rKTs


H806

(e-text produced by ACIP)

see text in transliteration
329a
རྒྱ་གར་སྐད་དུ། ཌཱ་ཀི་ནཱི་ཨགྣི་ཛི་ཧཝ་ཛྭ་ལ་ཏནྟྲ། བོད་སྐད་དུ། མཁའ་འགྲོ་མ་མེ་ལྕེ་འབར་བའི་རྒྱུད། སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ། །བདག་དང་གཞན་གྱི་དཔལ་གྱུར་སྙིང་རྗེ་ཅན། །བདུད་ལས་རྣམ་རྒྱལ་ཡེ་ཤེས་ལྔ་དང་ལྡན། །ཕྱག་ན་རྡོ་རྗེ་ཆེ་ལ་ཕྱག་འཚལ་བསྟོད། །འདི་སྐད་བདག་གིས་ཐོས་པ་དུས་གཅིག་ན། རི་རབ་རིའི་རྩེ་མོ། གཤིན་རྗེ་འབར་བའི་ཕོ་བྲང ། གནོད་སྦྱིན་
329b
ུཏྤ་ལའི་གདོང་གནས་པའི་དུར་ཁྲོད། སྲིན་པོ་མ་ཏང་ཀ་རུ་ཏྲ་ཀའི་འཆགས། བདུད་གཙུག་ཕུད་ནག་པོའི་ཁང་པ། རྩུབ་འགྱུར་གྱི་ཚལ་ཆེན་པོ། །ལྷ་དང་ལྷ་མ་ཡིན་གཡུལ་འགྱེད་པའི་གནས། འབྱུང་པོ་དགེ་བ་ཁ་ཊྭཱཾ་གའི་ཤིང་ནག་པོ་ཏི་ཤ་ཀ་སྐྱེ་ས། སྲིན་མོ་ཀངྐ་ལ་ཟངས་ཀྱི་གཤོག་པ་མེ་ལྟར་འབར་བའི་ཞིང་ཁམས། མི་རོ་གསར་རྙིང་མང་པོ་ཡོད་པ།་ནམ་མཁའ་ལས་ཏྲི་ཤཱུ་ལ་དང ། འཁོར་ལོ་དང ། ལྕེ་འབབ་བ། ས་གཞི་ལས་རལ་གྲི་དང ། སྤུ་གྲི་དང ། མདུང་རྩེ་ལྔ་པ་སྐྱེས་པ། རི་བོ་ཐམས་ཅད་ཀེང་རུས་སུ་སྣང་བ། ཆུ་ཀླུང་ཐམས་ཅད་རྣག་ཁྲག་ཏུ་འབབ་པ། ས་ཕྱོགས་ཐམས་ཅད་ནི། མི་རོ་ཨུཏྤ་ལ་སྔོན་པོའི་དྲི་མནམ་པ། ཉེ་འཁོར་ན་རྔམ་པ་དང ། ངུ་བའི་ང་རོ་རབ་ཏུ་འཇིགས་པ་གྲག་སྟེ་ཤིན་ཏུ་འཇིགས་པ་རབ་ཏུ་སྐྱི་གཡའ་བའི་གནས་དེ་ན། བཅོམ་ལྡན་འདས་དཔལ་འཇིགས་བྱེད་ཀྱི་རྒྱལ་པོ། །རིག་སྔགས་དང་གསང་སྔགས་ཀྱི་བདག་པོ། །ཐབས་དང་ཤེས་རབ་ཀྱི་དབང་ཕྱུག་།སྐུ་དང་ཡེ་ཤེས་ཀྱི་རང་བཞིན། དྲག་པོ་ཆེན་པོ་དཔལ་ཕྱག་ན་རྡོ་རྗེ་སྙིང་རྗེ་ཆེན་པོ་གཏུམ་ཞིང་ཁྲོ་བ། ལུས་བསྐལ་བའི་མེ་ཆེན་པོ་ལྟར་འབར་བ། སྲིད་པ་གསུམ་དང ། བདུད་བཞི་དང ། ཉོན་མོངས་པ་བརྒྱད་ཁྲི་དང ། སྒྲིབ་བ་རྣམ་པ་གཉིས་ལས་རབ་ཏུ་རྒྱལ་བ། སངས་རྒྱས་སྟོང་རྩ་བརྒྱད་ཀྱི་ཐུགས་ཡང་དག་པའི་ཡེ་
330a
༄#། །ཤེས་ལས་གྲུབ་པ། ལྷ་མ་སྲིན་སྡེ་བརྒྱད་ཀྱིས་མཆོད་ཅིང་ཕྱག་བྱས་པ། ཉི་མ་སྟོང་གི་གཟི་དང་ལྡན་པ། དབུ་སྐྲ་ཁམ་པ་གྱེན་ལ་བརྫེས་པ། སྤྱན་སྡང་མིག་མེ་ལྟར་འབར་བ། ཤངས་ཀྱི་རླུང་སྒྲོམ་ནས་བསྐལ་པའི་རླུང་འབྱུང་བ། ཞལ་གྱི་མཆེ་བ་རྡོ་རྗེ་ཟླ་ཚེས་སུ་གཙིགས་བ། རིན་པོ་ཆེ་མརྒད་ཏས་དབུ་བརྒྱན་པ། རིགས་ལྔའི་རྒྱལ་བ་མི་བསྐྱོད་པ་བཞུགས་པ། ཐོད་པ་སྐམ་རློན་གྱི་དབུ་རྒྱན་དང་མགུར་ཆུ་ཅན། མཆོག་དང་གླང་གི་ཀོ་བས་བརྒྱན་པ། ལག་ན་ཡེ་ཤེས་ཀྱི་རྡོ་རྗེ་རྩེ་ལྔ་པ་འཛིན་པ།་ཀླུའི་རྒྱལ་པོ་གཟི་ཅན་གྱིས་ཐོད་དུ་བཅིངས་པ། ཀླུ་ཏཀྵ་ཀས་རྐེད་ཆིངས་བྱས་པ། ཀླུ་ཀུན་ནས་གདུག་དང ། སོག་མ་མེད་ཀྱིས་གདན་ཁྲི་བྱས་ཏེ་ཁྲོ་བོ་ཆེན་པོའི་ཆ་བྱད་དུ་བྱས་ནས་བཞུགས་སོ། །དེའི་འཁོར་ན་ཚངས་པ་དང ། འཇུག་སྲེད་དང ། བརྒྱ་བྱིན་དང ། མ་ཧཱ་ཀཱ་ལི་དང ། དྲང་སྲོང་མེ་བཞི་འཇུག་དང ། ཐང་ལ་གནས་དང ། གཤིན་རྗེ་ཏེ་ལ་བ་ནག་པོ་དང ། སྲིན་པོ་རཱ་མ་ཎ་དང ། ཆུའི་ལྷ་དང ། རླུང་གི་ལྷ་དང ། གནོད་སྦྱིན་ཆེན་པོ་ཀུ་བེ་ར་དང ། འབྱུང་པོ་དབང་ལྡན་དང ། ཉི་མ་དང ། ཟླ་བ་དང ། སྐར་མ་དང ། ས་བདག་ལག་ཆེན་དང ། མ་མོ་ནག་མོ་རལ་གཅིག་མ་དང ། ལྟོ་འཕྱེ་རབ་བརྟན་དང ། གྲུལ་བུམ་དང ། དྲི་ཟ་དང ། མིའམ་ཅི་དང ། རྣམ་ཐོས་ཀྱི་བུ་དང །
330b
ལྷ་མ་ཡིན་དང ། ནམ་མཁའ་ལྡིང་དང ། འབྱུང་པོ་ཕོ་མོ་དང ། གཅན་གཟན་གྱི་ཚོགས་ནི། སེངྒེ་དང ། སྟག་དང ། ཁཝ་དང ། སྤྱང་ཀི་དང ། དོམ་དང ། ཆུ་སྲིན་དང ། གུང་དང ། གཟིག་དང ། ཅེ་སྤྱང་དང ། སྲེ་མོ་དང ། ཁྱི་ལི་འདུ་དང ། འཕར་བ་དང ། སྲམ་དང ། བྱའི་ཚོགས་ཀྱང་བྱ་རྒོད་དང ། ཆུ་གླག་དང ། དུར་བྱ་ཀངྐ་དང ། བཞད་དང ། ཁྱུང་དང ། བྱ་རོག་དང ། སོ་བྱ་དང ། འུག་པ་དང ། ཁྲ་དང ། སྐྱ་ག་དང ། སྲིན་བྱ་དང ། ཤང་ཤང་ཏེའུ་དང ། ནེ་ཙོ་ཡང་ཡོད་དོ། །གཞན་ཡང་གླང་པོ་དང ། ཤ་སྦྲང་དང ། སྦྲུལ་གདུག་པ་ཅན་དང ། རུས་སྦལ་དང ། རྡ་མོ་དང ། བསེ་དང ། ཕག་རྒོད་དང ། བ་མེན་དང ། ཁྱི་སྙ་དང ། ཤ་བ་དང ། གླ་བ་ལ་སོགས་པས་བསྐོར་ཏེ་བཞུགས་སོ། །དེའི་ཚེ་འཁོར་འདུས་པ་དེ་རྣམས་ཀྱི་ནང་ནས་གླང་པོ་ཆེ་རབ་ཏུ་བརྟན་པ་གཙུག་ན་གསེར་གྱི་དྲ་བས་བརྒྱན་པ། མགོ་བོ་སུམ་ཅུ་རྩ་གསུམ་ཡོད་པའི་སྟེང་ན་ཉེ་དབང་སུམ་ཅུ་རྩ་གཉིས་ཀྱི་དབུས་ནས་ལྷ་རྣམས་ཀྱི་དབང་པོ་བརྒྱ་བྱིན་ཞེས་བྱ་བ། སྤྱི་བོ་གཙུག་ན་ཡིད་བཞིན་གྱི་ནོར་བུ་རིན་པོ་ཆེ་འབར་བ། ལུས་ལ་གསེར་དང་བཻཌཱུརྱས་བརྒྱན་པ་དེས་འཁོར་ལོས་བསྒྱུར་བའི་ཆ་བྱད་དུ་བྱས་ནས་གླང་པོ་ཆེའི་སྟན་ལས་ལངས་ཏེ་དཔལ་ཕྱག་ན་རྡོ་རྗེ་ལ་བསྐོར་བ་ལན་གསུམ་བྱས་ནས་རྒྱལ་སྲིད་རིན་པོ་ཆེ་སྣ་བདུན་གྱིས་མཆོད་པ་བྱས་སོ། །དེ་ནས་བརྒྱ་བྱིན་གྱིས་འདི་
331a
༄#། །སྐད་ཅེས་གསོལ་ཏོ། །རྡོ་རྗེ་འཛིན་པ་གསང་དབང་པོ། །ཡིད་བཞིན་ནོར་བུ་རབ་འདྲ་ཞིང ། །དངོས་གྲུབ་ཚོགས་ལ་མངའ་བརྙེས་ཁྱོད། །སྙིང་རྗེ་བདག་པོ་ཡིན་པས་ན། །མ་འོངས་སེམས་ཅན་སྐལ་ལྡན་གྱི། །རྡོ་རྗེ་མཁའ་འགྲོ་གོ་འཕང་མཆོག་།ནག་མོ་མེ་ལྕེ་འབར་བའི་རྒྱུད། །བདག་ནི་ཁྱོད་ལ་དྲི་བར་འཚལ། །དེང་འདིར་སྟོན་པས་སྐབས་འབྱེད་ཞུ། །ཞེས་གསོལ་པ་དང ། དཔལ་ཧཱུཾ་མཛད་ཆེན་པོ་དེས་མེ་འབར་བའི་གདན་ལས་བཞེངས་ཏེ་རྡོ་རྗེ་རྣམ་པར་བསྒྱིངས་པའི་ཏིང་ངེ་འཛིན་ལ་སྙོམས་པར་ཞུགས་ནས་བརྒྱ་བྱིན་ལ་སེངྒེའི་ལྟ་སྟངས་ཀྱིས་གཟིགས་ནས་གླང་པོ་ཆེ་འགྱིང་བག་ཏུ་གོམ་པ་གསུམ་བོར་ཏེ་ཧཱུཾ་ཧཱུཾ་ཧཱུཾ་གི་སྔགས་བཟླས་ཏེ་ཡེ་ཤེས་ཀྱི་ཕྱག་གིས་རྡོ་རྗེ་ལན་གསུམ་ནམ་མཁའ་ལ་དྲིལ་ཏེ་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །དེ་ནས་དཔལ་ཕྱག་ན་རྡོ་རྗེས་འདི་སྐད་ཅེས་བཀའ་སྩལ་ཏོ། །སྙིང་རྗེའི་ཡིད་ཀྱིས་བརྒྱ་བྱིན་ཉོན། །སྐལ་ལྡན་དུས་མཐའི་སེམས་ཅན་རྣམས། །མི་ནུབ་ཆོས་ཀྱི་རྒྱལ་མཚན་དང ། །རྡོ་རྗེ་མཁའ་འགྲོ་མེ་ལྕེའི་རྒྱུད། །བདག་གཞན་དོན་ལ་འཇིགས་མེད་པ། །ངས་བཤད་ཁྱོད་ཀྱི་ཡིད་ཀྱིས་ཟུངས། །ཞེས་བཀའ་སྩལ་པ་དང ། བརྒྱ་བྱིན་ལ་སོགས་པའི་འཁོར་ཤིན་ཏུ་དགའ་བ་དང ། སྤྲོ་བ་སྐྱེས་ནས་ལ་ལས་ནི། །མེ་ཏོག་མནྡཱ་
331b
ར་བ་དང ། པུཎྜ་རཱི་ཀ་དང ། པདྨ་དང ། ུཏྤ་ལ་དང ། ཙམ་པ་ཀ་དང ། བུ་རམ་དང ། བདུག་སྤོས་དང ། མར་མེ་དང ། བྱུག་པ་དང ། ཁ་ཟས་དང ། གདུགས་དང ། བ་དན་དང ། བསིལ་ཡབ་དང ། བླ་རེ་དང ། རྒྱལ་མཚན་དང ། འཕན་ལ་སོགས་པ་ཕྱིའི་མཆོད་པས་མཆོད་དོ། །འཁོར་ལ་ལས་ནི། བདུད་རྩི་རྣམ་པ་ལྔ་དང ། ལྕགས་ཀྱུ་ལ་སོགས་པ་ནང་གི་མཆོད་པས་མཆོད་དོ། །འཁོར་ལ་ལས་ལྷ་མོ་དང ། གནོད་སྦྱིན་མོའི་ཆ་བྱད་དུ་བྱས་ནས་གསང་བའི་མཆོད་པས་མཆོད་དོ། །དེ་ནས་དཔལ་ཕྱག་ན་རྡོ་རྗེ་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །ཁྲོ་ཆེན་དུས་མཐའི་མེ་ལྟར་འབར། །དྲག་པོ་ཧཱུཾ་མཛད་རྡོ་རྗེ་འཛིན། །ད་ལྟར་འདོད་པའི་ཁམས་འདི་ན། །ལྷ་མོ་ནག་མོ་ཞེས་བྱ་བ། ། གཏུམ་ཞིང་ཁྲོ་ལ་ལུས་ཀྱང་འཇིགས། །སྲིད་གསུམ་སྐྲག་པའི་ནུས་མཐུ་ཅན། །དངོས་གྲུབ་དམ་པའི་གཞིར་གྱུར་འདི། །དང་པོ་གླེང་གཞི་རྒྱུ་ཡི་རྒྱུད། །སློབ་དཔོན་སློབ་མ་གང་གི་རྒྱུད། །དོན་དམ་ཀུན་རྫོབ་ལྟ་བའི་རྒྱུད། །དཀྱིལ་འཁོར་དམ་པ་གསུམ་གྱི་རྒྱུད། །ཐང་ག་ལྷ་རྟེན་སྐུ་གཟུགས་རྒྱུད། །དཔོན་དང་གཡོག་ནི་དམ་རྫས་རྒྱུད། །བསྐྱེད་དང་རྫོགས་ནི་ཏིང་འཛིན་རྒྱུད། །རྗེ་དང་ཁོལ་གྱི་སྔགས་ཀྱི་རྒྱུད། །བཅའ་བ་ཕྱག་རྒྱ་བཅུ་གཉིས་རྒྱུད། །མཆོད་པ་གཏོར་མ་སྦྱིན་སྲེག་རྒྱུད། །འདའ་བར་དཀའ་བ་དམ་ཚིག་
332a
༄#། །རྒྱུད། །གྲུབ་པའི་དྲོད་ཚད་མཚན་མའི་རྒྱུད། །སྦོགས་དང་གནད་ལ་དབབ་པའི་རྒྱུད། །མི་འབྲལ་འགྲོགས་པ་གཟུངས་ཀྱི་རྒྱུད། །པྲ་དང་མཚན་མ་དབབ་པའི་རྒྱུད། །དབང་བསྐུར་གནང་བ་སྦྱིན་པའི་རྒྱུད། །སོ་སོ་ལས་ཀྱི་བྱེ་བྲག་རྒྱུད། །མར་མེ་དང་ནི་བདུད་རྩི་རྒྱུད། །ཐིག་ལེ་ཡེ་ཤེས་མན་ངག་རྒྱུད། །ལྷ་སྲིན་སྡེ་བརྒྱད་བསྟོད་བའི་རྒྱུད། །འཁོར་ལོ་ཡོངས་སུ་གཏད་པའི་རྒྱུད། །ཐ་མ་ལུང་དུ་བསྟན་པའི་རྒྱུད། །དགོས་འབྲེལ་ཉི་ཤུ་རྩ་གཉིས་གང ། །སྟོན་པས་བཀའ་སྩོལ་བདག་ཉན་འཚལ། ། དེ་སྐད་ཅེས་གསོལ་པ་དང ། དཔལ་ཕྱག་ན་རྡོ་རྗེས་བཀའ་སྩལ་པ། བརྒྱ་བྱིན་ལ་སོགས་པ་ཁྱེད་རྣམས་ཀྱིས་རྡོ་རྗེ་མཁའ་འགྲོ་མའི་དངོས་གྲུབ་འབྱུང་བའི་རྒྱུད་ཆེན་པོ་ཞུ་བ་ཞུས་པ་ལེགས་སོ་ལེགས་སོ། །ཁྱེད་ཀྱང་རབ་ཏུ་ཉོན་ལ་ཡིད་ལ་ཟུངས་ཤིག་།དེས་རྣམ་པར་ཕྱེ་བ་བསྟན་པར་བྱའོ། །སྔོན་འདོད་པའི་ཁམས་འདི་ཉིད་ན་རི་རབ་ཀྱི་རྩེ་བྱང་ཤར་གྱི་མཚམས་ཤིང་ཡོངས་འདུ་ས་རྟོལ་ཞེས་བྱ་བ། རྩེ་མོ་ན་བྱ་ཁྱུང་ག་རུ་ཌ་གནས་པ། ལོ་མ་ལ་འདོད་པའི་ཡོན་ཏན་ལྔ་རང་འབྱུང་བ། འབྲས་བུ་ལ་རིན་པོ་ཆེ་སྣ་བདུན་ལོ་ཏོག་ལྟར་སྨིན་པ། །ཡལ་གའི་རྩེ་གཡུའི་ཟེ་བའི་བར་བར་ན་ལྷ་དང ། ལྷ་མོ་དང ། གཟའ་དང ། སྐར་མ་དང ། ཉི་མ་དང ། ཟླ་བའི་ཚོགས་ཀྱིས་བརྒྱན་
332b
པ།་རྩ་བའི་ངོས་ལ་ཁྲུས་ཀྱི་རྫིང་བུ་བདུན་ལ་རེ་རེ་ལ་ཤིང་རྟ་རེ་རེ། ཤིང་རྟ་རེ་རེ་ལ་བུ་མོ་བདུན་བདུན། བུ་མོ་རེ་རེ་ལ་གཡོག་མོ་བདུན་བདུན། གཡོག་མོ་རེ་རེ་ལ་རྨ་བྱ་བདུན་བདུན་ཡོད་དོ། །ཤིང་རྟ་དེའི་ས་ཕྱོགས་ན་སྨན་གྱི་རྣམ་པ་སྣ་ཚོགས་དང ། ལོ་ཏོག་གི་རིགས་ཁྲི་ཕྲག་བཞི་རང་སྐྱེ་བ་ཙནྡན་དང ། ག་བུར་དང ། གོར་ཤི་ཥ་དང ། སྦྲུལ་གྱི་སྙིང་པོ་རྫིང་བུ་ལྔ་བརྒྱས་བསྐོར་ཏེ། དེ་ལྟ་བུའི་ཤིང་དེ་ཐུན་མོང་གི་བསོད་ནམས་ཀྱིས་སྐྱེས་སོ། །དེའི་དུས་ན་འདོད་པའི་ཤིང་དེ་ནི། ལྷ་རྣམས་ཀྱིས་དབང་བྱེད་པའི་ཚེ་རི་རབ་ཀྱི་རྩ་བ་ན་འོད་མི་སྣང་བ་ཞེས་བྱ་བའི་གནས་ན་ལྷ་མ་ཡིན་གྱི་རྒྱལ་པོ་སུམ་བརྩེགས་དང ། ཐགས་བཟང་རིས་དང ། ཧེ་རན་ན་ཀེ་ཤུ་དང ། རྣམ་པར་སྣང་བྱེད་དང ། རབ་ཚིམ་དང ། སྒྲ་གཅན་འཛིན་ལ་སོགས་པ་བྱེ་བ་དུང་ཕྱུར་ཙམ་ཤིན་ཏུ་མི་སྡུག་པའི་ཆ་བྱད་ནས་རབ་ཏུ་རྔམ་པའི་ང་རོ་དང ། འཇིགས་ཤིང་སྐྲག་པའི་མཚོན་ཆ་ཐོགས་ནས་རི་རབ་ཀྱི་ཁ་ཆོས་བཟང་ཞེས་བྱ་བར་ལྷགས་སོ། །དེ་ནས་རི་རབ་ཀྱི་ཁ་ལ་ལྷ་བ་སུ་དེ་བ་དང ། ལྷ་མ་ཧཱ་དེ་བ་དང ། བརྒྱ་བྱིན་ཉིད་ལ་སོགས་པ་ལྷ་བྱེ་བ་དུང་ཕྱུར་ལ་ལྷ་མ་ཡིན་རྣམས་ཀྱིས་འདི་སྐད་ཅེས་སྨྲས་སོ། །རི་རབ་རྩེ་གནས་སུམ་ཅུ་རྩ་གསུམ་ལྷ། །ཤིང་འདི་ལྷ་དང་ལྷ་མིན་ཐུན་མོང་ལས། །ད་ལྟ་འདོད་པས་ཁྱེད་ཅག་ལྷ་དབང་ན། །ད་ནི་ངེད་ཅག་ལྷ་མིན་བདུད་ལ་བླངས། །ཞེས་སྨྲས་པ་དང །
333a
༄#། །ལྷ་རྣམས་ཀྱིས་སླར་སྨྲས་པ། དཔག་བསམ་ཤིང་ལ་འདོད་ཡོན་བསམ་ཡས་ཀྱང ། །བསོད་ནམས་དབང་གིས་ལྷ་ལ་ཡོངས་སུ་གྲུབ། །གཞན་ལ་ཡོད་ན་བསྐམས་ཤིང་མེད་པར་འགྱུར། །དེ་བས་ཁྱེད་ལ་ལྗོན་ཤིང་ངེད་མི་སྟེར། །ཞེས་སྨྲས་པ་དང ། སླར་ལྷ་ལ་སྨྲས་པ། ཐུན་མོང་ལས་གྲུབ་བདེ་ལྡན་ལྗོན་པའི་ཤིང་།། ལྷ་ཡིས་དབང་བྱས་ངེད་ལ་མི་སྟེར་ན། །འཇིག་རྟེན་སྲེག་པའི་མཚོན་གྱིས་ཆར་ཕབ་ལ། །ལྷ་དང་ལྷ་མིན་གཡུལ་ཆེན་འགྱེད་ཅེས་ཟེར། །ཅེས་སྨྲས་ཏེ་སླར་ཡང་སོང་ནས་ལྷ་མ་ཡིན་གྱིས་དམག་དྲངས་སོ། །གླང་པོ་ཆེས་སྲུང་གི་མགོ་སུམ་ཅུ་རྩ་གཉིས་ལ་གནོད་སྦྱིན་སུམ་ཅུ་རྩ་གཉིས་ཞོན་ཏེ་དབུས་ཀྱི་མགོ་ལ་དབང་པོ་ཐགས་བཟང་རིས་ཞོན་ཏེ།་གླང་པོ་ཆེའི་སྣ་ལ་ཀ་མ་ལ་ནག་པོ་བཏགས་ཏེ་ལྷ་མ་ཡིན་གྱི་དམག་བྱེ་བ་དུང་ཕྱུར་གྱིས་བསྐོར་ཏེ་རྫུ་འཕྲུལ་གྱིས་ནམ་མཁའ་ལ་མཚོན་གྱི་ཆར་ཆེན་པོ་མེ་ལྕེ་འབར་བ་འདྲ་བའི་ཆར་འབབས་ཏེ་དམག་དྲངས་སོ། །དེ་ནས་ཆོས་བཟང་ཞེས་བྱ་བའི་གདན་སར་ལྷ་རྣམས་འཚོགས་ཏེ་འཐབ་པར་བརྩམས་པ་དང ། དང་པོ་ལྷ་རྣམས་ཀྱིས་ཁྲོམ་ཤེས་ནས་རྩུབ་འགྱུར་གྱི་ཁང་པ་ན་ཁྲོ་བོ་ལངྐ་ནག་པོ་ཁྲོས་པའི་ཁ་ཆུ་ཁྲོ་ཆུའི་རྫིང་བུ་བདུན་འཁྱིལ་བ་ལས་འཐུངས་སོ། །དེར་ལྷ་རྣམས་ཞེ་སྡང་སྐྱེས་ཏེ་ཤིན་
333b
ཏུ་ཁྲོ་བར་གྱུར་ནས་བཟོའི་ལྷ་བི་ཤོ་ཀ་རྨས་ནུབ་གཅིག་ལ་གསེར་ཁྲབ་བྱེ་བ་ཕྲག་དགུ་འབུམ་རང་བརྡུངས་སོ། །ལྷ་མཧཱ་ཀྲོ་དྷས་ནུབ་གཅིག་ལ་མཚོན་རལ་གྲི་དང ། འཁོར་ལོ་དང ། ཐོ་བ་དང ། ལྕགས་ཀྱུ་དང ། དགྲ་སྟ་དང ། མདུང་རྩེ་གསུམ་པ་བྱེ་བ་ཕྲག་དགུ་ཁྲི་དགུ་འབུམ་རང་བརྡུངས་སོ། །དུས་དེ་ཙམ་ན་ལྷ་རྣམས་གོ་མཚོན་ཐོགས་ཏེ་གླང་པོ་ཆེ་རབ་ཏུ་བརྟན་པའི་མགོ་སུམ་ཅུ་རྩ་གཉིས་ལ་ཉེ་དབང་སུམ་ཅུ་རྩ་གཉིས་ཞོན། །དབུས་ཀྱི་མགོ་བོ་ལ་ལྷའི་དབང་པོ་བརྒྱ་བྱིན་ཞོན། ལྷ་དམག་བྱེ་བ་དུང་ཕྱུར་གྱིས་མཐའ་བརྟེན་ཏེ་གླང་པོ་ཆེའི་སྣ་ལ་རལ་གྲི་བཏགས་ནས་ལྷ་དང་ལྷ་མ་ཡིན་གཉིས་གཡུལ་བཀྱེའོ། །དུས་དེ་ཙམ་ན་ལྷས་མཚོན་བརྒྱབ་པ་རྣམས་ནི། ཁྲག་གར་ཕོག་པ་ལ་བདུད་ཀྱི་དམག་མི་ཁྲི་ཁྲི་ཙམ་དུ་འཕེལ། ལྷ་མ་ཡིན་གྱིས་མཚོན་བརྒྱབ་པ་ལ་ནི། ཁྲག་ལ་དམག་མི་འཕེལ་བར་ཤིའོ། །དེར་ལྷ་ཐམས་ཅད་གཏིང་ཕམ་སྟེ་ལྷ་མ་ཡིན་རབ་ཏུ་རྒྱལ་བའི་དུས་སུ་ཕྱག་ན་རྡོ་རྗེ་ཉིད་ཀྱིས་ལྷ་རྣམས་རྒྱལ་བར་བྱ་བའི་ཕྱིར་དཔལ་བེའུའི་དབུས་ནས་ཧཱུཾ་མཐིང་ནག་འབར་བ་གཅིག་སྤྲུལ་ཏེ་ལྷ་བི་ནུ་རཱ་ཛའི་དཔལ་བེའུའི་དབྱིངས་སུ་ལྕགས་ཀྱི་མཛེར་བ་ཞིག་ཏུ་གྱུར་ཏོ། །འཛེར་པ་བརྟོལ་བའི་ནང་ནས་བུད་མེད་སྔོན་མོ་དབུ་སྐྲ་བཻ་ཌཱུ་རྱའི་ཆུན་འཕྱང་ཅན། མིག་ཨུཏྤ་ལའི་འདབ་མ་འདྲ་བ། མཚན་དང་དཔེ་བྱད་དུ་ལྡན་པ་ཞིག་བྱུང་ངོ ། །དེ་ལ་ལྷ་
334a
༄#། །རྣམས་ཀྱིས་མིང་བཏགས་པ། ལྷ་མོ་ཨུ་མ་དེ་བ་བྱ་\?\་བར་བཏགས། ལྷའི་བུ་མོ་དེ་ཀུན་གྱི་ཆུང་མར་འདོད་པ་ལ་ནམ་མཁའ་ལ་ཕྱག་ན་རྡོ་རྗེས་སྤྲུལ་པའི་ཚིགས་བཅད་འདི་བསྒྲགས་སོ། །ལྷ་ཡི་རྒྱལ་སྲིད་མཐོ་ཞིང་བརྟན་པ་དང ། །རིས་དྲུག་སེམས་ཅན་དགེ་ལ་དགོད་པ་དང ། །ལྷ་མིན་བདུད་ཀྱི་གཡུལ་ཆེན་བཟློག་པའི་ཕྱིར། །དབང་ཕྱུག་ལྷ་ལ་ཨུ་མ་ཆུང་མར་བྱིན། །ཞེས་བསྒྲགས་སོ། །དུས་དེའི་ཚེ་ན་འཛམ་བུའི་གླིང་གི་ནུབ་བྱང་མཚམས་ཡཀྵ་ཀ་མ་ལ་འབར་བའི་དུར་ཁྲོད་ན་ལྷ་མ་ཧཱ་དེ་བ་དགེ་སློང་གི་ཆ་ལུགས་སུ་འགོག་པའི་བརྟུལ་ཞུགས་དྲག་པོ་ལ་ཞུགས་པའི་དྲུང་དུ་ཨུ་མ་དེ་བ་ཁྲིད་ནས་ཞག་བདུན་ཕྲག་བདུན་དྲོད་ལ་བཙས་པས་འདོད་པའི་འཁྲིག་པ་སྤྱད་དོ། །འཁྲིག་པ་སྤྱད་པའི་དབང་གིས་བར་སྣང་ལ་གཟའ་དང་སྐར་མ་བྱུང་ངོ ། །དེར་ལྷ་མོ་ཨུ་མ་དེ་བ་ལ་བུ་ཚ་མིང་སྲིང་གཉིས་སྐྱེས་སོ། །མིང་པོ་ནི། གཤིན་རྗེ་མ་ཧཱ་ཀ་ལ་ཞེས་གྲགས་སོ། །སྲིང་མོ་ནི། ལྷ་མོ་དམར་མོ་ཙ་མུཎྜི་ཞེས་བྱ་བར་གྲགས་སོ། །གཤིན་རྗེ་མིང་སྲིང་དེ་གཉིས་ཆོས་བཟང་ལྷའི་མདུན་སར་ཁྲིད་ནས་ཕྱིན་ཏོ། །དེ་ནས་ཕྱག་ན་རྡོ་རྗེ་ཉིད་ཀྱིས་གཤིན་རྗེའི་མིང་སྲིང་ལ་མ་ཧཱ་ཡཀྵ་བདུད་ལས་རྣམ་པར་རྒྱལ་བའི་དབང་བསྐུར་ཏེ། སྔར་བཞིན་དུ་ལྷ་དང་ལྷ་མ་ཡིན་གཉིས་གཡུལ་ཆེན་པོ་བཀྱེའོ།
334b
