རྒྱ་གར་སྐད་དུ། ཀུ་ལ་ལོ་ཀ་ནཱ་ཐ་པཉྩ་ད་ཤ་ཀ་ནཱ་མ། བོད་སྐད་དུ། རིགས་ཀྱི་འཇིག་རྟེན་མགོན་པོ་ལྔ་བཅུ་པ་ཞེས་བྱ་བ། དཔལ་ལྡན་རིགས་ཀྱི་འཇིག་རྟེན་མགོན་པོ་ལ་ཕྱག་ 368a ༄#། །འཚལ་ལོ། །དེ་ནས་འདི་ནི་མཆོག་ཏུ་གསང ། །འཇིག་རྟེན་ཡང་དག་རྨོངས་པའི་མཆོག་།རིགས་དང་རིགས་བྱུང་མངོན་བརྗོད་པས། །གཉིས་མོད་སྔགས་ནི་རབ་བཤད་བྱ། །དམ་ཚིག་སྤྱོད་པ་ངེས་པར་གྲོལ། །བྱ་བ་དུས་ཚོད་རྣམ་པར་སྤངས། །དེ་ཉིད་གསུམ་ལྡན་ཡང་དག་ལྷ། །འཇིག་རྟེན་མགོན་པོ་འགྲོ་བའི་བདག་།འདོད་པའི་དབང་ཕྱུག་འདོད་པའི་ལྷ། །མཐོང་དང་མ་མཐོང་འབྲས་རབ་སྟེར། །དེ་འདིར་སྔགས་ནི་མཚུངས་མེད་པ། །བླ་མའི་ཞལ་ལ་རྣམ་པར་གནས། །དྲག་ཆེན་འཇིགས་བྱེད་ལུས་ལ་ནི། །ལྔ་པའི་ཐིག་ལེ་དང་བཅས་ཤིང ། །རྣམ་གཅོད་དང་པོ་ཡང་དག་ལྡན། །ཆེན་པོ་ལྔ་པའི་ལྔ་པས་བརྒྱན། །ལྕེ་གཉིས་ཡན་ལག་མེད་གཉིས་གནས། །ལུས་གསུམ་གྱིས་ནི་སྔགས་མཆོག་ལ། །ཡི་གེ་རྣམས་ཀྱི་བསྡུ་བ་ལས། །མཚན་ཉིད་ཆོ་ག་བཞིན་དུ་བཟླས། །འདི་ཡི་རྗེས་དྲན་སྔགས་པ་ཡིས། །གཙང་ངམ་ཡང་ན་མི་གཙང་རུང ། །ལྷ་བཞིན་མཐོང་བ་ལྷ་རྣམས་ཀྱིས། །དེ་ཡི་ལྷ་མོ་འདོད་ལྷ་བཞིན། །འདི་བཞིན་སྔགས་ཀྱི་འདོད་ལྷ་ཡི། །བྱ་བ་མེད་ཅིང་བསྒྲུབ་པའང་མེད། །མཆོད་མེད་མེ་ལ་སྦྱིན་སྲེག་མེད། །རྣལ་འབྱོར་ལྡན་དང་ཡང་དག་ལྡན། །དུས་ཚོད་རྣམས་ལས་རྣམ་ངེས་གྲོལ། །རྩེ་གཅིག་སེམས་ནི་གཡོ་མི་བྱེད། །སྒྲིབ་པ་དང་བྲལ་མཚུངས་པ་ཡི། །མཆོག་གི་བསམ་གཏན་ཡང་དག་སྦྱར། །རིགས་ཀྱི་འཇིག་ 368b