྱུར་རོ་ཞེས་བྱ་བ་མ་ཐོས་སམ། རྗེའི་སྲས་དེ་ཞི་བར་གྱུར་ཅིག་།དེ་ལྟར་མི་འགྱུར་གྱིས་དེ་ཁྲིད་དེ་སྤྱོན་ཅིག་།གལ་ཏེ་ནུ་མོ་ཙམ་ཞིག་ན་ནུ་མོའི་འདུ་ཤེས་ཉེ་བར་གཞག་པར་བགྱིའོ། །གལ་ཏེ་བུ་མོ་ཙམ་ཞིག་ན་བུ་མོའི་འདུ་ཤེས་ཉེ་བར
8.213b
གཞག་པར་བགྱིའོ། །དེས་སྨྲས་པ། བཟང་མོ་གལ་ཏེ་དེ་ལྟ་ན་མ་ཉེས་ཀྱིས་ཁྲིད་དེ་འོང་ངོ་ཞེས་དེས་དེ་ཁྲིད་དེ་འོངས་པ་དང ། དེས་དེ་མཐོང་ནས་རྗེས་སུ་ཆགས་པ་སྐྱེས་སོ། །དུས་གཞན་ཞིག་ན་ཨུཏྤ་ལའི་མདོག་གིས་བུ་མོ་དེའི་སྐྲ་བྱ་བར་བརྩམ་པ་དང ། མགོ་ལ་སྒྲོས་ཡོད་པ་མཐོང་ངོ ། །མཐོང་ནས་ཀྱང་དྲིས་པ་བུ་མོ་འདི་ཅི་ཉེས། དེས་སྨྲས་པ། བདག་གིས་ཀྱང་མ་འཚལ་ཏེ། བདག་གི་ཕྱི་མོའི་མཆིད་ནས་ཁྱོད་ཀྱི་མ་ཕ་ལ་ཁྲོས་པས་ཁྱོད་འཕངས་པས་སྒོའི་ཐེམ་པར་ལྟུང་སྟེ། དེར་སྒྲོས་འདི་བྱུང་ངོ་ཞེས་མཆིའོ། །ཁྱོད་ཀྱི་ཕྱི་མོ་ཅི་མིང ། ཆེ་གེ་མོ་ཞིག་གོ། །ཁྱོད་ཀྱི་མ་ཅི་མིང ། ུཏྤ་ལའི་མདོག་གོ། །དེས་བསམས་པ་བདག་དེར་ནི་མ་དང་ཆེན་ཆུང་ངུ་གྱུར་ལ། འདིར་ནི་བུ་མོ་དང་ཆེན་ཆུང་ངུ་གྱུར་གྱིས་རྣམ་པ་ཐམས་ཅད་དུ་འགྲོ་བར་བྱའོ་སྙམ་ནས། དེ་མགོ་གཡོགས་ཏེ་ཁྱིམ་ནས་བྱུང་བ་དང ། ཇི་ཙམ་ན་དོན་འཐུན་ཡུལ་ཡངས་པ་ཅན་དུ་འཕགས་པ་མཐོང་ནས། དེ་ཡང་དེ་དང་ལྷན་ཅིག་འཕགས་པ་དང་དེ་ཚོང་པ་དག་དང་ལྷན་ཅིག་དགའ་མགུར་སྤྱོད་ཅིང་ཡངས་པ་ཅན་དུ་སོང་ངོ ། །ཡངས་པ་ཅན་ན་གནས་པའི་ཚོགས་ཅན་མ་དག་གིས་སྨྲས་པ། བཅོམ་བརླག་པའི་ཚོང་པ་འདི་དག་བདག་ཅག་དང་ལྷན་ཅིག་རྩེད་མོ་དང ། དགའ་བ་དང་དགའ་མགུར་སྤྱོད་པ་ཉམས་སུ་མྱོང་བར་མི་བྱེད་དོ་དེ་ན་ཚོགས་ཅན་མ་གཅིག་གིས་སྨྲས་པ། དེ་དག་གིས་ས་འཛིན་མ་འདི་ལྟ་བུ་ཞིག་ཁྲིད་དེ་འོངས་པས་བདག་ཅག་དེའི་རྐང་པ་གཉིས་འཁྲུ་བར་ཡང་མི་རུང་བས་ཅིའི་ཕྱིར་དེ་དག་བདག་ཅག་དང་ལྷན་ཅིག་རྩེ་བ་དང ། དགའ་བ་དང་དགའ་མགུར་སྤྱོད་པ་ཉམས་སུ་མྱོང་བར་བྱེད། ཚོགས་ཅན་མ་དེ་དག་འདུས་ཏེ་ཨུཏྤ་ལའི་མདོག་གི་གན་དུ་དོང་ནས་སྨྲས་པ། ས་འཛིན་མ་ཁྱོད་ཁོ་མོ་ཅག་གི་འཚོ་བས་བྱེད་ན་ཅིའི་ཕྱིར་ཁོ་མོ་ཅག་གི་ནང་དུ་མི་འཇུག་།དེས་མགོ་གཡོགས་པ་བཤུས་ཏེ་སྨྲས་པ། བདག་དེང་ཕྱིན་ཆད་ཁྱེད་ཅག་གི་ནང་དུ་འཇུག་གོ་ཞེས་དེ་དེ་དག་གི་ནང་དུ་ཞུགས་སོ། །ཇི་ཙམ་དུས་གཞན་ཞིག་ན་ཚོགས་ཅན་མ་དེ་དག་ཆང་གྲལ་དུ་ཚོགས་ཤིང་གཏམ་ཟེར་བ་ན་སྨྲས་པ། བདག་ཅག་ལས་གང་གིས་ཚོང་པ་གང་ནོར་ཇི་ཙམ་དང་བྲལ་བར་བྱས། དེ་ན་གཅིག་གིས
8.214a
སྨྲས་པ། ཁོ་མོས་ནི་ཚོང་པ་ཆེ་གེ་མོ་ཞིག་ནོར་འདི་ཙམ་དང་བྲལ་བར་བྱས་སོ། །གཞན་དག་གིས་སྨྲས་པ། ཁོ་མོ་ཅག་གིས་ནི་ཚོང་པ་ཆེ་གེ་མོ་དག་ནོར་འདི་ཙམ་དང་བྲལ་བར་བྱས་སོ། །ཡང་གཞན་དག་གིས་སྨྲས་པ། ཁོ་མོ་ཅག་གིས་ཀྱང་ཚོང་པ་ཆེ་གེ་མོ་དག་ནོར་འདི་ཙམ་དང་བྲལ་བར་བྱས་སོ། །ཡངས་པ་ཅན་ན་སྤོས་འཚོང་གི་ཁྱེའུ་མི་སྡུག་པ་ཐོབ་པ་ཞིག་འདུག་པ་དེ་ཚོགས་ཅན་མ་འགས་ཀྱང་རྗེས་སུ་འཇུག་པར་མ་བྱས་ནས་ཚོགས་ཅན་མ་དེ་དག་གིས་སྨྲས་པ། བདག་ཅག་ལས་གང་གིས་སྤོས་འཚོང་གི་ཁྱེའུ་ཆེ་གེ་མོ་ཞིག་རྗེས་སུ་འཇུག་པར་བྱེད་ནུས་པའི་བུད་མེད་དེ་ནི་བུད་མེད་ཀྱི་ཡོན་ཏན་དང་ལྡན་པར་བདག་ཅག་སྨྲའོ། །ུཏྤ་ལའི་མདོག་གིས་སྨྲས་པ། ཅི་དེ་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནམ། འོན་ཏེ་མ་ཡིན་དེ་དག་གིས་སྨྲས་པ། དེ་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནོ། །གལ་ཏེ་ཁོ་མོས་དེ་རྗེས་སུ་འཇུག་པར་བྱས་ན་ཁྱེད་ཀྱི་ཁོ་མོ་ཐུ་མོའི་གནས་སུ་གཞག་གམ། གཞག་གོ། །གལ་ཏེ་ཁྱོད་ཀྱིས་དེ་རྗེས་སུ་འཇུག་པར་མ་ནུས་ན་ཁྱོད་ཇི་ལྟར་བྱ། ཁོ་མོས་ཁྱེད་ལ་ཀར་ཥ་པ་ཎ་དྲུག་བཅུ་གཞལ་ལོ། །མ་ཉེས་ཀྱིས་དེ་ལྟར་གྱིས་ཤིག་།ུཏྤ་ལའི་མདོག་གི་ཁྱིམ་བདག་སྤོས་འཚོང་གི་ཁྱེའུ་དེའི་དྲུང་དགས་བླངས་པས་དེས་བུ་མོ་མངག་གཞུགས་མ་སློབ་ཏུ་བཅུག་སྟེ། བུ་མོ་ཁྱོད་ཀྱིས་སྤོས་འཚོང་གི་ཁྱེའུ་ཆེ་གེ་མོ་ཞིག་ལས་ཉི་མ་རེ་རེ་ཞིང་སྤོས་ཉོ་བར་བྱའོ། །གལ་ཏེ་སུའི་གན་དུ་ཁྱེར་ཞེས་ཟེར་ན། ཨུཏྤ་ལའི་མདོག་གི་གན་དུ་རིགས་ཀྱི་བུ་ཞིག་འོངས་པ་དེའི་གན་དུ་ཁྱེར་རོ་ཞེས་བརྗོད་པར་བྱའོ། །བུ་མོ་མངག་གཞུག་མ་དེ་སྤོས་འཚོང་གི་ཁྱེའུ་དེ་ལས་ཉི་མ་རེ་རེ་ཞིང་སྤོས་ཉོ་བར་བྱེད་དོ། །དེས་དེ་ལ་སྨྲས་པ། བུ་མོ་ཁྱོད་ཉི་མ་རེ་རེ་ཞིང་སུའི་གན་དུ་སྤོས་ཁྱེར་བར་བྱེད། དེས་སྨྲས་པ། ཨུཏྤ་ལའི་མདོག་གི་གན་དུ་རིགས་ཀྱི་བུ་ཞིག་འོངས་པ་དེའི་གན་དུ་ཁྱེར་རོ། །ཡང་ཨུཏྤལ་ལའི་མདོག་གིས་བུ་མོ་མངག་གཞུག་མ་དེ་ལ་སྨྲས་པ། བུ་མོ་སྤོས་འཚོང་གི་ཁྱེའུ་དེ་ལས་སྨན་བསྐ་བ་དང ། ཁ་བ་དང ། ཚ་བ་དག་ཉོ་བར་བྱའོ། །གལ་ཏེ་སུའི་གན་དུ་ཁྱེར་ཞེས་ཟེར་ན་རིགས་ཀྱི་བུ་དེ་ན་བས་དེའི་སྨན་གྱི་ཕྱིར་ཁྱེར་རོ་ཞེས་བརྗོད་པར་བྱའོ། །གལ
8.214b
ཏེ་དབྱིག་སུའི་ཡིན་ཞེས་ཟེར་ན། ཨུཏྤ་ལའི་མདོག་གི་ཡིན་ནོ་ཞེས་བརྗོད་པར་བྱའོ། །བུ་མོ་མངག་གཞུག་མ་དེས་ཀར་ཥ་པ་ཎ་དག་ཁྱེར་ཏེ་སྤོས་འཚོང་གི་ཁྱེའུ་དེའི་གན་དུ་སོང་ནས་སྨྲས་པ། སྨན་བསྐ་བ་དང ། ཁ་བ་དང ། ཚ་བ་དག་བྱིན་ཅིག་།དེས་སྨྲས་པ། སུའི་གན་དུ་ཁྱེར། དེས་སྨྲས་པ། རིགས་ཀྱི་བུ་དེ་ན་བས་ན་དེའི་སྨན་གྱི་ཕྱིར་ཁྱེར་རོ། །དེས་སྨྲས་པ། དབྱིག་སུའི་ཡིན། དེས་སྨྲས་པ། ཨུཏྤ་ལའི་མདོག་གིའོ། །དེས་བསམས་པ། དེ་ནི་ན་ཅུང་ཆེན་མོ་ཞིག་སྟེ། རང་གི་སྨན་གྱིས་བསྙེན་བཀུར་བྱེད་དོ། །སྙམ་ནས་དེ་དེ་ལ་རྗེས་སུ་ཆགས་པ་སྐྱེས་ནས། དེས་བུ་མོ་དེ་ལ་སྨྲས་པ། བུ་མོ་ཨུཏྤ་ལའི་མདོག་ལ་སྤོས་འཚོང་གི་ཁྱེའུ་དེ་ཁྱོད་ལྟ་བར་འདོད་དོ་ཞེས་གྱིས་ཤིག་།བུ་མོ་དེས་ཨུཏྤ་ལའི་མདོག་ལ་བརྗོད་པ་དང ། དེས་སྨྲས་པ། བུ་མོ་སོང་ལ་འདི་སྐད་ཅེས། ད་དུང་རིགས་ཀྱི་བུ་དེ་མ་སོས་སོ་ཞེས་གྱིས་ཤིག་།དེ་སོང་སྟེ་དེ་ལ་དེ་སྐད་བརྗོད་པ་དང ། དེ་ཡང་དང་ཡང་དུ་བུ་མོ་དེ་ལ་ཉི་མ་གང་ལ་འོང་བར་བྱ་ཞེས་འདྲིའོ། །དེས་ཨུཏྤ་ལའི་མདོག་ལ་བརྗོད་པ་དང ། དེས་བསམས་པ། དེ་ལྷག་པར་ཆགས་པར་གྱུར་གྱིས་ཐབས་ཀྱི་རྣམ་པ་ལེགས་པ་ཞིག་བྱའོ་སྙམ་ནས་དེ་རྩཝ་མི་ཞིག་བྱས་ཏེ། ཁྲིའི་སྟེང་དུ་བཞག་ནས་དུར་ཁྲོད་དུ་ཁྱེར་ཏེ་བསྲེགས་ནས་དེའི་འོག་ཏུ་སྐྲ་བཤིག་ཅིང་ངུ་བའི་བཞིན་གྱིས་སྤོས་འཚོང་གི་ཁྱེའུ་དེའི་ཚོང་ཁང་དང་ཧ་ཅང་ཐག་མི་རིང་བ་ནས་འགྲོ་བར་བརྩམས་པ་དང ། སྤོས་འཚོང་གི་ཁྱེའུ་དེས་དེ་མཐོང་ངོ ། །བཅོམ་ལྡན་འདས་ཀྱིས་བུད་མེད་ཀྱིས་སྐྱེས་པ་རྣམ་པ་བརྒྱད་ཀྱིས་འཆིང་བར་བྱེད་དེ། གར་དང ། གླུ་དང ། རོལ་མོ་དང ། གད་མོ་དང ། ངུ་བ་དང ། ལྟ་བ་དང ། རེག་པ་དང ། རྨ་འབྱེད་པས་སོ་ཞེས་གསུངས་པས་སྤོས་འཚོང་གི་ཁྱེའུ་དེ་དེ་ལ་ཤིན་ཏུ་ཆགས་པར་གྱུར་ནས་བུ་མོ་དེ་ལ་ཡང་སྨྲས་པ། བུ་མོ་ད་འོང་ངོ ། །དེས་ཨུཏྤ་ལའི་མདོག་ལ་བརྗོད་པ་དང ། དེས་སྨྲས་པ། བུ་མོ་སོང་ལ་འདི་སྐད་ཅེས་རིག་ཀྱི་བུ་དེ་དེར་དུས་ལ་བབ་སྟེ། ད་དུང་མྱ་ངན་མ་སངས་པས་མཐོང་བར་ག་ལ་འགྱུར་ཞེས་བྱོས་ཤིག་།ུཏྤ་ལའི་མདོག་གིས་ཇི་ལྟ་ཇི་ལྟར་བསྐྱངས་པ་དེ་ལྟ་དེ་ལྟར་སྤོས་འཚོང་གི་ཁྱེའུ་དེ་ཆགས་པ་དང་བཅས་པས་མཐོང་འདོད་པར་གྱུར་ནས། ཨུཏྤ་ལའི་མདོག་གིས་དེ་ལ་སྡུམ་པར་མ་བྱོན་པར་སྐྱེད་མོས་ཚལ་ག་གེ་མོ་ཞིག་ཏུ་སྤྱོན་ཅིག་ཅེས་ཕྲིན་སྤྲིང་བ་དང ། སྤོས་འཚོང་གི་ཁྱེའུ་དེ་བཟའ་བ་དང ། བཏུང་བ་དང་གོས་དང ། ཕྲེང་བ་རྒྱུ་མང་པོ་ཐོགས་ཏེ
8.215a
སྐྱེད་མོས་ཚལ་དེར་འོངས་ནས། དེས་ཨུཏྤ་ལའི་མདོག་དང་ལྷན་ཅིག་རེ་ཤིག་ཟོས་ཤིང་འཐུངས་པ་དང ། ཇི་ཙམ་ན་དེ་ར་རོ་ཞིང་ཆང་གི་དབང་གིས་བདག་ཉིད་མི་དྲན་པར་གྱུར་ནས་ཨུཏྤ་ལའི་མདོག་གིས་བསམས་པ། ད་ནི་འདི་སྐྱེ་བོ་མང་པོས་ཚོར་བར་བྱའོ་སྙམ་ནས། དེས་དེའི་མགོ་ལ་ཕྲེང་བ་བཏགས་ཏེ་གཉའ་བ་བསྒྲིལ་ནས་ཁྱིམ་དུ་ཁྲིད་པ་དང ། ཚོགས་ཅན་མ་དེ་དག་གིས་དེ་མཐོང་ནས་དེ་དག་མཆོག་ཏུ་ངོ་མཚར་སྐྱེས་ཏེ་སྨྲས་པ། ས་འཛིན་མ་འདིས་སྤོས་འཚོང་གི་ཁྱེའུ་མི་སྡུག་པ་ཐོབ་པ་རྗེས་སུ་འཇུག་པར་བྱས་པ་ལེགས་སོ་ཞེས་དེ་དག་གིས་དེ་ཐུ་མོའི་གནས་སུ་བཞག་གོ། །དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཇི་ཙམ་དུས་གཞན་ཞིག་ན་དེ་ལ་སེམས་ཅན་ཞུགས་པར་གྱུར་ཏོ། །ཡངས་པ་ཅན་ན་སྒོ་བ་གཉིས་ཡོད་དེ། ཤར་ཀྱི་དང ། ནུབ་ཀྱིའོ། །དེ་གཉིས་ཕན་ཚུན་བཤེས་པར་གྱུར་ནས་དེ་ན་གཅིག་གིས་སྨྲས་པ། ཤེད་འཐུན་གང་གིས་བདག་ཅག་གཉིས་ཤི་ཞིང་དུས་ལ་བབ་ཀྱང་བཤེས་པའི་རྒྱུན་མི་ཆད་པར་འགྱུར་བ་དེ་ལྟ་བུའི་ཐབས་ཅི་ཡོད། གཅིག་ཤོས་ཀྱིས་སྨྲས་པ། ཤེད་འཐུན་བདག་ཅག་གཉིས་ཀྱི་བུ་མོ་ཕན་ཚུན་ཤ་གླག་བྱ་སྟེ། གལ་ཏེ་ཁོ་བོ་ལ་བུ་ཡོད་ལ་ཁྱོད་ལ་བུ་མོ་ཡོད་ན་ཁྱོད་ཀྱི་བུ་མོ་ཁོ་བོའི་བུ་ལ་སྦྱིན་པར་བྱའོ། །གལ་ཏེ་ཁྱོད་ལ་བུ་ཡོད་ལ། ཁོ་བོ་ལ་བུ་མོ་ཡོད་ན་ཁོ་བོས་བུ་མོ་ཁྱོད་ཀྱི་བུ་ལ་སྦྱིན་པར་བྱ་སྟེ། དེས་ན་བདག་ཅག་གཉིས་ཤི་ཞིང་དུས་ལ་བབ་ན་ཡང་བཤེས་པའི་རྒྱུན་མི་འཆད་པར་འགྱུར་རོ། །མ་ཉེས་ཀྱིས་དེ་ལྟར་བྱའོ། །ུཏྤ་ལའི་མདོག་ཟླ་བ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེས་བསམས་པ། བུད་མེད་གང་ལ་བུ་ཆུང་ངུ་ཡོད་པ་དེ་སྐྱེས་པ་དག་གིས་འདི་ཡོངས་སུ་སྤང་ངོ ། །ཞེས་ཡོངས་སུ་སྤོང་བར་རིག་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱེའུ་འདི་དང་མར་མེ་ཁྱེར་ལ་ལམ་པོ་ཆེར་སོང་སྟེ་དེར་གནས་གཅིག་ཏུ་ཁྱེའུ་ཞོག་སྟེ། མར་མེ་ཚུགས་ལ་འགའ་ཞིག་གིས་བླངས་ཀྱི་བར་དུ་མཐའ་གཅིག་ཏུ་སྡོད་ཅིག་།དེས་དེ་ཁྱེར་ཏེ་ཤར་གྱི་སྒོ་བ་དང་ཧ་ཅང་ཐག་མི་རིང་བའི་གནས་ཤིག་ཏུ་བཞག
8.215b
སྟེ། མར་མེ་བཙུགས་ནས་མཐའ་གཅིག་ཏུ་བསྡད་པ་དང ། ཤར་གྱི་སྒོ་བ་དེས་མར་མེ་མཐོང་ནས་ཐེ་ཚོམ་ཟ་ཞིང་དེར་སོང་བ་དང ། ཇི་ཙམ་ན་ཁྱེའུ་དེ་མཐོང་ནས་དེས་དེ་བླངས་ཏེ་ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཀྱི་བུ་འདི་རེ། དེ་རབ་ཏུ་དགའ་བས་བླངས་སོ། །དེ་ནས་མཚན་མོ་ནམ་ནངས་པ་དང་ཀུན་དགའ་བར་འགྱུར་བ་བྱས་སོ། །ཁྱིམ་ཚེས་ཀྱི་སྐྱེ་བོ་དག་གིས་ཕན་ཚུན་སྨྲས་པ། ཤེས་ལྡན་དག་ཤར་གྱི་སྒོ་བ་འདིའི་ཁྱིམ་ན་ཅི་ཞིག་གིས་ཀུན་དགའ་བར་འགྱུར་བ་བྱུང ། དེ་ན་ཁ་ཅིག་གིས་སྨྲས་པ། འདིའི་བུ་བྱུང་ངོ ། །ཁ་ཅིག་གིས་སྨྲས་པ། འདིའི་ཆུང་མ་མི་སྦྲུམ་ན་འདིའི་བུ་ག་ལས་བྱུང ། ཁ་ཅིག་གིས་སྨྲས་པ། ཤེས་ལྡན་དག་བུད་མེད་ཁ་ཅིག་གི་མངལ་ན་གནས་པ་མི་མངོན་པ་ཡང་ཡོད་དོ། །ནུབ་ཀྱི་སྒོ་བས་ཐོས་ནས་དེས་བསམས་པ། དེའི་བུ་བྱུང་བས་གལ་ཏེ་བདག་ལ་བུ་མོ་ཡོད་པར་གྱུར་ན་དེ་བདག་གིས་དམགས་པར་འགྱུར་རོ་སྙམ་ནས་དེས་དེ་ལ་གོས་དང་རྒྱན་དག་བསྐུར་རོ། །དེ་བསྲིངས་ཤིང་བསྐྱེད་དེ་ཆེན་པོར་གྱུར་ནས་ཇི་ཙམ་ན་དེ་དགའ་འདུན་གྱི་ནང་དུ་ཞུགས་སོ། །ཇི་ཙམ་དུས་གཞན་ཞིག་ན་ཡང་ཨུཏྤ་ལའི་མདོག་ལ་སེམས་ཅན་ཞུགས་པར་གྱུར་ནས་དེ་ཟླ་བ་དགུ་འདས་ཏེ་བཙས་པ་ལས་བུ་མོ་ཞིག་བྱུང་ནས་དེས་ཡངས་བསམས་པ། བུད་མེད་གང་ལ་བུ་མོ་ཆུང་ངུ་ཡོད་པ་དེ་སྐྱེས་པ་དག་གིས་འདི་ཡོངས་སུ་སྤང་ངོ་ཞེས་ཡོངས་སུ་སྤོང་བར་རིག་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་བུ་མོ་འདི་དང་མར་མེ་ཁྱེར་ལ་ལམ་པོ་ཆེར་སོང་སྟེ། དེར་གནས་གཅིག་ཏུ་བུ་མོ་ཞོག་སྟེ། མར་མེ་ཚུགས་ལ་འགའ་ཞིག་གིས་བླངས་ཀྱི་བར་དུ་མཐའ་གཅིག་ན་སྡོད་ཅིག་།དེས་དེ་ཁྱེར་ཏེ་ནུབ་ཀྱི་སྒོ་བ་དང་ཧ་ཅང་ཐག་མི་རིང་བའི་གནས་ཤིག་ཏུ་བཞག་སྟེ། མར་མེ་བཙུགས་ནས་མཐའ་གཅིག་ཏུ་བསྡད་པ་དང ། ནུབ་ཀྱི་སྒོ་བ་དེས་མར་མེ་མཐོང་ནས་ཐེ་ཚོམ་ཟ་ཞིང་དེར་སོང་བ་དང ། ཇི་ཙམ་ན་བུ་མོ་དེ་མཐོང་ནས་དེས་དེ་བླངས་ཏེ་ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཀྱི་བུ་མོ་འདི་རེ། དེ་རབ་ཏུ་དགའ་བས་བླངས་སོ། །དེ་ནས་མཚན་མོ་ནམ་ནངས་པ་དང ། ཀུན་དགའ་བར་འགྱུར་བར་བྱས་སོ། །ཁྱིམ་ཚེས་ཀྱི་སྐྱེ་བོ་དག་གིས་ཕན་ཚུན་སྨྲས་པ། ཤེས་ལྡན་དག་ནུབ་ཀྱི་སྒོ་བ་འདིའི་ཁྱིམ་ན་ཅི་ཞིག་གིས་ཀུན
8.216a
དགའ་བར་འགྱུར་བ་བྱུང ། དེ་ན་ཁ་ཅིག་གིས་སྨྲས་པ། འདིའི་བུ་མོ་བྱུང་ངོ ། །ཁ་ཅིག་གིས་སྨྲས་པ། འདིའི་ཆུང་མ་མི་སྦྲུམ་ན་འདིའི་བུ་མོ་ག་ལས་བྱུང ། ཁ་ཅིག་གིས་སྨྲས་པ། ཤེས་ལྡན་དག་བུད་མེད་ཁ་ཅིག་གི་མངལ་ན་གནས་པ་མི་མངོན་པ་ཡང་ཡོད་དོ། །ཤར་གྱི་སྒོ་བས་ཐོས་ནས་དེས་བསམས་པ། དེའི་བུ་མོ་བྱུང་བས་དེ་བདག་གི་མནའ་མར་འགྱུར་རོ་སྙམ་ནས་དེས་དེ་ལ་གོས་དང་རྒྱན་དག་བསྐུར་རོ། །དེ་བསྲིངས་ཤིང་བསྐྱེད་དེ་ཆེན་མོར་གྱུར་ནས་ཇི་ཙམ་ན་དེ་ཡང་དགའ་འདུན་མའི་ནང་དུ་ཞུགས་སོ། །ཇི་ཙམ་དུས་གཞན་ཞིག་ན་དགའ་འདུན་ལྔ་བརྒྱ་སྐྱེད་མོས་ཚལ་དུ་འཕགས་པ་དང་དེ་དག་གིས་གྲོས་བྱ་བར་བརྩམས་པ། བདག་ཅག་གྱི་ན་དེ་བཞིན་དུ་སྐྱེད་མོས་ཚལ་དུ་དོང་སྟེ་ཅིར་རུང ། འཇུད་འཐུན་མ་འགའ་ཞིག་བཀྲིའོ། །དེ་ལྟར་བྱའོ། །གང་བཀྲི། ས་འཛིན་མའོ། །མ་ཉེས་ཏེ་འདི་ལྟར་ཁྲིམས་སུ་བྱ་བ་བབ་སྟེ། བདག་ཅག་ལས་གང་དེ་དང་ལྷན་ཅིག་དགའ་མགུར་སྤྱོད་པར་མི་བྱེད་པ་དེ་ལ་དགའ་འདུན་དག་གིས་ཀར་ཤ་པ་ཎ་དྲུག་བཅུ་དབབ་བོ། །དེ་དག་གིས་ས་འཛིན་མ་ཨུཏྤ་ལའི་མདོག་ཀར་ཥ་པ་ཎ་ལྔ་བརྒྱས་གླས་ཏེ་སྐྱེད་མོས་ཚལ་དུ་ཁྲིད་ནས་དགའ་འདུན་དེ་དག་ཐམས་ཅད་ཀྱིས་རེས་ཀྱིས་དེ་དང་ལྷན་ཅིག་དགའ་མགུར་སྤྱོད་དོ། །ཤར་གྱི་སྒོ་བའི་བུ་དེ་དགའ་མགུར་སྤྱོད་པར་མི་འདོད་ནས་ཨུཏྤ་ལའི་མདོག་གིས་དེ་ལ་སྨྲས་པ། རྗེའི་སྲས་དགའ་མགུར་སྤྱོད་ཅིག་།གཞན་དུ་ན་འདི་དག་གིས་ཁྱོད་ལ་ཀར་ཥ་པ་ཎ་དྲུག་བཅུ་ཕབ་པར་འགྱུར་རོ། །དེས་ཆད་པས་འཇིགས་པས་དགའ་མགུར་སྤྱད་པ་དང ། དེ་ཨུཏྤ་ལའི་མདོག་ལ་རྗེས་སུ་ཆགས་པ་སྐྱེས་ནས་དེས་དེ་གཅིག་པུས་ཆུང་མ་ཁུད་པར་བྱས་སོ། །ལི་ཙ་བི་དག་ཁྲོས་ནས་ཤར་གྱི་སྒོ་བའི་བུ་དེས་ཚོགས་ཀྱིས་སྤྱད་པར་བྱ་བའི་བུད་མེད་དེ་གཅིག་པུས་ཆུང་མ་ཁུད་པར་བྱས་ཀྱིས་དེ་གསོད་དུ་འདོང་ངོ་ཞེས་ཟེར་རོ། །འཇིག་རྟེན་ནི་མཛའ་བཤེས་དང་དགྲ་བོ་དང་ཐ་མལ་པ་ཡིན་པས་གཞན་ཞིག་ཤར་གྱི་སྒོ་བ་དེའི་གན་དུ་སོང་སྟེ་ཇི་ལྟར་གྱུར་པ་སྨྲས་པ་དང ། ཤར་གྱི་སྒོ་བ་དེ་སྐྲག་ནས་ལི་ཙ་བི་རྣམས་ཀྱི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། བུའི་སློངས་མོ་སྩོལ་ཅིག་།དེ་དག་གིས་སྨྲས་པ། ཀཝའི་ནང་རྗེ་དེ་ཅི་ཉེས། དེས་དེ་དག་ལ་རྒྱས་པར་བརྗོད་པ་དང ། དེ་ནས་ཁ་ཅིག་གིས་སྨྲས་པ། ཤེས་ལྡན་དག་ཤར་གྱི་སྒོ་བ་འདི་བདག་ཅག་ལ་ཡུན་རིང་པོ་ནས་ཕན་པ་བྱེད་བྱེད་པ་ཡིན་གྱིས། གལ་ཏེ་འདིའི་བུ་ཚོགས་ཅན་མ་འདོད་ན་སྦྱིན་ནོ། །གཞན་དག་གིས་སྨྲས་པ། མ་ཉེས་ཀྱིས་དེ་བཞིན
8.216b
བྱའོ་ཞེས་དེ་དག་གིས་དེ་ལ་ཨུཏྤ་ལའི་མདོག་བྱིན་ནོ། །ཤར་གྱི་སྒོ་བའི་བུ་དེས་ཚོགས་ལས་ཐོབ་པས་བག་ཚ་བ་མེད་པར་ཨུཏྤ་ལའི་མདོག་ཆུང་མར་བླངས་སོ། །དེ་ནས་དེའི་ཕས་ནུབ་ཀྱི་སྒོ་བ་ལ་སྨྲས་པ། ཤེད་འཐུན་ཁྱེའུ་ལ་བུ་མོ་བག་མར་ཐོང་ཤིག་།དེས་སྨྲས་པ། ཤེད་འཐུན་ཁྱོད་ཀྱི་བུས་ཆུང་མ་བླངས་ཟིན་ན་བག་མ་གཞན་གྱིས་ཅི་བྱ། དེས་སྨྲས་པ། ཤེད་འཐུན་སྔར་འཐམས་ཟིན་གྱིས་ད་བྱིན་ཅིག་དང ། གལ་ཏེ་ཁོ་བོ་ལ་འབྱོར་པ་ཡོད་པར་གྱུར་ན་ཁོ་བོའི་བུའི་ཆུང་མའི་འཁོར་རྣམ་པར་འཇོག་པར་བྱེད་དོ། །ནུབ་ཀྱི་སྒོ་བས་སྔར་འཐམས་པའི་ཕྱིར་ཤར་གྱི་སྒོ་བའི་བུ་ལ་བུ་མོ་བྱིན་ནོ། །ཤར་གྱི་སྒོ་བའི་བུ་དེས་ཀྱང་ཉི་མ་དང ། ཚེས་གྲངས་དང ། ཡུད་ཙམ་གྱི་སྦྱོར་བས་དེ་བག་མར་བླངས་སོ། །དེའི་ཚེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་ཤར་གྱི་སྒོ་བ་དེའི་ཁྱིམ་དུ་འགྲོ་བས་དེས་བུ་མོ་དེ་ལ་སྨྲས་པ། བུ་མོ་ཁྱོད་ཀྱི་ཆེན་མ་གང་ཡིན་པ་དེ་ནི་ཁྱོད་ཀྱི་མའོ། །ཁྱོད་ཀྱི་ཁྱིམ་ཐབ་གང་ཡིན་པ་འདི་ནི་ཁྱོད་ཀྱི་མིང་པོ་ཡིན་གྱིས། མ་ལ་རབ་ཏུ་སྡང་བའི་སེམས་མ་སྐྱེད་ཅིག་།སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག་།ུཏྤ་ལའི་མདོག་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་བྱུང་ནས་བུ་མོ་དེས་ཁྱེའུ་དེ་སྒོ་ཁང་གི་ཕྱི་རོལ་དུ་རྩེར་གཞུག་པར་བརྩམས་པ་དང ། ཇི་ཙམ་ན་བྲམ་ཟེ་ཞིག་ལམ་དེ་ནས་འགྲོ་བ་དེས་མཐོང་ནས་དེས་ཚིགས་སུ་བཅད་པ་སྨྲས་པ། མི་རྣམས་ནང་ན་མཆོག་གི་རབ་ཀྱི་མཆོག་།མཚུངས་མེད་རྒྱལ་བ་སྐྱོབ་པའི་ཉན་ཐོས་མ། །མེ་ཏོག་མན་དཱ་ར་ཀ་རབ་འདྲ་བ། །སྲིང་མོ་ཁྱེའུ་འདི་ཁྱོད་ཀྱི་ཅི་ཞིག་ཡིན། །དེས་ཀྱང་ཚིགས་སུ་བཅད་པ་སྨྲས་པ། བྲམ་ཟེ་འདི་ནི་བདག་གི་མིང་པོ་དང ། །མིང་པོའི་བུ་དང་བུ་དང་སྐུད་པོ་ཡིན། །འདི་ཡི་ཕ་དེ་བདག་གི་ཕ་ཡིན་ཏེ། །མིང་པོར་གྱུར་ནས་ད་ལྟར་ཁྱོ་འདི་ཡིན། །ུཏྤ་ལའི་མདོག་གིས་ཐོས་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་འདི་གཉིས་ཅི་ཟེར། དེས་སྨྲས་པ། འདི་གཉིས་མད་པ་མཆིའོ། །ཤོ་བེ་མི་མཆིའོ། །འདི་ལ་ཅི་བདེན། ཁྱོད་ཀྱི་བུ་བདག་གིས་ཤར་སྒོར་བོར་བ་གང་ལགས་པ་དེ་ནི་ད་ལྟར་ཁྱོད་ཀྱི་ཁྱིམ་ཐབ་འདི་ལགས་སོ། །ཁྱོད་ཀྱི་བུ་མོ་བདག་གིས་ནུབ་སྒོར་བོར་བ་གང་ལགས་པ་དེ་ནི་ད་ལྟར་ཁྱོད་ཀྱི་ཆུན་མ་འདི་ལགས་སོ། །ུཏྤ་ལའི་མདོག་གིས་བསམས་པ། སྔོན་ནི་བདག་མ་དང་ཆེན་ཆུང་དུ་གྱུར་ནས་ཡང
8.217a
བུ་མོ་དང་ཆེན་ཆུང་དུ་གྱུར། ད་ཡང་བདག་བུ་མོ་དང་ཆེན་ཆུང་དུ་གྱུར་ཅིང་བུ་ཁྱིམ་ཐབ་དུ་གྱུར་གྱིས། རྣམ་པ་ཐམས་ཅད་དུ་འགྲོ་བར་བྱའོ་སྙམ་ནས། དེ་མགོ་གཡོགས་ཏེ་ཁྱིམ་ནས་བྱུང་བ་དང ། ཇི་ཙམ་ན་དོན་འཐུན་རྒྱལ་པོའི་ཁབ་ཏུ་འཕགས་པ་མཐོང་ནས་དེ་དེ་དང་ལྷན་ཅིག་རྒྱལ་པོའི་ཁབ་ཏུ་སོང་ངོ ། །དེར་ཡང་འཇུད་འཐུན་མའི་འཚོ་བས་འཚོ་བར་བྱེད་དོ། །ཇི་ཙམ་ན་དགའ་འདུན་ལྔ་བརྒྱ་སྐྱེད་མོས་ཚལ་དུ་འཕགས་ནས་དེ་དག་གིས་གྲོས་བྱ་བར་བརྩམས་པ། ཤེས་ལྡན་དག་བདག་ཅག་གྱི་ན་དེ་བཞིན་དུ་སྐྱེད་མོས་ཚལ་དུ་དོང་སྟེ་ཅི་རུང ། འཇུད་འཐུན་མ་འགའ་ཞིག་བཀྲིའོ། །དེ་ལྟར་བྱའོ། །གང་བཀྲི། ས་འཛིན་མའོ། །མ་ཉེས་སོ་ཞེས་དེ་དག་གིས་ས་འཛིན་མ་ཨུཏྤ་ལའི་མདོག་ཀར་ཥ་པ་ཎ་ལྔ་བརྒྱས་གླས་ཏེ་སྐྱེད་མོས་ཚལ་དུ་ཁྲིད་དོ། །དེ་དག་ཟོས་ཤིང་འཐུངས་ནས་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ཨུཏྤ་ལའི་མདོག་གདུལ་བའི་དུས་ཤེས་ནས་དེ་དག་དང་ཧ་ཅང་ཐག་མི་རིང་བ་ན་ཤིང་ལྗོན་པ་ཞིག་གི་དྲུང་ན་འཆག་ཅིང་འདུག་གོ། །དེ་ན་དགའ་འདུན་གཅིག་གིས་སྨྲས་པ། འཕགས་པ་མཽད་གལ་གྱི་བུ་ཆེན་པོ་འདི་ནི་ཉོན་མོངས་པའི་འཆིང་བ་འདི་ལྟ་བུ་ལས་གྲོལ་བ་ཡིན་གྱི་བདག་ཅག་ནི་འདོད་པའི་འདམ་དུ་བྱིང་བ་ཡིན་ནོ། །ུཏྤ་ལའི་མདོག་གིས་སྨྲས་པ། བདག་གིས་ཡངས་པ་ཅན་དུ་སྤོས་འཚོང་གི་ཁྱེའུ་མི་སྡུག་པ་ཐོབ་པ་རྗེས་སུ་འཇུག་པར་བྱས་སོ། །དགའ་འདུན་དེས་སྨྲས་པ། སྨྲས་པ་དེའི་དོན་ཅི་འདི་ཡང་རྗེས་སུ་འཇུག་པར་བྱེད་འདོད་དམ། དེས་སྨྲས་པ། ཅི་འདི་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནམ། འདི་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནོ། །ཁོ་མོས་གལ་ཏེ་འདི་རྗེས་སུ་འཇུག་པར་བྱ་ན་ཁྱེད་ལ་ཅི་དབབ། ཀར་ཥ་པ་ཎ་ལྔ་བརྒྱའོ། །གལ་ཏེ་ཁྱོད་ཀྱིས་འདི་རྗེས་སུ་འཇུག་པར་མ་ནུས་ན་ཁྱོད་ལ་ཅི་དབབ། ཁྱོད་གཅིག་པུའི་ཆུང་མ་ཁུད་པའོ། །མ་ཉེས་ཀྱིས་དེ་ལྟར་གྱིས་ཤིག་།ུཏྤ་ལའི་མདོག་གིས་ཁས་བླངས་ནས་དེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་སོང་སྟེ་ཕྱིན་ནས་བུད་མེད་ཀྱི་གཡོ་དག་དང ། བུད་མེད་ཀྱི་གྱ་གྱུ་དག་དང ། བུད་མེད་ཀྱི་ཡ་ཡོ་དག་དང ། བུད་མེད་ཀྱི་སྒྱུ་གང་དག་ཡིན་པ་དེ་དག་ཉེ་བར་བསྟན་པར་བརྩམས་པ་དང །
8.217b
