rKTs


J165

(e-text produced by ADARSHA)

see text in transliteration
58.94a
༄#། ་་།རྒྱ་གར་སྐད་དུ། ཨཱརྱ་མ་ཧཱ་བྷེ་རཱི་ཧ་ར་ཀ་པ་རི་བརྟ་ནཱ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་རྔ་བོ་ཆེ་ཆེན་པོའི་ལེའུ་ཞེས་བྱ་བ་ཐེག་པ་ཆེན་པོའི་མདོ། ་བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་སྟོང་ཉིས་བརྒྱ་ལྔ་བཅུ་དང་ཐབས་གཅིག་ཏུ་བཞུགས་ཏེ། བྱང་ཆུབ་སེམས་དཔའ་རྒྱ་སྟོང་མང་པོ་དག་དང་ཐབས་གཅིག་གོ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་མང་པོ་དང་ཡང་ཐབས་གཅིག་གོ། །དགེ་བསྙེན་དང ། དགེ་བསྙེན་མ་བརྒྱ་སྟོང་མང་པོ་དང་ཡང་ཐབས་གཅིག་གོ། །མི་མཇེད་ཀྱི་བདག་པོ་ཚངས་པ་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དག་དང་ཡང་ཐབས་གཅིག་གོ། །འདི་ལྟ་སྟེ། ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་བྱང་ཆུབ་སེམས་དཔའ་དུ་མ་དང་ཡང་ཐབས་གཅིག་གོ། །དེ་ན་དེ་བཞིན་གཤེགས་པ་ཆོས་སྟོན་པ་ནི་འདི་ལྟ་སྟེ། འཁོར་བཞི་པོ་རྣམས་ཀྱི་ནང་དུ་འདི་ལྟ་བུའི་ཆོས་ཀྱི་གཏམ། སྲིད་ཡོད་བདེ་དང་སྡུག་བསྔལ་ཏེ། །ཟད་དང་རྟེན་ཡོད་མ་ཡིན་ནོ། །དེ་ལྟས་བདེ་སྡུག་སྤངས་པའི་ཕྱིར། །མྱ་ངན་འདས་པ་མཆོག་ཏུ་བདེ། །ཞེས་སྟོན་པར་མཛད་དོ། །འདིར་སྨྲས་པ། ཅིའི་ཕྱིར་བཅོམ་ལྡན་འདས་ལ་དེ་བཞིན་གཤེགས་པ་དགེ་སློང་ལྔ་བརྒྱ་ཙམ་དང་ཐབས་གཅིག་ཏུ་བཞུགས་སོ་ཞེས་བྱ་བ་དེའི་གཏན་ཚིགས་བརྗོད་པར་བྱ་སྟེ། ཅིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་མང་པོ་དང ། འཁོར་མང་པོའི་གཙོ་བོ་དང་ལྡན་པ།
58.94b
འཁོར་རྟག་ཏུ་མི་ཕྱེད་པ། རྨད་དུ་བྱུང་བའི་ཆོས་དང་ཆོ་འཕྲུལ་མང་པོ་མངའ་བའོ་ཞེས་སྒྲ་གྲགས། གལ་ཏེ་དེ་ལྟ་ན་ནི་འཁོར་ལྔ་བརྒྱར་ཟད་ན། བཅོམ་ལྡན་འདས་འཁོར་བྱེ་བ་ཅན་དུ་འགྱུར་རོ། །ཡང་འདིར་སྨྲས་པ། འདུལ་བ་ཐམས་ཅད་ལ་མངའ་སྒྱུར་བའི་སྟོབས་མངའ་བས་མཉན་ཡོད་ན་དེ་བཞིན་གཤེགས་པ་དགེ་སློང་ལྔ་བརྒྱ་དང་ཐབས་གཅིག་ཏུ་བཞུགས་སོ་ཞེས་ཚིག་ཏུ་གསུངས་པ། ཅི་དཔེར་ན་མས་བུ་ཁུར་དུ་ཐོགས་ཏེ་རང་གི་ཡུལ་ནས་ཡུལ་གཞན་དུ་འགྲོ་བ་ན་རང་གི་བུ་སྤྲོ་བསྲིང་བའི་ཕྱིར་བུ་གྲོང་འདི་ཉེའོ་ཞེས་བྱ་བའི་ཚིག་སྨྲ་བ་དེ་བཞིན་དུ། སངས་རྒྱས་བཅོམ་ལྡན་འདས་འགྲོ་བ་རྗེས་སུ་སྲུང་བ་རྣམས་དགེ་སློང་ལྔ་བརྒྱ་ཙམ་དང་ཐབས་གཅིག་གོ་ཞེས་བྱ་བ་ཡིན་ནམ་ཞེ་ན། དེ་དག་ལ་སྨྲས་པ། དགེ་སློང་དག་ཆོས་ཀྱི་གཏམ་འདི་ནི་ལན་གསུམ་དུ་བཟླས་པ་ཡིན་ཏེ། དེ་བས་ན་དགེ་སློང་ལྔ་བརྒྱ་ཙམ་ཞེས་བྱ་བ་དེ་དག་ནི་སྐྱེས་བུའི་གཙོ་བོ་རྣམས་ཡིན་པར་རིག་པར་བྱ་སྟེ། དོན་གཞན་ནི་མ་ཡིན་ནོ། །དཔེར་ན་ཁྱུ་མཆོག་རེ་རེ་ལ་ཡང་བ་ལང་གི་ཚོགས་ཡོད་པ་བཞིན་དུ་སྐྱེས་བུའི་གཙོ་བོ་ལ་ཡང་སློབ་མ་ལྔ་བརྒྱ་ཡོད་དེ། རེ་རེ་ལ་ཡང་སློབ་མ་ལྔ་བརྒྱ་ལྔ་བརྒྱ་ཡོད་དོ། །དེ་ལྟ་བས་ན་ཉན་ཐོས་ཆེན་པོ་ལྔ་བརྒྱ་ཙམ་ཞེས་བྱ་སྟེ། འདི་ལྟ་སྟེ། འོད་སྲུང་ཆེན་པོ་དང ། དེ་བཞིན་དུ་ཀུན་དགའ་བོ་ལ་སོགས་པ་ཉན་ཐོས་ཆེན་པོ་ལྔ་བརྒྱ་ཙམ་པོ་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ་དབང་དུ་གྱུར་པ། གླང་པོ་ཆེན་པོ། ཅང་ཤེས་པ། སེམས་ཤིན་དུ་རྣམ་པར་གྲོལ་བ། ཤེས་རབ་ཤིན་དུ་རྣམ་པར་གྲོལ་བ། བྱ་བ་བྱས་པ། བྱེད་པ་བྱས་པ། ཁུར་བོར་བ་བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ། སེམས་ཀྱི་དབང
58.95a
ཐམས་ཅད་ཀྱི་དམ་པའི་ཕ་རོལ་དུ་ཕྱིན་པ་རྗེས་སུ་ཐོབ་པ། མི་སློབ་པ་རྣམས་དང ། སློབ་པ་རྒྱུན་དུ་ཞུགས་པ་དང ། ལན་གཅིག་ཕྱིར་འོང་བ་དང ། ཕྱིར་མི་འོང་བའི་འབྲས་བུ་ལ་གནས་པ་ལ་སོགས་པ་དཔག་ཏུ་མེད་པ་རྣམས་དང ། ཟག་པའི་ཆོས་ཅན་གྱི་དགེ་སློང་གི་ཚོགས་དུ་མ་དག་དང ། ཡོན་ཏན་བརྒྱ་སྟོང་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་ཅིང་དཔག་ཏུ་མེད་པའི་ཕྱོགས་བཅུ་ནས་ལྷགས་པ་གང་ཡིན་པ་དེ་དག་གི་ཚད་ཀྱང་འཇམ་དཔལ་མ་གཏོགས་པ་རྩིས་མཁན་ནམ། རྩིས་མཁན་གྱི་སློབ་མས་ཀྱང་བགྲང་བར་མི་ནུས་ཤིང་ཉན་ཐོས་དང ། རང་སངས་རྒྱས་རྣམས་ཀྱིས་ཀྱང་མི་ནུས་པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང ། འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དང ། བྱང་ཆུབ་སེམས་དཔའི་ཚོགས་ཚད་མེད་གྲངས་མེད་པ་དཔེར་ན་ཤིང་ཆེན་པོ་སྣད་པའི་ཤིང་ཤུན་རྣམས་འབྱུང་བ་དེ་བཞིན་དུ་ས་ཆེན་པོ་འདི་ཤུན་པ་བཞིན་དུ་བརྟུལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་ཅིང་གྲངས་མེད་པ་གང་ཡིན་དེ་དག་གི་ཚད་ཀྱང་རྩིས་མཁན་ནམ། རྩིས་མཁན་གྱི་སྣ་ཆེན་པོ་ལ་གཏོགས་པ་རྣམས་ཀྱིས་ཀྱང་བརྗོད་པར་མི་ནུས་པ་ལྷགས་པ་རྣམས་དང ། སྲིང་མོའི་ཚོགས་དགེ་སློང་མ་དེས་མ་ལ་སོགས་པ་དང ། རི་དགས་འཛིན་གྱི་མ་ས་ག་དང ། བཙུན་མོ་ཕྲེང་ལྡན་མ་ལ་སོགས་ཏེ། དགེ་བསྙེན་མ་དུ་མ་དང ། ཁྱིམ་བདག་བཟང་སྦྱིན་ལ་སོགས་པ་དགེ་བསྙེན་དུ་མ་དག་སྟེ། བཅོམ་ལྡན་འདས་དེ་བཞིན་གཤེགས་པ་འཁོར་མང་པོ་དེ་དག་ཐམས་ཅད་ཀྱི་གུང་ལ་བཞུགས་ནས་བཅོམ་ལྡན་འདས་ཆོས་ཀྱི་སྒོ་སྟོན་ཏོ། །དེ་ནས
58.95b
དེའི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་རང་གི་མལ་ནས་ལངས་ཏེ་བསམས་པ། བཅོམ་ལྡན་འདས་ཀྱི་སྤྱན་སྔར་འགྲོ་བར་བྱའོ་སྙམ་ནས་དེ་ནས་དེ་རང་གི་མལ་ནས་ལངས་པ་དང་རྒྱལ་པོ་གཤེགས་སོ་ཞེས་རྔ་བོ་ཆེ་ཆེན་པོ་དག་ནི་རྡུང ། དུང་དག་ནི་འབུད། གདུགས་དང ། རྒྱལ་མཚན་དང ། བ་དན་མང་པོ་བསྒྲེང་བ་དག་ནི་ནམ་མཁའ་ལ་ཉི་མའི་འོད་བཞིན་དུ་ཀུན་དུ་སྣང་ངོ ། །བཅོམ་ལྡན་འདས་ནི་མཁྱེན་བཞིན་དུ་རྨེད་པ་ཡིན་པས་དེ་ནས་དེ་ན་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་རྔ་བོ་ཆེ་ཆེན་པོ་དག་གི་སྒྲ་དང ། དུང་དག་གི་སྒྲ་གྲག་པ་འདི་ཅི་ཞིག་།ཀུན་དགའ་བོས་གསོལ་པ། བཅོམ་ལྡན་འདས་ས་སྐྱོང་བའི་རྒྱལ་པོ་གསལ་རྒྱལ་དམ་པ་འདིར་མཆིས་ཏེ། དེའི་རྔ་བོ་ཆེ་དག་བརྡུངས་པའི་སྒྲ་ཆེན་པོ་འབྱིན་པ་ལགས་སོ། །བཀའ་སྩལ་པ། ཀུན་དགའ་བོ་ཅིའི་ཕྱིར་རྔ་བོ་ཆེའི་སྒྲ་འབྱིན། གསོལ་པ། དང་རྒྱལ་པོ་ཤཱཀྱའི་མགོན་པོ་བལྟ་ཞིང་མཆི་བ་དེས་རང་གི་དཔུང་ལ་བཅོམ་ལྡན་འདས་ཀྱི་སྤྱན་སྔར་འདེང་གིས་ཆོས་ཤིག་ཅེས་གོ་བར་བགྱིད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ཀྱང་ཆོས་ཀྱི་རྔ་བོ་ཆེ་བརྡུངས་ལ་ཆོས་ཀྱི་དུང་བུས་ཤིག་དང ། ངས་དེ་ནས་རྔ་བོ་ཆེ་ཆེན་པོ་ཞེས་བྱ་བའི་ཆོས་ཀྱི་མདོ་བཤད་དོ། །གསོལ་པ། བཅོམ་ལྡན་འདས་བདག་གི་རྔ་བོ་ཆེ་ཆེན་པོ་ཞེས་བགྱི་བའི་མདོ་སྔོན་ནམ་ཡང་མ་ཐོས་ལགས་ན་རྔ་བོ་ཆེ་ཆེན་པོ་ཞེས་བྱ་བའི་ཆོས་དེ་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཅི་ཁྱོད་ཀྱིས་ཤེས་པར་འགྱུར་སྙམ་འམ། རེ་ཤིག་ཕྱོགས་བཅུ་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ཐམས་ཅད་ཀྱིས་ཀྱང་འདི་ལྟར་རྔ་བོ་ཆེ་ཆེན་པོའི་མདོ་ཡིག་འབྲུ་བཞི་ཙམ་ཡང་མི་ཤེས་ན། ཁྱོད་ཀྱིས
58.96a
ལྟ་སྔོན་མ་ཐོས་པ་ཇི་ལྟར་ཤེས། གསོལ་པ། བཅོམ་ལྡན་འདས་ཆོས་འདི་དེ་ལྟར་རྙེད་དཀའ་བ་ནི་ངོ་མཚར་ཆེ་ལགས་སོ། །དེ་བཞིན་གཤེགས་པས་བཀའ་སྩལ་པ། ཀུན་དགའ་བོ་མདོ་འདི་ནི་ཤིན་དུ་རྙེད་པར་དཀའ་སྟེ། ཀུན་དགའ་བོ་རྔ་བོ་ཆེ་ཆེན་པོའི་མདོ་ཆེན་པོ་འདི་ནི་འདི་ལྟ་སྟེ་དཔེར་ན། འཇིག་རྟེན་ན་མེ་ཏོག་ཨུ་དུམ་བ་ར་རྙེད་པ་བཞིན་ནོ། །གསོལ་པ། བཅོམ་ལྡན་འདས་ཅི་ལགས། འདི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཉིད་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འདི་ནི་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡང་ཆོས་ཉིད་ཡིན་ནོ། །གསོལ་པ། གལ་ཏེ་འདི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཉིད་ལགས་ན་ཅིའི་སླད་དུ་སངས་རྒྱས་བཅོམ་ལྡན་འདས་དེ་དག་གིས་རང་རང་གི་སངས་རྒྱས་ཀྱི་ཞིང་དེ་དང་དེ་དག་ཏུ་མ་བཤད་ཅིང་རབ་ཏུ་མ་བསྟན་ལ། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་མཆོག་འདི་དག་འདིར་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དཔེར་ན་འདི་ན་དགེ་སློང་དགོན་པ་པ་འགའ་ཞིག་རི་བོ་འམ། འབབ་ཆུའི་འགྲམ་འམ། ཕུག་ཅིག་ན་འདུག་འདུག་པ་ལས་ནམ་ནངས་ནས་གྲོང་ངམ། གྲོང་ཁྱེར་ཞིག་ཏུ་བསོད་སྙོམས་ཀྱི་ཕྱིར་སོང་ན་དེས་སྦྲུལ་ལམ། ཁྱི་འམ། མི་ཤི་བའི་རོ་འམ། ཤི་བའི་རོ་གང་ཡང་རུང་བ་མཐོང་ངོ ། །དེས་དེ་མཐོང་ནས་ཨེ་མའོ་ཀྱི་ཧུད་ཨེ་མའོ་ཀྱི་ཧུད་བདག་ཀྱང་ཡུན་རིང་པོར་འཁོར་བར་འཁོར་བ་ན། འདི་ལྟ་བུའི་གནས་སྐབས་དག་ཉམས་སུ་མྱོང་བར་གྱུར་པས་ད་སྲིད་པ་ནི་ཐ་ཆད་ཡིན་ནོ་ཞེས་བྱ་བར་གྱུར་ཏོ། །དེ་ནས་དེ་དུས་གཞན་ཞིག་ན་སྙིང་དགའ་བར་འགྱུར་བའི་ཆོས་འགའ་ཞིག་གིས་ཡིད་བདེ་བ་དང ། དེ་ནས་ཡང་མི་སེམས་པ་ལས་ཡང་དེས
58.96b
རོ་མཐོང་སྟེ། དེ་མཐོང་བ་ན་དེ་ཡིད་བྱུང་བར་གྱུར་ནས་དེ་ཕྱིར་ཞིང་གྲོང་ཁྱེར་རམ། རི་འོར་རམ། ལུང་པའི་མདོར་རྒྱུ་ཞིང ། དེ་དེ་ལྟར་རྒྱུ་བ་ན་ཤི་ནས་ཞག་གཅིག་ལོན་པ་འམ། ཤི་ནས་ཞག་གཉིས་ལོན་པ་འམ་ཞེས་བྱ་བ་ནས། མི་རོ་མཐོང་ན་ཞེས་བྱ་བའི་བར་གོང་མ་བཞིན་དུ་སྟེ། དེ་མཐོང་བ་ཁོ་ནས་འབྲས་བུའི་མཆོག་དགྲ་བཅོམ་པ་མངོན་སུམ་དུ་བྱེད་པ་དེ་བཞིན་དུ་འཇིག་རྟེན་གྱི་ཁམས་གཞན་དག་ན་སངས་རྒྱས་བཅོམ་ལྡན་འདས་རྣམས་སྡུག་བསྔལ་གྱི་གཏམ་ཡང་མི་གསུང ། མི་རྟག་པའི་གཏམ་ཡང་མི་གསུང ། བདག་མེད་པ་དང ། མི་གཙང་བའི་གཏམ་ཡང་མི་གསུང་ངོ ། །དེ་ཅིའི་ཕྱིར་ཞེ་ན། འདི་ནི་དེ་དག་གི་ཆོས་ཉིད་ཡིན་ཏེ། དེ་ན་སངས་རྒྱས་བཅོམ་ལྡན་འདས་ཇི་སྙེད་བཞུགས་པ་དེ་དག་གིས་དགོས་པའི་དོན་དུ་ནི་རང་རང་གི་སངས་རྒྱས་ཀྱི་ཞིང་དག་ན་འཁོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་སྐད་ཅེས་རིགས་ཀྱི་བུ་དག་རེ་ཤིག་སངས་རྒྱས་བཅོམ་ལྡན་འདས་རྣམས་སེམས་ཅན་རྣམས་ཀྱི་དོན་དུ་ཞིང་གི་སྙིགས་མ་སྙིགས་མ་ལྔ་ཅན་གྱི་སངས་རྒྱས་ཀྱི་ཞིང་འདི་འདྲ་བར་འབྱུང་བ་ནི་དཀའ་བ་མཛད་པ་ཡིན་ཏེ། དེ་ལྟ་བས་ན་རིགས་ཀྱི་བུ་དག་ཁྱོད་ཀྱིས་ཀྱང་དེ་ལྟར་བསླབ་པར་བྱའོ་ཞེས་རབ་ཏུ་འཇོག་པར་མཛད། འདོམས་པར་མཛད་དོ། །དེ་ནས་དེ་དག་ལྟ་འདོད་ཅིང་ཕྱག་བྱེད་པར་འདོད་པར་འགྱུར་ཏེ། དེ་དག་ལྟ་འདོད་ཅིང་ཕྱག་བྱེད་པར་འདོད་པ་ན་དེ་དག་གིས་དེ་རྣམས་ཉེ་བར་བསྟན་པས་དེའི་ཕྱིར་དེ་དག་མི་མཇེད་ཀྱི་འཇིག་རྟེན་གྱི་ཁམས་འདིར་འོང་བར་འགྱུར་ཞིང་འོངས་ནས་ཁ་ཅིག་ནི་ས་དང་པོ་ཐོབ་པར་འགྱུར། ཁ་ཅིག་གིས་ནི་ས་བདུན་པ་དང ། བརྒྱད་པ་དང ། དགུ་པ་དང ། བཅུ་པའི་བར་དག་ཀྱང་ཐོབ་པར་འགྱུར་རོ། །ཀུན་དགའ་བོ་དེ་ལྟ་བས་ན་རྔ་བོ་ཆེ་ཆེན་པོ་ཞེས་བྱ་བའི་མདོ་འདི་ནི་ཤིན་དུ་རྙེད་པར་དཀའ་བ་ཡིན་ཏེ། ཕྱོགས་བཅུ་ནས་ལྷགས་པའི་འཁོར་འདི་དག་ཐམས་ཅད་ཉན
58.97a
པར་འདོད་པ་ཡང་དེའི་ཕྱིར་རོ། །ཀུན་དགའ་བོས་གསོལ་པ། བཅོམ་ལྡན་འདས་ལེགས་སོ། །ཐམས་ཅད་ལྷགས་པ་ལེགས་སོ། །ལྷགས་པ་ལེགས་སོ། །འདི་དག་ཐམས་ཅད་ཀྱིས་ཤིན་དུ་རྙེད་པར་དཀའ་བའི་མདོ་འདི་འདྲ་བ་ཐོབ་པར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཐམས་ཅད་ཀྱི་ཐུན་མོང་ལྟར་མདོ་འདི་ཐུན་མོང་མ་ཡིན་པས་ལྷགས་པ་ལེགས་སོ་ཞེས་ཚིག་ཏུ་མ་བརྗོད་ཅིག་།གསོལ་པ། བཅོམ་ལྡན་འདས་ཅིའི་སླད་དུ་ཐམས་ཅད་ལྷགས་པ་ལེགས་སོ། །ལྷགས་པ་ལེགས་སོ་ཞེས་མི་བགྱི་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མདོ་འདི་ནི་ཟབ་ཅིང་རྟོགས་པར་དཀའ་བ། ཡིད་ཆེས་ཤིང་དད་པར་དཀའ་བ། སངས་རྒྱས་ཀྱི་གསང་བ་ཡིན་ཏེ། ཀུན་དགའ་བོ་དེའི་ཕྱིར་འོངས་པ་དང་མ་འོངས་པ་ཐམས་ཅད་ལ་ལྷགས་པ་ལེགས་སོ་ལྷགས་པ་ལེགས་སོ་ཞེས་ཚིག་ཏུ་མ་བརྗོད་ཅིག་།གསོལ་པ། བཅོམ་ལྡན་འདས་ཅི་ལགས། ཡུལ་ཀོ་ས་ལའི་རྒྱལ་པོ་གསལ་རྒྱལ་གཡུལ་འགྱེད་པའི་དུས་སུ་རྔ་བོ་ཆེའི་སྒྲ་འབྱིན་པ་དང ། ཁར་དཀྲོལ་རྡེབས་པ་དེའི་ཚེ་དཔུང་གི་ཚོགས་ཐམས་ཅད་ཀྱི་མ་ལགས་སམ་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རྔ་བོ་ཆེ་དེ་ཉིད་གང་གི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་ཕ་རོལ་གྱི་དཔུང་དང་ལྷན་ཅིག་གཡུལ་འགྱེད་པ་དེའི་དུས་སུ་ཇི་ཙམ་ན་རྔ་བོ་ཆེའི་སྒྲ་བྱུང་བ་དེའི་ཚེ་སེམས་ཅན་མང་པོ་དག་ནི་ཐོས་ནས་དགའ་བར་མི་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་སྡར་མའི་རིགས་ཅན་གཞན་དག་ནི་སྒྲ་དེ་ཐོས་ན་དེ་ཉིད་ཀྱིས་དེ་དག་འཆི་བ་འམ། འཆི་བ་ལ་ཐུག་པའི་སྡུག་བསྔལ་སྐྱེ་བར་འགྱུར་རོ། །ཀུན་དགའ་བོ་དེའི་ཕྱིར་རྔ་བོ་ཆེ་ཆེན་པོ་ཞེས་བྱ་བའི་མདོ་འདི་ནི་ཀུན་དགའ་བོ་ཁྱོད་ཀྱིས་ཀྱང་མི་ཤེས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་ཆོས་ཀྱི་སྒོའི་མདོ་འདི་ལ་ནི་ཉན་ཐོས་དང ། རང་སངས་རྒྱས་ཀྱི་ཐེག་པ
58.97b
ཅན་རྣམས་ཡིད་ཆེས་པར་མི་འགྱུར་རོ། །ཀུན་དགའ་བོ་དེ་ལྟ་བས་ན་རྒྱུ་དེས་ན་གང་གི་ཚེ་ཡུལ་ཀོ་ས་ལའི་རྒྱལ་པོ་གཡུལ་འགྱེད་པའི་དུས་སུ་རྒྱལ་པོ་རྔ་བོ་ཆེའི་སྒྲ་འབྱིན་པ་ཇི་ལྟ་བ་དེ་བཞིན་དུ་རྔ་བོ་ཆེ་ཆེན་པོའི་མདོ་འདི་ཡང་སངས་རྒྱས་ཀྱི་གསང་བ་ཡིན་ཏེ། སངས་རྒྱས་པའི་དུས་སུ་གསུང་བར་འགྱུར་རོ། །དེ་ནས་དེ་ན་བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་བོས་ཏེ། བོས་ནས་འདི་སྐད་ཅེས་བཀའ་སྩལ་ཏོ། །འོད་སྲུང་ཅི་དགེ་སློང་འདི་དག་དད་པ་ཅན་ཚུལ་དང་མཐུན་པ། མཐུ་དང་ལྡན་པ་ཡིན་ནམ། གསོལ་པ། བཅོམ་ལྡན་འདས་དེའི་དོན་ཅི་ལགས། བཀའ་སྩལ་པ། འོད་སྲུང་སེམས་ཅན་སྦུན་པ་ལྟ་བུ་མ་ཡིན་པ་དེ་དག་རྔ་བོ་ཆེ་ཆེན་པོ་ཞེས་བྱ་བའི་མདོ་འདི་ཉན་པར་འགྱུར་རོ། །གསོལ་པ། བཅོམ་ལྡན་འདས་དེའི་སླད་དུ་གནས་བརྟན་མཽད་གལ་གྱི་བུ་ཆེན་པོ་ཡང་རང་ལ་སྨོད་པར་བགྱིད་ཅིང ། བཅོམ་ལྡན་འདས་ཇི་ལྟར་བདག་ཀྱང་གལ་ཏེ་དེ་འདྲ་བའི་དགེ་སློང་དག་མཆིས་ན་དེ་དག་གི་ནང་དུ་མཆིས་པ་མ་ལགས་ན་དེ་བཞིན་གཤེགས་པ་བཞུགས་པ་ལྟ་ཅི་སྨོས་ཏེ། དགེ་སློང་ཚུལ་ཁྲིམས་འཆལ་པ་དང ། ཚུལ་ཁྲིམས་དང་མི་ལྡན་པ་གང་ལགས་པ་དེ་དག་ནི་མ་མཆིས་ལགས་སོ། །བཅོམ་ལྡན་འདས་འཁོར་འདི་ཐམས་ཅད་ནི་ཚུལ་ཁྲིམས་བསྲུང་བ། ཚུལ་དང་མཐུན་པ་ལགས་ཏེ། འཁོར་གྱི་དཀྱིལ་འཁོར་ན་དེ་དག་ནི་ཙན་དན་གྱི་སྙིང་པོ་འདྲ་བ་ཤ་སྟག་ལགས་སོ། །བཀའ་སྩལ་པ། འོད་སྲུང་འཁོར་འདི་ཐམས་ཅད་ཚུལ་ཁྲིམས་བསྲུངས་པ། ཚུལ་དང་ལྡན་པ་ཡིན་ཡང་ཅི་དགོངས་པའི་ཚིག་ལ་མཁས་པ་ཡིན་ནམ། གསོལ་པ། བཅོམ་ལྡན་འདས་དགོངས་པའི་ཚིག་ཅེས་བགྱི་བ་ཅི་ལགས། བཀའ་སྩལ་པ། འོད་སྲུང་དགོངས་པའི་ཚིག་ཅེས་བྱ་བ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཞེས་བྱ་བ་ད་ལྟར་འདི་ལས་དེ་བཞིན་གཤེགས་པ་རྟག་པ། བརྟན་པ། ཞི་བ། ཐེར་ཟུག་པ། ཡོངས་སུ་མྱ་ངན་ལས་འདས་ཀྱང་ཉམས་པར་མི་འགྱུར་བ་ཞེས་བྱ་བ་སྟེ།
58.98a
མདོ་འདི་ནི་དགོངས་པའི་ཚིག་ཅེས་བྱའོ། །འོད་སྲུང་མི་མཐུན་པའི་མདོ་དག་པ་འོད་གསལ་བ་འདི་ནི་སེམས་ཅན་དམན་པ་རྣམས་ཀྱིས་རྒྱུ་དང་གཏན་ཚིགས་བརྒྱ་སྟོང་གིས་རིག་པར་བྱ་དགོས་སོ། །འོད་སྲུང་དེ་ལྟ་བས་ན་ཡང་ཁྱོད་ཀྱིས་རེ་ཤིག་འཁོར་འདི་རྟོགས་ཤིག་།དེ་ནས་དེའི་ཚེ་གནས་བརྟན་འོད་སྲུང་ཆེན་པོས་སེམས་ཅན་ལྷགས་པ་འདི་དག་ཅི་འདྲ་བ་ཞིག་ཡིན་པར་བལྟས་སོ། །དེ་ནས་སྐད་ཅིག་དེ་ཉིད་ལ་རྒྱ་ཆེན་པོ་མ་ཡིན་པའི་སེམས་ཅན་རྣམས་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་ཅན་རྣམས་དང ། བྱང་ཆུབ་སེམས་དཔའ་ཐེག་པ་ལ་གསར་དུ་ཞུགས་པ་གང་ཡིན་པ་དེ་དག་ཐམས་ཅད་རང་རང་ལ་སྨོད་པར་བྱེད་དེ། དཔེར་ན་གྱད་ཀྱི་ཚོགས་ཆེན་པོར་རྒྱལ་པོའི་གྱད་སྟོང་ཐུབ་པ་ཞིག་སྟན་ལས་ལངས་ཏེ། འདི་ན་ཁོ་བོ་དང་ལྷན་ཅིག་འགྱེད་པར་འོས་པའི་རྒོལ་ཕོད་པ་གང་ཡིན་པ་དེ་སུ་ཡོད་ཅེས་དྲིལ་བསྒྲགས་པ་དང ། དེ་ནས་དེ་ན་རྒོལ་བར་མ་འོས་པའི་སེམས་ཅན་གང་ཡིན་པ་དེ་དག་ཐམས་ཅད་ནི་བདག་ཅག་གསོད་པར་འགྱུར་གྱིས་འདི་དང་ལྷན་ཅིག་བདག་ཅག་འགྱེད་པར་མི་ནུས་སོ་ཞེས་རང་གིས་རང་ལ་སྨད་ནས་ཅང་མི་སྨྲ་བར་འགྱུར་རོ། །དེ་ནས་གལ་ཏེ་དེས་དེར་གྱད་ཀྱི་ཟླ་འགའ་ཡང་མ་རྙེད་ན་དེ་དེ་ན་དཔའ་བོ་གྱད་ཟླ་མེད་དུ་གྱུར་ཅིང་རུ་མཚོན་འཛུགས་པ་དེ་བཞིན་དུ་དེ་ན་རྒྱལ་པོ་མ་ཡིན་པའི་སེམས་ཅན་ཉན་ཐོས་དང ། རང་སངས་རྒྱས་ཀྱི་ཐེག་པ་ཅན་རྣམས་དང ། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་གང་ཡིན་པ་རྣམས་ཀྱང་བདག་ཅག་ནི་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདས་བཞིན་དུ་ཡང་ང་ནི་རྟག་པ་བརྟན་པ་ཞི་བ་ཐེར་ཟུག་པ་ཡིན་ནོ་ཞེས་སྟོན་པ་འདི་ནི་རྟོགས་པར་མི་ནུས་སོ་ཞེས་འདོར་བར་བྱེད་དོ། །དེ་ཅིའི་ཕྱིར་ཞེ་ན། དེ་དག་ནི་ཡུན་རིང་པོར་སྟོན་པ་ཉིད་ཀྱི་ལྟ་བ་ཉམས་པར་བྱེད་པའི་ལྟ་བ་བསྒོམས་པའི་བདག་ཉིད་ཡིན་པའི་ཕྱིར་ཏེ། དམན་པའི་སེམས་ཅན་རྣམས་ཀྱིས་མདོ་དག་པ
58.98b
འདི་ཐོས་ནས་དོང་ངོ ། །ཕྱོགས་བཅུ་དེ་དང་དེ་དག་ནས་ལྷགས་པའི་ཉན་ཐོས་དང ། རང་སངས་རྒྱས་ཀྱི་ཐེག་པ་ཅན་དང ། བྱང་ཆུབ་སེམས་དཔའི་ཐེག་པ་ལ་གསར་དུ་ཞུགས་པ་གང་དང་གང་དག་ཡིན་པ་དེ་དང་དེ་དག་དང་ལྷན་ཅིག་ཏུ་གང་དང་གང་དག་ལྷགས་པ་དེ་དག་ལས་ཀྱང་བཅུའི་ཆའི་ཆ་དང ། བརྒྱའི་ཆའི་ཆ་དང ། སྟོང་གི་ཆའི་ཆ་དང ། བརྒྱ་སྟོང་གི་ཆའི་ཆ་དང ། བྱེ་བའི་ཆའི་ཆ་དང ། གྲངས་མེད་པའི་ཆའི་ཆ་གང་ཡིན་པ་དག་འདུས་པར་གྱུར་ཏོ། །དེ་ལ་ཙན་དན་གྱི་སྙིང་པོ་འདྲ་བ་སྦུན་པ་ལྟ་བུ་མ་ཡིན་པའི་དགེ་བསྙེན་ཅི་འདྲ་བ་དག་འདུག་པར་གྱུར་ཅེ་ན། བསླབ་པའི་གཞི་ལྔ་དང་ལྡན་པ་དང ། བསླབ་པའི་གཞི་བརྒྱད་དང་ལྡན་པ་དང ། གསུམ་འདོན་པ་དང ། བཅུ་བཞིའི་དང ། བཅཝ་ལྔའི་ཞེས་བྱ་བ་ནས་ཟླ་བ་ཕྱེད་ཀྱི་དང ། ཚེས་བརྒྱད་ཀྱི་དང ། ཆོ་འཕྲུལ་གྱི་ཟླ་བ་ཕྱེད་ཀྱི་བར་གྱི་ཡན་ལག་བརྒྱད་ལེགས་པར་བླངས་པ་སྦྱིན་པ་དང ། སྙན་པར་སྨྲ་བ་དང ། དོན་སྤྱོད་པ་དང ། དོན་མཐུན་པ་ཅན་གལ་ཏེ་མུ་གེ་ལོ་བཅུ་འམ། བཅུ་གཉིས་སམ། གཞན་ཡང་ལོ་མང་པོ་བྱུང་ཡང་བདག་གིས་བཟའ་བ་འམ། བལྡག་པ་འམ། ཟས་སམ། བཏུང་བ་རང་གི་སྐལ་བ་དེ་ལས་བདག་གིས་ཕ་དང་མ་གཉིས་ལ་ཕྱེད་ཕྱེད། དགེ་སློང་རྣམས་ལ་ཕྱེད་འབུལ་ཞིང་བདག་གིས་དགེ་སློང་རྣམས་ལ་མཆོད་ཡོན་གྱི་སྦྱིན་པ་དོར་བར་མི་བྱའོ་སྙམ་པ་སྟེ། རིགས་ཀྱི་བུ་དེའི་དུས་ངན་པ་ལ་རྟག་པར་སྐལ་བ་གང་ཡིན་པ་དེ་ཙམ་ཞིག་ཡོད་པར་འགྱུར་ཞེ་ན། སྐྱེས་བུ་དཔའ་བོ་དེའི་ཟླ་བ་ཕྱེད་ཀྱིས་ཟ་མ་གཅིག་ཅིག་འབྱུང་སྟེ། དེས་ཟ་མ་གཅིག་པོ་ཡང་དགེ་སློང་རྣམས་ལ་བྱིན་ནས་བསོད་ནམས་མི་ཟད་པའི་སྐལ་བ་ཅན་དུ་འགྱུར་རོ། །སྐྱེས་བུས་དེ་ལྟར་བྱིན་ནས་འཇིག་རྟེན་དུ། །སྐྱེས་བུ་དམ་པར་འགྱུར་བས་ལེགས་འདོད་མིས། །འདི་ན་བདག་ཉིད་བག་མེད་ཅི་བྱ་སྟེ། །དེ་བས་བསྟན་ལ་བག་བྱེད་མཆོག་ཡིན་ནོ། །ནོར་ནི་དགྲ་དང་ཆོམ་རྐུན་སོགས་མང་དང ། །རྒྱལ་པོ་ཆུ
58.99a
དང་མེ་དང་མཛའ་བཤེས་དང ། །ཉེ་དུ་མི་མཛའ་བགོ་སྐལ་སྤྱོད་མང་གིས། །སྡིག་པ་སྤྱད་པ་ཡིས་ནི་ཟད་པར་འགྱུར། །རང་དང་རང་གི་ལོངས་སྤྱོད་དག་ལ་ཡང ། །སྤྱོད་པར་བྱེད་པ་སྐྱེས་བུ་རྣམས་ཀྱི་ནོར། །སྤྱད་པ་ཉིད་དང་གནོད་པ་གཞན་གྱིས་ཀྱང ། །ཟད་པར་མི་འགྱུར་ཤེས་བྱ་དམ་ཆོས་ཕྱིར། །འདི་ཟད་བྱས་མཆོག་ཕ་རོལ་ཟད་མི་འགྱུར། །འཇིག་རྟེན་འདིར་འཕེལ་འཇིག་རྟེན་ཕ་རོལ་དུ། །ཟད་པར་མི་འགྱུར་ཁ་དོག་མཐུར་བཅས་བྱེད། །མཐོང་ན་ཐམས་ཅད་དགའ་ཞིང་རྙེད་པ་དང ། །མདོག་དང་གྲགས་པ་རབ་ཏུ་གསལ་བར་འགྱུར། །དེ་ཡི་ཕྱུགས་རྣམས་ཟད་པར་མི་འགྱུར་ཞིང ། །དེ་ཡི་བྲན་ཕོ་བྲན་མོ་ལས་བྱེད་དང ། །ལས་ཀྱི་མཐའ་རྣམས་ཉམས་པར་མི་འགྱུར་ཏེ། །དེ་ལ་ཐབ་མོ་རྩོད་དང་འགྱེད་མེད་ཅིང ། །དེ་ནི་ནམ་ཡང་གནོད་སེམས་མེད་མཆོག་ཐོབ། །སྦྱིན་ལ་དགའ་བའི་སྐྱེ་བོ་འཇིག་རྟེན་དུ། །དེ་ལ་སོགས་པའི་ཡོན་ཏན་འཐོབ་འགྱུར་བས། །དེ་ལྟ་བས་ན་རྟག་ཏུ་ཆོས་འདོད་པ། །སངས་རྒྱས་རྣམས་དང་ལྷན་ཅིག་ཕྲད་པར་འགྱུར། །ལུས་དང་སྲོག་ལ་མི་བལྟ་ལྷུག་པར་གཏོང ། །མི་ཡི་མི་མཆོག་དེ་ནི་ལག་རྐྱོང་ཡིན། །སེམས་ཅན་ཀུན་ལ་རྗེས་སུ་སྙིང་བརྩེ་བས། །བུ་བཞིན་མཐོང་ན་སྡུག་ཅིང་རིག་པར་ལྡན། །བསམ་གཏན་བག་ཡོད་ཐོས་པས་དཔག་ཏུ་མེད། །ཁྱིམ་ན་གནས་པའི་ཤེས་རབ་ཅན་གྱིས་ནི། །རྟག་ཏུ་དེ་ལྟར་བྱ་དགོས་དེ་དག་གི་།དཔེ་ནི་དེ་འདྲ་མང་དུ་ཡོད་པ་ཡིན། །ཡང་དེའི་ཚེ་ན་དགེ་བསྙེན་མ་ཅི་འདྲ་བ་དག་ཅིག་འདུག་ཅེ་ན། ཇི་ཙམ་ཁཝ་མ་ལངས་པ་དེ་ཙམ་ནས་རང་གིས་ཕྱགས་མ་བླངས་ཏེ། རང་གི་ཉེན་ཀོར་འཕྱག་ཅིང་བའི་ལྕི་བའི་བྱུག་པས་ས་གཞི་བྱུགས་པས། ས་རྒྱན་གྱིས་མཛེས་པར་བྱེད་པའི་ལེགས་པར་བྱ་བ་བྱེད་པ་ཡིན། དེས་དེར་བསོད་སྙོམས་པ་རབ་ཏུ་མང་པོ་འོངས་པར་ཤེས་ན་རང་གི་ལག་གིས་བཟའ་བ་དང ། བཏུང་བ་གྱ
58.99b
ནོམ་པ་ལེགས་པར་རྒྱུན་དུ་སྟོབས་པར་བྱེད་ཅིང་དེ་དག་དང་བདག་གྲོང་རྡལ་ལམ། གྲོང་ཁྱེར་རམ། གྲོང་དག་ཏུ་ཡང་ཕྲད་ཅིང་འགྲོགས་པར་གྱུར་ཅིག་།བདག་ནམ་ཡང་ཡུལ་མཐའ་འཁོབ་ཏུ་སྐྱེ་བ་དང ། དགེ་བའི་བཤེས་གཉེན་དང་སྐོལ་བར་དུས་སྟོན་བཞི་བྱེད་པར་མ་གྱུར་ཅིག་།བདག་སྦྱིན་པ་དང ། ཚུལ་ཁྲིམས་སྤྱད་པ་དང ། ཉན་པ་དང ། བདག་ཆོས་ཀྱི་གཏམ་ལ་རྟག་ཏུ་སྤྱོད་པར་གྱུར་ཅིག་ཅེས་དེ་ལྟ་བུའི་ཡོན་ཏན་ཕུན་སུམ་ཚོགས་པའི་སྲིང་མོ་དགེ་བསྙེན་མ་ཡིད་རྣམ་པར་དག་པ་སྟེ། དེ་ལྟ་བུ་ནི་དགེ་བསྙེན་མའི་ཡོན་ཏན་དག་ཡིན་ནོ། །དེ་ལ་དགེ་སློང་དང་དགེ་སློང་མ་ཅི་འདྲ་བ་དག་ཅིག་ཅེ་ན། དུལ་བ། ཞི་བ། བག་ཚ་བ་མེད་པ། ཟག་པ་ཟད་པ། ཐ་མའི་ལུས་འཛིན་པ། ཙན་དན་གྱི་སྙིང་པོ་འདྲ་བའི་འཁོར་དག་གོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་འདྲ་བ་དག་ཅིག་ཅེ་ན། ཐམས་ཅད་ཀྱང་དེ་བཞིན་གཤེགས་པའི་ཆོས་འདོད་པ། ཐམས་ཅད་ཀྱང་དེ་བཞིན་གཤེགས་པའི་སྙིང་པོའི་མདོ་སྡེ་འཛིན་པ་དང ། ཐམས་ཅད་ཀྱང་དེ་བཞིན་གཤེགས་པའི་ཕན་པ་སྟོན་པ། ཐམས་ཅད་ཀྱང་སངས་རྒྱས་རྟག་པ་ཉིད་འདོད་པ། ཐམས་ཅད་ཀྱང་དགོངས་པའི་ཚིག་ལ་བྱང་བ། ཐམས་ཅད་ཀྱང་ངེས་པའི་དོན་གྱི་མདོ་སྡེ་སྟོན་པ། སྲན་ཐུབ་པ། ཐམས་ཅད་ཀྱང་ཚུལ་ཁྲིམས་འཆལ་པ་རྣམས་ཚར་གཅོད་ཅིང་ཕན་འདོགས་པར་ཞུགས་པ་དེས་པ་རྣམས་ལ་མཆོག་ཏུ་གུས་པ། ཐེག་པ་ཆེན་པོ་ལ་དད་པ་ཆེན་པོ་ཐོབ་པ། ཉན་ཐོས་དང ། རང་སངས་རྒྱས་ཀྱི་ཐེག་པ་ལ་ཡ་མཚན་དུ་མི་འཛིན་པ། འདི་ལྟ་བུའི་མདོ་སྡེ་རྒྱ་ཆེན་པོ་མཆོག་བོར་ནས་མདོ་སྡེ་གཞན་མི་སྒྲོགས་པའི་ཤེས་རབ་ཅན། གང་དུ་སངས་རྒྱས་རྟག་པ་དེ་བཞིན་གཤེགས་པའི་སྙིང་པོ་ཡོད་དོ་ཞེས་བསྟན་པ་གཞན་ཡང་སྒྲོགས་ཤིང་མི་སྤོང་བ། བརྟན་པ། འཇིག་ཚོགས་ལ་ལྟ་བས་སྟོང་པ་སྟོང་པ་མ་ཡིན་གྱི། འདུས་བྱས་ཐམས་ཅད་རང་བཞིན་གྱིས་སྟོང་པ་ཐེར་ཟུག་མཆོག་གི་གཞི་དེ་འདོད་པ་དེ
58.100a