རྟེན་དབང་ཕྱུག་གི་རྟོག་པ་ལྔ་བཅུ་པ་ལས་སྔགས་ཀྱི་དེ་ཁོན་ཉིད་ཀྱི་ལེའུ་སྟེ་དང་པོའོ།། །།སྙིང་གའི་འཁོར་ལོའི་ནང་སོང་བའི། །དེ་ཉིད་གཞན་དང་གཞན་དུ་འགྲོ་།དབྱེ་བ་ཉིས་འགྱུར་དེ་ལས་ནི། །ཡེ་ཤེས་ཉིད་ནི་ཀུན་འགྲོ་བྱ། །མི་འགྱུར་དགའ་བའི་ཡུལ་རིག་པ། །སེམས་ཀྱི་རྗེས་སུ་རྟོགས་པ་ཅན། །བྱ་བ་དེ་ཡི་བདེ་འདོད་ཕྱིར། །རྟོག་པ་ཀུན་ནས་འཇུག་པར་འགྱུར། །དེ་ཡི་ངོ་བོ་རྟོགས་ཉིད་འཇུག་།དེ་སེམས་དགའ་བའི་སྤྱོད་ཡུལ་ལ། །བྱ་བ་དང་ནི་ལས་རྣམས་ཀུན། །ཚིག་དང་བཅས་པས་ཐེ་ཚོམ་མེད། །བསམ་གཏན་རྣལ་འབྱོར་ཡང་དག་ལྡན།། བརྟན་པར་དགོད་བྱ་བློ་ལྡན་གྱིས། །འགྲོ་ཀུན་དགྲ་ཡི་རང་བཞིན་གྱི། །ས་སྟེང་ས་འོག་མཐོ་རིས་སྒྲུབ། །ལྟེ་བའི་པདྨར་པདྨ་ཆེ། །རྣམ་གསུམ་ནམ་མཁའི་ནང་སོང་བ། །པདྨའི་ཕྱག་རྒྱ་ཡང་དག་ལྡན། །ནམ་མཁའ་ཕྱག་རྒྱའི་བདག་ཉིད་བཞིན། །སྲོག་འབབ་པ་ཡི་ཚད་ཀྱིས་ནི། །གནས་གཉིས་པོ་ཡིས་གོམས་པར་བྱ། །དེ་བཞིན་རབ་ཏུ་དགོད་བྱས་ནས། །འཇིག་རྟེན་མགོན་པོའི་སྐུ་རུ་འགྱུར། །གང་གིས་གཞན་དུ་བཟླས་བྱས་དང ། །ལས་རྣམས་ཀྱང་ནི་བསྒྲུབ་བྱས་ན། །དེ་ནི་མཁའ་ལ་ཁུ་ཚུར་བསྣུན། །རྨོངས་པས་སྦུན་སྟོང་འཇོམས་པར་བྱེད། །བསམ་གཏན་སྦྱོར་བས་ཆོ་ག་བཞིན། །ལས་གང་རྟག་ཏུ་བྱ་བ་སྟེ། །དེ་ལས་མྱུར་དུ་སྒྲུབ་བྱེད་དོ། །དེ་ཡི་ལས་ནི་ཡིད་ཀྱིར་འདོད། །རིགས་ཀྱི་འཇིག་རྟེན་དབང་ཕྱུག་གི་རྟོག་པ་ལྔ་བཅུ་པ་ལས་བདག་གི་དེ་ཁོ་ན་ཉིད་ 369a ༄#། །ཀྱི་ལེའུ་སྟེ་གཉིས་པའོ།། །།རང་བཞིན་བསམ་གཏན་དང་བཅས་ཤིང ། །ཛཱ་ཏི་མཚལ་གྱི་འོད་ཟེར་བཞིན། །སེ་འབྲུ་ལེ་བརྒན་མེ་ཏོག་བཞིན། །ལི་ཁྲི་དམར་པོ་དང་མཚུངས་གཙོ། །སྔགས་ཀྱི་སྐུ་ཡི་ལྷ་ཡི་ལྷ། །ཞལ་གཅིག་ཕྱག་ནི་བཞི་པ་སྟེ། །མཁའ་པད་ཟླ་བའི་གདན་ལ་བཞུགས། །ཁྱབ་བདག་ཞགས་པ་ལྕགས་ཀྱུ་བསྣམས། །མཆོག་སྦྱིན་ཕྱག་གིས་ཡང་དག་རོལ། །མུ་ཏིག་ནོར་བུས་རྣམ་པར་བརྒྱན། །པདྨའི་ཕྱག་དང་སྤྱན་གསུམ་པོ། །གཟི་བརྗིད་ཆེན་པོ་སྣ་ཚོགས་སྐུ། །དཔའ་བོ་དབང་ཕྱུག་འགྲོ་བའི་མགོན། །རྣལ་འབྱོར་མ་ཡི་