ཚེ་དང་ལྡན་པ་མཽད་གལ་གྱི་བུ་ཆེན་པོ་དབང་པོ་དག་ཕབ་སྟེ་འདུག་གོ། །དེས་བསམས་པ། བུད་མེད་ཀྱི་ཡུལ་གྱི་རེག་པ་ནི་དུག་ཡིན་པས་བདག་གིས་འཁྱུད་ན་འདི་བདག་གི་དབང་དུ་འགྱུར་རོ་སྙམ་ནས། དེས་འཁྱུད་པར་བརྩམས་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་ཚིགས་སུ་བཅད་པ་དག་སྨྲས་པ། རུས་པའི་འཁྲུལ་འཁོར་གཅེར་བུ་ལ། །ཆུ་བས་ཡོངས་སུ་དཀྲིས་གྱུར་ཅིང ། །མི་གཙང་རུལ་བ་དྲི་ང་བ། །གཞན་ལ་སྟེན་ཅིང་བདག་གིར་བྱེད། །བརྩོགས་པས་གང་བའི་རྐྱལ་པ་ཁྱོད། །གསོང་ལྡོང་ཕོལ་མིག་ངལ་སྐྱེན་ལྡན། །རྒྱུན་ལམ་དགུ་ནས་རྟག་ཏུ་ནི། །མི་གཙང་རབ་ཏུ་འཛག་པ་ཡིན། །ཇི་ལྟར་ཁོ་བོས་ཁྱོད་ཤེས་ལྟར། །སྐྱེ་བོས་ཁྱོད་ནི་ཤེས་གྱུར་ན། །དབྱར་དུས་ཕྱི་སའི་གནས་བཞིན་དུ། །ཐག་རིང་རྣམ་པར་སྤོང་བར་འགྱུར། །གང་ཕྱིར་བྱིས་པ་གཏི་མུག་གིས། །མུན་པས་བསྒྲིབས་པས་མི་ཤེས་པ། །དེ་ཕྱིར་རྫབ་ལ་གླང་རྒན་བཞིན། །དེ་དག་ཁྱོད་ལ་ཆགས་པར་བྱེད། །ུཏྤ་ལའི་མདོག་གིས་ཀྱང་ཚིགས་སུ་བཅད་པ་དག་སྨྲས་པ། སྐལ་བ་ཆེན་པོ་དེ་ལྟ་ལགས། །འཕགས་པས་ཇི་སྐད་གསུངས་པ་བཞིན། །རུས་པའི་འཁྲུལ་འཁོར་སྤྱིལ་བུ་ལ། །ཆུ་བས་ཡོངས་སུ་དཀྲིས་གྱུར་ཅིང ། །མི་གཙང་རུས་པ་དྲི་ང་བ། །གཞན་ལ་སྟེན་ཅིང་བདག་གིར་བགྱིད། །བཙོག་པས་ལྟམ་པའི་རྐྱལ་པ་བདག་།གསོང་ལྡོང་ཕོལ་མིག་ངལ་སྐྱེན་ལྡན། །རྒྱུན་ལམ་དགུ་ནས་རྟག་ཏུ་ནི། །མི་གཙང་རབ་ཏུ་འཛག་པ་ལགས། །ཇི་ལྟར་འཕགས་པས་བདག་མཁྱེན་ལྟར། །སྐྱེ་བོས་བདག་ནི་འཚལ་གྱུར་ན། །དབྱར་དུས་སླད་སའི་གནས་བཞིན་དུ། །ཐག་རིང་རྣམ་པར་སྤོང་བར་འགྱུར། །གང་ཕྱིར་བྱིས་པ་གཏི་མུག་གི། །མུན་པས་བསྒྲིབས་པས་མ་འཚལ་བ། །དེ་ཕྱིར་རྫབ་ལ་གླང་རྒན་བཞིན། །དེ་དག་བདག་ལ་ཆགས་པར་བགྱིད། །སྐལ་བ་ཆེན་པོ་མར་གཤེགས་ཏེ། །འཕགས་པ་ཆོས་ནི་བསྟན་དུ་གསོལ། །ཤེས་རབ་མཆོག་གི་བསྟན་པ་ལ། །བདག་གིས་ཁྱོད་ཀྱི་ཉན་ཐོས་བགྱི། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་སྟེང་གི་ནམ་མཁའི་དཀྱིལ་ནས
8.218a
བབས་ནས་དེས་དེའི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཁོང་དུ་ཆུད་ནས། འདི་ལྟར་ཨུཏྤ་ལའི་མདོག་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་བྱས་སོ། །དེས་བདེན་པ་མཐོང་ནས་སྨྲས་པ། འཕགས་པ་བདག་གིས་དགེ་བའི་བཤེས་གཉེན་འཕགས་པ་ལ་བརྟེན་ནས་འཕགས་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་ཡི་དག་ནས་ནི་རྐང་པ་ཕྱུང ། ལྷ་དང་མི་རྣམས་ཀྱི་ནང་དུ་ནི་བཞག་།ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་ཏུ་ཞུགས་པའི་འབྲས་བུ་ནི་ཐོབ་སྟེ། འཕགས་པ་བདག་ནི་མངོན་པར་ཞུགས་པ་ལགས་སོ། །འཕགས་པ་བདག་ནི་མངོན་པར་ཞུགས་པ་ལགས་ཏེ། འཕགས་པ་བདག་བཅོམ་ལྡན་འདས་དང ། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་དུ་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་རིགས་ཀྱི་བུ་མོ་ཨུཏྤ་ལའི་མདོག་གིས་ཚེ་དང་ལྡན་པ་མཽད་གལ་གྱི་བུ་ཆེན་པོའི་རྐང་པ་གཉིས་ལ་གཏུགས་ཏེ་སྨྲས་པ། བཙུན་པ་མཽད་གལ་གྱི་བུ་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཐོབ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །
8.218b
དེས་སྨྲས་པ། སྲིང་མོ་སོང་ལ་ཁྱིམ་ཐབ་དག་ལ་གསོལ་ཅིག་།དེ་དེ་དག་གི་གན་དུ་སོང་སྟེ་སྨྲས་པ། རྗེའི་སྲས་དག་བདག་རབ་ཏུ་འབྱུང་བར་ཅི་གནང ། དེ་དག་གིས་སྨྲས་པ། ས་འཛིན་མ་ཅིའི་ཕྱིར་ཁོ་བོ་ཅག་ལ་ཅོ་འདྲི་བར་བྱེད། དེས་སྨྲས་པ། མད་པར་རབ་ཏུ་འབྱུང་སྟེ་ཅོ་འདྲི་བར་མི་བགྱིད་དོ། །དེ་དག་གིས་སྨྲས་པ། གལ་ཏེ་དེ་ལྟ་ན་རབ་ཏུ་བྱུང་ཤིག་།དེ་དེ་དག་གིས་གནང་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་སོང་བ་དང ། དེས་དེ་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ་ཨུཏྤ་ལའི་མདོག་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། མ་ཉེས་ཀྱིས་རབ་ཏུ་འབྱུང་བ་ལེགས་སོ་ཞེས་བཀའ་སྩལ་ནས། རང་ཉིད་ཀྱིས་སྐྱེ་དགུའི་བདག་མོ་ཆེན་མོ་ལ་ཕྲིན་ཡིག་བྲི་བར་བརྩམས་སོ། །བཅོམ་ལྡན་འདས་ཕྲིན་ཡིག་མཛད་པ་ན་རྒྱལ་པོ་གཟུགས་ཅན་སྙིང་པོ་འོངས་ཏེ་གསོལ་པ། བཅོམ་ལྡན་འདས་འཇུད་འཐུན་མ་འདི་ཅིའི་སླད་དུ་འདིར་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་སྐད་མ་ཟེར་ཅིག་།ཁྱོད་ཀྱི་ཆོས་ཀྱི་སྲིང་མོ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འདོད་དོ། །བཅོམ་ལྡན་འདས་གང་དུ་ཕྲིན་ཡིག་མཛད། རྒྱལ་པོ་ཆེན་པོ་མཉན་ཡོད་དུ་སྐྱེ་དགུའི་བདག་མོ་ཆེན་མོ་ལའོ། །བཅོམ་ལྡན་འདས་བདག་གིས་ཀྱང་འདི་ལ་བསེལ་བ་སྩལ་བར་བགྱིའོ། །རྒྱལ་པོ་ཆེན་པོ་མ་ཉེས་སོ། །རྒྱལ་པོས་དེའི་བསེལ་བ་བསྐོས་སོ། །ུཏྤ་ལའི་མདོག་གིས་ཕྲིན་ཡིག་མནོས་ཏེ་མཉན་ཡོད་དུ་སོང་བ་དང ། སྐྱེ་དགུའི་བདག་མོ་ཆེན་མོ་གཽ་ཏ་མཱིས་དེ་རབ་ཏུ་ཕྱུང་རྫོགས་པར་བསྙེན་པར་བྱས་ཏེ། གདམས་ངག་བྱིན་ནས་དེ་གཅིག་ཏུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་བཏང་བར་གནས་པ་ན་འཁོར་བའི་འཁོར་ལོ་ཆ་ལྔ་པ
8.219a
གཡོ་བ་འདི་ཉིད་རིག་སྟེ་འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང་རྣམ་པར་འཐོར་བ་དང ། །རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་མོ་དག་གང་གི་ཕྱིར་སྐྲ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང་མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་ནང་ན་འདི་ལྟ་སྟེ། དགེ་སློང་མ་ཨུཏྤ་ལའི་མདོག་འདི་མཆོག་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཨུཏྤ་ལའི་མདོག་གིས་ལས་ཅི་ཞིག་བགྱིས་ན་དེས་མིག་ཨུཏྤ་ལ་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེ་འབྲུའི་མདོག་འདྲ་བར་གྱུར། ལས་ཅི་ཞིག་བགྱིས་ན་དེས་སྐྱེས་པ་དག་གིས་ཕོངས་པ་མ་མཆིས་པར་གྱུར་ཅིང ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེ་ཉན་ཐོས་མ་རྫུ་འཕྲུལ་ཆེ་བ་མཐུ་ཆེ་བ་རྣམས་ཀྱི
8.219b
མཆོག་ཏུ་བསྟན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཨུཏྤ་ལའི་མདོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཨུཏྤ་ལའི་མདོག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། །དགའ་བར་བྱེད། །དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་ཟོང་ཐོགས་ཏེ་ཡུལ་གཞན་དུ་སོང་ངོ ། །དེའི་ཆུང་མ་གོས་དང་ཟས་བཟང་བས་ཉོན་མོངས་པ་དག་གིས་གནོད་པར་གྱུར་ནས། དེ་དང་ཧ་ཅང་ཐག་མི་རིང་བ་ན་འཇུད་འཐུན་མའི་ཁྱིམ་ཞིག་འདུག་པ་དེར་སྐྱེས་པ་གཞན་དག་འཇུག་ཅིང་གཞན་དག་འབྱུང་བ་མཐོང་ནས་དེས་བསམས་པ། བུད་མེད་འདི་ནི་བསོད་ནམས་བྱས་པ་ཡིན་པས་འདི་སྐྱེས་པ་དག་གིས་ཕོངས་པ་མེད་པ་ཡིན་ན། བདག་ཀྱང་གང་གིས་སྐྱེས་པ་དག་གིས་ཕོངས་པ་མེད་པར་འགྱུར་བ་དེ་ལྟ་བུའི་ཐབས་ཅི་ཡོད་སྙམ་ནས་དེ་དེ་ལྟར་སེམས་པ་ན། དེར་གཅེར་བུ་པའི་ཉན་ཐོས་མ་ཞིག་འོངས་ནས་དེས་དེ་ལ་སྨྲས་པ། ཕུ་ནུ་མོ་གང་གིས་གང་སེམས་པ་དང་གང་སྒྲུབ་པ་དེ་ཐམས་ཅད་འགྲུབ་པར་འགྱུར་བ་དེ་ལྟ་བུའི་ཐབས་ཅི་ཡོད། །དེས་སྨྲས་པ། ཕུ་ནུ་མོ་ཁོ་མོའི་མིང་པོ་རབ་ཏུ་བྱུང་བ་བརྟུལ་ཞུགས་གྲུབ་པ་བདག་ཉིད་ཆེན་པོ་ཞིག་ཡོད་པ་དེ་ལ་ཟན་བྱིན་ལ་སྨོན་ལམ་ཐོབ་ཤིག་དང །
8.220a
ཁྱོད་གང་སེམས་པ་དང་གང་སྒྲུབ་པ་དེ་ཐམས་ཅད་གྲུབ་པར་འགྱུར་རོ། །དེས་སྨྲས་པ། ཕུ་ནུ་མོ་གལ་ཏེ་དེ་ལྟ་ན་སོང་ལ་བདག་ཉིད་ཆེན་པོ་དེ་ཁོ་མོའི་ཁྱིམ་དུ་ཟན་ལ་བོས་ཤིག་།དེས་དེ་ཟན་ལ་བོས་སོ། །ཁྱིམ་བདག་གི་ཆུང་མ་དེས་ཀྱང་ཟན་སྦྱར་ཅིང ། ུཏྤ་ལ་དག་གིས་ལག་པ་སྟ་གོན་བྱས་སོ། །གཅེར་བུ་པ་དག་ནི་དུས་སུ་ཡང་ཟན་ཟ་ལ། དུས་མ་ཡིན་པར་ཡང་ཟ་བས་དེ་ཡུན་རིང་ཞིག་ཐོགས་སོ། །སངས་རྒྱས་རྣམས་འབྱུང་བ་མེད་པའི་ཚེ། རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཇི་ཙམ་ན་རང་སངས་རྒྱས་ཤིག་ལྗོངས་རྒྱུ་བ་ན་རི་བྲགས་དེར་ཕྱིན་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང ། ཁྱིམ་བདག་གི་ཆུང་མ་དེས་ལུས་མཛེས་པ། སེམས་མཛེས་པ་དེ་མཐོང་ནས་དེས་བསམས་པ། འདི་ནི་བརྟུལ་ཞུགས་གྲུབ་པ། བདག་ཉིད་ཆེན་པོ་དེ་ཡིན་གྱིས་ཟན་སྦྱིན་ནོ་སྙམ་ནས། དེས་དེ་ཟས་བསོད་པས་ཚིམ་པར་བྱས་ཤིང་དེ་ལ་ཨུཏྤ་ལ་དག་གིས་ཀྱང་མཆོད་པ་བྱས་སོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ཚིག་གིས་ཆོས་མི་སྟོན་པས་རང་སངས་རྒྱས་དེ་ཟས་ཀྱི་བྱ་བ་བྱས་ནས། དེ་ལ་སྙིང་བརྩེ་བའི་ཕྱིར་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཁྱིམ་བདག་གི་ཆུང་མ་དེས་གུས་པར་བསྒྲིམ་པ་དང་བཅས་པས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་བཏབ་པ། བདག་གིས་ཡོན་གནས་ཡང་དག་པར་གྱུར་པ་འདི་ལྟ་བུ་ལ་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་སྐྱེས་པ་དག་གིས་ཕོངས་པ་མེད་པར་འགྱུར་ཞིང་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར
8.220b
མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་དག་ཀྱང་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་ཁྱིམ་བདག་གི་ཆུང་མ་གང་ཡིན་པ་དེ་ནི་ཨུཏྤ་ལའི་མདོག་འདི་ཡིན་ཏེ། འདིས་རང་སངས་རྒྱས་ལ་ཟན་བྱིན་ཏེ་ཨུཏྤ་ལ་དག་གིས་མཆོད་པ་བྱས་པ་གང་ཡིན་པའི་ལས་དེའི་རྣམ་པར་སྨིན་པས་ནི་ད་ལྟར་མིག་ཨུཏྤ་ལ་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེ་འབྲུའི་མདོག་འདྲ་བར་གྱུར་ཏོ། །བདག་གིས་ཡོན་གནས་ཡང་དག་པར་གྱུར་པ་འདི་ལྟ་བུ་ལ་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་སྐྱེས་པ་དག་གིས་ཕོངས་པ་མེད་པར་འགྱུར་ཞིང ། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་དག་ཀྱང་ཐོབ་པར་གྱུར་ཅིག་ཅེས་སྨོན་ལམ་བཏབ་པ་དེས་ནི་སྐྱེས་པ་དག་གིས་ཕོངས་པ་མེད་པར་གྱུར་ཅིང ། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཤིང ། འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་མ་གང་གིས་དེ་རབ་ཏུ་ཕྱུང་བའི་དགེ་སློང་མ་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས
8.221a
འགའ་ཡང་མ་ཐོབ་ནས། དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང ། ཇི་ལྟར་མཁན་མོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཨུཏྤ་ལའི་མདོག་གིས་ལས་ཅི་ཞིག་བགྱིས་ན་དེས་ཆོལ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཨུཏྤ་ལའི་མདོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས
8.221b
པ། ཨུཏྤ་ལའི་མདོག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང ། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་འང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་འདི་བུད་མེད་སྨྱན་བྱེད་པ་ཞིག་ཏུ་གྱུར་ནས་དེ་ན་འདིས་བུ་ལྟ་བུ་མང་པོ་དག་མ་ལྟ་བུ་དག་དང་ལྷན་ཅིག་བསྡུས་ཤིང ། མིང་པོ་ལྟ་བུ་མང་པོ་དག་ཀྱང་སྲིང་མོ་ལྟ་བུ་དག་དང་ལྷན་ཅིག་བསྡུས་པས་ལས་དེའི་རྣམ་པར་སྨིན་པས་ད་ལྟར་ཆོལ་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང ། འདྲེན་མ་རྣམས་སྤངས་ནས་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ུཏྤ་ལའི་མདོག་གི་ཀུན་དུ་སྤྱོད་པ་ནི་བསོད་སྙོམས་བརྒྱུས་ནས་བསོད་སྙོམས་ཀྱི་ཕུད་དང་པོར་དགེ་འདུན་ལ་འབུལ་ཞིང་ཕྱིས་གཞན་དུ་བརྒྱུས་ཏེ་བདག་ཉིད་ཟ་བར་བྱེད་དེ། ཇི་ཙམ་དུས་གཞན་ཞིག་ན་དེ་བསོད་སྙོམས་ལ་ཞུགས་ནས་དེས་བསོད་སྙོམས་ཀྱི་ཕུད་དགེ་འདུན་ལ་ཕུལ་ནས། དེའི་འོག་ཏུ་བདག་ཉིད་ཀྱི་དོན་དུ་བརྒྱུས་པ་དང ། དགེ་སློང་གློ་བུར་དུ་འོངས་པ་ཞིག་བསོད་སྙོམས་ལ་ཞུགས་པ་ན་དེ་སྤྱོད་ཡུལ་ལ་མི་མཁས་པས་ཅི་ཡང་མ་རྙེད་པ་དེ་ཨུཏྤ་ལའི་མདོག་གིས་མཐོང་ནས་སྨྲས་པ། འཕགས་པ་ཅི་ཡང་མ་བརྙེས་སམ། འཕགས་མ་ཅི་ཡང་མ་རྙེད་དོ། །དེས་བདག་ཉིད་ཀྱི་བསོད་སྙོམས་དེ་བསོད་སྙོམས་པ་དེ་ལ
8.222a
ཕུལ་ནས་དེའི་ཟན་ཆད་པར་གྱུར་ཏོ། །ཉེ་དགས་དེ་མཐོང་ནས་དེས་བསམས་པ། སྲིང་མོ་འདི་ནི་དགེ་འདུན་ལ་མངོན་པར་དད་པ་འབའ་ཤིག་ཏུ་མ་ཟད་ཀྱི་གང་ཟག་ལ་ཡང་མངོན་པར་དད་པ་འདྲ་ན། འདི་བགམ་པར་བྱའོ་སྙམ་ནས་ཕྱི་དེ་ཉིན་པར་ཨུཏྤ་ལའི་མདོག་བསོད་སྙོམས་ལ་ཞུགས་ནས། དེས་བསོད་སྙོམས་ཀྱི་ཕུད་དགེ་འདུན་ལ་ཕུལ་ནས་བདག་ཉིད་ཀྱི་དོན་དུ་གཉིས་པ་བསྒྲུབས་པ་དང ། ཉེ་དགའ་ཡང་འོངས་ནས་སྨྲས་པ། འཕགས་མ་རྙེད་པ་ཅུང་ཟད་ཡོད་དམ། དེས་སྨྲས་པ། འཕགས་པ་མཆིས་ན་གསོལ་ན་བཞེད་དམ། ལྷའི་གནས་ཀྱི་ལྷག་མ་ཇི་ལྟ་བ་བཞིན་ནོ། །འཕགས་པ་གལ་ཏེ་དེ་ལྟ་ན་ལྷུང་བཟེད་བཟེད་དུ་གསོལ། དེས་ལྷུང་བཟེད་བཟེད་པ་དང ། དེས་བསོད་སྙོམས་དེ་དེའི་ལྷུང་བཟེད་དུ་ཕུལ་ལོ། །ུཏྤ་ལའི་མདོག་ཉི་མ་གཉིས་སུ་ཟན་ཆད་པས་ཉམ་ཆུང་བའི་སྦྱོར་བས་བརྒྱལ་ཏེ་ས་ལ་སྒྱེལ་བ་དང ། མ་དད་པ་དག་གིས་གླགས་རྙེད་ནས། ཤེས་ལྡན་དག་ཨུཏྤ་ལའི་མདོག་འདི་འདོད་ཆགས་དང་བྲལ་ལོ་ཞེས་གྲག་ན། ཤཱཀྱ་གཞོན་ནུ་གཟུགས་བཟང་བ་འདི་མཐོང་ནས་འདོད་ཆགས་ཀྱིས་བརྒྱལ་ཏེ་ས་ལ་སྒྱེལ་བར་གྱུར་པ་དེ་ཇི་ལྟ་ཞེས་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་བཅའ་བ་དང་བཟའ་བ་རང་གི་ལག་གིས་བླངས་ཏེ་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།
8.222b
དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་བཅའ་བ་དང ། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་དགེ་སློང་དེས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ནི་སོ་སོར་བཤགས་པར་བྱ་བའོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ཞེས་བྱ་བ་ནི་ཕྱི་མོ་དང ། མེས་པོ་དང ། ཕྲུགས་ལས་བརྟེན་པའི་བདུན་པ་ཚུན་ཅད་ནི་ཉེ་དུ་ཡིན་ལ་དེ་ཕན་ཅད་ནི་ཉེ་དུ་མ་ཡིན་ནོ། །ལམ་པོ་ཆེ་ན་འདུག་པ་ཞེས་བྱ་བ་ནི་སྲང་དུ་སོང་བའོ། །བསོད་སྙོམས་ཀྱི་ཕྱིར་གྲོང་དུ་འགྲོ་བ་ཞེས་བྱ་བ་ལ། གྲོང་ཞེས་བྱ་བ་ནི་གང་ན་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་ཡོད་པའོ། །ལས་ཤེས་བྱ་བ་ནི་གན་ནས་སོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །རང་གི་ལག་གིས་ཤེས་བྱ་བ་ནི་ལག་གིས་ལག་ཏུའོ། །བླངས་ཏེ་ཞེས་བྱ་བ་ནི་བྱིན་ལེན་སྟོབས་སུ་བཅུག་སྟེའོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ནའོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །ཕྱི་རོལ་ཀུན་དགའ་ར་བར་སོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་སོང་སྟེའོ། །དགེ་སློང་རྣམས་ལ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་ལའོ། །ཚེ་དང་ལྡན་པ་བདག་ལ་སྨད་པའི་གནས་ཤེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་འཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་འཐོལ་བར་བྱ་བའོ། །བྱུང་གིས་ཤེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར
8.223a
གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་འཐོལ་ལོ་ཞེས་སོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་འཐོལ་བར་བྱ་སྟེའོ། །ཆོས་འདི་ནི་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ནི་འཐོལ་བར་བྱ་བ་སྟེ། དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་ཉེ་དུ་མ་ཡིན་པར་འདུ་ཤེས་པས་བཅའ་བ་དང ། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །ཉེ་དུ་མ་ཡིན་པ་ལ་ཡིད་གཉིས་ཟ་བས་བཅའ་བ་དང ། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་ཉེ་དུ་མ་ཡིན་པར་འདུ་ཤེས་པས་བཅའ་བ་དང་བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ཉེ་དུ་ལ་ཡིད་གཉིས་ཟ་བས་བཅའ་བ་དང ། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་སྟེ་དང་པོ་རྫོགས་སྷོ།། །།འདུལ་བ་རྣམ་པར་འབྱེད་པ། བམ་པོ་བརྒྱད་བཅུ་རྩ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་མུ་གེ་ཉམ་ང་བ་དགོན་པ་སློངས་མོ་བས་ཟས་རྙེད་པར་དཀའ་ཞིང ། ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློང་མོ་པ་དག་ལ་ལྟ་སྨོས་ཀྱང་ཅི་དགོས་པ་བྱུང་ངོ ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང ། ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང ། ལ་ལ་ནས་ཐོབ། ལ་ལ་ནས་མ་ཐོབ་ནས་དེ་དག་བཀྲེས་པས་ཉེན་ནས་བཅུ་གཉིས་སྡེ་དག་གི་གན་དུ་དོང་བ་དང ། དེ་དག་གིས་འཕགས་པ་དག་བཞུགས་སུ་གསོལ་ཞེས་སྟན་དག་བཤམས་སོ། །དེ་དག་འཁོད་པ་དང་བཅུ
8.223b
གཉིས་སྡེ་དག་གིས་རྐང་པ་ལ་ཕྱག་འཚལ་ཏེ་མདུན་དུ་འཁོད་ནས་སྨྲས་པ། འཕགས་པ་དག་འཚོ་འམ། སྲིང་མོ་དག་འདི་ན་ཇི་ལྟར་འཚོ། ཁོ་བོ་ཅག་བཀྲེས་པས་ཉེན་ཏོ། །འཕགས་པ་དག་གལ་ཏེ་དེ་ལྟ་ན་སང་སྤྱོན་ཅིག་དང་ཞལ་ཚུས་གསོལ་ལོ། །སྲིང་མོ་དག་སང་ཁྱེད་ཀྱིས་སྦྱིན་ན་གནངས་སུས་སྦྱིན། འཕགས་པ་དག་བདག་ཅག་ཉིད་ཀྱིས་གསོལ་ལོ། །སྲིང་མོ་དག་དེ་ལྟས་འཚོ་བར་མི་ནུས་ཀྱིས། འདི་ལྟར་སངས་རྒྱས་ལ་སོགས་པ་དགེ་སློང་གི་དགེ་འདུན་གང་དུ་སྤྱན་དྲངས་པ་དེར་ཁྱེད་ཅག་གིས་ཞལ་ཏ་གྱིས་ལ་ཁོ་བོ་ཅག་ལ་ཡང་དང་ཡང་དུ་བྱིན་ཅིག་དང ། དེ་ལྟ་ན་ཁོ་བོ་ཅག་འཚོ་བར་འགྱུར་རོ། །སྦོམ་དགའ་མོས་སྨྲས་པ། འཕགས་པ་དག་དེ་ལྟར་བགྱིར་རུང་ངམ། །སྲིང་མོ་དག་ལེགས་པར་རུང་ངོ ། །ཤིན་དུ་རུང་ངོ ། །སུས་བཀག་།གང་དུ་བཀག་།དེས་སྨྲས་པ། འཕགས་པ་དག་གལ་ཏེ་རུང་ན་མ་ནོངས་ཀྱིས་དེ་བཞིན་བགྱིའོ། །དེ་དག་གིས་ཨ་རོག་ཁྱ་ཞེས་བྱས་ཏེ་དོང་ངོ ། །ཇི་ཙམ་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། དགེ་སློང་གི་དགེ་འདུན་ནི་ཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པ་དང ། ལྷ་རྣམས་ལ་ཆོས་སྟོན་པར་བཞེད་པ་དང ། ནད་པ་ལ་ལྟ་བར་བཞེད་པ་དང ། གནས་མལ་ལ་རྟོགས་པར་བཞེད་པ་དང ། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དོ། །ཁྱིམ་བདག་དེ་ནང་མི་དང་བཅས་པས་དགེ་སློང་གི་དགེ་འདུན་ལ་བྲིམ་པར་བརྩམས་པ་དང ། སྦོམ་དགའ་མོ་རྒན་པའི་མཐའ་ལོགས་སུ་འདུག་སྟེ། སྨྲས་པ། ཁྱིམ་བདག་འདི་ནི་འཕགས་པ་དགའ་བོ་སྟེ། ཤཱཀྱ་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཡིན་གྱིས
8.224a
