rKTs


H454

(e-text produced by ACIP)

see text in transliteration
135b
།།རྒྱ་གར་སྐད་དུ། ཤྲཱི་བ་ར་མཱ་ངྱ་མནྟྲ་ཀལྤ་ཁཎྜ་ནཱ་མ། བོད་སྐད་དུ། དཔལ་མཆོག་དང་པོའི་སྔགས་ཀྱི་རྟོག་པའི་དུམ་བུ་ཞེས་བྱ་བ། བཅོམ་ལྡན་འདས་བདེ་བ་ཆེན་པོ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་གསང་བའི་ཆོས་ཉིད་བརྙེས་པ།
136a
༄#། །ཆོས་ཐམས་ཅད་སྤྲོས་པ་མེད་པས་ཡང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ། རྡོ་རྗེ་ཆོས་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དཔལ་མཆོག་དང་པོ་ཐོག་མ་དང་ཐ་མ་དང་དབུས་མེད་པའི་དམ་པ་འདི་གསུངས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་འདོད་ཆགས་ཆེན་པོའི་དངོས་གྲུབ་དམ་པ་ནི་བདེ་བ་ཆེན་པོའི་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་བདེ་བ་ཆེན་པོའི་དངོས་གྲུབ་དམ་པ་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་དངོས་གྲུབ་དམ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་དངོས་གྲུབ་དམ་པ་ནི་བདུད་ཆེན་པོའི་སྟོབས་ཐམས་ཅད་རབ་ཏུ་འཇོམས་པར་བྱེད་པའི་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བདུད་ཆེན་པོའི་སྟོབས་རབ་ཏུ་འཇོམས་པའི་དངོས་གྲུབ་དམ་པ་ནི། ཁམས་གསུམ་ཐམས་ཅད་ཀྱི་དབང་ཕྱུག་ཆེན་པོའི་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཁམས་གསུམ་པ་ཐམས་ཅད་ཀྱི་དབང་ཕྱུག་གི་དངོས་གྲུབ་དམ་པ་ནི་སེམས་ཅན་གྱི་ཁམས་མ་ལུས་ཤིང་ལུས་པ་མེད་པར་ཡོངས་སུ་སྦྱོང་བར་འདོད་པའི་རྒྱུའི་ཕྱིར། འཁོར་བ་ལ་ཡང་མ་
136b
ཆགས་ཤིང ། བརྩོན་འགྲུས་ཆེན་པོའི་བྱང་ཆུབ་སེམས་དཔའ་རྣམས་ཀྱིས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པར་ཡོངས་སུ་བསྐྱབ་པ་དང ། སེམས་ཅན་ཐམས་ཅད་ལ་ཕན་པ་དང ། བདེ་བའི་མཆོག་ཤིན་ཏུ་བདེ་བ་ཆེན་པོའི་དངོས་གྲུབ་དམ་པར་འགྱུར་རོ། །དེ་ཅིའི་ཕྱིར་ཞེ་ན། ཅི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །ཇི་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་ཐབས་དང ། །ཡེ་ཤེས་གནས་སུ་བསྒྲུབས་པས་ནི། ། ཆོས་ཀུན་རྣམ་པར་དག་པའི་ཕྱིར། །འཁོར་བ་ཡོངས་སུ་དག་པར་འགྱུར། །ཆགས་ལ་སོགས་པས་འདུལ་ན་ནི། །འཁོར་བའི་བར་དུ་རྟག་པར་ཡང ། །འཇིག་རྟེན་སྡིག་བྱེད་དེ་སྦྱང་ཕྱིར། །འཁོར་བ་སྲིད་དུ་བདག་ཉིད་འདུལ། །ཅི་ལྟར་པདྨ་རབ་དམར་བ། །འདམ་གྱི་ཉེས་པས་མི་གོས་པ། །དེ་བཞིན་གནས་ཀྱི་ཉེས་པ་ཡིས། །འགྲོ་ཕན་རྣམས་ལ་མི་གོས་སོ། །འདོད་ཆགས་ཆེན་པོ་རྣམ་པར་དག་།བདེ་བ་ཆེན་པོ་ནོར་ཆེ་བ། །ཁམས་གསུམ་དབང་ཕྱུག་ཐོབ་པས་ན། །སེམས་ཅན་དོན་རྣམས་སྟོན་པར་བྱེད། ། གང་ལ་ལ་ཞིག་ནང་པར་ལངས་ནས་དཔལ་མཆོག་དང་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་འདི་ཉིན་རེ་ཞིང་འདོན་པ་དང ། ཉན་པ་དང །
137a
༄#། །འཛིན་པ་དང ། ཀློག་པ་དང ། སྒོམ་པ་དེ་ཡིས་བདེ་བ་དང ། ཡིད་བདེ་བ་ཐམས་ཅད་ཀྱང་ཐོབ་པར་འགྱུར་རོ། །བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་དངོས་གྲུབ་ཀྱི་མཆོག་ཀྱང་ཚེ་འདི་ལ་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བ་མཆོག་ཀྱང་འགྲུབ་སྟེ། རྡོ་རྗེ་འཛིན་པ་ཆེན་པོ་ཐམས་ཅད་དམ། དེ་བཞིན་གཤེགས་པར་འགྱུར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་དཔལ་མཆོག་དང་པོ་ལས། དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོ་རྡོ་རྗེ་གསང་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔའ་བྱིན་གྱིས་བརླབས་པའི་རྡོ་རྗེ་གསང་བ་མཆོག་གི་དངོས་གྲུབ་ཀྱི་ཆོ་ག་རྒྱས་པའི་རྒྱལ་པོ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་གསང་བའི་དོན་ཡོད་ཅིང་བསྟན་པའི་ཆོ་ག་ཕྱག་རྒྱས་བཏབ་པའི་སྐུ་གསུང་ཐུགས་ཐམས་ཅད་ཀྱི་རྡོ་རྗེ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་ཐམས་ཅད་ལ་རབ་ཏུ་ཞུགས་ནས་ཆོས་ཉིད་རྟོགས་པའི་ཡེ་ཤེས་ལ་རབ་ཏུ་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་པའི་
137b
ཕྲིན་ལས་ཀྱིས་དུས་གསུམ་དུ་འཇིག་རྟེན་གྱི་ཁམས་མ་ལུས་པར་སྤྲོས་པ་ལས་ཀྱི་མཐའ་ཅན་དེ་བཞིན་གཤེགས་པ་རྣམ་པར་སྣང་མཛད་ཆེན་པོ། ཟླ་བ་ཕྱེད་པ་དུ་མ་ལ་རབ་ཏུ་གནས་པའི་རྡོ་རྗེ་རིན་པོ་ཆེ་རྣམས་ཀྱི་འོད་ཟེར་སྣ་ཚོགས་པ་རྣམ་པར་འབར་བའི་འོད་ཀྱིས་གསལ་བ། གསེར་གྱི་དྲིལ་བུ་བཏགས་པ་དང ། སྣ་ཚོགས་པའི་བ་དན་རླུང་གིས་བསྐྱོད་པ་རྣམས་ཀྱིས་ཉེ་བར་མཛེས་པར་བྱས་པ། མེ་ཏོག་གི་ཕྲེང་བ་སྣ་ཚོགས་པ་དང ། ན་བཟའ་དང ། མེ་ལོང་དང ། མུ་ཏིག་གི་ཕྲེང་བ་རབ་ཏུ་འཕྱང་བས་མཛེས་ཤིང་བརྒྱན་པ། སྣ་ཚོགས་པའི་ཁ་ཁྱེར་ལ་གནས་པ་མཆོག་ཏུ་གྱུར་པའི་ལྷའི་བུ་མོ་དགོད་པ་དང ། སྒེག་པ་དང ། གར་དང ། གླུ་ཡིས་རབ་ཏུ་བརྒྱན་པ་དང ། བསྟོད་པས་སད་པར་བྱེད་པ། བདེ་བ་ཆེན་པོ་རྡོ་རྗེ་སེམས་དཔའི་གནས་གཞལ་ཡས་ཁང་པ་ལ་བཞུགས་སོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་རྡོ་རྗེས་བྱིན་གྱིས་བརླབས་པའི་དམ་ཚིག་སེམས་དཔའ་ཐམས་ཅད་དང ། དབང་བསྐུར་བ་ཐམས་ཅད་དང ། ཐམས་ཅད་མཁྱེན་པའི་ཏིང་ངེ་འཛིན་ལས་ཐམས་ཅད་མཆོག་ཏུ་གྱུར་པ། ཁམས་གསུམ་ཐམས་ཅད་འདུལ་བར་མཛད་པ། ཐམས་ཅད་དབང་དུ་བྱེད་པ་པོ། འཛིན་པ་པོ། འདོད་པ་ཐམས་ཅད་
138a
༄#། །པ། རྒྱ་ཆེ་བའི་དངོས་གྲུབ་ཀྱི་ཆོ་ག་ཐམས་ཅད་བརྟག་པའི་དེ་བཞིན་གཤེགས་པ་ལ་གསོལ་བ་བཏབ་པ། ཅི་སྲིད་སྲིད་པའི་བར་གནས་པ། །དེ་སྲིད་སེམས་ཅན་དོན་མཆོག་མཛོད། །སེམས་ཅན་ཁམས་ནི་མཐའ་ཡས་དང ། །རྒྱལ་སྲས་སྲིད་པར་འདོད་པའི་ཕྱིར། །སྲིད་པའི་སྐྱོན་རྣམས་འཇོམས་ཕྱིར་དང ། །བདེ་བ་ཆེན་པོ་འཕེལ་བྱའི་ཕྱིར། །གསང་བའི་རྟོག་པ་མཆོག་གསུང་བའི། །རྗེས་སུ་གནང་བར་བདག་ལ་སྩོལ། །དེ་ནས་བཅོམ་ལྡན་འདས་དེ་བཞིན་གཤེགས་པས་ཆོས་ཐམས་ཅད་སྒྲིབ་པ་མེད་པ་ཉིད་ལ་ལྷག་པར་དགོངས་ནས། གདུལ་བྱ་ཐམས་ཅད་ཐུགས་རྗེ་ཆེན་པོའི་སྣ་ཚོགས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། མ་ལུས་ཤིང་ལུས་པ་མེད་པའི་སེམས་ཅན་གྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང ། ཐམས་ཅད་ཡོངས་སུ་བསྐྱང་བ་དང ། ཕན་པ་དང ། བདེ་བ་དང ། དངོས་གྲུབ་ཐམས་ཅད་ཕུན་སུམ་ཚོགས་པ་དང ། ཡེ་ཤེས་དང ། ལས་དང ། མཆོག་གི་དངོས་གྲུབ་ཀྱི་རྒྱུར་འགྱུར་བའི་བར་དུ་དེ་བཞིན་གཤེགས་པ་ཐམས་ཅད་ཉིད་དང ། རྡོ་རྗེ་འཆང་ཆེན་པོ་ཐོབ་པ་མཆོག་གི་དངོས་གྲུབ་ཀྱི་དོན་བདེ་བ་ཆེན་པོའི་རྡོ་རྗེ་དང་པོ་དེ། དེ་བཞིན་གཤེགས་པ་
138b
ཐམས་ཅད་ཀྱི་འཁོར་ལོས་བསྒྱུར་བ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་སྐུའི་ཕྲེང་བའི་ཅོད་པན་གྱིས་དབང་བསྐུར་བས་དབང་བསྐུར་བ་ཡིན་ནོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་མ་ལུས་ཤིང་ལུས་པ་མེད་པའི་བདེ་བ་ཆེན་པོ་མཆོག་གི་དངོས་གྲུབ་ལ་སོགས་པ་དངོས་གྲུབ་པ་ཐམས་ཅད་ཐོབ་པར་བྱ་བའི་ཕྱིར། སེམས་དཔའི་སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲང་སྟེ། གཡོན་པ་བསྙེམས་པའི་ཚུལ་དུ་མཛད་ནས་གཡས་པ་རྡོ་རྗེ་གསོར་བས་རང་གི་ཐུགས་ཀར་དང་པོའི་རྡོ་རྗེ་མཆོག་གི་སྦྱོར་བ་འཛིན་ཅིང་བདེ་བ་ཆེན་པོའི་རྡོ་རྗེ་ཞེས་བྱ་བ་ཐམས་ཅད་ཀྱི་ཕྱག་རྒྱ་འདི་ཉིད་ཀྱི་སྐུ་དང ། གསུང་དང ། ཐུགས་ལས་འབྱུང་ངོ ། །ོཾ་མ་ཧཱ་སུ་ཁ་བཛྲ་ས་ཏྭ་ཛཿ ་ཧཱུཾ་བཾ་ཧོཿ ་སུ་ར་ཏ་སྟཾ། དེ་ནས་ཕྱུང་བ་ཙམ་གྱིས་དེ་བཞིན་གཤེགས་པ་ཐམས་ཅད་བྱོན་ནས་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་བཟུང་བ་རྣམས་སླར་ཡང་བྱང་ཆུབ་ཆེན་པོ་མངོན་པར་རྟོགས་ནས་དེ་རྣམས་ཀྱིས་བཞད་པ་ཆེན་པོ་མངོན་པར་མཛད་དོ། །འཇིག་རྟེན་གྱི་ཁམས་ཐམས་ཅད་གཡོས་པ་དང ། ཤིན་ཏུ་གཡོས་པས་ཡོངས་སུ་དག་པར་གྱུར་ཏོ། །ཁམས་གསུམ་རྒྱས་པར་སྤྲོས་པ་ཐམས་ཅད་ཀྱང་བཅོམ་ལྡན་འདས་ཀྱི་དཀྱིལ་འཁོར་ཆེན་པོར་འགྱུར་ཏོ། །གང་གི་སེམས་ཅན་ཐམས་ཅད་བདེ་བ་དང ། ཡིད་
139a
༄#། །བདེ་བ་ཐོབ་པར་གྱུར་ཏོ། །དེ་ནས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱི་དོན་ཡོད་ཅིང ། ཐོགས་པ་མེད་པ་ལས་མངོན་པར་བྱུང་བ་རྡོ་རྗེ་ཆེན་པོ་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བདེ་བ་ཆེན་པོ་རྡོ་རྗེའི་དམ་ཚིག་ཅེས་བྱ་བ་རྣམ་པར་གནོན་པར་མཛད་ནས། དེའི་སྐུ་ཐམས་ཅད་ལས་དངོས་གྲུབ་ཐམས་ཅད་དང ། བདེ་བ་དང ། ཡིད་བདེ་བ་སྟེར་བ། རྟག་ཏུ་རྗེས་སུ་འབྲེལ་བ་ཅན། ལྷན་ཅིག་ཏུ་སྤྱོད་པ། བདེ་བ་ཆེན་པོ་རྡོ་རྗེའི་དམ་ཚིག་གི་སེམས་དཔའ་རྣམས་ཕྱུང་ནས་ཕྱོགས་ཐམས་ཅད་དུ་ཕྱུང་སྟེ། མདུན་དུ་རྡོ་རྗེ་གསང་བ་ཡིད་ལས་བྱུང་བ། གཡས་སུ་རྡོ་རྗེ་ཀི་ལི་ཀི་ལི། རྒྱབ་ཏུ་འདོད་པའི་རྡོ་རྗེ་གཡོན་དུ་རྡོ་རྗེ་བསྒྱིངས་པའོ། །མཚམས་རྣམས་སུ་མཆོད་པའི་ལྷ་མོ་རྣམས་སོ། །ཕྱི་རོལ་གྱི་ཁ་ཁྱེར་མཚམས་སུ་ལྷའི་བུ་མོ་རྣམས་སོ། །སྒོ་སྲུང་བ་རྣམས་ནི་རྡོ་རྗེ་ལྕགས་ཀྱུ་དང ། ཞགས་པ་དང ། ལྕགས་སྒྲོགས་དང ། དྲིལ་བུ་འཛིན་པའོ། །ཕྱི་རོལ་ཏུ་རྡོ་རྗེ་སྒོ་སྲུང་གི་ཚོགས་དང ། ཕོ་ཉ་དང ། བྲན་རྣམས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་བཅིངས་ཏེ། དེ་བཞིན་གཤེགས་པ་ཐམས་ཅད་བྱང་ཆུབ་རྡོ་རྗེ་ཞེས་བྱ་བའི་
139b
ཏིང་ངེ་འཛིན་ལ་སྙོམས་པར་ཞུགས་ནས། བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་འཆང་ཆེན་པོ་ལ་གསོལ་བ་བཏབ་སྟེ། །སེམས་ཅན་ཀུན་ལ་ཕན་དོན་དུ། །རྒྱལ་བ་ཆེན་པོ་འབྱུང་བ་སྟེ། །ཆགས་བྲལ་དེ་རྣམས་ཆགས་ལྡན་ཡང ། །རང་གི་བཙུན་མོའང་གསོལ་མཛད་པས། །དེ་ཕྱིར་བདག་གིས་ཁྱོད་ལ་གསོལ། །བདེ་བ་ཆེན་པོ་རྡོ་རྗེ་ཆེ། །གསང་བའི་རྟོག་པའི་དངོས་གྲུབ་སྟེ། །འདུལ་བ་མཆོག་ནི་བཤད་དུ་གསོལ། །དེ་ནས་བཅོམ་ལྡན་འདས་དོན་ཡོད་ཅིང་ཐོགས་པ་མེད་པའི་བཀའ་བདེ་བ་ཆེན་པོ་ཐམས་ཅད་ཀྱི་དངོས་གྲུབ་འདུལ་བ་རྡོ་རྗེ་འདོད་པའི་མཆོག་ཅེས་བྱ་བའི་རྣམ་པར་གནོན་པར་མཛད་ནས་རྡོ་རྗེ་ཆེན་པོ་གསང་བའི་དམ་ཚིག་ཅེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །བདེ་བ་ཆེན་པོ་རྡོ་རྗེ་མཆོག་།དམ་ཚིག་དམ་པའི་མིང་ཅན་ཡིན། །དཀྱིལ་འཁོར་གནས་ནི་འདུས་བྱས་ལ། །དེའི་དབུས་ཆོ་ག་བཞིན་དུ་ནི། །ཕྱག་རྒྱ་ཆེན་པོ་མཉམ་གཞག་ནས། །དེར་ནི་དཀྱིལ་འཁོར་བསྒྲུབ་པར་བྱ། །གསར་ཞིང་ལེགས་པར་བསྒྲིལ་བ་དང ། །མདུད་པ་དག་ནི་མེད་པ་ཡི། །ཐིག་སྐུད་དམར་པོས་ཐིག་བཏབ་ནས། །ཚོན་གྱི་ཕྱེ་མས་བྲི་བར་བྱ། །ཟུར་བཞི་པ་ལ་སྒོ་བཞི་པ། །སྒོ་ཁྱུད་བཞིས་ནི་མཛེས་པ་
140a
༄#། །དང ། །ཁ་ཁྱེར་གྱིས་ནི་ཡོངས་སུ་བསྐོར། །མཚམས་སུ་ལྷ་ཡི་བུ་མོས་མཛེས། །དཀྱིལ་འཁོར་གྱི་ནི་མཚམས་རྣམས་དང ། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་ཕྱེད་ལ་གནས་པ་ཡི། །རྡོ་རྗེ་རིན་ཆེན་འོད་ཟེར་འབར། །རླུང་གིས་བསྐྱོད་པའི་དྲིལ་བུ་མཆོག་།བ་དན་སྣ་ཚོགས་མཛེས་པ་ཡིན། །མེ་ལོང་དྲ་བ་མེ་ཏོག་ཕྲེང ། །ལྡན་པའི་ཕྱི་རོལ་དཀྱིལ་འཁོར་བྲི། །དེ་ཡི་ནང་དུ་འཁོར་ལོ་ནི། །དཀྱིལ་འཁོར་བརྒྱད་པ་དང་འདྲ་བ། །རྡོ་རྗེ་ཐིག་གིས་ཡོངས་བསྐོར་བའི། །རྡོ་རྗེ་འཁོར་ལོ་ཡང་དག་བྲི། །དེ་དབུས་ཆོ་ག་བཞིན་དུ་ནི། །རྡོ་རྗེ་དཔའ་དགོད་པར་བྱ། །བླུགས་སམ་ཡང་ན་བྱས་པའམ། །བརྡུངས་སམ་ཡང་ན་བྲིས་པ་ཡིས། ། བཞད་པ་དང་བཅས་ཟླ་བའི་འོད། །འབར་བའི་འོད་ཟེར་དམར་པོས་ཁྱབ། །སངས་རྒྱས་ཕྲེང་བས་རྣམ་པར་མཛེས། །སྐུ་ལ་ཚོན་གྱིས་ཡང་དག་བྱུགས། །སེམས་དཔའི་སྐྱིལ་མོ་ཀྲུང་གིས་བཞུགས། །རྡོ་རྗེ་བསྙེམས་པ་འཛིན་པའི་མཆོག་།ས་མ་ཡ་སྟྭཾ་ཞེས་བརྗོད་ནས། །སྙིང་གར་རྣམ་པར་དགོད་པར་བྱ། །དེ་ཡི་ལོགས་ནི་ཐམས་ཅད་དུ། །སེམས་དཔའ་ཆེན་པོ་རྣམས་བྲི་སྟེ། །ཚོན་ནམ་ཡང་ན་རྡུལ་ཚོན་གྱིས། །གོ་རིམ་ཇི་བཞིན་བྲི་བར་བྱ། །མདུན་དུ་སྐུ་མདོག་དམར་པོ་ནི། །རྡོ་རྗེ་མཚོན་ཆ་ལ་
140b
བརྩོན་པ། །གཡས་སུ་དག་པའི་དཀར་པོ་སྟེ། །ལེགས་པར་འཁྱུད་པའི་རྡོ་རྗེ་ཅན། །རྒྱབ་ཏུ་སྐུ་མདོག་སེར་པོ་སྟེ། །ཆུ་སྲིན་གྱི་ནི་རྒྱལ་མཚན་འཛིན། །གཡོན་དུ་སྐུ་མདོག་སྔོན་པོ་སྟེ། །ཕྱག་གཉིས་བསྙེམས་པ་འཛིན་ལ་སོགས། །མཆོད་པའི་སྣོད་རྣམས་འཛིན་པའོ། །མཆོད་པའི་ལྷ་མོ་བྲི་བར་བྱ། །སྒེག་མོ་བཞད་མ་གླུ་མ་དང ། དཀར་མོ་ལྷ་ཡི་བུ་མོའི་ཚོགས། །རྡོ་རྗེ་ལྕགས་ཀྱུ་ཞགས་པ་དང ། །རྡོ་རྗེ་ལྕགས་སྒྲོག་དྲིལ་བུ་རྣམས། །སྒོ་ནི་བཞི་པོ་རྣམས་ལ་ནི། །སྒོ་སྲུང་བཞི་པོ་དགོང་པར་བྱ། །དེ་ནས་དེ་དག་གི་སྙིང་པོ་རྣམས་ནི་འདི་ཡིན་ཏེ། ཧཱུཾ་བཛྲྀ་དྲཥྚི་སཱ་མ་ཀེ་མ་ཊ། ཧཱུཾ་བཛྲ་ཀི་ལི་ཀི་ལཱ་ཡ་ཧཱུཾ། ཧཱུཾ་སྨ་ར་བཛྲ་བནྡྷ་ཧཱུཾ། ཧཱུཾ་ཏུཥྚ་བཛྲི་ཎི་ཧཱུཾ། རྡོ་རྗེ་བྲན་ནོ། །དེ་ནས་མཆོད་པའི་ལྷ་མོ་རྣམས་ཀྱི་ནི། ཧཱུཾ་མ་དྷུ་ར་བཛྲི་ཧཱུཾ། ཧཱུཾ་བཛྲ་མེ་གྷེ་ཧཱུཾ། ཧཱུཾ་ཤཱ་རད་བཛྲི་ཧཱུཾ། ཧཱུཾ་བཛྲ་ཤི་ཤི་རི་ཧཱུཾ། དེ་ནས་ལྷའི་བུ་མོ་རྣམས་ཀྱི་ནི། ཧཱུཾ་བཛྲ་ལཱ་སྱཻ། མཧཱ་བ་ར་བཛྲི་ཎི། ཨོཾ་བཛྲ་གཱི་ཏྱེ་བཛྲ། ཨོཾ་བཛྲ་ནྲི་ཏྱེ་བཛྲ། དེ་ནས་སྒོ་སྲུང་རྣམས་ཀྱི་ནི། ཛཿ ་བཛྲ་ཨཾ་ཀུ་ཤི་པྲ་ཏི་ཧ་ར། ཧཱུཾ་བཛྲ་པཱ་ཤ་ག་ན། བཾ་བཛྲ་སྥོ་ཊ་དུ་ཧ། ཨཿ ་བཛྲ་གྷནྜ་ཙྪེ་དྲ། །དེ་ལྟར་ལྷ་མོའི་དཀྱིལ་འཁོར་དུ། །བུད་མེད་གྲགས་པ་དེ་ཉིད་དགོད། །བཀོད་ན་དེ་དག་རྣམས་ཀྱིས་ནི། ། བྱིན་གྱིས་བརླབས་པ་ཉིད་དུ་འགྱུར། །དེ་ནས་ཕྱག་ན་རྡོ་རྗེ་འཛིན། །དཀྱིལ་འཁོར་ཀུན་ཏུ་བྲིས་བྱས་ནས། །བུམ་པ་གང་བ་ཇི་སྙེད་དང ། མེ་ཏོ་ལ་སོགས་ཀུན་གྱིས་མཆོད། །
141a
༄#། །དྲིལ་བུ་བཏགས་པའི་བ་དན་རྣམས། །མཚམས་རྣམས་སུ་ནི་གཞག་པར་བྱ། །ལྕུག་མ་དང་བཅས་བུམ་པ་རྣམས། །སྒོ་ཡི་ཕྱི་རོལ་དག་ཏུ་གཞག་།རྡོ་རྗེ་དང་བཅས་གཞི་དང་བཅས། །ལྕུག་མོ་ཡོངས་སུ་བཟླས་ནས་ནི། །དྲི་ཆུས་གང་བའི་བུམ་པ་སྟེ། །ཕྱག་ན་རྡོ་རྗེའི་མདུན་གཞག་བྱ། །དེ་ལ་འདི་ལྟར་བདེ་བ་ཆེན་པོའི་དམ་ཚིག་གི་བདུད་རྩིའི་ཆུ་བྱིན་གྱིས་བརླབ་པའི་སྙིང་པོ་ནི། ཨོཾ་མཧཱ་སུ་ཁ་བཛྲ་ས་མ་ཡ། ཨ་བྷི་ཥེ་ཀ་ཛཿ ་ཧཱུཾ་བཾ་ཧོཿ ། ལན་ཉི་ཤུ་རྩ་གཅིག་བཟླའོ། །ཆུ་འདི་གཏོར་བའམ། འཐུངས་ན་སྡུག་བསྔལ་ཐམས་ཅད་རབ་ཏུ་བྱང་བ་དང ། བདེ་བ་ཐམས་ཅད་རབ་ཏུ་འཕེལ་བར་འགྱུར་བ་ཡིན་ནོ། །དེ་ནས་རང་གི་དམ་ཚིག་རྣམས་ཀྱིས་རྡོ་རྗེ་འཆང་ལ་སོགས་པ་བསྒྲུབ་པར་བྱའོ། །ཛཿ ་ཧཱུཾ་བཾ་ཧོ། ཞེས་བརྗོད་ནས་དགུག་པ་དང ། གཞུག་པ་དང ། བཅིངས་ནས་སྐད་ཅིག་གིས་དབང་དུ་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །དེ་བཞིན་གཡས་སུ་མཛུབ་ལྕགས་ཀྱུས། །དགུག་པ་འདི་ནི་ལན་ཅིག་གིས། །འགྲུབ་སྟེར་རབ་ཏུ་གཞུག་པར་བྱ། །ོཾ་མཧཱ་སུ་ཁ་བཛྲ་སཏྭ། ཨ་ཨ་ཧི་ཤཱི་གྷྲཾ་མཧཱ་སུ་ཁ་བཛྲ་གུ་ཧྱ་ས་མ་ཡ་ནུ་སྨ་ར་ཕྲ་བྷཱུ་ཏ་ས་མ་སྟྭཾ་ཧྲཾ་ད་ཡཾ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྚོ་མེ་བྷ་བ། ཨ་དྷི་ཏིཥྛ་བྷ་ག་བཱཾ་ཨ་ན་ཏི་ནཾ་
141b
ད་ན་སིད་དྷྱཾ་ཏུ་མེ་མན་ཏྲ་པ་དཻཿ ། ཛཿ ་ཧཱུཾ་བཾ་ཧོཿ ། དེ་ནས་རྟག་ཏུ་བཅོམ་ལྡན་འདས། །དཀྱིལ་འཁོར་དུ་ནི་རང་ཉིད་བྱོན། །དགུག་ཅིང་བཅུག་གནས་བརྟན་པ་དང ། །དབང་དུ་འགྱུར་ཞིང་འགྲུབ་པ་ཡིན། རྨད་དུ་བྱུང་བའི་རྫུ་འཕྲུལ་དུ་མ་རྣམས་མཐོང་བའམ། ཡང་ན་བཅོམ་ལྡན་འདས་རང་ཉིད་ཀྱིས་མཐོང་བར་འགྱུར་རོ། །དེ་ནས་རང་ཉིད་རྡོ་རྗེ་འཛིན་ཀུན་གྱི། ། སློབ་དཔོན་ནི་ཕྱག་རྒྱ་ཐམས་ཅད་གྲུབ་པ། དམ་ཚིག་ཐམས་ཅད་ཤེས་པ། ལས་ཐམས་ཅད་ནུས་པ། བཅོམ་ལྡན་འདས་ཀྱིས་བྱིན་གྱིས་བརླབས་པ་ཡིན་ནོ། །འཇུག་པའི་ཆོ་ག་འདི་ཡིས་རྡོ་རྗེ་སློབ་དཔོན་རང་ཉིད་ཅི་སྙེད་པའི་དྲིས་བྱུགས་ཤིང་བསྒོས་པ་རྒྱན་དང་བཅས་པའི་མེ་ཏོག་གི་ཕྲེང་བས་ལུས་ཤིན་ཏུ་བརྒྱན་པ། གོས་དམར་པོ་གཉིས་བསྒོས་པ་རང་ཉིད་ཀྱིས་བཅོམ་ལྡན་འདས་ལ་བསྟོད་ཅིང་རྡོ་རྗེ་དང་བཅས་པའི་རྡོ་རྗེ་བསྙེམས་པས་རང་ཉིད་འཇུག་པར་བྱའོ། །བསྟོད་པ་ནི་དྲུག་ལྡན་ལ་སོགས་པ་གླུ་ཡིས་བྱའོ། །འདོད་ཆགས་ལ་སོགས་བདེ་ཀུན་ཡིད་ཁྱོད་ནི། །ཀུན་འདུས་བདག་ལ་བདེ་བ་སྩོལ་མཛོད་ཅིག་།རྡོ་རྗེ་སེམས་དགོངས་མྱུར་དུ་བདག་སྟོན་མཛོད། །བདག་དགྱེས་མཛད་དང་བདེ་མཆོག་གྲུབ་ལ་འདུད། །དེ་ནས་རབ་ཏུ་ཞུགས་ནས་དགོངས་སུ་གསོལ་བར་བྱ་སྟེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་བདེ་བ་
142a
༄#། །ཆེ། །ཀུན་ཏུ་བཟང་པོ་ཁྱོད་ཡིན་ཏེ། །རྡོ་རྗེ་བསྙེམས་བདག་ཁྱབ་བདག་ཡིན། །སེམས་ཀྱི་སེམས་དཔའི་ཏིང་ངེ་འཛིན། །དེ་བཞིན་རྡོ་རྗེ་རྡོ་རྗེ་འཛིན། ། ཀུན་མཆོག་དམ་ཚིག་དངོས་གྲུབ་ཅན། །རྡོ་རྗེ་སེམས་བདག་དེང་གྲུབ་མཛོད། །དེ་ནས་བཅོམ་ལྡན་དེ་ཉིད་ཀྱིས། །རྡོ་རྗེ་སློབ་དཔོན་བྱིན་བརླབ་འགྱུར། །དེ་སྔར་མ་བྱུང་བའི་སོ་སོར་རང་རིག་པའི་བདེ་བ་གཉིས་ཀ་ལ་སྐྱེ་བར་འགྱུར་རོ། །ཕྲ་མོ་དབབ་པར་འགྱུར་རོ། །དེ་ནས་བདག་ལ་བཅོམ་ལྡན་འདས་གྲུབ་པར་འགྱུར་ཏོ་ཞེས་ཤེས་པར་བྱའོ། །དེ་ནས་དེ་བཞིན་དུ་འདུག་ལ་ཅི་འདོད་པའི་བཟླས་བརྗོད་བྱའོ། །དེ་ནས་དེ་བཞིན་དུ་འདུག་ལ་རང་གི་བསོད་ནམས་ཀྱི་བྱིན་གྱི་རླབས་ཀྱིས་འདོད་པའི་དངོས་གྲུབ་ཐོབ་པར་འགྱུར་རོ། །དེ་ནས་བརྩམས་ཏེ་སེམས་དཔའ་ཆེན་པོ་ཐམས་ཅད་འགྲུབ་པར་འགྱུར་ཞིང་མཐོང་བར་འགྱུར་རོ། །དེ་རྣམས་ཀྱིས་ཀྱང་དེ་ལ་དངོས་གྲུབ་ཐམས་ཅད་སྩོལ་བར་མཛད་དོ། །ཕྱག་རྒྱ་ཐམས་ཅད་ཀྱང་བདག་རང་ཉིད་ཀྱིས་བཅིངས་ན་ལས་ཐམས་ཅད་འགྲུབ་པར་འགྱུར་རོ། །དམ་ཚིག་ཐམས་ཅད་ཀྱང་འདི་ལ་བསྟན་པར་འགྱུར་རོ། ། ཡིད་ཀྱི་འདོད་པའི་ལས་རྣམས་ཀྱང་བྱེད་པ་ཡིན་ནོ། །བདེ་བ་དང ། ཡིད་བདེ་བ་ཐམས་ཅད་ཉམས་སུ་མྱོང་ཞིང་གཞན་གྱིས་མི་ཐུབ་པ་དང ། མི་སོད་པས་ལོ་གཅིག་འདས་
142b
ནས་སངས་རྒྱས་ཉིད་ལ་སོགས་པའི་མཆོག་གི་དངོས་གྲུབ་ཐོབ་པ་ཡིན་ནོ། །དེ་ནས་སེམས་ཅན་ཐམས་ཅད་གཞུག་པའི་དོན་དུ་བརྟག་པར་བྱ་བ་ཡིན་ནོ། །རྡོ་རྗེ་སློབ་དཔོན་རང་ཉིད་སྔ་མ་བཞིན་དུ་ལུས་ལ་བརྒྱན་ནས་རབ་ཏུ་བདེ་བའི་རྡོ་རྗེའི་དམ་ཚིག་གི་ཕྱག་རྒྱ་རབ་ཏུ་བཅུག་སྟེ། དེ་བཞིན་དུ་དེ་ཁོ་ན་ཉིད་ཆེན་པོ་བསྐུལ་བས་ཡང་དག་པར་བསྐུལ་ལ་དགུག་པར་བྱ་ལ་འདི་སྐད་ཅེས་བརྗོད་དོ། །སྲིད་པའི་བདེ་བ་རྣམ་དག་ཕྱིར། །སྔར་གྱི་སྲིད་པ་ལ་ཁྱོད་དགའ། །འདོད་པ་ཀུན་གྱི་དངོས་གྲུབ་ཆེ། །འགྲོ་བ་ཀུན་ལའང་འགྲུབ་པར་གྱིས། །དེ་ནས་མཆོད་པ་བྱས་ལ། རང་གི་ལྷག་པའི་ལྷ་གང་ཡིན་པ་དེའི་དམ་ཚིག་ཕྱག་རྒྱ་མེ་ཏོག་དང་བཅས་པ་གཞུག་པར་བྱ་སྟེ། བཅུག་ནས་རྣ་བར་འདི་སྐད་ཅེས་བརྗོད་པར་བྱ་འོ། །ཆགས་བྲལ་འདུལ་བའི་འཇིག་རྟེན་ནི། །ཆགས་བྲལ་ཉིད་ཀྱིས་འདུལ་བར་འགྱུར། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔའ་སྦས་པ་ཡིན། ། འདོད་ཆགས་བྲལ་བ་ལྟ་བུ་ཡི། །སྡུག་བསྔལ་གཞན་ནི་རང་བཞིན་མེད། །དེ་བས་སེམས་ཅན་ཆགས་བྲལ་ལོ། །སླར་ཡང་ཡིད་ནི་མ་བྱེད་ཅིག་།དེ་ནས་མེ་ཏོག་ལ་སོགས་པ་སྙིང་པོ་འདིས་འདོར་དུ་གཞུག་གོ་།ོཾ་མཧཱ་སུ་ཁ་བཛྲ་སཏྭ་པྲ་ཏི་གྲྀ་ཧྞ་ས་མ་ཡ་སྟྭཾ། དེ་ནས་གང་དུ་བབས་པ་དེ་ནི་དེའི་ལྷ་ཡིན་ནོ། །དེ་ནས་དེ་ཁོ་ན་ཉིད་ཆེན་པོ་བརྗོད་པར་
143a
༄#། །བྱ་འོ། །གང་འདོད་པའི་སྙིང་པོ་བྱིན་ལ་སྒྲུབ་ཏུ་བཅུག་ལ་རང་ཉིད་ལྷག་པའི་ལྷའི་དབང་བསྐུར་བས་དབང་བསྐུར་ནས་དེའི་མཚན་མ་ལག་པ་གཉིས་སུ་བྱིན་ཏེ། དེའི་རིགས་ཀྱི་མིང་གི་དབང་བསྐུར་ལ་སྙིང་པོ་འདིས་དབང་བསྐུར་བར་བྱ་འོ། །ོཾ་སརྦ་ཏ་ཐཱ་ག་ཏ་ཨཱ་ཏྨ་ཀོ་ཉ་ལྷཾ་བྫྲ་དྷ་ར་ས་མུ་ཁེ་བྷ་ཨ་བྷི་ཥེ་ཏྭཾ་ཨ་བྷི་ཥི་ཉྩ་མི་གྲྀ་ཧྞ་སིདྡྷི་བྫྲཾ་ཨ་མོ་གྷ་སི་དྡྷི་སྟྭཾ་།དེ་ནས་ཕྱག་རྒྱ་བཅིངས་པ་བསླབ་པར་བྱའོ། །དེ་ནས་ཅི་འདོད་པའི་མཆོད་པ་བྱས་ཤིང་བྱེད་དུ་བཅུག་ནས་ཅི་འདོད་པ་བཟའ་བ་དང ། བཏུང་བས་སློབ་མ་རྣམས་ཚིམ་པར་བྱས་ལ་ཕྱག་རྒྱ་དང ། ཕྱག་རྒྱའི་ལན་དང ། གར་དང ། དགོད་པ་བྱེད་དུ་བཅུག་ཅིང་རང་ཉིད་ཀྱིས་ཀྱང་བྱ་འོ། །དེ་ནས་ཐམས་ཅད་བསྐྲད་ནས་འདི་སྐད་བརྗོད་པར་བྱའོ། །ཐོག་མཐར་རྒྱུ་བའི་འགྲོ་བ་འདི། །དགའ་བ་མཆོག་ལ་རག་ལུས་ཏེ། །སེམས་དཔའ་ཆེན་པོ་རྡོ་རྗེར་འགྱུར། །སླར་ཡང་གཤེགས་པར་མཛད་དུ་གསོལ། །དེ་ནས་སྙིམ་པའི་མེ་ཏོག་དོར་ནས་དབྱུང་བར་བྱའོ། །དཀྱིལ་འཁོར་ཡང་རང་ཉིད་ཀྱིས་ཕྱགས་ལ་རྡུལ་ཚོན་དེ་དག་གི་རིལ་བུ་བྱས་ལ་བཞག་ན་ལས་ཐམས་ཅད་འགྲུབ་པར་འགྱུར་རོ། །དེ་ནས་བདེ་བ་ཆེན་པོ་རྡོ་རྗེ་དམ་ཚིག་གི་བདུད་རྩིའི་ཚུལ་དེ་ཡང་བཅུག་ན་ཚེ་
143b
འཕེལ་བ་ལ་སོགས་པའི་ལས་ཐམས་ཅད་དགོངས་པ་ཡིན་ནོ། །དེ་ཉིད་ཀྱིས་དབང་བསྐུར་ན་ཡང་དཀྱིལ་འཁོར་དུ་དབང་བསྐུར་བ་ཐོབ་པ་དང ། མཆོག་གི་དངོས་གྲུབ་ཀྱང་ཐོབ་པར་འགྱུར་རོ། །གལ་ཏེ་སྐུ་བྲི་བའི་རི་མོ་མཁན་མ་རྙེད་ན་རང་རང་གི་ཕྱག་མཚན་གྱི་ཕྱག་རྒྱ་རྣམས་ཀྱིས་དཀྱིལ་འཁོར་བྲི་བར་བྱ་འོ། །གལ་ཏེ་དེ་ཡང་མི་ཤེས་ན་ཕྱག་མཚན་གཞག་པར་བྱ་འོ། །ཕྱག་རྒྱའི་ཆོ་ག་རྒྱས་པའོ། །དེ་ནས་བཅོམ་ལྡན་འདས་དོན་ཡོད་པ་ཐོགས་པ་མེད་པ་མྱུར་དུ་འགྲུབ་པའི་ཆོ་ག་རྒྱ་ཆེ་བའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་རྣམ་པར་གནོན་པར་མཛད་ནས་རྡོ་རྗེ་འཆང་ཆེན་པོས་འདི་གསུངས་སོ། །བདེ་བ་ཆེན་པོ་རབ་སྒྲུབ་དང ། །འདོད་པ་ཆེན་པོ་རྣམ་དག་ཕྱིར། །རྡོ་རྗེ་སེམས་དཔའ་གྲུབ་པ་ནི། །རྟག་པར་མྱུར་དུ་བཤད་པར་བྱ། །ཅི་སྲིད་འཁོར་བའི་གནས་སུ་ནི། །དེ་སྲིད་སེམས་ཅན་གདོན་པར་བྱ། ། མྱ་ངན་འདས་པ་བྱང་ཆུབ་སྒྲིབ། །དེ་ཉིད་ཀྱིས་ནི་དམ་ཚིག་རྣམས། །ཅི་སྲིད་སྲིད་པ་ལ་གནས་པ། །དེ་སྲིད་སེམས་ཅན་དོན་ཉིད་བྱེད། །ཐམས་ཅད་དག་པའི་མཆོག་ཆོས་ཅན། །ཅི་ལྟར་སེམས་ཅན་ཀུན་གྱི་དོན། །དངོས་གྲུབ་ཐམས་ཅད་རབ་སྒྲུབ་པ། །དེ་ལྟར་སྦྱིན་ཚོགས་ཕ་རོལ་ཕྱིན། །བྱང་ཆུབ་སྤྱོད་པ་མཆོག་གིས་མིན། །དེ་བཞིན་
144a
༄#། །གཤེགས་ནི་གདུལ་མིན་ལ། །སེམས་ཅན་ཀུན་རྣམས་དོན་མཛད་པ། །འདི་ནི་དངོས་གྲུབ་རབ་བསྒྲུབས་ན། །དུས་ཀུན་དུ་ནི་ཐམས་ཅད་མཛད། ། དེས་ན་བསྒྲུབ་འདི་བཤད་བྱ་སྟེ། །དངོས་གྲུབ་ཤིན་ཏུ་རྟག་པ་ཡིན། །གང་གིས་སྲིད་པ་འདི་ཉིད་དུ། །ཤིན་ཏུ་རྟག་པའི་དངོས་གྲུབ་ཐོབ། །དཀྱིལ་འཁོར་དཔག་ཏུ་མ་ཞུགས་ཀྱང ། །དམ་ཚིག་རྣམ་པར་སྤངས་པ་འམ། །བསོད་ནམས་མེད་ཀྱང་ཐམས་ཅད་དུ། །སྲིད་པ་འདི་ལ་མྱུར་དུ་འགྲུབ། །གལ་ཏེ་དངོས་གྲུབ་སྒྲུབ་འདོད་ན། །རྟག་ཏུ་ཡུལ་དང་ལྡན་གྱུར་ན། །གསང་བའི་མཆོད་པས་མཆོད་ནས་ནི། །རང་རང་ཕྱག་རྒྱས་འགྲུབ་པར་འགྱུར། །དྲུག་ལྡན་ལ་སོགས་སྙན་པའི་གླུ། །ཆགས་པ་ཀུན་ཀྱང་ཅི་འདོད་པར། །བཟླས་པའི་དོན་ནི་ཅི་ནུས་པས། །རྡོ་རྗེ་སེམས་དཔའ་བསྒྲུབ་པར་བྱ། །འདི་ཡིས་འདོད་པའི་ཀུན་དབང་ཕྱུག་།ཅི་འདོད་འགྲོ་འོད་མཁའ་ལ་རྒྱུ། ། དངོས་གྲུབ་ཀུན་གྱི་དབང་ཕྱུག་གྲུབ། །རྒ་ཤི་མེད་ཅིང་གཙོ་བོར་འགྱུར། །རྒྱལ་བ་ཀུན་གྱིས་མཆོད་བྱས་ལ། །རང་གཞན་ཀུན་གྱིས་བསྙེན་བསྐུར་ཞིང ། །རྡོ་རྗེ་འཆང་ཆེན་དང་མཚུངས་ཤིང ། །དོན་ཡོད་ཀུན་མཆོག་སྤྱོད་པ་ཡིན། །བདེ་བ་ཆེན་པོ་རྡོ་རྗེ་གྲུབ་པའི་རྒྱལ་པོ་དེ་བཞིན་གཤེགས་པ་ལ་སོགས་པའི་དངོས་གྲུབ་ཐམས་ཅད་
144b
རབ་ཏུ་སྟེར་བའི་རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ཡིན་ལ། གལ་ཏེ་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་མངོན་པར་འདོད་པ་དེས། བཅོམ་ལྡན་འདས་དེ་བཞིན་གཤེགས་པ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་ཁུ་ཚུར་ཡོངས་སུ་འཛིན་པ་རས་རིས་ལ་བྲི་བར་བྱའོ། །བཞད་པ་དང ། བཅས་པ་དངོས་པོ་ཐམས་ཅད་དུ་དེ་བཞིན་གཤེགས་པ་རྣམས་ཀྱིས་ཡོངས་སུ་བསྐོར་བ་འོ། །དེའི་མདུན་དུ་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་འཛིན་པས་རྡོ་རྗེའི་ཚིག་གིས་སྟོང་ཕྲག་བརྒྱ་བཟླས་པར་བྱ་འོ། །འབུམ་རྫོགས་པ་ན་མཚན་ཕྱེད་ན་བདུད་ཀྱི་ཚོགས་རྣམས་འོང་བར་འགྱུར་རོ། །དེ་ནས་བདུད་ཐམས་ཅད་ཀྱི་སྟོབས་གཞོམ་པས་བཅོམ་པར་བྱའོ། །དེ་ནས་ཐོ་རངས་ཀྱི་དུས་སུ་དེ་བཞིན་གཤེགས་པ་ཐམས་ཅད་ཉིད་དང ། བྱང་ཆུབ་སེམས་དཔའ་ཉིད་ཐོབ་པར་འགྱུར་རོ། །གལ་ཏེ་རྡོ་རྗེ་འཆང་ཆེན་པོ་ཉིད་མངོན་པར་འདོད་ན། དེས་ལུགས་མ་འམ། འདུས་བྱས་པ་འམ། འདུས་བྱས་པ་འམ། རས་རིས་ལ་སོགས་པར་ལེགས་པར་བྲིས་པའི་ཕྱག་ན་རྡོ་རྗེའི་དཀྱིལ་འཁོར་བཞིན་དུ་སྔར་སྒྲུབ་པ་ལ་སྐུ་གཟུགས་ཀྱི་ཁྱད་པར་ཅི་ལྟར་ཐོབ་པ་ལྟར་རྡོ་རྗེ་སེམས་དཔའི་བསྒྲུབ་པ་བཤད་དོ། །ཟླ་བ་དྲུག་གིས་རྡོ་རྗེ་འཆང་ཆེན་པོའི་དངོས་གྲུབ་ཆེན་པོ་འགྲུབ་པོ། །གལ་ཏེ་རྡོ་རྗེ་
145a
༄#། །འཆང་ཆེན་པོ་དགུག་ན་བདེ་བ་ཆེན་པོའི་རྡོ་རྗེ་ལྕགས་ཀྱུས་དགུག་ཅིང་ཅི་འདོད་པ་བསྒྲུབ་པར་བྱ་འོ། །ཟླ་བ་གཅིག་བཟླས་ནས་ཐམས་ཅད་གསོལ་བར་བྱའོ། །གལ་ཏེ་རང་གི་ཕྱག་རྒྱས་བདག་ཉིད་བསྒྲུབ་ན་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ་བསྒོམས་པས་བདག་རྡོ་རྗེ་སེམས་དཔའ་ཡིན་ནོ་ཞེས་བསྒྲོམས་ལ་བསྒྲུབ་པར་བྱའོ། །དེ་ཅི་ལྟར་མངོན་པར་འདོད་པའི་བཟླས་པས་བདག་ཉིད་བསྒྲུབ་པར་བྱའོ། །ཡང་དང ། ཡང་དུ་སྒོམ་ཞིང་བཟླས་པ་དེ་སྲིད་བདག་གིས་བྱ་འོ། །ཅི་སྲིད་རྡོ་རྗེ་འཆང་ཉིད་ཟླ་བ་ཕྱེད་བཟླས་ནས་ཐོབ་པར་འགྱུར་རོ། །དེ་ནས་འདོད་པ་ཐམས་ཅད་ཀྱི་དབང་ཕྱུག་བསྒྲུབ་པར་འདོད་ན་དེ་བཞིན་དུ་རང་ཡིད་དུ་འོང་བ་དང་བཅས་པར་རབ་ཏུ་ཞུགས་ཏེ་ཕྱག་རྒྱ་བཅིངས་ལ་དེ་སྲིད་བཟླས་པར་བྱའོ། །ཅི་སྲིད་བདག་འདོད་པ་ཀུན་གྱི་དབང་ཕྱུག་དང ། ཁམས་གསུམ་པ་མ་ལུས་པའི་བདག་པོར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་འཆང་ཁམས་གསུམ་པ་མ་ལུས་པའི་རྡོ་རྗེའི་རྒྱུན་གྱི་རང་བཞིན་ཐམས་ཅད་གྲུབ་པའི་ཆོས་ཉིད་ཀྱི་ཡེ་ཤེས་རྣམ་པར་རོལ་པར་མཛད་ནས་མ་བསྒྲུབས་པའི་ཕྱག་རྒྱའི་ལས་ཀྱི་རྒྱུན་རྡོ་རྗེའི་ཆོ་ག་རྒྱས་པ་འདི་གསུངས་སོ། །མ་བསྒྲུབས་པའི་སྙིང་པོའི་ལས་རྣམས་འདི་ལྟ་སྟེ། བདག་ཉིད་བསྲུང་
145b
བ་ནི་བདེ་བ་ཆེན་པོའི་རྡོ་རྗེ་གསང་བའི་གཙུག་ཏོར་གྱིས་སོ། །ཐམས་ཅད་བསྲུང་པ་ནི་བདེ་བ་ཆེན་པོ་རྡོ་རྗེ་གསང་པའི་མཛོད་སྤུས་སོ། །ཕྱོགས་ཐམས་ཅད་དང ། མཚམས་དང ། དཀྱིལ་འཁོར་བཅིང་བ་ནི་བདེ་བ་ཆེན་པོ་རྡོ་རྗེ་གསང་བ་འབར་བའི་ཕྲེང་བས་སོ། །བདུད་ཐམས་ཅད་ཀྱི་སྟོབས་གཞོམ་པ་ནི་བདེ་བ་ཆེན་པོའི་རྡོ་རྗེ་གསང་བ་མི་བསྐྱོད་པས་སོ། ། ཚེ་འཕེལ་བར་བྱ་བ་ནི་བདེ་བ་ཆེན་པོ་རྡོ་རྗེ་གསང་བའི་བདུད་རྩིས་སོ། །གཟུགས་ཆེན་པོ་ཕུན་སུམ་ཚོགས་པ་ནི་བདེ་བ་ཆེན་པོ་རྡོ་རྗེ་གསང་བའི་གཟུགས་ཅན་གྱིས་སོ། །གཟི་བརྗིད་དང ། ན་ཚོད་ཤིན་ཏུ་བཟང་པོ་རབ་ཏུ་འཕེལ་བ་ལ་ནི་བདེ་བ་ཆེན་པོ་རྡོ་རྗེ་གསང་བའི་བཅུད་ཀྱིས་ལེན་གྱིས་སོ། །སྟོབས་དང ། མདོག་འཕེལ་བ་ལ་ནི་བདེ་བ་ཆེན་པོ་རྡོ་རྗེ་གསང་བའི་མཐུ་ཡིས་སོ། །དབང་བསྐུར་བ་ཐམས་ཅད་ལ་ནི་རྡོ་རྗེ་གསང་བའི་ཅོད་པན་གྱིས་སོ། །ནོར་ཐམས་ཅད་ཐོབ་པར་བྱ་བ་ལ་ནི་རྡོ་རྗེ་གསང་བའི་དབང་ཕྱུག་གིས་སོ། །རྒྱལ་སྲིད་ཐོབ་པ་ལ་ནི་རྡོ་རྗེ་གསང་བའི་རྒྱལ་པོའི་ཕྱག་རྒྱས་སོ། །ས་མ་ལུས་པ་ཐོབ་པ་ལ་ནི་རྡོ་རྗེ་གསང་བའི་རྩལ་གྱིས་སོ། །ཐམས་ཅད་དབབ་པ་དང ། གཡོ་བར་བྱ་བ་དང ། གར་བྱེད་དུ་གཞུག་པ་དང ། དུས་གསུམ་བདེན་པ་ཉིད་དུ་སྨྲར་གཞུག་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་དོན་དུ་གཞུག་པས་སོ། །པྲ་སེ་ན་ཐམས་ཅད་གྲུབ་པ་
146a
༄#། །ལ་ནི་རྡོ་རྗེ་གསང་བའི་པྲ་སེ་ན་དབབ་པས་སོ། །གདོན་ཐམས་ཅད་ལས་ཐར་པ་ལ་ནི་རྡོ་རྗེ་གསང་བའི་གདོན་ལས་ཐར་བས་སོ། །གདུག་པ་ཐམས་ཅད་གཞིག་པ་ལ་ནི་རྡོ་རྗེ་གསང་བའི་བགེགས་འཇོམས་པས་སོ། །ཐམས་ཅད་རེངས་པར་བྱ་བ་ལ་ནི་རྡོ་རྗེ་གསང་བའི་རེངས་པས་སོ། །ཐམས་ཅད་གཉིད་ལོག་པར་བྱ་བ་ལ་ནི་རྡོ་རྗེ་གསང་བའི་གཉིད་ཀྱིས་སོ། །ཐམས་ཅད་རྒྱས་གདབ་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་མཁའ་འགྲོ་མས་སོ། །ཐམས་ཅད་དུ་གསང་བ་ལ་ནི་རྡོ་རྗེ་གསང་བ་མཐར་བྱེད་ཀྱིས་སོ། །ཐམས་ཅད་བསྒྱེལ་བ་ལ་ནི་རྡོ་རྗེ་གསང་བའི་ཧཱུཾ་མཛད་ཀྱིས་སོ། །ཐམས་ཅད་བསླང་བ་ལ་ནི་རྡོ་རྗེ་གསང་བའི་དམ་ཚིག་གིས་བསླང་བ་འོ། །ཐམས་ཅད་བཅིང་བ་ལ་ནི་རྡོ་རྗེ་གསང་བའི་བཅིངས་པས་སོ། །ཐམས་ཅད་ཐར་པར་བྱ་བ་ལ་ནི་རྡོ་རྗེ་གསང་བའི་ཡི་གེ་མུས་སོ། །ཕྲ་མེན་མ་ཐམས་ཅད་ལས་ཐར་བར་བྱ་བ་ལ་དང ། སྔོན་གྱི་གནས་སྐབས་རྗེས་སུ་སྦྱིན་པ་ལ་ནི་གསང་བ་ཆེན་པོ་ཧེ་རུ་ཀའི་རྡོ་རྗེས་སོ། །མ་མོའི་གདོན་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་གསང་བའི་དྲག་མོས་སོ། །ཕྲ་མེན་མ་ཐམས་ཅད་ཀྱིས་རྒྱས་བཏབ་པ་ལ་དང ། ཐར་བར་བྱ་བ་ལ་དང ། སྙིང་ཟོས་པ་ལས་སྙིང་གཞན་འབྱུང་བར་
146b
