rKTs


H62

(e-text produced by ACIP)

see text in transliteration
458b
།།རྒྱ་གར་སྐད་དུ། ཨཱ་རྱ་རཱཥྚ་པཱ་ལ་པ་རི་པྲྀ་ཙྪ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་ལྔ་སྟོང་ཐམས་ཅད་ཀྱང་སྤོབས་པ་ཐོགས་པ་མེད་པ། བཟོད་པ་ཐོབ་པ། བདུད་དང་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་ཉེ་བར་གྱུར་པ། སྐྱེ་བ་གཅིག་གིས་ཐོགས་པ། གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་མཐའ་ཡས་པ་ཐོབ་པ། མི་འཇིགས་པ་ཐོགས་པ་མེད་པ་ཐོབ་པ། རྫུ་
459a
༄#། །འཕྲུལ་གྱི་སྟོབས་དང ། དབང་དམ་པའི་ཕ་རོལ་ཏུ་སོན་པ་ནས་ཡོན་ཏན་གྱི་ཚོགས་ཐམས་ཅད་ཟད་མི་ཤེས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང ། ཀུན་ཏུ་མིག་དང ། ཀུན་ཏུ་ལྟ་བ་དང ། ཀུན་ཏུ་འོད་ཟེར་དང ། ཀུན་ཏུ་འོད་དང ། བློ་གྲོས་མཆོག་དང ། བློ་གྲོས་འཕེལ་དང ། བློ་གྲོས་མཐའ་ཡས་དང ། བློ་གྲོས་རྒྱ་ཆེན་དང ། བློ་གྲོས་མི་ཟད་པ་དང ། ས་འཛིན་དང ། འགྲོ་བ་འཛིན་དང ། རྒྱལ་བའི་བློ་གྲོས་དང ། ཁྱད་པར་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་གི་རྒྱལ་པོ་དང ། འཇམ་དཔལ་ལ་སོགས་པ་སེམས་དཔའ་དཔེ་མེད་དྲུག་ཅུ་དང ། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང ། མི་མཇེད་ཀྱི་བདག་པོ་ཚངས་པ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང ། ལྷའི་བུ་མཚམས་བཟང་དང ། ལྷའི་བུ་བློ་གྲོས་ལེགས་གནས་དང ། ལྷའི་དབང་བོ་ཐམས་ཅད་དང ། ཀླུའི་དབང་པོ་དང ། མི་འམ་ཅིའི་དབང་པོ་དང ། དྲི་ཟེའི་དབང་པོ་དང ། གནོད་སྦྱིན་གྱི་དབང་པོ་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོའི་འཁོར་བརྒྱ་སྟོང་དུ་མ་ཡོད་པ་
459b
ཐམས་ཅད་དང ། འཁོར་དེ་ཉིད་དུ་འདུས་ཏེ་འཁོད་པ་རྣམས་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་དཔལ་གྱི་སྙིང་པོའི་སེངྒེའི་ཁྲི་ལ་བཞུགས་ཏེ། ལྷུན་པོ་ལྟར་འཁོར་གྱི་དཀྱིལ་འཁོར་ཐམས་ཅད་ལས་ནི། མངོན་པར་འཕགས། ཉི་མ་ལྟར་འཇིག་རྟེན་ཐམས་ཅད་ལ་ནི། སྣང ། ཟླ་བ་ལྟར་འགྲོ་བ་ཐམས་ཅད་ལ་ནི། སྣང་བར་མཛད། ཚངས་པ་ལྟར་རབ་ཏུ་ཞི་བར་ནི། བཞུགས། བརྒྱ་བྱིན་ལྟར་སྐུ་ནི། བསྙེན་པར་དཀའ། འཁོར་ལོས་བསྒྱུར་བ་ལྟར་བྱང་ཆུབ་ཀྱི་ཡན་ལག་གི་རིན་པོ་ཆེ་བདུན་དང་ནི། ལྡན། སེངྒེ་ལྟར་ཆོས་ཐམས་ཅད་བདག་མེད་པ་དང་སྟོང་པར་ནི། སྒྲོག་།མེའི་ཕུང་པོ་ཆེན་པོ་ལྟར་འགྲོ་བ་ཐམས་ཅད་ལ་སྣང་བའི་སྐུ་དང་ནི། ལྡན། ལྷ་ཐམས་ཅད་སྣང་བའི་ནོར་བུ་རིན་པོ་ཆེ་ཀུན་ནས་བསྡུས་པའི་ནོར་བུ་རིན་པོ་ཆེའི་རྒྱལ་པོ་ལྟར་གཟི་བརྗིད་ཀྱིས་ཤིན་ཏུ་འབར་ཞིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་མཛད་ནས་དོན་ཤིན་ཏུ་རྣམ་པར་ངེས་པས་ཆོས་ཐམས་ཅད་ཀྱི་དམ་པའི་ཕ་རོལ་ཏུ་བྱོན་པ་འཁོར་གྱི་ནང་ན་བཞུགས་ཤིང་ཚངས་པའི་སྒྲ་དབྱངས་བསྒྲགས་པ། སེམས་ཅན་ཐམས་ཅད་ཀྱི་གོ་བར་བྱེད་པ་དང་ལྡན་པའི་དབྱངས་ཀྱིས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ།
460a
༄#། །བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་སེངྒེའི་ཁྲི་ལ་བཞུགས་པ། ཉི་མ་སྟོང་ལས་ལྷག་པའི་འོད་ཀྱིས་འཁོར་གྱི་དཀྱིལ་འཁོར་ཐམས་ཅད་ཟིལ་དུ་རླག་པར་མཛད་ནས་ཤིན་ཏུ་ལྷང་ངེར་བཞུགས་པ་མཐོང་སྟེ། དགའ་བ་དང ། མགུ་བ་དང ། དད་པས་འདུན་པའི་སེམས་ཀྱིས་སྟན་ལས་ལངས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ལྷ་ཚོགས་ལྷ་མ་ཡིན་དང་མི་འམ་ཅི། །ཀླུ་དང་ཉན་ཐོས་དག་དང་སངས་རྒྱས་སྲས། །འགྲོ་བ་འདི་དག་རྒྱལ་བས་གཟི་ཡངས་ཀྱིས། །ཟིལ་མནན་ཁྱོད་ནི་གསེར་གྱི་རི་ལྟར་གསལ། །རྒྱ་མཚོའི་དབུས་ན་གནས་ཀྱང་རྣམ་མཛེས་པ། །ལྷུན་པོ་ལྷ་ཡི་ཚོགས་ཀྱི་གནས་ལྟ་བུར། །ཐུགས་རྗེའི་རྒྱ་མཚོའི་དབུས་སུ་དེ་བཞུགས་ཏེ། །འོད་ཟེར་སྟོང་ཕྲག་བརྒྱ་དག་འགྱེད་པར་མཛད། །ཚངས་པའི་གནས་
460b
ལ་གནས་པའི་ཚངས་པ་དེ། །ཚངས་པའི་མདུན་ན་གནས་ཏེ་མངོན་མཛེས་ལྟར། །བསམ་གཏན་རྣམ་ཐར་ཏིང་ངེ་འཛིན་བཞུགས་པ། །སེམས་ཅན་དམ་པ་འགྲོ་བ་ཀུན་ལ་གསལ། །བརྒྱ་ཕྱིན་སུམ་ཅུ་རྩ་གསུམ་ལྷ་ནང་དུ། །གནས་ནས་གཟི་བརྗིད་ཡངས་པས་མཛེས་པ་ལྟར། །མཚན་གྱིས་སྤྲས་པ་ཡེ་ཤེས་ཡོན་ཏན་ཕྱུག་།ཐུབ་པའི་རྒྱལ་པོ་འགྲོ་བ་ཀུན་ལ་གསལ། །གླིང་བཞི་མི་ཡི་བདག་པོ་སྣང་ལྡན་པ། །འཇིག་རྟེན་འདི་ལ་སྟོན་པ་མཛེས་པ་ལྟར། །འཕགས་པའི་ལམ་དུ་འཇུག་པ་རབ་མཛད་ཅིང ། །ཐུགས་རྗེས་དགོངས་པའི་ཐུགས་མངའ་འདི་ཡང་མཛེས། །མཁའ་ལ་ཉི་མ་ལྷམ་མེ་ཐལ་ལེ་བ། །ནོར་བུ་མེ་འོད་མོག་མོག་བྱེད་འདི་ལྟར། །ཉི་མ་སྟོང་བས་ཁྱད་པར་འཕགས་པའི་འོད། །སངས་རྒྱས་ཉི་མ་འགྲོ་བ་འདི་ན་གསལ། །དྲི་མེད་ཟླ་བ་ནམ་གྱི་གུང་གསལ་ལྟར། །ཤིན་ཏུ་རྣམ་དག་འགྲོ་བ་ཀུན་ལ་གསལ། །རྒྱལ་བའི་ཞལ་རས་ཟླ་བ་ཉ་བ་འདྲ། །ཀུན་འོད་ཟིལ་གྱིས་མནན་ནས་རྣམ་པར་མཛེས། །ཇི་ལྟར་རི་བོའི་ཟོམ་ལ་མེ་འབར་བ། །མཚན་མོ་མི་ཉལ་ཙམ་ན་ཀུན་སྣང་ལྟར། །གཏི་མུག་མུན་པ་མ་ལུས་བཅོམ་ནས་ནི། །དྲང་སྲོང་ཆེན་པོའི་ཡེ་ཤེས་འོད་ཀྱང་གསལ། །སེངྒེ་རི་སུལ་བརྟེན་པའི་སྒྲ་སྒྲོག་ཅིང ། །ས་ལ་རི་དྭགས་ཚོགས་རྣམས་སྐྲག་བགྱིད་ལྟར། །མི་དབང་སྟོང་པ་བདག་མེད་གསུང་
461a
༄#། །སྒྲོག་ཅིང ། །ཕ་རོལ་མུ་སྟེགས་ཅན་རྣམས་སྐྲག་པར་མཛད། །ནོར་བུའི་རྒྱལ་པོ་བཟང་བ་གཟི་བརྗིད་འབར། །ནོར་བུ་ཐམས་ཅད་ཟིལ་མནན་ལྷམ་མེ་ལྟར། །རྒྱལ་བའི་སྐུ་ནི་གསེར་གྱི་མདོག་འདྲ་བ། །འགྲོ་ཀུན་ཟིལ་གྱིས་མནན་ནས་ལྷམ་མེར་བཞུགས། །འཇིག་རྟེན་གང་ནའང་ཁྱོད་དང་མཚུངས་མ་མཆིས། །ལྷག་པའི་སེམས་ཅན་མཆིས་པར་ག་ལ་འགྱུར། །བསོད་ནམས་ཡེ་ཤེས་བརྩོན་འགྲུས་ཐབས་རྣམས་དང ། །ཡོན་ཏན་ཀུན་གྱིས་ཁྱོད་དང་མཚུངས་མ་མཆིས། །མི་ཡི་དཔའ་བོ་འགྲོ་ལ་ལྷམ་མེ་བ། །མགོན་པོ་ཡོན་ཏན་རྒྱ་མཚོ་བདག་གིས་མཐོང ། །གུས་པ་སྐྱེས་ཤིང་དགའ་བ་རྣམ་པར་འཕེལ། །རྒྱལ་བའི་ཞབས་ཀྱི་མཐིལ་ལ་བདག་གིས་གཏུགས། །ཡོན་ཏན་ཀུན་གྱི་འབྱུང་གནས་འཇིག་རྟེན་སྒྲོན། །གྲགས་པ་དམ་པ་རྒྱ་ཆེན་ཐུགས་མངའ་བ། །བདག་གིས་བསྟོད་དེ་བསོད་ནམས་འདིས་ཐོབ་དེས། །འགྲོ་བ་ཐམས་ཅད་བྱང་ཆུབ་མཆོག་རེག་ཤོག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ་མིག་གཉིས་མི་འཛུམ་པར་དེ་བཞིན་གཤེགས་པའི་སྐུ་ལ་ནི །
461b
བལྟ།་ཆོས་ཀྱི་དབྱིངས་ཉིད་ལ་ནི། རྣམ་པར་དཔྱོད། ཟབ་པ་དང ། གཏིང་དཔག་དཀའ་བ་དང ། མཐོང་བར་དཀའ་བ་དང ། ཁོང་དུ་ཆུད་པར་དཀའ་བ་དང ། བརྟག་མི་ནུས་པ་དང ། རྟོག་གེའི་སྤྱོད་པ་མ་ཡིན་པ་དང ། ཞི་བ་དང་ཕྲ་བ་ལ་ནི། འཇུག་།སངས་རྒྱས་ཀྱི་སྤྱོད་ཡུལ་བསམ་གྱིས་མི་ཁྱབ་པ་ལ་ནི། རྗེས་སུ་རྣམ་པར་དཔྱོད། དེ་བཞིན་གཤེགས་པའི་ཡེ་ཤེས་ཆོས་ཀྱི་དབྱིངས་ཐམས་ཅད་དུ་ཞུགས་པ་ལ་ནི། རྗེས་སུ་རྣམ་པར་སེམས། སངས་རྒྱས་ཀྱི་ཡུལ་མི་མཉམ་པ་དང་མཉམ་པ་ལ་ནི། ཡང་དག་པར་བལྟ། དེ་བཞིན་གཤེགས་པའི་ཐབས་ཀྱི་ཡུལ་གྱི་སྤྱོད་ཡུལ་བསམ་གྱིས་མི་ཁྱབ་པ་ལ་ནི། འཇུག་།སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་གཅིག་གི་ཚུལ་གྱི་ངོ་བོ་ཉིད་ལ་འཇུག་པ་ལ་ནི། རྟོག་།སངས་རྒྱས་བཅོམ་ལྡན་འདས་རྣམས་ཀྱི་གནས་མེད་པ་ནམ་མཁའ་སྤྱོད་ཡུལ་དུ་ནི། ཡང་དག་པར་བལྟ། ཆོས་ཐམས་ཅད་ཡང་དག་པའི་མཐའ་མཐའ་མ་ཡིན་པའི་རང་བཞིན་ལ་འཇུག་པ་ལ་ནི། མོས། སངས་རྒྱས་ཀྱི་རྣམ་པར་ཐར་པ་སྒྲིབ་པ་མེད་པ་ལ་ནི། མངོན་པར་འདོད། སངས་རྒྱས་བཅོམ་ལྡན་འདས་རྣམས་ཀྱི་སྐུ་རྟག་པ་དང ། ཞི་བ་དང ། ཐེར་ཟུག་པ་ལ་ནི། འཇུག་།དེ་བཞིན་གཤེགས་པའི་སྐུ་ཞིང་རབ་འབྱམས་ཐམས་ཅད་ཀྱི་རྗེས་སུ་སོང་བ་དང །
462a
༄#། །སེམས་ཅན་ཐམས་ཅད་ལ་མངོན་དུ་ཕྱོགས་པ་ལ་ནི། འཇུག་།སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་གྱི་ཕྱི་མའི་མཐའི་བསྐལ་པའི་མུར་ཡང་ཐུག་པ་མེད་པ་ནི། རྗེས་སུ་དྲན་པར་བྱེད། ཆོས་ཀྱི་དབྱིངས་ཉིད་ལ་རྣམ་པ་དཔྱོད་ཅིང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོ་ཡང་ཅང་མི་སྨྲ་བར་གྱུར་ཏོ། །དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་མཉན་ཡོད་དུ་དབྱར་ཟླ་བ་གསུམ་གནས་པར་དམ་བཅས་ཏེ། དེ་ཟླ་བ་གསུམ་འདས་ནས་ཆོས་གོས་བྱས་ཏེ་ཆོས་གོས་ཟིན་ནས་དེ་ལྷུང་བཟེད་དང་ཆོས་གོས་ཐོགས་ཏེ་དགེ་སློང་གི་དགེ་འདུན་དང ། གསར་བུ་ལས་དང་པོ་རབ་ཏུ་བྱུང་ནས་རིང་པོ་མ་ལོན་པ་དག་དང་ལྷན་ཅིག་ཏུ་མཐར་གྱིས་ཡུལ་རྒྱུ་བ་རྒྱུ་ཞིང ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། བྱ་རྒོད་ཀྱི་ཕུང་པོའི་རི་ག་ལ་བ་དེར་སོང་ངོ ། ། དེ་ནས་ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཀྱང་ཚེ་དང་ལྡན་པ་ཡུལ་འཁོར་སྐྱོང་གིས་ཐལ་མོ་སྦྱར་ཏེ་ཚིགས་སུ་
462b
བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །མི་མཆོག་འོད་མཛད་པ་ལ་ཕྱག་འཚལ་ལོ། །ནམ་མཁའ་མཚུངས་པའི་ཐུགས་ལ་ཕྱག་འཚལ་ལོ། ། རྒྱལ་བ་ཡིད་གཉིས་གཅོད་ལ་ཕྱག་འཚལ་ལོ། །སྲིད་གསུམ་མཐར་བྱོན་ཐུབ་ལ་ཕྱག་འཚལ་ལོ། །ཞིང་རྣམས་བྱེ་བ་རབ་འབྱམས་ཀུན་ཏུ་ཡང ། །འདྲེན་པ་དག་ནི་ཁྱོད་ཀྱི་བསྔགས་པ་གསུང ། །རྒྱལ་བའི་སྲས་ཀྱིས་ཐོས་ནས་རབ་དགའ་ཞིང ། །ཡོན་ཏན་རྒྱ་མཚོ་ཐུབ་པ་མཆོད་དུ་མཆི། །བདེ་གཤེགས་ཚུལ་དང་མཐུན་པས་མཆོད་བགྱིས་ཏེ། །ཐུབ་པ་ཆེ་ལས་རྡུལ་བྲལ་ཆོས་ཐོས་ནས། །དེ་དག་ཁྱོད་ཀྱི་ཡོན་ཏན་ཕྲེང་བརྗོད་ཅིང ། །ཡིད་རབ་དགའ་ནས་རང་གི་ཞིང་དུ་མཆི། །བྱང་ཆུབ་དམ་པ་མཆོག་ནི་ཚོལ་བ་ན། །ཁྱེད་ཀྱི་ཐུགས་ནི་སྐྱོ་བ་མི་མངའ་བར། །བསྐལ་པ་བྱེ་བ་ཁྲག་ཁྲིག་བསམ་ཡས་སུ། །སེམས་ཅན་རྣམས་ཀྱི་ཆེད་དུ་སྤྱོད་པ་སྤྱད། །འདྲེན་པ་ཁྱོད་ཀྱི་སྦྱིན་དང་ཚུལ་ཁྲིམས་སྤྱད། །བཟོད་དང་བརྩོན་འགྲུས་དང་ནི་བསམ་གཏན་བསླབ། །ཤེས་རབ་ཐབས་དང་དབང་གི་ཕ་རོལ་གཤེགས། །དེས་ན་རྣམ་འདྲེན་ཆེ་ལ་ཕྱག་འཚལ་ལོ། །རྫུ་འཕྲུལ་རྐང་དག་མངོན་ཤེས་མཆོག་ལ་མཁས། །དབང་པོ་སྟོབས་དང་རྣམ་པར་ཐར་པ་བསླབ། །སེམས་ཅན་ཀུན་གྱི་སྤྱོད་པ་ཐུགས་ཆུད་རྟོགས། །མཉམ་མེད་ཡེ་ཤེས་གཙོ་ལ་ཕྱག་འཚལ་ལོ། །འགྲོ་
463a
༄#། །བ་རྣམས་ཀྱི་སེམས་རྒྱུད་རབ་ཏུ་མཁྱེན། །སྤྱོད་པ་གང་དང་ཇི་ལྟར་ལས་འབྱུང་དང ། །ཚུལ་སྒོ་གང་གིས་རྣམ་པར་གྲོལ་འགྱུར་བ། །དེ་ནི་བཅོམ་ལྡན་མི་ཡི་མཆོག་གིས་མཁྱེན། །འདོད་ཆགས་ཞེ་སྡང་གཏི་མུག་འབྱུང་བ་སྤོང ། །གང་གིས་སེམས་ཅན་ངན་སོང་གསུམ་མཆི་དང ། །གང་གིས་བདེ་འགྲོར་མཆི་བར་འགྱུར་བའི་ལས། །འགྲོ་བས་ལེགས་བགྱིས་པ་དང་ནོངས་བགྱིས་མཁྱེན། །འགྲོ་ལ་ཕན་མཛད་གང་དག་འདས་རྣམས་དང ། །དེ་ལྟར་ལྷ་དང་མི་ཡིས་མཆོད་རྣམས་དང ། །གང་དག་མ་བྱོན་ཡོན་ཏན་མཆོག་མཐར་ཕྱིན། །བདེ་གཤེགས་དེ་དག་ཐམས་ཅད་རབ་ཏུ་མཁྱེན། །དག་པའི་ཞིང་དང་ཕུན་སུམ་ཚོགས་འཁོར་དང ། །བྱང་ཆུབ་སེམས་དཔའ་ཚོགས་དང་ཉན་ཐོས་དང ། །དྲང་སྲོང་ཆེན་པོ་རྣམས་ཀྱི་སྐུ་ཚེའི་ཚད། །རྣམ་པ་ཀུན་ཏུ་མ་ལུས་རྣམ་པར་མཁྱེན། །མྱ་ངན་འདས་ནི་ཆོས་གནས་ཅི་འདྲ་དང ། །རྒྱལ་བའི་རིང་བསྲེལ་མཆོད་པ་ཅི་འདྲ་དང ། །དེར་ནི་ཆོས་མཛོད་འཛིན་པ་ཅི་འདྲ་བ། །དེ་དག་མ་ལུས་མི་ཡི་དམ་པས་མཁྱེན། །དུས་གསུམ་རྣམས་སུ་རྟག་པར་སྟོབས་བཅུ་ཡི། །ཡེ་ཤེས་མཁྱེན་པ་སྒྲིབ་པ་མི་མངའ་འཇུག་།ཆོས་རྣམས་ཀུན་ལ་ཐུགས་ནི་ཆགས་མི་མངའ། །ཕྱག་འཚལ་རྒྱལ་བ་
463b
ཡེ་ཤེས་མཚོ་ཁྱོད་ལ། །ཁྱོད་དང་མཚུངས་མཉམ་མ་མཆིས་རབ་ཏུ་ལྷག་།སྐར་མ་རྣམས་ཀྱིས་ནམ་མཁའ་སྤྲས་པ་ལྟར། །མཚན་རྣམས་ཀྱིས་ཀྱང་སྐུ་ནི་རབ་སྤྲས་པ། །མི་མཆོག་ཐུབ་པ་མཆོག་ལ་ཕྱག་འཚལ་ལོ། །གཟུགས་ཀྱང་མཚུངས་པ་མ་མཆིས་ཡིད་དུ་མཆི། །ལྷར་བཅས་འགྲོ་བ་ཟིལ་དུ་རླག་པར་བགྱིད། །ཚངས་པ་བརྒྱ་བྱིན་འོག་མིན་ལྷ་ཡི་རྣམས། །ཁྱོད་ཀྱི་སྤྱན་སྔར་དེ་དག་མཛེས་མ་ལགས། །ཁྱོད་ནི་གསེར་གྱི་རི་ལྟར་དྲི་མི་མངའ། །དབུ་སྣུམ་འཇམ་ཞིང་གཡས་སུ་འཁྱིལ་བར་གནས། །ལྷུན་པོའི་རྒྱལ་པོ་ལྟ་བུར་སྤྱི་གཙུག་འཕགས། །བསོད་ནམས་རྒྱ་ཆེར་བྱུང་བ་ལྷམ་མེར་བཞུགས། །འོད་ཟེར་བྱེ་བ་ཁྲག་ཁྲིག་རབ་འགྱེད་ཅིང ། །ཁྱོད་ཀྱི་སྨིན་མའི་མཚམས་ཀྱི་མཛོད་སྤུ་མཛེས། །འགྲོ་ལ་ཐུགས་རྗེ་དགོངས་པས་གང་གཟིགས་པ། །སྤྱན་ནི་ཨུཏྤལ་འདྲ་ཞིང་ཡིད་དུ་མཆི། །ཟླ་ཉི་དྲི་མེད་མཁའ་ལ་ཇི་ལྟ་བར། །རྣམ་འདྲེན་ཁྱོད་ཀྱི་ཞལ་ནི་ལྷམ་མེ་སྟེ། །ལྷ་པའི་སྐྱེ་བོ་ངོམས་པར་མི་འགྱུར་བ། །ཞལ་བཟང་མི་ཡི་མཆོག་ལ་ཕྱག་འཚལ་ལོ། །ངན་པ་རྨ་བྱ་རི་དྭགས་རྒྱལ་གྱི་སྟབས། །གླང་པོ་དྲེགས་པ་དལ་གྱིས་མཆི་སྟབས་ཀྱིས། །ས་རྣམས་གཡོ་བར་མཛད་ཅིང་རབ་གཤེགས་པ། །སྟོབས་བཅུ་བརྟུལ་ཞུགས་བརྟན་ལ་ཕྱག་འཚལ་ལོ། །ཕྱག་གི་སོར་མོ་རིང་ཞིང་ཟླུམ་
464a
༄#། །ལ་མཛེས། །སེན་མོ་ཟངས་མདོག་དག་ཅིང་དྲ་བས་སྤྲས། །བཞེངས་ཀྱང་པུས་མོའི་ལྷ་ངར་རེག་ཅིང་སླེབ། །སྐུ་མདོག་གསེར་མདོག་འདྲ་ལ་ཕྱག་འཚལ་ལོ། །འཁོར་ལོ་དྲ་བས་ཁྱབ་པའི་ཞབས་འདོར་བར། །ས་སྟེང་རི་མོར་མཛད་ཅིང་རབ་ཏུ་གཤེགས། །ཞབས་ཀྱི་འོད་ཟེར་གྱིས་ནི་ཡོངས་སྨིན་པའི། །མི་རྣམས་གུམ་ནས་ལྷ་ཡི་འཇིག་རྟེན་མཆི། །ཆོས་ཀྱི་རྒྱལ་པོ་ནོར་བདུན་སྦྱིན་པ་པོ། །ཆོས་ཀྱི་སྦྱིན་བདག་དུལ་བའི་ཐུགས་མངའ་བ། །ཆོས་ཀྱི་སྤྱོད་པས་འགྲོ་བ་རྗེས་སྟོན་པ། །འདྲེན་པ་ཆོས་ཀྱི་རྗེ་ལ་ཕྱག་འཚལ་ལོ། །བྱམས་པའི་གོ་ཆེ་དྲན་པའི་རལ་གྲི་མཆོག་།ཚུལ་ཁྲིམས་གཞུ་དང་ཤེས་རབ་ཐབས་ཀྱི་མདའ། །དེ་ཡིས་སྐྱེ་འཆི་སྲིད་སྲེད་འཕེལ་བགྱིད་པ། །ཉོན་མོངས་དགྲ་དག་རྣམ་པར་བཅོམ་པར་གྱུར། །བརྒལ་ནས་སེམས་ཅན་ཁྲག་ཁྲིག་རྣམས་ཀྱང་སྒྲོལ། །གྲོལ་ནས་འཆིང་པ་ལས་ནི་འགྲོ་བ་འགྲེལ། །བདེ་གཤེགས་གང་གིས་ཞི་བའི་གནས་མཆི་བ། །བདེ་བ་རིམས་ནད་མ་མཆིས་ལམ་ཡང་སྟོན། །གང་ན་སྐྱེ་དང་འཆི་བ་མ་མཆིས་ཤིང ། །འཕྲལ་བའི་སྡུག་བསྔལ་འབྱུང་བར་མི་འགྱུར་བ། །གནས་མཆོག་ཞི་བ་འདུས་མ་བགྱིས་པ་དེ། །ཐུགས་རྗེས་བརྙེས་ནས་ཁྱེད་ཀྱིས་བསྟན་པ་
464b
མཛད། །ཆོས་ཀུན་དབང་གི་ཕ་རོལ་གཤེགས་པའི་རྒྱལ། །ཐུབ་པ་ཆེན་པོ་འཇིག་རྟེན་མཆོག་བསྟོད་པས། །བདག་གིས་འདིར་ནི་བསོད་ནམས་གང་བསགས་དེས།། འགྲོ་བ་བྱང་ཆུབ་མངོན་པར་འཚང་རྒྱ་ཤོག་།དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐྱབས་ཕྱེ་ན།་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང ། ཁྱོད་ཅི་དད་ཅི་འདོད་པ་དྲིས་ཤིག་དང ། ངས་དྲིས་པ་དེ་དང་དེ་ཉིད་ཀྱི་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། ཚེ་དང་ལྡན་པ་ཡུལ་འཁོར་སྐྱོང་གིས་
465a
༄#། །བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན། ཆོས་ཐམས་ཅད་ཀྱི་ཡོན་ཏན་གྱི་ཁྱད་པར་ཐོབ་པར་གྱུར། །གཞན་ལ་རག་མ་ལས་པའི་ཤེས་པ་འཐོབ། མྱུར་བའི་ཤེས་རབ་འཐོབ། སྤོབས་པ་རྣམ་པར་ངེས་པ་འཐོབ། སྣང་བ་འཐོབ། ཐམས་ཅད་མཁྱེན་པ་ཉིད་ལ་འཇུག་པ་དང ། སེམས་ཅན་ཡོངས་སུ་སྨིན་པར་བགྱིད་པ་དང ། ཡིད་གཉིས་སྤོང་བ་དང ། སོམ་ཉི་སྤོང་བ་དང ། ཐམས་ཅད་མཁྱེན་པ་ཉིད་དུ་རྣམ་པར་ངེས་པ་འཐོབ། སེམས་ཅན་འཛུད་པ་ལ་མཁས་པ་དང ། ཇི་སྐད་སྨྲས་པ་དེ་བཞིན་དུ་བགྱིད་པ་དང ། ལྡེམ་པོ་དག་ཡང་དག་པ་དང ། སེམས་ཅན་གྱི་ཁམས་ལ་མཁས་པ་དང ། སངས་རྒྱས་རྗེས་སུ་དྲན་པ་འཐོབ་པ་དང ། ཞུ་བ་ཐམས་ཅད་ཞུ་བ་དང ། ཆོས་ཐམས་ཅད་འཛིན་པ་དང ། མྱུར་དུ་ཐམས་ཅད་མཁྱེན་པ་ཉིད་འཐོབ་པར་འགྱུར། དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བྱང་ཆུབ་སེམས་དཔའི་སྤྱོད་པ་རབ་ངེས་པ། །ཡང་དག་ཉིད་དུ་ཇི་ལྟར་ངེས་འབྱུང་དང ། །ཡེ་ཤེས་
465b
