རྒྱ་གར་སྐད་དུ། ཨཱརྱ་ཨ་མོ་གྷ་དཱ་ཤ་ཀལྥ་རཱ་ཛ་བི་དྷི་ནཱ་མ། བོད་སྐད་དུ། འཕགས་པ་དོན་ཡོད་ཞགས་པའི་རྟོག་པའི་རྒྱལ་པོའི་ཆོ་ག་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེང་བདག་ཅག་གིས་འཁོར་གྱི་དཀྱིལ་འཁོར་གྱི་དབུས་སུ་སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བགྱིས་ཤིང་བསྔགས་པ་དོན་ཡོད་པའི་ཞགས་པའི་རྟོག་པའི་རྒྱལ་པོའི་ཆོ་ག་ཞིབ་མོ་ཞེས་བགྱི་བ་འདི་ཉིད་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། རྗེས་སུ་བརྩེ་བར་བགྱི་བའི་སླད་དུ་བརྗོད་པར་བགྱི་ཡིས་གསོན་ཅིག་།ོཾ་པདྨ་ཧསྟ་མཧཱ་ཨ་མོ་གྷ་པཱ་ཤ་ས་ཧཱ་ཡཾ་ས་མ་ཡ་ཧྲྀ་ད་ཡཱཾ་ཙ་ར་ཙ་ར་ཧཱུཾ། དོན་ཡོད་པའི་རང་བཞིན་གྱི་སྤྱན་རས་གཟིགས་ཀྱི་སྙིང་པོ་ཞེས་བགྱི་སྟེ། ལས་ཐམས་ཅད་ཀྱང་བགྱི་བའོ། །ོཾ་དི་བྱ་སཾ་པཱུ་ར་ནཾ་གེ་ཕི་ཀི་ཀཥ་ཎི་ཧཱུཾ། འཁར་གསིལ་གྱི་རིག་པ་སྟེ། ལན་ཉི་ཤུ་རྩ་གཅིག་བཟླས་ན་སྒྲ་གྲགས་པས་སེམས་ཅན་རྣམས་ངན་འགྲོ་ལས་ཐར་བར་ 476b འགྱུར་རོ། །ོཾ་པཏྟྲ་པཱུ་ར་ཡ་ཨ་མོ་གྷ་བ་ཏོ་ས་མནྟ་པྲ་བྷེ་སཝཱ་ཧཱ། ལྷུང་བཟེད་ཀྱི་རིག་པ་སྟེ། ལན་ཉི་ཤུ་རྩ་གཅིག་བཟླས་ན་བདུད་རྩིའི་རྣམ་པར་འགྱུར་ཞིང་གང་གིས་ཟོས་པ་རྣམས་ངན་འགྲོ་ལས་ཐར་པར་འགྱུར་རོ། ། ཕྱག་རྒྱ་ཐལ་མོ་ལྷན་ཅིག་ཏུ་དམ་དུ་སྦྱར་བ་ལས་སླར་པདྨའི་ཚུལ་དུ་བགྱིས་ནས་མཛུབ་མོ་ནོར་བུ་ལྟ་བུར་བགྱིས་ཏེ། གུང་མོ་ཡིད་ཙམ་བཀུག་པ་ནི་ཡིད་བཞིན་གྱི་ནོར་བུ་ཆེན་པོའི་རྒྱལ་མཚན་གྱི་རྩེ་མོའི་ཕྱག་རྒྱ་སྟེ། ལག་པ་སྤྱི་བོར་བཀན་ནས་བཞག་པ་སྤྱི་བོར་དབང་བསྐུར་བའི་རིག་པ་འདི་ལན་བདུན་བརྗོད་དོ། །ོཾ་ཏྲྱཻ་བྷཱ་ས་ནུ་ག་ཏ། ཨ་བྷི་ཥིཉྩ་ཏུ་མཱཾ་ས་རྦཏྲཻ་ཡ་དྷཱི་ཀེ་པདྨ་མ་ཎི་སུ་པདྨེ་ཨ་མོ་གྷེ་སརྦ་ཏ་ཐཱ་ཏཱ་འགྱུར་རོ། །རིག་སྔགས་འདིས་དབང་བསྐུར་བ་ཙམ་གྱིས་རིག་སྔགས་འཆང་ལ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གིས་དབང་བསྐུར་བར་འགྱུར་རོ། །རིག་སྔགས་འཆང་གི་རྒྱལ་པོ་ཆེན