འཇུག་པ་དང ། ཤི་བ་གསོ་བ་ལ་ནི་དམ་ཚིག་ཆེན་པོ་གསང་བའི་ཧེ་རུ་ཀའི་རྡོ་རྗེའི་དབང་བསྐུར་བའི་ཕྱག་རྒྱས་སོ། །གདུག་པ་ཐམས་ཅད་ཀྱི་ཕྱག་རྒྱ་གཞིག་པ་ལ་ནི་རྡོ་རྗེ་གསང་བའི་རྡོ་རྗེས་སོ། །རིམས་ཐམས་ཅད་རབ་ཏུ་ཞི་བ་ལ་ནི་རྡོ་རྗེ་གསང་བའི་འབར་བའི་ལྟ་བས་སོ། །དུག་ཐམས་ཅད་གཞིག་པ་དང ། བཟའ་བ་དང ། འབབ་པ་དང ། འཆི་བ་གསོ་བ་ལ་ནི་གསང་བ་ཆེན་པོ་རྡོ་རྗེ་ནོར་བུའི་ཕྱག་རྒྱས་སོ། །དུག་ཐམས་ཅད་དང ། སྦྱར་བའི་དུག་ཐམས་ཅད་རབ་ཏུ་ཞི་བར་བྱ་བ་ལ་ནི་རྡོ་རྗེ་གསང་བའི་དུག་མེད་པས་སོ། །གཤེད་བྱེད་ཐམས་ཅད་དང ། བྱད་དང ། རོ་ལངས་དང ། བྱུར་དང ། གནོད་སྦྱིན་མོ་རྣམས་ཀྱི་གཞིག་པ་ལ་ནི་རྡོ་རྗེ་གསང་བའི་སྦྱིན་སྲེག་གིས་སོ། །རྩོད་པ་ཐམས་ཅད་དང ། འཐབ་པ་དང ། འཐབ་མོ་དང ། རྩོད་པ་གཞིག་པ་ལ་ནི་རྡོ་རྗེ་གསང་བའི་ཞལ་རབ་ཏུ་གདངས་པས་སོ། །ཡམས་དང ། འཚེ་བ་ཐམས་ཅད་དང ། སྡིག་པ་དང ། རྨི་ལམ་ངན་པ་གཞིག་པ་ལ་ནི་རྡོ་རྗེ་གསང་བའི་ཞི་བས་སོ། །གཞན་གྱི་དཔུང་ཐམས་ཅད་རེངས་པར་བྱ་བ་དང ། གཉིད་ལོག་པར་བྱ་བ་དང ། རྨོངས་པར་བྱ་བ་དང ། ལྐུགས་པར་བྱ་བ་དང ། རྒྱས་གདབ་པ་དང ། གསད་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་གཤེད་བྱེད་ཀྱིས་སོ། །འཐབ་མོ་ཐམས་
147a
༄#། །ཅད་ལས་རྒྱལ་བ་ཐོབ་པ་ལ་ནི་རྡོ་རྗེ་གསང་བའི་རྒྱལ་མཚན་གྱི་དཔུང་རྒྱན་གྱིས་སོ། །གདུག་པ་ཐམས་ཅད་གཞིག་པ་ལ་ནི་རྡོ་རྗེ་གསང་བའི་རྡོ་རྗེ་ལེགས་པས་སོ། །བགེགས་ཐམས་ཅད་ཞི་བར་བྱ་བ་ལ་ནི་རྡོ་རྗེ་གསང་བའི་ཐབས་སྦྱོར་གྱིས་སོ། །དགྲ་བོ་ཐམས་ཅད་རྣམ་པར་གཞིག་པ་ལ་ནི་རྡོ་རྗེ་གསང་བའི་རྣམ་པར་འཐོར་བས་སོ། །བདུད་ཀྱི་སྟོབས་ཐམས་ཅད་གཞོམ་པ་ལ་ནི་རྡོ་རྗེ་གསང་བའི་རབ་ཏུ་འདུལ་བས་སོ། །སྤྲིན་བསྐྱེད་པ་ལ་ནི་རྡོ་རྗེ་གསང་བའི་སྤྲིན་ཆེན་པོས་སོ། །ཆར་དབབ་པ་ལ་ནི་རྡོ་རྗེ་གསང་བའི་སྡིག་མཛུབ་ཀྱིས་སོ། །ཐོག་དབབ་པ་དང ། གློག་དང ། རླུང་དང ། ཆར་ཞི་བར་བྱ་བ་ལ་ནི་རྡོ་རྗེ་གསང་བའི་སྤྲིན་སྲུང་གིས་སོ། །སྤྲིན་དང ། མུན་པ་དང ། ཁུག་རྣ་ཞི་བར་བྱ་བ་ལ་ནི་རྡོ་རྗེ་གསང་བའི་བདེ་བ་ཆེན་པོའི་སྤྱན་གྱིས་སོ། །ཀླུ་ཐམས་ཅད་དགུག་པ་ལ་ནི་རྡོ་རྗེ་གསང་བའི་ཕྱག་རྒྱས་སོ། །ཀླུ་ཐམས་ཅད་དབང་དུ་བྱ་བ་ལ་ནི་གསང་བ་ཐམས་ཅད་ཀྱི་ནོར་བུའི་ཕྱག་རྒྱས་སོ། །ཀླུ་ཐམས་ཅད་རྗེས་སུ་འབྲང་བར་བྱ་བ་ལ་ནི་རྡོ་རྗེ་གསང་བའི་ཀླུ་འདུལ་བས་སོ། །ཀླུ་ཐམས་ཅད་འབྱིན་པ་ལ་ནི་རྡོ་རྗེ་གསང་བའི་ཀླུ་གདོན་པས་སོ། །ས་མ་ལུས་པ་གཡོ་ཞིང་འགུལ་བར་བྱ་བ་ལ་ནི་
147b
རྡོ་རྗེ་གསང་བའི་ཐར་པས་སོ། །ཆུ་མེད་པར་ཆུའི་ཕུང་པོ་ཆེས་ཆེར་བསིལ་ཞིང་དྲི་མ་མེད་པར་བསྐྱེད་པ་ལ་ནི་བདེ་བ་ཆེན་པོ་རྡོ་རྗེ་ཀླུའི་ཕྱག་རྒྱས་སོ། །མུན་པར་ཉི་མའི་སྣང་བ་ཆེན་པོ་བསྐྱེད་པ་ལ་ནི་རྡོ་རྗེ་ཉི་མའི་ཕྱག་རྒྱས་སོ། །རླུང་ཐམས་ཅད་དབང་དུ་བྱ་བ་ལ་ནི་རྡོ་རྗེ་རླུང་ཐམས་ཅད་ཀྱིས་སོ། །ནམ་མཁའ་ལ་གཟུགས་ཐམས་ཅད་ཀུན་ཏུ་སྟོན་པ་ལ་ནི་རྡོ་རྗེ་གསང་བའི་འཛིན་པས་སོ། །ནམ་མཁའ་ལས་དངོས་པོ་ཐམས་ཅད་འབྱུང་བར་བྱ་བ་ལ་ནི་རྡོ་རྗེ་གསང་བའི་འབྱུང་བས་སོ། །ནམ་མཁའ་ལ་རང་གི་བདག་ཉིད་ཀྱི་དངོས་པོ་ཀུན་ཏུ་བསྟན་པར་བྱ་བ་ལ་ནི་རྡོ་རྗེ་གསང་བའི་རྫུ་འཕྲུལ་གྱིས་སོ། །ནམ་མཁའ་ལ་དེ་བཞིན་གཤེགས་པ་དང ། རྡོ་རྗེ་འཛིན་པ་ལ་སོགས་པ་བྱང་ཆུབ་སེམས་དཔའ་ཐམས་ཅད་དང ། འཇིག་རྟེན་གྱི་ཁམས་ཐམས་ཅད་བསྟན་པ་ལ་ནི་རྡོ་རྗེ་གསང་བའི་རྣམ་པར་འཕྲུལ་བས་སོ། །ནམ་མཁར་ཤིང་ཐམས་ཅད་ལ་ལོ་མ་དང ། མེ་ཏོག་དང ། འབྲས་བུ་ཐམས་ཅད་འབྱུང་བ་ལ་ནི་རྡོ་རྗེ་གསང་བའི་དུས་ཀྱི་ཕྱག་རྒྱས་སོ། །སའི་ཆ་ཐམས་ཅད་ལ་འབྲུའི་ཆ་ཐམས་ཅད་སྨིན་པར་འགྱུར་བ་ལ་ནི་རྡོ་རྗེ་གསང་བའི་གཤོལ་གྱི་ཕྱག་རྒྱས་སོ། །ཐམས་ཅད་ལས་ལྷའི་ཁ་ཟས་དང ། བཏུང་བ་དང ། གོས་དང ། རྒྱན་དང ། གནས་སར་པ་དང ། བུ་མོ་གཞོན་ནུ་འབྱུང་བ་དང །
148a
༄#། །སྐྱེས་པ་དང ། བུད་མེད་དང ། བྲན་ཕོ་དང ། བྲན་མོ་ཐམས་ཅད་འབྱུང་བར་བྱ་བ་ལ་ནི་བདེ་བ་ཆེན་པོ་རྡོ་རྗེ་དམ་ཚིག་གི་བསོད་ནམས་ཀྱི་ཆུ་བོས་སོ། །གཡུལ་དུ་དཔུང་གི་ཚོགས་ཡན་ལག་བཞི་པ་བསྟན་ཏེ་གཡུལ་འགྱེད་པ་ལ་ནི་རྡོ་རྗེ་བདེ་བ་ཆེན་པོའི་སྡོམ་པས་སོ། །སྒྱུ་མ་ཐམས་ཅད་བསྟན་པ་ལ་ནི་རྡོ་རྗེ་བདེ་མཆོག་གིས་སོ། །བདེ་མཆོག་གི་བྱ་བ་ཐམས་ཅད་ལ་ནི་རྡོ་རྗེ་སྒྱུ་མའི་བྱ་བས་སོ། །རྨད་དུ་འབྱུང་བ་དང ། ཆོ་འཕྲུལ་ཐམས་ཅད་བསྟན་པ་ལ་ནི་རྡོ་རྗེ་རྨད་དུ་འབྱུང་བའི་རྫུ་འཕྲུལ་གྱི་རྣམ་པར་འཕྲུལ་བས་སོ། །ལན་ཐམས་ཅད་གདབ་པར་བྱ་བ་ལ་ནི་རྡོ་རྗེ་ལན་བསྟན་པས་སོ། །མེ་རེངས་པར་བྱ་བ་ལ་ནི་རྡོ་རྗེ་ཤིན་ཏུ་གྲང་བས་སོ། །ཆུ་དབབ་པར་བྱ་བ་ལ་ནི་རྡོ་རྗེ་ཟླ་བའི་ཆུ་ཤེལ་གྱིས་སོ། །དགོན་པ་དང ། གྲོང་དང ། ནགས་དང ། ཆུ་བོ་དང ། རྫིང་བུ་དང ། སྐྱེད་མོས་ཚལ་དང ། ཟས་དང ། སྐོམ་དང ། གཙུག་ལག་ཁང་བསྲུང་བ་ལ་ནི་རྡོ་རྗེ་གྲུབ་པས་སོ། །ཆུའི་སྟེང་དུ་བཞག་པ་དང ། བདག་ཉིད་གཟུགས་མང་པོའི་དངོས་པོ་སྟོན་པ་དང ། མི་སྣང་བ་དང ། ནམ་མཁའ་ལ་འགྲོ་བའི་དངོས་གྲུབ་ལ་ནི་རྡོ་རྗེ་གསང་བའི་དངོས་གྲུབ་ཀྱི་ཕྱག་རྒྱས་སོ། །ལྷ་ལ་སོགས་པ་ཐམས་ཅད་མངག་གཞུག་པར་བྱ་བ་ལ་ནི་རྡོ་རྗེ་གསང་བའི་
148b
བཀའ་བསྒོ་བས་སོ། །སེམས་ཅན་ཐམས་ཅད་དབང་དུ་བྱ་བ་ལ་ནི་རྡོ་རྗེ་གསང་བའི་དབང་གིས་སོ། །མི་རྒྱུ་བ་ཐམས་ཅད་དྲང་བ་དང ། དབབ་པ་དང ། བདེན་པར་སྨྲར་གཞུག་པ་ལ་ནི་རྡོ་རྗེ་གསང་བའི་དངོས་གྲུབ་ཆེན་པོའི་ཕྱག་རྒྱས་སོ། །གཟུགས་བརྙན་ཐམས་ཅད་དབབ་པ་དང ། དགུག་པ་དང ། དགོད་པར་བྱ་བ་དང ། གར་བྱེད་དུ་གཞུག་པ་དང ། ཀུན་ཏུ་རོལ་བར་བྱ་བ་དང ། བསྒོ་བ་ཐམས་ཅད་བྱེད་དུ་གཞུག་པ་དང ། ཐམས་ཅད་ཁྱེར་ཏེ་འོང་བ་དང ། ལས་ཐམས་ཅད་བྱེད་དུ་གཞུག་པ་ལ་ནི་བདེ་པ་ཆེན་པོ་རྡོ་རྗེའི་དམ་ཚིག་བསྒྲུབས་པས་སོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་བདེ་བ་ཆེན་པོ་རྡོ་རྗེ་ཡིད་ལས་བྱུང་བས་སོ། །རྒྱུ་བ་དང ། མི་རྒྱུ་བ་ཐམས་ཅད་རྩེར་གཞུག་པ་ལ་ནི་རྡོ་རྗེ་ཀི་ལི་ཀི་ལིའི་གསང་བས་སོ། །ཐམས་ཅད་བརྟན་པར་བྱ་བ་ལ་ནི་རྡོ་རྗེ་ཆུ་སྲིན་གྱི་ཕྱག་རྒྱས་སོ། །ཐམས་ཅད་དཔའ་བར་བྱ་བ་ལ་ནི་རྡོ་རྗེ་བསྙེམས་པས་སོ། །རྨི་ལམ་ངན་པ་བཟློག་པ་ལ་ནི་རྡོ་རྗེ་ངག་གིས་སོ། །གཞན་དག་གིས་རང་འདོད་པའི་རྨི་ལམ་མཐོང་བར་བྱ་བ་ལ་ནི་རྡོ་རྗེ་རྨི་ལམ་མཐོང་བས་སོ། །རྨི་ལམ་ངན་པ་ཐམས་ཅད་གཞིག་པ་ལ་ནི་རྡོ་རྗེ་སྲེག་བླུགས་ཀྱིས་སོ། །རྨི་ལམ་བཟང་བ་ཐམས་ཅད་བསྒྲུབ་པ་བརྟན་པར་བྱ་བ་ལ་ནི་རྡོ་རྗེ་རྨི་ལམ་གྲུབ་པས་སོ། །ནད་དང ། གནོད་པ།
149a
༄#། །ཐམས་ཅད་བསལ་བ་ལ་ནི་རྡོ་རྗེ་སྨན་གྱིས་སོ། །རིམས་ནད་ཐམས་ཅད་གཞིག་པ་ལ་ནི་རྡོ་རྗེ་བཅུད་ཀྱིས་ལེན་གྱིས་སོ། །དུས་མ་ཡིན་པར་འཆི་བ་གཞིག་པ་ལ་ནི་རྡོ་རྗེ་དཱུར་བས་སོ། །དམྱལ་བ་ལ་སོགས་པའི་ངན་འགྲོ་ཐམས་ཅད་གཞིག་པ་ལ་ནི་རྡོ་རྗེ་སྡིག་པ་དྲལ་བས་སོ། །སྐུ་ཐམས་ཅད་བསྒྲུབ་པ་ལ་རྡོ་རྗེ་སྐུའི་མཆོག་གིས་སོ། །གསུང་ཐམས་ཅད་བསྒྲུབ་པ་ལ་ནི་རང་གི་ལྕེས་འདས་པ་དང ། མ་འོངས་པ་དང ། ད་ལྟར་གྱི་དངོས་པོ་ཐམས་ཅད་བདེན་པར་སྟོན་པའི་རྡོ་རྗེ་གསང་བའི་ལྗགས་ཀྱི་མཆོག་གིས་སོ། །ཐུགས་ཐམས་ཅད་བསྒྲུབ་པ་ལ་ནི་རྡོ་རྗེ་ཐུགས་ཐམས་ཅད་བསྐྱེད་པས་སོ། །རྡོ་རྗེ་ཐམས་ཅད་ཀྱི་དངོས་གྲུབ་ལ་ནི་རབ་ཏུ་དག་པའི་རྡོ་རྗེས་སོ། །དཀྱིལ་འཁོར་ཐམས་ཅད་རབ་ཏུ་འཇུག་པ་ལ་ནི་རྡོ་རྗེ་འཁོར་ལོས་སོ། །ཕྱག་རྒྱས་ཐམས་ཅད་བཅིང་བའི་དངོས་གྲུབ་ལ་ནི་རྡོ་རྗེ་གསང་བའི་མཆོད་པས་ཕྱག་རྒྱ་ཆེན་པོས་སོ། །ཐམས་ཅད་དམ་ཚིག་ཐམས་ཅད་བསྒྲུབ་པ་ནི་རྡོ་རྗེ་དམ་ཚིག་གི་ཕྱག་རྒྱས་སོ། །ལས་ཐམས་ཅད་བསྒྲུབ་པ་ལ་ནི་རྡོ་རྗེ་གསང་བའི་མཆོད་པས་སོ། །དངོས་གྲུབ་ཐམས་ཅད་ལ་ནི་རྡོ་རྗེ་གསང་བའི་བདེ་བ་ཆེན་པོ་གྲུབ་པས་སོ། །ཕུན་སུམ་ཚོགས་པ་ཐམས་ཅད་ལ་ནི་རྡོ་རྗེ་ལྟུང་བ་ལས་གདོན་པའི་ཕྱག་རྒྱས་སོ། །
149b
ཐམས་ཅད་མཁྱེན་པའི་ཡེ་ཤེས་ཐོབ་པ་ལ་ནི་རྡོ་རྗེ་ཡེ་ཤེས་ཀྱི་ཕྱག་རྒྱས་སོ། །ཐམས་ཅད་ཀྱི་མཆོད་པ་བྱ་བ་ཉིད་ལ་ནི་རྡོ་རྗེ་གསང་བའི་གར་གྱིས་སོ། །རྡོ་རྗེ་ཐམས་ཅད་ཀྱི་དངོས་གྲུབ་དམ་པ་ལ་ནི་རྡོ་རྗེ་བདེ་བ་ཆེན་པོའི་རྡོ་རྗེས་སོ། །སེམས་དཔའ་ཆེན་པོ་ཐམས་ཅད་ཀྱི་དངོས་གྲུབ་དམ་པ་ལ་ནི་རྡོ་རྗེ་སེམས་དཔའི་བདེ་བ་ཆེན་པོས་སོ། །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་དམ་པ་ལ་ནི་རྡོ་རྗེ་སེམས་དཔའ་གསང་བ་མཆོག་གི་བདེ་བ་ཆེན་པོས་སོ། །རྡོ་རྗེ་འཛིན་པ་ཐམས་ཅད་ཀྱི་དངོས་གྲུབ་དམ་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོ་ལས། རབ་ཏུ་དགའ་བའི་རྡོ་རྗེ་གསང་བའི་མཆོད་པའི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་བདེ་བ་ཆེན་པོ་རྡོ་རྗེའི་དམ་ཚིག་གི་སེམས་དཔའི་བྱིན་གྱིས་བརླབས་པ་གསང་བའི་ཆོས་ཅན་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་འཛིན་པས་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་བྱིན་གྱིས་རློབ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་རྡོ་རྗེ་སེམས་དཔའ་ལ་གསོལ་བ་བཏབ་པོ། །བདེ་བ་ཆེན་པོ་རབ་གྲུབ་དང ། །འདོད་ཆགས་ཆེན་པོ་རྣམ་དག་ཕྱིར། །དེ་
150a
༄#། །བཞིན་གཤེགས་པ་མཐའ་ཡས་ཉིད། །དམ་པའི་རིགས་ནི་བསྐྱེད་དུ་གསོལ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བདེ་བ་ཆེན་པོ་མི་ཕྱེད་པའི་རྣམ་པར་གནོན་པ་མཛད་ནས། བཅོམ་ལྡན་འདས་ཀྱི་སྐུ་དང ། གསུང་དང ། ཐུགས་རྡོ་རྗེ་ཐམས་ཅད་ལ་རབ་ཏུ་བཞུགས་ནས་ཐམས་ཅད་ཀྱི་བདག་ཉིད་མཉམ་པར་སྤྲོས་ནས། བདེ་བ་ཆེན་པོའི་རྡོ་རྗེའི་ཕྱག་རྒྱའི་གཟུངས་འདི་གསུངས་སོ། །ོཾ་དྷཾ། དེ་ནས་འདི་ནི་གསུངས་ཙམ་གྱིས། །རྣམ་པ་དྲུག་ཏུ་གཡོས་གྱུར་ཏེ། །སངས་རྒྱས་སྲས་དང་བཅས་པ་ཀུན། །ཀུན་ནས་འདུས་ཤིང་བསྟན་པར་གྱུར། །དཀྱིལ་འཁོར་ཆེན་པོའི་སྦྱོར་བ་ཡིས། །ཐམས་ཅད་གྲུབ་ཕྱིར་ཀུན་ནས་བཞུགས། །བཞད་པ་ཆེན་པོའི་ཁྱད་པར་གྱིས། །རྨད་བྱུང་ཆེན་པོ་རབ་ཏུ་བཞད། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་སེམས་དཔའ་དེ་བཞིན་དུ་རྡོ་རྗེ་ལ་སྙོམས་པར་ཞུགས་ཏེ། བདེ་བ་ཆེན་པོའི་དམ་ཚིག་རྡོ་རྗེ་གསང་བ་ཞེས་བྱ་བའི་གཟུངས་ཀྱི་དཀྱིལ་འཁོར་འདི་གསུངས་སོ། ། འདི་ལྟར་ཆོས་ཀྱིས་བྲིས་ནས་ནི། །རྒྱལ་བ་གཡོན་དུ་བསྙེམས་འཛིན་པ། །དམ་ཚིག་མཆོག་གི་མཆོག་བཀོད་ནས། །ས་མ་ཡ་སྟྭཾ་ཞེས་བརྗོད་དོ། །དེ་བཞིན་
150b
གཤེགས་པ་སྲས་དང་བཅས། །རྡོ་རྗེ་མཚོན་ཆ་ལ་སོགས་གཟུང ། །བྱང་ཆུབ་སེམས་དཔའ་སེམས་དཔའ་ཆེ། །མེ་ཏོག་ལ་སོགས་སྤྱིར་ཐལ་སྦྱར། །དེ་ལ་འཇུག་པ་ལ་སོགས་པའི་ཆོ་ག་རྒྱས་པའི་ཁྱད་པར་ནི་འདི་ཡིན་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱ་བའི་ཕྱག་རྒྱ་དང ། རྡོ་རྗེའི་གླུ་འདིས་འཇུག་པར་བྱའོ། །རྡོ་རྗེ་སེམས་དཔའ་བསྡུས་པ་ཡིས། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་ནི་བྱེད་པར་འགྱུར། །དེ་ནས་རབ་ཏུ་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་གཟུངས་བདེ་བ་ཆེན་པོ་རྡོ་རྗེ་གསང་བའི་ལྕགས་ཀྱུས་དགུག་པར་བྱའོ། །ོཾ་བཛྲ་དྷཱ་ར་སུ་ར་མ་ཧཱ་སུ་ཁ་སརྦ་ཧཱ་ར་རྨ་པ་མ་ཏ་ཡ། སརྦ་ཏ་ཐཱ་ག་ཏ་ཛྙ་ན་མཻ་མནྟ་པཱ་དཻཿ ་ཛཿ ་ཧཱུཾ་བཾ་ཧོཿ ། དེ་ནས་དེ་བཞིན་གཤེགས་པ་ཐམས་ཅད་འཛིན་པ་དང་བཅས་པ་ཡང་དག་པར་བྱོན་པར་འགྱུར་རོ། །ཡིད་བདེ་བ་ལ་སོགས་པའི་མཚན་མ་འབྱུང་ངོ ། །ཆོ་འཕྲུལ་དུ་མ་དག་མཐོང་བ་ཡིན་ནོ། །དེ་ནས་ཆོ་ག་རྒྱས་པ་དང ། བསྒྲུབ་པ་དང ། ཡིད་ཀྱིས་འདོད་པའི་དངོས་གྲུབ་ཐམས་ཅད་དང ། དོན་ཡོད་པ་དང ། ཐོགས་པ་མེད་པར་མྱུར་དུ་དམ་པ་གྲུབ་པ་ཡིན་ནོ། །དེ་བཞིན་དུ་བྱའོ། །དེ་ནས་མ་བསྒྲུབས་པར་ལན་གཅིག་བཟླས་པས་ལས་རྣམས་བྱེད་པར་འགྱུར་རོ། །ཐམས་ཅད་
151a
༄#། །བསྲུང་བ་ལ་ནི་རྡོ་རྗེ་གཙུག་ཏོར་གྱིས་སོ། །སེམས་ཅན་ཐམས་ཅད་དབང་དུ་བྱ་བ་ལ་ནི་རྡོ་རྗེ་མཛོད་སྤུས་སོ། །ཆོས་ཉིད་ཐམས་ཅད་ཐོབ་པ་ལ་ནི་རྡོ་རྗེ་ཆོས་ཉིད་ཀྱིས་སོ། །དེ་བཞིན་གཤེགས་པ་ཐམས་ཅད་ཀྱི་མཆོད་པའི་དངོས་གྲུབ་ནི་རྡོ་རྗེ་མཆོད་པས་སོ། །གདུག་པ་ཐམས་ཅད་འདུལ་བ་ལ་ནི་རྡོ་རྗེ་ཁྲོ་བོས་སོ། །བྱང་ཆུབ་ཀྱི་སྤྱོད་པ་མ་ལུས་པར་རྫོགས་པར་བྱ་བ་ལ་ནི་རྡོ་རྗེ་སྤྱོད་པའི་ཕྱག་རྒྱས་སོ། །བདུད་ཐམས་ཅད་གཞོམ་པ་ལ་ནི་བདུད་ཐམས་ཅད་འཇོམས་པར་བྱེད་པས་སོ། །དེ་བཞིན་གཤེགས་པ་ཐམས་ཅད་ཀྱི་བདག་ཉིད་དུ་བྱ་བ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱིས་སོ། །བདེ་བ་ཆེན་པོ་རྡོ་རྗེ་གསང་བ་ལས། དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོའི་ཆོ་ག་རྒྱས་པ་འོ། །དེ་བཞིན་གཤེགས་པའི་དཀྱིལ་འཁོར་གསུངས་པ་འོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་ཅིང་ཐོགས་པ་མེད་པའི་བཀའ་བསྟན་པ། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་ཆེན་པོའི་ཐབས་བདེ་བ་ཆེན་པོའི་ཁྲོ་བོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་དང ། །ཆགས་པ་ཆེན་པོ་རྣམ་དག་
151b
ཕྱིར། །གདུག་པ་ཐམས་ཅད་གཞོམ་པའི་ཕྱིར། །རང་རིགས་སྤྲུལ་མཛོད་རྡོ་རྗེ་འཛིན། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་བཀའ་རྡོ་རྗེའི་དམ་ཚིག་ཅེས་བྱ་བའི་རབ་ཏུ་དགའ་བའི་རྡོ་རྗེ་ཁྲོ་བོ་འདི་གསུངས་སོ། །ཧཱུཾ་རཀྟ་ཛྭ་ལ་མཱ་ལཱ་པྲ་ལ་ཡ། ཨགྣི་པྲ་ཏི་པ་ཏ་ཏེ་ཛ། མ་ཧཱ་སུ་ར་ཏ་བཛྲ་ཀྲོ་དྷ་ཛཿ ་ཧཱུཾ་བཾ་ཧོ་ཕཊ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་ཕྱག་ན་རྡོ་རྗེའི་རྡོ་རྗེ་ལས་ཀུན་ནས་འོད་ཟེར་དམར་པོ་འབར་བའི་སྙིང་པོ་ཅན་སྨིན་མ་འགྱུར་ཞིང་ཁྲོ་གཉེར་བསྡུས་པ། སྨ་ར་སེར་ཞིང་སྤྱན་འབར་བ། རྡོ་རྗེ་མཆེ་བ་གཙིགས་པས་མ་མཆུའི་སྒྲོས་རྣམ་པར་གནོན་པའི་ཞལ་མངའ་བ། དབུ་སྐྲ་གྱེན་དུ་འབར་བ། རྡོ་རྗེ་དང ། གཞུ་ལ་སོགས་པ་ཡོངས་སུ་འཛིན་པ། བཅོམ་ལྡན་འདས་ཀྱི་དཀྱིལ་འཁོར་ཆེན་པོའི་ཚུལ་དུ་བཞུགས་སོ། །བཅོམ་ལྡན་འདས་ཀྱིས་ཀྱང་ཁམས་གསུམ་པའི་གདུག་པ་ཐམས་ཅད་འདུལ་བར་མཛད་ནས་རྡོ་རྗེ་དམ་ཚིག་ཆེན་པོའི་བྱིན་གྱིས་བརླབས་སོ། །དཀྱིལ་འཁོར་ཆེན་པོ་ཐིག་གདབ་བྱ། །དེ་ལ་དང་པོ་ཁྲོས་པ་གཞག་།སུ་ར་ཏོད་བྷ་བ་ཧཱུཾ་ཞེས་ཟློས། ། ུཏྤལ་སྔོན་པོའི་འོད་འབར་བ། །རྡོ་རྗེ་བསྙེམས་པ་འཛིན་པའི་མཆོག་།མཆེ་བ་ཅུང་ཟད་གཙིགས་པའི་ཞལ། །ཁྲོ་དང་བཅས་པའི་བཞད་པའི་ཞལ། །རྡོ་རྗེ་སྐྱིལ་མོ་
152a
༄#། །ཀྲུང་གིས་བཞུགས། །འོད་ཟེར་འབར་བ་འཁྲུགས་པའི་འོད། །དཀྱིལ་འཁོར་ཆེན་པོའི་ཚུལ་གྱིས་ནི། །ཐམས་ཅད་དུ་ནི་ཁྲོ་བོ་བྲི། །རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོས་དང་པོར་སློབ་དཔོན་གྱིས་འཇུག་པར་བྱ་སྟེ། སློབ་མ་རྣམས་ཀྱང་དེ་བཞིན་ནོ། །སློབ་དཔོན་ཞུགས་ནས་ཁྲོས་པས་ལྕགས་ཀྱུ་དེ་ཉིད་ཀྱིས་དགུག་པར་བྱའོ། །ཧཱུཾ་སུ་ར་ཏ་བཛྲ་ཀྲོ་དྷ་ཨ་ཡ་ཏེ། མཧཱ་སུ་ཁ་བཛྲ་སཏྭ་ཛཿ ། སརྦ་བཛྲ་ཀུ་ལ་ནེ་ཏྲ་པྲ་བེ་ཤ་ཡ་ཧཱུཾ། སརྦ་མུ་དྲཱ་ག་ཎ་བནྡྷ་ཡ་བཾ། སརྦ་མ་ཡཱ་མ་བི་ཤཝ་ཀུ་རུ་ཧོ། སརྦ་ཀརྨ་ནེ་ཏྲ་སཏྭ་ཡ་ཨ། དེ་ནས་རྡོ་རྗེའི་རིགས་ཐམས་ཅད་བཅོམ་ལྡན་འདས་དང་བཅས་པ་བྱོན་ཞིང་གྲུབ་པ་ཡིན་ནོ། །སློབ་དཔོན་དང ། སློབ་མ་རྣམས་ལ་དགྱེས་པ་དང ། ཁྲོ་བོ་འབབ་པའི་མཚན་མ་ཡང་དག་པར་འབྱུང་བར་འགྱུར་རོ། །གཞན་ཡང་ཅུང་ཟད་འབྱུང་བ་ཡིན་ན་དེ་གྲུབ་པ་དང ། དངོས་གྲུབ་དང ། ཆོ་ག་རྒྱས་པ་ཡང་དེ་བཞིན་དུ་འོ། །གལ་ཏེ་མ་གྲུབ་ན་ལན་གཅིག་བཟླ་འོ། །ཁམས་གསུམ་པ་མ་ལུས་པ་ལས་རྒྱལ་བར་བྱ་བ་ལ་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱས་སོ། །སེམས་ཅན་གྱི་ཁམས་ཐམས་ཅད་འདུལ་བ་ལ་ནི་རྡོ་རྗེ་ཁྲོ་བོའི་གསང་བས་སོ། །འཇིག་རྟེན་གསུམ་པོ་ལས་རྣམ་པར་རྒྱལ་བ་ལ་ནི་འཇིག་རྟེན་གསུམ་ལས་རྣམ་པར་རྒྱལ་
152b
བའི་ཕྱག་རྒྱས་སོ། །ཐམས་ཅད་དགུག་པ་དང ། གཞུག་པ་དང ། དབབ་པ་དང ། བཅིང་བ་དང ། དབང་དུ་བྱ་བ་དང ། གཞིག་པ་དང ། རེངས་པ་དང ། གཉིད་ལོག་པར་བྱ་བ་དང ། རྒྱས་གདབ་པ་དང ། བསྒྱེལ་བ་དང ། གསད་པར་བྱ་བ་ལ་ནི་བདེ་བ་ཆེན་པོ་རྡོ་རྗེ་ཁྲོ་བོས་སོ། །ཐམས་ཅད་ལྟུང་བར་བྱ་བ་ལ་ནི་རྡོ་རྗེ་ཕྲ་མོའི་ཁྲོ་བོས་སོ། །ཐམས་ཅད་དབབ་པ་ལ་ནི་རྡོ་རྗེ་འབེབས་པའི་ཁྲོ་བོས་སོ། །ཐམས་ཅད་ངེས་པར་གནོན་པ་ལ་ནི་རྡོ་རྗེ་གད་རྒྱངས་ཀྱིས་སོ། །ལས་ཐམས་ཅད་ལ་ཉེ་བར་དགོད་པ་ལ་ནི་བདེ་བ་ཆེན་པོ་རྡོ་རྗེ་དམ་ཚིག་གི་ཁྲོ་བོས་སོ། །བདེ་བ་ཆེན་པོའི་རྡོ་རྗེའི་གསང་བ་ལས། རབ་ཏུ་དགའ་བ་ལས་བྱུང་བ་རྡོ་རྗེ་གསང་བ་རྣམ་པར་རྒྱལ་བའི་དམ་ཚིག་གི་ཆོ་ག་རྒྱས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དོན་ཡོད་ཅིང་ཐོགས་པ་མེད་པ་ཐམས་ཅད་དག་པའི་ཆོས་སྒྲིབ་པ་མེད་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེན་པ་ཆེན་པོ་རབ་གྲུབ་དང ། །འདོད་ཆགས་ཆེན་པོ་རྣམ་དག་ཕྱིར། །པདྨའི་རིགས་ཆེན་དག་པ་ལ། །མཆོག་ཆེན་ཁྱོད་ཀྱིས་བསྐྱེད་པར་མཛོད། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་ཆོས་ཐམས་
153a
༄#། །ཅད་ལ་གཟིགས་པ་རྡོ་རྗེ་ཞེས་བྱ་བའི་རྣམ་པར་གནོན་པར་མཛད་ནས་བདེ་བ་ཆེན་པོ་རྡོ་རྗེ་གསང་བའི་པདྨ་ཞེས་བྱ་བའི་སྔགས་འདི་གསུངས་སོ། ། ོཾ་ཧྲཱི་བཾ་ཧོཿ ། འདི་གསུངས་པ་ཙམ་གྱིས་བཅོམ་ལྡན་འདས་ཀྱི་ཞལ་ནས་པདྨའི་མདོག་གི་མདངས་ཅན་ཟླ་བའི་དཀྱིལ་འཁོར་གྱི་འོད་ལྟ་བུ་པདྨའི་འདབ་མ་ལ་སོགས་པ་ཡོངས་སུ་འཛིན་པ། དེ་བཞིན་གཤེགས་པའི་དབང་བསྐུར་བ་དང ། རལ་པའི་ཅོད་པན་དང ། ན་བཟའ་དམར་པོ་འཆང་བ་དང ། པདྨ་ཆེན་པོའི་སེམས་དཔའ་རྣམས་བྱུང་ནས་དཀྱིལ་འཁོར་ཆེན་པོའི་ཚུལ་གྱིས་བཞུགས་སོ། །བཅོམ་ལྡན་འདས་ཞལ་རབ་ཏུ་བཞད་པས་གཡས་པས་རྡོ་རྗེ་གཡོན་པས་པདྨ་འཛིན་ཅིང་དེ་བཞིན་དུ་རྡོ་རྗེ་བསྙེམས་པས་རྡོ་རྗེ་སྐྱིལ་མོ་ཀྲུང་གིས་བཞུགས་སོ། །དེ་ནས་དཀྱིལ་འཁོར་ནི། དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཐིག་གདབ་བོ། །རྡོ་རྗེ་འཇིག་རྟེན་དབང་ཕྱུག་གཞག་།པདྨའི་མཚན་མའི་ཚོགས་རྣམས་བྲི། །དེ་ན་རྡོ་རྗེ་པདྨས་ཞུགས་ལ་མཛུབ་མོའི་ལྕགས་ཀྱུ་གཉིས་ཀྱིས་དགུག་པར་བྱའོ། ། ོཾ་ཧྲཱི་བཾ་ཧོཿ ། ཨོཾ་ཧྲཱིཿ ་མཧཱ་སུ་ཁ་བཛྲ་ཨཱ་ལོ་ཀེ་ཤཝ་རཱ་ཡ་མེ། ཨཱ་ཨཱ་ཧེ་པྲ་བེ་ཤ་དྷི་དྷི་མེ་བྷ་བ་སིདྡྷི་མྨེར་མུ་དྲཱ་པཱ་དཻཿ ་ཛཿ ་ཧཱུཾ་བཾ་ཧོཿ ། དེ་ནས་བཅོམ་ལྡན་འདས་སྤྱན་རས་
153b
གཟིགས་དབང་ཕྱུག་བྱོན་ཏེ་མཆོག་ཐམས་ཅད་སྩོལ་བར་འགྱུར་རོ། །སྣང་བའི་མཚན་མ་འབྱུང་བར་འགྱུར་རོ། །ཆོ་ག་རྒྱས་པ་ཐམས་ཅད་དང ། སྒྲུབ་པ་དང ། དངོས་གྲུབ་ཐམས་ཅད་ཀྱང་དེ་བཞིན་ནོ། །མ་བསྒྲུབས་ཀྱང་ལན་གཅིག་བཟླས་པས་ལས་ཐམས་ཅད་བྱེད་དོ། །སྒྲིབ་པ་ཐམས་ཅད་རྣམ་པར་སྦྱང་བ་ལ་ནི་པདྨ་ཆེན་པོས་སོ། ། ཐམས་ཅད་བསྲུང་བ་ལ་ནི་པདྨའི་གཙུག་ཏོར་གྱིས་སོ། །ཐམས་ཅད་རྗེས་སུ་ཆགས་པ་ལ་ནི་པདྨ་ལ་ལྟ་བས་སོ། །ཐམས་ཅད་དག་པའི་ཏིང་ངེ་འཛིན་ཐོབ་པ་ལ་ནི་པདྨ་ཁ་འབྱེད་པས་སོ། །བུད་མེད་ཐམས་ཅད་དབང་དུ་བྱ་བ་ལ་ནི་པདྨ་ཆེན་པོའི་འདོད་ཆགས་ཀྱིས་སོ། །སྐྱེས་པ་ཐམས་ཅད་དབང་དུ་བྱ་བ་ལ་ནི་པདྨ་ཆེན་པོའི་དབང་ཕྱུག་གིས་སོ། །རྨི་ལམ་གདབ་པ་ལ་ནི་པདྨ་ཆེན་པོ་དམར་པོས་སོ། །བཅོམ་ལྡན་འདས་ཀྱི་མཆོག་ཐོབ་པར་བྱ་བ་ལ་ནི་རྡོ་རྗེ་གསང་བའི་པདྨ་རྨོངས་པ་མེད་པས་སོ། །བདེ་བ་ཆེན་པོ་པདྨ་གསང་བ་ལས། བདེ་བ་ཆེན་པོ་པདྨའི་རིགས་ཀྱི་ཆོ་ག་རྒྱས་པ་འོ།། །།དེ་ནས་བཅོམ་ལྡན་འདས་ཁམས་གསུམ་པ་ཐམས་ཅད་ཀྱི་བདག་པོ་དབང་ཕྱུག་དེ་བཞིན་གཤེགས་པས་བསམ་པ་ཐམས་ཅད་ཡོངས་སུ་རྫོགས་པའི་རིན་པོ་ཆེའི་དབང་བསྐུར་བའི་ཕྱག་རྒྱ་ཞེས་བྱ་བའི་ཏིང་ངེ་
154a
༄#། །འཛིན་ལ་སྙོམས་པར་ཞུགས་ནས་རང་གི་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་དང ། །ཆགས་པ་ཆེན་པོ་རྣམ་དག་ཕྱིར། ། ནོར་བུ་ཆེན་པོའི་རིགས་མཆོག་ནི། །མགྲིན་འབྱོར་ཕྱིར་ནི་སྐྱེད་པར་མཛོད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དམ་ཚིག་རབ་ཏུ་བཞག་པ་ཞེས་བྱ་བའི་རྣམ་པར་གནོན་པར་མཛད་ནས་བདེ་བ་ཆེན་པོའི་རྡོ་རྗེ་རིན་པོ་ཆེ་ཞེས་བྱ་བའི་རིགས་སྔགས་འདི་གསུངས་སོ། །ོཾ་ལི་ཏི་དྷ་བྷཎྚ་ཊ་ཏེ་ཏྲཱཾ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་དབང་བསྐུར་བའི་བདེ་བ་ཆེན་པོའི་རྡོ་རྗེ་ལས་ནོར་བུ་རིན་པོ་ཆེ་རབ་ཏུ་ཕྱུང་ནས་ཕྱག་གཡོན་པ་ལ་རབ་ཏུ་གནས་སོ། །ནོར་བུ་རིན་པོ་ཆེ་དག་པ་དེ་ཡང་མྲྒད་རྙོག་པ་མེད་པའི་མདོག་ཅན་རྡོ་རྗེ་རིན་པོ་ཆེ་རང་གི་འོད་ཟེར་གྱིས་དབང་བསྐུར་བ་ཅན་ནོར་བུ་རིན་པོ་ཆེའི་མདའ་ལ་སོགས་པའི་མཚན་མ་ཡོངས་སུ་བསྣམས་པ། བཅོམ་ལྡན་འདས་ཀྱི་དཀྱིལ་འཁོར་ཆེན་པོའི་ཚུལ་གྱིས་ཞུགས་སོ། །དེ་ནས་དཀྱིལ་འཁོར་བྲི་བ་ནི། །དཀྱིལ་འཁོར་ཐམས་ཅད་ཐིག་གདབ་བྱ། །རྡོ་རྗེ་རིན་ཆེན་བདག་པོ་བཞག་།ནོར་བུའི་རིགས་
154b
ནི་ཆེན་པོ་བྲི། །རྡོ་རྗེ་རིན་ཆེན་གྱི་ཕྱག་རྒྱ་ཞུགས་ཏེ། དེ་བཞིན་དུ་མཛུབ་མོ་གཉིས་ཀྱིས་རྡོ་རྗེ་ལྕགས་ཀྱུས་དགུག་པར་བྱ་འོ། །ོཾ་མཧཱ་སུ་ཁ་བཛྲ་བི་བྷཱུ་ཏེ་ར་ཡ་བྷ་ག་བཱན་ཏཾ་ཨཱ་ཀཪྵ་ཡ་གི་ར་བཾ་སརྦ་ཏ་ཐཱ་ག་ཏ་ཨ་གྲཾ་སཾ་ཏྲ་ས་མ་བེ་ན་ནཱ་མ་བྷེ་ར་མ་ཏྲ་བེ། ཏྲཾ་བ་ཌ་ཌ་སཝཱཧཱ། དེ་ནས་བཅོམ་ལྡན་འདས་ནམ་མཁའི་སྙིང་པོའི་ནོར་བུ་ཐམས་ཅད་དང་བཅས་པ་བྱོན་པ་ཡིན་ནོ། །སྤྱི་བོ་ནས་སྤུ་ལྡང་བའི་མཚན་མ་འབྱུང་བར་འགྱུར་རོ། །བཅོམ་ལྡན་འདས་ཀྱིས་བདག་ལ་དབང་བསྐུར་བ་ལ་ནི་ཞེས་ཤེས་པར་བྱ་འོ། །དེ་ནས་སློབ་མ་རྣམས་གཞུག་པར་བྱ་སྟེ་ཆོ་ག་རྒྱས་པ་ཐམས་ཅད་དེ་བཞིན་དུ་བྱའོ། །དེ་ནས་མ་བསྒྲུབས་པའི་ལས་རྣམས་ལན་གཅིག་བཟླས་པས་འགྲུབ་པར་འགྱུར་རོ། །དབང་བསྐུར་བ་ཐམས་ཅད་ཐོབ་པ་ལ་ནི་རྡོ་རྗེ་རིན་པོ་ཆེའི་མྱུ་གུས་སོ། །དོན་ཐམས་ཅད་ཐོབ་པ་ལ་ནི་རྡོ་རྗེ་རིན་ཆེན་གྱི་རྒྱལ་མཚན་གྱིས་རྩེ་མོས་སོ། །བསམ་པ་ཐམས་ཅད་ཡོངས་སུ་རྫོགས་པར་བྱ་བ་ལ་ནི་རྡོ་རྗེ་ནོར་བུ་ཆེན་པོའི་མཚན་མའི་ཕྱག་རྒྱས་སོ། །གཏེར་ཆེན་པོ་ཐོབ་པར་བྱ་བ་ལ་ནི་རྡོ་རྗེ་རིན་ཆེན་གྱིས་འོག་གི་ཕྱག་རྒྱས་སོ། །རྡོ་རྗེའི་དབང་བསྐུར་བའི་ཕྱག་རྒྱ་ཐོབ་པར་བྱ་བ་ལ་ནི་རྡོ་རྗེ་རིན་ཆེན་ཆེན་པོའི་ས་འོག་གི་ཕྱག་རྒྱས་སོ། །རྡོ་
155a
༄#། །རྗེའི་དབང་བསྐུར་བ་ཐོབ་པ་ལ་རྡོ་རྗེ་ཆེན་པོའི་ཕྲེང་བས་སོ། །བྱང་ཆུབ་སེམས་དཔའ་ཆེན་པོའི་དབང་བསྐུར་བ་ཐོབ་པ་ལ་ནི་རྡོ་རྗེ་རིན་པོ་ཆེ་ཆེན་པོའི་ཕྲེང་བས་སོ། །དེ་བཞིན་གཤེགས་པའི་དབང་བསྐུར་བ་ཐོབ་པ་ལ་ནི་རྡོ་རྗེ་རིན་ཆེན་གྱི་དབང་བསྐུར་བ་དམ་པའི་ཕྲེང་བས་སོ། །རྡོ་རྗེ་འཛིན་པ་ཆེན་པོར་དབང་བསྐུར་བ་ཐོབ་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་རྡོ་རྗེ་རིན་ཆེན་གྱི་ཅོད་པན་གྱི་ཕྲེང་བས་སོ། །བདེ་བ་ཆེན་པོའི་རྡོ་རྗེ་གསང་བ་ལས། བདེ་བ་དང ། ཡིད་བདེ་བ་ཐམས་ཅད་ཀྱང་ཀྱི་ནོར་བུའི་རིགས་ཀྱི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རིགས་པ་ཐམས་ཅད་བསྡུས་པའི་རྡོ་རྗེ་བྱིན་གྱིས་བརླབས་པའི་ཡེ་ཤེས་ཐོབ་པས་སེམས་ཅན་ཐམས་ཅད་གཞུག་པའི་འཁོར་ལོ་རྡོ་རྗེའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཐོག་མ་ཐ་མ་མེད་པའི་བཅོམ་ལྡན་འདས་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་པ། །ཆགས་པ་ཆེན་པོ་རྣམ་དག་ཕྱིར། །བདེ་བ་ཆེན་པོའི་དོན་གྱི་ཕྱིར། །འགྲོ་རྣམས་ཅི་བདེར་གཞུག་ཏུ་གསོལ། །
155b
དེ་ནས་བཅོམ་ལྡན་འདས་ཐམས་ཅད་ལས་རྣམ་པར་རྒྱལ་བའི་འགྲོ་བ་ཀུན་འདུལ་བ། དམ་ཚིག་ཐམས་ཅད་དང ། དངོས་གྲུབ་ཐམས་ཅད་སྩོལ་བ། རྡོ་རྗེ་འཆང་ཆེན་པོ། སྟོན་པ་པོ། སྒྲུབ་པ་པོ། སྟོབས་དང ། ཕ་རོལ་གནོན་པ། ཐོགས་པ་མེད་པ། ཐམས་ཅད་ལ་རྗེས་སུ་སྟོན་པས་དོན་ཡོད་པར་གྲུབ་པ། དམ་ཚིག་རྡོ་རྗེ་འཛིན་པ་ཞེས་བྱ་བའི་རྣམ་པར་གནོན་པ་མཛད་ནས་བདེ་བ་ཆེན་པོ་དངོས་གྲུབ་ཐམས་ཅད་ཀྱི་དམ་ཚིག་ཅེས་བྱ་བའི་དོན་ཡོད་པ་མཚུངས་པ་མེད་པ་ཐམས་ཅད་ཀྱི་སྙིང་པོ་འདི་གསུངས་སོ། །ཧོཿ ་ཨཱཿ ་ཧཱུཾ་ཧྲཱིཿ ་ཏྲཱཾ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་ཀྱི་དཀྱིལ་འཁོར་ཆེན་པོ་དེར་ཡང་དག་པར་གནས་ཏེ། དཀྱིལ་འཁོར་གཅིག་ཉིད་དུ་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་སེམས་ཅན་ཐམས་ཅད་རྗེས་སུ་གཞུག་པ་བདེ་བ་ཆེན་པོའི་རྡོ་རྗེའི་དམ་ཚིག་གི་གསང་བ་གསུངས་པ། དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཀུན་ཏུ་བྲི། །དཀྱིལ་འཁོར་ཐམས་ཅད་ཀུན་ཏུ་བྲི། །དཀྱིལ་འཁོར་ཆེན་པོ་དང་པོ་ནི། །དེ་ཡི་དབུས་སུ་བརྟག་པར་བྱ། །དེ་ཡི་ལོགས་སུ་རིགས་
156a
༄#། །རྣམས་ཀྱི། །དཀྱིལ་འཁོར་བཞི་པོ་བྲི་བར་བྱ། །ཕྱི་ཡི་མཚམས་ཀྱི་མཐའ་མ་རུ། །ཕྱི་ཡི་དཀྱིལ་འཁོར་ཚོགས་རྣམས་བྲི། །སྒྲོ་རྣམས་ཀུན་ཏུ་འཇུག་པར་ནི། །རང་གི་ཕྱག་རྒྱར་རབ་ཏུ་གནས། །དཀྱིལ་འཁོར་དམ་པ་ལྔ་སྡུད་ཅིང ། །རྡོ་རྗེ་ཤུགས་ཀྱིས་འཇུག་པར་བྱ། །ཆོ་ག་རྒྱས་པ་ཐམས་ཅད་དང ། དངོས་གྲུབ་ཐམས་ཅད་དང ། ལས་ཐམས་ཅད་ཀྱང་དེ་བཞིན་ནོ། །རིགས་བསྡུས་པའི་ཆོ་ག་རྒྱས་པའོ།། །།དེ་ནས་ལྷ་ལ་སོགས་པ་དམ་ཚིག་སེམས་དཔའ་ཐམས་ཅད་བཅོམ་ལྡན་འདས་ལས་རང་རང་གི་རྗེས་སུ་གནང་བ་མནོས་ནས་སེམས་ཅན་ཐམས་ཅད་ལ་བདེ་བའི་དོན་ཡོད་པ་བཅོམ་ལྡན་འདས་རྡོ་རྗེ་འཆང་ཆེན་པོའི་ཞབས་ལ་ཕྱག་བྱས་ནས་རང་རང་གི་གསང་བའི་སྙིང་པོ་འདི་རྣམས་ཕུལ་ལོ། །དེ་ནས་འཇིག་རྟེན་གསུམ་པོས་གསོལ་པ་ནི། ཨོཾ་བྷྲཱུཾ་ཏྲཱཾ། དེ་ནས་དཀྱིལ་འཁོར་བྲི་བ་ནི། །ཟུར་བཞི་བ་ལ་སྒྲོ་བཞི་པ། །ཕྱི་ཡི་དཀྱིལ་འཁོར་མཆོག་ཡིན་ནོ། །དེ་ཡི་དབུས་སུ་དངོས་གྲུབ་ཕྱིར། །གཞུ་ཡི་སེ་རལ་ཁར་ལྡན་ཞིང ། །མདའ་དང་ཙ་ཤ་ག་ཐོགས་བྲི། །སྦྲང་རྩིར་བྱེད་དང་རྒྱལ་བར་བྱེད། །བསྒྲུབ་པ་ཐམས་ཅད་སྒྲུབ་
156b
པ་པོ། །རྩེ་གསུམ་མཚན་མའི་ཕྱག་རྒྱ་ཡིས། །པུས་མོ་ལྷ་ང་བཙུགས་བྱས་ཏེ། །ཞུགས་ནས་དམ་ཚིག་བཅིངས་ནས་ནི། །ཡང་དག་དགུག་པ་ཉིད་དུ་བྱ། །ོཾ་བྷཱུར་བྷཱུ་བ་སྭའྷཱ། ཉི་ཤུ་རྩ་གཅིག་བཟླས་པ་ཡིས། །ཐམས་ཅད་ཀུན་གྱིས་ཡོངས་བསྐོར་བ། །དངོས་གྲུབ་ཀུན་དོན་འོངས་པ་ལ། །ཅི་ལྟར་རྙེད་པའི་གཏོར་མ་སྦྱིན། །སློབ་དཔོན་གྱིས་ནི་འཇུག་པ་ཡིས། །སློབ་མ་ཐམས་ཅད་གཞུག་པར་བྱ། །དམ་ཚིག་མཆོག་གི་དེ་ཉིད་དང ། །གསང་བའི་དེ་ཉིད་བརྗོད་པར་བྱ། །གལ་ཏེ་མ་བརྟགས་ལ་སྨྲས་དང ། །འོ་ན་ཏེ་འདི་སྐད་བཤད་པའི་ཆོས། །འདིར་ནི་ཀུན་ཏུ་མ་སྤྱད་ན། །རྩེ་གསུམ་གྱིས་ནི་ཁྱོད་སྙིང་འཇོམས། །སྙིང་སྟོབས་རྡུལ་དང་མུན་པ་དང ། །ཚངས་པ་ཁྱབ་འཇུག་དབང་ཕྱུག་ཆེ། །མིང་པོ་གསུམ་པོ་འདི་དག་སྟེ། །ནམ་ཡང་བརྙས་པར་མི་བྱའོ། །གང་ཞིག་འདི་དག་ལ་བརྙས་པས། །ཡང་དང་ཡང་དུ་རབ་ཞུགས་ནས། །དཀྱིལ་འཁོར་མཆོད་པ་བྱེད་པ་དེ། །དངོས་གྲུབ་ཐམས་ཅད་ཐོབ་པ་ནི། །ཕྱག་རྒྱ་དག་ཀྱང་བསྟན་བྱས་ནས། །དེ་ཡིས་གར་གྱི་མཆོད་པ་བྱ། །འདོད་པའི་ཡོན་ཏན་ལྔ་པོ་ཡི། །རྟག་ཏུ་དཀྱིལ་འཁོར་མཆོད་པར་བྱ། །དེ་ནས་གསང་བའི་ལྷ་མོ་རྣམས་ཀྱིས་རང་གི་ཕྱག་རྒྱ་ཕུལ་ལོ། །ཧྲཱིཿ ་ཧཱུཾ་ཤྲཱི་བྷྱོ།
157a
༄#། །དཀྱིལ་འཁོར་ཐམས་ཅད་བྱ་བ་ནི། །གྲུ་བཞི་པ་ལ་སྒོ་བཞི་པ། །ཐིག་བཞི་པ་དང་ཡང་དག་ལྡན། །ཀ་བ་ཆེན་པོ་བཞི་དང་བཅས། །གྲུ་ཆད་བཞི་ཡིས་རྣམ་པར་མཛེས། །དེ་ཡི་དབུས་སུ་དེ་བཞིན་དུ། །དཀྱིལ་འཁོར་བཞི་པོ་བྲི་བར་བྱ། །སྒོ་རུ་མངོན་ཕྱོགས་བཞི་པོ་ནི། ། སྙིང་པོ་དང་བཅས་གཞག་པར་བྱ། །དགའ་མོ་ལག་ན་མཚོན་ཆ་ཐོགས། །དངོས་གྲུབ་བྱ་བ་བསྙེམས་དང་བཅས། །དེ་ནས་དང་པོ་དཀྱིལ་འཁོར་དུ། ། དེ་བཞིན་ཀུན་ནས་འཇུག་པར་བྱ། །སྲིང་མོ་རང་གི་ཕྱག་རྒྱ་ཡིས། །གོ་རིམས་ཅི་བཞིན་འཇུག་པར་བྱའོ། །ཞུགས་ནས་བདུག་པ་ལ་སོགས་ཀྱིས། །ཆོ་ག་བཞིན་དུ་མཆོད་བྱས་ནས། །གསང་བ་དེ་ཉིད་རབ་གྲུབ་པས། །དགུག་པ་ཡང་དག་བྱ་བ་ཡིན། །ོཾ་ཀཱ་ལི་མ་ནི་ར་དེ་པྲོ་ཏ་ལ་མེ་བྷཱུ་རཱཀྵ་སི་པ་རསྟཱ་མ་ཡ་ཧེ་བ་ཧོ་བ། བ་རཱ་ཧེ་བི་དྱེ་ཏཱི་མ་ཡ་སྭའྷཱ། སིདྡྷི་ཀེ་སིདྡྷི་སྟཱ་མ་ཨ་ཧེ། ཕྱག་རྒྱ་འདི་རྣམས་ཀྱིས་སོ། །ཧྲཱིཿ ་ཧཱུཾ་ཤྲཱི་བྷྱོ། དེ་ནས་ཐམས་ཅད་དབབ་པར་འགྱུར་རོ། ། བབས་ནས་གཞུག་པར་བྱའོ། །དེ་ནས་དེ་བཞིན་དུ་ཕྱག་རྒྱ་བཅིང་བ་བསླབས་ལ་མནའ་བསྒགས་ནས་གསང་བ་བརྗོད་པར་བྱའོ། །སེམས་ཅན་དོན་ལ་
157b
གང་ཞུགས་པ། །གང་དུ་དཀྱིལ་འཁོར་སྟོན་པ་རྣམས། །གལ་ཏེ་གསང་བ་མི་སྲུང་ན། །ཁྱོད་ཀྱིས་དེ་དག་གསད་པ་ཡིན། །འདོད་ཆགས་ཞེ་སྡང་གཏི་མུག་དང ། །དེ་བཞིན་ཟས་དང་སྐོམ་དང་རོ། །ཆོས་ཀྱི་འཇིག་རྟེན་བདེ་བ་དང ། །ཆོས་མིན་པས་ནི་སྡུག་བསྔལ་ཏེ། །ཕྱག་རྒྱ་གར་གྱི་མཆོད་པ་ཡིས། །ཙི་འདོད་པར་ནི་མཆོད་པར་བྱ། །ཅི་སྙེད་པ་དང་ཅི་འདོད་བཞིན། །ཡུལ་རྣམས་ལ་ནི་བརྟེན་པར་བྱ། །དེ་ནས་ལྷ་མ་ཡིན་ཐམས་ཅད་ཀྱིས་རང་གི་སྙིང་པོ་ཕུལ་ལོ། །ོཾ་སརྦ་མཧཱ་ཙཀྲཾ་པྲ་བརྟ་ཡ་དཪྴ་ཡ་བཾ་ཧཱུཾ་ཕཊ། ཟུར་བཞི་པ་ཡི་དཀྱིལ་འཁོར་ནི། །ཁྲུ་གང་ཙམ་དུ་བརྐོས་བྱས་ནས། །གྱེན་དུ་ཁ་བལྟས་སྒོ་བྲི་བྱ། །བདེ་མཆོག་ལ་སོགས་བྲི་བར་བྱ། །འཁོར་ལོ་རབ་ཏུ་ཞུགས་བྱས་ལ། །ཡང་དག་དགུག་ལ་གཞུགས་པར་བྱ། །མེ་ཏོག་ལ་སོགས་མཆོད་པ་དང ། །ཤ་ལ་སོགས་པའི་གཏོར་མ་བྱ། །ོཾ་པིཥྞུ་ཙ་ཀྲ་ཨཱ་ན་ཡ། ཤཾ་བརྩི་མ་ཙི་ཏ་ཏྲཾ་སུ་ར་ཨ་དྷི་པན་ཧེ་ཤོ་ཧཾ། སརྦ་མཱ་ཡཱ་གྷརྀ་ཏཾ་དྷ་བ་མེ་སིད་དྷྱ་ཧཱ་ཧཱ་སྭའྷཱ། དེ་ནས་ཡིད་ཀྱི་འདོད་པའི་སྒྱུ་མ་ཐམས་ཅད་གྲུབ་པ་ཡིན་ནོ། །སློབ་མ་གཞུགས་པ་ཡང་དེ་བཞིན་དུ་བྱའོ། །དེ་ནས་ཀླུའི་རིགས་བཞིས་སྙིང་པོ་ཕུལ་ལོ། །ཕུཿ ། དེ་ནས་
