རྒྱ་གར་སྐད་དུ། ཨཱརྱ་སརྦ་ཏ་ཐཱ་ག་ཏཱ་དྷཥྛཱི་ཎ་སཏྭཱ་བ་ལོ་ཀེ་ན་བུདྡྷ་ཀྵེ་ཏྲེ་ནི་རྡེ་ཤ་ན་བྱཱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་གྲུ་འཛིན་ན་འཕགས་པ་སྤྱན་རས་གཟིགས་དབང་ཕྱུག་གི་གནས་ལྷའི་ནོར་བུ་རིན་པོ་ཆེ་དཔལ་གྱི་སྙིང་པོ་དང ། མེ་ཏོག་རྒྱས་པ་དང ། ལྷའི་སེངྒེའི་ཁྲི་བཀོད་པ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་སོན་པ་ཤ་སྟག་དང ། བྱང་ཆུབ་སེམས་དཔའ་ཐམས་ཅད་ཀྱང་སྙིང་རྗེ་ཆེན་པོའི་ཤེས་པ་ལ་གནས་པ། ཐམས་ཅད་ཀྱང་སྐྱེ་བ་གཅིག་གིས་ཐོགས་པ་དང ། སྐྱེ་བ་གཉིས་དང ། སྐྱེ་བ་གསུམ་དང ། སྐྱེ་བ་བཅུ་དང ། སྐྱེ་བ་ཉི་ཤུ་དང ། སྐྱེ་བ་སུམ་ཅུ་དང ། སྐྱེ་བ་བརྒྱའི་བར་དག་གིས་ 416b ཐོགས་པ། ཐམས་ཅད་ཀྱང་ས་བརྒྱད་པ་དང ། ས་བཅུ་པ་ལ་གནས་པ་ཤ་སྟག་སྟེ། འཕགས་པ་སྤྱན་རས་གཟིགས་དབང་ཕྱུག་དང ། འཇམ་དཔལ་དང ། དྲི་མེད་ཏོག་དང ། ནོར་དཔལ་དང ། གློག་གི་ཏོག་དང ། དྲི་མེད་འོད་དང ། ཙནྡན་དང ། བདུད་རྩིའི་ཏོག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བདུན་བརྒྱ་དང ། དགེ་བསྙེན་དང ། དགེ་བསྙེན་མ་ཐམས་ཅད་ཀྱང་ལུང་བསྟན་པ་དང་ལྡན་པ། ཏིང་ངེ་འཛིན་ཐོབ་པ། འཇིག་རྟེན་གྱི་ཁམས་ཐ་དད་པ་ནས་འདུས་པ་ལྔ་སྟོང་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་ཐམས་ཅད་ཀྱང་སྔོན་གྱི་སངས་རྒྱས་ལ་བསྙེན་བཀུར་བྱས་པ། དེ་བཞིན་གཤེགས་པའི་ཆོ་འཕྲུལ་མཐོང་བ་བརྒྱ་སྟོང་དང ། གནོད་སྦྱིན་མོ་ཆེན་མོ་ཐམས་ཅད་ཀྱང་བྱང་ཆུབ་སེམས་དཔའི་ཡེ་ཤེས་ཐོབ་པ་ལུང་བསྟན་པ་ཐོབ་པ། ཕྱིར་མི་ལྡོག་པ་དཔེ་མེད་མ་དང ། དྲི་མེད་འོད་དང ། འོད་ཅན་མ་དང ། འཇིགས་བྱེད་མ་དང ། དཔལ་ལྡན་མ་དང ། འཕྲོག་མ་དང ། དུང་ཅན་མ་ལ་སོགས་པ་གནོད་སྦྱིན་མོ་ཆེན་མོ་བརྒྱད་ཅུ་དང ། བརྒྱ་བྱིན་དང ། ཚངས་པ་དང ། རྣམ་ཐོས་ཀྱི་བུ་དང ། ཡུལ་འཁོར་སྲུང་དང ། འཕགས་སྐྱེས་པོ་དང ། མིག་མི་བཟང་དང ། ནོར་བུ་བཟང་པོའི་བུ་དང ། གང་པ་བཟང་པོ་ལ་སོགས་པ་འཇིག་རྟེན་སྐྱོང་བ་ཐམས་ཅད་ཀྱི་བར་དག་དང་ཐབས་ཅིག་ཏུ་བཞུགས་སོ། །དེ་ནས་དེ་དག་ཐམས་ཅད་ཀྱིས་དེ་བཞིན་གཤེགས་པ་སེངྒེའི་ཁྲི་ལ་ 417a ༄#། །བཞུགས་པར་རིག་ནས་རང་རང་གི་དགེ་བའི་རྩ་བ་དག་གིས་དེ་བཞིན་གཤེགས་པ་ལ་ལྷའི་རྒྱན་དང ། ན་བཟའ་དང ། མེ་ཏོག་དང ། མེ་ཏོག་ཕྲེང་དང ། སྤོས་དང ། བྱུག་པ་དང ། རོལ་མོའི་སྒྲ་རྣམས་ཀྱིས་མཆོད་པར་བྱས། རི་མོར་བྱས་སོ། །ཁ་ཅིག་གིས་ལན་འབུམ་ཕྲག་དུ་མར་བསྐོར་བ་བྱས་ཏེ་བསྟོད་དོ། །དེ་ནས་དེའི་ཚེ་བཅོམ་ལྡན་འདས་སེམས་ཅན་ཐམས་ཅད་ལ་དམིགས་པ་སྙིང་རྗེ་ཆེན་པོའི་ཤེས་པ་ལ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེའི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འོད་ཀྱིས་སྣང་བར་གྱུར་ཅིང ། གཟུགས་ཐམས་ཅད་སྣང་བས་ཁྱབ་པར་གྱུར་ནས་སེམས་ཅན་དམུས་ལོང་གང་ཡིན་པ་དེ་དག་གིས་ནི། མིག་གིས་གཟུགས་མཐོང་བར་གྱུར་ཏོ། །འོན་པ་རྣམས་ཀྱིས་ནི་རྣ་བས་སྒྲ་དག་ཐོས་པར་གྱུར་ཏོ། །ནད་ཀྱིས་བཏབ་པ་རྣམས་ནི་ནད་དག་དང་བྲལ་བར་གྱུར་ཏོ། །གོས་མེད་པ་རྣམས་ནི་གོས་དག་ཐོབ་པར་གྱུར་ཏོ། །སྨྱོན་པ་རྣམས་ནི་དྲན་པ་ཐོབ་པར་གྱུར་ཏོ། །ལུས་ཉམས་པ་དང་དབང་པོ་མ་ཚང་བ་རྣམས་ནི་ལུས་དང་དབང་པོ་ཡོངས་སུ་རྫོགས་པར་གྱུར་ཏོ། །དབུལ་པོ་རྣམས་ཀྱིས་ནི་ནོར་དག་ཐོབ་པར་གྱུར་ཏོ། །སེམས་ཅན་གང་དག་ནོར་དང ། ཡོ་བྱད་དང ། ལོངས་སྤྱོད་མེད་པ་དེ་དག་ནོར་དང ། ཡོ་བྱད་དང ། ལོངས་སྤྱོད་དག་དང་ 417b ལྡན་པར་གྱུར་ཏོ། །སེམས་ཅན་ཐམས་ཅད་ཀྱང་བདེ་བ་ཐམས་ཅད་དང་ལྡན་ཞིང་བསམ་པ་ཐམས་ཅད་ཡོངས་སུ་རྫོགས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་གང་ཡིན་པ་དེ་དག་ཐམས་ཅད་ལའང་བསྐུལ་ནས་ཐམས་ཅད་ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་ཏེ། སེམས་ཅན་གང་དག་ལྷ་རྣམས་ཀྱི་ནང་དུ་སྐྱེས་པ་དེ་དག་ཐམས་ཅད་ཀྱིས་ནི་ལྷའི་བདེ་བ་ཡོངས་སུ་སྤངས་ནས་སངས་རྒྱས་རྗེས་སུ་དྲན་པར་བྱས་ཏེ་ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །སེམས་ཅན་གང་དག་མི་རྣམས་ཀྱི་ནང་དུ་སྐྱེས་པ་དེ་དག་གིས་ཀྱང་མིའི་བདེ་བ་ཡོངས་སུ་སྤངས་ནས་ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །སེམས་ཅན་གང་དག་ཀླུ་དང ། གནོད་སྦྱིན་དང ། སྲིན་པོ་དང ། ཡི་དྭགས་དང ། ཤ་ཟ་རྣམས་ཀྱི་ནང་དུ་སྐྱེས་པ་དེ་དག་གིས་ཀྱང་སངས་རྒྱས་རྗེས་སུ་དྲན་པ་སོ་སོར་ཐོབ་ནས་སེམས་ཅན་ཐམས་ཅད་ལ་བྱམས་པར་གནས་པ་དང ། ལུས་དང་སེམས་བདེ་བར་གྱུར་ནས་ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །སེམས་ཅན་གང་དག་གཤིན་རྗེའི་འཇིག་རྟེན་རྣམས་སུ་མུན་པ་མུན་ནག་གི་ནང་དུ་སྐྱེས་པ་དེ་དག་ཀྱང་སངས་རྒྱས་ཀྱི་མཐུས་ཡུད་ཙམ་ཞིག་དྲན་པ་སོ་སོར་ཐོབ་ནས་གཅིག་གིས་གཅིག་ཀུན་ཏུ་ཤེས་པར་གྱུར་ཏེ། དེ་དག་མུན་པ་ 418a ༄#། །ཆེན་པོ་དེ་ནས་ཡོངས་སུ་ཐར་པར་གྱུར་ཏོ། །སེམས་ཅན་ཐམས་ཅད་གཅིག་ལ་གཅིག་བྱམས་པར་གནས་ཤིང་ཉེ་བའི་ཉོན་མོངས་པ་རྣམས་དང་བྲལ་བར་གྱུར་ཏོ། །དེ་ནས་དེའི་ཚེ་ས་ཆེན་པོ་འདི་རྣམ་པ་དྲུག་ཏུ་རབ་ཏུ་གཡོས་ཏེ་མཐོ་བ་དང ། དམའ་བར་གྱུར་ཏོ། །དེ་ནས་འཁོར་འདུས་པ་དེར་འཇམ་དཔལ་གཞོན་ནུར་གྱུར་པ་འདུས་ཏེ་འདུག་པར་གྱུར་ནས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ། བྱང་ཆུབ་སེམས་དཔའི་འདུས་པ་ཆེན་པོ་ཀུན་ཏུ་སྣང་ཞིང་འདུས་པ་ཆེན་པོའི་སྔ་ལྟས་ཀྱང་ཀུན་ཏུ་སྣང་ལ། རིགས་ཀྱི་བུ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་མང་པོ་དག་ལུང་སྟོན་པའང་ཀུན་ཏུ་སྣང་ཞིང་ཆོས་ཀྱི་འབྲེལ་བའི་གཏམ་ཆེན་པོའི་སྔ་ལྟས་ཀྱང་ཀུན་ཏུ་སྣང་བ་ལས་ན། རིགས་ཀྱི་བུ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གི་རེ་བ་ཐམས་ཅད་ཡོངས་སུ་རྫོགས་པར་འགྱུར་ཞིང་ཡེ་ཤེས་ཆེན་པོའང་འཐོབ་པར་འགྱུར་གྱི། རིགས་ཀྱི་བུ། དེའི་ཕྱིར་ཁྱེད་ཀྱིས་སེམས་ཅན་ཐམས་ཅད་ལ་སྙིང་རྗེ་སྐྱེད་ལ། ཕན་པ་དང ། བདེ་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་དགོད་པར་བྱ་བའི་བར་གྱི་ཕྱིར་དེ་བཞིན་གཤེགས་པ་ལ་ཡོངས་སུ་ཞུས་ 418b ཤིག་།རིགས་ཀྱི་བུ། ཕྱི་མའི་དུས་ཕྱི་མའི་ཚེ་ན་སེམས་ཅན་སྡིག་པ་བྱེད་པ། དབུལ་བ། ཉམ་ཆུང་བ། ལུས་མདོག་ངན་པ། རྒ་བ་དང་ན་བས་ཡོངས་སུ་གཟིར་བ། ལོངས་སྤྱོད་ཆུང་བ། ལུས་ཡོངས་སུ་མ་བསྒོམས་པ། ཚེ་ཐུང་བ། བློ་ཆུང་བ། འདོད་ཆགས་དང ། ཞེ་སྡང་དང ། གཏི་མུག་གིས་ཡོངས་སུ་གཟིར་བ་དག་འབྱུང་བ་ཡོད་དེ། རིགས་ཀྱི་བུ། དེ་དག་གི་དོན་དུ་ཆོས་བསྟན་པར་བྱ་བའི་ཕྱིར་དེ་བཞིན་གཤེགས་པ་ལ་གསོལ་བ་ཐོབ་ཅིག་དང ། རིགས་ཀྱི་བུ། དེའི་ཕྱིར་ཁྱོད་ཀྱིས་ཡུན་རིང་པོར་སེམས་ཅན་རྣམས་ཀྱི་དོན་དང ། ཕན་པ་དང ། བདེ་བ་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། སྡིག་པ་ཐམས་ཅད་བཟློག་པར་བྱ་བ་དང ། སྡིག་པ་ཐམས་ཅད་རབ་ཏུ་ཞི་བར་བྱ་བ་དང ། རེ་བ་ཐམས་ཅད་ཡོངས་སུ་རྫོགས་པར་བྱ་བ་དང ། བླ་ན་མེད་པའི་ཡོངས་སུ་མྱ་ངན་ལས་འདའ་བ་དག་བྱས་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཕྱོགས་བཅུར་རྣམ་པར་བལྟས་ཏེ། དེ་བཞིན་གཤེགས་པ་བྱེ་བ་ཕྲག་གངྒཱའི་ཀླུང་གི་བྱེ་མ་སྙེད་དག་ཡིད་ལ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ལན་གསུམ་བསྐོར་བ་བྱས་ནས་ཡན་ལག་ལྔས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སླད་མའི་དུས་སླད་མའི་ཚེ་ན་སེམས་ 419a ༄#། །ཅན་རྒ་བ་དང ། ན་བ་དང ། འཆི་བ་དང ། མྱ་ངན་གྱིས་ནོན་པར་གྱུར་པ། དུས་མ་ལགས་པར་འགུམ་པས་ཡོངས་སུ་གཟིར་བ། ཉམ་ཆུང་བ། མདོག་ངན་པ། ཚེ་ཐུང་བ། ལོངས་སྤྱོད་ཆུང་བ། ལུས་ཡོངས་སུ་མ་བསྒོམས་པ་དག་འབྱུང་བ་མཆིས་ཏེ། དེ་དག་ནི། སེར་སྣ་དང ། འཆལ་བའི་ཚུལ་ཁྲིམས་ཀྱི་སེམས་ཀྱིས་གཅིག་ལ་གཅིག་འགུམ་པར་འགྱུར་ལ། གཅིག་གིས་གཅིག་གི་ནོར་དང ། ལོངས་སྤྱོད་དང ། དབང་ཕྱུག་དག་འཕྲོག་པར་འགྱུར་ཞིང ། གད་མོ་དང ། འཇོ་སྒེག་དང ། བྲོ་གར་དང ། རྩེད་མོ་དག་གིས་མངོན་པར་རྩེ་བ་དང ། མི་རྟག་པ་ལ་རྟག་པར་འདུ་ཤེས་པ་དང ། མི་སྡུག་པ་ལ་སྡུག་པར་འདུ་ཤེས་པར་བགྱིད་ལགས་སོ། །དེ་ཅིའི་སླད་དུ་ཞེ་ན། དེ་དག་རྒྱུ་དེ་དང ། གཞི་དེས་སེམས་ཅན་རྣམས་ལ་མི་དགེ་བ་རྣམ་པ་སྣ་ཚོགས་དག་གིས་གཙེས་ནས་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དག་ཏུའང་སྐྱེ་བར་འགྱུར་ལགས་པས། བཅོམ་ལྡན་འདས། དེའི་སླད་དུ་བདག་དེ་དག་གི་དོན་དང ། སྨན་པ་དང ། བདེ་བ་དང ། རེ་བ་ཐམས་ཅད་ཡོངས་སུ་རྫོགས་པར་བགྱི་བ་དང ། དེ་བཞིན་གཤེགས་པའི་ཡེ་ཤེས་ཐོབ་པར་བགྱི་བ་དང ། སངས་རྒྱས་ཀྱི་ཞིང་དུ་སྐྱེ་བར་བགྱི་བ་དང ། སྡིག་པ་ཐམས་ཅད་བཟློག་པར་བགྱི་བའི་སླད་དུ་དེ་བཞིན་ 419b གཤེགས་པ་ལ་གསོལ་བ་འདེབས་པར་འཚལ་གྱི། བཅོམ་ལྡན་འདས། དེ་བཞིན་གཤེགས་པ་ལ་ནི་མི་མཁྱེན་པ་དང ། མ་རྟོགས་པ་དང ། མ་གཟིགས་པ་དང ། མ་གསན་པ་དང ། རྣམ་པར་མི་མཁྱེན་པ་ཅིའང་མི་མངའ་བས་ཆོས་ཀྱི་འབེལ་བའི་གཏམ་ཉན་པར་འཚལ་བ་དང ། སྔོན་གྱི་སངས་རྒྱས་ལ་བསྙེན་བཀུར་བགྱིས་པ་དང ། ཤེས་རབ་དང་ལྡན་པའི་རང་བཞིན་ཅན་གྱི་བྱང་ཆུབ་སེམས་དཔའ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་མང་པོ་ལྷགས་པ་འདི་དག་རེ་བ་མ་མཆིས་པར་གྱུར་ཅིང ། སླར་མཆི་བར་མི་འགྱུར་བར་བཅོམ་ལྡན་འདས། བཤད་དུ་གསོལ། བདེ་བར་གཤེགས་པ། བཤད་དུ་གསོལ། དེ་ནས་ཐམས་ཅད་དང་ལྡན་པའི་འཁོར་ཇི་ལྟར་ལྷགས་པ་དེ་དག་གིས་ཀྱང་ཡན་ལག་ལྔས་ཕྱག་བྱས་ཏེ་ཚིག་མཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས། ལེགས་པར་བཤད་དུ་གསོལ། བདེ་བར་གཤེགས་པ། ལེགས་པར་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ལན་གཉིས་ལན་གསུམ་དུ་གསོལ་བ་བཏབ་པར་ཐུགས་སུ་ཆུད་ནས་ཕྱོགས་བཅུར་རྣམ་པར་གཟིགས་ཏེ། སྙན་ཅིང་འཇེབས་ལ་ཡིད་དུ་འོང་བའི་གསུང་དབྱངས་ཀྱིས་བྱང་ཆུབ་སེམས་ 