དེ་ནས་གཤིན་རྗེ་མ་ཧཱ་ཀ་ལས་ལག་ན་གསལ་ཤིང་རི་རབ་ཙམ་ཞིག་གིས་ལྷ་མ་ཡིན་གྱི་གཡུལ་ངོར་དྲིལ་བས་གཡུལ་བཟློག་གོ་།ཙ་མུཎྜིའི་རལ་གྲི་མེ་ལྕེ་ཕྲེང་བ་ཞེས་བྱ་བས། ལྷ་མ་ཡིན་ཧེ་རན་ན་ཀེ་ཤུའི་མགོ་བཅད་དོ། །དེ་ནས་ལྷ་དམག་མང་པོས་ཀྱང་ལྷ་མ་ཡིན་ལ་མཚོན་ཆའི་ཆར་ཕབ་ནས་ཁྲག་རྣམས་དམག་མིར་སྤྲུལ་པ་འདྲ་སྟེ། ལྷ་མོ་ཙ་མུཎྜིས་ཧེ་རན་ན་ཀེ་ཤུའི་ཐོད་པས་ཁྲག་བཅུས་ཤིང་རོལ་པས་འཕེལ་མ་ནུས་པར་བྱེད་ཀྱིན་མཚོན་གྱིས་ཆར་ཕབ་ནས་ཙ་མུཎྜིའི་ལྟེ་བ་ལ་ལྷ་བྱེ་བ་དུང་ཕྱུར་རྣམས་ཀྱི་རྫོང་བྱས་པས་འཐབས་སོ། །ལྷ་དམག་དཀར་པོ་རྒྱལ་བར་བྱས་ཤིང་དཔག་བསམ་ཤིང་གི་མངའ་བདག་ཏུ་གྱུར་ཏེ། རྣམ་པར་རྒྱལ་བའི་ཁང་བཟང་ཡང་རང་བྱུང་དུ་ཡོད་དེ། ལྷ་མ་ཡིན་ཕམ་པར་གྱུར་ཏོ། །བརྒྱ་བྱིན་ཉོན་ཅིག་།དེ་ནས་ལྷའི་བུ་མོ་ཙ་མུཎྜི་དེས་རི་ཁྲོད་ཆེན་པོ་མདངས་དགའ་ཞེས་བྱ་བར་ཤིང་རི་ཁྲོད་ཅེས་བྱ་བའི་ལོ་མ་གྱོན་ནས་ལོ་བདུན་དུ་འཕགས་པ་མི་ཕམ་པའི་གཟུངས་བཟླས་པས། ལྷ་མོ་པརྞ་ཤ་བ་རི་རི་ཁྲོད་ལོ་མ་ཅན་ཞེས་བྱ་བར་གྱུར་ཏོ། །དེ་ནས་ལྷ་མོ་དེས་ཀླུ་དུང་གི་འཛེར་པ་ཅན་ཞེས་བྱ་བའི་བྱང་ཆུབ་སེམས་དཔའ་དེ་བྱ་ཁྱུང་ག་རུ་ཌ་ཞེས་ལྷ་མོ་པརྞ་ཤ་བ་རི་དེས་བྱ་ཁྱུང་བཏུལ་བས་ཀླུ་བསྐྱངས་ཏེ་ལྷ་མོ་དཀར་མོ་དུང་སྐྱོང་མ་ཞེས་བྱ་བར་གྱུར་ཏོ། །ལྷ་མོ་དུང་སྐྱོང་མ་དེ་ནི། རི་རབ་རྩེ་མོ་
335a
༄#། །རྣམ་པར་རྒྱལ་བའི་ཁང་བཟང་རྩེ། བྱང་ཤར་གྱི་མཚམས་བྱང་ཆུབ་ཀྱི་ཤིང་དྲུང་ན་རིན་པོ་ཆེའི་ཁང་པ་བདུན་བརྩེགས་ཀྱི་གཞལ་ཡས་ཀྱི་ཁང་ན་རིན་པོ་ཆེའི་ཁྲི་སྟེང་ན་གསེར་དངུལ་བཻ་ཌཱུརྱའི་དབུ་རྒྱན་དང་མགུར་ཆུས་བརྒྱན་ཏེ་ལུས་འགྱིང་བག་ཏུ་བཞུགས་སོ། །ལྷའི་བུ་དང་བུ་མོ་མང་པོས་ཀྱང་ལོངས་སྤྱོད་དང ། གླུ་དང ། དབྱངས་དང ། རོལ་མོ་བསམ་གྱིས་མི་ཁྱབ་པའི་མཆོད་པ་བྱེད་དོ། །བརྒྱ་བྱིན་ཉོན་ཅིག་།དེ་ནས་ཡུལ་ལངྐ་པུ་རངས་སུ་སྲིན་པོའི་གྲོང་ཁྱེར་བདུན་འབུམ་ཡོད་པ་ལ་ལྷ་རྣམས་ཀྱིས་སྐྱོན་ཕབ་སྟེ། སྲིན་པོ་ད་ཤ་གྲི་བ་དང ། དེའི་སྲིང་མོ་རྣ་ལ་རྩེ་གཉིས་ལུས་སོ། །དེ་ནས་སྲིན་པོ་ད་ཤ་གྲི་བས་ལྷ་དང་མི་འདུལ་འདོད་པའི་དོན་ཆེད་དུ་སྲིང་མོ་ལྷ་མ་ཧཱ་དེ་པ་ལ་བཙུན་མོར་ཕུལ་ལོ། །དེ་ནས་ལྷ་དབང་ཕྱུག་མཧཱ་དེ་བ་དང ། སྲིང་མོ་རྣ་ལ་རྩེ་གཉིས་ཚོགས་པ་ལས། ཕས་ནི། ཁྱེའུར་སྨོན་ལམ་བཏབ། མས་ནི། བུ་མོར་སྨོན་ལམ་བཏབ། མའི་སྨོན་ལམ་མཐུ་བཙན་པས་ཡ་མཚན་ཅན་གྱི་བུ་མོ་ཞིག་བྱུང ། ཕ་ཁྲོས་པས་ཐལ་ཁུང་དུ་བོར་རོ། །མས་སླར་བླངས་ནས་ལུས་ཀྱི་དྲོད་ལ་བཙས་ནས་ཨཱ་ཡུ་བྲུཾ་ཞེས་ཚེ་དྲངས་གསོས་ཏེ། ཕས་མིང་བཏགས་པ་སྦས་པའི་ཐལ་མདོག་མར་མིང་བཏགས། མས་མིང་མི་ཕམ་ཁྲོ་གཉེར་རོ་ལངས་
335b
མར་མིང་བཏགས། གནོད་སྦྱིན་ལག་ན་རྡོ་རྗེས་དམོད་བཙུགས་ནས་མིང་བཏགས་པ། དུས་ཐམས་ཅད་དུ་ནག་མོ་རེམ་ཏི་ཞེས་བྱ་བར་གྲགས་པར་གྱུར་ནས་སངས་རྒྱས་ཀྱི་བསྟན་པ་བསྲུང་བའི་ནུས་མཐུ་དང་ལྡན་པར་གྱུར་ཅིག་།ཅེས་མིང་དུ་བཏགས་པའི་ཚེ་བར་སྣང་གི་ལྷ་མ་སྲིན་སྡེ་བརྒྱད་པོ་ཡོངས་ཀྱིས་ཀྱང་དེ་ལྟར་གྱུར་ཅིག་ཅེས་བཟླས་སོ། །དེ་ནས་སྐྱེ་བ་ཐམས་ཅད་དུ་ནག་མོ་རེ་མ་ཏི་ཞེས་བྱ་བར་གྲགས་སོ། །ལྷ་མོ་དུང་སྐྱོང་མས་མིང་བཏགས་པ་ནི། སྲིན་མོ་དམར་འདབ་ཕུར་བའི་ལྷ་གསེར་ཅན་ཞེས་བྱ་བར་མིང་བཏགས་སོ། །དུས་དེར་སྲིན་པོ་ད་ཤ་གྲི་བ་དེས་ད་ནི་ལྕེབ་བོ་ལྕེབ་བོའི་སྒྲས་འཇིག་རྟེན་དུ་གྲགས་སོ། །སྲིང་མོ་དང་རྣ་ལ་རྩེ་གཉིས་ཀྱིས་མིང་པོ་མ་ལྕེབ་པར་ཅི་འདོད་པ་ང་ལ་སྨྲོས་ཤིག ། ཅེས་གསོལ་ལོ། །ད་ཤ་གྲི་བས་གསོལ་པ། ང་ནི། ལྷ་མོ་དུང་སྐྱོང་འདོད་དོ། །ཞེས་གསོལ་ཏོ། །སྲིང་མོས་སྨྲས་པ། ངའི་ནུ་མོ་ཕུར་པའི་ལྷ་མོ་དུང་སྐྱོང་གི་ཁོལ་མོ་བྱེད་དུ་གསོལ་ཏེ། དེ་ནས་གདོད་བསླུའོ་ཞེས་སྨྲས་སོ། །དེ་ནས་རྣ་ལ་རྩེས་བུ་མོ་ཁྲིད་ནས་དཀར་མོ་དུང་སྐྱོང་གི་གཡོག་ཏུ་ཕུལ་ལོ། །དེ་ནས་རེ་མ་ཏིས་དཀར་མོ་དུང་སྐྱོང་ལ་འདི་སྐད་ཅེས་གསོལ་ཏོ། །ཀྱེ་ཆེ་ཞེ་ཆེན་མོ་རིགས་ཀྱི་ཡུམ། །བདག་ཉིད་ཆེན་མོ་ག་གར་མ། །དབུ་བཟང་རིན་ཆེན་ཐོར་ཚུགས་ལ། །བཻ་ཌཱུར་སྔོན་མོ་འོད་ལམ་ལམ། །ཞལ་བཟང་པདྨའི་
336a
༄#། །དཀྱིལ་འཁོར་དུ། །ཉི་ཟླ་ཕྲུགས་གཅིག་རྒྱན་བཀོད་དེ། །ཚེམས་བཟང་དུང་ལ་ལྗགས་བཟད་མེ། །ཁྱོད་འདྲ་འཇིག་རྟེན་ཁམས་ན་མེད། །བདག་ནི་ཁྱོད་ཀྱི་གཏན་འབངས་བགྱི། །ཁྱོད་ཀྱིས་བདག་ལ་ཐུགས་བརྩེར་དགོངས། །བདག་ཀྱང་གློ་བ་ཉེ་བར་བགྱི། །ཞེས་གསོལ་ཏོ། །དེ་ནས་ལྷ་མོའི་གཡོག་མོ་བྱས་ནས་གློ་བ་ཉེ་བར་བྱས་ཏ་ལྷ་མོའི་ཡིད་ལ་ཅི་འདོད་པ་དགོས་པར་བྱས་སོ། །དེ་ནས་ལྷ་མོ་ཡང་ཁོ་མོ་དེ་ལ་དགྱེས་ནས་གཅེས་པར་བྱེད་དེ། དེའི་ཚེ་དེའི་དུས་ན་ཡུལ་ལངྐ་བུ་རངས་སུ་སྤྲེའུ་འབལ་ལེ་དང ། མགྲིན་བཟང་འཐབས་པ་ལ་ལྷ་ཐམས་ཅད་ལྟད་མོ་ལ་འགྲོ་བས། ལྷ་མོ་ཨུ་མས་བུ་མོ་དུང་སྐྱོང་མ་ལ་འདི་སྐད་ཅེས་སྨྲས་སོ། །དེ་རིང་ཁྱོད་ཀྱི་གན་དུ་སུ་འོངས་པས་ཁྱོད་བསླུ་སྟེ་འོང་བས། དེ་ལ་མ་ལྟ་ཞིག་ཅེས་བསྟན་ཙམ་ན། ཁོལ་མོས་སྐབས་དེར་ད་ཤ་གྲི་བ་ལ་སྦྲན་ནོ། །དེར་སྲིན་པོ་ད་ཤ་གྲི་བས་སྲིན་གྱི་བོང་བུ་ག་དམར་ལ་ཞོན་ནས་ལྷ་མོའི་ཕོ་བྲང་སྒོར་ཕྱིན་ཏེ་སྲིན་པོ་ཁོ་བདག་ནི་མིའི་ཆ་བྱད་ལ་ཤིན་ཏུ་གཟུགས་བཟང་ལ་མཛེས་པ་གཅིག་ཏུ་སྤྲུལ། བོང་བུ་ནི། རི་དྭགས་གདོར་སྨུག་པོ་ཞིག་ཏུ་སྦྲུལ་ཏེ་ལྷ་མོ་དུང་སྐྱོང་མའི་སྤྱན་སྔར་ཕྱིན་ནས་རོལ་མོ་སིལ་སྙན་དང ། གླུ་དབྱངས་སྣ་ཚོགས་བྱས་པས་བསླུས་སོ། །ལྷ་མོ་རོལ་མོ་
336b
ལ་དགའ་བས་འཛུམ་ཞིག་ཤོར་རོ། །དེ་ནས་སྲིན་པོས་གླགས་རྙེད་དེ་ལྕགས་ཀྱི་ལྷམ་སྒྲོག་སྔོན་པོ་བཀྲོལ་ནས་བཟུང་སྟེ་གླུ་འདི་སྐད་བླངས་སོ། །ཀྱེ་ཡོངས་འདུ་ཤིང་གི་གནས་མཆོག་ན། །རིན་ཆེན་མཛེས་པའི་ཕོ་བྲང་ནས། །བདེ་ལྡན་འཕྲུལ་གྱི་ལྡིང་ཁང་ན། །འགྱིང་བག་ཚུལ་དུ་གར་མཛད་པ། །དབང་ཕྱུག་སྲས་མོ་མ་ལགས་སམ། །དགའ་བྱེད་དུང་སྐྱོང་མ་ལགས་སམ། །ལྷ་མོ་མང་པོའི་ཚོགས་དད་རོལ། །དབུ་ཡི་སྙན་ཆ་གདུབ་ཀོར་ནི། །རིན་ཆེན་མཛེས་པས་ཀུན་ནས་སྤྲས། །སྤྱན་ནི་ཨུཏྤལ་འདབ་མ་འདྲ། ། ཤངས་ནི་བིལ་བའི་འབྲས་བུ་འདྲ། །ཞལ་ནས་ཨུཏྤལ་ངད་ཀྱང་བྲོ། །སྐུ་ནི་འཁྲིལ་ལྡེམ་གཞོན་ཚུལ་འདྲ། །གསུང་ནི་ཚངས་པའི་དབྱངས་སྙན་མཆོག་།ནུ་འབུར་སྟོད་སྨད་ཕྱེད་པས་འགྱིང ། །ཁྱོད་འདྲའི་སྐུ་ནི་གཞན་ན་དཀོན། །ལྷ་ཡི་ལོངས་སྤྱོད་མཛེས་པས་མི་བྲེལ་ཡང ། །ཞབས་ཀྱི་ཆས་སུ་ལྕགས་སྒྲོག་འདི་འབུལ་ཞེས། །ཅི་མཛད་ཅི་སྡུག་ཅི་ཡང་གསུང་བ་སྙན། །ཁམས་གསུམ་དག་ན་ཁྱོད་འདྲ་ཤིན་ཏུ་དཀོན། །སེམས་ཅན་ཀུན་གྱིས་བལྟ་བས་མི་ངོམས་ཁྱོད། །བདག་གིས་དབུལ་འདི་བཞེས་པར་གནང་བར་མཛོད། །ཅེས་ཕུལ་བ་ལ། ལྷ་མོས་ལྕགས་སྒྲོག་བླངས་སོ། །དེ་ནས་རང་གི་རྐང་པ་གཡས་པ་ལ་དཀྲིས་ཏེ་རྒྱན་བྱས་སོ། །དེ་ནས་ཁོལ་མོ་དེས་ཇོ་མོ་དུང་སྐྱོང་མལ་ཞུས་
337a
༄#། །པ།་ཀྱེ་ཇོ་མོ་བདེ་མཆོག་དུང་སྐྱོང་མ། བདག་ཞུ་བ་ཞིག་མཆིས་\?\་ན་གནང་ངམ་བྱས་པ་ལ། ཇོ་མོ་ན་རེ། ཁྱོད་གློ་བ་ཉེ་བས་ཅི་ཞུས་པ་གནང་ངོ་ཟེར་རོ། །དེ་ནས་ལྷ་ནི། ངག་བདེན་པའི་སྡོམ་པ་ཡོད་པས། ཇི་སྐད་སྨྲས་པ་ལྟར་བྱེད་པ་ཡིན་ནོ། །དེ་ནས་ཁོལ་མོས་གསོལ་པ། ཀྱེ་བདག་གི་ཡུལ་གྱི་རྗེར་གྱུར་དུང་སྐྱོང་མ། །ཁྱོད་འདྲ་འཇིག་རྟེན་གཞན་ན་མེད། །འགྲོགས་པས་ཟླ་མེད་སྐར་མ་གཅིག་ཤར་འདྲ། །དེང་འདིར་མཆིས་པའི་ལྕགས་སྒྲོག་འབུལ་མཁན་དེ། །གཏན་གྱི་གྲོགས་ཟླར་མཛད་པར་ཞུ་བ་འབུལ། །བདག་ཀྱང་རྟག་ཏུ་ཁྱོད་ཀྱི་བྲན་མོ་བྱེད། །ཅེས་ཞུས་པ་ལ། ལྷ་མོ་དེས་སྔར་ཁས་བླངས་པ་དེས་མི་བྱ་བའི་དབང་མེད་ནས་ལྷ་མོ་ན་རེ། ཁྱོར་བྱའི།་མི་དེ་གང་ན་འདུག་།སུ་ཡིན་བྱས་པ་ལ། ཁོལ་མོས་སྨྲས་པ། དེ་ནི། བདག་གི་ཞང་པོ་སྲིན་པོ་ད་ཤ་གྲི་བ་ཡིན། ཡུལ་ལངྐ་པུ་རངས་ན་འདུག་ཅེས་སྨྲས་པ་དང ། དེ་ནས་དུང་སྐྱོང་མ་དབང་མེད་དུ་སྲིན་པོའི་ཆུང་མར་སོང་ངོ ། །དེ་ནས་ལྷ་མོ་ཨུ་མས་བུ་མོ་དུང་སྐྱོང་མ་ལ་དམོད་པ་བོར་བ། ང་ཡི་བུ་མོ་རབ་ཏུ་གཅེས་པར་བྱས་ཏེ། །ལྷ་ཡི་ལོངས་སྤྱོད་མཛེས་པས་མི་བྲེལ་ཡང ། །ང་ལ་གསང་ནས་སྲིན་པོའི་ཆུང་མར་སོང ། །ཕྱིན་ཆད་བུ་མོ་ཁྱོད་ཀྱང་སྲིན་དང་འགྲོགས། །མི་ཤ་ཟ་ཞིང་མི་ལྤགས་གྱོན་པར་
337b
གྱུར། །སྲོག་གཅོད་བྱེད་ཅིང་མི་ཡི་ཐོད་ཁྲག་ཐོགས། །བོང་བུ་ཞེན་ལ་ལྷ་ཡི་ཁ་དོག་ཉམས། །སྲིན་གྱི་ཁ་དོག་ནག་ལ་འཇིགས་པར་ཤོག་།དེ་ཡི་ཁོལ་མོ་རེ་མ་ཏི་ཁྱོད་ཀྱང ། །ང་ཡི་བུ་མོ་བསླུས་ཏེ་སྲིན་ལ་བྱིན། །ཁྱོད་ཀྱང་མི་སྡུག་འཇིགས་པའི་གདོང་དུ་གྱུར། །ཚེ་རབས་ཀུན་ཏུ་ཁྱོ་དང་མ་ཕྲད་ཅིག་།ཅེས་དམོད་པ་བཅུ་གཉིས་པ་བོར་རོ། །དེ་ནས་བུ་མོ་ལ་མའི་དམོད་པས་བསྡིགས་ནས་ལྷའི་ཁ་དོག་དཀར་པོ་ཉམས་ཏེ་མཐིང་ནག་ཏུ་གྱུར། མི་ཤ་ཟ། མི་ཁྲག་འཐུང ། མི་ལྤགས་གྱོན། བོང་བུ་ཞོན། གཅེར་བུར་བུད་ནས་འདུག་གོ་།བུ་ནི། སྲིན་པོ་ཕྲུ་གུ་སེངྒེ་ཟླ་དང ། མེ་ཏོག་ཅོད་པན་དང ། གངས་ཅན་དང ། མཆེ་བ་བདུན་པ་ལ་སོགས་པ་ལྔ་བརྒྱ་སྐྱེས་ཙམ་ན་ཁྱོ་སྲིན་པོ་ད་ཤ་གྲི་བ་ཤིའོ། །དེ་ནས་བུ་མོ་དུང་སྐྱོང་མ་ཡང་ཡུགས་སའི་ཆ་ལུགས་བྱས་ཏེ་སྐྲ་མདུན་སྐྲ་ལན་བུ་གཅིག་ལ་བླས་སོ། །བྲན་མོ་ཕུར་བའི་ལྷ་ཡང་དམོད་པས་བསྡིགས་པས་སྲིན་གྱི་ཕག་རྫི་བྱེད་ཙམ་ན་ཕག་རྫི་དུན་བུ་སྲིན་བྱ་བས་མོ་ལ་དབང་མེད་དུ་ཆགས་པ་སྤྱད་དོ། །དེ་ནས་ཕུར་པ་ལྷ་ཡང་ནལ་བུ་སྦྲུམ་མོ། །དེ་ནས་དཔོན་གཡོག་གཉིས་ཀྱིས་སྲིན་པོའི་བོང་བུ་བརྐུས་པ་ཞོན་ནས་ད་ཤ་གྲི་བའི་རལ་གྲི་སྡིག་པ་ཅན་བརྐུས་པ་གཡས་ན་ཐོགས། སྲིན་པོའི་ནོར་བུ་རིན་པོ་ཆེ་བརྐུས་ནས་ནེའུ་ལེའི་རྐྱལ་བུ་\?\་སྲེས་ནས་ལག་པ་གཡོན་དུ་ཐོགས་ནས་བྲོས་སོ། །ཕྱི་ནས་སྲིན་པོའི་དམག་གིས་བསད་
338a
༄#། །ཀྱིས་དོགས་ནས་བོང་བུ་བསྐྱོན་ནས་ཁ་ཕྱིར་བསྟན་ཏེ་ཕྱི་ན་སྲིན་པོ་བྱ་ར་བྱེད་ཅིང་ཕྱིན་ནོ། །ཐ་མར་དུར་ཁྲོད་ཅིག་ཏུ་ཕྱིན་ན། སྐྱེས་པ་གཡུལ་དུ་བསད་པའི་རོ་ཞིག་དང་ཕྲད་དོ། །དེ་ནས་ཁོང་གཉིས་ཤ་དེ་བསྲེགས་ནས་ཟ་འདོད་པ་ལ། གཙུབ་ཤིང་མེད་ནས་རྒྱ་མཚོའི་འགྲམ་ན་རྡོ་སོལ་གྱི་རི་ལ་ཆར་བབ་སྟེ་མེ་འབར་བ་མཐོང་ནས་རྡོ་སོལ་མེ་བླངས་ནས་ཤ་བསྲེགས་ནས་ཟོས་སོ། །ཕྱི་ན་ཁྱི་དཀར་པོ་ཞིག་འབྲང་བ་ཡང་བསད་ནས་ཟོས་སོ། །པགས་པ་ལ་རྒྱལ་མཚན་བྱས་སོ། །དེ་ནས་ཁོལ་མོ་རེ་མ་ཏི་ལ་ནལ་ཕྲུག་སྐྱེས་སོ། །ཁོང་གཉིས་ཀྱིས་ནལ་ཕྲུག་གི་ཤ་ཡང་ཟོས་སོ། །དེ་ནས་ཇོ་མོ་བོང་བུ་ལ་ཞོན། ཁོལ་མོས་ཁ་ཁྲིད་བྱས་ནས་རྒྱ་མཚོའི་ཁར་ཕྱིན་ནས་གཤིན་རྗེ་རླུང་གི་འཁོར་ལོ་ཅན་ཞག་བདུན་བསྒོམས་པས་རླུང་ནག་འཚུབ་མ་ནག་པོ་ཞིག་དྲུང་དེར་གྲུབ་བོ། །དེ་ནས་ལྷ་མོ་དཔོན་གཡོག་གཉིས་ཀྱིས་སྣང་སྲིད་ཀྱི་ལྷ་འདྲེ་མཐུ་བོ་ཆེ་པོས་ནས། སྨོན་ལམ་བཏབ་པ། ད་ཡང་ཚེ་འདི་འཕོས་མ་ཐག་ཏུ་གསང་སྔགས་ཀྱི་གྲུབ་པ་ཐོབ་ནས་རྒྱལ་བའི་ཞལ་མཐོང་སྟེ་འདོད་པའི་ཁམས་ཀྱི་དབང་ཕྱུག་མར་ཤོག་ཅིག་།ངའི་བྲན་མོ་ཕུར་པའི་ལྷ་འདི་ཡང་དུས་ཐམས་ཅད་དུ་ངའི་འབངས་ཀ་མ་ལར་ཤོག་ཅིག་།ནོར་དུ་མི་མགོ་ལ་ལོངས་སྤྱོད་པར་ཤོག་ཅིག་།ཞོན་པ་བོང་བུ་ལ་བྱེད་ལ་ལག་ཆ་རལ་གྲི་ལ་
338b
བྱེད་བར་ཤོག་ཅིག་།ཅེས་སྨྲས་སོ། །རྒྱ་མཚོ་བསྐོར་ཞིང་རླུང་འཚུབ་མ་ལ་བཱ་ཡ་བེ་བཱ་ཡ་བེ་ཞེས་བོས་ཙམ་ན། འཚུབ་མ་བྱུང་བས་དཔོན་གཡོག་གཉིས་ཀ་རྒྱ་མཚོའི་ནང་དུ་བསྐྱུར་ཏེ་བཏང་ངོ ། །དེ་ནས་ལྷ་མོ་དུད་སྐྱོང་མ་དེ་མི་ཤ་ཟོས་པའི་མཐུ་དང ། རང་གི་སྨོན་ལམ་གྱི་དབང་གིས་རྒྱ་མཚོའི་འགྲམ་དུ་དུར་ཁྲོད་ཆེན་པོ་རོའི་ཚལ་ཞེས་བྱ་བར་གཤིན་རྗེའི་ལྷ་མཐུ་ཅན་གྱི་བུ་མོར་སྐྱེས་ཏེ། གནོད་སྦྱིན་མ་ཆེན་མོ་ལ་ཁ་དོག་མཐིང་ནག་ལ་རབ་ཏུ་འཇིགས་པ། མིག་རྩ་དམར་བ། མཆེ་བ་ཟང་ཡག་ལ་རལ་པ་ཏིང་ཟ་བང་དུ་འདུག་བ་ཞིག་ཏུ་གྱུར་ཏེ་གཤིན་རྗེ་མ་རུ་རྩེ་དང་སྦྱོར་བ་བྱས་བ་ལ་བུ་བདུད་ཁྲམ་ནག་པོ་བྱ་བ་བྱུང ། བོང་བུ་ཡང་དམར་གཝ་ལ་གཡུའི་རྣ་བ་ཅན་རླུང་གི་གཤོག་པ་ཅན་མིག་མཇུག་མ་ལ་ཡོད་པ་ཞིག་ཏུ་བྱུང་ནས་ནོར་སྐལ་བྱེད་དོ། །དེ་ནས་ཁོལ་མོ་རེ་མ་ཏི་རོ་ལངས་མ་འདི་ནི། སྐྱེ་བ་གང་བླངས་ཤེ་ན། རྒྱ་མཚོའི་ནང་དུ་བུད་མེད་ལུས་པོ་ཕྱེད་བསྐམས་ལ་ཆུ་སྲིན་གྱི་མགོ་ཅན་ཞིག་ཏུ་སྐྱེས་ཏེ། མིང་ཡང་ཀླུ་མོ་གཞོགས་བསྐམས་ཆུ་སྲིན་མགོ་ཀླུ་མོ་རེ་མ་ཏི་ཞེས་བྱ་བར་བཏགས་ནས་ཞག་དགུ་བཅུ་ན་ཚེ་འཕོས་ནས་སྐྱེ་བ་བླངས་པ་ནི། ཡུལ་དྲི་ཟའི་གྲོང་ཁྱེར་གསེར་སྡིངས་སྐྱེད་མོས་ཚལ་ཞེས་བྱ་བ་ན་དུག་ཤིང་ནག་པོ་འགྱུར་མེད་ཀྱི་རྩ་བ་ན་བདུད་རི་ཏི་འགོང་ཉག་དང ། དྲན་པ་དབང་བྱེད་གཉིས་བྱི་བྱས་པ་ལ་ཞག་དྲུག་ཅུ་རྩ་གཅིག་ན་བུ་མོ་ཞིག་སྐྱེས་
339a
༄#། །ཏེ།་ཕས་ནི། སྲིད་པ་གསུམ་གྱི་བློ་འཕྲོག་མར་བཏགས། མས་མིང་བཏགས་པ་ནི། ཡ་མཚན་འཕྲུལ་གྱི་གཤོག་པ་ཅན་དུ་བཏགས། བདུད་ཕ་མ་གཉིས་ཀྱིས་རང་གི་བུ་མོ་ལ་སྐྲ་ཉག་རེ་ལ་གསེར་དང ། བཻ་ཌཱུརྱའི་ཆུན་འཕྱང་དང ། རིན་པོ་ཆེའི་དབུ་རྒྱན་དང ། ཉི་ཟླའི་ཐོད་གདེངས་དང ། ཐོད་པའི་མགུར་ཆུ་དང ། སྦྲུལ་གྱི་གདུ་བུས་བརྒྱན་ཏེ་བྱི་བྱས་པའི་ནལ་ཕྲུག་ཡིན་པས། བདུད་ཀྱིས་རིན་པོ་ཆེ་སྣ་ལྔའི་ཁང་པའི་དབུས་སུ་ཐོད་པའི་གཞལ་ཡས་ཁང་བྱས། ཐོད་པའི་ནང་དུ་ཡང་ཐོད་འཕྲུལ་གྱི་ལྡིང་ཁང་གྲུབ། །དེའི་ནང་དུ་ཁང་པ་བདུན་བརྩེགས་ཀྱི་བདུན་ཚོགས་ཀྱི་ནང་དུ་མི་རོ་འབུམ་གྱི་ཁྲི་སྟེང་དུ་བུ་མོ་དེ་སུས་མ་མཐོང ། སུས་ཀྱང་མཚོར་བར་སྦས་ཏེ་སྒོ་སྨྲ་བོ་ལག་རིང་དང ། ནམ་གྲུ་ཁྲམ་ཐོགས་ཀྱིས་བཅད་དོ། །བདུད་ཀྱི་དམག་གི་རྒྱལ་མོ་དང ། གླིང་བཞིའི་རྒྱལ་མོ་དང ། ས་བདག་གི་རྒྱལ་མོ་དང ། དེ་རྣམས་ཀྱིས་ཁང་པ་དེ་རབ་ཏུ་སྲུང་ཞིང་འཁོད་དོ། །བརྒྱ་བྱིན་ཉོན་ཅིག་།དེའི་ཚེ་ན་ལྷ་མོ་དུང་སྐྱོང་མ་ནི། སྔོན་གྱི་ཁོལ་མོ་རེ་མ་ཏི་རོ་ལངས་མ་བདུད་ཀྱི་བུ་མོར་སྐྱེས་པ་བཀུག་ནས་ཁོལ་འདོད་པ་ལས་ཕྱག་ན་རྡོ་རྗེ་ངའི་གསང་སྔགས་བྱེ་བ་ཕྲག་བཅོ་བརྒྱད་བཟླས་པས། གསང་སྔགས་དེའི་བྱིན་གྱི་རླབས་ལས་མཁའ་འགྲོའི་ཏིང་ངེ་འཛིན་གྲུབ་པ་པོ་ལག་ན་པདྨ་ཧེ་རུ་ཀ་
339b
ཐོགས་པ་ཞིག་རང་བྱུང་བས། མ་བདུད་ཀྱི་ཡུལ་དང་ཕོ་བྲང་ཀུན་བྱིན་གྱིས་བརླབས་བའི་ཚེ་ན་བདུད་ཀྱི་རྒྱལ་པོ་དང ། བློན་པོ་དང ། འཁོར་རྣམས་དྲན་པ་མེད་པར་མྱོས་པར་གྱུར་ཏོ། །བདུད་ཀྱི་བུ་མོ་རེ་མ་ཏི་དེས་སྔོན་གྱི་ཇོ་མོ་ལྷ་མོ་དུང་སྐྱོང་མ་དྲན་པས་ཡིད་ཕྱོགས་ཏེ་དུང་སྐྱོང་མའི་སྤྱན་སྔར་འགྲོ་འདོད་པའི་བསམ་པ་དྲག་པོ་བྱུང་ནས་བདུད་རི་ཏི་འགྲོང་ཉག་གི་མཚོན་བདུད་ཀྱི་ཁྲམ་བམ་ནག་པོ་དེ་བུ་མོ་རེ་མ་ཏིས་བརྐུས་ནས་ལག་པ་གཡས་སུ་ཐོགས། མའི་མཚོན་གྱི་གྲུ་གུ་སྔོན་དམར་དེ་བརྐུས་ནས་ལག་པ་གཡོན་ན་ཐོགས་ནས་ནམ་ཕར་ཕྱེད་ཚུར་ཕྱེད་ན་ཇོ་མོ་དུང་སྐྱོང་མའི་གན་དུ་བྲོས་ཏེ་ཕྱིན་ནས་ལུས་གཅེར་བུར་འདུག་པ་ལ། ཁྱིམ་བདག་རབ་སྦྱིན་གསལ་གྱི་བ་རྫི་མོ་དམངས་རིགས་མོ་བྱ་ཧ་མུ་ཞེས་བྱ་བ་དེ་རེ་ལྡེ་ནག་པོ་གྱོན་ནས་འདུག་པ་དང་ཕྲད། མོས་དམངས་རིགས་མོ་བསད་ནས་ཤ་ཟོས། པགས་པ་རྐེད་ལ་དཀྲིས། དེའི་གོས་རེ་ལྡེ་བཤུས་ནས་བདུད་མོ་ཉིད་གྱོན་ནས་ཕྱིན་ཙམ་ན་ལམ་ཁར་སྲིན་མོ་བུམ་རྣ་ཤི་བའི་གསུར་ཁྲག་ནད་ཀྱི་རྫིང་བུ་ཞིག་ཡོད་པའི་ཁར་ཕྱིན་པ་ལས། བདུད་མོ་རེ་མ་ཏིས་སྐོམ་ནས་ཐོག་ཅིག་འཐུངས་ཙམ་ན་ཁ་རླངས་ལས་ནད་དུ་སོང་བས། མོའི་ཁ་རླངས་གར་ཕོག་པས་རིམས་ནད་བྱུང་ངོ ། །དེར་མོ་རང་ཡང་ངོ་ཚ་སྐྱེས་ནས་སྔར་གྱི་དམངས་རིགས་མོ་བསད་པའི་རླིདྒ་བུ་རྐེད་ལས་བཀྲོལ་ཏེ་ནང་
340a
