།རྒྱ་གར་སྐད་དུ། ཨཱརྱ་པྲ་བྷ་ས་མནྟ་མུཀྟོ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འོད་ཟེར་ཀུན་ཏུ་བསྐྱེ་བ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་རང་དབང་ཆེན་པོ་ཐོབ་པ་ལྔ་བརྒྱ་དང ། གཞན་ཡང་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་ཁྲག་ཁྲིག་ཕྲག་བརྒྱད་ཅུ་དང ། གཞན་ཡང་བྱང་ 322b ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་སོགས་པ་ཁྲག་ཁྲིག་ཕྲག་བཞི་བཅུ་དང་ཐབས་ཅིག་ཏུ་བཞུགས་ཏེ། དེའི་ཚེ་འཁོར་འདུས་པ་དེ་ཉིད་དུ་ཟླ་འོད་གཞོན་ནུར་གྱུར་པ་ཞེས་བྱ་བ་ཞིག་འདུས་པར་གྱུར་ཏེ་འདུག་པ་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་གཙུགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་གུས་པས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པས་སྔོན་འཕྲིན་ལས་ཅི་ཞིག་མཛད་ན། འདི་ལྟར་རྣམ་པར་ངེས་པའི་འོད་ཟེར་དང ། ཡོངས་སུ་སྡུད་པའི་འོད་ཟེར་དང ། ཀུན་ནས་སློང་བའི་འོད་ཟེད་དང ། རབ་ཏུ་སྟོན་པའི་འོད་ཟེར་དང ། ཁ་དོག་སྣ་ཚོགས་ཀྱི་འོད་ཟེར་དང ། ཁ་དོག་འདྲེས་པ་མ་མཆིས་པའི་འོད་ཟེར་དང ། རྒྱ་ཆུང་དུའི་འོད་ཟེར་དང ། རྒྱ་ཆེན་པོའི་འོད་ཟེར་དང ། རྣམ་པར་དག་པའི་འོད་ཟེར་དང ། ཤིན་ཏུ་རྣམ་པར་དག་པའི་འོད་ཟེར་དང ། དྲི་མ་མ་མཆིས་པའི་འོད་ཟེར་དང ། ཤིན་ཏུ་དྲི་མ་མ་མཆིས་པའི་འོད་ཟེར་དང ། དྲི་མ་དང་བྲལ་བའི་འོད་ཟེར་དང ། རིམ་གྱིས་འཕེལ་བའི་འོད་ཟེར་དང ། གསལ་བའི་འོད་ཟེར་དང ། ཤིན་ཏུ་གསལ་བའི་འོད་ཟེར་དང ། མཐའ་མ་མཆིས་པའི་འོད་ཟེར་དང ། ཤིན་ཏུ་མཐའ་མ་མཆིས་པའི་འོད་ཟེར་ 323a ༄#། །དང ། ཚད་མ་མཆིས་པའི་འོད་ཟེར་དང ། ཤིན་ཏུ་ཚད་མ་མཆིས་པའི་འོད་ཟེར་དང ། གྲངས་ཀྱི་ཚད་མ་མཆིས་པའི་འོད་ཟེར་དང ། ཤིན་ཏུ་གྲངས་ཀྱ་ཚད་མ་མཆིས་པའི་འོད་ཟེར་དང ། མྱུར་བའི་འོད་ཟེར་དང ། ཤིན་ཏུ་མྱུར་བའི་འོད་ཟེར་དང ། གནས་མ་མཆིས་པའི་འོད་ཟེར་དང ། ཀུན་ཏུ་འབར་བའི་འོད་ཟེར་དང ། སྣང་བར་བགྱིད་པའི་འོད་ཟེར་དང ། མོས་པར་བགྱིད་པའི་འོད་ཟེར་དང ། ཕ་རོལ་ཏུ་ཕྱིན་པར་བགྱིད་པའི་འོད་ཟེར་དང ། ཐོགས་པ་མ་མཆིས་པའི་འོད་ཟེར་དང ། གཡོ་བ་མ་མཆིས་པའི་འོད་ཟེར་དང ། དྲང་པོའི་འོད་ཟེར་དང ། དཔག་ཏུ་མ་མཆིས་པ་ལ་གནས་པའི་འོད་ཟེར་དང ། གཟུགས་ཀྱི་མཚན་གྱི་འོད་ཟེར་དང ། གཟུགས་ཀྱི་མཚན་སྣ་ཚོགས་ཀྱི་འོད་ཟེར་དང ། གཟུགས་ཀྱི་མཚན་ཉིད་ཚད་མ་མཆིས་པའི་འོད་ཟེར་དང ། ཁ་དོག་སྔོན་པོ་དང ། སེར་པོ་དང ། དམར་པོ་དང ། དཀར་པོའི་མཚན་ཉིད་ཀྱི་འོད་ཟེར་དང ། ཁ་དོག་ལེབ་རྒན་གྱི་འོད་ཟེར་དང ། ཆུ་ཤེལ་གྱི་ཁ་དོག་གི་མཚན་ཉིད་ཀྱི་འོད་ཟེར་དང ། ནམ་མཁའི་ཁ་དོག་གི་མཚན་ཉིད་ཀྱི་འོད་ཟེར་དང ། དེ་ལྟ་བུ་ལ་སོགས་པ་རྣམ་པ་སྣ་ཚོགས་ཀྱི་འོད་ཟེར་རེ་རེ་ཀུན་ཀྱང་ཁ་དོག་རྣམ་པ་ལྔའི་འོད་ཟེར་འདྲེས་པར་གྱུར་པ་སྟོན་པར་མཛད་པ་ནས་ཁ་དོག་སྔོན་པོ་དང ། སེར་པོ་དང ། དམར་པོ་དང ། དཀར་པོའི་དངོས་ 323b པོ་རེ་རེ་ཀུན་ཀྱང་འོད་ཟེར་ཁ་དོག་རྣམ་པ་སྣ་ཚོགས་ཚད་མ་མཆིས་པ་དཔག་ཏུ་མ་མཆིས་པ་དག་དང་འདྲེས་པར་གྱུར་པ་རབ་ཏུ་སྟོན་པར་མཛད་པའི་བར་དུ་བརྙེས་པར་གྱུར་ལགས།། དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་ཚིགས་སུ་བཅད་དེ་བཀའ་སྩལ་པ། ང་ནི་བསམ་གྱིས་མི་ཁྱབ་པའི། །དགེ་བའི་ལས་ཀྱི་རྒྱུ་རྐྱེན་གྱིས། །རྨོངས་པ་རྣམས་ནི་རབ་སྤངས་ནས། །འོད་ཟེར་སྣ་ཚོགས་གྲུབ་པ་ཡིན། །གཞན་ཡང་སྤྱོད་པ་སྣ་ཚོགས་ཀྱིས། །སངས་རྒྱས་ལམ་ལ་རབ་གནས་ཤིང ། །སྟོང་པ་བྱེད་མེད་ཤེས་རབ་ཀྱིས།། འདྲེས་པའི་འོད་ཟེར་བསྟན་པ་ཡིན། །ཇི་ལྟར་ཕྱི་རོལ་ཆོས་དག་ལ། །མཚན་ཉིད་བྱེ་བྲག་སྣ་ཚོགས་སྣང ། །དེ་ནི་སྟོང་ཞིང་བདག་ཀྱང་མེད། །བྱེད་པ་མེད་ཅིང་སེམས་ཡིད་མེད།། གཞན་ཡང་ཇི་ལྟར་ནང་གི་ལུས། །སྟོང་ཞིང་བདག་མེད་བྱེད་མེད་ཀྱང ། །དེ་ལས་རྣམ་པ་སྣ་ཚོགས་གྱི། །སྒྲ་སྐད་དག་ནི་རབ་ཏུ་སྟོན། །དེ་ལྟར་བྱེད་མེད་དབང་གིས་ནི། །ཁ་དོག་དཔག་མེད་འོད་བསྟན་ནས། །མོས་པ་དག་ནི་ཇི་བཞིན་དུ། །རེ་བ་དག་ནི་སྐོང་བར་མཛད། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་གཉིས་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པར་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་གསུམ་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ 324a ༄#། །ཡོད་པར་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བཞི་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པར་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་ལྔ་འབྱུང་བ། །སོ་སོར་རབ་འབྲིང་ཐ་མ་ཡང ། །ལས་གཙང་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་དྲུག་འབྱུང་བ། །སོ་སོར་རབ་འབྲིང་ཐ་མ་ཡང ། །ཐབས་མཁས་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བདུན་འབྱུང་བ། །སོ་སོར་རབ་འབྲིང་ཐ་མ་ཡང ། །ལས་དགེ་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བརྒྱད་འབྱུང་བ།། སོ་སོར་རབ་འབྲིང་ཐ་མ་ཡང ། །དགེ་བའི་ཆོས་ལས་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་དགུ་འབྱུང་བ། །སོ་སོར་རབ་འབྲིང་ཐ་མ་ཡང ། ། ཚོགས་དག་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བཅུ་འབྱུང་བ། །སོ་སོར་རབ་འབྲིང་ཐ་མ་ཡང ། །སྦྱིན་པ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ཉི་ཤུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །ཚུལ་ཁྲིམས་བསྲུངས་ལས་སྐྱེས་པ་ཡིན། །རས་འགའ་ 324b དངོས་པོ་གཅིག་ལས་ནི། །ཁ་དོག་སུམ་ཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །བཟོད་པ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བཞི་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །བརྩོན་འགྲུས་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ལྔ་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །བསམ་གཏན་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་དྲུག་ཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །ཤེས་རབ་ལས་ནི་སྐྱེས་པ་ཡིན། །ངེས་འགའ་དངོས་པོ་གཅིག་ལས་ནི། །ཁ་དོག་བདུན་ཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །བྱམས་པའི་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བརྒྱད་ཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །སྙིང་རྗེའི་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་དགུ་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །དགའ་བའི་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་རྣམ་བརྒྱ་གང་འབྱུང་བ། །སོ་སོར་རབ་འབྲིང་ཐ་མ་ཡང ། །བཏང་སྙོམས་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་སྟོང་ནི་གང་འབྱུང་བ། །སོ་སོར་རབ་འབྲིང་ཐ་མ་ཡང ། །ཡོན་ཏན་སྟོན་ 325a ༄#། །ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ཁྲི་ནི་གང་འབྱུང་བ། །སོ་སོར་རབ་འབྲིང་ཐ་མ་ཡང ། །བསོད་ནམས་ཚོགས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གང་བསྟན་པ། །སོ་སོར་རབ་འབྲིང་ཐ་མ་ཡང ། །ཡིད་ཆེས་པ་ལས་སྐྱེས་བ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གཉིས་སྟོན་པ། །སོ་སོར་རབ་འབྲིང་ཐ་མ་ཡང ། །རྗེས་སུ་ཡི་རང་ལས་སྐྱེས་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གསུམ་སྟོན་པ། །སོ་སོར་རབ་འབྲིང་ཐ་མ་ཡང ། །ཤིན་ཏུ་སྦྱངས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བཞི་སྟོན་པ། །སོ་སོར་རབ་འབྲིང་ཐ་མ་ཡང ། །སངས་རྒྱས་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་ལྔ་སྟོན་པ། །སོ་སོར་རབ་འབྲིང་ཐ་མ་ཡང ། །ཆོས་ལ་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་དྲུག་སྟོན་པ། །སོ་སོར་རབ་འབྲིང་ཐ་མ་ཡང ། །དགེ་འདུན་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བདུན་སྟོན་པ། །སོ་སོར་རབ་འབྲིང་ཐ་མ་ཡང ། །ཚུལ་ཁྲིམས་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བརྒྱད་ 325b སྟོན་པ། །སོ་སོར་རབ་འབྲིང་ཐ་མ་ཡང ། །ཏིང་འཛིན་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་དེ་གུ་སྟོན་པ། །སོ་སོར་རབ་འབྲི་བ་ཐ་མ་ཡང་ཀུན་བརྩེ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བཅུ་སྟོན་པ། །སོ་སོར་རབ་འབྲིང་ཐ་མ་ཡང ། །བག་ཡོད་ལས་ནི་སྐྱེས་པ་ཡིན། །གཞན་ཡང་སྤུ་ཁུང་གཅིག་ལས་ནི། །འོད་ཟེར་མང་པོ་གང་སྟོན་པ། །འོད་ཟེར་སྣ་ཚོགས་མིང་དེ་དག་།དེང་འདིར་ཁྱོད་ལ་བཤད་པར་བྱ། །ང་ལ་འོད་ཟེར་གཅིག་ཡོད་དེ། །དེ་མིང་སྦྲིན་གཙང་སྣང་ཞེས་བྱ། །འོད་ཟེར་དེ་ནི་དགེ་བའི་རྩ། །དཔག་མེད་བསགས་ལས་སྐྱེས་པ་ཡིན། །དེ་ལྟར་འདས་པའི་དུས་ཀྱི་ཚེ། །སེམས་ཅན་རྣམ་པ་ཇི་སྙེད་པ། །ནད་རྣམས་སྣ་ཚོགས་བཏབ་པ་ལས། །སྙིང་བརྩེའི་སེམས་ནི་རབ་བསྐྱེད་ནས། །སྨན་ནི་མང་པོ་རབ་བཏང་ཞིབ། །དེ་དག་གསོས་པར་བྱས་པ་ཡི། །རྒྱ་དང་རྐྱེན་ནི་འདི་ཡི་ཕྱིར། །དེ་འདྲའི་འོད་ཟེར་ཐོབ་པ་ཡིན། ། ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་མིག་ཅེས་བྱ། །མར་མེས་སངས་རྒྱས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྣ་ཞེས་བྱ། །སྒྲ་དབྱངས་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྣ་ཞེས་བྱ། །སྦོས་ཆུ་དག་གིས་ 326a ༄#། །མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ལྕེ་ཞེས་བྱ། །རོ་མཆོག་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ལུས་ཞེས་བྱ། །འདི་ལྟར་གོས་ཀྱིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། ། ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སེམས་ཞེས་བྱ། །རྟག་ཏུ་སངས་རྒྱས་ཡིད་ཆེས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་གཟུགས་ཞེས་བྱ། །སངས་རྒྱས་གཟུགས་ནི་བྲིས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྒྲ་ཞེས་བྱ། །རྟག་ཏུ་ཆོས་ལ་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་དྲི་ཞེས་བྱ། །རྟག་ཏུ་དགེ་འདུན་གུས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རོ་ཞེས་བྱ། །ཡིད་བཞིན་དུ་ནི་སྦྱིན་བཏང་བས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རེག་ཅེས་བྱ། །བྱུག་སྤོས་དག་གིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཆོས་ཞེས་བྱ། །ཆོས་རྣམས་ 326b ཡོངས་སུ་བཟུང་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ས་ཞེས་བྱ། །སངས་རྒྱས་དགེ་འདུན་ས་ཕྱག་བས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཆུ་ཞེས་བྱ། །ཆུ་མིག་ཁྲོན་པས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་མེ་ཞེས་བྱ། །མེ་འཛིན་མཆོད་ཅིང་སྦྱིན་བཏང་བས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རླུང་ཞེས་བྱ། །རླུང་གཡབ་ཐོགས་ནས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཕུང་ཞེས་བྱ། །ལུས་ཀྱིས་སངས་རྒྱས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཁམས་ཞེས་བྱ། །རྟག་ཏུ་བྱམས་པའི་སེམས་བསྒོམས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་བདེན་ཞེས་བྱ། །རྟག་ཏུ་རྫུན་ནི་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཞི་ཞེས་བྱ། །རྟག་ཏུ་སྦྱིན་པ་བཏང་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྒྲ་ཞེས་བྱ། །སངས་རྒྱས་རྣམས་ཀྱིས་བསྔགས་བརྗོད་པས། །དེ་ཕྱིར་ད་ལས་སྐྱེས་པ་ཡིན། །ང་ལ་འོད་ཟེར་ 327a ༄#། །ཡང་ཡོད་དེ། །དེ་མིང་རྣམ་དག་དྲན་ཞེས་བྱ། །ཏིང་འཛིན་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ།། དེ་མིང་རྣམ་དག་སྤོབས་ཞེས་བྱ། །ཀུན་འཛིན་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་མཐུན་ཞེས་བྱ་བ་ཡིན། །རྩོད་བ་དག་ནི་བསྡུམས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་དོན་རབ་བསྟན་ཞེས་བྱ། །སྟོང་ཉིད་རབ་ཏུ་རྟོགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་སྔོ་ཞེས་བྱ། །པདྨ་སྔོན་པོས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་སེར་ཞེས་བྱ། །ཙམྤ་ཀས་ནི་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་དམར་ཞེས་བྱ། །མུ་ཏིག་དག་གིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་དཀར་ཞེས་བྱ། །གསེར་གྱི་གདུགས་ཀྱིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། ། ང་ལ་འོད་ཟེར་ཡང་ཡོད་དེ། །དེ་མིང་ཡོན་ཏན་མཆོག་ཅེས་བྱ། །ཚོན་སྣ་མང་པོས་བརྒྱན་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཀླུ་ 327b ཡི་གཟི་ཞེས་བྱ། །ཀླུ་ཡི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གླང་པོའི་གཟི་ཞེས་བྱ། །གླང་པོའི་བདན་གྱིས་མཆོད་པས། ། དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སེངྒེའི་རྒྱལ་ཞེས་བྱ། །སེངྒེའི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁྱུ་མཆོག་རྒྱལ་ཞེས་བྱ། །ཁྱུ་མཆོག་བདན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཟླ་བ་ཡིན། ། སངས་རྒྱས་མཆོད་རྟེན་ཕྱགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཀླུ་འདུལ་ཞེས་བྱའོ། །དར་གྱི་ལྡ་ལྡི་ཕུལ་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གནོད་སྦྱིན་འདུལ་ཞེས་བྱ། །སོ་སོར་ལེགས་པར་བརྟགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ།། དེ་མིང་བུད་མེད་རྟོགས་ཞེས་བྱ། །བུད་མེད་མཚན་མ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྐྱེས་པ་རྟོགས་ཞེས་བྱ། །སྐྱེས་པའི་མཚན་མ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དོ། །དེ་མིང་རྡོ་རྗེ་སྟོབས་ཞེས་བྱ། །ལས་ཀྱི་ཤེས་བ་དག་པས་ན། །དེ་ཕྱིར་དེ་ལས་སྐྱེས་པ་ཡིན།། 328a ༄#། །ང་ལ་འོད་ཟེར་ཡང་ཡོད་དེ། །དེ་མིང་སྟོང་པ་སྟན་ཞེས་བྱ། །འཇིག་རྟེན་རྣམ་སྨིན་སྟོན་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རྟོགས་ཞེས་བྱ། །ཕྱིན་ཅི་ལོག་ནི་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སངས་རྒྱས་གསུངས་ནི་སྟོན་ཞེས་བྱ། །ཆོས་དབྱིངས་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སྐྱོན་རྣམས་སྤངས་པ་ཞེས་བྱའོ། །མོས་པའི་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །བཀོད་པ་ཀུན་ཏུ་སྣང་ཞེས་བྱ། །མར་མེ་ཕུལ་བའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན།། ང་ལ་འོད་ཟེར་ཡང་ཡོད་དེ། །དེ་མིང་སྲིད་པ་སྤངས་ཞེས་བྱ། །ཏིང་འཛིན་ཤེས་རབ་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་བག་ཆགས་སྤངས་ཞེས་བྱ། །སྔོན་མཐའི་ཤེས་པ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཆགས་པ་སྤངས་ཞེས་བྱ། །མི་སྐྱེ་ཡེ་ཤེས་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །འགྲོ་བ་རྣམས་ནི་སྤངས་ཞེས་བྱ། །ཟག་ཟད་ཡེ་ཤེས་བསྔགས་པས་ན། །དེ་ཕྱིར་དེ་ལས་ 328b སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གནས་སྤངས་ཞེས་བྱ་སྟེ། །སྡུག་བསྔལ་ཤེས་པ་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དོ། །སངས་རྒྱས་ཆོ་འཕྲུལ་ཞེས་བྱའོ། །རྫུ་འཕྲུལ་མཐུ་ཡི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གཟུགས་མང་སྟོན་ཞེས་བྱ། ། རྫུ་འཕྲུལ་རྐང་གི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དགེ་བའི་གྲོགས་ལ་མོས་ཞེས་བྱ། །རྟོགས་པའི་རང་བཞིན་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །མིག་གི་སྔོན་མཐའ་ཞེས་བྱའོ། །མིག་གི་སྔོན་མཐའ་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །མིག་གི་མཐའ་ཟད་ཅེས་བྱའོ། །མིག་ཟད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྲིད་པའི་མཐའ་ཞེས་བྱ། །སྲིད་མེད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འཇིགས་པ་མེད་ཅེས་བྱ། །འགོག་པ་ཉིད་ཀྱི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་མཐའ་མེད་ཅེས་བྱའོ། །མཐའ་མེད་བསྔགས་པ་བརྗོད་པ་ན་འདེ་ཕྱིར་དེ་ལས་སྐྱེས་པ་ཡིན། ། 329a ༄#། །ང་ལ་འོད་ཟེར་ཡང་ཡོད་དེ། །དེ་མིང་མཚན་མ་མེད་ཅེས་བྱ། །འདུས་མ་བྱས་ཀྱི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འགྱུར་བ་མེད་ཅེས་བྱ། །ཁྱད་པར་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འཇུག་པ་མེད་ཅེས་བྱ། །ཞེན་པ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འབྱུང་བ་མེད་ཅེས་བྱ། །སྐྱེ་བ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྐྱེ་བ་མེད་ཅེས་བྱ། །འབྱུང་བ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་བསྟན་མེད་ཅེས་བྱ་ཡོད། །སྐྱེ་རྒུ་རྣམས་ནི་ཡོངས་སུ་སྨིན་པར་བྱེད། །ང་ལ་འོད་ཟེར་ཆོས་ཉིད་ཅེས་བྱ་ཡོད། །སངས་རྒྱས་ཞིང་ནི་བྱེ་བ་གཡོ་བར་བྱེད། །ང་ལ་འོད་ཟེར་བདུད་འདུལ་ཞེས་བྱ་ཡོད། །འོད་ཟེར་དེ་ཡི་གཟིས་ནི་བདུད་སྐྲག་བྱེད། །ང་ལ་འོད་ཟེར་བསོད་ནམས་རྒྱལ་མཚན་ཡོད། །དེ་ཡེ་མིང་འཛིན་དག་ནི་གནོད་པ་སྤོང ། །ང་ལ་འོད་ཟེར་སྟོབས་ལྡན་རྒྱལ་མཚན་ཡོད། །ད་ཡི་མིང་འཛིན་དག་ནི་དགྲ་རབ་སྤོང ། །ང་ལ་འོད་ཟེར་རབ་ཞི་རྒྱལ་མཚན་ཡོད། །དེ་ཡི་མིང་འཛིན་ 329b དག་ནི་འདོད་ཆགས་སྤོང ། །ང་ལ་འོད་ཟེར་བསམ་གཏན་རྒྱལ་མཚན་ཡོད། །དེ་ཡི་མིང་འཛིན་དག་ནི་ལོག་སྤྱོད་སྤོང ། །ང་ལ་འོད་ཟེར་གྲགས་པའི་རྒྱལ་མཚན་ཡོད། །དེ་ཡི་མིང་འཛིན་དག་ནི་གྲགས་པ་ཐོབ། །ང་ལ་འོད་ཟེར་ཡིད་དགའ་རྒྱལ་མཚན་ཡོད། །དེ་ཡི་མིང་འཛིན་དག་ནི་མྱ་ངན་སྤོང ། །ང་ལ་འོད་ཟེར་སྡོམ་གཙང་རྒྱལ་མཚན་ཡོད། །དེ་ཡི་མིང་འཛིན་ཚུལ་ཁྲིམས་འཆལ་པ་སྤོང ། །ང་ལ་འོད་ཟེར་སྤོས་མཆོག་རྒྱལ་མཚན་ཡོད། །དེ་ཡི་མིང་འཛིན་མི་གཙང་མེད་པར་འགྱུར། །ང་ལ་འོད་ཟེར་ཆོས་ཟབ་ཅེས་བྱ་ཡོད། །དེ་ཡི་མིང་འཛིན་ཐེ་ཚོམ་མེད་པར་འགྱུར། །ང་ལ་འོད་ཟེར་གནས་པ་མེད་པ་ཡོད། །དེ་ཡི་མིང་འཛིན་སྲིད་པ་སྤོང་བར་བྱེད། །ང་ལ་འོད་ཟེར་རྟོག་བྲལ་ཞེས་བྱ་ཡོད། །དེ་ཡི་མིང་འཛིན་འཛིན་པ་མེད་པར་འགྱུར། །ང་ལ་འོད་ཟེར་རི་རབ་ཅེས་བྱ་ཡོད། །དེ་ཡི་མིང་འཛིན་གཡོ་བ་མེད་པར་ནི། །ང་ལ་འོད་ཟེར་གསང་བའི་སྤྱོད་པ་ཡོད། །དེ་ཡི་མིང་འཛིན་མངོན་པར་ཞེན་པ་མེད། །ང་ལ་འོད་ཟེར་རྣམ་གྲོལ་སྤྱོད་པ་ཡོད། །དེ་ཡི་མིང་འཛིན་འཆི་བ་མེད་པར་འགྱུར། །ང་ལ་འོད་ཟེར་ལེགས་འདུལ་ཞེས་བྱ་ཡོད། །དེ་ཡི་མིང་འཛིན་མཉེན་དེས་འཐོབ་པར་འགྱུར། །ང་ལ་འོད་ཟེར་མི་གཡོ་ཞེས་བྱ་ཡོད། །དེ་ཡི་མིང་འཛིན་འདོད་ཆགས་ཞེན་སྤང་འགྱུར། །ང་ལ་འོད་ཟེར་རབ་འདུལ་ཞེས་བྱ་ཡོད། །དེ་ཡི་མིང་འཛིན་ཚུལ་ 330a ༄#། །ཁྲིམས་རྫོགས་པར་འགྱུར། །ང་ལ་འོད་ཟེར་དགེ་མང་སྦྱོད་པ་ཡོད། །དེ་ཡི་མིང་འཛིན་གོས་པ་མེད་པར་འགྱུར། །ང་ལ་འོད་ཟེར་ཕན་མང་བྱེད་པ་ཡོད། །གང་གིས་མིང་ཐོས་ཉེས་པ་རྣམ་སྤང་འགྱུར། །ང་ལ་འོད་ཟེར་མཆོག་ཤེས་མཐོང་བ་ཡོད། །གང་གིས་མིང་ཐོས་རྨོངས་པ་མེད་པར་འགྱུར། །ང་ལ་འོད་ཟེར་ཕན་ཚོལ་ཞེས་བྱ་ཡོད། །གང་གིས་མིང་ཐོས་ཞེ་སྡང་མེད་པར་འགྱུར། །ང་ལ་འོད་ཟེར་སེམས་དགའ་བྱེད་པ་ཡོད། །གང་གིས་མིང་ཐོས་བདེ་བ་ཐོབ་པར་འགྱུར། །ང་ལ་འོད་ཟེར་གདུང་བ་མེད་པ་ཡོད། །གན་གིས་མིང་ཐོས་སྟོང་ཉིད་རྟོགས་པར་འགྱུར། །ང་ལ་འོད་ཟེར་ངོ་བོ་ཉིད་མེད་ཡོད། །གང་གིས་མིང་འཛིན་སྤྲོས་ལས་འདའ་བར་འགྱུར། ། ང་ལ་འོད་ཟེར་རྟེན་པ་མེད་པ་ཡོད། །གང་གིས་མིང་འཛིན་གཡོ་བ་མེད་པར་འགྱུར། །ང་ལ་འོད་ཟེར་རྨོངས་དང་བྲལ་བ་ཡོད། །གང་གིས་མིང་འཛིན་སོམ་ཉི་མེད་པར་འགྱུར། །ང་ལ་འོད་ཟེར་གནས་མེད་ཅེས་བྱ་ཡོད། །གང་གིས་མིང་འཛིན་གཏི་མུག་མུན་པ་སྤོང ། །ང་ལ་འོད་ཟེར་ནང་ལུས་སྐྱེས་པ་ཡོད། །གང་གིས་མིང་འཛིན་དེ་ནི་ལེན་མི་འགྱུར། །ང་ལ་འོད་ཟེར་འཛིན་མེད་ཅེས་བྱ་ཡོད། །གང་གིས་མིང་འཛིན་ཡི་གེ་ཚིག་འབྲུ་སྤོང ། །ང་ལ་འོད་ཟེར་རྨོངས་པ་མེད་པ་ཡོད། །གང་གིས་མིང་འཛིན་ 330b བརྗོད་དང་བྲལ་བར་འགྱུར། །ང་ལ་འོད་ཟེར་འགྲོ་མེད་ཅེས་བྱ་ཡོད། །གང་གིས་མིང་འཛིན་མ་འོབས་ཤེས་པར་འགྱུར། །ང་ལ་འོད་ཟེར་ཀུན་མཐའ་ཞེས་བྱ་མོད། །གང་གིས་མིང་འཛིན་འདས་པ་ཤེས་པར་འགྱུར། །ང་ལ་འོད་ཟེར་མཚུངས་མེད་ཅེས་བྱ་ཡོད། །གང་གིས་མིང་འཛིན་ཟག་མེད་རྟོགས་པར་འགྱུར། །ང་ལ་འོད་ཟེར་འཕགས་ཐོབ་ཅེས་བྱ་ཡོད། །གང་གིས་མིང་འཛིན་མཆོག་གྱུར་ཤེས་པར་འགྱུར། །ང་ལ་འོད་ཟེར་དྲི་མ་མེད་པ་ཡོད། །གང་གིས་མིང་འཛིན་མངོན་པར་ཞེན་པ་སྤོང ། །ང་ལ་འོད་ཟེར་རྡུལ་སྤོང་ཞེས་བྱ་ཡོད། །གང་གིས་མིང་འཛིན་མུན་པ་མེད་པར་འགྱུར། །ང་ལ་འོད་ཟེར་སྲེད་པ་མེད་པ་ཡོད། །གང་གིས་མིང་འཛིན་རྟེན་དག་སྤོང་བར་འགྱུར། །ང་ལ་འོད་ཟེར་མཆོག་རྒྱལ་ཞེས་བྱ་ཡོད། །གང་གིས་མིང་འཛིན་ཕ་རོལ་སྨྲ་བ་གནོན། །ང་ལ་འོད་ཟེར་དར་ལ་བབ་པ་ཡོད། །གང་གིས་མིང་འཛིན་སྤྱོད་པ་དྲུག་འགྲུབ་འགྱུར། །ང་ལ་འོད་ཟེར་མཆོག་བཙུན་ཞེས་བྱ་ཡོད། །གང་གིས་མིང་འཛིན་ཤེས་པ་ཐོགས་མེད་འགྱུར། །ང་ལ་འོད་ཟེར་མྱུར་བ་ཞེས་བྱ་ཡོད། །གང་གིས་མིང་འཛིན་དགེ་སློང་མཆོག་འགྲུབ་འགྱུར། །ང་ལ་འོད་ཟེར་མཚན་ལྡན་ཞེས་བྱ་ཡོད། །གང་གིས་མིང་འཛིན་ཆོས་ལྷ་རྟོགས་པར་འགྱུར། །ང་ལ་འོད་ཟེར་མཚན་མ་མེད་པ་ཡོད། །གང་གིས་མིང་འཛིན་ང་རྒྱལ་སྤོང་བར་འགྱུར། །ང་ 331a ༄#། །ལ་འོད་ཟེར་སྐྱེ་མེད་ཅེས་བྱ་ཡོད། །གང་གིས་མིང་འཛིན་ཐོབ་མེད་རྙེད་པར་འགྱུར། །ང་ལ་འོད་ཟེར་སངས་རྒྱས་དྲན་པ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །སངས་རྒྱས་མང་ལ་སྤྱོད་པ་རྣམས་བསྒྲུབས་པས། །འདི་ལྟ་བུ་ཡི་འོད་ཟེར་གྲུབ་པ་ཡིན། །སངས་རྒྱས་སྐུ་ལས་བྱུང་བའི་འོད་ཟེར་རྣམས། ། རྡུལ་ཕྲན་གྲངས་ནི་བརྒྱ་སྟོང་བྱེ་སྙེད་མངའ། །དེ་བཞིན་ཞིང་ནི་ཚད་མེད་བྱེ་སྙེད་མངའ། །དེ་ཡི་གྲངས་ནི་རྒྱ་མཚོའི་བྱེ་མ་སྙེད། །རྡུལ་དེ་སྙེད་ཀྱི་འོད་ཟེར་རྣམས་ཀྱང་ནི། །སོ་སོ་ལ་ཡང་འཁོར་ནི་མང་བ་ཡོད། །འོད་ཟེར་དེ་ནི་སངས་རྒྱས་མེད་ཞིང་དུ། །དེ་བཞིན་གཤེགས་པའི་རྣམ་དག་སྐུར་སྤྲུལ་ནས། །ཤིན་ཏུ་ཟབ་མོའི་ཆོས་ནི་སྟོན་མཛད་པས།། སེམས་ཅན་ཐམས་ཅད་བཟོད་ལ་རབ་ཏུ་འགོད། །ང་ལ་འོད་ཟེར་སངས་རྒྱས་ཞེས་བྱ་ཡོད། །སེམས་ཅན་སངས་རྒྱས་ལམ་ལ་གནས་པར་མཛད། །ང་ལ་འོད་ཟེར་ཆོས་ཞེས་བྱ་བ་ཡོད། །ཤིན་ཏུ་རྣམ་དག་གསལ་བྱེད་དྲི་མ་མེད། །ང་ལ་འོད་ཟེར་དགེ་འདུན་ཞེས་བྱ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །ང་ལ་འོད་ཟེར་རྣམ་དག་ཅེས་བྱ་ཡོད། །འོད་ཟེར་དེ་ནི་ཁྱད་འཕགས་རྙེད་པར་དགའ། །ང་ལ་འོད་ཟེར་པདྨ་ཞེས་བྱ་ཡོད། །སེམས་ཅན་ཕན་འདོགས་ཡོངས་སུ་སྨིན་པར་བྱེད། །ང་ 331b ལ་འོད་ཟེར་ཚངས་པ་ཞེས་བྱ་ཡོད། །ཁ་ཅིག་བརྒྱ་བྱིན་ཡང་ན་ལྷ་ཞེས་བྱ། །ཟླ་བ་ཀླུ་དང་གནོད་སྦྱིན་ཞེས་ཀྱང་བྱ། །ལྷ་མ་ཡིན་དང་ནམ་མཁའ་ལྡིང་ཞེས་བྱ། །ཁ་ཅིག་རྒྱལ་པོ་བུད་མེད་ཅེས་ཀྱང་བྱ། །ཁ་ཅིག་བུ་མོ་ཁ་ཅིག་ཁྱེའུ་ཞེས། །དེ་ལྟར་འོད་ཟེར་སྣ་ཚོགས་མང་པོ་རྣམས། །སོ་སོར་དགེ་ཆོས་དག་གིས་སྐལ་མཚུངས་འདུལ། །འཁོར་ནི་ཚད་མེད་བྱེ་བ་སྙེད་དག་ཀྱང ། །ཐམས་ཅད་བྱང་ཆུབ་ཡོངས་སུ་སྨིན་པར་བྱེད། །ང་ལ་འོད་ཟེར་ཤེས་རབ་ཅེས་བྱ་ཡོད། །ཁ་ཅིག་ཚུལ་ཁྲིམས་ཁ་ཅིག་མིང་བྱམས་པ། །ཁ་ཅིག་སྙིང་རྗེ་དགའ་དང་སྒྲོན་ཞེས་བྱ། །ཁ་ཅིག་བྱུག་སྤོས་ཁ་ཅིག་རོལ་མོའི་སྒྲ། །འདི་ལྟ་བུ་ལ་སོགས་པའི་འོད་ཟེར་རྣམས། །སྔོན་གྱི་སྤྱོད་པའི་རྗེས་སུ་མཐུན་པ་ནི། །སྐྱེ་རྒུའི་རྣམ་པ་ཚད་མེད་ཡོངས་བསྡུས་པས། །དེས་ན་འོད་ཟེར་དེ་དག་རྫོགས་པ་ཡིན། །ང་ལ་འོད་ཟེར་གཙོ་བོ་ཞེས་བྱ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །སངས་རྒྱས་བསྟན་པ་རྣམས་ལ་རྟག་གུས་པས། །དེས་ན་འོད་ཟེར་འདི་ནི་རྫོགས་པ་ཡིན། །སངས་རྒྱས་སྤྱན་གྱིས་སེམས་ཅན་གྲངས་གཟིགས་ནས། །སྤུ་ཁུང་ཀུན་ནས་འོད་ཟེར་སྣ་ཚོགས་གཏོང ། །འོད་ཟེར་མང་པོ་དེ་དག་རེ་རེ་ཡང ། །སོ་སོར་འཁོར་མང་དག་གིས་རབ་ཏུ་བསྐོར། །སེམས་ཅན་རྣམས་ཀྱི་མོས་པ་ཇི་བཞིན་དུ། །སངས་རྒྱས་འོད་ཟེར་གཏོང་ཞིང་སྨིན་པར་ 332a ༄#། །མཛད། །གང་གིས་འོད་ཟེར་བསྟན་པ་འདི་ཐོས་ནས། །རབ་ཏུ་དགའ་ཞིང་མོས་པར་གང་བྱེད་པ། །དེ་སྔོན་སངས་རྒྱས་མང་པོ་དག་ལས་ནི། །མདོ་སྡེ་འདི་ནི་ཐོས་པར་གྱུར་པ་ཡིན། །ང་ལ་འོད་ཟེར་ཁྱད་པར་འཕགས་པ་ཡོད། །འཁོར་ནི་བྱེ་བ་བརྒྱད་ཅུ་གྲངས་སྙེད་མོད། །སྔོན་གྱི་སངས་རྒྱས་དག་ལ་ཚིགས་བཅད་གཅིག། བསྔགས་པས་དེ་ཕྱིར་འོད་ཟེར་འདི་གྲུབ་བོ། །ང་ལ་འོད་ཟེར་མྱ་ངན་མེད་པ་ཡོད། །འཁོར་ནི་ཁྲག་ཁྲིག་བརྒྱད་ཅུ་སྙེད་ཡོད་དོ། །དེ་བཞིན་གཤེགས་པའི་བསྟན་པ་གཅིག་བཟུང་བས། །དེ་ཕྱིར་འོད་ཟེར་འདི་ནི་གྲུབ་པ་ཡིན། །ང་ལ་འོད་ཟེར་རྣམ་དག་མཆོག་ཡོད་དེ། །འཁོར་ནི་བྱེ་བ་བརྒྱད་ཅུའི་གྲངས་སྙེད་ཡོད། །ཏིང་འཛིན་གཅིག་ནི་ཡོངས་སུ་བཟུང་བས་ན། །དེ་ཕྱིར་འོད་ཟེར་འདི་ནི་གྲུབ་པ་ཡིན། །འདས་པའི་དུས་ཀྱི་སངས་རྒྱས་མཚན། །ཁྱད་པར་འཕགས་པ་ཞེས་བྱ་བྱུང ། །སངས་རྒྱས་དེ་ནི་འཇིག་རྟེན་ན། །སྐུ་ཚེའི་ཚད་ནི་མེད་པར་བཞུགས། །དང་པོ་མངོན་པར་སངས་རྒྱས་ཚེ། །ཆོས་བསྟན་འཁོར་དུ་འདུས་པ་ཡི། །གྲངས་ནི་ཁྲག་ཁྲིག་བརྒྱད་ཅུ་སྙེད། །དེ་ཉིད་དུ་ནི་འདུས་པར་གྱུར། །དེ་ཡི་ཚེ་ན་འཛམ་བུ་ཡི། །གླིང་ཆེན་དག་ནི་འདི་དག་ཏུ། །ཡུལ་གྱི་རྒྱལ་པོ་དེ་ཡི་མིང ། །སྒྲ་ལ་མོས་ཞེས་བྱ་བ་བྱུང ། །རྒྱལ་པོ་ཆེན་པོ་དེ་ལ་ནི། །བུ་ཕོ་དག་ནི་ལྔ་ 332b བརྒྱ་ཡོད། །བྱད་བཞིན་དག་ནི་སྡུག་མཛེས་པས། །མཐོང་བ་དག་ནི་དགའ་བར་འགྱུར། །དེ་ཡི་ཚེ་ན་རྒྱལ་པོའི་ཁབ། །གཟི་བྱིན་རང་དབང་རབ་ལྡན་ཞིང ། །དཀོན་མཆོག་དག་ནི་གསུམ་པོ་ལ། །ཤིན་དུ་དད་པ་སྐྱེས་པར་གྱུར། །རྒྱལ་པོ་དེ་ལ་སྐྱེད་མོས་ཚལ། །མཆོག་ཏུ་གྱུར་བ་ཇི་སྙེད་པ། །དེ་དག་ཐམས་ཅད་གུས་པས་ནི། །བཅོམ་ལྡན་དེ་ལ་རབ་ཏུ་ཕུལ། །སྐྱེད་མོས་ཚལ་ནི་དེ་དག་ཏུ། །འཆག་ས་དག་ནི་ཇི་སྙེད་པ། །དེ་དག་ཐམས་ཅད་ཀུན་ཏུ་ནི། །ལྗོན་ཤིང་ཙམྤ་ཀ་དག་དང ། །ལྗོན་ཤིང་ནྱ་གྲོ་དྷ་དང ། །ལྗོན་ཤིང་ཀིངྴུ་ཀ་དང་ནི། །ལྗོན་ཤིང་ཨུ་དུམ་ཝ་ར་དང ། །ལྗོན་ཤིང་པ་ལ་པ་ཏྲ་དང ། །ལྗོན་ཤིང་ཤི་རི་ཤ་དག་དང ། །ལྗོན་ཤིང་མྱ་ངན་འཚང་ལ་སོགས། །དེ་དག་གྲངས་ནི་སོ་སོར་ཡང ། །བྱེ་བ་ཕྲག་ནི་བརྒྱད་ཅུ་ཡོད། །ལྗོན་ཤིང་མང་པོ་དེ་དག་ཀྱང ། །དབྱར་དང་དགུན་ནི་འདྲ་བར་ཡང ། །མེ་ཏོག་འབྲས་བུ་ཡལ་ག་དག་།ཁ་དོག་དག་ནི་གསལ་ཞིང་རྒྱས། །དྲི་མཆོག་དམ་པ་རབ་བྱུང་ཞིང ། །དེ་བཞིན་གཤེགས་པའི་སྐུ་ལ་ཕུལ། །དགེ་སློང་དག་ནི་ཇི་སྙེད་པ། །ལུས་ཀྱི་ཁ་དོག་གསེར་དང་འདྲ། །དེ་དག་ཐམས་ཅད་ཀུན་ཀྱང་ནི། །ལྗོན་ཤིང་དག་ནི་དེ་དྲུང་དུ། །འདུག་ནས་རབ་ཏུ་བརྩོན་པས་ན། །གཟུངས་ནི་རབ་ཏུ་ཐོབ་པར་གྱུར། །དེ་ཚེ་དེ་བཞིན་གཤེགས་པ་དེ། །རྒྱལ་པོ་ཡབ་དང་སྲས་རྣམས་དང ། །གཞན་ཡང་ 333a ༄#། །འཁོར་ནི་མང་པོ་ལ། །ཤིན་ཏུ་ཐུགས་ནི་བརྩེ་བའི་ཕྱིར། །རྣམ་པར་ངེས་པའི་འོད་ཟེར་མདོ། །དེ་དག་ལ་ནི་རབ་ཏུ་བསྟན། །རྒྱལ་པོ་དེས་ནི་ཐོས་གྱུར་ནས། །སེམས་ནི་རབ་ཏུ་དགའ་བར་གྱུར། །ཚིགས་སུ་བཅད་པ་ཚད་མེད་པས། །དེ་བཞིན་གཤེགས་པའི་བསྔགས་པ་བརྗོད། །གཞན་ཡང་རྒྱལ་པོ་ཆེན་པོ་དེས།། རིན་པོ་ཆེ་ཡི་གདུགས་དམ་པ། །བྱེ་བ་ཕྲག་ནི་བརྒྱད་ཅུ་སྙེད། །བཅོམ་ལྡན་དེ་ལ་རབ་ཏུ་ཕུལ། །རིན་ཆེན་གདུགས་ནི་རེ་རེ་ལ། །ཡིད་བཞིན་ནོར་བུའི་དྲ་བ་དག་།མཐའ་མ་འཁོར་བར་རབ་ཏུ་བརྒྱན། །ཡིད་བཞིན་ནོར་བུ་རིན་པོ་ཆེ། །དེ་དག་རེ་རེའི་རིན་ཐང་ཡང ། །འཛམ་བུའི་གསེར་ནི་བཙོ་མ་དག་།སྲང་ནི་བྱེ་བ་བརྒྱད་ཅུ་རི། །རིན་ཆེན་གདུགས་ནི་རེ་རེ་ཡང ། །ཡིད་བཞིན་ནོར་བུ་རིན་པོ་ཆེ། །བྱེ་བ་ཕྲག་ནི་བརྒྱད་ཅུ་སྙེད། །གྲང་བ་དག་ཀྱང་བྱས་པར་གྱུར། །ཡིད་བཞིན་རིན་ཆེན་དེ་དག་ཀྱང ། །ཁ་དོག་དག་ནི་རབ་གསལ་བས། །ཉིན་མཚན་དག་ནི་མེད་པར་ཡང ། །རྟག་ཏུ་འོད་ཟེར་རབ་ཏུ་གཏོང ། །འོད་ཟེར་དེ་དག་རེ་རེས་ཀྱང ། །དཔག་ཚད་བརྒྱ་ནི་སྣང་བར་བྱེད། །འོད་ཟེར་དེ་དག་རབ་གསལ་བས། །ཉི་ཟླ་དག་ནི་ཟིལ་གྱིས་གནོན། །གཞན་ཡང་རིན་ཆེན་གདུགས་དེ་དག་།སེངྒེ་རིན་ཆེན་ཆུན་འཕྱང་ནི། །བྱེ་བ་ཕྲག་ནི་བརྒྱད་ཅུ་དང ། །གསེར་སྐུད་ 333b རིན་ཆེན་ཕྲེང་བ་ཡང ། །བྱེ་བ་ཕྲག་ནི་བརྒྱད་ཅུ་དག་།ངོས་བཞི་དག་ནི་རབ་ཏུ་བརྒྱན། །གཞན་ཡང་རིན་ཆེན་དམ་པ་ནི། །འདི་ལྟར་རྣམ་པ་སྣ་ཚོགས་ཀྱིས། །མུ་ཏིག་རིན་ཆེན་དྲ་བ་དག་།སྤེལ་བ་དག་གིས་རྣམ་པར་བརྒྱན། །འདི་ལྟ་བུ་ཡི་གདུགས་དག་གིས། །སྐྱེད་མོས་ཚལ་ནི་ཀུན་ཏུ་གཡོགས། །དེ་ཡི་སྟེང་དུ་གཞན་ཡང་ནི། །པདྨ་སུ་མན་ད་དང་ནི། །པདྨ་ཨ་ཏི་མུཀྟ་ཀ་།བཏང་བཟུང་ཞེས་ནི་བྱ་བ་དང ། །པདྨ་ཨུ་དུམ་ཝ་ར་དང ། །པདྨ་སྔོན་པོ་ལ་སོགས་དང ། །དེ་བཞིན་རྣམ་པ་སྣ་ཚོགས་ཀྱི། །པདྨའི་གདུགས་ནི་ཚད་མེད་པ། །རེ་རེ་ཐམས་ཅད་ཀུན་ཀྱང་ནི། །རིན་ཆེན་དྲ་བ་འཚམ་པར་བྱས། །གཞན་ཡང་གསེར་གྱི་སྐུད་པ་ལས། །བྱས་པའི་གོས་བཟང་དག་གིས་ནི། །བླ་རེ་དག་ཏུ་རབ་བྱས་ནས། །དེ་ཡི་སྟེང་དུ་ཁྱབ་པར་གཡོགས། །གཞན་ཡང་ཙནྡན་རིན་ཆེན་ཁྲི། །གསེར་དག་ལས་ནི་རྐང་བྱས་པ། །དེ་ཡི་གྲངས་ཀྱང་བྱེ་བ་ཕྲག་།བརྒྱད་ཅུ་སྙེད་ནི་རབ་ཏུ་བཤམས། །རིན་ཆེན་ཁྲི་ནི་དེ་དག་ལ། །ཟབ་དར་དག་ལས་བྱས་པ་ཡི། །སྟན་ནི་བྱེ་བ་ཕྲག་བརྒྱད་ཅུ། །དེ་ཡི་སྟེང་དུ་རབ་བརྒྱན་ཏོ། །དེ་ཡི་ཚེ་ན་སེམས་ཅན་གྱི། ། རྣམ་པ་དག་ནི་ཇི་སྙེད་པ། །སྲིད་པའི་རྩེ་མོ་མན་ཆད་ཀྱང ། །ཐམས་ཅད་དེར་ནི་འདུས་གྱུར་ནས། །དེ་བཞིན་གཤེགས་པ་དེ་ལས་ནི། །མདོ་སྡེ་འདི་ནི་རབ་ཏུ་ཉན། །ལྷ་ 334a ༄#། །དང་ཀླུ་དང་གནོད་སྦྱིན་དང ། །དྲི་ཟ་ཡི་ནི་རྒྱལ་བོ་དང ། །ལྟོ་འཕྱེ་ཆེན་པོ་ལྷ་མ་ཡིན། །དེ་དག་མདོ་སྡེ་འདི་ཐོས་ནས། །རབ་ཏུ་དགའ་བའི་སེམས་བསྐྱེད་ནས། །ཚིགས་སུ་བཅད་པ་བརྒྱད་སྟོང་གིས། །དེ་བཞིན་གཤེགས་པའི་བསྔགས་བརྗོད་ནས། །དེ་དག་ཐམས་ཅད་ཀུན་གྱིས་ཀྱང ། །བྱང་ཆུབ་ཆེན་པོར་སྨོན་ལམ་བཏབ། །ལྷ་དང་ཀླུ་དང་ལྷ་མ་ཡིན། །དེ་ལ་སོགས་པ་ཐམས་ཅད་ཀྱང ། །ཡོངས་སུ་དང་བའི་སེམས་ཀྱིས་ནི། །མེ་ཏོག་མནྡཱ་ར་བ་དང ། །མུ་ཏིག་རིན་ཆེན་ལ་སོགས་པའི། །ཆར་ཕབ་མཆོད་པ་རབ་ཏུ་བྱས། །དེ་ཡི་ཚེ་ན་གཞན་ཡང་ནི། །ལྷ་ཆེན་མཐུ་དང་གཟི་ལྡན་པ། །བྱེ་བ་ཕྲག་ནི་བརྒྱད་ཅུ་སྙེད། །མདོ་སྡེ་འདི་ནི་ཐོས་པས་ན། །རབ་ཏུ་དགའ་བའི་སེམས་བསྐྱེད་ནས། །བྱང་ཆུབ་ཆེན་\?