རྒྱ་མཚོའི་བཀའ་མཆིད་རྣམ་ངེས་པ། །མི་མཆོག་རྒྱལ་བ་བདག་ལ་བཤད་དུ་གསོལ། །ཤིན་ཏུ་སྦྱངས་པའི་གསེར་གྱི་གཟུགས་ལྟ་བུ། །སེམས་ཅན་དམ་པ་བསོད་ནམས་ཚོགས་བསགས་པ། །ཁྱོད་ནི་སྐྱབས་དང་གནས་དང་དཔུང་གཉེན་ལགས། །བྱང་ཆུབ་སྤྱོད་མཆོག་དྲི་མེད་དེང་བདག་གསུངས། །གཟུངས་དང་བདུད་རྩི་བྱང་ཆུབ་འབྱུང་བ་ཡི། །ཡེ་ཤེས་མི་ཟད་ཇི་ལྟར་འཐོབ་པར་འགྱུར། །གང་གིས་སྐྱེ་བོའི་དོགས་པ་གཅོད་འགྱུར་བ། །ཤེས་རབ་རྒྱ་མཚོ་ཇི་ལྟར་རྣམ་པར་དག་།འཁོར་བར་བསྐལ་པ་བྱེ་བ་མང་པོར་ནི། །འཇིག་རྟེན་སྡུག་བསྔལ་ཉེན་པ་བལྟ་བགྱིད་ཀྱང ། །སྐྱོ་བའི་བློ་ནི་ནམ་ཡང་མི་བསྐྱེད་ཅིང ། །དེ་དག་དོན་དགེ་བསྟེན་པར་འགྱུར་བ་དང ། །དག་པའི་ཞིང་དང་ཕུན་སུམ་ཚོགས་འཁོར་དང ། །ཚེ་མཆོག་དང་ནི་ཕུན་སུམ་ཚོགས་ཞིང་དང ། །སེམས་ཅན་ཆེད་ཀྱི་བཀའ་མཆིད་བླ་མེད་དང ། །བྱང་ཆུབ་སྤྱོད་པ་དྲི་མེད་བཤད་དུ་གསོལ། །བདུད་འཇོམས་མཛད་པ་ལྟ་ངན་སྦྱོང་བ་པོ། །སྲེད་པ་སྐེམ་པ་རྣམ་གྲོལ་རེག་མཛད་པས། །ཆོས་ཀྱི་ཚུལ་ཡང་བསྐྱུད་པར་མི་འགྱུར་བ། །སེམས་ཅན་རིན་ཆེན་སྤྱོད་མཆོག་བསྟན་དུ་གསོལ། །གཟུགས་དང་ལོངས་སྤྱོད་སྤོབས་པ་ཕུན་སུམ་ཚོགས། །སྣུམ་པའི་
466a
༄#། །གསུང་གིས་འཁོར་རྣམས་ཚིམ་པར་མཛད། །བདེ་གཤེགས་སྤྲིན་ལྟར་འགྲོ་བ་ཚིམ་མཛད་པ། །སངས་རྒྱས་སྤྱོད་ཡུལ་ལེགས་པར་བསྟན་དུ་གསོལ། །ཀ་ལ་པིངྐའི་སྒྲ་སྙན་གསུང་འབྱིན་པ། །ཚངས་པའི་དབྱངས་ཀྱིས་བློ་ངན་རབ་འཇིག་པ། །ཆོས་འཚལ་གྱུར་པའི་འཁོར་རྣམས་ལྷགས་ལགས་ཀྱི། ། གཙོ་བོ་བདུད་རྩིའི་རོ་ཡིས་ཚིམ་པར་མཛོད། །བྱང་ཆུབ་དམ་པའི་མཆོག་ལ་འདུན་པ་མཆིས། །ཆོས་དང་འདུན་པ་བཟློག་པ་མི་རིགས་ཏེ། །འདྲེན་པ་བསྟན་པ་མཛད་པའི་དུས་འདི་ལགས། །རིན་ཆེན་དམ་པ་བསྒྲག་པའི་དུས་ལ་བབ། །ཐུབ་པ་བདག་ནི་བྱང་ཆུབ་རེ་བ་མཆིས། །བདག་གི་བསམ་པ་རྒྱལ་བས་རབ་ཏུ་མཁྱེན། །རྒྱལ་བ་ཅོ་འདྲི་མ་ལགས་དོན་དུ་གཉེར། །སྤྱོད་པ་དམ་པ་ལེགས་པར་བཤད་དུ་གསོལ། །དེ་སྐད་ཅེས་གསོལ་པ་དང ། །བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང ། ཁྱོད་ལེགས་སོ། །ཡུལ་འཁོར་སྐྱོང ། །ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་དང ། ཡུལ་འཁོར་སྐྱོང ། ཁྱོད་སྐྱེ་བོ་མང་པོ་ལ་བདེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང ། ད་ལྟར་དང ། མ་འོངས་པའི་བྱང་ཆུབ་སེམས་དཔའ་སེམས་དཔའ་
466b
ཆེན་པོ་རྣམས་ཡོངས་སུ་གཟུང་བའི་ཕྱིར་དེ་བཞིན་གཤེགས་པ་ལ་དོན་འདི་དྲི་བར་སེམས་པ་ནི། ལེགས་སོ། །ཡུལ་འཁོར་སྐྱོང ། ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས། ལེགས་སོ། །ཞེས་གསོལ་ཏོ། །ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། ཡོངས་སུ་དག་པ་འདི་དག་འཐོབ་བོ། །བཞི་གང་ཞེ་ན། འདི་ལྟ་སྟེ། བསམ་པ་དང་ལྷག་པའི་བསམ་པས་ནན་ཏན་བྱེད་པ་དང ། སེམས་ཅན་ཐམས་ཅད་ལ་སེམས་མཉམ་པ་དང ། སྟོང་པ་ཉིད་སྒོམ་པ་དང ། ཇི་སྐད་སྨྲས་པ་དེ་བཞིན་བྱེད་པ་སྟེ། ཡུལ་འཁོར་སྐྱོང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན། ཡོངས་སུ་དག་པ་འདི་དག་འཐོབ་བོ། །འདི་ལ་འདི་ནི། ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །བསམ་པ་ཐག་པས་རྟག་ཏུ་མངོན་བརྩོན་པ། །བྱང་ཆུབ་ལམ་ལས་མི་ལྡོག་ཡིད་ལྡན་པ། །གཡོ་མེད་ཐ་བ་མེད་ཅིང་སྒྱུ་མེད་པ། །ཡེ་ཤེས་མཐའ་མེད་ལྡན་ལ་དེ་དག་ཡོད། །སྐྱེ་དང་ང་དང་རྒ་དང་
467a
༄#། །འཆིས་གཟིར་བ། །སེམས་ཅན་མགོན་མེད་སྡུག་བསྔལ་མཐོང་ནས་ནི། །སྲིད་པའི་མཚོ་ལས་འགྲོ་བ་བསྒྲལ་བའི་ཕྱིར། །དེ་དག་ཆོས་ཀྱི་གྲུ་ནི་ཡང་དག་སྦྱོར། །ངེས་པ་སེམས་ཅན་ཀུན་ལ་སེམས་མཉམ་པ། །བུ་གཅིག་པ་བཞིན་འགྲོ་བ་རྣམས་ལ་བལྟ། །འདི་དག་ཐམས་ཅད་བདག་གིས་དགྲོལ་ལོ་ཞེས། །གང་ཟག་མཆོག་གི་བསམ་པ་དེ་འདྲའོ། །སྟོང་ཉིད་རྟག་ཏུ་རྟོགས་པར་ཁོང་དུ་ཆུད། །བདག་ཡོད་མ་ཡིན་སེམས་ཅན་ཡོད་མ་ཡིན། །འདུས་བྱས་སྒྱུ་མ་རྨི་ལམ་འདྲ་བ་ལ། །བྱིས་པ་མི་མཁས་འདི་ལ་རྣམ་པར་རྨོངས། །མཁས་པ་དེ་དག་ཇི་སྐད་ཚིག་སྨྲས་པ། །དེ་ལ་ནན་ཏན་བྱེད་ཅིང་ཀུན་ཏུ་གནས། །དུལ་ཞིང་ཞི་ལ་རྟག་ཏུ་སྐྱོན་རྣམས་སྤངས། །རྒྱལ་བའི་སྲས་རྣམས་བྱང་ཆུབ་ལམ་ལ་དགའ། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པ་སྟེ། །བཞི་གང་ཞེ་ན། གཟུངས་འཐོབ་པ་དང ། དགེ་བའི་བཤེས་གཉེན་རྙེད་པ་དང ། ཆོས་ཟབ་མོ་ལ་བཟོད་པ་ཐོབ་པ་དང ། ཚུལ་ཁྲིམས་ཡོངས་སུ་དག་པར་སྤྱོད་པ་སྟེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པའོ། །འདི་ལ་འདི་ནི། ཆོས་ཉིད་
467b
ཡིན་ཏེ།་དེ་ལ་འདི་སྐད་ཅེས་བྱའོ། །གང་གིས་སངས་རྒྱས་ཀུན་གྱིས་གསུངས་པའི་ཆོས་མཆོག་འཛིན་འགྱུར་པ། །གཟུངས་རྣམས་གྲགས་པ་ཆེན་པོ་དེ་དག་གིས་ནི་རྟག་ཏུ་འཐོབ། །ནམ་ཡང་ཆུད་ཟར་མི་འགྱུར་ཕྱིར་ཞིང་བློ་གྲོས་རབ་ཏུ་འཕེལ། །དེ་དག་ཡེ་ཤེས་ཆགས་པ་མེད་ཅིང་ཆོས་ཀུན་ཕ་རོལ་ཕྱིན། །བྱང་ཆུབ་ཡན་ལག་འཕེལ་བར་བྱེད་པའི་དགེ་བའི་བཤེས་གཉེན་རྙེད། །དེ་དག་འདྲེན་པ་རྣམས་ནི་གང་ནས་བཞུད་པའི་ལམ་མཆོག་སྟོན། །དེ་དག་སྡིག་པའི་གྲོགས་པོ་དག་ལ་བརྟེན་པ་མ་ཡིན་ཏེ། ། ཚིག་བྱེད་བདག་ཉིད་མེ་ལྟར་རིང་དུ་རྣམ་པར་སྤོང ། །དཔའ་བོ་སྟོང་པ་ཉིད་དང་ལྡན་པའི་ཟབ་མོའི་ཆོས་ཐོས་ནས། །དེ་དག་བདག་དང་སེམས་ཅན་སྲོག་ཏུ་ལྟ་བ་ཀུན་མི་འབྱུང ། །དེ་དག་ཚུལ་ཁྲིམས་སྐྱོན་མེད་དུལ་ཞིང་ཞི་བའི་ཡིད་དང་ལྡན། །སངས་རྒྱས་ཚུལ་ཁྲིམས་བླ་ན་མེད་ལ་སེམས་ཅན་རྣམས་ཀྱང་སྦྱོར། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང ། སངས་རྒྱས་མཐོང་བས་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང ། ཡུལ་འཁོར་སྐྱོང ། རྗེས་སུ་མཐུན་པའི་ཆོས་ཐོས་པ་བྱང་ཆུབ་སེམས་དཔའ་
468a
༄#། །འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང ། ཡུལ་འཁོར་སྐྱོང ། བདོག་པ་ཐམས་ཅད་ཡོངས་སུ་གཏོང་བ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང ། ཡུལ་འཁོར་སྐྱོང ། དམིགས་སུ་མེད་པའི་ཆོས་ལ་བཟོད་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་སོ། །འདི་ལ་འདི་ནི། ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །གཟི་བརྗིད་ཀྱིས་ནི་འཇིག་རྟེན་ཐམས་ཅད་ཀུན་ནས་སྣང་མཛད་པའི། ། རྫོགས་པའི་སངས་རྒྱས་མི་མཆོག་ཚེ་རབས་ཀུན་ཏུ་དེ་དག་མཐོང ། །བྱང་ཆུབ་དམ་པ་མཆོག་ཚོལ་ཚེ་ན་སེམས་ཅན་དགྲོལ་བའི་ཕྱིར། །དགའ་ཞིང་གུས་པར་གནས་ན་དེ་ལྟར་མི་དབང་རྒྱལ་པོ་མཆོད། །འདྲེན་པ་རྣམས་ལས་ཞི་བ་རྗེས་སུ་མཐུན་པའི་ཆོས་ཀྱང་ཉན། །ཐོས་ནས་བསམ་པ་ཐག་པས་བརྟན་པ་ཚུལ་བཞིན་རབ་ཏུ་སྦྱོར། ། དམིགས་མེད་ཆོས་ཐོས་ཆོས་འདི་ཐམས་ཅད་སེམས་ཅན་མེད་པ་དང ། །འདི་ལ་བདག་མེད་པར་ནི་ཆོས་ལ་སོམ་ཉི་དེ་མི་སྐྱེ། །དེ་ནི་བདོག་པ་ཐམས་ཅད་ཡོངས་
468b
གཏང་རྟག་ཏུ་ཀུན་འཛིན་མེད། །སློང་བ་ཉེ་བར་འོངས་པ་མཐོང་ན་སེམས་ནི་རབ་ཏུ་དགའ། །གྲོང་དང་ཡུལ་འཁོར་ས་དང་སྲོག་དང་བུ་དང་ཆུང་མ་དང ། །ཐམས་ཅད་གཏོང་ཞིང་དེ་ཡི་སེམས་ནི་གང་དུའང་གཡོ་བ་མེད། །ཡུལ་འཁོར་སྐྱོང ། བྱང་ཆུབ་སེམས་དཔས་ཆོས་བཞི་ལ་བལྟ་བར་མི་བྱ་སྟེ། བཞི་གང་ཞེ་ན། ཡུལ་འཁོར་སྐྱོང ། །བྱང་ཆུབ་སེམས་དཔས་ཁྱིམ་གྱི་གནས་ལ་བལྟ་བར་མི་བྱ་བ་དང ། ཡུལ་འཁོར་སྐྱོང ། བྱང་ཆུབ་སེམས་དཔས་རབ་ཏུ་བྱུང་ནས་རྙེད་པ་དང་བཀུར་སྟི་ལ་བལྟ་བར་མི་བྱ་བ་དང ། ཡུལ་འཁོར་སྐྱོང ། བྱང་ཆུབ་སེམས་དཔས་ཁྱིམ་ལ་འདྲིས་པར་བྱ་བ་ལ་བལྟ་བར་མི་བྱ་བ་དང ། ཡུལ་འཁོར་སྐྱོང ། བྱང་ཆུབ་སེམས་དཔས་ལུས་དང ། སྲོག་ལ་བལྟ་བར་མི་བྱ་སྟེ། ཡུལ་འཁོར་སྐྱོང ། བྱང་ཆུབ་སེམས་དཔས་ཆོས་བཞི་པོ་དེ་དག་ལ་བལྟ་བར་མི་བྱའོ། །འདི་ལ་འདི་ནི། ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །སྐྱོན་གྱིས་གཟིངས་པ་མཐའ་ཡས་ལྡན་པའི་ཁྱིམ་སྤངས་རྟག་ཏུ་ནོར་མི་བལྟ། །ཡོན་ཏན་ལྡན་པ་ངེས་པ་དེ་དག་དགོན་པར་དགའ་ཞིང་དབང་པོ་དུལ། །དེ་དག་གང་དུའང་བུད་མེད་རྣམས་དང་སྐྱེས་པ་དག་དང་འདྲིས་མི་བྱེད། །བསེ་ལྟར་གཅིག་པུར་གནས་ཤིང་བསམ་པ་དྲི་མེད་དག་ལ་
469a
༄#། །དྲི་མ་བྲལ། །དེ་དག་རྙེད་པ་རྣམས་ཀྱིས་དགའ་བར་མི་འགྱུར་མི་ཐོབ་ཡིད་ཞུམ་མེད། །འདོད་པ་ཆུང་སྟེ་ངན་ངོན་ཙམ་ལ་དགའ་ཞིང་སྒྱུ་དང་ཚུལ་འཆོས་སྤངས། །སེམས་ཅན་དོན་ཕྱིར་བརྩོན་འགྲུས་ཡིད་ལྡན་སྦྱིན་དང་དུལ་ལ་རབ་ཏུ་གནས། །སངས་རྒྱས་ཡེ་ཤེས་དོན་གཉེར་བསམ་གཏན་བརྩོན་འགྲུས་ཡོན་ཏན་ཕ་རོལ་ཕྱིན། །ལུས་དང་དེ་བཞིན་སྲོག་ལ་མི་ལྟ་སྡུག་པའི་རྩ་ལག་རྣམ་སྤངས་ཏེ། །བསམ་པ་རྡོ་རྗེ་ལྟ་བུར་རབ་བརྟན་རྟག་ཏུ་བྱང་ཆུབ་ལམ་ལ་སྦྱོར། །ལུས་ནི་དུམ་བུ་དུམ་བུར་བཅད་ཀྱང་དེ་དག་སེམས་ལ་གཡོ་བ་མེད། །ཐམས་ཅད་མཁྱེན་པ་ཉིད་རེས་ཕྱིར་ཞིང་བརྩོན་འགྲུས་ཤིན་ཏུ་བརྟན་འདིར་རྩོམ། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང ། ཚུལ་ཁྲིམས་སྐྱོན་མེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་དང ། ཡུལ་འཁོར་སྐྱོང ། དགོན་པ་ལ་གནས་པ་མི་གཏོང་བ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་དང ། ཡུལ་འཁོར་སྐྱོང ། འཕགས་པའི་རིགས་བཞི་དང་མཐུན་པར་བྱེད་པ་བྱང་ཆུབ་སེམས་དཔའ་རྣམས་
469b
ཀྱི་གདུང་བ་མེད་པར་བྱེད་པའི་ཆོས་དང ། ཡུལ་འཁོར་སྐྱོང ། མང་དུ་ཐོས་པ་ཐོབ་པར་བྱེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་ཏེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་སོ། །འདི་ལ་འདི་ནི། ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། ། སངས་རྒྱས་ཚུལ་ཁྲིམས་དམ་པ་འདི་ལ་འདོད་བྱེད་ཅིང ། །ཚུལ་ཁྲིམས་དྲི་མེད་ནོར་བུ་རིན་ཆེན་འདྲ་བ་སྲུང ། །དེ་དག་ང་ནི་ཁྲིམས་ལྡན་ལེགས་སྡོམ་ཡིན་མི་སེམས། ། ཚུལ་ཁྲིམས་དེ་ཉིད་ལ་ནི་རྟག་ཏུ་སེམས་ཅན་སྦྱོར། །དེ་དག་སྟོང་པ་དགོན་པར་རྟག་ཏུ་གནས་པར་བྱེད། །དེ་དག་བདག་གི་འདུ་ཤེས་སྲོག་གི་འདུ་ཤེས་མེད། །གཟུགས་ཀུན་རྩཝ་དང་ཤིང་དང་རྩིག་པ་འདྲ་བར་མཐོང ། །འདི་ལ་སྐྱེས་པ་བུད་མེད་བདག་གི་མེད་པར་མཐོང ། །འཕགས་རིགས་བཞི་ལ་དགའ་ཞིང་གཡོ་མེད་ཚུལ་འཆོས་མེད། ། བག་ཡོད་དེ་དག་བསམ་པ་ཐག་པས་རབ་ཏུ་སྦྱོར། །ཐོས་དང་ཡོན་ཏན་རྣམས་ལ་རྟག་ཏུ་བརྩོན་པར་བྱེད། །བདེ་བར་གཤེགས་པའི་ཡོན་ཏན་མཐུ་ཆེན་དོན་དུ་གཉེར། ། སྐྱེ་རྒ་འཆི་བས་བཅོམ་ཞིང་ནད་ཀྱིས་གཟིར་གྱུར་པ། །འགྲོ་བ་མགོན་མེད་སྲིད་པའི་བཙོན་ར་འདིར་བལྟས་ནས། །ཞི་བ་དམ་པ་མཆོག་གི་ཆོས་ཀྱི་གྲུ་སྦྱར་ཏེ། །སྲིད་པའི་རྒྱ་
470a
༄#། །མཚོའི་ཆུ་ལས་སྐྱེ་བོ་སྒྲོལ་བར་བྱེད། །འདུས་བྱས་གྱུར་པར་འཇིག་རྟེན་འཁྱམས་པས་སྐྱབས་མགོན་དང ། །དཔུང་གཉེར་བྱེད་པ་གཞན་ནི་གང་ཡང་ཡོད་མིན་གྱི། །བདག་གིས་སེམས་ཅན་འདི་དག་ཐམས་ཅད་ཡོངས་དགྲོལ་ཞེས། །དེ་ཕྱིར་བྱང་ཆུབ་མཆོག་ཏུ་བདག་གིས་སྨོན་ལམ་གདབ། །ཡུལ་འཁོར་སྐྱོང ། བྱང་ཆུབ་སེམས་དཔས་བཞི་པོ་འདི་དག་ནི། ཅང་ཤེས་ཀྱི་འགྲོས་སུ་ཤེས་པར་བྱ་སྟེ། བཞི་གང་ཞེ་ན། བདེ་འགྲོ་ཐོབ་སྟེ། དེ་ཡང་སངས་རྒྱས་འབྱུང་བ་དང་ཕྲད་པ་དང ། བླ་མ་ལ་སྲིད་ཞུ་བྱེད་དེ། དེ་ཡང་ཟང་ཟིང་མེད་པའི་སེམས་ཀྱིས་བསྟེན་པ་དང ། བས་མཐའི་གནས་མལ་ལ་མངོན་པར་དགའ་སྟེ། དེ་ཡང་རྙེད་པ་དང་བཀུར་སྟི་ལ་མི་ལྟ་བ་དང ། སྤོབས་པ་ཐོབ་སྟེ། དེ་ཡང་ཟབ་མོ་ལ་བཟོད་པ་དང་ལྡན་པ་སྟེ། ཡུལ་འཁོར་སྐྱོང ། བྱང་ཆུབ་སེམས་དཔས་ཆོས་བཞི་པོ་དེ་དག་ནི། ཅང་ཤེས་ཀྱི་འགྲོས་སུ་ཤེས་པར་བྱའོ། །འདི་ལ་འདི་ནི། ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །བརྟེན་པ་ནགས་དང་སུལ་ན་རྟག་ཏུ་གནས་པར་བྱེད། །དེ་དག་རྟག་ཏུ་ཁོར་མོར་རྙེད་པ་དོན་གཉེར་མིན། །ཆགས་མེད་བློ་ཅན་རྟག་ཏུ་སྤོབས་དང་ལྡན་པ་ཡིན། །ཟབ་མོའི་ཆོས་ལ་མཁས་ཤིང་སྤྲོས་པ་རྣམས་
470b
དང་བྲལ། །རྟག་ཏུ་ཁོར་མོར་བླ་མ་རྣམས་ལ་སྲི་ཞུ་བྱེད། །དེ་དག་ཇི་སྐད་སྨྲས་པ་དེ་བཞིན་དེ་དག་སྦྱོར། །བདེ་གཤེགས་དཔག་ཏུ་མེད་པ་མང་པོ་མཉེས་པར་བྱེད། །རྒྱལ་བའི་ཡེ་ཤེས་ཆེད་དུ་མཆོད་པ་རྒྱ་ཆེན་བྱེད། །གྲགས་པ་ཆེན་པོ་རྣམས་ཀྱི་འགྲོ་བ་གཙོ་བོར་འགྱུར། །ལྷ་མི་རྣམས་ཀྱི་ནང་ན་སྤྱི་བོར་ཕྱིན་པ་ཡིན། །རྫོགས་པའི་བྱང་ཆུབ་ལམ་ལ་རྟག་ཏུ་སེམས་ཅན་འཛུད། །དགེ་བ་བཅུ་པོ་དག་ལའང་ཡང་དག་སྦྱོར་བར་བྱེད། །སངས་རྒྱས་ཡོན་ཏན་ཐོས་ནས་དེ་དག་དགར་འགྱུར་ཏེ། །དེ་དག་རིང་པོར་མི་ཐོགས་ང་དང་ཉེ་བར་འགྱུར། ། དེ་དག་བྱང་ཆུབ་རྡུལ་བྲལ་དམ་པ་སངས་རྒྱས་ནས། །སེམས་ཅན་ཁྲག་ཁྲིག་སྡུག་བསྔལ་མཐའ་ཡས་རྣམས་ལས་འགྲོ་ལ། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྤྱོད་པའི་ཆོས་ཏེ། བཞི་གང་ཞེ་ན། ཁོང་ཁྲོ་བ་མེད་པའི་སེམས་བྱང་ཆུབ་སེམས་དཔའི་སྤྱོད་པ་དང ། ཚུལ་འཆོས་པ་དང ། ཁ་གསག་དང ། ཐོབ་ཀྱིས་འཇལ་བ་ཡོངས་སུ་སྤངས་ཏེ་དགོན་པར་གནས་པ་དང ། བདོག་པ་ཐམས་ཅད་ཡོངས་སུ་གཏོང་ཞིང་རྣམ་པར་སྨིན་པ་ལ་རེ་བ་མེད་པ་དང ། ཉིན་མཚན་དུ་ཆོས་འདོད་ཅིང་ཆོས་སྨྲ་བ་རྣམས་ལ་འཁྲུལ་བ་མི་ཚོལ་བ་སྟེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྤྱོད་པའི་ཆོས་
471a
༄#། །སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བླ་ན་མེད་པའི་བྱང་ཆུབ་འདོད་པ་ན། ཐ་བ་དྲི་མ་མེད་ཅིང་ཁྲོ་སེམས་མེད། ། དེ་ནི་སུ་ལའང་སྐྱོན་ཚོལ་བྱེད་མ་ཡིན། །གཡོ་མེད་ཚུལ་འཆོས་མེད་ཅིང་སྤྲོས་སེམས་མེད། །ཁྱིམ་གྱི་བློ་གྲོས་ཡང་མྱ་ངན་རྩ། །སྐྱེ་བོ་ངན་འགྲོགས་ཚུལ་བཞིན་རིང་འགྱུར་བ། །སྤངས་ཏེ་དེ་ལ་མི་ལྟ་རབ་བྱུང་ནས། །ཐར་པ་འདོད་པ་རི་ཁྲོད་གནས་པར་བྱེད། །དགོན་པ་བས་མཐའི་རྣམ་པར་བསྟེན་པས་ན། །ཤེས་ཁེ་ཐོབ་པ་ཀུན་ལ་མི་རྟོན་ཞིང ། །ལུས་དང་སྲོག་ལའང་ལྟ་བར་མི་བྱེད་ལ། །སེངྒེ་ལྟ་བུར་གནས་ཤིང་དགྲ་ལས་རྒྱལ། །བྱང་ཆུབ་ལམ་ཕྱིར་ཡེ་ཤེས་ཚོལ་བ་ན། །ངན་ངོམ་ཙམ་གྱིས་ཆོག་པར་འཛིན་བྱེད་ཅིང ། །རྟག་ཏུ་བྱ་ལྟར་གསོག་པ་སྤངས་ནས་ནི། །འཇིག་རྟེན་ཀུན་ལ་གནས་པ་མ་ཡིན་ནོ། །དཔེར་ན་བསེ་ལྟར་གཅིག་པུར་གནས་བྱེད་ཅིང ། །སེངྒེ་ལྟ་བུར་འཇིགས་པ་ཡོད་མ་ཡིན། །རི་དྭགས་ལྟ་བུར་གསར་འཇིགས་ཡིད་མི་རྟོན། །དེ་ནི་མཆོད་པས་ཁེངས་པར་འགྱུར་བ་མེད། །གཡང་སར་ལྷུང་བའི་འགྲོ་བ་འདི་བལྟས་ནས། །རབ་ཏུ་ཐར་པར་བྱ་ཕྱིར་འབད་པར་བྱེད། །གལ་ཏེ་བག་ཡོད་དགེ་བའི་ཆོས་སྤྱོད་ན། ། བདག་ཀྱང་འགྲོ་བ་འདི་ཡི་དཔུང་གཉེན་འགྱུར། །མི་མཆོག་སྤྱོད་པ་འདི་དག་འདོད་པ་ན། །འཛུམ་པའི་བཞིན་གྱིས་རབ་སྙན་ཚིག་སྨྲ་ཞིང ། །སྡུག་དང་མི་སྡུག་རྟག་ཏུ་རྙོག་སེམས་མེད། །
471b
རླུང་དང་འདྲ་བར་ཆགས་པ་མེད་པར་གནས། །སྟོང་པ་ཉིད་དང་མཚན་མ་མེད་ལ་མོས། །འདུས་བྱས་ཀུན་ལ་སྒྱུ་མ་ལྟར་བུར་རྟོག། ཡངས་པའི་བློ་ཅན་ཞི་དང་དུལ་ལ་དགའ། །དེ་ནི་རྟག་ཏུ་བདུད་རྩིའི་རོ་ཡིས་མགུ། །ཅི་ནས་བྱང་ཆུབ་ལམ་ནི་གྲུབ་བྱེད་ཅིང ། །དེ་ནི་རྟག་ཏུ་བསམ་པ་ཡོངས་སུ་སྦྱོང ། །གཟུངས་དང་སྤོབས་པ་ཚོལ་བར་བྱེད་པ་ན། །ཡོན་ཏན་འདོད་པ་སྡུག་བསྔལ་བརྒྱ་དག་བཟོད། །བྱང་ཆུབ་སེམས་དཔའི་སྤྱོད་པ་འདི་བལྟས་ནས། །གང་ཞིག་དོན་དུ་གཉེར་དེ་དགར་འགྱུར་རོ། །གང་ཞིག་བྱང་ཆུབ་འདི་ལ་མ་མོས་པ། །བློ་ཆུང་དེ་ནི་ཉེས་པ་བརྒྱ་ཡང་བསྐྱེད། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའི་གཡང་ས་སྟེ། བཞི་གང་ཞེ་ན། ཡུལ་འཁོར་སྐྱོང ། མ་གུས་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང ། ཡུལ་འཁོར་སྐྱོང ། བྱས་པ་མི་གཟོ་ཞིང་གཡོ་ལ་བརྟེན་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང ། ཡུལ་འཁོར་སྐྱོང ། རྙེད་པ་དང་བཀུར་སྟི་ལ་ཆགས་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང ། ཡུལ་འཁོར་སྐྱོང ། །ཚུལ་འཆོས་པ་དང་ཁ་གསག་གིས་རྙེད་པ་དང་བཀུར་སྟི་སྒྲུབ་པ་བྱང་ཆུབ་སེམས་དཔའ་རྣམས་ཀྱི་གཡང་ས་སྟེ། ཡུལ་འཁོར་སྐྱོང ། །བཞི་པོ་དག་ནི། བྱང་ཆུབ་སེམས་དཔའ་རྣམས་ཀྱི་གཡང་སའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཕགས་པ་བླ་མ་རྣམས་དང་ཕ་མ་ལ། །དེ་དག་རྟག་ཏུ་གུས་པ་མེད་པ་ཡིན། །དེ་དག་བྱས་པ་མི་
472a