༄#། །ནད་ཀྱི་རྫིང་བུས་བཀང་ནས་ཁ་སྦྲུལ་གྱིས་བཅིངས་ཏེ་མཆན་ཁུང་དུ་སྦས་ནས་སེམས་ཅན་ལ་གདུག་པར་བྱ་བར་བསམས་ཏེ་ཕྱིན་ཙམ་ན། བཙན་སྐྱ་རྡོ་རྗེ་ཟླ་བ་དང་ཕྲད་པ་ན་རེ། བདུད་མོ་ཆེན་མོ་ཆགས་པ་སྤྱད་དགོས། རྔན་པ་ཡང་སྦྱིན་ཟེར་ནས་མོ་བཟུང་ནས་ཆགས་པ་སྤྱད་པའི་ཁུ་བ་ཐིགས་པ་གཅིག་ཛམ་བུའི་གླིང་དུ་བོ་བ་ནི།་ཇོད་ཇི་དཀར་པོར་སོང ། དེར་བཙན་སྐྱ་རྡོ་རྗེ་ཟླ་བའི་ལག་ན་ཤོད་རྡེའུ་དཀར་ནག་གང་ལ་བོར་བ་ཕུང་བར་བྱེད་པ་བདུན་ཡོད་པ་ལ། མོ་ལ་བྱི་རྔན་དུ་བྱིན་པ་དེ་བླངས་ཏེ་ལག་པ་གཡོན་དུ་བཟུང་ནས་གྲོང་ཁྱེར་སྤྲང་ལྡན་ཞེས་བྱ་བར་ཕྱིན་ཙམ་ན་རྒྱལ་པོ་སེངྒེ་རྩལ་ལ་བསོད་སྙོམས་བྱས་ཏེ་སྦྲང་རྩི་ལྷུང་བཟེད་གང་ཕུལ་ནས་སྦྲང་རྩི་ལག་ཏུ་ལེན་ཀར་ཕྱག་ཚང་བས་ཧུབ་བྱས་ནས་མོ་ལ་བྱིན། མོས་བླངས་ཙམ་ན་བར་སྣང་གི་ལྷ་རྣམས་ཀྱིས། བདུད་མོ། རྒྱལ་པོའི་ཁོལ་མོའི་ལྷག་མ་དང ། ཁ་འཕྲོ་འཐུང་ངམ།་ཆེ་བ་ཉམས་སོ་ཞེས་ཟེར་ཙམ་ན། བདུད་མོ་རེ་མ་ཏི་ཁྲོས་པས་ཡིད་འཁྲུགས་ཏེ་རྒྱལ་རིགས་ལ་དེར་རིམས་ནད་བཏང་ངོ ། །དེར་རྒྱལ་པོའི་དཀོར་ཟངས་ཀྱི་དྲ་བ་དགུ་ཕུལ་ནས་རིམས་བཅད་དོ། །དེ་ནས་ནག་མོ་རེ་མ་ཏི་དེས་རྒྱ་མཚོའི་འགྲམ་དུ་དུར་ཁྲོད་ཆེན་པོ་རོའི་ཚལ་དུ་སྔོན་གྱི་ཇོ་མོ་དུང་སྐྱོང་མའི་སྤྱན་སྔར་ཕྱིན་ཏོ། །དེ་ནས་
340b
དཔོན་གཡོག་གཉིས་འགྲོགས་ནས་སྲིད་པ་གསུམ་གྱི་སེམས་ཅན་ཟད་ཅིང་སྟོངས་པར་བྱེད་པའི་དུས་དེ་ཙམ་ན། ཇོ་མོ་དུང་སྐྱོང་མའི་ཞོན་པ་སྲིན་གྱི་བོང་བུ་ག་དམར་དང ། སྲིན་མོ་རྣ་ལ་དུན་རྩེའི་རྒོད་མ་ཟངས་ཀྱི་སོ་ཅན་གཉིས་ཆགས་པ་སྤྱད་པ་ལས་དྲེའུ་མོ་སྔོན་མོ་རླུང་གི་གཤོག་པ་ཅན་ཞིག་བྱུང་བ་དེ། རྒྱུ་མའི་མཐུར་ལ་ཟངས་ཀྱི་སྒ་བསྟད་ནས་ལྷ་མོ་དུང་སྐྱོང་མའི་ཁོལ་མོ་རེ་མ་ཏི་ལ་ཞོན་པར་བྱིན། དེར་ཇོ་མོ་ནི། བོང་བུ་དམར་གཝ་ལ་ཞོན། ཁོལ་མོས་དྲེའུ་སྔོན་མོ་ལ་ཞོན། རྗེ་མོས་མི་ལྤགས་གོན། ཐོད་པ་དང་རལ་གྲི་ལག་ན་ཐོགས། ཁོལ་མོས་རེ་ལྡེ་ནག་པོ་གྱོན། ལག་ན་ཁྲམ་བམ་དང ། ཤོ་རྡེའུ་ཐོགས། དེ་ནས་ཤིན་ཏུ་མཐུ་རྩལ་ཆེ་སྟེ། སྐྱེ་བ་རྣམ་བཞིའི་སེམས་ཅན་ཡོ་ཟད་ཅིང་སྟོངས་པ་ཙམ་དུ་ཟོས་སོ། །འཇིག་རྟེན་གྱི་མཁའ་འགྲོ་མ་དཀར་མོའི་ཚོགས་དང ། སྔོན་མོ་དང ། དམར་མོ་དང ། སེར་མོའི་ཚོགས་དང ། ལྷ་མོ་དང ། བདུད་མོ་དང ། སྲིན་མོ་དང ། བསམ་གྱིས་མི་ཁྱབ་པ་མང་པོ་ཡང་ལྷ་མོ་རྗེ་ཁོལ་གྱི་འབངས་བགྱི་ཟེར་ཞིང་བྲན་དུ་འོངས་སོ། །བརྒྱ་བྱིན་ཉོན་ཅིག་།དུས་དེ་ཙམ་ན་ལྷ་མོ་དཔོན་གཡོག་གཉིས་བུད་མེད་ཀྱི་རང་བཞིན་དུ་གྱུར་པ་ཉིད་ཀྱིས་རྟག་པར་འདོད་པའི་འཁྲིག་པ་མྶྤྱད་པའི་ཆེད་དུ་ཁྱོ་དགུ་དང་སྦྱོར་བ་བྱེད་དེ། ཇེ་མོ་ལ་ཁྱོ་ལྔ་ཁོལ་མོ་ལ་ཁྱོ་བཞི་ཡོད་དེ། རྗེ་མོའི་ཁྱོ་ལྔ་ནི།
341a
༄#། །གཟའ་རཱ་ཧུ་ལ། སྲིན་པོ་སྒྲ་ལྡན། གཤིན་རྗེ་མ་རུ་རྩེ། བདུད་ཆར་ཀ་ནག་པོ། །ཀླུ་ཀུནྡཱ་ལ་དང་ལྔ། ཁོལ་མོའི་ཁྱོ་བཞི་ནི། འབྱུང་པོ་དགེ་བ་དང ། བགེགས་བི་ན་ཡ་ཀ་དང ། གནོད་སྦྱིན་ཡཀྵ་ཀ་པཱ་ལ་དང ། རླུང་བ་ཡུ་བེ་དང་བཞིའོ། །དེ་ལྟར་དཔོན་གཡོག་གཉིས་ཀྱི་ཁྱོ་དགུ་ནི། ཉིན་པར་ནི། མཆན་ཁུང་གཡོན་དུ་བསྐུངས་ཤིང་སྦེད་ལ། མཚན་མོ་དུར་ཁྲོད་དུ་བསྐུངས་ཤིང་སྦྱོར་བ་བྱེད་དོ། །བརྒྱ་བྱིན་ཉོན་ཅིག་།དེ་ནས་ལྷའི་བུ་མོ་ལ་སྔོན་གྱི་ལས་འཕྲོས་འབྲེལ་ཞིང་དགེ་བ་སྤྱད་པའི་ཤུགས་ཀྱིས་བྱང་ཆུབ་ཀྱི་ཤིང་དྲུང་ན་བཅོམ་ལྡན་འདས་བཞུགས་པའི་སྤྱན་སྔར་ཕྱིན་ནས་ལྷ་མོ་དེས་བྱང་ཆུབ་མཆོག་ཏུ་སེམས་བསྐྱེད་དེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་རང་གི་སྙིང་པོ་འདི་ཕུལ་ལོ། །ཏདྱ་ཐཱ། ཨོཾ་རུ་རུ་བེ་ཏིསྟ་བ་དོ་སི། རུ་རུ་རོ་རུ་བེསྟི་སྟ་བ་དོ་སི། ཙ་པ་ལ་ཨ་ཤུགྨེ་ཧཱུཾ་བྷྱོ་ཛ། ཞེས་ཕུལ་ལོ། །ཁོལ་མོས་རང་གི་སྙིང་པོ་ཕུལ་བ། ཏདྱ་ཐཱ། ཨོཾ་རུ་རུ་བེ་རོ་རུ་ཧཱུཾ་ཏིསྟ་ཏོ་སི། རགྨོ་ཙ་ཏི་ཁ་རགྨ་དུན་བྷྱོ། མ་མ་ཏྲག་རཀྵ་ཁ་མུནྟྲ་བ་ཏྲ་རཀྵ་ཙི་ཏ་ཁ་རགྨ་དུཾ་ཧཱུཾ་བྷྱོ། །རུ་ལུ་ས་མ་ཡ་ཕྲ་མ་མ་ཧཱ་སྟཾ་ཕྲ་བྷྱོ། །ཞེས་ཕུལ་ལོ། །དེ་ནས་བྱང་ཆུབ་མཆོག་ཏུ་སེམས་བསྐྱེད་ནས་ལྷ་མོ་དབོན་གཡོག་གཉིས་ཀྱིས་ཨ་སུ་རའི་བྲག་ཕུག་ཏུ་ཕྱིན་པ་ལས། བྲམ་ཟེ་མཆོག་སྲེད་
341b
སྒྲུབ་པ་བྱེད་པ་དང་ཕྲད་དོ། །ལྷ་མོས་ཁྱོད་འདི་ན་ཅི་བྱེད་བྱས་པ་ལས། བྲམ་ཟེ་མཆོག་སྲེད་ཀྱིས་སྨྲས་པ། སྔོན་ཁམས་འདི་ཉིད་ན་དགེ་སློང་བརྟན་པའི་སྡེ་དང ། དགེ་སློང་མ་དར་རི་སྡེ་གཉིས་ཁྲིམས་ཉམས་ཏེ་རྒྱལ་པོའི་ཆད་པས་བསད་དོ། །དེ་སྐྱེ་བ་འཕོས་པ་ནི། བདུད་ལཾ་ང་གེའུ་རི་དང ། རོ་ཤ་ཁ་འདར་གཉིས་སུ་གྱུར་ཏེ་ཡུལ་མི་ཅི་ཡོད་ཟད་པར་ཟོས་ནས་དེ་ནས་ང་ལ་ཟ་རེས་བབ་པས། ང་ནི། བདུད་འདུལ་བའི་ཕྱིར་ཡུམ་ཨེ་ཀ་ཛ་ཊི་རལ་གཅིག་མ་སྒྲུབ་བོ་ཞེས་ཟེར་རོ། །དུང་སྐྱོང་མ་ན་རེ། འོ་ན་ངེད་དཔོན་གཡོག་ཀྱང་བསྒྲུབ་པར་བྱན་ཡོན་ཏན་དེ་ལྟ་བུ་ཡོད་དམ་བྱས་པ་ན། བྲམ་ཟེ་ན་རེ། ཁྱེད་གཉིས་དངོས་གྲུབ་ཅི་འདོད་པ་ཡིན། ལྷ་མོ་ན་རེ། ངེད་གཉིས་འདོད་པའི་ཁམས་ཀྱི་དབང་མོ་ཆེར་གྱུར་ནས་སངས་རྒྱས་ཀྱི་བསྟན་པ་སྲུང་བའི་གྲུབ་པ་འདོད་བྱས་པ་ལ། འོ་ན་གྲུབ་པར་བྱའོ་ཞེས་ཟེར་ནས་བྲམ་ཟེ་དང་ལྷ་མོ་དཔོན་གཡོག་སྒྲུབ་པ་བྱས་པས་ཡུམ་ཨེ་ཀ་ཛ་ཊི་ཞལ་མཐོང་ནས་གྲུབ་པ་ཐོབ་བོ། །ཡུམ་ཨེ་ཀ་ཛ་ཊིས་ལྷ་མོ་དུང་སྐྱོང་མའི་མིང་ནི། དཔལ་ལྷ་མོ་ནག་མོ་མཧཱ་ཀ་ལི་ཞེས་བཏགས་སོ། །ཁོལ་མོའི་མིང་ནི། ཡཀྴ་རེ་མ་ཏི་ཞེས་བྱ་བར་བཏགས་སོ། །འདོད་ཁམས་འདུལ་བའི་དབང་མོ་ཆེར་དབང་བསྐུར་རོ། །མཧཱ་ཀ་ལིས་ཀྱང་ཆོས་སྐྱོང་ཞིང་བསྟན་པ་སྲུང་བར་ཁས་བླངས་སོ། །རང་གི་སྙིང་པོ་འདི་ཕུལ་ལོ། །
342a
༄#། །ོཾ་རུ་རུ་བེ་ཏི་སྟ་བ་དོ་སི། རུ་རུ་རོ་རུ་བེ་ཏིསྟ་བ་དོ་སི། ཙ་བ་ལ་ཨ་ཤུགྨེ་བྷྱོ་ཛ། རེ་མ་ཏིས་ཀྱང ། ོཾ་རུ་རུ་རོ་རུ་བ་ཏིསྟ་བ་དོ་སི། རཀྨོ་ཙཾ་ཏ་ཁ་རཀྨ་ཧཱུཾ་བྷྱོ། མ་མ་ཏྲག་རཀྴ་ཁ་མུནྟ་བ་ཏྲ་ཏྲག་རཀྴ་ཙིཏ་ཁ་རགྨ་རེ་མ་ཏི་ས་མ་ཡ་ཕྲ་མ་ཡ་ཕྲ་མ་མ་ཧཱ་ཏེ་ཕྲ་དུན་བྷྱོ། །ཛ་ཛ་རུ་ལུ་བྷྱོ། །ཞེས་ཕུལ་ལོ། །བདུད་ལཾ་ང་གེའུ་རི་དང ། རོ་ཤ་ཁ་འདར་བསྒྲལ་ལོ། །དེ་ནས་སའི་ལྷ་མོ་བརྟན་མས་ཀྱང་ནམ་གྲུ་མཆེད་བརྒྱད་ཀྱང་འབངས་སུ་ཕུལ་ལོ། །སྲིན་ཡུལ་དུ་དམག་དྲངས་པས་སྲིན་པོ་ཡཀྴ་ཀོ་རེ་བསྒྲལ་ལོ། །བརྒྱ་བྱིན་ཉོན་ཅིག་།དེ་ནས་འཕགས་པ་སྤྱན་རས་གཟིགས་ཀྱིས་དཔལ་རྟ་མགྲིན་དུ་སྤྲུལ་པའི་སྒྲུབ་པ་བྱས་ཏེ་རྟ་མགྲིན་ཞལ་མཐོང་ཞིང་གསང་བའི་གཟུངས་མ་བྱས་ཏེ།་རྗེ་མོའི་མིང་དཔལ་ལྷ་མོ་ནག་མོར་བཏགས་སོ། །ཁོལ་མོའི་མིང་ནི། རྡོ་རྗེ་གློག་མ་སྲིན་དུ་མིང་བཏགས་སོ། །དེས་ཕྱག་རྒྱ་ཆེན་པོའི་དབང་བསྐུར་རོ། །ལས་ཀྱི་ལྷར་བྱིན་གྱིས་བརླབས་སོ། །དེའི་ཚེ་ན་དཔལ་ལྷ་མོ་ནག་མོས་དཔལ་རྟ་མགྲིན་ལ་སྙིང་པོ་མདོངས་གསོལ་དུ་ཕུལ་ལོ། །བསྟན་པ་སྲུང་བར་ཁས་བླངས་སོ། །དེ་ནས་སྔོན་གྱི་ཨུ་མ་དེ་བ་དང ། རྣ་ལ་རྩེ་གཉིས་ཀྱང་སྔོན་གྱི་བུ་མོ་གཉིས་ལ་སྲིན་ལག་རྩེ་ལ་ནུ་ཞོ་བླུགས་པས་བྲོས་ནས་དྲེད་མོའི་རལ་པས་གཡབ་མོས་འབོད་དེ། བུ་མོ་གཉིས་མའི་དྲུང་
342b
དུ་ཕྱིན་ཙམ་ན་དབང་བསྐུར་ཞིང་དམ་བསྒྲགས། བསྟན་པ་སྲུང་བར་དབང་བྱིན་ཏོ། །འཁོར་ལོས་བསྒྱུར་བའི་རྒྱལ་པོས་ཀྱང་རང་གི་རྩ་དང ། ཁྲག་དང ། ཁུ་བའི་མཆོད་པ་བྱས་ནས་ལྷ་དང་མིའི་རྒྱལ་སྲིད་ཕུལ་ནས་རྨ་བྱ་རིན་པོ་ཆེའི་གཤོག་པ་ཅན་སྤྱི་བོ་ན་ནོར་བུ་རིན་པོ་ཆེ་ཡོད་པ་ཇོ་མོ་ལ་ནོར་སྐལ་དུ་བྱིན་ནོ། །བྱ་དེ་མོ་ནག་མོ་སྤྱི་བོ་ན་ནོར་བུ་རིན་པོ་ཆེ་ཡོད་པ་ཞིག་ཁོལ་མོ་ལ་ནོར་སྐལ་དུ་བྱིན་ནས་ལྷ་མོ་རྗེ་ཁོལ་གཉིས་འཁོར་ལོས་བསྒྱུར་བའི་རྒྱལ་པོས་བྱིན་པའི་རྨ་བྱ་དང ། དེ་མོ་ནག་མོ་གཉིས་གཏན་གྱི་ནོར་སྐལ་བྱེད་ཅིང་ཆགས། དེ་ནས་དཔལ་ལྷ་མོ་ནི། གསང་བའི་གནས་དུར་ཁྲོད་རོ་ཁང་ནག་པོའི་དབུས་མ་རུ་རྩེའི་སྒོ་འགྲམ་དུ་དཔལ་ཕྱག་ན་རྡོ་རྗེའི་ཧེ་རུ་ཀའི་དངོས་གྲུབ་སྒྲུབ་པའི་ཚེ་དཔལ་ཕྱག་ན་རྡོ་རྗེའི་དངོས་གྲུབ་གྲུབ་སྟེ། དཔལ་ཕྱག་ན་རྡོ་རྗེས་ལྷ་མོ་དཔོན་གཡོག་ལ་སྤྱི་བོའི་གཙུག་ཏུ་དཔལ་རྟ་མགྲིན་གསང་བའི་དབང་བསྐུར། ལུས་ངག་ཡིད་གསུམ་ལ་ཁྲག་འཐུང་ཧེ་རུ་ཀའི་དབང་བསྐུར། ཐུགས་ཀྱི་དཔལ་བེའུར་རིགས་ལྔ་སངས་རྒྱས་ཀྱི་དབང་བསྐུར། སྐུ་སྟོད་ཀྱི་རྒྱན་དུ་ཕྲ་མེན་མ་བཅུ་དྲུག་གི་དབང་བསྐུར། ལྗགས་ཀྱི་དཀར་དམར་ལ་ལྕགས་ཀྱུ་གསང་བའི་དབང་བསྐུར་རོ། །གནད་མདོ་ཆེན་དྲུག་ཏུ་ཚོམ་བུ་གསང་བའི་དབང་བསྐུར་རོ། །གསང་བ་པདྨ་ལ་ཐིག་ལེ་ཡེ་ཤེས་ཤར་བའི་དབང་བསྐུར། རྡོ་རྗེ་ཕོ་ཉ་
343a
༄#། །མོ་དྲུག་ཅུ་རྩ་བཞི་འཁོར་དུ་དབང་བསྐུར། པདྨ་གར་གྱི་དབང་ཕྱུག་ནི། སྤྲུལ་པ་དང་ཡང་སྤྲུལ་དུ་དབང་བསྐུར། དེའི་ཚེ་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །དེ་ནས་དཔལ་ཕྱག་ན་རྡོ་རྗེས་ཇོ་མོའི་མིང་ནི། དཔལ་མཧཱ་ཀ་ལི་ཞེས་བཏགས་སོ། །ཁོལ་མོའི་མིང་ནི། གནོད་སྦྱིན་ཤན་པ་ནག་མོ་རེ་མ་ཏི་ཞེས་བཏགས་སོ། །སངས་རྒྱས་ཀྱི་བསྟན་པ་སྲུང་བར་གཉེར་གཏད་དོ། །དེ་ནས་དཔལ་ཕྱག་ན་རྡོ་རྗེ་ཉིད་ལ་དཔལ་ལྷ་མོས་རང་གི་སྙིང་པོ་ཕུལ་ཏེ་སངས་རྒྱས་ཀྱི་བསྟན་པ་དུས་རྟག་ཏུ་སྲུང་བར་ཁས་བླངས་སོ། །དེ་ནས་དཔལ་ལྷ་མོ་དེ་མཐུ་དང ། རྫུ་འཕྲུལ་བསམ་གྱིས་མི་ཁྱབ་པར་གྱུར་ཏོ། །འདོད་པའི་ཁམས་ཀྱི་དབང་ཕྱུག་མར་གྱུར་པའི་ཚེ་ལྷ་ཚངས་པས་ཉི་མའི་རྒྱན་ཕུལ། ཁྱབ་འཇུག་གིས་ཟླ་བའི་རྒྱན་ཕུལ། རྣམ་ཐོས་སྲས་ཀྱིས་སེངྒེའི་རྣ་ཆ་ཕུལ། ནམ་མཁའི་ལྷ་བྲན་རྣམས་ཀྱིས་དྲིལ་བུའི་རྒྱན་ཕུལ། སྲིན་པོ་དང་ཤ་ཟ་རྣམས་ཀྱིས་ཐོད་ཕྲེང་དང ། ཁྲག་དང ། ཞག་གི་ཐིག་ལེ་ཕུལ་ལོ། །ཀླུ་དགའ་བོས་སྤྲུལ་གྱི་གདེངས་ཀ་ཕུལ། ལྷ་མོ་དེ་སྲིད་པ་གསུམ་ན་འགྲན་པའི་ཟླ་མེད་པར་གྱུར་ཏོ། །དེ་ནས་བརྒྱ་ཕྱིན་གྱིས་གསོལ་པ། ཀྱེ་བཅོམ་ལྡན་འདས་གསང་བའི་བདག་པོ། །འདོད་པའི་ཁམས་ཀྱི་དབང་ཕྱུག་མ་འདི་དང་པོ་ལྷའི་བུ་མོར་གྱུར་པ་
343b
དང ། བར་དུ་སྲིན་པོའི་ཆུང་མར་གྱུར་པ་དང ། ད་ལྟར་འདོད་པའི་ཁམས་ཀྱི་དབང་ཕྱུག་མར་གྱུར་པ་འདི། སྔོན་གྱི་རྐྱེན་ཅི་ལས་གྲུབ་ལགས། ཞེས་གསོལ་པ་དང ། གསང་བའི་བདག་པོས་བཀའ་སྩལ་བ། བརྒྱ་བྱིན་ཉོན་ཅིག་།ད་ལྟར་ལྷ་མོ་ནག་མོ་འདི་སྔོན་སངས་རྒྱས་འཁོར་བ་འཇིག་གི་བསྟན་པ་ལ་ལྷ་མོ་འོད་ཟེར་ཅན་དུ་གྱུར་ཏེ་དགེ་བ་བཅུ་ཤ་སྟག་སྤྱད་དོ། །དེ་ནས་སངས་རྒྱས་གསེར་ཐུབ་ཀྱི་བསྟན་པ་ལ་ལྷ་མོ་དཔལ་བསྟན་མ་ཞེས་བྱ་བར་གྱུར་ཏེ་ཞེ་སྡང་རང་ཁ་མར་སྤྱད་དོ། །དེ་ནས་སངས་རྒྱས་འོད་སྲུང་གི་བསྟན་པ་ལ་ལྷ་མོ་མཉྫུ་ཞེས་བྱ་བར་གྱུར་ཏེ། དུས་དེ་ཙམ་ན་ཤཱཀྱ་ཐུབ་པ་ནི། དགེ་སློང་དབང་ཕྱུག་དཔའ་བོ་ཞེས་བྱ་བར་གྲགས་སོ། །དགེ་སློང་དེ་ལ་ལྷ་མོ་མཉྫུས་མཆོད་གནས་བྱས་ཤིང་སྨོན་ལམ་གཅིག་ཏུ་བཏབ་བོ། །བརྒྱ་བྱིན་ཉོན་ཅིག་།དེ་ད་ལྟ་ན་ནི། ལྷ་མོ་འདི་ལ་སངས་རྒྱས་གསུམ་གྱི་རིང་གི་རྣམ་པར་སྨིན་པ་ཤཱཀྱ་ཐུབ་པའི་བསྟན་པ་ལ་དུས་གཅིག་ཏུ་སྨིན་ནོ། །ལྷ་མོ་འདི་དང་པོར་མཧཱ་དེ་བའི་བུ་མོར་སྐྱེས་པ་ནི། དང་པོར་དགེ་བས་སྤྱད་པའི་མཐུའོ། །བར་དུ་སྲིན་པོའི་ཆུང་མར་གྱུར་ནས་རང་ལྕེབ་པ་ནི། ཞེ་སྡང་སྤྱད་པའོ། །ཐ་མར་ད་ལྟར་འདོད་པའི་ཁམས་ཀྱི་དབང་ཕྱུག་མར་གྱུར་པ་ནི། སངས་རྒྱས་ཐམས་ཅད་ཀྱིས་དབང་བསྐུར་ནས་ཤཱཀྱ་ཐུབ་པའི་བསྟན་པ་སྲུང་བ་ནི། སྔོན་ཤཱཀྱ་
344a
༄#། །ཐུབ་པ་ལ་སྡིག་བཤགས་བྱས་ཀྱི་སྨོན་ལམ་བཏབ་བོ། །ཁོལ་མོ་རེ་མ་ཏི་སྔགས་ཀྱི་བསོད་ནམས་ལས་གྲུབ་པའོ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་གསང་བའི་བདག་པོ་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་མགོན་པོ་གསང་བའི་བདག་།མ་འོངས་ཕྱི་མའི་སེམས་ཅན་རྣམས། །མཁའ་འགྲོ་རྣལ་འབྱོར་རབ་སྦྲུབ་\?\པའི། །སློབ་དཔོན་སློབ་མའི་མཚན་མའི་རྒྱུད། །གང་ཡིན་བདག་གིས་ཉན་པར་འཚལ། །ཞེས་ཞུས་པའི་ཚེ་གསང་བའི་བདག་པོས་བཀའ་སྩལ་པ། དཔལ་ལྡན་ལྷ་མོ་རྡོ་རྗེ་མཁའ་འགྲོ་མ། །ཐུན་མོང་མ་ཡིན་ཀུན་གྱི་བྱ་བ་མིན། །དེ་ཡང་སློབ་དཔོན་མཚན་ཉིད་བཤད། །སློབ་དཔོན་ཆོས་ལ་རབ་འདུད་པ། །ཚད་མེད་བཞིར་ལྡན་སྙིང་རྗེ་ཅན། །ཕྱི་ནང་གསང་བའི་དབང་ཐོབ་ནས། །དམ་ཚིག་སྲོག་བཞིན་འཛིན་བྱེད་ཅིང ། །བདེན་པ་གཉིས་རྟོགས་ལྟ་བ་ཅན། །སྔགས་དང་ཕྱག་རྒྱ་མི་སྤོང་ཞིང ། །རྟག་ཏུ་ཕྱག་རྒྱ་ཆེ་ལ་གནས། །སེམས་ཅན་དོན་བྱེད་མན་ངག་ལྡན། །དེ་ནི་སློབ་དཔོན་མཚན་ཉིད་དེ། །སློབ་མ་དུལ་ལ་དད་པ་ཅན། །བླ་མའི་ཞབས་ལ་རབ་འདུད་ཅིང ། །དད་དང་
344b
གཏོང་བོད་སྙིང་རྗེ་ཅན། །འདུལ་དང་སྡོམ་པ་དམ་ཚིག་འཛིན། །ལྷ་དང་སློབ་དཔོན་རྟག་ཏུ་བཅང ། །གསང་སྔགས་འཛིན་པའི་སྣོད་ལྡན་ལ། །སློབ་མར་བྱ་བ་ང་ཡིས་བཤད། ། དཔལ་མཁའ་འགྲོ་མ་མེ་ལྕེ་འབར་བའི་རྒྱུད་ལས། སློབ་དཔོན་དང་སློབ་མའི་ཚད་བསྟན་པའི་ལེའུ་སྟེ་གཉིས་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །རྡོ་རྗེ་སེམས་དཔའ་སེམས་དཔའ་ཆེ། །དུས་མཐའི་རྣལ་འབྱོར་བསྐྱབ་སླད་དུ། །རྡོ་རྗེ་གསང་བའི་མཁའ་འགྲོ་མའི། ། ལྟ་བ་དམ་པ་བདག་ཉན་འཚལ། །ཞེས་ཞུས་པའི་ཚེ་དཔལ་ཕྱག་ན་རྡོ་རྗེས་བཀའ་སྩལ་པ། བདག་དང་རྡོ་རྗེ་མཁའ་འགྲོ་མའི། །གདོད་ནས་མ་སྐྱེས་གཟུང་འཛིན་ཡུལ་དང་བྲལ། །ང་དང་བདག་འཛིན་མཚན་མའི་རྟོག་པ་བཅོམ། །དོན་དམ་ཀུན་རྫོབ་སྐྱེ་བ་མེད་པའི་གཞི། །གཉིས་མེད་ཆོས་ཀྱི་དབྱིངས་སུ་དབྱེར་མེད་ཅིང ། །སྟོང་ཉིད་ཆོས་སྐུ་ནམ་མཁའ་ཡེ་ཤེས་ལྔ། །སྤྲུལ་པའི་ཕྱག་རྒྱ་ལྷ་དང་ལྷ་མོའི་མཚན་མར་སྣང ། །མཁའ་ལ་འཇའ་འདྲ་རང་བཞིན་ག་ལ་ཡོད། །སྙིང་རྗེའི་དབང་གིས་འགྲོ་དོན་བྱེད་པ་ན། །མདོར་ན་སངས་རྒྱས་སྤྲུལ་པ་ཡིན་པ་སྟེ། །ཁོལ་མོ་བྱང་ཆུབ་སེམས་དཔའི་སྤྲུལ་པའོ། །མཚན་མའི་སྲིན་མོ་བདུད་མོང་\?\་བལྟ་མི་བྱ། །མཁའ་འགྲོ་མ་མེ་ལྕེ་འབར་བའི་རྒྱུད་ལས།
345a
༄#། །ལྟ་བ་བསྟན་པའི་ལེའུ་སྟེ་གསུམ་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །གསང་བའི་བདག་པོ་ཡེ་ནས་ཐུགས་རྗེ་ཅན། །རྡོ་རྗེ་མཁའ་འགྲོའི་དངོས་གྲུབ་བསྒྲུབ་པའི་ཕྱིར། །དཀྱིལ་འཁོར་རྣམ་པ་གསུམ་གྱི་རྒྱུད་བཤད་འཚལ། །ཞེས་ཞུས་པའི་ཚེ་ཕྱག་ན་རྡོ་རྗེས་བཀའ་སྩལ་པ། བརྒྱ་བྱིན་ལ་སོགས་འཁོར་རྣམས་རབ་ཏུ་ཉོན། །དཀྱིལ་འཁོར་རྣམ་གསུམ་མཚན་མའི་ཕྱག་རྒྱ་ནི། །རང་བཞིན་དཀྱིལ་འཁོར་བྱང་ཤར་རི་རབ་རྩེ། ། ཏིང་འཛིན་དཀྱིལ་འཁོར་རྣལ་འབྱོར་སེམས་ཀྱི་ཡུལ། །གཟུགས་བརྙན་དཀྱིལ་འཁོར་གནས་བཞིའི་ས་ལ་བྱ། །ཚོན་རྩི་མི་རུས་ལྡོང་རོས་རམས་དང་སྐེགས། །མཐིང་ནག་གྲུ་བཞིའི་དབུས་ནི་ཨེ་གྲུ་གསུམ། །དབུས་སུ་གཙོ་བོ་ཕྱག་ན་རྡོ་རྗེ་སྟེ། །དེ་ཡི་གཡས་སུ་ལྷ་མོ་ནག་མོ་སྟེ། །གཡོན་དུ་མ་མོའི་ཏིང་འཛིན་སྒྲུབ་པ་མོ། །གཙོ་མོའི་མདུན་དུ་ཁོལ་མོ་རེ་མ་ཏི། །དེ་ཡི་ཕྱི་རིམ་སྲིད་པའི་མ་མོ་དང ། །སྟག་སྤྱང་བྱ་རྒོད་སེངྒེ་ཁྱུང་གིས་བསྐོར། །ཕྱིར་རིམ་ཐོད་ཕྲེང་མེ་རི་ཀེང་རུས་བྲི། །ཙ་ཀ་ལི་འམ་ཡིག་འབྲུ་ཕྱག་མཚན་བྲི། །མཁའ་འགྲོ་མ་མེ་ལྕེ་འབར་བའི་རྒྱུད་ལས། དཀྱིལ་འཁོར་བསྟན་པའི་ལེའུ་སྟེ་བཞི་པའོ།། །།དེ་ནས་ལྷའི་དབང་པོ་བརྒྱ་བྱིན་
345b
གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་འཇིགས་བྱེད་མཆོག་འགྲོ་ཀུན་འདུལ་བའི་གཙོ། །རྡོ་རྗེ་མཁའ་འགྲོ་ནག་མོ་དམ་པ་ཡིན། །དངོས་གྲུབ་བསྒྲུབ་པའི་རྫས་རྣམས་གང་ལགས་པ། །གསང་བའི་བདག་པོ་བདག་ལ་བཤད་དུ་གསོལ། །ཞེས་ཞུས་པ་དང ། ཕྱག་ན་རྡོ་རྗེས་བཀའ་སྩལ་པ། རྡོ་རྗེ་མཁའ་འགྲོའི་དངོས་གྲུབ་འདོད་པའི་མིས། །རྫས་རྣམས་མེད་ན་དངོས་གྲུབ་མེ་ཐོབ་སྟེ། །རྨོངས་པས་ས་བོན་གཙུབ་ཤིང་གཙུབ་སྟན་འདྲ། །ཀུན་ཀ་ཚང་ན་དངོས་གྲུབ་མཚན་མ་སྟེར། །མཁའ་འགྲོ་མ་ལ་རྫས་ནི་རྣམ་པ་བདུན། །འབོད་པའི་རྫས་དང་མ་མོ་བསྟེན་རྫས་དང ། །མཆོད་པའི་རྫས་དང་དམ་ཚིག་བསྲེ་བའི་རྫས། །བསྐུལ་བའི་རྫས་དང་མཚན་མ་དབབ་པའི་རྫས། །ཐ་མར་གནད་ལ་འབེབས་ཤིང་བཟློག་པའི་རྫས། །བདུན་པོ་འདི་ཚང་གྲུབ་པའི་མཚན་མ་འབྱུང ། །གཙོ་བོ་ཕྱག་ན་རྡོ་རྗེའི་དམ་རྫས་ནི། །གོ་རོ་ཙ་ན་གཙོ་བོ་འབོད་པའི་རྫས། །གཙོ་བོའི་རྟེན་ནི་སེང་ལྡེང་མི་རུས་ཕུར། །གསལ་བ་ལྔ་དང་བདུད་རྩིས་གཙོ་བོ་མཆོད། །དམ་ཚིག་བཅུ་ཡིས་རྡོ་རྗེ་ས་ནི་མཆོད། །གུ་གུལ་ནག་པོ་ཡུངས་ནག་ཏིལ་གྱིས་བསྐུ། །སྤོས་དད་ལྕེ་པོག་མི་ཚིལ་མཚན་མ་འབེབས། །གཙོ་བོ་གནད་ལ་འབེབས་པ་ཨ་མྲྀ་ཏ། །དཔལ་ལྡན་ལྷ་མོ་ནག་མོའི་འབོད་རྫས་ནི། །གཡབ་དར་དང་
346a
༄#། །ནི་ཧསྟ་མི་ཚིལ་དང ། །ཅོང་ཞུན་སྤོས་ལྔས་བསྲེགས་ལ་འབོད། །ལྷ་མོའི་རྟེན་ནི་བུ་མོ་གཙང་མ་དང ། །རྒྱ་མཚོར་ཤི་བའི་བུད་མེད་ཐོད་པ་གཉིས། །མཁར་དུ་བརྩིགས་པ་དཀྱིལ་འཁོར་དབུས་སུ་ཁ་སྤྲད་ལ། །མི་བསད་མཚོན་གྱི་རལ་གྲི་སོར་བརྒྱད་པ། །ཡུ་བ་མ་བྲིས་དཀྱིལ་འཁོར་དབུས་སུ་གཟུགས།། རྨ་བྱ་སེངྒེ་གཡང་གཞི་གོ་ཟུང་ནག་པའོ། །རྗེ་མོ་ལྷ་མོ་ནག་མོའི་དམ་རྫས་ནི། །དགེ་སློང་ཤ་དང་མི་རོ་སེངྒེའི་སྙིང ། །གྲི་རྒོད་ཤ་དང་དབང་པོ་རྣམ་པ་ལྔ། །རུ་ཏྲ་ནག་པོའི་སྙིང་དང་བདུད་རྩི་ལྔ། །སྨན་མའི་ཁྲག་དང་ཤ་ཁྲག་སྣ་ཚོགས་དང ། །ཕྱེ་མ་ལྔ་ཡིས་གཏོར་བས་གུར་གུམ་བརྫི། །པདྨའི་རཀྟས་བྱུགས་ལ་རྒྱུན་གཏོར་བྱ། །ལྷ་མོ་ནག་མོ་འདི་དང་དམ་ཚིག་བསྲེ་བའི་རྫས། །རུ་ཧི་རྡོ་རྗེ་པདྨ་མི་དེ་སྔགས། །བསྐུལ་རྫས་མི་ཡི་ཚིལ་དང་གུ་གུལ་བསྲེག་།མཚན་མ་འབེབས་པ་བུ་མོ་གཙང་མའོ། །གནད་ལ་འབེབས་ཤིང་བཟློག་པ་ཡུགས་སའི་རྐང ། །ཁོལ་མོ་རེ་མ་ཏི་ཡི་འབོད་རྫས་ནི། །དྲེད་མོའི་རལ་པས་གཡབ་ཅིང་སྲིན་ལག་བསྟན། །གུ་གུལ་དང་ནི་མི་ཚིལ་གསུར་གྱིས་འབོད། །རེ་མ་ཏི་ཡི་རྟེན་དུ་ལུག་ནག་གམ། །དེ་མོ་ནག་མོ་དྲི་མོའི་ཐོད་པའོ། །ཁོལ་མོ་རེ་མ་ཏི་ཡི་མཆོད་རྫས་ནི། །བུམ་པ་གང་བའི་ཁྲག་དང་ཨ་མྲྀ་ཏ། །ནལ་བུའི་ཤ་དང་མི་
346b
ཤ་ཆང་ཕུད་དོ། །དམ་ཚིག་བསྲེ་ཞིང་རྟག་ཏུ་མཆོད་པའི་རྫས། །རུ་ཧི་རྡོ་རྗེ་པདྨ་དག་གི་ཤིས། །བསྐུལ་རྫས་གུ་གུལ་ནག་དང་ཅོང་ཟི་འོ། །མཚན་མ་འབེབས་པ་བུ་མོ་གཅང་མ་འོ། །གནད་ལ་འབེབས་ཤིང་བཟློག་རྫས་དྲེའུ་ཡི་རྐང ། །འདི་རྣམས་གཙང་ཞིང་མཉམས་ཚོགས་གྱུར་ན། །རྡོ་རྗེ་མཁའ་འགྲོ་མ་ཡི་ཚོགས་རྣམས་ནི། །བུང་པས་ཨུ་དུམ་ཝར་མཐོང་བ་ལྟར། །དགའ་བ་སྐྱེས་ནས་མི་ལ་དངོས་གྲུབ་སྟེར། །དེ་བས་ནན་ཏན་བསྐྱེད་ལ་བརྩོན་པར་བྱ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། དཔོན་གཡོག་གི་དམ་རྫས་བསྟན་པའི་ལེའུ་སྟེ་ལྔ་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་གསང་བདག་ཕྱག་ན་རྡོ་རྗེ་འདུལ་བའི་གཙོ། །སྒྲུབ་པའི་རྟེན་གྱི་རྡོ་རྗེ་མཁའ་འགྲོ་སྐུ། །ཐང་ག་བྲི་བའི་ནན་ཏན་འབྲི་བར་འཚལ། །ཞེས་ཞུས་པའི་ཚེ་གསང་བའི་བདག་པོས་བཀའ་སྩལ་པ། མཁའ་འགྲོའི་རྟེན་གྱི་སྐུ་གཟུགས་ནི། །མིས་མ་འཕྲིགས་པར་དུར་ཁྲོད་འགྲོ། །དང་པོ་ཕྱག་ན་རྡོ་རྗེ་དང ། །ལྷ་མོའི་བསྙེན་པ་འབུམ་འབུམ་བཟླས། །དེ་ལ་སྦྱིན་སྲེག་གཏོར་མ་དབུལ། །རི་མོ་མཁན་ལ་དབང་བསྐུར་རོ། །དམ་ཚིག་རབ་ཏུ་སྦྱིན་པར་བྱ། །དེ་ནས་བུད་མེད་ཞབས་མ་དང ། །རོ་དཀྲིས་དག་གི་རས་དག་ནི། །རོ་བསྲེགས་མགལ་བའི་ཤིང་གིས་ཀྱང་།།
347a
༄#། །བྲི་བའི་ཚོན་རྩི་རྣམ་པ་ལྔ། །དཔའ་བོ་འབྲུ་ལྔའི་འཕྲོ་འདུ་ལས། །རྒྱལ་བ་རིགས་ལྔར་བྱིན་བརླབས་ལ། །དབུས་སུ་ཕྱག་ན་རྡོ་རྗེ་བྲི། །མདུན་དུ་ལྷ་མོ་ནག་མོ་ནི། །བོང་ཞོན་རལ་གྲི་ཐོགས་པ་བྲི། །གཡོན་དུ་ཁོལ་མོ་རེ་མ་ཏི། །དྲེའུ་ཞོན་ཁྲམ་བམ་ཐོགས་པ་འོ། །གཡས་སུ་བྲམ་ཟེ་མཆོག་སྲེད་ནི། །མགྲིན་པ་སྨ་ར་དཀར་ལ་རིང ། །ཁྲི་སྙན་སྟན་ལ་ལོང་ཕྲེང་འཛིན། །རྨ་བྱ་ནེའུ་ལེ་ཐོགས་པ་འོ། །དེ་ཡི་གཡོན་དུ་བདག་ཉིད་ནི། །ཁྲི་སྙའི་སྟན་ལ་ལོང་ཕྲེང་འཛིན། །རྨ་བྱའི་སྤུ་དང་ནེའུ་ལེ་ཐོགས། །དེ་ནས་རང་གི་སྲིན་ཁྲག་གིས། །སྐུ་གཟུགས་རྣམས་ཀྱི་སྤྱན་ཕྱེ་ལ། །མདུན་དུ་གཏོར་མའི་སྦྱིན་སྲེག་དབུལ། །ཞབས་ལ་བཏུད་དེ་ཕྱག་བྱས་ལ། །དངོས་གྲུབ་གང་འདོད་གསོལ་བ་གདབ། །དཀྱིལ་འཁོར་དབུས་སུ་བཞུགས་སུ་གསོལ། །ལྷ་ཡི་སྐུ་ཡི་ཐུགས་ཀར་ནི། །སྲིན་ལག་ཁྲག་གིས་ཟླ་གམ་བྲི། །དེ་ཡི་དབུས་སུ་སྙིང་པོ་བྲི། །དེའི་དབུས་རྒྱུས་ཆེན་སུམ་སྒྲིལ་གདགས། །རྩེ་མོ་བདག་བཟུང་བཟླས་པ་བྱ། །ཡང་ན་ལུགས་མ་དག་ལ་བྱ། །དེ་ལྟར་བྱས་ན་དངོས་གྲུབ་རྒྱུ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། སྐུ་གཟུགས་བསྟན་པའི་ལེའུ་སྟེ་དྲུག་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་གསང་བའི་བདག་པོ་དཔལ་ཕྱག་ན་
347b
རྡོ་རྗེ་འདི་སྐད་ཅེས་གསོལ་ཏོ། །ཀྱེ་གསང་མཛད་དྲག་པོ་ཧཱུཾ་མཛད་ཆེ། །དཔལ་ལྡན་རྡོ་རྗེ་མཁའ་འགྲོ་མའི། །ཏིང་འཛིན་སྒོམ་ཐབས་བདག་ལ་ཤོད། །ཅེས་གསོལ་པ་དང ། ཕྱག་ན་རྡོ་རྗེས་བཀའ་སྩལ་པ། ལྷའི་དབང་པོ་བརྒྱ་བྱིན་ཉོན་ཅིག་།སྐྱེ་བ་མེད་པའི་ངང་ལས་སྤྲུལ་པའི་ཆོ་འཕྲུལ་ནི། །ཧཱུཾ་ལས་རྡོ་རྗེ་རྩེ་ནི་ལྔ་པ་སྟེ། །དེ་ནི་བདག་ཉིད་ཕྱག་ན་རྡོ་རྗེ་ཡིན། ། མདོག་ལྗང་སྔོ་ལ་ཁྲོ་བོའི་ཆ་བྱད་དེ། །ལུས་འགྱིང་བག་ཅན་དབུ་སྐྲ་རལ་པ་གྱེན་ལ་བརྫེས་པ་ལ་རིགས་ལྔའི་དབུ་རྒྱན་ཅན། ཕྱག་ན་ཡེ་ཤེས་ཀྱི་རྡོ་རྗེ་རྩེ་ལྔ་པ་འབར་བ། ལུས་ལ་གླང་ཆེན་གྱི་ཀོ་བ་དང ། མཆོག་གི་གཡང་གཞི་དང ། སྟག་གི་ཤམ་ཐབས་དང ། ཐོད་པའི་ཕྲེང་བ་དང ། སྦྲུལ་གྱི་ཆུན་པོས་ལུས་བརྒྱན་པ། སྤྱན་མིག་དམར་བ། མཆེ་བ་གཙིགས་པ། བསྐལ་པའི་མེ་དཔུང་ལྟར་འབར་བའོ། །དེའི་མདུན་དུ་དཔལ་ལྷ་མོ་ནག་མོ་བསྐྱེད་དེ། མ་ཧཱ་ཀ་ལི་བ་ཡ་བེ་སྥ་ར་ན་ཡ། དེ་ནི། རླུང་ནག་འཚུབ་མའི་དཀྱིལ་འཁོར་བསྐྱེད་པའོ། །མ་ཧཱ་ཀ་ལི་ཛྭ་ལ་རཾ། དེ་ནི། མེའི་དཀྱིལ་འཁོར་བསྐྱེད་པའོ། །དེའི་དྦུསུ་བྲུཾ་བི་ཤུདྷེ་ཀ་པཱ་ལ་ཧཱུཾ། དེ་ནི། ཐོད་པའི་གཞལ་ཡས་ཁང་ངོ ། །གརྦྷ་པ་ཧཱུཾ། དེ་ནི།་བོང་བུ་དམར་གཝ་ལ་མིག་མཇུག་མ་ན་ཡོད་པ། རླུང་གི་གཤོག་པ་ཅན་ནོ། །སྟི་ར་བཾ། བོང་བུའི་ཐོག་ཏུ་ཞིང་བསྣོལ་བའོ། །མ་སུརྱ་མཎྜ་ལ་ཨ། ཉི་ཟླའི་གདན་ནོ། །བྷྱོ་
348a
༄#། །ནག་མོའི་འཕྲོ་འདུ་ལས་ལྷ་མོའི་ཏིང་ངེ་འཛིན། ཨོཾ་དེ་བི་ཤྲཱི་མ་ཧཱ་ཀ་ལི་ཧཱུཾ་ཞེས་པ་ལ། རང་གི་བྱང་ཆུབ་ཀྱི་སེམས་ལ་ལྷ་མོ་ནག་མོ་ནི། ཁ་དོག་ནག་མོ་ལ་རལ་པ་གཏིང་ཟ་པད་དུ་འདུག་པ། མིག་རྩ་དམར་བ། ཁ་གདངས་པ། མཆེ་བ་གཙིགས་པ། ལུས་ལ་སྦྲུལ་དང ། ཐོད་པས་བརྒྱན་པ། ལག་ན་རལ་གྲི་དང ། ནེའུ་ལེ་ཐོགས་པའོ། །ཐལ་བ་དང ། ཁྲག་དང ། ཞག་གིས་མཚོན་ ། །རྣ་རྒྱན་དྲིལ་བུ་དང ། སེངྒེ་ལ་བྱས་པ། ཉི་མ་དན་ཟླ་བས་ལུས་བརྒྱན་པའོ། །སྐུ་སྨད་གླང་གི་ཀོ་བས་བརྒྱན་པའོ། །རྐང་པ་ལ་ལྕགས་སྒྲོག་གིས་བརྒྱན་པའོ། །ལྷ་མོ་དེའི་སྤྱན་སྔར་རེ་མ་ཏི་ཁོལ་མོ་བསྐྱེད་དེ། ཡཾ་བ་ཡ་བེ། རླུང་གི་འཚུབ་མའོ། །བྲུཾ་བི་ཧ་ར་ན་ཧཱུཾ། རིན་པོ་ཆེའི་གཞལ་ཡས་ཁང་ངོ ། །དེའི་ནང་དུ་ཀ་པཱ་ལ་བྲུཾ་ལས་ཐོད་པའི་གཞལ་ཡས་ཁང་ངོ ། །དེའི་ནང་རྟིརྟི་སྟི་བྲུཾ་ལས་འཕྲུལ་གྱི་ལྡིང་ཁང་ངོ ། །དེའི་ནང་དུ་ཁང་པ་བདུན་བསྐྱེད་དོ། །དེའི་ནང་དུ་དྲེའུ་རླུང་གི་གཤོག་པ་ཅན་བསྐྱེད་དོ། །དེའི་སྟེང་དུ་བསེའི་གདན་ནོ། །དེའི་སྟེང་དུ་མ་ནག་མོའི་འཕྲོ་འདུ་ལས་རཀྴ་རེ་མ་ཏི་ཧཱུཾ་ཞེས་པ་ལས་བདུད་ཀྱི་བུ་མོ་རེ་མ་ཏི་དེ་ནག་མོ་རལ་པ་ཁམ་པ་ལ་མེ་སྟག་དང ། རིན་པོ་ཆེས་བརྒྱན་པའོ། །མིག་དམར་བ། མཆེ་བ་གཙིགས་པ། རེ་ལྡེ་ནག་པོ་དང ། མི་ལྤགས་གྱོན་པ། ལག་ན་
348b
ཁྲམ་བམ་དང ། ཤོ་རྡེའུ་ཐོགས་པའི་སྤྲུལ་གྱི་གདེངས་ཀ་དང ། ཉི་ཟླའི་ཐོད་གདེངས་དང ། ནད་ཀྱི་ཁ་རླངས་ཅན། སྟག་གི་ཤམ་བུ་དང ། ཟངས་ཀྱི་དྲ་བ་དང ། མཚོན་གྱི་གྲུ་གུ་དང་ལྡན་པ་རྣམས་བསྐྱེད་དོ། །བྷྱོ་བྷྱོ་བྷྱོ་བྷྱོ་ཞེས་བརྗོད་པ་ལས་འཁོར་ནག་མོ་འབུམ་བསྐྱེད་དོ། །དཔལ་མེ་ལྕེ་འབར་བའི་རྒྱུད་ལས། ཏིང་འྔེ་འཛིན་བསྟན་པའི་ལེའུ་སྟེ་བདུན་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །མཉམ་ཉིད་རྡོ་རྗེའི་སྐུ་སྙེམས་གསང་བའི་ལྷ། །མཚན་མ་འཇོམས་པའི་དཔའ་བརྟན་དྲག་ཤུལ་ཅན། །རྡོ་རྗེ་མཁའ་འགྲོ་མེ་ལྕེ་ཕྲེང་བ་ཡི། །སྲོག་སྙིང་བསྒྲུབ་པའི་སྔགས་རྣམས་བཤད་པར་ཞུ། །ཞེས་གསོལ་པ་དང ། དཔལ་ཕྱག་ན་རྡོ་རྗེས་བཀའ་སྩལ་པ། སྔགས་ཞེས་བྱ་བ་མཁའ་འགྲོའི་སྲོག་རྩ་ཡིན། །གྲངས་ཀྱང་མང་ལ་ཟུར་ཡང་མ་ཆག་སྟེ། །གུག་སྐྱེད་ཚེག་དྲག་དག་ཀྱང་མ་ནོར་ན། །ལྷ་མོ་ནག་མོ་སྔོན་དུ་འགུགས་པ་ཡིན། །ཞེས་བཀའ་སྩལ་པ་དང ། དཔལ་ཕྱག་ན་རྡོ་རྗེ་དེ་རྡོ་རྗེ་ལྟ་བུའི་ཏིང་ངེ་འཛིན་ལ་ཞུགས་ཏེ་དཔལ་ཕྱག་ན་རྡོ་རྗེས་རང་གི་སྙིང་པོ་འདི་ཐུགས་ཀ་ནས་ཕྱུང་ངོ་།། ཨོཾ་བཛྲ་ཙཎྜ་མཧཱ་རོ་ཥ་ཎ་ཧཱུཾ། གཙོ་བོ་ཕྱག་ན་རྡོ་རྗེའི་བསྙེན་པ་འདི། །སྔོན་དུ་འབུམ་ཚོ་བདུན་དུ་བཟླས་བྱས་ལ། །གཏོར་མ་དང་ནི་སྦྱིན་སྲེག་གིས་མཆོད་དེ། །དེས་ནི་ཕྱག་ན་རྡོ་རྗེའི་
349a
༄#། །གྲུབ་པ་ཐོབ། །ལྷ་མོ་བཀུག་ཅིང་དབང་དུ་བྱེད་པར་ནུས། །དེ་ནས་གདོད་ཅིག་ལྷ་མོའི་སྔགས་ལ་འཇུག་།སྔགས་ནི་དཔོན་མོའི་སྙིང་དང་གཡོག་མོའི་སྲོག་།མངོན་དུ་འགུགས་པ་སྲོག་གི་སྙིང་པོའི་སྔགས། །གཙོ་བོའི་སྤྱན་འདྲེན་གཡོག་མོ་འགུགས་པའི་སྔགས། །མི་གཡོ་བརྟན་པ་རྡོ་རྗེ་གདན་གྱི་སྔགས། ། མཉེས་པར་བྱ་ཕྱིར་གཏོར་མ་འབུལ་བའི་སྔགས། །གིང་དུ་དབང་བསྐུར་དམ་ལ་གདགས་པའི་སྔགས། །མངག་གཞུག་ཕན་གནོད་ལས་ལ་བསྐུལ་བའི་སྔགས། །མི་བྱ་དབང་མེད་གནད་ལ་འབེབས་པའི་སྔགས། །སྐུ་གསུང་ཐུགས་ཀྱི་དངོས་གྲུབ་བླང་བའི་སྔགས། །ཞབས་ལ་འདུད་པའི་སློབ་མ་དབང་བསྐུར་སྔགས། །ལྷ་དང་བགེགས་ཀྱི་ཉམས་ལེན་བརྟགས་པའི་སྔགས། །བརྡ་དང་མཆོད་པ་རྡོ་རྗེ་གསང་བའི་སྔགས། །བར་ཆད་མཚན་མ་ངན་པ་ཟློག་པའི་སྔགས། །བཅུ་གཉིས་རྡོ་རྗེའི་གསང་སྔགས་བསྟན་པར་བྱ། །དཔལ་ལྷ་མོ་ནག་མོའི་སྲོག་སྙིང་ལ། ཨོཾ་རུ་རུ་བེ་ཏིསྟ་བ་དོ་སི། པ་ཙ་ལ་ཨ་ཤུགྨེ་ཧཱུཾ་བྷྱོ་ཛ། ཁོལ་མོ་རེ་མ་ཏིའི་སྲོག་སྙིང་ལ། ཨོཾ་རུ་རུ་རོ་རུ་ཧཱུཾ་ཏིསྚ་བ་ཏོ་སི། རགྨོ་ཙི་ཏ་ཁ་རགྨོ་ཧཱུཾ་བྷྱོ། །མ་མ་ཏྲག་རཀྵ། ཁ་མུནྟྲ་བ་ཏྲ་བ་ཏྲག་རཀྵ་ཙ་ཏི་ཁ་རགྨ་རེ་མ་ཏི་ས་མ་ཡ་པྲ་མ་མཧཱ་སྟེ་པྲ་དུན་བྷྱོ་རུ་ལུ་རུ་ལུ་བྷྱོ་ཛ་ཛ། དེ་ནི་སྲོག་ལས་འདྲེན་
349b
པའི་སྔགས་ཡིན་ཏེ། །ས་ཡ་བཟླས་ན་མ་མོ་མངོན་དུ་ཡོང ། །བྱེ་བ་བཟླས་ན་ཕྱག་རྒྱ་སྟོན་པར་བྱེད། །འབུམ་ཕྲག་གིས་ཀྱང་དངོས་གྲུབ་མཚན་མ་སྟེར། །ཁོལ་མོའི་སྙིང་པོ་བཟླས་མ་ཐག་ནས་འོང ། །ས་མ་ཡ་དུ་ལིང་རཀྵ་སི། ཧེ་རཀྵ། བྷྱོ་རཀྵ། དུ་མ་རཀྵ། མཱ་རཀྵ་སི། མཱ་མཱ་མཱ་མཱ། རུ་ལུ་རུ་ལུ། རུ་ལུ་རུ་ལུ། བྷྱོ་བྷྱོ་བྷྱོ་བྷྱོ། རུ་རུ་རུ་རུ། དེ་ནི། འཁོར་མ་མོ་འབུམ་གྱི་སྤྱིའི་སྙིང་པོའོ། །ོཾ་མ་ཧཱ་ཀཱ་ལི་མཎྜལ་མ་ཏྲེ། ཨ་གཙྪ་ཡ། ཨ་གཙྪ་ཡ། པྲ་བེ་ཤ་ཡ་པར་བེ་ཤ་ཡ། ཏིཥྛ་ཏིཥྛ། ཨ་བ་ལོ་ཀ་། བ་ལོ་ཀ་ཡེ་ཧཱུཾ་ཛ། དེ་ནི། སྤྱན་དྲང་བའི་སྔགས་སོ། །ོཾ་མ་ཧཱ་ཀཱ་ལི་མ་མ་ས་མ་ཡ་ཤི་ཏི་ཏིཥྛ་སྟྭཾ། མ་ཧཱ་ཀཱ་ལི་ཨཱ་བེ་ཤ་ཡ། རེ་མ་ཏི་ས་མ་ཡ་བེ་ས། དེ་ནི། གདན་གདིང་བའི་སྔགས་སོ། ། མཥྚ་བི་མ་ཧཱ་ཀཱ་ལི་རེ་མ་ཏི་བྷ་ལིཾ་ཁ་ཁ་ཁཱ་ཧི་ཁཱ་ཧི། མ་ཧཱ་པཱུ་ཛ་ཧོ། ། མྲྀ་ཏ་ཁ་ཁ་ལེ་ལེ། དེ་ནི། གཏོར་མ་འབུལ་བའི་སྔགས་སོ། །མ་མ་ས་མ་ཡ་མཧཱ་ཀཱ་ལི་ས་མ་ཡ། མཧཱ་ཀཱ་ལི་ཀཱ་ཡ་ས་མ་ཡ།་མ་ཧཱ་ཀཱ་ལི་ཝཱ་ཀ་ས་མ་ཡ། མ་ཧཱ་ཀཱ་ལི་ཙིཏྟ་ས་མ་ཡ། མ་ཧཱ་མུ་ཏྲ་ཀ་པཱ་ལ་ཧཱུཾ། དེ་ནི། དམ་ཚིག་བསྟན་པའི་སྔགས་སོ། །ོཾ་བཛྲ་ཛོ་གི་ནི་ཏི་བི་མ་ཧཱ་ཀཱ་ལི་ས་མ་ཡ། བཛྲ་ཀྲོ་དྷ་ཀརྨ་རཀྵ་ཧཱུཾ། དེ་ནི། ལས་ལ་བསྐུལ་བའི་སྔགས་སོ། །ོཾ་རུ་རུ་རུ་ཙ་ཧཱུཾ། ཨ་ཤུགྨེ་བ་ཏྲི་རུ་ཏྲ་ཁ་ཤ་ལ་ནག་མོ་ཧཱུཾ། རགྵ་ཙིཏྟ་མཧཱ་ས་མཱ་ཏི། མ་རུ་ཁ་ཙིཏྟ་ནན། རགྨོ་
350a
༄#། །ཏི་ཀི་མ་ཛ། མ་མ་ཏི་ཏི་ཧཱུཾ་བྷྱོ། །དེ་ནི། དཔོན་གཡོག་གནད་ནས་བསྐུལ་བའི་སྔགས་སོ། །ོཾ་བཛྲ་ཌཱ་ཀི་ནི་དེ་བི་མ་ཧཱ་ཀཱ་ལ་རེ་མ་ཏི། ཀཱ་ཡ་ཝཱ་ཀ་ཙཏྟི་སིདྡྷི་ས་མ་ཡ་ཕ་ལ་ཨཱ་བེ་ཤ་ཡ་ཨ། དེ་ནི། དངོས་གྲུབ་བླང་བའི་སྔགས་སོ། །ོཾ་མཧཱ་ཀ་ལི་ཡེ་ཧཱུཾ་ཕཊ། རུ་རུ་ཙ་པ་ལ་ཨ་ཤུགྨེ་ཧཱུཾ་མཧཱ་ཀཱ་ལེ་ཨ་བྷི་ཥིཉྩ། ཀ་པཱ་ལ་ཏྲི་ན། མཧཱ་ཛྙཱ་ན། ཀཱ་ཡ་ཝཱཀ་ཙཏྟི་སིདྡྷི་ཧཱུཾ། དེ་ནི། དབང་བསྐུར་བའི་སྔགས་སོ། །ཧྲིང་ཧྲིང་ཙ་མུཎྜི་གུ་ར་ཙེ་ཧཱུཾ། དེ་ནི། ཉམས་ལེན་བརྟག་པའི་སྔགས་སོ། ། ཧཱུཾ་ཕཊ། མཧཱ་དེ་བི་ཀཱ་ལི་དུཥྚན་ཏ་ཀ་ཧ་ན་ད་ཧ་པ་ཙ་ཧུ་ལུ་ནན། ད་ཧ་པ་ཙ་མཱ་ར་ཡ་ཧཱུཾ་ཕཊ། དེ་ནི། མཚན་མ་ངན་པ་ཟློག་པའི་སྔགས་སོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཧྲིང་ཧྲིང་ཧྲིང་ཧྲིང་ཧྲིང་ཧྲིང་ཧྲིང་ཧྲིང ། ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་།བྲུཾ་གེཾ་བྲུཾ་གེཾ་བྲུཾ་གེཾ་བྲུཾ་གེཾ་བྲུཾ་གེཾ་བྲུཾ་གེཾ་བྲུཾ་གེཾ་དྲུཾ་གེཾ་།ཧཱུཾ་དུ་ཧཱུཾ་དུཾ་ཧཱུཾ་དུཾ་ཧཱུཾ་དུཾ་ཧཱུཾ་དུཾ་ཧཱུཾ་དུ་ ་ཧཱུཾ་དུཾ་ཧཱུཾ་དུཾ། ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་ཕཊ་ཏ་ཀ་།དེ་ནི། རྡོ་རྗེ་མ་ཧཱ་མྐའ་འགྲོ་མའི་རྔ་སྒྲའོ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། །སྔགས་བསྟན་པའི་ལེའུ་སྟེ་བརྒྱད་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་མགོན་
350b
བོ་རྒྱལ་ཚབ་ལས་ཀྱི་ལྷ། །རྡོ་རྗེ་མཁའ་འགྲོའི་རྣལ་འབྱོར་མའི། །གསང་བའི་ཕྱག་རྒྱ་བདག་ལ་བསྟན་པར་འཚལ། །ཞེས་ཞུས་པ་དང ། ཕྱག་ན་རྡོ་རྗེས་བཀའ་སྩལ་པ། རྣལ་འབྱོར་གསང་བའི་ཕྱག་རྒྱ་དམ་པ་ནི། །སྤང་བར་མི་བྱ་རྟག་ཏུ་བཅང་བར་བྱ། །དང་པོ་གཙོ་བོ་རྡོ་རྗེ་རྒྱལ་ལ་གནས། །རླུང་གིས་མེ་སྦར་བོང་ཞོན་དབང་ཕྱུག་མ། །ལྕགས་ཀྱུས་བཟུང་ནས་གཤོག་པས་ཟིལ་གྱིས་གནོན། །བོང་བུས་གདན་འདིང་ཐོད་པས་དབང་བསྐུར་ཏེ། །ཐོད་རློན་དམ་བརྟན་གཉིས་མེད་དངོས་གྲུབ་བླང ། །རྟག་ཏུ་མཚན་མ་ངན་པ་ཕྱག་རྒྱས་བཟློག་།དང་པོ་གཙོ་བོ་རྡོ་རྗེ་རྩེ་ལྔ་ནི། །ལག་གཉིས་སོར་མོ་རྒྱབ་ཏུ་བསྣོལ་བཅངས་ལ། །མཐེ་བོང་གུང་མོ་མཐེའུ་ཆུང་གཤིབས་ལ་བསྒྲེང ། །རྡོ་རྗེ་རྩེ་ལྔ་ཕྱག་ན་རྡོ་རྗེའི་རྒྱའོ། །དང་པོ་རླུང་ནག་འཚུབ་མའི་ཕྱག་རྒྱ་ནི། །ལག་ནི་ཐལ་སྦྱར་གུང་སྤྲད་བསྒྲེང་པ་དང ། །མཐེ་ཆུང་སྲིན་ལག་ཚིགས་བསྣོལ་བགྲད་པ་དང ། །དེ་བརྐྱང་མཐེ་བོང་གུང་གཏད་མཛུབ་མོག་ཉིས་བསྒྲེང་རྫོང ། །རྩེ་མོ་བཀུག་པ་རླུང་གི་ཕྱག་རྒྱའོ། །མེ་རི་སྨུག་ནག་འབར་བའི་ཕྱག་རྒྱ་ནི། །མཛུབ་མོ་གཉིས་ནི་སོར་མོ་དགུག་ ་ཏེ། །མཐེ་བོང་བཀུག་སྟེ་དེ་ལ་གཏད་བྱས་ལ། །གུང་མོ་མཐེའུ་ཆུང་བསྒྲེང་སྟེ་ཕྱར་བའོ། །ལྷ་མོ་ནག་མོའི་རལ་གྲིའི་ཕྱག་རྒྱ་ནི། །ལག་གཡས་མཐེའུ་ཆུང་བཀུག་སྟེ་མཐེ་བོས་མནན། །གུང་མཛུབ་