\་པོར་སྨོན་ལམ་བཏབ། །མ་འོངས་པ་ཡི་དུས་ཀྱི་ཚེ། །འོད་ཟེར་འདི་འདྲ་ཐོབ་པར་ཤོག་།དེ་བཞིན་གཤེགས་པས་དེ་ཡི་ཚེ། །དེ་ཡི་བསམ་པ་ཐུགས་ཆུད་པས། །མ་འོངས་སངས་རྒྱས་འགྲུབ་འགྱུར་ཞེས། །བྱང་ཆུབ་ཏུ་ནི་ལུང་ཡང་བསྟན། །དེ་ཡི་ཚེ་ན་གཞན་ཡང་ནི། །བརྒྱ་བྱིན་ལྷ་ཡི་དབང་པོ་དང ། །ཚངས་པ་འཁོར་དང་བཅས་པ་ཡང ། །བྱེ་བ་ཕྲག་ནི་བརྒྱད་ཅུ་སྙེད། །འོད་ཟེར་རབ་ཏུ་སྟོན་པ་ཡི། །མདོ་སྡེ་འདི་ནི་ཐོས་པས་ན། །རབ་ 334b ཏུ་དགའ་བའི་སེམས་བསྐྱེད་ནས། །བྱང་ཆུབ་ཏུ་ནི་སེམས་ཀྱང་བསྐྱེད། །མ་འོངས་སངས་རྒྱས་འགྲུབ་འགྱུར་ཞེས། །བྱང་ཆུབ་ཏུ་ནི་ལུང་ཡང་བསྟན། །དེ་ཡི་ཚེ་ན་གཞན་ཡང་ནི། །ཀླུ་ནི་བྱེ་བ་ཁྲག་ཁྲིག་ཕྲག་།བརྒྱད་ཅུ་སྙེད་ནི་འདུས་པ་དག་།མདོ་སྡེ་འདི་ནི་ཐོས་པས་ན། །བྱང་ཆུབ་ཏུ་ནི་སེམས་བསྐྱེད་པས། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། །གསེར་འདབ་རྒྱལ་པོ་བྱེ་བ་ཕྲག་།བརྒྱད་ཅུ་སྙེད་ནི་འདུས་པ་དག་།མདོ་སྡེ་འདི་ནི་ཐོས་པས་ན། །སྡོམ་པ་ལྔ་ནི་རབ་བསྲུངས་ཏེ། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། །དྲི་ཟའི་རྒྱལ་པོ་བྱེ་བ་ཕྲག་།བརྒྱད་ཅུ་སྙེད་ནི་འདུས་པ་དག་།མདོ་སྡེ་འདི་ནི་ཐོས་པས་ན། །རོལ་མོ་བརྒྱ་སྟོང་རྣམས་བྱས་ཏེ། །སྒྲ་སྙན་དག་ནི་རབ་ཕྱུང་ནས། །བཅོམ་ལྡན་དེ་ལ་མཆོད་བྱས་པས། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། །གནོད་སྦྱིན་རྒྱལ་པོ་ཁྲག་ཁྲིག་སྙེད། །མདོ་སྡེ་འདི་ནི་ཐོས་པས་ན། །སངས་རྒྱས་ཡེ་ཤེས་དག་ལ་ནི། །ཤིན་ཏུ་དང་བ་སྐྱེས་པར་གྱུར། །དེ་དག་ཐམས་ཅད་ཀུན་གྱིས་ཀྱང ། །བྱང་ཆུབ་ལུང་བསྟན་ཐོབ་པར་གྱུར། །ཟླ་འོད་འདི་ལྟར་ཤེས་པར་གྱིས། །དེ་ཚེ་རྒྱལ་པོ་སྒྲ་མོས་པས། །མཆོད་པ་རྣམ་པ་སྣ་ཚོགས་ཀྱིས། །བཅོམ་ལྡན་དེ་ལ་མཆོད་བྱས་པ། །གཞན་ཡིན་སྙམ་དུ་མི་ 335a ༄#། །བལྟ་སྟེ། །དེ་ནི་ཁྱོད་བདག་ཉིད་ཡིན་ནོ། །ཁྱོད་ནི་སྔོན་འདས་དུས་ཀྱི་ཚེ། །མདོ་སྡེ་འདི་ནི་ཐོས་པའི་རྒྱུས། །དེ་ལྟ་བས་ན་དེང་འདིར་ཡང ། །འདི་ཉིད་སླར་ཡང་ཞུས་པ་ཡིན། །ང་ནི་མྱ་ངན་འདས་པའི་འོག་།གང་ཡང་རུང་བ་སུ་ཞིག་གིས། །དམ་པའི་ཆོས་ཀྱི་འཁོར་ལ་དག་།རྣམ་པར་འཇིག་པའི་དུས་ཀྱི་ཚེ། ། ཆོས་ཀྱི་བསྟན་པ་འདི་དག་ལ། །དང་བའི་སེམས་ནི་གང་བསྐྱེད་པ། །འདི་ལྟ་བུ་ཡི་མདོ་སྡེ་དག་།རྒྱ་ཆེར་ཡང་དག་སྟོན་པར་ནུས། །མ་འོངས་མདོ་སྡེ་འདི་ནི་གང་སྟོན་པ། ། དེས་ནི་ང་ཡི་ཆོས་འཛིན་སྲུང་བར་བྱེད། །དེ་ནི་འགྲོ་མང་འདེང་པའི་དེད་དཔོན་འདྲ། །རིན་ཆེན་གཏེར་འཛིན་སྲུང་བ་ཞེས་ཀྱང་བྱ། །མ་འོངས་དུས་ཚེ་མདོ་སྡེ་གང་ཐོས་ནས། ། སྐད་ཅིག་ཙམ་དུ་མོས་པ་སྐྱེད་བྱེད་པ། །དེ་ནི་སངས་རྒྱས་བྱིན་གྱིས་བརླབས་པ་ཡིན། །འཇམ་དཔལ་བྱིན་གྱིས་བརླབས་པར་རིག་བར་བྱ། །དེས་ནི་སངས་རྒྱས་མང་པོ་མཐོང་འགྱུར་པས། །གསང་བའི་ཆོས་གཏད་ཤེས་རབ་རྣོ་བར་འགྱུར། །སེམས་ཅན་གང་དག་སེམས་དྲང་མཉེན་དེས་ཤིང ། །རྟག་ཏུ་སངས་རྒྱས་རིམ་གྲོ་བྱེད་ལ་བརྩོན། ། བདག་མེད་སྒོམ་ཞིང་བྱམས་དང་བཟོད་སྐྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་རྟག་ཏུ་མི་དགེའི་སེམས་འཆང་ཞིང ། །རྙེད་ལ་གདུ་ཞིང་ཆོག་མི་ 335b ཤེས་པ་དང ། །རབ་དབེན་རྣམས་ལ་མོས་པར་མི་འགྱུར་བ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་དེ་བཞིན་གཤེགས་པ་རྣམས་མཆོད་དང ། །དམ་ཆོས་ཟབ་མོ་ལེགས་པར་རྟོགས་པ་དང ། །སངས་རྒྱས་ཡང་དག་ཡེ་ཤེས་ཡིད་ཆེས་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་སེམས་གཡེང་དང་བའི་སེམས་མེད་ཅིང ། །རྟག་ཏུ་སྲོག་གཅོད་འདུལ་བར་རབ་དཀའ་དང ། །འདོད་པའི་ཡུལ་རྣམས་ཀྱི་ནི་བྲན་བྱེད་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་རྟག་ཏུ་དགོན་གནས་རབ་མོས་ཤིང ། །གཅིག་བུ་དབེན་པར་འདུག་ཅིང་སེམས་ཞི་དང ། །རྙེད་དང ། གཉེན་ལ་མངོན་པར་ཞེན་མེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་གྲོགས་ངན་དག་གི་རྗེས་འབྲང་ཞིང ། །བདག་དང་གཞན་གྱི་དགེ་བ་འཇིག་བྱེད་དང ། །ཚུལ་ཁྲིམས་ཏིང་འཛིན་དག་ནི་ཆེར་ཉམས་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་ཡིད་མོས་ཤིན་ཏུ་རྣམ་དག་ཅིང ། །རྟག་ཏུ་ཤེས་རབ་ཆོས་རྣམས་རབ་འབྱེད་དང ། །དགེ་བའི་བཤེས་གཉེན་དག་གིས་རབ་བསྲུངས་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་གཉེན་གྱི་ཁྱིམ་ལ་རབ་ཆགས་ཤིང ། །མེ་ཏོག་འབྲས་བུ་བྱིན་ན་དགའ་བྱེད་དང ། །སེམས་ལ་དྲང་པོ་མེད་ཅིང་སྒྱུ་འཆང་བ། །དེས་ནི་མདོ་སྡེ་འདི་ལ་མོས་ 336a ༄#། །མི་འགྱུར། །གང་ཞིག་རྟག་ཏུ་སངས་རྒྱས་དྲིན་དྲན་ཞིང ། །དགེ་བའི་རྩ་བ་མཆོག་ལ་མོས་པ་དང ། །བྱང་ཆུབ་བསྔོ་ཞིང་གཡོ་སྒྱུ་མེད་གྱུར་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་ཆུང་མ་བུ་མོར་སྲེད་ཆགས་ཤིང ། །གོས་མཆོག་སྣ་ཚོགས་དག་གིས་རབ་བརྒྱན་ནས། །རྟག་ཏུ་བདེ་དང་ལྷན་ཅིག་རྩེ་སྨོན་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་སེམས་ཟབ་གནས་བ་མེད་གྱུར་ཅིང ། །འདོད་པའི་ཡུལ་གྱིས་གོས་པ་མེད་པ་དང ། ། ཟས་སྐོམ་དག་གིས་གཡོ་སྒྱུ་མི་སྐྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་སྐྱེ་རྒུ་རྣམས་ལ་འདི་སྐད་དུ། །འདོད་ཆགས་སྦྱད་ཀྱང་ཉེས་མེད་གང་ཟེར་བ། །དུས་གསུམ་སངས་རྒྱས་རྣམས་ལ་སྐུར་བ་ཡིན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་ཡིད་ཆེས་རྟག་ཏུ་རབ་བརྟན་ཞིང ། །ནན་ཏན་བསྐྱེད་ནས་ཆོས་རྣམས་ཚོལ་བ་ལ། །སྐྱེ་བ་མེད་ཅིང་བརྙས་པར་མི་བྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་ཆུང་མ་བུ་མོར་མངོན་ཞེན་ཅིང ། ། རྟག་ཏུ་འདོད་པའི་ཡུལ་ནི་རྗེས་དྲན་དང ། །ཤེས་རབ་མི་སྒོམ་རྒྱ་ཆེར་ཕན་མི་འདོགས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་རི་དང་ནགས་ཁྲོད་རབ་ 336b གནས་ཤིང ། །ཤེས་རབ་བསྒོམས་ནས་ཤིན་ཏུ་དགའ་འགྱུར་དང ། །འཚོ་བའི་ཡོ་བྱད་དག་ལ་འདོད་མེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་སྔོན་དང་ཕྱི་མའི་མཐའ། །རྟག་ཏུ་རྨོངས་དང་མི་རྟོག་གང་ཡིན་པ། །དེ་ནི་གཏི་མུག་བདུད་ཀྱིས་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་སྔོན་དང་ཕྱི་མའི་མཐའ། །རྟག་ཏུ་རྟོགས་ཤིང་རྨོངས་པ་མེད་གྱུར་པ། །དེ་ནི་བདུད་ཀྱི་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་མཐའ་ཡོད་དང་མེད་པ་ལ། །རྟག་ཏུ་རྨོངས་ནས་ཁོང་དུ་མ་ཆུད་པ། །དེ་ནི་གཏི་མུག་བདུད་ཀྱིས་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་མཐའ་ཡོད་དང་མེད་པ་དག་།རྟག་ཏུ་རྟོགས་ཤིང་རྨོངས་པ་མེད་གྱུར་པ། །དེས་ནི་བདུད་གྱི་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གནས་འཇིག་པའི་མཚན་ཉིད་ལ། །རྟག་ཏུ་རྨོངས་ཤིང་ཁོང་དུ་མི་ཆུད་པ། །དེ་ནི་གཏི་མུག་བདུད་ཀྱི་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གནས་འཇིག་པའི་མཚན་ཉིད་དག་།རྟག་ཏུ་ཁོང་དུ་ཆུད་ཅིང་རྨོངས་མེད་པ། །དེ་ནི་བདུད་ཀྱིས་བཅིངས་ལས་གྲོལ་བས་ན། ། 337a ༄#། །དེས་ནི་མདོ་སྡེ་འདི་ལ་མོས་པར་འགྱུར། །རྣ་བ་སྣ་དང་ལྕེ་ལུས་ཡིད་དག་དང ། །གཟུགས་སྒྲ་དྲི་རོ་རེག་བྱ་ཆོས་རྣམས་དང ། །ས་ཆུ་མེ་རླུང་ངོ་བོ་ཉིད་དག་དང ། །དངོས་པོ་སེམས་ཅན་སྡུག་བསྔལ་ཕུང་པོ་དང ། །ཁམས་དང་འཇིག་རྟེན་སྐྱེ་སྒྲ་མི་བདེན་དང ། །འདོད་ཆགས་ཞེ་སྡང་གཏི་མུག་ང་རྒྱལ་སྲེད། ། འཆབ་རྒྱགས་སེར་སྣ་ཕྲག་དོག་གཡོ་སྒྱུ་དང ། །ཁྲོ་སོགས་པ་ཡང་དེ་བཞིན་རིག་པར་གྱིས། །གང་ཞིག་མིག་ཟད་མཐའ་ནི་དེ་དག་ལ། །རྟག་ཏུ་རྨོངས་ཤིང་ཁོང་དུ་མི་ཆུད་པ། །དེ་ནི་སྐྱེ་བའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་མཐའ་ནི་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། ། དེ་ནི་སྐྱེ་བའི་སྤྱོད་དང་བྲལ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་འཇིག་པ་དེ་དག་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་འཇིག་པ་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་རབ་དབེན་དེ་དག་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བའི་ 337b སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་རི་རབ་དབེན་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་འགྲོ་འོང་མེད་པ་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བའི་སྤྱོད་པར་ལྟུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་འགྲོ་འོང་མེད་པ་དག་།རྟག་ཏུ་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ལ་བདག་མེད་མ་རྟོགས་ནས། །མིག་ཟད་ངོ་བོ་ཉིད་ལ་རྟག་རྨོངས་པ། །དེ་ནི་སྐྱེ་བོའི་སྤྱོད་པར་ལྟུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ལ་བདག་མེད་རབ་རྟོགས་ནས། །མིག་ཟད་ངོ་བོ་རྟག་ཏུ་རྟོགས་གྱུར་པ། །དེ་ནི་སྐྱེ་བའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ལ་བདག་མེད་མ་རྟོགས་ནས། །བཟོད་པའི་གནས་ལ་རྟག་ཏུ་རྨོངས་གྱུར་པ། །དེ་ནི་སྐྱེ་བའི་སྤྱོད་པར་ལྟུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ལ་བདག་མེད་རབ་རྟོགས་ནས། །བཟོད་པའི་གནས་ནི་རྟག་ཏུ་རྟོགས་གྱུར་པ། །དེ་ནི་སྐྱེ་བའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་ 338a ༄#། །པར་འགྱུར། །གང་ཞིག་མིག་ཟང་ངོ་བོ་མ་རྟོགས་པ། །དེ་ནི་མི་གནས་ཚུལ་ཁྲིམས་སྒྲུབ་མི་ནུས། །མི་གནས་ཚུལ་ཁྲིམས་མངོན་པར་མི་སྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེ་ནི་མི་གནས་ཚུལ་ཁྲིམས་སྒྲུབ་པར་ནུས། །མི་གནས་ཚུལ་ཁྲིམས་མངོན་པར་སྒྲུབ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེས་ནི་ཟག་མེད་ཚུལ་ཁྲིམས་སྒྲུབ་མི་ནུས། །ཟག་མེད་ཚུལ་ཁྲིམས་མངོན་པར་མི་སྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཟག་མེད་ཚུལ་ཁྲིམས་སྒྲུབ་པར་ནུས། ། ཟག་མེད་ཚུལ་ཁྲིམས་མངོན་པར་སྒྲུབ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེས་ནི་ཟག་མེད་ཤེས་རབ་སྒྲུབ་མི་ནུས། །ཟག་མེད་ཤེས་རབ་མངོན་པར་མི་སྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཟག་མེད་ཤེས་རབ་སྒྲུབ་པར་ནུས། །ཟག་མེད་ཤེས་རབ་མངོན་པར་སྒྲུབ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །མིག་སྟོང་ཉིད་ལ་ 338b རྟག་ཏུ་རྨོངས་པར་འགྱུར། །དེས་ནི་ཀུན་འཛིན་ཡེ་ཤེས་མི་སྐྱེད་པས། །མདོ་སྡེ་འདི་ལ་རབ་ཏུ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །མིག་སྟོང་ཉིད་ནི་རྟག་པར་རྟོགས་པར་འགྱུར། །དེས་ནི་ཀུན་འཛིན་ཡེ་ཤེས་རབ་སྐྱེད་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཀུན་འཛིན་ཡེ་ཤེས་སྒྲུབ་པ་ན། །བླ་མེད་མ་ཆགས་ཡེ་ཤེས་རབ་སྒྲུབ་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མདོ་སྡེ་འདི་ལ་མ་མོས་པ། །མིག་ཟད་ངོ་བོ་ཉིད་ལ་རྟག་ཏུ་རྨོངས། །དེ་ནི་ཏིང་འཛིན་རྣམས་ལས་ཉམས་པས་ན། །བླ་མེད་ཡེ་ཤེས་ཐོབ་པར་ཤིན་ཏུ་དཀའ། །གང་ཞིག་མདོ་སྡེ་འདི་ལ་རབ་མོས་ཤིང ། ། མིག་ཟད་ངོ་བོ་ཉིད་ནི་མངོན་རྟོགས་པ། །དེ་ནི་ཏིང་འཛིན་མངོན་པར་སྒྲུབ་པས་ན། །བླ་མེད་ཡེ་ཤེས་མངོན་བྱེད་དཀའ་བ་མེད། །གང་ཞིག་མིག་ཟད་ངོ་བོ་ཉིད་རྟོགས་ཤིང་།། བདག་མེད་པ་ཡི་མཚན་ཉིད་རབ་རྟོགས་པ། །དེས་ནི་རྟག་ཏུ་ཆོས་འདི་ཐོས་པས་ན། །མངོན་པར་ཡིད་ཆེས་ཐེ་ཚོམ་མེད་པ་འཐོབ། །གང་ཞིག་མིག་ཟད་ངོ་བོ་ཉིད་སེམས་ཤིང ། །ཉིན་མཚན་རབ་བརྩོན་ལེ་ལོ་མེད་གྱུར་པ། །དེས་ནི་ཀུན་འཛིན་སྤོབས་པ་མངོན་སྒྲུབས་ནས། །མདོ་སྡེ་འདི་ནི་རྟག་ཏུ་སྟོན་པར་འགྱུར། །གང་ཞིག་མདོ་ 339a ༄#། །སྡེ་འདི་ནི་སེམས་བྱེད་པ། །འོད་ཟེར་འབྱིན་པའི་ཡེ་ཤེས་རྫོགས་པར་འགྱུར། །དེས་ནི་དེ་བཞིན་གཤེགས་པ་རབ་སྟོན་ཅིང ། །མིག་སྟོང་ཉིད་ནི་རབ་ཏུ་རྟོགས་པར་འགྱུར། །གང་གིས་མཆོད་རྟེན་བརྒྱ་སྟོང་རབ་བྱས་ཤིང ། །སངས་རྒྱས་ཐམས་ཅད་མཆོད་པ་བྱས་པ་བས། །གང་ཞིག་མདོ་སྡེ་འདི་ནི་སེམས་བྱེད་ན། །འདི་ཡི་ཡོན་ཏན་དེ་བས་ཁྱད་པར་འཕགས། །གང་གིས་རོལ་མོ་བརྒྱ་སྟོང་རབ་བྱས་ནས། །དེ་བཞིན་གཤེགས་པའི་རིང་བསྲེལ་མཆོད་པ་པས། །གང་ཞིག་མདོ་སྡེ་འདི་ནི་ཐོས་གྱུར་ན། །འདི་ཡི་ཡོན་ཏན་དེ་བས་ཁྱད་པར་འཕགས། །སངས་རྒྱས་སྤྱན་གྱིས་གཟིགས་པའི་སེམས་ཅན་རྣམས། །བསྐལ་པ་དག་ནི་བྱེ་བ་ཚད་མེད་པར། །དེ་བཞིན་གཤེགས་དང་མཚུངས་པར་མཆོད་པ་བས། །མདོ་སྡེ་འདི་བཟུང་བསོད་ནམས་ཁྱད་པར་འཕགས། །གང་གིས་མདོ་སྡེ་འདི་ལས་ཚིག་བཞི་པའི།། ཚིགས་བཅད་གཅིག་ཙམ་འཛིན་ཅིང་སྟོན་བྱེད་ན། །དེ་ལ་རྒྱལ་བ་ཐུགས་རྗེ་ཆེན་པོ་ཡི། །གཙོ་ལྟར་གུས་པ་རབ་ཏུ་བསྐྱེད་པར་བྱ། །ང་ནི་འདས་པའི་བསྐལ་པ་བརྒྱ་སྟོང་དུ། །སྲིད་པ་གསུམ་དུ་འཁོར་བར་གྱུར་པའི་ཚེ། །སངས་རྒྱས་དག་ནི་ཚད་མེད་པ་རྣམས་ལ། །མདོ་སྡེ་འདི་ཡི་ཕྱིར་ནི་རིམ་གྲོ་བྱས། །རེས་འགའ་མར་མེ་བརྒྱ་ 339b སྟོང་ཚད་མེད་པ། །སྙིང་པོ་རེ་རེའི་ཚད་ཀྱང་དཔག་ཚད་ཙམ། །སྤར་ནས་མདོ་སྡེ་འདི་ལ་རང་དབང་དག། འཐོབ་པར་བྱ་ཕྱིར་འདྲེན་པ་རྣམས་ལ་མཆོད། །རེས་འགའ་མེ་ཏོག་ཙམ་པ་ཀ་དང་ནི། །སུ་མ་ན་དང་མྱ་ངན་མེད་པ་ཡི། །ཕྲེང་བ་རྒྱལ་མཚན་གདུགས་ནི་སྣ་ཚོགས་ཀྱིས། །དེ་བཞིན་གཤེགས་པའི་མཆོད་རྟེན་མཆོད་པ་བྱས། །ང་སྔོན་འཁོར་བའི་འཁོར་བར་གྱུར་པའི་ཚེ། །སློང་དུ་འོངས་པ་དག་ལ་སྦྱིན་བཏང་སྟེ། །རེས་འགའ་མེ་ཏོག་འབྲས་བུ་དག་ཀྱང་བཏང ། །རེས་འགའ་བྲམ་པ་ཁྲོན་པ་ཆུ་མིག་བཏང ། །རེས་འགའ་གླང་པོ་ཆེ་དང་བཞོན་པ་དང ། །རེས་འགའ་རིན་ཆེན་རྟ་དང་ཆུང་མ་བཏང ། །རེས་འགའ་གསེར་གྱི་ཁྲི་དང་རིན་ཆེན་གུར། །རེས་འགའ་སེ་མོ་དེ་དང་ཕྲེང་བ་བཏང ། །དེ་བཞིན་བསྐལ་པ་བརྒྱ་སྟོང་རྫོགས་པར་ནི། །མདོ་སྡེ་འདི་ཕྱིར་སེམས་ལ་སེར་སྣ་མེད།། །བམ་པོ་གཉིས་པ། ང་སྔོན་མདོ་སྡེ་འདི་ཡི་ཕྱིར། །ཚུལ་ཁྲིམས་ཡོངས་སུ་དག་པར་བསྲུངས། །ཏིང་འཛིན་ཤེས་རབ་རྟག་ཏུ་བསྒོམས། །སེམས་ཅན་རྣམས་ལ་སྦྱིན་པ་བཏང ། །ང་སྔོན་མདོ་སྡེ་འདི་ཡི་ཕྱིར། །གཏུམ་པོ་དག་གིས་བརྒྱད་བཀག་ཀྱང ། །དེ་ཚེ་ང་ནི་སྙིང་བརྩེ་བས། །དེ་ལ་གནོད་པ་ཡོང་མ་བྱས། །ང་སྔོན་མདོ་སྡེ་འདི་ཡི་ཕྱིར། །སློང་དུ་འོངས་པ་དག་ལ་ནི། །ཇི་ལྟར་མོས་བཞིན་རབ་བཏང་བས། །ཐམས་ 340a ༄#། །ཅད་རབ་ཏུ་དགའ་བར་བྱས། །ང་སྔོན་མདོ་སྡེ་འདི་ཡི་ཕྱིར། །གཞལ་མེད་ཁང་ཆེན་རྣམས་ལ་ནི། །རིན་ཆེན་དྲ་བས་རབ་བརྒྱན་ནས། །སངས་རྒྱས་རྣམས་ལ་ཡོངས་སུ་ཕུལ། །ང་སྔོན་མདོ་སྡེ་འདི་ཡི་ཕྱིར། །རིན་ཆེན་རྣམ་པ་སྣ་ཚོགས་དང ། །ཡིད་བཞིན་ནོར་བུ་རིན་པོ་ཆེས། །སངས་རྒྱས་རྣམས་ལ་མཆོད་པ་བྱས། །ང་སྔོན་མདོ་སྡེ་འདི་ཡི་ཕྱིར། །དྲིན་ཡོད་རྣམས་ནི་རྟག་དྲ་ན་བྱས། །ཐ་ན་ཚིགས་བཅད་གཅིག་ཉན་པ། །དེ་ལ་ཡང་ནི་བཀུར་སྟི་བྱས། །ང་སྔོན་མདོ་སྡེ་འདི་ཡི་ཕྱིར། །ཚུལ་ཁྲིམས་ལྡན་ལ་རབ་བཀུར་བས། །ཐ་ན་འཆག་པའི་ཚེ་ན་ཡང ། །དེ་ལ་རྟག་ཏུ་གུས་པ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །འཁོར་བ་དག་ན་འཁོར་བའི་ཚེ། །དྲི་ན་ནི་ཅུང་ཟད་ཡོད་པ་ལའང ། །དེ་ལ་རྟག་ཏུ་དྲིན་དུ་གཟོས། །ང་སྔོན་མདོ་སྡེ་འདི་ཡི་ཕྱིར། །རྙེད་པ་མ་བཙལ་ཆོས་མ་སྐུར། །ཉེ་བཤེས་སེམས་ཅན་རྣམས་ལ་ནི། །སྙིང་བརྩེ་དག་ནི་རབ་ཏུ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །མང་ཐོས་ལེགས་བཤད་ལྡན་པས་ན། །ཆོས་ལ་མངོན་པར་ཞེན་བྱེད་ཅིང ། །བཤེས་པའི་ཁྱིམ་ལ་སེར་སྣ་མེད། །ང་སྔོན་མདོ་སྡེ་འདི་ཡི་ཕྱིར། །མི་དགེའི་སེམས་ནི་སྐྱེས་གྱུར་ན། །མྱུར་བ་ཉིད་དུ་རབ་བཤགས་པས། །འཕེལ་བར་ཡང་ནི་ཡོང་མ་བྱས། །ང་སྔོན་མདོ་སྡེ་འདི་ཡི་ཕྱིར། །རྒྱལ་པོའི་ 340b བུར་ནི་གྱུར་པ་ན། །རིན་པོ་ཆེ་དང་བྱུག་སྤོས་དང ། །སྤོས་ཀྱི་ཕྱེ་མ་ཇི་སྙེད་པ། །དད་པའི་སེམས་ནི་ངས་བསྐྱེད་ནས། །སངས་རྒྱས་རྣམས་ལ་བསྔོས་ཤིང་ཕུལ། །ང་སྔོན་མདོ་སྡེ་འདི་ཡི་ཕྱིར། །ཁྲི་མོན་བཙོན་ལ་སྙིང་བརྩེ་བས། །སྡུག་བསྔལ་སྣ་ཚོགས་གང་མྱོང་བ། །ལུས་ཀྱི་སྐྱིན་པར་དང་དུ་བླངས། །ང་སྔོན་མདོ་སྡེ་འདི་ཡི་ཕྱིར། །འདོད་པའི་ཡོན་ཏན་ལྔ་སྤངས་ནས། །རྟག་ཏུ་དུས་དྲུག་དག་གི་ཚེ། །སྡོམ་པ་དག་ནི་རབ་ཏུ་བླངས། །ང་སྔོན་མདོ་སྡེ་འདི་ཡི་ཕྱིར། །རྟག་ཏུ་བཟོད་པ་རབ་བསྒོམས་པས། །ཐ་ན་ཆུང་མ་དག་ལ་ཡང ། ། འདོད་པའི་སེར་སྣ་ཡོང་མ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །དབུལ་ཕོངས་དག་ནི་ཐམས་ཅད་ཀུན། །བདེ་བ་དག་ནི་ཐོབ་བྱའི་ཕྱིར། །ནོར་དག་གིས་ནི་ཕྱུག་པོར་བྱས།། ང་སྔོན་མདོ་སྡེ་འདི་ཡི་ཕྱིར། །དགེ་སྦྱོང་དང་ནི་བྲམ་ཟེ་དང ། །སྐྱེ་རྒུ་རྣམ་པ་སྣ་ཚོགས་ཀུན། །ཐམས་ཅད་དག་ནི་རབ་ཏུ་བསྡུས། །ང་སྔོན་མདོ་སྡེ་འདི་ཡི་ཕྱིར། །ཐམས་ཅད་ཀུན་ལ་ཕན་གདགས་ཕྱིར། །རྟག་ཏུ་སྦྱིན་བདག་ཆེར་བྱས་ནས། །སློང་བ་དག་ལ་ཡོངས་སུ་བཏང ། །རེས་འགའ་མེ་ཏོག་འབྲས་བུ་དག་།གཞན་དག་གཅོད་དུ་མི་གཞུག་པར། །སེམས་ཅན་རྣམས་ལ་ཡོངས་བཏང་ཞིང ། །ཡིད་བཞིན་དུ་ནི་ཚིམ་པར་བྱས། །ང་སྔོན་སྦྱིན་པ་གཏོང་བའི་ཚེ། །སེམས་ནི་སྟག་ཏུ་སྙོམས་པས་ན། །ཚུལ་ཁྲིམས་ 341a ༄#། །ཡོན་ཏན་ལྡན་པ་དང ། །ཚུལ་ཁྲིམས་འཆལ་དང་ངོ་ཚ་མེད། །རྫུ་འཕྲུལ་ཆེན་པོ་ཐོབ་པ་ནས། །སོ་སོའི་སྐྱེ་བོའི་བར་དག་ལ། །ངོ་མཚར་སྙམ་པའི་སེམས་བསྐྱེད་ནས། །གུས་པས་ཀུན་ལ་སྦྱིན་པ་བཏང ། །ང་སྔོན་སྦྱིན་པ་གཏོང་བའི་ཚེ། །སེམས་ལ་མཐོ་དམན་མེད་པས་ན། །སྡུག་བསྔལ་འགྲོ་བ་མི་ཚོལ་ཞིང ། ། མདོ་སྡེ་འདི་ལ་རྩེ་གཅིག་མོས། །རེས་འགའ་ཡུལ་ཁམས་དག་ཏུ་ནི། །ཕྱིར་རྒོལ་ཐམས་ཅད་མེད་བྱས་ཤིང ། །ཀླུ་རྣམས་ཀུན་ནི་རབ་བཏུལ་ནས། །དུས་བཞིན་ཆར་ནི་རབ་ཏུ་ཕབ། །ཟླ་འོད་ཁྱོད་ཀྱིས་ཤེས་པར་གྱིས། །ངས་ནི་ཚེ་རབས་དཔག་མེད་ནས། །མདོ་སྡེ་འདི་ནི་གཉེར་བའི་ཕྱིར། །དཀའ་བ་རྣམས་ནི་རབ་ཏུ་སྤྱད། །བསྐལ་པ་བརྒྱ་སྟོང་སྙེད་དུ་ནི། །བརྗོད་ཀྱང་མཐར་ཐུག་མི་འགྱུར་རོ། །ཡིད་ཆེས་པ་ལ་ཁྱོད་གནས་ནས། །མ་འོངས་ཐ་མའི་དུས་ཀྱི་ཚེ། །ཡང་དག་དྲན་པའི་སེམས་བསྐྱེད་ལ། །མདོ་སྡེ་འདི་ནི་བཤད་པར་གྱིས། །ངས་ནི་སངས་རྒྱས་སྤྱན་དག་གིས། །མ་འོངས་དུས་ནི་གསལ་གཟིགས་པས། །སྤྱོད་པ་སྣ་ཚོགས་ཇི་ལྟ་བ། །ཐམས་ཅད་རབ་ཏུ་མཁྱེན་པ་ཡིན། །དགེ་སློང་དག་ནི་གང་ཞིག་གིས། །བླ་མེད་ཡེ་ཤེས་བཙལ་བའི་ཕྱིར། །ཤིན་ཏུ་དང་བའི་སེམས་ཀྱིས་ནི། །མདོ་སྡེ་འདི་ནི་གང་སྟོན་པ། །གང་ཟག་དེ་དང་ཕྱོགས་ 341b རྣམས་ཀྱང ། །ཐམས་ཅད་མ་ལུས་ཐུགས་སུ་ཆུད། །མ་འོངས་ཐ་མའི་དུས་ཀྱི་ཚེ། །མདོ་འདི་ཐོས་ནས་གང་མོས་པ། །བསམ་པ་དང་ནི་ཐབས་རྣམས་ཀྱང ། །ཐམས་ཅད་མ་ལུས་ཐུགས་སུ་ཆུད། །དམན་པ་དག་ནི་གང་ཞིག་གིས། །མདོ་སྡེ་འདི་ནི་མ་ཐོས་པས། །ཆོས་བསྟན་པ་ལ་སྐུར་འདེབས་པ། །ཐམས་ཅད་མ་ལུས་ཐུགས་སུ་ཆུད། །དགེ་སློང་རྣམས་ནི་གང་ཞིག་དང ། །དགེ་སློང་མ་ནི་གང་ཞིག་གིས། །མདོ་སྡེ་འདི་ནི་ཐོས་གྱུར་ནས། །ཤིན་ཏུ་གདུང་བས་གདུང་བྱེད་པ། །དེ་ཀུན་ངས་ནི་ལུང་བསྟན་ནས། །རྒྱལ་བ་གཙོ་བོ་མཐོང་བར་འགྱུར། །ཟླ་འོད་ཁྱོད་ཀྱིས་ཤེས་པར་གྱིས། །སངས་རྒྱས་རྫུ་འཕྲུལ་སྟོབས་ཀྱིས་ནི། །གང་དག་ཡིད་ནི་དག་པ་དང ། །གང་དག་གི་ནི་མ་དག་དང ། །ཐ་ན་མོས་པ་གང་ཡིན་པ། །ཐམས་ཅད་མ་ལུས་ཐུགས་སུ་ཆུད། །སེམས་ཅན་དག་ནི་གང་ཞིག་གིས། །རབ་ཞི་དབེན་ལ་རྟག་མོས་ཤིང ། །ཏིང་འཛིན་རྣམས་ལ་རབ་གནས་ནས། །འཁོར་བ་དག་ལ་མ་ཆགས་པས། །ཐ་ན་བག་ཆགས་རྣམས་ཀྱང་ནི། །གཏན་ནས་རབ་ཏུ་གང་སྤངས་དང ། །དེ་ལ་སོགས་པའི་ཡོན་ཏན་རྣམས། །ཐམས་ཅད་མ་ལུས་ཐུགས་སུ་ཆུད། །སེམས་ཅན་དག་ནི་གང་ཞིག་གིས། །མི་བདེན་ཆོས་ལ་ཞེན་པ་དང ། །སེམས་ཅན་དག་ནི་གང་ཞིག་གིས། །སངས་རྒྱས་ལ་ནི་རབ་མོས་ཤིང ། །མ་འོངས་དངོས་པོ་འདི་ལྟ་བུ། །ཐམས་ཅད་ 342a ༄#། །མ་ལུས་ཐུགས་སུ་ཆུད། །སེམས་ཅན་དག་ནི་གང་ཞིག་གིས། །འཇིག་རྟེན་བདེ་ལ་རབ་ཆགས་པས། །སངས་རྒྱས་བྱང་ཆུབ་ས་བོན་དག་།ལེགས་པ་ཉིད་དུ་མི་བསྐྱེད་པ། །རྒྱུ་དང་རྐྱེན་ནི་དེ་ཡི་ཕྱིར། །སྦྱོར་བ་རྣམས་ནི་ཉམས་པར་འགྱུར། །སུ་ཡང་རུང་བ་གང་ཞིག་གིས། །བྱང་ཆུབ་ས་བོན་རྟོགས་གྱུར་ན། །གང་ཟག་དེ་ཡིས་ངེས་པར་ནི། །རྣམ་དག་འོད་ཟེར་དཔག་མེད་ཐོབ། །ཟླ་འོད་ཁྱོད་ཀྱིས་འདི་ལྟ་བུ། །འོད་ཟེར་འདི་ལ་སོགས་པ་ཡི། །རྒྱུན་དུ་རྐྱེན་ནི་རེ་རེ་ཀུན། །སོ་སོ་ཐ་དད་ཉིད་དུ་ལྟོས། །ཁྱོད་ཀྱི་ཤེས་རབ་སྟོབས་ཀྱིས་ནི། །ཐམས་ཅད་དེ་ལྟར་རིག་པར་བགྱི། །གང་ཞིག་མི་དགེའི་གྲོགས་སྤངས་ཏེ། །དགེ་བའི་བཤེས་གཉེན་ལ་བརྟེན་ནས། །ཚུལ་ཁྲིམས་རྣམ་དག་གང་སྲུང་བ། །སངས་རྒྱས་འོད་ཟེར་སྒྲུབ་པར་འགྱུར། །ཁྱོད་ཀྱིས་དབང་པོ་རབ་སྲུངས་ལ། །ངོ་ཚ་ཁྲེལ་མེད་རབ་ཏུ་སྤོངས། །དགེ་བའི་ཆོས་ནི་རབ་བསྒོམས་ལ། །སེམས་ཅན་རྣམས་ནི་སྲུང་བར་གྱིས། །ཁྱོད་ཀྱིས་རྩོད་པ་རབ་སྤོངས་ལ། །སྟོང་ཉིད་དག་ནི་རྟོགས་པར་གྱིས། །རྙེད་པ་དག་ལ་མ་གདུ་བར། །མང་ཐོས་ལེགས་བཤད་ལྡན་པར་གྱིས། །ཁྱོད་ཀྱིས་རྙེད་པ་དག་ལ་ནི། །མི་གཙང་ལྟ་བུར་བལྟ་བར་གྱིས། །རྙེད་བའི་དྲི་མ་དག་གིས་ནི། །རྣམ་དག་སེམས་ནི་སྤགས་མ་བྱེད། །རྣམ་པར་ 342b གྲོལ་བ་བཙལ་བར་བྱོས། །བླ་མེད་རྙེད་པ་ཐོབ་པར་འགྱུར། །ཁྱོད་ཀྱིས་སངས་རྒྱས་ལམ་བསྒྲུབས་ལ། །སངས་རྒྱས་ཆོས་ཉིད་འདྲ་བར་ལྟོས། །ཆོས་ཀྱི་སྒྲོན་མ་རྟག་སྦྱོར་ལ། ། འཇིག་རྟེན་ཀུན་ནི་སྣང་བར་གྱིས། །ཁྱོད་ཀྱི་སེམས་ནི་རི་རྒྱལ་ལྟར། །མི་གཡོ་ཉིད་དུ་རབ་ཏུ་བྱོས། །ཁ་ངན་དང་ནི་བརྡེག་པ་ཡང ། །ཐམས་ཅད་བཟོད་པ་དང་དུ་ལོངས། །ཁྱོད་ནི་སེམས་ཅན་རྣམས་ཀྱི་ཕྱིར། །དགེ་བཤེས་ཡང་དག་རབ་ཏུ་བྱོས། །དམན་པའི་སེམས་ནི་ཡོངས་སྤོངས་ལ། །རྣམ་དག་ལས་ནི་རྟག་ཏུ་སྒྲུབས། །ཁྱོད་ཀྱི་སེམས་ནི་བརྟན་བྱོས་ལ། །བླ་མེད་ཆོས་ནི་རབ་ཏུ་སྟོན། །མདོ་སྡེ་དམ་པ་འདི་ལྟ་བུ། །བརྩེ་བ་ཅན་ལ་སྦྱིན་པར་གྱིས། །བླ་མེད་ཡེ་ཤེས་གང་ཚོལ་བ། །འཁོར་བ་དག་ལ་འཇིགས་མ་བྱེད། །དེས་ནི་སྡིག་པ་རྣམ་སྤངས་ནས། །ཕན་ཡོན་མཆོག་ནི་ཐོབ་པར་འགྱུར། །དཔེར་ན་བློ་དང་ལྡན་པ་དག་།མེ་ལ་སྤྱོད་པར་མཁས་པ་གང ། །རོ་རྣམས་སྣ་ཚོགས་སྦྱིན་བྱེད་ཀྱང ། ། མེས་ནི་བསྲེག་པར་ཡོང་མི་འགྱུར། །གང་ཞིག་བློ་དང་མི་ལྡན་པ། །ཐབས་དག་ལ་ནི་མི་མཁས་པས། །མེ་ཁྱེར་ལག་མཐིལ་གང་བཞག་པ། །མེས་ནི་རབ་ཏུ་བསྲེག་པར་འགྱུར། ཇི་ལྟར་མི་ཞིག་དུག་དག་གིས། །སེམས་ནི་འཁྲུགས་ནས་མྱོས་བ་གང ། །མེ་ལ་རབ་ཏུ་བ་སྲོས་ན་ནི། །དེ་ཡི་རྒྱུ་ཡིས་སོས་པར་འགྱུར། །ཟླ་འོད་ཁྱོད་ཀྱིས་ཤེས་པར་ཀྱིས། །བློ་དང་ 343a ༄#། །ལྡན་པའང་དེ་བཞིན་དུ། །ཡིད་བརྟེན་ཡིད་ནི་སྟོང་པར་རིག་།དེ་ཕྱིར་འཁོར་བར་གནས་ཀྱང་ནི། །མིག་བརྟེན་མིག་ནི་སྟོང་རིག་པས། །མིག་ལ་མངོན་པར་ཞེན་པ་མེད། །གལ་ཏེ་དེ་ལྟར་རབ་ཤེས་ན། །མིག་ལ་གནས་ཀྱང་ཉོན་མོངས་མེད། །གལ་ཏེ་མིག་ཉིད་སྟོང་རིག་ན། །ཡང་དག་ཡེ་ཤེས་སྒྲུབ་པར་འགྱུར། །ཡང་དག་ཡེ་ཤེས་ཐོབ་པའི་ཕྱིར། །འོད་ཟེར་དག་ནི་འབྱུང་བར་འགྱུར། །གལ་ཏེ་མིག་ཉིད་སྟོང་རིག་ན། །འདོད་ཆགས་དག་ནི་གཏན་ནས་སྤོང ། །འདོད་ཆགས་དག་ནི་མེད་པའི་ཕྱིར། །འོད་ཟེར་དག་ནི་འབྱུང་བར་འགྱུར། །དེ་བཞིན་ཞེ་སྡང་གཏི་མུག་དང ། །ངར་འཛིན་འཆབ་དང་ཁྲོ་བ་དང ། །སེར་སྣ་ཕྲག་དོག་ངོ་ཚ་མེད། །མི་བཟོད་སེམས་ནི་མཐོ་བ་དང ། །རྒྱགས་དང་མངོན་པའི་ང་རྒྱལ་དང ། །གཡོ་སྒྱུ་དང་ནི་བག་མེད་དང ། །གྱ་གྱུ་ལ་སོགས་བར་དུ་ཡང ། །ཐམས་ཅད་འདོད་ཆགས་བཞིན་དུ་བཤད། ། ཡང་དག་ཡེ་ཤེས་ཐོབ་གྱུར་ན། །མིག་ནི་ཞི་བ་ཉིད་དུ་རྟོགས། །ཞི་བ་ཉིད་དུ་རྟོགས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་ཐོབ་གྱུར་ན། ། སངས་རྒྱས་ཚུལ་ལ་རབ་ཏུ་གནས། །ཚུལ་ལ་རབ་ཏུ་གནས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་ཐོབ་གྱུར་ན། །སངས་རྒྱས་ཐབས་ལ་ 343b གནས་པར་འགྱུར། །ཐབས་ལ་རབ་ཏུ་གནས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་མ་བསྒྲུབས་པར། །སྒྲིབ་པ་དག་ནི་གཏན་སྤོང་ཞིང ། །འོད་ཟེར་འབྱུང་བ་སྒྲུབ་པར་ནི། །བསྔོན་མ་ཐོས་མ་མཐོང་ངོ ། །ཡང་དག་ཡེ་ཤེས་རབ་བསྒྲུབས་ནས། །སྒྲིབ་པའི་གནོད་པ་གཏན་སྤོང་ཞིང ། །སྤྱོད་པ་འདི་རྗེས་གང་འབྲང་བ། །འོད་ཟེར་འགྱེད་པ་འཐོབ་པར་འགྱུར། །རྒྱལ་བའི་སྤྱོད་པ་ཡོངས་ཚོལ་ཞིང ། །མདོ་སྡེ་འདི་ལ་བསླབ་བྱས་ནས། །དེ་བཞིན་གཤེགས་ལ་གང་མཆོད་པ། །ཡང་དག་ཡེ་ཤེས་ཐབས་ཐོབ་འགྱུར། །ཡང་དག་ཡེ་ཤེས་གང་སྒྲུབ་པ། །སངས་རྒྱས་རྣམས་ལ་མཆོད་པར་གྱིས། །འོད་ཟེར་འགྱེད་པ་རྫོགས་པར་འགྱུར། །ལག་མཐིལ་འབྲས་བུ་ཇི་བཞིན་ནོ། །མིག་ལ་བདག་མེད་གང་རྨོངས་པ། །དགེ་སྦྱོང་ཆོས་ནི་ཉམས་པར་འགྱུར། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །མིག་ལ་བདག་མེད་གང་རྟོགས་པ། །དགེ་སྦྱོང་ཆོས་ནི་སྒྲུབ་པར་འགྱུར། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །མིག་གི་མཐའ་ཟད་གང་རྟོགས་པ། །རྣ་བ་སྐྱེ་བའི་མཐའ་ཡང་རྟོགས། །རྣ་བ་སྐྱེ་བའི་མཐའ་རྟོགས་པས། །དགེ་སྦྱོང་ཆེན་པོའི་ཆོས་ཞེས་བྱ། །གལ་ཏེ་མིག་ནི་ངོ་བོ་ཉིད། །མཐའ་ནི་ཡོངས་སུ་མ་ཤེས་ན། །མིག་ནི་སྐྱེ་བའི་མཐའ་དག་ཀྱང ། །ཡོངས་ 344a ༄#། །སུ་ཤེས་པར་མི་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ཡོངས་སུ་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང ། །ཡོངས་སུ་ཤེས་པ་ཉིད་དུ་འགྱུར། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་མ་ཤེས་ན། །མིག་ནི་སྐྱེ་བའི་མཐའ་དག་ཀྱང ། །ལེགས་པ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང ། །ལེགས་པ་ཉིད་དུ་ཤེས་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་མངོན་སུམ་མ་ཤེས་ན། །མིག་ནི་སྐྱེ་བའི་མཐའ་དག་ཀྱང ། །མངོན་སུམ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་མངོན་སུམ་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང ། །མངོན་སུམ་ཉིད་དུ་རབ་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ 344b ལེགས་པར་མ་ཤེས་ན། །མིག་ནི་སྐྱེ་བའི་མཐའ་དག་ཀྱང ། །ཡོངས་སུ་ཤེས་པར་མི་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང ། །མངོན་སུམ་ཉིད་དུ་ཤེས་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །རྣམ་དག་ལེགས་པར་མ་ཤེས་ན། །རྣ་བའི་ངོ་བོ་རྣམ་དག་པ། །ལེགས་པ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། ། འོད་ཟེར་འགྱེད་པ་འཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །རྣམ་དག་ལེགས་པར་ཤེས་གྱུར་ན། །རྣ་བའི་ངོ་བོ་རྣམ་དག་པ། །ལེགས་པ་ཉིད་དུ་རྟོགས་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་འཐོབ་པར་འགྱུར། །དེ་བཞིན་སྣ་དང་ལྕེ་དང་ལུས། །ཡིད་དང་གཟུགས་སྒྲ་དྲི་རོ་དང ། །རེག་བྱ་ཆོས་དང་ས་ཆུ་དང ། །མེ་རླུང་དག་གི་དངོས་པོ་དང ། །འཇིག་རྟེན་སྡུག་བསྔལ་ཕུང་པོ་དང ། །ཁམས་དང་འཇིག་རྟེན་སྐྱེ་མཆེད་དང ། །སྒྲ་དང་མིང་ལ་སོགས་པ་ཡང ། །ཐམས་ཅད་དེ་བཞིན་རིག་པར་གྱིས། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སེམས་ཅན་གང་ཐེག་པ་ཆེན་པོ་ལ་ཡང་དག་པར་གཞོལ་ཞིང་འོད་ཟེར་འགྱེད་པ་ 345a ༄#། །དེ་ལྟ་བུ་ཡོངས་སུ་རྫོགས་པར་བྱ་བར་འདོད་པ་དེས་དགེ་བའི་རྩ་བའི་ཚོགས་རྣམ་པ་བརྒྱད་ཅུ་པོ་འདི་དག་མངོན་པར་བསྒྲུབ་པར་བྱའོ། །རྣམ་པ་བརྒྱད་ཅུ་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྲུང་ཞིང་རྗེས་སུ་དྲན་པ་དང ། གནོད་སེམས་མེད་པ་དང ། ཚུལ་ཁྲིམས་ཡོངས་སུ་དག་པ་སྲུང་ཞིང་ཉམས་པར་མི་བྱེད་པ་དང ། སེམས་ཤིན་ཏུ་མཉམ་པ་དང ། གཡོ་སྒྱུ་མེད་པ་དང ། །སེར་སྣ་མེད་པ་དང ། ཕྲག་དོག་མེད་པ་དང ། འདོད་ཆགས་ཀྱི་བསམ་པ་མེད་པ་དང ། སླུ་བའི་བསམ་པ་མེད་པ་དང ། ཐེག་པ་ཆེན་པོའི་མདོ་སྡེ་དམ་པ་དག་ལ་མངོན་པར་ཡིད་ཆེས་པ་དང ། དབང་ཕྱུག་དང ། རྒྱགས་པ་ལ་ཞེན་ཅིང་སྲེད་པ་མེད་པ་དང ། བཟོད་པའི་སྟོབས་ཕུན་སུམ་ཚོགས་པ་དང ། སྨོན་ལམ་ལས་ཕྱིར་མི་ལྡོག་པ་དང ། བསམ་པ་ཤིན་ཏུ་རྣམ་པར་དག་པར་གྱུར་པ་དང ། དགོན་པ་ན་གནས་པ་དང ། འཁོར་རྣམས་ལ་མི་བརྟེན་པ་དང ། རྙེད་པ་ལ་མི་བརྟེན་པ་དང ། གྲགས་པ་ལ་མི་བརྟེན་པ་དང ། བསམ་གཏན་རྣམས་ལ་རབ་ཏུ་གནས་པ་དང ། འོད་ཟེར་གྱི་ཏིང་ངེ་འཛིན་རབ་ཏུ་སྟོན་པ་དང ། ཚུལ་ཁྲིམས་དང་ལྡན་པ་དག་ལ་སྒྱུ་མེད་པར་རིམ་གྲོ་བྱེད་པ་དང ། ཚངས་པ་མཚུངས་པར་སྤྱོད་པ་དག་ལ་མཆོག་གི་བསམ་པ་བསྐྱེད་པ་དང ། ཆོས་ལ་གུས་ 345b པའི་ཕྱིར་མཁན་པོ་དང་སློབ་དཔོན་དག་ལ་ཤིན་ཏུ་བཀུར་བ་དང ། མདོ་སྡེའི་དོན་རབ་ཏུ་རྟོགས་པ་དང ། ཡང་དག་པར་བསྟན་པ་ལ་རབ་ཏུ་མཁས་པ་དང ། ཚིག་སྨྲས་པ་རྣམས་ལ་མི་བདེན་པ་མེད་པ་དང ། ཡང་དག་པའི་བསམ་པ་ལ་གནས་པ་དང ། དགེ་བའི་རྩ་བ་བསྐྱེད་པ་ལ་བརྩོན་པ་དང ། རྟག་ཏུ་སྦྱིན་པ་གཏོང་བ་དང ། བདུད་ཀྱི་ལས་རབ་ཏུ་རྟོགས་པ་དང ། དབང་པོ་རྣམས་དམ་དུ་སྲུང་བ་དང ། ཚིག་རབ་ཏུ་བརྟགས་པ་དང ། དོན་དམ་པའི་བདེན་པ་ལ་མཁས་པ་དང ། ས་རྣམས་ཀྱི་རང་གི་མཚན་ཉིད་རབ་ཏུ་རྟོགས་པ་དང ། གཟུངས་ཟད་མི་ཤེས་པ་ཡོངས་སུ་ཚོལ་བ་དང ། ལུས་དང་སྲོག་ལ་ཕངས་པ་མེད་པ་དང ། འཁོར་བཞི་པོ་དག་ལ་རྗེས་སུ་སྟོན་པར་བྱེད་པ་དང ། འཇིག་རྟེན་པའི་བསམ་པ་ཡོངས་སུ་བཅད་པ་དང ། འཇིག་རྟེན་ཕྱི་མའི་ཆོས་མེད་དོ། །ཞེས་ཟེར་བའི་ལོག་པར་ལྟ་བ་རྣམས་སྤངས་པ་དང ། ད་དུང་མ་བསླབ་པ་དག་ལ་གྱ་གྱུའི་མཚན་མ་མི་སྟོན་པ་དང ། གང་བསླབ་པར་འདོད་པ་དག་ལ་ཅི་ནུས་ཀྱིས་རྣམ་པར་ཕྱེ་ནས་རབ་ཏུ་སྟོན་པ་དང ། གླུ་དང་རོལ་མོའི་སྒྲ་དག་གི་བསྔགས་པ་མི་བརྗོད་པ་དང ། རྒྱན་དང་ཡོ་བྱད་ཀྱི་བསྔགས་པ་མི་བརྗོད་པ་དང ། བདེན་པ་རྣམས་ལ་ཡང་དག་པར་ཞུགས་པ་དང ། མང་དུ་ཐོས་པ་ཕུན་སུམ་ཚོགས་པ་དང ། གཉིད་རབ་ཏུ་སྤངས་པ་དང ། ཡང་དག་པའི་ཆོས་ཡོངས་སུ་ཚོལ་བ་ལ་རབ་ཏུ་བརྩོན་པ་ 346a ༄#། །དང ། སངས་རྒྱས་ལ་གུས་པ་དང ། བྱང་ཆུབ་ཏུ་སེམས་བསྐྱེད་པ་དང ། འཇིག་རྟེན་པའི་ལས་ཡོངས་སུ་སྤང་བ་དང ། བསླབ་པའི་གནས་རྣམས་ལ་ཡང་དག་པར་བརྩོན་པ་དང ། ཆོས་ལ་སྲེད་པའི་ཕྱིར་གྲོགས་ཁྱད་པར་ཅན་ལ་རྟེན་པར་བྱེད་པ་དང ། དགེ་བའི་རྩ་བ་རྣམས་ཡོངས་སུ་ཚོལ་བ་ལ་སྐྱོ་བ་མེད་པ་དང ། རབ་ཏུ་འབྱུང་བ་ལ་ཤིན་ཏུ་མོས་པ་དང ། སངས་རྒྱས་ཀྱི་ཆོས་སྲུང་ཞིང་ཡོངས་སུ་འཛིན་པར་བྱེད་པ་དང ། སྡིག་པའི་ལས་མི་སྤོང་བ་དང ། བསྟན་པ་རྣམས་ལ་ཐེ་ཚོམ་མེད་པ་དང ། དཔེས་སྟོན་པ་ལ་རབ་ཏུ་མཁས་པ་དང ། གསང་བ་རྣམས་རྣམ་པར་ཕྱེ་ནས་སྟོན་པར་བྱེད་པ་དང ། བྱང་ཆུབ་ཆེན་པོ་ཡོངས་སུ་ཚོལ་བ་ལ་ངལ་བ་མེད་པ་དང ། མདོ་སྡེ་ཡང་དག་པར་བཟུང་བ་རྣམས་བརྗེད་པར་མི་བྱེད་པ་དང ། རང་གི་བསླབ་པ་མི་སྤོང་བ་དང ། ཕ་རོལ་གྱི་སྨྲ་བ་རྣམས་ཚར་གཅོད་པ་དང ། ངེས་པར་འབྱུང་བའི་ལམ་ཡོངས་སུ་ཚོལ་བ་དང ། སྤྱོད་པ་ཚད་མེད་པ་རྣམས་མངོན་པར་སྒྲུབ་པ་དང ། ཆོས་ཀྱི་ཡེ་ཤེས་དེ་དག་ལ་སེམས་ངེས་པར་གྱུར་པ་དང ། རྒྱུ་དང་འབྲས་བུ་གསལ་བར་མཐོང་ཞིང་འཁོར་བའི་རྒྱུན་མི་གཅོད་པ་དང ། སྲིད་པ་གསུམ་པོ་དག་ལ་ཆགས་པ་མེད་པ་དང ། མངོན་པའི་ང་རྒྱལ་སྤངས་པ་དང ། མངོན་པར་ཡིད་ཆེས་པ་དག་ལ་གཉེན་པོ་རྣམ་པར་གཞག་པ་དག་སྟོན་པར་བྱེད་པ་དང ། མ་ 346b འོངས་པའི་འབྲས་བུ་རྣམ་པར་སྨིན་པའི་བྱེ་བྲག་རྟོགས་པར་ཁོང་དུ་ཆུད་པ་དང ། སྔོན་གྱི་མཐའ་ཡོངས་སུ་ལེགས་པར་ཤེས་པ་དང ། གཞན་གྱི་དྲིང་ལ་མི་ལྟོས་པ་དང ། ཡོངས་སུ་སྤོང་བའི་སྤྱོད་པ་དག་ལ་བརྩོན་འགྲུས་ཀྱིས་སྒྲུབ་པར་བྱེད་པ་དང ། སངས་རྒྱས་ཀྱི་མཚན་དང་དཔེ་བྱད་ཀྱི་བཀོད་པ་དག་ཕུན་སུམ་ཚོགས་པར་བྱེད་པ་གང་ཡིན་པ་འདི་ནི། རྣམ་པ་བརྒྱད་ཅུ་ཞེས་བྱའོ། །གཞན་ཡང་ཟླ་འོད་གཞོན་ནུ། །ཆོས་བརྒྱད་ཅུ་པོ་འདི་དག་ནི། ཆོས་ལྔའི་ནང་དུ་འཇུག་པར་འགྱུར་རོ། །ཆོས་ལྔ་གང་ཞེ་ན། འདི་ལྟ་སྟེ། འཁོར་བ་ཤེས་པ་དང ། མྱ་ངན་ལས་འདས་པ་ཤེས་པ་དང ། ཉོན་མོངས་པ་ཟད་པ་ཤེས་པ་དང ། མཆོག་ཏུ་གྱུར་པ་ཤེས་པ་དང ། བསོད་ནམས་ཀྱི་འབྲས་བུ་ཤེས་པ་གང་ཡིན་པའོ། །གཞན་ཡང་ཟླ་འོད་གཞོན་ནུ། ཆོས་ལྔ་པོ་དེ་དག་ནི། ཆོས་གཉིས་ཀྱི་ནང་དུ་འཇུག་པར་འགྱུར་རོ། །གཉིས་གང་ཞེ་ན། འདི་ལྟ་སྟེ། སེམས་ཡོངས་སུ་དག་པས་རབ་ཏུ་བརྒྱན་པ་དང ། གཟུགས་ཡོངས་སུ་དག་པས་རབ་ཏུ་བརྒྱན་པ་གང་ཡིན་པའོ། །གཞན་ཡང་ཟླ་འོད་གཞོན་ནུ། ཆོས་གཉིས་པོ་དེ་དག་ནི། ཆོས་གཅིག་གི་ནང་དུ་འཇུག་པར་འགྱུར་རོ། །གཅིག་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་རྣམ་པར་གྲོལ་བ་མངོན་པར་གྲུབ་པ་གང་ཡིན་པའོ། །གཞན་ཡང་ཟླ་འོད་གཞོན་ནུ། ཡང་ཆོས་རྣམ་པ་བརྒྱད་ཅུ་ཡོད་དེ་དེ་དག་གིས་དེ་བཞིན་ 347a ༄#། །གཤེགས་པ་རྣམས་ཀྱི་ཐོགས་པ་མི་མངའ་བའི་རྣམ་པར་གྲོལ་བ་ལེགས་པར་ཡོངས་སུ་རྫོགས་པར་བྱེད་པའོ། །རྣམ་པ་བརྒྱད་ཅུ་གང་ཞེ་ན། འདི་ལྟ་སྟེ། སྦྱིན་པའི་ཚོགས་དང ། ཤེས་རབ་རྒྱ་ཆེན་པོར་གྱུར་པ་དང ། ཚུལ་ཁྲིམས་རྣམ་པར་དག་པ་ཡོངས་སུ་སྒྲུབ་པ་དང ། ཉོན་མོངས་པའི་གདུང་བ་དང་བྲལ་བ་དང ། ང་རྒྱལ་རབ་ཏུ་བཅོམ་པ་དང ། ཚིག་མཉེན་པ་དང ། དངོས་པོ་སྣ་ཚོགས་རབ་ཏུ་ཤེས་པ་དང ། དགེ་བའི་གྲོགས་པོ་ཡོངས་སུ་ཤེས་པ་དང ། ཐེག་པ་ཆེན་པོ་ལ་ཡང་དག་པར་གཞོལ་བ་དང ། བརྩོན་འགྲུས་ཀྱི་གོ་ཆ་བགོས་པ་དང ། སྤྱོད་ལམ་གྱིས་སེམས་ཅན་འདུལ་བ་དང ། ཉོན་མོངས་པར་ལྟུང་བ་རྣམས་ཀྱི་ཐེ་ཚོམ་རབ་ཏུ་གཅོད་པ་དང ། མི་དགེ་བ་རྣམས་ལ་སྨོད་ཅིང་ཆོས་དཀར་པོ་རྣམས་མངོན་པར་སྒྲུབ་པ་དང ། མི་དགེ་བའི་གྲོགས་པོ་དང་མི་འགྲོགས་པ་དང ། དགེ་བའི་རྩ་བ་རྣམས་བསྐྱེད་པ་ལ་ཡོངས་སུ་སྐྱོ་བ་མེད་པ་དང ། བྱང་ཆུབ་ཏུ་སེམས་བསྐྱེད་པ་དང ། བརྩོན་འགྲུས་རབ་ཏུ་རྩོམ་པ་དང ། བདུད་ཀྱི་དངོས་པོ་རབ་ཏུ་རྟོགས་པ་དང ། བདེན་པ་རྣམས་མངོན་དུ་གྱུར་པ་དང ། ཡང་དག་པ་ཁོ་ནར་མཆོད་པ་བྱེད་པ་དང ། ཐེ་ཚོམ་ཡོངས་སུ་གཅོད་པ་དང ། སེམས་ཀྱིས་རྟག་ཏུ་སེམས་ཅན་ཡོངས་སུ་མྱ་ངན་ལས་བཟླ་བར་སེམས་པ་དང ། སྲིད་པ་རྣམས་ལ་མངོན་པར་ཞེན་པ་མེད་པ་དང ། སེམས་ 347b རྒྱ་ཆེན་པོ་ཡོངས་སུ་བསྐྱེད་པ་དང ། སེམས་ཅན་མི་དགེ་བ་རྣམས་ལ་ཉེས་དམིགས་མང་དག་པར་སྟོན་པ་དང ། འདོད་ཆགས་དང ། ཞེ་སྡང་དང ། གཏི་མུག་རབ་ཏུ་སྤོང་བ་དང ། འདོད་པའི་ཕན་པ་ཡོངས་སུ་མི་ཚོལ་བ་དང ། སེམས་ཅན་ཡོངས་སུ་སྨིན་པར་བྱེད་པ་དང ། དེ་བཞིན་གཤེགས་པའི་མཆོད་རྟེན་འཆོས་པ་དང ། འཕགས་པ་རྣམས་ལ་གུས་པ་བསྐྱེད་པ་དང ། ཐེག་པ་ཆེན་པོ་ལ་གནས་པ་དག་ལ་བརྟེན་ཅིང་རིམ་གྲོ་བྱེད་པ་དང ། ཐེག་པ་དམན་པ་དག་གི་བསྔགས་པ་མི་བརྗོད་པ་དང ། ཉན་ཐོས་ཀྱི་ཐེག་པ་པ་དག་ཐག་རིང་དུ་སྤོང་བ་དང ། ཕྱིར་རྒོལ་བ་རྣམས་ཚར་གཅོད་པ་དང ། སངས་རྒྱས་བཅོམ་ལྡན་འདས་རྣམས་ལ་མཆོད་པ་རྒྱ་ཆེན་པོ་བཤམས་ནས་ཁྱད་པར་དུ་འཕགས་པའི་སེམས་ཀྱིས་འབུལ་བར་བྱེད་པ་དང ། ཐོགས་པ་མེད་པའི་ཡེ་ཤེས་ཐོབ་པ་དང ། སྤོབས་པ་ཕུན་སུམ་ཚོགས་པ་དང ། དཔེ་སྣ་ཚོགས་ཀྱིས་ཡང་དག་པ་ཆོས་རབ་ཏུ་སྟོན་པར་བྱེད་པ་དང ། སྟོང་པའི་ངོ་བོ་ཉིད་དང་འགལ་བར་མི་བྱེད་བ་དང ། ཆོས་ཡོངས་སུ་ཚོལ་བ་ལ་ལེ་ལོ་མེད་པ་དང ། དོན་ཟབ་མོ་ཡང་དག་པར་སྟོན་པ་དང ། གཟུངས་ཆེན་པོ་དང་ལྡན་པ་དང ། ཆོས་ཡང་དག་པར་སྟོན་པར་བྱེད་ཀྱང་མངོན་པར་ཞེན་པ་མེད་པ་དང ། ཆོས་རྒྱ་ཆེར་སྤེལ་བར་བྱེད་པ་དང ། ཡོངས་སུ་འདྲེན་པ་ལ་ཆོག་ཤེས་པ་མེད་པ་དང ། སྤྱོད་པ་རྣམས་ཡོངས་སུ་རྫོགས་པ་དང ། གཟི་བརྗོད་ཆེན་པོ་དང་ལྡན་པ་དང ། 348a ༄#། །སྤོབས་པ་ཐོགས་པ་མེད་པ་དང ། མང་དུ་ཐོས་པ་ཕུན་སུམ་ཚོགས་པ་དང ། མི་དགེ་བ་རྣམས་ཀྱི་བསྔགས་པ་མི་བརྗོད་པ་དང ། དགེ་བའི་ལས་ཡང་དག་པར་སྒྲུབ་པ་དང ། ཕུང་པོ་རྣམས་ཁོང་དུ་ཆུད་པ་དང ། ལྟ་བ་རྣམས་རབ་ཏུ་སྤངས་པ་དང ། རྒྱུའི་ངོ་བོ་ཉིད་རབ་ཏུ་རྟོགས་པ་དང ། སྤྱོད་ཡུལ་ལས་ཡང་དག་པར་འདས་པ་དང ། སྤྱོད་ཡུལ་མ་ཡིན་པ་ཡོངས་སུ་སྤངས་པ་དང ། ཡོངས་སུ་དང་པ་བསྐྱེད་པ་དང ། ཡང་དག་པའི་ལམ་ལ་གནས་པ་དང ། ཐེག་པ་ཆེན་པོ་ལ་རབ་ཏུ་དགའ་བ་དང ། མཉམ་པ་ཉིད་དུ་ཡོངས་སུ་སྡུད་པར་བྱེད་པ་དང ། བདག་མེད་པ་ལ་མངོན་པར་མ་ཆགས་པ་དང ། འཁོར་བ་ལ་ཡོངས་སུ་སྐྱོ་བ་མེད་པ་དང ། མྱ་ངན་ལས་འདས་པ་ཡོངས་སུ་ཚོལ་བ་ལ་མོས་པ་དང ། འདོད་པ་ཆུང་བའི་ཕྱིར་དགོན་པ་ན་གནས་པ་དང ། རྟག་ཏུ་བསོད་སྙོམས་སློང་ཞིང་ལེ་ལོ་མེད་པར་གྱུར་པ་དང ། ཇི་ཙམ་རྙེད་པ་དེ་ཉིད་ཀྱིས་ཆོག་པར་འཛིན་པ་དང ། ངོ་ཚ་མེད་པ་དང་ཁྲེལ་མེད་པ་སྤངས་པ་དང ། སངས་རྒྱས་རྣམས་ལ་བསྙེན་པར་བྱེད་པ་དང ། དགེ་བའི་གྲོགས་པོ་དང་ལྷན་ཅིག་གནས་པ་དང ། བདག་གི་ཟླ་མ་ཡིན་པ་རྣམས་རབ་ཏུ་སྤོང་བ་དང ། སོ་སོའི་སྐྱེ་བོ་རྣམས་ལ་སྙིང་བརྩེ་བ་དང ། སེམས་ཅན་གྱི་སྤྱོད་པ་དང་མཐུན་པར་བྱེད་པ་དང ། སངས་རྒྱས་ལ་ཤིན་ཏུ་དང་བ་དང ། སྣོད་མ་ཡིན་ 348b པ་ཡོངས་སུ་སྤོང་བ་དང ། མི་མཐུན་པ་རྣམས་ལ་ཚིག་སྦྱིན་པར་མི་བྱེད་པ་དང ། གསོལ་བ་མི་འདེབས་པ་དག་ལ་ཡང་དག་པར་སྟོན་པར་མི་བྱེད་པ་དང ། གསོལ་བ་འདེབས་པ་ཞིག་འོངས་ན་ཅི་རིགས་པར་སྟོན་པར་བྱེད་པ་དང ། ཟས་ལ་སྙོམས་པར་གྱུར་པ་དང ། རྟག་ཏུ་གཏོང་ཞིང་མཉམ་པ་ཉིད་དུ་གཏོང་བ་དང ། སྒོ་ཆེན་པོ་ཕྱེ་ནས་གཏོང་བར་བྱེད་པ་གང་ཡིན་པ་དེ་དག་ནི། གཞོན་ནུ། ཆོས་རྣམ་པ་བརྒྱད་ཅུ་ཞེས་བྱ་སྟེ། འདི་དག་གིས་དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་རྣམ་པར་གྲོལ་བ་ཐོབ་པར་བྱེད་དོ། །དེའི་ཚེ་ཟླ་འོད་གཞོན་ནུར་གྱུར་པ་ཆོས་དེ་ལྟ་བུ་ཐོས་པས་རབ་ཏུ་དགའ་བར་གྱུར་ནས་བཅོམ་ལྡན་འདས་ཀྱི་སྤྱར་སྔར་ཚིགས་སུ་བཅད་དེ་མངོན་པར་བསྟོད་པ། དེ་བཞིན་གཤེགས་པ་མིག་ཟད་མཐའ་མཁྱེན་པས། དེ་སླད་རྣམ་དག་ཡེ་ཤེས་སྟོན་མཛད་ལགས། །རྣམ་དག་ཡེ་ཤེས་སྟོན་པར་མཛད་པས་ན། །རྣམ་དག་འོད་ཟེར་ཕུན་སུམ་ཚོགས་པ་ལ། །དེ་བཞིན་གཤེགས་པས་མིག་བདག་མེད་མཁྱེན་པས། །དེ་སླད་རྣམ་དག་དབྱངས་ནི་སྟོན་མཛད་ལགས། །རྣམ་དག་དབྱངས་ནི་སྟོན་པར་མཛད་པས་ན། །ཚངས་དབྱངས་མཚན་ཉིད་ཕུན་སུམ་ཚོགས་པ་ལགས། །བཅོམ་ལྡན་འདས་སྔོན་ནི་སེམས་ཅན་ཕན་བཏགས་པས། །དེ་སླད་རྣམ་དག་གསུང་ནི་རྫོགས་པ་ལགས། །རྣམ་དག་གསུང་ནི་ཡོངས་སུ་རྫོགས་པས་ན། །འཇིག་རྟེན་ཚད་མེད་ 349a ༄#། །རྣམས་ལ་ཕན་འདོགས་མཛད། །དེ་བཞིན་གཤེགས་པས་མིག་ཉིད་སྟོང་མཁྱེན་པས། །དེ་སླད་ཀུན་འཛིན་མཁྱེན་པ་རྫོགས་པ་ལགས། །ཀུན་འཛིན་མཁྱེན་པ་ཡོངས་སུ་རྫོགས་པས་ན། །དེ་བཞིན་གཤེགས་པའི་འོད་ཟེར་དཔག་མེད་སྟོན། །དེ་བཞིན་གཤེགས་པས་མིག་གི་ཁྱད་པར་མཁྱེན། །མིག་གི་ཁྱད་པར་དག་ཀྱང་མཐའ་མ་མཆིས། །མཁྱེན་པའི་མིང་ནི་དཔག་ཏུ་མ་མཆིས་པས། །དེ་བཞིན་གཤེགས་པའི་འོད་ཟེར་དཔག་མེད་སྟོན། །སངས་རྒྱས་ཡི་གེ་ཁྱད་པར་སྒོ་མཁྱེན་པས། །མིག་སྟོང་ཡི་གེ་བྲལ་བར་རབ་ཏུ་མཁྱེན། །མིག་སྟོང་ཡི་གེ་བྲལ་བར་མཁྱེན་པས་ན། །དེ་བཞིན་གཤེགས་པའི་འོད་ཟེར་དཔག་མེད་སྟོན། །གང་ཞིག་མིག་ལ་བདག་མེད་རབ་སེམས་པ། །སངས་རྒྱས་གསུང་ནི་བདེན་པ་ཉིད་དུ་རྟོགས། །སངས་རྒྱས་གསུང་ནི་བདེན་པར་རྟོགས་པས་ན། །དེ་བཞིན་གཤེགས་པའི་འོད་ཟེར་ངེས་པར་སྟོན། །བཅོམ་ལྡན་རྫུ་འཕྲུལ་མཆོག་ནི་ཡོངས་རྫོགས་པས། །མིག་གི་འཇིག་པ་དཔག་མེད་ཐུགས་སུ་ཆུད། །མིག་གི་འཇིག་པ་རབ་ཏུ་མཁྱེན་པས་ན། །འཇིག་རྟེན་ཐམས་ཅད་ལ་ནི་ཕན་འདོགས་མཛད། །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །མིག་གི་སྐྱེ་བ་དཔག་མེད་རབ་ཏུ་མཁྱེན། །ཇི་ལྟར་བཅོམ་ལྡན་མིག་གི་སྐྱེ་མཁྱེན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།དེ་བཞིན་རྣ་བ་སྣ་ 349b དང་ལྕ་ལུས་ཡིད། །གཟུགས་སྒྲ་དྲི་རོ་རེག་བྱ་དག་དང་ཆོས། །འཇིག་རྟེན་སྐྱེ་དང་སྒྲ་དང་མིང་ལ་སོགས། །ཐམས་ཅད་ལ་ཡང་དེ་བཞིན་རབ་ཏུ་མཁྱེན། །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །སྦྱིན་པའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་སྦྱིན་པའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཚུལ་ཁྲིམས་རྣམ་དག་ཕ་རོལ་བྱོན་དང་ལྡན། །ཇི་ལྟར་བཅོམ་ལྡན་ཚུལ་ཁྲིམས་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བཟོད་པའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བཟོད་པའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བརྩོན་འགྲུས་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བརྩོན་འགྲུས་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བསམ་གཏན་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བསམ་གཏན་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཤེས་རབ་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་ཤེས་རབ་ཕ་རོལ་བྱོན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ 350a ༄#། །ཆེན་པོ་རྐང་གཉིས་མཆོག་གྱུར་པ། །ཆོས་སྐུའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་ཆོས་སྐུའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་གཟུགས་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་གཟུགས་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་ཡིད་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་ཡིད་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཡོན་ཏན་མཆོག་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་ཡོན་ཏན་མཆོག་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །གཟུགས་ཀྱི་མཚན་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་གཟུགས་ཀྱི་མཚན་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་གཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་སྒྲ་ནི་དཔག་མེད་ཕུན་སུམ་ཚོགས།། ཇི་ལྟར་བཅོམ་ལྡན་རྣམ་དག་སྒྲ་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྫུ་འཕྲུལ་ཆེན་པོ་དཔག་མེད་ཕུན་སུམ་ 350b ཚོགས། །ཇི་ལྟར་བཅོམ་ལྡན་རྫུ་འཕྲུལ་ཆེ་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །སེམས་ཅན་འདུལ་སླད་སྲིད་པ་གསུམ་ན་བཞུགས། །ཇི་ལྟར་བཅོམ་ལྡན་སེམས་ཅན་འདུལ་མཛད་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འཁོར་བའི་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་འཁོར་བའི་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་འདོད་ཆགས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཞེ་སྡང་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་ཞེ་སྡང་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ།། གཏི་མུག་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་གཏི་མུག་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ།། འདོད་ཆགས་ཞེ་སྡང་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་འདོད་སྡང་\?\་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ།། 351a ༄#། །ཞེ་སྡང་གཏི་མུག་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་སྡང་རྨོངས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག། ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་གཏི་མུག་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་འདོད་རྨོངས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཆ་མཉམ་སྤྱོད་པ་དཔག་མེད་ཡང་དག་འདས། །ཇི་ལྟར་བཅོམ་ལྡན་ཆ་མཉམ་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག་།འདྲེན་པ་འདོད་ཆགས་དག་ལས་ཡོངས་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།འདྲེན་པ་ཞེ་སྡང་དག་ལས་ཡོངས་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།འདྲེན་པ་གཏི་མུག་སྤྱོད་ལས་ཡོངས་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།འདྲེན་པ་འདོད་ཆགས་ཞེ་སྡང་སྤྱོད་འདས་པས། །འཇིག་རྟེན་ཀུན་ལ་ 351b ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།འདྲེན་པ་ཞེ་སྡང་གཏི་མུག་སྤྱོད་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།འདྲེན་པ་འདོད་ཆགས་གཏི་མུག་སྤྱོད་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།འདྲེན་པ་ཆགས་སྡང་གཏི་མུག་སྤྱོད་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །ལྷ་ཚོགས་མང་པོ་ཐམས་ཅད་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མིའི་ཁ་ལོ་སྒྱུར་པའི་སྟོན་པར་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །ཀླུ་ཚོགས་མང་པོ་ཐམས་ཅད་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། ། ལྷ་མིའི་ཁ་ལོ་སྒྱུར་བའི་སྟོན་པར་ཤོག། དེ་བཞིན་གཤེགས་པ་མཁྱེན་པ་མཆོག་ལྡན་པས། །གནོད་སྦྱིན་མང་པོ་ཐམས་ཅད་འདུལ་བར་མཛད། །བདག་ཀྱང་དེ་འདྲའི་ཡེ་ 352a ༄#། །ཤེས་གྲུབ་གྱུར་ནས། །ལྷ་མིའི་ཁ་ལོ་སྒྱུར་བའི་སྟོན་པར་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །དྲི་ཟ་ཐམས་ཅད་རབ་ཏུ་འདུལ་མཛད་ཅིང ། །དེ་བཞིན་གྲུལ་བུམ་དཔག་ཏུ་མ་མཆིས་པ། །འཁོར་བཅས་ཇི་སྙེད་རབ་ཏུ་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མིའི་ཁ་ལོ་སྒྱུར་བའི་སྟོན་པར་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །ཆོས་རྣམས་ཡང་དག་དོན་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། ། ཡང་དག་དོན་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་སྡུག་བསྔལ་ཟད་མཐའ་མཁྱེན། །སྐྱེ་རྒུ་ཐམས་ཅད་ལ་ནི་ཕན་འདོགས་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྡུག་བསྔལ་ཟད་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་རྒྱུ་ཟད་མཐའ་མཁྱེན་པས། །སྐྱེ་རྒུ་ཐམས་ཅད་ལ་ནི་ཕན་འདོགས་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །རྒྱུ་ཟད་དེ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་སྤྱོད་པ་དག་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་སྤྱོད་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་གནས་དང་གནས་མེད་ 352b རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་ལས་དང་འབྲས་བུ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་རང་བཞིན་སྣ་ཚོགས་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག། །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཐམས་ཅད་ཀུན་ཏུ་འགྲོ་བའི་སྤྱོད་པ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་མོས་པ་སྣ་ཚོགས་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །དབང་པོ་རྣམས་ཀྱི་རང་བཞིན་ཐམས་ཅད་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །བསམ་གཏན་སྤྱོད་པ་དག་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་ 353a ༄#། །མཁྱེན་པ་མཆོག་ལྡན་པས། །རྣམ་པར་ཐར་པའི་སྤྱོད་པ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །ཆ་མཉམ་སྤྱོད་པ་དག་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །སྙོམས་འཇུག་སྤྱོད་པ་དག་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་འཁོར་བ་རབ་མཁྱེན་པས། །འཁོར་བ་ཉོན་མོངས་རྒྱུ་ལས་སྐྱེས་པར་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་ཐམས་ཅད་རབ་མཁྱེན་པས། །འཇིག་རྟེན་ཕན་འདོགས་དཔེ་ཟླ་ཡོང་མ་མཆིས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་ཏིང་འཛིན་རབ་གནས་པས། །ཁྱད་པར་ཐབས་ཀྱི་ཡེ་ཤེས་སྐྱེད་པར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །སྔོན་གྱི་གནས་ཀྱི་སྤྱོད་པ་དཔག་མེད་མཁྱེན། །བདག་ཀྱང་དེ་འདྲའི་ 353b ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །འཆི་འཕོ་སྐྱེ་བ་དཔག་མེད་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །ཉོན་མོངས་ཟད་པ་ཐམས་ཅད་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །བླ་མེད་བྱང་ཆུབ་ཡང་དག་མངོན་སངས་རྒྱས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། །ཉོན་མོངས་བག་ཆགས་དག་ནི་རབ་ཏུ་སྤངས། །བདག་ཡང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་མཁྱེན་པ་མཆོག་ལྡན་པས། ། འཁོར་བ་ངེས་འབྱུང་ཆོས་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་ཆོས་དོན་རབ་མཁྱེན་པས། །སེམས་ཅན་དཔག་མེད་རྣམས་ནི་གོ་པར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་ 354a ༄#། །པས་ཆོས་ཉིད་སྒྱུ་མ་དང ། །རྨི་ལམ་སྨིག་སྒྱུ་ལྟ་བུར་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་འཇིག་རྟེན་ཐམས་ཅད་ཀྱི། །ཡི་གེ་དག་དང་བརྗོད་པ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པ་སྤོབས་པ་མཆོག་ལྡན་པས། །དམ་ཆོས་ཟབ་མོ་དག་ནི་སྟོན་པར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་སྐུ་གསུང་ཐུགས་དུལ་བས། །ཐམས་ཅད་ཡེ་ཤེས་རྗེས་སུ་འབྲང་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་དུས་གསུམ་རབ་མཁྱེན་པས། །འཛིན་དང་ཆགས་པ་མི་མངའ་ཐོགས་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། ། འཇིག་རྟེན་ཐམས་ཅད་ལ་ནི་ཕན་བགྱིད་ཤོག་།དེ་བཞིན་གཤེགས་པས་ཚུལ་ཁྲིམས་ཏིང་འཛིན་དང ། །ཤེས་རབ་བསྒྲུབས་པས་དེ་ལས་ལྡོག་མི་འགྱུར། །བདག་ཀྱང་ངེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག་།དེ་བཞིན་གཤེགས་པས་རྣམ་གྲོལ་རབ་བསྒྲུབས་པས། །རྣམ་གྲོལ་མཁྱེན་དང་གཟིགས་པ་ལྡོག་མི་ 354b མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག་།དེ་བཞིན་གཤེགས་པས་ཞི་གནས་ལྷག་མཐོང་བསྒྲུབས། །ལྷ་མིའི་འཇིག་རྟེན་དག་ན་མཚུངས་མ་མཆིས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག་།དེ་བཞིན་གཤེགས་པ་མཁྱེན་པ་མཆོག་ལྡན་པས།། འཇིག་རྟེན་ཆོས་རྣམས་ལ་ནི་ཞེན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག་།དེ་བཞིན་གཤེགས་པ་འཇིག་རྟེན་མཁྱེན་ལྡན་པས། །འགྲོ་བ་སྣ་ཚོགས་དག་ནི་གསལ་བར་གཟིགས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འགྲོ་བ་དེ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་སྐྱེ་ཟད་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱེ་ཟད་ཉིད་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་རབ་ཞི་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །རབ་ཞི་དེ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་འཁོར་བའི་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཁོར་བ་དེ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་སྔོན་དང་ཕྱི་མཐའ་མཁྱེན། 355a ༄#། །དེ་སླད་སློབ་དཔོན་མ་མཆིས་མཁྱེན་དང་ལྡན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྔ་ཕྱིའི་མཐའ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་སྐྱོན་ཟློག་མཐའ་རབ་མཁྱེན། །དེ་སླད་སློབ་དཔོན་མ་མཆིས་མཁྱེན་དང་ལྡན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱོན་ཟློག་དེ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་སྔོན་དང་ཕྱི་མཐའ་མཁྱེན། །མིག་གི་རྟག་ཆད་དག་ལ་འཛིན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྔ་ཕྱིའི་མཐའ་ལ་ཐེ་ཚོམ་མ་མཆིས་ཤོག་།དེ་བཞིན་གཤེགས་པས་སྐྱེ་ཟད་མཐའ་མཁྱེན་པས། །མིག་གི་རྟག་ཆད་དག་ལ་འཛིན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། ། སྐྱེ་ཟད་ཉིད་ལ་ཐེ་ཚོམ་མ་མཆིས་ཤོག་།གང་ཞིག་སྔོན་དང་ཕྱི་མཐའ་མ་རྟོགས་པས། །དེ་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། ། དེ་སླད་འདོད་པ་དག་ལ་ཞེན་མི་མངའ། །གང་ཞིག་ཡོད་མེད་མཐའ་ནི་མ་རྟོགས་པས། །དེས་ནི་འདོད་པ་དག་ལ་ཞེན་བསྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །གང་ཞིག་ཟད་དང་མི་ཟད་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་ 355b འདོད་པ་དག་ལ་ཞེན་མི་མངའ། །གང་ཞིག་འཇུག་དང་མི་འཇུག་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །ཞེ་སྡང་གཏི་མུག་ཁོང་ཁྲོ་འཆབ་པ་དང ། །གཡོ་སྒྱུ་ཕྲག་དོག་ང་རྒྱལ་ཁེངས་པ་དང ། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང ། །བསམ་གཏན་ཤེས་རབ་དག་ཀྱང་དེ་བཞིན་ནོ། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་འཛུམ་པ་མཛད་དེ་འོད་ཟེར་གསེར་གྱི་ཁ་དོག་ལྟ་བུ་རབ་ཏུ་བཀྱེའོ། །འོད་ཟེར་དེས་ཀྱང་སངས་རྒྱས་ཀྱི་ཞིང་ཚད་མེད་དཔག་ཏུ་མེད་པ་རྣམས་སྣང་བར་བྱས་ཏེ་འཇིག་རྟེན་གྱི་ཁམས་དེ་དག་ཏུ་ཕན་པ་དག་བྱས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་དེ་བཞིན་གཤེགས་པའི་གཙུག་ཏོར་ཉིད་དུ་ཐིམ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་བྱམས་པ་འདུག་པའི་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་གུས་པས་ཐལ་མོ་སྦྱར་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དེ་བཅོམ་ལྡན་འདས་ལ་ཞུ་བ་ཞུས་པ། འབྲུག་དང་སེངྒེའི་སྒྲ་སྒྲོག་ཅིང ། །ཀ་ལ་པིངྐའི་སྒྲ་ཕྱུང་བས། །ཆོས་རྔ་ཆེན་པོའི་སྒྲ་འབྱིན་པ། །ཅི་ཡི་སླད་དུ་འཛུམ་པ་མཛད། །ཉི་མ་སྟོང་ 356a ༄#། །པས་ཁྱད་པར་འཕགས། །རྣམ་དག་སྒྲ་རབ་དག་དང་ལྡན། །ཡོན་ཏན་ངོ་མཚར་རབ་མངའ་བ། །ཅི་སླད་འོད་ཟེར་བཀྱེ་བ་མཛད། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་རབ་བརྒྱན་པས། །ཐམས་ཅད་དག་ནི་ཡོངས་རྫོགས་པས། །ཅི་སླད་འོད་ཟེར་བཀྱེ་བ་མཛད། །དེ་བཞིན་གཤེགས་པ་དབྱངས་སྙན་པས། །ངག་རྩུབ་རྣམས་ནི་རྟག་ཏུ་སྤངས། །སེམས་ཅན་ནད་ནི་ལེགས་གསོ་བ། །ཅི་སླད་འོད་ཟེར་བཀྱེ་བ་མཛད། །ཐུགས་རྗེ་ཆེན་པོ་རྐང་གཉིས་གཙོ། །མིག་ནི་རྟག་ཏུ་སྟོང་དབེན་མཁྱེན། །རྣམ་དག་ཚངས་པའི་དབྱངས་མངའ་བས། །སེམས་ཅན་རྣམས་ལ་སྟོན་པ་མཛད། །རྣ་བ་སྣ་ལྕེ་ལུས་དང་ཡིད། །སྒྲ་དང་མིང་ལ་སོགས་པ་ནས། །ཀུན་འབྱུང་འགོག་པ་ལམ་དག་དང ། །ཡེ་ཤེས་བཟོད་པའི་བར་དེ་བཞིན། །ཐུགས་རྗེ་ཆེན་པོ་རྐང་གཉིས་གཙོ། །མིག་ཟད་སྐྱེ་བའི་མཐའ་དག་དང ། །རབ་ཞི་དང་ནི་འཁོར་བ་དག་།ཐམས་ཅད་སྟོང་དབེན་ཉིད་དུ་མཁྱེན། །རྣ་བ་སྣ་ལྕེ་ལུས་དང་ཡིད།། གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། །གཞན་ཡང་རྟེན་ཅིང་འབྲེལ་འབྱུང་ཆོས། །ཆད་དང་རྟག་པ་ཡོངས་བྲལ་ནས། ། བདག་དང་གཞན་གྱིས་བྱས་མིན་པས། །རྐྱེན་མང་ལས་བྱུང་ཉིད་དུ་གསུངས། །རེས་འགའ་རྣམ་གྲངས་སྣ་ཚོགས་ཀྱིས། །སྡུག་བསྔལ་བཞི་ནི་སྟོན་པ་མཛད། །རེས་འགའ་དོན་ནི་ 356b སྣ་ཚོགས་ཀྱིས། །སངས་རྒྱས་འོད་ཟེར་བསྔགས་པར་མཛད། །རེས་འགའ་ཚིག་ནི་སྣ་ཚོགས་ཀྱིས། །རབ་དབེན་ཆོས་ནི་སྟོན་མཛད་ཅིང ། །གང་ཟག་སྲོག་དང་བདག་མེད་དང ། །སེམས་ཅན་མེད་པ་ཉིད་དུ་སྟོན། །འདས་པའི་སངས་རྒྱས་ཚད་མེད་ཀྱང ། །བསམ་གྱིས་མི་ཁྱབ་པ་དག་གིས། །ཚིགས་སུ་བཅད་པ་བརྒྱ་སྟོང་གིས། །དེ་འདྲའི་ཆོས་ནི་སྟོན་པར་མཛད། །དེ་བཞིན་གཤེགས་པའི་ཡོན་ཏན་ཆོས། །ཡང་དག་ཉིད་ནི་སྟོན་མཛད་ཀྱང ། །རྗོད་དང་བརྗོད་བྱ་མི་མངའ་བས། །རྗོད་མཛད་ཆོས་ཀྱང་ཡོང་མི་མངའ། །བཅོམ་ལྡན་ཡང་དག་ཆོས་གསུང་ཞིང ། །སྐྱེ་རྒུ་རྣམས་ནི་གོ་མཛད་པས། །ལྷ་རྣམས་དང་ནི་གནོད་སྦྱིན་དག་།གང་ཐོས་དེ་དག་རྟོགས་པར་འགྱུར། །ལྷ་མ་ཡིན་ནི་ཐམས་ཅད་ཀྱང ། །མོས་པ་དག་ནི་རྣམ་པར་དག་།མི་ནི་མང་པོ་ཚད་མེད་ཀྱང ། །ཐེ་ཚོམ་དྲ་བ་ཆད་པར་འགྱུར། །འདོད་ཆགས་རང་བཞིན་རབ་ཏུ་རྟོགས། །ཞེ་སྡང་གཏི་མུག་རྣམ་པར་བཤིག་།སྲེད་དང་ང་རྒྱལ་མ་རིག་དང ། །གཡོ་སྒྱུ་ཕྲག་དོག་སྤྲོས་པ་ནས། །སྡུག་བསྔལ་ཕུང་པོ་ལ་སོགས་པར། །ཐམས་ཅད་ཀྱང་ནི་ཡོངས་སུ་སྤངས། །འདི་ལ་སོགས་པའི་ཚིག་གི་དོན། །མཐའ་ནི་ཀུན་ཀྱང་རྣམ་པར་དག་།དེ་བཞིན་གཤེགས་པས་ཆོས་གཅིག་ལ། །སྣ་ཚོགས་མིང་ནི་རབ་མཁྱེན་པས། །གྲངས་ནི་བརྒྱ་སྟོང་མང་པོ་རྣམས། །བསམ་གྱིས་མི་ཁྱབ་པ་རབ་ཏུ་སྟོན། །སངས་རྒྱས་ཚད་མེད་མང་པོ་ལས། །དེ་འདྲའི་ཆོས་ནི་ལེགས་བསླབ་པས། །ཆོས་ཀྱི་དངོས་པོ་ 357a ༄#། །གཅིག་ལས་ཀྱང ། །བརྗོད་པ་ཐུག་པ་མེད་པ་སྟོན། །དེ་བཞིན་གཤེགས་པས་ཆོས་རྣམས་ཀྱི། །རྣམ་གྲངས་སྣ་ཚོགས་རབ་མཁྱེན་པས། །མིང་ཚིག་དང་པོ་བར་མ་དང ། །ཐ་མ་རྣམ་འབྱེད་རབ་ཏུ་མཁྱེན། །ཐ་དད་ཚིག་ནི་སྣ་ཚོགས་དག་།ཐམས་ཅད་རབ་ཏུ་བསླབ་པས་ན། །དོན་མཆོག་དག་ནི་གྱ་ནོམ་པ། །སྟོན་པ་དག་ནི་རབ་ཏུ་མཁྱེན། །དེ་འདྲའི་དབྱངས་ནི་རྣམ་དག་པ། །རྒྱུ་རྐྱེན་ཚོགས་པ་ལས་བྱུང་བས། །ལྕེ་འབའ་ཞིག་ལ་བརྟེན་པ་ནས། །ལུས་སེམས་བར་ལ་བརྟེན་པའང་མིན། །ས་ནི་རྣམ་པ་དྲུག་ཏུ་གཡོས། །ཕྱོགས་བཅུའི་འཁོར་ནི་ཡོངས་འདུས་ནས། །ཐལ་སྦྱར་བཅོམ་ལྡན་ཞལ་བལྟ་ན། །ཐེ་ཚོམ་དག་ནི་བསལ་དུ་གསོལ། །དེ་བཞིན་གཤེགས་པས་མིག་ཟད་དང ། །སྐྱེ་མཐའ་དང་ནི་རང་བཞིན་གྱིས། །རྟག་ཏུ་སྟོང་ཞིང་དབེན་པ་དང ། །འགྲོ་འོང་མེད་པ་རབ་ཏུ་མཁྱེན། །བཞུགས་དང་གནས་ནི་མི་མངའ་བས། །ཡང་དག་མཐའ་ལ་རབ་ཏུ་བཞུགས། །བཅོམ་ལྡན་སྤྱན་ནི་ཐོགས་མི་མངའ། །དེ་སླད་དེང་བདག་ཞུ་བ་ལགས། །དེ་བཞིན་གཤེགས་པས་མིག་ཉིད་ཀྱི། །སྔོན་དང་ཕྱི་མའི་མཐའ་དག་དང། །ཟད་དང་མ་ཟད་འཁོར་བ་ནི། །རང་བཞིན་སྟོང་དབེན་རབ་མཁྱེན་པས། །ཆོས་ཀྱི་དོན་རྣམས་རབ་ཕྱེ་ནས། །འཇིག་རྟེན་རྣམས་ནི་དགའ་བར་མཛད། །ཐུབ་པ་དབྱངས་ 357b སྙན་རབ་མངའ་བས། །ཅི་སླད་འཛུམ་པ་སྟོན་པར་མཛད། །བཅོམ་ལྡན་སྔོན་དང་ཕྱི་མཐའ་དང ། །མིག་ཉིད་སྟོང་དབེན་རབ་མཁྱེན་ཅིང ། །རྣམ་རྟོག་ཚིག་དང་བྲལ་ལགས་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་མིག་ནི་དཔག་མེད་དང ། །བརྗོད་པ་སྣ་ཚོགས་རང་བཞིན་གྱིས། །རྟག་ཏུ་སྟོང་དབེན་མཁྱེན་ལགས་ནི། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཟད་དང་སྐྱེ་མཐའ་དང ། །མིག་ཉིད་སྟོང་ཉིད་རབ་མཁྱེན་ཅིང ། །ཉོན་མོངས་རྣམས་ནི་ཡོངས་སྤངས་པས། །སངས་རྒྱས་བྱང་ཆུབ་མཁྱེན་པ་བརྙེས། །གྲགས་པ་མཆོག་ནི་ཕུན་ཚོགས་པ། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཡུན་རིང་བསྒོམས་བསླབ་པས། །བསམ་གྱིས་མི་ཁྱབ་སྟོན་པར་མཛད། །མིག་ཉིད་སྟོང་པ་ཉིད་དུ་མཁྱེན། །དྲི་བྲལ་རྟག་ཏུ་རྣམ་པར་དག་།སེམས་ཀྱི་སྤྱོད་པ་ཚད་མེད་རྣམས། །དགོངས་པ་གཅིག་གིས་ཐམས་ཅད་མཁྱེན། །འོད་ཟེར་འཇིག་རྟེན་སྣང་མཛད་པ། །འདི་ནི་གང་གི་སྔ་རྟགས་ལགས། །དྲང་སྲོང་ཆེན་པོ་མངོན་སངས་རྒྱས། །རྐང་གཉིས་གཙོ་བོ་ཁྱད་པར་འཕགས། །ཉོན་མོངས་དག་ནི་རབ་གསལ་བས། ། ཐུགས་ནི་རྟག་ཏུ་ཞི་ཞིང་དབེན། །དེ་བཞིན་གཤེགས་པ་མཁྱེན་མཆོག་གིས། །མིག་ཟད་མཐའ་ནི་རབ་ཏུ་རྟོགས། །རྒྱུ་དང་རྐྱེན་ནི་གང་གི་སླད། །དེང་འདིར་འཛུམ་པ་སྟོན་ 358a ༄#། །བར་མཛད། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། ། བཅོམ་ལྡན་མིག་ལ་བདག་མེད་མཁྱེན། །རྣ་བ་མི་རྟག་ཉིད་དུ་རྟོགས། །སྣ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ལྕེ་ལ་བདག་མེད་མཁྱེན། །ལུས་ཀྱང་མི་རྟག་ཉིད་དུ་རྟོགས། །སེམས་ཡིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་གཟུགས་ལ་བདག་མེད་མཁྱེན།། སྒྲ་ཡང་མི་རྟག་ཉིད་དུ་རྟོགས། །དྲི་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་རོལ་བདག་མེད་མཁྱེན། །རེག་བྱ་མི་རྟག་ཉིད་དུ་རྟོགས། ། ཆོས་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ས་ལ་བདག་མེད་མཁྱེན། །ཆུ་ཡང་མི་རྟག་ཉིད་དུ་རྟོགས། །མེ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་རླུང་ལ་བདག་མེད་མཁྱེན། །ངོ་བོ་མི་རྟག་ཉིད་དུ་རྟོགས། །དངོས་པོ་ཉིད་སྟོང་བར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་འཇིག་རྟེན་བདག་མེད་མཁྱེན། །སྡུག་བསྔལ་མི་རྟག་ཉིད་དུ་རྟོགས། །ཕུང་པོ་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་ 