158a
༄#། །དཀྱིལ་འཁོར་བྲི་བ་ནི། །ཟུར་བཞི་པ་ལ་སྒོ་བཞི་པ། །སྦྲུལ་གྱི་ཐིག་གིས་ཀུན་ཏུ་བྲི། །ཀླུ་ཡི་གདེངས་ཀའི་རྩེ་མོས་འཁྱུད། ། མཚམས་ཀྱི་ཆར་ནི་མཇུག་རྩེ་མདུད། །དེ་ཡི་དབུས་སུ་ས་འཛིན་པ། །ཀླུ་ཡི་རྒྱལ་པོ་ཤེ་ཥ་བྲི། །ཤེས་རབ་ཅན་གྱིས་ཀླུ་ཆེན་གྱི། །རིགས་རྣམས་ཐམས་ཅད་བྲི་བར་བྱ། །དེ་ནས་ཏིང་འཛིན་ཤུགས་ཀྱིས་ནི། །ཁྲོས་ཤིང་རྒྱུག་པས་འཇུག་པར་བྱ། །དཀྱིལ་འཁོར་དེར་ནི་རབ་ཞུགས་ནས། །གདེངས་ཀའི་ཕྱག་རྒྱས་དགུག་པར་བྱ། །ོཾ་ཧྲཱིཿ ་ཨ་ནཱི་ལ་ཛ་བ་བེ་ག་པྲྀ་ཐཱི་བྷིནྡ་དྷ་ར་ཤེ་ཥ་ཎ། ཨཱ་ཡ་ཧྲཱིཿ ་ནུ་ཡ་ནཱ་ག་ཀུ་ལི་ཨཱ་ན་ཡ་ཧཱུཾ་ཕུཿ ། ས་མ་ཡ་པྲ་བེ་ཤ་ཡ་ཕུཿ ། སརྦཾ་སཱ་དྷ་ཡ་ཕུཿ ་ཕུཿ ་ཕུཿ ་ཕུཿ ་དེ་ནས་ཀླུ་ཐམས་ཅད་ཕུཿ ་ཞེས་བྱ་བ་བཟློས་ཤིང་དཀྱིལ་འཁོར་དུ་ཞུགས་ན་བབས་པར་འགྱུར་ཞིང་འཐོབ་པོ། །དེ་ནས་སློབ་དཔོན་གྱིས་རི་མོའི་ཕྱག་རྒྱས་དུག་མེད་པར་བྱའོ། །དེ་ནས་བརྩམས་ཏེ་ཐམས་ཅད་ཟོས་ན་ཡང་བདུད་རྩི་བཞིན་དུ་འཇུ་བར་བྱེད་དོ། །འདི་རྣམས་དང་ལྷན་ཅིག་ཏུ་གར་བྱེད་པ་དང ། དུག་ཐམས་ཅད་སྲེག་པ་དང ། །འཇིག་པ་དང ། ཟ་བ་ནས་པར་འགྱུར་རོ། །དེ་ནས་ཅི་འདོད་པའི་དམ་ཚིག་སྦྱིན་པར་བྱ་སྟེ།
158b
འདོད་ཆགས་ཞེ་སྡང་གཏི་མུག་སྟེ། །འདི་དག་འཇིག་རྟེན་དུག་གསུམ་མོ། །གལ་ཏེ་བདེན་ལས་འདས་གྱུར་ན། །འཚོ་བའི་འཇིག་རྟེན་འདི་རྟག་གནས། །གལ་ཏེ་དངོས་གྲུབ་ཐོབ་འདོད་ན། །གློག་ལ་བརྙས་པར་མི་བྱ་ཞིང ། །སེར་བ་བཟློག་པར་མི་བྱ་འོ། །སྦྲུལ་ནི་གང་ཡང་གསད་མི་བྱ། །བདེ་བ་ཆེན་པོ་རྡོ་རྗེ་གསང་བའི་རྟོག་པའི་རྒྱལ་པོ་ལས། བདེ་པ་ཆེན་པོའི་དམ་ཚིག་ཆེན་པོའི་རྡོ་རྗེ་གསང་བ་ལ་སོགས་པའི་ཆོ་ག་རྒྱས་པའོ། །དུམ་བུ་གཉིས་པ་རྩ་བའི་དཀྱིལ་འཁོར་བཅུའི་རྟོག་པའོ།། །།དེ་ནས་རྡོ་རྗེ་ཆེན་པོ་ཡི། །རི་རབ་རི་ཡི་རྩེ་མོ་ནི། །རྡོ་རྗེ་རིན་ཆེན་འོད་གསལ་བས། །དྲི་མེད་གཟི་བརྗིད་མཛེས་པ་ལ། །ཟུར་བཞི་པ་ལ་སྒོ་བཞི་པ། །སྒོ་ཁྱུད་ཀྱིས་ནི་རྣམ་པར་མཛེས། །ཁ་ཁྱེར་རྣམས་ལ་གནས་པ་ཡི། །རྡོ་རྗེ་ལྷ་མོའི་ཚོགས་ཀྱིས་མཆོད། །ཟླ་བ་ཕྱེད་ལ་གནས་པ་ཡི། །རྡོ་རྗེ་རིན་ཆེན་རྣམས་ཀྱིས་མཛེས། །རླུང་གིས་བསྐྱོད་པའི་དར་དཔྱངས་ཀྱི། །བདན་དྲིལ་བུའི་སྒྲ་སྒྲོགས་པ། །དྲ་བ་མེ་ལོང་མེ་ཏོག་གི་།ཕྲེང་བ་ཆེན་པོ་བཏགས་པས་བརྒྱན། །བདེ་བ་ཆེན་པོ་རྡོ་རྗེ་ཆེ། །རྡོ་རྗེ་ཀུན་གྱི་མངོན་འདུས་བྱས། །རྡོ་རྗེ་སེམས་དཔའ་གནས་ཆེན་པོ། །སངས་རྒྱས་ཀུན་གྱི་ངེས་བསྟེན་པ། །བྱང་ཆུབ་སེམས་དཔའི་གནས་པ་མཆོག །
159a
༄#། །རྡོ་རྗེ་འཆང་བ་ཀུན་གྱི་གནས། །བདེ་བ་ཆེན་པོ་རྡོ་རྗེ་ཆེ། །ནོར་བུ་ཆེན་པོ་མཆོག་ཅེས་བྱ། །རྡོ་རྗེ་ཆེན་པོའི་ཁང་པ་ན། །བདེ་བ་ཆེན་པོ་བཞུགས་པ་ཡིན། ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག་།སེམས་ཅན་ཀུན་གྱི་སེམས་གང་ཡིན། །བརྟན་ཕྱིར་སེམས་དཔར་བཤད་པ་ཡིན། །མཉམ་པར་གཞག་པས་ཏིང་འཛིན་ཏེ། །ངེས་པའི་ཕྱིར་ནི་རྡོ་རྗེར་འགྱུར། །སེམས་དཔའི་བྱིན་རླབས་སྦྱོར་བ་ཡིས། །སླར་ཡང་རྡོ་རྗེ་སེམས་དཔར་འགྱུར། །དེ་ཉིད་རྟག་པ་བཅོམ་ལྡན་འདས། །བྱང་ཆུབ་སྤྱོད་པའི་རྗེས་འགྲོ་ཡིན། །རང་སེམས་སོ་སོར་རྟོགས་སོགས་ན། །སངས་རྒྱས་བྱང་ཆུབ་ཆོ་ག་བཞིན། །བདུད་ནི་སངས་རྒྱས་རྡོ་རྗེ་ཅན། །རྡོ་རྗེ་འཆང་ཆེན་དེ་ཉིད་ཡིན། །དེ་ཉིད་དེ་བཞིན་གཤེགས་པའི་རིགས། །དེ་ཉིད་རྡོ་རྗེ་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ནོར་བུའི་རིགས་དམ་པ། །དེ་ཉིད་འདོད་ཆགས་བྲལ་བ་ཡིས། །འདོད་དང་ཐར་བ་ཉིད་ཡིན་ཏེ། །དུས་གསུམ་སྲིད་གསུམ་མཆོག་གསུམ་དང ། །འཇིག་རྟེན་གསུམ་དང་ཁམས་གསུམ་པ། །མི་གཡོ་ཐམས་ཅད་མཆོག་དེ་ཉིད། །བརྟན་ཞིང་སྙིང་པོ་ནོར་བུ་ཆེ། །རྒྱུ་བ་སེམས་ཀྱི་འདུ་བྱེད་ཐབས། །ཐམས་ཅད་
159b
བྱེད་པ་ཐམས་ཅད་ཉིད། །དང་པོའི་སེམས་དཔའ་སེམས་དཔའ་ཆེ། །བྱང་ཆུབ་སེམས་དཔའ་བདེ་རབ་སྩོལ། །སེམས་དཔའི་སྐྱིལ་མོ་ཀྲུང་བཅས་ནས། །པདྨའི་ལྟེ་བར་ཞུགས་པ་ཡིན། ། བཙུན་མོའི་ཚོགས་བཅས་སྣ་ཚོགས་པའི། །རྡོ་རྗེ་ལྷ་མོ་རྣམས་ཀྱིས་བསྐོར། །བདེ་བ་ཆེན་པོ་རབ་གྲུབ་དང ། །ཆགས་པ་ཆེན་པོ་རྣག་དག་ཕྱིར། །མ་ལུས་གདུལ་བྱའི་དོན་དང་ནི། །དངོས་གྲུབ་ཐམས་ཅད་རབ་གྲུབ་ཕྱིར། །བདག་ཉིད་ལ་སོགས་སེམས་དཔའ་ཆེ། །དངོས་གྲུབ་ཐམས་ཅད་རབ་གྲུབ་ཕྱིར། །དམ་ཚིག་མཆོག་གི་དམ་ཚིག་རྣམས། །རྒྱལ་བས་ཀྱང་ནི་སྲུང་བར་མཛད། །བསྙེམས་བཅས་རྡོ་རྗེ་གསོར་བ་དང ། །རྡོ་རྗེ་བསྙེམས་བཅས་ཡང་དག་ལྡན། །ཕྱག་རྒྱ་ཐམས་ཅད་རྣམ་དག་དང ། །རྡོ་རྗེ་སེམས་དཔའ་མཆོག་གྲུབ་ཕྱིར། །བདེ་བ་ཆེན་པོ་རྡོ་རྗེ་ཆེ། །དངོས་གྲུབ་ཐམས་ཅད་སྒྲུབ་པ་ལ། །ཡེ་ཤེས་ཕྱག་རྒྱར་ཡང་དག་ལྡན། །སྙིང་པོ་ཆེན་པོ་དམ་པ་ཡིན། །གང་གི་བསོད་ནམས་མི་ལྡན་དང ། །དེ་བཞིན་དཀྱིལ་འཁོར་མ་ལུས་ཞུགས། དོན་ཡོད་ཐོགས་མེད་ཉིད་མཆོག་གི་།དངོས་གྲུབ་ཐམས་ཅད་རྙེད་མི་དཀའ། །བདེ་བ་ཆེན་པོ་རྡོ་རྗེ་ཆེ། །གསང་བའི་མཆོག་དེ་དམ་ཚིག་བརྟན། །དངོས་གྲུབ་ཐམས་ཅད་སྒྲུབ་པ་ཡིན། །རྟོག་པ་ཐམས་ཅད་མྱུར་འགྲུབ་བྱེད། །ཐོག་མཐའ་མེད་ཅིང་དང་པོར་བྱུང ། །བསོད་ནམས་ཐམས་ཅད་ཆེར་མཐོ་བ། །གཟི་ཅན་རྣམས་ཀྱི་བདེ་མཆོག་དང ། །འདོད་ཆགས་ཆེན་པོ་རྣམ་དག་
160a
༄#། །ཕྱིར། །རྗེས་སུ་ཆགས་པ་སྒོམ་པ་ཞེས། །ཇི་བཞིན་ཡེ་ཤེས་རབ་འཇུག་པ། །ཉེ་བའི་སྙིང་པོ་བཅས་སྙིང་པོ། །བསྐལ་པ་དང་པོར་བཅོམ་ལྡན་གསུངས། །ཧཱུཾ། དེ་ནས་འདི་ནི་གསུངས་ཙམ་གྱིས། །སངས་རྒྱས་སྲས་དང་བཅས་པ་རྣམས། །ཉེ་བར་འཛིན་པ་མཛད་ནས་ནི། །འགྲོ་བ་ཐམས་ཅད་སྐྱེད་པར་མཛད། །སྣ་ཚོགས་འགྲོ་བ་ཀུན་བསྐྱེད་ནས། །གཙོ་བོས་དངོས་གྲུབ་དྲིས་གྱུར་བས། །ཅི་ལྟར་སྐད་ཅིག་གིས་འདི་འགྲུབ། །སེམས་དཔའ་ཆེན་པོ་མྱུར་དུ་སྨྲོས། །དེ་ནས་དཀྱིལ་འཁོར་ཆེན་པོ་ནི། །ཐོག་མར་དཀྱིལ་འཁོར་བྱིན་རླབས་ནི། །རྡོ་རྗེ་ཀུན་མཆོག་དམ་ཚིག་ནི། །ཆོ་ག་བཞིན་དུ་བསྒྲུབས་ནས་ནི། །དེ་ནས་ཕན་ཆད་སེམས་ཅན་འབྱུང ། །ཇི་བཞིན་ལས་ཀྱི་རྗེས་འགྲོ་བ། །རྟག་པར་སྡིག་པ་ཀུན་སྤྱོད་དང ། །ངན་སེམས་དང་ནི་ལེ་ལོ་ཅན། །དེ་ནི་སྐྱེ་བོ་གསུམ་གཟིགས་ནས། །འཇིག་རྟེན་གཙོ་བོ་རྣམས་ཀྱིས་དྲིས། །བཅོམ་ལྡན་ཅི་ལྟར་འོ་ན་ནི། །བྱིས་པ་དགེ་བ་ཀུན་ཏུ་སྐྱེད། །དེ་རྣམས་ཀྱི་ནི་ཚིག་གསན་ནས། །ཚིག་ནི་འདི་སྐད་གསུངས་པ་ཡིན། །རྡོ་རྗེ་འཛིན་ཀུན་བྱེད་པ་པོས། །ལས་ཀྱི་འཆི་བ་ལྟོས་གྱུར་པ། །དེ་ཡི་ཚིག་དེ་ཐོས་ནས་ནི། །རྡོ་རྗེ་སེམས་དཔའ་རྡོ་རྗེ་འཛིན། །སྲས་བཅས་སངས་རྒྱས་ཐམས་ཅད་ཀྱིས། །ཐུགས་རྗེ་ཆེན་པོས་འདི་སྐད་གསུངས། །བདེ་བ་ཆེན་པོ་རབ་གྲུབ་དང ། །ཤིན་ཏུ་ཆགས་པ་རྣམ་དག་ཕྱིར། །ཀུན་མཆོག་ཆོ་ག་རྒྱས་པ་ཡི། །
160b
སྙིང་པོ་དེ་ནི་བཤད་དུ་གསོལ། །དེ་ནས་སྟོན་པ་རྡོ་རྗེ་འཛིན། །དངོས་གྲུབ་ཐམས་ཅད་སྩོལ་བ་ཡིན། །རྟོག་པ་ཀུན་གྱི་བདེ་བ་ཆེ། །རྡོ་རྗེ་གསང་བ་དང་པོ་མཆོག་།གཞན་ཡང་སྙིང་པོ་བསྟན་པ་དང ། །དཀྱིལ་འཁོར་ལ་སོགས་ཆོ་ག་ཆེ། །སྣ་ཚོགས་ཕྱི་མའི་རྒྱུད་དང་བཅས། །དངོས་གྲུབ་ཐམས་ཅད་རབ་གྲུབ་བྱེད། །འཇིག་རྟེན་ཐམས་ཅད་ཁམས་ཆེན་པོ། །ཕྲ་རབ་རྡུལ་རྣམས་དང་མཉམ་པ། །སྙིང་པོ་ཆེན་པོ་འདི་ཉིད་ཀྱིས། །གྲུབ་པའི་བདེན་པ་དམ་པར་གྱུར། །དེ་ནས་བདེ་གཤེགས་དེ་རྣམས་ནི། །དེ་ཡི་ཚིག་མཆོག་གསན་གྱུར་ནས། །དང་པོའི་དཀྱིལ་འཁོར་གྲུབ་སྩོལ་བ། །དེ་ཚེ་དེ་ལ་གསོལ་བ་བཏབ། །ཆགས་པ་དང་བྲལ་འདུལ་བའི་ཕྱིར། །ཆགས་བྲལ་བསྟན་པར་བྱ་བའམ། །འདོད་ཆགས་ཐམས་ཅད་རྣམ་དག་ཕྱིར། །ཉིད་ཀྱི་ཐུགས་ཀྱི་ཆོ་ག་གསུངས། །དེ་ནས་བཅོམ་ལྡན་འདས་ཀྱིས་རྡོ་རྗེའི་གླུ་ཆེན་པོ་གསུངས་ཞིང་དཀྱིལ་འཁོར་བརྟག་པར་མཛད་དོ། །ཐམས་ཅད་རྗེས་སུ་ཆགས་པ་བདེ་བ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ཏུ་བྱུང་བ་ཡིན། །རབ་ཏུ་དགའ་བ་འགྲོ་བ་ཀུན་གྱི་བདེ་ཆེན་པོ། །བརྟན་མཐོ་དེ་རིང་བདག་ལ་མྱུར་གྲུབ་མངོན་ཕྱོགས་མཛོད། །ཅེས་བྱ་བའི་དཀྱིལ་འཁོར་གླུ་ལེན་ཅིང་བརྟག་པར་མཛད་དོ། །དཀྱིལ་འཁོར་ཆེན་པོའི་སྦྱོར་བ་ཡིས། །དང་པོའི་དཀྱིལ་འཁོར་
161a
༄#། །བརྟག་པར་བྱ། །ཕྱག་ན་རྡོ་རྗེ་ཐམས་ཅད་དུ། །རྡོ་རྗེ་ལྷ་མོ་ལ་སོགས་ཚོགས། །ཇི་ལྟར་ཆོ་ག་བཞིན་དུ་ནི། །བརྒྱན་པར་བྱ་སྟེ་རབ་འཇུག་བྱ། ། གཡོན་དུ་བུ་མོ་རྡོ་རྗེ་འཛིན། །བསྡུས་ཏེ་རྣལ་འབྱོར་བཅང་བར་བྱ། །རྡོ་རྗེ་དང་བཅས་བསྙེམས་པ་ཡི། །ཕྱག་རྒྱ་མཆོག་གིས་རང་ཉིད་འཇུག་།དཀྱིལ་འཁོར་དེ་རུ་ཞུགས་ནས་ཀྱང ། །ལན་གསུམ་དུ་ནི་བསྐོར་བར་བྱ། །རྡོ་རྗེ་སེམས་དཔའི་མདུན་འདུག་སྟེ། །དེ་ཉིད་གསང་བའང་བརྗོད་པར་བྱ། །ཧཱུཾ་ཧཱུཾ་མཧཱ་སུ་ཁ་བཛྲ་སཏྭ་ཛཿ ་ཧཱུཾ་བཾ་ཧོཿ ། ས་མ་ཡ་སྟྭཾ་ཨ་ནུ་རཀྟོ་མེ་བྷ་བ། སུ་ཏོ་ཥྱོ་མེ་བྷ་བ། དྲྀ་ཊྷོ་མེ་བྷ་བ། སུ་པོ་ཥྱོ་མེ་བྷ་བ། ཨ་དྷི་ཏིཥྛ་བྷ་ག་བཱན། ཨ་ན་དི་ནི་དྷེ་ན་སཝཱཧཱ། མ་ཧཱ་སུ་ཁ་བཛྲ་སཏྭ་ས་མ་ཡ་གུ་ཧྱེ་ས་མ་ཡ། སིདྡྷི་མྨེ་པྲ་ཡ་ཙྩ་ཨོཾ་ཧ་ཧ་ཧ་ཧ་ཨ། དེ་ནས་རབ་ཏུ་དགའ་བས་རྡོ་རྗེ་ལྷ་མོ་དགའ་བའི་གཏམ་བྱའོ། །ོཾ་བཛྲ་མུཥྚི་ས་མ་ཡ་ཀེ་ཕཊ། བཛྲ་ཀིལི་ཀི་ལི་ཧོ། །ཧཱུཾ་སྨ་ར་བཛྲེ་ཎེ་བནྡྷ་ཧཱུཾ་ཧཱུཾ་ཏུཥྚ་བཛྲ་ཧཱུཾ། དེ་ནས་བཅོམ་ལྡན་འདས་ཀྱི་མདུན་དུ་ཉེ་བར་འདུག་སྟེ། དེ་བཞིན་དུ་བཅོམ་ལྡན་འདས་པ་བདག་ལ་གྲུབ་པར་མཛོད་ཅིག་ཅེས་བཅོམ་ལྡན་འདས་ལ་གསོལ་བ་བརྗོད་པར་བྱའོ། །མྱུར་དུ་ཐམས་ཅད་རྗེས་ཆགས་པར། ཀི་ལི་ཀེ་ལས་ཐམས་ཅད་ནུས། །ཐམས་ཅད་རྗེས་སུ་ཆགས་དྲན་དང ། །རྟག་ཏུ་
161b
ལེགས་པར་མཉེས་གྱུར་བདག་།ོཾ་མཧཱ་སུ་ཁ་སིདྡྷི་བཛྲ་སཏྭ་ཛཿ ་ཧཱུཾ་བཾ་ཧོ། །སིདྡྷི་ས་མ་ཡ་སྟྭཾ་སིདྡྷི་ཧཱུཾ། དེ་ནས་བདེ་བ་ཆེན་པོའི་རྡོ་རྗེའི་ཆུས་དབང་བསྐུར་ཞིང་འཐུངས་ལ་རྡོ་རྗེ་རྩེ་ལྔ་བ་བཟུང་སྟེ།་བདག་རྡོ་རྗེ་སེམས་དཔའ་ཡིན་ནོ་ཞེས་རང་གི་མིང་བརྗོད་ལ་སྔ་མ་བཞིན་དུ་གར་གྱི་མཆོད་པས་མཆོད་པ་བྱ་སྟེ། ཅི་ལྟར་རྙེད་པའི་ཡུལ་དང་ལྡན་པས་སློབ་མ་དང་ལྷན་ཅིག་མཆོད་པ་བྱས་ནས་འབྱུང་བར་བྱའོ། །སློབ་མ་གཞུག་པར་བྱ་ཞིང་རང་ཉིད་ཀྱང་དེར་ཞུགས་པས་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །རྡོ་རྗེ་སློབ་དཔོན་ཐམས་ཅད་ཕྱག་རྒྱ་ཐམས་ཅད་ཀྱི་བདག་པོ། དམ་ཚིག་ཐམས་ཅད་ཤེས་པ། ཐམས་ཅད་ལ་ཚར་གཅོད་པ་དང ། ཕན་འདོགས་པར་ནུས་པ། དངོས་གྲུབ་ཐམས་ཅད་ཕུན་སུམ་ཚོགས་པའི་ཡེ་ཤེས་ཀྱི་ལས་བྱེད་པ། རང་ཉིད་འཇུག་པ་ཙམ་ཉིད་ཀྱིས་སློབ་དཔོན་མ་ཡིན་པ་དང ། དཀྱིལ་འཁོར་དུ་མ་ཞུགས་པར་སྐད་ཅིག་ཉིད་ཀྱིས་བཅོམ་ལྡན་འདས་ཀྱི་བྱིན་གྱིས་རློབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བཅོམ་ལྡན་འདས་ཉིད་ངེས་པར་རང་ཉིད་རང་གི་དམ་ཚིག་གི་རྡོ་རྗེ་སློབ་དཔོན་དུ་གྱུར་ནས་འཇུག་པར་མཛད་དོ། །ལས་ཐམས་ཅད་ཀྱི་ཆོ་ག་རྒྱས་པ་ཡང་མཛད་པ་ཡིན་ནོ། ། སྙིང་པོ་འདིའི་བྱིན་གྱིས་རླབས་ཀྱིས་དཀྱིལ་འཁོར་དུ་མ་ཞུགས་ནས་ཡང་དཀྱིལ་འཁོར་ཐམས་ཅད་དུ་ཞུགས་པ་དང ། ཐམས་ཅད་ཀྱི་སློབ་དཔོན་དུ་འགྱུར་རོ། །ལན་གཅིག་བཟླས་པ་བྱས་
162a
༄#། །པས་མི་སོད་པ་དང ། མི་ཚུགས་པ་དང ། ཐམས་ཅད་དུ་སྣ་ཚོགས་པའི་ཡི་གེ་རྣམས་ཀྱིས་མཐོང་བ་དང ། ཐོས་པ་དང ། རིག་པ་དང ། ཤེས་པ་ཡིན་ནོ། །རྡོ་རྗེ་འཆང་ཆེན་པོ་དང་བཅས་པའི་དེ་བཞིན་གཤེགས་པ་ཐམས་ཅད་མ་ལུས་པར་མཛད་ནས། དངོས་གྲུབ་ཐམས་ཅད་དེ་ལ་སྩོལ་བ་ཡིན་ནོ། །ཡོངས་སུ་སྦྱང་བ་དང་བརྟེན་པའི་དོན་དུ་མ་ཡིན་ནོ། །བགེགས་བྱེད་པ་རྣམས་ཀྱང་སྡུག་བསྔལ་སྟེར་བར་འགྱུར་བ་མ་ཡིན་ནོ། །བཅོམ་ལྡན་འདས་བདེ་བ་ཆེན་པོ། །རྡོ་རྗེ་འཆང་ཆེན་ཤིན་ཏུ་བརྟན་ཞིང་ཤིན་ཏུ་དགྱེས་པ།་རྗེས་སུ་ཆགས་པ། ཤིན་ཏུ་རྒྱས་པ། དངོས་གྲུབ་ཐམས་ཅད་དང ། ཕུན་སུམ་ཚོགས་པ་ཐམས་ཅད་དང ། ཡེ་ཤེས་ཐམས་ཅད་དང ། ལས་ཐམས་ཅད་གདོན་མི་ཟ་བའི་གྲུབ་པས་མྱུར་དུ་གྲུབ་པར་མཛད་པ་ཡིན་ནོ། །འོན་ཀྱང་གང་གིས་བྲིས་སམ། འདྲིར་བཅུག་གམ། །ལན་གཅིག་བརྗོད་པའམ། འཛིན་པ་དེས་མ་བསྒྲུབས་ཤིང་དཀྱིལ་འཁོར་དུ་མ་ཞུགས་ན་ཡང་ཚེ་འདི་ཉིད་ལ་ཅི་ལྟར་མངོན་པར་འདོད་པའི་མཆོག་གི་དངོས་གྲུབ་ཐམས་ཅད་འགྲུབ་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དོན་ཡོད་ཅིང་ཐོགས་པ་མེད་པ་དེ་བཞིན་གཤེགས་པ་ཐམས་ཅད་ཀྱི་བདག་པོའི་བདག་དང ། དེ་བཞིན་གཤེགས་པ་ཐམས་ཅད་ཀྱིས་ཀྱང་བར་ཆད་བྱེད་པར་མི་ནུས་ཏེ་ཐམས་ཅད་རྗེས་སུ་ཆགས་པ་ཉིད་ཀྱི་ཕྱིར་རོ། །སངས་རྒྱས་ཀྱི་བྱང་ཆུབ་ཀྱང་རྗེས་
162b
སུ་ཆགས་པ་ལས་བྱུང་བ་ཡིན་ནོ། །འདོད་པ་བརྟན་པས་རྗེས་སུ་ཆགས་པ་སྟེ། དེ་མི་འདོད་པ་ཇི་ལྟར་མཆོག་གི་བདེ་བ་ཆེན་པོ་ལ་སོགས་པའི་གོ་འཕང་ཐམས་ཅད་དུ་འགྱུར་རོ་ཞེས་བྱ་བར་ཐོགས་པ་མེད་པའི་བཅོམ་ལྡན་འདས་ཆགས་པ་ཆེན་པོའི་བདེ་བ་ཆེན་པོས་གསུངས་སོ། །གྲུབ་ན་བདེ་བ་ཆེན་པོ་ནི། རྡོ་རྗེ་ཆགས་པས་སྐད་ཅིག་སྟེར། །སྒྲུབ་པའི་དམ་ཚིག་འདི་ཡིན་ཏེ། །འདི་ནི་ཀུན་གྱིས་འདའ་བར་དཀའ། །སྡིག་པ་ཆེན་པོ་བྱེད་པའམ། དེ་བཞིན་དཀྱིལ་འཁོར་མ་མཐོང་བར། ལན་གཅིག་བཟླས་པས་སྡིག་སྦྱངས་པས་།མཆོག་སྒྲུབ་པས་ནི་གྲུབ་པར་འགྱུར། །རྟོག་པར་གསུངས་པའམ། འདོད་པ་ཡིས། །གཟུགས་བརྙན་རྗེས་སུ་དྲན་བསྒོམས་ན། །སྙིང་པོ་ཡང་ན་གླེགས་བམ་དུ། །ཐམས་ཅད་ཉིད་ཕྱིར་བདག་པོ་གྲུབ། །ང་ལ་གཟུགས་བརྙན་མེད་པ་དང ། གླེགས་བམ་མེད་པར་འགྱུར་ན་ཡང ། །ཡི་གེ་ཧཱུཾ་ནི་ཐམས་ཅད་དུ། །བྲིས་ཏེ་བདག་སྒྲུབ་བསྒྲུབ་པར་བྱ། །ཞེས་བྱ་བ་དོན་ཡོད་ཅིང་ཐོགས་པ་མེད་པའི་དངོས་གྲུབ་ཅན་རྡོ་རྗེ་འཆང་ཆེན་པོས་གསུངས་སོ། །དེ་ནས་རྟོག་པའི་རྒྱལ་པོ་འདིའི། །ལས་ཀུན་སྒྲུབ་པར་འདོད་ན་ནི། །དཀྱིལ་འཁོར་ཐམས་ཅད་ཐིག་བཏབ་ནས། །མཚན་མའི་ཕྱག་རྒྱ་བྲི་བར་བྱ། །དང་པོའི་རྡོ་རྗེས་ཞུགས་ནས་བརྗོད་པར་བྱ་སྟེ། ཆགས་པ་ཆེ་ལས་ཐོགས་པ་ཆེ། ། ཐོགས་པ་ཆེ་ལས་བདེ་བ་ཆེ། །བདེ་བ་ཆེ་ལས་རྡོ་རྗེ་བརྟན། །རྡོ་རྗེ་ལས་ནི་ཕྱག་རྒྱ་འབྱུང ། །སྐུ་གསུང་ཐུགས་ཀྱི་རྡོ་རྗེ་ཡི། །གཟུགས་བརྙན་རབ་ཏུ་སྦྱོར་བ་ཡིས། །ཕྱག་རྒྱ་ཐམས་ཅད་བཤད་པ་
163a
༄#། །སྟེ། །དམ་ཚིག་འདའ་བར་དཀའ་བའོ། །ཕྱག་རྒྱ་བཅིངས་པ་ཙམ་གྱིས་ནི། །སངས་རྒྱས་རྡོ་རྗེ་འཆང་ལ་སོགས། །ཡང་དག་བསྡུས་པར་གྱུར་ནས་ནི ། མཉམ་པའི་འཇིག་རྟེན་གྲུབ་པར་འགྱུར། །ཇི་ལྟར་རྒྱལ་པོའི་ཕྱག་རྒྱ་ཡི། །བཀའ་ནི་འདའ་བར་དཀའ་བ་སྟེ། །དེ་བཞིན་རྒྱལ་བ་ཀུན་གྱི་ནི། །ཕྱག་རྒྱ་འདའ་བར་ནུས་པ་མིན། ། སངས་རྒྱས་ཉིད་དམ་རྡོ་རྗེ་འཆང ། །དེ་ལྟར་བསྐལ་བ་བྱེ་བ་ཡིས། །ཐོབ་མིན་ཇི་ལྟར་ཕྱག་རྒྱ་མཆོག་།བསྡུས་པ་ཚེ་འདི་ཉིད་ལ་ཐོབ། །ཇི་ལྟར་གདུལ་བྱའི་འཇིག་རྟེན་ནི། ། དེ་བཞིན་དངོས་གྲུབ་གསུངས་པ་ཡིན། །དེ་ཡི་ཐབས་ནི་ཕྱག་རྒྱ་སྟེ། །དངོས་གྲུབ་ཐམས་ཅད་བྱེད་པ་མཆོག་།དེ་བཞིན་ཆོ་ག་རྒྱས་པ་དང ། དངོས་གྲུབ་ཐམས་ཅད་གདོན་མི་ཟའོ། །དེ་ནས་དང་པོའི་དཀྱིལ་འཁོར་གྱི་གསང་བའི་དམ་ཚིག་གི་ཕྱག་རྒྱ་བཅིང་བ་འདི་ཡིན་ཏེ། སོར་མོ་ཐམས་ཅད་ཀུན་སྦྱར་ནས། །རྡོ་རྗེ་ཐལ་མོ་ཞེས་བརྗོད་དོ། །སོར་མོ་ནང་དུ་བཅིངས་པ་ལས། །རྡོ་རྗེ་བསྡམས་པར་ཡང་དག་བཤད། །རྡོ་རྗེ་བསྡམས་པའི་ནང་དུ་ནི། །མཛུབ་མོ་མཐེ་བོང་ཡང་དག་སྦྱར། །གཡས་པ་ཡི་ནི་མཐེ་བོང་བཏེགས། །བཅུག་སྟེ་བཙིར་བའི་ལྕགས་ཀྱུ་འཛིན། །མདའ་ལྔ་བསྡུས་པ་བཅིངས་ནས་ནི། །དབུས་མའི་བཅིངས་པ་ནང་དུ་གནས། །མཐེ་བོང་བསྙམས་པའི་མཐའ་
163b
རྡོ་རྗེ། །དང་པོའི་བདེ་བ་དམ་པ་བསྟན། །མཐེབ་མཛུབ་རྩེ་སྦྱར་དབུས་མའི་རྩེ། །མིག་འབྲས་ལྟར་སྦྱར་འཛིན་པ་འོ། །དབུས་མའི་རྡོ་རྗེའི་འོག་ཏུ་ནི། །མཐེ་བོང་གིས་མནན་བཙིར་བར་བྱའོ། །རྡོ་རྗེ་འདྲེན་མ་དང་འདྲ་བ། །སྲིན་ལག་མཐེའུ་ཆུང་ཁ་ཕྱེ་བ། །བསྐོར་ནས་པུས་མོར་བཞག་པ་ནི། །དང་པོའི་རྡོ་རྗེ་ལས་བྱུང་བའོ། །གྱེན་དུ་གཏོར་དང་ཐུར་དུ་བླུགས། ། མཐེ་བོང་སྦྱར་ནས་བསྐོར་བ་དང ། རབ་ཏུ་བརྐྱང་ཞིང་བྱུག་པ་དང ། །བསྐོར་ཞིང་སྤྱི་བོར་གནས་པ་དང ། །བསྐོར་ནས་སྙིང་གར་བཞག་པ་དང ། །ཡོངས་སུ་བསྐོར་ཞིང་དགོད་པའོ། །ཁ་ལས་གྱེན་དུ་འབྱུང་བ་དང ། དེ་བཞིན་གར་གྱིས་བསྐོར་བ་དང ། མཛུབ་མོའི་སོར་མོ་གཉིས་ཀྱི་དང ། །གཡོན་པའི་མཛུབ་མོ་གཡས་ཀྱིས་བཟུང ། །མཛུབ་མོའི་མཐེ་བོ་བཅིང་བ་དང ། མཐེ་བོང་མཐའ་མའི་ནང་དུ་བཞག་།ཁུ་ཚུར་གྱི་ཕྱག་རྒྱ་རྣམས་སོ། །དེ་ནས་དོན་ཡོད་ཅིང་ཐོགས་པ་མེད་པ་འདི་རྣམས་ཁོ་ནའི་ལས་ཀྱི་ཕྱག་རྒྱ་བཅིང་བ་མཆོག་ཏུ་གསང་བ་བླ་ན་མེད་ཅིང་བླ་མའི་ལས་ཀྱི་ཚོགས་སྒྲུབ་པར་བྱེད་པ་དེ་བཞིན་གཤེགས་པ་ཐམས་ཅད་དང་བཅས་པའི་བདག་གིས་ཀྱང་གནོན་པར་མི་ནུས་སོ། །དེ་ལ་བདེ་བ་ཆེན་པོའི་རྡོ་རྗེ་དབུས་མ་ལས་རྡོ་རྗེ་སེན་མོའི་རྩེ་མོ་མཆུ་ལ་སོགས་པར་གཞག་པ་དང ། འཁོར་ལོ་རབ་ཏུ་བསྐོར་བ་དང ། རྡོ་རྗེ་ནུ་དང ། ཅི་ལྟར་འདོད་
164a
༄#། །པའི་དངོས་གྲུབ་ཀུན་ཏུ་བྱེད་པ་རྣམས་ཀྱིས་རྡོ་རྗེ་འཆང་ཆེན་པོ་དང ། སངས་རྒྱས་དང ། བྱང་ཆུབ་སེམས་དཔའ་རྣམས་དང ། རྡོ་རྗེ་རིན་པོ་ཆེ་དང ། མཆོག་གི་དངོས་གྲུབ་པོ། །རྡོ་རྗེ་འདྲེན་མས་ནི་མིག་འབྲས་ཀྱི་ལས་སོ། །གཡས་པ་དང ། གཡོན་པའི་མིག་གིས་བལྟས་པས་ཐམས་ཅད་རྗེས་སུ་ཆགས་པའོ། །མིག་འབྲས་ཚུར་འདྲེན་པས་ནི་དགུག་པའོ། །གཞུག་པས་ཐམས་ཅད་གཞུག་པའོ། །བཙིར་བས་འཆིང་བའོ། །བཙུམས་པ་མེད་པས་དབང་དུ་བྱ་བའོ། །རྡོ་རྗེ་ཀི་ལི་ཀི་ལས་དབུས་མ་ལ་ཙུམ་པ་ན་དང ། འཁྱུད་པ་དང ། བཙིར་བ་དང ། རོལ་བ་དང ། དབུས་མ་དང ། མཐེ་བོའི་རྩེ་མོར་བདེ་བར་བརྡེག་པས་མཐོང་བ་དང ། རོལ་བ་དང ། བཙིར་བ་རྣམས་ཀྱིས་ཐམས་ཅད་ལ་རོལ་བ་སྟེ། རྒྱུ་བ་དང ། མི་རྒྱུ་བ་ཐམས་ཅད་དུ་ལྷའི་གཟུགས་ཀྱིས་བུད་མེད་རྣམས་འབྱུང་བ་ཡིན་ནོ། །ཅི་སྲིད་འདི་རྣམས་དང་རོལ་ཅིང་རྡོ་རྗེ་སེམས་དཔའི་བཙུན་མོ་ལ་ཡང་རོལ་པར་བྱེད་དོ། །རྡོ་རྗེ་ཆུ་སྲིན་མས་བཙིར་བ་དང ། གྱེན་དུ་བཏེག་པ་དང ། མྱང་བ་དང ། དྲུང་དུ་འགྲོ་བ་དང ། མྱུར་དུ་ཟ་བ་རྣམས་ཀྱིས་བརྟན་པའི་ཆགས་པས་བཅིང་བ་དང ། ཐམས་ཅད་ལས་རྣམ་པར་རྒྱལ་བ་དང ། ཆུའི་ནང་དུ་གནས་པ་དང ། འཆག་པ་དང ། ཐམས་ཅད་ཟ་བ་གྲུབ་པའོ། །རྡོ་རྗེ་བསྐོར་བས་གཡོ་
164b
ཞིང་གཡོ་བ་དང ། ལྷོད་པར་བྱེད་པ་དང ། བཙིར་བ་དང ། དབུས་མ་ཕན་ཚུན་ལྷན་ཅིག་དགུག་པ་དང ། མགྱོགས་པར་དབུས་མའི་རྡོ་རྗེ་དྲལ་བ་རྣམས་ཀྱིས་ཁྲོ་བོ་ཐམས་ཅད་འབར་བ་དང ། རབ་ཏུ་ཞི་བ་དང ། ཐམས་ཅད་ལ་རྒྱས་བཏབ་པ་དང ། ལྟུང་བ་དང ། གསོད་པ་རྣམས་མྱུར་དུ་འགྲུབ་པའོ། །མཐེ་བོ་རྡོ་རྗེའི་ནང་དུ་ཞུགས་པའི་མཆོད་པ་རྣམས་ཀྱིས་མཆོད་ན་རྡོ་རྗེ་འཆང་ཆེན་པོས་ཀྱང་མཆོད་པར་འགྱུར་རོ། །དེ་བཞིན་དུ་ལྷའི་བུ་མོ་རྣམས་ཀྱིས་མཐེ་བོ་རྡོ་རྗེའི་ནང་དུ་ཞུགས་པའི་ལས་རྣམས་ཀྱིས་ལྷའི་བུ་མོ་ཐམས་ཅད་ཀྱང་བཀུག་ནས་རོལ་པ་ལ་སོགས་པའི་ལས་ཐམས་ཅད་ཉེ་བར་སྦྱར་བའོ། །རྡོ་རྗེ་ལྕགས་ཀྱུ་མ་ལ་སོགས་པའི་ནང་གི་ཁུ་ཚུར་གྱིས་ལས་རྣམས་ཀྱིས་ཡིད་ཀྱིས་འདོད་པའི་དངོས་གྲུབ་ཐམས་ཅད་དོ། །དེ་ནས་དངོས་གྲུབ་ཐམས་ཅད་ཀྱི་རྒྱུད་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོས་དངོས་གྲུབ་དང ། དམ་ཚིག་དང ། ཡེ་ཤེས་དང ། ལས་ཀྱི་དངོས་གྲུབ་གྲུབ་པའོ། །དོན་ཡོད་པས་གྲུབ་པ་མྱུར་དུ་ཐམས་ཅད་ཀྱི་བདག་ཉིད་བཅོམ་ལྡན་འདས་ཀྱིས་བྱིན་གྱིས་བརླབས་པས་ཡིད་ཀྱིས་འདོད་པ་གྲུབ་པའོ། །རབ་ཏུ་དགའ་བའི་རྡོ་རྗེས་རྟགས་ཀྱི་རྩེ་མོ་གཡོ་བ་ལས་ཐམས་ཅད་དོ། །སྐྱེ་གནས་གཡོ་བས་ཀྱང་དེ་བཞིན་ནོ། །བདེ་བ་ཆེན་པོའི་རྡོ་རྗེ་དབུས་མའི་ལས་བྱེད་པས་དངོས་གྲུབ་ཐམས་ཅད་
165a
༄#། །སྒེག་མོ་དགའ་བའི་རྡོ་རྗེ་མིག་མི་གཡོ་བར་བྱེད་པས་ལས་ཐམས་ཅད་བསྒྲུབ་པར་བྱས་ན་ཐོགས་པ་མེད་པའི་དངོས་གྲུབ་ཀྱིས་གྲུབ་པར་འགྱུར་རོ། །དེ་བཞིན་དུ་རང་གི་ཕྱག་མཚན་རྣམས་ཀྱིས་དངོས་གྲུབ་ཐམས་ཅད་གྲུབ་པར་འགྱུར་རོ། །དང་པོ་ཉིན་རེ་ལན་གཅིག་ཏུ། །ཕྱག་རྒྱ་ཆེན་པོས་སྙིང་པོ་བཟླ། །རྡོ་རྗེ་ཉེ་བའི་སྙིང་པོ་ཡིས། །ཕྱག་རྒྱ་ཐམས་ཅད་ངེས་སྦྱར་བྱ། །ཐམས་ཅད་དོན་ཡོད་གྲུབ་པའོ། །བདེ་བ་ཆེན་པོ་རྡོ་རྗེ་ཆེ། །གསང་བའི་རྟོག་པ་མཆོག་ཕྱིར་མ། །སྒྲུབ་པའི་དོན་ཡོད་དམ་ཚིག་ནི། །སྙིང་པོས་སྐད་ཅིག་དངོས་གྲུབ་སྟེར། །རྩ་རྒྱུད་ཕྱི་མའི་རྒྱུད་དང་བཅས། །ཕྱག་རྒྱའི་རྒྱུད་ནི་བླ་ན་མེད། །དངོས་གྲུབ་མཆོག་ནི་དེ་བཞིན་དུ། །བླ་ན་མེད་པའི་ཡེ་ཤེས་གྲུབ། །དེ་ནས་དང་པོའི་དཀྱིལ་འཁོར་ལ་སོགས་པའི་ཕྱག་རྒྱ་ཐམས་ཅད་རྒྱུད་ཀྱི་ཆོ་ག་རྒྱས་པའོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོའི་རྒྱུད་ནི། །པང་བ་གཡོན་དུ་དགོད་བྱ་བ། །ཞབས་ཀྱི་པདྨ་ཅི་བདེར་བྲི། །རྡོ་རྗེ་སྐྱིལ་མོ་ཀྲུང་བཅས་ནས། །སྐུ་ནི་དྲང་པོར་འཛིན་པ་བདེ། །བསྙེམས་བཅས་རྡོ་རྗེ་གསོར་ནས་ནི། །རྡོ་རྗེ་བསྙེམས་པ་ཡང་དག་འཆང ། །སྐུ་གསུང་ཐུགས་ཀྱི་རྡོ་རྗེ་ཡིས། །རྡོ་རྗེ་སེམས་དཔའ་རང་ཉིད་འགྱུར། །འདིས་ནི་རྡོ་རྗེ་སེམས་དཔའ་ཉིད། །སངས་རྒྱས་ཉིད་དམ་སྲས་ཉིད་དམ། །དངོས་
165b
གྲུབ་ཀུན་གྱི་དབང་ཕྱུག་ཉིད། །ཚེ་འདི་ཉིད་ལ་འགྲུབ་པར་འགྱུར། །སྐུ་གསུང་ཐུགས་ཀྱི་རྡོ་རྗེ་ཡིས། །ཇི་བཞིན་ཕྱག་རྒྱའི་རྗེས་འབྲངས་ནས། །མཚན་མའི་ཕྱག་རྒྱར་ལྡན་པ་ཡི། ། སེམས་དཔའ་ཆེན་པོ་རང་ཉིད་འགྱུར། །ཕྱག་རྒྱ་ཆེན་པོའོ། །དེ་ནས་དམ་ཚིག་གི་ཕྱག་རྒྱ་བཅིང་བ་ནི་བདེ་བ་ཆེན་པོའི་རྡོ་རྗེ་བཤད་དོ། །རྡོ་རྗེ་མདའ་ལ་སོགས་པའི་བཞི་བོ་འདི་ལས་བྱུང་ངོ ། །མཛུབ་མོ་གཉིས་ཀྱིས་ལྕགས་ཀྱུའི་ཕྱི་རོལ་ཏུ་མངོན་པར་ཕྱོགས་པའོ། །མཐེ་བོས་འཁྱུད་པའོ། །མཐེ་བོ་གཉིས་ཁ་ཕེ་ལ་མཛུབ་མོ་གཉིས་ཀྱི་དབུས་མའི་རྩེ་མོ་འདྲེན་ཅིང་སྲིན་ལག་དང ། མཐེའུ་ཆུང་མཉམ་པོར་སྦྱར་ལ་རྩེ་མོ་སོ་སོར་ཁ་ཕྱེ་བས་ཆུ་སྲིན་གྱི་རྒྱལ་མཚན་གྱི་བསྒྲེང་བའོ། །བརླ་གཉིས་ལ་བསྐོར་ཞིང་གནས་པའོ། །དེ་བཞིན་དུ་མཚམས་རྣམས་ལ་རྡོ་རྗེ་ཐལ་མོས་བསྐོར་བས་སོ། །སྒོའི་ཕྱག་རྒྱ་རྣམས་ནི་རྡོ་རྗེ་བསྙེམས་པའི་ཁུ་ཚུར་གྱིས་སོ། །བདེ་ཆེན་མཆོག་གི་ཕྱག་རྒྱ་ཆེ། །དེ་བཞིན་དངོས་གྲུབ་རབ་སྩོལ་བ། ། མདའ་སོགས་དམ་ཚིག་སྣ་ཚོགས་པའི། །དངོས་གྲུབ་ཆེན་པོ་མཆོག་སྟེར་བའོ། །དེ་ནས་ཆོས་ཀྱི་ཕྱག་རྒྱ་ནི། །ཧོ་བིད་ཧཱུཾ་དྷརྀ་ཀ་ཧཱུཾ། དེ་རྣམས་ཀྱང་དངོས་གྲུབ་ཐམས་ཅད་སྩོལ་བའོ། །དེ་ནས་ལས་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་རྡོ་རྗེ་མེད་པ་རྣམས་ཀྱིས་རྟོགས་པར་བྱའོ། །གཡོན་པའི་རྡོ་རྗེ་བསྙེམས་པས་གཡས་པའི་ཁུ་ཚུར་གཏོད་པའི་ཚུལ་གྱིས་སྙིང་གར་
166a
༄#། །བཟུང་བར་བྱས་པ་རྡོ་རྗེ་བསྙེམས་པ་སྟེ། རབ་ཏུ་དགའ་བ་བརྟན་པར་བྱེད་ཅིང་དངོས་གྲུབ་ཐམས་ཅད་སྩལ་བའོ། །མདའ་གཞུ་གཏོད་པས་རྡོ་རྗེ་མཚོན་ཆ་མའོ། །འོག་ཏུ་འཁྱུད་པའོ། །རྒྱལ་མཚན་གྱེན་དུ་བསྒྲེང་བའོ། །བསྙེམས་པ་གཉིས་གཏོད་པའོ། །སྒེག་པ་དང་བཅས་མཐའ་མལ་སོགས་པས་བཀྲོལ་བས་གློག་འགྱུ་བའི་གར་གཡས་སུ་ཡོངས་སུ་བསྐོར་བས་མེ་ཏོག་ལ་སོགས་པའི་ཀ་བུ་ཏའི་ཐལ་མོ་སྤྱི་བོ་ནས་ཕབ། རྡོ་རྗེ་ཐལ་མོ་བཀྲོལ་བས་དེ་བཞིན་དུ་སྒེག་པ་དང་བཅས་པས་མཆོད་པ་དོར་བར་བྱའོ། །རྡོ་རྗེ་གར་ནི་ནང་གི་མཚམས་ལའོ། །རྫོགས་པའམ་ནི་མ་ཚང་བ། །ཡང་ན་ཇི་ལྟར་རྙེད་པ་བཞིན། །མེ་ཏོག་མཆོད་ལ་སོགས་མ་ཡིས། །དངོས་གྲུབ་མཆོག་སྩོལ་ཐུན་མོང་ཡིན། །དམ་ཚིག་གི་ཕྱག་རྒྱའི་སྦྱོར་བའི་མཚན་མ་ཡོངས་སུ་གཟུང་བའོ། །འདི་རྣམས་ཀྱང་དོན་ཡོད་པའི་ལས་སྒྲུབ་པ་རྣམས་སོ། །རྡོ་རྗེ་ཁུ་ཚུར་གྱི་བདུད་རྩིའི་ཆུ་བཟླའོ། །འཇུག་པའི་ཆོ་གའི་ཕྱག་རྒྱ་བཤད་པ་ནི། དཀྱིལ་འཁོར་ཆེན་པོ་ཐམས་ཅད་ཀྱི་རྡོ་རྗེ་སློབ་དཔོན་གྱིས་བྱིན་གྱིས་བརླབས་པའི་གསང་བའི་དམ་ཚིག་ཅེས་བྱ་བའི་འཇུག་པའི་ཕྱག་རྒྱ་གཉིས་པ་ནི། རྡོ་རྗེ་བསྡམས་པ་བཅིངས་ནས་ནི། །གཡོན་མཐེབ་མཛུབ་མོའི་སྐྱེ་གནས་སུ། །གཡས་པ་མཐེ་པོའི་ལྟག་བཅུག་ལ། །བཙིར་བ་བདེ་བ་
166b
སྟེར་བའོ། །མཛུབ་མོ་ལྕགས་ཀྱུ་བཅིངས་པ་དེས། དཀྱིལ་འཁོར་མཆོག་ཏུ་འཇུག་པར་བྱ། །ཡང་ན་སེམས་དཔའ་གང་ལ་འཇུག་།དེ་དེར་མྱུར་དུ་འགྲུབ་པར་འགྱུར། །རབ་ཏུ་དགའ་བའི་རྡོ་རྗེ་མའོ། །རང་གི་ཁུ་ཚུར་གྱིས་རྡོ་རྗེ་བདུད་རྩིའི་ཆུ་བླངས་ནས་ཆུའི་རྒྱུན་དེས་དབང་བསྐུར་ཏེ་འཐུང་དུ་བཅུག་ན་དབང་བསྐུར་བར་འགྱུར་རོ། །དབང་བསྐུར་བ་ཐམས་ཅད་ཀྱིས་ན་ཚོད་དར་ལ་བབ་པ་དང ། ནད་མེད་པ་དང ། དངོས་གྲུབ་ཐམས་ཅད་དང་ལྡན་པར་འགྱུར་རོ། །འདི་ལ་རིམས་དང ། གདོན་དང ། དུག་དང ། སྦྱར་དུག་དང ། མཁའ་འགྲོ་མ་དང ། ཕྱག་རྒྱ་ལ་སོགས་པས་གནོད་པ་བྱེད་པར་མི་ནུས་སོ། །སྐྱིལ་མོ་ཀྲུང་གིས་ནི་གར་དང ། མཆོད་པ་འབུལ་བར་བྱའོ། །དེ་ནས་མཆོད་པ་ནི་རྡོ་རྗེ་གར་གྱིས་སོ། །རྡོ་རྗེ་གླུ་བླངས་པས་རྡོ་རྗེ་གར་དབུལ་བ་ནི་འཁོར་ལོས་བསྒྱུར་བའི་གར་གྱིས་སོ། །རྡོ་རྗེ་ཁུ་ཚུར་ཡོངས་སུ་བཟུང་བ་རྡོ་རྗེ་གཏོད་པས་རྡོ་རྗེ་མཚོན་ཆ་ལ་སོགས་པ་བསྒྲེང་བར་བྱ་སྟེ། མཐར་སྒེག་མོ་དགའ་བའི་རྡོ་རྗེ་གསང་བའི་བཞད་པ་དང་བཅས་པའི་ཞལ་དང ། སྤྱན་གཡོ་བས་ཕྱག་འཚལ་བའོ། །བཅོམ་ལྡན་འདས་རྡོ་རྗེ་འཆང་དགྱེས་པས་དགའ་བ་ཐམས་ཅད་ལ་སོགས་པའི་བདེ་བ་དང ། ཡིད་བདེ་བ་ཐམས་ཅད་ཀྱི་དངོས་གྲུབ་སྩོལ་བ་ཡིན་ནོ། །རྡོ་རྗེ་བསྡམས་པ་བཙིར་བ་རང་གི་སྙིང་གར་བདེ་བ་དགྲོལ་ན་དཀྱིལ་འཁོར་དགྲོལ་བ་ལ་རྡོ་རྗེ་སེམས་དཔའི་
167a
༄#། །སྒོམ་པས་རེ་ཁཱ་དང་རྡོ་རྗེ་ཡིད་ཀྱིས་གྱེན་དུ་བཏེག་ལ་རིམ་པས་ནང་གི་དཀྱིལ་འཁོར་དུ་ཞུགས་ན་དམ་ཚིག་ཉམས་པར་མི་འགྱུར་རོ། །རྡོ་རྗེ་སེམས་དཔའི་སྒོམ་པས་དཀྱིལ་འཁོར་ལ་ཕྱོགས་ན་དམ་ཚིག་ཉམས་པར་ཡང་མི་འགྱུར་རོ། །དེ་ནས་ལས་ཀྱི་ཕྱག་རྒྱའི་རྒྱུད་ནི། བདེ་བ་ཆེན་པོ་རྡོ་རྗེ་སྤྱི་བོ་དང ། དཔྲལ་བ་དང ། སྙིང་གར་བཞག་པ་ཕུབ་སྟེ། ཕྱོགས་ཐམས་ཅད་དུ་འབར་བའི་ར་བ་འབྱུང་བར་འགྱུར་ཏེ། རྡོ་རྗེ་ཁྲོ་བོའི་རྒྱལ་པོ་ཆེན་པོ་རྣམས་ཀྱིས་ཀྱང་འཇུག་པར་མི་ནུས་སོ། །སྙིང་གར་སྒོམ་པ་རྡོ་རྗེ་དང་བཅས་པའོ། །གྱེན་དུ་ཁ་བལྟ་བས་ལྟུང་བར་བྱའོ། །རང་གི་གདོང་ཡོངས་སུ་སྦྱངས་ནས་གདོང་པར་དགྲོལ་བར་བྱའོ། །དབུས་མའི་རྡོ་རྗེ་བརྟག་པར་བྱའོ། །དཔུང་མགོ་གཉིས་སུ་བཞག་ཅིང་སྙིང་གར་བཞག་པར་བྱའོ། །དར་དཔྱངས་ཀྱི་དབང་བསྐུར་བ་མཐོང་བའོ། །སྐྱེ་གནས་ལས་དང ། ཚེ་འབྱིན་པའོ། །སྤྱི་བོར་གཞག་པར་བྱའོ། །ས་ལ་རེག་པར་བྱའོ། །རབ་ཏུ་དགའ་བའི་རྡོ་རྗེའི་རྟགས་ཀྱི་ལྕགས་ཀྱུས་སོ། །རྩེ་མོ་གཏོད་པའི་སྐྱེ་གནས་བཀྲོལ་བ་ལག་པ་གཡོན་པའི་མཐིལ་ཉེད་ཅིང་བསྣུན་པར་བྱའོ། །དེ་བཙིར་བར་བྱའོ། །མིག་བཙུམ་པར་བྱའོ། །བསྐོར་ཞིང་བཙིར་ནས་ཁྲོ་བོའི་ལྟ་བས་བལྟ་བར་བྱའོ། །ཡོངས་སུ་བསྐོར་ནས་ཁའི་མཐར་མཆེ་བ་བསྟན་པའི་གཡས་པའི་མཛུབ་མོས་
167b
སྡིགས་མཛུབ་བོ། །མཛུབ་མོ་ལ་ལྡང་བར་བྱའོ། །མཐེ་བོང་བཙིར་བར་བྱའོ། །ཡི་གེ་མུས་ཕྱག་རྒྱ་དགྲོལ་བའོ། །དང་པོ་མཐེའུ་ཆུང་གི་རྡོ་རྗེས་བསྣུན་པར་བྱའོ། །དེ་ཉིད་རྣམ་པར་འགྱུར་བའི་གདོང་པས་སོ། །དེ་ཉིད་ཡོངས་སུ་བསྐོར་ནས་དཔྲལ་བར་གྱེན་དུ་ཁ་བལྟ་བས་གནས་པའོ། །དེ་ཉིད་ཀྱིས་ནམ་མཁའ་ལ་རྡེག་པའོ། །གཡོ་ཞིང་བཙུམ་པའི་མིག་གིས་ཕྱག་རྒྱ་བཅིངས་པ་དགྲོལ་བའོ། །མཐེའུ་ཆུང་གི་ནོར་བུས་རེག་པར་བྱའོ། །མཛུབ་མོ་མཉམ་པས་ཞབས་ཀྱི་སོར་མོ་བརྗེ་བར་བྱ་སྟེ། བཟའ་བའམ། ཡིད་ཀྱིས་གཞག་པར་བྱའོ། །མཛུབ་མོས་སྦྱིན་སྲེག་བྱེད་པའོ། །རབ་ཏུ་དགའ་བའི་རྡོ་རྗེ་གདོང་པར་དགྲོལ་བར་བྱའོ། །སྦྱིན་སྲེག་བྱེད་པའོ། །མཐེའུ་ཆུང་གཉིས་སྐྱེ་གནས་ལ་སྦྱར་ཏེ་ཕྱག་རྒྱ་དྲལ་བར་བྱའོ། །སྲིན་ལག་དང་མཐའ་མ་མཉམ་པར་སྦྱར་སོར་མོ་བ་དན་གྱི་ཚུལ་དུ་བསྒྲེང་བར་བྱའོ། །རྡོ་རྗེ་བསྡམས་པས་ལེགས་པར་བྱེད་པ་མཛུབ་མོ་མཐེ་བོང་མཉམ་པོར་ཕྱེ་བ་དང་བཀུག་པ་བསྐོར་ནས་དྲལ་བར་བྱའོ། །རྡོ་རྗེ་བསྡམས་པ་རབ་ཏུ་བརྐྱང་པའི་མཐིལ་ས་ལ་རེག་པར་བྱའོ། །དང་པོའི་རྡོ་རྗེ་སྤྲིན་སྐྱེད་པའོ། །མཛུབ་མོས་ཆར་བསྐྱེད་པར་བྱའོ། །མཛུབ་མོས་བཟློག་པར་བྱའོ། །རྡོ་རྗེ་བལྟ་བས་འཕྲོག་པར་བྱའོ། །རབ་ཏུ་དགའ་བའི་རྡོ་རྗེ་བཤད་དོ། །མཛུབ་མོ་གཅིག་གི་ནོར་བུའོ། །མཐེའུ་ཆུང་རྡོ་རྗེ་སྡིགས་མཛུབ་བོ། །མཛུབ་མོས་ས་འོག་
168a
༄#། །ནས་ཆུ་མིག་བཀུག་ལ་བསྟན་པའོ། །བདེ་བ་ཆེན་པོ་རྡོ་རྗེ་ས་ལ་བཟུང་ནས་གཡོ་བར་བྱའོ། །མཛུབ་མོ་གཉིས་ཀྱིས་གདེངས་ཀའི་ཚུལ་བསྟན་པའོ། ། རྩེ་མོ་བཞིའི་འོད་ཟེར་གྱིས་མེ་སྟག་སྟོན་པའོ། །མཛུབ་མོས་རླུང་སྐྱེད་པའོ། །རབ་ཏུ་དགའ་བའི་རྡོ་རྗེས་མཛུབ་མོའི་རྩེ་མོས་མེ་ལོང་དང ། རོལ་པ་དང ། ནམ་མཁའ་ལ་རྡོ་རྗེ་བལྟ་བ་དང ། སྟེང་དུ་བསྐོར་བར་བྱའོ། །རྡོ་རྗེའི་མདངས་ཤིང་དྲུང་ཐམས་ཅད་དང ། ནགས་དང ། སྐྱེད་མོས་ཚལ་དང ། འབྲུ་ཐམས་ཅད་ལ་གཞག་པར་བྱའོ། ། མཛུབ་མོ་རྣོན་པོས་ཀློག་པར་བྱའོ། །བདག་ཉིད་ཀྱིས་ཐམས་ཅད་ལ་དྲང་བར་བྱའོ། །ཕྱི་རོལ་གྱི་དཔུང་མདུན་དུ་བསྐོར་བར་བྱའོ། །རྡོ་རྗེ་ཁུ་ཚུར་གཉིས་ཀྱིས་གློག་འགྱུ་བས་བསྐོར་བར་བྱའོ། །གློག་འགྱུ་བས་ནམ་མཁའ་ལ་བསྐོར་བར་བྱའོ། །གཡས་པས་གཡོན་པ་ལ་བརྡེག་པར་བྱའོ། །རྡོ་རྗེ་ཁུ་ཚུར་གཉིས་གཡོ་ཞིང་གཡོ་བ་མེད་པ་ལ་གཞག་པར་བྱའོ། །མཛུབ་མོ་མཉམ་པའི་དཀྱིལ་འཁོར་ནི་ནོར་བུའོ། །མཛུབ་མོའི་རྡོ་རྗེའི་གཡོན་པའི་མཐེ་བོང་གི་བུ་གར་གཡས་པའི་མཛུབ་མོ་གཞུག་པར་བྱའོ། །རབ་ཏུ་དགའ་བའི་རྡོ་རྗེས་སྟེང་དུ་ནམ་མཁའ་ལ་དཀའ་བ་བསྐྱོད་པ་དང ། སྐྱེ་གནས་གཡོ་བ་དང ། དབུས་མའི་རྡོ་རྗེ་བསྐྱོད་ཅིང་བཙིར་བའོ། །རྡོ་རྗེ་ཡིད་