420a ༄#། །དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་བའི་ཏིང་ངེ་འཛིན་ཡོད་དེ། ངས་སྔོན་དང་པོ་སེམས་བསྐྱེད་པ་ནས་བཟུང་སྟེ། དེ་བཞིན་གཤེགས་པ་མེ་ཏོག་སྣང་བ་ཀུན་ཏུ་སྟོན་པ་ཞེས་བྱ་བའི་སྤྱན་སྔར་དེ་ཐོས་སོ། །རིགས་ཀྱི་བུ། ཏིང་ངེ་འཛིན་དེའི་མིང་ཐོས་མ་ཐག་ཏུ་སེམས་ཅན་བྱེ་བ་ཕྲག་དགུ་བཅུས་དེ་བཞིན་གཤེགས་པའི་ཡེ་ཤེས་ཐོབ་པར་གྱུར་ནས་ཐམས་ཅད་ཀྱང་དེ་བཞིན་གཤེགས་པས་སངས་རྒྱས་ཀྱི་ཞིང་ཐ་དད་པ་དག་ཏུ་ལུང་བསྟན་ཏེ། ངས་ཀྱང་ལུང་བསྟན་པ་ཐོབ་བོ། ། རིགས་ཀྱི་བུ། ངས་དེ་བཞིན་གཤེགས་པའི་ལྷའི་མཁྱེན་པས་སྔོན་དེ་བཞིན་གཤེགས་པ་སུམ་ཁྲིས་སེམས་ཅན་ཐམས་ཅད་ཀྱི་དོན་དུ་ཆོས་ཀྱི་རྣམ་གྲངས་འདི་བཤད་དེ། ཐམས་ཅད་དུའང་དེ་བཞིན་གཤེགས་པ་ལ་གསོལ་བ་འདེབས་པ་ནི་འཕགས་པ་སྤྱན་རས་གཟིགས་དབང་ཕྱུག་ཁྱོད་ཉིད་དང ། འཇམ་དཔལ་གཞོན་ནུར་གྱུར་པ་ཡིན་ལ། བྱང་ཆུབ་སེམས། དཔའ་སེམས་དཔའ་ཆེན་པོའི་འཁོར་རྣམས་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་འཁོར་ཇི་ལྟར་ལྷགས་པ་འདི་དག་གིས་ཀྱང་ཐོས་ནས་རི་ 420b མོ་དང ། མཆོད་པ་དག་བྱས་ཏེ། དེའི་འོག་ཏུ་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་ངག་གིས་ལུང་བསྟན་པ་ཐོབ་ཅིང་བྱང་ཆུབ་སེམས་དཔའི་ཏིང་ངེ་འཛིན་དག་ཐོབ་པར་གྱུར་ནས་འདོད་པ་ཐམས་ཅད་དུ་འགྲོ་བ་དང ། རེ་བ་ཐམས་ཅད་གྲུབ་པ་དང ། ནད་རྣམས་དང་བྲལ་བར་ཡང་གྱུར་ལ། དགེ་བའི་རྩ་བ་རྣམས་ཡོངས་སུ་སྨིན་པ་དང ། སྒྲིབ་པ་ཐམས་ཅད་སྤངས་པ་དང ། གཟུགས་བཟང་ཞིང་མཛེས་ལ་བལྟ་ན་སྡུག་པ་དང ། ནོར་དང ། འབྲུ་དང ། མཛོད་དང ། བང་བ་རྣམས་འབྱོར་བ་དང ། རྒྱལ་པོ་དང ། རྒྱལ་བུ་དང ། བློན་པོ་རྣམས་ཀྱིས་མངོན་པར་བསྟོད་པར་འོས་པ་དང ། སེམས་ཅན་ཐམས་ཅད་ཀྱིས་ཕྱག་བྱ་བར་འོས་པ་དང ། དྲན་པ་དང་ལྡན་པ་དང ། ཤེས་རབ་དང་ལྡན་པ་དང ། སངས་རྒྱས་དང ། ཆོས་དང ། དགེ་འདུན་ལ་དད་པ་མི་ཕྱེད་པ་དང་ལྡན་པ་དང ། རྫུ་འཕྲུལ་དང་ལྡན་པ་དང ། ཚེ་དང ། ཁ་དོག་དང ། གཟི་བརྗིད་དང ། མཐུ་སྟོབས་དང་ལྡན་ཞིང་རྣམ་པ་ཐམས་ཅད་ཀྱི་མཆོག་དང་ལྡན་པར་གྱུར་ཏེ། ནམ་ཡང་སྡུག་པ་དང་བྲལ་བར་མ་གྱུར་ཅིང ། སྡུག་པའི་སྡུག་བསྔལ་མེད་པར་གྱུར་པ་དེ་དྲན་ཏེ། རིགས་ཀྱི་བུ། དེ་ལྟར་ན། རིགས་ཀྱི་བུའམ། རིགས་ཀྱི་བུ་མོ་དག་ཆོས་སྨྲ་བ་དེ་ལ་མཆོག་ཏུ་གུས་པའི་སེམས་བསྐྱེད་དེ། ཆོས་ཀྱི་རྣམ་གྲངས་འདི་ལ་ཡན་ལག་ལྔས་ཕྱག་བྱས་ཤིང ། མེ་ཏོག་དང ། བདུག་སྤོས་དང ། མེ་ཏོག་ཕྲེང་དང ། 421a ༄#། །བྱུག་པ་དང ། གདུགས་དང ། རྒྱལ་མཚན་དང ། བ་དན་དག་གིས་ལེགས་པར་བརྒྱན་ནས་སངས་རྒྱས་ལ་ཕྱག་འཚལ་ལོ། །ཞེས་བརྗོད་ཅིང་ཕྱག་འཚལ་བར་བྱེད་པ་དང ། ལགས་སོ། །ཞེས་བྱ་བ་སྦྱིན་པར་བྱེད་པ་དང ། འཛིན་པ་དང ། འཆང་བ་དང ། ཀློག་པ་དང ། ཡི་གེར་འབྲིར་འཇུག་པ་དེ་དག་ནི་ཡོན་ཏན་མང་པོ་དང་ལྡན་པར་འགྱུར་རོ། །དེ་དག་ནི་ཚེ་འདི་ཉིད་ལའང་ཡོན་ཏན་མང་པོ་དང་ལྡན་པར་འགྱུར་ཏེ། གཟུགས་བཟང་ཞིང་མཛེས་ལ་བལྟ་ན་སྡུག་པ་དང ། ནད་རྣམས་དང་བྲལ་བ་དང ། ཚེ་རིང་བ་དང ། བློ་བརྟན་པ་དང ། དྲན་པ་དང་ལྡན་པ་དང ། བརྟན་པ་དང་ལྡན་པ་དང ། རྒྱལ་པོ་ཐམས་ཅད་དང ། རྒྱལ་པོའི་བཙུན་མོ་ཐམས་ཅད་དང ། རྒྱལ་བུ་ཐམས་ཅད་དང ། བློན་པོ་ཐམས་ཅད་དང ། དགྲ་ཐམས་ཅད་དང ། སེམས་ཅན་གྱིས་མངོན་པར་བསྟོད་པར་འོས་པ་དང ། ཕྱག་བྱ་བར་འོས་པ་དང ། བསྙེན་བཀུར་བྱ་བར་འོས་པར་འགྱུར་རོ། །ནོར་དང་ཡོ་བྱད་མང་པོར་ཡང་འགྱུར་རོ། །དེ་དག་གི་ཁ་ནས་ཙནྡན་གྱི་དྲིའི་ངད་འབྱུང་བར་ཡང་འགྱུར་རོ། །མིག་ཨུཏྤ་ལ་སྔོན་པོའི་འདབ་མ་འདྲ་བར་ཡང་འགྱུར་རོ། །དེ་དག་གིས་ཉིན་མཚན་དུ་སངས་རྒྱས་དང་བྱང་ཆུབ་སེམས་དཔའ་དག་མཐོང་བར་ཡང་འགྱུར་རོ། །མཚམས་མེད་པ་ལ་སོགས་པའི་སྒྲིབ་པ་ཐམས་ཅད་ཟད་པར་ཡང་འགྱུར་རོ། །དེ་དག་ལ་ལྷ་རྣམས་སྲུང་བར་ཡང་ 421b འགྱུར་རོ། །དེ་དག་འཆི་བའི་དུས་ན་སངས་རྒྱས་དང་བྱང་ཆུབ་སེམས་དཔའ་དག་མཐོང་བར་ཡང་འགྱུར་རོ། །ཕྲག་དོག་མེད་པ་དང ། སེམས་རྣམ་པར་གཡེང་བ་མེད་པར་འཆི་བའི་དུས་བྱེད་པར་ཡང་འགྱུར་རོ། །ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བའི་བར་དུ་འགྱུར་རོ། །རིགས་ཀྱི་བུ། གང་དག་ཆོས་ཀྱི་རྣམ་གྲངས་འདི་འཛིན་པ་དང ། བསྙེན་བཀུར་བྱས་ཏེ་ཡི་གེར་འབྲི་བ་དང ། ཡི་གེར་འབྲིར་འཇུག་པ་དང ། ཀློག་པ་དང ། མཆོད་པར་བྱེད་པ་དང ། འཆང་བ་དང ། མིང་ཙམ་ཐོས་པར་འགྱུར་བ་དེ་དག་ནི་ངས་མངོན་སུམ་དུ་ལུང་བསྟན་པས་ལུང་བསྟན་པ་ཡིན་ཏེ། དེ་དག་གིས་ང་མཐོང་ཞིང་བསྙེན་བཀུར་བྱས། རི་མོར་བྱས། མཆོད་པ་བྱས་པའང་ཡིན་པས། དེ་དག་གིས་ནི་སངས་རྒྱས་ཀྱི་བྱང་ཆུབ་ལ་ཐེ་ཚོམ་བསྐྱེད་པར་མི་བྱའོ། །གང་དག་གི་རྣ་ལམ་དུ་གྲག་པར་གྱུར་པ་དེ་དག་ཀྱང་བྱང་ཆུབ་སེམས་དཔའ་ཡིན་པར་ཡིད་ལ་བྱས་ལ་བསྙེན་བཀུར་བྱའོ། །དེའི་སྔོན་གྱི་ལས་ཀྱི་རྣམ་པར་སྨིན་པས་གཟུགས་མི་མཛེས་པ་དང ། ལོངས་སྤྱོད་མེད་པ་དང ། བློ་མེད་པ་དང ། སྲེད་པ་ཆེ་བ་དང ། སྡུག་པ་དང་བྲལ་བ་དང ། རྒྱལ་སྲིད་འཁྲུགས་པར་གྱུར་པ་གང་ཡིན་པ་དེ་དག་དང ། ཀླད་པ་ན་བ་གང་ཡིན་པ་དང ། ཟན་ཆད་པ་གང་ཡིན་པ་དང ། གོས་ངན་པར་གྱུར་པ་གང་ཡིན་པ་དང ། ལུས་དང་སེམས་ལ་གནོད་པ་གང་ཡིན་པ་དང ། རེག་ན་མི་བདེ་བའི་མལ་བཅས་ 422a ༄#། །པ་གང་ཡིན་པ་དང ། སྤྱོ་བ་གང་ཡིན་པའི་ལས་ཀྱི་སྒྲིབ་པ་དེ་དག་ཐམས་ཅད་ཀྱང་ཏིང་ངེ་འཛིན་འདི་ཐོས་པའི་མཐུས་ཡོངས་སུ་ཟད་པར་འགྱུར་རོ། །དེས་ཀྱང་འདི་ལྟར་སེམས་བསྐྱེད་པར་བྱ་སྟེ། བདག་གིས་སྔོན་འཁོར་བ་ན་འཁོར་བའི་ཚེ་སེམས་ཅན་རྣམས་ལ་སྡིག་པ་མེ་དགེ་བ་རྣམ་པ་སྣ་ཚོགས་བསགས་པ་དེ་དག་སོ་སོར་བཤགས་པར་བྱའོ། །བསལ་བར་བྱའོ། །མི་བཅབ་པར་བྱའོ། །སངས་རྒྱས་དང ། ཆོས་དང ། དགེ་འདུན་ལ་དད་པ་མི་ཕྱེད་པ་དང་ལྡན་པའི་སེམས་བསྐྱེད་པར་བྱ་སྟེ། རིགས་ཀྱི་བུའམ་རིགས་ཀྱི་བུ་མོ་དེའི་ལོངས་སྤྱོད་ཀྱི་འབྲས་བུ་མེད་པར་འགྱུར་བའི་ལས་ཀྱི་སྒྲིབ་པ་དང ། སངས་རྒྱས་དང ། ཆོས་དང ། དགེ་འདུན་དང ། ཉན་ཐོས་དང ། རང་སངས་རྒྱས་དག་དང ། ཕ་མ་དག་ལ་སྡིག་པའི་ལས་བྱས་ཤིང་བསགས་པར་གྱུར་པ་གང་ཡིན་པ་དེ་དག་ཐམས་ཅད་ཡོངས་སུ་ཟད་པར་འགྱུར་ཞིང་དབང་ཕྱུག་ཆེན་པོ་དག་ཀྱང་ཡང་དག་པར་འགྲུབ་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེའི་སེམས་ཅན་དམྱལ་བའི་སྡུག་བསྔལ་མྱོང་བར་འགྱུར་བའི་ལས་ཀྱི་སྒྲིབ་པ་དང ། སྡུག་པ་དང་བྲལ་བར་འགྱུར་བ་དང ། དམུས་ལོང་དུ་འགྱུར་བ་དང ། བུད་མེད་ཀྱི་དངོས་པོར་འགྱུར་བ་དང ། མཚན་གཉིས་པར་འགྱུར་བ་དང ། ཕྲག་དོག་དང ། ང་རྒྱལ་དང ། ཁྲོ་བའི་དབང་གིས་གཤིན་རྗེའི་འཇིག་རྟེན་ 422b དང ། ཡི་དྭགས་དང ། དུད་འགྲོའི་སྐྱེ་གནས་སུ་འགྱུར་བ་གང་ཡིན་པ་དེ་དག་ཐམས་ཅད་ཀྱང་ཡོངས་སུ་ཟད་པར་འགྱུར་ཏེ། རིགས་ཀྱི་བུ། དེ་ལྟར་ན། ཏིང་ངེ་འཛིན་འདི་ནི་ཡོན་ཏན་ཐམས་ཅད་ཀྱི་འབྱུང་གནས་ཡིན་ནོ། །རིགས་ཀྱི་བུ། ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་བྱེད་པ་དང ། རིགས་ཀྱི་བུ་དང ། རིགས་ཀྱི་བུ་མོ་དེ་དག་ལ་སྲུང་བ་དང ། སྐྱོབ་པ་དང ། སྦེད་བར་བྱེད་པ་དང ། དེ་དག་ཐམས་ཅད་ཀྱི་ཡོན་ཏན་དང ། རེ་བ་ཐམས་ཅད་ཡོངས་སུ་རྫོགས་པར་ལོངས་སྤྱོད་པ་དང ། དབང་ཕྱུག་དང ། བདེ་བ་ཆེན་པོར་བྱེད་པ་དང ། བསམ་པ་དང་འདོད་པ་ཐམས་ཅད་ཡང་དག་པར་འགྲུབ་པར་བྱེད་པ་དང ། ལས་ཐམས་ཅད་ཟད་པར་བྱེད་པ་དང ། དུས་མ་ཡིན་པར་འཆི་བ་དང ། རྨི་ལམ་ངན་པ་ཐམས་ཅད་རབ་ཏུ་ཞི་བར་བྱེད་པ་དང ། གཡུལ་ཐམས་ཅད་ལས་རྒྱལ་བར་བྱེད་པ་དང ། ཚེ་དང ། མདོག་དང ། སྟོབས་དང ། བརྩོན་འགྲུས་དང ། མཐུ་ཆེ་བར་བྱེད་པ་དང ། གནོད་སྦྱིན་དང ། འབྱུང་པོ་དང ། མི་དང ། མི་མ་ཡིན་པ་ཐམས་ཅད་དབང་དུ་བྱེད་པ་དང ། རིམས་དང ། དུག་དང ། མེ་དང ། ཆུ་ཐམས་ཅད་རབ་ཏུ་ཞི་བར་བྱེད་པ་དང ། ལུང་བསྟན་པའི་བར་དག་ཐོབ་པར་བྱེད་པའི་གཟུངས་ཀྱི་གསང་སྔགས་ཀྱི་གཞི་དག་ཡོད་དེ། དེ་དག་མཉན་ཅིང་བཟུང་སྟེ་བསྙེན་བཀུར་བྱེད་པ་དང ། ཀློག་པ་དང ། ཡི་གེར་འབྲི་བ་དང ། ཡི་གེར་འབྲིར་འཇུག་པའི་རིགས་ཀྱི་བུ་དང ། རིགས་ཀྱི་བུ་ 423a ༄#། །མོ་དག་ནི་ཡོན་ཏན་དེ་དག་ཐམས་ཅད་འཐོབ་པར་འགྱུར་རོ། །དེ་ནས་དེའི་ཚེ་ས་ཆེན་པོ་འདི་རྣམ་པ་དྲུག་ཏུ་རབ་ཏུ་གཡོས་པ་དང ། ཇི་ལྟར་ལྷགས་པའི་འཁོར་དེ་དག་གིས་ཀྱང་དེ་བཞིན་གཤེགས་པའི་སྐུ་ལ་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། ཕྱེ་མ་དང ། བྱུག་པ་དང ། རས་བཅོས་བུ་ཟུང་དག་གསོལ་ཏེ། ལེགས་སོ་ཞེས་བྱ་བ་གསོལ་ནས་བཅོམ་ལྡན་འདས། ལེགས་སོ། །ལེགས་སོ། །གཟུངས་ཀྱི་གསང་སྔགས་ཀྱི་གཞི་དེ་དག་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ན་མཿ ་སརྦ་ཏ་ཐཱ་ག་ཏཱ་ནཱཾ། ཏདྱ་ཐཱ། བུདྡྷེ། སུ་བུདྡྷེ། བུདྡྷ་མ་ཏེ། ལོ་ཀ་བི་ལོ་ཀེ་ལོ་ཨ་ཏི་ཀྲཱནྟེ། སཏྭ་ཨ་བ་ལོ་ཀེ་ནི། སརྦ་ཏ་ཐཱ་ག་ཏ་ཨ་དྷིཥཱ་ཏེ། སརྦ་ཨ་ཤ་པ་རི་པཱུ་ར་ཎི། དྱུ་ཏི་ནདྷ་རེ། ན་ར་དེ་བ་པཱུ་ཛི་ཏེ་ཏ་ཐཱ་ག་ཏ་ཛྙཱ་ན་ད་དེ། ཏ་ཐཱ་ག་ཏ་ཨ་དྷིཥྵཱ་ནེ་ན། སརྦ་ལོ་ཀ་མ་སུ་ཁཱ་བྷ་བ་ཏུ། བཱུརྦ་ཀྵརྨ་ཀྵ་པ་ཡ་ཏུ། རཀྵ་བྷ་བ་ཏུ། སརྦ་ཡེ་བྷྱ་ཏ་ཐཱ་ག་ཏ་ཨ་དྷི་ཤཱ་ནེ་ན་སཝཱཧཱ། ཀྱེ་རིགས་ཀྱི་བུ་དག་།གཟུངས་ཀྱི་གསང་སྔགས་ཀྱི་གཞི་འདི་དག་ནི། དེ་བཞིན་གཤེགས་པ་སུམ་ཁྲིས་གསུངས་ཤིང་བྱིན་གྱིས་བརླབས་པ་ཡིན་ནོ། །ངས་ཀྱང་ད་ལྟར་སེམས་ཅན་ཐམས་ཅད་ཀྱི་དོན་དང ། ཕན་པ་དང ། བདེ་བ་དང ། སྲུང་བ་དང ། སྐྱོབ་པ་དང ། སྦ་བ་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། སངས་རྒྱས་ཀྱི་ 423b