ལྟ་བུ་ལ་སོགས་པའི་ཡོན་ཏན་ལ་བརྟེན་པ་དག་སྟེ། ཡོན་ཏན་ལྷག་མ་ནི་བསམ་གྱིས་མི་ཁྱབ་བོ། །འོད་སྲུང་དེ་ལྟ་བས་ན་ཁྱོད་ཀྱིས་ལན་གཉིས་ལན་གསུམ་དུ་ཡང་འཁོར་སོལ་ཅིག་།དེ་ནས་གནས་བརྟན་འོད་སྲུང་ཆེན་པོས་ལན་གཉིས་ལན་གསུམ་གྱི་བར་དུ་ཡང་བལྟས་ཤིང་བརྟགས་ཏེ་བསལ་ན་སྦུན་པ་ལྟ་བུའི་སྐྱེས་བུ་ལྷག་མའི་འཁོར་དག་ཡོད་པར་འགྱུར་རོ། །ཡང་ལན་གསུམ་གྱི་བར་དུ་བསལ་བས་བསལ་བ་ན་སྐྱེས་བུ་སྦུན་པ་ལྟ་བུ་མ་ཡིན་པ་ཤ་སྟག་ཏུ་གྱུར་ཏོ། །དེ་ནས་བཅོམ་ལྡན་འདས་ཀྱིས་ཡང་གནས་བརྟན་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ད་འཁོར་འདི་དག་དག་པ་སྙིང་པོར་གྱུར་པ་ཡིན་མོད། ཡང་བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འཁོར་འདིར་ལེགས་པར་སྦྱངས་པ་ལེགས་སོ་ལེགས་སོ། །གསོལ་པ། བཅོམ་ལྡན་འདས་ཇི་ལྟར་འཁོར་ཡོངས་སུ་སྦྱངས་པ་ལགས། སྟོན་ཀའི་ཟླ་བ་ཉ་བ་ལ་རྣམ་པར་དག་པ་བཞིན་ནོ། །འོད་སྲུང་འདི་ལྟ་སྟེ་དཔེར་ན། རྩིས་མཁན་ནམ། རྩིས་མཁན་གྱི་སློབ་མས། སྔོན་གྱི་སྡོམ་པས་བསྡམས་པ་ལ་འགོད་པའི་ཆས་ཕྲིན་ལྷག་མ་གང་ཡིན་པ་དེ་འདུག་པ་ཇི་ལྟ་བ་དེ་བཞིན་དུ་འཁོར་ལྷགས་པ་གང་ཡིན་པ་འདི་དག་ཐམས་ཅད་ཅེས་བྱ་བ་ནས་གྲངས་མེད་པ་དཔག་ཏུ་མེད་པ་ཞེས་བྱ་བར་སྔ་མ་བཞིན་ནོ། །འོད་སྲུང་དེ་དག་ལས་བྱེ་བ་བརྒྱ་སྟོང་གི་ཆའི་ཆ་གང་དག་ཡིན་པ་ནི་མི་མཆོག་བག་ཚ་བ་མེད་པའི་འཁོར་འདུག་པ་འདི་དག་ཡིན་གྱིས་འོད་སྲུང་ད་ཡང་ཁྱོད་ཀྱིས་འཁོར་རྣམས་ལ་གྲོགས་པོ་དག་ཅི་ཁྱེད་ཅག་རྔ་བོ་ཆེ་ཆེན་པོ་ཞེས་བྱ་བའི་མདོ་ཆེན་པོ་ཡངས་པ་ཐེག་པ་གཅིག་པ་འདི་ལྟ་སྟེ། ཐེག་པ་ཆེན་པོ་དད་པར་དཀའ་བ། ཡིད་ཆེས་པར་དཀའ་བ་འདི་མཉན་པར་ནུས་སམ་ཞེས་དྲིས་ཤིག་།འོད་སྲུང་དེ་བཞིན་དུ་ཁྱོད་ཀྱིས་ལན་གཉིས་ལན་གསུམ་དུ་ཡང་འཁོར་རྣམས་ལ་དྲིས་ཤིག་།
58.100b
བཅོམ་ལྡན་འདས་ལེགས་སོ་ཞེས་གསོལ་ནས། དེ་ནས་གནས་བརྟན་འོད་སྲུང་ཆེན་པོ་སྟན་ལས་ལངས་ཏེ་བླ་གོས་ཕྲག་པ་གཅིག་དུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལངས་ཏེ་ལན་གསུམ་དུ་བསྐོར་བ་བྱས་ནས་འཁོར་མང་པོ་དེ་ལ་སྨྲས་པ། ཤེས་ལྡན་དག་ཅི་རྔ་བོ་ཆེ་ཆེན་པོ་ཞེས་བྱ་བའི་མདོ་ཉན་པའི་འོས་ཡིན་ནམ། དེ་བཞིན་གཤེགས་པའི་ཐེག་པ་གཅིག་པ་འདི་ལྟ་སྟེ། ཐེག་པ་ཆེན་པོ་ཉན་ཐོས་དང ། རང་སངས་རྒྱས་ཐམས་ཅད་ཀྱི་ཡུལ་ལས་འདས་པ་དེ་ཁྱོད་ལ་སྟོན་པར་འགྱུར་རོ། །དེ་བཞིན་དུ་གནས་བརྟན་འོད་སྲུང་ཆེན་པོས་ལན་གཉིས་ལན་གསུམ་དུ་ཡང་སྐུལ་བ་བསྐུལ་བ་དང ། དེ་རྣམས་ཀྱིས་སྨྲས་པ། བཙུན་པ་འོད་སྲུང་བདག་ཅག་དམ་པའི་ཆོས་མཉན་པའི་ཆེད་དུ་མཆིས་ལགས་པས་ཉན་པར་འཚལ་གྱིས། བཙུན་པ་འོད་སྲུང་དེ་བཞིན་གཤེགས་པས་བདག་ཅག་ལ་ཐུགས་བརྩེ་བས་ཉེ་བར་བཟུང་སྟེ། མདོ་ཆེན་པོ་དེ་ལེགས་པར་བསྒྲགས་པ་མཛད་དུ་གསོལ། འོད་སྲུང་ཆེན་པོས་སྨྲས་པ། ཇི་ལྟར་ཡིད་ཆེས་པར་འགྱུར། དེ་དག་གིས་སྨྲས་པ། བཙུན་པ་འོད་སྲུང་དཔེར་ན་སྐྱེས་བུ་བཙས་ནས་ལོ་ཉི་ཤུ་ལོན་པ་ཞིག་ལ་བུ་ལོ་བརྒྱ་ལོན་པ་དག་ཡོད་དོ་ཞེས་སྨྲས་པ་ལ་གལ་ཏེ་དེ་བཞིན་གཤེགས་པ་དེ་ཁོ་ན་བཞིན་དུ་གསུང་ན། བདག་ཅག་གིས་ཀྱང་དེ་བཞིན་དུ་ཡིད་ཆེས་པར་བགྱི་ལགས་ན་བཙུན་པ་འོད་སྲུང་དམ་པའི་ཆོས་མཉན་པ་ལྟ་སྨོས་ཀྱང་ཅི་འཚལ། དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་ཅི་གསུང་བ་དེ་བཞིན་དུ་མཛད་པ། དེ་བཞིན་གཤེགས་པ་ནི་ཀུན་ནས་སྤྱན་མངའ་བ། དེ་བཞིན་གཤེགས་པ་ནི་སངས་རྒྱས་ཀྱི་སྤྱན་གྱིས་གཟིགས་པ་ཡིན་ནོ། །བཙུན་པ་འོད་སྲུང་གཞན་ཡང་བདག་ཅག་ནི་དེ་བཞིན་གཤེགས་པས་མཁྱེན་ཏོ། །སྨྲས་པ། ཤེས་ལྡན་དག་ཁྱེད་ཅག་ནི་རྔ་བོ་ཆེ་ཆེན་པོའི་མདོ་ཆེན་པོ་མཉན་པ་དང ། བཀླག་པ
58.101a
དང ། གཟུང་བ་དང ། བསྟན་པའི་འོས་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འདི་ནི་ཇི་ལྟར་སྐྱེས་བུ་བཙས་ནས་ལོ་ཉི་ཤུ་ལོན་པའི་བུ་ལོ་བརྒྱ་ལོན་པ་དག་ལྟར་རྔ་བོ་ཆེ་ཆེན་པོའི་མདོ་འདི་ཡང་དེ་དང་འདྲའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཡོངས་སུ་མྱ་ངན་ལས་འདས་བཞིན་དུ་ད་དུང་དུ་གནས་སོ་ཞེས་བྱ་བ་དང ། བདག་ཡོད་པ་མ་ཡིན་ཞིང་བདག་གི་ཡོད་པ་མ་ཡིན་པ་དག་ལ་ཡང་བདག་ཅེས་བྱ་བས་སོ། །དེ་དག་གིས་གསོལ་པ། དེ་ནི་བཅོམ་ལྡན་འདས་ཁོ་ནས་མཁྱེན་པས་བཅོམ་ལྡན་འདས་ཀྱིས་ཇི་སྐད་གསུངས་པ་དེ་བཞིན་དུ་གཟུང་བར་བགྱི་ལགས་སོ། །འོད་སྲུང་གིས་གསོལ་པ། བཅོམ་ལྡན་འདས་དེ་བཞིན་གཤེགས་པས་ད་ནི་རྔ་བོ་ཆེ་ཆེན་པོའི་མདོ་ཆེན་པོ་བཤད་དུ་གསོལ། བཅོམ་ལྡན་འདས་ཀྱིས་ཆོས་ཀྱི་རྔ་བོ་ཆེ་བརྡུང་དུ་གསོལ། བཅོམ་ལྡན་འདས་ཀྱིས་ཆོས་ཀྱི་དུང་བུད་དུ་གསོལ། བཀའ་སྩལ་པ། འོད་སྲུང་ལེགས་སོ་ལེགས་སོ། །འོད་སྲུང་ད་ནི་ཁྱོད་རྔ་བོ་ཆེ་ཆེན་པོའི་མདོ་ཆེན་པོ་འདི་ཉོན་ཅིག་།གསོལ་པ། བཅོམ་ལྡན་འདས་བདག་ཅག་གིས་མཉན་པར་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གལ་ཏེ་བདག་གི་སྤྱོད་ཡུལ་དུ་མ་གྱུར་ཀྱང་དེ་བཞིན་གཤེགས་པས་བདག་རྔ་བོ་ཆེ་ཆེན་པོའི་སླད་དུ་བདག་ལ་གུས་པར་མཛད་ལགས་པས་སོ། །ཡང་གསོལ་པ། ཇི་ལྟར་ལགས་ཤེ་ན་བཅོམ་ལྡན་འདས་ཀྱིས་བདག་ལ་འདི་སྐད་ཅེས་འོད་སྲུང་ཁྱོད་ང་དང་ལྷན་ཅིག་འདུག་གིས་ཚུར་ཤོག་ཅེས་གསུངས་ཏེ། བཅོམ་ལྡན་འདས་བདག་ནི་དོན་དེའི་སླད་དུ་བགྱི་བ་གཟོ་བར་བགྱིས་པ་ཚོར་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ལེགས་སོ་ལེགས་སོ། །ངས་ཀྱང་དོན་འདིའི་ཕྱིར་གསུངས་སོ། །འོད་སྲུང་དཔེར་ན་རྒྱལ་པོ་གསལ་རྒྱལ་གྱིས་གླང་པོ་ཆེ་དང ། རྟ་དང ། དམག་མི་རྣམས་ཁ་ཟས་དང །
58.101b
བཟའ་བ་དང ། བཏུང་བ་དང ། བལྡག་པ་ལ་སོགས་པས་གསོར་འཇུག་གོ། །དེ་ཅིའི་ཕྱིར་ཞེ་ན། གང་གི་ཚེ་བདག་རྔ་བོ་ཆེ་དང ། རྫ་རྔ་དང ། དུང་གི་སྒྲ་ཤིན་དུ་ཆེན་པོ་འབྱིན་པ་དང ། གདུགས་དང ། རྒྱལ་མཚན་དང ། བ་དན་དག་བསྒྲེང་བ་དང ། གང་གི་ཚེ་ཕ་རོལ་གྱི་དཔུང་གི་ཚོགས་ཆེན་པོ་ཉེ་བར་གནས་པར་གྱུར་པ་དེའི་ཚེ་བདག་གིས་གསོར་བཅུག་པའི་ཕན་ཡོན་རྗེས་སུ་དྲན་ནས་ཕ་རོལ་གྱི་དམག་ཚོགས་དང་ལྷན་ཅིག་གཡུལ་འགྱེད་པར་འགྱུར་ཞིང་དེའི་ཚེ་སེམས་ཅན་རྣམས་ལ་ཡང་ཕན་པ་བྱེད་པར་འགྱུར། བདག་གི་བཀའ་ལ་ཡང་ཕན་པ་བྱེད་པར་འགྱུར་རོ་སྙམ་སྟེ། དེ་དག་ཀྱང་དེ་བཞིན་དུ་འགྱུར་རོ། །འོད་སྲུང་དེ་བཞིན་དུ་ང་ཡོངས་སུ་མྱ་ངན་ལས་འདས་ན་ཡང་ཁྱོད་ཀྱིས་རྔ་བོ་ཆེ་ཆེན་པོའི་མདོ་འདི་འབྱིན་པར་འགྱུར་རོ་ཞེས་ངས་ཁྱོད་ལ་སྟན་གྱི་ཕྱེད་བསྟན་པ་ཡིན་གྱིས་ངེས་པ་ཁོ་ནར་དེ་བཞིན་དུ་གྱིས་ཤིག་།གསོལ་པ། བཅོམ་ལྡན་འདས་བདག་ནི་ཁྱོད་ཀྱི་ཐུགས་ལས་སྐྱེས་པའི་སྲས་ཀྱི་ཐུ་བོར་གཞག་པའི་རིགས་ལགས་སོ། །འོད་སྲུང་དཔེར་ན་ཀོ་ས་ལའི་རྒྱལ་པོ་གསལ་རྒྱལ་རང་གི་བུ་རྣམས་ལ་འདི་དག་ནི་མ་འོངས་པའི་དུས་ན་བདག་གི་རིགས་འཚོ་བར་འགྱུར་རོ་ཞེས་བསྟན་བཅོས་སྣ་ཚོགས་དང ། བཟོའི་གནས་རྣམས་ལ་སྦྱོང་བར་བྱེད་པ་དེ་བཞིན་དུ་འོད་སྲུང་ཁྱོད་ཀྱང་ང་འདས་ནས་མདོ་འདི་འབྱིན་པར་འགྱུར་རོ། །འོད་སྲུང་དཔེར་ན་ཀོ་ས་ལའི་རྒྱལ་པོ་གསལ་རྒྱལ་རྒྱལ་པོ་མང་པོས་བསྡོས་ནས་དེ་རྣམས་དང་ལྷན་ཅིག་གཡུལ་འགྱེད་པ་དེ་དང་དེའི་དུས་ཀྱི་དམག་མི་གླང་པོ་ཆེ་བ་དང ། རྟ་པ་དང ། དཔུང་བུ་ཆུང་གང་དག་ཡིན་པ་ལས་གོ་ཆ་བཟང་པོ་བགོས་ཤིང་རྔ་བོ་ཆེ་ཆེན་པོ་དང ། དུང་གི་སྒྲ་ཐོས་ན་མི་དངང་མི་སྐྲག་ཅིང་བྲེད་པར་མི་འགྱུར་བ་གང་ཡིན་པ་དེ་དག་ལ་ནི་རྒྱལ་པོས་བཟའ་བ་དང ། བཅའ་བ་དང ། ཟས་དང ། སྐོམ་དང ། གོས་དང །
58.102a
རྒྱན་དང ། ལྷབ་ལྷུབ་དང ། ཆས་དག་སྦྱིན་པར་བྱེད་དོ། །དེ་ལས་གཞན་པ་གཡུལ་ངོར་ཞུགས་ནས་གཡུལ་འགྱེད་པའི་དམག་མི་གང་ཡིན་པ་དེ་དག་ལ་ནི་གསེར་དང ། ནོར་བུ་དང ། མུ་ཏིག་ལ་སོགས་པ་དང ། གྲོང་རྡལ་དང ། ཡུལ་རྣམས་སྦྱིན་པར་བྱེད་དོ། །དེ་ན་སྐྱེས་བུ་དཔའ་བོ་སྡེ་དང་བཅས་པར་ཕྱིར་མི་ལྡོག་པ། གླང་པོ་ཆེ་བ་དང ། རྟ་པ་དང ། ཤིང་རྟ་པ་དང་ལྡན་པས་དགྲའི་དཔུང་ཕམ་པར་བྱེད་པ་གང་ཡིན་པ་དེ་དག་ནི་རྒྱལ་པོ་རང་གིས་རིག་པར་བྱས་ནས་རྒྱལ་ཚབ་ཏུ་དབང་བསྐུར་བའི་ཅོད་པན་བཅིང་བར་བྱེད་དོ། །འོད་སྲུང་དེ་བཞིན་དུ་ངའི་ཉན་ཐོས་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་བསླབ་པ་ལེགས་པར་ཇི་ལྟར་བཅས་པ་ལ་ལེགས་པར་བསླབས་པ་གང་ཡིན་པ་དེ་དག་དང ། སོ་སོར་ཐར་པའི་སྡོམ་པས་བསྡམས་པ་དང ། འདུལ་བའི་ཆོ་ག་དང ། སྤྱོད་ཡུལ་ལ་གནས་པ་དེ་དག་ལ་ནི་དེ་བཞིན་གཤེགས་པས་ལྷ་དང་མིའི་བདེ་བ་སྦྱིན་པར་མཛད་དོ། །དེ་ལས་གཞན་པས་ཕུང་པོའི་བདུད་དང ། ཉོན་མོངས་པའི་བདུད་དང ། འཆི་བདག་གི་བདུད་དང ། ལྷའི་བུའི་བདུད་ཕམ་པར་བྱེད་པ་གང་ཡིན་པ་དེ་དག་ལ་ནི་དེ་བཞིན་གཤེགས་པས་འཕགས་པའི་བདེན་པ་བཞིའི་རྣམ་པར་གྲོལ་བའི་ཅོད་པན་འཆིང་བར་མཛད་དོ། །དེ་ལས་གཞན་པའི་རྒྱ་ཆེན་པོ་ལ་ལྷག་པར་མོས་པ་དེ་བཞིན་གཤེགས་པའི་སྙིང་པོའི་ཆེ་བའི་བདག་ཉིད་རྟག་པ་དང ། བརྟན་པ་དང ། ཞི་བ་དང ། ཐེར་ཟུག་པ་འདོད་པའི་སེམས་ཅན་གང་ཡིན་པ་དེ་དག་ལ་ནི་དེ་བཞིན་གཤེགས་པས་རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཐེག་པ་ཆེན་པོ་དབང་བསྐུར་བའི་ཅོད་པན་འཆིང་བར་མཛད་དོ། །འོད་སྲུང་དེ་བཞིན་དུ་ཁྱོད་ཀྱང་དེ་རིང་ཐེག་པ་ཆེན་པོའི་དབང་བསྐུར་བའི་ཅོད་པན་བཅིངས་ཏེ། སངས
58.102b
རྒྱས་བརྒྱ་སྟོང་ཕྲག་མང་པོའི་སྤྱན་སྔ་ནས་རྔ་བོ་ཆེ་ཆེན་པོའི་མདོ་འདི་འབྱིན་པར་འགྱུར་རོ། །དེ་ལྟ་བས་ན་འོད་སྲུང་ཁྱོད་ཀྱིས་ཀྱང་ད་ནི་ང་འདས་ནས་མདོ་འདི་འབྱུང་བའི་རིགས་སོ། །གསོལ་པ། བཅོམ་ལྡན་འདས་རེ་ཤིག་བདག་གིས་རིགས་པར་ལྟ་རྔོ་མི་ཐོག་ཀྱང་བཅོམ་ལྡན་འདས་རེ་ཤིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སམ་བཞུགས་ཀྱང་བདག་གིས་ཕྱུང་ནས་བསྟན་པར་བགྱི་ལགས་སོ། །བཀའ་སྩལ་པ། འོད་སྲུང་ལེགས་སོ། །ད་ནི་དེ་བཞིན་གཤེགས་པས་རྔ་བོ་ཆེ་ཆེན་པོ་ཞེས་བྱ་བའི་མདོ་ཆེན་པོ་བཤད་པ་བརྩམ་མོ། །དེ་ནས་ནམ་མཁའ་ལས་ལྷའི་ཚོགས་དང ། འབྲུག་གི་ཚོགས་ཀྱིས་ལེགས་སོ་ཞེས་བྱ་བ་བྱིན་ཏེ། འོད་སྲུང་ལེགས་སོ་ལེགས་སོ། །སེམས་ཅན་ཐམས་ཅད་ལ་ཕན་པ་དང ། བདེ་བའི་ཕྱིར་ད་ནི་ལྷ་རྣམས་དང ། འབྲུག་གི་ཚོགས་རྣམས་ཀྱང་མེ་ཏོག་གི་ཆར་འབེབས་ཤིང་བདུད་རྩིའི་ཆུས་གང་བའི་ཕྱེ་མའི་ཆར་གྱི་རྒྱུན་ཆེན་པོ་ཡང་འབེབས་སོ། །འོད་སྲུང་ཁྱོད་བཅོམ་ལྡན་འདས་ཀྱི་ཞལ་དང་ཐུགས་ལས་སྐྱེས་པ་སྟེ། དེ་བཞིན་གཤེགས་པའི་སྲས་ཀྱི་ཐུ་བོར་འོས་སོ། །དེ་ནས་ལྷའི་ཚོགས་དང ། འབྲུག་གི་ཚོགས་ཀྱིས་སྐད་མཐུན་པར་ཚིགས་སུ་བཅད་པ་འདི་སྨྲས་སོ། །མཉན་ཡོད་གྲོང་ཁྱེར་དག་ཏུ་རྔ་ཆེན་དང ། །ཤིན་དུ་རྔ་ཆེན་དུང་རྣམས་སྒྲོགས་པ་ན། །མགོན་པོ་ཆོས་ཀྱི་རྗེ་ཡིས་རྒྱལ་བྱེད་ཀྱི། །ཚལ་དུ་ཆོས་ཀྱི་རྔ་ཆེན་སྒྲོགས་པར་མཛད། །འོད་སྲུང་ཁྱོད་ཀྱིས་ཆོས་རྔ་བརྡུང་བར་གྱིས། །ཆོས་ཀྱི་རྒྱལ་པོ་དག་གིས་གསུངས་པའི་མདོ། །ཞུ་བའི་དབྱིག་གུས་ཆོས་རྔ་ཆེ་བརྡུངས་ན། །ལྷའི་ལྷས་ཆོས་མང་ཐེ་ཙོམ་གཅོད་པར་མཛད། །རྔ་བོ་ཆེ་ཆེན་པོའི་མདོ་ཆེན་པོ་ལས་འོད་སྲུང་འོངས་པ་ཞེས་བྱ་བའི་ལེའུའོ།། །།དེ་ནས་བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ངས་སྔར། མདོ་འདི་ལས་གོང
58.103a
ནས་གོང་དུ་དགེ་སློང་ཡངས་པ་ལ་དད་པའི་ཡིད་ཅན་ཞེས་བྱ་བ་ཞིག་ཡོད་ཅེས་བཤད་པ་དགེ་སློང་དེའི་མིང་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་འམ། སེམས་ཅན་གང་དག་གིས་ཐོས་པའི་སེམས་ཅན་དེ་དག་ཐམས་ཅད་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་ཟུག་རྔུ་རྣམས་དབྱུང་བར་འགྱུར་རོ། །དེ་ཅིའི་ཕྱིར་ཞེ་ན། འོད་སྲུང་འདི་ལྟ་སྟེ་དཔེར་ན། ཀོ་ས་ལའི་རྒྱལ་པོ་གསལ་རྒྱལ་ལ་འཚོ་བྱེད་ཀྱི་བུ་སྨན་མཆོག་ཅེས་བྱ་བ་ཡོད་དེ། དེ་གང་གི་ཚེ་རྒྱལ་པོ་གསལ་རྒྱལ་ཕ་རོལ་གྱི་དམག་ཚོགས་དང་ལྷན་ཅིག་གཡུལ་འགྱེད་པར་འགྱུར་ལ་དེ་ནས་རྒྱལ་པོས་གཡུལ་ཤོམ་པ་ན་སྨན་པ་སྨན་མཆོག་བཀུག་སྟེ། བཀུག་ནས་འདི་སྐད་ཅེས་སྨན་པ་སྨན་གང་གིས་སེམས་ཅན་གང་དང་གང་དག་ཟུག་རྔུས་ཟུག་པར་གྱུར་པའི་སེམས་ཅན་དེ་དང་དེ་དག་ཇི་ལྟ་ཇི་ལྟར་ཟུག་རྔུ་དབྱུང་བར་འགྱུར་བ་དེ་ལྟ་བུའི་སྨན་སྦྱོར་ལ་མྱུར་དུ་ཁྱེར་ཏེ་ཤོག་ཤིག་།དེ་ནས་སྨན་པ་སྨན་མཆོག་དེས་སྨན་གྱི་རྒྱལ་པོ་དུག་སྨན་རྟོལ་པ་ཞེས་བྱ་བ་ཁྱེར་ནས་རྒྱལ་པོ་ཆེན་པོ་གཡུལ་ངོར་འཇུག་པའི་རྔ་བོ་ཆེ་ལ་སྨན་དེས་བྱུག་ཤིང་བདུགས་ཏེ་བརྡུངས་སོ། །བྱུགས་ཤིང་བདུགས་ཏེ་བརྡུངས་མ་ཐག་ཏུ་སེམས་ཅན་ཟུག་རྔུས་ཟུག་པར་གྱུར་པ་གང་དག་ཡིན་པ་དེ་དག་གིས་སྒྲ་དཔག་ཚད་དམ། དཔག་ཚད་གཉིས་སུ་ཐོས་ནས་ཐོས་པ་ཙམ་གྱིས་སེམས་ཅན་དེ་དང་དེ་དག་ཐམས་ཅད་ཀྱི་ཟུག་རྔུ་རྣམས་དབྱུང་བར་འགྱུར། ཟུག་རྔུ་རྣམས་བསལ་བར་འགྱུར་རོ། །འོད་སྲུང་དེ་བཞིན་དུ་དགེ་སློང་ཡངས་པ་ལ་དད་པའི་ཡིད་ཅན་དེའི་མིང་ཐོས་པའི་སེམས་ཅན་གང་དག་ཡིན་པ་དེ་དག་ཐམས་ཅད་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་ཟུག་རྔུ་རྣམས་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། དེས་ངའི་བསྟན་པ་ལ་མདོ་འདི་ཕྱུང་ཞིང་རྒྱས་པར
58.103b
བྱས་ཏེ། དེ་བས་ན་ཆོས་དང་ལྡན་པ་མངོན་སུམ་དུ་བྱས་པ་དེའི་མཐུའོ། །འོད་སྲུང་ལྟོས། རེ་ཤིག་རྒྱལ་པོའི་རྔ་བོ་ཆེ་སེམས་མེད་པ་ཕལ་པ་དེ་ཡང་སེམས་དང་བཅས་པས་སྨན་གྱིས་བྱུགས་ཤིང་བདུགས་ཏེ་བརྡུངས་མ་ཐག་ཏུ་སེམས་ཅན་རྣམས་ལ་ཕན་པ་སྐྱེད་པར་བྱེད་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཡངས་པ་ལ་དད་པའི་ཡིད་ཅན་གྱི་མིང་ཐོས་པས་སེམས་ཅན་རྣམས་ཀྱི་ཉོན་མོངས་པ་རྣམ་པ་གསུམ་འབྲལ་བར་འགྱུར་བ་ལྟ་སྨོས་ཀྱང་ཅི་དགོས། གལ་ཏེ་དེ་ལྟར་རེ་ཤིག་བྱང་ཆུབ་སེམས་དཔའི་མིང་ཐོས་པས་སེམས་ཅན་རྣམས་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་ཟུག་རྔུ་རྣམས་འབྲལ་བར་འགྱུར་ན། བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་སངས་རྒྱས་བཅོམ་ལྡན་འདས་རྣམས་ཀྱི་མཚན་བརྗོད་པ་འམ། ཡོན་ཏན་ཡོངས་སུ་བསྒྲགས་པ་ལྟ་སྨོས་ཀྱང་ཅི་དགོས། གལ་ཏེ་དེ་ལྟར་བཅོམ་ལྡན་འདས་ཤཱཀྱ་ཐུབ་པའི་མཚན་ཙམ་གྱིས་སེམས་ཅན་རྣམས་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་ཟུག་རྔུ་རྣམས་འབྲལ་བར་འགྱུར་ན་སེམས་ཅན་ལ་ཕན་པ་སྟོན་པ་ཞིག་གིས་རྔ་བོ་ཆེ་ཆེན་པོའི་མདོ་འདི་ལས་འགྲེས་སམ། ཚིགས་སུ་བཅད་པ་འམ། ཚིག་འགའ་ཙམ་འམ། མིང་ཙམ་བསྟན་པ་འམ། ལེའུ་སྟོན་ན་སེམས་ཅན་རྣམས་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་ཟུག་རྔུ་རྣམས་འབྲལ་བར་འགྱུར་བ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། ངས་དགེ་སློང་དག་ཚུལ་ཁྲིམས་དང་ལྡན་པའི་སེམས་ཀྱི་སྨོན་ལམ་འགྲུབ་བོ་ཞེས་བཤད་དེ། སྔོན་སྨོན་ལམ་ལེགས་པར་སྦྱང་བ་བྱས་པའི་ཕྱིར་རོ། །འདི་ནི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཉིད་ཡིན་ཏེ། འདི་ལྟ་སྟེ། རྔ་བོ་ཆེ་ཆེན་པོའི་མདོ་ཆེན་པོས་མ་བྱས་པ། མ་བྱུང་བ
58.104a
མ་འགགས་པའོ། །འོད་སྲུང་ཁྱོད་ཀྱང་དེ་ལྟ་བས་ན་མ་འོངས་པའི་དུས་ན་ང་དང་འདྲ་བར་འགྱུར་རོ། །དེ་ཅིའི་ཕྱིར་ཞེ་ན། ཁྱོད་ཀྱི་ཡང་མིང་ཐོས་པའི་དགེ་སློང་ངམ། །དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ཡིན་པ་དེ་དག་དང ། སེམས་ཅན་དེ་དག་ཐམས་ཅད་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་ཟུག་རྔུ་རྣམས་འབྲལ་བར་འགྱུར་རོ། །དེའི་ཕྱིར་འོད་སྲུང་ཁྱོད་ཀྱང་མདོ་འདི་ཞུས་ནས་ཡུན་རིང་པོར་འཇིག་རྟེན་དུ་འབྱིན་པར་འགྱུར་རོ། །གསོལ་པ། བཅོམ་ལྡན་འདས་གལ་ཏེ་དེ་ལྟ་ལགས་ན་རྔ་བོ་ཆེ་ཆེན་པོའི་མདོ་ཆེན་པོ་དེ་ལས་ཕྱོགས་འགའ་ཙམ་ཞིག་བདག་ལ་ལེགས་པར་བཤད་དུ་གསོལ། །འོད་སྲུང་དུས་ལ་བབ་ཀྱིས་ཁྱོད་ང་ལ་ཕྱོགས་འགའ་ཞིག་ཞུས་ཤིག་།འོད་སྲུང་གིས་ལེགས་སོ་ཞེས་གསོལ་ནས་ཞུ་བ་འདི་ཞུས་སོ། །བཅོམ་ལྡན་འདས་གང་ན་སྲིད་ཡོད་སྲིད་པ་དེར་སྡུག་བསྔལ། །གང་ན་སྲིད་མེད་སྡུག་བསྔལ་མེད་པ་ཡི། །མྱ་ངན་འདས་པ་དེ་ནི་མཆོག་ཏུ་བདེ། །བདེ་སྡུག་སྤང་ཕྱིར་མྱ་ངན་འདས་མཆོག་འགྱུར། །སྲིད་པ་ཡོད་ན་བདེ་དང་སྡུག་བསྔལ་ཏེ། །སྲིད་པ་མེད་ན་བདེ་དང་སྡུག་བསྔལ་མེད། །དེའི་ཕྱིར་མྱ་ངན་འདས་ཐོབ་འདོད་པ་ཡིས། །རིགས་ཀྱི་བུ་ཡིས་སྲིད་འདོད་ཡོངས་སུ་གཅད་ཅེས་བཀའ་སྩལ་པ་འདིའི་དོན་ཅི་ལགས། འདིར་ཚིགས་སུ་བཅད་པས་ལེགས་པར་བཀའ་སྩལ་པ། སྲེད་པ་ཐམས་ཅད་མི་རྟག་མི་བརྟན་ལ། །ཐམས་ཅད་དུ་ཡང་སྙིང་པོ་མེད་པས་ན། །སྲིད་པ་གང་ཡིན་དེ་ནི་སྡུག་བསྔལ་ཏེ། །གང་ལ་སྲིད་མེད་དེ་ན་སྡུག་བསྔལ་མེད། །སྲིད་པ་ཡོད་པ་མིན་ན་སྡུག་བསྔལ་མེད། །འདི་ན་སྲིད་ཡོད་སྡུག་བསྔལ་འགྱུར་བས་ན། །སྲིད་ལ་མངོན་པར་དགའ་བར་མི་བྱ་ཞིང ། །སྲིད་པ་རྣམས་ལ་ཡིད་བརྟན་འགྲོ་མི་བྱ། །བཅོམ་ལྡན་སྲིད་དང་སྲིད
58.104b
པ་མེད་པ་དང ། །བདེ་དང་སྡུག་བསྔལ་འགྱུར་བ་ཡོད་པར་སྟོན། །དེ་སྐད་གསུངས་ནས། བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་བཀའ་སྩལ་ཏོ། །འོད་སྲུང་དེ་ལྟར་ཚིག་གི་དོན་འདི་ནི་བརྟན་པའི་ཚིག་གི་དོན་ཡིན་པས་རེ་ཤིག་འོད་སྲུང་ཁྱོད་ཀྱིས་མི་ཤེས་སོ། །སེམས་ཅན་ནི་ཕལ་ཆེར་སྲིད་པ་གཅོད་པར་མི་བྱེད་དེ། སེམས་ཅན་རྣམས་ནི་འདུ་བྱེད་སྐུད་པས་བརྒྱུས། །སྲིད་མེད་མྱ་ངན་འདས་པ་མཆོག་ཏུ་བདེ། །འོད་སྲུང་གིས་གསོལ་པ། གང་གིས་མྱ་ངན་འདས་ཐོབ་པ། །མྱ་ངན་འདས་པ་དེ་མི་གནས། །དེ་ལ་བདེ་བ་མིང་ཙམ་སྟེ། །མིས་ནི་མྱོང་བར་འགྱུར་མ་མཆིས། །བཅོམ་ལྡན་འདས་ཀྱིས་བཀའ་སྩལ་པ། ཐར་པ་བརྟན་པ་མིང་ཙམ་མིན། །ཡོད་དང་མེད་དང་ཐེར་ཟུག་གཞི། །དེ་ལྟ་བས་ན་འདི་ནི་ཉན་ཐོས་དང ། རང་སངས་རྒྱས་ཐམས་ཅད་ཀྱི་ཡུལ་མ་ཡིན་ཞིང་སྤྱོད་ཡུལ་མ་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་གཟུགས་ཀྱང་ལགས་ལ་ཐེར་ཟུག་ཀྱང་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དཔེར་ན་ལྷོ་ཕྱོགས་ཀྱི་ཡུལ་སྐྱེ་བོའི་བཅོམ་བརླག་ཅེས་བྱ་བ་ནས་སེམས་ཅན་གཞན་འགའ་ཞིག་འོངས་པར་གྱུར་ལ། མི་དེ་ལ་མི་འགའ་ཞིག་གིས་ཁྱོད་གང་ནས་འདིར་འོངས་ཤེས་དྲིས་པ་དང ། དེ་ནས་དེས་སྨྲས་པ། ཁོ་བོ་ནི་ལྷོ་ཕྱོགས་ཀྱི་བཅོམ་བརླག་ནས་འོངས་སོ། །མིས་ཡང་སྨྲས་པ། དེ་ཡུལ་གྱི་ཕྱོགས་གང་ན་ཡོད། དེ་ནས་མི་དེས་མཛུབ་མོས་ལྷོ་ཕྱོགས་ཀྱི་ལམ་གྱི་ནམ་མཁའ་བསྟན་ན། འོད་སྲུང་མི་དེས་མི་དེ་ལ་ཇི་ག་ཡིད་ཆེས་པར་འགྱུར་རམ། དེ་ཅིའི་ཕྱིར་ཞེ་ན། སོང་ན་དེ་མཐོང་བར་འགྱུར་རོ། །འོད་སྲུང་དེ་བཞིན་དུ་ཁྱོད་ཀྱིས་མ་མཐོང་བར་དད་པས་ཡིད་ཆེས་པར་གྱིས་ཤིག ། འཕགས་པ་རྔ་བོ་ཆེ་ཆེན་པོའི་ལེའུ། བམ་པོ་གཉིས་པ། དེ་ནས་བཅོམ་ལྡན་འདས་ཀྱིས་ཚིགས་སུ་བཅད
58.105a
པ་འདི་བཀའ་སྩལ་ཏོ། །ཇི་ལྟར་མཁའ་ལ་མཛུབ་མོས་སྟོན་པ་ལྟར། །དེ་བཞིན་ཐར་པ་མིང་ཙམ་གྱིས་བསྟན་ཏོ། །ཇི་ལྟར་ལྷོ་ཕྱོགས་བཅོམ་བརླག་མི་བཞིན་དུ། །དེ་བཞིན་ང་ཉིད་བརྟེན་པ་མེད་ནས་བྱོན། །འོད་སྲུང་འདི་ལ་འང་དོན་མཐོང་ན། །རྒྱུ་ནི་དགོས་པ་ཡོད་མེད་དེ། །མངོན་སུམ་མ་གྱུར་དོན་ལ་ནི། །རྒྱུ་དང་རྐྱེན་ཀྱང་དེ་བཞིན་ནོ། །འོད་སྲུང་དེ་ལྟ་བས་ན་སངས་རྒྱས་བཅོམ་ལྡན་འདས་ཀྱིས་རྒྱུ་དུ་མས་ཐར་པའི་ཚིག་གི་དོན་ཉེ་བར་སྟོན་པར་མཛད་དོ། །བཀའ་སྩལ་པ། འོད་སྲུང་རྒྱུ་ཞེས་བྱ་བ་ཅི་ཡིན་པར་འདོད། གསོལ་པ། རྒྱུ་ནི་བྱེད་རྒྱུ་ཞེས་བགྱི་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྐྱེན་ཅེས་བྱ་བ་གང་གི་ཚིག་བླ་དགས་ཡིན། གསོལ་པ། བཅོམ་ལྡན་འདས་རྐྱེན་ཅེས་བགྱི་བ་དེ་ནི་རྟེན་ལགས་སོ། །བཀའ་སྩལ་པ། འོད་སྲུང་རིགས་པའི་དཔེ་དང ། རྒྱུ་དང་ཉེ་བར་སྦྱར་བ་དང ། བྱེད་རྒྱུ་རྣམས་ཀྱིས་དེ་ཇི་ལྟ་བུ་ཡིན་པ་དེ་ཁོ་ན་དེ་བཞིན་དུ་གསལ་བར་སྟོན་ཅིག་།གསོལ་པ། བཅོམ་ལྡན་འདས་དཔེར་ན་ཕ་དང་མ་གཉིས་འདུས་པ་ལས་བུ་འབྱུང་བར་འགྱུར་ཏེ། དེ་ལ་མ་ནི་རྒྱུ་ལགས་སོ། །ཕ་ནི་རྐྱེན་ལགས་ཏེ། དེ་ལྟ་བས་ན་ཕ་དང་མ་གཉིས་ནི་བུའི་རྒྱུ་དང་རྐྱེན་ལགས་སོ། །དེ་བཞིན་དུ་རྒྱུ་དང་རྐྱེན་གྱིས་ཆོས་སྐྱེ་བར་འགྱུར་ཏེ། འདི་ནི་གྲུབ་པ་ཞེས་བགྱིའོ། །གྲུབ་པ་ཞེས་བྱ་བ་ཅི་ཡིན། གྲུབ་པ་ཞེས་བགྱི་བ་ནི་འཇིག་རྟེན་གྱི་གྲགས་པ་ལགས་སོ། །འཇིག་རྟེན་ཞེས་བྱ་བ་ཅི་ཡིན། འོད་སྲུང་གིས་གསོལ་པ། སེམས་ཅན་དང་ལྡན་པས་བཏགས་པ་གང་ལགས་པའོ། །སེམས་ཅན་ཞེས་བྱ་བ་ཅི་ཡིན། སེམས་ཅན་ཞེས་བགྱི་བ་ནི་ཆོས་ཀྱི་བརྡར་བཏགས་པ་ལགས་སོ། །ཆོས་ཞེས་བྱ་བ་ཅི་ཡིན། གསོལ་པ། ཆོས་མ་ལགས་པའི་ཆོས་དང ། ཆོས་ཀྱི་ཆོས་སོ། །ཆོས་དེ་དག་ཀྱང་རྣམ་པ་གཉིས་སུ་བསྟན་ཏོ། །རྣམ་པ་གཉིས་གང་ལགས་ཤེ་ན། འདུས་བྱས་དང ། འདུས་མ་བྱས་དང ། གཟུགས་ཅན་དང ། གཟུགས་ཅན་མ་ལགས་པ་སྟེ།
58.105b
དེ་ལས་མུ་གསུམ་པ་ནི་མ་མཆིས་པ་ལགས་སོ། །དེ་ལ་ཆོས་ཞེས་བྱ་བ་ཇི་ལྟ་བུ་ཡིན། གསོལ་པ། ཆོས་ཞེས་བགྱི་བ་ནི་གཟུགས་མ་མཆིས་པ་ལགས་སོ། །བཀའ་སྩལ་པ། ཆོས་མ་ཡིན་པ་ཇི་ལྟ་བུ་ཡིན། ཆོས་མ་ལགས་ཤེས་བགྱི་བ་དེ་ཡང་གཟུགས་མ་མཆིས་པ་ལགས་སོ། །བཀའ་སྩལ་པ། གལ་ཏེ་ཆོས་དང་ཆོས་མ་ཡིན་པ་གཟུགས་མེད་ཅིང་མཚན་མ་མེད་པ་ཡིན་ན་དེ་ལ་ཆོས་ནི་གང ། ཆོས་མ་ཡིན་པ་ནི་གང ། གསོལ་པ། ཆོས་ཞེས་བགྱི་བ་ནི་མྱ་ངན་ལས་འདས་པ་ཞེས་བགྱི་བ་ལགས་སོ། །ཆོས་མ་ལགས་པ་ཞེས་བགྱི་བ་ནི་སྲེད་པ་ཞེས་བགྱི་བ་ལགས་སོ། །བཀའ་སྩལ་པ། གལ་ཏེ་དེ་ལྟར་ཆོས་དང་ཆོས་མ་ཡིན་པ་གཟུགས་མེད་ཅིང་མཚན་ཉིད་མེད་པ་ཡིན་ན་སངས་རྒྱས་རྣམས་ཀྱིས་ཇི་ལྟར་ཅི་ཞིག་མཚན་མ་གང་གིས་འདི་ནི་ཆོས་ཡིན་ནོ་ཞེས་རྣམ་པར་མཁྱེན་པར་འགྱུར། གསོལ་པ་སེམས་ཅན་རྣམས་འཁོར་བར་སྐྱེས་ནས་དགེ་བའི་བསོད་ནམས་དང ། དགེ་བའི་རྩ་བ་རྣམ་པ་སྣ་ཚོགས་ལ་བསྟེན་པ་ན་དེའི་ཚུལ་འདི་དང ། དེ་དེ་ལྟར་ཆོས་མངོན་དུ་ཡང་དག་པར་སྤྱད་པས་དགེ་བའི་མཚན་ཉིད་ཐམས་ཅད་ཀུན་དུ་སྐྱེ་བར་འགྱུར་བ་སྟེ། དེ་ལྟར་ཆོས་མངོན་དུ་ཡང་དག་པར་སྤྱོད་པ་གང་ལགས་པ་དེ་ལྟ་བུའི་སེམས་ཅན་དེ་དག་ནི་ཆོས་ལགས་སོ། །སེམས་ཅན་རྣམས་འཁོར་བར་སྐྱེས་ནས་བསོད་ནམས་མ་ལགས་པ། སྡིག་པའི་ལས་རྣམ་པ་སྣ་ཚོགས་ཀུན་དུ་སྤྱོད་ཅིང་ཆོས་མ་ལགས་པ་ཀུན་སྤྱོད་པ། དེ་ཁོ་ན་ལ་སྡིག་པ་མི་དགེ་བའི་མཚན་ཉིད་དེ་དག་ཐམས་ཅད་སྐྱེ་བར་འགྱུར་ཏེ། དེ་ལྟར་ཆོས་མ་ལགས་པ་ཀུན་དུ་སྤྱོད་པ་གང་ལགས་པ་དེ་ལྟ་བུའི་སེམས་ཅན་དེ་ནི་ཆོས་མ་ལགས་པ་ལགས་སོ། །དེ་ལ་སེམས་ཅན་ཞེས་བགྱི་བ་ནི་ནང་གི་སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང །
58.106a
ཁམས་བཞིས་ཡང་དག་པར་བསྡུས་ཤིང་བཏགས་པ་དང ། མིག་དང ། རྣ་བ་དང་སྣ་དང ། ལྕེ་དང ། ལུས་དང ། ཡིད་ཀྱི་སྐྱེ་མཆེད་དྲུག་དང ། དབང་པོ་ལྔ་དང ། ཚོར་བ་དང ། འདུ་ཤེས་དང ། སེམས་པ་དང ། སེམས་དང ། ཡིད་ཀྱི་རྣམ་པར་ཤེས་པ་སྟེ། དེ་ལྟར་སྲིད་པའི་ཡན་ལག་བཅུ་གསུམ་གྱི་བར་ནི་ཆོས་ཐམས་ཅད་ཅེས་བགྱི་བ་ལགས་སོ། །བཀའ་སྩལ་པ། འོད་སྲུང་དེ་དག་ཁོ་ན་ལ་སེམས་ཅན་གྱི་ཆོས་ཞེས་བྱ་ན། དེ་ལ་སེམས་ཅན་ཞེས་བྱ་བའི་ཆོས་གང་ཡིན་ཞེ་ན། གསོལ་པ། དེ་ལ་སེམས་ཅན་ཞེས་བགྱི་བར་བཏགས་པའི་ཆོས་འགའ་ཡང་མ་མཆིས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དཔེར་ན་ཀོ་ས་ལའི་རྒྱལ་པོ་གསལ་རྒྱལ་གྱི་རྔ་བོ་ཆེ་ཞེས་བགྱི་བ་གང་ལགས་པ་དེའི་རྔ་བོ་ཆེ་ཞེས་བགྱི་བ་དེ་གང་ལགས། བཀའ་སྩལ་པ། འོད་སྲུང་རྔ་བོ་ཆེ་གང་ཡིན་པ་དེ་ཉིད་རྔ་བོ་ཆེ་ཡིན་པར་ཤེས་པར་བྱ་སྟེ། རྔ་བོ་ཆེ་ཞེས་བྱ་བ་ནི་ལྤགས་པ་དང ། དབྱིག་གུ་དང ། ཤིང་ལེབ་དང ། ཆོས་འདི་གསུམ་ཚོགས་པ་གང་ཡིན་པའི་ཆོས་དེ་དག་ལ་རྔ་བོ་ཆེ་ཞེས་བྱའོ། །གསོལ་པ། དེ་ལ་བརྡུང་བའི་མི་ལ་རྔ་བོ་ཆེ་ཞེས་བགྱི་བ་ལགས་སམ། བཀའ་སྩལ་པ། མི་མེད་པར་ཡང་རྔ་བོ་ཆེ་རླུང་གིས་བསྐྱོད་པ་ན་སྒྲ་འབྱུང་ངོ ། །གསོལ་པ། བཅོམ་ལྡན་འདས་ཅི་ལགས། རྔ་བོ་ཆེ་ཞེས་བགྱི་བ་ཆོས་སམ། འོན་ཏེ་ཆོས་མ་ལགས་པ་ལགས། བཀའ་སྩལ་པ། རྔ་བོ་ཆེ་ཞེས་བྱ་བ་འདི་ནི་ཆོས་ཀྱང་མ་ཡིན། ཆོས་མ་ཡིན་པ་ཡང་མ་ཡིན་ནོ། །གསོལ་པ། དེ་ཅི་ཞེས་བགྱི། བཀའ་སྩལ་པ། ཆོས་གང་ཞིག་ཆོས་གང་དང་ཡང་ལྷན་ཅིག་ལྡན་པ་མ་ཡིན་ཞིང ། ཆོས་མ་ཡིན་པ་དང་ཡང་མ་ཡིན་པ་འདི་ལུང་དུ་མ་བསྟན་པའི་ཆོས་ཞེས་བྱའོ། །གསོལ་པ། གལ་ཏེ་ལུང་དུ་མ་བསྟན་པའི་ཆོས་ཤིག་མཆིས་ན་དེས་ན་འཇིག་རྟེན་ན་ཆོས་གསུམ་མཆིས་པར་འགྱུར་རོ། །བཀའ་སྩལ་པ། ལུང་དུ་མ་བསྟན་པ་ཞེས་བྱ་བ་གང་ཡིན་པ་དེ་ནི་ཇི་ལྟར་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་པ་ལྟར་མ་ནིང་ཞེས་བྱའོ། །དཔེར་ན་ཇི་ལྟ་བུ་ལགས། བཀའ་སྩལ་པ། འོད་སྲུང་ཁྱོད་ཀྱིས