168b
ལས་བྱུང་བ་དང ། རྡོ་རྗེ་ཀཱི་ལི་ཀཱི་ལ་དང ། རྡོ་རྗེ་ཆུ་སྲིན་དང ། རྡོ་རྗེ་བསྙེམས་མ་ནི་བཤད་པའོ། །རྡོ་རྗེ་བསྡམས་པའི་མཛུབ་མོས་གསོལ་བ་འདེབས་པར་བྱེད་པས་མཛུབ་མོ་གཉིས་ཀྱི་རང་གི་མིག་བཀབ་ལ་ཡིད་ཀྱིས་ཅི་ལྟར་མངོན་པར་འདོད་པ་བསྒོམ་པར་བྱའོ། །སྦྱིན་སྲེག་བྱེད་པའོ། །མཛུབ་མོས་རང་མིག་བཙུམ་པར་བྱའོ། །སོས་གཟུང་བར་བྱའོ། །བཏུང་བར་བྱའོ། །རྩེ་མོ་བསྐྱོད་ཅིང་སྦྱིན་སྲེག་བྱའོ། །མཐེ་བོའི་འོག་ཏུ་རབ་ཏུ་བརྐྱང་ལ་སྦྱིན་པར་བྱའོ། །རྡོ་རྗེ་སྐུའི་ཕྱག་རྒྱ་མཆོག་ནི་མཐེ་བོང་སེམས་དཔའི་སྐྱིལ་མོ་ཀྲུང་གི་མཛུབ་མོ་རྡོ་རྗེ་ནི་རྡོ་རྗེའི་སྐུ་མཆོག་གོ་།དབུས་མའི་མཉམ་པའི་མགོ་ལྕོགས་ཀྱིས་ངག་འབྱིན་པའོ། །སྙིང་གར་བཞག་ནས། ཨོཾ་བོ་དྷི་ཙིཏྟ་ཨུཏ་པཱ་ད་ཡཱ་མི་ཞེས་བྱ་བ་བསྒོམ་མོ། །མཐེ་བོའི་རྟགས་གཡོན་པའི་མཐེ་བོའི་བུ་གར་གཞུག་པར་བྱའོ། །རྡོ་རྗེ་ཁུ་ཚུར་གཉིས་གློག་འགྱུ་བ་ལྟར་བསྐོར་བས་རྡོ་རྗེ་འཁོར་ལོའོ། །རྡོ་རྗེ་བསྙེམས་མ་རྡོ་རྗེ་དང་བཅས་པའོ། །ཡི་གེ་ཧཱུཾ་གིས་སྡིགས་མཛུབ་བོ། །རབ་ཏུ་དགའ་བའི་རྡོ་རྗེ་གར་གྱི་ཁ་སྦྱོར་རོ། །རྡོ་རྗེ་བསྙེམས་མ་བཤད་དོ། །མཐེའུ་ཆུང་གི་ཟུར་གྱིས་མདུད་པའི་རྩེ་མོ་མཉམ་པ་ཡོངས་སུ་བསྐོར། འོག་ནས་བཏེག་པ་མཛུབ་མོ་མཉམ་པའི་རྩེ་མོ་དང ། དབང་བསྐུར་བའི་གནས་སུ་གཞག་ན་རྡོ་རྗེ་མཛོད་སྤུའོ། །དེ་བཞིན་
169a
༄#། །གཤེགས་པ་ཐམས་ཅད་ཀྱི་ཁུ་ཚུར་ནི་འོག་ནས་བཤད་པར་བྱ་འོ། །རྡོ་རྗེ་གར་གྱི་བཤད་པ་ཡིན་ནོ། །མཛུབ་མོ་ཕྱིར་ཕྱོགས་པ་བསླང་བའི་རྡོ་རྗེ་སྙིང་གར་བཛྲོ་ཧཾ་ཞེས་བྱ་བ་ནི་ཕྱག་རྒྱ་ཆེན་པོའོ། །དེ་བཞིན་དུ་སྙིང་གར་རྡོ་རྗེ་སྒོམ་ཞིང་མ་ཧཱ་ས་ཧ་ཧཾ་ཞེས་བྱའོ། །ཡེ་ཤེས་ཀྱི་ཁུ་ཚུར་གྱིས་ཏ་ཐཱ་ག་ཏོཿ ་ཧཾ་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཤད་དོ། །དེ་ནས། རྡོ་རྗེ་ཁུ་ཚུར་བཅིང་པ་ནི། །མཛུབ་མོ་རྡོ་རྗེ་བསྡམས་པ་བཅིང ། །མཛུབ་མོ་བཀུག་པ་གཉིས་ཀྱིས་བརྒྱན། །མཐའ་མ་གཉིས་ཀྱི་ནང་དུ་ནི། །མཐེ་བོང་གཉིས་ཀྱི་ཁ་སྦྱར་བ། །དམ་ཚིག་ཆེན་པོ་རྡོ་རྗེ་མཆོག་།ཁུ་ཚུར་དངོས་གྲུབ་མཆོག་ཀུན་སྩོལ། །རྡོ་རྗེ་ཁུ་ཚུར་རབ་ཏུ་བརྟགས།། །། དེ་ནས་དེ་བཞིན་གཤེགས་པའི་རིགས་ཀྱི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་ནི་ཕྱག་རྒྱ་ཆེན་པོ་རྣམས་ནི་ཏ་ཐཱ་ག་ཏོ་ཉ་ཧཾ་ཞེས་བྱ་བས་བཅིང་བར་བྱའོ། །དམ་ཚིག་ཆོ་ག་མཆོག་ནི་མཐེ་བོང་མཐེ་ཆུང་མཉམ་པའོ། །རྡོ་རྗེ་སྣ་ཚོགས་རྡོ་རྗེ་འོ། །མདའ་ལ་སོགས་པ་བཅིང་བ་ནི་དེ་བཞིན་ནོ། །ལས་ཀྱི་ཕྱག་རྒྱ་རྣམས་ནི་ཉིད་དོ། །དེ་བཞིན་གཤེགས་པའི་ཁུ་ཚུར་གྱིས་དེ་བཞིན་དུ་བཅིང་བ་འོ། །ལྕགས་ཀྱུ་མ་བཞིན་ནོ། །ཁུ་ཚུར་གྱི་ཁྱད་པར་རྡོ་རྗེ་བསྔམས་པའི་ཁུ་ཚུར་མཐེ་བོང་གཉིས་ལ་གནས་པ་
169b
དམ་ཚིག་གི་ཁུ་ཚུར་ཏེ། དེ་གཉིས་སུ་བྱས་པ་དེ་བཞིན་གཤེགས་པའི་ཁུ་ཚུར་རོ། །དེ་བཞིན་གཤེགས་པའི་ཁུ་ཚུར་གཉིས་དང ། དཀྱིལ་འཁོར་ལྔས་ཕྱག་འཚལ་ཞིང་འཇུག་པར་བྱའོ། །འདི་དག་ཀྱང་དངོས་གྲུབ་ཐམས་ཅད་སྩོལ་བའོ། །དེ་ནས་ལས་ཀྱི་ཕྱག་རྒྱ་བཅིང་བ་ནི་རྡོ་རྗེ་སྐུ་མཆོག་གིས་སྤྱི་གཙུག་དང ། མཛོད་སྤུ་དང ། སྙིང་ཁར་བཞག་སྟེ། བསྐོར་ཞིང་བསྐོར་བས་མཁུར་ཚོས་དང ། གཙུག་ཏོར་དུ་གཟུང་བར་བྱའོ། །དེ་བཞིན་གཤེགས་པའི་ཁུ་ཚུར་གཉིས་ཀྱི་མཛུབ་མོ་གཉིས་ཀྱིས་སྡིགས་མཛུབ་བྱ་བ་དང ། སྦྱིན་པའི་ཚུལ་བྱའོ། །གཡོན་པ་སྙིང་གར་བཟུང་སྟེ། གཡས་པའི་མཛུབ་མོ་གཅིག་གིས་ས་ལ་རེག་པའོ། །གཡོན་པའི་ཁྲོ་བོའི་མཛུབ་མོ་གཡས་པའི་ཁུ་ཚུར་གྱི་ནང་དུ་མངོན་པར་ཕྱོགས་པས་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་སངས་རྒྱས་ཉིད་དུ་མྱུར་དུ་ཐོབ་པའོ། །རྡོ་རྗེ་བསྡམས་པའི་འོག་ཏུ་བཅིང་བས་བརྟན་པའི་སྐྱིལ་མོ་ཀྲུང་ངོ་།། །།དེ་ནས་རྡོ་རྗེ་རིགས་ཀྱི་ཕྱག་རྒྱའི་ཆོ་ག་རྒྱས་པའི་རྒྱུད་ནི། འཇུག་པའི་ཕྱག་རྒྱ་རབ་ཏུ་དགའ་བའི་རྡོ་རྗེ་ཁྲོ་བོའི་དགུག་པའི་ཕྱག་རྒྱ་དེ་ཉིད་དོ། །ཕྱག་རྒྱ་ཆེན་པོ་རྣམས་ཀྱང་དེ་བཞིན་ནོ། ། དམ་ཚིག་ནི་འོག་དུ་རྡོ་རྗེ་བསྔམས་པའི་སོར་མོ་ཐམས་ཅད་འབར་བའི་ནང་དུ་མཐེ་བོང་རྡོ་རྗེ་ནི་རྡོ་རྗེ་ཁྲོ་བོ་ཏི་རིན་ཏི་རི་སྟེ། རྡོ་རྗེ་འཆང་ཆེན་པོ་སྒྲུབ་པར་བྱེད་པའོ། །གཞན་དག་
170a
༄#། །ཀྱང་དེ་བཞིན་ནོ། །ཆོས་ཀྱི་རྣམས་ནི་དེ་བཞིན་ཏེ། ལས་ཀྱི་ཕྱག་རྒྱ་རྣམས་ནི་དེ་བཞིན་ནོ། །ཁུ་ཚུར་གྱི་ཁྱད་པར་རོ། །རྡོ་རྗེ་ཁུ་ཚུར་གྱི་མཛུབ་མོ་སྡིགས་མཛུབ་བོ། །དམ་ཚིག་ལས་བྱུང་བ་ནི་དེ་བཞིན་ནོ། །དེ་ནས་ལས་ཀྱི་ཕྱག་རྒྱ་རྣམས་ནི་རྡོ་རྗེ་ཧཱུཾ་མཛད་ལས་བྱུང་བའོ། །ལག་པ་རྡོ་རྗེའི་མཐེའུ་ཆུང་གདུ་བུར་བཅིངས་པའི་སྡིགས་མཛུབ་ནི། རྡོ་རྗེ་ཧཱུཾ་མཛད་དེ་གཡོན་བརྐྱང་པས་གནས་པའོ། །གཡོན་པའི་མཛུབ་མོའི་རྡོ་རྗེ་སྡིགས་མཛུབ་བོ། །སྣའི་དབུགས་དང ། ཡི་གེ་ཧཱུཾ་གིས་སོ། །ཁྲོས་པས་ཡི་གེ་ཨ་སྦྱར་བར་བྱ་འོ། །ཧ་ཧར་དགོད་པས་བཞད་པར་བྱའོ། །སྙིང་གར་རྡོ་རྗེ་བསྒོམས་པས་རྡོ་རྗེའི་ཕྱག་རྒྱ་ཆེན་པོའོ།། །།དེ་ནས་པདྨའི་རིགས་ཀྱི་ཕྱག་རྒྱའི་ཆོ་ག་རྒྱས་པའི་རྒྱུད་ནི། དེ་བཞིན་གཤེགས་པའི་རྡོ་རྗེའི་མཛུབ་མོ་གཉིས་བཀུག་ལ་དེའི་སྙིང་གར་གཞག་པ་ནི་རྡོ་རྗེ་པདྨའོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་ནི་དེ་བཞིན་ནོ། །དམ་ཚིག་གི་ཁྱད་པར་དང ། ཁུ་ཚུར་གྱི་ཁྱད་པར་རོ། །ཁ་འབུས་པའི་ཐལ་མོ་ལས་མཐེ་བོ་དང ། མཐེའུ་ཆུང་ཁ་ཕྱེ་བས་འདབ་མ་བཞི་པའི་པདྨ་ཆེན་པོའོ། །ཐམས་ཅད་བཅིང་བ་ནི་ཅི་ལྟ་བ་བཞིན་ནོ། །ཁུ་ཚུར་གྱི་ཁྱད་པར་ནི་རྡོ་རྗེ་བསྡམས་པའི་མཛུབ་མོ་གཉིས་བཀུག་ལ་མཐེ་བོང་མཉམ་པར་བརྐྱང་ལ་དབུས་མ་གཉིས་ཕྱི་རོལ་ཏུ་
170b
གཤིབས་པ་དང་བཅས་པ་བཞག་པ་སྟེ་དེ་གཉིས་སུ་བྱས་པ་པདྨའི་ཁུ་ཚུར་རོ། །དེ་ནས་ལས་ཀྱི་ཕྱག་རྒྱ་རྣམས་ནི་པདྨ་ཆེན་པོའི་བཤད་པའོ། །དེ་ཉིད་སྤྱི་བོ་ལའོ། །དེ་ཉིད་རྡོ་རྗེ་ལྟ་བས་བལྟ་བར་བྱའོ། །དེ་ཉིད་སོར་མོ་ཐམས་ཅད་ཁ་ཕྱེ་བས་སོ། །དེ་ཉིད་རྡོ་རྗེ་གཉིས་གཉིས་ཀྱི་མིག་གོ་།དེ་ཉིད་ལེགས་པར་བྱེད་པའོ། །དེ་ཉིད་དཔྲལ་བར་བྱས་ནས་གསོལ་བ་གདབ་པར་བྱའོ། །དེ་ཉིད་གཡོན་པའི་སྐྱེ་གནས་སུ་མཐེ་བོའི་རྟགས་བཅག་པའོ།། །།དེ་ནས་ནོར་བུའི་རིགས་ཀྱི་ཕྱག་རྒྱའི་རྒྱུད་ཀྱི་ཆོག་རྒྱས་པ་ནི། རྡོ་རྗེ་ཐལ་མོ་རབ་ཏུ་བརྐྱང་ཞིང་མཐེ་བོང་མཉམ་པོ་ལ་མཛུབ་མོ་བཀུག་པ་བཞག་སྟེ་དཔྲལ་བའི་མཛོད་སྤུའི་ཕྱོགས་སུ་བཞག་ན་དབང་བསྐུར་བ་ཐམས་ཅད་གསོལ་བའོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བ་དེ་བཞིན་ནོ། །དམ་ཚིག་གི་རྡོ་རྗེ་བསྡམས་པའི་མཛུབ་མོ་གཉིས་ཕྱིར་བཀུག་པའི་སོར་མོ་མཉམ་པོར་ནོར་བུ་མཐེ་བོང་རྡོ་རྗེས་བཀག་པ་རྡོ་རྗེ་ནོར་བུའོ། །གཞན་རྣམས་ནི་དེ་ལས་བྱུང་བའི་རྡོ་རྗེ་རིན་པོ་ཆེའི་ཁུ་ཚུར་རོ། །དེ་གཉིས་སུ་བྱས་ནས་རིན་བོ་ཆེའི་ཁུ་ཚུར་རོ། །དེ་ནས་ལས་ཀྱི་ཕྱག་རྒྱ་རྣམས་ནི་རྡོ་རྗེ་རིན་པོ་ཆེ་བསྒྲེང་བ་བསྒྲུབ་པར་བྱ་བའི་མྱུ་གུའོ། །ཁ་སྦྱར་ནས་སྲིན་ལག་དང་མཐེའུ་ཆུང་མཉམ་པོར་ཁ་ཕྱེ་བས་མཆོག་གི་དར་དབྱངས་འཛིན་པའོ། །དབུས་མའི་ནོར་བུའོ། །མཐེའུ་ཆུང་གི་རྩེ་མོའོ། །འོག་
171a
༄#། །དུ་གཏོར་བའོ། །རྡོ་རྗེ་བསྡམས་པ་ལས་ནི་མཛུབ་མོའི་ནོར་བུ་བརྐྱང་བའི་ཕྲེང་བའོ། །རྡོ་རྗེ་རིན་པོ་ཆེ་གསུམ་མདུན་དང ། ལོགས་གཉིས་སུ་བཅིང་བར་བྱའོ། །རྡོ་རྗེ་རིན་པོ་ཆེའི་མཛོད་སྤུའི་ཕྱོགས་སུ་བཞག་སྟེ་མཛུབ་མོའི་རྩེ་མོས་སྟེང་དུ་མདུད་པ་དར་དཔྱངས་ཀྱི་ཚུལ་དུ་བྱའོ། །མཐེ་བོང་གཉིས་བརྟན་པའི་སྐྱིལ་མོ་ཀྲུང་བྱས་ལ་མཛུབ་མོ་གཉིས་བཀུག་ནས་མཉམ་པའི་ཁ་འབུས་པའི་མཆོག་གི་ལུས་ཅན་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གོ་།དེས་སྤྱི་བོ་ནས་བརྩམས་ཏེ་མདུན་དང ། གཡས་དང ། རྒྱབ་དང ། གཡོན་དུ་བྱ་བ་བྱས་ནས་དེ་བཞིན་དུ་མདུན་དང ། རྒྱབ་དང ། ལོགས་གཉིས་སུ་སྒེག་པ་དང ། བཅས་པས་མཐའ་མ་ལ་སོགས་པ་བཀྲོལ་བ་བྱས་ནས། ཕྲེང་བ་བཅིང་བའི་མདུད་བ་བྱ་ཞིང་དར་དཔྱངས་ཀྱིས་ཚུལ་དུ་བྱ་སྟེ། རྡོ་རྗེ་སེམས་དཔའི་དབང་བསྐུར་བ་དང་སྲིད་པ་གསུམ་གྱི་དབང་ཕྱུག་ཐམས་ཅད་ཀྱི་མཆོག་རྡོ་རྗེ་སེམས་དཔའ་ཉིད་ཐོབ་པ་ཡིན་ནོ། །རྡོ་རྗེ་ཐམས་ཅད་ཀྱི་རྟོག་པ་ཐམས་ཅད་ནི་གོང་དུ་ཅི་ལྟ་བ་བཞིན་ནོ། །དེ་ནས་ཕྱིའི་ཕྱག་རྒྱ་ཤེས་པར་བྱ་བ་ནི་འདི་ཡིན་ཏེ། ཕྱག་རྒྱ་ཆེན་པོ་ནི་གཡོན་པར་ཁམ་ཕོར་དང་གཡས་སུ་མདའ་གཏོད་པའི་ཕྱག་རྒྱའོ། །དམ་ཚིག་གི་འཇུག་པ་ནི་མཛུབ་མོ་དང ། གུང་མོ་དང ། སྲིན་ལག་མཉམ་པོར་ལེགས་པར་སྦྱར་
171b
ལ་རྩེ་གསུམ་པར་བྱས་ལ་མཐེ་བོ་དང་མཐེའུ་ཆུང་གཉིས་ལུ་གུ་རྒྱུད་ནི་མགོན་པོ་རྣམས་ཀྱིའོ། །ཅི་ནས་ལྟར་བཟུང་བ་བཞིན་དུ་ལྷ་མོ་རྣམས་ཀྱི་ཕྱག་རྒྱའོ། །དམ་ཚིག་ནི་གུང་མེ་དང་སྲིན་ལག་རྡོ་རྗེ་བསྡམས་པས་མཛུབ་མོ་དང ། གུང་མོ་དང ། མཐེའུ་ཆུང་དང ། སྲིན་ལག་མཐེ་བོའི་སོར་མོའི་རྩ་བར་བསྡུས་པ་ནི་སྲིང་མོ་བཞིའི་དཀྱིལ་འཁོར་གྱི་ཕྱག་རྒྱའོ། །གལ་ཏེ་དཀྱིལ་འཁོར་བརྟག་པར་མི་ནུས་ན་དེའི་ཚེ་འདི་བཅིངས་པས་དཀྱིལ་འཁོར་ཤིན་ཏུ་བརྟག་པར་འགྱུར་ཏེ་དངོས་གྲུབ་ཀྱང་ཤིན་ཏུ་གསོལ་བ་ཡིན་ནོ། །ལྷ་མོ་རྣམས་འདི་ཉིད་ཀྱིས་སྤྱན་དྲང་བ་དང་འཇུག་པར་བྱའོ།། །།དེ་ནས་སྒྱུ་མའི་འཁོར་ལོ་ནི་གཡོན་པའི་སྟེང་དུ་སོར་མོ་ཐམས་ཅད་ཤིན་ཏུ་བརྐྱང ། དམ་ཚིག་དཀྱིལ་འཁོར་གྱི་འཁོར་ལོ་སྟེ། ལྷ་མ་ཡིན་ཐམས་ཅད་ཀྱི་སྒྱུ་མ་ཐམས་ཅད་དོན་ཡོད་པར་བསྒྲུབ་པའོ། །གདེངས་ཀ་ཅན་གྱི་དབང་པོའི་མཐེ་བོང་གཉིས་པས་རྩེ་མོ་ཕྱི་རོལ་ཏུ་ཕྱོགས་པའི་སོར་མོ་བརྒྱད་ཀྱིས་གདེངས་ཀའི་ཚོགས་ཀྱིས་ཀླུ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བའི་དམ་ཚིག་སྟེ་ལྟོ་འཕྱེ་ཆེན་པོའི་ལག་པའོ། །གལ་ཏེ་འདའ་བར་བྱེད་ན་འཆི་བར་འགྱུར་རོ། །གུང་མོ་དང་སྲིན་ལག་བཞི་པོས་མདུད་པ་བྱས་ལ་མགུ་བའི་ཚུལ་གྱིས་སྟེང་དུ་སྒྲེང་སྟེ་བསྡུས་ནས་མཐེའུ་ཆུང་གཉིས་ཀྱི་རྩེ་མོས་བརྡེགས་པར་བྱས་ན་དུག་ཐམས་
172a
༄#། །ཅད་འབར་བ་དང ། དུག་ཐམས་ཅད་བཅིང་བ་དང ། ཀུན་ནས་བསྡུས་ཏེ་བརྡེགས་པས་དུག་ཐམས་ཅད་འཇིག་པའོ། །འདི་ཉིད་ཀྱི་དུག་ཐམས་ཅད་ཟ་བ་དང ། འཕྲོ་བ་དུག་མེད་པར་བྱའོ། །ཕྱི་རོལ་གྱི་ཕྱག་རྒྱའི་ཆོ་ག་རྒྱས་པའི་རྒྱུད་དོ།། །།དེ་ནས་རྟོག་པ་ཐམས་ཅད་བསྒྲུབ་པའི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་བཤད་པར་བྱའོ། །ཞེས་བཅོམ་ལྡན་འདས་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་ཆེན་པོ་རྡོ་རྗེ་སེམས་དཔས་གསུངས་སོ། །དེ་ལ་སྐུའི་ཕྱག་རྒྱ་ལྔ་ནི། ཕྱག་རྒྱ་ཆེན་པོ་རྡོ་རྗེ་འཆང་ཆེན་པོའི་རིགས་ལའོ། །དམ་ཚིག་གི་ཕྱག་རྒྱ་དེ་བཞིན་གཤེགས་པའི་རིགས་ལའོ། །རྡོ་རྗེ་ཧཱུཾ་མཛད་ནི་རྡོ་རྗེའི་རིགས་ལའོ། །པདྨ་ཆེན་པོ་ནི་པདྨའི་རིགས་ལའོ། །རྡོ་རྗེ་ནོར་བུ་ཆེན་པོ་ནི་ནོར་བུའི་རིགས་ལའོ། །དེ་ནས་གསུང་གི་ཕྱག་རྒྱ་ལྔ་ནི། སྙན་པའི་གླུའི་ཡུལ་ཐམས་ཅད་ཀྱི་ཚུལ་རྣམས་ནུས་པ་ཅི་ལྟ་བུའི་གླུའི་རྒྱུན་ཐམས་ཅད་ཀྱིས་གླུ་བླངས་ཏེ་བཟླས་པ་ནི་རྡོ་རྗེ་སེམས་དཔའི་རིགས་ལ་རབ་ཏུ་དགའ་བའི་རྡོ་རྗེའི་ངག་གོ་།ལྕེ་དང ། མཆུ་གཉིས་ཤིན་ཏུ་གཡོ་བ་མེད་ཅིང་ངོས་ཤིན་ཏུ་མ་འབྱར་བ་དབྱངས་དང་བྲལ་བའི་རྡོ་རྗེའི་ངག་དེ་ནི་དེ་བཞིན་གཤེགས་པའི་རིགས་ལ་སྟེ། རིགས་ཐམས་ཅད་དགོས་པའོ། །སྤྲིན་གྱི་འབྲུག་སྒྲ་ཡི་གེ་ཧཱུཾ་གི་སྒྲ་ཕྲ་མོ་དང་ལྡན་པ་ནི་རྡོ་རྗེ་ཁྲོ་བོའི་རྡོ་རྗེ་ཞེས་བྱ་བའི་ངག་རྡོ་
172b
རྗེའི་རིགས་སོ། །ཏིང་ངེ་འཛིན་གྱི་ངག་པདྨའི་རིགས་ལ་ཏེ་ཐམས་ཅད་དག་པའི་པདྨ་ཞེས་བྱ་བའོ། །ཆོས་ཀྱི་ངག་ནོར་བུའི་རིགས་ལ་ཏེ་མཆོད་པའི་ནོར་བུའོ། །དེ་ནས་ཐུགས་ཀྱི་ཕྱག་རྒྱ་ལྔ་སྟེ། ཐམས་ཅད་བསྒྲུབ་པར་བྱ་བ་ལ་ནི་རྡོ་རྗེ་སེམས་དཔའི་དངོས་པོས་སོ། །སངས་རྒྱས་རྗེས་སུ་དྲན་པས་དེ་བཞིན་གཤེགས་པའི་རིགས་ལའོ། །བདག་གམ་བདག་གི་མདུན་དུ་གསད་པར་བྱའོ་ཞེས་བྱ་བ་ནི་རྡོ་རྗེའི་རིགས་ལའོ། །སྦྱང་བར་བྱའོ་ཞེས་བྱ་བ་ནི་པདྨའི་རིགས་ལའོ། །ནམ་མཁའ་ཐམས་ཅད་བསྒོམས་པས་ནོར་བུའི་རིགས་ལའོ།། །།དེ་ནས་རྡོ་རྗེའི་ཕྱག་རྒྱ་ལྔ་ནི། རྡོ་རྗེ་རྩེ་མོ་ལྔ་འོད་ཟེར་གྱི་ཕྲེང་བས་རྩེ་མོ་ཡོངས་སུ་ཁྱབ་པ་དང ། བདེ་བ་ཆེན་པོའི་རྡོ་རྗེ་ཁུ་ཚུར་གྱིས་རྡོ་རྗེ་སེམས་དཔའི་རིགས་ལའོ། །རྡོ་རྗེ་རྩེ་ལྔ་པ་འོད་ཟེར་དང་བཅས་པ་དེ་བཞིན་གཤེགས་པའི་ཁུ་ཚུར་གྱིས་དེ་བཞིན་གཤེགས་པའི་རིགས་ལའོ། །འབར་བའི་རང་བཞིན་རྡོ་རྗེ་རྩེ་བཞི་པ་རྡོ་རྗེ་ཁྲོ་བོའི་ཁུ་ཚུར་གྱིས་རྡོ་རྗེའི་རིགས་ལའོ། །པདྨའི་སྟེང་གི་དེ་བཞིན་གཤེགས་པའི་རྡོ་རྗེའི་པདྨའི་ཁུ་ཚུར་གྱིས་པདྨའི་རིགས་ལའོ། །རྡོ་རྗེ་ཕྱེད་པ་རྡོ་རྗེ་རིན་པོ་ཆེ་ནོར་བུའི་ཁུ་ཚུར་གྱིས་ནོར་བུའི་རིགས་ལའོ།། །།དེ་ནས་རིགས་ཐམས་ཅད་རྟོགས་པའི་གསང་བ་ཐོགས་པ་མེད་ཅིང་གདོན་མི་ཟ་བའི་དེ་ཁོ་ན་ཉིད་ཀྱི་བདེན་པ་མྱུར་དུ་མཆོག་
173a
༄#། །གི་དངོས་གྲུབ་ཀྱི་ཆོ་ག་རྒྱས་པ་བསྒྲུབ་པ་ཐམས་ཅད་ཀྱི་རྒྱུད་བཤད་པར་བྱའོ་ཞེས་བཅོམ་ལྡན་འདས་དོན་ཡོད་ཅིང་ཐོགས་པ་མེད་པར་མྱུར་བའི་མཆོག་གི་དངོས་གྲུབ་ཅན་རྡོ་རྗེ་སེམས་དཔས་གསུངས་སོ། །རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་གོ་།གསུང་གི་ཕྱག་རྒྱ་ནི་སྙིང་པོའོ། ། ཐུགས་ཀྱི་ཕྱག་རྒྱ་ནི་ཉེ་བའི་སྙིང་པོའོ། །རྡོ་རྗེའི་ཕྱག་རྒྱ་ནི་རྡོ་རྗེ་སྙེམས་མའི་འོ།། །།དེ་ནས་ཕྲ་མོའི་ལས་ཀྱི་ཕྱག་རྒྱའི་རྒྱུད་དོན་ཡོད་ཅིང་ཐོགས་པ་མེད་པ་འདི་ཡིན་ཏེ། མ་མཆུའི་སྒྲོས་སོ་རྣམས་ཀྱིས་བཟུང་ནས་རྡོ་རྗེའི་ལྟ་བས་བལྟ་ཞིང་ཐམས་ཅད་རྗེས་སུ་ཆགས་པ་དང ། དབང་དུ་བྱེད་པ་དང ། རོལ་པ་དང ། བརྟན་པར་བྱེད་པའི་དངོས་གྲུབ་སྐད་ཅིག་གིས་སོ་སོར་ཉམས་སུ་མྱོང་བ་ནི་རྡོ་རྗེ་སེམས་དཔའི་རིགས་ལའོ། །རྡོ་རྗེ་ཕྲ་མོས་བྱིན་གྱིས་བརླབས་ཏེ། དམ་ཚིག་ཙམ་དུ་བལྟ་བ་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བའི་དངོས་གྲུབ་ཐོབ་པར་འགྱུར་བ་ནི་དེ་བཞིན་གཤེགས་པའི་རིགས་ལས་བྱུང་བའོ། །ཁྲོ་གཉེར་དང་བཅས་པའི་ཁྲོ་བོས་མི་བཟད་པའི་ལྟ་བ་བྱས་ནས་ཤིན་ཏུ་མ་མགལ་བསྡམས་ནས་ཐམས་ཅད་ལྟུང་བ་དང ། དབབ་པ་
173b
དང ། རེངས་པ་དང ། ཉལ་དུ་བཅུག་པ་དང ། རྒྱས་བཏབ་པ་དང ། གསོད་པ་དང ། གཞན་གྱི་དཔུང་རྨུགས་པ་དང ། ཐམས་ཅད་ལས་རྣམ་པར་རྒྱལ་བའི་དངོས་གྲུབ་སྐད་ཅིག་མས་འབྱུང་པར་འགྱུར་བ་ནི་ཁྲོ་བོའི་རྡོ་རྗེ་ཁུ་ཚུར་རིགས་ལའོ། །བཙུམས་པ་མེད་པས་བརྟན་པའི་རྡོ་རྗེའི་ལྟ་བས་མཆུ་མཉམ་པ་ནི་སྒྲིབ་པ་ཐམས་ཅད་རྣམ་པར་སྦྱང་བ་དང ། བསྲུང་བ་དང ། ཏིང་ངེ་འཛིན་མངོན་དུ་གྱུར་པའི་དངོས་གྲུབ་འབྱུང་བ་ནི་པདྨའི་རིགས་ལའོ། །འབར་བའི་ལྟ་བས་ཞལ་རྣམ་པར་བཞད་པས་དབང་བསྐུར་བ་ཐམས་ཅད་དང ། ཕུན་སུམ་ཚོགས་པ་ཐམས་ཅད་དང ། མཆོད་པའི་ཆོ་ག་རྒྱས་པའི་དངོས་གྲུབ་མྱུར་དུ་ཐོབ་པར་འགྱུར་རོ།། །།དེ་ནས་ཕྱག་རྒྱ་ཐམས་ཅད་བཅིང་བ་སྒྲུབ་པ་ནི། །ཉིན་རེ་མངོན་དུ་ལན་གཅིག་ཏུ། །སྙིང་པོ་རང་ཉིད་བསྒྲུབ་པ་སྟེ། །རང་གིས་བཅིངས་ནས་མདོར་བསྡུས་པས། །ཕྱག་རྒྱ་ཐམས་ཅད་གྲུབ་པར་འགྱུར། །དེ་ནས་ཕྱག་རྒྱ་ཐམས་ཅད་ཀྱི་གསང་བ་སྒྲུབ་པ་ནི། །སྙིང་པོའི་ཕྱག་རྒྱ་སྔགས་རིག་པའི། །སྒྲུབ་པ་འདི་ནི་རྨད་དུ་བྱུང ། །ཅི་ནུས་ཅི་འདོད་བཟླས་པ་ཡིས། །ཉེ་བའི་སྙིང་པོ་གསང་བ་འོ། །དོན་ཡོད་ཐོགས་མེད་གསང་བ་དང ། །རང་བཞིན་གྲུབ་པ་དེ་བཞིན་དུ། །བསོད་ནམས་མེད་པ་རྣམས་ལ་ཡང ། །དངོས་གྲུབ་ཀུན་ལ་གྲུབ་པར་འགྱུར། །དཀྱིལ་འཁོར་མ་ཞུགས་པ་རྣམས་ལ། །སྙིང་པོ་
174a
༄#། །མཆོག་འདི་སྦྱིན་མི་བྱ། །གསང་བའམ་གསང་རྒྱུད་དམ་པ་ནི། །གལ་ཏེ་དངོས་གྲུབ་ཡིད་འོང་འདོད། །གང་གི་ཁྱིམ་དུ་གནས་གྱུར་པའི། །ཕྱག་རྒྱ་སྔགས་འདི་དགེ་བ་སྟེ། །གཞན་གྱིས་མི་ཐུབ་མི་སོད་ཅིང ། །དངོས་གྲུབ་ཐམས་ཅད་ཐོབ་པར་འགྱུར། །དུམ་བུ་གཉིས་པ་སྔགས་དུམ་གྱི་རྩ་རྒྱུད་རྫོགས་སོ།། །།སེམས་ཅན་ཐམས་ཅད་བདེ་དོན་དང ། །བསྒྲུབ་པ་ཐམས་ཅད་སྒྲུབ་པའི་ཕྱིར། །སྲས་བཅས་སངས་རྒྱས་ཐམས་ཅད་ཀྱིས། །རྡོ་རྗེ་མཆོག་འཛིན་དེ་ལ་ཞུས། །བདེ་བ་ཆེན་པོ་རབ་སྒྲུབ་དང ། །ཆགས་པ་ཆེན་པོ་རྣམ་དག་ཕྱིར། །རྟོག་པ་ཐམས་ཅད་བསྡུས་པའི་རྒྱུད། །སེམས་དཔའ་ཆེན་པོ་བཤད་དུ་གསོལ། །རྣམ་རྟོག་མེད་པའི་ཆོས་རྣམས་ལ། ། འདིར་ནི་རྟོག་པ་གང་ཞིག་བརྗོད། །སྙིང་པོ་ཞེས་ནི་གང་བཤད་པའི། །ཡེ་ཤེས་རྒྱུད་ནི་ཇི་ལྟར་ཡིན། །དཀྱིལ་འཁོར་ཞེས་ནི་བརྗོད་པ་ཅི། །དེར་འཇུག་ཡོན་ཏན་ཅི་དང་ལྡན། །རིགས་ཀྱི་འཁོར་ལོའི་ཁྱད་པར་དང ། །གཞན་ཡང་སྒྲུབ་པ་ཇི་ལྟ་བུ། །རྡོ་རྗེ་སེམས་དཔའ་སེམས་དཔའ་ཉིད། །འདི་ཡང་ཅི་ལྟར་དེ་ཉིད་གང ། །ཐོག་མ་ཐ་མ་མེད་ཉིད་དང ། །རབ་ཏུ་དགའ་བ་ཇི་ལྟར་འགྱུར། །དང་པོའི་སྙིང་པོ་འདི་ཡི་ཡིན། །དེ་བཞིན་ཉིད་ནི་གང་ཞིག་ཡིན། །ཧཱུཾ་གི་གླུ་ནི་གང་གིས་གསུངས། །འདི་ཡི་དོན་ནི་ཇི་ལྟར་
174b
བརྗོད། །སེམས་ནི་རྡོ་རྗེ་ཉིད་དང་ནི། །དེ་བཞིན་ཕྱག་རྒྱ་རྡོ་རྗེ་ཉིད། །སངས་རྒྱས་རྣམས་ནི་འབྱུང་བ་དང ། །རིགས་རྣམས་ཀྱང་ནི་དེ་བཞིན་དུ། །སངས་རྒྱས་བྱང་ཆུབ་བསྒྲུབ་པ་དང ། ། སངས་རྒྱས་བདུད་དུ་ཇི་ལྟར་འགྱུར། །རྟོགས་པ་རྣམས་ཀྱང་བསྒྲུབ་པ་དང ། །དང་པོའི་སྙིང་པོའི་དེ་ཉིད་དང ། །སྙིང་པོ་ཕྱག་རྒྱ་སྔགས་རིག་པའི། །སྒྲུབ་པ་དེ་བཞིན་དངོས་གྲུབ་རྣམས། ། བསོད་ནམས་མེད་པའི་ཅི་ལྟར་འགྲུབ། །སློབ་དཔོན་ཉིད་དུ་ཇི་ལྟར་འགྱུར། །མེ་ཏོག་སྤོས་དང་མར་མེ་དང ། །དྲི་རྣམས་ཅི་ཡིན་ཇི་ལྟར་འགྱུར། །མཆོད་པ་ཡང་ནི་ཇི་ལྟར་བྱ། །གསང་བའི་མཆོད་པ་ཇི་ལྟར་ཡིན། །ཀུན་བྱེད་ཀུན་ཟ་སྡིག་པ་ཅན། །ཤིན་ཏུ་སྡིག་ཅན་ཇི་ལྟར་གྲུབ། །དོན་ཡོད་ཐོག་མེད་དངོས་གྲུབ་ཀྱིས། །དེ་རྣམས་ཇི་ལྟར་འགྲུབ་པར་འགྱུར། །གསང་བ་དེ་ཡང་གང་ཞིག་ཡིན། །འདི་ཉིད་དུ་ནི་གང་གིས་འགྲུབ། །བདེ་བ་ཆེན་པོ་རབ་གྲུབ་དང ། །ཆགས་པ་ཆེན་པོ་རྣམ་དག་ཕྱིར། །གསང་བའི་དེ་ཉིད་གསང་བ་ནི། །བདག་ཅག་རྣམས་ལ་ཀུན་བཤད་གསོལ།། །།དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་གསན་ནས། ཞལ་རབ་ཏུ་བཞད་དེ། བཞད་པ་ཆེན་པོའི་དམ་ཚིག་ཆེན་པོ་ཐམས་ཅད་ཀྱི་དེ་ཁོ་ན་ཉིད་ཀྱི་རྡོ་རྗེ་ཞེས་བྱ་བའི་རྣམ་པར་གནོན་པར་མཛད་ནས་རྟོག་པ་ཐམས་ཅད་ཀྱི་རྒྱུད་ཕྱི་མ་འདི་
175a
༄#། །གསུངས་སོ། །དེ་ལ་རྣམ་པར་མི་རྟོག་པ་ཁྱབ་པའི་རྒྱུད་ནི། །རྣམ་རྟོག་མེད་པའི་ཏིང་འཛིན་ལས། །སེམས་ཅན་དོན་ནི་ཡོངས་སུ་བརྟག་།དེས་ན་བརྟག་པར་བཤད་བྱ་སྟེ། །རྟོག་པ་ཡོངས་སུ་དག་ཕྱིར་རོ། །དེ་ལ་བདེ་བ་ཆེན་པོ་རྡོ་རྗེ་གསང་བའི་དཀྱིལ་འཁོར་རྒྱུད་ནི་འདི་ཡིན་ཏེ། །ས་ལ་ཡི་གེའི་གནས་བྲིས་ནས། ། བདེ་བ་ཆེན་པོ་ཞེས་བརྗོད་པ། །དེ་ཡི་དམ་ཚིག་རྡོ་རྗེ་སྟེ། །སྙིང་པོ་ཐམས་ཅད་སྒྲུབ་བྱེད་པ་འོ། །དེ་ལ་དཀྱིལ་འཁོར་གྱི་བཤད་པའི་རྒྱུད་ནི། །ཅི་ལྟར་གནས་དང་ཅི་ལྟར་དུས། །ཅི་ལྟར་འཇིག་རྟེན་ཅི་ལྟ་བུ། །འཁོར་ནི་དགོད་པར་བྱ་བ་སྟེ། །དེ་ལྟ་བུ་ཡི་དཀྱིལ་འཁོར་འདྲི། །དེ་ནས་དཀྱིལ་འཁོར་ཐམས་ཅད་དུ་ཞུགས་པའི་རྣམ་པར་སྨིན་པའི་རྒྱུད་ནི། །རྡོ་རྗེ་སེམས་སོགས་སེམས་དཔའ་ཡི། །འཁོར་བཅས་དེ་ཚེ་དཀྱིལ་འཁོར་དུ། །ཞུགས་པའི་བསོད་ནམས་ཅི་འདྲ་བ། །དེ་ལྟར་བྲིས་པའང་དེ་དང་འདྲ། ། དེ་ནས་རིགས་ཐམས་ཅད་ཀྱི་འཁོར་ལོའི་ཁྱད་པར་གྱི་རྒྱུད་ནི། །རྡོ་རྗེ་འཁོར་ལོ་བསྟན་པ་བཞིན། །ལྕགས་ཀྱི་འཁོར་ལོ་དམ་པ་སྟེ། །འབར་བའི་འཁོར་ལོ་དེ་བཞིན་དུ། ། པདྨ་འདབ་བརྒྱད་ནོར་བུ་ཆེ། །དེ་ནས་དཀྱིལ་འཁོར་ཐམས་ཅད་སྒྲུབ་པའི་རྒྱུད་ནི། །དཀྱིལ་འཁོར་བརྟག་པར་བྱས་ནས་ནི། །ནང་གི་རིམ་པར་ཞུགས་བྱ་སྟེ། །དཀྱིལ་འཁོར་
175b
དག་ལ་ཛཿ ་ཧཱུཾ་བཾ། །ཧོཿ ་པྲ་སིད་དྷྱ་མཾ་བརྗོད་བྱ། དེ་ནས་རྡོ་རྗེ་སེམས་དཔའ་ཉིད་རྒྱུད་ནི། སངས་རྒྱས་ལ་སོགས་འགྲོ་ཀུན་གྱི། །ཐམས་ཅད་བདག་ཉིད་བཅོམ་ལྡན་མཆོག་།སེམས་ཅན་འབྱུང་ཕྱིར་སེམས་དཔའ་སྟེ། །རྡོ་རྗེ་སེམས་དཔའ་རབ་ཏུ་གྲགས། །དེ་ནས་དམ་ཚིག་ཆེན་པོའི་དེ་ཁོ་ན་ཉིད་བཤད་པའི་རྒྱུད་ནི། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །འཁོར་བ་མྱ་ངན་འདས་དེ་ཉིད། །དེ་ནས་ཐོག་མ་དང ། ཐ་མ་མེད་པའི་དེ་ཁོ་ན་ཉིད་བཤད་པའི་རྒྱུད་ནི། ཐོག་མཐའ་མེད་པ་ཐམས་ཅད་ནི། །ནམ་མཁའ་འབྱུང་བ་ཆེན་པོའི་གནས། །ནམ་མཁའ་སྐྱེ་བ་སྐྱེ་མེད་ཕྱིར། །རྡོ་རྗེ་སེམས་དཔའ་དེ་བཞིན་ནོ། །དེ་ནས་བཅོམ་ལྡན་འདས་རབ་ཏུ་དགའ་བའི་བཤད་པའི་རྒྱུད་ནི། རབ་ཏུ་དགའ་ཕྱིར་ཉོན་མོངས་ཏེ། །འགྲོ་བ་ཐམས་ཅད་བདེ་འདོད་པ། །དེ་ལ་བདེ་བ་རྣམ་དག་ཕྱིར། །སྲིད་གསུམ་སྔ་རོལ་བཅོམ་ལྡན་འབྱུང ། ། དེ་ནས་དང་པོའི་སྙིང་པོའི་དེ་ཁོ་ན་ཉིད་བཤད་པའི་རྒྱུད་ནི། ཆགས་པ་ཀུན་ལ་ཆགས་པ་ཆེ། །འདོད་ལྡན་ཐམས་ཅད་སད་པར་བྱེད། །འདོད་ཆགས་འབར་བ་དྲི་ཟ་ཡི། །སྙིང་པོའི་ཕྱག་རྒྱ་རྡོ་རྗེའོ། །དེ་ནས་ཡི་གེ་ཧཱུཾ་གི་གླུ་བླང་བའི་རྒྱུད་ནི། གླུ་ལས་ཆགས་པ་དགའ་ལས་འདོད། །རབ་ཏུ་དགའ་ལས་ཐམས་ཅད་འབྱུང ། །ཐམས་ཅད་འབྱུང་བར་གྲུབ་པའི་
176a
༄#། །ཕྱིར། །བསྐལ་པ་དང་པོར་བཅོམ་ལྡན་གསུངས། །དེ་ནས་ཡི་གེ་ཧཱུཾ་གི་བཟླས་པའི་དོན་གྱི་རྒྱུད་བཤད་པའི་རྒྱུད་ནི། མྱུར་དུ་ཐམས་ཅད་རྗེས་ཆགས་པས། །དངོས་གྲུབ་ཐམས་ཅད་རྗེས་སུ་ཆགས། །རྗེས་སུ་ཆགས་པར་བྱེད་མཆོག་ནི། སྙིང་པོའི་བཟླས་པའི་དོན་ཡིན་ནོ། །དེ་ནས་རྡོ་རྗེ་སེམས་རྒྱུད་ནི། གླུ་རྣམས་ཅི་ལྟར་ཁྲོ་བོ་ནི། བསྡུས་ནས་ཀུན་ཏུ་འཇུག་པ་ན། །རྡོ་རྗེ་ཐོག་ནི་བརྟན་གྱུར་པ། །དེ་བཞིན་རྡོ་རྗེ་བསྡུས་པ་འོ། །དེ་ནས་རྡོ་རྗེ་སེམས་དཔའ་འབྱུང་བ་ཤེས་པའི་རྒྱུད་ནི། ཐམས་ཅད་བདག་ཉིད་སེམས་དཔའ་ནི། བདག་གི་བདག་ཉིད་ལ་ཡང་གནས། །རྡོ་རྗེ་སེམས་དཔའ་དངོས་སུ་ནི། །མྱུར་དུ་ཐམས་ཅད་དུ་ཡང་ཞུགས། །དེ་ནས་དེ་བཞིན་གཤེགས་པ་འབྱུང་བ་ཤེས་པའི་རྒྱུད་ནི། འདོད་ལས་ཆགས་པ་དགའ་ལས་བདེ། །བདེ་ལས་སྡིག་པ་སྡིག་ལས་སྡུག་།སྡུག་ལས་ཏིང་འཛིན་ཤིན་ཏུ་བརྟན། །རྡོ་རྗེ་ཉིད་ལས་སངས་རྒྱས་འབྱུང ། །དེ་ནས་དེ་བཞིན་གཤེགས་པའི་རིགས་ལ་སོགས་པ་འབྱུང་བ་ཤེས་པའི་རྒྱུད་ནི། དེ་བཞིན་གཤེགས་པའི་རིགས་ཉིད་དང ། །དེ་ཉིད་རྡོ་རྗེ་རིགས་ཆེན་པོ། །དེ་ཉིད་པདྨའི་རིགས་དག་བ། །དེ་ཉིད་ནོར་བུའི་རིགས་མཆོག་བཤད། །དེ་ནས་མངོན་པར་བྱང་ཆུབ་པ་ཤེས་པའི་རྒྱུད་ནི། རང་སེམས་སོ་སོར་རྟོག་པ་ནི། །
176b
བྱང་ཆུབ་སེམས་ནི་ཡང་དག་འབྱུང ། །རྡོ་རྗེ་ཉིད་ཕྱིར་སངས་རྒྱས་ཉིད། །བདག་ཉིད་སངས་རྒྱས་རབ་ཏུ་བསྒོམ། །དེ་བཞིན་གཤེགས་པ་བདུད་ཉིད་དུ་ཤེས་པའི་རྒྱུད་ནི། །རང་སེམས་ཉིད་ནི་བདུད་ཉིད་དེ། །སེམས་ཉིད་དེ་བཞིན་གཤེགས་པ་ཡིན། །རང་གི་སེམས་ནི་གདུལ་བའི་ཕྱིར། །སངས་རྒྱས་བདུད་ཉིད་དུ་ནི་འབྱུང ། །དེ་ནས་རྟོག་པ་ཐམས་ཅད་སྒྲུབ་པ་ཤེས་པའི་རྒྱུད་ནི། །རྟོག་པ་ཀུན་ལ་གྲུབ་བྱ་གང ། །རྒྱུ་བ་དང་ནི་མི་རྒྱུ་ཡིན། །རང་གི་ལྷ་ཡི་རྣལ་འབྱོར་གྱིས། །དེ་དག་ཐམས་ཅད་བསྒྲུབ་པར་བྱ། །དེ་ནས་དང་པོའི་སྙིང་པོ་སྒྲུབ་པ་ཤེས་པའི་རྒྱུད་ནི། །བཟླས་པའི་དོན་ཤེས་ནུས་པ་ཡིས། །རྡོ་རྗེ་སེམས་དཔའ་རབ་བསྒྲུབ་སྟེ། །ཅི་སྲིད་འདོད་པའི་བཟླས་པ་མཆོག་།དངོས་གྲུབ་ཆེན་པོའི་བདེ་བ་སྟེར། །དེ་ནས་སྙིང་པོ་དང ། ཕྱག་རྒྱ་དང ། སྔགས་དང ། རིག་པ་སྒྲུབ་པ་ཤེས་པའི་རྒྱུད་ནི། །སེམས་དཔའ་གང་གི་སྙིང་པོ་དང ། །ཕྱག་རྒྱ་སྔགས་དང་རིག་པ་དང ། །བཟླས་པའི་དོན་དུ་སེམས་དཔའ་ཆེ། །བདག་ཉིད་དང་ནི་བསྒྲུབ་བྱ་བ། །དེ་ནས་དངོས་གྲུབ་ཤེས་པའི་རྒྱུད་ནི། །རྡོ་རྗེ་སེམས་དཔའི་དངོས་གྲུབ་ཆེ། །དེ་བཞིན་དེ་བཞིན་གཤེགས་ཀུན་གྱི། །བྱང་ཆུབ་རྡོ་རྗེ་སེམས་དཔའ་ཉིད། །ལས་ཀུན་མཆོག་གི་དངོས་གྲུབ་ཕྱིར། །དེ་ནས་བསོད་ནམས་མེད་པ་རྣམས་ཀྱི་དངོས་གྲུབ་གྲུབ་པ་ཤེས་པའི་རྒྱུད་ནི། །ཅི་འདོད་འཁོར་
177a
༄#། །ལོ་བྲིས་ནས་ནི། །ཅི་ཡང་རུང་བའང་ཐལ་བས་ཀྱང ། །སེམས་དཔའ་ཆེན་པོ་བཞག་བྱས་ནས། །ཉིན་ཞག་བཞིར་ནི་བསྒྲུབ་པར་བྱ། །དེ་ནས་སློབ་དཔོན་ཉིད་ཀྱི་གྲུབ་པ་ཤེས་པའི་རྒྱུད་ནི། བདེ་བ་ཆེན་པོ་རྡོ་རྗེ་ཡི། །གསང་མཆོག་དམ་ཚིག་གྲོང་ཁྱེར་དུ། །ཅི་བཞིན་རང་ཉིད་རབ་ཞུགས་ཏེ། །བདུད་རྩིའི་ཆུ་ཡིས་དབང་བསྐུར་བྱ། །དེ་ནས་མེ་ཏོག་ལ་སོགས་པའི་མཆོད་པ་འབུལ་བའི་ཤེས་པའི་རྒྱུད་ནི། རྡོ་རྗེ་ཅན་ལ་མཆོད་པ་ཀུན། །དེ་བཞིན་གཤེགས་པའི་རིགས་ལ་དཀར། །རྡོ་རྗེ་བདག་ཉིད་ནག་པོ་སྟེ། །དམར་པོ་པདྨ་ནོར་བུ་སེར། །དེ་ནས་དབུལ་བ་ཤེས་པའི་རྒྱུད་ནི། རྫོགས་པ་འམ་ནི་མཚང་བ། །ཡང་ན་ཇི་ལྟར་རྙེད་པ་ནི། རྡོ་རྗེ་གར་སོགས་མཆོད་པ་ཡིས། །རྟག་ཏུ་ཐམས་ཅད་འགྲུབ་པར་འགྱུར། །དེ་ནས་དུས་ཀྱི་མཆོད་པ་ཤེས་པའི་རྒྱུད་ནི། །དྲུག་ལྡན་ལ་སོགས་སྙམ་པའི་གླུ། །གླུ་ནི་ཐམས་ཅད་ཅི་འདོད་པས། །རྡོ་རྗེ་འབྱེད་མ་ལ་སོགས་འགྲོལ། །མཆོད་པ་དག་ནི་རབ་ཏུ་བྱ། །དེ་ནས་གསང་བའི་མཆོད་པ་ཤེས་པའི་རྒྱུད་ནི། རྡོ་རྗེ་གར་བཅས་མཆོད་པ་ནི། གོ་རིམས་ཅི་ལྟ་བ་བཞིན་དུ། །བཟླས་པའི་དོན་གྱིས་མ་བརྗོད་ཀྱང ། །མཆོག་གི་དངོས་གྲུབ་འགྲུབ་པར་འགྱུར། །དེ་ནས་སྡིག་པ་ཆེན་པོ་བྱེད་པའང་གྲུབ་པ་ཤེས་པའི་རྒྱུད་ནི། དཀྱིལ་འཁོར་ལ་ནི་མ་ཞུགས་ཀྱང ། །
177b
ཚུལ་ཁྲིམས་འཆལ་བ་ལ་སོགས་པ། །ཏིང་ངེ་འཛིན་གྱི་སྟོས་ཀྱིས་ནི། སྡིག་པ་ཀུན་ལས་གྲོལ་བར་འགྱུར། །དེ་ནས་དངོས་གྲུབ་མི་ཐོབ་པའི་རྒྱུ་ཤེས་པའི་རྒྱུད་ནི། ཆགས་པ་སྨད་པར་མི་བྱ་སྟེ། །རྣམ་དག་དེ་བཞིན་བདེ་བ་སྟེར། །བཅོམ་ལྡན་འདས་ཀྱང་ཆགས་པ་ཆེ། །འདི་མ་དག་པས་འགྲུབ་མི་འགྱུར། །དེ་ནས་མཆོག་གི་དངོས་གྲུབ་སྒྲུབ་པ་ཤེས་པའི་རྒྱུད་ནི། ཇི་བཞིན་ཡུལ་དང་ལྡན་གྱུར་ནས། །མཆོག་གི་དངོས་གྲུབ་བསྒྲུབ་པར་བྱ། །རྟོག་པ་ཀུན་ནས་རྣལ་འབྱོར་འདི། །ཚེ་འདི་ཉིད་ལ་སྒྲུབ་པར་བྱེད། །བདེ་བ་ཆེན་པོ་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོའི་རྡོ་རྗེ་རིན་པོ་ཆེ་ཆེན་པོ་ལས། རྟོག་པ་ཐམས་ཅད་ཀྱི་རྒྱུད་ཕྱི་མའི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རྟོག་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསང་བ་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རྡོ་རྗེ་རིན་པོ་ཆེ། དེ་བཞིན་གཤེགས་པ་ཐམས་ཅད་ཀྱི་ཆོ་ག་གཟིགས་པའི་ཡེ་ཤེས་ཀྱི་དབང་ཕྱུག་གི་རྡོ་རྗེའི་པདྨ། དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་པའི་མཛད་པས་འཕྲིན་ལས་དམ་པའི་ཆོ་ག་རྒྱས་པའི་རྡོ་རྗེས་ཐམས་ཅད་ལ་ཁྱབ་པ། མ་ལུས་ཤིང་ལུས་པ་མེད་པའི་རྡོ་རྗེའི་ཁམས་བསྟན་པའི་དངོས་གྲུབ་ཀྱི་ཆོ་ག་རྒྱས་པ་ནམ་མཁའི་ཁམས་ཀྱི་མཐར་ཐུག་པར་ཆོས་ཀྱི་དབྱིངས་སྤྲོ་བ་ཐམས་ཅད་ཁྱབ་པའི་དེ་བཞིན་
178a
༄#། །གཤེགས་པ་ཐམས་ཅད་ཀྱིས་འཁོར་ལོ་མངོན་པར་མཁྱེན་པར་མཛད་ནས་དང་པོའི་སྙིང་པོའི་གསང་བའི་དེ་ཁོ་ན་ཉིད་ཀྱི་རྡོ་རྗེའི་སྒྲུབ་པའི་རྒྱུད་འདི་གསུངས་སོ། །ཅི་སྲིད་འཁོར་བའི་གནས་ལ་ཞུགས། །དེ་སྲིད་སེམས་ཅན་གདོན་པར་མཛད། །མྱ་ངན་འདས་བཞུགས་གཟི་བརྗིད་ཅན། །སེམས་ཅན་དོན་ནི་ནུས་པ་མིན། །དེ་ཕྱིར་སེམས་དཔའ་དམ་པ་རྣམས། །འཁོར་བ་སྲིད་དུ་འཁོར་བར་བཞུགས། །སེམས་ཅན་དོན་ནི་མངོན་པར་བཞེད། །ཐམས་ཅད་དག་པའི་མཆོག་ཆོས་ཅན། །དེ་བཞིན་གཤེགས་པས་མི་འདུལ་བས། །སེམས་ཅན་དོན་མི་མཛད་པ་དེ། །འདིར་ནི་རབ་གྲུབ་དངོས་གྲུབ་མཆོག་།དུས་ཀུན་དུ་ནི་ཐམས་ཅད་དུ། །རྡོ་རྗེ་འཆང་ཆེན་ལ་སོགས་པ། །འདི་ལྟར་བསོད་ནམས་རྣམ་སྨིན་གྱིས། །ཀུན་ལ་མཐོང་བ་ལ་སོགས་ཀྱིས། །རང་གི་ལས་ཀྱིས་མཛད་མི་སྤྱོད། །དཀྱིལ་འཁོར་ལ་ནི་མ་ཞུགས་ཀྱང ། །སྲིད་པ་འདི་ལ་མྱུར་འགྲུབ་འགྱུར། །ཤིན་ཏུ་མཐོང་བ་ལ་སོགས་ཀུན། །སེམས་ཅན་ཐམས་ཅད་རབ་སྩོལ་མཛད། །ཀུན་ནས་དུས་ཀུན་ཐམས་ཅད་ལ། །དངོས་གྲུབ་ཐམས་ཅད་རབ་སྩོལ་འགྱུར། །རྒྱལ་པོ་རྡོ་རྗེ་འཆང་ཆེན་པོ། །སྲིད་པའི་དབང་ཕྱུག་ཀུན་གྱི་གཙོ། །དེ་ཕྱིར་བསྒྲུབ་བྱ་འདི་བཤད་བྱ། །དངོས་གྲུབ་ཤིན་ཏུ་རྟག་པའོ། །གང་གིས་སྲིད་པ་འདི་ཉིད་དུ། །ཤིན་ཏུ་རྟག་
178b