་པོར་ཡང་འགྱུར་རོ། །རིག་སྔགས་ཐམས་ཅད་ཀྱང་འགྲུབ་པར་འགྱུར་རོ། །ཉོན་མོངས་པའི་སྒྲིབ་པ་ཐམས་ཅད་ཀྱང་རྣམ་པར་དག་པར་འགྱུར་རོ། །འཇིག་རྟེན་གྱི་གཙོ་བོ་གཅིག་པུའི་གནས་སུ་ཡང་འགྱུར་པར་ཐེ་ཚོམ་མ་མཆིས་སོ། །ོཾ་པདྨོ་ཥྞཱི་ཥ་པི་མ་ལེ་ཧཱུཾ་ཕཊ། བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོགང་ལ་ལས་གསང་སྔགས་ཀྱི་སྙིང་པོ་ཡི་གེ་བཅུ་པ་འདི་སྙིང་རྗེ་དང་ལྡན་པར་བགྱིས་ཏེ་བཟླས་བརྗོད་བགྱིས་ན་བྱང་ཆུབ་ལས་ཕྱིར་མི་ལྡོག་པར་འགྱུར་བ་ནས་ས་བཅུ་ལ་གནས་པའི་བར་དུ་འགྱུར་ཞིང ། ལྷ་དང ། མིའི་སྐྱེ་དགུ་དག་གིས་འདི་ནི་དེ་བཞིན་གཤེགས་པའོ་ཞེས་བརྗོད་པར་འགྱུར་ལ། བླ་ན་མེད་པ་ཡང་ 477a ༄#། །དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། དོན་ཡོད་པའི་ཞགས་པའི་པདྨའི་གཙུག་ཏོར་དྲི་མ་མེད་པའི་འཁོར་ལོས་སྒྱུར་བར་འགྱུར་ཏེ་འདི་ལ་ཐེ་ཚོམ་མ་མཆིས་སོ། །བཅོམ་ལྡན་འདས་གསང་སྔགས་ཀྱི་སྙིང་པོ་ཡི་གེ་བཅུ་པ་འདི་ནི་ཡོན་ཏན་ཆེན་པོ་ཚད་མ་མཆིས་པ་རྣམས་དང་ལྡན་པར་རིག་པར་བྱའོ། །བཅོམ་ལྡན་འདས་ཀྱིས་བཀའ་སྩལ་བ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་གཟུངས་སྔགས་ཀྱི་སྙིང་པོ་འདི་དག་ནི་ཡི་གེ་འབྲུ་རེ་རེ་ཙམ་བཟླས་བརྗོད་བྱས་པ་ཙམ་གྱིས་ཀྱང་སངས་རྒྱས་ཀྱི་མཛད་པ་བྱེད་པར་འགྱུར་ན། རིགས་ཀྱི་བུ་གང་གིས་ཆེད་དུ་གཉེར་ཏེ། ཆེས་ངལ་ཞིང་དུབ་པར་བཟླས་བརྗོད་དང ། སྒྲུབ་པ་དང ། ཆོ་གས་ཚུལ་བཞིན་དུ་རྒྱས་པར་སྒྲུབ་པ་རྣམས་ལྟ་སྨོས་ཀྱང་ཅི་དགོས། དོན་ཡོད་པའི་ཞགས་པའི་པདྨའི་གཙུག་ཏོར་དྲི་མ་མེད་པའི་སྙིང་པོ་ཁྲོ་བོའི་གཟུངས་སྔགས་རིམ་པར་ཕྱེ་བ་གསང་སྔགས་ཆེན་པོ་ཡི་གེ་བཅུ་པ་འདི་ལན་གཅིག་ཙམ་དྲན་ནམ། བཀླགས་སམ། མིང་ཙམ་ཡང་བཟུང་ངམ། དུས་ཚིགས་འགའ་རེར་དྲན་པ་ཙམ་གྱིས་ཀྱང་སེམས་ཅན་དེའི་མཚམས་མེད་པའི་ལས་བྱས་པས་མནར་མེད་པའི་དམྱལ་བར་གཞོལ་བ་ཚེ་བསྐལ་བར་གནས་པར་འགྱུར་བ་ཡང་ལས་ཐམས་ཅད་རྣམ་པར་དག་པར་འགྱུར་རོ། །སྡིག་པ་དང་སྒྲིབ་པ་ཐམས་ཅད་ཀྱང་རང་རབ་ཏུ་ཟད་པར་འགྱུར། ལུས་ཡོངས་སུ་དག་ཅིང་དྲི་མ་མེད་པར་འགྱུར། སྒྲིབ་པ་དང ། ཉོན་མོངས་པ་ཐམས་ཅད་དང་བྲལ་ 477b པར་འགྱུར། ཚེ་འཕོས་ནས་ཀྱང་བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་བརྫུས་ཏེ་སྐྱེ་བར་འགྱུར་རོ། །ཚེ་རབས་ཐམས་ཅད་དུ་སྐྱེ་བ་དྲན་པར་འགྱུར། ནམ་ཡང་ངན་འགྲོར་འགྲོ་བར་མི་འགྱུར། བསྐལ་པ་བྱེ་བ་འབུམ་ཕྲག་བརྒྱད་ཅུར་འཁོར་ལོས་སྒྱུར་བའི་མཆོག་ཏུ་འགྱུར་རོ། །སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་རྣམས་སུ་འགྲོ་བར་འགྱུར། སངས་རྒྱས་བཅོམ་ལྡན་འདས་རྣམས་ཀྱིས་རབ་ཏུ་དགོངས་པར་འགྱུར་རོ། །སྒྲུབ་པའི་ཆོ་གའོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་བ། ལག་ན་རྡོ་རྗེ་གསང་སྔགས་ཀྱི་རྩ་བ་དོན་ཡོད་པའི་ཞགས་པའི་པདྨའི་གཙུག་ཏོར་གྱི་སྙིང་པོ་དྲི་མ་མེད་པ་གསང་བ་འདི་རིག་སྔགས་འཆང་བའི་རིག་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལས་ལན་ཅིག་ཙམ་ཡང་དྲན་པས་ཡིད་ལ་བྱེད་ཅིང ། ཡོངས་སུ་དག་པའི་བདག་ཉིད་སྙིང་རྗེ་ཆེན་པོ་དང ། བྱམས་པའི་སེམས་དང་ལྡན་པ་དང ། ལྷག་པའི་བསམ་པས་སེམས་ཅན་ཐམས་ཅད་ཡོངས་སུ་མི་གཏོང་བའི་བློ་དང ། དམིགས་པ་དང་ལྡན་པས་སེམས་ཅན་གང་ཡང་རུང་བའི་རྣ་ཁུང་དུ་བརྗོད་ན་སེམས་ཅན་དེ་དག་ངན་སོང་དུ་སྐྱེ་བར་མི་འགྱུར་ཏེ་དེ་ནི་གནས་མེད་དོ། །སེམས་ཅན་དེ་དག་ཐམས་ཅད་དགེ་བའི་རྩ་བ་ཆེན་པོ་དང་ཡང་ལྡན་པར་འགྱུར་རོ། །ལན་གཉིས་བརྗོད་ན་ནད་ཐམས་ཅད་རབ་ཏུ་ཞི་བར་འགྱུར་རོ། །ལན་གསུམ་བརྗོད་ན་རིམས་དང ། འབྲུམ་བུ་དང ། འབྲས་དང ། 478a ༄#། །ལྷོག་པ་དང ། མེ་དཔལ་དང ། གཡན་པ་དང ། རྐང་ཤུ་དང ། མཛེ་ནད་ཐམས་ཅད་རབ་ཏུ་ཞི་བར་འགྱུར་རོ། ལན་བཞི་བརྗོད་ན། དུག་དང ། དབྱིག་དུག་དང ། བྱང་དང ། གཤེད་བྱེད་ཐམས་ཅད་རབ་ཏུ་ཞི་བར་འགྱུར་རོ། །ལན་ལྔ་བརྗོད་ན་འཐབ་པ་དང ། རྩོད་པ་དང ། འགྱེད་པ་དང ། ཤགས་སུ་གྱུར་བ་ཐམས་ཅད་རབ་ཏུ་ཞི་བར་འགྱུར་རོ། །ལན་དྲུག་བརྗོད་ན་འཇིགས་པ་ཐམས་ཅད་དང ། གདོན་ཐམས་ཅད་དང ། རིམས་ཐམས་ཅད་དང ། ཕ་རོལ་གྱི་གནོད་པ་ཐམས་ཅད་རབ་ཏུ་ཞི་བར་འགྱུར་རོ། །ལན་བདུན་བརྗོད་ན་དུས་མ་ཡིན་པར་འཆི་བ་ཐམས་ཅད་དང ། སེམས་ཅན་ཐམས་ཅད་ཀྱི་འཚེ་བ་དང ། ཡམས་ཐམས་ཅད་རབ་ཏུ་ཞི་བར་འགྱུར་རོ། །ལག་ན་རྡོ་རྗེ་དེ་ལྟ་བས་ན་སེམས་ཅན་ཐམས་ཅད་ཀྱི་དོན་དུ་ཉིན་རེ་བཞིན་དུ་ཚིག་གཞན་མི་སྨྲ་བར་སྙིང་པོ་འདི་ལན་བདུན་བདུན་བཟླས་པར་བྱའོ། །ལག་ན་རྡོ་རྗེ་གང་ལ་ལ་དག་འདི་ལྟར་སྡིག་པ་མི་དགེ་བ་བཅུ་རབ་ཏུ་སྤྱོད་པ། མཚམས་མེད་པ་བྱེད་པ། དམ་པའི་ཆོས་ལ་སྐུར་བ་འདེབས་པ། འཕགས་པའི་གང་ཟག་ལ་རབ་ཏུ་བརྙས་པས་དེ་དག་སེམས་ཅན་དམྱལ་བར་གཞོལ་བའི་ཚེའི་དུས་བྱས་པར་གྱུར་བ་དང ། དགེ་སློང་གང་ལ་ལ་དག་རང་གི་བསླབ་པའི་སྡོམ་པ་དྲལ་བ། ཚུལ་ཁྲིམས་ཀྱི་སྡོམ་པ་རལ་ཅིང་ཞིག་པ་དང ། མཁན་པོ་དང ། སློབ་དཔོན་ལ་མ་གུས་ཤིང་འཁུ་བ་དང ། དམ་པའི་ཆོས་ལ་རྨ་འབྱིན་པས་ཚའི་དུས་བྱས་པར་འགྱུར་ན་སེམས་ཅན་དམྱལ་བར་གཞོལ་བར་གྱུར་པ་དེ་དག་གི་དོན་དུ་བྱེ་མ་གཙང་མ་ལ་ལན་ 478b གྲངས་བདུན་བདུན་བཟླས་ནས། དུར་ཁྲོད་དུ་བོར་བའི་རོ་དང ། རོ་བསྲེགས་པའི་རུས་པའམ། དུར་མཆད་དུ་བཅུག་པའི་རོའམ། རུས་པ་ལ་བྱེ་མ་དེས་གཏོར་བར་བྱའོ། །གང་དང་གང་ན་སེམས་ཅན་རྣམས་ཀྱི་རུས་པ་གང་དག་ཡོད་པ་དེ་དང་དེ་དག་ཏུ་བྱེ་མ་དེས་གཏོར་མ་ཐག་ཏུ། དེ་དང་དེར་བྱེ་མས་ཕོག་པའི་སེམས་ཅན་དེ་དག་རྣམས་སེམས་ཅན་དམྱལ་བ་དང ། ཡི་དྭགས་དང ། དུད་འགྲོ་དང ། ཤ་ཟའི་སྐྱེ་གནས་དང ། གནོད་སྦྱིན་གྱི་སྐྱེ་གནས་སུ་སྐྱེས་པར་གྱུར་ན་ཡང་དེ་དག་དེའི་མོད་ལ་ཚེ་བརྗེས་ནས་ཐམས་ཅད་མཐོ་རིས་ཀྱི་འཇིག་རྟེན་ལྷ་དང་མིའི་གནས་སུ་རབ་ཏུ་གཞོལ་བར་འགྱུར་ཞིང ། ཕྱིན་ཆད་ནམ་ཡང་སེམས་ཅན་ཐམས་ཅད་དམྱལ་བ་དང ། ཡི་དྭགས་དང ། དུད་འགྲོའི་འགྲོ་བ་རྣམས་སུ་སྐྱེ་བར་མི་འགྱུར་རོ། །གཟུངས་སྔགས་ཡི་གེ་བཅུ་པ་འདི་ཉིད་གྲོ་ག་དང ། རས་སམ་ཤོག་བུ་ལ་བྲིས་ཏེ་མཆོད་རྟེན་གྱི་ནང་དུ་བཅུག་ན། གནས་དེར་སྲོག་ཆགས་རྐང་གཉིས་པ་དང ། རྐང་བཞི་པ་དང ། རྐང་མངས་པ་དང ། རྐང་མེད་པ་གང་དག་ཉེ་བར་འོངས་པ་དེ་དག་ཐམས་ཅད་མཆོད་རྟེན་དེའི་གྲི་མ་ཕོག་པ་ཙམ་གྱིས་དེ་དག་གི་སྡིག་པ་དང ། སྒྲིབ་པ་ཐམས་ཅད་རྣམ་པར་དག་ཅིང་མཐོ་རིས་སུ་གཞོལ་བར་འགྱུར་རོ། །རི་དྭགས་དང ། བྱ་དང ། ཝ་དང ། ཁྱི་དང ། ནེའུ་ལེ་དང ། གྲོག་སྦུར་དང ། སྦྲུལ་དང ། རུས་སྦལ་དང ། ལག་འགྲོ་ལ་སོགས་པ་སྲོག་ཆགས་ཕྲ་མོ་གང་དག་གིས་མཆོད་རྟེན་དེའི་གྲིབ་མ་ལ་འགྲིམས་པ་ཐམས་ཅད་ཀྱང་གྲིབ་མ་ཕོག་པ་ཙམ་གྱིས་དེ་དག་རྣམས་ཀྱི་སྡིག་པ་དང ། སྒྲིབ་པ་ཐམས་ཅད་རྣམ་པར་དག་པར་འགྱུར་ཞིང་དེ་དག་ཐམས་ཅད་ཀྱང་མཐོ་ 479a ༄#། །རིས་ཀྱི་འཇིག་རྟེན་དུ་གཞོལ་བར་འགྱུར་རོ། །བུད་དུང་ལ་སོགས་པ་ལ་ལན་བདུན་བཟླས་བརྗོད་བྱས་ནས་གནས་མཐོན་པོའི་རྩེ་མོ་ནས་དུང་དེ་བུས་ན། སེམས་ཅན་གང་དག་གིས་དུང་དེའི་སྒྲ་ཐོས་པའི་སྐྱེས་པའམ། བུད་མེད་དམ། ཁྱིའུའམ། བུ་མོའམ། ལྷའམ། ཡི་དྭགས་སམ། དུད་འགྲོའི་སྐྱེ་གནས་སུ་གཏོགས་པ་དེ་དག་ཐམས་ཅད་བདེ་འགྲོ་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་ཞིང་དགེ་བའི་བཤེས་གཉེན་རྣམས་དང་ཕྲད་ནས་ཆོས་ཐོས་ཏེ་རིམ་གྱིས་མྱ་ངན་ལས་འདའ་བའི་བར་དུ་འགྱུར་རོ། །སེམས་ཅན་གང་དག་སྦྱིན་པ་ལ་དགའ་བ་དང ། གང་དག་བསྙེན་གནས་ལ་ཉེ་བར་གནས་པ་དང ། གང་དག་སྐྱབས་གསུམ་ཉེ་བར་གཟུང་བ་དང ། གང་དག་ཚུལ་ཁྲིམས་ཡོངས་སུ་དག་པ་དང་ལྡན་པ་དང ། གང་དག་བྱང་ཆུབ་སེམས་དཔའི་སྡོམ་པས་ཡང་དག་པར་བསྡམས་པ་དེ་དག་གིས་སྒྲ་དེ་ཐོས་ན། དེ་དག་ཐམས་ཅད་བྱང་ཆུབ་ལས་ཕྱིར་མི་ལྡོག་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །ཚེ་དེ་བརྗེས་མ་ཐག་ཏུ་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཙནྡན་དཀར་པོ་ལ་ལན་བདུན་བཟླས་བརྗོད་བྱས་ནས་དགེ་འདུན་གྱི་ཀུན་དགའ་ར་བའམ། དཀོར་སའམ། སྐྱེ་བོའི་དབུས་སམ། རྒྱལ་པོའི་ཕོ་བྲང་དུ་བདུག་པར་བྱས་ན། གང་དག་དེའི་དྲི་ལ་བསྣམས་པའི་སེམས་ཅན་དེ་དག་ཐམས་ཅད་ཀྱང་ལས་དང་ཉོན་མོངས་པའི་སྒྲིབ་པ་ཐམས་ཅད་རྣམ་པར་བྱང་བར་འགྱུར་ཏེ། སངས་རྒྱས་ཀྱི་སྐུ་ཡོངས་སུ་རྫོགས་ 