351a
༄#། །སྲིན་ལག་གཤིབས་ཏེ་བསྒྲེང་བ་འོ། །ཁོལ་མོ་རེམ་ཏི་ཡི་ཕྱག་རྒྱ་ནི། །ལག་པ་གཡས་བཀུག་མཐེ་བོས་མནན་བྱས་ཏེ། །ལྷག་མ་གསུམ་བརྐྱང་བས་ནི་ཁྲམ་བམ་ཕྱག་རྒྱ་ཡིན། །མ་མོ་དགུག་པ་ལྕགས་ཀྱུའི་ཕྱག་རྒྱ་ནི། །ལག་གཉིས་རྒྱབ་སྐྲད་མཐེའུ་ཆུང་བསྒྲེང་ནས་ནི། །མཛུབ་མོ་གཉིས་བཀུག་གུང་སྲིན་མཐེབ་མོས་བསྡུ། །བརྐྱང་སྟེ་ཕྲལ་ནས་སྙིང་གར་ལྕགས་ཀྱུ་གཉིས། །ཟིལ་གྱིས་མནན་པ་ཁྱུང་གཤོག་ཕྱག་རྒྱ་ནི། །མཐེ་བོང་གཉིས་གཤིབས་སོར་མོ་གཤོག་ལྟར་བརྐྱང ། ། གདན་མཆོག་བོང་བུ་དག་གི་ཕྱག་རྒྱ་ནི། །མཐེའུ་ཆུང་བསྣོལ་བས་སྲིན་ལག་མནན་བྱས་ཏེ། །སྲིན་ལག་ཐོར་ཏོ་མཐེ་བོས་མནན་པ་འོ། །དེ་བཞིན་གུང་མོ་གཉིས་ནི་ནང་དུ་བསྟན། །བྱིན་བརླབ་དབང་བསྐུར་ཐོད་ཕྲེང་ཕྱག་རྒྱ་ནི། །ལག་པ་གཡས་གཡོན་ཁུ་ཚུར་བཅངས་པ་ལ། །མཐེབ་མཛུབ་བཞི་པོ་ལྕགས་སྒྲོག་ལྟ་བུར་སྦྲེལ། །ལག་གཉིས་ཐོད་རློན་དམ་ཚིག་ཕྱག་རྒྱ་ནི། །མཐེ་བོང་མཛུབ་མོ་བཀུག་ནས་ཟླུམ་བྱས་ཏེ། །བཀུག་ནས་སྲིན་ལག་གཉིས་བཅུག་མིག་འབྲས་འདྲ། །གུང་མོ་མཐེའུ་ཆུང་གཉིས་ནི་ཐོད་རློན་ཁ། །དངོས་གྲུབ་བླང་བའི་བདུད་རྩི་བུམ་པ་ནི། །ལག་གཉིས་སོར་བཅུ་རྩེ་བསྡུས་བཀུག་ལ་ཟླུམ། །མཚན་ངན་ཟློག་པ་ཏྲི་ཤཱུལ་ཕྱག་རྒྱ་ནི། །ལག་གཡས་མཐེབ་
351b
མཛུབ་སྲིན་ལག་མཐིལ་དུ་བཀུག་།མཐེ་བོང་གུང་མོ་མཐེའུ་ཆུང་ཕྱར་ལ་བསྒྲེང ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། ཕྱག་རྒྱ་བསྟན་པའི་ལེའུ་སྟེ་དགུ་པའོ།། །། དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་སྟོབས་པོ་ཆེ་ལ་གནོད་སྦྱིན་གྲགས་པ་ཅན། །རིག་སྔགས་གསང་སྔགས་ཚོགས་ཀྱི་མངའ་བདག་གིས། །རྡོ་རྗེ་མཁའ་འགྲོ་མཉེས་པར་བྱ་བའི་ཕྱིར། །མཆོད་པའི་རིམ་པ་བདག་ལ་བཤད་དུ་གསོལ། །ཞེས་ཞུས་པ་ལ། གསང་བའི་བདག་པོས་བཀའ་སྩལ་པ། རྡོ་རྗེ་མཁའ་འགྲོའི་དངོས་གྲུབ་མྱུར་བྱའི་ཕྱིར། །མཉེས་པར་བྱས་ཏེ་མཆོད་པ་རྟག་ཏུ་དབུལ། །དང་པོར་མཆོད་པའི་རྫས་ཀྱི་གཏོར་མ་འབུལ། །གཉིས་པ་ལ་ནི་སྦྱིན་སྲེག་འབུལ་བ་འོ། །དེ་བཞིན་གསུམ་པ་གསང་བའི་མཆོད་པ་འབུལ། །དང་པོར་གཏོར་མ་ཤ་ལྔ་བདུད་རྩི་ལྔ། །མཆོད་པའི་རྫས་དང་ཛ་གད་རཀྟ་རྣམས། །པདྨ་མཛེས་པའི་སྣོད་དུ་བཀང་བྱས་ནས། །རླུང་གིས་མེ་སྦར་ཨ་ཡིས་ཐོད་པ་བསྐོལ། །ཧཱུཾ་གིས་རྡོ་རྗེས་རབ་ཏུ་དཀྲུགས་ནས་ཀྱང ། ། དཀར་འབར་བས་ཁ་ཟས་དུག་བཅོམ་ལ། །དཔའ་བོ་འབྲུ་ལྔས་བདུད་རྩིར་བྱིན་གྱིས་བརླབ། །དང་པོས་གཙོ་བོ་ཕྱག་ན་རྡོ་རྗེ་མཆོད། །གཉིས་པས་ལྷ་མོ་འཐུངས་པར་བསམ། །ཐ་མ་རེ་མ་ཏི་ཡིས་རྡུབས་པར་བསྒོམ། །ོཾ་བཛྲ་པཱ་ཎི་ཧཱུཾ། ཌཱ་ཀི་ནི་མ་
352a
༄#། །ཧཱ་ཀ་ལི། ཡཀྴ་རེ་མ་ཏི། མ་མ་ཤ་ཏྲུཾ་ཨ་མུ་ཀ་།མ་ཙ་མེ་ཏ་བ་ས་མ་མ་ས། རུ་ཏི་ཛི་བཾ། པྲི་ཡ་བག་ཤི་ནི། ཨི་དཾ་བ་ལིཾ་གྲིཧྣ་གྲིཧྣ། ཁ་ཁ་ཁ་ཁ། ཁཱ་ཧི་ཁཱ་ཧི། གསང་སྔགས་དེས་ནི། རྟག་ཏུ་གཏོར་མ་འབུལ་བའོ། །དེ་ནས་སྦྱིན་སྲེག་དབུལ་བ་བསྟབ་པར་བྱ། །སྐུ་གཟུགས་མདུན་དུ་མེ་ཐབ་བསྐོར་བྱས་ཏེ། །འོ་མ་ཚེར་མ་ཡོད་པའི་ཤིང་བརྩིགས་ལ། །བྲམ་ཟེའི་ཁྱིམ་ནས་མེ་བླངས་མེ་སྦར་ལ། །བསྲེག་རྫས་མི་ཤ་མར་ནག་སྦྲང་རྩི་ཆང ། །ཁྲག་ལ་སྦྱར་ལ་ཁྲི་ཕྲག་གཅིག་ཏུ་དབུལ། །སྒོམ་ཐབས་མེ་ཉིད་མེ་ལྷ་ར་སྐྱེས་ཞོན་པ་ལ། །ཕྱག་བཞི་གཡས་ན་དབྱུག་པ་དང་ནི་མཆོད་སྦྱིན་ནོ། །གཡོན་ན་གུཎྜེ་དང་ནི་བགྲང་ཕྲེང་རབ་ཏུ་འཛིན། །དེ་ཡི་སྙིང་གར་ཕྱག་ན་རྡོ་རྗེ་དང་།། ལྷ་མོ་ཉིད་དང་ཁོལ་མོ་རེ་མ་ཏི། །གསལ་བར་བསྐྱེད་ལ་སྦྱིན་སྲེག་དབུལ་བར་བྱའོ། །གཉིས་པས་གཙོ་བོ་ཕྱག་ན་རྡོ་རྗེ་མཆོད། །གསུམ་པས་ལྷ་མོ་ནག་མོ་དེ་ལ་འབུལ། ། དེ་བཞིན་ཐ་མས་རེ་མ་ཏི་ལ་མཆོད། །སོ་སོའི་སྙིང་པོ་བཟླས་ཤིང་དབུལ་བར་བྱའོ། །ོཾ་བཛྲ་ཙཎྜ་མ་ཧཱ་རོ་ཥ་ཎ་ན་ཧཱུཾ། མཧཱ་དེ་བི་ཀ་ལི་ཧཱུཾ། ཡཀྴ་རེ་མ་ཏི་ཧཱུཾ། ཨགྣེ་ཧབ་བྱ་ཀབ་བྱ། མཧཱ་ཏི་བ་ཏི་བ་ཏི་བ་བྱ། སརྦ་དུཥྚ་ན་བག་ཤ་ནི་ཁ་རཾ་ཁཱ་ཧི་སཝཱ་ཧཱ། དེ་ནས་ཐལ་བདུར་ཁྲོད་དུ་བསྐྱལ། དེ་ནས་གསང་བའི་མཆོད་པ་རབ་བཤད་བྱ། །དངོས་
352b
ལ་མཁའ་འགྲོ་གསལ་ལམ་ཏིང་འཛིན་ལ། །གསང་བ་ཡེ་ཤེས་ཧཱུཾ་དང་ཨཾ་གཉིས་ལ། །རྡོ་རྗེ་པདྨས་རབ་ཏུ་བཀླུགས་ནས་ཀྱང ། །ཟླ་བས་མཁའ་འགྲོ་རབ་ཏུ་མཉེས་འགྱུར་ཏེ། ། ཐུགས་ཀྱི་ཐིག་ལེས་བདག་གི་གཟི་བྱིན་བསྐྱེད། །ཐུགས་ཀྱི་དངོས་གྲུབ་དམ་པའི་མན་ངག་གོ་།མཧཱ་ཀ་ལི་ས་མ་ཡ་བོ་དྷི་ཙིཏྟ། མཧཱ་པཱུ་ཛ་གུ་ཡ་སྟྭཾ། སྤྲོ་བའོ། །མཧཱ་ཀཱ་ལི་ས་མ་ཡ། མཧཱ་རཀྟ་གུ་ཡ་སྟྭཾ། ཨཱ་བེ་ཤ་ཨ། བསྡུ་བའོ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། མཆོད་པའི་ལེའུ་སྟེ་བཅུ་པའོ།། །།དེ་ནས་ལྷའི་དབང་པོ་བརྒྱ་བྱིན་དེས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཡེ་ཤེས་ལྔར་ལྡན་དཔའ་བརྟན་ཐུགས་རྗེ་ཅན། །དཔལ་ལྡན་མི་བསྐྱོད་རྡོ་རྗེ་སེམས་དཔའ་ཁྱོད། །རྡོ་རྗེ་མཁའ་འགྲོ་མ་ཡི་དངོས་གྲུབ་ནི། །སྲོག་དང་འདྲ་བའི་དམ་ཚིག་བདག་ཉན་འཚལ། །ཞེས་གསོལ་པ་དང ། དཔལ་ཕྱག་ན་རྡོ་རྗེས་བཀའ་སྩལ་པ། མཁའ་འགྲོ་མ་ཡི་དམ་ཚིག་ནི། །གསང་བའི་ཕྱག་རྒྱ་འདའ་དཀའ་བ། །མི་ཤིགས་རྒྱལ་པོས་དབང་བསྐུར་ཏེ། །རྡོ་རྗེ་མཚན་མ་འཇོམས་པའི་རྒྱུ། །དམ་ཚིག་དེ་ཉིད་རབ་བཤད་བྱ། །འདས་ན་རྡོ་རྗེ་དམྱལ་བ་འོ། །མ་འདས་དངོས་གྲུབ་དམ་པའི་རྒྱུ། །གཙོ་བོ་ཕྱག་ན་རྡོ་རྗེ་དང ། །ལྷ་མོ་ནག་མོ་དཔོན་གཡོག་ལ། །སྐུ་གསུང་ཐུགས་ཀྱི་དམ་ཚིག་ནི། །གཙོ་བོའི་སྐུ་ཡི་
353a
༄#། །དམ་ཚིག་ནི། སྐུ་ཡི་ཕྱག་རྒྱ་མི་སྤོང་ཞིང ། །ལྷ་དང་སློབ་དཔོན་མཉེས་པར་བྱ། །རྡོ་རྗེ་སྤུན་ལ་གདུང་བ་བསྐྱེད། །གཙོ་བོའི་གསུང་གི་དམ་ཚིག་ནི། ། བཟླས་བརྗོད་སྙིང་པོ་རྒྱུན་མི་གཅོད། །མི་ཡེངས་རྫུན་སྤངས་གསང་སྔགས་འཛིན། །གཙོ་བོའི་ཐུགས་ཀྱི་དམ་ཚིག་ནི། །གསང་བ་གཞན་ལ་མི་སྤེལ་ཞིང ། །སྟན་གན་འབྲས་བུ་ལྔ་ལ་སྤྱོད། །དེ་ནས་གཙོ་མོའི་དམ་ཚིག་བཤད། །ལྷ་མོའི་སྐུ་ཡི་དམ་ཚིག་ནི། །བོང་བུ་ལ་ནི་བྱམས་པར་བྱ། །ཁལ་གྱིས་མི་མནན་དབྱུག་མི་བརྡེག་།རྨ་བྱའི་མདོངས་ནི་རྟག་ཏུ་བཅངས། །མེ་ཡི་དཀྱིལ་འཁོར་མཐོང་བ་ན། །མེ་ཏོག་སྐྱེས་ལྟར་དགའ་བར་བྱ། །རྟག་ཏུ་ཡི་དམ་མི་འདའ་བའི། །ཞག་རེ་ཕྱག་རྒྱ་གཉིས་སུ་བསྟན། །ལྷ་མོའི་གསུང་གི་དམ་ཚིག་ནི། །རྒྱུན་ཏུ་བཟླས་པ་བྱེད་པ་དང ། །ནེའུ་ལེ་མཐོང་ན་བསྟོད་པ་བྱ། །ཕྱག་རྒྱ་བསྟན་ཞིང་དགའ་བར་བྱ། །ཞིང་ལྤགས་རྫས་ཀྱི་སྣོད་དུ་བྱ། ། ཚུབ་མ་དག་དང་ཕྲད་གྱུར་ན། །རྐེད་པར་མི་གཅོད་རྒྱབ་མི་བསྟན། །ཚེས་གྲངས་ཤིས་དང་ནམ་གུང་ལ། །ཕྱག་རྒྱ་བྱ་ཞིང་བསྟོད་པ་བྱ། །ལྷ་མོའི་ཐུགས་ཀྱི་དམ་ཚིག་ནི།། འཇིག་རྟེན་གང་དང་གང་དག་ན། །བུད་མེད་ཡུགས་ས་ཡོད་པ་ལ། །བྱམས་པར་བྱ་ཞིང་ཆགས་པ་སྤྱད། །རྟག་ཏུ་བུ་མོ་གཙང་མ་བསྟེན། །ལྷ་མོ་ཟླ་མཚན་རྒྱུ་དུས་སུ། །
353b
གསང་བའི་མཆོད་པས་དམ་བསྲེ་འོ། །ལྷ་མོའི་ཁོལ་མོ་རེ་མ་ཏི། །དེ་ཡི་སྐུ་ཡི་དམ་ཚིག་ནི། །བྱིས་པ་དག་གི་ནལ་ཕྲུག་ལ། །གོས་དང་ཁ་ཟས་མགྲོན་དུ་སྦྱིན། །རྟག་པར་དེ་ལ་བྱམས་པར་བྱ། །ཤིང་ལོ་སོར་བཞི་རྐེད་པར་བཅང ། །ཕྱེད་ལ་མ་མོའི་སྐུ་བྲིས་སྟེ། །ཁྱེད་ལ་དངོས་གྲུབ་གསོལ་བར་བྲི། །དེ་ནི་རྟག་ཏུ་བཅང་བ་འོ། །ཁོལ་མོ་གསུང་གི་དམ་ཚིག་ནི།། མ་ཕེབས་བར་དུ་སྲོག་སྙིང་དྲང ། །ནུབ་རེ་གཏོར་མ་འདར་མི་རུང ། །ཁ་འཕྲོ་དག་ཀྱང་བསྲེ་བ་མིན། །ཕྲེང་བ་ལ་ཡང་རིག་པ་བསྲུང ། །བདག་གིས་དགྲ་ལ་བྱད་བྱས་ཏེ། །ཕྱིས་ནི་བཅོས་པར་མ་བཤད་དོ། །ཁས་བླངས་ཡོལ་དུ་ག་ལ་རུང ། །ཕུད་ཀྱང་ཉམས་པར་བྱ་བ་ཡིན། །རྡོ་སོལ་ཆུར་ནི་བསྐྱུར་མི་བྱ། །ཁོལ་མོའི་ཐུགས་ཀྱི་དམ་ཚིག་ནི། །ནལ་བུ་ཡོད་པའི་སྦྲུམ་མ་ལ། །མེ་ཏོག་གཏོར་ཞིང་བྱམས་པར་བྱ། །ཁ་ཟས་སྦྱིན་ཞིང་རྔན་མི་བགྲང ། །སྣ་ཁྲག་ཟླ་མཚན་བླང་བར་བྱ། །དམ་ཚིག་ཡོད་རུང་མེད་རུང་སྟེ། །བདག་མ་ཡིན་པའི་རྣལ་འབྱོར་ལ། །རང་གི་ལྷ་དང་སྙིང་པོ་དང ། །རྫས་དང་ཕྱག་རྒྱ་མི་བསྟན་ནོ། །མཚན་མ་རྡོ་སོལ་ཞུ་བས་བསྐུ། །བྱ་ནག་ལུག་ནག་རྟག་ཏུ་བཅང ། །ཐེ་ཚོམ་ཟར་ནི་མི་རུང་ངོ ། །དཔོན་གཡོག་སྦྱི་ཡི་དམ་ཚིག་ནི། །རུ་ཧི་རྡོ་རྗེ་པདྨའི་མི། །རྟག་ཏུ་བཅངས་ལ་བརྟེན་ཅིང་མཆོད། །དེ་དང་བྲལ་ཏུ་མི་རུང་ངོ ། །རྣལ་འབྱོར་དངོས་གྲུབ་ཐོབ་བྱའི་ཕྱིར། །སྐུ་གསུང་ཐུགས་ཀྱི་
354a
༄#། །དམ་ཚིག་བསྟན། །བརྒྱ་བྱིན་དག་གིས་རབ་ཞུས་པ། །དམ་ཚིག་ཉམས་པའི་སྐྱོན་ནི་གང ། །དམ་ཚིག་བསྲུང་བའི་ཡོན་ཏན་གང ། །འབྱུང་པོའི་གཙོ་བོས་བཤད་དུ་གསོལ། །ཕྱག་ན་རྡོ་རྗེས་བཀའ་སྩལ་པ། །རབ་ཏུ་བཤད་ཀྱི་བརྒྱ་བྱིན་ཉོན། །གཙོ་བོ་ཕྱག་ན་རྡོ་རྗེ་ཡི། །སྐུ་ཡི་དམ་ཚིག་ཉམས་པ་ན། །མཐོ་རིས་གོ་འཕང་རྒྱུན་ལམ་འཆད། །གསུང་གི་དམ་ཚིག་ཉམས་པ་ན། །བསྒྲུབས་ཀྱང་དངོས་གྲུབ་མི་འཐོབ་ཅིང ། །སྔགས་ལ་ནུས་མཐུ་མེད་པར་རོ། །ཐུགས་ཀྱི་དམ་ཚིག་ཉམས་པ་ན། །མཁའ་འགྲོའི་ཆད་པས་རབ་བཅད་ནས། །ངེས་པར་རྡོ་རྗེ་དམྱལ་བར་སྐྱེ། །དངོས་གྲུབ་མེད་པར་བར་ཆོད་འབྱུང ། །དཔལ་ལྡན་ལྷ་མོ་ནག་མོ་ཡི། །སྐུ་ཡི་དམ་ཚིག་ཉམས་པ་ན། །རྒྱལ་པོ་འཆད་དང་སྦྲུལ་གདུག་དང ། །མེ་དང་ཆུ་ཡི་བར་དུ་ཆོད། །གསུང་གི་དམ་ཚིག་ཉམས་པ་ན། །སྒྲུབ་ལ་གཡེལ་ཞིང་ནུས་མཐུ་མེད། །སྒྲུབ་པ་རྩོམ་རེས་བར་ཆད་འོང ། །ཐུགས་ཀྱི་དམ་ཚིག་ཉམས་པ་ན། །ཉམས་ལེན་འོང་ཞིང་རིམས་ནད་འོང ། །ཁོལ་མོ་བདུད་མོ་རེ་མ་ཏིའི། །སྐུ་ཡི་དམ་ཚིག་ཉམས་གྱུར་ན། ། འཁོར་ལ་རིམས་ནད་སྨྱོ་འབོག་འོང ། །དགྲ་རྣམས་ཚེ་དང་བསོད་ནམས་འཕེལ། །གསུང་གི་དམ་ཚིག་ཉམས་པ་ན། །བུ་དང་ཆུང་མ་འཆི་བ་དང ། །སྙིང་མི་དགའ་ཞིང་
354b
ཁ་ཡང་ཡོ། །ནོར་དང་ལོངས་སྤྱོད་ཟད་པར་འགྱུར། །ཐུགས་ཀྱི་དམ་ཚིག་ཉམས་པ་ན། །རང་གི་ཚེ་ལ་བར་ཆད་འོང ། །མཛེ་དང་རྒྱུ་གཟེར་ན་ཞིང་འབོག་།སྤྱི་ཡི་དམ་ཚིག་ཉམས་པ་ན། །རྟག་པར་བསྒྲུབས་ཀྱང་འགྲུབ་དུས་མེད། །རྟག་པར་དགྲ་དང་མི་འབྲལ་ལོ། །ཡང་ནི་ལྷ་དབང་བརྒྱ་བྱིན་ཉོན། །དམ་ཚིག་བསྲུང་བའི་ཡོན་ཏན་ལ། །གཙོ་བོ་ཕྱག་ན་རྡོ་རྗེ་ཡི། །སྐུ་ཡི་དམ་ཚིག་མ་ཉམས་ན། །བླ་མེད་བྱང་ཆུབ་གོ་འཕང་འཐོབ། །གསུང་གི་དམ་ཚིག་མ་ཉམས་ན། །ཕྱག་ན་རྡོ་རྗེའི་ཞལ་མཐོང་ནས། །རྡོ་རྗེའི་ངག་ལ་དབང་ཐོབ་འགྱུར། །ཐུགས་ཀྱི་དམ་ཚིག་མ་ཉམས་ན། །འཕྲིན་ལས་རྣམ་བཞི་མངོན་དུ་འགྲུབ། །མཁའ་འགྲོ་མ་རྣམས་མངོན་དུ་འཁོལ། །མཐུ་དང་རྫུ་འཕྲུལ་བསམ་པས་འགྲུབ།། དཔལ་ལྡན་ལྷ་མོ་ནག་མོ་ཡི། །སྐུ་ཡི་དམ་ཚིག་མ་ཉམས་ན། །ལྷ་སྲིན་ཕོ་མོས་ཕྱག་བྱེད་དེ། །འདོད་པའི་ཁམས་ཀྱི་རྒྱལ་སྲིད་འཐོབ། །གསུང་གི་དམ་ཚིག་མ་ཉམས་ན། །སྔགས་བཟླས་མཁའ་འགྲོ་མངོན་དུ་འོང ། །བར་ཆད་མེད་པར་དངོས་གྲུབ་སྟེར། །ཐུགས་ཀྱི་དམ་ཚིག་མ་ཉམས་ན། །བདུད་དང་དགྲ་ཡིས་མི་ཚུགས་ཤིང ། །རྟག་ཏུ་རིམས་ནད་མི་འབྱུང་ཞིང ། །དགྲ་རྣམས་ཐེ་ཚོམ་མེད་པར་འཆི། །ལྷ་མི་ཡོངས་ཀྱིས་བཀུར་བར་འགྱུར། །ཚེ་རིང་ནོར་དང་ལྡན་པར་འགྱུར། །དེ་ནས་ནག་མོ་རེ་མ་ཏིའི། །སྐུ་
355a
༄#། །ཡི་དམ་ཚིག་མ་ཉམས་ན། །འཁོར་ནི་བཀྲ་ཤིས་དར་ཅིང་རྒྱས། །དགྲ་དང་བགེགས་རྣམས་ཕུང་བར་བྱེད། །གསུང་གི་དམ་ཚིག་མ་ཉམས་ན། །བུ་དང་ཆུང་མ་དར་བ་དང ། །ནོར་དང་ལོངས་སྤྱོད་རྒྱས་པར་འགྱུར། །མིག་རྣོན་རྐང་མགྱོགས་རོ་ལངས་འགྲུབ། །ཐུགས་ཀྱི་དམ་ཚིག་མ་ཉམས་ན། །ཚེ་རིང་གྲགས་པ་ཐོབ་པ་དང ། ། ལུས་ལ་ཆད་ཀྱིས་མི་ཐེབས་ཤིང ། །སེམས་ལ་སྡུག་བསྔལ་མེད་པར་འགྱུར། །མཐུ་རྩལ་ཆེན་པོ་ཐོབ་པར་འགྱུར། །སྤྱི་ཡི་དམ་ཚིག་མ་ཉམས་ན། །གཙོ་བོ་ཕྱག་ན་རྡོ་རྗེ་དང ། །ལྷ་མོ་ནག་མོ་དཔོན་གཡོག་ཀུན། །རྟག་ཏུ་བདག་དང་མི་འབྲལ་ལོ། །ཇི་ལྟར་འདོད་པའི་དོན་དེ་འགྲུབ། །གང་ལྟར་མངག་པའི་ལས་དེ་བྱེད། །མཁའ་འགྲོ་མེ་ལྕེ་འབར་བའི་རྒྱུད་ལས། དམ་ཚིག་གི་ལེའུ་སྟེ་བཅུ་གཅིག་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཧཱུཾ་མཛད་ཧཱུཾ་གི་རྒྱལ་པོ་རྡོ་རྗེ་ཆེ། །རྡོ་རྗེ་མཁའ་འགྲོའི་དྲོད་ཚད་མཚན་མ་ཤོད། །ཅེས་ཞུས་པ་དང ། དཔལ་ཕྱག་ན་རྡོ་རྗེས་བཀའ་སྩལ་པ། སྐྱེས་བུ་བློ་ལྡན་མན་ངག་རྩལ་ཅན་གྱིས། །གསང་སྔགས་ཏིང་འཛིན་ཕྱག་རྒྱར་རབ་ལྡན་ན། །རྡོ་རྗེ་མཁའ་འགྲོའི་གྲུབ་རྟགས་འདི་ལྟར་འབྱུང ། །གྲུབ་རྟགས་ཕྱི་ནང་གསང་བ་
355b
གསུམ་དུ་བཤད། །ནང་གི་གྲུབ་རྟགས་མིག་དང་རྣ་བ་དང ། །སྣ་དང་ལྕེ་དང་ལུས་དང་སྙིང་ལ་འབྱུང ། །གལ་ཏེ་མིག་གིས་སྲིད་པ་གསུམ་མཐོང་ན། །གཙོ་བོ་ཕྱག་ན་རྡོ་རྗེའི་མཚན་མ་ཡིན། །མིག་གིས་ལྷ་མོ་མཐོང་ན་ལྷ་མོ་ཡིན། །མིག་ནི་འདར་ཞིང་འགུལ་ན་རེ་མ་ཏི། །རྣ་བས་སྲིད་པ་གསུམ་པོ་ཐོས་ན་རྡོ་རྗེ་འཛིན། །མཁའ་འགྲོས་གཏམ་ཟེར་ཐོས་ན་ལྷ་མོས་བསྟན། །བུད་མེད་འབྲུག་སྒྲ་སྒྲོགས་ན་རེ་མ་ཏི། །སྣ་ལ་ག་པུར་དྲི་ནི་རྡོ་རྗེ་འཛིན། །ཀུ་མུ་ཏ་ཡི་དྲི་ནི་ལྷ་མོ་ཉིད། །སྤོས་སམ་གུར་གུམ་བྲོ་ན་རེ་མ་ཏི། །ལྕེ་ལ་དམ་ཆོས་འཆད་ན་རྡོ་རྗེ་འཛིན། །ལྕེ་ལ་གསང་སྔགས་ཟློས་ན་ལྷ་མོ་ཡིན། །ལེགས་ཉེས་མཚན་མ་སྨྲ་ན་རེ་མ་ཏི། །ལུས་ནི་འཕྲོ་ན་ཕྱག་ན་རྡོ་རྗེ་ཡིན། །ལུས་ལ་འོད་འབྱུང་བ་ནི་ལྷ་མོའི་རྟགས། །ལུས་པོ་འདར་རམ་སྐྱི་ཤ་བུང་བ་དང ། །ཤ་རྩ་འགུལ་ན་རེ་མ་ཏི་ཡི་རྟགས། །གླལ་ལམ་སྐྱུགས་ཤིང་མཆི་མ་འོང་བ་ན། །ལྷ་མོ་དཔོན་གཡོག་ཡོ་ག་ཕེབས་པ་ཡིན།། གལ་ཏེ་སྙིང་གིས་སྐྱེ་བ་དྲན་པ་ན། །ཕྱག་ན་རྡོ་རྗེའི་དངོས་གྲུབ་མཚན་མ་འོ། །སྙིང་ནི་དགའ་ལ་འཚིག་ན་རྗེ་མོ་ཡིན། །སྙིང་འདི་ཁྲི་ལ་འཚིག་ན་ཁོལ་མོ་ཡིན། །ད་ནི་གསང་བའི་གྲུབ་རྟགས་བསྟན་པར་བྱ། །སྔགས་དང་ཏིང་འཛིན་ནུས་པ་སྐྱེས་ཙམ་ན། །རྡོ་རྗེ་དབུས་ཀྱི་རྩ་ཡི་ནམ་མཁའ་ལ། །བྱང་ཆུབ་སེམས་ཀྱི་དགའ་བདེ་སྐྱེ་བ་ན། །མཁའ་འགྲོ་
356a
༄#། །རང་ལ་ཤར་བར་བཤད། །ད་ནི་ཕྱི་ཡི་གྲུབ་རྟགས་བསྟན་པར་བྱ། །ཕྱི་ཡི་རྟགས་ནི་རབ་འབྲིང་ཐ་མ་གསུམ། །རབ་ནི་ལྷ་མོ་ཉིད་ཀྱི་སྐུ་མཐོང་སྟེ། ། ནམ་མཁའི་དབུས་སུ་ཕྱག་ན་རྡོ་རྗེ་མཐོང ། །བུད་མེད་དཀར་མོ་བཞད་ཅིང་བྱུང་བ་ན། །གསང་བའི་ཡེ་ཤེས་དངོས་གྲུབ་སྟེར་བ་འོ། །ནག་མོ་རལ་བ་ཅན་དུ་བྱུང་བ་ན། །འདོད་ཁམས་འདུལ་བའི་མཐུ་རྩལ་དངོས་གྲུབ་བདག་ལ་སྟེར། །དམར་མོ་བསེ་ཡི་རལ་པ་ཅན་དུ་བྱུང་བ་ན། །འཇིག་རྟེན་དབང་དུ་སྡུད་པའི་དངོས་གྲུབ་སྟེར། །སེར་མོ་ཐོད་པའི་ཕྲེང་བ་ཅན་དུ་བྱུང་བ་ན། །ཚེ་དང་ལོངས་སྤྱོད་རྒྱས་པའི་གྲུབ་པ་སྟེར། །མཁའ་འགྲོ་གྲུབ་རྟགས་འབྲིང་པོ་ནི། །རྡོ་རྗེ་ནམ་མཁའ་ལས་དབང་གཙོ་བོ་ཡིན། །རྗེ་མོ་ལྷ་མོ་དུང་སྐྱོང་གྲུབ་རྟགས་ལ། །རྫས་ལུད་དང་ནི་མུན་པ་ཤིན་ཏུ་ནག་།མེ་ཏོག་ཆར་འབབ་འབྲུག་དང་རླུང་དམར་དང ། །བུད་མེད་གཟུགས་དང་གཞའ་ཚོན་སྟོན་པ་འོ། །ཁོལ་མོ་རེ་མ་ཏི་ཡི་གྲུབ་རྟགས་ནི། །འབྲུག་དང་རླུང་དམར་སྒོ་རྡུང་ཁང་ཐོག་འཛེག་།ཐིབས་ཐིབས་མནན་དང་ཐོལ་ཐོལ་སྨྲ་བ་འོ། །གྲུབ་རྟགས་ཐ་མ་རྨི་ལམ་དག་ཏུ་སྟོན། །བྱང་ཆུབ་སེམས་དཔའ་རྨིས་ན་གཙོ་བོ་ཡིན། །མ་དང་སྲིང་མོ་རྨིས་ན་ཇོ་མོ་ཡིན། །ཆུང་མ་ཁོལ་མོ་རྨིས་ན་གཡོག་མོ་ཡིན། །བོང་བུ་ཤ་བ་རྨིས་ན་རྗེ་མོ་ཡིན། །དྲེའུ་དང་བྱ་ནག་རྨིས་ན་ཁོལ་མོ་ཡིན། །མ་མོ་གྲུབ་ནས་དབང་དུ་འདུས་པ་ན། །