འདི་ལ་ཡང་གསོལ་ཅིག་།འདི་ནི་འཕགས་པ་ཉེ་དགའོ། །འདི་ནི་འགྲོ་འགྱོགས་སོ། །འདི་ནི་ནབ་སོའོ། །འདི་ནི་འདུན་པ་སྟེ། འདི་དག་ཀྱང་ཤཱཀྱ་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཡིན་གྱིས་འདི་དག་ལ་ཡང་ཡང་གསོལ་ཅིག་།འདི་ནི་འཕགས་པ་འཆར་ཀ་སྟེ། བྲམ་ཟེ་མདུན་ན་འདོན་གྱི་བུ་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཡིན་གྱིས་འདི་ལ་ཡང་ཡང་གསོལ་ཅིག་།ཁྱིམ་བདག་དེས་དེ་བཞིན་དུ་དེ་དག་ལ་ཡང་དང་ཡང་དུ་བྱིན་ནོ། །དེ་བཞིན་དུ་སྦོམ་དགའ་མོས་འབྲིམ་མཁན་དག་ལ་ཡང་སྨྲས་ནས། དེ་དག་གིས་ཀྱང་དེ་བཞིན་དུ་དེ་དག་ལ་ཡང་དང་ཡང་དུ་བྱིན་ནོ། །དེ་ན་དགེ་སློང་ཁ་ཅིག་ལ་ནི་འབྲས་ཅན་ཆད། ཁ་ཅིག་ལ་ནི་ཚོད་མ་ཆད། ཁ་ཅིག་ལ་ནི་བཅའ་བ་ཆད། ཁ་ཅིག་ལ་ནི་བཟའ་བ་ཆད། ཁ་ཅིག་གིས་ནི་ཟས་ཅུང་ཟད་ཐོབ་ནས་ཟན་ཆད་པར་གྱུར། ཁ་ཅིག་གིས་ནི་ཟན་མ་ཐོབ་པར་ཟན་ཆད་པར་གྱུར་ཏོ། །དེ་ན་དགེ་སློང་གང་དག་འཆིང་བ་མཐའ་དག་ཡོད་པ་དེ་དག་གིས་ཁྱིམ་བདག་དེ་ལ་ཐོ་བརྩམས་པ། ཁྱིམ་བདག་གལ་ཏེ་ཁྱོད་ལ་འབྱོར་པ་མེད་ན་ཅིའི་ཕྱིར་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་འདྲེན་པར་བྱེད། དེས་སྨྲས་པ། འཕགས་པ་དག་བདག་གིས་ཞལ་ཟས་མང་པོ་སྟ་གོན་བགྱིས་ན་སྦོམ་དགའ་མོ་བགྲེས་པའི་མཐའ་ལོགས་སུ་མཆིས་པས་བགྲེས་པའི་མཐའ་ལོགས་སུ་འབའ་ཞིག་ཏུ་ཡང་དང་ཡང་དུ་སྟོབས་སུ་སྩལ་བས་དེ་ལ་བདག་གིས་ཇི་ལྟར་བགྱི་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ
8.224b
རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་རབ་ཏུ་མང་པོ་ཁྱིམ་རྣམས་སུ་མགྲོན་དུ་བོས་ནས་ཟན་ཟ་བའི་ཚེ་དེ་ན་གལ་ཏེ་དགེ་སློང་མ་ཞིག་འདི་ལ་ནི་བཅའ་བ་བྱིན་ཅིག་།འདི་ལ་ནི་འབྲས་ཅན་བྱིན་ཅིག་།འདི་ལ་ནི་སྲན་ཚོད་བྱིན་ཅིག་།འདི་ལ་ནི་ཡང་བྱིན་ཅིག་ཅེས་སྒོ་ཞིང་འདུག་ན་དགེ་སློང་མ་དེ་ལ་དགེ་སློང་དེ་རྣམས་ཀྱིས་འདི་སྐད་ཅེས་སྲིང་མོ་ཁྱོད་དགེ་སློང་ཟན་ཟ་བའི་བར་དུ་རེ་ཤིག་སྡོད་ཅིག་ཅེས་བསྒོ་བར་བྱའོ། །གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་སྨྲ་མ་སྤོབས་ན་དགེ་སློང་དེ་དག་ཐམས་ཅད་ཀྱིས་ཕྱི་རོལ་ཀུན་དགའི་ར་བར་དོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ཅག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །དགེ་སློང་རབ་ཏུ་མང་པོ་ཞེས་བྱ་བ་ནི་གཉིས་ལས་ལྷག་པ་ནི་རབ་ཏུ་མང་པོའོ། །ཁྱིམ་རྣམས་སུ་ཞེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་རྣམས་སུའོ། །མགྲོན་དུ་བོས་ནས་ཞེས་བྱ་བ་ནི་ཟན་གྱི་ཕྱིར་རོ། །ཟན་ཟ་བའི་ཚེ་ཞེས་བྱ་བ་ནི་བཅའ་བ་ལྔ་དང ། བཟའ་བ་ལྔ་དག་གོ། །དེ་ལ་གལ་ཏེ་དགེ་སློང་མ་ཞིག་ཅེས་བྱ་བ་ནི་སྦོམ་དགའ་མོ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་དེ་ལ་ཞེས་བྱ་བ་ནི་སྦོམ་དགའ་མོ་འམ། གཞན་ཡང་དེ་ལྟ་བུ་གང་ཡིན་པ་ལའོ། །དགེ་སློང་དེ་རྣམས་ཀྱིས་ཤེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ཀྱིས་སོ། །འདི་སྐད་ཅེས་ཤེས་བྱ་བ་ནི་འདི་སྐད་ཅེས་བསྒོ་བར་བྱ་བའོ། །སྲིང་མོ་ཁྱོད་དགེ་སློང་རྣམས་ཟན་ཟ་བའི་བར་དུ་རེ་ཤིག་སྡོད་ཅིག་ཅེས་བསྒོ་བར་བྱའོ་ཞེས་བྱ་བ་ནི་སྲིང་མོ་ཁྱོད་དགེ་སློང་རྣམས
8.225a
ཟན་ཟ་བའི་བར་དུ་རེ་ཤིག་ཡུད་ཙམ་ཞིག་ཁ་རོག་པར་སྡོད་ཅིག་ཅེས་བརྗོད་པར་བྱ་བའོ། །གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་སྨྲ་མ་སྤོབས་ན་ཞེས་བྱ་བ་ནི་གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་མ་སྨྲས་ནའོ། །དགེ་སློང་དེ་དག་ཐམས་ཅད་ཀྱིས་ཤེས་བྱ་བ་ནི་དེ་ན་དགེ་སློང་གང་དག་འཁོད་པ་དེ་དག་ཐམས་ཅད་ཀྱིས་སོ། །ཕྱི་རོལ་ཀུན་དགའ་ར་བར་དོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་དོང་སྟེའོ། །དགེ་སློང་རྣམས་ལ་ཚེ་དང་ལྡན་པ་དག་བདག་ཅག་ལ་སྨད་པའི་གནས་ཞེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་འཐོལ་བར་བྱ་བའོ། །བྱུང་གིས་ཤེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཤེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་འཐོལ་ལོ་ཞེས་བྱ་བའོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་འཐོལ་བར་བྱ་སྟེའོ། །ཆོས་འདི་ཡང་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ཡང་འཐོལ་བར་བྱ་སྟེ། དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་རྣམས་ཁང་ཏོག་ན་ཟན་ཟ་ཞིང་གཞན་དག་བར་ཁང་ན་ཟན་ཟ་བའི་ཚེ་དེ་ན་གལ་ཏེ་དགེ་སློང་མ་ཞིག་སྒོ་ཞིང་འདུག་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་འགྱུར་རོ། །གང་དག་བར་ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོ་འམ་ཞེས་དྲི་བར་བྱའོ། །མ་དྲིས་པར་ཟ་ན་ཉེས་བྱས་སུ་འགྱུར་རོ། །དགེ་སློང་རྣམས་འོག་ཁང་ན་ཟན་ཟ་ཞིང་གཞན་དག་སྒོ་ཁང་ན་ཟན་ཟ་བའི་ཚེ་དེ་ན་གལ་ཏེ་དགེ་སློང་མ་ཞིག་བསྒོ་ཞིང་འདུག་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་འགྱུར་རོ། །གང་དག་སྒོ་ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོ་འམ་ཞེས་དྲི་བར་བྱའོ། །མ་དྲིས་པར་ཟོས་ན་ཉེས་བྱས
8.225b
སུ་འགྱུར་རོ། །དགེ་སློང་ཁ་ཅིག་ཟོས་ཏེ་ཕྱིར་འབྱུང་ཞིང་གཞན་དག་ནང་དུ་འཇུག་ན་དེ་ན་གང་དག་ནང་དུ་འཇུག་པ་དེ་དག་གིས་དགེ་སློང་མ་དེ་ལ་བསྒོ་འམ་ཞེས་དྲི་བར་བྱའོ། །མ་དྲིས་པར་ཟ་ན་ཉེས་བྱས་སུ་འགྱུར་རོ། །དེའི་ངོར་མགྲོན་དུ་བོས་པ་དང ། ཡང་དག་པར་འཛིན་དུ་འཇུག་པ་ལ་ལྟུང་བ་མེད་དོ། །བྱུག་རིས་སྟོན་པ་དང ། མ་བྱིན་པ་ལ་སྦྱིན་དུ་འཇུག་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུག་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གྲལ་རིམས་སུ་མ་ཕེབས་པར་འདྲིམ་དུ་འཇུག་པ་མ་བཟློག་པར་ཟ་བའི་སོ་སོར་བཤགས་པར་བྱ་བ་སྟེ་གཉིས་པ་རྫོགས་སྷོ།། ་་་་་་་་་་་།། སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །གང་གི་ཚེ་དམག་དཔོན་སེང་གེས་བཅོམ་ལྡན་འདས་ཀྱི་སྤྱན་སྔ་ནས་བདེན་པ་དག་མཐོང་བ་དེའི་ཚེ་དེས་ཆ་གཅིག་བཟུང་ནས་འདི་ལྟར་ཁྱུ་མཆོག་རླབས་པོ་ཆེའི་ཚིག་སྨྲས་ཤིང་འཁོར་གྱི་ནང་དུ་སེང་གེའི་སྒྲ་ཡང་དག་པར་བསྒྲགས་ཏེ། དེང་ཕྱིན་ཅད་གཅེར་བུ་པ་དག་དང ། གཅེར་བུ་མ་དག་དང ། གཅེར་བུ་པའི་ཉན་ཐོས་དག་དང ། གཅེར་བུ་པའི་ཉན་ཐོས་མ་དག་གི་སྒོ་ནི་བཅད། བཅོམ་ལྡན་འདས་ཀྱི་ཉན་ཐོས་དགེ་སློང་དག་དང ། དགེ་སློང་མ་དག་དང ། དགེ་བསྙེན་དག་དང ། དགེ་བསྙེན་མ་དག་གི་སྒོ་ནི་ཕྱེའོ་ཞེས་བསྒྲགས་ཤིང་ཞིང་ལས་ཀྱི་མཐའ་དག་ཀྱང་ཁ་ན་མ་ཐོ་བ་དང་བཅས་པ་ཡིན་ནོ་ཞེས་ཡོངས་སུ་བཏང་ངོ ། །དེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མེད་དེ། དེས་དེ་ལྟར་ཕུལ་ཞིང་ཡོངས་སུ་བཏང
8.226a
བས་ལོངས་སྤྱོད་སྲབས་ཤིང་ཡོངས་སུ་ཟད་དེ། ཡོངས་སུ་མཐར་ཐུག་པར་གྱུར་ཏོ། །དེའི་སྐབས་སུ་ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ལྗོངས་རྒྱུ་ཞིང་འདོང་བ་ན་ཡངས་པ་ཅན་དུ་ཕྱིན་ནས་དམག་དཔོན་སེང་གེས་དེ་གཉིས་ཁྱིམ་གཞན་དུ་ཟན་ལ་མགྲོན་དུ་བོས་ནས་དེ་དེ་གཉིས་ཀྱི་ཟན་སྦྱར་བའི་ཕྱིར་བདག་ཉིད་སྲང་དུ་སོང་བ་དང་གཅེར་བུ་པ་དག་གིས་མཐོང་ནས། དེ་དག་ཤེས་ལྡན་དག་གང་གི་ཚེ་དམག་དཔོན་སེང་གེ་བདག་ཅག་ལ་མངོན་པར་དད་པ་དེའི་ཚེ་ན་འདིའི་ཐམས་ཅད་ཕུན་སུམ་ཚོགས་པར་གྱུར་ན། ད་ལྟར་ཤཱཀྱའི་བུའི་དགེ་སྦྱོང་དག་ལ་མངོན་པར་དད་པས་འདི་ལ་བཅར་མེད་བཟར་ཡང་མེད་དེ་བདག་ཉིད་ཁྱིམ་གྱི་ལས་བྱེད་དོ་ཞེས་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དམག་དཔོན་སེང་གེ་དང་གཞན་ཡང་དེ་ལྟ་བུ་གང་ཡིན་པ་ལ་བསླབ་པའི་སྡོམ་པ་བྱིན་ཅིག་།འདི་ལྟར་སྦྱིན་པར་བྱ་སྟེ། གནས་མལ་བཤམ་པ་བྱས་ནས། གཎ་ཌི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གཅིག་གིས་གསོལ་བ་འབའ་ཤིག་གི་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དམག་དཔོན་སེང་གེ་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་བས་ཏེ་ཡོངས་སུ་མཐར་ཐུག་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དམག་དཔོན་སེང་གེ་ལ་བསླབ་པའི་སྡོམ་པ་སྩོལ་ཏོ། །འདི་ནི་གསོལ་བའོ། །དགེ་འདུན་གྱིས་གང་ལ་བསླབ་པའི་སྡོམ་པ་བྱིན་པ་དེར་དགེ་སློང་གིས་ཁྱིམ་དུ་འགྲོ་བར་མི་བྱ། སྟན་ལ་ལོངས་སྤྱད་པར་མི་བྱ། བསོད་སྙོམས་བཟའ་བར་མི་བྱ། ཆོས་བསྟན་པར་མི་བྱའོ། །བཅོམ་ལྡན་འདས་ཀྱིས་གང་ལ་དགེ་འདུན་གྱིས་བསླབ་པའི་སྡོམ་པ་བྱིན་པ་དེར་དགེ་སློང་གིས་ཁྱིམ
8.226b
དུ་འགྲོ་བར་མི་བྱ། སྟན་ལ་ལོངས་སྤྱད་པར་མི་བྱ། བསོད་སྙོམས་བཟའ་བར་མི་བྱ། ཆོས་བསྟན་པར་མི་བྱའོ་ཞེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་གཉིས་སྔར་མགྲོན་དུ་བོས་པ་ཡང་དེའི་ཁྱིམ་དུ་མ་དོང་ངོ ། །དེ་ནས་དམག་དཔོན་སེང་གེས་ཁ་ཟས་སྟ་གོན་བྱས་ནས། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་ཆེན་པོ་གཉིས་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུ་དང ། མཽད་གལ་གྱི་བུ་གཉིས་ཀྱི་རྐང་པ་ལ་མགོ་བོས་ཕྱག་འཚལ་ཏེ་འདི་སྐད་ཅེས་སྨྲས་སོ། །འཕགས་པ་གཉིས་གདུགས་ཚོད་གཡར་དགོངས་འཚལ་ན་ད་དེའི་དུས་ལ་བབ་པར་དགོངས་སུ་གསོལ། དེ་གཉིས་ཀྱིས་སྨྲས་པ། ཁྱིམ་བདག་ཁྱོད་ལ་དགེ་འདུན་གྱིས་བསླབ་པའི་སྡོམ་པ་བྱིན་གྱིས་མི་འགྲོའོ། །དེས་སྨྲས་པ། འཕགས་པ་གཉིས་བདག་གིས་ཁྱེད་གཉིས་སྔར་སྤྱན་དྲངས་ཀྱིས་གཤེགས་སུ་གསོལ། དེ་གཉིས་ཀྱིས་སྨྲས་པ། ཁྱིམ་བདག་འོ་ན་བཅོམ་ལྡན་འདས་ལ་ཞུའོ་ཞེས་དེ་གཉིས་ཀྱིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྔར་མགྲོན་དུ་བོས་པ་གང་ཡིན་པ་དེས་བཟའ་བར་བྱ་སྟེ་འདི་ལ་འགྱོད་པར་མི་བྱའོ། །དེ་གཉིས་དམག་དཔོན་སེང་གེའི་ཁྱིམ་དུ་འཕགས་པ་དང ། དྲུག་སྡེ་དག་གིས་དེ་གཉིས་མཐོང་ནས། དེ་དག་གིས་སྨྲས་པ། ཁྱོད་གཉིས་གར་བཞུད། དམག་དཔོན་སེང་གེའི་ཁྱིམ་དུའོ། །དེ་ལ་དགེ་འདུན་གྱིས་བསླབ་པའི་སྡོམ་པ་མ་བྱིན་ནམ། གང་ལ་བྱིན་པ་དེ་ལ་བྱིན་གྱིས་ཁོ་བོ་ཅག་གཉིས་སྔར་མགྲོན་དུ་བོས་སོ། །གལ་ཏེ་དེ་ལྟ་ན་ཁོ་བོ་ཅག་ཆེས་སྔར་མགྲོན་དུ་བོས་ཏེ། གང་གི་ཚེ་དམག་དཔོན་སེང་གེས་བཅོམ་ལྡན་འདས་ཀྱི་སྤྱན་སྔ་ནས་བདེན་པ་དག་མཐོང་བ་དེའི་ཚེ་ན། དེས་ཆ་གཅིག་བཟུང་ནས། འདི་ལྟར་ཁྱུ་མཆོག་རླབས་པོ་ཆེའི་ཚིག་སྨྲས་ཤིང་འཁོར་གྱི་ནང་དུ་སེང་གེའི་སྒྲ་ཡང་དག་པར་བསྒྲགས་ཏེ། དེང་ཕྱིན་ཅད་གཅེར་བུ་པ་དག་དང །
8.227a
གཅེར་བུ་མ་དག་དང ། གཅེར་བུ་པའི་ཉན་ཐོས་དག་དང ། གཅེར་བུ་མའི་ཉན་ཐོས་མ་དག་གི་སྒོ་ནི་བཅད་དོ། །བཅོམ་ལྡན་འདས་ཀྱི་ཉན་ཐོས་དགེ་སློང་དག་དང ། དགེ་སློང་མ་དག་དང ། དགེ་བསྙེན་དག་དང ། དགེ་བསྙེན་མ་དག་གི་སྒོ་ནི་ཕྱེའོ་ཞེས་བསྒྲགས་པས་དེའི་ཕྱིར་ཁོ་བོ་ཅག་ཆེས་སྔར་མགྲོན་དུ་བོས་སོ། །དེ་གཉིས་ཅང་མི་སྨྲ་བར་དོང་བ་དང་དེ་དག་ཀྱང་དེ་གཉིས་ཀྱི་ཕྱི་བཞིན་ཕྱི་བཞིན་དུ་རྗེས་སུ་འབྲང་བ་ན་དམག་དཔོན་སེང་གེས་དགེ་སློང་རབ་ཏུ་མང་པོ་དག་འོང་བ་མཐོང་ནས་མཆོག་ཏུ་དགའ་བ་བསྐྱེད་དེ་ཁྱིམ་མི་ལ་དགོས་པ་གང་དག་ཡིན་པ་དེ་དག་ཀྱང་དགེ་སློང་རྣམས་ལ་བྲིམས་སོ། །དེ་དག་གིས་ཟོས་ཏེ་དོང་བ་དང་དེའི་བུ་དག་གིས་ཟས་བསླང་བར་བརྩམས་པ་ན་དེས་སྨྲས་པ། བུ་དག་ཁྱིམ་མི་ལ་དགོས་པ་གང་ཡིན་པ་དེ་དག་ཀྱང་དགེ་སློང་རྣམས་ལ་བྲིམས་ཀྱིས་གཞན་སྒྲུབ་ཀྱི་བར་དུ་རེ་ཤིག་སྡོད་ཅིག་།དེ་དག་གིས་ངུ་བར་བརྩམས་པ་ཐོས་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དག་ཏུ་སྔར་མགྲོན་དུ་མ་བོས་པར་དོང་སྟེ་རང་གི་ལག་གིས་བཅའ་བ་དང ། བཟའ་བ་བླངས་ནས་འཆའ་བར་བྱེད། ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང ། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་དག་ཏུ་སྔར་མགྲོན་དུ་མ་བོས་པར་དོང་སྟེ། རང་གི་ལག་གིས་བཅའ་བ་དང ། བཟའ་བ་བླངས་ནས་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས
8.227b
བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམ་པར་གྱུར་ལ། ཡང་དགེ་སློང་གང་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་ལྟ་བུ་དག་ཏུ་སྔར་མགྲོན་དུ་མ་བོས་པར་སོང་སྟེ་རང་གི་ལག་གིས་བཅའ་བ་དང ། བཟའ་བ་བླངས་ནས་འཆའ་འམ་ཟ་ན་དགེ་སློང་དེས་ཕྱི་རོལ་ཀུན་དགའི་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །གང་གི་ཚེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་པ་དེའི་ཚེ་ན་དགེ་སློང་འགའ་ཡང་དམག་དཔོན་སེང་གེའི་ཁྱིམ་དུ་མི་འགྲོའོ། །དེ་ནས་དམག་དཔོན་སེང་གེའི་ཆུང་མས་དམག་དཔོན་སེང་གེ་ལ་འདི་སྐད་ཅེས་སྨྲས་སོ། །རྗེའི་སྲས་མཁྱེན་པར་མཛོད་ཅིག་།དགེ་འདུན་གྱིས་སྐོལ་ཅག་ལ་བསླབ་པའི་སྡོམ་པ་སྩལ་ནས། དགེ་སློང་འགའ་ཡང་མི་མཆི་བས་དོན་གྱིས་ན་དགེ་འདུན་གྱིས་ཚུལ་ཤིང་གིས་སྐོལ་གྱི་དགེ་སློང་རྣམས་ཀྱི་བཤོས་ཤིན་དུ་བཀག་ཀྱང་གདན་གྱི་ལོངས་སྤྱོད་དང ། ཆོས་སྟོན་པ་ལ་ནོངས་པ་ཅི་མཆིས་ཤེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་དམག་དཔོན་སེང་གེའི་ཁྱིམ་དུ་འགྲོ་བར་བྱ། སྟན་ལ་ལོངས་སྤྱད་པར་བྱ། ཆོས་བསྟན་པར་བྱ
8.228a
ཞིང་བསོད་སྙོམས་བླང་བར་ནི་མི་བྱའོ། །དགེ་སློང་དག་ལྷུང་བཟེད་སྟོང་པ་ཁོ་ནས་དང་པོར་དེའི་ཁྱིམ་དུ་འཇུག་ཅིང་འབྱུང་ནས། དམག་དཔོན་སེང་གེའི་ཆུང་མས་དེ་མཐོང་བ་དང ། སྔོན་ནི་འཕགས་པ་འདི་དག་ལྷུང་བཟེད་སྟོང་པ་ཁོ་ནས་དང་པོར་བདག་གི་ཁྱིམ་དུ་ཞུགས་ནས་ལྷུང་བཟེད་གང་བ་དང་ལག་པ་གང་བ་དག་གིས་འབྱུང་ན། ད་ནི་ལྷུང་བཟེད་སྟོང་པ་དང་ལག་པ་སྟོང་པ་དག་གིས་འབྱུང་ངོ་ཞེས་ངུ་བར་བརྩམས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་ལྷུང་བཟེད་སྟོང་པ་ཁོ་ནས་དང་པོར་དེའི་ཁྱིམ་དུ་འཇུག་པར་མི་བྱའོ། །དགེ་སློང་དག་གིས་བསོད་སྙོམས་བརྒྱུས་ནས་ལྷུང་བཟེད་གང་བས་དེའི་ཁྱིམ་དུ་འཇུག་པར་བརྩམས་པ་དང ། དེའི་བུ་བྱིས་པ་ཁྱེའུ་དག་བཅའ་བ་དག་སློང་བ་ན་དགེ་སློང་རྣམས་ཀྱིས་མ་བྱིན་ནས། བཅོམ་ལྡན་འདས་ཀྱིས་བཀའ་སྩལ་པ། སྦྱིན་པར་བྱའོ། །དགེ་སློང་དག་གིས་རིལ་པོར་སྦྱིན་པར་བརྩམས་པ་དང ། བྱིས་པ་ཁྱེའུ་དག་གིས་བླངས་ནས་འཆའ་ཞིང་ཕྱིར་བྱུང་བ་གཅེར་བུ་པ་དག་གིས་མཐོང་ནས། དྲིས་པ་ཁྱེའུ་དག་ཁྱེད་ཅག་གིས་བཅའ་བ་ག་ལས་རྙེད། འཕགས་པ་དག་གིས་བྱིན་ནོ། །མ་ཉེས་སོ་བུམ་པས་བུམ་པ་འགེངས་ཏེ། ཁྱེད་ཀྱང་དེ་དག་ལ་སྦྱིན་ལ། དེ་དག་ཀྱང་ཁྱེད་ལ་སྦྱིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་བཅའ་བ་རིལ་པོར་མི་སྦྱིན་པར་དུམ་བུར་བྱས་ཏེ་སྦྱིན་པར་བྱའོ། །ཇི་ཙམ་དུས་གཞན་ཞིག་ན་དམག་དཔོན་སེང་གེའི་ཆུང་མས་དགེ་སློང་འོངས་པ་རྣམས་ལ་ག་གོན་དང་ལ་བུག་ལ་སོགས་པ་འབྲས་བུ་དང ། རྩ་བ་དག་དང ། ལྡམ་ལྡུམ་ལ་སོགས་པ་ཚོད་མ་དག་ཕུལ་བ་དང ། དགེ་སློང་དག་མི་ལེན་ནས་དེས་སྨྲས་པ། འཕགས་པ་དག་འདི་དག་གིས་བདག་ཅག་གི་མཛོད་དང ། བང་བ་དག་བས་པར་འགྱུར་རམ་ཅི་བཞེས་ཤིག་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་ག་གོན་དང་ལ་པུག
8.228b
ལ་སོགས་པ་འབྲས་བུ་དང ། རྩ་བ་དག་དང ། ལྡམ་ལྡུམ་ལ་སོགས་པ་ཚོད་མ་ཁྱིམ་ནས་འབྱུང་བ་བླང་བར་བྱའོ། །དེའི་ཚེ་ན་ཡངས་པ་ཅན་གྱི་ལི་ཙ་བི་དག་དཔང་སའི་ཁང་པ་ན་གཏམ་འདྲེ་ཞིང་འཁོད་པ་དེ་དག་གིས་དགེ་སློང་དེ་དག་དམག་དཔོན་སེང་གེའི་ཁྱིམ་ནས་བྱུང་བ་མཐོང་ནས་དེ་ན་གང་དག་མ་དད་པ་དེ་དག་གིས་སྨྲས་པ། ཤེས་ལྡན་དག་གང་གི་ཚེ་དམག་དཔོན་སེང་གེ་དགེ་སྦྱོང་གཽ་ཏ་མ་ལ་མངོན་པར་དད་པར་གྱུར་པ་དེ་ཚུན་ཆད་ནས་དེའི་ལོངས་སྤྱོད་དག་སྲབས་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་ཏོ། །དད་པ་ཅན་དག་གིས་སྨྲས་པ། ཤེས་ལྡན་དག་གང་བཅོམ་ལྡན་འདས་ལ་མངོན་པར་དད་པ་དེའི་ལོངས་སྤྱོད་དག་སྲབས་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་ག་ལ་འགྱུར། འདི་ལྟར་དམག་དཔོན་སེང་གེས་ནི་བཅོམ་ལྡན་འདས་ཀྱི་སྤྱན་སྔ་ནས་བདེན་པ་དག་མཐོང་ནས་དེའི་ཞིང་ལས་ཀྱི་མཐའ་དག་ཁ་ན་མ་ཐོ་བ་དང་བཅས་པ་ཡིན་ནོ་ཞེས་རྒྱུན་བཅད་པས་དེས་ན་དེའི་ལོངས་སྤྱོད་དག་སྲབས་པ་དང ། ཡོངས་སུ་ཟད་པ་དང ། ཡོངས་སུ་གཏུགས་པར་གྱུར་ཏོ། །ཡངས་པ་ཅན་གྱི་ལི་ཙ་བི་དག་གིས་གྲོས་བྱས་ནས། དམག་དཔོན་སེང་གེའི་ཞིང་པ་དག་ལ་སྨྲས་པ། ཤེས་ལྡན་དག་ཁྱེད་ཅིའི་ཕྱིར་དམག་དཔོན་སེང་གེའི་ཞིང་ལས་ཀྱི་མཐའ་དག་མི་བྱེད། གླ་མ་ཐོབ་བམ་ཅི། དེ་དག་གིས་སྨྲས་པ། ཤེས་ལྡན་དག་གླ་མ་ཐོབ་པ་མ་ཡིན་ཏེ། དམག་དཔོན་གྱིས་བདག་ཅག་བཀག་ན་ཇི་ལྟར་བྱ། ཁྱེད་ཅག་ལ་ཚོགས་ཀྱིས་བསྒོས། དེང་ལ་དམག་དཔོན་གྱི་ཞིང་ལས་ཀྱི་མཐའ་དག་གྱིས་ཤིག་།དེ་དག་གིས་ཡངས་པ་ཅན་གྱི་ལི་ཙ་བི་དག་གི་ཚིག་གིས་དམག་དཔོན་སེང་གེའི་ཞིང་ལས་ཀྱི་མཐའ་དག་བྱ་བར་བརྩམས་པ་དང ། ལྷས་དུས་སུ་ཆར་གྱི་རྒྱུན་ལེགས་པར་ཕབ་ནས་ལོ་ཏོག་གི་འབྱོར་པ་ཆེན་པོ་སྐྱེས་པར་གྱུར་ཏོ། །དམག་དཔོན་སེང་གེ་ཡང་ལོངས་སྤྱོད་དག་གིས་མཐོ་བར་གྱུར་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་དམག་དཔོན་སེང་གེས་འདི་སྐད་ཅེས་གསོལ་ཏོ། །བཙུན་པ་སྔོན་བདག་གི་ལོངས་སྤྱོད་དག་སྲབས
8.229a
པ་དང ། ཡོངས་སུ་བས་པ་དང ། ཡོངས་སུ་གཏུག་པར་གྱུར་ནས་དགེ་འདུན་དོན་བཞེད་པ། ཕན་པ་བཞེད་པ་བདག་ལ་བསླབ་པའི་སྡོམ་པ་སྩལ་ན། ད་ནི་ཡངས་པ་ཅན་གྱི་ལི་ཙ་བིའི་ཚོགས་ཀྱིས་བདག་གི་ལོངས་སྤྱོད་བསྒྲུབས་ནས་ལོངས་སྤྱོད་དག་འཕེལ་བར་གྱུར་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་བདག་ལ་བསླབ་པའི་སྡོམ་པ་གཞིག་པ་མཛད་ན་ལེགས་སོ། །བཅོམ་ལྡན་འདས་ཀྱིས་དམག་དཔོན་སེང་གེ་ལ་ཅང་མི་གསུང་བས་གནང་ངོ ། །དེ་ནས་དམག་དཔོན་སེང་གེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དམག་དཔོན་སེང་གེ་དང་གཞན་ཡང་དེ་ལྟ་བུ་གང་ཡིན་པའི་བསླབ་པའི་སྡོམ་པ་གཞིག་པར་བྱའོ་འདི་ལྟར་གཞིག་པར་བྱ་སྟེ། གནས་མལ་བཤམ་པ་བྱས་ནས་གཎ་ཌི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་དམག་དཔོན་སེང་གེས་ཕྱག་བྱས་ཏེ་རྒན་པའི་མཐའ་ལོགས་སུ་ཙོག་ཙོག་པོར་འདུག་ནས་ཐལ་མོ་སྦྱར་ཏེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དམག་དཔོན་སེང་གེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། བདག་གིས་འདི་ལྟ་སྟེ། སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། བདག་གིས་དེ་ལྟར་ཕུལ་ཞིང་དེ་ལྟར་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་བས་ཏེ་ཡོངས་སུ་མཐར་ཐུག་ནས་དགེ་འདུན་དོན་བཞེད་པ། ཕན་པ་བཞེད་པས་བདག་ལ་བསླབ་པའི་སྡོམ་པ་སྩལ་བ་ལས་བདག་དམག་དཔོན་སེང་གེ་ཡང་ལོངས་སྤྱོད་འཕེལ་ནས། བདག་དམག་དཔོན་སེང་གེ་བསླབ་པའི་སྡོམ་པ་སྩལ་བ། བསླབ་པའི་སྡོམ་པ་གཞིག་པར་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི
8.229b
སླད་དུ་བདག་ལ་བསླབ་པའི་སྡོམ་པ་གཞིག་པ་སྩལ་དུ་གསོལ། དེ་སྐད་ལན་གཉིས་ལན་གསུམ་དུ་བཟླས་སོ། །དེ་ནས་དམག་དཔོན་སེང་གེ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་བཞག་ནས་དགེ་སློང་གཅིག་གིས་གསོལ་བ་འབའ་ཞིག་གི་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དམག་དཔོན་སེང་གེ་དེ་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བ་འམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་བས་ཏེ་ཡོངས་སུ་མཐར་ཐུག་ནས་དེ་ལ་དགེ་འདུན་དོན་བཞེད་པ། ཕན་པ་བཞེད་པས་བསླབ་པའི་སྡོམ་པ་སྩལ་བ་ལས་དམག་དཔོན་སེང་གེ་དེ་ཡང་ལོངས་སྤྱོད་འཕེལ་ཏེ། དམག་དཔོན་སེང་གེ་བསླབ་པའི་སྡོམ་པ་སྩལ་བ་དགེ་འདུན་ལས་སྡོམ་པ་གཞིག་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དམག་དཔོན་སེང་གེ་ལ་བསླབ་པའི་སྡོམ་པ་གཞིག་པ་མཛད་དོ། །འདི་ནི་གསོལ་བའོ། །དགེ་འདུན་གྱིས་གང་ལ་བསླབ་པའི་སྡོམ་པ་བཤིག་པ་དེར་དགེ་སློང་རྣམས་ཀྱིས་འགྲོ་བར་བྱ། སྟན་ལ་ལོངས་སྤྱད་པར་བྱ། བསོད་སྙོམས་བླང་བར་བྱ། ཆོས་བསྟན་པར་བྱའོ། །སློབ་པ་དག་གི་ཞེས་བྱ་བ་ལ། སློབ་པ་དག་ཅེས་བྱ་བ་ནི་རྒྱུན་ཏུ་ཞུག་པ་དག་དང ། ལན་ཅིག་ཕྱིར་འོང་བ་དག་དང ། ཕྱིར་མི་འོང་བ་དག་གོ། །ཁྱིམ་གང་དག་ཅེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་དག་གོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །བསླབ་པའི་སྡོམ་པས་བསྡམས་པར་གྱུར་ལ་ཞེས་བྱ་བ་ནི་གསོལ་བའི་ལས་ཀྱིས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །སློབ་པ་དག་གི་ཁྱིམ་གང་དག་དགེ་འདུན་གྱི་བསླབ