58.106b
འདི་ནི་ཕ་དང་མ་འདུས་པའི་བུ་ཡིན་ནོ་ཞེས་སྨྲས་པ་གལ་ཏེ་ཕ་དང་མ་འབྲས་བུ་མེད་པར་གྱུར་ན་ཁ་ཅིག་འདི་སྐད་ཅེས་མ་དང་ཕ་ནི་རྒྱུ་དང་རྐྱེན་མ་ཡིན་ནོ་ཞེས་སྨྲ་བར་འགྱུར་རོ། །ཡང་བཀའ་སྩལ་པ། སེམས་ཅན་གྱི་ས་བོན་གྱི་དངོས་པོ་མེད་པ་གང་ཡིན་པ་དེ་དག་ནི་འབྲས་བུ་མེད་པས་དེ་དག་ནི་རྟག་ཏུ་མ་ནིང་ཞེས་བྱ་བར་ཤེས་པར་བྱའོ། །དེ་ཅིའི་ཕྱིར་ཞེ་ན། འོད་སྲུང་དཔེར་ན་ཀོ་ས་ལའི་རྒྱལ་པོ་གསལ་རྒྱལ་གང་གི་ཚེ་ཕ་རོལ་གྱི་དམག་ཚོགས་དང་ལྷན་ཅིག་ལྷག་པར་ཉམ་ང་བར་གྱུར་པ་ན་བརྒྱ་ལ་ཇི་ཞིག་ལྟར་གྱུར་པ་དེའི་ཚེ། དེའི་དྲུང་དུ་དབང་ཐང་གིས་འཚོ་བ་དག་དེ་དང་ལྷན་ཅིག་རྗེས་སུ་མི་འབྲང་ཞིང་སྒྲོལ་བར་མི་བྱེད་པ་གང་ཡིན་པ་དེ་དག་བུད་མེད་དང་འདྲ་བར་བལྟ་བར་བྱའོ། །གསོལ་པ། ཅིའི་སླད་དུ། བཀའ་སྩལ་པ། རྒྱལ་པོ་རྣམས་ནི་ཞོ་ཤས་འཚོ་བའི་མི་རྣམས་ཀྱི་རང་བཞིན་བརྟགས་ནས་གསོར་འཇུག་གོ། །རྒྱུ་དེས་ན་ས་བོན་མེད་པའི་སེམས་ཅན་དེ་དག་ཕ་དང་མར་མི་འགྱུར་བས་སེམས་ཅན་དེ་དག་རྟག་པར་མ་ནིང་ཡིན་པར་བལྟ་བར་བྱའོ། །ཡང་བཀའ་སྩལ་པ། དགེ་བའི་ཆོས་དང ། མི་དགེ་བའི་ཆོས་དང ། ལུང་དུ་མ་བསྟན་པའི་ཆོས་ཏེ། དགེ་བའི་ཆོས་ནི་ཚོར་བ་བདེ་བ་ཡིན་ནོ། །མི་དགེ་བའི་ཆོས་ནི་ཚོར་བ་སྡུག་བསྔལ་བ་ཡིན་ནོ། །ལུང་དུ་མ་བསྟན་པའི་ཆོས་ནི་ཚོར་བ་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་ཡིན་ཏེ་སེམས་ཅན་རྣམས་ནི་ཆོས་འདི་གསུམ་གྱིས་རྟག་ཏུ་རེག་པར་འགྱུར་རོ། །དེ་ལ་ཚོར་བ་བདེ་བ་ཞེས་བྱ་བ་ནི་ལྷ་དང་མི་རྣམས་ཀྱི་འདོད་པའི་ཡོན་ཏན་ལྔ་ཡིན་ནོ། །ཚོར་བ་སྡུག་བསྔལ་བ་ཞེས་བྱ་བ་ནི་སེམས་ཅན་དམྱལ་བ་དང ། དུད་འགྲོའི་སྐྱེ་གནས་པ་དང ། ཡི་དགས་ཀྱི་འཇིག་རྟེན་གྱི་ཡིན་ནོ། །ཚོར་བ་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་ནི་ཇི་ལྟར་འབྲུམ་བུ་ཕྲ་མོ་དང ། ཤུ་བ་ཡིན་ཏེ་དེ་ལ་འབྲུམ་བུ་ཕྲ་མོ་དང ། ཤུ་བས་ཉོན་མོངས་པའི་སེམས་ཅན་རྣམས་ནི་ལུང་དུ་མ་བསྟན་པ་ཡིན་ནམ། འོད་སྲུང་གིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། ཅིའི་ཕྱིར། གསོལ་པ། བདེ་བ་ལས་སྡུག་བསྔལ་འབྱུང་ཞིང་སྡུག་བསྔལ་ལས་ཀྱང་སྡུག་བསྔལ་འབྱུང་བས་འདི་གཉིས་ཀ་ལུང་དུ་མ་བསྟན་པ་ལགས
58.107a
སོ། །བཀའ་སྩལ་པ། ཅི་ཁ་ཟས་ལས་ནད་བྱུང་ངམ། གསོལ་པ། གང་གི་ཚེ་འཚལ་བ་དེའི་ཚེ་བདེ་བ་ཞེས་བགྱི་བ་ལགས་སོ། །གང་གི་ཚེ་ནད་དུ་གྱུར་པ་དེའི་ཚེ་སྡུག་བསྔལ་ཞེས་བགྱི་བ་ལགས་ཏེ། དེ་ལ་ཤུ་བ་གང་ལགས་པ་དེ་ནི་ལུང་དུ་མ་བསྟན་པ་ཞེས་བགྱི་ལགས་སོ། །བཀའ་སྩལ་པ། གལ་ཏེ་དེ་ལྟ་བས་ན་བདེ་བ་དང་སྡུག་བསྔལ་བ་ཡང་ལུང་དུ་མ་བསྟན་པ་ཞེས་བྱ་ལ་ཕ་དང་མ་དང་བུ་ཡང་ལུང་དུ་མ་བསྟན་པར་འགྱུར་རོ། །གསོལ་པ་དེ་ནི་མ་ལགས་སོ། །བཀའ་སྩལ་པ། འོ་ན་ཇི་ལྟ་བུ་ཡིན། གསོལ་པ། ཇི་ལྟར་འདུ་ཤེས་མེད་འདུ་ཤེས་མེད་མིན་ལ་སོགས་པའི་ལྷ་ཐེར་ཟུག་གི་གཞི་ཞེས་མི་བགྱི་བ་ལྟ་བུའི་ཆོས་དགེ་བ་འདི་ཡང་དེ་དང་འདྲ་ལགས་སོ། །བཀའ་སྩལ་པ། འོད་སྲུང་ཁྱོད་ཀྱིས་ཚོར་བ་དང ། འདུ་ཤེས་ལ་སེམས་ཅན་ནོ་ཞེས་སྨྲས་པ། དེས་ན་འདུ་ཤེས་མེད་འདུ་ཤེས་མེད་མིན་ལ་སོགས་པའི་ལྷ་དག་སེམས་ཅན་མ་ཡིན་པར་འགྱུར་རོ། །གསོལ་པ། བཅོམ་ལྡན་འདས་དེ་རྣམས་ལ་ཡང་འདུ་བྱེད་ཀྱི་ངོ་བོ་མཆིས་ལགས་སོ། །བཀའ་སྩལ་པ། འོ་ན་ཚོར་བ་དང་འདུ་ཤེས་མ་གཏོགས་པའི་ཆོས་འདི་དག་ལ་སེམས་ཅན་ཞེ་འམ། འོན་ཏེ་ཁ་ཅིག་དེ་ལྟ་བུའི་སེམས་ཅན་དག་ཡོད་དོ་ཞེས་ཟེར་ན། དེས་ན་འདི་ལྟར་སེམས་ཅན་མ་ཡིན་པའི་ཆོས་དང་ལྡན་པ་དག་སེམས་ཅན་དུ་འགྱུར་རོ། །ཅིའི་སླད་དུ། སེམས་ཅན་གཟུགས་ཅན་ཡིན་ནམ་འོན་ཏེ་གཟུགས་ཅན་མ་ཡིན། གསོལ་པ། གཟུགས་ཅན་ཡང་མ་ལགས། གཟུགས་ཅན་མ་ལགས་པ་ཡང་མ་ལགས་མོད་ཀྱི་ཆོས་དེ་དག་དང་ལྡན་པ་ནི་སེམས་ཅན་ཞེས་བགྱི་ལགས་སོ། །བཀའ་སྩལ་པ། གལ་ཏེ་དེ་ལྟར་ན་སེམས་ཅན་མ་ཡིན་པའི་ཆོས་དང་ལྡན་པ་དེ་དག་སེམས་ཅན་དུ་སྐྱེ་བར་འགྱུར་བའི་གཟུགས་མེད་པ་ཞེས་བྱའོ། །ཇི་སྟེ་དེ་ལྟར་གྱུར་ན་འཇིག་རྟེན་དུ་ཆོས་རྣམ་པ་གཉིས་པོ་གཟུགས་ཅན་མ་ཡིན་པ་དེ་འབྱུང་བར་འགྱུར་ཏེ། ཆོས་གཟུགས་ཅན་དང ། ཆོས་མ་ཡིན་པ་གཟུགས་ཅན་ནོ། །ཐར་པ་ཆོས་དང་ལྷན་ཅིག་གམ། འོན་ཏེ་ཆོས་མ་ལགས་པ་དང་ལྷན་ཅིག་ལགས། གཟུགས་མ་མཆིས་པའི་ལྷ་ལ་ཡང་ཐར
58.107b
པ་མཆིས་པ་ལགས་སམ། བཀའ་སྩལ་པ། དེ་ནི་མ་ཡིན་ཏེ། ཆོས་འདུས་བྱས་དང ། འདུས་མ་བྱས་པ་ཡོད་པས། དེའི་ཕྱིར་གཟུགས་མེད་པའི་ལྷ་དེ་དག་ཀྱང་འདུས་བྱས་ཀྱི་ནང་དུ་བགྲང་བར་འགྱུར་གྱི་ཐར་པ་ནི་འདུས་མ་བྱས་ཡིན་ནོ། །གསོལ་པ། དེས་ན་གཟུགས་མ་མཆིས་པའི་ལྷ་རྣམས་ཀྱང་གཟུགས་དང་ལྡན་པར་འགྱུར་ལགས་སོ། །འོད་སྲུང་ཇི་ལྟར་འདུས་བྱས་ཐམས་ཅད་གཟུགས་ཅན་ཡིན་པ་དང ། འདུས་མ་བྱས་གཟུགས་ཅན་མ་ཡིན་པར་གསལ་བར་སྨྲོས་ཤིག་།གསོལ་པ། བཅོམ་ལྡན་འདས་གཟུགས་མ་མཆིས་པའི་ལྷ་རྣམས་གཟུགས་དང་ལྡན་ནོ་ཞེས་བགྱི་བའི་གཟུགས་སངས་རྒྱས་ཀྱི་ཡུལ་དུ་འགྱུར་བ་ལགས་གྲང ། བདག་ཅག་གི་ཡུལ་དུ་ནི་མི་འགྱུར་ལགས་སོ། །བཀའ་སྩལ་པ། འོད་སྲུང་ལེགས་སོ་ལེགས་སོ། །དེ་བཞིན་དུ་ཐར་པར་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱང་ངའི་ཡུལ་ཡིན་ཏེ། དེ་རྣམས་ཀྱང་གཟུགས་ཅན་ཡིན་ལ་ཐར་པ་དེ་ཡང་གཟུགས་ཅན་ཡིན་ནོ། །ཡང་བཀའ་སྩལ་པ། འོད་སྲུང་ཅི་ཁྱོད་ཀྱིས་གཟུགས་མེད་པའི་ལྷ་རྣམས་ཀྱི་ལྷའི་གནས་དང་བྱེད་པ་ཡང་དག་པར་ཤེས་སམ། ཡང་བཀའ་སྩལ་པ། འོད་སྲུང་ཅི་ཁྱོད་ཀྱིས་གཟུགས་ཅན་གྱི་ལྷ་རྣམས་གཟུགས་མེད་པ་ཞེས་བྱ་བའི་ནང་དུ་བགྲང་ངམ། ཅི་ན་བདག་ཅག་གི་ཡུལ་མ་ལགས་སོ་ཞེས་ཟེར། ཡང་བཀའ་སྩལ་པ། ཐར་པ་བརྙེས་པའི་སངས་རྒྱས་བློ་ཤིན་དུ་རྣམ་པར་དག་པ་རྣམས་ཀྱང་དེ་ཁོ་ན་བཞིན་དུ་གཟུགས་ཞེས་བྱ་བར་གསལ་བར་ཡང་དག་པར་ལྟོས་ཤིག་།འོད་སྲུང་གིས་གསོལ་པ། བཅོམ་ལྡན་འདས་གལ་ཏེ་དེ་ལྟར་ན་ཐར་པ་ཐོབ་པ་གནས་པའི་ཕྱིར་ཡང་བདེ་བ་དང ། སྡུག་བསྔལ་མྱོང་བར་འགྱུར་ལགས་སོ། །བཀའ་སྩལ་པ། སེམས་ཅན་ནད་པ་ཞིག་སྨན་བཅུད་ཀྱིས་ལེན་འཐུངས་ནས་ནད་དང་བྲལ་བར་གྱུར་ན་ཅི་ཡང་ནད་བུ་ཅན་དུ་འགྱུར
58.108a
རམ། གལ་ཏེ་འགའ་ཞིག་མཆིས་ན་ངེས་པར་འགྱུར་ལགས་སོ། །བཀའ་སྩལ་པ། གལ་ཏེ་ལས་མེད་ཀྱང་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། འོད་སྲུང་བདེ་བ་དང་སྡུག་བསྔལ་སྤངས་པ་དེ་ཉིད་ཐར་པ་ཡིན་ཏེ། ནད་ནི་བདེ་བ་དང་སྡུག་བསྔལ་ལྟ་བུ་ཡིན་ལ་མི་ལྟ་བུར་ནི་མྱ་ངན་ལས་འདས་པ་ཐོབ་པར་བལྟའོ། །གསོལ་པ། བཅོམ་ལྡན་འདས་ཅི་ལགས། བདེ་བ་དང་སྡུག་བསྔལ་སྤངས་པ་ཞེས་བགྱི་བ་ལས་མ་མཆིས་པས་ནད་ཟད་པ་ཐོབ་པ་ལགས་སམ། བཀའ་སྩལ་པ། ཐར་པ་ཐོབ་པ་ནི་འཇིག་རྟེན་གྱི་བདེ་བ་དང་སྡུག་བསྔལ་གྱི་ལས་གང་ཡིན་པ་དེ་དང་བྲལ་ཞིང་ཟད་པ་བཞིན་ནོ། །བཅོམ་ལྡན་འདས་དེ་ཅིའི་སླད་དུ་ཡང་འགུམ་པར་མི་འགྱུར་ལགས། བཀའ་སྩལ་པ། ནམ་མཁའ་ནམ་མཁའ་ལྟ་བུའོ་ཞེས་བྱ་བ་རྒྱ་མཚོ་ཆེན་པོ་ནམ་མཁའ་ལྟ་བུའོ་ཞེས་པ། ཅི་ནམ་མཁའ་དཔེ་མེད་པ་རྒྱ་མཚོ་ཆེན་པོ་ལྟ་བུ་ཡིན་ནམ། དེ་བཞིན་དུ་ཐར་པ་ནི་དཔེ་མེད་པ་ཡིན་ནོ། །ཇི་ལྟར་གཟུགས་མེད་པའི་ལྷ་རྣམས་ཀྱི་གཟུགས་ཡོད་ཀྱང་དགའ་བ་དེ་དང་དེ་ལྟ་བུས་གནས་པ་མི་ཤེས་པ་དེ་བཞིན་དུ་ཉན་ཐོས་དང ། རང་སངས་རྒྱས་རྣམས་ཀྱི་ཐར་པ་ཡང་བཏགས་པ་མེད་དོ། །གསོལ་པ། བཅོམ་ལྡན་འདས་ནམ་མཁའ་ཡང་མི་རྟག་པ་ལགས་སོ། །བཀའ་སྩལ་པ། དཔེར་ན་ཇི་ལྟ་བུ་ཇི་ལྟར་རྒྱལ་པོ་གསལ་རྒྱལ་གྱི་ཁང་བཟངས་ངང་པ་ལྟར་དཀར་བ་བརྩིགས་པ་དེའི་ཚེ་ནམ་མཁའ་ཉམས་པ་དེ་ནི་ནམ་མཁའ་ཞིག་པ་ཞེས་བགྱི་ལགས་སོ། །བཀའ་སྩལ་པ། ཆོས་གཟུགས་མེད་པ་ཇི་ལྟར་འཇིག་།གཟུགས་མེད་པའི་ལྷ་རྣམས་ཀྱང་ཇི་ལྟར་འཇིག་ལགས། བཀའ་སྩལ་པ། གཟུགས་མེད་པའི་ལྷ་གང་དག་ཡིན་པ་དེ་དག་སེམས་ཅན་ཞེས་བགྱི་བར་བགྲང་ངམ་ཅི། བཅོམ་ལྡན་འདས་ནམ་མཁའ་སེམས་མ་མཆིས་པ་སེམས་དང་བཅས་པ་ཇི་ལྟར་འགྱུར་ལགས། བཀའ་སྩལ་པ། ནམ་མཁའ་ལ་རྟེན་པའི་ཁང་པ་འམ། རི་གང་དང་གང་དག
58.108b
ཡིན་པ་ཞིག་ཀྱང་ནམ་མཁའ་མི་འཇིག་པ་ལྟར་མྱ་ངན་ལས་འདས་པའི་དབྱིངས་ཀྱི་འགྲོ་བ་ཐམས་ཅད་ལ་ཁྱབ་པ་ཡང་དེ་དང་འདྲའོ། །རྟེན་ནམ་མཁའ་མི་འཇིག་པ་ལྟར་བྱེད་པ་པོ་དང ། ཚོར་བ་པོ་ཡང་དེ་དང་འདྲ་ལགས་སམ། བཀའ་སྩལ་པ། འོད་སྲུང་མྱ་ངན་ལས་འདས་པའི་དུས་ན། སེམས་ཅན་རྣམས་ཀྱི་ལས་དང ། ཉོན་མོངས་པའི་ཆོས་ཡོད་པ་གང་ཡིན་པ་འཇིག་པར་འགྱུར་རོ། །བཅོམ་ལྡན་འདས་སེམས་ཅན་ཐམས་ཅད་དང ། ཆོས་ཐམས་ཅད་མ་མཆིས་པ་ཇི་ལྟ་བུ་ལགས། རྔ་བོ་ཆེའི་ཚོགས་པ་ཇི་ལྟ་བ་བཞིན་ནོ། །ཡང་གསོལ་པ། ཇི་ལྟར་གདུགས་ཀྱི་འོད་དང ། ནོར་བུའི་འོད་གཉིས་པོ་དེ་ལས་འཇིག་རྟེན་ན་ཞུགས་ཞེས་བགྱི་བ་དེ་བཞིན་དུ་མི་རྣམས་ལས་བདག་གིར་བྱ་བ་ཞེས་བགྱི་ན་བཅོམ་ལྡན་འདས་ཆོས་གཅིག་པོ་འདི་གང་གི་རྣམ་པར་སྨིན་པ་ལགས། བཀའ་སྩལ་པ། འོད་སྲུང་ཁྱོད་ཀྱིས་མི་ཤེས་སམ། གསོལ་པ། བཅོམ་ལྡན་འདས་འཚལ་ལགས་སོ། །བཀའ་སྩལ་པ། ཟླ་བ་བྱུང་བ་སྨྲོས་ཤིག་།བཅོམ་ལྡན་འདས་ཟླ་བ་ནི་སེམས་ཅན་རྣམས་ཀྱི་རྣམ་པར་སྨིན་པ་ལས་སྐྱེས་པའི་ཆོས་མ་ལགས་སོ། །བཀའ་སྩལ་པ། གལ་ཏེ་དེ་ལྟ་ན་དཔེ་བརྗོད་དགོས་ཏེ། ཅི་སྟེ་ནོར་བུ་དང ། ཟླ་བ་དང ། ཉི་མ་དང ། མེ་སེམས་ཅན་གྱིས་མ་བྱས་ཀྱི། ཚོགས་པས་བྱས་པ་ཡིན་ན། སྟེང་གི་ལྷ་རྣམས་ཀྱིས་ཕྱག་བྱ་བའི་ཉི་མ་དང ། ཟླ་བ་དེ་དག་ཅི་སེམས་ཅན་མ་ཡིན་ནམ། བཅོམ་ལྡན་འདས་སངས་རྒྱས་བཅོམ་ལྡན་འདས་ཀྱང་ཡོངས་སུ་མྱ་ངན་ལས་འདས་ཀྱི་བར་དུ་སེམས་ཅན་ཞེས་བགྱི་བས་དེ་དག་ཀྱང་སེམས་ཅན་གྱི་གྲངས་སུ་བགྲང་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་ནི་སེམས་ཅན་མ་ཡིན་ནོ། །དེ་ཅིའི་སླད་དུ་ལགས། སེམས་ཅན་གྲོང་བའི་བཤེས་གཉེན་ཅན་ཕལ་པ་མ་ཡིན་པ་ཡང་སེམས་ཅན་རྣམས་དང་མཉམ་པར་མི་རྩི་བས། སངས་རྒྱས་ནི་རྣམ་པར་སྨིན་པ་ལས་སྐྱེས་པའི་ཆོས་ཀྱི་རྒྱུ་འཐུན་པ་སྟེ།
58.109a
སངས་རྒྱས་ནི་ཡོངས་སུ་མྱ་ངན་ལས་འདས་པ་ཡིན་ལ། སེམས་ཅན་ཡང་རྣམ་པར་སྨིན་པ་ལས་སྐྱེས་པའི་ཆོས་ཀྱི་རྒྱུ་འཐུན་པ་ཡིན་ནོ། །འོད་སྲུང་གང་གི་ཚེ་སེམས་ཅན་ཐམས་ཅད་ཟད་པར་གྱུར་པ་དེའི་ཚེ། གལ་ཏེ་མེ་བྱུང་ནས་འཇིག་པ་འམ། འབྱུང་བར་འགྱུར་བ་དེ་སྨྲོས་ཤིག་།བཅོམ་ལྡན་འདས་མ་འཚལ་ལགས་སོ། །ངས་སྔར་ཁྱོད་ཀྱི་མི་ཤེས་སོ་ཞེས་གསུངས་སོ། །བཅོམ་ལྡན་འདས་སྐྱེ་བ་དང ། རྒ་བ་དང ། ན་བ་དང ། འཆི་བ་གང་ནས་མཆིས། གང་དུ་མཆི་ལགས། བཀའ་སྩལ་པ། རྔ་བོ་ཆེའི་སྒྲ་གང་ནས་འོངས། གང་དུ་འགྲོ། བཅོམ་ལྡན་འདས་ཚོགས་པ་ལས་ལགས་སོ། །བཀའ་སྩལ་པ། ཇི་ལྟ་བུ་ཡིན། ཇི་ལྟར་ཆོས་ཐམས་ཅད་མ་བགྱིས་པ། བྱེད་པ་པོ་མ་མཆིས་པ། བྱེད་པ་པོ་དང་བྲལ་བ་ལྟར་རྔ་བོ་ཆེའི་སྒྲ་ཡང་དེ་དང་འདྲ་ལགས་སོ། །བཀའ་སྩལ་པ། དེ་ནི་མ་ཡིན་ཏེ། རྔ་བོ་ཆེ་ལ་ནི་བྱེད་པ་པོ་ཡོད་དམ། བཅོམ་ལྡན་འདས་མ་མཆིས་ལགས་སོ། །བཀའ་སྩལ་པ། དེ་བཞིན་དུ་མྱ་ངན་ལས་འདས་པ་ཐེར་ཟུག་གི་གཞི་ཐོབ་པའི་སེམས་ཅན་དེ་དག་སུ་ཞིག་བྱེད་དེ་བྱེད་པ་པོ་མེད་དོ། །སེམས་ཅན་རྣམས་རང་གི་བདག་ཉིད་ཀྱིས་བདག་བྱེད་དེ། ཇི་ལྟ་ཞེ་ན། སེམས་ཅན་གྱིས་གལ་ཏེ་བསོད་ནམས་བྱེད་ན་ནི་སངས་རྒྱས་ཡིན་ལ། འོན་ཏེ་མི་བྱེད་ན་ནི་སེམས་ཅན་ཡིན་ནོ། །སེམས་ཅན་ཐོག་མ་སུས་བགྱིས་ལགས། བཀའ་སྩལ་པ། འདུ་ཤེས་མེད་འདུ་ཤེས་མེད་མིན་གྱི་ལྷ་ལ་སོགས་པ་གཟུགས་མེད་པའི་ལྷ་རྣམས་ཀྱང་སུས་བྱས། གསོན་པོར་ཡང་ཇི་ལྟར་གནས། བཅོམ་ལྡན་འདས་ལས་ཀྱིས་ནི་གནས་ལགས་ན་དེ་དག་གི་ལས་དང་དེ་བཞིན་དུ་ཁྱིམ་བདག་ཚོང་དཔོན་དང་ཚུལ་ཡང་འཚལ་བར་ནི་རྔོ་མི་ཐོག་ལགས་སོ། །ཤིན་ཏུ་གནས་པ་ཉིད་དུ་སུ་ཞིག་བྱེད། གསོལ་པ། ལས་ཀྱིས་བགྱིད་དོ། །ལས་ལས་ནི་ཆོས་དུ་མ་སྐྱེ་སྟེ། དགེ་བ་ལས་ཀྱང་ཆོས་དུ་མ་སྐྱེའོ། །དེ་ལ་དགེ་བ་ལས་སྐྱེ
58.109b
བའི་ཆོས་ནི་གང་དག་ལགས་མི་དགེ་བས་སྐྱེ་བ་ནི་གང་དག་ལགས། བཀའ་སྩལ་པ། ལས་ལས་ནི་སྲིད་པ་སྐྱེའོ། །དགེ་བའི་ལས་ལས་ནི་ཐར་པ་སྐྱེའོ། །གསོལ་པ། བཅོམ་ལྡན་འདས་མ་སྐྱེས་པའི་གནས་དགེ་བ་ལ་ཇི་ལྟར་སྐྱེ་བར་འགྱུར་ལགས། བཀའ་སྩལ་པ། གཞན་མ་ཡིན་པ་དེ་བཞིན་ཉིད་ལས་སོ། །གལ་ཏེ་སངས་རྒྱས་དགེ་བ་ལས་སྐྱེ་བ་ལགས་ན། མི་སྐྱེ་བའི་གནས་ཇི་ལྟར་འཐོབ་ལགས། བཀའ་སྩལ་པ། ལེགས་པར་སྐྱེ་བའི་ལས་ཀྱིས་སོ། །དེ་སུས་བསླབས་ལགས། བཀའ་སྩལ་པ། ཐོག་མ་མེད་པའི་དུས་ཀྱི་སངས་རྒྱས་རྣམས་ཀྱིས་བསླབས་སོ། །ཐོག་མ་མ་མཆིས་པའི་དུས་ཐམས་ཅད་སུ་ཞིག་གིས་མངོན་པར་སྤྲུལ་ཅིང་བསླབས་ལགས། བཀའ་སྩལ་པ། ཐོག་མ་མེད་པའི་ནི་ཉན་ཐོས་དང ། རང་སངས་རྒྱས་ཐམས་ཅད་ཀྱིས་ཤེས་པ་འམ་བསམ་པར་མི་ནུས་སོ། །གལ་ཏེ་འཇིག་རྟེན་དུ་ཤཱ་རིའི་བུ་ལྟ་བུར་མང་དུ་ཐོས་པར་གྱུར་པའི་མི་འགའ་ཞིག་བྱུང་སྟེ། དེས་འདི་ལྟར་སངས་རྒྱས་རྣམས་ཀྱི་སངས་རྒྱས་འབྱུང་བའི་དང་པོ་གང་ཡིན་ཞེས་དུས་རིང་པོ་མཐའ་ཡས་པར་རྟག་ཏུ་བསམས་ཀྱང་ཤེས་པ་འམ་བསམ་པར་མི་ནུས་ཀྱི་དེའི་བར་སྐབས་སུ་མྱ་ངན་ལས་འདའ་བར་འགྱུར་བ་ཁོ་ནར་ཟད་དོ། །ཡང་བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་ཆེན་པོ་ལྟ་བུ་དག་ཕྱི་མའི་མཐའ་ཡས་པར་རྟག་ཏུ་རྫུ་འཕྲུལ་གྱི་སྟོབས་ཀྱིས་སོང་ཡང་སངས་རྒྱས་རྣམས་ཀྱི་སངས་རྒྱས་འབྱུང་བ་དང ། ཞིང་བལྟ་བ་རྟོགས་པར་མི་ནུས་ཏེ། བྱང་ཆུབ་སེམས་དཔའ་བྱམས་པ་ལ་སོགས་པ་ས་བཅུ་ཐོབ་པ་རྣམས་ཀྱིས་ཀྱང་དེ་བཞིན་ནོ། །ཉན་ཐོས་དང ། རང་སངས་རྒྱས་ཐམས་ཅད་ཀྱིས་ཀྱང་དེ་བཞིན་ནོ། །ཡང་བཀའ་སྩལ་པ། སངས་རྒྱས་འབྱུང་བ་ཇི་ལྟ་བ་དེ་བཞིན་དུ་སེམས་ཅན་འབྱུང་བ་ཡང་དེ་ཁོ་ན་བཞིན་དུ་ཤེས་པར་གྱིས་ཤིག་།བཅོམ་ལྡན་འདས་དེ་བཞིན་དུ་བྱེད་པ་པོ་དང ། ཚོར་བ་པོ་ཡང་མ་མཆིས་པ་མ་ལགས་སམ།
58.110a
བཀའ་སྩལ་པ། འོད་སྲུང་བྱེད་པ་པོ་དང ། ཚོར་བ་པོ་ནི་རྒྱུ་ཡིན་ནོ། །གསོལ་པ། བཅོམ་ལྡན་འདས་འཇིག་རྟེན་འདི་ལ་བས་པ་མཆིས་སམ། འོན་ཏེ་མ་མཆིས། བཀའ་སྩལ་པ། འཇིག་རྟེན་ལ་ནི་ནམ་ཡང་ཇི་ལྟར་ཡང་ལན་འགའ་ཡང་ཟད་པ་མེད་དོ། །ཡང་བཀའ་སྩལ་པ། འོད་སྲུང་ཁྱོད་ལ་དཔེ་བསྟན་པར་བྱའོ། །བཅོམ་ལྡན་འདས་ཇི་ལྟ་བུ་ལགས། བཀའ་སྩལ་པ། འོད་སྲུང་དཔེར་ན་རྒྱ་མཚོ་ཟད་མི་ཤེས་པ་ལ་མི་འགའ་ཞིག་གིས་སྐྲའི་རྩེ་མོས་བཅུས་ན། བ་ལང་གི་རྨིག་རྗེས་ཙམ་དུ་འགྱུར་རམ་མི་འགྱུར། གསོལ་པ། བཅོམ་ལྡན་འདས་དེ་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འདས་པའི་དུས་བསྐལ་པ་གྲངས་མེད་པའི་ཆེས་གྲངས་མེད་པ། བསྐལ་པ་ཡངས་ཤིང་ཆེས་ཡངས་པ་ཞིག་བྱུང་བ་དེའི་ཚེ་དེའི་དུས་ན་འཇིག་རྟེན་དུ་ཡང་དག་པར་རྫོགས་པའི་སངས་རྒྱས་སྒྲ་ཅན་ཞེས་བྱ་བ་ཞིག་བྱུང་སྟེ། དེ་ནས་བཅོམ་ལྡན་འདས་དེས་གྲོང་ཁྱེར་ཆེན་པོ་འདི་ཉིད་དུ་ཆོས་བཤད་པ་དེའི་ཚེ་ལི་ཙ་བི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ཆོས་ཀྱི་རྒྱལ་པོ་ཆོས་དང་ལྡན་པ་འཁོར་ལོ་སྒྱུར་བའི་རྒྱལ་པོར་གྱུར་ཏོ། །དེ་ནས་རྒྱལ་པོ་དེ་བཞིན་གཤེགས་པ་དེའི་དྲུང་དུ་སོང་ནས། དེས་འབྱོར་པ་ཆེན་པོ་དང ། ཀླུའི་བསྐོར་བ་བྱས་ནས་བཙུན་མོ་དང་ལྷན་ཅིག་ཏུ་བཅོམ་ལྡན་འདས་ལ་མཆོད་དེ་ཚིག་འདི་དག་གསོལ་ཏོ། །བཅོམ་ལྡན་འདས་བདག་ནམ་ཞིག་ན་བྱང་ཆུབ་སེམས་དཔར་འགྱུར་ལགས། དེའི་ཚེ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འཁོར་ལོས་སྒྱུར་བའི་རྒྱལ་པོར་གྱུར་པ་གང་ཡིན་པ་དེ་ནི་བྱང་ཆུབ་སེམས་དཔའ་ལས་གཞན་དུ་མི་འགྱུར་རོ། །དེ་ཅིའི་ཕྱིར་ཞེ་ན། དབང་པོ་དང་ཚངས་པ་ལ་ནི་འཁོར་ལོས་སྒྱུར་བའི་རྒྱལ་པོ་ཉིད་ཡོད་པ་མ་ཡིན་པས་དེ་ལས་གཞན་དུ་མི་འགྱུར་རོ། །རྒྱལ་པོ་ཆེན་པོ་དགེ་བསྙེན་དུ་གྱུར་པ་གང་དང་གང་ཡིན་པ་དེ་དང་དེ་དག་ནི་དབང་པོ་དང
58.110b
ཚངས་པར་འགྱུར་རོ། །དབང་པོ་ཉིད་དང་ཚངས་པ་ཉིད་ཀྱི་རྒྱལ་པོ་མང་པོ་དུ་མ་བྱས་ནས་དེའི་འོག་ཏུ་ཆོས་ཀྱི་རྒྱལ་པོ་ཆོས་དང་ལྡན་པ་འཁོར་ལོས་སྒྱུར་བར་འགྱུར་ཏེ། ཁྱོད་ཀྱིས་དབང་པོ་ཉིད་དང ། ཚངས་པ་ཉིད་གང་གཱའི་ཀླུང་གི་བྱེ་མ་དང་མཉམ་པར་བྱས་ནས། དེའི་འོག་ཏུ་ཁྱོད་ཀྱིས་འཁོར་ལོས་སྒྱུར་བ་འདི་ཉིད་ཐོབ་པ་ཡིན་ནོ། །དེ་ནས་ཡང་རྒྱལ་པོ་དེས་ཡང་བཅོམ་ལྡན་འདས་ལ་ཞུས་པ། བཅོམ་ལྡན་འདས་དབང་པོ་ཉིད་དང ། ཚངས་པ་ཉིད་ཇི་ལྟ་བུ་ལགས། དེའི་ཚེ་བཅོམ་ལྡན་འདས་དེས་བཀའ་སྩལ་པ། དབང་པོ་དང་ཚངས་པ་ལ་སོགས་པ་ཇི་སྙེད་ཡོད་པ་ཁྱོད་དང་འདྲ་བར་ཅོད་པན་ཐོགས་པ་དེ་དག་ཐམས་ཅད་ནི་ཁྱོད་ཀྱི་དྲུང་ན་ཇིས་ཀྱང་མཛེས་པ་མ་ཡིན་ཏེ། དཔེར་ན་སངས་རྒྱས་ཀྱི་སྐུའི་མདུན་ན་ཉན་ཐོས་དང ། རང་སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལམ་མེར་མ་ཡིན། ཐལ་ལེར་མ་ཡིན། ལྷག་གེར་མ་ཡིན་པ་བཞིན་ནོ། །དེ་བཞིན་དུ་རྒྱལ་པོ་ཆེན་པོ་ཁྱོད་དང་སངས་རྒྱས་ཀྱི་སྐུའི་ཁ་དོག་དང་འདྲ་བར་ཁོང་དུ་ཆུད་པར་བྱ་ན། འོད་སྲུང་ཁྱོད་འཁོར་ལོས་སྒྱུར་བའི་རྒྱལ་པོའི་དཔེ་མི་མཇེད་ཀྱི་བདག་པོ་ཚངས་པ་དང ། བརྒྱ་བྱིན་ཀཽ་ཤི་ཀ་ལས་བླང་བར་སེམས་པ་ལྟ་སྨོས་ཀྱང་ཅི་དགོས། འོད་སྲུང་དེ་ནས་གླིང་བཞི་པའི་དབང་ཕྱུག་འཁོར་ལོས་སྒྱུར་བའི་རྒྱལ་པོ་དེས་ཡང་བཅོམ་ལྡན་འདས་དེ་ལ་ཞུས་པ། བཅོམ་ལྡན་འདས་ཅི་ལགས། བདག་འཇིག་རྟེན་དུ་སངས་རྒྱས་སུ་འགྱུར་ལགས་སམ། དེའི་ཚེ་སངས་རྒྱས་བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ཁྱོད་དུས་རིང་མོའི་ཡང་ཤིན་དུ་དུས་རིང་མོ་ཞིག་ན་སངས་རྒྱས་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་གལ་ཏེ་ཁྱོད་རང་གི་བསོད་ནམས་སྤངས་ཤིང་གཅིག་ཏུ་བོར་ནས་བརྩམས་ཏེ། ཕལ་བའི་འདུ་ཤེས་སུ་བྱས་ནས་དེའི་ཚེ་སྐྲའི་རྩེ་མོས་རྒྱ་མཚོ་ཆེན་པོ་འདི་བཅུས་ཏེ། བ་ལང་གི་རྨིག་རྗེས་ཙམ་དུ་བྱེད་ན་དེའི་ཚེ་འཇིག་རྟེན་དུ
58.111a
ཡང་དག་པར་རྫོགས་པའི་སངས་རྒྱས་མར་མེ་མཛད་ཅེས་བྱ་བ་འབྱུང་བར་འགྱུར་ཏེ། དེར་རྒྱལ་པོ་སའི་དབང་ཕྱུག་ཅེས་བྱ་བ་ཞིག་འབྱུང་བར་འགྱུར་རོ། །དེའི་ཚེ་བཅོམ་ལྡན་འདས་མར་མེ་མཛད་དེས་རྒྱལ་པོ་ཆེན་པོ་ཁྱོད་མ་འོངས་པའི་དུས་ན་ཤཱཀྱའི་སྐྱེས་མཆོག་གཽ་ཏ་མཱ་ཞེས་བྱ་བར་འགྱུར་རོ་ཞེས་བྱ་བར་ལུང་སྟོན་པར་འགྱུར་རོ། །དེའི་ཚེ་འཇིག་རྟེན་དུ་སྲེག་པའི་བསྐལ་པ་འབྱུང་བར་འགྱུར་རོ། །ཁྱོད་ཀྱིས་དེང་ནས་བཟུང་སྟེ། རྒྱ་མཚོ་ཆེན་པོ་བ་ལང་གི་རྨིག་རྗེས་ཙམ་དུ་བྱེད་ན། དེའི་ཚེ་ལོ་བརྒྱ་ཕྲག་མང་པོ་དང ། བར་གྱི་བསྐལ་པ་མང་པོ་དང ། བསྐལ་པ་སྟོང་ཕྲག་མང་པོ་འདས་ནས། སྲེག་པའི་བསྐལ་པ་མང་པོ་དང ། སངས་རྒྱས་རྣམས་འབྱུང་བར་འགྱུར་ཏེ། སངས་རྒྱས་དེ་དག་ལ་མཉེས་པར་བྱེད། མཆོད་པར་བྱེད་པས་རྒྱ་མཚོ་ཆེན་པོ་བ་ལང་གི་རྨིག་རྗེས་ཙམ་དུ་བྱེད་པར་འགྱུར་རོ། །འོད་སྲུང་འཁོར་ལོས་སྒྱུར་བའི་རྒྱལ་པོ་དེས་རྟག་ཏུ་སྐྲའི་རྩེ་མོས་རྒྱ་མཚོ་ཆེན་པོ་དེ། ཇི་ལྟར་ཟད་པར་བྱེད་ཅེ་ན། དེ་ལྟར་ལ་ལར་བརྒྱ་བྱིན་དང ། ཚངས་པ་དང ། འཁོར་ལོས་སྒྱུར་བའི་རྒྱལ་པོ་ཉིད་ཀྱི་ཤིན་དུ་བདེ་བ་ཡང་དང་ཡང་དུ་འདོད་ན་རྒྱ་མཚོ་ཆེན་པོ་དེ་རིམ་པ་འདིས་ཟད་པར་བྱེད་དོ། །དེ་ནས་སྲེག་པའི་བསྐལ་པ་དེ་དག་ཀྱང་ཚར་ཕྱིན། སངས་རྒྱས་བཅོམ་ལྡན་འདས་དེ་དག་ཀྱང་ཡོངས་སུ་མྱ་ངན་ལས་འདས་པའི་འོག་ཏུ་དེའི་ཚེ་བརྒྱ་ལམ་ན་རེས་འགའ་ཞིག་སངས་རྒྱས་མཁན་པོ་མར་མེ་མཛད་ཅེས་བྱ་བ་འབྱུང་བར་འགྱུར་ཏེ། དེ་ན་བཅོམ་ལྡན་འདས་མར་མེ་མཛད་དེས་རྒྱལ་པོ་སའི་དབང་ཕྱུག་དེ་ལ་རྒྱལ་པོ་ཆེན་པོ་ཁྱོད་སངས་རྒྱས་སུ་འགྱུར་རོ་ཞེས་ལུང་སྟོན་ཏོ། །དེའི་ཚེ་རྒྱལ་པོ་ཆེན་པོ་ཁྱོད་རྒྱལ་པོ་དེའི་བུ་གཞོན་ནུ་ཐུ་བོར་གྱུར་ནས་དེ་དང་ལྷན་ཅིག་སངས་རྒྱས་སུ་ལུང་བསྟན་པ་ཐོབ་པར་འགྱུར་རོ། །དེ་ནས་དེ་བཞིན་གཤེགས་པ་དེས་ཆེད་དུ་བརྗོད་པར་འགྱུར་ཏེ། རྒྱལ་པོ་ཆེན་པོ་ཁྱོད་ཀྱི་བུས་རྒྱ་མཚོ་ཆེན་པོ་དེ་ལྟར་ཟད་པར་བྱས་ནས་ད་ལྟར་ཁྱོད་ཀྱི་བུར་གྱུར
58.111b
པས། ཁྱོད་ཀྱི་བུ་ནི་རྒྱལ་པོ་ཕལ་པའི་རང་བཞིན་མ་ཡིན། མི་མཇེད་ཀྱི་བདག་པོ་ཚངས་པ་འམ། ལྷའི་རྒྱལ་པོ་བརྒྱ་བྱིན་ནམ། ཆོས་ཀྱི་རྒྱལ་པོ་ཆོས་དང་ལྡན་པ་འཁོར་ལོས་སྒྱུར་བ་ཞིག་ཡིན་ནོ། །ཁྱོད་ཀྱི་བུ་ནི་བརྩོན་འགྲུས་ཆེན་པོར་འགྱུར་ཏེ། སའི་དབང་ཕྱུག་དེ་ལྟར་བྱང་ཆུབ་ནི་རྙེད་དཀའོ་ཞེས་དཔེ་ཆེད་དུ་བརྗོད་པ་འདི་བླངས་པ་ཡིན་ནོ། །སའི་དབང་ཕྱུག་ཁྱོད་ཀྱི་བུ་འདི་བུད་མེད་སྟོང་ཕྲག་དྲུག་ཅུ་ནོར་བུ་དང ། རྣ་ཆ་གདུབ་འཁོར་གྱི་ཕྲེང་བ་ཅན་དང ། ལྷའི་བུ་མོ་སྒེག་མོ་ལྟ་བུའི་བུད་མེད་དག་མཆིལ་མའི་ཐལ་བ་བཞིན་བོར་ནས། ཨེ་མའོ་འདོད་པ་རྣམས་ནི་མི་རྟག་གོ་ཞེས་གྲགས་པས་ལྷའི་བུ་མོ་སྒེག་མོ་ལྟ་བུའི་བུད་མེད་དེ་དག་ནི་མཆིལ་མའི་ཐལ་བ་བཞིན་དུ་རྟོགས་སོ། །ེ་མའོ་འདོད་པ་རྣམས་ནི་ཐེར་ཟུག་མ་ཡིན་པ། མི་བརྟན་པ། མི་རྟག་གོ་ཞེས་གྲགས་པས་བདག་ནི་ཁྱིམ་ནས་ཁྱིམ་མེད་པར་རབ་ཏུ་བྱུང་བ་སླའོ་ཞེས་དེ་ལྟར་རབ་ཏུ་འབྱུང་བར་འགྱུར་རོ། །དེ་ལྟར་དེ་བཞིན་གཤེགས་པ་དེས་གཞོན་ནུ་དེ་ལ་གང་གི་ཚེ་འཇིག་རྟེན་གྱི་ཁམས་མི་མཇེད་འདིར་མགོན་པོ་ཤཱཀྱ་ཐུབ་པ་ཞེས་བྱ་བ་འབྱུང་བ་དེའི་ཚེ། རྒྱལ་པོ་ཆེན་པོ་ཁྱོད་ལི་ཙ་བི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་འགྱུར་ཏེ། དེ་ནས་འཇིག་རྟེན་གྱི་ཁམས་དེར་མགོན་པོ་ཡོངས་སུ་མྱ་ངན་ལས་འདས་པའི་འོག་ཏུ་བསྟན་པ་ནུབ་པའི་དུས་ཀྱི་ཚེ། ལོ་བརྒྱད་བཅུ་ལོན་པ་ན་དགེ་སློང་བློ་འཆང་ཤེས་བྱ་བར་གྱུར་ནས་རང་གི་སྲོག་ལ་ཡང་མི་ལྟ་བར་བྱས་ཏེ་མདོ་འདི་འབྱིན་པར་འགྱུར་རོ། །དེ་ནས་ལོ་བརྒྱ་ལོན་པའི་འོག་ཏུ་ཤི་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །དེའི་ཚེ་ཁྱོད་ཀྱིས་རྫུ་འཕྲུལ་ཆེན་པོ་མང་དུ་འབྱིན་པར་འགྱུར་ཞིང་ས་བརྒྱད་པ་ལ་གནས་ཏེ། ལུས་གཅིག་ནི་བདེ་བ་ཅན་ན་འདུག་།ལུས་གཅིག་ནི་སྤྲུལ་ཏེ་དགའ་ལྡན་དུ་བཞག་ནས། མགོན་པོ་མི་ཕམ་པ་ལ་མདོ་འདི་འདྲི་བར་འགྱུར་རོ་ཞེས་ལུང་བསྟན་ཏོ། །དེ་ནས་རྒྱལ་པོ་སའི་དབང་ཕྱུག་དེ་རང་གི་བུ་ལུང་བསྟན་པ་ཐོས་ནས། བདག
58.112a
གི་བུ་སངས་རྒྱས་སུ་ལུང་བསྟན་ཏོ་ཞེས་དབང་པོ་ཐམས་ཅད་ཚིམ་པར་གྱུར་ཏོ། །དེ་ནས་གཞོན་ནུ་དེ་ལྷག་པར་ཡང་དམ་བཅས་པ་ལ་བརྟན་པར་བྱེད་དོ། །འོད་སྲུང་གིས་གསོལ་པ། བཅོམ་ལྡན་འདས་དེ་ནས་རྒྱ་མཚོ་ཆེན་པོ་ཡང་ཐིགས་པ་ཐིགས་པ་ནས་ཕྲི་བས་མ་མཆིས་ལགས་སོ། །བཀའ་སྩལ་པ། ཇི་ལྟ་བུ་ཡིན། བཅོམ་ལྡན་འདས་དཔེར་ན་ཚོང་པ་ལམ་གྱིས་འཚོ་བ་འགའ་ཞིག་གིས་ཀཱཪྵ་པ་ཎ་དག་བགྲངས་ཏེ། བུམ་པར་སྦས་པ་ལམ་དེ་ནས་དེའི་བུ་ངུས་ནས་འགྲོན་བུ་དག་སྩལ་ཏོ། །དེ་ནས་དེ་འགྲོན་བུ་འདི་ཉུང་ངོ་ཞེས་འཚལ་བར་འགྱུར་ཞིང་དེ་ནས་དེ་དག་ཐམས་ཅད་བས་པར་གྱུར་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་རྒྱ་མཚོ་ཆེན་པོ་ལས་ཆུའི་ཐིགས་པ་གཅིག་ཕྲི་བ་ཡང་ཡང་དག་པར་འཚལ་ལ། དེ་བཞིན་དུ་ཆབ་ཀྱི་ལྷག་མ་ཡང་དག་པར་འཚལ་ལགས་ན་བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་སེམས་ཅན་གྱི་ཕུང་པོ་ཟད་པར་མཁྱེན་པར་མི་འགྱུར་བ་ལྟ་སྨོས་ཀྱང་ཅི་འཚལ། བཅོམ་ལྡན་འདས་སེམས་ཅན་གྱི་ཕུང་པོ་དེ་ནི་ཐིགས་པ་མ་མཆིས་ཏེ། དེ་ཡང་ཉན་ཐོས་དང ། རང་སངས་རྒྱས་ཐམས་ཅད་ཀྱིས་མ་འཚལ་གྱི། འདི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་ནི་མཁྱེན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ལེགས་སོ། །ལེགས་སོ། །དེ་དེ་བཞིན་ཏེ། སེམས་ཅན་གྱི་ཕུང་པོ་ལ་ཟད་པ་མེད་དོ། །གསོལ་པ། བཅོམ་ལྡན་འདས་སེམས་ཅན་གང་དག་ཡོངས་སུ་མྱ་ངན་ལས་འདས་པ་དེ་དག་ལ་བས་པ་མཆིས་སམ། འོན་ཏེ་མ་མཆིས། བཀའ་སྩལ་པ། སེམས་ཅན་ལ་ཟད་པ་མེད་དོ། །བཅོམ་ལྡན་འདས་སེམས་ཅན་བས་པ་མ་མཆིས་པ་ཇི་ལྟ་བུ་ལགས། བཀའ་སྩལ་པ། གལ་ཏེ་ཟད་པ་ཡོད་ན་དེས་ན་འགྲིབ་པ་ཉིད་ཡིན་ལ། འཕེལ་བ་ཉིད་ཡིན་ན། མདོ་འདིའི་དགོས་པ་ཆེན་པོར་འགྱུར་བས་སྔར་མདོ་འདིར་ཚིགས་སུ་བཅད་པ་སུམ