ཞིང་དུ་སྐྱེ་བར་བྱ་བའི་ཕྱིར་བཤད་དེ། གྲོགས་པོ་དག་།གང་ལ་ལ་ཞིག་འདི་སྙམ་དུ་བདག་གིས་ཇི་ལྟར་ན། དེ་བཞིན་གཤེགས་པས་གསུངས་པའི་ཡོན་ཏན་དེ་དག་ཐམས་ཅད་འཐོབ་པར་འགྱུར་སྙམ་དུ་སེམས་པ་དེས་ནང་པར་སྔར་ལངས་ཏེ་སེམས་ཅན་ཐམས་ཅད་ལ་སྙིང་བརྩེ་བའི་སེམས་དང ། སྙིང་རྗེའི་སེམས་དང ། བྱམས་པའི་སེམས་དང ། ཕྲག་དོག་དང ། ང་རྒྱལ་དང ། འཆབ་པ་དང ། ཁྲོ་བ་ཡོངས་སུ་སྤངས་པའི་སེམས་དང ། རྩེ་གཅིག་པའི་སེམས་ཀྱིས་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པ་ཤིན་ཏུ་རྒྱ་ཆེར་བྱས་ལ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ་གང་འདོད་པ་ཡིད་ལ་བྱས་ནས་མེ་ཏོག་ལ་བཟླས་བརྗོད་ལན་བརྒྱ་རྩ་བརྒྱད་བྱ་ཞིང ། དེ་བཞིན་གཤེགས་པ་ལ་རེ་རེ་ནས་དབུལ་བར་བྱའོ། །དེས་ན་དེའི་རེ་བ་ཐམས་ཅད་ཡང་དག་པར་འགྲུབ་པར་འགྱུར་རོ། །རྨི་ལམ་ན་དེ་བཞིན་གཤེགས་པ་མཐོང་བར་ཡང་འགྱུར་རོ། །དམ་པ་གང་འདོད་པ་དེ་ཐོབ་པར་ཡང་འགྱུར་རོ། །འཆི་བའི་ཚེ་ན་དེ་བཞིན་གཤེགས་པ་མཐོང་བར་ཡང་འགྱུར་རོ། །ཤི་འཕོས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཚེ་དང ། སྟོབས་དང ། མདོག་དང ། བརྩོན་འགྲུས་དང་ལྡན་པར་ཡང་འགྱུར་རོ། །དགྲ་ཐམས་ཅད་ཀྱང་དེའི་དབང་དུ་འགྱུར་རོ། །གཟུངས་འདི་བཤད་པ་ན་སྲོག་ཆགས་དྲུག་ཁྲི་མི་སྐྱེ་བའི་ཆོས་ལ་བཟོད་པ་ཐོབ་ 424a ༄#། །པར་གྱུར་ནས་དེ་དག་ཐམས་ཅད་ལས་ཀྱི་སྒྲིབ་པ་ཐམས་ཅད་ལས་རྣམ་པར་གྲོལ་ཞིང་བསམ་པ་ཐམས་ཅད་ཡོངས་སུ་རྫོགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་ཕྱོགས་བཅུར་རྣམ་པར་བལྟས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་དམ་འཆའ་བ་མི་འཇིགས་པའི་གཟི་བརྗིད་ཅེས་བགྱི་བའི་གཟུངས་མཆིས་ཏེ། བདག་གིས་དེ་བཞིན་གཤེགས་པ་འཇིགས་མེད་བཀོད་པ་གཟི་བརྗིད་རྒྱལ་པོའི་སྤྱན་སྔར་དེ་བཟུང་ལགས་སོ། །བཟུང་ནས་ཀྱང་སེམས་ཅན་ཐམས་ཅད་ལ་བཤད་ལགས་སོ། །བཅོམ་ལྡན་འདས། དེང་སླན་ཆད་བདག་གིས་མངོན་འཚལ་ཏེ། གང་གི་རྣ་ལམ་དུ་གཟུངས་དེ་གྲགས་པར་གྱུར་ཏམ། གློ་བུར་ཆུད་པར་གྱུར་པ་དེའི་ལུས་ཉམ་ང་བའམ། ཉོན་མོངས་པ་སྣ་ཚོགས་སམ། བྲོ་ནད་དམ། རིམས་སམ། ལུས་བྲོ་འཚལ་བའམ། སེམས་གདུང་བའམ། དུས་མ་ལགས་པར་འགྲུམ་པའམ། ཆབ་ཀྱིས་འཇིགས་པའམ། མཚོན་གྱིས་འཇིགས་པའམ། དུག་གིས་འཇིགས་པའམ། དུག་སྦྱར་མས་འཇིགས་པའམ། མཁའ་འགྲོ་མ་དང ། འབྱུང་པོའི་འཇིགས་པའམ། གནོད་སྦྱིན་ནམ། དགྲ་རྣམས་སམ། མི་དང ། མི་མ་ལགས་པ་དག་གིས་མཐོ་འཚམ་པའམ། རྣམ་པར་གཙེ་བའམ། གནོད་པ་བགྱིད་པར་འགྱུར་བ་དེ་ནི་ 424b གནས་མ་མཆིས་ལགས་སོ། །དེའི་སླད་དུ་བཅོམ་ལྡན་འདས་ཀྱིས་བདག་ལ་རྗེས་སུ་གནང་བ་སྩོལ་ཅིག་།བདག་གིས་ཆོས་སྨྲ་བ་དང ། ཆོས་ཉན་པ་དེ་དག་གི་དོན་དུ་ཉན་པ་རྣམས་དང ། རི་མོར་བགྱིད་པ་རྣམས་དང ། མཆོད་པར་བགྱིད་པ་རྣམས་དང ། འཛིན་པར་བགྱིད་པ་རྣམས་ཀྱི་རེ་བ་ཐམས་ཅད་ཡོངས་སུ་རྫོགས་པར་བགྱིད་པ། བྱང་ཆུབ་སེམས་དཔའ་རྣམས་ཀྱི་དམ་བཅའ་བའི་ཕྱག་རྒྱ་དག་སྩལ་བར་བགྱིའོ། །ན་མཿ ་སརྦ་ཏ་ཐཱ་ག་ཏཱ་ནཱཾ། སརྦ་བེ་དྷི་སཏྭ་ནཱཾ། ཨ་རི་ཧ་ཧཱ་ན། ཏད་ཐཱ། ཨོཾ་བཛྲ་དྷ་ར། བཛྲ་ཀཱ་ཡཾ། བཛྲ་བ་ལ། བཛྲ་ཏེ་ཛ། ཧཱུཾ་ཧཱུཾ། བཛྲ་པཱ་ཎི། ཏ་ཐཱ་ག་ཏ་ཨཱ་ཛྙཱ་པ་ལཱ་ཡ། སྨ་ར་པྲ་ཏི་ཛྙཱཾ། སརྦ་བྱ་དྷི་ན་སརྦ་པཱ་པཾ་ནཱ་ཤ་ཡ། དེ་ཧི་མེ། ཡི་ཐེ་བ་སི་ཏཾ་ཕ་ར་མ། ཡན་ཡ་མེ་བ་ཨ་བྷི་པྲཱ་ཡན་ཙ་མི་ཏནྟ་མེ་བ་ས་མྲཾ་དྷྱ་ཏུ། ཧེ་ཧེ། ཏུ་རུ་ཏུ་རུ། ཨཱ་གཙྪ། ཨཱ་གཙྩ། མ་བི་ལམྦ་ད་རི་ཤ་ཡ། བཛྲ་ཀཱ་ཡ། ད་རི་ཤ་ཡ། བཛྲ་ཀྲཱ་ཡཾ། བུདྡྷ་ཨ་དྷི་ཤྴཱ་ནེ་ན་སཝཱཧཱ། གཟུངས་འདི་བརྗོད་པ་ན་ས་ཆེན་པོ་མཐོ་བ་དང་དམའ་བར་གྱུར་ཏོ། །གནོད་སྦྱིན་དང་སྲིན་པོ་ཐམས་ཅད་ཀྱང་རབ་ཏུ་དངངས་སོ། །ལྷ་ཐམས་ཅད་དང ། མི་དང ། མི་མ་ཡིན་པའི་བར་དག་ཀྱང་ངོ་མཚར་དུ་གྱུར་ནས་སེམས་ཅན་ཆེན་པོ་རབ་ཏུ་གྲུབ་པར་བྱེད་པའི་གཟུངས་ཀྱི་གསང་སྔགས་ཀྱི་གཞི་འདི་དག་བཤད་པ་ནི་ལེགས་སོ། །ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། ། 425a ༄#། །བཙུན་པ་བཅོམ་ལྡན་འདས། གང་ལ་ལ་ཞིག་བྱང་ཆུབ་སེམས་དཔའི་སའམ། ནོར་དང ། འབྲུ་དང ། ལོངས་སྤྱོད་ཀྱི་དབང་ཕྱུག་གམ། རྒྱལ་སྲིད་ཀྱི་དབང་ཕྱུག་གམ།་རིག་སྔགས་འཆང་བ་ཉིད་དམ། ཚེ་དང ། སྟོབས་དང ། མདོག་དང ། བརྩོན་འགྲུས་དང ། ཚེ་རིང་པོ་ཉིད་འཚལ་བ་དེས་སྔ་ནས་བསྙེན་པར་བགྱིས་ལ་དགུང་ཟླ་ཡར་གྱི་ངོ་ཚེས་བརྒྱད་ལ་ཙནྡན་དཀར་པོ་ལས་རྡོ་རྗེ་འཛིན་པ་རྟ་གང་དུ་དགོད་ཅིང་རྒྱན་ཐམས་ཅད་ཀྱིས་བརྒྱན་པ། སྙིང་གར་སྐུ་གདུང་སྩལ་པ། སྐུ་གདུང་དང་བཅས་པའི་རྡོ་རྗེ་འཛིན་པ། རིག་སྔགས་འཆང་ཡང་དག་པར་དབུགས་འབྱིན་པར་བགྱིད་པ་བགྱིས་ལ། གཙང་མས་བདུག་སྤོས་ཀྱིས་བདུག་ཅིང་གདུགས་མཚན་གཅིག་ཏུ་སྨྱུང་བ་བགྱིས་ལ། དེ་ནས་ཚེས་བརྒྱད་ནས་ཚེས་བཅོ་ལྔའི་བར་དུ་དེ་བཞིན་གཤེགས་པའི་སྐུ་གཟུགས་བཞུགས་པའི་གནས་གཙང་མར་ཙནྡན་དཀར་པོའི་དཀྱིལ་འཁོར་བགྱིས་ལ་བུམ་པ་གང་བ་བཞིའང་གཞག་པར་བགྱི།་ཕྱོགས་བཞིར་ཡང་རོ་དང་ལྡན་པ་དང ། དྲི་དང་ལྡན་པ་དང ། སྐྱེམས་དང ། འོ་ཐུག་གི་གཏོར་མ་དག་སྩལ་ལ་རད་པ་དཀར་པོ་བགོས་ཏེ་སེམས་རྩེ་གཅིག་ཏུ་བགྱིས་ནས་དུས་གསུམ་དུ་བདུག་སྤོས་དང ། མེ་ཏོག་དང ། སྤོས་དང ། མར་མེ་དག་གིས་མཆོད་པ་ཆེན་པོ་བགྱི་ཞིང་དེ་བཞིན་གཤེགས་པའང་མཆོད་པ་བགྱིས་ཏེ། དེ་བཞིན་གཤེགས་པ་ལ་ཕྱག་ 425b བགྱིས་ནས་སྣ་མའི་མེ་ཏོག་བརྒྱ་རྩ་བརྒྱད་ལ་བཟླས་བརྗོད་བརྒྱ་རྩ་བརྒྱད་བཟླས་ཤིང ། རེ་རེ་ནས་ལག་ན་རྡོ་རྗེ་ལ་བསྣུན་པར་བགྱིའོ། །དེས་ན་སྒྲ་སྐད་ཆེན་པོ་འབྱུང་བར་འགྱུར་ཞིང ། དོག་ས་གཡོ་བ་དང ། འོད་ཟེར་ཀྱང་འབྱུང་བར་འགྱུར་ཏེ། དེ་ནས་དམ་པ་ཅི་འཚལ་བའང་སྩལ་བར་བགྱིའོ། །བཟླས་བརྗོད་བགྱིས་པ་ཙམ་གྱིས་ལས་ཐམས་ཅད་དང ། དགོས་པ་ཐམས་ཅད་ཀྱང་ཡང་དག་པར་འགྲུབ་པར་འགྱུར་ལགས་སོ། །བྲོ་ནད་མ་མཆིས་པ་དང ། ཚེ་རིང་པ་དང ། སྡིག་པ་ཐམས་ཅད་བྲལ་བར་འགྱུར་ཞིང་ཡོན་ཏན་སྟོང་ཡང་འབྱུང་བར་འགྱུར་ལགས་སོ། །འགུམ་པའི་ཚེ་ནའང་སངས་རྒྱས་བཅོམ་ལྡན་འདས་སྟོང་མཐོང་བར་འགྱུར་ལགས་སོ། །བདག་མཐོང་བར་ཡང་སྩལ་བར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་ལེགས་སོ། །ལེགས་སོ། །ཕྱག་རྒྱ་འདི་ནི་ལྷ་དང་བཅས་པའི་འཇིག་རྟེན་གྱིས་འདའ་བར་བྱ་བ་མ་ཡིན་ཏེ། འདི་ལ་སོམ་ཉི་མེད་པ་དང ། ཡིད་གཉིས་མེད་པ་དང ། ཐེ་ཚོམ་མེད་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་དུ་ཏིང་ངེ་འཛིན་འདི་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་ 426a ༄#། །པ་ཐམས་ཅད་ཀྱི་བྱིན་གྱི་རླབས་དང ། བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དེ་ལས་ཏིང་ངེ་འཛིན་ཐམས་ཅད་དང ། གཟུངས་ཀྱི་སྒོ་ཐམས་ཅད་འཐོབ་པར་འགྱུར་བ་དང ། ལྷ་རྣམས་དང ། ཀླུ་རྣམས་དང ། མི་རྣམས་དང ། གནོད་སྦྱིན་རྣམས་དང ། དྲི་ཟ་རྣམས་དང ། ཡི་དྭགས་རྣམས་དང ། དུད་འགྲོའི་སྐྱེ་གནས་སུ་སྐྱེས་པ་རྣམས་དང ། གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བ་ལྷག་པར་གཡོ་བ་དང་བྲལ་བར་གཡོ་བ་དག་རབ་ཏུ་ཤེས་ཤིང་སེམས་ཅན་འདི་དག་ནི་བསོད་ནམས་སུ་ཉེ་བར་འགྲོ་བ་སྟེ། ལེགས་པར་སྤྱོད་པའི་ལས་བྱེད་ལ། སངས་རྒྱས་དང ། ཆོས་དང ། དགེ་འདུན་དག་ལ་དད་པ་འཐོབ་པར་འགྱུར་པའོ། །འདི་དག་ནི་སེམས་ཅན་དམྱལ་བར་འགྲོ་བ་སྟེ། ཉེས་པར་སྤྱོད་པའི་ལས་བྱེད་པ། སྡིག་པ་སྤྱོད་པར་བྱེད་པ། ཤེས་ནས་སྡིག་པའི་ལྟ་བར་གྱུར་པའི་སེམས་ཅན་དེ་དག་ལ་ཆོས་སྟོན་པར་བྱེད་ཅིང ། སྡིག་པ་ཐམས་ཅད་ལས་ཟློག་བར་བྱེད་པ་དང ། སངས་རྒྱས་ཀྱི་བྱང་ཆུབ་ལ་འགོད་པར་བྱེད་པ་དང ། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང ། ཕྲག་དོག་དང ། ང་རྒྱལ་དང ། ཁྲོ་བ་དང ། སེར་སྣ་དག་སེལ་བར་བྱེད་པ་དང ། སེམས་ཅན་དེ་དག་ཀྱང་སངས་རྒྱས་དང ། ཆོས་དང ། དགེ་འདུན་ 426b དག་ལ་དད་པ་རབ་ཏུ་ཐོབ་ནས་སངས་རྒྱས་ཀྱི་ཞིང་རྣམས་སུ་སྐྱེ་ཞིང་ནམ་དུའང་སྡུག་བསྔལ་ཉམས་སུ་མྱོང་བར་མི་འགྱུར་ལ། ཡིད་མི་བདེ་བར་མི་འགྱུར་བས་ན། རིགས་ཀྱི་བུ། དེའི་ཕྱིར་ཏིང་ངེ་འཛིན་འདི་ནི་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་སྟེ། འདི་ཐོས་པའི་སེམས་ཅན་རྣམས་ནི་ཕྱིར་མི་ལྡོག་པར་ངེས་པའི་ས་འཐོབ་པར་འགྱུར་རོ། །གསོལ་པ། བཅོམ་ལྡན་འདས། ཅིའི་སླད་དུ་རིགས་ཀྱི་བུ་དང ། རིགས་ཀྱི་བུ་མོ་དེ་དག་ལུང་བསྟན་པར་འགྱུར་ལགས། བཅོམ་ལྡན་འདས། དགྲ་བཅོམ་པ་ཉིད་ཀྱང་དཀའ་བ་ལགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་ཅི་སྨོས་ཀྱང་མི་འཚོལ་ལགས་ན། དེ་དག་གི་བསོད་ནམས་ཀྱི་ཕུང་པོ་དང ། དཀའ་བ་སྤྱོད་པ་ཇི་ཙམ་ཞིག་ཏུ་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ངས་དང་པོ་སེམས་བསྐྱེད་པ་ནས་ཉེ་བར་བཟུང་སྟེ་སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་པ་གང་ཡིན་པ་དང ། མགོ་དང ། ལག་པ་དང ། རྐང་པ་དང ། མིག་དང ། ལུས་དང ། སྡུག་པའི་བུ་དང ། བུ་མོ་དང ། 427a ༄#། །ཆུང་མ་དང ། བྲན་དང ། བྲན་མོ་དག་ཡོངས་སུ་བཏང་བར་གྱུར་པ་གང་ཡིན་པའི་བསོད་ནམས་མངོན་པར་འདུ་བྱ་བ་དང ། དགེ་བའི་རྩ་བ་མངོན་པར་འདུ་བྱ་བ་སྔ་མ་འདི་ནི་ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་དང ། བསྙེན་བཀུར་བྱེད་པ་དང ། ཡི་གེར་འབྲི་བ་དང ། ཡི་གེར་འབྲིར་འཇུག་པ་དང ། ཀློག་པ་དང ། འཛིན་པའི་བསོད་ནམས་མངོན་པར་འདུ་བྱ་བ་དང ། གཞན་དག་ལའང་ཡང་དག་པར་སྟོན་པར་བྱེད་པའི་བསོད་ནམས་མངོན་པར་འདུ་བྱ་བ་གང་ཡིན་པ་དང ། ཆོས་སྨྲ་བ་དེ་དག་ལའང་མཆོད་པ་བྱེད་པ་དང ། བསྙེན་བཀུར་བྱེད་པའི་བསོད་ནམས་མངོན་པར་འདུ་བྱ་བ་གང་ཡིན་པ་དེའི་བརྒྱའི་ཆར་ཡང་ཉེ་བར་མི་འགྲོའོ། །རིགས་ཀྱི་བུ། ངེས་ཀུན་ཆུབ་པར་བྱས་ཤིང་བཤད་པའི་ཆོས་དེ་དག་ཐམས་ཅད་ལ་བསྙེན་བཀུར་བྱེད་པ་དང ། བླ་མར་བྱེད་པ་དང ། རི་མོར་བྱེད་པ་དང ། མཆོད་པ་བྱེད་པ་དང ། བསྙེན་བཀུར་བྱས་ཏེ་ཡི་གེར་འབྲི་པ་དང ། ཡི་གེར་འབྲིར་འཇུག་པ་གང་ཡིན་པ་དེ་བས་ནི་གང་ཞིག་ཆོས་ཀྱི་རྣམ་གྲངས་འདི་ཡི་གེར་འབྲི་བ་དང ། ཡི་གེར་འབྲིར་འཇུག་པ་དང ། ཀློག་པ་དང ། མཆོད་པ་བྱེད་པ་དང ། ཡང་དག་པར་སྟོན་པར་བྱེད་པ་དང ། ཉན་པར་བྱེད་ན། དེ་ལས་བསོད་ནམས་མངོན་པར་འདུ་བྱ་བ་ཆེས་མང་དུ་ཡོངས་སུ་སྡུད་པར་འགྱུར་ཏེ། དེས་ན། དེ་བཞིན་གཤེགས་པས་བླ་ན་མེད་པ་ཡང་ 427b དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ཉན་པ་དང ། འཛིན་པ་དང ། འཆང་བ་དང ། ཀློག་པ་དང ། མཆོད་པ་དང ། ཡི་གེར་འབྲི་བ་དང ། ཡི་གེར་འབྲིར་འཇུག་པའི་བསོད་ནམས་ནི། དེ་ལྟར་དཀའ་བ་ཡིན་པའི་ཕྱིར་རོ། །རིགས་ཀྱི་བུ། སེམས་ཅན་གང་དག་སྡིག་པ་ཀུན་ཏུ་སྤྱོད་པ་དང ། བཟའ་བ་དང ། བཏུང་བ་དང ། བྲོ་གར་ལ་མངོན་པར་དགའ་བ་དང ། མི་སྡུག་པ་ལ་སྡུག་པར་འདུ་ཤེས་པ་དང ། འདོད་པ་དང ། ཁྲོ་བ་དང ། གནོད་སེམས་མང་བ་དང ། མི་བདེ་བ་ལ་བདེ་བར་འདུ་ཤེས་པ་དང ། མཚོན་ཆ་དང ། སྤྱོ་བ་དང ། བསྡིགས་པ་དང ། རྡེག་པ་ལ་མངོན་པར་དགའ་བ་དང ། ཤེས་པར་མི་འགྱུར་བ་དང ། ཡིད་ལ་བྱེད་པར་མི་འགྱུར་བ་དེ་དག་ནི་སྡིག་པའི་ལས་ཀྱི་གཞི་དེ་དང ། མི་ཤེས་པ་དེས་མི་དགེ་བའི་བཤེས་གཉེན་གྱིས་ཡོངས་སུ་ཟིན་ཅིང་རྒ་བ་དང ། ན་བ་དང ། མྱ་ངན་དང ། འཆི་བས་ཡོངས་སུ་ཟིན་པས་འཆི་བའི་ཚེ་ན་ཡོངས་སུ་གདུང་བར་འགྱུར་ཏེ། དམིགས་པ་ན་སོ་སོ་ནས་དུར་ཁྲོད་དང་འདྲ་འཁོ་ནར་མཐོང་ཞིང ། དགེ་བའི་སེམས་བསྐྱེད་པར་ཡང་མི་འགྱུར་ལ། དད་པ་མི་ཕྱེད་པ་ཐོབ་པར་ཡང་མི་འགྱུར་ཏེ། དེ་དག་དེ་ནས་ཤི་འཕོས་ནས་ཀྱང་སྡུག་བསྔལ་དག་ཉམས་སུ་མྱོང་བར་འགྱུར་བས་ན། ལུང་བསྟན་པའི་དགེ་བའི་རྩ་བ་མེད་པ་དང ། དེ་བཞིན་གཤེགས་པ་མ་མཐོང་བ་དང ། ལུང་བསྟན་པ་མ་ཐོབ་ 428a ༄#། །པ་དག་གིས་ནི་ཆོས་ཀྱི་རྣམ་གྲངས་འདི་མཉན་པ་དང ། རི་མོར་བྱ་བ་དང ། མཆོད་པར་བྱ་བ་དང ། གཟུང་བ་དང ། ཡི་གེར་འབྲི་བ་དང ། ཡི་གེར་འབྲིར་གཞུག་པ་དང ། དད་པར་ཡང་མི་ནུས་ལ། ཆོས་སྨྲ་བ་དེ་ལའང་བསྙེན་བཀུར་བྱ་བ་དང ། བླ་མར་བྱ་བ་དང ། རི་མོར་བྱ་བ་དང ། མཆོད་པ་བྱ་བར་ཡང་མི་ནུས་སོ། །རིགས་ཀྱི་བུ།་གང་དུ་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་བའི་ཡུལ་དེར་ནི་དེ་བཞིན་གཤེགས་པའི་མཛད་པ་འབྱུང་བར་འགྱུར་རོ། །དེ་ནས་ཇི་ལྟར་ལྷགས་པའི་འཁོར་དེ་དག་གིས་བཅོམ་ལྡན་འདས་ལ་ལེགས་སོ་ཞེས་བྱ་བ་གསོལ་ཏོ། །བཅོམ་ལྡན་འདས། ལེགས་སོ། ལེགས་སོ། །བཅོམ་ལྡན་འདས། བདག་ཅག་གིས་ཀྱང་ཆོས་སྨྲ་བ་དེ་དང ། ཆོས་ཉན་པ་དེ་དག་ལ་དེ་བཞིན་གཤེགས་པའི་མཛད་པས་བསྙེན་བཀུར་བགྱི། བླ་མར་བགྱི། རི་མོར་བགྱི། མཆོད་པར་བགྱི་ཞིང ། བདེ་བའི་ཡོ་བྱད་ཐམས་ཅད་ཀྱང་ཉེ་བར་བསྒྲུབ་པར་བགྱི་ལགས་སོ། །ཆོས་ཀྱི་རྣམ་གྲངས་འདིའང་རྒྱས་པར་བགྱི་བསྲུང་བར་བགྱི་སྟེ། དེས་ན་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་ཡང་འགྱུར་ལགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟར་ལྷགས་པའི་འཁོར་རྣམས་ལ་རྣམ་པར་གཟིགས་ཏེ་བཀའ་སྩལ་པ། ཀྱེ་རིགས་ཀྱི་བུ་དག་།ལེགས་སོ། །ལེགས་ 428b སོ། །ཁྱེད་ཅག་གིས་དེ་བཞིན་དུ་གྱིས་ཤིག་།གནོད་པ་བྱེད་པ་དང ། བརྙས་པ་དང ། གཤེ་བ་དང ། བསྡིགས་པ་དང ། མཚོན་འབྱིན་པ་དང ། རྒྱ་འགལ་བར་བྱེད་ནའང་ལུས་དང ། སྲོག་ལ་མི་ཏ་བར་བྱས་ལ་ཆོས་ཀྱི་རྣམ་གྲངས་འདི་མཉན་པར་བྱ། ཡི་གེར་འབྲི་བར་བྱ། ཡི་གེར་འབྲིར་གཞུག་པར་བྱ། བཀླག་པར་བྱའོ། །ཆོས་སྨྲ་བ་དེ་ལའང་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱའོ། །ཡུལ་ཕྱོགས་དེ་དང ། གླིང་དེ་དང ། གྲོང་ཁྱེར་དེ་དག་ཀྱང་འཇིགས་པ་དང ། གནོད་པ་དང ། འགོ་བའི་ནད་དང ། འཁྲུག་པ་དག་ལས་བསྲུང་བར་བྱའོ། ། རིགས་ཀྱི་བུ་དང ། རིགས་ཀྱི་བུ་མོ་དེ་དག་ལའང་རྟག་པར་རྒྱུན་དུ་བསམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་གྲངས་མེད་སྟོང་ཕྲག་བྱེ་སྙེད་དུ། །སངས་རྒྱས་འབྱུང་བ་ལན་འགའ་རྙེད་པ་ལ། །ཕྱི་མའི་དུས་ན་འགྱོད་པར་མི་འགྱུར་བར། །རིགས་ཀྱི་བུ་རྣམས་བག་ཡོད་ཆོས་ཉོན་ཅིག་།ཡོན་ཏན་ཉན་ཅིང་མངོན་པར་དད་བྱེད་པ། །དེ་དག་གིས་ནི་ཏིང་འཛིན་རྙེད་མི་དཀའ། །གང་གིས་རྐང་གཉིས་གཙོ་བོ་རྣམས་ལ་ནི། །བསྐལ་པ་བྱེ་བ་གངྒཱའི་བྱེ་སྙེད་དུ། །ནོར་དང་འབྲུ་དང་དེ་བཞིན་གོས་དང་རྒྱན། །སྤོས་དང་ཕྲེང་བ་བྱུག་པ་ཕུལ་བ་བས། །གང་གིས་མདོ་སྡེ་འདི་ལ་དད་བྱས་ཏེ། །ཉན་ཅིང་ཀློག་ལ་ཡི་གེར་འབྲི་བྱེད་པ། །དེ་ལ་བསོད་ནམས་ཚད་ནི་ཡོད་མིན་ཏེ། །བདེ་བར་ 429a ༄#། །གཤེགས་པས་དེ་སྙེད་ཚད་མ་གསུངས། །རྟག་ཏུ་བག་ཡོད་དགོན་པར་རྟེན་བྱེད་ཅིང ། །སེམས་གཞན་མེད་པར་བསམ་གཏན་དག་སྒོམ་དང ། །སྡུག་པའི་བུ་དང་བུ་མོ་སྦྱིན་བྱེད་ཅིང ། །ལག་པ་རྐང་པ་ཡོངས་སུ་གཏོང་བ་བས། །གང་སུ་མདོ་སྡེ་འདི་ནི་འཛིན་བྱེད་པ། །དེ་ནི་དེ་བས་བསོད་ནམས་མང་པོ་འཐོབ། །མདོ་མཆོག་འདི་ནི་ནོར་སྦྱིན་བྱེད་པ་སྟེ། །དེ་ཡི་ངན་སོང་ཀུན་ཀྱང་རྟག་ཏུ་སྤངས། །འདི་ནི་ནོར་དང་འབྲུ་སྦྱིན་བྱེད་པ་སྟེ། །གང་ཞིག་མདོ་སྡེ་རྣམ་དག་འདི་འཛིན་པ། །དེ་ལ་ཡོན་ཏན་ཀུན་ཀྱང་མི་དཀོན་ཞིང ། ། དེ་ལ་ཚེ་སྟོབས་བརྩོན་འགྲུས་མོད་པ་ཡིན། །འདྲེན་པ་སངས་རྒྱས་འོད་དཔག་མེད་མཐོང་ཞིང ། །ངས་དེ་སངས་རྒྱས་བྱང་ཆུབ་ལུང་ཡང་བསྟན། །དེ་ལ་ནམ་ཡང་སྡིག་པ་ཡོད་མིན་ཅིང ། །བདེ་བ་ཅན་གྱི་འཇིག་རྟེན་ཁམས་ཀྱང་མཐོང ། །དེ་ལ་རྟག་ཏུ་ལས་གང་འབྱུང་འགྱུར་བ། །སེམས་གདུང་ལུས་ལན་བའང་དེ་བཞིན་དུ། །ཀླད་པ་ན་བས་ཐམས་ཅད་ཟད་འགྱུར་ཞིང ། །དེ་ནི་ནམ་ཡང་རྣམ་པར་ལྟུང་མི་འགྱུར། །དེས་ནི་མཐོང་བའི་ཆོས་ལའང་ཡོན་ཏན་ཀུན། །ཇི་ལྟར་བསམ་ཞིང་འདོད་པས་འཐོབ་པར་འགྱུར། །དེ་ལྟར་རྟག་ཏུ་དགེ་སློང་ཕོ་མོ་དང ། །དགེ་བསྙེན་རྣམས་དང་རྒྱལ་པོས་རྟག་ཏུ་ནི། །མི་ཡི་དབང་པོ་དེ་བཞིན་གཤེགས་པ་ལྟར། །ཆོས་སྨྲ་བ་ལ་རྗེས་སུ་གུས་བྱས་ཏེ། །མདོ་སྡེ་འདི་ནི་ 429b རྟག་ཏུ་གཟུང་བྱ་ཞིང ། །འཛིན་པ་ལ་ཡང་རྟག་ཏུ་བསྙེན་བཀུར་བྱ། །སྤོས་དང་ཕྲེང་བ་བྱུག་པ་རྣམས་ཀྱིས་ནི། །བསྙེན་བཀུར་བྱས་ཏེ་ཡི་གེར་འབྲིར་ཡང་གཞུག་།ཕྱི་མའི་དུས་ལ་རྒ་ནས་གདུངས་གྱུར་ལ། །འཁྲུག་པ་སྟོང་ཕྲག་དུ་མས་གཡེན་སྤྱོ་ཞིང ། །སེམས་དམྱལ་ཡི་དྭགས་རྣམས་སུ་ཡོངས་འཁྱམས་དང ། །ཟ་མ་མ་ནིང་སྨད་པར་བྱ་བ་དང ། །དམུས་ལོང་ཉིད་དང་རོ་དང་ཁྱི་ཡི་དྲི། །རིགས་དམའ་བུད་མེད་རྣམས་སུ་སྐྱེ་བར་བྱེད། །ཕྲག་དོག་ཆེ་ཞིང་རྟག་ཏུ་སྡིག་བྱེད་ལ། །ཁྲོ་བས་ཟིལ་ནོན་རྟག་ཏུ་སེར་སྣ་ཅན། །སངས་རྒྱས་ཆོས་ལ་གུས་པར་མ་བྱས་པས། །དེ་ནི་དེ་འདྲའི་རིགས་སུ་སྐྱེ་འགྱུར་ལ། །དེར་ཡང་སྡུག་བསྔལ་ཚོར་བ་མྱོང་འགྱུར་ཞིང ། །དེ་ནི་ཕྱི་མའི་དུས་ལའང་གདུང་བར་འགྱུར། །དེ་ཕྱིར་གང་དག་འཛིན་ཅིང་སྟོན་བྱེད་པ། །དེ་དག་གིས་ནི་རྟག་ཏུ་མཆོད་པར་བྱ། །གང་གིས་དེ་ལ་ཡོངས་སུ་སྤྱོ་བ་དང ། །སྨད་ཅིང་བརྡེགས་ལ་བཅིང་བ་བྱས་གྱུར་པ། །དེ་ནི་ང་ཡང་ཡོངས་སུ་སྤྱོས་པ་ཡིན། །འཛིན་ལ་ཕུ་དུད་བྱས་ན་ང་ལའང་བྱས། །དེ་ཕྱིར་དེ་དག་གིས་ནི་ཆོས་སྨྲ་དང ། །གང་ཞིག་འདི་འཛིན་འབྲི་ཞིང་ཀློག་བྱེད་པ། །དེ་དག་ལ་ནི་རྟག་ཏུ་བསྙེན་བཀུར་ཞིང ། །ཚིག་འཇམ་སྙན་པ་རྒྱུན་དུ་བརྗོད་པར་བྱ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་བཅོམ་ལྡན་ 430a ༄#། །འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་རྣམ་པར་ལྟ་བའི་ཆོ་འཕྲུལ་ཞེས་བགྱི་བའི་གཟུངས་མཆིས་པར་རྗེས་སུ་དྲན་ཏེ། བདག་གིས་སྔོན་དེ་བཞིན་གཤེགས་པ་འོད་མཛད་ཡེ་ཤེས་ཏོག་ཅེས་བགྱི་བའི་སྤྱན་སྔར་དེ་ཐོས་ཤིང་བཟུང་ལགས་སོ། །དེ་ཉན་ཅིང་བཟུང་ལ་བཅངས་ཤིང་བཀླགས་ཏེ་གཞན་དག་ལའང་བསྒྲགས་ཤིང་བསྙེན་བཀུར་བགྱིས་ནས་ཡི་གེར་བྲིས་སམ། ཡི་གེར་འབྲིར་སྩལ་ན། ཕྱིར་མི་ལྡོག་པའི་ས་འཐོབ་པར་འགྱུར་ཞིང ། དེ་བཞིན་གཤེགས་པས་གསུངས་པའི་ཡོན་ཏན་དེ་དག་ཐམས་ཅད་ཀྱང་འཐོབ་པར་འགྱུར། དེས་ཇི་ལྟར་བསམ་པ་ཐམས་ཅད་ཡང་དག་པར་འགྲུབ་པར་འགྱུར། དེའི་ལས་ཀྱི་སྒྲིབ་པ་ཐམས་ཅད་ཀྱང་བྱང་བར་འགྱུར། ཏིང་ངེ་འཛིན་ཀྱང་འཐོབ་པར་འགྱུར། བྲོ་ནད་རྣམས་དང་བྲལ་བར་ཡང་འགྱུར། སངས་རྒྱས་མཐོང་བ་དང ། བྱང་ཆུབ་སེམས་དཔའ་ཡང་མཐོང་བར་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ། །ཞེས་བྱ་བ་བྱིན་ཏེ།་རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ། ཁྱོད་ལ་དེ་བཞིན་གཤེགས་པས་བྱིན་གྱིས་བརླབས་ཟིན་གྱི་ཤོད་ཅིག་།དེ་ནས་བྱང་ཆུབ་སེམས་དཔའ་ 430b སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ་གསང་སྔགས་ཀྱི་གཞི་འདི་དག་སྨྲས་སོ།། ན་མཿ ་སརྦ་ཏ་ཐཱ་ག་ཏཱ་ནཱཾ། སརྦ་ཨཱ་ཤཱ་པ་རི་པཱུ་ར་ཀཱ་ནཱཾ། ན་མ་ཨཱརྱ་བ་ལོ་ཀི་ཏེ་ཤཝ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཧ་ཧ་ཧ། མ་མ་མ། དྷི་རི་དྷི་རི་དྷི་རི། ཤཱནྟེ། པྲ་ཤཱནྟེ། སརྦ་པཱ་པ་ཀྵ་ཡཾ་ཀ་རི། ཨ་བ་ལོ་ཀཱ་ཡ། ཀཱ་རུ་ཅི་ཀ། །བོ་དྷི་ཙིཏྟ་མ་མ་ན་སི་ཀུ་རུ། བྱ་བ་ལོ་ཀཱ་ཡ། མཱ་མ། སྨ་ར་སྨ་ར། ཡནྟ་ཡཱ་བཱུརྦ། སད་ཏྱ་ཨ་དྷིཥྛ་ནཾ་ཀྲི་ཏཾ། ཏེ་ན་སན་ཏྱེ་ན་པ་ཙ་ནེ་ན། སརྦ་ཨཱ་ཤཱ་མེ་པ་རི་པཱུ་ར་ཡ། བུདྡྷ་ཀྵེ་ཏ་མ་པ་རི་ཤོ་དྷ་ཡཱ། མ་མེ་ཀཤྩི་དེ་བ་ཧེ་ཐཾ་ཀ་རོ་ཏུ། བུདྡྷ་ཨ་དྷིཥྛཱ་ནེ་ན་སཝཱཧཱ། ཏདྱ་ཐཱ། ཏེ་ཛེ་ཏེ་ཛེ། མ་ཧཱ་ཏེ་ཛེ། ཡ་ན་མ་མ་ཀཱ་ཡ་དུ་ཤྩ་རི་ཏ་མ་བཱ། ཝཱག་དུ་ཤྩ་རི་ཏ་མ་བཱ། མ་ནོ་དུ་ཤྩ་རི་ཏ་མ་བཱ། དཱ་རཱི་དྲྱ་མ་བཱ། ཏད་སརྦ་དཀྵཱ་པཱ་ཡ། ཨ་ལོ་ཀཱ་ཡ། བི་ལོ་ཀཱ་ཡ། ཏ་ཐཱ་ག་ཏ་ད་རི་ཤ་ནན་ཙ། ཨ་ཧ་མ་དྷི་ཀ་དཀྵ་མི་བོ་དྷི་ས་ཏྱ་ད་རི་ཤ་ན་མ། དྷ་དྷུ་མ། དད་ས་སཝ་མེ་ད་རི་ཤ་ན་མ། སརྦ་མེ་ཀུ་ཤ་ལཱ་ཨ་བྷི་བརྡྷནྟུ། ན་མཿ ་སརྦ་ཏ་ཐཱ་ག་ཏཱ་ནན། ན་མ་ཨཱརྱ་བ་ལོ་ཀི་ཏེ་ཤཝ་ར་ཡ། བོ་དྷི་སཏྭཱ་ཡ། སྨ་ར་པྲ་ཏི་ཛྙཱ་མ་མ་སཏྭ། སིདྡྷྱིནྟུ་མནྟྲ་པ་དེ་སཝཱཧཱ། གཟུངས་འདི་བརྗོད་པ་ན་ས་ཆེན་པོ་འདི་རབ་ཏུ་གཡོས་ཤིང་གཞའི་སྒྲ་ཆེན་པོ་དང ། ལྷའི་མེ་ཏོག་གི་ཆར་དག་ཀྱང་མངོན་པར་རབ་ཏུ་བབ་པར་གྱུར་ཏོ། ། 431a ༄#། །ཐམས་ཅད་དང་ལྡན་པའི་འཁོར་དེས་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། །ལེགས་སོ། །སེམས་ཅན་ཆེན་པོ་ཁྱོད་སེམས་ཅན་ཐམས་ཅད་བསྐྱབ་པའི་ཕྱིར་རེ་བ་ཐམས་ཅད་ཡོངས་སུ་རྫོགས་པར་བྱེད་པ། འཇིགས་པ་ཐམས་ཅད་ལས་སྲུང་བར་བྱེད་པ། ལས་ཐམས་ཅད་ཕྱང་བར་ཕྱེད་པ། སྡང་བ་དང་རྨི་ལམ་ངན་པའི་གནོད་པ་ཐམས་ཅད་རབ་ཏུ་ཞི་བར་བྱེད་པའི་གཟུགས་འདི་ལེགས་པར་སྨྲས་སོ། །བདག་ཅག་ཐམས་ཅད་ཀྱིས་ཀྱང་གཟུང་བར་བྱ། བསྙེན་བཀུར་བྱའོ། །སྤྱན་རས་གཟིགས་དབང་ཕྱུག་གིས་སྨྲས་པ། རིགས་ཀྱི་བུ་དག་།གང་ལ་ལ་ཇི་ལྟར་དེ་བཞིན་གཤེགས་པས་ཡོངས་སུ་བསྒྲགས་པའི་ཡོན་ཏན་དེ་དག་མངོན་པར་འདོད་ཅིང་ལུང་བསྟན་པ་དང ། ཁོ་བོའང་མངོན་སུམ་དུ་མཐོང་བ་དང ། ཏིང་ངེ་འཛིན་འཐོབ་པ་དང ། སངས་རྒྱས་དང་བྱང་ཆུབ་སེམས་དཔའ་མཐོང་བ་དང ། ལོངས་སྤྱོད་དང་དབང་ཕྱུག་འཐོབ་པ་དང ། སངས་རྒྱས་ཀྱི་ཞིང་དུ་སྐྱེ་བར་འདོད་པ་དེས་ཟླ་བ་ཡར་གྱི་ངོ་ལ་ལུས་ལེགས་པར་ཁྲུས་བྱས་ཤིང་གཙང་ལ་བསྙེན་ཏེ་གནས་པ་འཕགས་པ་ཡན་ལག་བརྒྱད་པ་ལ་གནས་པར་བྱས་ལ་ཚེས་བརྒྱད་ནས་བརྩམས་ཏེ། དེ་བཞིན་གཤེགས་པས་བྱིན་གྱིས་བརླབས་པའི་ཕྱོགས་སུ་སྤོས་དང ། མེ་ཏོག་དང ། རྒྱལ་མཚན་དང ། བ་དན་དག་དང ། བུམ་པ་གང་བ་ 431b དག་གིས་ཕྱོགས་དེ་དང ། ཆོས་སྨྲ་བ་དེའང་མཆོད་པ་བྱས་ནས་ལུས་ལེགས་པར་ཁྲུས་བྱས་པ་གཙང་མས་གོས་དཀར་པོ་བགོས་ཏེ་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པ་སྣ་ཚོགས་དག་གིས་མཆོད་ནས་ཡི་གེར་བྲི་བར་བྱའོ། །འབྲི་བའི་ཚེ་ན་ཉིན་གཅིག་བཞིན་དུ་དགེ་བའི་རྩ་བ་རྣམས་སེམས་ཅན་ཐམས་ཅད་དང་ཐུན་མོང་དུ་བྱས་ལ། དེ་བཞིན་གཤེགས་པ་ལ་བླ་མ་དང ། གུས་པའི་སེམས་ཉེ་བར་བཞག་ནས་སེམས་ཅན་ཐམས་ཅད་ལ་བྱམས་པའི་སེམས་དང ། སྙིང་བརྩེ་བའི་སེམས་དང ། སྙིང་རྗེའི་སེམས་ཀྱིས་ཉི་མ་ཕྱེད་ཚུན་ཆད་ཀྱི་བར་དེ་ཙམ་དུ་བྲི་བར་བྱའོ། །ཚེས་བརྒྱད་ནས་བརྩམས་ཏེ་ཚེས་བཅོ་ལྔའི་བར་དུ་ཉིན་གཅིག་བཞིན་དུ་མཆོད་པའང་དེ་བཞིན་བྱའོ། །ཆོ་ག་འདི་ཁོ་ན་བཞིན་དུ་བྱས་ཏེ་བྲིས་ན། དེ་མ་ཐག་ཏུ་མཚམས་མེད་པ་ལྔ་ལ་སོགས་པ་ལས་ཀྱི་སྒྲིབ་པ་ཐམས་ཅད་དང ། སྡིག་པ་ཐམས་ཅད་བྱང་བར་འགྱུར་ཞིང་དགེ་བའི་རྩ་བ་རྣམས་ཀྱང་འཕེལ་བར་འགྱུར། བརྩོན་འགྲུས་འབར་བར་འགྱུར་རོ། །ཚེ་དེ་ཉིད་ལའང་ལུས་བདེ་པ་འཐོབ་པར་འགྱུར། འདོད་ཆགས་དང ། ཞེ་སྡང་དང ། གཏི་མུག་དང ། ང་རྒྱལ་དང ། ཁྲོ་བ་དང ། ཕྲག་དོག་དང ། སེར་སྣ་དག་སྲབ་མོར་འགྱུར་རོ། །དེས་ཡི་གེར་འབྲིར་བཅུག་ནས་ཀྱང་སྐུ་གདུང་དང་བཅས་པའི་མཆོད་རྟེན་གྱི་གནས་སུ་དེ་བཞིན་ 432a ༄#། །གཤེགས་པའི་སྐུ་གཟུགས་སྐུ་གདུང་དང་བཅས་པ་དང ། སྤྱན་རས་གཟིགས་དབང་ཕྱུག་གི་གཟུགས་སྐུ་གདུང་དང་བཅས་པ་ཞལ་ཤར་ཕྱོགས་སུ་བསྟན་ཏེ་བཞག་ལ། མེ་ཏོག་དང ། བདུག་སྤོས་དང ། སྤོས་དང ། མར་མེ་དག་གིས་མཆོད་པ་ཤིན་ཏུ་རྒྱ་ཆེར་བྱས་ལ། ཚེས་བརྒྱད་ནས་བརྩམས་ཏེ་ཚེས་བཅོ་ལྔའི་བར་དུ་སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་པར་བྱ་ཞིང ། གཙང་མ་ཁ་ཟས་དཀར་པོ་ཟ་བ། བསྙེན་ཏེ་གནས་པ་འཕགས་པ་ཡན་ལག་བརྒྱད་པ་ལ་གནས་པ་གྲོགས་པོ་ཡིད་གཅུགས་པ་དང་ལྡན་པ། ང་རྒྱལ་དང ། ཁྲོ་བ་དང ། ཕྲག་དོག་དང ། སེར་སྣ་ཡོངས་སུ་སྤངས་པས་ཉིན་གཅིག་བཞིན་དུ་མཆོད་པ་རྒྱ་ཆེན་པོ་བྱས་ཏེ་དུས་གསུམ་དུ་བཟླས་བརྗོད་ལན་བརྒྱ་རྩ་བརྒྱད་རྩ་བརྒྱད་བྱའོ། །མེ་ཏོག་དང ། བདུག་སྤོས་དང ། སྤོས་དང ། མར་མེ་དག་ཀྱང་ཕུལ་ལ། དུས་གསུམ་དུ་སྣ་མའི་མེ་ཏོག་བརྒྱ་རྩ་བརྒྱད་རྩ་བརྒྱད་འཕགས་པ་སྤྱན་རས་གཟིགས་དབང་ཕྱུག་གི་གཟུགས་ལ་གཏོར་བར་བྱའོ། །ལག་ན་རྡོ་རྗེ་ལའང་བདུག་སྤོས་ཀྱིས་བདུག་པར་བྱའོ། །ཕྱོགས་བཅུར་ཕྱག་བྱས་ལ་ནུབ་ཕྱོགས་ཀྱི་ལྷ་མོ་འཇིགས་བྱེད་མ་དང ། ཤར་ཕྱོགས་ཀྱི་དཔེ་མེད་མ་དང ། སྟེང་གི་ཕྱོགས་ཀྱི་དུང་ཅན་མ་ལ་སོགས་པ་ལ་ཕྱོགས་བཞིར་གཏོར་མ་རོ་སྣ་ 432b ཚོགས་དང་ལྡན་པ་དང ། འོ་ཐུག་དང ། ཞོ་དང ། འབྲས་ཆན་དག་ཀྱང་གཏོར་བར་བྱའོ། །དེས་ན་དེ་ལ་རྣམ་པར་གཡེང་བ་དང ། འཇིགས་པ་འགའ་ཡང་འབྱུང་བར་མི་འགྱུར་ཞིང་སེམས་འཁྲུལ་བར་མི་འགྱུར་རོ། །སྣ་མའི་མེ་ཏོག་བརྒྱ་རྩ་བརྒྱད་པོ་ཐམས་ཅད་ལ་བཟླས་བརྗོད་བརྒྱ་རྩ་བརྒྱད་བྱས་ལ་བསྐུལ་བར་བྱའོ། །ཆོ་ག་འདི་ཁོ་ན་བཞིན་དུ་སྔར་བསྙེན་པ་བྱས་ལ་དེ་ནས་ཚེས་བཅོ་ལྔའི་ནང་པར་ས་ཕྱོགས་དེར་བུམ་པ་གང་བ་བཞི་བཞག་ལ་བདུག་སྤོས་དང ། ཙནྡན་དང ། པོག་དཀར་པོ་དང ། ག་བུར་དག་ཀྱང་གཞག་མར་མེ་ཁ་བཞི། མེ་ཏོག་དང ། བདུག་སྤོས་དང ། གདུགས་དང ། རྒྱལ་མཚན་དང ། དར་དང ། བ་དན་སྣ་ཚོགས་དག་དང ། གསེར་དངུལ་གྱི་སྣོད་དག་གིས་ལེགས་པར་བརྒྱན་ལ་སྦྲང་རྩི་དང་སྦྱར་བའི་འོ་ཐུག་དང ། ཞོ་དང ། འབྲས་ཆེན་དང ། གཞན་ཡང་ཅི་འབྱོར་པའི་ལྷ་བཤོས་དང ། གཏོར་མ་དག་ཀྱང་ཕྱོགས་བཞིར་གཞག་གོ་།སྣ་མའི་མེ་ཏོག་བརྒྱ་རྩ་བརྒྱད་ལ་སྔ་མ་བཞིན་དུ་བཟླས་བརྗོད་ལན་རེ་བྱས་ལ་ཕྱོགས་བཞིར་གཏོར་རོ། །དེ་ནས་སྣ་མའི་མེ་ཏོག་བརྒྱ་རྩ་བརྒྱད་ཕྲག་གསུམ་ལ་བཟླས་བརྗོད་ལན་རེ་བྱས་ལ།་རེ་རེ་ནས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་ལ་བསྣུན་པར་བྱའོ། །དེ་ནས་གཟུགས་དེ་འགུལ་བར་འགྱུར་ཞིང་སྒྲ་སྐད་ཆེན་པོའང་འབྱུང་བར་འགྱུར། 433a ༄#། །འོད་ཟེར་དག་ཀྱང་འབྱུང་བར་འགྱུར། སའང་གཡོ་བར་འགྱུར་རོ། །དེ་ནས་ལས་ཐམས་ཅད་དང ། དགོས་པ་ཐམས་ཅད་ཀྱང་འགྲུབ་པར་འགྱུར་ཞིང་དེ་བཞིན་གཤེགས་པ་མཐོང་བ་དང ། བྱང་ཆུབ་སེམས་དཔའི་ས་ཐོབ་པར་ཡང་འགྱུར། སེམས་ཅན་ཐམས་ཅད་ཀྱིས་ཕྱག་བྱ་བའི་འོས་སུའང་འགྱུར། ནོར་དང ། འབྲུ་དང ། མཛོད་དང ། བང་བ་རྣམས་འབྱོར་པར་ཡང་འགྱུར། ནད་ཐམས་ཅད་ཡོངས་སུ་སྤངས་པ་དང ། ཚེ་རིང་བར་ཡང་འགྱུར། དགྲ་ཐམས་ཅད་དང ། རྒྱལ་པོ་དང ། རྒྱལ་བུ་དང ། བློན་པོ་རྣམས་ཀྱང་དེ་ལ་ལྟ་འདོད་ཅིང་གཅེས་སྤྲས་བྱེད་པར་ཡང་འགྱུར། ཉོན་མོངས་པ་ཐམས་ཅད་དང ། འདོད་ཆགས་དང ། ཞེ་སྡང་དང ། གཏི་མུག་སྤངས་པར་འགྱུར། ནམ་དུའང་སྡུག་པ་དང་མི་འབྲལ་བར་འགྱུར་རོ། །བརྟན་པ་དང ། སྟོབས་དང ། བརྩོན་འགྲུས་ཆེན་པོ་དང་ལྡན་པ་དང ། གཟི་བརྗིད་དང་ལྡན་པ་དང ། དབང་པོ་རྣོ་བ་དང ། བློ་དང་ལྡན་པ་དང ། སེམས་ཅན་ཐམས་ཅད་ལ་སྙིང་བརྩེ་བའི་སེམས་དང་ལྡན་པ་དང ། ཆོ་ག་ཤེས་པ་དང ། འཆི་བའི་ཚེ་ན་སངས་རྒྱས་བཅོམ་ལྡན་འདས་རྣམས་མཐོང་བ་དང ། འཕགས་པ་སྤྱན་རས་གཟིགས་དབང་ཕྱུག་ཀྱང་མཐོང་བ་དང ། བྱམས་པ་ལ་གནས་ཤིང་ཆོས་སྟོན་བཞིན་དུ་འཆི་བའི་དུས་བྱེད་པའི་བར་དུའང་འགྱུར་རོ། །སངས་རྒྱས་ཀྱི་ཞིང་ཇི་ལྟ་བུ་ 433b འདོད་པ་དག་གམ། འཁོར་ལོས་བསྒྱུར་བའི་རིགས་ཆེན་པོའམ། གང་དུ་རྗེས་སུ་དྲན་པར་བྱེད་པ་དེར་སྐྱེ་བ་དང ། གཞན་ཡང་ཡོན་ཏན་སྟོང་ཕྲག་དུ་མ་དག་ཀྱང་འཐོབ་པར་འགྱུར་རོ། ། གསོལ་པ། བཅོམ་ལྡན་འདས། དེ་ལྟར་ན། ཆོས་ཀྱི་རྣམ་གྲངས་འདི་དང ། གཟུངས་ཀྱི་གསང་སྔགས་ཀྱི་གཞི་འདི་དག་ནི། ཡོན་ཏན་མང་པོའི་འབྱུང་གནས་ལགས་ཏེ། ཆོས་ཀྱི་རྣམ་གྲངས་འདི་ནི། དེ་བཞིན་གཤེགས་པའི་བྱིན་གྱི་རླབས་མ་མཆིས་པར་མཉན་པར་ཡང་རྔོ་མི་ཐོགས་ལ་གཟུང་བར་ཡང་རྔོ་མི་ཐོགས། ཀློག་པར་ཡང་རྡོ་མི་ཐོགས། མཆོད་པར་ཡང་རྔོ་མི་ཐོགས། ཡི་གེ་བྲི་བར་ཡང་རྔོ་མི་ཐོགས། ཡི་གེར་འབྲིར་སྩལ་བར་ཡང་རྔོ་མི་ཐོགས། དད་པར་ཡང་རྔོ་མི་ཐོགས་ལགས་སོ། །གལ་ཏེ་མཐོང་བར་གྱུར་ནའང་ཉན་པར་མི་འགྱུར་ལ། གལ་ཏེ་ཉན་པར་གྱུར་ནའང་དེ་སེམས་རྣམ་པར་གཡེངས་པས་ཉན་པར་འགྱུར་ཞིང་དད་པར་མི་འགྱུར། བསྙེན་བཀུར་བགྱིད་པར་མི་འགྱུར་ལགས་སོ། །གལ་ཏེ་བསྙེན་བཀུར་བགྱིད་པར་འགྱུར་ནའང་ཉོན་མོངས་པ་དང ། གནོད་སེམས་དང་བཅས་པའི་སེམས་ཀྱིས་བསྙེན་བཀུར་བགྱིད་པར་འགྱུར་ལགས་སོ། །གལ་ཏེ་ཡི་གེར་འབྲིའམ། ཡི་གེར་འབྲིར་སྩལ་བར་གྱུར་ནའང་དེ་གཞན་དག་ཡིད་ལ་བགྱིད་པར་འགྱུར་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དེའི་སྔོན་གྱི་ལས་ཀྱི་འབྲས་བུ་ལགས་པའི་སླད་དུ་སྟེ། དེ་ནི་ལས་དེ་ཉམས་སུ་མྱོང་བར་བགྱིད་ 434a ༄#། །ཅིང་ཐེ་ཚོམ་སྐྱེ་བར་འགྱུར་ལགས་སོ། །མཚམས་མ་མཆིས་པ་ལྔ་བགྱིད་པས་ཀྱང་ལན་གསུམ་བསྒྲུབས་ན། རེ་བ་ཐམས་ཅད་ཡང་དག་པར་འགྲུབ་པར་འགྱུར་ལགས་ཏེ། དེ་ལ་ནེམ་ནུར་མ་མཆིས་པ་དང ། ཡིད་གཉིས་མ་མཆིས་པ་དང ། ཐེ་ཚོམ་མི་བསྐྱེད་པར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། །ལེགས་སོ། །ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་ལ་དེ་བཞིན་གཤེགས་པའི་མཛད་པ་བྱེད་པར་འགྱུར་རོ། །དེ་ནས་གནོད་སྦྱིན་མོ་ཆེན་མོ་དཔེ་མེད་མ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དང ། སྤོས་དང ། བདུག་སྤོས་སྣ་ཚོགས་དང ། རས་བཅོས་བུ་ཟུང་དག་གིས་མཆོད་པར་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་འདི་ལྟར་བཅོམ་ལྡན་འདས་ཡུལ་ཀོའུ་ཤ་མྦྷི་ན་དབྱངས་ཅན་གྱི་ཀུན་དགའ་ར་བ་ན་བཞུགས་པའི་སྤྱན་སྔར་སེམས་ཅན་ཐམས་ཅད་ཀྱི་དོན་དང ། སྨན་པ་དང ། བདེ་བའི་སླད་དུ་དམ་བཅས་པ་བརྗོད་པར་རྗེས་སུ་དྲན་ལགས་ཏེ། བཅོམ་ལྡན་འདས། བདག་ 434b ཅག་གིས་ཀྱང་རིག་སྔགས་འཆང་བ་ཐམས་ཅད་ཀྱི་སྙིང་པོ་དག་འཚལ་ལགས་སོ། །དེའི་སླད་དུ་བཅོམ་ལྡན་འདས་ཀྱིས་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། རེ་བ་ཐམས་ཅད་ཡོངས་སུ་རྫོགས་པར་འགྱུར་བ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་ཀྱི་དོན་དུ་བདག་རྗེས་སུ་གཟུང་དུ་གསོལ། ན་མཿ ་སརྦ་ཏ་ཐཱ་ག་ཏཱ་ནཱཾ། སྱཱད་ཡ་ཐེ་དན། ཧ་ཧ། ཧི་ཧི། ཧུ་ཧུ། ས་ར་ས་ར། ལ་ཧཱུཾ་ལ་ཧཱུཾ། ཤཱ་གྷྲཱིཾ། མ་ཧཱ་བིདྱཱ། སརྦ་བིདྱཱ་དྷ་ར་ན་མ་སྐྲི་ཏེ། ཧ་ས་ཧ་ས་ཀིཾ་ཏིཥྛ་སི། ཀིཾ་ཀིཾ་ཏིཥྛ་སི། ཀན་ཀ་བི་ཙི་ཏྲ། ཨ་བ་ར་ཎ་བི་བྷཱུ་ཥི་ཏཱངྒེ། པ་ཊ་པ་ཊ། བྷ་ར་བྷ་ར། བྷི་རི་བྷི་རི། བྷུ་རུ་བྷུ་རུ། སརྦ་ཨརྠན་མེ་སཱ་དྷ་ཡ། ཏུ་རུ་ཏུ་རུ། ཨརྠན་སཱ་དྷ་ཡ། ཨརྠན་དེ་ཧི་མེ། སརྦ་སཏྲཱ་ནཱཾ་སིདྡྷིཾ། ཧཱ་ཧཱ། པདྨེ་པདྨེ།་མ་ཧཱ་པདྨེ། བི་ཤ་དེ་བི་ཤ་དེ། མ་ཧཱ་བི་ཤ་དེ། བྷ་བ་བྷ་བ། བྷ་བོ་བྷ་བཱ་ཡ། ཏ་མ་ཧཾ་གྷོ་རེ། ཏན་མེ་བིདྱ་མ་པྲ་ཡོ་ཛ་ན་ཡ། སིདྡྷིཾ་ཀུ་རུ། སརྦ་ཨཱ་ཤཱ་མེ་པ་རི་པཱུ་ར་ཡ། བུདྡྷ་ཨ་དྷིཥྛཱ་ནེ་ན་སཝཱཧཱ།་བཅོམ་ལྡན་འདས། གང་ལ་ལ་ཡོན་ཏན་འཚལ་བ་དང ། ནོར་དང་འབྲུ་འཚལ་བ་དང ། སེམས་ཅན་ཐམས་ཅད་དབང་དུ་བགྱིད་པར་འཚལ་བ་དང ། ནོར་གྱི་དབང་ཕྱུག་ཆེན་པོ་དང ། རྒྱལ་སྲིད་དང ། རིག་སྔགས་འཆང་ཆེན་པོ་ཉིད་དང ། བདག་ཀྱང་མངོན་སུམ་དུ་མཐོང་བར་འཚལ་བ་དེས་ཆོས་བརྒྱད་ཀྱི་གདུགས་ལ་རས་དཀར་པོ་གསར་པ་ཁ་ཚར་མ་ 435a ༄#། །བཀུམ་པ་སྐྲ་བསལ་བ་ལ་རི་མོ་མཁན་གཙང་མ་བསྙེན་ཏེ་གནས་པ། འཕགས་པ་ཡན་ལག་བརྒྱད་པ་ལ་གནས་པས། ཚོན་རྩི་སྤྱིན་དང་མ་འབགས་པ་སྣོད་གསར་པའི་ནང་དུ་སྩལ་བས་དབུས་སུ་དེ་བཞིན་གཤེགས་བའི་སྐུ་གཟུགས་ཆོས་སྟོན་པའི་ཚུལ་དུ་བཞུགས་པ་བྲི་བར་བགྱིའོ། །གཡས་ཕྱོགས་སུ་འཕགས་པ་རྡོ་རྗེ་ཁྲོ་བོ་རད་པ་དཀར་པོ་འཚལ་བ། རྒྱན་ཐམས་ཅད་དང ། མེ་ཏོག་ཕྲེང་བ་དང ། ཟླ་གམ་དང ། སེ་མོ་དོས་བརྒྱན་པ་རྡོ་རྗེ་གསོར་ཞིང་མཆིས་པ་བྲི་བར་བགྱིའོ། །གཡོན་ཕྱོགས་སུ་ནི་གནོད་སྦྱིན་མོ་ཆེན་མོ་དཔེ་མེད་མ་འདམ་བུ་མདའ་རྒྱུའི་མདོག་ལྟར་དཀར་ཤམ་དུ་མཆིས་ལ། རད་པ་དཀར་པོ་འཚལ་བ། རྒྱན་ཐམས་ཅད་ཀྱིས་བརྒྱན་པ། སུག་པ་ན་པདྨ་ཐོགས་ཤིང་ཡང་དག་པར་དབུགས་འབྱིན་པའི་ཚུལ་དུ་མཆིས་པ་བྲི་བར་བགྱིའོ། །དེ་ནས་རིག་སྔགས་འཆང་གཙང་མ་བསྙེན་ཏེ་གནས་པ། འཕགས་པ་ཡན་ལག་བརྒྱད་པ་ལ་གནས་པ། རད་པ་དཀར་པོ་འཚལ་བ། གྲོགས་དང་ལྡན་པ། ནས་ཆན་འོ་མ་དང་སྦྱར་བ་འཚལ་བས་སྔར་བསྙེན་པ་བགྱི་ལ། ཚེས་བརྒྱད་ཀྱི་གདུགས་ལ་དེ་བཞིན་གཤེགས་པའི་སྐུ་གདུང་དང་བཅས་པའི་གནས་གཙང་མར་དང་པོར་ཁོ་ནར་དེ་བཞིན་གཤེགས་པ་དང ། ལག་ན་རྡོ་རྗེ་ལ་མེ་ཏོག་དང ། བདུག་སྤོས་དང ། སྤོས་དག་གསོལ་བར་བགྱི་ཞིང ། ཕྱོགས་བཞིར་ 435b ཡང་འོ་ཐུག་དང ། ཞོ་དང ། འབྲས་ཆན་དང ། རོ་སྣ་ཚོགས་དང་ལྡན་པ་དང ། ཆན་སྣ་ཚོགས་ཀྱི་གཏོར་མ་དག་གཏོར་ལ། མེ་ཏོག་དང ། བདུག་སྤོས་དང ། སྤོས་དང ། མར་མེ་སྣ་ཚོགས་དག་གིས་མཆོད་པ་བགྱིས་ནས་དུས་གསུམ་དུ་སྣ་མའི་མེ་ཏོག་བརྒྱ་རྩ་བརྒྱད་ཕྲག་གསུམ་ལ་བཟླས་བརྗོད་བརྒྱ་རྩ་བརྒྱད་ཕྲག་གསུམ་བགྱི་ཞིང ། རེ་རེ་ནས་གནོད་སྦྱིན་མོ་ཆེན་མོ་དཔེ་མེད་མའི་གཟུགས་དེ་ལ་བསྣུན་པར་བགྱིའོ། །དེ་ནས་ཟླ་བ་ཉའི་ཚེས་བཅོ་ལྔའི་གདུགས་ལའང་ཆོག་འདི་ཉིད་དང ། གཞན་ཡང་ཅི་འབྱོར་བ་དག་དང ། བདུག་སྤོས་དང ། ག་པུར་དང ། པོག་དཀར་པོ་དང ། ཙནྡན་དང ། ཤིང་མུ་ས་དག་ཀྱང་དབུལ། འབྲུ་མར་དྲི་བདའ་བའི་ཞུགས་མར་ཁ་གཉིས་ཀྱང་དབུལ་བར་བགྱིའོ། །དེ་ནས་བདག་དེར་རང་གི་གཟུགས་ཀྱིས་གནས་པར་བགྱི་ཞིང་དམ་པ་ཅི་འཚལ་བའང་སྩལ་བར་བགྱི་སྟེ། ཏིང་ངེ་འཛིན་ཐོབ་པ་དང ། ནམ་མཁའ་ལ་མཆིས་པ་དང ། ལུས་མི་སྣང་བར་བགྱི་བ་དང ། རྒྱལ་སྲིད་དང ། སྟོབས་ཀྱི་འཁོར་ལོས་བསྒྱུར་བ་ཉིད་དང ། རིག་སྔགས་འཆང་ཉིད་དང ། གཏེར་ལྟ་འཚལ་བ་དང ། ནོར་སྒྱུར་འཚལ་བ་དང ། ཕ་རོལ་གྱི་སེམས་འཚལ་བ་དང ། ཚེ་རིང་བ་དང ། དམ་པ་ཅི་འཚལ་བའང་སྩལ་བར་བགྱི་ལགས་སོ། །དེས་ཀྱང་སེམས་ཅན་ཐམས་ཅད་ལ་བྱམས་པའི་སེམས་དང ། ང་རྒྱལ་དང ། ཁྲོ་བ་དང ། ཕྲག་དོག་དང ། སེར་སྣ་ཡོངས་སུ་ 436a ༄#། །སྤངས་པའི་སེམས་སུ་བགྱིའོ། །མཆོད་རྟེན་དང ། ཆོས་དང ། དགེ་འདུན་གྱི་ནོར་འཕྲོག་པ་ཡོངས་སུ་སྤང་བ་དང ། དེ་བཞིན་གཤེགས་པ་རྣམས་ལ་དང་བ་མི་ཕྱེད་པར་བགྱིའོ། །བཅོམ་ལྡན་འདས། གལ་ཏེ་མཚམས་མ་མཆིས་པ་བགྱིད་བ་ཞིག་གིས་ཀྱང་ལན་གསུམ་བསྒྲུབས་ཏེ་བདག་གིས་མ་སྩལ་བར་གྱུར་ན། བཅོམ་ལྡན་འདས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།གལ་ཏེ་སངས་རྒྱས་ལ་མ་དད་པར་གྱུར་པ་དང ། ཡིད་གཉིས་སུ་གྱུར་པ་གང་ལགས་པ་དང ། སྡིག་པ་མི་དགེ་བའི་ཆོས་བགྱིས་ནས་འགྱོད་པར་མི་བགྱིད་པ་དང ། ཉོན་མོངས་པ་དང ། ཉེ་བའི་ཉོན་མོངས་པའི་སེམས་དང་ལྡན་པ་གང་ལགས་པ་དེ་དག་ལའང་བདག་མཐོང་བ་སྩལ་བར་བགྱི་ཞིང་ཐོབ་པར་ཡང་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་མོ་ཆེན་མོ་དཔེ་མེད་མ་ལེ་ལེགས་སོ་ཞེས་བྱ་བ་བྱིན་ཏེ། སྲིང་མོ། ལེགས་སོ། །ལེགས་སོ། །སྲིང་མོ་ཁྱོད་ཀྱིས་སེམས་ཅན་ཐམས་ཅད་ཀྱི་དོན་དུ་སྡིག་པ་ཀུན་ཏུ་སྤྱོད་པའི་སེམས་ཅན་རྣམས་ལ་གསང་སྔགས་ཀྱི་གཞི་འདི་ལྟ་བུ་འདི་དག་སྨྲས་ཞིང་དམ་བཅའ་བའང་བྱས་པ་ནི། ཡང་ཁྱོད་ལེགས་སོ། །ཁྱོད་སྙིང་རྗེ་ཆེན་པོ་འདི་ལྟ་བུ་འདིས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་ 436b པའི་བྱང་ཆུབ་ལ་རབ་ཏུ་འགོད་ནུས་པར་འགྱུར་གྱི། ཁྱོད་ཀྱིས་དེ་བཞིན་དུ་གྱིས་ཤིག་།དེ་ནས་ལྷ་མོ་ཆེན་མོ་དུང་ཅན་མས་བཅོམ་ལྡན་འདས་ལ་མེ་ཏོག་སྣ་ཚོགས་དང ། སྤོས་སྣ་ཚོགས་དག་གིས་མཆོད་པ་བྱས་ཏེ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་དེ་བཞིན་གཤེགས་པའི་བྱིན་གྱི་རླབས་ཀྱིས་དེ་བཞིན་གཤེགས་པའི་བསྟན་པ་ཡུན་རིང་དུ་གནས་པར་བགྱི་བ་དང ། ཆོས་སྨྲ་བ་དེ་དག་ཀྱང་བསྲུང་བའི་སླད་དུ་དམ་བཅའ་བར་བགྱི་ཞིང ། རེ་བ་ཐམས་ཅད་ཡོངས་སུ་རྫོགས་པར་བགྱིད་པའི་གསང་སྔགས་ཀྱི་གཞི་རྣམས་སྩལ་བར་བགྱི་ལགས་ཀྱི། དེའི་སླད་དུ་བཅོམ་ལྡན་འདས་ཀྱིས་བདག་ལ་རྗེས་སུ་གནང་བར་མཛད་དུ་གསོལ། ན་མཿ ་སརྦ་ཏ་ཐཱ་ག་ཏ་ནཱི། ཏདྱ་ཐཱ། ཨོཾ་ཤཾ་ཁི་ནི་དེ་བི། ཨཱ་གཙྪ་ཨཱ་གཙྪ། ཏིཥྛཱ་དྷ་ནེ། དྷཱ་ན་ཛ་ཡེ། བྲི་བྲི། བྲི་དྷཱ་ཀ་རི། དྷྲི་དྷྲི། དྷྲི་ཏི་ཀ་རི། ནཱ་ནཱ་བི་བི་དྷ། པ་ཤ་བསྟ། ཨཱ་ཡུ་དྷ་དྷ་ར་ནི། ཡུ་ཡུ་ཨཱ་ཡུཥྤ་ལ་ན། ཏ་ཐཱ་ག་ཏ་ནཱཾ། སྨ་ར་བོ་དྷ་ཙིཏྟཾ། མ་བི་ལམྦ། དེ་ཧི་མེ་བ་ར་ན། ཤཾ་ཁི་ནི་སཝཱཧཱ། བཅོམ་ལྡན་འདས། གསང་སྔགས་ཀྱི་གཞི་འདི་དག་ལུས་ལ་གནས་པར་བགྱིས་ན། དེའི་སྙན་པ་འཕེལ་བར་འགྱུར་ཞིང ། གཟི་བརྗིད་འཕེལ་བ་དང ། ལོངས་སྤྱོད་འཕེལ་པ་དང ། དབང་ཕྱུག་འཕེལ་བ་དང ། ཚེ་རིང་བ་དང ། དགྲ་རྣམས་དབང་ 437a ༄#། །དུ་བགྱི་བའང་འཕེལ་བར་འགྱུར་ལགས་སོ། །ས་ཕྱོགས་གཙང་མའམ། ལྷའི་གནས་སུ་ཅི་འབྱོར་བའི་གཏོར་མ་ཕྱོགས་བཞིར་སྩལ་ལ། དེ་བཞིན་གཤེགས་པ་ལ་བདུག་སྤོས་དང ། པོག་དཀར་པོ་དག་གིས་མཆོད་པ་རྒྱ་ཆེར་བགྱི་ཞིང་ཞུགས་མར་དག་ཀྱང་ཕུལ་ལ། དགུང་ཉི་ཤུ་རྩ་གཅིག་ཏུ་བྱམས་པ་ལ་གནས་པ་དང ། དེས་པར་གནས་ཤིང་བཟླས་བརྗོད་ལན་བརྒྱ་རྩ་བརྒྱད་བགྱིས་ན། དམ་པའི་ཆོས་སྤོང་བ་མ་གཏོགས་པ་རྣམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་བགྱི་ལགས་སོ། །དེ་ནས་བཅོམ་ལྡན་འདས་དང ། ཇི་ལྟར་ལྷགས་པའི་འཁོར་དེ་དག་གིས་ལྷ་མོ་ཆེན་མོ་དུང་ཅན་མ་ལ་ལགས་སོ་ཞེས་བྱ་བ་བྱིན་ཏེ། སྲིང་མོ། ལེགས་སོ། །ལེགས་སོ། །ཡོན་ཏན་མང་པོ་དང་ལྡན་པའི་དམ་བཅའ་བ་འདི་ནི་ལེགས་པར་སྨྲས་སོ། །སྲིང་མོ། ཁྱོད་ཀྱིས་མ་འོངས་པའི་དུས་ན་དེ་བཞིན་དུ་གྱིས་ཤིག་།དེ་ནས་ལྷ་མོ་ཆེན་མོ་འཇིགས་བྱེད་མས་བཅོམ་ལྡན་འདས་ལ་གསེར་གྱི་མེ་ཏོག་དག་གིས་མཆོད་པ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ཆོས་སྨྲ་བ་དེ་དག་དང ། ཆོས་ཉན་པ་དེ་དག་དང ། ཡི་གེར་འབྲི་བ་དེ་དག་དང ། འཛིན་པ་དང ། ཀློག་པ་དང ། མཆོད་པ་བགྱིད་ 437b པ་དེ་དག་གི་དོན་དུ་རེ་བ་ཐམས་ཅད་ཡོངས་སུ་རྫོགས་པར་བགྱིད་པ། དབྱིག་དང ། ནོར་བུ་དང ། མུ་ཏིག་དང ། ལོངས་སྤྱོད་དང ། དབང་ཕྱུག་དང ། རྒྱལ་སྲིད་དང ། ཚེ་རིང་བར་བགྱིད་པ།་དགྲ་ཐམས་ཅད་དབང་དུ་བགྱིད་པའི་གསང་སྔགས་ཀྱི་གཞི་རྣམས་སྩལ་བར་བགྱི་སྟེ། རྒྱལ་པོའམ། རྒྱལ་པོའི་བཙུན་མོའམ། དགེ་སློང་ངམ། དགེ་སློང་མའམ། དགེ་བསྙོན་ནམ།་དགེ་བསྙེན་མ་གང་ལ་ལ་ཞིག་འཛིན་ཏམ། ཀློག་གམ། བསྙེན་བཀུར་བགྱིད་དམ། ཡི་གེར་འབྲིའམ། ཡི་གེར་འབྲིར་སྩོལ་ཏམ། མཆོག་ཏུ་གུས་པས་ཇི་སྐད་གསུངས་བའི་སྒྲུབ་པ་ལ་སྒྲུབ་པར་བགྱིད་ན། བཅོམ་ལྡན་འདས། བདག་གིས་དེ་བསྲུང་བར་བྱ། ཡོངས་སུ་བསྐྱང་བར་བགྱི་ཞིང་དམ་པ་ཅི་འཚལ་བའང་སྩལ་བར་བགྱི་སྟེ། ལོངས་སྤྱོད་དང ། དབང་ཕྱུག་དག་གིས་མི་བྲེལ་བར་བགྱི། འཐབ་མོ་དང ། འགྱེད་པ་དང ། ཁྲག་ཁྲུག་དང ། འཁྲུག་སློང་དག་ལུས་རྒྱལ་བར་བགྱི། ཚེ་ཕུན་སུམ་ཚོགས་པ་ཉེ་བར་བསྒྲུབ་པར་བགྱི། དེའི་ཡུལ་དང་གྲོང་ཁྱེར་དག་ཀྱང་ཡོངས་སུ་བསྐྱང་བར་བགྱི་ལགས་ཀྱི། དེའི་སླང་དུ་བཅོམ་ལྡན་འདས་ཀྱིས་བདག་ལ་རྗེས་སུ་གནང་བར་མཛད་དུ་གསོལ། ན་མཿ ་སརྦ་ཏ་ཐཱ་ག་ཏ་ནཱཾ། ཏདྱ་ཐཱ། ཨོཾ་ཤཾ་ཁི་ནི་དེ་བི། ཨཱ་གཙྪ་ཨཱ་གཙྪ། ཏིཥྛཱདྷ་ནེ། དྷཱ་ན་ཛ་ཡེ། བྲི་བྲི། བྲི་དྷཱ་ཀ་རི། དྷྲི་དྷྲི། དྷྲི་ཏ་ཀ་རི། ནཱ་ནཱ་བི་བི་དྷ། བ་ཤ་བསྟ་དྷ་དྷ་རི་ནི། ཡུ་ཡུ་ཨ་ཡུཥྤྲཱ་ལ་ལེ། ཏ་ཐཱ་ག་ཏ་ནཱཾ། སྨ་ར་བོ་དྷི་ 438a ༄#། །ཙིཏྟཾ། མ་བི་ལམྦ། དེ་ཧི་མེ་པ་ར་ན། ཤཾ་ཁི་ནི་སཝཱཧཱ། བཅོམ་ལྡན་འདས། བདག་གིས་སེམས་ཅན་ཐམས་ཅད་ཀྱི་དོན་དུ་དེ་བཞིན་གཤེགས་པས་བྱིན་གྱིས་བརླབས་ཤིང་དེ་བཞིན་གཤེགས་པས་རྗེས་སུ་གནང་བའི་གསང་སྔགས་ཀྱི་གཞི་འདི་དག་སྨྲས་ལགས་ཏེ། དེ་བཞིན་གཤེགས་པའི་སྤྱན་སྔར་མེ་ཏོག་དང ། བདུག་སྤོས་དང ། སྤོས་དང ། མར་མེ་དག་གིས་མཆོད་པ་བགྱིས་ལ། ཕྱོགས་བཞིར་ཡང་འོ་ཐུག་དང ། རོ་སྣ་ཚོགས་དང་ལྡན་པའི་གཏོར་མ་དག་སྩལ་ཏེ། ཅི་དང་ཅི་འཚལ་བ་ཡིད་ལ་བགྱིས་ཤིང་བཟླས་བརྗོད་ལན་བརྒྱ་རྩ་བརྒྱད་ཀྱིས་མཆོད་པ་བགྱིས་ན། རེ་བ་དེ་དང་དེ་དག་ཐམས་ཅད་ཡོངས་སུ་རྫོགས་པར་བགྱིད་ལགས་སོ། །གང་ལ་ལ་བདག་རང་གི་གཟུགས་མཐོང་བར་འཚལ་བ་དེས་ཚེས་བརྒྱད་ཀྱི་གདུགས་ལ་རས་དཀར་པོ་གསར་པ་ཁ་ཚར་མ་བཀུམ་པ་སྐྲ་མ་མཆིས་པ་ལ་རི་མོ་མཁན་གཙང་མ་འཕགས་པའི་ཡན་ལག་བརྒྱད་ཡོངས་སུ་བཟུང་བས་ཚོན་རྩི་སྤྱིན་དང་མ་འབགས་པ་སྣོད་གསར་པའི་ནང་དུ་སྩལ་བས། དབུས་སུ་དེ་བཞིན་གཤེགས་པའི་སྐུ་གཟུགས་ཆོས་སྟོན་པའི་ཚུལ་དུ་བཞུགས་པ་བྲི་བར་བགྱིའོ།། གཡས་ཕྱོགས་སུ་འཕགས་པ་སྤྱན་རས་གཟིགས་དབང་ཕྱུག་ཆོས་ཀྱི་འབེལ་བའི་གཏམ་སྟོན་པ་བྲི་བར་བགྱིའོ། །གཡོན་ཕྱོགས་སུ་ནི་ལྷ་མོ་ཆེན་མོ་འཇིགས་བྱེད་མ་འདམ་བུ་ 438b མདའ་རྒྱུའི་མདོག་ལྟར་དཀར་ཤམ་དུ་མཆིས་ལ། རད་པ་དཀར་པོ་འཆལ་བ། རྒྱན་ཐམས་ཅད་ཀྱིས་བརྒྱན་པ། རིལ་བ་དང ། བགྲང་ཕྲེང་ཐོགས་ཤིང་ཡང་དག་པར་དབུགས་འབྱིན་པའི་ཚུལ་དུ་མཆིས་པ་བྲི་བར་བགྱིའོ། །དེ་ནས་རིག་སྔགས་འཆང་གཅང་མས་སྔར་བསྙེན་པ་བགྱི་ལ་ཚེས་བརྒྱད་ནས་ཚེས་བཅོ་ལྔའི་བར་དུ་མཆོད་རྟེན་སྐུ་གདུད་དང་བཅས་པའི་གནས་སུ་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དག་གིས་མཆོད་པ་བགྱི་ཞིང ། ཕྱོགས་བཞིར་ཡང་འོ་ཐུག་དང ། ཞོ་དང ། འབྲས་ཆན་གྱི་གཏོར་མ་དག་གཏོར་ལ། མེ་ཏོག་དང ། བདུག་སྤོས་དང ། མར་མེ་སྣ་ཚོགས་དག་གིས་མཆོང་པ་རྒྱ་ཆེར་བགྱི་ཞིང་ལྷ་བཤོས་དཀར་པོ་དག་ཀྱང་ཕུལ་ལ། གཏོར་མ་རོ་སྣ་ཚོགས་དང་ལྡན་པ་དང ། གཞན་ཡང་ཅི་འབྱོར་པ་དག་སྩལ་ནས་སེམས་ཅན་ཐམས་ཅད་ལ་བྱམས་པའི་སེམས་དང ། སྙིང་རྗེའི་སེམས་ཀྱིས་སྣ་མའི་མེ་ཏོག་བརྒྱ་རྩ་བརྒྱད་ལ་བཟླས་བརྗོད་ལན་བརྒྱ་རྩ་བརྒྱད་བགྱི་ཞིང ། རེ་རེ་ནས་ལྷ་མོ་ཆེན་མོ་འཇིགས་བྱེད་མའི་གཟུངས་དེ་ལ་འཕང་བར་བགྱིའོ། །དེ་ནས་བདག་དེར་རང་གི་གཟུགས་ཀྱིས་གནས་པར་བགྱི། དམ་པ་ཅི་འཚལ་བའང་སྩལ་བར་བགྱི་སྟེ། རྒྱལ་སྲིད་ཀྱི་དབང་ཕྱུག་དང ། ནམ་མཁའ་ལ་མཆི་བ་དང ། གཏེར་ལྟ་འཚལ་བ་དང ། ནོར་སྒྱུར་འཚལ་བ་དང ། རིག་སྔགས་འཆང་ཉིད་དང ། དུས་མ་ལགས་པར་ 439a ༄#། །འགུམ་པ་བཟློག་པ་དང ། བྲོ་ནད་ཐམས་ཅད་རབ་ཏུ་ཞི་བར་བགྱི་བ་དང ། ཕ་རོལ་གྱི་དམག་ཚོགས་རབ་ཏུ་གཞོམ་པ་དང ། སེམས་ཅན་ཐམས་ཅད་ལ་བྱམས་པ་སྐྱེ་བ་དང ། གཞན་ཡང་ཅི་འཚལ་པའི་ལས་དག་ཀྱང་བགྱི་ལགས་སོ། །བཅོམ་ལྡན་འདས། གལ་ཏེ་དམ་པའི་ཆོས་སྤོང་བ་དང ། སངས་རྒྱས་དང ། ཆོས་དང ། དགེ་འདུན་དག་ལ་ཐེ་ཚོམ་དུ་གྱུར་པ་གང་ལགས་པ་མ་གཏོགས་པར་མཚམས་མ་མཆིས་པ་ལྔ་བགྱིད་པ་ཞིག་ལགས་ནའང་བདག་གི་རེ་བ་ཐམས་ཅད་ཡོངས་སུ་རྫོགས་པར་མ་བགྱིས་པར་གྱུར་ན། བཅོམ་ལྡན་འདས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ།་སྲིང་མོ། ལེགས་སོ། །ལེགས་སོ། །སྲིང་མོ་ཁྱོད་སེམས་ཅན་ཐམས་ཅད་ཀྱི་དོན་དང ། ཕན་པ་དང ། བདེ་བའི་ཕྱིར་ཞུགས་ཤིང ། ཆོས་ཀྱི་རྣམ་གྲངས་འདིའང་ཡུན་རིང་དུ་གནས་པར་བྱ་བའི་ཕྱིར་ཞུགས་པ་ནི། ཡང་ཁྱོད་ལེགས་སོ། །སྲིང་མོ། དེའི་ཕྱིར་ཁྱོད་ཀྱིས་རྟག་ཏུ་དམ་བཅས་པ་འདི་དྲན་པར་གྱིས་ཤིག་།དེ་ནས་དེའི་ཚེ་ས་ཆེན་པོ་འདི་རབ་ཏུ་གཡོས་ཤིང་ལྷའི་མེ་ཏོག་གི་ཆར་དག་ཀྱང་མངོན་པར་རབ་ཏུ་བབ་པ་དང ། ཐམས་ཅད་དང་ལྡན་པའི་འཁོར་དེ་དག་གིས་ཀྱང་ལེགས་སོ། །ཞེས་བྱ་བ་བྱིན་ཏེ། སྲིང་མོ། ལེགས་ 439b སོ། །ལེགས་སོ། །ཁྱོད་ཀྱིས་སེམས་ཅན་ཐམས་ཅད་ཀྱི་རེ་བ་ཐམས་ཅད་ཡོངས་སུ་རྫོགས་པར་འགྱུར་བའི་དམ་བཅའ་བ་འདི་ནི་ལེགས་པར་སྨྲས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅི་རིགས་ཀྱི་བུའམ། རིགས་ཀྱི་བུ་མོ་ད་ཆོས་ཀྱི་རྣམ་གྲངས་འདི་ཡི་གེར་འབྲི་བ་དང ། ཡི་གེར་འབྲིར་སྩོལ་བ་དང ། ཀློག་པ་དང ། མཆོད་པ་དང ། ཡང་དག་པར་སྟོན་པ་དང ། འདོན་པ་དང ། མཆིད་ཏོན་དུ་བགྱིད་པ་དེས་བསོད་ནམས་འཐོབ་པར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཕགས་པ་སྤྱན་རས་གཟིགས་དབང་ཕྱུག་།དེའི་ཕྱིར་དེ་ཁྱོད་ཉིད་ལ་དྲི་ཡི། ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཅིག་།སྤྱན་རས་གཟིགས་དབང་ཕྱུག་གིས་གསོལ་པ། བཅོམ་ལྡན་འདས། དེ་བཞིན་གཤེགས་པ་ལ་ནི་མ་གཟིགས་པའམ། མ་གསན་པའམ། མ་དགོངས་པ་དང ། རྣམ་པར་མི་མཁྱེན་པ་མི་མངའ་བས་བཅོམ་ལྡན་འདས་ཉིད་ཀྱིས་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཆོས་ཀྱི་རྣམ་གྲངས་འདི་ཡི་གེར་འབྲི་བ་དང ། ཡི་གེར་འབྲིར་འཇུག་པ་དང ། ཀློག་པ་དང ། མཆོད་པ་དང ། ཡང་དག་པར་སྟོན་པ་དང ། འདོན་པ་ནྡང ། ཁ་ཏོན་དུ་བྱེད་པ་ལས་བསོད་ 440a ༄#། །ནམས་འཐོབ་པར་འགྱུར་བ་གང་ཡིན་པ་དེ་ནི་དཔེས་བརྗོད་པར་ཡང་མི་ནུས་སོ། །དེ་ཅིའི་ཕྱིར་ཞེ་ན། གོས་དང ། རྒྱན་དང ། དབྱིག་དང ། གསེར་དང ། ནོར་བུ་དང ། མུ་ཏིག་དག་གིས་སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་བྱས་ཏེ་རྩེར་བཅུག་ཀྱང་སེམས་ཅན་དེ་དག་སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་ལས་ཡོངས་སུ་ཐར་པར་མི་འགྱུར་བ་ཉིད་ཡིན་ཞིང ། ལོ་འབུམ་དུ་འདོད་པའི་ཡོན་ཏན་ལྔ་པོ་དག་གིས་རྩེར་བཅུག་ཀྱང་སེམས་ཅན་དེ་དག་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། ཡི་དྭགས་ཀྱི་ཡུལ་དག་ལས་ཡོངས་སུ་ཐར་པར་མི་འགྱུར་བ་ཉིད་དེ། སེམས་ཅན་རྣམས་ཀྱི་ཕྱིར་ཆོས་ཀྱི་རྣམ་གྲངས་འདི་ཉན་ཅིང་མཆོད་པ་བྱེད་པ་དང ། ཡང་དག་པར་བསྟན་ཏེ། དེའི་དོན་ཀྱང་མཉན་ཅིང་ནན་ཏན་གྱིས་སྒྲུབ་པར་བྱེད་པ་ནི་སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་ཐམས་ 440b ཅད་ལས་ཡོངས་སུ་ཐར་བར་ཁོ་ནར་འགྱུར་བས་དེའི་ཕྱིར་དེ་བཞིན་གཤེགས་པས་འདིའི་བསོད་ནམས་ཀྱི་ཆེད་ཀྱི་དཔེ་མི་མཛད་དོ། །རིགས་ཀྱི་བུ། གང་གིས་ཆོས་ཀྱི་རྣམ་གྲངས་འདི་དང ། ཆོས་སྨྲ་བ་དང ། འཛིན་པ་དང ། ཀློག་པ་དང ། ཡི་གེར་འབྲི་བ་དང ། མཆོད་པ་བྱེད་པ་དང ། གང་གི་ཕྱིར་དབྱིག་ཡུངས་འབྲུ་ཙམ་ཡོངས་སུ་གཏོང་བར་བྱེད་དམ། མེ་ཏོག་གཅིག་གམ། འབྲས་བུ་གཅིག་གམ། བ་དན་ནམ། རོལ་མོའི་སྒྲ་འམ། སྤོས་སམ། གོས་སམ། རྒྱན་གཅིག་ཙམ་ཞིག་ཡོངས་སུ་གཏོང་བར་བྱེད་དམ། ཡི་གེར་འབྲི་བའམ།་ཡི་གེར་འབྲིར་འཇུག་གམ། འཆང་ངམ། ཀློག་གམ། མཆོད་པ་བྱེད་དམ། ཡང་དག་པར་སྟོན་ཏམ། བསྙེན་བཀུར་བྱེད་དམ། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་པ་གང་ཡིན་པ་དང ། གང་གིས་དེ་བཞིན་གཤེགས་པ་འཁོར་དང་བཅས་པ་མངོན་སུམ་དུ་བཞུགས་པ་ལ་ལོ་འབུམ་དུ་མེ་ཏོག་དང ། བདུག་སྤོས་དང ། སྤོས་དང།་མེ་ཏོག་ཕྲེང་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་དག་གིས་མཆོད་པས་མཆོད་པར་བྱེད། རྗེ་པར་བྱེད་ཅིང ། བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་པ་དང ། གཙུག་ལག་ཁང་དང ། འཆགས་དང ། སྐྱེད་མོས་ཚལ་དག་བྱེད་དུ་བཅུག་གམ། དེ་བཞིན་གཤེགས་པའི་ཕྱིར་རིན་པོ་ཆེ་སྣ་བདུན་གྱི་མཆོད་རྟེན་ 441a ༄#། །འཕང་དུ་དཔག་ཚད་ཕྱེད་པ་བརྒྱའམ་སྟོང་བྱེད་དུ་བཅུག་སྟེ། དེ་དག་ལ་ལོ་འབུམ་དུ་མཆོད་པ་དག་གིས་མཆོད་པར་བྱེད་པ་བས། གང་ཆོས་ཀྱི་རྣམ་གྲངས་འདི་ཡི་གེར་འབྲི་བ་དང ། ཡི་གེར་འབྲིར་འཇུག་པ་དང ། འཆང་བ་དང ། ཀློག་པ་དང ། འདོན་པ་དང ། མཆོད་པ་བྱེད་པ་དང ། ཡང་དག་པར་སྟོན་པ་དེ་ནི། དེ་པས་ཆོས་བསོད་ནམས་མངོན་པར་འདུ་བྱ་བ་ཆེས་མང་དུ་སྐྱེ་བར་འགྱུར་གྱི། དེ་བཞིན་གཤེགས་པ་ལ་མངོན་སུམ་དུ་མཆོད་པ་བྱེད་པ་དེ་ནི་དེ་ལྟ་མ་ཡིན་ལ། སེམས་ཅན་ཐམས་ཅད་ལ་སྦྱིན་པ་བྱིན་ཞིང་འདོད་པའི་ཡོན་ཏན་ལྔ་པོ་དག་གིས་རྩེར་བཅུག་པའང་དེ་ལྟ་མ་ཡིན་ནོ། །དེ་ལྟ་བས་ན། རིགས་ཀྱི་བུ་དང ། རིགས་ཀྱི་བུ་མོ་དང ། རྒྱལ་པོ་དང ། རྒྱལ་བུ་དང ། བློན་པོ་ཆེན་པོ་དང ། བློན་པོ་དེ་དག་གིས་རྟག་པར་རྒྱུན་དུ་ཆོས་ཀྱི་རྣམ་གྲངས་འདི་མཆོད་པར་བྱའོ། །གང་ཆོས་ཀྱི་རྣམ་གྲངས་འདི་སྒྲོག་པར་བྱེད་པ་དང ། རྗོད་པར་བྱེད་པ་དང ། དོན་ཀྱང་ཉེ་བར་སྒྲུབ་པར་བྱེད་པའི་དགེ་བའི་བཤེས་གཉེན་དེ་དག་ལའང་དེ་བཞིན་གཤེགས་པ་ཉིད་དུ་འདུ་ཤེས་བསྐྱེད་པར་བྱ་ཞིང ། དེ་དག་གིས་བསྙེན་བཀུར་བྱས་ཏེ་ཆོས་ཀྱི་རྣམ་གྲངས་འདི་མཉན་པར་བྱ། གཟུང་བར་བྱ། བཅང་བར་བྱ། བཀླག་པར་བྱ། ཡིད་ལ་བྱ་ཞིང་འདི་ལྟར་སེམས་བསྐྱེད་པར་བྱ་སྟེ། བདག་ཅག་དོན་མེད་པ་ལ་དོན་ 441b འདུ་ཤེས་པ་དང ། མི་རྟག་པ་ལ་རྟག་པར་འདུ་ཤེས་པ་དང ། སྡུག་བསྔལ་བ་ལ་བདེ་བར་འདུ་ཤེས་ཤིང ། ལམ་མ་ཡིན་པར་ཞུགས་པ་ལ་ལམ་ཉེ་བར་སྟོན་པ་གང་ཡིན་པ་དང ། བདག་ཅག་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་ལས་ཡོངས་སུ་ཐར་པར་བྱ་བའི་ཕྱིར་དེ་བཞིན་གཤེགས་པའི་མཛད་པ་གང་ཡིན་པ་དེ་ནི་བདག་ཅག་གིས་རྙེད་པ་ལེགས་པར་རྙེད་དོ་སྙམ་དུ་སེམས་བསྐྱེད་པར་ཡང་བྱའོ། །སྤྱན་རས་གཟིགས་དབང་ཕྱུག་གིས་གསོལ་པ། བཅོམ་ལྡན་འདས། ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་ལ་དེ་བཞིན་གཤེགས་པའི་མཛད་པ་མཛད་པ་ཆེན་པོས་ཡང་དག་པར་བཤད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཆོས་ཀྱི་རྣམ་གྲངས་འདི་ནི་ཕྱི་མའི་དུས་ཕྱི་མའི་ཚེན་ལྷོ་ཕྱོགས་ཀྱི་རྒྱུད་ན་སྤྱོད་པར་འགྱུར་ཏེ། དེར་ཡང་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། རྒྱལ་པོ་དང ། རྒྱལ་བུ་དང ། བློན་པོ་ཆེན་པོ་དང ། བློན་པོ་སྣོད་དུ་གྱུར་པ། མཆོད་པ་བྱེད་པ། འཛིན་པར་བྱེད་པ། ཀློག་པར་བྱེད་པ་དག་འབྱུང་བར་འགྱུར་ཞིང ། དང་པར་འགྱུར། ཡིད་ཆེས་པར་འགྱུར་རོ། །གལ་ཏེ་བྱང་དང ། ཤར་དང ། ནུབ་ཕྱོགས་ཀྱི་རྒྱུད་དག་ན་སྤྱོད་པར་འགྱུར་ནའང་དེ་ན་གང་དག་ཉན་པར་མི་བྱེད་པ་དང ། དད་པར་མི་བྱེད་པ་དང ། ཡིད་ 442a ༄#། །ཆེས་པར་མི་བྱེད་པ་དང ། མཆོད་པར་མི་བྱེད་པ་དང ། བརྩོན་འགྲུས་ཞན་པ་དང ། བརྗེད་ངེས་པ་དང ། བུ་སྨད་དང ། བྲན་མོ་དང ། ལོངས་སྤྱོད་དང ། དབང་ཕྱུག་དང ། བཞད་གད་དང ། འཇོ་སྒེག་དང ། བྲོ་དང ། གར་དང ། གླུ་སྣ་ཚོགས་ཀྱིས་རྣམ་པར་གཡེངས་ཤིང ། ཕྲག་དོག་དང ། སེར་སྣའི་དྲན་པས་ཉན་པར་མི་བྱེད་པའི་སེམས་ཅན་དེ་དག་ནི་བདུད་ཀྱི་ལས་ལ་མངོན་པར་བརྩོན་པ་ཡིན་ཏེ། དེ་དག་ནི་སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། ཡི་དྭགས་ཀྱི་ཡུལ་རྣམས་ལས་ཡོངས་སུ་མི་ཐར་པ་ཁོ་ནར་འགྱུར་རོ། །དེ་ལྟ་བས་ན། རིགས་ཀྱི་བུ་དང ། རིགས་ཀྱི་བུ་མོ་བདག་ཉིད་ངན་སོང་ཐམས་ཅད་ལས་ཡོངས་སུ་ཐར་པར་འདོད་པ་དེ་དག་གིས་བསྙེན་བཀུར་བྱས་ཏེ་ཆོས་ཀྱི་རྣམ་གྲངས་འདི་མཆོད་པར་བྱ་ཞིང ། གཞན་དག་ལ་ཡང་དག་པར་བསྟན་པར་བྱ། ཡིད་ལའང་གཟུང་བར་བྱའོ། །ཁྲག་ཁྲུག་དང ། འཁྲུག་ཀློག་དང ། རྨི་ལམ་ངན་པ་དང ། ལྟས་ངན་པ་དག་དང ། དུས་མ་ཡིན་པར་འཆི་བ་དང ། གནག་ནད་དང ། ཕྱུགས་ན་དང ། མི་ནད་དག་དང ། ནད་དང ། འཇིགས་པ་དང ། 442b གནོད་པ་སྣ་ཚོགས་དག་ལའང་ཆོས་ཀྱི་རྣམ་གྲངས་འདི་མཆོད་པ་བྱས་ཏེ་བཀླག་པར་བྱའོ། །རྒྱལ་མཚན་བཙུགས་པ་མེ་ཏོག་དང ། བདུག་སྤོས་དང ། སྤོས་དང ། རོལ་མོའི་སྒྲ་སྣ་ཚོགས་དག་གིས་མཆོད་ཅིང་ཕྱོགས་བཞིར་གཏོར་མ་གཏོར་ལ་མེ་ཏོག་དང ། བདུག་སྤོས་དང ། སྤོས་དག་གིས་ཕྱག་བྱས་ཏེ་འཇུག་པར་བྱས་ན། དེར་ཡམས་ཀྱི་ནད་དང ། གནོད་པ་དང ། འགོ་བའི་ནད་ཐམས་ཅད་ཀྱང་རབ་ཏུ་ཞི་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ལ་ཏོ། །སྔོན་གྱི་སྲིད་པར་འདྲེན་པས་གང་གསུངས་ཤིང ། །སེམས་ཅན་ཐམས་ཅད་རྗེས་སུ་གཟུང་བའི་ཕྱིར། །ད་ལྟར་ངས་ཀྱང་ཁྱོད་ལ་བཤད་པ་ཡི། །ཏིང་འཛིན་འདི་ནི་གཟུང་ཞིག་ཀུན་དགའ་པོ། །སངས་རྒྱས་ཆོས་དང་དགེ་འདུན་དཀོན་མཆོག་ལ། །གང་གིས་ཁམས་གསུམ་སྦྱིན་པར་བྱིན་པ་བས། །མདོ་སྡེ་འདི་ལ་མཆོད་པ་བྱས་ན་ནི། །སྦྱིན་པས་དེ་ཡིད་དཔེར་ཡང་མི་ཕོད་དོ། །གང་གིས་སངས་རྒྱས་ལ་ནི་དད་བྱས་ཏེ། །ཚད་མེད་གཙུག་ལག་ཁང་དག་བརྩིགས་པ་བས། །གང་ཞིག་མདོ་འདི་འཛིན་པ་གང་ཡིན་པ། །དེ་ནི་དེ་བས་བསོད་ནམས་མང་པོར་འགྱུར། །གང་ཞིག་མེ་ཏོག་གཅིག་ཙམ་འཐོར་བྱེད་ཅིང ། །གོས་དང་ཕྲེང་བ་བྱུག་པ་དེ་བཞིན་ཏེ། །ཏིང་འཛིན་འདི་ལ་བསྙེན་བཀུར་བྱེད་གྱུར་ན། །བསོད་ནམས་ཚོགས་ཆར་སྔ་མ་དེ་མི་འགྱུར། །གང་གིས་མདོ་སྡེ་འདི་ལ་ 443a ༄#། །མཆོད་པའི་ཕྱིར། །ཀཪྴ་པ་ཎིའི་སྦྱིན་པ་སྦྱིན་བྱེད་ཅིང ། །བྱང་ཆུབ་ཕྱིར་ནི་བྱམས་པའི་སེམས་བསྐྱེད་ན། །དེ་ནི་དེ་བས་བསོད་ནམས་མང་པོ་འཐོབ། །བྱང་ཆུབ་སེམས་དཔའ་གང་གིས་སེམས་ཅན་ལ། །ཏིང་འཛིན་འདི་བཤད་ལུང་ཕོག་དེ་བཞིན་དུ། །བླ་མེད་བྱང་ཆུབ་ཕྱིར་ནི་བཀོད་གྱུར་ན། །དེ་ཡི་བསོད་ནམས་དཔེར་ཡང་མི་བཟོད་འགྱུར། །དེ་ལྟས་ཕན་ཡོན་འདི་དག་ཐོས་ནས་ཀྱང ། །སེམས་ཅན་ཀུན་ལ་དེ་བཞིན་བྱམས་བྱས་ཏེ། །མདོ་འདི་གཟུང་ཞིང་ཡི་གེར་བྲི་བར་བྱ། །བཀླག་པར་བྱ་ཞིང་དེ་བཞིན་བཤད་པར་བྱ། །རྒ་དང་དེ་བཞིན་ན་འཆིས་གནོད་གྱུར་ཅིང ། །སྡུག་བསྔལ་རབ་དྲག་བརྒྱ་ཡིས་ཡོངས་གདུངས་ལ། །སེམས་དམྱལ་ཡི་དྭགས་རྣམས་སུ་སྐྱེ་བ་ན། །ཕྱི་མའི་དུས་ན་འགྱོད་པར་གྱུར་ཏ་རེ། །འཆི་བའི་དུས་ན་ཡིད་སྐྲག་འཇིགས་གྱུར་ལ། །ཡང་དང་ཡང་དུ་སྔམ་པ་འདོད་བྱེད་ཅིང ། །བདག་གི་དཔུང་གཉེན་སྐྱབས་སུ་འགྱུར་བ་ཞེས། །བྱིས་པའི་བློ་ཅན་ཕན་ཚུན་རྟོག་ག་རེ། །གང་ཕྱིར་དེ་བཞིན་གཤེགས་པ་མ་མཆོད་ཅིང ། །སངས་རྒྱས་ཆོས་དང་དགེ་འདུན་ནོར་འཕྲོག་པ། །མི་ཟད་གཤིན་རྗེའི་འཇིག་རྟེན་ཁྲིད་འགྱུར་ཞིང ། །ཕྱིན་ཆད་རྟག་ཏུ་སྐྱབས་འགྱུར་འགའ་ཡང་མེད། །བུ་སྨད་ཡོད་མིན་ཉེ་དུ་རྩ་ལག་མེད། །ཡུལ་འཁོར་ཡོད་མིན་བཞད་གད་འཇོ་སྒེག་མེད། །ནོར་དང་འབྲུ་དང་དེ་བཞིན་གོས་དང་རྒྱན། ། 443b ཀུན་སྤངས་སྡུག་བསྔལ་ཡང་དང་ཡང་མི་ཟད། །ཏིང་འཛིན་འདི་ལ་དད་པར་མ་བྱས་པས། །དེ་འདྲའི་སྡུག་བསྔལ་མི་ཟད་མྱོང་འགྱུར་བས། །སྡུག་བསྔལ་འདི་དང་ཕན་ཡོན་དེ་ཐོས་ན། ། བྱིས་པའི་བློ་ཡང་སུ་ཞིག་དད་མི་སྐྱེད། །དེ་ཕྱིར་རྟག་ཏུ་དགེ་སློང་ཕ་མ་དང ། །དགེ་བསྙེན་རྣམས་དང་རྒྱལ་པོས་ཁོར་ཟུག་དང ། །མདོ་སྡེ་འདི་ནི་རྟག་ཏུ་གཟུང་བྱ་ཞིང ། །འཛིན་པ་ལ་ཡང་རྟག་ཏུ་བསྙེན་བཀུར་བྱ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཆོས་ཀྱི་རྣམ་གྲངས་འདི་གཟུང་ལགས་ཏེ། སྟོན་པའི་འདུ་ཤེས་ཀྱིས་བཅང་བར་བགྱི་ཞིང་སེམས་ཅན་ཐམས་ཅད་ལ་ཡང་དག་པར་བསྟན་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ།་གལ་ཏེ་ཁྱོད་ཀྱིས་ངས་ཆོས་གང་བསྟན་པ་མཉན་ཏེ་ཀུན་བཟུང་བ་དེ་དག་ཐམས་ཅད་འཕང་བར་མི་བྱེད། ཀློག་པར་མི་བྱེད། རྒྱས་པར་མི་བྱེད་ཀྱང ། དེས་ནི་ཁྱོད་ཀྱིས་ང་ལ་ཉེས་པ་བྱས་པར་མི་འགྱུར་ཞིང་གུས་པར་མ་མཉན་པར་ཡང་མི་འགྱུར་ལ། ཉན་ཐོས་ཉིད་མ་ཡིན་པར་ཡང་མི་འགྱུར་གྱི། ཆོས་ཀྱི་རྣམ་གྲངས་འདི་འཆང་པར་མི་བྱེད། ཀློག་པར་མི་བྱེད། མཆོད་པར་མི་བྱེད། ཡང་དག་པར་སྟོན་པར་མི་བྱེད། ཡིད་ལ་མི་བྱེད་ན་ནི་དེས་ན་ཁྱོད་ཀྱིས་ང་ལ་ཉེས་པ་བྱས་པར་འགྱུར་ཞིང་གུས་པར་མ་མཉན་པར་ཡང་འགྱུར་ལ། ཉན་ཐོས་ 444a ༄#། །ཉིད་ཡིན་པར་ཡང་མི་འགྱུར་རོ། །ཀུན་དགའ་བོ། དེ་ལྟ་བས་ན། ཁྱོད་ཀྱིས་ཕུ་དུད་བྱས་ཏེ་ཆོས་ཀྱི་རྣམ་གྲངས་འདི་བཅང་བར་བྱའོ། །དཱི་ནི་ཕྱི་མའི་དུས་ཕྱི་མའི་ཚེ་ན་སེམས་ཅན་ཐམས་ཅད་ལ་དེ་བཞིན་གཤེགས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱིས་དེ་བཞིན་གཤེགས་པའི་མཛད་པ་བྱེད་པར་འགྱུར་རོ། ། བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་དྲུག་ཁྲི་ལན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་བདུན་བརྒྱས་ནི་ཏིང་ངེ་འཛིན་ཐོབ་པར་འགྱུར་ཏོ། །ལྔ་བརྒྱས་ནི། སངས་རྒྱས་ཀྱི་ཞིང་ཐ་དད་པར་སྐྱེ་བར་ལུང་བསྟན་པ་ཐོབ་པར་གྱུར་ཏོ། །སྲོག་ཆགས་དགུ་ཁྲི་ནི། ཉོན་མོངས་པ་ཐམས་ཅད་ལས་རྣམ་པར་གྲོལ་ཏེ་མི་ཁོམ་པ་དང ། ངན་སོང་དང ། ངན་འགྲོ་ཐམས་ཅད་སྤངས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་ནི། སླད་མའི་དུས་སླད་མའི་ཚེ་ན་རིགས་ཀྱི་བུ་དང ། རིགས་ཀྱི་བུ་མོ་ཉན་པར་བགྱིད་པ་དང ། འཛིན་པར་བགྱིད་པ་དང ། རི་མོར་བགྱིད་པ་དང ། མཆོད་པར་བགྱིད་པ་དེ་དག་དང ། ཡི་གེར་འབྲི་བར་བགྱིད་པ་དེ་དག་ 444b ལ་དེ་བཞིན་གཤེགས་པའི་མཛད་པ་བགྱིད་པར་འགྱུར་ཏེ། དེ་དག་ཀྱང་ཇི་ལྟ་བུ་འཚལ་བའི་སངས་རྒྱས་ཀྱི་ཞིང་ཐ་དད་པ་དག་ཏུ་ལུང་བསྟན་པ་ལགས་སོ། །སླད་མའི་དུས་སླད་མའི་ཚེ་ན་སེམས་ཅན་གང་བཞད་གད་དང ། འཇོ་སྒེག་དང ། གར་དང ། བྲོ་དང ། གླུ་དང ། རོལ་མོའི་སྒྲ་དག་ལ་སྣ་ཚོགས་སུ་གཡང་བ། འདོད་ཆགས་དང ། ཞེ་སྡང་དང ། གཏི་མུག་གི་མུན་པ་ཆེ་བ། རྩེད་མོ་ལ་དགའ་བར་འདུ་ཤེས་པ། མི་རྟག་པ་ལ་རྟག་པར་འདུ་ཤེས་པ། ཕྲག་དོག་དང ། སེར་སྣས་ཡོངས་སུ་ཟིན་ཅིང ། མཆོད་པར་མི་བགྱིད། རི་མོར་མི་བགྱིད། དད་པར་མི་བགྱིད། གློ་བ་ཆོས་པར་མི་བགྱིད། འཆང་བར་མི་བགྱིད། ཀློག་པར་མི་བགྱིད། ཉན་པར་མི་བགྱིད། ནན་ཏན་གྱིས་སྒྲུབ་པར་མི་བགྱིད་པ་དེ་དག་ནི་ངལ་བ་འདི་ཡིད་བྱུང་བར་བགྱིས་ཤིང ། སྔོན་གྱི་ལས་ཀྱི་འབྲས་བུ་དེ་ཡོངས་སུ་བས་པར་བགྱིས་ནས་སྡུག་བསྔལ་བ་ཡིད་མི་བདེ་བ་སྣ་ཚོགས་དང ། སེམས་ཅན་དམྱལ་བའི་སྡུག་བསྔལ་དག་ཉམས་སུ་མྱོང་བར་འགྱུར་ཞིང ། དེའང་བསྐལ་པ་བྱེ་བ་བརྒྱ་ཕྲག་དུ་མར་སྡུག་བསྔལ་ཉམས་སུ་མྱོང་ནས་ཡང་སླར་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་རྣམས་སུ་སྐྱེ་བར་འགྱུར་ལགས་ཏེ། མི་དགེ་བའི་བཤེས་གཉེན་གྱི་དབང་གིས་ཡུན་རིང་པོར་རྗེས་སུ་འགྱོད་པར་འགྱུར་ལགས་སོ། །དེ་ལྟ་ལགས་པས་ན། ལུས་དང ། 445a ༄#། །ངག་དང ། ཡིད་ལེགས་པར་བསྡམ་པར་བགྱི་ཞིང ། སངས་རྒྱས་དང ། ཆོས་དང ། དགེ་འདུན་དག་ལའང་དད་པ་མི་ཕྱེད་པར་བགྱི། སེམས་ཅན་ཐམས་ཅད་ལའང་བྱམས་པའི་སེམས་དང ། ཕྲག་དོག་དང ། སེར་སྣ་དང ། འཆལ་བའི་ཚུལ་ཁྲིམས་ཡོངས་སུ་སྤངས་པའི་སེམས་དང ། ཁྲོ་བ་ཡོངས་སུ་སྤངས་པའི་སེམས་སུ་བགྱི་ལགས་སོ། །དེ་ནས་ཇི་ལྟར་ལྷགས་པའི་འཁོར་དེ་དག་གིས་རང་རང་གི་བསོད་ནམས་མངོན་པར་འདུ་བྱ་བ་དག་གིས་དེ་བཞིན་གཤེགས་པ་ལ་ལྷའི་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པ་དང ། ན་བཟའ་དང ། རྒྱན་དག་དང ། ་ལ་ལ་ཞེས་ཅ་ཅོ་དང ། གཞའི་སྒྲ་དག་དང ། ལྷའི་སིལ་སྙན་དང ། ཕེག་རྡོབ་པ་དང ། གླུ་དབྱངས་དག་གི་མཆོད་པ་བྱས་ནས། ལགས་སོ་ཞེས་བྱ་བ་གསོལ་ཏེ། བཅོམ་ལྡན་འདས། ལེགས་སོ། །ལེགས་སོ། །སེམས་ཅན་ཐམས་ཅད་ཀྱི་དོན་དང ། དེ་བཞིན་གཤེགས་པའི་བསྟན་པ་ཡུན་རིང་དུ་གནས་པར་བགྱི་པའི་སླད་དུ་ཆོས་ཀྱི་རྣམ་གྲངས་ཆེན་པོ་འདི་ཤིན་ཏུ་ལེགས་པར་བཀའ་སྩལ་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་པོ། དེའི་ཕྱིར་ཁྱོད་ 445b ཀྱིས་ཆོས་ཀྱི་རྣམ་གྲངས་འདི་དེ་བཞིན་གཤེགས་པ་ཐམས་ཅད་ཀྱིས་རྗེས་སུ་གནང་བ་དང ། བྱང་ཆུབ་སེམས་དཔའི་ས་གནོན་པ་ཞེས་བྱ་བར་ཡང་ཟུངས་ཤིག་།རྫུ་འཕྲུལ་གྱི་རྣམ་པར་འཕྲུལ་པ་འདུས་པ་ཆེན་པོ་ཞེས་བྱ་བར་ཡང་ཟུངས་ཤིག་།དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཕགས་པ་སྤྱན་རས་གཟིགས་དབང་ཕྱུག་དང ། འཇམ་དཔལ་དང ། ལག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་དང ། ཉན་ཐོས་ཆེན་པོ་དེ་དག་ཐམས་ཅད་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་ཐམས་ཅད་དང ། རྒྱལ་པོ་ཆེན་པོ་བཞི་དང ། གནོད་སྦྱིན་ཆེན་མོ་དཔེ་མེད་མ་དང ། དྲི་མེད་འོད་དང ། འོད་ཅན་མ་དང ། འཇིགས་བྱེད་མ་དང ། དཔལ་ལྡན་མ་དང ། དུང་ཅན་མ་དང ། འཕྲོག་མ་ལ་སོགས་པ་དེ་དག་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དེ་དག་ཐམས་ཅད་དང ། ཐམས་ཅད་དང་ལྡན་པའི་འཁོར་ཇི་ལྟར་ལྷགས་པ་དེ་དག་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མའི་འཁོར་རྣམས་ཡི་རང་སྟེ་བཅོམ་ལྡན་འདས་ཀྱིས་ 446a ༄#། །གསུངས་པ་ལ་མངོན་པར་བསྟོད་དོ། །འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། སུ་རེནྡྲ་བོ་དྷི་དང ། ཞུ་ཆེན་གྱི་ལོ་ཙ་བ་བནྡྷེ་ཡེ་ཤེས་སྡེས་ཞུས་ཏེ་གཏན་ལ་ཕབ་པ། བནྡེ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། |