མཁར་སིལ་འཆང་བའི་ཀུན་ཏུ་སྤྱོད་པའི་ཆོ་ག ། མཁར་སིལ་ཡང་དག་པར་ལེན་པར་འདོད་པས། བཙུན་པ་ཞིག་དྲུང་དུ་པུས་མོ་བཙུགས་ཏེ་འདི་སྐད་དུ་བྱའོ། །བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དེང་བཙུན་པ་ལས་མཁར་སིལ་འཆང་བའི་སློབ 67.292a དཔོན་དུ་གསོལ་ལོ་ཞེས་ལན་གསུམ་དུ་བཟླས་པར་བྱའོ། །དེས་ཀྱང་འདི་སྐད་དུ་དགོངས་ཤིག་།ཚེ་དང་ལྡན་པ་ཁྱོད་བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་མཁར་སིལ་ཡང་དག་བླངས་ཏེ་ཆོས་བཞིན་དུ་སྤྱོད་པར་བྱེད་དམ། ལག་པ་ཡོངས་སུ་མི་གཙང་བས་དེ་བཟུང་བར་མི་བྱ། དགེ་འདུན་གྱི་གནས་སུ་འཇུག་པའི་ཚེ་མགོ་དང་མ་རྩེ་དབྱུང་བར་བྱས་ལ་གཞག་པར་མི་བྱ། གལ་ཏེ་ཁྱིམ་པའི་ཁྱིམ་དུ་འཇུག་ན་མ་རྩེ་རྒྱབ་ལོགས་སུ་བསྟན་པར་བྱ། གལ་ཏེ་སྔ་དྲོ་ཁྱིམ་པའི་ཁྱིམ་དུ་བསོད་སྙོམས་ལ་འགྲོ་དགོས་པའི་རྐྱེན་ཚོགས་བྱུང་ན་མཁར་སིལ་ལན་གསུམ་དུ་དཀྲོལ་བར་བྱའོ། །ལན་གསུམ་དུ་དཀྲོལ་ཏེ་མ་འོངས་ན་ལན་ལྔའི་བར་དུ་དཀྲོལ་བར་བྱའོ། །ལན་ལྔའི་བར་དུ་དཀྲོལ་ཏེ་མ་འོངས་ན་ལན་བདུན་གྱི་བར་དུ་དཀྲོལ་བར་བྱའོ། །ལན་བདུན་གྱི་བར་དུ་དཀྲོལ་ཏེ་མ་འོངས་ན་ཁྱིམ་གཞན་དུ་ལན་བདུན་གྱི་བར་དུ་དཀྲོལ་བར་བྱའོ། །ཁྱིམ་བདུན་གྱི་བར་དུ་ཕྱིན་ཏེ་ཆོག་པར་གྱུར་ན་ཡང་དེར་ཟས་ཀྱི་བྱ་བ་བྱའོ་ཞེས་ལན་གསུམ་གྱི་བར་དུ་བཟླས་པར་བྱའོ། །མཁར་སིལ་བཅང་བའི་ཆོས་ནི་ཉི་ཤུ་རྩ་ལྔ་ཡོད་དེ། ས་ལ་སྦྲུལ་ཡོད་པ་བསྲུང་བའི་ཕྱིར་བཅང་བར་བྱ་བ་དང ། རྒལ་བའི་ཕྱིར་བཅང་བར་བྱ་བ་དང ། བསོད་སྙོམས་སྤྱོད་པའི་ཕྱིར་བཅང་བར་བྱ་བ་དང ། འབྱུང་ཞིང་འཇུག་པ་ན་ཡང་སྐུ་གཟུགས་མཐོང་བའི་ཚེ་སྒྲ་དབྱུང་བར་བྱ་བ་དང ། མཁར་སིལ་ཐོགས་ནས་དགེ་འདུན་གྱི་ནང་དུ་འཇུག་པར་མི་བྱ་བ་དང ། དྲོ་ཡོལ་ཕན་ཅད་མཁར་སིལ་ཐོགས་ནས་འགྲོ་བར་མི་བྱ་བ་དང ། ཕྲག་པ་གཉིས་ལ་བཀལ་ཏེ་མགོ་བོ་གཉིས་ལ་དཔྱང་བར་མི་བྱ་བ་དང ། ཕྲག་པར་བསྐུར་བར་མི་བྱ་བ་དང ། ལག་པས་སྐྱོག་པར་མི་བྱ་བ་དང ། མཁར་སིལ་ཐོགས་ནས་བཤང་ཅིའི་སར་འགྲོ་བར་མི་བྱ་བ་དང ། མཁན་པོ་དང་སློབ་དཔོན་མཁར་སིལ་ཐོགས་ཏེ་འགྲོ་བའི་རྗེས་བཞིན་དུ་འགྲོ་བར་མི་བྱ་བ་དང ། གང་ཟག་བཞི་ཡན་ཆོད་མཁར་སིལ་ཐོགས་ཏེ་འགྲོ་བའི་རྗེས་ནས་མཁར་སིལ་ཐོགས་ཏེ་འགྲོ་བར་མི་བྱ་བ་དང ། ཡོན་བདག་གི་ཁྱིམ་དུ་ཕྱིན་ན་མཁར་སིལ་ལུས་དང་བྲལ་བར་མི་བྱ་བ་དང ། ཡོན་བདག་གི 67.292b སྒོར་ཕྱིན་པ་དང་ལན་གསུམ་གྱི་བར་དུ་དཀྲོལ་བར་བྱའོ། །གལ་ཏེ་མ་འོངས་ན་ལན་ལྔའི་བར་དུ་དཀྲོལ་བར་བྱའོ། །ལན་དེ་ལྔའི་བར་དུ་དཀྲོལ་ཏེ་མ་འོངས་ན་ལན་བདུན་གྱི་བར་དུ་དཀྲོལ་བར་བྱའོ། །ལན་བདུན་གྱི་བར་དུ་དཀྲོལ་ཏེ་མ་འོངས་ན་ཁྱིམ་གཞན་དུ་དཀྲོལ་བར་བྱ་བ་དང ། བདག་ཕྱིར་ཕྱུང་ན་མཁར་སིལ་ལག་པ་གཡས་པ་ལ་བསྙེས་ཏེ་གཞག་པར་བྱ་བ་དང ། གནས་ཁང་ན་གཞག་པའི་ཚེ་ས་ལ་རེག་པར་མི་བྱ་བ་དང ། རྟག་ཏུ་གར་ཉལ་བའི་ཁྲིའི་དྲུང་དུ་ཉེ་བར་བཞག་པར་བྱ་བ་དང ། སྐབས་སྐབས་སུ་ཕྱི་བདར་བྱ་བ་དང ། མཁར་སིལ་གྱི་མགོ་ཡ་ཡོ་མེད་པར་བྱ་བ་དང ། བསོད་སྙོམས་ལ་འགྲོ་བའི་ཚེ་དགེ་ཚུལ་ལམ་ཁྱིམ་པ་ལས་བྲལ་བར་མི་བྱ་བ་དང ། ནད་པའི་སར་མཚན་མོ་གནས་ན་མཁར་སིལ་བསྐུར་བར་བྱ་བ་དང ། ལམ་རིང་པོར་སྐྱེལ་དུ་འགྲོ་ན་མཁར་སིལ་བསྐུར་བར་བྱ་བ་དང ། ལམ་རིང་པོ་ནས་འགྲོན་དུ་གཉེར་བ་ཡོད་དེ། དེར་འགྲོ་ཞིང་འདུག་དགོས་པར་གྱུར་ན་མཁར་སིལ་བསྐུར་བར་བྱ་བ་དང ། ག་ཤེད་དུ་འགྲོ་དགོས་པར་གྱུར་ན་མཁར་སིལ་བསྐུར་བར་བྱ་བ་དང ། བདག་གི་དྲུང་དུ་བསྙེན་པར་བྱ་བའི་ཕྱིར་གཞན་ལ་རེག་ཅིང་ས་ལ་རི་མོ་བྲི་བར་བྱའོ། །མཁར་སིལ་འཆང་བའི་ཀུན་ཏུ་སྤྱོད་པའི་ཆོ་ག་རྫོགས་སོ།། །། |