rKTs


H97

(e-text produced by ACIP)

see text in transliteration
352a
རྒྱ་གར་སྐད་དུ། ཨཱརྱ་མཉྫུ་ཤྲཱི་བི་ཀྲཱི་ཌཱི་ཏ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འཇམ་དཔལ་རྣམ་པར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་
352b
ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་བརྒྱ་སྟོང་དང་ཐབས་ཅིག་ཏུ་བཞུགས་ཏེ། དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་སྨད་ཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་འདུག་སྟེ། བུ་མོ་དེའང་སྔོན་གྱི་དགེ་བའི་རྩ་བའི་རྒྱུས་ལུས་ཀྱི་མདོག་གསེར་གྱི་ཁ་དོག་ལྟ་བུར་མངོན་པར་གྲུབ་པར་གྱུར་ཅིང ། སའི་ཕྱོགས་གང་དུ་འགྲེང་བ་དང ། འདུག་པ་དང ། འགྲོ་བའི་ས་ཕྱོགས་དེ་དག་ཀྱང་གསེར་གྱི་ཁ་དོག་ལྟ་བུའི་འོད་ཀྱིས་སྣང་བར་གྱུར་ཏེ། དེས་གོས་དམར་པོའམ། དཀར་པོའམ། གང་དག་གྱོན་པར་གྱུར་པའི་གོས་དེ་དག་ཐམས་ཅད་ཀྱང་གསེར་གྱི་ཁ་དོག་ལྟ་བུ་ཉིད་དུ་ཀུན་ཏུ་སྣང་ངོ ། །བུ་མོ་དེའང་སྐྱེ་བོའི་ཚོགས་ཐམས་ཅད་ལ་དགའ་ཞིང་ཡིད་གཅུགས་པ་དང ། བལྟ་བས་མི་ངོམས་ཤིང་བཀའ་བློ་བདེ་ལ་དེས་པ་དང ། འཇམ་པ་དང ། སྙན་པ་དང ། དགའ་བར་སྨྲ་ཞིང་བཞིན་འཛུམ་པ་དང ། ཤིན་ཏུ་མཐུན་པར་འཛིན་པ་དང ། ཁྲོ་གཉེར་མེད་པ་དང ། མི་རྩུབ་པ་དང ། མི་བརླང་བར་གྱུར་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དེ་ན་རྒྱལ་བུ་གཞོན་ནུ་རྣམས་དང ། བློན་པོའི་བུ་གཞོན་ནུ་
353a
༄#། །རྣམས་དང ། ཚོང་དཔོན་གྱི་བུ་གཞོན་ནུ་རྣམས་དང ། ཁྱིམ་བདག་གི་བུ་གང་ཇི་སྙེད་པ་དེ་དག་ཀྱང་དེ་ལ་ཤིན་ཏུ་ཆགས་ཤིང་ཡིད་འབྲང་བར་གྱུར་ཏེ་བལྟ་བས་ཆོག་མི་ཤེས་སོ། །སྨད་ཚོང་མའི་བུ་མོ་གསེར་མཆོག་འོད་དཔལ་དེ་སྐྱེད་མོས་ཚལ་ལམ། འབབ་ཆུའམ། རྫིང་བུའམ། ཁྱིམ་མམ། ལམ་པོ་ཆེའམ། གྲོང་བར་རམ། གང་དང་གང་དུ་འགྲོ་བ་དེ་དང་དེ་དག་ཏུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་མང་པོ་རྣམས་ཀྱང་ཤིན་ཏུ་ལྟད་མོར་གྱུར་ནས་ཀུན་འདུས་ཏེ་དེའི་ཕྱི་བཞིན་འབྲང་ཞིང་འགྲོའོ།། དེ་ནས་སྨད་ཚོང་མའི་བུ་མོ་གསེར་མཆོག་འོད་དཔལ་དེ་ཚོང་དཔོན་གྱི་བུ་འཇིགས་བྱིན་ཞེས་བྱ་བས་ནོར་གྱིས་གླས་ཏེ་སྐྱེད་མོས་ཚལ་གྱི་སར་བྱུང་ནས་རྟ་བཞི་དང་ལྡན་པའི་ཤིང་རྟ་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། གསེར་གྱིས་ལེགས་པར་བརྒྱན་པ། གདུགས་དང ། རྒྱལ་མཚན་དང ། བ་དན་བསྒྲེང་ཞིང་མེ་ཏོག་དང ། བདུག་པ་དང ། སྤོས་དང ། ཕྱེ་མ་དང ། མེ་ཏོག་ཕྲེང་གིས་མཛེས་པར་བྱས་པ། མེ་ཏོག་ཙམྤ་ཀའི་ཕྲེང་བས་སྐར་ཁུང་བྱས་པའི་ནང་དུ་སྟན་བཟང་པོ་བཤམས་པ་ལ་འདུག་ནས་འདི་ལྟར་རྩེ་ཞིང་དགའ་བའི་བསམ་པས་ཤིང་རྟ་དེའི་མདུན་དུ་ནི་སིལ་སྙན་དང ། ཕག་རྡོབ་པ་དང ། གླུ་དབྱངས་ལེན་པ་དག་གིས་དྲངས། ཤིང་རྟ་དེའི་ཕྱི་བཞིན་དུ་ནི་ཉེ་བར་སྤྱད་
353b
པ་དང ། ཡོངས་སུ་སྤྱད་པ་ཐོགས་པ་ཐམས་ཅད་རྗེས་སུ་འབྲང་ལ། སྐྱེ་བོའི་ཚོགས་ཆེན་པོ་ལྟད་མོ་ལྟ་བའི་བསམ་པ་ཅན་དག་ཀྱང་ཕྱི་བཞིན་འབྲང་བར་གྱུར་ཅིང་སྐྱེད་མོས་ཚལ་གྱི་སར་དོང་ངོ ། །དེ་ནས་འཇམ་དཔལ་གཞོན་ནུར་གྱུར་པ་ནང་དུ་ཡང་དག་འཇོག་ལས་ལངས་ཏེ་སེམས་ཅན་ཐམས་ཅད་ལ་སྙིང་རྗེ་ཆེན་པོ་སྐྱེས་ནས་འདི་སྙམ་དུ་སེམས་ཏེ། སུ་ཞིག་རྫུ་འཕྲུལ་གྱི་ཆོ་འཕྲུལ་ལམ། ཀུན་བརྗོད་པའི་ཆོ་འཕྲུལ་ལམ། རྗེས་སུ་བསྟན་པའི་ཆོ་འཕྲུལ་གྱིས་འདུལ་བར་འགྱུར་བའི་སེམས་ཅན་གང་ཐེག་པ་ཆེན་པོ་ལ་ཡོངས་སུ་སྨིན་པར་བྱ་སྙམ་པ་དང ། འཇམ་དཔལ་གཞོན་ནུར་གྱུར་པས་སྨད་ཚོང་མའི་བུ་མོ་གསེར་མཆོག་འོད་དཔལ་ཚོང་དཔོན་གྱི་བུ་འཇིགས་བྱིན་དང་ལྷན་ཅིག་ཏུ་ཤིང་རྟ་ལ་ཞོན་ཏེ་སྐྱེད་མོས་ཚལ་གྱི་སར་འགྲོ་བ་མཐོང་ངོ ། །མཐོང་ནས་ཀྱང་གདུལ་བའི་ཕྱིར་དེའི་དབང་པོ་དང ། སྟོབས་དང ། བརྩོན་འགྲུས་ཀྱི་བྱེ་བྲག་ལ་རྣམས་པར་བལྟས་ན། དེ་སྔོན་གྱི་དགེ་བའི་རྩ་བ་དང་ལྡན་ཞིང་ཆོས་ཀུན་ཤེས་པར་བྱ་བའི་ནུས་པ་དང ། མཐུ་དང ། སྐལ་པ་ཡོད་པར་རིག་ནས་དེའི་ཚེ་འཇམ་དཔལ་གཞོན་ནུར་གྱུར་པས་འདི་ལྟ་བུ་རྫུ་འཕྲུལ་མངོན་པར་འདུ་བྱ་བ་མངོན་པར་བྱས་ཏེ།་ཇི་ལྟ་བུའི་རྫུ་འཕྲུལ་མངོན་པར་བྱས་པས། འདི་ལྟར་རང་གི་ལུས་བསྟན་མ་ཐག་ཏུ་ཉི་མ་དང ། ཟླ་བའི་འོད་ཀྱང་ཟིལ་དུ་རླག་པར་བྱེད་ན། སེམས་ཅན་གཞན་དག་གི་ལྟ་
354a
༄#། །སྨོས་ཀྱང་ཅི་དགོས་པ་དེ་ལྟ་བུར་རང་གི་ལུས་མངོན་པར་སྤྲུལ་ནས་གོས་གང་གི་འོད་ཀྱིས་དཔག་ཚད་གཅིག་ཙམ་གྱི་ཁོར་ཡུག་སྣང་བས་སྣང་བར་བྱེད་པའི་གོས་དེ་ལྟ་བུའང་ལུས་ལ་གྱོན་པར་ཀུན་ཏུ་བསྟན་ཏོ། །རང་གི་ལུས་རྒྱན་ཐམས་ཅད་ཀྱིས་རྣམ་པར་བརྒྱན་པར་ཡང་བསྟན་ཏོ། །དེ་ནས་འཇམ་དཔལ་གཞོན་ནུར་གྱུར་པས་ལུས་ལ་གོས་དང་རྒྱན་ཐམས་ཅད་ཀྱིས་ལེགས་པར་བརྒྱན་ནས་ལམ་གང་ནས་སྨད་ཚོང་མའི་བུ་མོ་གསེར་མཆོག་འོད་དཔལ་འོང་བའི་ལམ་དེའི་མདུན་ལོགས་སུ་བསྡད་དོ། །འཇམ་དཔལ་གཞོན་ནུར་གྱུར་པས་དེར་བསྡད་མ་ཐག་ཏུ་དེ་ནས་ཚོང་དཔོན་གྱི་བུ་དེའི་ཤིང་རྟའང་མོག་མོག་པོར་གྱུར། སྨད་ཚོང་མའི་བུ་མོ་གསེར་མཆོག་འོད་དཔལ་གྱི་ལུས་ཐམས་ཅད་ཀྱང་མོག་མོག་པོར་གྱུར་ཏོ། །འདི་ལྟ་སྟེ། དཔེར་ན། ཛམྦུ་ཆུ་བོའི་གསེར་གྱི་དྲུང་དུ་སྣག་ཚའི་ཡུག་བཞག་ན་ལམ་མེར་མི་འདུག་།ལྷན་ནེར་མི་འདུག་།ལྷང་ངེར་མི་འདུག་གོ་།དེ་བཞིན་དུ་འཇམ་དཔལ་གཞོན་ནུར་གྱུར་པའི་ལུས་ཀྱི་འོད་ཀྱིས་རེག་པ་ན་བུ་མོ་དེའི་ལུས་ཀྱང་ལམ་མེར་མི་འདུག་།ལྷན་ནེར་མི་འདུག་།ལྷང་ངེར་མི་འདུག་གོ་།སྨད་ཚོང་མའི་བུ་མོ་གསེར་མཆོག་འོད་དཔལ་གྱིས་འཇམ་དཔལ་གཞོན་ནུར་གྱུར་པ་ལྷའི་བུ་གཞོན་ནུ་ལྟར་འདུག་ལ། ལུས་ལ་རྒྱན་གྱིས་བརྒྱན་ཅིང་གསལ་བའི་གོས་ལེགས་པར་གྱོན་ལ།
354b
གོས་དེ་ལས་ཀྱང་འོད་འབྱུང་བར་མཐོང་སྟེ། མཐོང་མ་ཐག་ཏུ་དེ་བདག་གི་ལུས་ལ་བརྙས་པའི་འདུ་ཤེས་དང ། དམན་པའི་འདུ་ཤེས་སྐྱེས་ཤིང་གོས་དེ་ལའང་མངོན་པར་འདོད་པ་དང ། གཟུང་པའི་འདུ་ཤེས་སྐྱེས་ནས་དེ་འདི་སྙམ་དུ་སེམས་ཏེ། ཚོང་དཔོན་གྱི་བུ་འདིས་ཆོག་གི་བདག་ཤིང་རྟ་འདི་ལས་བབས་ལ་འདི་དང་ལྷན་ཅིག་ཏུ་དགའ་བ་དང ། རྩེ་བ་དང ། དགའ་མགུར་སྤྱད་ལ་གོས་འདིའང་བསླང་བར་བྱའོ་སྙམ་མོ། །བུ་མོ་དེས་དེ་ལྟ་བུའི་སེམས་བསྐྱེད་མ་ཐག་ཏུ་དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱིས་རླབས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུས་བདག་ཉིད་མིའི་གཟུགས་སུ་མངོན་པར་སྤྲུལ་ནས་བུ་མོ་དེ་ལ་འདི་སྐད་ཅེས་སྨྲས་སོ། །བུ་མོ། ཁྱོད་སྐྱེས་བུ་དམ་པ་འདི་ལ་ཀུན་ཏུ་ཆགས་པའི་སེམས་མ་སྐྱེད་ཅིག་།དེ་ཅིའི་ཕྱིར་ཞེ་ན།་འདི་ནི་འདོད་པ་དོན་དུ་གཉེར་བ་མ་ཡིན་པའི་ཕྱིར་རོ། །བུ་མོས་སྨྲས་པ། འདི་སུ་ཞིག་ཡིན། འདིའི་མིང་ཅི། རྣམ་ཐོས་ཀྱི་བུས་སྨྲས་པ། འདི་ནི་བྱང་ཆུབ་སེམས་དཔའ་སྟེ། འཇམ་དཔལ་གཞོན་ནུར་གྱུར་པ་ཞེས་བྱའོ། །བུ་མོས་སྨྲས་པ། བྱང་ཆུབ་སེམས་དཔའ་ཞེས་བྱ་བ་དེ་ཅི་ཞིག་ཡིན། ཅི་དེ་ལྷའམ། འོན་ཏེ་ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། བརྒྱ་བྱིན་ནམ། ཚངས་པའམ། འཇིག་རྟེན་སྐྱོང་བའམ། རྒྱལ་པོ་ཆེན་པོའམ། བྱང་ཆུབ་སེམས་དཔའ་
355a
༄#། །ཞེས་བྱ་བ་དེ་ཅི་ཞིག་ཡིན། རྣམ་ཐོས་ཀྱི་བུས་སྨྲས་པ། བུ་མོ། བྱང་ཆུབ་སེམས་དཔའ་ཞེས་བྱ་བ་དེ་ནི། ལྷའང་མ་ཡིན། ཀླུའང་མ་ཡིན། གནོད་སྦྱིན་ཡང་མ་ཡིན། དྲི་ཟའང་མ་ཡིན། ལྷ་མ་ཡིན་ཡང་མ་ཡིན། ནམ་མཁའ་ལྡིང་ཡང་མ་ཡིན། མིའམ་ཅིའང་མ་ཡིན། ལྟོ་འཕྱེ་ཆེན་པོའང་མ་ཡིན། བརྒྱ་བྱིན་ཡང་མ་ཡིན། ཚངས་པའང་མ་ཡིན། འཇིག་རྟེན་སྐྱོང་བའང་མ་ཡིན། རྒྱལ་པོ་ཆེན་པོའང་མ་ཡིན་ཏེ། བུ་མོ། དེ་ནི་སེམས་ཅན་ཐམས་ཅད་ཀྱི་བསམ་པ་ཀུན་ཡོངས་སུ་རྫོགས་པར་བྱེད་པ་སྟེ། དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །འདི་ནི་བསླང་བ་ཐམས་ཅད་སྦྱིན་པར་བྱེད་དེ། ཡོངས་སུ་མི་གཏོང་བ་ཅིའང་མེད་པས་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །དེ་ནས་བུ་མོ་དེ་འདི་སྙམ་དུ་སེམས་ཏེ། དེ་སྐད་གྲགས་པ་ལས་ན། འདིས་བདག་ལ་གོས་འདི་སྦྱིན་པར་འགྱུར་རོ་སྙམ་ནས་དེ་ནས་སྨད་ཚོང་མའི་བུ་མོ་གསེར་མཆོག་འོད་དཔལ་ཤིང་རྟ་དེ་ལས་བབས་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། གང་ཁྱོད་ཀྱི་སྐུ་ལ་གསོལ་བའི་ན་བཟའ་འདི་བདག་ལ་སྩལ་དུ་གསོལ། དེའི་ཚེ་ཚིགས་སུ་བཅད་པ་འདིའང་སྨྲས་སོ། །གལ་ཏེ་ཁྱོད་ནི་བྱང་ཆུབ་ལ་ཡང་ཞུགས་གྱུར་ན། །འཇམ་དབྱངས་ན་བཟའ་འདི་ནི་བདག་ལ་སྩལ་དུ་གསོལ། །སེར་སྣ་ཅན་གྱི་བྱང་ཆུབ་
355b
སེམས་དཔའ་མི་མཛེས་ཏེ། །དཔེར་ན་ཆབ་དང་བྲལ་ཞིང་བསྐམས་པའི་ཀླུང་དང་མཚུངས། །འཇམ་དཔལ་གྱིས་སྨྲས་པ། གལ་ཏེ་བུ་མོ་ཁྱོད་ནི་བྱང་ཆུབ་ཞུགས་གྱུར་ན། །ཁོ་བོས་དེ་རིང་གོས་འདི་ཁྱོད་ལ་སྦྱིན་པར་བྱ། །གང་དག་གཡོ་བ་མེད་པར་བྱང་ཆུབ་སེམས་ལ་གནས། །དེ་དག་འདི་ན་ལྷར་བཅས་འཇིག་རྟེན་མཆོད་འོས་ཡིན། །བུ་མོས་སྨྲས་པ། བྱང་ཆུབ་ཅེས་བགྱི་ཚིག་གི་དོན་ནི་གང་ཞིག་ལགས། །དེ་ནི་གང་ལས་འཐོབ་ཅིང་སུ་ཞིག་སྩལ་བར་བགྱིད། །ཚོགས་རྣམས་གང་དག་ལ་ནི་ངེས་པར་བསྟན་བགྱིས་ན། །མཁས་པ་མ་ལགས་མ་རྟོགས་རྣམས་ཀྱིས་རྟོགས་པར་འགྱུར། །འཇམ་དཔལ་གྱིས་སྨྲས་པ། སྲིང་མོ། བརྗོད་པ་མེད་པ་དང ། ཡི་གེ་མེད་པ་དང ། ཕུང་པོ་དང ། ཁམས་དང ། སྐྱེ་མཆེད་དག་ལས་རྣམ་པར་གྲོལ་བ་དང ། སྟོང་པ་དང ། མཚན་མ་དག་དང་བྲལ་བ་དང ། ཉོན་མོངས་པ་མེད་པ་དང ། ཞི་བ་དང ། རབ་ཏུ་ཞི་བ་དང ། ཉེ་བར་ཞི་བ་ནི་བྱང་ཆུབ་ཅེས་བྱའོ། །དེ་སྐད་ཅེས་སྨྲས་ནས་ཡང་འཇམ་དཔལ་གཞོན་ནུར་གྱུར་པས་བུ་མོ་དེ་ལ་འདི་སྐད་ཅེས་སྨྲས་སོ། །སྲིང་མོ། ཁྱོད་བྱང་ཆུབ་ཏུ་སེམས་སྐྱེད་ཅིག་དང ། ངས་ཁྱོད་ལ་གོས་འདི་སྦྱིན་ནོ། །བུ་མོས་སྨྲས་པ།་འཇམ་དཔལ། བྱང་ཆུབ་ཅེས་བགྱི་བ་དེ་གང་ལགས། འཇམ་དཔལ་གྱིས་སྨྲས་པ། སྲིང་མོ། ཁྱོད་ཉིད་བྱང་ཆུབ་ཡིན་ནོ། །བུ་མོས་སྨྲས་པ། འཇམ་དཔལ། ཁྱོད་ཀྱིས་
356a
༄#། །གསུངས་བའི་དོན་དེ་བདག་གིས་མ་འཚལ་ན། ཇི་ལྟར་བདག་བྱང་ཆུབ་ལགས། འཇམ་དཔལ་གྱིས་སྨྲས་པ། སྲིང་མོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཞིག་བཞུགས་པ་དེ་འདི་སྐད་དུ། འདི་ལྟར་ལུས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་ལུས་མཉམ་པ་ཉིད་དོ་ཞེས་ཆོས་སྟོན་ཏེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། འདི་ཇི་སྙམ་དུ་སེམས། ཁྱོད་ཀྱི་ལུས་འདི་ལ་ཕུང་པོ་དང ། ཁམས་དང ། སྐྱེ་མཆེད་མངོན་པར་གྲུབ་པ་ཡོད་དམ། དེ་ནས་བུ་མོ་དེས་བསྟན་པ་འདི་ཐོས་ནས་དེ་སྔོན་གྱི་དགེ་བའི་རྩ་བའི་རྒྱུ་མཐུན་པས་ཆོས་ལ་སྣང་བ་སྐྱེས་པར་གྱུར་ཏེ། དེས་སྣང་བ་ཐོབ་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དེ་ནི་དེ་ལྟ་ལགས་ཏེ། བདག་གི་ལུས་འདི་ལ་ཕུང་པོ་དང ། ཁམས་དང ། སྐྱེ་མཆེད་དག་མངོན་པར་གྲུབ་ལགས་སོ། །འཇམ་དཔལ་གྱིས་སྨྲས་པ། སྲིང་མོ། འདི་ཇི་སྙམ་དུ་སེམས། གཟུགས་ལ་སེམས་པའམ། རྣམ་པར་ཤེས་པ་ཡོད་དམ། བུ་མོས་སྨྲས་པ། འཇམ་དཔལ། དེ་ནི་མ་མཆིས་སོ། །འཇམ་དཔལ་གྱིས་སྨྲས་པ། སྲིང་མོ། བྱང་ཆུབ་ཀྱང་མི་སེམས་ཤིང་རྣམ་པར་ཤེས་པ་མེད་དེ།
356b
སྲིང་མོ།་དེའི་ཕྱིར་གཟུགས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཟུགས་མཉམ་པ་ཉིད་དོ། །སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། འདི་ཇི་སྙམ་དུ་སེམས། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ལ་སེམས་པའམ། རྣམ་པར་ཤེས་པ་ཡོད་དམ། བུ་མོས་སྨྲས་པ། འཇམ་དཔལ། དེ་ནི། མ་མཆིས་སོ། །འཇམ་དཔལ་གྱིས་སྨྲས་པ། སྲིང་མོ། བྱང་ཆུབ་ཀྱང་མི་སེམས་ཤིང་རྣམ་པར་ཤེས་པ་མི་སེམས་སོ། །སྲིང་མོ། དེའི་ཕྱིར་རྣམ་པར་ཤེས་པ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་རྣམ་པར་ཤེས་པ་མཉམ་པ་ཉིད་དེ། སྲིང་མོ།་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་གཟུགས་ནང་ངམ། ཕྱི་རོལ་ལམ། གཉི་ག་མེད་པར་རམ། གཟུགས་འདི་སྔོན་པོ་འམ། སེར་པོའམ། དམར་པོའམ། དཀར་པོའམ། ལེ་རྒན་ནམ། ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་ནུས་སམ། བུ་མོས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། སྲིང་མོ། བྱང་ཆུབ་ཀྱང་ནང་ངམ། ཕྱི་རོལ་ལམ། གཉི་ག་མེད་པར་
357a
༄#། །རམ།་བྱང་ཆུབ་དེ་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ།་ཕྱོགས་ན་གནས་པ་ཞེས་བསྟན་པར་མི་ནུས་ཏེ། སྲིང་མོ། དེའི་ཕྱིར་གཟུགས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཟུགས་མཉམ་པ་ཉིད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། དེ་བཞིན་དུ་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ནང་ངམ། ཕྱི་རོལ་ལམ། གཉི་ག་མེད་པར་རམ། རྣམ་པར་ཤེས་པ་འདི་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང ། དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་ནུས་སམ། བུ་མོས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། སྲིང་མོ། བྱང་ཆུབ་ཀྱང་ནང་ངམ། ཕྱི་རོལ་ལམ། གཉི་ག་མེད་པར་རམ། བྱང་ཆུབ་དེ་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ།་ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་མི་ནུས་ཏེ། སྲིང་མོ། དེའི་ཕྱིར་རྣམ་པར་ཤེས་པ་མཉམ་པ་ཉིད་ཀྱིས་