356b
བུད་མེད་དག་གིས་བདག་ལ་ཕྱག་འཚལ་ན། །འཛུམ་ཞིང་འཁྲིག་གོ་བྱེད་པ་སྤྱོད་པ་ཡིན། །མ་མོ་གྲུབ་ནས་དབང་དུ་མ་འདུས་ན། །མི་སྡུག་གཟུགས་སུ་སྟོན་ཞིང་རྗེ་མོར་རྫུ། །གཅན་གཟན་ཟར་འོང་མ་མོ་ཕྱག་སྒུགས་སོ། །དམ་ཚིག་ཉམས་ནས་མ་མོ་འཁྲུགས་གྱུར་ན། །མ་མོ་ནང་འཐབ་མཚོན་གྱི་ཆར་པ་འབབ། །བྱ་ནག་ནང་འཐབ་ཁྲག་གི་ན་བུན་འཁྲིགས། །ལྟས་དེ་མཐོང་ན་བཀའ་ཆད་འོང་བའི་རྟགས། །གལ་ཏེ་ལྟེ་ཕུར་ནག་མོ་ལ་སོགས་པའི། །དམ་སྲི་རྣམས་ཀྱིས་སྒྲུབ་པར་བར་གཅོད་ན། །གྲོང་ལ་འཁྲིགས་ཤིང་ཁྱིམ་དུ་འགྲོ་སྙིང་འདོད། ། ཁ་བླ་སྨྲ་སྙིང་འདོད་ལ་ཁྲོ་ཞིང་འཚིག་།བུད་མེད་རྐུབ་དང་མོ་མཚན་སྟོན་པ་རྨི། །གལ་ཏེ་གཏོར་མ་དུས་ལས་ཡོལ་བ་ན། །མོ་མཚན་དང་ནི་སྔོན་གྱི་དབང་རྟགས་སྟོན། །དུ་བ་འཁྲིགས་ནས་བུད་མེད་གླལ་བ་མཐོང ། །བུད་མེད་ངུ་བ་མཐོང་ན་ཉམས་པ་གནོད། །མིག་ནི་བཙུམས་པ་ཏིང་འཛིན་གཡེལ་བའི་རྟགས། །ཐལ་མོ་རྡེབ་ན་དམ་ཚིག་མ་ཚང་ཟེར། །ལྕེ་རྩེ་སྟོན་ན་སྙིང་པོ་ཆད་པ་ཡིན། །སོ་སྒྲ་འཁྲིགས་ན་གཞན་དང་འཐབ་མོ་འོང ། །རྒོད་པ་ཐོས་ན་དགྲ་བགེགས་བསྒྲལ་བའི་རྟགས། །ཁྲོ་ན་བར་ཆད་འོང་བ་སྦྲོན་པ་ཡིན། །སྦྱོར་བར་བྱེད་ན་དངོས་གྲུབ་སྟེར་བ་ཡིན། །རྒྱང་གླུ་ལེན་བ་མཐོང་ན་གྲུབ་ཐག་རིང ། །མཆི་རིས་ངོ་ལ་ཡོད་ན་རིམས་ནད་འོང ། །གར་ཐོབས་བྱེད་ཅིང་བྱུང་ན་ཅི་བསམ་འགྲུབ། །གླིང་བུ་འབུད་པ་མཐོང་ན་གཏོར་
357a
༄#། །མ་འདོད་པ་ཡིན། །ཕྲེང་བ་བགྲང་བ་མཐོང་ན་སྦྱིན་སྲེག་འདོད་པ་ཡིན། །ཁ་ལ་འོ་བྱེད་སྦྱོར་བ་འདོད་པ་ཡིན། །བོང་བུ་ཞོན་པ་རྨིས་ན་རྗེ་མོ་ཡིན། །དྲེའུ་ཞོན་པ་རྨིས་ན་ཁོལ་མོ་ཡིན། །སྙིང་སྦམས་ཐོགས་པ་མཐོང་ན་རང་ལ་ཆགས། །གཡབ་དར་ཐོགས་པ་མཐོང་ན་རང་ལ་ཆགས་པ་འོ། །མེ་ལོང་ཐོགས་པ་མཐོང་ན་ཆུང་མའི་ལུས་ལ་ཆགས། སྟང་སྟབས་བྱེད་པ་སློབ་མའི་ལུས་ལ་ཆགས། །བྱ་དང་གཅན་གཟན་གཏོར་མ་ཟ་བ་བཟང ། །ཁ་རོག་འདུག་ན་སྙིང་པོ་ཕྱག་རྒྱ་ནོར། །འཛུམ་པ་མཐོང་ན་བདག་ཉིད་ཚེ་རིང་རྟགས།། གོས་ལ་མེ་རེག་ཡོད་ན་སློབ་མ་ཉམས། །ཤ་བ་ཞོན་ན་ནོར་རྣམས་འཕེལ་བའི་རྟགས། །མ་མོ་གྲུབ་པའི་རྟགས་རྣམས་གང་བྱུང་ཡང ། །དེ་ནས་གྲུབ་རྟགས་བཟང་པོ་མཐོང་བ་ན། །བདུད་རྩི་བུམ་པའི་ཕྱག་རྒྱ་བཅས་ལ་ནི། །དངོས་གྲུབ་བླང་བའི་སྔགས་ནི་བཟླས་བྱས་ལ། །སྙིང་ལ་ཅི་འདོད་པ་ཡི་དངོས་གྲུབ་བླང ། །མ་དང་སྲིང་མོ་ཁོལ་མོ་དམ་ལ་གདགས། །མཚན་མ་ངན་པ་དག་ནི་མཐོང་བ་ན། །མཚན་མ་ངན་པ་ཟློག་པའི་ཏྲི་ཤུལ་ཕྱག་རྒྱ་བཅའ། །མཚན་མ་ངན་པ་བཟློག་པ་སྔགས་ཀྱིས་བཟློག་།གལ་ཏེ་བདག་ནི་གཞན་དུ་དོན་གཉེར་ན། །བུད་མེད་ལག་ན་རྫས་ནི་གང་བ་ཐོགས། །བྱ་དང་གཅན་གཟན་སྔོན་དུ་འགྲོ་ན་བཟང ། །དེ་ཚེ་གཏོར་མ་འབུལ་ལ་དོན་ལ་འགྲོ། །སྤྱད་སྟོང་ཐོགས་
357b
པ་མཐོང་ན་དོན་མི་གཉེར། །གྲུབ་པའི་དྲོད་ཆད་རྣལ་འབྱོར་སྤྱི་ལ་གཅེས། །མཁའ་འགྲོ་མ་མེ་ལྕེ་འབར་བའི་རྒྱུད་ལས། དྲོད་ཚད་བསྟན་པའི་ལེའུ་སྟེ་བཅུ་གཉིས་པའོ།། །། དེ་ནས་དཔལ་ཕྱག་ན་རྡོ་རྗེ་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །ཐབས་དང་ཤེས་རབ་མངའ་མཛད་རྡོ་རྗེ་འཛིན། །རྡོ་རྗེ་མཁའ་འགྲོ་བསྒྲུབས་ཀྱང་མ་གྲུབ་ན། །སྤོགས་ཤིང་གནད་ལ་དབབ་པར་ཞུ། །ཞེས་གསོལ་པ་དང ། དཔལ་ལྡན་ཕྱག་ན་རྡོ་རྗེས་བཀའ་སྩལ་པ། སྐྱེས་བུ་ཏིང་འཛིན་བློ་ལྡན་རྩལ་ཅན་གྱིས། །རྡོ་རྗེ་མཁའ་འགྲོ་མ་ཡི་གསང་སྔགས་གཙོར་བླངས་ཏེ། །གང་འདོད་དངོས་གྲུབ་མི་ཐོབ་མི་སྲིད་དོ། །འོན་ཀྱང་སྒྲུབ་ཐག་རིང་བ་ན། །དེ་ལ་ཉེས་དམིགས་རྣམ་པ་བཞི། །སྡོན་གྱི་ལས་འཕྲོས་མ་འབྲེལ་དང ། །བསྙེན་པ་ཞག་གྲངས་ཉུང་བ་དང ། །བགེགས་ཀྱིས་བར་དུ་གཅོད་པ་དང ། །རྣལ་འབྱོར་དམ་ཚིག་ཉམས་པ་བཞི། །སྒྲུབ་ཐག་རིང་བའི་རྒྱུ་བཞི་ཡིན། །དེ་བཞིན་མཚན་མ་ངོས་བཟུང་སྟེ། །སྔོན་གྱི་ལས་འཕྲོས་མ་འབྲེལ་ན། །བསྒྲུབས་ཀྱང་དངོས་གྲུབ་མཚན་མ་མེད། །བཟླས་བརྗོད་བསྙེན་པ་གྲངས་ཉུང་ན། །གྲུབ་རྟགས་འོང་ཞིང་ལས་མི་ཉན། །བགེགས་ཀྱིས་བར་དུ་གཅོད་པ་ན། །སྙིང་མི་དགའ་ལ་ཁྲོ་ཞིང་འཇིགས། །རྣལ་འབྱོར་དམ་ཚིག་ཉམས་པ་ན། །བར་ཆོད་རྐྱེན་དབང་དྲག་པོ་འབྱུང ། །འོན་ཀྱང་མི་
358a
༄#། །གཞག་བསྐྱར་ཞིང་བསྒྲུབ། །སྔོན་གྱི་ལས་འཕྲོས་མ་འབྲེལ་ན། །དང་པོར་བསྙེན་པ་ཡུན་རིང་ལ། །དེ་ནས་གནད་ལ་དབབ་པ་ནི། །བསྒྲུབ་པའི་དཀྱིལ་འཁོར་བྱང་ཤར་དུ། །དུར་ཁྲོད་ས་ལ་གྲུ་གསུམ་དཀྱིལ། །འཕང་དུ་ཁྲུ་གང་ཡོད་པ་བརྩིགས། །མི་ཡི་ཁྲག་གིས་ཆག་ཆག་གདབ། །དེ་ནས་ཞིང་སོགས་གཡས་པ་ལ། ། ལྷ་མོ་ཉིད་ཀྱི་སྐུ་བྲིས་ལ། །རྒྱུས་པའི་གཟུངས་ཐག་སྙིང་གར་གདགས། །གྲུ་གསུམ་སྟེང་དུ་གན་རྐྱལ་མནན། །གཟུངས་ཐག་རྩེ་མོ་སོས་བཟུང་ལ། །ཧཱུཾ་མཛད་ཆེན་པོར་གསལ་བསྒོམས་ལ། །མ་མོ་གསོད་པའི་སྙིང་པོ་བཟླས། །རཀྨོ་ཙིཏྟ་རཀྟ་སྟི་ར་ཏི་ཏི་མཱ་རཱ་ཡ་ཧཱུཾ་ཛ། དེ་སྐད་གསང་སྔགས་བཟླས་ནས་ནི། །མ་མོའི་སྙིང་ཁྲག་རྡུབ་པར་བསྒོམ་མ་མོ་བོང་བུར་བཅས་པ་རྣམས། །མ་ཏྲང་བཞིན་དུ་འགྱེལ་བར་བསམ། །དེ་ནས་སྙིང་གར་རྡོག་པས་མནན། །ཙིཏྟ་ཛྭ་ལ་རཾ་ཞེས་པས། །བདག་གི་ཞལ་ནས་མེ་བྱུང་བས། ། མ་མོ་ཐུལ་གྱིས་བསྲེགས་པར་བསམ། །མ་མོའི་ས་བོན་མཾ་ནག་པོ། །བདག་གི་ཞབས་འོག་བརྒྱུད་པ་ལས། །མ་མ་རུ་ལུ་ཞེས་བརྗོད་པ་ལས། །བདག་ཉིད་དཔལ་གྱི་ཞབས་འོག་ནས། །ལྷ་མོ་ནུས་པའི་ཐོད་ཕྲེང་ཅན། །ཐལ་མོ་སྦྱར་ནས་འདུག་པར་བསྒོམ། །རྟ་མགྲིན་ཕྱག་རྒྱས་དབང་དུ་བསྡུ། །ཁྱུང་གཤོག་ཕྱག་རྒྱས་ཟིལ་མནན་ནས། །གནད་
358b
ལ་དབབ་པའི་དམ་རྫས་བསྲེག་།དེ་ལྟར་ལན་གཅིག་བསད་པ་དེས། །གཟུགས་ནི་རྡོག་པའི་འོག་ནས་དབྱུང ། །བྱང་ཤར་མཚམས་སུ་བཞུགས་སུ་གསོལ། །སྨྲེ་བཤགས་བྱ་ཞིང་གདུང་གླུ་བླང ། །བདུད་རྩི་རྣམ་པ་ལྔ་ཡིས་གསོ། །མཚང་ནས་འདྲུ་ཞིང་གནད་ནས་བསྐུལ། །དེ་ནས་སྒྲུབ་པ་བསྐྱར་ལ་བརྩམ། །ཐེ་ཚོམ་མེད་པར་འགྲུབ་པར་འགྱུར། ། བསྙེན་པ་ཞག་གྲངས་ཉུང་བ་ན། །མི་རུས་སམ་ནི་རུ་རག་ཤ། །ལུང་ཐང་དག་གི་ཕྲེང་བ་ལ། །མ་ཡེངས་གྲངས་ཀྱི་བསྙེན་པ་ནི། །འབུམ་ཚོ་བདུན་དུ་བཟླས་ཀྱང་རུང ། །ཡང་ན་མཚན་མའི་བཟླས་པ་ཤིས། །བགེགས་ཀྱིས་བར་དུ་གཅོད་པ་ན། །གྲུ་གསུམ་ཨེ་དོང་ནག་པོ་བརྐོ། །མི་ཁྱི་ཕག་གི་ཆག་ཆག་གདབ། །ཁམ་ས་རྫ་ཡི་ལིངྒ་ལ། །སྙིང་གར་དམ་སྲིའི་མིང་བྲིས་ལ། །རབས་ཆད་ནག་པོའི་ཐོད་པར་གཞུག་།ཐོད་པ་དོང་གི་ནང་དུ་གཞུག་།འབར་བའི་དཀྱིལ་འཁོར་གསལ་བར་བསྒོམས། །དམ་སྲི་བཀུག་ཅིང་བསྟིམས་བྱས་ལ། །མི་རུས་སོར་བརྒྱད་ཕུར་པ་ཡིས། །མི་གཡོ་མགོན་པོར་གསལ་བསྒོམས་གདབ། །མཚན་མ་ངན་པ་བཟློག་སྔགས་བཟླས། །དེ་སྟེང་རྡོ་བ་ནག་པོ་ལ། །རི་རབ་རྡོ་རྗེ་རྒྱ་གྲམ་བྲི། །འབྲུབ་ཁུང་དེ་ཡི་ཁ་བཅད་ལ། །དེ་སྟེང་སྐུ་གདུང་ནག་པོ་བརྩིག་།དེ་ནི་དམ་སྲི་མནན་པར་བཤད། །རྣལ་འབྱོར་དམ་ཚིག་ཉམས་པ་ལ། །མཁའ་འགྲོ་མ་ཡི་ཆད་པ་འབྱུང ། །ཉམས་ཚད་
359a
༄#། །ཆེ་ན་བཀའ་ཆད་ཆེ། །སྒྲུབ་པ་གྲུབ་རྟགས་མེད་པ་དང ། །རང་ཉིད་སྲོག་ལ་འབབ་པའོ། །ཉམས་པ་འབྲིང་གི་བཀའ་ཆད་ནི། །འཁོར་ལ་རྐྱེན་དང་རིམས་ནད་འབྱུང ། །ཉམས་པ་ཐ་མའི་བཀའ་ཆད་ནི། །དགྲ་དང་ནོར་ལ་གོད་ཀ་འབྱུང ། །དེ་ནས་ཉམས་པ་བསྐང་བ་བསྟན། །ཉམས་པ་ཆེན་པོ་བསྐང་བ་ནི། །གཏོར་མ་ཁྲི་དང་སྦྱིན་སྲེག་ཁྲི། །དེ་བཞིན་ར་ཙ་གསུམ་གྱིས་བསྐང ། །དེས་ཀྱང་སྐོངས་པར་མི་འགྱུར་ན། །དང་པོ་མཁའ་ལྡིང་གསུམ་གྱིས་བསྐང ། །དེ་ནས་ཤེལ་ནག་གསུམ་གྱིས་བསྐང ། ། བཀའ་ཆད་འབྲིང་པོ་བྱུང་བ་ན། །གཏོར་མ་སྟོང་དང་སྦྱིན་སྲེག་སྟོང ། །མཁའ་ལྡིང་གཉིས་དང་སྤྱི་ནག་གཉིས། །དེ་བཞིན་ར་ཙ་གཉིས་ཀྱིས་བསྐང ། །མ་དངས་ཀྱི་མར་མེ་བཅོ་བརྒྱད་དབུལ། །བཀའ་ཆད་ཐ་མ་བྱུང་བ་ན། །གཏོར་མ་བརྒྱ་དང་སྦྱིན་སྲེག་བརྒྱ། །མཁའ་ལྡིང་གཅིག་དང་ཤེལ་ནག་གཅིག་།ར་ཙ་གཅིག་གིས་སྐོང་བར་བཤད། ། མཁའ་འགྲོ་མ་མེ་ལྕེ་འབར་བའི་རྒྱུད་ལས། སྤོགས་ཤིང་ཐུགས་དམ་སྐོང་བའི་ལེའུ་སྟེ་བཅུ་གསུམ་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །དྲག་པོ་དཔལ་འབར་གནོད་སྦྱིན་ཁྲོས་པའི་གཙོ། །རྡོ་རྗེ་མཁའ་འགྲོའི་དངོས་གྲུབ་སྒྲུབ་འདོད་པས། །རྟག་ཏུ་
359b
བསྟེན་པ་རྡོ་རྗེ་འཛིན་པས་ཤོད། །ཅེས་གསོལ་པ་དང ། དཔལ་ཕྱག་ན་རྡོ་རྗེས་བཀའ་སྩལ་པ། ཉོན་ཅིག་མཁའ་འགྲོ་རྟག་ཏུ་བསྟེན་པ་ནི། །དང་པོ་གྲུབ་ཅིང་མཚན་མ་ཐོབ་པ་གཅེས། །དེ་ནས་ཕྱི་ནང་གསང་བ་གསུམ་དུ་བསྟེན། །དཔོན་མོའི་ཕྱི་ཡི་རྟེན་ནི་རྨ་བྱའོ། །རྨ་བྱའི་སྙིང་གར་བྷྱོ་ལས་ལྷ་མོ་བསྐྱེད། །ཁོལ་མོའི་ཕྱི་ཡི་རྟེན་ནི་བྱ་ནག་མོ། །སྙིང་གར་བྷྱོ་ལས་རེ་མ་ཏི་བསྐྱེད་ལ། །རྨ་བྱ་དེ་མོ་ནག་གམ་ཤེལ་ནག་ལ། །སྣ་ལ་མ་མོ་དཔོན་གཡོག་ལེགས་པར་དབབ། །དེ་ནས་ཕྱི་ནང་གསང་བའི་དབང་བསྐུར་ལ། །དུས་སུ་གཏོར་མས་མཆོད་ཅིང་རྟེན་དུ་གཟུང ། །ནང་གི་རྟེན་ནི་སྐུ་དང་གསང་མཚན་ནོ། །རང་གི་གཟུགས་དང་གསང་མཚན་ཁ་སྤྲད་ལ། །བར་དུ་རུ་ཏི་རྡོ་རྗེ་པདྨ་མི། །གསང་བ་ག་བུར་སྩལ་ཏེ་ལུས་ལ་བསྲེལ། །གསང་བའི་རྟེན་ནི་ལྷན་ཅིག་གྲུབ་པའི་ལྷ། །གསང་བ་ཡེ་ཤེས་ཐིག་ལེ་མ་མོར་བལྟའོ། །དེ་ནས་རྟག་ཏུ་སྔགས་དང་ཕྱག་རྒྱ་དང ། །ཏིང་འཛིན་རྫས་དང་དམ་ཚིག་མི་སྤོང་ངོ ། །རྟག་ཏུ་ཟས་ཀྱི་ཕུད་ཀྱིས་བསྟེན་པར་བཤད། །མཁའ་འགྲོ་མ་མེ་ལྕེ་འབར་བའི་རྒྱུད་ལས། མ་མོ་རྟག་ཏུ་བསྟེན་པའི་ལེའུ་སྟེ་བཅུ་བཞི་པའོ།། །། དེ་ནས་དཔལ་ཕྱག་ན་རྡོ་རྗེ་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །ཀྱེ་དཔལ་འབར་ཆེན་པོ་ཉི་མ་སྟོང་གི་གཟི། །རྡོ་རྗེ་ལྷ་མོ་མཁའ་འགྲོ་མ་དཔལ་གྱི་ལྷ་མོ་
360a
༄#། །ཡི། །པྲ་རྟགས་དབབ་དང་སློབ་མ་དབང་བསྐུར་བའི། །མ་མོ་དབབ་པའི་གསང་སྔགས་བདག་ལ་ཤོད། །ཅེས་གསོལ་པ་དང ། དཔལ་ཕྱག་ན་རྡོ་རྗེས་བཀའ་སྩལ་བ། ལྷ་མོ་འབེབས་ཤིང་སློབ་མ་དབང་བསྐུར་བའི། །སློབ་དཔོན་ཉིད་ཀྱིས་མ་མོ་གྲུབ་པ་གཅེས། །དེ་ནས་མ་མོ་གྲུབ་པའི་སློབ་དཔོན་དེས། །དུར་ཁྲོད་ཆེན་པོར་ཞག་བདུན་བསྙེན་པ་བྱ། །སྔགས་དང་མན་ངག་རྫས་སུ་ལྡན་པར་བྱ། །དང་པོར་རང་ལ་མ་མོ་ཕེབས་པར་དབབ། །དེ་ནས་སློབ་མ་དཀྱིལ་འཁོར་འཇུག་པ་དང ། །མེ་ཏོག་དོར་དང་ལྷ་ངོ་བསྟན་བྱ་དང ། །དཔལ་ཕྱག་ན་རྡོ་རྗེའི་དབང་བཞི་བསྐུར། །དང་པོ་རྡོ་རྗེ་རྩེ་ལྔ་འབར་བའི་དབང ། །གཉིས་པ་ཤེས་རབ་དྲིལ་བུ་དག་གི་དབང ། །དེ་བཞིན་གསུམ་པ་ལ་ནི་དབུ་རྒྱན་ཏེ། །བཞི་པ་རིགས་ལྔ་ཡེ་ཤེས་ལྔ་ཡི་དབང ། །དེ་ནས་ལྷ་མོ་ནག་མོའི་དབང་བཞི་བསྐུར། །དང་པོ་ལ་ནི་ཐོད་པའི་དབང ། །གཉིས་པས་ཤེས་རབ་རལ་གྲིས་དབང་བསྐུར་ཏེ། །གསུམ་པ་ལ་ནི་ནེའུ་ལེའི་རྐྱལ་བུ་འོ། །དེ་བཞིན་བཞི་པ་དཔའ་བོ་ཧ་སྟ་སྦྱིན། །དེ་ནས་རེ་མ་ཏི་ཡི་དབང་བཞི་བསྐུར། །དང་པོ་དུར་ཁྲོད་གཡང་གཞིའི་དབང ། །གཉིས་པ་རྡོ་རྗེ་ཌ་མ་རུ་ཡི་དབང ། །གསུམ་པ་ཁ་ཊྭཱཾ་བདུད་ཀྱི་ཁྲམ་བམ་དབང ། །དེ་བཞིན་བཞི་པ་ཆུ་གྲི་གདེངས་པའི་དབང ། །དབང་ནི་བསྐུར་བའི་སྔགས་
360b
ཀྱང་བཟླས་པར་བྱ། །བཅུ་གཉིས་རིམ་པ་སྔོན་དུ་བརྗེས་པ་དང ། །སྐུ་དང་གསུང་གི་དམ་ཚིག་འབོག་པར་བྱའོ། །དེ་ནས་གསང་བའི་དབང་ལ་འཇུག་པར་བྱ་སྟེ། །དབང་པོ་བྲམ་ཟེ་རྒྱལ་རིགས་རྗེའུ་རིགས་ཀྱི། །བུ་མོ་བརྒྱད་དང་བཅུ་དྲུག་ཉི་ཤུ་མ། །མིག་གི་དཀྱུས་རིང་སྤོ་སངས་ནུ་མ་གྱིས། །སྐྲ་བཟང་སོ་དཀར་ཨུཏྤལ་བྲོ། །དེ་ལ་ཁྲུས་བྱས་མེ་ཏོག་གསེར་གྱིས་བརྒྱན། །དབང་པོ་ལྔ་ལ་བདུད་རྩི་དག་གིས་གདབ། །དཔྲལ་བར་ཕྱག་ན་རྡོ་རྗེའི་གསང་སྔགས་བྲི། །དེ་ཡི་སྙིང་གར་ལྷ་མོའི་སྙིང་པོ་ལ། །ལྟེ་བར་རེ་མ་ཏི་ཡི་སྙིང་པོ་བྲི། །སྨན་ལྔ་བདུད་རྩི་ལྔ་ཡི་ཟས་བྱིན་ལ། །གསང་བའི་པདྨར་རུ་ཧི་རྡོ་རྗེ་སྩལ། །དེ་ནས་བསྒྲུབ་པའི་དཀྱིལ་འཁོར་ནུབ་ཕྱོགས་སུ། །དབང་བསྐུར་སྟེགས་བུ་ཟླུམ་པོ་དམར་པོ་བརྩིགས། །དེ་ཡི་སྟེང་དུ་བུ་མོ་དེ་བཞག་ལ། །ཕྱོགས་མཚམས་ཀུན་ཏུ་ཚིལ་དང་ཅོང་ཟི་བསྲེག་།སྟེང་འོག་ཀུན་ཏུ་ཞིང་གི་བླ་རེ་གདན། །མདུན་དང་རྒྱབ་ཏུ་གཏོར་མ་སྦྱིན། །དེ་ནས་མ་མོའི་སྙིང་པོ་འབུམ་དུ་གདོན། །དེ་ནས་རྡོ་རྗེ་སློབ་དཔོན་གུ་རུ་ཡིས། །ཌ་མ་རུ་རྡུང་མ་མོ་དྲག་ཏུ་འབོད། །སྲོག་སྙིང་དྲང་ཞིང་གཡབ་དར་གཡབ། །དེ་ནས་བུ་མོ་དེ་ལ་སེམས་གཏད་ལ། །སྔགས་འདི་བཟླས་ཤིང་གདོང་དུ་རྟག་ཏུ་བལྟ། །བུ་མོ་མ་ཡེངས་ས་ལེ་བསྒོམ་དུ་གཞུག་།ོཾ་ཙཎྜ་མཧཱ་རོ་ཥ་ཎ་ཧཱུཾ་ས་མ་ཡ་པྲ་ཐཱ་རུ་རུ་རོ་རུ་ཙ་པ་ལ་ཨ་ཤུག་
361a
༄#། །མེ་ས་མ་ཡ་པྲ་ཐཱ། ཁ་མུནྟྲ་པྲ་མ་ཡ་མ་ཏིཥྚ་པྲ་ཡོ་ག་སིདྡྷི་ས་མ་ཡ་པྲ་ཐཱ་ཨཱ་བེ་ཤ་ཨཱ། དྲག་ཏུ་མ་མོ་བསྐུལ་ཞིང་དབབ་པར་བྱའོ། །ཕེབས་པར་དཀའ་ན་གདན་ལ་འབེབས་རྫས་བསྲེག་།ལན་གསུམ་མ་མོ་འབུམ་གྱིས་ངེས་པར་ཕེབས། །བཟང་ངན་ལེགས་ཉེས་མཚན་མ་ཐོལ་ཐོལ་སྨྲའོ། །ཡང་ན་མི་སྨྲ་བར་ཡང་ཕེབས་པར་བྱེད། །དེ་ནས་བུ་མོ་དེ་ཡི་ལུས་པོ་ལ། །སྤོས་དང་མེ་ཏོག་མར་མེ་དྲི་ཆབ་ཀྱིས། །དང་པོ་ལ་ནི་ཕྱི་ཡི་མཆོད་པ་བྱ། །ཤ་ལྔ་བདུད་རྩི་ལྔ་དང་བཟའ་བཏུང་གིས། །དེ་ནས་གཉིས་པ་ནང་གི་མཆོད་པ་དབུལ། །གསང་བའི་མཆོད་པ་ཁུ་བའི་ཐིག་ལེ་དེས། །དང་པོས་གཙོ་བོ་རྡོ་རྗེ་འཛིན་པ་མཆོད། །གཉིས་པས་ལྷ་མོ་དཔོན་གཡོག་མཆོད་པར་བྱ། །གསུམ་པས་ཁུ་བ་བདག་བཏུང་དངོས་གྲུབ་བླངས། །གཟུངས་མ་མཁའ་འགྲོ་ཡིན་པར་ངེས་བསྐྱེད་ལ། །གཟུངས་མའི་ལྕེ་ལ་བཞག་ལ་དམ་ཚིག་བསྲེ། །དེ་ནས་ཐིག་ལེ་སློབ་མའི་ལྕེ་ལ་བཞག་།དེ་ནས་མ་མོ་ཐུགས་ཀྱི་དབང་སྦྱིན་ནོ། །དེ་ནས་བུ་མོ་དེ་ཡི་མདུན་དུ་ནི། །དབང་གི་རྟགས་སུ་ཟླ་ཁམ་དམར་པོ་བརྩིགས། །དེ་ནས་སློབ་མ་སྟེགས་བུའི་ཁ་ལ་བཞག་།མཁའ་འགྲོ་ཀུན་ལ་སྦྱིན་སྲེག་གཏོར་མ་དབུལ། །དེ་ནས་བུ་མོ་ཤེས་རབ་མ་དེ་ཡིས། །མ་མོ་འདོད་ཀྱི་སློབ་མ་དེ་ལ་དབབ། །མ་མོ་སྐུལ་
361b
བའི་རྫས་རྣམས་བསྲེག་པར་བྱ། །ཕྱི་དང་ནང་གི་དྲོད་ཚད་མཚན་མ་དབང ། །མཚན་མ་ཕེབས་ནས་ཐུགས་ཀྱི་དམ་ཚིག་དབབ། །དམ་ཚིག་བསྲེ་བའི་གསང་བའི་དབང་བསྐུར་རོ། །དེས་ནི་མཁའ་འགྲོ་མངོན་དུ་འགྲུབ་པར་བཤད། །མ་མོ་མཁའ་འགྲོ་ཐུགས་ཀྱི་གསང་རྒྱུད་འདི། །དབང་དང་དམ་ཚིག་མེད་པའི་སློབ་མ་ལ། །ཚིག་གཅིག་བསྟན་ཡང་ཚེ་ཡི་འདུ་བྱེད་སྐུལ། །མྱུར་དུ་ཤི་ནས་རྡོ་རྗེ་དམྱལ་བར་སྐྱེ། །དེ་བས་དབང་བསྐུར་གནང་བ་ཐོབ་ལ་སྦྱིན་པར་བཤད། །མཁའ་འགྲོ་མ་མེ་ལྕེ་འབར་བའི་རྒྱུད་ལས། དབང་བསྐུར་བའི་ལེའུ་སྟེ་བཅོ་ལྔ་པའོ།། །།དེ་ནས་ལྷའི་དབང་པོ་བརྒྱ་བྱིན་དེས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་མ་ཕྱག་ན་རྡོ་རྗེ་ཆེ། །ངོ་མཚར་བྱིན་བརླབས་རྣམས་ཀྱི་མཆོག་།ལྷ་མོ་གྲུབ་པའི་རྣལ་འབྱོར་པའི། །ལས་ཀྱི་རིམ་པ་བཤད་དུ་གསོལ། །ཅེས་གསོལ་པ་དང ། དཔལ་རྡོ་རྗེ་འཛིན་པས་བཀའ་སྩལ་པ། ཉོན་ཅིག་ལྷ་ཡི་དབང་པོ་བརྒྱ་བྱིན་ཉོན། །ལྷ་མོའི་གྲུབ་པ་ཐོབ་པའི་རྣལ་འབྱོར་པས། །སོ་སོའི་ལས་ལ་ཆེད་དུ་མ་བརྩམས་ཀྱང ། །ཡིད་ལ་ཅི་འདོད་བསམ་པ་ཙམ་གྱིས་འགྲུབ། །འོན་ཀྱང་ཆེད་དུ་སྒྲུབ་པ་རྩོམ་པ་ན། །ལས་ཀྱི་བྱེ་བྲག་དམ་པ་ངས་བཤད་དོ། །མ་མོ་གྲུབ་པ་རྣམས་ཀྱིས་བྱ་བ་ཡིན། །དང་པོའི་ལས་ཅན་རྣམས་ཀྱིས་མི་བརྩམ་མོ། །བརྒྱ་བྱིན་ཉོན་ཅིག་ཞི་བའི་ལས་ཀྱི་ཁྱད་པར་ནི། །བུ་རམ་སྦྲང་རྩི་གི་ཝང་དང ། །
