rKTs


H70

(e-text produced by ACIP)

see text in transliteration
278b
།།རྒྱ་གར་སྐད་དུ། ཨཱ་རྱ་སུ་བཱ་ཧུ་བ་རི་བྲྀཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ལག་བཟང་གིས་
279a
༄#། །ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀའི་གནས་ན། དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་བཟང་ཞེས་བྱ་བ་གཡོག་དང་བཅས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས། འོད་མའི་ཚལ་བྱ་ཀ་ལན་ད་ཀའི་གནས་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་བཟང་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་བཟང་ལ་འདི་སྐད་ཅེས་བཀའ་
279b
སྩལ་ཏོ། །ལག་བཟང ། བྱང་ཆུབ་སེམས་དཔའ་སེམས་དཔའ་ཆེན་པོས་མྱུར་དུ་མངོན་པར་རྫོགས་པར་བྱང་ཆུབ་པར་བྱ་བའི་ཕྱིར། ཕ་རོལ་ཏུ་ཕྱིན་པ་དྲུག་པོ་འདི་དག་རྟག་པར་རྒྱུན་དུ་ཡོངས་སུ་རྫོགས་པར་བྱའོ། །དྲུག་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ལག་བཟང ། བྱང་ཆུབ་སེམས་དཔའ་སེམས་དཔའ་ཆེན་པོས་ཕ་རོལ་ཏུ་ཕྱིན་པ་དྲུག་པོ་འདི་དག་རྟག་པར་རྒྱུན་དུ་ཡོངས་སུ་རྫོགས་པར་བྱའོ། །ལག་བཟང ། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་ཀྱིས་ལོངས་སྤྱོད་པ་རྣམས་ཡོངས་སུ་ཚོལ་གྱི། ཆོས་མ་ཡིན་པས་ནི་མ་ཡིན་ནོ། །མཉམ་པ་ཉིད་ཡིན་གྱི་མི་མཉམ་པས་ནི་མ་ཡིན་ནོ། །དེ་སྲོག་ཆགས་གཞན་དག་དང ། སེམས་ཅན་གཞན་རྣམས་ལ་གནོད་པ་མི་བྱེད། ཉམ་ང་བ་མི་བྱེད་པར་སྦྱིན་པ་བྱིན་ཏེ། བརྗོད་པ་དང་སྒྲ་དང་ཚིགས་སུ་བཅད་པའི་ཕྱིར་མ་ཡིན། འཛེམ་པའི་ཕྱིར་མ་ཡིན། འཇིགས་པའི་ཕྱིར་མ་ཡིན། ལན་དུ་ཕན་འདོགས་སུ་རེ་བའི་ཕྱིར་མ་ཡིན། མཐོ་རིས་ཀྱི་ཕྱིར་མ་ཡིན། ཚུལ་འཆོས་
280a
༄#། །པ་མ་ཡིན། ཁ་གསག་བྱེད་པ་མ་ཡིན། བརྙས་པ་མ་ཡིན་ནོ། །སྦྱིན་གནས་སམ་སྦྱིན་གནས་མ་ཡིན་པའམ། མངོན་པར་གྲགས་པའམ་མངོན་པར་གྲགས་པ་མ་ཡིན་པའམ། ཚུལ་ཁྲིམས་དང་ལྡན་པའམ་ཚུལ་ཁྲིམས་འཆལ་བའམ། འདྲིས་པའམ་མ་འདྲིས་པའམ། མཛའ་བའམ་མི་མཛའ་བ་ཡང་རུང་སྟེ། བཀུར་སྟིར་བྱེད། བླ་མར་བྱེད།་རིམ་གྲོ་བྱེད། མཆོད་པར་བྱེད་ཅིང་འདུན་པ་དྲག་པོ་དང ། དགའ་བ་དྲག་པོ་དང ། དད་པ་དྲག་པོས་དེ་ཉུང་དུ་བདོག་ནའང་རུང་ཉུང་དུ་སྦྱིན། མང་དུ་བདོག་ན་ཡང་མང་དུ་སྦྱིན་བཟང་དུ་བདོག་ན་ཡང་བཟང་དུ་སྦྱིན། ངན་པ་བདོག་ན་ཡང་ངན་པ་སྦྱིན། གྱ་ནོམ་པ་བདོག་ན་ཡང་གྱ་ནོམ་བ་སྦྱིན་ནོ། །ལག་བཟང ། ཇི་ལྟར་བྱང་ཆུབ་སེམས་དཔའ་བརྒྱ་སྟོང་སྦྱིན་པ་དང ། རླབས་པོ་ཆེའི་སེམས་དང ། རངས་པའི་སེམས་ཀྱིས་སྦྱིན་པ་དེ་བཞིན་དུ། ཀ་ཀཱ་ནི་ཙམ་ཡང་སྦྱིན་ཞིང་རླབས་པོ་ཆེའི་སེམས་དང་རངས་པའི་སེམས་ཀྱིས་སྦྱིན་ནོ། །དེ་ཟས་འདོད་པ་རྣམས་ལ་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་བླ་ན་མེད་པའི་སྟོབས་ཀྱིས་བརྟན་པ་ཐོབ་པར་བྱ་བའི་ཕྱིར་ཟས་སྦྱིན་ནོ། །སྐོམ་འདོད་པ་རྣམས་ལ་ནི་སེམས་ཅན་ཐམས་ཅད་ཉོན་མོངས་པའི་སྐོམ་པ་ཐམས་ཅད་བསལ་བའི་སྟོབས་ཐོབ་པར་བྱ་བའི་ཕྱིར་སྐོམ་སྦྱིན་ནོ། །གོས་འདོད་པ་རྣམས་ལ་ནི་སེམས་ཅན་ཐམས་ཅད་ངོ་ཚ་ཤེས་པ་དང་ཁྲེལ་ཡོད་
280b
པའི་གོས་ཐོབ་པར་བྱ་བའི་ཕྱིར་གོས་སྦྱིན་ནོ། །བཞོན་པ་འདོད་པ་རྣམས་ལ་ནི་སེམས་ཅན་ཐམས་ཅད་བྱང་ཆུབ་སེམས་དཔའི་ཐེག་པ་དང ། རྫོགས་པའི་སངས་རྒྱས་ཀྱི་ཐེག་པ་བླ་ན་མེད་པ་ཐོབ་པར་བྱ་བའི་ཕྱིར་བཞོན་པ་སྦྱིན་ནོ། །སྤོས་འདོད་པ་རྣམས་ལ་ནི་སེམས་ཅན་ཐམས་ཅད་སངས་རྒྱས་ཀྱི་ཚུལ་ཁྲིམས་ཀྱི་དྲི་བསུང་ཐམས་ཅད་ཐོབ་པར་བྱ་བའི་ཕྱིར་སྤོས་སྦྱིན་ནོ། །མེ་ཏོག་འདོད་པ་རྣམས་ལ་ནི་སེམས་ཅན་ཐམས་ཅད་དེ་བཞིན་གཤེགས་པའི་བྱང་ཆུབ་ཀྱི་ཡན་ལག་བདུན་གྱི་མེ་ཏོག་བླ་ན་མེད་པ་ཐོབ་པར་བྱ་བའི་ཕྱིར་མེ་ཏོག་རྣམས་སྦྱིན་ནོ། །ཕྱེ་མ་འདོད་པ་རྣམས་ལ་ནི་སེམས་ཅན་ཉེས་པར་སྤྱོད་པའི་དྲི་ང་བའི་དྲི་མ་གཞོམ་པའི་སྟོབས་ཐོབ་པར་བྱ་བའི་ཕྱིར་ཕྱེ་མ་སྦྱིན་ནོ། །བྱུག་པ་འདོད་པ་རྣམས་ལ་ནི་སེམས་ཅན་ཐམས་ཅད་ཉེས་པ་མེད་པའི་ཚུལ་ཁྲིམས་དང ། སྤྱོད་པའི་བྱུག་པ་ཐོབ་པར་བྱ་བའི་ཕྱིར་བྱུག་པ་སྦྱིན་ནོ། །གདུགས་འདོད་པ་རྣམས་ལ་ནི་སེམས་ཅན་ཐམས་ཅད་ཉོན་མོངས་པའི་གདུང་བ་ཐམས་ཅད་ཉེ་བར་ཞི་བའི་སྟོབས་ཐོབ་པར་བྱ་བའི་ཕྱིར་གདུགས་སྦྱིན་ནོ། །ལྷམ་འདོད་པ་རྣམས་ལ་ནི་སེམས་ཅན་ཐམས་ཅད་བླ་ན་མེད་པའི་བདེ་བ་མངོན་པར་ཤེས་པ་ཐོབ་པར་བྱ་བའི་ཕྱིར་ལྷམ་སྦྱིན་ནོ། །མལ་ཆ་འདོད་པ་རྣམས་ལ་ནི་སེམས་ཅན་ཐམས་ཅད་ལྷ་དང ། ཚངས་པ་དང ། འཕགས་པའི་གནས་པའི་མལ་ཆའི་བདེ་བ་སྦྱར་བའི་སྟོབས་ཐོབ་པར་བྱ་བའི་ཕྱིར་མལ་ཆ་སྦྱིན་ནོ། །སྟན་འདོད་པ་རྣམས་ལ་ནི་སེམས་ཅན་
281a
༄#། །ཐམས་ཅད་བྱང་ཆུབ་ཀྱི་སྙིང་པོར་བདུད་དང ། ཉོན་མོངས་པའི་སྒྲིབ་པ་བར་དུ་གཅོད་པ་ཐམས་ཅད་ཀྱིས་མི་ཕྱེད་པར་དཔའ་བའི་སྟན་ཐོབ་པར་བྱ་བའི་ཕྱིར་སྟན་སྦྱིན་ནོ། །གནས་འདོད་པ་རྣམས་ལ་ནི་སེམས་ཅན་ཐམས་ཅད་སྐྱབས་དང ། གནས་དང ། མགོན་དང ། དཔུང་གཉེན་དུ་གྱུར་པའི་ལུས་ཐོབ་པར་བྱ་བའི་ཕྱིར་གནས་སྦྱིན་ནོ། །ཕྲུ་ཏོག་དང ། བུམ་པ་དང ། འཚོག་ཆས་འདོད་པ་རྣམས་ལ་ནི་སེམས་ཅན་ཐམས་ཅད་ཆོས་ཀྱི་རྫིང་ལྟ་བུའི་ལུས་ཐོབ་པར་བྱ་བའི་ཕྱིར་ཕྲུ་ཏོག་དང ། བུམ་པ་དང ། འཚོགས་ཆས་སྦྱིན་ནོ། །སེམས་ཅན་ཐམས་ཅད་ཞི་བ་དང ། ཉེ་བར་ཞི་བ་བླ་ན་མེད་པའི་ཏིང་ངེ་འཛིན་དང ། སྙོམས་པར་འཇུག་པ་ཐམས་ཅད་ཐོབ་པར་བྱ་བའི་ཕྱིར་སངས་རྒྱས་དང ། ཆོས་དང ། དགེ་འདུན་ལ་དཀའ་ཐུབ་ཀྱི་ནགས་ཚལ་སྦྱིན་པ་སྦྱིན་ནོ། །སེམས་ཅན་ཐམས་ཅད་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུ་ཐོབ་པར་བྱ་བའི་ཕྱིར་མཆོད་རྟེན་རྣམས་ལ་རྒྱན་སྦྱིན་པ་སྦྱིན་ནོ། །སེམས་ཅན་ཐམས་ཅད་དེ་བཞིན་གཤེགས་པའི་ལྷའི་སྤྱན་མཐའ་ཡས་པ་ཐོབ་པར་བྱ་བའི་ཕྱིར་མུན་ཁྲོད་ཀྱི་མཆོད་རྟེན་ནམ། ལམ་རྣམས་ལ་མར་མེ་སྦྱིན་པ་སྦྱིན་ནོ། །སེམས་ཅན་ཐམས་ཅད་དེ་བཞིན་གཤེགས་པའི་ལྷའི་སྙན་མཐའ་ཡས་པ་ཐོབ་པར་བྱ་བའི་ཕྱིར་སངས་རྒྱས་ལ་མཆོད་པ་རྣམས་སམ། ཆོས་ལ་མཆོད་
281b
པ་རྣམས་སམ། དགེ་འདུན་ལ་མཆོད་པ་རྣམས་ལ་རོལ་མོའི་དབྱངས་སྒྲའི་སྦྱིན་པ་སྦྱིན་ནོ། །སེམས་ཅན་ཐམས་ཅད་ཆ་བྱད་དང ། ཚུལ་ཁྲིམས་དང ། སྤྱོད་པ་མཛེས་པ་བླ་ན་མེད་པ་ཐོབ་པར་བྱ་བའི་ཕྱིར་ལྷུང་བཟེད་དང ། ཆོས་གོས་སྦྱིན་པ་སྦྱིན་ནོ། །སེམས་ཅན་ཐམས་ཅད་དབུགས་དབྱུང་བ་སྦྱིན་པའི་སྟོབས་ཐོབ་པར་བྱ་བའི་ཕྱིར་སྣོད་ཆགས་སྦྱིན་པ་སྦྱིན་ནོ། །སེམས་ཅན་ཐམས་ཅད་ཤེས་རབ་ཆེན་པོའི་ཚོགས་ཡོངས་སུ་བསྐང་བ་ཐོབ་པར་བྱ་བའི་ཕྱིར་སྨྱུ་གུ་དང ། སྣག་ཚ་དང ། གླེགས་བུ་དང ། ཆོས་ཀྱི་ཁྲི་སྟན་སྦྱིན་པ་སྦྱིན་ནོ། །སེམས་ཅན་ཐམས་ཅད་ཀྱི་ཉོན་མོངས་པའི་ནད་ཐམས་ཅད་གཞོམ་པའི་ཕྱིར་ན་བའི་གསོས་སྨན་དང ། ཡོ་བྱད་སྦྱིན་པ་སྦྱིན་ནོ། །སེམས་ཅན་ཐམས་ཅད་བྱང་ཆུབ་རྣམ་པ་གསུམ་གྱིས་དང ། བདུད་རྩི་དབྱིངས་ཀྱིས་ཐོབ་པར་བྱ་བའི་ཕྱིར་ས་གཞི་སྦྱིན་པ་སྦྱིན་ནོ། །སེམས་ཅན་ཐམས་ཅད་སློབ་དཔོན་མེད་པའི་ཆོས་མཐོན་པོ་ཐོབ་པར་བྱ་བའི་ཕྱིར་མཆོད་རྟེན་མཐོན་པོ་དང ། སྐུ་གཟུགས་མཐོན་པོ་བྱེད་དོ། །བདོག་པ་ལྟ་ན་སེམས་ཅན་ཐམས་ཅད་མངོན་པར་ཤེས་པ་མྱུར་བ་ཐོབ་པར་བྱ་བའི་ཕྱིར་མྱུར་ཞིང་ཡོངས་སུ་ཉོན་མོངས་པར་མ་གྱུར་པར་སྦྱིན་པ་སྦྱིན་ནོ། །སེམས་ཅན་ཐམས་ཅད་བར་དུ་གཅོད་པ་མེད་པར་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་རུང་བ་སྦྱིན་གྱི། རུང་བ་མ་ཡིན་པ་ནི་མ་ཡིན་ནོ། །སེམས་ཅན་ཐམས་ཅད་སྤོབས་པ་ཆེན་པོ་ཡོངས་སུ་མི་འཆད་པ་ཐོབ་པར་བྱ་བའི་ཕྱིར་ཡོངས་སུ་མི་གཅོད་
282a
༄#། །པར་སྦྱིན་པ་སྦྱིན་ནོ། །སེམས་ཅན་ཐམས་ཅད་སྙིང་རྗེ་ཆེན་པོ་མཚུངས་པ་མེད་པ་ཐོབ་པར་བྱ་བའི་ཕྱིར་སེམས་ཅན་ཐམས་ཅད་ལ་མཉམ་པར་སྦྱིན་པ་སྦྱིན་ནོ། །སེམས་ཅན་ཐམས་ཅད་བདུད་དང་མུ་སྟེགས་བྱེད་པ་ཐམས་ཅད་ཀྱིས་ཚར་མི་ཆོད་པ་དང ། གནོད་པར་མི་ནུས་པའི་ཆོས་མངོན་པར་རྫོགས་པར་བྱང་ཆུབ་པར་བྱ་བའི་ཕྱིར་གཞན་ལ་མི་གནོད་པར་སྦྱིན་པ་སྦྱིན་ནོ། །ལག་བཟང ། གལ་ཏེ་བྱང་ཆུབ་སེམས་དཔའ་ལ་སྦྱིན་པ་འདི་དག་སྦྱིན་དུ་ནོར་མེད་ཅིང་འབྱོར་པ་མེད་པར་གྱུར་ན། དེ་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་སྦྱིན་པ་མཐའ་ཡས་ཤིང་དཔག་ཏུ་མེད་པ་འདི་དག་སྦྱིན་པར་ཡིད་ཀྱིས་འདོད་ཅིང་སྨོན་ལ་སྨོན་ལམ་འདེབས་ཏེ། ལག་བཟང ། བྱང་ཆུབ་སེམས་དཔའ་དེ་སྦྱིན་པ་འདི་དག་བྱིན་པའི་ནུས་པ་དང་ལྡན་ཡང་རུང ། ནུས་པ་དང་མི་ལྡན་པ་ཡང་རུང་སྟེ། གང་འཇིག་རྟེན་གྱི་ཁམས་ཐམས་ཅད་ན་སེམས་ཅན་ཐམས་ཅད་བདག་གི་བདེ་བར་སྦྱར་བ་ཉིད་དང་ལྡན་པ་དང ། ཡང་དག་པར་ལྡན་པར་འགྱུར་ཞིང་འབད་པ་མེད་པ་དང་འདོད་པ་མེད་པར་བྲང་པ་རྣམས། ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཤིན་ཏུ་ཡོངས་སུ་རྫོགས་ཤིང ། བསམ་པ་མ་ལུས་པར་ཡོངས་སུ་རྫོགས་ནས་བདེ་བ་ལ་རེག་པར་གནས་པར་འགྱུར་བར་བདག་གི་དེ་བཟང་པོར་གྱུར་ཅིག་།བདག་
282b
གི་དེ་དགེ་བར་གྱུར་ཅིག་ཅེས་དེ་ལྟར་ཡིད་ཀྱིས་འདོད་ཅིང་སྨོན་ལམ་སྨོན་ལམ་འདེབས་སོ། །འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་རིན་པོ་ཆེའི་རྒྱ་མཚོ་ཡང་སྦྱིན་པར་འདོད་ཅིང་སྨོན་ལ་སྨོན་ལམ་འདེབས་སོ། །དབྱིག་གི་རི་དང ། གསེར་གྱི་རི་དང ། གོས་ཀྱི་རི་དང ། ཡོ་བྱད་ཐམས་ཅད་ཀྱི་རི་དང ། བཟའ་བརྒྱ་མཚོ་དང ། བཏུང་བ་རྒྱ་མཚོ་དང ། གནས་ལེགས་པར་བྱས་པ། ལེགས་པར་གནས་པ། མཐའ་ཡས་ཤིང་དཔག་ཏུ་མེད་པ་དག་ཀྱང་སྦྱིན་པར་འདོད་ཅིང་སྨོན་ལ་སྨོན་ལམ་འདེབས་སོ། །འཁོར་བའི་སྲིད་པ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་འདས་པ་དང ། མ་འོངས་པ་དང ། ད་ལྟར་བྱུང་བ་ཐམས་ཅད་ཀྱི་སྦྱིན་པ་དང ། གཏོང་བ་དང ། རྣམ་པར་གཏོང་བ་གང་ཡིན་པ་ཟང་ཟིང་སྦྱིན་པའམ། མི་འཇིགས་པ་སྦྱིན་པའམ། ཆོས་སྦྱིན་པ་མ་ལུས་པ་དེ་དག་ཐམས་ཅད་ལ་ཐ་ན་དུས་གསུམ་དུ་ཡང་མངོན་པར་དགའ་ཞིང་རྗེས་སུ་ཡི་རང་ངོ ། །གལ་ཏེ་དེ་ལ་བསླངས་ལ་ནོར་སྦྱིན་མི་ནུས་ན་ཡང་རང་གི་ཟོས་སྐལ་སྦྱིན་པའམ། གྲོགས་སུ་འགྱུར་བའམ། ཀུན་དུ་བཙལ་བའི་ཐབས་ཀྱང་དེ་ལ་སྟོན་པར་འགྱུར་རོ། །ཆོས་ཀྱི་གཏམ་གྱིས་དེའི་འདོད་པ་སེལ་བར་བྱེད་དོ། །དེ་སྦྱིན་པར་འདོད་པར་གྱུར་པ་ན་ཡང་སྦྱིན་པ་དེ་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། སེམས་ཅན་
283a
༄#། །ཐམས་ཅད་ཡོངས་སུ་མྱ་ངན་ལས་བཟླ་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར།་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །སྦྱིན་པ་དག་བྱིན་ནས་ཀྱང་སྦྱིན་པ་དེ་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །གལ་ཏེ་སྦྱིན་པ་དང ། གཏོང་བ་དང ། རྣམ་པར་གཏོང་བ་དེ་ལ་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་ཡང་དག་པར་སློབ་སྟེ། དུས་དུས་སུའམ། ཅུང་ཟད་ཅུང་ཟད་དུ་ཡང་ཆགས་པ་དང ། སེར་སྣ་དང ། སྦྱིན་པས་འཇིགས་པ་སྤང་བ་དང ། དོར་བ་དང ། བསལ་བར་རྩོལ་ལོ། །འབད་དོ། །དུས་དུས་སུའམ། ཅུང་ཟད་ཅུང་ཟད་དུ་ཡང་སྦྱིན་པ་དང ། གཏོང་བ་དང ། རྣམ་པར་གཏོང་བ་ལ་སློབ་པ་དང ། མངོན་པར་འཕེལ་བར་བྱ་བ་དང ། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྐྱིད་ལུག་པར་མི་འགྱུར་རོ། །ལག་བཟང ། བྱང་
283b
ཆུབ་སེམས་དཔའ་རྣམས་བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཀྱི་སེམས་རྗེས་སུ་དྲན་པ་དང ། བྱང་ཆུབ་ཀྱི་སེམས་བསྒོམ་པ་དང ། བྱང་ཆུབ་ཏུ་སྨོན་པ་དང ། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་སྦྱིན་པ་ཆེན་པོ་དང ། གཏོང་བ་ཆེན་པོ་དང ། རྣམ་པར་གཏོང་བ་ཆེན་པོ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ།་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་དམ་པའི་ཆོས་ཀྱི་ཆར་སྦྱིན་པར་འདོད་པ་དང ། བདུད་རྩིའི་དབྱིངས་ཀྱི་ཆར་སྦྱིན་པར་འདོད་པ་དང ། དམ་པའི་ཆོས་ཀྱི་ཆར་གཏོང་བར་འདོད་པ་དང ། བདུད་རྩིའི་དབྱིངས་ཀྱི་ཆར་གཏོང་བར་འདོད་པ་དང ། དམ་པའི་ཆོས་ཀྱི་ཆར་རྣམ་པར་གཏོང་བར་འདོད་པ་དང ། བདུད་རྩིའི་དབྱིངས་ཀྱི་ཆར་རྣམ་པར་གཏོང་བར་འདོད་པ་དེ་ནི་སྦྱིན་པ་དང ། གཏོང་བ་དང ། རྣམ་པར་གཏོང་བ་ཐམས་ཅད་ཀྱི་ནང་ན་མཆོག་ཡིན་ནོ། །དེ་ནི་དམ་པ་ཡིན་ནོ། །ལག་བཟང ། དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ་ཡིད་བདེ་བ་དང་ལྡན་ཞིང་ཚེགས་ཆུང་དུ་དང ། སྡུག་བསྔལ་ཆུང་དུས་མྱུར་དུ་སྐྱེན་པར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟང ། བྱང་ཆུབ་སེམས་དཔའ་ནི་སློང་བ་རྣམས་ཀྱིས་བསླངས་པ་ན་ཡན་ལག་དང་ཉིང་ལག་གཅོད་དམ། བཅད་ནས་སློང་བ་རྣམས་ལ་སྦྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་དག་ཉིད་ཀྱི་སེམས་ཅན་དམྱལ་བ་ཆེན་པོར་
284a