༄#། །གཟོ་གཡོན་ཅན་ཏེ། རྟག་ཏུ་ཀུན་ཏུ་མ་བསྡམས་སྤྱོད་ཅིང་རྨོངས། །རྙེད་ལ་རྟག་ཏུ་ཆགས་ཤིང་ཞེན་པ་སྟེ། །དེ་དག་ཚུལ་འཆོས་པ་དང་གཡོ་སྦྱོར་དགའ། །ཁ་ཅིག་ཚུལ་ཁྲིམས་བརྟུལ་ཞུགས་ཇི་ལྟས་ཀྱང ། །འདི་ན་བདག་དང་མཚུངས་པ་མེད་ཅེས་སྨྲ། །དེ་དག་ཕན་ཚུན་སྡང་བར་སེམས་པ་སྟེ། །གླགས་ཚོལ་བ་ལ་རྟག་ཏུ་བརྩོན་པ་ཡིན། །དེ་དག་ཞིང་གི་ལས་དང་ཚོང་ལ་དགའ། །དེ་དག་དགེ་སྦྱོང་ཡོན་ཏན་ཤིན་ཏུ་རིང ། །ཕྱི་མའི་དུས་ན་འདི་ལྟར་མ་བསྡམས་པའི། །དགེ་སློང་ཚུལ་ཁྲིམས་ཡོན་ཏན་རབ་རིང་བ། །དེ་དག་མཚང་འདྲུ་བ་དང་འཐབ་པ་དང ། །ཕྲག་དོག་དབང་གིས་ཆོས་འདི་ནུབ་པར་བྱེད། །བྱང་ཆུབ་ལམ་ལས་རྟག་པར་ཤིན་ཏུ་རིང ། །འཕགས་པའི་ནོར་ལས་དེ་དག་ཤིན་ཏུ་རིང ། །འཕགས་ལམ་གྱ་ནོམ་རྣམ་པར་སྤངས་ནས་ནི། །དེ་དག་འགྲོ་པ་ལྔར་ནི་འཁྱམས་པར་འགྱུར། །ཡུལ་འཁོར་སྐྱོང ། །བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང ། ལེ་ལོ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང ། ཡུལ་འཁོར་སྐྱོང ། མ་དད་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང ། ཡུལ་འཁོར་སྐྱོང ། ང་རྒྱལ་བྱང་ཆུབ་སེམས་དཔའ་རྣམས་
472b
ཀྱི་བྱང་ཆུབ་ལ་བགེགས་བྱེད་པའི་ཆོས་དང ། ཡུལ་འཁོར་སྐྱོང ། ཕ་རོལ་གྱི་མཆོད་པ་ལ་ཕྲག་དོག་དང་སེར་སྣའི་སེམས་དང་ལྡན་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་ཏེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མ་དད་ལེ་ལོ་རྟག་ཏུ་རྨོངས་པའི་སེམས། །དེ་དག་མངོན་པའི་ང་ཅན་རྟག་ཏུ་ཁྲོ། །བཟོད་ལྡན་རྟག་བརྩོན་དགེ་སློང་མཐོང་ནས་ནི། །གཙུག་ལག་ཁང་ནས་འགྲོ་ཚེ་དབྱུག་པས་བརྡེག་།ཕ་རོལ་མཆོད་ཕྱིར་འདི་ནི་ཕྲག་དོག་སྐྱེ། །དེ་དག་སེམས་ནི་གནས་པ་ཡོད་མ་ཡིན། །གླགས་ལྟ་བྱེད་ཅིང་འཁྲུལ་པ་ཚོལ་བ་ཅན། །སུ་ལ་འཁྲུལ་ཡོད་གང་ལ་གླེང་བྱ་སྙམ། །དེ་དག་ང་ཡི་བསྟན་པ་འདི་ལས་རིང ། །དེ་དག་ཡོན་ཏན་སྡང་ཞིང་ངན་སོང་གཞོལ། །དེ་དག་རྒྱལ་བའི་བསྟན་པ་བོར་ནས་ནི། །ངན་སོང་ཤིན་ཏུ་མི་ཟད་འབར་བར་འགྲོ། །དེ་དག་རྣམས་ཀྱི་སྡིག་པའི་སྤྱོད་པ་དང ། །ཆོས་མིན་ལྡན་འགྲོ་རབ་སྡིག་འདིར་ཐོས་ནས། ། རྟག་ཏུ་འཁོར་མོར་བྱང་ཆུབ་ལམ་ལ་སྦྱོར། །ངན་འགྲོར་སྐྱེས་ཤིང་གདུང་བར་གྱུར་ཏ་རེ། །སངས་རྒྱས་འཇིག་རྟེན་ཕན་པ་དྲང་སྲོང་ཆེ། །བསྐལ་པ་བྱེ་མང་བརྒྱ་ལམ་འབྱུང་བར་
473a
༄#། །འགྱུར། །དེ་ལྟར་དལ་བ་དམ་པ་རྙེད་པ་ལ། །གལ་ཏེ་ཐར་འདོད་བག་མེད་སྤང་བར་གྱིས། །ཡུལ་འཁོར་སྐྱོང ། གང་ཟག་བཞི་པོ་འདི་དག་ནི། བྱང་ཆུབ་སེམས་དཔས་བསྟེན་པར་མི་བྱ་བ་སྟེ། །བཞི་གང་ཞེ་ན། ཡུལ་འཁོར་སྐྱོང ། བྱང་ཆུབ་སེམས་དཔས་སྡིག་པའི་བཤེས་གཉེན་གྱི་གང་ཟག་བསྟེན་པར་མི་བྱ་བ་དང ། ཡུལ་འཁོར་སྐྱོང ། བྱང་ཆུབ་སེམས་དཔས་དམིགས་པར་ལྟ་བ་ཅན་གྱི་གང་ཟག་བསྟེན་པར་མི་བྱ་བ་དང ། ཡུལ་འཁོར་སྐྱོང ། བྱང་ཆུབ་སེམས་དཔས་དམ་པའི་ཆོས་སྤང་པའི་གང་ཟག་བསྟེན་པར་མི་བྱ་བ་དང ། ཡུལ་འཁོར་སྐྱོང ། བྱང་ཆུབ་སེམས་དཔས་ཟང་ཟིང་ལ་བརྐམ་པའི་གང་ཟག་བསྟེན་པར་མི་བྱ་བ་སྟེ། ཡུལ་འཁོར་སྐྱོང ། གང་ཟག་བཞི་པོ་འདི་དག་ནི། བྱང་ཆུབ་སེམས་དཔས་བསྟན་པར་མི་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་སྡིག་པའི་བཤེས་གཉེན་རྣམ་སྤོང་ཞིང ། །གང་དག་དགེ་བའི་བཤེས་གཉེན་སྟེན་བྱེད་པ། །དེ་དག་རྟག་ཏུ་བྱང་ཆུབ་ལམ་ལ་འཕེལ། །དཔེར་ན་མཁའ་ལ་ཟླ་བ་ཡར་ངོ་བཞིན། །དམིགས་པར་ལྟ་ལ་རྟག་ཏུ་ཞེན་པ་དང ། །བདག་དང་སྲོག་དང་གསོ་བར་ཞེན་པ་དང ། །དེ་དག་དུག་ཕྱིས་བཞིན་དུ་རྟག་ཏུ་སྤང ། །གང་དག་སངས་རྒྱས་ཡེ་ཤེས་དོན་མི་
473b
གཉེར་རོ། །གང་དག་མི་མཆོག་རྣམས་ཀྱི་ཞི་བའི་ཆོས། །འདོད་ཆགས་བྲལ་བའི་བདུད་རྩི་མཐུན་སྤོང་བ། །དེ་དག་དཔེར་ན་ངན་སྐྱུག་ཇི་བཞིན་སྤང ། །གང་ཞིག་བྱང་ཆུབ་དམ་པ་འཚང་རྒྱར་འདོད། །ཟང་ཟིང་དག་དང་ཆོས་གོས་ལྟུང་བཟེད་ཆགས། །རྟག་ཏུ་ཁྱིམ་ལ་འདྲིས་པར་བྱེད་བརྩོན་པ། །དེ་དག་རྣམས་དང་འདྲེས་པར་མི་བྱ་སྟེ། །དེ་དག་མེ་ཡི་འོབས་བཞིན་སྤང་བར་བྱ། །གང་ཞིག་བདུད་ནི་གདུལ་བར་བྱ་བ་དང ། །འཁོར་ལོ་དམ་པ་བླ་མེད་བསྐོར་བ་དང ། །དེ་ལྟར་སེམས་ཅན་དོན་ཡངས་བྱེད་འདོད་པ། །དེས་ནི་སྡིག་པའི་བཤེས་གཉེན་སྤང་བར་བྱ། །གང་ཞིག་བྱང་ཆུབ་དམ་པ་འཚང་རྒྱར་འདོད། །དེ་ཡིས་རྙེད་དང་སྡུག་དང་མི་སྡུག་དང ། །གྲགས་དང་མཚང་འདྲུ་ཕྲག་དོག་ང་སྤངས་ཏེ། ། སངས་རྒྱས་ཡེ་ཤེས་རྟག་ཏུ་བཙལ་བར་བྱ། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་ཏེ། །བཞི་གང་ཞེ་ན། ཡུལ་འཁོར་སྐྱོང ། ཤེས་པས་མངོན་པར་རློམ་སེམས་སུ་བྱེད་པ་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང ། ཡུལ་འཁོར་སྐྱོང ། ཕྲག་དོག་དང་སེར་སྣ་དང་ལྡན་པའི་སེམས་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང ། ཡུལ་འཁོར་སྐྱོང ། མ་མོས་པ་བྱང་
474a
༄#། །ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང ། ཡུལ་འཁོར་སྐྱོང ། ཡོངས་སུ་མ་དག་པའི་ཤེས་པ་དང ། བཟོད་པའི་ལོངས་སྤྱོད་ཡོངས་སུ་ཚོལ་བ་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་ཏེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་ས་ལ་ཆོས་ནི་འཛིན་གྱུར་ཅིང་།། འགྲོ་བ་ཐམས་ཅད་ཀྱིས་ཀྱང་མཆོད་འགྱུར་བ། །དེ་ལ་མི་ཤེས་པས་ནི་བརྙས་བྱེད་ན། །དེས་ན་དེ་ནི་སྡུག་བསྔལ་མཐའ་ཡས་རྙེད། །ཡང་བས་ནི་གང་ཞིག་ལོངས་སྤྱོད་ཚུལ། ། ཤེས་པ་མ་དག་རྟག་ཏུ་འདུན་ཅིང་འདོད། །གང་ཞིག་རྟག་ཏུ་ང་རྒྱལ་ཁེངས་གྱུར་ལ། །བླ་མ་འཕགས་པའི་སྐྱེ་བོ་མི་འདུད་ཅིང ། །སངས་རྒྱས་ལ་ཡང་མོས་པ་ཡོད་མིན་ལ། །ཆོས་དང་ཚོགས་ལ་དེ་ནི་མོས་པ་མེད། །བསླབ་དང་སྦྱངས་པ་རྣམས་ལ་དེ་མི་མོས། །སྡིག་པའི་བློ་ཅན་ངན་སོང་གསུམ་ཕྱོགས་པ། །དེ་ནི་མི་ནང་འདི་ནས་ཤི་འཕོས་ནས། ། ལས་ཀྱི་དབང་གིས་མི་མཁས་རྣམ་པར་རྨོངས། །དམྱལ་བའམ་འོན་ཏེ་དུད་འགྲོའི་སྐྱེ་གནས་སམ། །ཡི་དྭགས་འགྲོ་བ་རྣམས་སུ་སྡུག་བསྔལ་རྙེད། །གང་ཞིག་འཇིག་རྟེན་
474b
སྒྲོན་འགྱུར་བློ་ལྡན་ཞིང ། མི་ཡི་དཔའ་བོ་སྡུག་བསྔལ་མཐར་འབྱིན་པ། །དེ་ཡིས་ངན་སོང་ལམ་རྣམས་རབ་སྤངས་ཏེ། །བྱང་ཆུབ་ལམ་ནི་རྟག་ཏུ་བསྟེན་པར་བྱ།། །།བམ་པོ་གཉིས་པ། །ཡུལ་འཁོར་སྐྱོང ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་འཆིང་བ་སྟེ། བཞི་གང་ཞེ་ན། ཕ་རོལ་ལ་བརྙེས་པ་བྱང་ཆུབ་སེམས་དཔའ་རྣམས་ཀྱི་འཆིང་བ་དང ། འཇིག་རྟེན་པའི་ཐབས་ཀྱིས་བསྒོམ་པ་ལ་སྦྱོར་བ་དང ། མཚན་མའི་འདུ་ཤེས་བྱང་ཆུབ་སེམས་དཔའ་རྣམས་ཀྱི་འཆིང་བ་དང ། ཀུན་འཛིན་པའི་སེམས་དང་ལྡན་པ་དང ། ཡེ་ཤེས་དང་བྲལ་བ་དང ། བག་མེད་པ་ལ་བརྟེན་པར་བྱེད་པ་བྱང་ཆུབ་སེམས་དཔའ་རྣམས་ཀྱི་འཆིང་བ་དང ། ཕྱིར་འབྲང་བའི་སེམས་ཀྱིས་ཁྱིམ་ལ་འདྲིས་པར་བྱེད་པ་བྱང་ཆུབ་སེམས་དཔའ་རྣམས་ཀྱི་འཆིང་བ་སྟེ། ཡུལ་འཁོར་སྐྱོང ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་འཆིང་བའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྟག་ཏུ་གཞན་དག་ལ་ནི་བརྙས་བྱེད་ཅིང ། །རྟག་ཏུ་འཇིག་རྟེན་པ་ཡིས་བསམ་གཏན་སྒོམ། །ལྟར་གྱུར་འདི་དག་གིས་ནི་དེ་བཅིངས་ཏེ། །གླང་པོ་ལུས་རིང་འདམ་དུ་སོང་བ་བཞིན། །ཁྱིམ་ལ་འདྲིས་བྱེད་འཆིང་དང་ལྡན་པ་དང ། །གང་ཞིག་བག་མེད་རྟག་ཏུ་ཀུན་འཛིན་སེམས། །ཡེ་ཤེས་སྤངས་
475a
༄#། །ཤིང་བློ་གྲོས་རྨོངས་གྱུར་པ། །མི་རིགས་སྤྱོད་པ་འདི་དག་རྣམས་ཀྱིས་བཅིངས། །གང་ཞིག་སྡུག་བསྔལ་འཇིག་པ་འདི་དག་དང ། །སྐྱེ་རྒ་ན་འཆི་ལ་སོགས་ལས་གྲོལ་འདོད། །བརྙས་པར་བྱེད་དང་རློམ་སེམས་བོར་ནས་ནི། །བྱང་ཆུབ་ལམ་ལ་རྟག་ཏུ་བརྩོན་པར་འགྱུར། །སྡུག་བསྔལ་མཐའ་ཡས་མ་ལུས་བཟོད་བྱ་སྟེ། །བདེ་བ་ཀུན་ལ་ཆགས་པ་མེད་གྱུར་ནས། །སྡུག་དང་མི་སྡུག་གཉེན་པ་མ་ལུས་བཏང ། །བརྟན་པ་དག་ནི་སྡིག་བྲལ་སངས་རྒྱས་འགྱུར། །ཕ་རོལ་ཕྱིན་དྲུག་ས་དང་ཡོན་ཏན་དང ། །སྟོབས་དང་དབང་པོ་དག་དང་ཤེས་ལ་སྦྱོར། །ཡོན་ཏན་ཀུན་དང་རྟག་ཏུ་ལྡན་གྱུར་ནས། །འགྲོ་བའི་དྲ་བ་གྲོལ་བའི་སངས་རྒྱས་འགྱུར། ། བསྐལ་པ་བསམ་གྱིས་མི་ཁྱབ་སྔོན་སྤྱད་ཚེ། །སེམས་ཅན་ཕན་ཕྱིར་བྱང་ཆུབ་མཆོག་དོན་དུ། །སྦྱིན་དང་དུལ་དང་དེ་ལ་རྟག་ཏུ་སྤྱད། །གཉེན་པ་སྤངས་ནས་བདེ་བར་གནས་པར་འགྱུར། །བས་མཐའི་ནགས་སུ་རྟག་པར་ང་དགའ་སྟེ། །བྱང་ཆུབ་ཆེད་དུ་བསམ་པ་རྣམ་པར་སྦྱང ། །བརྒྱ་ལམ་ན་ཡང་བརྩོན་འགྲུས་ཉམས་མ་གྱུར། །སྐྱེས་ཆེན་རྣམས་ཀྱི་ཡེ་ཤེས་དེ་འདྲའོ། །སྲིད་པའི་བརྩོན་རར་འགྲོ་བ་ལྔ་འཁྱམས་པས། །སེམས་ཅན་འཁྱམས་པའི་འགྲོ་བ་མཐོང་ནས་ནི། །སྔོན་ཆད་འདིར་ནི་སྙིང་རྗེ་རྒྱ་ཆེན་བསྐྱེད། །འགྲོ་བའི་
475b
དོན་དུ་བྱང་ཆུབ་དམ་པ་བསྒྲུབས། །བསྐལ་པ་མང་པོར་བྱང་ཆུབ་མཆོག་ཚོལ་ཞིང ། །རང་གི་བུ་ཕོ་བུ་མོ་ཆུང་མ་སྡུག་།ཕངས་པའི་སྲོག་དང་ཤིན་ཏུ་འབྱོར་པ་དང ། །གྲོང་ཁྱེར་ནོར་དང་འབྲུ་རྣམས་མང་པོ་བཏང ། །མེ་ཏོག་འབྲས་བུ་ཆུ་འབྱོར་ཉམས་དགའ་བའི། །ནགས་སུ་ཐུབ་པ་ང་ནི་བཟོད་དགར་གྱུར། །སུམ་མཚན་རྒྱལ་པོས་ལག་པ་རྐང་པ་བཅད། །དེ་ཚེ་ང་ནི་སྡང་བའི་ཡིད་མ་གྱུར། །ནགས་དང་སུལ་ན་སྔོ་བསངས་ཞེས་བྱ་བའི། །ཐུབ་པས་བླ་མ་རྒོས་པ་གསོ་བ་ན། །མི་ཡི་དབང་པོས་སྲ་བའི་མདས་བསྣན་ཀྱང ། །ཡིད་ནི་ཡོངས་སུ་གནོད་པར་སེམས་མ་གྱུར། །ལེགས་པར་གསུངས་པའི་ཆེད་དུ་གཡང་ས་ནས། །ལུས་ལ་མ་བལྟས་རབ་ཏུ་མཆོངས་པར་གྱུར། །ང་ནི་བྱང་ཆུབ་མཆོག་གི་རྒྱུ་ཡི་ཕྱིར། །ལུས་དང་སྲོག་ལ་བལྟས་པར་མ་གྱུར་ཏོ། །སྟག་མོ་བུ་དང་བཅས་པའི་སྲོག་གི་ཕྱིར། །ལུས་བཏང་ནས་ནི་སྟག་མི་ཚིམ་པར་བྱས། །ནམ་མཁའ་ལས་ནི་ལྷ་ཡི་ཚོགས་རྣམས་ཀྱིས། །སྐྱེས་ཆེན་བརྩོན་འགྲུས་བསྟན་པ་ལེགས་ཞེས་བསྒྲགས། །གང་ཚེ་སྔོན་ཆད་སྲིད་པར་སྤྱོད་པ་ན། །སྦྱིན་ལ་རབ་དགའ་བྲམ་ཟེ་ཁྱེའུར་གྱུར་ཚེ། །རིན་ཆེན་ཆེད་དུ་རྒྱ་མཚོ་བསྐམས་ནས་ནི། །ནོར་བུ་རྙེད་ནས་སེམས་ཅན་བདེ་བར་བྱས། །རྒྱལ་བོ་ཟླ་ངའི་བུ་ཞེས་བྱར་གྱུར་ཏེ། །བརྗོད་པ་གྲགས་ཤིང་ང་ནི་སྤྱོད་པའི་ཚེ། །ང་ཡིས་བདེན་པའི་ཚུལ་གྱིས་རྒྱལ་པོ་
476a
༄#། །བརྒྱ། །བསད་པར་བྱས་པ་མྱུར་དུ་ཐར་པར་བྱས། །དབུལ་ཞིང་སྡུག་བསྔལ་བ་ཡི་མི་མཐོང་ནས། །ང་ཡིས་ཕངས་པའི་ལུས་ནི་བཏང་བྱས་ཏེ། །ང་ཡིས་ནོར་རྙེད་དེ་ནི་ཕྱུག་པོར་བྱས། །དེ་ཚེ་ང་ནི་ཀུན་སྤྱིན་རྒྱལ་པོར་གྱུར། །ང་འདིར་མི་ཡི་རྒྱལ་པོར་གྱུར་པའི་ཚེ། །སྐྱབས་སུ་འོངས་པའི་ཕུག་རོན་མཐོང་ནས་ནི། །རང་གི་ལུས་ལས་ཤ་ཡང་བཅད་བྱས་ཏེ། །རང་ལུས་ངས་བཏང་འཇིགས་པས་ཕོངས་མ་བཏང ། །རྒྱལ་པོ་རལ་པ་ཅན་ཞེས་སྔོན་གྱུར་ཚེ། །སྨན་པ་མཆོག་གིས་ང་ཡི་ཆེད་དུ་ནི། །མཚུངས་མེད་སྨན་རྣམས་མ་ལུས་སྦྱར་བ་ཡང ། །སྲོག་བཏང་ནས་ནི་དེ་དག་གཞན་ལ་བྱིན། །འགྲོ་བའི་དོན་ཕྱིར་སྔོན་ཆད་སྤྱོད་པ་ན། །རྒྱལ་བུ་མཆེ་བ་བཟང་ཞེས་བྱར་གྱུར་ཚེ། །ཆུང་མ་མ་དྲིས་ཁྱོ་ལས་མི་འཕྱོ་བ། །བུར་བཅས་བུ་མོ་མ་ཆགས་མ་བལྟས་བཏང ། །གང་ཚེ་བརྩོན་འགྲུས་འབར་ཞེས་བྱར་གྱུར་ཚེ། །ང་སྔོན་ལོ་ནི་སྟོང་དུ་ཚང་བར་ཡང ། །བྱ་དཀའ་བརྒྱད་ཅུ་རྩ་བཞི་བཟོད་པར་བྱས། །ནོར་དང་དཔལ་ཡང་སྔོན་ཆད་ངས་བཏང་ངོ ། །རྒྱལ་བུ་གཟི་བརྗིད་དྲི་མ་མེད་གྱུར་ཚེ། །ང་ཡིས་རྒྱལ་བའི་རིང་བསྲེལ་མཆོད་རྟེན་བདུན། །མཆོག་ཏུ་གུས་པས་ལུས་ལ་མེ་བཏང་སྟེ། །སྟོབས་བཅུ་མངའ་བ་རྣམས་ལ་
476b
མཆོད་པ་བྱས། །ང་ནི་རྒྱལ་པོ་ཟླ་འོད་གྱུར་བའི་ཚེ། །མི་བཟད་མིག་ཅན་ཁྲོས་པར་གྱུར་ན་ནི། །དེ་ཡིས་ང་ཡི་མགོ་བོ་བསླངས་པ་ན། །དེ་ཚེ་ང་ཡིས་མགོ་བོ་བཅད་དེ་བྱིན། །ང་ནི་བསོད་ནམས་མཉམ་ཞེས་བྱར་གྱུར་ཚེ། །གྲོང་དང་གྲོང་ཁྱེར་དག་དང་ལམ་སྲང་སྒོ། །ཐམས་ཅད་དུ་ཡང་རྒྱ་ཆེར་སྨན་གྱི་རྣམས། །དེ་དག་སེམས་ཅན་དོན་ཕྱིར་ངས་བཞག་གོ་།སྲིད་པ་རྣམས་ན་སྤྱོད་པ་གང་གི་ཚེ། །ང་སྔོན་རྒྱལ་པོ་དགེ་བར་གྱུར་པ་ན། །བུད་མེད་གཟུགས་བཟང་གསེར་དང་མུ་ཏིག་གིས། །ལུས་བརྒྱན་སྟོང་དག་ངས་ནི་བཏང་བ་བྱས། །གང་ཚེ་ང་སྔོན་མི་ཡི་རྒྱལ་པོ་ནི། །རིན་ཆེན་གཙུག་ཕུད་གྱུར་ཚེ་མེ་ཏོག་དང ། །སྤོས་མཆོག་རྣམས་དང་གསེར་གྱིས་བརྒྱན་པ་ཡི། །ཅོད་པན་དཔལ་ལྡན་དམ་པ་ངས་བཏང་ངོ ། །ང་སྔོན་རྒྱལ་པོ་མོས་ལྡན་གྱུར་པའི་ཚེ། །ཤིང་བལ་འདབ་མ་འཇམ་པ་ལྟ་བུ་དང ། །པདྨའི་འདབ་མཉེན་ལྟ་བུར་འཇམ་གཞོན་པའི། །ལག་བ་རྐང་པ་དག་ཀྱང་ངས་བཏང་ངོ ། །དེད་དཔོན་སེངྒེ་འཛིན་དུ་གྱུར་པ་ན། །སྙིང་རྗེ་མེད་ཅིང་མི་བཟད་རབ་གཏུམ་པ། །སྲིན་མོ་བརྒྱ་དག་ཤིན་ཏུ་ཚར་བཅད་ནས། །རྒྱ་ཤུག་གླིང་དུ་མི་རྣམས་བཀོད་པར་གྱུར། །གང་ཚེ་མིག་བཟང་ཞེས་བྱར་གྱུར་པ་ན། །བྱིས་པ་འདོད་དང་ལྡན་ཞིང་ཡིད་རྨོངས་པ། །སྲིན་མོ་དག་ལ་ན་ཆུང་འདུ་ཤེས་པ། །ཚོང་པ་
477a
༄#། །ལྔ་བརྒྱ་དེ་དག་ཐར་པར་བྱས། །གང་ཚེ་བསོད་ནམས་འོད་ཟེར་གྱུར་པ་ན། །ལྷ་ཡི་བུ་མོ་ལྟ་བུའི་གཟུགས་ལྡན་པའི། །བུད་མེད་བྱེ་བ་ཕྲག་བཞི་སྤངས་ནས་སུ། །རྒྱལ་བའི་བསྟན་པ་ལ་ནི་རབ་ཏུ་བྱུང ། །སེམས་ཅན་དོན་ཕྱིར་ང་ནི་སྤྱོད་པ་ན། །དྲི་མེད་དག་པའི་གསེར་གྱི་མདོག་ཅན་གྱི། །རྒྱལ་པོར་གང་ཚེ་ང་ནི་གྱུར་པ་ན། །སོར་མོ་དྲ་བས་འབྲེལ་བ་རྒྱ་ཆེན་བཏང ། །རྒྱལ་པོ་ཨུཏྤལ་མིག་ཅེས་བྱར་གྱུར་ཚེ། །པདྨ་སྔོན་པོ་བཟང་པོའི་མདོག་འདྲའི་མིག་།ཡིད་དུ་འོང་ཞིང་སྙིང་དུ་སྡུག་གྱུར་པ། །འགྲོ་བའི་དོན་དུ་ང་ཡིས་བཏང་བ་བྱས། །སྨན་པའི་རྒྱལ་པོ་སྐྲ་འདྲར་གྱུར་པའི་ཚེ། །སྡུག་དང་བྲལ་བས་ཉེན་པ་མཐོང་ནས་ནི། །བུད་མེད་ཆ་བྱད་གཟུགས་དང་བློ་ཉམས་པ། །ངས་ནི་སྙིང་རྗེས་ཡོངས་སུ་ཐར་པར་བྱས། །སྔོན་གྱི་སྲིད་པར་ཀུན་མཐོང་གྱུར་པ་ན། །ནད་ཀྱིས་བཏབ་པ་ནད་པའི་མི་མཐོང་ནས། །ང་ཡིས་རང་གི་ཁྲག་ཀྱང་བྱིན་གྱུར་ཏེ། །མི་དེ་ངས་ནི་ནད་དང་བྲལ་བར་བྱས། །རྒྱལ་པོ་མེ་ཏོག་བཟང་ཞེས་བྱ་གྱུར་ཚེ། །ང་ཡིས་ལུས་ལས་རུས་པ་ཕྱུང་ནས་ནི། །ནད་ཀྱིས་རིད་པར་གྱུར་ལ་རྐང་བྱིན་ཏེ། །ངས་ནི་ནམ་ཡང་སེམས་ཅན་མ་བཏང་ངོ ། །རྒྱལ་པོ་དོན་གྲུབ་ཅེས་བྱར་སྔོན་གྱུར་ཚེ། །རང་གི་མཛོད་རྣམས་ཐམས་ཅད་ངས་བཏང་ཞིང ། །ཕངས་ཤིང་ཡིད་
477b
དུ་འོང་བའི་སྲོག་བཏང་སྟེ། །ཕོངས་པར་གྱུར་པའི་མི་ནི་ཐར་པར་བྱས། །རྒྱལ་པོ་ཕྱོགས་ཀྱི་ཏོག་ཏུ་གྱུར་པའི་ཚེ། །བྱང་ཆུབ་འདོད་ནས་འགྲོ་བའི་དོན་གྱི་ཕྱིར། །འཁོར་ལོའི་མཚན་ཅན་པདྨ་ལྟ་བུ་ཡི། །ལག་པ་ཕྲུགས་ཀྱང་མི་བལྟ་རབ་ཏུ་བྱིན། །རྒྱལ་པོ་ཐམས་ཅད་མཐོང་དུ་གྱུར་པའི་ཚེ། །སྙིང་རྗེ་ལྡན་ཞིང་འགྲོ་དོན་ཕན་འདོད་དེ། །སྐྱེས་པ་བུད་མེད་དག་གིས་རྒྱས་པ་ཡི། །གླིང་བཞི་པ་ཡང་ངས་ནི་བཏང་བར་བྱས། །རྒྱལ་པོའི་བུ་མོ་ཡེ་ཤེས་ལྡན་གྱུར་ཚེ། །འཇམ་ཞིང་མཉེན་ལ་དྲི་མེད་དཀར་བའི་བརླ། །དགའ་ཞིང་མགུ་བའི་ཡིད་ཀྱིས་བཅད་ནས་ནི། །རང་གི་ཤ་དང་ཁྲག་ཀྱང་ངས་བྱིན་ནོ། །བུད་མེད་གཟུགས་ལྡན་ཞེས་ནི་བྱར་གྱུར་ཚེ། །བུད་མེད་བཀྲེས་སྐོམ་ཉམ་ཐག་ངས་མཐོང་ནས། ། གསེར་ལྟར་སེར་ཞིང་ཤིན་ཏུ་གཞོན་པ་ཡིན། །ནུ་མ་སྙིང་དུ་སྡུག་པ་གཉི་ག་བཏང ། །རྒྱལ་པོ་དཔལ་གྲགས་ཞེས་བྱར་གྱུར་པ་ན། །ཤིན་ཏུ་ཉམས་དགའ་བ་ཡི་རྒྱན་མཆོག་དང ། །རིན་ཆེན་དུ་མ་གོས་དང་ཤིང་རྟ་བཞིན། །གཏང་བར་དཀའ་བ་རྣམ་པ་དུ་མ་དང ། །རྒྱལ་པོ་བྱས་པ་གཟོ་བར་གྱུར་པའི་ཚེ། །རྒྱ་མཚོ་ལས་ནི་བྱས་པ་མི་གཟོ་བསྒྲལ། ། རིན་ཆེན་ཕྱིར་ནི་དེ་ཡིས་ང་མིག་ཕྱུང ། །འོན་ཀྱང་ང་ལ་ཁྲོས་པའི་སེམས་མེད་དོ། །སྲོག་ཆགས་གོ་དྷར་སྔོན་སྲིད་གྱུར་པའི་ཚེ། །གྲོག་སྦུར་དག་ནི་འཆི་བར་གྱུར་དོགས་
478a
༄#། །ནས། །ལུས་ཀྱི་དམ་པ་མ་བལྟས་བཏང་བར་བྱས། །དེ་ཚེ་ང་ཡི་སེམས་ནི་གཡོ་བ་མེད། །སྤྱད་པ་སྤྱོད་ཚེ་བྱ་སྲེག་གྱུར་པ་ན། །རྒན་ལ་བསྙེན་བཀུར་བྱ་བར་རྟག་དགའ་སྟེ། །ང་ནི་རིམ་གྲོ་གུས་ལ་རབ་ཏུ་དགའ། །ང་རྒྱལ་ལྡན་པ་མ་ཡིན་ཁེངས་པ་མེད། །སྐྱབས་སུ་འོངས་པའི་དོན་ཕྱིར་ང་ཡིས་ནི། །སྙིང་རྗེ་བསྐྱེད་པ་བྱས་ནས་ལུས་བཏང་སྟེ། །གདོལ་པ་མི་ཡིས་མདའ་རྣམས་བསྣུན་ཀྱང་ནི། །སྤྲེའུ་གྱུར་ངས་ནི་མི་དེ་མ་བཏང་ངོ ། །རྒྱལ་པོ་དབང་དུ་གྱུར་ཚེ་ང་ཡིས་ནི། །གླང་པོ་བླ་མ་རྒན་དྲན་ལུས་བསྐམས་ཏེ། །ཤིན་ཏུ་ཡིད་འོང་ཟས་ཀྱང་ངས་མ་ཟོས། །དེ་ཚེ་གླང་པོ་བདག་ཉིད་ཐར་བར་གྱུར།། བགྲོད་དཀའ་གངས་ཅན་རི་ལ་དྲེད་དབང་གྱུར། །ང་ཡིས་ཞག་བདུན་བར་དུ་བསྲུངས་པའི་མི། །དེ་ཡིས་གསོད་པ་ང་ལ་བཏང་བྱས་ཀྱང ། །ངས་ནི་དེ་ཚེ་ཁོང་ཁྲོ་བྱས་པ་མེད། །ཁ་བ་ཀུན་ད་འདྲ་བའི་གླང་པོར་གྱུར། །བྱང་ཆུབ་མཆོད་རྟེན་སངས་རྒྱས་ཡོན་ཏན་ཚོལ། །དུག་དང་བཅས་པའི་མདའ་ཡིས་བསྣུན་ཀྱང་ནི། །མཆེ་བ་དམ་པ་བྱིན་གྱི་ཁྲོས་པ་མེད། །དུམ་བུའི་གླིང་དུ་ནགས་ཚལ་སྤྱོད་ཡུལ་བ། །སྲེག་པའི་ཕྲུག་གུ་བྱམས་ལ་གནས་གྱུར་ཚེ། །མཐོང་བ་ཙམ་གྱིས་མེ་དེ་ཞི་གྱུར་ནས། །ལྷ་ཚོགས་དག་གིས་མེ་ཏོག་རྣམས་ཀྱང་གཏོར། །རི་དྭགས་གྱུར་ཚེ་གངྒཱའི་རླབས་ཤུགས་ཀྱིས། །ཁྱེར་བ་ཞིག་ནི་ང་ཡིས་བསྒྲལ་བྱས་པ། །དེ་ཡིས་གསོད་ཕྱིར་ང་གན་ཁྲིད་དེ་འོངས། །འོན་ཀྱང་ང་ནི་དེ་ལ་ཡིད་མ་ཁྲོས། །རྒྱ་མཚོའི་དབུས་སུ་སོན་ཏེ་