362a
༄#། །གུ་གུལ་སྤོས་དང་འོ་མ་དང ། །མར་ཁུ་ཏིལ་དང་འབྲས་ཆན་དང ། ། ག་རུ་དང་དུ་རུ་ཀ་།གང་ལ་བྱ་བའི་མིང་དང་བཅས། །རི་ལུ་ཁྲི་ཚོ་གཅིག་བྱས་ལ། །ཞི་བའི་ཐབ་ཁུང་ཟླུམ་པོ་དང ། །འོ་མ་ཡོད་པའི་ཤིང་བརྩིགས་ལ། །མཁའ་འགྲོ་མ་རྣམས་དཀར་པོ་ལ། །བདུད་རྩིའི་བུམ་པ་ཐོགས་ནས་ཀྱང ། །གང་ལ་བྱ་བའི་སྤྱི་བོ་ནས། །དབང་བསྐུར་ལུས་པོ་ཞི་བར་བསྒོམ། །མེ་སྤར་རི་ལུ་རིམ་གྱིས་བསྲེག་།གོང་མའི་སྲོག་སྙིང་བཟླས་ཤིང་འབུལ། །སྲོག་གི་སྙིང་པོའི་གཞུག་རྒྱན་དུ། །ཤའྣྟིཾ་ཀུ་རུ་སཝཱ་ཧཱ་བཟླས། །འབུམ་ཚོ་བཞི་རུ་བཟླས་བྱས་ལ། །བདུད་དང་བགེགས་རྣམས་ཞི་བ་དང ། །དགྲ་དང་ནད་ཡམས་ཞི་བར་བྱེད། །རྒྱས་པའི་ལས་སུ་བྱ་བ་ནི། །གུར་གུམ་སྟརྒའི་རྒུན་འབྲུམ་དང ། །ུཏྤལ་མར་ཁུ་གི་ཝང་དང ། །བདུད་རྩི་ལྔ་དང་དཔག་བསམ་ཤིང ། །གང་ལ་བྱ་བའི་མིང་དང་བཅས། །ཁྲི་ཚོ་གཉིས་ཀྱི་རི་ལུ་བྱ། །རྒྱས་པའི་ཐབ་ཁུང་གྲུ་བཞི་པ། །འབྲས་བུ་ཡོད་པའི་ཤིང་བརྩིགས་ལ། །གཙོ་བོ་ཕྱག་ན་རྡོ་རྗེ་དང ། །མཁའ་འགྲོ་མ་ཀུན་སེར་པོ་ལ། །རིན་ཆེན་མཛོད་དང་བུམ་པ་ཐོགས། །གང་ལ་བྱ་བའི་སྙིང་ག་རུ། །དབང་བསྐུར་ཕུང་པོ་རྒྱས་པར་ཤོག་།མེ་སྤར་རི་ལུ་རིམ་གྱིས་འབུལ། །ོཾ་ཙཎྜ་མ་ཧཱ་རོ་ཥ་ཎ་ཧཱུཾ། མ་མུཏྟྲ་བ་ཏྲ་བ་ཏྲག་རགྨོ་པུཥྚིཾ་ཀུ་རུ་སཝཱཧཱ། འབུམ་ཚོ་བརྒྱད་
362b
དུ་བཟླས་པ་བྱ། །ཆེ་དང་རིགས་རྒྱུད་འཕེལ་བར་བྱེད། །ནོར་དང་ལོངས་སྤྱོད་འཕེལ་བར་འགྱུར། །དབང་གི་ལས་སུ་བྱ་བ་ནི། །སྦྲང་རྒོད་ར་ཁྲག་ཆང་དང་ཆབ་ཚན་དང ། །ཁུག་ཆོས་ལུག་མིག་པ་དང་ནི། །ཡུང་དང་གླ་རྩི་ཅོང་ཞུན་དང ། །ཉ་ཤ་མར་ཁུ་རྒྱ་སྐྱེགས་ནི། །རི་ལུ་ཁྲི་ཚོ་གསུམ་བྱས་ལ། །དབང་གི་ཐབ་ཁུང་ཟླ་གམ་ལ། །ཚེར་མ་ཅན་གྱི་ཤིང་བརྩིགས་ལ། །གཙོ་དང་འཁོར་གྱི་མ་མོ་ཀུན། །མདོག་དམར་ལྕགས་ཀྱུ་ཐོགས་པ་ཡིས། །གང་ལ་བྱ་བ་བཀུག་པར་བསྒོམ། །མེ་སྦར་རི་ལུ་རིམ་གྱིས་བསྲེག་།ོཾ་ཙཎྜ་མ་ཧཱ་རོ་ཥ་ཎ་ཧཱུཾ། པ་ཙ་ལ་ཨ་ཤུགྨེ་པྲ་མ་མཧཱ་སྟི་པྲ་ཆེ་གེ་མོ་ཨཱ་ཀཪྵ་མ་ན་ཡ་ཧྲི་ཛ། འབུམ་ཚོ་བཅུ་དྲུག་བཟླས་པ་ན། །འཁོར་ལོས་བསྒྱུར་བའི་རྒྱལ་པོ་དང ། །སྟག་དང་གླང་པོ་ནོར་བུ་དང ། །འགྲོ་བ་བཟང་དང་བློན་པོ་དང ། །དམག་མི་དང་ནི་ལྷ་མི་དང ། །ཀླུ་དང་གནོད་སྦྱིན་བུ་མོ་དང ། །ཀུན་ཀྱང་བདག་གི་དབང་དུ་འགྱུར། །བསྲེག་པའི་ལས་སུ་བསྟན་པ་ནི། ། དྲག་པོའི་མེ་ཐབ་གྲུ་གསུམ་དུ། །དུག་ཤིང་ཚེར་མའི་མེ་བུས་ལ། །རྟ་དང་མགྲིན་རིང་ཤ་དང་ཆིལ། །ཁཝ་ཡི་སྒྲོ་དང་ཐར་ནུའི་ཆང ། །གང་ལ་བྱ་བའི་མིང་དང་བཅས། །འབུམ་ཚོ་རུ་ནི་བཟླས་པ་བྱ། །རླུང་གི་དཀྱིལ་འཁོར་སྟེང་དུ་ནི། །རླུང་གི་རྔ་མོ་སྔོན་མོ་བསྐྱོན། །དེ་སྟེང་གང་ལ་བྱ་བ་བསྐྱོན། །རེ་མ་ཏི་ཡིས་སྣ་ནས་ཁྲིད། །ལྷ་མོ་ནག་ཕྱི་ནས་དེད། །
363a
༄#། །ཕྱག་ན་རྡོ་རྗེས་རྒྱབ་ནས་ཕུལ། །དཔག་ཚད་བརྒྱད་ཁྲིར་བསྐྲད་པར་བསམ། །སྙིང་པོ་བཟླས་ཤིང་ཡས་སྟགས་བསྲེག་།སྙིང་པོ་ཐ་མ་སྐྲོད་ཅེས་བསྐུལ། །ཡུལ་ནས་འབྱུང་ཞིང་འཁྱམས་པར་ནུས། །ཕཊ་ཙ་པ་ལ་ཨ་ཤུགྨེ། སྥ་ར་ཎ་མ་ཡཾ་ཕཊ་ཕཊ་སྐྲོད་ཅིག་།དབྱེ་བའི་ལས་སུ་བསྟན་པ་ནི། །རྟ་གཡག་བྱ་རོག་འུག་པའི་ཤ། །བཙན་དུག་སྐེ་ཚེ་སྤྱང་ཀིའི་ཚིལ། །མཛའ་བོ་གཉིས་ཀྱི་མིང་བཅས་ལ། །ཚེར་མའི་ཤིང་ལ་མེ་བུས་ལ། །འབུམ་ཚོ་གཅིག་ཏུ་བསྟབ་པར་བྱ། །སྲོག་གི་སྙིང་པོའི་ཐ་མར་ནི། །མ་མ་ཏྲག་རག་ཤ་རུ་ཏྲ་མ་ར་ཡ་ཧཱུཾ་ཕཊ། ག་ཙ་ཕཊ་ཅེས་ནི་བཟླས་པ་བྱ། །ཐེ་ཚོམ་མེད་པར་དབྱེ་བར་ནུས། །བུད་མེད་འགུགས་པའི་སྦྱོར་བ་ནི། །ལན་ཚ་རྒྱ་སྐྱེགས་རྡོ་སོལ་དང ། །ཅོང་ཟི་བུ་རམ་ཉ་ཤ་དང ། །སྦྲང་རྩི་མངལ་ཁྲག་ཁུ་བ་དང ། །གང་ལ་བྱ་བའི་མིང་ངམ་སྐྲ། །རི་ལུ་བརྒྱ་རྩ་བརྒྱད་བྱས་ལ། །སེང་ལྡེང་མེ་ལ་བསྲེག་པར་བྱ། །དུ་བ་བྱུང་ན་འདོད་ཆགས་ལངས། །མེ་ལྕེ་འབར་ནས་ཁུགས་པར་བྱེད། །སྔགས་ནི་མཁའ་འགྲོའི་སྙིང་པོས་བྱ། །ཐ་མ་བུད་མེད་འདིས་ཁུག་བྱ། །དེས་ནི་ཐེ་ཚོམ་མེད་པར་ནུས། ། ལྐུགས་པར་བྱ་བ་བསྟན་པ་ནི། །ཁམ་པའི་རྫས་ལ་དགྲ་གཟུགས་བྱ། །ལུག་གི་རྐན་ལ་མིང་བྲིས་ལ། །དེ་ཡི་སྙིང་གར་གཞུག་པར་བྱ། །ཁ་ཡི་ནང་དུ་ཉ་མགོ་གཞུག་།ཁ་ནི་
363b
ཚེར་མས་རབ་ཏུ་གཏུར། །གཟུགས་ནི་ཁྱི་མགོའི་ཁར་གཞག་ལ། །ཁྱི་མགོ་སྤྱང་ཀིའི་རྒྱུས་པས་དཀྲིས། །གསང་སྔགས་བརྒྱ་རྩ་བརྒྱད་དུ་བཟླས། །ོཾ་བཛྲ་ཙཎྜ་རོ་ཥ་ཎ་ཧཱུཾ། རེ་མ་ཏི་ཆེ་གེ་མོ་བགྴ་ཧཱུཾ། སོས་པར་བྱ་ན་སླར་ལ་བཤིག་།གལ་ཏེ་མ་བཤིག་མནན་ན་ནི། །མ་ཤིའི་བར་དུ་ཁ་འཐམས་སོ། །སྨྱོ་བའི་ལུས་སུ་བྱ་བ་ནི། །བཙན་དུག་ལྡོང་རོས་སྦྲུལ་ནག་གོ་།སྡིག་པའི་རཝ་དང་བྱེའུ་ཆུང་རོ། །གང་ལ་བྱ་བའི་མིང་དང་བཅས། །དེ་ཉིད་ཀྱི་ནི་གནས་སུ་བསྲེག་།ཆེ་གེ་མོ་ཤ་ཏྲུན་ན་ཤ་པྲ་མ་ཡ་ཧཱུཾ་ཕཊ། ཐེ་ཚོམ་མེད་པར་འབོག་ཅིང་སྨྱོ། །རེངས་པར་བྱ་བ་བསྟན་པ་ནི། །དྲི་རྒོད་རོ་བསྲེགས་རུས་པ་དང ། ། པྲ་ནག་པོའི་འབྲས་བུ་དང ། །དམངས་རིགས་ཁྱིམ་གྱི་དུད་པ་དང ། །བྱི་ལའི་ཤ་དང་བཙན་དུག་དང ། །ཕབས་དང་སུག་པ་གུ་གུལ་ནག་པོ་དང ། །ཕྱེ་མ་དག་ཏུ་རབ་སྦྱངས་ལ། །སྔགས་ནི་འབུམ་དུ་བཟླས་པ་བྱ། །ོཾ་པ་ཎི་བཛྲ་མཧཱ་ཀ་ལི་ཙ་པ་ལ་ཧཱུཾ། སྤོ་ཏ་གྲུམ་སྔོ་སྲེང་ཧཱུཾ་ཧཱུཾ་ཧཱུཾ། དེ་རྣམས་ཀྱི་ནི་ཕྱེ་མ་དེ། །གང་ལ་གཏོར་བས་རེངས་པར་ནུས། །རང་ལུས་སྦ་བའི་སྦྱོར་བ་ནི། །ཁཝ་ཏ་ནག་པོའི་ཚང་ཤིང་ལ། །ུཏྤལ་ནག་པོའི་ཁུ་བས་བྱུག་།བྲམ་ཟེའི་གོ་རོ་ཙ་ནས་བསྐུ། །བསྒྲུབ་པའི་དཀྱིལ་འཁོར་དབུས་སུ་གཟུགས། །ཕྱག་ན་རྡོ་རྗེའི་སྙིང་པོ་བཟླས། །དེ་ནས་ན་བུན་བུ་མོ་བདུན། །སྲིན་བལ་ནང་དུ་དྲིལ་ལ་གཞག་།ལྷ་
364a
༄#། །མོ་དཔོན་གཡོག་སྙིང་པོ་བཟླས། །སྲིན་བལ་ཐུམ་པོ་ཤིང་ལ་གདགས། །མི་མ་མཐོང་བར་ལུས་ལ་བཙའ། །བདག་ནི་སུས་ཀྱང་མི་མཐོང་ངོ ། །ཉོན་ཅིག་ལྷ་དབང་བརྒྱ་བྱིན་ཉོན། །བསྟན་པ་གཉེན་པོ་བཤིག་པ་དང ། །རྡོ་རྗེ་སློབ་དཔོན་བརྙས་པ་དང ། །གསད་པའི་སྦྱོར་བ་རབ་ཏུ་བཤད། །རྗེ་མོས་གསད་པའི་ལས་བཞི་དང ། །ཁོལ་མོ་ནག་མོའི་ཐུན་དྲུག་ནི། །ངས་གསུངས་པ་ལ་ཐེ་ཚོམ་མེད། །གསད་པའི་ལས་བཞི་བསྟན་པ་ནི། །དང་པོར་ཁྲག་ནད་དབབ་པ་དང ། །གཉིས་པ་རིམས་ནད་དབང་པ་དང ། །གསུམ་པ་ཚ་བ་འབྲུམ་ནག་འབར། །བཞི་པ་སྙིང་གཟེར་འབར་བ་འོ། །ནད་གཞི་གང་འདོད་འབར་བས་གསད། །ཁྲག་ནད་དག་གིས་དགྲ་གསད་ན། །རོ་ཚས་རས་ལ་ལིངྒ་བྲི། །ཚ་བ་གསུམ་གྱི་ཁུ་བས་བསྐུ། །བཟླས་པ་བྱ་ཞིང་གཏོར་མ་གཏང ། །ཕེབས་པ་དང་དབབ་ཅིང་བསྐུལ་བར་བྱ། །ོཾ་བཛྲ་ཙཎྜ་མཧཱ་རོ་ཥ་ན་ཧཱུཾ། ཨོཾ་རུ་རུ་ཏིཥྚ་བ་ཏོ་སི། རུ་རུ་བེ་རོ་རུ་བེ་ཏིཥྚ་བ་ཏོ་སི། ཙ་པ་ལ་ཨ་ཤུགྨེ། ཆེ་གེ་མོ་རཀྟ་རོ་གེ་ནག་མར་ཡ་ཧཱུཾ་ཕཊ། ཁྲི་ཚོ་གཅིག་ཏུ་བཟླས་བྱས་ལ། །ལིངྒ་གཏོར་མར་དབུལ་བར་བྱ། །ཁྲག་ནད་ཀྱིས་ནི་འཆི་བར་འགྱུར། །ད་ནི་རིམས་ནད་དབབ་པ་བཤད། །བཙན་དུག་མདའ་དུག་རྒྱུ་གཟེར་ཁྲག་།ཆང་དང་ལོ་དུག་ཁྲག་དང་
364b
བཞི། །ཐོད་པ་དུམ་བུ་བརྒྱད་པར་སྩལ། །ཞིང་རས་དག་གིས་ཁ་བཅད་ལ། །སྔགས་འདི་སུམ་འབུམ་བཟླས་པ་བྱ། །ོཾ་བཛྲ་ཙཎྜ་མཧཱ་རོ་ཥ་ཎ་ཧཱུཾ། རུ་རུ་བེ་ཏིཥྚ་བ་ཏོ་སི། རུ་རུ་རོ་རུ་ཧོ་རུཥྚ་བ་ཏོ་སི། ཙ་པ་ལ་ཨ་ཤུགྨེ་ཧཱུཾ། བྱ་ཧ་ད་མི་རོ་གེ་ན་ག་ཨཱ་བེ་ཤ་ཡ་མ་ར་ཡ་ཕཊ། རང་ཉིད་ཁྲོས་པའི་ཆ་ལུགས་བྱ། །དགྲ་ཡི་ཕྱོགས་སུམ་མཚན་མོ་གཏོར། །རིམས་ནད་དག་གིས་ཕུང་བར་ནུས། །ཚ་བའི་ནད་ཀྱིས་གསད་པ་ནི། །རབས་ཆད་ནག་པོའི་ཤ་ཁྲག་དང ། །བྱ་རོག་འུག་པའི་ཤ་ཚིལ་དང ། །སེང་སྟག་བྱ་རྒོད་སྐྱུང་ཀའི་སྙིང ། །རྟ་ནག་ར་རོག་ཕག་གི་སྙིང ། །སྤྱང་མོའི་སྙིང་དང་རྨེ་གྲིའི་ཤ་།ཅོང་ཞུན་དང་ནི་གི་ཝང་སྦྱར། །དུག་དང་ཁྲག་ཀྱང་བསྲེས་བྱས་ལ། །རི་ལུ་ཁྲི་ཚོ་བཞི་བྱས་ལ། །མ་ཏང་ནག་པོའི་ཞལ་བཅས་ལ། །མ་ཏང་དེ་ཡི་ཁ་ནང་དུ། །དུག་ཤིང་ནག་པོའི་ཧོམ་སྦར་ཏེ། །རྡོ་རྗེ་མཁའ་འགྲོ་དཔོན་གཡོག་ཀྱང ། །ནག་མོ་རལ་པ་རྔམ་བག་ཅན། །ལག་ན་རལ་གྲི་ཐོགས་པ་ཡི། །དགྲ་ཤ་བཅད་ཅིང་ཟ་བར་བསྒོམ། །རི་ལུ་རེ་དང་དགྲ་མིང་རེ། །བསྡེབས་ཤིང་བསྲེགས་པའི་ལས་བྱ་འོ། །མ་མོ་བསྐུལ་བའི་རྫས་དེ་བསྲེག་།ནག་མོ་ཆེན་མོའི་དམོད་པ་ནི། །ོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ། རུ་རུ་བེ་ཏིཥྚ་བ་ཏོ་སི། རུ་རུ་རོ་རུ་བེ་ཏིཥྚ་བ་ཏོ་སི། ཙ་པ་ལ་ཨ་ཤུགྨེ། མ་མ་སརྦ་ཤ་ཏྲུཾ་ཨ་མུ་ཀ་ཤི་གྷྲཾ་མ་ར་ཎ། ཛྭ་ལ་རཾ་ཙིཏྟ་ཛྭ་ལ་ཛི་བཾ་རུ་དྷི་རཾ་མ་ར་ཡ་ན་ཤ་
365a
༄#། །ཡ་ཧཱུཾ་ཕཊ། དེ་ནས་ཐལ་བ་ཧོམ་ཁུང་མནན། །ཚ་བའི་ནད་ལ་ཐེ་ཚོམ་མེད། །སྙིང་གཟེར་འབར་བས་དགྲ་གསད་ན། །ལྕགས་སམ་དུག་ཤིང་ཕུར་བུ་འབར། །ལུས་ལ་བཅངས་ལ་བསྙེན་པ་དབུལ། །སྤྱི་བོར་ཕྱག་ན་རྡོ་རྗེ་བསྒོམ། །རྐེད་པར་ལྷ་མོ་ནག་མོ་བསྒོམ། །རྩེ་མོར་རེ་མ་ཏི་ཡང་བསྒོམ། །ལོགས་ལ་འཁོར་གྱི་མ་མོ་བསྒོམ། །ཀཱི་ལ་ཡ་ལ་བསྒོམ་པ་རྣམས། །སྐུ་སྟོད་རྒྱན་དང་ལག་ཆར་ལྡན། །རྐེད་པར་ཞེ་སྡང་སྦྲུལ་གྱིས་དཀྲིས། །སྐུ་སྨད་གདུག་པའི་ཕུར་བུ་འབར། །ལུས་ལ་བཅངས་ལ་བསྙེན་པ་དབུལ། །ོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ། རུ་རུ་བེ་ཏིཥྚ་བ་ཏོ་སི། རུ་རུ་རོ་རུ་བེ་ཏིཥྚ་བ་ཏོ་སི། ཙ་པ་ལ་ཨ་ཤུགྨེ། རེ་མ་ཏི་བཛྲ་ཀཱི་ལི་ཀཱི་ལ་ཡ་ཧཱུཾ་མ་ར་ཎ་ཧཱུཾ་ཕཊ། རྟག་ཏུ་བསྙེན་པ་དབུལ་བྱས་ལ། །གཏོར་མ་སྦྱིན་སྲེག་དག་གིས་མཆོད། །དེ་ནས་དགྲ་ཡི་གཟུགས་བྱས་ལ། །རྐང་ལག་དག་ལ་བཏབ་པ་ན། །སྙིང་ལ་བཏབ་ན་འཆི་བར་བྱེད། ། སྙིང་གཟེར་འབར་བའི་ཆོ་ག་འོ། །ཁོལ་མོ་ནག་མོའི་ཐུན་དྲུག་ནི། །འགུ་ལི་ནག་མོའི་ཐོད་པའི་ཐུན། །ནི་རྟི་ནག་མོ་མདའ་ཡི་ཐུན། །རཀྟ་ནག་མོ་ཁྲག་གི་ཐུན། །ཙ་རཾ་ནག་མོ་སྒོ་ངའི་ཐུན། །བྱ་ཤ་ནག་མོ་དུག་གི་ཐུན། །ཙིཏྟ་ནག་མོ་སྙིང་གི་ཐུན། །ནག་མོའི་ཐུན་དྲུག་རབ་བཤད་བྱ། །འགུ་ལི་ནག་མོའི་ཐོད་མདའ་ནི། །མི་རོ་དཀྲིས་པའི་དཀྲིས་
365b
མ་ལ། །དུག་དང་ཁྲག་གི་སང་ཚ་ཡིས། །དབུས་ནས་བསྐོར་ལ་ཡི་གེ་བྲི། །ོཾ་ཙྞྜ་མ་ཧཱ་རོ་ཥ་ཎ་ཧཱུཾ། ཞེས་བྱ་བ་དབུས་སུ་བྲི། །དེ་ཡི་ཕྱི་རིམ་དུ་རུ་རུ་བེ་ཏིཥྛ་བ་དོ་སི། རུ་རུ་རོ་རུ་བ་ཏིཥྚ་བ་དོ་སི། ཙ་པ་ལ་ཨ་ཤུགྨེ་ཧཱུཾ་བྷྱོ། ཞེས་བྲི། དེའི་ཕྱི་རིམ་དུ་རུ་རུ་བེ་རོ་རུ་ཧཱུཾ་ཏིཥྛ་བ་ད་སི། རཀྨོ་ཙིཏྟ་ཁ་རག་མ་ཧཱུཾ་བྷྱོ། མ་མ་ཏྲག་རཀྴ་ཁ་མུནྟྲ་བ་ཏྲ་བ་ཏྲག་རཀྴ་ཙི་ཏྲ་ཁ་རག་མ། རེ་མ་ཏི་སམ་ཡ་མ་ཧཱ་པྲ་མ་སྟི་པྲ་དུན་བྷྱོ་ཛ་ཛ། རུ་ལུ་བྷྱོ་བྷྱོ་ཞེས་བྲི། དེའི་ཕྱི་རིམ་དུ་མ་ནག་མོས་བསྐོར། དེའི་ཕྱི་རིམ་དུ་བྷྱོས་བསྐོར། དེ་ནས་སྔགས་ཀྱི་འཁོར་ལོ་དེ། །ནལ་ཐོད་དུམ་བུ་བརྒྱད་པར་སྩལ། །ཐོད་པ་དེ་ཡི་ནང་དུ་ནི། །བཾ་དང་ཁྱི་རྒྱར་རོག་སྙིང ། །ཡུག་ས་མོ་ཡི་མངལ་ཁྲག་དང ། །ནད་གང་འདོད་པའི་ཤ་རུས་ཁྲག་།དུག་སྣ་ཚོགས་དང་ཁྲག་སྣ་ཚོགས། །ཆང་དང་སྦྱར་ལ་ཐོད་པར་བླུག་།ཐོད་པ་གཡང་གཞིའི་སྟེང་དུ་གཞག་།དེ་རག་ཛ་ཏི་ཏ་བཾ་དང ། །མཁའ་འགྲོ་མ་ལ་ཕུལ་ནས་ནི། །སྐེ་ཚེ་ཡུངས་ནག་ཐལ་ཆེན་ལ། ། སྔགས་འདི་བཟླས་ལ་ཐོད་པར་བླུག་།ོཾ་རུ་རུ་བེ་རོ་རུ་ཧཱུཾ་ཏིཥྚ་བ་ཏོ་སི། ཧཱུཾ་ཧཱུཾ། ཙ་པ་ལ་ཨ་ཤུགྨེ། ཀརྨ་དེ་བྱི་མུ་དི་ར་ག་པཾ་ཧཱུཾ་ཧཱུཾ་ཙ་པ་ལ་ཨ་ཤུགྨེ། མུ་ཡཾ་རཀྵ་ཐུཾ་དུ་ན་ནན། ཁ་རག་ཙ་མུན་ཏི་ཧཱུཾ་ཧཱུཾ་ཙ་པ་ལ་ཨ་ཤུགྨེ། ཨརྒྷཾ་མ་ར་ན་ཧཱུཾ་ཕཊ། སྔགས་དེ་ཁྲི་ཚོ་ཐོན་པའི་ཚེ། །གོ་རོ་ཙ་ནས་ཁ་བཅད་ལ། །དུར་ཁྲོད་དག་ཏུ་གནས་དག་སྟེ། །ནམ་ཕྱེད་ཐོད་མདའ་དགྲ་
366a
༄#། །ལ་འཕང ། །མ་མོ་སྐུལ་བའི་དམ་རྫས་བསྲེག་།དེ་ནི་ཕུང་ཞིང་རླག་པར་བྱེད། །ནི་རྟི་ནག་མོའི་མདའ་ཐུན་ནི། །མདའ་སྒྲོ་བྱ་སྐྱུང་ཀ་ཡིས་སྒྲོན། ། དུག་ཤིང་ནག་པོའི་མདེའུ་བཙུགས་ལ། །བམ་གྱི་སྙིང་ཁྲག་ཡུག་སའི་ཁྲག་།བཙན་དུག་ཡུངས་ཀར་སྐེ་ཚེ་དང ། །མི་རིགས་དགུ་ཡི་སོ་སེན་དང ། །བྱ་དང་སྤྱང་ཀིའི་སྡེར་མོ་དང ། །ཚེར་མ་དགུ་དང་མཚོན་དབལ་དགུ། །དྲི་རྒོད་ཁྲག་དང་གཡུལ་སྤྲད་ས། །དེ་རྣམས་བསྲེས་པའི་ཕྱེ་མ་ལ། །མ་མོ་ལས་ལ་བསྐུལ་བ་དང ། །གནད་ལ་དབབ་པའི་སྔགས་ཀྱིས་གདབ། །དེ་ཡི་གཏིང་ལ་ཐུན་གྱི་མཐུ། །དམེ་གྲི་ནག་མོའི་ཟོར་སྔགས་བཟླས། །རགྨོ་ཙིཏྟ་མོ་ཙ་ཙ་མོ་བྷྱོ། ཧི་ལི་ཧི་ལི་མ་མ་བྷྱོ། བཛྲ་ཨ་ལི་ག་སྲི་ག་སི་ཧཱུཾ་བྷྱོ། བཛྲ་མ་མ་ཏི་བྷྱོ། དེ་སྐད་སྔགས་ནི་བཟླས་ནས་ནི། །རྫས་དང་ཕུར་ཐུན་མདའ་སྦུབས་བླུག་།མདའ་ཉིད་དུག་དང་ཁྲག་གིས་བྱུགས། དུར་ཁྲོད་མགལ་བའི་གཞུ་བརྡུངས་ལ། ། མདེའུ་ཡི་རྩེ་མོ་བསྲེགས་བྱས་ལ། །མདའ་དེ་ནམ་ཕྱེད་དགྲ་ལ་འཕང ། །གང་ལ་བྱ་བ་གྲི་རུ་འཆི། །རཀྟ་ནག་མོའི་ཁྲག་ཐུན་ནི། །མི་རྟ་ར་ཁྱི་ཕག་ཁྲག་དང ། །རིམས་ནད་ཁྲག་དང་གུ་གུལ་དང ། །ཚེར་མ་དགུ་དང་མཆེ་སྡེར་དགུ། །ཀླུ་ཡི་ཆུ་དང་བཙན་དུག་དང ། །རྡར་གྲི་འབུམ་ཏྲི་ནང་དུ་སྩལ། །ཡུངས་ཀར་དག་ལ་ཐུན་སྔགས་འདི། །བདུན་ཁྲི་བཟླས་
366b
ལ་ཁྲག་གི་ནང་དུ་བླུག་།རུ་རུ་ཙ་དུག་ཨ་ཤུགྨེ་བ་ཏི་རུ་ཏྲ་ཁ་ཤལ་མོ། ཆེ་གེ་མོ་ཨ་མུ་ཀ་རཀྟ་ཙ་ར་ནན། མ་ར་ཡ་མ་ར་ཡ་རུ་ཏི་རཾ། ཨཱ་ཀཪྵ་ཡ་ཨ་ཧཱུཾ་ཕཊ། དེ་སྐད་ཁྲག་ལ་སྔགས་བཟླས་ལ། །མ་མོ་ལས་ལ་སྐུལ་སྔགས་གདབ། །དེ་ནས་ཁྲག་གི་ཟོར་མདའ་དེ། །རོ་སྐྲའི་དག་གི་འུར་རྡོར་སྩལ། །ནམ་ཕྱེད་དགྲ་ལ་འཕང་བར་བྱའོ། །དེས་ནི་གང་ལ་བྱ་བ་འཆི། །ཙ་ར་ནག་མོའི་སྒོང་ཐུན་ནི། །བྱ་མོ་ནག་མོའི་སྒོ་ང་ཡེ། །སྤྱི་བོ་བརྟོལ་བའི་སྒོང་སྟོང་དུ། །རིམས་ཀྱི་ཁྲག་དང་བཙན་དུག་སྩལ། །ཡུངས་ཀར་ཐལ་ཆེན་མཚོན་དབལ་ལ།། སྲོག་གི་སྙིང་པོ་འབུམ་དུ་བཟླས། །ཐ་མར་སྒོང་ཐུན་གདབ་སྔགས་བཟླས། །ཁ་མུནྟྲ་བ་ཏྲ་བ་ཏྲགྴ་རགྨོ་ཏེ་ཀེཾ་ཛ་ཛ། ཁ་ར་ལ་ཏེ་ཀེཾ་བྷྱོ་བྷྱོ། དེ་ནས་སྒོ་ང་ཁ་བཅད་ལ། །ཧསྟ་ལག་པར་བཅུག་ལ་འཕང ། །མཁར་ལ་བརྒྱབ་ཀྱང་འཇིག་པར་ནུས། །དགྲ་ལ་འཕང་ན་ཐེ་ཚོམ་མེད། །བྱི་ཤ་ནག་མོའི་དུག་ཐུན་ནི། །མ་ཧེའི་རཝ་འམ་བ་མེན་རུ། །མདའ་དུག་བཙན་དུག་ལོ་དུག་དང ། །རིམས་ནད་ཁྲག་དང་ཆང་བླུགས་ལ། །རཝ་རུ་ནང་ཉིད་ཁར་བཅུག་ལ། །དང་ལ་མཁའ་འགྲོའི་སྙིང་པོ་དང ། །ལས་ལ་སྐུལ་སྔགས་མིང་དང་བཅས། །དེ་ནས་དུག་གི་དབལ་སྔགས་བཟླས། །ཧཱུཾ་རེ་མ་ཏི་མ་མ་རུ་ལུ་རགྴ་བྷྱོ། རེ་མ་ཏི་བྱི་ཤི་མ་ཡ་སྟ་ཡཀྵ་ཀྲོ་དྷ་ཆེ་གེ་མོ་མཱ་ར་ཡ་ཕཊ། རཝ་རྩེ་ཕྲ་མོ་བཅད་པར་ནི། །དུག་གི་ཁུ་བ་མི་མགོས་གཏིང ། །
367a
༄#། །མི་མགོ་དུག་གིས་ཁེངས་ཙམ་ན། །མ་མོ་སྐུལ་བའི་རྫས་བསྲེགས་ལ། །ཁྲམ་བམ་ཕྱག་རྒྱ་བཅས་ལ་ནི། །ནམ་ཕྱེད་ཁྲོས་ཏེ་དགྲ་ལ་འཕང ། །ཐེ་ཚོམ་མེད་པར་དགྲ་བརླག་གོ་།ཙིཏྟ་ནག་མོའི་སྙིང་ཐུན་ནི། །སྤྱང་ཀི་སྟག་དང་སྲེ་མོང་སྙིང ། །ཁྱི་དང་འུག་པ་ཝ་ཡི་སྙིང ། །ཕོ་རོག་ཁྲག་དང་སྦྲུལ་གྱི་སྙིང ། །ཐོད་པའི་ནང་དུ་སྩལ་ལ་ནི། །དང་པོའི་མ་མོ་དཔོན་གཡོག་གི་།གནད་ལ་སྐུལ་བའི་སྔགས་བཟླས་ཤིང ། །མ་མོ་སྐུལ་བའི་དམ་རྫས་བསྲེག་།དེ་ནས་སྙིང་གི་ཐུན་སྔགས་ནི། །ཏྲག་རཀྴ་ཙིཏྟ་དུང་རོ་ཏ་མ་ཏ་སྨ་ར་ར་ཏ་བྷྱོ། །དེ་སྐད་བཟླས་པའི་སྙིང་ཐུན་དེས། །གྲོང་ལ་བརྒྱབ་ཀྱང་ཕུང་བར་བྱེད། །ནག་མོ་འབར་བའི་ཐུན་དྲུག་འདིས། །མཁར་ལ་བརྒྱབ་ཀྱང་འཇིག་པ་ལ། །གཡུལ་ངོ་ཆེན་པོར་བརྒྱབ་ཀྱང་ཟློག་།གཞན་གྱི་བྱད་དང་སྔགས་ཀྱང་ཟློག་།དགྲ་དང་བགེགས་ལ་ཐེ་ཚོམ་མེད། །ཡང་ནི་བཤད་ཀྱི་བརྒྱ་བྱིན་ཉོན། ། བསྟན་པ་གཉེན་པོའི་སྐུ་དགྲ་ལ། །ལྟས་ངན་བྱ་ནག་དབབ་པ་སྟེ། །དང་པོ་བྱ་ནག་བཟུང་བྱས་ལ། །བཅུ་གཉིས་དབང་གི་རིམ་པ་བསྐུར། །དེ་ནས་བྱ་ལ་མ་མོ་དབབ། །བྱ་དེ་མིག་རྩ་རྒོད་པ་དང ། །སྐད་འབྱིན་གཤོག་པ་གདེང་བ་ན། །མ་མོ་ཕེབས་པའི་རྟགས་ཡིན་པས། །ཕྱི་དང་ནང་གི་མཆོད་པ་བྱ། །ཕྱག་རྒྱ་དགུ་ནི་རབ་བསྟན་ལ། །དབང་