357b
བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་རྣམ་པར་ཤས་པ་མཉམ་པ་ཉིད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཕུང་པོ་ལྔ་ནི་སྒྱུ་མ་ལྟ་བུ་སྟེ། ཡོད་པ་མ་ཡིན་པ། ཕྱིན་ཅི་ལོག་ནས་སྐྱེས་ཤིང་ཡོད་པ་མ་ཡིན་པ། ཕྱིན་ཅི་ལོག་གིས་ཐ་སྙད་བཏགས་པའོ། །སྲིང་མོ། བྱང་ཆུབ་ཀྱང་སྒྱུ་མ་ལྟ་བུ་སྟེ།་ཡོད་པ་མ་ཡིན་པ་ཕྱིན་ཅི་ལོག་གིས་ཐ་སྙད་བཏགས་པ་སྟེ། སྲིང་མོ། དེའི་ཕྱིར་སྒྱུ་མ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་སྒྱུ་མ་མཉམ་པ་ཉིད་དོ། །སྒྱུ་མ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་སྒྱུ་མ་མཉམ་པ་ཉིད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཕུང་པོ་ལྔ་ནི། རྨི་ལམ་ལྟ་བུ་སྟེ། ཤིན་ཏུ་མངོན་པར་མ་གྲུབ་པའོ། །སྲིང་མོ། བྱང་ཆུབ་ཀྱང་རྨི་ལམ་གྱི་རང་བཞིན་ཡིན་པས་ཤིན་ཏུ་མངོན་པར་མ་གྲུབ་པ་སྟེ། སྲིང་མོ། དེའི་ཕྱིར་རྨི་ལམ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་རྨི་ལམ་མཉམ་པ་ཉིད་དོ། །རྨི་ལམ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་རྨི་ལམ་མཉམ་པ་ཉིད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ།
358a
༄#། །གཞན་ཡང་ཕུང་པོ་ལྔ་ནི་སྨིག་རྒྱུ་ལྟ་བུ་སྟེ། འཁྲུལ་པའི་ལས་ཀྱིས་བསྐྱེད་པའོ། །སྲིང་མོ། བྱང་ཆུབ་ཀྱང་སྨིག་རྒྱུའི་རང་བཞིན་ཏེ། ལས་ཀྱི་རྣམ་པར་སྨིན་པ་མེད་པའོ། །སྲིང་མོ། དེའི་ཕྱིར་སྨིག་རྒྱུ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་སྨིག་རྒྱུ་མཉམ་པ་ཉིད་དོ། །སྨིག་རྒྱུ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་སྨིག་རྒྱུ་མཉམ་པ་ཉིད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཕུང་པོ་ལྔ་ནི་གཟུགས་བརྙན་ལྟ་བུ་སྟེ། འཕོ་བ་མེད་པའོ། །སྲིང་མོ། བྱང་ཆུབ་ཀྱང་གཟུགས་བརྙན་གྱི་རང་བཞིན་ཏེ། འཕོ་བ་མེད་པའོ། །སྲིང་མོ། དེའི་ཕྱིར་གཟུགས་བརྙན་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་གཟུགས་བརྙན་མཉམ་པ་ཉིད་དོ། །གཟུགས་བརྙན་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཟུགས་བརྙན་མཉམ་པ་ཉིད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཕུང་པོ་ལྔ་ནི་མིང་ཙམ་སྟེ། མིང་དེའང་གཡོ་བ་མེད་པའོ། །སྲིང་མོ། བྱང་ཆུབ་ཀྱང་མིང་ཙམ་སྟེ། མིང་དེའང་གཡོ་བ་མེད་པའོ། །སྲིང་མོ། དེའི་ཕྱིར་གཡོ་བ་མེད་པ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ།།
358b
ཕུང་པོ་མཉམ་པ་ཉིད་ཀྱིས་གཡོ་བ་མེད་པ་མཉམ་པ་ཉིད་དོ། །གཡོ་བ་མེད་པ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཡོ་བ་མེད་པ་མཉམ་པ་ཉིད་དེ། སྲིང་མོ།་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཕུང་པོ་རྣམས་ལ་བྱེད་པ་པོ་མེད་དེ། མ་བྱས་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་ངོ་བོ་ཉིད་མེད་དེ། ངོ་བོ་ཉིད་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་འབྱུང་བ་མེད་དེ། མ་བྱུང་བའི་དོན་ནི་བྱང་ཆུབ་བོ། །ཕུང་པོ་རྣམས་ལ་རྟག་པ་ཉིད་མེད་དེ། མི་རྟག་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་བདེ་བ་ཉིད་མེད་དེ། སྡུག་བསྔལ་བའི་དོན་ནི་བྱང་ཆུབ་བོ། །ཕུང་པོ་རྣམས་ལ་སྡུག་པ་མེད་དེ། མི་སྡུག་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་བདག་མེད་དེ། བདག་མེད་པའི་དོན་ནི་བྱང་ཆུབ་བོ། །སྲིང་མོ། གཞན་ཡང་ཕུང་པོ་རྣམས་ལ་མངོན་པར་གྲུབ་པ་མེད་དེ། མངོན་པར་མ་གྲུབ་པའི་དོན་ནི་བྱང་ཆུབ་བོ། །ཕུང་པོ་རྣམས་ནི་དབེན་པ་སྟེ། དབེན་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་གཟུང་བ་མེད་དེ། གཟུང་བ་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་གཞི་མེད་དེ། གཞི་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་འོང་བ་དང་འགྲོ་བ་མེད་དེ། འོང་བ་དང་འགྲོ་བ་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ནི་ད་ལྟར་བྱུང་བ་ལ་མི་གནས་པ་སྟེ། ད་ལྟར་བྱུང་བ་ལ་
359a
༄#། །མི་གནས་པའི་དོན་ནི་བྱང་ཆུབ་བོ། །སྲིང་མོ། གཞན་ཡང་ཕུང་པོ་རྣམས་ནི་འཕགས་པ་རྣམས་ཀྱི་ཐ་སྙད་ཡིན་པས་བྱང་ཆུབ་ཀྱང་འཕགས་པ་རྣམས་ཀྱི་ཐ་སྙད་དོ། །ཕུང་པོ་རྣམས་ནི་ཐ་སྙད་མེད་པའི་རང་བཞིན་ཅན་ཏེ། བྱང་ཆུབ་ཀྱང་ཐ་སྙད་མེད་པའོ། །ཕུང་པོ་ལྔའི་རང་བཞིན་གང་ཡིན་པ་དེ་ནི་དེ་བཞིན་གཤེགས་པས་ཐུགས་སུ་ཆུད་པའི་ཆོས་ཐམས་ཅད་ཀྱི་རང་བཞིན་ཏེ། དེ་ནི་བྱང་ཆུབ་ཅེས་བྱའོ། །སྲིང་མོ། དེ་ལྟར་ན། ཕུང་པོ་ལྔའི་རང་བཞིན་ནི་བྱང་ཆུབ་ཀྱི་རང་བཞིན་ནོ། །བྱང་ཆུབ་ཀྱི་རང་བཞིན་ནི་ཆོས་ཐམས་ཅད་ཀྱི་རང་བཞིན་ཏེ། སྲིང་མོ། ཕུང་པོ་ལྔའི་རང་བཞིན་གང་ཡིན་པ་དང ། བྱང་ཆུབ་ཀྱི་རང་བཞིན་གང་ཡིན་པ་དེ་ནི་སེམས་ཅན་ཐམས་ཅད་ཀྱི་རང་བཞིན་ཡིན་ཏེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཕུང་པོ་རྟོགས་པ་གང་ཡིན་པ་དེ་ཉིད་བྱང་ཆུབ་ཡིན་ཏེ། ཕུང་པོ་མ་གཏོགས་པར་རྟོགས་པའང་མེད་ལ།་བྱང་ཆུབ་མ་གཏོགས་པར་ཡང་རྟོགས་པ་མེད་པས་དེ་ལྟར་རྟོགས་པ་གང་ཡིན་པ་དེ་བྱང་ཆུབ་ཅེས་བྱ་སྟེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། ཇི་ལྟར་སེམས་ཅན་ཐམས་ཅད་བྱང་ཆུབ་ཏུ་གཏོགས་པ་ལྟར་དེ་གཏོགས་པ་མེད་པར་བསྟན་པ་ནི་བྱང་
359b
ཆུབ་སྟེ།་སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཁྱོད་ཀྱི་ལུས་འདི་ལ་སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང་ཁམས་བཞི་པོ་དག་མངོན་པར་གྲུབ་པ་དེ་ལ་སྲིང་མོ། སའི་ཁམས་ནི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །བྱང་ཆུབ་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །དེ་བཞིན་དུ་ཆུའི་ཁམས་དང ། མེའི་ཁམས་དང ། རླུང་གི་ཁམས་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །བྱང་ཆུབ་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན།་གང་ཟག་མ་ཡིན་ནོ། །ཤིན་ཏུ་ནམ་མཁའ་དང་མཚུངས་པའི་ཕྱིར་སའི་ཁམས་དང་བྱང་ཆུབ་མཉམ་མོ། །ཤིན་ཏུ་མེད་པའི་ཕྱིར་ཆུའི་ཁམས་དང་བྱང་ཆུབ་མཉམ་མོ། །ཤིན་ཏུ་མི་གཡོ་བའི་ཕྱིར་མེའི་ཁམས་དང་བྱང་ཆུབ་མཉམ་མོ། །ཤིན་ཏུ་བསྟན་དུ་མེད་པའི་ཕྱིར་རླུང་གི་ཁམས་དང་བྱང་ཆུབ་མཉམ་མོ། །སྲིང་མོ། སའི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །སྲིང་མོ། ཆུའི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་
360a
༄#། །པར་རྫོགས་པར་ཐུགས་སུ་ཆུད་དོ། །སྲིང་མོ། མེའི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །སྲིང་མོ། རླུང་གི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །སྲིང་མོ། སའི་ཁམས་རྟོགས་པ་ནི་བྱང་ཆུབ་བོ། །སྲིང་མོ། དེ་བཞིན་དུ་ཆུའི་ཁམས་དང ། མེའི་ཁམས་དང ། རླུང་གི་ཁམས་རྟོགས་པ་ནི་བྱང་ཆུབ་སྟེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། སའི་ཁམས་ཀྱིས་ཆུའི་ཁམས་ཡང་དག་པར་མི་ཤེས་སོ། །ཆུའི་ཁམས་ཀྱིས་མེའི་ཁམས་ཡང་དག་པར་མི་ཤེས་སོ། །མེའི་ཁམས་ཀྱིས་རླུང་གི་ཁམས་ཡང་དག་པར་མི་ཤེས་སོ། །སྲིང་མོ། དེ་ལྟར་ན། ཁམས་ཀྱི་མིང་ཡོངས་སུ་ཤེས་པ་གང་ཡིན་པ་དེ་ནི་བྱང་ཆུབ་ཅེས་བྱ་སྟེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་གང་ཁྱོད་ཀྱི་ལུས་འདི་ལ་མིག་མངོན་པར་གྲུབ་པ་དང ། དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་མངོན་པར་གྲུབ་པ་དེ་ལ་སྲིང་མོ། མིག་ནི་སྟོང་པ་སྟེ། མིག་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །རྣ་བ་ནི་སྟོང་པ་སྟེ། རྣ་བ་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །སྣ་ནི་སྟོང་པ་སྟེ། སྣ་སྟོང་
360b
པ་ཉིད་ཀྱི་རང་བཞིན་ནི་བྱང་ཆུབ་བོ། །ལྕེ་ནི་སྟོང་པ་སྟེ། ལྕེ་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །ལུས་ནི་སྟོང་པ་སྟེ། ལུས་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །ཡིད་ནི་སྟོང་པ་སྟེ།་ཡིད་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་མིག་སྟོང་པ་ཉིད་གང་ཡིན་པ་དེ་ནི་གཟུགས་སུ་འདོགས་པར་མི་བྱེད་དོ། །གཟུགས་སྟོང་པའི་གཟུགས་ཀྱི་ངོ་བོ་ཉིད་ནི་བྱང་ཆུབ་བོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་སྟོང་པ་ཉིད་གང་ཡིན་པ་དེ་ནི་ཆོས་སུ་འདོགས་པར་མི་བྱེད་དོ། །ཆོས་སྟོང་པའི་ཆོས་ཀྱི་ངོ་བོ་ཉིད་ནི་བྱང་ཆུབ་སྟེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། མིག་ནི་གཟུགས་མི་ལེན་ཏེ།་བྱང་ཆུབ་ཀྱང་གཟུགས་མི་ལེན་ཏོ། །རྣ་བ་ནི་སྒྲ་མི་ལེན་ཏེ། བྱང་ཆུབ་ཀྱང་སྒྲ་མི་ལེན་ཏོ། །སྣ་ནི་དྲི་མི་ལེན་ཏེ། བྱང་ཆུབ་ཀྱང་དྲི་མི་ལེན་ཏོ། །ལྕེ་ནི་རོ་མི་ལེན་ཏེ། བྱང་ཆུབ་ཀྱང་རོ་མི་ལེན་ཏེ། །ལུས་ནི་རེག་བྱ་མི་ལེན་ཏེ། བྱང་ཆུབ་ཀྱང་རེག་བྱ་མི་ལེན་ཏོ། །ཡིད་ནི་ཆོས་མི་ལེན་ཏེ། བྱང་ཆུབ་ཀྱང་ཆོས་མི་ལེན་ཏོ། །སྲིང་མོ། དེ་ཅིའི་ཕྱིར་ཞེ་ན། མིག་གཟུགས་དང་བྲལ་བ་ནི་བྱང་ཆུབ་བོ། །ཡིད་ཆོས་དང་བྲལ་བའི་བར་དུའང་བྱང་ཆུབ་ཡིན་པའི་ཕྱིར་རོ། །སྲིང་མོ། དེ་ལྟར་ན། མིག་གི་རྣམ་པར་ཤེས་པའི་ཁམས་གང་ཡིན་པ་དེ་ནི་གཟུགས་ཀྱི་ཁམས་དང་མཚམས་
361a
༄#། །སྦྱོར་བ་མེད་དེ། མིག་གི་རྣམ་པར་ཤེས་པའི་ཁམས་དང ། གཟུགས་ཀྱི་ཁམས་སུ་བྲལ་བ་ནི་བྱང་ཆུབ་བོ། །རྣ་བའི་རྣམ་པར་ཤེས་པའི་ཁམས་གང་ཡིན་པ་དེ་ནི་སྒྲའི་ཁམས་དང་མཚམས་སྦྱོར་བ་མེད་དེ། རྣ་བའི་རྣམ་པར་ཤེས་པའི་ཁམས་དང ། སྒྲའི་ཁམས་སུ་བྲལ་བ་ནི་བྱང་ཆུབ་བོ། །སྣའི་རྣམ་པར་ཤེས་པའི་ཁམས་གང་ཡིན་པ་དེ་ནི་དྲིའི་ཁམས་དང་མཚམས་སྦྱོར་བ་མེད་དེ། སྣའི་རྣམ་པར་ཤེས་པའི་ཁམས་དང ། དྲིའི་ཁམས་སུ་བྲལ་བ་ནི་བྱང་ཆུབ་བོ། །ལྕེའི་རྣམ་པར་ཤེས་པའི་ཁམས་གང་ཡིན་པ་དེ་ནི་རོའི་ཁམས་དང་མཚམས་སྦྱོར་བ་མེད་དེ། ལྕེའི་རྣམ་པར་ཤེས་པའི་ཁམས་དང ། རོའི་ཁམས་སུ་བྲལ་བ་ནི་བྱང་ཆུབ་བོ། །ལུས་ཀྱི་རྣམ་པར་ཤེས་པའི་ཁམས་གང་ཡིན་པ་དེ་ནི་རེག་བྱའི་ཁམས་དང་མཚམས་སྦྱོར་བ་མེད་དེ། ལུས་ཀྱི་རྣམ་པར་ཤེས་པའི་ཁམས་དང ། རེག་བྱའི་ཁམས་སུ་བྲལ་བ་ནི་བྱང་ཆུབ་བོ། །ཡིད་ཀྱི་རྣམ་པར་ཤེས་པའི་ཁམས་གང་ཡིན་པ་དེ་ནི། ཆོས་ཀྱི་ཁམས་དང་མཚམས་སྦྱོར་བ་མེད་དེ། ཡིད་ཀྱི་རྣམ་པར་ཤེས་པའི་ཁམས་དང ། ཆོས་ཀྱི་ཁམས་སུ་བྲལ་བ་ནི་བྱང་ཆུབ་སྟེ། སྲིང་མོ།་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། དེ་ལྟར་ན། བྱང་ཆུབ་དང ། མིག་གི་རྣམ་པར་ཤེས་པའི་ཁམས་དེ་ནི་གཉིས་སུ་མེད་དེ་གཉིས་
361b
སུ་དབྱེར་མེད་དོ། །བྱང་ཆུབ་དང ། གཟུགས་ཀྱི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང ། མིག་གི་རྣམ་པར་ཤེས་པའི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང ། ཡིད་ཀྱི་ཁམས་ཀྱི་བར་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང ། ཆོས་ཀྱི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང ། ཡིད་ཀྱི་རྣམ་པར་ཤེས་པའི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་མིག་རྟོགས་པ་ནི་བྱང་ཆུབ་བོ། །དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་རྟོགས་པ་ནི་བྱང་ཆུབ་བོ། །མིག་གི་རང་བཞིན་ནི་སྟོང་པ་པ་སྟེ།་རང་བཞིན་སྟོང་པ་དེ་ནི་བྱང་ཆུབ་བོ། །དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་རང་བཞིན་ནི་སྟོང་པ་སྟེ། རང་བཞིན་སྟོང་པ་དེ་ནི་བྱང་ཆུབ་བོ། །སྲིང་མོ།། མིག་གི་རང་བཞིན་ནི་མ་ཆགས། མི་སྡང ། མ་རྨོངས་པ་སྟེ། འདོད་ཆགས་དང ། ཞེ་སྡང་དང ། གཏི་མུག་དང་བྲལ་བ་ནི་བྱང་ཆུབ་བོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་རང་བཞིན་ནི་མ་ཆགས་པ། མི་སྡང་བ། མ་རྨོངས་པ་སྟེ། འདོད་ཆགས་དང ། ཞེ་སྡང་དང ། གཏི་མུག་དང་བྲལ་བ་ནི་བྱང་ཆུབ་བོ། །སྲིང་མོ། མིག་ནི་བདག་པོ་མེད་པ། བདག་
362a