58.112b
སྟོང་གསུངས་པ་བསྡུས་ནས་ཡང་དག་པར་བཏགས་པ་ལས་དེ་དག་ཐམས་ཅད་རྒྱས་པར་རིག་པར་བྱའོ། །གལ་ཏེ་ཚིགས་སུ་བཅད་པ་སུམ་སྟོང་ཡང་དག་པར་བཏགས་པ་དེ་ལས་མེད་ན། དགེ་སློང་ཡངས་པ་ལ་དད་པའི་ཡིད་ཅན་གྱིས་ཞུས་པ་གང་ཡིན་པ་དེ་ཁོ་ན་ལས་ལེགས་པར་ཤེས་པར་གྱིས་ཤིག་།སངས་རྒྱས་བཅོམ་ལྡན་འདས་གང་དང་གང་དག་ཡོངས་སུ་མྱ་ངན་ལས་འདས་པ་དེ་དག་ཐམས་ཅད་ནི་རྟག་པ་བརྟན་པ་ཞི་བ་ཐེར་ཟུག་པ་ཡིན་ནོ། །རྒྱུ་གང་གིས་ན་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་གང་དག་ལགས་པ་དེ་དག་བས་པར་མི་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ཁྱམས་སམ། ཁང་བཟངས་དུས་དུས་སུ་འཇིག་ཅིང་ཞིག་ན་ནམ་མཁའ་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པའི་མགོན་པོ་གང་དང་གང་དག་ཡིན་པ་དེ་དང་དེ་དག་ཐམས་ཅད་ཀྱི་ཐམས་ཅད་དུ་ཐར་པ་ཁོ་ནར་འགྱུར་རོ། །དཔེར་ན་ཥི་དྷུ་ཞེས་བྱ་བའི་སྐད་ཀྱི་བྱིངས་ཀྱི་དོན་ནི་ཏ་ཞེས་བྱ་བའི་རྐྱེན་གྱིས་དེ་གྲུབ་པ་ཞེས་བྱ་བའི་རང་བཞིན་དུ་འགྱུར་རོ། །ཇི་ལྟར་ན་འཇིག་རྟེན་པའི་བསྟན་བཅོས་རྣམས་ལ་ནཱ་མཱ་ཁྱ་ད་ཨུ་པ་ས་ག་སྲིད་ཏང་དྷི་ཏ་ཞེས་བྱ་བ་ལ་སོགས་པས་བསྡུས་པའི་གྲུབ་པའི་ཚིག་དེ་ལ་གྲུབ་པ་ཞེས་བྱའོ། །གྲུབ་པའི་ཚིག་དེ་གྲུབ་པ་གང་ཡིན་པ་དེ་ཡང་མི་མངོན་པ་མེད་དོ། །དེ་བཞིན་དུ་སེམས་ཅན་གྱིས་སྟེང་དང ། འོག་ཏུ་ཉོན་མོངས་པ་ཞེས་བྱ་བ་ཞི་བར་བྱས་ནས་ཐར་པ་ཐོབ་ན་ཡང་སྐྱེ་བ་དང ། རྒ་བ་དང ། འཆི་བའི་སྲིད་པ་འབྱུང་བར་མི་འགྱུར་རོ། །བརྡ་སྤྲོད་པ་ཅི་དགར་ཀློག་པ་དག་སིད་དྷ་ཞེས་བྱ་བ་གང་ཡིན་པ་དེའི་ཚིག་དེ་ཡང་བི་དྷུ་ཞེས་བྱ་བར་བྱེད་དེ་ཡང་རང་གིས་ཚིག་བསྡུས་ནས་རང་གི་ཚིག་གི་ངོ་བོར་བྱེད་དོ། །དེ་ཅིའི་ཕྱིར་ཞེ་ན། རྒྱུད་དེའི་ཕུལ་དུ་ཕྱིན་པའི་ཕྱིར་དང ། སློབ་མ་རྣམས་ཕུལ་དུ་ཕྱིན་པར་བྱ་བའི་ཕྱིར་དེ་འདི་ལྟར་སྔོན་གྱི་ཡི་གེ་དང ། ཆོ་ག་ཅི་དག་གམ་མ་དག་མི་ཤེས་པར་གཅད་པ་དང ། དབྱེ་བ་བསླབས་ནས་ཡང །
58.113a
གཅད་པ་དབྱེ་བ་ཞེས་བྱ་བར་བྱེད་དོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་འདི་ལྟར་ཐོག་མ་རྫོགས་པའི་བྱང་ཆུབ་ཀྱི་སངས་རྒྱས་སུ་དབང་བསྐུར་བ་དེ་ནས་བཟུང་སྟེ། རྒྱུན་མི་འཆད་པར་འཁོར་བ་ན་སེམས་ཅན་ཇི་ཙམ་པ་དེ་སྲིད་དུ་ལ་ལར་འབྱུང་བ། ལ་ལར་ཡོངས་སུ་མྱ་ངན་ལས་འདས་པ་སྟོན་ཀྱང་དེ་ཉམས་པར་མི་འགྱུར་རོ། །དེ་ཅིའི་ཕྱིར་ཞེ་ན། དགྲ་བཅོམ་པ་ཉིད་ཀྱི་རྒྱུས་ཡང་སྐྱེ་བ་དང ། རྒ་བ་དང ། འཆི་བའི་སྲིད་པ་འབྱུང་བར་མི་འགྱུར་རོ། །འོད་སྲུང་ཁྱོད་ཀྱིས་ཇི་ལྟར་སྟེང་དང་འོག་ཏུ་གྲུབ་པ་མ་གྲུབ་པའི་ཚིག་ཏུ་མི་འགྱུར་བ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཤེས་པར་གྱིས་ཤིག་།འོད་སྲུང་སངས་རྒྱས་བཅོམ་ལྡན་འདས་རྣམས་ནི་སྐུ་གཅིག་གིས་སངས་རྒྱས་གསུམ་དུ་འགྱུར་ཏེ། ཤཱཀྱ་མགོན་པོའི་སྐུ་གཅིག་གིས་དེ་དག་ཐམས་ཅད་སངས་རྒྱས་ཉིད་དུ་བྱེད་པ་དང ། མི་ཕམ་པ་མི་ཕམ་པ་ཞེས་བྱ་བ་མགོན་པོ་བྱམས་པར་འགྱུར་བ་གང་ཡིན་པ་དང ། ང་ཉིད་ཐེར་ཟུག་པ་ཡིན་ཏེ། འདས་པའི་སངས་རྒྱས་དག་ཀྱང་ང་ཉིད་ང་ཡིན་ནོ་ཞེས་བྱ་བ་གང་ཡིན་པ་དེ་དང་དེ་དག་གསུངས་ཏེ། གང་ཡང་བསྐལ་པ་འདིའི་སངས་རྒྱས་སྟོང་པོ་ཇི་སྙེད་པ་དེ་དག་ཐམས་ཅད་ཀྱང་སངས་རྒྱས་ཤཱཀྱ་ཐུབ་པའོ་ཞེས་བྱ་བ་དེ་ལྟར་ཤེས་པར་གྱིས་ཤིག་།སངས་རྒྱས་ཞེས་བྱ་བའི་སྐད་ཀྱི་དབྱིངས་ནི་མཁས་ཤིང་རྟོགས་པའི་སྐད་ཀྱི་དབྱིངས་ཡིན་ཏེ། སངས་རྒྱས་ཀྱི་སྐད་ཀྱི་དབྱིངས་དང ། མྱ་ངན་ལས་འདས་པའི་སྐད་ཀྱི་དབྱིངས་ནི་དེ་ལྟ་བུ་ཡིན་པར་གསུངས་སོ། །ཇི་ལྟར་མཁས་ཤིང་རྟོགས་པའི་སྐད་ཀྱི་དབྱིངས་ཉམས་པ་མེད་པ་དེ་བཞིན་དུ་སངས་རྒྱས་ང་ཡང་རྟོགས་པའི་མྱ་ངན་ལས་འདས་པར་འགྱུར་རོ། །འོད་སྲུང་མདོ་སྡེ་འདི་ལྟ་བུ་འདི་དག་མ་འོངས་པའི་དུས་ན་ཐོས་ན་རང་བཟོར་བྱས་པའོ་ཞེས་སྨྲ་བར་འགྱུར་རོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་གསུང་ལ་སྐད་ཀྱི
58.113b
དབྱིངས་མི་སྣང་བས་གྲུབ་པའི་སྐད་ཀྱི་དབྱིངས་ཀྱི་མདོ་ནི་འགའ་ཞིག་གིས་བྱས་སོ། །སངས་རྒྱས་ཀྱི་གསུང་ལ་ནི་དེ་བཞིན་གཤེགས་པ་རྟག་པ་མི་སྣང་ན་ཁ་ཅིག་གིས་ཡང་རང་བཟོར་བྱས་སོ། །སངས་རྒྱས་ཀྱི་གསུང་ལ་ནི་བདག་མི་སྣང་ན་ཁ་ཅིག་གིས་ཡང་རང་བཟོར་བྱས་སོ། །ཡང་གསུང་རབ་ཡན་ལག་དགུ་ལ་གང་དུ་ཡང་མཚུངས་པ་མེད་པ་ཞེས་བྱ་བའི་མདོ་མི་སྣང་ན་འགའ་ཞིག་གིས་རང་བཟོར་བྱས་སོ། །མཚུངས་པ་མེད་པའི་མདོ་འདི་ནི་འགའ་ཞིག་རང་བཟོར་བྱས་པར་ཟད་དོ་ཞེས་ཟེར་རོ། །དཔེར་ན་འདི་ལྟར་རྒྱལ་པོ་གཏོང་བ་དང་ལྡན་པར་གྱུར་པ་དེའི་ཚེ་རྒྱལ་པོ་དེའི་ནོར་བསགས་པའི་བུམ་པ་མང་པོ་ས་རུམ་ནས་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། ཇི་ལྟ་ཇི་ལྟར་རིན་པོ་ཆེ་གང་དང་གང་དག་ཤི་བ་དང ། བཀྲེན་པ་དང ། ཕོངས་པ་དང ། སློང་མོ་པ་ལ་སོགས་པ་ལ་བགོ་བཤའ་བྱེད་པ་དེ་ལྟ་དེ་ལྟར་དེ་ལ་འཇིག་རྟེན་དུ་རིན་པོ་ཆེ་ཡ་མཚན་ཅན་དེ་དང་དེ་དག་འབྱུང་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཐབས་ཆེན་པོ་ལ་མཁས་པ་ཆོས་ཟབ་མོ་རིན་པོ་ཆེ་གང་དང་གང་དག་ཡིན་པ་སེམས་ཅན་རྣམས་ལ་ཆོས་བསྟན་པ་སྟོན་ཅིང་དེས་ཆོག་ཤེས་པ་དང ། ཡོ་བྱད་བསྙུངས་པ་ཐོག་མར་བྱས་ནས། དེ་ལྟར་ཆོས་སྟོན་པ་ལ་ཞུགས་པ་ན་དམ་པ་མ་ཡིན་པའི་རྫས་སྤོང་བའི་མདོ་སྡེ་གང་ཡིན་པ་དེ་དག་འཐོབ་པར་འགྱུར་བ་འདི་ལྟ་སྟེ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང་ལྡན་པའི་སྒོ་དེ་ལྟ་བུ་དག་འཐོབ་པར་འགྱུར་རོ། །དེ་བཞིན་གཤེགས་པ་རྟག་པ་ཉིད་དང ། དེ་བཞིན་གཤེགས་པའི་སྙིང་པོ་ཡོད་པ་ཉིད་ཀྱི་མདོ་སྡེ་སྙིང་པོ་ཅན་གྱི་ལེའུ་འདི་ལྟ་བུ་འདི་དག་ཀྱང་འཐོབ་པར་འགྱུར་རོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་ཆོས་ལ་གུས་པར་བགྱིད་པ་དེ་ཇི་ལྟ་བུ་ལགས། བཀའ་སྩལ་པ། གང་གི་ཚེ་རུང་བ་མ་ཡིན་པ་ལ་རུང་བའི་འདུ་ཤེས་ཀྱིས་སྤྱོད་ནའོ། །གསོལ་པ། ཇི་ལྟ་བུ་ལགས་བཀའ་སྩལ་པ། དཔེར་ན།
58.114a
ཀོ་ས་ལའི་རྒྱལ་པོ་གསལ་རྒྱལ་འདིའི་དྲུང་དུ་གང་གི་ཚེ་རྒྱལ་པོ་འགའ་ཞིག་གི་ཕོ་ཉ་རིགས་དམའ་བ་ལས་སྐྱེས་པ་གདོལ་བ་བཀྲེན་པ་ཞིག་འོངས་པར་གྱུར་ན། དེ་ལ་རྔ་བོ་ཆེ་དང ། རོལ་མོའི་སྒྲ་མང་པོ་དང ། གླང་པོ་ཆེའི་སྟེང་ནས་སྐད་ཆེན་པོ་སྒྲོགས་ཤིང་སྟན་ཆེན་པོ་བཏིང་ནས་རྒྱལ་པོ་ལས་དྲི་དང ། ཕྲེང་བ་དང ། བྱུག་པ་དང ། མེ་ཏོག་དང ། ཕྱེ་མ་དང ། གོས་དང ། རྒྱན་མང་དུ་འཐོབ་པར་འགྱུར་ཞིང་རྒྱལ་པོ་རང་ཡང་གོས་བཟང་པོ་བགོས་ནས་སྟན་མཐོན་པོ་ལས་བབས་ཏེ། གླང་པོ་ཆེ་དང ། རྟ་དང ། ཤིང་རྟ་དག་ཡོད་བཞིན་དུ་དེའི་མདུན་ནས་བསུ་བའི་ཕྱིར་རྐང་གིས་འགྲོ་ཞིང་སྟན་དང་གདིང་བ་ཡོད་བཞིན་དུ་དེའི་མདུན་ན་ས་ལ་འདུག་པར་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་འཇིག་རྟེན་དེ་དག་གིས་གོས་དང་རྒྱན་དུ་བཅས་པ་བྱས་པར་འགྱུར་མོད་ཀྱི་འོན་ཀྱང་དེ་རྒྱལ་པོའི་ཕོ་ཉ་ཡིན་ནོ་ཞེས་བཀུར་སྟི་བྱེད་དོ། །དེ་བཞིན་དུ་ཆོས་སྨྲ་བའི་མདུན་དུ་གཏམ་གྱི་དུས་ན་དགེ་སློང་ངམ། ཁྱིམ་པས་ཇི་ལྟར་ངའི་སྤྱན་སྔ་ན་སྟན་དམའ་བ་ལ་འདུག་ནས་ལྷའི་ཕྱེ་མ་དང ། དྲི་དང ། ཕྲེང་བ་དང ། བྱུག་པ་དང ། བདུག་པ་དང ། མེ་ཏོག་དང ། རྒྱན་རྣམས་ཀྱིས་བྱེད་པ་བཞིན་དུ་བྱའོ། །གང་ཞིག་དེ་ལྟར་སྤྱོད་པ་དེ་ལ་ཡ་མཚན་དེ་དང་དེ་དག་དེའི་དྲུང་དུ་འབྱུང་བར་འགྱུར་ཞིང་དེ་ལ་རྟག་ཏུ་ངོ་མཚར་དུ་བྱ་བ་གནོད་སྦྱིན་དང ། སྲིན་པོའི་རྒྱལ་པོ་རྣམས་ཀྱང་རིམ་གྲོ་བྱེད་པར་འགྱུར་རོ། །དཔེར་ན་བྱང་གི་སྒྲ་མི་སྙན་གྱི་མི་རྣམས་ཀྱི་ཟས་འཕེལ་བར་འགྱུར་གྱི་འགྲིབ་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ཇི་སྲིད་འཚོའི་བར་དུ་ཟས་དང་སྐོམ་གྱི་འདུ་ཤེས་མེད་ཅིང་མཁྲེན་པ་དང ། ཕྲག་དོག་དང ། སེར་སྣ་མི་འབྱུང་བའི་ཕྱིར་བར་མ་དོར་འགྲིབ་པར་མི་འགྱུར་རོ། །དེ་བཞིན་དུ་འཛམ་བུའི་གླིང་འདི་ན་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་མདོ་སྡེ་འདི་ལྟ་བུ་འདི་དག་འདྲི་བ་དང ། ཀློག་པ་དང ། འཆང་བ་དང ། ཀུན་ཆུབ་པར་བྱེད་པ་དང ། གཞན
58.114b
དག་ལ་ཡང་སྟོན་པར་བྱེད་ཅིང་བར་མ་དོར་སྒྱིད་ལུག་པར་མི་འགྱུར། སོམ་ཉི་ཟ་བར་མི་འགྱུར། ཐེ་ཚོམ་ཟ་བར་མི་འགྱུར། སྐུར་པ་འདེབས་པར་མི་འགྱུར་བ་གང་ཡིན་པ་དེ་དག་གིས་རྟག་ཏུ་སངས་རྒྱས་ཀྱི་བྱིན་གྱིས་བརླབས་ཀྱིས་ངོ་མཚར་དུ་བྱ་བ་བཟའ་བ་དང ། བཏུང་བ་མང་པོ་རྙེད་པར་འགྱུར་ཏེ། བྱང་ཆུབ་ལ་ཐུག་པའི་བར་དུ་མི་ཟད་མི་འབྲི། མི་འགོང་ཞིང་བར་མ་དོར་ཡོངས་སུ་གཏུགས་པར་མི་འགྱུར་རོ། །གཞན་ཡང་དཔེར་ན། དགེ་སློང་བར་མ་དོར་གཡེལ་བ་མི་བྱེད་པ་གང་ཡིན་པ་དེ་ལ་ལུས་ཐ་མ་འཛིན་པའི་ལྷ་རྣམས་རང་གི་ལུས་ཁོ་ནས་ཇི་སྲིད་འཚོའི་བར་དུ་རིམ་གྲོ་བྱེད་དོ། །དེ་བཞིན་དུ་གང་དག་མདོ་སྡེ་འདི་ལྟ་བུ་དག་ལ་ཐ་ན་ཡུངས་འབྲུ་ཙམ་ཡང་སྐུར་པ་གདབ་པའི་འདུ་ཤེས་སྐྱེ་བར་མི་འགྱུར་བ་དེ་དག་ནི་དེ་བཞིན་གཤེགས་པའི་སྙིང་པོའོ། །དེ་བཞིན་གཤེགས་པ་རྟག་པ་ཉིད་ཐོབ་པར་འགྱུར་རོ། །དེ་དག་འཆད་པ་དང ། བསྟེན་པ་དང ། བཀུར་སྟི་དང ། རིམ་གྲོ་བྱེད་པ་ཡང་དེ་བཞིན་གཤེགས་པ་རྣམས་ལས་མངོན་དུ་འགྱུར་རོ། །དཔེར་ན་འཁོར་ལོས་སྒྱུར་བའི་རྒྱལ་པོ་གང་དང་གང་དུ་འགྲོ་བ་དེ་དང་དེར་རིན་པོ་ཆེ་སྣ་བདུན་དག་འདོང་བར་འགྱུར་རོ། །དེ་བཞིན་དུ་གང་དུ་ཕན་པ་སྟོན་པར་འབྱུང་བ་དེ་དང་དེར་མདོ་སྡེ་འདི་ལྟ་བུ་འདི་དག་འབྱུང་བར་འགྱུར་རོ། །དཔེར་ན་གང་དང་གང་དུ་འཁོར་ལོས་སྒྱུར་བའི་རྒྱལ་པོ་འདུག་པ་དེ་དང་དེར་རིན་པོ་ཆེ་སྣ་བདུན་དག་འདུག་གི་ཕྱོགས་གཞན་དུ་གོམ་པ་གཅིག་ཀྱང་མི་འདུག་གོ། །དེར་ནི་རིན་པོ་ཆེ་ངན་པ་གཞན་དག་འདུག་གོ། །དེ་བཞིན་དུ་གང་དུ་ཕན་པ་སྟོན་པ་མངོན་སུམ་དུ་གྱུར་པ་འབྱུང་བ་དེའི་ཚེ་ལྷོ་ཕྱོགས་ཀྱི་ལམ་ནས་མདོ་སྡེ་འདི་ལྟ་བུ་འདི་དག་འོང་བར་འགྱུར་ཞིང་འོངས་ནས་ཀྱང་དེ་དག་གི་དྲུང་དུ་འགྲོ་བར་འགྱུར་གྱི། ཕྱོགས་གཞན་དུ་ནི་གནས་པར་མི་འགྱུར་རོ། །འཕགས་པ་རྔ་བོ་ཆེ་ཆེན་པོའི་ལེའུ།
58.115a
བམ་པོ་གསུམ་པ། དེར་ནི་སྟོང་པ་ཉིད་ཀྱི་ལེའུ་དང་ལྡན་པའི་དྲང་བའི་མདོ་སྡེ་གཞན་དག་འབྱུང་ཞིང་གལ་ཏེ་དེ་ན་སྟོན་པ་ཡོད་ན་དེ་ཉིད་དུ་གནས་པར་འགྱུར་རོ། །ཡང་འཁོར་ལོས་སྒྱུར་བའི་རྒྱལ་པོ་ཕྱོགས་གཞན་དུ་སོང་ན་དེ་ན་སེམས་ཅན་གང་དག་རྒྱལ་པོའི་ཞམ་རིང་བྱེད་པ་དེ་དག་འདི་སྙམ་དུ་བདག་ཀྱང་རྒྱལ་པོ་གང་དུ་བཞུད་པ་དེར་འདོང་ངོ་སྙམ་དུ་སེམས་པར་འགྱུར་རོ། །དེ་བཞིན་དུ་གང་དུ་ཕན་པ་སྟོན་པ་འབྱུང་བ་དེར་མདོ་སྡེ་འདི་ལྟ་བུ་འདི་དག་འབྱུང་བར་འགྱུར་རོ། །དཔེར་ན་གང་གི་ཚེ་འཁོར་ལོས་སྒྱུར་བའི་རྒྱལ་པོ་འབྱུང་བར་འགྱུར་བ་དེའི་ཚེ་རིན་པོ་ཆེ་སྣ་བདུན་དག་འབྱུང་བར་འགྱུར་རོ། །དེ་བཞིན་དུ་ཕན་པ་སྟོན་པ་གང་དུ་འབྱུང་བར་འགྱུར་བ་དེའི་ཚེ་དེ་དག་གི་ལག་ཏུ་མདོ་སྡེ་འདི་ལྟ་བུ་འདི་དག་འོང་བར་འགྱུར་རོ། །གཞན་ཡང་གང་གི་ཚེ་འཁོར་ལོས་སྒྱུར་བའི་རྒྱལ་པོས་རིན་པོ་ཆེ་སྣ་བདུན་ལས་སྣ་གཅིག་མ་མཐོང་ནས་དེས་བཙལ་ནས་རིན་པོ་ཆེ་སྣ་བདུན་པོ་གང་ན་ཡོད་པ་དེ་ཉིད་དུ་ཕྱིན་པར་འགྱུར་རོ། །དེ་བཞིན་དུ་མདོ་སྡེ་འདི་ལྟ་བུ་འདི་མཉན་ན་གང་ན་ཕན་པ་སྟོན་པ་ཡོད་པ་དེ་དང་དེ་ཁོ་ནར་བཙལ་ན་རྙེད་པར་འགྱུར་རོ། །དཔེར་ན་གང་ན་འཁོར་ལོས་སྒྱུར་བའི་རྒྱལ་པོ་མེད་པ་དེ་ན་ཁམས་ཀྱི་རྒྱལ་པོ་དང ། སྟོབས་ཀྱི་འཁོར་ལོས་སྒྱུར་བ་དང ། རྒྱལ་ཕྲན་གྱི་ཚོགས་རྣམས་འབྱུང་ངོ ། །དེ་བཞིན་དུ་གང་ན་མདོ་སྡེ་འདི་ལྟ་བུ་འདི་དག་འཆད་པར་མི་འགྱུར་བ་དེར་ཕན་པ་སྟོན་པ་དག་འདི་ལྟ་སྟེ། སྟོང་པ་ཉིད་ཀྱི་ལེའུ་དང་ལྡན་པ་ཕལ་པ་གཞན་སྟོན་ཅིང་འཆད་པར་འགྱུར་རོ། །དེའི་ཚེ་དེ་དག་གིས་མདོ་སྡེ་དེ་ལྟ་བུ་མང་པོ་དག་མཐོང་ཐོས་ནས་སེམས་ཅན་དེ་དག་སློབ་ཅིང་དེ་དག་གིས་ལོབས་ནས་གང་གི་ཚེ་དེ་བཞིན་གཤེགས་པའི་སྙིང་པོ་དེ་བཞིན་གཤེགས་པ་རྟག་པའི་བདག་ཉིད་དང་ལྡན་པའི་མདོ་སྡེ་འདི་ལྟ་བུ་འདི་དག་ཐོས་ན་དེ་དག་ཡིད་གཉིས་དང ། ཐེ་ཙོམ་འཐོབ་ཅིང་བློ་ཕྱིན་ཅི་ལོག་ཏུ་འགྱུར་རོ། །ཐེ་ཙོམ་དང་བློ་ཕྱིན་ཅི་ལོག་ཏུ་གྱུར
58.115b
ནས་ཅི་ནས་ཀྱང་ཕན་པ་སྟོན་པ་ལ་འཕྱ་ཡང་རུང་མི་འཕྱ་ཡང་རུང ། དགའ་བར་བྱེད་ཀྱང་རུང ། མགུ་བར་བྱེད་ཀྱང་རུང ། བརྙས་པར་བྱེད་ཀྱང་རུང ། རྙོག་པར་བྱེད་ཀྱང་རུང ། འདི་སྐད་ཅེས་ཅི་འདི་རང་བཟོར་བྱས་པ་ཞིག་གམ། འོན་ཏེ་འདི་བསྟན་པ་ཉམས་པར་བདུད་ཀྱིས་བསམས་ནས་བྱས་པ་ཞིག་ཅེས་སྨྲ་ཞིང་བསམས་ནས་དེ་དག་གི་དྲུང་ནས་ལོག་སྟེ། རང་རང་གི་ཡུལ་དུ་དོང་ནས་ཕན་ཚུན་ཚུལ་ཁྲིམས་ཉམས་པར་བྱེད། ལྟ་བ་ཉམས་པར་བྱེད་པར་འགྱུར་གྱི། དེ་དག་གིས་མདོ་སྡེ་འདི་ལྟ་བུ་འདི་དག་ཐོབ་པར་ནི་མི་འགྱུར་རོ། །དེ་ཅིའི་ཕྱིར་ཞེ་ན། གང་ན་ཕན་པ་སྟོན་པ་དེར་མདོ་སྡེ་འདི་ལྟ་བུ་འདི་དག་འབྱུང་བར་འགྱུར་རོ། །དེའི་ཚེ་འཇིག་རྟེན་འདིར་སེམས་ཅན་མང་པོ་མང་པོ་དག་གིས་མཐོང་ཞིང་ཐོས་ནས་ཐེག་པ་ཆེན་པོ་ལ་སྐུར་པ་འདེབས་པར་འགྱུར་གྱིས་ཞུམ་པར་མི་བྱའོ། །དེ་ཅིའི་ཕྱིར་ཞེ་ན། དུས་འདི་ནི་སྙིགས་མ་ལྔའི་དུས་ཡིན། དུས་འདི་ནི་བསྟན་པ་ཉམས་པར་འགྱུར་བ་ཡིན་པས་སེམས་ཅན་མང་པོ་དག་ཐེག་པ་ཆེན་པོ་ལ་ཤིན་དུ་སྐུར་པ་འདེབས་པར་འགྱུར་རོ། །དཔེར་ན་ཁྱིམ་བདུན་གྱི་གྲོང་ལ་འགྲོན་བུ་གཅིག་ཡོད་པ་དེ་བཞིན་དུ་གང་ན་མདོ་སྡེ་འདི་ལྟ་བུ་འདི་དག་རབ་ཏུ་སྤྱོད་པ་དེ་ན་ཡང་སྐྱེ་བོ་བདུན་ལས་གཅིག་ནི་གདོན་མི་ཟ་བར་དམ་པའི་ཆོས་སྤོང་བར་འགྱུར་རོ། །འདི་ལྟ་སྟེ། ཚུལ་ཁྲིམས་མཚུངས་པ་དེ་དག་གིས་ཚུལ་ཁྲིམས་དག་པ་མཐོང་ནས་ཡི་རངས་པར་གྱུར་ཅིང་ཕན་ཚུན་གཅིག་ལ་གཅིག་ཚུལ་ཁྲིམས་ཉམས་པར་བྱེད་པས་དགའ་བར་འགྱུར་རོ། །དེ་ལ་ཚུལ་ཁྲིམས་མཚུངས་པ་ཞེས་བྱ་བ་ཇི་ལྟ་བུ་ཞེ་ན། གང་ཞིག་མདོ་སྡེ་འདི་ལྟ་བུ་འདི་ཐོས་ཤིང་མདོ་སྡེ་དེ་དག་གི་ཆོས་སྟོན་པ་ལ་སོགས་པ་མཐོང་ན་འདི་ལྟར་ཡིད་ལ་གཅགས་ནས་ནི་ཕྱིར་ཕྱོགས་པར་བྱེད་ཅིང་གཏམ་འདི་ལྟ་བུ་དག་སྨྲ་སྟེ། དེ་ལ་སེམས་ཅན་གྱི་ཁམས་ནི་གང་དེ་ལ་དེ་བཞིན་གཤེགས་པའི་བདག་གི་ངོ་བོ་ཉིད་རྟག་པ་འམ། རང་བཞིན་རྟག་པ་ཉིད་ནི་གང་ཡངས་པའི་མདོ་བསྟན་པ་འདིའི་གཏམ་ནི་ཅི་ཡིན་ཞེས་ཁ་གཞན་དུ
58.116a
བལྟས་ཏེ། སེམས་པར་བྱེད་ཅིང་དེ་དག་འདི་དག་ནི་བདག་གི་ཕྱོགས་བྱེད་པར་འགྱུར་རོ་ཞེས་དེ་དག་ཕན་ཚུན་དུ་བྱམས་པར་བྱེད་ཅིང་དེ་ལྟར་རིམ་གྱིས་རང་བཞིན་ལ་འཇོག་པར་བྱེད། དེ་དག་གི་རང་བཞིན་དང་རང་བཞིན་གཅིག་པར་བྱེད་དོ། །དཔེར་ན་བྲམ་ཟེའི་ཁྱིམ་འམ་ཁྱིམ་བདག་གི་ཁྱིམ་ན་ཁྱེའུ་འགའ་ཞིག་སྤྱོད་པ་མ་ཡིན་པ་ལ་ཞུགས་པར་གྱུར་པ་ན་དེ་ཕ་དང་མས་བཟློག་སྟེ། དེ་དེ་ལས་བཟློག་པ་ན་སྤྱོད་པ་མ་ཡིན་པ་དེ་ལས་ལྡོག་ཏུ་མ་བཏུབ་ནས་ཇི་ཙམ་ན་དེ་རང་གི་ཁྱིམ་ནས་བྱུང་སྟེ། བྱུང་ནས་ཁྱེའུ་གཞན་ཞིག་དང་ལྷན་ཅིག་འདྲིས་པར་བྱེད་དོ། །དེ་ནས་ཁྱེའུ་དེས་ཁྱེའུ་དེ་ཡང་ཁྲིད་ནས་མདའ་འམ། བུས་པའི་རྩེད་མོ་འམ། རྩེད་མོ་གང་ཡང་རུང་བ་དག་གིས་རྩེ་བར་བྱེད་དེ་དེ་ཇི་ལྟར་དགའ་བ་དེ་བཞིན་དུ་ཡང་བྱེད་དོ། །དེ་ནས་དུས་གཞན་ཞིག་ན་དེ་ཡང་ཡིད་དགའ་བར་གྱུར་ནས་རང་གི་ཁྱིམ་ནས་འབྱུང་ཞིང་བྱུང་ནས་སེམས་ཤིང་བདག་ཅག་ལ་འདི་དང་འདི་སྐད་ཅེས་ཟེར་བསམ་ལ་བདག་ཅག་ཡུལ་གཞན་དུ་འདོང་ངོ་ཞེས་ཟེར་བ་ལྟ་བུ་དག་ནི་ཚུལ་ཁྲིམས་མཚུངས་པ་ཞེས་བྱ་བ་ཡིན་ཏེ། དེ་ལྟ་བུ་དེ་དག་ནི་མདོ་སྡེ་འདི་ལྟ་བུ་འདི་དག་ལ་དགའ་བར་མི་འགྱུར་རོ། །མདོ་སྡེ་འདི་ལྟ་བུ་འདི་དག་ཀློག་པ་དང ། གཞན་ལ་ཡང་སྟོན་པ་དང ། གཞན་དག་སྦྱོང་བར་བྱེད་པ་དེ་ལྟ་བུ་གནས་པ་དང ། དེ་ལྟར་སྦྱོང་བར་བྱེད་པ་དེ་དག་ལ་ཕྱོགས་པར་མི་འགྱུར་རོ། །དེ་ཅིའི་ཕྱིར་ཞེ་ན། དེ་འདྲ་བའི་དུས་ལ་ནི་སེམས་ཅན་རྣམས་ཆོས་ཀྱིས་ཕོངས་པར་འགྱུར་བས་བཅོམ་པའི་ཡིད་ཀྱིས་ལྷོད་པར་འགྱུར་བའི་ཕྱིར་རོ། །དེ་ནས་དེའི་ཚེ་གང་དང་གང་དུ་བསྐལ་པ་འདྲ་བའི་སྤྱོད་པ་དེ་དང་དེར་དོང་ནས་སྐུར་པ་འདེབས་པར་འགྱུར་རོ། །བཅོམ་ལྡན་འདས་ཀྱེ་མའོ་དུས་ངན་པའི་དུས་འབྱུང་བར་འགྱུར་ལགས་སོ། །བཀའ་སྩལ་པ། འོད་སྲུང་དེ་འདྲ་བའི་དུས་བྱུང་བ་ན་ཕན་པར་སྟོན་པ་རྣམས་ཀྱིས་ཅི་འདྲ་བ་དང ། ཇི་ལྟ་བུའི་རང་བཞིན་དུ་བྱ་ཞེ་ན། དཔེར་ན་གྲོང་རྡལ་ལམ། གྲོང་ཁྱེར་རམ། ཚོང་འདུས་ཀྱི་ལམ་པོ་ཆེ་ལ་རྟེན་པའི་ཞིང་གླང་པོ
58.116b
ཆེ་དང ། རྟ་དང ། མིས་བཟའ་བར་འོས་པའི་མོན་སྲན་སྡེའུ་དང ། མོན་སྲན་གྲེའུ་དང ། བུ་རམ་ཤིང་གི་ཞིང་ལོ་ཏོག་ཕུན་སུམ་ཚོགས་པ་ཞིག་ཡོད་པར་གྱུར་ལ། དེ་ཡང་གཟན་ཁར་བབ་པས་དེའི་དབུས་སུ་ལམ་པོ་ཆེ་བྱུང་ལ། དེ་ནས་དེར་ཁྱིམ་མི་ཞིང་བདག་གིས་སྲུངས་མ་ཞིག་བཞག་པ་དང ། དེ་ནས་དེས་ཉི་མ་གཅིག་བསྲུངས་ནས་བག་ཚ་སྟེ་གཡེལ་བར་གྱུར་ཏོ། །དེ་ནས་དེ་བཞིན་དུ་གཉིས་པ་དང ། གསུམ་པ་དང ། བཅུ་པ་དང ། ཉི་ཤུ་པ་དང ། བརྒྱ་པ་ཡང་དེ་བཞིན་ནོ། །དེ་ལ་མི་ཐ་མ་ཤོས་ཀྱིས་བསམས་པ། གལ་ཏེ་བདག་གིས་འདི་དག་ཐམས་ཅད་ཕྱིར་བཟློག་ན་དེ་ཉིད་ཀྱིས་བདག་གིས་ཞིང་བསྲུངས་པར་མི་འགྱུར་བ་དང ། ལོ་ཏོག་ཀྱང་འགྲུབ་པར་མི་འགྱུར་བས་བདག་གིས་ཐབས་ལེགས་པ་གང་གིས་བདག་ཞིང་སྲུངས་སུ་འགྱུར་བ། ཞིང་གི་ལོ་ཏོག་ཆུད་གཟོན་པར་ཞུགས་པ་རྣམས་ལ་ཐབས་ལེགས་པ་ཞིག་བསམ་པར་བྱའོ་སྙམ་ཞིང་དེ་ནས་དེས་དེ་ལྟར་བསམས་ནས། དེས་གང་ན་མོན་སྲན་ཙམ་འམ། མོན་སྲན་སྡེའུ་འམ། མོན་སྲན་གྲེའུ་འམ། རྒྱ་སྲན་ཡོད་པ་དེ་ལས་དེ་ཐོག་མར་འདྲོན་པ་རྣམས་ལ་གུས་པས་བསུ་ནས་ཕུ་ནུ་བོ་བདག་གི་འདི་སྣོམས་ཤིག་ཅེས་སྨྲ་ཞིང་སྦྱིན་པ་བྱེད་ན་དེ་ལྟར་བྱིན་ཞིང་དེ་ལྟར་སྨྲས་པས་ཞིང་དེ་ཐམས་ཅད་འགྲུབ་པར་འགྱུར་རོ། །འོད་སྲུང་ཁྱོད་ཀྱིས་ཀྱང་དེ་བཞིན་དུ་ང་འདས་པའི་འོག་ཏུ་ཐབས་དེ་ལྟ་བུ་བྱོས་ལ་མདོ་འདི་ཕྱུང་ཤིག་།འོད་སྲུང་གིས་གསོལ་པ། བཅོམ་ལྡན་འདས་བདག་གིས་རྣམ་གྲངས་འདིས་སྐྱེས་བུ་ཐ་ཤལ་རྣམས་ཡང་དག་པར་གཟུང་རྔོ་མི་ཐོག་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བསྐལ་པ་བརྒྱ་སྟོང་དུ་རིའི་རྒྱལ་པོ་རི་རབ་ཁུར་དུ་ཐོགས་པ་ནི་མི་མདོ་ལགས་ཀྱི། སྐྱེས་བུ་ཐ་ཤལ་ཚུལ་ཁྲིམས་འཆལ་པ་དམ་པའི་ཆོས་ལ་སྐུར་པ་འདེབས་པ། དམ་པའི་ཆོས་ལ་སྨོད་པའི་སེམས་ཅན་དག་གི་ཚིག་རྩུབ་མོ་ཉན་པ་ནི་མ་ལགས་སོ། །བཅོམ་ལྡན་འདས་གཞན་གྱི་སུག་པར་མཆིས་ཏེ། དབང་དུ་བགྱིས་པ་ནི་མི་མདོ
58.117a
ལགས་ཀྱི། སྐྱེས་བུ་ཐ་ཤལ་ཚུལ་ཁྲིམས་འཆལ་པ་དམ་པའི་ཆོས་ལས་ཁ་ཕྱིར་ཕྱོགས་པ། དམ་པའི་ཆོས་ལས་རིང་དུ་གྱུར་པ། དམ་པའི་ཆོས་མཉན་པ་མ་བཟུང་བས་ཉམས་པའི་རྒྱུད་ཅན་གྱི་སེམས་ཅན་དེ་དག་གི་ཚིག་རྩུབ་པོ་དང ། རང་བཞིན་ངན་པའི་ངག་དང ། ཚིག་མཉན་པ་ནི་མ་ལགས་སོ། །བཅོམ་ལྡན་འདས་ས་ཆེན་པོ་འདི་རྒྱ་མཚོ་དང ། རི་དང་བཅས་པར་བསྐལ་པ་བྱེ་བ་ས་ཡ་ཕྲག་བརྒྱ་སྟོང་མང་པོར་སྤྱི་བོར་ཐོགས་པ་ནི་མི་མདོ་ལགས་ཀྱི། སྐྱེས་བུ་ཐ་ཤལ་ཚུལ་ཁྲིམས་འཆལ་པ་བསྟན་པ་རབ་ཏུ་རྣམ་པར་འཇིག་པར་བགྱིད་པ་བདག་ལ་སྟོད་ཅིང་གཞན་ལ་སྨོད་པའི་སེམས་ཅན་དེ་དག་གི་ཚིག་རྩུབ་པོ་ཉན་པ་ནི་མ་ལགས་སོ། །བཅོམ་ལྡན་འདས་འོན་པ་ཉིད་དང ། ལྐུག་པ་ཉིད་དང ། དམུས་ལོང་ཉིད་ནི་མི་མདོ་ལགས་ཀྱི། སྐྱེས་བུ་ཐ་ཤལ་ཚུལ་ཁྲིམས་འཆལ་པ་མུ་གེའི་ཚེ་འཚོ་བའི་ཕྱིར་སྐྲ་བྲེགས་ཤིང་ངུར་སྨིག་བགོས་ནས་ཟས་དང ། སྐོམ་ལྷུར་བགྱིད་པའི་སེམས་ཅན་དེ་དག་གི་ཚིག་རྩུབ་པོ་ཉན་པ་ནི་མ་ལགས་སོ། །བཅོམ་ལྡན་འདས་མྱུར་དུ་ཡོངས་སུ་མྱ་ངན་ལས་འདས་པ་ནི་མི་མདོ་ལགས་ཀྱི། སྐྱེས་བུ་ཐ་ཤལ་ཚུལ་ཁྲིམས་འཆལ་པ་ལུད་བོང་ལྟར་ཀུན་དུ་སྤྱོད་པ། ལུས་ཀྱི་ཚུལ་འཆོས་པ་དང ། ངག་གི་ཚུལ་འཆོས་པའི་སེམས་ཅན་དག་གི་ཚིག་རྩུབ་པོ་དང ། ངག་དང་ཚིག་ཉན་པ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཁྱོད་ཡོངས་སུ་མྱ་ངན་ལས་འདས་ན་ཡང་སྐྱེ་བར་མི་འགྱུར་རམ། ཡོངས་སུ་མྱ་ངན་ལས་འདས་པའི་མཐར་ཕྱིན་པ་དེ་ཡིན་ནམ། བཅོམ་ལྡན་འདས་གང་ཞིག་ཡོངས་སུ་མྱ་ངན་ལས་འདས་ན་ཡང་སྐྱེ་བར་མི་འགྱུར་ཞིང་འགུམ་པར་མི་འགྱུར་བའི་སེམས་ཅན་རྣམས་ཀྱི་ལམ་ནི་ཐེག་པ་གསུམ་ལགས་ཏེ། བཅོམ་ལྡན་འདས་ཉན་ཐོས་དང ། རང་སངས་རྒྱས་དང ། སངས་རྒྱས་བཅོམ་ལྡན་འདས་རྣམས་ཀྱི་ལགས་སོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཡོངས
58.117b
སུ་མྱ་ངན་ལས་འདས་ན་ཡང་ཡོངས་སུ་མྱ་ངན་ལས་འདས་པར་མི་འགྱུར་བ་ཇི་ལྟ་བུ་ལགས། བཀའ་སྩལ་པ། འོད་སྲུང་ཉན་ཐོས་རྣམས་ཉན་ཐོས་ཀྱི་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདས་ན། དེ་ནི་ཡོངས་སུ་མྱ་ངན་ལས་འདས་པའི་མཐར་ཐུག་པ་མ་ཡིན་ནོ། །དེ་ཅིའི་ཕྱིར་ཞེ་ན། ཡང་རང་སངས་རྒྱས་ཉིད་དུ་འགྱུར་ལ། རང་སངས་རྒྱས་རྣམས་རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདས་ན་ཡང ། དེ་ནི་ཇི་སྲིད་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཐེག་པ་ཆེན་པོའི་ཡོངས་སུ་མྱ་ངན་ལས་འདའ་བ་མཆོག་གི་མཐར་མ་ཕྱིན་གྱི་བར་དུ་ཡོངས་སུ་མྱ་ངན་ལས་འདས་པའི་མཐར་ཕྱིན་པ་མ་ཡིན་ནོ། །བཅོམ་ལྡན་འདས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དཔེར་ན་འོ་མ་ལས་ཞོ་དང ། ཞོ་ལས་མར་སར་དང ། མར་སར་ལས་ཞུན་མར་དང ། ཞུན་མར་ལས་མར་གྱི་སྙིང་ཁུ་སྟེ། དེ་ལ་ཞུན་མར་ཇི་ལྟ་བ་དེ་ལྟར་ནི་ས་བཅུ་ཐོབ་པའི་བྱང་ཆུབ་སེམས་དཔའ་རྣམས་ཏེ། ཉོན་མོངས་པའི་ལྷག་མ་ཡོད་པས་སོ། །མར་སར་ལྟར་ནི་ཉན་ཐོས་རྣམས་སོ། །མར་སར་བསྒོངས་པ་ལྟར་ནི་རང་སངས་རྒྱས་རྣམས་སོ། །མར་གྱི་སྙིང་ཁུ་ལྟར་དེ་བཞིན་གཤེགས་པ་རྣམས་སུ་བལྟ་བར་བྱའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅིའི་སླད་དུ་ཐེག་པ་གསུམ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དཔེར་ན་དམག་མིའི་མི་མཆོག་སྒྱུ་མ་ལ་མཁས་པ་ཞིག་རང་གི་ཡུལ་ནས་ཡུལ་གཞན་དུ་ཆས་པ་ན། དེའི་སྐྱེ་བོའི་ཚོགས་ཀྱང་དེད་ཅིང་སྐྱེ་བོའི་ཚོགས་གཞན་ཡང་དེད་ནས་རྣམ་པ་མང་པོ་བསྒྲལ་བར་འདོད་པར་གྱུར་ལ། དེ་ནི་འདྲོན་པ་ཕལ་པོ་ཆེ་དེའི་སྟོན་པ་ཡིན་ཞིང་དེ་ཉིད་དེད་དཔོན་ཡང་ཡིན་པས་དེ་འདྲོན་པ་དེ་རྣམས་འབྲོག་དགོན་པ་དེ་ལས་སྒྲོལ་བ་ན་དེ་དག་དབུགས་དབྱུང་བའི་ཕྱིར་སྤྲུལ་པའི་གྲོང
58.118a