478b
མགོན་མེད་པ། །ཚོང་པ་ལྔ་བརྒྱ་དག་ནི་བསྒྲལ་བྱས་ནས། །བཀྲེས་པ་དེ་དག་རྣམས་ཀྱིས་བསད་གྱུར་ཚེ། །རུས་སྦལ་སྐྱེ་གནས་གྱུར་ཀྱང་བྱམས་དང་ལྡན། །ང་ནི་བྱང་ཆུབ་སྤྱད་པ་སྤྱོད་པ་ན། །སྔོན་ཆད་ཆུ་ན་རྒྱུ་བའི་ཉར་གྱུར་ཚེ། །སེམས་ཅན་ཕན་ཕྱིར་ང་ཡིས་ལུས་བཏང་སྟེ། །སྲོག་ཆགས་བརྒྱ་སྟོང་དག་གིས་ཟོས་པར་གྱུར། །སྲོག་ཆགས་ངེས་པར་གང་ཚེ་གྱུར་པ་ན། །ནད་བརྒྱས་གཟིར་བའི་འགྲོ་བ་མཐོང་ནས་ནི། །ལུས་ནི་སྨན་ལྟ་བུར་ཡང་བསྒྱུར་བྱས་ཏེ། །སེམས་ཅན་བདེ་ཞིང་ནད་ཀྱང་མེད་པར་བྱས། ། རི་དྭགས་རྒྱལ་པོ་སེངྒེར་གྱུར་པའི་ཚེ། །མཐུ་སྟོབས་ལྡན་པར་གྱུར་ཅིང་སྙིང་རྗེ་ལྡན། །མདའ་ཡིས་བསྣུན་ཀྱང་ཁྲོས་པའི་སེམས་མེད་དེ། །དེ་ཚེ་གསོད་ལ་ང་ཡིས་བྱམས་པ་བྱས། །དུང་དང་བ་མོ་ལྟ་བུའི་རྟ་རྒྱལ་དུ། །ང་སྔོན་རྒྱ་མཚོའི་དོགས་སུ་གྱུར་པའི་ཚེ། །སྲིན་མོའི་ནང་དུ་སོང་བའི་ཚོང་པ་རྣམས། །ང་ཡིས་སྙིང་བརྩེ་སྙིང་རྗེ་བསྐྱེད་ནས་བསྒྲལ། ། འགྲོ་བའི་དོན་དུ་བྱང་ཆུབ་སྤྱད་སྤྱོད་ཚེ། །འདབ་ཆགས་ཀུན་ལར་ནི་ང་གྱུར་ཚེ། །འདོད་པའི་ཡོན་ཏན་ཉེས་པ་མང་སྤངས་ནས། །བུད་མེད་དབང་དུ་ང་ནི་སོང་མ་གྱུར། །གེལ་བའི་ནགས་གནས་རི་བོང་གྱུར་པའི་ཚེ། །ལེགས་སྤྱད་རི་བོང་ཚོགས་གྱུར་དེ་ལ་བསྟན། །ཐུབ་པ་གནས་ལ་གནས་པ་བཀྲེས་ཕོངས་པ། །དེ་ཡི་ཆེད་དུ་ངས་ནི་ལུས་ཀྱང་
479a
༄#། །བཏང ། །སྡོང་པོ་མེ་ཏོག་འབྲས་རྒྱས་ནེ་ཙོའི་ཚེ། །སྡོང་པོ་བསྐམས་ཀྱང་ངས་ནི་དེ་མ་བཏང ། །དེ་ཚེ་བརྒྱ་བྱིན་བྱས་གཟོས་སང་མཐོང་ནས། །སྡོང་པོ་དེ་ནི་ལོ་འབྲས་རྒྱས་པར་བྱས། །ང་ནི་སྤྲ་ཡི་རྒྱལ་པོར་གྱུར་པའི་ཚེ། །མི་ཡི་རྒྱལ་པོ་ཀླུ་ཡིས་ཡུལ་བཅོམ་སྟེ། །སྤྲ་ཡི་ཚོགས་ལ་གནོད་པ་བྱུང་མཐོང་ནས། །རྒྱལ་པོའི་འཇིགས་ལས་དེ་དག་ངས་བཏོན་ནོ། །ང་སྔོན་ནེ་ཙོར་གྱུར་ཏེ་ཕ་མའི་ཕྱིར། །སཱ་ལུ་བླངས་ཚེ་མི་ཡིས་བཟུང་ནས་ནི། །ནེ་ཙོ་ཅི་ཕྱིར་ང་ཡི་སཱ་ལུ་ལེན། །ལོ་ཏོག་སྨིན་འདི་མ་རུངས་བྱར་སེམས་སམ། །ནེ་ཙོ་དེས་སྨྲས་བཟང་པོ་གསན་དུ་གསོལ། །བདག་ནི་རྐུ་བས་ཁྱོད་ཀྱི་འབྲས་མི་ལེན། །ཕ་མ་རྒན་རྒོན་གཉིས་ནི་གསོ་བའི་ཕྱིར། །དེ་ལ་སྙིང་རྗེས་བདག་གིས་སཱ་ལུ་བླངས། །གང་ཚེ་ཐོག་མ་ས་བོན་འདབས་པའི་ཚེ། །འགྲོ་བ་ཀུན་ལ་ཆ་ཤས་སྦྱིན་ནོ་ཞེས། །དེ་སྐད་ཚིག་སྨྲས་དེ་ནི་བདག་ཐོས་ཏེ། །དེས་ན་བདག་ནི་རྐུ་བ་གཞར་མི་འགྱུར། །ནེ་ཙོ་ལེགས་སོ་སཱ་ལུ་ཅི་དགར་ཁྱེར། །སྲི་ཞུ་འདི་ནི་མི་ཡི་ནང་ན་དཀོན། །ཁྱོད་ནི་མི་ཡིན་ང་འདིར་དུད་འགྲོ་ཡིན། །ལེགས་སོ་ཁྱོད་ནི་དུལ་ཞིང་ཡང་དག་བསྡམས། །བྱང་ཆུབ་རྡུལ་བྲལ་དམ་པ་ཚོལ་བ་ན། །སྔོན་ཆད་སྤྱོད་པ་དེ་ལ་སོགས་པ་རྣམས། །སྤྱད་པའི་ཚེ་ན་དཀའ་བ་བརྒྱ་ལ་ཡང ། །ང་ཡི་ཡིད་ནི་
479b
སྐྱོ་བར་གྱུར་པ་མེད། །ནང་གི་དག་གམ་འོན་ཏེ་ཕྱིར་ཡང་རུང ། །ང་ཡིས་དངོས་པོ་མ་བཏང་གང་ཡང་མེད། །ཚུལ་ཁྲིམས་བཟོད་དང་དེ་བཞིན་བརྩོན་འགྲུས་དང ། །བསམ་གཏན་ཐབས་དང་ཤེས་རབ་ངས་སྤྱད་དོ། །ཤ་དང་པགས་པ་དེ་བཞིན་རྐང་དང་ཁྲག་།དེ་དག་རང་གི་ལུས་ལས་སྦྱིན་པ་བྱས། །བས་མཐའ་དག་དང་ཕུག་ན་རྒྱུ་བའི་ཚེ། །ངས་ནི་དེ་ཚེ་ལུས་ནི་བསྐམས་བར་བྱས། །གང་ལ་སྦྱར་ན་རྒྱལ་བར་འགྱུར་བ་ཡི། །སྦྱངས་པ་གང་དག་རྒྱལ་བས་བསྟན་མཛད་པ། །སྦྱངས་པ་དེ་ལ་རྟག་ཏུ་རབ་བརྩོན་ཏེ། །སྔོན་སྤྱད་ཚེ་ན་ང་ནི་རྟག་ཏུ་འཇུག་།སྤྱོད་པའི་ཚེ་ན་ང་ཡིས་གང་བསྟེན་པ། །བརྟུལ་ཞུགས་རྒྱ་ཆེན་དེ་འདྲ་དེ་དག་དང ། །སྤྱོད་པ་འདི་ཐོས་ནས་ནི་དེ་དག་རྣམས། །ཚིག་གཅིག་ལ་ཡང་འདུན་པར་མི་འགྱུར་རོ། །འདི་ཐོས་གྱུར་ནས་དེ་ཡི་ཚེ་ན་ནི། །བསྟན་པ་འདི་ཉིད་ལ་ནི་འཕྱ་བར་འགྱུར། །དེ་དག་ཟས་དང་འཁྲིག་པ་ལྷུར་ལེན་ཅིང ། །རྟག་ཏུ་གཉིད་ནོན་ཁབ་ལྟར་གཡོ་ངན་འགྱུར། །རྟག་ཏུ་འཕགས་པ་མ་ཡིན་ཆོས་ལ་སྡང ། །བསྟན་པ་སུན་འབྱིན་བྱེད་ཅིང་ཡོན་ཏན་ཉམས། །ཞི་བའི་ཆོས་འདི་ཐོས་པར་གྱུར་པ་ན། །འདི་ནི་རྒྱལ་བས་གསུངས་པ་མིན་ཞེས་འཛེར། །ང་ཡི་སློབ་དཔོན་ཐོས་པ་རྒྱ་མཚོར་གྱུར། །མང་དུ་ཐོས་པ་སྨྲ་བའི་གཙོ་བོ་ཡི། །དེ་ཡིས་འདི་ནི་རྣམ་པ་ཇི་ལྟར་ཡང ། །སངས་རྒྱས་བཀའ་མ་ཡིན་ཞེས་དགག་པ་བྱས། །ཕ་རོལ་ལས་ཀྱང་རྒན་
480a
༄#། །པར་གྱུར་དེ་ཡི། །བླ་མ་དེ་ནི་དཔག་མེད་ཡོན་ཏན་ཆུང ། །དེས་ཀྱང་འདི་ནི་བླང་བ་མ་བྱས་ཀྱི། །འདི་ལམ་འཇུག་པ་འདི་ནི་ནོར་བ་ཡིན། །གང་ལ་བདག་ཡོད་མ་ཡིན་སྲོག་མེད་དང ། །རྣམ་པ་ཅིས་ཀྱང་གང་ཟག་མེད་བསྟན་པ། །ཚུལ་ཁྲིམས་སྦྱོར་དང་སྡོམ་པའི་བྱ་བ་ལ། །གང་འབད་དེ་ཡི་ངལ་བ་དོན་མེད་འགྱུར། ། གལ་ཏེ་རྡེག་པ་ཆེན་པོ་ཡོད་ན་ནི། །འདི་ལ་བདག་དང་སེམས་ཅན་ཤེད་སྐྱེས་མེད། །གང་ལ་བདག་དང་སེམས་ཅན་མི་དམིགས་པ། །དེ་ལ་བདག་གིས་ངལ་བྱས་དོན་མེད་འགྱུར། །སྡིག་པའི་བློ་དང་མུ་སྟེགས་ངན་མཚུངས་པས། །རང་གི་བློ་ཡིས་རང་བཟོ་བྱེད་པ་སྟེ། །དགེ་སློང་འཁོར་གྱི་ནང་དུ་རྒྱལ་བ་ནི། །ཚིག་འདི་གསུང་བར་ནམ་ཡང་མི་འགྱུར་རོ། །ངོ་ཚ་ཁྲེལ་དང་འཛེམ་དང་བྲལ་བ་དང ། །ཁཝ་ལྟར་སྤྱི་རྟོལ་ཆེ་ལ་རྒོད་གཏུམ་ཞིང ། །ཕྲག་དོག་ང་རྒྱལ་རྒྱགས་པས་ཚིག་པ་ཡི། །དགེ་སློང་དག་ནི་ང་ཡི་བསྟན་ལ་འབྱུང ། །ལག་པ་དང་ནི་རྐང་པ་རྡོབ་བྱེད་ཅིང ། །ཆོས་གོས་གྲ་རྣམས་ཀྱང་ནི་དཀྱོག་པར་བྱེད། །ཆོས་གོས་ཐོགས་ཤིང་ཆང་དང་རྒྱགས་མྱོས་ནས། ། གྲོང་དང་ཁྱིམ་དག་ཏུ་ནི་རྣམ་པར་རྒྱུ། །དེ་དག་སངས་རྒྱས་རྒྱལ་མཚན་ཐོགས་ནས་ནི། །ཁྱིམ་ན་གནས་པའི་སྐྱེ་བོ་སྟེན་པར་བྱེད། །བསྟན་པ་ཡོན་ཏན་ཕུང་པོ་འདི་སྤངས་
480b
ནས། །དེ་དག་རྟག་ཏུ་འཕྲིན་ཡིག་འཁྱེར་བར་བྱེད། །དེ་དག་བ་ལང་རྟ་དང་བོང་བུ་དང ། །དེ་དག་ཕྱུགས་དང་བྲན་མོ་བྲན་ཕོ་བསྲེལ། །ཞིང་གི་ལས་དང་ཚོང་གི་སྦྱོར་པ་ལ། །བརྩོན་ཡིད་ལྡན་ཞིང་རྟག་ཏུ་འཕགས་མ་ཡིན། །དེ་དག་འཕགས་མིན་ཚིགས་ཀྱང་མི་སྨྲ་མེད། །བྱ་བ་མ་ཡིན་པ་ཡང་གང་ཡང་མེད། །དེ་དག་རྣམས་ལ་མཆོད་རྟེན་ནོར་དང་ནི། །དགེ་འདུན་གྱི་དང་གང་ཟག་ནོར་དང་མཚུངས། །དགེ་སློང་ཡོན་ཏན་འབྱོར་པ་མཐོང་ནས་ནི། །དེ་དག་ལ་ཡང་མི་སྙན་རྗོད་བྱེད་དེ། །ཚུལ་ཁྲིམས་འཆལ་པ་སླུ་བ་ཞུགས་ནས་ནི། །བུད་མེད་འཇིགས་བྱེད་མི་བཟད་རབ་ཅེས་བརྗོད། །རབ་ཏུ་བྱུང་བ་དེ་དག་བརྐམ་པ་ལྟར། །ཁྱིམ་པ་འདོད་པས་བརྐམ་པ་དེ་ལྟ་མིན། །ཁྱིམ་པ་མཚུངས་པ་དེ་དག་ཆུང་མ་དང ། །བུ་དང་བུ་མོ་དག་ཀྱང་ཡོད་པར་འགྱུར། །གང་གི་ཁྱིམ་དུ་དེ་དག་ཆོས་གོས་དང ། །ལུས་དང་ལོངས་སྤྱོད་དག་གིས་བསྙེན་བཀུར་བྱ། །དེ་ཡི་ཆུང་མ་ལ་ནི་ཡོངས་ཆགས་ཤིང ། །ཉོན་མོངས་དབང་འགྲོ་རྟག་ཏུ་འཕགས་པ་མིན། །འདོད་པ་འདི་དག་བསྟེན་བྱ་མ་ཡིན་ཏེ། །དུད་འགྲོ་ཡི་དྭགས་དམྱལ་བར་ལྷུང་བྱེད་ཅེས། །དེ་དག་ཁྱིམ་པ་རྣམས་ལ་རྟག་སྨྲ་ཞིང ། ། དེ་དག་བདག་ཉིད་མ་དུལ་ཉེར་ཞི་མིན། །ཇི་ལྟར་དེ་དག་བདག་ཉིད་མ་དུལ་བ། །དེ་དག་སློབ་མ་ཚོགས་ཀྱང་རབ་མ་དུལ། །ཁ་ཟས་དག་ཀྱང་འཁྲིག་པའི་གཏམ་རྣམས་ལ། །དེ་
481a
༄#། །དག་ཉིན་དང་མཚན་དུ་བགྲོ་བར་བྱེད། །བསྟན་པའི་ཕྱིར་གྱི་ཡོན་ཏན་ཕྱིར་མིན་ཏེ། །དེ་དག་ལ་ནི་དེ་དག་བསྡུ་བ་སྦྱིན། །འགྲོ་ལས་རྟག་འདིར་མཆོད་པ་ཐོབ་སྙམ་ནས། །རང་གི་སློབ་མའི་ཚོགས་ཀྱིས་བདག་ཀྱང་བསྐོར། །དེ་དག་སྐྱེ་བོ་རྣམས་ལ་སྨྲ་བ་ནི། །བདག་གིས་སྙིང་རྗེས་འདི་དག་སྡུད་བྱེད་ཀྱི། །སློབ་མའི་ཚོགས་དེ་དག་ལས་ནམ་ཡང་ནི། །རིམ་གྲོ་དོན་དུ་གཉེར་བ་མེད་ཅེས་སྨྲ། །དེ་ལ་ནད་ཀྱིས་ནོན་དང་མཛེ་ཅན་མང ། །ལུས་ལ་ཤ་ཀྲ་ཅན་དང་གཟུགས་མི་སྡུག་།རྟག་ཏུ་འཕགས་མིན་མི་དག་ཁ་ཅིག་ཀྱང ། །འོངས་ཤིང་ལྷག་པ་རབ་ཏུ་འབྱིན་པར་འགྱུར། །ལུང་ནོད་པ་དང་སྡོམ་པ་རྣམ་པར་ཉམས། །དེ་དག་དགེ་སློང་ཡོན་ཏན་རྟག་མི་བརྩོན། །དེ་དག་ཁྱིམ་པ་མ་ཡིན་དགེ་སློང་མིན། །དེ་དག་སྤངས་པ་དུར་ཁྲོད་ཤིང་དང་མཚུངས། །དེ་དག་སོ་སོར་ཐར་དང་བསླབ་པ་དང ། །འདུལ་བ་ལ་ཡང་གུས་པར་བྱེད་མི་འགྱུར། །དེ་དག་རང་ཉམས་རང་དབང་འགྲོ་བ་སྟེ། །ལྕགས་ཀྱོ་བཏང་བའི་གླང་པོའི་དབང་པོ་འདྲ། །དེ་དག་ནགས་སུ་གནས་པར་གྱུར་ཀྱང་ནི། །སེམས་ནི་གྲོང་དུ་འགྲོ་བར་འགྱུར་བ་སྟེ། ། ཉོན་མོངས་མེ་ཡིས་རྟག་ཏུ་རབ་གདུངས་ལ། །དེ་དག་སེམས་ཀྱང་གནས་པ་མེད་པར་འགྱུར། །དེ་དག་སངས་རྒྱས་ཡོན་ཏན་ཐམས་ཅད་དང ། །བསླབ་དང་སྦྱངས་དང་ཐབས་
481b
ཀྱང་བརྗེད་ནས་ནི། །རྒྱགས་དང་ང་རྒྱལ་གྲགས་པ་ཡོངས་རྒྱས་ཏེ། །དེ་དག་མི་ཟད་མནར་མེད་ལྷུང་བར་འགྱུར། །དེ་དག་རྒྱལ་པོའི་གཏམ་ལ་རྟག་དགའ་ཞིང ། །ཀུན་པོའི་གཏམ་བརྗོད་པ་ལའང་རྟག་ཏུ་དགའ། །ཉེ་དུ་བསྟེན་ལའང་རབ་ཏུ་དགའ་བ་སྟེ། །དེ་དག་ཉིན་དང་མཚན་དུ་སེམས་པར་བྱེད། །བསམ་གཏན་དང་ནི་ཁ་ཏོན་བཏང་ནས་སུ། །རྟག་ཏུ་གཙུག་ལག་ཁང་གི་ལས་ལ་བརྩོན། །གནས་ལ་བཀྲམ་ཞིང་ཁྲོ་གཉེར་འབྱིན་པར་བྱེད། །དེ་དག་སློབ་མ་འཁོར་ཀྱང་མ་དུལ་བ། །ང་ནི་གཙུག་ལག་ཁང་གི་ལག་གི་བླ། །བདག་གི་ཆེད་དུ་འདི་ནི་ངས་བྱས་ཏེ། །དགེ་སློང་གང་དག་ང་ཡི་རྗེས་མཐུན་པ། །གཙུག་ལག་ཁང་འདིར་དེ་དག་གནས་ཡོད་དོ། །གང་དག་ཚུལ་ཁྲིམས་ལྡན་ཞིང་ཡོན་ཏན་ལྡན། ། ཆོས་འཛིན་སྐྱེ་བོའི་དོན་ལ་མངོན་བརྩོན་ལ། །དུལ་ཞིང་ཡང་དག་སྡོམ་ལ་རྟག་བརྩོན་པ། །དེ་དག་རྣམས་ནི་སྡུག་པར་མི་བྱེད་དོ། །འདི་ནི་ང་ཡི་གནས་སུ་བསྐོས་པ་སྟེ། ། འདི་ནི་ང་ཡི་ལྷན་གཅིག་གནས་པ་ཡིན། །འདི་ནི་ང་ཡི་དགའ་བར་བྱེད་པ་ཡིན། །ཁྱོད་ཀྱི་གནས་ནི་གང་ཡང་མེད་ཀྱི་སོང ། །འདི་ནི་དགེ་སློང་དག་ཀྱང་མང་བཀོད་དེ། །མལ་ཆ་རྣམས་ཀྱང་མ་ལུས་བགོས་ཟིན་ལ། །འདི་ན་རྙེད་པ་འབྱུང་བ་ཡོད་མ་ཡིན། །འདིར་ནི་ཅི་ཞིག་སྤྱོད་ཀྱི་དགེ་སློང་སོང ། །དེ་དག་ལ་ནི་མལ་སྟན་བགོ་བྱ་བ། །ནམ་དུའང་སྲིད་
482a
༄#། །པར་འབྱུང་བ་མ་ཡིན་ཏེ། །དེ་དག་ཁྱིམ་པ་ལྟ་བུར་གསོག་འགྱུར་ཞིང ། །འཚོག་ཆས་རྣམས་དང་གཡོག་འཁོར་མང་བར་འགྱུར། །ཕྱི་མའི་དུས་ན་ང་ཡི་བུ་དེ་དག་།ཀུན་ཏུ་སྨད་པ་བྱས་པར་གྱུར་པ་ནི། །དེ་དག་ང་ཡི་ཚིག་ནི་དྲན་འགྱུར་ཏེ། །བས་མཐའ་དག་དང་ནགས་སུ་དེ་ཚེ་གནས། །ཀྱེ་ཧུད་རྙེད་པས་ཟིལ་ནོན་ཡོན་ཏན་སྡང ། །དགེ་སློང་མང་པོ་གང་དུ་བྱུང་གྱུར་པ། །རྒྱལ་བ་དམ་པ་ཡི་ནི་བསྟན་པ་དག་།རིང་པོར་མི་ཐོགས་པར་ཡང་འཇིག་པར་འགྱུར། །ཕྱི་དུས་ཚུལ་ཁྲིམས་ཡོན་ཏན་ལྡན་པ་དག་།རྟག་པར་ཡོངས་སུ་བརྙས་པར་འགྱུར་བ་སྟེ། །དེ་དག་གྲོང་དང་ཡུལ་འཁོར་གྲོང་ཁྱེར་རྣམས། །སྤངས་ནས་དགོན་པ་ནགས་སུ་གནས་པར་འགྱུར། ། འབྱེད་དང་ཟུར་ཟེར་འཐབ་མོ་དགའ་བ་དང ། །ཡོན་ཏན་ཉམས་ལ་རྟག་ཏུ་བསྟི་སྟང་བྱེད། །དེ་དག་སྐྱེ་བའི་སྟོན་པར་གྲགས་གྱུར་ཏེ། །དེ་དག་ང་རྒྱལ་རྒྱགས་པས་ཚིག་པར་འགྱུར། །འདིར་ནི་ང་ཡི་བསྟན་པ་ཡོན་ཏན་གཏེར། །ཡོན་ཏན་ཀུན་གྱི་འབྱུང་གནས་མཆོག་དགའ་བ། །འདི་ནི་ཚུལ་ཁྲིམས་ཉམས་དང་ཕྲག་དོག་དང ། །རྒྱགས་པའི་སྐྱོན་རྣམས་ཀྱིས་ནི་འཇིག་པར་འགྱུར། །ཇི་ལྟར་རིན་ཆེན་འབྱུང་གནས་བསུབས་པ་དང ། །པདྨའི་རྫིང་བུ་ཡོངས་སུ་བསྐམས་པ་དང ། །རིན་ཆེན་མཆོད་སྡོང་ཆག་པར་
482b
གནས་པ་ལྟར། །ཕྱི་མའི་དུས་ན་བསྟན་པ་འཇིག་པར་འགྱུར། །ཕྱི་མའི་དུས་ཀྱི་ཚེ་ན་དམ་པའི་ཆོས། །རྣམ་པར་འཇིག་འགྱུར་ཤིན་ཏུ་མི་བཟད་ཚེ། །དགེ་སློང་དུལ་པ་མ་ཡིན་དེ་འདྲ་བ། །དེ་དག་ང་ཡི་བསྟན་འདི་འཇིག་པ་ཡིན། །སྤྱོད་པ་འདི་ལ་བརྟེན་པར་དགའ་བ་རྣམས། །དེ་དག་བཟང་འགྲོ་ག་ལ་ཡོད་དེ་རིང ། །འདི་ནས་ཤི་འཕོས་ཡི་དྭགས་འགྲོ་བ་དང ། དུད་འགྲོའི་འགྲོ་དང་སེམས་ཅན་དམྱལ་བར་གནས། །ལོ་བརྒྱ་དུ་མར་སྡུག་བསྔལ་མཐའ་ཡས་པ། །མི་བཟད་དྲག་པོ་ཉམས་སུ་མྱོང་བར་འགྱུར། །ཅི་སྟེ་དེ་ཡིས་མི་ཡི་ལུས་རྙེད་ཀྱང། །རྟག་ཏུ་སྡུག་བསྔལ་མྱ་ངན་ལྡན་པར་འགྱུར། །སྡིག་པའི་སྤྱོད་པ་འདི་དག་རྟག་བསྟེན་པ། །ལོང་བའམ་འོན་པའམ་ཞར་བར་སྐྱེ་བར་འགྱུར། །ལུས་ལ་རྟག་ཏུ་ཤ་བཀྲ་འབྱུང་བར་འགྱུར། །འཇིགས་པའི་གཟུགས་ཅན་མཐོང་ན་འཇིགས་པར་འགྱུར། །གང་ཞིག་ཡ་ངའི་སྤྱོད་པ་བསྟེན་པ་ནི། །དེ་དག་སུ་ཡང་ཡིད་རྟོན་མི་འགྱུར་ཏེ། །དེ་ཡི་ཚིག་ལ་ཡིད་ཆེས་མི་འགྱུར་ཞིང ། །དེ་ནི་རྟག་ཏུ་སྨ་འབབ་པར་ཡང་འགྱུར། །དེ་དག་ནད་དང་སྡུག་བསྔལ་བརྒྱ་ཡིས་གདུངས། །མཚོན་དང་ཤིང་དང་བོང་བ་རྣམས་ཀྱིས་བསྣུན། །བཀྲེས་དང་སྐོམ་པའི་འཇིགས་པས་ཡོངས་སུ་གདུངས། །ཡང་ན་དེ་ནི་རྟག་པར་རབ་ཏུ་བརྙས། །སྡུག་བསྔལ་མཐའ་ཡས་པ་དག་ཐོས་ནས་ནི། །ངེས་པ་རྣམས་ཀྱི་སྡིག་པའི་སྤྱོད་བོར་ལ། །ལག་
483a
༄#། །པའི་སྤྱོད་ལ་རྟག་ཏུ་བརྟེན་པར་གྱིས། །འདི་ནས་ཕྱིན་ཆད་འགྱོད་པར་གྱུར་ཏེ་རེ། །གང་ཞིག་སངས་རྒྱས་ཚོགས་དང་འཕགས་ཚོགས་དང ། །བསླབ་དང་སྦྱངས་པའི་ཆོས་ལ་དགའ་གྱུར་པ། །གཉེན་དང་རྙེད་དང་གྲགས་བརྗོད་སྤང་བྱོས་ལ། །དེ་ལྟར་རྟག་ཏུ་མངོན་པར་བརྩོན་པར་གྱིས། །འདུས་བྱས་འདི་ནི་སྒྱུ་མ་ལྟ་བུ་དང ། །འཇིག་པར་འགྱུར་དང་རྨི་ལམ་ལྟ་བུ་དང ། །སྡུག་པ་ཀུན་དང་མི་རིང་འབྲལ་འགྱུར་ཞིང ། །འདི་ལ་རྟག་པ་གང་ཡང་མེད་རྟོགས་ལ། །ཕ་རོལ་ཕྱིན་དང་ས་དང་སྟོབས་རྣམས་ལ། །རྟག་ཏུ་རབ་ཏུ་སྦྱོར་ཞིང་འབད་པར་གྱིས། །ཇི་སྲིད་བྱང་ཆུབ་མཆོག་སངས་མ་རྒྱས་པ། །དེ་སྲིད་བརྩོན་འགྲུས་ནམ་ཡང་ཉམས་མི་བྱ། །གླེང་གཞིའི་ལེའུ་ཞེས་བྱ་བ་སྟེ། དང་པོའོ།། །། ཡུལ་འཁོར་སྐྱོང ། །བྱང་ཆུབ་སེམས་དཔའི་ཐེག་པ་པའི་གང་ཟག་ཕལ་ཆེར་ལ་སྐྱོན་དེ་དག་འབྱུང་བར་འགྱུར་ཏེ། མི་བརྩོན་པ་དག་ནི་མི་བརྩོན་པ་དག་ལ་མཆོད་པར་འགྱུར། གཡོ་དང་ལྡན་པ་དག་ནི། གཡོ་དང་ལྡན་པ་དག་ལ་མཆོད་པར་འགྱུར། མི་ཤེས་པ་དག་ནི། མི་ཤེས་པ་དག་ལ་བསྟི་སྟང་བྱེད་པར་འགྱུར། ཟང་ཟིང་ལ་དགའ་བར་འགྱུར་ཞིང ། ཆགས་པ་མང་བ་དང ། ཁྱིམ་ལ་སེར་སྣ་བྱེད་པ་དང ། གཡོ་དང་ལྡན་པ་དང ། བྱ་ཁཝ་ལྟར་མུ་ཅོར་སྨྲ་བ་དང ། ཚུལ་འཆོས་པ་དང །
483b
ཉེ་དུ་ལྷུར་ལེན་པར་འགྱུར། ཕན་ཚུན་བསྔགས་པ་སྨྲ་བས་རྙེད་པ་སྒྲུབ་པར་འགྱུར། རྙེད་པ་ཡོངས་སུ་བཙལ་བའི་ཕྱིར་དེ་དག་གྲོང་དུ་འཇུག་གི་།སེམས་ཅན་ཡོངས་སུ་སྨིན་པར་བྱ་བའི་ཕྱིར་མ་ཡིན། སེམས་ཅན་ལ་སྙིང་བརྩེ་བའི་ཕྱིར་མ་ཡིན་པར་འགྱུར། དེ་དག་མི་ཤེས་བཞིན་དུ་ཇི་ལྟར་ན་བདག་ལ་ཕ་རོལ་གྱིས་མང་དུ་ཐོས་པ་དང ། དགེ་བའི་ཆོས་དང་ལྡན་པར་ཤེས་པར་འགྱུར་སྙམ་དུ་བདག་ཤེས་པ་དང་ལྡན་པར་ཁས་འཆེ་བར་འགྱུར། ཇི་ལྟར་འདིར་མི་བརྩོན་པ་དེ་བཞིན་དུ་ཞེ་ས་མེད་པར་འགྱུར། སྣོད་ཆག་པ་བཞིན་དུ་འགྱུར། གཅིག་ལ་གཅིག་འཁྲུལ་པ་ཚོལ་བ་དང ། སྦྱོར་བ་ཉམས་པ་དང ། མི་ཤེས་པ་དང ། ལེ་ལོ་ཅན་དང ། ཕན་ཚུན་མི་མཐུན་པའི་ཆོས་འགྲོ་བ་སྐྱེད་པས་ཡེ་ཤེས་ལ་མི་རྟོག་པ་མང་བ་དང།་རང་དགར་བྱེད་པ་དང ། ཤར་གཉེར་བ་དམ་པ་དང ། གནོད་སེམས་ཀྱིས་རྒྱས་པ་དང ། རིགས་པ་མ་ཡིན་པའི་འཁོར་གྱི་སྐྱེ་བོ་དང་འགྲོ་བ་བྱེད་པས་བསྟན་པ་འདི་ལ་སྤྱོད་པར་འགྱུར།་ཡོངས་སུ་མི་འདྲི་བའི་ངང་ཚུལ་ཅན་དང ། ཆོས་མཉན་པ་དོན་དུ་མི་གཉེར་བར་འགྱུར། མི་རིགས་པའི་སྤྱོད་པས་དབུལ་པོའི་ཁྱིམ་རྣམས་སུ་སྐྱེ་བ་ཡོངས་སུ་འཛིན་པར་འགྱུར།་དེ་དག་དབུལ་པོའི་ཁྱིམ་ནས་རབ་ཏུ་བྱུང་ནས་རྙེད་པ་ཙམ་གྱིས་བསྟན་པ་འདི་ལ་དགའ་བ་བསྐྱེད་པར་འགྱུར་རོ། །དེ་དག་ལ་ཉེས་པ་བཤགས་པ་ཡང་མེད་པར་འགྱུར་ན།
484a