༄#། །གི་མེད་པ། ཡོངས་སུ་འཛིན་པ་མེད་པ་སྟེ། བྱང་ཆུབ་ཀྱང་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པའོ། །དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱང་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པ་སྟེ། བྱང་ཆུབ་ཀྱང་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པའོ། །སྲིང་མོ། མིག་ནི་སྐྱེས་པའི་ཆོས་དང་མཚུངས་པར་ལྡན་པའང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པའང་མ་ཡིན་ནོ། །སྲིང་མོ། བྱང་ཆུབ་ཀྱང་སྐྱེས་པའི་ཆོས་དང་མཚུངས་པར་ལྡན་པའང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པའང་མ་ཡིན་ནོ། །སྲིང་མོ། དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱང་སྐྱེས་པའི་ཆོས་དང་མཚུངས་པར་ལྡན་པའང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པའང་མ་ཡིན་ནོ། །སྲིང་མོ། བྱང་ཆུབ་ཀྱང་སྐྱེས་པའི་ཆོས་དང་མཚུངས་པར་ལྡན་པའང་མ་ཡིན།་བུད་མེད་ཀྱི་ཆོས་དང་མཚུངས་པར་ལྡན་པའང་མ་ཡིན་ནོ། །སྲིང་མོ། མིག་ནི་སྐྱེས་པའང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ། བྱང་ཆུབ་ཀྱང་སྐྱེས་པའང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ། ཡིད་ཀྱི་བར་དུའང་སྐྱེས་པའང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ། བྱང་ཆུབ་ཀྱང་སྐྱེས་པའང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ།
362b
དེ་ལྟར་མིག་གི་དེ་བཞིན་ཉིད་ནི་དེ་བཞིན་གཤེགས་པས་ཐུགས་སུ་ཆུད་དེ། དེ་བཞིན་ཉིད་རྟོགས་པ་ནི་བྱང་ཆུབ་བོ། །ཡིད་ཀྱི་དེ་བཞིན་ཉིད་ཀྱི་བར་དུའང་དེ་བཞིན་གཤེགས་པས་ཐུགས་སུ་ཆུད་དེ།་དེ་བཞིན་ཉིད་རྟོགས་པ་ནི་བྱང་ཆུབ་བོ། །སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་ཁྱོད་ཀྱི་ལུས་འདི་ནི་བདག་མ་ཡིན།་སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན། ཤེད་ལས་སྐྱེས་པ་མ་ཡིན། ཤེད་བུ་མ་ཡིན། བྱེད་པ་པོ་མ་ཡིན། ཚོར་བ་པོ་མ་ཡིན། ཤེས་པ་པོ་མ་ཡིན།་མཐོང་བ་པོ་མ་ཡིན། ཉན་པ་པོ་མ་ཡིན། སྣོམ་པ་བོ་མ་ཡིན། ཟ་བ་པོ་མ་ཡིན། རེག་པ་པོ་མ་ཡིན། རྣམ་པར་ཤེས་པ་པོ་མ་ཡིན་ནོ། །སྲིང་མོ། བྱང་ཆུབ་ཀྱང་བདག་མ་ཡིན་སེམས་ཅན་མ་ཡིན། སྲོག་མ་ཡིན། གསོ་བ་མ་ཡིན། གང་ཟག་མ་ཡིན། བདག་གི་མ་ཡིན། ཡོངས་སུ་འཛིན་པ་མ་ཡིན། བྱས་པ་མ་ཡིན། ཚོར་བ་མ་ཡིན། གཟུགས་མ་ཡིན། སྒྲ་མ་ཡིན།་དྲི་མ་ཡིན། རོ་མ་ཡིན། རེག་མ་ཡིན། རྣམ་པར་རེག་པ་མ་ཡིན་ཏེ། སྲིང་མོ། དེ་ལྟ་བས་ན། ཆོས་ཐམས་ཅད་མཉམ་པ་ཉིད་ནི་བྱང་ཆུབ་ཅེས་བྱའོ། །སྲིང་མོ། གང་ཡང་ཁྱོད་ཀྱི་ལུས་ནི་གཡོ་བ་མེད་པ། བྱེད་པ་མེད་པ། རྟག་པ་མེད་པ་སྟེ། རྩཝ་དང ། ཤིང་དང ། ཤིང་ལྗོན་པ་དང ། རྩིག་པའི་ཚོགས་རྣམས་དང་ཁྱད་པར་མེད་ཅིང་ཐ་དད་དུ་དབྱེར་མེད་དོ། །སྲིང་
363a
༄#། །མོ།་གང་ཡང་ནང་གི་སའི་ཁམས་དང ། ཕྱི་རོལ་གྱི་སའི་ཁམས་ནི་གཉིས་སུ་མེད་ཅིང་གཉིས་སུ་དབྱེར་མེད་དེ། འདི་ལྟར་མཚན་ཉིད་མེད་པར་མཚན་ཉིད་གཅིག་པར་དེ་བཞིན་གཤེགས་པས་ཤེས་རབ་དང ། ཡེ་ཤེས་ཀྱིས་མངོན་པར་རྫོགས་པར་ཐུགས་སུ་ཆུད་དེ། སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ། གཞན་ཡང་སེམས་དང ། ཡིད་དང ། རྣམ་པར་ཤེས་པའི་རྣམ་པར་རིག་པ་གང་གིས་སེམས་པ་དང ། རྣམ་པར་ཤེས་པའི་སེམས་དང ། ཡིད་དང ། རྣམ་པར་ཤེས་པའི་རྣམ་པར་རིག་པ་དེ་ནི་སྐྲ་ལ་གནས་པ་མ་ཡིན། སྤུ་ལ་གནས་པ་མ་ཡིན། ཤ་མདོག་ལ་གནས་པ་མ་ཡིན། པགས་པ་ལ་གནས་པ་མ་ཡིན། ཤ་ལ་གནས་པ་མ་ཡིན། ཁྲག་ལ་གནས་པ་མ་ཡིན། རུས་པ་ལ་གནས་པ་མ་ཡིན། ཆུ་བ་ལ་གནས་པ་མ་ཡིན། རྐང་ལ་གནས་པ་མ་ཡིན། ནང་ལ་གནས་པ་མ་ཡིན། ཕྱི་རོལ་ལ་གནས་པ་མ་ཡིན། གཉིས་ཀ་མེད་པ་ལ་གནས་པ་མ་ཡིན། མིག་ལ་གནས་པ་མ་ཡིན། རྣ་བ་ལ་གནས་པ་མ་ཡིན། སྣ་ལ་གནས་པ་མ་ཡིན། ལྕེ་ལ་གནས་པ་མ་ཡིན། ལུས་ལ་གནས་པ་མ་ཡིན། ཡིད་ལ་གནས་པ་མ་ཡིན་ཏེ།་གནས་པ་མ་ཡིན། མི་གནས་པ་མ་ཡིན། རྒྱུན་ཆད་པ་མ་ཡིན། ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན། གཟུགས་མེད་པ། བསྟན་དུ་མེད་པ། རྣམ་པར་རིག་
363b
པ་མེད་པ། གཟུང་བ་མེད་པ། འདྲེ་བ་མེད་པ། གཞི་མེད་པ། དག་པ། གཙང་བ། འོད་གསལ་བ་སྟེ། སེམས་དང ། ཡིད་ཀྱི་རྣམ་པར་རིག་པ་དེ་ནི་ཀུན་ནས་ཉོན་མོངས་པ་མེད་པ། རྣམ་པར་བྱང་བ་མེད་པ་སྟེ། དེ་ནི་རང་བཞིན་གྱིས་རྣམ་པར་དག་ཅིང་འོད་གསལ་ལ་ལུས་མེད་པའི་ཕྱིར་ཀུན་ནས་ཉོན་མོངས་པ་མེད་ཅིང་རྣམ་པར་བྱང་བ་མེད་དོ། །སྲིང་མོ། དེ་ལྟར་ན། ཕུང་པོ་དང ། ཁམས་དང ། སྐྱེ་མཆེད་ཀྱི་རང་བཞིན་ནི་བྱང་ཆུབ་བོ། །བྱང་ཆུབ་ཀྱི་རང་བཞིན་ཡང་ཕུང་པོ་དང ། ཁམས་དང ། སྐྱེ་མཆེད་རྣམས་སོ། །སྲིང་མོ། ཁྱེད་ཀྱི་ལུས་འདི་ལ་ཕུང་པོ་དང ། ཁམས་དང ། སྐྱེ་མཆེད་གང་དག་མངོན་པར་གྲུབ་པ་དེ་དག་ནི་བྱང་ཆུབ་སྟེ། བྱང་ཆུབ་གཞན་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི་ཕུང་པོ་དང ། ཁམས་དང ། སྐྱེ་མཆེད་རྣམས་ལས་གཞན་པ་མ་ཡིན་ཏེ། དེ་དག་ཉིད་བྱང་ཆུབ་ཡིན་པས་ཆོས་ཐམས་ཅད་མཉམ་པ་ཉིད་དུ་རྟོགས་པས་ནི་བྱང་ཆུབ་ཡིན་པའི་ཕྱིར་རོ། །སྲིང་མོ། དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་ནམ་མཁའི་དཀྱིལ་ན་གནས་པའི་ལྷའི་བུ་ལྔ་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །གང་དག་སྨད་ཚོང་མའི་བུ་མོ་གསེར་མཆོག་འོད་དཔལ་གྱི་ཕྱི་བཞིན་འབྲང་བའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་རྣམས་
364a
༄#། །ལས་སྲོག་ཆགས་ཉིས་བརྒྱས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷ་དང་མི་དྲུག་ཅུ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།སྨད་ཚོང་མའི་བུ་མོ་གསེར་མཆོག་འོད་དཔལ་ཡང་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ་ཡན་ལག་ལྔས་ཕྱག་འཚལ་ནས་འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་གཏུགས་ཏེ་སངས་རྒྱས་དང ། ཆོས་དང ། དགེ་འདུན་ལ་སྐྱབས་སུ་སོང་ནས་ཚངས་པར་སྤྱད་པ་དང ། བསླབ་པའི་གཞི་རྣམས་ཡང་དག་པར་བླངས་ཏེ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་འདི་སྐད་ཅེས་སྨྲས་སོ། །འཇམ་དཔལ། བདག་ཀྱང་ཁྱོད་ཀྱིས་རྗེས་སུ་བསྟན་པ་དང ། སེམས་ཅན་ཐམས་ཅད་ལ་སྙིང་བརྩེ་བ་དང ། སྙིང་རྗེས་སངས་རྒྱས་ཀྱི་གདུང་མི་གཅད་པ་དང ། ཆོས་ཀྱི་གདུང་མི་གཅད་པ་དང ། དགེ་འདུན་གྱི་གདུང་མི་གཅད་པའི་སླད་དུ་ཁྱོད་ཀྱིས་བསྟན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེར་སེམས་བསྐྱེད་པར་བགྱིའོ། །དེ་བཞིན་དུ་ཆོས་རྟོགས་པར་བགྱི་བའི་སླད་དུ་སེམས་ཅན་ཐམས་ཅད་ལ་ཆོས་བསྟན་པར་ཡང་བགྱིའོ། །ཉེས་པར་བགྱིས་པའི་ལས་ཀྱི་སྒྲིབ་པ་ཡོངས་སུ་སྦྱང་བའི་སླད་དུ་ནོངས་པ་ལ་ནོངས་པར་བཤགས་པར་བགྱིའོ། །
364b
གང་ན་ཆོས་ཐམས་ཅད་ཞི་ཞིང་ཉེ་བར་ཞི་བར་མ་རྟོགས་ནས་ཚུལ་བཞིན་མ་ལགས་པ་ཡིད་ལ་བགྱིད་པ་སྔོན་དུ་འགྲོ་བ་དང ། ཕྱིན་ཅི་ལོག་གི་དབང་དུ་མཆིས་པ་དང ། རང་གི་ལུས་ལ་མངོན་པར་ཞེན་པས་འདོད་ཆགས་ཀྱི་སྦྱོར་བ་དང་ལྡན་པའི་སེམས་ཅན་རྣམས་ཀྱིས་ནི་ཆོས་རྣམས་ཀྱི་རང་བཞིན་ཉིད་མ་གཏོགས་སོ། །འཇམ་དཔལ། དེ་ལྟ་ལགས་མོད་ཀྱི་འོན་ཀྱང་གང་དག་འདོད་ཆགས་ཀྱི་སྦྱོར་བ་དང་ལྡན་པའི་སེམས་ཅན་དེ་དག་ཀྱང་ཆོས་རྣམས་ཀྱི་ཆོས་ཉིད་འདི་ཅི་འདྲ་བ་དེ་ཉིད་དང་ལྡན་ནོ། །བྱང་ཆུབ་སེམས་དཔའ་རྣམས་ནི་ལྡན་པའི་ཆོས་འདི་ལ་སློབ་ཅིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ཅིའི་སླད་དུ་ཞེ་ན། འཇམ་དཔལ། ཉོན་མོངས་པ་རྣམས་ནི་ཇི་ལྟར་མཆིས་པ་མ་ལགས་པ་ལ་ཀུན་བཏགས་པ་ལས་འབྱུང་བར་དེ་ལྟར་ཀུན་བཏགས་པ་ཡོངས་སུ་རྟོགས་ན་འགག་པར་འགྱུར་བས་གསོག་དང་འདྲ་བའི་སླད་དུའོ། །འཇམ་དཔལ། ཇི་ལྟར་ཁྱོད་ཀྱིས་གསུངས་པའི་དོན་བདག་གིས་འཚལ་བ་ལྟར་ན།་ཉོན་མོངས་པ་རྣམས་ནི་རང་བཞིན་མ་མཆིས་ཤིང་བྱུང་བ་མ་མཆིས་པས་སྤྲིན་གྱི་ཚོགས་དང་འདྲའོ། །ཉོན་མོངས་པ་རྣམས་ནི་སྐད་ཅིག་ལ་འཇིག་ཅིང་འཇུ་སྟེ། ཆུའི་ཆུ་བུར་དང་འདྲའོ།། ཉོན་མོངས་པ་རྣམས་ནི་ཤིན་ཏུ་མངོན་པར་གྲུབ་པ་མ་མཆིས་པ་སྟེ། རླུང་དང་འདྲའོ། །ཉོན་མོངས་པ་རྣམས་ནི་ཡུལ་ཐམས་ཅད་ལས་ཡང་དག་པར་འདས་པ་སྟེ། ནམ་མཁའི་རི་མོ་དང་
365a
༄#། །འདྲའོ། །ཉོན་མོངས་པ་རྣམས་ནི་རིང་དུ་མི་གནས་པས་ཆུའི་རི་མོ་དང་འདྲའོ། །ཉོན་མོངས་པ་རྣམས་ནི་ཚུལ་བཞིན་མ་ལགས་པ་ཡིད་ལ་བགྱིད་པའི་འཇུག་པ་ལས་འབྱུང་བ་སྟེ། གནོད་སྦྱིན་དང་འབྱུང་པོ་འདྲའོ། །ཉོན་མོངས་པ་རྣམས་ནི་མ་མཆིས་པ་ལ་ཕྱིན་ཅི་ལོག་ཏུ་མཐོང་བ་ལས་བྱུང་བ་སྟེ། སྤྲིན་མར་དང་འདྲའོ། །ཉོན་མོངས་པ་རྣམས་ནི་ཀུན་བཏགས་པ་ལས་བྱུང་བ་སྟེ། ཡང་དག་པ་མ་ལགས་པའོ། །ཉོན་མོངས་པ་རྣམས་ནི་བར་འཛིན་པས་ལྷག་པར་ཆགས་པ་དང་འབྲེལ་བའོ། །ཉོན་མོངས་པ་རྣམས་ནི་བདག་གིར་འཛིན་པས་དངོས་པོ་ཡོངས་སུ་འཛིན་པའོ། །ཉོན་མོངས་པ་རྣམས་ནི་ལོག་པར་བསྐྱེད་པས་གློ་བུར་དུ་བྱུང་བའོ། །ཉོན་མོངས་པ་རྣམས་ནི་རྣམ་པར་རྟོག་པ་ལས་བྱུང་བས་མཚན་མའི་རྗེས་སུ་འབྲང་བ་དང་འདྲའོ། །ཉོན་མོངས་པ་རྣམས་ནི་ཁམས་སྣ་ཚོགས་ལ་མི་དཔྱོད་པའི་ཚུལ་གྱིས་བསྐྱེད་པ་སྟེ། སོ་སོར་མི་རྟོག་པའོ། །ཉོན་མོངས་པ་རྣམས་ནི་སེམས་དང་རྗེས་སུ་མཐུན་པས་བསྐྱེད་པ་སྟེ། ངེས་པར་མི་སེམས་པའོ། །ཉོན་མོངས་པ་རྣམས་ནི་བདག་དང་གཞན་ལ་མངོན་པར་ཞེན་པ་ལས་བྱུང་བ་སྟེ། ཡིད་ཆེས་པར་མི་བགྱི་བའོ། ། ཉོན་མོངས་པ་རྣམས་ནི་ཕུང་པོ་དག་ལེན་པའོ། །ཉོན་མོངས་པ་རྣམས་ནི་ཁམས་རྣམས་ལ་རིལ་པོར་འཛིན་པའོ། །ཉོན་མོངས་པ་རྣམས་ནི་སྐྱེ་མཆེད་རྣམས་གསོག་པའོ། །ཉོན་མོངས་
365b
པ་རྣམས་ནི་མིང་དང་གཟུགས་ལ་རྣམ་པར་འབྱེད་པའོ། །ཉོན་མོངས་པ་རྣམས་ནི་ཚུལ་བཞིན་མ་ལགས་པ་ཡིད་ལ་བགྱིད་པ་དག་མི་རྟོགས་པའོ། །འཇམ་དཔལ། དེ་ལྟ་ལགས་མོད་ཀྱི། འོན་ཀྱང་ཉོན་མོངས་པ་རྣམས་ནི་བྱང་ཆུབ་ཀྱི་ཕུར་བུའི་གཞི་ལགས་སོ། །དེ་ཅིའི་སླད་དུ་ཞེ་ན། བྱང་ཆུབ་ནི་གཡོ་བ་མ་མཆིས་པའི་སླད་དུའོ། །ཉོན་མོངས་པ་རྣམས་ནི་བྱང་ཆུབ་ཀྱི་ས་བོན་ཏེ། ཉོན་མོངས་པ་རྟོགས་པ་ཉིད་བྱང་ཆུབ་ལགས་སོ། །ཉོན་མོངས་པ་རྣམས་ནི་བྱང་ཆུབ་རྡོ་རྗེའི་གཞི་ལགས་སོ། །དེ་ཅིའི་སླད་དུ་ཞེ་ན། ཆོས་ཀྱི་དབྱིངས་དབྱེར་མ་མཆིས་པའི་ཚུལ་གྱིས་བྱང་ཆུབ་ནི་ཉོན་མོངས་པ་རྣམས་ཀྱིས་མི་ཕྱེད་པའི་སླད་དུའོ། །འཇམ་དཔལ། ཉོན་མོངས་པ་རྣམས་མཐོང་བ་ནི་བྱང་ཆུབ་སྟེ། བྱང་ཆུབ་ནི་ཡུལ་ཐམས་ཅད་ཀྱི་རྗེས་སུ་སོང་བའོ། །འཇམ་དཔལ། ཇི་ལྟར་བྱང་ཆུབ་རྣམ་པར་གནས་པ་མ་མཆིས་པ་དེ་ལྟར་ཉོན་མོངས་པ་རྣམས་ཀྱང་རྣམ་པར་གནས་པ་མ་མཆིས་པ་སྟེ། སྐྱེས་ནས་འཇིག་ཅིང་འཇུབས་མི་གནས་པའོ། །འཇམ་དཔལ། ཉོན་མོངས་པ་རྣམས་ནི་སེམས་ཀྱི་རང་བཞིན་ལགས་སོ། །དེ་ཅིའི་སླད་དུ་ཞེ་ན་འཇམ་དཔལ། སེམས་འདི་ནི་ཆགས་པའམ། སྡང་བའམ། རྨོངས་པ་ཞེས་སེམས་ཀྱི་རང་བཞིན་བསྟན་པར་མི་ནུས་ཏེ།་འཇམ་དཔལ། ཇི་ལྟར་སེམས་བསྟན་པར་མི་ནུས་པ་དེ་བཞིན་དུ་ཉོན་མོངས་པ་རྣམས་ཀྱང་ཡུལ་ན་གནས་པའམ། ཕྱོགས་ན་གནས་པ་ཞེས་ཉོན་མོངས་པའི་རང་བཞིན་བསྟན་པར་མི་
366a
༄#། །ནུས་པའི་སླད་དུའོ། །འཇམ་དཔལ། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟ་ཇི་ལྟར་ཉོན་མོངས་པ་དེ་དག་རབ་ཏུ་རྟོགས་པ་དེ་ལྟ་དེ་ལྟར་དེ་འདོད་ཆགས་ལ་སྤྱོད་པའི་སེམས་ཅན་རྣམས་ཡོངས་སུ་སྨིན་པར་བགྱི་བ་ལ་སྐྱོ་བར་མི་འགྱུར་རོ། །ཞེ་སྡང་ལ་སྤྱོད་པ་རྣམས་ལ་མ་ལགས། གཏི་མུག་ལ་སྤྱོད་པ་རྣམས་ལ་མ་ལགས་ཏེ། ཆ་མཉམ་པ་ལ་སྤྱོད་པའི་སེམས་ཅན་རྣམས་ཡོངས་སུ་སྨིན་པར་བགྱི་བ་ལ་སྐྱོ་བར་མི་འགྱུར་རོ། །འཇམ་དཔལ། ད་ལྟར་བདག་གི་འདོད་ཆགས་ཇི་ལྟ་བ་དེ་བཞིན་དུ་འདོད་ཆགས་ལ་སྤྱོད་པ་ཐམས་ཅད་ཀྱི་འདོད་ཆགས་ལ་བལྟ་བར་བགྱིའོ། །འཇམ་དཔལ། ད་ལྟར་བདག་གི་ཞེ་སྡང་ཇི་ལྟ་བ་དེ་བཞིན་དུ་ཞེ་སྡང་ལ་སྤྱོད་པ་ཐམས་ཅད་ཀྱི་ཞེ་སྡང་ལ་བལྟ་བར་བགྱིའོ། །འཇམ་དཔལ། ད་ལྟར་བདག་གི་གཏི་མུག་ཇི་ལྟ་བ་དེ་བཞིན་དུ་གཏི་མུག་ལ་སྤྱོད་པ་ཐམས་ཅད་ཀྱི་གཏི་མུག་ལ་བལྟ་བར་བགྱིའོ། །འཇམ་དཔལ། ད་ལྟར་བདག་གི་ཉོན་མོངས་པ་ཐམས་ཅད་ཇི་ལྟ་བ་དེ་བཞིན་དུ་ཉོན་མོངས་པ་ཐམས་ཅད་ལ་སྤྱོད་པའི་སེམས་ཅན་ཐམས་ཅད་ཀྱི་ཉོན་མོངས་པ་ལ་བལྟ་བར་བགྱིའོ། །འཇམ་དཔལ། འདི་ལྟ་སྟེ། དཔེར་ན། མེ་ནི་རྩཝ་དང ། ཤིང་ཐམས་ཅད་ཀྱིས་འཇིགས་པ་མ་མཆིས་པའོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ཀྱི་མེའང་ཉོན་མོངས་པའི་རྩཝ་དང ། ཤིང་ཐམས་ཅད་ཀྱིས་འཇིགས་པ་མ་མཆིས་པའོ། །འཇམ་དཔལ་
366b
འདི་ལྟ་སྟེ། དཔེར་ན། ཉི་མའི་དཀྱིལ་འཁོར་ནི་མུན་པ་མུན་ནག་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ཀྱང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ། འདི་ལྟ་སྟེ། དཔེར་ན། རླུང་དམར་ནི་ཤིང་ལྗོན་པ་དང ། རི་ཐམས་ཅད་ལ་མི་ཆགས་སོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པའི་ཡུལ་ཐམས་ཅད་ལ་མི་ཆགས་སོ། །འཇམ་དཔལ། འདི་ལྟ་སྟེ། དཔེར་ན། ནམ་མཁའི་ཁམས་ནི་སྲེག་པའི་བསྐལ་པ་ཐམས་ཅད་ཀྱིས་ཚིག་པར་མི་འགྱུར་རོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པའི་སྲེག་པའི་བསྐལ་པ་ཐམས་ཅད་ཀྱིས་ཚིག་པར་མི་འགྱུར་རོ། །འཇམ་དཔལ། འདི་ལྟ་སྟེ། དཔེར་ན། ནམ་མཁའ་ནི། རྡུལ་དང ། ན་བུན་དང ། སྤྲིན་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ། འདི་ལྟ་སྟེ། དཔེར་ན། ནམ་མཁའ་ནི།་ས་དང་ལྷན་ཅིག་མི་གནས་སོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །
367a