༄#། །འགྱུར་བ་དང ། མི་དགེ་བའི་ལས་ཆེན་པོ་རྒྱ་ཆེ་བ་ཡོངས་སུ་མ་སྡོད་བའི་ཕྱིར་རོ། །སེམས་ཅན་གཞན་གྱི་ཕྱིར་རམ། སེམས་ཅན་གཞན་གྱི་ཆེད་ལ་དེ་རང་གི་ཡན་ལག་དང་ཉིང་ལག་ཡོངས་སུ་མི་གཏོང་བ་ནི་མ་ཡིན་ནོ། །ལག་བཟང ། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སློང་བས་བདོག་པ་ཐམས་ཅད་བསླངས་ན་ཕ་མ་ལ་གནོད་པ་བྱས་ཤིང་སྤངས་ཏེ་སྡུག་བསྔལ་བར་བྱས། བུ་དང ། ཆུང་མ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་ལ་གནོད་པ་བྱས་ཤིང་སྤངས་ཏེ་སྡུག་བསྔལ་བར་བྱས་ནས།་བདོག་པ་ཐམས་ཅད་སློང་བ་རྣམས་ལ་སྦྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལ་མཚུངས་པར་སྙིང་བརྩེ་བ་ཡིན་ཏེ། ཇི་ལྟར་ཕ་མ་ལ་གནོད་པ་མི་བྱེད་ཅིང་མི་སྤོང་ལ་སྡུག་བསྔལ་བར་ཡང་མི་བྱེད་པ་དང ། བུ་དང ། ཆུང་མ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་ལ་གནོད་པ་མི་བྱེད་ཅིང་མི་སྤོང་སྟེ། སྡུག་བསྔལ་བར་མི་བྱེད་པར་སྦྱིན་པ་ཡང་སྦྱིན་པ་དེ་བཞིན་དུ་སེམས་ཅན་ཐམས་ཅད་ལ་མཚུངས་པར་གསོ་བར་བྱེད་དོ། །དེ་ནི་སེམས་ཅན་གཞན་གྱི་ཕྱིར་རམ། སེམས་ཅན་གཞན་གྱི་ཆེད་ལ་བདོག་པ་ཐམས་ཅད་ཡོངས་སུ་མི་གཏོང་བ་ཡང་མ་ཡིན་ནོ། །ལག་བཟང ། དེ་བཞིན་གཤེགས་པ་རྣམས་ནི་སེམས་ཅན་ལ་གནོད་པའི་སྦྱིན་པའི་བསྔགས་པ་གསུང་བ་
284b
མ་ཡིན་ན། བྱང་ཆུབ་སེམས་དཔའ་རྣམས་ཀྱིས་ཡན་ལག་བཅད་པ་ལྟ་ལ་དེ་ལྟར་ག་ལ་འགྱུར། ལག་བཟང ། བྱང་ཆུབ་སེམས་དཔའ་ཇི་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང ། འདི་ལ་བྱང་ཆུབ་སེམས་དཔའ་ནི་སྲོག་གི་ཕྱིར་ཡང་སྲོག་ཆགས་གཞན་དག་དང ། སེམས་ཅན་གཞན་རྣམས་ལ་མི་བརྡེག་།མི་གསོད་ཅིང ། གསོད་པ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་མ་བྱིན་པར་མི་ལེན་ལ་མ་བྱིན་པར་ལེན་དུ་མི་འཇུག་ཅིང་མ་བྱིན་པར་ལེན་པ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་འདོད་པ་ལ་ལོག་པར་གཡེམ་པ་མི་བྱེད་ལ། འདོད་པ་ལ་ལོག་པར་གཡེམ་པ་བྱེད་དུ་མི་འཇུག་ཅིང ། འདོད་པ་ལ་ལོག་པར་གཡེམ་པ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་རྫུན་མི་སྨྲ་ལ་རྫུན་ཟེར་དུ་མི་འཇུག་ཅིང ། རྫུན་སྨྲ་བ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་ཆང་མི་འཐུང་ལ་ཆང་འཐུང་དུ་མི་འཇུག་ཅིང ། ཆང་འཐུང་བ་ལ་རྗེས་སུ་ཡི་རང་བར་མི་བྱེད་དོ། །དེ་བསླབ་པའི་གཞི་ལྔ་པོ་དེ་དག་ལ་རིང་དུ་གནས་ཤིང་བརྟན་པོར་གནས་ལ་དམ་པོར་གནས་ཏེ་མི་ལྷོད་པར་གནས་ཤིང་བསྒྲུབ་བོ། །དེ་བཞིན་དུ་ཞིང་རྨེད་པ་དང ། ཞིང་རྨེད་དུ་འཇུག་པ་དང ། འཆིང་བ་དང་འཆིང་དུ་འཇུག་པ་དང ། གོ་རར་གཞུག་པ་དང ། གོ་རར་གཞུག་ཏུ་འཇུག་པ་དང ། བརྡེག་པ་དང ། བརྡེག་ཏུ་འཇུག་པ་དང ། གཅོད་པ་དང ། གཅོད་དུ་
285a
༄#། །འཇུག་པ་དག་སྤང་བ་དང ། དོར་བ་དང ། བསལ་བར་འབད་པ་བྱེད་དོ། །དེ་དེ་ལྟར་བསླབ་པའི་གཞི་ལྔ་པོ་དག་ལ་རིང་དུ་གནས་ཤིང་བརྟན་པོར་གནས་ལ་དམ་པོར་གནས་ཏེ་མི་ལྷོད་པར་གནས་ཤིང་བསྒྲུབ་པོ། །དེ་བཞིན་དུ་ཕྲ་མའི་ཚིག་དང ། ངག་རྩུབ་པོ་དང ། ཚིག་ཀྱལ་པ་སྤང་པ་དང ། དོར་བ་དང ། བསལ་བར་འབད་པར་བྱེད་དོ། །དེ་སྲོག་ཆགས་ཐམས་ཅད་དང ། སེམས་ཅན་ཐམས་ཅད་ནི་བདག་གི་ཕ་མ་ཇི་ལྟ་བ་བཞིན་ནོ། །བུ་གཅིག་པ་ཕངས་པ་ཇི་ལྟ་བ་བཞིན་ཏེ། ཇི་ལྟར་ཕ་མ་དང ། བུ་གཅིག་པ་ཕངས་པ་བདག་ལ་འཁུ་ཡང་སླར་འཁུ་བར་མི་བྱ་ལ། ལག་པའམ། བོང་བའམ། དབྱུག་པའམ། རལ་གྲིའམ། མདས་བརྡེགས་ཀྱང་སླར་བརྡེག་པར་མི་བྱ། གསོད་ཀྱང་སླར་གསད་པར་མི་བྱ་ཞིང།་ཇི་ལྟར་ཕ་མ་དང་བུ་གཅིག་པ་ཕངས་པ་འཁུ་ཡང་སླར་འཁུ་བར་མི་བྱ་བ་དེ་བཞིན་དུ་བདག་སྲོག་ཆགས་ཐམས་ཅད་དང ། སེམས་ཅན་ཐམས་ཅད་ཀྱིས་ལག་པའམ། བོང་བའམ། དབྱུག་པའམ། རལ་གྲིའམ། མདས་བརྡེགས་ཀྱང་སླར་བརྡེག་པར་མི་བྱ། གསོད་ཀྱང་སླར་གསད་པར་མི་བྱའོ་ཞེས་དེ་ལྟར་སློབ་པོ། །དཔེར་ན་ཕའམ། མའམ། བུ་གཅིག་པ་ཕངས་པ་ཡུན་རིང་པོར་ཡུལ་རྒྱུ་སྟེ་འོངས་པ་མཐོང་ན་དགའ་ཞིང་ཡིད་བདེ་བར་འགྱུར་བ་དེ་བཞིན་དུ། ལག་བཟང ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སྲོག་ཆགས་
285b
ཐམས་ཅད་དང ། སེམས་ཅན་ཐམས་ཅད་མཐོང་ན་དགའ་བ་དང ། ཡིད་བདེ་བར་འགྱུར་རོ། །དེའི་སྲོག་གཅོད་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་མི་སློབ་པའི་ཚུལ་ཁྲིམས་སྲོག་གཅོད་པ་སྤང་པ་ལ་དགོད་པའི་ཕྱིར་རོ། །དེའི་མ་བྱིན་པར་ལེན་པར་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་མི་སློབ་པའི་ཚུལ་ཁྲིམས་མ་བྱིན་པར་ལེན་པ་སྤང་བ་ལ་དགོད་པའི་ཕྱིར་རོ། །དེའི་འདོད་པ་ལ་ལོག་པར་གཡེམ་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་མི་སློབ་པའི་ཚུལ་ཁྲིམས་ཚངས་པར་སྤྱོད་པ་ལ་དགོད་པའི་ཕྱིར་རོ། ། དེའི་བརྫུན་དུ་སྨྲ་བ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་མི་སློབ་པའི་ཚུལ་ཁྲིམས་བརྫུན་དུ་སྨྲ་བ་སྤང་བ་ལ་དགོད་པའི་ཕྱིར་རོ། །དེའི་ཆང་འཐུང་བ་སྤངས་པའི་ཚུལ་ཁྲིམས་ནི།་སེམས་ཅན་ཐམས་ཅད་མི་སློབ་པའི་ཚུལ་ཁྲིམས་ཆང་འཐུང་བ་སྤང་བ་ལ་དགོད་པའི་ཕྱིར་རོ། །དེའི་ཞིང་རྨེད་པ་དང ། ཞིང་རྨེད་དུ་འཇུག་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་ཐོབ་པར་བྱ་བའི་ཕྱིར་རོ། །དེའི་འཆིང་བ་དང ། འཆིང་དུ་འཇུག་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་ཀྱི་ཉོན་མོངས་པའི་བཅིང་བ་ཐམས་ཅད་གཅད་པའི་ཕྱིར་རོ། །དེའི་གོ་རར་འཇུག་པ་དང ། གོ་རར་གཞུག་ཏུ་འཇུག་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་ཀྱི་འགྲོ་བ་ལྔ་དགག་པ་དང་
286a
༄#། །བསལ་བའི་ཕྱིར་རོ། །དེའི་བརྡེག་པ་དང ། བརྡེག་ཏུ་འཇུག་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་བདུད་དང་ཉོན་མོངས་པའི་སྒྲིབ་པ་བར་དུ་གཅོད་པ་ཐམས་ཅད་ཀྱིས་ཟིལ་གྱི་མི་ནོན་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་གཅོད་པ་དང ། གཅོད་དུ་འཇུག་པ་སྤངས་པའི་ཚུལ་ཁྲིམས་ནི། སེམས་ཅན་ཐམས་ཅད་ལུས་དང ། ངག་དང ། ཡིད་ཀྱི་ལས་ཀུན་དུ་བསྲུངས་པ་ཐོབ་པར་བྱ་བའི་ཕྱིར་རོ། །དེའི་ཕྲ་མའི་ཚིག་སྤངས་པའི་ཚུལ་ཁྲིམས་ནི་གཡོག་ཉན་ཐོས་ཀྱི་དགེ་འདུན་ཆེན་པོ་མི་ཕྱེད་པ་ཐོབ་པར་བྱ་བའི་ཕྱིར་རོ། །དེའི་ཚིག་རྩུབ་པོ་སྤངས་པའི་ཚུལ་ཁྲིམས་ནི། ཡན་ལག་ལྔ་པའི་ངག་གི་ལམ་དང་ལྡན་པའི་ཚངས་པའི་དབྱངས་ཐོབ་པར་བྱ་བའི་ཕྱིར་རོ། །དེའི་ཚིག་ཀྱལ་པ་སྤངས་པའི་ཚུལ་ཁྲིམས་ནི། ཚིག་བཟུང་བར་འོས་པར་ཐོགས་པ་མེད་པ་ཐོབ་པར་བྱ་བའི་ཕྱིར་རོ། །དེའི་འཆི་བས་འཇིགས་སྐྲག་པ་ཡོངས་སུ་སྐྱོབ་པའི་ཚུལ་ཁྲིམས་ནི། སེམས་ཅན་ཐམས་ཅད་ཀྱི་སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པའི་འཇིགས་པ་རབ་ཏུ་ཞི་བར་བྱ་བའི་ཕྱིར་རོ། །དེའི་གཞན་གྱི་ནོར་དང་ཡོ་བྱད་འཇིག་ཅིང་ཆུད་ཟ་བ་ཡོངས་སུ་སྐྱོབ་པའི་ཚུལ་ཁྲིམས་ནི། སེམས་ཅན་ཐམས་ཅད་བྱང་ཆུབ་ཀྱི་ཕྱོགས་ཀྱི་ཆོས་ཀྱི་ནོར་བླ་ན་
286b
མེད་པ་ཐོབ་པར་བྱ་བའི་ཕྱིར་རོ། །དེའི་གཞན་གྱི་བུད་མེད་ལ་འཛིན་པ་གཏོང་བར་བྱེད་པ་དང ། གཏོང་བར་བྱེད་དུ་འཇུག་པའི་ཚུལ་ཁྲིམས་ནི། འཁྲུལ་པ་མེད་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་འགུག་པ་གཏོང་བར་བྱེད་པ་དང ། གཏོང་བར་བྱེད་དུ་འཇུག་པའི་ཚུལ་ཁྲིམས་ནི། རང་གི་སེམས་ལ་དབང་ཐོབ་པར་བྱ་བའི་ཕྱིར་རོ། །དེའི་འཆིང་བ་འགྲོལ་བ་དང ། འགྲོལ་དུ་འཇུག་པའི་ཚུལ་ཁྲིམས་ནི། དཔའ་བོའི་སྟན་བྱང་ཆུབ་ཀྱི་སྙིང་པོར་བདུད་ཀྱི་དམག་དང ། ཉོན་མོངས་པའི་འཆིང་བ་ཐམས་ཅད་གཞིག་པའི་ཕྱིར་རོ། །དེའི་ཁྱིམ་ནས་འབྱུང་བའི་ཚུལ་ཁྲིམས་ནི། སེམས་རྣམ་པར་གྲོལ་བ་སྒྲིབ་པ་མེད་པ་ཐོབ་པར་བྱ་བའི་ཕྱིར་རོ། །དེའི་བརྡེག་པ་འཆགས་པའི་ཚུལ་ཁྲིམས་ནི། མི་འཇིགས་པ་རྣམ་པ་བཞིས་འཇིག་པ་ཡང་དག་པར་གཞོམ་པ་ཐོབ་པར་བྱ་བའི་ཕྱིར་རོ། །དེའི་གཅོད་པ་བཟློག་པའི་ཚུལ་ཁྲིམས་ནི། ཀུན་དུ་བསྲུང་བའི་ཆོས་བཞི་ཐོབ་པར་བྱ་བའི་ཕྱིར་རོ། །དེའི་མི་སླུ་བའི་ཚིག་སྨྲ་བའི་ཚུལ་ཁྲིམས་ནི་དཔའ་བོའི་སྟན་བྱང་ཆུབ་ཀྱི་སྙིང་པོར་བདུད་དང་ཉོན་མོངས་པའི་སྒྲིབ་པ་བར་དུ་གཅོད་པ་ཐམས་ཅད་ཀྱིས་མི་སླུ་བའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་བྱེ་བ་རྣམས་ཀྱི་སྡུམས་བྱེད་ཅིང་མཛའ་བ་བརྟན་པར་བྱེད་པའི་ཚུལ་ཁྲིམས་ནི་གཡོག་འཕགས་པའི་ཉན་ཐོས་ཀྱི་དགེ་བདུན་ཆེན་པོ་མི་ཕྱེད་པ་ཐོབ་པར་བྱ་བའི་ཕྱིར་རོ། །དེའི་ཚིག་སྙན་པ་དང་འཇམ་པོ་སྨྲ་བའི་ཚུལ་ཁྲིམས་ནི།
287a
༄#། །སེམས་ཅན་ཐམས་ཅད་ཀྱི་རྣར་བདེ་ཞིང་སྙིང་དུ་འོང་ལ། བདེན་པའི་ངག་ཐོབ་པར་བྱ་བའི་ཕྱིར་རོ། །དེའི་ཀུན་དུ་མཐུན་པ་སྨྲ་བའི་ཚུལ་ཁྲིམས་ནི། ཚར་མི་ཆོད་ཅིང་བཟུང་བར་འོས་ལ་འབྲས་བུ་ཡོད་པའི་ཆོས་སྟོན་པ་ཐོབ་པར་བྱ་བའི་ཕྱིར་རོ། །དེའི་སངས་རྒྱས་ཀྱི་ཡོན་ཏན་གྱི་བསྔགས་པ་བརྗོད་པའི་ཚུལ་ཁྲིམས་ནི། འཕགས་པའི་ཡོན་ཏན་དང་ལྡན་པའི་དགེ་འདུན་གྱི་གཡོག་འཁོར་ཆེན་པོ་ཐོབ་པར་བྱ་བའི་ཕྱིར་རོ། །དེའི་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་དང ། ཆོས་དང ། དགེ་འདུན་དང ། བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་དུ་གཏོགས་པ་གྲངས་མེད་དཔག་ཏུ་མེད་པ་རྣམས་ལ་དུས་གསུམ་དུ་ཡན་ལག་ལྔས་གཏུགས་ཏེ་ཕྱག་འཚལ་བར་བྱེད་པའི་ཚུལ་ཁྲིམས་ནི། སེམས་ཅན་ཐམས་ཅད་དཔའ་བོའི་སྟན་བྱང་ཆུབ་ཀྱི་སྙིང་པོར་མི་ཕྱེད་ཅིང་སྲ་ལ་ཤིན་ཏུ་བརྟན་པའི་དད་པ་དང ། བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་མཆོག་གི་ཆོས་ཉིད་དམ་པ་ལྔ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སངས་རྒྱས་ཀྱི་མཆོད་རྟེན་ཐམས་ཅད་ལ་རིམ་གྲོ་བྱེད་པའི་ཚུལ་ཁྲིམས་ནི།་སངས་རྒྱས་ཀྱི་ཆོས་ཐམས་ཅད་ཡོངས་སུ་བསྐང་བ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་ཆོས་ཀྱི་ཡོན་ཏན་བརྗོད་པ་སྨྲ་བའི་ཚུལ་ཁྲིམས་ནི་ཆོས་ཀྱི་འཁོར་ལོ་གནས་མེད་
287b
པ་བླ་ན་མེད་པ་བསྐོར་བའི་ཕྱིར་རོ། །དེའི་དུས་གསུམ་དུ་དགེ་འདུན་གྱི་ཡོན་ཏན་བརྗོད་པ་སྨྲ་བའི་ཚུལ་ཁྲིམས་ནི། འཕགས་པའི་དགེ་འདུན་མི་ཕྱེད་པའི་གཡོག་འཁོར་ཆེན་པོ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་དཀོན་མཆོག་གསུམ་ལ་སྐྱབས་སུ་འགྲོ་བའི་ཚུལ་ཁྲིམས་ནི། སེམས་ཅན་ཐམས་ཅད་ལ་སྐྱབས་བླ་ན་མེད་པ་སྦྱིན་པའི་ཕྱིར་རོ། །དེའི་དུས་གསུམ་དུ་འཇིག་རྟེན་གྱི་ཁམས་ཐམས་ཅད་དཀོན་མཆོག་གསུམ་དང ། བྱང་ཆུབ་སེམས་དཔའ་རྣམས་ཀྱིས་སྟོངས་པར་མི་འགྱུར་བར་གསོལ་བ་འདེབས་པའི་ཚུལ་ཁྲིམས་ནི། བདེ་བར་འགྱུར་བ་གཅིག་ཏུ་ངེས་པར་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སངས་རྒྱས་ཐམས་ཅད་ལ་བསྐལ་པར་ཆོས་སྟོན་པར་གསོལ་བ་འདེབས་པའི་ཚུལ་ཁྲིམས་ནི། ས་བཅུ་པ་ཆོས་ཀྱི་སྤྲིན་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སྡིག་པ་ཐམས་ཅད་སོ་སོར་འཆགས་པ་དང ། སྡིག་པ་ཐམས་ཅད་སོ་སོར་འདོར་བ་དང ། སྡིག་པ་ཐམས་ཅད་ལ་སྨོད་པའི་ཚུལ་ཁྲིམས་ནི། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་གཞོམ་པ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་དགེ་བའི་རྩ་བ་ཐམས་ཅད་ཡང་དག་པར་འཛིན་པའི་ཚུལ་ཁྲིམས་ནི། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བསྐང་བ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སངས་རྒྱས་དང ། རང་སངས་རྒྱས་དང ། འཕགས་པའི་ཉན་ཐོས་ཀྱི་དགེ་འདུན་དང །
288a
༄#། །བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ཏུ་གཏོགས་པ་འདས་པ་དང ། མ་འོངས་པ་དང ། ད་ལྟར་བྱུང་བ་ཐམས་ཅད་དང ། སེམས་ཅན་འགྲོ་བ་ཐམས་ཅད་དུ་སོང་བ་འཇིག་རྟེན་གྱི་ཁམས་ཐམས་ཅད་དུ་གཏོགས་པ། འདས་པ་དང ། མ་འོངས་པ་དང ། ད་ལྟར་བྱུང་བ་ཐམས་ཅད་ཀྱི་དགེ་བའི་རྩ་བ་ཐམས་ཅད་ལ་རྗེས་སུ་ཡི་རང་བའི་ཚུལ་ཁྲིམས་ནི། བྱང་ཆུབ་ཀྱི་ཚོགས་མཐའ་ཡས་ཤིང་དཔག་ཏུ་མེད་པ་བསགས་པ་ཡོངས་སུ་རྫོགས་པར་བྱ་བའི་ཕྱིར་རོ། །དེའི་དུས་གསུམ་དུ་རྫོགས་པའི་བྱང་ཆུབ་ཏུ་སྨོན་པའི་ཚུལ་ཁྲིམས་ནི། རྫོགས་པའི་བྱང་ཆུབ་ཐོབ་པར་ངེས་པ་ལ་འཇུག་པར་བྱ་བའི་ཕྱིར་རོ། །དེའི་དུས་གསུམ་དུ་དགེ་བའི་རྩ་བ་ཐམས་ཅད་རྫོགས་པའི་བྱང་ཆུབ་ཐོབ་པར་ཡོངས་སུ་བསྔོ་བའི་ཚུལ་ཁྲིམས་ནི། གཅིག་ཏུ་དེ་བཞིན་གཤེགས་པའི་སྟོབས་དང་མི་འཇིགས་པ་ཐོབ་པར་བྱ་བའི་ཕྱིར་རོ། །དེའི་ཕ་མ་དང ། བླ་མ་དང ། རྒན་པ་དང ། སློབ་དཔོན་དང།་མཁན་པོ་ལ་ཡོངས་སུ་སྤྱད་པར་བྱེད་པའི་བསྙེན་བཀུར་བྱེད་པའི་ཚུལ་ཁྲིམས་ནི། ཟིལ་གྱིས་མི་ནོན་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་འཇིགས་པ་དང ། སྐྲག་པ་དང།་ཉམ་ཐག་པ་དང ། མགོན་མེད་པ་དབུགས་འབྱིན་པའི་ཚུལ་ཁྲིམས་ནི། དྲིས་པ་ཐམས་ཅད་ལ་མི་སྐྱོ་བར་ལན་འདེབས་པ་ལ་མཁས་པ་ཐོབ་པར་བྱ་བའི་ཕྱིར་རོ། །དེའི་རྒྱལ་པོ་
288b
དང།་ཆོམ་རྐུན་དང ། མེ་དང ། ཆུ་དང ། བགོ་སྐལ་ལ་སྤྱོད་པའི་སྡུག་བསྔལ་གྱི་ནང་དུ་ཆུད་པ་རྣམས་ཡོངས་སུ་བསྐྱབ་ཅིང་གྲོགས་བྱ་བའི་ཚུལ་ཁྲིམས་ནི། གནས་དང ། ས་དང ། ཕ་རོལ་ཏུ་ཕྱིན་པ་ཆེན་པོ་ཡོངས་སུ་བསྲུང་བ་ཐོབ་པར་བྱ་བའི་ཕྱིར་རོ། །དེའི་སངས་རྒྱས་དང ། རང་སངས་རྒྱས་དང ། འཕགས་པ་ཉན་ཐོས་དང ། བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་ཆོ་འཕྲུལ་རྗེས་སུ་བསྔགས་པའི་ཚུལ་ཁྲིམས་ནི་དེ་བཞིན་གཤེགས་པའི་རྫུ་འཕྲུལ་གྱི་སྟོབས་བླ་ན་མེད་པ་ཐོབ་པར་བྱ་བའི་ཕྱིར་རོ། །དེའི་ཕ་རོལ་གྱི་སེམས་རྗེས་སུ་བསྲུང་བ་དང་མཐུན་པའི་ལུས་ཀྱི་ལས་ཀྱི་ཚུལ་ཁྲིམས་དང ། ཕ་རོལ་གྱི་སེམས་མངོན་པར་དགའ་བ་དང ། ཡང་དག་པར་དགའ་བར་འགྱུར་བའི་ལུས་ཀྱི་ལས་ཀྱི་ཚུལ་ཁྲིམས་དང ། ཕ་རོལ་གྱི་སེམས་རྗེས་སུ་བསྲུང་བ་དང་མཐུན་པའི་ངག་གི་ལས་ཀྱི་ཚུལ་ཁྲིམས་དང ། ཕ་རོལ་གྱི་སེམས་མངོན་པར་དགའ་བ་དང ། ཡང་དག་པར་དགའ་བར་འགྱུར་བའི་ངག་གི་ལས་ཀྱི་ཚུལ་ཁྲིམས་ནི་དེ་བཞིན་གཤེགས་པའི་ཕ་རོལ་ཀྱི་སེམས་མཁྱེན་པའི་སྟོབས་མཐའ་ཡས་པ་ཐོབ་པར་བྱ་བའི་ཕྱིར་རོ། །དེའི་ཚེ་འདིའི་དོན་དང ། ཚེ་རབས་གཞན་གྱི་དོན་དང ། ཉན་ཐོས་ཀྱི་ཐེག་པའི་དོན་དང ། རང་སངས་རྒྱས་ཀྱི་ཐེག་པའི་དོན་དང ། རྫོགས་པའི་བྱང་ཆུབ་ཀྱི་ཐེག་པའི་དོན་རྣམས་ལ་བག་མེད་པ་དང ། བརྗེད་པ་རྣམས་ཀྱི་དྲན་པ་ཡང་དག་པར་བསྐྱེད་པའི་ཚུལ་ཁྲིམས་དང ། དྲན་པ་འབྱུང་བར་བྱེད་པའི་ཚུལ་