༄#། །ཡེ་ཤེས་མངོན་པར་རྟོགས་པ་ལྟ་སྨོས་ཀྱང་ཅི་དགོས། དེ་དག་གིས་སངས་རྒྱས་ཀྱི་ཡོན་ཏན་རྣམས་བོར་ནས་ཤེས་ཀྱི་ཁེ་དང་རྙེད་པ་ཙམ་གྱིས་བདག་དགེ་སྦྱོང་ངོ ། །ཞེས་བདག་ཉིད་ཁས་འཆེ་བར་འགྱུར་ཏེ། ཡུལ་འཁོར་སྐྱོང ། ང་ནི། གང་ཟག་དེ་ལྟ་བུ་དེ་དག་ལ་རྗེས་སུ་མཐུན་པའི་བཟོད་པ་ཡང་མི་སྨྲ་ན། སངས་རྒྱས་ཀྱི་ཡེ་ཤེས་ལྟ་ག་ལ་ཞིག་།དེ་དག་ལ་ནི་བདེ་འགྲོ་ཡང་རིང་ན། བྱང་ཆུབ་ལྟ་སྨོས་ཀྱང་ཅི་དགོས། ཡུལ་འཁོར་སྐྱོང ། གང་ཟག་དེ་ལྟ་བུ་དེ་དག་ལ་བྱང་ཆུབ་ཀྱི་བར་ཆད་བྱེད་པའི་ཆོས་བརྒྱད་ཡོད་པར་སྨྲ་སྟེ། བརྒྱད་གང་ཞེ་ན། ངན་སོང་གསུམ་དུ་སྐྱེ་བ་དང ། མཐའ་འཁོབ་པའི་མིའི་ནང་དུ་སྐྱེ་བ་དང ། དབུལ་པོའི་ཁྱིམ་དུ་སྐྱེ་བ་དང ། རིགས་དམའ་བར་སྐྱེ་བ་དང ། མདོག་ངན་ཅིང་རྟོགས་པ་ཞན་པ་དང ། སྡིག་པའི་བཤེས་གཉེན་དང་ཕྲད་པ་དང ། ནང་མང་བ་དང ། ཡ་ང་བ་མ་སྤངས་པས་འཆི་བའི་དུས་བྱེད་པར་འགྱུར་བ་སྟེ། ཡུལ་འཁོར་སྐྱོང ། ཆོས་བརྒྱད་པོ་དེ་དག་ནི། བྱང་ཆུབ་ཀྱི་བར་ཆད་བྱེད་པར་བརྗོད་དོ། །དེ་ཅིའི་ཕྱིར་ཞེ་ན། ཡུལ་འཁོར་སྐྱོང ། ཚིག་གིས་ཁས་འཆེ་བ་ལ་ང་བྱང་ཆུབ་ཅེས་མི་སྨྲའོ། །ཚུལ་འཆོས་པ་ལ་སྤྱོད་པ་ཡོངས་སུ་དག་པ་ཞེས་ང་མི་སྨྲའོ། །གཡོ་བྱེད་པ་ལ་བྱང་ཆུབ་ཀྱི་སྤྱོད་པ་ཞེས་ང་མི་སྨྲའོ། །ཟང་ཟིང་ལྷུར་
484b
ལེན་པ་ལ་སངས་རྒྱས་ལ་མཆོད་པ་ཞེས་ང་མི་སྨྲའོ། །མངོན་པའི་ང་རྒྱལ་ཅན་ལ་ཤེས་རབ་ཡོངས་སུ་དག་པ་ཞེས་ང་མི་སྨྲའོ། །ཤེས་རབ་འཆལ་པ་ལ་ཐེ་ཚོམ་གཅོད་པ་ཞེས་ང་མི་སྨྲའོ། །སེར་སྣ་ཅན་ལ་བསམ་པ་ཡོངས་སུ་དག་པ་ཞེས་ང་མི་སྨྲའོ། །མི་བརྩོན་པ་མང་བ་ལ་གཟུངས་ཐོབ་ཅེས་ང་མི་སྨྲའོ། །ཡང་དག་པའི་ཡོན་ཏན་མ་ཡིན་པ་ཡོངས་སུ་ཚོལ་བ་ལ་བདེ་འགྲོ་ཐོབ་ཅེས་ང་མི་སྨྲའོ། །ཁྱིམ་ལ་སེར་སྣ་བྱེད་པ་ལ་ལུས་ཡོངས་སུ་དག་པ་ཞེས་ང་མི་སྨྲའོ། །སྤྱོད་ལམ་བཅོས་མ་ཅན་ལ་སངས་རྒྱས་དང་ཕྲད་པ་ཞེས་ང་མི་སྨྲའོ། ། ཁྱིམ་ལ་ཆགས་པ་ལ་ངག་ཡོངས་སུ་དག་པ་ཞེས་ང་མི་སྨྲའོ། །མ་གུས་པ་ལ་སེམས་ཡོངས་སུ་དག་པ་ཞེས་ང་མི་སྨྲའོ། །ཚོད་མི་ཤེས་པ་ལ་ཆོས་འདོད་པ་ཞེས་ང་མི་སྨྲའོ། །ལུས་དང་སྲོག་ལ་ལྟ་བ་དང་བཅས་པ་ལ་ཆོས་ཡོངས་སུ་ཚོལ་བ་ཞེས་ང་མི་སྨྲའོ། །ཡུལ་འཁོར་སྐྱོང ། ཇི་ལྟར་སྐྱེས་བུ་བླུན་པོ་དེ་དག་ལ་སྨད་པ་ལྟར་སྟོན་པ་དྲུག་ལ་དེ་ལྟར་ང་མི་སྨོད་དོ། །དེ་ཅིའི་ཕྱིར་ཞེ་ན། དེ་དག་ནི། གཞན་དུ་སྨྲ་ལ་གཞན་དུ་བྱེད་པའོ། །ལྷ་དང་བཅས་པའི་འཇིག་རྟེན་ལ་སླུ་བའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅས་པ་འདི་དག་བཀའ་སྩལ་ཏོ། །ཡང་དག་མ་བསྡམས་རྒོད་ཅིང་ཁེངས་པ་ཅན། །མ་གུས་ང་རྒྱལ་ལྡན་ཞིང་ཆགས་ཤས་ཆེ། །ཉོན་མོངས་ཟིལ་ནོན་ཐ་བ་ཉོན་མོངས་བཅས། །དེ་འདྲ་
485a
༄#། །དག་ལ་བྱང་ཆུབ་མཆོག་རབ་རིང ། །ཆགས་བས་ཟིལ་གྱིས་ནོན་ན་ལེ་ལོ་འཕེལ། །ལེ་ལོས་ཟིལ་གྱིས་ནོན་ན་དད་པ་ཉམས། །དད་པ་ཉམས་ན་ཚུལ་ཁྲིམས་རབ་ཏུ་ཉམས། །ཚུལ་ཁྲིམས་འཆལ་བར་གྱུར་ན་བཟང་འགྲོ་ཉམས། །དབུལ་པོར་གྱུར་པས་རབ་ཏུ་བྱུང་གྱུར་ཏེ། །མཆོད་པ་རྙེད་ནས་དབུལ་ལས་གྲོལ་པར་གྱུར། །དེ་དག་གསེར་གྱི་ཁུར་ནི་བོར་ནས་སུ། །གསོ་མའི་ཁུར་ནི་ལེན་པར་བྱེད་དང་མཚུངས། །རྙེད་པ་དོན་དུ་གཉེར་བས་དགོན་པར་འགྲོ། །དེར་སོང་ནས་ཀྱང་གོས་དང་ཉེ་དུ་ཚོལ། །མངོན་ཤེས་རིག་དང་སྤོབས་པ་ཕུན་སུམ་ཚོགས། །བོར་ནས་དེ་ནི་ཕྱིར་ཡང་ཉེ་དུ་འཛིན། །རྨོངས་ནས་ང་རྒྱལ་དབང་གིས་ངན་སོང་ས། །མི་ཁོམ་འགྲོ་བ་རྣམས་དང་དབུལ་པོ་དང ། །དམའ་བའི་རིགས་སུ་སྐྱེ་དང་ལོང་བ་དང ། །མདོག་ངན་པ་དང་མཐུ་ཆུང་དེ་དག་འཛིན། །དེ་དག་ཚུལ་དང་སྤྱོད་པ་ཡོངས་ཉམས་དངོས། །བག་མེད་རྙེད་ནས་དྲན་པ་རབ་ཏུ་ཉམས། །གཡང་ས་ཆེན་པོ་མི་བཟད་ལྷུང་བར་འགྱུར། །དེ་ནས་བསྐལ་པ་བྱེ་བར་ཐར་པ་མེད། །གལ་ཏེ་འདིར་ནི་འཐོབ་པས་བྱང་ཆུབ་ན། །དེ་ཕྱིར་ལྷས་སྦྱིན་གྱིས་ཀྱང་བྱང་ཆུབ་འཐོབ། །རྣམ་པར་འཐོར་རླུང་གིས་ནི་བྱ་ལྷུང་ལྟར། །ཆགས་པས་ཀྱང་ནི་དེ་ལྟར་མི་རིགས་སོ། །བསོད་ནམས་ཉམས་ཤིང་གཞན་གྱི་ཆུང་མར་
485b
ཆགས། །ཚུལ་ཁྲིམས་མ་དག་དགེ་བ་རྣམས་ལས་ཉམས། །བྱང་ཆུབ་སེམས་ཀྱིས་ཡེ་ཤེས་གང་མ་ཐོབ། །དེ་དག་བསྟན་ལ་མི་དགོས་དུར་ཤིང་བཞིན། །བྱང་ཆུབ་དོན་གཉེར་སངས་རྒྱས་ཆོས་ཚོལ་བ། །དཔེར་ན་ཐར་པ་དེ་བཞིན་མི་གནས་སོ། །དེ་ནི་རྙོང་གིས་སྤྲེའུ་ལ་དམ་བྱས་ལྟར། །ང་རྒྱལ་ཟིལ་ནོན་བྱང་ཆུབ་དེ་འདྲའོ། །བྱང་ཆུབ་དོན་དུ་གཉེར་བས་ཆོས་ཚིག་ཕྱིར། །ང་ཡི་རང་གི་སྲོག་ནི་ཕངས་པའང་བཏང ། །ཆོས་དེ་བཏང་ནས་བརྩོན་དང་མི་ལྡན་པ། །དོན་མེད་གྱུར་ནས་བསྟན་ལས་ལྷུང་བར་འགྱུར། །ང་ནི་སྔོན་ཆད་ལེགས་པར་བཤད་དོན་ཕྱིར། །གཡང་ས་ཆེན་པོ་མེ་ལྕེ་འབར་བར་མཆོངས། །དེ་ཐོས་ནས་ནི་སྡུག་དང་མི་སྡུག་པ། །ཐམས་ཅད་རྣམ་པར་སྤངས་ཏེ་ནན་ཏན་གནས།། བསྟན་པ་སྣ་ཚོགས་ཡོན་ཏན་འབྱོར་ཐོས་ལ། །དེ་དག་ནམ་ཡང་འདོད་པ་མི་སྐྱེ་ན། །ཆོས་མིན་འདོད་ལ་བྱང་ཆུབ་ག་ལ་ཡོད། །དཔེར་ན་ལོང་བ་ལམ་སེལ་མེད་དང་མཚུངས།། ཡུལ་འཁོར་སྐྱོང ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། རྒྱ་ཆེ་བ། བསམ་གྱིས་མི་ཁྱབ་པ། མཚུངས་པ་མེད་པ། དཔག་ཏུ་མེད་པ།་ཚད་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་
486a
༄#། །པ།་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དོན་གྲུབ་བློ་ཞེས་བྱ་བ་འཇིག་རྟེན་དུ་བྱུང་ངོ ། །ཡུལ་འཁོར་སྐྱོང ། དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བ་ཞིག་བྱུང་ངོ ། །ཡུལ་འཁོར་སྐྱོང ། རྒྱལ་པོ་འོད་ཟེར་ལྡན་ནི། འཛམ་བུའི་གླིང་དཔག་ཚད་ཁྲི་དྲུག་སྟོང་ལ་རྒྱལ་སྲིད་བྱེད་དོ། །ཡུལ་འཁོར་སྐྱོང ། དེའི་ཚེ་དེའི་དུས་ན་འཛམ་བུའི་གླིང་དེ་ན་གྲོང་ཁྱེར་ཉི་ཁྲི་དང་ཁྱིམ་བྱེ་བ་ཕྲག་སྟོང་ཡོད་དོ། །ཡུལ་འཁོར་སྐྱོང ། རྒྱལ་པོ་འོད་ཟེར་ལྡན་དེ་རྒྱལ་པོ་ཕོ་བྲང་གང་ན་གནས་པ་རྒྱལ་པོ་འོད་ཟེར་ལྡན་དེའི་གྲོང་ཁྱེར་རིན་པོ་ཆེ་སྣང་བ་ཞེས་བྱ་པ་ཤར་ནུབ་ཏུ་ཆུར་དཔག་ཚད་བཅུ་གཉིས་ཡོད་པ། ལྷོ་བྱང་དུ་རྒྱར་དཔག་ཚད་བདུན་ཡོད་པ། རིན་པོ་ཆེ་སྣ་བདུན་གྱི་ཕྱིར་ར་བ་རིམ་པ་བདུན་དང ། མིག་མང་རིས་སུ་བྲིས་པས་མཛེས་པར་བྱས་པ་ཡོད་དོ། །དེའི་ཚེ་སེམས་ཅན་རྣམས་ཀྱི་ཚེའི་ཚད་ནི། ལོ་བྱེ་བ་ཕྲག་བཅུ་ཐུབ་པར་གྱུར་ཏོ། །ཡུལ་འཁོར་སྐྱོང ། རྒྱལ་པོ་འོད་ཟེར་ལྡན་གྱི་བུ་བསོད་ནམས་ཀྱི་འོད་ཟེར་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་དེ། དེ་བཙས་མ་ཐག་ཏུ་རིན་
486b
པོ་ཆེ་སྣ་བདུན་གྱི་གཏེར་སྟོང་བྱུང་བར་གྱུར་ཏོ། །རྒྱལ་པོའི་ཁང་བཟང་གི་ནང་དུ་ཡང་རིན་པོ་ཆེ་སྣ་བདུན་གཏེར་གྱི་མི་བཅུའི་ཚད་ཙམ་བྱུང་བར་གྱུར་ཏེ་ཡུལ་འཁོར་སྐྱོང ། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་དེ་བཙས་མ་ཐག་ཏུ་འཛམ་བུའི་གླིང་པའི་སེམས་ཅན་ཐམས་ཅད་ཡིད་རངས་པར་གྱུར་ཏོ། །སེམས་ཅན་གང་དག་བརྩོན་ར་ན་འཁོད་པ་དེ་དག་ཀྱང་བརྩོན་ར་ནས་ཐར་པར་གྱུར་ཏོ། །ཡུལ་འཁོར་སྐྱོང ། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་དེས་ཉི་མ་བདུན་གྱིས་འཇིག་རྟེན་པའི་སྒྱུ་རྩལ་ཇི་སྙེད་པ་དེ་དག་ཐམས་ཅད་རྟོགས་པར་གྱུར་ཏོ། །ཡུལ་འཁོར་སྐྱོང ། དེ་ནས་གནས་གཙང་མའི་རིས་ཀྱི་ལྷ་རྣམས་ཀྱིས་ནམ་གྱི་གུང་གི་དུས་ལ་བབ་པ་དང ། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་གཞོན་ནུ། ཁྱོད་བག་ཡོད་པར་གྱིས་ཤིག་།མི་རྟག་པར་སོ་སོར་བརྟག་པ་ལ་མཁས་པར་གྱིས་ཤིག་།གཞོན་ནུ། མི་རྣམས་ཀྱི་སྲོག་ནི། ཆེན་པོ་མེད་པ་སྟེ། ཚེ་འཕོ་བར་འགྲོ་བ་ཡིན་གྱི། འཇིག་རྟེན་ཕ་རོལ་ལ་འཇིགས་པར་བལྟ་བར་བྱ་ཞིང་ལས་དང་བྱ་བ་དང་མི་འགལ་བར་གྱིས་ཤིག་།ཅེས་བསྐུལ་ཏེ། དེའི་ཚེ་ལྷའི་བུ་དེ་དག་གིས་ཚིགས་སུ་བཅད་པ་འདི་དག་ཀྱང་སྨྲས་སོ། །གཞོན་ནུ་བག་མེད་པར་ནི་གྱུར་ཏ་རེ། །བག་མེད་དབང་དུ་སོང་བར་གྱུར་ཏ་རེ། །བདེ་བར་གཤེགས་པས་བག་ཡོད་རབ་བསྟོད་ཅིང ། །བདེ་གཤེགས་རྣམས་ཀྱིས་བག་མེད་རྣམས་
487a
༄#། །ཀྱང་སྨད། །ངེས་པ་གང་དག་འདི་ན་བག་ཡོད་ཅིང ། །ལེགས་སྡོམ་དགའ་ལ་སེར་སྣ་བྱེད་པ་དང ། །སེམས་ཅན་ཀུན་ལ་སྙིང་རྗེ་བྱམས་ཡིད་ལྡན། །དེ་དག་རིང་པོར་མི་ཐོགས་མི་མཆོག་འགྱུར། །བདེ་བར་གཤེགས་པ་གང་དག་འདས་པ་དང ། །འདི་ན་ད་ལྟར་དག་དང་གང་མ་བྱོན། །དེ་དག་ཐམས་ཅད་དགེ་བ་རྣམས་ཀྱིས་འཕགས་བག་ཡོད་ལམ་ཉིད་ལ་ཡང་ཤིན་ཏུ་གནས། །བཟའ་དང་བཏུང་དང་གོས་དང་ཁ་ཟས་དང ། །གསེར་དང་དངུལ་དང་ནོར་བུ་མུ་ཏིག་དང ། །བསྐལ་པ་བྱེ་བར་དེ་དག་རྣམས་ཀྱིས་བཏང། །བྱང་ཆུབ་དམ་པ་འདི་ནི་དོན་དུ་གཉེར། །རྐང་པ་ལག་པ་དེ་བཞིན་རྣ་བ་སྣ། །སློང་བ་རྣམས་ལ་རབ་ཏུ་དགོས་བྱིན་ན། །བྱང་ཆུབ་ཡོན་ཏན་ཀུན་གྱིས་བསམ་རྫོགས་ནས།། དེ་དག་རིང་པོར་མི་ཐོགས་མི་མཆོག་འགྱུར། །རྒྱལ་སྲིད་བདེ་དང་སྡུག་པའི་བུད་མེད་དང ། །ནོར་རྣམས་ཐམས་ཅད་དུ་ཡང་རྣམ་སྤངས་ཏེ། །འདུས་བྱས་གང་ལ་བལྟ་དང་སྒྱུ་མ་འདྲས། །འདོད་པ་མེད་པར་དགོན་པར་གནས་པར་གྱིས། །སྲོག་ནི་བརྟན་པ་མེད་དེ་རྟག་ཏུ་གཡོ། །འཛིམ་པའི་བུམ་པ་ལྟ་བུར་འཇིག་པ་ཅན། །བརྙན་མ་འདྲ་ཞིང་རྟག་ཏུ་ཐེར་ཟུག་མིན། །གཞོན་ནུ་འདི་ལྟ་རྟག་མེད་དགེ་མ་ཡིན། །ངན་འགྲོར་ལྷུང་བའི་ཚེ་ན་འདི་ན་ནི། །ཕ་དང་མ་ཡང་འཛིན་པར་བྱེད་པ་མེད། །དེ་ཡིས་དགེ་དང་མི་དགེ་གང་བྱས་
487b
བ། །དེ་ནི་རྟག་ཏུ་ཕྱི་བཞིན་འབྲང་བར་འགྱུར། །འདོད་པའི་རྒྱུ་ཡིས་བསྐལ་མང་རྒྱ་མཚོར་ནི། །དོན་མེད་པར་ཡང་གཅིག་གིས་གཅིག་བསད་དེ། །ཁྱོད་ཀྱིས་མི་ཕན་མ་བྱས་ཅི་ཡང་མེད། ། དོན་མེད་ཉིད་དུ་ངལ་བ་བསྟེན་པར་གྱུར། །ད་ལྟར་ཁྱོད་ཀྱིས་འགྲོ་ཕན་བྱང་ཆུབ་ཞི། །མཚུངས་མེད་གོ་འཕང་དམ་པ་བཙལ་བའི་ཕྱིར། །རྐང་དང་ཤ་དང་པགས་པ་དེ་བསྐམས་ཀྱང ། །ད་ལྟ་ན་ཡང་ཁྱོད་ནི་ངལ་མ་སེམས། །བདེ་བར་གཤེགས་པ་འབྱུང་བ་རྙེད་པར་དགའ། །ཞི་བའི་ཆོས་ཐོས་པ་ཡང་ཤིན་ཏུ་དཀའ། །བསྒྲིམ་པ་བྱས་ཏེ་བདུད་ཀྱི་ཕྱོགས་བསལ་ན། །སངས་རྒྱས་ཡེ་ཤེས་རིང་པོར་མི་ཐོགས་ཐོབ། །བཤེས་གཉེན་བཟང་ལ་རྟག་ཏུ་ཡོངས་བརྟེན་ཅིང ། །སྡིག་པའི་བཤེས་གཉེན་ཡོངས་སུ་སྤང་བར་གྱིས། །དེ་དག་རྟག་ཏུ་བཟང་ལམ་ཁྲིད་པར་བྱེད།། ལམ་གོལ་ལས་ཀྱང་རྟག་ཏུ་ཟློག་པར་བྱེད། །བརྩོན་འགྲུས་ཤིན་ཏུ་བརྟན་པ་ལེགས་བྱོས་ཏེ། །ལུས་དང་སྲོག་ལ་འདོད་པ་རྣམས་སྤངས་ནས། །རྡོ་རྗེ་ལྟ་བུ་སྙིང་གི་བསམ་གཏན་པར། །སངས་རྒྱས་ལམ་འདི་ཉིད་ལ་གནས་པར་གྱིས། །སྔོན་གྱི་མི་མཆོག་དམ་པ་འོད་བྱེད་པ། །ཀུན་ཀྱང་གོ་འཕང་དམ་པ་བླ་མེད་པ། །ཚོལ་བའི་ཚེ་ན་སྤྱོད་ཡུལ་དགོན་པར་དགའ། །ཁྱོད་ཀྱང་དེ་དག་སྤྱོད་པའི་ལམ་དུ་ཕྱོགས། །དགོན་པར་གནས་ལ་རྟག་ཏུ་དགའ་བར་གྱིས། །ཕ་དང་མ་དང་བུ་དང་སྡུག་པའི་གཉེན། །སྐྱེ་བོ་སྙིང་དུ་སྡུག་པ་ཀུན་སྤོངས་
488a
༄#། །ལ། །ལུས་དང་སྲོག་ལ་སྲེད་པར་མ་བྱེད་པར། །བདེ་གཤེགས་ཡེ་ཤེས་རྒྱ་ཆེན་བཙལ་བར་གྱིས། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་དེ་ནས་བཟུང་སྟེ་ལོ་བཅུའི་བར་དུ་ནམ་ཡང་རྨུགས་པ་དང ། གཉིད་ཀྱིས་ནོན་པར་མ་གྱུར། ནམ་ཡང་རྒོད་པར་མ་གྱུར། རྩེས་པར་མ་གྱུར།་དགའ་བ་བྱེད་པར་མ་གྱུར། ཡོངས་སུ་སྤྱད་པར་མ་གྱུར། ནམ་ཡང་སྐྱེད་མོས་ཚལ་དུ་མ་སོང ། ནམ་ཡང་གྲོགས་པོ་མཐོང་ནས་ངོ་མཚར་དུ་མི་འཛིན། ནམ་ཡང་གླུ་ལ་དགའ་བར་མ་གྱུར། རྒྱལ་སྲིད་དང ། ནོར་དང ། ཁྱིམ་དང ། གྲོང་ཁྱེར་རྣམས་ལ་འདོད་པ་བསྐྱེད་པར་མ་གྱུར་ཏེ། དེ་ལྟར་དངོས་པོ་ཐམས་ཅད་ལ་མི་ལྟ་བར་གཅིག་པུར་སེམས་ཤིང་གནས་པར་གྱུར་ཏོ། །ནང་དུ་ཡང་དག་འཇོག་ལྷུར་ལེན་ཅིང་འཇིག་རྟེན་ལ་སྙིང་པོ་མེད་པ་དང ། འཇིག་པ་དང ། དབུགས་འབྱིན་པ་མེད་པ་དང ། མི་སྡུག་པ་དང་ཕྲད་པ་དང ། སྡུག་པ་དང་བྲལ་བ་དང ། བྱིས་པ་འདྲིད་པ་དང ། འཁོར་བ་ལ་དགའ་བ་རོ་བྲོ་བ་མེད་པ་དང ། རྒྱལ་སྲིད་ཀྱི་བདེ་བ་སླུ་བའི་ཆོས་ཅན་དང ། སྲིད་པ་ལ་མངོན་པར་དགའ་བས་ཆོག་མི་ཤེས་པ་དང ། སོ་སོའི་སྐྱེ་བོ་ཉིད་རྟག་ཏུ་མི་མཐུན་པར་རྣམ་པར་སེམས་ཤིང ། བདག་ནི། བྱིས་པའི་སྐྱེ་བོ་མི་བརྩོན་པའི་ནང་
488b
ན་གནས་ཀྱི། བདག་གིས་ཅང་མི་སྨྲ་བས་འདའ་བར་བྱའོ། །སྙམ་ནས་དེ་ཕྱོགས་གཅིག་ཏུ་ཅང་མི་སྨྲ་བར་གྱུར་ཏེ། བག་ཡོད་པ་ལ་སེམས་ཤིང་སྡུག་པ་དང་བྲལ་བར་གཅིག་བུ་གནས་པར་གྱུར་ཏོ། །ཡུལ་འཁོར་སྐྱོང ། དེ་ནས་རྒྱལ་པོ་འོད་ཟེར་ལྡན་གྱིས་གཞོན་ནུའི་ལོངས་སྤྱོད་ཀྱི་ཕྱིར་ས་ཕྱོགས་ཤིག་ཏུ་གྲོང་ཁྱེར་དགའ་མཆོག་ཅེས་བྱ་བ་བྱས་ཏེ། ལྷོ་དང་བྱང་གི་ངོས་སུ་ལམ་སྲང་བདུན་བརྒྱ་བདུན་བརྒྱ་བྱས་སོ། །རིན་པོ་ཆེ་སྣ་བདུན་གྱི་ཕྱིར་དྲིལ་བུ་གཡེར་ཀའི་དྲ་བས་བྲེས་པ། མུ་ཏིག་གི་དྲ་བ་དང ། རིན་པོ་ཆེའི་སྲོག་ཤིང་བླ་རེ་དང་ལྡན་པ་རིམ་པ་བདུན་གྱིས་ཀུན་ནས་བསྐོར་ཏོ། །ལམ་སྲང་ཐམས་ཅད་ཀྱི་སྒོར་ཡང་རིན་པོ་ཆེའི་སྲོག་ཤིང་སྟོང་བཙུགས་སོ། །རིན་པོ་ཆེའི་སྲོག་ཤིང་ཐམས་ཅད་ཀྱང་རིན་པོ་ཆེའི་སྐུད་པ་དྲུག་ཁྲིས་སྦྲེལ་ཏོ། །རིན་པོ་ཆེའི་སྐུད་པ་ཐམས་ཅད་ཀྱང་ཕྱོགས་བཞི་ནས་ཤིང་ཏ་ལའི་ཕྲེང་བ་བྱེ་བས་སྦྲེལ་ཏོ། །དེ་དག་རླུང་གིས་བསྐྱོད་དེ་བསྐུལ་ན། འདི་ལྟ་སྟེ། དཔེར་ན། རོལ་མོའི་སིལ་སྙན་བརྒྱ་སྟོང་གི་སྒྲ་སྙན་པ་ལྟ་བུའི་སྒྲ་འབྱུང་ངོ ། །ལམ་སྲང་གི་སྒོ་ཐམས་ཅད་ན་བུ་མོ་གླུ་མཁས་པ། གར་མཁས་པ།་དབང་པོ་དར་ལ་བབ་པ། སྐྱེ་བོ་ཐམས་ཅད་ཀྱིས་སྤྱད་པའི་འོས་སུ་གྱུར་པ་ལྔ་བརྒྱ་ལྔ་བརྒྱ་བཀོད་དོ། །དེ་དག་ཐམས་ཅད་ལ་རྒྱལ་པོ་འོད་ཟེར་ལྡན་གྱིས་ཁྱེད་ཉིན་མཚན་
489a
༄#། །དུ་གླུ་དང ། གར་དང ། རོལ་མོའི་སྒྲས་གང་དག་ཕྱོགས་བཞི་ནས་ལྷགས་པའི་སེམས་ཅན་རྣམས་ཡང་དག་པར་དགའ་བར་བྱ་ཞིང ། ཅི་ནས་གཞོན་ནུ་དགའ་བར་བྱ་བའི་སེམས་བསྐྱེད་པར་བྱ་བ་མ་གཏོགས་པར་གཏམ་གཞན་མ་བྱེད་ཅིག་།སེམས་ཅན་གང་ལ་ཡང་ཡིད་དུ་མི་འོང་བ་མ་སྨྲ་ཞིག་།ཅེས་བསྒོའོ། །ལམ་སྲང་དེ་དག་ཐམས་ཅད་ཀྱི་སྒོར་ཡང་བཟའ་བ་འདོད་པ་རྣམས་ལ་ནི། བཟའ་བ། བཏུང་བ་འདོད་པར་ནམས་ལ་ནི། བཏུང་བ། བཞོན་པ་འདོད་པ་རྣམས་ལ་ནི། བཞོན་པ་ནས་གོས་དང ། སྤོས་དང ། ཕྲེང་བ་དང ། བྱུག་པ་དང ། མལ་དང ། རྒྱབ་རྟེན་དང ། འཚོ་བའི་ཡོ་བྱད་རྣམས་དང ། གསེར་དང ། དངུལ་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱི་རུ་དང ། ས་ལེ་སྦྲམ་དང ། དངུལ་སིལ་མ་དང ། གླང་པོ་ཆེ་དང ། རྟ་དང ། ཤིང་རྟ་དང ། བ་ལང་དང ། ནོར་དང ། རྒྱན་ཐམས་ཅད་བྱིན་ཞིང ། སྐྱེ་བོ་ཐམས་ཅད་ཀྱི་ཡོངས་སུ་སྤྱད་པའི་ཕྱིར་རིན་པོ་ཆེའི་ཕུང་པོ་ཡང་བཞག་པར་གྱུར་ཏོ། །དེའི་ཚེ་གྲོང་ཁྱེར་གྱི་དབུས་སུ་གཞོན་ནུའི་ལོངས་སྤྱོད་ཀྱི་ཕྱིར་ཁྱིམ་ཁོར་ཡུག་ཏུ་དཔག་ཚད་ཙམ་ཡོད་པ། རིན་པོ་ཆེ་ན་བདུན་མིག་མང་རིས་སུ་བྲིས་པ། རྟ་བབས་བརྒྱས་རབ་ཏུ་བརྒྱན་པ་བྱས་སོ། །དེའི་ནང་དུ་ཁང་བཟང་ཞིག་བྱས་ཏེ། དེར་གཞོན་
489b
ནུའི་ལོངས་སྤྱོད་ཀྱི་ཕྱིར་མལ་བྱེ་བ་ཕྲག་བཞི་བཤམས་སོ། །དེའི་དབུས་སུ་སྐྱེད་མོས་ཚལ་བྱས་ཏེ་མེ་ཏོག་གི་ཤིང་ལྗོན་པ་ཐམས་ཅད་དང ། འབྲས་བུའི་ཤིང་ལྗོན་པ་ཐམས་ཅད་དང།་རིན་པོ་ཆེའི་ཤིང་ལྗོན་པ་ཐམས་ཅད་ཀྱིས་ཁྱབ་པར་བཀོད་དོ། །ཡུལ་འཁོར་སྐྱོང ། སྐྱེད་མོས་ཚལ་དེའི་དབུས་སུ་རིན་པོ་ཆེ་ཐམས་ཅད་ཀྱི་རྫིང་རིན་པོ་ཆེ་སྣ་བཞིའི་ཐེམ་སྐས་དང་ལྡན་པ་བྱས་པ་འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་ལོ། །གང་ནས་སྤོས་ཆུ་འབབ་པའི་སེངྒེའི་ཁ་བརྒྱ་རྩ་བརྒྱད་བཙུགས་སོ། །རྫིང་དེའི་སེངྒེའི་ཁ་བརྒྱ་རྩ་བརྒྱད་པོ་དེ་ནས་ཀྱང་ཆུ་འབབ་བོ། །མེ་ཏོག་ཨུཏྤལ་དང ། ཀུ་མུ་ཏ་དང ། པདྨ་དཀར་པོ་རྣམས་རྟག་པར་རྒྱུན་དུ་རྒྱས་སོ། །ཁོར་ཡུག་ཏུ་རིན་པོ་ཆེའི་ཤིང་ལྗོན་པས་ཡོངས་སུ་བསྐོར་ཏོ། །དུས་ཐམས་ཅད་པའི་མེ་ཏོག་དང ། འབྲས་བུའི་ཤིང་ལྗོན་པ་རྣམས་ཀྱིས་ཀྱང་ཡོངས་སུ་རྒྱས་སོ། །རྫིང་དེའི་འགྲམ་དུ་རིན་པོ་ཆེའི་ཤིང་ལྗོན་པ་བརྒྱད་བརྒྱད་བསྐྱེད་དེ། རིན་པོ་ཆེའི་ཤིང་ལྗོན་པ་ཐམས་ཅད་ཀྱང་རིན་པོ་ཆེའི་སྐུད་པ་རྣམས་ཀྱིས་སྤྲེལ་ཅིང་ཐམས་ཅད་དུ་ཡང་ཤིང་ཏ་ལའི་ཕྲེང་བ་བྱེ་བས་སྦྲེལ་ཏོ། །དེ་དག་ཀྱང་རླུང་གིས་བསྐྱོད་ཅིང་རླུང་གིས་བསྒུལ་ན། འདི་ལྟ་སྟེ། དཔེར་ན། རོལ་མོའི་སིལ་སྙན་བརྒྱ་སྟོང་བླངས་པ་ལྟ་བུའི་སྒྲ་འབྱུང་ངོ ། །གཞོན་ནུའི་ལུས་ལ་ས་དང་རྡུལ་གྱིས་རེག་ཏུ་འོང་ངོ ། །ཞེས་རྫིང་དེའི་
490a