ཐུགས་དགྱེས་པ། །དངོས་གྲུབ་ཐམས་ཅད་རབ་སྟེར་བའི། །སྔགས་རྣམས་ཀུན་ལ་བསམ་གཏན་བྱ། །གང་དང་གང་གིས་བསྒོམ་པ་ཡིས། ། རྣལ་འབྱོར་གོམས་པར་གྱུར་པའི་ཕྱིར། །དེ་ནི་དེ་ཡི་རང་བཞིན་འགྱུར། །ཡིད་བཞིན་ནོར་མཆོག་ཇི་བཞིན་ནོ། །ལྷ་ནི་དཀར་པོས་ཞི་རབ་སྟེར། །དེ་བཞིན་དག་ནི་རབ་སད་བྱེད། །དབང་དང་དགུག་པའི་དེ་ཉིད་ལ། །སྐུ་མདོག་དམར་པོ་རྣམ་པར་བསམ། །དུ་བ་དམར་བའི་འོད་མདོག་ཅན། །རླུང་གི་དཀྱིལ་འཁོར་གྱིས་དཀྲིས་པས། །དགྲ་བོ་རྣམས་ནི་ཉེར་སྐྲོད་པ། །འདིར་ནི་ཐེ་ཚོམ་མེད་པར་བྱེད། །དུ་བ་སྐྱ་བོ་དམར་བ་ཡིས། །རྣམ་བར་ཞེ་སྡང་ངེས་སྦྱོར་བ། །གསད་པ་ལ་ནི་ཁ་དོག་གནག་།རེངས་པ་ལ་ནི་སེར་པོར་ཤིས། །ལུག་གི་སྟེང་དུ་གནས་པ་ལ། ། 369b རྐན་གྱི་བར་དུ་རྣམ་ཕུག་ན། །སྲིད་པ་གསུམ་དུ་གང་གང་གནས། །ཐམས་ཅད་རབ་ཏུ་རྨོངས་པར་བྱེད། །གཞན་དག་རྨོངས་པས་ཅི་ཞིག་བྱ། །དོན་མང་ཚིག་ནི་རབ་འདུས་བ། །འཇིག་རྟེན་གསུམ་གྱི་ལས་རྣམས་ནི། །ཡོན་ཏན་བརྒྱད་དང་ལྡན་པ་ཡི། །རྒྱུད་གཞན་རྣམས་ལ་ཉེར་གྱུར་པ། །གསུངས་དང་མ་གསུངས་གྱུར་པ་ནི། །རང་བཞིན་བསམ་གཏན་སྦྱོར་བ་ཡིས། །བྱ་བ་འདི་ལ་ཐེ་ཚོམ་མེད། །གང་ཞིག་ལྷ་ནི་ནམ་མཁའ་མཚུངས། །ཁ་དོག་དབྱེ་བས་སོ་སོ་སྟེ། །འཇིག་རྟེན་གསུམ་ན་གང་སྤྱོད་པའི། །ལས་རྣམས་ཐམས་ཅད་བྱ་བའོ། །སྐལ་བཟང་བྱེད་པའི་སྔགས་རྣམས་ནི། །སྙིང་གའི་ཆུ་སྐྱེས་དབུས་སོང་བ། །སྙིང་གའི་ཆུ་སྐྱེས་སྦྱོར་བ་ཡིས། །དབང་ལ་སོགས་པ་ཡང་དག་བསྒྲུབ། །ཡི་གེ་གསུམ་དང་བཅས་པའི་ལྷ། །སྟེང་དུ་འགྲོ་བ་གསུམ་ལྡན་པས། །མི་རྣམས་ལས་ནི་རྟག་བསྒྲུབས་པ། །རྣལ་འབྱོར་མ་རྣམས་ཞལ་ལ་གནས། །རྣམ་པ་གསུམ་ནི་འགུགས་པར་བྱེད། །པདྨ་གཟུགས་ལྡན་གྱུར་པས་མཛེས། །རྟག་སྦྱོར་རྒྱུན་དུ་རྣལ་འབྱོར་བས། །མར་མེ་གཡོ་མེད་གནས་པ་བཞིན། །སྔོན་གསུངས་ལྷ་ཡི་ལྷ་དབང་ཕྱུག་།སྐྱ་རེངས་དམར་པོ་དང་མཚུངས་འོད། །མཚན་མོ་ཕྱེད་ཀྱི་དུས་གནས་ལ། ། རྣལ་འབྱོར་ཉིད་ནི་ཡང་དག་སྤྱོད། །དེ་ཡི་གཟུགས་འཛིན་ལུས་ལ་ནི། །ཡང་དག་སྔོན་དུ་བཀོད་པ་ཡིས། །ཞགས་པ་ལྕགས་ཀྱུ་འཛིན་པའི་ལྷ། །བསྒྲུབ་བྱའི་ལུས་ལ་ཡང་དག་བླང ། ། 370a ༄#། །ཐམས་ཅད་བླ་མའི་ཞལ་ལ་གནས། །ཞགས་པ་ལྕགས་ཀྱུའི་འོད་ཟེར་གྱིས། །དེ་ལས་ལྕགས་ཀྱུ་བསྣུན་ནས་ནི། །ཞགས་པ་ཡིས་ནི་འགུགས་པར་བྱེད། །རྣམ་པར་མྱོས་ཤིང་ལུས་ནི་དམར། །ཡང་དང་ཡང་དུ་བརྒྱལ་གྱུར་ཏེ། །བུ་ག་སྒོ་དགུ་ནས་བསྣུན་ནས། །ཁྲག་གིས་རབ་ཏུ་འབབ་པར་བྱེད། །སྒྲིབ་པ་མེད་པར་དང་མཚུངས་པར། ། རང་ལུས་རྣམ་པར་ལྟ་བར་བྱ། །དེ་ཡི་དབུགས་ལས་བཞེངས་པའི་སྔགས། །ཡི་གེའི་དབང་པོ་དང་པོར་བསམ། །འབར་ཞིང་འབར་བ་ལྟ་བུ་ཡིས། །ཁ་ཡི་སྒོ་རུ་སྔོན་འདོད་རོལ། །པདྨའི་གཟུགས་འཛིན་དེ་ཡང་ནི། །ཁ་ཡི་ནང་ནས་ངེས་པར་འབྱུང ། །བསྒྲུབ་བྱའི་ཁ་རུ་ཐིམ་གྱུར་ཏེ། །ཇི་སྲིད་དེ་སྙིང་ཆུ་སྐྱེས་ལ། །གང་ཞིག་དེ་ཡི་སྙིང་གནས་པ། །འདིར་ནི་དེའི་སྙིང་ཀུན་ནས་ཕྲོགས། །མེར་མེར་པོར་ནི་བླངས་པ་ཡིས། །སྒྲོལ་མའི་གཟུགས་བཞིན་ཡིད་འཕྲོག་པ། །དེ་ནི་གསུམ་པས་ཆོ་ག་བཞིན། །རླུང་གིས་ལོ་མ་གཡོ་བ་ལྟར། །རང་གི་ཁྱིམ་དུ་རིམ་པར་བསྒོམ། །གཅིག་གི་ངོ་བོར་གྱུར་པ་མཆོག་།ལྷ་དང་ལྷ་ཡི་སྒྲུབ་པའི་ཐབས། །མཚན་མོ་མདུན་དུ་བསྒྲུབ་པར་བྱ། །བྲན་གྱི་ངོ་བོས་འཇུག་འགྱུར་ཞིང ། །འཚོ་བ་དང་ནི་ནོར་གྱིས་ཀྱང་།། ས་སྟེངས་འཇིག་རྟེན་སླར་ཅི་སྨོས། །འགྲུབ་འགྱུར་འདི་ལ་ཐེ་ཚོམ་མེད། །སྔགས་ཀྱི་དབང་པོ་སྒྲུབ་པ་པོས། །རང་དབང་མེད་རྣམས་སྦྱར་མི་བྱ། །སྔགས་ཀྱི་རྒྱལ་དབང་བཟླས་བྱས་ 370b