289a
༄#། །ཁྲིམས་ནི། བརྗེད་པ་མེད་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་ཆོས་ཉན་པའི་ཚུལ་ཁྲིམས་དང ། ཆོས་འཛིན་པའི་ཚུལ་ཁྲིམས་དང ། ཆོས་གོམས་པར་བྱེད་པའི་ཚུལ་ཁྲིམས་དང ། ཆོས་ཉེ་བར་སྟོན་པའི་ཚུལ་ཁྲིམས་ནི། སོ་སོ་ཡང་དག་པར་རིག་པ་དང ། ཕ་རོལ་ཏུ་ཕྱིན་པ་ཡོངས་སུ་བསྐང་བ་ཐོབ་པར་བྱ་བའི་ཕྱིར་རོ། །དེའི་ཚུལ་ཁྲིམས་ཡང་དག་པར་ལེན་པར་འདོད་པ་དང ། ལྷག་པར་སྤྱད་པར་འདོད་པ་ན་ཡང་ལུས་དང ། ངག་དང ། སེམས་ཀྱི་དགེ་བའི་རྩ་བ་དེ་ཐམས་ཅད་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །ཡང་དག་པར་འཛིན་པ་དང ། ལྷག་པར་སྤྱོད་པ་དང ། ཡང་དག་པར་བླངས་པ་དང ། ལྷག་པར་སྤྱད་ནས་ཀྱང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །གལ་ཏེ་ཚུལ་ཁྲིམས་དེ་མ་ཞིག་པ་དང ། མ་རལ་བ་དང ། འདྲེན་མ་མ་ཡིན་པར་སློབ་པའི་ནུས་པ་དང་མི་ལྡན་པར་
289b
གྱུར་ན། དེ་འདི་ལྟར་ཡང་དག་པར་སློབ་སྟེ། དུས་དུས་སུའམ། ཅུང་ཟད་ཅུང་ཟད་དུ་ཡང་མི་དགེ་བ་སྤང་བ་དང ། དོར་བ་དང ། བསལ་བར་རྩོལ་ལོ། །འབད་དོ། དུས་དུས་སུའམ། ཅུང་ཟད་ཅུང་ཟད་དུ་ཡང་དགེ་བ་ལ་སློབ་པ་དང ། མངོན་པར་འཕེལ་བར་བྱ་བ་དང ། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟང ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཀྱི་སེམས་རྗེས་སུ་དྲན་པ་དང ། བྱང་ཆུབ་ཀྱི་སེམས་བསྒོམ་པ་དང ། བྱང་ཆུབ་ཏུ་སོན་པ་དང ། བྱང་ཆུབ་ཏུ་སྨོན་ལམ་འདེབས་པ་གང་ཡིན་འདི་ཉིད་དེ་དག་གི་དགེ་བའི་ཚུལ་ཁྲིམས་ཡང་དག་པར་འཛིན་པ་དང ། དགེ་བའི་ཚུལ་ཁྲིམས་ལ་ལྷག་པར་སྤྱོད་པ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་ཟག་པ་མེད་པའི་ཚུལ་ཁྲིམས་བསྐྱེད་པར་འདོད་པ་དང ། མི་སློབ་པའི་ཚུལ་ཁྲིམས་བསྐྱེད་པར་འདོད་པ་དང ། ཟག་པ་མེད་པའི་ཚུལ་ཁྲིམས་ཡང་དག་པར་བསྐྱེད་པར་འདོད་པ་དང ། མི་སློབ་པའི་ཚུལ་ཁྲིམས་ཡང་དག་པར་བསྐྱེད་པར་འདོད་པ་དེ་ནི་དགེ་བའི་ཚུལ་ཁྲིམས་ཡང་དག་པར་འཛིན་པ་དང ། དགེ་བའི་ཚུལ་ཁྲིམས་ལྷག་པར་སྤྱོད་པའི་མཆོག་ཡིན་ནོ། །དེ་ནི་དམ་པ་ཡིན་ནོ། །ལག་བཟང ། དེ་ལྟར་ན་བྱང་ཆུབ་
290a
༄#། །སེམས་དཔའ་བདེ་བ་དང་ལྡན་ལ་ཡིད་བདེ་བ་དང་ལྡན་ཞིང ། ཚེགས་ཆུང་ངུ་དང་སྡུག་བསྔལ་ཆུང་ངུས་མྱུར་དུ་སྐྱེན་པར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟང ། བྱང་ཆུབ་སེམས་དཔའ་ཇི་ལྟར་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང ། འདི་ལ་བྱང་ཆུབ་སེམས་དཔའ་ནི་གཞན་དག་གིས་རང་གི་ལུས་ཀྱི་སྲོག་གཅོད་དམ། བདོག་པ་ཐམས་ཅད་འཕྲོག་གམ། ཆུང་མ་འཕྲོག་གམ། བརྫུན་དུ་སྨྲ་བའམ། ཕྲ་མའམ། ངག་རྩུབ་པོའམ། ཚིག་ཀྱལ་བ་སྨྲ་བའམ།་གཤེ་འམ། གསོད་དམ། འཛིན་ནམ། བརྡེག་གམ། གཅོད་ཀྱང་སླར་གནོད་པར་མི་བྱེད་ཅིང་སླར་མི་ཁྲོ་སྟེ། ཤར་གཉེར་ཞིང་འཁོན་དུ་འཛིན་པར་མི་བྱེད་དོ། །དེ་འདི་ལྟར་ཡང་དག་པར་སློབ་སྟེ། བདག་ཉིད་ཀྱིས་སྔོན་གྱི་སྲིད་པ་རྣམས་དང ། སྲིད་པ་འདི་ལ་སྡིག་པ་མི་དགེ་བའི་ལས་འདི་དག་བྱས་ཤིང་བསགས་པ་དེ་དག་གི་འབྲས་བུ་ནི་འདི་དག་ཡིན།་དེ་དག་གི་རྣམ་པར་སྨིན་པ་ནི་འདི་ཡིན་ཏེ། རང་གི་ལས་ཀྱི་འབྲས་བུ་དང་རང་གི་ལས་ཀྱི་རྣམ་པར་སྨིན་པ་རང་གིས་མྱོང་བ་ལ་ཅིའི་ཕྱིར་གཞན་ལ་སླར་གནོད་པ་བྱ་ཞིང་སླར་ཁྲོ་བ་དང ། ཤར་གཉེར་ཞིང་འཁོན་དུ་འཛིན་པར་བྱ་སྙམ་དུ་སེམས་སོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གལ་ཏེ་བདག་གི་སྲོག་
290b
གཅོད་པའམ། བདོག་པ་ཐམས་ཅད་འཕྲོག་པའམ། ཆུང་མ་འཕྲོག་པའམ། བརྫུན་དུ་སྨྲ་བའམ། ཕྲ་མའམ། ངག་རྩུབ་པོའམ། ཚིག་ཀྱལ་པ་སྨྲ་བའམ། གཤེ་བའམ། གསོད་པའམ། འཛིན་པའམ། བརྡེག་པའམ། གཅོད་པ་ཡང་རུང་སྟེ། གཞན་དག་ལ་སླར་གནོད་པ་བྱས་སམ། སླར་ཁྲོ་བའམ། ཤར་གཉེར་ཞིང་ཁོན་དུ་བཟུང་ན་སླར་གནོད་པ་བྱས་པ་དང ། སླར་ཁྲོས་པ་དང ། ཤར་གཉེར་ཞིང་འཁོན་དུ་བཟུང་བའི་སྡིག་པ་མི་དགེ་བ་དེའི་སྡུག་བསྔལ་གྱི་ཚོར་བ་མི་འདོད་པ། མི་སྡུག་པ། ཡིད་དུ་མི་འོང་བ་འདིས་བདག་ལ་ལས་ཀྱི་རྣམ་པར་སྨིན་པ་དང ། ལས་ཀྱི་རྒྱུ་མཐུན་པ་བརྒྱ་འགྱུར་རམ། སྟོང་འགྱུར་རམ། དེ་བས་ལྷག་པར་མི་འདོད་པ་དང ། མི་སྡུག་པ་དང ། ཡིད་དུ་མི་འོང་བའི་སྡུག་བསྔལ་གཞན་ཡང་འབྱུང་བར་འགྱུར་རོ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། སྲོག་ཡོད་པས་སྲོག་གཅོད་པར་འགྱུར། རྫས་ཡོད་པས་རྫས་འཕྲོག་པར་འགྱུར། རྣ་བའི་དབང་པོ་ཡོད་པས་བརྫུན་དུ་སྨྲ་བ་ཐོས་པར་འགྱུར། ཕྲ་མ་དང ། ངག་རྩུབ་པོ་དང ། ཚིག་ཀྱལ་པ་ཐོས་པར་འགྱུར་ལ། ལུས་ཡོད་པས་འདྲེན་པ་དང ། འཆི་བ་དང ། འཛིན་པ་དང ། བརྡེག་པ་དང ། གཅོད་པར་འགྱུར་ཏེ། བདག་ཉིད་ཀྱིས་སྡུག་བསྔལ་གྱི་དངོས་པོ། སྡུག་བསྔལ་གྱི་གཞི། སྲོག་གི་དབང་པོ་དང ། རྣ་བའི་དབང་པོ་དང ། ལུས་བླངས་པར་གྱུར་ན། ཇི་ལྟར་གཞན་དག་ལ་སླར་གནོད་པ་དང ། སླར་ཁྲོ་
291a
༄#། །བའམ། ཤར་གཉེར་ཞིང་འཁོན་དུ་བཟུང་བར་བྱ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། དཔེར་ན། སའི་ཁམས་ཀྱི་མཚན་ཉིད་ནི་སྲ་བ་སྟེ། དེ་ནི་ངོ་བོ་ཉིད། དེ་ནི་ཆོས་ཉིད་།དེ་ནི་རང་བཞིན་ནོ། །ཆུའི་ཁམས་ཀྱི་མཚན་ཉིད་ནི་གཤེར་བ། མེའི་ཁམས་ཀྱི་མཚན་ཉིད་ནི་ཚ་བ། རླུང་གི་ཁམས་ཀྱི་མཚན་ཉིད་ནི་ཡང་ཞིང་གཡོ་བ་སྟེ། དེ་ནི་ངོ་བོ་ཉིད། དེ་ནི་ཆོས་ཉིད། དེ་ནི་རང་བཞིན་ནོ། །དེ་བཞིན་དུ་སྲོག་ཐམས་ཅད་ཀྱང་ཟད་པའི་ཆོས་ཅན། འགོད་པའི་ཆོས་ཅན། འགོག་པའི་ཆོས་ཅན་ནོ། །དབང་པོ་ཐམས་ཅད་ཀྱང་སྡུག་བསྔལ་གྱི་ཆོས་ཅན། སྡུག་བསྔལ་འདུས་ཏེ་རེག་པའི་ཆོས་ཅན། སྡུག་བསྔལ་མྱོང་བའི་ཆོས་ཅན། ལུས་ཐམས་ཅད་ཀྱང་སྡུག་བསྔལ་གྱི་ཆོས། སྡུག་བསྔལ་འདུས་ཏེ་རེག་པའི་ཆོས། སྡུག་བསྔལ་མྱོང་བའི་ཆོས་ཏེ། དེ་ནི་ངོ་བོ་ཉིད། དེ་ནི་ཆོས་ཉིད། དེ་ནི་རང་བཞིན་ནོ། །སྲོག་གི་དབང་པོ་ཟད་པའི་ཆོས་ཅན། འགོད་པའི་ཆོས་ཅན། འགོག་པའི་ཆོས་ཅན། ཟད་ཅིང་དངོས་ལ་འགོག་པ་དང ། དབང་པོ་དྲུག་སྡུག་བསྔལ་གྱི་ཆོས་ཅན། སྡུག་བསྔལ་འདུས་ཏེ་རེག་པའི་ཆོས་ཅན། སྡུག་བསྔལ་མྱོང་བའི་ཆོས་ཅན་རྣམས་ལ། སྡུག་བསྔལ་འདུས་ཏེ་རེག་པས་ཇི་ལྟར་གཞན་དག་ལ་སླར་གནོད་པའམ། སླར་ཁྲོ་བའམ། ཤར་གཉེར་ཞིང་འཁོན་དུ་གཟུང་བར་བྱ། དེ་ཅིའི་ཕྱིར་ཞེ་ན།
291b
འདི་ནི་ངོ་བོ་ཉིད། འདི་ནི་ཆོས་ཉིད། འདི་ནི་རང་བཞིན་ནོ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། བདག་གི་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱང་བདག་མེད་ཅིང་བདག་གི་མེད་པ་ཡིན་ལ། གཞན་དག་གི་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱང་བདག་མེད་ཅིང་བདག་གི་མེད་པ་ཡིན་ན། མཁས་པ་རིག་པ་དག་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་བདག་མེད་ཅིང ། ཡིད་བདག་གི་མེད་པ་ལ་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་བདག་མེད་ཅིང ། བདག་གི་མེད་པས་ཇི་ལྟར་དགའ་བའམ། རྗེས་སུ་ཆགས་པའམ། ཡང་དག་པར་དགའ་བར་འགྱུར་བའམ། བརྡེག་པའམ། སླར་གནོད་པར་བྱེད་པའམ། སླར་ཁྲོ་བའམ། ཤར་གཉེར་ཞིང་འཁོན་དུ་འཛིན་པར་འགྱུར་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔས་འདི་ལྟར་སློབ་སྟེ། འདི་ལྟ་སྟེ། མིར་སྐྱེ་བའི་སྡུག་བསྔལ་ནི་ཉུང་ཞིང་ཆུང་གི་།ཡི་དྭགས་ཀྱི་སྡུག་བསྔལ་ནི་ཆེས་མི་བཟད་ལ་ཆེས་བཟོད་པར་དཀའ་བ་ཡིན། དུད་འགྲོའི་སྐྱེ་གནས་ཀྱི་སྡུག་བསྔལ་དང ། སེམས་ཅན་དམྱལ་བའི་སྡུག་བསྔལ་ཡང་ཆེས་མི་བཟད་ཅིང་བཟོད་པར་དཀའ་བ་ཡིན་ན། བདག་གིས་ཇི་ལྟར་སྡུག་བསྔལ་ཆུང་ཞིང་ཉུང་བ་ཙམ་གྱི་ཕྱིར་གཞན་དག་ལ་སླར་གནོད་པ་དང ། སླར་ཁྲོ་བ་དང ། ཤར་གཉེར་
292a
༄#། །ཞིང་འཁོན་དུ་གཟུང་བར་བྱ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་བདག་གཅིག་པུའི་དོན་འདོད་པ་དང ། བདག་གཅིག་པུ་ལ་ཕན་པར་འདོད་པས། གཞན་དག་ལ་ཕྱིར་གནོད་པར་བྱེད་ཅིང་ཕྱིར་ཁྲོ་སྟེ། ཤར་གཉེར་ཞིང་ཁོན་དུ་འཛིན་པ་ཡང་མི་རིགས་ཏེ། ཆ་མ་ཡིན་ན་བདག་འཇིག་རྟེན་ཐམས་ཅད་ཀྱི་དོན་འདོད་པ། འཇིག་རྟེན་ཐམས་ཅད་ལ་ཕན་པར་འདོད་པ། གོ་ཆ་ཆེན་པོ་བགོས་པ། ཡིད་དམ་བཅས་པ་ཆེན་པོས་ཡིད་དམ་བཅས་པ། ཐེག་པ་ཆེན་པོ་ལ་ཡང་དག་པར་ཞུགས་པ། སངས་རྒྱས་ཀྱི་ཆོས་རྒྱ་ཆེན་པོ་ཡོངས་སུ་བསྐང་བར་འདོད་པ་ལྟ་ལ་སྨོས་ཀྱང་ཅི་དགོས་ཏེ། མི་བཟོད་པ་དང ། ཕྱིར་གནོད་པ་བྱེད་པ་དང ། ཕྱིར་ཁྲོ་བ་དང ། ཤར་གཉེར་ཞིང་འཁོན་དུ་འཛིན་པས་ནི། སངས་རྒྱས་ཀྱི་ཆོས་འདི་དག་གསོག་པ་དང ། འཕེལ་བ་དང ། ཡོངས་སུ་རྫོགས་པར་མི་འགྱུར་གྱི། གཟོད་པ་དང ། ཕྱིར་གནོད་པ་མི་བྱེད་པ་དང ། ཕྱིར་མི་ཁྲོ་བ་དང ། ཤར་གཉེར་ཞིང་འཁོན་དུ་འཛིན་པ་མི་བྱེད་པས་སངས་རྒྱས་ཀྱི་ཆོས་འདི་དག་གསོག་ཅིང་འཕེལ་ཏེ་ཡོངས་སུ་རྫོགས་པར་འགྱུར་སྙམ་མོ། ། ལག་བཟང ། རིགས་ཀྱི་བུའམ། རིགས་ཀྱི་བུ་མོ་སངས་རྒྱས་ཀྱི་ཆོས་ཡོངས་སུ་བསྐང་བར་འདོད་པས། མནར་མེད་པའི་སྡུག་བསྔལ་གྱི་རེག་པས་རེག་ཀྱང་གཞན་དག་ལ་སླར་
292b
གནོད་པར་མི་བྱ། སླར་ཁྲོ་བར་མི་བྱ། ཤར་གཉེར་ཞིང་འཁོན་དུ་གཟུང་བར་མི་བྱ་ན་མིའི་སྡུག་བསྔལ་གྱིས་རེག་པས་ལྟ་སྨོས་ཀྱང་ཅི་དགོས། དེ་སྤྱོས་སམ། བརྒྱད་དམ། སྨད་དམ། མི་སྙན་པ་བྱས་ཀྱང་བྱམས་པའི་སེམས་དང ། སྙིང་རྗེའི་སེམས་དང ། དེ་བཞིན་གཤེགས་པའི་ཐུགས་ཤིན་ཏུ་དྲི་མ་མེད་ཅིང་དག་ལ་དཀར་བ་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེ་དྲུད་བཤལ་ཏམ། བཅིངས་སམ། བཟུང་ཡང་བྱམས་པའི་སེམས་དང ། སྙིང་རྗེའི་སེམས་དང ། སྐད་ཅིག་གཅིག་ལ་མ་རིག་པའི་སྒྲིབ་པའི་སྒོ་ངའི་སྦུབས་གཞོམ་པའི་ཕྱིར་བཟོད་ཅིང་དང་དུ་ལེན་ཏོ། །དེ་བརྡེགས་ཀྱང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་ཀྱི་རྗེས་སུ་འཆགས་པ་དང ། ཁོང་ཁྲོ་བ་བཟློག་པའི་ཕྱིར་བཟོད་ཅིང་དང་དུ་ལེན་ནོ། །དེ་རྣ་བ་བཅད་ཀྱང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་ལ་དད་པར་བྱ་བའི་ཆོས་ཀྱི་རྣ་བ་བསྐྱེད་པའི་ཕྱིར་བཟོད་ཅིང་དང་དུ་ལེན་ནོ། །དེ་སྣ་བཅད་ཀྱང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་ཚུལ་ཁྲིམས་ཀྱི་ཡོན་ཏན་མཛེས་ཤིང ། བླ་ན་མེད་པ་ལ་ལོངས་སྤྱོད་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེ་རྐང་པ་བཅད་ཀྱང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་དེ་བཞིན་གཤེགས་པའི་རྫུ་འཕྲུལ་གྱི་རྐང་པ་བཞི་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེ་ལག་
293a
༄#། །པ་བཅད་ཀྱང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་ལ་ཞི་བ་དང་ཉེ་བར་ཞི་བའི་ཆོས་ཀྱི་ལག་པ་སྦྱིན་པ་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེ་ཡན་ལག་ཐམས་ཅད་བཅད་ཀྱང་བྱམས་པའི་སེམས་དང ། སྙིང་རྗེའི་སེམས་དང ། ཕ་རོལ་ཏུ་ཕྱིན་པ་དྲུག་གི་ཡན་ལག་དང་ཉིང་ལག་ཡོངས་སུ་རྫོགས་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེའི་མིག་ཕྱུང་ཡང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་ཤེས་བཞིན་གྱི་མིག་གཡུང་དྲུང་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེ་མགོ་བཅད་ཀྱང་བྱམས་པའི་སེམས་དང ། སྙིང་རྗེའི་སེམས་དང ། སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་ཆོས་ཀྱི་མགོ་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ནོ། །དེ་བཟོད་པ་འདི་དག་དང ། ཇི་མི་སྙམ་པ་འདི་དག་མངོན་སུམ་དུ་བྱ་བར་འདོད་པ་དང ། ཡིད་ལ་བྱ་བར་འདོད་པ་ན་ཡང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །མངོན་སུམ་དུ་བྱེད་པ་དང ། ཡིད་ལ་བྱེད་པ་དང ། མངོན་སུམ་དུ་བྱས་པ་དང ། ཡིད་ལ་བྱས་ནས་ཀྱང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་
293b
ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །གལ་ཏེ་བཟོད་པ་འདི་དག་དང ། ཇི་མི་སྙམ་པ་འདི་དག་མ་ཉམས་པ་དང ། སྐྱོན་མེད་པ་དང ། འདྲེན་མ་མ་ཡིན་པར་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་ཡང་དག་པར་སློབ་སྟེ། དུས་དུས་སུའམ། ཅུང་ཟད་ཅུང་ཟད་དུ་ཡང་མི་བཟོད་པ་དང ། མི་སྙམ་པར་མ་བྱས་པ་སྤང་བ་དང ། དོར་བ་དང ། བསལ་བར་རྩོལ་ལོ། །འབད་དོ། །དུས་དུས་སུའམ། ཅུང་ཟད། ཅུང་ཟད་དུ་ཡང་བཟོད་པ་དང ། ཇི་མི་སྙམ་པ་ལ་སློབ་པ་དང ། མངོན་པར་འཕེལ་བར་བྱ་བ་དང ། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟང ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཀྱི་སེམས་རྗེས་སུ་དྲན་པ་དང ། བྱང་ཆུབ་ཀྱི་སེམས་བསྒོམ་པ་དང ། བྱང་ཆུབ་ཏུ་སྨོན་པ་དང ། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་བཟོད་པ་ཀུན་ཏུ་སྤྱོད་པ་དགེ་བ་དང ། བཟོད་པ་ཡང་དག་པར་སྒྲུབ་པ་དགེ་བ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་ཟག་པ་མེད་པའི་བཟོད་པ་བསྐྱེད་པར་འདོད་པ་དང ། མི་སློབ་པའི་