367b
བསྐུར་དམ་ཚིག་སྦྱིན་པར་བྱ། །དེ་ནས་མ་མོ་སྐུལ་སྔགས་བཟླས། །ལས་ལ་སྐུལ་བའི་དམ་རྫས་བསྲེག་།སྔགས་འདིས་བྱ་དེ་སྤར་ལ་གཏང ། །ོཾ་ཀྵ་རཀྴ་ཙིཏྟ་ཁ་རག་མ་ཙིཏྟ་ཏུང་ཏུང་ཛ་ཤ་ཡུ་ཏ་ཏི་བྷྱོ། །རེ་མ་ཏི་རཀྴ་སི་རུ་ལུ་རུ་ལུ་པྲ་མ་མ་ཧཱ་སྟི་པྲ་དུང་བྷྱོ། །ཀརྨ་ས་མ་ཡ་བྷྱོ་བྷྱོ་བྷྱོ་ཞེས་གཏང་ངོ ། །དེས་ནི། བྱ་ནག་གང་དུ་སྨོས་པར་འགྲོའོ། །མཁའ་འགྲོ་མ་མེ་ལྕེ་འབར་བའི་ལས་ཀྱི་རྒྱུད་ལས། ལས་སོ་སོ་མ་མོའི་བྱེ་བྲག་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་ལྷའི་དབང་པོ་བརྒྱ་བྱིན་དེས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་རིག་སྔགས་གསང་སྔགས་བདག་པོ་གསང་དབང་པོ། །ཕྱག་ན་རྡོ་རྗེ་ཐིག་ལེ་བསྟན་པ་སྲུང་པ་ཡི་དོན་དུ། །བདུད་རྩི་འཆང་བཞིན་མར་མེ་གསོད་པ་ཡི། །སྐྱེས་བུ་ཆེན་པོ་མངའ་བདག་བཤད་དུ་གསོལ། །ཞེས་ཞུས་པ་ལ། དཔལ་ཕྱག་ན་རྡོ་རྗེས་བཀའ་སྩལ་པ། ལྔ་བརྒྱ་ཐ་མ་མེ་ལྟར་འབར་བའི་ཚེ། །ཉམས་པ་གསོད་པའི་སྦྱོར་བ་བཤད་ཀྱི་ཉོན། །དང་པོ་མཁའ་འགྲོ་མེ་ལྕེ་སྒྲུབ་པའི་རྣལ་འབྱོར་པས། །སྐབས་སུ་གསད་པའི་ལས་ལ་འཇུག་པ་ནི། །དང་ལ་མཚན་མ་ཕེབས་པའི་བསྙེན་པ་བྱ། །གཏོར་མ་སྦྱིན་སྲེག་སྟི་རས་བུ་ཙ་བྱ། །ཁམས་རྐང་རྗེས་དྲི་ཆུ་སྐྲ་ཤད་ལ། །གང་ལ་བྱ་བའི་སྙིང་གར་མིང ། །དུག་དང་བདུད་རྩིའི་གཏོར་མའི་ནང་དུ་སྩལ། །དེ་ནས་མ་མོ་
368a
༄#། །ཞག་བདུན་གདབ་ཅིང་བསྟབ། །སྐུལ་བ་གནད་ལ་གདབ་བའི་དང་རྫས་བསྲེག་།གནད་ལ་དབབ་ཅིང་ལས་ལ་སྐུལ་སྔགས་བཟླས། །ཏིང་འཛིན་ཁྲག་འཐུང་བདུད་མོའི་བར་དུ་ནི། །སྙིང་གི་འོད་ཟེར་དག་གིས་དྲངས་བྱས་ཏེ། །བདུད་རྩི་དྲངས་པའི་སྦྱོར་བ་སྟོན་པ་ནི། །གསལ་བ་དངོས་གྲུབ་སྤྱི་སྟེ་ལོག་པ་ཡིས། །གསང་སྦུབས་བདུད་རྩི་བདུད་མོའི་ཞལ་དུ་དྲང ། །ཐུགས་ཀྱི་དཀར་དམར་པདྨའི་སྦུ་གུར་སྤྲོ། །བདག་གི་སྦུབས་ན་ཐུགས་ཀྱི་དཔལ་བེའུ་རྒྱས། །དེ་ནས་མར་མེ་གསད་པའི་ཏིང་འཛིན་ནི། །བཞིས་བསྡུས་དབུས་ནས་ནྲི་ལས་འོད་འབར་བས། །བདག་ཉིད་བདུད་མོའི་རང་བཞིན་གསལ་བ་ལ། །སྤྲོ་བའི་རླུང་གིས་མར་མེ་གཏིང་ནས་འབར། །བུད་པའི་རླུང་གིས་མར་མེ་ཁད་ཀྱིས་གསད། །འདྲེན་པའི་རླུང་གིས་ཐིག་ལེའི་རྩེ་མོར་དྲང ། །དང་པོས་བཀྲག་ཤོར་གཉིས་པས་སུམ་ཆ་ཉམས། །གསུམ་པས་ཕྱེད་ལ་བཞི་པས་སུམ་གཉིས་མེད།། ལྔ་པས་མུན་ཁང་ལྟར་གྱུར་བདག་ལ་གསལ། །མར་མེ་བདུད་རྩི་ལོ་གྲངས་དུ་ལོན་ཐུབ། །དེ་ནས་དགྲ་གཟུགས་འགུ་ལིང་ནག་པོར་གཞུག་།ཧོཾ་ཁུང་ནང་དུ་རྩང་ནང་ཕུར་བུས་བསྐོར། །ནག་མོ་རོ་ཟན་ཁ་ལ་མེ་འབར་མ། །མ་བདུད་རྒྱལ་མོ་ལྷག་བའི་སྙིང་རྗེ་ཅན། །ཁྲག་འཐུང་རེ་མ་ཏི་ཡི་དམོད་པ་ནི། །ཏྲག་རཀྴ་རེ་མ་ཏི་ཧཱུཾ་ཨ་མུ་ཀ་སྲི་ཀྲམ་མཱ་ར་ཎ་ཡ་
368b
མ་རཀྨོ་ཨཱརྱ་ཙ་ཙ་ཐིག་གི་མ་ཁ་ལ་བྷྱོ་བྷྱོ། །རཀྨོ་ཙིཏྟ་ཁ་རག་མ་བྷྱོ། །རཀྨོ་ཏི་ཀི་མ་ཛ་ཛ། །ཁ་ལེ་དུན་བྷྱོ། །ཁར་གཏི་ཀི་མ་ཛ་ཁ་ལེ་དུན་བྷྱོ། །མ་རག་ཐུན་མ་བྷྱོ། །ཆེ་གེ་མོ་མཱ་ར་ཡ་ཧཱུཾ་ཕཊ། ། གསང་སྔགས་དེ་ནི་ཁྲི་ཚོ་གཉིས་སུ་གདབ། །ཡུངས་ཀར་ཐལ་ཆེན་དག་ལ་སྔགས་ལ་གདབ། །འགུ་ལིང་དུར་ཁྲོད་རྙིང་པའི་གཏིང་དུ་མནན། །གང་ལ་བྱ་བ་དེ་ནི་ཞག་བདུན་ལོན། །མཁའ་འགྲོ་མ་མེ་ལྕེ་འབར་བའི་རྒྱུད་ལས། མར་མེ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་བདེ་བ་ཆེན་པོ་རྡོ་རྗེ་འཆང ། །འཁོར་བའི་རྒྱུན་ལམ་གཅད་པ་དང ། །ཡེ་ཤེས་ནུས་པ་བསྐྱེད་པའི་ཕྱིར། །ཐིག་ལེ་ཡེ་ཤེས་མན་ངག་འདི། །སྙིང་རྗེ་ཅན་གྱིས་བཤད་དུ་གསོལ། །ཞེས་ཞུས་པའི་ཚེ་དཔལ་ཕྱག་ན་རྡོ་རྗེ་དེས་གསང་བའི་ཐུགས་ཀ་ནས་ཡེ་ཤེས་འབྱུང་བ་ཞེས་བྱ་བའི་འོད་ཟེར་བ་ཀྱེ་ནས་འཛུམ་པའི་མདངས་ཀྱིས་འདི་སྐད་ཅེས་བཀའ་སྩལ་ཏོ། །ཡེ་ཤེས་རྡོ་རྗེ་ཐིག་ལེ་ནི། །ཐུན་མོང་མ་ཡིན་ཤེས་པར་དཀའ། །དོན་དམ་ཀུན་རྫོབ་གཉིས་སུ་བཤད། །དོན་དམ་ཀུན་རྫོབ་སྤྱོད་ཡུལ་ལོ། །ཀུན་རྫོབ་ལས་ཀྱི་ཕྱག་རྒྱ་དངོས། །རྒྱལ་རིགས་བུ་མོ་དེ་ལ་བརྟེན། །རང་རིག་རྩལ་གྱིས་རླུང་གཡོས་ཏེ། །རླུང་གི་ཐིག་ལེ་ཡེ་ཤེས་མེ། །རྡོ་རྗེ་གསང་བས་ས་བོན་བསྐུལ། །རྟོག་མེད་གསང་བའི་ཐིག་ལེ་ལ། །མི་བསྐྱོད་མཉམ་
369a
༄#། །པར་སེམས་གཏད་ན། །མར་མེའི་རྩེ་མོ་ལྟ་བུར་བརྟན། །གནས་པའི་རྩ་ཡི་ནམ་མཁའ་ལ། །སྲོག་འདྲེན་ཐིག་ལེ་བསྒོམས་པའི་ཚེ། །བརྟན་དང་གཡོ་བའི་དངོས་པོ་ཀུན། །བདེན་གཉིས་བྱང་ཆུབ་དོན་གསལ་ནས། །དང་བའི་ཆུ་ལ་གཟུགས་བརྙན་བཞིན། །རྒྱལ་བའི་གོ་འཕང་རང་ལ་འཆར། །མཁའ་འགྲོ་མ་ཡི་རང་བཞིན་གྲུབ། ། ལྷན་ཅིག་སྐྱེས་པའི་ལྷ་མོའི་དོན། །མཁའ་འགྲོ་མ་མེ་ལྕེ་འབར་བའི་རྒྱུད་ལས། ཡེ་ཤེས་ཀྱི་ཐིག་ལེ་བཤད་པའི་ལེའུ་སྟེ་བཅོ་བརྒྱད་པའོ།། །།དེ་ནས་ལྷའི་དབང་པོ་བརྒྱ་བྱིན་དེས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བགེགས་ཀྱི་གཙོ་བོ་དབང་ཕྱུག་རྗེ། །འགྲོ་བ་ཐུགས་རྗེས་བསྐྱང་བའི་ཕྱིར། །བཅུ་དྲུག་རྡོ་རྗེ་འཕྲུལ་གྱི་རྒྱུད།། དཔའ་བོ་ཆེན་པོས་བཤད་དུ་གསོལ། །ཞེས་ཞུས་པ་དང ། དཔལ་ཕྱག་ན་རྡོ་རྗེས་བཀའ་སྩལ་པ། མ་འོངས་ཕྱི་མའི་སེམས་ཅན་རྣམས། །དད་དང་སྤྲོ་བ་བསྐྱེད་པའི་ཕྱིར། །རྫུ་འཕྲུལ་བཅུ་དྲུག་བཤད་ཀྱི་ཉོན། །དང་པོར་ལྷ་ཡི་རྣལ་འབྱོར་ལ། །དྲོད་དང་མཚན་མ་ཐོབ་པར་བྱ། །དེ་ནས་འཕྲུལ་ལ་འཇུག་པ་ནི། ། ནུ་ས་ཏིའི་རི་ལུ་སྦྱར། །རྨ་བྱ་ཁྲུང་ཁྲུང་ནེ་ཙོ་ཤ་།ཉ་དང་སྤྲེའུ་དང་བྱི་ལའི་ཤ་།རྔ་མོ་ཁཝ་ཏ་ངང་པའི་ཤ་།ནེའུ་ལེ་སོ་བྱ་མཐིང་རིལ་ཤ་།དེ་རྣམས་བསྐམས་པའི་ཕྱེ་མ་དང ། །བིལ་བའི་ཤིང་དང་ཨརུ་ར། །ཤིང་ཚ་སུག་སྨེལ་
369b
རུས་སྦལ་རུས། །ཀ་ཀ་རུ་དང་མེ་ཁྱེར་སྲིན། །མི་རུས་དང་ནི་ཕག་རྒོད་ཁྲག་།མི་རྒོད་སྐྲ་དང་ཆུ་གླག་སྒྲོ། །དེ་རྣམས་བསྲེས་ལ་རི་ལུ་བྱ། །སྦྲང་རྒོད་དག་གིས་མགོ་བསྡུས་ལ། །དུར་ཁྲོད་ཐོད་པའི་གའུར་སྩལ། །ཕྱག་ན་རྡོ་རྗེའི་སྙིང་པོ་དང ། །མ་མོའི་སྲོག་སྙིང་བདུན་འབུམ་བཟླས། །བར་བར་བྲམ་ཟེའི་མེ་ལ་བསྲོ། །དེ་ནས་སྣ་ཡི་རི་ལུ་ལ། །འོད་དང་མེ་སྟག་འཕྲོས་ཙམ་ན། །ཟངས་སམ་ལྕགས་ཀྱི་གའུར་སྩལ། །དེ་ནས་རྡོ་རྗེ་མཁའ་འགྲོ་ལ། །དུག་དང་ཁྲག་གི་སྦྱིན་སྲེག་འབུལ། ། བུ་སི་ཏིའི་རི་ལུ་དེ། །རང་གི་ལྕེ་ལ་མྱངས་བ་ན། །རྟག་ཏུ་བཙན་དུག་འཐུང་བར་ནུས། །ཡང་ན་མ་མོ་མཁའ་འགྲོ་ལ། །བྱ་རོག་མོ་ཡི་སྦྱིན་སྲེག་འབུལ། ། བུ་སི་ཏིའི་རི་ལུ་དེ། །རྐང་པའི་མཐིལ་དུ་བསྐུས་པ་དེས། །ཆུ་ཡི་སྟེང་དུ་འགྲོ་བར་བྱེད། །མ་མོ་མཁའ་འགྲོ་དཔོན་གཡོག་ལ། །ཆང་དང་བྱ་རྒོད་སྦྱིན་སྲེག་འབུལ། །རི་ལུ་ཡན་ལག་བཞི་ལ་བསྐུ། །བདག་ནི་ནམ་མཁའ་དག་ལ་འཕུར། །རྡོ་རྗེ་མཁའ་འགྲོ་མ་དག་ལ། །མི་ཤའི་མར་ཁུ་སྦྱིན་སྲེག་དབུལ། །རི་ལུ་ལྕེ་ལ་མྱངས་པ་ན། །སྐྱེ་བ་སྔ་ཕྱི་དྲན་པར་ནུས། །མ་མོ་དག་དང་མཁའ་འགྲོ་ལ། །མར་དང་ར་ཁྲག་སྦྱིན་སྲེག་དབུལ། ། བུ་སི་ཏིའི་རི་ལུ་དེ། །བུད་མེད་གང་གི་དཔྲལ་བར་བསྐུས། །དེ་ནི་བདག་གི་དབང་དུ་འགྱུར། །རྡོ་རྗེ་ནག་མོ་ཆེན་མོ་ལ། །ཆང་དང་སྦྲང་རྒོད་སྦྱིན་སྲེག་དབུལ། །དེ་ནས་རི་ལུ་མིག་ལ་བསྐུ། །སྲིད་པ་གསུམ་ག་དུས་
370a
༄#། །གཅིག་མཐོང ། །རྡོ་རྗེ་མཁའ་འགྲོ་ཆེན་མོ་ལ། །མར་དང་ཁཝ་ཏའི་སྦྱིན་སྲེག་དབུལ། །རི་ལུ་རྐང་པའི་མཐིལ་ལ་བསྐུ། །ཉིན་གཅིག་དཔག་ཚད་བརྒྱད་ཁྲིར་ཕྱིན། །རྡོ་རྗེ་ལྷ་མོ་ནག་མོ་ལ། །ཁྲག་དང་མར་ཁུའི་སྦྱིན་སྲེག་དབུལ། །རི་ལུས་མཆན་ཁུང་གཉིས་བསྐུས་ན། །རང་ལུས་སུས་ཀྱང་མི་མཐོང་ངོ ། །དཔལ་ལྡན་ལྷ་མོ་དཔོན་གཡོག་ལ། །འབྲས་བུ་བུ་རམ་སྦྱིན་སྲེག་འབུལ། །རི་ལུ་ཁོང་པར་འཐུངས་པ་ན། །ཚེ་ལོ་སྟོང་ནི་ཐུབ་པར་ངེས། །དཔལ་ལྡན་རྡོ་རྗེ་ལྷ་མོ་ལ། །འབྲུ་དང་མར་ཁུའི་སྦྱིན་སྲེག་དབུལ། །རི་ལུ་ལུས་ལ་བསྲེལ་བ་ན། །ནོར་གྱི་གཏེར་ལ་སྤྱོད་པར་འགྱུར། །དེ་ནས་མཁའ་འགྲོ་མ་ལ་ནི། །ཏིལ་དང་མི་ཤའི་སྦྱིན་སྲེག་འབུལ། ། བུ་སི་ཏིའི་རི་ལུ་དེ། །མི་རོ་གསར་པའི་ཁར་བཅུག་ནས། །མ་མོའི་སྙིང་པོ་འབུམ་བཟླས་ན། །མི་རོ་ལངས་ནས་དངོས་གྲུབ་སྟེར། །གསེར་དང་དངུལ་དུ་འགྱུར་ཡང་རུང ། །ཡང་ན་དེ་ལ་རལ་གྲི་སྦྱིན། །ཅི་འདོད་ཕོ་ཉའི་མངག་གཞུག་བྱེད། །འཕྲིན་ལས་རྣམ་བཞི་གང་བཅོལ་འགྲུབ། །རྡོ་རྗེ་དཔལ་ལྡན་ལྷ་མོ་ལ། །གོ་རོ་ཙ་ནའི་སྦྱིན་སྲེག་དབུལ། །རི་ལུ་ནད་པའི་ལུས་ལ་བསྐུ། །ནད་པ་རྣམས་ནི་འཚོ་བར་བྱེད། །ཡང་ནི་རྡོ་རྗེ་ལྷ་མོ་ལ། །ཆང་དང་གི་ཝང་སྦྱིན་སྲེག་དབུལ། །རི་ལུ་བགྱིས་པ་ལྟེ་བར་བསྐུ། །སྲིན་བུ་དག་ནི་འཚོ་བའོ། །རྡོ་རྗེ་དཔལ་ལྡན་ནག་མོ་ལ།།
370b
ཏིལ་མར་སྐེ་ཚེའི་སྦྱིན་སྲེག་དབུལ། །རི་ལུ་མེ་རུ་བསྲེགས་པ་ན། །དགྲ་ལ་ཐོག་དང་སེར་བ་འབེབས། །རྡོ་རྗེ་ལྷ་མོ་ནག་མོ་ལ། །མར་དང་མུ་ཏིག་སྦྱིན་སྲེག་དབུལ། །རི་ལུ་དཔྲལ་བའི་དབྱིངས་སུ་བསྐུ། །རྒྱལ་པོའི་ཆད་པ་མི་འབྱུང་ཞིང ། །མེ་དང་ཆུས་ཀྱང་མི་ཚུགས་སོ། །རྡོ་རྗེ་མཁའ་འགྲོ་མ་ཀུན་ལ། །མེ་ཏོག་བུ་རམ་སྦྱིན་སྲེག་དབུལ། །རི་ལུ་ལྟེ་བར་བསྐུས་པ་ན། །སྦྲུལ་དང་བཙན་གྱིས་མི་ཚུགས་སོ། །བྱད་སྟེམས་ཀྱང་ནི་ཟློག་པར་འགྱུར། །མཁའ་འགྲོ་མ་མེ་ལྕེ་འབར་བའི་རྒྱུད་ལས། རྫུ་འཕྲུལ་བཅུ་དྲུག་གི་ལེའུ་སྟེ་བཅུ་དགུ་པའོ།། །། དེའི་ཚེ་འཁོར་འདུས་པའི་ནང་ནས་ལྷའི་དབང་པོ་བརྒྱ་བྱིན་སྟན་ལས་ལངས་ཏེ་དཔལ་ལྡན་ཕྱག་ན་རྡོ་རྗེ་ལ་བསྟོད་པ། བཅོམ་ལྡན་མགོན་པོ་རྡོ་རྗེ་འཛིན། །སྐུ་གསུང་ཡེ་ཤེས་ལྔར་ལྡན་ལྷ། ། ཐབས་དང་ཤེས་རབ་བདག་ཉིད་ཅན། །རིག་སྔགས་གསང་སྔགས་དངོས་པོ་འཛིན། །སྲིད་པ་གསུམ་གྱིས་བཀུར་བའི་གནས། །ལྷ་སྲིན་བརྒྱད་ཀྱིས་མཆོད་ཅིང་བསྟོད། ཉོན་མོངས་བདུད་ལས་རྣམ་པར་རྒྱལ། །ཕྱག་ན་རྡོ་རྗེ་ཆེ་ལ་ཕྱག་འཚལ་བསྟོད། །དཔལ་ལྷ་མོ་ལ་དགེ་བཅུའི་སྒོ་ནས་བསྟོད་པ། བརྒྱ་བྱིན་གྱིས་བསྟོད་པ། དེ་ནས་དཔལ་ལྷ་མོ་ལ་ལྷ་མ་སྲིན་སྡེ་བརྒྱད་ཀྱིས་སོ་སོ་ནས་བསྟོད་པ། དེ་ནས་གཡོག་མོ་རེ་མ་ཏི་ལ་བདུད་རི་ཏི་འགོང་ཉག་གིས་འདུལ་ཐབས་ཀྱི་དབང་གི་སྒོ་ནས་བསྟོད་པ། ལྷ་ལ་དབང་བསྒྱུར་ལྷ་མོ་དཔལ་འབར་མ།།
371a
༄#། །དབང་ཕྱུག་སྲས་མོ་ལྷ་མོ་གཟི་ལྡན་མ། །སུམ་ཅུ་རྩ་གསུམ་གནས་ཀྱི་གཙོ་མོ་སྟེ། །ལྷ་མོ་རེ་མྟི་ལ་ཕྱག་འཚལ་བསྟོད། །བདུད་ལ་དབང་བསྒྱུར་བདུད་མོ་དཔལ་འབར་མ། །རི་ཏི་འགོང་ཉག་བུ་མོ་རེ་མ་ཏི། །ནག་མོ་རྩེ་དགུ་གནས་ཀྱི་གཙོ་མོ་སྟེ། །བདུད་མོ་རེ་མ་ཏི་ལ་ཕྱག་འཚལ་བསྟོད། །ཀླུ་ལ་དབང་བསྒྱུར་ཀླུ་མོ་དཔལ་འབར་མ། ། གཙུག་ན་རིན་ཆེན་བུ་མོ་ཡིད་འོང་མ། །རོལ་མཚོ་བདུན་གྱི་གནས་ཀྱི་གཙོ་མོ་སྟེ། །ཀླུ་མོ་རེ་མ་ཏི་ལ་ཕྱག་འཚལ་བསྟོད། །གནོད་སྦྱིན་དབང་བསྒྱུར་གནོད་སྦྱིན་དཔལ་འབར་མ། །གང་བ་བཟང་པོའི་བུ་མོ་ཤངྐ་ན། །ནགས་ཚལ་དྲ་བ་ཅན་གྱི་གཙོ་མོ་སྟེ། །གནོད་སྦྱིན་རེ་མ་ཏི་ལ་ཕྱག་འཚལ་བསྟོད། །བསྟོད་པའི་ལེའུ་སྟེ་ཉི་ཤུ་པའོ།། །།དེ་ནས་དཔལ་ཕྱག་ན་རྡོ་རྗེ་དེས་པདྨའི་གདན་ལས་སྐུ་བཞེངས་ཏེ་འདི་སྐད་ཅེས་གསུངས་སོ། །སྲས་མཆོག་འཁོར་གྱི་དམ་པ་བརྒྱ་བྱིན་ཉོན། །ལྷ་དང་ལྷ་མིན་མི་དང་ནམ་མཁའ་ལྡིང ། ། བགེགས་དང་གཤིན་རྗེ་མ་མོ་དང ། །ཤ་ཟ་ལྟོ་འཕྱེ་དྲི་ཟ་དང ། །སྲིན་པོ་གྲུལ་བུམ་བདུད་དམ་མི། །སྔགས་འཆང་རྣལ་འབྱོར་གནོད་སྦྱིན་དང ། །ང་ཡི་འཁོར་རྣམས་རབ་ཏུ་ཉན་པར་གྱིས། །ངས་ནི་རྡོ་རྗེ་ཏིང་འཛིན་ལྷུན་གྱིས་གྲུབ། །ངས་ནི་མཚན་མ་འཇོམས་པའི་ཕྱག་རྒྱ་རྙེད། །ངས་ནི་ཐུན་མོང་སྟོན་པའི་བདུད་ལས་རྒྱལ། །ངས་ནི་སྙིང་རྗེས་འགྲོ་ཀུན་
371b
དགེ་ལ་བཀོད། །ངས་ནི་ཐབས་དང་ཤེས་རབ་ཀུན་ལ་བྱེད། །ངས་ནི་རྡོ་རྗེ་མཁའ་འགྲོའི་གསང་བའི་རྒྱུད། །ཐུན་མོང་མ་ཡིན་མེ་ལྕེ་འབར་བ་འདི། །ངོ་མཚར་ཐབས་མཆོག་དངོས་གྲུབ་དམ་བའི་གཞི། །ངས་ནི་བཤད་ཟིན་ཁྱོད་ལ་རབ་ཏུ་གཏད། །སྐལ་ལྡན་དང་དད་བརྩོན་འགྲུས་ཡོད་ལ་གཏད། །སྙིང་རྗེ་གཞོལ་ཞིང་བརྟུལ་ཞུགས་ཆེ་ལ་གཏད། །བདེན་གཉིས་དོན་རྟོགས་ཡིད་རངས་བརྟན་ལ་གཏད། །བརྣག་པའི་གཟུངས་ཐུབ་སྣོད་ལྡན་ཡོངས་ལ་གཏད། །ཟུངས་ཤིག་ཆོངས་ཤིག་སྣོད་ལྡན་རྣམས་ལ་ཤོད། །འདི་ཡི་དོན་རྣམས་རྩེ་གཅིག་ཡིད་ཀྱིས་ཉོན། །འདིས་ནི་མི་ནུབ་ཆོས་ཀྱི་རྒྱལ་མཚན་ཆེན་པོ་ཐོབ། །འདིས་ནི་ཆོས་ཀྱི་དབང་ཕྱུག་གོ་འཕང་ཐོབ། །འདིས་ནི་ཡིད་བཞིན་རིན་ཆེན་འབར་བ་ཐོབ། །འདིས་ནི་ཅི་འདོད་ཐོགས་མེད་དངོས་གྲུབ་ཐོབ། །བློ་དམན་ཤེས་ཆུང་ཉན་ཐོས་རྣམས་ལ་གསང ། །ལོག་པའི་མཐར་འཁྱམས་མུ་སྟེགས་ཅན་ལ་གསང ། །རྨུ་རྒོད་མི་མཁས་སྐུར་པ་མཁན་ལ་གསང ། །དད་མེད་སྙིང་རྗེ་སྤངས་པ་རྣམས་ལ་གསང ། །མ་རིག་རྨོངས་པའི་ལེ་ལོ་ཅན་ལ་གསང ། །ཞེས་བཀའ་སྩལ་ནས་བརྒྱ་བྱིན་གྱིས་སྦྱི་བོས་བླངས་སོ། །འཁོར་ལ་གཏད་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་ལྷའི་དབང་པོ་བརྒྱ་བྱིན་དེས་དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས་ལུང་བསྟན་དུ་གསོལ། བདེ་བར་གཤེགས་
372a
༄#། །པ་མཁའ་འགྲོ་མ་ལུང་བསྟན་དུ་གསོལ། །ཞེས་ཞུས་བ་དང ། དཔལ་ཕྱག་ན་རྡོ་རྗེས་བཀའ་སྩལ་པ། མཁའ་འགྲོ་མ་ལྷ་མོ་ནག་མོ་འདིས། བསྐལ་པ་མང་པོའི་སྔོན་རོལ་ནས། །དུས་གསུམ་རྒྱལ་བའི་ཞལ་མཐོང་སྟེ། །དམན་པའི་ཞིང་འདིར་སྤྲུལ་སྐུ་ཡིས། །ལྷ་མོའི་ཚུལ་དུ་སྐུ་བསྟན་ནས། །འགྲོ་བའི་དོན་ལ་རབ་ཏུ་བརྩོན། ། ཉོན་མོངས་སྒྲིབ་པ་རབ་ཏུ་སྤངས། །ད་ལྟར་ཤེས་བྱའི་སྒྲིབ་པ་སྦྱོང ། །དེ་ཡི་ཁོལ་མོ་རེ་མ་ཏི། །སྨོན་ལམ་དབང་གིས་འགྲོ་དོན་བྱེད། །སྒོམ་པའི་ལམ་ལ་རབ་གནས་ནས། ། ད་ལྟར་ཉོན་མོངས་སྒྲིབ་པ་སྦྱོང ། །འདི་ནས་དུས་འདི་ཕྱི་མའི་ཚེ། །མཁའ་འགྲོ་ལྷ་མོ་ནག་མོ་འདི། །བྱང་ཤར་མཚམས་ཀྱི་འཇིག་རྟེན་ཁམས། །པདྨོ་རྣམ་པར་རོལ་པ་དེར། །ཡང་དག་རྫོགས་པའི་སངས་རྒྱས་སུ། །པདྨའི་དཔལ་ཞེས་བྱ་བར་ནི། །ངས་ནི་ལྷ་མོ་ལུང་བསྟན་ཏོ། །དེ་ཡི་གཡོག་མོ་རེ་མ་ཏི། །པདྨ་ཅན་གྱི་ཞིང་ཁམས་དེ། །བདེ་བའི་བྱང་ཆུབ་སེམས་དཔའ་ནི། །བློ་གྲོས་བཤེས་གཉེན་བྱ་བར་ནི། །དེ་འདིར་ངས་ནི་ལུང་བསྟན་ནོ། །མཁའ་འགྲོ་མ་མེ་ལྕེ་འབར་བའི་རྒྱུད་ལས། ཡོངས་སུ་ལུང་བསྟན་པའི་ལེའུ་སྟེ་ཉི་ཤུ་རྩ་གཉིས་པ་རྫོགས་སོ།། །།མཆོད་ན་རྒྱལ་བ་རིགས་ལྔ་རྟག་ཏུ་མཆོད། །སྲུང་ན་དམ་ཚིག་ཉི་ཤུ་རྩ་བརྒྱད་སྲུངས། །དགྲ་བྱུང་ལྷ་མོ་
372b
ནག་མོ་མཚོན་ཆར་ཕྱུང ། །ཉེས་ཆུང་ཁ་འཐབ་ཙམ་ལ་མཚོན་མི་དབྱུང ། །ང་ཡི་དཀོར་ཁང་འཇིག་ན་མཚོན་ཆར་ཕྱུང ། །དཀོན་མཆོག་དབུ་འཕང་སྨོད་ན་མཚོན་ཆར་ཕྱུང ། །སངས་རྒྱས་བསྟན་པ་འཇིག་ན་མཚོན་ཆར་ཕྱུང ། །དཀོན་མཆོག་སྐུ་དགྲ་དར་ན་མཚོན་ཆར་ཕྱུང ། །ཞེས་སློབ་དཔོན་པདྨས་སློབ་བུ་གླང་དཔལ་གྱི་སེང་གེ་ལ་དེ་སྐད་ཅེས་བཀའ་སྩལ་ཞིང་གདམས་སོ།། །།