༄#། །འཇམ་དཔལ། འདི་ལྟ་སྟེ། དཔེར་ན། ཁབ་ལོང་ནི་ལྕགས་དང་ལྷན་ཅིག་མི་གནས་སོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ། འདི་ལྟ་སྟེ། དཔེར་ན། རི་ཁོར་ཡུག་ནི་རླུང་ཐམས་ཅད་ཀྱིས་བསྐྱོད་པར་མི་ནུས་སོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་ཀྱིས་བསྐྱོད་པར་མི་ནུས་སོ། །འཇམ་དཔལ། འདི་ལྟ་སྟེ། དཔེར་ན། དུད་འགྲོའི་སྐྱེ་གནས་སུ་སོང་བ་བྱ་ངང་པ་ཞེས་བགྱི་བ་ནི་འོ་མ་དང ། ཆབ་བསྲེས་པ་ལས་འོ་མ་ཉིད་ནི་འཚལ་གྱི། ཆབ་ནི་མ་ལགས་སོ། །འཇམ་དཔལ།་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་འཕགས་པའི་ཤེས་རབ་དང ། ཉོན་མོངས་པའི་འདྲེས་པ་དག་ལས་ཤེས་རབ་ཉིད་ནི་ལེན་གྱི།་ཉོན་མོངས་པ་ནི་མ་ལགས་སོ། །འཇམ་དཔལ། འདི་ལྟ་སྟེ། དཔེར་ན། བྱང་གི་སྒྲ་མི་སྙན་གྱི་གླིང་ན་ཉེ་དུར་འབྲེལ་བའི་བུད་མེད་རྣམས་ལ་ཤིང་གི་ཡལ་ག་འདུད་པར་མི་བགྱིད་དོ། །འཇམ་དཔལ། དེ་བཞིན་དུ་དབང་པོ་ཡོངས་སུ་མ་སྨིན་པའི་སེམས་ཅན་རྣམས་ལ་བྱང་ཆུབ་སེམས་དཔའི་སྤྱོད་པ་དང ། འཕགས་པའི་ཤེས་རབ་དང ། ཡེ་ཤེས་འདུད་པར་མི་
367b
བགྱིད་དོ། །འཇམ་དཔལ། ད་ལྟར་བདག་ནི་ཉོན་མོངས་པ་རྣམས་ཀྱིས་འཇིགས་པའམ། སྐྲག་པ་ཅིའང་མ་མཆིས་སོ། །དེ་ཅིའི་སླད་དུ་ཞེ་ན། འཇམ་དཔལ། བདག་གིས་ཆོས་ཐམས་ཅད་ཀྱི་རང་བཞིན་དབེན་པར་རྟོགས་པའི་སླད་དུའོ། །འཇམ་དཔལ། བྱང་ཆུབ་སེམས་དཔའ་རྣམས་ནི་འཇིགས་པ་མ་མཆིས་པའི་གོ་ཆ་བགོས་པ་སྟེ། འཇམ་དཔལ། འདི་ལྟ་སྟེ། དཔེར་ན། གང་དགྲས་འཇིགས་པ་དེ་ནི་དཔའ་བོ་ཞེས་མི་བགྱིའོ། །འཇམ་དཔལ། དེ་བཞིན་དུ་གང་ཉོན་མོངས་པ་རྣམས་ཀྱིས་འཇིགས་པ་དེའང་བྱང་ཆུབ་སེམས་དཔའ་ཞེས་མི་བགྱིའོ། །འཇམ་དཔལ། འདི་ལྟ་སྟེ། དཔེར་ན། གང་དགྲས་བཅོམ་པ་དེ་ནི་དཔའ་བོ་ཞེས་མི་བགྱིའོ། །འཇམ་དཔལ། དེ་བཞིན་དུ་གང་ཉོན་མོངས་པ་རྣམས་ཀྱིས་བཅོམ་པ་དེའང་བྱང་ཆུབ་སེམས་དཔའ་ཞེས་མི་བགྱིའོ། །འཇམ་དཔལ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆུ་འདང་ཞེས་བགྱི་བ་ཆབ་ཀྱི་ནང་དུ་སྩལ་ན། གཤེར་བར་ཡང་མི་འགྱུར་ཞིང་ཆབ་ཀྱི་དྲི་མས་ཀྱང་མི་གོས་ལ། ཆབ་ཀྱི་རྙོག་པ་ཐམས་ཅད་ཀྱང་རབ་ཏུ་དང་བར་བགྱིད་དོ། །འཇམ་དཔལ། དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པའི་ནང་ན་གནས་ཀྱང་ཉོན་མོངས་པས་གཤེར་བར་ཡང་མི་འགྱུར་ཞིང་ཉོན་མོངས་པའི་དྲི་མས་ཀྱང་མི་གསོལ། ཉོན་མོངས་པའི་རྙོག་པ་ཐམས་ཅད་ཀྱང་རབ་ཏུ་ཞི་བར་བགྱིད་དོ། །དེ་ནས་སྨད་ཚོང་མའི་བུ་མོ་གསེར་
368a
༄#། །མཆོག་འོད་དཔལ་གྱིས་བསྟན་པ་འདི་བཤད་ནས་ཡང་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཇི་ལྟར་ན། བྱང་ཆུབ་སེམས་དཔའ་ཉོན་མོངས་པ་མ་མཆིས་པ་ལགས། འཇམ་དཔལ་གྱིས་སྨྲས་པ། སྲིང་མོ། བྱང་ཆུབ་སེམས་དཔའ་གང་གིས་ཉོན་མོངས་པ་སྐྱེ་བའམ། འགག་པར་མཐོང་ན། བྱང་ཆུབ་སེམས་དཔའ་དེ་ནི་ཉོན་མོངས་པ་མེད་པ་ཞེས་མི་བྱའོ། །སྲིང་མོ། འདི་ལྟ་སྟེ། དཔེར་ན། འབྲུ་མར་གྱི་སྒྲོན་མ་ལ་མུན་པ་མུན་ནག་སྣང་ན། འབྲུ་མར་གྱི་སྒྲོན་མ་ཞེས་མི་བྱའོ། །སྲིང་མོ། དེ་བཞིན་དུ་བྱང་ཆུབ་སེམས་དཔའ་གང་གིས་ཉོན་མོངས་པ་སྐྱེ་བའམ། འགག་པར་མཐོང་ན། བྱང་ཆུབ་སེམས་དཔའ་དེ་ནི་ཉོན་མོངས་པ་མེད་པ་ཞེས་མི་བྱའོ། །སྲིང་མོ། ཉོན་མོངས་པ་མེད་པ་ཞེས་བྱ་བ་ནི་སུ་གང་དུ་ཀུན་ནས་ཉོན་མོངས་པའང་མི་མཐོང ། རྣམ་པར་བྱང་བའང་མི་མཐོང་སྟེ། མཐོང་བ་དང ། མི་མཐོང་བ་དང ། སེམས་དང ། ཡིད་དང ། རྣམ་པར་རིག་པ་དང་བྲལ་བ་ནི་ཉོན་མོངས་པ་མེད་པའོ། །སྲིང་མོ། གང་དང་གང་དུ་སེམས་དང ། ཡིད་དང ། རྣམ་པར་རིག་པ་འཇུག་ན། ཐ་ན་མྱ་ངན་ལས་འདས་པར་སེམས་པའང་རུང་སྟེ། དེ་ཐམས་ཅད་ནི། ཉོན་མོངས་པའོ། །དེ་ཅིའི་ཕྱིར་ཞེ་ན། ཉོན་མོངས་པ་མེད་པ་ལ་ནི་སེམས་སམ། སེམས་པ་འཇུག་པ་མེད་པའི་ཕྱིར་ཏེ། གང་གིས་དགེ་བའམ་མི་དགེ་བའི་དམིགས་པ་ལ་སེམས་འཇུག་པ་དེ་དག་
368b
ཐམས་ཅད་ནི་མངོན་པར་འདུ་བྱེད་པའོ། །གང་མངོན་པར་འདུ་བྱེད་པ་དེ་ནི་འཁོར་བའོ། །གང་འཁོར་བ་དེ་ནི་འདུ་བྱེད་དོ། །འདུ་བྱེད་ཐམས་ཅད་ནི་འཁོར་བ་སྟེ། སྲིང་མོ། དེ་དག་ནི་ཉོན་མོངས་པ་ཡིན་ནོ། །སྲིང་མོ། ཉོན་མོངས་པ་ཞེས་བྱ་བ་དེ་ནི་སྦྱོར་བ་སྟེ། མིག་དང་གཟུགས་སུ་སྦྱོར་བ་ནི་ཉོན་མོངས་པའོ། །དེ་བཞིན་དུ་རྣ་བ་དང ། སྒྲ་དང ། སྣ་དང ། དྲི་དང ། ལྕེ་དང ། རོ་དང ། ལུས་དང ། རེག་བྱ་དང ། ཡིད་དང ། ཆོས་སུ་སྦྱོར་བ་ནི་ཉོན་མོངས་པའོ། །ཚུལ་ཁྲིམས་ལ་སྦྱོར་བ་ནི་ཉོན་མོངས་པའོ། །ཏིང་ངེ་འཛིན་ལ་སྦྱོར་བ་ནི་ཉོན་མོངས་པའོ། །ཤེས་རབ་དང ། རྣམ་པར་གྲོལ་བའི་ཡེ་ཤེས་མཐོང་བ་ལ་སྦྱོར་བ་ནི་ཉོན་མོངས་པའོ། །རབ་ཏུ་དབེན་པ་ལ་སྦྱོར་བར་སེམས་པ་ནི་ཉོན་མོངས་པའོ། །སྲིང་མོ། ཉོན་མོངས་པ་མེད་པ་ཞེས་བྱ་བ་དེ་ནི་རྒྱུ་བ་མེད་པ་ཞེས་བྱ་བའི་ཚིག་བླ་དྭགས་སོ། །དེ་ནི་སྤྲོས་པ་མེད་པ་ཞེས་བྱ་བའི་ཚིག་བླ་དྭགས་སོ། །དེ་ནི་རྩོལ་བ་མེད་པ་ཞེས་བྱ་བའི་ཚིག་བླ་དྭགས་སོ། །ཀུན་ཏུ་འབྱུང་བ་མེད་པ་ཞེས་བྱ་བའི་ཚིག་བླ་དྭགས་ཏེ། སྲིང་མོ། གྲངས་དང་གྲངས་མེད་པ་དང་བྲལ་བ་ནི་ཉོན་མོངས་པ་མེད་པ་ཉིད་དོ། །སྲིང་མོ། གཞན་ཡང་བྱང་ཆུབ་སེམས་དཔའ་གང་བདག་ལའང་ཉོན་མོངས་པ་མེད་ལ། གཞན་དག་ཉོན་མོངས་པ་ལས་རབ་ཏུ་ཐར་པ་ལའང་ཤིན་ཏུ་བརྩོན་པ་དེ་ནི་ཉོན་མོངས་པ་མེད་པའོ་ཞེས་དེ་བཞིན་གཤེགས་པས་གསུངས་ཏེ། གཞན་དག་ཉོན་མོངས་པ་ལས་རབ་ཏུ་ཐར་
369a
༄#། །པར་བྱེད་པ་ནི་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་ལོ། །བུ་མོས་སྨྲས་པ། འཇམ་དཔལ། བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་གང་ལགས། འཇམ་དཔལ་གྱིས་སྨྲས་པ། སྟོང་པ་ཉིད་ལ་སོ་སོར་རྟོག་པའི་རྗེས་སུ་འཇུག་ཅིང་ལྟ་བ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང ། མཚན་མ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་མཚན་མ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང ། སྨོན་པ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་སྨོན་པ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང ། མངོན་པར་འདུ་བྱེད་པ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་མངོན་པར་འདུ་བྱེད་པ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང ། སྐྱེ་བ་མེད་ཅིང་འཆི་འཕོ་བ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་རྒ་བ་དང་ཤི་བར་འདུ་ཤེས་པའི་སེམས་ཅན་རྣམས་ལ་སྙིང་རྗེ་བ་དང ། སྐྱེ་བ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་སྐྱེ་བ་དང ། འཇིག་པར་འདུ་ཤེས་པའི་སེམས་ཅན་རྣམས་ལ་སྙིང་རྗེ་བ་དང ། ཉན་ཐོས་སུ་ངེས་པ་ལ་སོ་སོར་རྟོག་པའི་རྗེས་སུ་འཇུག་ཅིང་ཉན་ཐོས་ཀྱི་འབྲས་བུ་ཐོབ་པ་ལས་ལྡོག་པ་དང ། རང་སངས་རྒྱས་སུ་ངེས་པ་ལ་སོ་སོར་རྟོག་པའི་རྗེས་སུ་འཇུག་ཅིང་རང་སངས་རྒྱས་ཀྱི་འབྲས་བུ་ཐོབ་པ་ལས་ལྡོག་པ་དང ། བྱང་ཆུབ་སེམས་དཔའི་སྐྱོན་མེད་པ་ལ་
369b
འཇུག་པ་སོ་སོར་རྟོག་པའི་རྗེས་སུ་འཇུག་ཅིང་སེམས་ཅན་ཐམས་ཅད་ལའང་སྙིང་རྗེ་བ་སྟེ། སྲིང་མོ། འདི་ནི་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་ལོ། །སྲིང་མོ། འདི་ལྟ་སྟེ།་དཔེར་ན། རྒྱ་མཚོ་ཆེན་པོར་འཇུག་པ་ནི་སླའི། རིན་པོ་ཆེ་ཆེན་པོ་དག་ཐོགས་ཏེ་ལྡོག་པར་ནི་དཀའོ། །སྲིང་མོ། དེ་བཞིན་དུ་སྟོང་པ་ཉིད་ལ་སོ་སོར་བརྟག་པ་ནི་སླའི། ཐབས་ལ་མཁས་པ་དང་བྲལ་བས་ལྡོག་པར་ནི་དཀའོ། །མཚན་མ་མེད་པ་དང ། སྨོན་པ་མེད་པ་དང ། མངོན་པ་འདུ་བྱེད་པ་མེད་པ་དང ། སྐྱེ་བ་མེད་པ་དང ། འབྱུང་བ་མེད་པ་དང ། ཉན་ཐོས་ཀྱི་སྐྱོན་མེད་པ་དང ། རང་སངས་རྒྱས་ཀྱི་སྐྱོན་མེད་པ་ལའང་སོ་སོར་བརྟག་པ་ནི་སླའི། །ཐབས་ལ་མཁས་པ་དང་བྲལ་བ་ལྡོག་པར་ནི་དཀའོ། །སྲིང་མོ། འདི་ལྟ་སྟེ། དཔེར་ན། གཡུལ་ངོ་ཆེན་པོར་འཇུག་པ་ནི་སླའི། །མ་རྨས་མ་ཉམས་པར་རྒལ་བ་ནི་དཀའོ། །སྲིང་མོ། དེ་བཞིན་དུ་རྣམ་པར་ཐར་པའི་སྒོ་གསུམ་དུའང་འཇུག་པ་ནི་སླའི། །ཐབས་ལ་མཁས་པ་དང་བྲལ་བས་ལྡོག་པར་ནི་དཀའོ། །བུ་མོས་སྨྲས་པ། འཇམ་དཔལ། ཐབས་ཞེས་བགྱི་བ་ཇི་ལྟ་བུ་ལགས། འཇམ་དཔལ་གྱིས་སྨྲས་པ། སྲིང་མོ། ཐབས་ཞེས་བྱ་བ་ནི་གང་ཕྱོགས་གཉིས་མི་སྤོང་བ་སྟེ། འདི་ལྟར་འཁོར་བའི་ཕྱོགས་དང ། མྱ་ངན་ལས་འདས་པའི་ཕྱོགས་སོ། །སྲིང་མོ། ཐབས་ཞེས་བྱ་བ་ནི་གང་སྒོ་གཉིས་སྟོན་པར་བྱེད་པ་སྟེ། འཁོར་བའི་སྒོ་དང ། མྱ་ངན་ལས་འདས་པའི་སྒོ་
370a
༄#། །དང ། སྟོང་པ་ཉིད་ཀྱི་སྒོ་དང ། ལྟ་བ་ལས་རབ་ཏུ་ཐར་པའི་སྒོ་དང ། མཚན་མ་མེད་པའི་སྒོ་དང ། མཚན་མ་ལས་རྣམ་པར་ཐར་པའི་སྒོ་དང ། སྨོན་པ་མེད་པའི་སྒོ་དང ། བསམ་བཞིན་དུ་སྐྱེ་བའི་སྒོ་དང ། མངོན་པར་འདུ་བྱེད་པ་མེད་པའི་སྒོ་དང ། དགེ་བ་མངོན་པར་འདུ་བྱ་བའི་སྒོ་དང ། སྐྱེ་བ་མེད་པའི་སྒོ་དང ། སྐྱེ་བ་ཀུན་ཏུ་སྟོན་པའི་སྒོ་དང ། འབྱུང་བ་མེད་པའི་སྒོ་དང ། ཕུང་པོ་དང ། ཁམས་དང ། སྐྱེ་མཆེད་ཀྱི་སྒོ་དང ། སྐྱེ་བ་མེད་ཅིང་འགག་པ་མེད་པའི་སྒོ་དང ། སྐྱེ་བ་དང་འབྱུང་བའི་སྒོ་དང ། དབེན་པའི་སྒོ་དང ། སེམས་ཅན་ཡོངས་སུ་སྨིན་པར་བྱ་བའི་སྒོ་དང ། ཆོས་ཀྱི་དབྱིངས་ཀྱི་སྒོ་དང ། ཆོས་ཐམས་ཅད་སོ་སོར་སྲུང་བའི་སྒོ་དང ། ཉན་ཐོས་ཀྱི་ཐེག་པའི་སྒོ་དང ། བྱང་ཆུབ་སེམས་དཔའི་ལྷག་པའི་བསམ་པའི་སྒོ་དང ། རང་བྱང་ཆུབ་ཀྱི་སྒོ་དང ། སངས་རྒྱས་ཀྱི་ཆོས་མི་བརྗེད་པའི་སྒོ་སྟེ། སྲིང་མོ། བྱང་ཆུབ་སེམས་དཔའ་གང་སྒོ་གཉིས་ཉེ་བར་སྟོན་ཀྱང་སྒོ་ཐམས་ཅད་ལའང་ཆགས་པ་མེད་པ་དེ་ནི་ཐབས་ལ་མཁས་པ་ཞེས་བྱའོ། །དེ་བཞིན་དུ་འདོད་ཆགས་ཀྱི་སྒོ་དང ། འདོད་ཆགས་དང་བྲལ་བའི་སྒོ་དང ། ཞེ་སྡང་གི་སྒོ་དང ། ཞེ་སྡང་དང་བྲལ་བའི་སྒོ་དང ། གཏི་མུག་གི་སྒོ་དང ། གཏི་མུག་དང་བྲལ་བའི་སྒོ་དང ། ཉོན་མོངས་པའི་སྒོ་དང ། ཉོན་མོངས་པ་དང་བྲལ་བའི་སྒོ་དང ། འགྲོ་བ་ཐམས་ཅད་ཀྱི་སྒོ་དང ། འགྲོ་བ་མེད་པའི་སྒོ་སྟེ། སྲིང་མོ། འདི་ནི་བྱང་ཆུབ་སེམས་དཔའི་ཐབས་ལ་མཁས་པའོ།།
370b
བྱིས་པ་སོ་སོའི་སྐྱེ་བོ་ཐམས་ཅད་ཀྱི་སྤྱོད་པའི་སྒོ་དང ། སློབ་པ་དང ། མི་སློབ་པ་དང ། ཉན་ཐོས་དང ། རང་སངས་རྒྱས་དང ། བྱང་ཆུབ་སེམས་དཔའི་སྤྱོད་པའི་སྒོ་གང་ཡིན་པ་དེ་གཉིས་ཤེས་པ་གང་ཡིན་པ་འདི་ནི། བྱང་ཆུབ་སེམས་དཔའི་ཐབས་ལ་མཁས་པ་ཞེས་བྱའོ། །བམ་པོ་གཉིས་པ་སྟེ། ཐ་མ། ཡང་དེའི་ཚེ་ན་བཅོམ་ལྡན་འདས་བྱ་རྒོད་ཀྱི་ཕུང་པོའི་རིའི་ངོས་ཀྱི་སྨན་ལྗོངས་ཤིག་ན་ཞབས་འབྲིང་བྱེད་པའི་དག་སྦྱོང་ཚེ་དང་ལྡན་པ་ཀུན་དགའ་བོ་དང་ཐབས་ཅིག་ཏུ་རིང་དུ་འཆག་པས་འཆག་ཅིང་བཞུགས་སོ། །དེར་བཞུགས་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འཇམ་དཔལ། ཁྱོད་ཀྱིས་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་དང ། ཐབས་ལ་མཁས་པ་ཇི་སྐད་བསྟན་པ་དེ་ནི་དེ་བཞིན་ཏེ། ལེགས་སོ། །ལེགས་སོ་ཞེས་བྱ་བ་བྱིན་པ་དང ། ལེགས་སོ་ཞེས་བྱ་བའི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དབྱངས་ཀྱིས་གོ་བར་གྱུར་ཅིང ། ལེགས་སོ། །ཞེས་བྱ་བའི་སྒྲ་དེ་ཉིད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་པར་ཡང་གྱུར་ནས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་རྣམས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་མང་པོ་དག་ལེགས་སོ་ཞེས་བྱ་བའི་སྒྲ་དེས་བསྐུལ་ནས་བཅོམ་ལྡན་འདས་ག་ལ་བ་དེར་དོང་
371a
༄#། །སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ལྷ་དང ། ཀླུ་དང ། གནོད་སྦྱིན་དང་དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ལེགས་སོ་ཞེས་བགྱི་བའི་སྒྲ་གང་གིས་སྟོང་གསུམ་གྱིས་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་བར་མཛད་པ་དེ་བཅོམ་ལྡན་འདས་ཀྱིས་སུ་ལ་སྩལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་།དེ་ནི་འཇམ་དཔལ་གཞོན་ནུར་གྱུར་པ་ལའོ། །ལྷའི་བུ་རྣམས་ཀྱིས་གསོལ་པ། བཅོམ་ལྡན་འདས། འཇམ་དཔལ་གཞོན་ནུར་གྱུར་པ་དེ་ད་ལྟར་གང་ན་མཆིས། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་།འཇམ་དཔལ་གཞོན་ནུར་གྱུར་པ་ནི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཤར་ཕྱོགས་ཀྱི་སྒོ་ན་སྨད་ཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་དང་ལྷན་ཅིག་ཏུ་ཆོས་དང་ལྡན་པའི་གཏམ་ཟེར་ཞིང་འདུག་གི་།ལྷའི་བུ་དག་།གང་དག་ཆོས་ཉན་པར་འདོད་པ་དག་ཀྱང་དེར་དེངས་ཤིག་།དེ་ནས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་
371b