པས། །རྒྱལ་སྲིད་སྒྲུབ་པ་དེ་མཆོག་གོ་།གཞན་དུ་གང་གིས་རབ་བསྒྲུབས་ན། །བུད་མེད་འདོད་པས་ལོང་བཞིན་མྱོས། །གལ་ཏེ་ལྷ་ཡི་བུ་མོ་ཡང ། །དེ་ཡི་སྐད་ཅིག་ཉིད་ལ་མཆི། །རིགས་ཀྱི་འཇིག་རྟེན་མགོན་པོའི་ལྔ་བཅུ་པ་ལས་ལྷའི་དེ་ཁོ་ན་ཉིད་ཀྱི་ལེའུ་སྟེ་གསུམ་པའོ།། །།འཇིག་རྟེན་དབང་ཕྱུག་སྙིང་པོ་མཆོག་།སྦ་ཞིང་སྲོག་བཞིན་ཡང་དག་བསྲུང ། ། དམ་ཚིག་སྤྱོད་པ་དམན་པས་ཀྱང ། །འདྲེན་པའི་བདག་ཉིད་སྔགས་བཟླས་བྱ། །གཅིག་པུ་གྲོགས་དང་བྲལ་བྱས་ཏེ། །བློ་དང་ལྡན་པས་འབུམ་དུ་བཟླས། །དེ་ཡི་མངོན་སུམ་འོང་འགྱུར་ཏེ། །འཁོར་ལོ་གསུམ་དུ་ལེགས་འགྲོ་མཆོག་།འཇིག་རྟེན་ཐམས་ཅད་འབྱིན་པ་དང ། །སྡུད་པ་དང་ནི་ཡང་དང་ཡང ། །ནམ་མཁའི་གོ་འཕང་བདེར་འགྲོ་སྟེ། །དྲན་པས་འདི་ལ་ཐེ་ཚོམ་མེད། །སེམས་དང་སེམས་མེད་སྦྱོར་བ་ནི། །སེམས་ནི་སེམས་མེད་ལ་ངེས་མཐོང ། །སེམས་ནི་སེམས་མ་ལ་ཐིམ་ནས། །རབ་འཇུག་ལུས་སྐྱེས་མ་རྣམས་ལ། །ནད་བཅས་ནད་མེད་པ་དང་ནི། །ནད་མེད་དེ་བཞིན་ནད་བཅས་བྱེད། །ཞགས་པ་ལྕགས་ཀྱུ་འཛིན་པའི་མཆོག་།སྔགས་ཀྱི་རྒྱལ་པོའི་དབང་པོས་སོ། །གཞན་དུ་བྱིས་པ་རྨོངས་པ་ཡིས། །ཟླ་བ་འཛིན་པར་འདོད་པ་བཞིན། ། གང་ཞིག་རང་བཞིན་སྦྱོར་བྲལ་བས། །ལས་རྣམས་བསྒྲུབ་པ་དེ་མཆོག་མིན། །གང་གིས་གསུམ་གསུམ་གནས་སྐབས་གསུམ། །འཇིག་རྟེན་མགོན་པོ་ཉིད་རིག་ནས། །ཆུ་འཛིན་བྲལ་ 371a ༄#། །བའི་ནམ་མཁའ་བཞིན། །འཇིག་རྟེན་མགོན་པོའི་གོ་འཕང་འགྲོ། །ཞེས་པ་ནི་དཔལ་པདྨ་འབར་བའི་རྒྱུད་ཆེན་པོ་ལས་བྱུང་བ་རིགས་ཀྱི་འཇིག་རྟེན་མགོན་པོ་ལྔ་བཅུ་པ་རྫོགས་སོ།། །།པཎྜི་ཏ་ཆེན་པོ་བི་མ་ལ་ཤྲཱི་བྷ་དྲའི་ཞལ་སྔ་ནས། བྱང་ཆུབ་རིན་ཆེན་གྱིས་བསྐུལ་ནས། ཤུད་ཀེ་གྲགས་པ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་ཆེན་པོར་བསྒྱུར་བའོ།། །། |