294a
༄#། །བཟོད་པ་བསྐྱེད་པར་འདོད་པ་དང ། ཟག་པ་མེད་པའི་བཟོད་པ་ཡང་དག་པར་བསྐྱེད་པར་འདོད་པ་དང ། མི་སློབ་པའི་བཟོད་པ་ཡང་དག་པར་བསྐྱེད་པར་འདོད་པ་དེ་ནི་བཟོད་པ་ཀུན་ཏུ་སྤྱད་པ་དགེ་བ་དང ། བཟོད་པ་ཡང་དག་པར་བསྒྲུབ་པ་དགེ་བ་ཐམས་ཅད་ཀྱི་མཆོག་ཡིན་ནོ། །དེ་ནི་དམ་པ་ཡིན་ནོ། །ལག་བཟང ། དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ་ཡིད་བདེ་བ་དང་ལྡན་ཞིང་ཚེགས་ཆུང་ངུ་དང ། སྡུག་བསྔལ་ཆུང་ངུས་མྱུར་དུ་སྐྱེན་པར་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟང ། བྱང་ཆུབ་སེམས་དཔའ་ཇི་ལྟར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང ། འདི་ལ་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་མཐའ་ཡས་མུ་མེད་དེ། འཇིག་རྟེན་གྱི་ཁམས་རེ་རེ་ན་ཡང་སེམས་ཅན་མཐའ་ཡས་སོ། །དེ་ལྟར་སེམས་ཅན་གྱི་ཚོགས་མཐའ་ཡས་ཤིང་མུ་མེད་པ་མཐའ་ཡོད་པ་མ་ཡིན། མུ་ཡོད་པ་མ་ཡིན་ཏེ། བདག་ནི་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེ་ལ་ཕན་པའི་ཕྱིར་གོ་ཆ་བགོས་ལ་སེམས་ཅན་གྱི་ཚོགས་མཐའ་ཡས་ཤིང ། མཐའ་ཡས་པ་ལ་བདེ་བའི་ཕྱིར་གོ་ཆ་བགོས་ན་སེམས་ཅན་ཐམས་ཅད་ལ་ཕན་པར་དམིགས་པ་མཐའ་ཡས་ཤིང་མཐའ་ཡས་པ་དང ། སེམས་ཅན་ཐམས་ཅད་ལ་བདེ་བར་དམིགས་པ་མཐའ་
294b
ཡས་ཤིང་མཐའ་ཡས་པའི་དགེ་བའི་རྩ་བ་མཐའ་ཡས་པ་དག་བག་མེད་པར་གྱུར་ཏམ། སེམས་གཞན་དུ་གྱུར་ཏམ། གཉིད་ཀྱིས་ལོག་ཀྱང་ཉིན་མཚན་དུ་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་འཕེལ་བ་དང ། རྒྱས་པ་དང ། ཡོངས་སུ་རྫོགས་པར་འགྱུར་ཏེ། སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་དག་སྐྱེ་བ་དང ། བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་དག་སྐྱེ་བས་རྫོགས་པའི་བྱང་ཆུབ་རྙེད་དཀའ་བར་མི་འགྱུར་ན། བདག་གིས་འདིར་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་འཕེལ་བ་མཐའ་ཡས་ཤིང་མཐའ་ཡས་པ་དང ། དགེ་བའི་རྩ་བ་རྒྱས་པར་འགྱུར་བ་མཐའ་ཡས་ཤིང་མཐའ་ཡས་པ་ཡང་དག་པར་རྗེས་སུ་མཐོང་ལ་གཞི་དེ་ལས་རྫོགས་པའི་བྱང་ཆུབ་རྙེད་མི་དཀའ་བར་ཡང་དག་པར་རྗེས་སུ་མཐོང་བཞིན་དུ་རྫོགས་པའི་བྱང་ཆུབ་འཐོབ་པར་འགྱུར་བའི་བརྩོན་འགྲུས་སྲོག་གི་ཕྱིར་ཡང་ཅིའི་ཕྱིར་ཉམས་པར་བྱ་སྙམ་མོ། ། ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་རྒ་བའི་སྡུག་བསྔལ་གཅིག་པུ་བསལ་བ་དང་གཞོམ་པར་འདོད་པ་དེ་ཡང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་འཕེལ་ལ་དགེ་བའི་རྩ་བ་མཐའ་ཡས་ཤིང་མཐའ་
295a
༄#། །ཡས་པ་རྒྱས་པར་འགྱུར་ན། གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྐྱེ་བའི་སྡུག་བསྔལ་དང ། འཆི་བའི་སྡུག་བསྔལ་བསལ་བར་འདོད་པ་དང ། སྡུག་པ་དང་བྲལ་བའི་སྡུག་བསྔལ་དང ། མི་སྡུག་པ་དང་ཕྲད་པའི་སྡུག་བསྔལ་དང ། འདོད་པ་མི་འབྱོར་བའི་སྡུག་བསྔལ་དང ། དུད་འགྲོའི་སྐྱེ་གནས་ཀྱི་སྡུག་བསྔལ་དང ། གཤིན་རྗེའི་འཇིག་རྟེན་གྱི་སྡུག་བསྔལ་དང ། སེམས་ཅན་དམྱལ་བའི་སྡུག་བསྔལ་དང ། གྲང་བའི་སེམས་ཅན་དམྱལ་བའི་སྡུག་བསྔལ་དང ། ཚ་བའི་སེམས་ཅན་དམྱལ་བའི་སྡུག་བསྔལ་བསལ་བར་འདོད་པ་ལྟ་སྨོས་ཀྱང་ཅི་དགོས་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྡུག་བསྔལ་སེམས་ཀྱི་སྐད་ཅིག་གཅིག་པའི་སེམས་ཀྱི་སྐད་ཅིག་གཅིག་ཙམ་དང་འབྲེལ་བ་བསལ་བར་འདོད་པ་དེ་ཡང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་འཕེལ་ལ། དགེ་བའི་རྩ་བ་མཐའ་ཡས་ཤིང་མཐའ་ཡས་པ་རྒྱས་པར་འགྱུར་ན། གང་ཞིག་མ་འོངས་ཤིང་མ་བྱིན་པའི་བསྐལ་པ་མཐའ་ཡས་དཔག་ཏུ་མེད་པ་རྣམས་སུ་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྐྱེ་བའི་སྡུག་བསྔལ་ནས་སྲིད་པའི་སྡུག་བསྔལ་གྱི་བར་དུ་
295b
བསལ་བར་འདོད་པ་ལྟ་སྨོས་ཀྱང་ཅི་དགོས་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་ཞིག་རང་སངས་རྒྱས་ཀྱི་ཡོན་ཏན་ནམ། ཉན་ཐོས་ཀྱི་ཡོན་ཏན་འདོད་པ་དེ་ཡང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་འཕེལ་ལ། དགེ་བའི་རྩ་བ་མཐའ་ཡས་ཤིང་མཐའ་ཡས་པ་རྒྱས་པར་འགྱུར་ན། རིགས་ཀྱི་བུའམ་རིགས་ཀྱི་བུ་མོ་གང་སངས་རྒྱས་ཀྱི་ཆོས་ཡོན་ཏན་མཐའ་ཡས་ཤིང་ཡོན་ཏན་མུ་མེད་པ། སྟོབས་མཐའ་ཡས་ཤིང་སྟོབས་མུ་མེད་པ་མཐའ་དག་ཆུབ་པ་ཡོངས་སུ་རྫོགས་པ་འདོད་པ་དང ། སྨོས་པ་དང ། སྨོན་པ་ལྟ་སྨོས་ཀྱང་ཅི་དགོས། བག་མེད་པར་གྱུར་རམ། གཉིད་ཀྱིས་ལོག་ཀྱང ། རྒྱུ་བཞི་དང ། རྐྱེན་བཞི་དང ། དམིགས་པ་བཞི་པོ་དེ་དག་ནི་དེའི་དགེ་བའི་རྩ་བའི་ཕུང་པོ་མཐའ་ཡས་ཤིང་མུ་མེད་པ་བཞི་དང ། བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མུ་མེད་པ་བཞི་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་འཕེལ་ཞིང་རྒྱས་པར་འགྱུར་བ་སྟེ། སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བའི་ཕུང་པོ་མཐའ་ཡས་ཤིང་མཐའ་ཡས་པ་བཞི་སྐྱེས་པ་དང ། རྫོགས་པའི་བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་བཞི་སྐྱེ་བ་དག་གིས་རྫོགས་པའི་བྱང་ཆུབ་རྙེད་པར་མི་དཀའ་ན། བདག་གིས་འདིར་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བའི་ཕུང་པོ་མཐའ་ཡས་ཤིང་མཐའ་
296a
༄#། །ཡས་པ་བཞི་དང ། རྫོགས་པའི་བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་བཞི་ཡང་དག་པར་རྗེས་སུ་མཐོང་ལ། གཞི་དེ་ལས་རྫོགས་པའི་བྱང་ཆུབ་རྙེད་པར་མི་དཀའ་བར་ཡང་དག་པར་རྗེས་སུ་མཐོང་བཞིན་དུ་རྫོགས་པའི་བྱང་ཆུབ་ཐོབ་པར་འགྱུར་བའི་བརྩོན་འགྲུས་སྲོག་གི་ཕྱིར་ཡང་ཅིའི་ཕྱིར་ཉམས་པར་བྱ་སྙམ་མོ། །རྒྱ་མཚོ་ཆེན་པོ་བཞི་ནི་ཤར་ཕྱོགས་ཀྱི་མཐའ་ཡང་མངོན་ཞིང་མུ་ཡང་མངོན་ལ། ལྷོ་དང ། ནུབ་དང ། བྱང་དང ། འོག་དང ། སྟེང་གི་མཐའ་ཡང་མངོན་ཞིང ། མུ་ཡང་མངོན་ལ། དགེ་བའི་རྩ་བ་རྒྱ་མཚོ་མཐའ་ཡས་མུ་མེད་པ་བཞི་པོ་དེ་དག་ལ་ནི་མཐའ་དང་མུ་ཡོད་པ་མ་ཡིན་ན་བདག་གིས་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་བྱང་ཆུབ་ཀྱི་ཚོགས་ཀྱི་རྒྱ་མཚོ་ཆེན་པོ་བཞི་པོ་འདི་དག་འཕེལ་ཞིང་རྒྱས་ན། རྫོགས་པའི་བྱང་ཆུབ་འཐོབ་པར་འགྱུར་བ་ལ་སྲོག་གི་ཕྱིར་ཡང་ཅིའི་ཕྱིར་བརྩོན་འགྲུས་ཉམས་པར་བྱ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་དག་སེང་གེ་དང ། སྟག་དང ། ཁྱི་དང ། ཅེ་སྦྱང་དང ། བྱ་རྒོད་དང ། ཁྲུང་ཁྲུང་དང ། བྱ་རོག་དང ། འུག་པ་དང ། སྲིན་བུ་དང ། སྦྲང་མ་དང ། སྦྲང་བུ་དང ། ཤ་སྦྲང་དུ་གྱུར་པ་དེ་དག་གིས་ཀྱང་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ན། བདག་མིར་གྱུར་བཞིན་དུ་སྲོག་གི་ཕྱིར་ཡང་
296b
ཅིའི་ཕྱིར་རྫོགས་པའི་བྱང་ཆུབ་ཐོབ་པར་འགྱུར་པའི་བརྩོན་འགྲུས་ཉམས་པར་བྱ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། མི་བརྒྱའམ། མི་སྟོང་གིས་ཀྱང་སངས་རྒྱས་ཉིད་རྟོགས་ཤིང་ཐོབ་ན། བདག་གིས་ཀྱང་འདིར་ཅིའི་ཕྱིར་མི་རྟོགས་ཤིང་ཐོབ་པར་མི་འགྱུར། །གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་རྟོགས་ཤིང་བརྙེས། གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་རྟོགས་ཤིང་བརྙེས་པ་གྱུར་ན། བདག་གིས་འདིར་སྲོག་གི་ཕྱིར་ཡང་ཅིའི་ཕྱིར་རྫོགས་པའི་བྱང་ཆུབ་ཐོབ་པར་འགྱུར་བའི་བརྩོན་འགྲུས་ཉམས་པར་བྱ་སྙམ་མོ། །ལག་བཟང ། གཞན་ཡང་བྱང་ཆུབ་སེམས་དཔའ་བརྩོན་འགྲུས་བརྩམས་པ་ཡིན་ཏེ། སངས་རྒྱས་སྟོན་པའོ་ཞེས་སྟོན་ན། སངས་རྒྱས་ཀྱིས་གསུངས་པའམ། ཉན་ཐོས་ཀྱིས་བཤད་པའམ། བྱང་ཆུབ་སེམས་དཔས་བཤད་པའམ། ཐ་ན་སྨྱོན་པ་རྣམས་ཀྱིས་བཤད་པའི་ཆོས་གང་ཡིན་པ་དག་དང ། སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་བ་དང ། སངས་རྒྱས་ཀྱི་
297a
༄#། །ཆོས་ཐོབ་པར་འགྱུར་བ་དང ། རྫོགས་པའི་བྱང་ཆུབ་ཐོབ་པར་འགྱུར་བ་དང ། ཐམས་ཅད་མཁྱེན་པ་ཉིད་ཐོབ་པར་འགྱུར་བའི་ཆོས་གང་ཡིན་པ་དེ་དག་མགོ་དང་གོས་ལ་མེ་འབར་བ་བཞིན་དུ་རྟག་པར་རྒྱུན་དུ་ཉན་ནོ། །ངེས་པར་བྱེད་དོ། །རྟོག་གོ་།མཁས་པ་ལེ་ལོ་མེད་པ་ནི་རུ་ཤིང་བཞིན་བྱེད་ཅིང ། ཡིད་ལ་བྱེད་པས་མདུང་ཐུང་དག་གིས་བཟློག་ཀྱང་དེ་མགོ་དང་གོས་ལ་མེ་འབར་བ་བཞིན་དུ་རྟག་པར་རྒྱུན་དུ་ཆོས་དེ་དག་འཛིན་ཏོ། །ཡོངས་སུ་ཤེས་པར་བྱེད་དོ། །འཆང་ངོ ། །ཀློག་གོ་།རྗེས་སུ་སེམས་སོ། །གཞན་དག་ལ་སྟོན་ནོ། །གོ་བར་བྱེད་དོ། །མཁས་པ་ལེ་ལོ་མེད་པ་ནི་རུ་ཤིང་བཞིན་དུ་བྱེད་ཅིང་ཡིད་ལ་བྱེད་པས་མདུང་ཐུང་དག་གིས་བཟློག་ཀྱང་རླུང་དེ་བཅོལ་ཀྱང་རུང ། མ་བཅོལ་ཀྱང་རུང ། སེམས་ཅན་ཐམས་ཅད་ཀྱི་དོན་དང་ཅི་བྱ་བ་ཆོས་དང་ལྡན་པ་འཇིག་རྟེན་འདི་ལ་བདེ་བའམ། འཇིག་རྟེན་ཕ་རོལ་ཏུ་བདེ་བ་དག་ལ་རང་གི་ལུས་ཉེ་བར་སྤྱོད་པ་དང་ཡོ་བྱད་དུ་འགྱུར་བར་བྱེད་དོ། །འདི་ལྟ་སྟེ། དཔེར་ན།་འབྱུང་བ་ཆེན་པོ་སྒྲིབ་པ་མེད་པ་ཡོངས་སུ་གཟུང་བ་མེད་པ་བཞི་པོ་འདི་དག་ནི་སེམས་ཅན་ཐམས་ཅད་ལ་ཉེ་བར་སྤྱོད་པ་དང་ཡོ་བྱད་དུ་འགྱུར་བ་རྣམས་ཡིན་ནོ། །ལག་བཟང ། དེ་བཞིན་དུ་བྱང་ཆུབ་སེམས་དཔའ་ཡང་རང་གི་ལུས་སེམས་ཅན་ཐམས་ཅད་ཀྱི་ཉེ་བར་སྤྱོད་པ་དང་ཡོ་བྱད་དུ་གྱུར་པར་བྱེད་དེ། སངས་རྒྱས་དང ། ཆོས་དང ། དགེ་འདུན་དང ། བྱང་ཆུབ་
297b
སེམས་དཔའ་དང ། སློབ་དཔོན་དང ། བླ་མ་དང ། རྒན་པ་དང ། ནད་པ་དང ། མགོན་མེད་པ་རྣམས་ལ་ཡོངས་སུ་སྤྱད་པར་བྱ་བ་དང ། སྲི་ཞུ་བྱ་བ་དང ། བསྙེན་བཀུར་བྱ་བས་བྱེ་བྲག་ཏུ་འགྱུར་རོ། །དེ་མགོ་དང་གོས་ལ་མེ་འབར་བ་བཞིན་དུ་གཞན་གྱི་སེམས་དང ། གཞན་གྱི་སྙིང་དགའ་བར་འགྱུར་བའི་ཚིག་དང་རྗེས་སུ་མཐུན་པ་དང ། མཐུན་པར་བྱེད་པ་དང ། ཡང་དག་པར་བྱེད་པ་དང ། གྲོགས་བྱེད་པ་དང ། གྲོགས་སུ་གྱུར་པ་དང ། དགེ་བ་མཐུན་པ་དང ། དོན་མཐུན་པས་རྗེས་སུ་ཞུགས་ནས་མངོན་དུ་དད་པར་བྱས་ཤིང་བསྡུས་ཏེ། ཉན་ཐོས་ཀྱི་ཐེག་པ་ལ་འོས་པ་རྣམས་ནི་ཉན་ཐོས་ཀྱི་ཐེག་པ་ལ་འཛུད་དོ། །འདུལ་ལོ། །འགོད་དོ། །རང་སངས་རྒྱས་ཀྱི་ཐེག་པ་ལ་འོས་པ་རྣམས་ནི་རང་སངས་རྒྱས་ཀྱི་ཐེག་པ་ལའོ། །རྫོགས་པའི་བྱང་ཆུབ་ཀྱི་ཐེག་པ་ལ་འོས་པ་རྣམས་ནི་རྫོགས་པའི་བྱང་ཆུབ་ཀྱི་ཐེག་པ་ལ་འཛུད་དོ། །འདུལ་ལོ། །འགོད་དོ། །མཁས་པ་ལེ་ལོ་མེད་པ་ནི་མདུང་ཐུང་དག་གིས་བཟློག་ཀྱང ། མགོ་དང་གོས་ལ་མེ་འབར་བ་བཞིན་དམ་པའི་ཆོས་ཀྱི་རྒྱུ་དང ། དམ་པའི་ཆོས་ཀྱི་ཆེད་དང ། ཕ་རོལ་ཏུ་ཕྱིན་པ་དྲུག་གི་རྒྱུ་དང ། ཕ་རོལ་ཏུ་ཕྱིན་པ་དྲུག་གི་ཆེད་དང ། དགེ་བའི་རྒྱུ་དང ། དགེ་བའི་ཆེད་ལ་གྲང་བ་ཡང་ཁྱད་དུ་གསོད་ལ། ཚ་བ་དང ། བཀྲེས་པ་དང ། སྐོམ་པ་དང ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱིས་རེག་པ་དང ། གཞན་གྱིས་ངན་དུ་སྨྲས་པ་དང ། ངན་དུ་བརྗོད་པའི་
298a
༄#། །ཚིག་གི་ལམ་དང ། ངལ་བ་དང ། ཉོན་མོངས་པ་དང ། གཉིད་དང ། མི་དགའ་བ་དང ། ལུས་དང་སྲོག་ཀྱང་ཁྱད་དུ་གསོད་དོ། །མཁས་པ་ལེ་ལོ་མེད་པ་ནི་མདུད་ཐུང་དག་གིས་བཟློག་ཀྱང་དེ་རྫོགས་པའི་བྱང་ཆུབ་ཀྱི་རྒྱུ་དང ། རྫོགས་པའི་བྱང་ཆུབ་ཀྱི་ཆེད་ལ་ལྷའི་སྡུག་བསྔལ་ཡང་ཁྱད་དུ་གསོད་དོ། །ལྷ་མ་ཡིན་གྱི་སྡུག་བསྔལ་ཡང་ཁྱད་དུ་གསོད་དོ།། མིའི་སྡུག་བསྔལ་ཡང་ཁྱད་དུ་གསོད་དོ། །ཡི་དྭགས་ཀྱི་སྡུག་བསྔལ་ཡང་ཁྱད་དུ་གསོད་དོ། །དུད་འགྲོའི་སྐྱེ་གནས་ཀྱི་སྡུག་བསྔལ་དང ། སེམས་ཅན་དམྱལ་བའི་སྡུག་བསྔལ་ཡང་ཁྱད་དུ་གསོད་དོ། །མཁས་པ་ལེ་ལོ་མེད་པ་ནི་མདུད་ཐུང་དག་གིས་བཟློག་ཀྱང་དེ་མི་མཉམ་པ་དང་མཉམ་པའི་སངས་རྒྱས་ཀྱི་ཆོས་ཡོངས་སུ་བསྐང་བ་ཐོབ་པར་བྱ་བ་དང ། སྤྱོད་ལམ་དང་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པ་ཐོབ་པར་བྱ་བའི་ཕྱིར་བརྩོན་འགྲུས་བརྟན་ཞིང་རྟུལ་བ་བརྟན་ནོ། །དེ་བརྩོན་འགྲུས་འདི་དང ། རྟུལ་བ་འདི་མངོན་སུམ་དུ་བྱ་བར་འདོད་པ་དང ། བརྩམ་པར་འདོད་པ་ན་ཡང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །མངོན་སུམ་དུ་བྱེད་པ་དང ། རྩོམ་པ་དང ། མངོན་སུམ་དུ་བྱས་པ་
298b
དང།་བརྩམས་ནས་ཀྱང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །གལ་ཏེ་བརྩོན་འགྲུས་འདི་མ་ཉམས་པ་དང ། སྐྱོན་མེད་པ་དང ། འདྲེན་མ་མ་ཡིན་པར་སློབ་པའི་ནུས་པ་དང་མི་ལྡན་པར་གྱུར་ན། དེ་འདི་ལྟར་ཡང་དག་པར་སློབ་སྟེ་དུས་སུའམ། ཅུང་ཟད་ཅུང་ཟད་དུ་ཡང་སྙོམས་ལས་དང ། ལེ་ལོ་སྤང་བ་དང ། དོར་བ་དང ། བསལ་བར་རྩོལ་ལོ། །འབད་དོ། །དུས་དུས་སུའམ། ཅུང་ཟད་ཅུང་ཟད་དུ་ཡང་བརྩོན་འགྲུས་དང་རྟུལ་བ་ལ་སློབ་པ་དང ། མངོན་པར་འཕེལ་བར་བྱ་བ་དང་ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། ། སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟང ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཀྱི་སེམས་རྗེས་སུ་དྲན་པ་དང ། བྱང་ཆུབ་ཀྱི་སེམས་བསྒོམ་པ་དང ། བྱང་ཆུབ་ཏུ་སྨོན་པ་དང ། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་བརྩོན་འགྲུས་དགེ་བ་དང ། རྩོལ་བ་དགེ་བ་བ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་ཟག་པ་མེད་པའི་བརྩོན་འགྲུས་བསྐྱེད་པར་འདོད་པ་དང །
299a