པའི་དངོས་གྲུབ་ཐོབ། །ལུགས་མ་འམ་ནི་བརྡུངས་མ་འམ། །རི་མོར་བྲིས་པ་འམ་འདུས་བྱས་པའི། །ཕྱག་ན་རྡོ་རྗེའི་སྐུ་གཟུགས་ནི། །ཅི་བཞིན་བཤད་པར་རབ་གཞུག་བྱའོ། །བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་དེ་ཁོ་ན་ཉིད་སྒྲུབ་པའི་དངོས་གྲུབ་གྱི་ཆོ་ག་རྒྱས་པ་འོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་ཕྱག་རྒྱའི་ཡེ་ཤེས་ཀྱི་སླར་ཡང་ཕྱག་རྒྱ་ཐམས་ཅད་སྒྲུབ་པའི་དངོས་གྲུབ་ཀྱི་རྒྱུད་འདི་གསུངས་སོ། །ཉིན་རེ་སྔ་རོལ་དུས་ཅི་བཞིན། །དང་པོའི་རྡོ་རྗེ་བདེ་བ་ཆེ། །འདིས་ནི་རྟག་པ་ཐམས་ཅད་ལ། །ཕྱག་རྒྱ་ཐམས་ཅད་མདོར་བསྡུས་པས། །དམ་ཚིག་ཡང་དག་བཅིངས་ནས་གྲུབ། །ཕྱི་ནས་མ་བསྒྲུབས་ཀྱང་གྲུབ་འགྱུར། །དེ་ནས་བཅོམ་ལྡན་འདས་ཀྱིས་རྡོ་རྗེ་ཆོས་ཀྱི་དེ་ཁོ་ན་ཉིད་ཀྱི་གསང་བའི་སྔགས་སྒྲུབ་པ་འདི་གསུངས་སོ། །ལངས་པ་འམ་ནི་འདུག་པ་འམ། །གང་དང་དེར་ནི་གནས་པ་འམ། །ཐམས་ཅད་རྗེས་ཆགས་རྣལ་འབྱོར་གྱིས། །དངོས་གྲུབ་ཐམས་ཅད་ཐོབ་པར་འགྱུར། །དེ་ནས་བཅོམ་ལྡན་འདས་ཀྱིས་ལས་ཀྱི་གསང་བའི་དེ་ཁོ་ན་ཉིད་ཀྱི་རྒྱུད་འདི་གསུངས་སོ། །གསང་བའི་གར་མཆོག་མཆོད་པ་འམ། །ཡང་ན་མཆོད་པ་ཅི་བདེ་བར། །བྱས་ཏེ་མགོན་པོ་བསྒྲུབ་བྱས་ན། །མཆོག་གི་དངོས་གྲུབ་མྱུར་དུ་འཐོབ། །དེ་ནས་རང་གི་ཕྱག་རྒྱས་བདག་
179a
༄#། །ཉིད་བསྒྲུབ་པའི་རྒྱུད་ནི། །ཕྱག་རྒྱ་ཆེན་པོ་མཉམ་གཞག་སྟེ། །རང་གི་སྙིང་པོས་ལན་གཅིག་བསྒྲུབ། །བརྟན་ཞིང་ཤིན་ཏུ་དགྱེས་ཀུན་ཆགས། །ཤིན་ཏུ་དགྱེས་མྱུར་བདག་པོ་གྲུབ། །དེ་ནས་ཡི་གེ་ཧཱུཾ་གི་གླུ་བླང་བའི་གྲུབ་པའི་རྒྱུད་ནི། རི་བྷི་ད་སོགས་རྒྱན་དང་ལྡན། །ཅི་ནུས་པ་དང་ཅི་འདོད་པ། །དྲི་ཟ་དང་པོ་བླངས་ནས་ནི། །ཡི་གེ་ཧཱུཾ་གིས་གྲུབ་པར་འགྱུར། །ཞེས་བཅོམ་ལྡན་འདས་ཆགས་པ་ཆེན་པོ་དང་པོའི་རྡོ་རྗེ་སེམས་དཔའ་རྡོ་རྗེ་འཆང་ཆེན་པོས་གསུངས་སོ། །དེ་ཁོ་ན་ཉིད་ཆེན་པོའི་གསང་བའི་དངོས་གྲུབ་སྒྲུབ་པའི་རྒྱུད་དོ།། །།དེ་ནས་རྟོག་པ་ཐམས་ཅད་ཀྱི་ལས་ཀྱི་ཕྱག་རྒྱ་བཤད་པར་བྱའོ་ཞེས་བྱ་བ་བཅོམ་ལྡན་འདས་ཐོག་མ་དང ། ཐ་མ་མེད་པའི་འཕྲིན་ལས་ཅན་རྡོ་རྗེ་སེམས་དཔས་གསུངས་སོ། །ཤིན་ཏུ་རིང་བའི་ཚེ་འཕེལ་བ་ནི་བདེ་བ་ཆེན་པོའི་རྡོ་རྗེའི་ཆོས་སོ། །ཤིན་ནུ་གཞོན་པའི་ན་ཚོད་འཕེལ་བ་ནི་བདེ་བ་ཆེན་པོའི་རྡོ་རྗེའི་བཅུད་ཀྱིས་ལེན་གྱིས་སོ། །གཟུགས་ཆེན་པོ་དང ། གཟི་བརྗིད་ཆེན་པོ་འཕེལ་བ་ནི་བདེ་བ་ཆེན་པོའི་རྡོ་རྗེའི་གཟུགས་ཀྱི་གཟི་བརྗིད་ཀྱིས་སོ། །འདུ་བྱེད་ཆེན་པོ་ཐམས་ཅད་འཕེལ་བ་ནི་བདེ་བ་ཆེན་པོ་རྡོ་རྗེ་འདུ་བྱེད་ཆེན་པོས་སོ། །སེམས་ཅན་ཐམས་ཅད་ཀྱི་བདག་ཉིད་ཐམས་ཅད་བསྲུང་བ་ནི་བདེ་བ་ཆེན་པོའི་རྡོ་རྗེ་བསྲུང་བས་སོ། །ཕྱོགས་ཐམས་
179b
ཅད་དང ། མཚམས་དང ། དཀྱིལ་འཁོར་བཅིང་བ་ནི། བདེ་བ་ཆེན་པོ་རྡོ་རྗེ་བསྐོར་བས་ཏེ། ཐམས་ཅད་རྡོ་རྗེ་ཆེན་པོའི་ངོ་བོ་ཉིད་ཁྲོ་བོའི་རྒྱལ་པོ་ཆེན་པོ་རྡོ་རྗེས་ཀྱང་འཇུག་པར་མི་ནུས་ཤིང་མི་ཕྱེད་པར་འགྱུར་རོ། །སྲིད་པ་ཐམས་ཅད་སྲུང་བ་ནི་བདེ་བ་ཆེན་པོའི་རྡོ་རྗེའི་བྱིན་གྱིས་བརླབས་པས་སོ། །བདག་ཉིད་ཀྱི་དངོས་གྲུབ་ཐམས་ཅད་དམ། །གཞན་དག་རྡོ་རྗེར་བྱེད་པ་ནི་བདེ་བ་ཆེན་པོའི་རྡོ་རྗེ་གོ་ཆས་སོ། །འཐབ་མོ་ཐམས་ཅད་ལས་རྣམ་པར་རྒྱལ་བ་ནི་བདེ་བ་ཆེན་པོའི་རྡོ་རྗེ་རྒྱལ་མཚན་མཆོག་གི་དཔུང་རྒྱན་གྱིས་སོ། །འཐབ་མོ་སྲུང་བ་ནི་བདེ་བ་ཆེན་པོའི་གཞན་གྱིས་མི་ཐུབ་པས་སོ། །གཞན་གྱི་དཔུང་ཐམས་ཅད་གཞིག་པ་ནི་རྡོ་རྗེ་བདེ་བ་ཆེན་པོའི་རྡོ་རྗེ་འཛིན་པར་བྱེད་པས་སོ། །གཞན་གྱི་དཔུང་ཉམས་པ་དང ། ལྡང་བ་དང ། ལྟུང་བ་དང ། གསོད་པ་ནི་བདེ་བ་ཆེན་པོའི་རྡོ་རྗེ་གློག་བསྐོར་བས་སོ། །རིམས་ཐམས་ཅད་ལ་སོགས་པའི་ནད་ཐམས་ཅད་དང ། ནད་ཆེན་པོ་ཞི་བ་ནི་བདེ་བ་ཆེན་པོའི་རྡོ་རྗེ་འཕྲོག་པས་སོ། །དུག་ཐམས་ཅད་གཞིག་པ་དང ། དུག་མེད་པར་བྱ་བ་ནི་བདེ་བ་ཆེན་པོའི་རྡོ་རྗེ་ཕྱག་རྒྱའི་ལས་ཀྱིས་སོ། །གདོན་ཐམས་ཅད་ལས་དགྲོལ་བ་ནི་བདེ་བ་ཆེན་པོ་རྡོ་རྗེའི་འབྱུང་པོ་བསྐྲད་པས་སོ། །མ་མོ་དང ། མཁའ་འགྲོ་མ་དང ། གདོན་ཐམས་ཅད་དགྲོལ་བ་ཆེན་པོ་དང ། གཞོམ་པ་དང ། སྙིང་གཞན་དབྱུང་བ་དང ། ཤི་བ་གསོ་བ་དང །
180a
༄#། །ཚེ་འཕེལ་བ་དེ་ཤིན་ཏུ་སྲུང་བ་རྣམས་ནི་བདེ་བ་ཆེན་པོའི་རྡོ་རྗེའི་ཕྱག་རྒྱའི་ལན་གྱིས་སོ། །ཐམས་ཅད་དབབ་པ་དང ། གཡོ་བ་དང ། འཆིང་བ་དང ། གར་བྱེད་དུ་གཞུག་པ་དང ། གླུ་ལེན་དུ་གཞུག་པ་དང ། སྔ་མ་འབྱུང་བ་སོ་སོར་བསྟན་པ་དང ། རྨད་དུ་བྱུང་བ་དང ། ཆོ་འཕྲུལ་བསྟན་པ་དང ། བདེན་པ་ཐམས་ཅད་པ་ཐམས་ཅད་སྨྲར་གཞུག་པ་དང ། དགྲོལ་བ་དང ། བསྲུང་བ་དང ། སོས་སུ་བཅུག་པ་རྣམས་ནི་བདེ་བ་ཆེན་པོའི་རྡོ་རྗེ་དབབ་པས་སོ། །རྒྱུ་བ་དང ། མི་རྒྱུ་བའི་དངོས་པོ་ཐམས་ཅད་ལ་ཡིད་ཀྱིས་འདོད་པའི་པྲ་དབབ་པ་ཐམས་ཅད་གྲུབ་པ་ནི་བདེ་བ་ཆེན་པོ་རྡོ་རྗེ་པྲ་དབབ་པས་སོ། །རང་གི་ལུས་དང ། ངག་དང ། ཡིད་རྡོ་རྗེས་མཐོང་བ་དང ། ཐོས་པ་དང ། སྨྲ་བ་དང ། སྟོན་པའི་ཤེས་པ་གྲུབ་པ་ནི་བདེ་བ་ཆེན་པོའི་རྡོ་རྗེའི་བདག་ཉིད་བསྒོམས་པས་སོ། །ཐམས་ཅད་ལས་འདས་པ་དང ། མ་འོངས་པ་དང ། ད་ལྟར་བྱུང་བ་ཐམས་ཅད་བཀའ་མཐོང་བའི་ཡི་གེ་སྣ་ཚོགས་པ་འམ། དངོས་པོ་སྣ་ཚོགས་པ་ཐམས་ཅད་ཀྱིས་རྣ་བའི་ཤེས་པ་རབ་ཏུ་འཇུག་པ་ནི་བདེ་བ་ཆེན་པོའི་རྡོ་རྗེ་ཐམས་ཅད་མཁྱེན་པས་སོ། །གློག་དང ། ཆར་པ་དང ། ཐོག་དབབ་པ་ཐམས་ཅད་བཟློག་པ་དང ། སྤྲིན་གཞིག་པ་ནི་བདེ་བ་ཆེན་པོའི་རྡོ་རྗེ་ཁྲོ་བོའི་ལྟ་བས་སོ། །སའི་འོག་ཐམས་
180b
ཅད་ལས་སྔར་མ་བྱུང་བའི་འབྲུ་ལ་སོགས་པའི་འབྲས་བུ་འབྱུང་བ་དང ། ཉེ་བར་ལེན་པ་དང ། ཆུ་མེད་པའི་གནས་ལས་ཆུའི་དངོས་པོ་འབྱུང་བ་དང ། ཉེ་བར་ལེན་པ་དང ། མུན་པ་ཆེན་པོར་སྣང་བ་ཆེན་པོ་བསྐྱེད་པ་དང ། ཉེ་བར་ལེན་པ་དང ། རླུང་ཐམས་ཅད་ལ་བཀའ་བསྒོ་བ་དང ། ཉེ་བར་ལེན་པ་དང ། ནམ་མཁའ་ཐམས་ཅད་ལས་ཡིད་ཀྱིས་འདོད་པའི་དངོས་པོ་ཐམས་ཅད་མཐོང་བ་དང ། ཉེ་བར་ལེན་པ་ནི་བདེ་བ་ཆེན་པོའི་རྡོ་རྗེ་དབྱིངས་ཀྱི་དབང་ཕྱུག་མས་སོ། །ཐམས་ཅད་གཞོམ་པ་དང ། རེངས་པ་དང ། དྲལ་བ་དང ། རྨུགས་པ་དང ། གཉིད་ལོག་པར་བྱ་བ་དང ། རྒྱས་གདབ་པ་དང ། ལྟུང་བ་དང ། རྨོངས་པ་དང ། གསད་པ་དང ། ཕྱིར་ལྡོག་པ་ནི་བདེ་བ་ཆེན་པོའི་གདུག་པའི་རྡོ་རྗེའི་ཕྱག་རྒྱས་སོ། །ཐམས་ཅད་རྗེས་སུ་ཆགས་པ་དང ། དགུག་པ་དང ། གཞུག་པ་དང ། དབབ་པ་དང ། བཅིང་བ་དང ། བཀྲོལ་བ་དང ། དྲལ་བ་དང ། ལྟུང་བ་དང ། ལྟུང་བ་བསླང་བ་དང ། འདྲེན་པ་དང ། བྲན་དུ་བྱེད་པ་དང ། མངག་གཞུག་བཀའ་བསྒོ་བ་བྱེད་པ་དང ། ཐམས་ཅད་ཚུར་དྲང་བ་དང ། ཕར་བཏང་བ་དང ། གསད་པ་དང ། སླར་གསོ་བ་ལ་སོགས་པའི་ལས་ཐམས་ཅད་བྱེད་པ་དང ། དབང་དུ་བྱེད་པའི་སྒྲུབ་པ་ནི་བདེ་བ་ཆེན་པོ་རྡོ་རྗེའི་ཐམས་ཅད་སྒྲུབ་པས་སོ། །རིགས་ཐམས་ཅད་ཀྱི་མཆོག་གི་དངོས་གྲུབ་ལ་སོགས་པའི་མཆོག་གི་དངོས་གྲུབ་ཐམས་ཅད་
181a
༄#། །དང ། མཆོག་གི་དབང་བསྐུར་བ་ལ་སོགས་པ་ཐམས་ཅད་དང ། ཕུན་སུམ་ཚོགས་པ་ཐམས་ཅད་དང ། ཐམས་ཅད་རྗེས་སུ་ཆགས་པ་ལ་སོགས་པའི་བདེ་བ་དང ། ཡིད་བདེ་བ་ཐམས་ཅད་རབ་ཏུ་གཞུག་པ་དང ། མཆོད་པ་ཆེན་པོ་ཐམས་ཅད་ལ་སོགས་པའི་ལས་ཐམས་ཅད་མྱུར་དུ་གྲུབ་པའི་ཆོ་ག་རྒྱས་པ་ནི་བདེ་བ་ཆེན་པོའི་རྡོ་རྗེ་མཆོག་གི་དངོས་གྲུབ་ཀྱིས་སོ། །དེ་ལ་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་དང་པོའི་མཆོག་གི་དམ་ཚིག་གི་ལས་ཀྱི་ཕྱག་རྒྱའི་རྒྱུད་ནི་འདི་ཡིན་ཏེ། བདེ་བ་ཆེན་པོའི་རྡོ་རྗེ་ནི་རྡོ་རྗེ་སེམས་དཔའི་ཚེ་སྟེར་བའོ། །འདིའི་ལས་ཀྱི་ཕྱག་རྒྱ་ཐམས་ཅད་བཅིང་བའོ། །དབུས་མའི་རྡོ་རྗེ་བཏུང་བར་བྱ། རྩེ་མོའི་འོད་ཟེར་བྱས་པས་གདོང་པ་ཡོངས་སུ་སྦྱངས་ཏེ་གདོང་པར་དགྲོལ་བར་བྱའོ། །བདག་ཉིད་ལ་ཀུན་ཏུ་བསྐོར་ནས་སྙིང་གར་དགྲོལ་བར་བྱའོ། །གཙུག་ཏོར་དང ། ཕྱོགས་ཐམས་ཅད་དང ། དཀྱིལ་འཁོར་བསྐོར་བའོ། །སྙིང་ག་དང ། ཡིད་ཀྱིས་རྒྱབ་དང ། ཕྲག་པ་དང ། སྤྱི་བོ་དང ། དཔྲལ་བར་བཞག་ལ་རྡོ་རྗེ་ཁུ་ཚུར་གཉིས་ཀྱིས་ཕྲེང་བ་བཅིངས་ལ་གོ་ཆ་བྱ་སྟེ། མདུད་པ་བྱས་ནས་རྡོ་རྗེའི་གནས་རྣམས་སུ་སླར་ཡང་ཕྲེང་བ་བྱས་པས་རྒྱབ་ཏུ་མདུད་པ་བྱས་ཏེ་དར་དཔྱངས་བྱའོ། །སྙིང་ག་དང ། དཔྲལ་བ་དང ། མགྲིན་པ་དང ། སྤྱི་བོར་གཞག་
181b
པར་བྱའོ། །དབུས་མའི་དར་མཆོག་གོ་།བྱབ་པའི་གྱེན་དུ་ཁ་བལྟས་པའི་དབུགས་པ་དང ། འཇིགས་པའི་གདོང་གིས་བལྟ་བའོ། །འབར་བ་བཞིའི་ཚུལ་གྱིས་འདོར་ཞིང་ཁྲོས་པའི་རང་གི་སྙིང་གར་བཅིངས་ཏེ་ཞི་བའི་ལྟ་བས་རྩེ་མོ་འཕྲོག་པར་བྱའོ། །ལྟ་བས་འཕྲོག་པར་བྱའོ། །དབབ་པས་མྱུར་དུ་དགྲོལ་བར་བྱའོ། །ཡོངས་སུ་བསྐོར་ནས་དཔྲལ་བར་བཞག་སྟེ་དབུས་མའི་རྡོ་རྗེ་སོར་མོའི་རྩེ་མོ་གཉིས་བསྐྱོད་པར་བྱས་ན་ཅི་ལྟ་བ་བཞིན་དུ་ལས་བྱེད་པའི་སྙིང་གར་བཞག་སྟེ། དབུས་མ་རྡོ་རྗེའི་ལས་ནི་འདི་ལྟ་སྟེ། སྙིང་གར་གཏོད་པ་དང ། སྐྱེད་པ་དང ། འཆིང་བ་དང ། གར་བྱེད་དུ་བཅུག་པ་དང ། མགྲིན་པ་གསལ་བ་དང ། རྡོ་རྗེ་རྩེ་མོ་བཙིར་བ་དང ། ཁ་དབུབ་པ་དང ། མགྲིན་པ་གསལ་བ་དང ། བཅིངས་པ་མྱུར་དུ་དཀྲོལ་བ་དང ། བསྲུང་བ་དང ། བྱ་བ་པའི་ལས་སོ། །སྙིང་ག་ཁ་སྦྱོར་བསྐྱེད་པའོ། །ཉིད་རེ་བཞིན་སྔ་རོལ་ཏུ་ལན་གཅིག་ལུས་ཡོངས་སུ་སྦྱང་བ་དང ། མགྲིན་པ་གསལ་བའི་ངག་དང ། སྙིང་གར་གཞག་པ་དང ། ཕྱག་རྒྱ་ལ་ལྟ་བ་སྟེ། ཉིན་རེ་སྔ་རོལ་དུ་ལན་གཅིག་དབང་པོ་ཐམས་ཅད་ལ་ཀུན་ཏུ་བསྐོར་བར་བྱའོ། །དབུས་མ་རྡོ་རྗེས་བྱེད་པ་ནི་ཁྲོ་བོའི་རྡོ་རྗེའི་ལྟ་བས་སོ། །དབུས་མའི་རྡོ་རྗེའི་ལས་ནི་འོག་ནས་འབྱུང་སྟེ། ཉེ་བར་ལོངས་སྤྱོད་པ་དང ། ཐམས་ཅད་ལ་དགུག་པར་བྱེད་པ་དང ། དབབ་པ་སྦྱིན་པ་དང ། འབར་བའི་མེ་སྟག་བྱེད་
182a
༄#། །པ་དང ། ཉེ་བར་ལེན་པ་དང ། རླུང་གི་ཚུལ་དང ། ནམ་མཁར་སྒོམ་པ་ལས་དུ་མའོ། །དབུས་མའི་རྡོ་རྗེའི་ལུས་ནི་ཕྱག་རྒྱས་གཞོམ་པ་དང ། རྩེ་མོ་གཉིས་སྙིང་གར་བཙིར་བ་དང ། སེན་མོ་བྲུད་པ་དང ། མིག་འདེགས་པ་དང ། བཙུམ་པ་དང ། སོར་མོ་མཉམ་པོས་སྙིང་གར་བཏེག་པ་དང ། ལྟུང་བ་དང ། སློང་བར་བྱེད་པ་དང ། ཕན་ཚུན་རྡེག་པ་དང ། རང་གི་སྙིང་གར་རང་བཞིན་དུ་གཞག་པའི་ལས་སོ། །དབུས་མའི་རྡོ་རྗེ་ལས་ནི་མདའ་གཏོད་པ་དང ། ལྕགས་སྒྲོག་གཉིས་ཀྱིས་དགུག་པ་དང ། གཡོན་པ་ལ་གཡས་པ་བཅུག་པ་དང ། རྩེ་མོ་བསྐྱོད་པ་དང ། གདུ་བུར་བཅིང་བ་དང ། མྱུར་དུ་དགྲོལ་བ་དང ། སོར་མོ་མཉམ་པོར་མྱུར་དུ་དྲལ་བ་དང ། ལྟུང་བར་བྱེད་པ་དང ། འོག་ནས་བཏེག་པ་དང ། གཡོན་པ་གཡས་པས་དྲང་བ་དང ། ལས་ཐམས་ཅད་ལ་སྦྱར་བར་བྱེད་པ་དང ། འོག་ནས་བསྐྱོད་ཅིང་གྱེན་དུ་དྲང་བ་དང ། ཚུར་འདྲེན་པ་དང ། ཕར་གཏང་བ་དང ། གཡོན་དང ། གཡས་ཀྱིས་དྲག་པོར་འདེགས་པ་དང ། རང་གི་སྙིང་གར་རྩེ་མོ་འདྲེན་པ་དང ། ལས་ཐམས་ཅད་ལ་ངེས་པར་སྦྱོར་བར་བྱེད་པའི་ལས་དང ། སྙིང་གར་འཁོར་ལོ་གཞུག་པ་དང ། དབང་བསྐུར་བའི་ཕྲེང་བ་དང ། དར་དཔྱངས་འཆིང་བར་བྱེད་པ་དང ། སྙིང་གར་
182b
དེ་ལས་དྲངས་ཏེ་བདེ་བ་ཚུར་འདྲེན་པ་ཐམས་ཅད་ཡོངས་སུ་སྦྱང་བ་དང ། གར་གྱིས་བླངས་ཏེ་སྤྱི་བོར་དགྲོལ་བའི་ལས་སོ། །བདེ་བ་ཆེན་པོ་རབ་གྲུབ་དང ། །ཆགས་པ་ཆེན་པོ་རྣམ་དག་ཕྱིར། །དོན་ཡོད་ཐོགས་མེད་སྣ་ཚོགས་པའི། །ཕྱག་རྒྱའི་རྒྱུད་ནི་རབ་ཏུ་བཤད། །རྡོ་རྗེ་འཛིན་པ་ཆེན་པོ་ཡིས། །སངས་རྒྱས་སྲས་བཅས་བདག་ཉིད་ཀུན། །སེམས་ཅན་ཐམས་ཅད་མྱུར་གྲུབ་དང ། །དོན་ཡོད་དངོས་གྲུབ་ཀུན་སྩོལ་བའོ། །དཀྱིལ་འཁོར་དག་ཏུ་མ་ཞུགས་པ། །སྡིག་པའི་ལས་ནི་ཀུན་དང་ལྡན། །དེ་དག་ཀྱང་ནི་གྲུབ་འགྱུར་ཏེ། ། བཅིངས་པ་ཙམ་གྱིས་སྡིག་བྱང་ཕྱིར། །གང་ཞིག་ལེ་ལོ་ཉིད་ཀྱིས་སམ། །བརྩོན་འགྲུས་ལྡན་ཡང་མ་ཚད་བ། །དཀྱིལ་འཁོར་མེད་པའི་སེམས་ཅན་གང ། །སློབ་དཔོན་ཉིད་བྱིན་མ་རླབས་དང ། །དེ་དག་གྲུབ་མཆོག་རྡོ་རྗེ་ཆེན། །རྡོ་རྗེ་སློབ་དཔོན་ཉིད་དུ་འགྱུར། །དོན་ཡོད་མཆོག་དང་སྣ་ཚོགས་པའི། །བཅིངས་པ་ཙམ་གྱིས་མྱུར་གྲུབ་བྱེད། །བསམ་པ་ཐམས་ཅད་ཡོངས་རྫོགས་པའི། །མཆོག་གི་དངོས་གྲུབ་ཀུན་ལ་འཇུག་།དང་པོ་འབྱུང་བའི་རྡོ་རྗེ་མཆོག་།བདེ་བ་ཆེ་ལས་ཡང་དག་འབྱུང ། །བག་ཆག་ཤིན་ཏུ་གྲུབ་པ་དང ། །དགྲོལ་བ་ཐམས་ཅད་ལ་ཡང་ངོ ། །དེ་ནས་ཕྱག་རྒྱ་ཐམས་ཅད་སྒྲུབ་པའི་གསང་བའི་རྒྱུད་ནི། །ལས་འདོད་ཐོག་མར་ཕྱག་རྒྱ་ནི། །སྐལ་བ་ཅི་བཞིན་སྙིང་པོས་གྲུབ། །རང་གི་བདག་ཉིད་
183a
༄#། །ངེས་སྦྱར་བྱ། །བདེ་བ་ཆེན་པོའི་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོ་ལས། བདེ་བ་ཆེན་པོ་ཐམས་ཅད་ཀྱི་རྡོ་རྗེའི་དམ་ཚིག་དོན་ཡོད་པའི་དངོས་གྲུབ་ཀྱི་མཆོག་ཅེས་བྱ་བའི་རྒྱུད་ཕྱི་མའི་ཆོ་ག་རྒྱས་པ་ཡོངས་སུ་རྫོགས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡོངས་སུ་མཐར་ཐུག་པ་མེད་པའི་སྐུ་དང ། གསུང་དང ། ཐུགས་རྡོ་རྗེ་ཐམས་ཅད་ཀྱི་ལས་ཀྱིས་སྦྱོར་བ་ནི། རྡོ་རྗེ་འཆང་བ་དང་བཅས་པ་རྣམས་ཀྱིས་བདེ་བ་ཆེན་པོའི་རྡོ་རྗེ་གསང་པའི་དམ་ཚིག་རྟོག་པའི་རྒྱལ་པོ་ཆེན་པོ་འདིས་སེམས་ཅན་གྱི་ཁམས་མ་ལུས་པ་ཀུན་དུ་ཁྱབ་ཅིང་སྤྲོ་བ་དང ། དངོས་གྲུབ་ཐམས་ཅད་ཀྱི་ཆོ་ག་རྒྱས་པ། སྲིད་པ་ཐམས་ཅད་ཀྱི་རྩེ་མོའི་ཡོངས་སུ་མཐར་ཐུག་པའི་གསུང་རབ་ཡོངས་སུ་མཐར་ཐུག་པའི་དོན་དུ་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ལ་གསོལ་བ་བཏབ་པ་ཡིན་ནོ། །རྡོ་རྗེ་ནམ་མཁའ་ཆེན་པོ་ཡིས། །ཆོས་ཀྱི་དབྱིངས་ནི་སྤྲོ་བ་མཆོག་།རྡོ་རྗེའི་ནམ་མཁའ་ཆེན་པོ་ཡི། །ཆོས་དབྱིངས་སྤྲོ་བའི་དངོས་གྲུབ་སྟེར། །རྟག་ཏུ་སངས་རྒྱས་ཐམས་ཅད་ནི། །རྡོ་རྗེ་འཆང་ཆེན་བཅས་པ་དང ། །རྡོ་རྗེ་འཆང་གི་ཐེག་པ་ནི། །ཡོངས་སུ་མཐར་ཐུག་ནུས་པ་མིན། །ེ་མའོ་མངོན་ཞེས་སེམས་ཅན་དང ། །ལེ་ལོ་ཅན་དང་
183b
ལས་ཀུན་དང ། །ཐུགས་རྗེ་དམ་པའི་རྡོ་རྗེ་ཁྱོད། །བྱང་ཆུབ་སེམས་ནི་བླ་ན་མེད། །བདེ་བ་ཆེན་པོ་རབ་སྒྲུབ་དང ། །ཆགས་པ་ཆེན་པོ་རྣམ་དག་ཕྱིར། །རྟོག་པ་འདི་ནི་མཐར་ཐུག་པ། ། རབ་ཏུ་སྒྲུབ་ཕྱིར་མཐར་ཐུག་བརྗོད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་གསན་ནས། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་རྡོ་རྗེ་སེམས་དཔའ་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། །བདེ་བ་ཆེན་པོ་རབ་སྒྲུབ་དང ། །ཆགས་པ་ཆེན་པོ་རྣམ་དག་ཕྱིར། །ཐམས་ཅད་དངོས་གྲུབ་དོན་དུ་ནི། །ཡོངས་སུ་མཐར་ཐུག་བྱིན་བརླབས་པའོ། །གང་གིས་ཚུལ་མཆོག་འདི་ནི་ཉན་འགྱུར་དང ། །གང་གིས་ཁྱིམ་ན་གསང་བ་ཐམས་ཅད་གནས། །བདེ་ཆེན་མཆོག་གི་རྡོ་རྗེ་མཆོག་གསང་བའི། །དངོས་གྲུབ་ཚེ་འདིར་དེ་དག་རྣམས་ལ་བསྟན། །བརྟན་པ་ཉིད་ཕྱིར་འདུལ་བར་ང་མི་བྱེད། ། སེམས་ཅན་དོན་དུ་རྒྱལ་བ་ལས་དག་ཕྱིར། །རྣམ་པར་སྦྱང་བར་མཛད་པ་འདི་ཡིན་ཏེ། །རྟོག་པ་འདི་ནི་བགེགས་མེད་བདུད་རྣམས་མེད། །དངོས་གྲུབ་འཕེལ་མེད་མིན་པར་བྱིན་གྱིས་བརླབས། །བདུད་དང་བརྟན་མེད་ཉིད་ནི་བདག་མི་བྱེད། །བརྟན་པ་ཉིད་ཕྱིར་འདུལ་བར་ང་མི་བྱེད། །རྟོག་པ་ཆེན་པོའི་མཆོག་འདི་གང་བསྒྲུབ་པ། །མྱུར་དུ་དངོས་
184a
༄#། །གྲུབ་མཆོག་ཕྱིར་བདག་བརྟན་འགྱུར། །བརྟན་ཞིང་རབ་དགྱེས་བརྟན་པས་རྗེས་སུ་ཆ་ཆགས། །བདེ་བ་ཆེན་པོ་ཀུན་བྱེད་ཤིན་ཏུ་རྒྱས། །ང་ཡི་དང་པོའི་སྙིང་པོ་གང་སྒྲུབ་པ། །དེ་ལ་ང་ནི་རྟག་ཏུ་དངོས་གྲུབ་སྟེ། །དེ་ནས་དེ་བཞིན་གཤེགས་པ་ཐམས་ཅད་འདུས་ནས་ལེགས་སོ་ཞེས་བྱ་བ་བྱིན་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།བདེ་བ་ཆེན་པོ་རྡོ་རྗེ་གསང་བ་ཞེས་བྱ་བའི་རྟོག་པའི་རྒྱལ་པོ་མཆོག་ཏུ་གྲུབ་པའི་རྒུད་ཕྱི་མ་ཡོངས་སུ་རྫོགས་སོ།། །། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འདི་ཉིད་སླར་ཡང་སྟོན་པར་མཛད་ཅིང་ཞལ་རབ་ཏུ་འཛུམ་པ་དང ། མཆོག་དང་པོའི་རྡོ་རྗེ་བདེ་བ་ཆེན་པོ་རྡོ་རྗེ་བསྙེམས་པས་གསོར་ནས་རང་གི་ཐུགས་གར་གཏོད་པའི་ཚུལ་དུ་འཛིན་ཅིང་མཆོག་ཏུ་གསང་ཞིང་མཆོག་ཏུ་གྲུབ་པ་དོན་ཡོད་ཅིང་ཐོགས་པ་མེད་པ་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་འདི་རྟོག་པ་ཐམས་ཅད་ཀྱི་སྡིག་པ་དང ། སྒྲིབ་པ་དང ། བདུད་ཐམས་ཅད་འདུལ་བར་བྱིན་གྱིས་བརླབས་པའི་དབང་གིས་མ་གྲུབ་པ་རྣམས་ཀྱང་མཆོག་དམ་པར་གྲུབ་པར་བྱེད་པ་དང ། མཆོག་ཏུ་གསང་བ། ཐོག་མ་དང ། ཐ་མ་མེད་པའི་མཚོན་ཆ་མཆོག་དང་པོ་ཞེས་བྱ་བའི་རྟོག་པའི་རྒྱལ་པོ་དབང་ཕྱུག་ཆེན་
184b
པོའི་ཆེན་པོ་རྒྱུད་ཕྱི་མ་གསུངས་པ། །དེ་ནས་ཐོག་མའི་གནས་ཉམས་དགའ། །ནམ་མཁའ་ཀུན་ལ་རབ་ཏུ་གནས། །རིན་ཆེན་འོད་འབར་རབ་ཏུ་གསལ། །དྲི་མ་མེད་པའི་མ་དངས་ཀྱིས་བརྒྱན། །ཟུར་བཞི་པ་ལ་སྒོ་བཞི་པ། །སྒོ་ཁྱུད་རྣམས་ཀྱིས་རབ་ཏུ་བརྒྱན། །ཁ་ཁྱེར་གྱིས་ནི་ཡོངས་སུ་བསྐོར། །རྡོ་རྗེ་ལྷ་མོ་ཚོགས་ཀྱིས་མཆོད། །ཟླ་བ་ཕྱེད་ནི་རབ་ཏུ་གནས། ། རྡོ་རྗེ་རིན་ཆེན་འབར་བྱེད་པ། །རླུང་གིས་བསྐྱོད་པའི་རྩེ་མོ་མཆོག་།དར་འཕན་དྲིལ་བུ་སྒྲ་སྒྲོགས་པ། །དྲ་བ་མེ་ལོང་རྟོག་མེ་ལོང ། །མེ་ཏོག་ཆུན་པོའི་རྒྱན་གྱིས་བསྐོར། །བདེ་བ་ཆེན་པོ་རྡོ་རྗེ་ཆེ། །རྡོ་རྗེ་ཀུན་གྱིས་ལེགས་སྦྱར་བ། །རྡོ་རྗེ་སེམས་དཔའི་བཞུགས་གནས་ཆེ། །སངས་རྒྱས་ཀུན་གྱིས་རྗེས་བསྟེན་པ། །བྱང་ཆུབ་སེམས་དཔའི་གནས་ཀྱི་མཆོག་།རྡོ་རྗེ་འཛིན་པ་ཀུན་གྱི་གནས། །བདེ་བ་ཆེན་པོ་རྡོ་རྗེ་ཆེ། །རྡོ་རྗེ་རིན་ཆེན་མཆོག་ཅེས་བྱ། །རྡོ་རྗེ་འཆང་ཆེན་བཞུགས་ནས་ནི། །བདེ་བ་ཆེན་པོ་རྣམ་པར་བཞུགས། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག། །སེམས་ཅན་ཀུན་གྱི་སེམས་གང་ནི། །བརྟན་པའི་ཕྱིར་ནི་དཔའ་ཞེས་བྱ། །བརྟན་པར་བཞག་པས་ཏིང་འཛིན་ཏེ། །ངེས་པ་ལ་ནི་རྡོ་རྗེར་གྱུར། །སེམས་དཔར་བྱིན་བརླབས་སྦྱོར་བ་ཡིས། །རྡོ་རྗེ་སེམས་དཔའ་ཉིད་དུ་འགྱུར།།
185a
༄#། །དེ་ཉིད་བཅོམ་ལྡན་སྣ་ཚོགས་པ། །བྱང་ཆུབ་སྤྱོད་པའི་རྗེས་མཐུན་པ། །བདུད་དང་བདུད་ལས་རྒྱལ་བ་ཉིད། །བྱང་ཆུབ་སེམས་རྒྱས་དེ་ཉིད་དོ། །རྡོ་རྗེ་དྲག་པོ་མཐར་བྱེད་ཉིད། །ཕྱག་ན་རྡོ་རྗེ་ཉིད་ཀྱང་དེ། །དེ་ཉིད་དེ་བཞིན་གཤེགས་པའི་རིགས། །དེ་ཉིད་རྡོ་རྗེ་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ནོར་བུའི་རིགས་བཟང་བཤད། །དེ་ཉིད་འདོད་ཆགས་བྲལ་བ་ཉིད། །འདོད་དང་གྲོལ་བ་དེ་ཉིད་དེ། །དུས་གསུམ་སྲིད་གསུམ་མཆོག་གསུམ་སྟེ། །འཇིག་རྟེན་གསུམ་མཆོག་ཁམས་གསུམ་པ། །མི་གཡོ་ཐམས་ཅད་མཆོག་དེ་ཉིད། །བརྟན་པ་སྲ་བ་ནོར་ཆེན་པོ། །རྒྱུ་བ་སེམས་ཀྱི་འདུས་བྱས་པ། །ཐམས་ཅད་བྱེད་པ་ཐམས་ཅད་ཉིད། །དང་པོའི་སེམས་དཔའ་སེམས་དཔའ་ཆེ། །བྱང་ཆུབ་སེམས་དཔའ་བདེ་བར་སྩོལ། །སེམས་དཔའི་སྐྱིལ་ཀྲུང་བཅས་ནས་ནི། །པདྨའི་སྟེང་དུ་བཞུགས་པ་དང ། །བཙུན་མོའི་ཚོགས་བཅད་སྣ་ཚོགས་པ། རྡོ་རྗེ་ལྷ་མོས་ཡོངས་སུ་བསྐོར། །བདེ་བ་ཆེན་པོ་གྲུབ་དོན་དུ། །འདོད་ཆགས་ཆེན་པོ་རྣམ་དག་ཕྱིར། །མ་ལུས་གདུལ་བྱའི་དོན་དུ་ནི། །དངོས་གྲུབ་ཐམས་ཅད་རབ་གྲུབ་ཕྱིར། ། དམ་ཚིག་མཆོག་ནི་མ་ལུས་པ། །རྒྱལ་བས་ཀྱང་ནི་བསྲུང་བར་བྱ། །བསྙེམས་བཅས་རྡོ་རྗེ་གསོར་བ་དང ། །རྡོ་རྗེ་བསྙེམས་པའི་ཚུལ་འཆང་ཞིང ། །ཕྱག་རྒྱ་ཀུན་མྱུར་གྲུབ་
185b
མངོན་དུ། །རྡོ་རྗེ་སེམས་དཔའ་མཆོག་གྲུབ་ཕྱིར། །དངོས་གྲུབ་ཀུན་གྱི་ཐབས་ཆེན་པོ། །བསོད་ནམས་ཀུན་གྱིས་ཆེར་མཐོང་བ། །ཡེ་ཤེས་ཕྱག་རྒྱ་ཡང་དག་ལྡན། །སྙིང་པོ་ཆེན་པོ་དམ་ཡིན་སྟེ། །གང་གིས་བསོད་ནམས་མི་ལྡན་པ་འམ། །དེ་བཞིན་དཀྱིལ་འཁོར་མ་ཞུགས་པ་འང ། །དོན་ཡོད་ཐོགས་པ་མེད་མཆོག་འགྱུར། །དངོས་གྲུབ་ཐམས་ཅད་རྙེད་དཀའ་མིན། །བདེ་བ་ཆེན་པོ་རྡོ་རྗེ་ཆེ། །གསང་བ་མཆོག་གི་དམ་ཚིག་བརྟན། །དངོས་པོ་ཐམས་ཅད་སྒྲུབ་པ་སྟེར། །རྟོག་པ་ཐམས་ཅད་མྱུར་གྲུབ་བྱེད། །ཐོག་མཐའ་མེད་ཕྱིར་དང་པོར་འབྱུང ། །མཆོག་དང་དང་པོ་ཞེས་བྱར་བཤད། །ཚིག་ཀུན་གྱིས་ནི་ཅི་འདོད་དང ། །ཆགས་པ་ཀུན་གྱིས་ཅི་དགའ་བར། །རྗེས་སུ་ཆགས་པར་བགྱིའོ་ཞེས། །ཅི་བཞིན་འབབ་པའི་ཡེ་ཤེས་འཇུག་།ཉེ་བའི་སྙིང་པོ་བཅས་སྙིང་པོ། །བསྐལ་བ་དང་པོར་བཅོམ་ལྡན་གསུངས། །ཧཱུཾ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཐམས་ཅད་སྲས་བཅས་པ། །རྡོ་རྗེ་འཛིན་བཅས་སྣ་ཚོགས་པ། །སྐད་ཅིག་གིས་ནི་འདུས་པར་འགྱུར། །རྡོ་རྗེ་འཛིན་གྱིས་ཐོག་མར། །ཡུད་ཀྱི་འཇིག་རྟེན་གསུམ་པོ་འབྱུང ། །ཅི་ལྟར་འགྲོ་བར་རབ་གྲུབ་ཅེས། །བདེ་གཤེགས་རྣམས་ཀྱིས་དངོས་གྲུབ་དྲིས། །དེ་རྣམས་ཀྱིས་ནི་བཀའ་གསན་ནས། །རྡོ་རྗེ་འཛིན་རང་གྲོལ་བ་ནི། །འབྱིན་དང་སྩོལ་དང་སྟོན་པ་པོ། །བྱེད་
186a
༄#། །པས་ཚིག་ནི་འདི་སྐད་གསོལ། །ཆགས་བྲལ་གྱིས་འདུལ་འཇིག་རྟེན་རྣམས། །ཆགས་བྲལ་ཉིད་ཀྱིས་དག་པར་འགྱུར། །འདོད་ཆགས་ཆེན་པོ་བདེ་བ་ཆེ། །འདི་ནི་ཇི་ལྟར་འགྲུབ་པར་འགྱུར། །དེ་ཡི་ཚིག་དེ་གསན་ནས་ནི། །རྒྱལ་བ་རང་ཉིད་ཀྱིས་གསུངས་པ། །བྱང་ཆུབ་སེམས་དེ་ཐོག་མའི་ལྷ། །ཁྱོད་ནི་ཐབས་ཆེན་ཉིད་ཡིན་ནོ། །ཇི་སྲིད་འཁོར་ལོའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཅི་སྲིད་སེམས་ཅན་རྣམ་རྟོག་པ། །དེ་སྲིད་བྱང་ཆུབ་སྲིད་པ་ཆེ། །བྱང་ཆུབ་སེམས་ཅན་ལ་ཕན་ཕྱིར། །རྡོ་རྗེ་ཅན་གྱིས་ཅི་བདེར་གྱིས། །དེ་ནས་ཐོག་མ་དང་དཀྱིལ་འཁོར། །དང་པོའི་དཀྱིལ་འཁོར་བྱིན་གྱིས་བརླབས། །རྡོ་རྗེ་ཀུན་གྱི་དམ་ཚིག་མཆོག་།ཅི་བཞིན་ཆོ་གས་བསྒྲུབས་པ་ཉིད། །དེ་ནས་བཅོམ་ལྡན་འདས་དེ་ནི། །བདེ་བ་ཆེན་པོ་གྲུབ་ཕྱིར་དང ། །འདོད་ཆགས་ཆེན་པོ་རྣམ་དག་ཕྱིར། །གཙོ་བོ་མགོན་ལ་གསོལ་བ་བཏབ། །བཅོམ་ལྡན་ཁྱོད་ལ་གསོལ་བ་ནི། །འདོད་ཆགས་ཆེན་པོ་བདེ་བ་ཆེ། །སྙིང་པོ་འདི་ནི་རྟོག་པ་མཆོག་།བདེ་ཆེན་མྱུར་དུ་གྲུབ་པ་འོ། །དེ་རྣམས་ཀྱི་ནི་བཀའ་གསན་ནས། །རྡོ་རྗེ་སེམས་དཔའ་བདེ་ཆེན་པོ། །བདེ་བ་ཆེན་པོ་རྡོ་རྗེ་ཆེ། །དཀྱིལ་འཁོར་ཆེན་པོ་
186b
བཀའ་སྩལ་ཏོ། །དེ་ནས་རབ་ཏུ་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །བདེ་བ་ཆེན་པོ་རྡོ་རྗེ་མཆོག་།གསང་བ་དམ་པ་ཞེས་བཤད་དོ། །ཐོག་མར་དམ་ཚིག་གསུམ་ཐོབ་པའི། །རྡོ་རྗེ་སློབ་དཔོན་རང་ཕྱག་རྒྱས། །འཁོར་ལོ་ཀུན་གྱི་ཆོ་ག་ལ། །རྟག་ཏུ་རྡོ་རྗེ་དྲིལ་འཆང་བྱ། །རྟག་པ་ཐམས་ཅད་ཡང་དག་འབེབས། །དཀྱིལ་འཁོར་ཐམས་ཅད་སྒྲུབ་བྱེད་ཡིན། །དམ་ཚིག་ཆེ་གསུམ་ཞེས་བྱ་བའི། །རྒྱ་འདི་ཐམས་ཅད་སྒྲུབ་བྱེད་ཡིན། །དངོས་གྲུབ་ཆོ་ག་ཐམས་ཅད་ལ། །རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་གམ་མ་ཚང་ཡང ། ། འགྲུབ་འགྱུར་སྨད་པར་མི་བྱ་འོ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །མཆོག་གི་དང་པོ་མཐའ་ཡས་མཆོག་།བླ་ན་མེད་ཅིང་མཉམ་མེད་པ། །ནམ་མཁའ་ཀུན་ལ་རབ་ཏུ་གནས། །མཆོག་སྟེ་ཡི་གེ་དམ་པ་ཡིན། །དཀྱིལ་འཁོར་གནས་ནི་སྦྱང་བྱས་ལ། །དེ་ཡི་དབུས་སུ་ཆོ་ག་བཞིན། །དངོས་གྲུབ་བྱིན་རླབས་ཆོ་ག་ཡིས། །དཀྱིལ་འཁོར་དེ་ནི་གྲུབ་པར་བྱ། །གླུ་དང་རོལ་མོའི་ཆོ་ག་དང ། །མེ་ཏོག་སྤོས་སོགས་མཆོད་པ་ཡིས། །ཇི་རྙེད་པ་དང ། ཅི་འདོད་པར། །མཆོག་དང་པོར་ནི་བརྟག་པར་བྱ། །མཆོག་གི་དང་པོར་མཐའ་ཡས་མཆོག་།བླ་ན་མེད་ཅིང་དཔེ་མེད་པ། །ནམ་མཁའ་ཀུན་ལ་རབ་ཏུ་གནས། །གྲོང་ཁྱེར་དག་ནི་མི་འགྱུར་མཆོག་།ཐོག་མ་མེད་མཆོག་རྟག་པའི་ཕྱིར། །སངས་
187a
༄#། །རྒྱས་འབྱུང་བའང་རབ་ཏུ་བཞུགས། །ཀུན་མཆོག་མཉམ་པ་ཉིད་རྟེན་པས། །ལྷག་དང་མཚང་མེད་ཀུན་གང ། །མཐའ་དང་དབུས་མེད་ནམ་མཁའ་ནི། །འདི་ནི་དབུ་མར་རྣམ་བརྟགས་པས། །ཕྱག་རྒྱའི་སྦྱོར་བའི་ཏིང་འཛིན་གྱིས། །དེ་ཡི་དབུ་མར་རྣམ་བརྟག་ཉིད། །དེ་ཡི་དབུས་སུ་པདྨའི་གཟུགས། །ཡུ་བར་བཅས་པ་རབ་ཏུ་གཞག་།སྣ་ཚོགས་པདྨས་ཡང་དག་ཁེབས། །ཐམས་ཅད་དག་པའི་གདན་དེ་ཡིན། །དེ་ནས་སྲད་བུ་ཉིས་འགྱུར་དུ། །བྱས་པའི་ཐིག་ནི་གདབ་བྱ་སྟེ། །ནམ་མཁའ་ཀུན་གྱི་ཚད་ཡིན་ཕྱིར། །གདུལ་བྱའི་བློ་ནི་མཐའ་ཡས་པས། །ཚད་ནི་ཚད་མེད་པ་ཡིན་ནོ། །མི་མཉམ་མེད་པས་ཟུར་བཞི་པ། །དྲན་དང་དབང་པོ་སྒོ་བཞི་སྟེ། །བསམ་གཏན་རྣམས་ཀྱི་རྟ་བབས་བཞི། །ཏིང་འཛིན་ཁྱམས་སུ་བཤད་པ་ཡིན། །ཁྱམས་ལ་བརྟེན་པའི་རྡོ་རྗེའི་བདག་།གཟུགས་རྣམས་ལྷ་མོས་མཆོད་པ་འོ། །རྒྱན་རྣམས་ཀུན་གྱིས་བཀྲ་བ་ནི། །བསམས་པ་ཐམས་ཅད་རྫོགས་བྱེད་པ། །གདུལ་བས་བསྐྱོད་པ་སྣ་ཚོགས་མཆོག་།དམ་ཆོས་མཆོག་སྟེ་ཀུན་ཏུ་འགྲོ་།རླུང་གིས་བསྐྱོད་པ་སྣ་ཚོགས་པའི། །བ་དན་རྩེར་བཏགས་དྲིལ་སྒྲ་སྒྲོགས། །མེ་ལོང་ཡེ་ཤེས་རྟག་མེ་ཏོག་།བྱང་ཆུབ་ཡན་ལག་མེ་ཏོག་ཕྲེང ། །དྲ་བ་མེ་ལོང་མེ་ཏོག་ཆེ། །མེ་ཏོག་ཕྲེང་བའི་རྒྱན་གྱིས་
187b
བསྐོར། །ཀུན་གྲུབ་མི་འགྱུར་བདེ་བ་ནི། །བདེ་བ་ཆེན་པོ་ཞེས་བཤད་དོ། །བདེ་བ་ཆེན་པོའི་གཞལ་ཡས་ཁང ། །དང་པོའི་གནས་སུ་བྲི་བར་བྱ། །ཐར་པ་ཆེན་པོའི་གྲོང་ཁྱེར་མཆོག་ཀུན་མཆོག་དེ་ནི་ལེགས་བྲིས་ནས། །ཐོག་མ་ཐ་མ་མེད་པའི་དབྱིངས། །ཕྱོགས་ཀུན་མཉམ་པ་ཉིད་དུ་བསམ། །དེ་ནི་ཕྱི་ཡི་དཀྱིལ་འཁོར་རོ། །དེ་ཡི་ནང་གི་འཁོར་ལོ་ནི། །དཀྱིལ་འཁོར་བརྒྱད་པ་ལྟ་བུ་ཡིན། །འདི་ནི་རྣམ་ཐར་བརྒྱད་པོ་སྟེ། །དངོས་གྲུབ་ཀུན་གྱི་བདེ་བ་སྟེར། །བྱང་སེམས་ཐེག་པ་ཆེན་པོ་ཡི། །མདོ་སྡེའི་འཁོར་ལོ་རབ་བསྐོར་བས། །རྡོ་རྗེ་ཐིག་གིས་ཡོངས་བསྐོར་བ། །རྡོ་རྗེ་འཁོར་ལོ་ཡང་དག་བྲི། །དེ་ནི་སྣ་ཚོགས་པདྨ་ཆེར། །རྡོ་རྗེ་སེམས་དཔའ་དགོད་པར་བྱ། །ལུགས་མའམ་ཡང་ན་བརྐོས་པ་འམ། །བྱས་པ་འམ་ཡང་ན་བྲིས་བ་སྟེ། །འཛུམ་བཅས་ཟླ་བའི་མདོག་ཅན་ལ། །དམར་ཞིང་སྣ་ཚོགས་འོད་འབར་བ། །སངས་རྒྱས་ཀུན་གྱི་དབང་ལ་སོགས། །རྒྱན་དང་ན་བཟའ་སྣ་ཚོགས་པ། །སེམས་དཔའི་སྐྱིལ་ཀྲུང་དག་གིས་བཞུགས། །རྡོ་རྗེ་བསྙེམས་ཚུལ་འཆང་བའི་མཆོག་།སུ་ར་ཏ་སྟྭཾ་ཞེས་བརྗོད་ཅིང ། །རང་སྙིང་པོས་ཀྱང་གཞག་པར་བྱ། །དེ་ཡི་ཕྱོགས་ནི་ཐམས་ཅད་དུ། །ཚོན་ནམ་དེ་བཞིན་ཕྱེ་མ་ཡིས། །གོ་རིམས་དག་ནི་ཅི་བཞིན་དུ། །རྡོ་རྗེ་ལྷ་མོ་ཡང་དག་བྲི། །རྡོ་རྗེ་མཆོད་བསྟོད་ལ་བརྩོན་བྱ། །རྡོ་རྗེ་ཆགས་མ་མདུན་དུ་བྲི། །ལྷ་མོ་
188a
༄#། །རྡོ་རྗེ་རོལ་པ་ནི། །རྡོ་རྗེ་ཅན་ལ་རབ་འཁྱུད་པ། །རྒྱབ་ཏུ་རྡོ་རྗེ་དྲན་མ་ནི། །ཆུ་སྲིན་རྒྱལ་མཚན་འཛིན་པ་འོ། །རྡོ་རྗེ་འདོད་པའི་དབང་ཕྱུག་མ། །རྡོ་རྗེ་ཁུ་ཚུར་གཉིས་བསྙེམས་བྲི། །དེ་ནས་འདི་རྣམས་དགོད་པའི་ཕྱག་རྒྱ་ནི། ཛཿ ་བཛྲ་དྲི་ཥྚི་ས་མ་ཀེ་མ་ཊ་ཧཱུཾ། ཨོཾ་བྫྲ་ཀི་ལི་ཀི་ལ་ཧཱུཾ། བཾ་བྫྲི་ཎི་སྨ་ར་ར་ཊ། ཧོ་བྫྲ་ཀླ་མེ་ཤཝ་རི་སྟྭཾ། །མཚམས་སུ་རྡོ་རྗེ་སེམས་མ་སོགས། །དུས་ཀྱི་མཆོད་པ་ཡང་དག་བྲི། །རྡོ་རྗེ་སྦྲང་རྩི་མ་དང་སྤྲིན། །སྟོན་དང་དགུན་ནི་རྡོ་རྗེ་མ། །མེ་ཏོག་བདུན་པ་མར་མེ་ཆེ། །དྲི་སྟེ་སྤྱི་བོར་ཐལ་སྦྱར་བ། །རྡོ་རྗེ་རྒྱལ་པོའི་ལྷ་མོ་སྟེ། །དེ་ནས་ཕྱག་རྒྱ་རབ་བཤད་བྱ། །ོཾ་མ་དྷུ་བཛྲི་གྷུཾ་གྷུཾ། ཨོཾ་བྫྲ་མེ་གྷེ་གུ་ལུ་གུ་ལུ། ཨོཾ་ཤ་རད་བཛྲི། ཨོཾ་ཨོཾ། ཨོཾ་བྫྲ་ཤི་ཤི་རི་ཧཱུཾ་ཧཱུཾ། སྒེག་མོ་བཞད་མ་གླུ་ཆེན་མ། །གར་མཛད་མ་ཡི་ལྷ་མོའི་ཚོགས། །རྡོ་རྗེ་རོལ་མོ་འདི་དག་ནི། །ཕྱི་རོལ་གྱི་ནི་མཚམས་སུ་བྱ། །ཧེ་ར་ཏི་བཛྲ་མེ་གྷ་བི་ལ་སི་ནི་ཏྲ་ཧ། །ཧེ་ར་ཏི་བཛྲ་ནརྀ་ཏྱེ་བེ་བ་བེ་བ། སྒོ་ཡི་གནས་ནི་ཐམས་ཅད་དུ། །གསོལ་ག་པ་ནི་བཞི་པོ་སྟེ། །རྡོ་རྗེ་ལྕགས་ཀྱུ་ཞགས་པ་དང ། །ལྕགས་སྒྲོག་དེ་བཞིན་དྲིལ་བུ་མའི། །བཛྲ་ཨཾ་ཀུ་ཤ་ཛཿ ། བཛྲ་པཱ་ཤེ་ཧཱུཾ། བཛྲ་ཤྲིཾ་ཁ་ལེ་བཾ། བྫྲ་གྷ་ཎྜེ་ཧོཿ ། །དམ་ཚིག་མཆོག་ནི་ཐམས་ཅད་ཀྱི། །དགོངས་ཤིང་བརྟག་པ་ཉིད་དུ་འགྱུར། །རྡོ་རྗེ་ལྷ་
188b
མོ་ལ་སོགས་པ། །དངོས་གྲུབ་ཀུན་ལ་འབྱུང་བར་འགྱུར། །གསོལ་ཀ་བ་དང་གཡོག་མོ་ཡི། །གཙོ་མོ་ཕོ་ཉ་བྲན་མོའོ། །དེ་ནས་ཀུན་མཆོག་ལ་སོགས་པ། །མངོན་བྲིས་ཡང་དག་བསྒྲུབ་པར་བྱ། །དམ་ཚིག་མཆོག་ནི་བཅིངས་ནས་སུ། །ཛཿ ་ཧཱུཾ་བོཾ་ཧོཿ ་ཞེས་བརྗོད་བྱ། །སེམས་དཔའི་སྐྱིལ་ཀྲུང་བཅས་ནས་ནི། །རྡོ་རྗེ་ཅན་གྱི་སྤྱན་སྔར་འདུག་།བདེ་བ་ཆེན་པོའི་རྡོ་རྗེ་མཆོག་།བདག་པོ་ལན་ཅིག་ཡང་དག་དགུག་།ཧཱུཾ་མཧཱ་སུ་ཁ་བཛྲ་སཏྭ། ཡ་ཧི་ཤཱི་གྷྲཾ་མཧཱ་སུ་ཁ་བཛྲ་ཨ་མོ་གྷཱ་ཡ། ཨ་ནུ་པཱ་ལ་ཡ། པྲ་བུ་དདྷ་སུ་ར་ཏ་སྟྭཾ་ཨ་ནུ་ར་ཀྟོ་མེ་བྷ་བ། སུ་ཏོ་ཤྱོ་མེ་བྷ་ཝ། སུ་ཏོ་ཤྱོ་མེ་བྷ་ཝ། བྷ་ག་ཝཱ་ན་ནཱ་དི་ན་ས་སཏྭ། སརྦ་སི་དདྷི་མེ་པྲ་ཡཙྪ། ཨ་ཤེ་ཏ་མ་ཏྲི་ཤ་ཨཱ་བེ་ཤ་ཡ་ས་མ་ཡེ་ར་བད་དྷ། པ་ཤཱི་ཀ་རོ་མེ། ཨི་མེ་ར་མུ་དྲཱ་པ་དཻཿ ། ཛཿ ་ཧཱུཾ་བཾ་ཧོཿ ། འདི་ཡིས་བཅོམ་ལྡན་འདས་རྟག་པར། །དཀྱིལ་འཁོར་དུ་ནི་རང་ཉིད་གཤེགས། །བཀུག་ཅིང་བཅུག་ལ་ཤིན་ཏུ་བརྟན། །དབང་དུ་གྱུར་ནས་རབ་ཏུ་ཐུབ། ཅེས་བཅོམ་ལྡན་འདས་དམ་ཚིག་ཆེན་པོ་གསུངས་སོ། །རྡོ་རྗེ་སློབ་དཔོན་རང་ལྷ་ནི། །འོད་ཟེར་ཀུན་ཏུ་སྟོན་ལ་སོགས། །མཚན་མ་རྣམས་པ་མང་པོ་ནི། །ངོ་མཚར་གྱུར་པ་མཐོང་བར་འགྱུར། །དེ་ནས་རྡོ་རྗེ་མཆོད་ཡོན་ནི། །རྡོ་རྗེ་ཐལ་མོ་ཁ་བྱེད་བུལ། །བུམ་པ་ཀང་དག་ཅི་སྙེད་པའི། །མེ་ཏོག་སོགས་ཀྱིས་ཡང་དག་མཆོད། །བ་དན་རྩེ་མོར་དྲིལ་བཏགས་
189a