ཁྱེར་ར་བ་དང ། ཁྱམས་དང ། ཡང་ཐོག་ཕུན་སུམ་ཚོགས་པ་ཞིག་མངོན་པར་སྤྲུལ་ནས་འཛུབ་མོས་རྒྱང་རིང་པོ་ནས་བསྟན་ཏེ། འདི་སྐད་ཅེས་གྲོགས་པོ་དག་འུ་བུ་ཅག་གང་དུ་འདོང་བའི་གྲོང་ཁྱེར་ནི་ཕ་བི་ཡིན་ནོ་ཞེས་སྨྲས་པ་དང ། དེ་ནས་དེ་དག་ཉེ་བར་གྱུར་ཏོ་སྙམ་དུ་བསམས་ནས་གྲོང་རྡལ་ལམ། གྲོང་ཁྱེར་རམ། ཚོང་འདུས་དེ་ནི་ཉེའོ། །དེ་ནི་རྟེན་དུ་འགྱུར་རོ་སྙམ་དུ་ཤེས་ནས་དབུགས་མཆོག་ཏུ་ཕྱིན་པར་འགྱུར་རོ། །དེ་ནས་དེ་དག་གྲོང་ཁྱེར་དེར་ཞུགས་པ་ན་བདེ་བ་དང་ལྡན་པས་སེམས་ལས་ཆུང་ངུར་གྱུར་ཅིང་ཡང་གྲོང་དུ་འགྲོ་བར་སེམས་བསྐྱེད་པར་མི་བྱེད་དོ། །དེ་ནས་སྟོན་པ་དེ་འདི་སྙམ་དུ་སེམས་ཏེ། སེམས་ཅན་འདི་དག་ནི་དམན་པ་བརྩོན་འགྲུས་ཞན་པ་བདེ་བ་ཕལ་པ་འདི་ཙམ་གྱིས་ཚིམ་པར་རྩི་བས་མ་ལ་གྲོང་ཁྱེར་འདི་མི་སྣང་བར་བྱའོ་སྙམ་མོ། །དེ་ནས་དེ་དག་གིས་གྲོང་ཁྱེར་དེ་མི་སྣང་བར་རིག་ནས་སྟོན་པ་དེ་ལ་འདི་སྐད་ཅེས་སྨྲས་སོ། །དེ་ལྟ་བུར་གྱུར་པ་དེ་ཅི་སྒྱུ་མ་ཡིན་ནམ། འོན་ཏེ་རྨི་ལམ་ཡིན་ནམ། ཅི་བརྫུན་ནམ། བདེན། དེ་ནས་སྟོན་པ་དེས་དེ་དག་ལས་ཐོས་ནས་འདི་སྐད་ཅེས་སྨྲས་སོ། །རིགས་ཀྱི་བུ་དག་གྲོང་ཁྱེར་འདི་ནི་ཁྱེད་ཅག་ངལ་སོར་གཞུག་པའི་ཕྱིར་ཁོ་བོས་སྤྲུལ་གྱིས་གྲོང་ཁྱེར་ཆེན་པོ་མཆོག་ཏུ་བདག་ཅག་གནས་དགོས་ཏེ། གྲོང་ཁྱེར་གཞན་གང་ན་བ་དེར་དོང་ངོ ། །དེ་དག་གིས་ཀྱང་བདག་ཅག་འཐའ་འཁོབ་ཀྱི་གྲོང་ཁྱེར་ཕལ་པར་གནས་པ་འདི་ཅི་རུང་དེ་ལྟར་བྱའོ་ཞེས་སྨྲས་པའི་བར་གོང་མ་བཞིན་དུ་ཤེས་པར་བྱའོ། །ཡང་གྲོང་ཁྱེར་ཆེན་པོ་ཞིག་སྤྲུལ་ཏེ་དེར་ཡང་དེ་ཁོ་ན་བཞིན་ནོ། །དེ་ནས་སྟོན་པ་དེ་དག་འབྲོག་དགོན་པ་དེ་ནས་དེ་ལྟར་སྒྲོལ་ཞིང་དེ་ལྟར་དབུགས་འབྱིན་པ་ན་གྲོང་ཁྱེར་དེར་བཙུད་དོ། །དེ་ནས་དེ་དག་གྲོང་ཁྱེར་དེར་ཞུགས་པ་ན་འདི་སྙམ་དུ་སེམས་ཏེ། ཅི་ག་གྲོང་ཁྱེར་འདིའི་ཕ་རོལ་ན་ཆེས་ཁྱད་པར་དུ་འཕགས་པའི་གྲོང་ཁྱེར་གཞན་ཡོད་དམ་སྙམ་པ་དང་དེ་ནས་སྟོན་པ་དེ་འདི་སྙམ་དུ་སེམས་ཏེ། སྐྱེ་བོ
58.118b
འདི་དག་གྲོང་ཁྱེར་འདི་ཉིད་དུ་གནས་པར་འདོད་དོ་སྙམ་ནས། དེ་ནས་སྟོན་པ་དེས་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་གྲོང་ཁྱེར་འདིའི་ཕ་རོལ་ན་ཆེས་ཁྱད་པར་དུ་འཕགས་ལ་བཟང་བའི་གྲོང་ཁྱེར་ཐམས་ཅད་ཀྱི་མཐར་ཕྱིན་པ་ཡིན་པས། དེ་འདྲ་བའི་གྲོང་ཁྱེར་གཞན་མེད་དོ། །དེ་ནས་འདྲོན་པ་དེ་དག་དེད་དཔོན་དེའི་ཚིག་ལ་ཡིད་ཆེས་པར་བྱས་ན་དེ་དག་གིས་གྲོང་ཁྱེར་གྱི་ཡོན་ཏན་གྱི་ཁྱད་པར་གོང་ནས་གོང་དུ་ཐོས་ཤིང་མཐོང་བ་དང་སྟོན་པ་དེ་ལ་འདི་སྐད་ཅེས་སྨྲས་སོ། །གྲོགས་པོ་བདག་ཅག་ཐམས་ཅད་ཀྱང་ལྷན་ཅིག་ཏུ་གྲོང་ཁྱེར་ཐམས་ཅད་ཀྱི་མཐར་ཕྱིན་པའི་གྲོང་ཁྱེར་ཆེན་པོ་གང་ན་བ་དེར་དོང་ངོ ། །དེ་ནས་སྟོན་པ་དེས་དེ་དག་ལ་འདི་སྐད་ཅེས་སྨྲས་སོ། །ལེགས་སོ། །ཐམས་ཅད་དང་ལྷན་ཅིག་ཏུ་དོང་ངོ ། །དེ་ནས་སྟོན་པ་དེས་འདྲོན་པ་དེ་དག་འབྲོག་དགོན་པ་དེ་ནས་སྒྲོལ་བ་ན། སྐྱེ་བོའི་ཚོགས་ཆེན་པོ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ད་ནི་ཁྱེད་ཀྱིས་གྲོང་ཁྱེར་ཆེན་པོ་དེའི་སྔ་ལྟས་དང ། གྲོང་ཁྱེར་ཆེན་པོ་དེ་དང ། བདེ་བ་མང་པོའི་གྲོང་ཁྱེར་མཐོང་བར་འགྱུར་རོ། །དེ་ནས་སྟོན་པ་དེས་འདྲོན་པ་དེ་དག་འབྲོག་དགོན་པ་དེ་ནས་སྒྲོལ་ཞིང་དེ་དག་ལ་དབུགས་འབྱིན་པ་དང ། གྲོང་ཁྱེར་དེ་རྒྱང་རིང་པོ་ནས་བསྟན་ཏེ་འདི་སྐད་ཅེས་ཀྱང་སྨྲས་སོ། །གྲོགས་པོ་དག་གྲོང་ཁྱེར་ཆེན་པོ་དེའི་སྔ་ལྟས་ལ་ལྟོས། དེ་ནི་སྐྱེ་བོའི་ཚོགས་ཆེན་པོས་ཡུལ་དང ། ལྗོངས་དང ། གྲོང་ཁྱེར་དེ་ན་གནས་པའི་ལོངས་སྤྱོད་འབྱོར་ཅིང་རྒྱས་པ་དང ། གྲོང་ཁྱེར་ཆེན་པོ་དེ་མཐོང་ནས་ཡིད་དགའ་ཞིང་མགུ་བར་གྱུར་ཏེ། གཅིག་གི་གདོང་དུ་གཅིག་བལྟས་ནས་ཡ་མཚན་དུ་གྱུར་ཏེ། བསམས་པ་ཅི་གྲོང་ཆེན་པོའི་གྲོང་ཁྱེར་ཆེན་པོ་གསལ་བ་གཞན་འདི་ལྟ་བུ་གཞན་ན་ཡོད་དམ་སྙམ་མོ། །དེ་ནས་སྟོན་པ་དེས་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་གྲོང་ཁྱེར་ཆེན་པོ་འདི་ནི་གྲོང་ཁྱེར་ཐམས་ཅད་ལས
58.119a
ཁྱད་པར་དུ་འཕགས་པ་གསལ་བ་ཡིན་ཏེ། གྲོང་ཁྱེར་ཆེན་པོའི་གྲོང་ཁྱེར་བདེ་བ་མང་བ། རྟག་པ། བརྟན་པ། ཞི་བ། རྒ་བ་མེད་པ། འཆི་བ་མེད་པ། རྟག་ཏུ་བདེ་བ། རྒྱུན་དུ་བདེ་བ། བར་ཆད་མེད་པར་བདེ་བ་ཡིན་ནོ་ཞེས་དེ་ལྟར་དབུགས་ཕྱུང་ནས་འདི་སྐད་ཅེས་ཀྱང་སྨྲས་ཏེ་གྲོང་ཁྱེར་ཆེན་པོའི་གྲོང་ཁྱེར་ཆེན་པོར་ཞུགས་ཤིང་སྐྱེ་བོའི་ཚོགས་ད་ཞུགས་པ་དང ། ཡང་འདི་སྐད་ཅེས་སྨྲས་སོ། །གྲོགས་པོ་དག་གྲང་ཁྱེར་ཆེན་པོ་མཆོག་འདི་ནི་གྲོང་ཁྱེར་ཐམས་ཅད་ཀྱི་མཐར་ཕྱིན་པ་ཡིན་ཞིང་གྲོང་ཁྱེར་འདི་ལས་ཕ་རོལ་ན་གྲོང་ཁྱེར་གཞན་མེད་དོ། །དེ་ནས་དེ་དག་གྲོང་ཁྱེར་ཆེན་པོ་དེར་ཞུགས་པ་ན། ངོ་མཚར་དུ་གྱུར་ཅིང་ཡ་མཚན་དུ་གྱུར་ཏེ། རབ་ཏུ་མགུ་ནས་སྟོན་པ་དེ་ལ་སྐལ་ལྡན་ཤེས་རབ་ཆེན་པོ་སྙིང་རྗེ་ཆེན་པོ་ཅན་བདག་ཅག་ལ་རྗེས་སུ་བརྩེ་བ་ཁྱོད་ལེགས་སོ་ལེགས་སོ་ཞེས་ལེགས་སོ་བྱ་བ་བྱིན་ནས་དེ་ནས་ཡང་སྟོན་པ་དེ་ལས་དྲིས་པ་སྐལ་ལྡན་ཅི་བདག་ཅག་གིས་རྒལ་བའི་གྲོང་ཁྱེར་གང་ཡིན་པ་དེ་དག་ཐམས་ཅད་ད་ཡོད་དམ། འོན་ཏེ་མེད། སྟོན་པ་དེས་སྨྲས་པ། གྲོང་ཁྱེར་ཞེས་བྱ་བ་དེ་དག་ནི་དབུགས་དབྱུང་བཞི་ཕྱིར་ཡིན་ཏེ། གལ་ཏེ་གནས་དེ་གནས་སྟོང་པ་ཡིན་ན་གནས་སྟོང་པ་དེ་ནི་དགོས་པ་མེད་པས་དེ་ནས་འདོང་ངོ་ཞེས་བྱ་བ་ཅིར་དགོས་ཤེ་ན་གྲོང་ཁྱེར་སྟོང་པ་ཡིན་པའི་ཕྱིར་རོ། །གྲོང་ཁྱེར་གྱི་དབྱིབས་དང ། ར་བ་དང ། ཡང་ཐོག་སྤྲུལ་པ་དང་པོ་ལྟ་བུའི་ཉན་ཐོས་ཀྱི་ཐེག་པ་ཤེས་པ་དག་པ་འདི་ལྟ་སྟེ། སྟོང་པ་ཉིད་ཀྱི་མདོ་དག་ཡིན་ནོ། །གཅིག་ཤོས་ལྟ་བུ་ནི་རང་སངས་རྒྱས་ཀྱི་ཐེག་པ་མི་གསལ་བ་ཡིན་ནོ། །སངས་རྒྱས་ཉིད་ནི་ཐར་པ་གསལ་བ་ཡིན་ནོ། །དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་ཐེག་པ་གསུམ་དུ་གཏམ་རྣམ་པ་གསུམ་སྟོན་ཅིང་མྱ་ངན་ལས་འདས་པ་ཡང་རྣམ་པ་གསུམ་དུ་སྟོན་ལ་ཐེག་པ་གཅིག་ཀྱང་སྟོན་པར་མཛད་དོ། །འོད་སྲུང་གང་ཞིག་མདོ་སྡེ་འདི་ལྟ་བུ་འདི་དག
58.119b
མེད་དོ་ཞེས་སྨྲ་ན། དེའི་སྟོན་པ་ཡང་ང་མ་ཡིན་ལ་དེ་ཡང་ངའི་ཉན་ཐོས་མ་ཡིན་ནོ། །གསོལ་པ། བཅོམ་ལྡན་འདས་ཐེག་པ་ཆེན་པོ་ལ་ཡང་སྟོང་པ་ཉིད་ཀྱི་དོན་སྟོན་པའི་མདོ་མང་དུ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྟོང་པ་ཉིད་སྟོན་པ་གང་ཅི་ཡང་རུང་བ་དེ་ཐམས་ཅད་ནི་དགོངས་པ་ཅན་དུ་རིག་པར་བྱ་ལ། བླ་ན་མེད་པའི་མདོ་འདི་ལྟ་བུ་འདི་དག་ནི་དགོངས་པ་ཅན་མ་ཡིན་པར་རིག་པར་བྱའོ། །འོད་སྲུང་གཞན་ཡང་འདི་ལྟ་སྟེ་ཀོ་ས་ལའི་རྒྱལ་པོ་གསལ་རྒྱལ་གྱི་དགུན་ཟླ་ཐ་ཆུངས་ཏེ། གང་གི་ཚེ་དགུན་ཟླ་ཐ་ཆུངས་ལ་བབ་པ་དེའི་ཚེ་རྒྱལ་པོས་ཤི་བ་དང ། བཀྲེན་པ་དང ། ཕོངས་པ་དང ། དགེ་སྦྱོང་དང ། བྲམ་ཟེ་དང ། རིགས་སྣ་ཚོགས་ཀྱི་སློང་མོ་བ་ལ་སོགས་པ་ལ་བུ་རམ་དང ། ཟན་དང ། མར་དང ། འབྲས་ཆན་དང ། བཅའ་བ་དང ། ཐུག་པ་དང ། ཐམས་ཅད་བསྲེས་པ་དང ། འབྲུ་ཐམས་ཅད་ལས་བྱས་པ་དག་སྦྱིན་པར་བྱེད་དེ། བྱིན་པ་ན་དེ་ན་ཁ་ཅིག་ནི་ཐུག་པ་འདོད་པ་ནས་ཁ་ཅིག་ནི་སྐྱུར་བ་དང ། ཁ་ཅིག་ནི་ཐམས་ཅད་བསྲེས་པའི་བར་རོ། །དེ་དག་ཐམས་ཅད་ལ་དེ་ཐམས་ཅད་བྱིན་ཏེ། དེ་ལ་ཁ་ཅིག་ནི་ཐམས་ཅད་བསྲེས་པའི་ཟས་ཟ། ཁ་ཅིག་ནི་མོན་སྲན་གྲེའུ་འམ། མོན་སྲན་སྡེའུ་འམ། ན་ལེ་ཤམ་དག་གི་བར་རེ་རེའི་རོ་བསྒྲུབས་ནས་ཚུགས་སུ་ཚུགས་སུ་ཟོས་ཤིང་འཐུངས་སོ། །དེ་ནས་དེའི་འོག་ཏུ་སེམས་འཁྲུགས་པར་གྱུར་ནས་དེ་འདི་སྐད་ཅེས་བདག་གིས་ཟོས་པ་གང་ཡིན་པ་དེ་འགའ་ཡང་མ་ཟ་ཞིག་ཟེར་ཞིང་དེ་ན་ཚུགས་དྲོད་དུ་ཟ་བའི་ཟས་ཞིམ་པོ་གང་ཡིན་པ་དེ་སྡུག་པའི་བུ་འམ། སྐྱེས་པ་འམ། གྲོང་མི་འམ། རང་གི་སྐྱེ་བོ་འམ། གཞན་དག་ལ་བྱིན་པ་དེ་བཞིན་དུ་འོད་སྲུང་ངས་སེམས་ཅན་མོས་པ་སྣ་ཚོགས་རྣམས་ལ་དགོངས་པ་སྣ་ཚོགས་ཀྱི་མདོ་རྣམས་བསྟན་པ་ན་དེ་ལ་སྙོམ་ལས་ཅན་ཚུལ་ཁྲིམས་འཆལ་པ། ལུས་དང ། ངག་དང ། ཡིད་མ
58.120a
བསྡམས་པ་རྣམས་དེ་བཞིན་གཤེགས་པའི་སྙིང་པོ་སངས་རྒྱས་རྟག་པ་ཉིད་ཀྱི་མདོ་འདི་ལྟ་བུ་འདི་དག་བོར་ནས་སྟོང་པ་ཉིད་ཀྱི་ལེའུ་ཡི་མདོ་དག་ལ་སློབ་པར་བྱེད་ཅིང ། དེ་ལ་ཁ་ཅིག་ནི་ཚིག་དང་ཡི་གེ་འདྲེན་པར་བྱེད། ཁ་ཅིག་ནི་ཕན་ཚུན་ཚིག་དང་ཡི་གེ་དག་སྤོང་བར་བྱེད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་གསུང་ཐམས་ཅད་ལས་ནི་སྟོང་པ་ཉིད་དང་བདག་མེད་པ་སྟོན་ཏོ། །སྟོང་པ་ཉིད་དང་བདག་མེད་པའི་དོན་མ་ཤེས་པའི་མི་བླུན་པོ་རྣམས་ནི་ཉམས་པར་འགྱུར་རོ། །གཞན་ཡང་སྟོང་པ་ཉིད་དང་བདག་མེད་པ་ཉིད་ནི་སངས་རྒྱས་ཀྱི་གསུང་ལ་ཉོན་མོངས་པ་ཕྲག་བྱེ་བས་རྟག་ཏུ་སྟོང་པ་མྱ་ངན་ལས་འདས་པ་ཡིན་ལ་མྱ་ངན་ལས་འདས་པ་ཉིད་ཀྱི་ཚིག་གི་གཞི་རྣམས་ནི་དེ་དག་ཐམས་ཅད་ཀྱི་གཞི་ཡིན་ཏེ། སངས་རྒྱས་བཅོམ་ལྡན་འདས་དེ་དག་ནི་ཞི་བ་ཐེར་ཟུག་པའི་མྱ་ངན་ལས་འདས་པ་ཐོབ་པ་ཡིན་ནོ། །གསོལ་པ། བཅོམ་ལྡན་འདས་ཆད་པ་དང ། རྟག་པ་ཇི་ལྟར་འཚལ་བར་འགྱུར་ལགས། བཀའ་སྩལ་པ། ཇི་སྲིད་དུ་སེམས་ཅན་འཁོར་བ་ན་འཁྱམ་པ་དེ་སྲིད་དུ་བདག་འཇུག་པ་ཡིན་ཏེ། བདག་མེད་པའི་ལྟ་བའི་དོན་ནི་ཐེར་ཟུག་པ་དང ། རྟག་པ་ཡིན་ནོ། །གལ་ཏེ་རྟག་པ་བཀག་ན་ཐེར་ཟུག་ཉམས་པར་འགྱུར་རོ། །བཅོམ་ལྡན་འདས་གཞན་ཡང་བདག་མེད་པ་ནི་ཡུན་རིང་པོ་ནས་ཞུགས་པ་ལགས་ཀྱི་བདག་ནི་ཡུན་རིང་པོ་ནས་བྱུང་བ་མ་ལགས་སོ། །བཀའ་སྩལ་པ། འཇིག་རྟེན་པ་རྣམས་ཀྱི་བདག་ཅེས་བྱ་བ་དེ་དག་གཞིག་པའི་ཕྱིར་བདག་མེད་པ་སྟོན་ཏོ། །གལ་ཏེ་དེ་ལྟར་སྤྱོད་པའི་བསྟན་པ་ལས་མ་གསུངས་ན་ཇི་ལྟ་ན་གྲོངས་པ་ཡིན་པར་མི་འགྱུར། སངས་རྒྱས་བཅོམ་ལྡན་འདས་ནི་བདག་མེད་པར་གསུང་བར་གྲག་གོ་ཞེས་ཡ་མཚན་སྐྱེས་པར་གྱུར་པ་དང་དེའི་འོག་ཏུ་རྒྱུ་དང ། གཏན་ཚིགས་བརྒྱ་སྟོང་གིས་བསྟན་པ་ལ་འཛུད་དོ། །དེ་ལྟར་བཙུད་པ་ལས་གང་གི་ཚེ
58.120b
ཡང་གོང་མ་ལ་དད་པ་སྐྱེས་ཤིང་ཞུགས་པ་ན་སྟོང་པ་ཉིད་ཀྱི་ཆོས་རྣམས་ལ་སློབ་པར་བྱེད། བརྩོན་པར་བྱེད་འབད་པར་བྱེད་དོ། །དེ་ནས་དེའི་འོག་ཏུ་དེ་དག་ལ་ཐར་པ་ནི་ཞི་བ་རྟག་པ་གཟུགས་དང་བཅས་པའོ་ཞེས་སྟོན་ཏོ། །གཞན་ཡང་འཇིག་རྟེན་པ་ཁ་ཅིག་ཐར་པ་ཡོད་དོ་ཞེས་ཟེར་ཏེ། ངས་དེ་དག་གཞིག་པའི་ཕྱིར་ཐར་པ་ནི་ཅུང་ཟད་མེད་དོ་ཞེས་བྱ་བ་འདི་གསུངས་སོ། །གལ་ཏེ་དེ་ལྟར་སྟོན་པས་ལྟ་བ་ཆུད་གཟོན་པར་བྱེད་པ་དང་འདྲ་བར་མ་བསྟན་ན་ཇི་ལྟར་སྟོན་པའི་བསྟན་པ་ལ་ཡིད་ཆེས་པར་འགྱུར། དེ་ལྟ་བས་ན་རྒྱུ་དང ། གཏན་ཚིགས་བརྒྱ་སྟོང་གིས་ཐར་པ་ཆུད་གཟོན་པ་ཉིད་ཀྱི་བདག་མེད་པ་གསུངས་སོ། །དེ་ནས་དེའི་འོག་ཏུ་ཐར་པ་ཆུད་གཟོན་པའི་ལྟ་བ་མཐོང་ན་མི་བླུན་པོ་རྣམས་ཉམས་པར་འགྱུར་བས་དེའི་འོག་ཏུ་ངས་ཡང་རྒྱུ་དང ། གཏན་ཚིགས་བརྒྱ་སྟོང་གིས་ཐར་པ་ཡོད་པ་ཉིད་དུ་གསུངས་སོ། །གསོལ་པ། གལ་ཏེ་འཐར་པ་ཐོབ་པ་བསྟན་པ་དང ། དབང་ཕྱུག་ལགས་ན་སེམས་ཅན་ཡང་མཆིས་ཤིང་བརྟན་པར་རིག་པར་བགྱི་ལགས་སོ། །དེ་ཅིའི་སླད་དུ་ཞེ་ན། དུ་བས་ཞུགས་བཞིན་དུ་གལ་ཏེ་ཐར་པ་ཐེར་ཟུག་པ་བདག་ལགས་ན་ཐར་པ་བདག་ཏུ་སྨྲ་བ་གཟུགས་དང་བཅས་པ་བཞིན་དུ་སྨྲ་བར་འགྱུར་བ་ལགས་སམ། ཇི་ལྟར་འཇིག་རྟེན་པའི་འཇིག་ཚོགས་ཀྱི་ལྟ་བ་ལྟར་ཡང་མ་ཡིན་ལ། ཆད་པ་དང་རྟག་པར་སྨྲ་བ་ལྟར་ཡང་མ་ཡིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་དེ་བཞིན་གཤེགས་པ་རྣམས་ལ་ཡང་ཡོངས་སུ་མྱ་ངན་ལས་འདའ་བ་མི་མངའ་ན་ཅིའི་སླད་དུ་དེ་ལྟར་ཡོངས་སུ་མྱ་ངན་ལས་འདའ་བ་སྟོན་ཅིང་འབྱུང་བ་མ་མཆིས་ན་ཅིའི་སླད་དུ་སྐྱེ་བ་སྟོན་པ་ལགས། སེམས་ཅན་རྣམས་ཀྱིས་རེ་ཤིག་སངས་རྒྱས་ཀྱང་ནོངས་པར་འགྱུར་ན། བདག་ཅག་ལྟ་ཅི་སྨོས། རེ་ཤིག་སངས་རྒྱས་ཀྱིས་ཀྱང་བདག་གི་དབང་མ་ཐོབ་ན་བདག་ཅག་ངར་འཛིན་པ་དང ། ང་ཡིར་འཛིན་པས་ཟིན་པ་རྣམས་ལྟ་སྨོས་ཀྱང་ཅི་དགོས
58.121a
ཞེས་ཤེས་པར་འགྱུར་བས་སོ། །དཔེར་ན་ཉི་འོག་གི་རྒྱལ་པོས་རྒྱལ་པོ་ཞིག་བཟུང་སྟེ། ལྕགས་སུ་བཅུག་ནས་བཙོན་རར་བཅུག་པ་དང ། དེ་ནས་དེས་བསམས་པ། བདག་ནི་རྒྱལ་པོ་ཡིན། བདག་ནི་ཇོ་བོ་ཡིན་ནོ་སྙམ་པ་ལས་ཡང་སྨྲས་པ། བདག་ནི་མ་ཡིན་ཏེ། བག་མེད་པ་མ་གཏོགས་པ་འདི་ནི་སྡུག་བསྔལ་ལས་ཅི་ཞིག་ཡོད་སྙམ་པ་དེ་བཞིན་དུ། ཇི་སྲིད་དུ་འཁོར་བ་ན་འཁྱམ་པ་དེ་སྲིད་དུ་ང་ནི་བདག་གོ་ཞེས་བདག་ཏུ་ལྟ་སྟེ། བདག་མེད་པར་ལྟ་བའི་དོན་ཡིན་ནོ། །དཔེར་ན་ཆོམ་རྐུན་པ་གསོད་པ་པོ་རལ་གྲི་གདེངས་པ་དེའི་ཚེ་རྗེས་བཞིན་ཆས་པ་དང ། དེ་ནས་དེས་བསམས་པ། ཅི་བདག་ཆོམ་རྐུན་པ་འདིའི་ལག་ནས་འཆོར་བར་འགྱུར་རམ་སྙམ་པ་ལས་བདག་ལ་ལུས་ཀྱི་དབང་མེད་དོ་སྙམ་དུ་རྟོགས་པར་བྱེད་པ་དེ་བཞིན་དུ་སྐྱེ་བ་དང ། རྒ་བ་དང ། ན་བ་དང ། འཆི་བའི་སྡུག་བསྔལ་རྣམ་པ་དུ་མ་དང་ལྡན་པའི་སེམས་ཅན་རྣམས་བདག་ནི་དབང་པོ་འམ། ཚངས་པར་གྱུར་ཅིག་སྙམ་དུ་རྟོགས་པར་བྱེད་པ་དེ་དག་གི་རྟོག་པ་གཞིག་པའི་ཕྱིར་དེ་བཞིན་གཤེགས་པ་གྲོངས་པར་སྟོན་པ་མཛད་དོ། །རེ་ཤིག་དེ་བཞིན་གཤེགས་པ་ནི་ལྷའི་ཡང་ལྷ་ཡིན་ན་གལ་ཏེ་དེ་བཞིན་གཤེགས་པ་ནི་དེ་ལྟར་ཡོངས་སུ་མྱ་ངན་ལས་འདས་ཏེ་མེད་པར་གྱུར་ན་དེའི་ཚེ་འཇིག་རྟེན་འགྲིབ་པ་ཉིད་སྣང་བར་འགྱུར་རོ། །གལ་ཏེ་མི་འགྲིབ་ན་ནི་བརྟེན་པ་ཞི་བ་ཡིན་ནོ། །གལ་ཏེ་དེ་ལྟར་བརྟེན་པ་ཡིན་ན་བདག་ཡོད་པར་རིག་པར་བྱ་སྟེ། དཔེར་ན་དུ་བ་ལས་མེ་བཞིན་ནོ། །གལ་ཏེ་ཡང་བདག་མེད་པ་བདག་ཏུ་གྱུར་ན་དེའི་ཚེ་འཇིག་རྟེན་འཕེལ་བ་ཉིད་དུ་རིག་པར་བྱའོ། །བདག་བདེན་ཡང་བདག་ཀྱང་མ་ཡིན་ལ་འཇིག་པར་ཡང་མི་འགྱུར་རོ། །བདག་མེད་པ་བདེན་ན་བདག་ཐར་བར་མི་འགྱུར་རོ། །འོད་སྲུང་གིས་གསོལ་པ། བཅོམ་ལྡན་འདས་མཆིས་པ་ཞེས་བགྱི་བ་ཅི་ལགས། བཀའ་སྩལ་པ།
58.121b
ཡོད་པ་ཞེས་བྱ་བ་ནི་སེམས་ཅན་གྱི་སྤྱོད་པ་སྲིད་པ་ཉི་ཤུ་རྩ་ལྔ་པ་ཡིན་ནོ། །མེད་པ་ཞེས་བྱ་བ་ནི་སེམས་པ་མེད་པའི་དངོས་པོ་ཡིན་ནོ། །གལ་ཏེ་མེད་པ་སེམས་ཅན་དུ་གྱུར་ན་དེས་ན་གཞན་ནས་འོང་བར་འགྱུར་རོ། །གལ་ཏེ་སེམས་པ་ཞིག་པར་གྱུར་ན་དེས་ན་འགྲིབ་པ་ཉིད་དུ་འགྱུར་རོ། །གལ་ཏེ་མེད་པ་སེམས་ཅན་དུ་གྱུར་ན་དེས་ན་འཕེལ་བ་ཉིད་དུ་འགྱུར་རོ། །དེ་ལྟ་བས་ན་དེ་གཉིས་མི་སྐྱེ་ཞིང་ཉམས་པར་མི་འགྱུར་ཏེ། དེའི་ཕྱིར་འགྲིབ་པ་མེད་ཅིང་འཕེལ་བ་མེད་པ་ཉིད་ཡིན་ནོ། །གསོལ་པ། བཅོམ་ལྡན་འདས་བདག་མཆིས་པར་ཇི་ལྟར་རིག་པར་བགྱི་ལགས། བཀའ་སྩལ་པ། འོད་སྲུང་ལེགས་སོ། ལེགས་སོ། །ཞུ་བ་དེ་ལྟ་བུ་ཞུ་བར་མི་བྱའོ། །འོད་སྲུང་དཔེར་ན་གསེར་འཚེད་པ་ཞིག་གིས་གསེར་གྱི་ཁམས་མཐོང་ནས་འདི་སྙམ་དུ་བསམས་ཏེ། ནམ་ཞིག་ནས་གསེར་འདི་དྲི་མ་ཅན་དུ་གྱུར་བདག་གིས་རེ་ཤིག་གསེར་གྱི་དྲི་མའི་དང་པོའི་མཐའ་བཙལ་ལོ་སྙམ་ན་ཇི་ལྟ་དེའི་དང་པོའི་མཐའ་རྙེད་པར་འགྱུར་རམ། བཅོམ་ལྡན་འདས་མི་འགྱུར་ལགས་སོ། །གལ་ཏེ་དེའི་དང་པོའི་མཚན་མ་དང་རྟགས་ཇི་སྲིད་འཚོའི་བར་དང ། ཇི་སྲིད་མཐའ་མེད་པ་དེ་སྲིད་དུ་བསམས་ཀྱང་ཇི་ག་མཐའ་རྙེད་པར་འགྱུར་རམ། མཐའ་ཡང་རྙེད་པར་མི་འགྱུར་ཞིང་གསེར་ཡང་བླང་བར་མི་ནུས་སོ། །གལ་ཏེ་དྲི་མ་དེ་ཡང་ཐབས་མཁས་པའི་བརྩོན་འགྲུས་དྲག་པོས་དྲི་མ་སྦྱང་བ་བྱས་ན་དེའི་འོག་ཏུ་གསེར་བླང་བར་ནུས་ཀྱི་ཤིན་དུ་སྐྱོ་བ་དང་བརྟང་པས་ནི་མི་ནུས་སོ། །འོད་སྲུང་དེ་བཞིན་དུ་བདག་གི་ཉོན་མོངས་པ་བློ་བུར་པ་རྣམས་ཀྱང་དེ་དང་འདྲ་བར་ཤེས་པར་བྱའོ། །ཡང་འགའ་ཞིག་བདག་ལྟ་བར་འདོད་ནས་དེ་འདི་སྙམ་དུ་སེམས་ཏེ། མ་ལ་རེ་ཤིག་བདག་གིས་ཉོན་མོངས་པ་རྣམས་དང ། བདག་གི་དང་པོ་དང་ཐ་མ་བཙལ་ལོ་སྙམ་ན་ཅི་རྙེད་པར་འགྱུར་རམ། གསོལ་པ། བཅོམ་ལྡན་འདས་མི་འགྱུར་ལགས་སོ། །
58.122a
གལ་ཏེ་ཉོན་མོངས་པ་སྦྱང་བ་བྱས་ན་དེའི་འོག་ཏུ་བདག་རྙེད་པར་འགྱུར་རོ། །བདག་དེ་ཡང་མདོ་དེ་ལྟ་བུ་དེ་དག་ཐོས་པ་རྙེད་པར་མི་འགྱུར་གྱི་ཐབས་ལ་མཁས་པས་སྐྱོ་བ་མེད་ཅིང་མ་བརྟགས་པ་བརྩོན་འགྲུས་དྲག་པོ་དང ། ལམ་རྣམས་གསུམ་གྱིས་འཐོབ་པར་འགྱུར་ཞིང་དེ་ནས་མདོ་འདི་ལྟ་བུ་འདི་དག་ལ་ཡིད་ཆེས་པར་འགྱུར་རོ། །གཞན་ཡང་འོད་སྲུང་གིས་གསོལ་པ། བཅོམ་ལྡན་འདས་གལ་ཏེ་བདག་མཆིས་ན་ཅིའི་སླད་དུ་ཉོན་མོངས་པ་བློ་བུར་བ་འདི་དག་གིས་འདི་ལྟར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཁྱོད་ལ་དཔེ་བསྟན་ཏེ། འོད་སྲུང་དཔེར་ན་འགའ་ཞིག་གིས་ཡི་གེ་འབྲུ་ལྔ་པ་བསླབས་པ་ལས་སྐད་ཀྱི་དབྱིངས་གྲུབ་པའི་ཚིག་གམ། ཚིགས་སུ་བཅད་པའི་དོན་ཤེས་པར་བྱས་ལ་ཕྱིས་བསླབ་པོ་ཞེས་ཟེར་ན། ཅི་དེས་ཤེས་པར་འགྱུར་རམ། གལ་ཏེ་ཇེ་བསླབས་ན་དེའི་འོག་ཏུ་ཤེས་པར་འགྱུར་མོད། རྟག་ཏུ་ལེགས་པར་བསླབས་པར་གྱུར་པ་དེའི་ཚེ་ནི་དེའི་སློབ་དཔོན་གྱིས་འཁོར་དེ་ལ་སྐད་ཀྱི་དབྱིངས་ཀྱི་གྲུབ་པའི་དོན་སྨྲ་བ་ན་དེ་ལ་དཔེ་བསྟན་མི་དགོས་པར་དེས་མཉན་པར་ནུས་པར་དེས་རང་གི་སློབ་དཔོན་གྱི་སྐད་ཀྱི་དབྱིངས་གྲུབ་པའི་ཚིག་ཇི་ལྟ་བ་བཞིན་ཡིད་ཆེས་པར་བྱས་ན་ཕྱིས་དོན་ཤེས་ཤིང་ཡིད་ཆེས་པར་འགྱུར་རོ། །དེ་བཞིན་དུ་ངས་དེ་རིང་ཉོན་མོངས་པ་བྱེ་བའི་སྦུབས་ཀྱིས་ཁེབས་པའི་སེམས་ཅན་དེ་ལྟ་བུ་དེ་ལ་རིགས་ཀྱི་བུ་དེ་བཞིན་གཤེགས་པའི་སྙིང་པོ་ཅན་ཞེས་བཤད་དོ། །དེ་ཡང་ལྟ་འདོད་པར་གྱུར་ན་ཅི་དེ་དག་གིས་མཐོང་བར་ནུས་སམ། གསོལ་པ། བཅོམ་ལྡན་འདས་རྔོ་མི་ཐོག་ལགས་སོ། །ཇི་ལྟར་སློབ་མ་དེས་སློབ་དཔོན་ལ་ཡིད་ཆེས་ཤིང་དད་པར་བྱས་ན་ཕྱིས་དེས་སྐད་ཀྱི་དབྱིངས་ཀྱི་གྲུབ་པའི་ཚིག་གི་དོན་གྱི་གཞི་ཤེས་པར་འགྱུར་བ་དེ་བཞིན་དུ་འོད་སྲུང་ཁྱོད་ཀྱིས་ཀྱང་དེ་བཞིན་གཤེགས་པ་ནི་བདེན་པ་གསུང་བ། བདེན
58.122b
པའི་ཚིག་གསུང་བར་གྱུར་པ་ཡིན་པས་སེམས་ཅན་ཡོད་པ་ཉིད་དོ་ཞེས་གསུང་ན་ཡང་རིག་པར་བྱོས་ཤིག་དང ། སློབ་མ་གྲུབ་པ་བཞིན་ཕྱིས་ཁྱོད་ཀྱིས་ཤེས་པར་འགྱུར་རོ། །འོད་སྲུང་ཡང་ཁྱོད་ལ་དཔེ་བསྟན་ཏེ། འོད་སྲུང་བཞི་པོ་འདི་དག་ནི་སེམས་ཅན་གྱི་ཁམས་ན་སྒྲིབ་པའི་རྒྱུ་དང ། གཏན་ཚིགས་ཀྱི་དཔེ་ཡིན་ཏེ། བཞི་གང་ཞེ་ན། མིག་ལིང་ཏོག་སེར་པོ་དང་སྔོན་པོས་རབ་རིབ་ཏུ་གྱུར་པ་ལྟ་བུ་དང ། ཟླ་བ་སྤྲིན་གྱིས་ཁེབས་པ་ལྟ་བུ་དང ། ཁྲོན་པ་རྐོ་བ་ལྟ་བུ་དང ། བུམ་པའི་ནང་གི་སྒྲོན་མ་ལྟ་བུའོ། །འོད་སྲུང་བཞི་པོ་འདི་དག་ནི་སྙིང་པོ་ཡོད་དོ་ཞེས་བྱ་བའི་རྒྱུ་དང་གཏན་ཚིགས་ཡིན་ཏེ། རྒྱུ་དང་གཏན་ཚིགས་དེ་དག་གིས་སེམས་ཅན་ཐམས་ཅད་དང ། སྲོག་ཆགས་ཐམས་ཅད་ལ་སངས་རྒྱས་ཀྱི་ཁམས་ཡོད་དེ་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པ་ན་སྣང་བར་འགྱུར་ཞིང་ཁམས་དེས་སེམས་ཅན་རྣམས་ཀྱིས་མྱ་ངན་ལས་འདས་པ་འཐོབ་པར་འགྱུར་རོ། །དེ་ལ་མིག་རབ་རིབ་ཅན་ཞེས་བྱ་བ་ནི་ལིང་ཏོག་སེར་པོ་དང ། སྔོན་པོས་ཡོག་ནས་རབ་རིབ་ཏུ་གྱུར་པ་བཅོས་སུ་རུང་བ་ཇི་སྲིད་དུ་སྨན་པ་མ་རྙེད་པ་དེ་སྲིད་དུ་ལོང་བར་འགྱུར་ཞིང་སྨན་པ་རྙེད་ན་ཡང་མྱུར་དུ་མཐོང་བར་འགྱུར་རོ། །སྔོན་པོས་ཡོག་ནས་རབ་རིབ་ཏུ་གྱུར་པ་དེ་བཞིན་དུ་ཉོན་མོངས་པ་བྱེ་བའི་སྦུབས་ཀྱིས་ཁེབས་པའི་ཁམས་འདི་ཇི་སྲིད་དུ་ཉན་ཐོས་དང ། རང་སངས་རྒྱས་རྣམས་ལ་དགའ་བར་བྱེད་པ་དེ་སྲིད་དུ་བདག་ནི་བདག་མ་ཡིན་པར་འགྱུར་ཞིང་བདག་གི་བདག་ཏུ་འགྱུར་རོ། །གང་གི་ཚེ་སངས་རྒྱས་བཅོམ་ལྡན་འདས་རྣམས་ལ་དགའ་བར་གྱུར་པ་དེའི་ཚེ་བདག་ཏུ་འགྱུར་ཞིང་དེའི་འོག་ཏུ་བསྒྲུབ་ཏུ་རུང་བའི་མིར་འགྱུར་རོ། །མི་དེའི་མིག་ནད་ལིང་ཏོག་སེར་པོ་དང་སྔོན་པོའི་རབ་རིབ་གང་ཡིན་པ་ལྟར་ཉོན་མོངས་པ་རྣམས་བལྟ་བར་བྱའོ། །དེ་བཞིན་གཤེགས་པའི་སྙིང་པོ་ནི་མིག་བཞིན་དུ་ངེས་པར་ཡོད་དོ། །དེ་ལ་ཟླ་བ་སྤྲིན་གྱིས་ཁེབས་པ་ཞེས
58.123a
བྱ་བ་ནི་ཇི་ལྟར་སྤྲིན་སྟུག་པོས་ཁེབས་པའི་ཟླ་བའི་དཀྱིལ་འཁོར་མི་སྣང་བ་དེ་བཞིན་དུ་ཉོན་མོངས་པའི་སྦུབས་ཀྱིས་ཁེབས་པའི་ཁམས་མི་སྣང་ངོ ། །གང་གི་ཚེ་ཉོན་མོངས་པའི་ཚོགས་སྤྲིན་བཞིན་དུ་བྲལ་བར་གྱུར་ན་དེའི་འོག་ཏུ་ཟླ་བ་ཉ་བ་བཞིན་དུ་ཁམས་སྣང་བར་འགྱུར་རོ། །དེ་ལ་ཁྲོན་པ་རྐོ་བ་ཞེས་བྱ་བ་ནི་དཔེར་ན། མི་ཞིག་ཁྲོན་པ་བརྐོ་ཞིང་བརྐོ་བ་ན་ཇི་ཙམ་ཇི་ཙམ་དུ་ས་སྐམ་པོ་བྱུང་བ་དེ་ཙམ་དེ་ཙམ་དུ་རྟགས་དེས་ན་འདི་ནས་ཆུ་རིང་ངོ་སྙམ་དུ་སེམས་ཤིང་གང་གི་ཚེ་འཇིམ་པ་བྱུང་བ་དེའི་ཚེ་རྟགས་དེས་ན་འདི་ནས་ཆུ་ཉེའོ་ཞེས་ཤེས་པར་འགྱུར་རོ། །གང་གི་ཚེ་ཆུ་ལ་ཐུག་པ་དེའི་ཚེ་རྐོ་བའི་མཐར་ཕྱིན་པ་ཡིན་ནོ། །དེ་བཞིན་དུ་ཉན་ཐོས་དང ། རང་སངས་རྒྱས་རྣམས་དེ་བཞིན་གཤེགས་པ་རྣམས་མཉེས་པར་བྱེད་ཅིང་ལེགས་པར་སྤྱད་པ་སྤྱོད་པ་བསྟན་པས་ཉོན་མོངས་པ་བརྐོ་བར་བྱེད་དེ། བརྐོས་ནས་ཆུ་བཞིན་དུ་དེ་བཞིན་གཤེགས་པའི་སྙིང་པོ་རྙེད་པར་འགྱུར་རོ། །བུམ་པའི་ནང་གི་སྒྲོན་མ་ཞེས་བྱ་བ་ནི་ཇི་ལྟར་བུམ་པའི་ནང་ན་སྒྲོན་མ་ཡོད་པའི་འོད་ལམ་མེར་མ་ཡིན། ལྷག་གེར་མ་ཡིན་ཞིང་སེམས་ཅན་རྣམས་ལ་ཅི་ཡང་མི་བྱེད་པ་བཞིན་དུ་དེ་བཞིན་གཤེགས་པའི་སྙིང་པོ་མཚན་དང་དཔེ་བྱད་མཐའ་ཡས་པ་དང་ལྡན་པར་གསུངས་པ་ཡང་སེམས་ཅན་རྣམས་ཀྱི་དོན་མི་བྱེད་དོ། །གང་གི་ཚེ་ཡང་བུམ་པ་ཆག་ནས་དེ་ནས་སྒྲོན་མ་རང་སྣང་བས་སྲོག་ཆགས་རྣམས་ཀྱི་དོན་བྱེད་པར་གྱུར་པ་དེ་བཞིན་དུ་ཉོན་མོངས་པ་བྱེ་བའི་སྦུབས་ཅན་འཁོར་བའི་བུམ་པ་ན་དེ་བཞིན་གཤེགས་པའི་སྙིང་པོ་གརུས་པ་སྒྲོན་མ་བཞིན་རབ་ཏུ་འབར་ནས་འཁོར་བའི་ཉོན་མོངས་པ་ཟད་པའི་ཚེ་བུམ་པ་ཆག་པའི་སྒྲོན་མ་བཞིན་དུ་དེ་བཞིན་གཤེགས་པ་སེམས་ཅན་རྣམས་ཀྱི་དོན་བྱེད་པར་འགྱུར་རོ། །གཏན་ཚིགས་བཞི་པོ་འདི་དག་གིས་ཇི་ལྟར་ང་ལ་སེམས་ཅན་གྱི་ཁམས་ཡོད་པ་དེ་བཞིན་དུ་སེམས་ཅན་ཐམས་ཅད
58.123b
ལ་ཡང་ཡོད་པར་རིག་པར་བྱའོ། །དེ་ལ་བསྒྲུབ་ཏུ་རུང་བའི་ཁམས་ཞེས་བྱ་བ་ནི་གཅིག་པུ་གནས་པ་ཡིན་པར་རིག་པར་བྱ་སྟེ། ཇི་ལྟར་གོང་དུ་གཏན་ཚིགས་བརྒྱ་རྩ་བརྒྱད་བཤད་པའི་གཏན་ཚིགས་རེ་རེ་ཞིང་ཚིགས་སུ་བཅད་པ་བརྒྱད་བརྒྱད་དུ་བསྡེབས་པ་ལས་བྱུང་བ་ཡིན་ནོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅིའི་སླད་དུ་ཐེག་པ་གསུམ་བསྟན་ལགས། བཀའ་སྩལ་པ། འོད་སྲུང་ཁྱོད་ལ་དཔེ་བསྟན་ཏེ། དཔེར་ན་ཁྱིམ་བདག་ནོར་བྱེ་བ་ཡོད་པ་ཞིག་ལ་བུ་གཅིག་པ་ཞིག་ཡོད་པ་སྐྱེ་བོ་མང་པོའི་ནང་དུ་མ་མའི་ལག་ནས་སྟོར་བར་གྱུར་ལ། དེ་ནས་ཁྱིམ་བདག་དེ་འཆི་བའི་དུས་ལ་བབ་པ་ན་འདི་སྙམ་དུ་བདག་གི་བུ་ནི་སྟོར་ཏེ། བདག་ལ་བུ་གཞན་ནམ། ཕའམ། མ་འམ། ལྷན་ཅིག་སྐྱེས་པའི་སྤུན་ནམ། ནང་མི་མེད་པས་བདག་གི་ནོར་གྱི་མཛོད་འདི་དག་ནི་རྒྱལ་པོས་བཞེས་པར་འགྱུར་རོ་སྙམ་དུ་སེམས་ཏེ། དེ་དེ་ལྟར་ཡང་དང་ཡང་དུ་སེམས་པ་ན་དུས་རིང་ཞིག་འདས་པ་དང་དེ་ནས་བུ་སྟོར་བ་དེ་གྲོང་ཁྱེར་དེ་ཉིད་དུ་འོངས་ནས་ཟས་ཀྱི་ཕྱིར་རང་གི་ཁྱིམ་དུ་ཞུགས་པ་ན་ཁྱིམ་འདི་ནི་བདག་གི་ཕའི་ཁྱིམ་ཡིན་ནོ་སྙམ་དུ་མི་ཤེས་སོ། །དེ་ནས་དེའི་ཕས་ནི་མཐོང་མ་ཐག་ཁོ་ནར་འདི་ནི་བདག་གི་འཐུན་པའི་བུ་ཡིན་ན་འདི་ལ་ཁྱོད་བདག་གི། བུ་ཡིན་ནོ་ཞེས་ཅུང་ཟད་ཀྱང་སྨྲ་བར་མི་བྱའོ། །དེ་ཅིའི་ཕྱིར་ཞེ་ན། སླར་ཡང་བྲོས་དང་མི་རུང་ངོ་ཞེས་དེས་དེ་ལ་ནོར་གྱི་མཛོད་རབ་ཏུ་མང་པོ་བྱིན་ནོ། །དེ་ནས་དེས་དེ་ལ་སྨྲས་པ་བདག་ནི་ཁྱོད་ཀྱི་ཁྱིམ་ན་གནས་མི་ཕོད་དོ། །དེ་ཅིའི་ཕྱིར་ཞེ་ན། བདག་ཁྱོད་ཀྱི་ཁྱིམ་ན་གནས་པ་ནི་ཞགས་པའི་བཅིང་བས་བཅིངས་པ་བཞིན་སྡུག་བསྔལ་ལོ། །དེ་ནས་ཁྱིམ་བདག་དེས་འདི་སྐད་ཅེས་སྨྲས་སོ། །ཅི་ཞིག་བྱ། དེས་འདི་སྐད་ཅེས་སྨྲས་སོ། །བདག་གིས་ཁྱོད་ཀྱི་བ་གླང་བཙའ
58.124a