༄#། །སྟེང་རིན་པོ་ཆེའི་དྲ་བས་བཀབ་པར་གྱུར་ཏོ། །དེའི་ཚེ་ཁང་བཟང་དེར་རིན་པོ་ཆེ་སྣ་བདུན་གྱི་ཁྲི་བྱེ་བ་ཕྲག་བཞི་བཤམས་ཏེ། ཁྲི་ཐམས་ཅད་ཀྱི་སྟེང་དུ་ཡང་རས་བཅོས་བུ་ལྔ་བརྒྱ་ལྔ་བརྒྱ་བཏིང་བར་གྱུར་ཏོ། །གང་དུ་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་འདུག་པར་གྱུར་པའི་ཁྲི་རིན་པོ་ཆེ་སྣ་བདུན་ལས་བྱས་པ་འཕང་དུ་མི་བདུན་ཙམ་ཡོད་པ་བཤམས་པ་དབུས་མ་དེར་རས་བཅོས་བུ་བྱེ་བ་ཁྲག་བརྒྱད་ཅུ་རྩ་བདུན་བཏིང་བར་གྱུར་ཏོ། །ཁྲི་ཐམས་ཅད་ཀྱི་དྲུང་དུ་ཡང་པོག་པོར་ནས་ཨ་ག་རུས་བདུགས་ཤིང ། ཉིན་ལན་གསུམ་མཚན་ལན་གསུམ་དུ་མེ་ཏོག་འགྲེམ་པར་བྱེད་དོ། །གསེར་གྱི་ལྡ་ལྡི་བྲེས་སོ། །གསེར་གྱི་པདྨ་རབ་ཏུ་དཔྱངས་སོ། །མུ་ཏིག་དང་ནོར་བུའི་དྲ་བས་བྲེས་སོ། །ནོར་བུ་རིན་པོ་ཆེའི་འོད་ཀྱིས་སྣང་བར་བྱས་སོ། །རིན་པོ་ཆེའི་དྲ་བ་བརྒྱད་ཁྲི་རབ་ཏུ་དཔྱངས་སོ། །རིན་པོ་ཆེའི་ཤིང་ལྗོན་པ་ཐམས་ཅད་ལ་ཡང་བ་དན་བརྒྱ་བརྒྱ་དཔྱངས་སོ།། སྐྱེད་མོས་ཚལ་ཀུན་ཏུ་ཡང་ནོར་བུ་རིན་པོ་ཆེའི་འོད་དཔག་ཚད་ཙམ་ཡོད་པ་འབུམ་ཕྲག་དགུ་བཅུ་རྩ་དགུ་བཞག་པར་གྱུར་ཏེ། དེ་དག་གི་འོད་ཀྱིས་འཇིག་རྟེན་ཐམས་ཅད་སྣང་བར་གྱུར་ཏོ། །ཡུལ་འཁོར་སྐྱོང ། སྐྱེད་མོས་ཚལ་དེ་ན་བྱའི་ཚོགས་མིའི་སྐད་དུ་སྨྲ་བ་ནེ་ཙོ་དང ། རི་སྐེགས་དང ། ཁྲུང་ཁྲུང་དང ། ཁུ་བྱུག་དང ། རྨ་བྱ་དང ། ངང་པ་དང ། ངུར་པ་དང །
490b
ཀུན་ལ་དང ། ཀ་ལ་པིངྐ་དང ། ཤང་ཤང་ཏེའུ་རྣམས་འཁོད་དོ། །དེ་དག་སྐད་འབྱིན་ཅིང་སྒྲ་སྒྲོག་པ་ན་དགའ་ཚལ་གྱི་ལྷ་རྣམས་རྒྱགས་པར་འགྱུར་པ་ལྟ་བུའི་སྒྲ་འབྱུང་ངོ ། །གཞོན་ནུའི་ལོངས་སྤྱོད་ཀྱི་ཕྱིར་རོའི་རྣམ་པ་ཐམས་ཅད་ཕུན་སུམ་ཚོགས་པ་རོ་རྣམ་པ་ལྔ་བརྒྱ་བའི་ཁ་ཟས་རྣམས་རྟག་པར་རྒྱུན་དུ་བཤམས་པར་གྱུར་ཏོ། །དེའི་ཚེ་གཞོན་ནུ་ལོ་བཅུ་དྲུག་ལོན་པ་ཉི་ཤུ་ལོན་པའི་ཤེད་དང་ལྡན་པ་དག་གྲོང་ཁྱེར་ཐམས་ཅད་ནས་བསྡུས་ནས་གྲོང་ཁྱེར་དེར་བཙུད་དོ། །ཐམས་ཅད་ཀྱང་བཟོའི་གནས་དང ། ལས་ཀྱི་གནས་ཀྱི་བྱ་བ་ཤེས་པ། ཐམས་ཅད་ཀྱང་འཇིག་རྟེན་པའི་དགའ་བ་དང ། འཚོག་ཆས་ཀྱི་བྱ་བ་ཤེས་པ་བྱེ་བ་ཕྲག་བརྒྱད་ཅུ་གྲོང་ཁྱེར་དེར་བཙུད་པར་གྱུར་ཏོ། །ཕ་མ་གཉིས་ཀྱིས་དེ་ལ་བུ་མོ་བྱེ་བ་བྱིན་ནོ། །ཉེ་དུའི་ཚོགས་ཀྱིས་བྱེ་བ་དང ། གྲོང་རྡལ་བའི་མིས་བྱེ་བ་དང ། རྒྱལ་པོ་ཐམས་ཅད་ཀྱིས་བུ་མོ་བྱེ་བ་བྱིན་པར་གྱུར་ཏེ། དེ་དག་ཐམས་ཅད་གཟུགས་བཟང་བ། མཛེས་པ། བལྟ་ན་སྡུག་པ་ཤ་སྟག་གོ་།ཐམས་ཅད་ཀྱང་ན་ཚོད་ལོ་བཅུ་དྲུག་ལོན་པ་གླུ་མཁས་པ། རོལ་མོའི་སྒྲ་མཁས་པ། གར་མཁས་པ། རྒོད་མཁས་པ། སྐྱེས་བུའི་གན་དུ་འགྲོ་མཁས་པ། དྲང་བ། གཞོན་པ། མཉེན་པ། ཡན་ལག་འཇམ་པ། གསོང་པོར་སྨྲ་བ། བཞིན་འཛུམ་པ། ཚུལ་མཁས་པ། སྒྱུ་རྩལ་ཐམས་ཅད་ཀྱི་བྱ་
491a
༄#། །བ་ལ་མཁས་པ། ཧ་ཅང་ཡང་མི་རིང་བ། ཧ་ཅང་ཡང་མི་ཐུང་བ། ཧ་ཅང་ཡང་མི་སྐེམ་པ། ཧ་ཅང་ཡང་མི་སྦོམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་སྔོ་བ། ཁ་ནས་མེ་ཏོག་ཨུཏྤ་ལའི་བསུང་འབྱུང་བ། ལུས་རྣམས་ལས་ཙནྡན་གྱི་དྲི་འབྱུང་བ། ལྷའི་བུ་མོ་ལྟར་གསལ་བ། ཤིན་ཏུ་ཡིད་དུ་འོང་བའི་ཚུལ་དང་ལྡན་པ། གླུ་དབྱངས་ལེན་པ་དེ་དག་གི་ནང་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གནས་སོ། །གླུ་དབྱངས་དང་རོལ་མོའི་སྒྲ་དེ་ལ་ཀྱེ་མའོ་བདག་དང་མི་མཛའ་བའི་ཚོགས་ཆེན་པོ་དང ། བདག་གི་དགེ་བའི་ཆོས་ཡོངས་སུ་ཉམས་པར་བྱེད་པ་བྱུང་སྟེ། བལྟ་བར་མི་བྱའོ། །སྙམ་པའི་སེམས་བསྐྱེད་དོ། །དེ་དེའི་ཚེ་འདི་ལྟ་སྟེ། དཔེར་ན། གསད་པར་བྱ་བའི་མིས་གཤེད་མ་མཐོང་ན། ངོ་མཚར་གྱི་སེམས་མི་བསྐྱེད་པ་དེ་བཞིན་དུ་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཡང་བུད་མེད་དེ་དག་མཐོང་ན། ངོ་མཚར་དུ་མི་འཛིན་ཏོ། །གྲོང་ཁྱེར་དེ་ལ་ཡང་གྲོགས་དང་ལྷན་གཅིག་ངོ་མཚར་དུ་མི་འཛིན་ཏོ། །ལོ་བཅུ་པོ་དེ་དག་གི་བར་དུ་བདག་ནམ་ཞིག་ན་མི་མཛའ་བའི་ཚོགས་རྣམས་པ་འདི་ལྟ་བུའི་ནང་ནས་ཐར་པར་འགྱུར་སྙམ་པ་དང ། བདག་ནམ་ཞིག་ན་བག་ཡོད་པའི་སྤྱད་པ་སྤྱོད་ཅིང་དེས་བདག་ཐར་པར་འགྱུར་ཞིག་གུ་སྙམ་པ་དེ་ལྟ་བུའི་སེམས་འཇུག་པ་མ་གཏོགས་པར་ནམ་ཡང་གཟུགས་
491b
ཀྱི་མཚན་མ་བཟུང་བར་མ་གྱུར་ཏེ། དེ་བཞིན་དུ་སྒྲའི་མཚན་མ་དང ། དྲིའི་མཚན་མ་དང ། རོའི་མཚན་མ་དང ། རེག་གི་མཚན་མ་བཟུང་བར་མ་གྱུར་ཏོ། །དེ་ནས་བུ་མོ་དེ་དག་གིས་རྒྱལ་པོ་འོད་ཟེར་ལྡན་ལ་ལྷ། གཞོན་ནུ་ནི། མི་རོལ་ཏོ། །དགྱེས་པར་མི་མཛད་དོ། །དགྱེས་རྒུར་མི་སྤྱོད་དོ། །ཞེས་སྨྲས་སོ། །བམ་པོ་གསུམ་པ་སྟེ། ཐ་མ། ཡུལ་འཁོར་སྐྱོང ། དེ་ནས་རྒྱལ་པོ་འོད་ཟེར་ལྡན་རྒྱལ་པོ་བརྒྱད་ཁྲི་དང་ལྷན་ཅིག་ཏུ་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ག་ལ་བ་དེར་སོང་སྟེ་ཕྱིན་ནས་གདོང་ལས་མཆི་མ་འཛག་ཅིང་ལུས་འདར་ཏེ་མྱ་ངན་གྱིས་ས་ལ་འགྱེལ་ཏོ། །དེ་ས་ལས་ལངས་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཚིགས་སུ་བཅད་དེ་སྨྲས་པ། བུ་གཅིག་རིན་ཆེན་དམ་པ་ང་ལ་ལྟོས་ཤིང་སྨྲོས།། ང་ནི་མྱ་ངན་གཟིར་ཏེ་ཁྱིམ་ནང་ས་ལ་འགྱེལ། །སུ་ཡིས་ཁྱོད་མི་དགའ་བྱས་དེ་མྱུར་ང་ལ་སྨྲོས། །དེ་འདིར་དེའུ་རེ་ཆད་པ་ཆེན་པོས་གཅད་པར་བྱ། །ཁྱེད་ཀྱི་ཆེད་དུ་ངས་འདིར་ཡིད་ཀྱིས་གང་སྨྲས་པ། །ལྷ་ཡི་ཁྱིམ་ལྟར་ཉམས་དགའ་གྲོང་ཁྱེར་དེར་ལྟོས་ཤིག་།འདི་ལ་ཡན་ལག་མ་ཚང་ཅི་ཡོད་དེ་མྱུར་སྨྲོས། །བརྒྱ་བྱིན་ལྟ་བུའི་འབྱོར་པ་དེ་རིང་ཁྱོད་ལ་བསྟན། །པདྨའི་མིག་ཅན་མིག་མཛེས་མྱ་ངན་ཉམ་ཐག་པ། །ལྷ་ཡི་བུ་མོ་ལྟ་བུའི་བུད་མེད་ཚོགས་སྨྲ་ལྟོས། །མྱ་ངན་ཐུལ་ཏེ་དེ་དག་རྣམས་དང་དེ་རིང་རྩེས། །ཅི་ཕྱིར་ཟུག་
492a
༄#། །རྔུས་ཟུག་བཞིན་ལུས་དམན་སེམས་ཤིང་འདུག་།དེ་དག་རབ་དགའ་ཚུལ་མཁས་དབྱངས་ཀྱི་ཡན་ལག་སྙན། །གླུ་དབྱངས་ཕེག་རྡོབ་དུས་ཀྱི་རྣམ་པར་ངེས་པ་ཤེས། །ཁྱོད་དགའ་དུས་ལ་དེང་བབ་མྱ་ངན་མ་བྱེད་ཅིག་།པདྨ་རྙིང་པ་ལྟ་བུར་ཅི་ཕྱིར་དེང་ལུས་དམན། །མེ་ཏོག་འབྲས་བུ་ཡལ་ག་འདབ་རྒྱས་སྐྱེད་མོས་ཚལ། །སྣ་ཚོགས་སྟོང་བཞག་ལྷ་ཡི་སྣ་ཚོགས་ཤིང་རྟ་འདྲ། །སོམས་ཤིག་ཁྱོད་ཀྱི་ན་ཚོད་འདི་ནི་ཐོག་མ་ཡིན། །དགའ་བའི་དུས་ལ་བབ་ཀྱི་དེང་འདིར་བུ་དགའ་གྱིས། །ཁྱོད་ཀྱི་ཁྲུས་ཆེན་རྫིང་འདི་ལྷ་རྣམས་ཀྱི་ཡང་འདྲ། །ུཏྤ་ལ་དང་པདྨ་དག་གི་ཚལ་གྱིས་གང ། །པདྨ་རྣམས་ཀྱང་བུང་བ་རྒྱགས་པ་མཆོག་གིས་བརྒྱན། །དེ་ལ་བུ་སོམས་སུ་ཞིག་འདི་ལ་དགའ་མི་བྱེད། །ངང་པ་རྨ་བྱ་ནེ་ཙོ་ཁུ་བྱུག་རི་སྐེགས་དང ། །ཀ་ལ་པིངྐ་ཤང་ཤང་ཏེའུ་དང་ཀུན་ལ། །ཡིད་འོང་སྒྲ་ལྡན་གང་ཉེ་སྤོས་ངད་ལྡང་འདྲ་བ། །ཐོས་ནས་མི་གང་འདི་ལ་དགའ་བ་ཐོབ་མི་འགྱུར། །གཞལ་མེད་ཁང་དག་མུ་ཏིག་དྲ་ར་བཅས་ནོར་བུ་བཙུགས། །གསེར་དང་བཻ་ཌཱུརྱ་སྤྲས་རྣམ་རྒྱལ་ཁང་པ་འདྲ། །རིན་ཆེན་ཁྲི་མཆོག་དམ་པ་རྣམས་ཀྱང་རབ་བཏིང་བ། །གསེར་དྲིལ་གཡེར་ཀ་ཏ་ལའི་ཕྲེང་བ་སྒྲ་སྙན་པ། །ཟབ་ཅིང་བརྟན་པ་མཆོག་གི་སིལ་སྙན་སྒྲ་བསྒྲགས་
492b
པ། །ཁྱོད་ཀྱི་ཆེད་དུ་སྲང་རྣམས་སུ་ཡང་སྦྱིན་རྒྱ་ཆེ། །བུ་མོ་སྟོང་དག་གླུ་མཆོག་སྙན་པའི་སྒྲ་འབྱིན་པ། །དགའ་ཚལ་ལྷ་ཡི་བུ་མོ་རྣམས་ཀྱི་འདྲ་བ་སྒྲོག་།མཐོ་རིས་འདྲ་བའི་གནས་ཡིད་འོང་ལ་ཅི་ཡི་ཕྱིར། །རྣམ་པར་གཡེང་བའི་སེམས་ཀྱིས་འདི་ལ་དགའ་མི་བྱེད། །གཞོན་ནུ་ཁྱོད་ཀྱི་རྩེད་གྲོགས་ལྟ་བུའི་བུ་འདྲ་བ། །བུ་མོ་དེ་དག་རྣམས་དང་ལྷན་ཅིག་རྩེད་མོ་གྱིས། །ཁྱོད་ཀྱི་ཕ་དང་མ་ཡང་མཆི་མས་བརྣངས་ཤིང་འདུག་།སྐྱེ་བོ་འདི་ལ་སྡུག་བསྔལ་སྙིང་རྗེ་མེད་དམ་ཅི། །འདུས་བྱས་ཡིད་བྱུང་དོར་བའི་ལོངས་སྤྱོད་དོན་མི་གཉེར། །ཡོན་ཏན་བསགས་པ་སྲིད་པའི་སྐྱོན་མཐོང་དེས་སྨྲས་པ། །འཁོར་བའི་དྲ་བར་ཆུད་པའི་འགྲོ་བ་འདི་བལྟས་ནས། །ཐར་པ་དོན་གཉེར་ཕ་ལ་སྨྲས་པ་ཡབ་གསོན་ཅིག ། ལྷ་ཅིག་སུས་ཀྱང་བདག་ལ་མི་དགའ་བགྱིས་མ་མཆིས། །བདག་ནི་དེ་ལྟར་འདོད་པའི་ཡོན་ཏན་མོས་མ་ལགས། །ཉོན་མོངས་གང་དག་ངན་འགྲོའི་གཡང་སར་ལྷུང་བྱེད་པ།། སྡུག་པ་ཐམས་ཅད་དགྲ་དང་མཚུངས་ཏེ་རྗེས་མི་སྲུང ། །མི་མཁས་བུས་པ་སྐྱེ་བོ་བུད་མེད་དེ་དག་དགའ། །བདུད་ཀྱི་ཞགས་པ་ཡོན་ཏན་འཆིང་བ་གཡང་ས་ཆེ། །རྟག་ཏུ་འཕགས་བའི་སྐྱེ་བོས་དེ་དག་དེ་ལྟར་སྨད། །སེམས་དམྱལ་ངན་འགྲོ་མྱ་ངན་རྩ་བ་ཅི་ཕྱིར་བསྟན། །བུད་མེད་འདི་དག་པགས་པའི་གཟུགས་ཀྱིས་དགའ་བ་ཙམ། །བདག་ནི་རུས་རྒྱུས་
493a
༄#། །འཁྲུལ་འཁོར་མི་གཙང་དོན་མི་གཉེར། །ཁྲག་དང་གཅིན་དང་མི་གཙང་བ་དང་དྲི་མ་འཛག་།གསལ་བར་དུར་ཁྲོད་འདྲ་ལ་ཇི་ལྟར་དགའ་བར་བགྱི།།་གླུ་དང་གར་དང་རོལ་མོའི་དབྱངས་སྒྲ་གཟུང་མི་བགྱི། །དགའ་བ་རྨི་ལམ་འདྲ་བ་མི་མཁས་རྨོངས་པར་བགྱིད། །ཀུན་ཏུ་རྟོག་པ་སྲེད་གྱུར་མི་མཁས་འདི་བརླག་གི་།ཅི་ཕྱིར་བྱིས་པའི་སྐྱེ་བོ་ལྟ་བུར་ཉོན་མོངས་ཁོལ། །ཤིང་ལྕུག་འདི་དག་ཐམས་ཅད་དགུན་གྱི་དུས་བྱུང་ན། །དགོན་དུང་ཤིང་ལྟར་འགྱུར་ཏེ་དགའ་བར་འགྱུར་མ་ལགས། །མི་རྟག་འདི་ཡིས་དཔའ་རྣམས་ཐམས་ཅད་བཤིག་གྱུར་ཏེ། །སྲོག་གཡོར་གྱུར་ཀྱང་གཏི་མུག་གིས་ནི་བག་མེད་གྱུར། །སེམས་ཀྱི་རྒྱ་མཚོ་ལྟ་བུར་ཚིམ་པར་བྱེད་མི་ནུས། །སྲིད་པར་རབ་ཏུ་འཕེལ་ལ་དགའ་བས་ཕྱིར་ཞིང་འདོད། །འདོད་རྒྱུས་ཕན་ཚུན་གསོད་པའི་འགྲོ་བ་བལྟས་ནས་སུ། །འདིར་ནི་ཇི་ལྟར་ལྷུན་པོ་རླུང་གིས་མི་བསྐྱོད་བཞིན། །རྒྱལ་པོ་ཁྱོད་དང་ཕ་དང་ལྷན་ཅིག་སྐྱེས་པ་དང ། །གཉེན་གྱི་སྐྱེ་བོ་ཆུང་མ་ངན་སོང་བདག་སྐྱབས་མིན། །བདག་ཅག་ཐམས་ཅད་རྩཝ་རྩེའི་ཟིལ་པ་འདྲ་བ་སྟེ། སེམས་ཀྱི་དབང་དུ་འགྲོ་བར་མ་གྱུར་བག་ཡོད་མཛོད། །མི་དབང་དར་ལ་བབ་པ་མི་རྟག་ཅིར་མི་རུང ། །སྲོག་ཀྱང་རི་ཡི་ཆུ་ལྟར་མྱུར་འགྲོ་ཅིར་མི་རུང ། །འདུས་བྱས་འདི་ཟད་གློག་སྤྲིན་འདྲ་སྟེ་ཅིར་མི་རུང ། །རྒྱལ་པོ་མཁས་ལ་
493b
སྲིད་གསུམ་འདོད་ལ་ཆགས་པ་ངན། །ལྷ་རྣམས་ཀྱིས་ནི་བདག་ལ་བག་ཡོད་འགྱུར་གྱིས་ཤིག། བྱང་ཆུབ་སེམས་དཔའ་ཡུལ་ལ་ཆགས་པ་མིན་ཞེས་བསྐུལ། །འཇིག་རྟེན་ཕན་པའི་སྙིང་བརྩེ་སངས་རྒྱས་འདིར་འགྱུར་བགྱི། །རྒྱལ་པོ་བག་མེད་སྤྱོད་ལ་བྱང་ཆུབ་ཡོད་མ་ལགས། །རྒྱལ་པོ་གང་ཞིག་འདོད་པས་གཡེན་སྤྱོ་སེམས་འཁོལ་བ། །དེ་ནི་བསོད་ནམས་ཆུད་ཟ་དགའ་ཞིང་མཐོ་རིས་ལྡོག་།འཚེ་བ་ཤིན་ཏུ་རྒྱགས་པ་ནམ་ཡང་སྤྱད་མི་བགྱི། །སྐོན་པར་བཅུག་པའི་བྱ་ལྟར་ཇི་ལྟར་དབུགས་ཕྱིན་འགྱུར། །ཁམས་རྣམས་སྦྲུལ་དང་འདྲ་ཞིང་ཕུང་པོ་གཤེད་མ་འདྲ། །ཟག་དང་བཅས་པའི་སེམས་ནི་དོན་མེད་གྲོང་སྟོང་མཚུངས། །རྒྱལ་པོ་འདི་ནི་དུག་སྡོང་མེ་ཏོག་རྒྱས་འདྲ་ལུས། །ཆུ་བོ་རྣམས་ཀྱིས་བདས་ན་བདག་འདིར་ཇི་ལྟར་དགའ། །རབ་ཏུ་གསལ་ནས་འབར་བ་ནམ་མཁའ་ལྟ་བུ་དང ། འགྲོ་བ་ངན་ཞུགས་འགྲོ་བ་འདི་ལ་བདག་བལྟས་ནས། །རྒྱལ་པོ་དེ་རིང་འདིར་ནི་དེ་དག་དགྲོལ་བ་དང ། །གཉིད་ལོག་སད་པར་བགྱི་དང་ནད་པ་གསོ་བ་དང ། །ཟུག་རྔུ་རྩད་ནས་གདོན་དང་ལམ་ལོག་བཟློག་པའི་ཕྱིར། །བདག་གིས་ཞི་བའི་ཆོས་ཀྱི་གྲུ་ནི་རབ་ཏུ་སྦྱར། །སྟོང་ཆེན་དུ་ནི་བཅིངས་པ་རྣམ་གྲོལ་རབ་བསྒྲགས་ནས། །ལེགས་པར་བཤད་པས་རིང་ནས་དབུལ་བ་ཚིམ་པར་བགྱི། །ངན་འགྲོའི་ལམ་དུ་ལྷུང་བ་དག་ཀྱང་གདོན་པར་བགྱི། །ལོང་བ་མིག་སྦྱིན་སྲེད་པའི་
494a
༄#། །འཁྲི་ཤིང་བསྐམ་པར་བགྱི། །རྣམ་གྲོལ་མཆོག་ཕྱིར་ཤེས་རབ་འོད་ཟེར་མར་མེ་བྱས། །དེ་ཡིས་སྲིད་གསུམ་གར་ལ་བལྟ་བར་འདྲར་མཐོང་འགྱུར།། བྱམས་དང་སྙིང་བརྩེས་སྙིང་རྗེ་ཕ་རོལ་ཕྱིན་པའི་སྤྲིན། །སེམས་ཅན་བདེ་འབྲུག་ལྷ་མཐོང་གློག་གི་ཕྲེང་བ་དང ། །བྱང་ཆུབ་ཡན་ལག་བདེ་བསིལ་ཆར་རྒྱུན་འདྲ་བ་ཡིས། །འགྲོ་བ་ཡུན་རིང་དུས་ནས་གདུངས་པ་བསིལ་བར་བགྱི། །རྒྱལ་པོ་བདག་ནི་དེ་དྲན་གྱུར་ནས་འདིར་མཆིས་ཏེ། །བདག་ནི་འདུས་བྱས་འདོད་པ་ཀུན་ལ་སྨོན་མ་མཆིས། །བྱང་ཆུབ་དོན་གཉེར་སེམས་ཅན་ཆེད་དུ་འདིར་སྤྱད་བགྱི། གཅིག་ཏུ་ངེས་ཏེ་བདག་ནི་སྲིད་ལ་དགའ་མ་མཆིས། །རྒྱལ་པོ་འདི་ན་ཤེས་བཞིན་སུ་ཞིག་དགྲ་ཁྲོད་གནས། །བློ་དང་ལྡན་པ་སུ་ཞིག་འཇིགས་བཅས་ལམ་དུ་འགྲོ། །མི་དང་ལྡན་པ་སུ་ཞིག་འདི་ན་གཡང་སར་ལྟུང ། །བྱང་ཆུབ་ལམ་ཤེས་ནས་ནི་སུ་ཞིག་བག་མེད་འགྱུར། །འགྲོ་བ་ཐམས་ཅད་རྒྱུན་འགྲོ་དག་ནི་རྒྱུན་ཟློག་པ། །རྒྱལ་པོ་ཚིག་ཙམ་གྱིས་ནི་བྱང་ཆུབ་ཐོབ་མི་ནུས། །ལྷུན་པོའི་རྩེ་ནས་རྒྱ་མཚོའི་ནང་དུ་མཆོང་སྤྲོ་ཡི། །བདག་འདིར་འདོད་པ་རྣམས་ཀྱིས་ཡིད་དགའ་དེ་ལྟ་མིན། །རྒྱལ་པོ་དམ་པ་རང་གཉེར་ཐབས་ཅིག་མྱུར་དུ་བཞུད། །ཡུལ་འཁོར་དགའ་བ་ཐམས་ཅད་འཇིག་རྟེན་ཀུན་ལ་སྩོལ། །གང་བདག་བསམ་པ་
494b
ཇི་བཞིན་བླངས་ནས་མཆི་བར་འགྱུར། །ཡབ་བདག་བག་མེད་རྒྱལ་སྲིད་བྱེ་བ་འཚལ་མ་ལགས། །བུད་མེད་ཚོགས་ཀྱི་ནང་དུ་གནས་པས་བྱང་ཆུབ་དང ། །གྲུབ་བདེ་ཞི་བ་བླ་མེད་གནས་ནི་ཐོབ་མི་ནུས། །དགོན་པར་དགྱེས་པས་རྒྱལ་བས་བྱང་ཆུབ་བརྙེས་པས་ན། །བདག་ནི་རི་དང་ནགས་ཁྲོད་མཆིས་ཏེ་གནས་པར་བགྱི། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཁང་བཟང་གི་ནང་ན་འདུག་བཞིན་དུ་ཡིད་བྱུང་བ་དང་ལྡན་པའི་སེམས་ཀྱིས་བུད་མེད་དེ་དག་དང་ལྷན་ཅིག་འཆག་ཅིང་དེ་སྤྱོད་ལམ། གསུམ་གྱིས་གནས་སོ། །གསུམ་གང་ཞེ་ན། འདི་ལྟ་སྟེ། འགྲེང་བ་དང ། འགྲོ་བ་དང ། འདུག་པ་སྟེ། རྨུགས་པ་དང ། གཉིད་ཡོངས་སུ་སྤངས་སོ། །ཁང་པའི་སྟེང་དུ་སོང་སྟེ་ས་བརྒྱད་ལ་གནས་ནས་དེ་ནམ་གྱི་གུང་ལ་བབ་པའི་དུས་ཀྱི་ཚེ་གནས་གཙང་མའི་རིས་ཀྱི་ལྷ་རྣམས་སངས་རྒྱས་ཀྱི་བསྔགས་པ་རྒྱ་ཆེར་བརྗོད་ཅིང་བར་སྣང་ལ་འགྲོ་བ་དང ། ཆོས་དང ། དགེ་འདུན་གྱི་བསྔགས་པ་རྒྱ་ཆེར་བརྗོད་ཅིང་འགྲོ་བ་ཐོས་སོ། །ཐོས་ནས་ཀྱང་ཡུལ་འཁོར་སྐྱོང ། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་སྤུ་ཟིང་ཞེས་བྱེད་པར་གྱུར་ནས་མཆི་མ་ཟག་ཅིང་སྐྱོ་བ་སྐྱེས་ཏེ་ཐལ་མོ་སྦྱར་ནས་ལྷ་རྣམས་ལ་ཚིགས་སུ་བཅད་དེ་སྨྲས་པ། ལྷ་རྣམས་སྡུག་བསྔལ་བདག་ལ་ཐུགས་རྗེ་བསྐྱེད་ནས་ནི། །གལ་ཏེ་སྐྱོ་མི་མཛད་ན་ཅུང་ཞིག་ཞུ་བར་
495a
༄#། །བགྱི། །སུ་ཡི་ཡོན་ཏན་བརྗོད་ཅིང་བར་སྣང་འདི་ལས་བཞུད། །ཚིག་དེ་ཐོས་ནས་བདག་འདིར་ཡིད་ནི་བདེ་བར་གྱུར། །ཡུལ་འཁོར་སྐྱོང ། །དེ་ནས་ལྷ་དེ་དག་གིས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཚིགས་སུ་བཅད་པས་སླར་སྨྲས་པ། གཞོན་ནུ་ཁྱོད་ཀྱིས་སངས་རྒྱས་ཐོས་པར་མ་གྱུར་ཏམ། །དོན་གྲུབ་བློ་ཞེས་བྱ་སྟེ་སྐྱབས་མེད་རྣམས་ཀྱི་སྐྱབས། །དེ་བཞིན་སྤྱོད་མཁས་བསོད་ནམས་ཤེས་རབ་ཡོན་ཏན་མཆོག་།དེ་ཡི་དགེ་འདུན་ཁྲག་ཁྲིག་སྟོང་བཅུ་བསམ་གཏན་པ། །བསོད་ནམས་འོད་ཟེར་གྱིས་སྨྲས་པ། བདག་ནི་རྒྱལ་བ་ལྟ་འཚལ་དེ་ཡི་གཟུགས་ཅི་འདྲ། །དེ་ཡི་ཁ་དོག་ཅི་འདྲ་ཐམས་ཅད་བཀའ་སྩོལ་ཅིག་།ཇི་ལྟར་སྤྱད་ན་སེམས་ཅན་ཀུན་མགོན་གཅིག་གྱུར་པ། །བྱང་ཆུབ་སྤྱོད་པ་ཅི་འདྲ་བདག་ནི་ཡོངས་སུ་འདྲི། །དེ་ནས་ལྷ་དེ་དག་གིས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཚིགས་སུ་བཅད་པས་སླར་སྨྲས་པ། དེ་ཡི་གཙུག་ཏོར་རི་ཡི་རྩེ་ལ་གསེར་མཛེས་བཞིན། །དབུ་སྐྲ་འཇམ་ཞིང་མཛེས་ལ་གཡས་སུ་འཁྱིལ་པ་སྟེ། །དེ་ཡི་མཛོད་སྤུ་མཁའ་ལ་ཉི་ལྟར་ལྷམ་མེ་བ། །ནོར་བུ་ཤེལ་ལྟར་རྣམ་པར་དག་ཅིང་གཡས་སུ་འཁྱིལ། །སྤྱན་དག་བུང་བའི་ཚོགས་དང་ཨུཏྤལ་སྔོན་པོ་འདྲ། །མི་དབང་སེངྒེའི་འགྲམ་པ་རང་བྱུང་བིམ་པའི་སྒྲོས། །སེམས་ཅན་ལྷན་ཅིག་འོད་ཟེར་བྱེ་བ་མཐའ་ཡས་འགྱེད།།
495b
སྟོང་གསུམ་རྒྱས་པར་འགེངས་ཤིང་ངན་འགྲོ་རྣམས་ཀྱང་སྐེམ། །དེ་ཡི་ཚེམས་ནི་རབ་དཀར་ཁ་བ་དངུལ་ལྟར་དག་།བཞི་བཅུ་མཉམ་ཞིང་ཐགས་བཟང་རྨད་བྱུང་ལེགས་པར་གྲུབ།། རྒྱལ་བ་དམ་པ་མཆོག་དེའི་ཚེམས་ཀྱི་མཆེ་བ་བཞི། །དེ་ཡི་ལྗགས་ནི་རབ་ཡངས་རང་གི་ཞལ་གདོང་ཁེབས། །རྒྱལ་བ་དེ་ཡི་གསུང་ནི་རི་མཆོག་འདྲ་བའི་དོན། །ཤིན་ཏུ་ཚིམ་བྱེད་འབྲེལ་ཅིང་གྱ་གྱུ་མེད་པ་སྟེ། །ཚངས་དབྱངས་ཤིན་ཏུ་སྙན་པ་སིལ་སྙན་སྟོང་འདྲ་བ། །ཡིད་གཉིས་འཇོམས་པ་འདོད་པ་རྣམས་ནི་ཚིམ་བྱེད་པ། །རྒྱལ་བའི་གསུང་ནི་ལྷ་ཡི་སྒྲ་སྐད་ཚིམ་བྱེད་པ། །ཡོན་ཏན་སྣ་ཚོགས་ཚང་བ་བྱང་ཆུབ་ཡན་ལག་མཐུན། །ཆོས་ཀྱི་ཕྲེང་པ་ཡིད་འོང་བརྒྱ་སྟོང་རབ་བརྒྱུས་པ། །སིལ་སྙན་དགའ་བ་བསྒྲགས་པ་ལྷ་ཀླུ་ཉམས་དགའ་བ། །མི་ཅི་ཀ་ལ་པིངྐ་ཁུ་བྱུག་ངུར་པ་དང ། །རྨ་བྱ་ངང་པ་སྒྲ་སྙན་ཀུ་ན་ལ་ཡི་སྒྲ། །ཚངས་པའི་སྒྲ་དབྱངས་མི་ཅི་དབྱངས་ཀྱི་ཡན་ལག་འདྲ། །མ་འཁྲུལ་སྡིག་མེད་དོན་རྣམས་ཐམས་ཅད་རྟོགས་བྱེད་པ། །རྨད་བྱུང་ཤེལ་ལྟར་འཇམ་ཞིང་མཁས་པའི་ཡིད་འོང་བ། །སྐུལ་བ་འདུལ་བར་འགྱུར་བ་སྤྱོད་པ་དགར་འགྱུར་བ། །གཞན་གྱི་སྤྱོད་དང་མཐུན་པ་ཞུས་ན་ཚིམ་བྱེད་པ། །ཆོས་ཀྱི་དབང་ཕྱུག་དེ་ཡི་གསུང་གི་ཡོན་ཏན་འདི། །སྟོན་པའི་མགུལ་མཛེས་དུང་དང་འདྲ་ཞིང་དཔུང་མགོ་ཟླུམ། །དབྱུག་པ་ལྟ་བུར་ཕྱག་རིང་དེ་ཡི་བདུན་