ཡིན་པ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་ཐམས་ཅད་ལྷན་ཅིག་ཏུ་འདུས་ནས་འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་སྟེ་ཕྱིན་པ་དང ། ལུས་རགས་པར་སྤྲུལ་ནས་མེ་ཏོག་གི་ཆར་རབ་ཏུ་ཕབ་སྟེ། མེ་ཏོག་གི་ཆར་དེས་རྒྱལ་པོའི་ཁབ་ཀྱི་ཁོ་ར་ཁོར་ཡུག་ཏུ་མེ་ཏོག་ཆལ་བར་བཀྲམ་པར་གྱུར་ཏོ། །དེ་ན་ལྷ་རྣམས་ཀྱིས་ཀྱང་མི་རྣམས་མཐོང་ཞིང ། མི་རྣམས་ཀྱིས་ཀྱང་ལྷ་རྣམས་ཀྱང་མཐོང་སྟེ། ཕན་ཚུན་སྨྲ་བར་ནི་མི་བྱེད་དོ། །དེ་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་སྲོག་ཆགས་བརྒྱ་སྟོང་ཕྲག་མང་པོ་དག་མེ་ཏོག་དེ་དག་གིས་ཀྱང་བསྐུལ། ལྷའི་ལུས་རགས་པ་དེ་དག་གིས་ཀྱང་བསྐུལ་ནས་འཇམ་དཔལ་གཞོན་ནུར་གྱུར་བ་ག་ལ་བ་དེར་དོང་ངོ ། །རྒྱལ་པོ་མ་སྐྱེས་དགྲའང་བུད་མེད་ཀྱི་ཚོགས་རྣམས་ཀྱིས་བསྐོར་ཏེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རྒྱལ་པོའི་འབྱོར་བ་ཆེན་པོ་དང ། རྒྱལ་པོའི་མཐུ་ཆེན་པོས་འཇམ་དཔལ་གཞོན་ནུར་གྱུར་པ་ག་ལ་བ་དེར་སོང་ནས་འཁོར་དེ་དང ། རྒྱལ་པོ་མ་སྐྱེས་དགྲ་དང ། རྒྱལ་པོ་དང ། བློན་པོའི་བུ་རྣམས་དང ། ཚོང་དཔོན་དང ། ཁྱིམ་བདག་གི་བུ་རྣམས་ཀྱིས་སྨད་ཚོང་མའི་བུ་མོ་གསེར་མཆོག་འོད་དཔལ་དེ་འདོད་ཆགས་ཀྱིས་ཉོན་མོངས་པའི་ཀུན་ནས་ལྡང་བ་དང་བྲལ་ཏེ། དབང་པོ་དང་སྤྱོད་ལམ་རབ་ཏུ་ཞི་ཞིང་དབང་པོ་མི་གཡེང་ལ་ངོ་ཚ་ཤེས་པ་དང ། དཔལ་གྱིས་ལེགས་པར་བརྒྱན་པར་མཐོང་ངོ ། །མཐོང་ནས་ཀྱང་དེ་ལ་ཕྱིན་ཆད་སུའང་འདོད་པའི་
372a
༄#། །རྣམ་པར་རྟོག་པ་མི་སྐྱེ་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་སྐྱེ་བོའི་ཚོགས་ཆེན་པོ་དེ་འདུས་པར་རིག་ནས་སྨད་ཚོང་མའི་བུ་མོ་གསེར་མཆོག་འོད་དཔལ་ལ་འདི་སྐད་ཅེས་སྨྲས་སོ། །བུ་མོ། སྐྱེ་བོའི་ཚོགས་ཆེན་པོ་ཐམས་ཅད་ཀྱིས་ཁྱོད་མཐོང་ཡང་ཕྱིར་ཞིང་ཆགས་པ་མེད་ན། ཁྱོད་ཀྱིས་ཉོན་མོངས་པ་དེ་དག་གང་དུ་བཞག་།བུ་མོས་སྨྲས་པ། འཇམ་དཔལ། སེམས་ཅན་ཐམས་ཅད་ཀྱི་ཉོན་མོངས་པ་རྣམས་ནི་ཡེ་ཤེས་དང་རྣམ་པར་གྲོལ་བ་ལ་གནས་པ་དང ། ཆོས་ཀྱི་དབྱིངས་ལ་གནས་པ་སྟེ། དེ་དག་ཀྱང་མ་སྐྱེད་པ་དང ། མ་བཀག་པ་དང ། མ་བསྒྱུར་བར་དེ་ལྟར་བདག་གིས་རྟོགས་སོ། །ཉོན་མོངས་པའི་རང་བཞིན་གང་ལགས་པ་དེའང་བདག་གིས་རྟོགས་ལགས་སོ། །འཇམ་དཔལ་གྱིས་སྨྲས་པ། བུ་མོ། ཉོན་མོངས་པའི་རང་བཞིན་དེ་གང་ཡིན། བུ་མོས་སྨྲས་པ། འཇམ་དཔལ། རྟོག་པ་མ་མཆིས་ཤིང་རྣམ་པར་རྟོག་པ་མ་མཆིས་པའི་རང་བཞིན་ནི་ཉོན་མོངས་པའི་རང་བཞིན་ལགས་སོ། །ཚུལ་བཞིན་མ་ལགས་པ་མ་སྐྱེས་པའི་རང་བཞིན་ནི་ཉོན་མོངས་པའི་རང་བཞིན་ལགས་སོ། །ཉོན་མོངས་པ་རྣམས་ནི་གློ་བུར་ཏེ། སྟོང་པ་ཉིད་རྟོགས་པ་དང་ལྷན་ཅིག་མི་གནས་སོ། །མཚན་མ་མེད་པ་དང ། སྨོན་པ་མེད་པ་ཤེས་པ་དང་ལྷན་ཅིག་མི་གནས་སོ། །རང་བཞིན་གྱིས་འོད་གསལ་བ་དང་ལྷན་ཅིག་མི་གནས་སོ། །འཇམ་
372b
དཔལ།་འདི་ལྟ་སྟེ། དཔེར་ན། དུག་དྲག་པོའི་སྦྲུལ་གདུག་པས་བལྟས་བ་ཙམ་གྱིས་སྐྱེ་བོ་འགུམ་པར་འགྱུར་བ་ལས་དེར་མི་ཞིག་གིས་དུག་ཐམས་ཅད་འཇིལ་བ་དང ། དུག་ཐམས་ཅད་རབ་ཏུ་ཞི་བར་བགྱིད་པའི་སྨན་གནོད་སེལ་ཞེས་བགྱི་བ་འཚལ་ཏེ་མཆིས་ནས་དེ་ནས་སྨན་དེ་བསྟན་མ་ཐག་ཏུ་སྦྲུལ་གདུག་པའི་དུག་དེ་མ་མཆིས་པར་བགྱིས་ནས་དེ་ལ་ཁྱེའུ་དང ། བུ་མོ་རྣམས་རྩེ་བས་རྩེ་ཞིང ། ཁྱེའུ་དང ། བུ་མོ་དེ་དག་སྤྲུལ་གདུག་པ་དེ་དང་ལྷན་ཅིག་ཏུ་རྩེ་བར་བགྱིད་དེ། ཕང་པར་ལེན་ཅིང་གློ་ལ་སེ་རལ་ཕྲེང་དུ་བཏགས་ཏེ་རྒྱན་དུ་བགྱིས་ཀྱང་ཚིག་པར་མི་བགྱིད། ཟ་བར་མི་བགྱིད། སྡུག་བསྔལ་དུ་མི་བགྱིད་དོ། །འཇམ་དཔལ། དེ་བཞིན་དུ་བདག་ཀྱང་སྔོན་ཆོས་འདུལ་བ་མ་ཐོས་པས་ཚུལ་བཞིན་མ་ལགས་པ་ཡིད་ལ་བགྱིད་པ་ཕྱིན་ཅི་ལོག་ལ་ཉེ་བར་གནས་པའི་ཉོན་མོངས་པས་ཡོངས་སུ་བསྲེགས་པ་ན་འདོད་ཆགས་ཀྱི་རང་གི་ལུས་ལ་ཆགས་ཤིང་རང་གི་གཟུགས་ལ་མངོན་པར་ཞེན་ཏེ། གཟུགས་དབུ་བ་ལྟ་བུར་སོ་སོར་རྟོག་པར་མི་བགྱིད་ལུས་སྒྱུ་མའི་ཆོས་ཉིད་དུ་མ་འཚལ། དགའ་བའི་རྩེད་མོ་རྨི་ལམ་ལྟ་བུར་མ་འཚལ། འདོད་པའི་དགའ་བའི་རོ་མྱང་བ་སྦྲང་རྩིའི་ཐིགས་པ་ལྟ་བུར་མ་འཚལ། སྲོག་གི་དབང་པོ་ཟིལ་པའི་ཐིགས་པ་ལྟ་བུར་མ་འཚལ། འདུ་བྱེད་ཐམས་ཅད་མི་རྟག་པར་མ་འཚལ། ལུས་མི་སྡུག་པར་མ་འཚལ། འདུ་བྱེད་ཐམས་ཅད་ཤིན་ཏུ་སྡུག་བསྔལ་བར་མ་འཚལ་ཞིང ། ཆོས་ཐམས་ཅད་བདག་
373a
༄#། །མ་མཆིས་པར་སོ་སོར་རྟོག་པར་མི་བགྱིད་དེ། བདག་ཀྱང་མུན་པ་མུན་ནག་གིས་བསྒྲིབས་ཤིང ། གཞན་ལའང་མུན་པར་བགྱིད། བདག་ཀྱང་བཅིངས་ཤིང་གཞན་ལའང་འཆིང་བར་བགྱིད་པ་ལས། འཇམ་དཔལ། གང་གི་ཚེ་བདག་གིས་ཁྱོད་ལས་ཆོས་དང་ལྡན་པའི་བཀའ་མཆིད་ཐོས་ཏེ། ཐོས་ནས་ཀྱང་མོས་ཤིང་མོས་ནས་ཀྱང་རྣམ་པར་གྲོལ་ཏེ། དེའི་སླད་དུ་བདག་ད་ལྟར་དང ། སླན་ཆད་ཆགས་པའི་མིག་གིས་སུ་ལའང་ལྟ་བར་མི་བགྱིད་དོ། །དེ་ཅིའི་སླད་དུ་ཞེ་ན། འཇམ་དཔལ། སྣང་བ་ནི་མུན་པ་དང་ལྷན་ཅིག་མི་གནས་སོ། །འཇམ་དཔལ། དེ་བཞིན་དུ་འདོད་ཆགས་དང་བྲལ་བ་ནི་སུའང་ཉོན་མོངས་པ་རྣམས་ལ་ཆགས་པ་མ་མཆིས་པའི་སླད་དུའོ། །དེ་ནས་ཡང་འཇམ་དཔལ་གཞོན་ནུར་གྱུར་པ་ལ་སྨད་ཚོང་མའི་བུ་མོ་གསེར་མཆོག་འོད་དཔལ་གྱིས་འདི་སྐད་ཅེས་སྨྲས་སོ། །ཀྱེ་མ་འཇམ་དཔལ། ལྷའི་འཁོར་དང ། མིའི་འཁོར་ཆེན་པོ་འདི་འདུས་ཀྱི། གང་གིས་ལྷ་དང་མི་འདི་དག་གིས་ཉོན་མོངས་པའི་རང་བཞིན་དེ་དག་རྟོགས་ནས་སེམས་ཅན་རྣམས་ལ་སྙིང་རྗེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དེ་ལྟ་བུའི་ཆོས་ཀྱི་བཀའ་མཆིད་བགྱི་བར་ཁྱོད་སྤོ་བས་པར་མཛོད་ཅིག་།འཇམ་དཔལ་གྱིས་སྨྲས་པ། སྲིང་མོ། ཉོན་མོངས་པའི་རང་བཞིན་ལ་ནི་མོས་པར་དཀའོ། །དེ་ཅིའི་ཕྱིར་ཞེ་ན། སྲིང་
373b
མོ། །ཉོན་མོངས་པའི་རང་བཞིན་ནི་བྱང་ཆུབ་ཡིན་པའི་ཕྱིར་རོ། །སྲིང་མོ། འདི་ལྟ་སྟེ། དཔེར་ན། མེ་མ་སྦར་བ་ནི་སྲེག་པའི་བདག་ཉིད་མ་ཡིན་ནོ། །སྲིང་མོ། དེ་བཞིན་དུ་ཉོན་མོངས་པའང་ཡོངས་སུ་མ་བརྟགས་ན། འཁོར་བའི་བདག་ཉིད་མ་ཡིན་ནོ། །སྲིང་མོ། འདི་ལྟ་སྟེ། དཔེར་ན། མེ་སྦར་བ་ནི་སྲེག་པའི་བདག་ཉིད་ཡིན་ནོ། །སྲིང་མོ། དེ་བཞིན་དུ་ཉོན་མོངས་པའང་ཡོངས་སུ་བརྟགས་ན།་འཁོར་བའི་བདག་ཉིད་ཡིན་ནོ། །སྲིང་མོ། འདི་ལྟ་སྟེ། དཔེར་ན། མེ་ནི་རྒྱུ་ཡོད་ན། འབར་རོ། །སྲིང་མོ། །དེ་བཞིན་དུ་ཉོན་མོངས་པ་རྣམས་ཀྱང་ལྟ་བའི་ཀུན་ནས་ལྡང་བའི་རྒྱུ་ཡོད་ན། ཁམས་གསུམ་དུ་འབར་རོ། །སྲིང་མོ། འདི་ལྟ་སྟེ། དཔེར་ན། མེ་ནི་རྒྱུ་མེད་ན། མི་འབར་རོ། །སྲིང་མོ། དེ་བཞིན་དུ་ཉོན་མོངས་པ་རྣམས་ཀྱང་ལྟ་བའི་ཀུན་ནས་ལྡང་བའི་རྒྱུ་མེད་ན། ཁམས་གསུམ་དུ་མི་འབར་རོ། །སྲིང་མོ། འདི་ལྟ་སྟེ། དཔེར་ན། ལོ་སྟོང་དུ་འབར་བའི་མེ་ལ་ནི་སྐྱེ་བ་དང ། འབྲི་བ་མེད་དོ། །སྲིང་མོ། དེ་བཞིན་དུ་བསྐལ་པ་བརྒྱ་སྟོང་དུ་རྒྱུ་བའི་ཉོན་མོངས་པ་ལའང་སྐྱེ་པ་དང ། འབྲི་བ་མེད་དོ། །སྲིང་མོ། །འདི་ལྟ་སྟེ། དཔེར་ན། མེ་ཤི་བ་ལ་ནི་མེ་ཞེས་མི་གདགས་སོ། །སྲིང་མོ། དེ་བཞིན་དུ་ཉོན་མོངས་པ་ཞི་བ་ལའང་ཉོན་མོངས་པ་ཞེས་མི་གདགས་སོ། །སྲིང་མོ། འདི་ལྟ་སྟེ།་དཔེར་ན། ནམ་མཁའ་གང་ལ་མེ་འབར་ཡང་ནམ་མཁའ་ནི་མེ་དེས་ཚིག་པར་མི་ནུས་སོ། །སྲིང་མོ། དེ་བཞིན་དུ་གང་རང་བཞིན་གྱིས་འོད་གསལ་བ་ལ་གློ་བུར་གྱི་ཉོན་མོངས་པ་བྱུང་ཡང་
374a
༄#། །རང་བཞིན་གྱིས་འོད་གསལ་བ་དེ་ནི་གློ་བུར་གྱི་ཉོན་མོངས་པ་དེས་ཀུན་ནས་ཉོན་མོངས་པར་བྱེད་མི་ནུས་སོ། །སྲིང་མོ། འདི་ལྟར་ཡང་གཟུགས་ཀྱི་ལུས་ལ་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ། དཔེར་ན། མཚོ་བྲན་གྱི་ཆབ་ཀྱི་ནང་གི་ཆུ་ཟླ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། ཕུང་པོ་རྣམས་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ། དཔེར་ན། དེ་བཞིན་གཤེགས་པའི་སྤྲུལ་པ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། ཁམས་རྣམས་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ། དཔེར་ན། ཁམས་གསུམ་བསྐལ་པའི་མེས་བསྲེགས་པར་གྱུར་པ་དེ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། སྐྱེ་མཆེད་རྣམས་ཇི་ལྟར་བལྟ་བར་བྱ། བུ་མོས་སྨྲས་པ།་འཇམ་དཔལ། དཔེར་ན། མངོན་པར་འདུ་བྱ་བའི་ལས་མངོན་པར་འདུས་མ་བགྱིས་པ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། འཁོར་འདི་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ། དཔེར་ན། འཁོར་འདི་ནི་སྟེང་གི་ནམ་མཁའི་མཚམས་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ། དཔེར་ན། བདག་གི་ཕ་དང་མ་གཉིས་ཀྱི་གཉིས་ཕྲད་པ་མ་མཆིས་པ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། ང་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་
374b
དཔལ། དཔེར་ན། ལོང་བ་གཟུགས་ལ་བལྟ་བ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཀྱིས་ཆོས་འདི་དག་ཐོས་སམ། བུ་མོས་སྨྲས་པ། འཇམ་དཔལ། དཔེར་ན། སྒྱུ་མ་སྤྲུལ་པའི་རྣ་བའི་རྣམ་པར་རིག་པ་ལྟ་བུས་ཐོས་ལགས་སོ། །འཇམ་དཔལ་གྱིས་སྨྲས་པ། བུ་མོ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དམ། བུ་མོས་སྨྲས་པ། འཇམ་དཔལ།་བདག་ཉིད་བྱང་ཆུབ་ལགས་ཏེ། ཡང་འདོད་པར་མི་བགྱིད་དོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཀྱིས་སྦྱིན་པའི་ཕ་རོལ་ཏུ་ཕྱིན་པ་སྤྱད་དམ། བུ་མོས་སྨྲས་པ། འཇམ་དཔལ།་བདག་གིས་ཉོན་མོངས་པ་ཐམས་ཅད་གཏན་དུ་ཡོངས་སུ་བཏང་བས་སྤྱད་ལགས་སོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཀྱིས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་སམ། བུ་མོས་སྨྲས་པ། འཇམ་དཔལ། ནམ་མཁའ་ཡོངས་སུ་རྫོགས་པས་ཡོངས་སུ་རྫོགས་པར་བགྱིས་ལགས་སོ། །འཇམ་དཔལ་གྱིས་སྨྲས་པ། བུ་མོ། ། ཁྱོད་ཀྱིས་བཟོད་པའི་ཕ་རོལ་ཏུ་ཕྱིན་པ་བསྒོམས་སམ། བུ་མོས་སྨྲས་པ། འཇམ་དཔལ། སེམས་ཅན་ཐམས་ཅད་སྐྱེ་བ་མ་མཆིས་པ་དང ། འབྱུང་བ་མ་མཆིས་པས་བསྒོམས་ལགས་སོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཀྱིས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བརྩམས་སམ། བུ་མོས་སྨྲས་པ། འཇམ་དཔལ། ཆོས་ཐམས་ཅད་ཐོབ་པར་བགྱི་བ་མ་མཆིས་
375a
༄#། །པའི་ཚུལ་གྱིས་བརྩམས་ལགས་སོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཀྱིས་བསམ་གཏན་གྱི་ཕ་རོལ་ཏུ་ཕྱིན་པ་ལ་གནས་སམ། བུ་མོས་སྨྲས་པ།་འཇམ་དཔལ། ཆོས་ཀྱི་དབྱིངས་གནས་པ་མ་མཆིས་པའི་ཚུལ་གྱིས་བདག་གནས་ལགས་སོ། །འཇམ་དཔལ་གྱིས་སྨྲས་པ། བུ་མོ། ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་སམ། བུ་མོས་སྨྲས་པ། འཇམ་དཔལ། ལྷག་ཆད་མ་མཆིས་པར་ཡོངས་སུ་རྫོགས་པར་བགྱིས་ལགས་སོ། །འཇམ་དཔལ་གྱིས་སྨྲས་པ། བུ་མོ ། ཁྱོད་ཀྱིས་བྱམས་པ་བསྒོམས་སམ། བུ་མོས་སྨྲས་པ། འཇམ་དཔལ། སེམས་ཅན་ཐམས་ཅད་མི་སྲིད་པའི་ཚུལ་གྱིས་བསྒོམས་ལགས་སོ། །འཇམ་དཔལ་གྱིས་སྨྲས་པ། བུ་མོ། བྱང་ཆུབ་སེམས་དཔས་སྙིང་རྗེ་ཆེན་པོ་གང་ནས་བཙལ་བར་བྱ། བུ་མོས་སྨྲས་པ། འཇམ་དཔལ། བྱང་ཆུབ་སེམས་དཔས་སྙིང་རྗེ་ཆེན་པོ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་བཙལ་བར་བགྱིའོ། །དེ་ཅིའི་སླད་དུ་ཞེ་ན། གལ་ཏེ་སེམས་ཅན་རྣམས་ཀྱི་ཉོན་མོངས་པ་མ་མཆིས་པར་གྱུར་ན། བྱང་ཆུབ་སེམས་དཔའ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བར་མི་འགྱུར་བའི་སླད་དུའོ། །འཇམ་དཔལ་གྱིས་སྨྲས་པ། བུ་མོ། བྱང་ཆུབ་སེམས་དཔས་དགའ་བ་ག་ལས་བཙལ་བར་བྱ། བུ་མོས་སྨྲས་
375b
པ།་ལྷག་པའི་བསམ་པ་དང་ལྡན་པའི་བྱང་ཆུབ་ཀྱི་སེམས་ལས་སོ། །འཇམ་དཔལ་གྱིས་སྨྲས་པ། བུ་མོ། བྱང་ཆུབ་སེམས་དཔའི་བཏང་སྙོམས་ཅི་ཞིག་བྱེད། བུ་མོས་སྨྲས་པ། འཇམ་དཔལ། བྱང་ཆུབ་སེམས་དཔའི་བཏང་སྙོམས་ནི་སེམས་ཅན་ཐམས་ཅད་ལ་མི་སླུ་བ་ཡོངས་སུ་རྫོགས་པར་བགྱིད་པ་དང ། ཆོས་ཐམས་ཅད་ལ་འགལ་བ་མ་མཆིས་པར་ཉེ་བར་མཆི་བར་བགྱིད་པའོ། །འཇམ་དཔལ་གྱིས་སྨྲས་པ། བུ་མོ། འགལ་བ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། གང་དག་མ་མཆིས་པའི་ཉོན་མོངས་པ་རྣམས་སྤང་བའི་སླད་དུ་བྱང་ཆུབ་ལ་རབ་ཏུ་ཞུགས་པ་དག་གོ་།འཇམ་དཔལ་གྱིས་སྨྲས་པ། དེ་དག་གང་དང་འགལ། བུ་མོས་སྨྲས་པ། ཕས་ཀྱི་རྒོལ་བ་ཐམས་ཅད་དང་ངོ ། །འཇམ་དཔལ་གྱིས་སྨྲས་པ། བུ་མོ། ཕས་ཀྱི་རྒོལ་བ་གང་དག་ཡིན། བུ་མོས་སྨྲས་པ། གང་དག་བཟོད་པའི་རློམ་སེམས་ཀྱིས་གཞན་ལ་རྒོལ་བ་དག་ལགས་སོ། །འཇམ་དཔལ་གྱིས་སྨྲས་པ། བུ་མོ། བཟོད་པ་ཞེས་བྱ་བ་ག་ལས་འོང ། བུ་མོས་སྨྲས་པ། འཇམ་དཔལ། སེམས་ཅན་ཐམས་ཅད་ཀྱིས་མཐོ་བཙམས་པ་ལས་མཆིའོ། །དེ་ཅིའི་སླད་དུ་ཞེ་ན། མཐོ་བཙམས་པ་མ་མཆིས་ན། བཟོད་པ་ཅིའང་མ་མཆིས་པའི་སླད་དུ་སྟེ།་འཇམ་དཔལ། གང་ལ་སེམས་ཅན་ཐམས་ཅད་ཀྱིས་མཐོ་བཙམས་པ་ན་འཁྲུག་པ་མ་མཆིས་ཤིང་གནོད་པ་མི་བགྱིད་པ་དེ་བཟོད་པ་བསྒོམས་པ་ལགས་སོ། །འཇམ་དཔལ་གྱིས་སྨྲས་
376a