8.230a
པའི་སྡོམ་པས་བསྡམས་པ་དེ་ལྟ་བུ་དག་ཏུ་ཞེས་བྱ་བ་ནི་ཇི་སྐད་བསྟན་པ་ལྟ་བུ་དག་ཏུའོ། །སྔར་མགྲོན་དུ་མ་བོས་པར་ཞེས་བྱ་བ་ནི་སྔར་མ་བསྟན་པར་རོ། །སོང་སྟེ་ཞེས་བྱ་བ་ནི་སོང་ནས་སོ། །རང་གི་ལག་གིས་ཤེས་བྱ་བ་ནི་ལག་པས་ལག་པར་རོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །བླངས་ན་ཤེས་བྱ་བ་ནི་བྱིན་ལེན་སྟོབས་སུ་བཅུག་ནས་སོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ནའོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །ཕྱི་རོལ་ཀུན་དགའ་ར་བར་སོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་སོང་སྟེའོ། །དགེ་སློང་རྣམས་ལ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ལ་འོ། །ཚེ་དང་ལྡན་པ་དག་བདག་ལ་སྨད་པའི་གནས་ཤེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་འཐོལ་བར་བྱ་བ་འོ། །བྱུང་གིས་ཤེས་བྱ་བ་ནི་ལྟུང་བ་བྱུང་གིས་སོ་ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་མཐོལ་ལོ་ཞེས་སོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་འཐོལ་བར་བྱ་སྟེའོ། །ཆོས་འདི་ཡང་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ཡང་འཐོལ་བར་བྱ་བ་སྟེ། དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་སློབ་པ་དག་གིས་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་ལྟ་བུ་དག་ཏུ་སྔར་མགྲོན་དུ་མ་བོས་པར་སོང་སྟེ་རང་གི་ལག་གིས་བཅའ་བ་དང་བཟའ་བ་བླངས་ནས་འཆའ་འམ་ཟ་ན་ཐམས་ཅད་དུ་སོ་སོར་བཤགས་པར་བྱ་བར་འགྱུར་རོ། །སྔར་མགྲོན་དུ་བོས་པ་ལ་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྟེ་གསུམ་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་སེར་སྐྱའི་གནས་ན་སེར་སྐྱའི་གནས་ཀྱི་ནགས་སུ་དབྱར་གནས་པར་ཞལ
8.230b
གྱིས་བཞེས་སོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཞག་བདུན་ནམ་བརྒྱད་ན་དགག་དབྱེ་འབྱུང་བར་འགྱུར་བ་ན་སྤྱོད་ཡུལ་གྱི་གྲོང་དུ་ཞག་འདི་སྙེད་ན་དགག་དབྱེ་འབྱུང་བར་འགྱུར་རོ། །ཞེས་བརྗོད་པར་བྱའོ་ཞེས་བཀའ་སྩལ་ནས་དགེ་སློང་རྣམས་དོང་སྟེ་བརྗོད་དོ། །དེ་ནས་སེར་སྐྱའི་གནས་ན་གནས་པའི་ཤཱཀྱ་དག་དེ་གཉིས་ཀྱི་དགག་དབྱེ་བཅཝ་ལྔ་པ་ལ་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་སེར་སྐྱའི་གནས་ན་གནས་པའི་ཤཱཀྱ་རྣམས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ ། །དེ་ནས་སེར་སྐྱའི་གནས་ན་གནས་པའི་ཤཱཀྱ་རྣམས་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་འདི་ཉིད་དུ་བདག་ཅག་གི་གདུག་ཚོད་གསོལ་བར་ཅི་གནང ། སང་དགེ་སློང་འགས་ཀྱང་བསོད་སྙོམས་ལ་འཇུག་པར་མི་བགྱི་སྟེ། བདག་ཅག་བསོད་སྙོམས་འཚལ་ཏེ་མཆི་ཞིང ། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་རང་གི་སུག་པ་ནས་ཚིམ་ཞིང་སྟོབས་པར་བགྱིད་དོ། །བཅོམ་ལྡན་འདས་ཀྱིས་སེར་སྐྱའི་གནས་ན་གནས་པའི་ཤཱཀྱ་རྣམས་ལ་ཅང་མི་གསུངས་བས་གནང་ངོ ། །དེ་ནས་སེར་སྐྱའི་གནས་ན་གནས་པའི་ཤཱཀྱ་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེ་དག་གིས་སེར་སྐྱའི་གནས་སུ་དོང་སྟེ། དེ་ཉིད་ཀྱི་མཚན་མོ
8.231a
བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་ནས་དེ་ནས་ནང་པར་སྔར་ལངས་ཏེ་བཅའ་བ་དང་བཟའ་བ་དག་གིས་ཤིང་རྟ་དག་བཀང་ནས་ཤཱཀྱ་མོ་རྣམས་ལ་སྨྲས་པ། ཁྱེད་ཅག་ཤིང་རྟ་དག་ཞོན་ལ་དེང་ཤིག་དང་ཁོ་བོ་ཅག་ཀྱང་ཕྱི་བཞིན་འོང་ངོ ། །དེ་ནས་དེ་དག་རྒྱན་ཐམས་ཅད་ཀྱིས་བརྒྱན་ཏེ་ཤིང་རྟ་དག་ལ་ཞོན་ནས་འཕགས་སོ། །སེར་སྐྱའི་གནས་ཀྱི་ཉེན་ཀོར་ཐིབས་པོ་ཡིན་པས་དེ་དག་ལམ་ཀར་ཆོམ་རྐུན་པ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ཤཱཀྱ་མོ་རྒྱན་ཐམས་ཅད་ཀྱིས་བརྒྱན་པ་འདི་དག་འདོང་གིས་ཚུར་ཤེག་གཞོམ་མོ། །ཆོམ་རྐུན་པའི་དམག་དཔོན་གྱིས་སྨྲས་པ། ཤེས་ལྡན་དག་འདོང་དུ་ཟད་མོད་ཁྱེད་ཅག་ལ་འདི་དག་བཅོམ་པས་ཅི་བྱ། ཤཱཀྱ་གདུག་པ་ཕ་རོལ་གནོན་པ་དག་གནོན་པ་བྱེད་པར་འགྱུར་གྱིས་ཐོང་ཤིག་།དེ་དག་གིས་སྨྲས་པ། དམག་དཔོན་ཟླ་བའི་རྒྱབ་སུས་མཐོང ། གཞོམ་མོ་ཞེས་དེ་དག་གིས་དེའི་ཚིག་ཚིག་མ་ཡིན་པར་བྱས་ཏེ་དེ་དག་བཅོམ་ནས། གོས་དང་རྒྱན་ཐམས་ཅད་ཕྲོགས་ཏེ་དོང་ངོ ། །ཤཱཀྱ་མོ་དེ་དག་ཀྱང་འཇིགས་ཤིང་སྐྲག་ནས་སྒྲེན་མོར་ཚང་ཚིང་དང་ནགས་མ་དག་གི་ནང་དུ་ཡིབ་སྟེ་འཁོད་དོ། །ཤིང་རྟ་དེད་པ་དག་ཀྱང་སྐྲག་ནས་བྱེར་རོ། །གླང་དག་ཀྱང་ཆུ་དག་བཅད་ནས་ཅི་དགར་ཡན་ཅིང་འཁོད་དོ། །ཤིང་རྟ་དག་ཀྱང་ཤིང་རྟའི་མདའ་དང་བྲལ་ཏེ་འདུག་གོ། །དྲུག་སྡེ་དག་གིས་ཕན་ཚུན་གྲོས་བྱ་བར་བརྩམས་པ། དགའ་བོ་ཉེ་དགའ་ཤཱཀྱ་བག་མེད་པ་དག་ཡུན་རིང་དུ་ཐོགས་པས་བདག་ཅག་གིས་ཟན་གཅད་པར་བྱ་འམ་ཅི། བསོད་སྙོམས་ལ་འདོང་ངོ ། །དེ་ལྟར་བྱའོ་ཞེས་དེ་དག་ལྷུང་བཟེད་དང་ཆོས་གོས་ཐོགས་ཏེ་འཕགས་པ་དང ། ཇི་ཙམ་ན་ལམ་ཀ་ན་ཤིང་རྟ་བཅའ་བ་དང ། བཟའ་བས་གང་བ་ཤིང་རྟའི་མདའ་དང་བྲལ་བ་དག་འདུག་པ་དང ། གླང་དག་ཆུ་དག་བཅད་དེ་ཅི་དགར་ཡན་ཅིང་འཁོད་པ་དག་མཐོང་ནས་དེ་དག་གིས་ཕན་ཚུན་རྣམ་པར་བལྟས་ནས་བོད་པར་བརྩམས་པ། ཤེས་ལྡན་དག་འདི་ན་སུ་འཁོད། དེ་དག་གིས་སྐད་ཕྱུང་བ་དང ། དྲུག་སྡེ་དག་གིས་སྨྲས་པ་ཁྱེད་ཅག་སུ་ཡིན། འཕགས་པ་དག་བདག་ཅག་ཤཱཀྱ་མོ་དག་གོ
8.231b
ཚུར་ཤེག་ཁོ་བོ་ཅག་ལ་བྲིམས་ཤིག་།འཕགས་པ་དག་བདག་ཅག་ཆོམ་རྐུན་པ་དག་གིས་བཅོམ་སྟེ་སྒྲེན་མོར་མཆིས་སོ། །ཁོ་བོ་ཅག་གདུག་ཚོད་ཡོལ་གྱིས་ཚུར་ཤེག་ཁྱེད་ཅག་གི་ཡན་ལག་དང་ཉིང་ལག་དག་ལས་ཁོ་བོ་ཅག་གིས་སྔོན་མ་མཐོང་བ་གང་ཡོད་ཚུར་ཤེག་དེ་དག་ལོ་མ་དག་གིས་གཡོགས་ཏེ་བྱུང་ནས་བྲིམ་པར་བརྩམས་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྟོས་ཤིག་ཤཱཀྱ་མོ་འདི་དག་གི་མིག་ཅི་འདྲ། སྣ་ཅི་འདྲ་མཆུ་ཅི་འདྲ་ནུ་མ་ཅི་འདྲ་ལག་པ་ཅི་འདྲ་རྐེད་པ་ཅི་འདྲ། རྐང་པ་ཅི་འདྲ་ལྟོས་ཤིག་།དེ་དག་དེ་ལྟར་གཙེས་པ་ན་ངོ་ཚ་ནས་ཚང་ཚིང་དང་ནགས་མ་དེ་དག་ཉིད་ཀྱི་ནང་དུ་ཡིབ་སྟེ་འཁོད་དོ། །བསེལ་བ་དག་གིས་ཤཱཀྱ་རྣམས་ལ་ཤཱཀྱ་མོ་རྣམས་བཅོམ་མོ་ཞེས་སྦྲན་པ་དང ། དེ་ནས་ཤཱཀྱ་དག་མདའ་གཞུ་ལག་ན་ཐོགས་ཤིང་མཚོན་གཟས་པ་དག་གིས་ལམ་གར་དོང་སྟེ། ལམ་བགགས་ནས་དེ་དག་གིས་ཆོམ་རྐུན་པ་དེ་དག་བཟུང་ངོ ། །དེ་ན་ཁ་ཅིག་གིས་སྨྲས་པ། འདི་དག་ལ་བཏང་སྙོམས་བྱར་ཅི་ཡོད་གསད་དོ་ཁ་ཅིག་གིས་སྨྲས་པ། རེ་ཤིག་དེར་ཁྲིད་ལ་ཤཱཀྱ་མོ་རྣམས་ལ་དྲིས་ཏེ། གང་ལ་ཡན་ལག་གང་གིས་ཉེས་པ་བྱས་པ་དེའི་དེ་གཅད་པར་བྱའོ། །དེ་དག་གིས་དེ་དག་ཁྲིད་ནས་ཤཱཀྱ་མོ་རྣམས་ཀྱི་གན་དུ་དོང་སྟེ་སྨྲས་པ། ཚུར་ཤེག་ཆོམ་རྐུན་པ་འདི་དག་ལས་གང་གིས་ཁྱེད་ཅག་ལ་ཡན་ལག་གང་གིས་ཉེས་པ་བྱས་པ་སྨྲོས་ཤིག་།དེ་དག་གིས་སྨྲས་པ། ཆོམ་རྐུན་པའི་དམག་དཔོན་འདི་ནི་ཉེས་པ་མེད་པ་གནོད་པ་མི་བྱེད་པ་ཡིན་ཏེ། འདིས་དེ་དག་བཟློག་ན་དེ་དག་མ་བཏུབ་པས་འདི་ནི་ཐོང་ཤིག་།དེ་དག་གིས་དེ་བཏང་ངོ་དེ་སྲོག་དེའུ་ཆད་པ་ལས་ཕྱིར་ཐོབ་ནས་དེས་དེ་དག་གི་རྐང་པ་ལ་གཏུགས་ཏེ་སྨྲས་པ། ཤེས་ལྡན་དག་ཁྱེད་ཅག་དད་པ་སྐྱེས་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་དུ་འགྲོ་བ་ཡིན་ན་འདི་དག་བསད་པས་ཁྱེད་ལ་ཅི་བྱ། ཉེས་པ་བྱེད་པ་འདི་དག་ཀྱང་བཏང་བར་གསོལ། དེ་དག་གིས་དེ་དག་ལས་བཅོམ་པའི་རྫས་དག་ཕྱིར་བཀུག་སྟེ་བཏང་ངོ ། །དེ་ནས་ཤཱཀྱ་དེ་དག་གིས་ཤཱཀྱ་མོ་དེ་དག་གོས་བསྐོན་ཅིང་རྒྱན
8.232a
ཐོགས་སུ་བཅུག་ནས་ཤིང་རྟ་དག་ཀྱང་ཆུ་དག་བཏགས་ཏེ་ཤིང་རྟ་ལ་ཞོན་ནས་བཅོམ་ལྡན་འདས་ཀྱི་སྤྱན་སྔར་དོང་ངོ ། །བཅོམ་ལྡན་འདས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་པ་དང ། ཤཱཀྱ་དང་ཤཱཀྱ་མོ་རྣམས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བྲིམ་པར་བརྩམས་སོ། །ཤཱཀྱ་མོ་རྣམས་དྲུག་སྡེ་དག་ལ་ཟས་མི་སྦྱིན་ནས་ཤཱཀྱ་རྣམས་ཀྱིས་སྨྲས་པ། ཅིའི་ཕྱིར་འཕགས་པ་དག་ལ་ཞལ་ཟས་མི་གསོལ། དེ་དག་གིས་སྨྲས་པ། འདི་དག་གིས་ཟོས་ཟིན་ཏོ། །གང་དུ་གསོལ། དེ་ཉིད་དུའོ་སུས་བྲིམས། ཁོ་མོ་ཅག་གིས་སོ། །ཁྱེད་ཅག་སྒྲེན་མོ་དག་གིས་ཇི་ལྟར་བྲིམས། དེའི་ཕྱིར་འདི་དག་གིས་ཁོ་མོ་ཅག་ཐོ་བརྩམས་ཏེ་ཇི་ལྟར་ཁོ་མོ་ཅག་ལོ་མ་དག་གིས་གཡོགས་ཏེ་ཚང་ཚིང་དང་ནགས་མ་དག་གི་ནང་ནས་བྱུང་སྟེ་བྲིམ་པར་བརྩམས་པ་དང ། འདི་དག་གིས་ཐོ་བརྩམས་ཏེ་འདི་ལྟར་བརྗོད་པར་བྱ་བ་མང་དུ་ཡོད་དོ། །དེ་ནི་མཇལ་གྱིས་འདི་དག་ནི་གནས་ངན་ལེན་ཀུན་ཏུ་སྤྱོད་པ་ཡིན་གྱིས་འདི་དག་ལ་ཟས་མི་སྦྱིན་ནོ། །དེ་དག་ཅང་མི་སྨྲ་བར་འཁོད་དོ། །དེ་ནས་དེ་དག་གིས་དགེ་སློང་གི་དགེ་འདུན་ལ་བྲིམས་ནས་སྨྲས་པ། འཕགས་པ་དག་ཀྱེ་མ་ཁྱེད་ཀྱིས་ལམ་འདི་འཇིགས་པ་དང་བཅས་པ་ཡིན་ནོ་ཞེས་བཀའ་སྩལ་ན་བདག་ཅག་བག་བགྱིད་ཅིང་མཆིའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་ནགས་ཉུལ་བ་བསྐོ་བར་བྱ་སྟེ། དགེ་སློང་ནགས་ཉུལ་བ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན་འདུན་པས་འགྲོ་བ་དང་ཞེ་སྡང་གིས་འགྲོ་བ་དང་གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། ནགས་བྱུལ་བ་དང་མ་བྱུལ་བ་མི་ཤེས་པའོ། །ནགས་ཉུལ་བ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན་འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། ནགས་བྱུལ་བ་དང་མ་བྱུལ་བ་ཤེས་པའོ། །འདི་ལྟར་བསྐོ་བར་བྱ
8.232b
སྟེ་གནས་མལ་བཤམ་པ་བྱས་ནས་གཎ་ཌི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ན་རྗེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་གྱི་ནགས་ཉུལ་བར་སྤྲོ་འམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེ་ནས་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་བར་སྤྲོ་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་གྱི་ནགས་ཉུལ་བར་བསྐོ་སྟེ། དགེ་སློང་ནགས་ཉུལ་བ་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་ལོ། །འདི་ནི་གསོལ་བའོ་ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་བར་སྤྲོ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་ནགས་ཉུལ་བར་བསྐོས་ཏེ་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་ནགས་ཉུལ་བར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་ནགས་ཉུལ་བར་བསྐོས་ལགས་སོ། །མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་དགེ་སློང་ནགས་ཉུལ་བའི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ནགས་ཉུལ་བས་དཔག་ཚད་ཕྱེད་ནས་བཟུང་སྟེ་ཁོ་ར་ཁོར་ཡུག་ཏུ་ནགས་བྱུལ་བར་བྱའོ། །བཅོམ་ལྡན་འདས་ཀྱིས་དགེ་སློང་ནགས་ཉུལ་བས་དཔག་ཚད་ཕྱེད་ནས་བཟུང་སྟེ་ཁོ་ར་ཁོར་ཡུག་ཏུ་ནགས་བྱུལ་བར་བྱའོ། །ཞེས་བཀའ་སྩལ་ནས་དེ་ལམ་གྱིས་དུབ་ཅིང་གཅིག་པུ་འཇིགས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་གལ་ཏེ་འདོད་ན་ཁྱེའུ་སུས་སྦྱིན་པར་བྱ
8.233a
ཞིང་གྲོགས་ཀྱང་སྦྱིན་པར་བྱའོ། །གལ་ཏེ་ནགས་འཇིགས་པ་དང་བཅས་པ་ཉིད་ཡིན་ན་དེས་དུད་བརྡ་གཏུལ་བར་བྱའོ། །བ་དན་སྔོན་པོ་བསྒྲེང་བར་བྱའོ། །འདབ་མའི་ཆང་བུ་དག་ལམ་ཀར་གཞག་པར་བྱའོ། །གལ་ཏེ་ནགས་འཇིགས་པ་མེད་པ་ཉིད་ཡིན་ན་བ་དན་དཀར་པོ་བསྒྲེང་བར་བྱའོ། །དགེ་སློང་ནགས་ཉུལ་བས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་ནགས་སྔར་མ་བྱུལ་བར་ཀུན་དགའི་ར་བའི་ཕྱི་རོལ་ཏུ་བཅའ་བ་དང་བཟའ་བ་བླངས་ཏེ་འཆའ་ཞིང་ཟ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་སྔར་ནགས་མ་བྱུལ་བར་ཀུན་དགའི་ར་བའི་ཕྱི་རོལ་ཏུ་བཅའ་བ་དང་བཟའ་བ་བླངས་ཏེ་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་འདུན་གྱི་གནས་མལ
8.233b
དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་གྱུར་ལ། ཡང་དགེ་སློང་གང་དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དེ་ལྟ་བུ་དག་ཏུ་སྔར་མ་བྱུལ་བར་ཀུན་དགའི་ར་བའི་ཕྱི་རོལ་ཏུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་དགེ་སློང་དེས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས། ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ་ཆོས་འདི་ཡང་སོ་སོར་བཤགས་པར་བྱ་བའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གནས་མལ་དགོན་པ་གང་དག་ཅེས་བྱ་བ་ལ་དགོན་པ་ཞེས་བྱ་བ་ནི་རྡུལ་ཕྲ་རབ་དྲུག་ལ་རྡུལ་ཕྲ་མོ་གཅིག་གོ། །རྡུལ་ཕྲ་མོ་དྲུག་ལ་ཆུ་རྡུལ་གཅིག་གོ། །ཆུ་རྡུལ་དྲུག་ལ་ལྕགས་རྡུལ་གཅིག་གོ། །ལྕག་རྡུལ་དྲུག་ལ་རི་བོང་གི་རྡུལ་གཅིག་གོ། །རི་བོང་གི་རྡུལ་དྲུག་ལ་ལུག་རྡུལ་གཅིག་གོ། །ལུག་རྡུལ་དྲུག་ལ་གླང་རྡུལ་གཅིག་གོ། །གླང་རྡུལ་དྲུག་ལ་ཉི་ཟེར་གྱི་རྡུལ་གཅིག་གོ། །ཉི་ཟེར་གྱི་རྡུལ་དྲུག་ལ་སྲོ་མ་གཅིག་གོ། །སྲོ་མ་དྲུག་ལ་ཤིག་གཅིག་གོ། །ཤིག་དྲུག་ལ་ནས་གཅིག་གོ། །ནས་དྲུག་ལ་སོར་གཅིག་གོ། །སོར་བཞི་དྲུག་ལ་ཁྲུ་གང་ངོ ། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུའོ། །གཞུ་ལྔ་བརྒྱ་ལ་རྒྱང་གྲགས་གཅིག་སྟེ། གྲོང་ནས་རྒྱང་གྲགས་གཅིག་ནི་དགོན་པ་སྟེ། དེ་ན་གཙུག་ལག་ཁང་གང་ཡོད་པ་དེ་ནི་གནས་མལ་དགོན་པ་ཡིན་ནོ། །དོགས་པ་དང་བཅས་པར་གྲགས་པ་ཞེས་བྱ་བ་ནི་ཆོམ་རྐུན་པ་དང་གཡོན་ཅན་གྱིས་འཇིགས་པར་གྲགས་པའོ། །འཇིགས་པ་དང་བཅས་པར་གྲགས་པ་ཞེས་བྱ་བ་ནི་སེང་གེ་དང ། སྟག་དང་གུང་གིས་འཇིགས་པར་གྲགས་པའོ། །འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་གྱུར་ལ་ཞེས
8.234a
བྱ་བ་ནི་ཤ་སྦྲང་དང་སྦྲང་བུ་མཆུ་རིངས་དང ། རླུང་དང་ཉི་མ་དང་སྡིག་སྦྲུལ་གྱི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་གྱུར་ལའོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ་གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དེ་ལྟ་བུ་དག་དུ་ཞེས་བྱ་བ་ནི་ཇི་སྐད་བསྟན་པ་ལྟ་བུ་དག་ཏུའོ། །སྔར་མ་བྱུལ་བར་ཞེས་བྱ་བ་ནི་ནགས་ཉུལ་བས་སྔར་མ་བྱུལ་བར་རོ། །ཀུན་དགའ་ར་བའི་ཕྱི་རོལ་ཏུ་ཞེས་བྱ་བ་ནི་གཙུག་ལག་ཁང་གི་ཕྱི་རོལ་ཏུའོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །བླངས་ཏེ་ཞེས་བྱ་བ་ནི་བྱིན་ལེན་སྟོབས་སུ་བཅུག་སྟེའོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ནའོ། །དགེ་སློང་དེས་ཤེས་བྱ་བ་ནི་དགེ་སློང་གང་ཡིན་པ་དེས་སོ། །ཕྱི་རོལ་ཀུན་དགའ་ར་བར་སོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་སོང་སྟེའོ། །དགེ་སློང་རྣམས་ལ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ལའོ། །ཚེ་དང་ལྡན་པ་དག་བདག་ལ་སྨད་པའི་གནས་ཤེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་མཐོལ་བར་བྱ་བའོ། །བྱུང་གིས་ཤེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་མཐོལ་ལོ་ཞེས་པའོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་འཐོལ་བར་བྱ་སྟེ་འོ། །ཆོས་འདི་ཡང་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ཡང་མཐོལ་བར་བྱ་བ་སྟེ་དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ནགས་མ་བྱུལ་བ་ལ་མ་བྱུལ་བར་འདུ་ཤེས་པས་ཀུན་དགའ་ར་བའི་ཕྱི་རོལ་ཏུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །ནགས་མ་བྱུལ་བ་ལ་ཡིད་གཉིས་ཟ་བས་ཀུན་དགའ་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ
8.234b
འམ་ཟ་ན་སོ་སོར་བཤགས་པར་བྱ་བར་འགྱུར་རོ། །དགེ་སློང་གིས་ནགས་བྱུལ་བ་ལ་མ་བྱུལ་བར་འདུ་ཤེས་པས་ཀུན་དགའ་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ནགས་བྱུལ་བ་ལ་ཡིད་གཉིས་ཟ་བས་ཀུན་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ནགས་ཉུལ་བ་ཤི་འམ་བྲོས་ན་ལྟུང་བ་མེད་དོ། །ལས་དང་པོ་པ་དང་སྨྱོས་པ་དང ། སེམས་འཁྲུགས་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །ནགས་བརྟག་པ་ལས་གྱུར་པའི་སོ་སོར་བཤགས་པར་བྱ་བ་སྟེ་བཞི་པ་རྫོགས་སྷོ། །སོ་སོར་བཤགས་པར་བྱ་བ་རྣམས་རྫོགས་སྷོ།། ་་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བརྒྱད་བཅུ་རྩ་གཉིས་པ། སྤྱི་སྡོམ་ལ། ཤམ་ཐབས་ཟླུམ་དང་ཆོས་གོས་ཟླུམ། །མགོ་མི་གཡོག་དང་མི་མཆོད་དང ། །མིག་མི་བསྒྱུར་དང་མ་བསྒོ་དང ། །ལེགས་བླང་ལེགས་བཟའ་ཙུག་ཙུག་དང ། །འབྲུ་ནས་ཐ་དད་ལག་མི་བལྡག་།འཕྱ་དང་ལྷུང་བཟེད་འདུག་པ་དང ། །མགོ་གཡོགས་དོ་ཀེར་གླང་ཆེན་ཞོན། །ཁར་བ་དང་ནི་འགྲེང་བ་དང ། །ཤིང་ལ་འཛེག་པར་མི་བྱ་བ། །བསླབ་པ་བརྒྱ་པོ་བསྡུས་པ་ཡིན། །སངས་རྒྱས་བཅོམ་ལྡན་འདས་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ལྔ་པ་དག་སྐྱོན་མེད་པ་ལ་འཇུག་པས་དགེ་སློང་ཉིད་ལ་བཀོད་པ་དེའི་ཚེ་ན་དེ་དག་སྔོན་གོམ་པའི་སྦྱོར་བས་ཤམ་ཐབས་ཁྱིམ་པ་བཞིན་དུ་གྱོན་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་གིས་མཐོང་ནས་སྨྲས་པ། འཕགས་པ་དག་ཇི་ལྟར་ཁྱེད་ཤམ་ཐབས་གསོལ་བ་འདི་ལྟར་ནོར་ཅན་དག་དང་ཚོང་དཔོན་དག་དང ། དེད་དཔོན་དག་འཚལ་བར་བགྱིད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་གྱིས་ངས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱི་ཉན་ཐོས་དག་ཤམ་ཐབས་ཇི་ལྟར་གྱོན་པར་གྱུར་པ་བསམ་མོ་སྙམ་དུ་དགོངས་པ་དང ། ལྷ་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་འདི་ལྟ་སྟེ། གནས་གཙང་མའི་རིས་ཀྱི་ལྷ་རྣམས་ཇི་ལྟ་བ་བཞིན་ནོ། །བཅོམ་ལྡན་འདས་ཉིད་ལ་ཡང་འདི་ལྟ་སྟེ། གནས་གཙང་མའི་རིས་ཀྱི་ལྷ་རྣམས་ལྟ་བུར་མཁྱེན་པ་དང་གཟིགས་པ་བྱུང་ངོ ། །དེ་ནས་བཅོམ་ལྡན་འདས
8.235a