༄#། །ཟག་པ་མེད་པའི་བརྩོན་འགྲུས་ཡང་དག་པར་བསྐྱེད་པར་འདོད་པ་དང ། མི་སློབ་པའི་བརྩོན་འགྲུས་བསྐྱེད་པར་འདོད་པ་དང ། མི་སློབ་པའི་བརྩོན་འགྲུས་ཡང་དག་པར་བསྐྱེད་པར་འདོད་པ་དེ་ནི་བརྩོན་འགྲུས་དགེ་བ་དང ། རྩོལ་བ་དགེ་བ་ཐམས་ཅད་ཀྱི་མཆོག་ཡིན་ནོ། །དེ་ནི་དམ་པ་ཡིན་ནོ། །ལག་བཟང ། དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ། ཡིད་བདེ་བ་དང་ལྡན་ཞིང་ཚེགས་ཆུང་དུ་དང ། སྡུག་བསྔལ་ཆུང་དུས་མྱུར་དུ་སྐྱེན་པར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ།། །།བམ་པོ་གཉིས་པ་སྟེ་ཐ་མའོ། །ལག་བཟང ། བྱང་ཆུབ་སེམས་དཔའ་ཇི་ལྟར་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང ། འདི་ལ་བྱང་ཆུབ་སེམས་དཔའ་མིག་གིས་གཟུགས་རྣམས་མཐོང་ན་མཚན་མར་མི་འཛིན་ཅིང་མངོན་རྟགས་སུ་མི་འཛིན་པ་ཡིན་ཏེ། གང་གི་ཕྱིར་མིག་གི་དབང་པོ་སྡོམ་པས་མ་བསྡམས་པར་གནས་པས་འཇིག་རྟེན་ན་བརྣབ་སེམས་དང ། ཡིད་མི་བདེ་བ་དང ། སྡིག་པ་མི་དགེ་བའི་ཆོས་རྣམས་ལ་སེམས་རྗེས་སུ་ཟག་པ་དེ་དག་བསྡམ་པའི་ཕྱིར་ནན་ཏན་བྱེད་ཅིང་བསྲུང་སྟེ། མིག་གི་དབང་པོས་མིག་གི་དབང་པོ་སྡོམ་པར་བྱེད་དོ། །དེ་བཞིན་དུ་རྣ་བས་སྒྲ་རྣམས་ཐོས་པ་དང ། སྣས་དྲི་རྣམས་ཚོར་བ་དང ། ལྕེས་རོ་རྣམས་མྱོང་བ་དང ། ལུས་ཀྱིས་རེག་བྱ་རྣམས་རེག་པ་དང ། ཡིད་ཀྱིས་
299b
ཆོས་རྣམས་རྣམ་པར་ཤེས་ནས་མཚན་མར་མི་འཛིན་ཞིང་མངོན་རྟགས་སུ་མི་འཛིན་པ་ཡིན་ཏེ། གང་གི་ཕྱིར་ཡིད་ཀྱི་དབང་པོ་སྡོམ་པས་མ་བསྡམས་པར་གནས་པས་འཇིག་རྟེན་ན་བརྣབ་སེམས་དང ། ཡིད་མི་བདེ་བ་དང ། སྡིག་པ་མི་དགེ་བའི་ཆོས་རྣམས་ལ་སེམས་རྗེས་སུ་ཟག་པ་དེ་དག་བསྡམ་པའི་ཕྱིར་ནན་ཏན་བྱེད་ཅིང་བསྲུང་སྟེ། ཡིད་ཀྱི་དབང་པོས་ཡིད་ཀྱི་དབང་པོ་སྡོམ་པ་བྱེད་དོ། །དེ་འགྲོའམ། འགྲེང་ངམ། འདུག་གམ། ཉལ་ལམ། ཅང་མི་སྨྲ་བར་གྱུར་ཀྱང་རུང་སྟེ། མཉམ་པར་བཞག་པའི་གནས་དང ། ཞི་བའི་གནས་ཀྱི་གནས་མི་འདོར་རོ། །རྣམ་པར་མི་འདོར་རོ། །དེ་ལག་མི་རྒོད་པ་དང ། མུ་ཅོར་མི་སྨྲ་བ་དང ། ཚིག་མི་མང་བ་དང ། མིག་མི་གཡེང་བ་དང ། དབང་པོ་མི་གཡེང་བ་དང ། མི་རྒོད་པ་དང ། ཏོམ་ཅོལ་མེད་པ་དང ། ལུས་འཁྲུལ་པ་མེད་པ་དང།་ངག་འཁྲུལ་བ་མེད་པ་དང ། སེམས་འཁྲུལ་པ་མེད་པ་དང ། དབེན་ཡང་རུང ། མི་དབེན་ཡང་རུང ། སྤྱོད་ལམ་མི་ཉམས་པ་ཡིན་ནོ། །བཟའ་བ་དང ། བཏུང་བ་དང ། མལ་ཆ་དང ། སྟན་དང ། གནས་དང ། ན་བའི་གསོས་སྨན་དང ། ཡོ་བྱད་ཇི་ལྟ་བུ་ཡང་རུང་བ་དག་གིས་ཆོག་ཤེས་ཤིང་གསོ་སླ་བ་དང ། དགང་སླ་བ་དང ། རིམ་གྲོ་བྱ་སླ་བ་དང ། ཆོ་ག་དང་སྤྱོད་ཡུལ་དགེ་བ་དང ། འདུ་འཛི་ལས་དབེན་པའི་སྤྱོད་ཡུལ་ཡིན། ཐོབ་པ་དང་མ་ཐོབ་པ་ལ་མཉམ་ཞིང་འགྱུར་པ་མེད་དོ། །མ་ཁེངས་མ་དུད་པ་ཡིན། བདེ་བ་དང་སྡུག་བསྔལ་བ་དང ། སྟོད་པ་དང་སྨོད་པ་
300a
༄#། །དང།་གྲགས་པ་དང་མ་གྲགས་པ་དང ། འཚོ་བ་དང་འཆི་བ་ལ་མཉམ་ཞིང་འགྱུར་བ་མེད་དེ། མ་ཁེངས་མི་འདུད་པ་ཡིན། མཛའ་བོ་དང་དགྲ་དང ། དགེ་བ་དང ། མི་དགེ་བ་དང ། ཡིད་དུ་འོང་བ་དང་མཐུན་པ་དང ། ཡིད་དུ་མི་འོང་བ་དང་མི་མཐུན་པ་དང ། འཕགས་པ་དང ། འཕགས་པ་མ་ཡིན་པའི་ཆོས་རྣམས་དང ། དབེན་པ་དང་ལང་ལོང་རྣམས་ལ་མཉམ་ཞིང་འགྱུར་བ་མེད་དེ། མ་ཁེངས་མདུད་པ་ཡིན། གཟུགས་སྡུག་པ་དང་མི་སྡུག་པ་རྣམས་ལ་ཡང་མཐུན་པ་དང་མི་མཐུན་པ་མེད་པ་ཡིན། སྒྲ་དང ། དྲི་དང ། རོ་དང ། རེག་བྱ་དང ། ཆོས་སྡུག་པ་དང ། མི་སྡུག་པ་རྣམས་ལ་ཡང་མཐུན་པ་དང་མི་མཐུན་པ་མེད་པ་ཡིན་ནོ། །དེ་འདོད་པ་རྣམས་ནི་རང་གི་སེམས་ཀྱིས་ཀུན་དུ་བསླང་ནས་ལོག་པར་རྣམ་པར་རྟོག་པས་རོ་མྱང་བ་ཡིན་པས་ཀེང་རུས་ལྟ་བུར་ཡིད་ལ་བྱེད་དོ། །འདོད་པ་རྣམས་ནི་དགྲ་མང་བའི་ཕྱིར་ཤ་སྣ་གུ་ལྟ་བུར་ཡིད་ལ་བྱེད་དོ། །འདོད་པ་རྣམས་ནི་བླངས་ན་སྡུག་བསྔལ་ལ་ཡོངས་སུ་བཏང་ན་བདེ་བའི་ཕྱིར་རྩཝ་མེ་ལྟ་བུར་ཡིད་ལ་བྱེད་དོ། །འདོད་པ་རྣམས་ནི་གནོད་པ་མང་བའི་ཕྱི་ཤིང་གི་རྩེ་མོའི་ཤིང་ཏོག་ལྟ་བུར་ཡིད་ལ་བྱེད་དོ། །འདོད་པ་རྣམས་ནི་དབང་བྱེད་པ་མ་ཡིན་པའི་ཕྱིར་སློང་བ་ལྟ་བུར་ཡིད་ལ་བྱེད་དོ། །འདོད་པ་རྣམས་ནི་སྐད་ཅིག་ཙམ་ཞིག་ནོར་བས་དགའ་བའི་ཕྱིར་རྨི་ལམ་ལྟ་བུར་ཡིད་ལ་བྱེད་དོ། །འདོད་པ་རྣམས་ནི་
300b
སྡུག་བསྔལ་ལ་བདེ་བར་འདུ་ཤེས་པ་ཕྱིན་ཅི་ལོག་གིས་བསྐྱེད་པའི་ཕྱིར་མཛེ་ལྟ་བུ་ཡིད་ལ་བྱེད་དོ། །འདོད་པ་རྣམས་ནི་ཤེས་པར་སྤྱོད་པ་ཐམས་ཅད་ཀྱི་དངོས་པོ་ཡིན་པ་དང ། ངན་འགྲོ་ལོག་པར་ལྟུང་བ་དང ། སེམས་ཅན་དམྱལ་བའི་མཐའ་ཡིན་པས་མཆིལ་པ་ལྟ་བུ་ཡིད་ལ་བྱེད་དོ། །འདོད་པ་རྣམས་ནི་ངོམས་པར་མི་བྱེད་པ་དང ། སྐོམ་པ་འཕེལ་བར་བྱེད་པའི་ཕྱིར་ཚཝ་ཆུ་ལྟ་བུར་ཡིད་ལ་བྱེད་དོ། །དེ་འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །དེ་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཞིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། བསམ་གཏན་གསུམ་པ་བསྒྲུབས་ཏེ་གནས་སོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་
301a
༄#། །ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ། །དེ་སེམས་ཅན་ཐམས་ཅད་ལ་བདེ་བའི་འདུ་ཤེས་ཡིད་ལ་བྱེད་པས་བྱམས་པ་ཚད་མེད་པ་བསྒྲུབས་ཏེ་གནས་སོ། །དེ་སེམས་ཅན་ཐམས་ཅད་ལ་སྡུག་བསྔལ་བའི་འདུ་ཤེས་ཡིད་ལ་བྱེད་པས་སྙིང་རྗེ་ཚད་མེད་པ་བསྒྲུབས་ཏེ་གནས་སོ། །དེ་སེམས་ཅན་རྣམས་ལ་དགའ་བའི་འདུ་ཤེས་ཡིད་ལ་བྱེད་པས་དགའ་བ་ཚད་མེད་པ་བསྒྲུབས་ཏེ་གནས་སོ། །དེ་སེམས་ཅན་རྣམས་ལ་སྡུག་བསྔལ་ཡང་མེད། བདེ་བ་ཡང་མེད་པ་ཡིད་ལ་བྱེད་པས་བཏང་སྙོམས་ཚད་མེད་པ་བསྒྲུབས་ཏེ་གནས་སོ། །དེ་གཟུགས་ལ་རགས་པའི་འདུ་ཤེས་ཡིད་ལ་བྱེད་ཅིང ། ནམ་མཁའ་ལ་ཞི་བའི་འདུ་ཤེས་ཡིད་ལ་བྱེད་པས་ནམ་མཁའ་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །དེ་རྣམ་པར་ཤེས་པ་ལ་ཞི་བའི་འདུ་ཤེས་ཡིད་ལ་བྱེད་པས་རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་སོ། །དེ་ཅི་ཡང་མེད་པ་ལ་ཞི་བའི་འདུ་ཤེས་ཡིད་ལ་བྱེད་པས་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་སོ། །དེ་འདུ་ཤེས་མེད་འདུ་ཤེས་མེད་མིན་ལ་ཞི་བའི་འདུ་ཤེས་ཡིད་ལ་བྱེད་པས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བསྒྲུབས་ཏེ་གནས་སོ། །དེ་རང་གི་དབུགས་རྔུབ་པ་དང་འབྱུང་བ་ཇི་ལྟར་གནས་ཤིང་ཇི་ལྟར་འདུག་པ་དེ་བཞིན་དུ་རྒྱུན་ཐུང་བ་རྣམས་ལ་ཡང་རྒྱུན་
301b
ཐུང་བའི་འདུ་ཤེས་དང ། རྒྱུན་རིང་བ་རྣམས་ལ་ཡང་རྒྱུན་རིང་བའི་འདུ་ཤེས་ཡིད་ལ་བྱེད་པས་དབུགས་རྔུབ་པ་དང་འབྱུང་བ་དྲན་པ་བསྒྲུབས་ཏེ་གནས་སོ། །དེ་སེམས་ཅན་གྱི་ལུས་རྣམས་ལ་མི་སྡུག་པའི་མཚན་མ་ཡིད་ལ་བྱེད་པས་མི་སྡུག་པའི་འདུ་ཤེས་བསྒྲུབས་ཏེ་གནས་སོ། །དེ་འཆི་བའི་མཚན་མ་ཡིད་ལ་བྱེད་པས་འཆི་བའི་འདུ་ཤེས་བསྒྲུབས་ཏེ་གནས་སོ། །དེ་ན་བ་དང ། རྒ་བའི་མཚན་མ་ཡིད་ལ་བྱེད་པས་ཉེས་དམིགས་ཀྱི་འདུ་ཤེས་བསྒྲུབས་ཏེ་གནས་སོ། །དེ་ཁ་ཟས་ཡོངས་སུ་ཚོལ་བ་དང་འགྱུར་བ་ལ་ནད་ཀྱི་རྒྱུ་དང་གནོད་པའི་རྒྱུར་ཡིད་ལ་བྱེད་པས་ཁ་ཟས་ལ་མི་མཐུན་པའི་འདུ་ཤེས་བསྒྲུབས་ཏེ་གནས་སོ། །དེ་ཁྱིམ་དང ། གྲོང་དང ། གྲོང་ཁྱེར་དང ། ལྗོངས་ཀྱི་འཇིག་རྟེན་ཐམས་ཅད་ལ་འབྱོར་བ་དང་འབྲེལ་བའི་མཚན་མར་ཡིད་ལ་བྱེད་པ་དང ། ནགས་ཚལ་རྨད་དུ་བྱུང་བ་དང ། ཀུན་དགའ་ར་བ་རྨད་དུ་བྱུང་བ་དང་བྲལ་བའི་མཚན་མར་ཡིད་ལ་བྱེད་པས་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་བསྒྲུབས་ཏེ་གནས་སོ།། དེ་ནང་གཟུགས་སུ་འདུ་ཤེས་པས་ཕྱི་རོལ་ཀྱི་གཟུགས་ཆུང་དུ་ཁ་དོག་བཟང་པོ་དང ། ཁ་དོག་ངན་པ་རྣམས་ལ་མཚན་མར་ཡིད་ལ་བྱེད་པས་ཟིལ་གྱིས་གནོན་པའི་སྐྱེ་མཆེད་དང་པོ་བསྒྲུབས་ཏེ་གནས་སོ། །དེ་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་གཞན་མེད་པ་ཁ་དོག་བཟང་པོ་དང ། ཁ་དོག་ངན་པ་རྣམས་ལ་མཚན་མར་ཡིད་ལ་བྱེད་པས་ཟིལ་གྱིས་གནོན་པའི་སྐྱེ་
302a
༄#། །མཆེད་གཉིས་པ་བསྒྲུབས་ཏེ་གནས་སོ། །དེ་ཤི་བའི་ལུས་བསྲེགས་པ་དེ་ལ་རླུང་ངམ་ཆུས་ཐལ་བ་ཡང་མེད་པར་བྱེད་པའི་འདུ་ཤེས་དང ། ཞིགས་པ་ལ་ཕྱེ་མ་ཡང་མེད་པ་དང ། རྡུལ་དུ་གྱུར་པ་ལ་རྡུལ་ཀྱང་མེད་པའི་འདུ་ཤེས་སུ་རྣམ་པར་འཇིག་པ་བསྒོམས་ཤིང་བསྒྲུབས་ཏེ། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་དུ་ཁ་དོག་བཟང་པོ་དང ། ཁ་དོག་ངན་པ་རྣམས་ལ་མཚན་མར་ཡིད་ལ་བྱེད་པས་ཟིལ་གྱིས་གནོན་པའི་སྐྱེ་མཆེད་གསུམ་པ་བསྒྲུབས་ཏེ་གནས་སོ། །དེ་དེ་བཞིན་དུ་ནང་གཟུགས་མེད་བར་འདུ་ཤེས་པས་ཕྱི་རོལ་གྱི་གཟུགས་ཚད་མེད་པ་ཁ་དོག་བཟང་པོ་དང ། ཁ་དོག་ངན་པ་རྣམས་ལ་མཚན་མར་ཡིད་ལ་བྱེད་པས་ཟིལ་གྱིས་གནོན་པའི་སྐྱེ་མཆེད་བཞི་པ་བསྒྲུབས་ཏེ་གནས་སོ། །ད་དེ་བཞིན་དུ་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ་ཚད་མེད་པ་ཡིད་དུ་འོང་བ་རྣམས་ལ་མཚན་མར་ཡིད་ལ་བྱེད་པས་ཟིལ་གྱིས་གནོན་པའི་སྐྱེ་མཆེད་ལྔ་པ་བསྒྲུབས་ཏེ་གནས་སོ། །དེ་དེ་བཞིན་དུ་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སེར་པོ་དང ། དམར་པོ་དང ། དཀར་པོ་ཚད་མེད་པ་ཡིད་དུ་འོང་བ་རྣམས་ལ་མཚན་མར་ཡིད་ལ་བྱེད་པས་ཟིལ་གྱིས་གནོན་པའི་སྐྱེ་མཆེད་དྲུག་པ་དང ། བདུན་པ་དང ། བརྒྱད་པ་བསྒྲུབས་ཏེ་གནས་སོ། །དེས་འདི་མཐའ་ཡས་སོ་ཞེས་མཚན་མར་
302b
ཡིད་ལ་བྱེད་པས་ཟད་པར་སར་བསྒྲུབས་ཏེ་གནས་སོ། །དེ་ཆུ་དང ། མེ་དང ། རླུང་དང ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ནམ་མཁའ་དང ། རྣམ་པར་ཤེས་པ་མཐའ་ཡས་སོ་ཞེས་མཚན་མར་ཡིད་ལ་བྱེད་པས་ཟད་པར་ཆུ་དང ། ཟད་པར་མེ་དང ། ཟད་པར་རླུང་དང ། ཟད་པར་སྔོན་པོ་དང ། ཟད་པར་སེར་པོ་དང ། ཟད་པར་དམར་པོ་དང ། ཟད་པར་དཀར་པོ་དང ། ཟད་པར་ནམ་མཁའ་དང ། ཟད་པར་རྣམ་པར་ཤེས་པ་བསྒྲུབས་ཏེ་གནས་སོ། །དེ་སྙོམས་པར་འཇུག་པ་ན་དགེ་བའི་རྩ་བ་ཐམས་ཅད་ལ་དམིགས་པ་ལ་སེམས་ཉེ་བར་འདོགས་ཏེ། སྙིང་རྗེ་ཆེན་པོ་ལ་དམིགས་པ་དང ། དམ་པའི་ཆོས་ཡོངས་སུ་བཟུང་བ་ལ་དམིགས་པ་དང ། དཀོན་མཆོག་གསུམ་གྱི་རིགས་མི་འཆད་པར་བྱ་བ་ལ་དམིགས་པ་དང ། སངས་རྒྱས་ཀྱི་སྐུ་དང ། རྒྱན་ལ་དམིགས་པ་དང ། སངས་རྒྱས་ཀྱི་གསུང་ཚངས་པའི་དབྱངས་ལ་དམིགས་པ་དང ། སྔོན་གྱི་སྨོན་ལམ་ལ་དམིགས་པ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་དམིགས་པ་དང ། འཇིག་རྟེན་རྣམ་པར་སྦྱང་བ་ལ་དམིགས་པ་དང ། བྱང་ཆུབ་ཀྱི་སྙིང་པོའི་བཀོད་པ་ལ་དམིགས་པ་དང ། ཆོས་ཀྱི་འཁོར་ལོ་བསྐོར་བ་ལ་དམིགས་པ་དང ། སེམས་ཅན་ཐམས་ཅད་ཀྱི་ཉོན་མོངས་པ་གཞོམ་པ་ལ་དམིགས་པ་ལ་སེམས་ཉེ་བར་འདོགས་སོ། །དེ་བསམ་གཏན་བྱེད་པ་ན་རྣམ་པར་ཤེས་པའི་གནས་བཞི་དང་བྲལ་བར་བསམ་གཏན་བྱེད་དོ། །སའི་ཁམས་ལ་མི་གནས་
303a
༄#། །ཆུའི་ཁམས་ལ་མི་གནས། མེའི་ཁམས་ལ་མི་གནས། རླུང་གི་ཁམས་ལ་མི་གནས། ནམ་མཁའི་ཁམས་ལ་མི་གནས། རྣམ་པར་ཤེས་པའི་ཁམས་ལ་མི་གནས། འཇིག་རྟེན་འདི་ལ་མི་གནས། འཇིག་རྟེན་ཕ་རོལ་ལ་མི་གནས་པར་བསམ་གཏན་བྱེད་དོ། །དེ་ཏིང་ངེ་འཛིན་དང ། སྙོམས་པར་འཇུག་པ་བླ་ན་མེད་པ་ཐམས་ཅད་ཐོབ་པར་བྱ་བའི་ཕྱིར་བསམ་གཏན་ལ་གནས་ཤིང་བསམ་གཏན་ལ་དགའོ། །དེ་བསམ་གཏན་དེ་དང ། ཏིང་ངེ་འཛིན་དེ་ལ་བསམ་གཏན་བྱེད་པར་འདོད་པ་དང ། སྙོམས་པར་འཇུག་པར་འདོད་པ་ན་ཡང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །བསམ་གཏན་བྱེད་པ་དང ། བསམ་གཏན་བྱས་པ་དང ། ལངས་ནས་ཀྱང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །གལ་ཏེ་བསམ་གཏན་དེ་དང ། ཏིང་ངེ་འཛིན་དེ་ལ་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་
303b
ཡང་དག་པར་སློབ་སྟེ། དུས་དུས་སུའམ། ཅུང་ཟད་ཅུང་ཟད་དུ་ཡང་སེམས་རྣམ་པར་གཡེང་བ་དང ། ཏིང་ངེ་འཛིན་མ་ཡིན་པ་སྤང་བ་དང ། དོར་བ་དང ། བསལ་བར་རྩོལ་ལོ། །འབད་དོ། །དུས་དུས་སུའམ། ཅུང་ཟད་ཅུང་ཟད་དུ་ཡང་སེམས་རྩེ་གཅིག་ཏུ་བྱ་བ་དང ། སེམས་མཉམ་པར་གཞག་པར་སློབ་པ་དང ། མངོན་པར་འཕེལ་བར་བྱ་བ་དང ། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟང ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཀྱི་སེམས་རྗེས་སུ་དྲན་པ་དང ། བྱང་ཆུབ་ཀྱི་སེམས་སྒོམ་པ་དང ། བྱང་ཆུབ་ཏུ་སྨོན་པ་དང ། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་སེམས་མཉམ་པར་གཞག་པ་དགེ་བ་དང ། སེམས་རྩེ་གཅིག་ཏུ་བྱ་བ་དགེ་བ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་ཟག་པ་མེད་པའི་སེམས་མཉམ་པར་གཞག་པ་བསྐྱེད་པར་འདོད་པ་དང ། མི་སློབ་པའི་སེམས་མཉམ་པར་གཞག་པ་བསྐྱེད་པར་འདོད་པ་དང ། ཟག་པ་མེད་པའི་སེམས་མཉམ་པར་གཞག་པ་ཡང་དག་པར་བསྐྱེད་པར་འདོད་པ་དང ། མི་སློབ་པའི་སེམས་མཉམ་པར་གཞག་པ་ཡང་དག་པར་བསྐྱེད་པར་འདོད་པ་དེ་ནི་སེམས་མཉམ་པར་གཞག་པར་དགེ་བ་དང ། སེམས་རྩེ་གཅིག་ཏུ་
304a