༄#། །པ། །མཚམས་ཀྱི་ཆར་ནི་བཞག་པར་བྱ། །བུམ་པ་སྤོས་ཆུས་གང་པ་ལ། །རྡོ་རྗེ་བཅས་པས་ཕྱིན་བརླངས་པ། །ལྕུག་མ་ལ་ནི་ཡོངས་སུ་བཟླས། །དེ་ལ་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་ཚུར་བསྒྲུབ་པ་ནི་འདི་ཡིན་ཏེ། ཧཱུཾ་མཧཱ་སུ་ཁ་བྫྲ་མ་མོགྷ་ས་མ་ཡོ་ད་ཀ་སད་དྷ་མ་བྷི་ཤ་ཉྩ། སརྦ་སུ་ཁ་སོ་མ་ན་སྱཱ་མྱཱ་ད་ད་ཀུ་རུ་ཀུ་རུ། ཛཿ ་ཧཱུཾ་བཾ་ཧོཿ ། །འདི་ལན་ཉི་ཤུ་རྩ་གཅིག་ཡོངས་སུ་བཟླས་ལ་བདག་ཉིད་ལ་རྡོ་རྗེས་དབང་བསྐུར་བར་བྱའོ། །བསང་གཏོར་བྱ་བ་དང ། འཐུངས་པས་ཀྱང་སྡུག་བསྔལ་ཐམས་ཅད་བསལ་པ་དང ། བདེ་བ་ཆེན་པོ་ཐམས་ཅད་འཕེལ་བར་འགྱུར་རོ། །ཞེས་བཅོམ་ལྡན་འདེས་རྡོ་རྗེ་སེམས་དཔས་གསུངས་སོ། །དེ་ནས་འཁོར་ལོར་མ་ཞུགས་ཀྱང ། །རང་ཉིད་ཐོག་མར་བྱུང་ཞུགས་ཤིང ། །རྡོ་རྗེ་ཀུན་གྱི་སློབ་དཔོན་ཆེ། །རྡོ་རྗེ་ཅན་གྱིས་རང་བྱིན་རློབ། །དེ་ནས་རྡོ་རྗེ་འཛིན་སློབ་དཔོན། །རང་ཉིད་ཁྲུས་བྱས་དྲིས་ལེགས་བྱུགས། །ཅི་རྙེད་པ་ཡི་རྒྱན་གྱིས་བརྒྱན། །ཤིན་ཏུ་དམར་བའི་གོས་བགོ་ཞིང ། །མེ་ཏོག་ཕྲེང་བཏགས་ཁ་དྲིས་བསྒོ། །རྣམ་སྒེག་དགའ་བའི་རྡོ་རྗེ་དང ། །རྡོ་རྗེ་གར་གྱི་སྦྱོར་བ་ཡིས། །སྤྱི་བོར་མེ་ཏོག་ཐལ་སྦྱར་ནས། །གནས་དེ་མགོན་ལ་ཕྱག་བྱའོ། །ཞུགས་ནས་དཀྱིལ་འཁོར་དེ་ལ་ནི། །བསྐོར་བ་དག་ནི་ལན་གསུམ་བྱ། །དེ་ནས་མདུན་དུ་
189b
འདུག་ནས་ནི། །དེ་ཁོ་ན་ཉིད་ལན་གཅིག་བརྗོད། །འདོད་ཆགས་ཆེན་པོ་བདེ་བ་ཆེན། །རྡོ་རྗེ་ཆེན་པོ་ནོར་ཆེ་བ། །ཡེ་ཤེས་ཆེན་པོ་ལས་ཆེན་པོ། །དེ་དག་རྡོ་རྗེ་སེམས་གྲུབ་བརྗོད། །དེ་ནས་མེ་ཏོག་སིལ་མ་ནི། །མགོན་ལ་གཏོར་ཏེ་ཆོ་ག་བཞིན། །དང་པོ་ཥ་ཌ་ལ་སོགས། །བསྟོད་པ་གླུ་རུ་ལན་གཅིག་བླང ། །དེ་ནས་བཅོམ་ལྡན་འདས་ཀྱི་བསྟོད་པའི་རྒྱལ་པོ་མཚན་བརྒྱ་རྩ་བརྒྱད་པ་དེ་ཁོ་ན་ཉིད་ཆེན་པོ་ནི་འདི་ཡིན་ཏེ། །དཔལ་མཆོག་དང ། པོ་སེམས་དཔའ་ཆེ། །དགའ་བ་ཆེན་པོའི་དགའ་བ་ཆེན། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག་།སེམས་དང་སེམས་དཔའི་ཏིང་འཛིན་མཆོག་།རྡོ་རྗེ་རྡོ་རྗེ་མཆོག་ཆེན་པོ། །ཀུན་ཏུ་བཟང་པོའི་སྤྱོད་པ་མཆོག་།བདུད་དང་བདུད་རྣི་རབ་འཇོམས་པ། །ཐམས་ཅད་དུ་ནི་བྱང་ཆུབ་ཆེ། །སངས་རྒྱས་སངས་རྒྱས་སྐྱེས་མཆོག་སྐྱེས། །རྡོ་རྗེ་ཧཱུཾ་མཛད་ཡི་གེ་ཧཱུཾ། །འཇིག་རྟེན་དབང་ཕྱུག་ནོར་རབ་གསལ། །འདོད་ཆགས་ཆེན་པོ་བདེ་བ་ཉིད། །འདོད་དང་ཐར་པ་ནོར་ཆེ་བ། །དུས་གསུམ་སྲིད་གསུམ་མཆོག་གསུམ་དང ། །འཇིག་རྟེན་གསུམ་མཆོག་ཁམས་གསུམ་པ། །བརྟན་པར་རང་འབྱུང་གསལ་བ་སྟེ། །རབ་ཕྲ་སྦོམ་དང་ལེགས་བསགས་པ། །རྒྱུ་བ་རབ་མཆོག་ཐོབ་མཛད་པ། །སྲིད་པ་འཁོར་བ་སྦྱོང་མཛད་པ། །ཐོག་མཐའ་མེད་ཅིང་ཐོག་མཐའ་ཅན། །མདངས་ལྡན་དང་པོར་ཐམས་ཅད་གནས། །སྙིང་པོ་ཕྱག་རྒྱ་
190a
༄#། །སྦྱོར་དམ་ཚིག་།དེ་ཉིད་བདེན་པ་མཆོག་པ་སྟེ། །དེ་བཞིན་གཤེགས་པའི་དངོས་གྲུབ་ཆེ། །ཆོས་དང་ལས་ནི་ཁམས་ཆེན་པོ། །དམ་པའི་ཆོས་སྟེ་ལས། མཆོག་བདག་།བྱང་ཆུབ་སེམས་ནི་རབ་སྦྱོད་མཛད། །རྡོ་རྗེ་ཁྲོ་བོ་ཁྲོ་བོ་ཆེ། །དུས་མཐའ་ལྟར་འབར་འདུལ་བ་པོ། །འདུལ་མཛད་ཆེན་པོ་གདུག་པའི་མཆོག་།དྲག་པོ་དྲག་ཉིད་ཟད་མཛད་པ། །ཐམས་ཅད་དག་པ་པདྨ་ཆེ། །ཤེས་རབ་ཐབས་ཏེ་ཚུལ་ཆེན་པོ། །འདོད་ཆགས་དག་པའི་ཏིང་འཛིན་མཆོག་།སྣ་ཚོགས་ཆགས་པ་དབང་ཕྱུག་ཆེ། །ནམ་མཁའ་མཐའ་ཡས་རྟག་པའི་དོན། །འབྱུང་པོ་ཐམས་ཅད་གནས་ཆེན་པོ། །འབྱོར་པ་པོ་ནི་ཐམས་ཅད་གནས། །འབྱོར་པ་དཔལ་དང་གཙོ་བོ་རྒྱལ། །བསམ་པ་ཐམས་ཅད་རྫོགས་མཛད་པ། །ཕྱག་འཚལ་ཁྱོད་ལ་ཕྱག་འཚལ་ལོ། །ཕྱག་འཚལ་འདུད་ཅིང་ཕྱག་འཚལ་ལོ། །དད་པས་ཁྱེད་ལ་བདག་བརྟེན་བགྱིད། །རྡོ་རྗེ་སེམས་དཔའ་བདག་གྲུབ་མཛོད། ། གང་ཞིག་བསྟོད་པའི་རྒྱལ་པོ་འདི། །ཉིད་རེ་ནང་པར་རྗོད་བྱེད་དམ། །ཆོས་ཀྱི་ཚིག་གིས་ལན་གཅིག་བརྗོད། །དངོས་གྲུབ་ཤིན་ཏུ་མྱུར་བར་འགྱུར། །གལ་ཏེ་འདིར་གྲུབ་མི་འདོད་ན། །དང་པོར་ཉིན་རེ་དུས་གསུམ་དང ། །བསྟོད་ན་སྡིག་པ་ལས་ངེས་གྲོལ། །ཞིང་དག་པ་ནི་གྲུབ་པར་བྱེད། །རྟག་ཏུ་སྡུག་བསྔལ་ཐམས་ཅད་སེལ། །ལན་གཅིག་རབ་ཏུ་བརྗོད་
190b
པ་ཡིས། །དངོས་གྲུབ་ཐམས་ཅད་སྐལ་བཟང་བྱེད། །ཕུན་སུམ་ཚོགས་དཔལ་འཕེལ་བར་བྱེད། །དངོས་གྲུབ་དོན་ཡོད་ཡོན་ཏན་ཅན། །མཚན་བརྒྱ་རྩ་བརྒྱད་དམ་པ་འོ། །དེ་ནས་གསང་བའི་མཆོད་པས་ནི། །རབ་ཏུ་དགའ་བས་མགོན་ལ་མཆོད། །རང་གི་ཕྱག་རྒྱས་ལན་གཅིག་ནི། །རང་གི་ཕྱག་རྒྱས་བཅིངས་ཏེ་གྲུབ། །དེ་ནས་ལྷ་ཡི་ཆུ་དང་ནི། །དེ་བཞིན་སྐུ་མཆོག་གིས་དབང་བསྐུར། །རང་ཉིད་སྙིང་པོ་རྡོ་རྗེ་ཕྱག་།སྙིང་པོ་འདི་ནི་བླང་བར་བྱ། །དེ་ལ་རྡོ་རྗེ་སེམས་དཔར་དབང་བསྐུར་བའི་སྙིང་པོ་ནི་འདི་ཡིན་ཏེ། ཧཱུཾ་མཧའ་སུ་ཁ་བཛྲ་སཏྭ་ཨ་བྷི་ཥེ་ཀེ་ན་ཧྲཱིཿ ་ཨ་བྷི་ཥིཉྩ་མི། སརྦ་བཛྲ་ཨ་དྷི་པ་ཏི་སྟྭཾ་དྲྀ་དྷོ་མེ་བྷ་བ་མི་དྷ་ནཱ་མ་མ་སྟེ་ག་བླན། མྷཱ་བྫྲ་དྷ་ར་སུ་རཏ་སྟྭཾ། མྷཱ་བཛྲ་སཏྭ། ཨོཾ་བྷུར་བྷུ་བ་སཝ། །དེ་ནས་རྡོ་རྗེ་དབང་བསྐུར་བ། །ཕྱག་ན་རྡོ་རྗེ་རིལ་འཛིན་པ། །རྡོ་རྗེ་འཛིན་ཆེན་སློབ་དཔོན་དུ། །འདི་ཉིད་དུ་ནི་རབ་འགྲུབ་འགྱུར། །དེ་ནས་ཀྱང་ནི་ཅི་འདོད་པར། །ཆོ་གའི་དམ་པ་བསྒྲུབས་ནས་ནི། །རྡོ་རྗེ་གར་གྱི་མཆོད་པ་ཡིས། །ལེགས་པར་མཆོད་ལ་ཕྱིར་ཕྱུང་བྱ། །དེ་ནས་བརྩམས་ཏེ་རྡོ་རྗེའི་བདག་།རྡོ་རྗེ་ཀུན་གྱི་གསུང་རབ་འཛིན། །རྡོ་རྗེ་ཐམས་ཅད་འཛིན་སློབ་དཔོན། །དངོས་གྲུབ་ཐམས་ཅད་གྲུབ་པར་འགྱུར། །རྡོ་རྗེ་སེམས་དཔའ་དངོས་གྲུབ་ ། །ཕྱག་རྒྱ་ཀུན་བདག་དབང་ཕྱུག་ཆེ། །དྷཱིཿ ། ཐམས་ཅད་མཁྱེན་པའི་རྡོ་རྗེ་ཆེ། །ལས་རྣམས་ཐམས་ཅད་
191a
༄#། །ནུས་ལ་བརྟག་།མི་ཚུགས་པ་དང་མི་སོད་པ། །ཀུན་བྱེད་དངོས་གྲུབ་ཐམས་ཅད་སྟེར། །སེམས་ཅན་ཀུན་གྱི་རྒྱལ་པོ་ཆེ། །ཚར་གཅོད་པ་དང་ཕན་འདོགས་ནུས། །ཐམས་ཅད་རྗེས་ཆགས་བྱེད་ཀུན་མཆོག་།ཀུན་རིག་པ་དང་ཀུན་གྱི་བདག་།འདོད་པ་ཐམས་ཅད་ལ་རབ་སྦྱོར། །ཕུན་ཚོགས་ཀུན་གྱི་དབང་ཕྱུག་ཆེ། །ལྷ་ལ་སོགས་པའི་སེམས་ཅན་ཀུན། །བསྒོ་བ་ཐམས་ཅད་རྟག་ཏུ་བྱེད། །རྡོ་རྗེ་སེམས་དཔའ་རྟག་ཏུ་མཐོང ། །ཚེ་འདི་ཉིད་ལ་འགྲུབ་པར་འགྱུར། །དེ་ཉིད་ཀྱིས་ནི་འདོད་པར་ལྡན། །དགའ་ཞིང་རང་ཉིད་དེ་བདག་པོར། །རྡོ་རྗེ་སློབ་དཔོན་འགྱུར་བ་ཡིན། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །བདེ་བ་ཆེན་པོ་རྡོ་རྗེ་སློབ་དཔོན་བྱིན་གྱིས་བརླབ་ཅིང་འཇུག་པའི་ཆོ་ག་རྒྱས་པའི་རྒྱུད་དོ།། །།དེ་ནས་རྡོ་རྗེ་སློབ་མ་འཇུག་པའི་ཆོ་ག་རྒྱས་པའི་རྒྱུད་རྗེས་སུ་བཤད་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྡོ་རྗེ་མཆོད་ཡོན་སྙིང་གར་བསྐོར། །བཅིངས་ནས་བསམ་གཡོས་བཞིན་གྱིས་ནི། །མགོ་བོས་ཡང་དག་ཕྱག་རྒྱ་བྱ་བ། །དངོས་གྲུབ་ཐམས་ཅད་གྲུབ་བྱེད་ཡིན། །དཀྱིལ་འཁོར་དུ་ནི་རབ་ཞུགས་ལ། །བསྐོར་བ་ལན་གསུམ་བྱས་ནས་ནི། །འདོད་ཆགས་ཆེན་པོ་བདེ་བ་ཆེ། །འགྲོ་བ་ཀུན་ལའང་གྲུབ་མཛད་བརྗོད། །དེ་ནས་དུས་ཀྱི་
191b
མཆོད་པ་ཡིས། །བདེ་བ་ཆེན་པོ་ཡང་དག་མཆོད། །དེ་བཞིན་དུ་ནི་དབང་བསྐུར་བར། །རྡོ་རྗེ་གསང་བའི་སློབ་མ་གཞུག་།དེ་ནས་ཅི་བཞིན་བརྒྱན་ནས་ནི། །རྡོ་རྗེ་སློབ་དཔོན་གྱིས་རབ་གཞུག་།སློབ་མའི་ཚོགས་རྣམས་བཅུག་ནས་ནི། །ཅི་འདོད་པ་ཡི་དངོས་གྲུབ་འཐོབ། །དེ་ནས་སློབ་མ་བཅུག་ནས་ནི། །དགའ་ཆེན་པོ་འདི་བརྗོད་པར་བྱ། །རབ་དགྱེས་རབ་བདེ་བསྟན་པ་ཡི། །རྡོ་རྗེ་སེམས་དཔའ་དེང་གྲུབ་མཛོད། །དེ་ནས་མེ་ཏོག་ཕྲེང་བ་ནི། །སྤྱི་བོ་ནས་ནི་མྱུར་དུ་འདོར། །གང་དུ་མེ་ཏོག་བབས་གྱུར་ཏེ། །ལྷག་པའི་ལྷར་ནི་རབ་འགྲུབ་འགྱུར། །དེ་ནས་ལྷ་ཡི་ཆུ་ཡིས་ནི། །རྡོ་རྗེ་འཛིན་པར་དབང་བསྐུར། རྡོ་རྗེ་ཆེན་པོ་རྡོ་རྗེ་ལྔ། །བྱོན་ལ་རྡོ་རྗེ་བོ་དྷི་བརྗོད། །ོཾ་མ་ཧཱ་སུ་ཁ་བཛར། །བཛར་ཨ་བྷི་ཥེ་ཀེ་ན་སྟྭཾ། ། བྷི་ཥིཉྩ་མི། །མ་ཧཱབཛརྡྷཱ་ར། ཧེ་བཛྲ་ནཱ་མ་སི་དྡྷ་ནཱ་མ། གང་ལ་རྡོ་རྗེ་མིང་གང་ཞིག་ཡིན་པ་དེ་ལ་ཀྱེ་ཞེས་བྱ་བའི་སྒྲ་དང་སྦྱར་བར་བྱའོ། །དེ་ནས་སྙིང་པོ་བྱིན་ལ། ཕྱག་རྒྱ་བཅིང་བ་བསླབས་ནས་ཅི་ལྟར་མངོན་པར་འདོད་པ་བསྒྲུབ་པར་བྱའོ། །རྡོ་རྗེ་སེམས་དཔའི་ཆོ་ག་འམ། །གང་འདོད་རང་གིས་གྲུབ་པ་ལ། །དེ་ཉིད་ཀྱིས་ནི་དམ་ཚིག་ཉིད། །འཇུག་ལ་སོགས་པའི་ཆོ་ག་བཤད། །འཇིག་རྟེན་པ་ནི་སྣ་ཚོགས་དང ། །དེ་བཞིན་འཇིག་རྟེན་འདས་པ་ཡང ། །ཐམས་ཅད་རང་གི་ངོ་བོ་ནི། །རྒྱས་པར་བསྒྲུབས་ན་རབ་ཏུ་འགྲུབ། །འདི་ལ་རབ་ཏུ་འཇུག་ཙམ་གྱིས། །མི་ཚུགས་པ་
192a
༄#། །དང་མི་ལྡོག་པ། །ཉིད་དུ་རྒྱལ་བའི་སྲས་འགྱུར་ཞིང ། བདེ་ཆེན་རབ་ཏུ་གྲུབ་པ་སྟེར། །དེ་ནས་རྡོ་རྗེ་འཛིན་སློབ་དཔོན། །མནའ་ནི་དམ་དུ་བསྔགས་ནས་ཀྱང ། དེ་ཉིད་ཆོས་དང་དམ་ཚིག་ནི། །རང་ཉིད་དང་ནི་གཞན་གྱིས་བསླབ། །དེ་ལ་འདི་ནི་མནའ་གྲུབ་པའི་རྡོ་རྗེ་ཆུས་དབང་བསྐུར་ནས་བརྗོད་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་འགྲུབ་པར་འགྱུར། །དངོས་གྲུབ་རྡོ་རྗེ་བདུད་རྩི་ཆུ། །དེ་ཉིད་ཆོས་དང་དམ་ཚིག་ནི། །གལ་ཏེ་དཀྱིལ་འཁོར་མ་མཐོང་སྨྲ། །སྐྱེ་བོ་འདུག་ནང་གནས་པ་འགའ། །དད་པ་མེད་པས་བགད་པར་འགྱུར། །དེ་ལ་འདི་ནི་དེ་ཁོ་ན་ཉིད་དང ། དམ་ཚིག་གི་གསང་བའི་ཆོ་ག་རབ་ཏུ་སྦྱིན་པ་ཡིན་ཏེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག། །དེ་ཁོ་ན་ཉིད་མཆོག་གི་གསང་བ་ལྔའི་དེ་ཁོ་ན་ཉིད་ཆེན་པོར་བཤད་པར་བརྗོད་པར་བྱའོ། །བཅོམ་ལྡན་དེ་ཉིད་ཆོས་ཀྱི་མཆོག་བཀའ་སྩལ་བར་མཛད་དེ། སྲིད་པ་ངོ་བོ་ཉིད་ཀྱིས་དག། ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག་།སྲིད་པ་མཆོག་ནི་བྱེད་པ་ཡིན། །དེ་ལ་སྲིད་པ་རྣམ་པར་དག་པའི་ཐབས་རྟོག་པ་ཐམས་ཅད་ཀྱི་གསང་བའི་མཆོག་དམ་
192b
ཚིག་ཆེན་པོ་བསྟེན་པར་བྱ་བ་ནི་འདི་ཡིན་ཏེ། །སྲིད་པའི་བདེ་བ་ཤིན་ཏུ་ཆུང ། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་རྟག་ཏུ་བསྟེན་པར་བྱ། ། འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷག་པའི་ལྷ་སྦྱོར་བས། །བདག་དང་གཞན་ལ་མཆོད་པར་བྱ། །དེ་ལ་རྟོག་པ་ཐམས་ཅད་ཀྱི་གསང་བའི་མཆོག་གི་དམ་ཚིག་ཆེན་པོ་འདི་བརྗོད་པར་བྱ་སྟེ། །ཅི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་བའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །གསང་བ་མཆོག་གི་དམ་ཚིག་ཐབས། །བསོད་ནམས་བྱིན་རླབས་སྒྲུབ་བྱེད་པ། །དངོས་གྲུབ་ཀུན་གྱི་དབང་ཕྱུག་མཆོག་།རྒྱུན་ཏུ་སེམས་ཅན་དོན་བྱེད་པའོ། །དེ་ལྟར་སེམས་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་སྐྱེད་བསྟེན་པར་གྱིས། །དེ་ན་འགྲོ་ལ་མྱུར་དུ་བདེ་བ་སངས་རྒྱས་ཐམས་ཅད་དང ། །རབ་ཏུ་མཚུངས་ཤིང་རྟག་པ་ཉིད་དུ་རྟོགས་པར་འགྱུར། །དེ་ནས་ཁྱེད་ཀྱིས་བཅུད་དང ། ཁ་ཟས་དང ། གནས་པ་དང ། གླུ་དང ། རོལ་མོ་ལ་སོགས་པའི་མཆོད་པ་རྣམས་ལེགས་པར་བསྟབས་པ་བས་བདག་ཉིད་གང་ལ་སྲེད་པས་ཀྱང་རྡོ་རྗེ་སློབ་དཔོན་ཆེན་པོ་མཆོད་པར་བྱའོ། །རྡོ་རྗེ་སློབ་དཔོན་མེ་ཏོག་སོགས། །ཅི་འདོད་པར་ནི་ལེགས་མཆོད་ཅིང ། །རྡོ་རྗེ་གར་གྱི་
193a
༄#། །མཆོད་པ་ཡིས། །ཡང་དག་པར་ནི་མཆོད་དེ་བྱུང ། །དེ་ནས་རྡོ་རྗེ་འཛིན་སློབ་དཔོན། །གར་གྱི་མཆོད་པས་མཆོད་ནས་ནི། །རྡོ་རྗེ་ཐལ་མོའི་སྦྱོར་བ་ཡིས། ། སློབ་མ་ཀུན་གྱིས་རབ་ཏུ་མཆོད། །རོ་དང་ཁ་ཟས་གནས་པ་དང ། །གླུ་དང་རོལ་མོ་ཅི་འདོད་པས། །རྡོ་རྗེ་སེམས་དཔའ་དེ་བཞིན་བདག་།ཡང་དག་མཆོད་ནས་ཕྱིར་བྱུང་བྱ། །དཔལ་མཆོག་དང་པོ་ཞེས་བྱ་བའི་དཀྱིལ་འཁོར་མཆོག་ཏུ་གསང་བའོ།། །།དེ་ནས་སྒྲུབ་པ་བཤད་བྱ་བ། །དངོས་གྲུབ་ཤིན་ཏུ་རྟག་པ་སྟེ། །གང་གི་སྲིད་པ་འདི་ཉིད་ལ། ། དངོས་གྲུབ་རྟག་པ་ཐོབ་བྱེད་པའོ། །འདི་ཡིས་བྱང་ཆུབ་སེམས་དཔའ་ནི། །སྲིད་པར་གནས་ཤིང་སྲིད་པར་སངས། །དངོས་གྲུབ་ཀུན་གྱི་དབང་ཕྱུག་གྲུབ། །རྟག་ཏུ་སེམས་ཅན་ཀུན་དོན་བྱེད། །འདི་ཡི་ཅི་ལྟར་མཆོག་གྲུབ་པ། །དེ་ལྟར་བྱང་ཆུབ་སྤྱོད་སོགས་པས། །དགེ་བའི་ཚུལ་ནི་གཞན་གྱིས་ཀྱང ། །སངས་རྒྱས་ཀུན་སོགས་ཐོབ་མི་འགྱུར། །གདུལ་བྱ་མིན་པ་བསོད་ནམས་མེད། །སངས་རྒྱས་རྡོ་རྗེ་འཛིན་པ་ནི། །རྣམ་པ་ཀུན་ཏུ་མཐོང་སོགས་ཀྱིས། །སེམས་ཅན་དོན་བྱེད་མི་ནུས་སོ། །དེ་བས་རྒྱུད་ཆེན་ལས་གྲུབ་པ། །སངས་རྒྱས་སམ་ནི་རྡོ་རྗེ་འཛིན། །མཐོང་ལ་སོགས་པ་སེམས་ཅན་དོན། །ནམ་མཁའ་མཉམ་པར་བྱེད་པ་ཡི། །འདོད་ཆགས་ཆེན་པོ་བདེ་བ་ཆེ། །སྲིད་པའི་ངེས་པ་དྲི་མ་མེད། །ནམ་
193b
མཁའ་མཐའ་ཡས་སེམས་ཅན་དོན། །མྱ་ངན་མི་འདའ་བྱེད་པ་ཡིན། །དཀྱིལ་འཁོར་དག་ཏུ་མ་ཞུགས་པའམ། །བསོད་ནམས་མེད་པའམ་ལེ་ལོ་ཅན། །དེ་ཡང་ཀུན་མཆོག་གྲུབ་པ་ཡིས། །ཚེ་འདི་ཉིད་ལ་འགྲུབ་པར་འགྱུར། །ཞེས་བཅོམ་ལྡན་འདས་དོན་ཡོད་གྲུབ་པ་རྡོ་རྗེ་སེམས་དཔས་གསུངས་སོ། །དེ་ནས་དོན་ཡོད་ཅིང་ཐོགས་པ་མེད་པ་མྱུར་དུ་སྒྲུབ་པའི་མཆོག་རྗེས་སུ་བཤད་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ལུགས་མ་འམ་ནི་བརྐོས་པ་འམ། །བྱས་པ་འམ་ནི་བྲིས་པ་ཡི། །དང་བའི་སེམས་དཔའི་བརྟགས་ནས་ནི། །མདུན་དུ་དེ་ནི་བསྒྲུབ་པར་བྱ། །ཉིན་རེ་ཞིང་ནི་དང་པོ་རུ། །དེ་བཞིན་ཡུལ་དང་ལྡན་གྱུར་པས། །དང་པོའི་གསང་མཆོག་གིས་བཀུག་སྟེ། །ཕྱག་རྒྱ་ཆེན་པོར་རབ་བྱིན་བརླབ། །རྡོ་རྗེ་མིག་གིས་དེ་བཞིན་བལྟས། །རྡོ་རྗེ་བསྙེམས་ཚུལ་བདག་པོ་རང ། །རྡོ་རྗེ་ཧཱུཾ་ནི་གླུར་བླངས་པས། །རྡོ་རྗེ་སེམས་དཔའ་བསྒྲུབ་པར་བྱ། །རྡོ་རྗེ་ཆ་ལུགས་ཅི་བཞིན་དུ། །མཆོག་གི་དད་པོར་རབ་དགྱེས་པས། །གཟུགས་བརྙན་ལ་སོགས་དང་པོར་ནི། །ཅི་འདོད་པར་ནི་རབ་ཏུ་བསྒྲུབ། །འདི་ཡིས་འདོད་པ་ཀུན་དབང་ཕྱུག་།འདོད་པ་ཙམ་གྱིས་འགྲོ་འོང་ལྡིང ། །དངོས་གྲུབ་ཀུན་གྱི་དབང་ཕྱུག་གྲུབ། །ཀུན་མཆོག་དམ་པའི་དབང་ཕྱུག་ཡིན། །ཕུན་ཚོགས་ཀུན་བདག་ཐམས་ཅད་པ། །འདོད་ཆགས་ཆེན་པོ་བདེ་བ་ཆེ། །
194a
༄#། །ཐམས་ཅད་འཇུག་མཛད་སྣ་ཚོགས་པ། །རྟག་པར་ཀུན་ཏུ་འདུལ་བ་པོ། །དངོས་གྲུབ་ཀུན་གྱི་བདེ་བ་མཆོག་།ཕྱག་རྒྱ་ཀུན་བདག་དབང་ཕྱུག་ཡིན། །རྡོ་རྗེ་ཀུན་གྱི་དངོས་གྲུབ་ཆེ། །ཐམས་ཅད་མཁྱེན་པའི་འབྱུང་གནས་ཆེ། །མི་ཚུགས་པ་དང་མི་སོད་པ། །ཐམས་ཅད་བྱེད་ཅིང་ཀུན་གྱི་གནས། །ཁམས་གསུམ་ལས་རྒྱལ་སྣ་ཚོགས་པ། །ཚར་གཅོད་པ་དང་ཕན་འདོགས་པ། །ཀུན་ལ་རྗེས་ཆགས་ཀུན་གྱི་མཆོག་།ཀུན་རིག་དངོས་གྲུབ་ཐམས་ཅད་སྟེ། །འཇིག་རྟེན་ཁམས་ནི་ཐམས་ཅད་དུ། །རང་གི་རྣམ་འཕྲུལ་རབ་སྟོན་བྱེད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོའི་དབང་ཕྱུག་ཆེ། །གཟུགས་དང་ཚེ་སྟོབས་རྡོ་རྗེ་མཆོག་།རྡོ་རྗེ་སེམས་དཔའ་གཉིས་པ་བཞིན། ། འགྲོ་བ་རྣམས་ཀྱིས་མཆོད་ཅིང་རྗེད། །རང་གི་གཉེན་རྣམས་ཀྱིས་བརྟེན་པ། །རྒྱལ་པོ་རྡོ་རྗེ་འཆང་ཆེན་ལྟར། །རྒ་དང་འཆི་བ་མེད་པར་འགྱུར། །གལ་ཏེ་རྡོ་རྗེ་སེམས་དཔའ་འམ། །སངས་རྒྱས་བྱང་ཆུབ་སེམས་ཉིད་འདོད། །དངོས་གྲུབ་ཇི་ལྟར་འདོད་པ་ཉིད། །ཚེ་འདི་ཉིད་ལ་འགྲུབ་པར་འགྱུར། །ཕྱི་མ་འམ་ནི་འཇིག་རྟེན་པ། །རྟོག་པ་ཀུན་བཤད་ཆོ་ག་འམ། །རང་ཉིད་ཀྱིས་མཛད་ཀྱིས་རྟག་ཏུ། །དངོས་གྲུབ་ཐམས་ཅད་གྲུབ་འགྱུར་ཞེས། །བཅོམ་ལྡན་རྡོ་རྗེ་དངོས་གྲུབ་ཀྱིས། །དབང་ཕྱུག་བདེ་བ་ཆེན་པོ་ནི། །རྡོ་རྗེ་འཆང་བ་
194b
ཆེ་རྒྱལ་པོ། །ཀུན་མཆོག་ས་ཡི་དབང་པོས་གསུངས། །དེ་ལ་ཅི་ལྟར་ན་རང་གི་ཕྱག་རྒྱ་སྒྲུབ་པའི་རྒྱུད་ཡིན་ཞེ་ན། །ཕྱག་རྒྱ་ཆེན་པོ་མཉམ་གཞག་ལ། །རང་གི་སྙིང་པོས་ལན་གཅིག་སྒྲུབ། །དྲྀཌྷ་སུ་ཏོ་ཥྱ་སཾ་ར་ཀཏ། །སུ་པོ་སི་དྡྷ་ཏ་ལ་གུ། །དེ་ལ་ཅི་ལྟར་ཡི་གེ་ཧཱུཾ་གི་གླུ་བླངས་པའི་རྒྱུད་ཡིན་ཞེ་ན། །རི་དྷི་ཏ་སོགས་ཀྱིས་བརྒྱན་ལྡན། །ཅི་ནུས་པ་དང་། ་དགའ་དང་གྞཌེ་ལ་སོགས་གླུ་བླངས་པའི་ཡི་གེ་ཧཱུཾ་གིས་འགྲུབ་པར་འགྱུར། །དེ་ནས་ཕྱོགས་རྒྱ་ཐམས་ཅད་ཀྱི། །མཆོག་དེ་སྒྲུབ་པའི་རྒྱུད་བཤད་དེ། །གལ་ཏེ་ཕྱག་རྒྱ་སྒྲུབ་འདོད་ན། དེ་བཞིན་ཡུལ་དང་ལྡན་གྱུར་པས། །རང་ཉིད་ཀྱིས་ནི་རྒྱ་བཅིངས་ལ། །ཡོངས་སུ་མི་སྐྱོའི་བར་དུ་བསྒྲུབ། །དེ་ལ་ཅི་ལྟར་ན་དམ་ཚིག་ཐམས་ཅད་གྲུབ་པའི་རྒྱུད་ཡིན་ཞེ་ན། དམ་ཚིག་ཕྱག་རྒྱ་བཅིང་ནས་ནི། །ས་མ་ཡ་སྟྭཾ་ཞེས་བརྗོད་ལ། །རང་གི་སྙིང་གར་རིམ་བཞིན་དུ། །ཕྱག་རྒྱའི་མཆོག་དེ་བསྒྲུབ་པར་བྱ། །དེ་ནས་ལས་ཀྱི་ཕྱག་རྒྱའི་མཆོག་སྒྲུབ་པའི་རྒྱུད་ནི། །རྡོ་རྗེ་གར་གྱི་མཆོད་པ་ཡིས། །ཡོངས་སུ་མི་སྐྱོའི་བར་བསྒྲུབས་ན། །མཆོད་པ་ཀུན་སོགས་ལས་རྣམས་ནི། །ཚེ་འདི་ཉིད་ལ་འགྲུབ་པར་འགྱུར། །རྡོ་རྗེ་འཆང་ཆེན་ཉིད་དང་ནི། །སངས་རྒྱས་བྱང་ཆུབ་སེམས་ཉིད་དང ། །གཞན་ཡང་དངོས་གྲུབ་ཐམས་ཅད་ནི། །དམ་པར་མྱུར་དུ་འགྲུབ་པར་འགྱུར། །རྟོག་པ་ཐམས་ཅད་ཀྱི་སྒྲུབ་པ་
195a
༄#། །ཆེན་པོ་དོན་ཡོད་པར་གྲུབ་པའི་ཆོ་ག་རྒྱས་པའི་རྒྱུད་དོ།། །།དེ་ནས་རྟོག་པ་ཐམས་ཅད་སྒྲུབ་པའི་དངོས་གྲུབ་ཀྱི་རྒྱུད་ནི། །ཉིན་རེ་ཞིང་དང་པོར་ལན་གཅིག་ཕྱག་རྒྱ་བསྒྲུབ་པར་དོན་ཡོད་པ་དངོས་གྲུབ་ཐོགས་པ་མེད་པ་བཤད་པར་བྱའོ་ཞེས་བཅོམ་ལྡན་འདས་ཀྱིས་གསུངས་སོ། །ཐམས་ཅད་རྗེས་སུ་མཉེས་པར་བྱ་བ་དང ། དགུག་པ་དང ། བཅིང་བ་དང ། དབང་དུ་བྱ་བ་བསྒྲུབ་པ་ལ་ནི་བདེ་བ་ཆེན་པོའི་རྡོ་རྗེ་ལྟ་བས་སོ། །བདེ་བ་དང ། ཡིད་བདེ་བ་དང ། ཕུན་སུམ་ཚོགས་པ་དང ། དངོས་གྲུབ་ཐམས་ཅད་མངོན་པར་འཕེལ་བར་བྱ་བ་ལ་ནི་བདེ་བ་ཆེན་པོའི་རྡོ་རྗེ་ཆོས་སོ། །ཚེ་དང ། ལང་ཚོ་དང ། གཟུགས་དང ། གཟི་བརྗོད་ཆེན་པོ་མངོན་པར་འཕེལ་བར་བྱ་བ་ལ་ནི་དང་པོའི་རྡོ་རྗེ་བཅུད་ཀྱིས་ལེན་གྱིས་སོ། །དཔལ་ཆེན་པོ་དང ། སྐལ་བ་བཟང་པོ་དང ། གྲགས་པ་དང ། སྙན་པ་འཕེལ་བར་བྱ་བ་ལ་ནི་དང་པོའི་རྡོ་རྗེ་གྲུབ་པས་སོ། སྟོབས་ཆེན་པོ་དང ། ཡེ་ཤེས་དང ། ཆོས་དང ། ལས་བསྒྲུབ་པར་བྱ་བ་ལ་ནི་དང་པོའི་རྡོ་རྗེ་སྙིང་སྟོབས་ཆེ་བས་སོ། །རྫུ་འཕྲུལ་དང ། ཆོ་འཕྲུལ་དང ། རྨད་དུ་བྱུང་བ་དང ། རྣམ་པར་འཕྲུལ་བ་ཐམས་ཅད་སྟོན་པ་ལ་ནི་དང་པོའི་རྡོ་རྗེའི་རྣམ་པར་འཕྲུལ་བས་སོ། །ཐམས་ཅད་དུ་ཡི་གེ་དང ། གཟུགས་ཀྱི་བདེན་པ་ཐམས་ཅད་མཐོང་བ་དང ། ཐོས་པ་
195b
དང ། སྨྲ་བ་དང ། འདྲི་བ་གྲུབ་པར་བྱ་བ་ལ་ནི་དང་པོའི་རྡོ་རྗེ་དོན་ཡོད་པའི་བདེན་པས་སོ། །དབང་པོ་ཐམས་ཅད་ཀྱིས་བདེན་པ་ཐམས་ཅད་མཐོང་བ་དང ། ཐོས་པ་དང ། སྨྲ་བ་དང ། ཟིལ་གྱིས་གནོན་པར་བྱ་བ་ལ་ནི་དང་པོའི་རྡོ་རྗེ་དོན་ཡོད་པའི་བདེན་པས་སོ། །སྒྱུ་མ་ཐམས་ཅད་དང ། བདེ་བའི་མཆོག་དང ། ལུང་བསྒོ་བ་དང ། ལན་ཐོབ་པ་གྲུབ་པ་ལ་དང་པོའི་རྡོ་རྗེ་ཡིད་དུ་བྱུང་བས་སོ། །གཏེར་ཐམས་ཅད་དབྱུང་བ་དང ། ནོར་དབྲོག་པ་དང ། རྒྱལ་སྲིད་ཐོབ་པ་དང ། ས་ལ་ཉེ་བར་ལོངས་སྤྱོད་པ་ལ་ནི་དང་པོའི་རྡོ་རྗེས་དབང་བསྐུར་བས་སོ། །ཡུལ་ཐམས་ཅད་དང ། སྐྱེ་བོ་དང ། གྲོང་ཁྱེར་དང ། ནངས་དང ། ཆུ་བོར་ཉེ་བར་ལོངས་སྤྱོད་སྤྲུལ་བ་ལ་ནི་དང་པོའི་རྡོ་རྗེ་གྲུབ་པས་སོ། །ཐམས་ཅད་ལས་སྔོན་མ་བྱུང་བའི་ལྷ་ཡུལ་དང་རིན་པོ་ཆེ་དང ། ཁ་ཟས་དང ། བཏུང་བ་དང ། གཡོག་འཁོར་ཤིན་ཏུ་བཟང་པོ་ལ་སོགས་པ་སྤྲུལ་ཏེ་ཉེ་བར་ལོངས་སྤྱོད་པ་ལ་ནི་དང་པོའི་རྡོ་རྗེ་སྤྲུལ་པས་སོ། །སྐད་ཅིག་གིས་ས་གཞི་ཐམས་ཅད་འབྲུ་ལ་སོགས་པ་སྨིན་པར་བསྐྱེད་པ་དང ། ཆུའི་ཕུང་པོ་ཆེན་པོ་འབྱུང་བ་དང ། སྣང་བ་ཆེན་པོ་བསྐྱེད་པ་དང ། རླུང་ཐམས་ཅད་དབང་དུ་བྱ་བ་ལ་ནི་དང་པོའི་རྡོ་རྗེ་དབྱིངས་ཀྱི་དབང་ཕྱུག་གིས་སོ། །རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བཟའ་བ་དང ། བཏུང་བ་དང ། རང་རྩེར་གཞུག་པ་དང ། ལས་ཐམས་ཅད་ལ་སྦྱར་བ་ལ་ནི། དང་
196a
༄#། །པོའི་རྡོ་རྗེ་དོན་ཡོད་པའི་ཐམས་ཅད་དབང་དུ་བྱེད་པས་སོ། །དངོས་གྲུབ་ཐམས་ཅད་ལས་དེ་བཞིན་གཤེགས་པ་དང ། བྱང་ཆུབ་སེམས་དཔའ་དང ། རྡོ་རྗེ་འཛིན་པ་དང ། རྡོ་རྗེ་ལ་སོགས་མཐོང་བ་ལ་ནི་དང་པོའི་རྡོ་རྗེའི་བསྙེམས་པས་སོ། །རང་གི་བདག་ཉིད་རྡོ་རྗེ་སེམས་དཔའ་ལ་སོགས་པའི་གཟུགས་ཐམས་ཅད་སྤྲུལ་ཅིང་སྟོན་པ་མི་སྣང་བ་དང ། ནམ་མཁར་འགྲོ་བ་གྲུབ་པ་དང ། ཤིན་ཏུ་ཕྲ་བ་དང ། སྦོམ་པ་དང ། དུ་མར་སྟོན་པ་ལ་ནི་དང་པོའི་རྡོ་རྗེ་གཟུགས་སྣ་ཚོགས་པས་སོ། །འཇིག་རྟེན་གསུམ་གྱི་བདག་པོར་གྱུར་པ་ཐམས་ཅད་དབབ་པ་དང ། དབང་དུ་བྱ་བ་དང ། བཅིང་བ་དང ། ལས་ཐམས་ཅད་ལ་སྦྱར་བ་ལ་ནི་དང་པོའི་རྡོ་རྗེ་ཧཱུཾ་མཛད་ཀྱིས་སོ། །ལྷ་ཐམས་ཅད་དབབ་པ་དང ། བཅིང་བ་དང ། དབང་དུ་བྱ་བ་དང ། ལས་ཐམས་ཅད་ལ་ངེས་པར་སྦྱར་བ་ལ་ནི་དང་པོའི་རྡོ་རྗེ་ལྷའི་བདག་པོས་སོ། །ཀླུ་ཐམས་ཅད་གདོན་པ་དང ། འདུལ་བ་དང ། དབང་དུ་བྱ་བ་དང ། ལས་ཐམས་ཅད་ལ་ངེས་པར་སྦྱར་བར་བྱ་བ་ལ་ནི་དང་པོའི་རྡོ་རྗེ་འབར་བའི་རྡོ་རྗེས་སོ། །གནོད་སྦྱིན་ལ་སོགས་པ་ཐམས་ཅད་དགུག་པ་དང ། དབང་དུ་བྱ་བ་དང ། ལས་ཐམས་ཅད་ལ་ངེས་པར་སྦྱར་བར་བྱ་བ་དང ། སྐྲག་པར་བྱ་བ་ལ་ནི་དང་པོའི་རྡོ་རྗེ་གདོན་འདུལ་བས་སོ། །དཀྱིལ་འཁོར་ཐམས་ཅད་བརྟག་པ་དང ། འཇུག་པ་
196b
དང ། མཆོད་པ་དང ། བསྒྲུབ་པ་དང ། ལས་ཐམས་ཅད་ལ་ངེས་པར་སྦྱར་བར་བྱ་བ་ལ་ནི་དང་པོའི་རྡོ་རྗེ་འཁོར་ལོས་སོ། །ཕྱག་རྒྱ་ཐམས་ཅད་དགུག་པ་དང ། བཅིང་བ་དང ། དབང་དུ་བྱ་བ་དང ། བརྟན་པར་བྱ་བ་དང ། བསྒྲུབ་པ་ལ་ནི་དང་པོའི་རྡོ་རྗེ་ཕྱག་རྒྱ་གྲུབ་པས་སོ། །དམ་ཚིག་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། བསྒྲུབ་པ་ལ་ནི་དང་པོའི་རྡོ་རྗེ་དམ་ཚིག་མཆོག་གིས་སོ། །ལས་ཐམས་ཅད་རབ་ཏུ་བསྒྲུབ་པ་ལ་རྣམ་པ་མི་འཇིགས་པར་བྱ་བ་དང ། བརྟན་པར་བྱ་བ་དང ། གྲགས་པ་ཆེན་པོ་རབ་ཏུ་བསྒྲགས་པ་ལ་ནི་དང་པོའི་རྡོ་རྗེ་ལས་ཀྱིས་སོ། །རྡོ་རྗེ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་བསྒྲུབ་པ་ལ་ནི་དང་པོའི་རྡོ་རྗེས་སོ། །སེམས་དཔའ་ཆེན་པོ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་བསྒྲུབ་པ་ལ་ནི་དང་པོའི་རྡོ་རྗེ་སེམས་དཔས་སོ། །དེ་བཞིན་གཤེགས་པ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་བསྒྲུབ་པ་ལ་ནི་དང་པོའི་དེ་བཞིན་གཤེགས་པས་སོ། །རྡོ་རྗེ་འཛིན་པ་ཆེན་པོ་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་ལ་ནི་དང་པོའི་རྡོ་རྗེ་འཛིན་པས་སོ་ཞེས་ཀྱང་གསུངས་སོ། །དཀྱིལ་འཁོར་དག་ཏུ་མ་ཞུགས་པའམ། །སྡིག་པ་ཐམས་ཅད་བྱས་པ་འམ། །རང་གི་སྙིང་པོ་མ་བསྒྲུབས་པ་དང ། །དངོས་གྲུབ་
197a
༄#། །ཐམས་ཅད་གྲུབ་པར་འགྱུར། མ་བསྒྲུབས་པར་ཐམས་ཅད་འགྲུབ་པ་དོན་ཡོད་པར་གྲུབ་པ་ཕྱག་རྒྱ་ཆེན་པོ་མཆོག་ཏུ་གྲུབ་པའོ། །དེ་ནས་དང་པོའི་སྙིང་པོ་མ་བསྒྲུབས་པའི་ཐམས་ཅད་དོན་ཡོད་པ་ཐོགས་པ་མེད་པ་ལས་ཐམས་ཅད་ཀྱི་རྒྱུ་སྐད་ཅིག་ལ་བསྒྲུབ་པ་རྗེས་སུ་བཤད་པར་བྱའོ། །ཞེས་བཅོམ་ལྡན་འདས་རྡོ་རྗེ་ཐམས་ཅད་ཀྱི་སྣ་ཚོགས་པའི་འཕྲིན་ལས་རྡོ་རྗེ་འཆང་ཆེན་པོས་གསུངས་སོ། །དོན་ཡོད་པ་དང་ཐོགས་མེད་པ། །བདག་ཀྱང་བདེ་གཤེགས་ལྷན་ཅིག་ཏུ། །ལས་ཀྱི་རབ་འབྱམས་འདི་དག་ནི། ། དངོས་གྲུབ་སྐད་ཅིག་གིས་སྒྲུབ་བྱེད། །འདི་ལྟ་སྟེ། ཐམས་ཅད་ཤིན་ཏུ་བསྲུང་བ་དང ། ཡོངས་སུ་བསྐྱང་བ་དང ། ཞི་པ་དང ། བདེ་ལེགས་སུ་བྱ་བ་དང ། ཚེ་མངོན་པར་འཕེལ་བར་བྱ་བ་ལ་ནི་རྡོ་རྗེ་གར་གྱི་སེམས་དཔའི་ཚུལ་གཙུག་ཏོར་གྱི་ཕྱག་རྒྱས་སོ། །དཀྱིལ་འཁོར་ཐམས་ཅད་མཚམས་དང ། ཕྱོགས་དང ། དམ་ཚིག་དང ། དངོས་གྲུབ་བཅིང་ཞིང་བསྲུང་བ་ལ་ནི་རྡོ་རྗེ་གར་གྱི་སོ་སོར་འབྲང་བ་ཆེན་པོས་སོ། །ཉིན་གསུམ་པ་དང ། ཉིན་བཞི་པ་དང ། སླར་ཟློག་པ་དང ། རྟག་པ་ཅན་དང ། ཁྱབ་འཇུག་གི་རིམས་ཐམས་ཅད་གསལ་བ་ལ་ནི་རྡོ་རྗེ་གར་གྱི་རིམས་ནད་མེད་པས་སོ། །གདུང་བ་ཐམས་ཅད་དང ། གནོད་བྱེད་དང ། ནད་དང ། མྱ་ངན་དང ། སྡུག་བསྔལ་ཐམས་ཅད་གཞིག་
197b
པ་ལ་ནི་རྡོ་རྗེ་གར་གྱིས་སྡུག་བསྔལ་ཉེ་བར་ཞི་བས་སོ། །དུག་དང་སྦྱར་བའི་དུག་ལས་ཉེ་བར་ཐར་པ་དང ། དབབ་པ་དང ། བཅིང་བ་དང ། བཟའ་བ་དང ། བདུད་རྩིར་བྱ་བ་ལ་ནི་རྡོ་རྗེ་གར་གྱི་ཉེ་བའི་དུག་གིས་སོ། །གདོན་ཐམས་ཅད་དབབ་པ་དང ། བཅིང་བ་དང ། དམ་ཚིག་འཛིན་དུ་གཞུག་པ་དང ། རབ་ཏུ་གདུལ་བ་དང ། བསྲུང་བ་ལ་ནི་རྡོ་རྗེ་གར་གྱི་གདོན་ལས་ཐར་པའོ། །ཐམས་ཅད་ལ་བཅིང་བ་དང ། ཐར་པ་དང ། དྲལ་བ་དང ། ལྟུང་བ་དང ། ལྡང་བ་ལ་ནི་རྡོ་རྗེ་གར་གྱི་རྡོ་རྗེ་ཆེན་པོའི་ཁྲོ་བོས་སོ། །མཁའ་འགྲོ་མ་ཐམས་ཅད་ཀྱི་ཕྱག་རྒྱ་གཞིག་པ་དང ། གདོན་ལས་ཐར་བར་བྱ་བ་དང ། ཤི་བ་བསླང་བར་བྱ་བ་དང ། ཚེ་མངོན་པར་འཕེལ་བ་དང ། ཤིན་ཏུ་བསྲུང་བ་ལ་ནི་རྡོ་རྗེ་གར་གྱི་ཕྱག་རྒྱའི་ལན་གྱིས་སོ། །སྒྲིབ་པ་ཐམས་ཅད་དང ། སྡིག་པ་ཐམས་ཅད་དང ། རྨི་ལམ་ངན་པ་དང ། ལྟས་ངན་པ་དང ། བྱུར་གཞིག་པ་ལ་ནི་རྡོ་རྗེ་གར་གྱི་ཞི་བས་སོ། །ཐམས་ཅད་དབབ་པ་དང ། བསྐྱོད་པ་དང ། གར་བྱེད་དུ་གཞུག་པ་དང ། ཐམས་ཅད་བདེན་པར་སྨྲར་གཞུག་པ་དང ། པྲ་སེ་ན་ཐམས་ཅད་བསྒྲུབ་པ་ལ་ནི་རྡོ་རྗེ་གར་གྱི་ཐམས་ཅད་འབེབས་པའི་ཕྱག་རྒྱས་སོ། །ཐམས་ཅད་རྒྱས་གདབ་པ་དང ། གསད་པ་དང ། ལྟུང་བར་བྱ་བ་དང ། བསླང་བ་དང ། སླར་གསོ་བ་ལ་ནི་དོན་ཡོད་པའི་རྡོ་རྗེ་གར་གྱི་མཁའ་འགྲོ་མ་ཆེན་མོས་སོ། །
198a
༄#། །ཐམས་ཅད་རེངས་པར་བྱ་བ་དང ། རྨོངས་པར་བྱ་བ་དང ། གཉིད་ལོག་པར་བྱ་བ་དང ། གསད་པ་དང ། བཟའ་བར་བྱ་བ་ལ་ནི་རྡོ་རྗེ་གར་གྱི་གདུག་པའི་སྲིན་པོས་སོ། །གཞན་གྱི་དཔུང་ཐམས་ཅད་སྐྲག་པར་བྱ་བ་དང ། གཞིག་པར་བྱ་བ་དང ། དབང་དུ་བྱ་བ་དང ། ལྟུང་བར་བྱ་བ་དང ། གསད་པར་བྱ་བ་ལ་ནི་རྡོ་རྗེ་གར་གྱི་གཤེད་བྱེད་ཀྱིས་སོ། །ཁྲོ་བོ་ཐམས་ཅད་བསལ་བ་དང ། བཞིན་རས་དང་བར་བྱ་བ་དང ། རྩོད་པ་ལས་རྒྱལ་བ་དང ། འཇིགས་པ་ལས་ཐར་པ་དང ། གཡུལ་འགྱེད་པ་ལ་སོགས་པའི་རྒྱལ་བ་བསྒྲུབ་པ་ལ་ནི་རྡོ་རྗེ་གར་གྱི་རྒྱལ་མཚན་མཆོག་གི་དཔུང་རྒྱན་གྱིས་སོ། །སྤྲིན་ཐམས་ཅད་ཡང་དག་པར་བཟུང་ཞིང་མི་གཡོ་བར་བྱ་བ་དང ། ཆར་ཆེན་པོ་དབབ་པ་དང ། རླུང་དང ། ཆར་པ་དང ། གློག་དང ། སེར་བ་བཟློག་པ་དང ། དྲོ་བ་དང ། གྲང་བ་བསལ་བ་ལ་ནི་རྡོ་རྗེ་གར་གྱི་དབང་པོའི་རྡོ་རྗེས་སོ། །གཟུགས་དང ། སྒྲ་དང ། དྲི་དང ། རོ་དང ། རེག་བྱ་ཐམས་ཅད་ཤིན་ཏུ་གྲུབ་པ་ལ་ནི་རྡོ་རྗེ་གར་གྱི་འདོད་པའི་དབང་ཕྱུག་གིས་སོ། །རྒྱུ་བ་དང ། མི་རྒྱུ་བ་ཐམས་ཅད་རྗེས་སུ་ཆགས་པ་དང ། དགུག་པ་དང ། དབང་དུ་བྱ་བ་དང ། རྩེ་བ་དང ། ལས་ཐམས་ཅད་ལ་ངེས་པར་སྦྱར་བ་ལ་ནི་རྡོ་རྗེ་གར་གྱི་དངོས་གྲུབ་ཐམས་ཅད་ཀྱིས་སོ། །ལྷ་ཐམས་ཅད་དབབ་པ་དང ། ཀླུ་
198b
ཐམས་ཅད་དབང་དུ་བྱ་བ་དང ། གནོད་སྦྱིན་དང ། འབྱུང་པོ་དང ། མ་མོ་ཐམས་ཅད་ལས་ལ་ངེས་པར་སྦྱར་བ་ལ་ནི་རྡོ་རྗེ་གར་གྱི་རྡོ་རྗེ་གླུའི་མཆོག་གིས་སོ། །རྣམ་ཐོས་སྲས་མནན་ནས་དཔལ་དྲང་བ་དང ། ལྷའི་བུ་མོ་ཐམས་ཅད་རབ་ཏུ་དབྲོག་པ་དང ། ལྷ་དང ། ལྷ་མ་ཡིན་གྱི་བུད་མེད་ཐམས་ཅད་དང་རྩེ་བ་དང ། འཇིག་རྟེན་གསུམ་མ་ལུས་པ་ལས་རྒྱལ་བ་དང ། འདོད་པའི་དབང་ཕྱུག་ཐམས་ཅད་ལས་རྒྱལ་བ་དང ། དབང་ཕྱུག་ཆེན་པོ་ཐམས་ཅད་དབྲོག་པ་ལ་ནི་རྡོ་རྗེ་གར་གྱི་སྐྱེས་བུ་བྱེད་པ་ཆེན་པོས་སོ། །མཆོད་པ་ཐམས་ཅད་སྒྲུབ་པ་དང ། ཐམས་ཅད་རྡོ་རྗེར་བྱ་བ་དང ། བདུད་ལ་སོགས་པ་ཐམས་ཅད་རབ་ཏུ་གཞོམ་པ་དང ། ཕྱག་རྒྱ་ཐམས་ཅད་བཅིང་བ་དང ། དངོས་གྲུབ་ཀྱི་མཆོག་ལ་སོགས་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་མྱུར་དུ་གྲུབ་པར་བྱ་བ་ལ་ནི་རྡོ་རྗེ་གར་གྱི་དོན་ཡོད་ཅིང་ཐོགས་པ་མེད་པ་མྱུར་བའི་ལས་སྣ་ཚོགས་ཀྱི་དངོས་གྲུབ་དམ་པས་སོ།། །།དེ་ནས་ཕྱག་རྒྱ་ཐམས་ཅད་བསྒྲུབ་པའི་ཆོ་ག་རྒྱས་པའི་རྒྱུད་ནི། ཉིན་རེ་དང་པོ་ལན་གཅིག་ནི། །ཕྱག་རྒྱ་ཐམས་ཅད་རབ་སྒྲུབ་བྱེད། །སྙིང་མཆོག་ལན་གཅིག་བཟླས་ནས་ནི། །ཕྱག་རྒྱ་ཆེན་པོ་རབ་གྲུབ་བྱ། །དེ་ཡིས་རྗེས་ལ་ཉེ་སྙིང་པོ། །ལས་རྣམས་ཀུན་ལ་ངེས་སྦྱར་བས། །དོན་ཡོད་གྲུབ་པས་ལས་རྣམས་ནི། །ཀུན་ལ་
199a
༄#། །ཤིན་ཏུ་འགྲུབ་པར་འགྱུར། །ཕྱག་རྒྱ་ཐམས་ཅད་རབ་བྱིན་རློབ། །ཕྱག་ན་རྡོ་རྗེའི་ཕྱག་རྒྱ་ནི། །དཀྱིལ་འཁོར་དག་ཀྱང་མཐོང་བ་ལ། །མ་བཤད་པ་ལའང་རབ་འགྲུབ་འགྱུར། །རྟོག་འདིར་འཇིག་པ་ཡོད་མིན་ཏེ། །འཁོར་ལོ་མེད་ལ་བརྒྱ་བྱིན་ལ། །གང་ཕྱིར་བདག་ལ་བྱིན་རློབ་པས། །རང་སྲས་རྒྱུ་ནི་འགྱུར་བ་ཡིན། །སྡིག་པ་ཆེན་པོ་བྱེད་པ་ཡང ། །བསམ་པ་ཤེས་ནས་སྦྱིན་པར་བྱ། །འདི་དག་བཅིངས་ཙམ་ཉིད་དག་བྱེད། །དངོས་གྲུབ་ཐམས་ཅད་འགྲུབ་པར་འགྱུར། །དཔལ་མཆོག་དང་པོའི་རྟོག་པ་ཆེན་པོའི་རྒྱལ་པོ་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་ཆོ་ག་རྒྱས་པའི་རྟོག་པའོ།། །།དེ་ནས་སྟོན་པ་རྡོ་རྗེ་འཛིན། །འབྱིན་པ་བྱེད་པ་བདེ་བ་ཆེ། །བདེ་ཆེན་ཅན་དུ་བརྟན་ཕྱིར་དང ། །སེམས་ཅན་ཐམས་ཅད་རྣམ་དག་ཕྱིར། །ཁམས་ཀུན་དང་མཉམ་ཟད་པ་མེད། །ཀུན་གྱི་བདག་ཉིད་ལ་ཞུགས་ཏེ། །མཉམ་པའི་དངོས་གྲུབ་མཆོག་སྤྲོས་ནས། ། དེ་བཞིན་གཤེགས་པའི་རིགས་ཕྱུང་ངོ ། །མཐའ་ཡས་པ་ཡི་ཞིང་ཐམས་ཅད། །འཇིག་རྟེན་ཀུན་གྱི་ཁམས་བཅས་པས། །དེ་ཚེ་སངས་རྒྱས་ཐམས་ཅད་ཀྱིས། །ཏིལ་གྱི་གང་བུ་བཞིན་མྱུར་གང ། །འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་མདུན་ཡང་དག་བཞུགས། །སེམས་ཅན་ཐམས་ཅད་མ་དག་པས། །རང་རིག་ལས་ཀྱི་
199b