ཀྱིས་དགེ་སློང་རྣམས་ལ་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་ཟླུམ་པོར་བགོ་བར་བསླབ་པར་བྱའོ། །བཅོམ་ལྡན་འདས་ཀྱིས་ཤམ་ཐབས་ཟླུམ་པོར་བགོ་བར་བསླབ་པར་བྱའོ་ཞེས་བཀའ་སྩལ་ནས། དགེ་སློང་ལྔ་པ་དག་གིས་ཤམ་ཐབས་ཟླུམ་པོར་བགོ་བར་བརྩམས་སོ། །དེ་བཞིན་དུ་ཉེ་ལྔ་དག་དང་མངོན་པར་མཐོ་བ་ལྔ་བཅུ་དང ། བཟང་སྡེའི་ཚོགས་དྲུག་བཅུ་དང ། གཞན་ཡང་བཅོམ་ལྡན་འདས་ཀྱིས་བརྒྱུད་པས་དགེ་སློང་དག་གིས་རབ་ཏུ་ཕྱུང་བ་གང་དག་ཡིན་པ་དེ་དག་གིས་ཀྱང་ཤམ་ཐབས་ཟླུམ་པོར་བགོ་བར་བརྩམས་སོ། །གང་གི་ཚེ་དྲུག་སྡེ་དག་རབ་ཏུ་ཕྱུང་བ་དེའི་ཚེ་ན་དེ་དག་གིས་ཤམ་ཐབས་ཧ་ཅང་རྩེངས་པར་བསྒོ་བར་བརྩམས་པ་དང ། བྲམ་ཟེ་དང་ཁྱིམ་བདག་དད་པ་ཅན་དག་གིས་མཐོང་ནས་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང་ནལ་གྱི་བུ་དག་ཤམ་ཐབས་འདི་ལྟར་འཆོལ་བས་འདི་ནི་ཚུལ་དང་མཐུན་པ་མ་ལགས་ཀྱིས་ཤམ་ཐབས་ཧ་ཅང་རྩེངས་པར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། རྗེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབ་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་ཧ་ཅང་རྩེངས་པ་མ་ཡིན་པར་བགོ་བར་བསླབ་པར་བྱའོ། །བཅོམ་ལྡན་འདས་ཀྱིས་ཤམ་ཐབས་ཧ་ཅང་རྩེངས་པ་མ་ཡིན་པར་བསྒོ་བར་བསླབ་པར་བྱའོ། །ཞེས་བཀའ་སྩལ་ནས། དྲུག་སྡེ་དག་གིས་ཧ་ཅང་འཇོལ་བར་བགོ་བར་བརྩམས་པ་དང ། བྲམ་ཟེ་དང་ཁྱིམ་བདག་དད་པ་ཅན་དག་གིས་མཐོང་ནས་སྨོད་པར་བྱེད་དེ། འཕགས་པ་དག་ཏག་ཀའི་ཡུལ་ན་གནས་པའི་བུད་མེད་དག་དང་རིགས་ཀྱི་མནའ་མ་དག་ཤམ་ཐབས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས། ཤམ་ཐབས་ཧ་ཅང་འཇོལ་བར
8.235b
མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་ཧ་ཅང་འཇོལ་བ་མ་ཡིན་པར་བགོ་བར་བྱའོ། །དྲུག་སྡེ་དག་ཤམ་ཐབས་གྱོན་པ་ན་མདུན་འཕྱང་བར་བྱེད་ནས་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང་ཆང་གིས་ར་རོ་བ་དག་དང ། འབྱུང་པོ་དང་ཤ་ཟས་བརླམས་པ་དག་ཤམ་ཐབས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཤམ་ཐབས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་གླང་པོ་ཆེའི་སྣ་ལྟར་མ་ཡིན་པར་བགོ་བར་བསླབ་པར་བྱའོ། །དྲུག་སྡེ་དག་ཤམ་ཐབས་གྱོན་པ་ན་གློ་དག་ཏུ་ལྟེབས་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་གར་མཁན་དག་ཚོགས་ཀྱི་ནང་དུ་ཤམ་ཐབས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཤམ་ཐབས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ
8.236a
དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་ཏ་ལའི་ལོ་མ་ལྟར་བལྟབ་པ་མ་ཡིན་པར་བགོ་བར་བསླབ་པར་བྱའོ། །དྲུག་སྡེ་དག་ཤམ་ཐབས་གྱོན་པ་ན་གློར་བལྟབ་སྟེ་ཕུར་མ་ལྟར་འཇོག་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་ནོར་ཅན་དག་དང་ཚོང་དཔོན་དག་དང་དེད་དཔོན་དག་དང ། བུད་མེད་དག་ཤམ་ཐབས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཤམ་ཐབས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་འབྲུའི་ཕུར་མ་ལྟར་མ་ཡིན་པར་བགོ་བར་བསླབ་པར་བྱའོ། །དྲུག་སྡེ་དག་ཤམ་ཐབས་གྱོན་པ་ན་ལྟེ་བའི་འོག་ཏུ་སྦྲུལ་མགོའི་གདེངས་ཀ་ལྟར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་རྒྱན་པོ་བགྱིད་པ་དག་ཤམ་ཐབས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཤམ་ཐབས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ
8.236b
དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབ་པར་གྱུར་པའོ། །དེ་དག་རྒྱ་ཆེར་སྨོད་པར་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་སྦྲུལ་མགོའི་གདེང་ཀ་ལྟར་མ་ཡིན་པར་བགོ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ཤམ་ཐབས་ཟླུམ་པོར་བགོ་བར་བསླབ་པར་བྱ། ཤམ་ཐབས་ཧ་ཅང་རྩེངས་པ་མ་ཡིན་པ་དང ། ཧ་ཅང་འཇོལ་བ་མ་ཡིན་པ་དང ། གླང་པོ་ཆེའི་སྣ་ལྟར་མ་ཡིན་པ་དང ། ཏ་ལའི་ལོ་མ་ལྟར་བལྟབ་པ་མ་ཡིན་པ་དང ། འབྲུའི་ཕུར་མ་ལྟར་མ་ཡིན་པ་དང ། སྦྲུལ་མགོའི་གདེངས་ཀ་ལྟར་མ་ཡིན་པར་བགོ་བར་བསླབ་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་ཤམ་ཐབས་ཟླུམ་པོར་བགོ་བར་བསླབ་པར་བྱ། ཤམ་ཐབས་ཧ་ཅང་རྩེངས་པ་མ་ཡིན་པ་དང ། ཧ་ཅང་འཇོལ་བ་མ་ཡིན་པ་དང ། གླང་པོ་ཆེའི་སྣ་ལྟར་མ་ཡིན་པ་དང ། ཏ་ལའི་ལོ་མ་ལྟར་བལྟབ་པ་མ་ཡིན་པ་དང ། འབྲུའི་ཕུར་མ་ལྟར་མ་ཡིན་པ་དང་སྦྲུལ་མགོའི་སྡེང་ཀ་ལྟར་མ་ཡིན་པར་བགོ་བར་བསླབ་པར་བྱའོ། །ཞེས་བཀའ་སྩལ་ནས། དགེ་སློང་དག་ཆོས་གོས་གྱོན་པ་ན་ཇི་ལྟར་བགོ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་རྣམས་ཀྱིས་ཆོས་གོས་ཟླུམ་པོར་བགོ་བར་བསླབ་པར་བྱའོ། །བཅོམ་ལྡན་འདས་ཀྱིས་ཆོས་གོས་ཟླུམ་པོར་བགོ་བར་བསླབ་པར་བྱའོ་ཞེས་བཀའ་སྩལ་ནས། དྲུག་སྡེ་དག་ཆོས་གོས་ཧ་ཅང་རྩེངས་པར་གྱོན་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་སྟོད་གཡོགས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཆོས་གོས་འདི་ལྟར་མ་གསོལ་ཅིག་།དེ་དག་གིས་སྨྲས་པ།
8.237a
ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབ་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཆོས་གོས་ཧ་ཅང་རྩེངས་པ་མ་ཡིན་པར་བགོ་བར་བསླབ་པར་བྱའོ། །བཅོམ་ལྡན་འདས་ཀྱིས་ཆོས་གོས་ཧ་ཅང་རྩེངས་པ་མ་ཡིན་པར་བགོ་བར་བསླབ་པར་བྱའོ་ཞེས་བཀའ་སྩལ་ནས། དྲུག་སྡེ་དག་ཧ་ཅང་འཇོལ་བར་གྱོན་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་ཏག་ཀའི་ཡུལ་ན་གནས་པའི་མི་དག་དང ། རིགས་ཀྱི་མནའ་མ་དག་སྟོད་གཡོགས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཆོས་གོས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཆོས་གོས་ཧ་ཅང་འཇོལ་བ་མ་ཡིན་པར་བགོ་བར་བསླབ་པར་བྱའོ། །དྲུག་སྡེ་དག་ལག་པ་དང་རྐང་པ་རྐྱོང་བར་བྱེད་ཅིང་ཁྱིམ་གཞན་དུ་འདོང་ནས་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། ཆང་གིས་ར་རོ་བ་དག་དང་འབྱུང་པོ་དང་ཤ་ཟས་བརླམས་པ་དག་ལག་པ་དང་རྐང་པ་འདི་ལྟར་རྐྱོང་བར་བགྱིད་ཅིང་མཆི་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག
8.237b
དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ་ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ཆོས་གོས་བསྡུས་ཤིང་ཕྲག་པ་ལ་གཟར་ཏེ་ཁྱིམ་གཞན་དུ་འགྲོ་བར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་གྱད་འགྱེད་སར་མཆི་བ་དག་སྟོད་གཡོགས་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་ཆོས་གོས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབ་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལེགས་པར་བགོས་ཤིང་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་བྱུང་རྒྱལ་སྨྲ་བས་སྒྲ་འབྱིན་ཅིང་ཁྱིམ་གཞན་དུ་འདོང་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། ཆང་གིས་ར་རོ་བ་དག་དང ། འབྱུང་པོ་དང ། ཤ་ཟས་བརླམས་པ་དག་འདི་ལྟར་བྱུང་རྒྱལ་སྨྲ་བས་སྒྲ་འབྱིན་ཅིང་མཆི་བས་འདི་ནི་ཚུལ་དང་འཐུན་པ་མ་ལགས་ཀྱིས། འདི་ལྟར་སྒྲ་འབྱིན་ཅིང་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས
8.238a
པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། སྒྲ་བསྐྱུང་ཞིང་ཚིག་ཉུང་ངུས་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་མིག་ཡེངས་ཤིང་ཁྱིམ་གཞན་དུ་འགྲོ་བ་ན་དེ་དག་གླང་པོ་ཆེ་འཁྲུལ་པ་དང་ལྷན་ཅིག་འདོམ་པ་དང ། རྟ་འཁྲུལ་པ་དང ། ཤིང་རྟ་འཁྲུལ་པ་དང ། རྐང་ཏང་འཁྲུལ་པ་དང་འདོམ་ཞིང་དེ་དག་གིས་བརྔོས་ཤིང་ཕུལ་བ་ན་མི་གཙང་བ་དང ། རྫབ་ཀྱི་ཁུང་དང ། ཕྱག་དར་གྱི་ཁྲོད་དུ་སྒྱེལ་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་སྐར་མ་ལ་རྟོག་པ་དག་དང ། མིག་བཙུམས་པ་དག་བཞིན་ཅིའི་ཕྱིར་གཟིགས། ས་ལ་གཟིགས་ན་ཅི་ནོངས། འདི་ནི་ཚུལ་དང་འཐུན་པ་མ་ལགས་ཀྱིས། འདི་ལྟར་ཡེངས་ཤིང་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མིག་གཡེང་བར་མི་བྱ་ཞིང་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་མིག་རྒྱང་རིང་པོར་ལྟ་ཞིང་ཁྱིམ་གཞན་དུ་འདོང་བ་ན། དེ་དག་སྤྱོད་ལམ་ཉམས་ཤིང་ལམ་ཤོར་བ་ལ་སོགས་པར་གྱུར་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་སྐར་མ་ལ་རྟོག་པ་དག་དང ། བྱ་ར་བ་དག་འདི
8.238b
ལྟར་ལྟ་བར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་གཟིགས་ཤིང་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གཉའ་ཤིང་གང་ཙམ་དུ་བལྟ་ཞིང་ཁྱིམ་གཞན་དུ་འགྲོ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི། ཆོས་གོས་ཟླུམ་པོར་བགོ་བར་བསླབ་པར་བྱ། ཆོས་གོས་ཧ་ཅང་རྩེངས་པ་མ་ཡིན་པ་དང ། ཧ་ཅང་འཇོལ་བ་མ་ཡིན་པར་བགོ་བར་བསླབ་པར་བྱའོ། །ཤིན་དུ་བསྡམས་པ་དང ། ལེགས་པར་བགོས་པ་དང ། སྒྲ་བསྐྱུང་བ་དང ། མིག་གཡེང་བར་མི་བྱ་བ་དང ། གཉའ་ཤིང་གང་ཙམ་དུ་བལྟ་ཞིང་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་མགོ་གཡོགས་ཤིང་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་རིགས་ཀྱི་མནའ་མ་དག་དང ། མིག་ན་བ་དག་དང ། སྦྲང་རྩིའི་སྦྲང་བུས་འཇིགས་པ་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གཡོགས་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མགོ་མི
8.239a
གཡོག་པར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ཤམ་ཐབས་བརྫེས་ཏེ་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བཤང་བ་དང་གཅི་བ་བགྱིད་པའི་མི་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བརྫེ་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་བརྫེ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ཆོས་གོས་ཕྲག་པ་ལ་གཟར་ཏེ་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གཟར་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་གཟར་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ལག་པ་གཉའ་གོང་དུ་བསྣོལ་ཏེ་ཁྱིམ་གཞན་དུ་འདོང་བར
8.239b
བྱེད་ནས་བྲམ་ཟེ་དང ། ཁྱིམ་བདག་དད་པ་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་གཉའ་གོང་དུ་མ་བསྣོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གཉའ་གོང་དུ་མི་བསྣོལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ལག་པ་ལྟག་པར་བསྣོལ་ཏེ་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་གཡོག་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་ལྟག་པར་མ་བསྣོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལྟག་པར་མི་བསྣོལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་མགོ་མི་གཡོག་པ་དང ། མི་བརྫེ་བ་དང ། མི་གཟར་བ་དང ། གཉའ་གོང་དུ་མི་བསྣོལ་བ་དང ། ལྟག་པར་མི་བསྣོལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་རིབ་མ་ལ་མཆོང་ཞིང་ཁྱིམ་གཞན་དུ་འདོང་ནས།
8.240a
བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་འཇིགས་པས་སྐྲག་ཅིང་འབྲོས་པ་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་མཆོང་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་མཆོང་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་གོམ་པ་ཧ་ཅང་ཆེན་པོ་དག་གིས་ཁྱིམ་གཞན་དུ་འདོང་ནས་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་ཆང་གིས་ར་རོ་བ་དག་དང ། འབྱུང་པོ་དང ། ཤ་ཟས་བརླམས་པ་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་བརྐྱང་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ཙོག་པུས་ཁྱིམ་གཞན་དུ་འདོང་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་འགྲོས་ཉམས་པ་དག་དང ། རྐང་བམ་ཅན་དག་དང ། བྱིས་པ་ཁྱེའུ་དག་འདི་ལྟར་བགྱིད་པས
8.240b
འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་མཛད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཙོག་པུས་མ་ཡིན་པར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་རྐང་པའི་བྲང་བ་དག་གིས་ཁྱིམ་གཞན་དུ་འདོང་བར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་སྨིག་མ་བཞིན་དུ་རྩེ་བ་དག་དང ། རྐང་མཐིལ་སྨས་པ་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བྲང་བས་མ་ཡིན་པར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ལག་པ་གཉིས་དཀུར་བརྟེན་ཏེ་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་ནོར་ཅན་དག་དང ། ཚོང་དཔོན་དག་དང་དེད་དཔོན་དག་འདི་ལྟར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང
8.241a
བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དཀུར་མི་བརྟེན་པར་ཁྱིམ་གཞན་དུ་འགྲོ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་མི་མཆོང་བ་དང ། མི་བརྐྱང་པ་དང ། ཙོག་པུས་མ་ཡིན་པ་དང ། བྲང་བས་མ་ཡིན་པ་དང ། དཀུར་མི་བརྟེན་པར་ཁྱིམ་གཞན་དུ་འགྲོ་བར་བསླབ་པ་བྱའོ། །དྲུག་སྡེ་དག་ལུས་བསྒྱུར་ཞིང་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ་འཕགས་པ་དག་གཟུགས་འཚོ་མ་དག་དང ། གླང་པོ་ཆེ་དག་དང ། བལ་གླང་མོ་དག་འདི་ལྟར་མཆི་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལུས་མི་བསྒྱུར་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ལག་པ་དཀྱོག་ཅིང་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང་ནལ་གྱི་བུ་དག་འདི་ལྟར་མཆི་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད
8.241b
པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལག་པ་མི་དཀྱོག་པར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ལུས་བསྒྱུར་ཞིང་ཁྱིམ་གཞན་དུ་འདོང་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་གླང་པོ་ཆེ་དག་དང ། སྲོག་ཆགས་རྩངས་པ་དག་འདི་ལྟར་མཆི་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མགོ་མི་བསྒྱུར་བར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ཕྲག་པ་སྤྲད་ཅིང་ཁྱིམ་གཞན་དུ་འདོང་བ་ན། ཇི་ཙམ་ན་མི་ཞིག་སྤོས་དང་མེ་ཏོག་གིས་བརྒྱན་ཏེ། འཇིག་རྟེན་ལ་བུ་ཙམ་དུ་སེམས་ཤིང་འགྲོ་ནས་དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཀྲེན་པ་འདི་འཇིག་རྟེན་ལ་བུ་ཙམ་དུ་སེམས་ཤིང་འགྲོ་ན། ཅི་འདིའི་སྙིང་ལམ་ན་དྲུག་སྡེ་དག་གིས་སྔོན་ལན་འགའ་ཡང་དྲི་དང་མེ་ཏོག་ཐོགས་མ་མྱོང་སྙམ་པ་འདྲས་ཚུར་ཤེག་འདི་མི་དགའ་བར་བྱའོ། །དེ་ལྟར་བྱའོ་ཞེས་དེ་ན་དེ་དག་གཅིག་དང་གཅིག་ཕྲག་པ་སྤྲད་ཅིང་གཞན་དང་གཞན་ཡང་ཕྲག་པ་སྤྲད་དེ། དེ་ཕུལ་བ་དང་ས་ལ་འགྱེལ་ནས་དེས་སྨྲས་པ། བདག་གིས་ཁྱེད་ཅག་ལ་ནོངས་པ་ཅི་བགྱིས། བཀྲེན་པ་ཁྱོད་ཀྱི་སྙིང་ལམ་ན་དྲུག་སྡེ་དག་གིས་སྔོན་ལན་འགའ་ཡང་སྤོས་དང་མེ་ཏོག་ཐོགས་མ་མྱོང་སྙམ་པས་ཁྱོད་དེ་ལྟར
8.242a
མི་དགའ་བར་བྱའོ། །དེ་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་བདག་དེ་གནས་སུ་སྨོད་པར་བྱེད་དོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཕྲག་པ་མི་སྤྲད་པར་ཁྱིམ་གཞན་དུ་འགྲོ་བར་བསླབ་པར་བྱའོ། །དྲུག་སྡེ་དག་ལག་པ་སྦྲེལ་ཅིང་ཁྱིམ་གཞན་དུ་འདོང་བ་ན། ཇི་ཙམ་ན་མི་ཞིག་སྤོས་དང་མེ་ཏོག་གིས་བརྒྱན་ཏེ། འཇིག་རྟེན་ལ་བུ་ཙམ་དུ་སེམས་ཤིང་འགྲོ་ནས། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཀྲེན་པ་འདི་འཇིག་རྟེན་ལ་བུ་ཙམ་དུ་སེམས་ཤིང་འགྲོ་ན། ཅི་འདིའི་སྙིང་ལམ་ན་དྲུག་སྡེ་དག་གིས་སྔོན་ལན་འགའ་ཡང་དྲི་དང་མེ་ཏོག་ཐོགས་མ་མྱོང་སྙམ་པ་འདྲས། ཚུར་ཤེག་འདི་མི་དགའ་བར་བྱའོ། །དེ་ལྟར་བྱའོ་ཞེས་དེ་ན་དེ་དག་གཅིག་དང་གཅིག་ལག་པ་སྦྲེལ་ཅིང ། གཞན་དང་གཞན་ཡང་ལག་པ་སྦྲེལ་ཏེ་ཕུལ་བ་དང་ས་ལ་འགྱེལ་ནས། དེས་སྨྲས་པ། བདག་གིས་ཁྱེད་ཅག་ལ་ནོངས་པ་ཅི་བགྱིས། བཀྲེན་པ་ཁྱོད་ཀྱི་སྙིང་ལམ་ན་དྲུག་སྡེ་དག་གིས་སྔོན་ལན་འགའ་ཡང་སྤོས་དང་མེ་ཏོག་ཐོགས་མ་མྱོང་སྙམ་པས་ཁྱོད་དེ་ལྟར་མི་དགའ་བར་བྱའོ། །དེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་བདག་དེ་གནས་སུ་སྨོད་པར་བྱེད་དོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལག་པ་མི་སྦྲེལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ལུས་མི་བསྒྱུར་བ་དང ། ལག་པ་མི་དཀྱོག་པ་དང ། མགོ་མི་བསྒྱུར་བ་དང ། ཕྲག་པ་མི་སྤྲད་པ་དང ། ལག་པ་མི་སྦྲེལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །སངས་རྒྱས
8.242b
བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་གཙང་སྦྲ་འདོད་པ་ཞིག་འདུག་པ་དེས་སྒོ་ཁང་དུ་མལ་བཤམས་ནས། དེ་ན་བུ་མོ་ཞིག་བསིལ་ཡབ་ཐོགས་ཏེ་སྦྲང་མ་སྐྱོབ་ཅིང་འདུག་གོ། །ཚེ་དང་ལྡན་པ་ཉེ་དགའ་དེའི་ཁྱིམ་དུ་བསོད་སྙོམས་ལ་ཞུགས་ནས་དེས་སྨྲས་པ། བུ་མོ་བྲམ་ཟེའི་གན་དུ་སོང་ལ་ཉེ་དགའ་སྒོ་ན་སྡོད་དོ་ཞེས་གྱིས་ཤིག་།དེས་སྨྲས་པ། འཕགས་པ་བདག་འདི་ན་སྦྲང་མ་སྐྱོབ་ཅིང་མཆིས་པས་མི་མཆིའོ། །དེས་སྨྲས་པ། བུ་མོ་གལ་ཏེ་དེ་ལྟ་ན་ཁོ་བོས་རེ་ཤིག་བསྲུང་གིས་ཁྱོད་སོང་ལ་སྨྲོས་ཤིག་།དེ་སོང་བ་དང་ཉེ་དགའ་རྐང་པ་དང་བཅས་པར་འཛེགས་ཏེ། མལ་དེའི་སྟེང་དུ་འདུག་གོ། །བྲམ་ཟེ་དེ་ཕྱིར་བྱུང་བ་དང་ཉེ་དགའ་རྐང་པ་དང་བཅས་པའི་མལ་གྱི་སྟེང་དུ་འཛེགས་ཏེ་འདུག་པ་མཐོང་ངོ ། །མཐོང་ནས་ཀྱང་སྨྲས་པ། འཇིག་རྟེན་གྱི་གཙང་སྦྲ་ནི་ཐ་དད་པ་ཡིན་ན། ཅིའི་ཕྱིར་ཁྱོད་འདིར་རྐང་པ་དང་བཅས་པར་འཛེགས་ཏེ་འདུག་དེས་སྨྲས་པ། བྲམ་ཟེ་དགེ་སློང་གིས་མལ་ལ་ལོངས་སྤྱད་པ་གང་ཡིན་པ་ནི་ཁྱོད་ཀྱི་ཁྱིམ་བདུན་པ་ཚུན་ཆད་ལ་ཕན་བཏགས་པ་ཡིན་ནོ། །དེ་སྨོད་པར་བྱེད་ཕྱར་ཀ་གཏོང་བར་བྱེད། ཁ་ཟེར་བར་བྱེད་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། བྲམ་ཟེ་དེ་གནས་སུ་སྨོད་དོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མ་བསྒོ་བར་ཁྱིམ་གཞན་དུ་སྟན་ལ་མི་འདུག་པར་བསླབ་པར་བྱའོ། །གང་གི་ཚེ་ཚེ་དང་ལྡན་པ་འཆར་ཀས་གཏུམ་མོ་བཏུལ་བ་དེའི་ཚེ་ན་དེས་དྲང་སྲོང་གི་སྟན་བཤམས་ནས་ཚེ་དང་ལྡན་པ་འཆར་ཀས་ལོངས་སྤྱད་ཅིང་སྤྱད་ཅིང་འགྲོའོ། །ཇི་ཙམ་དུས་གཞན་ཞིག་ན་དེས་གཏུམ་མོ་ལ་སྨྲས་པ། སྲིང་མོ་ཁྱོད་བལྟས་ཀྱིས་ལྗོངས་རྒྱུར་འགྲོའོ། །དེས་སྨྲས་པ། འཕགས་པ་མྱུར་དུ་སླར་སྤྱོན་ཅིག་།སྡོད་སྐྱོ་བ་སྐྱེད་པར་མ་མཛད་ཅིག་།དེས་སྨྲས་པ། སྲིང་མོ་མ་ཉེས་ཀྱིས་དེ་བཞིན་དུ་བྱའོ། །དེས་དེ་བལྟས་ཏེ་རྒྱལ་བྱེད་ཀྱི་ཚལ་དུ
8.243a
སོང་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་བཅོམ་ལྡན་འདས་ཉི་མ་བདུན་པ་ལ་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་སྒོ་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་ཉི་མ་བདུན་པ་ལ་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་གཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོའོ། །ཚེ་དང་ལྡན་པ་འཆར་ཀས་བསམས་པ། སངས་རྒྱས་ལྗོངས་རྒྱུར་གཤེགས་པ་ལ་ཕན་ཡོན་བཅཝ་བརྒྱད་ཡོད་ཀྱིས་བཅོམ་ལྡན་འདས་ཉིད་དང་ཐབས་གཅིག་འགྲོའོ་སྙམ་ནས་དེ་མ་འཕགས་སོ། །དེའི་ཚེ་ན་གཏུམ་མོའི་ཁྱིམ་ན་ཁྱེའུ་བཙས་ནས་རིང་པོ་མ་ལོན་པ་ཞིག་ཡོད་ནས། དེས་བུ་མོ་དེ་ལ་སྨྲས་པ། བུ་མོ་ཁྱེའུ་འདི་དྲང་སྲོང་གི་གདན་ལ་སྙོལ་ཅིག་དང་ཡུན་རིང་དུ་འཚོ་ཞིང་ཚེ་རིང་དུ་སྐྱོང་བར་འགྱུར་རོ། །དེས་དེ་གོས་དཀར་པོ་བསྐོན་ཏེ་བསྙལ་བ་དང ། ཚེ་དང་ལྡན་པ་འཆར་ཀ་མཉན་ཡོད་དུ་བསོད་སྙོམས་ལ་ཞུགས་ནས་དེས་བསམས་པ། ཇེ་གཏུམ་མོའི་ཁྱིམ་དུ་སྟན་ལ་ལོངས་སྤྱོད་དུ་འགྲོ་ཞིང་ཕྱིས་བསོད་སྙོམས་བརྒྱུས་ཏེ་འགྲོའོ་སྙམ་ནས་དེ་དེར་སོང་ངོ ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས། དེ་སྟན་དེ་ཉིད་ལ་གྱ་ཚོམ་དུ་འདུག་པ་དང ། ནང་མི་བརྟད་པ་དང་བཅས་པས་འཕགས་པ་ཁྱེའུ་ཁྱེའུ་ཞེས་སྨྲས་པ་དང ། དེ་མྱུར་བ་མྱུར་བར་ལངས་ནས་ཇི་ཙམ་ནས་དེ་དག་གིས་དུས་ལ་བབ་པར་མཐོང་ནས། དེ་དག་ངུ་བར་བརྩམས་པ་དང ། དེས་སྨྲས་པ། སྲིང་མོ་དག་འདི་ལ་ཅི་ངུ ། འདུ་བྱེད་ཐམས་ཅད་ཀྱི་ཆོས་ཉིད་འདི་ལྟ་བུ་ཡིན་ནོ། །འོན་ཀྱང་ཁོ་བོ་ལ་བརྟེན་ཏེ་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་འགྱུར་བས་འདི་ལ་ཁོ་བོས་ངུ་བར་བྱ་བ་ཡིན་ནོ། །འཁོར་བ་ན་སེམས་ཅན་རྣམས་ཉེ་དུ་ལ་བྱམས་པ་ནི་ཐོག་མ་མེད་པའི
8.243b
དུས་ནས་གོམས་པ་ཡིན་པས་དེ་དག་དེ་བཞིན་དུ་ངུ་ཞིང་མི་སྡོད་པ་ཐོས་ནས་དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། སྟན་ལ་མ་བརྟགས་པར་ཁྱིམ་གཞན་དུ་སྟན་ལ་འདུག་པར་མི་བྱ་བར་བསླབ་པར་བྱའོ། །གང་གི་ཚེ་བཅོམ་ལྡན་འདས་མངོན་པར་བྱུང་ནས་ལོ་བཅུ་གཉིས་ལོན་ཞིང ། རྫོགས་པར་སངས་རྒྱས་ནས་ལོ་དྲུག་ལོན་ནས་སེར་སྐྱའི་གནས་སུ་བྱོན་པ་དེའི་ཚེ་ན་ཉི་མ་གཅིག་ནི་ཡབ་ཀྱི་གན་དུ་གདུགས་ཚོད་གསོལ། ཉི་མ་གཉིས་པ་ལ་ནི་རང་གི་བཙུན་མོའི་འཁོར་དུ་གདུགས་ཚོད་གསོལ་བ་ན་ཚེ་དང་ལྡན་པ་འཆར་ཀས་བཙུན་མོ་གྲགས་འཛིན་བཤོས་འབྲིམ་པ་ལ་རྐང་པས་རྐང་པ་ལ་ཕུལ་བ་དང ། དེ་སྟོབས་དང་ལྡན་པས་མ་འགྱེལ་ནས། དེས་བཙུན་མོ་ས་འཚོ་མ་ལ་སྨྲས་པ་ས་འཚོ་མ། འཕགས་པ་འཆར་ཀས་བདག་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་སྤྱན་སྔར་ཐོ་བརྩམས་སོ། །ཅི་བྱས་དེས་ཇི་ལྟར་གྱུར་པ་བརྗོད་པ་དང ། དེས་སྨྲས་པ། དེ་ཅི་ནས་ཀྱང་ཕྱིན་ཅད་དེ་ལྟར་བྱེད་པར་མི་འགྱུར་བ་དེ་ལྟར་མི་དགའ་བར་བྱའོ། །ཇི་ཙམ་ཉི་མ་གཞན་ཞིག་ལ་བཙུན་མོ་གྲགས་འཛིན་གྱིས་ཁྲིའུ་མ་བརྒྱུས་པ་ཞིག་རས་ཀྱིས་གཡོགས་ནས་བུ་མོ་མངག་གཞུག་མ་ལ་སྨྲས་པ། བུ་མོ་སོང་ལ་རེ་ཤིག་རྒྱལ་པོའི་ཕོ་བྲང་གི་སྒོར་སྡོད་ལ། གང་གི་ཚེ་འཕགས་པ་འཆར་ཀ་འོང་བ་དེའི་ཚེ་ན་ཁྱོད་ཀྱིས་འདི་སྐད་ཅེས་བྲམ་ཟེ་བྲམ་ཟེ་ཞེས་བརྗོད་པར་བྱའོ། །གལ་ཏེ་བྲམ་ཟེས་ཅི་བྱ་ཞེས་ཟེར་ན་དེ་ལ་བཙུན་མོའི་འཁོར་དུ་འབོད་དོ་ཞེས་བརྗོད་པར་བྱའོ། །བུ་མོ་དེ་བྱུང་བ་དང ། ཚེ་དང་ལྡན་པ་འཆར་ཀ་ཡང་འོངས་ནས། དེར་བྲམ་ཟེ་བྲམ་ཟེ་ཞེས་བོད་པར་བརྩམས་པ་དང ། དེས་སྨྲས་པ། བུ་མོ་བྲམ་ཟེས་ཅི་བྱ། འཕགས་པ་བཙུན་མོའི་འཁོར་དུ་འབོད་དོ། །དེས་བསམས་པ། དེར་གོར་མ་ཆག་པར་སྦྱིན་པར་བྱེད་ཀྱིས་འགྲོའོ་སྙམ་ནས་དེ་མྱུར་བར་མྱུར་བར་སོང་བ་དང ། བཙུན་མོ་གྲགས་འཛིན་གྱིས་བུ་མོ་ལ་སྨྲས་པ། བུ་མོ་ཁོ་མོས་ཁྱོད་ལ་བྲམ་ཟེ་བོས་ཤིག་ཅེས་བསྒོ་ན་ཁྱོད་ཀྱིས་ཅིའི་ཕྱིར་དགེ་སྦྱོང་མགོ་རེག་བོས་དེས་ཅང་མི་ཟེར་བར་འདུག་གོ། །ཚེ་དང་ལྡན་པ་འཆར་ཀས་སྨྲས་པ། གལ་ཏེ་ཁོ་བོ་ཁྱོད་ཀྱི་ཁྱིམ་ཐབ་ཀྱི་གན་དུ་རབ་ཏུ་བྱུང་ཞེས་ཏེ་ཁོ་བོའི་བྲམ་ཟེ
8.244a
ཡང་ཉམས་སྙམ་འམ་ཅི། གལ་ཏེ་བྲམ་ཟེ་ན་ནི་\ུ0f00་བྷུར་བྷུ་བ་སཝཱ་ཞེས་ཟེར་ལ། འོན་ཏེ་རབ་ཏུ་བྱུང་ན་ནི། །སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན་ཞེས་ཟེར་རོ། །དེས་སྨྲས་པ། ཁྱོད་བྲམ་ཟེ་ཡང་རུང ། དགེ་སྦྱོང་ཡང་རུང་སྟེ། ཁོ་མོས་ནི་བཅོམ་ལྡན་འདས་དཀའ་བ་སྤྱོད་པ་ན། གལ་ཏེ་བཅོམ་ལྡན་འདས་སེར་སྐྱའི་གནས་སུ་གཤེགས་ན་དེའི་ཕྱིར་བདག་གིས་བྲམ་ཟེ་ལ་འདི་དང་འདི་སྦྱིན་པར་བྱའོ་ཞེས་གསོལ་བ་བྱས་སོ། །དེས་སྨྲས་པ། བཅོམ་ལྡན་འདས་ཀྱིས་སྲོག་ཆགས་འབུམ་ཕྲག་དུ་མ་དག་ལྟ་བའི་རྣམ་པ་དང་བྲལ་བར་མཛད་ན་ཁྱོད་ནི་ལྟ་བའི་རྣམ་པ་དང་བྲལ་བར་མ་མཛད་དོ། །དེས་སྨྲས་པ། འཕགས་པ་བུད་མེད་ཀྱི་ཡུལ་ནི་དབྲལ་དཀའ་བ་ལགས་པས་ཇི་ལྟར་བགྱི། དེས་སྨྲས་པ། དེ་ནི་མཇལ་གྱིས། ཇེ་སློངས་མོ་པ་དག་ལ་ཇི་ཞིག་སྦྱིན་པ་དེ་བལྟའོ། །འཕགས་པ་ཞོའི་ཁམ་ཕོར་འདི་དང་ཕྱེའི་ཁམ་ཕོར་འདི་འགྲེང་སྟེ་ལོང་ལ་ཁྲིའུ་འདི་ལ་བཞུགས་ཤིག་།ཅི་ཁྲིའུ་འདི་ཡང་ཁོ་བོ་ལ་སྦྱིན་ནམ། འཕགས་པ་ཁྲིའུ་ནི་མི་གསོལ་ལོ། །དེས་བསམས་པ། གལ་ཏེ་ཁྲིའུ་མི་སྟེར་ན་ཁྲིའུ་འདི་བཅག་པར་བྱའོ་སྙམ་དུ་རིག་ནས། དེ་ཁྲིའུ་དེ་ཉིད་ལ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ་འདུག་པ་དང ། སྒྱེལ་ནས་ཞོའི་ཁམ་ཕོར་དང་ཕྱེའི་ཁམ་ཕོར་དེ་དེའི་མགོར་བོ་བ་དང ། དེ་དག་གིས་རྟ་གད་ཀྱིས་བཏབ་སྟེ། ལག་པ་དང་རྐང་པ་དག་ནས་བཟུང་ནས་བྱང་ཆུབ་སེམས་དཔའ་རོལ་པའི་རྫིང་དུ་འཕངས་སོ། །དེ་ལངས་ཏེ་གོས་དག་འཚིར་བ་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་འཆར་ཀ་འདི་ཅི་ཉེས། དེས་སྨྲས་པ། ཁོ་བོས་ཀུ་རེ་ཅུང་ཞིག་བྱས་ན་ཉེས་དམིགས་འདི་ལྟ་བུ་འདི་བྱུང་ངོ ། །དེ་དག་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། དེ་དག་གནས་སུ་སྨོད་དོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས
8.244b
འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལུས་ཐམས་ཅད་ཀྱི་ལྗིད་ཀྱིས་མི་དབབ་པར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་རྐང་པ་བསྣོལ་ཏེ་འདུག་པར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་འདི་ལྟར་མཆིས་པས་འདི་ནི་ཚུལ་དང་འཐུན་པ་མ་ལགས་ཀྱིས། འདི་ལྟར་མ་བཞུགས་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། རྐང་པ་མི་བསྣོལ་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་བརླ་བསྣོལ་ཏེ་འདུག་པར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་འདི་ལྟར་མཆིས་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུགས་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བརླ་མི་བསྣོལ་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །དྲུག་སྡེ་དག་ལོང་བུའི་སྟེང་དུ་ལོང་བུ་བཞག་སྟེ་ཁྱིམ་གཞན་དུ
8.245a
འདུག་པར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་འདི་ལྟར་མཆིས་པར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུགས་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལོང་བུའི་སྟེང་དུ་ལོང་བུ་མི་གཞག་པར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །དྲུག་སྡེ་དག་རྐང་པ་བཀུག་སྟེ་ཁྱིམ་གཞན་དུ་འདུག་པར་བྱེད་ནས། དགེ་བསྙེན་མ་དག་ལྷགས་ཏེ་ཕྱག་འཚལ་བ་ན་དེ་དག་ཨ་རོག་ཁྱ་མི་ཟེར་ནས་དེ་དག་གིས་སྨྲས་པ། འཕགས་པ་དག་ཅིའི་སླད་དུ་ཨ་རོག་ཁྱ་མི་གསུང ། དེ་དག་གིས་སྨྲས་པ། ཁྱེད་ཅག་གིས་ཁོ་བོ་ཅག་གི་རྐང་པ་ལ་ཕྱག་མ་བྱས་སོ། །དེ་དག་དེ་དག་གི་རྐང་པ་ལ་ཕྱག་འཚལ་བ་ན་རྐུབ་ཙོས་འཇལ་བར་བྱེད་ཅིང ། དགའ་བོ་ཉེ་དགའ་འདི་དག་གི་རྐུབ་ཙོས་ཆེ་ཁྱད་ལ་ལྟོས་ཤེས་སྨྲས་པ་དང ། དེ་དག་ངོ་ཚ་ནས་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། རྐང་པ་མི་དགུག་པར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །དྲུག་སྡེ་དག་རྐང་པ་གདངས་ཏེ་ཁྱིམ་གཞན་དུ་འདུག་པར་བྱེད་ནས། དགེ་བསྙེན་མ་དག་ལྷགས་ཏེ་ཕྱག་འཚལ་བ་ན་དེ་དག་ཨ་རོག་ཁྱ་ལྷག་མ་དང་བཅས་པར་ཟེར་ནས། དེ་དག་གིས་སྨྲས་པ། འཕགས་པ་དག་ཅིའི་སླད་དུ་ཨ་རོག་ཁྱ་ལྷག་མ་དང་བཅས་པར་གསུང ། དེ་དག་གིས་སྨྲས་པ། ཁྱེད་ཅག་གིས་ཁོ་བོ་ཅག་གི་རྐང་པ་ལ་ཕྱག་མ་བྱས་སོ། །དེ་དག་དེ་དག་གི་རྐང་པ་ལ་ཕྱག
8.245b
འཚལ་བ་ན་རྐུབ་ཙོས་འཇལ་བར་བྱེད་ཅིང་དགའ་བོ་ཉེ་དགའ་འདི་དག་གི་རྐུབ་ཙོས་ཆེ་ཁྱད་ལ་ལྟོས་ཤེས་སྨྲས་པ་དང ། དེ་དག་ངོ་ཚ་ནས་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། རྐང་པ་མི་གདང་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །དྲུག་སྡེ་དག་མདོམས་སྣང་བར་སྟན་ལ་འཁོད་ཅིང་སྒྲེན་མོར་སྣང་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ་འཕགས་པ་དག་བྱིས་པ་ཁྱེའུ་དག་དང ། ཆང་གིས་ར་རོ་བ་དག་དང ། འབྱུང་པོ་དང ། ཤ་ཟས་བརླམས་པ་དག་འདི་ལྟར་མཆིས་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་བཞུགས་ཤིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མདོམས་མི་སྣང་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །བསླབ་པ་བསྡུ་བའི་མདོ་ནི་མ་བསྒོ་བར་ཁྱིམ་གཞན་དུ་སྟན་ལ་མི་འདུག་པར་བསླབ་པར་བྱ། སྟན་ལ་མ་བརྟགས་པ་དང ། ལུས་ཐམས་ཅད་ཀྱི་ལྗིད་ཀྱིས་མི་དབབ་པ་དང ། རྐང་པ་མི་བསྣོལ་བ་དང ། བརླ་མི་བསྣོལ་བ་དང ། ལོང་བུའི་སྟེང་དུ་ལོང་བུ་མི་གཞག་པ་དང ། རྐང་པ་མི་དགུག་པ་དང ། རྐང་པ་མི་གདང་བ་དང ། མདོམས་མི་སྣང་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །སངས་རྒྱས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་ན་བཞུགས་སོ། །རྒྱལ་བུ་རྟོགས་ལྡན་གྱིས་ཁང་བཟངས་པད་མ་ཅན་ཚོན་བརྒྱ་རྩ་གཅིག
8.246a
གིས་བྲིས་པ་དེར་དགེ་སློང་གི་དགེ་འདུན་སྤྱན་དྲངས་ཏེ་བཤོས་གསོལ་བ་ན། རྒྱལ་བུ་རྟོགས་ལྡན་ནི་དད་པ་དང་ལྡན་པ་ཡིན་ལ། འཁོར་ནི་མ་དད་པས་འབྲིམ་མཁན་རྣམས་ཀྱིས་ལ་ཐུ་དག་གིས་དགེ་སློང་རྣམས་ཀྱི་ལྷུང་བཟེད་དག་གཅོག་པར་བྱེད་ནས། དྲུག་སྡེ་དག་གིས་གྲོས་བྱས་པ། འདི་དག་མི་དགའ་བར་བྱའོ་ཞེས་དེ་དག་འབྲས་ཆན་དང ། ཚོད་མ་འབྲིམ་པ་ན་དྲུག་སྡེ་དག་གིས་ལྷུང་བཟེད་ཕྱིར་བཀྱེད་པ་དང ། དེ་དག་ས་ལ་བོ་ནས་དེ་དག་གིས་སྨྲས་པ། འཕགས་པ་དག་རྒྱལ་བུ་རྟོགས་ལྡན་གྱི་ཁང་བཟངས་པད་མ་ཅན་ཚོན་བརྒྱ་རྩ་གཅིག་གིས་བྲིས་པའི་ས་གཞི་ཁྱེད་ཀྱིས་མ་རུང་བར་བྱས་སོ། །དེ་དག་གིས་སྨྲས་པ། བཀྲེན་པ་དག་ཁྱེད་ཅག་ས་གཞི་མ་རུང་བ་ན་མི་དགའ་བར་བྱེད་ན། དགེ་སློང་གང་དག་གི་ལྷུང་བཟེད་དག་ཆག་པ་དེ་དག་ཇི་ལྟར་བྱེད་ཅེས་ཟེར་བ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལེགས་པར་ཟས་བླང་བར་བསླབ་པར་བྱའོ། །དྲུག་སྡེ་དག་རྒྱལ་བུ་རྟོགས་ལྡན་གྱི་ཁྱིམ་དུ་བསོད་སྙོམས་ལ་ཞུགས་ནས། དེ་དག་དང་པོར་འབྲས་ཆེན་ཇི་ཙམ་གྱིས་ལྷུང་བཟེད་གང་བ་དེ་ཙམ་ལེན་པར་བྱེད་པ་ན། བསོད་སྙོམས་འབུལ་བ་དག་གིས་སྨྲས་པ། འཕགས་པ་དག་ཀྱུ་རུམ་གང་དུ་སྩལ། དེ་དག་གིས་སྨྲས་པ། འདི་ཉིད་དུ་ལུགས་ཤིག་།དེ་དག་གིས་དེར་བླུགས་པ་དང ། དེ་སྟེང་དུ་ལུད་དེ་ས་ལ་བོ་ནས་དེ་དག་གིས་སྨྲས་པ། འཕགས་པ་དག་རྒྱལ་བུ་རྟོགས་ལྡན་གྱི་ཁང་བཟངས་པད་མ་ཅན་ཚོན་བརྒྱ་རྩ་གཅིག་གིས་བྲིས་པའི་ས་གཞི་ཁྱེད་ཀྱིས་མ་རུང་བར་བྱས་སོ། །དེ་དག་གིས་སྨྲས་པ། བཀྲེན་པ་དག་རེ་ཤིག་རྒྱལ་བུ་རྟོགས་ལྡན་གྱིས་འདི་ལ་ལྷག་པར་ཆགས་པར་བྱས་ནས་གང་དུ་སྐྱེ་བར་འགྱུར་བ་ནི་མ་ཤེས་ཀྱི། ཁྱེད་ཅག་ནི་འདི་ལ་ལྷག་པར་ཆགས་པར་བྱས་ནས་ཡི་དགས་ལྦ་བ་ཅན་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང །
8.246b
བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མུ་དང་ཁ་ད་ཆད་དུ་མ་ཡིན་པར་ཟས་བླང་བར་བསླབ་པར་བྱའོ། །དྲུག་སྡེ་དག་རྒྱལ་བུ་རྟོགས་ལྡན་གྱི་ཁྱིམ་དུ་བསོད་སྙོམས་ལ་ཞུགས་ནས། དེ་དག་དང་པོར་ཚོད་མ་ཇི་ཙམ་གྱིས་ལྷུང་བཟེད་གང་བ་དེ་ཙམ་ལེན་པར་བྱེད་པ་ན་བསོད་སྙོམས་འབུལ་བ་དག་གིས་སྨྲས་པ། འཕགས་པ་དག་འབྲས་ཆན་གང་དུ་སྩལ་དེ་དག་གིས་སྨྲས་པ། འདི་ཉིད་དུ་ལུགས་ཤིག་།དེ་དག་གིས་དེར་བླུགས་པ་དང ། དེའི་སྟེང་དུ་ལུད་དེ་བོ་ནས་དེ་དག་གིས་སྨྲས་པ། འཕགས་པ་དག་རྒྱལ་བུ་རྟོགས་ལྡན་གྱི་ཁང་བཟངས་པད་མ་ཅན་ཚོན་བརྒྱ་རྩ་གཅིག་གིས་བྲིས་པའི་ས་གཞི་ཁྱེད་ཀྱིས་མ་རུང་བར་བྱས་སོ། །དེ་དག་གིས་སྨྲས་པ། བཀྲེན་པ་དག་རེ་ཤིག་རྒྱལ་བུ་རྟོགས་ལྡན་གྱིས་འདི་ལ་ལྷག་པར་ཆགས་པར་བྱས་ནས་གང་དུ་སྐྱེ་བར་འགྱུར་བ་ནི་མ་ཤེས་ཀྱི། ཁྱེད་ཅག་ནི་འདི་ལ་ལྷག་པར་ཆགས་པར་བྱས་ནས་ཡི་དགས་ལྦ་བ་ཅན་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཚོད་མ་དང་མཉམ་པ་མ་ཡིན་པར་ཟས་བླང་བར་བསླབ་པར་བྱའོ། །དྲུག་སྡེ་དག་ཟན་ཟ་བ་ན་ཚོད་མ་མི་ལེན་པར་ཕྱིས་ཐག་རིང་དུ་སོང་བ་དང་འབོད་པར་བྱེད་ནས། འབྲིམ་མཁན་དག་བྲེལ་བར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མཐར་ཆགས་སུ་ཟས་བླང་བར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་འདུག་པ་དེས་སངས་རྒྱས་ལ་སྩོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། དེས་ཞལ་ཟས་བསོད་པ་སྟ་གོན་བྱས་ནས། དེས་དང
8.247a
པོར་ཟན་བྲིམ་པར་བརྩམས་པ་དང ། དགེ་སློང་རྣམས་ཀྱིས་མང་དུ་བླང་བར་བརྩམས་པ་ན་དེས་སྨྲས་པ། འཕགས་པ་དག་བདག་གིས་ཞལ་ཟས་བསོད་པ་དག་སྟ་གོན་བགྱིས་ཀྱིས་མང་དུ་མ་བཞེས་ཤིག་།དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཁྱིམ་བདག་བཀྲེན་པ་འདི་རྣམ་པ་འདིས་ཟན་ཡང་འགོག་པར་བྱེད་ཀྱིས་མང་དུ་བླང་ངོ་ཞེས་དེ་དག་གིས་མང་དུ་བླངས་སོ། །ཇི་ཙམ་ན་རྒན་པའི་མཐའ་ལོགས་སུ་བཅའ་བ་བསོད་པ་དག་འབྲིམ་པ་དྲུག་སྡེ་དག་གིས་མཐོང་ནས། དེ་དག་གི་འོག་ན་དགེ་སློང་རྒན་ཞུགས་ཤིག་འདུག་པ་དེ་རྒན་པའི་མཐའ་ལོགས་སུ་རྣམ་པར་ལྟ་བའི་ཚེ་དྲུག་སྡེ་དག་གིས་དེའི་ལྷུང་བཟེད་ཟན་གྱི་ཆང་བུས་བཀང་ངོ ། །ཁྱིམ་བདག་དེས་བཅའ་བ་བྲིམས་པ་ན་རྒན་ཞུགས་དེ་ལ་བཅའ་བ་བྱིན་པ་དང ། དེ་ལྷུང་བཟེད་ཀྱི་གཞིར་ལྷུང་ནས། དེས་ཁྱིམ་བདག་གི་གདོང་དུ་ལྟ་བར་བརྩམས་པ་དང ། དེས་སྨྲས་པ། འཕགས་པ་ཅིའི་སླད་དུ་ཁྱོད་ཀྱིས་ཟན་མང་པོ་དག་བླངས། ཁྱིམ་བདག་བདག་གིས་མ་བླངས་སོ། །འོ་ན་འདི་དག་ག་ལས་མཆིས། མ་ཤེས་སོ། །དྲུག་སྡེ་དག་གིས་སྨྲས་པ། ཁྱིམ་བདག་རྒྱལ་པོ་ང་ལས་ནུ་ལ་ཉི་མ་བདུན་དུ་དབྱིག་གི་ཆར་བབ་ཅེས་གྲག་པས་རྒན་ཞུགས་འདི་ལ་ཡང་དེ་དང་འདྲ་བར་ཟན་གྱི་ཆང་བུའི་ཆར་བབ་བོ། །དེ་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལྷུང་བཟེད་ལ་བལྟ་ཞིང་ཟས་བླང་བར་བསླབ་པར་བྱའོ། །དྲུག་སྡེ་དག་བསོད་སྙོམས་ལ་ཞུགས་པ་ན་ཇི་སྲིད་དུ་བསོད་སྙོམས་མི་སྦྱིན་པ་དེ་སྲིད་དུ་ལྷུང་བཟེད་བཟེད་དེ་སྡོད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་ཅིའི་སླད་དུ་བཅའ་བ་དང་བཟའ་བ་མ་མཆིས་པར་ལྷུང་བཟེད་བཟེད་དེ་གཞེས་པར་མཛད། འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་མཛད་ཅིག་།དེ་དག་གིས་སྨྲས་པ། ཤེས་ལྡན་དག
8.247b
འདི་ལ་དགོས་པ་ཡོད་དོ། །དེ་དག་གིས་སྨྲས་པ། འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། ཁྱིམ་བདག་དེ་ལ་འབྲས་ཆན་མང ། ཚོད་མ་ནི་ཉུང་ནས། དྲུག་སྡེ་དག་གིས་འབྲས་ཆན་གྱིས་ཚོད་མ་བཀབ་པ་དང ། ཁྱིམ་བདག་དེས་འབྲས་ཆན་མཐོང་ནས་སྨྲས་པ། འཕགས་པ་དག་སྐྱུ་རུམ་མ་མཆིས་སམ་ཅི། དེ་དག་གིས་སྨྲས་པ། ཁྱིམ་བདག་འདིར་ལྟོས་ཤིག་།དེས་ཚོད་མ་གཞན་ཡང་བྱིན་ནོ། །དགེ་སློང་རྣམས་གཙུག་ལག་ཁང་དུ་དོང་སྟེ་སྨྲས་པ། ཚེ་དང་ལྡན་པ་དག་ཁྱིམ་བདག་དེས་འབྲས་ཆན་བཟང་པོ་བྱས་ན་འདི་ལྟར་ཚོད་མ་ཉུང་ངོ ། །དྲུག་སྡེ་དག་གིས་སྨྲས་པ། ཁོ་བོ་ཅག་གིས་ནི་ཚོད་མ་མང་དུ་ཐོབ་བོ། །ཇི་ལྟར་དེ་དག་གིས་ཇི་ལྟར་གྱུར་པ་བརྗོད་པ་དང ། དགེ་སློང་རྣམས་ཀྱིས་སྨྲས་པ། ཁྱེད་ཅག་དེ་ལྟར་བྱར་རུང་ངམ། རུང་ཡང་སྲིད་མི་རུང་ཡང་སྲིད་དེ། ཁོ་བོ་ཅག་གིས་ནི་དེ་ལྟར་བྱས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་འབྲས་ཅན་གྱིས་ཚོད་མ་མི་དགབ་པར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། ཁྱིམ་བདག་དེ་ལ་ཚོད་མ་ནི་མང ། འབྲས་ཆན་ནི་ཉུང་ནས། དྲུག་སྡེ་དག་གིས་ཚོད་མས་འབྲས་ཆན་བཀབ་པ་དང ། ཁྱིམ་བདག་དེས་ཚོད་མ་མཐོང་ནས་སྨྲས་པ། འཕགས་པ་དག་འབྲས་ཆན་མ་མཆིས་སམ་ཅི་དེ་དག་གིས་སྨྲས
8.248a
པ། ཁྱིམ་བདག་འདིར་ལྟོས་ཤིག་།དེས་འབྲས་ཅན་གཞན་ཡང་བྱིན་ནོ། །དགེ་སློང་རྣམས་གཙུག་ལག་ཁང་དུ་དོང་སྟེ་སྨྲས་པ། ཚེ་དང་ལྡན་པ་དག་ཁྱིམ་བདག་དེས་ཚོད་མ་བཟང་པོ་བྱས་ན་འདི་ལྟར་འབྲས་ཆན་ཉུང་ངོ ། །དྲུག་སྡེ་དག་གིས་སྨྲས་པ། ཁོ་བོ་ཅག་གིས་ནི་འབྲས་ཆན་མང་དུ་ཐོབ་བོ། །ཇི་ལྟར་དེ་དག་གིས་ཇི་ལྟར་གྱུར་པ་བརྗོད་པ་དང ། དགེ་སློང་རྣམས་ཀྱིས་སྨྲས་པ། ཁྱེད་ཅག་དེ་ལྟར་བྱར་རུང་ངམ། རུང་ཡང་སྲིད་མི་རུང་ཡང་སྲིད་དེ། ཁོ་བོ་ཅག་གིས་ནི་དེ་ལྟར་བྱས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཚོད་མས་འབྲས་ཅན་མི་དགབ་པར་བསླབ་པར་བྱའོ། །མཉན་ཡོད་ན་དགེ་སློང་བསོད་སྙོམས་པ་ཞིག་བསོད་སྙོམས་ལ་རྒྱུ་བ་ན་དེས་འབྲས་ཆན་དང་ཚོད་མ་ཐོབ་ནས། ཡང་ཚོད་མ་དང་འབྲས་ཅན་ཐོབ་པ་དང ། དེ་བདག་གིས་འབྲས་ཅན་གྱིས་ཚོད་མ་བཀབ་ཅིང ། ཚོད་མས་འབྲས་ཅན་བཀབ་པར་མ་གྱུར་ཏམ་སྙམ་དུ་འགྱོད་པ་སྐྱེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལ་ནི་ཉེས་པ་མེད་དེ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ། ཚོད་མས་འབྲས་ཆན་མི་དགབ་པར་བསླབ་པར་བྱའོ། །དྲུག་སྡེ་དག་བཅའ་བ་དང་བཟའ་བའི་སྟེང་དུ་ལྷུང་བཟེད་འཛིན་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་གཙང་སྦྲ་ནི་ཐ་དད་པ་ལགས་ན་ཅིའི་སླད་དུ་བཅའ་བ་དང་བཟའ་བའི་སྟེང་དུ་ལྷུང་བཟེད་འཛིན་པར་མཛད། འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་མཛད་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །དེ་དག་གིས་སྨྲས་པ། འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ
8.248b
ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བཅའ་བ་དང་བཟའ་བའི་སྟེང་དུ་ལྷུང་བཟེད་མི་གཟུང་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ལེགས་པར་ཟས་བླང་བར་བསླབ་པར་བྱ། མུ་དང་ཁ་ད་ཆད་དུ་མ་ཡིན་པ་དང ། ཚོད་མ་དང་མཉམ་པར་མ་ཡིན་པ་དང ། ཐར་ཆགས་སུ་དང་ལྷུང་བཟེད་ལ་བལྟ་བ་དང ། བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པ་དང་ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ་ཚོད་མས་འབྲས་ཆན་མི་དགབ་པ་དང ། བཅའ་བ་དང་བཟའ་བའི་སྟེང་དུ་ལྷུང་བཟེད་མི་གཟུང་བར་བསླབ་པར་བྱའོ།། ་་་་་་་་་་་།།འདུལ་བ་རྣམ་པར་འབྱེད་པ། བམ་པོ་བརྒྱད་བཅུ་རྩ་གསུམ་པ་སྟེ་ཐ་མ། དྲུག་སྡེ་དག་རྣམ་པར་འགྱུར་བ་དག་གིས་ཟས་ཟ་བར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། གཟུགས་འཚོ་མ་དག་འདི་ལྟར་འཚལ་བར་བགྱིད་པས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལེགས་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁམ་ཧ་ཅང་ཆུང་ངུར་ཟ་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། རིགས་ཀྱི་མནའ་མ་དག་དང་གཟུགས་འཚོ
8.249a
མ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁམ་ཧ་ཅང་ཆུང་བ་མ་ཡིན་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁམ་ཧ་ཅང་ཆེན་པོར་ཟ་བར་བྱེད་ནས། བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་མུ་ལྟོ་བ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁམ་ཧ་ཅང་ཆེན་པོ་མ་ཡིན་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁམ་རན་པ་མ་ཡིན་པར་ཟ་ན་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། མུ་ལྟོ་བ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག
8.249b
ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁམ་རན་པར་ཟས་བཟའ་བར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང ། ཇི་ཙམ་ན་དྲུག་སྡེ་དག་གི་འོག་ན་དགེ་སློང་རྒན་ཞུགས་ཤིག་།འདུག་པ་དེ་ཁ་གདངས་ཏེ་རྒན་པའི་མཐའ་ལོགས་སུ་ལྟ་བར་བྱེད་པ་དང ། ཉེ་དགས་དེའི་ཁར་བོང་བ་བཅུག་སྟེ། ཇེ་འདི་ཟོ་ཤིག་ཅེས་སྨྲས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁམ་མ་གཟས་པར་ཁ་མི་གདང་བར་བསླབ་པར་བྱའོ། །དྲུག་སྡེ་དག་ཁ་ཁམ་གྱིས་བཀང་སྟེ་སྨྲ་བར་བྱེད་པ་ན་སྐད་ཉམས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁ་ཁམ་གྱིས་བཀང་སྟེ་མི་སྨྲ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ལེགས་པར་ཟས་བཟའ་བར་བསླབ་པར་བྱ། ཁམ་ཧ་ཅང་ཆུང་བ་མ་ཡིན་པ་དང ། ཁམ་ཧ་ཅང་ཆེན་པོ་མ་ཡིན་པ་དང ། ཁམ་རན་པ་དང ། ཁམ་མ་གཟས་པར་ཁ་མི་གདང་བ་དང ། ཁ་ཁམ་གྱིས་བཀང་སྟེ་མི་སྨྲ་བར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན
8.250a
དུ་གདུགས་ཚོད་ལ་སྤྱན་དྲངས་ནས་དེས་ཚོད་མ་ཏེ་པོར་མངར་བ་དག་སྟ་གོན་བྱས་པ་དང ། དྲུག་སྡེ་དག་གིས་ཁས་སྒྲ་ཕྱུང་སྟེ་སྨྲས་པ། དགའ་བོ་ཉེ་དགའ་ཚོད་མ་དག་ཏེ་པོར་སྐྱུར་རོ། །ཁྱིམ་བདག་དེས་ཐོས་ནས་དེ་སྐྱེངས་ཏེ་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཙུག་ཙུག་མི་བྱ་བར་ཟས་བཟའ་བར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དེས་ཚོད་མ་ཏེ་པོར་སྐྱུར་བ་དག་སྟ་གོན་བྱས་པ་དང ། དྲུག་སྡེ་དག་གིས་ཁས་སྒྲ་ཕྱུང་སྟེ་སྨྲས་པ། དགའ་བོ་ཉེ་དགའ་ཚོད་མ་ཏེ་པོར་མངར་རོ། །ཁྱིམ་བདག་དེས་ཐོས་ནས་དེ་སྐྱེངས་ཏེ་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བལྕག་བལྕག་མི་བྱ་བར་ཟས་བཟའ་བར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། ཁྱིམ་བདག་དེ་ལ་སྣོད་སྤྱད་མེད་པས་དེས་འབྲས་ཆན་བཙོས་ཏེ་སྒྲོམ་དུ་བླུགས་པ་དང ། དེ་ཚ་ནས་དྲུག་སྡེ་དག་གིས་ཁས་སྒྲ་ཕྱུང་སྟེ་སྨྲས་པ། དགའ་བོ་ཉེ་དགའ་འབྲས་ཅན་འདི་སྟེ་པོར་གྲང་གིས་ཁའི་དབུགས་ཀྱིས་བསྲོས་ཏེ་བཟའོ། །ཁྱིམ་བདག་དེས་ཐོས་ནས་དེ་སྐྱེངས་ཏེ་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཧུ་ཧུ་མི་བྱ་བར་ཟས་བཟའ་བར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས
8.250b
པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། དེས་འབྲས་ཆན་བཙོས་ཏེ་རེ་ལྡེར་བདལ་བ་དང་དེ་གྲངས་པར་གྱུར་ནས། དྲུག་སྡེ་དག་གིས་ཁས་སྒྲ་ཕྱུང་སྟེ་སྨྲས་པ། དགའ་བོ་ཉེ་དགའ་འབྲས་ཆན་འདི་ཏེ་པོར་ཚ་བས་ཁའི་དབུགས་ཀྱིས་བསྒྲང་སྟེ་བཟའོ། །ཁྱིམ་བདག་དེས་ཐོས་ནས་དེ་སྐྱེངས་ཏེ་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཕུ་ཕུ་མི་བྱ་བར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལྕེ་ཕྱུང་སྟེ་ལྟ་ཞིང་མཆུ་གཉིས་ལ་ལྡག་པར་བྱེད་ནས་དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཅིའི་ཕྱིར་ལྕེ་ཕྱུང་སྟེ་ལྟ། དེ་དག་གིས་སྨྲས་པ། ཚེ་དང་ལྡན་པ་དག་མ་བཅས་པར་མིད་ན་མི་རུང་བས་དེ་བལྟའོ། །དེ་དག་སྨོད་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལྕེ་ཕྱུང་སྟེ་ཟས་མི་བཟའ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ཙུག་ཙུག་མི་བྱ་བ་དང ། བལྕག་བལྕག་མི་བྱ་བ་དང ། ཧུ་ཧུ་མི་བྱ་བ་དང ། ཕུ་ཕུ་མི་བྱ་བ་དང ། ལྕེ་ཕྱུང་སྟེ་ཟས་མི་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་འབྲས་ཆན་འབྲུ་རེ་རེ་ནས་ཐུ་ཞིང་ཟ་ནས་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། དྭ་དག་དང ། རྒྱན་པོ་པ་དག་དང ། ནལ་གྱི་བུ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ
8.251a
བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འབྲུ་ནས་ཐ་དད་དུ་མི་བྱ་བར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་དགའ་བོ་ཉེ་དགའ་ཚོད་མ་འདི་དག་ཧ་ཅང་ཁའོ། །ཧ་ཅང་སྐྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འཕྱས་མི་གདགས་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་མཁུར་བ་ནས་མཁུར་བར་ཁམ་སྤོ་ཞིང་ཟ་བར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། མུ་ལྟོ་བ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང ། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མཁུར་བ་མི་སྤོ་བར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་རྐན་སྒྲ་གཏོག་པར་བྱེད་ནས་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། མུ་ལྟོ་བ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར
8.251b
མ་གསོལ་ཅིག་།དེ་དག་གིས་སྨྲས་པ། བཞིན་བཟངས་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། རྐན་མི་གཏོགས་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁམ་བླངས་ནས་ཕྱེད་ཁར་འཛུད་ཅིང་ཕྱེད་ལྷུང་བཟེད་དུ་ལྷུང་བར་བྱེད་ནས་བྲམ་ཟེ་དང ། ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང ། གཟུགས་འཚོ་མ་དག་འདི་ལྟར་འཚལ་བས་འདི་ནི་ཚུལ་དང་འཐུན་པ་མ་ལགས་ཀྱིས་འདི་ལྟར་མ་གསོལ་ཅིག་།དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཇེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁམ་འཕྲོར་མི་བཅད་པར་ཟས་བཟའ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་འབྲུ་ནས་ཐ་དད་དུ་མི་བྱ་བ་དང ། འཕྱས་མི་གདགས་པ་དང ། མཁུར་བ་མི་སྤོ་བ་དང ། རྐན་མི་གཏོག་པ་དང ། ཁམ་འཕྲོར་མི་བཅད་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལག་པ་ལྡག་པར་བྱེད་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཅིའི་ཕྱིར་མི་མཛེས་པ་འདི་ལྟ་བུ་བྱེད། དེ་དག་གིས་སྨྲས་པ། ཚེ་དང་ལྡན་པ་དག་སྙིང་པོ་གང་ཡིན
8.252a
པ་དེ་འདི་ལ་ཆགས་སོ། །དེ་དག་སྨོད་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལག་པ་མི་བལྡག་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལྷུང་བཟེད་བྱོག་པར་བྱེད་ནས་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཅིའི་ཕྱིར་མི་མཛེས་པ་འདི་ལྟ་བུ་བྱེད། དེ་དག་གིས་སྨྲས་པ། ཚེ་དང་ལྡན་པ་དག་སྙིང་པོ་གང་ཡིན་པ་དག་འདི་ལ་ཆགས་སོ། །དེ་དག་སྨོད་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལྷུང་བཟེད་མི་བྱོག་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལག་པ་སྤྲུག་པར་བྱེད་པས་དགེ་སློང་རྣམས་ལ་ལག་པའི་ཆུས་ཕོག་ནས་དེ་དག་སྨོད་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལག་པ་མི་སྤྲུག་པར་ཟས་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་དེ་དག་གི་འོག་ན་དགེ་སློང་སྣམ་སྦྱར་དམར་སེར་ཅན་ཞིག་འདུག་ནས་དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཀྲེན་པ་འདིའི་སྙིང་ལམ་ན་ཡུ་བུ་ཅག་གིས་སྔོན་ལན་འགའ་ཡང་སྣམ་སྦྱར་འདི་ལྟ་བུ་གྱོན་མ་མྱོང་སྙམ་གྱིས་འདི་མི་དགའ་བར་བྱའོ་ཞེས་དེ་དག་གིས་ལྷུང་བཟེད་བསྐྱོམས་པ་དང ། དགེ་སློང་དེའི་སྣམ་སྦྱར་ལྷུང་བཟེད་ཀྱི་ཆུས་མ་རུང་བར་གྱུར་ནས། དེ་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལྷུང་བཟེད་མི་བསྐྱམ་པར་ཟས་བཟའ་བར་བསླབ་པར་བྱའོ། །མཉན་ཡོད་ན
8.252b
ཁྱིམ་བདག་ཅིག་འདུག་པ་དེ་གཅེར་བུ་པ་དག་ལ་མངོན་པར་དད་དོ། །དེ་དུས་གཞན་ཞིག་ན་བཅོམ་ལྡན་འདས་ལ་མངོན་པར་དད་པར་གྱུར་ནས་དེས་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དེར་ཕྱེ་དག་བྲིམས་པ་དང ། དྲུག་སྡེ་དག་གིས་དེ་དག་སྦྲུས་ཏེ་མཆོད་རྟེན་འདྲ་བ་རྣམ་པར་བཞག་གོ། །ལ་པུག་གི་ཕྱེད་ཚལ་དག་བྲིམས་པ་དང ། དེ་ཡང་དེ་ཉིད་ལ་བཙུགས་ཏེ་སྲོག་ཤིང་འདྲ་བར་རྣམ་པར་བཞག་གོ། །ཁུར་བ་དག་བྲིམས་པ་དང ། དེ་ཡང་ལ་ཕུག་དེ་ཉིད་ཀྱི་སྟེང་དུ་གདུགས་འདྲ་བར་རྣམ་པར་བཞག་གོ། །དེ་ནས་སྨྲས་པ། དགའ་བོ་ཉེ་དགའ་མཆོད་རྟེན་འདི་ནི་ངན་འགྲོ་རྫོགས་པར་བྱེད་པ་རྫོགས་བྱེད་ཀྱི་ཡིན་ནོ་ཞེས་ཟེར་རོ། །ཡང་བཅོམ་སྟེ་ཟ་ཞིང་སྨྲས་པ། དགའ་བོ་ཉེ་དགའ་ངན་འགྲོ་རྫོགས་པར་བྱེད་པ་རྫོགས་བྱེད་ཀྱི་མཆོད་རྟེན་རྡིབ་བོ་ཞེས་ཟེར་རོ། །ཁྱིམ་བདག་དེས་ཐོས་ནས་དེས་སྨྲས་པ། འཕགས་པ་དག་བདག་ནི་སྡིག་པ་ཅན་གྱི་ལྟ་བའི་རྣམ་པ་དེ་དང་བྲལ་ལགས་ན་ཁྱེད་ཅག་ད་རུང་ཡང་ཞེ་སྡང་དང་མ་བྲལ་ལོ། །དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མཆོད་རྟེན་འདྲ་བ་བཅོམ་སྟེ་ཟས་མི་བཟའ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ལག་པ་མི་བལྡག་པ་དང ། ལྷུང་བཟེད་མི་བྱོག་པ་དང ། ལག་པ་མི་སྤྲུག་པ་དང ། ལྷུང་བཟེད་མི་བསྐྱམ་པ་དང ། མཆོད་རྟེན་འདྲ་བ་བཅོམ་སྟེ་ཟས་མི་བཟའ་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་དེ་དག་གི་དྲུང་ན་འདུག་པའི་དགེ་སློང་མང་དུ་ཟ་བ་དང ། དྲུག་སྡེ་དག་འཕྱས་འདོགས་ཤིང་དགའ་བོ་ཉེ་དགའ་རྒན་ཞུགས་འདི་མང་པོ་འདི་སྙེད་ཟ་བ་ལ་ལྟོས་ཤིག་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བར་བསླབ
8.253a
པར་བྱའོ། །དྲུག་སྡེ་དག་ཁྱིམ་གཞན་དུ་ཟས་ཟ་བ་ན་ལག་པ་ཟས་དང་འབགས་པས་ཆུ་སྣོད་ལ་འཛིན་པར་བྱེད་ནས། མ་དད་པ་དག་ཤཱཀྱའི་བུའི་དགེ་སྦྱོང་དག་ནི་ལག་པ་ཟས་དང་འབགས་པས་ཆུ་སྣོད་ལ་འཛིན་པས་གཙང་སྦྲ་མེད་པ་ཡིན་ནོ་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལག་པ་ཟས་དང་འབགས་པས་ཆུ་སྣོད་ལ་མི་གཟུང་བར་བསླབ་པར་བྱའོ། །དྲུག་སྡེ་དག་ཁྱིམ་གཞན་དུ་ཟན་ཟ་བ་ན་དེ་དག་གི་འོག་ན་དགེ་སློང་སྣམ་སྦྱར་དམར་སེར་ཅན་ཞིག་འདུག་ནས་དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཀྲེན་པ་འདིའི་སྙིང་ལམ་ན་ཡུ་བུ་ཅག་གིས་སྔོན་ལན་འགའ་ཡང་སྣམ་སྦྱར་འདི་ལྟ་བུ་གྱོན་མ་མྱོང་སྙམ་གྱིས་འདི་མི་དགའ་བར་བྱའོ་ཞེས་དེ་དག་གིས་ཟས་དང་འབགས་པའི་ཆུས་གཏོར་བ་དང ། དགེ་སློང་དེའི་སྣམ་སྦྱར་ཟས་དང་འབགས་པའི་ཆུས་མ་རུང་བར་གྱུར་ནས། དེ་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་བར་བསླབ་པར་བྱའོ། །སངས་རྒྱས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་འཇིགས་རུང་གི་ནགས་རི་དགས་ཀྱི་ཚལ་ན་བཞུགས་སོ། །རྒྱལ་བུ་རྟོགས་ལྡན་གྱིས་ཁང་བཟངས་པད་མ་ཅན་ཚོན་བརྒྱ་རྩ་གཅིག་གིས་བྲིས་པ་དེར་དགེ་སློང་གི་དགེ་འདུན་སྤྱན་དྲངས་ཏེ་བཤོས་གསོལ་པ་ན། དྲུག་སྡེ་དག་གིས་ལྷུང་བཟེད་ཀྱི་ཆུ་དེ་ཉིད་དུ་ཕོ་བ་དང ། འབྲིམ་མཁན་དག་འཕགས་པ་དག་རྒྱལ་བུ་རྟོགས་ལྡན་གྱི་ཁང་བཟངས་པད་མ་ཅན་ཚོན་བརྒྱ་རྩ་གཅིག་གིས་བྲིས་པའི་ས་གཞི་ཁྱེད་ཀྱིས་མ་རུང་བར་བྱས་སོ། །ཞེས་སྨོད་པར་བྱེད་པ་དང །
8.253b
དྲུག་སྡེ་དག་གིས་སྨྲས་པ། རྒྱལ་བུ་རྟོགས་ལྡན་གྱིས་རེ་ཤིག་འདི་ལ་ཆགས་པར་བྱས་ནས་གང་དུ་སྐྱེ་བར་འགྱུར་བ་ནི་མ་ཤེས་ཀྱི། ཁྱེད་ཅག་ནི་འདི་ལ་ཆགས་པར་བྱས་ནས་ཡི་དགས་ལྦ་བ་ཅན་རྣམས་ཀྱི་ནང་དུ་སྐྱེ་བར་འགྱུར་རོ། །དེ་དག་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །མཉན་ཡོད་ན་ཁྱིམ་བདག་ཅིག་གིས་ཁྱིམ་རྩིག་ཏུ་བཅུག་ནས་དགེ་སློང་གི་དགེ་འདུན་གདུགས་ཚོད་ལ་སྤྱན་དྲངས་ཏེ་བཤོས་གསོལ་བ་ན། དགེ་སློང་རྣམས་ཆུ་ཟས་དང་འབགས་པ་ཁྱིམ་གྱི་ཕྱི་རོལ་ཏུ་འབོད་པར་བྱེད་ནས་ཁྱིམ་བདག་དེས་སྨྲས་པ། འཕགས་པ་དག་འདི་ཉིད་དུ་ཕོ་ཞིག་དང་བདག་གི་ཁྱིམ་གྱིས་སྤྱད་པར་འགྱུར་རོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཁྱིམ་པ་ན་རེ་ཕོ་ཞིག་ཅེས་ཟེར་ན་དབོ་བར་བྱའོ། །གཞན་དུ་ན་དབོ་བར་མི་བྱའོ། །དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཁྱིམ་པ་འདུག་པ་ལ་མ་དྲིས་པར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བར་བསླབ་པར་བྱ། ལག་པ་ཟས་དང་འབགས་པས་ཆུ་སྣོད་ལ་མི་གཟུང་བར་བསླབ་པར་བྱ། དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་བར་བསླབ་པར་བྱ། ཁྱིམ་པ་འདུག་པ་ལ་མ་དྲིས་པར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །མཉན་ཡོད་ན་བྲམ་ཟེ་ཞིག་འདུག་པ་དེའི་བུ་ན་བར་གྱུར་ནས་དེ་སྨན་པའི་གན་དུ་སོང་སྟེ་སྨྲས་པ། བཞིན་བཟངས་ཁོ་བོའི་བུ་ན་བས་སྨན་སྟོན་ཅིག་།སྨན་པ་དེ་དད་པ་ཅན་ཞིག་ཡིན་པ་དེས་སྨྲས་པ། བྲམ་ཟེ་འཕགས་པ་རྣམས་ཀྱི་ལྷུང་བཟེད་ཀྱི
8.254a
ཆུས་ཁྲུས་གྱིས་ཤིག་།དེ་རྒྱལ་བྱེད་ཀྱི་ཚལ་དུ་སོང་བ་དང ། དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཚེ་དང་ལྡན་པ་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་ནས། བྲམ་ཟེ་དེས་དེའི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་བདག་གི་བུ་བྲོ་འཚལ་ཏེ། དེ་ལ་འཕགས་པ་དག་གི་ལྷུང་བཟེད་ཀྱི་ཆབ་ཅིག་འཚལ་ན་སྩལ་དུ་གསོལ། དེས་སྨྲས་པ། བྲམ་ཟེ་འདི་ཉིད་དུ་རེ་ཤིག་སྡོད་ཅིག་དང་ལྷུང་བཟེད་ཀྱི་ཆུ་ཁྱེར་ཏེ་འོང་ངོ ། །དེས་གཙུག་ལག་ཁང་དུ་སོང་སྟེ་ལྷུང་བཟེད་དུ་ཕྱེ་ཉུང་ཤས་ཤིག་དང ། འབྲས་ཆན་ཉུང་ཤས་ཤིག་དང ། ཁུར་བ་ཉུང་ཤས་ཤིག་དང ། ཤ་ཉུང་ཤས་ཤིག་དང ། རུས་པ་ཉུང་ཤས་ཤིག་བླུགས་ཏེ་ཆུས་བླུགས་ནས་ཕྱིར་བྱུང་སྟེ། སྨྲས་པ། བྲམ་ཟེ་དེས་ལོང་ཞིག་བྲམ་ཟེ་དེས་མཐོང་ནས་སྨྲས་པ། འཕགས་པ་ཁྱེད་ཀྱི་ལྷུང་བཟེད་ཀྱི་ཆབ་འདི་ལྟ་བུ་འམ། བྲམ་ཟེ་འདི་ལྟ་བུའོ། །འཕགས་པ་བདག་གི་བུ་གུམ་པ་ནི་ལེགས་ཀྱི། འདི་ལྟ་བུའི་མི་གཙང་བས་བཀྲུ་བ་ནི་མི་རུང་ངོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་བསླབ་པར་བྱའོ། །འདི་ལྟར་གང་ལྷུང་བཟེད་ཀྱི་ཆུ་སློང་བ་དེ་ལ་ལྷུང་བཟེད་ལན་གསུམ་བཀྲུས་ཏེ། གཙུག་ལག་གི་ཚིགས་སུ་བཅད་པ་དག་གིས་བཟླས་བརྗོད་བྱས་པའི་ལྷུང་བཟེད་ཀྱི་ཆུ་སྦྱིན་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དག་འོག་གཞི་མེད་པའི་ས་ཕྱོགས་སུ་ལྷུང་བཟེད་འཇོག་པར་བྱེད་ནས། དེ་བཙས་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འོག་གཞི་མེད་པའི་ས་ཕྱོགས་སུ་ལྷུང
8.254b
བཟེད་མི་གཞག་པར་བསླབ་པར་བྱའོ། །དགེ་སློང་དག་ལྷུང་བཟེད་གད་ཁར་འཇོག་པར་བྱེད་ནས་དེ་འདྲིལ་ཏེ་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གད་ཁ་མ་ཡིན་པར་ལྷུང་བཟེད་གཞག་པར་བསླབ་པར་བྱའོ། །དགེ་སློང་དག་ལྷུང་བཟེད་གཡང་སར་འཇོག་པར་བྱེད་ནས་དེ་འདྲིལ་ཏེ་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གཡང་ས་མ་ཡིན་པར་ལྷུང་བཟེད་བཞག་པར་བསླབ་པར་བྱའོ། །དགེ་སློང་དག་ལྷུང་བཟེད་དཀན་གཟར་པོར་འཇོག་པར་བྱེད་ནས་དེ་འདྲིལ་ཏེ་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དཀན་གཟར་པོ་མ་ཡིན་པར་ལྷུང་བཟེད་གཞག་པར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་འགྲེང་སྟེ་ལྷུང་བཟེད་འཁྲུ་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འགྲེང་སྟེ་ལྷུང་བཟེད་མ་འཁྲུ་ཞིག་།དེས་སྨྲས་པ་ཅིར་འགྱུར་ཤོར་ཏེ་ཆག་པར་འགྱུར་མོད། གཞན་ཅི་ཞིག་ཏུ་འགྱུར། དེ་དག་གིས་བཟློག་པ་ན་དེ་མ་བཏུབ་ནས། ལྷུང་བཟེད་དེ་ཤོར་ཏེ་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འགྲེང་སྟེ་ལྷུང་བཟེད་མི་བཀྲུ་བར་བསླབ་པར་བྱའོ། །དགེ་སློང་དག་ལྷུང་བཟེད་གད་ཀར་འཁྲུ་བར་བྱེད་ནས་དེ་ཤོར་ཏེ་འདྲིལ་ནས་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་
8.255a
འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གད་ཀ་མ་ཡིན་པར་ལྷུང་བཟེད་བཀྲུ་བར་བསླབ་པར་བྱའོ། །དགེ་སློང་དག་ལྷུང་བཟེད་གཡང་སར་འཁྲུ་བར་བྱེད་ནས་དེ་ཤོར་ཏེ་འདྲིལ་ནས་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གཡང་ས་མ་ཡིན་པར་ལྷུང་བཟེད་བཀྲུ་བར་བསླབ་པར་བྱའོ། །དགེ་སློང་དག་ལྷུང་བཟེད་དཀན་གཟར་པོར་འཁྲུ་བར་བྱེད་ནས་དེ་ཤོར་ཏེ་འདྲིལ་ནས་ཆག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དཀན་གཟར་པོ་མ་ཡིན་པར་ལྷུང་བཟེད་བཀྲུ་བར་བསླབ་པར་བྱའོ། །དགེ་སློང་དག་འབབ་ཆུ་དྲག་པོའི་རྒྱུན་ལས་བཟློག་སྟེ་ལྷུང་བཟེད་ཀྱིས་ཆུ་འཆུ་བར་བྱེད་ནས་དེ་ཤོར་ཏེ་ཆུས་ཁྱེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འབབ་ཆུ་དྲག་པོའི་རྒྱུན་ལས་བཟློག་སྟེ་ལྷུང་བཟེད་ཀྱིས་ཆུ་མི་བཅུ་བར་བསླབ་པར་བྱའོ། །བསླབ་པ་བསྡུ་བའི་མདོ་ནི་ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་བསླབ་པར་བྱ། འོག་གཞི་མེད་པའི་ས་ཕྱོགས་སུ་ལྷུང་བཟེད་མི་གཞག་པར་བསླབ་པར་བྱ། གད་ཀ་མ་ཡིན་པ་དང ། གཡང་ས་མ་ཡིན་པ་དང ། དཀན་གཟར་པོ་མ་ཡིན་པར་ལྷུང་བཟེད་གཞག་པར་བསླབ་པར་བྱ། འགྲེང་སྟེ་ལྷུང་བཟེད་མི་བཀྲུ་བར་བསླབ་པར་བྱ། གད་ཀ་མ་ཡིན་པ་དང ། གཡང་ས་མ་ཡིན་པ་དང ། དཀན་གཟར་པོ་མ་ཡིན་པར་ལྷུང་བཟེད་བཀྲུ་བར་བསླབ
8.255b
པར་བྱ། འབབ་ཆུ་དྲག་པོའི་རྒྱུན་ལས་བཟློག་སྟེ་ལྷུང་བཟེད་ཀྱིས་ཆུ་མི་བཅུ་བར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་མི་ན་བར་འདུག་པ་ལ་འགྲེང་སྟེ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་འདུག་པ་རྣམས་ལ་འགྲེང་སྟེ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་འདུག་པ་ལ་འགྲེང་སྟེ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ཉལ་བ་ལ་འདུག་སྟེ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ཉལ་བ་རྣམས་ལ་འདུག་སྟེ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས་དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ཉལ་བ་ལ་འདུག་སྟེ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག
8.256a
བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ནས། ཁྱེད་ཅག་རྗེ་ས་མེད་པ་དང ། གུས་པ་མེད་པ་སྟན་མཐོན་པོ་ལ་འདུག་པ་རྣམས་ལ་སྟན་དམའ་བ་ལ་འདུག་སྟེ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་མདུན་དུ་འགྲོ་བ་རྣམས་ལ་ཕྱི་ནས་འགྲོ་ཞིང་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལམ་ནས་འགྲོ་བ་ལམ་གྱི་འགྲམ་ནས་འགྲོ་ཞིང་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ལམ་ནས་འགྲོ་བ་རྣམས་ལ་ལམ་གྱི་འགྲམ་ནས་འགྲོ