འམ། རྩཝ་རྔ་བ་འམ། ཕྱག་དར་དོར་བ་འམ། འབྲས་ཀྱི་ཞིང་རྨོ་བ་ལགས་སོ། །དེ་ནས་ཁྱིམ་བདག་དེས་བསམས་པ། ཨེ་མའོ་བསོད་ནམས་མ་བྱས་པའི་སེམས་ཅན། ཀྱི་ཧུད་རིམ་གྱིས་དུས་ཤེས་པར་བྱ་བ་ལས་གཞན་ནི་མི་ནུས་སོ་སྙམ་ནས་ལེགས་ཀྱིས་རེ་ཤིག་ཕྱག་དར་གྱི་ཕུང་པོ་དག་ཁོ་ན་ཕྱོགས་ཤིག་།དེ་ནས་ཕྱིས་དུས་གཞན་ཞིག་གི་ཚེ་ཕྱག་དར་འཕྱག་པ་ན་མི་དེས་ཁྱིམ་བདག་དེ་འདོད་པ་མང་པོ་ལ་རྩེ་ཞིང་དགའ་བར་བྱེད་དེ་བདེ་བའི་ཡུལ་ཉམས་སུ་མྱོང་བར་བྱེད་པ་མཐོང་ངོ ། །མཐོང་ནས་ཀྱང་བསམས་པ། ཇོ་བོས་བདག་ལ་ནོར་གྱི་མཛོད་མང་པོ་སྦྱིན་པར་འགྱུར་བ་འམ། ཡང་ན་བདག་བུ་ཉིད་དུ་བྱེད་པར་འདོད་ན་ཅི་མ་རུང་སྙམ་སྟེ། མི་དེ་དེ་ལྟར་སེམས་པ་ན་ཕྱག་དར་གྱི་ཕུང་པོ་དག་ཧ་ཅང་འཕྱག་པར་མི་བྱེད་དོ། །དེའི་ཚེ་དེའི་ཕས་དེའི་ལས་བྱེད་པ་དེ་དག་མཐོང་ནས་བསམས་པ་བདག་གི་བུ་འདི་ད་ནི་བཟང་པོའི་སྐལ་པ་ཡོད་དོ་སྙམ་ནས་དེ་ནས་དེའི་ཕས་བུ་དེ་ལ་འདི་སྐད་ཅེས་སྨྲས་སོ། །ཀཝའི་མི་ཁྱོད་དེ་རིང་གཞན་དུ་སེམས་སམ། ཅིའི་ཕྱིར་ལས་ལེགས་པ་མི་བྱེད། དེས་སྨྲས་པ་དེ་བཞིན་ཏེ། བདག་དེ་རིང་ཉིད་དུ་ཁྱོད་ཀྱི་བུ་ཉིད་དུ་ཁས་ལེན་པར་འདོད་དེ་དེས་ན་དེ་རིང་བདག་གི་སེམས་དེ་ལྟར་དད་པར་གྱུར་ཏོ། །དེས་སྨྲས་པ་ལེགས་སོ་ང་ནི་ཁྱོད་ཀྱི་ཕ་ཡིན་ལ། ཁྱོད་ནི་ངའི་བུ་ཡིན་ན་ཁྱོད་ཀྱིས་ང་འདི་ལྟར་ཕན་པར་འདོད་ཅིང་རྗེས་སུ་བརྩེ་བ་ཡིན་པར་མ་ཤེས་སོ་ཞེས་བྱས་ནས། དེ་ནས་དེས་དེ་ལ་རང་དབང་བའི་ནོར་གྱི་མཛོད་མང་པོ་ཐམས་ཅད་བྱིན་ནས་སྐྱེ་བོའི་ཚོགས་ཆེན་པོའི་དབུས་སུ་དེ་མངོན་སུམ་དུ་བྱས་ཏེ། འདི་སྐད་ཅེས་འདི་ནི་བདག་གི་བུ་གཅིག་པ་ཡིན་ཏེ། སྟོར་ནས་རིང་ཞིག་ལོན་པ་ལས་འདི་སླར་འཁོར་ཏེ། རང་གི་ཁྱིམ་དུ་ཞུགས་ནས་འདིས་འདི་ནི་བདག་གི་ཕའི་ཁྱིམ་ཡིན་ནོ་ཞེས་བྱ་བར་མ་ཤེས་མ་རྟོགས་ནས་དེའི་ཚེ་འདིས་ཁྱོད་ནི་བདག་གི་ཕའོ། །བདག་ནི་བུའོ་ཞེས
58.124b
བྱ་བའི་མིང་ཡང་མི་འདོད་པ་ཉིད་ལས་ད་ལྟར་འདི་མོད་ལ་བུ་ཡིན་ནོ་ཞེས་ཚིག་ཏུ་སྨྲས་སོ་ཞེས་སྨྲས་པ་དེའི་ཚེ་དེ་ནས་སྐྱེ་བོ་མང་པོས་ཀྱེ་མའོ་སེམས་ཅན་རྣམས་ནི་ལས་རྣམ་པ་མང་པོ་དག་གིས་ཉོན་མོངས་པར་གྱུར་ཏོ་ཞེས་ངོ་མཚར་དུ་གྱུར་ཏོ། །འོད་སྲུང་དེ་བཞིན་དུ་ངའི་ཉན་ཐོས་ཐམས་ཅད་ཀྱང་ཕྱག་དར་གྱི་ཕུང་པོ་འཕྱག་པའི་བུ་བཞིན་དུ་གདོད་ཤེས་ནས་ཨེ་མ་ཀྱི་ཧུད་བཅོམ་ལྡན་འདས་ད་དུང་བདག་ཅག་གིས་རང་གི་ཕ་དང་འདྲ་བར་མ་འཚལ་བས་ན། ཉན་ཐོས་ཀྱི་ཐེག་པ་ནི་ང་ཐ་ཆད་ལགས་སོ་ཟེར་རོ། །དེ་བས་ན་འོད་སྲུང་ཁྱོད་ཀྱིས་འདི་ལྟར་བསླབ་པར་བྱ་སྟེ། གལ་ཏེ་རེ་ཤིག་ཡོངས་སུ་སྤང་བར་ནུས་ན་གཤེ་ཡང་རུང་སྤྱོས་ཀྱང་རུང་ཁྱོད་ཀྱིས་དེ་དག་གི་ཡོངས་སུ་སྨིན་པའི་དུས་ལ་བབ་པར་ཤེས་པར་བྱའོ། །འོད་སྲུང་གཞན་ཡང་འདི་ན་ཐེག་པ་ཆེན་པོ་པ་རྣམས་དང ། ཉན་ཐོས་ཀྱི་ཐེག་པ་ཅན་རྣམས་ནི་རྟག་པར་མི་མཐུན་པ་ཡིན་ཏེ། ཇི་ལྟར་འཇིག་རྟེན་པ་དང ། འཇིག་རྟེན་ལས་འདས་པ་ལྟ་བུ་དང ། མཁས་པ་དང ། ངན་པ་ལྟར་མི་མཐུན་པ་ཡིན་ནོ། ། འཕགས་པ་རྔ་བོ་ཆེ་ཆེན་པོའི་ལེའུ། བམ་པོ་བཞི་པ། འོད་སྲུང་ཁྱོད་ཀྱིས་ཡང་མདོ་སྡེ་སྤོང་བ་དེ་དག་ཀུན་དུ་གཟུང་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་སྤོང་བ་དེ་དག་སེམས་དེ་དང་བཅས་ཏེ་དུས་བྱེད་པར་གྱུར་ན་དེ་ཉིད་དེ་དག་གི་ཤིན་དུ་བརྣག་པ་ཉིད་ཀྱི་མཐར་ཕྱིན་པ་ཡིན་ནོ། །དེ་ལྟ་བས་ན་དེ་དག་ལ་སྙིང་བརྩེ་བའི་ཕྱིར་འདི་ལྟ་སྟེ། ཐེག་པ་ཆེན་པོ་ལ་སྦྱར་བའི་ཆེད་དུ་ཐབས་ཐམས་ཅད་ལ་མཁས་པར་བྱའོ། །དེ་ལ་གང་དག་མ་དད་པ་དེ་དག་ནི་དད་པར་འགྱུར་ཞིང་གང་དག་དད་པ་དེ་དག་ནི་ཡིད་ཆེས་པར་འགྱུར་ཏེ། དེ་དག་ཐམས་ཅད་བསྡུ་བའི་དངོས་པོ་རྣམས་ཀྱིས་ཀུན་དུ་བསྡུ་བར་བྱ་ཞིང་གཟུང་བར་བྱའོ། །འོད་སྲུང་གཞན་ཡང་འདི་ན་མི་འགའ་ཞིག་རིམས་སམ། རིམས་ནད་དྲག་པོས་ཐེབས་པ་ཁོ
58.125a
ནར་གྱུར་ན། འདི་ལྟར་མི་དེ་ལ་སྨན་ཡང་མི་སྦྱིན་ཞིང་དཔྱད་ཀྱང་མི་བྱའོ། །དེ་ཅིའི་ཕྱིར་ཞེ་ན། བྱ་བའི་དུས་ལ་མ་བབ་པ་དང ། བྱ་བའི་དུས་ལ་བབ་ན་མི་བྱ་བ་དང ། བྱ་བའི་གནས་འདི་གཉིས་མི་ཤེས་པའི་སྨན་པ་གང་ཡིན་པ་ནི་འཇིག་རྟེན་ན་སྨད་པ་ཡིན་ཏེ། དེ་ལྟ་བས་ན་ནད་སྨིན་ན་དཔྱད་བྱ་ལ་མ་སྨིན་ན་དུས་སུ་བསྡད་དོ། །དེ་བཞིན་དུ་སེམས་ཅན་གང་དང་གང་དག་ཚུལ་འདི་སྤོང་བར་བྱེད་པ་དེ་དང་དེ་དག་ནི་ཚར་གཅད་པར་བྱའོ། །དེ་དག་གང་གི་ཚེ་ནད་སྨིན་པར་གྱུར་པ་དང ། དེའི་འོག་ཏུ་དེ་དག་རྗེས་སུ་དྲན་ནས། ཨེ་མའོ་བདག་ཅག་གིས་མཚར་བྱས་སོ་ཞེས་ཤེས་པར་གྱུར་པ་དེའི་ཚེ་དེ་དག་ཉན་ཐོས་སམ། རང་སངས་རྒྱས་ཀྱི་ཐེག་པ་ལ་བསྡུས་ནས་དཔྱད་བྱའོ། །འོན་ཏེ་གཞན་དུ་མ་ནུས་ན་དེ་དག་ལ་གོས་དཀར་པོ་དག་བྱིན་ཏེ་བསྐྲད་པ་འམ། རིམ་པ་གཞན་དང་གཞན་གྱིས་གདུལ་བར་བྱའོ། །དེ་ཅིའི་ཕྱིར་ཞེ་ན། དེ་དག་ཁོ་ན་ལ་སྙིང་བརྩེ་བས་ཅི་ཡང་རུང་བས་ཐེག་པ་ཆེན་པོ་ལ་སྦྱར་བའི་ཕྱིར་རོ། །རྒྱུ་གཉིས་ཀྱིས་སེམས་ཅན་རྣམས་ཐེག་པ་ཆེན་པོ་ལ་སྦྱར་བར་བྱ་སྟེ། གཉིས་གང་ཞེ་ན། རིགས་པ་དང ། བསྡིགས་པས་སོ། །དེ་ལྟ་བས་ན་དེ་དག་རིགས་པས་སམ། བསྡིགས་པས་སྦྱར་བར་བྱའོ། །དེ་ལྟར་སྦྱར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་དང་པོ་གནོན་པར་འགྱུར་ཞིང་དེ་ས་དང་པོ་ལ་གནས་པར་འགྱུར་རོ། །ཡང་དེ་དེ་ལྟར་སྦྱོར་ཞིང་དེ་བཞིན་དུ་སྨྲ་ན་ས་གཉིས་པ་ཐོབ་པས་འདི་ལྟ་སྟེ། བྱང་ཆུབ་ཏུ་མགོ་གཅིག་ཏུ་ལུང་བསྟན་པ་ཡིན་ནོ། །འདི་ལྟ་སྟེ་དཔེར་ན། མི་ཞིག་བཙོན་ར་ནས་ཕྱུང་ན་དེ་ཅི་སླར་བཙོན་རར་འཇུག་པར་འགྱུར་རམ། དེ་བཞིན་དུ་ཉན་ཐོས་ཀྱི་ཐེག་པ་ལས་བྱུང་སྟེ། ཐེག་པ་ཆེན་པོའི་ལམ་དུ་ཞུགས་པ་དེ་ཅི་ཉན་ཐོས་ཀྱི་ཐེག་པ་ལ་རེག་པར་འགྱུར་ལགས་སམ། འོད་སྲུང་འདི་ནི་མི་འགྱུར་ཏེ། དེ་ཁྲོས་འཁྲུགས་ནས་ས་ལ་རྡེབས
58.125b
པར་འགྱུར་རོ། །ཡང་བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཁྱོད་ཀྱིས་དེ་བཞིན་གཤེགས་པའི་སྙིང་པོ་ཤེས་ཀྱིས་འོད་སྲུང་ཁྱོད་དེ་ལྟར་མ་ངུ་ཤིག་།འོད་སྲུང་དཔེར་ན་དོན་མཐོང་ན་གཏན་ཚིགས་དགོས་པ་མེད་དེ། དཔེར་ན་སྔོན་སྐྱུ་རུ་ར་མཐོང་བ་ལ་སྐྱུ་རུ་ར་ནི་འདི་ཡིན་ནོ་ཞེས་བྱ་བ་དགོས་པ་མེད་མོད་ཀྱི་སྔོན་སྐྱུ་རུ་ར་མ་མཐོང་བ་ལ་སྐྱུ་རུ་ར་གཏན་ཚིགས་དང་བཅས་པ་དགོས་པ་ལྟ་བུ། དཔེར་ན་ལྷོ་ཕྱོགས་ཀྱི་མི་རྣམས་ལ་མི་འམ་ཅི་རི་མོར་བྲིས་ནས་བསྟན་དགོས་ཀྱི་བྱང་ཕྱོགས་ཀྱི་མི་རྣམས་ལ་ནི་བསྟན་མི་དགོས་པ་ལྟ་བུའོ། །དེ་ཅིའི་ཕྱིར་ཞེ་ན། དེ་དག་གིས་སྔོན་མཐོང་བའི་ཕྱིར་རོ། །དེ་བཞིན་དུ་ཁྱོད་ཀྱིས་ཀྱང་སྐྱུ་རུ་ར་བཞིན་དུ་དེ་བཞིན་གཤེགས་པའི་སྙིང་པོ་མཐོང་ངོ ། །འོད་སྲུང་གཞན་ཡང་ང་བཞུགས་པའི་ཚེ་དང ། ཁྱོད་འདུག་པའི་ཚེ་མདོ་འདི་སྤོང་བ་གང་དག་ཡིན་པ་དང ། སྤང་བར་འགྱུར་བ་གང་དག་ཡིན་པ་དེ་དག་གལ་ཏེ་ནུས་ན་ཁྱོད་ཀྱིས་ཚར་གཅད་ཅིང་གཟུང་བར་བྱའོ། །དེའི་ཚེ་ཚར་བཅད་ཅིང་བཟུང་ནས་རིགས་པ་འམ། བསྡིགས་པས་རང་གི་བུ་ལ་བྱ་བ་འམ། སྡུག་པ་ལ་བྱ་བ་འམ། རང་དང་འདྲ་བར་སྡུག་པར་བྱ་བས་ཐེག་པ་ཆེན་པོ་ལ་སྦྱར་བར་བྱའོ། །འོད་སྲུང་དེ་ལྟར་ཉན་ཐོས་ཀྱི་ཐེག་པ་པ་དེ་དག་ཐམས་ཅད་ཀྱང་ངའི་བུ་ཡིན་ནོ། །དེ་དག་ཐམས་ཅད་སྔོན་ང་སྤྱད་པ་སྤྱོད་པ་ན་ཡོངས་སུ་སྨིན་པར་བྱས་པ་ཡིན་ཏེ། བསྐལ་པ་མང་པོ་གྲངས་མེད་པ་དཔག་ཏུ་མེད་པ་ཕ་རོལ་པས་ཆེས་ཕ་རོལ་དུ་དེ་བཞིན་གཤེགས་པ་འཇིག་རྟེན་གྱི་གཉེན་ཞེས་བྱ་བ་བྱུང་བ་དེའི་ཚེ་དེའི་དུས་དེ་ན་མདོ་ཆེན་པོ་འདི་ལས་ཐེག་པ་གཅིག་པ་བཤད་པ་དང ། དེའི་ཚེ་འདི་དག་དང་གཞན་དེ་དག་ཐམས་ཅད་སྤོང་བར་བྱེད་དེ་དག་ཐམས་ཅད་གཅིག་ཏུ་བསྡོམས་ནས་ཁྲོ་བ་དང ། སྨོད་པ་དང ། མཚང་འདྲུ་བས་རྒྱུ་བར་བྱེད་དོ། །དེ་ནས་དེ་དག་ལ་འདི་དག་ནི་བདག་གི་བུ་ཡིན་བདག་གི་སློབ་མ་ཡིན་པས་དུས་ལས་ཐལ་ན་མི་རུང
58.126a
གིས་ཇི་ལྟར་འདི་དག་ཉེ་བར་ཞི་བར་འགྱུར་བ་དེ་ལྟ་དེ་ལྟར་གདུལ་བར་བྱ་བའི་ཐབས་མཁས་པ་ཞིག་ངས་བསམས་སོ། །དེ་ནས་ངས་དེ་དག་གི་སྟོབས་དང་སྟོབས་མེད་པར་ཤེས་པར་བྱས་ནས་དེ་ལྟ་བུའི་གཏམ་སྟོན་ཏོ། །དེ་ལ་གང་དག་ཐེག་པ་ཆེན་པོ་ལ་མ་དད་པར་གྱུར་པ་དེ་དག་ལ་ནི་ངས་ཉན་ཐོས་ཀྱི་ཐེག་པའི་གཏམ་སྨྲས་ཏེ། རིགས་ཀྱི་བུ་མཐར་ཕྱིན་པ་འདི་ལྟ་སྟེ་ཐེག་པ་ཆེན་པོ་འདི་ཡིན་གྱི། ལྷག་མ་ནི་སྤང་བའི་ཐེག་པ་ཡིན་པར་བཟུང་ངོ ། །བུད་མེད་ཀྱིས་ནི་ལེགས་པར་སྤྱོད་པ་སྤྱད་ཀྱང་ཐར་པ་མི་འཐོབ་སྟེ་གྲོང་ཁྱེར་པས་ཀྱང་དེ་བཞིན་ནོ། །རྟ་ཅང་ཤེས་ལ་ཞོན་ཏེ་བརྒྱུགས་པས་ནི་གྲོང་རྡལ་ལམ། གྲོང་ཁྱེར་དུ་མྱུར་དུ་ཕྱིན་པར་འགྱུར་གྱི། བྱིས་པའི་གོམ་པས་ཀྱང་རིམ་གྱིས་སོང་ན་ཅི་དེས་ཀྱང་སོན་པར་མི་འགྱུར་རམ། ཇི་ལྟར་བྱིས་པ་གཞོན་ནུ་ནི་མཛུབ་མོས་མར་དང་ཁ་ཟས་ཟ་ལ་སྟོབས་དང་ལྡན་པས་སྣོད་བཀང་སྟེ་ཟ་བ་དེ་བཞིན་དུ་འོད་སྲུང་ངས་ཀྱང་གང་དག་ཐེག་པ་ཆེན་པོ་མི་འདོད་པ་དེ་དག་བསྡུས་ནས་ངས་དེའི་ཚེ་དེ་དག་ལ་ཕྱག་དར་གྱི་ཕུང་པོ་འཕྱག་པའི་བུ་བཞིན་དུ་ཉན་ཐོས་ཀྱི་ཐེག་པས་ཐེག་པ་ཆེན་པོ་ཉེ་བར་བསྟན་ཏོ། །དེ་དག་གི་མོད་ལ་སྐུར་པ་བཏབ་པའི་ལས་གང་ཡིན་པ་དེ་ཡང་ངའི་སྔོན་གྱི་བྱམས་པའི་རིམ་པས་ཐེག་པ་ཆེན་པོ་ལ་ཞུགས་པར་གྱུར་ན་ལུས་གཅིག་པོ་དེ་ལ་ཁ་ཅིག་ནི་གླད་ནད་དམ། མྱ་ངན་ནམ། སེམས་མི་བདེ་བ་ཙམ་གྱིས་ཡོངས་སུ་ཟད་པར་འགྱུར་རོ། །དེའི་ཚེ་གང་དག་ངའི་ཚིག་མ་མཉན་ཅིང་བླངས་པ་དེ་དག་ནི་ཚུལ་མ་ཡིན་པས་གནོད་པར་གྱུར་ཏོ། །འོད་སྲུང་དེ་ལྟར་ན་ཕྱག་དར་གྱི་ཕུང་པོ་འཕྱག་པའི་བུ་བཞིན་དུ་ཉན་ཐོས་དེ་དག་ཐམས་ཅད་ཀྱང་ངའི་བུ་ཡིན་ཏེ། ད་གདོད་ཤེས་པར་འགྱུར་རོ། །ེ་མའོ་ཀྱི་ཧུད་བཅོམ་ལྡན་འདས་བདག་ཅག་གིས་ད་དུང་རང་གི་ཕ་མ་འཚལ་བས་ཉན་ཐོས་ཀྱི་ཐེག་པ་ནི་ད་གདོད་ཐ་ཆད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ།
58.126b
འོད་སྲུང་དེ་ཉིད་ཀྱི་ཕྱིར་ངས་ཁྱོད་ཀྱིས་ཕྱིས་ཤེས་པར་འགྱུར་གྱིས་ཁྱེད་གང་འདོད་པ་དེ་བྱེད་ལ་རག་མ་སྤོང་ཤིག་ཅེས་གསུངས་པ་ཡིན་གྱིས་གལ་ཏེ་ཁྱོད་ཀྱིས་མི་ནུས་ན་དེ་ཞོག་ཤིག་།འོད་སྲུང་ཁྱོད་ཀྱིས་དེ་ལྟར་བསླབ་པར་བྱ་སྟེ། དེ་དག་ཁྲོས་སམ། སྨོད་ན་ཡང་ཁྱོད་ཀྱིས་མནགས་པར་བྱའོ། །འདི་ལྟ་སྟེ་དཔེར་ན། འབབ་ཆུ་འམ། ལྟེང་ཀ་འམ། མཚེའུ་འམ། མཚོ་བྲན་ནམ། རྫིང་བུ་འམ། ཁྲོན་པ་ཞིག་ཡོད་ལ། དེ་ལ་སྐྱེས་པ་འམ། བུད་མེད་དམ། ཁྱེའུ་འམ། བུ་མོ་འམ། སེམས་ཅན་གང་དང་གང་དག་གིས་སྣོད་ཅི་དང་ཅི་འདྲ་བ་དག་ཐོགས་ཏེ་ལྷགས་ནས་དེ་ཙམ་དེ་ཙམ་གྱིས་ཆུ་བླངས་ནས་དོང་སྟེ། བུམ་པ་ནི་བུམ་པ་གང ། རྫ་མ་ནི་རྫ་མ་གང ། ཁྱོར་བ་ནི་ཁྱོར་བ་གང་གི་སྣོད་ཆག་པ་ཁོ་ན་ལ་ཅི་ཡང་མེད་ན། རིགས་ཀྱི་བུ་དེ་ལ་ཁྱོར་བས་སྐྱེད་པས་བུམ་པས་སྐྱེད་པ་ལ་ཁྲོ་བ་འམ། འོན་ཏེ་སྟོང་པས་ཁྲོར་ཅི་ཡོད། དེ་བཞིན་དུ་རིགས་ཀྱི་བུ་ཁྱོད་ཀྱིས་རང་གི་ནུས་པའི་སྟོབས་བསྐྱེད་པས་ཉན་ཐོས་ཀྱི་ཐེག་པ་ལ་ཞུགས་ཏེ། ངེད་ལ་ཐེག་པ་ཆེན་པོས་ཅི་བྱ་ཞེས་མི་འདོད་ཅིང་སྤོང་བར་གྱུར་ཏོ། །གཞན་ཡང་དཔེར་ན། རྒྱལ་པོ་ནི་འབྲས་སཱ་ལུའི་ཁ་ཟས་ཟ། ཡི་དགས་དང ། བཀྲེན་པ་ནི་འབྲས་བུ་དང་རྩ་བ་ཟ། ཁྱིམ་བདག་ནི་རང་གི་འབྱོར་པ་ཟ་ན། ཅི་དེས་རྒྱལ་པོ་ལ་ཁ་བྱ་འམ། གང་དང་གང་གིས་ཅི་དང་ཅི་བྱས་པའི་བདེ་བ་འམ། སྡུག་བསྔལ་དེ་དག་གསལ་བ་ཐོབ་པར་འགྱུར་བས་དེས་གནས་པར་བྱའོ། །དེ་བཞིན་དུ་གལ་ཏེ་ཁྱེད་ཐེག་པ་ཆེན་པོ་ལ་འཇུག་པའི་མཐུ་མེད་ན་ཡང་ཅི་སྟེ་དེ་འགོག་།གཞན་ཡང་རྒྱལ་པོ་ནི་དབྱིག་དང ། གསེར་དང ། མུ་ཏིག་དང ། ནོར་བུ་དང ། བཻ་དཱུརྱ་དང ། མན་ཤེལ་དང ། བྱི་རུ་ལ་སོགས་པ་སྦྱིན་པར་གཏོང་ལ། བཀྲེན་པ་རྣམས་ནི་གཟར་བུ་གང་གི་ཁ་ཟས་སྦྱིན་པར་གཏོང་ངོ ། །གང་དག་མང་དུ་ཐོས་པ་ནི་ལུང་འཛིན་པར་བྱེད་ལ། བློ་ཞན་པ་ནི་རང་གི་སྤྱོད་ཡུལ་ཙམ་མོ། །གཞན་དག་ནི
58.127a
གྲོང་ཁྱེར་ཆེན་པོ་འམ། དཔག་ཚད་མང་པོར་རྒྱུག་ལ་དེ་ལ་བྱིས་པ་དག་ནི་འདོམ་ཕྱེད་དུ་ཡང་རྒྱུག་མི་ནུས་ན། ཅི་དེ་ལ་བྱིས་པ་གཞོན་ནུས་འདི་ལྟར་ང་རྒྱུག་མ་ནུས་སོ་ཞས་ཅི་དེ་ལས་བརྡེག་པར་བྱ་བ་འམ། དེ་ལ་སུས་ཉེས། འོད་སྲུང་གཞན་ཡང་གྲོང་གི་བུད་མེད་ནི་གྲོང་དུ་དགའ་ལ་གྲོང་ཁྱེར་མོ་ནི་གྲོང་ཁྱེར་ལ་དགའོ། །འོད་སྲུང་དེ་བཞིན་དུ་དེ་བཞིན་གཤེགས་པ་ཡང་སེམས་ཅན་རྣམས་ལ་སྣོད་ཇི་ལྟ་བ་བཞིན་ཆོས་སྟོན་ཏོ། །གཞན་ཡང་བཅོམ་ལྡན་འདས་ལ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་ཆོས་ཤིག་ཞུ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་ཞིག་གསོལ་པ། སེམས་ཅན་གྱི་ལྟ་བ་ལས་བརྩམས་ལགས་ན་སེམས་ཅན་གྱི་ལྟ་བ་ཅི་ལགས་ན། ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དཔེར་ན་ཡུལ་ཙམ་པ་ཞེས་བྱ་བའི་གྲོང་ཁྱེར་ཆེན་པོ་ནས་མི་འགའ་ཞིག་མཉན་ཡོད་ཀྱི་གྲོང་ཁྱེར་དུ་ཆས་ཏེ། དེ་ཡང་མཉན་ཡོད་ཀྱི་གྲོང་ཁྱེར་ཆེན་པོ་དང་ཧ་ཅང་ཡང་མི་རིང་བའི་གྲོང་རྡལ་ཞིག་ཏུ་གནས་བཏབ་བོ། །དེ་ནས་དེས་འགྲོན་པོ་གཞན་ཞིག་ལ་དྲིས་པ། ཀྱེ་མི་མཉན་ཡོད་ན་ཡུལ་ལོག་མ་པ་རྣམས་ཇི་ལྟར་གནས། དེ་ན་ཁྱིམ་འམ། བཀད་ས་འམ། འགྲོན་གནས་པ་གནས་པའི་བུད་མེད་རྙེད་པར་འགྱུར་རམ། དེ་ནས་མི་དེ་ཐབས་མཁས་ཤིང་ཕ་རོལ་གྱི་སེམས་ཤེས་པས་ལྷའི་མིག་གིས་དེ་འོང་བ་ལ་བརྟགས་ན་དེ་ནས་དེས་རིག་སྟེ། ངན་པ་འདི་ནི་རང་གི་མ་དཀའ་བར་བྱེད་པ་བླ་མ་དམ་པ་ཡོངས་སུ་སྤངས་ཏེ། བརྫུན་ཅན་གྱི་བུ་ཞིག་གི་ཚིག་མཉན་ནས་བདག་མཉན་ཡོད་དུ་སོང་སྟེ། སྨད་འཚོང་མ་དང་ལྷན་ཅིག་རྩེ་བར་བྱའོ་སྙམ་ནས་འདིར་འོངས་སོ་སྙམ་པ་སེམས་ནས་དེ་ནས་དེས་མི་དེ་ལ་འདི་སྐད་ཅེས་སྨྲས་སོ། །ཀྱེ་མི་ལམ་ནས་སླར་མྱུར་དུ་ལོག་ན་ལེགས་ཏེ། ཡུལ་ལོག་མ་པ་ཁྱོད་འདྲ་བ་རྣམས་ནི་རྒྱལ་པོ
58.127b
གསལ་རྒྱལ་གྱིས་སྲིན་པོའི་རིགས་ཀྱི་ལག་ཏུ་ཟས་སུ་སྦྱིན་པར་བྱེད་ཀྱིས། ཀྱེ་མི་མྱུར་དུ་སླར་སོང་ཤིག་།དེ་ནས་མི་དེས་མི་དེའི་ཚིག་མཉན་ནས་མྱུར་དུ་བརྒྱུགས་ཏེ་རང་གི་ཁྱིམ་གང་ན་བ་དེར་སོང་ནས་རང་གི་མའི་རྐང་པ་ལ་གཏུགས་ཏེ་བཟོད་པར་གསོལ་ཏོ། །དེ་ནས་དུས་གཞན་ཞིག་ན་མི་དེའི་མ་ཤི་ནས་རང་དབང་བའི་ནོར་ཐམས་ཅད་ཐོགས་ཏེ། ཡང་མཉན་ཡོད་གང་ན་བར་ཆས་པ་དང་དེ་མི་དེ་ཉིད་ཀྱིས་མཐོང་ངོ ། །དེ་མཐོང་ནས་ཡང་དེ་འོང་བ་ལ་བསམས་ནས་འདི་ལྟར་བདག་དེར་སོང་ནས་ནོར་བདོག་པ་ཐམས་ཅད་ཤི་བ་དང ། བཀྲེན་པ་དང ། ཕོངས་པ་དང ། སློང་བ་པ་ལ་སོགས་པ་ལ་བགོ་བ་དང ། དེ་བཞིན་གཤེགས་པ་ལ་མཆོད་པ་དང་བཀུར་སྟི་དང་རི་མོ་བྱས་ལ་ང་རྒྱལ་བཅག་སྟེ། བདག་གི་མེད་ཅིང་ང་རྒྱལ་མེད་པར་རིམ་གྱིས་བྱས་ལ་སྨད་འཚོང་མ་དང་ལྷན་ཅིག་ཇི་སྲིད་འདོད་པར་རྩེད་མོ་དང ། དགའ་བ་དང ། དགའ་མགུར་སྤྱད་ནས་དེའི་འོག་ཏུ་དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བར་བྱའོ་སྙམ་པར་ཤེས་སོ། །མི་དེས་མི་དེ་ལ་དྲིས་པ། ཀྱེ་མི་དེང་སང་མཉན་ཡོད་ཀྱི་གྲོང་ཁྱེར་ཆེན་པོ་ཅི་འདྲ། དེས་སྨྲས་པ། ཀྱེ་མི་ང་ནི་མཉན་ཡོད་ཀྱི་གྲོང་ཁྱེར་ནི་སྡུག་ཅིང་ཡིད་དུ་འོང་བ། དགའ་བ། མཐོང་ན་ཡིད་དགའ་བ། ཡུལ་གྱི་བཟང་མོའི་སྨད་འཚོང་གི་ཚོགས་ཡོད་པ། འབྱོར་པ། རྒྱས་པ། བདེ་བ། ཉམས་དགའ་བ་ཡིན་ནོ། །འོད་སྲུང་དེ་སྐད་དུ་སྨྲ་ན་ཅི་དེ་བརྫུན་སྨྲ་བ་ཡིན་ནམ། གསོལ་པ། བཅོམ་ལྡན་འདས་ལགས་ཆེས་སོ། །བཀའ་སྩལ་པ། དེ་ནི་མ་ཡིན་ནོ། །གསོལ་པ། ཅི་ལགས། བཀའ་སྩལ་པ། དེ་ནི་ཐབས་ཡིན་ནོ། །ཡང་བཀའ་སྩལ་པ། དེ་བཞིན་གཤེགས་པས་ནི་རྣམ་གྲངས་ཀྱིས་བརྫུན་ཅུང་ཟད་བྱ་བར་གསུངས་སོ། །གསོལ་པ། ཅིའི་སླད་དུ་ལགས། འོད་སྲུང་ཁྱོད་དང་བུ་མོ་སེར་སྐྱ་བཟང་མོ་ལྷན་ཅིག་ཁྱིམ་པར་གྱུར་ཏེ་འཁོར་བ་ན། བཟང་མོའི
58.128a
ཕ་དང་མ་གཉིས་སྨྲ་ཞིང་ཕ་དང་མ་གཉིས་ཀྱིས་བསམས་ན། བདག་ཅག་གི་བུ་གཉིས་ཡུལ་ཉམས་སུ་མྱོང་བར་བྱེད་དམ། འོན་ཏེ་བདག་ཅག་གི་བུ་མི་བྱེད་ཅེས་ནང་མི་ལ་དྲིས་པ་དང ། ནང་མི་ཉེ་བར་སོང་ནས་ནང་མིས་དྲིས་པ་ན་འཇིག་རྟེན་ན་སུ་ཞིག་གཟུགས་དང ། སྒྲ་དང ། དྲི་དང ། རོ་དང ། རེག་བྱའི་འདོད་པ་ལ་རྩེ་བ་དང ། དགའ་བའི་ཡུལ་ཉམས་སུ་མྱོང་བར་མི་བྱེད་ཅེས་ཁྱོད་ཀྱིས་སྨྲས་པ་ཐོས་པ་ཡིན་ནམ། གསོལ་པ། བཅོམ་ལྡན་འདས་དེ་ནི་བདག་གི་བརྫུན་དུ་སྨྲས་པ་མ་ལགས་སོ། །དེ་བཞིན་དུ་འདི་ལ་ཡང་དེ་ནི་ཐབས་མཁས་པ་ཡིན་པར་རྣམ་གྲངས་འདིས་ཐ་སྙད་གདགས་པར་ནུས་ཏ། རྒྱུད་གཉིས་ཀ་རྣམ་གྲངས་འདིས་མགུ་བར་བྱའོ། །གསོལ་པ། བཅོམ་ལྡན་འདས་བདག་ཅག་ཚེ་རབས་ལྔ་བརྒྱར་སྤ་ཤུག་ཏུ་མཆིས་ན་ཡང་ཆུང་ངུ་ན་གཡར་ལམ་དུ་ཡང་ཉལ་པོ་མ་མྱོང་ངོ ། །བཀའ་སྩལ་པ། དེ་ནི་དེ་ཁོ་ན་ལྟར་ཡིན་གྱི་གཞན་དུ་མ་ཡིན་ཏེ། དེ་ཡང་སྐྱེས་བུའི་ཐབས་མཁས་པ་ཡིན་ནོ། །གསོལ་པ། བཅོམ་ལྡན་འདས་ཐབས་མཁས་པ་ཞེས་བགྱི་བ་ཅི་ལགས། བཀའ་སྩལ་པ། ཐབས་མཁས་པ་ཞེས་བྱ་བ་ནི་སྔ་མ་དང་ཕྱི་མར་འགལ་བ་དང ། ཕྱི་མ་དང་སྔ་མར་འགལ་བ་སྨྲ་བའི་དོན་ཏེ། དོན་གྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་རྣམས་ནི་ཐབས་གང་དང་གང་གིས་དོན་འགྲུབ་པར་འགྱུར་བའི་ཐབས་དེ་དང་དེས་ངེས་པའི་དོན་གྱིས་སམ། དྲང་བའི་དོན་གྱིས་གསུང་བ་ཡིན་ནོ། །གསོལ་པ། དོན་གྲུབ་པ་ཞེས་བགྱི་བ་གསུང་བ་ཅི་ལགས། བཀའ་སྩལ་པ། དོན་གྲུབ་པ་ཞེས་བྱ་བ་ནི་ཆོས་གྲུབ་པ་ཞེས་བྱའོ། །གསོལ་པ། དེ་བཞིན་གཤེགས་པས་དགེ་སློང་དག་ཚད་མས་རུང་བ་མ་ཡིན་པ་དེ་ཡང་བླང་བར་བྱའོ་ཞེས་རྣམ་གྲངས་ཅུང་ཟད་ཅིག་གསུངས་པ། གལ་ཏེ་དེ་ལྟར་ལགས་ན་དེ་ཡང་བླང་བར་འགྱུར་རམ། བཀའ་སྩལ་པ། འོད་སྲུང
58.128b
དེ་ནི་རྒྱུ་མ་ཡིན་ནོ། །གསོལ་པ། ཅིའི་སླད་དུ་ལགས། ཅི་ཕའི་ཆེད་དུ་མ་སྲོག་དང་དབྲལ་བར་བྱའམ། ཅི་གཞན་གྱི་ཆེད་དུ་རང་སྲོག་དང་དབྲལ་བར་བྱའམ། ཅི་མའི་ཆེད་དུ་ཕ་སྲོག་དང་དབྲལ་བར་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ཕ་དང་མས་མི་བྱེད་པ་གང་ཡིན་པ་དེ་ནི་དེ་བཞིན་གཤེགས་པའི་སྙིང་པོར་བྱེད་དོ། །འོད་སྲུང་ཇི་ལྟར་གོང་དུ་ཡུལ་ཙམ་པ་ན་གནས་པའི་མི་བཞིན་ནོ་ཞེས་གསུངས་པ་ལྟར་བདག་བདེན་ཡང་ངས་བདག་ཏུ་འཛིན་པ་དགག་པ་མཛད་དོ། །དེ་ཅིའི་ཕྱིར་ཞེ་ན། ཇི་འདི་ལྟར་མི་དེས་རང་གི་མ་བོར་ནས་དེའི་མ་ཡང་སྡུག་བསྔལ་བར་གྱུར། དེ་ཡང་རང་གི་མ་དང་བྲལ་བར་གྱུར་པ་ལས་དེ་མི་དེས་དེ་སྐད་ཚིག་བསྒོ་ནས་སླར་བཟློག་པ་དང་མ་དང་བུ་དེ་གཉིས་ཕྲད་པར་གྱུར་ཏོ། །དེ་ནས་དེའི་འོག་ཏུ་མ་ཤི་ནས་རང་དབང་བ་རྣམས་ཇི་སྐད་བཤད་པ་དེ་བཞིན་དུ་འདོད་པའི་བདེ་བ་བསྟན་ནས་དེའི་འོག་ཏུ་རབ་ཏུ་བྱུང་བ་བཞིན་ནོ། །དགེ་སློང་དག་དེ་བཞིན་དུ་ངས་ཀྱང་གལ་ཏེ་ཐོག་མ་ཁོ་ནར་བདག་ཡོད་དོ་ཞེས་བསྟན་ན་སུ་ཞིག་དད་པར་འགྱུར། གལ་ཏེ་དད་པར་གྱུར་ནས། འཇིག་ཚོགས་ལ་ལྟ་བའི་བདག་ཏུ་འཛིན་པ་ནི་འཇིག་རྟེན་གྱི་སྤྱི་ཐུན་ཡིན་པས་ངའི་ཡང་ངར་འགྱུར་རོ། །ངས་ཀྱང་ཡུལ་ཙམ་པ་ན་གནས་པའི་མི་བཞིན་དུ་ཐོག་མར་བདག་མེད་པ་བསྟན་ནས་དེའི་འོག་ཏུ་བདག་ཡོད་པ་ཉིད་སྟོན་པར་འགྱུར་ཏེ། དེ་ཉིད་དང་བདག་གི་དེ་ཁོ་ན་ཉིད་ཀྱང་བཤད་དོ། །འོད་སྲུང་དེ་ལྟ་བས་ན་ཐབས་ལ་མཁས་པར་བྱའོ། །འོད་སྲུང་གཞན་ཡང་དཔེར་ན་མི་ཞིག་ལམ་པོ་ཆེ་ཞིག་ནས་འབྲོག་དགོན་པར་སོང་བ་ལས་བྱ་རབ་གནོན་ཅེས་བྱ་བས་སྒྲ་ཕྱུང་བ་དང ། དེ་ནས་མི་དེ་ལམ་དུ་ཞུགས་ཏེ་འགྲོ་བས་བྱའི་སྐད་དེ་ཐོས་ནས་བསམས་པ། ཅི་ཆོམ་རྐུན་པ་བྱུང་ངམ་ཞེས་དེ་ཆོམ་རྐུན་པས་འཇིགས་སྐྲག་ཏེ། བྱོལ་བ་ལས་དགོན་པ་གང་ན་སྟག
58.129a
ཡོད་པ་དེར་ཆུད་ནས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །འོད་སྲུང་དེ་བཞིན་དུ་མ་འོངས་པའི་དུས་ན་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས། བདག་དང་བདག་གི་ཞེས་བྱ་བའི་སྒྲ་ཙམ་གྱིས་འཇིག་རྟེན་པའི་འཇིག་ཚོགས་ལ་ལྟ་བའི་བདག་མེད་པ་སེམས་ཤིང་སྟོང་པ་ཉིད་ཆེན་པོ་ཆད་པའི་ལྟ་བ་སྨྲ་བའི་བདག་ཉིད་དུ་འགྱུར་བས་དེ་བཞིན་གཤེགས་པ་རྟག་པ་སངས་རྒྱས་རྟག་པའི་བདག་ཉིད་དང་ལྡན་པའི་མདོ་སྡེ་འདི་ལྟ་བུ་འདི་དག་ལ་དད་པར་མི་འགྱུར་རོ། །འོད་སྲུང་གཞན་ཡང་ཞིང་པ་བླུན་པོ་མཉན་ཡོད་ཀྱི་གྲོང་ཁྱེར་ཆེན་པོ་སྔོན་མ་མཐོང་བ་ཞིག་ཡོད་པ་དེ་དེར་ཞུགས་པ་ན་སྐྱེས་པ་དང ། བུད་མེད་གཟུགས་བཟང་བ་མཛེས་པ་བལྟ་ན་སྡུག་པ་དག་མཐོང་ངོ ། །མཐོང་ནས་ཀྱང་མིག་མི་འཛུམ་པར་རིགས་ཀྱི་བུ་དང ། རིགས་ཀྱི་བུ་མོ་དག་ལ་བལྟས་སོ། །བལྟས་ཏེ་ཕྱིར་བྱུང་ནས་དེ་ནས་དེ་རང་ཁྱིམ་གང་ན་བ་དེར་སོང་སྟེ། ཞིང་པ་བླུན་པོ་རྣམས་ལ་སྨྲས་པ། རྒྱལ་པོ་ནི་འདི་འདྲ། དེ་ན་བུད་མེད་ཀྱི་གཟུགས་ནི་ལྷའི་བུ་མོ་འདྲ། མིའི་དབང་པོའི་གཟུགས་ནི་ལྷའི་བུ་ཕོ་འདྲའོ་ཞེས་སྨྲས་པ་ན། མི་ཕལ་པ་གཞན་རྣམས་ཀྱང་རྒྱལ་པོ་མཐོང་ནས་འདི་སྙམ་དུ་བདག་ཅག་གིས་ཀྱང་ལྷའི་བུ་དང་བུ་མོ་དང་བཅས་པ་མཐོང་ངོ་སྙམ་པ་དང ། དེ་ནས་རྒྱལ་པོའི་ཕོ་ཉ་བཀྲབས་པ་དག་གིས་ཐོས་ནས་ཅལ་ཅོལ་ཤ་དག་སྨྲའོ་ཞེས་བྱས་ཏེ་གསོད་པར་འགྱུར་རོ། །འོད་སྲུང་དེ་བཞིན་དུ་དེ་བཞིན་གཤེགས་པ་སངས་རྒྱས་པའི་དུས་མྱ་ངན་ལས་འདས་པ་ཉིད་ན་རྟག་པ། བརྟན་པ། ཞི་བ། ཐེར་ཟུག་པ། བདག་ཅེས་བྱ་བའི་ཚིག་གི་གཞི་བསྟན་པ་ཡང་འཇིག་རྟེན་ལས་འདས་པའི་དུས་ན་བདག་ཅི་འདྲ་བ་དེ་འདྲ་བར་འགྱུར་ཞིང་འཇིག་རྟེན་པའི་འཇིག་ཚོགས་ལ་ལྟ་བ་གོམས་པར་བྱས་པའི་བདག་ཉིད་ཀྱང་ཟད་པར་གྱུར། ཟད་པར་འགྱུར། ཟད་པར་འགྱུར་ཏེ། ལྟ་བ་དེ་ལྟ་བུ་གང་ཡིན་པ་དེ་ངའི་མ་ཡིན་པས
58.129b
དེའི་ཕྱིར་རྟག་པ་དང་ཆད་པ་སྤངས་པ་ཞེས་གསུངས་པ་ནི་ངས་ལེགས་པར་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ང་བདག་ཉིད་སྐྱེས་སོ་ཞེས་གསུང་ན་ཅི་དེ་བཞིན་གཤེགས་པ་སྐྱེས་སམ། ང་ཚེམས་ཤིང་སྟེན་ཏོ་ཞེས་གསུང་ན། ཅི་ང་ཚེམས་ཤིང་སྟེན་སྙམ་འམ། འོད་སྲུང་སྔ་མ་དང་ཕྱི་མའི་ཚིག་གི་དོན་འགལ་གྱི་དོན་ལ་ནི་མ་ཡིན་ནོ། །གསོལ་པ། ཇི་ལྟར་མ་ལགས། བཀའ་སྩལ་པ། འོད་སྲུང་ཁྱོད་ལ་དཔེ་བསྟན་ཏེ། དཔེར་ན་བཙོ་བླག་མཁན་མཁས་པས་གོས་ཕལ་པ་ཞིག་ཉོས་ནས་དམར་པོར་བྱས་ཏེ་བཙོངས་ན་རིན་ཆེན་པོར་འདོང་ངོ ། །དེ་ནས་དེས་ཕྱིས་རིན་ལྷག་པས་ཉོས་ནས་གོས་དེ་ཉིད་སྔོན་པོས་ཚིག་གུར་བྱས་ཏེ་གཞན་གྱི་ལག་ཏུ་བཙོངས་ནས་དེ་ཉིས་གྱུར་གྱི་རིན་དུ་ལྡོམ་ན་འོད་སྲུང་ཅི་དེ་གོས་དེ་ཉིད་ཡིན་ནམ། འོན་ཏེ་གཞན་ཡིན་ཞེ་ན། དེ་ནི་གཞན་མ་ཡིན་ཏེ་ཁ་བསྒྱུར་བར་ཟད་དོ། །འོད་སྲུང་དེ་བཞིན་དུ་གོས་ཀྱི་རྣམ་པ་བཞིན་དུ་བསོད་ནམས་གསར་གྱི་རྒྱུན་ཆགས་པས་དེ་ཕྱིས་ཚོན་རྩིའི་ཐབས་ཀྱི་ཐབས་མཁས་པས་ཁ་དོག་སྒྱུར་བ་ལྟ་བུར་བྱེད་དོ། །འོད་སྲུང་གཞན་ཡང་དཔེར་ན་གྲོང་ཁྱེར་ཆེན་པོ་ཞིག་ན་དགེ་སློང་ཚུལ་ཁྲིམས་དང་ལྡན་པ་ཞིག་ཡོད་པ་འཆི་ཀའི་ཚེ་གྲོང་རྡལ་ལམ། གྲོང་ཁྱེར་དུ་བསོད་སྙོམས་སུ་རྒྱུ་བ་ན་སྨད་འཚོང་མ་ཞིག་མཐོང་ནས་དེ་སེམས་ཆགས་པར་གྱུར་ཏེ་དེ་ནས་དེས་བསམས་པ། གྱོན་པའི་གོས་འདི་བྱིན་ལ་འདི་ལྟ་བུ་ཞིག་བྱའོ་ཞེས་ངེས་པར་བྱས་ནས་དེས་གྱོན་པའི་གོས་དེས་སྨད་འཚོང་མ་དེ་བྲོངས་པ་དང ། སྨད་འཚོང་མ་དེ་ཡང་ཆགས་པའི་རང་བཞིན་པས་དེ་བཞིན་དུ་བྱའོ་ཞེས་དེ་ལ་ཁས་བླངས་སོ། །དེ་ནས་དགེ་བསྙེན་ཐབས་ལ་མཁས་པ་ཞིག་གིས་དེ་མཐོང་ནས་བསམས་པ། ཨེ་མའོ་ཀྱི་ཧུད་དགེ་སློང་ཚུལ་ཁྲིམས་དང་ལྡན་པ་འདི་ནི་ད་ནི་ཚུལ་ཁྲིམས་འཆལ་པར་གྱུར་ལ། ཉེས་ན་དགེ་སློང་འདི་ལུས་འདིས་ཤི་བ་བླའི། ཚུལ་ཁྲིམས་འཆལ་པ་ནི་མ་ཡིན་པས་དེའི
58.130a
སྡིག་པ་གང་ཡིན་པ་དེ་བདག་ལ་བབ་པར་གྱུར་ཅིག་ཅེས་དེ་ནས་དེས་གཏམ་ཅི་ཞིག་བྱས་ནས་རྨོངས་པར་བྱས་ཏེ་མོད་ལ་བསད་ན། འོད་སྲུང་ཅི་མི་དེ་དམྱལ་བར་འགྱུར་རམ། འོད་སྲུང་གིས་གསོལ་པ། དེ་ནི་བཅོམ་ལྡན་འདས་ཉིད་མཁྱེན་ལགས་སོ། །བཀའ་སྩལ་པ། འོད་སྲུང་མི་དེའི་དགེ་སྦྱོང་སྲོག་དང་ཕྲལ་བའི་སྡིག་པ་གང་ཡིན་པ་དེ་ཟླ་བ་བཞིར་རིམས་ཀྱིས་ཐེབས་ནས་ལུས་དེ་ཉིད་ལ་རྣམ་པར་སྨིན་པ་དང་དེངས་པར་འགྱུར་ན། འོད་སྲུང་ཐབས་མཁས་པ་སེམས་ཅན་གྱི་དོན་དུ་ཚིག་ཙམ་དུ་སྨྲ་བས་ཉེས་པ་མེད་དེ། བདག་བདེན་པར་ཡོད་པ་ལ་བདག་མེད་དོ་ཞེས་འགོག་པའི་ཚིག་ཙམ་དུ་སྨྲ་བས་ཅིར་ཡང་མི་འགྱུར་བ་ལྟ་ཅི་སྨོས། འོད་སྲུང་གཞན་ཡང་ཁྱོད་ཀྱིས་ཀུན་དགའ་བོ་ཟིལ་གྱིས་མནན་ནས་ང་ལ་ཞུས་པ། སྲིད་པ་ཡོད་ན་བདེ་དང་སྡུག་བསྔལ་ཏེ། མེད་ན་བདེ་དང་སྡུག་བསྔལ་ག་ལ་ཡོད་ཅེས་བྱ་བ་དེའི་དོན་འོད་སྲུང་ཁྱོད་ད་ཉོན་ཅིག་།འོད་སྲུང་དེ་བཞིན་གཤེགས་པ་ནི་དངོས་པོ་མེད་པ། སེམས་ཅན་མེད་པ། འཇིག་པར་འགྱུར་བ་མ་ཡིན་པའོ། །གསོལ་པ། ཇི་ལྟ་བུ་ལགས། བཀའ་སྩལ་པ། འོད་སྲུང་དཔེར་ན་རིའི་རྒྱལ་པོ་གངས་ཅན་གྱི་དྲུང་ན་ནོར་བུ་རིན་པོ་ཆེ་འོད་མཐའ་ཡས་སྣང་བ་ཞེས་བྱ་བའི་ཁམས་ཡོད་དོ། །དེ་ནས་ནོར་བུ་རིན་པོ་ཆེའི་ཁམས་དེ་ལ་ནོར་བུ་རིན་པོ་ཆེའི་ཁམས་བྱི་དོར་བྱེད་པས་བལྟས་ནས་དེས་དེ་མཐོང་སྟེ་ཤེས་ནས་དེས་དེ་བླངས་ཏེ། གསེར་གྱི་ཁ་དོག་བཞིན་དུ་ཐབས་ཀྱིས་དྲི་མ་སྦྱངས་ཏེ་བླངས་ནས་དེ་ནས་དེས་གང་གི་ཚེ་དྲི་མ་དག་པར་གྱུར་པ་དེ་ཕན་ཆད་ས་འམ། འདམ་རྫབ་བམ། བྱེ་མ་འམ། སྣོད་གང་དང་གང་དུ་མི་དེས་བཅུག་ཀྱང་དེས་དེར་ནོར་བུ་རིན་པོ་ཆེ་དེ་དེ་ལྟ་དེ་ལྟར་ཕྱིས་བདར་བྱས་པས་ཇི་ལྟར་ཐོག་མའི་དྲི་མའི་སྐྱོན་དེ་ཁོ་ནས་འདྲེས་པར་མི་འགྱུར་རོ། །དེ་ཅིའི་ཕྱིར་ཞེ་ན། དཔེར་ན་གང་དང་གང་དུ་མི་སྒྲོན་མ་ཐོགས་ཏེ་སོང་བ་དེ་དང་དེ་ཉིད་དུ