༄#། །དགེ་བ་མཐའ་ཡས་མུ་མེད་པ་ཡིན་ནོ། །ལག་བཟང ། དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ། ཡིད་བདེ་བ་དང་ལྡན་ཞིང་ཚེགས་ཆུང་ངུ་དང ། སྡུག་བསྔལ་ཆུང་ངུས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟང ། བྱང་ཆུབ་སེམས་དཔའ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང ། འདི་ལ་བྱང་ཆུབ་སེམས་དཔའ་ནི་མདུང་ཐུང་དག་གིས་བཟློག་ཀྱང ། གང་ཟག་གང་དག་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ། དོན་ཤེས་པ། བཤད་པ་ཤེས་པ། དཔྱོད་པ་ཅན་ཇི་ལྟར་ཐོས་པའི་དོན་ལ་ཡོངས་སུ་རྟོག་པ། དེ་དག་ལ་བསྙེན་ཅིང་བརྟེན་ཏེ། བསྙེན་བཀུར་བྱེད་དོ། །དེ་ཐོས་པའི་ཆེད་དང ། བཤད་པའི་ཆེད་དང ། དོན་གྱི་ཆེད་དང།་དོན་ལ་ཡོངས་སུ་རྟོག་པའི་ཆེད་དང ། སློབ་དཔོན་དང ། མཁན་པོ་ལ་བསྙེན་བཀུར་བྱ་བའི་ཆེད་ལ། གྲང་བ་ཡང་ཁྱད་དུ་གསོད། ཚ་བ་དང ། བཀྲེས་པ་དང ། སྐོམ་པ་དང ། ཤ་སྦྲང་དང།་སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱིས་རེག་པ་དང ། གཞན་གྱིས་ངན་དུ་སྨྲས་ཤིང ། ངན་དུ་བརྗོད་པའི་ཚིག་གི་ལམ་དང ། ལུས་ཀྱི་ཚོར་བ་དྲག་པ། རྩུབ་པ། མི་བཟོད་པ། སྲོག་འཆད་པར་འགྱུར་བ་ཡང་ཁྱད་དུ་གསོད་དོ། །དེ་ཆོས་རྣམས་ལ་ནི་རིན་པོ་ཆེའི་འདུ་ཤེས་ཉེ་བར་གནས། ཆོས་སྨྲ་བ་རྣམས་ལ་ནི་རིན་པོ་ཆེའི་གཏེར་དུ་འདུ་ཤེས། ཆོས་
304b
ཉན་པ་ལ་ནི་དཀོན་པ་རྙེད་པར་འདུ་ཤེས། ཆོས་འཛིན་པ་ལ་ནི་དོན་ཡོད་པར་འདུ་ཤེས། སྲོག་ཕྱོགས་པར་འདུ་ཤེས། ཆོས་ཀྱི་ཡོན་ཏན་མང་དུ་བྱེད་པ་ལ་ནི་སྲོག་དོན་ཡོད་པར་འདུ་ཤེས། ཆོས་ལ་ཡོངས་སུ་རྟོག་པ་ལ་ནི་ཚེ་རབས་བརྒྱར་མི་རྙེད་པར་འདུ་ཤེས་ཉེ་བར་གནས་པ་ཡིན་ཏེ། དེ་ཆོས་དེ་དག་ཉན་ཅིང་འཛིན་ལ། མང་དུ་བྱེད་ཅིང་ཡོངས་སུ་རྟོག་པ་ན། ཁམས་རྣམས་ཀྱང་རབ་ཏུ་ཤེས། ཕུང་པོ་རྣམས་དང ། སྐྱེ་མཆེད་རྣམས་དང ། འཕགས་པའི་བདེན་པ་རྣམས་དང ། རྟེན་ཅིང་འབྲེལ་བར་འབྱུང་བ་དང ། དུས་དང ། ཐེག་པ་རྣམས་དང ། དགེ་བ་བསགས་པ་ཡང་རབ་ཏུ་ཤེས་སོ། །ཁམས་རྣམས་ཇི་ལྟར་རབ་ཏུ་ཤེས་ཞེ་ན། ཁམས་ནི་གཉིས་ཏེ། འདུས་བྱས་དང ། འདུས་མ་བྱས་ཞེས་བྱ་བ་སྟེ། ཁམས་གཉིས་པོ་དེ་དག་གོ་།འདུས་བྱས་ཀྱི་ཁམས་ནི་གང ། འདུས་མ་བྱས་ཀྱི་ཁམས་ནི་གང་ཞེ་ན། གང་ཅི་ཡང་རུང་སྟེ། སྐྱེ་བ་དང ། གནས་པ་དང ། འགག་པ་འདི་ནི་འདུས་བྱས་ཀྱི་ཁམས་ཞེས་བྱའོ། །གང་ཅི་ཡང་རུང་སྟེ། སྐྱེ་བ་མེད་པ་དང ། གནས་པ་མེད་པ་དང ། འགག་པ་མེད་པ་དེ་ནི་འདུས་མ་བྱས་ཀྱི་ཁམས་ཞེས་བྱ་སྟེ། དེ་ལྟར་འདུས་བྱས་དང ། འདུས་མ་བྱས་ཀྱི་ཁམས་རབ་ཏུ་ཤེས་སོ། །གཞན་ཡང་ཁམས་གསུམ་རབ་ཏུ་ཤེས་ཏེ།་དགེ་བའི་ཁམས་དང ། མི་དགེ་བའི་ཁམས་དང ། ལུང་དུ་མ་བསྟན་པའི་ཁམས་ཏེ། ཁམས་གསུམ་པོ་དེ་དག་གོ་།དགེ་བའི་ཁམས་ནི་གང ། མི་དགེ་བའི་ཁམས་ནི་གང ། ལུང་དུ་མ་
305a
༄#། །བསྟན་པའི་ཁམས་ནི་གང་ཞེ་ན། གང་ཅི་ཡང་རུང་སྟེ་ཆགས་པ་མེད་པ་དང ། ཆགས་པ་མེད་པ་དང་ལྡན་པ་དང ། གང་ཅི་ཡང་རུང་སྟེ། ཞེ་སྡང་མེད་པ་དང ། ཞེ་སྡང་མེད་པ་དང་ལྡན་པ་དང ། གང་ཅི་ཡང་རུང་སྟེ། གཏི་མུག་མེད་པ་དང ། གཏི་མུག་མེད་པ་དང་ལྡན་པ་དེ་ནི། དགེ་བའི་ཁམས་ཞེས་བྱའོ། །གང་ཅི་ཡང་རུང་སྟེ། ཆགས་པ་དང ། ཆགས་པ་དང་ལྡན་པ་དང ། གང་ཅི་ཡང་རུང་སྟེ། ཞེ་སྡང་དང ། ཞེ་སྡང་དང་ལྡན་པ་དང ། གང་ཅི་ཡང་རུང་སྟེ། གཏི་མུག་དང ། གཏི་མུག་དང་ལྡན་པ་དེ་ནི། མི་དགེ་བའི་ཁམས་ཞེས་བྱའོ། །དེ་གཉིས་ལ་མ་གཏོགས་པ་ནི། ལུང་དུ་མ་བསྟན་པ་ཉིད་དེ། དེ་ལྟར་ཁམས་གསུམ་རབ་ཏུ་ཤེས་སོ། །གཞན་ཡང་ཁམས་གསུམ་རབ་ཏུ་ཤེས་ཏེ། གསུམ་གང་ཞེ་ན། འདོད་པའི་ཁམས་དང།་གཟུགས་ཀྱི་ཁམས་དང ། གཟུགས་མེད་པའི་ཁམས་སོ། །འདོད་པའི་ཁམས་གང་ཞེ་ན། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། ཡི་དྭགས་དང ། ལྷ་མ་ཡིན་དང ། མི་དང ། རྒྱལ་ཆེན་བཞིའི་ལྷ་རྣམས་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་ཏེ། གང་དེ་དག་ལ་འདུན་པ་དང ། ཆགས་པ་དང ། ཞེ་སྡང་དང ། གཏི་མུག་དང ། ཡིད་ཀྱིས་སྨོན་པ་དང ། སྨོན་ལམ་འདེབས་པ་དང ། མངོན་པར་འདུ་བྱེད་པ་དེ་ནི་འདོད་པའི་ཁམས་ཞེས་བྱའོ། །
305b
གཟུགས་ཀྱི་ཁམས་གང་ཞེ་ན། ཚངས་རིས་ཀྱི་ལྷ་རྣམས་དང ། ཚངས་པའི་འདུན་ན་འདོན་རྣམས་དང ། ཚངས་ཆེན་དང ། འོད་ཆུང་དང ། ཚད་མེད་འོད་དང ། འོད་གསལ་དང ། དགེ་ཆུང་དང ། ཚད་མེད་དགེ་དང ། དགེ་རྒྱས་དང ། སྤྲིན་མེད་དང ། བསོད་ནམས་སྐྱེས་དང ། འབྲས་བུ་ཆེ་དང ། འདུ་ཤེས་མེད་པའི་སེམས་ཅན་དང ། མི་ཆེ་བ་དང ། མི་གདུང་བ་དང ། གྱ་ནོམ་སྣང་དང ། ཤིན་ཏུ་མཐོང་དང ། འོག་མིན་གྱི་ལྷ་རྣམས་ཏེ། གང་དེ་དག་ལ་འདུན་པ་དང ། ཆགས་པ་དང ། ཞེ་སྡང་བ་དང ། གཏི་མུག་པ་དང ། ཡིད་ཀྱིས་སྨོན་པ་དང ། སྨོན་ལམ་འདེབས་པ་དང ། མངོན་པར་འདུ་བྱེད་པ་དེ་ནི་གཟུགས་ཀྱི་ཁམས་ཞེས་བྱའོ། །གཟུགས་མེད་པའི་ཁམས་གང་ཞེ་ན། ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང ། རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང།་ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཏེ། གང་དེ་དག་ལ་འདུན་པ་དང ། ཆགས་པ་དང ། ཞེ་སྡང་དང ། གཏི་མུག་པ་དང ། ཡིད་ཀྱི་སྨོན་པ་དང ། སྨོན་ལམ་འདེབས་པ་དང ། མངོན་པར་འདུ་བྱེད་པ་གང་ཡིན་པ་དེ་ནི་གཟུགས་མེད་པའི་ཁམས་ཞེས་བྱ་སྟེ། དེ་ལྟར་ཁམས་གསུམ་རབ་ཏུ་ཤེས་སོ། །གཞན་ཡང་ཁམས་བཞི་རབ་ཏུ་ཤེས་ཏེ། གཞི་གང་ཞེ་ན། འདོད་པའི་ཁམས་དང ། གཟུགས་ཀྱི་ཁམས་དང ། གཟུགས་མེད་པའི་ཁམས་དང ། འདུས་མ་བྱས་ཀྱི་ཁམས་ཞེས་བྱ་བའི་
306a
༄#། །ཁམས་བཞི་པོ་དེ་དག་སྟེ། དེ་ལྟར་ཁམས་བཞི་རབ་ཏུ་ཤེས་སོ། །གཞན་ཡང་ཁམས་དྲུག་རབ་ཏུ་ཤེས་ཏེ། དྲུག་གང་ཞེ་ན། འདོད་པའི་ཁམས་དང ། གནོད་སེམས་ཀྱི་ཁམས་དང ། རྣམ་པར་འཚེ་བའི་ཁམས་དང ། མངོན་པར་འབྱུང་བའི་ཁམས་དང ། གནོད་སེམས་མེད་པའི་ཁམས་དང ། རྣམ་པར་འཚེ་བ་མེད་པའི་ཁམས་ཏེ། ཁམས་དྲུག་པོ་དེ་དག་རབ་ཏུ་ཤེས་སོ། །གཞན་ཡང་ཁམས་དྲུག་རབ་ཏུ་ཤེས་ཏེ། དྲུག་གང་ཞེ་ན། སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་ཏེ། ཁམས་དྲུག་པོ་དེ་དག་རབ་ཏུ་ཤེས་སོ། །དེ་ལ་སའི་ཁམས་ནི་མི་རྟག་པ། མི་བརྟན་པ། འགྱུར་བའི་ཆོས་ཅན་ཏེ། མི་རྟག་པ་གང་ཡིན་པ་དེ་སྡུག་བསྔལ་བའོ། །སྡུག་བསྔལ་བ་གང་ཡིན་པ་དེ་བདག་མེད་པའོ། །དེ་བཞིན་དུ་ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་ཀྱང་མི་རྟག་པ། མི་བརྟན་པ། འགྱུར་བའི་ཆོས་ཅན་ཏེ། མི་རྟག་པ་གང་ཡིན་པ་དེ་སྡུག་བསྔལ་བའོ། །སྡུག་བསྔལ་བ་གང་ཡིན་པ་དེ་བདག་མེད་པ་སྟེ། ད་ལྟར་ཁམས་དྲུག་རབ་ཏུ་ཤེས་སོ། །དེ་ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན། གཟུགས་ཀྱི་ཕུང་པོ་དང ། ཚོར་བའི་ཕུང་པོ་དང ། འདུ་
306b
ཤེས་ཀྱི་ཕུང་པོ་དང ། འདུ་བྱེད་ཀྱི་ཕུང་པོ་དང ། རྣམ་པར་ཤེས་པའི་ཕུང་པོ་སྟེ། ཕུང་པོ་ལྔ་རབ་ཏུ་ཤེས་སོ། །གཟུགས་ནི་དབུབ་རྡོས་པ་ལྟ་བུ་དང ། ངན་པ་དང ། འཇིག་པ་དང ། རིང་དུ་མི་གནས་པ་དང ། ཚོར་བ་ནི་ཆུའི་ཆུ་བུར་ལྟ་བུ་དང ། ངན་པ་དང ། འཇིག་པ་དང ། རིང་དུ་མི་གནས་པ་དང ། འདུ་ཤེས་ནི་སྨིག་རྒྱུ་ལྟ་བུ་དང ། ངན་པ་དང ། འཇིག་པ་དང ། རིང་དུ་མི་གནས་པ་དང ། འདུ་བྱེད་རྣམས་ནི་ཆུ་ཤིང་ལྟ་བུ་དང ། ངན་པ་དང ། འཇིག་པ་དང ། རིང་དུ་མི་གནས་པ་དང ། རྣམ་པར་ཤེས་པ་ནི་སྒྱུ་མ་ལྟ་བུ་དང ། ངན་པ་དང ། འཇིག་པ་དང ། རིང་དུ་མི་གནས་པར་དེ་ལྟར་ཕུང་པོ་ལྔ་རབ་ཏུ་ཤེས་སོ། །དེ་ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན་ནང་གི་སྐྱེ་མཆེད་དྲུག་རབ་ཏུ་ཤེས་ཏེ། མིག་ནང་གི་སྐྱེ་མཆེད་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ནང་གི་སྐྱེ་མཆེད་ཅེས་བྱ་བ་ནང་གི་སྐྱེ་མཆེད་དྲུག་པོ་དེ་དག་གོ། དེ་ལ་མིག་ནང་གི་སྐྱེ་མཆེད་ནི། ན་བའི་ཆོས་ཅན་དང ། རྒ་བའི་ཆོས་ཅན་དང ། འཆི་བའི་ཆོས་ཅན་དང ། བདག་དང་བདག་གིས་སྟོང་པ་དང ། འདོད་ཆགས་ཀྱི་མེ་དང ། ཞེ་སྡང་གི་མེ་དང ། གཏི་མུག་གི་མེ་ཀུན་དུ་འབར་བ་དང ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ཀྱིས་ཀུན་ཏུ་འབར་བ་དང ། སྡུག་བསྔལ་གྱིས་ཀུན་ཏུ་འབར་བར་རབ་ཏུ་ཤེས་སོ། །དེ་བཞིན་དུ་རྣ་བ་དང ། སྣ་དང ། ལྕེ་
307a
༄#། །དང ། ལུས་དང ། ཡིད་ནང་གི་སྐྱེ་མཆེད་ལ་ཡང་ན་བའི་ཆོས་ཅན་དང ། རྒ་བའི་ཆོས་ཅན་དང ། འཆི་བའི་ཆོས་ཅན་དང ། བདག་དང་བདག་གིས་སྟོང་པ་དང ། འདོད་ཆགས་ཀྱི་མེ་དང ། ཞེ་སྡང་གི་མེ་དང ། གཏི་མུག་གི་མེ་ཀུན་ཏུ་འབར་བ་དང ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ཀྱིས་ཀུན་དུ་འབར་བ་དང ། སྡུག་བསྔལ་གྱིས་ཀུན་ཏུ་འབར་བར་རབ་ཏུ་ཤེས་ཏེ། དེ་ལྟར་ནང་གི་སྐྱེ་མཆེད་དྲུག་པོ་དག་རབ་ཏུ་ཤེས་སོ། །གཞན་ཡང་ཕྱིའི་སྐྱེ་མཆེད་དྲུག་རབ་ཏུ་ཤེས་ཏེ། མིག་གིས་རྣམ་པར་ཤེས་པར་བྱ་བ་གཟུགས་རྣམས་ཕྱིའི་སྐྱེ་མཆེད་དང ། རྣ་བས་རྣམ་པར་ཤེས་པར་བྱ་བ་སྒྲ་རྣམས་དང ། སྣས་རྣམ་པར་ཤེས་པར་བྱ་བ་དྲི་རྣམས་དང ། ལྕེས་རྣམ་པར་ཤེས་པར་བྱ་བ་རོ་རྣམས་དང ། ལུས་ཀྱིས་རྣམ་པར་ཤེས་པར་བྱ་བ་རེག་བྱ་རྣམས་དང ། ཡིད་ཀྱིས་རྣམ་པར་ཤེས་པར་བྱ་བ་ཆོས་ཕྱིའི་སྐྱེ་མཆེད་རྣམས་ཞེས་བྱ་བ་སྟེ། སྐྱེ་མཆེད་དྲུག་པོ་དེ་དག་གོ། དེ་ལ་མིག་གིས་རྣམ་པར་ཤེས་པར་བྱ་བ་གཟུགས་ཕྱིའི་སྐྱེ་མཆེད་ལ་སྐྱབས་མེད་པ་དང ། མགོན་མེད་པ་དང ། སྟོབས་མེད་པ་དང ། ཉམ་ཆུང་བ་སྟེ། དེ་ལ་རྟག་པའམ། བརྟན་པའམ། ཐེར་ཟུག་པའམ། དེ་བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་ནི་གང་ཡང་མེད་ཀྱི། སྒྱུ་མ་དེ་ནི་ཡོད།
307b
སྒྱུ་མར་བྱས་པ་དེ་ནི་ཡོད། སེམས་རྨོངས་པར་བྱེད་པ་དེ་ནི་ཡོད་དེ། གང་ཅི་ཡང་ཡོད་པ་དང ། དེ་བཞིན་དུ་རྣ་བས་རྣམ་པར་ཤེས་པར་བྱ་བ་སྒྲ་རྣམས་དང ། སྣས་རྣམ་པར་ཤེས་པར་བྱ་བ་དྲི་རྣམས་དང ། ལྕེས་རྣམ་པར་ཤེས་པར་བྱ་བ་རོ་རྣམས་དང ། ལུས་ཀྱིས་རྣམ་པར་ཤེས་པར་བྱ་བ་རེག་བྱ་རྣམས་དང ། ཡིད་ཀྱིས་རྣམ་པར་ཤེས་པར་བྱ་བའི་ཆོས་ཕྱིའི་སྐྱེ་མཆེད་ལ་ཡང ། སྐྱབས་མེད་པ་དང ། མགོན་མེད་པ་དང ། སྟོབས་མེད་པ་དང ། ཉམ་ཆུང་བ་སྟེ། དེ་ལ་རྟག་པའམ། བརྟན་པའམ། ཐེར་ཟུག་པའམ། དེ་བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་ནི་གང་ཡང་མེད་ཀྱི། སྒྱུ་མ་དེ་ནི་ཡོད། སྒྱུ་མར་བྱས་པ་དེ་ནི་ཡོད། སེམས་རྨོངས་པར་བྱས་པ་དེ་ནི་ཡོད་དེ། གང་ཅི་ཡང་ཡོད་པར་ཕྱིའི་སྐྱེ་མཆེད་དྲུག་པོ་དེ་ལྟར་རབ་ཏུ་ཤེས་སོ། །དེ་ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན། འཕགས་པའི་བདེན་པ་བཞི་རབ་ཏུ་ཤེས་སོ། །བཞི་གང་ཞེ་ན། སྡུག་བསྔལ་འཕགས་པའི་བདེན་པ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱ་བ་འཕགས་པའི་བདེན་པ་བཞི་པོ་དེ་དག་གོ། ཕུང་པོ་ལྔ་རྣམས་དང ། ཁམས་དྲུག་པོ་དག་དང ། ནང་གི་སྐྱེ་མཆེད་དྲུག་པོ་དག་དང ། ཕྱིའི་སྐྱེ་མཆེད་དྲུག་པོ་དག་གང་ཡིན་པ་དེ་ནི་སྡུག་བསྔལ་ཞེས་བྱ་སྟེ། སྡུག་བསྔལ་དེ་ནི་མི་རྟག་པ་དང ། སྡུག་བསྔལ་བ་དང ། ནད་དང །
308a
༄#། །འབྲས་དང ། ཟུག་རྔུ་དང ། སྡིག་པ་དང ། བདག་མེད་པ་དང ། རབ་ཏུ་འཇིག་པའི་ཆོས་ཉིད་དུ་ལྟའོ། །འདོད་ཆགས་དང ། ཞེ་སྡང་དང ། གཏི་མུག་དང ། ང་རྒྱལ་དང ། ངའོ་སྙམ་དུ་མངོན་པར་ཞེན་པ་དང ། བདག་གི་བདག་ནི་འདི་ཡིན་ནོ་སྙམ་དུ་བདག་ཏུ་མངོན་པར་ཞེན་པ་དང ། འབྱུང་བར་འགྱུར་རོ་སྙམ་པ་དང ། འབྱུང་བར་མི་འགྱུར་རོ་སྙམ་པ་དང ། གཟུགས་ཅན་དུ་འགྱུར་རོ་སྙམ་པ་དང ། གཟུགས་ཅན་མ་ཡིན་པར་འགྱུར་རོ་སྙམ་པ་དང ། འདུ་ཤེས་ཅན་དུ་འགྱུར་རོ་སྙམ་པ་དང ། འདུ་ཤེས་ཅན་མ་ཡིན་པར་འགྱུར་རོ་སྙམ་པ་དང ། འདུ་ཤེས་ཅན་མ་ཡིན་ལ། འདུ་ཤེས་ཅན་མ་ཡིན་པ་ཡང་མ་ཡིན་པར་འགྱུར་རོ་སྙམ་པ་དང ། ཕུང་པོ་རྣམས་བདག་གོ་སྙམ་པ་དང ། ཕུང་པོ་རྣམས་ལས་བདག་གཞན་ནོ་སྙམ་པ་དང ། ཕུང་པོ་རྣམས་ལ་བདག་གོ་སྙམ་པ་དང ། བདག་ལ་ཕུང་པོ་རྣམས་སོ་སྙམ་པ་དང ། ཁམས་རྣམས་དང ། སྐྱེ་མཆེད་རྣམས་བདག་གོ་སྙམ་པ་དང ། སྐྱེ་མཆེད་རྣམས་ལས་བདག་གཞན་ནོ་སྙམ་པ་དང ། སྐྱེ་མཆེད་རྣམས་ལ་བདག་གོ་སྙམ་པ་དང ། བདག་ལ་སྐྱེ་མཆེད་རྣམས་སོ་སྙམ་པ་དང ། ཚོར་བ་བདག་གོ་སྙམ་པ་དང ། ཚོར་བར་བྱེད་པ་བདག་གོ་སྙམ་པ་དང ། གཟུགས་ཅན་ཆུང་ངུ་བདག་གོ་སྙམ་པ་དང ། གཟུགས་ཅན་མ་ཡིན་པ་ཆུང་ངུ་བདག་གོ་སྙམ་པ་དང ། གཟུགས་ཅན་མཐའ་ཡས་པ་བདག་གོ་སྙམ་པ་དང ། གཟུགས་
308b
ཅན་མཁྱེན་པ་མཐའ་ཡས་པ་བདག་གོ་སྙམ་པ་དང ། བདག་རྟག་གོ་སྙམ་པ་དང ། བདག་མི་རྟག་གོ་སྙམ་པ་དང ། རྟག་ཀྱང་རྟག་ལ། མི་རྟག་ཀྱང་མི་རྟག་གོ་སྙམ་པ་དང ། རྟག་པ་ཡང་མ་ཡིན། མི་རྟག་པ་ཡང་མ་ཡིན་ནོ་སྙམ་པ་དང ། བདག་མཐའ་ཡོད་དོ་སྙམ་པ་དང ། བདག་མཐའ་ཡོད་པ་མ་ཡིན་ནོ་སྙམ་པ་དང ། མཐའ་ཡོད་ཀྱང་ཡོད་ལ། མཐའ་མེད་ཀྱང་མེད་དོ་སྙམ་པ་དང ། མཐའ་ཡོད་པ་ཡང་མ་ཡིན། མཐའ་མེད་པ་ཡང་མ་ཡིན་ནོ་སྙམ་པ་དང ། དེ་བཞིན་སོང་བ་ཤི་ནས་འབྱུང་བར་འགྱུར་རོ་སྙམ་པ་དང ། འབྱུང་བར་མི་འགྱུར་རོ་སྙམ་པ་དང ། འབྱུང་ཡང་འབྱུང་ལ།་མི་འབྱུང་ཡང་མི་འབྱུང་ངོ་སྙམ་པ་དང ། དེ་བཞིན་སོང་བ་ཤི་ནས་འབྱུང་བ་ཡང་མ་ཡིན། མི་འབྱུང་བ་ཡང་མ་ཡིན་ནོ་སྙམ་པ་དང ། སྲོག་དེ་ལུས་ཡིན་སྙམ་པ་དང ། སྲོག་ཀྱང་གཞན། ལུས་ཀྱང་གཞན་ནོ་སྙམ་པ་དང ། སེམས་ཅན་འདི་གང་ནས་འོངས། དེ་འདི་ནས་ཤི་འཕོས་ནས་གང་དུ་འགྲོ་བར་འགྱུར་སྙམ་པ་དང ། སེམས་ཅན་ཡོད་པ་ལས་ཆད་དེ་འཇིག་ཅིང་མེད་པར་འགྱུར་རོ་སྙམ་པ་དང ། བྱེད་པ་དེ་མྱོང་བ་དེ་ཡིན་ནོ་སྙམ་པ་དང ། བྱེད་པ་ཡང་གཞན། མྱོང་བ་ཡང་གཞན་ནོ་སྙམ་པ་དང ། བདག་ཡོད་པས་བདག་གི་ཡོད་པར་འགྱུར་རོ་སྙམ་པ་དང ། བདག་གི་ཡོད་པས་བདག་ཡོད་པར་འགྱུར་རོ་སྙམ་པ་དང ། འདི་ན་བདག་དེ་ལྟ་བུའམ། བདག་གཞན་དུ་འགྱུར་བ་ཞིག་གམ། དེ་བཞིན་དུ་འགྱུར་བ་ཞིག་གམ། གཞན་དུ་འགྱུར་བ་ཞིག་
309a