358b པར་མཛད། །བཅོམ་ལྡན་ཁམས་ལ་བདག་མེད་མཁྱེན། །འཇིག་རྟེན་མི་རྟག་ཉིད་དུ་རྟོགས། །སྐྱེ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་སྒྲ་ལ་བདག་མེད་མཁྱེན། །མིང་ཡང་མི་རྟག་ཉིད་དུ་རྟོགས། །ལམ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཡེ་ཤེས་བདག་མེད་མཁྱེན། །རབ་དབེན་མི་རྟག་ཉིད་དུ་རྟོགས། །སེམས་ཅན་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་རང་བཞིན་རང་བཞིན་མེད། །བདག་དང་བདག་མེད་པ་ཡང་མཁྱེན། །མོས་པ་སྟོན་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །འཁོར་བ་བདག་མེད་ཉིད་དུ་གཟིགས། །རྟག་དང་མི་རྟག་པ་ཡང་མཁྱེན། །མྱ་ངན་འདས་པ་སྟོང་མཁྱེན་ན། །ཅི་སླད་འཛུམ་པ་སྟོན་པར་མཛད། །དེ་བཞིན་གཤེགས་པ་ཐུགས་རྣམ་གྲོལ། །གྲགས་པ་ཁམས་གསུམ་ཀུན་ཏུ་གང ། །བརྒྱ་བྱིན་མི་ཡི་དབང་པོ་དང ། །ཀླུ་རྣམས་ལ་སོགས་ཀུན་གྱིས་མཆོད། །དེ་བཞིན་གཤེགས་པས་མིག་ཟད་དང ། །སྐྱེ་མཐའ་རབ་དབེན་མཁྱེན་ལགས་ན། །ཅི་སླད་འཛུམ་པ་སྟོན་པར་མཛད། །སངས་རྒྱས་སྲས་ནི་ཚད་མེད་པ། །འཁོར་འདིར་ཐམས་ཅད་རབ་ཏུ་འདུས། །སངས་རྒྱས་གསུང་ལས་སྐྱེས་པ་དང ། །ཆོས་ལས་སྤྲུལ་ཏེ་གང་བྱུང་བ། །ཐམས་ཅད་ 359a ༄#། །བཅོམ་ལྡན་སྤྱན་སྔར་མཆིས། །གུས་པས་ཐལ་མོར་སྦྱར་ལགས། །འཁོར་འདུས་དེ་དག་སླད་དུ་ནི། །འོད་ཟེར་རྒྱ་རྐྱེན་འདི་ཞུ་ལགས། དེ་བཞིན་གཤེགས་པས་མི་གཉིད་ནི། །སྟོང་ཞིང་བདག་མེད་མཁྱེན་པས་ན། །ཁྱིམ་ན་གནས་པའི་རྣལ་འབྱོར་བ། །ཐམས་ཅད་ལས་ནི་ཡང་དག་འདས། །དེ་བཞིན་གཤེགས་པས་ཆོས་རྣམས་ནི། །བྱེ་བྲག་མེད་ཅིང་མཉམ་མཁྱེན་པས། །བཅོམ་ལྡན་དགོངས་པ་རབ་མཁྱེན་གྱི། །རྫུ་འཕྲུལ་དག་གིས་གཟིགས་མ་ཡིན། །བཅོམ་ལྡན་མིག་ལ་བདག་མེད་མཁྱེན། །ངོ་བོ་ཉིད་སྟོང་འགྲོ་འོང་མེད། །རྣམ་དག་མཁྱེན་པ་ཚད་མེད་མཆིས། །ཅི་སླད་འཛུམ་པ་སྟོན་པར་མཛད།། །།བམ་པོ་གསུམ་པ། དེ་བཞིན་གཤེགས་པ་སྐྱེ་མཐའ་རབ་ཟད་པ། །ཐུགས་རྗེ་ཆེན་པོ་འཇིག་རྟེན་ཀུན་སྐྱོབ་མཛད། །ཆོས་རྗེ་མཆོག་གྱུར་མི་ཡི་གཙོར་གྱུར་པ། །ཅི་སླད་འཛུམ་པ་བསྟན་མཛད་མ་ཤད་དུ་གསོལ། །བྱང་ཆུབ་སེམས་དཔའ་ཆེན་པོ་ཚིམ་མ་མཆིས། །གཞན་ཡང་ལྷ་ཚོགས་གཟི་བྱིན་ཆོ་བ་རྣམས། །མཁའ་ལ་གདུགས་ནི་དམ་པ་དག་ཀྱང་ཐོགས། །ས་ཆེན་འདི་ནི་རབ་ཏུ་གཡོས་པར་གྱུར། །གང་ཞིག་སྔོན་ནི་དེ་བཞིན་གཤེགས་པ་ལས། །ཡུན་རིང་དགེ་བའི་ཆོས་ནི་གང་བསྒྲུབས་པ། །མཉམ་པར་ 359b དགའ་མཛད་ཐུགས་རྗེ་ཆེན་པོའི་གཙོ། །ཅི་སླད་འཛུམ་པ་བསྟན་མཛད་བཤད་དུ་གསོལ། །གང་ཞིག་སྔོན་ནི་སངས་རྒྱས་རབ་མཆོད་ན། །ཆོས་འདི་ཐོས་ནས་དགའ་བ་རབ་བསྐྱེད་པས། །འདྲེན་པ་རབ་མཆོག་མི་ཡི་གཙོར་གྱུར་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་གསུང་ནི་མང་པོ་དགའ་མཛད་པས།། བྱ་རྒྱལ་ངང་པ་བཞིན་དུ་དབྱངས་རབ་སྙན། །སྒྲ་སྙན་ཚད་མེད་རང་གི་དང་གིས་འབྱུང ། །ཅི་སླད་འོད་ཟེར་འདི་བཀྱེ་བཤད་དུ་གསོལ། །ཚིགས་བཅད་བྱེ་བ་ཚད་མ་མཆིས་པ་ཡིས། །རྗེས་མཐུན་གསུང་གི་བསྔགས་པ་བརྗོད་གྱུར་ཅིང ། །ཀུ་ཙི་ར་ཡི་སྒྲ་སྐད་མཆོག་ལྡན་པ། །ཅི་སླད་འོད་ཟེར་བཀྱེ་བ་བཤད་དུ་གསོལ། །འབྲུག་སྒྲ་ཟབ་མོས་ཆོས་ནི་བསྟན་པའི་སྒྲས། །འཇིག་རྟེན་བརྒྱ་སྟོང་དཔག་མེད་གྲགས་གྱུར་པ། །ཐུགས་རྗེས་ཚིག་རྩུབ་ཡང་ན་འཇམ་སྟོན་པ། །ཅི་སླད་འོད་ཟེར་གསེར་གྱི་ཁ་དོག་བཀྱེ། །སྐྱེ་དང་མི་སྐྱེ་ཟད་དང་མི་ཟད་མཁྱེན། །མིག་ཉིད་བྲལ་ཞིང་འགྲོ་འོང་མེད་པར་རྟོགས། །འཇིག་རྟེན་སྣང་མཛད་བདུད་རྩིའི་མཆོག་གྱུར་པ། །ཅི་སླད་འོད་ཟེར་གསེར་གྱི་ཁ་དོག་བཀྱེ། །མིག་གི་བྱུང་བ་རྟག་ཏུ་སྟོང་དབེན་དང ། །འགྲོ་འོང་མ་མཆིས་གནས་པ་མ་མཆིས་དང ། །སྨིག་རྒྱུ་ཆུ་བུར་ལྟ་བུར་རབ་མཁྱེན་པ། །རྒྱུ་རྐྱེན་གང་གི་སླད་དུ་འཛུམ་ 360a ༄#། །མཛད་ལགས། །དེ་བཞིན་རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ཆོས་རྣམས་ནས། །སྒྲ་དང་མིང་ལ་སོགས་པའི་བར་དུ་ཡང ། །ཐམས་ཅད་དེ་བཞིན་དུ་ནི་རིག་པར་བགྱི། །རྡོ་རྗེ་རྟག་པའི་སྐུ་དང་མི་འཇིག་སྐུ། །མཚན་མཆོག་བརྒྱ་སྟོང་དག་ནི་ཕུན་སུམ་ཚོགས། །སྐུ་ལ་འཁྲུལ་འཁོར་མི་མངའ་གཡོ་མཛད་པ། །རྒྱུ་རྐྱེན་གང་སླད་འཛུམ་མཛད་བཤད་དུ་གསོལ། །བྱིན་པ་ཟླུམ་ཞིང་ཞབས་ཀྱི་རྟིང་པ་ཡངས། །ཕྱལ་གྱི་མཚན་མ་མི་གདའ་སེངྒེ་འདྲ། ། ལྟེ་བ་ཤིན་ཏུ་ཟབ་ཅིང་རྐེད་རྒྱས་པ། །རྒྱུ་རྐྱེན་གང་སླད་འཛུམ་མཛད་བཤད་དུ་གསོལ། །གསེར་སྐུ་རྣམ་དག་རྡུལ་དང་དྲི་མ་སྤངས། །བ་སྤུ་རེ་རེ་ཁ་དོག་མཐོན་མཐིང་ལྡན། །གཡས་སུ་འཁྱིལ་ཞིང་སྤོས་ཀྱི་ངད་ལྡང་བ། །རྒྱུ་རྐྱེན་གང་སླད་འཛུམ་མཛད་བཤད་དུ་གསོལ། །སྐུ་མཆོག་དམ་པ་ཡོངས་རྫོགས་རྟག་གནས་པ། །དཔེར་ན་ནྱ་གྲོ་དྷ་ཡི་ཤིང་རྒྱལ་བཞིན། །ཡོན་ཏན་ཐམས་ཅད་ཀྱིས་ནི་རབ་ཏུ་བརྒྱན། །གསུང་དབྱངས་དག་གིས་འཁོར་ནི་དགའ་བར་མཛད། །དཔུང་པ་ཟླུམ་ཞིང་ཕྲག་པ་སྡུག་ལ་མཛེས། །གཙུག་ཏོར་ཡོངས་རྫོགས་གཡས་སུ་འཁྱིལ་བར་གདའ། །ཞིང་ནི་བརྒྱ་སྟོང་དཔག་མེད་རྒྱུ་བར་མཛད། །སེམས་ཅན་ལོག་དང་ཡང་དག་ལམ་སྟོན་ 360b མཛད། །ཚེམས་དཀར་དྲི་མི་མངའ་བས་དུང་དང་འདྲ། །ལྗགས་མཚན་སྲིད་རིང་ཞལ་ནི་ཀུན་ཏུ་ཁེབས། །འགྲམ་པ་སེངྒེའི་འདྲ་ཞིང་ཤངས་ཀྱང་མཐོ། །ཐམས་ཅད་ཐབས་དང་རྣམ་དག་ཐུགས་ལས་སྐྱེས། །ུཏྤ་ལ་ཡི་གསུང་ནི་ཞལ་ནས་འབྱུང ། །ཙནྡན་དྲི་དག་སྐུ་ནི་ཀུན་ཏུ་ཁྱབ། །སྔོན་ནི་བྱམས་པ་རྒྱ་ཆེར་བསྒོམས་པས་ན། །རྣམ་དག་མོས་པ་རྟག་ཏུ་རྒྱུན་མི་འཆད། །དེ་བཞིན་གཤེགས་པའི་ཞབས་མཐིལ་རྟག་ཏུ་མཉམ། །ས་ལ་རེག་ཀྱང་རྡུལ་ནི་གོས་མི་འགྱུར། །གོམ་པ་སེངྒེ་གླང་པོ་ཆེ་འདྲ་བས། ། འཇིག་རྟེན་ཐམས་ཅད་ལས་ནི་ཡང་དག་འདས། །འཁོར་ལོ་རྩིབས་སྟོང་མཚན་གྱིས་ལེགས་པར་བརྒྱན། །ཁྱད་འཕགས་འོད་ཟེར་དག་ནི་རྟག་ཏུ་གསལ། །དགེ་བ་དག་གིས་སྐྱེ་རྒུ་ཕན་འདོགས་པས། །གང་གིས་མཐོང་བ་དང་བ་རབ་ཏུ་སྐྱེ། །སོར་གཅིག་འོད་ཟེར་བརྒྱ་སྟོང་རབ་བཀྱེ་ནས། །སངས་རྒྱས་ཞིང་ནི་དཔག་མེད་སྣང་བར་མཛད། ། སྔོན་ནི་དགེ་སྦྱོང་མང་པོ་རབ་བསྒྲུབས་པས། །མཚན་གྱི་བཀོད་པ་སྣ་ཚོགས་འདི་བརྙེས་ལགས། །གཟུགས་སྐུ་ཡོངས་རྫོགས་དཔེ་ཟླ་ཡོང་མ་མཆིས། །ཞལ་མཚན་རབ་མཛེས་ཤིན་ཏུ་ཁྱད་པར་འཕགས། །རྫུ་འཕྲུལ་དག་གིས་འཇིག་རྟེན་ཕན་འདོགས་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བྱིན་པ་རི་དྭགས་ཨེ་ན་ཡ་དང་ 361a ༄#། །འདྲ། །སྐུ་དབྱིབས་མི་སྒུ་སེངྒེ་ཇི་ལྟ་བཞིན། །འཇིག་རྟེན་བྱུང་ནས་འཇིག་རྟེན་སྣང་མཛད་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །ཅང་ཤེས་བཞིན་དུ་མཚན་སྦས་རྡུལ་མི་མངའ། །ཕྱག་མཐིལ་མཉམ་རྒྱས་ཕྱག་ནི་པུས་མོ་འདས། །མི་ཡི་སེངྒེ་ངོ་མཚར་ཁྱད་པར་འཕགས། །ཅི་སླད་འཛུམ་པ་བསྟན་མཛད་པ་ཤད་དུ་གསོལ། །སྐུ་ལ་འོད་ཟེར་དཔག་མེད་རབ་འགྱེད་ཅིང ། །ཁ་དོག་གྱ་ནོམ་རབ་ཞི་རྟག་གསལ་ཞིང ། །རྣམ་དག་ཐུགས་ནི་རྟག་ཏུ་རྒྱུན་མི་འཆད།། མདོ་སྡེ་ཚད་མེད་པ་དག་སྟོན་པར་མཛད། །རྟག་དང་ཆད་པ་དག་ལ་གནས་པ་ཡིས། །དེ་འདྲའི་ཆོས་ནི་སྒྲུབ་པར་འགྱུར་མ་ལགས། །གང་གིས་མཐར་ལྟ་རྣམས་ནི་རབ་སྤངས་ན། །བཅོམ་ལྡན་རྣམ་དག་སྐུ་ནི་མྱུར་ཐོབ་འགྱུར། །ལྷ་རྔ་འབྲུག་སྒྲའི་གསུང་ནི་ཀུན་གྲགས་ཤིང ། །ཀ་ལནད་ཀའི་དབྱངས་སྙན་རབ་ཏུ་གསལ། །ལྷ་ཡི་གླུ་སྒྲ་བརྒྱ་སྟོང་མང་ལྡན་པ། །ཅི་སླད་འོད་ཟེར་བཀྱེ་བ་བཤད་དུ་གསོལ། །འདྲེན་པས་གསུང་གཅིག་ཏུ་ནི་ཆོས་བསྟན་པས། །འཆལ་པའི་ཚུལ་ཁྲིམས་ཅན་དག་རྒྱུན་ཡང་བཅད། །དེ་བཞིན་གཤེགས་པས་དབྱངས་རབ་གང་གསུང་པ། །དེ་ཀུན་ཟབ་ཅིང་ངོ་མཚར་ཆོས་ལགས་སོ། །ཁྱུ་མཆོག་སྨིན་མཚམས་འོད་ཟེར་རབ་བཀྱེ་ 361b པས། །སངས་རྒྱས་ཞིང་ནི་བརྒྱ་སྟོང་གསལ་བར་མཛད། །སྤྱན་མཆོག་དག་ནི་མཐོན་མཐིང་ཁ་དོག་འདྲ། །གཙུག་ཏོར་མཚན་ནི་མཁའ་ཡི་ལྷས་མི་མཐོང ། །ཚེམས་དཀར་གཏམས་པ་བཞི་བཅུ་དག་དང་ལྡན། །དཔེར་ན་རིན་ཆེན་ཆུ་ཤེལ་དག་དང་མཚུངས། །དགེ་བའི་འཕྲིན་ལས་ཚད་མེད་དག་ལས་སྐྱེས། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་བཞིན་གཤེགས་པ་ཡོན་ཏན་རྫོགས་པའི་སྐུ། །ཁ་དོག་དམ་པ་དཔག་མེད་ཕུན་ཚོགས་ཤིང ། །འོད་ཟེར་རྣམ་དག་ངོ་མཚར་རབ་བཀྱེ་བ། ། ཅི་སླད་འཛུམ་པ་བསྟན་མཛད་བཤད་དུ་གསོལ། །ཐུགས་རྗེ་ཆེན་པོ་མཆོག་རྒྱལ་རྐང་གཉིས་གཙོ། །སེམས་ཅན་ཡང་དག་བསམ་པ་ཐུགས་སུ་ཆུད། །ཐོགས་པ་མ་མཆིས་སྤོབས་པ་མཆོག་བརྙེས་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་བཞིན་གཤེགས་པས་ཕ་རོལ་རབ་བྱོན་པས། །རིག་པ་གསུམ་དང་མངོན་ཤེས་དུག་ཕུན་ཚོགས། །རྣམ་དག་འོད་ཟེར་དཔག་མེད་སྟོན་མཛད་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་སྔོན་ནི་བསྐལ་པ་དཔག་མེད་སྙེད། །བཅོམ་ལྡན་བརྒྱ་སྟོང་སྙེད་ལ་མཆོད་པ་མཛད། །དེ་འདྲའི་རྒྱུ་འབྲས་ཆབ་ནི་མི་འཚལ་བ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་ 362a ༄#། །སྔོན་ནི་བསྐལ་པ་དཔག་མེད་སྙེད། །ཏིང་འཛིན་མཆོག་རྣམས་ལ་ནི་རབ་ཞུགས་པས། །མིག་གི་སྐྱེ་མཐའ་ཟད་པའི་མཐའ་མཁྱེན་ན། །ཅི་སླད་འཛུམ་པ་བསྟན་མཛད་བཤད་དུ་གསོལ། །འདས་པ་དང་ནི་མ་འོངས་ད་ལྟར་དུས། །འདྲེན་པས་དེ་དག་ཀུན་ནི་རབ་ཏུ་མཁྱེན། །རྣམ་དག་མཁྱེན་པ་ཐོགས་མེད་བསམ་མི་ཁྱབ། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་འཁོར་མང་པོའི་མདུན་དུ་ཕྱག་གསེར་གྱི་ཁ་དོག་ལྟ་བུ་བརྐྱངས་ཏེ་ཟླ་འོད་གཞོན་ནུར་གྱུར་པའི་སྤྱི་བོ་ལ་བཞག་ནས་ཚིགས་སུ་བཅད་དེ་བཀའ་སྩལ་པ། །གཞོན་ནུ་ཤིན་ཏུ་ལེགས་པར་ཉོན། །ངས་ནི་དེང་འདིར་བྱང་ཆུབ་ཆོས། །འོད་ཟེར་རབ་ཏུ་སྟོན་པའི་མདོ། །ཁྱོད་ལ་ཤིན་ཏུ་ཡོངས་གཏད་ཀྱི། །མ་འོངས་ཐ་མ་དུས་ངན་ཚེ། །ཆོས་ནི་རྣམ་པར་འཇིག་པས་ན། ། ཁྱོད་ཀྱིས་སེམས་ཅན་རྣམས་ལ་ནི། །རབ་ཏུ་ཕྱེ་ནས་བཤད་པར་གྱིས། །ངས་ནི་སངས་རྒྱས་སྤྱན་དག་གིས། །མ་འོངས་ཐ་མའི་དུས་ཀྱི་ཚེ། །ཤིན་ཏུ་ཟབ་ཅིང་གྱ་ནོམ་པའི། །མདོ་སྡེ་དམ་པ་འདི་དག་ལ། །གང་མོས་གང་ནི་མི་མོས་པ། །ཐམས་ཅད་ཀུན་ཀྱང་གཟིགས་ཤིང་མཁྱེན། །སེམས་ཅན་དག་ནི་གང་ཞིག་གིས། །བྱང་ 362b ཆུབ་ལམ་ནི་རབ་ཚོལ་བ། །རྟག་ཏུ་སངས་རྒྱས་རྗེས་དྲན་ཞིང ། །མདོ་སྡེ་འདི་ནི་གཟུང་བར་གྱིས། །གང་ཞིག་དད་པ་རབ་འཇིག་ཅིང ། །འདུ་འཛི་ལ་ནི་མོས་གྱུར་ངང ། །ཉིན་མཚན་གཉིད་ལ་གང་དགའ་བ། །མདོ་སྡེ་འདི་ལ་མོས་མི་འགྱུར། །ང་ཡི་བསྟན་པ་དག་ལ་ནི། །རབ་ཏུ་བྱུང་བར་གྱུར་ནས་ཀྱང ། །མྱ་ངན་འདས་པའི་ཆོས་དག་ལ། ། མོས་པ་དག་ནི་མི་སྐྱེ་བ། །སྐྱེས་བུ་བླུན་པོ་དེ་དག་ནི། །དད་པས་བྱིན་པ་ཆུད་ཟོས་འགྱུར། །འདུས་བྱས་རྣམས་ནི་ཆོས་དག་ལ། །ཉེས་དམིགས་མང་བར་ཐོས་ཀྱང་ནི། ། འཇིག་རྟེན་དག་ལ་མངོན་ཞེན་ནས། །འཇིག་པ་དག་ནི་མི་སྐྱེ་བ། །སྐྱེས་བུ་བླུན་པོ་དེ་དག་ནི། །མཁས་པ་རྣམས་ཀྱིས་སྨོད་པར་འགྱུར། །ཆོས་གོས་དག་ནི་བགོས་གྱུར་ཀྱང ། །དེ་ལ་ཤེས་རབ་ཅི་ཡང་མེད། །ཐུབ་པས་ལེགས་པར་གསུངས་པ་ཡི། །ཡང་དག་དཀའ་ནི་གང་ཡིན་པ། །ཤེས་པ་མེད་པས་ཐོས་གྱུར་ན། །ཡིད་ཆེས་ལེན་པར་མི་འགྱུར་ཏེ། །སྐྱེས་བུ་བླུན་པོ་དེ་དག་དང ། །ལྷན་ཅིག་གནས་པར་མི་བྱའོ། །ཁྱད་པར་འཕགས་པའི་ཆོས་འདི་དག་།གལ་ཏེ་ཐོས་པར་གྱུར་ནས་ཀྱང ། །རབ་ཏུ་དགའ་ཞིང་མོས་པ་ཡི། །སེམས་ཀྱང་སྐྱེ་བར་མི་འགྱུར་བ། །དེ་འདྲའི་གང་ཟག་དེ་དག་ནི། །ངས་ནི་རབ་ཏུ་སྨོད་པར་བྱེད། །མ་ལུས་ཐོབ་པར་གྱུར་མོད་ཀྱི། །དེ་ནི་ 363a ༄#། །དོན་མེད་ཆུད་ཟོས་ཡིན། །གལ་ཏེ་ཤིན་ཏུ་ཟབ་པའི་ཆོས། །འདི་དག་ཐོས་པར་གྱུར་ན་ནི། །རབ་ཏུ་དགའ་ཞིང་མོས་པ་ཡི། །སེམས་ནི་རབ་ཏུ་སྐྱེ་འགྱུར་བ། །དེ་འདྲའི་གང་ཟག་དེ་དག་ནི། །སྔོན་ཆད་སངས་རྒྱས་ཕྲད་པས་ན། །གདོན་མི་ཟ་བ་ཁོ་ནར་ནི། །བླ་མེད་བྱང་ཆུབ་ཐོབ་པར་འགྱུར། །སྐྱེས་བུ་བླུན་པོ་གང་དག་ཅིག་།ལྟ་བ་ངན་པས་རབ་རྨས་ནས། །ཤེས་རབ་སྲོག་ནི་གཅོད་བྱེད་པ། །བྱང་ཆུབ་ཡོངས་སུ་སྤོང་བར་འགྱུར། །དེ་ལྟ་བས་ན་མི་དགེ་བའི། ། བཤེས་གཉེན་དག་ནི་རབ་སྤངས་ནས། །བློ་ལྡན་མཁས་པ་དག་ལ་ནི། །བརྟེན་ཅིང་གུས་པ་བསྐྱེད་པར་བྱ། །འཇིག་རྟེན་དག་ནི་ཐམས་ཅད་ན། །ཉེས་དམིགས་ཚད་མེད་གང་ཡོད་པ། །སེམས་ཅན་ངན་སོང་གསུམ་པོར་ནི། །རྟག་ཏུ་བྱང་བར་གང་བྱེད་པ། །ཐམས་ཅད་གཏི་མུག་རྨོངས་པ་ཡི། །རྒྱུ་དང་རྐྱེན་ལས་བྱུང་བས་ནི། །ཉོན་མོངས་རྗེས་སུ་འཇུག་བྱེད་ཅིང ། །རང་དབང་དག་ནི་ཐོབ་མི་འགྱུར། །ཡང་དག་ཆོས་ནི་སྤོང་བྱེད་ཅིང ། །ཆོས་མ་ཡིན་པ་སྤྱོད་པར་བྱེད། །དེ་ལྟ་བས་ན་རྨོངས་པ་ཡི། །སྐྱེས་བུ་དམན་པ་སྤང་བར་བྱ། །ཇི་ལྟར་ཁ་ལོ་སྒྱུར་བ་ཡི། །རང་གི་སྲོག་ཤིང་བཅག་པ་བཞིན། །མི་དགེའི་ལས་ནི་བྱས་པས་ན། །སེམས་ཅན་དམྱལ་ 363b བར་སྐྱེ་བར་འགྱུར། །ཁ་ནས་ཚིག་ངན་ཕྱུང་ནས་ནི། །རྟག་ཏུ་བདག་ལ་གནོད་བྱེད་པ། །ཇི་ལྟར་སྟ་རེ་རྣོ་ཐོགས་ནས། །རང་གི་ལུས་ནི་གཅོད་བྱེད་འདྲ། །ཆོས་རྣམས་རྒྱུ་དང་རྐྱེན་དག་གིས། །བྱས་པའི་ལས་ཀྱི་རྗེས་སུ་ནི། །རྣམ་སྨིན་མྱོང་བ་སྐྱབས་མེད་པར། །དེ་ལྟར་ཁོང་དུ་མ་ཆུད་པས། །འཇིག་རྟེན་དྲང་སྲོང་ལ་བརྟེན་ནས། །དགེ་བའི་གྲོགས་པོ་ཡིན་སྙམ་སེམས། །དེ་ནས་རང་ཉིད་འདི་སྙམ་དུ། །སྟོང་པ་ཉིད་ནི་གང་སྒོམ་པ། །འདུས་མ་བྱས་ནི་རྟོགས་སྙམ་ནས། །ཆད་པར་ལྟ་བ་སྐྱེད་པར་བྱེད། །ལུས་ནི་སྣོད་ཆག་པ་དང་འདྲ། །སེམས་ཀྱང་རྗེས་སུ་འགག་འགྱུར་ཞེས། །ཕལ་ཆེར་ཀྱལ་པའི་ཚིག་དག་ལ། །མོས་པ་ཉིད་དུ་རབ་འགྱུར་ཞིང ། །འདི་ལ་མངོན་པར་ཞེན་པས་ན། །ཕན་པའི་དོན་ནི་ཅི་ཡང་མེད། །གལ་ཏེ་སྤྲུལ་ནི་གདུག་པ་ཡིས། །གནོད་པ་དག་ནི་རབ་བྱས་ཀྱང ། །ནམ་ཡང་སྐྱེ་རྒུ་མང་པོ་རྣམས། །ངན་འགྲོ་དག་ཏུ་ལྟུང་མི་བྱེད། །བླུན་པོ་གང་ཞིག་ཆོས་སྟོན་པ། །དགེ་བའི་རྩ་བ་འཇིག་བྱེད་པས། །སྐྱེ་རྒུ་མང་པོ་ཚད་མེད་སྙེད། །སེམས་ཅན་དམྱལ་བར་ལྟུང་བར་བྱེད། །ཁྱེད་ལ་སོགས་པ་འཁོར་འདུས་པ། །འདི་ལྟ་བུར་ནི་བལྟ་བར་གྱིས། །དེང་འདིར་ང་ཡི་སྤྱན་སྔར་ནི། །ཟླ་འོད་གཞོན་ནུ་གང་འདུག་པ། །འདིས་ནི་སྔོན་ཆད་འདས་པ་ཡི། །སངས་རྒྱས་དག་ནི་བཅོམ་ལྡན་འདས། །ཚད་མེད་ 364a ༄#། །གངྒཱའི་ཀླུང་བྱེ་སྙེད། །མཆོད་པ་རིམ་གྲོ་རབ་བྱས་ཤིང ། །ཤིན་ཏུ་བརྟན་པར་ཡོངས་བསྒོམས་ནས། །བླ་མེད་ཡེ་ཤེས་བཙལ་བས་ན། །སྲིད་པ་དག་ནི་ཐམས་ཅད་ལ། །སེམས་ཀྱིས་གནས་པ་ཅི་ཡང་མེད། །མིག་གི་སྐྱེ་མཐའ་གཏན་དུ་ནི། །རྣམ་པར་དག་པ་ཤེས་པས་ན། །སྤྲོས་པ་དག་ནི། ཡོངས་སྤངས་ནས། །མངོན་པར་ཤེས་པ་ཅི་ཡང་མེད། །སེམས་ཅན་དག་ནི་ཚད་མེད་ལ། །ཕན་པ་དག་ནི་བྱ་བའི་ཕྱིར། །བླ་མེད་འོད་ཟེར་སྟོན་པ་ཡི། །མདོ་སྡེ་དག་ནི་སྟོན་པར་བྱེད། །སྐྱེས་བུ་བླུན་པོ་གང་ཡིན་པ། །ཆོས་འདི་སློབ་པར་མི་ནུས་པས། །རྣལ་འབྱོར་སྒོམ་པ་དག་ལ་ནི། །སྐྱོན་ཉིད་དུ་ཡང་ལྟ་བར་བྱེད། །དེ་ལྟ་བས་ན་བླུན་པོ་དག་།ཐག་རིང་པོར་ནི་ཡོངས་སྤངས་ནས། །དེ་དག་ལ་ནི་བསྟན་མི་བྱ། །དེ་ཡི་ཆོས་ཀྱང་མི་བསླབ་བོ། །སྐྱེས་བུ་བླུན་པོ་གང་ཡིན་པ། །རྩོད་པའི་སྨྲ་ལ་མོས་པས་ན།། རྩོད་སྨྲ་མེད་པའི་སྤྱོད་པ་ལ། །ནན་ཏན་སྒྲུབ་པར་མི་ནུས་པས། །སྐྱེས་བུ་དེ་དག་རྣམས་ལ་ནི། །ཚུལ་བཞིན་སེམས་ནི་ཅི་ཡང་མེད། །དེ་ལྟ་བས་ན་དེ་དག་ལ། ། བསྙེན་བཀུར་མི་བྱ་བསྔགས་མི་བརྗོད། །སྐྱེས་བུ་བླུན་པོ་གང་ཡིན་པ། །ལེ་ལོ་སྙོམས་ལས་ལ་གནས་པས། །རྟག་ཏུ་ལུས་དང་ངག་ཡིད་ཀྱི། །མི་དགེའི་ལས་ནི་ 364b སྤྱོད་པས་ན། །དེ་ལ་ཚུལ་ཁྲིམས་དག་པ་དང ། །ཤེས་རབ་མང་ཐོས་ཅི་ཡང་མེད། །རྟག་ཏུ་འདོད་པའི་ཡུལ་སེམས་ཤིང ། །འདུ་འཛི་དག་ལ་མོས་པར་བྱེད། ། ཁྱེད་ཀྱིས་འདི་ལྟར་བླུན་པོ་དེ། །རིགས་དང་རུས་དང་ལུས་ཀྱང་ནི། །དམན་པ་ཡིན་པར་རབ་ཏུ་ལྟོས། །ཁོང་ཁྲོ་བཀའ་བློ་མི་བདེ་ཞིང ། །བྱད་བཞིན་དག་ནི་མི་སྡུག་ལ། ། གལ་ཏེ་དགེ་བའི་གནས་སྐྱེས་ཀྱང ། །ལུས་ནི་རྟག་ཏུ་མ་རབས་འགྱུར། །བདག་ཏུ་འདུ་ཤེས་ལ་ཞེན་པས། །ཡང་དག་དོན་ལ་རྨོངས་པར་འགྱུར། །བློ་གྲོས་དག་དང་མི་ལྡན་པས། །ཚིག་གི་བྱེ་བྲག་འབྱེད་མི་ནུས། །རང་བཞིན་སྟོང་པའི་ཆོས་ཐོས་ཀྱང ། །དེ་ལ་མོས་པ་སྐྱེ་མི་འགྱུར། །དེ་བཞིན་གཤེགས་པ་བཅོམ་ལྡན་འདས། །ཡུན་རིང་པོ་ནས་འཇིག་རྟེན་པའི། །ཚིག་གི་སྤྲོས་པ་གང་ཡིན་པ། །ཐམས་ཅད་རབ་ཏུ་སྤངས་པ་ཡིན། །སོ་སོའི་སྐྱེ་བོས་འདི་དག་ལ། །ཤིན་ཏུ་ཞེན་ཅིང་ཆགས་པས་ན། །ཇི་སྲིད་འཚོ་ཡི་བར་དུ་ཡང ། །རྟོགས་ཤིང་ཁོང་དུ་ཆུད་མི་འགྱུར། །ཚུལ་ཁྲིམས་བསྔགས་པ་བརྗོད་བྱེད་ཀྱང ། །ཚངས་པར་སྤྱོད་པ་སྒྲུབ་མི་བྱེད། །ཁ་ནས་ཆོས་ནི་སྟོན་བྱེད་ཀྱང ། ། ལུས་ཀྱིས་ཆོས་མིན་སྤྱོད་པར་བྱེད། །རང་གིས་འདུལ་བ་སྟོན་བྱེད་ཀྱང ། །རྟག་ཏུ་འདུལ་མིན་སྤྱོད་པར་བྱེད། །སངས་རྒྱས་སློབ་མ་དག་ལ་ནི། །ཁ་དོག་བསྒྱུར་པའི་ 365a ༄#། །གོས་གྱོན་གསུངས། །འཆལ་བའི་ཚུལ་ཁྲིམས་ཅན་དག་གིས། །གོས་འདི་རབ་ཏུ་བགོས་གྱུར་ཀྱང ། །ང་རྒྱལ་དང་ནི་བག་མེད་པའི། །སེམས་ནི་རབ་ཏུ་འཕེལ་བར་བྱེད། །དད་པས་བྱིན་པ་ཅི་ཟོས་པ། །ཐུ་ལུམ་འབར་བ་མིད་པ་འདྲ། །དེ་ལྟར་ཁྱིམ་གྱི་གནས་སྤངས་ནས། །འདོད་པ་ལྔ་ཡི་བདེ་བའང་མེད། །གཞན་ཡང་སངས་རྒྱས་ཆོས་དག་ལ། །མཆོག་གི་བདེ་བ་མ་ཐོབ་ནས། །སྤྱོད་པ་འདྲེན་མ་མོས་བྱེད་པ། །མཐའ་གཉིས་དག་ནི་སྤོང་མི་འགྱུར། །ཡིད་ཀྱི་མོས་པ་ཇི་སྙེད་པ། །ཐམས་ཅད་ཀྱང་ནི་དག་མི་འགྱུར། །དེ་འདྲའི་གང་ཟག་བླུན་པོ་ནི། །འཁོར་མང་ནང་དུ་གནས་གྱུར་ཀྱང ། །དཔེར་ན་ཇི་ལྟར་ཝ་སྐྱེས་དག་།སེངྒེའི་ཁྱུར་ནི་ཞུགས་པ་བཞིན། །དེ་ལྟར་རབ་ཏུ་ཞི་བ་ཡི། །ཆོས་ནི་ཡང་དག་བསྟན་བྱས་ཀྱང ། །དེ་བཞིན་ཉིད་དང་སྟོང་པའི་དོན། །རྟོགས་ཤིང་ཁོང་དུ་མ་ཆུད་པས། །འཁོར་མང་དག་ལ་བསྟན་བསྔགས་ཀྱང ། །ཁེངས་པའི་སེམས་ནི་སྐྱེད་པར་བྱེད། །སྟོན་པ་ཆེན་པོ་མི་དྲན་པས། །ངོ་ཚ་དམན་པའི་སེམས་ཀྱང་མེད། །མི་གཙང་དངོས་པོ་ལེན་བྱེད་ཀྱང ། །ཡིད་བཞིན་ནོར་བུ་ཐོབ་པ་བཞིན། །ཤིན་ཏུ་དགའ་བས་འཛིན་བྱེད་པས། །སེམས་ཀྱིས་ཅུང་ཟད་གཏོང་མི་བྱེད། །འདི་ལྟ་བུ་ཡི་མ་རབས་དག་།ཁྱིམ་ནས་རབ་ཏུ་བྱུང་ནས་ནི། །སྤྱོད་ལམ་དག་ཀྱང་ 365b སྲུང་བ་དང ། །ཆོས་གོས་ལྷུང་བཟེད་འཛིན་བྱེད་ཀྱང ། །ཆ་བྱད་ཙམ་དང་ལྡན་པས་ན། །ཡང་དག་ཤེས་རབ་ཅི་ཡང་མེད། །ཁ་སྤུ་དག་ནི་བྲེག་གྱུར་ཀྱང ། །སྡིག་པའི་སེམས་ནི་མི་སྤོང་ཞིང ། །དགེ་སྦྱོང་མ་ཡིན་པ་ཡི་ཆོས། །ལོག་ལྟ་རྟག་ཏུ་ལྷུང་གྱུར་ན། །རབ་དབེན་མྱ་ངན་འདས་པའི་ལམ། །དེ་དག་རབ་ཏུ་ཉམས་པར་འགྱུར། །དགེ་སྦྱོང་མངོན་དུ་བྱ་བ་ཡི། །འབྲས་བུ་དག་ཀྱང་ཐོབ་མི་འགྱུར། །མ་རིག་ཉོན་མོངས་རྣམས་ཀྱང་ནི། །རྡུལ་ཙམ་ཉམས་པར་མི་འགྱུར་རོ། །གྲོང་ཁྱེར་དག་ཏུ་རྣམ་རྒྱུ་ཞིང ། །རང་ཉིད་དབེན་པའི་བསྔགས་བརྗོད་ཀྱང ། །སྐྱེས་བུ་བླུན་པོ་བློ་མེད་པས། །ཡང་དག་བགྲོད་པ་ཤེས་མི་འགྱུར། །སེམས་ཀྱི་འདུན་པ་ཅི་ཡོད་པ། །དེ་དག་ཐམས་ཅད་མི་དགེ་ཡིན། །རྙེད་པ་འདོད་པའི་རྒྱུ་ཡི་ཕྱིར། །དགོན་པ་དག་ན་གནས་བྱེད་ཀྱི། །མྱ་ངན་འདས་པའི་ཡང་དག་རྒྱུ། །བསྒྲུབ་པའི་ཕྱིར་ནི་མ་ཡིན་ནོ། །རྨུགས་དང་གཉིད་ལ་རབ་ཏུ་དགའ། །ལུས་ནི་ཇི་ལྟར་བདེ་སྙམ་ནས། །རྟག་ཏུ་དེ་ལྟའི་དངོས་པོ་དག་།སྒྲུབ་པ་ལ་ནི་མོས་པར་བྱེད། །དགོན་པའི་གནས་ནི་དེ་དག་ཏུ། །ལོ་ནི་མང་པོར་གནས་བྱེད་ཀྱང ། །ཕྱིན་ལོག་ལྟ་བར་གྱུར་པའི་ཕྱིར།། མྱ་ངན་འདས་ལམ་སྟོར་བས་ན། །ནམ་ཡང་དགེ་སྦྱོང་ལམ་དག་གིས། །འབྲས་བུ་དག་ནི་ཐོབ་མི་འགྱུར། །ཡང་དག་ལྟ་བ་རབ་ཉམས་ཤིང ། །ཚུལ་ཁྲིམས་དག་དང་འགལ་ 366a ༄#། །བྱས་པས། །གོས་བཟང་དག་གིས་ལུས་བརྒྱན་པ། །དེ་ལ་ཤིན་ཏུ་སྲེད་པར་འགྱུར། །འདོད་པའི་བདེ་བ་རྣམས་ལ་ནི། །རྟག་ཏུ་སྲེད་པ་སྐྱེད་པར་བྱེད། །གལ་ཏེ་གྲོང་ཁྱེར་ཞུགས་ན་ཡང ། །ང་རྒྱལ་མཚན་མ་སྟོན་བྱེད་ཅིང ། །ལུས་ཀྱི་ལས་ནི་མི་སྲུང་བས། །སྤྱོད་ལམ་དག་ལ་གནས་མི་བྱེད། །རེས་འགའ་གྲོང་ཁྱེར་ཞུགས་ནས་ནི། །རྒྱུ་ཚེ་རང་ཉིད་འདི་སྐད་དུ། །དགོན་པའི་གནས་ནི་དེ་དག་ན། །རི་ཕུག་དག་ནི་གང་ཡོད་པ། །ཁྱེད་རྣམས་འདི་ལྟར་ཤེས་པར་གྱིས། །དེ་ནི་བདག་གི་གནས་ཡིན་ཏེ། །མཐོན་དམན་རན་པར་ལྟ་བ་དང ། །འགྲོ་གོམ་ཚུལ་ལ་གནས་སོ་ཞེས། །ཐ་དད་མཚན་མའི་ཚིག་བརྗོད་དེ། །དགྲ་བཅོམ་པ་ཡི་རྟགས་བསྟན་པས། །ཁྱིམ་པ་དག་ནི་ཇི་སྙེད་པ། །ཕན་ཚུན་དུ་ནི་འདི་སྐད་དུ། །དགོན་པའི་དགེ་སློང་གང་ཡིན་པ། །ཡང་དག་འཕགས་པ་ཡིན་ཞེས་ཟེར། །རེས་འགའ་དགོན་པ་དེ་དག་ན། །གནས་པར་གྱུར་པ་དེ་ཡི་ཚེ། །གལ་ཏེ་གཞན་དག་འོངས་གྱུར་ན། །འདི་ལྟ་བུ་ནི་སྟོན་པར་བྱེད། །བདག་ནི་དགོན་གནས་འདི་དག་ཏུ། །ཉིན་མཚན་འཆག་པར་བྱེད་ཅེའམ། ། ཡང་ན་རྩཝ་འཇམ་བཏིང་ནས་ནི། །འདིར་ནི་འདུག་པར་བྱེད་ཅེས་ཟེར། །རེས་འགའ་གྲོང་ཁྱེར་ཞུགས་གྱུར་ནས། །ཁྱིམ་པས་དེར་ནི་ཕྱིན་པའི་ཚེ། །གཡོ་སྒྱུས་ནན་ཏན་ 366b འདི་སྐད་དུ། །བདེ་འམ་ཞེས་ནི་འདྲི་བར་བྱེད། །འཇིག་རྟེན་པ་ཡི་འདུ་འཛིའི་གཏམ། །རྒྱལ་པོ་ཆོམ་རྐུན་ལ་སོགས་པའི། །སྣ་ཚོགས་དག་ནི་རྗོད་པར་བྱེད། །རེས་འགའ་ཆགས་པའི་སེམས་དག་གིས། །བུད་མེད་རྣམས་ཀྱི་མདུན་དག་ཏུ། །ཐབས་ནི་རྣམ་པ་སྣ་ཚོགས་ཀྱིས། །རང་གི་ཡོན་ཏན་རྗོད་པར་བྱེད། །བདག་ནི་འཇིག་རྟེན་ཐམས་ཅད་ཀྱི། །བསོད་ནམས་ཞིང་ནི་ཆེན་པོར་བྱེད། །བདག་ནི་རྒྱལ་ཐབས་རབ་སྤངས་ནས། །རབ་ཏུ་བྱུང་ནས་ལམ་སྒོམ་ཡིན། །བཙུན་མོ་དང་ནི་སྲས་རྣམས་ཀྱང ། །མཐོ་རིས་སྐྱེ་བར་འགྱུར་ཞེས་ཟེར། །དེ་དག་དེ་སྐད་ཐོས་ནས་ནི། །ཤིན་ཏུ་གུས་པ་རབ་བསྐྱེད་དེ། །གོས་ཟས་དང་ནི་བཏུང་བ་དག་།སྣ་ཚོགས་སྦྱར་ནས་མཆོད་པར་བྱེད། །བཙུན་པས་ཐུགས་རྗེས་རབ་དགོངས་ཤིང ། ། བདག་ཅག་ཐད་དུ་ཡང་གཤེགས་ཟེར། །རོ་ཞིམ་དག་ལ་ཞེན་ཆགས་ཤིང ། །ཉེས་དམིགས་རྣམས་ནི་མི་ཤེས་པས། །བདུད་ཀྱིས་གླགས་ཀྱང་རྙེད་འགྱུར་ཏེ། །རུས་སྦལ་རྒྱ་མོས་ཟིན་པ་འདྲ། །དགོན་པར་གནས་པ་དག་ལ་ཡང ། །རྙེད་པ་དག་གིས་སྙེམས་པར་བྱེད། །དགེ་སློང་བརྩོན་འགྲུས་ཅན་དག་ལ། །བརྙེས་ཤིང་སྐུར་བ་འདེབས་པར་བྱེད། །རྙེད་དང་གྲགས་པས་སེམས་རྨོངས་པས། །ཡང་ནས་ཡང་དུ་ཞེན་པ་བསྐྱེད། །ལུས་ནི་ཡོངས་སུ་གསོ་བའི་ཕྱིར། །རྟག་ཏུ་གཡོ་སྒྱུ་སྤྱོད་པས་ན། །ལུས་དང་ངག་གི་མི་དགེའི་ལས།། 367a ༄#། །ཡང་ནས་ཡང་དུ་འཕེལ་བར་བྱེད། །གལ་ཏེ་སྦྱིན་བདག་དད་པ་ཡིས། །དང་བའི་སེམས་ཀྱིས་མཆོད་ན་ཡང ། །ལེ་ལོ་སྙོམས་ལས་དབང་གིས་ནི། །དེ་ཡི་བསོད་ནམས་འབྲི་བར་བྱེད། །སྐྱེས་བུ་བླུན་པོ་དེ་དག་ནི། །རྟག་ཏུ་མི་དགེའི་འདོད་བསྐྱེད་པས། །སྟོང་པ་ཉིད་ཀྱི་ཆོས་འདི་ལ། །རྗེས་མཐུན་བཟོད་སེམས་ཐོབ་མི་འགྱུར། །གང་དག་ང་ཡི་བསྟན་པ་ལ། །ཉེས་དམིགས་དེ་དག་རབ་སྤངས་ནས། །ནན་ཏན་བག་ཡོད་སྒྲུབ་བྱེད་ན། །ཆོས་འདི་ཐོས་པར་དཀའ་མི་འགྱུར། །རྙེད་པ་དང་ནི་མི་རྙེད་དང ། །བསྟོད་སྨད་སྡུག་བསྔལ་བདེ་ལ་སོགས། །འཇིག་རྟེན་ཆོས་ཀྱིས་མི་གཡོ་བ། །ཆོས་འདི་ཐོས་པར་དཀའ་མི་འགྱུར། །ལུས་ལ་འདུ་ཤེས་མི་གཙང་དང ། ། ཕུང་པོ་རྨ་ཡི་འདུ་ཤེས་དང ། །ཟས་ནི་རྨ་བསྐུས་འདུ་ཤེས་པ། །ཆོས་འདི་ཐོས་པར་དཀའ་མི་འགྱུར། །གོས་བཟང་དག་ནི་ཐོབ་གྱུར་ཀྱང ། །དྲེགས་པ་དག་ནི་མི་སྐྱེད་ཅིང ། །ངོ་ཚ་དག་པའི་ཕྱིར་གྱོན་པ། །ཆོས་འདི་ཐོབ་པར་དཀའ་མི་འགྱུར། །གཟུགས་དང་སྟོབས་ནི་མི་སྙེམས་ཤིང ། །ཟས་ལ་ཆགས་པ་མེད་པ་དང ། །སྲོག་གནས་ཕྱིར་ནི་གང་ཟ་བ། །ཆོས་འདི་ཐོབ་པར་དཀའ་མི་འགྱུར། །སྲེད་པ་རྣམས་ནི་སྟོང་ཤེས་ནས། །འདོད་པ་དག་ལ་བླང་དོར་མེད། །རྟག་ཏུ་སྟོང་དབེན་གང་སྤྱོད་པ། །ཆོས་འདི་ 367b ཐོབ་པར་དཀའ་མི་འགྱུར། །དཔག་ཚད་གཅིག་འདས་རི་ཁྲོད་དུ། །གཅིག་པུ་འདུག་ནས་མཉམ་གཞག་ཅིང ། །འདུས་བྱས་བདག་མེད་གང་རྟོགས་པ། །ཆོས་འདི་ཐོབ་པར་དཀའ་མི་འགྱུར། །མིག་ཟད་སྐྱེ་བའི་མཐའ་དག་དང ། །མིག་འཇུག་མཚན་ཉིད་རྟོགས་བྱེད་ཅིང ། །མི་གཙང་ལམ་ནི་གང་སྒྲུབ་པ། །ཆོས་འདི་ཐོབ་པར་དཀའ་མི་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་ཀུན་ཀྱང་དེ་བཞིན་ནོ། །དེ་བཞིན་མ་འོངས་དུས་ཀྱི་ཚེ། །དགེ་སློང་དག་ནི་ཚད་མེད་སྙེད། །བརྩོན་པ་དང་ནི་ལེ་ལོ་ཅན། །ཐམས་ཅད་དེ་བཞིན་ཤེས་པར་གྱིས། །དགེ་དང་མི་དགེའི་གྲོགས་པོ་དག་།སྒྲུབ་པ་དང་ནི་མི་སྒྲུབ་པ། །ཡིད་ཆེས་པ་དང་ཡིད་མི་ཆེས། །ཐམས་ཅད་དེ་བཞིན་གཤེགས་པར་གྱིས། །དགེ་དང་མི་དགེའི་གྲོགས་པོ་དག་།མིག་ཟད་ལམ་ནི་གང་ཡིན་པ། །སྒྲུབ་པ་དང་ནི་མི་སྒྲུབ་པ། །ཐམས་ཅད་དེ་བཞིན་ཤེས་པར་གྱིས། །གང་ཞིག་བྱང་ཆུབ་རབ་མོས་ཤིང ། །ཟླ་གཅིག་གཉིས་གསུམ་འདས་ནས་ནི། །དུས་གཞན་ཕྱིར་ནི་གང་ལྡོག་པ། །ཐམས་ཅད་དེ་བཞིན་ཤེས་པར་གྱིས། །གང་ཞིག་ཆོས་འདི་ཐོས་གྱུར་ནས། །མོས་པའི་སེམས་ནི་གང་སྐྱེད་པ། །གལ་ཏེ་ཉམས་པར་གྱུར་ན་ཡང ། །སླར་ནི་དང་བ་ཐོབ་པར་འགྱུར། །གང་ཞིག་ཆོས་འདི་ཐོས་གྱུར་ནས། །བག་མེད་སྤོང་བར་མི་བྱེད་ 368a ༄#། །ན། །མདོ་འདི་སངས་རྒྱས་བཀའ་མ་ཡིན། །དེ་སྙམ་དུ་ནི་སེམས་པར་འགྱུར། །གང་ཞིག་ཆོས་འདི་ཐོས་གྱུར་ནས། །བདུད་ཀྱིས་ཡོངས་སུ་གང་བཟུང་བ། །དང་པོ་དད་པ་སྐྱེས་གྱུར་ཀྱང ། །ཕྱིས་ནི་རབ་ཏུ་སྤོང་བར་འགྱུར། །གང་ཞིག་ཆོས་ལ་མ་མོས་པ། །མི་བདེན་གྲགས་དང་རྙེད་པ་ཚོལ། །གྲོང་ཁྱེར་གྲོང་རྡལ་རབ་རྒྱུ་ཞིང ། ། གཟུངས་རྣམས་དང་ནི་ཏིང་འཛིན་དང ། །ཀུན་འཛིན་འོད་ཟེར་བསྔགས་བརྗོད་ཀྱང ། །དེ་ཡིས་ཡང་དག་རྟོགས་མི་འགྱུར། །འདོད་པ་ལྔ་པོས་བཅིངས་པ་དང ། །འཇིག་རྟེན་ལས་ནི་འདོད་ཚོལ་བ། །བརྗོད་པ་དག་ནི་རྟོགས་བྱེད་པས། །སྟོང་ཉིད་སྒོམ་ལ་སྐུར་པ་འདེབས། །དྲན་དང་ཤེས་རབ་སེམས་མེད་པས། །ཚེ་ཚད་བར་དུ་དོན་མེད་འདས། ། བླུན་པོས་སྟོང་པའི་ཆོས་སྤོང་བ། །དེ་ནི་ཚུལ་ཁྲིམས་གེགས་བྱས་པས། །མནར་མེད་དག་ཏུ་ལྟུང་བར་གྱུར། །ནམ་ཡང་མཐོ་རིས་ཡོངས་མི་སྐྱེ། །གང་གིས་སྐད་ཅིག་གཅིག་ལ་ནི། །མཆོད་རྟེན་སྟོང་ནི་བྱས་པ་བས། །གང་གིས་མདོ་སྡེ་འདི་ཐོས་ནས། །ཚིག་བཞི་ཚིགས་བཅད་གཅིག་འཛིན་འཕགས། །མེ་ཏོག་ཕྲེང་བ་བརྒྱ་སྟོང་དག་།སངས་རྒྱས་མཆོད་རྟེན་མཆོད་པ་བས། །གང་ཞིག་མདོ་སྡེ་འདི་ཐོས་ནས། །ཚིག་བཞི་ཚིགས་བཅད་སེམས་པ་འཕགས། །གང་གིས་རིན་ཆེན་མཆོད་རྟེན་དག་།གངྒཱའི་བྱེ་སྙེད་ 368b བྱས་པ་བས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །སངས་རྒྱས་ཞིང་ནི་འབུམ་ཕྲག་བརྒྱ། །མེ་ཏོག་གཏོར་ནས་མཆོད་པ་བྱས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །ཆོས་གོས་འབུམ་ཕྲག་བརྒྱ་མང་པོ། །སངས་རྒྱས་རྣམས་ལ་ཕུལ་པ་བས། །གང་གིས་ཐ་ན་སྐད་ཅིག་ཙམ། ། མདོ་སྡེ་འདི་སེམས་ཁྱད་པར་འཕགས། །སངས་རྒྱས་སྤྱན་ནི་རྣམ་དག་འཕགས། །མི་མཁྱེན་མི་གཟིགས་གང་ཡང་མེད། །གང་གིས་མདོ་སྡེ་འདི་མོས་ན། །སངས་རྒྱས་སྤྱན་ནི་ཐོབ་པར་འགྱུར། །འདས་པའི་བསྐལ་པ་གྲངས་མེད་ཚེ། །སངས་རྒྱས་མར་མེ་མཛད་པ་བྱུང ། །ང་ནི་དྲང་སྲོང་ཁྱེ་འུར་གྱུར། །མེ་ཏོག་ཐོགས་ནས་མཆོད་པ་བྱས། །ཤཱཀྱ་ཐུབ་པ་ཞེས་བྱ་བ། །བྱང་ཆུབ་སྙིང་པོ་ལ་འདུག་ནས། །མདོ་སྡེ་འདི་ནི་སྟོན་འགྱུར་ཞེས། །ང་ལ་བྱང་ཆུབ་ལུང་ཡང་བསྟན། །ཁྱོད་ནི་དེ་ཚེ་གཞོན་ནུར་གྱུར། །ང་ལུང་བསྟན་པ་ཐོས་གྱུར་ནས། །དགའ་ཞིང་དང་བའི་སེམས་བསྐྱེད་དེ། །ཐལ་མོ་སྦྱར་ནས་འདི་སྐད་དུ། །གལ་ཏེ་བྲམ་ཟེ་ཁྱེའུ་ནི། །མངོན་པར་རྫོགས་པར་སངས་རྒྱས་ཚེ། །བདག་ནི་དེ་ཡི་གྲོགས་གྱུར་ནས། །མྱ་ངན་འདས་པའི་འོག་ཏུ་ཡང ། །ཆོས་ཀྱི་མདོ་སྡེ་རབ་འཛིན་ཅིང ། །སྲུང་བར་ཤོག་ཅེས་སྨོན་ལམ་བཏབ། །སངས་རྒྱས་མར་མེ་མཛད་དེ་ཡིས། །འོད་ 369a ༄#། །ཟེར་སྟོན་པའི་མདོ་འདི་ནི། །ཇི་སྐད་གསུངས་བཞིན་དེ་ཡི་ཚེ། །བྲམ་ཟེའི་ཁྱེའུ་དང་གཞོན་ནུ་གཉིས། །ལེགས་པར་ཉན་ཅིང་ཡོངས་སུ་བཟུང་།། ང་སྔོན་འདས་པའི་དུས་ཀྱི་ཚེ། །མེ་ཏོག་ཨུཏྤལ་དག་གིས་ནི། །སངས་རྒྱས་དེ་ལ་མཆོད་པ་བྱས། །དེ་ཚེ་ཁྱོད་ཀྱང་དེར་འདུག་སྟེ། །འདི་སྐད་དུ་ནི་སྨོན་ལམ་བཏབ། །ང་ཡི་བསྟན་པ་ཐ་མ་ལ། །མདོ་སྡེ་འདི་ནི་རབ་བཟུང་ནས། །རྒྱ་ཆེར་སྟོན་པར་ཤོག་ཅེས་སྨྲས། །གང་གིས་ཆོས་འདི་ཐོས་གྱུར་ནས། །ཞེ་སྡང་སེམས་ནི་མི་བསྐྱེད་པར། །གཟུང་འཛིན་ཀློག་ཅིང་གང་འདོན་པ། །དེ་ནི་སྐྱེས་བུ་དམ་པ་ཡིན། །ཁྱོད་ཀྱིས་མ་འོངས་དུས་ཀྱི་ཚེ། །ཐོས་དཀའི་ཆོས་འདི་རབ་བཟུང་ནས། །སེམས་ཅན་དག་ལ་དོན་གྱི་ཚུལ། །རྒྱ་ཆེར་དབྱེ་ཞིང་བསྟན་པར་བྱ། །ངས་ཀྱང་འདས་པའི་དུས་ཀྱི་ཚེ། །ཡང་དག་ཆོས་ནི་ནུབ་པ་ན། །འོད་ཟེར་སྟོན་པའི་མདོ་འདི་ནི། །སེམས་ཅན་དག་ལ་རྒྱ་ཆེར་བསྟན། །བླུན་པོས་ནན་ཏན་མི་སྒྲུབ་པས། །འདི་ལ་སྐུར་པ་འདེབས་པར་བྱེད། །ངས་ནི་དེ་སྐད་ཐོས་གྱུར་ནས། །ཞེ་སྡང་དག་ནི་སྐྱེད་མི་བྱེད། །ང་ནི་རྟག་ཏུ་བཟོད་བསྒོམས་ནས། །འཇིག་རྟེན་རྣམས་ལ་ཕན་འདོགས་བྱེད། །བཟོད་པའི་སྟོབས་ནི་རྫོགས་པས་ན། །མཚན་དང་དཔེ་བྱད་དག་གིས་བརྒྱན། །གཞོན་ནུ་ཁྱོད་ཀྱིས་ 369b སངས་རྒྱས་སྐུ། །གྱ་ནོམ་ཡོངས་སུ་རྫོགས་གྱུར་ཅིག་།གསེར་གྱི་ཁ་དོག་རྣམ་དག་འཕགས། །བཟོད་པའི་སྟོབས་ལས་བྱུང་བར་ལྟོས། །ང་ཡི་ཞབས་ནི་ས་རེག་ནས། །ཞིང་ནི་ཚད་མེད་གཡོ་བྱེད་ཀྱང ། །སེམས་ཅན་རྣམས་ནི་མི་ལྷུང་བ། །བཟོད་པའི་སྟོབས་ལས་ཐམས་ཅད་སྐྱེད། །ང་ཡི་སྤུ་ཁུང་གཅིག་ནས་ནི། །འོད་ཟེར་བརྒྱ་སྟོང་རབ་བཀྱེ་ནས། ། ཐམས་ཅད་གསལ་བར་གང་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང ། །སྲིན་པོ་ཤིན་ཏུ་འཇིགས་པའི་གཟུགས། །སྲོག་ཆགས་གཟི་བརྗིད་འཕྲོག་བྱེད་པ། །ང་ལ་རྟག་ཏུ་གུས་པ་ཡང ། །ཐམས་ཅད་བཟོད་མཆོག་སྟོབས་ལས་བྱུང ། །ང་ཡི་འཁོར་ནི་ཇི་སྙེད་པ། །སེམས་ནི་རབ་ཏུ་དུལ་གྱུར་ནས། །དེ་བཞིན་གཤེགས་ལ་གུས་པ་ཡང ། །ཐམས་ཅད་བཟོད་མཆོག་སྟོབས་ལས་བྱུང ། །རོལ་མོའི་སྒྲ་ནི་བརྒྱ་སྟོང་དག་།འཁོར་འདུས་ཆེན་པོའི་ནང་དག་ཏུ། །སངས་རྒྱས་ཡོན་ཏན་བསྔགས་བརྗོད་པ། །ཐམས་ཅད་བཟོད་མཆོག་སྟོབས་ལས་བྱུང ། །ཀླུ་ཡི་རྒྱལ་པོ་བརྒྱ་སྟོང་དག་།རབ་ཏུ་གདུག་ཅིང་འཇིགས་རུང་བ། །སངས་རྒྱས་མཐོང་ན་དགའ་བ་ཡང ། །ཐམས་ཅད་བཟོད་མཆོག་སྟོབས་ལས་བྱུང ། །སྲིན་པོ་གནོད་སྦྱིན་ལ་སོགས་པས། །མེ་ཏོག་ཕྲེང་བ་བརྒྱ་སྟོང་ཐོགས། །འོངས་ནས་ང་ལ་མཆོད་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང ། 370a ༄#། །ཞིང་ནི་བརྒྱ་སྟོང་ཚད་མེད་པར། །བཞུགས་པའི་དེ་བཞིན་གཤེགས་པ་རྣམས། །ང་ཡི་ཡོན་ཏན་བསྔགས་པ་ཡང ། །ཐམས་ཅད་བཟོད་མཆོག་སྟོབས་ལས་བྱུང ། །ལྟོ་འཕྱེ་དང་ནི་ལུས་སྲུལ་པོ། །བརྒྱ་སྟོང་དག་ནི་འདུས་གྱུར་ནས། །མེ་ཏོག་གཏོར་ནས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང ། ། གནོད་སྦྱིན་རྒྱལ་པོ་ལ་སོགས་པ། །བྱེ་བ་བརྒྱ་ཕྲག་དྲུག་ཅུ་རྣམས། །འོངས་ནས་ང་ལ་གང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང ། །གཞན་ཡང་ཀླུ་ཡི་རྒྱལ་པོ་ནི། །མ་ན་པ་ག་ལ་སོགས་པས། །མུ་ཏིག་དམར་པོས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང ། །དུ་མུ་རུ་དང་ཤི་ཁྱི་བི། །བརྒྱ་སྟོང་སྙེད་ནི་འདུས་གྱུར་ནས། །རོལ་མོ་དག་གིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང ། །ལྟོ་འཕྱེ་དང་ནི་ལུས་སྲུལ་པོ། །བརྒྱ་སྟོང་སྙེད་ནི་འདུས་གྱུར་ནས། །མེ་ཏོག་སྤོས་ཀྱིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང ། །ས་ཆེན་འཇིན་པ་ཀླུ་ཡི་རྒྱལ། །ལུས་ཕྱེད་དག་ནི་རབ་བསྟན་ནས། །ཐལ་སྦྱར་ང་ལ་གུས་པ་ཡང ། །ཐམས་ཅད་བཟོད་མཆོག་སྟོབས་ལས་བྱུང ། །ལུས་མེད་སྒྲ་གཅན་འཛིན་ལ་སོགས། །བྱེ་བ་ཕྲག་ནི་བརྒྱ་སྟོང་རྣམས། །དང་བའི་སེམས་ཀྱིས་ང་མཆོད་པ། །ཐམས་ཅད་བཟོད་ 370b མཆོག་སྟོབས་ལས་བྱུང ། །གཞོན་ནུ་ཁྱོད་ཀྱིས་འདི་ལྟར་ལྟོས། །སངས་རྒྱས་འོད་ཟེར་གང་རེག་པ། །སྡུག་བསྔལ་བྲལ་ནས་བདེ་ཐོབ་པ། །ཐམས་ཅད་བཟོད་མཆོག་སྟོབས་ལས་བྱུང ། །ས་མུ་ཏ་དང་རླུང་གི་ལྷ། །བརྒྱ་སྟོང་ནམ་མཁའ་གང་བར་ནི། །སྤོས་ཀྱིས་ཆར་བབ་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང ། །ལྷ་ཡི་འཁོར་ནི་བརྒྱ་སྟོང་དག། ལྷ་ཡི་མེ་ཏོག་གཏོར་མཆོད་དེ། །སྲེད་སྤངས་སངས་རྒྱས་སྟེན་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང ། །ཁྱོད་ཀྱིས་སངས་རྒྱས་རྫུ་འཕྲུལ་དང ། །སྦྱིན་དང་ཚུལ་ཁྲིམས་རབ་བསྒྲགས་ནས། །ཐམས་ཅད་ཀུན་ཏུ་ཐོས་མཛད་པ། །བཟོད་མཆོག་སྟོབས་ལས་བྱུང་བར་ལྟོས། །ཕུང་པོ་ཁམས་ཀྱི་སྒྲ་དག་དང ། །བདེན་པ་བཞི་ཡི་སྒྲ་དག་ནས། །ཐམས་ཅད་ཀུན་ཏུ་གོ་མཛད་པ། །ཐམས་ཅད་བཟོད་མཆོག་སྟོབས་ལས་བྱུང ། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལ་མིག་ཟད་མཐའ་དག་དང ། །རབ་ཞིའི་སྒྲ་ནི་ཐོས་གྱུར་ཏེ། །སྐྱེ་བའི་མཐའ་ཡང་དེ་བཞིན་ནོ། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ནི་རྒྱུ་དང་རྐྱེན། །དེ་ལས་སྐྱེ་དང་འགྲོ་འོང་མེད། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ཞི་རྟོགས་བྱེད་ན། །སངས་རྒྱས་རྣམས་ཀྱང་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ 371a ༄#། །ཀྱིས་ནི། །མཁའ་ལ་མིག་ཟད་མཐའ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ཟད་རབ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་སྐྱེ་མཐའ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་འཇུག་རབ་ཞི་ན། ། སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ནི་སྐྱེ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ཡང་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་དབེན་རབ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། །འདོད་ཆགས་གཏི་མུག་ཁོང་ཁྲོ་དང ། །འཆབ་དང་ཕྲག་དོག་གཡོ་སྒྱུ་དང ། །ཁེངས་དང་ང་རྒྱལ་ལ་སོགས་པ། །རྒྱ་ཆེར་བཤད་པའང་དེ་བཞིན་ནོ། །དེ་ནས་ཟླ་འོད་གཞོན་ནུར་གྱུར་པ་དེ་ 371b ལྟ་བུའི་ཆོས་ཁྱད་པར་དུ་འཕགས་པ་ཐོས་པས་རབ་ཏུ་དགའ་བར་གྱུར་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སང་གི་གདུགས་ལ་བདག་དེ་བཞིན་གཤེགས་པ་འཁོར་མང་པོ་དང་བཅས་པར་གདུགས་ཚོད་ལ་སྤྱན་འདྲེན་ན། ཐུགས་བརྩེ་བར་དགོངས་ཏེ་བདག་གིས་སྦྱར་བའི་གདུགས་ཚོད་གསོལ་བར་ཅི་གནང ། དེ་སྐད་ཅེས་གསོལ་པ་དང ། དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་དེའི་བསམ་པ་རྣམ་པར་དག་པ་དང ། སེམས་ཅན་ཚད་མེད་པ་རྣམས་ལ་ཡང་ཕན་གདགས་པར་འགྱུར་བར་ཐུགས་ཀྱིས་མཁྱེན་ནས་ཐུགས་བརྩེ་བར་དགོངས་ཏེ་ཅང་མི་གསུང་བས་གནང་ངོ ། །དེ་ནས་ཟླ་འོད་གཞོན་ནུར་གྱུར་པ་བསྟན་ལས་ལངས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ལན་གསུམ་བསྐོར་བ་བྱས་ནས་རབ་ཏུ་དགའ་བས་རང་གི་ཁྱིམ་དུ་སོང་སྟེ། རང་གི་འཁོར་དང་བཅས་པ་དང ། ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྟོ་འཕྱེ་ལ་སོགས་པས་རྒྱལ་པོའི་ཁབ་གྲོང་ཁྱེར་ཆེན་པོའི་བཞི་མདོར་དར་གྱི་ལྡིང་ཁང་བྲེས་ཏེ། ལྡིང་ཁང་དེ་ཡང་ཤིན་ཏུ་མཐོ་ཞིང་རྒྱ་ཆེ་ལ་ཐམས་ཅད་ཀུན་དུ་ཁྱབ་པ། གསེར་གྱི་ཙོང་ཙོང་དྲ་བར་བྲེས་པ། ནོར་བུ་རིན་པོ་ཆེའི་ཕྲེང་བ་དཔྱངས་པ། སེངྒེའི་བ་དན་དང ། གསེར་གྱི་ཕྲེང་བ་ལུ་གུ་རྒྱུད་ཅན་ 372a ༄#། །འབུམ་ཕྲག་བརྒྱ་སྟོང་སྣ་ཚོགས་ཀྱིས་བརྒྱན་པ། གཞན་ཡང་རིན་པོ་ཆེའི་མེ་ཏོག་ཁ་དོག་ཁྱད་པར་དུ་འཕགས་པའི་ཕྲེང་བའི་ཕུང་པོ་དག་གཅལ་དུ་བཀྲམ་མོ། །མེ་ཏོག་ཙམྤ་ཀ་དང ། ་ཏི་མུཀྟ་ལ་སོགས་པ་རྣམ་པ་སྣ་ཚོགས་ཀྱི་ཕྲེང་བ་ཚད་མེད་གྲངས་མེད་པ་ཡང་རིན་པོ་ཆེའི་ལྡིང་ཁང་གི་ནང་ཐམས་ཅད་དང་འཁོར་འདུས་པ་ཐམས་ཅད་ཀུན་དུ་ཁྱབ་པར་དཔྱངས་ཤིང་རྒྱན་དུ་བྲེས་སོ། །གཞན་ཡང་དེའི་ནང་དུ་ཁྲི་སྟན་རྣམས་བཤམས་ནས་རིན་པོ་ཆེའི་སྤོས་ཕྱི་ལི་ཀ་དང ། དུ་མ་ཙ་དང ། ཙནྡན་དང ། གུར་གུམ་རྣམ་པར་དག་ཅིང་ཡིད་དགའ་བར་བྱེད་པ་སྣ་ཚོགས་བསྲེགས་སོ། །དེ་བཞིན་དུ་སྦྱར་སྤོས་མཆོག་དམ་པ་སྣ་ཚོགས་ཀྱང་མཆོད་པའི་ཡོ་བྱད་དུ་སྦྱར་ཏོ། །གཞན་ཡང་སྤོས་ཀྱི་ཆུས་ལམ་སྲང་རྣམས་ཀུན་དུ་ཁྱབ་པར་ཆག་ཆག་བཏབ་བོ། །ས་གཞི་ཀུན་དུ་མེ་ཏོག་སྣ་ཚོགས་གཅལ་དུ་བཀྲམ་མོ། །དེའི་ཚེ་ལྷའི་བུ་མོ་དང ། ལྷ་མ་ཡིན་གྱི་བུ་མོ་དང ། སྒྲ་གཅན་འཛིན་གྱི་བུ་མོ་གྲངས་མེད་ཚད་མེད་པ་ཡང་རབ་ཏུ་དགའ་བའི་སེམས་བསྐྱེད་ནས་བྱང་ཆུབ་ཀྱི་རྒྱུ་མངོན་པར་སྒྲུབ་པར་འདོད་པའི་ཕྱིར་དེར་འོངས་ནས་གྲོང་ཁྱེར་ཆེན་པོ་དེའི་ཁྱད་པར་དུ་འཕགས་པ་དེ་རབ་ཏུ་བརྒྱན་ཏོ། །དེ་ནས་ཟླ་འོད་གཞོན་ནུར་གྱུར་པས་གྲོང་ 372b ཁྱེར་དེ་ཀུན་དུ་ཁྱབ་པར་བརྒྱན་ཞིང་ཡོངས་སུ་དག་པ་དང ། གདུགས་ཚོད་ལ་བབ་པར་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་ཅན་རྣམས་ལ་སྨན་པར་མཛད་པའི་སླད་དུ་གྲོང་ཁྱེར་ཆེན་པོར་གཤེགས་སུ་གསོལ། །དེ་ནས་བཅོམ་ལྡན་འདས་འཁོར་མང་པོ་དང་ཐབས་ཅིག་ཏུ་གྲོང་ཁྱེར་དུ་གཤེགས་ནས་སྒོའི་ཐེམ་པ་ལ་ཞབས་བཞག་མ་ཐག་ཏུ་གྲོང་ཁྱེར་ཆེན་པོ་དེའི་ས་ཆེན་པོ་ཡང་རབ་ཏུ་གཡོས་པར་འགྱུར། །ཕྱོགས་བཅུའི་འཇིག་རྟེན་གྱི་ཁམས་འབུམ་ཕྲག་བརྒྱ་སྟོང་ཚད་མེད་པ་ཡང་རབ་ཏུ་གཡོས་པར་གྱུར་ཏེ། དེའི་ཚེ་ལོང་བ་དག་གིས་མིག་གིས་གཟུགས་མཐོང་བར་གྱུར། སྡུག་བསྔལ་བ་རྣམས་ནི། བདེ་བ་ཐོབ་པར་གྱུར། །འོན་པ་རྣམས་ནི། རྣ་བས་སྒྲ་ཐོས་པར་གྱུར།་བྱད་བཞིན་མི་སྡུག་པ་རྣམས་ནི། བྱད་བཞིན་བཟང་པོ་ཐོབ་པར་གྱུར། ནོར་མེད་པ་རྣམས་ནི། ནོར་དང་ལྡན་པར་གྱུར། བུ་མེད་པ་རྣམས་ནི། བུ་ཡོད་པར་གྱུར། གོས་མེད་པ་རྣམས་ནི།་གོས་ཐོབ་པར་གྱུར། རིན་པོ་ཆེ་མེད་པ་རྣམས་ནི། རིན་པོ་ཆེ་ཐོབ་པར་གྱུར། ཉེ་བཤེས་མེད་པ་རྣམས་ནི། ཉེ་བཤེས་དང་ལྡན་པར་གྱུར། ལུས་ཀྱི་རྒྱན་ཐམས་ཅད་ཀྱིས་ཕོངས་པ་རྣམས་ནི། ལུས་ཀྱི་རྒྱན་ཐམས་ཅད་དང་ལྡན་པར་གྱུར་ཏོ། །གཞན་ཡང་ངང་པ་དང ། ཁྲུང་ཁྲུང་དང ། ནེ་ཙོ་དང ། རྨ་བྱ་དང ། ཀ་རི་ཀ་ལ་སོགས་པ་བྱའི་ཚོགས་མང་པོ་རྣམས་དེ་ 373a ༄#། །བཞིན་གཤེགས་པ་མཐོང་བ་དང་རབ་ཏུ་དགའ་བའི་སེམས་བསྐྱེད་ནས་སྒྲ་སྙན་ཅིང་ཡིད་དུ་འོང་བ་མཆོག་དམ་པ་ཕྱུང་སྟེ། གང་གིས་སྒྲ་དེ་ཐོས་པ་ཡང་ཡིད་ཤིན་ཏུ་བདེ་བར་གྱུར་ཏོ། །གཞན་ཡང་དེ་བཞིན་གཤེགས་པས་རྫུ་འཕྲུལ་གྱི་སྟོབས་ཀྱིས་ཙམྤ་ཀའི་ལྗོན་ཤིང་ཚད་མེད་པ་སྙེད་མངོན་པར་སྤྲུལ་པས་སེམས་ཅན་བརྒྱ་སྟོང་མང་པོ་རྣམས་མེ་ཏོག་ཡོངས་སུ་དག་པ་དེ་དག་དང ། གཞན་ཡང་སྤོས་མཆོག་དམ་པ་ཐོགས་ནས་བཅོམ་ལྡན་འདས་ལ་མངོན་པར་གཏོར་ཏེ་མཆོད་པ་བྱས་སོ། །གཞན་ཡང་ལྷ་མ་ཡིན་གྱི་བུ་མོ་དབང་ཕྱུག་ཐོབ་པ་བརྒྱ་སྟོང་དུ་མ་མུ་ཏིག་དམར་པོ་དང ། ཙནྡན་གྱི་ཕྱེ་མ་ཐོགས་ནས་དེ་བཞིན་གཤེགས་པ་ལ་རབ་ཏུ་དགའ་བས་མངོན་པར་གཏོར་ཏོ། །ལྷ་མ་ཡིན་མང་པོ་དང ། གཞན་ཡང་ལྷ་མང་པོ་རྣམས་རིན་པོ་ཆེའི་གདུགས་གསེར་དང་དངུལ་གྱིས་རབ་ཏུ་བརྒྱན་པ་ཐོགས་ནས་བར་སྣང་ལ་འདུག་སྟེ། དེ་བཞིན་གཤེགས་པའི་སྟེང་དུ་ཁེབས་པར་གཡོགས་སོ། །གཞན་ཡང་བཅོམ་ལྡན་འདས་ཀྱི་རྫུ་འཕྲུལ་གྱི་སྟོབས་ཀྱིས་ཙནྡན་གྱི་ལྗོན་ཤིང་དང ། གསེར་གྱི་ལྗོན་ཤིང་དང ། རིན་པོ་ཆེའི་སྣོད་དང ། གོས་ལ་སོགས་པའི་ལྗོན་ཤིང་བརྒྱ་སྟོང་ཚད་མེད་དཔག་ཏུ་མེད་པ་རིན་པོ་ཆེ་རྣམས་ཀྱིས་བརྒྱན་པ། མེ་ཏོག་དང་ལོ་མ་ཕུན་སུམ་ཚོགས་ཤིང་རྒྱས་པ། སེམས་ཅན་ཚད་མེད་པའི་བསོད་ནམས་ 373b ཀྱི་རྣམ་པར་སྨིན་པའི་འབྲས་བུ་ཐུན་མོང་དུ་མངོན་པར་གྲུབ་པ། རླུང་གི་ངད་ལངས་པ་ཙམ་གྱིས་སྤོས་མཆོག་དམ་པའི་དྲིས་སངས་རྒྱས་ཀྱི་ཞིང་ཚད་མེད་པ་རྣམས་ཀུན་དུ་ཁྱབ་གང་བར་མངོན་པར་སྤྲུལ་ཏོ། །སེམས་ཅན་བརྒྱ་སྟོང་ཚད་མེད་པ་རྣམས་ཀྱིས་ཀྱང་དུས་གཅིག་ཏུ་མེ་ཏོག་ཐོགས་ནས་བཅོམ་ལྡན་འདས་ལ་མངོན་པར་གཏོར་ཏོ། །དེ་བཞིན་དུ་སེམས་ཅན་དང ། སེམས་ཅན་མ་ཡིན་པ་ཚད་མེད་པ་རྣམས་ཀྱང་དེ་བཞིན་གཤེགས་པའི་རྫུ་འཕྲུལ་གྱི་སྟོབས་ཀྱིས་མངོན་པར་སྤྲུལ་པ་ཤ་སྟག་གོ་།གང་དག་ཅི་དང་ཅི་སྨོན་པ་དེ་དག་ཀྱང་རྫུ་འཕྲུལ་གྱི་དབང་གིས་དེ་དག་གི་བསམ་པ་ཇི་ལྟ་བ་བཞིན་དུ་རེ་བ་ཡོངས་སུ་རྫོགས་པར་གྱུར་ཏོ། །བཅོམ་ལྡན་འདས་གྲོང་ཁྱེར་དུ་གཤེགས་པའི་ཚེ་འཁོར་འདུས་པ་ཐམས་ཅད་ནམ་མཁའ་ལས་ཁྱད་པར་དུ་འཕགས་པའི་སྒྲས་བསམ་གྱིས་མི་ཁྱབ་པར་ཡང་དག་པར་སྟོན་པའི་སྒྲ་ཐོས་པར་གྱུར་ཀྱང་དེ་གང་ནས་བྱུང་བ་ཤེས་པར་ཡང་མ་གྱུར་ལ། ཚིགས་སུ་བཅད་པ་བརྒྱ་སྟོང་དུ་མས་ཀྱང་ཆོས་རྣམས་ཡང་དག་པར་བསྟན་པར་གྱུར་ཏོ། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་ཟད་མཐའ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་ 374a ༄#། །པར་གྱུར། །འདོད་ཆགས་སྐྱེ་མཐའ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་མཐའ་ནི་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་རབ་ཞི་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་འཇུག་པ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་མེད་ཅིང་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་སྐྱེ་མེད་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་ 374b པར་གྱུར། །འདོད་ཆགས་རབ་འགོག་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །ཞེ་སྡང་གཏི་མུག་ཁོང་ཁྲོ་འཆབ་སེར་སྣ། །གཡོ་སྒྱུ་ཁེངས་དང་ང་རྒྱལ་མྱ་ངན་དང ། །སྡུག་བསྔལ་ཀུན་འབྱུང་འགོག་པ་ལམ་སེམས་ཅན། །ཁྱེའུ་དང་བུ་མོ་བུད་མེད་དག་དང་ནི། །སྐྱེས་པ་གསོ་བ་དག་དང་དབང་པོ་དྲུག་།ཡུལ་དྲུག་འབྱུང་ཆེན་བཞི་ཡི་དངོས་པོ་དང ། །འཇིག་རྟེན་སྡུག་བསྔལ་ཕུང་པོ་ཁམས་རྣམས་དང ། །འཇིག་རྟེན་སྐྱེ་སྒྲ་མིང་སོགས་ཀྱང་དེ་བཞིན། །ཆོས་རྗེ་དམ་པའི་ཆོས་ནི་བསྟན་པས་ན། །སེམས་ཅན་ཐམས་ཅད་རབ་ཏུ་དགའ་བར་གྱུར། །ལྷ་ཡི་འཇིག་རྟེན་ཀུན་ཀྱང་ཐོས་གྱུར་ནས། །དེ་བཞིན་གཤེགས་པའི་ཐག་ལ་གནས་པར་མོས། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ་མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་སྦྱིན་སྟོབས་དག་ལ་རབ་མོས་པས། །སྦྱིན་པའི་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་ཚུལ་ཁྲིམས་རྣམ་དག་རབ་མོས་པས། །ཚུལ་ཁྲིམས་སྟོབས་ཀྱིས་བྱང་ཆུབ་བརྙེས་པར་གྱུར།། བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བཟོད་པ་དག་ལ་རབ་མོས་པས། །བཟོད་པའི་སྟོབས་ཀྱིས་བྱང་ 375a ༄#། །ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བརྩོན་འགྲུས་དག་ལ་རབ་མོས་པས། །བརྩོན་འགྲུས་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར།། བཅོམ་ལྡན་བསམ་གཏན་དག་ལ་རབ་མོས་པས། །བསམ་གཏན་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་ཤེས་རབ་དག་ལ་རབ་མོས་པས། །ཤེས་རབ་སྟོབས་ཀྱིས་བྱང་ཆུབ་བརྙེས་པར་གྱུར། །རྫུ་འཕྲུལ་མངོན་ཤེས་ཡོན་ཏན་གནས་ཤེས་སྟོབས། །ཐབས་དང་གཟུངས་ཀྱི་སྟོབས་དང་གྲགས་པའི་སྟོབས། །ལས་དང་རྟེན་འབྱུང་ཡན་ལག་དད་དང་ཐོས། །གཏོང་དང་མཐུན་པའི་སྟོབས་དང་རབ་ཞི་སྟོབས། །རབ་དུལ་ཡང་དག་མཐའ་དང་དབེན་མཁས་སྟོབས། །འཇིགས་དང་དགའ་དང་ཕན་འདོགས་ལ་མོས་དང ། །བྱམས་དང་སྙིང་རྗེ་དགའ་སྙོམས་བཟོད་འཚེ་མེད། །སྟོང་དང་མཚན་མ་མེད་སོགས་ཀྱང་དེ་བཞིན། །སྟོབས་བཅུ་འཕགས་པའི་མངའ་བདག་ལྷ་ཡི་གཙོ། །ཡོན་ཏན་གྲགས་པ་དཔེ་ཟླ་མ་མཆིས་པ། །གྲོང་ཁྱེར་མཆོག་གཤེགས་ཞབས་ནི་ 375b བཞག་པའི་ཚེ། །སེམས་ཅན་རྣམས་ལ་རྒྱ་ཆེར་ཕན་པ་མཛད། །སྔོན་ཆད་སྲིད་གསུམ་ལས་དགེ་རབ་བསྒྲུབས་པས། །ལྷ་ཡི་དགེ་བ་སྣ་ཚོགས་འཕེལ་བར་མཛད། །འཇིག་རྟེན་ཐམས་ཅད་ཀྱིས་ནི་རབ་ཏུ་བཀུར། །ང་ཡི་བསྟན་པ་འདི་ཐོས་ཐམས་ཅད་དགའ། །བཅོམ་ལྡན་གྲོང་ཁྱེར་གཤེགས་ནས་ཞབས་བཞག་ཚེ། །གྲོང་ཁྱེར་ས་ཆེན་དག་ནི་རབ་ཏུ་གཡོས།། བཅོམ་ལྡན་རྣམ་དག་འོད་ཟེར་མཐོང་བས་ན། །ངོ་མཚར་མི་འཛིན་མི་དགའ་གང་ཡང་མེད། །བཅོམ་ལྡན་གྲོང་གཤེགས་ཕན་པ་ཆེར་མཛད་པས། །ལྷ་མིའི་འཁོར་རྣམས་སེམས་ནི་དགའ་བར་གྱུར། །ས་དང་མཁའ་འགྲོ་དག་གིས་སྲིད་གསུམ་ན། །བཅོམ་ལྡན་ཤིན་ཏུ་བདེ་ཞེས་བསྔགས་པར་གྱུར། །བཅོམ་ལྡན་ཞབས་ཀྱི་འཁོར་ལོ་ས་བཞག་ཚེ། །རྣམ་དག་འོད་ཟེར་ཀུན་གསལ་ངོ་མཚར་གྱུར། །རྟ་ནི་ཅང་ཤེས་གྲོང་ཁྱེར་སྒྲ་སྙན་ཕྱུང ། །བྱ་ཚོགས་དག་ཀྱང་མཁའ་ལས་རབ་ཏུ་དགའ། །གཞན་ཡང་རབ་དད་བུད་མེད་མང་པོ་ཡི། །ལག་དང་རྐང་གི་གདུབ་འཁོར་ཕྲེང་བ་དང ། །དེ་བཞིན་རིན་ཆེན་རྒྱན་ནི་སྣ་ཚོགས་ལས། །མ་དཀྲོལ་བར་ཡང་རང་ལས་སྒྲ་སྙན་བྱུང ། །སོ་སོར་ཕན་ཚུན་དགའ་བའི་གཏམ་བརྗོད་ཅིང་།། སྐད་མཐུན་བཀྲ་ཤིས་མཆོག་གི་བསྔགས་པ་བརྗོད། །འོན་ལོང་དབང་པོ་མ་ཚང་དབང་པོ་ཐོབ། །ཐམས་ཅད་བཅོམ་ལྡན་ཁྱད་འཕགས་འབྲས་བུ་དབང ། །བཅོམ་ལྡན་གྲོང་ཁྱེར་ 376a ༄#། །གཤེགས་ཚེ་ཀུན་དགའ་བས། །ལྷ་མིས་མེ་ཏོག་ཀུན་གཏོར་མཆོད་པ་བྱས། །མཁའ་ལས་ཀུན་ཏུ་སྒྲ་སྙན་བྱུང་བས་ན། །ལྷ་ཚོགས་ཚད་མེད་རབ་ཏུ་དགའ་བར་གྱུར། །གཞན་ཡང་སེམས་ཅན་དྲན་པ་ཉམས་པ་དང ། །སྨྱོས་འཁྲུགས་རབ་ཞི་ཕན་ཚུན་གཏམ་སྙན་བརྗོད། །བུད་མེད་གང་སྦྲུམ་མྱ་ངན་འཇིགས་གྱུར་པ། །འོད་ཟེར་བྱིན་གྱིས་བདེ་བ་ཐོབ་པར་གྱུར། །སྐྱེས་པ་བུད་མེད་ངོ་ཚ་ཁྲེལ་བཅས་ལ། །དྲི་མ་སྤངས་པའི་ཆོས་དག་རབ་བཤད་པས། །ཐམས་ཅད་དགའ་ནས་དག་པའི་སེམས་བསྐྱེད་དེ། །ཐུབ་མཆོག་ཞབས་ལ་སྤྱི་བཏུད་ཕྱག་བྱས་ནས། །ཁ་ཅིག་བཅོམ་ལྡན་བླ་མེད་ལམ་མཆོག་ཚོལ། །ཁ་ཅིག་བྱང་ཆུབ་སེམས་དཔའ་ཉན་ཐོས་ཚོལ། །བཅོམ་ལྡན་གྲོང་ཁྱེར་མཆོག་ཏུ་གཤེགས་པས་ན། །བཅོམ་ལྡན་ཞལ་དུ་བལྟ་ཞིང་རང་ཉིད་དགའ། །བཅོམ་ལྡན་མཁྱེན་པས་ས་ཡི་སྤྱོད་རྟོགས་པས། །འཇིག་རྟེན་རྗེས་མཐུན་ཕན་པ་རབ་ཏུ་མཛད། །ཆོས་ཀྱི་ནོར་མཆོག་བྱང་ཆུབ་སེམས་དཔའ་བྱིན། །རིན་ཆེན་མཆོག་ནི་སེམས་ཅན་རྣམས་ལ་བཏང ། །བཅོམ་ལྡན་གྲོང་ཁྱེར་གཤེགས་པའི་ཚེ། །མཁའ་ལས་སྒྲ་ནི་འདི་སྐད་བྱུང ། །གང་ཞིག་མིག་ཟད་མཐའ་སྲེད་པ། །སངས་རྒྱས་ལ་ནི་གུས་པ་ཡིན། །བཅོམ་ལྡན་གྲོང་ཁྱེར་གཤེགས་པའི་ཚེ། །མཁའ་ལས་སྒྲ་ 376b ནི་འདི་སྐད་བྱུང ། །གང་ཞིག་མིག་སྐྱེ་མཐའ་སྲེད་པ། །སངས་རྒྱས་ལ་ནི་གུས་པ་ཡིན། །གང་ཞིག་མིག་ཟད་མཐའ་སྲེད་པ། །སངས་རྒྱས་ཡིད་ཆེས་མི་འཇིགས་ཐོབ། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །ཆོས་ལ་ཡིད་ཆེས་མི་འཇིགས་ཐོབ། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །དགེ་འདུན་ཡིད་ཆེས་མི་འཇིགས་ཐོབ། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །ཚུལ་ཁྲིམས་འཛིན་མེད་ཐོབ་པར་འགྱུར། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །ངན་འགྲོའི་འདོད་ཆགས་སྤོང་བར་འགྱུར། །མིག་ཟད་མཐར་ནི་ལྟ་བས་ན། །འདོད་ཆགས་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐའ་སྲེད་པ། །ངན་འགྲོའི་ཞེ་སྡང་སྤོང་བར་འགྱུར།། མིག་ཟད་མཐར་ནི་ལྟ་བས་ན། །ཞེ་སྡང་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐའ་སྲེད་པ། །ངན་འགྲོའི་གཏི་མུག་སྤོང་བར་འགྱུར། །མིག་ཟད་མཐར་ནི་ལྟ་བས་ན། ། གཏི་མུག་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐའ་སྲེད་པ། །བྱང་ཆུབ་ཡེ་ཤེས་དག་ལ་གནས། །མིག་ཟད་མཐར་ནི་ལྟ་བས་ན། །བྱང་ཆུབ་ཡེ་ཤེས་རྒྱུན་མི་འཆད། ། 377a ༄#། །མིག་སྐྱེ་མཐའ་དང་མིག་གི་མཐའ། །འཇུག་པ་དང་ནི་རབ་དབེན་དང ། །ཡོད་པ་ཉིད་དུ་མི་འགྱུར་དང ། །མི་སྐྱེ་རབ་ཏུ་ཞི་བ་དང ། །འདི་ལ་སོགས་པའི་སྒོ་རྣམས་ཀྱང ། །ཐམས་ཅད་མིག་ཟད་འདྲ་བར་བསྟན། །གང་ཞིག་མིག་ཟད་མཐའ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་སྐྱེ་མཐའ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་གི་མཐའ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་གི་འཇུག་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་དབེན་རབ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་མི་སྐྱེ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་མེད་ལ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་ 377b མིག་ཞི་ལ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །མིག་སྐྱེ་དཔག་མེད་གང་བསྐྱེད་པ། །ཡེ་ཤེས་དཔག་མེད་སྐྱེད་པར་བྱེད། །ཡེ་ཤེས་དཔག་ཏུ་མེད་པའི་ཕྱིར། །ཆོས་འདི་བསྟན་པའང་དེ་བཞིན་ནོ། །མིག་ཟད་དཔག་མེད་གང་ཤེས་པ། །མིག་ལ་སྒྲིབ་པ་མེད་པར་འགྱུར། །དེ་ལྟར་སྒྲིབ་པ་མེད་པའི་ཕྱིར། །སངས་རྒྱས་མཁྱེན་པ་ཐོགས་མེད་ཐོབ། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་བརྒྱ་སྟོང་སྙེད། །མཁའ་ལས་ཆོས་བཤད་སྒྲ་ཐོས་ནས། །སངས་རྒྱས་ཡོན་ཏན་ཐེ་ཚོམ་མེད། །ཁ་ཅིག་འདོད་ཆགས་སེམས་བྱུང་ཡང ། །སངས་རྒྱས་ཡེ་ཤེས་འཇིགས་མི་བྱེད། །གང་ཞིག་འདོད་ཆགས་སེམས་བྱུང་ཡང ། །སངས་རྒྱས་ཡོན་ཏན་སྟོར་མ་གྱུར། །ཁ་ཅིག་འདོད་ཆགས་སེམས་བྱུང་ཡང ། །བླ་མེད་ཡེ་ཤེས་ཚོལ་བྱེད་ཅིང ། །མ་འདྲེས་ཆོས་ནི་སྒྲུབ་པ་དང ། །ཉན་ཐོས་ཐེག་པ་མོས་མི་བྱེད། །བྱིས་པ་བསམ་གཏན་སྒོམ་བྱེད་ཀྱང ། །བསམ་གཏན་བདེ་ལ་མོས་པས་ན། ། 378a ༄#། །མངོན་པའི་ང་རྒྱལ་རབ་བསྐྱེད་ནས། །དགེ་སྦྱོང་འབྲས་བུ་ཐོབ་སྙམ་སེམས། །བྱིས་པ་གསམ་གཏན་སྒོམ་བྱེད་ཀྱང ། །མི་ཟད་མཐའ་ཡི་ཤེས་མེད་ན། །བསྐལ་པ་བརྒྱ་སྟོང་སྒོམ་བྱེད་ཀྱང ། །དེ་ལ་རྣམ་གྲོལ་ཅི་ཡང་མེད། །སྐྱེ་བ་ལེན་པ་ཐམས་ཅད་ནི། །དེ་ལ་ཞེན་ཆགས་སྐྱེད་པར་བྱེད། །གལ་ཏེ་སྐྱེ་ཉིད་སྟོང་རིག་ན། །མཐོང་བ་རྣམས་ནི་རྣམ་དག་འགྱུར། །གང་ཞིག་བསམ་གཏན་བཞི་བསྒྲུབས་ཀྱང ། །མིག་ཟད་མཐའ་ཤེས་མེད་གྱུར་ན། །བསྐལ་པ་བརྒྱ་སྟོང་ལོན་ཀྱང་ནི། །བསམ་གཏན་ཡོངས་སུ་དག་མི་འགྱུར། །གང་ཞིག་ཉེར་བསྡོགས་ཐོབ་གྱུར་ཀྱང ། །ཟད་མཐའ་ཤེས་པ་ཐོབ་མི་འགྱུར། །ཟད་པ་ཐོབ་པ་མ་ཤེས་ཕྱིར། །ཟག་པ་ཐོབ་ལ་རྟག་ཏུ་སྤྱོད། །གང་ཞིག་འདུ་ཤེས་ཞེན་བྱེད་པ། །འདུ་ཤེས་ཟད་མཐའི་ཤེས་པ་མེད། །འདུ་ཤེས་ཟད་པ་མ་ཤེས་ཕྱིར། །རྟག་ཏུ་འདུ་ཤེས་ཟག་ལ་སྤྱོད། །གང་ཞིག་འཇིག་རྟེན་ཞེན་ཆགས་པ། །འཇིག་རྟེན་ཟད་མཐའ་ཤེས་པ་མེད། །འཇིག་རྟེན་ཟད་མཐའ་མ་ཤེས་ཕྱིར། །རྟག་ཏུ་འཇིག་རྟེན་ཟག་ལ་སྤྱོད། །གང་ཞིག་ཟག་བཅས་སེམས་ལ་གནས། ། སེམས་ཟད་མཐའ་ཡི་ཤེས་པ་མེད། །སེམས་ཟད་པ་ནི་མ་ཤེས་ཕྱིར། །རྟག་ཏུ་སེམས་ནི་ཟག་ལ་སྤྱོད། །གང་ཞིག་ཟག་བཅས་ཆོས་ལ་གནས། །ཆོས་ཟད་མཐའ་ཡི་ཤེས་པ་ 378b མེད། །ཆོས་ཟད་པ་ནི་མ་ཤེས་ཕྱིར། །རྟག་ཏུ་ཟད་བཅས་ཆོས་ལ་སྤྱོད། །སྦྱངས་པའི་ཆོས་ལ་གནས་གྱུར་ཀྱང ། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། ། ཡང་དག་སྦྱངས་ལ་གནས་མ་ཡིན། །ཁ་དོག་བསྒྱུར་གོས་བགོས་གྱུར་ཀྱང ། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །ཡང་དག་ཆོས་གོས་བགོས་མ་ཡིན། །ཡ་རབས་རིགས་སུ་སྐྱེས་གྱུར་ཀྱང ། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །དེ་ནི་དག་པའི་རིགས་མ་ཡིན། །འཁོར་མང་དག་ནི་བདོག་གྱུར་ཀྱང ། །མིག་ཟད་མཐའ་ཡི་ཤེས་མེད་ན། །མྱུར་དུ་ངན་འགྲོར་ལྷུང་འགྱུར་ཏེ། །འཁོར་དག་གིས་ནི་སྐྱོབ་མི་ནུས། །སྒྲ་ཡི་རིག་པ་མཁས་གྱུར་ཀྱང ། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །སྒྲ་ཡི་རིག་པ་རྟོགས་མ་ཡིན། །བཟོ་རྣམས་ལ་ནི་མཁས་གྱུར་ཀྱང ། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །དེ་ནི་བཟོ་ལ་མཁས་མ་ཡིན།། དྲི་བ་མང་ལ་མཁས་གྱུར་ཅིང ། །ཡི་གེ་གཅིག་གིས་རྣམ་འབྱེད་ཀྱང ། །མིག་ཟད་མཐའ་ཡི་ཤེས་མེད་ན། །དེ་ནི་དོན་མཐུན་བཤད་མ་ཡིན། །མཁས་པའི་རྗེས་སུ་སློབ་བྱེད་ཀྱང ། ། གསང་དང་གསང་མིན་མི་ཤེས་ཤིང ། །མིག་ཟད་མཐའ་ཡི་ཤེས་མེད་ན། །ཆོས་ནི་རྟོགས་པར་མི་འགྱུར་རོ། །བརྗོད་པ་སྣ་ཚོགས་རྒྱང་པན་དང ། །ཆོས་རྣམས་རབ་ཏུ་ཤེས་གྱུར་ 379a ༄#། །ཀྱང། །མིག་ཟད་མཐའ་ཡི་ཤེས་མེད་ན། །འཁྲི་ཤིང་སྟུག་བོར་ལྷུང་བ་འདྲ། །སྒྲ་ཡི་རིག་པ་མཁས་གྱུར་ཅིང ། །དགེ་དང་མི་དགེའི་རྟགས་སྟོན་ཀྱང་།། ཚིག་འབྲུ་ཡི་གེ་སྒྲ་སྐད་དང ། །ཀློག་དང་འདོན་པའི་མཐར་ཐུག་དང ། །མིག་ཟད་མཐའ་ནི་མ་ཤེས་ན། །དེ་དག་རྣམས་ནི་ཤེས་མེད་ཡིན། །བུད་མེད་དག་གི་མཚན་མ་དང ། ། ཚིག་མཁན་རྨོངས་པར་བྱེད་པ་དང ། ལུས་ཉེས་ངལ་སོས་ཆོས་རྣམས་དང ། །མཁྱུད་དཔྱད་དག་ལ་མཁས་གྱུར་ཀྱང ། །མིག་ཟད་མཐའ་ནི་མ་ཤེས་ན། །དེ་དག་རྣམས་ནི་ཤེས་མེད་ཡིན། །གཞུང་ལུགས་བརྒྱ་མང་སྟོན་བྱེད་ཅིང ། །ཡི་གེ་འབྲུ་གཅིག་མི་བརྗེད་ཀྱང ། །མིག་ཟད་མཐའ་ནི་མ་ཤེས་ན། །བཤད་པ་དེ་ནི་དོན་མེད་ཡིན། །དེ་བཞིན་མིག་སྐྱེ་མཐའ་དག་དང ། །མིག་མཐའ་དང་ནི་འཇུག་པ་ནས། །རབ་ཏུ་ཞི་བའི་བར་དུ་ཡང ། །དེ་བཞིན་དུ་ནི་རིག་པར་གྱིས། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། ། སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །སྒྲ་ཡི་རིག་པ་ཀློག་འདོན་ཅིང ། །དེ་ཡི་དོན་ནི་རྟོགས་གྱུར་ཀྱང ། །མིག་ཟད་མཐའ་ནི་མ་ཤེས་ན། །དེ་ནི་ནམ་ཡང་དམན་པ་ཡིན། །སྨྲང་གཞི་དག་ནི་འདོན་བྱེད་ཅིང ། །གསང་སྔགས་དག་ནི་རྟོགས་གྱུར་ཀྱང ། །མིག་ཟད་མཐའ་ནི་མ་ཤེས་ན། །དེ་ནི་ནམ་ཡང་དམན་པ་ 379b ཡིན། །དེ་བཞིན་མིག་གི་སྐྱེ་མཐའ་དག་།མིག་གི་མཐའ་དང་འཇུག་པ་ནས། །རབ་ཏུ་ཞི་བའི་བར་དུ་ཡང ། །དེ་བཞིན་ཉིད་དུ་རིག་པར་གྱིས། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱའོ། །བམ་པོ་བཞི་པ། བཅོམ་ལྡན་གྲོང་ཁྱེར་གཤེགས་པའི་ཚེ། ། སེམས་ཅན་དག་ནི་ཚད་མེད་སྙེད། །མཁའ་ལས་ཆོས་བསྟན་སྒྲ་ཐོས་པས། །མིག་ཟད་མཐའ་ཡི་ཤེས་པ་ཐོབ། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་ཚད་མེད་སྙེད། །མཁའ་ལས་ཆོས་བསྟན་སྒྲ་ཐོས་པས། །མིག་གི་རང་བཞིན་རྟོགས་པར་འགྱུར། །སྟོང་དང་བདག་མེད་རབ་རྟོགས་པས། །ཐམས་ཅད་རྣམ་དག་མིག་ཐོབ་གྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །འདོད་སྡང་གཏི་མུག་ཁོང་ཁྲོ་དང ། ང་རྒྱལ་ཁེངས་དང་གཡོ་སྒྱུ་ནས། །བག་མེད་པ་ཡི་བར་དུ་ཡང ། །དེ་བཞིན་དུ་ནི་རིག་པར་གྱིས། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་ཚད་མེད་སྙེད། །སྟེང་གི་ནམ་མཁའ་དག་ལས་ནི། སངས་རྒྱས་མཚན་ནི་སྣ་ཚོགས་ཐོས། །ཁ་ཅིག་འདོད་ཆགས་འཇིགས་པ་ཡི། །དཔེ་ཟླ་མེད་པའི་མིང་ཡང་ཐོས། །ཁ་ཅིག་ཞེ་སྡང་འཇིགས་བྱེད་ 380a ༄#། །ཅིང། །འཇིག་རྟེན་ཕན་འདོགས་མིང་དག་ཐོས། །ཁ་ཅིག་གཏི་མུག་རབ་རྟོགས་ཤིང ། །ང་རྒྱལ་འདུལ་བའི་མིང་དག་ཐོས། །ཁ་ཅིག་འཇིག་རྟན་དག་ལ་ནི། །རབ་ཞི་སྟོན་པའི་འདྲེན་མིང་ཐོས། །ཁ་ཅིག་ཤེས་རབ་དག་བསྟན་ནས། །འཇིག་རྟེན་ཕན་འདོགས་མིང་དག་ཐོས། །ཁ་ཅིག་ཐབས་དག་རབ་བསྟན་ནས། ། སེམས་ཅན་ཕན་འདོགས་མིང་དག་ཐོས། །ཁ་ཅིག་བདུད་ནི་རབ་བཏུལ་ཀྱང ། །འཁོན་འཛིན་མེད་པའི་མིང་དག་ཐོས། །ཁ་ཅིག་གསུང་རབ་ཆོས་དག་གིས། །རྣམ་གྲོལ་བསྟན་པའི་མིང་དག་ཐོས། །ཁ་ཅིག་སེམས་ཅན་སྡུག་བསྔལ་བ། །རྒྱ་ཆེར་སྒྲོལ་བའི་མིང་དག་ཐོས། །ཁ་ཅིག་མི་ཡི་གཙོ་བོ་ཡིས། །འཇིག་རྟེན་སྒྲོལ་བའི་མིང་དག་ཐོས།། མིང་ནི་དེ་དག་ཐོས་གྱུར་ནས། །ཐམས་ཅད་རྣམ་དག་མིང་ཐོབ་གྱུར། །ནམ་མཁའ་དང་ནི་རྒྱ་མཚོའི་ཆུ། །རི་རབ་ལྷུན་པོའི་བར་དུ་ཡང ། །ཐམས་ཅད་གཞལ་དུ་རུང་སྲེད་ཀྱི། ། སངས་རྒྱས་མཁྱེན་པ་ཐུག་མི་འགྱུར། །གང་ཞིག་མིག་ཟད་ངེས་པ་ཐོབ་གྱུར་ན། །ཆོས་སྐུ་མངོན་པར་གྲུབ་པ་དཀའ་མི་འགྱུར། །གང་ཞིག་ཆོས་སྐུ་མཆོག་ནི་གྲུབ་གྱུར་ན།། ཀུན་འཛིན་ཡེ་ཤེས་དཔག་མེད་ཐོབ་པར་འགྱུར། །གང་ཞིག་ཀུན་འཛིན་ཡེ་ཤེས་དཔག་མེད་ཐོབ། །དེས་ནི་མདོ་སྡེ་དཔག་མེད་གོ་བར་འགྱུར། །གང་ཞིག་མདོ་སྡེ་དཔག་མེད་ 380b གོ་གྱུར་པས། །སངས་རྒྱས་རྫུ་འཕྲུལ་ཐོབ་པ་དཀའ་མི་འགྱུར། །གང་ཞིག་མིག་སྐྱེ་ངེས་པ་ཐོབ་གྱུར་ན། །ཆོས་སྐུ་མངོན་པར་གྲུབ་པ་དཀའ་མི་འགྱུར། །གང་ཞིག་ཆོས་སྐུ་མཆོག་ནི་གྲུབ་གྱུར་ན། །ཀུན་འཛིན་ཡེ་ཤེས་དཔག་མེད་འཐོབ་པར་འགྱུར། །གང་ཞིག་ཀུན་འཛིན་ཡེ་ཤེས་དཔག་མེད་ཐོབ། །དེས་ནི་མདོ་སྡེ་དཔག་མེད་གོ་བར་འགྱུར། །གང་ཞིག་མདོ་སྡེ་དཔག་མེད་གོ་གྱུར་པས། །སངས་རྒྱས་རྫུ་འཕྲུལ་ཐོབ་པར་དཀའ་མི་འགྱུར། །དེ་བཞིན་རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ཆོས་དག་ནས། །སྒྲ་རྣམས་དང་ནི་མིང་གི་བར་དུ་ཡང ། །ཐམས་ཅད་དེ་བཞིན་དུ་ནི་སྦྱར་བ་བྱ། །དེ་ཚེ་ས་ཆེན་དག་ནི་རབ་ཏུ་གཡོས། །རྒྱ་མཚོ་རི་རྣམས་ཀྱང་ནི་དེ་བཞིན་ནོ། །ལྷ་མ་ཡིན་དང་ལྷ་ནི་མང་པོ་རྣམས། །ཐམས་ཅད་རབ་ཏུ་དགའ་བ་སྐྱེས་པར་གྱུར། །བདུད་དང་བདུད་དཔུང་གཡོ་སྒྱུ་རབ་བཅོམ་ནས། །ཐམས་ཅད་སངས་རྒྱས་བཀོད་པ་སྒྲུབ་པར་མོས། །ལྷ་རྣམས་སོ་སོ་གཞལ་མེད་ཁང་ཞུགས་ནས། །ཕན་ཚུན་དགའ་བའི་གཏམ་ནི་འདི་སྐད་སྨྲས། །འདྲེན་པ་དེང་ནི་འཇིག་རྟེན་བྱུང་བས་ན། །ལྷ་མི་ཐམས་ཅད་ལ་ནི་ཕན་པ་མཛད། །ས་བླའི་ལྷ་འཁོར་གཞལ་མེད་ཁང་གནས་ནས། །དང་བའི་སེམས་ཀྱིས་དགའ་ནས་འདི་སྐད་དུ། །འདྲེན་པ་འཇིག་རྟེན་དེང་བྱུང་ཤིན་ཏུ་ལེགས། །འཇིག་རྟེན་ཀུན་བདེའི་རྒྱུ་ནི་རབ་ཏུ་མཛད། །མཁའ་ལ་སྤྱོད་པའི་ལྷ་ 381a ༄#། །རྣམས་དེ་ཐོས་ནས། །ཐམས་ཅད་དགའ་ནས་རབ་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་བ་བྱུང་བས་འཇིག་རྟེན་ཕན་མཛད་ཟེར། །རྒྱལ་ཆེན་རིགས་བཞིའི་ལྷ་ནི་དེ་ཐོས་ནས། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། ། འདྲེན་པ་བྱུང་བས་འཇིག་རྟེན་ཕན་མཛད་ཟེར། །སུམ་ཅུ་རྩ་གསུམ་ལྷ་ནི་དེ་ཐོས་ནས། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །འཐབ་བྲལ་ལྷ་དག་དེ་སྐད་ཐོས་ནས་ནི། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །བདག་ཅག་བྱང་ཆུབ་སེམས་ནི་རབ་བསྐྱེད་ན། །བཅོམ་ལྡན་བླ་མེད་མཁྱེན་པ་ཉེ་བར་བགྱི། །ལྷ་མི་གཙོ་མཆོག་ལ་ནི་བརྟེན་ནས་སུ། །སེམས་ཅན་ཐམས་ཅད་སྒྲོལ་བར་བགྱིད་ཅེས་ཟེར། །དགའ་ལྡན་ལྷ་རྣམས་དེ་སྐད་ཐོས་ནས་ཀྱང ། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །བཅོམ་ལྡན་འདས་ཀྱིས་བསྐལ་པ་བྱེ་བར་ 381b ནི། །སྤྱོད་མཆོག་ཁྱད་འཕགས་དཔག་མེད་སྔོན་བསྒྲུབས་ནས། །སེམས་ཅན་སྡུག་བསྔལ་བ་ལ་བདེ་ལམ་བསྟན། །འཁོར་བ་བསྒྲལ་ནས་མྱ་ངན་འདས་ལ་བཀོད། །འཕྲུལ་དགའི་ལྷ་རྣམས་དེ་སྐད་ཐོས་ནས་ནི། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །གཞན་འཕྲུལ་དབང་བྱེད་ལྷ་ནི་དེ་ཐོས་ནས། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །དེ་བཞིན་གཤེགས་པ་སྐྱེ་ཤི་འདས་པ་ན། །བདུད་དང་མུ་སྟེགས་མང་པོ་ཕམ་པར་མཛད། །བླ་མེད་བྱང་ཆུབ་དག་ནི་ཡོངས་རྫོགས་ནས། །སྐྱེ་རྒུ་དྲངས་ནས་ཕ་རོལ་འཇོག་ཅེས་ཟེར། །ཚངས་རིས་ལྷ་རྣམས་དེ་སྐད་ཐོས་ནས་ཀྱང ། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །དེ་བཞིན་གཅིག་ནས་གཅིག་ཏུ་སྒྲ་ཐོས་པས། །ཚངས་པའི་འཁོར་རྣམས་དགའ་ནས་འདི་སྐད་དུ། །འདྲེན་པ་བྱུང་བས་འཇིག་རྟེན་ཕན་པ་མཛད། །བདུད་དཔུང་འཇིགས་སྐྲག་མྱ་ངན་བྱེད་ཅེས་ཟེར། །སྲིད་པའི་རྩེ་མོའི་ལྷ་ཡི་བར་དུ་ཡང ། །སངས་རྒྱས་བྱུང་ནས་འཇིག་རྟེན་ཕན་མཛད་ཐོས། ། 382a ༄#། །དེ་བཞིན་སྒྲ་ནི་ཀུན་དུ་གྲགས་པས་ན། །ལྷ་མ་ཡིན་དག་འགྲིབ་ཅིང་ལྷ་རྣམས་འཕེལ། །བདུད་ཀྱི་ཁང་པ་དག་ནི་ཡོངས་སྟོངས་ཤིང ། །ལྷ་རྣམས་འཁོར་ནི་རབ་ཏུ་རྒྱས་པར་འགྱུར། །མི་འཇིགས་སྟོབས་ཀྱིས་ལོག་པ་རབ་བཏུལ་ནས། །བྱང་ཆུབ་ཆེན་པོའི་མཆོག་ནི་མྱུར་དུ་བརྙེས། །དེ་བཞིན་སྐད་ཅིག་ཡུད་ཙམ་ལྷ་རྣམས་ཀྱིས། །བཅོམ་ལྡན་བྱུང་ནས་ཕན་མཛད་ཐོས་གྱུར་པས། །འཇིག་རྟེན་འདྲེན་པར་མཛད་པ་ཤིན་ཏུ་ལེགས། །རྣམ་དག་མིང་ནི་སེམས་ཅན་སྦྱིན་ཞེས་ཟེར། །བཅོམ་ལྡན་གྲོང་ཁྱེར་གཤེགས་པའི་ཚེ། །འདོད་པས་ཡོངས་སུ་གདུངས་པ་རྣམས། །མི་གཙང་སྒོམ་པ་བཤད་ཐོས་པས། །འདོད་ཆགས་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཞེ་སྡང་དག་གིས་གདུངས་པ་རྣམས། །བྱམས་པ་བསྟན་པའི་ཆོས་ཐོས་པས། །ཞེ་སྡང་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །གཏི་མུག་དག་གིས་གདུངས་པ་རྣམས། །ཤེས་རབ་ཆོས་ནི་བསྟན་ཐོས་པས། །གཏི་མུག་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ང་རྒྱལ་དག་གིས་གདུངས་པ་རྣམས། །ང་རྒྱལ་སྤངས་པའི་ཆོས་ཐོས་པས། །ང་རྒྱལ་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཕྲག་ 382b དོག་དག་གིས་གདུངས་པ་རྣམས། །ཕྲག་དོག་སྤངས་པའི་ཆོས་ཐོས་པས། །ཕྲག་དོག་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཁོང་ཁྲོ་དག་གིས་གདུངས་པ་རྣམས། །ཁོང་ཁྲོ་སྤངས་པའི་ཆོས་ཐོས་པས། །ཁོང་ཁྲོ་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །སེར་སྣ་དག་གིས་གདུངས་པ་རྣམས། །སེར་སྣ་སྤངས་པའི་ཆོས་ཐོས་པས། །སེར་སྣ་ཞི་སྟེ་མ་ལུས་སྤངས། །གང་ཞིག་དུལ་བའི་སྤྱོད་གྲུབ་པ། །དཔག་མེད་ཆོས་ནི་འདི་ཐོས་པས། །མང་དུ་ཐོས་པའི་མཚོར་ཞུགས་པས། །ཀུན་འཛིན་སྒོ་ནི་སྒྲུབ་པར་བྱེད། །གཞན་ཡང་མཁའ་ལས་སྒྲ་ཐོས་པས། །མེ་ཏོག་དག་གིས་སངས་རྒྱས་མཆོད། །ཡོན་ཏན་ཁྱད་པར་འཕགས་སྒྲུབ་ཅིང ། །སྙིང་རྗེ་ཆེན་པོའི་རྫུ་འཕྲུལ་སྟོན། ། གཞན་ཡང་མཁའ་ལས་སྒྲ་ཐོས་པས། །བཅོམ་ལྡན་སྐུ་དང་སྐྱེ་གནས་དང ། །གདུང་རྒྱུད་དང་ནི་གསུང་སྒྲ་རྣམས། །ཁྱད་པར་འཕགས་པའི་བསྔགས་པ་བརྗོད། །སེམས་ཅན་འགྲོ་བ་ཇི་ལྟ་བར། །རྫུ་འཕྲུལ་དག་ཀྱང་ཅི་རིགས་བཤད། །མིག་དང་རྣ་བ་སྣ་ལྕེ་ལུས། །གཟུགས་དང་སྒྲ་དྲི་ལ་སོགས་དང ། །བསྐུམ་པ་དང་ནི་བརྐྱང་བ་དང ། །སྟོན་པར་མཛད་པ་ཁྱད་པར་འཕགས། །བཅོམ་ལྡན་འཇིག་རྟེན་འདས་པ་ན། །འཇིག་རྟེན་སྒྲོན་མ་རབ་མཛད་ཅིང ། །གཟུགས་ནི་མང་པོ་སྟོན་པ་ཡང ། །ཐམས་ཅད་སངས་རྒྱས་རྫུ་འཕྲུལ་ཡིན། ། 383a ༄#། །སྣོད་དང་སྣོད་མིན་དེ་རྗེས་སུ། །མི་མཐུན་ཆོས་ནི་སྟོན་མཛད་པས། །སེམས་ཅན་ཚེ་རབས་ཚད་མེད་ནས། །སངས་རྒྱས་མཆོད་པར་མ་བྱས་ཤིང་།། དམུ་རྒོད་གདུལ་བར་དཀའ་བ་ལ། །སེམས་ཅན་དམྱལ་བ་བཤད་པར་མཛད། །གང་ཞིག་ལས་ལ་རྨོངས་གྱུར་ཅིང ། །ལྟ་ལ་བརྟེན་ནས་སྤྲོས་དགའ་བ། །བཅོམ་ལྡན་དེ་དག་ལྟ་བ་དང ། །སྤྲོས་པ་ཞི་བའི་སྒྲ་ཐོས་མཛད། །གཞན་ཡང་མཁའ་ལས་ངོ་བོ་ཉིད། །ངེས་པ་ཉིད་དུ་སྟོང་པ་དང ། །འགྲོའོང་མེད་ཅིང་མཚན་མེད་དང ། །ཅི་ཡང་མེད་པའི་སྒྲ་ཡང་ཐོས། །གཞན་ཡང་སེམས་ཅན་བརྒྱ་སྟོང་དག་།མཁའ་ལས་ཤ་དང་ཤེས་རབ་སྤྱན། །དེ་བཞིན་ཆོས་ཀྱི་སྤྱན་བར་དུ། །ཡང་དག་སྟོན་པའི་སྒྲ་ཡང་ཐོས། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ཚུལ་ཁྲིམས་ཏིང་འཛིན་ཤེས་རབ་སྒྲ། །རྣམ་གྲོལ་རྣམ་གྲོལ་མཐོང་བའི་སྒྲ། །སྟོན་པ་དག་ཀྱང་ཐོས་པར་གྱུར། །སེམས་ཅན་དག་ནི་ཇི་སྙེད་ལ། །དེ་བཞིན་རྫུ་འཕྲུལ་རབ་བསྟན་ནས། །ཇི་ལྟར་རྗེས་མཐུན་སྒྲ་སྐད་ཀྱིས། །ཡང་དག་ཆོས་ནི་བསྟན་པར་མཛད། །སེམས་ཅན་ལ་ལ་གང་ཞིག་གིས། །སྦྱིན་དང་ཚུལ་ཁྲིམས་བཟོད་སྒྲུབ་མོས། །རྫུ་འཕྲུལ་མོས་པ་ཇི་ལྟ་བཞིན། །སྦྱིན་དང་ཚུལ་ཁྲིམས་བཟོད་སྒྲ་སྟོན། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །སེམས་ཅན་དབང་པོ་ཇི་ལྟ་ 383b བཞིན། །རྒྱ་ཆེར་ཡང་དག་འབྱེད་མཛད་པས། །ལེན་འཛིན་སྟོན་ལ་དགོད་པར་མཛད། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ཕུང་པོ་ཁམས་དང་སྐྱེ་མཆེད་ཀྱི། །བཅིངས་དང་གྲོལ་དང་ཉི་རིང་དང ། །ས་ཡི་གནས་སྐབས་བྱེ་བྲག་གི་།མཚན་ཉིད་སྟོང་པ་ཐོས་པར་འགྱུར། །གཞན་ཡང་ས་དང་ཡེ་ཤེས་ཀྱི། །འོད་ཟེར་ཚད་མེད་སྟོན་པ་དང ། །ཉོན་མོངས་བག་ཆགས་སྤངས་པ་དང ། །སྤངས་མིན་སྟོན་པ་ཐོས་པར་གྱུར། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ལྷ་དང་མི་ཡི་ངོ་བོ་ཉིད། །ལས་དང་འབྲས་བུ་མི་མཚུངས་པས། །སྐྱེ་ལེན་ཐ་དད་ཐོས་པར་འགྱུར། །རེས་འགའ་བུད་མེད་མདུན་དག་ཏུ། །བུད་མེད་བརྒྱན་པའི་ལུས་སྤྲུལ་ནས། །མཁའ་ལས་སྐྱོ་སྟོན་སྒྲ་བསྒྲགས་པས། །གང་ཐོས་འདོད་ཆགས་སེལ་བར་མཛད།། ཤཱ་རིའི་བུ་ནི་ཇི་ལྟ་བཞིན། །ཤིན་ཏུ་དང་བ་སྐྱེས་གྱུར་པ། །ཐུགས་རྗེས་མོས་པ་ཇི་བཞིན་དུ། །བླ་མེད་ཆོས་ནི་སྟོན་པར་མཛད། །མཽ་དགལ་བུ་དང་འོད་སྲུང་དང ། །ཀ་པི་ན་དང་ཀུན་དགའ་དང ། །འོད་སྲུང་ཆེན་པོ་དག་དང་ནི། །ཀུན་ཤེས་ཀཽ་དི་ནྱ་ལ་སོགས། །དེ་དག་མོས་པ་ཇི་བཞིན་དུ། །ཉན་ཐོས་ཆོས་སྟོན་ཐོས་པར་འགྱུར། །ལྷ་རྣམས་དང་ནི་ལྷ་མ་ཡིན། ། གནོད་སྦྱིན་དག་ནི་མང་པོ་དང ། །བེ་རོ་ཀ་ནི་འཁོར་དང་བཅས། །གྲུལ་བུམ་དག་ནི་ཚད་མེད་རྣམས། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །གཟུངས་སྔགས་སྒྲ་ནི་ཐོས་པར་ 384a ༄#། །གྱུར། །ི་དི་སི། བི་དི་སི། ཨི་ར་སུ། ཨི་ར། ཨཽ་ན་སི། མ་ན་སི། ཨུ་ཁྱི། ཨ་ནོ་ཁྱི། ཨ་ཁི་ཙ་ལ་མཾ་ནཾ་ཡེ། དི་ར་ནི་ཤྠ་ནི་མི། ཏ་ཀ་ནི། ཨི་མི་མནྟྲ། ནི་ཧ་ར། ཨ་བུ་རེ། བུདྡྷེ། ནི་རེ། ཨ་ཁི་ཙ་ར། བི་ཡ་ཀི་རི་ཡ་ཏེ། ཨ་ཁི་ཙར་པ་ར་མི་ཏེ། ཀ་ལཱ་བ་ཧི་ནི། སརྦ་བིདྴི་ནིར་དྷེ་བཽ་ན། བ་ར་ཤ་སད་ཏེ།་ཤ་ས་ཏ། པ་ར་ཤ་སད་ཏ། ཏ་ར་སད་ཏ། བྷཱུ་མི། ཨཱམ་བྷ་ར། ལི་ལ་བྷ་ན། ཤིཉྩ་ཙིད་ཏ། བི་བ་མ་ཏི། ཙིད་ཏ་ཨ་ནནྟ། ཨོ་བེ་ར་ཧ་བ་མི་ཏ་བྷཱུ་མི། ན་ནམ་ཀཱ་ནི། ཨ་ཀ་ནི་བི་བྷི་མིད་ཏེ། ཤ་རི་བི་ཤྠ། ཨ་མ་ལ་ནི་མ་ལ། བཱུ་ལི་ཏེ་ན་ར་ཤི་ཙ། ཧ་ཧ་རི། མ་མ་ལཱི། བྷ་ར་ཎི་ཏི་ཤྠ། ཙཀྵུ་ནིར་ཧ་ར། ཨུ་དྷ་རི་ཏ་བ་ཙི། ཨནྟ་རི། ཀུ་ཏ་རི། ཀེ་ཏུ་སུ་ཀེ་ཏུ་སུ་པ་ར་ནི།་ཀ་ར་ནི། ཀུ་སུ་མ་ནི་ཡཻ། ཀ་ཀ་རི། ཀ་ཁ་རི། ཨུ་པ་ལཾ་མཱུ་རི། ཏི་ཤྠ་ད་ར་ནི། ནཱ་ག་ནི་ར་ཧ་རེ། པ་ར་ལད་ཏེ། ཨ་ཏེ་པ་ར་ཡ་ཏེ། ཨནྟ་ར་བྷནྡྷེ། ཨནྟ་ར་ཏ་བྷ་ཏི་ཤི་ཙ། ཧ་སི་རི། མ་ཁ་ལི། ཨཱི་ནི་སམྦྷ་རེ། ཏི་ཤྠ་སིཏྟ་ར་ཎི། ཀུ་བྷུ་ལོ་ཙ་ཏེ། གཞན་ཡང་རྒྱལ་པོ་རྣམ་ཐོས་བུ། །ཡུལ་འཁོར་སྲུང་ནི་ལ་སོགས་པས། །ཁྱད་འཕགས་སྒྲ་ནི་གྲངས་མེད་ཀྱིས། །བདེན་པའི་སྔགས་ཚིག་རབ་ཏུ་སྨྲས། །ཚད་མེད་སྒྲ་ནི་དེ་དག་ཀྱང ། །བདེ་གཤེགས་རྫུ་འཕྲུལ་དབང་གིས་བྱུང ། །རྫུ་འཕྲུལ་དག་ནི་ཚད་མེད་པས། །བསྟན་པ་ 384b དག་ཀྱང་ཚད་མེད་དོ། །རེས་འགའ་སངས་རྒྱས་མེད་ཞིང་དུ། །རྫུ་འཕྲུལ་རོལ་པའི་སྟོབས་དག་གིས། །འཁོར་བསྐོར་སངས་རྒྱས་སྐུ་སྟོན་པ། །ད་ལྟར་མཐོང་བ་དེ་བཞིན་ནོ། །བསམ་གྱིས་མི་ཁྱབ་ཞིང་དག་ཏུ། །སྤྲུལ་པ་ཚད་མེད་སྟོན་མཛད་པ། །བལྟམས་ནས་གོམ་པ་བདུན་གཤེགས་དང ། །རྒྱལ་སྲིད་སྤངས་ནས་རབ་བྱུང་དང ། །བྱང་ཆུབ་སྙིང་པོར་སངས་རྒྱས་ནས། ། བརྙེས་པའི་ཆོས་དག་རབ་དགོངས་ཏེ། །ཆོས་ཀྱི་འཁོར་ལོ་བསྐོར་མཛད་དང ། །མྱ་ངན་འདས་པ་སྟོན་པར་མཛད། །རྫུ་འཕྲུལ་གྱི་ནི་སྟོབས་དག་གིས། །སྣ་ཚོགས་ཆོས་ནི་སྟོན་མཛད་པས། །སེམས་ཅན་དག་ནི་ཚད་མེད་རྣམས། །ཁྱད་འཕགས་ཡེ་ཤེས་གྲུབ་པར་མཛད། །དེ་ཚེ་ཐུགས་རྗེ་ཆེན་པོ་ཡིས། །ཚངས་པའི་འཁོར་གྱིས་ཡོངས་བསྐོར་ནས། །བྱམས་ཆོས་སྒོམ་པ་བཤད་བསྟན་ནས། །བྱམས་པའི་སེམས་ནི་འཕེལ་བར་མཛད། །དེ་ཚེ་ཐུགས་རྗེ་ཆེན་པོ་ཡིས། །ལྷ་རྣམས་ཀྱིས་ནི་ཡོངས་བསྐོར་ནས། །བསྡུ་བའི་དངོས་བཞི་བཤད་བསྟན་པས། །བསྡུ་བའི་དངོས་བཞི་འཕེལ་བར་མཛད། །དེ་ཚེ་ཐུགས་རྗེ་ཆེན་པོ་ཡིས། །ཀླུ་རྣམས་ཀྱིས་ནི་ཡོངས་བསྐོར་ནས། །ཞེ་སྡང་ཉེས་དམིགས་བཤད་བསྟན་པས། །ཞེ་སྡང་སེམས་ནི་སྤངས་པར་གྱུར། །དེ་ཚེ་ཐུགས་རྗེ་ཆེན་པོ་ཡིས། །གནོད་སྦྱིན་རྣམས་ཀྱིས་ཡོངས་བསྐོར་ནས། །རྣམ་འཚེའི་ཉེས་དམིགས་བཤད་བསྟན་པས། །རྣམ་འཚེའི་སེམས་ནི་སྤངས་ 385a ༄#། །པར་གྱུར། །དེ་ཚེ་ཐུགས་རྗེ་ཆེན་པོ་ཡིས། །ལྷ་མ་ཡིན་གྱིས་ཡོངས་བསྐོར་ནས། །འཐབ་པའི་ཉེས་དམིགས་བཤད་བསྟན་ཏེ། །བཟོད་པ་སྒོམ་པའི་བསྔགས་པ་བརྗོད། །དེ་ཚེ་ཐུགས་རྗེ་ཆེན་པོ་ཡིས། །ནམ་མཁའ་ལྡིང་གིས་ཡོངས་བསྐོར་ནས། །འགལ་བྱས་ཉེས་དམིགས་བཤད་བསྟན་ཏེ། །འདུམ་པའི་སེམས་ཀྱི་བསྔགས་པ་བརྗོད། །དེ་ཚེ་ཐུགས་རྗེ་ཆེན་པོ་ཡིས། །དྲི་ཟའི་འཁོར་གྱིས་ཡོངས་བསྐོར་ནས། །དགའ་བའི་ཚིག་ནི་དཔག་མེད་ཀྱིས། །དེ་བཞིན་གཤེགས་པའི་བསྔགས་བརྗོད་བསྟན། །དེ་ཚེ་ཐུགས་རྗེ་ཆེན་པོ་ཡིས། །ལྟོ་འཕྱེའི་འཁོར་གྱིས་ཡོངས་བསྐོར་ནས། །མུ་སྟེགས་ཆོས་ལ་སྨོད་མཛད་ཅིང ། །བཅོམ་ལྡན་གསུང་རབ་བསྔགས་བརྗོད་བསྟན། ། དེ་ཚེ་ཐུགས་རྗེ་ཆེན་པོ་ཡིས། །འདྲེ་སྲིན་འཁོར་གྱིས་ཡོངས་བསྐོར་ནས། །དེ་བཞིན་གཤེགས་པའི་ཡོན་ཏན་མཆོག་།རྒྱ་ཆེར་བསྔགས་པ་བསྟན་པར་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ཟད་མཐའ་བསྟན་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་སྐྱེ་མཐའ་ནི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོའི་འཕྲུལ་བསྟན་པས། ། 385b སེམས་ཅན་དག་ནི་བརྒྱ་སྟོང་སྙེད། །མིག་གི་མཐའ་ནི་བསྟན་ཐོས་པས། །མཐར་ཕྱིན་དེ་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་དག་ནི་བརྒྱ་སྟོང་སྙེད། །མིག་འཇུག་བསྟན་པ་ཐོས་གྱུར་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་དབེན་བསྟན་པ་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་སྐྱེ་མེད་བསྟན་ཐོས་པས།། མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་མེད་བསྟན་པ་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ནི་ཉེར་ཞི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་བདག་མེད་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་གང་ཟག་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ 386a ༄#། །ཅན་དག་ནི་བརྒྱ་སྟོང་སྙེད། །མིག་ལ་སེམས་ཅན་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། ། སེམས་ཅན་དག་ནི་བརྒྱ་སྟོང་སྙེད། །མིག་ལ་སྲོག་མེད་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་གསོ་བ་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་ཞེན་པ་རབ་སྨད་དེ། །ཞེན་པ་མི་བསྐྱེད་ཉིད་དུ་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་རྙེད་པ་རབ་སྨད་དེ། །འདུས་མ་བྱས་ཀྱི་བསྔགས་བརྗོད་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །ཟག་བཅས་ཤེས་པ་རབ་སྨད་དེ། །ཟག་མེད་ཤེས་རབ་བསྔགས་པ་མཛད། ། ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་བསམ་གཏན་རབ་སྨད་དེ། །འཇིག་རྟེན་འདས་པའི་ཏིང་འཛིན་བསྔགས། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཟག་བཅས་ཚུལ་ཁྲིམས་རབ་སྨད་དེ། །ཟག་མེད་བསླབ་ནས་བསྔགས་པར་མཛད། །ཐུགས་རྗེ་ཆེན་པོས་འཕྲུལ་ 386b བསྟན་ནས། །སེམས་ཅན་རྣམས་ལ་རྒྱ་ཆེར་ནི། །སེམས་རྒྱ་ཆུང་དུའི་སྐྱོན་བརྗོད་དེ། །སེམས་རྒྱ་ཆེན་པོའི་ཡོན་ཏན་བསྔགས། །ཐུགས་རྗེ་ཆེན་པོའི་འཕྲུལ་བསྟན་ནས། །ལུས་ཀྱི་ཚུལ་ཁྲིམས་སེམས་ཤེས་རབ། །ཟག་མེད་བརྟེན་པ་མེད་པ་ཡི། །བསྔགས་པ་དག་ནི་བརྗོད་པར་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སྡུག་བསྔལ་འགོག་པའི་ལམ་བསྔགས་ཤིང ། །སྤྲོས་ལ་དགའ་ཞིང་ཞེན་པ་དག་།སངས་རྒྱས་སྨད་པ་རབ་ཏུ་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །མིག་ཟད་སྐྱོན་ནི་རབ་འབྱེད་ཅིང ། །རབ་ཞི་མཚན་ཉིད་བསྟན་པར་མཛད། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །དར་ལ་བབ་ཅིང་གཞོན་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཆོ་རིགས་དག་ནི་སྙེམས་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ལོངས་སྤྱོད་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །རང་དབང་བག་མེད་གྱུར་པ་ལ། །ཉེས་ 387a ༄#། །དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །གཟུགས་ཀྱིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །བུད་མེད་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །གོས་ཀྱི་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཆང་གིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །རྒྱལ་པོ་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཚུལ་ཁྲིམས་སྙེམས་པར་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས།། སེམས་ཅན་རྣམས་ལ་རྒྱ་ཆེར་ནི། །ཤེས་རབ་སྙེམས་པར་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །དེ་བཞིན་རྟོགས་དང་རྫུ་འཕྲུལ་དང ། །བསམ་གཏན་ 387b མཁས་པའི་ང་རྒྱལ་དང ། །ནོར་དང་བཤད་དང་རིགས་དང་འཁོར། །རོལ་མོ་གླུ་དང་ལྕེ་རྒྱད་དང ། །གྲགས་བ་ཕུན་ཚོགས་བསྔགས་པ་དང ། །བཀུར་སྟི་དང་ནི་རྙེད་པ་དང ། མཛེས་དང་གཡོ་སྒྱུ་ང་རྒྱལ་དང ། །ངོ་ཚ་མེད་དང་ཁྲེལ་མེད་དང ། །ཁེངས་དང་ཕུན་ཚོགས་ང་རྒྱལ་དང ། །བག་མེད་འདོད་ཆགས་དེ་བཞིན་ནོ། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་སེམས་དང་ཡིད། །དམན་པར་གྱུར་པ་དེ་དག་ལ། །ཁྱད་པར་འཕགས་པའི་འདུ་ཤེས་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་རབ་ཞུམ་ཞིང ། །རྩོལ་བར་མི་བྱེད་དེ་དག་ལ། །བརྩོན་འགྲུས་སྟོབས་ནི་སྟོན་པར་མཛད། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་ནོར་རྣམས་ལ། །ཆགས་པར་གྱུར་པ་དེ་དག་ལ། །ཆོག་ཤེས་ཆོས་ནི་སྟོན་པར་མཛད། །གཞན་ཡང་སྦོས་ཀྱི་དྲི་གཙང་ཁང ། །མེ་ཏོག་དག་གི་གཞལ་མེད་ཁང ། །ཁང་པ་བརྩེགས་མ་མཆོག་སྤྲུལ་ནས། ། སྤྲུལ་པའི་སངས་རྒྱས་བཞུགས་པར་བསྟན། །གཞན་ཡང་ལྷ་ཡི་བུ་མོ་རྣམས། །མེ་ཏོག་ཙམྤའི་ཁང་པ་ན། །གནས་པའི་ལུས་ཕྱེད་བསྟན་སྤྲུལ་ནས། །མེ་ཏོག་ཕྲེང་ཐོགས་མཆོད་བྱེད་བསྟན། །གཞན་ཡང་ལྷ་མིན་བུ་མོ་དག་།མེ་ཏོག་མ་ལའི་ཁང་པ་ན། །གནས་པའི་ལུས་ཕྱེད་བསྟན་སྤྲུལ་ནས། །མེ་ཏོག་ཕྲེང་ཐོགས་མཆོད་བྱེད་བསྟན། །གཞན་ཡང་ལྷ་ཡི་བུ་ 388a ༄#། །མོ་རྣམས། །པདྨ་སྔོན་པོའི་ཁང་པ་ན། །གནས་པའི་ལུས་ཕྱེད་བསྟན་འཕྲུལ་ནས། །སངས་རྒྱས་ཡོན་ཏན་བསྔགས་པ་བསྟན། །གཞན་ཡང་ཚངས་པ་རྣམས་ཀྱི་ལྷ། །གསེར་གྱི་གཞལ་མེད་ཁང་པ་ན། །གནས་པའི་ལུས་ཀུན་བསྟན་བསྡུས་ནས། །སྒྲ་སྙན་སངས་རྒྱས་བསྔགས་པ་བསྟན། །གཞན་ཡང་ལྷ་ཡི་བུ་མོ་དག་།སྣ་ཚོགས་རྒྱན་གྱིས་ལུས་བརྒྱན་ཞིང ། །རྒྱན་ནི་ཕན་ཚུན་རེག་པ་ལས། །སྒྲ་སྙན་དག་ནི་རབ་བྱུང་ནས། །འདུས་བྱས་རྣམས་ཀྱི་ཆོས་དག་ནི། །འགྱུར་ཞིང་མི་བརྟན་ཡིན་ན་ཡང ། །བྱིས་པ་མི་བདེན་རྟོགས་པ་ཡིས། །ཡང་དག་ཇི་བཞིན་མི་ཤེས་ཟེར། །རྒྱན་གྱི་སྒྲ་ནི་དེ་དག་ཀྱང ། །ལུས་དང་སེམས་ལས་བྱུང་མ་ཡིན། །འགྲོ་བ་མེད་ཅིང་འོང་བ་མེད། །ཕྱོགས་ཀྱང་ཡོད་པ་མ་ཡིན་ཏེ། །གཟུགས་དང་སེམས་ཀྱི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །བྱིས་པ་རྣམས་ནི་མི་ཤེས་པས། །འདི་ལ་ཐེ་ཚོམ་སྐྱེ་བར་འགྱུར། །རྒྱན་གྱི་རྣམ་པ་དེ་དག་ལས། །སྒྲ་སྙན་བྱུང་བ་དེ་ཡིས་ནི། །སངས་རྒྱས་ཞིང་ཀུན་གྲགས་པས་ན། །སེམས་ཅན་ཚད་མེད་གྲོལ་བར་འགྱུར། །དེ་ལྟ་བས་ན་ཁྱེད་རྣམས་ཀྱིས། །འདྲེན་པ་དང་བྱུང་ཡེ་ཤེས་དང ། །ཡོན་ཏན་དཔག་མེད་སྐུ་དག་ནི། །སྲེད་པའི་སྤྲོས་ལས་འདས་པ་དང ། །རབ་དབེན་སྐྱོན་ནི་མེད་པ་དང ། །ལྟ་བྲལ་སེམས་ནི་རབ་སྦྱངས་དང ། །མཚན་ 388b དང་དཔེ་བྱད་བརྒྱན་པ་དང ། །སྐུ་དང་ཐུགས་ནི་དག་པར་ལྟོས། །ཁྱེད་ཀྱིས་བཅོམ་ལྡན་གྲོང་གཤེགས་ཚེ། །གོམ་པ་དག་ནི་སེངྒེ་འདྲ། །གཤེགས་སྟངས་ངང་པ་གླང་ཆེན་འདྲ། །སེམས་ཅན་རེ་བ་སྐོང་བར་མཛད། །བསོད་ནམས་ཁྱད་འཕགས་ཡོངས་སུ་རྫོགས། །ཡང་དག་མཚན་གྱིས་རབ་ཏུ་བརྒྱན། །སེམས་ཅན་དག་ནི་ཐམས་ཅད་ཀུན། །བལྟ་བས་མི་ངོམས་ཉིད་དུ་ལྟོས། །ཁྱེད་ཀྱིས་རྐང་གཉིས་གཙོ་མཆོག་ནི། །ཐུགས་རྗེ་ཆེན་པོ་ལྡན་པས་ན། །དངོས་པོ་ཆུང་དུས་མཆོད་བྱས་ཀྱང ། །ཡོན་ཏན་ཚད་མེད་ཐོབ་མཛད་པས། །སེམས་ཅན་དག་ནི་མང་པོ་རྣམས། །བསྐལ་པ་བརྒྱ་སྟོང་མང་པོར་ནི། །མྱ་ངན་འདས་པ་ཐོབ་བར་དུ། །རྣམ་སྨིན་ཐུག་པ་མེད་པར་ལྟོས། །ཁྱེད་ཀྱི་རྐང་གཉིས་གཙོ་མཆོག་ནི། །ཟག་མེད་ཚུལ་ཁྲིམས་རྫོག་པས་ན། །སེམས་ཅན་དག་ནི་མང་པོ་རྣམས། །གུས་པས་སྤྱི་བོས་ཕྱག་བྱེད་དང ། །ལྷ་ཡི་འཁོར་ནི་མང་པོ་རྣམས། །སོ་སོར་གཞལ་མེད་ཁང་སྤངས་ནས། །རྩེ་བ་དག་ལ་ཆགས་མེད་པར། །འདྲེན་པ་ལ་ནི་རྟོན་བྱེད་ལྟོས། །ཁྱེད་ཀྱིས་བདུད་དང་བདུད་ཀྱི་འཁོར། །བཅོམ་ལྡན་འདས་ལ་དད་བསྐྱེད་ནས། །གསེར་གྱི་རླུང་ཡབ་དག་ཐོགས་ཏེ། །གཡས་གཡོན་དུ་ནི་འཁོད་པ་དང ། །བདུད་ཀྱི་བུ་ནི་ལྔ་བརྒྱ་ཡིས། །ལྷ་ཡི་མེ་ཏོག་ཡིད་འོང་བས། །དེ་བཞིན་གཤེགས་ལ་མངོན་གཏོར་ནས། །བླ་མེད་ཡེ་ཤེས་ཚོལ་ལ་ལྟོས། །འདས་པའི་སངས་རྒྱས་རྣམས་ 389a ༄#། །ལ་ནི། །བསྔགས་པ་བརྗོད་ཅིང་མཆོད་པས་ན། །དེང་ནི་བཅོམ་ལྡན་ཕྲད་གྱུར་ནས། །སོ་སོར་དགའ་བར་གྱུར་པ་ཡིན། །སྤོབས་པ་དག་ནི་ཚད་མེད་ཀྱིས། ། དེ་བཞིན་གཤེགས་པའི་བསྔགས་པ་བརྗོད། །དེ་ཡི་ཚེ་ན་བདུད་ཀྱི་བུ། །སྲེད་པ་སྤངས་པ་ཞེས་བྱ་བ། །ཐོག་མར་བཅོམ་ལྡན་བསྔགས་བརྗོད་ནས། །མིག་ཟད་མཐའ་ནི་ཤེས་པར་གྱུར། །མིག་གི་སྐྱེ་མཐའ་ཤེས་པས་ན། །རབ་ཞིའི་མཚན་ཉིད་བར་དུ་རྟོགས། །གཞན་ཡང་མིག་ལ་སོགས་པ་ཡི། །མིང་དོན་ཚིག་ནི་དཔག་མེད་རྟོགས། །དེས་ནི་ཚིག་མཁས་དག་གིས་ནི། །སེམས་ཅན་རྣམས་ལ་ཡང་དག་བསྟན། །མིང་དང་དོན་རྣམས་ལ་ཡང་ནི། །ཞེན་པ་ཐེ་ཚོམ་མེད་པས་ན། །འགྲོ་འོང་མེད་པར་རབ་རྟོགས་ཤིང ། །བླང་དོར་མེད་པ་ཉིད་དུ་གྱུར། །རང་བཞིན་དག་ནི་སྟོང་དབེན་པས། །ཡི་གེ་རྣམས་ནི་སྤངས་པ་དང ། །ལེན་དང་འཛིན་དང་ཀློག་པ་དང ། །ཁ་ཏོན་འདོན་ཅིང་སྒྲུབ་མེད་རྟོགས། །འདས་པའི་དེ་བཞིན་གཤེགས་པ་རྣམས། །སྔོན་ཡང་རབ་ཏུ་ཕྱེ་སྟེ་བསྟན། །བཏགས་པའི་མིང་ཙམ་ཡིན་པས་ན། །ཡང་དག་བརྗོད་དུ་ཅི་ཡང་མེད། །རང་བཞིན་སྟོང་པ་དེ་དག་ནི། །ཕུང་པོ་ཁམས་དང་སྐྱེ་མཆེད་འདས། །རྫུན་པ་མེད་ཅིང་བདེན་པའང་མེད། །གནས་དང་གནས་པ་ཡོད་མ་ཡིན། །ཚིག་གི་སྨྲ་བའི་ལམ་ཆད་ཅིང ། །སེམས་ཀྱི་སྤྱོད་པའང་རབ་ཏུ་ཞི། །སྐྱེ་བོ་མཚན་ 389b མ་མེད་པའི་ཕྱིར། །བཅོམ་ལྡན་གྲོང་ཁྱེར་གཤེགས་པར་མཐོང ། །བཅོམ་ལྡན་མཚན་མ་ཡོངས་སྤངས་ཀྱང ། །བྱིས་པ་ཡང་དག་མ་ཡིན་རྟོག་།བཅོམ་ལྡན་གྲོང་ཁྱེར་གཤེགས་པའི་ཚེ། །གང་ཞིག་དགའ་བ་སྐྱེ་འགྱུར་བ། །དེ་ནི་མཚན་མར་རྟོག་པ་སྟེ། །མྱ་ངན་གདུང་དང་བཅས་པར་འགྱུར། །གང་གི་མཚན་མའི་རྟོག་སྤངས་པ། །གྲོང་ཁྱེར་གཤེགས་པ་མཐོང་མི་འགྱུར། །གཤེགས་ཤིང་བསྐྱོད་པའི་མཚན་མ་ལ། །རྣམ་རྟོག་མེད་པའི་ཤེས་རབ་ཐོབ། །གང་གིས་མཚན་མར་སངས་རྒྱས་མཐོང ། །དེས་ནི་གྲོང་ཁྱེར་གཤེགས་པ་མཐོང ། །སྐྱེ་ཞིང་འཁོར་པའི་ཆོས་དག་ལ། །རྣམ་པར་རྟོག་པ་སྐྱེད་པར་བྱེད། །གང་གིས་སངས་རྒྱས་མཚན་མར་མཐོང ། །དགའ་བ་དང་ནི་སྐྱེ་འགྱུར་བ། །དེ་ནི་བདུད་ཀྱི་སྤྱོད་ལ་གནས། །བདུད་ཀྱི་སྤྱོད་ཡུལ་སྣང་བ་ཡིན། །གང་གིས་མཚན་མར་སངས་རྒྱས་མཐོད། །དེ་ནི་འགྱུར་བ་མཐོང་བ་ཡིན། །དེ་ནི་མྱ་ངན་གདུང་བཅས་པས། །མཁས་པས་སྙིང་བརྩེར་བྱ་བ་ཡིན། །ཆོས་ལ་ཐོབ་པར་གང་ལྟ་བ། །དེ་ལ་ཆོས་སྟོར་མྱ་ངན་ཡོད། །སངས་རྒྱས་མཐོང་བ་སྐྱེས་པ་ལ། །མྱ་ངན་འདས་པའི་སྡུག་བསྔལ་ཡོད། །བསྐལ་པ་མང་པོར་གང་བསྒོམས་པས། །མཚན་མ་ཐམས་ཅད་རྟོགས་ནས་ནི། །གྲོང་ཁྱེར་གཤེགས་པ་མི་རྟོག་ཅིང ། །མྱ་ངན་འདའ་བའི་འདུ་ཤེས་མེད། །སེམས་ཀྱི་མཚན་ཉིད་སྟོང་རྟོགས་པ། །སངས་རྒྱས་སྤྱོད་ལ་གནས་པས་ན། །གྲོང་ཁྱེར་ 390a ༄#། །གཤེགས་པར་མི་རྟོག་ཅིང ། །མྱ་ངན་འདའ་བའི་འདུ་ཤེས་མེད། །གང་གིས་དེ་ལྟར་རབ་ཤེས་པ། །སངས་རྒྱས་རྣམས་ནི་མཐོང་འགྱུར་ཞིང ། །ངོ་བོ་ཉིད་ཀྱང་སྟོང་རྟོགས་པས། །མཐར་ནི་སྐྱེ་འགག་ཅི་ཡང་མེད། །བཅོམ་ལྡན་བསྐལ་པ་དཔག་མེད་ནས། །དཀའ་བ་རྣམས་ནི་རབ་སྤྱད་ནས། །ངོ་བོ་ཉིད་ནི་སྟོང་མཁྱེན་ན། །བྱིས་པ་རྣམས་ཀྱིས་མི་རྟོགས་སོ། །བཅོམ་ལྡན་གྲོང་ཁྱེར་གཤེགས་པའི་ཚེ། །འཁོར་ནི་བརྒྱ་སྟོང་མང་པོས་བསྐོར། །མི་དང་མི་མ་ཡིན་ལ་སོགས། །དང་བའི་སེམས་ཀྱིས་མཆོད་པ་བས། །གང་གིས་སྐད་ཅིག་ཙམ་དུ་ནི། །མིག་ཟད་མཐར་ནི་རབ་སེམས་ཤིང ། །མཚན་མ་རྣམས་ནི་སྟོང་རྟོགས་ན། །འདི་ཡི་བསོད་ནམས་དེ་བས་འཕགས། །བགྲང་བ་དང་ནི་གྲངས་ཀྱི་ཆ། ། རྒྱུ་ཙམ་དུ་ཡང་མི་བཟོད་དོ། །དེ་བཞིན་མིག་གི་སྐྱེ་མཐའ་དང ། །མིག་གི་མཐའ་དང་འཇུག་པ་ནས། །རབ་ཏུ་ཞི་བའི་བར་དུ་ཡང ། །དེ་བཞིན་དུ་ནི་རེག་པར་བྱ། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང ། །ཐམས་ཅད་དེ་བཞིན་སྦྱར་བར་བྱ། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ།། ཞབས་ནི་ས་ལ་རེག་ཙམ་གྱིས། །ས་ནི་ཀུན་ཏུ་རབ་ཏུ་གཡོས། །རི་རྣམས་གང་ཡིན་དེ་དག་ཀྱང ། །ཐམས་ཅད་བཅོམ་ལྡན་འདས་ལ་ཕྱོགས། །ལྷ་མི་དག་ནི་ཆོས་ཀྱི་ཕྱིར། །ཐམས་ 390b ཅད་འོང་ནས་གུས་མཆོད་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ལྷ་ཡི་དབང་པོ་མི་ཡི་རྒྱལ། །ལྷ་མ་ཡིན་ནི་མང་པོ་དང ། །གནོད་སྦྱིན་དག་ནི་མང་པོ་རྣམས། །རང་གི་གྲོང་ཁྱེར་སྤངས་ནས་ནི། །བཅོམ་ལྡན་སྤྱན་སྔར་འདུས་གྱུར་ཏེ། །རབ་ཏུ་དགའ་བས་མཆོད་པ་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །གཞན་ཡང་རྣམ་པ་ཐ་དད་པའི། །བྱ་ཡི་ཚོགས་ནི་ཚད་མེད་པ། །ནེ་ཙོ་དང་ནི་རྨ་བྱ་དང ། །ཀ་ལ་པིངྐ་བྱ་ཡི་རྣམས། །བཅོམ་ལྡན་དེ་བཞིན་གཤེགས་པ་ཡི། །ཡོན་ཏན་མཆོག་ནི་མཐོང་བས་ན། །ཐམས་ཅད་ནམ་མཁའ་དག་ལ་ནི། །རབ་ཏུ་དགའ་བས་རྣམ་པར་རྩེ། །ཐམས་ཅད་རྣམ་པ་སྣ་ཚོགས་ཀྱིས། །སྒྲ་སྙན་དག་ནི་རབ་ཏུ་ཕྱུང ། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །བཅོམ་ལྡན་འདས་ཀྱི་ཡོན་ཏན་དང ། །རྫུ་འཕྲུལ་གྱི་ནི་སྟོབས་དག་གིས། །སེམས་ཅན་ཚད་མེད་བརྒྱ་སྟོང་སྙེད། །ལོང་བ་དག་ནི་མཐོང་བར་གྱུར། །འོན་པ་རྣམས་ནི་ཐོས་པར་གྱུར། །དབང་པོ་མ་ཚང་གང་ཡིན་པ། །ཐམས་ཅད་དབང་པོ་ཚང་བར་གྱུར། །སྡུག་བསྔལ་ལ་ནི་གནས་པ་དག་།ཐམས་ཅད་བདེ་བ་ཐོབ་པར་གྱུར། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །འདི་སྐད་སྨྲ་བ་ཐོས་པར་གྱུར། །གང་གིས་ 391a ༄#། །མཚན་མ་རྣམས་ཀྱིས་ནི། །དེ་བཞིན་གཤེགས་པ་རྟོག་བྱེད་པ། །དེ་ཡིས་བཅོམ་ལྡན་འདས་ལ་ནི། །མཆོད་པ་བྱས་ཞེས་བརྗོད་མི་བྱ། །མིག་ཟད་མཐའ་ཡི་ངོ་བོ་ཉིད། །རྟོགས་པར་ཡང་ནི་མི་འགྱུར་རོ། །མཚན་མ་རྣམས་ནི་གང་སྤངས་པ། །ཡོན་ཏན་གཞི་ནི་བསགས་པས་ན། །མིག་ཟད་མཐའ་ཡི་ངོ་བོ་ཉིད། །རབ་ཏུ་རྟོགས་པར་ཡང་འགྱུར་རོ། །འདི་ལྟར་མིག་ནི་ཟད་པའི་མཐའ། །རབ་ཏུ་རྟོགས་པར་གྱུར་པའི་ཕྱིར། །སངས་རྒྱས་རྣམས་ཀྱི་ཡོན་ཏན་ཡང ། །རབ་ཏུ་རྟོགས་པར་ཁོང་དུ་ཆུད།། མིག་ནི་ཟད་པའི་མཐའ་དག་ལ། །མི་འཛིན་སྦེད་པ་མེད་པ་དང ། །མིག་ནི་སྐྱེ་བའི་མཐའ་དག་ལ། །བརྟེན་ཅིང་གནས་པ་མེད་པ་དང ། །མིག་ནི་རབ་ཏུ་དབེན་པ་ལ། །གཡོ་བའི་བསམ་པ་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་འགྱུར་བ་ཡིན། །མིག་ནི་སྐྱེ་བའི་མཐའ་དག་ལ། །རྣམ་པར་རྟོག་པ་མེད་པ་དང ། །མིག་གི་མཐའ་ནི་གང་ཡིན་པ། །དེ་ལ་ཡིད་ཀྱིས་རྟོག་མེད་དང ། །མིག་ནི་རྣམ་པར་འཇིག་པ་ལ། །བསྟན་པར་བྱ་བ་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་འགྱུར་བ་ཡིན། །མིག་ནི་མེད་པར་གྱུར་པ་ལ། །མངོན་པར་ཞེན་པ་མེད་པ་དང ། །མིག་ནི་སྐྱེ་བ་མེད་པ་ལ། །ཡོངས་སུ་སྡུད་པ་མེད་པ་དང ། །མིག་ནི་རབ་ཏུ་ཞི་བ་ལ།། 391b འཛིན་པ་དག་ནི་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་ནི་ཟད་པ་མེད་པའི་ཕྱིར། །མཚན་རྣམས་མངོན་པར་སྒྲུབ་པ་དང ། །མིག་གི་མཐའ་ནི་ཤེས་པའི་ཕྱིར། །དབང་པོ་དག་ནི་ངེས་གྱུར་དང ། །མིག་ནི་སྐྱེ་བ་ཤེས་པའི་ཕྱིར། །དབང་པོ་རང་དབང་ཐོབ་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་ནི་མེད་པར་རྟོགས་གྱུར་ནས། །གཟུགས་ནི་ཁོང་དུ་ཆུད་པ་དང ། །མིག་ནི་འཇིག་པར་རབ་ཤེས་ནས། །ཆོས་ལ་སོ་སོར་རྟོག་པ་ད་དང ། །མིག་ནི་སྐྱེ་མེད་ཤེས་གྱུར་ནས། །ལམ་ནི་སྒྲུབ་པར་གང་བྱེད་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་ཟད་མཐའ་ནི་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར།། ལས་ཀྱི་བྱེ་བྲག་ཐ་དད་པ། །དེ་ཡང་རབ་ཏུ་རྟོགས་པར་འགྱུར། །ལས་ཀྱི་བྱེ་བྲག་ཐ་དད་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་སྐྱེ་མཐའ་ནི་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །སྡུག་བསྔལ་བྱེ་བྲག་ཐ་དད་པ། །དེ་ཡང་རབ་ཏུ་རྟོགས་པར་འགྱུར། །སྡུག་བསྔལ་བྱེ་བྲག་ཐ་དད་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་འཇིག་པ་གང་ཡིན་པ། །ཡང་དག་ཇི་བཞིན་ 392a ༄#། །རྟོགས་པའི་ཕྱིར། །སྡུག་བསྔལ་འཇིག་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །སྡུག་བསྔལ་འཇིག་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་མེད་པ་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །མཚན་མ་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །མཚན་མ་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་སྐྱེ་མེད་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །བག་ཆགས་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །བག་ཆགས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་གི་མི་རྟོག་ཉིད། ། ཡང་དག་ཇི་བཞིན་རྟོགས་པའི་ཕྱིར། །སྒྲིབ་པ་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །སྒྲིབ་པ་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར།། དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་ལ་ཡི་གེ་མེད། །ཡང་དག་ཇི་བཞིན་རྟོགས་པའི་ཕྱིར། །སངས་རྒྱས་ཡེ་ཤེས་སྟོབས་ 392b དག་ཀྱང ། །རབ་ཏུ་རྟོགས་པར་འགྱུར་བ་ཡིན། །སངས་རྒྱས་ཡེ་ཤེས་སྟོབས་དག་ནི། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་གི་ངོ་བོ་ཉིད། །ཡང་དག་ཇི་བཞིན་རྟོགས་པའི་ཕྱིར། །འདོད་རྣམས་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །འདོད་རྣམས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་བསམ་གཏན་སྒོམ་པ་དག་།ཡང་དག་ཇི་བཞིན་རྟོགས་པའི་ཕྱིར། །ཉོན་མོངས་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །ཉོན་མོངས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གང་ཟག་དེས་ནི་དེ་བཞིན་དུ། །མིག་གི་མངོན་མཐའ་ཤེས་པ་དང ། །མིག་གི་མི་གནས་ཤེས་པ་དང ། །མིག་ནི་སྐྱེ་བ་ཤེས་པ་དང ། །སངས་རྒྱས་རྫུ་འཕྲུལ་ཤེས་པ་དང ། །མིག་གི་དམན་པ་ཤེས་པ་དང ། །མིག་ནི་ཁྱད་པར་འཕགས་ཤེས་དང ། །ཡེ་ཤེས་དམན་པ་ཤེས་པ་དང ། །རྣམ་དག་ཡེ་ཤེས་ཤེས་པ་དང ། །ཚུལ་ཁྲིམས་རྣམ་དག་ཤེས་པ་དང ། །ལུས་ཀྱི་སྡོམ་པའི་ཤེས་པ་དང ། །རྣམ་དག་སྒྲ་ཡི་ཤེས་པ་དང ། །ངག་གི་སྡོམ་པའི་ཤེས་པ་དང ། །རྣམ་དག་སེམས་ཀྱི་ཤེས་ 393a ༄#། །པ་དང ། །གནས་ཀྱི་བྱེ་བྲག་ཤེས་པ་དང ། །སེམས་ཀྱི་ཆོས་ཀྱི་ཤེས་པ་དང ། །སེམས་སྐྱོན་ཤེས་པའི་ཤེས་པ་དང ། །རྣམ་དག་ལས་ཀྱི་ཤེས་པ་དང ། སེམས་ཀྱི་སྡོམ་པའི་ཤེས་པ་དང ། །ཉེས་དམིགས་ཤེས་པའི་ཤེས་པ་དང ། །རྣམ་དག་སྒྲ་ཡི་ཤེས་པ་དང ། །ཕུང་པོའི་བྱེ་བྲག་ཤེས་པ་དང ། །ཕུང་པོའི་རྒྱུ་རྐྱེན་ཤེས་པ་དང ། །མིག་ནི་ཡོངས་ཤེས་ཤེས་པ་དང ། །སྡུག་བསྔལ་འབྱུང་གནས་ཤེས་པ་དང ། །ཟག་མེད་ཚུལ་ཁྲིམས་ཤེས་པ་དང ། །ཚུལ་ཁྲིམས་རྒྱུ་རྐྱེན་ཤེས་པ་དང ། །སྡུག་བསྔལ་རྒྱུ་རྐྱེན་ཤེས་པ་དང ། །སྡུག་བསྔལ་ཟད་པའི་རྒྱུ་ཤེས་དང ། །འདུས་བྱས་རྣམས་ཀྱི་ཤེས་པ་དང ། །ཟག་པ་ཟད་པའི་ཤེས་པ་དང ། །ཡོངས་སུ་རྫོགས་པར་ཤེས་པ་ཡིན། །གཞན་ཡང་རྒྱུ་རྐྱེན་བཅུ་གཉིས་ཀྱི། །སྤྱོད་དང་བཅས་པའི་ཤེས་པ་དང ། །སྤྱོད་པ་མེད་པའི་ཤེས་པ་དང ། །མཚན་མ་དང་བཅས་མཚན་མ་མེད། །འདུས་བྱས་དང་ནི་འདུས་མ་བྱས། །རྣམ་པར་གཞག་དང་ཡོངས་སྡུད་དང ། །བདག་དང་གཞན་གྱི་སེམས་ཤེས་པ། །ཡང་དག་ཇི་བཞིན་ཤེས་པ་ཡིན། །གཞན་ཡང་མིག་ཟད་སྐྱེ་མཐའ་དང ། །མིག་གི་མཐའ་དང་རབ་དབེན་དང ། ། འཇུག་པ་དང་ནི་མེད་པ་དང ། །མི་སྐྱེ་བ་དང་ཉེར་ཞི་ཉིད། །ཡང་དག་ཇི་བཞིན་ཤེས་པས་ན། །སེམས་ཅན་དག་ནི་མང་པོ་རྣམས། །རྣམ་པར་དག་པའི་ཡེ་ཤེས་དང ། །མཐུ་དང་ 393b བཅས་པའི་ཡེ་ཤེས་དང ། །བརྩོན་འགྲུས་ཡེ་ཤེས་ཐོབ་པར་བྱེད། །གཞན་ཡང་གཅིག་དང་ཐ་དད་ཤེས། །སེམས་ཅན་དག་ནི་ཐམས་ཅད་ཀྱི། །མོས་པའི་ཤེས་པ་གང་ཡིན་པ། །ཡང་དག་དེ་བཞིན་ཤེས་པ་ཡིན། །གཞན་ཡང་སེམས་ཅན་ཐམས་ཅད་ཀྱི། །མོས་པ་ཁྱད་པར་འཕགས་པ་དང ། །རྣམ་དག་སེམས་ཀྱི་ཤེས་པ་དང ། །ལས་དང་རྣམ་སྨིན་ཤེས་པ་དང ། ། དབང་པོ་ཁམས་ཀྱི་ཤེས་པ་དང ། །སེམས་ཀྱི་འགྱུར་བ་ཤེས་པ་དང ། །ཤེས་རབ་མོས་པའི་ཤེས་པ་དང ། །ཤིན་ཏུ་རྣམ་གྲོལ་ཤེས་པ་དང ། །སྤོབས་པ་མཆོག་གི་ཤེས་པ་དག་།ཡང་དག་ཇི་བཞིན་ཤེས་པ་ཡིན། །གཞན་ཡང་སེམས་ཅན་མ་རུངས་དང ། །ཆོས་ལ་མོས་པ་མེད་གྱུར་པ། །ཡང་དག་ཇི་བཞིན་ཤེས་པས་ན། །མོས་པའི་ཤེས་པ་སྐྱེད་པར་བྱེད། །གཞན་ཡང་དོན་གྱི་ཚུལ་དག་ནི། །ཡང་དག་ཇི་བཞིན་ཤེས་པས་ན། །ལེ་ལོ་མེད་པའི་ཤེས་པ་དང ། །འདུ་ཤེས་སྒྲུབ་པར་བྱེད་པ་ཡིན། །གཞན་ཡང་རྫུ་འཕྲུལ་སྟོབས་དག་གིས། །ཆོས་རྣམས་རབ་ཏུ་འབྱེད་པ་དང ། །ཐོགས་པ་མེད་པའི་ཡེ་ཤེས་དག་།ཡང་དག་ཇི་བཞིན་ཤེས་པ་ཡིན། །གཞན་ཡང་རྒྱ་ཆེན་དོན་དག་དང ། །ཚིག་གིས་བསྟན་པ་གང་ཡིན་པ། །རྗེས་སུ་ཤེས་པའི་ཤེས་པ་དག་།ཡང་དག་ཇི་བཞིན་ཤེས་པ་ཡིན། །གཞན་ཡང་གྲོགས་བཟང་མཐུན་གནས་དང ། །གོས་དང་ཟས་དང་བཏུང་བ་དག་།ཚོད་ཤེས་པ་ཡི་ཤེས་པ་རྣམས། །ཡང་དག་ 394a ༄#། །ཇི་བཞིན་ཤེས་པ་ཡིན། །གཞན་ཡང་བྱ་བ་མེད་པ་ཡི། །གཟུགས་ཀྱི་ཆོས་ནི་གང་ཡིན་པ། །ནན་ཏན་སྒྲུབ་པའི་ཤེས་པ་དག་།ཡང་དག་ཇི་བཞིན་ཤེས་པ་ཡིན། །གཞན་ཡང་ལུས་སེམས་སྐྱོན་མེད་ཅིང ། །སྒྲོ་འདོགས་སྐུར་འདེབས་ཡོངས་སྤངས་ནས། །བླ་མེད་ཡེ་ཤེས་གང་ཚོལ་བ། །ཡང་དག་ཇི་བཞིན་ཤེས་པ་ཡིན། ། གཞན་ཡང་རྫུ་འཕྲུལ་སྟོབས་དག་གིས། །ནམ་མཁའ་བར་སྣང་དག་ལས་ནི། །སྤྲུལ་པའི་སྐུ་ནི་རབ་བསྟན་ནས། །སེམས་ཅན་དག་ནི་བརྒྱ་སྟོང་སྙེད། །ཡོངས་སུ་སྨིན་པར་མཛད་པས་ན། །ཐམས་ཅད་རབ་ཏུ་དགའ་གྱུར་ནས། །དང་བ་སྐྱེས་པའི་ཤེས་པ་དང ། །དེ་བཞིན་གཤེགས་པ་རྣམས་ལ་ཡང ། །མོས་ཤིང་གུས་པའི་ཤེས་པ་དང ། །འདོད་ཆགས་སྤངས་པའི་ཆོས་དག་ལ། །རབ་མོས་སྒྲུབ་པའི་ཤེས་པ་དང ། །འཕགས་པའི་དགེ་འདུན་ཚོགས་ལ་ཡང ། །མཆོད་པར་མོས་པའི་ཤེས་པ་དང ། །བྱང་ཆུབ་ཆེན་པོ་དག་ལ་ཡང ། །རབ་མོས་བསྔོ་བའི་ཤེས་པ་དང ། །གཟུངས་རྣམས་ཀྱི་ནི་སྒོ་དག་ལ། །རབ་མོས་སྟོན་པའི་ཤེས་པ་དང ། །མོས་པ་རྣམས་ནི་གང་ཡིན་པ། །སོ་སོར་རབ་རྟོགས་ཤེས་པ་དང ། །འཕགས་པའི་ཏིང་འཛིན་གང་ཡིན་པ། །ལེགས་པར་རྟོགས་པའི་ཤེས་པ་དང ། །སྲུང་དང་རྗེས་སུ་དྲན་རྣམས་ལ། །ངེས་པར་འབྱེད་པའི་ཤེས་པ་དང ། །དཔག་ཏུ་མེད་ 394b པའི་སེམས་དག་ལ། །ལེགས་པར་འཇུག་པའི་ཤེས་པ་དང ། །ཚིགས་སུ་བཅད་པ་ཚད་མེད་རྣམས། །ཡང་དག་སྟོན་པའི་ཤེས་པ་དང ། །འདོད་པའི་མཚམས་སྦྱོར་གང་ཡིན་པ། ། རྟོགས་ཤིང་གོ་བའི་ཤེས་པ་དང ། །འགྲོ་བ་དམན་པ་དེ་དག་ཏུ། །ལྟུང་བར་མི་འགྱུར་ཤེས་པ་དང ། །མི་དགེ་བཤེས་གཉེན་གང་ཡིན་པ། །ཡོངས་སུ་སྤོང་བྱེད་ཤེས་པ་དང ། །དགེ་བའི་བཤེས་གཉེན་གང་ཡིན་པ། །སྟེན་པར་བྱེད་པའི་ཤེས་པ་དང ། །འདྲི་ཞིང་ལན་ལྡོན་གང་ཡིན་པ། །རབ་ཏུ་རྣམ་འབྱེད་ཤེས་པ་དང ། །གནས་དང་གནས་མིན་གང་ཡིན་པ། ། ལེགས་པར་རྟོགས་པའི་ཤེས་པ་དང ། །ས་དང་ས་མིན་གང་ཡིན་པ། །ལེགས་པར་རྟོགས་པའི་ཤེས་པ་དང ། །རབ་འབྲིང་ཐ་མ་གང་ཡིན་པ། །རྣམ་པར་འབྱེད་པའི་ཤེས་པ་དང ། ། འདུས་བྱས་ཤེས་པ་གང་ཡིན་དང ། །འདུས་མ་བྱས་ཀྱི་ཤེས་པ་དང ། །དངོས་པོ་དང་ནི་རྫས་ཀྱི་ཤེས། །དངོས་དང་རྫས་མིན་ཤེས་པ་དང ། །ཡོངས་སུ་སྡུད་བྱེད་ཤེས་པ་དང ། ། ཡོངས་སུ་སྡུང་མིན་ཤེས་པ་དང ། །མངོན་པར་སྒྲུབ་པའི་ཤེས་པ་དང ། །མངོན་པར་སྒྲུབ་མིན་ཤེས་པ་དང ། །ཡང་དག་སྒྲུབ་པའི་ཤེས་པ་དང ། །ཡང་དག་སྒྲུབ་མིན་ཤེས་པ་དང ། །མིག་དང་མིག་མིན་ཤེས་པ་དང ། །མིག་དང་ལྷན་ཅིག་ཤེས་པ་དང ། །མིག་གི་བྱེ་བྲག་ཤེས་པ་དང ། །མིག་གི་རང་བཞིན་ཤེས་པ་དག་།ཡང་དག་ཇི་བཞིན་ཤེས་པ་ 395a ༄#། །ཡིན། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་རྒྱུ་རྐྱེན་ཉིད། །ཡང་དག་སྟོང་ཞིང་དབེན་པ་དང ། །མཐར་ནི་བག་ཡོད་མ་ཡིན་པར། །སེམས་པར་བྱེད་པ་གང་ཡིན་པ། །གང་ཟག་དེས་ནི་དེ་བཞིན་དུ། །ཡང་དག་ངེས་པ་ཁོ་ནར་ནི། །སེམས་ཀྱི་ཏིང་འཛིན་གང་ཡིན་པ། །ཡོངས་སུ་རྫོགས་པར་བྱེད་པར་འགྱུར། །གང་ཞིག་མིག་གི་རྟེན་འབྲེལ་དང ། །མིག་མི་རྟག་པའི་མཚན་ཉིད་དང ། །ངེས་པ་ཉིད་དུ་རྟོགས་པར་འགྱུར། །སེམས་པར་བྱེད་པ་གང་ཡིན་པ། །གང་ཟག་དེས་ནི་དེ་བཞིན་དུ། །མིག་གི་རྒྱུ་རྐྱེན་གང་ཡིན་པ། །མཐར་ནི་ཡོད་པ་མ་ཡིན་པ། །ཡང་དག་ཇི་བཞིན་རྟོགས་པར་འགྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །དེ་ཡི་ཚིན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ཞབས་ནི་ས་ལ་རེག་ཙམ་གྱིས། །དངོས་པོ་ངོ་མཚར་རབ་བསྟན་པ། །དེང་འདིར་བདག་གིས་མདོར་བསྡུས་ནས། །ཡོན་ཏན་ཕྱོགས་ནི་ཅུང་ཟད་ཅིག་།སེམས་ཅན་དགའ་བ་སྐྱེ་བའི་ཕྱིར། །ཡང་དག་པར་ནི་བསྟན་པར་བྱ། །དེ་ཚེ་ལྷ་མིའི་འདྲེན་པ་ཡིས། །སྤུ་ཡི་ཁུང་ 395b བུ་གཅིག་ནས་ནི། །འོད་ཟེར་བརྒྱ་སྟོང་ཚད་མེད་སྙེད། །རབ་ཏུ་བཀྱེ་བར་གྱུར་པས་ན། །འོད་ཟེར་དག་ནི་རེ་རེས་ཀྱང ། །ཞིང་ནི་ཚད་མེད་གསལ་མཛད་ནས། །སེམས་ཅན་མང་པོ་ཀུན་གྱི་ཕྱིར། །སངས་རྒྱས་མཛད་པ་རབ་ཏུ་མཛད། །གང་ཞིག་འདས་པའི་དུས་སུ་ནི། །སངས་རྒྱས་རྣམས་ལ་མཆོད་པ་དང ། །ཡུན་རིང་སྦྱིན་དང་ཚུལ་ཁྲིམས་དག་།མངོན་པར་སྒྲུབ་པ་གང་ཡིན་པ། །དེ་ལྟ་བུ་ཡི་གང་ཟག་དག་།དེས་ནི་ཇི་སྐད་བསྟན་པ་ཡི། །རྫུ་འཕྲུལ་དངོས་པོ་ཐོས་གྱུར་ན། །རབ་ཏུ་དགའ་ཞིང་མོས་པར་འགྱུར། །གང་ཞིག་སངས་རྒྱས་རྫུ་འཕྲུལ་རྣམས། ། ཉན་ཐོས་དང་ནི་རང་རྒྱལ་གྱི། །སྤྱོད་ཡུལ་མིན་པར་རབ་ཤེས་ནས། །དེ་ལྟ་བུ་ཡི་གང་ཟག་དག་།དེས་ནི་ཇི་སྐད་བསྟན་པ་ཡི། །རྫུ་འཕྲུལ་དག་ནི་ཐོས་གྱུར་ན། །མོས་པ་དག་ནི་སྐྱེ་འགྱུར་ཞིང ། །ངོ་མཚར་འཛིན་པའི་སེམས་ཀྱང་བསྐྱེད། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །དེ་ལྟ་བུ་ལ་སོགས་པ་ཡི། །རྫུ་འཕྲུལ་སྣ་ཚོགས་རབ་བསྟན་པས། །སེམས་ཅན་དག་ནི་བརྒྱ་སྟོང་དང ། །ཚད་མེད་གྲངས་མེད་པ་རྣམས་ཀྱིས། །དེ་བཞིན་གཤེགས་པ་རྣམས་ལ་ནི། །བསྟེན་ཅིང་རིམ་གྲོ་མཆོད་པ་བྱས། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །མདོ་སྡེ་དག་ནི་བརྒྱ་སྟོང་དང ། །ཚད་མེད་གྲངས་མེད་རབ་བཤད་པས། །སེམས་ཅན་དག་ནི་མང་པོ་རྣམས། །བསྟན་པ་ 396a ༄#། །དེ་ནི་ཐོས་པས་ན། །ཐམས་ཅད་དང་བས་རབ་བླངས་ཏེ། །སེམས་ནི་རབ་ཏུ་དགའ་བར་གྱུར། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །རྫུ་འཕྲུལ་གྱི་ནི་མཐུ་དག་གིས། །ནམ་མཁའ་ལས་ནི་འདི་སྐད་དུ། །མིག་ཟད་མཐའ་ནི་ཤེས་པ་ནས། །མིག་ནི་ཉེ་བར་ཞི་བ་དང ། །མིག་ཉིད་རྒྱུ་ཡི་བར་དུ་ཡང ། །འགྲོ་བ་མེད་ཅིང་འོང་མེད་དང ། །མཐར་ནི་སྟོང་དབེན་ཤེས་པར་གྱིས། །དེ་སྐད་དུ་ནི་ཐོས་པར་གྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །སྒྲ་སྙན་དམ་པ་མཆོག་བྱུང་ནས། །དེ་བཞིན་གཤེགས་པའི་མཚན་སྣ་ཚོགས། །རབ་ཏུ་བསྔགས་པར་གྱུར་པས་ན། །འཁོར་ནི་འདུས་པ་ཆེན་པོ་རྣམས། །ཐམས་ཅད་དད་མོས་སེམས་ཀྱང་བསྐྱེད། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་བདུད་དང་བདུད་དཔུང་དག་།ཕན་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལོག་པར་ལྟ་བའི་ཚོགས་ཐམས་ཅད། །རབ་ཏུ་འདུལ་བར་ནུས་ཞེས་ཟེར། །དེ་ལྟར་འཇིག་རྟེན་བཞུགས་ 396b པ་ཡི། །མི་ཡི་སེངྒེ་གང་ཡིན་པ། །མཚན་ནི་འདོད་ཆགས་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །འདོད་པའི་འདོད་ཆགས་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ཞེ་སྡང་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཞེ་སྡང་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་གཏི་མུག་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །གཏི་མུག་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ཉིད་ང་རྒྱལ་གཞོམ་པ་དང ། ། ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ང་རྒྱལ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ཁོང་ཁོར་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་ 397a ༄#། །པ་དེ་དག་ནི། །ཁོང་ཁྲོ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ཕྲག་དོག་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཕྲག་དོག་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་མི་བདེན་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །མི་བདེན་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ལྷ་རྣམས་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལྟ་བ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་སྤྲོས་པ་གཞོམ་པ་དང ། །ཞི་མཛད་ཆོས་ཀྱི་རྒྱལ་ཞེས་བྱ། །གང་གི་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །སྤྲོས་པ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་ 397b བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ཡང་དག་པ་ཡི་ཆོས། །རྣམ་དག་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྣམ་དག་ཆོས་ནི་གང་ཡིན་པ། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ལས་རྣམས་རྟོགས་པ་ཡི། །ཆོས་ཀྱི་རྒྱལ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལས་རྣམས་ཐམས་ཅད་གང་ཡིན་པ། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་རྫུ་འཕྲུལ་ཕུན་ཚོགས་པའི། །ཆོས་ཀྱི་རྒྱལ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྫུ་འཕྲུལ་ཡོན་ཏན་གང་ཡིན་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ཕ་རོལ་ཕྱིན་པ་རྣམས། །ཕུན་ཚོགས་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཕ་རོལ་ཕྱིན་དྲུག་གང་ཡིན་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་འདུ་བྱེད་གང་ཡིན་པ། །རབ་རྟོགས་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་ 398a ༄#། །དེ་དག་ནི། །འདུ་བྱེད་དག་ནི་ཐམས་ཅད་ཀུན། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་རྣམ་པར་དག་པ་ཡི། །འོད་ཟེར་ཀུན་འཛིན་བསྐྱེད་ཅེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་སྐྱེ་ལེན་དག་།ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་ཁ་དོག་དག་པ་ཡིན། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་གཟུགས་དམ་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་སྐུ་ཉིད་དམ་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། ། ཁྱད་པར་འཕགས་པའི་གཟུགས་སྐུ་དག་།ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་གདུད་ཉིད་དག་བ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་རུས་རིགས་རྣམས། །ཡོངས་སུ་རྫོགས་ 398b པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་རྒྱ་ཆེར་གྲགས་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྒྱ་ཆེར་གྲགས་པའི་གྲགས་པ་རྣམས། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་སྦྱིན་པ་གཏོང་བ་དང ། །ཚུལ་ཁྲིམས་ཅན་དང་བཟོད་བསྒོམས་དང ། །བརྩོན་འགྲུས་བརྩམས་དང་བསམ་གཏན་པ། །ཤེས་རབ་ཀུན་འཛིན་ཞེས་ཀྱང་བྱ། ། གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །སྦྱིན་པ་དང་ནི་ཚུལ་ཁྲིམས་ནས། །ཤེས་རབ་ཕ་རོལ་ཕྱིན་པ་དང ། །གཟུངས་ཀྱི་སྒོ་ནི་གང་ཡིན་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་སྟོང་ཉིད་རྫོགས་པ་ཡི། །ཆོས་ཀྱི་རྗེ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །ཆོས་རྣམས་སྟོང་པའི་དོན་དག་ཀྱང ། །ཡང་དག་སྟོན་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་བདག་མེད་རྫོགས་པ་ཡི། །ཆོས་ཀྱི་རྗེ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །སྐྱེ་འགག་མེད་དོན་གང་ 399a ༄#། །ཡིན་པ། །ཡང་དག་སྟོན་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེངྒེ་གང་ཡིན་པ། །མཚན་ནི་སྤྱན་ཉིད་དག་པ་ཡི། ། ཀུན་འཛིན་ཆོས་ཀྱི་རྗེ་ཞེས་བྱ། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །མིག་ཟད་མཐའ་དོན་གང་ཡིན་པ། །ཡང་དག་སྟོན་པར་འགྱུར་ཞེས་ཟེར། ། རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་ཉི་ཤུ་རྩ་ལྔ་དང ། །མེ་ཏོག་ཕྲེང་བ་སྤོས་དག་དང ། །མར་མེ་གདུགས་དང་གོས་རྣམས་ཀྱང ། །ཐམས་ཅད་དེ་བཞིན་སྦྱར་བར་བྱ།། །།བམ་པོ་ལྔ་པ་སྟེ། ཐ་མ། དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །བསམ་གྱིས་མི་ཁྱབ་པ་དག་གི་།རྫུ་འཕྲུལ་གྱི་ནི་སྟོབས་རྣམས་ཀྱིས། །ནམ་མཁའ་བར་སྣང་དག་ལས་ནི། །སྒྲ་བརྙན་དམ་པ་རབ་ཕྱུང་སྟེ། །གཟུངས་ཀྱི་སྤྱོད་པ་སྣ་ཚོགས་དག་།ཡང་དག་པར་ནི་བསྟན་པས་ན། །འཁོར་ནི་འདུས་པ་ཆེན་པོ་རྣམས། །འདི་ལྟ་བུ་ཡི་ཚིག་ཐོས་ཏེ། །གཟུངས་ནི་གང་ཡིན་འདི་དག་གིས། །མིག་ནི་ཟད་མཐའ་གང་ཡིན་དང ། །སྐྱེ་མཐའ་དང་ནི་མཐའ་རྣམས་དང ། །རབ་དབེན་དང་ནི་འཇུག་པ་ནས། །ཉེ་བར་ཞི་བའི་བར་རྣམས་ཀྱི། །ཆོས་རྣམས་གང་ཡིན་དེ་དག་གི་།མཐར་ཕྱིན་གནས་ནི་གང་ཡིན་པ། །ཐམས་ཅད་རབ་ཏུ་རྟོགས་ 399b པར་བྱེད། །སྦྱིན་པའི་སྟོབས་ནི་གང་དག་གིས། །མཐར་ནི་གང་དག་སྡུད་པ་དང ། །ཚུལ་ཁྲིམས་སྟོབས་ནི་གང་དག་གིས། །མཐར་ནི་གང་དག་འགྲུབ་པ་དང ། །བཟོད་པའི་སྟོབས་ནི་གང་དག་གིས། །མཐར་ནི་གང་དག་བཀོད་པ་དང ། །བརྩོན་འགྲུས་སྟོབས་ནི་གང་དག་གིས། །མཐར་ནི་གང་དག་སློང་བ་དང ། །བསམ་གཏན་སྟོབས་ནི་གང་དག་གིས། །མཐར་ནི་གང་དག་སྒོམ་པ་དང ། །ཤེས་རབ་སྟོབས་ནི་གང་དག་གིས། །མཐར་ནི་གང་དག་སྟོན་པ་དང ། །ཡི་གེ་རྣམ་དག་བརྗོད་པ་དང ། །སྒྲ་སྐད་རྣམས་ནི་སྤངས་པ་ནས། །གཟུགས་དང་སེམས་གྱི་བར་དུ་ཡང ། །མཐར་ནི་རྣམ་དག་ཉིད་དུ་རྟོགས། །ཟག་དང་བཅས་དང་ཟག་མེད་དང ། །དོན་རྣམས་དང་ནི་ཕན་པ་དག་།ཐམས་ཅད་སྟོང་ཞིང་དབེན་པ་དང ། །མཐར་ནི་རྣམ་དག་ཉིད་དུ་རྟོགས། །སྲིད་པ་དག་ནི་ཐམས་ཅད་ལ། །རྟེན་ཅིང་གནས་པར་མི་བྱེད་དང ། །གཟུངས་དང་ཏིང་འཛིན་དག་ལ་ནི། །རབ་ཏུ་དབེན་པར་གནས་པར་བྱེད། །འགྲོ་བ་མེད་ཅིང་འོང་མེད་དང ། །དགེ་བ་མ་ཡིན་མི་དགེ་མིན། །ལུང་དུ་མི་སྟོན་པ་ཡང་མིན། །བདག་དང་གཞན་ལ་ཕན་འདོགས་པའི། །དེ་ལྟ་བུ་ཡི་མཚན་མ་རྣམས། །ཐམས་ཅད་ཡོངས་སུ་དག་པས་ན། །དབང་ཕྱུག་ཡོན་ཏན་དག་ལ་ཡང ། །གནས་པར་ཡང་ནི་མི་བྱེད་དོ། །ཉན་ཐོས་དང་ནི་སྐྱེ་བོ་དང ། །སངས་རྒྱས་རྣམས་ཀྱི་ཆོས་ལ་ཡང ། །གནས་པར་ཡང་ནི་མི་བྱེད་དོ། ། 400a ༄#། །མིག་ནི་ཟད་པའི་མཐའ་དག་དང ། །སྐྱེ་མཐའ་དང་ནི་མཐའ་རྣམས་ནས། །ཉེ་བར་ཞི་བའི་བར་རྣམས་ཀྱི། །སྤྱོད་པ་དག་ནི་གང་ཡིན་པ། །ཐམས་ཅད་ཡོངས་སུ་ཞི་བར་བྱེད། །སྐྱེ་བ་དང་ནི་མི་སྐྱེ་དང ། །སྡུག་བསྔལ་དང་ནི་བདེ་བ་དང ། །བསྟོད་པ་དང་ནི་སྨོད་པ་དག་།ཐམས་ཅད་ཡོངས་སུ་སྤོང་ཞེས་ཟེར། །མཐར་ཕྱིན་སྣང་བ་གང་ཡིན་དང ། །སྟོང་པའི་གཟུངས་ནི་གང་ཡིན་པ། །ཐམས་ཅད་རབ་ཏུ་གང་རྟོགས་པ། །འདི་ཉིད་སངས་རྒྱས་སྤྱོད་ཡུལ་ལ། །རབ་ཏུ་གནས་པར་བྱེད་པ་ཡིན། །འདི་ཉིད་སངས་རྒྱས་རོལ་པ་ཡི། །གནས་ལ་རབ་ཏུ་གནས་པ་ཡིན། །འདི་ཉིད་སངས་རྒྱས་རྫུ་འཕྲུལ་ལ། །རབ་ཏུ་གནས་པར་གྱུར་པ་ཡིན། །འདི་ཉིད་སངས་རྒྱས་མཁྱེན་པ་ལ། །རབ་ཏུ་གནས་པར་གྱུར་པ་ཡིན། །མིག་ཟད་མཐའ་ཡི་སྟོབས་དག་ལ། །དེ་བཞིན་དུ་ནི་གནས་པ་དང ། །མིག་སྐྱེ་མཐའ་ཡི་སྟོབས་དག་ལ། །དེ་བཞིན་དུ་ནི་གནས་པ་དང ། །མིག་གི་མཐའ་ཡི་སྟོབས་དག་ལ། །དེ་བཞིན་དུ་ནི་གནས་པ་ནས། །ཉེ་བར་ཞི་བའི་སྟོབས་ཀྱི་བར། །དེ་ལ་རབ་ཏུ་གནས་པ་དང ། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་ཞེས་ཟེར། །གཟུངས་ནི་གང་ཡིན་འདི་དག་གིས། །དེ་བཞིན་གཤེགས་པ་རྣམས་ཀྱི་སྟོབས། །ཁྱད་པར་འཕགས་པ་གང་ 400b ཡིན་པ། །ཡོངས་སུ་རྫོགས་པར་བྱེད་ཅེས་ཟེར། །གཟུངས་ནི་གང་ཡིན་འདི་དག་གིས། །གཟི་བྱིན་མཐུ་སྟོབས་དེ་ལྟ་བུ། །ཡོངས་སུ་རྫོགས་པར་བྱས་ནས་ནི། །དེ་བཞིན་གཤེགས་པ་ཐམས་ཅད་ཀྱི། །གནས་ཀུན་ལ་ནི་འཇུག་པ་དང ། །དེ་བཞིན་གཤེགས་པ་ཐམས་ཅད་ཀྱི། །སྤྱོད་ཡུལ་ཀུན་ལ་གནས་གྱུར་པས། །འཇིག་རྟེན་པ་ནི་ཐམས་ཅད་ཀུན། །ལྷ་མ་ཡིན་གྱི་ཚོགས་དག་ལ། །བརྟན་པར་འཛིན་པའི་སེམས་སྤངས་ནས། །ཚངས་པའི་སྤྱོད་ལ་གནས་པར་བྱེད། །གནོད་སྦྱིན་བརྒྱ་སྟོང་ཚད་མེད་དང ། །གྲུལ་བུམ་དག་ནི་ཚད་མེད་རྣམས། །དེ་དག་ཐམས་ཅད་ཀུན་ཀྱང་ནི། །རབ་ཏུ་དགའ་བ་སྐྱེད་པར་བྱེད། །དྲི་ཟའི་འཁོར་ནི་གང་ཡིན་དང ། །སྲིན་པོའི་འཁོར་ནི་གང་ཡིན་པ། །མཚན་མེད་གྲངས་མེད་དེ་དག་ཀྱང ། །རབ་ཏུ་དུལ་ལ་དགའ་བར་བྱེད། །གལ་ཏེ་ཚངས་པའི་འཁོར་རྣམས་ཀྱིས། །སྒྲ་སྙན་དག་ནི་དམ་པ་ཡི། །ཚིག་དང་དོན་ནི་རྗོད་བྱེད་ཀྱང ། །ཡང་དག་བསྟན་པར་མི་ནུས་ཏེ། །སེམས་ལས་བྱུང་བའི་ཆོས་རྣམས་ཀྱིས། །དཔག་པར་བྱ་བ་མ་ཡིན་དང ། །སེམས་ལས་བྱུང་བའི་ཆོས་རྣམས་ཀྱིས། །གཟུང་བར་བྱ་བ་མིན་ཞེས་ཟེར། །གཟུངས་ནི་གང་ཡིན་འདི་དག་ནི། །མིག་གིས་དམིགས་པར་བྱ་བ་མིན། །གཟུངས་ནི་གང་ཡིན་འདི་དག་ནི། །ལུས་ཀྱི་བར་གྱིས་དམིགས་བྱ་མིན། །གཟུངས་ནི་གང་ཡིན་འདི་དག་ནི། །མིག་གིས་དམིགས་པར་བྱ་བ་ 401a ༄#། །མིན། །མིག་གི་སྤྱོད་ཡུལ་བར་གྱིས་ཀྱང ། །དམིགས་པར་བྱ་བ་མ་ཡིན་ཏེ། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་ཞེས་ཟེར། །གཞན་ཡང་མིག་གི་ཟད་མཐའ་དང ། །མིག་རྣམས་ཀྱི་ནི་སྐྱེ་མཐའ་དང ། །མིག་གི་མཐའ་དང་འཇུག་པ་ནས། །ཉེ་བར་ཞི་བའི་བར་དག་ལ། །བདག་དང་སྐྱེས་བུ་མེད་པ་དང ། །སེམས་དང་སྲོག་ནི་མེད་པ་དང ། །དེ་བཞིན་གང་ཟག་མེད་པ་དང ། །མཚན་མ་མེད་ཅིང་བྱེད་མེད་དང ། །འགྲོ་བ་མེད་ཅིང་འོང་མེད་དང ། །འདི་ལྟ་བུ་ལ་སོགས་པའི་མཚན། །ཐམས་ཅད་རྟོགས་པར་འགྱུར་ཞེས་ཟེར། །གཞན་ཡང་འདི་སྐད་ཆོས་ཉིད་ཀྱི། །མིག་ནི་རྟོགས་པར་འགྱུར་ཞེས་ཟེར། །གཞན་ཡང་འདི་སྐད་ཆོས་རྣམས་ལས། །གྲུབ་པའི་མིག་ནི་གང་ཡིན་དང ། །ཡེ་ཤེས་མིག་དང་ཤེས་རབ་མིག་།ཚངས་པའི་མིག་དང་ལྷ་ཡི་མིག་།ཚངས་པར་སྐྱེ་གནས་ཐོབ་མིག་དང ། །ལྷ་ཡི་སྐྱེ་གནས་ཐོབ་མིག་དང ། །ཚངས་པའི་རྣམ་སྨིན་མིག་དག་དང ། །ལྷ་ཡི་རྣམ་སྨིན་མིག་དག་དང ། །ཚངས་པའི་རྒྱུ་ལས་སྐྱེ་མིག་དང ། །ལྷ་ཡི་རྒྱུ་ལས་སྐྱེས་པའི་མིག་།ལྷ་ཡི་རྫུ་འཕྲུལ་མིག་དག་དང ། །ལྷ་ཡི་བརྩོན་འགྲུས་དག་གི་མིག་།དམན་པར་སྐྱེས་པའི་མིག་དག་དང ། །ཁྱད་འཕགས་སྐྱེས་པའི་མིག་དག་དང ། ། 401b གཤིན་རྗེའི་འཇིག་རྟེན་གང་ཡིན་པ། །ཡོངས་སུ་སྤངས་པའི་མིག་དག་དང ། །ཀླུ་དང་གནོད་སྦྱིན་མིག་དག་དང ། །གྲུལ་བུམ་གྱི་ནི་མིག་དག་དང ། །ཡོངས་སུ་གདུང་བཅས་མིག་དག་དང ། །ཡོངས་སུ་གདུང་མིན་མིག་དག་དང ། །རྣམ་པར་དག་པའི་མིག་དག་དང ། །རྣམ་པར་དག་མིན་མིག་དག་དང ། །མཆུ་རིང་ཞེད་ཆུང་མིག་དག་དང ། །ཉན་ཐོས་ཐེག་པའི་མིག་དག་དང ། །བསམ་གཏན་པ་ཡི་མིག་དག་དང ། །ཏིང་ངེ་འཛིན་གྱི་མིག་དག་དང ། །སྤྱོད་ཡུལ་ལས་བྱུང་མིག་དག་དང ། །འདུ་ཤེས་ལས་བྱུང་མིག་དག་དང ། །འདོད་ཆགས་ལས་བྱུང་མིག་དག་དང ། །འདོད་ཆགས་བྲལ་བའི་མིག་དག་དང ། །རྒྱུ་ལས་བྱུང་བའི་མིག་དག་དང ། །རྒྱུ་མིན་ལས་བྱུང་མིག་དག་དང ། །མཚུངས་པར་ལྡན་པའི་མིག་དག་དང ། །མཚུངས་པར་ལྡན་མིན་མིག་དག་དང ། །སྒོ་རྟེན་ལས་བྱུང་མིག་དག་དང ། །སྒོ་ལས་བྱུང་མིན་མིག་དག་དང ། །རྒྱུ་རྐྱེན་ལས་བྱུང་མིག་དག་དང ། །རྒྱུ་སྒོ་ལས་སྐྱེས་མིག་དག་དང ། །ཤ་ལས་གྲུབ་མིན་མིག་དག་དང ། །ཡེ་ཤེས་རྣམ་པར་དག་མིག་དང ། །ཡོད་པ་མིན་པའི་མིག་དག་དང ། །དམིགས་མེད་མིག་ནི་གང་ཡིན་པ། །ཐམས་ཅད་རྟོགས་པར་བྱེད་ཅེས་ཟེར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་ཞེས་ཟེར། །དེ་ཡི་ཚེ་ན་བཅོམ་ལྡན་འདས། །ནམ་མཁའ་ 402a ༄#། །བར་སྣང་དག་ལས་ནི། །གཞན་ཡང་དཔག་ཏུ་མེད་པ་ཡི། །སྒྲ་སྙན་དམ་པ་མཆོག་བྱུང་ནས། །ཁྱད་པར་འཕགས་པའི་གཟུངས་ཀྱི་ཆོས། །འདི་སྐད་དུ་ནི་བཀའ་སྩལ་ཏེ། །འདི་ཡང་དེ་བཞིན་གཤེགས་པ་ཡི། །རྫུ་འཕྲུལ་དག་གིས་སྤྲུལ་པ་ཡིན། །འདི་ལྟ་སྟེ། སི་ལི། མ་ལེ་མ་ལེ། སིདྡྷཻ། ཨཻ་ནི། སི་ཎེ། ཀུ་ལུ་ནི་ཡུ། ཀུ་ལུ་ནེ་ཡུ། ཀུ་ལེ་མ་ལེ། ཀུ་ནུ་ཏེ། ཨ་ལ་ཤི་། སི་ལེ། སི་སི་ལི་ཏེ། སུ་སི་ལི། སི་ལེ་སི་ལེ། ཁྱི་བི་ལི། ཨ་བི་ལི། །སུ་ཊེ་ཙ་ན། དྷ་ནི་མ་ནི། ཀ་ནི། ཀ་ལ་ཏེ། སུ་ཀ་ལེ། པྲ་ཡ། ཤ་ནཾ་ནི། ཨ་ནུ་ལོ་སི་ཀྱེ། བི་ལོ་མེ། སུ་བྷ་ནི་རེ་ཤྷེ། ཨ་ཤི་རི་ལེ། ས་ར་མ་པ་ར་ཕུན་ཏེ། པ་རི་བྷ་ཧེ། དྷ་ར་ཎི། དྷེ་ཤུ་ཙི་ཧ། སུ་དྷེ། ཨ་ཙ་ན། བྷུ་བོ་ག་ག་ནཾ། ཀུང་པ་ནོ། བྷ་ས་བྷ་ནཾ།་པ་ར་རི་དྷུ་རི་ཡ། ནི་པ་རི་ཀ་ནོ་ནི། མ་ནཾ་བྷ། སུ་རུ་ཙི་ཋ། པ་ན་ཨ་ཙ་ར། ཨ་བྷེ་ལ་བིརྱ་པྲ་ཏི་ཤྠ་ཧ། དྷ་རི་ནི། ཨ་སི་ཋ། ལོ་ཎི་བྷི། གཟུངས་རྣམས་གང་ཡིན་འདི་དག་ནི། །སངས་རྒྱས་རྣམས་ཀྱིས་རབ་ཏུ་བརྙེས། །མཐུ་ཆེན་དག་ནི་ཕུན་སུམ་ཚོགས། །ཤེས་རབ་དག་ནི་ཚད་ཀྱང་མེད། །འཛིན་པ་དག་ནི་ཡོངས་སུ་སྤོང ། །དྲན་པ་དག་ནི་དག་པར་བྱེད། ། གཟུགས་མེད་འགྲོ་དང་འོང་བ་མེད། །ཕྱོགས་དང་ཕྱོགས་མཚམས་ཡོད་པ་མིན། །མཚན་མ་མེད་ཅིང་བརྗོད་དང་བྲལ། །སྤྲོས་པ་དག་ལས་ཡང་དག་འདས། །བྱང་ཆུབ་སེམས་ 402b དཔས་སྒྲུབ་བྱེད་ན། །མཐར་ནི་བསིལ་པ་ཐོབ་པར་འགྱུར། །ཚིགས་སུ་བཅད་པ་བྱེ་བ་ཕྲག་།བརྒྱ་སྟོང་མང་པོ་དག་གིས་ནི། །ཚིག་གཅིག་ཙམ་ནི་རབ་བསྟན་ཀྱང ། །མཐའ་ནི་དམིགས་པར་ཡོང་མི་ནུས། །འཕགས་པ་མང་པོས་རབ་ཏུ་བསྔགས། །རྣམ་པར་དག་ཅིང་ཞེན་པ་མེད། །འཁོར་འདུས་མང་པོ་ཐམས་ཅད་ཀྱིས། །ཤིན་ཏུ་གུས་པ་བསྐྱེད་པར་གྱིས། །གཟུངས་ནི་གང་ཡིན་འདི་དག་གི་།དགེ་བའི་ཆོས་ཀྱི་མཐུ་སྟོབས་ཀྱིས། །ཉོན་མོངས་རབ་བཅོམ་ཉེར་ཞི་ནས། །ཁྱད་འཕགས་ཕན་ཡོན་ཐོབ་པར་བྱེད། །ཡོན་ཏན་དང་ནི་ཤེས་རབ་དག། ཤིན་ཏུ་རྒྱ་ཆེ་རྒྱ་མཚོ་འདྲ། །བཟོད་པ་དག་ནི་སྒྲུབ་པར་བྱེད། །སེམས་ནི་རབ་བདེ་གཡོ་མེད་འགྱུར། །བྱང་ཆུབ་སེམས་དཔས་རྟག་ཏུ་བསྒོམས། །མཁས་པ་དག་གིས་རབ་ཏུ་བསྔགས། །དབུལ་ཕོངས་དག་ནི་སྤོང་བྱེད་ཅིང ། །ནོར་དང་རིན་ཆེན་འཐོབ་པར་བྱེད། །གཟུངས་ནི་གང་ཡིན་འདི་དག་གིས། །ཡོན་ཏན་རྣམས་ནི་འཕེལ་བར་བྱེད། །རྟག་ཏུ་སྟོང་ཉིད་ལ་སོགས་པའི། །བདེན་ཚིག་དག་གིས་རབ་ཏུ་བརྒྱན། །ཡི་གེ་དག་ནི་སྤངས་པས་ན། །སྟོང་པའི་ངོ་བོ་ཉིད་ཅེས་བྱ། །སེམས་དང་རྣམ་ཤེས་སྤངས་པས་ན། །ཆོས་ཀྱི་ངོ་བོ་ཉིད་ཅེས་བྱ། །གཟུངས་ནི་གང་ཡིན་འདི་དག་གིས། །དྲི་བྲལ་རྟག་ཏུ་རྣམ་དག་བྱེད། །ཡང་དག་ཡེ་ཤེས་ལ་གནས་ནས། །ཕན་པ་སྣ་ཚོགས་སྟོན་པར་བྱེད། །སེམས་ཅན་དག་ 403a ༄#། །ནི་མང་པོ་རྣམས། །དགའ་ཞིང་དང་བ་སྐྱེད་པར་བྱེད། །གནོད་སྦྱིན་འཁོར་ནི་ཚད་མེད་དང ། །གྲུལ་བུམ་འཁོར་ནི་གང་ཡིན་པ། །འདི་ལ་སོགས་པ་ཡི་དྭགས་རྒྱལ། །དགའ་བ་ཆེན་པོ་སྐྱེད་ཅེས་ཟེར། །གཟུངས་སྔགས་གང་ཡིན་འདི་དག་ནི། །རབ་ཏུ་ཞི་ཞིང་སྤྲོས་པ་མེད། །སེམས་ཅན་དག་ལ་བྱམས་པས་ན། །ཀུན་ལ་བདེ་བ་སྦྱིན་པར་བྱེད། །བསྐལ་པ་མང་པོ་བརྒྱ་སྟོང་དུ། །འགྲོ་བ་རྣམས་སུ་རྟག་གནས་ཤིང ། །ཕན་པ་ཚད་མེད་རབ་འབྱེད་ཀྱང ། །རྣམ་པར་དག་ཅིང་གོས་པ་མེད། ། ཚིགས་སུ་བཅད་པ་བརྒྱ་སྟོང་གིས། །བདུད་རྩིའི་ཆོས་ནི་རབ་བསྟན་ནས། །སེམས་ཅན་དག་ནི་ཚད་མེད་རྣམས། །དགའ་བ་ཆེན་པོ་སྐྱེད་པར་བྱེད། །སྔོན་གྱི་སངས་རྒྱས་ཚད་མེད་རྣམས། །ཤིན་ཏུ་རྣམ་དག་མོས་པ་ཡིས། །གཟུངས་འདི་ལ་ནི་བརྟེན་ནས་སུ། །རྟག་ཏུ་ཆོས་ཉིད་དགོངས་པར་མཛད། །ཚངས་དང་བརྒྱ་བྱིན་ལྷ་རྣམས་དང ། །ཀླུ་ཡི་རྒྱལ་པོ་ལྷ་མ་ཡིན། །གཟུངས་འདི་ཐོས་པར་གྱུར་ནས་ཀྱང ། །སེམས་ཀྱི་དགའ་བ་སྐྱེད་ཅེས་ཟེར། །གཟུངས་སྔགས་གང་ཡིན་འདི་དག་རྣམས། །གང་དུ་གནས་པའི་ཡུལ་དེར་ནི། །རྟག་ཏུ་གནོད་དང་འཁྲུག་པ་དང ། །ནད་དང་སྡུག་བསྔལ་མྱ་ངན་མེད། །སེམས་ཅན་དག་ནི་ཐམས་ཅད་ཀུན། །སོ་སོ་དགའ་བའི་སེམས་བསྐྱེད་ནས། །གཟུངས་ 403b འདི་རྟག་ཏུ་བདག་ཅག་གི་།སེམས་ལ་གནས་པར་སྨོན་ལམ་འདེབས། །གཟུངས་སྔགས་གང་ཡིན་འདི་དག་ནི། །ལུས་དང་སེམས་དང་རྐན་དག་དང ། །ཁ་མཆུ་དག་ལ་གནས་གྱུར་ན། །ཡོན་ཏན་དཔག་མེད་སྐྱེད་པར་བྱེད། །གལ་ཏེ་རྟག་ཏུ་འཛིན་བྱེད་ན། །ཡོན་ཏན་ཚད་མེད་ཐོབ་གྱུར་ནས། །སེམས་ཅན་མང་ལ་ཕན་འདོགས་ཤིང ། །ཐམས་ཅད་དགའ་བ་ཐོབ་ཅེས་ཟེར། །གཟུངས་སྔགས་གང་ཡིན་འདི་དག་གིས། །སྡིག་པ་རྣམས་ནི་རབ་སྤོང་ཞིང ། །དམ་ཆོས་དག་ནི་སྟོན་བྱེད་པས། །ཐུག་པ་མེད་པའི་སྤོབས་པ་ཐོབ། ། སེམས་ཅན་དག་ནི་བརྒྱ་སྟོང་རྣམས། །ཐེ་ཚོམ་དག་ནི་རབ་བསལ་ནས། །ང་རྒྱལ་རྣམས་ནི་རབ་བཅོམ་སྟེ། །ཡོན་ཏན་དཔག་མེད་ཐོབ་ཅེས་ཟེར། །ཤིན་ཏུ་ཟབ་ཅིང་གསང་བའི་ཆོས། །གཟུངས་སྔགས་གང་ཡིན་འདི་དག་ནི། །མཁས་པས་རྟག་ཏུ་སེམས་བྱེད་ཅིང ། །ནན་ཏན་གྱིས་ནི་སྒྲུབ་པར་བྱེད། །ཤེས་རབ་གོ་ཆ་རབ་བགོས་ནས། །ཉོན་མོངས་རབ་ཏུ་འཇོམས་པར་བྱེད། །ཡོན་ཏན་སེམས་ནི་འཕེལ་བྱེད་པས། །རབ་ཏུ་མོས་ཤིང་སྐྱོ་བ་མེད། །གཟུངས་སྔགས་གང་ཡིན་དེ་དག་ནི། །གྲགས་པ་ཆེན་པོ་ཕུན་ཚོགས་པས།། ཟད་པ་དང་ནི་མི་ཟད་དང ། །སྐྱེ་དང་མི་སྐྱེ་མཐའ་རབ་རྟོགས། །འདི་འདྲའི་ཤེས་རབ་སྣ་ཚོགས་ཀྱིས། །བདག་ཉིད་རབ་ཏུ་བརྒྱན་པས་ན། །དེ་བཞིན་གཤེགས་པ་བརྒྱ་སྟོང་རྣམས། ། 404a ༄#། །ཤིན་ཏུ་གུས་ཤིང་མཆོད་པ་མཛད། །དེ་འདྲའི་གཟུངས་ནི་གང་ཡིན་པ། །རིག་པ་དག་གིས་རྐང་གཉིས་བྱེད། །ཏིང་འཛིན་མཆོག་ལ་རབ་གནས་ནས། །བྱང་ཆུབ་ལམ་ལ་གཞོལ་བར་བྱེད། །ཞི་གནས་ལྷག་མཐོང་རྗེས་འབྲང་ཞིང ། །ཟག་མེད་ཤེས་རབ་རྟོགས་པར་བྱེད། །རབ་དང་དབང་པོ་སྟོབས་ཀྱིས་ནི། །ལག་གཉིས་ཡོངས་སུ་སྒྲུབ་པར་བྱེད། །བརྩོན་འགྲུས་དང་ནི་བཟོད་པ་ཡིས། །ནུ་མ་གཉིས་ནི་གྲུབ་པར་བྱེད། །ཤེས་རབ་ཕ་རོལ་ཕྱིན་པས་ནི། །སྤྱི་གཙུག་མཚན་ཉིད་རབ་ཏུ་བྱེད།། མདོ་སྡེ་དག་གིས་སྐུད་བྱས་ནས། །སོ་སོ་རིག་བཞིའི་ཕྲེང་བ་བརྒྱུས། །སྔོན་ནི་མངོན་པར་བསྒྲུབས་པ་ཡི། །ཡོན་ཏན་རྣམ་པ་སྣ་ཚོགས་དང ། །དཔེ་ནི་ཚད་མེད་ཇི་སྙེད་པ། །ཐམས་ཅད་རབ་ཏུ་རྒྱན་ཅེས་ཟེར། །གཟུངས་སྔགས་གང་ཡིན་འདི་དག་ནི། །ཡོན་ཏན་ཚད་མེད་ཕུན་ཚོགས་པས། །མིག་གི་སྔོན་དང་ཕྱི་མཐའ་དང ། །ཟད་དང་མི་ཟད་མཐའ་དག་དང ། །སྐྱེ་བ་དང་ནི་མི་སྐྱེ་དང ། །མཐའ་དང་མཐའ་མིན་གང་ཡིན་དང ། །དབེན་པ་དང་ནི་མི་དབེན་དང ། །འཇུག་པ་དང་ནི་འཇུག་མིན་དང ། །ཅི་ཡང་མེད་དང་མི་འབྱུང་དང ། །ཉེར་ཞི་དང་ནི་བདག་མེད་དང ། །གང་ཟག་མེད་དང་སྲོག་མེད་དང ། །སེམས་ཅན་མེད་པའི་བར་དག་དང ། །འདི་ལ་སོགས་པའི་ཚད་མེད་སྒོ། །ཐམས་ 404b ཅད་རབ་ཏུ་རྟོགས་པར་འགྱུར། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་བར་དུ། །ཐམས་ཅད་དེ་བཞིན་སྦྱར་ཞེས་ཟེར། །གོང་དུ་བསྔགས་པ་བརྗོད་པ་ཡི། །གཟུངས་མཆོག་དམ་པ་གང་ཡིན་པ། །རབ་དབེན་ཡོན་ཏན་མཆོག་ལྡན་ཞིང ། །སངས་རྒྱས་སྤྱོད་ཡུལ་ཡིན་པས་ན། །གཟུངས་དོན་ཡང་དག་གང་ཡིན་པ། །ཡི་གེས་བརྗོད་བྱ་མ་ཡིན་ཡང ། །འཇིག་རྟེན་པ་ཡི་རྗེས་སུ་ནི། །བཏགས་པའི་མིང་གིས་བརྗོད་པ་ཡིན། །དེ་ནས་བཅོམ་ལྡན་འདས་འཁོར་མང་པོ་དང་ཐབས་ཅིག་ཏུ་ཟླ་འོད་གཞོན་ནུའི་ཁྱིམ་དུ་བྱོན་པ་དང ། གདན་བཤམས་པ་ལ་རབ་ཏུ་བཞུགས་སོ། །དེའི་ཚེ་ཟླ་འོད་གཞོན་ནུར་གྱུར་པས་བཅོམ་ལྡན་འདས་གདན་བཤམས་པ་ལ་བཞུགས་པར་རིག་ནས་བདག་ཉིད་མཆོད་པའི་ཡོ་བྱད་མཆོག་དམ་པ་ཐོགས་ནས་དེ་བཞིན་གཤེགས་པ་དང ། འཁོར་འདུས་པ་ཆེན་པོ་རྣམས་ལ་རབ་ཏུ་ཕུལ་ཏེ། །མཆོད་པ་དེ་ཡང་བསམ་གཏན་དང ། །ཏིང་ངེ་འཛིན་དང ། བསམ་གཏན་གྱི་ཡོན་ཏན་ཁྱད་པར་དུ་འཕགས་པའི་དགེ་བའི་རྩ་བ་དང ། བསམ་གྱིས་མི་ཁྱབ་པའི་མཐུ་ལས་མངོན་པར་གྲུབ་པ་ཤ་སྟག་གོ་།དེ་ལྟར་མཆོད་པ་ཕུལ་བ་ཡང་བདག་འབའ་ཞིག་གི་ཕྱིར་མ་ཡིན་གྱི། སེམས་ཅན་ཚད་མེད་པ་ཐམས་ཅད་བླ་ན་མེད་པའི་བྱང་ཆུབ་ལ་གཞོལ་ཞིང་ཕན་པ་ཆེན་ 405a ༄#། །པོ་འཐོབ་པར་བྱ་བའི་ཕྱིར་མཆོད་ཅིང་ཕུལ་བས་ན། མཆོད་པ་དེས་ཀུན་ཏུ་ཁྱབ་ཅིང་ཐམས་ཅད་རབ་ཏུ་ཚིམ་པར་གྱུར་ཏོ། །དེ་ནས་བཅོམ་ལྡན་འདས་གདུགས་ཚོད་གསོལ་བའི་འོག་ཏུ་འཁོར་འདུས་པ་མང་པོའི་མདུན་དུ་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་ཐེག་པ་ཆེན་པོ་ལ་གནས་ནས་སྦྱིན་པའི་ཚོགས་མངོན་པར་སྒྲུབ་པར་བྱེད་ན། ཡོན་ཏན་ཁྱད་པར་དུ་འཕགས་པ་རྣམ་པ་བརྒྱད་ཅུ་དང་ལྡན་པར་འགྱུར་རོ། །རྣམ་པ་བརྒྱད་ཅུ་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྨིན་པར་བྱེད་ཅིང་ཚིག་སྙན་པས་ཡོངས་སུ་སྡུད་པར་བྱེད་པ་དང ། མཚན་གྱ་ནོམ་པ་ཡོངས་སུ་རྫོགས་པ་དང ། དབང་པོ་རྣམས་མ་ཚང་བ་མེད་པ་དང ། འཁོར་བ་སྤངས་ནས་མྱ་ངན་ལས་འདས་པ་མངོན་དུ་བྱེད་པ་དང ། །ཉོན་མོངས་པ་རྣམས་ཟད་ནས་དབང་ཕྱུག་མཆོག་ཐོབ་པ་དང ། ཡོན་ཏན་ཕུན་སུམ་ཚོགས་ཤིང་སངས་རྒྱས་ཀྱི་ཞིང་རབ་ཏུ་བརྒྱན་པ་དང ། འཁོར་རྣམ་པར་དག་པ་དང ། གཟི་བྱིན་ཆེན་པོ་དང་ལྡན་པ་དང ། ཤེས་རབ་ཕུན་སུམ་ཚོགས་པ་དང ། སྤྱོད་པ་ཁྱད་པར་དུ་འཕགས་པ་མཆོག་མངོན་པར་སྒྲུབ་པ་དང ། སྤྱོད་པ་བླ་ན་མེད་ཅིང་མཚུངས་པ་མེད་པ་ཡོངས་སུ་རྫོགས་པ་དང ། །བག་ 405b ཆགས་ཡང་དག་པར་བཅོམ་ནས་དེ་བཞིན་གཤེགས་པའི་ཐམས་ཅད་མཁྱེན་པའི་སྤྱོད་པ་འཕེལ་བར་བྱེད་པ་དང ། ལུས་དང་རིང་བསྲེལ་འཇིག་རྟེན་ཐམས་ཅད་དང ། ཉན་ཐོས་དང་རང་སངས་རྒྱས་རྣམས་ཀྱིས་མཆོད་པར་འགྱུར་བ་དང ། མ་རུངས་པ་རྣམས་རབ་ཏུ་བཏུལ་བས་མིའི་རྒྱལ་པོ་དང ། ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་གི་རྒྱལ་པོ་དང ། ཚངས་པའི་རྒྱལ་པོ་རྣམས་ཡོངས་སུ་དང་བ་སྐྱེ་བར་འགྱུར་བ་དང ། མཐུ་ཆེན་པོ་དང་ལྡན་པ་དང ། མདོའི་སྡེ་དང ། ཚིགས་སུ་བཅད་པ་དང ། ལུང་དུ་བསྟན་པ་དང ། །ཆེད་དུ་བརྗོད་པ་དང ། །དབྱངས་ཀྱིས་བསྙད་པ་དང ། རྟོགས་པ་བརྗོད་པ་དང ། །གླེང་གཞི་དང ། །ད་ལྟར་བྱུང་བ་དང ། སྐྱེས་པའི་རབས་དང ། ཤིན་ཏུ་རྒྱས་པ་དང ། རྨད་དུ་བྱུང་བ་དང ། གཏན་ལ་ཕབ་པར་བསྟན་པའི་སྡེའི་བར་དུ་ལེན་པ་དང ། འཛིན་པ་དང ། ཡང་དག་པར་སྟོན་པར་འགྱུར་བ་དང ། སེམས་ལ་ལེ་ལོ་མེད་པ་དང ། ཆོས་ལ་སེར་སྣ་མེད་པ་དང ། སངས་རྒྱས་ཀྱི་ལམ་ལ་ཡང་དག་པར་གནས་པ་དང ། འཇིག་རྟེན་ན་མཆོག་ཏུ་འགྱུར་ཞིང་མིང་དང་གཟུགས་ཡོངས་སུ་དག་པར་འགྱུར་བ་དང ། ཆོས་ཀྱི་སྐུ་མངོན་དུ་བྱེད་པར་འགྱུར་བ་དང ། མི་འཇིགས་པ་ཐོབ་པར་འགྱུར་བ་དང ། བསོད་ནམས་ཕུན་སུམ་ཚོགས་པར་འགྱུར་བ་དང ། མུ་སྟེགས་ཅན་རྣམས་ཟིལ་གྱིས་གནོན་པ་དང ། 406a ༄#། །སྐྱེས་བུ་དམ་པའི་ཆོས་ཕུན་སུམ་ཚོགས་པ་དང ། སྡིག་པ་ཅན་གྱི་སྤྱོད་པ་སྤོང་བར་འགྱུར་བ་དང ། བསོད་ནམས་དང་ཡེ་ཤེས་ཀྱི་རྒྱུ་ལ་མངོན་པར་ཡིད་ཆེས་པ་དང ། སངས་རྒྱས་ཀྱི་ཆོས་སྡུད་པར་བྱེད་པ་དང ། བདུད་མང་པོ་ཕམ་པར་བྱེད་པ་དང ། སངས་རྒྱས་ཀྱིས་གསུངས་པའི་ཆོས་བདེན་པ་དག་ལ་ཐེ་ཚོམ་དང ། ནེམ་ནུར་མེད་པ་དང ། འདོད་པ་ངན་པ་རྣམས་རབ་ཏུ་བཅོམ་པ་དང ། གཟི་བྱིན་ཆེན་པོ་དང་ལྡན་པ་དང ། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབས་པས་རྫུ་འཕྲུལ་ཁྱད་པར་དུ་འཕགས་པ་འཐོབ་པར་འགྱུར་བ་དང ། སྐྱེ་ཤི་སྤོང་བར་འགྱུར་བ་དང ། སེམས་ཅན་ཡོངས་སུ་སྨིན་པར་བྱེད་པ་དང ། སྤྱོད་པ་དཔག་ཏུ་མེད་པའི་བསྔགས་པ་བརྗོད་པ་དང ། ཡོན་ཏན་རྣམས་ཡོངས་སུ་སྡུད་པར་འགྱུར་པ་དང ། སེམས་ཅན་རྣམས་ལ་སྤྲོ་བ་བསྐྱེད་པ་དང ། ཆོས་ཀྱི་དགའ་བ་ལ་ཡོངས་སུ་སྤྱོད་པར་འགྱུར་བ་དང ། སྦྱིན་པ་གཏོང་བ་མངོན་པར་སྒྲུབ་པར་འགྱུར་བ་དང ། ཡེ་ཤེས་ཆེན་པོའི་སྒོར་འཇུག་པར་འགྱུར་བ་དང ། དྲོ་བར་གྱུར་པའི་ཆོས་ལ་གནས་པར་འགྱུར་བ་དང ། རིགས་ངེས་པ་ཉིད་དུ་འགྱུར་བ་དང ། ཆོས་ཀྱི་བཟོད་པ་སྒྲུབ་པར་འགྱུར་བ་དང ། སངས་རྒྱས་ཀྱི་ལམ་ལ་བདེ་བར་གནས་པ་གང་ཡིན་པའོ། །གཞོན་ནུ། རིགས་ཀྱི་བུའམ་རིགས་ཀྱི་བུ་མོ་གང་ 406b ལ་ལ་ཞིག་སྦྱིན་པའི་ཚོགས་མངོན་པར་སྒྲུབ་པར་བྱེད་ན། ཡོན་ཏན་ཁྱད་པར་དུ་འཕགས་པ་རྣམ་པ་བརྒྱད་ཅུ་པོ་འདི་དག་ཕུན་སུམ་ཚོགས་ཤིང་ཡོངས་སུ་རྫོགས་པར་འགྱུར་རོ། ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་བློ་ཆེན་གང ། །སྦྱིན་པའི་ཚོགས་དང་ལྡན་པ་ལ། །ཕན་ཡོན་མཆོག་ནི་བརྒྱད་ཅུ་ཡོད། །ངས་མདོར་བསྡུས་ཏེ་བསྟན་པ་ཡིན། །གཞན་ཡང་དཔག་མེད་བསམ་དཀའ་ཡི། །ཡོན་ཏན་དག་ནི་གང་ཡིན་པ། །ཐམས་ཅད་སྦྱིན་པ་ལས་སྐྱེ་སྟེ། །དེང་འདིར་ཅུང་ཟད་བསྟན་པར་བྱ། །ཁྱེད་ཀྱིས་འཁོར་འདུས་མང་པོ་ལ། །མཉམ་པའི་སེམས་ཀྱིས་གང་མཆོད་པ། །སྦྱིན་པའི་ཚོགས་ནི་དེ་དག་ལ། །མཁས་པ་རྣམས་ཀྱིས་བསྒྲུབ་པར་བྱ། །སྦྱིན་པ་འདི་ཡིས་བསགས་པ་ཡི། །བསོད་ནམས་ཕུང་པོ་བསམ་མི་ཁྱབ། །མཚན་དང་དཔེ་བྱད་ལུས་བརྒྱན་པ། །ཐམས་ཅད་ཡོངས་སུ་རྫོགས་པར་འགྱུར། །སྐྱེ་གནས་དང་ནི་རུས་རིགས་དང ། །ཡུལ་རྣམས་དང་ནི་ཁྱིམ་དག་དང ། །གྲགས་པ་དང་ནི་གཟུགས་དང་སེམས། །ཐམས་ཅད་ཡོངས་སུ་དག་པར་འགྱུར། །ལྷ་རྣམས་རྫུ་འཕྲུལ་དངོས་པོ་དང ། །གཞལ་མེད་ཁང་དང་ལྷ་མོ་དང ། །རྣམ་དག་ཐོགས་མེད་སྤོབས་པ་ཡང ། །སྦྱིན་པ་ལས་ནི་བྱུང་བ་ཡིན། །སྦྱིན་པའི་ཚོགས་མཆོག་གང་ཡིན་པ། །སངས་རྒྱས་ 407a ༄#། །རྣམས་ཀྱིས་འདི་སྐད་དུ། །འདི་ནི་དང་པོར་བྱང་ཆུབ་རྣམས། །གནས་པའི་གཞི་ཞེས་བསྔགས་པ་མཛད། །བྱང་ཆུབ་སེམས་དཔའ་བརྩོན་འགྲུས་ཅན། །སྦྱིན་ལ་ཐེ་ཚོམ་མེད་པ་དག་།ངེས་པའི་སེམས་ལ་རབ་གནས་ནས། །སྦྱིན་པ་ནན་ཏན་སྒྲུབ་པར་གྱིས། །སྦྱིན་པའི་སེམས་ནི་གང་དག་གིས། །བསོད་ནམས་ཚོགས་ནི་རྫོགས་བྱེད་པ། །བྱང་ཆུབ་སེམས་དཔའ་སྒྲུབ་བྱེད་ན། །སངས་རྒྱས་བྱང་ཆུབ་ཐོབ་པར་འགྱུར། །སྦྱིན་པའི་མཐུ་ཡི་སྟོབས་ཀྱིས་ནི། །རྫུ་འཕྲུལ་མཆོག་ནི་རྫོགས་བྱེད་པས། །ཞིང་ནི་བྱེ་བ་བསྐུལ་བྱས་ནས། །སེམས་ཅན་རྣམས་ལ་གནོད་མི་འགྱུར། །སྦྱིན་པ་བཏང་བའི་དབང་གིས་ན། །རྣམ་དག་ཚུལ་ཁྲིམས་མང་ཐོས་དང ། །ཡང་དག་ཡིད་ཆེས་བརྩོན་འགྲུས་དང ། །ཏིང་འཛིན་ཟག་མེད་ཤེས་རབ་འདྲེན། །སྦྱིན་པ་བཏང་བའི་དབང་གིས་ན། །དབང་པོ་སྟོབས་དང་ཡང་དག་ལམ། །ཡང་དག་སྤོང་དང་རྫུ་འཕྲུལ་རྐང ། །བག་ཆགས་སྤོང་བ་འདྲེན་པར་བྱེད། །སྦྱིན་པ་བཏང་བའི་དབང་གིས་ན། །རྣམ་དག་སྒྲ་སྙན་དག་གིས་ནི། །ཞིང་ནི་བྱེ་བ་བརྒྱ་ཕྲག་ཏུ། །དཔག་མེད་ཆོས་སྟོན་འདྲེན་པར་བྱེད། །ཡོངས་སུ་དང་བས་སྦྱིན་བཏང་བས། །རྫུ་འཕྲུལ་རྣམས་ནི་མྱུར་དུ་འཐོབ། །རྫུ་འཕྲུལ་ཡོངས་སུ་རྫོགས་བྱའི་ཕྱིར། །ནན་ཏན་སྦྱིན་པ་བཏང་ 407b བར་གྱིས། །ལྷ་ནི་མང་པོ་ཚད་མེད་རྣམས། །ལྷ་མ་ཡིན་དང་ཀླུ་རྣམས་དང ། །གནོད་སྦྱིན་བརྒྱ་སྟོང་མང་པོ་དང ། །འཁོར་རྣམས་ཀྱིས་ནི་ཡོངས་བསྐོར་ནས། །གཞལ་མེད་ཁང་མཆོག་རབ་ཞུགས་ཏེ། །རང་དབང་དག་གིས་རྩེ་བྱེད་ན། །འདི་ལ་སོགས་པའི་རྒྱལ་པོ་རྣམས། །སྦྱིན་ལ་བརྩོན་པ་མཐོང་གྱུར་ན། །ཐམས་ཅད་ལངས་ནས་བསུ་ནས་ནི། ། སྟན་གདིང་མཆོད་པ་དག་ཀྱང་བྱེད། །སྦྱིན་གཏོང་གང་ཟག་གང་ཡིན་པ། །གཟི་བྱིན་ཆེན་པོ་ཕུན་སུམ་ཚོགས་ཤིང ། །རྫུ་འཕྲུལ་སྟོབས་ལ་དབང་ཐོབ་པས། །ལྷ་རྒྱལ་རྣམས་ནི་སྡུད་པར་བྱེད། །གྲུལ་བུམ་དང་ནི་གནོད་སྦྱིན་རྣམས། །ཐམས་ཅད་སྐྱབས་སུ་འགྲོ་བར་འགྱུར། །དྲི་ཟ་འཁོར་བཅས་རྣམས་ཀྱིས་ཀྱང ། །རོལ་མོ་དག་གིས་མཆོད་པར་བྱེད། ། ཆོམ་རྐུན་དག་ནི་བྱམས་སེམས་བསྐྱེད། །མ་རུངས་པ་རྣམས་རིང་དུ་འགྲོ། །ནོར་རྣམས་ཉམས་པར་མི་འགྱུར་ཏེ། །བང་མཛོད་དག་ནི་གང་བར་འགྱུར། །སྦྱིན་པ་ཡོངས་སུ་བཏང་བའི་ཕྱིར། །ཚོགས་མཆོག་དག་ནི་རྫོགས་པར་འགྱུར། །སངས་རྒྱས་ཡེ་ཤེས་ཐུག་བར་དུ། །མུ་སྟེགས་ཆོས་ནི་སྤྱོད་མི་བྱེད། །ད་ལ་ན་བ་ཡོང་མེད་དེ། །གཟུངས་རྣམས་ཡོངས་སུ་སྲུང་བར་བྱེད། །ཁྱད་པར་འཕགས་པའི་སྟོབས་རྣམས་ཀྱང ། །སྦྱིན་པ་ལས་ནི་བྱུང་བ་ཡིན། །དེ་ལྟར་སྦྱིན་པ་གང་གཏོང་བ། །བྱང་ཆུབ་ལམ་ནི་སྒྲུབ་པར་ 408a ༄#། །བྱེད། །མི་དགེའི་བཤེས་གཉེན་ཕྲད་མི་འགྱུར། །སྤྱོད་མཐུན་གྲོགས་པོ་ཐོབ་པར་འགྱུར། །གཞན་ཡང་བྱང་ཆུབ་སེམས་དཔའ་རྣམས། ། སྦྱིན་པའི་ཚོགས་ནི་གསོག་བྱེད་པས། །བསམ་གྱིས་མི་ཁྱབ་གཟུངས་དག་དང ། །ཤེས་རབ་ཡོངས་སུ་རྫོགས་བྱེད་པས། །ཚིགས་སུ་བཅད་པ་ཚད་མེད་ཀྱིས། །ཀུན་འཛིན་ཡང་དག་སྟོན་པར་བྱེད། །ཐམས་ཅད་ལ་ནི་ཐོགས་མེད་པས། །ངོ་བོ་ཉིད་དོན་སྟོར་མི་འགྱུར། །བྱང་ཆུབ་སེམས་ནི་རྒྱ་ཆེ་ལ། །མོས་པའི་སེམས་ནི་བརྟན་པར་འགྱུར། ། ཚུལ་ཁྲིམས་དག་པ་ཕུན་ཚོགས་ཤིང ། །བདུད་ཀྱི་ལས་རྣམས་སྤོང་བར་བྱེད། །འདོད་པ་ལྔ་ལ་ཞེན་མེད་ཅིང ། །རྩེ་གཅིག་ཡང་དག་དྲན་པ་ཚོལ། །སེམས་ལ་རྟག་ཏུ་རྨོངས་མེད་པས། །འདོད་པ་དག་ལ་སྲེད་མི་བསྐྱེད། །ཞེ་སྡང་ཉོན་མོངས་གང་ཡིན་པ། །ཡང་དག་ཇི་བཞིན་རབ་ཏུ་རྟོགས། །སྤྱོད་ཡུལ་དག་ནི་ཐམས་ཅད་ལ། །ཞེན་པ་མེད་ཅིང་རྨོངས་པ་མེད། །གང་ཟག་དེས་ནི་ཉོན་མོངས་རྣམས། །ལེགས་པ་ཉིད་དུ་རྟོགས་པར་འགྱུར། །རྒྱུ་དང་རྐྱེན་ནི་འདུས་པ་ལས། །ཉེས་དམིགས་རྣམས་ནི་སྐྱེ་བ་ནས། །སངས་རྒྱས་ཆོས་ཀྱི་བར་དག་གི་།རྒྱུ་དང་རྒྱུ་ཡི་རྒྱུ་ཉིད་དང ། །དེ་བཞིན་རྒྱུ་ཡི་བྱ་བ་རྣམས། །ཐམས་ཅད་རབ་ཏུ་རྟོགས་པར་འགྱུར། །དེས་ནི་མིག་ཟད་མཐའ་ཡི་ 408b རྒྱུ། །གང་ཡིན་རབ་ཏུ་རྟོགས་པས་ན། །རྨོངས་པ་རྣམས་ནི་ཡོངས་སྤངས་ནས། །མིག་ལ་མངོན་པར་ཞེན་མི་འགྱུར། །དེས་ནི་མིག་གི་སྐྱེ་མཐའ་དང ། །མཐའ་དང་རབ་ཏུ་དབེན་པ་དང ། །འཇུག་པ་དང་ནི་མེད་པ་དང ། །མི་སྐྱེ་བ་ནས་ཉེར་ཞིའི་བར། །འདི་ལ་སོགས་པའི་རྒྱུ་ཉིད་ཀྱང ། །རབ་ཏུ་རྟོགས་པར་གྱུར་པས་ན། །རྨོངས་པ་རྣམས་ནི་ཡོངས་སྤངས་ནས། །མིག་ལ་མངོན་པར་ཞེན་མི་འགྱུར། །དེས་ནི་མིག་གི་སྔོན་མཐའ་ཡི། །བརྗོད་པ་འཇིག་རྟེན་རྗེས་སུ་ནི། །བཏགས་པ་ཡིན་པས་དེ་ལ་ནི། །ཡང་དག་ཅི་ཡང་མེད་པར་རྟོགས། །དེས་ནི་མིག་གི་ཕྱི་མཐའ་ཡི། །བརྗོད་པ་འཇིག་རྟེན་རྗེས་སུ་ནི། །བཏགས་པ་ཡིན་པས་དེ་ལ་ནི། །ཡང་དག་ཅི་ཡང་མེད་པར་རྟོགས། །དེས་ནི་མིག་གི་སྐྱེ་མཐའ་དང ། །མཐའ་དང་རབ་དབེན་འཇུག་པ་དང ། །ཅི་ཡང་མེད་དང་སྐྱེ་མེད་ནས། །ཉེ་བར་ཞི་བའི་བར་དག་དང ། །འདི་ལ་སོགས་པའི་བརྗོད་པ་རྣམས། །འཇིག་རྟེན་རྗེས་སུ་བཏགས་པས་ན། །དེ་ལ་ཡང་དག་མེད་པར་ནི། །རབ་ཏུ་རྟོགས་པར་འགྱུར་བ་ཡིན། །དེས་ནི་མིག་གི་སྔོན་མཐའ་ཡི། །བརྗོད་པ་རྒྱུ་རྐྱེན་འདུས་པ་ལས། །བྱུང་བ་ཉིད་དུ་རྟོགས་པས་ན། ། དེ་ལ་ཞེན་པ་ཅི་ཡང་མེད། །དེས་ནི་མིག་གི་ཕྱི་མཐའ་ཡི། །བརྗོད་པ་རྒྱུ་རྐྱེན་འདུས་པ་ལས། །བྱུང་བ་ཉིད་དུ་རྟོགས་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་སྐྱེ་ 409a ༄#། །མཐའ་དང ། །མཐའ་དང་རབ་དབེན་འཇུག་པ་དང ། །ཅི་ཡང་མེད་དང་སྐྱེ་མེད་ནས། །ཉེ་བར་ཞི་བའི་བར་དག་དང ། །འདི་ལ་སོགས་པའི་བརྗོད་པ་རྣམས། །རྒྱུ་དང་རྐྱེན་ནི་འདུས་པ་ལས། །བྱུང་བ་ཉིད་དུ་རྟོགས་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་སྔོན་མཐའ་ཡི། །བརྗོད་པའི་རང་བཞིན་བསྟན་མེད་པར། །རབ་ཏུ་རྟོགས་པར་གྱུར་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་ཕྱི་མཐའ་ཡི། །བརྗོད་པ་རང་བཞིན་བསྟན་མེད་པར། །རབ་ཏུ་རྟོགས་པར་གྱུར་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་སྐྱེ་མཐའ་དང ། །མཐའ་དང་རབ་དབེན་འཇུག་པ་དང ། །ཅི་ཡང་མེད་དང་སྐྱེ་མེད་ནས། །ཉེ་བར་ཞི་བའི་བར་དག་དང ། །འདི་ལ་སོགས་པའི་བརྗོད་པ་རྣམས། །རང་བཞིན་གྱིས་ནི་བསྟན་མེད་པར། །རབ་ཏུ་རྟོགས་པར་གྱུར་བས་ན། །དེ་ལ་ཞེན་པ་ཅི་ཡང་མེད། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དག་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །དེས་ནི་འདོད་ཆགས་སངས་རྒྱས་ལམ། ། རང་བཞིན་དབྱེར་མེད་ཡིན་པར་ནི། །རབ་ཏུ་རྟོགས་པར་གྱུར་པས་ན། །འདོད་ཆགས་ལ་ནི་ཞེན་པ་མེད། །སངས་རྒྱས་ལམ་ནི་ཐམས་ཅད་ཀུན། །ཉོན་མོངས་ལས་ 409b ནི་བཙལ་བར་བྱ། །རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོར་ནི་ཞུགས་པ་ཡིན། །འདོད་ཆགས་ཀུན་འཛིན་ཡིན་པ་དང ། །ཀུན་འཛིན་འདོད་ཆགས་ཡིན་སྟོན་ཅིང ། ། རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོར་ནི་སློབ་པ་ཡིན། །དེ་བཞིན་འདོད་ཆགས་གང་མཆོད་པ། །དེ་ནི་སངས་རྒྱས་མཆོད་པ་ཡིན། །སངས་རྒྱས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེས་ནི་ཞེ་སྡང་སངས་རྒྱས་ལམ། །རང་བཞིན་དབྱེར་མེད་ཡིན་པར་ནི། །རབ་ཏུ་རྟོགས་པར་གྱུར་པས་ན། །ཞེ་སྡང་ལ་ནི་ཞེན་པ་མེད། །ཞེ་སྡང་ཀུན་འཛིན་ཡིན་པ་དང ། །ཀུན་འཛིན་ཞེ་སྡང་ཡིན་སྟོན་ཅིང ། །རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོར་ནི་སློབ་པ་ཡིན། །དེ་བཞིན་ཞེ་སྡང་གང་མཆོད་པ། །དེ་ནི་སངས་རྒྱས་མཆོད་པ་ཡིན། །སངས་རྒྱས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེས་ནི་གཏི་མུག་སངས་རྒྱས་ལམ། །རང་བཞིན་དབྱེར་མེད་ཡིན་པར་ནི། །རབ་ཏུ་རྟོགས་པར་གྱུར་པས་ན། །གཏི་མུག་ལ་ནི་ཞེན་པ་མེད། །གལ་ཏེ་གཏི་མུག་ཉིད་ཀྱི་མཐའ། །ཡང་དག་ཇི་བཞིན་རྟོགས་གྱུར་ན། །དེ་ནི་སངས་རྒྱས་ལམ་བསྒྲུབས་པས། །ཀུན་འཛིན་སྒོ་ནི་རྫོགས་པར་འགྱུར། །གཏི་མུག་ཀུན་འཛིན་ཡིན་པ་དང ། །ཀུན་འཛིན་གཏི་མུག་ཡིན་སྟོན་ཞིང ། །རང་བཞིན་དབྱར་མེད་རབ་ 410a ༄#། །ཤེས་ན། །ཀུན་འཛིན་སྒོར་ནི་སློབ་པ་ཡིན། །དེ་བཞིན་གཏི་མུག་གང་མཆོད་པ། །དེ་ནི་སངས་རྒྱས་མཆོད་པ་ཡིན། །སངས་རྒྱས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དེ་ནི་ཆོས་ལ་མཆོད་པ་ཡིན། །ཆོས་ལ་མཆོད་པ་བྱས་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དེ་ནི་དགེ་འདུན་མཆོད་པ་ཡིན། །དགེ་འདུན་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དེ་ནི་ཚུལ་ཁྲིམས་མཆོད་པ་ཡིན། །ཚུལ་ཁྲིམས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །བརྩོན་འགྲུས་ལ་ནི་མཆོད་པ་ཡིན། །བརྩོན་འགྲུས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །བསྔགས་པ་བརྗོད་ཅིང་མཆོད་པ་ཡིན། །བསྔགས་པ་བརྗོད་ཅིང་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སངས་རྒྱས་ཆོས་ལ་མཆོད་པ་ཡིན། །སངས་རྒྱས་ཆོས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་ 410b མུག་གང་མཆོད་པ། །ཆོས་ཉིད་ལ་ནི་མཆོད་པ་ཡིན། །ཆོས་ཉིད་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དེ་བཞིན་ཉིད་ལ་མཆོད་པ་ཡིན། །དེ་བཞིན་ཉིད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྐྱེ་བ་མེད་ལ་མཆོད་པ་ཡིན། །སྐྱེ་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འགག་པ་མེད་ལ་མཆོད་པ་ཡིན། །འགག་པ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཟག་པ་མེད་ལ་མཆོད་པ་ཡིན། །ཟག་པ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། ། དེ་བཞིན་གཏི་མུག་གང་མཆོད་པ། །ཅི་ཡང་མེད་ལ་མཆོད་པ་ཡིན། །ཅི་ཡང་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ་པ། །དཔག་ཏུ་མེད་ལ་མཆོད་པ་ཡིན། །དཔག་ཏུ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྲིད་པ་གསུམ་ལ་མཆོད་པ་ཡིན། །སྲིད་པ་གསུམ་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །རབ་དབེན་ལ་ནི་མཆོད་པ་ཡིན། །རབ་དབེན་ལ་ནི་ 411a ༄#། །མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འཁོར་བར་འཇུག་ལ་མཆོད་པ་ཡིན། །འཁོར་བར་འཇུག་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འཇུག་པ་མེད་ལ་མཆོད་པ་ཡིན། །འཇུག་པ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཡོད་པ་མིན་ལ་མཆོད་པ་ཡིན། །ཡོད་པ་མིན་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འབྱུང་བ་མེད་ལ་མཆོད་པ་ཡིན། །འབྱུང་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཉེ་བར་ཞི་ལ་མཆོད་པ་ཡིན། །ཉེ་བར་ཞི་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། ། འོང་བ་མེད་ལ་མཆོད་པ་ཡིན། །འོང་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འགྲོ་བ་མེད་ལ་མཆོད་པ་ཡིན། །འགྲོ་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འདུས་བྱས་ལ་ནི་མཆོད་པ་ཡིན། །འདུས་བྱས་ 411b ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྡུག་བསྔལ་ལ་སོགས་མཆོད་པ་ཡིན། །སྡུག་བསྔལ་ལ་སོགས་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྡུག་བསྔལ་ཤེས་ལ་མཆོད་པ་ཡིན། །སྡུག་བསྔལ་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཀུན་འབྱུང་ཤེས་ལ་མཆོད་པ་ཡིན། །ཀུན་འབྱུང་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འགོག་པ་ཤེས་ལ་མཆོད་པ་ཡིན། །འགོག་པ་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ལམ་ཤེས་ལ་ནི་མཆོད་པ་ཡིན། །ལམ་ཤེས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཆོས་ཤེས་ལ་ནི་མཆོད་པ་ཡིན། །ཆོས་ཤེས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །རྗེས་ལ་ཤེས་ལ་མཆོད་པ་ཡིན། །རྗེས་ལ་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྐྱེ་མེད་ཡེ་ 412a ༄#། །ཤེས་མཆོད་པ་ཡིན། །སྐྱེ་མེད་ཡེ་ཤེས་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཟད་པའི་ཡེ་ཤེས་མཆོད་པ་ཡིན། །ཟད་པའི་ཡེ་ཤེས་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་ཡང་དག་སྤོང་བ་དང ། །དྲན་པ་ཉེར་གཞག་རྫུ་འཕྲུལ་རྐང ། །དབང་པོ་ལྔ་དང་སྟོབས་ལྔ་དང ། །བྱང་ཆུབ་ཡན་ལག་བདུན་པོ་དང ། །ཡན་ལག་བརྒྱད་པའི་ལམ་དག་དང ། །ཞི་གནས་ལྷག་མཐོང་ལ་སོགས་པ།། ཆོས་ནི་རྣམ་པ་དགུ་པོ་རྣམས། །ཐམས་ཅད་དེ་བཞིན་སྦྱར་བར་བྱ། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། རིགས་ཀྱི་བུ། སེམས་ཅན་གང་ལ་ལ་ཞིག་ཐེག་པ་ཆེན་པོ་ལ་གནས་ནས་གོང་དུ་ཇི་སྐད་བསྟན་པའི་གཟུངས་མངོན་པར་སྒྲུབ་པར་འདོད་པས། གང་ཟག་རྣམ་པ་བརྒྱད་ཅུ་ཡོངས་སུ་སྤང་བར་བྱའོ། །རྣམ་པ་བརྒྱད་ཅུ་གང་ཞེ་ན། འདི་ལྟ་སྟེ། ཕ་བསད་པ་དང ། མ་བསད་པ་དང ། དགྲ་བཅོམ་པ་བསད་པ་དང ། གནོད་སེམས་ཀྱིས་དེ་བཞིན་གཤེགས་པའི་སྐུ་ལ་མཚལ་བྱུང་བ་དང ། དགེ་འདུན་མཐུན་པ་བཤིག་པ་དང ། རྐུན་བུར་རབ་ཏུ་བྱུང་བ་དང ། དབང་པོ་མ་ཚང་བ་དང ། དབང་པོ་གཉིས་དང་ལྡན་པ་དང ། ལོག་པར་ལྟ་བ་ 412b དང ། ལོག་པར་སེམས་པ་དང ། ལོག་པར་སྨྲ་བ་དང ། ལོག་པའི་ལམ་ཅན་དང ། ལོག་པས་འཚོ་བ་དང ། ལོག་པར་བརྩོན་པ་དང ། ལོག་པའི་དྲན་པ་ཅན་དང ། ལོག་པའི་ཏིང་ངེ་འཛིན་ལ་གནས་པ་དང ། གནས་མི་ཤེས་པ་དང ། དུས་མ་ཤེས་པ་དང ། ཚོད་མི་ཤེས་པ་དང ། །ལམ་མི་ཤེས་པ་དང ། ཚད་མི་ཤེས་པ་དང ། བདག་དང་གཞན་མི་ཤེས་པ་དང ། །སངས་རྒྱས་དང ། ཆོས་དང ། དགེ་འདུན་དང ། བསླབ་པའི་གནས་རྣམས་ལ་གུས་པ་མེད་པ་དང ། བག་ཡོད་པ་དང ། སྤྱོད་ཡུལ་ཁྱད་པར་དུ་འཕགས་པ་དག་ལ་བཙུན་པར་མི་འཛིན་པ་དང ། ཆོས་མི་ཤེས་པ་དང ། འདུལ་བ་མི་ཤེས་པ་དང ། བསླབ་པའི་གནས་མི་ཤེས་པ་དང ། ཁ་ན་མ་ཐོ་བ་ལྕི་བ་དང་ཡང་བ་མི་ཤེས་པ་དང ། ཚུལ་ཁྲིམས་ཉམས་པ་དང་རལ་པ་མི་ཤེས་པ་དང ། གཞན་ཡང་སྤྱོད་པ་ཤིན་ཏུ་ཕྲ་བ་དང་རིགས་མི་ཤེས་པ་དང ། ལས་མ་འོངས་པ་དང་ད་ལྟར་བྱུང་བ་མི་ཤེས་པ་དང ། དངོས་པོ་དམན་པ་རྣམས་མི་ཤེས་པ་དང ། ཉན་ཐོས་ཀྱི་ཐེག་པའི་བསྔགས་པ་བརྗོད་ཅིང ། དེ་བཞིན་གཤེགས་པའི་ཆོས་ལ་སྐུར་པ་འདེབས་པ་དང ། རང་སངས་རྒྱས་ཀྱི་ཐེག་པ་སྒྲུབ་པར་བསྐུལ་བ་དང ། བླ་ན་མེད་པའི་ལམ་ཡང་དག་པ་ལ་སྐྱོ་ཞིང་སྤོང་བར་བྱེད་པ་དང ། ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། སྤྱོད་ལམ་ཉམས་པ་དང ། ལམ་མ་ཡིན་པ་སྤྱོད་པ་ 413a ༄#། །དང ། བདག་ཡོད་པར་སྨྲ་བ་དང ། སེམས་ཅན་ཡོད་པར་སྨྲ་བ་དང ། སྲོག་ཡོད་པར་སྨྲ་བ་དང ། གང་ཟག་ཡོད་པར་སྨྲ་བ་དང ། བསམ་པ་ཤིན་ཏུ་དམན་ཞིང་འདོད་ཆགས་དང ། ཞེ་སྡང་དང ། གཏི་མུག་སྐྱེད་པར་བྱེད་པ་དང ། ཆད་པར་ལྟ་བ་དང ། རྟག་པར་ལྟ་བ་དང ། སྟོང་ཞིང་རྒྱུ་མེད་པར་ལྟ་བ་དང ། ཡོད་པ་མི་མཐོང་བ་དང ། མེད་པ་མི་མཐོང་བ་དང ། ལས་མི་མཐོང་བ་དང ། བརྩོན་འགྲུས་མི་མཐོང་བ་དང ། ལས་མི་ཤེས་པ་དང ། ལས་ཀྱི་རྒྱུ་མི་ཤེས་པ་དང ། རྣམ་པར་སྨིན་པ་མི་ཤེས་པ་དང ། རྣམ་པར་སྨིན་པའི་རྒྱུ་མི་ཤེས་པ་དང ། དབང་པོ་རྣམས་མི་ཤེས་པ་དང ། དབང་པོ་རྣམས་ཀྱི་རྒྱུ་མི་ཤེས་པ་དང ། ཁམས་མི་ཤེས་པ་དང ། ཁམས་ཀྱི་རྒྱུ་མི་ཤེས་པ་དང ། རྣམ་པར་གྲོལ་བ་མི་ཤེས་པ་དང ། རྣམ་པར་གྲོལ་བའི་རྒྱུ་མི་ཤེས་པ་དང ། ལམ་མི་ཤེས་པ་དང ། ལམ་གྱི་རྒྱུ་མི་ཤེས་པ་དང ། ཉོན་མོངས་པ་མི་ཤེས་པ་དང ། ཉོན་མོངས་པའི་རྒྱུ་མི་ཤེས་པ་དང ། གཏོང་བ་མི་ཤེས་པ་དང ། གཏོང་བའི་རྒྱུ་མི་ཤེས་པ་དང ། སྔོན་གྱི་མཐའ་དང་ཕྱི་མའི་མཐའ་མི་ཤེས་པ་དང ། སྔོན་གྱི་མཐའ་དང་ཕྱི་མཐའི་རྒྱུ་མི་ཤེས་པ་དང ། སྐྱེ་ཤི་མི་ཤེས་པ་དང ། སྐྱེ་ཤིའི་རྒྱུ་མི་ཤེས་པ་དང ། ཟག་པ་དང་བཅས་པ་མི་ཤེས་པ་དང ། ཟག་པ་དང་བཅས་པའི་རྒྱུ་ 413b མི་ཤེས་པ་དང ། ཟད་པ་དང་ཟད་པ་མ་ཡིན་པ་མི་ཤེས་པ་དང ། ཡོད་པ་དང་ཡོད་པ་མ་ཡིན་པ་མི་ཤེས་པ་དང ། མཐའ་དང་མཐའ་མ་ཡིན་པ་མི་ཤེས་པ་དང ། དབེན་པ་དང་དབེན་པ་མ་ཡིན་པ་མི་ཤེས་པ་དང ། འཇུག་པ་དང་འཇུག་པ་མ་ཡིན་པ་མི་ཤེས་པ་དང ། ངོ་བོ་ཉིད་དང་ངོ་བོ་ཉིད་མ་ཡིན་པ་མི་ཤེས་པ་དང ། སྐྱེ་བ་དང་སྐྱེ་བ་མ་ཡིན་པ་མི་ཤེས་པ་དང ། འགག་པ་དང་འགག་པ་མ་ཡིན་པ་མི་ཤེས་པ་གང་ཡིན་པ་སྟེ། གཞོན་ནུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གོང་དུ་ཇི་སྐད་བསྟན་པའི་གཟུངས་མངོན་པར་སྒྲུབ་པར་འདོད་པས་ཆོས་མ་ཡིན་པ་སྤྱོད་པའི་གང་ཟག་བརྒྱད་ཅུ་པོ་འདི་དག་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གང་ཞིག་མིག་གི་སྐྱེ་མཐའ་དང ། །ཟད་མཐའ་དག་ནི་མི་རྟོགས་པ། །དེ་ནི་ཀུན་འཛིན་ལ་རྨོངས་པས། །མཁས་པས་ཡོངས་སུ་སྤང་བར་བྱ། །གང་ཞིག་མིག་ལ་བདག་མེད་དང ། །སེམས་ཅན་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་སྐྱེ་ཟད་དང་།། ཡི་གེ་སྤངས་པ་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་དབེན་པ་དང ། །གནས་པ་མེད་པར་རྟོགས་ 414a ༄#། །གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་གི་རང་བཞིན་ཉིད། །གནས་པ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་རབ་ཏུ་བསྟེན་པར་བྱ། །གང་ཞིག་མིག་ལ་འཇུག་མེད་དང ། །གཟུགས་ཀྱི་མཚན་ཉིད་མི་རྟོགས་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ལ་སྐྱེ་མེད་དང ། །རང་བཞིན་ཞི་བར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་རང་བཞིན་གྱིས། །མིག་གི་མཚན་ཉིད་སྤངས་པས་ན། །སངས་རྒྱས་རྣམས་ཀྱིས་བསྔགས་པ་དང ། །བསྟན་དུ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་རང་བཞིན་གྱིས། །མིག་གི་མཚན་ཉིད་སྤངས་པས་ན། །སུ་ཡང་སེམས་ཤིང་འཛིན་པ་དང ། །བཤད་དུ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །དེ་བཞིན་གཟུངས་ཀྱི་ངོ་བོ་ཉིད། །ཡི་གེས་བརྗོད་བྱ་མ་ཡིན་པས། །ཕྱོགས་ཀྱང་ཡོད་པ་མ་ཡིན་ལ། །སེམས་ཀྱིས་ཀྱང་ནི་ཕྱིན་མི་འགྱུར། །ཆོས་དེ་ལ་ནི་ 414b དགའ་བ་མེད། །ཞེ་སྡང་ལ་ཡང་གནས་པ་མིན། །རི་རྒྱལ་བཞིན་དུ་མི་གཡོ་བས། །རྗོད་པར་བྱེད་ཀྱང་དམིགས་སུ་མེད། །ཀུན་འཛིན་ཡང་དག་ཡོད་མ་ཡིན། །བདག་ཀྱང་ཡོད་པ་མ་ཡིན་ཏེ། །གལ་ཏེ་བདག་ནི་རང་བཞིན་སྟོང ། །ཀུན་འཛིན་ཡང་ནི་ཡོད་མི་འགྱུར། །ཀུན་འཛིན་རང་བཞིན་སྟོང་ཡིན་ན། །བྱིས་པས་ཡོད་པར་རབ་ཏུ་བརྟགས། །ཡང་དག་མ་ཡིན་བརྟགས་པས་ན། །མ་ཐོས་པར་ཡང་མྱ་ངན་བསྐྱེད། །གང་ཞིག་འདོད་དང་ཀུན་འཛིན་དང ། །སྟོང་པ་ཉིད་དུ་རྣམ་རྟོག་པ། །རྟོག་པ་གཉིས་པོ་དེ་དག་ཀྱང ། །མཐར་ནི་གང་ཡང་དམིགས་མི་འགྱུར། །གལ་ཏེ་སྟོང་ཉིད་སྟོང་རྟོགས་ན། །ཀུན་འཛིན་དག་ཀྱང་ཡོད་མི་འགྱུར། །བྱང་ཆུབ་ཡན་ལག་བར་དག་དང ། །ཏིང་འཛིན་དག་ཀྱང་སྟོང་པ་ཡིན། །གང་ཞིག་ཀུན་འཛིན་སྟོང་ཉིད་དང ། །ཏིང་འཛིན་དག་གི་བར་དག་དང ། །རབ་ཏུ་རྟོགས་པར་གྱུར་ན་ནི། །མིག་ཀྱང་རབ་ཏུ་རྟོགས་པར་འགྱུར། །གང་ཞིག་མིག་ནི་ཟད་པའི་མཐའ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་སྐྱེ་བའི་མཐའ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་མཐའ་ཡི་རྣམས། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་ 415a ༄#། །གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་རབ་དབེན་པ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འཇུག་པ་དག་།ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་ཡོད་མིན་པ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། ། གང་ཞིག་མིག་ནི་ཉེར་ཞི་བ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་འགྱུར་བ་ཡི། །ཟད་མཐའ་ཡང་དག་བཞིན་རྟོགས་པ། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིང་མིག་གི་འགྱུར་བ་ཡི། །སྐྱེ་མཐའ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །མཐའ་ནི་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །རབ་དབེན་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་ 415b པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །འཇུག་པ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །མེད་པ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་དག་།སྐྱེ་མེད་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །ཉེར་ཞི་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་སྔོན་མཐའ་འམ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཟད་མཐའ་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། ། གང་ཞིག་མིག་གི་སྐྱེ་མཐའ་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་མཐའ་དག་ལ། ། 416a ༄#། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཉེར་ཞི་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་འཇུག་པ་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་མེད་པ་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་སྐྱེ་མེད་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཉེར་ཞི་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །འདོད་སྡང་གཏི་མུག་ང་རྒྱལ་ཆེ། །ཕྲག་དོག་གཡོ་སྒྱུ་སེར་སྣ་དང ། །ཉེས་དམིགས་དྲི་མ་ཟུག་རྔུ་དང ། །ཆུ་བོ་དཀར་ནག་ལས་རྣམས་དང ། །སྐྱེ་བ་མེད་དང་འགོག་མེད་དང ། །འགྲོ་བ་མེད་དང་འོང་མེད་དང ། །མི་གཡོ་ཐ་དད་མི་འགྱུར་དང ། །བྱས་མིན་སྤྱོད་པ་མ་ཡིན་ 416b དང ། །སྣང་མིན་མུན་པ་མ་ཡིན་དང ། །འཇུག་མིན་ཆུ་བོ་སྤངས་པ་དང ། །ཟག་པ་མེད་དང་གནས་མེད་དང ། །འགྲོ་མིན་མི་འགྲོ་མ་ཡིན་དང ། །ཡི་གེ་མ་ཡིན་དམིགས་མིན་དང ། །འབྱུང་བ་མ་ཡིན་འཇུག་མིན་དང ། །ཡང་དག་མ་ཡིན་རྣམ་རྟོག་སོགས། །སྒོ་ནི་དྲུག་ཅུ་རྩ་གཉིས་རྣམས། །སོ་སོའི་དོན་དང་ཅི་རིགས་པར། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་སྔོན་མཐའ་ཡི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཟད་མཐའ་ཡི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིས་མིག་གི་སྐྱེ་མཐའ་ཡི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་མཐའ་དག་གི་།རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་རབ་དབེན་པའི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་འཇུག་པ་ཡི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་ནི་མེད་པ་ཡི། །རབ་དང་ཐ་མའི་རབ་ཤེས་ 417a ༄#། །ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་ནི་མི་སྐྱེ་བའི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་ནི་ཉེར་ཞི་བའི། །རབ་དང་ཐ་མའི་བར་ཤེས་ཤིང ། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །ས་ལ་འགྱུར་བ་མེད་པ་དང ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ནི་མི་སྐྱེ་འདུ་ཤེས་ཤིང ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ནི་འགག་མེད་འདུ་ཤེས་ཤིང ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ལ་འཇུག་པར་འདུ་ཤེས་ཤིང ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ལ་ངེས་འབྱུང་འདུ་ཤེས་ཤིང ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད།། 417b ས་ལ་སྨོན་མེད་འདུ་ཤེས་ཤིང ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ལ་གནས་མེད་འདུ་ཤེས་ཤིང ། །འགྲོ་བ་མེད་དང་འོང་མེད་དང ། །མཐའ་མེད་དང་ནི་ཟད་མེད་དང ། །མཚུངས་པར་ལྡན་དང་མཚུངས་མི་ལྡན། །མིང་དང་ཡི་གེ་བརྟགས་བྲལ་དང ། །སོ་སོར་བརྟགས་དང་འཇུག་པ་དང་།། གཉེན་པོ་མི་མཐུན་ཕྱོགས་མེད་དང ། །བརྗོད་དུ་མེད་ཅིང་བསྟན་མེད་དང ། །རབ་དབེན་གནས་པ་མེད་པ་དང ། །དྲན་པ་ཉེར་གཞག་ཡང་དག་སྤོང ། །རྫུ་འཕྲུལ་རྐང་དང་དབང་པོ་སྟོབས། ། བྱང་ཆུབ་ཡན་ལག་མི་འཇིགས་ལམ། །དེ་ལྟར་ས་ཡི་ཆོས་རྣམས་ལ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་འཇུག་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་འབྱུང་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་མཚན་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་སྨོན་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་ 418a ༄#། །རྫོགས་པར་བྱེད། །གལ་ཏེ་བདག་ལ་གནས་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་སྐྱེ་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་འགག་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་ཡིག་མེད་པས། །ལེན་དང་རྣམ་རྟོག་མེད་པར་ནི།། དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ནི་ཡིག་བྲལ་བས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ།། ཀུན་འཛིན་སྒོ་ནི་རྫོགས་པར་བྱེད། །མིག་གི་སྔོན་དང་ཕྱི་མཐའ་དང ། །རྟག་ཆད་དག་ནི་སྤངས་པ་དང ། །རྒྱུ་རྐྱེན་རང་བཞིན་སྟོང་པར་ནི། །འདྲེན་པས་ཐབས་ཀྱིས་བསྟན་རིག་བྱོས།། གལ་ཏེ་ཆོས་ནི་སྟོན་པའི་ཚེ། །མིག་གི་མཚན་ཉིད་རྟོགས་བྱེད་ན། །དེ་ནི་མི་བདེན་རྟོགས་ཡིན་པས། །ཡང་དག་ཆོས་བསྟན་ཞེས་མི་བྱ། །གལ་ཏེ་ཆོས་ནི་སེམས་པའི་ཚེ། ། མིག་གི་མཚན་ཉིད་རྟོགས་བྱེད་ན། །དེ་ནི་མི་བདེན་རྟོགས་ཡིན་པས། །ཆོས་སེམས་པ་ཞེས་མི་བྱའོ། །གལ་ཏེ་ཆོས་ནི་སྒོམ་པའི་ཚེ། །མིག་གི་མཚན་ཉིད་རྟོགས་བྱེད་ན། །དེ་ནི་ 418b མི་བདེན་རྟོགས་ཡིན་པས། །ཆོས་སྒོམ་པ་ཞེས་མི་བྱའོ། །གང་ཞིག་མིག་གི་སྟོང་ཉིད་རྟོགས། །བྱང་ཆུབ་གཞོལ་བར་མི་བྱེད་ན། །སངས་རྒྱས་གང་ཟག་དེ་དག་ལ། །རྟག་ཏུ་མངོན་སུམ་ཆོས་སྟོན་མཛད། །གལ་ཏེ་མིག་ནི་མ་རྟོགས་ན། །གཟུགས་ཀྱང་རྟོགས་པར་མི་འགྱུར་ལ། །གལ་ཏེ་མིག་ནི་རྟོགས་གྱུར་ན། །གཟུགས་ཀྱང་རབ་ཏུ་རྟོགས་པར་འགྱུར། །གལ་ཏེ་མིག་ནི་རྟོགས་གྱུར་ན། །གཟུགས་ཀྱང་རབ་ཏུ་རྟོགས་འགྱུར་ལ། །གལ་ཏེ་གཟུགས་ནི་རྟོགས་གྱུར་ན། །མིག་ཀྱང་རབ་ཏུ་རྟོགས་པར་འགྱུར། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །གལ་ཏེ་ཆོས་ནི་སྟོན་པའི་ཚེ། །རྒྱུ་ཡི་མཚན་ཉིད་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །འབྲས་བུའི་མཚན་ཉིད་རྟོག་བྱེད་ན། །དེ་ནི་མི་བདེན་རྟོགས་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །ལམ་གྱི་མཚན་ཉིད་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །སྟོང་པའི་མཚན་ཉིད་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །བསགས་པ་དག་ཏུ་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་ 419a ༄#། །སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །རྫས་ཀྱི་དངོས་པོར་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །མིག་གི་འཛིན་པར་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །མིག་ནི་ཤེས་པར་མ་གྱུར་ན། །འདོད་ཆགས་དག་ནི་སྐྱེ་བར་འགྱུར། །གལ་ཏེ་མིག་ནི་ཤེས་གྱུར་ན། །འདོད་ཆགས་དག་ནི་སྐྱེ་མི་འགྱུར། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །གལ་ཏེ་ཆོས་ནི་སྟོན་པའི་ཚེ། །ཁམས་ནི་སྣ་ཚོགས་རྟོག་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། ། ཡི་དམ་དག་ནི་མི་ཉམས་ཤིང ། །ངོ་བོ་ཉིད་སྟོང་རྟོག་པ་དང ། །ཏིང་འཛིན་སྒོ་རྣམས་ཐོབ་གྱུར་པ། །དེ་ནི་ཆོས་ལེགས་སྟོན་པར་འགྱུར། །ཡི་དམ་དག་ནི་མི་ཉམས་ཤིང ། །མིག་ལ་རྟོག་པ་སྤངས་པ་ནི། །རྣམ་རྟོག་མེད་པར་གྱུར་པའི་ཕྱིར། །དེས་ནི་ཆོས་ལེགས་སྟོན་པར་འགྱུར། །མིག་ཉིད་སྟོང་པར་མ་ཤེས་ན། །མིག་གི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། །མིག་གི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེ་ནི་ཆོས་ 419b རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །མིག་གི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེ་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན།། ཚིག་གི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེས་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །ཡི་གེའི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། །ཡི་གེའི་རང་བཞིན་ཤེས་པར་འགྱུར། །དེ་ལྟར་རབ་ཏུ་ཤེས་པའི་ཕྱིར། །དེ་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །མིག་གི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། ། མིག་གི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེས་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །གཟུགས་ཀྱི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། །གཟུགས་ཀྱི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེ་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །འཇིག་རྟེན་མཚན་གནས་རྟོགས་བྱེད་པས། །རྗེས་སུ་མཐུན་པ་ཁོ་ནར་ནི། །སེམས་ཅན་རྣམས་ནི་གདུལ་མི་ནུས། །མིག་གི་ཡོད་ 420a ༄#། །མེད་མ་རྟོགས་པར། །འཁོར་གྱི་ནང་དུ་ཆོས་སྟོན་པ། །དེ་ནི་རྙེད་ལ་གདུ་བས་ན། །ཐམས་ཅད་ཡིད་ཆེས་ལེན་མི་བྱེད། །མིག་གི་ཡོད་མེད་རྟོགས་གྱུར་ན། ། འཁོར་གྱི་ནང་དུ་ཆོས་སྟོན་པས། །དེས་ནི་མངོན་ཞེན་མེད་པས་ན། །ཐམས་ཅད་ཡིད་ཆེས་ལེན་པར་བྱེད། །མིག་ནི་སྟོང་པར་མ་རྟོགས་པར། །ཆོས་ཀྱི་སྟན་ལ་འདུག་ནས་ནི། །དཔེ་མང་དག་གིས་རབ་བསྟན་ཀྱང ། །ཐམས་ཅད་ཡིད་ཆེས་ལེན་མི་བྱེད། །གལ་ཏེ་མིག་ཉིད་སྟོང་ཤེས་ན། །ཆོས་ཀྱི་སྟན་ལ་འདུག་ནས་ནི། །དཔེ་རྣམས་ཀྱིས་ནི་སྟོན་བྱེད་ན། །ཐམས་ཅད་ཡིད་ཆེས་ལེན་པར་བྱེད། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཟླ་འོད་གཞོན་ནུར་གྱུར་པ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་འཁོར་འདུས་པ་ཆེན་པོ་ཐམས་ཅད་ཡི་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོ་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། །འོད་ཟེར་ཀུན་ཏུ་བསྐྱེ་བའི་ལེའུ་སྟེ། བཅུ་གཅིག་པ་རྫོགས་སོ།། |