༄#། །པ།་བུ་མོ། ཁོང་ཁྲོ་བ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། འཇམ་དཔལ། གང་གིས་བསྐལ་པ་བརྒྱར་བསགས་པའི་དགེ་བའི་རྩ་བ་རྣམས་ལ་གནོད་པར་བགྱིད་པ་འདི་ནི། ཁོང་ཁྲོ་བ་ཞེས་བགྱིའོ། །འཇམ་དཔལ་གྱིས་སྨྲས་པ། བུ་མོ།་ཁོང་ཁྲོ་བ་མེད་པ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། འཇམ་དཔལ། གང་གིས་སེམས་ལ་ཞེ་འགྲས་པ་མ་མཆིས་ཤིང་ཡུལ་ཐམས་ཅད་ལ་གནོད་པ་མི་བགྱིད་པ་སྟེ། དེ་ནི་བཟོད་པ་ལགས་པར་རིག་པར་བགྱིའོ། །འཇམ་དཔལ་གྱིས་སྨྲས་པ། བུ་མོ། ཇི་ལྟར་ན། བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་ཡིན། བུ་མོས་སྨྲས་པ། འཇམ་དཔལ། གང་ཆོས་ཐམས་ཅད་ལ་རྣམ་པར་འབྱེད་ཀྱང་མི་དམིགས་པ་ལགས་སོ། །འཇམ་དཔལ་གྱིས་སྨྲས་པ།་བུ་མོ། ཇི་ལྟར་ན་བྱང་ཆུབ་སེམས་དཔའ་བདུད་ཕྱིར་རྒོལ་བ་བཅོམ་པ་ཡིན། བུ་མོས་སྨྲས་པ། གང་བདུད་ཐམས་ཅད་འདུལ་བར་བགྱིད་ཀྱང་ཉོན་མོངས་པ་མ་མཆིས་པ་སྟེ། དེ་ཅིའི་སླད་དུ་ཞེ་ན། འཇམ་དཔལ། བྱང་ཆུབ་སེམས་དཔའ་ནི་ཕུང་པོ་རྣམས་སྟོན་ཀྱང་ཕུང་པོའི་ཉོན་མོངས་པ་རྣམས་དང་ལྷན་ཅིག་མི་གནས་པ་དང ། འཇམ་དཔལ། བྱང་ཆུབ་སེམས་དཔའ་ནི་ཉོན་མོངས་པ་རྣམས་སྟོན་ཀྱང་རང་བཞིན་ཆོས་ཉིད་ཀྱིས་ཆགས་པ་མ་མཆིས་པ་དང ། འཇམ་དཔལ། བྱང་ཆུབ་སེམས་དཔའ་སེམས་ཅན་ཡོངས་སུ་སྨིན་པར་བགྱི་བའི་སླད་
376b
དུ་རྒ་བ་དང ། འཆི་བ་སྟོན་ཀྱང་ཆོས་ཐམས་ཅད་ལ་འཆི་འཕོ་བ་དང ། འགྲོ་བ་མ་མཆིས་པར་རབ་ཏུ་རྟོགས་པ་དང ། འཇམ་དཔལ། བྱང་ཆུབ་སེམས་དཔའ་ནི་ལྷའི་བུ་དག་སྟོན་ཀྱང་ཕྲག་དོག་དང ། རློམ་སེམས་ཐམས་ཅད་དང་བྲལ་བའི་སླད་དུའོ། །འཇམ་དཔལ་གྱིས་སྨྲས་པ། བུ་མོ། བྱང་ཆུབ་སེམས་དཔའ་ཇི་ལྟར་སེམས་ཅན་ཡོངས་སུ་སྨིན་པར་བྱེད། བུ་མོས་སྨྲས་པ། འཇམ་དཔལ། བྱང་ཆུབ་སེམས་དཔས་ཤེས་རབ་དང་ཐབས་ཡོངས་སུ་སྒོམ་པས་སེམས་ཅན་ཡོངས་སུ་སྨིན་པར་བགྱིད་དོ། །འཇམ་དཔལ་གྱིས་སྨྲས་པ། བུ་མོ་།བྱང་ཆུབ་སེམས་དཔས་ཇི་ལྟར་སེམས་ཅན་ཐམས་ཅད་ཀྱི་དྲུང་དུ་གནས་པར་བྱ། བུ་མོས་སྨྲས་པ། འཇམ་དཔལ། རང་གི་སེམས་དང་ཤེས་པ་ཡོངས་སུ་སྒོམ་པས་བྱང་ཆུབ་སེམས་དཔས་སེམས་ཅན་ཐམས་ཅད་ཀྱི་དྲུང་དུ་གནས་པར་བགྱིའོ། །འཇམ་དཔལ་གྱིས་སྨྲས་པ། བུ་མོ། འཁོར་འདི་ནི་ཁྱོད་ལ་ཆོས་ཉན་པར་འདོད་དོ། །བུ་མོས་སྨྲས་པ། འཇམ་དཔལ། གང་དུ་བདག་དང་གཞན་གྱི་འདུ་ཤེས་འཇུག་པ་དེ་ནི་ཉན་པར་འཚལ་བ་མ་ལགས་ལ། གང་ལ་རྣ་བའི་རྣམ་པར་རིག་པས་རྣམ་པར་ཤེས་པ་འཇུག་པའམ་ཉན་པར་འཚལ་བ་མ་ལགས་སོ། །འཇམ་དཔལ་གྱིས་སྨྲས་པ།་བུ་མོ། ཆོས་ཉན་པར་འདོད་པ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། འཇམ་དཔལ། གང་གི་ཚེ་རང་གི་ལུས་ལ་རྨི་ལམ་གྱི་མི་ལྟ་བུར་མོས་པ་དང ། ཆོས་སྟོན་པ་ལ་སྒྱུ་མའི་
377a
༄#། །མི་ལྟ་བུར་མོས་པ་དང ། བསྟན་པའི་ཆོས་དེ་ལའང་བྲག་ཅའི་སྒྲ་སྐད་ལྟ་བུར་མོས་ཤིང ། མོས་པ་དང ། རྣམ་པར་གྲོལ་བ་ལའང་གཉིས་སུ་མི་བགྱིད་པ་དེ་ཙམ་གྱིས་ན།་ཆོས་ཉན་པར་འཚལ་པ་ལགས་སོ། །འཇམ་དཔལ་གྱིས་སྨྲས་པ། བུ་མོ། ཆོས་ཇི་ལྟར་མཉན་པར་བྱ། བུ་མོས་སྨྲས་པ། ཆོས་ལ་རྟོན་པ་ལ་ནན་ཏན་བགྱིད་པས་ཆོས་མཉན་པར་བགྱིའོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་དང ། རང་གི་དགེ་བའི་རྩ་བ་བསགས་པའི་ཤེས་རབ་ཀྱིས་སྨད་ཚོང་མའི་བུ་མོ་གསེར་མཆོག་འོད་དཔལ་གྱིས་དེ་ལྟ་དེ་ལྟར་ཆོས་བསྟན་པ་ན་འཁོར་དེ་ལས་སྲོག་ཆགས་ཁྲི་ཉིས་སྟོན་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའི་ཐེག་པ་མ་སྔོན་དགེ་བའི་རྩ་བ་བསགས་པའི་ལྷ་དང་མི་ལྔ་བརྒྱས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།བུ་མོ་དེའང་ཆོས་ཉན་པའི་དགའ་བ་དང ། མཆོག་ཏུ་དགའ་བས་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། ། དེས་བཟོད་པ་ཐོབ་ནས་འཇམ་དཔལ་གཞོན་ནུར་གྱུར་པའི་རྐང་པ་ལ་གཏུགས་ཏེ་འཇམ་དཔལ། ཐུགས་བརྩེ་བའི་སླད་དུ་བདག་རབ་ཏུ་དབྱུང་དུ་གསོལ། ཚུལ་བཞིན་མ་ལགས་པར་
377b
བསྐྱེད་པ། འཕགས་པ་མ་ལགས་པ། འཕགས་པའི་ཆོས་ལས་ཉམས་པར་བགྱིད་པའི་ལུས་འདི་ལས་ཐར་པར་མཛད་དུ་གསོལ་ཞེས་རབ་ཏུ་འབྱུང་བར་གསོལ་བ་བཏབ་བོ། །འཇམ་དཔལ་གྱིས་སྨྲས་པ། སྲིང་མོ། འདི་ལྟ་སྟེ། མགོའི་སྐྲ་འབྲེག་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། བུ་མོ། གང་སེམས་ཅན་ཐམས་ཅད་ཀྱི་ཉོན་མོངས་པ་གཅད་པའི་ཕྱིར་བརྩོན་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་པའི་ཕྱིར་རོ། །བུ་མོ། གང་གོས་ངུར་སྨྲིག་འཆང་བ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི།་བུ་མོ། གང་བདག་ཉིད་ཀྱང་བསླབ་པ་དང ། ཚུལ་ཁྲིམས་ཡང་དག་པར་བླངས་ལ། ཚུལ་ཁྲིམས་འཆལ་པའི་སེམས་ཅན་རྣམས་ཀྱང་ཚུལ་ཁྲིམས་ཀྱི་སྡོམ་པ་དང ། བརྟུལ་ཞུགས་ལ་ཡང་དག་པར་སྦྱོར་བར་བྱེད་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བུ་མོ། གང་བདག་ཉིད་དབེན་པར་གནས་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། བུ་མོ། །གང་འགྲོ་བ་ལྔའི་འཁོར་བ་ན་རྣམ་པར་རྒྱུག་པའི་སེམས་ཅན་རྣམས་དབེན་པ་ཤེས་པ་ལ་འགོད་པར་བྱེད་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །ཁ་དོག་དང ། གཟུགས་ཀྱི་རྟགས་དང ། སྤྱོད་ལམ་གྱི་དབྱིབས་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་གཞན་དང ། གང་ཟག་གཞན་དག་ལ་བྱམས་པ་དང ། སྙིང་རྗེའི་སེམས་
378a
༄#། །བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་གི་དགེ་བའི་རྩ་བ་བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་གཞན་གྱི་དགེ་བའི་རྩ་བ་བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་ཡོངས་སུ་མྱ་ངན་ལས་འདའ་བའི་ལྷག་པའི་བསམ་པ་ལ་གུས་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་གཞན་ཡོངས་སུ་མྱ་ངན་ལས་བཟླ་བའི་ལྷག་པའི་བསམ་པར་གུས་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་གི་ཉོན་མོངས་པ་ཞི་བར་བྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་ཀྱི་ཉོན་མོངས་པ་ཞི་བར་བྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་གི་སེམས་རྗེས་སུ་སྲུང་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་ཀྱི་སེམས་རྗེས་སུ་སྲུང་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་ཐར་པར་བྱ་བ་ལ་བརྩོན་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་ཐར་པར་བྱ་བ་ལ་བརྩོན་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བུ་མོ། འཁོར་བས་སྐྱོ་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་འཁོར་བ་ལས་
378b
སྒྲོལ་བར་བྱ་བ་ལ་དགའ་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བུ་མོ། མྱ་ངན་ལས་འདའ་བ་ལ་དགའ་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་སེམས་ཅན་གཞན་དག་ལ་སྙིང་རྗེ་ཆེ་བ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་འཁྲུལ་པ་ལ་སྐྱོན་དུ་མི་ལྟ་བ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་རྙེད་པ་ལ་ཕྲག་དོག་མེད་པ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་བདག་དང་གཞན་ལ་གདུང་པ་མེད་པ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི། གཞན་ལ་མི་སྨོད་པ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་གཞན་ལ་བསྟེན་པ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་ལྟུང་བ་མི་གླེང་བ་ཞེས་བྱ་བའི་ཚིག་བླ་དྭགས་སོ། །བུ་མོ། རབ་ཏུ་འབྱུང་བ་ཞེས་བྱ་བ་དེ་ནི་ཉེས་པ་ཐམས་ཅད་ལས་འབྱིན་པ་ཞེས་བྱ་བའི་ཚིག་བླ་དྭགས་སོ། །བུ་མོ། བྱང་ཆུབ་སེམས་དཔའི་རབ་ཏུ་འབྱུང་བ་ནི་གཞན་ལ་རག་ལས་པ་ཡིན་ཏེ། བྱང་ཆུབ་སེམས་དཔས་གཞན་ལ་རག་མ་ལས་པར་བྱའོ།
379a
༄#། །བུ་མོས་སྨྲས་པ། འཇམ་དཔལ། ཇི་ལྟར་ན། བྱང་ཆུབ་སེམས་དཔའི་རབ་ཏུ་འབྱུང་བ་གཞན་ལ་རག་ལས་པ་ལགས། འཇམ་དཔལ་གྱིས་སྨྲས་པ། བུ་མོ་རབ་ཏུ་འབྱུང་བ་ཚུལ་ཁྲིམས་ལ་རག་ལས་པ་ཡིན་ཏེ། ཚུལ་ཁྲིམས་འཆལ་པ་ལ་ནི་རབ་ཏུ་འབྱུང་བ་ཅིའང་མེད་དོ། །བུ་མོ། རབ་ཏུ་འབྱུང་བ་ནི་ཏིང་ངེ་འཛིན་ལ་རག་ལས་པ་ཡིན་ཏེ།་བརྗེད་ངས་པ་ལ་ནི་རབ་ཏུ་འབྱུང་བ་ཅིའང་མེད་དོ། །བུ་མོ། རབ་ཏུ་འབྱུང་བ་ནི་ཤེས་རབ་ལ་རག་ལས་པ་ཡིན་ཏེ། ཤེས་རབ་འཆལ་པ་ལ་ནི་རབ་ཏུ་འབྱུང་བ་ཅིའང་མེད་དོ། ། བུ་མོ།་རབ་ཏུ་འབྱུང་བ་ནི་རྣམ་པར་གྲོལ་བ་ལ་རག་ལས་པ་ཡིན་ཏེ། སེམས་རྣམ་པར་མ་གྲོལ་བ་ལ་ནི། རབ་ཏུ་འབྱུང་བ་ཅིའང་མེད་དོ། །བུ་མོ། རབ་ཏུ་འབྱུང་བ་ནི་རྣམ་པར་གྲོལ་བའི་ཡེ་ཤེས་མཐོང་བ་ལ་རག་ལས་པ་ཡིན་ཏེ། རྣམ་པར་གྲོལ་བའི་ཡེ་ཤེས་མཐོང་བ་མེད་པ་ལ་ནི་རབ་ཏུ་འབྱུང་བ་ཅིའང་མེད་དོ། །བུ་མོས་སྨྲས་པ། འཇམ་དཔལ། ཇི་ལྟར་ན། བྱང་ཆུབ་སེམས་དཔའི་རབ་ཏུ་འབྱུང་བ་གཞན་ལ་རེག་ལས་པ་མ་མཆིས་པ་ལགས། འཇམ་དཔལ་གྱིས་སྨྲས་པ། བུ་མོ། བྱང་ཆུབ་སེམས་དཔའ་ནི་གཞན་གྱི་དྲིང་མི་འཇོག་པས་ན། གཞན་ལ་རག་ལས་པ་མེད་པ་སྟེ། རང་གི་ཀུན་ཤེས་པའི་ཡེ་ཤེས་ཀྱིས་འདིས་གང་ཅི་ཤེས་པ་དེ་བདག་གིས་ཀྱང་ཤེས་ལ། འདི་གང་ཅི་སྨྲ་བ་དེ་བདག་ཀྱང་སྨྲའོ་ཞེས་གཞན་དག་གི་ངོར་
379b
མི་ལྟ་བས་ན། གཞན་ལ་རག་ལས་པ་མེད་པ་ཡིན་ནོ། །འཇམ་དཔལ། གཞོན་ནུར་གྱུར་པས་རབ་ཏུ་འབྱུང་བའི་ལེའུའི་ཆོས་ཀྱི་རྣམ་གྲངས་འདི་བཤད་པ་ན། ལེགས་པར་བཤད་པའི་ཕྱིར་བྱང་ཆུབ་སེམས་དཔའ་ལྔ་བརྒྱས་རང་རང་གི་གོས་དང་རྒྱན་ཐམས་ཅད་ལུས་ལས་ཕུད་དེ། འཇམ་དཔལ་གཞོན་ནུར་གྱུར་པ་ལ་ཕུལ་ནས་འདི་སྐད་ཅེས་སྨྲས་སོ། །འཇམ་དཔལ། ཁྱེད་ཀྱིས་བྱང་ཆུབ་སེམས་དཔའ་རྣམས་ཀྱི་རབ་ཏུ་འབྱུང་བ་ལེགས་པར་བཤད་དེ། བདག་ཅག་རྣམས་ཀྱིས་ཀྱང་རབ་ཏུ་འབྱུང་བ་འདི་བསྒྲུབ་པར་བགྱིའོ། །དེ་ནས་འཇམ་དཔལ་གཞོན་ནུར་གྱུར་པས་སྨད་ཚོང་མའི་བུ་མོ་གསེར་མཆོག་འོད་དཔལ་ལ་འདི་སྐད་ཅེས་སྨྲས་སོ། །བུ་མོ། ཁྱོད་རྟའི་ཤིང་རྟ་འདི་ལ་ཞོན་ལ། ཚོང་དཔོན་གྱི་བུ་འཇིགས་བྱིན་ལ་སྙིང་བརྩེ་བའི་ཕྱིར་ཡོངས་སུ་སྨིན་པར་གྱིས་ཤིག་དང ། དེ་ཉིད་ཀྱིས་ཁྱོད་རབ་ཏུ་འབྱུང་བ་དང ། བསྙེན་པར་རྫོགས་པར་འགྱུར་རོ། །དེ་ནས་སྐྱེ་བོ་ཕལ་པོ་ཆེ་དེ་དག་འདི་སྙམ་དུ་སེམས་ཏེ། འདོད་ཆགས་དང་བྲལ་བ་དང ། འདོད་ཆགས་དང་མ་བྲལ་བ་གཉིས་ལྷན་ཅིག་གནས་སུ་ཇི་ལྟར་རུང་སྙམ་མོ། །དེ་ནས་བུ་མོ་དེས་སྐྱེ་བོ་ཕལ་པོ་ཆེ་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་སྐྱེ་བོ་ཕལ་པོ་ཆེ་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་།འདོད་ཆགས་དང་བྲལ་བའི་བྱང་ཆུབ་སེམས་དཔའ་ནི་འདོད་ཆགས་དང་བཅས་པའི་སེམས་ཅན་
380a
༄#། །རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ། འདོད་ཆགས་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །གྲོགས་པོ་དག་།ཞེ་སྡང་དང་བྲལ་བའི་བྱང་ཆུབ་སེམས་དཔའ་ནི་ཞེ་སྡང་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ། ཞེ་སྡང་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། ། གྲོགས་པོ་དག་།གཏི་མུག་དང་བྲལ་བའི་བྱང་ཆུབ་སེམས་དཔའ་ནི་གཏི་མུག་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ། གཏི་མུག་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །གྲོགས་པོ་དག་།ཉོན་མོངས་པ་དང་བྲལ་བའི་བྱང་ཆུབ་སེམས་དཔའ་ནི་ཉོན་མོངས་པ་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ། ཉོན་མོངས་པ་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །གྲོགས་པོ་དག་།འདི་ལྟ་སྟེ། དཔེར་ན། མ་ནི་བུ་དང་ལྷན་ཅིག་གནས་ཀྱང་ཆགས་པ་མེད་དོ། །གྲོགས་པོ་དག་།དེ་བཞིན་དུ་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་དང་ལྷན་ཅིག་གནས་ཀྱང་ཆགས་པ་མེད་དོ། །གྲོགས་པོ་དག་།འདི་ལྟ་སྟེ། དཔེར་ན། བཅིངས་པ་ལས་བཀྲོལ་བའི་མི་ནི་འདོད་ཆགས་ཀྱི་ཀུན་ཏུ་སྤྱད་པ་ལ་མི་སྤྱོད་དོ། །གྲོགས་པོ་དག་།དེ་བཞིན་དུ་བྱང་ཆུབ་སེམས་དཔའ་ཡང་ཁམས་གསུམ་པ་དག་འཆིང་བ་དང ། འོབས་ལྟ་བུར་
380b
འདུ་ཤེས་པས་ཆགས་པ་མེད་དོ། །དེ་ནས་སྨད་ཚོང་མའི་བུ་མོ་གསེར་མཆོག་འོད་དཔལ་ཆོས་ཀྱི་འབབ་སྟེགས་སུ་ནི་ཞུགས། གཏིང་ནི་རྙེད། ཐང་ལ་ནི་ཕྱིན། མ་རིག་པའི་མུན་པ་དང་ནི་བྲལ་ཏེ་སྲིད་པའི་སྐྱོན་གྱི་ཉོན་མོངས་པ་འཇིགས་པར་ལྟ་བ་ནི་ལེགས་པར་མཐོང་ནས་འཇམ་དཔལ་གཞོན་ནུར་གྱུར་པའི་རྐང་པ་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་ཤིང་རྟ་ལ་ཞོན་ཁར་ཚིགས་སུ་བཅད་པ་འདི་དག་སྨྲས་སོ། །རང་བཞིན་རྣམ་དག་ཆགས་པས་མ་ཆགས་ཤིང ། །རྟག་ཏུ་བྱམས་སེམས་སྣང་བས་སྡང་བ་མེད། །ཤེས་རབ་སྣང་ཤར་གཏི་མུག་རྨོངས་བྲལ་བ། །ཉོན་མོངས་མེད་པར་ཤིང་རྟ་བཞོན་པར་བྱ། །གང་གིས་སྔོན་ཆད་བདག་ནི་རྒྱལ་གྱུར་ཅིག་།ནོར་ཆགས་ཚོང་དཔོན་བུ་དང་ལྷན་ཅིག་ཏུ། །ཤིང་རྟར་ཞུགས་ནས་སྐྱེད་མོས་ཚལ་སོང་བ། །འདོད་པའི་རྣམ་རྟོག་དེ་དག་གང་དུ་སོང ། །ཇི་ལྟར་སྤྲིན་ཚོགས་སྟུག་པོས་ས་ཁེབས་ན། །ཉི་མའི་འོད་ཟེར་ལྷམ་མེ་ལྷན་ནེར་མིན། །འོན་ཀྱང་འོད་ཟེར་དེ་དག་གར་མི་འགྲོ་།སྤྲིན་གྱིས་བསྒྲིབས་པས་སྣང་བ་མེད་དུ་ཟད། །དེ་བཞིན་ཉོན་མོངས་བསྒྲིབས་པས་བྱིས་པ་ཀུན། །ཤེས་རབ་སྣང་ལ་བློ་སྐྱེ་མེད་པ་ཡང ། །ཤེས་རབ་ཡུལ་གང་ན་ཡང་གནས་པ་མེད། །ཉོན་མོངས་ཡོངས་སུ་ཤེས་པས་ཤེས་རབ་སྣང ། །ཉོན་མོངས་གང་ནས་འོང་བའང་མ་ཡིན་ཞིང ། །ཡུལ་གྱི་ཕྱོགས་དང་ཆར་ཡང་མ་ཡིན་ཏེ། །ཚུལ་བཞིན་མ་ཡིན་པ་ལས་ཉོན་མོངས་འབྱུང ། །ཚུལ་
381a