དག་མ་གྱུར། །དེ་ཚེ་སེམས་ཅན་ཁམས་རྣམས་ནི། །རང་བཞིན་གྱིས་ནི་གསོ་དཀའ་ཕྱིར། །རང་གི་ལས་ནི་སྦྱང་དོན་དུ། །བཏང་སྙོམས་ཆེན་པོ་མཛད་པ་ཡིན། །དེ་ནས་བཅོམ་ལྡན་རྡོ་རྗེ་ཅན། །སེམས་དཔའ་ཆེན་པོ་བདེ་བ་ཆེ། །བྱང་ཆུབ་ཆེན་པོར་ཐུགས་བརྟན་པས། །སྐད་ཅིག་གིས་ནི་ཡང་དག་བསྐུལ། །སེམས་ཅན་ལ་ཕན་བསོད་ནམས་ཅན། །བྱང་ཆུབ་སེམས་ནི་བརྟན་པ་དག་།སེམས་ཅན་ཁམས་ནི་རྒུད་འགྱུར་བས། །ཤིན་ཏུ་བཏང་སྙོམས་མ་མཛད་ཅིག་།དེ་ནས་སངས་རྒྱས་ཀྱིས་གསུངས་པ། །སྐུ་གསུང་ཐུགས་ཀྱི་རྡོ་རྗེ་ཅན། །ཐུགས་རྗེའི་བདག་ཉིད་ཅན་གྱི་ཐབས། །བྱང་ཆུབ་སེམས་མཆོག་ཁྱོད་སྨྲོས་ཤིག་།དེ་ནས་སྟོན་པ་རྡོ་རྗེ་འཛིན། །དེ་ཚེ་ཀུན་ནས་བྱིན་གྱིས་བརླབས། །བདེ་བ་ཆེན་པོ་རྡོ་རྗེ་ཆེ། །དཀྱིལ་འཁོར་ཆེན་པོ་དམ་པ་ཡིན། །ཁམས་གསུམ་འཁོར་བའི་རྒྱ་ཁྱོན་གྱི། །འཁོར་ལོ་ཆེན་པོ་གདོད་ནས་བྱུང ། །དེ་ཡིས་ཁམས་གསུམ་གནས་པ་ཡིས། །སེམས་ཅན་ཐམས་ཅད་ཡང་དག་བསྒྲུབས། །སངས་རྒྱས་ཀུན་སོགས་དངོས་གྲུབ་ལ། །དེ་ཚེ་དག་པ་འགྲུབ་པར་འགྱུར། །དེ་ནས་སངས་རྒྱས་ཐམས་ཅད་ནི། །འདུས་ནས་གསོལ་བ་འདེབས་མཛད་པ། །དེ་བཞིན་གཤེགས་པའི་རིགས་ཆེན་པོ། །སངས་རྒྱས་ཀུན་མཆོག་བཤད་དུ་གསོལ། །དེ་ནས་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ལ་ཡང་དག་གནས། །སྐུ་གསུང་
200a
༄#། །ཐུགས་ནི་རྡོ་རྗེ་ལ། །ཡང་དག་སྤྲོས་ཏེ་འདི་གསུངས་སོ། །ོཾ་བྷཱུཾ་ཁཾ། །དེ་ནས་འདི་ནི་གསུངས་ཙམ་གྱིས། །སངས་རྒྱས་ཐམས་ཅད་འདུས་ནས་ནི། །བདུད་བཅོམ་ལ་སོགས་མཛད་ནས་ནི། །བྱང་ཆུབ་སྙིང་པོར་བྱིན་གྱིས་བརླབས། །དེ་ནས་སྟོན་པ་རྡོ་རྗེ་འཛིན། །དཀྱིལ་འཁོར་གྱི་ནི་མཆོག་གསུངས་པ། །སེམས་ཅན་ལ་ནི་བདེ་དོན་ཕྱིར། །རྟོག་པ་ཀུན་གྱི་བདེ་བ་ཆེ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །དཀྱིལ་འཁོར་ཆེན་པོའི་ཕྱི་རོལ་མཆོག་།རྡོ་རྗེ་འཁོར་ལོ་ཡང་དག་བྲི། །འཁོར་ལོ་ལྟ་བར་སངས་རྒྱས་ཉིད། །འཛུམ་པའི་ཚེམས་ནི་མི་སྣང་བ། །སུ་ར་ཏེ་ས་མ་ཡ་སྟྭཾ། །ོཾ་སིདྡྷ་མཱཾ་ཞེས་བརྗོད་དགོད། །མདུན་དུ་བདུད་ལས་རྣམ་པར་རྒྱལ། །མཛད་པའི་སངས་རྒྱས་ཡང་དག་བྲི། །གཡས་སུ་བྱང་ཆུབ་སེམས་དཔའ་ཡི། །ནོར་ཆེན་པོས་ནི་དབང་བསྐུར་བ། །རྒྱབ་ཏུ་བྱང་ཆུབ་སེམས་དཔའ་དང ། །མཉམ་དུ་ཆོས་ཀྱི་འཁོར་ལོ་བསྐོར། །གཡོན་དུ་ལོག་པར་རྣམ་དྲེགས་པ། །སྡིག་པ་བསྡུས་པ་ཀུན་འབྱིན་པའོ། །དེ་ནས་འདི་རྣམས་ཀྱི་སྙིང་པོ་ནི། བཛྲ་སཏྭ། བཛྲ་རཏྣ། བཛྲ་དྷརྨ། བཛྲ་ཀརྨ། དེ་ནས་ཕྱག་རྒྱ་རྣམས་ཏེ། སཏྭ་བཛྲཱི། རཏྣ་བཛྲཱི། པདྨ་བཛྲཱི། བི་ཤཝ་བཛྲཱི། །མཚམས་ཀྱི་ཆར་ནི་རྡོ་རྗེ་དང ། །རིན་ཆེན་སྡོང་བུ་ནོར་བུ་བྲིའོ། །མཚམས་རྣམས་སུ་ནི་ལྷ་མོ་སྟེ། །ལྕགས་ཀྱུ་ལ་སོགས་སྒོ་རྣམས་
200b
སུ། །དེ་བཞན་སྔ་མ་ཅི་ལྟ་བར། །འཁོར་ལོ་དེ་ནི་བརྟག་པར་བྱ། །མཆོད་པའི་ཐལ་མོ་སྙིང་གར་བཅིང ། །གཡོན་དུ་དེ་བཞིན་བསྐོར་བར་བྱ། །མེ་ཏོག་དང་བཅས་ཕྱག་རྒྱ་འདི། །སངས་རྒྱས་ཀུན་གྱི་དམ་ཚིག་རིམ། །མེ་ཏོག་བཅས་ཏེ་སྙིང་གར་བཅིང ། །བསམ་པ་གཡོས་པས་གདུང་པར་བྱ། །མགོན་ལ་མགོ་བོས་ཕྱག་བྱས་ལ། །བསྐོར་བ་ལན་གསུམ་བྱས་ནས་ནི། །ཞུགས་ནས་མེ་ཏོག་འདོར་བར་བྱ། །ཤིན་ཏུ་གསང་བ་ཡང་དག་དགུག་།དེ་ལ་དེ་བཞིན་གཤེགས་པ་ཐམས་ཅད་མཉེས་པར་བྱ་བ་དང ། དབང་དུ་བྱ་བ་དང ། དགུག་པ་དང ། བསྒྲུབ་པར་བྱ་བའི་སྙིང་པོ་ནི་འདི་ཡིན་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ། ཨཱདྱ་ནུཏྤན་ན་ཏྭ་ད། །དེ་ནས་ཆོ་ག་ཇི་བཞིན་དུ། །སྟོན་ལ་མེ་ཏོག་སིལ་མ་དོར། །སངས་རྒྱས་བྱང་ཆུབ་རབ་བསྒྲུབ་ཕྱིར། །འགྲོ་བའི་མགོན་ལ་དེ་ཉིད་བརྗོད། །དེ་ཡིས་ཀུན་ནས་སངས་རྒྱས་ནི། །ཐམས་ཅད་འདུས་པ་ཉིད་དུ་འགྱུར། །ཐམས་ཅད་མི་དམིགས་སྦྱོར་བ་ཡིས། ། དངོས་གྲུབ་ཐམས་ཅད་སྩོལ་བར་མཛད། །དཀྱིལ་འཁོར་དེར་ཞུགས་པ་ལ་ནི། །དངོས་གྲུབ་ཐམས་ཅད་འགྲུབ་པར་འགྱུར། །དགའ་བ་ལ་སོགས་མཚན་མ་མཆོག་།སྣ་ཚོགས་པ་ནི་འབྱུང་བར་འགྱུར། །དེ་ནས་དེ་བཞིན་ཆོ་ག་ནི། །རྒྱས་པས་སློབ་མ་མཆོག་ཏུ་གཞུག་།མཆོད་པའི་ཐལ་མོས་འཁོར་ལོ་ཆེ། །མཆོད་ནས་སླར་ནི་དབྱུང་བར་བྱ། །སྒྲུབ་པ་
201a
༄#། །བྱས་ནས་དངོས་གྲུབ་ཀྱང ། །ཆོ་ག་ཅི་བཞིན་རབ་བཤད་བྱ། །རས་ལ་བཅོམ་ལྡན་བདུད་ལ་སོགས། །རྣམ་པར་རྒྱལ་བ་མཉེས་པར་བྲི། །སྒྲུབ་འདི་ལན་གཅིག་ཙམ་གྱིས་ནི། །དེ་འདྲའི་སྒྲུབ་པས་འགྲུབ་པར་འགྱུར། །སྐུ་གཟུགས་སོགས་མདུན་ཡང་དག་པར། །ཡེ་ཤེས་ཁུ་ཚུར་ཡོངས་བཟུང་ལ། །རྡོ་རྗེའི་ཚིག་གི་ཆོ་ག་བཞིན། ། བཟླས་བརྗོད་སྟོང་ཕྲག་བརྒྱ་བྱའོ། །མདོར་ན་འབུམ་ནི་རྫོགས་པ་ན། །ཅི་འདོད་དངོས་གྲུབ་ཐམས་ཅད་དང ། །ཚེ་མཆོག་འདི་ལ་སངས་རྒྱས་ཉིད། །ཐོབ་འགྱུར་འདི་ལ་ཐེ་ཚོམ་མེད། །དེ་ནས་དེ་བཞིན་གཤེགས་པའི་ཕྱག་རྒྱ་ཆེན་པོའི་སྒྲུབ་པ་ཆེན་པོའི་རྒྱུད་ནི། ཕྱག་རྒྱ་གང་རུང་གཅིག་བཅིངས་ནས། །བདག་ནི་སངས་རྒྱས་ཡིན་བསྒོམས་ན། །ཕྱག་རྒྱ་ཆེན་པོའི་དངོས་གྲུབ་ཆེ། །བསྟན་པར་མྱུར་དུ་ཐོབ་པར་འགྱུར། །དེ་ནས་དམ་ཚིག་སྒྲུབ་པའི་རྒྱུད་ནི། །སྙིང་གར་རྡོ་རྗེ་གཟུགས་བཞག་སྟེ། །ས་མ་ཡ་སྟྭཾ་ཞེས་བརྗོད་ལ། ། བཟླས་བརྗོད་འབུམ་གྱིས་བསྒྲུབས་ནས་ནི། །དངོས་གྲུབ་ཐམས་ཅད་ཐོབ་པར་འགྱུར། །དེ་ནས་ལས་ཀྱི་ཕྱག་རྒྱ་ཐམས་ཅད་སྒྲུབ་པའི་རྒྱུད་ནི། །བདུད་ལས་རྒྱལ་བའི་མཆོག་བཅིངས་ཏེ། །ཆོས་ཀྱི་འཁོར་ལོ་རབ་ཏུ་བསྐོར། །མཚུངས་མེད་སེམས་ཅན་དོན་བྱས་ནས། །ལས་ཀྱི་ཕྱག་རྒྱ་རྟག་ཏུ་འགྲུབ། ཅེས་བཅོམ་ལྡན་འདས་ཀྱིས་གསུངས་སོ། །དེ་
201b
བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་མཆོག་སྒྲུབ་པའི་ཆོ་ག་རྒྱས་པའི་རྒྱུད་དོ།། །།དེ་ནས་མ་བསྒྲུབས་དངོས་གྲུབ་མཆོག་།ལས་རྣམས་རབ་འབྱམས་དམ་པ་སྟེ། །སྡིག་པ་ཀུན་སེལ་སྣ་ཚོགས་པ། །གོ་རིམས་བཞིན་དུ་རབ་བཤད་བྱ། །འདི་ལྟ་སྟེ། ནད་ཐམས་ཅད་དང ། མྱ་ངན་དང ། གནོད་པ་དང ། གནོད་བྱེད་དང ། དུག་ཐམས་ཅད་དང ། སྦྱར་བའི་དུག་དང ། གཤེད་བྱེད་དང ། གཡེངས་བྱེད་དང ། རོ་ལངས་དང ། སྔགས་དང ། སྨན་དང ། བགེགས་དང ། ལོག་འདྲེན་དང ། སྡིག་པ་དང ། རྨི་ལམ་ངན་པ་དང ། དུས་མ་ཡིན་པར་འཆི་བ་དང ། རིམས་དང ། གདོན་དང ། མཁའ་འགྲོ་མ་དང ། ཉེ་བར་འཚེ་བ་དང ། འགོ་བའི་ནད་དང ། ཉེས་པ་དང ། ཉོན་མོངས་པ་དང ། ལུས་དང ། ངག་དང ། སེམས་ཀྱི་སྡུག་བསྔལ་ཐམས་ཅད་རྣམ་པར་བཤིག་པ་ལ་ནི་དེ་བཞིན་གཤེགས་པ་ཐམས་ཅད་ཀྱིས་སྡུག་བསྔལ་འཕྲོག་པར་བྱེད་པས་སོ། །ཚེ་དང ། ལང་ཚོ་དང ། གཟུགས་དང ། ཁ་དོག་དང ། གཟི་བྱིན་ཆེན་པོ་དང ། མདངས་དང ། སྟོབས་དང ། སྤྲོ་བ་དང ། བརྩོན་འགྲུས་དང ། དཔལ་དང ། སྐལ་བ་བཟང་པོ་དང ། བསོད་ནམས་དང ། མིང་དང ། སྙན་པ་དང ། གྲགས་པ་དང ། དྲན་པ་དང ། བློ་གྲོས་དང ། བརྟན་པ་དང ། རྟོག་པ་དང ། སྟོབས་དང ། ཏིང་ངེ་འཛིན་དང ། ཕུང་པོ་དང ། འདུ་བྱེད་དང ། སྐུ་དང ། གསུང་
202a
༄#། །དང ། ཐུགས་འཕེལ་བ་ལ་ནི་དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོས་སོ། །དེ་བཞིན་གཤེགས་པ་ཐམས་ཅད་ཀྱི་སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཡེ་ཤེས་དང ། སྟོབས་དང ། ཐབས་དང ། རྡོ་རྗེ་དང ། བསྒྲུབ་པ་དང ། གཟུངས་དང ། ས་དང་སྤྱོད་པ་དང ། སོ་སོ་ཡང་དག་པར་རིག་པ་དང ། སངས་རྒྱས་ཀྱི་ཆོས་མ་འདྲེས་པ་དང ། ཆོས་དང ། ལས་དང ། སྣ་ཚོགས་པའི་བྱ་བ་དང ། སེམས་ཅན་གྱི་དོན་དང ། སངས་རྒྱས་ཀྱི་མཛད་པའི་དོན་དང ། སྐུ་དང ། གསུང་དང ། ཐུགས་དང ། རྡོ་རྗེ་ཆེན་པོ་གྲུབ་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐམས་ཅད་ཀྱིས་སོ། །དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའི་སེམས་བསྐྱེད་པ་དང ། ཀུན་ཏུ་བཟང་པོའི་ཆོ་ག་སྤྱོད་པ་རྫོགས་པར་བྱ་བ་དང ། སེམས་ཅན་ཐམས་ཅད་ཀྱི་དོན་དང ། འཕོ་བ་དང ། སྐྱེ་བའི་ས་དང ། གཞོན་ནུའི་རོལ་པ་སྟོན་པ་དང ། མངོན་པར་བྱུང་བ་དང ། དཀའ་བ་སྤྱོད་པ་སྟོན་པ་དང ། བྱང་ཆུབ་ཀྱི་སྙིང་པོར་གཤེགས་པ་དང ། བདུད་ཐམས་ཅད་འདུལ་བ་དང ། བྱང་ཆུབ་ཆེན་པོར་མངོན་པར་བྱང་ཆུབ་པ་དང ། ཆོས་ཀྱི་འཁོར་ལོ་བསྐོར་བ་དང ། མུ་སྟེགས་ཐམས་ཅད་ཚར་གཅོད་པ་
202b
དང ། འཇིག་རྟེན་གསུམ་ལས་རྣམ་པར་རྒྱལ་བ་དང ། ལྷ་ལས་བབས་པ་དང ། འདུས་པ་ཆེན་པོའི་བྱིན་གྱིས་བརླབ་པ་དང ། གདུག་པ་ཐམས་ཅད་འདུལ་བ་དང ། འདུལ་བ་ལ་རབ་ཏུ་བཞག་པ་དང ། ངན་འགྲོ་ཐམས་ཅད་ལས་འདོན་པ་དང ། མདོ་སྡེ་ཐམས་ཅད་སྟོན་པར་མཛད་པ་དང ། རྟོག་པ་ཐམས་ཅད་བྱིན་གྱིས་བརླབ་པ་དང ། དངོས་གྲུབ་ཐམས་ཅད་སྦྱིན་པ་དང ། དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ལ་དམིགས་པའི་རྫུ་འཕྲུལ་དང ། ཆོ་འཕྲུལ་བསྒྲུབ་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་ཀྱི་རྡོ་རྗེས་སོ། །ཅི་ལྟར་ཕྱག་རྒྱ་འདི་དག་གིས། །བྱང་ཆུབ་སེམས་ལ་མངོན་བརྟེན་པ། །དེ་ལྟར་བྱང་ཆུབ་སྤྱོད་ཚོགས་ཀྱིས། །བྱང་ཆུབ་དམ་པ་ཐོབ་མི་འགྱུར། ། དོན་ཡོད་བསོད་ནམས་དམ་པ་ཡིས། །ལས་ཀྱི་རབ་འབྱམས་སྒྲུབ་བྱེད་པ། །ཆོ་ག་མ་གྲུབ་པ་རྣམས་གྲུབ། །སངས་རྒྱས་ཆོས་ནི་རབ་སྟེར་བྱེད། །རྣམ་པ་ཀུན་ཏུ་དད་ལྡན་པའི། ། སེམས་ཅན་ཀུན་ལ་སྦྱིན་པར་བྱ། །དཀྱིལ་འཁོར་དག་ཏུ་མ་ཞུགས་པ། །སྐད་ཅིག་གིས་ནི་སྦྱོར་བར་བྱེད། །དཔལ་མཆོག་དང་པོ་རྟོག་པའི་རྒྱལ་པོ་ཆེན་པོ་ལས། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་རྡོ་རྗེ་བྱིན་གྱིས་བརླབས་པའི་རྡོ་རྗེའི་རྟོག་པ་རྒྱས་པའོ།། །།དེ་ནས་སྣ་ཚོགས་ལས་ཆེན་པོ། །ཁྱབ་བདག་རྡོ་རྗེ་འཛིན་ཆེན་
203a
༄#། །པོ། །གདུག་པ་ཐམས་ཅད་འདུལ་བའི་མཆོག་།སེམས་ཅན་ཀུན་ལ་རྗེས་སྟོན་མཛད། །དེ་བཞིན་གཤེགས་པའི་རིགས་བསྐྱེད་ཅིང ། །གང་ཕྱིར་ཉེས་བྱས་ཀྱིས་གདུག་པའི། །རང་གི་རང་སེམས་སྤྱོད་པ་ཡིས། །ཞི་བས་སེམས་ཅན་ཀུན་གྱི་དོན། །གདུལ་བར་རབ་ཏུ་བསྒྲུབ་མི་ནུས། །སངས་རྒྱས་ཀུན་གྱིས་བསྒྲུབ་བྱ་བ། །འགྲོ་བ་འདི་དག་ཐམས་ཅད་ཡིན། །གང་ཚེ་བདེ་གཤེགས་སེམས་ཅན་དོན། །དམ་བ་མཛད་པར་མི་སྤྱོད་པ། །དེ་ཚེ་ཉིད་ཀྱིས་དངོས་པོ་ཀུན། །གཙོ་བོས་རྡོ་རྗེ་གསོལ་བ་བཏབ་སེམས་ཅན་ཐམས་ཅད་འདུལ་མཛད་པ། །བཅོམ་ལྡན་འདས་ལ་གསོལ་བ་བཏབ། །ུ་ཏི་ཥྛ་ས་མ་ཡ་ཀྲོ་བྷ་ནི་སུམྦྷ་ཛྭཱ་ལ་བཛྲ་ཧཱུཾ། དེ་ནས་སྔགས་འདི་གསུངས་ཙམ་གྱིས། ། ཕྱག་ན་རྡོ་རྗེ་རང་ཉིད་གཙོ། །སྐུ་གསུང་ཐུགས་ཀྱི་རྡོ་རྗེ་ལས། །སླར་བྱུང་ནས་ནི་མདུ་ནན་གནས། །ཁྲོ་ཆེན་རྒྱལ་པོའི་སྐུ་ཡིས་ནི། །སེམས་དཔའི་སྐྱིལ་ཀྲུང་གིས་ལེགས་བཞུགས། །འབར་བའི་ཕྲེང་འོད་ཀྱིས་གསལ་བ། །སྲེག་པའི་བསྐལ་པ་གཞན་འདྲ་བ། །གཡོན་པའི་རྡོ་རྗེ་བསྙེམས་པ་ཆེ། །དྲག་ཏུ་གསོར་བས་བསྐྱོད་མཛད་ཅིང ། །འབར་བའི་རྡོ་རྗེ་ཆེར་འབར་བ། །རྣམ་པར་འཕྲོས་པས་སྲེག་པ་འདྲ། །འབར་བ་ཆེན་པོས་གསོད་པ་ནི། །བསྐལ་པའི་མེ་ཡི་ཕུང་པོ་འདྲ། །དང་པོའི་རྡོ་རྗེ་ཁྲོ་གཉེར་བཅས། །རྡོ་རྗེ་
203b
མཆོག་འཛིན་པས་གསུངས་པ། །དེ་ལ་རྡོ་རྗེ་ཆེན་པོ་མེ་དང་ཉི་མ་ལྟར་འབར་བ་ཞེས་བྱ་བའི་སྙིང་པོ་འདི་ཡིན་ཏེ། ཧཱུཾ། དེ་ནས་འདི་ནི་གསུངས་ཙམ་གྱིས། །སྡིག་པ་ཀུན་གྱི་བུད་ཤིང་ཟད། །འཇིག་རྟེན་ཁམས་ཀྱི་འཇིག་རྟེན་གསུམ། །ཐམས་ཅད་གཡོས་ཞིང་འགུལ་པར་འགྱུར། །ལྷ་ཆེན་ལ་སོགས་ལྷ་རྣམས་ནི། །གཡོ་བ་མེད་ཅིང་རྨོངས་པར་འགྱུར། །རྡོ་རྗེ་འབར་བ་འཁྲུགས་པ་ཀུན། །དེ་བཞིན་འཇིག་པ་ལྟ་བུར་འགྱུར། །ཉན་ཐོས་དང་ནི་རང་རྒྱལ་རྣམས། །མྱ་ངན་འདས་པར་ཉེ་བར་འགྲོ། ལྷ་ལ་སོགས་པའི་སྲིད་གསུམ་ཀུན། །དེ་ཚེ་ཀུན་ཏུ་རྨོངས་པར་འགྱུར། །སངས་རྒྱས་ཐམས་ཅད་འདུས་པ་ཡིས། །སངས་རྒྱས་བྱང་ཆུབ་ཡང་བསྟན་མཛད། །སེམས་དཔའ་ཀུན་གྱི་ཐབས་ཆེན་པོ། །དམ་པ་ཡང་ནི་ཐུགས་སུ་ཆུད། །དེ་ནས་རྡོ་རྗེ་འབར་བའི་མཆོག་།འབར་བའི་ཕྲེང་བ་འཁྲུགས་པའི་འོད། །རྡོ་རྗེ་མཆེ་བ་གཙིགས་པའི་ཞལ། །ཞལ་རས་ཁྲོ་དང་བཅས་པ་ཡིན། །གཡོན་བརྐྱང་བས་ནི་ལེགས་པར་བཞུགས། །སྤྱན་འབར་འཇིགས་སུ་རུང་བ་སྟེ། །དབུ་སྐྲ་གྱེན་དུ་བརྫེས་ཤིང་གཡོ། །ཀུན་ནས་འཁྱིལ་ཅིང་འབར་བ་ཆེ། །རྡོ་རྗེ་གསང་བའི་རྣལ་འབྱོར་ཆེ། །མཁའ་འགྲོའི་ཚོགས་ཀྱི་ལུས་ཅན་རྣམས། །ཕྱུང་ནས་ཀུན་ཏུ་འགྲོ་བ་རྣམས། །ཐམས་ཅད་དུ་ནི་འབར་བར་འཁྲུག་།རླུང་བསྐྱོད་བསྐལ་བའི་མེ་ལྟ་བུར། །འབར་བའི་ཕྲེང་བ་ཀུན་ཏུ་
204a
༄#། །འཁྲུགས། །འཇིག་རྟེན་ཁམས་ནི་མ་ལུས་ན། །སངས་རྒྱས་ཐམས་ཅད་སྲས་བཅས་པ། །ཡང་དག་བཞུགས་པ་ལེགས་བསྐུལ་ཏེ། །འཇིག་རྟེན་ཐམས་ཅད་ཡོངས་སུ་བསྐོར། །བཀུག་ནས་སེམས་ཅན་ཀུན་དོན་དང ། །བརྟན་པ་ཐམས་ཅད་འགྲུབ་པའི་ཕྱིར། །འཇིག་རྟེན་གསུམ་བདག་དེ་རྣམས་དང ། །རྒྱུ་དང་མི་རྒྱུའི་སེམས་མེད་བྱས། །དེ་ནས་རྡོ་རྗེ་འཛིན་རྒྱལ་པོས། །ཀུན་མཆོག་ས་ཡི་དབང་ཕྱུག་ནི། །དེ་རྣམས་ལ་ནི་ཐུགས་རྗེ་ཡིས། །འཆི་བ་སླར་གསོ་བརྟན་པོར་གསུངས། །ོཾ་ཨུ་ཏྟིཥྛ་མ་ཧཱ་ཨ་དྷི་པ་ཏི་བཛྲི་ཎི། ཤཱི་གྷྲཾ་ཨུད་ཐཱ་པ་ཡ་ཧཱུཾ། རྒྱུ་བ་དང ། མི་རྒྱུ་བ་ཐམས་ཅད་བསླང་བའོ། །དེ་ནས་ས་གསུམ་བསླང་བ་ནི། །ཐམས་ཅད་དུ་ནི་ཤི་བ་གསོ། །སངས་རྒྱས་དཔའ་བོས་བཏུལ་གྱུར་ཅིང ། །རྡོ་རྗེ་ཅན་གྱིས་ཀྱང་རྗེས་བཏུལ། །དེ་ནས་རྡོ་རྗེ་འཛིན་ཁྲོ་བས། །འབར་བའི་རྡོ་རྗེ་གསོར་བྱེད་ཅིང ། །ང་ཡི་དམ་ཚིག་ལ་གནས་ཞེས། །སྣ་ཚོགས་པ་ལ་བཀའ་རབ་བསྒོ། ། དེ་རྣམས་ཀྱིས་གསོལ་བ། འདི་སུ་ཞིག་ལགས། །བཅོམ་ལྡན་སྐུ་ནི་ཞི་བ་ལ། །གནོད་སྦྱིན་གཟུགས་ཅན་གང་ལགས་གསུངས། །ཁྱེད་ཀྱི་དམ་ཚིག་ཅི་འདྲ་བ། །ཞུས་པ་བདེ་བའི་ཚིག་ཏུ་གསུངས། །བཅོམ་ལྡན་འདས་ཀྱིས་བཀའ་སྩལ་བ། །འདི་ནི་སངས་རྒྱས་རྣམ་གྲོལ་བ། །གདོད་སྐྱེས་རྡོ་རྗེ་གནོད་སྦྱིན་ཆེ། །དཀོན་མཆོག་གསུམ་དང་དེ་བཞིན་
204b
དུ། །ང་ལ་སྐྱབས་སུ་འགྲོ་བར་གྱིས། །འཇིག་རྟེན་གསུམ་གྱིས་འདི་ཐོས་ནས། །ཚོགས་བདག་ཚོགས་ཀྱི་དབང་ཕྱུག་བཅས། །བསྐལ་པའི་མེ་དཔུང་ལྟ་བུ་ཡི། །འབར་བའི་མཚོན་གྱིས་འཐབ་པར་བརྩམས། །དེ་རྣམས་ཀྱིས་སྨྲས་པ། བདག་ཅག་གིས་ནི་སངས་རྒྱས་རིགས། །རྡོ་རྗེ་གནོད་སྦྱིན་ཤེས་མ་ཡིན། །བདག་ཅག་འཇིག་རྟེན་གསུམ་པོ་གཅིག་།གནོད་སྦྱིན་བསྒོ་བས་ཅི་ཞིག་བྱ། །དེ་ནས་རྡོ་རྗེ་འཛིན་ཁྲོས་ནས། །ཁྲོ་གཉེར་དཔྲལ་བར་བསྡུས་ཏེ་གནས། །དེ་ནས་ཁྲོ་གཉེར་ཐམས་ཅད་ནི། །རྡོ་རྗེ་འཛིན་པའི་རྗེས་སུ་སྤྱོད། །གཡོན་པ་བསྙེམས་པ་རྒྱ་བཅས་པས། །སྨིན་མ་སྤྱན་བསྡུས་པས་དགོད་ཅིང ། །ནམ་མཁའ་ཁྱབ་པའི་དབྱངས་ཀྱིས་ནི། །དྲག་ཏུ་ཁྲོས་བཅས་པས་སྨྲས་སོ། །དེ་ལ་ཁམས་གསུམ་རྣམ་པར་རྒྱལ་བའི་ཉེ་བའི་སྙིང་པོ་སེམས་ཅན་མ་ལུས་རྒྱལ་བ་ལ་ནི་འདི་ཡིན་ཏེ། །ཧི། དེ་ནས་སྙིང་པོ་འདི་ཕྱུང་བས། །དེས་རྒྱལ་བཅུ་གཅིག་བཅིངས་པ་དང ། །དམ་ཚིག་བརྟན་པ་འཛིན་དུ་བཅུག ། རྡོ་རྗེ་མིང་གིས་དབང་བསྐུར་ནས། །ལག་ན་རྡོ་རྗེ་འཛིན་མཆོག་བྱས། །རྡོ་རྗེ་མིང་ནི་བྱིན་ནས་སུ། །འཇིག་རྟེན་གསུམ་པོའི་ཏིང་འཛིན་བཞག་།དེ་ནས་རྡོ་རྗེ་ཆེན་པོ་མཆོག་།མགོན་པོ་ཡིས་ནི་གསོལ་བཏབ་པ། །སེམས་ཅན་ཀུན་ལ་རྗེས་སྟོན་པས། །རྟོག་པྦ་འདི་ནི་བཤད་དུ་གསོལ། །རྡོ་རྗེ་འཛིན་པས་གསུངས་པ་ཡི་།དཀྱིལ་འཁོར་ཆེན་པོའི་ཕྱི་རོལ་ཏུ། །འབར་
205a
༄#། །པའི་འཁོར་ལོ་ཡང་དག་བྲི། །དེ་ཡི་དབུས་སུ་བཞག་བྱ་བ། །སྔོན་པོ་འབར་བའི་གཟུགས་བཟང་བ། །ཞལ་གྱི་མཆེ་བཅུང་ཟད་གཙིགས། །ཞལ་ནི་ཁྲོ་དང་བཅས་པས་བཞད། །སེམས་དཔའི་སྐྱིལ་ཀྲུང་གིས་ལེགས་བཞུགས། །བསྙེམས་བཅས་ཤས་ཆེར་འབར་བ་ལ། །འོད་ཟེར་འབར་བའི་འོད་འཁྲུགས་པའི། །རྡོ་རྗེ་གསོར་བ་མཛད་ལ་བརྩོན། །དེ་ཡི་དངོས་ནི་ཐམས་ཅད་དུ། །རྡོ་རྗེ་རྣལ་འབྱོར་མ་ཡི་གཟུགས། །རྡོ་རྗེ་མཚོན་ཆ་མདུང་ཆེན་དང ། །རལ་གྲི་ཞགས་པ་མཚོན་འཛིན་པ། །མཚམས་སུ་མདའ་དང་ཁ་ཊྭཾ་ག་།འཁོར་ལོ་བ་དན་སྣ་ཚོགས་འཛིན། །རྡོ་རྗེའི་རིགས་ནི་སྣ་ཚོགས་པ། །འབར་བའི་འཁོར་ལོས་ཡོངས་སུ་བསྐོར། །དཀྱིལ་འཁོར་དགོད་པར་བྱ་བ་ནི། །ཐིག་བདུན་གྱིས་ནི་ཡང་དག་ཏུ། །དང་པོ་རྡོ་རྗེ་ཕྱག་རྒྱ་བདག་།གཉིས་པ་སྔགས་ཀྱི་ལྷ་མོ་སྟེ། །གསུམ་པར་རྡོ་རྗེ་རྒྱལ་པོ་ནི། །རྡོ་རྗེ་ལྷ་མོས་ཡང་དག་བསྐོར། །རྡོ་རྗེ་ཆེན་མོ་སྒེག་མོ་ཆེ། །བཞི་པ་གླུ་མཁན་མ་ལ་སོགས། །རྒྱལ་རིགས་གསོལ་ཀ་བྲན་རྣམས་ཀྱིས། །ཁྲོ་བོ་རྣམས་ནི་ལྔ་བ་ལ། །དྲུག་པར་རྡོ་རྗེ་ཕོ་ཉ་མཆོག་།གནོད་སྦྱིན་སྲིན་པོ་ཀིང་ཀར། །དབང་ཕྱུག་དམ་པ་དྲག་པོ་སོགས། །གཏུམ་པོ་ཆེན་པོ་འདུལ་བར་མཛད། །ཕྱི་ཡི་དཀྱིལ་འཁོར་དབྱིབས་རྣམས་སུ། །མདོར་ན་མིང་པོ་གསུམ་ལ་
205b
སོགས། །ལྷ་ལ་སོགས་པའི་ཚོགས་ཐམས་ཅད། །ལེགས་པར་བྲི་བ་འམ་གཞག་པར་བྱ། །མཚམས་སུ་ལྷ་མོ་རབ་བཤད་པ། །དེ་རྣམས་ཀྱི་ནི་སྒོ་བུས་སུའྔ། །ལྕགས་ཀྱུ་ལ་སོགས་དེ་བཞིན་དུ། །དཀྱིལ་འཁོར་ཆེན་པོའི་ཚུལ་གྱིས་ནི། །གོ་རིམས་དག་ནི་ཇི་བཞིན་དུ། །ཆོ་ག་རྒྱས་པ་ཇི་བཞིན་བྱ། །ཁྲོས་པས་རྡོ་རྗེ་གསོར་བ་དང ། །ཁྲོ་གཉེར་འཛུམ་དང་བཅས་པས་མདུད། །དེ་ནས་ཁྲོ་ཞིང་སློབ་དཔོན་ཆེ། །རྡོ་རྗེ་ཅན་མཆོག་རབ་ཞུགས་ལ། །རྡོ་རྗེ་ཧཱུཾ་མཛད་ཀྱིས་སྡིགས་མཛུབ། །ཧཱུཾ་མཛད་རབ་ཏུ་སྦྱར་བར་བྱ། །བསྙེམས་དང་བཅས་པས་རྒྱས་གདབ་ཉིད། །དེ་བཞིན་ཁྲོ་བས་གདུལ་བ་ལ། །རྡོ་རྗེ་འཆང་ཆེན་རྒྱས་པ་ཡིས། །གདུག་པ་ཉིད་ལ་རབ་ཏུ་དགྱེས། །དེ་ནས་མེ་ཏོག་བླངས་ནས་ནི། །ཁྲོས་པས་བདག་པོ་ཆེ་ལ་གཏོར། །རྡོ་རྗེ་འབར་བའི་ལྕགས་ཀྱུ་ཆེས། །ཡང་དག་པར་ནི་དགུག་པར་བྱ། །ོཾ་མ་ཧཱ་བཛྲ་ཛྭཱ་ལ་ཡཱ་ན་ལ་རྐ་ཡ་ཧི་ཛཿ ། སརྦ་བཛྲ་ཀུ་ལ་པྲ་བེ་ཤ་ཡ་ཧཱུཾ། སརྦ་མུ་དྲཾ་ག་ནཱ་བནྡྷ་ན་ཏྲཱ་ཊ། སརྦ་ས་མ་ཡཾ་སཱ་བྷ་ཡ་ཕཊ། སརྦ་དུ་ཥྚཱ་ན་ད་ཧ་བ་ཙཾ་བྷ་སྨིཾ་ཀུ་རུ་མ་ཧཱ་ཀྲོ་དྷ་ཨ་ཀ་ནི་བཛྲ་ཎི་ཧཱུཾ་ཕཊ། ཨ་ཨ་ཨ་ཨ། དེ་ནས་བཅོམ་ལྡན་ཁྲོ་བོ་ཡི། རྒྱལ་པོ་བརྟན་པ་ཆེ་བྱོན་འགྱུར། །རྡོ་རྗེ་རིགས་ལ་སོགས་པ་ཀུན། །དངོས་གྲུབ་ཐམས་ཅད་གསོལ་བར་མཛད། །དེ་ནས་ཧཱུཾ་མཛད་ལ་སོགས་སྒྲས། །མཚན་མ་རྣམས་ཀྱང་འབྱུང་
206a
༄#། །བར་འགྱུར། །གལ་ཏེ་སློབ་མ་ལ་སོགས་ལ། །སྙིང་གར་དབབ་པ་བྲ་བ་སྐྱེ། །དེ་ནས་རྡོ་རྗེ་ཧཱུཾ་མཛད་ཀྱི། །ཕྱག་རྒྱས་སློབ་མ་གཞུག་པར་བྱ། །བཅུག་ནས་དང་པོའི་སེམས་དཔའ་ཡི། །རང་གི་སྙིང་པོ་བརྗོད་པར་བྱ། །ཧཱུཾ་ཧཱུཾ་བཛྲ་པྲ་ཧ་ར་ཎི་ཕཊ། ཧཱུཾ་བཛྲ་ཤཱུ་ལ་ཡཱ་གྲྀ་ཎི་ཏྲི་ཏི། མ་ཏས་ཧཱུཾ་བཛྲ་ཀོ་ཥེ་ཙྪིནྡ་ཧཾ། ཨོཾ་བཛྲ་ཨ་མ་ལ་པཱ་ཤེ་མཊ། རྡོ་རྗེ་འགུགས་པ་དང ། རྡོ་རྗེ་མདུང་དང ། རྡོ་རྗེ་རལ་གྲི་དང ། རྡོ་རྗེ་ཞགས་པ་སྟེ། རྡོ་རྗེ་ཁྲོ་བོའི་སྲུང་བའོ། །དེ་ནས་འདི་རྣམས་ཀྱི་ཕྱག་རྒྱ་རྡོ་རྗེ་དོན་ཡོད་པའི་ཐོགས་པ་མེད་པ། ཤིན་ཏུ་གྲུབ་པ། སྟོབས་དང ། ཕ་རོལ་གནོན་པ་རྣམས་སེམས་ཅན་མངོན་པར་རྒྱས་གདབ་པ་ནུས་པ་རྣམས་བསྐུལ་བར་བྱའོ། །ོཾ་བཛྲ་གུ་ཧྱ་སིདྡྷ་པ་ར་མ་ཡོ་གཱི་ཤཝ་རི་ཧི། ཧཱུཾ་བཛྲ་ཙཎྜ་ཧོ་ཁ་ཊྲཱཾ་ག་མ་ཧཱ་བཛྲ་ཀ་པཱ་ལ་ཡ་མ་ཀུ་ཏེ་རུ་ལུ་རུ་ལུ་ཎྜི་ཧཱུཾ་བཛྲ་ནཱ་རཱ་ཡ་ཎི་ཛི། ཧཱུཾ་བཛྲ་བ་ཊ་ཀ་ཛི། རྡོ་རྗེ་ཁྲོ་བོའི་མཁའ་འགྲོ་མ་ལན་གཅིག་བཟླས་ཏེ་དགོད་པ་འམ་བྲི་བར་བྱའོ། །བཅོམ་ལྡན་འདས་དེ་ཁོ་ན་ཉིད་ཀྱི་སྙིང་པོས་བཞུགས་སུ་གསོལ་ན་དངོས་གྲུབ་ཐམས་ཅད་ལ་དོན་ཡོད་པའི་དངོས་གྲུབ་འགྲུབ་པར་འགྱུར་རོ། །དེ་ནས་དམ་ཚིག་བརྗོད་པར་བྱ་སྟེ། །སེམས་ཅན་རྣམས་ལ་བདེ་ཕྱིར་དང ། །བསྟན་པ་ཐམས་ཅད་འགྲུབ་པའི་ཕྱིར། །གདུག་པ་འདུལ་ལས་བསོད་ནམས་ནི། །འགྱུར་ཞེས་རྡོ་རྗེ་འཛིན་གྱིས་གསུངས། །
206b
དེ་ནས་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་དང་བཅས་པའི་མཛུབ་མོ་སྦྱར་བར་བྱའོ། །དེ་ནས་བཅོམ་ལྡན་འདས་གདུག་པ་ཐམས་ཅད་དང ། བདུད་ཐམས་ཅད་དང ། འཇིག་རྟེན་གསུམ་པོ་ཐམས་ཅད་ཡང་དག་པར་འདུལ་བ་ཉིད་དུ་བྱིན་གྱིས་རློབ་པར་མཛད་དོ། །དེ་ནས་དབང་བསྐུར་བ་རྒྱས་པ་ལ་སོགས་པ་དེ་བཞིན་དུ་བྱས་ལ་རྡོ་རྗེ་ཁྲོ་བོའི་ལས་བཞི་པ་ལ་བསླབ་པར་བྱ་སྟེ། ཕྱག་རྒྱ་རྣམས་ཀྱིས་སེམས་ཅན་རྣམས་རྒྱས་གདབ་པ་དང ། ཕྱག་རྒྱ་གཞག་པ་དང ། གསད་པ་དང ། སླར་འཚོ་བར་བྱའོ། །གང་ལ་ཕྱག་རྒྱ་སྦྱར་བ་ནི་འཆི་བར་འགྱུར་ན་དེ་ནི་གདུག་པ་ཡིན་པར་ཤེས་པར་བྱའོ། །དེ་ནས་འཚོ་བར་བྱེད་པའི་ཕྱག་རྒྱས་འཚོ་བར་བྱས་ལ་ཤིན་ཏུ་བསྲུང་བ་རབ་ཏུ་སྦྱར་བ་བྱས་ན་ཤིན་ཏུ་བསྲུང་བ་ཡིན་པའི་ཕྱིར། གདུག་པ་རྣམས་སླར་ཡང་གནོད་པར་མི་བྱེད་དོ། །དེ་ནས་བརྩམས་ཏེ་སློབ་མ་བཟང ། །དཀྱིལ་འཁོར་ཚོགས་ནི་ཀུན་གྱིས་ཀྱང ། །མི་ཚུགས་པ་དང་མི་སོད་པར། །ཚེ་འདི་ཉིད་ལ་འགྲུབ་པར་འགྱུར། །དེ་ནས་འདི་སྒྲུབ་བཤད་བྱ་སྟེ། །ཅི་བཞིན་སྐུ་ནི་དགེ་འདུན་དུ། །རྡོ་རྗེ་གསོར་ཞིང་དང་པོར་ནི། །བཟླས་བརྗོད་སྟོང་ཕྲག་བརྒྱ་བྱའོ། །འབུམ་ཚང་ནས་ནི་སེམས་དཔའ་ཆེ། །རྡོ་རྗེ་སེམས་དཔའ་དང་མཉམ་མཆོག་།རྡོ་རྗེ་ཁྲོ་བོ་རྒྱལ་པོ་མཆོག་།རྒྱས་དང་འཆི་བ་མེད་པར་འགྱུར། །གདུག་པ་རྣམས་ནི་རྗེས་འདུལ་ཞིང ། །
207a
༄#། །སངས་རྒྱས་ཀུན་ལ་རབ་མཆོད་པར། །འཇིག་རྟེན་གསུམ་དུ་ལེགས་སྣང་ཞིང ། །ཅིས་ཀྱང་འཇིགས་པ་མེད་པར་འགྱུར། །དེ་ནས་དེ་ཁོ་ན་ཉིད་ཀྱི་སྙིང་པོ་སྒྲུབ་པ་ནི། །འགྲེང་ངམ་ཡང་ན་འདུག་པ་འམ། །འགྲོ་བའམ་ཉལ་བར་བྱེད་པ་ན། །ཅི་ལྟར་དེ་ལྟར་འབུམ་བཟླས་ན། །ཚེ་འདི་ཉིད་ལ་འགྲུབ་པར་འགྱུར། །འདི་ཡིས་འདོད་པའི་དབང་ཕྱུག་ཀུན། །འདོད་པ་ཙམ་གྱིས་འགྲོ་འོང་ལྡིང ། །དངོས་གྲུབ་ཀུན་གྱི་དབང་ཕྱུག་གྲུབ། །རྒས་དང་འཆི་བ་མེད་པར་འགྱུར། །འགྲོ་བ་རྣམས་ཀྱིས་མཆོད་པ་དང ། །རང་གི་ཉེ་དུ་རྣམས་ཀྱིས་བསྟེན། །གདུག་པ་ཐམས་ཅད་རྗེས་འདུལ་ཞིང ། །གང་ལ་འཇིགས་པ་མེད་པར་འགྱུར། །བཅོམ་ལྡན་འདས་ཁྲོ་བོའི་རྒྱལ་པོ་ཆེན་པོས་གསུངས་སོ། །དེ་ནས་ཕྱག་རྒྱའི་དམ་པ་སྒྲུབ་པ་ནི། །ཅི་བཞིན་དུས་སུ་ཕྱག་རྒྱ་བཅིང ། །བདག་ཉིད་ངེས་པར་བསྲེགས་ནས་ནི། །ཅི་སྲིད་ཉིད་དུ་ཁྲོ་ཆེན་པོའི། །དངོས་གྲུབ་ཐམས་ཅད་འགྲུབ་པར་འགྱུར། །དེ་ནས་དམ་ཚིག་སྒྲུབ་པ་ནི། །བདག་ནི་ཐམས་ཅད་གསད་བྱ་ཞེས། །བརྗོད་ཅིང་ཕྱག་ན་རྡོ་རྗེ་ཡིས། །དམ་ཚིག་ཕྱག་རྒྱ་བཅིངས་ནས་ནི། །བཟླས་ན་རྡོ་རྗེ་འཛིན་འགྲུབ་འགྱུར། །དེ་ནས་ལས་རྣམས་སྒྲུབ་པ་ནི། །ལས་རྣམས་དམ་བསྒྲུབ་པ་ནི། །རྣམ་པ་བཞིར་ནི་རབ་ཕྱེད་ཅིང ། །ཐམས་ཅད་བདེ་བའི་ཕྱིར་ཟོས་ན། །རྡོ་རྗེ་ལས་ཉིད་ཐོབ་
207b
པར་འགྱུར། །སྒྲུབ་པ་ཆེན་པོའི་ཆོ་ག་རྒྱས་པའི་རྒྱུད་དོ།། །།དེ་ནས་དངོས་གྲུབ་སྒྲུབ་པ་ནི། །རྡོ་རྗེ་ཁྲོ་མཆོག་རྒྱལ་པོ་ཡི། །ལས་ཀྱི་རྒྱུན་ནི་དམ་པ་རྣམས། །གོ་རིམས་བཞིན་དུ་བཤད་པར་བྱ། །འདི་ལྟ་སྟེ། ཐམས་ཅད་བསྲེག་པ་དང ། བསྐྲད་པ་དང ། གཞིག་པ་དང ། རེངས་པར་བྱ་བ་དང ། གཉིད་ལོག་པར་བྱ་བ་དང ། རྒྱས་གདབ་པ་དང ། རྨོངས་པ་དང ། གཞིག་པ་དང ། བཅིང་བ་དང ། གཟིར་བ་དང ། དྲལ་བ་དང ། བརྡེག་པ་དང ། འབར་བ་དང ། བསྒྱེལ་བ་དང ། བཙོ་བ་དང ། གཅད་པ་དང ། དབུག་པ་དང ། ཕྱེ་མར་བྱ་བ་དང ། གཏོར་བ་དང ། རྣམ་པར་གཞོམ་པ་དང ། རིམས་དང ། དུག་དང ། གདོན་གྱིས་ཟིན་དུ་གཞུག་པ་དང ། སྨྱོ་བར་བྱ་བ་དང ། གསད་པར་བྱ་བ་ལ་ནི་རྡོ་རྗེ་ཧཱུཾ་མཛད་ཀྱིས་སོ། །ཐམས་ཅད་དགུག་པར་བྱ་བ་དང ། དེས་པར་བཀོད་པ་དང ། བསྐྱོད་པ་དང ། གར་བྱེད་དུ་གཞུག་པ་དང ། གླུ་ལེན་དུ་གཞུག་པ་དང ། བརྒྱལ་དུ་གཞུག་པ་དང ། རྩེར་གཞུག་བ་དང ། ཧ་ཧ་ཞེས་དགོད་དུ་གཞུག་པ་དང ། འཁོར་བ་དང ། དྲང་བ་དང ། འོད་དུ་གཞུག་པ་དང ། བསྒོམ་པ་དང ། ནུབ་པར་བྱ་བ་དང ། དབྱུང་བ་དང ། འཕང་བ་དང ། ཉེ་བར་འདེགས་པ་བྱ་བ་དང ། བསྐུར་བ་དང ། ང་རོ་འདོན་པར་བྱ་བ་དང ། དུར་གཞུག་པར་བྱ་བ་དང ། རང་ཉིད་བརྡེག་པར་བྱ་བ་དང ། འཆིང་བར་བྱ་བ་དང ། སྐྲ་འབལ་བར་བྱ་བ་
208a
༄#། །དང ། ཞེ་འགྲས་པར་བྱ་བ་དང ། གོས་བཤུ་བ་དང ། ཁྲོ་བ་འབར་བར་བྱ་བ་ལ་ནི་ཁྲོ་བོའི་གདོན་གྱི་ཕྱག་རྒྱས་སོ། །ཐམས་ཅད་དགུག་པ་དང ། གཞུག་པ་དང ། དབབ་པ་དང ། པྲ་སེ་ན་བསྒྲུབ་པ་དང ། བདེན་པ་སྨྲ་བར་བྱ་བ་དང ། སྒྱུ་མ་སྟོན་ཅིང་ལན་སྟོན་པ་སྟོན་པ་དང ། དུས་ཚིགས་ཀྱི་འཁོར་ལོ་ཡོངས་སུ་བཟློག་པ་དང ། །དུས་མ་ཡིན་པར་ཤིང་ལས་མེ་ཏོག་དང ། འབྲས་བུ་སྨིན་པར་བྱེད་པར་སྟོན་པ་དང ། འབྲུ་ཐམས་ཅད་ཡང་དག་པར་སྟོན་པར་བྱ་བ་དང ། རིམས་དང ། སྦྱར་བའི་དུག་དང ། གདོན་དང ། དུག་དང ། མཁའ་འགྲོ་མ་ལས་ཐར་བར་བྱ་བ་དང ། གཡུལ་འགྱེད་པ་ཐམས་ཅད་ལས་ཐར་བར་བྱ་བ་དང ། གཞན་གྱི་དཔུང་གཞོམ་པ་དང ། ཕྱོགས་དང ། མཚམས་དང ། དཀྱིལ་འཁོར་བཅིང་བ་དང ། ཤིན་ཏུ་བསྲུང་བ་དང ། ཡོངས་སུ་སྐྱོབ་པར་བྱ་བ་དང ། ཐར་པར་བྱ་བ་དང ། བསླང་བ་དང ། དབང་དུ་བྱ་བ་ལ་ནི་ཁྲོ་བོ་ཆེན་པོ་སྣ་ཚོགས་གྲུབ་པས་སོ། །ལྷ་ལ་སོགས་ཐམས་ཅད་ལྟུང་བར་བྱ་བ་དང ། ཀླུ་གདོན་པར་བྱ་བ་དང ། གནོད་སྦྱིན་རྗེས་སུ་འབྲང་བར་བྱ་བ་དང ། སྲིན་པོ་སྐྲག་པ་དང ། མཁའ་འགྲོ་མ་ལ་སོགས་པའི་གདོན་ཐམས་ཅད་བཏུལ་བ་དང ། བདུད་ཀྱི་དཔུང་ཐམས་ཅད་གཞོམ་པ་དང ། མ་མོ་རྣམས་གདུལ་བ་དང ། གདུག་
208b
པའི་ཚོགས་རྣམ་པར་གཏོར་བ་དང ། གདུག་པ་རྣམས་ཚར་གཅོད་པ་དང ། འདུམ་པ་དང ། འཇིགས་པ་མེད་པར་ཡང་དག་པར་བསྐྱེད་པ་དང ། ནོར་བུ་བཟང་པོ་དབང་དུ་བྱ་བ་དང ། ནོར་སྦྱིན་ལས་ནོར་བུ་ཐམས་ཅད་དབྲོག་པ་དང ། རྣམ་ཐོས་སྲས་མནན་ནས་དཔལ་དྲང་བ་དང ། ལྷའི་བུ་མོ་གཞོན་ནུ་མ་ཐམས་ཅད་དང་རྩེ་འཇོ་བྱ་བ་དང ། བརྒྱ་བྱིན་མནན་ནས་བདེ་སོགས་མ་དབྲོག་པ་དང ། སྐེམ་བྱེད་ཚར་གཅད་པ་དང ། ཚངས་པ་ལྟུང་བར་བྱ་བ་དང ། ཁྱབ་འཇུག་གདུལ་བ་དང ། དབང་ཕྱུག་ཆེན་པོ་ལས་རྣམ་པར་རྒྱལ་བ་དང ། འདོད་པའི་དབང་ཕྱུག་མནན་ནས་དགའ་བ་མོ་དབྲོག་པ་དང ། རྡོ་རྗེ་བསྒྲུབ་པ་དང ། བྱང་ཆུབ་ཆེན་པོ་བསྒྲུབ་པ་དང ། དེ་བཞིན་གཤེགས་པ་ཐམས་ཅད་མཉེས་པར་བྱ་བ་དང ། དགུག་པ་དང ། གཞུག་པ་དང ། དམ་ཚིག་གིས་བཅིང་བ་དང ། དབང་དུ་བྱ་བ་དང ། བསྒྲུབ་པ་ལ་ནི་རྡོ་རྗེ་ཁྲོ་བོ་ཆེན་པོ་རྒྱལ་པོ་དམ་པའི་དངོས་གྲུབ་ཀྱིས་སོ། ། ཞེས་ཀྱང་གསུངས་སོ། །ལན་གཅིག་བཟླས་པས་མཆོག་གྲུབ་པ། །ཐོག་མའི་རྩ་སྙིང་བཟང་ལན་གཅིག་།དེ་ཡི་འོག་ཏུ་ཁྲོ་གཉེར་གྱིས། །བསྒྲུབ་བྱ་ཐམས་ཅད་གྲུབ་པ་ཡིན། ། དཔལ་མཆོག་དང་པོའི་རྟོག་པ་ཆེན་པོའི་རྒྱལ་པོ་ལས། རྡོ་རྗེ་མེ་དང་ཉི་མ་ལྟར་རབ་ཏུ་འབར་བའི་རྟོག་པའི་ཆོ་ག་རྒྱས་པའོ།། །།དེ་ནས་ཏིང་འཛིན་ཐམས་ཅད་ནི། །
209a
༄#། །རྣམ་དག་མཆོག་གི་ཆོས་ཉིད་ལས། །སྤྱན་རས་གཟིགས་དབང་ཆེན་པོ་ནི། །རྡོ་རྗེ་སེམས་དཔའི་གཙོ་ཆེན་ཡིན། །གདུག་པ་ཐམས་ཅད་འདུལ་དོན་དུ། །རང་རིག་རིན་པོ་ཆེ་བསྐྱེད་ན། །སངས་རྒྱས་ཀུན་གྱི་ཁྲེ་བོ་ཆེ། །ཐབས་མེད་པས་ན་ཐབས་ཡིན་ནོ། །འདོད་ཆགས་ལ་སོགས་ཀུན་བསགས་པས། །མ་དག་སེམས་ཅན་ཁམས་དག་ནི། །དེ་རྣམས་ལ་ནི་རབ་སྤྱོད་པར། །སྐྱེས་བུ་མཆོག་ནི་རྣམ་པར་མཁྱེན། །མཆོག་ཏུ་མི་འདུལ་བ་ཉིད་ཀྱིས། །སངས་རྒྱས་ཀྱང་ནི་མངའ་མི་མཛད། ། འཇིག་རྟེན་ཀུན་ན་འཇིག་རྟེན་མཆོག་།རང་ཉིད་བཟང་པོ་ལ་སྙོམས་ཞུགས། །དེ་ལ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་རྒྱལ་པོ་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཆོས་ཉིད་ཀྱི་ཡེ་ཤེས་ཀྱི་རྡོ་རྗེ་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ཏེ། གང་ལ་གཟིགས་པས་དེ་བཞིན་གཤེགས་པ་ཐམས་ཅད་ཁམས་གསུམ་པ་ཐམས་ཅད་ཀྱི་དབང་ཕྱུག་ཐམས་ཅད་ཉིད་ཐུགས་སུ་ཆུད་པར་གྱུར་པའོ། །བསྙེམས་པས་པདྨ་གཡོན་པ་ནི། །བཟུང་སྟེ་འདབ་མ་འབྱེད་མཛད་པས། །ཅི་ནུས་པ་ཡི་ཏིང་འཛིན་གྱིས། །རང་བཞིན་གྱིས་ནི་གཟིགས་པར་མཛད། །ཅི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་པ། །གནས་ཀྱི་ཉེས་པ་སྣ་ཚོགས་པའི། །
209b
ཁམས་གསུམ་པ་ནི་དེ་བཞིན་དག་།འདི་ལ་གཟིགས་པ་ལ་སོགས་པས། །རྒྱལ་བ་རྣམས་ནི་དབང་པོར་འགྱུར། །དེ་ཡིས་རྡོ་རྗེ་སེམས་དཔའ་ནི། །སྤྱན་རས་གཟིགས་ཀྱི་དབང་ཕྱུག་གྱུར། ། དེ་ནས་སྒོམ་པའི་སྙིང་པོ་འདི། །དག་པར་བསྒོམས་པས་སྒོམ་པ་ནི། །རྡོ་རྗེ་འཆང་བ་ཆེན་པོ་ནི། །པདྨ་ཆེན་པོ་འཆང་བར་འགྱུར། །གསེར་སྦྱངས་རི་ཡི་དབང་པོ་སྟེ། །རྒྱལ་པོ་ཆེན་པོ་དང་མཉམ་པ། །བསྙེམས་པ་གཡོན་པའི་པད་མཆོག་གི་།གཡས་པ་མཆོག་ལ་རྣམ་པར་གཟིགས། །དེ་ནས་པདྨའི་འདབ་མ་ལ། །པདྨ་ཆེན་པོ་མཆོག་འཛིན་པ། །སངས་རྒྱས་ལ་སོགས་འབྱུང་བ་ཡི། །འཁོར་ལོ་རྣམས་ནི་འདུལ་བའི་མཆོག་།འགྲོ་བ་སྣ་ཚོགས་འདུལ་མཛད་པ། །བཞུགས་པ་རབ་ཏུ་བྲི་བར་བྱ། །དཀྱིལ་འཁོར་ཆེན་པོའི་ཚུལ་གྱིས་ནི། །དེ་ལ་པདྨ་དགེ་བ་དེར། །འགྲོ་བ་ཐམས་ཅད་རྣམ་སྦྱོང་བའི། །ཚུལ་གྱིས་འདུལ་བ་མཛད་པ་ན། །པདྨའི་རིགས་མཆོག་སྟོན་པའི་ཕྱིར། །རྒྱལ་པོ་རྣམས་ཀྱིས་གསོལ་བ་བཏབ། །དེ་ནས་ཐམས་ཅད་འདུལ་མཛད་ཅིང ། །ཤིན་ཏུ་དཀར་བའི་ཆོས་འཛིན་པ། །རྡོ་རྗེ་ཆོས་ཏེ་རང་རྒྱལ་པོ། །འཇིག་རྟེན་དབང་པོས་བཀའ་སྩལ་པ། །ཕྱི་ནི་དཀྱིལ་འཁོར་ཆེན་པོ་ལ། །པདྨ་འདབ་མ་བརྒྱད་པ་བྲི། །དེ་ཡི་དབུས་སུ་སྤྱན་འཛུམ་པ། །འཇིག་རྟེན་དབང་ཕྱུག་དགོད་པར་བྱ། །གསེར་སྦྱངས་ལྟ་བུའི་པདྨ་ནི། །གཡོན་བསྙེམས་ཚུལ་གྱིས་གཟིགས་
210a