58.130b
མུན་པ་མེད་པར་འགྱུར་ཞིང་སྒྲོན་མ་ཡང་གསལ་བ་ཁོ་ནར་འགྱུར་རོ། །འོད་སྲུང་དེ་བཞིན་དུ་ནོར་བུ་རིན་པོ་ཆེ་དེ་གསེར་བཞིན་དུ་དྲི་མས་གོས་པ་མེད་པར་གྱུར་ཅིང་ནོར་བུ་རིན་པོ་ཆེ་དེ་ཡང་མཚན་མོ་ནི་རྒྱུ་སྐར་དང ། བ་ཟླའི་འོད་ཀྱི་རྐྱེན་གྱིས་ཆུ་འཛག་པར་འགྱུར་ལ་ཉིན་མོ་ནི་ཉི་མའི་འོད་ཀྱིས་མེའི་ཁ་དོག་ལྟར་འབར་ཡང་ཅུང་ཟད་ཀྱང་སྲེག་པར་མི་བྱེད་དོ། །འོད་སྲུང་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ནས་བྱང་ཆུབ་སངས་རྒྱས་པ་ཉིད་ཀྱིས་སྐྱེ་བ་དང ། རྒ་བ་དང ། ན་བ་དང ། འཆི་བའི་དྲི་མ་བསལ་ཅིང་ཉོན་མོངས་པ་བྱེ་བ་ལས་རྣམ་པར་གྲོལ་ཏེ། བག་ཆགས་ཀྱི་དྲི་མ་ཐམས་ཅད་དང་བྲལ་བ་ན་ནོར་བུ་དག་པ་བཞིན་དུ་རབ་ཏུ་གསལ་ཞིང་པད་མ་བཞིན་དུ་ཐམས་ཅད་དུ་གོས་པ་མེད་པར་འགྱུར་རོ། །འོད་སྲུང་གཞན་ཡང་དེ་བཞིན་གཤེགས་པ་གང་གི་གཟུགས་ཀྱིས་འཇིག་རྟེན་གང་དང་གང་དུ་འབྱུང་ཞིང་བྱུང་ནས་ཀྱང་ཕལ་པ་བཞིན་དུ་སྟོན་པར་མཛད་དེ། ཕལ་པར་བྱུང་ཡང་ངན་འགྲོའི་ཉེས་པ་དེ་དག་གིས་གོས་པར་མི་འགྱུར་ཞིང་ལྷ་དང་མིའི་བདེ་བ་དང་སྡུག་བསྔལ་ཡང་ཉམས་སུ་མྱོང་བར་མི་འགྱུར་རོ། །ལྷ་དང ། མིའི་བདེ་བ་དང ། སྡུག་བསྔལ་ཞེས་བྱ་བ་ནི་འདོད་པའི་ཡོན་ཏན་ལྔ་ཡིན་ཏེ། སྡུག་བསྔལ་ནི་བཀག་ལ་ཐར་པ་གཅིག་ཏུ་མཐར་ཕྱིན་པ་ནི་ཤིན་དུ་བདེ་བ་ཡིན་ནོ། །དེ་ནས་གནས་བརྟན་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །བདག་ནི་ད་གདོད་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་དང་དགྲ་བཅོམ་པ་ཉིད་དུ་གྱུར་ལགས་ཏེ། ད་ནི་བདག་གིས་དེ་བཞིན་གཤེགས་པ་ལ་བགྱིས་པ་གཟོ་བ། བགྱིས་པ་ཚོར་བར་བགྱི་ལགས་སོ། །གང་དེ་བཞིན་གཤེགས་པས་བདག་ལ་འདི་སྐད་ཅེས་འོད་སྲུང་ཚུར་ཤོག་སྟན་གྱི་ཕྱེད་སྦྱིན་གྱིས་བདག་ཅག་གཉིས་སྟན་ཅིག་ལ་ལྷན་ཅིག་འདུག་གོ། །ཞེས་གསུངས་པ་དེའི་དོན་ནི་དེ་རིང་བཅོམ་ལྡན
58.131a
འདས་ཀྱིས་འཁོར་བཞིའི་དབུས་སུ་བདག་ཐེག་པ་ཆེན་པོ་ལ་དབང་བསྐུར་བ་ལགས་སོ། །དེ་ནས་འཁོར་དེའི་ནང་ན་སྐྲ་དང་ཁ་སྤུ་བྲེགས་པ་དགེ་སློང་གི་ཁ་དོག་དང་གཟུགས་འཆང་བ་དག་ཀྱང་འདུག་།དགེ་བསྙེན་མ་ཡིན་པ་དགེ་བསྙེན་གྱི་གཟུགས་འཆང་བ་དག་དང་ཁ་དོག་སྣ་ཚོགས་པའི་གཟུགས་འཆང་བ་དག་དང ། ཁ་ལོགས་ཤིག་ཏུ་ཕྱོགས་པ་དང ། སྙན་དངགས་མཁན་དང ། མགྲིན་པ་སྟ་རི་ལྟ་བུ་དང ། དུད་འགྲོ་དང ། ཁ་གྱེན་དུ་ལྟ་བ་དང ། ཁ་ཐུར་དུ་ལྟ་བ་དག་འཁོད་དེ། དེ་དག་ཐམས་ཅད་ནི་བདུད་ཀྱིས་བྱིན་གྱིས་བརླབས་པ་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་ནི་ཤིན་ཏེ་མ་མ་ལགས་པ་སྦུན་པ་དང་བྲལ་བ། ཕུབ་མ་མཆིས་པ། ཙན་དན་གྱི་སྙིང་པོ་ལྟ་བུ་སྲ་བ་བརྟན་པར་གནས་པ་ལགས་ན་འཁོར་འདི་ལྟ་བུའི་ནང་དུ་འདི་དག་ཅིའི་སླད་དུ་ཞུགས་ལགས་བཀའ་སྩལ་པ། ཀུན་དགའ་བོ་ཁྱོད་གནས་བརྟན་འོད་སྲུང་ལ་དྲིས་ཤིག་།ཀུན་དགའ་བོས་ལེགས་སོ་བཀའ་བཞིན་འཚལ་ཞེས་མཉན་ནས་གནས་བརྟན་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་འདི་དག་འཁོར་གྱི་ནང་དུ་ཇི་ལྟར་ཞུགས། འོད་སྲུང་གིས་སྨྲས་པ། ཀུན་དགའ་བོ་འདི་དག་ནི་སྐྱེས་བུ་བླུན་པོ་བདུད་ཀྱི་འཁོར་ཏེ་བདུད་དང་ལྷན་ཅིག་ལྷགས་པ་ཡིན་ནོ། །ཀུན་དགའ་བོ་བདག་ནི་རྒྱུ་འདིས་འདི་སྐད་ཅེས་བཅོམ་ལྡན་འདས་བདག་ནི་ཞིང་སྲུང་བ་ཐབས་མཁས་པ་བཞིན་དུ་དེ་བཞིན་གཤེགས་པ་འདས་ནས་དམ་པའི་ཆོས་བསྲུང་བའི་རྔོ་མི་ཐོགས་ལགས་སོ་ཞེས་གསོལ་ནས་དོན་དེའི་ཕྱིར་བདག་གིས་དེའི་ཚེ་ས་ཆེན་པོ་འདི་ཁུར་དུ་ཐོགས་པ་ནི་མི་མདོ་ལགས་སོ་ཞེས་ཀྱང་གསོལ་ཏོ། །དེའི་ཚེ་བཅོམ་ལྡན་འདས་ཀྱིས་བདག་ལ་བཀའ་སྩལ་པ། འོད་སྲུང་ཁྱོད་ཀྱིས་ང་འདས་ནས་ཇི་སྲིད་བསྟན་པ་ཉམས་པར་མ་གྱུར་པ་དེ་སྲིད་དུ་འཇིག་རྟེན་དུ་དམ་པའི་ཆོས་འབྱིན
58.131b
པར་ནུས་སོ་ཞེས་བདག་ལ་བཅོམ་ལྡན་འདས་ཀྱིས་སྤྲོ་བ་བསྐྱེད་དོ། །དེའི་ཚེ་བདག་གིས་བཅོམ་ལྡན་འདས་རེ་ཤིག་བདག་གིས་དགུང་ལོ་བཞི་བཅུ་ཞིག་དམ་པའི་ཆོས་དབྱུང་བར་བགྱིའོ་ཞེས་གསོལ་པ་དང ། དེ་ནས་བཅོམ་ལྡན་འདས་ཀྱིས་བདག་ལ་བཀའ་སྩལ་པ། རེ་ཤིག་དེའི་བར་དུ་ཡང་ཁྱོད་སྙོམ་ལས་སྐྱེད་དམ་ཅི། ཇི་སྲིད་བསྟན་པ་མ་ཉམས་པའི་བར་དུ་བརྩོན་པར་མི་ནུས་སམ། དེའི་ཚེ་བཅོམ་ལྡན་འདས་ཀྱིས་ཡང་བདག་ལ་བཀའ་སྩལ་པ། འོད་སྲུང་རེ་ཤིག་བདུད་ཚོལ་ཅིག་།གལ་ཏེ་རྙེད་ན་དེའི་ཚེ་དམ་པའི་ཆོས་འབྱིན་ནུས་པར་འགྱུར་ཞིང་ངའི་དོན་ཡང་ཤེས་པར་འགྱུར་རོ། །ཀུན་དགའ་བོ་བདག་གིས་ནི་དེའི་ཚེ་ལྷའི་མིག་གིས་བདུད་སྡིག་ཅན་བལྟས་ན་མ་མཐོང་མ་ཤེས་སོ། །དཔེར་ན་མཉན་ཡོད་ཀྱི་གྲོང་ཁྱེར་དུ་སྐྱེ་བོ་མང་པོའི་དབུས་སུ་ཞིང་པ་བུ་སྟོར་བ་ཞིག་གིས་རང་གི་བུ་བཙལ་ཏེ་མ་རྙེད་ན་དུབ་ཅིང་སླར་ལྡོག་པར་འགྱུར་རོ། །ཀུན་དགའ་བོ་དེ་བཞིན་དུ་བདག་གིས་བཙལ་བ་ན་མ་རྙེད་དོ། །མ་རྙེད་ནས་འདི་སྐད་ཅེས་བཅོམ་ལྡན་འདས་བདག་ནི་བདུད་སྡིག་ཅན་ཚོལ་བར་སྤྲོ་བ་མ་མཆིས་ལགས་སོ་ཞེས་གསོལ་ནས་དེའི་ཚེ་བདག་ཕྱོགས་གཅིག་ཏུ་འདུག་གོ། །དེ་ནས་དེ་བཞིན་དུ་འོད་སྲུང་ཆེན་པོའི་འོག་མའི་གནས་བརྟན་ནས་ཉན་ཐོས་ཆེན་པོ་བརྒྱད་བཅུའི་བར་གྱི་ཉན་ཐོས་ཆེན་པོ་རེ་རེ་ཞིང་འདི་ལྟ་སྟེ། ཞིང་པ་བཞིན་དུ་དཔེ་སྦྱར་བ་ལ་ཚིགས་སུ་བཅད་པའི་གྲངས་ཀྱིས་བགྲངས་ན་སྟོང་ཕྲག་འབྱུང་བར་འགྱུར་རོ། །དེ་ནས་བྱང་ཆུབ་སེམས་དཔའ་བཟང་སྐྱོང་དང ། ཕུག་སྦས་ལ་སོགས་པ་ལྔ་བརྒྱ་དང ། འཇིག་རྟེན་ཐམས་ཅད་ཀྱིས་མཐོང་ན་དགའ་བ་མ་གཏོགས་པ་ལ་སོགས་པ་དེ་དག་གིས་ཀྱང་དེ་བཞིན་དུ་བཙལ་ན་མ་རྙེད་དེ། དེ་དག་ལ་ཡང་ཚིགས་སུ་བཅད་པ་དེ་བཞིན་དུ་བགྲང་བར་བྱའོ། །དེ་ནས་བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་གང་མ་འོངས་པའི་དུས་ན་དམ་པའི་ཆོས
58.132a
ཀུན་དུ་འབྱིན་པར་མི་ནུས་པའི་རྒྱུ་ནི་དམ་པའི་ཆོས་ནུབ་ནས་ལོ་བརྒྱད་བཅུ་ལོན་པ་དང ། ལོ་བརྒྱད་བཅུ་པ་ཉིད་ལ་ལྷོ་ཕྱོགས་ཀྱི་བྱང་ཆུབ་སེམས་དཔའ་བཟང་སྐྱོང་དང ། ཕུག་སྦས་ལ་སོགས་ཏེ། བྱང་ཆུབ་སེམས་དཔའ་ལྔ་བརྒྱ་པོ་གང་ཡིན་པ་དེ་དག་ཐམས་ཅད་ཀྱི་ཐ་མ་ཤོས་དེས་འབྱིན་པར་འགྱུར་བ་ཡིན་པས་རེ་ཤིག་དེ་ཚོལ་ཅིག་།གསོལ་པ། ལེགས་སོ། །བཙལ་ལགས་ཏེ་ལིད་ཙ་བི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་ཉིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེའི་དྲུང་དུ་འོད་སྲུང་སོང་ལ་གསོལ་བ་ཐོབ་ཤིག་དང་དེས་བདུད་བཙལ་བར་ནུས་སོ། །དེ་ནས་འོད་སྲུང་ཆེན་པོ་ལ་སོགས་ཏེ། ཉན་ཐོས་ཆེན་པོ་བརྒྱད་བཅུ་དང ། བཟང་སྐྱོང་དང ། ཕུག་སྦས་ལ་སོགས་པའི་གཞོན་ནུའི་དྲུང་དུ་དོང་ནས་གོ་བར་བྱས་པ། གཞོན་ནུ་ཁྱོད་ཀྱིས་ནི་བདུད་སྡིག་ཅན་བཙལ་བར་ནུས་སོ་ཞེས་བཅོམ་ལྡན་འདས་ཀྱིས་བསྟན་ཏོ་ཞེས་གྲག་གོ་།དེ་ནས་གཞོན་ནུས་འཁོར་གྱི་གཙོ་བོ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་བདག་གིས་བདུད་སྡིག་ཅན་བཙལ་བར་ནི་བགྱི་ན། འོན་ཀྱང་བཙུན་པ་འོད་སྲུང་བཟང་སྐྱོང་ལ་སོགས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནས་འཇམ་དཔལ་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་ཐོབ་དང ། ངན་སོང་སྦྱོང་དང ། བྱམས་པ་ལ་སོགས་པའི་བར་དག་ཡོད་ན། ཅི་བདག་ལ་ཐོ་བཙམ་འམ། བཙུན་པ་འོད་སྲུང་བདག་བདུད་ཀྱི་རྫི་བོ་མ་ལགས་ཀྱིས་རེ་ཤིག་བསོད་ནམས་དང་ལྡན་པ་རྣམས་ཀྱིས་ཚོལ་ཅིག་།འོད་སྲུང་གིས་སྨྲས་པ། གཞོན་ནུ་ཅི་བདུད་སྡིག་ཅན་ཚར་བཅད་པས་བསོད་ནམས་སུ་མི་འགྱུར་རམ། གཞོན་ནུས་སྨྲས་པ། བཙུན་པ་གལ་ཏེ་དེ་ལྟར་བདག་གིས་ཀྱང་ཅི་སྟེ་མི་ནུས་ན་ཁྱོད་ཉིད་ཤིན་དུ་ཤེས་པས་ཁྱོད་ཀྱིས་ཚོལ་ཅིག་།དེ་ནས་བཅོམ་ལྡན་འདས་ལ་འོད་སྲུང་གིས་དོན་དེ་གསོལ་པ་དང ། བཅོམ་ལྡན་འདས
58.132b
ཀྱིས་བཀའ་སྩལ་པ། འོད་སྲུང་དེ་སྐད་བྱས་ན་གཞོན་ནུ་ཅི་ཟེར། གསོལ་པ། བཅོམ་ལྡན་འདས་གཞོན་ནུ་འདི་སྐད་ཅེས་རེ་ཤིག་བསོད་ནམས་དང་ལྡན་པ་རྣམས་ཀྱིས་ལེགས་པར་ཚོལ་ཅིག་།དེའི་འོག་ཏུ་བདག་གིས་བདུད་སྡིག་ཅན་བཙལ་བར་བགྱིའོ། །རེ་ཤིག་ཉན་ཐོས་ཆེན་པོ་བརྒྱད་བཅུས་ཚོལ་ཅིག་།བདག་ནི་ཁྱིམ་ན་གནས་པ་རིགས་ལྷག་པར་དམའ་བ་ལགས་པས་དེའི་འོག་ཏུ་བཙལ་བར་བགྱིའོ་ཞེས་མཆི་ལགས་སོ། །དེ་ནས་ཉན་ཐོས་མཆོག་དེ་དག་དང ། བཟང་སྐྱོང་དང ། ཕུག་སྦས་ལ་སོགས་པས་ཡང་བཙལ་ན། དཔེར་ན་ཞིང་པའི་ཆུང་མ་གྲོང་ཁྱེར་དུ་བུ་སྟོར་བ་བཞིན་དུ་དེ་དག་བདག་ནི་སྤྲོ་བ་མེད་དོ། །བདག་ནི་སྤྲོ་བ་མེད་དོ་ཞེས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་གཞོན་ནུ་བོས་ཏེ་བཀའ་སྩལ་པ། གཞོན་ནུ་ཁྱོད་ཀྱིས་བདུད་ཚོལ་ཅིག་།གཞོན་ནུས་གསོལ་པ། བཅོམ་ལྡན་འདས་ས་འཛིན་གྱི་རྒྱལ་པོའི་བུ་མོ་རྒྱལ་པོའི་གཞོན་ནུ་མ་ལྔ་དཀར་ཞེས་བགྱི་བ་བསོད་ནམས་དང་ལྡན་པ་དེ་འདིར་མཆིས་ཏེ། དེའི་སླད་དུ་རྔ་བོ་ཆེ་དང ། དུང་དང ། རོལ་མོའི་སྒྲ་སྒྲོགས་ཤིང་མཆི་ལགས་སོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། ས་འཛིན་གྱི་རྒྱལ་པོའི་བུ་མོ་རྒྱལ་པོའི་གཞོན་ནུ་མ་ལྔ་དཀར་ཞེས་བྱ་བས་དྲི་བ་གཅིག་གི་ལན་མ་ཐོབ་ནས་མུ་སྟེགས་ཅན་ཐམས་ཅད་ཕམ་པར་བྱས་ཏེ། དེ་རིང་དུ་ཞག་བདུན་ལོན་ནས་འདི་སྐད་ཅེས་རྒྱལ་པོ་ཟས་གཙང་གི་བཙུན་མོ་སྒྱུ་འཕྲུལ་ཆེན་མོ་ཞེས་བྱ་བ་ཞིག་ཡོད་དེ། དེའི་སྲས་དེ་གཽ་ཏཱ་མའི་རྒྱུད་གཟུགས་བཟང་པོ་སངས་རྒྱས་ཞེས་བྱ་བ་ཞིག་ཡོད་དོ་ཞེས་གྲག་གིས་དེའི་སྤྱན་སྔར་འགྲོའོ་ཞེས་སྨྲ་ཞིང་འོང་ངོ ། །དེ་ནས་དེ་འོང་བ་ན་དེའི་ཚེ་མཉན་ཡོད་ནས་རྒྱལ་བུ་རྒྱལ་བྱེད་ཀྱི་ཚལ་དེའི་བར་འཁོར་གྱིས་རྒྱས་པར་གྱུར་ཅིང ། རྔ་བོ་ཆེ་དང་དུང་དང་རོལ་མོའི་སྒྲས་མཉན་ཡོད་ནས་རྒྱལ་བུ་རྒྱལ་བྱེད་ཀྱི་ཚལ་དེའི་བར་གྲགས་པར
58.133a
གྱུར་ཏོ། །དེ་ནས་གཞོན་ནུས་གསོལ་པ། བཅོམ་ལྡན་འདས་བདག་ཀྱང་བདུད་སྡིག་ཅན་ཚོལ་ལ། བསོད་ནམས་དང་ལྡན་པ་རྣམས་ཀྱང་དེ་སྐད་མཆི་ན། དེའི་དྲི་བ་སུ་ལན་ལྡོན་པར་འགྱུར་ལགས། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་བཀའ་སྩལ་ཏོ། །སྐྱེས་བུ་བརྟན་པོས་རྟག་ཏུ་ནི། །གནོད་སེམས་མེད་པར་བུ་བཞིན་སྦྱིན། །ཉམས་ལ་ནམ་ཡང་མིན་ཞེས་གྲགས། །དྲི་བ་འདི་ཡི་ལན་ཐོབ་ཤིག་།དེ་ནས་ཉན་ཐོས་ཆེན་པོ་བརྒྱད་བཅུ་དང ། ཕུག་སྦས་ལ་སོགས་པ་བྱང་ཆུབ་སེམས་དཔའི་ཚོགས་ཀྱིས་ཚིག་འཐུན་པར་ཚིགས་སུ་བཅད་པ་འདི་སྨྲས་སོ། །གནོད་སེམས་མེད་པའི་སེམས་ཀྱིས་སུ། །གཡེལ་ལམ་ཚུལ་ཁྲིམས་ལྡན་ཡང་རུང ། །མཛའ་བོ་དགྲ་ལ་བུ་བཞིན་དུ། །ཐམས་ཅད་ཏུ་ནི་སྦྱིན་པ་བསྔགས། །བཅོམ་ལྡན་འཇིག་རྟེན་མགོན་པོ་ཡིས། །དྲི་བ་འདི་འདྲ་གསུངས་པ་གང ། །འདི་འདྲ་བདག་ཅག་མ་ཐོས་ན། །རེ་ཤིག་འཇམ་དཔལ་གྱིས་རྟོགས་ཤིག་།དེ་ནས་འཇམ་དཔལ་ལ་སོགས་པའི་བྱང་ཆུབ་སེམས་དཔའི་ཚོགས་དེ་དག་གིས་ཀྱང་དེ་བཞིན་དུ་ཚིགས་སུ་བཅད་པ་དེ་ཉིད་ཀྱིས་ལན་གླན་ཏོ། །དེ་ནས་བཅོམ་ལྡན་འདས་ཀྱིས་ལི་ཙ་བི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ལ་བཀའ་སྩལ་པ། གཞོན་ནུ་ཁྱོད་ཀྱིས་དྲིས་པ་འདིའི་ལན་ཐོབ་ཤིག་།གཞོན་ནུས་གསོལ་པ། བཅོམ་ལྡན་འདས་རེ་ཤིག་གླང་པོ་ཆེ་ཆེན་པོ་འདི་དག་ཐམས་ཅད་ཀྱིས་རྒན་རིམས་བཞིན་ཇི་ལན་འདེབས་སུ་སྩལ་དུ་གསོལ། དེ་ནས་རྒྱལ་པོའི་གཞོན་ནུ་མ་ལྔ་དཀར་རྒྱལ་པོའི་གཞོན་ནུ་མ་ལྔ་བརྒྱ་དང་ལྷན་ཅིག་བཅོམ་ལྡན་འདས་ལ་ཕྱག་འཚལ་ཏེ། བཅོམ་ལྡན་འདས་ལ་མཆོད་པ་དཔེ་མེད་པ་དག་བྱས་ནས་རྔ་བོ་ཆེ་དག་བརྡུངས་སོ། །བརྡུངས་ནས་འདི་སྐད་ཅེས་སྨྲས་སོ། །བརྟན་པོ་གང་དང་གང་དག་རྔ་བོ་ཆེ་ཆེན་པོའི་མདོ་ཉན་པར་འདོད་ནས་ལྷགས་པ་དེ་དག་བདག་གི་རྔ་བོ་ཆེ་བསྒྲགས་པ་གསན་ནས་དྲི་བ་དེའི་ལན་ལོན་ཅིག་།གཞོན་ནུས་གསོལ་པ། བཅོམ
58.133b
ལྡན་འདས་ལན་ལྡོན་དུ་སྩལ་དུ་གསོལ། དེ་དག་གིས་གསོལ་པ། བཅོམ་ལྡན་འདས་རེ་ཤིག་བུད་མེད་ནི་རང་བཞིན་གྱིས་མི་བརྟན་པ་ལགས་པས་དེའི་སླད་དུ་བདག་ཅག་ལན་ལྡོན་རྔོ་མི་ཐོག་ལགས་སོ། །གཞོན་ནུས་ཀྱང་གསོལ་པ། བཅོམ་ལྡན་འདས་བུད་མེད་འདི་རང་བཞིན་གྱིས་གཞོན་ནུ་མ་ལགས་ན་བདག་སྐྱེས་པར་གྱུར་པས་བུད་མེད་ཀྱིས་སྨྲས་པའི་དྲི་བ་ལན་གླན་ལགས་སམ། ལྔ་དཀར་གྱིས་སྨྲས་པ། གཞོན་ནུ་ཁྱོད་མགོན་པོའི་བསྟན་པ་ལ་ཞུགས་ནས་ཁྱོད་ཀྱིས་ཆོས་ཉིད་ཀྱང་ཐོས་ན་ཅི་ད་དུང་སྐྱེས་པའོ། །བུད་མེད་དོ་སྙམ་པའི་ཕྱིན་ཅི་ལོག་གི་འདུ་ཤེས་མ་སྤངས་སམ། སྨྲས་པ། སྲིང་མོ་ཇི་ལྟར་དེ་ཡིན། དེ་ནས་ལྔ་དཀར་གྱིས་སྨྲས་པ། རེ་ཤིག་བཅོམ་ལྡན་འདས་ཀྱང་གང་གི་ཕྱིར་དེ་སྐད་དུ་གསུང་ན་དེའི་ཕྱིར་ཕྱིན་ཅི་ལོག་གི་མཚན་ཉིད་ཅན་ཡིན་ནོ། །གཞོན་ནུས་ལྔ་དཀར་ལ་སྨྲས་པ། རེ་ཤིག་ཇེ་ཐོག་པར་དེ་བཅོམ་ལྡན་འདས་ལ་གསོལ་ཅིག་།དེའི་འོག་ཏུ་འདི་བདག་དང་ལྷན་ཅིག་སྨྲ་བར་བྱའོ། །འོད་སྲུང་གིས་གསོལ་པ། བཅོམ་ལྡན་འདས་གཞོན་ནུ་དེ་སྐད་ཅེས་མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རེ་ཤིག་གཞོན་ནུ་ཁོ་ན་ལན་འདེབས་པར་འགྱུར་རོ། །གཞོན་ནུས་ཀྱང་སྨྲས་པ། བུ་མོ་ཁྱོད་སུ་ཡིན་སྨྲས་པ། བདག་ནི་ལྔ་དཀར་ཞེས་བྱ་བ་ཡིན་ནོ། །སྨྲས་པ། སྲིང་མོ་ཅི་ཁྱོད་ཀྱིས་དཀར་པོ་ལྔ་ཐོབ་བམ། ལྔ་དཀར་གྱིས་སྨྲས་པ། ཆོས་རྣམས་ནི་མིང་མེད་པ་ཡིན་ཏེ། མིང་ནི་རྟོག་པས་ཀུན་རྫོབ་ཏུ་བསྟན་པའོ། །གཞོན་ནུའི་མཆོག་འདི་ལྟར་དོན་དམ་པར་ནི་དེ་སྟོང་པ་ཉིད་ཡིན་གྱིས་དེ་ལྟར་ཤེས་པར་གྱིས་ཤིག་།གཞོན་ནུས་སྨྲས་པ། ལྷ་མོ་ད་དུང་ཡང་ཕྱིན་ཅི་ལོག་མ་སྤངས་སམ། འདི་ལ་གལ་ཏེ་གཞོན་ནུ་འམ། གཞོན་ནུ་མ་ཞེས་བྱ་བ་རྙེད་ན་དེ་མྱུར་དུ་སྨྲོས་ཤིག་།ལྔ་དཀར་གྱིས་སྨྲས་པ། གཞོན་ནུ་ལེགས་སོ་ལེགས་སོ། །འདི་དྲི་བའི་ལན། དེ་ལྟ་བས་ན་ཁྱོད་རྗེས་སུ་གདགས་ན
58.134a
འཇིག་རྟེན་དུ་སངས་རྒྱས་སུ་འགྱུར་བར་ཤེས་སོ། །དེས་སྨྲས་པ། ལྷ་མོ་ཅི་ཁྱོད་ཀྱིས་ད་དུང་དྲི་བ་བཅད་པ་ཤེས་སམ། ཇི་ལྟར་གཞོན་ནུ་དང་གཞོན་ནུ་མ་ཟད་པར་འགྱུར་ཞིང་མི་སྐྱེ་བ་དེ་ལྟར་ཁྱོད་མི་ཤེས་ཏེ། ཁྱོད་ནི་ཉན་ཐོས་དག་ཇི་སྐད་བརྗོད་པ་དེ་བཞིན་དུ་རྗོད་པར་བྱེད་ཀྱི། དྲི་བ་འདི་ནི་འཇམ་དཔལ་གྱིས་ཇི་སྐད་སྨྲས་པ་བཞིན་ཡིན་ནོ། །ལྔ་དཀར་གྱིས་སྨྲས་པ། དཔེར་ན་ཇི་ལྟ་བུ་ཡིན། གཞོན་ནུས་སྨྲས་པ། ཀྱེ་མའོ་ཇི་ལྟར་སྐྱེས་པ་འགའ་ཞིག་ཡི་གེ་རྣམས་ཀྱི་མཐར་ཕྱིན་ནས་བདག་ཉིད་ཀྱི་མིང་བྲིས་ན་ཀློག་མི་ཤེས་པ་དེ་བཞིན་དུ་ལྷ་མོ་ལྔ་དཀར་གྱིས་ཀྱང་ལྔ་དཀར་མི་ཤེས་སོ། །འཕགས་པ་རྔ་བོ་ཆེ་ཆེན་པོའི་ལེའུ། བམ་པོ་ལྔ་པ་སྟེ་ཐ་མ། དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དང ། ནམ་མཁའི་ལྷའི་ཚོགས་དང ། འབྲུག་གི་ཚོགས་ཀྱིས་ཕྱོགས་བཅུ་ནས་གཡོས། རབ་ཏུ་གཡོས། ལྡེག་རབ་ཏུ་ལྡེག་།ཆེམ་ཆེམ་རབ་ཏུ་ཆེམ་ཆེམ་སྟེ། དེ་དག་ཐམས་ཅད་ཀྱིས་དེ་ལྟ་བུའི་མཆོད་པའི་ལས་ཆེན་པོ་བྱས་ན་ལེགས་སོ་ཞེས་བྱ་བ་བྱིན་ཏེ། གཞོན་ནུ་གང་གིས་ཡ་མཚན་ཅན་ཐམས་ཅད་དྲི་བ་གཅིག་གིས་ཚར་བཅད་ཅིང ། སྲོག་ཆགས་བྱེ་བ་བརྒྱ་སྟོང་ཕྲག་དུ་མ་དག་དེ་བཞིན་གཤེགས་པའི་བསྟན་པ་ལ་བཙུད་པའི་ལྷ་མོ་དེ་ལྟ་བུ་དེང་ཐུབ་པ་དང་དེས་བཞག་པའི་དྲི་བ་ཀུན་ཤེས་པ་ལེགས་སོ་ལེགས་སོ། །དེ་ནས་དེའི་ཚེ་མུ་སྟེགས་བྱེད་པ་ཡ་མཚན་ཅན་ཐམས་ཅད་རང་རང་གི་རབ་ཏུ་བྱུང་བ་སྤངས་ནས། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་སྟེ། དེ་ན་གང་དག་རབ་ཏུ་འབྱུང་བ་ལ་མི་སྟེན་པ་དེ་དག་ནི་དགེ་བསྙེན་དུ་གྱུར་ཏོ། །དེ་ནས་ཐམས་ཅད་དང་ལྡན་པའི་འཁོར་དེས་གཞོན་ནུ་ལ་ལེགས་སོ་ཞེས་བྱ་བ་བྱིན་ཏེ། གཞོན་ནུ་ཁྱོད་ཀྱིས་གང་གི་ཕྱིར་དྲི་བ་འདིའི་ལན་གླན་པ་ལེགས་སོ་ལེགས་སོ། །གཞོན་ནུས་སྨྲས་པ། འདི་ནི་བཅོམ་ལྡན་འདས་ཁོ
58.134b
ནའི་མཐུ་ཡིན་གྱི་བདག་གི་ནི་མ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། འཇིག་རྟེན་ཐམས་ཅད་ཀྱིས་མཐོང་ན་དགའ་བ་ངས་ཀྱང་ཚིགས་སུ་བཅད་པ་དེ་ཁོ་ན་བཞིན་དུ་ཤེས་སོ། །ཚིགས་སུ་བཅད་པ་དེའི་དོན་གྱི་ཚུལ་ནི་འདི་ཡིན་ནོ། །བྱང་ཆུབ་སེམས་དཔའ་སྐྱེས་མཆོག་གིས། །རྟག་ཏུ་གནོད་པའི་སེམས་སུ་བྱ། །རྟག་ཏུ་སྦྱིན་པ་བསྔགས་པ་ནི། །ཚུལ་ཁྲིམས་བཀུར་བ་གཡེལ་ལ་མིན། །བྱམས་དང་དགྲ་ལ་བུ་བཞིན་མིན། །ཚིག་འདིའི་རྣམ་དབྱེ་སྣ་ཚོགས་ཉོན། །སྐྱེས་བུ་མཆོག་གིས་ཚུལ་ཁྲིམས་འཆལ་པ་མཐོང་ན་རྟག་ཏུ་གནོད་སེམས་སུ་བྱ་ཞིང་དེ་དག་ལ་ཅུང་ཟད་ཀྱང་སྦྱིན་པ་སྦྱིན་པར་མི་བྱ་སྟེ། དེ་དག་བསྟན་པ་ལ་དགྲ་དང་མཚུངས་པ་ཡིན་པས་འདི་ལ་སྦྱིན་པར་བྱའོ། །འདི་ལ་སྦྱིན་པར་མི་བྱའོ་ཞེས་འབྱུང་པོ་རྣམས་ཀྱི་ཆེད་དུ་བསམ་པར་བྱའོ། །སྦྱིན་པ་རྣམ་པ་གཉིས་སུ་གསུངས་པ་སོ་སོའི་སྐྱེ་བོའི་ཚུལ་ཁྲིམས་དང་ལྡན་པ་དང ། སེམས་ཅན་སྡུག་བསྔལ་བ་ལ་སྙིང་རྗེས་སྦྱིན་པའོ། །གལ་ཏེ་ཚུལ་ཁྲིམས་འཆལ་པ་ལ་སྙིང་རྗེས་བྱིན་ན་གོས་པར་མི་འགྱུར་རམ། ཇི་ལྟར་མདའ་དུག་གིས་བྱུགས་པ་དེས་མ་བྱུགས་པ་ཡང་གོས་པར་འགྱུར་བ་དེ་བཞིན་དུ་དགེ་སློང་ཚུལ་ཁྲིམས་འཆལ་པས་ཀྱང་ཚུལ་ཁྲིམས་དང་ལྡན་པ་གང་ཡིན་པ་དེ་ཡང་ཉམས་པར་བྱེད་དོ། །དེ་ལྟ་བས་ན་འདི་ལ་ཚར་གཅད་པ་ཁོ་ན་ལེགས་ཀྱི་སྦྱིན་པས་ལྟ་ག་ལ་གཟུང ། མཐོང་ན་རྟག་ཏུ་དགྲ་བོ་དང་འདྲ་བར་བྱ་སྟེ། དེས་ན་གནོད་སེམས་སུ་མི་བྱའོ་ཞེས་གསུངས་སོ། །ཚུལ་ཁྲིམས་འདྲེན་མ་མི་བསྟེན་ཏེ། །རྒྱུ་དེའི་ཕྱིར་ན་གནོད་པ་ཡི། །སེམས་ནི་བསྐྱེད་པར་བྱའོ་ཞེས། །སྔོན་གྱི་སངས་རྒྱས་རྣམས་ཀྱིས་གསུངས། །མཛའ་དང་དགྲ་ལ་མཉམ་པ་གང་ཡིན་དང ། །གཡེལ་དང་ཚུལ་ཁྲིམས་ལྡན་ལ་མཉམ་པ་གང ། །གནོད་སེམས་མེད་པར་སྤྱོད་པ་དེ་ཀུན་ནི། །བསྟན་པ་འདི་ལ་རྩཝ་དང་འདྲ་བར་གཟུང ། །བསྟན་པ་ལ་ནི་ངེས་པའི་དོན། །དེ་ལྟར་རབ་ཏུ་བསྔགས་པ་ཡི། །སྤྱོད་པ་སྤུ་གྲིའི
58.135a
སོ་ལྟ་བུར། །རྣོ་བའི་མཆོག་ནི་སྤྱད་པར་གྱིས། །དེའི་ཕྱིར་རྔ་བོ་ཆེ་ཆེན་པོའི་མདོས་བསྒྲགས་སོ། །རྔ་བོ་ཆེ་ཆེན་པོའི་མདོས་ཅི་ཞིག་བསྒྲགས་ཞེ་ན། ཚིགས་སུ་བཅད་པ་དེའི་དོན་གང་ཡིན་པ་དེ་འདིར་རྔ་བོ་ཆེ་ཆེན་པོའི་མདོ་ལས་སྨོས་པས་དེས་ན་མདོ་ཆེན་པོ་འདི་ནི་རྔ་བོ་ཆེ་ཆེན་པོ་ཞེས་བྱའོ། །དེ་ནས་ཇི་ལྟར་ལྷགས་པའི་འཁོར་དེ་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ཏེ། ཀྱེ་མ་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་མཁས་པ་ཇི་ལྟར་རྒྱལ་པོ་གསལ་རྒྱལ་འགྲོ་བ་ལ་ཕན་པའི་དོན་དུ་གཡུལ་ངོར་རྔ་བོ་ཆེ་སྒྲ་འབྱིན་པ་དེ་བཞིན་དུ་རྔ་བོ་ཆེ་ཆེན་པོའི་མདོ་འདི་བསྒྲགས་པ་ན་འགྲོ་བ་ལ་དཀོན་མཆོག་གསུམ་གྱི་བསྔགས་པའི་སྒྲ་བརྗོད་པའི་ཚུལ་གྱིས་སངས་རྒྱས་ཀྱི་གསུང་བ་འདི་ལྟ་སྟེ། དེ་བཞིན་གཤེགས་པ་རྟག་པ། བརྟན་པ། ཞི་བ་ཐེར་ཟུག་པའོ་ཞེས་སངས་རྒྱས་ཀྱི་གསང་བ་འདི་སྒྲོགས་སོ། །དེ་ནས་བཅོམ་ལྡན་འདས་ཀྱིས་ཡང་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ཁྱོད་ཀྱིས་གང་གི་ཚེ་བདུད་བསྟན་པར་མི་ནུས་པ་དེའི་ཚེ་འོད་སྲུང་ཁྱོད་ཀྱིས་རྔ་བོ་ཆེ་ཆེན་པོའི་མདོ་འདི་ཉོན་ལ་ང་འདས་ནས་ལོ་བཞི་བཅུའི་བར་དུ་ཇི་ལྟར་ད་ལྟར་གནས་པ་བཞིན་དུ་དམ་པའི་ཆོས་ཟུང་ཤིག་།ཆོས་ཆེན་པོའི་རྔ་བོ་ཆེ་རྡུངས་ཤིག་།ཆོས་ཆེན་པོའི་རྔ་བོ་ཆེ་དང ། དུང་སྒྲོགས་ཤིག་།དེའི་འོག་ཏུ་ལོ་བརྒྱད་བཅུ་ན་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་དེའི་ཚེ་དེའི་དུས་སུ་གཞོན་ནུ་འཇིག་རྟེན་ཐམས་ཅད་གྱིས་མཐོང་ན་དགའ་བས་དེའི་ཚེ་ཐོག་མར་བདུད་ཀྱིས་བསྒྱུར་བའི་སེམས་ཅན་སྐྲ་དང་ཁ་སྤུ་བྲེགས་པ་དག་གནས་པ་དང ། དེའི་ཚེ་གཞོན་ནུས་སྡིག་ཅན་འཁོར་དང་བཅས་པ། གཟུགས་དང་བཅས་པ་བཅིང་བ་ལྔས་བཅིངས་ནས་རི་བོང་བཞིན་དུ་སྟོན་པར་འགྱུར་ཞིང་རྔ་བོ་ཆེ་ཆེན་པོའི་མདོ་ལས་གསུངས་པའི་ཆོས་ཆེན་པོ་སྒྲོགས་པར་འགྱུར། ཆོས་ཆེན་པོའི་རྔ་བོ་ཆེ་རྡུང་བར་འགྱུར། ཆོས་ཆེན་པོའི་དུང་འབུད་པར་འགྱུར། ཆོས་ཀྱི་མཆོད་སྦྱིན་བྱེད་པར་འགྱུར། ཆོས་ཀྱི
58.135b
རྒྱལ་མཚན་འཛུགས་པར་འགྱུར་རོ། །གསོལ་པ། ནམ་ཞིག་ན་ལགས། བཀའ་སྩལ་པ། གང་གི་ཚེ་ལོ་བརྒྱད་བཅུ་ན་བསྟན་པ་ཉམས་པར་འགྱུར་བ་དེའི་ཚེ་ནའོ། །གསོལ་པ། བཅོམ་ལྡན་འདས་བདག་ཅག་གིས་བལྟ་ལགས་ན་ད་ལྟར་མངོན་སུམ་དུ་མཛད་དུ་གསོལ། དེ་ནས་བཅོམ་ལྡན་འདས་ཀྱིས་གཞོན་ནུ་ལ་བཀའ་སྩལ་པ། མྱུར་དུ་བདུད་སྟོན་ཅིག་།དེ་ནས་གཞོན་ནུས་བཅོམ་ལྡན་འདས་གང་ན་བ་དེ་ལོགས་སུ་གདོང་ཕྱོགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདུད་སྡིག་ཅན་མཆིས་པ་འོ་ནི་ལགས་ཏེ། འོ་ནི་འཇིག་རྟེན་གྱི་ཁམས་གཞན་ནས་མཆིས་ནས་བྱང་ཆུབ་སེམས་དཔའ་བཞིན་དུ་དགེ་སློང་གི་གཟུགས་སུ་མཆིས་པ་ལ་གཟིགས་ཞེས་མཛུབ་མོས་བསྟན་ཏོ། །ཐམས་ཅད་དང་ལྡན་པའི་འཁོར་གྱིས་ཀྱང་བདུད་དེ་བཅིང་བ་ལྔས་བཅིངས་པར་མཐོང་ངོ ། །དེ་ནས་བདུད་ཀྱིས་སྨྲས་པ། གཞོན་ནུ་བདག་མདོ་སྡེ་འདི་ལ་ལན་གཉིས་སུ་བར་ཆད་མི་བྱེད་དོ་ཞེས་ཚིག་དེ་ལན་གསུམ་དུ་སྨྲས་པ་དང ། གཞོན་ནུས་སྨྲས་པ། ཇི་ལྟར་ཡིད་ཆེས་པར་འགྱུར་བདུད་ཀྱིས་སྨྲས་པ། འདི་ལྟར་ཡིད་ཆེས་པར་གྱིས་ཤིག་།སྦྱོར་བ་ཇི་སྙེད་ཀྱིས་བདུད་ཀྱི་ཆ་བྱད་དུ་བྱས་ནས་སེམས་ཅན་རྣམས་དད་པ་བསྒྱུར་བའི་སྦྱོར་བ་དེ་ཐམས་ཅད་བསྟན་པར་བྱའོ། །གཞོན་ནུ་བདག་གིས་རྒྱུན་དུ་ཞུགས་པ་ལ་སོགས་པ་འབྲས་བུ་བཞིའི་བར་གྱིས་ཡོངས་སུ་མྱ་ངན་ལས་འདས་པ་དང ། སངས་རྒྱས་ཀྱི་ཡོངས་སུ་མྱ་ངན་ལས་འདས་པ་ཡང་སྟོན། སྟོང་པ་ཆེན་པོ་ཉིད་སྒོམས་ཤིག་པ་ཡང་སྨྲ། སེམས་ཅན་དུ་ལྟ་བ་ཡང་སྨྲ། སེམས་ཅན་དུ་ལྟ་བ་ཡང་འདོད་པར་བྱེད་དེ། འདི་ལྟར་སེམས་ཅན་ཡོད་དོ་ཞེས་ཀྱང་སྨྲའོ། །བདག་ནི་བདག་གི་ལུས་ནམ་མཁའ་ལ་འབར་བ་ཡང་སྟོན། དུ་བར་འཐུལ་བ་དང ། མེ་ཏོག་གི་ཆར་ཆེན་པོ་འབེབས་པ་ཡང་སྟོན་ཅིང་གང་ངས་སྟོང་པ་ཆེན་པོ་ཞེས་བཤད་པ་དེ་ཐམས་ཅད་ནི་ཞི་བ་ཡིན་ལ། གང་ངས་སེམས་ཅན་ཡོད་དོ་ཞེས་བཤད་པ་དེ་དག་ཐམས་ཅད་ནི་སྟོང་པ
58.136a