479b པ་རབ་ཏུ་འཐོབ་པའི་བར་དུ་འགྱུར་རོ། །ཆོས་གོས་ལ་རབ་ཏུ་བདུགས་ནས་ལུས་ལ་གྱོན་ན་གང་ཟག་དེའི་སྡིག་པ་དང ། སྒྲིབ་པ་ཐམས་ཅད་མ་ལུས་པར་རྣམ་པར་དག་པར་འགྱུར་རོ། །ལུས་ལ་བབ་པ་ཙམ་གྱིས་བག་ཆགས་ཀྱི་དྲི་མ་དང ། སེར་སྣ་དང་ཉོན་མོངས་པའི་སྐྱོན་ཐམས་ཅད་སྤངས་པར་འགྱུར་རོ། །གོས་ལ་བདུགས་ཏེ་བཅངས་པ་ཙམ་གྱིས་འཇིག་རྟེན་ཐམས་ཅད་དབང་དུ་འགྱུར་རོ། །བདག་གི་གོས་ལ་རབ་ཏུ་བདུགས་ཏེ་རྒྱལ་པོའི་ཕོ་བྲང་དུ་ཞུགས་ན་རྒྱལ་པོ་དང ། བཙུན་མོར་བཅས་པ་རྣམས་དབང་དུ་འགྱུར་རོ། །ཀུན་གྱི་མཆོད་གནས་ཆེན་པོར་འགྱུར་རོ། །འཇིག་རྟེན་ཐམས་ཅད་ཀྱི་བླ་མར་འགྱུར་རོ། །འཕགས་པའི་དགེ་འདུན་གྱི་དབུས་སུ་ཞུགས་ན་དགེ་འདུན་ཐམས་ཅད་ཀྱི་མཆོད་གནས་ཆེན་པོར་འགྱུར་རོ། །སྐྱེ་བོའི་ཚོགས་ཆེན་པོའི་ནང་དུ་ཞུགས་ན་ནོར་དང ། ལོངས་སྤྱོད་ཆེན་པོ་འཕེལ་བར་འགྱུར་ཞིང་མཆོད་གནས་ཆེན་པོའི་འོས་སུ་ཡང་འགྱུར་རོ། །ཙནྡན་གྱི་བདུག་པའི་ཆོ་གའོ། །དོན་ཡོད་པའི་ཞགས་པའི་རྟོག་པ་ལས་པདྨའི་གཙུག་ཏོར་དྲི་མ་མེད་པའི་སྙིང་པོའི་ལེའུ་སྟེ་བཞི་པའོ།། །། དེ་ནས་ཁྲོ་བོའི་རྒྱལ་བ་མེའི། རྟོག་པ་རབ་ཏུ་བཤད་བྱ་སྟེ། །དོན་ཡོད་རྒྱལ་པོ་རྨད་བྱུང་ཚེ། །ཀུན་ཏུ་དངོས་གྲུབ་ཐོགས་མེད་ཅིང ། །དཀྱིལ་འཁོར་ཀུན་ཏུ་དབང་བསྐུར་བས། །སྡང་བ་ཐམས་ཅད་རབ་ཏུ་འཇོམས། །བདུད་དང་བགེགས་དཔུང་རྣམ་པར་འཇིག། གནོད་སྦྱིན་སྶྲིན་སྲེག་པོ་གསང་བ་བ། འབྱུང་པོ་ཐམས་ཅད་རབ་ཏུ་འབྲོས། །བསམ་པ་ཐམས་ཅད་རབ་རྫོགས་བྱེད། །ོཾ་བྷརྀ་ཀུ་ཊི་དཾཥྚྲེ་ཨ་མོ་གྷ་ས་མ་ཡེ། 480a ༄#། ། བྷི་ཥིཉྩ་མཱཾ་སརྦ་བིད་ཨ་མོ་གྷ་ག་ཨ་བྷི་ཥེ་ཀ་ཧཱུཾ། མི་ལི་མི་ལི་སཝཱ་ཧཱ། ཁྲོ་བོའི་རྒྱལ་པོའི་སྙིང་པོའོ། །དེ་ནས་སྐུ་གཟུགས་ཀྱི་ཆོ་ག་ནི་དངུལ་ལ་ཁྲོ་བོའི་རྒྱལ་པོ་སོར་བཅུ་གཉིས་ཀྱི་ཚད་ཙམ་ཤིན་ཏུ་མཛེས་ཤིང་ཚད་དང་ལྡན་པ། གདོང་གསུམ་པ། རལ་བའི་ཐོར་ཚུགས་ཅན། རྒྱལ་བ་འོད་དཔག་ཏུ་མེད་པས་སྤྱི་བོར་བརྒྱན་པ། ཟླ་བ་ཚེས་པ་མགོ་ལ་ཐོགས་པ། གདོང་གསུམ་གྱི། དང་པོ་ཁྲོ་པ། གཡས་ཅུང་ཟད་འཛུམ་པ། གཡོན་གད་མོ་དགོད་པ། ལག་པ་བཞི་པ། གཡས་དང་པོ་ན་པདྨ། འོག་མ་ན་རལ་གྲི་འཕྱར་བ། གཡོན་དང་པོ་ན་ཞགས་པ། འོག་མ་མདུད་རྩེ་གསུམ་པ། རྒྱན་ཐམས་ཅད་ཀྱིས་བརྒྱན་པ་པདྨ་དང་ཟླ་བའི་གདན་ལ་རྒྱལ་པོའི་རོལ་སྟངས་ཀྱིས་འདུག་པ། གཅན་གཟན་ཁྲོ་བོའི་པགས་པས་སྨད་དཀྲིས་པའོ། །གཡས་ཕྱོགས་སུ་ནི་ལྷ་མོ་སྒྲོལ་མ་ཨུཏྤ་ལ་ཐོགས་པ་རྒྱན་ཐམས་ཅད་ཀྱིས་རབ་ཏུ་བརྒྱན་པའོ། །གཡོན་ཕྱོགས་སུ་ནི་ལྷ་མོ་རིག་སྔགས་ཀྱི་རྒྱལ་མོ་ནོར་བུ་རིན་པོ་ཆེ་ཐོགས་པ། རྒྱན་ཐམས་ཅད་ཀྱིས་རབ་ཏུ་བརྒྱན་པའོ། །འཇིག་རྟེན་དབང་ཕྱུག་གི་དྲུང་དུ་རིག་སྔགས་འཆང་པུས་མོ་བཙུགས་པ་ལག་ན་སྤོས་པོར་ཐོགས་ཤིང་བགྲང་ཕྲེང་འཛིན་པ་བཅོམ་ལྡན་འདས་ལ་གྱེན་དུ་བལྟ་བའོ། །ཡང་ན་ནི་རི་མོར་བྲི་བར་བྱ་སྟེ་ཆོ་ག་བཞིན་ནོ། །གཟུགས་བརྙན་དེ་དག་གི་དྲུང་དུ་བའི་ལྕི་བས་བྱུག་པ་བྱས་ལ། ཙནྡན་དཀར་པོའི་དཀྱིལ་འཁོར་བྱ་ཞིང་གུང་གུམ་གྱིས་མཆོད་ཡོན་བྱ་སྟེ། མེ་ཏོག་ལ་སོགས་པས་ཡང་དག་པར་མཆོད་པར་བྱའོ། །དཀྱིལ་འཁོར་དེའི་སྟེང་ 480b དུ་ཁྲོ་བོའི་རྒྱལ་པོ་བཞུགས་སུ་གསོལ་ཏེ། དེའི་དྲུང་དུ་བཟླས་བརྗོད་སྟོང་ཕྲག་བརྒྱད་བྱའོ། །དེ་ནས་གཟུགས་བརྙན་དེ་འགུལ་ཞིང་གཡོ་བར་འགྱུར་རོ། །རྐང་པས་ཕན་ཚུན་དུ་འཆག་པར་འགྱུར། གཟུགས་ལས་འོད་ཟེར་འབྱུང་བར་འགྱུར། ཚིག་འབྱིན་པར་འགྱུར། ལེགས་སོ་ཞེས་སྒྲ་འབྱིན་པར་འགྱུར། ལག་པ་གཡས་པ་རིག་སྔགས་འཆང་གི་སྤྱི་བོར་འཇོག་པར་འགྱུར། ཡིད་ལ་བསམས་སོ་ཅོག་ཐམས་ཅད་དང ། མཆོག་ཐམས་ཅད་ཡོངས་སུ་རྫོགས་པར་འགྱུར་རོ། །བཟླས་བརྗོད་རྫོགས་པའི་མོད་ལ་འཕགས་པ་སྤྱན་རས་གཟིགས་དབང་ཕྱུག་ཁྲོ་བོའི་རྒྱལ་པོ་རང་གི་མདུན་ན་བཞུགས་པར་འགྱུར་རོ། །དྲན་པ་ཙམ་གྱི་མོད་ལ་དངོས་གྲུབ་ཐམས་ཅད་འགྲུབ་པར་འགྱུར་རོ། །ལས་ཐམས་ཅད་ཀྱང་བྱེད་པར་འགྱུར་རོ། བཀླགས་པས་ལས་ཐམས་ཅད་དང ། དངོས་གྲུབ་ཐམས་ཅད་འགྲུབ་པར་འགྱུར་བ་དང ། གྲུབ་པ་ཐམས་ཅད་སྟོན་པར་འགྱུར་རོ། །ཁྲོ་བོའི་རྒྱལ་པོ་ཆེན་པོའི་ཞགས་པ་ནས་བཟུང་སྟེ། བཟླས་བརྗོད་སྟོང་རྩ་བརྒྱད་བྱས་ནས་སྔོན་ཆད་བསགས་པའི་བསོད་ནམས་དང ། ལས་ཀྱི་བགོ་བསྐལ་ཐམས་ཅད་མངོན་སུམ་དུ་འགྱུར་རོ། །ཚེའི་མཐར་ཐུག་གི་བར་དུ་དཔལ་ཆེན་པོ་ཐོབ་པ་དང ། ཆེ་བ་ཉམས་སུ་མྱང་བར་འགྱུར་རོ། །གདོང་དུ་བལྟས་ཏེ་བཟླས་བརྗོད་སྟོང་རྩ་བ་བརྒྱས་བྱས་ནས་དབང་ཕྱུག་ཆེན་པོའི་དངོས་གྲུབ་ཐོབ་པར་འགྱུར་རོ། །པདྨ་ནས་བཟུང་སྟེ་བཟླས་བརྗོད་སྟོང་རྩ་བརྒྱད་བྱས་ན་ཉོན་མོངས་པ་དང ། ཉེ་བའི་ཉོན་མོངས་པ་ཐམས་ཅད་དང་བྲལ་བར་འགྱུར་རོ། །རལ་གྲི་ 481a ༄#། །ནས་བཟུང་སྟེ། བཟླས་པ་སྟོང་རྩ་བརྒྱད་བྱས་ན་ནམ་མཁའ་ལ་འགྲོ་བའི་དངོས་གྲུབ་ཐོབ་པར་འགྱུར་རོ། །རྩེ་གསུམ་ནས་བཟུང་སྟེ། སྟོང་རྩ་བརྒྱད་བཟླས་བརྗོད་བྱས་ན།་འཇིག་རྟེན་གསུམ་གྱི་དབང་ཕྱུག་ཏུ་འགྱུར་རོ། །འགྲོ་བ་ཐམས་ཅད་དབང་དུ་འགྱུར་རོ། །རྐེད་པ་ནས་བཟུང་སྟེ་བཟླས་པ་སྟོང་རྩ་བརྒྱད་བྱས་ན་སྔོན་གྱི་ཚེ་རབས་དྲན་པར་འགྱུར་རོ། །རྒྱལ་པོ་དང་བཙུན་མོ་འཁོར་དང་བཅས་པ་རྣམས་དབང་དུ་འགྱུར་ཏེ། བདག་ཉིད་ཇི་སྲིད་འཚོའི་བར་དུ་ནོར་རྣམས་ཉེ་བར་གནས་པར་འགྱུར་རོ། །ཅོད་པན་ལ་ལན་བརྒྱ་རྩ་བརྒྱད་བཟླས་ཏེ། ཁྲོ་བོའི་རྒྱལ་པོའི་དབུ་ལ་བཅིངས་ན་ངེས་པར་དབང་བསྐུར་བ་ཐོབ་པར་འགྱུར་ཏེ། འདི་ལ་ཐེ་ཚོམ་དང་ཡིད་གཉིས་བསྐྱེད་པར་མི་བྱའོ། །བཟླས་བརྗོད་དང ། སྒྲུབ་པ་འདི་དག་གིས་ནི་འཕགས་པ་སྤྱན་རས་གཟིགས་དབང་ཕྱུག་ཁྲོ་བོའི་རྒྱལ་པོའི་གཟུགས་ཀྱིས་རིག་སྔགས་འཆང་གི་མདུན་དུ་བྱོན་ཏེ། ཅི་དགོས་པ་ཐམས་ཅད་བྱེད་པར་འགྱུར་རོ། །འཕགས་པ་དོན་ཡོད་ཞགས་པའི་རྟོག་པའི་རྒྱལ་པོའི་ཆོ་ག་ལས་བྱུང་བ་རྫོགས་སོ།། །།པཎྜི་ཏ་མཉྫུ་ཤྲཱི་ཝརྨ་དང ། ལོཙྪ་བ་དགེ་སློང་བློ་ལྡན་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། |