496a
༄#། །ཡང་མཐོ། །ཕྱག་མཛེས་སྣ་ཚོགས་སོར་མོ་རྣམས་ནི་རིང་ཞིང་ཟླུམ། །རྒྱལ་བ་དེ་ཡི་སྐུ་ནི་བཙོ་མ་གསེར་གྱི་མདོག་།བ་སྤུ་གཡས་སུ་འཁྱིལ་ཅིང་གྱེན་དུ་རེ་རེ་སྐྱེས། །ལྟེ་བ་མཐའ་དག་ཟབ་ཅིང་གསང་སྦུབས་རྟ་ཡི་འདྲ། །རང་བྱུང་ཨེ་ན་ཡ་ཡི་བྱིན་པ་གླང་པོའི་སྣ་འདྲའི་བརླ། །ཞབས་མཐིལ་མཛེས་པར་བྲིས་པ་བཀྲ་ཤིས་འཁོར་ལོའི་མཚན། །གླང་པོའི་དབང་པོའི་འགྲོས་ཐབས་སེངྒེའི་རྩལ་གྱི་སྟོབས། །ཁྱུ་མཆོག་འགྱིང་པའི་སྟབས་ཅན་དབང་པོའི་མཆོད་སྟོང་རྒྱས། །མཁའ་ལས་མེ་ཏོག་ཆར་འབབ་མེ་ཏོག་གདུགས་སུ་གྱུར། །གཤེགས་པའི་རྗེས་འགྲོ་འདི་དག་དེ་ཡི་རྨད་བྱུང་ཆོས། །རྒྱལ་བ་རྙེད་དང་མ་རྙེད་བདེ་དང་སྡུག་བསྔལ་དང ། །གྲགས་དང་མ་གྲགས་དེ་བཞིན་བསྟོད་དང་སྨད་པ་ཡིས། །པདྨ་ཆུས་ལྟར་ཐམས་ཅད་དུ་ཡང་གོས་པ་མེད། །མི་ཡི་སེངྒེ་དེ་འདྲ་མཚུངས་པའི་སེམས་ཅན་མེད། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་སངས་རྒྱས་ཀྱི་བསྔགས་པ་ཐོས་ཤིང ། ཆོས་དང ། དགེ་འདུན་གྱི་བསྔགས་པ་ཐོས་ནས་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ།་དགའ་བ་དང ། བདེ་བ་སྐྱེས་པར་གྱུར་ཏོ། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་དེ་ཅི་
496b
འདྲ་བ་དང ། དེའི་དགེ་འདུན་ཕུན་སུམ་ཚོགས་པ་ཅི་འདྲ་བ་དང ། དེས་མངོན་སུམ་དུ་བྱས་པའི་ཆོས་ཅི་འདྲ་བ་དང ། དེའི་སློབ་མ་ཕུན་སུམ་ཚོགས་པ་ཅི་འདྲ་བ་དང ། ཇི་ལྟར་འཁོར་བ་ཡ་ང་བ་དང་ཕྲད་པ་དང ། བྱས་པ་མི་གཟོ་བ་དང ། ཇི་ལྟར་འཁོར་བ་ན་བྱིས་པ་སོ་སོའི་སྐྱེ་བོ་དག་བྱས་པ་མི་གཟོ་བ་དང ། ཇི་ལྟར་འཇིག་ཚོགས་ལ་ལྟ་བ་ཡ་ང་བ་དང ། ཇི་ལྟར་ཁྱིམ་གྱི་གནས་ཉེས་དམིགས་མང་བ་དང ། ཇི་ལྟར་འདོད་པ་དག་ཉེས་པ་མང་བ་དང ། ཇི་ལྟར་མཁས་པ་རྣམས་ཀྱིས་བག་མེད་པ་སྨོད་པ་དང ། ཇི་ལྟར་མ་རིག་པའི་མུན་ནག་རྨོངས་པ་དང ། ཇི་ལྟར་འདུ་བྱེད་རྣམས་རྟོགས་པར་དཀའ་བ་དང ། ཇི་ལྟར་སེམས་གདུལ་བར་དཀའ་བ་དང ། ཇི་ལྟར་མིང་དང་གཟུགས་ཟབ་པ་དང ། ཇི་ལྟར་སྐྱེ་མཆེད་དྲུག་དབུགས་འབྱིན་པ་མེད་པ་དང ། ཇི་ལྟར་རེག་པ་ཡོངས་སུ་མ་ཤེས་ཏེ་སྡུག་བསྔལ་རྣམ་པར་སྨིན་པ་དང ། ཇི་ལྟར་ཚོར་བ་ཉེས་དམིགས་མང་བ་དང ། ཇི་ལྟར་སྲེད་པའི་འཆིང་བ་དམ་པ་དང ། ཇི་ལྟར་ཉེ་བར་ལེན་པ་ལས་འབྱུང་བར་དཀའ་བ་དང ། ཇི་ལྟར་སྲིད་པའི་སྲེད་པ་འཕགས་པ་མ་ཡིན་པ་དང ། ཇི་ལྟར་སྲིད་པ་ཡོད་ན་སྐྱེ་བ་རྒྱུན་གཅད་དཀའ་བ་དང ། ཇི་ལྟར་རྒ་བ་རྣམ་པར་འགྱུར་བར་བྱེད་པ་དང ། ཇི་ལྟར་ནད་ཀྱིས་རྣམ་པར་འཇིག་པར་བྱེད་པ་དང ། ཇི་ལྟར་འཆི་བ་རྗེས་སུ་མི་སྲུང་བ་དང ། ཇི་ལྟར་འཇུག་པ་རོ་བྲོ་བ་ཆུང་བ་དང ། ཇི་ལྟར་སྲིད་པ་མངོན་པར་འགྲུབ་
497a
༄#། །པ་ཉེས་དམིགས་མང་བ་དང ། ཇི་ལྟར་དེ་བཞིན་གཤེགས་པའི་བསྟན་པ་ཉམས་དགའ་བ་ལྟར་འདི་མི་ནུས་ཏེ། འདོད་པའི་ཁོལ་པོ་ཉོན་མོངས་པའི་རྨོངས་པ། སེམས་ཐ་བ་ཅན་བག་མེད་པ་ལ་དགའ་བ། བྱིས་པའི་ནང་ན་འདུག་པ། ཚུལ་བཞིན་མ་ཡིན་པའི་སེམས་དང་ལྡན་པ། འཁོར་བ་ལ་ཆགས་པའི་སེམས་དང་ལྡན་པ། སྐྱེ་བོ་མ་རུངས་པའི་ནང་ན་འདུག་པ་ནི། བདེ་འགྲོའི་ལམ་ཡང་རྣམ་པར་སྤྱད་པར་མི་ནུས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་ལྟ་ག་ལ་འགྱུར་སྙམ་མོ། །དེ་ཡང་འདི་སྙམ་དུ་སེམས་ཏེ། བདག་སྒོ་ནས་བྱུང་ན་ནི། ཉེ་དུའི་ཚོགས་ཀྱི་བར་ཆད་བྱས་སུ་འོང་གི་།བདག་ཁང་སྟེང་འདི་ནས་ཐུར་དུ་མཆོང་ངོ ། །སྙམ་མོ། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་དེ་ག་ལ་བ་དེ་ལོགས་སུ་ཕྱོགས་ཏེ། ཁང་པ་དེ་ནས་མཆོངས་ནས་ཚིག་འདི་སྐད་དུ་གལ་ཏེ་དེ་བཞིན་གཤེགས་པ་དེ་ཐམས་ཅད་མཁྱེན་ཅིང་ཐམས་ཅད་གཟིགས་ཤེ་ན། དེ་བཞིན་གཤེགས་པ་དེ་བདག་ལ་དགོངས་སུ་གསོལ་ཞེས་ཀྱང་སྨྲས་སོ། །ཡུལ་འཁོར་སྐྱོང ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་
497b
བློས་ཕྱག་གཡས་པ་བརྐྱངས་ཏེ། འོད་ཕྱུང་ནས་འོད་དེས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་རེག་གོ་།འོད་དེ་ལས་ཀྱང་པདྨ་འདབ་མ་བརྒྱ་སྟོང་ཡོད་པ་ཤིང་རྟའི་འཕང་ལོ་ཙམ་བྱུང་བར་གྱུར་ཏོ། །པདྨ་དེ་ལས་ཀྱང་འོད་ཟེར་བརྒྱ་སྟོང་བྱུང་སྟེ་སྣང་བ་ཆེན་པོར་གྱུར་ནས་སྣང་བ་དེས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཁྱབ་པར་གྱུར་ཏོ། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་པདྨ་དེ་ལ་འདུག་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་བློ་དེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་སངས་རྒྱས་ལ་ཕྱག་འཚལ་ལོ། །ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡུལ་འཁོར་སྐྱོང ། དེ་ནས་དེ་བཞིན་གཤེགས་པ་དོན་གྲུབ་བློ་དེས་འོད་དེ་བརྟུལ་བ་དང ། གཞོན་ནུ་དེ་སྡོང་བུ་བཅད་པ་སྒྱེལ་བ་བཞིན་དུ་དེ་བཞིན་གཤེགས་པའི་ཞབས་ཀྱི་དྲུང་དུ་བབས་ཏེ། དེ་བཞིན་གཤེགས་པ་དེ་ལ་ལན་བརྒྱ་སྟོང་དུ་ཕྱག་འཚལ་ལོ། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་ལ་ཚིགས་སུ་བཅད་དེ་གསོལ་པ། །བདག་ནི་རིང་ནས་ན་སྟེ་རིང་ནས་ལྡོངས། །ཆེགས་\?\་ཆེན་སྨན་པའི་རྒྱལ་པོ་ཁྱོད་རྙེད་དོ། །ཇི་ལྟར་བདེ་གཤེགས་བསྟན་ལ་གནས་ནས་ནི། །བདག་
498a
༄#། །གིས་ཐོབ་འགྱུར་མགོན་པོ་བསྟན་དུ་གསོལ། །འདྲེན་པ་བདག་གིས་བག་མཆིས་ཐོས་པ་ནི། །མཚན་མོ་བར་སྣང་ལྷ་ལས་ཐོས་ལགས་ཏེ། །ཐོས་ནས་སྐྱོ་སྟེ་བདག་ནི་འདིར་མཆིས་ན། །མི་རྣམས་བག་མཆིས་འགྱུར་བ་ཇི་ལྟ་བུ། །ལམ་མཉམ་པ་ལ་དེ་རིང་སྟོན་གྱུར་ཅིག་།ལྡོངས་པར་གྱུར་པའི་མིག་ཏུ་དེང་གྱུར་ཅིག་།དད་པའི་འབྱུང་གནས་གསོ་མཛད་ཐུགས་རྗེ་ལྡན། །གཡང་ས་ཆེན་པོ་འདི་ལས་བདག་ཕྱུང་ཞིང ། །དབུལ་པོར་གྱུར་པ་བདག་ནི་བསྡུ་བར་མཛོད། །མགོན་པོ་བཅིངས་པ་བདག་ནི་དེང་གྲོལ་མཛོད། །སོམ་ཉི་བཅས་པའི་ཡིད་གཉིས་གཅད་དུ་གསོལ། །བྱང་ཆུབ་ལམ་ལ་སྤྱོད་པ་བདག་ལུང་སྟོན། །ཆུས་ཁྱེར་བདག་ལ་འགྲམ་ནི་བསྟན་དུ་གསོལ། །མུན་པ་བདག་ལ་སྒྲོན་མ་མཛད་དུ་གསོལ། །རྨར་གྱུར་བདག་ལ་རྨ་མེད་མཛད་དུ་གསོལ། །སྨན་པའི་རྒྱལ་པོ་བདག་གི་ཟུག་རྔུ་ཕྱུང ། །ཁྱོད་ཀྱིས་ངན་འགྲོ་དག་ལས་བདག་ཐར་མཛོད། །སྲིད་པར་དམིགས་པ་འཛིན་པ་གཅད་དུ་གསོལ། །ཡན་ལག་བརྒྱད་པའི་ལམ་གྱི་ལམ་ཆེན་གྱིས། །མྱ་ངན་ཆུ་ཆེན་ཕ་རོལ་བསྒྲལ་དུ་གསོལ། །སྲོག་ནི་ཟད་པའི་ཆོས་ཅན་ཚེ་ཡང་ཐུང ། །དགེ་བ་བར་ཆད་མང་པོ་འབྱུང་བ་སྟེ། །བསོད་ནམས་རྣམ་སྨིན་རིང་པོར་མི་ཐོགས་འགྲུབ། །བདག་གིས་དལ་བ་གདོད་རྙེད་གཅིག་ངེས་གསུངས། །བྱང་ཆུབ་སེམས་དཔའ་ཇི་ལྟར་བག་མཆིས་འགྱུར། །ཇི་ལྟར་བྱང་ཆུབ་
498b
སྤྱོད་པ་མཆོག་སྤྱད་ན། །འགྲོ་བ་སྲིད་པའི་འཆིང་ལས་ཐར་འགྱུར་བ། །འཇིག་རྟེན་མགོན་པོ་དེ་དག་བདག་ལུང་སྟོན། ཡུལ་འཁོར་སྐྱོང ། དེ་ནས་དེ་བཞིན་གཤེགས་པ་དོན་གྲུབ་བློས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱི་ལྷག་པའི་བསམ་པ་མཁྱེན་ནས་བྱང་ཆུབ་སེམས་དཔའི་སྤྱོད་པ་རྒྱ་ཆེར་ཡང་དག་པར་བསྟན་ནོ། །རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་དེ་ཐོས་ནས་རྣམ་པར་ཐར་པ་ཞེས་བྱ་བའི་གཟུངས་ཐོབ་བོ། །མངོན་པར་ཤེས་པ་ལྔ་ཡང་ཐོབ་སྟེ། དེ་ནམ་མཁའ་ལ་གནས་ནས་མེ་ཏོག་རྣམས་མངོན་པར་སྤྲུལ་ཏེ། དེ་བཞིན་གཤེགས་པ་དེ་ལ་གཏོར། མངོན་པར་གཏོར་ཏོ། །ཡུལ་འཁོར་སྐྱོང ། དེ་ནས་རྒྱལ་པོ་གཞོན་ནུ་བསོད་ནམས་ཀྱི་འོད་ཟེར་བར་སྣང་དེ་ལས་བབས་ཏེ་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་དེ་ལ་ཚིགས་སུ་བཅད་དེ་མངོན་པར་བསྟོད་པ། མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཆེན་ཁྱོད་ལ་ཕྱག་འཚལ་ལོ། །རྒྱལ་བའི་དབུ་སྐྲ་འཇམ་མཛེས་སྣུམ་ཞིང་བཟང ། །ཁྱོད་ཀྱི་གཙུག་ཏོར་འདི་ནི་རི་རྒྱལ་བཞིན། ། གཙུག་ཏོར་མི་མཐོང་ཁྱོད་དང་མཚུངས་མ་མཆིས། །ཐུབ་པ་ཁྱོད་ནི་སྨིན་མཚམས་མཛོད་སྤུ་མཛེས། །ཀུན་ད་ཟླ་བ་ཁ་བ་དུང་ལྟར་དཀར། །ཐུགས་རྗེ་གང་གིས་འགྲོ་བ་འདི་
499a
༄#། །གཟིགས་པ། །སྤྱན་མཆོག་བཟང་པོ་ཨུཏྤལ་སྔོན་པོ་འདྲ། །རྒྱལ་བ་དྲི་མེད་སྤྱན་ལ་ཕྱག་འཚལ་ལོ། །ལྗགས་ཡངས་སྲབ་ལ་ཟངས་ཀྱི་མདོག་འདྲ་བ། །དེ་ཡིས་རང་གི་ཞལ་གྱི་གདོང་ཡང་ཁེབས། །ཆོས་གསུང་བས་ནི་འགྲོ་བ་འདུལ་བར་བགྱིད། །འཇམ་སྣུམ་གསུང་ལྡན་ཁྱོད་ལ་ཕྱག་འཚལ་ལོ། །ཚེམས་བཟང་ཤིན་ཏུ་བརྟན་པ་རྡོ་རྗེ་དང ། །བཅུ་དང་སུམ་ཅུ་སྙོམས་ཤིང་ཐགས་བཟང་བ། །འཛུམ་པ་མཛད་ནས་འགྲོ་བ་འདུལ་བར་བགྱིད། །བདེན་གཏམ་སྙན་པ་ཁྱོད་ལ་ཕྱག་འཚལ་ལོ། །རྒྱལ་བ་ཁྱོད་ཀྱི་གཟུགས་དང་མཚུངས་མ་མཆིས། །འོད་ཀྱིས་ཞིང་བརྒྱ་དག་ཀྱང་སྣང་བར་བགྱིད། །འཇིག་རྟེན་ན་ནི་ཚངས་དབང་སྐྱོང་དེ་དག་།བཅོམ་ལྡན་ཁྱོད་ཀྱི་འོད་ཀྱིས་ཟིལ་དུ་རླག་།ེ་ནའི་བྱིན་པ་མཉམ་མེད་བཅོམ་ལྡན་འདས། །གླང་པོའི་རྒྱལ་པོ་རྨ་བྱ་སེངྒེའི་སྟབས། །བཅོམ་ལྡན་གཉའ་ཤིང་གང་དུ་གཟིགས་ཤིང་གཤེགས། །ས་དང་རི་དང་དམ་པ་གཡོ་བར་མཛད། །བཅོམ་ལྡན་ཁྱོད་སྐུ་མཚན་གྱིས་བརྒྱན་པ་སྟེ། །ཁྱོད་ཀྱི་པགས་པ་འཇམ་ཞིང་གསེར་མདོག་འདྲ། །འགྲོ་བ་གཟུགས་འདི་བལྟ་བས་ངོམས་མི་འགྱུར། །ཁྱོད་ནི་མཚུངས་པ་མ་མཆིས་གཟུགས་དང་ལྡན། །ཁྱོད་སྔོན་བསྐལ་པ་བརྒྱར་ནི་དཀའ་ཐུབ་སྤྱད། །ཁྱོད་གཏོང་དུལ་དང་སྦྱིན་པ་ཀུན་ལ་དགྱེས། །སེམས་ཅན་
499b
ཀུན་ལ་ཐུགས་རྗེ་བྱམས་ཐུགས་ལྡན། །མཆོག་ཏུ་ཐུགས་རྗེ་ཅན་ལ་ཕྱག་འཚལ་ལོ། །ཁྱོད་ནི་སྦྱིན་དང་ཚུལ་ཁྲིམས་རྟག་ཏུ་དགྱེས། །ཁྱོད་ནི་བཟོད་དང་བརྩོན་འགྲུས་དགྱེས་རབ་བརྟན། ། ཁྱོད་ནི་བསམ་གཏན་ཤེས་རབ་འོད་གཟི་མངའ། །མཚུངས་མེད་ཡེ་ཤེས་མངའ་ལ་ཕྱག་འཚལ་ལོ། །ཁྱོད་ནི་སྨྲ་བ་ངན་པའི་ཚོགས་ཅན་འཇོམས། །ཁྱོད་ནི་སེངྒེ་ལྟ་བུར་འཁོར་དུ་སྒྲོག་།ཁྱོད་ནི་སྨན་པའི་རྒྱལ་པོ་དྲི་གསུམ་སེལ། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །ཐུབ་པ་སྐུ་གསུང་ཐུགས་ནི་རྣམ་པར་དག་།པདྨ་ཆུ་ལྟར་སྲིད་པ་གསུམ་མི་གོས། །ཁྱོད་ནི་ཚངས་དབྱངས་ཀ་ལ་པིངྐའི་སྐད། །སྲིད་གསུམ་ཕ་རོལ་གཤེགས་ལ་ཕྱག་འཚལ་ལོ། །ཁྱོད་ཀྱིས་འགྲོ་འདི་སྒྱུ་མ་ལྟ་བུ་དང ། །གར་ལ་ལྟ་དང་རྨི་ལམ་འདྲ་བ་དང ། །བདག་མེད་སེམས་ཅན་མེད་ཅིང་སྲོག་འགྲོ་མེད། །ཆོས་རྣམས་སྨིག་རྒྱུ་ཆུ་ཟླ་འདྲ་བར་མཁྱེན། །སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་ཏོ། །ཐུགས་རྗེ་ཐབས་ཚུལ་རིགས་པ་བརྒྱ་དག་གིས། །དེ་དག་རྣམས་ནི་འཛུད་པར་མཛད་པ་ལགས། །འདོད་ཆགས་ལ་སོགས་ནད་མང་བརྒྱ་དག་གིས། །སྐྲག་པར་གྱུར་པའི་འགྲོ་ལ་རྟག་གཟིགས་ཏེ། །བདེར་གཤེགས་སེམས་ཅན་བརྒྱ་དག་ཡོངས་འགྲེལ་ཅིང ། །བླ་མེད་སྨན་པ་ལྟ་བུར་རྣམ་པར་རྒྱུ། །སྐྱེ་དང་རྒ་དང་འཆི་དང་མྱ་ངན་ནོན། །སྡུག་དང་བྲལ་དང་སྨྲེ་སྔགས་འདོན་པ་བརྒྱས། །རྟག་ཏུ་ན་བའི་སྡུག་
500a
༄#། །བསྔལ་གཟིགས་པས་ནི། །ཐུབ་པ་ཐུགས་རྗེས་ཡོངས་སུ་འགྲེལ་ཅིང་རྒྱུ། །དུད་འགྲོ་ཡིད་དྭགས་དམྱལ་བའི་འགྲོ་རྣམས་སུ། །འགྲོ་ཀུན་ཤིང་རྟའི་འཕང་ལོ་བཞིན་དུ་འཁོར། །གླེན་པ་དམིགས་བུ་མ་མཆིས་མགོན་མ་མཆིས། །དེ་ལ་ལམ་གྱི་དམ་པ་སྟོན་པར་མཛད། །གཙོ་བོ་མཚུངས་པ་མེད་པས་གང་བསྟན་པ། ། འཕགས་ལམ་དེ་ཉིད་གང་དག་སྔོན་ཆད་ཀྱི། །ཆོས་ཀྱི་དབང་ཕྱུག་འགྲོ་བའི་དོན་མཛད་པ། །རྒྱལ་བ་དེ་དག་རྣམས་ཀྱིས་རབ་ཏུ་གསུངས། །འཇམ་ཞིང་མཉེན་ལ་ཡིད་དུ་འོང་བའི་མཆོག་།ཚངས་ལས་ལྷག་པར་མཆོག་ཏུ་དགའ་བགྱིད་པ། །དྲི་ཟ་མི་ཅི་ལྷ་ཡི་བུ་མོ་མཆོག་།སྒྲ་དེ་ཟིལ་གྱིས་མནན་ནས་གསུངས་པ་མཛད། །བདེན་དང་དྲང་བ་མི་ཟད་ཐབས་ཚུལ་གྱིས། །ཡོངས་སྦྱངས་ཡོན་ཏན་མཐའ་ཡས་ལྡན་པའི་གསུང ། །དེ་ཐོས་སེམས་ཅན་ཁྲག་ཁྲིག་ཕྲག་བརྒྱ་དག་།ཐེག་པ་གསུམ་གྱིས་ཞི་བར་མཆི་བར་བགྱིད། །ཁྱོད་ལ་མཆོད་པས་ལྷ་ཡི་བདེ་བ་ནི། །རྣམ་པ་མང་དང་དེ་བཞིན་མི་ཡི་ཐོབ། །མི་ཡི་བདག་པོ་འགྲོ་ལ་ཕན་བགྱིད་པ། །ཕྱུག་ཅིང་ནོར་ཆེ་འབྱོར་པ་ཆེན་པོར་འགྱུར། །མཚུངས་མེད་ཁྱོད་ལ་དད་པ་བསྐྱེད་པ་ནི། །གླིང་བཞིའི་བདག་པོ་འཁོར་ལོས་བསྒྱུར་བ་མཆོག་།འགྲོ་ལ་དགེ་བ་བཅུ་པོ་ཀུན་བྱེད་པ། །རིན་ཆེན་རབ་བཟང་བདུན་ལྡན་ཐོབ་པར་འགྱུར། །རྒྱལ་
500b
བ་ཁྱོད་ལ་མཆོད་པ་བགྱིས་པས་ནི། །ཚངས་པ་བརྒྱ་བྱིན་འཇིག་རྟེན་བདག་པོ་དང ། །ཡོངས་སུ་དགའ་ལྡན་ལྷ་ཡི་བདག་པོ་དང ། །གཞན་འཕྲུལ་བ་དང་འཐབ་བྲལ་རབ་དགར་འགྱུར།། འགྲོ་བའི་སྡུག་བསྔལ་རྣམ་མང་སེལ་མཛད་པ། །མཉམ་མེད་ཁྱོད་ལ་མཆོད་དང་མཐོང་བ་དང ། །ཐོས་པའང་དེ་ལྟར་འབྲས་བུ་མཆིས་ལགས་ཏེ། །གནས་མཆོག་རྒ་ཤི་མེད་པ་འཐོབ་པར་འགྱུར། །བཅོམ་ལྡན་ལམ་ལ་མཁས་ཤིང་ལམ་མཁྱེན་པ། །འཇིག་རྟེན་འདི་ནི་ངན་པའི་ལམ་ལས་བཟློག་།བཅོམ་ལྡན་འགྲོ་བ་དག་ནི་འཕགས་པའི་ལམ། ། བདེ་བ་ཞི་བ་རྡུལ་དང་བྲལ་ལ་འགོད། །བསོད་ནམས་གཏེར་ཁྱོད་བསོད་ནམས་དོན་གཉེར་བའི། །བསོད་ནམས་བགྱིད་པ་རྟག་ཏུ་མི་བས་ཏེ། །བྱང་ཆུབ་དམ་པ་མ་ཐོབ་བར་དུ་ནི། །བསྐལ་པ་བྱེ་བ་མང་པོ་བས་མི་འགྱུར། །གཞན་འཕྲུལ་འདྲ་བ་རྟག་ཏུ་དགའ་བགྱིད་པ། །ཡོངས་སུ་དག་ཅིང་མཛེས་པ་ཐོབ་པར་འགྱུར། །དམ་པའི་ཞིང་དུ་ལུས་དང་ངག་ཡིད་ཀྱིས། །སེམས་ཅན་དག་ནི་རྣམ་པར་དག་པར་འགྱུར། །རྒྱལ་བ་མཆོད་པའི་མི་ཡིས་འདི་ལ་སོགས། །ཡོན་ཏན་རྣམ་པ་དུ་མ་ཐོབ་པར་འགྱུར། །མཐོ་རིས་ཐར་པ་མི་ཡི་བདེ་བ་དང ། །འགྲོ་བ་ཀུན་གྱི་བསོད་ནམས་གཏེར་ཐོབ་འགྱུར། །ཁྱོད་ཀྱི་བརྗོད་དང་གྲགས་པ་རྒྱ་ཆེན་པོ། །ཕྱོགས་རྣམས་ཀུན་གྱི་ཞིང་མང་བརྒྱར་ཡང་མཆིས། །རྒྱལ་བ་ཁྱོད་ཀྱི་བསྔགས་
501a
༄#། །པའི་ཕྲེང་བ་ནི། །བདེ་བར་གཤེགས་རྣམས་འཁོར་དུ་རྟག་པར་སྒྲོག་།རིམས་ནད་བྲལ་ཞིང་འགྲོ་བ་ཐར་མཛད་པ། །མཐོང་ན་དགའ་བ་ཐུགས་རྗེ་མཆོག་ལྡན་པ། །བཅོམ་ལྡན་དབང་པོ་ཞི་བ་ཞི་བགྱིད་པ། །མི་མཆོག་དམ་པ་ཁྱོད་ལ་ཕྱག་འཚལ་ལོ། །བདག་གིས་རྒྱལ་བ་ཁྱོད་ཀྱི་གསུང་ཐོས་ནས། །མངོན་པར་ཤེས་པ་ལྔ་ཐོབ་མཁའ་ལ་གནས། །དཔའ་བོ་བདེ་གཤེགས་མཚུངས་པར་བདག་གྱུར་ཏེ། །དྲི་མེད་ཆོས་ནི་འགྲོ་ལ་རྣམ་པར་འབྱེད། །ལྷ་དང་མི་དང་ཀླུས་མཆོད་བདེ་བར་གཤེགས། །ཡོན་ཏན་ཀུན་གྱི་མཐར་ཕྱིན་དེང་བསྟོད་པས། །བསོད་ནམས་རྒྱ་ཆེན་གང་བསྒྲུབས་གྱུར་པ་དེས། །འགྲོ་བ་སངས་རྒྱས་གོ་འཕང་ཐོབ་པར་ཤོག་།ཡུལ་འཁོར་སྐྱོང ། དེ་ནས་མཚན་མོ་དེའི་ནམ་ནངས་པ་དང ། རྒྱལ་པོ་འོད་ཟེར་ལྡན་གྱིས་གཞོན་ནུའི་བུད་མེད་ཀྱི་ཁོར་དུ་བའི་སྒྲ་ཐོས་སོ། །ཐོས་ནས་ཀྱང་མྱུར་བ་མྱུར་བར་རིངས་པའི་གཟུགས་ཀྱིས་གྲོང་ཁྱེར་དགའ་མཆོག་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་ངུ ། དེ་དག་གིས་སྨྲས་པ། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་མི་གདའ་བའི་སླད་དུའོ། །ཡུལ་འཁོར་སྐྱོང ། དེ་ནས་རྒྱལ་པོ་འོད་ཟེར་ལྡན་གཞོན་ནུའི་ཕྱིར་ཤིང་བཅད་པ་བསྒྱེལ་བ་ལྟར་ས་ལ་འགྱེལ་ཏེ་ལངས་ནས་ངུ་
501b
ཞིང་གྲོང་ཁྱེར་དེར་ལན་སྟོང་དུ་ཡོངས་སུ་བཙལ་ལོ། །ཡུལ་འཁོར་སྐྱོང ། དེ་ནས་གྲོང་ཁྱེར་དེ་ན་གྲོང་ཁྱེར་གྱི་ལྷ་གང་ཡིན་པ་དེས་རྒྱལ་པོ་འོད་ཟེར་ལྡན་ལ་འདི་སྐད་ཅེས་སྨྲས་སོ། ། རྒྱལ་པོ་ཆེན་པོ། གཞོན་ནུ་ནི། དེ་བཞིན་གཤེགས་པ་དོན་གྲུབ་བློ་ལ་བལྟ་བ་དང ། ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་བའི་ཕྱིར་ཤར་ཕྱོགས་ལོགས་སུ་སོང་ངོ ། ། ཡུལ་འཁོར་སྐྱོང ། དེ་ནས་རྒྱལ་པོ་འོད་ཟེར་ལྡན་གཞོན་ནུ་བཙལ་བའི་ཕྱིར་བཙུན་མོའི་འཁོར་དང ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་དང་ལྷན་ཅིག་ཏུ་ཤར་གྱི་ཕྱོགས་ཆ་ག་ལ་བ་དེར་སོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་བློ་ག་ལ་བ་དེར་སོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཀྱང་རྒྱལ་པོ་འོད་ཟེར་ལྡན་གྱིས་བཅོམ་ལྡན་འདས་ལ་ཚིགས་སུ་བཅད་པས་མངོན་པར་བསྟོད་པ། སྲིད་གསུམ་ཁྱོད་མཚུངས་མ་མཆིས་ལྷག་པ་ག་ལ་མཆིས། །སེམས་ཅན་དམ་པ་ལྷ་དབང་ལྷ་མིན་རྒྱལ་པོས་བཀུར། །སྐྱེ་བོ་ཁྱོད་ཀྱི་གཟུགས་ལ་བལྟ་བས་ངོམས་མི་འགྱུར། །ཡོན་ཏན་ཡེ་ཤེས་རྒྱ་མཚོ་དཔའ་ལ་ཕྱག་འཚལ་ལོ། །རྒྱལ་བ་ཁྱོད་སྐུ་སུམ་ཅུ་རྩ་གཉིས་མཚན་རབ་དག་།ལྷུན་པོ་རིན་ཆེན་མཆོག་