༄#། །གམ།་འདིར་འབྱུང་བར་འགྱུར་རམ། དེ་ལྟར་འབྱུང་བར་འགྱུར་རམ། གཞན་དུ་འབྱུང་བར་འགྱུར་རམ། འདིར་བདག་སྔོན་འབྱུང་ངམ། བདག་ད་ལྟར་བྱུང་ངམ། བདག་གཞན་དུ་བྱུང་ངམ་སྙམ་དུ་དེ་དག་ལ་བདག་ཏུ་མངོན་པར་ཞེན་ཏེ། འཇིག་ཚོགས་ལ་ལྟ་བ་དང ། ངའོ་སྙམ་པའི་ང་རྒྱལ་དང ། སེམས་ཀྱི་གནས་དང ། མངོན་པར་ཞེན་པ་དང ། ང་རྒྱལ་གྱི་བག་ལ་ཉལ་བ་དང ། སྙེམས་པ་དང ། ང་རྒྱལ་བྱེད་པ་དང ། བདག་ཏུ་སྨྲ་བའི་ལེན་པ་དང ། འདོད་ཆགས་དང ། ཞེ་སྡང་དང ། གཏི་མུག་དང ། ང་རྒྱལ་གང་ཡིན་པ་ཐམས་ཅད་དང ། ལུས་སམ། ངག་གམ། སེམས་ཀྱི་ལས་བསོད་ནམས་སུ་ཉེ་བར་འགྲོ་བའམ། བསོད་ནམས་མ་ཡིན་པར་ཉེ་བར་འགྲོ་བའམ། མི་གཡོ་བར་ཉེ་བར་འགྲོ་བའམ། འདོད་པར་གཏོགས་པའམ། གཟུགས་སུ་གཏོགས་པའམ། གཟུགས་མེད་པར་གཏོགས་པ་གང་ཡིན་པ་དེ་ནི་སྡུག་བསྔལ་ཀུན་འབྱུང་བ་འཕགས་པའི་བདེན་པ་ཞེས་བྱའོ། །གང་འདོད་ཆགས་ཟད་པ་དང ། ཞེ་སྡང་ཟད་པ་དང ། གཏི་མུག་ཟད་པ་དང ། ང་རྒྱལ་ཟད་པ་དང ། བདག་ཏུ་མངོན་པར་ཞེན་པ་སྤངས་པ་དང ། བདག་ཏུ་སྨྲ་བའི་ལེན་པ་སྤངས་པ་དེ་ནི་སྡུག་བསྔལ་འགོག་པ་འཕགས་པའི་བདེན་པ་ཞེས་བྱའོ། །གང་སྡུག་བསྔལ་ལ་ཡང་སྡུག་བསྔལ་བ་དང ། ཀུན་འབྱུང་བ་ལ་ཡང་ཀུན་འབྱུང་བ་དང ། འགོག་པ་ལ་ཡང་འགོག་པ་དང ། ལམ་ལ་ཡང་ལམ་དུ་ཡིད་ལ་
309b
བྱེད་པ་དང ། འདུ་བྱེད་རྣམས་ལ་ཉེས་དམིགས་སུ་ལྟ་ཞིང་གནས་པ་དང ། མྱ་ངན་ལས་འདས་པ་ལ་ཕན་ཡོན་དུ་ལྟ་ཞིང་གནས་པ་དང ། ཇི་ལྟར་མཐོང་བ་དང ། རྒྱུ་བྱས་པ་ལ་སོ་སོར་རྟོག་པ་ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་བདག་ཡང་དག་པའི་ཏིང་ངེ་འཛིན་དེ་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱ་སྟེ། འདི་དག་ནི་འཕགས་པའི་བདེན་པ་བཞི་ཞེས་བྱའོ། །དེ་འཕགས་པའི་བདེན་པ་བཞི་པོ་དེ་དག་ལ་དཔྱོད་ཅིང་རྟོག་ལ་ཁོང་དུ་ཆུད་པར་བྱེད་ཅིང ། །རྣམ་པར་འཇིག་པ་ན་འདུས་བྱས་ཀྱི་ཁམས་ལ་ནི་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པར་མཐོང་ངོ ། ། འདུས་མ་བྱས་ཀྱི་ཁམས་ལ་ནི་སྐྱབས་དང ། གནས་དང ། མགོན་དང ། དཔུང་གཉེན་དུ་ཡང་མཐོང་ལ། འདུས་མ་བྱས་ཀྱི་ཁམས་མངོན་སུམ་དུ་ཡང་མི་བྱེད་དོ། །དེ་ལྟར་འཕགས་པའི་བདེན་པ་བའི་བདག་རབ་ཏུ་ཤེས་སོ། །དེ་ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན། རྟེན་ཅིང་འབྲེལ་བར་འབྱུང་བ་རབ་ཏུ་ཤེས་ཏེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས་དང ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་དང ། རྣམ་པར་ཤེས་པའི་རྐྱེན་གྱིས་མིང་དང་གཟུགས་དང ། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་དང ། སྐྱེ་མཆེད་དྲུག་གི་
310a
༄#། །རྐྱེན་གྱིས་རེག་པ་དང ། རེག་པའི་རྐྱེན་གྱིས་ཚོར་བ་དང ། ཚོར་བའི་རྐྱེན་གྱིས་སྲེད་པ་དང ། སྲེད་པའི་རྐྱེན་གྱིས་ལེན་པ་དང ། ལེན་པའི་རྐྱེན་གྱིས་སྲིད་པ་དང ། སྲིད་པའི་རྐྱེན་གྱིས་སྐྱེ་བ་དང ། སྐྱེ་བའི་རྐྱེན་གྱིས་རྒ་ཤི་སྟེ། འདི་ནི་རྟེན་ཅིང་འབྲེལ་བར་འབྱུང་བ་ཞེས་བྱའོ། །འཕགས་པའི་བདེན་པ་བཞི་དང ། རྟེན་ཅིང་འབྲེལ་བར་འབྱུང་བ་མི་ཤེས་པ་དང ། མི་མཐོང་བ་གང་ཡིན་པ་དེ་ནི་མ་རིག་པ་ཞེས་བྱའོ། །གང་ཅུང་ཟད་ལུས་དང ། ངག་དང ། ཡིད་ཀྱི་ལས་བསོད་ནམས་སུ་ཉེ་བར་འགྲོ་བའམ། བསོད་ནམས་མ་ཡིན་པར་ཉེ་བར་འགྲོ་བའམ། མི་གཡོ་བར་ཉེ་བར་འགྲོ་བའམ། འདོད་པའི་ཁམས་སུ་ཉེ་བར་འགྲོ་བའམ། གཟུགས་ཀྱི་ཁམས་སུ་ཉེ་བར་འགྲོ་བའམ། གཟུགས་མེད་པའི་ཁམས་སུ་ཉེ་བར་འགྲོ་བ་དེ་དག་ནི་འདུ་བྱེད་རྣམས་ཞེས་བྱའོ། །གང་ཅུང་ཟད་དེ་ལས་བྱུང་བ་སེམས་ཞེས་བྱ་བ་དང ། ཡིད་ཅེས་བྱ་བ་དེ་ནི་རྣམ་པར་ཤེས་པ་ཞེས་བྱའོ། །དེ་ལས་བྱུང་བ་གང་ཅི་ཡང་རུང་ཚོར་བ་དང ། འདུ་ཤེས་དང ། སེམས་པ་དང ། རེག་པ་དང ། ཡིད་ལ་བྱེད་པ་དེ་ནི་མིང་ཞེས་བྱའོ། །གང་ཅི་ཡང་རུང་ལྷན་ཅིག་བྱུང་བ་མེར་མེར་པོའི་གཟུགས་དང ། བརྫུས་ཏེ་བྱུང་བའི་གཟུགས་དང ། རྣམ་པར་རིག་བྱེད་ཀྱི་གཟུགས་དེ་ནི་གཟུགས་ཞེས་བྱ་སྟེ། དེ་གཉིས་ནི་མིང་དང་གཟུགས་ཞེས་བྱའོ། །དེ་ལས་བྱུང་པ་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་དེ་ནི་སྐྱེ་མཆེད་དྲུག་ཅེས་བྱའོ། །མིག་ལ་
310b
བརྟེན་ཅིང་གཟུགས་ལ་ཡང་བརྟེན་ཏེ་མིག་གི་རྣམ་པར་ཤེས་པ་འབྱུང་བ་དང ། གསུམ་འདུས་པ་ནི་རེག་པའོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་རྣམས་ལ་བརྟེན་ཏེ། ཡིད་ཀྱི་རྣམ་པར་ཤེས་པ་འབྱུང་བ་དང ། གསུམ་འདུས་པ་ནི་རེག་པ་སྟེ། དེ་ནི་རེག་པ་ཞེས་བྱའོ། །དེ་ལས་བྱུང་བ་བདེ་བའམ། སྡུག་བསྔལ་བའམ། སྡུག་བསྔལ་བ་ཡང་མ་ཡིན། བདེ་བ་ཡང་མ་ཡིན་པ་དེ་དག་ནི་ཚོར་བ་གསུམ་ཞེས་བྱའོ། །དེ་ལས་བྱུང་བ་འདོད་ཆགས་དང ། ཆགས་པ་དང ། དགའ་བ་དེ་ནི་སྲེད་པ་ཞེས་བྱའོ། །དེ་ལས་བྱུང་བ་ཀུན་དུ་ཆགས་པ་དང ། ལྟ་བ་དང ། ཚུལ་ཁྲིམས་དང ། བརྟུལ་ཞུགས་དང ། བདག་ཏུ་སྨྲ་བ་དེ་ནི་ལེན་པ་ཞེས་བྱའོ། །དེ་ལས་བྱུང་བ་གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་དེ་ནི་སྲིད་པ་ཞེས་པའོ། ། གང་སྲིད་པ་དེ་འབྱུང་བ་དང ། སྐྱེ་བ་དང ། མངོན་པར་འགྲུབ་པ་དེ་ནི་སྐྱེ་བ་ཞེས་བྱའོ། །གང་སྲིད་པ་དེ་འགྱུར་བ་དང ། འཇིག་པ་དང ། ཉེ་བར་ཁྲིད་པ་དེ་ནི་རྒ་བ་ཞེས་བྱའོ། །གང་ཁྲིད་པ་དེ་འཆི་འཕོ་བ་དང ། འབྲལ་བ་དེ་ནི་འཆི་བ་ཞེས་བྱའོ། །དེ་དེ་ལྟར་རྟེན་ཅིང་འབྲེལ་བར་འབྱུང་བ་ལ་དཔྱོད་ཅིང་ཡོངས་སུ་རྟོག་ལ། ཁོང་དུ་ཆུད་པར་བྱེད་ཅིང་རྣམ་པར་འཇིག་པ་ནས་རློམ་སེམས་སུ་མི་བྱེད། སས་རློམ་སེམས་སུ་མི་བྱེད། ས་བདག་གི་སྙམ་དུ་རློམ་སེམས་སུ་མི་བྱེད་དོ། །ས་ལ་མངོན་པར་དགའ་བར་མི་བྱེད་དོ། །ཆུ་དང ། མེ་དང ། རླུང་དང ། ནམ་མཁའ་དང ། རྣམ་
311a
༄#། །པར་ཤེས་པ་ལ་གཅིག་པ་དང ། ཐ་དད་པ་དང ། མཐོང་བ་དང ། ཐོས་པ་དང ། བྱེ་བྲག་ཕྱེད་པ་དང ། རྣམ་པར་ཤེས་པ་དང ། མྱ་ངན་ལས་འདས་པ་ལ་རློམ་སེམས་སུ་མི་བྱེད།་མྱ་ངན་ལས་འདས་པས་རློམ་སེམས་སུ་མི་བྱེད། མྱ་ངན་ལས་འདས་པ་ནི་བདག་གིའོ་སྙམ་དུ་རློམ་སེམས་སུ་མི་བྱེད་དོ། །མྱ་ངན་ལས་འདས་པ་ལ་མངོན་པར་དགའ་བར་མི་བྱེད་དོ། ། དེ་རྟེན་ཅིང་འབྲེལ་པར་འབྱུང་བའི་ཆོས་རྣམ་ཡང་དག་པར་རྗེས་སུ་མཐོང་བ་ན། རྣམ་པར་ཐར་པའི་སྒོ་གསུམ་པོ་ཆོས་རྣམས་ཀྱི་སྟོང་པ་ཉི་དང ། མཚན་མ་མེད་པ་དང ། སྨོན་པ་མེད་པ་ཁོང་དུ་ཆུད་པར་བྱེད་ཅིང་རྣམ་པར་འཇིག་གོ། དེ་རྟེན་ཅིང་འབྲེལ་པར་འབྱུང་བའི་ཆོས་རྣམས་ཡང་དག་པར་རྗེས་སུ་མཐོང་བ་ནི། འདི་ལྟ་སྟེ། མ་རིག་པ་འགགས་པས་འདུ་བྱེད་འགག། འདུ་བྱེད་འགགས་པས་རྣམ་པར་ཤེས་པ་འགག། རྣམ་པར་ཤེས་པ་འགགས་པས། མིང་དང་གཟུགས་འགག། མིང་དང་གཟུགས་འགགས་པས། སྐྱེ་མཆེད་དྲུག་འགག་སྐྱེ་མཆེད་དྲུག་འགགས་པས། རེག་པ་འགག། རེག་པ་འགགས་པས། ཚོར་བ་འགག། ཚོར་བ་འགགས་པས། སྲེད་པ་འགག། སྲེད་པ་འགགས་པས། ལེན་པ་འགག། ལེན་པ་འགགས་པས། སྲིད་པ་འགག། སྲིད་པ་འགགས་པས། སྐྱེ་བ་འགག། སྐྱེ་བ་འགགས་པས། རྒ་ཤི་འགག་པར་རྟེན་ཅིང་འབྲེལ་བར་འབྱུང་བའི་འགག་པ་ཁོང་དུ་ཆུད་པར་བྱེད་ཅིང ། རྣམ་པར་འཇོག་སྟེ། དེ་དེ་ལྟར་
311b
རྟེན་ཅིང་འབྲེལ་པར་འབྱུང་བའི་འགོག་པ་ཡང་དག་པར་རྗེས་སུ་མཐོང་ཡང ། རྟེན་ཅིང་འབྲེལ་བར་འབྱུང་བའི་འགོག་པ་མངོན་སུམ་དུ་ཡང་མི་བྱེད་དེ། དེ་ལྟར་རྟེན་ཅིང་འབྲེལ་བར་འབྱུང་བའི་འགོག་པ་རབ་ཏུ་ཤེས་སོ། །དེ་ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན། དུས་གསུམ་རབ་ཏུ་ཤེས་ཏེ། གསུམ་གང་ཞེ་ན། འདས་པའི་དུས་དང ། མ་འོངས་པའི་དུས་དང ། ད་ལྟར་བྱུང་བའི་དུས་ཏེ། དེ་དག་ནི་དུས་གསུམ་རྣམས་ཞེས་བྱའོ། །འདུ་བྱེད་གང་ལ་ལ་འགགས་པ་དེ་ནི་འདས་པའི་དུས་ཞེས་བྱའོ། །འདུ་བྱེད་གང་ལ་ལ་མ་འོངས་ཤིང་མ་སྐྱེས་པ་དེ་ནི་མ་འོངས་པའི་དུས་ཞེས་བྱའོ། །འདུ་བྱེད་གང་ལ་ལ་ད་ལྟར་བྱུང་བ་ད་ལྟར་དུ་གྱུར་པ་དེ་ནི་ད་ལྟར་བྱུང་བའི་དུས་ཞེས་བྱའོ། །དེ་འདས་པའི་དུས་ཀྱི་བདག་གི་མི་དགེ་བའི་རྩ་བ་རྣམས་རྗེས་སུ་དྲན་ན་སྨོད་ཅིང་བཤུང་སྟེ་ངེས་པར་སྤོང་ངོ ། །མ་འོངས་པའི་དུས་ཀྱི་བདག་གི་མི་དགེ་བའི་རྩ་བ་རྡུལ་ཙམ་ལ་ཡང་གཅིག་ཏུ་རྣམ་པར་སྨིན་པར་མཐོང ། མི་སྡུག་པར་རྣམ་པར་སྨིན་པར་མཐོང ། ཡིད་དུ་མི་འོང་བར་རྣམ་པར་སྨིན་པར་མཐོང ། འཇིགས་པར་མཐོང་ཞིང་གནས་སོ། །ད་ལྟ་བྱུང་བའི་དུས་ཀྱིས་བདག་གི་མི་དགེ་བའི་རྩ་བ་སྐྱེ་བའི་སྐབས་མི་འབྱེད་དེ། ལུས་སྡོམ་པས་བསྡམས། ངག་སྡོམ་པས་བསྡམས། ཡིད་སྡོམ་པས་བསྡམས། དབང་པོ་དྲུག་པོ་སྡོམ་པས་བསྡམས་སོ། །དེ་འདས་པའི་དུས་ཀྱི་བདག་གི་དགེ་བའི་རྩ་བ་རྣམས་དང ། བྱང་ཆུབ་ཏུ་སེམས་བསྐྱེད་པ་དང ། བྱང་
312a
༄#། །ཆུབ་ཀྱི་སེམས་ལ་སྨོན་པ་དང ། བྱང་ཆུབ་ཀྱི་སེམས་ལ་སྨོན་ལམ་འདེབས་པ་རྗེས་སུ་དྲན་ཞིང་འདུན་པ་དྲག་པོ་དང ། དགའ་བ་དྲག་པོ་དང ། དད་པ་དྲག་པོས་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །མ་འོངས་པའི་དུས་ཀྱི་བདག་གི་དགེ་བའི་རྩ་བ་རྣམས་དང ། བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཏུ་སྨོན་པ་དང ། བྱང་ཆུབ་ཏུ་སྨོན་ལམ་འདེབས་པ་ཡང་འདུན་པ་དྲག་པོ་དང ། དགའ་བ་དྲག་པོ་དང ། དད་པ་དྲག་པོས་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་འདོད་དོ། །མོས་སོ། །ཡིད་ཀྱིས་སྨོན་ནོ། །ད་ལྟར་བྱུང་བའི་བདག་གི་དགེ་བའི་སེམས་ཀྱི་རྒྱུན་དང ། དགེ་བའི་སེམས་ཀྱི་རྒྱུད་ཀྱང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་
312b
པར་བྱ་བའི་ཕྱིར་རྟག་པར་རྒྱུན་དུ་མི་འདོར་རོ། །ཉམས་པར་མི་བྱེད་དོ། །བརྗེད་པར་མི་བྱེད་དོ། །བག་མེད་པར་མི་བྱེད་དོ། །གང་འདས་པའི་ཕུང་པོ་དང ། ཁམས་དང ། སྐྱེ་མཆེད་ནི་འདས་པའི་འགགས་པ། མེད་པ། ཡོད་པ་མ་ཡིན་པ་སྟེ། དེ་ནི་ལྟར་བདག་མེད་པ། བདག་གི་མེད་པའོ། །གང་མ་འོངས་པའི་ཕུང་པོ་དང ། ཁམས་དང ། སྐྱེ་མཆེད་དེ་ནི་མ་སྐྱེས་པ། མ་བྱུང་བ། ཡོད་པ་མ་ཡིན་པ་སྟེ།་དེ་ནི་ད་ལྟར་བདག་མེད་པ། བདག་གི་མེད་པའོ། །གང་ད་ལྟར་བྱུང་བའི་དུས་ཀྱི་ཕུང་པོ་དང ། ཁམས་དང ། སྐྱེ་མཆེད་དེ་ནི་མི་གནས་པ། མི་འདུག་པའོ། །དེ་ཅིའི་ཕྱིར་ཞེ་ན། འཇིག་རྟེན་ནི་སྐད་ཅིག་ལས་ལྷག་པར་མི་གནས་པའི་ཕྱིར་རོ། །སྐད་ཅིག་པ་དེའི་སྐྱེ་བའི་དུས་ཀྱང་གཞན། གནས་པའི་དུས་ཀྱང་གཞན། འགག་པའི་དུས་ཀྱང་གཞན། གང་ཡིན་པའི་སྐད་ཅིག་པ་ནི་གནས་པ་མེད་པ། འདུག་པ་མེད་པའོ། །སྐད་ཅིག་གི་དུས་གང་ཡིན་པ་དེ་ནི། ནང་དང ། ཕྱིའི་ཕུང་པོ་དང ། ཁམས་དང ། སྐྱེ་མཆེད་དོ། །ནང་དང ། ཕྱིའི་ཕུང་པོ་དང ། ཁམས་དང ། སྐྱེ་མཆེད་གང་ཡིན་པ་དེ་ནི་དུས་སོ། །ད་ལྟར་བྱུང་བའི་ཕུང་པོ་དང ། ཁམས་དང ། སྐྱེ་མཆེད་གང་ཡིན་པ་དེ་ནི་སྐད་ཅིག་ཙམ་ཡང་མི་གནས་པ། མི་འདུག་པ་སྟེ། མི་གནས་པ། མི་འདུག་པ་ལ་ནི་བདག་གམ། བདག་གི་མེད་དོ། །དེ་ཡང་གང་གི་ཚེ་མ་འོངས་པར་གྱུར་པ་དེའི་ཚེ་མ་སྐྱེས་པ། མ་བྱུང་བ། ཡོད་པ་མ་ཡིན་པའོ། །བདག་ཏུ་མ་གྱུར་ཅིང ། བདག་གིར་མ་གྱུར་པའོ། །གང་གི་ཚེ་འདས་
313a
༄#། །ཏེ་འགགས་པ་དང ། མ་བྱུང་བ་སྟེ་ཡོད་པ་མ་ཡིན་པར་འགྱུར་བ་དེའི་ཚེ་ཡང་བདག་མེད་པ་དང ། བདག་གི་མེད་པ་ཉིད་དུ་འགྱུར་རོ། །གང་ཡང་དུས་གསུམ་དག་ཏུ་བདག་མེད་ཅིང་བདག་གི་མེད་པ་དེ་ནི་མ་བྱུང་ཞིང་ཡོད་པ་མ་ཡིན་པའི་ཕྱིར། མཁས་ཤིང་རིག་པ་རྣམས་ཀྱིས་འདི་ནི་བདག་གིའོ། །འདི་ནི་ངའི་འོ། །བདག་གི་འདི་ནི་ཡོད་དོ་ཞེས་བདག་ཏུ་ལྟ་བར་འོས་པ་མ་ཡིན་ནོ། །དེ་སྲིད་པ་ཐམས་ཅད་དང ། འདུ་བྱེད་ཐམས་ཅད་ལ་བདག་མེད་པའི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། སྤངས་པའི་འདུ་ཤེས་དང ། འགོག་པའི་འདུ་ཤེས་ཅན་དུ་གནས་ཏེ། འགོག་པ་མངོན་སུམ་དུ་བྱེད་པ་ཡང་མ་ཡིན་ནོ། །གང་དེ་ལྟར་དུས་གསུམ་རབ་ཏུ་ཤེས་པ་དེ། ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན། ཐེག་པ་གསུམ་རབ་ཏུ་ཤེས་ཏེ། གསུམ་གང་ཞེ་ན། ལྷའི་ཐེག་པ་དང ། ཚངས་པའི་ཐེག་པ་དང ། འཕགས་པའི་ཐེག་པ་སྟེ། དེ་དག་ནི་ཐེག་པ་གསུམ་ཞེས་བྱའོ། །བསམ་གཏན་དང་པོ་ནི་ལྷའི་ཐེག་པ་སྟེ། བསམ་གཏན་གཉིས་པ་དང ། གསུམ་པ་དང ། བཞི་པ་ཡང་ལྷའི་ཐེག་པའོ། །བྱམས་པ་ནི་ཚངས་པའི་ཐེག་པ་སྟེ། སྙིང་རྗེ་དང ། དགའ་བ་དང ། བཏང་སྙོམས་ཀྱང་ཚངས་པའི་ཐེག་པའོ། །ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་
313b
དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་པ་དང ། ཡང་དག་པའི་ཏིང་ངེ་འཛིན་ཅེས་བྱ་བ་འཕགས་པའི་ལམ་ཡན་ལག་བརྒྱད་པ་ཞེས་བྱ་བ་དེ་ནི་འཕགས་པའི་ཐེག་པ་ཞེས་བྱའོ། །དེ་དུས་དུས་སུ་ལྷའི་ཐེག་པ་སྒོམ་སྟེ། སེམས་ཅན་རྣམས་ཀྱང་དེ་ལ་འགོད། དུས་དུས་སུ་ཚངས་པའི་ཐེག་པ་སྒོམ་སྟེ། སེམས་ཅན་རྣམས་ཀྱང་དེ་ལ་འགོད་དོ། །དུས་དུས་སུ་འཕགས་པའི་ཐེག་པ་བསྒོམ་ཞིང་སེམས་ཅན་རྣམས་ཀྱང་དེ་ལ་འགོད་ལ། རྣམ་པར་གྲོལ་བ་འཕགས་པ་མངོན་སུམ་དུ་ཡང་མི་བྱེད་དོ། །གཞན་ཡང་ཐེག་པ་གསུམ་རབ་ཏུ་ཤེས་ཏེ།་གསུམ་གང་ཞེ་ན། ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོ་སྟེ། དེ་དག་ནི་ཐེག་པ་གསུམ་ཞེས་བྱའོ། །མོས་པ་དམན་པ་དང ། དབང་པོ་དམན་པ་སྐད་ཅིག་ཙམ་ཡང་སྲིད་པ་ལ་མོས་པར་མི་བྱེད། སྲེད་པར་མི་བྱེད་ཀྱི་འདོར་ཏེ། སྐད་ཅིག་དེ་ལ་དེ་མ་ཐག་ཏུ་མྱ་ངན་ལས་འདས་པ་ཐོབ་པའི་ཕན་ཡོན་མཐོང་བས། མགོ་དང་གོས་ལ་མེ་འབར་བ་བཞིན་དུ་འཕགས་པའི་བདེན་པ་བཞི་པོ་དེ་དག་ཁོང་དུ་ཆུད་པ་རྟོགས་པར་བྱ་བའི་ཕྱིར། འདུན་པ་དང་རྩོལ་བའི་ཤས་ཆེ་བ་དེ་ནི་ཉན་ཐོས་ཀྱི་ཐེག་པ་ཞེས་བྱའོ། །མོས་པ་འབྲིང་དང ། དབང་པོ་འབྲིང་དང ། དབེན་པར་དགའ་བ་དང ། རང་གི་དོན་ལྷུར་ལེན་པ་དང ། བསམ་གཏན་དང ། སྙོམས་པར་འཇུག་པ་ལ་གནས་པར་བརྩོན་པ་དང ། རྟེན་ཅིང་འབྲེལ་བར་