ཡིན་གྱིས་སྟོང་པ་ཆེན་པོ་ནི་དེ་ལྟར་གྱིས་ཤིག་།སེམས་ཅན་ཡོད་དོ་ཞེས་བྱ་བ་ནི་དེ་ལྟར་ཤེས་པར་གྱིས་ཤིག་ཅེས་ཀྱང་སྨྲའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བདུད་སྡིག་ཅན་དེ་ལྟ་བུ་བྱེད་ནུས་པ་ལ་ལྟོས། སངས་རྒྱས་ཡོངས་སུ་མྱ་ངན་ལས་འདའ་བའི་བར་འདི་ཡང་སྟེན་པར་བྱེད་ན། དགེ་སློང་དག་བདུད་ཀྱིས་དེ་ལྟར་བྱས་ན་སེམས་ཅན་རྣམས་ཇི་ལྟར་ཡིད་ཆེས་པར་མི་འགྱུར། དགེ་སློང་དག་དེ་ལྟ་བས་ན་སུ་ཡང་ཡོངས་སུ་མྱ་ངན་ལས་འདའ་བ་ནི་འདི་ལྟ་བུའི་ཚིག་གཉིས་སྨྲ་བ་ན། དེ་ནི་བདུད་ཡིན་པར་བལྟའོ། །གང་དག་དེ་སྐད་དུ་སྔ་ཕྱིར་ཚིག་གཉིས་སྨྲས་ནས་ཡོངས་སུ་མྱ་ངན་ལས་འདའ་ན། དེ་ནི་ངའི་ཉན་ཐོས་མ་ཡིན་པར་བལྟའོ། །དགེ་སློང་དག་དེ་ལྟ་བས་ན་ཆོས་རྣམ་པར་འཕྲུལ་པས་ཀྱང་མ་ཡིན་འབྲས་བུ་བཞིས་ཀྱང་མ་ཡིན། བསམ་གཏན་གྱིས་ཀྱང་མ་ཡིན། མངོན་པར་ཤེས་པའི་རྩེ་བས་ཀྱང་མ་ཡིན་ཏེ། དེ་དག་ནི་དེའི་ཕྱོགས་ཡིན་པར་དེ་དག་ལ་ཡིད་ཆེས་པར་མི་བྱའོ། །གང་དག་ཇི་ལྟར་ཡང་རུང་བ་དེ་སྐད་དུ་སྔ་ཕྱིར་ཚིག་གཉིས་སྨྲས་ནས་དེའི་འོག་ཏུ་ཡོངས་སུ་མྱ་ངན་ལས་འདའ་བ་དེ་དག་ནི་བདུད་ཀྱིས་སྤྲུལ་པ་ཡིན་པར་བལྟའོ། །འོད་སྲུང་ང་ཡོངས་སུ་མྱ་ངན་ལས་འདས་ནས་ལོ་བདུན་བརྒྱའི་བར་དུ་ངའི་ཉན་ཐོས་རྣམས་ཡོངས་སུ་མྱ་ངན་ལས་འདའ་བར་འགྱུར་ཏེ་དེ་དག་ནི་འདི་ལྟ་བུའི་ཚིག་གཉིས་པོ་ཉོན་མོངས་པ་གང་ཡིན་པ་དེ་ནི་སྟོང་པའོ། །ཞི་བ་གང་ཡིན་པ་དེ་ནི་མྱ་ངན་ལས་འདས་པའོ་ཞེས་སྨྲ་ཞིང་མྱ་ངན་ལས་འདའ་བར་འགྱུར་རོ། །དེ་ཕྱིན་ཅད་ནི་ཉན་ཐོས་སམ། བྱང་ཆུབ་སེམས་དཔའ་ཡོངས་སུ་མྱ་ངན་ལས་འདའ་བར་མི་འགྱུར་ཏེ། དེ་ཅིའི་ཕྱིར་ཞེ་ན། འདི་ལྟར་སངས་རྒྱས་ཀྱིས་བྱིན་གྱིས་བརླབས་པའི་ཕྱིར་རོ། །ཡང་དེ་ཅིའི་ཕྱིར་ཞེ་ན། དེའི་ཚེ་མི་རྣམས་སྟོང་པ་ཉིད་ལ་ཆད་པ་དང་རྟག་པར་ལྟ་ཞིང་སྤྱོད་དེ། རུང་བ་མ་ཡིན་པ་དང་འདྲེན་མར་འགྱུར་རོ། །དེ་ལྟ་བས་ན་དེ་དག་སྟོང་པ་ཆེན་པོ་ཉིད་ལ་རུང་བ་མ་ཡིན་པ་ཆད་པ་དང ། རྟག་པས་འགྲིབ་པ
58.136b
ཉིད་དང ། འཕེལ་བ་ཉིད་དུ་སྨྲ་ཞིང་དེ་བཞིན་གཤེགས་པའི་སྙིང་པོའི་གཏམ་བསྟན་པ་ན་སྨོད་པས་སངས་རྒྱས་རྟག་པ་ཉིད་ཀྱི་གཏམ་སྤོང་བར་འགྱུར་ཏེ། དེ་ཉིད་ཀྱིས་ཡོངས་སུ་མྱ་ངན་ལས་འདའ་བར་མི་འགྱུར་རོ། །གང་དག་འདི་ལྟར་བདུད་ཀྱི་མྱ་ངན་ལས་འདས་པའི་འབྲས་བུས་ཡོངས་སུ་མྱ་ངན་ལས་འདའ་བར་འགྱུར་བ་དེ་དག་ཐམས་ཅད་ནི་བདུད་ཀྱིས་སྤྲུལ་པ་ཡིན་པར་རིག་པར་བྱའོ། །མྱ་ངན་ལས་འདའ་བར་འགྱུར་བ་གང་དག་ཡིན་པ་དེ་དག་ཀྱང་ཕལ་ཆེར་བདུད་ཀྱིས་སྤྲུལ་པ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ལ་སོགས་པ་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག་ང་ཡོངས་སུ་མྱ་ངན་ལས་འདས་ནས་ཁྱེད་ཀྱིས་ཕྱི་མའི་ཚེ་ཕྱི་མའི་དུས་ན་དམ་པའི་ཆོས་འབྱིན་པར་སུ་འགྱུར། འོད་སྲུང་ཆེན་པོ་ལེགས་སོ། །ང་འདས་ནས་དམ་པའི་ཆོས་འབྱིན་པར་འགྱུར་རམ་ཞེས་ལན་གསུམ་གྱི་བར་དུ་སྤྲོ་བ་བསྐྱེད་ཀྱང་སྤྲོ་བར་མི་བྱེད་དོ། །དེའི་ཚེ་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པ་ལ་ཁྱད་དུ་གསོད་པར་མ་སེམས་ཤིག་།ང་ལ་གང་དག་ཕྱི་མའི་ཚེ་ཕྱི་མའི་དུས་ན་དམ་པའི་ཆོས་འཛིན་པར་འགྱུར་བའི་སློབ་མ་མང་དུ་ཡོད་དེ་གོང་དུ་མདོ་འདི་ལས་གསུངས་པ་བཟང་སྐྱོང་དང ། ཕུག་སྦས་ལ་སོགས་པ་ལྔ་བརྒྱ་པོ་དེ་དག་གི་ཕྱི་མ་ཤོས་གང་ཡིན་པ་དེ་ཡིན་པར་འགྱུར་རོ། །འོད་སྲུང་དེ་ཡང་གང་ཞེ་ན་ལི་ཙ་བི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་ཉིད་ཡིན་ཏེ། ཕྱི་མའི་དུས་ན་ལྷོ་ཕྱོགས་ཀྱི་མཁས་པར་གྱུར་ནས་ཆོས་ཀྱི་རྔ་བོ་ཆེ་ཆེན་པོ་རྡུང་བར་འགྱུར། ཆོས་ཀྱི་དུང་འབུད་པར་འགྱུར་རོ། །དེ་ནས་གཞོན་ནུས་བདུད་བཀྲོལ་ཏེ། བསྟན་ནས་ཆོས་ཇི་ལྟ་བ་དེ་བཞིན་དུ་མནའ་བསྒགས་ཏེ། དེའི་འོག་ཏུ་གཏད་དོ། །དེ་ནས་ཐམས་ཅད་དང་ལྡན་པའི་འཁོར་དེས་གཞོན་ནུ་ལ་སྨྲས་པ། གཞོན་ནུ་ཁྱོད་བཅོམ་ལྡན་འདས་ཀྱིས་ལུང་བསྟན་པ་ཡིན
58.137a
ཡིན་གྱིས་ཕན་པ་སྟོན་པ་ཆོས་ཀྱི་རྔ་བོ་ཆེ་རྡུངས་ཤིག་།རྔ་བོ་ཆེ་ཆེན་པོའི་མདོ་སྨྲོས་ཤིག་།ཆོས་ཀྱི་དུང་བུས་ཤིག་ཅེས་ཚིག་ཏུ་སྨྲས་སོ། །དེ་ནས་བཅོམ་ལྡན་འདས་ཀྱིས་ཡང་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཁྱོད་ནི་ཞིང་སྲུང་བ་ལྟ་བུར་མ་ནུས་ཏེ་ཞིང་སྲུང་བཞིན་དུ་ཐབས་ལ་མཁས་པའི་གཞོན་ནུས་མདོ་འདི་ཐམས་ཅད་མཉན་ནས་ལུས་ལ་ཐོགས་ཏེ། འཇིག་རྟེན་དུ་མངོན་སུམ་དུ་འབྱིན་པར་འགྱུར་རོ། །དེ་ནི་ངས་ས་བདུན་པ་ལ་བཞག་སྟེ་མི་ཕལ་པ་ཞིག་ཏུ་བྱིན་གྱིས་བརླབས་ནས་གང་གི་ཚེ་ལོ་བརྒྱད་བཅུ་པ་ལ་བསྟན་པ་ཉམས་པར་འགྱུར་བ་དེའི་ཚེ་ལྷོ་ཕྱོགས་སུ་ཡུལ་མུ་རུན་དུ་ཞེས་བྱ་བ་ན་ཆུ་བོའི་འགྲམ་ལ་རྟེན་པའི་གྲོང་ཁྱེར་དམག་གིས་མི་ཚུགས་པ་ཞེས་བྱ་བ་དང ། ཉེ་བའི་གྲོང་ཕྲེང་བ་ཆེན་པོ་ཞེས་བྱ་བར་ཀ་ཡོ་རི་ཞེས་བྱ་བའི་རིགས་རྒྱུད་དེར་སྐྱེས་ནས་ངའི་མིང་འཆང་བའི་དགེ་སློང་ཞིག་ཏུ་གྱུར་ཏེ། ཞིང་སྲུང་བའི་ཐབས་མཁས་པས་ངའི་དགེ་སྦྱོང་གཡེལ་བ་རྣམས་ཀྱི་ནང་དུ་རབ་ཏུ་བྱུང་ནས་དེ་དག་བསྡུ་བའི་དངོས་པོས་བསྡུས་ཏེ། མདོ་འདི་རྙེད་ནས་ལུས་ལ་བཅངས་ཏེ། དགེ་འདུན་དག་པར་བྱས་ནས་དང་པོ་རུང་བ་མ་ཡིན་པའི་གཞི་ཆེན་པོ་ཡོངས་སུ་སྤངས་ཏེ་ཆོས་ཆེན་པོ་སྒྲོགས་པར་འགྱུར། རྔ་བོ་ཆེ་ཆེན་པོའི་མདོ་ལས་གསུངས་པའི་ཆོས་ཀྱི་དུང་དང ། ཆོས་ཀྱི་རྒྱལ་མཚན་སྒྲོགས་པར་འགྱུར་རོ། །གཉིས་པ་ཐེག་པ་ཆེན་པོའི་མདོ་སྟོང་པ་ཉིད་ཀྱི་གཏམ་སྨྲ་བར་འགྱུར་རོ། །གསུམ་པ་སེམས་ཅན་གྱི་ཁམས་རྟག་པའི་གཏམ་དང ། རྔ་བོ་ཆེ་ཆེན་པོའི་མདོའི་གཏམ་སྨྲ་བར་འགྱུར་རོ། །ཆོས་ཆེན་པོའི་རྔ་བོ་ཆེ་རྡུང་བར་འགྱུར། ཆོས་ཆེན་པོའི་དུང་འབུད་པར་འགྱུར། ཆོས་ཀྱི་རྒྱལ་མཚན་འཛུགས་པར་འགྱུར། ངའི་མངོན་སུམ་དུ་གོ་གྱོན་པར་འགྱུར་རོ། །ཕྱིས་མདོ་འདི་ཐོས་ནས་ན་ཚོད་ཆེན་པོར་འགྱུར་ཏེ། ལོ་བརྒྱར་མདོ་འདིའི་གཏམ་སྨྲ་ཞིང་ཆོས་ཀྱི་ཆར་འབེབས་པར་འགྱུར་རོ། །ལོ་བརྒྱ་འདས་པའི་འོག་ཏུ་དེ་ལྷོ་ཕྱོགས་དེར་ལྷོ་ཕྱོགས་ཀྱི་མི་རྣམས་ཀྱི་ནང་དུ
58.137b
རྣམ་པར་འཕྲུལ་པ་ཆེན་པོས་རྣམ་པར་འཕྲུལ་ཞིང་ཡོངས་སུ་མྱ་ངན་ལས་འདས་པ་སྟོན་པར་འགྱུར་རོ། །རྒྱུ་དེས་ན་ཞིང་སྲུང་བའི་ཐབས་མཁས་པ་བཞིན་ནོ། །འོད་སྲུང་ད་ལྟར་བཟང་སྐྱོང་དང ། ཕུག་སྦས་ལ་སོགས་པའི་ཚིག་གི་སྐྱེས་བུས་ཕལ་པའི་བཞིན་ཏེ་འཛིན་མི་ནུས་པའི་སྙོམ་ལས་ཅན་དུ་གྱུར་ཏོ། །དེ་ནི་སྐྱེས་བུ་ཕལ་པ་ཁྲོ་བ་སྨོད་པར་བྱེད་པ་དེ་འདྲ་བ་རྣམས་ཀྱི་ནང་དུ་རྣམ་པར་འཕྲུལ་བ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་རོ། །གསོལ་པ། ཇི་ལྟར་ལགས། བཀའ་སྩལ་པ། བྱང་ཆུབ་སེམས་དཔའ་རྣམས་ཇི་ལྟ་བ་དེ་ལྟར་རོ། །གསོལ་པ། བྱང་ཆུབ་སེམས་དཔའ་རྣམས་ཇི་ལྟ་བུ་ལགས། བཀའ་སྩལ་པ། ཆོས་ཀྱི་རྣམ་པར་འཕྲུལ་པས་མ་ཡིན། འབྲས་བུ་བཞི་ཐོབ་པས་མ་ཡིན་ཏེ། དེ་དག་ནི་ས་འཕོ་བ་དང ། སངས་རྒྱས་དང་བཅས་པའི་སངས་རྒྱས་ཀྱི་ཞིང་དུ་འགྲོ་བས་སོ། །དེར་ཡང་གདུལ་བའི་སེམས་ཅན་དག་ཡོད་ན་སེམས་ཅན་དེ་འདྲ་བ་དག་གི་ནང་དུ་བཅོམ་ལྡན་འདས་ཤཱཀྱ་ཐུབ་པ་འདི་བྱོན་པ་ལ་ལྟོས་ཤེས་སྨྲ་ཞིང་དེ་བཞིན་གཤེགས་པ་ནི་རྟག་པ། བརྟན་པ། ཞི་བ། ཐེར་ཟུག་པ་ཡིན་པ་དེ་ལྟ་བུ་དེ་ལ་ལྟོས་ཤིག་།ངས་བརྟན་པ་དང་བདེ་བ་བསྟན་པ་བཤད་པ་ནི་དེ་ལྟ་བུ་ཡིན་པར་ཤེས་པར་གྱིས་ཤིག་ཅེས་ལུང་བསྟན་པར་འགྱུར་རོ། །དེ་ནས་ཕྱོགས་བཅུ་ནས་ནམ་མཁའ་ལས་སངས་རྒྱས་བཅོམ་ལྡན་འདས་རྣམས་ཀྱིས་སོ་སོའི་ཞལ་དེ་ལ་སྟོན་ཅིང་འདི་སྐད་ཅེས་དེ་ནི་དེ་ལྟ་ཡིན་ནོ་ཞེས་གསུང་བར་འགྱུར། འཇིག་རྟེན་ཐམས་ཅད་ཀྱང་དེའི་ཆོས་བསྟན་པ་ལ་ལེགས་པར་བསྟན་ཏོ་ཞེས་ཡིད་ཆེས་པར་འགྱུར་རོ། །དེ་ནས་བར་སྐབས་དེར་ངའི་མིང་འཆང་བའི་དགེ་སློང་དེ་འདི་སྐད་ཅེས་ཀྱེ་མ་གལ་ཏེ་བདག་ལ་རྫུ་འཕྲུལ་གྱི་མཐུ་ཞིག་ཡོད་ན་ཡ་མཚན་ཅན་ཐམས་ཅད་བདག་གིས་གདུལ་བ་ཞིག་ན་ཞེས་སྨྲ་བར་འགྱུར་ཞིང་བདག་ཉིད་ཤིན་དུ་ཕལ་པ་ཡིན་ནོ་སྙམ་དུ་སེམས་པར་འགྱུར་རོ། །དེ་གང་གི་ཚེ་ང་ལ་སློབ་པ་དེའི་ཚེ་བདག
58.138a
ཉིད་ཀྱིས་ཤེས་པར་འགྱུར་ཏེ། དེ་བཞིན་གཤེགས་པའི་བྱིན་གྱིས་བརླབས་ནི་དེ་འདྲའོ། །འོད་སྲུང་དཔེར་ན་རེ་ཤིག་དགའ་བ་རང་ཉིད་ཀྱིས་འབྲས་བུ་ཐོབ་པར་མི་ཤེས་ཏེ། འདི་ས་བཅུ་ཐོབ་པ་ཡིན་ཡང་བདག་གིས་ནི་འབྲས་བུ་མ་ཐོབ་བོ་སྙམ་དུ་བདག་ཉིད་ཀྱིས་ཤེས་སོ། །དེ་ཅིའི་ཕྱིར་ཞེ་ན། ངའི་བྱིན་གྱིས་བརླབས་ཀྱིས་གྱུར་ན་ས་བདུན་པ་དང ། ས་བརྒྱད་པ་ལ་གནས་པ་ཅི་སྨོས། རབ་འབྱོར་གཞན་ཡང་དཔེར་ན་དེ་བཞིན་གཤེགས་པས་ཡུངས་ཀར་གྱི་འབྲུའི་ནང་དུ་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་རབ་ཏུ་མང་པོ་གང་དག་ཡིན་པ་དེ་དག་བཅུག་ན་སེམས་ཅན་གཅིག་ལ་ཡང་དོག་པ་འམ། ཉམ་ང་བ་འམ། གནོད་པར་འགྱུར་བ་མེད་ཅིང་ཕན་ཚུན་ཡང་བདག་ཅག་གང་དུ་ཁྲིད་པ་དང ། ཁྱེར་བ་དང ། བཅུག་པ་ཡང་མི་ཤེས་ལ་བྱ་བ་དེ་ཡང་རབ་ཏུ་སྤྱོད་དོ། །དེ་བཞིན་དུ་ཇི་ལྟར་ངས་མཁྱེན་པ་དེ་ལྟར་ཁྱོད་ཀྱིས་ཀྱང་ཤེས་ལ་གཞན་གྱིས་ཀྱང་ཤེས་སོ། །ཁ་ཅིག་གིས་ནི་མི་ཤེས་ཏེ་དེ་ཡང་རང་ཁོ་ནས་མི་ཤེས་སོ། །ཡང་གལ་ཏེ་དེ་ལྟར་སངས་རྒྱས་མཐུ་དང་ལྡན་པ་ལགས་ན་ཉིད་ཇི་ལྟ་བ་བཞིན་དུ་ཅིའི་སླད་དུ་སེམས་ཅན་ཐམས་ཅད་བྱིན་གྱིས་མི་བརླབ་ལགས། རབ་འབྱོར་རེ་ཤིག་སྦྱོར་བ་མཁན་གྱིས་ཆུའི་བུམ་པ་ཁ་མ་བཅད་པ་ཡང་མི་འབོ་བར་བྱེད་ན། ཅིའི་ཕྱིར་སངས་རྒྱས་བཅོམ་ལྡན་འདས་སེམས་ཅན་རྣམས་བྱིན་གྱིས་རློབ་པར་མི་མཛད། འོད་སྲུང་གཞན་ཡང་རེ་ཤིག་འབྱུང་པོའི་སྦྱོར་བ་མཁན་གྱིས་ཆུའི་བུམ་པ་ཡང་འགུལ་བར་བྱེད་ན། ཅིའི་ཕྱིར་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའ་རྣམས་ལ་ཇི་ལྟར་རང་གིས་མི་ཤེས་པ་དེ་ལྟར་བྱིན་གྱིས་རློབ་པར་མི་མཛད། ཅི་དེ་ལྟར་མཛད་དམ་མི་མཛད། གསོལ་པ། བཅོམ་ལྡན་འདས་མཛད་ལགས་ཏེ་ས་བཅུ་ཐོབ་པ་རྣམས་ལ་འང་མཛད་ལགས་སོ། །གསོལ་པ། བྱང་ཆུབ་སེམས་དཔའ་ཡོན་ཏན་ད་དང་ལྡན་ན་དེ་བཞིན་གཤེགས་པ་རྟག་པ་མི་ཕྱེད་པའི
58.138b
སྐུ་མངོན་སུམ་དུ་མཐོང་བར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་ཞིང་དུས་བགྱིད་པར་འགྱུར། བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་བརྒྱད་དང་ལྡན་ན་དེ་བཞིན་གཤེགས་པ་རྟག་པ་མི་ཕྱེད་པའི་སྐུ་མངོན་དུ་མཐོང་བར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་ཞིང་དུས་བྱེད་པར་འགྱུར་ཏེ། བརྒྱད་གང་ཞེ་ན། མདོ་འདི་བཤད་པ་ན་མི་སྐྱོ་བ་དང ། ཐེག་པ་གསུམ་གྱིས་མི་སྐྱེ་ཞིང་གཏམ་རྣམ་པ་གསུམ་ལ་སྐྲག་པ་མེད་པ་དང ། གདུལ་བའི་སེམས་ཅན་རྣམས་མི་སྤོང་བ་དང ། དགེ་འདུན་བྱེ་བ་འཐུན་ཞིང་གཅིག་ཏུ་གྱུར་པར་ཡང་དག་པར་སྤྲོ་བ་དང ། བུད་མེད་དང ། མ་ནིང་དང ། དགེ་སློང་དང ། དགེ་སློང་མ་དང་ཀུན་དུ་འདྲིས་པར་མི་བྱེད་པ་དང ། རྒྱལ་པོ་དང ། དབང་ཕྱུག་དང་ལྷན་ཅིག་ཀུན་ཏུ་འདྲིས་པ་སྤོང་བ་དང ། བསམ་གཏན་དང ། སྤོང་བ་ལ་མངོན་པར་དགའ་བ་དང ། མི་གཙང་བ་དང ། བདག་མེད་པའི་འདུ་ཤེས་བརྒྱད་པོ་དེ་དག་གོ། །གཞན་ཡང་རྒྱུ་བཞིས་འགྱུར་ཏེ། བཞི་གང་ཞེ་ན། བདག་གིས་ཆོས་ངེས་པར་བཟུང་བ་ནི་ཤིན་དུ་ལེགས་པར་བྱས་སོ་སྙམ་པ་དང ། བདག་ཉིད་བདག་གི་སྐྱབས་ཡིན་ནོ་ཞེས་དེ་ལྟར་སེམས་པ་དང ། དེ་བཞིན་གཤེགས་པ་རྟག་པ། བརྟན་པ། ཞི་བ། ཐེར་ཟུག་པའོ་ཞེས་བྱ་བར་ཐེ་ཚོམ་མེད་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་པ་དང ། ཉིན་མཚན་རྟག་ཏུ་དེ་བཞིན་གཤེགས་པའི་ཡོན་ཏན་འདི་ལྟ་བུ་རྗེས་སུ་དྲན་པར་བྱེད་ན་དེ་བཞིན་གཤེགས་པ་རྟག་པ་མི་ཕྱེད་པའི་སྐུ་མངོན་སུམ་དུ་མཐོང་བར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་ཞིང་དུས་བྱེད་པར་འགྱུར་རོ། །འོད་སྲུང་ངས་དེ་ལྟ་བུའི་རིགས་ཀྱི་བུ་དང ། རིགས་ཀྱི་བུ་མོ་རྣམས་ལ་ཆོས་ཀྱི་སྐུ་བརྟག་པར་བྱའོ། །དེ་གྲོང་རྡལ་ལམ། གྲོང་ཁྱེར་རམ། ཚོང་རྡལ་གང་ན་འདུག་ཀྱང་རུང་སྟེ། དེར་ངས་དེ་དག་ལ་བསྟན་ནས་འདི་སྐད་ཅེས་རིགས་ཀྱི་བུ་དག་དེ་བཞིན་གཤེགས་པ་ང་ནི་རྟག་པ
58.139a
ཡིན་ནོ་ཞེས་གསུངས་སོ། །དེང་ཕྱིན་ཆད་སུ་ཞིག་མདོ་སྡེ་འཆང་བ་དང ། ཀློག་པ་དང ། འདོན་པ་དང ། གཞན་ལ་ཡང་སྒྲོགས་པར་བྱེད་ཅིང་འདི་སྐད་ཅེས་དེ་བཞིན་གཤེགས་པ་ནི་རྟག་པ། བརྟན་པ། ཞི་བ་ཐེར་ཟུག་པའོ། །ཞེས་སྨྲ་ཞིང་ཤེས་པར་བྱེད་པ་དང ། བཅོམ་ལྡན་འདས་ནི་རྟག་ཏུ་བཞུགས་སོ་ཞེས་བདག་ཉིད་ཀྱི་བསམ་པ་ཐག་པ་དང ། ངན་གཡོ་མེད་པ་དང ། བཅོས་མ་མ་ཡིན་པ་དང ། སྒྱུ་མེད་པས་དེ་ལྟར་ཤེས་པར་བྱེད་པ་བསམ་པ་ཐག་པ་ཕུན་སུམ་ཚོགས་པ་དེ་ལ་ནི་ངས་བདག་ཉིད་མངོན་སུམ་དུ་བསྟན་པར་བྱའོ། །འོད་སྲུང་ཁྱོད་དད་པར་གྱིས་ཤིག་།ཡིད་ཆེས་པར་གྱིས་ཤིག་།འོད་སྲུང་གལ་ཏེ་དེ་ལྟར་ཆོས་རྣམས་ལ་མི་སྤྱོད་ན་དེས་ང་མཐོང་བར་ཇི་ལྟར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་པར་ཇི་ལྟར་འགྱུར་ངས་ཡང་ཉན་ཐོས་ཀྱི་ཐེག་པ་འདིར་དགེ་སློང་དག་ཆོས་གཅིག་རབ་ཏུ་སྤོངས་ཤིག་དང ། ལན་གཅིག་ཕྱིར་མི་འོང་བར་འགྱུར་བར་ང་གཉའ་ཕོད་དོ་ཞེས་གསུངས་སོ། །དགེ་སློང་དག་དེ་བཞིན་དུ་འདིར་ཡང་སྤྱོད་པའི་ཡོན་ཏན་དང་ལྡན་པ་ན་ཁྱེད་ལ་ལྷ་ཆེན་པོ་རྣམས་བཀུར་སྟི་བྱེད་པར་འགྱུར་རོ་ཞེས་གསུངས་པས་ཁྱེད་ལུས་ལ་སོང་བའི་དྲན་པས་ཟང་ཟིང་ཚོལ་ཞིང་མ་འདུག་ཤིག་།འོད་སྲུང་ངའི་མིང་འཆང་བའི་དགེ་སློང་དེ་ནི་རྟག་ཏུ་དགེ་འདུན་ཡོངས་སུ་དག་པར་བྱེད་པར་འགྱུར་རོ། །འོད་སྲུང་གིས་གསོལ་པ། ཇི་ལྟར་བགྱིད་ལགས། བཀའ་སྩལ་པ། ཞིང་སྲུང་བ་བཞིན་དུ་ཐབས་མཁས་པས་དེ་དག་ཁཝའི་ཚོགས་ཇི་ལྟར་ཇི་སྲིད་དུ་ཀུན་དུ་བསྡུ་བའི་དུས་ཡིན་པ་དེ་སྲིད་དུ་གསོ་བར་འགྱུར་རོ། །དེའི་ཚེ་བཟང་སྐྱོང་དང་ཕུག་སྦས་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་ཡང་དེའི་ཚེ་ང་ནི་སྔོན་གྱི་ཞིང་སྲུང་བཞིན་དུ་ཕྱི་མའི་དུས་ན་ངའི་དམ་པའི་ཆོས་འབྱིན་པར་ངེས་པར་གྱུར་ཏོ། །ངའི་མིང་འཛིན་པའི་དགེ་སློང་དེས་ཀྱང་ཇི་སྲིད་དུ་ཀུན་དུ་བསྡུ་བའི་དུས་ཡིན་པ་དེ་སྲིད་དུ་གཡེལ་བའི་ཚོགས་ཉེ་བར་བསྡུས་ཏེ། བཀུར་སྟི་དང ། རི་མོ་དང ། གླེགས་བམ་དང ། ཟང་ཟིང་གི་སྦྱིན་པ་དང །
58.139b
བ་ལང་གི་ཚོགས་དང ། ཟས་ཀྱི་སྦྱིན་པས་ཡིད་དགའ་བར་གྱུར་པ་དང ། དེའི་འོག་ཏུ་ཚར་གཅད་པའི་དུས་ཤེས་ནས་ཚར་གཅོད་པར་འགྱུར་རོ། །གལ་ཏེ་ཚར་གཅད་པའི་ཕན་བཏགས་པའི་མི་འདུག་ན་སྤྱོད་པ་མ་ཡིན་པ་ལ་གནས་པ་གང་དང་གང་ཡིན་པ་དེ་དང་དེ་དག་ནི་ཇི་ལྟར་མདའ་དུག་གིས་རེག་པས་མ་རེག་པ་ཡང་འབགས་པ་བཞིན་དུ་འགྱུར་བས་ཚར་བཅད་ནས་སྤང་བར་སེམས་སོ། །དེ་ནས་དེས་འདི་སྙམ་དུ་བསམས་ནས་དགེ་སློང་ཚུལ་ཁྲིམས་དང་ལྡན་པ་གཞན་དག་ཚུལ་ཁྲིམས་ཉམས་པར་གྱུར་ན་མི་རུང་ངོ་ཞེས་འདི་དག་ནི་ཆོས་མ་ཡིན་པ་སྟོན་པ་དང ། སྤྱོད་པ་མ་ཡིན་པ་ལ་ཞུགས་པ་ཡིན་པས་དེ་དག་དང་ལྷན་ཅིག་ཐལ་མོ་སྦྱོར་བའི་ལས་ཀྱང་མི་བྱེད། དེ་དག་དང་ལྷན་ཅིག་གསོ་སྦྱོང་གི་ལས་དང ། སྨྲ་བ་དང ། ཀུན་དུ་སྨྲ་བར་ཡང་མི་བྱེད་དེ། ཇི་ལྟར་རྒྱལ་པོ་ལ་སྙིང་རིངས་པས་གཞན་དག་མ་རུངས་པར་བྱེད་པ་ལྟར་དེ་ཡང་དེ་དང་འདྲའོ། །དེས་དེ་ལྟར་བྱས་ནས་ལོ་བརྒྱར་ཆོས་ཀྱི་ཆར་ཕབ། ཆོས་ཆེན་པོའི་རྔ་བོ་ཆེ་བརྡུངས། ཆོས་ཀྱི་དུང་བུས། ཆོས་ཀྱི་མཆོད་སྦྱིན་བྱས། ཆོས་ཀྱི་རྒྱལ་མཚན་བཙུགས་ནས་རྣམ་པར་འཕྲུལ་པ་ཆེན་པོས་དུས་བྱེད་པར་འགྱུར་རོ། །དེ་ནས་ཕྱིས་སངས་རྒྱས་སུ་འགྱུར་ཏེ། སངས་རྒྱས་སྟོང་ཡོངས་སུ་མྱ་ངན་ལས་འདས་ནས་བསྐལ་པ་དྲུག་བཅུ་རྩ་གཉིས་འདས་ནས་རང་སངས་རྒྱས་འབུམ་ཡོངས་སུ་མྱ་ངན་ལས་འདས་ཤིང་གཞན་ཡང་མགོན་པོ་བརྒྱད་ཡོངས་སུ་མྱ་ངན་ལས་འདས་ནས་དེའི་འོག་ཏུ་ངའི་མིང་འཆང་བའི་དགེ་སློང་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་སངས་རྒྱས་ཀྱི་ཞིང་འཇིག་རྟེན་འདི་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ། །དེའི་ཚེ་གང་གིས་རྒྱལ་པོའི་བུ་མོ་ལྔ་དཀར་གྱིས་དྲི་བ་ལན་བཏབ་པ་དེ་ནི་ཕྱིས་རེ་ཤིག་འཇིག་རྟེན་དུ་སངས་རྒྱས་སུ་འགྱུར་ལ། རྒྱལ་པོའི་གཞོན་ནུ་མ་ལྔ་དཀར་ནི་སྔར་དེ་བཞིན་གཤེགས
58.140a
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་གསུམ་གྱི་མགོན་པོར་འགྱུར་ཏེ། གཞོན་ནུ་རྒྱས་པར་ལུང་བསྟན་པ་ནི་ཕྱིས་བྱའོ། །འོད་སྲུང་ལྟོས། འོད་སྲུང་སྐྱེ་བོ་ཕལ་པས་སངས་རྒྱས་འདི་ལྟ་བུ་ཉིད་ལེགས་པར་རྙེད་པར་ཇི་ག་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བདེ་བར་གཤེགས་པ་དེ་ནི་མ་ལགས་སོ། །རེ་ཤིག་དེ་བཞིན་གཤེགས་པ་ནི་སངས་རྒྱས་ཀྱི་ཞིང་གཅིག་ཏུ་གཅིག་ཁོ་ན་སངས་རྒྱས་ཀྱི་མཛད་པ་མཛད་དེ། གཉིས་པ་གང་ཡིན་པ་དང ། གསུམ་པ་གང་ཡིན་པ་དེ་དག་ཀྱང་དེ་བཞིན་ནོ། །དཔེར་ན་ཡུངས་འབྲུའི་ནང་དུ་འཇིག་རྟེན་གྱི་ཁམས་མང་པོ་བཅུག་ལ་དེ་དག་དེ་ཉིད་ན་རྒྱུ་ཡང་བདག་ཅག་གང་དུ་ཁྱེར་བ་འམ། བཅུག་པ་ཡང་མི་ཤེས་ལ་གཞན་དག་ནི་ཇི་ལྟར་ཤེས་པ་དེ་ལྟར་བྱེད་པ་དེ་བཞིན་དུ་ང་ཡང་སེམས་ཅན་གཞན་དག་གིས་ནི་ཤེས་ལ། གཞན་དག་གིས་ནི་མི་ཤེས་སོ། །འཇིག་རྟེན་གྱི་ཁམས་གཅིག་པོ་འདི་ཉིད་ན་ཤཱཀྱ་ཐུབ་པ་དང ། འདི་ཉིད་ན་མི་འཕམ་པ་དང ། འཇིག་རྟེན་གྱི་ཁམས་འདི་ཉིད་སྲེག་པའི་བསྐལ་པ་བྱུང་ན་མི་ཚིག་པ་དང ། འདི་ཉིད་ན་བྱ་རྒོད་ཀྱི་ཕུང་པོའི་རི་འདི་ལ་དམན་པའི་བསྟན་པ་སྟོན་པ་འདི་ལྟ་བུའི་ངོ་མཚར་ཡོད་ན། འཇིག་རྟེན་ཐམས་ཅད་ཀྱིས་མཐོང་ན་དགའ་བ་དགེ་སློང་ཕལ་པའི་ངོ་བོ་ལྟ་བུར་བྱིན་གྱིས་བརླབས་པ་གང་ཡིན་པ་ལྟ་ངོ་མཚར་ཅི་ཆེ། འོད་སྲུང་ཁྱོད་ཀྱིས་རིགས་གང་དུ་དེ་སྐྱེ་བ་ལེན་པ་དེ་དག་ཀྱང་བྱང་ཆུབ་སེམས་དཔའ་ཡིན་པར་དེ་ལྟར་ཤེས་པར་གྱིས་ཤིག་།འོད་སྲུང་བདག་ཅག་གི་རིགས་སུ་འདི་ལྟ་བུ་སྐྱེས་སོ་ཞེས་རིགས་ལ་དགའ་བ་དང ། ཡིད་དུ་འོང་བའི་རང་བཞིན་གྱིས་དེ་ལ་རིམ་གྲོ་བྱེད་པ་གང་ཡིན་པ་དེ་དག་ཐམས་ཅད་ངས་མངགས་པ་ཡིན་པར་ཁྱོད་ཀྱིས་དེ་ལྟར་ཤེས་པར་བྱ་སྟེ། དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ། །རྔ་བོ་ཆེ་ཆེན་པོའི་མདོ་འདི་བསྒྲགས་པ་སྒྲོགས་པ་ན་བདག་ཉིད་ཆེན་པོ
58.140b
དེའི་ཕྱོགས་འཛིན་པའི་འཁོར་བཞི་པོ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་གཞན་གང་དག་ཡིན་པ་དེ་དག་ཐམས་ཅད་ཀྱང་སྔར་གོང་དུ་མདོ་འདི་ལས་འཇིག་རྟེན་ཐམས་ཅད་ཀྱིས་མཐོང་ན་དགའ་བས་ཞུས་པའི་ཚོགས་ཀྱི་ལེའུར་ལུང་བསྟན་ཏོ། །མདོ་འདི་ལ་མཆོད་པ་བྱེད་པའི་སྐྱེས་པ་དང ། བུད་མེད་གང་ཡིན་པ་དེ་དག་ཐམས་ཅད་ཀྱང་གདོན་མི་ཟ་བར་རང་རང་གི་མཆོད་པ་དང་མིང་འཐུན་པའི་སངས་རྒྱས་སུ་འགྱུར་རོ། །འོད་སྲུང་རྔ་བོ་ཆེ་ཆེན་པོའི་མདོ་འདི་ནི་ངའི་མིང་འཆང་བའི་དགེ་སློང་འདི་དང་གཉིས་ཀྱིས་ཆོས་ཆེན་པོའི་རྔ་བོ་ཆེ་རྡུང་བར་འགྱུར་གྱི་གསུམ་པ་ནི་མེད་དོ། །ཡང་བཀའ་སྩལ་པ། འོད་སྲུང་འདས་པའི་དུས་ན་ང་གྲོང་ཁྱེར་ཆེན་པོ་ཡངས་པ་ཅན་དུ་རྒྱལ་པོ་དགའ་སྡེ་ཞེས་བྱ་བར་གྱུར་པ་དེའི་ཚེ། ཡངས་པ་ཅན་གྱི་གྲོང་ཁྱེར་ཆེན་པོ་ནི་དེ་ན་གླིང་བཞི་པའི་ཚད་ཙམ་དུ་གྱུར་ཏོ། །འཛམ་བུའི་གླིང་ནི་མི་མཇེད་ཀྱི་འཇིག་རྟེན་གྱི་ཁམས་ཀྱི་ཚད་ཙམ་ལ་དེ་བཞིན་དུ་གླིང་བཞི་དང ། དེ་བཞིན་དུ་སྟོང་གསུམ་གྱི་སྟོང་ཆེན་པོ་ཡང་དེ་ལྟར་བསྒྲེ་བར་བྱའོ། །དེ་ན་ངའི་ཚེ་ནི་བསམ་གྱིས་མི་ཁྱབ་སྟེ། དེ་ལྟར་ང་འཁོར་ལོས་སྒྱུར་བ་ཉིད་བྱེད་པ་ན་དེའི་ཚེ་གྲངས་མེད་པའི་སྦྱིན་པ་བྱིན། བསོད་ནམས་བསགས། ཚུལ་ཁྲིམས་བསྲུངས། འཕགས་པ་དག་བསྟེན་ཏོ། །སྐྱེས་པ་འམ། བུད་མེད་གང་ཞིག་རྔ་བོ་ཆེ་ཆེན་པོའི་མདོ་བསྒྲགས་པ་ཐོས་ནས་ལན་འགའ་མཆོད་པ་བྱེད་པ་འམ། དཔྱས་གདགས་པ་འམ། བསྟིང་བ་འམ། ཇི་ལྟ་བུས་འགྲོ་ཡང་རུང་བའི་སེམས་གཅིག་ཙམ་སྐྱེད་པར་སེམས་པ་དེས་བསགས་པའི་བསོད་ནམས་གང་ཡིན་པའི་བསོད་ནམས་དེ་ལ་ནི་ངས་བྱས་པའི་བསོད་ནམས་གོང་མ་དེ་ཐམས་ཅད་ཀྱིས་དཔེའི་དཔེར་ཡང་མི་ཕོད་དོ། །དཔེར་ན་རིག་པའི་རྒྱལ་པོ་བྲམ་ཟེ་གཟི་ལྡན་ཞེས་བྱ་བ་ཞིག་ཡོད་དེ། རིག་པ་དེ་ལན་གཅིག་བཀླགས་ན་ཟླ་བ་བཞིར་སྡང་བ་ཐམས་ཅད་ལས་བསྲུང་བ་བྱས་པར
58.141a
འགྱུར་རོ། །འོད་སྲུང་ལྟོས། རེ་ཤིག་རིག་པ་ཕལ་པ་དེའི་མཐུ་ཡང་འདི་ཡིན་ན། མདོ་འདི་ལན་གཅིག་གླགས་ཏེ་ཚེ་མཐར་ཐུག་གི་བར་དུ་བགེགས་མེད་པར་བསྲུང་བ་ཐམས་ཅད་བྱས་པར་ཅིའི་ཕྱིར་མི་འགྱུར། དེ་ལྟ་བས་ན་གང་སུ་ཡང་རུང་བ་དག་གིས་མདོ་འདི་ལ་མཆོད་པ་བྱས་པར་གྱུར་ན། དེ་ནི་སེམས་ཅན་དེ་དག་ཐམས་ཅད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་འགྱུར་ཞིང་འདི་ནས་བཟུང་སྟེ་བྱང་ཆུབ་ལ་ཐུག་པའི་བར་དུ་མདོ་འདི་རྙེད་པར་འགྱུར་རོ། །དེ་ནས་འཁོར་ཐམས་ཅད་ཀྱིས་ལེགས་སོ་ཞེས་བྱ་བ་གསོལ་ཏེ། དབྱངས་ཀྱིས་མགྲིན་འཐུན་པར་ཚིག་གསོལ་པ། ཀྱེ་མའོ་བཅོམ་ལྡན་འདས་གཞོན་ནུ་འདི་ཁྱོད་ཀྱི་མཚན་འཆང་བའི་དགེ་སློང་དུ་གྱུར་ནས་གང་གི་ཚེ་དུས་ལས་འདས་པར་གྱུར་པ་དེའི་ཚེ། གཡང་གཞི་ཅན་གྱི་ཕུག་ན་གནས་པའི་ལྷ་མགོན་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་འདི་ནི་ཁྱོད་འདས་ནས་ལྷོ་ཕྱོགས་སུ་མཆིས་ཏེ་དུས་བགྱིད་པར་འགྱུར་ལགས་སོ། །བཀའ་སྩལ་པ། དེ་མི་འོང་ན་ང་ཉིད་དེར་སོང་སྟེ་བདག་ཉིད་བསྟན་པར་བྱ་ཞིང་ཡུལ་དེར་ཐོག་མ་ཁོ་ནར་མདོ་འདི་བསྐུལ་བར་བྱའོ། །དེ་ཅིའི་ཕྱིར་ཞེ་ན། ཇི་སྲིད་དུ་མདོ་འདི་དེའི་ལག་ཏུ་སོན་པར་མ་གྱུར་པ་དེ་སྲིད་དུ་དེ་ལྡོག་པའི་སེམས་སྐྱེད་པར་འགྱུར་རོ། །ཡང་ན་དེ་ཉིད་དུ་གདུལ་བའི་དབང་ལ་བརྟེན་ཏེ། ང་ཚོགས་ཆེན་པོས་མདུན་གྱིས་བྱས་ནས་དེའི་མདུན་ན་འདུག་པར་བྱ་སྟེ། དེས་ང་མ་མཐོང་ན་དེ་ཉིད་དུ་ལྡོག་པར་འགྱུར་ཞིང་དེར་དེའི་དུས་བྱེད་པར་ཡང་སྟོན་པར་འགྱུར་རོ། །ཡང་ན་ཅི་འདོད་པ་བཞིན་དུ་བྱེད་ཅིང་དེ་གདུལ་བ་གང་ན་ཡོད་པ་དེར་དུས་བྱེད་པར་འགྱུར་རོ། །དེ་བཞིན་གཤེགས་པ་ངའི་སློབ་མ་ས་བཅུ་ཐོབ་པ་ཀུན་དགའ་བོ་ཡང་རྣམ་པར་འཕྲུལ་པ་ཆེན་པོས་དེར་འགྲོ་བར་འགྱུར་རོ། །བརྒྱ་བྱིན་གྱི་བུ་མངོན་མཆོད་ཅེས་བྱ་བ་ལོ་ཉུང་ཟད་ཅིག་གིས་ཐེག་པ་ཆེན་པོ་ལ་ལྷག་པའི་བསམ་པ་ཕུན་སུམ་ཚོགས་ཏེ
58.141b
གཅིག་པུ་ཟླ་མེད་པར་ལྷ་དང་མི་དང ། ལྷ་མ་ཡིན་རྣམས་ཀྱི་ནང་དུ་ཐེག་པ་ཆེན་པོའི་མདོ་འདི་འཛིན་པར་འགྱུར་རོ། །དེ་ལྟ་བས་ན་ཐར་པའི་རྒྱུ་བསྟན་པ་དེ་ཉིད་དེའི་སངས་རྒྱས་ཉིད་དུ་ལུང་བསྟན་པ་དང ། ཐེག་པ་ཆེན་པོ་རྣམ་པར་གཏན་ལ་འབེབས་པའི་དགེ་སློང་དུ་ལུང་བསྟན་པ་ཡིན་ནོ། །དེ་ནི་དེ་ཉིད་ཀྱི་སློབ་མར་གྱུར་ནས་དེ་ཉིད་ཀྱི་མིང་འཛིན་པར་འགྱུར་རོ། །དེ་ནས་དེ་ལྟ་བུ་དག་བྱུང་ནས་ལོ་ལྔ་ལོན་པ་དང ། དེའི་འོག་ཏུ་ཕན་པ་སྟོན་པའི་དགེ་བའི་མིག་ཉམ་ཆུང་བར་འགྱུར་རོ། །དེ་རྣམས་དུས་བདུན་གྱི་བར་དུ་གྱུར་ནས་བར་སྐབས་དེར་བྱང་ཆུབ་སེམས་དཔའ་དམ་པ་དེ་དག་མ་གཏོགས་པར་སྐྱེས་པ་འམ། བུད་མེད་ཀྱང་རུང་སེམས་ཅན་ཕལ་པ་འགའ་ཡང་མེད་དོ། །དེ་ནས་འཁོར་དེ་ཐམས་ཅད་ཀྱིས་མགྲིན་གཅིག་ཏུ་ཡང་ཚིགས་སུ་བཅད་པ་འདི་དག་སྨྲས་སོ། །ཀྱེ་མ་འཇིག་རྟེན་ཀུན་མཐོང་དགའ། །བརྟན་པོ་དགེ་སློང་གཟུགས་གྱུར་ནས། །རིང་ཞིག་བསྟན་པ་འབྱིན་བྱེད་ཅིང ། །ཆོས་ཀྱི་རྔ་ཆེན་རྡུང་བར་འགྱུར། །དེ་ནི་མྱ་ངན་ཡོངས་འདས་ནས། །དེ་འོག་འཇིག་རྟེན་སྟོངས་པར་འགྱུར། །ཆོས་སྨྲ་དེ་ནི་འདས་གྱུར་ནས། །དེ་འདྲ་གཞན་ནི་འགའ་མི་འབྱུང ། །དེ་འདྲའི་དགེ་སློང་རྙེད་དཀའ་སྟེ། །རིམ་གྱིས་སྣང་བ་ཉམས་པར་འགྱུར། །འདི་ལྟར་དེ་ནི་ལྷོ་ཕྱོགས་སུ། །འབྱུང་བའི་ཐ་མ་གཅིག་ཡིན་ནོ། །དམ་པའི་ཆོས་དེ་ནུབ་པའི་དུས་སུ་ཆོས་སྨྲ་བ་དེ་འབྱུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། འོད་སྲུང་དང་དགའ་བོ་དང ། བཟང་སྐྱོང་ལ་སོགས་པ་འཁོར་མང་པོ་དེ་དག་ཐམས་ཅད་དང ། ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་དེ་དག་ཐམས་ཅད་ཡི་རངས་ཏེ། དེ་དག་བྱང་ཆུབ་ཐོབ་པར་བྱ་བའི་ཕྱིར་དེ་བཞིན་གཤེགས་པ་རྟག་པ་ཉིད་ཀྱི་ཆོས་འདོམ་པར་གྱུར་ཏོ། །འཕགས་པ་ཐེག་པ་ཆེན་པོའི་མདོ་རྔ་བོ་ཆེ་ཆེན་པོ་ཞེས་བྱ་བའི་ལེའུ་རྫོགས་སྷོ།། །། རྒྱ་གར་གྱི་མཁན་པོ་བིདྱ
58.142a
ཀ་ར་པྲ་བྷ་དང ། ལོ་ཙ་བ་བན་དེ་དཔལ་གྱི་ལྷུན་པོས་བསྒྱུར། ཞུ་ཆེན་གྱི་ལོ་ཙ་བ་བན་དེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ།། ་་་་།།