8.256b
ཞིང་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བསླབ་པར་བྱའོ། །བསླབ་པ་བསྡུ་བའི་མདོ་ནི་མི་ན་བར་འདུག་པ་ལ་འགྲེང་སྟེ་ཆོས་མི་བཤད་པར་བསླབ་པར་བྱ། མི་ན་བར་ཉལ་བ་ལ་འདུག་སྟེ། ཆོས་མི་བཤད་པར་བསླབ་པར་བྱ། མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་ཆོས་མི་བཤད་པར་བསླབ་པར་བྱ། མི་ན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་མི་བཤད་པར་བསླབ་པར་བྱ། མི་ན་བར་ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་མགོ་གཡོགས་པ་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་མགོ་གཡོགས་པ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་མགོ་གཡོགས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་རྫེས་པ་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ
8.257a
རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་བརྫེས་པ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་བརྫེས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་གཟར་བ་ལ་ཆོས་འཆད་པར་བྱེད་ནས་བྲམ་ཟེ་དང ། ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པར་གཟར་བ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་གཟར་བ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་གཉའ་གོང་དུ་བསྣོལ་བ་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་གཉའ་གོང་དུ་བསྣོལ་བ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར
8.257b
བྱ་སྟེ། མི་ན་བར་གཉའ་གོང་དུ་བསྣོལ་བ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལྟག་པར་བསྣོལ་བ་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པར་ལྟག་པར་བསྣོལ་བ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལྟག་པར་བསྣོལ་བ་ལ་ཆོས་མི་བཤད་པར་བསླབ་པར་བྱའོ། །བསླབ་པ་བསྡུ་བའི་མདོ་ནི་མི་ན་བར་མགོ་གཡོགས་པ་དང ། བརྫེས་པ་དང ། གཟར་བ་དང ། གཉའ་གོང་དུ་བསྣོལ་བ་དང ། ལྟག་པར་བསྣོལ་བ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བ་སྐྲ་དོ་ཀེར་ཅན་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་སྐྲ་དོ་ཀེར་ཅན་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བ་སྐྲ་དོ་ཀེར་ཅན་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བ་ཞཝ་གྱོན་པ་ལ་ཆོས་འཆད་པར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ
8.258a
ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ཞཝ་གྱོན་པ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བ་ཞཝ་གྱོན་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བ་མགོ་ཅོད་པན་ཅན་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་མགོ་ཅོད་པན་ཅན་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བ་མགོ་ཅོད་པན་ཅན་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བ་མགོ་ཕྲེང་བ་ཅན་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་མགོ་ཕྲེང་བ་ཅན་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ
8.258b
སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བ་མགོ་ཕྲེང་བ་ཅན་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བ་མགོ་དཀྲིས་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་མགོ་དཀྲིས་པ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བ་མགོ་དཀྲིས་པ་ལ་ཆོས་མི་བཤད་པར་བསླབ་པར་བྱའོ། །བསླབ་པ་བསྡུ་བའི་མདོ་ནི་མི་ན་བ་སྐྲ་དོ་ཀེར་ཅན་དང ། ཞཝ་གྱོན་པ་དང ། མགོ་ཅོད་པན་ཅན་དང ། མགོ་ཕྲེང་བ་ཅན་དང ། མགོ་དཀྲིས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་གླང་པོ་ཆེ་ཞོན་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་གླང་པོ་ཆེ་ཞོན་པ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་གླང་པོ་ཆེ་ཞོན་པ་རྣམས་ལ་ཆོས་མི་བཤད་པར་བསླབ
8.259a
པར་བྱའོ། །དྲུག་སྡེ་དག་མི་ན་བར་རྟ་ཞོན་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་རྟ་ཞོན་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་རྟ་ཞོན་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ཁྱོགས་ན་འདུག་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ཁྱོགས་ན་འདུག་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ཁྱོགས་ན་འདུག་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་བཞོན་པའི་སྟེང་ན་འདུག་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད
8.259b
པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་བཞོན་པའི་སྟེང་ན་འདུག་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་བཞོན་པའི་སྟེང་ན་འདུག་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་མཆིལ་ལྷམ་གྱོན་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པར་མཆིལ་ལྷམ་གྱོན་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་མཆིལ་ལྷམ་གྱོན་པ་ལ་ཆོས་མི་བཤད་པར་བསླབ་པར་བྱའོ། །བསླབ་པ་བསྡུ་བའི་མདོ་ནི་མི་ན་བར་གླང་པོ་ཆེ་ཞོན་པ་དང ། རྟ་ཞོན་པ་དང ། ཁྱོགས་ན་འདུག་པ་དང ། བཞོན་པའི་སྟེང་ན་འདུག་པ་དང ། མཆིལ་ལྷམ་གྱོན་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལག་ན་ཁར་བ་ཐོགས་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ལག་ན་ཁར་བ་ཐོགས་པ་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང
8.260a
རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལག་ན་ཁར་བ་ཐོགས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལག་ན་གདུགས་ཐོགས་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ལག་ན་གདུགས་ཐོགས་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལག་ན་གདུགས་ཐོགས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལག་ན་མཚོན་ཐོགས་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ལག་ན་མཚོན་ཐོགས་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལག་ན་མཚོན་ཐོགས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལག་ན་རལ་གྲི་ཐོགས་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང
8.260b
ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ལག་ན་རལ་གྲི་ཐོགས་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལག་ན་རལ་གྲི་ཐོགས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་ལག་ན་དགྲ་ཆ་ཐོགས་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་ལག་ན་དགྲ་ཆ་ཐོགས་པ་རྣམས་ལ་ཆོས་འཆད་པར་བྱེད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ལག་ན་དགྲ་ཆ་ཐོགས་པ་ལ་ཆོས་མི་བཤད་པར་བསླབ་པར་བྱའོ། །དྲུག་སྡེ་དག་མི་ན་བར་གོ་ཆ་གྱོན་པ་རྣམས་ལ་ཆོས་འཆད་པར་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་།འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་བརྒྱ་སྟོང་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་ཡེ་ཤེས་བརྙེས་ན། ཁྱེད་ཅག་རྗེ་ས་མེད་པ་དང ། གུས་པ་མེད་པ་གོ་ཆ་གྱོན་པ་རྣམས་ལ་ཆོས་འཆད་དམ་ཞེས་སྨོད་པར་བྱེད་ནས། དེ་དག་ཅང་མི་སྨྲ་བར་འཁོད་པའི་སྐབས་དེ་དགེ་སློང
8.261a
རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་གོ་ཆ་གྱོན་པ་ལ་ཆོས་མི་བཤད་པར་བསླབ་པར་བྱའོ། །བསླབ་པ་བསྡུ་བའི་མདོ་ནི་མི་ན་བར་ལག་ན་ཁར་བ་ཐོགས་པ་དང ། ལག་ན་གདུགས་ཐོགས་པ་དང ། ལག་ན་མཚོན་ཐོགས་པ་དང ། ལག་ན་རལ་གྲི་ཐོགས་པ་དང ། ལག་ན་དགྲ་ཆ་ཐོགས་པ་དང ། གོ་ཆ་གྱོན་པ་ལ་ཆོས་མི་བཤད་པར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའ་འགྲེང་བཞིན་དུ་བཤང་གཅི་བྱེད་ནས་བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་སྟོན་པའི་ཉན་ཐོས་ནི་ངོ་ཚ་དང་ལྡན་པ་ལགས་ན། ཉན་ཐོས་ངོ་ཚ་དང་ཁྲེལ་མེད་པ་འདི་འགྲེང་བཞིན་དུ་བཤང་གཅི་བགྱིད་པ་ག་ལ་གདའ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་འགྲེང་སྟེ་བཤང་གཅི་མི་བྱ་བར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའ་བཙོ་བླག་མཁན་གྱི་གན་དུ་སོང་སྟེ་སྨྲས་པ། བཞིན་བཟངས་གོས་འདི་ཁྲུས་ཏེ་བྱིན་ཅིག་།དེས་སྨྲས་པ། འཕགས་པ་ཁྱོད་ཀྱིས་སྔོན་ནི་བདག་ཅག་བསྲུང་བ་བྱས་པར་གྱུར་ན། དེང་སང་མི་བྱེད་པས་ཅིའི་ཕྱིར་ཁྱོད་ཀྱི་གོས་བཀྲུས་ཏེ་སྦྱིན། དེས་སྡོད་ཅིག་ཅེས་བྱས་ཏེ་སོང་ནས་དེས་བསམས་པ། བཀྲེན་པ་དེ་མི་དགའ་བར་བྱའོ་སྙམ་ནས་དེས་བཀྲུ་སྨན་ཟོས་ཏེ་མི་གཙང་བས་གྱོ་མོ་བཀང་ནས་བཙོ་བླག་མཁན་དེའི་བཀྲུ་བཤལ་སར་བླུགས་སོ། །དེ་ནས་བཙོ་བླག་མཁན་དེ་ནང་པར་སྔར་ལངས་ཏེ་གོས་དག་བཀྲུ་བར་བརྩམས་པ་དང ། ཇི་ཙམ་ན་མི་གཙང
8.261b
བའི་དྲི་བྲོ་ནས་དེ་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་པ་དང ། ཉེ་དགས་ཆེད་དུ་བསམས་ཏེ་ཕྱོགས་དེར་སོང་ནས་དེས་སྨྲས་པ། བཞིན་བཟངས་ཁྱོད་ཅིའི་ཕྱིར་སེམས་ཁོངས་སུ་ཆུད་ཅིང་འདུག་།དེས་སྨྲས་པ། འཕགས་པ་བཀྲུ་བཤལ་ས་འདིར་གཅིག་གིས་མི་གཙང་བ་བླུགས་ཏེ་ལས་བགྱིར་མ་མཆིས་པས་ད་ཇི་ལྟར་བཙོ་ཆབ་སྦྱར་བར་བགྱི་མ་འཚལ་ཏོ། །ཉེ་དགས་སྨྲས་པ། བཀྲེན་པ་ཁྱོད་དེ་ལྟར་མི་དགའ་བར་བྱའོ། །དེ་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་ཆུའི་ནང་དུ་བཤང་གཅི་མི་བྱ་བར་བསླབ་པར་བྱའོ། །ཐམས་ཅད་ཆུས་གང་སྟེ་གོ་སྐབས་མེད་པ་ནི་མ་གཏོགས་སོ། །བཤང་གཅི་ཇི་ལྟ་བ་བཞིན་དུ་ཆུའི་ནང་དུ་མཆིལ་མ་དང ། སྣབས་དང ། སྐྱུགས་པ་དང ། རླུགས་པ་མི་དོར་བར་བསླབ་པར་བྱ་བ་ཡང་དེ་བཞིན་ནོ། །སངས་རྒྱས་བཅོམ་ལྡན་འདས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའ་ལྡུམ་པའི་གན་དུ་སོང་སྟེ་སྨྲས་པ། བཞིན་བཟངས་ལྡུམ་ཆུང་ཞིག་བྱིན་ཅིག་།འཕགས་པ་ཁྱོད་ཀྱིས་སྔོན་ནི་བདག་ཅག་བསྲུང་བ་བྱས་པར་གྱུར་ན་དེང་སང་མི་བྱེད་པས་ཅིའི་ཕྱིར་ཁྱོད་ལ་ལྡུམ་སྦྱིན། དེས་སྡོད་ཅིག་ཅེས་བྱས་ཏེ་སོང་ནས་དེས་བསམས་པ། བཀྲེན་པ་དེ་མི་དགའ་བར་བྱའོ་སྙམ་ནས། དེས་བཀྲུ་སྨན་ཟོས་ཏེ་མི་གཙང་བས་གྱོ་མོ་བཀང་ནས་ཕྱགས་མ་ཐོགས་ཏེ་ལྡུམ་ཞིང་གི་སྟེང་ཐམས་ཅད་དུ་མི་གཙང་བས་གཏོར་ནས་ལྡུམ་ཐམས་ཅད་མ་རུང་བར་བྱས་སོ། །མི་གཙང་བའི་དྲིས་དེར་ཝ་དག་འདུས་ནས་དེ་དག་གིས་ཀྱང་ལྡུམ་ཐམས་ཅད་མ་རུང་བར་བྱས་སོ། །དེ་ནས་ལྡུམ་པ་དེ་ལྡུམ་བཙོང་བའི་ཕྱིར་ནང་པར་སྔར་ལངས་ཏེ་ལྡུམ་རར་སོང་བ་དང ། ཇི་ཙམ་ན་ལྡུམ་ཐམས་ཅད་མི་གཙང་བས་གཏོར་ཅིང་ཝས་ཀྱང་ཟོས་ཏེ་ཟོང་དུ་མི་རུང་བར་མཐོང་ནས་དེ་ལག་པ་འགྲམ་པ
8.262a
ལ་གཏད་དེ་སེམས་ཁོངས་སུ་ཆུད་ཅིང་འདུག་པ་དང ། ཉེ་དགས་ཆེད་དུ་བསམས་ཏེ་ཕྱོགས་དེར་སོང་ནས་དེས་སྨྲས་པ། བཞིན་བཟངས་ཁྱོད་ཅིའི་ཕྱིར་སེམས་ཁོངས་སུ་ཆུད་ཅིང་འདུག་།དེས་སྨྲས་པ། འཕགས་པ་ལྡུམ་ཞིང་འདིར་གཅིག་གིས་མི་གཙང་བས་གཏོར་ཏེ་ཟོང་དུ་མི་རུང་བས་ད་ཇི་ལྟར་འཚོ་བ་སྦྱར་བ་བགྱི་མ་འཚལ་ཏོ། །ཉེ་དགས་སྨྲས་པ་བཀྲེན་པ་ཁྱོད་དེ་ལྟར་མི་དགའ་བར་བྱའོ། །དེ་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། མི་ན་བར་རྩཝ་སྔོན་པོ་ཡོད་པའི་ས་ཕྱོགས་སུ་བཤང་གཅི་མི་བྱ་བར་བསླབ་པར་བྱའོ། །ཐམས་ཅད་སྔོས་གང་སྟེ་གོ་སྐབས་མེད་པ་ནི་མ་གཏོགས་སོ། །བཤང་གཅི་ཇི་ལྟ་བ་བཞིན་དུ་རྩཝ་སྔོན་པོ་ཡོད་པའི་ས་ཕྱོགས་སུ་མཆིལ་མ་དང ། སྣབས་དང ། སྐྱུགས་པ་དང་རླུགས་པ་མི་དོར་བར་བསླབ་པར་བྱ་བ་ཡང་དེ་བཞིན་ནོ། །བསླབ་པ་བསྡུ་བའི་མདོ་ནི་མི་ན་བར་འགྲེང་སྟེ་བཤང་གཅི་མི་བྱ་བར་བསླབ་པར་བྱ་མི་ན་བར་ཆུའི་ནང་དུ་བཤང་གཅི་དང ། མཆིལ་མ་དང ། སྣབས་དང ། སྐྱུགས་པ་དང ། རླུགས་པ་མི་དོར་བར་བསླབ་པར་བྱ། མི་ན་བར་རྩཝ་སྔོན་པོ་ཡོད་པའི་ས་ཕྱོགས་སུ་བཤང་གཅི་དང ། མཆིལ་མ་དང ། སྣབས་དང ། སྐྱུགས་པ་དང ། རླུགས་པ་མི་དོར་བར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་ན་ཚེ་དང་ལྡན་པ་ཉེ་དགའ་ལ་དགེ་བསྐོས་ཀྱི་བསོད་སྙོམས་ནོད་པའི་རེས་བབ་ནས་དེས་བསམས་པ། གང་གིས་དགེ་བསྐོས་འདི་ཟན་གཅད་པར་བྱ་བ་དེ་ལྟ་བུའི་ཐབས་ཅི་ཡོད་སྙམ་ནས་དེ་འདི་སྙམ་དུ་སེམས་ཏེ། བདག་ལ་འགའ་ཞིག་མཉན་ཡོད་ནས་རྒྱལ་བྱེད་ཀྱི་ཚལ་ཐག་ཇི་སྲིད་ཡོད་ཅེས་འདྲི་ན་བདག་གིས་དེ་ལ་ཇི་སྐད་བརྗོད་པར་བྱས། རྣམ་པ་ཐམས་ཅད་དུ་གོམ་པ་དག་གིས་ས
8.262b
གཞི་གཞལ་བར་བྱའོ་སྙམ་ནས། དེ་གོམ་པ་དག་གིས་ས་གཞི་འཇལ་ཞིང་དལ་བུས་འོང་བ་ན་དགེ་བསྐོས་ཀྱིས་བསམས་པ། དེ་ཡུན་རིང་དུ་ཐོགས་པས་བདག་ཟན་ཆད་ན་མི་རུང་གིས་བལྟའོ་སྙམ་ནས། དེ་ཤིང་ལྗོན་པ་ཞིག་ལ་འཛེགས་ཏེ་བལྟ་བར་བརྩམས་པ་དང ། ཇི་ཙམ་ན་ཚེ་དང་ལྡན་པ་ཉེ་དགའ་དལ་བུ་དལ་བུས་འོང་བ་མཐོང་ནས་དེས་བསམས་པ། འདི་ཇི་ལྟར་འོང་བའི་སྟངས་ལས་ན་འདིས་བདག་ཟན་གཅོད་པར་བྱེད་དོ་སྙམ་དུ་རིག་ནས་དེ་ཤིང་ལྗོན་པ་དེ་ལས་བབས་ཏེ་འདུག་གོ་ཚེ་དང་ལྡན་པ་ཉེ་དགའ་ཡང་འོངས་པ་དང ། དེ་ཙམ་ན་གདུགས་ཚོད་ཡོལ་ནས་དེས་སྨྲས་པ། ཚེ་དང་ལྡན་པ་ཁྱོད་འགྲོས་དེ་ལྟ་བུར་འོང་བ་ལས་ན་དོན་གྱིས་ན་ཁྱོད་ཀྱིས་ཆེད་དུ་བསམས་ཏེ་ཁོ་བོ་ཟན་གཅོད་དུ་བཅུག་གོ་ཁྱོད་ཀྱིས་ཁོ་བོ་ཇི་ལྟར་མཐོང ། ཁོ་བོས་ཤིང་ལྗོན་པ་ལ་འཛེགས་ཏེ་བལྟས་སོ། །ཁྱོད་ཤིང་ལྗོན་པ་ལ་འཛེག་ཏུ་རུང་ངམ། རུང་ཡང་སྲིད་མི་རུང་ཡང་སྲིད་དེ། ཁོ་བོས་ནི་འཛེགས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཤིང་ལ་མི་འཛེག་པར་བསླབ་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་ཤིང་ལ་མི་འཛེག་པར་བསླབ་པར་བྱའོ་ཞེས་བཀའ་སྩལ་ནས་དགེ་སློང་དག་ཚོན་རྩིའི་ལས་བྱེད་པར་འདོད་པས་གཟར་ཐག་གང་དུ་གདགས་པ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཤིང་ལ་མི་གང་ཙམ་དུ་འཛེག་པར་བྱ་སྟེ། དེ་ལྟ་བས་ན་དགེ་སློང་གིས་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱའོ་ཞེས་བཀའ་སྩལ་ནས། དགེ་སློང་ཞིག་དོན་འཐུན་དང་ལྷན་ཅིག་ལྗོངས་རྒྱུར་འཕགས་པ་དང ། དོན་འཐུན་དགོན་པའི་ལམ་དུ་མཚན་མོ་བཏབ་པ་ན་དེར་སྟག་གི་འཇིགས་པ་བྱུང་ནས། དོན་འཐུན་དག་ནི་ཤིང་ལྗོན་པ་ལ་མཐོར་འཛེགས་ཏེ་འཁོད་དོ། །དགེ་སློང་དེ་ཤིང་ལྗོན་པ་ལ་མི་གང་ཙམ་དུ་འཛེགས་ཏེ་འདུག་པ་དང ། ཇི་ཙམ་ན་སྟག་འོངས་ནས་དོན་འཐུན་རྣམས་ཀྱིས་སྨྲས་པ། འཕགས་པ་སྟག་མཆིས་ཀྱིས
8.263a
མྱུར་དུ་མཐོར་འཛེགས་ཤིག་།དེས་བསམས་པ། བཅོམ་ལྡན་འདས་ཀྱིས་ཤིང་ལ་མི་གང་ཙམ་ལས་མཐོར་འཛེགས་པར་མ་གནང་བས་ཇི་ལྟར་མཐོར་འཛེག་སྙམ་ནས་དེ་དེ་ཉིད་དུ་འདུག་པ་དང ། སྟག་གིས་མཆོངས་པ་བྱས་ཏེ་བསད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱའོ། །བསླབ་པའི་ཆོས་མང་པོ་རྣམས་རྫོགས་སོ།། ་་་་་་་་་་་་།། སྡོམ་ལ། མངོན་སུམ་དྲན་པ་མ་མྱོས་པ། །དེ་བཞིན་གང་མང་ངོ་བོ་ཉིད། །རྩཝ་རྣམས་བཀྲམ་པ་ལྟ་བུ་དང ། །ཁས་བླངས་པར་ཡང་བྱ་བའོ། །མངོན་སུམ་དུ་འདུལ་བར་འོས་པ་ལ་མངོན་སུམ་དུ་འདུལ་བ་སྦྱིན་ནོ། །དྲན་པས་འདུལ་བར་འོས་པ་ལ་དྲན་པས་འདུལ་བ་སྦྱིན་ནོ། །མ་མྱོས་པས་འདུལ་བར་འོས་པ་ལ་མ་མྱོས་པས་འདུལ་བ་སྦྱིན་ནོ། །གང་ཚུལ་ཤིང་མང་པོ་སྦྱིན་པར་འོས་པ་ལ་ཚུལ་ཤིང་མང་པོ་སྦྱིན་ནོ། །དེའི་ངོ་བོ་ཉིད་ཚོལ་དུ་གཞུག་པར་འོས་པ་ལ་དེའི་ངོ་བོ་ཉིད་བཙལ་བ་སྦྱིན་ནོ། །རྩཝ་བཀྲམ་པ་ལྟ་བུར་འོས་པ་ལ་རྩཝ་བཀྲམ་པ་ལྟ་བུ་སྦྱིན་ནོ། །གང་ཁས་བླང་བར་འོས་པ་ལ་ཁས་བླང་བར་བྱའོ། །རྩོད་པ་བྱུང་བར་གྱུར་པ་རྣམས་རྩོད་པ་ཞི་བར་བྱ་བའི་ཆོས་བདུན་པོ་འདི་དག་གིས་ཆོས་དང ། འདུལ་བ་དང ། སྟོན་པའི་བསྟན་པ་བཞིན་དུ་དུལ་བར་བྱ། ཞི་བར་བྱ། རྣམ་པར་ཞི་བར་བྱའོ། །རྩོད་པ་ཞི་བར་བྱ་བའི་ཆོས་བདུན་རྫོགས་སྷོ།། ་་་་་་་་་་་།།བཟོད་པ་དཀའ་ཐུབ་དམ་པ་བཟོད་པ་ཡི། །མྱ་ངན་འདས་པ་མཆོག་ཅེས་སངས་རྒྱས་གསུང ། །རབ་ཏུ་བྱུང་བ་གཞན་ལ་གནོད་པ་དང ། །གཞན་ལ་འཚེ་བ་དགེ་སྦྱོང་མ་ཡིན་ནོ། །མིག་ལྡན་འགྲོ་བ་ཡོད་པ་ཡི། །ཉམ་ང་བ་དག་ཇི་བཞིན་དུ། །མཁས་པ་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ
8.263b
སྤོང ། །སྐུར་པ་མི་གདབ་གནོད་མི་བྱ། །སོ་སོར་ཐར་པ་འང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །བས་མཐའི་གནས་སུ་གནས་པར་བྱ། །ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཇི་ལྟར་བུང་བ་མེ་ཏོག་ལས། །ཁ་དོག་དྲི་ལ་མི་གནོད་པར། །ཁུ་བ་བཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །བདག་གི་རིགས་དང་མི་རིགས་ལ། །བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དང་གཞན་དག་གི་།བྱས་དང་མ་བྱས་རྣམས་ལ་མིན། །ལྷག་པའི་སེམས་ལ་བག་བྱས་ཏེ། །ཐུབ་པའི་ཐུབ་གཞི་རྣམས་ལ་བསླབ། །ཉེར་ཞི་རྟག་ཏུ་དྲན་ལྡན་པའི། །སྐྱོབ་པ་མྱ་ངན་མེད་པ་ཡིན། །སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སོགས་མི་འབྱུང་ངོ ། །དགེ་དང་ལྡན་པས་སྡིག་པ་སྤོང ། །ཉོན་མོངས་ཟད་པས་མྱ་ངན་འདའ། །སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་འང་ལེགས་པ་ཡིན། །ཡིད་ཀྱི་སྡོམ་པ་འང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་དུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་འགྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང ། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་འཐོབ་པར་འགྱུར། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུང་དང ། །ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །མི་འདུལ
8.264a
ཁ་ལོ་བསྒྱུར་བ་བླ་ན་མེད། །འཇིག་རྟེན་མགོན་པོ་སྐྱོབ་པ་མཆོག་།སངས་རྒྱས་དཔའ་བོ་བདུན་པོ་དག་།གྲགས་ལྡན་རྣམས་ཀྱིས་སོ་སོར་ཐར། །འདི་ནི་རབ་ཏུ་རྒྱས་པར་བསྟན། །འདི་ལ་སངས་རྒྱས་རྣམས་དང་གང ། །སངས་རྒྱས་ཉན་ཐོས་རྣམས་ཀྱང་གུས། །འདི་ལ་གུས་དང་བཅས་གྱུར་པས། །འདུས་མ་བྱས་པ་ཐོབ་པར་གྱིས། །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །འདུལ་བ་རྣམ་པར་འབྱེད་པ། རྫོགས་སྷོ།། །།དབང་ཕྱུག་དམ་པའི་མངའ་བདག་དཔལ་ལྷ་བཙན་པོའི་བཀའ་ལུང་གིས། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཁ་ཆེའི་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང ། ཞུ་ཆེན་གྱི་ལོཙྪ་བ་བན་དེ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ། འདི་ལ་ཤུ་ལོ་ཀ་ནི་ཉི་ཁྲི་ལྔ་སྟོང་ཡོད། བམ་པོ་ནི་བརྒྱད་བཅུ་རྩ་གསུམ་བྱས་སོ།། །།མཾ`་ག་ལཾ`།། །།