314a
༄#། །འབྱུང་བ་ལ་རབ་ཏུ་རྣམ་པར་འབྱེད་པ་ལ་མཁས་པ་དང ། རང་བྱང་ཆུབ་ཏུ་སྨོན་པ་དང ། རང་བྱང་ཆུབ་ཏུ་སྨོན་ལམ་འདེབས་པ་དེ་ནི་རང་སངས་རྒྱས་ཀྱི་ཐེག་པ་ཞེས་བྱའོ། །མོས་པ་ཁྱད་པར་དུ་འཕགས་པ། དབང་པོ་ཁྱད་པར་དུ་འཕགས་པ། སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བའི་ཕྱིར། སངས་རྒྱས་ཀྱི་ཆོས་ཐམས་ཅད་ཡོངས་སུ་བསྐང་བར་འདོད་པ་དང ། ཕ་རོལ་ཏུ་ཕྱིན་པ་དྲུག་ཡོངས་སུ་བསྐང་བར་འདོད་པ་དང ། འཇིག་རྟེན་གྱི་དོན་དུ་འཁོར་བའི་སྡུག་བསྔལ་ལ་མི་ལྟ་བ་དང ། འཁོར་བའི་བདེ་བ་ལ་ཡང་སྨོད་པ་མང་བ་ཡིན་ན། འཁོར་བའི་སྡུག་བསྔལ་ལ་སྨོད་པ་མང་བ་ལྟ་སྨོས་ཀྱང་ཅི་དགོས་ཏེ། ཚུལ་ཁྲིམས་དང ། སྤྱོད་པ་ཁྱད་པར་དུ་འཕགས་པ་ལ་རྣམ་པར་གནས་པ་དང ། རྫོགས་པའི་བྱང་ཆུབ་ཀྱི་ཐེག་པ་ཅན་གྱི་མདོ་སྡེ་རྣམས་ཀློག་པ་དང ། ཁ་ཏོན་དུ་བྱེད་པ་དང ། ལུང་ནོད་པ་དང ། ཡིད་ལ་བྱེད་པ་ལ་བརྩོན་འགྲུས་བརྩམས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡིན་པ་དེ་དག་དགེ་བའི་བཤེས་གཉེན་ཡིན་པ་དང ། དེ་དག་གི་བྱིན་གྱི་རླབས་བཞི་པོ་བདེན་པ་དང ། གཏོང་བ་དང ། ཉེ་བར་ཞི་བ་དང ། ཤེས་རབ་ལ་སློབ་པ་དང ། ཤེས་བྱ་ཐམས་ཅད་ཉན་པ་དང ། ལེན་པ་དང ། འཛིན་པ་དང །
314b
དཔྱོད་པར་དགའ་བ་དང ། ཏིང་ངེ་འཛིན་དང ། སྙོམས་པར་འཇུག་པ་ཐམས་ཅད་ཡང་དག་པར་བསྐྱེད་པར་འདོད་པ་དང ། རང་གི་དོན་ལ་མི་ལྟ་བ་དང ། འཇིག་རྟེན་གྱི་དོན་ལྷུར་ལེན་པ་དང ། སྟོབས་ཇི་ལྟ་བ་བཞིན་དུ་སེམས་ཅན་ཐམས་ཅད་ཐེག་པ་གསུམ་པོ་དག་ལ་དགོད་པར་འདོད་པ་དང ། དགོད་པར་སྤྲོ་བ་དང ། བདག་ཉིད་ཀྱང་བྱང་ཆུབ་ཀྱི་ཐེག་པ་ལ་ཤིན་ཏུ་གནས་པ་དང ། མི་བྱེད་པ་དང ། མི་བསྐྱོད་པ་དང ། རྡོ་རྗེ་ལྟ་བུའི་སེམས་དང ། རྟག་པར་རྒྱུན་དུ་བྱང་ཆུབ་ཏུ་སྨོན་ཅིང ། བྱང་ཆུབ་ཏུ་སྨོན་ལམ་འདེབས་པ་དེ་ནི་ཐེག་པ་ཆེན་པོ་ཞེས་བྱ་སྟེ། དེ་ལྟར་ཐེག་པ་གསུམ་པོ་དག་རབ་ཏུ་ཤེས་སོ། །དེ་ཆོས་དེ་དག་ཉན་ཅིང་འཛིན་པ་དང ། མང་དུ་བྱེད་ཅིང་ཡོངས་སུ་རྟོག་པ་ན་དགེ་བའི་ཐབས་རབ་ཏུ་ཤེས་ཏེ། སངས་རྒྱས་དང ། ཆོས་དང ། དགེ་འདུན་ཐམས་ཅད་ལ་ཕྱག་འཚལ་ལོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པ། འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་ཐམས་ཅད་དང ། ཆོས་ཐམས་ཅད་དང ། དགེ་འདུན་ཐམས་ཅད་ལ་ཕྱག་འཚལ་ལོ་ཞེས་དམིགས་པར་བྱེད་དོ། །དེ་ཕྱག་ལན་གཅིག་འཚལ་བ་ན་མཐའ་ཡས་ཤིང་དཔག་ཏུ་མེད་པར་ཕྱག་འཚལ་བར་བྱའོ་སྙམ་དུ་སེམས་བསྐྱེད་དོ། །དེ་བྱང་ཆུབ་ཏུ་སྨོན་པ་ན། སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་
315a
༄#། །བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །དེ་བཞིན་དུ་སྐྱབས་སུ་འགྲོ་བ་ན་ཡང་སེམས་བསྐྱེད་དོ། །དེ་འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དང ། ཁྲུས་བྱེད་པ་དང ། ཟ་བ་དང ། འཐུང་བ་དང ། ཞིང་རྨོ་བ་དང ། ས་བོན་འདེབས་པ་དང ། ལས་ཐམས་ཅད་བྱེད་པ་ན་ཡང་མཐའ་ཡས་ཤིང་དཔག་ཏུ་མེད་པར་བྱང་ཆུབ་ཏུ་སྨོན་ལམ་གདབ་པར་བྱའོ་ཞེས་སེམས་བསྐྱེད་དོ། །མང་དུ་བྱེད་དོ། །སྙོམས་པར་འཇུག་པ་དང ། བསམ་གཏན་བྱེད་པ་ན་ཡང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར། མཐའ་ཡས་ཤིང་དཔག་ཏུ་མེད་པར་བྱང་ཆུབ་ཏུ་སྨོན་ལམ་གདབ་བོ་ཞེས་སེམས་བསྐྱེད་དོ། །མང་དུ་བྱེད་དོ། །ཐམས་ཅད་མཁྱེན་པ་ཉིད་དང ། འཇིག་རྟེན་ཐམས་ཅད་ཀྱི་མཆོག་དང ། སེམས་ཅན་ཐམས་ཅད་གདུལ་བ་དང ། མཚུངས་པ་མེད་པ། མི་མཉམ་པ་དང་མཉམ་པ་དང ། འཇིག་རྟེན་ཐམས་ཅད་དབུགས་དབྱུང་བ་དང ། འཇིག་རྟེན་ཐམས་ཅད་ཡོངས་སུ་མྱ་ངན་ལས་བཟླ་བ་དང ། ཡང་དག་པར་རྫོགས་པའི་སངས་རྒྱས་དང ། སངས་རྒྱས་ཀྱི་ཆོས་ཐམས་
315b
ཅད་ཡོངས་སུ་རྫོགས་པར་བྱ་བའི་ཕྱིར་སྨོན་ལམ་གདབ་བོ་ཞེས་སེམས་བསྐྱེད་དོ། །མང་དུ་བྱེད་དོ། །དེ་དགེ་བ་གང་ཅི་སྤྱོད་ཀྱང ། དེ་སེམས་ཅན་ཐམས་ཅད་ཀྱི་འཇིགས་པ་མེད་པར་བྱ་བ་དང ། ངན་འགྲོའི་རྒྱུད་གཅད་པ་དང ། སྡུག་བསྔལ་ཐམས་ཅད་ཉེ་བར་ཞི་བར་བྱ་བ་དང ། ཉོན་མོངས་པ་ཐམས་ཅད་ཉེ་བར་ཞི་བར་བྱ་བ་དང ། མྱ་ངན་ལས་འདས་པ་ཐོབ་པར་བྱ་བར་ཕྱིར་ཡོངས་སུ་བསྔོ་པར་བྱེད་དོ། །ཉན་ཐོས་ཀྱི་ཐེག་པ་ཅན་ད་ལྟར་བྱུང་བ་དང ། མ་འོངས་པ་རྣམས་ཀྱི་ཉན་ཐོས་ཀྱི་ཐེག་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །རང་སངས་རྒྱས་ཀྱི་ཐེག་པ་ཅན་ད་ལྟར་བྱུང་བ་དང ། མ་འོངས་པ་རྣམས་ཀྱི་རང་སངས་རྒྱས་ཀྱི་ཐེག་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །བྱང་ཆུབ་སེམས་དཔའི་ཐེག་པ་ཅན་ད་ལྟར་བྱུང་བ་དང ། མ་འོངས་པ་རྣམས་ཀྱི་བྱང་ཆུབ་སེམས་དཔའི་ཐེག་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །དེ་བཞིན་གཤེགས་པ་འཇིག་རྟེན་གྱི་ཁམས་ཐམས་ཅད་དུ་གཏོགས་པ་འདས་པ་དང ། མ་བྱོན་པ་དང ། ད་ལྟར་བྱུང་བ་རྣམས་བསྐལ་བར་བཞུགས་པ་དང ། བསྐལ་པར་ཆོས་སྟོན་པ་དང ། བསྐལ་པར་དགེ་འདུན་མཐུན་པར་འགྱུར་བར་ཡོངས་སུ་བསྔོ་བར་བྱེད་དོ། །མཐོ་རིས་ཀྱི་ལམ་ལ་དགོད་པའམ། ཉན་ཐོས་ཀྱི་ལམ་ལ་དགོད་པའམ། རང་སངས་རྒྱས་ཀྱི་ལམ་ལ་དགོད་པའམ། རྫོགས་པའི་བྱང་ཆུབ་ཀྱི་ལམ་ལ་དགོད་པའམ།
316a
༄#། །སྦྱིན་པས་རྗེས་སུ་འཇུག་པའམ། སྙན་པར་སྨྲ་བས་རྗེས་སུ་འཇུག་པའམ། དོན་སྤྱོད་པས་རྗེས་སུ་འཇུག་པའམ། དོན་མཐུན་པས་རྗེས་སུ་འཇུག་པའམ། ཇི་ལྟ་ཇི་ལྟར་གཞན་དག་དགེ་བའི་ཕྱོགས་ཡང་དག་པར་བསྐྱེད་ཅིང ། དགེ་བའི་རྩ་བ་གསོག་པར་འགྱུར་བ་དེ་ཡང་རབ་ཏུ་ཤེས་སོ། །དེ་ཆོས་ཀྱི་ཚིག་འདི་དག་ལ་ཉིན་གཅིག་བཞིན་དུ་དུས་གསུམ་དུ་འཇུག་གོ། ཡིད་ལ་བྱེད་དོ། །དེ་འདི་ལྟ་སྟེ། འཇིག་རྟེན་དག་གི་ཁམས་རྣམས་ཐམས་ཅད་ན། །ཡང་དག་བཞུགས་པ་རྫོགས་པའི་སངས་རྒྱས་དང ། །ཆོས་དང་དགེ་འདུན་བྱང་ཆུབ་སེམས་དཔའ་ལ། །གན་འགྲོ་མགོ་བོས་མཐའ་ཡས་ཕྱག་ཀྱང་འཚལ། །འགྲོ་བའི་ནང་ན་ཡོན་ཏན་མཉམ་མེད་ཅིང ། །མི་མཉམ་མཉམ་པའི་ཡོན་ཏན་འབྱུང་གནས་ཅན། །ཡོན་ཏན་དཔག་མེད་དེ་དག་ཐམས་ཅད་ལ། །བདག་ནི་མགོ་བོས་མཐའ་ཡས་སྐྱབས་སུ་མཆི། །སངས་རྒྱས་དང་ནི་ཆོས་དང་ཚོགས་རྣམས་དང ། །བྱང་ཆུབ་སེམས་དཔའ་རྣམས་ཀྱིས་འཇིག་རྟེན་ཁམས། །གང་ཡང་བརྒྱ་ལམ་སྟོངས་པར་མི་འགྱུར་བར། །དེ་ལྟར་གསོལ་བ་མཐའ་ཡས་རབ་ཏུ་འདེབས། །ཞི་བའི་ཆོས་ནི་རབ་ཏུ་སྟོན་མཛད་ཅིང ། །བསྐལ་པ་མ་ལུས་རྣམས་སུ་བཞུགས་པར་ཡང ། །འཇིག་རྟེན་ཁམས་རྣམས་ཀུན་གྱི་བདེ་གཤེགས་ལ། །མགོ་བོས་གསོལ་བ་མཐའ་ཡས་རབ་ཏུ་འདེབས། །སྔོན་དང་འདི་དང་སྐད་ཅིག་ཙམ་ཡང་རུང ། །བདག་གིས་སྡིག་པ་
316b
གང་དང་གང་བགྱིས་པ། །སྡིག་པ་དེ་དག་ཐམས་ཅད་སྨད་པར་བགྱི། །སྡིག་པ་ཐམས་ཅད་བདག་གིས་སྤང་བར་བགྱི། །སྐད་ཅིག་ཙམ་ཡང་བདག་གིས་དགེ་བ་འདི། །མ་ལུས་པར་ནི་ཡང་དག་གཟུང་བར་བགྱི། །ཚེ་ཡིས་ཇི་ཙམ་ཐུབ་ཀྱི་བར་དུ་ནི། །དགེ་བ་ཀུན་ལ་གནས་པར་འགྱུར་བར་འཚལ། །སངས་རྒྱས་དག་དང་བྱང་ཆུབ་སེམས་དཔའ་རྣམས། །བྱང་ཆུབ་ཆོས་ཀྱི་འཁོར་ལོ་རབ་བསྐོར་བ། ། འཇིག་རྟེན་འདིར་ནི་བྱུང་དང་བྱུང་གྱུར་དང ། །འབྱུང་འགྱུར་རྣམས་ཀྱི་དགེ་བ་ཐམས་ཅད་དང ། །རྒྱལ་བ་རྣམས་དང་འཕགས་པ་ཐམས་ཅད་ཀྱི། །ཚུལ་ཁྲིམས་དང་ནི་ཡེ་ཤེས་ཏིང་འཛིན་དང ། ། རྣམ་གྲོལ་ཚེ་དང་ཆོས་རྣམས་གང་ཡིན་པ། །དེ་དག་འཇིག་རྟེན་རྣམས་ལ་ཕན་གྱུར་ཅིག། འགྲོ་བ་ལྔ་ཡི་སེམས་ཅན་ཐམས་ཅད་དག། བྱུང་དང་བྱུང་གྱུར་འབྱུང་བར་འགྱུར་རྣམས་ཀྱི། །དགེ་བ་དག་ལ་བདག་ནི་ཕྱི་ཕྱིར་ཞིང ། །མགོ་བོས་མཐའ་ཡས་རྗེས་སུ་ཡི་རང་ངོ ། །ཡོན་ཏན་ཡང་དག་དགེ་བ་མཐའ་ཡས་པ། །དེ་དག་ཐམས་ཅད་འགྲོ་བ་མ་ལུས་པས། །སེམས་ཅན་རེ་རེ་དང་ནི་བདག་ཉིད་ལའང ། །ཡོད་པར་བདག་ནི་སྨོན་ལམ་མཐའ་ཡས་འདེབས། །བདག་གི་དགེ་བ་དག་ནི་འདས་པ་དང ། །མ་འོངས་པ་དང་ད་ལྟར་ཐམས་ཅད་ཀྱིས། །འཇིག་རྟེན་དག་གི་ཁམས་ནི་ཐམས་ཅད་དུ། །དཀོན་མཆོག་གསུམ་པོ་རྟག་ཏུ་འབྱུང་བར་ཤོག། དཀོན་མཆོག་གསུམ་དང་བྱང་ཆུབ་སེམས་དཔའ་རྣམས། །བསྐལ་པར་བཞུགས་པས་ཕོངས་པར་མ་གྱུར་ཅིག་།བར་དུ་གཅོད་
317a
༄#། །པ་མེད་པར་བྱང་ཆུབ་དང ། ཕ་རོལ་ཕྱིན་པ་རྣམས་ནི་རྫོགས་པར་ཤོག། སེམས་ཅན་དག་ནི་ཐམས་ཅད་བདེ་བ་དང ། །འཇིགས་པ་མེད་ཅིང་ངན་འགྲོ་འདས་པ་དང ། །མི་དགེ་ཐམས་ཅད་དང་ནི་བྲལ་བ་དང ། །དགེ་བའི་རྩ་བ་ཐམས་ཅད་རྫོགས་གྱུར་ཅིག། ཐེག་པ་གསུམ་པོ་དག་ལ་ཅི་རིགས་པར། །དེ་དག་ལ་ནི་སྨོན་ལམ་མཐར་ཕྱིན་ཅིང ། །ཚེ་རིང་པ་དང་རྣམ་པར་གྲོལ་བ་དང ། ཁྱད་པར་ཅན་གྱི་དོན་ཀུན་རྫོགས་པར་ཤོག་།རྫོགས་པའི་བྱང་ཆུབ་སྨོན་ལམ་འདེབས་པ་ན། །མཐའ་ཡས་དཔག་ཏུ་མེད་པར་རབ་ཏུ་འདེབས། །སེམས་ཅན་ཐམས་ཅད་བདག་གི་སྡུག་བསྔལ་དང ། །ཉོན་མོངས་དག་ནི་ཉེ་བར་ཞི་གྱུར་ཅིག། ཆོས་དང་ལྡན་པའི་བྱ་བ་རྣམས་ཀྱི་ཕྱིར། །འཇིག་རྟེན་གྱི་ནི་ཁམས་རྣམས་ཐམས་ཅད་ཀྱི། །རྒྱལ་བ་ཀུན་དང་བྱང་ཆུབ་སེམས་དཔའ་ལ། །རང་གི་ལུས་ནི་ངེས་པར་དབུལ་བར་བགྱི། །རྫོགས་པའི་བྱང་ཆུབ་ཐོབ་པར་འགྱུར་བར་དུ། །མ་འོངས་པ་ན་སྨོན་ལམ་མཐའ་ཡས་གདབ། །སྐྱེ་དང་སྐྱེ་བར་དཀོན་མཆོག་གསུམ་པོ་ལ། །བདག་ནི་ཡོངས་སུ་སྤྱད་པར་བགྱི་བར་ཤོག། འཇིག་རྟེན་དག་གི་ཁམས་རྣམས་ཐམས་ཅད་ཀྱི། །དཀོན་མཆོག་གསུམ་དང་བྱང་ཆུབ་སེམས་དཔའ་ལ། །ནམ་མཁའ་མཉམ་པའི་ལྷ་ཡི་སྤོས་མཆོག་དང ། །ཕྲེང་བ་མེ་ཏོག་ཆུན་པོས་མཆོད་བྱེད་ཤོག། ལྷུན་པོ་མཉམ་པའི་གསེར་དང་དངུལ་དག་དང ། །གོས་དང་རིན་པོ་ཆེ་ཡི་ཕུང་པོ་དང ། །གཞལ་མེད་ཁང་བཅས་
317b
བཞོན་དང་མལ་ཆ་དང ། །བཟའ་བ་མཐའ་ཡས་དག་ནི་སྦྱིན་པར་ཤོག། འགྲོ་བའི་བསམ་པ་ལམ་གྱིས་རྫོགས་བྱེད་ཅིང ། །སྐྱབས་དང་ལུས་དང་ཕ་འདྲར་གྱུར་པར་ཤོག། བཟོད་ལ་དགའ་ཞིང་ཚུལ་ཁྲིམས་གཙང་བ་དང ། །འགྲོ་ལ་ཆོས་ནི་རབ་ཏུ་སྟོན་གྱུར་ཅིག། བྱང་ཆུབ་ཐེག་པ་མཆོག་ནི་རྙེད་པ་དང ། །དཀོན་མཆོག་གསུམ་ཕྱིར་གོ་ཆ་སྲ་བ་བགོ། ཕ་རོལ་ཕྱིན་པ་ཡོངས་སུ་རྫོགས་བྱེད་ཅིང ། །སངས་རྒྱས་ཆོས་རྣམས་ཡོངས་སུ་རྫོགས་བྱེད་ཤོག། སྡིག་པ་ཀུན་དང་བྲལ་ཞིང་ལུས་ངག་དང ། །ཡིད་ཀྱི་ལས་མཐའ་དགེ་བ་མཆོག་གྱུར་ཅིག། བྱང་ཆུབ་ལས་ནི་མི་ལྡོག་བདག་འགྱུར་ཞིང ། །བྱང་ཆུབ་དགའ་དང་བྱང་ཆུབ་སེམས་དཔར་འགྱུར། །སྲིད་དང་སྲིད་པར་བྱང་ཆུབ་སེམས་དཔའ་དང ། །སངས་རྒྱས་རྣམས་ཀྱི་དགེ་བ་ཀུན་ལ་སློབ། །བདག་གི་ཆོས་རྣམས་དེ་དག་ཀུན་ལ་ཡང ། །འཇིག་རྟེན་ཐམས་ཅད་རབ་ཏུ་དགོད་པར་བགྱི། །དེ་དེ་ལྟར་ནི་བདག་དང་གཞན་དག་གི་དགེ་བའི་རྩ་བ་བསགས་པ་རབ་ཏུ་ཤེས་སོ། །དེ་ཤེས་རབ་དེ་དང ། ཡེ་ཤེས་དེས་མངོན་སུམ་དུ་བྱ་བར་འདོད་པ་དང་ཡིད་ལ་བྱ་བར་འདོད་པ་ན་ཡང ། སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །མངོན་སུམ་དུ་བྱེད་པ་དང ། ཡིད་ལ་བྱེད་པ་
318a
༄#། །དང ། མངོན་སུམ་དུ་བྱས་པ་དང ། ཡིད་ལ་བྱས་ནས་ཀྱང་སེམས་ཅན་ཐམས་ཅད་བསྒྲལ་བ་དང ། སེམས་ཅན་ཐམས་ཅད་དགྲོལ་བ་དང ། སེམས་ཅན་ཐམས་ཅད་དབུགས་དབྱུང་བ་དང ། ཐམས་ཅད་མཁྱེན་པ་ཉིད་ཐོབ་པར་བྱ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །གལ་ཏེ་ཤེས་རབ་དེ་དང ། ཡེ་ཤེས་དེ་ལ་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་ཡང་དག་པར་སློབ་སྟེ། དུས་དུས་སུའམ། ཅུང་ཟད་ཅུང་ཟད་དུ་ཡང་འཆལ་བའི་ཤེས་རབ་དང ། མི་ཤེས་པ་སྤང་བ་དང ། དོར་བ་དང ། བརྩལ་བར་རྩོལ་ལོ། །འབད་དོ། །དུས་དུས་སུ་འམ། ཅུང་ཟད་ཅུང་ཟད་དུའང་ཤེས་རབ་དང ། ཡེ་ཤེས་ལ་སློབ་པ་དང ། མངོན་པར་འཕེལ་བར་བྱ་བ་དང ། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང ། སྒྱིད་ལུག་པར་མི་འགྱུར་རོ། །ལག་བཟང ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཏུ་སེམས་བསྐྱེད་པ་དང ། བྱང་ཆུབ་ཀྱི་སེམས་རྗེས་སུ་དྲན་པ་དང ། བྱང་ཆུབ་ཀྱི་སེམས་བསྒོམ་པ་དང ། བྱང་ཆུབ་ཏུ་སྨོན་པ་དང ། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་ཤེས་རབ་དགེ་བ་དང ། ཡེ་ཤེས་དགེ་བ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་
318b
སེམས་ཅན་ཐམས་ཅད་ལ་ཟག་པ་མེད་པའི་ཤེས་རབ་བསྐྱེད་པར་འདོད་པ་དང ། མི་སློབ་པའི་ཤེས་རབ་བསྐྱེད་པར་འདོད་པ་དང ། ཟག་པ་མེད་པའི་ཤེས་རབ་ཡང་དག་པར་བསྐྱེད་པར་འདོད་པ་དང ། མི་སློབ་པའི་ཤེས་རབ་ཡང་དག་པར་བསྐྱེད་པར་འདོད་པ་དེ་ནི་ཤེས་རབ་དགེ་བ་དང ། ཡེ་ཤེས་དགེ་བ་ཐམས་ཅད་ཀྱི་མཆོག་ཡིན་ནོ། །དེ་ནི་དམ་པ་ཡིན་པའི་ཕྱིར་རོ། །ལག་བཟང་དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ། ཡིད་བདེ་བ་དང་ལྡན་ཞིང་ཚེགས་ཆུང་ངུ་དང ། སྡུག་བསྔལ་ཆུང་ངུས་མྱུར་དུ་སྐྱེན་པར་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པ་ནི། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱའོ། །ཆོས་ཀྱི་རྣམ་གྲངས་འདི་བཤད་པ་ན། ལྷ་དང་མིའི་སྐྱེ་དགུའི་སེམས་ཅན་གྲངས་མེད་དཔག་ཏུ་མེད་པ་དག་ཐེག་པ་གསུམ་དང ། མཐོ་རིས་སུ་སྐྱེ་བའི་དོན་བྱས་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ལག་བཟང་དང ། བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་
319a
༄#། །རྣམ་གྲངས་ལེའུ་སྟོང་ཕྲག་བརྒྱ་པ་ལས། ལག་བཟང་གིས་ཞུས་པའི་ལེའུ་ཞེས་བྱ་སྟེ། འདུས་པ་ཉི་ཤུ་རྩ་དྲུག་པ་རྫོགས་སོ།། །།རྒྱ་གར་གྱི་མཁན་པོ་དྷ་ན་ཤཱི་ལ་དང ། ཛི་ན་མི་ཏྲ་དང ། ཞུ་ཆེན་གྱི་ལོ་ཙཱ་བ་བན་དེ་ཞང་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ།།