རྒྱ་གར་སྐད་དུ། ཨཱ་རྱ་ཀ་ན་ཀ་བ་ཏི་ནཱ་མ་དྷཱ་ར་ཎཱི། བོད་ 460a ༄#། །སྐད་དུ། འཕགས་པ་གསེར་ཅན་ཞེས་བྱ་བའི་གཟུངས། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷས་མ་ལྟ་བུ་ན་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་ཐབས་ཅིག་ཏུ་བཞུགས་ཏེ། དེ་ནས་ལྷའི་དབང་པོ་བརྒྱ་བྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གཡུལ་ངོར་མ་ཆིས་ཏེ་གཡུལ་འགྱེད་པ་ན་ལྷ་མ་ཡིན་གྱི་སྒྱུ་དང ། རིག་སྔགས་རྣམས་དང ། གསང་སྔགས་དང ། སྨན་དག་གིས་ཕམ་པར་གྱུར་པ་མཁྱེན་ལགས་སམ། བཅོམ་ལྡན་འདས། བདག་ཅག་རྗེས་སུ་གཟུང་བ་དང ། བདག་ཅག་ལ་ཐུགས་བརྩེ་བ་དང ། ལྷ་མ་ཡིན་རྣམས་ཀྱི་སྒྱུ་དང ། རིག་སྔགས་དང ། གསང་སྔགས་དང ། སྨན་རབ་ཏུ་གཞོམ་པ་དང ། རབ་ཏུ་གཞིག་པའི་སླད་དུ་རྣམ་པར་རྒྱལ་བ་ཆེན་པོའི་གསང་སྔགས་ཆེན་པོ་ལེགས་པར་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀོའུ་ཤི་ཀ་།དེ་དེ་ 460b བཞིན་ནོ། །ལྷ་མ་ཡིན་དང་གཡུལ་སྤྲད་པ་ན་རིག་སྔགས་རྣམས་དང ། གསང་སྔགས་རྣམས་དང ། སྨན་རྣམས་ཀྱིས་ཕམ་པ་དེ་དེ་བཞིན་ཏེ། ཀོའུ་ཤི་ཀ། སྙིང་བརྩེ་བའི་ཕྱིར་འདིར་རིག་སྔགས་བརྗོད་པར་བྱ་སྟེ། སྒྱུ་ཐམས་ཅད་རེངས་པར་བྱེད་པ། རིག་སྔགས་ཐམས་ཅད་ཟློག་པར་བྱེད་པ། གསང་སྔགས་ཐམས་ཅད་རེངས་པར་བྱེད་པ། འཐབ་པ་དང།་རྩོད་པ་དང ། མཚང་འདྲུ་བ་དང ། འཐབ་མོ་དང ། འགྱེད་པ་ཐམས་ཅད་རབ་ཏུ་ཞི་བར་བྱེད་པ། གསང་སྔགས་དང ། སྨན་ཐམས་ཅད་གཅོད་པའི་རིག་སྔགས་བཤད་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་རིག་སྔགས་ཆེན་པོ་གསེར་ཅན་བཀའ་སྩལ་པ། གང་བསྐལ་པ་གྲངས་མེད་པ་གསུམ་དུ་གཞན་མུ་སྟེགས་ཅན་སྤྱོད་པ་བ་དང ། ཀུན་ཏུ་རྒྱུ་དང ། གཅེར་བུ་པ་རྣམས་ཀྱིས་ངན་དུ་བསམས་ཤིང་བར་འཆད་དུ་བྱས་པ་ལས། ངས་དེ་ཚུན་ཆད་སྒྱུ་དང་ལྡན་པ་རྣམས་ཀྱི་རིག་སྔགས་ཐམས་ཅད་བཟློག་ནས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ཏེ་གཞན་མུ་སྟེགས་ཅན་སྤྱོད་པ་བ་དང ། ཀུན་ཏུ་རྒྱུ་དང ། གཅེར་བུ་པ་དང ། འཚེ་བ་རྣམས་ཀྱི་སྒྱུ་དང ། རིག་སྔགས་དང ། སྨན་དང ། བདུད་ཀྱི་སྡེ་ཐམས་ཅད་རབ་ཏུ་འཇོམས་པའི་རིག་པ་ཆེན་པོ་དེ་ངས་བཤད་པར་བྱའི། ཀོའུ་ཤི་ཀ་།ཁྱོད་ཀྱི་སེམས་ཅན་ཐམས་ཅད་རྗེས་སུ་གཟུང་ 461a ༄#། །པའི་ཕྱིར་གསང་སྔགས་ཆེན་པོ་རྣམ་པར་རྒྱལ་བ་ཆེན་པོ་ཟུངས་ཤིག་།བཅོམ་ལྡན་འདས། དེ་བཞིན་ནོ། །ཞེས་གསོལ་ཏེ་ལྷའི་དབང་པོ་བརྒྱ་བྱིན་བཅོམ་ལྡན་འདས་ཀྱི་ལྟར་ཉན་པ་དང ། དེ་ནས་བཅོམ་ལྡན་འདས་ཀྱིས་དེའི་ཚེ་རིག་སྔགས་ཆེན་པོ་གསེར་ཅན་འདི་དག་བཀའ་སྩལ་ཏོ། །ཏདྱ་ཐཱ། ཨོཾ་ཧི་ནི་ཧི་ནི། ཧི་ལི་ཧི་ལི། མི་ལི་མི་ལི། ཧི་ལི་མི་ལི། ནི་ཧི་ནི་ཧི། ནི་ཧི་ར་པི་ནི། ཀཱཉྩ་ནཱ་པ་ཏི། ལོ་ཀཱ་མཱ་ཏེ། བྷུ་ཏེ། བྷུ་ཀུ་ཏ་མནྟྲ། ཨ་དྷི་ཀྲྀ་ཏེ། བེ་དེ་བེ་དེ་བེ་ཏ་མནྟྲ། ཨ་དྷི་ཀྲྀ་ཏེ་།ཧ་ན་ཧ་ན། ཧ་ས་ཧ་ས། ཙིནྡྷ་ཙིནྡྷ། བྷིནྡྷ་བྷིནྡྷ། བྷ་ག་བ་ཏི། ཛ་ཡེ་བི་ཛ་ཡེ། ཛམྦྷ་ནི། སྟམྦ་ནི། བནྡྷ་ནི། མོ་ཧ་ནི། ཨ་མོ་གྷ་ཤཀྟྲི་དྷ་ར་ཎི། གྲྀཧྞ་གྲྀཧྞ། ཀཱ་ཌཱ་མ་མཱ་ན་སི། ཛམྦྷ་ཡ་ཛམྦྷ་ཡ། བྷཉྫ་ཡ་བྷཉྫ་ཡ། སྟམྦྷ་ཡ་སྟམྦྷ་ཡ། བནྡྷ་ཡ་བནྡྷ་ཡ། མོ་ཧ་ཡ་མོ་ཧ་ཡ། ལྷའི་སྒྱུ་དང ། ཀླུའི་སྒྱུ་དང ། གནོད་སྦྱིན་གྱི་སྒྱུ་དང ། སྲིན་པོའི་སྒྱུ་དང ། ནམ་མཁའ་ལྡིང་གི་སྒྱུ་དང ། དྲི་ཟའི་སྒྱུ་དང ། ལྷ་མ་ཡིན་གྱི་སྒྱུ་དང ། མིའམ་ཅིའི་སྒྱུ་དང ། ལྟོ་འཕྱེ་ཆེན་པོའི་སྒྱུ་དང ། རིག་སྔགས་འཆང་གི་སྒྱུ་དང ། རིག་སྔགས་འཆང་གྲུབ་པའི་རྒྱལ་པོའི་སྒྱུ་དང ། དྲང་སྲོང་གི་སྒྱུ་དང ། སེམས་ཅན་དང ། རིག་སྔགས་འཆང་ཐམས་ཅད་ཀྱི་སྒྱུ་དང ། འབྱུང་པོའི་སྒྱུ་དང ། སྒྱུ་ཐམས་ཅད་ར་ལ་ར་ལ། རཛྫ་རཛྫ། དྷུ་མ་དྷུ་མ། དྷུ་དྷུ་མ། རཱ་བ་རཱ་བ་རཱ་བ་ན། ཙ་ཀྲཱ་ 461b ནནྟ།་གྲཱནྠ་ནི། ཧ་ན་ཧ་ན། སརྦ་བིདྱཱ། ཤ་ཏྲཱུཾ་ཎཱཾ། སྟམྦྷ་ཡ། བ་ཡུཾ་སྟམྦྷ་ཡ། སཱུརྱཾ་སྟམྦྷ་ཡ། སོ་ནཾ་སྟམྦྷ་ཡ། བ་རུ་ཎཾ་སྟམྦྷ་ཡ། ཨགྣིཾ་སྟམྦྷ་ཡ། ཨུ་ད་ཀཾ་དྷི་ཏི་དྷི་ཏི། དྷཱ་ར་ཎི་པཱ་ཤ་ཧ་ཏེ། བཥྚ་ཡ་པཱ་ཤེ་ན། གང་དག་བདག་ལ་ཕྱིར་རྒོལ་བ་རྣམས་དང ། དགྲ་རྣམས་དང ། སྡང་བ་དང ། རབ་ཏུ་སྡང་བའི་སེམས་དང་ལྡན་པ་རྣམས་དང ། འཐབ་པ་དང ། རབ་ཏུ་འཐབ་པ་དང།་མི་ཕན་པར་འདོད་པ་ཐམས་ཅད་ཧ་ན་ཧ་ན། ད་ཧ་ད་ཧ། པ་ཙ་པ་ཙ། བྷཉྫ་ཡ་བྷཉྫ་ཡ། ཛམྦྷ་ཡ་ཛམྦྷ་ཡ། སྟམྦྷ་ཡ་སྟམྦྷ་ཡ། བནྡྷ་ཡ་བནྡྷ་ཡ། མོ་ཧ་ཡ་མོ་ཧ་ཡ། མ་ཧཱ་མོ་ཧ་ནི།་བྷ་ག་བ་ཏི་སཝཱཧཱ། བདག་འཇིགས་པ་ཐམས་ཅད་དང ། གནོད་པ་དང ། ནད་འགོ་བ་ཐམས་ཅད་ལས་སྲུངས་ཤིག། སྲུངས་ཤིག་ཕཊ་སཝཱཧཱ། ཀོའུ་ཤི་ཀ། རིགས་ཀྱི་བུའམ། རིགས་ཀྱི་བུ་མོའམ། རྒྱལ་པོའམ། རྒྱལ་པོའི་བློན་པོ་ཆེན་པོ་གང་ལ་ལ་ཞིག་གསེར་ཅན་གྱི་རིག་སྔགས་འདི་རྗེས་སུ་དྲན་པར་བྱེད་ན། དེ་ལ་ཕ་རོལ་གྱི་འཇིགས་པ་མི་འབྱུང་ངོ ། །དེའི་སྡེ་ལ་ཕ་རོལ་གྱི་དམག་ཚོགས་ཀྱིས་མི་ཚུགས་སོ། །ལྷས་མ་ཡིན། ཀླུས་མ་ཡིན། གནོད་སྦྱིན་གྱིས་མ་ཡིན། སྲིན་པོས་མ་ཡིན། དྲི་ཟས་མ་ཡིན། ལྷ་མ་ཡིན་གྱིས་མ་ཡིན། ནམ་མཁའ་ལྡིང་གིས་མ་ཡིན། མིའམ་ཅིས་མ་ཡིན། རིག་སྔགས་འཆང་གིས་མ་ཡིན། མཁའ་འགྲོ་མས་མ་ཡིན། དུས་མ་ཡིན་པར་འཆི་བའི་དུས་བྱེད་པར་མི་འགྱུར། 462a ༄#། །རིག་སྔགས་དང ། གསང་སྔགས་དང ། སྨན་རྣམས་ཀྱིས་མི་ཚུགས། ཕ་རོལ་གྱི་དམག་ཚོགས་ཀྱིས་མི་ཚུགས། ཕ་རོལ་གྱི་དམག་ཚོགས་ཀྱིས་འཆི་བའི་དུས་བྱེད་པར་མི་འགྱུར། ལུས་ལ་མཚོན་གྱིས་མི་ཚུགས། ལུས་ལ་མེ་དང ། ཆུ་དང ། དུག་དང ། རིག་སྔགས་དང ། གསང་སྔགས་དང ། སྨན་རྣམས་ཀྱིས་མི་ཚུགས་སོ།། གང་གིས་སྡིག་པ་བྱས་པ་དང ། བྱེད་དུ་བཅུག་པ་དང ། རྗེས་སུ་ཡི་རང་བ་དེ་ཉིད་ལ་སླར་འབབ་པར་འགྱུར། དེ་ཉིད་དུ་སླར་འགྲོ་བར་འགྱུར་རོ། །ཀོའུ་ཤི་ཀ། དེ་ལྟ་བས་ན། དད་པའི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རིགས་ཀྱི་བུའམ། རིགས་ཀྱི་བུ་མོས་རིག་སྔགས་འདི་ཆུ་ལ་ལན་བདུན་བཟླས་ཏེ་བདག་གི་ལུས་ལ་བླུགས་ན། བདག་གི་ལུས་སྲུང་བར་འགྱུར་རོ། །འཇིགས་པ་ཐམས་ཅད་དང ། གནོད་པ་ཐམས་ཅད་དང ། ཡམས་ཀྱི་ནད་དང ། ནད་འགོ་བ་ཐམས་ཅད་དང ། རིག་སྔགས་ཐམས་ཅད་དང ། གསང་སྔགས་དང ། སྨན་ཐམས་ཅད་དང ། བྱད་ཐམས་ཅད་ལས་ཤིན་ཏུ་འདའ་བར་འདོད་པས་གསེར་ཅན་གྱི་རིག་སྔགས་འདི་དྲན་པར་བྱའོ། །རྒྱལ་པོའམ། རྒྱལ་པོའི་བློན་པོ་ཕ་རོལ་གྱི་དམག་ཚོགས་གཞོམ་པ་དང ། ཕ་རོལ་གྱི་དམག་ཚོགས་འདུལ་བར་འདོད་པས་གསེར་ཅན་གྱི་རིག་སྔགས་འདི་ 462b དྲན་པར་བྱའོ། །ལན་བདུན་བཟླས་ཏེ་མདུད་པ་བདུན་པོར་བའི་སྲད་བུ་གདགས་པར་བྱ་བའམ། ཆུ་ལ་ལན་བདུན་བཟླས་པས་བདག་བསྲུང་བར་བྱའོ། །འཇིགས་པ་ཐམས་ཅད་ལ་ཐོགས་པ་མེད་པའི་གཟུངས་ཡི་གེར་བྲིས་ཏེ་འཆང་བར་བྱ། །མགུལ་དུ་གདགས་པར་བྱའོ། །ཡི་གེར་བྲིས་ནས་རྒྱལ་མཚན་གྱི་རྩེ་མོ་ལ་བཏགས་ཏེ་གཡུལ་དུ་ཞུགས་ན། དགེ་བ་དང ། བདེ་བར་ཐར་པར་འགྱུར་རོ། །རིག་སྔགས་འདིའི་སྟོབས་ཀྱིས་ནང་མི་དང ། གཡོག་འཁོར་དང ། སྡེ་དང་བཅས་ཏེ་དགེ་བ་དང ། བདེ་བར་རྒལ་བར་འགྱུར་རོ། །མ་གྲུབ་པ་རྣམས་ཀྱང་གྲུབ་པར་འགྱུར་རོ། །རིག་སྔགས་རེངས་པར་བྱེད་པར་འདོད་པས་སྲད་བུ་དཀར་པོ་ལ་ལན་བདུན་བཟླས་ཏེ་མདུད་པ་བདུན་བོར་ན། བཅིངས་པ་དང ། རེངས་པར་བྱས་པར་འགྱུར་རོ། ། སྒྱུ་རེངས་པར་བྱེད་པར་འདོད་པས་དུར་ཁྲོད་ཀྱི་ས་ལ་ལན་བདུན་བཟླས་ཏེ་གཏོར་ན། སྒྱུ་རེངས་པར་བྱས་པར་འགྱུར་རོ། །འགྱེད་པའི་ཚེ་ཁ་ལྐུགས་པར་བྱེད་པར་འདོད་པས་ཟིན་ཐིག་ལ་ལ་ན་བདུན་བཟླས་ཏེ་འཆོས་ན། སྨྲ་བ་ཐམས་ཅད་ཀྱི་ལན་ཐེབས་པར་འགྱུར་རོ། །བཀླག་པར་བྱ། ཁ་ཏོན་དུ་བྱ། བརྗོད་པར་བྱ་སྟེ། བརྗོད་པ་ཙམ་གྱིས་སྡིག་པ་ཐམས་ཅད་རབ་ཏུ་ཞི་བར་འགྱུར་རོ། །གང་གིས་བྱས་པར་གྱུར་པ་དང ། གང་གིས་བསམས་པར་གྱུར་པ་དེ་ཉིད་ལ་སླར་འགྲོའོ། །སྲད་བུ་བཏགས་སམ། ཆུས་བདག་བསྲུངས་ 463a ༄#། །པར་བྱས་ན། དེའི་ལུས་ལ་རིག་སྔགས་དང ། གསང་སྔགས་དང ། སྨན་ཐམས་ཅད་ཀྱིས་མི་ཚུགས་སོ། །མ་གྲུབ་པ་རྣམས་གྲུབ་པར་འགྱུར་རོ། །དེའི་དོན་ཐམས་ཅད་ཀྱང་མཐུན་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ལྷའི་དབང་པོ་བརྒྱ་བྱིན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་གསེར་ཅན་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོཙྪ་བ་བནྡྷེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ། |