༄#། །བཞིན་གྱིས་ནི་དེ་དག་འབྱུང་མི་འགྱུར། །བོར་བ་མེད་ཅིང་བླངས་པའང་ཡོད་མ་ཡིན། །བསྐྱེད་པ་མེད་ཅིང་བཀག་པའང་ཡོད་མ་ཡིན། །གཞན་ལ་མ་བྱིན་འཕྲོག་པའང་མ་ཡིན་ཏེ། །ཆོས་མཉམ་ཉིད་ཀྱིས་བདག་ཀྱང་རྣམ་པར་དག་།འབྲུ་མར་སྒྲོན་མ་མུན་པར་བྱུང་བ་ན། །མུན་པ་ཕྱོགས་སུ་འདོང་བ་མེད་པ་ལྟར། །ཤེས་རབ་ཀྱིས་ནི་མུན་པ་མེད་གྱུར་ན། །ཉོན་མོངས་ཟད་གྱུར་མེད་ཅིང་འབྱུང་བའང་མེད། །ཇི་ལྟར་སྨན་པས་ནད་པ་གསོ་བ་ན། །དེ་ཡི་ཁམས་ནི་འཇིགས་པར་མི་བྱེད་ཀྱང ། །དེ་ཡི་གློ་བུར་ནད་ནི་ཞི་བར་འགྱུར། ། ནད་རྣམས་གཞར་ཡང་འབྱུང་བ་མེད་པ་ལྟར། །དེ་བཞིན་སྨན་པའི་དམ་པ་འཇམ་དབྱངས་ཀྱིས། །རིགས་པའི་ཚུལ་མཁྱེན་སྦྱོར་བ་སྣ་ཚོགས་ཀྱི། །སེམས་ཅན་ཉོན་མོངས་ཉེ་བར་ཞི་མཛད་ཀྱང ། །ཆོས་རྣམས་རྣམ་པར་འཇིག་པར་མཛད་པ་མེད། །ཕུང་པོ་འདི་དང་ཁམས་རྣམས་འདི་དག་དང ། །སྐྱེ་མཆེད་འདི་རྣམས་གཏན་དུ་འགྱུར་བ་མེད། །གང་དག་སྔོན་ཆད་ཉེས་ལྡན་དུག་བཅས་པ། །དེ་དག་དེ་ནི་དུག་མེད་འགྱུར་བ་མེད། །དེ་ནས་སྨད་ཚོང་མའི་བུ་མོ་གསེར་མཆོག་འོད་དཔལ་གྱིས་ཚོགས་སུ་བཅད་པ་དེ་དག་སྨྲས་ནས་ཡང་འཇམ་དཔལ་གཞོན་ནུར་གྱུར་པའི་རྐང་པ་ལ་མགོ་བོས་ཕྱག་བྱས་ཏེ། ཡང་འཇམ་དཔལ་གཞོན་ནུར་གྱུར་པ་ལ་བསྐོར་བ་བྱས་ནས་ཚོང་དཔོན་གྱི་བུ་འཇིགས་བྱིན་དང་ལྷན་ཅིག་ཏུ་
381b
ཤིང་རྟ་ལ་ཞོན་ཏེ། དེ་ལྟ་བུའི་འབྱོར་པ་ཉིད་ཀྱིས་སྐྱེད་མོས་ཚལ་གྱི་སར་སོང་ངོ ། །འཇམ་དཔལ་གཞོན་ནུར་གྱུར་པས་ཀྱང་ཐམས་ཅད་དང་ལྡན་པའི་འཁོར་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག། ཡང་དག་པར་གཟེངས་བསྟོད། །ཡང་དག་པར་རབ་ཏུ་དགའ་བར་བྱས་སོ། །ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་།གང་དག་ཆོས་ཉན་པར་དགའ་བ་རྣམས་དེའང་ཕྱི་དྲོའི་དུས་ཀྱི་ཚེ་དེ་བཞིན་གཤེགས་པའི་སྤྱན་སྔར་དེངས་ཤིག་།དེ་སྐད་ཅེས་སྨྲས་ནས་ས་ཕྱོགས་དེ་ནས་ལངས་ཏེ། རང་རང་གི་གནས་ག་ལ་བ་དེ་ལོགས་སུ་སོང་ངོ ། །དེ་ནས་སྨད་ཚོང་མའི་བུ་མོ་གསེར་མཆོག་འོད་དཔལ་དང ། ཚོང་དཔོན་གྱི་བུ་འཇིགས་བྱིན་གཉིས་ལྷན་ཅིག་ཏུ་སྐྱེད་མོས་ཚལ་དུ་ཕྱིན་པ་དང ། དེར་མེ་ཏོག་ཆལ་བར་བཀྲམ་སྟེ་བདུག་པས་བདུགས ། བླ་བྲེ་བྲེས་ནས་གདུགས་དང ། རྒྱལ་མཚན་དང ། བ་དན་སྣ་ཚོགས་ཀྱིས་ལེགས་པར་བརྒྱན་ཏེ་བཟའ་བཏུང་འབྱོར་པ་དག་ཀྱང་བཤམས་ནས་དགའ་བའི་རྩེད་མོ་དང་རྗེས་སུ་མཐུན་པའི་སིལ་སྙན་དང ། ཕེག་རྡོབ་པར་གླུ་དབྱངས་ལེན་པར་བྱེད་ཅིང་སྐྱེད་མོས་ཚལ་ན་གནས་པར་གྱུར་ཏོ། །དེ་དག་གིས་ཟོས་ཤིང་འཐུངས་ནས་རབ་ཏུ་མྱོས་པར་གྱུར་བ་དང ། སྨད་ཚོང་མའི་བུ་
382a
༄#། །མོ་གསེར་མཆོག་འོད་དཔལ་ཚོང་དཔོན་གྱི་བུ་འཇིགས་བྱིན་གྱི་ཕང་བར་སྔས་བཅས་ཏེ་ཉལ་ལོ། །དེ་ནས་བུ་མོ་དེས་མངོན་པར་ཤེས་པའི་སྟོབས་ཀྱིས་རང་གི་ལུས་རྙིས་པར་བསྟན་ནས་དེས་འཆི་བའི་འདུ་ཤེས་བསྐྱེད་དེ། དེའི་ལུས་ཐམས་ཅད་མི་སྡུག་པར་གྱུར་ནས་རོ་མྱགས་པ་འདྲ་བར་སྣང་ཞིང ། དེའི་རྣ་བའི་བུ་ག་གཉིས་དང ། མིག་གི་དབང་པོ་དང ། སྣའི་ནང་ནས་མི་གཙང་པ་དྲི་མི་ཞིམ་པ་དག་འབྱུང་ཞིང་བྱུང་ནས་ཀྱང་ལུས་ཐམས་ཅད་ལ་ཁྱབ་པར་གྱུར་ཏོ། །དེའི་ཁའི་ནང་ནས་ཀྱང་དྲི་མནམ་པོ་དག་བྱུང་སྟེ། དྲི་མནམ་པོ་དེ་དག་གིས་སྐྱེད་མོས་ཚལ་དེ་ཐམས་ཅད་ཀྱང་ཁྱབ་པར་གྱུར་ཏོ། །སྤུའི་ཁུང་བུ་ཐམས་ཅད་ནས་ཀྱང་ཁྲག་དང་རང་མནམ་པོ་དག་འཛག་གོ་།ལྟོ་བ་དང་ལྟེ་བའི་དབུས་རྡོལ་བ་ནས་ཀྱང་མཚེར་བ་དང་རྒྱུ་མ་ཐམས་ཅད་བྱུང་ངོ ། །རྐུབ་དང་འདོམས་ནས་ཀྱང་བཤང་གཅི་དག་འབྱུང་ཞིང་འཛག་གོ་།དེའི་སྤྱི་བོ་ནས་ཀྱང་ཀླད་པ་འཛག་གོ། རྐང་ལག་གི་སོར་མོ་རྣམས་ལའང་སྦྲང་མ་སྔོན་པོ་དག་རྒྱུ་བར་གྱུར་ཏོ། །དེ་ནས་ཚོང་དཔོན་གྱི་བུ་འཇིགས་བྱིན་གྱིས་བུ་མོ་དེའི་ལུས་ལ་དེ་ལྟ་བུའི་གནས་སྐབས་སུ་གྱུར་པ་དག་མཐོང་ངོ ། །མཐོང་ནས་ཀྱང་འཇིགས་སྐྲག་སྟེ་ཡི་ཆད་ཅིང་སྐྱབས་མེད་རྟེན་མེད་དཔུང་གཉེན་མེད་པར་གྱུར་ནས་སྐྱབས་ཚོལ་ཞིང་འཇིགས་པ་ཆེན་པོས་སྐྲག་པར་གྱུར་ནས་འདར་ཞིང་ཆོ་ངེས་འདེབས་པར་གྱུར་ཏོ། །
382b
དེ་འཇིགས་པ་ཆེན་པོ་སྐྱེས་པའི་རྒྱུ་ནི་གཉིས་ཏེ། སོ་སོའི་སྐྱེ་བོ་ཉིད་ཡིན་པ་དང ། འཇིགས་པའི་སྐྱོན་དེ་དག་མཐོང་བའོ། །བདག་རེ་ཞིག་ན་བུ་མོ་འདིའི་ལེ་ལན་གྱིས་རྒྱལ་པོ་མ་སྐྱེས་དགྲས་གསད་པར་འོང་ངོ་སྙམ་ནས་དེས་བུ་མོ་དེ་ཕང་པ་ནས་དོར་བ་དང་འབྲོས་པར་བརྩམས་ནའང་མ་ནུས་སོ། །དེའི་འཁོར་ཐམས་ཅད་ཀྱིས་ཀྱང་འཇིགས་སུ་རུང་བའི་འཇིགས་པ་ཆེན་པོ་དེ་མཐོང་ནས་བྲོས་པར་གྱུར་ཏོ། །དེ་ནས་དེ་གཅིག་པུ་གྲོགས་མེད་པར་དེ་ན་ཤིན་ཏུ་འཇིགས་ཤིང་སྐྲག་ནས་བདག་འཇིགས་སྐྲག་ཆེན་པོ་འདི་ལས་ཡོངས་སུ་ཐར་པར་བྱེད་པ་ལྷའམ།་ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། མིའམ། མི་མ་ཡིན་པའམ། དགེ་སློང་ངམ། བྲམ་ཟེ་སུ་ཡོད་སྙམ་སེམས་ཤིང་འདུག་གོ་།ཚོང་དཔོན་གྱི་བུ་དེ་དང་དགེ་བའི་རྩ་བ་ཡོངས་སུ་མ་སྨིན་པས་འཇམ་དཔལ་གཞོན་ནུར་གྱུར་པས་བུ་མོ་དེ་ལ་ཆོས་བཤད་པ་དག་ཀྱང་མ་ཐོས་མི་ཤེས་སོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་སྐྱེད་མོས་ཚལ་དེའི་ཤིང་ལྗོན་པ་ཐམས་ཅད་ལས་ཚིགས་སུ་བཅད་པ་འདི་དག་བྱུང་ངོ ། །འཇིག་རྟེན་ཐམས་ཅད་ཡང་དག་མིན། །ཇི་ལྟར་སྒྱུ་མ་མཐོང་བ་བཞིན། །ཁྱེའུས་ཇི་ལྟར་མཐོང་གྱུར་པ། །ཆོས་རྣམས་རང་བཞིན་དེ་ཡིན་ནོ། །ཤ་དང་ཁྲག་གིས་བསྐུས་པ་ནི། །བྱིས་པ་རྣམས་
383a
༄#། །ཀྱི་འཁྲུལ་བ་སྟེ། །ཡང་དག་མིན་དེར་རྣམ་བརྟགས་ནས། །མི་མཁས་བྱིས་པ་ཆགས་པར་བྱེད། །ཇི་ལྟར་མི་མཁས་མི་ཞིག་ནི། །དྲི་ང་གླ་རྩིའི་བུམ་པ་ལ། ། ཕྱི་རོལ་རི་མོ་བྲིས་པ་ཞིག་།མགོ་ལ་ཁྱེར་ཏེ་སོང་པ་ལས། །འགྲོ་བ་དེ་ཡི་དེ་ཡང་ནི། །དེ་ལས་ལྷུང་སྟེ་ཆག་གྱུར་ནས། །དྲི་ང་གླ་རྩིའི་མཐོང་གྱུར་ཏེ། །ཆགས་པ་མེད་ཅིང་འབྲོས་པ་ལྟར། །དེ་བཞིན་བྱིས་པ་མི་མཁས་པ། །བུད་མེད་རྣམས་ལ་ཡིད་ཞེན་ཅིང ། །ཁ་དོག་གཟུགས་དང་དབྱིབས་རྣམས་ལ། །བརྟགས་ནས་དེ་ལ་ཆགས་པར་བྱེད། །ལུས་ཀྱི་རང་བཞིན་གང་ཡིན་པ། །དེ་ལ་ཁྱེའུ་ཁྱོད་རབ་རྟོགས་ཤིག་།དུར་ཁྲོད་རུལ་པའི་དྲི་ལ་ནི། །མཁས་པ་སུ་ཞིག་ཆགས་པར་འགྱུར། །ཡང་དག་མིན་ལ་འཇིགས་མེད་ཀྱི། །ཁྱོད་ནི་འཇིགས་པར་མ་བྱེད་པར། །གང་ལ་ཁྱོད་སྔོན་བརྒྱ་ལ་གྱུར་པའི། །ཆོས་རྣམས་ཀྱི་ནི་རང་བཞིན་ལྟོས། །ཆོས་ཀྱི་དམ་པ་སྟོན་མཛད་ཅིང ། །འཇིགས་གྱུར་འཇིགས་པ་སེལ་མཛད་པ། །ཤཱཀྱ་སེངྒེ་ཞེས་བྱ་བའི། །སྟོན་པ་ཡང་དག་བྱུང་བ་ཡོད། །འདོད་པ་མི་རྟག་མི་བརྟན་པ། །གློག་འོད་སྣང་བ་ཇི་བཞིན་ཏེ། །སྣང་ཡང་ཡང་དག་མ་ཡིན་པས། །མཁས་པ་དེ་ལ་ཆགས་པ་མེད། །ཇི་ལྟར་ཆུ་ནི་འཁྲུགས་པ་ལས། ། དབུ་བརྡོས་པ་བྱུང་བ་ཡང ། །རྒྱུ་ཡི་སྦྱོར་ལས་སྐྱེས་པ་སྟེ། །དེ་ལ་བྱེད་པ་པོ་ཡང་མེད། །དེ་བཞིན་མིང་དང་གཟུགས་རྣམས་ཀྱང ། །ལས་ཀྱི་སྦྱོར་ལས་སྐྱེས་པ་སྟེ། །རྒྱུ་ལས་བྱུང་བ་ཡིན་པས་
383b
ན། །བྱེད་པ་པོ་ནི་གང་ཡང་མེད། །ཁ་དོག་བཟང་པོ་གར་སོང་ཞིང ། །གང་གིས་ཁྱོད་འདིར་སྐྲག་པ་ཡི། །མི་གཙང་བ་ཡང་ག་ལས་འོངས། །ཁྱེའུ་ཁྱོད་དེ་ལ་མངོན་སུམ་གྱིས། །ཆོས་རྣམས་ཡུལ་ན་མི་གནས་ཤིང ། །དེ་དག་ཕྱོགས་ནས་འོངས་པ་མེད། །འོང་བ་མེད་ཅིང་འགྲོ་མེད་ཀྱང ། །དེ་དག་རང་བཞིན་སྟོན་པར་བྱེད། །འདི་ལ་བྱེད་པ་པོ་མེད་ཅིང ། །ཚོར་བ་པོ་ཡང་འདི་ལ་མེད། །བྱེད་མེད་ཚོར་བ་པོ་མེད་པའི། །ཆོས་རྣམས་སྒྱུ་འདྲ་དངོས་པོ་མེད། །རང་གི་ལུས་ལ་རྟོགས་ཤིག་དང ། །དེ་ཡང་འདི་དང་འདྲ་བས་ན། །ཁྱེའུ་ཁྱོད་གཞན་གྱི་ལུས་ཀྱིས་ནི། །འདིར་ཡང་སྐྲག་པར་མ་བྱེད་ཅིག་།ཇི་ལྟར་རྨི་ལམ་རྨིས་པ་ན། །རྩེད་མོ་བྱེད་ཅིང་དགའ་བལྟར། །དེ་བཞིན་དགའ་བའི་རྩེད་མོ་ཀུན། །རྨི་ལམ་རྩེད་མོ་བྱས་དང་འདྲ། །ཤཱཀྱ་སེངྒེའི་སྤྱན་སྔར་ནི། །ཁྱེའུ་ཁྱོད་འགྲོ་བར་གྱིས་ཤིག་དང ། །དེས་ནི་ཁྱེའུ་ཁྱོད་འཇིགས་དང་སྐྲག་།རྩ་དང་བཅས་ཏེ་འབྱིན་པར་འགྱུར། །ཕ་མ་ཁྱོད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་པོར་ནས། །ཇི་ལྟར་འདོད་པ་བཞིན་དུ་འགྲོ་།འཇིགས་གྱུར་འཇིགས་པ་སེལ་མཛད་ཅིང ། །སྐྱབས་མེད་སྐྱོབ་པའི་སངས་རྒྱས་དང ། །ཆོས་དང་ཚོགས་མཆོག་དགེ་འདུན་ལ། །དེར་ནི་སྐྱབས་སུ་འགྲོ་བར་གྱིས། །ལྷ་དང་དྲི་ཟ་མི་རྣམས་ལས། །གང་དག་དེ་ལ་སྐྱབས་སོང་བ། །འཇིགས་པ་ཀུན་ལས་ཐར་པར་འགྱུར། །བདེ་བ་རྙེད་པར་དཀའ་བ་མེད། །དེ་ནས་ཚོང་དཔོན་གྱི་ཁྱེའུ་དེས་
384a
༄#། །ཚིགས་སུ་བཅད་པ་དེ་དག་ཐོས་ནས་དགའ་མགུ་ཞིང་ཡིད་རངས་ཏེ་འཇིགས་སྐྲག་པ་དང་བྲལ་ནས་དགའ་བ་དང ། མཆོག་ཏུ་དགའ་བ་སྐྱེས་ཏེ། ཤི་བའི་རོ་མྱགས་པ་དེ་བོར་ནས་ནགས་ཁྲོད་དེ་ནས་བྱུང་ངོ ། །དེ་ནས་བཅོམ་ལྡན་འདས་ཀྱིས་ཚོང་དཔོན་གྱི་བུ་དེ་གདུལ་བའི་དབང་གི་ཕྱིར་སྐུ་ལས་འོད་རབ་ཏུ་ཕྱུང་སྟེ། འོད་དེས་ཡུལ་མ་ག་དྷ་ཐམས་ཅད་སྣང་བས་ཁྱབ་པར་གྱུར་ཏོ། །ཁྱེའུ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་དཀྱིལ་འཁོར་འཆར་བ་དང་འདྲ་བ། གཟི་བརྗིད་དང་དཔལ་གྱིས་འབར་བ། མཛེས་པ། དགའ་བར་བྱ་བ། དབང་པོ་ཞི་བ། ཐུགས་ཞི་བ། དུལ་བ་མཆོག་།མཚུངས་པ་མེད་པ། དམ་པའི་མཆོག་བརྙེས་པ། གསེར་གྱི་མཆོད་སྡོང་ལྟར་མངོན་དུ་འབར་བ། གླང་པོ་ཆེ་ལྟར་དབང་པོ་ཐུལ་ཅིང་བསྲུངས་བ། མཚོ་ལྟར་དྭངས་ཤིང་གསལ་ལ་རྙོག་པ་མེད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་བ། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་ནས་ཆོས་སྟོན་ཅིང་བཞུགས་པར་བྱ་བ་རིང་པོ་ནས་མཐོང་ངོ ། །དེའི་ལམ་བཀྲ་བ། བལྟ་ན་སྡུག་པ། རིན་པོ་ཆེའི་ལན་ཀན་བྲེས་པ། མེ་ཏོག་བཀྲམ་པ་ཞིག་ཀྱང་བྱུང་བར་གྱུར་ཏོ། །ལྷའི་དབང་པོ་བརྒྱ་བྱིན་ཡང་ཁྱེའུ་དེའི་མདུན་དུ་འགྲེང་ནས་ཁྱེའུ་དེ་ལ་འདི་སྐད་ཅེས་སྨྲས་སོ། །ཁྱེའུ། ཁྱོད་ཀྱིས་དེ་བཞིན་གཤེགས་པ་
384b
མཐོང་ནས་སེམས་རབ་ཏུ་དང་བར་གྱུར་པ་ནི། རྙེད་པ་ལེགས་པར་རྙེད་པ་ཡིན་ནོ། །དེ་བཞིན་གཤེགས་པའང་ཁྱོད་ཉིད་ལ་དགོངས་ཀྱི། ཁྱེའུ། ཁྱོད་ལམ་འདིར་ཞུགས་ལ་དེ་བཞིན་གཤེགས་པའི་སྤྱན་སྔར་སོང་ཞིག་།དེ་ནས་ཁྱེའུ་དེ་ལྷའི་དབང་པོ་བརྒྱ་བྱིན་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་སོང་ངོ ། །དེ་ནས་ལྷའི་དབང་པོ་བརྒྱ་བྱིན་གྱིས་ཁྱེའུ་དེ་ལ་ཁྱེའུ། ཁྱོད་ཀྱིས་མེ་ཏོག་འདི་དག་གིས་དེ་བཞིན་གཤེགས་པ་ལ་མངོན་པར་གཏོར་ཅིག་ཅེས་མེ་ཏོག་མནྡཱ་ར་བ་ཐུ་བ་གང་བྱིན་ནོ། །དེ་ནས་ཁྱེའུ་དེས་མེ་ཏོག་དེ་དག་བཅོམ་ལྡན་འདས་ལ་མངོན་པར་གཏོར་ཏོ་།གཏོར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིའོ། །བདག་གི་དགེ་བའི་རྩ་བ་འདིའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །བཅོམ་ལྡན་འདས། བདག་གིས་ཡུལ་གྱི་བཟང་མོ་རྒྱལ་པོས་ཐུགས་སུ་ཆུད་པ་གསེར་མཆོག་འོད་དཔལ་ཞེས་བགྱི་བ་ཞིག་དགའ་བར་རྩེ་བའི་སླད་དུ་སྐྱེད་མོས་ཚལ་དུ་ཁྲིད་པ་ལས། བཅོམ་ལྡན་འདས། དེ་མདོག་ཡལ་ཞིང་ལུས་མྱགས་ཏེ་ཉེ་དུའི་ཚོགས་ཐམས་ཅད་ཀྱིས་ཀྱང་སྤངས་ནས་བདག་ཀྱང་འཇིགས་པ་ཆེན་པོ་སྐྱེས་ན། བཅོམ་ལྡན་འདས།
385a
༄#། །འདིའི་ལེ་ལན་གྱིས་བདག་རྒྱལ་པོས་བཀུམ་དུ་མི་མཆི་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་།མ་དོགས་ཤིག་།སངས་རྒྱས་ལ་སྐྱབས་སུ་སོང་བ་རྣམས་ལ་འཇིགས་པ་ཕྱིས་མི་འབྱུང་བས་ངས་ཁྱོད་མི་འཇིགས་པས་མགྲོན་དུ་གཉེར་གྱི་འཇིགས་པ་མ་སྐྱེད་ཅིག་།ཁྱེའུ། དེ་ལྟ་མོད་ཀྱི་གཞི་གང་ལས་འཇིགས་པ་དང ། སྐྲག་པར་གྱུར་པའི་གཞི་དེ་ཡོངས་སུ་སྤོངས་ཤིག་།གསོལ་པ། བཅོམ་ལྡན་འདས། འཇིགས་པ་དང ། སྐྲག་པར་འགྱུར་བའི་གཞི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ།་འདོད་ཆགས་དང ། ཞེ་སྡང་དང ། གཏི་མུག་ནི་འཇིགས་པ་དང ། སྐྲག་པར་འགྱུར་བའི་གཞིའོ། །ངའོ་སྙམ་པའི་ང་རྒྱལ་ནི་གཞིའོ། །ལྟ་བའི་ཀུན་ནས་ལྡང་བ་ནི་གཞིའོ། ། སྲེད་པས་ལྷག་པར་ཆགས་པ་ནི་གཞིའོ། །ངར་འཛིན་པ་དང ། ང་ཡིར་འཛིན་པ་ནི་གཞིའོ། །དངོས་པོ་ལ་མངོན་པར་ཞེན་པ་ནི་གཞིའོ། །ཡོངས་སུ་འཛིན་པ་དང ། རྩོད་པ་ནི་གཞིའོ། ། འཇིག་ཚོགས་ལ་ལྟ་བའི་འཆིང་བ་ནི་གཞིའོ། །མི་རྟག་པ་ལ་རྟག་པར་འདུ་ཤེས་པ་ནི་གཞིའོ། །སྡུག་བསྔལ་བ་ལ་བདེ་བར་འདུ་ཤེས་པ་ནི་གཞིའོ། །མི་སྡུག་པ་ལ་སྡུག་པར་འདུ་ཤེས་པ་ནི་གཞིའོ། །བདག་མེད་པ་ལ་བདག་ཏུ་འདུ་ཤེས་པ་ནི་གཞིའོ། །ཕུང་པོ་རྣམས་ལ་ཡོངས་སུ་འཛིན་པའི་འདུ་ཤེས་ནི་གཞིའོ། །ཁམས་ལ་སོ་སོར་མི་རྟོག་པ་ནི་གཞིའོ། །
385b