502a
༄#། །གིས་སྤྲས་ལྟར་ཡོངས་སུ་དག་།རྒྱལ་བ་སྡུག་ཅིང་འཇམ་པ་གསེར་གྱི་ཁ་དོག་འདྲ། །བལྟ་སྡུག་གཟུགས་མངའ་ཐུབ་པའི་སྐུ་ལ་ཕྱག་འཚལ་ལོ། །བསྐལ་པ་བྱེ་བརྒྱ་བསམ་གྱིས་མི་ཁྱབ་བརྟུལ་ཞུགས་སྤྱད། །བསྐལ་པ་བྱེ་བ་བརྒྱ་མང་སངས་རྒྱས་བསྟི་སྟང་མཛད། །སྔོན་ཆད་མཆོད་སྦྱིན་བརྒྱ་ཕྲག་བསམ་གྱིས་མི་ཁྱབ་མཛད། །དེས་ན་ཁྱོད་སྐུ་བཟང་ཞིང་ཤིན་ཏུ་མཛེས་པ་ལགས། །སྦྱིན་དང་ཚུལ་ཁྲིམས་ཏིང་ངེ་འཛིན་དང་ཤེས་རབ་དང ། །བཟོད་དང་བརྩོན་འགྲུས་བསམ་གཏན་ཐབས་ཀྱིས་ཁྱོད་གཟུགས་སྦྱངས། །ཁྱོད་ཀྱི་སྤྱན་སྔར་བརྒྱ་བྱིན་ཚངས་འོད་གསལ་མ་ལགས། །ཆུ་ཤེལ་ནོར་བུ་གློག་གི་འོད་ཀྱང་མཛེས་མ་ལགས། །འགྲོ་བའི་དོན་དུ་ཡིད་དུ་མཆི་བའི་གཟུགས་ཀྱང་སྟོན། །ཆུ་ཟླ་འདྲ་ཞིང་སྒྱུ་མ་འདྲ་བར་གདའ་བ་ལགས། །རང་གི་ཕྱོགས་རྣམས་ཀུན་ཏུ་རྒྱལ་བའི་སྐུ་ཡང་གདའ། །བདེར་གཤེགས་རྣམས་ཀྱི་སྐུ་ཡི་ཚད་ནི་གདའ་མ་ལགས། །ཁྱོད་ནི་དགའ་ལྡན་འགའ་ཞིག་ན་ཡང་བཞུགས་པར་གདའ། །འཆི་འཕོ་མཛད་ཅིང་རབ་དགའ་གླང་པོར་གྱུར་ནས་ནི། །དཔའ་བོ་ཡུམ་གྱི་ལྷུམས་སུ་གཤེགས་པར་གདའ་བར་མཛད། །ཐུབ་ཆེན་ནམ་མཁའ་ལྟ་བུར་ཐམས་ཅད་རྗེས་སུ་ཞུགས། །བཅོམ་ལྡན་ཕྱོགས་འགར་བལྟམས་པར་སྟོན་པའང་མཛད་པ་སྟེ། །ས་
502b
དགའ་དག་ཏུ་གོམ་པ་བདུན་པོར་གདའ་བ་མཛད། །ང་ནི་ལྷ་མིར་བཅས་འགྲོ་ནང་གཙོ་ཤིན་ཏུ་ལྟ། །འགྲོ་བ་སྡུག་བསྔལ་མཚོ་ལས་གདོན་ཞེས་གསུང་ཡང་ཕྱུང ། །ཐུབ་ཁྱོད་ཆོས་གང་ལ་ཡང་ཐེ་ཚོམ་མི་མངའ་ཡང ། །ཡི་གེ་ཤེས་པ་སློབ་ལྟར་འཇིག་རྟེན་དག་ན་གདའ། །བསམ་གཏན་ཏིང་འཛིན་སྤྱོད་ཡུལ་ཞི་བ་བརྙེས་གྱུར་ཀྱང ། །ཁ་ཅིག་ཏུ་ནི་བུད་མེད་ནང་ན་ཞུགས་པར་གདའ། །ཡབ་དང་ཡུམ་དང་སྲས་དང་བུད་མེད་རྣམས་ཀྱང་བཏང ། །གཉེན་རྣམས་མྱ་ངན་ནོན་ཏེ་རྣམ་པར་བརྒྱལ་ཞིང་ངུ ། །སེམས་ཅན་དམ་པ་བྱེ་བ་བརྒྱ་ཡིས་ཡོངས་བསྐོར་ནས། །ནགས་གནས་གནས་གཅིག་པུ་ནས་འབྱུང་བར་གདའ་བའང་མཛད། །ཁྱོད་ནི་བདུད་བཞི་ཕམ་པར་མཛད་ནས་ཡུན་རིང་ཡང ། །ཞིང་ན་བདུད་འདུལ་བ་ཡང་གདའ་བ་སྟོན་པ་མཛད། །སྔོན་ཆད་འཁོར་ལོ་བསམ་གྱིས་མི་ཁྱབ་བསྐོར་གྱུར་ཀྱང ། །ཁྱོད་ནི་ཐུགས་རྗེས་འཁོར་ལོ་བསྐོར་བར་གདའ་བ་མཛད། །རྟག་ཏུ་རྟག་ལྟ་འདུ་ཤེས་ལྡན་པའི་འགྲོ་གཟིགས་ནས། །མྱ་ངན་འདའ་ཞེས་འཁོར་གྱི་ནང་དུ་ཚིག་ཏུ་གསུངས། །རྟག་ཏུ་འཁོར་བར་དགའ་བའི་འགྲོ་བ་གཟིགས་ནས་ནི། །ཁྱོད་ནི་ཞི་བ་བསིལ་གྱུར་མྱ་ངན་འདས་པ་གསུང ། །ཁྱོད་ཀྱི་བསོད་ནམས་ཡེ་ཤེས་ཤེས་རབ་ཐབས་མཚུངས་མེད། །ཐུབ་པ་ཁྱོད་སྐུ་འོད་ཀྱིས་ཞིང་མང་རྒྱས་པར་འགེངས། །ཕྱོགས་རྣམས་དག་ན་འདྲེན་པ་
503a
༄#། །ཁྱོད་ཀྱི་བསྔགས་པ་གསུང ། །ཀུན་ཏུ་སྤྱོད་ཡུལ་ཐུབ་པའི་རྒྱལ་ལ་ཕྱག་འཚལ་ལོ། །ཆོས་ཉིད་མ་ལུས་བརྙེས་པར་གྱུར་ལ་ཕྱག་འཚལ་ལོ། །སེམས་ཅན་ཀུན་གྱི་བགྱི་བ་སྒྱུ་མ་ལྟར་གདའ་ཡང ། །ཐུབ་པ་ཁྱོད་ནི་གང་དུ་བཞུད་པའམ་བྱོན་མ་ལགས། །སྒྱུ་མའི་ཆོས་ཚུལ་གནས་ལ་མངོན་པར་ཕྱག་འཚལ་ལོ། །འགྲོ་བའི་དོན་དུ་གང་གིས་བྱང་ཆུབ་མཆོག་ཐོབ་པ། །ལམ་མཆོག་མི་ཡི་དཔའ་བོ་ཁྱོད་ཀྱིས་ལེགས་གསུངས་པ། །བདག་གིས་ཆོས་ཉིད་འདི་ནི་མྱུར་དུ་སངས་རྒྱས་ནས། །མི་དཔའ་འགྲོ་བའི་དོན་དུ་ཆོས་ཉིད་བཤད་པར་བགྱི། །མི་ཡི་དཔའ་བོ་ཐུབ་པ་ཀུན་མཁྱེན་རིམས་བྲལ་བ། །སྲིད་གསུམ་མཚུངས་པ་མ་མཆིས་ལྷག་པ་ག་ལ་ཞིག་།བདག་གིས་འདིར་བསྟོད་བསོད་ནམས་མཐའ་ཡས་གང་བསྒྲུབས་དེས། །འཇིག་རྟེན་བྱང་ཆུབ་བླ་མེད་ཞི་མཆོག་ཐོབ་པར་ཤོག་།ཡུལ་འཁོར་སྐྱོང ། དེ་ནས་དེ་བཞིན་གཤེགས་པ་དོན་གྲུབ་བློ་དེས་རྒྱལ་པོ་འོད་ཟེར་ལྡན་དེའི་ལྷག་པའི་བསམ་པ་མཁྱེན་ནས་ཅི་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟར་ཆོས་བསྟན་ཏོ། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་དེ་ལ་
503b
འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་གྲོང་ཁྱེར་དུ་གདུགས་ཚོད་གསོལ་བར་གནང་བར་མཛད་དུ་གསོལ། །བཅོམ་ལྡན་འདས་ཀྱིས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཐུགས་བརྩེ་བར་དགོངས་ཏེ་ཅང་མི་གསུང་བར་གྱུར་པས་གནང་ངོ ། །ཡུལ་འཁོར་སྐྱོང ། དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་ཕ་མ་དེ་གཉིས་དང ། གྲོགས་པོ་དེ་དག་དང ། བུད་མེད་དེ་དག་ལ་སྨྲས་པ། ཁྱེད་ཅག་ཐམས་ཅད་རྗེས་སུ་ཡི་རང་བར་གྱིས་ཤིག་།ཅི་ནས་གྲོང་ཁྱེར་དགའ་མཆོག་བརྒྱན་ཏེ་མ་ཆགས་པར་དེ་བཞིན་གཤེགས་པ་ལ་དབུལ་དུ་རུང་བར་གྱིས་ཤིག་།དེ་དག་གིས་སྒྲ་སྐད་གཅིག་ཏུ་རྗེས་སུ་ཡི་རང་ངོ ། །ཡུལ་འཁོར་སྐྱོང ། དེ་ནས་རྒྱལ་པོ་གཞོན་ནུ་བསོད་ནམས་ཀྱི་འོད་ཟེར་གྱིས་ཅི་ནས་གྲོང་ཁྱེར་དགའ་མཆོག་བརྒྱན་ཏེ་མ་ཆགས་པར་དེ་བཞིན་གཤེགས་པ་ལ་ཕུལ་ལོ། །རོ་བྲོ་བ་བཀོད་པ་ལྔ་བརྒྱ་པའི་ཞལ་ཟས་ཀྱང་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་དེ་ལ་གསོལ་ཏོ། །དགེ་སློང་དེ་དག་ཐམས་ཅད་ཀྱི་ཕྱིར་རིན་པོ་ཆེ་སྣ་བདུན་གྱིས་གཡོགས་པའི་གཙུག་ལག་ཁང་ནོར་བུའི་འཆགས་བཤམས་པ། སྟེང་དུ་རིན་པོ་ཆེའི་དྲ་བས་བླ་རེ་བྲེས་པ། གཡས་གཡོན་དུ་མེ་ཏོག་གི་ཤིང་ལྗོན་པ་ལེགས་པར་ཡོངས་སུ་གྲུབ་པར་བྱས་པ། མེ་ཏོག་
504a
༄#། །པདྨ་དཀར་པོའི་རྫིང་གིས་མཛེས་པར་བྱས་པ། རས་བཅོས་བུ་མུ་གཉིས་དྲི་མ་མེད་པ་བརྒྱ་སྟོང་བཏིང་བའི་མལ་བཤམས་པ། དགེ་སློང་རེ་རེ་ལ་གོས་ཁ་ན་མ་ཐོ་བ་མེད་པ་གང་སྤྱིན་པ་དེ། ཕྱི་དེ་ཉིན་མི་སྦྱིན་གྱི། ཉིན་གཅིག་བཞིན་གོས་གཞན་དང ། གཞན་སྦྱིན་པར་འགྱུར་བར་བྱས་སོ། །དེ་ལོ་བྱེ་བ་ཕྲག་གསུམ་གྱི་བར་དུ་རྨུགས་པ་དང་གཉིད་ཀྱིས་ནོན་པར་མ་གྱུར། བདག་ལ་དགའ་བ་མ་བྱས། སངས་རྒྱས་ལ་མཆོད་པའི་ཕྱིར་གཞན་ཡིད་ལ་མ་བྱས་སོ། །བར་སྐབས་དེར་འདོད་པ་ལ་རྣམ་པར་རྟོག་པ་དང ། གནོད་སེམས་ཀྱི་རྣམ་པར་རྟོག་པ་དང ། འཚེ་བའི་རྣམ་པར་རྟོག་པས་རྣམ་པར་རྟོག་པར་མ་གྱུར། རྒྱལ་སྲིད་ལ་སྲེད་པར་མ་གྱུར་ཏེ། ལུས་དང་སྲོག་ལ་ཡང་མི་ལྟ་ན། དངོས་པོ་གཞན་ལ་ལྟ་སྨོས་ཀྱང་ཅི་དགོས། བར་སྐབས་དེར་བཅོམ་ལྡན་འདས་ཀྱིས་གང་གསུངས་པ་དེ་ཐམས་ཅད་ཀུན་ཏུ་བཟུང་སྟེ། དེ་བཞིན་གཤེགས་པ་ལ་ལན་གཉིས་སུ་མ་ཞུས་སོ། །བར་སྐབས་དེར་ཁྲུས་མ་བྱས། མར་དང་འབྲུ་མར་གྱིས་ལུས་ལ་མ་བསྐུས། རྐང་པ་མ་བཀྲུས། ངལ་བའི་འདུ་ཤེས་མ་བསྐྱེད་དོ། །ཟན་ཟ་བ་དང ། བཤང་གཅི་བྱེད་པ་མ་གཏོགས་པར་ནམ་ཡང་འདུག་པར་མ་གྱུར་ཏོ། །གང་གི་ཚེ་དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་
504b
པ་དེའི་ཚེ་ཙནྡན་དམར་པོའི་ཞུགས་ལ་བཞེན་པ་བྱས་སོ། །གང་དུ་དེ་བཞིན་གཤེགས་པ་དེ་ཞུགས་ལ་བཞེན་པའི་ས་ཕྱོགས་དེ་ཉིད་དུ་འཛམ་བུའི་གླིང་ཐམས་ཅད་པའི་མེ་ཏོག་ཐམས་ཅད་དང ། ཕྲེང་བ་ཐམས་ཅད་དང ། སྤོས་ཐམས་ཅད་དང ། རོལ་མོའི་སྒྲ་ཐམས་ཅད་ཀྱིས་ལོ་བརྒྱ་སྟོང་དུ་རིང་བསྲེལ་ལ་མཆོད་པ་བྱས་པར་གྱུར་བ་ནས་རྒྱུ་རྐྱེན་ཐམས་ཅད་བསགས་ཏེ་ཕྱིས་མཆོད་རྟེན་བྱེ་བ་ཕྲག་བརྒྱད་ཅུ་རྩ་བཞིའི་བར་དུ་བྱས་སོ། །མཆོད་རྟེན་དེ་དག་ལ་ཡང་རིན་པོ་ཆེ་སྣ་བདུན་གྱི་རིན་པོ་ཆེའི་དྲ་བས་གཡོགས་སོ། །མུ་ཏིག་གི་དྲ་བའི་བླ་རེ་དག་བྲེས་སོ། །མཆོད་རྟེན་རེ་རེ་ལ་ཡང་རིན་པོ་ཆེ་སྣ་བདུན་གྱི་གདུགས་ལྔ་བརྒྱ་ལྔ་བརྒྱ་ཕུལ་ལོ། །མཆོད་རྟེན་དེ་དག་ཐམས་ཅད་ལ་ཡང་སིལ་སྙན་བརྒྱ་སྟོང་ཕུལ་ལོ། །འཛམ་བུའི་གླིང་ཁོར་ཡུག་ཏུ་མེ་ཏོག་གི་ཤིང་ལྗོན་པ་བསྐྲུན་ཏོ། །མཆོད་རྟེན་རེ་རེ་ལ་ཡང་མར་མེའི་རྫ་བོ་བརྒྱ་སྟོང་ལས་མར་མེ་བུས་སོ། །མར་མེའི་རྫ་བོ་རེ་རེ་ནས་ཀྱང་སྤོས་ཀྱི་འབྲུ་མར་དྲུག་ཅུ་རྩ་བཞི་པ་སྟོང་གི་མར་མེ་བུས་སོ། །སྤོས་དང ། ཕྲེང་བ་དང ། བྱུག་པ་ཐམས་ཅད་ཀྱིས་ཀྱང་མཆོད་པ་བྱས་སོ། །ཚུལ་དེ་ལྟ་བུས་ལོ་བྱེ་བའི་བར་དུ་མཆོད་པ་བྱས་ཏེ། ཕྱིས་རབ་ཏུ་བྱུང་ངོ ། །དེ་རབ་ཏུ་བྱུང་ནས་ཀྱང་ཆོས་གོས་གསུམ་པར་གྱུར་ཅིང་རྟག་ཏུ་བསོད་སྙོམས་སྦྱིན་པ་དང ། རྟག་ཏུ་ཙོག་བུ་པ་སྟེ། ནམ་ཡང་གློས་མ་ཕབ་བོ། །ནམ་ཡང་
505a
༄#། །རྨུགས་པ་དང་གཉིད་ཀྱིས་ནོན་པར་མ་གྱུར་ཏོ། །དེ་ཟང་ཟིང་མེད་པའི་སེམས་ཀྱིས་ལོ་བྱེ་བ་ཕྲག་བཞིའི་བར་དུ་ཆོས་ཀྱི་སྦྱིན་པ་བྱིན་ཏེ། དེ་གཞན་ལ་ཐ་ན་ལེགས་སོ། །ཞེས་བྱ་བ་ཙམ་ལ་ཡང་རེ་བར་མ་གྱུར་ན། རྙེད་པ་དང་བཀུར་སྟི་ལྟ་སྨོས་ཀྱང་ཅི་དགོས། དེ་ཆོས་ཉན་པའམ་ཆོས་བཤད་པས་ཀྱང་ངལ་བར་མ་གྱུར་ཏོ། ། དེ་ལ་ལྷ་རྣམས་ཀྱང་བསྙེན་བཀུར་བྱེད་དོ། །ཡུལ་འཁོར་གྱི་མི་ཐམས་ཅད་དང ། བཙུན་མོའི་འཁོར་དང ། ནང་མི་ཐམས་ཅད་དང ། གྲོགས་པོ་ཐམས་ཅད་ཀྱང་དེའི་རྗེས་སུ་བསླབ་སྟེ་རབ་ཏུ་བྱུང་ངོ ། །ཡུལ་འཁོར་སྐྱོང ། དེ་ནས་གནས་གཙང་མའི་རིས་ཀྱི་ལྷའི་བུ་རྣམས་འདི་སྙམ་དུ་སེམས་ཏེ། བསོད་ནམས་ཀྱི་འོད་ཟེར་གྱི་རྗེས་སུ་སློབ་པའི་ཡུལ་གྱི་མི་ཐམས་ཅད་རབ་ཏུ་བྱུང་གི་།བདག་ཅག་གིས་དེ་ལ་རིམ་གྲོ་དང་བསྙེན་བཀུར་བྱས་ན། དཀོན་མཆོག་གསུམ་ལ་རིམ་གྲོ་བྱས་པར་འགྱུར་རོ། །སྙམ་མོ། དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ལོ་བྱེ་བ་ཕྲག་དྲུག་ཅུ་རྩ་བཞིའི་བར་དུ་གནས་ཏེ། དགེ་སློང་བསོད་ནམས་ཀྱི་འོད་ཟེར་གྱིས་ཐམས་ཅད་ཡོངས་སུ་བཟུང་ངོ ། །ཚུལ་འདི་ལྟ་བུས་སངས་རྒྱས་བྱེ་བ་ཁྲག་ཁྲིག་སྟོང་ཕྲག་དགུ་བཅུ་རྩ་བཞི་ལ་རྣམ་པ་དེ་ལྟ་བུའི་མཆོད་པ་བྱས་སོ། །ཡུལ་འཁོར་སྐྱོང །
505b
དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དེ་ལྟར་དོགས་ཤིང་ཐེ་ཚོམ་ཟའམ་ཡིད་གཉིས་སུ་གྱུར་ན། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འོད་དཔག་མེད་དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བར་གྱུར་ཏོ། །ཡུལ་འཁོར་སྐྱོང ། དེའི་ཚེ་དེའི་དུས་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་དེ་ལྟར་དོགས་ཤིང་ཐེ་ཚོམ་ཟའམ་ཡིད་གཉིས་སུ་གྱུར་ན། ཁྱོད་ཀྱིས་དེ་ལྟར་མི་བལྟའོ།། དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཞེས་བྱ་བར་གྱུར་ཏོ། །གྲོང་ཁྱེར་གྱི་ལྷ་གང་ཡིན་པ་དེ་ནི། དེ་བཞིན་གཤེགས་པ་མི་འཁྲུགས་པར་གྱུར་ཏོ། །ཡུལ་འཁོར་སྐྱོང ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་འདོད་པས་ལྷག་པའི་བསམ་པས་བསྒྲུབས་པ་དང ། སྡུག་པ་དང་མི་སྡུག་པ་ཡོངས་སུ་སྤངས་པ་དང ། བག་ཡོད་པའི་སྤྱོད་པས་རྒྱལ་བུ་བསོད་ནམས་ཀྱི་འོད་ཟེར་དེའི་རྗེས་སུ་བསླབ་པར་བྱའོ། །ངས་བྱ་དཀའ་བ་མངོན་པར་འདུ་བྱ་བ་དེ་ལྟ་བུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ། །དེ་ལྟ་བས་ན། དེ་དག་མི་
506a
༄#། །བརྩོན་པ་དང ། རྙེད་པ་དང ། བཀུར་སྟི་དང ། ཚིགས་སུ་བཅད་པ་ལྷུར་ལེན་པ་དང ། ཤེས་ཀྱི་ཁེ་ལ་ཆགས་པ་དང ། ང་རྒྱལ་གྱིས་བཅོམ་པ་དང ། འདོད་པའི་རྒྱུས་ཉོན་མོངས་ཤིང་ཤ་ཐང་པ་དང ། འདོད་པའི་རྒྱུས་བསྟན་པ་ལས་རིང་དུ་གྱུར་པ་དང ། རབ་ཏུ་བྱུང་བ་དོན་མེད་པ་དང ། དགེ་སྦྱོང་སུན་པར་བྱེད་པ་དང ། བྱང་ཆུབ་སེམས་དཔའ་དམུ་རྒོད་དང ། ལུས་དང ། ངག་དང ། སེམས་མི་དྲང་བ་དང ། ལྟས་ལྟ་བ་དང ། ཁས་འཆེ་བ་ནོར་བ་དང ། རང་གི་དམ་བཅས་པ་ལས་ཉམས་པ་དང ། གོས་དང ། ཟས་དང ། མལ་ཆ་དང ། ན་བའི་ཆེད་ཀྱི་སྨན་དང ། ཡོ་བྱད་ཀྱི་མཚན་མ་ལ་ཆགས་པ་དང ། ངོ་ཚ་མི་ཤེས་པ་དང ། ཁྲེལ་མེད་པ་དང ། ཆོ་ག་ཉམས་པ་དང ། དམ་པའི་ཆོས་མ་ཡིན་པ་ལ་འཇུག་པ་དང ། སྤྱོད་ཡུལ་དང་བྲལ་བ་དང ། སངས་རྒྱས་ཀྱི་སྤྱོད་ཡུལ་ལས་རིང་དུ་གྱུར་པ་དང ། སངས་རྒྱས་ཀྱི་ཐེག་པ་དང་བྲལ་བ་དང ། རྫོགས་པའི་བྱང་ཆུབ་ཀྱི་སེམས་དང་བྲལ་བར་གྱུར་ཏོ། །ཡུལ་འཁོར་སྐྱོང ། དེ་ལྟ་བས་ན། རྣམ་པ་འདི་ལྟ་བུའི་ཆོས་འདི་ཐོས་ནས་སྡིག་པའི་བཤེས་གཉེན་རིགས་པ་མེད་པ་རྙེད་པ་དོན་དུ་གཉེར་བ་དང་མི་བསྟེན་པར་ཤེས་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྟོབས་བཅུ་མངའ་བའི་སྤྱོད་
506b
པ་དཔག་མེད་ན། སྙིང་ནི་ཐོབ་དང་ཤེས་ཀྱི་ཁེ་ལ་སོང ། །བྱང་ཆུབ་ཡོན་ཏན་བརྒྱས་ཁེབས་པོར་ནས་ནི། །དེ་དག་ཐོབ་ཕྱིར་གཞན་གྱི་ཁྱིམ་ལ་དགའ། །ཁཝ་འདྲ་སྡང་བ་ཁྲེལ་དང་མོས་བློ་བྲལ། །ཤེས་ཀྱི་ཁེ་ཕྱིར་བདུད་ཀྱི་དབང་དུ་སོང ། །ཉོན་མོངས་རག་ལུས་སྲིད་པའི་འགྲོ་བར་གཞོལ། །བདག་འདིར་ཡོན་ཏན་ལྡན་ཞེས་དེ་སྐད་སྨྲ། །ལུས་ནི་དགོན་ན་དྲན་པ་གྲོང་ཁྱེར་དུ། །ཐོབ་ཕྱིར་དེ་དག་རྣམ་པར་རྟོག་པས་སྤྱོད། །གནམ་དང་ས་ལྟར་ཐར་ལས་རིང་བ་སྟེ། །དེ་འདྲ་དེ་དག་སྤྲུལ་ལྟར་རིང་དུ་སྤང ། །དེ་དག་སངས་རྒྱས་ཆོས་དང་ཇི་བཞིན་དུ། །དགེ་འདུན་ཡོན་ཏན་བརྒྱས་གང་དགའ་མ་ཡིན། །མཐོ་རིས་བོར་ནས་ངན་པའི་ལམ་དུ་སོང ། །སྡུག་པས་ཕོངས་ནས་སྲིད་པའི་འགྲོ་བར་འཁྱམས། །ང་ཡི་སྤྱོད་པ་ཉེ་བར་བསྟན་པ་འདི་ཐོས་ནས། །ཡང་དག་ལྷག་པའི་བསམ་པའི་སྒྲུབ་པས་འདི་ལ་སྦྱོར། །བསྐལ་པ་བྱེ་བ་མང་པོས་རྙེད་དཀའ་དལ་རྙེད་ཀྱི། །དེ་ལྟར་ཇི་སྐད་བསྟན་པའི་ཆོས་ཉིད་སྟོན་པ་འདིར་བརྩོན་གྱིས། །གང་ཞིག་ཐེག་མཆོག་བྱང་ཆུབ་དམ་པ་འཚང་རྒྱར་འདོད། །དེ་ཡིས་རྒྱལ་པོ་དེ་ཡི་ཡོན་ཏན་དྲན་པར་བྱ། །བསམ་སྟེ་ཡང་དག་ཇི་བཞིན་ཚུལ་བཞིན་གནས་པར་བྱ། །དེ་ལྟས་བདེ་གཤེགས་རྣམས་ཀྱི་བྱང་ཆུབ་ཆགས་མེད་འགྲུབ། །ཡོན་ཏན་འདི་དག་རྟོགས་པས་འཕགས་པའི་རིགས་ལ་བརྟེན། །རང་གིས་
507a
༄#། །འདིར་ནི་ཀུན་ཏུ་ཤེས་པ་བསྐྱེད་པར་བྱ། །བསྟན་པ་ཡོན་ཏན་སྙིང་པོ་འདི་འདྲ་མ་སྤངས་ཤིག་།བྱིས་པ་ལྟ་བུར་འགྲོ་བ་ལྔར་ནི་འཁྱམས་ས་རེ། ། འདིར་ནི་རི་དང་དགོན་པ་ཕུག་ཏུ་གནས་པར་བྱ། །དེར་གནས་ནས་ནི་བདག་མི་སྙེམས་ཤིང་གཞན་མི་སྨད། །སྔོན་ཆད་སངས་རྒྱས་བྱེ་བ་ཕྲག་བརྒྱ་མཉེས་མ་བྱས། །རྗེས་སུ་དྲན་ནས་རྟག་པར་རྒྱུན་དུ་བདག་ལ་སྤྱོས། །ལུས་དང་སྲོག་ལ་སྲེད་པ་མ་ཆགས་སྤང་བར་བྱ། །གུས་པ་དྲག་པོ་བསྐྱེད་ནས་ཆོས་ལ་བརྩོན་པར་བགྱི། །ང་ཡིས་མདོ་འདིར་སྒྲུབ་པ་བཤད་པ་འདིར་གནས་ན། །དེ་དག་རྣམས་ཀྱིས་ཕྱི་ནས་བྱང་ཆུབ་རྙེད་མི་དཀའ། །གང་དག་རྒྱལ་བའི་ཐེག་པ་འདི་ལ་དགའ་བརྩོན་པ། །ཐོས་ནས་ཕྱིར་ཞིང་ཡིད་ནི་འཇུག་པར་བྱ་བའི་རིགས། །དེ་ལྟ་བས་ན་བསྟན་ལ་མོས་པ་བསྐྱེད་པར་བྱ། །རྣམ་པར་རྒྱུ་བའི་ཚེ་ན་ཕྱིས་འགྱོད་གྱུར་ཏ་རེ། །ཡུལ་འཁོར་སྐྱོང ། བྱང་ཆུབ་སེམས་དཔའ་གང་ཞིག་ཕ་རོལ་ཏུ་ཕྱིན་པ་ལྔ་ལ་སྤྱོད་ལ། ཡང་གང་ཞིག་བདག་འདི་ལ་བསླབ་བོ། །བདག་སྡོམ་པ་འདི་ལ་གནས་པར་བྱའོ། །སྙམ་དུ་ཆོས་ཀྱི་རྣམ་གྲངས་འདི་ལ་ནན་ཏན་གྱིས་བསྒྲུབས་ན། བསོད་ནམས་ཀྱི་ཕུང་པོ་དེ་བསོད་ནམས་ཀྱི་ཕུང་པོ་འདིའི་གན་ན་བརྒྱའི་ཆར་ཡང་ཉེ་བར་མི་འགྲོ་སྟེ། སྟོང་གི་ཆ་དང ། བརྒྱ་སྟོང་གི་ཆ་དང ། བྱེ་
507b
བ་བརྒྱ་སྟོང་གི་ཆ་དང ། གྲངས་དང ། ཆ་དང ། བགྲང་བ་དང ། དཔེ་དང ། རྒྱུར་ཡང་ཉེ་བར་མི་འགྲོའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྔོན་སེམས་མ་བསྐྱེད་པའི་ལྷ་དང ། མི་དང ། ལྷ་མ་ཡིན་དུ་བཅས་པའི་སྐྱེ་རྒུ་ཁྲག་ཁྲིག་ཕྲག་སུམ་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དགེ་སློང་བདུན་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཡུལ་འཁོར་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང ། དེ་ལྟ་བས་ན། ཁྱོད་ཀྱིས་ཆོས་ཀྱི་རྣམ་གྲངས་འདི་དམ་བཅས་པ་དོན་ཡོད་པ་རྣམ་པར་དག་བ་ཞེས་བྱ་བར་ཟུངས་ཤིག་།སྐྱེས་བུ་དམ་པ་རྣམ་པར་རོལ་པ་དང ། བྱང་ཆུབ་སེམས་དཔའི་སྤྱོད་པ་རྣམ་པར་ངེས་པ་ཞེས་བྱ་བར་ཡང་ཟུངས་ཤིག་།དོན་ཡོངས་སུ་རྫོགས་པ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཡུལ་འཁོར་སྐྱོང་
508a
༄#། །དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡིད་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཡུལ་འཁོར་སྐྱོང་གིས་ཞུས་པའི་ལེའུ་ཞེས་བྱ་སྟེ།་འདུས་པ་བཅོ་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། མུ་ནི་ཝརྨ་དང ། ཞུ་ཆེན་གྱི་ལོཙྪ་བ་བནྡྷེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ། །།