སྐྱེ་མཆེད་རྣམས་ཡོངས་སུ་མི་ཤེས་པ་ནི་གཞིའོ། །ལུས་ལ་སྐྱོན་དུ་མི་ལྟ་བ་ནི་གཞིའོ། །སྲོག་ལ་མངོན་པར་དགའ་བ་ནི་གཞི་སྟེ། ཁྱེའུ། གཞི་དེ་དག་ལས་འཇིགས་པ་དང ། སྐྲག་པ་འབྱུང་བས་དེ་དག་སྤང་བར་བྱའོ། །ཁྱེའུ། ཁྱོད་ཀྱི་བུ་མོ་དེའི་ལུས་རྣམ་པར་ཞིག་པ་མཐོང་ངམ། གསོལ་པ། བཅོམ་ལྡན་འདས། བདག་གིས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེའུ། འདུས་བྱས་ཐམས་ཅད་ནི་དེ་ལྟར་མི་རྟག་པ། སྡུག་བསྔལ་བ། བདག་མེད་པ། རྣམ་པར་འགྱུར་བའི་ཆོས་ཅན། མི་བརྟན་པ། ཐེར་ཟུག་མ་ཡིན་པ། བྱིས་པ་འདྲིད་པ།་ལོག་པ་ལས་བྱུང་བ། གཡོ་བ་མེད་པ། རྣམ་པར་བསྒྲུབས་པ་སྟེ། མེད་པ་ལས་སྣང་བས་སྒྱུ་མ་ལྟ་བུའོ། །རོ་མྱང་བ་ཆུང་བས་རྨི་ལམ་ལྟ་བུའོ། །འཁྲུལ་པར་སྣང་བས་སྨིག་རྒྱུ་ལྟ་བུའོ། །གཟོད་མ་ནས་མ་སྐྱེས་པས་མིག་ཡོར་ལྟ་བུའོ། །ལས་ཀྱི་རྣམ་པར་སྨིན་པས་ཆུད་མི་ཟ་བའི་ཚུལ་གྱིས་གཟུགས་བརྙན་ལྟ་བུའོ། །འཕོ་བ་མེད་པའི་ཚུལ་གྱིས་ཆུ་ཟླ་ལྟ་བུའོ། །སྒྲ་མེད་པ་ལས་སྒྲར་གོ་བར་བྱེད་པས་བྲག་ཅ་ལྟ་བུའོ། །མངོན་པར་འདུ་བྱེད་པ་མེད་པའི་སྒོ་ཡིན་པས་གྲིབ་མའི་གཟུགས་ལྟ་བུའོ། །རང་བཞིན་གྱིས་ཡ་མ་བརླ་ཡིན་པས་ཆང་བ་སྟོང་པ་ལྟ་བུའོ།། གཟུང་དུ་མེད་པའོ། །རླུང་དང་མཚུངས་པའོ། །རྫུན་པའོ། །གཞི་མེད་པའོ། །གསོག་གོ་།འགྲིབ་པ་མེད་པའོ། །རྫོགས་པ་མེད་པའོ། །ཁྱེའུ། དེ་ལྟར་ན། ཆོས་ཐམས་ཅད་བདག་པོ་མེད་པ་སྟེ།
386a
༄#། །དེ་ལ་ཁྱོད་མངོན་པར་ཞེན་པར་མི་བྱའོ། །ཁྱེའུ། དེ་ཇི་སྙམ་དུ་སེམས། ཁྱོད་ཀྱི་འདོད་པ་དང་ལྡན་པའི་རྟོག་པ་དང ། དཔྱོད་པ་གང་ཡིན་པ་དེ་དག་ཇི་ལྟར་མཐོང ། ཁྱེའུས་གསོལ་པ། བཅོམ་ལྡན་འདས། བྱིས་པ་སོ་སོའི་སྐྱེ་བོ་རྣམས་ཀྱི་འདོད་ཆགས་ནི་ཁ་དོག་དང་དབྱིབས་བཟང་པོ་ལས་ཡོངས་སུ་བརྟགས་པས་སྐྱེ་ལགས་སོ། །དེ་ནི་འཕགས་པའི་ཆོས་འདུལ་བས་མི་གཙང་བ་ལ་སོགས་པར་སོ་སོར་བརྟགས་པས་མི་འབྱུང་སྟེ། བཅོམ་ལྡན་འདས། དེ་ལས་མི་རྟོག་ན་འདོད་ཆགས་ཀྱི་ཀུན་འབྱུང་བ་ཀུན་ཏུ་འབྱུང་བར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེའུ། ལེགས་སོ་ལགས་སོ། །འདི་ལྟ་སྟེ། མི་རྟོག་ཅིང་རྣམ་པར་མི་རྟོག་པ་འདི་ནི་འདོད་ཆགས་ཀྱི་རང་བཞིན་ཡིན་ནོ། །ཁྱེའུ། ཁྱོད་ཀྱིས་བདག་ཏུ་ལྟ་བ་མེད་པ་དང ། གཞན་དུ་ལྟ་བར་སྒྲོ་འདོགས་པ་མེད་པར་ཆོས་ལ་ཚུལ་བཞིན་དུ་སེམས་པར་བརྩོན་པར་བྱའོ། །ཁྱེའུས་གསོལ་པ། བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་ཆོས་ལ་ཚུལ་བཞིན་དུ་སེམས་པར་བརྩོན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ། བྱང་ཆུབ་སེམས་དཔའ་ནི་འདོད་ཆགས་ཀྱི་རང་བཞིན་གྱིས་བྱང་ཆུབ་ཡོངས་སུ་ཚོལ་ལོ། །ཁྱེའུ། དེ་བཞིན་དུ་བྱང་ཆུབ་སེམས་དཔའ་ནི་ཞེ་སྡང་གི་རང་བཞིན་དང ། གཏི་མུག་གི་རང་བཞིན་དང ། ཉོན་མོངས་པ་ཐམས་
386b
ཅད་ཀྱི་རང་བཞིན་གྱིས་བྱང་ཆུབ་ཡོངས་སུ་ཚོལ་ལོ། །ཁྱེའུ། ཇི་ལྟར་འདོད་ཆགས་དང ། ཞེ་སྡང་དང ། གཏི་མུག་དངོས་པོ་མེད་པ་དེ་ལྟར་ཆོས་ཐམས་ཅད་ལ་བྱང་ཆུབ་སེམས་དཔའི་ཤེས་པ་འཇུག་གོ་།ཁྱེའུ།་འདོད་ཆགས་དང ། ཞེ་སྡང་དང ། གཏི་མུག་རྣམས་ནི་རྩ་བ་མེད་པ། གནས་མེད་པ། གཞི་མེད་པ། བྱེད་པ་པོ་མེད་པ། ཚོར་བ་པོ་མེད་པ། ནང་དང་ཕྱི་རོལ་དབེན་པ།་སྟོང་པ། བདག་དང ། སེམས་ཅན་དང ། སྲོག་དང ། གསོ་བ་དང ། སྐྱེས་བུ་དང ། གང་ཟག་དང་བྲལ་བ། མཚན་མ་མེད་པ་སྟེ། མཚན་མར་རྟོག་པ་དང་བྲལ་བ། སྨོན་པ་མེད་པ། མངོན་པར་དགའ་བ་མེད་པ། དགའ་བ་དང་སྲེད་པ་དང་བྲལ་བ། མངོན་པར་འདུ་བྱེད་པ་མེད་པ། རང་བཞིན་མེད་པའོ། །ཁྱེའུ། འདོད་ཆགས་དང ། ཞེ་སྡང་དང ། གཏི་མུག་ཇི་ལྟ་བ་དེ་བཞིན་དུ་ཆོས་ཐམས་ཅད་ལ་བྱང་ཆུབ་སེམས་དཔའི་ཤེས་པ་འཇུག་གོ། ཁྱེའུ། གཞན་ཡང་ཚུལ་བཞིན་ལ་བརྩོན་པའི་བྱང་ཆུབ་སེམས་དཔའི་སེམས་བསྐྱེད་པ་ཐམས་ཅད་ནི་བྱང་ཆུབ་ཡིན་ནོ། །དེ་ཅིའི་ཕྱིར་ཞེ་ན། སེམས་རྟོགས་པ་གང་ཡིན་པ་དེ་ནི་བསྟན་དུ་མེད་པ་དང ། སྨོན་པ་མེད་པ་དང ། རྣམ་པར་རིག་པ་མེད་པ་དང ། སྒྱུ་མའི་རང་བཞིན་ལྟ་བུ་དང ། ནང་མ་ཡིན་པ་དང ། ཕྱི་རོལ་མ་ཡིན་པ་དང ། གཞན་དང་ལྡན་པ་མ་ཡིན་པས་གཟུགས་མེད་པ་སྟེ། ཁྱེའུ། དེ་ཉིད་བྱང་ཆུབ་སེམས་དཔའི་བྱང་ཆུབ་ཡིན་ཏེ། ཁྱེའུ། བྱང་ཆུབ་སེམས་དཔས་རང་གི་
387a
༄#། །སེམས་རྟོགས་པ་མ་གཏོགས་པར་ཁོང་དུ་ཆུད་པར་བྱ་བ་གཞན་ ་མེད་དོ། །རང་གི་སེམས་རྟོགས་པ་གང་ཡིན་པ་དེ་ཉིད་སེམས་ཅན་ཐམས་ཅད་ཀྱི་སེམས་རྟོགས་པ་ཡིན་ནོ། །རང་གི་སེམས་དབེན་པས་སེམས་ཅན་ཐམས་ཅད་ཀྱི་སེམས་དབེན་ནོ། །རང་གི་སེམས་ཀྱི་རང་བཞིན་གྱིས་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་ནོ། །རང་གི་སེམས་རྣམ་པར་དག་པས་སེམས་ཅན་ཐམས་ཅད་ཀྱི་སེམས་རྣམ་པར་དག་གོ་།རང་གི་སེམས་འདོད་ཆགས་དང་བྲལ་བས་སེམས་ཅན་ཐམས་ཅད་ཀྱི་སེམས་འདོད་ཆགས་དང་བྲལ་ལོ། །རང་གི་སེམས་ལ་ཞེ་སྡང་མེད་པས་སེམས་ཅན་ཐམས་ཅད་ཀྱི་སེམས་ལ་ཞེ་སྡང་མེད་དོ། །རང་གི་སེམས་ལ་གཏི་མུག་མེད་པས་སེམས་ཅན་ཐམས་ཅད་ཀྱི་སེམས་ལ་གཏི་མུག་མེད་དོ། །རང་གི་སེམས་ལ་ཉོན་མོངས་པ་མེད་པས་སེམས་ཅན་ཐམས་ཅད་ཀྱི་སེམས་ལ་ཉོན་མོངས་པ་མེད་དོ། །དེ་ལྟར་རྟོགས་པ་གང་ཡིན་པ་དེ་ཐམས་ཅད་མཁྱེན་པའི་ཡེ་ཤེས་རྟོགས་པ་ཡིན་ནོ། །ཁྱེའུ། དེ་ལྟར་ཚུལ་བཞིན་ལ་བརྩོན་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་སེམས་ལ་རང་བཞིན་གྱིས་ཀུན་ནས་ཉོན་མོངས་པ་མེད་པར་རབ་ཏུ་ཤེས་སོ། །གང་གློ་བུར་གྱི་ཉོན་མོངས་པས་ཉེ་བར་ཉོན་མོངས་ཀྱང་སེམས་ཀྱི་རྒྱུད་ལ་ནི་ཉོན་མོངས་པར་འགྱུར་བའང་
387b
མེད་ལ།་ཆོས་ཀྱི་རིགས་པའི་ལྷག་མཐོང་གིས་དེ་དག་དེ་ལ་ཡོངས་སུ་གདུང་བའང་མེད་དེ། དེས་བྱང་ཆུབ་སེམས་དཔའ་དེ་དག་གིས་གློ་བུར་གྱི་ཉོན་མོངས་པ་རྣམས་མཐོང་བས་ན། ཀུན་ནས་ཉོན་མོངས་པར་མི་འགྱུར་རོ། །བསྟན་པ་འདི་བཤད་པ་ན་ཚོང་དཔོན་གྱི་བུ་འཇིགས་བྱིན་ཆོས་རྣམས་ལ་རྗེས་སུ་མཐུན་པའི་བཟོད་པ་སྐྱེས་པར་གྱུར་ཏོ། །དེ་ནས་སྨད་ཚོང་མའི་བུ་མོ་གསེར་མཆོག་འོད་དཔལ་གྱིས་ཚོང་དཔོན་གྱི་བུ་དེ་དུལ་བར་རིག་ནས་ལྷའི་བུ་མོ་ལྔ་བརྒྱ་ཙམ་གྱིས་ཡོངས་སུ་བསྐོར་ཏེ་སིལ་སྙན་དང ། ཕེག་རྡོབ་པ་དང ། གླུ་དབྱངས་ལེན་པ་དག་བྱེད་ཅིང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་འཇམ་དཔལ་གཞོན་ནུར་གྱུར་པས་ཚོང་དཔོན་གྱི་བུ་འཇིགས་བྱིན་ལ་འདི་སྐད་ཅེས་སྨྲས་སོ། །ཁྱེའུ། ཁྱོད་ཀྱིས་སྲིང་མོ་འདི་ཤེས་སམ། སྨྲས་པ།་འཇམ་དཔལ། འཚལ་ལགས་སོ། །འཇམ་དཔལ་གྱིས་སྨྲས་པ། ཇི་ལྟ་བུར་ཤེས། དེ་ནས་ཁྱེའུ་དེས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་སྨྲས་པ། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་ཤེས་སྒྱུ་མ་ལྟ་བུ་སྟེ། །ཡོངས་སུ་རྟོགས་པས་ཀུན་ཏུ་བསྐྱེད།།
388a
༄#། །བྱིས་པས་ཡང་དག་མིན་བརྟགས་པ། །དེ་ལྟར་བདག་གིས་ཡོངས་སུ་འཚལ། །འདི་ལུས་མི་གཡོ་བེམ་པོ་སྟེ། །རྩཝ་དང་རྩིག་པ་ལྟ་བུ་ལགས། །རྣམ་ཤེས་བསྟན་དུ་མ་མཆིས་ཏེ། །དེ་ལྟར་བདག་གིས་ཡོངས་སུ་འཚལ། །འདི་ལ་སེམས་ཅན་བདག་མ་མཆིས། །སྲོག་དང་གང་ཟག་མ་མཆིས་ཏེ། །ལུས་འདི་བསགས་པ་ཙམ་ལགས་པར། །དེ་ལྟར་བདག་གིས་ཡོངས་སུ་འཚལ། །འདི་ལ་འདོད་ཆགས་སྡང་མ་མཆིས། །གཏི་མུག་འབྱུང་བའང་མ་མཆིས་ཏེ། །ཉོན་མོངས་མ་མཆིས་བདག་མ་མཆིས། །དེ་ལྟར་བདག་གིས་ཡོངས་སུ་འཚལ། །ཚུལ་བཞིན་མ་ལགས་བསླད་པ་འདི། །བྱིས་པ་རྣམས་ཀྱི་འཁྲུལ་པ་སྟེ། །མཁས་པ་དེ་ལ་མི་ཆགས་པར། །དེ་ལྟར་བདག་གིས་ཡོངས་སུ་འཚལ། །དཔེར་ན་འདིར་ནི་ནགས་ཁྲོད་ན། །ཤི་བའི་རོ་ནི་མན་མ་པ་བཞིན། །གཟུགས་འདི་རང་བཞིན་དེ་འདྲ་བར། །དེ་ལྟར་བདག་གིས་ཡོངས་སུ་འཚལ། །འདི་ནི་སྔོན་མཐར་མ་སྐྱེས་ཏེ། །ཕྱི་མཐར་འཆི་འཕོར་འགྱུར་མ་མཆིས། །ད་ལྟར་བྱུང་བ་མ་མཆིས་པར། །དེ་ལྟར་བདག་གིས་ཡོངས་སུ་འཚལ། །འདི་ཡིས་བདག་ནི་རྒྱལ་བ་ལས། །མི་གཙང་བ་ཡིས་བཀྲོལ་བས་ན། །འཇམ་དབྱངས་རྣམ་པ་ཇི་ལྟས་ཀྱང ། འདི་ལ་ལན་གླན་རྔོ་མ་ཐོགས། །མི་འགུམ་འཆི་འཕོ་མ་མཆིས་ཀྱང ། །སེམས་ཅན་ཡོངས་སྨིན་བགྱི་སླད་དུ། །བདག་ནི་འཆི་བར་སྟོན་བགྱིད་པས། །སུ་ཞིག་བྱང་ཆུབ་ཚོལ་མི་བགྱིད། །ཇི་
388b
ལྟར་བདག་གིས་ཆགས་སྡང་དང ། །ཉོན་མོངས་ཐམས་ཅད་ཚུལ་བཞིན་མིན། །སེམས་ཅན་ཀུན་གྱི་མཚན་དེ་འདྲ། །འདི་ནི་ཆོས་རྣམས་ཆོས་ཉིད་ལགས། །དེ་ནས་དེའི་ཚེ་བཅོམ་ལྡན་འདས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས།་ཁ་དོག་དུ་མ་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་སྟེ། དེ་དག་བྱུང་ནས་ཚངས་པའི་འཇིག་རྟེན་གྱི་བར་དུ་སོང་སྟེ། འཇིག་རྟེན་གྱི་ཁམས་མཐའ་ཡས་མུ་མེད་བདག་སྣང་བས་ཁྱབ་པར་བྱས་ནས་སླར་ལོག་སྟེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ངས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། རྒྱུ་དང་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས། འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། དེ་ནས་དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་
389a
༄#། །ཏོ། །རྣམ་འདྲེན་འཇིག་རྟེན་མཁྱེན་ལ་ཡ་མཚན་མི་མངའ་བས། །སྟོན་པ་རྒྱུ་མ་མཆིས་པར་འཛུམ་པ་མི་མཛད་ན། །འདི་ལྟར་ཁྱོད་ནི་འཛུམ་པ་མཛད་པར་གྱུར་པ་ཡི། །ཁྱོད་ཀྱི་འཛུམ་པའི་རྒྱུ་ནི་བདག་ཅག་ཤིན་ཏུ་འཚལ། །རྒྱལ་བའི་ཞལ་འཛུམ་མཛད་པར་གྱུར་པ་མཐོང་ནས་ནི། །ལྷར་བཅས་འགྲོ་བ་འདི་དག་ཐེ་ཚོམ་སྐྱེས་པར་གྱུར། །ཐེ་ཚོམ་གྱུར་པ་རྣམས་ཀྱི་སོམ་ཉི་བསལ་དུ་གསོལ། །མི་དབང་འཛུམ་པ་མཛད་པའི་རྒྱུ་ནི་བསྟན་དུ་གསོལ། །གང་གིས་དེ་རིང་ཆོས་རྣམས་ལ་ནི་ཡིད་བཞག་གམ། །ཆོས་ཉིད་དུ་ནི་རྒྱལ་བ་ལ་ལས་མཐོང་གྱུར་ཏམ། །སངས་རྒྱས་བསྔགས་པའི་མཆོད་པ་གང་གིས་དེང་བགྱིས་སམ། །བདག་ཅག་དེ་དག་ཉན་པར་འཚལ་ལོ་མི་ཡི་གཙོ། །གང་གང་དེ་རིང་བདུད་རྣམས་བཞོན་དང་བཅས་བཅོམ་མམ། །གང་གིས་སྟོན་པའི་ཐུགས་ནི་དེ་རིང་དགྱེས་བགྱིས་སམ། །གང་གིས་དེ་རིང་འདུས་བྱས་རྣམས་ཀྱི་གཏིང་རྟོགས་སམ། །དེ་དག་ཉན་པར་འཚལ་གྱི་ཐེ་ཚོམ་བསལ་དུ་གསོལ། ། འདྲེན་པ་འཛུམ་པ་མཛད་པའི་རྒྱུ་ནི་མཉན་སླད་དུ། །འགྲོ་བ་ཐམས་ཅད་ཐལ་མོ་སྦྱར་བ་བགྱིས་ཏེ་སྡོད། །རྐང་གཉིས་རྣམས་ཀྱི་གཙོ་བོ་ཐུགས་རྗེ་བསྐྱེད་མཛོད་ལ། །ཐེ་ཚོམ་གྱུར་པ་རྣམས་ཀྱི་ཡིད་གཉིས་བསལ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཁྱོད་ཀྱིས་སྨད་ཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་འདི་མཐོང་ངམ།
389b
གསོལ་པ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། སྨད་ཚོང་མའི་བུ་མོ་གསེར་མཆོག་འོད་དཔལ་འདི་ནི་སྔོན་འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། འདིས་དེ་ལས་ཐོས་ནས་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ། ཁྱོད་ཀྱིས་ཚོང་དཔོན་གྱི་བུ་འཇིགས་བྱིན་ཞེས་བྱ་བ་འདི་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། ། བདེ་བར་གཤེགས་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། འདི་ནི་ངས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། འདིས་ཀྱང་ང་ལས་ཆོས་ཐོས་ནས་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ། སྨད་ཚོང་མའི་བུ་མོ་གསེར་མཆོག་འོད་དཔལ་འདི་ནི་བསྐལ་པ་འབུམ་ཕྲག་དགུ་བཅུ་རྩ་གཉིས་འདས་པའི་འོག་ཏུ་བསྐལ་པ་རིན་ཆེན་འབྱུང་བ་ཞེས་བྱ་བ་ལ་འཇིག་རྟེན་གྱི་ཁམས་རིན་ཆེན་ཅན་ཞེས་བྱ་བར་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་ཅེས་བྱ་བར་འགྱུར་རོ། །ཀུན་དགའ་བོ། འཇིག་རྟེན་གྱི་ཁམས་དེའི་སེམས་ཅན་རྣམས་ཀྱི་ལོངས་སྤྱོད་དང ། ཉེ་བར་
390a
༄#། །སྤྱོད་པ་ནི་སུམ་ཅུ་རྩ་གསུམ་གྱི་ལྷ་རྣམས་ཅི་འདྲ་བ་དེ་འདྲ་བར་འགྱུར་རོ། །དེ་ན་བྱང་ཆུབ་སེམས་དཔའ་རིན་པོ་ཆེ་དག་མ་གཏོགས་པར་རིན་པོ་ཆེ་གཞན་འབྱུང་པར་མི་འགྱུར་རོ། །དེ་བཞིན་གཤེགས་པ་དེའི་ཚེའི་ཚད་ནི་དཔག་ཏུ་མེད་པར་འགྱུར་རོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང ། ཚོང་དཔོན་གྱི་བུ་འཇིགས་བྱིན་འདིའང་བྱང་ཆུབ་སེམས་དཔའ་ཡོན་ཏན་རིན་ཆེན་འོད་ཅེས་བྱ་བ་འགྱུར་ཏེ། དེ་བཞིན་གཤེགས་པ་དེའི་ཆོས་ཀྱི་མཛོད་འཛིན་པར་བྱེད་དོ། །གང་གི་ཚེ་དེ་བཞིན་གཤེགས་པ་རིན་ཆེན་འོད་ཡོངས་སུ་མྱ་ངན་ལས་འདའ་བར་འགྱུར་བ་དེའི་ཚེ་བྱང་ཆུབ་སེམས་དཔའ་ཡོན་ཏན་རིན་ཆེན་འོད་དེ་ལ་བྱང་ཆུབ་སེམས་དཔའ་ཡོན་ཏན་རིན་ཆེན་འོད་འདི་ནི་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་འཕྲོ་ཞེས་བྱ་བར་འགྱུར་རོ། །དེའི་སངས་རྒྱས་ཀྱི་ཞིང་བཀོད་པའང་ངའི་ཅི་འདྲ་བ་དེ་འདྲ་བར་འགྱུར་རོ་ཞེས་ལུང་སྟོན་པར་འགྱུར་རོ། །སྨད་ཚོང་མའི་བུ་མོ་གསེར་མཆོག་འོད་དཔལ་དང ། ཚོང་དཔོན་གྱི་བུ་འཇིགས་བྱིན་གཉིས་ལུང་བསྟན་མ་ཐག་ཏུ་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཤིང་འཇིག་རྟེན་དུ་
390b
སྣང་བ་ཆེན་པོས་ཁྱབ་པར་གྱུར་ཏོ། །ལུང་བསྟན་པ་བཤད་པ་འདི་བསྟན་པ་ན་སྲོག་ཆགས་བརྒྱ་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བཀོད་པ་ཆེན་པོའི་སྒོའི་ལེའུ་ཞེས་བྱ་བར་ཟུངས་ཤིག་།འཇམ་དཔལ་རྣམ་པར་རོལ་པ་ཞེས་བྱ་བར་ཡང་ཟུངས་ཤིག་།སྨད་ཚོང་མའི་བུ་མོ་གསེར་མཆོག་འོད་དཔལ་བཏུལ་བ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང ། །སྨད་ཚོང་མའི་བུ་མོ་གསེར་མཆོག་འོད་དཔལ་དང ། ཚོང་དཔོན་གྱི་བུ་འཇིགས་བྱིན་དང ། འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་འཇམ་དཔལ་རྣམ་པར་རོལ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་བོ་དྷི་དང ། ཞུ་ཆེན་གྱི་ལོ་ཙྪ་བ་བནྡྷེ་ཡེ་ཤེས་སྡེས་ཞུས་ཏེ་གཏན་ལ་
391a
༄#། །ཕབ་པ།་