༄#། །མཛད་པ། །རྒྱལ་མཚན་ཀུན་གྱིས་རྣམ་པར་སྤྲས། །སངས་རྒྱས་སྐུ་མཆོག་སྤྱི་བོར་བཞུགས། །དེ་ཡི་ངོས་ནི་ཐམས་ཅད་དུ། །སངས་རྒྱས་སྐུ་ནི་བརྒྱད་པོ་བྲི། །རང་གི་ཏིང་འཛིན་པདྨ་ཆེའི། །ཏིང་ངེ་འཛིན་ལ་རྣམ་པར་གཟིགས། །འཇིག་རྟེན་དབང་པོའི་གཟུགས་ལོགས་སུ། །སངས་རྒྱས་ལ་སོགས་རིགས་ཀྱི་ལྷ། །ཞི་བ་སྲེད་མེད་བུ་ཚངས་པ། །འདོད་པའི་གཟུགས་ནི་པདྨ་ཅན། །སྤྱི་བོར་འཚེར་ཞིང་མགྲིན་འདེགས་པ། །རྟ་མགྲིན་ལྕགས་ཀྱུ་བཅིངས་ནས་ནི། །ཆོས་ཀྱི་ཚིག་གིས་སྤྱན་དྲང་བྱ། །དེ་ནས་པདྨའི་སྙིང་པོ་ནི། །སརྦ་ཏ་ཐཱ་ག་ཏ་པདྨ་ཛཿ ་ཧཱུཾ་བཛྲ་པདྨ། ཧེ་པདྨ། པདྨ་བ། ཧོ་པདྨ་ནི་རཱ་ཛ། དེ་ནས་མཚམས་རྣམས་སུ་ནི། ཧཱུཾ་པདྨེ་ཙཎྜེ་ཤཝ་ར་ཧཱུཾ། ཧེ་མ་ཧཱ་བི་ཤཝ་པདྨ་ཙཱུ་རྞི་སིདྡྷ་ཧཱུཾ། མཊ་ཧྲཱིཿ ་པདྨ་པདྨོ་ཧཱུཾ་ཨ་ཧོ་པདྨ་ཨ་ཤཝ། ཀྲ་མ་ཀྲ་མ་ཧཱུཾ་ཛཿ ། དཀྱིལ་འཁོར་ཆེན་པོའི་ཚུལ་གྱིས་ནི། །ཆོ་ག་རྒྱས་པར་བྱས་ནས་ནི། །པདྨ་ཆེན་པོ་མེ་ཏོག་བཅས། །མ་ཡེངས་ཡིད་ཀྱིས་ཕྱག་བྱའོ། །དཀྱིལ་འཁོར་ཞུགས་ནས་ཏིང་ངེ་འཛིན། །ལས་བྱུང་གཟུངས་འདི་བརྗོད་པར་བྱ། །ོཾ་བི་ཤོ་དྷ་ཡ། མ་ནུ་ས་ནི་ཤུདྡྷ་མ་ཧཱ་སཏྭ། དྷཱ་ཏུ་ས་མ་ཡ་སཏྭ། རཱ་ག་དཱི་པཉྩ་ཡེ། ཙིཏྟ་མེ་སརྦ་དྷ་མེཥྱ་བཛྲི་ཎི་ཙིཏྟ་མེ་སརྦ་དྷ་མེ་ཤྱ་ཛི་ནི། །གཟུགས་ཀྱི་ཕྱག་རྒྱ་གསན་ནས་ནི། །དགྱེས་པས་པདྨ་འཛིན་པ་འགྲུབ། །དེ་ནས་
210b
མཛུབ་མོ་ལྕགས་ཀྱུ་བཅིང ། །ཆོས་ཀྱི་ཚིག་གིས་ལེགས་སྤྱན་དྲངས། །ོཾ་སརྦ་ཏ་ཐཱ་ག་ཏ་ཨ་ཝ་ལོ་ཀེ་ཤཝ་ར་པདྨ་ཧ་སྟ། ཡ་ཧི་ཤྲཱི་གྷྲཱཾ་མ་མེ་བཛྲ་མུ་དྲཱ་ཨ་གྲི་ཤྱ་ས་བེ་ས་མ་ཡེར་བ་དྷ་བི་ཤི་ཀོ་མི། ཛཿ ་ཧཱུཾ་བཾ་ཧོཿ ་ཤོ་དྷ་ཡ་སརྦ་སཱ་དྷ་ཡ་པ་མ་མེ། མ་ཧཱ་བཛྲ་དྷ་ར་སྟྭཾ། །དེ་ནས་འཇིག་རྟེན་མགོན་པོ་མཆོག་།འཇིག་རྟེན་འཛིན་པ་རང་ཉིད་བྱོན། །འཇིག་རྟེན་ཀུན་མཆོག་འགྲུབ་འགྱུར་བའི། །ཏིང་འཛིན་ཆོ་ག་ངེས་པར་མཛད། །དེ་ནས་དེ་བཞིན་སློབ་མ་རྣམས། །གཞུག་པའི་ཆོ་ག་རྒྱས་པ་ནི། །དངོས་གྲུབ་ཐམས་ཅད་སྦྱིན་པ་ཡི། ། ཡེ་ཤེས་དག་ནི་བསླབ་པར་བྱ། །ཏིང་འཛིན་སྙིང་པོ་འདི་ཡི་ནི། །སྒྲུབ་པ་ཆེན་པོ་གདོང་ནས་བྱུང ། །འཇིག་རྟེན་ཀུན་གྱི་དབང་ཕྱུག་ཉིད། །གོ་རིམས་བཞིན་དུ་བཤད་པར་བྱ། ། བུད་མེད་རྣམས་ཀྱི་ནང་ཞུགས་པའམ། །གདུག་པ་རྣམས་ཀྱི་ནང་ཆུད་པའམ། །གང་ཡང་རུང་བར་འདུག་ནས་ནི། །པདྨ་ཆེན་པོ་ཡོངས་སུ་བཟུང ། །དུས་དང་སྟོབས་ནི་ཇི་བཞིན་དུ། །ཉིན་རེ་ཅི་ནུས་བསྒྲུབ་པར་བྱ། །ཆོ་ག་འདི་ཡིས་ཚེ་འདི་ལ། །མྱུར་དུ་མཆོག་ནི་འགྲུབ་པར་འགྱུར། །འདོད་ཆགས་ཀུན་གྱི་བདེ་མྱུར་བར། །འདོད་པ་ཙམ་གྱིས་འགྲོ་འོང་ལྡིང ། །འཇིག་རྟེན་ཀུན་གྱི་དབང་ཕྱུག་རྒྱལ། །རྒ་དང་འཆི་བ་མེད་པར་འགྱུར། །སངས་རྒྱས་བྱང་ཆུབ་སེམས་དཔའ་ཉིད། །ཕྱག་ན་རྡོ་རྗེ་ཉིད་དང་ནི། །དངོས་གྲུབ་ཀུན་
211a
༄#། །གྱི་མཐའ་ཡས་མཆོག་།ཚེ་འདི་ཉིད་ལ་ཐོབ་པར་འགྱུར། །དེ་ནས་ཕྱག་རྒྱ་བསྒྲུབ་པ་ནི། །ཕྱག་རྒྱ་བཅིངས་ཏེ་ཏིང་འཛིན་གནས། །དངོས་གྲུབ་ཆེན་པོ་ཉིད་ཐོབ་བོ། །དམ་ཚིག་དམ་ཚིག་མཆོག་གིས་ཏེ། །ལས་ཀྱི་ལས་མཆོག་ཕྱག་རྒྱས་སོ། །ལས་ཀྱི་ལས་མཆོག་ཕྱག་རྒྱས་སོ། །སྒྲུབ་པ་ཆེན་པོའི་ཆོ་གའི་རྒྱུད་དོ།། །།དེ་ནས་དངོས་གྲུབ་མ་གྲུབ་པའི། །ཏིང་འཛིན་ལས་ནི་འདྲེས་མ་དག་།དང་པོའི་ཏིང་འཛིན་གྲུབ་པ་ནི། །གོ་རིམས་བཞིན་དུ་རབ་བཤད་བྱ། །འདི་ལྟ་སྟེ། སྒྲིབ་པ་ཐམས་ཅད་དང ། སྡིག་པ་ཐམས་ཅད་དང ། རྨི་ལམ་ངན་པ་དང ། ལྟས་ངན་པ་དང ། ཡམས་དང ། འཚེ་བ་དང ། ནད་འགོ་བ་དང ། ཉོན་མོངས་པ་དང ། དུས་མ་ཡིན་པར་འཆི་བ་དང ། འཇིགས་པ་དང ། སྐྲག་པ་དང ། རྩོད་པ་དང ། འཐབ་པ་དང ། བྱིས་པའི་གདོན་དང ། དམུ་རྒོད་དང ། ཉོན་མོངས་པ་དང ། ངལ་བ་དང ། སྡུག་བསྔལ་བ་དང ། ཡིད་མི་བདེ་བ་དང ། དབུལ་བ་དང ། རྒྱགས་པ་དང ། རེག་ན་མི་བདེ་བ་དང ། སྐལ་པ་ངན་པ་དང ། ནད་མེད་པ་མ་ཡིན་པ་དང ། ནོར་བརླག་པ་རྣམས་ལ་ནི་པདྨ་ཆེན་པོ་ཞི་བས་སོ། །རླུང་དང ། མཁྲིས་པ་དང ། ཁྲག་དང ། བད་ཀན་དང ། འདུས་པ་དང ། མ་ཞུ་བ་དང ། རིམས་དང ། སྦྱར་བའི་དུག་དང ། དུག་དང ། མཛེ་དང ། འབྲུམ་བུ་ཕྲ་མོ་དང ། གཡན་
211b
པ་དང ། རྐང་ཤུ་དང ། སྐྲན་དང ། ཆུའི་དམུ་རྫིང་དང ། མཚན་པར་རྡོལ་བ་དང ། ཤ་བཀྲ་དང ། ཟད་བྱེད་དང ། ཁྲག་ཟད་པ་དང ། ཁུ་བ་ཟད་པ་དང ། ནད་ཐམས་ཅད་དང ། གནོད་པ་དང ། གནོད་བྱེད་དང ། གདོན་དང ། ཕྲ་མེན་རྣམས་གསོ་བ་ལ་ནི་པདྨ་ཆེན་པོ་སྨན་གྱི་ཕྱག་རྒྱ་འཛིན་པས་སོ། །ཐམས་ཅད་རྡོ་རྗེར་བྱས་པ་དང ། ཆོས་དང ། གོ་ཆ་དང ། གཙུག་ཏོར་དང ། གཙུག་ཕུད་དང ། མཚམས་དང ། ཕྱོགས་དང ། དཀྱིལ་འཁོར་དང ། ས་དང ། ནམ་མཁའ་དང ། རྡོ་རྗེའི་གདན་དང ། ཁང་པ་ཆེན་པོ་དང ། རྡོ་རྗེ་ར་བ་དང ། མེ་འབར་བ་དང ། ཐལ་བའི་ར་བ་དང ། རྡོ་རྗེ་དང ། རི་བོང་དོན་ཡོད་པ་ལ་སོགས་པ་དང ། སྲད་བུས་ཡོངས་སུ་བསྐོར་བ་དང ། ཕུར་བུས་གདབ་པ་དང ། ཟས་དང ། བཏུང་བ་དང ། གོས་དང ། རྒྱན་དང ། ཕྱག་རྒྱ་དང ། སྲུང་བ་ལ་ནི་པདྨ་ཆེན་པོ་ཐམས་ཅད་སྲུང་བས་སོ། །ཚེ་ཐམས་ཅད་དང ། སྟོབས་དང ། ཁ་དོག་དང ། གཟི་བརྗིད་དང ། མདངས་དང ། ལང་ཚོ་དང ། བརྩོན་འགྲུས་དང ། སྤྲོ་བ་དང ། ནད་མེད་པ་དང ། དཔལ་དང ། སྐལ་བ་བཟང་པོ་དང ། ནོར་དང ། འབྲུ་དང ། དབང་ཕྱུག་དང ། འབྱོར་པ་དང ། དངོས་གྲུབ་དང ། བློ་དང ། རྙེད་པ་དང ། བཀྲ་ཤིས་པ་དང ། མིང་དང ། གྲགས་པ་དང ། སྙན་པ་དང ། ཏིང་ངེ་འཛིན་དང ། ཤེས་རབ་དམ་པ་འགྲུབ་པ་
212a
༄#། །ནི་པདྨ་ཆེན་པོ་མཆོག་གྲུབ་པས་སོ། །དཔལ་མཆོག་དང་པོའི་རྟོག་པ་ཆེན་པོའི་རྒྱལ་པོ་ལས། ཆོས་ཐམས་ཅད་སྒྲིབ་པ་མེད་པའི་ཡེ་ཤེས་ཀྱི་རྡོ་རྗེའི་ཆོ་ག་རྒྱས་པའོ།། །།དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་མི་འགྱུར་ནམ་མཁའ་ཆེ། །ཐམས་ཅད་དབང་བསྐུར་ཀུན་གྱི་དོན། །ཀུན་དབང་རིན་ཆེན་ཐམས་ཅད་འཛིན། །ཏིང་ངེ་འཛིན་གྱིས་རབ་བྱིན་བརླབས། །དྲག་པོ་ཆེན་པོ་རབ་སད་མཛད། །ཆོས་རྣམས་ལ་ནི་རྣམ་གཟིགས་པས། །ཀུན་དོན་དབང་ཕྱུག་གདོད་ནས་བྱུང ། །ཉི་ཟླ་དང་ནི་གཟའ་སྐར་ཅན། །ནམ་མཁའ་ཉིད་དུ་གྱུར་པ་ཡིན། །དེ་ནས་རིན་ཆེན་ཏིང་འཛིན་ནི། །ངེས་པར་རྡོ་རྗེ་ཅན་དུ་བརྗོད། །དེ་ནས་ནམ་མཁའ་རྡོ་རྗེ་ཉིད། །ལྗང་སྔོན་བཻ་ཌཱུརྱ་མཉམ་མདངས། །རྡོ་རྗེ་རིན་ཆེན་རྣམས་དགེ་བ། །ནམ་མཁའི་སྙིང་པོར་ཡང་དག་གྱུར། །དེ་ནས་བཅོམ་ལྡན་ཐོག་མ་འདི། །མཛོད་སྤུ་ཀུན་གྱི་གནས་ན་བཞུགས། །ཏིང་ངེ་འཛིན་ལ་རྣམ་གཟིགས་པས། །འཇིག་རྟེན་དབང་ཕྱུག་བདག་པོ་ཉིད། །སངས་རྒྱས་ཐམས་ཅད་སྲས་བཅས་དང ། །དེ་བཞིན་རྡོ་རྗེ་འཛིན་པ་མཆོག་།རྡོ་རྗེ་རིན་ཆེན་དེ་ཡིས་ནི། །ཀུན་རིག་ཀུན་གྱིས་དབང་བསྐུར་དང ། །བསམ་པ་ཐམས་ཅད་རྫོགས་བྱའི་ཕྱིར། །ཀུན་མཆོག་ཀུན་ལ་དབང་བསྐུར་ནས། །ཤིས་པ་བརྗོད་པ་འདི་གསུངས་སོ། །ོཾ་སརྦ་བཛྲ་སཏྭ་ཨ་ཏི་པ་
212b
ཏི་སྟྭཾ་ཨ་བྷི་ཥིཉྩ་མི་བྷུ་རྦྷུ་བ་རྦྷུ་བ་སཝཿ ། དེ་ནས་བཟང་པས་འདི་གསུངས་ཤིང ། །ལེགས་པར་ཤིས་བརྗོད་དབང་བསྐུར་བས། །རྡོ་རྗེ་རིན་ཆེན་ཆེ་དེ་ལས། །ཆོས་ཀྱི་གཙོ་བོར་བྱུང་བར་གྱུར། ། བྱུང་ནས་འགྲོ་བ་ཐམས་ཅད་ནི། །ཅི་རིགས་པར་ནི་ཀུན་དབང་བསྐུར། །རྡོ་རྗེ་ཀུན་གྱིས་དབང་སྐུར་ནས། །སླར་ཡང་དཀྱིལ་འཁོར་ཚུལ་གྱིས་བཞུགས། །བདེ་གཤེགས་ཀུན་གྱིས་བྱིན་བརླབས་པས། །རྡོ་རྗེ་རིན་ཆེན་བླ་ན་མེད། །ཤིན་ཏུ་དབང་ཕྱུག་ཆེན་པོའི་མཆོག་།དངོས་གྲུབ་གསོལ་བའི་རྟོག་པ་གསུངས། །དཀྱིལ་འཁོར་ཆེན་པོའི་ཕྱི་རོལ་ནི། །ནམ་མཁའི་འཁོར་ལོ་ནམ་མཁའི་མདོག་།ཉི་མ་ཟླ་བ་སྐར་མ་དང ། །གཟའ་རྣམས་ཀྱིས་ནི་བརྒྱན་པ་བྲི། །དེ་དབུས་ནམ་མཁའི་སྙིང་པོ་ནི། །བདག་ཉིད་ཐམས་ཅད་དགྱེས་པ་གཞག་།དག་པའི་བཻ་ཌཱུརྱ་མདོག་འདྲ། །འོད་ཟེར་འབར་བ་སྣ་ཚོགས་འཁྲུག་།གཡོན་པ་རིན་ཆེན་ཐུགས་ཀར་གཏོད། །གཡས་པས་ནོར་ཆེན་རབ་སྩོལ་བ། །དེ་ཡི་ངོས་སུ་སེམས་དཔའ་མཆོག ། བཞི་པོ་གཟུངས་བཅས་དམ་པ་ཡིན། །དབང་བསྐུར་བ་དང་གཏེར་ཉིད་དང ། །ནོར་བུ་ཆེན་པོ་བླ་མེད་དང ། །འབྱོར་པ་དཔལ་ནི་ཕུན་སུམ་ཚོགས། །རང་གི་མཚན་མས་མཆོད་པས་ནི། །དེ་ལ་དེ་དག་གི་སྙིང་པོ་འདི་ཡིན་ཏེ། བཛྲ་སཏྭ་ཛཿ ། བཛྲ་རཏྣ་ཧཱུཾཿ ། བཛྲ་དྷརྨ་བཾ། བཛྲ་ཀརྨ་ཧོཿ ། དེ་ནས་གཟུངས་རྣམས་ཀྱི་སྙིང་པོ་བཤད་དེ། ཨོཾ་པྲ་ཏི་བཛི་ཎི་ཕཊ། ཨོཾ་
213a
༄#། །བཛྲ་པྲཱི་ཏི་ཧི་ཧི། ཨོཾ་ཙིནྟ་མ་ཎི་ཧོཿ ། ཨོཾ་བཛྲ་མ་ཧཱ་མ་ཧེ་ཧཾ། དཀྱིལ་འཁོར་ཆེན་པོའི་ཚུལ་གྱིས་ནི། །ཆོ་ག་རྒྱས་པ་ཅི་བཞིན་བྱ། །ནོར་བུའི་ཁུ་ཚུར་གྱིས་བཞུགས་ལ། །མཁའ་སྐྱེས་ལ་ནི་མགོས་ཕྱག་བྱ། །བཞུགས་ནས་ནམ་མཁའ་མཁས་པ་ཡི། །དམ་ཚིག་དམ་པ་བརྗོད་པར་བྱ། །ཁྱེད་ནི་ནམ་མཁའ་ལས་བྱུང་བའི། །ཐམས་ཅད་ཀྱི་ནི་ལྔ་པ་ཡིན། །ོཾ་ཨི་སིདྡྷ་བྷུརྦྦྷུ་བ་སིདྡྷྷ་སིདྡྷ་སཝཿ ། སིདྡྷ་མ་ཧཱ་བཛྲ་རཏྣ། བ་བ་ཏྲ་ཊ་ཏྲཱཾ། འདི་ནི་བཟླས་པ་ཙམ་གྱིས་ནི། །མཁའ་སྙིང་དངོས་གྲུབ་ཐམས་ཅད་དང ། །ཕུན་ཚོགས་ཀུན་ལ་ཤིན་ཏུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་བཅོམ་ལྡན་འདས་རྡོ་རྗེ་རིན་ཆེན་བླ་ན་མེད་པས་གསུངས་སོ། །དེ་ནས་ནོར་བུ་ཁུ་ཚུར་ཅན་གྱི་ལྕགས་ཀྱུས་དགུག་པར་བྱའོ། །ོཾ་བྷུ་རཱ་ཡ་ཧཱི་ཛ། བྷུ་བ་པྲ་བི་ཤ་ཧཱུཾ་སཝ། གྲྀ་ཧྞ་པཾ་བ་བ་ཊ་ཊ་སིདྡྷ་ཧོ་ཏྲཱཾ། དེ་ནས་བཅོམ་ལྡན་མྱུར་དུ་ནི། །བྱོན་ནས་དངོས་གྲུབ་ཐམས་ཅད་ནི། ། འབྱོར་པ་ཤིན་ཏུ་གཡོ་བ་ལ། །དོན་ནི་རབ་ཏུ་འགྲུབ་པར་འགྱུར། །དེ་ནས་སློབ་མས་ཕྱག་རྒྱ་ནི། །མེ་ཏོག་བཅས་པ་མཆོག་གིས་གཞུག་།བཅུག་ནས་དེ་ཉིད་མཆོག་སྙིང་པོ། །བདེན་པ་ལན་གཅིག་བརྗོད་དུ་གཞུག་།དེ་ནས་འབྱོར་པའི་མཆོག་བརྟག་པ། །དཔལ་གྱི་ཕུན་ཚོགས་མཆོད་པ་ཆེ། །འཇིག་རྟེན་མཆོག་གི་དངོས་གྲུབ་
213b
རྣམས། །བདེ་བར་གཤེགས་པ་བཞིན་དུ་འཐོབ། །དེ་ནས་དེ་ཕྱིར་སྒྲུབ་པ་བཤད། །རྡོ་རྗེ་རིན་ཆེན་རྒྱལ་མཆོག་གིས། །དཔག་མེད་ཟློས་པས་བསྒྲུབ་བྱ་ཞིང ། །འདི་ཡི་སྐྱེས་མཆོག་འདི་ཉིད་ལ། །འདོད་ཆགས་འགྲོ་དང་འོང་བར་འགྱུར། །རིན་ཆེན་ཀུན་གྱི་དབང་ཕྱུག་རྒྱལ། །རྒ་དང་འཆི་བ་མེད་པར་འགྱུར། །དངོས་གྲུབ་ཀྱི་དམ་པ་ཐམས་ཅད་ཀྱང་དེ་བཞིན་ནོ། །ཕྱག་རྒྱ་བསྒྲུབ་པ་ནི་དགའ་བ་ཉིད་ཀྱིས་སོ། །དམ་ཚིག་གི་ཕྱག་རྒྱ་བསྒྲུབ་པ་ནི་དམ་ཚིག་གི་ཁུ་ཚུར་གྱིས་སོ། །དེ་བཞིན་དུ་ལས་བསྒྲུབ་པ་ནི་དངོས་གྲུབ་བླ་ན་མེད་པ་ཡིན་ནོ། །ཕྱག་རྒྱ་ཆེན་པོ་བསྒྲུབ་པ་ཉིད་དེའི་རྒྱུད་དོ།། །།དེ་ནས་དེ་ཕྱིར་ལས་རྣམས་ཀྱི། །རབ་འབྱམས་རྒྱུ་ནི་དམ་པ་དང ། །དངོས་གྲུབ་ཆེན་པོ་ཀུན་བསྒྲུབས་པ། །གོ་རིམས་ཇི་བཞིན་རབ་བཤད་བྱ། །འདི་ལྟ་སྟེ། འབྱོར་པ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་དང ། དབྲོག་པ་དང ། བསག་པ་དང ། ལེན་པ་དང ། འདྲེན་པ་དང ། འགུགས་པ་དང ། གཏོད་པ་དང ། གཞིག་པ་དང ། འཕེན་པ་དང ། འདེགས་པ་དང ། འབེབས་པ་དང ། བརྡེག་པ་དང ། སྦྱང་བ་དང ། རྙེད་པ་དང ། ཉོ་བ་དང ། བཙོང་བ་དང ། ཀུན་ཏུ་འགྱེད་པ་དང ། ཉེ་བར་དགོད་པ་དང ། བརྟན་པར་བྱ་བ་དང ། རྡོ་རྗེར་བྱ་བ་དང ། འབྱོར་བ་ཐམས་ཅད་བསྒྲུབ་པ་དང ། འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་
214a
༄#། །ཆེན་གྱི་དབང་བསྐུར་བས་སོ། །དཔལ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་དང ། དབྲོག་པ་དང ། བསག་པ་དང ། ལེན་པ་དང ། འདྲེན་པ་དང ། འགུགས་པ་དང ། གཏོད་པ་དང ། གཞིག་པ་དང ། འཕེན་པ་དང ། འདེགས་པ་དང ། འབེབས་པ་དང ། བརྡེག་པ་དང ། སྦྱང་བ་དང ། རྙེད་པ་དང ། ཉོ་བ་དང ། བཙོང་བ་དང ། ཀུན་ཏུ་འགྱེད་པ་དང ། ཉེ་བར་དགོད་པ་དང ། བརྟན་པར་བྱ་བ་དང ། རྡོ་རྗེར་བྱ་བ་དང ། འབྱོར་བ་ཐམས་ཅད་བསྒྲུབ་པ་དང ། འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་དཔལ་གྱིས་སོ། །ཕུན་སུམ་ཚོགས་པ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་དང ། དབྲོག་པ་དང ། བསག་པ་དང ། ལེན་པ་དང ། འདྲེན་པ་དང ། འགུགས་པ་དང ། གཏོད་པ་དང ། གཞིག་པ་དང ། འཕེན་པ་དང ། འདེགས་པ་དང ། འབེབས་པ་དང ། བརྡེག་པ་དང ། སྦྱང་བ་དང ། རྙེད་པ་དང ། ཉོ་བ་དང ། བཙོང་བ་དང ། ཀུན་ཏུ་འགྱེད་པ་དང ། ཉེ་བར་དགོད་པ་དང ། བརྟན་པར་བྱ་བ་དང ། རྡོ་རྗེར་བྱ་བ་དང ། འབྱོར་པ་ཐམས་ཅད་བསྒྲུབ་པ་དང ། འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་ཕུན་སུམ་ཚོགས་པས་སོ། །མཆོད་པ་ཐམས་ཅད་དགུག་པ་དང ། གཞུག་པ་
214b
དང ། བཅིང་བ་དང ། དབང་དུ་བྱ་བ་དང ། དབྲོག་པ་དང ། བསགས་པ་དང ། ལེན་པ་དང ། འདྲེན་པ་དང ། འགུགས་པ་དང ། གཏོད་པ་དང ། གཞིག་པ་དང ། འཕེན་པ་དང ། འདེགས་པ་དང ། འབེབས་པ་དང ། བརྡེག་པ་དང ། སྦྱང་བ་དང ། རྙེད་པ་དང ། ཉོ་བ་དང ། བཙོང་བ་དང ། ཀུན་ཏུ་འགྱེད་པ་དང ། ཉེ་བར་དགོད་པ་དང ། བརྟན་པར་བྱ་བ་དང ། རྡོ་རྗེར་བྱ་བ་དང ། འབྱོར་པ་ཐམས་ཅད་བསྒྲུབ་པ་དང ། འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་གྱི་མཆོད་པ་སྒྲུབ་པས་སོ། །ཞེས་ཀྱང་གསུངས་སོ། །སེམས་ཅན་ཐམས་ཅད་བདེ་དོན་དུ། །རྡོ་རྗེ་སེམས་དཔའ་ནོར་ཆེ་བ། །རང་གི་རྒྱལ་མཆོག་ལན་གཅིག་བསྒྲུབ། །ཡི་གེ་ཏྲཾ་ནི་སྦྱར་བར་བྱ། །དཔལ་མཆོག་དང་པོ་རྟོག་པའི་རྒྱལ་པོ་ཆེན་པོ་ལས། བསམ་པ་ཡོངས་སུ་རྫོགས་པར་བྱེད་པ་རྡོ་རྗེ་རིན་ཆེན་གྱི་རྟོག་པའི་ཆོ་ག་རྒྱས་པའོ།། །།དེ་ནས་རྒྱལ་བ་རྡོ་རྗེ་འཛིན། །འཇིག་རྟེན་གསུམ་པོ་ཁམས་གསུམ་པ། །འཇིག་རྟེན་གསུམ་བདག་ཐམས་ཅད་ལ། །འཇིག་རྟེན་གསུམ་མཆོག་འདུལ་མཛད་པ། །ཆོ་ག་བཞིན་དུ་བསྒོམས་གྱུར་ཞིང ། །སེམས་ཅན་དོན་ཕྱིར་ཆོ་གས་བཞུགས། ། འདོད་ཆགས་ཞེ་སྡང་གཏི་མུག་རྣམས། །རྟག་ཏུ་རྣམ་པར་གནས་པ་ཡིན། །མི་མཉམ་པ་ཡིས་བསྟེན་གྱུར་ན། །དུག་ཉིད་དུ་ནི་ཉེ་བར་འགྲོ། །བདུད་རྩི་ཉིད་ཀྱིས་བསྟེན་གྱུར་ན། །
215a
༄#། །བདུད་རྩི་ཉིད་དུའང་འགྱུར་བ་ཡིན། །འདོད་ཆགས་ཚངས་པ་མཆོག་འབྱིན་པ། །ཞེ་སྡང་དྲག་པོའི་ཏིང་འཛིན་གྱིས། །གཏི་མུག་ཁྱབ་འཇུག་བརྟན་མཛད་ནས། །འཇིག་རྟེན་གསུམ་པོ་བྱིན་གྱིས་བརླབས། །འདོད་ཆགས་ཞེ་སྡང་གཏི་མུག་རྣམས། །རྟག་ཏུ་གནས་པས་སྲིད་གསུམ་གནས། །ཆོས་ཀྱིས་བསྟེན་ནས་གསུམ་མཆོག་སྟེ། ། ཆོས་མིན་བསྟེན་པས་ངན་སོང་གསུམ། །འདོད་ཆགས་སྦྲང་རྩིར་བྱེད་པར་བཤད། །ཞེ་སྡང་རྒྱལ་བར་བྱེད་པར་བཤད། །གཏི་མུག་དོན་ནི་སྒྲུབ་བྱེད་ཅེས། །ཀུན་ཏུ་གསང་བའི་མིང་ཡིན་ནོ། །ང་ནི་འཇིག་རྟེན་གཅིག་པུ་ཉིད། །འཇིག་རྟེན་གསུམ་དུ་རབ་ཏུ་བཤད། །ང་ནི་འདོད་པ་གཅིག་པུ་ཉིད། །ཚངས་པ་དྲག་པོ་གཡུང་དྲུང་ཡིན། །དེ་ནས་གསུམ་པོ་འདི་ཡི་མཆོག་།སྦྱང་ཕྱིར་རྡོ་རྗེ་སྦྱང་འཛིན་པ། །གཟུགས་ནི་གསུམ་པོ་འདི་དག་ཉིད། །བདག་ཉིད་ཁོ་ན་བྱུང་བ་ཡིན། །གང་ཕྱིར་འཇིག་རྟེན་འདི་དག་ནི། །རྟག་ཏུ་ཡང་ནི་འདི་སྐད་སྨྲ། །ཚངས་སོགས་ཀྱིས་འདུལ་ཡང་དག་པའི། །སངས་རྒྱས་བྱང་ཆུབ་སྣོད་མ་ཡིན། །དེ་རྣམས་སྦྱང་ཕྱིར་བཅོམ་ལྡན་འདས། །རྡོ་རྗེ་འཆང་ཆེན་རང་ཉིད་ནི། །གཟུགས་ནི་གསུམ་པོ་འདི་མཛད་ནས། །ཕྱིས་ནི་སངས་རྒྱས་ཉིད་མི་འགྱུར། །དེ་ནས་ཚངས་པ་ལ་སོགས་ལྷ། །འཇིག་རྟེན་གསུམ་མཆོག་དབང་ཕྱུག་ཆེ། །དཀྱིལ་འཁོར་དེ་ནི་གསང་སྙིང་
215b
པོ། །རང་གི་རང་གྲུབ་ཕྱིར་རབ་ཕུལ། །ོཾ་བྷཱུར་བྷུ་བ་སཝཿ ། །ཟུར་བཞི་པ་ལ་སྒོ་བཞི་པ། །སྒོ་སྲུང་བཞིས་ནི་རབ་བསྲུངས་པ། །ཁ་ཁྱེར་གྱིས་ནི་ལེགས་བསྐོར་བ། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་མ་ཉིད་དང་ནི། །དཀྱིལ་འཁོར་གཞུ་ཡི་དབྱིབས་ཅན་ལ། །སྦྲང་རྩིར་བྱེད་དང་རྒྱལ་བྱེད་ཉིད། །བསྒྲུབ་པ་ཐམས་ཅད་སྒྲུབ་པ་ནི། །གོ་རིམས་དག་ནི་ཅི་བཞིན་དུ། །ལེགས་པར་བྲི་འམ་གཞག་པར་བྱ། །པུས་མོ་གཉིས་ཀྱིས་ཞུགས་ལ་དེར། །རྩེ་གསུམ་དམ་ཚིག་གིས་མཚན་པས། །ཞུགས་ཏེ་དམ་ཚིག་བཅིངས་ནས་ནི། །ཡང་དག་པར་ནི་དགས་པར་བྱ། ། ོཾ་བྷུརྦྷུ་བ་སཝཿ ། སཝ་སྟི་ནཱ་མ་སཝཱཧཱ། །ཉི་ཤུ་རྩ་གཅིག་བཟླས་པ་ཡིས། །ཐམས་ཅད་ཐམས་ཅད་ཀྱིས་བསྐོར་བ། །ཐམས་ཅད་གྲུབ་ཕྱིར་འོངས་པ་ལ། །དེ་སྙེད་པ་ཡི་གཏོར་མ་སྦྱིན། ། སློབ་དཔོན་རབ་ཏུ་ཞུགས་པ་ཡིས། །སློབ་མ་ཐམས་ཅད་གཞུག་པར་བྱ། །དེ་ཉིད་གསང་བ་བརྗོད་ནས་ནི། །དམ་ཚིག་མཆོག་ནི་སྦྱིན་པར་བྱ། །གལ་ཏེ་ཁྱོད་ཀྱིས་རྩེ་གསུམ་བཅག ། སྙིང་པོ་སྣོད་མིན་ལ་སྨྲས་སམ། །ཇི་སྐད་སྨྲས་པའི་ཆོས་རྣམས་ནི། །གལ་ཏེ་འདིར་ནས་སྤྱད་དམ། །སྙིང་སྟོབས་རྡུལ་དང་མུན་པ་ཉིད། །ཚངས་པ་དྲག་པོ་གཡུང་དྲུང་སྟེ། །མིང་པོ་གསུམ་པོ་འདི་ཉིད་ནི། །ནམ་ཡང་བརྙེས་པར་མི་བྱའོ། །ང་ཞིག་འདི་རྣམས་སྒོམ་པ་སློབ། །ཡང་དང་ཡང་དུ་ཞུགས་ནས་ནི། །དཀྱིལ་འཁོར་མཆོད་པར་བྱ་བ་དང ། །དངོས་
216a
༄#། །གྲུབ་ཐམས་ཅད་ཐོབ་པར་འགྱུར། །རང་གི་ཕྱག་རྒྱ་བསླབས་ནས་ནི། །དེ་ལ་གར་གྱི་མཆོད་པ་དང ། །འདོད་ཡོན་དམ་པ་ལྔ་རྣམས་ཀྱིས། །རྟག་ཏུ་དཀྱིལ་འཁོར་མཆོད་པར་བྱ། །འཇིག་རྟེན་གསུམ་འབྱིན་པའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །སེམས་ཅན་ཀུན་རྗེ་སྟོན་མཛད་པ། །འཇིག་རྟེན་གསུམ་ཕྱུང་དོན་གྲུབ་ཏུ། །སླར་ཡང་སྲིང་མོ་རྣམས་འབྱིན་མཛད། །ཀུན་ཏུ་ཆགས་དང་ཞེ་སྡང་རྨོངས། །བརྟན་པར་བྱེད་པའི་རྒྱུ་ཡིན་ནོ། །དགའ་དང་ཕྲག་དོག་བུད་མེད་ནི། །རབ་ཏུ་གྲགས་པའི་གྲུབ་ཀུན་སྟེར། །གང་ཞིག་འཇིག་རྟེན་ཀུན་ཏུ་བཤད། །ཚོགས་ཀུན་གྱིས་མཆོད་ལྷ་མོ་རྣམས། །ཞི་དང་འཇིགས་མ་དེ་བཞིན་གསར། །གྲུབ་པ་དང་ནི་ཞི་བར་བཤད། །ཕྱི་རོལ་སེམས་ཅན་ཕན་ཕྱིར་དང ། །རྟོགས་དོན་ཁོང་དུ་ཆུད་བྱའི་ཕྱིར། །དེ་རྣམས་ཀྱི་ནི་སྙིང་པོ་དང ། །དཀྱིལ་འཁོར་དེ་བཞིན་དམ་ཚིག་བཤད། །ཧྲཱི་ཧཱུཾ་ཤྲཱི་བྷྱོ། དཀྱིལ་འཁོར་བཟང་པོ་སྒོ་བཞི་པ། །སྲད་བུ་གསུམ་གྱིས་དཀྱིལ་འཁོར་བྱ། །མཚམས་ཀྱི་ཐིག་ནི་ཀ་བ་ཆེ། །བཞི་པོ་དག་གི་རིམ་པ་བཞིན། །དེ་ཡི་དབུས་སུ་དཀྱིལ་འཁོར་ནི། །བཞི་པོ་དག་ནི་དེ་བཞིན་བྱ། །རང་གི་སྙིང་པོ་བཞི་པོ་ནི། །རང་གི་སྒོར་ནི་ཕྱོགས་པར་གཞག་།སྐལ་བཟང་ལག་ན་རལ་གྲི་མཚོན། །སྲིང་མོ་ཕུབ་ཅན་ཞི་བ་མོ། །ཕག་མོ་ལག་ན་
216b
གཏེར་ཉིད་དེ། །གྲུབ་པ་མོ་ནི་བསྙེམས་དང་བཅས། །དེ་ནས་དང་པོའི་དཀྱིལ་འཁོར་དུ། །ཀུན་ནས་དེ་བཞིན་ཞུགས་ནས་ནི། །སྲིང་མོ་རྣམས་ཀྱི་རང་གི་རྒྱས། །གོ་རིམས་དག་ནི་ཅི་བཞིན་དུ། །ཞུགས་ནས་དེ་བཞིན་ཆོ་ག་བཞིན། །སྤོས་ལ་སོགས་པས་མཆོད་པར་བྱ། །དེ་ཉིད་གསང་བ་རབ་བསྒྲུབ་པས། །ཀུན་ནས་དགུག་པ་དག་ཏུ་བྱ། །ོཾ་སུཾ་བྷ་ག་ར་ཏི་ཥྛ་མ་ཡ་ཧཱི་བྷཱུ་ར། རཀྵ་ས་མཱ་ཏི་ཥྛ་མ་ཡ་ཧི་བྷུར་བྷུ་བ། བ་ར་ཧཱ་ཨ་མི་རྱ་ཏ་མ་ཡ་སཝཱ་ཧཱ། སིདྡྷི་ཀེ་སིདྡྷི་ས་མ་ཡ་ཧི་ཨཱི་མཾ་ཀེ་མཱུ་དྲ་བྷིཿ ། ཧྲཱིཿ ་ཧཱུཾ་ཤྲཱི་བྷྱོ། །དེ་ནས་ལུས་ནི་ཐམས་ཅད་ཀྱིས། །དེ་བཞིན་དུ་ནི་ལེགས་བཞུགས་ལ། །དེ་ནས་ཕྱག་རྒྱ་བཅིངས་བསྟན་ཏེ། །གསང་བ་མཆོག་འདི་བརྗོད་པར་བྱ། །གལ་ཏེ་གསང་ཉིད་མ་བསྲུངས་ན། །གང་ཞིག་སེམས་ཅན་དོན་ཞུགས་དང ། ། གང་ཡང་དཀྱིལ་འཁོར་སྒྲུབ་བྱེད་པ། །དེ་རྣམས་ཁྱེད་ཀྱིས་བསད་པར་འགྱུར། །ཆོས་དང་ལྡན་ལ་བདུད་རྩི་ཉིད། །ཆོས་མིན་པས་ནི་དུག་པས་ལྷགས། །ཅི་སྙེད་པ་དང་དུས་ཅི་བཞིན། །ཡུལ་རྣམས་ཉེ་བར་བསྟེན་པ་དང ། །ཕྱག་རྒྱ་གར་གྱི་མཆོད་པ་ཡིས། །ཅི་བདེ་བར་ནི་རྟག་ཏུ་མཆོད། །སྲིང་མོ་བཞིའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །ས་ཡི་དབང་ཕྱུག་ཀུན་གྱི་མཆོག་།འདོད་ཆགས་ཞེ་སྡང་གཏི་མུག་ཆེ། །སྒྲུབ་བདག་ནི་རབ་སྒྲུབ་ཉིད། །འདོད་ཆགས་སོགས་དུག་གཞིག་ཕྱིར་དང ། །ཀུན་ནས་བདུད་རྩི་
217a
༄#། །ཉིད་བྱའི་ཕྱིར། །ཞེ་སྡང་ལས་བྱུང་ཀླུ་ཡི་ནི། །དཀྱིལ་འཁོར་དམ་པ་འབྱུང་བར་འགྱུར། །དེ་ལ་སྙིང་པོ་ནི་འདི་ཡིན་ཏེ། ཕུཿ ། ཟུར་བཞི་པ་ལ་སྒོ་བཞི་པ། །སྲད་བུ་ཐམས་ཅད་ཡང་དག་བྲི། །སྒོ་ཁྱུད་ཀླུ་ཡི་གདེངས་ཀ་མཆོག་།མཚམས་ཀྱི་རྩེ་མཆོག་མཇུག་མ་མདུད། །དེ་ཡི་དབུས་སུ་ཀླུ་རྒྱལ་ནི། །མཐའ་ཡས་གདེངས་ཀ་བཅས་པ་ནི། །ཀླུ་ཡི་རིགས་ནི་བརྒྱད་པོ་དག་།ཤེས་རབ་ཅན་གྱིས་ཀུན་ཏུ་བྲི། །དེ་ནས་ཁྲོས་དང་ཞུགས་ནས་ནི། །ཀླུ་འཛིན་པ་ཡི་ཤུགས་ཀྱིས་ནི། །ཞུགས་ནས་དཀྱིལ་འཁོར་དེ་ཉིད་དུ། །སྦྲུལ་གྱི་གདེངས་ཀས་དགུག་པར་བྱ། །ོཾ་ཧྲཱིཿ ་ཨ་ནཱི་ལ་ཛ་བ་བེ་ག་པྲྀ་ཐི་བྷིན་དྀ་ར་ཥེ་ཤཱ་ཡ་ཧི་ཕུཿ ་སརྦ་ནཱ་ག་ཀུ་ལཱ་ནྱཱ་ན་ཡ་ཕུཿ ། ས་མ་ཡ་པྲ་བེ་ཤ་ཡ་ཕུཿ ། སརྦཱ་ན་སཱ་དྷ་ཡ་ཕུཿ ། ཏ་ཏ་ས་སརྦ་ནཱ་ག་པུ་ཏྲ་ཀ་ཕུཿ ། དེ་ལྟར་བྱས་ན་ལེགས་པར་བཞུགས་ཤིང་དགའ་བར་འགྱུར་རོ། །དེ་ནས་སློབ་དཔོན་གྱིས་དུག་མེད་པར་བསམ་པར་བྱའོ། །དེ་ནས་བརྩམས་ཏེ་དུག་ཐམས་ཅད་ཟོས་པས་ཀྱང་བདུད་རྩིར་འགྱུར་རོ། །ནོར་རྒྱས་དང་རྩེ་བར་བྱེད་དོ། །དུག་ཐམས་ཅད་སྦར་བ་དང ། གཞིག་ནུས་པར་འགྱུར་རོ། །དེ་ནས་མནའི་སྙིང་པོ་སྦྱིན་པར་བྱ་སྟེ། །འདོད་ཆགས་ཞེ་སྡང་གཏི་མུག་རྣམས། །འཇིག་རྟེན་ན་ནི་འདི་གསུམ་དུག་།གལ་ཏེ་བདེན་པ་ལས་འདས་ན། །འདི་དག་གིས་ནི་རྟག་གསོད་འགྱུར། །ཁྱོད་
217b
ཀྱིས་གློག་ལ་བརྙས་མི་བྱ། །སེར་བ་བཟློག་པར་མི་བྱ་ཞིང ། །གལ་ཏེ་དངོས་གྲུབ་ལ་དགའ་ན། །ཅི་ནས་སྦྲུལ་ནི་གསད་མི་བྱ། །ཀླུའི་དཀྱིལ་འཁོར་རོ།། །།དེ་ནས་སྟོན་པ་རྡོ་རྗེ་འཛིན། །སྡུག་བསྔལ་ཐམས་ཅད་སེལ་བའི་མཆོག་།སེམས་ཅན་ཀུན་ལ་བདེ་བའི་ཕྱིར། །གདོན་གྱི་དཀྱིལ་འཁོར་ཕྱུང་བ་ཡིན། །འདོད་ཆགས་ཞེ་སྡང་གཏི་མུག་རྣམས། །ཉེས་བྱས་ཀྱིས་ནི་དུག་ཉིད་འགྱུར། །གདོན་དང་རིམས་དང་སྡིག་པ་དང ། །དམྱལ་བ་ཡང་ནི་འགྱུར་བ་ཡིན། །དེ་ནས་གདུག་པའི་སྙིང་པོ་ནི། །ཧཾ། ཟུར་བཞི་པ་ལ་སྒོ་བཞི་པ། །གདོན་གྱི་དཀྱིལ་འཁོར་ཀུན་ཏུ་བྲི། །དེའི་དབུས་དང་པོར་གདོན་ལ་སོགས། །ཆོ་ག་རྒྱས་པ་གདོན་པར་བྱ། །དེ་ནས་བཤད་པ་བཞིན་ཞུགས་ནས། །དགོད་ཅིང་མྱུར་བར་དཀྱིལ་འཁོར་དུ། །རྡོ་རྗེ་འཛིན་པ་ཞུག་ནས་ནི། །ཁྲོས་པས་རྐང་པ་གཡོན་པས་མཉེ། །དེ་ནས་གདོན་དང་རིམས་སྡིག་པ། །དམྱལ་བ་ཐམས་ཅད་རྟག་ཏུ་ནི། །སྡིག་པ་ཆེན་པོ་བྱེད་པ་ཡང ། །རྡོ་རྗེས་རབ་ཏུ་འཇིགས་པར་འགྱུར། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །སྡུག་བསྔལ་ཐམས་ཅད་ལས་འདོན་པའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །ཀུན་མཆོག་དབང་ཕྱུག་དམ་པ་ཡིས། །སེམས་ཅན་ཀུན་དོན་རབ་བསྒྲུབ་ཕྱིར། །དཀྱིལ་འཁོར་ཐམས་ཅད་གསུངས་པ་ཡིན། དེ་ལ་སྙིང་པོ་ནི་འདི་ཡིན་ཏེ། ཨོཾ་ཨཱཿ ་ཧཱུཾ་ཧྲཱིཿ ་ཏྲཱཾ། དེ་ནས་འདི་ནི་
218a
༄#། །གསུངས་ཙམ་གྱིས། །ཀུན་མཆོག་དབང་ཕྱུག་དམ་པ་ནི། །གཟུགས་ཀུན་གྱིས་ནི་ཀུན་མཆོག་གི་།དབང་ཕྱུག་དམ་པ་མཛད་པ་ཡིན། །གསང་བ་ཆེན་པོ་ལྔ་ཡིས་ནི། །གང་ཚེ་འདུལ་བར་མ་གྱུར་པ། །དེ་ཚེ་སྣ་ཚོགས་ཆེར་མཛད་པ། །འགྲོ་བ་འདུལ་བའི་དམ་པ་ཡིན། །དེ་ནས་གང་ཕྱིར་དཀྱིལ་འཁོར་ཆེ། །དམ་པ་ཡང་དག་བཤད་བྱ་སྟེ། །ཀུན་མཆོག་སྣ་ཚོགས་རྣམ་པར་རྒྱལ། །ཀུན་མཆོག་དབང་ཕྱུག་དམ་པ་ཡི། །དཀྱིལ་འཁོར་ཆེན་པོ་བྲིས་ནས་ནི། །དེ་ཡི་དབུས་སུ་ཆོ་ག་བཞིན། །རྡོ་རྗེ་སེམས་དཔའ་རབ་བཞག་ལ། །རྡོ་རྗེ་ལྷ་མོ་ཚོགས་དཀྱིལ་འཁོར། །དེ་ཡི་ངོས་ནི་ཐམས་ཅད་དུ། །ཀུན་མཆོག་བདག་པོའི་སྐུ་རྣམས་སོ། །རྡོ་རྗེ་མཆོག་བཅས་མཚན་མ་ནི། །རང་གི་རིགས་ཀྱིས་བསྐོར་བ་གཞག་།རྒྱལ་པོ་རྡོ་རྗེ་སྲེད་མེད་བུའི། །གཟུགས་འཛིན་འཁོར་ལོ་བསྣམས་པ་བྲི། །ཁྱབ་བདག་རྡོ་རྗེ་ཅན་རྡོ་རྗེ། །གཏུམ་མ་དབང་རྡོ་རྗེ་མདུང་བསྣམས་པ། །རྡོ་རྗེ་པད་བྱུང་པདྨ་ཅན། །རྡོ་རྗེ་འཛིན་པ་ཚངས་གཟུགས་ལྡན། །ནམ་མཁའི་སྙིང་པོ་འདོད་པའི་གཟུགས། །རྡོ་རྗེ་དང་བཅས་མེ་ཏོག་མཚོན། །དཀྱིལ་འཁོར་གྱི་ནི་མཚམས་རྣམས་སུ། །རིགས་ཀྱི་ལྷ་མོ་བྲི་བར་བྱ། །རྡོ་རྗེ་དཔལ་མོ་དཀར་མོ་དང ། །རྡོ་རྗེ་སྒྲོལ་མ་མཁའ་རྡོ་རྗེ། །དེ་ནས་དཀྱིལ་འཁོར་གྱི་བདག་པོ་འདི་རྣམས་ཀྱི་སྙིང་པོ་འདི་བཤད་པར་བྱ་སྟེ།
218b
ོཾ་བཛྲ་ནཱ་རཱ་ཡ་ཎ་ཙིཚནྡ་པྲ་ཏི་ཧ་ན་བཛྲ་ཙཀྲ་ཏེ་ན་ཧོ། །བྷ་ག་ཝ་ན་བཛྲ་ཏ་ཐཱ་ག་ཏ། ཛཿ ་ཧཱུཾ་བཾ་ཧོཿ ། བཛྲ་དྷཱ་ར་ཏཾ། བཛྲ་ཏ་ཐཱ་ག་ཏ་ཧཱུཾ། བཛྲ་ཀྲོ་དྷ་མ་ཧཱ་ཡོ་གི་ནི་ག་ཎེ་ཤཝ་ར། མ་ཧཱ་བཛྲ་ཀུ་ལོ་གྲ་བ་ནེ་ཧོ། བྷ་ག་བཱན་བཛྲ་ཙནྡྲེ་ཤཝ་རཱ་ཡ། ཧ་ཧ་ཧ་ཧ་ཧྲཱིཿ ། བཛྲ་པདྨོད་བྷ་བ་ཧོ། བྷ་ག་བཱན་བཛྲ་ལོ་ཀེ་ཤཝ་རེ། མ་ཧཱ་པྲ་མེ་སིད་དྷྱ། ཨོཾ་བྷཱུར་བྷུ་བ་སཝཿ ། སཝ་སྟི་ན་མཿ ་སཝཱཧཱ། ཧེ་བཛྲ་ཀུ་སུ་མཱ་ཡུ་དྷ། སརྦ་ཀཱ་མ་མེ་སཱ་དྷ་ཡ་ཧོཿ ་བྷ་ག་བཱན་བཛྲ་ཨཱ་ཀཱ་ཤ་གརྒྷ། བ་བ་ཊ་ཊ་ཏྲཾ། བཛྲ་ཨཱ་ཀཱ་ཤ་གརྦྷ་ཨ་ཤེ་ཥམ་མུ་དྲཱ། ན་མོ་ཡེ་ན་སཱ་དྷེ་ན། བྷ་ག་བ་ཏེ་པྲཛྙཱ་པཱ་ར་མི་ཏཱ་ཡུ་དྷ། ཙྪིནྡྷ་ཙྪིནྡྷ་བཛྲ་ཎི་ཙ་ཀྲེ་ཎ་ཏེ་ན་ས་ཏྱེ་ན་པཱ་པ་ཀ་ན། ཨོཾ་དྷཱིཿ ། ཤྲཱི་ཤྲུ་ཏི་སྨྲི་ཏི་བི་ཛ་ཡེ་སཝཱཧཱ། བཛྲ་པ་ར་མི། ཨོཾ་བཛྲ་གཽ་རི་མ་ཧཱ་བིདྱ་ཏྲཻ་ལོ་ཀྱ་བི་ཛ་ཡེ་ཤཝ་རི་བཛྲ་ཀྲོ་དྷ་ཨ་གནི་ས་མ་ཡེ། བཛ་དྷ་རི་ན་མོ་སྟུ་སྟེ། ཏདྱ་ཐཱ། ཨོཾ་ཧི་ལི་མི་ལི། ལེ་ལི་ཏཱ་ལི་བཛྲ་ཀ་མུ་ཀ་ཡེ་སཝཱཧཱ། བཛྲ་ས་མ་ཡ་ན་མོ་ཡེ་ན་སཱ་དྷྱ་ན་བྷ་ག་བ་ཏེ། བུདྡྷ་བོ་དྷི་རྦུདྡྷ་དྷཱ་ར། བཛྲ་དྷརྨ་པྲ་ཡོ་གེ་ན། ཏེ་ན་ས་ཏྱེ་ན་སིདྡྷ་མཱཾ། ཨོཾ་ཏཱ་རེ་ཏུ་ཏྟཱ་རེ་ཏུ་རེ་སཝཱཧཱ། བཛྲ་དྷ་མོ་ཏ། ཨོཾ་ཀརྨ་བཛྲི་ཎི་སིདྡྷྱ་བི་ཤུདྡྷྱ་དྷྱ་བ་ཧ། ག་ག་ནོདྦྷ་བེ། ཡོ་གེ་ན་སི་ད་དྷ་མཱཾ་པ་ར་མ་ཀ་རེ། ཏདྱ་ཐཱ། ག་ག་ན་བི་ཤུད་དྷེ། སརྦ་མ་པ་པྲི་ཡ་པ་རི་པཱུ་ར་ནི་སཝཱཧཱ། །ཕྱི་ཡི་དཀྱིལ་འཁོར་གནས་རྣམས་སུ། །རྡོ་རྗེ་འཛིན་པ་རབ་སྤྱོད་གནས། །ལྷ་དབང་དང་ནི་མ་མོ་ཉིད། །
219a
༄#། །འཇིག་རྟེན་སྐྱོང་རྣམས་དགོད་པར་བྱ། །ཚོགས་ཀྱི་དབང་ཕྱུག་རྡོ་རྗེ་ཡི། །རོལ་མོ་ཆེ་བཅུ་རྡུང་བྱེད་པ། །ཕྱི་ཡི་དཀྱིལ་འཁོར་འཁྱེར་དང ། །སྒོ་དང་མཚམས་སུའང་དེ་བྲིའོ། །སྒོ་རྣམས་ཀུན་ཏུ་འཇུག་པ་ནི། །རང་གི་ཕྱག་རྒྱ་རབ་ཏུ་གཞུག་།དཀྱིལ་འཁོར་དམ་པ་ལྔ་པར་ནི། །དང་པོའི་སྦྱོར་བས་འཇུག་པར་བྱའོ། །དེ་ནས་དབུས་སུ་འདུག་ནས་ནི། །དང་པོ་ལྕགས་ཀྱུ་ཆེ་དེ་ཉིད། །སྙིང་པོ་འདི་ནི་བརྗོད་བྱེད་ཅིང ། །འགུགས་པ་འདི་ནི་བརྗོད་པར་བྱ། །ོཾ་མ་ཧཱ་སུ་ཁ་བཛྲ་སཏྭ་སིདྡྷི་ཧཱུཾ། སརྦ་ཏ་ཐཱ་ག་ཏཱ་ན། ས་མ་ཡ་ཨ་ཀཪྵ་ཡ་ཛཿ ། བཛྲ་ཀུ་ལ་དཱི་པཾ་ད་མ་ཡེ་དཱ་པྲ་བེ་ཤ་ཡ་ཧཱུཾ། སརྦ་ལོ་ཀེ་ཤཝ་རེ་པྲ་བེ་ཤ་ཡ་ས་མ་ཡ་བནྡྷ་ན་བཾ། ས་མ་ཡ་སརྦ་རཏྣ་དཱི་པཾ་མ་ཧཱ་མ་ཎི་རཱ་ཛཱ་ནཱཾ། བ་ཤཱི་ཀུ་རུ་ཧོཿ ། ཧཱུཾ་ཨཱཿ ་ཧཱུཾ་ཧྲཱིཾཿ ་ཏྲཱཾ། །དེ་ནས་གསང་བ་ཆེན་པོ་ཡི། །སྙིང་པོ་བཟང་པོ་འདི་བརྗོད་པས། །རྡོ་རྗེ་འཆང་ཆེན་རྒྱལ་པོ་ནི། །འཁོར་ལོ་ཐམས་ཅད་དང་བཅས་པར། །བཀུག་ཅིང་རབ་ཏུ་བཅུག་པ་དང ། །བདེན་པས་བཅིངས་ཏེ་དབང་དུ་བྱས། །དཀྱིལ་འཁོར་རྒྱལ་པོ་མཆོག་ཐམས་ཅད། །དངོས་གྲུབ་ཀུན་གྱིས་འགྲུབ་པར་འགྱུར། །དེ་ནས་གོ་རིམས་ཇི་བཞིན་དུ། །དཀྱིལ་འཁོར་ཐམས་ཅད་སྒྲུབ་པ་དང ། །དངོས་གྲུབ་དེ་རྣམས་ཉིད་ཀྱང་ནི། །ཐམས་ཅད་ཀྱང་ནི་བསྒྲུབ་པར་བྱ། །བདེ་བ་ཐམས་ཅད་མི་འགྱུར་གནས། །བདེ་བ་
219b
ཆེན་པོ་ཞེས་བརྗོད་དོ། །རྡོ་རྗེ་འདི་ནི་བསྒྲུབ་ལ་སོགས། །འདི་ནི་ཚེ་འདིར་འགྲུབ་པར་འགྱུར། །དེ་ལྟར་སྣ་ཚོགས་པའི་དོན་སྦྱང་བའི་དོན་གྱི་ཆོ་ག། འགྲོ་བ་དཔག་ཏུ་མེད་པ་འདུལ་བ། མཐའ་མེད་ཅིང་སྣ་ཚོགས་པ། མཉམ་པ་མེད་པའི་ཕུལ་དུ་བྱུང་བ། དེ་བཞིན་གཤེགས་པ་ལ་སོགས་པའི་རིགས་ཐམས་ཅད་འཛིན་པའི་བདེ་བའི་མཆོག་བྱེད་པ། རྒྱལ་བ་ཐམས་ཅད་ཀྱིས་བྱིན་གྱིས་བརླབས་པ། སྲིད་པའི་བདེ་བའི་མཆོག་བྱེད་པ་གསུངས་པ་ཡིན་ནོ། །དཔལ་མཆོག་དང་པོའི་རྟོག་པའི་རྒྱལ་པོ་ལས། རྟོག་པ་ཐམས་ཅད་ཀྱི་རྒྱུད་ཕྱི་མའི་རྩ་བའི་རྒྱུད་ཀུན་གྱི་མཆོག་དབང་ཕྱུག་དམ་པའི་དཀྱིལ་འཁོར་གྱི་ཆོ་ག་རྒྱས་པ་རྫོགས་སོ།། །།དེ་ནས་གསང་བ་རས་བྲིས་ཀྱི་ཆོ་ག་གསུངས་པ་ནི། སངས་རྒྱས་ཀུན་གྱི་གསང་བ་ཆེ། །དམ་ཚིག་མཆོག་གི་སྒྲུབ་པ་དང ། །བདེ་བ་ཆེན་པོའི་གཞལ་ཡས་ཁང ། །དངོས་གྲུབ་ཀུན་གྱིས་ལུས་བྱས་པ། །དེ་བཞིན་གཤེགས་པ་མཆོག་ཆེན་པོ་ཡི། ། རིན་ཆེན་རྒྱལ་པོ་སོགས་ཀྱིས་བརྒྱན། །བདེ་བ་ཆེན་པོ་ཆགས་པ་ཡི། །གླུ་དང་རོལ་མོ་རྗེས་ཆགས་པ། །བླ་མེད་དགའ་བ་ཆེན་པོ་ཡི། །མཆོད་པ་ཀུན་གྱིས་རབ་ཏུ་མཆོད། །དགའ་བ་ཆེན་པོ་དཔལ་གྱི་གནས། །རང་གི་བཞུགས་གནས་མཆོག་དེ་ལ། །རབ་ཏུ་དགའ་བའི་རྒྱལ་པོ་མཆོག་།མི་འགྱུར་མཆོག་ཏུ་ཡང་དག་བཞུགས། །རྡོ་རྗེ་སེམས་དཔའ་བདག་
220a
༄#། །རང་ཉིད། །རབ་ཏུ་དགའ་བ་མི་འགྱུར་མཆོག་།ཀུན་ཏུ་བཟང་པོ་འཁོར་བ་དང ། །བྱང་ཆུབ་སེམས་དཔའ་དེ་བཞིན་གཤེགས། །དངོས་གྲུབ་ཆེན་པོ་ཀུན་གྱི་མཆོག་།རྡོ་རྗེ་བསྙེམས་པ་བདག་པོའི་བདག་།ཀུན་མཆོག་ཆགས་པ་ཆེན་པོ་ཡི། །དངོས་གྲུབ་དབང་ཕྱུག་རྗེས་གྲུབ་པ། །གླུ་དང་རོལ་མོ་ཐོག་མཐའ་མེད། །མཆོག་ནི་བཅོམ་ལྡན་འདས་ཀྱིས་གསུངས། །ཧཱུཾ། དེ་ནས་འདི་ནི་གསུང་ཙམ་གྱིས། །རྡོ་རྗེ་ཐམས་ཅད་འཛིན་པ་ནི། །གསང་བ་ལྔ་ཡི་དེ་ཉིད་ཆེ། །ཕྱག་རྒྱའི་ལྷ་མོ་བྱུང་བར་གྱུར། ། རྟག་ཏུ་ཆགས་དང་དངོས་གྲུབ་ཆེ། །རྣམ་རྒྱལ་དབང་ཕྱུག་ལྷག་པའི་ལྷ། །ཕྱག་རྒྱ་དམ་པ་བཞི་པ་སྟེ། །སེམས་དཔའ་བྱིན་གྱིས་བརླབས་པའི་སྐུ། །དེ་ནས་དེ་རྣམས་ཀྱི་སྙིང་པོ་ནི་འདི་ཡིན་ཏེ། ཀུན་མཆོག་སོ་སོར་རྟོག་པ་དང ། །དངོས་གྲུབ་ཀུན་གྱི་བདེ་བའི་མཆོག་།ཀུན་མཆོག་རྣམ་རྒྱལ་མཐོང་བ་འམ། །ཐམས་ཅད་དབང་ཕྱུག་མཆོད་པ་ཆེ། །དངོས་གྲུབ་རྣམས་དང་ཕུན་ཚོགས་དང ། །དགའ་བ་དག་དང་བདག་པོ་རྣམས། །རྡོ་རྗེ་ལྷ་མོ་ཐོག་མཐའ་མེད། །རྡོ་རྗེ་སེམས་དཔའི་སྐུ་ཡི་མཆོག་།ཅེས་བྱའོ། །དེ་ནས་མཆོག་ཏུ་གསད་བའི་མི་རྣམས་ནི་དགའ་བ་ཆེན་པོ་དཔལ་རྡོ་རྗེ་དོན་ཡོད་དགའ་བའི་དམ་ཚིག་གི་འདོད་པའི་རྡོ་རྗེ་མ་དང ། དགའ་བ་ཆེན་པོ་དཔལ་དོན་ཡོད་ལ་ཆགས་པའི་དམ་ཚིག་གི་རྡོ་
220b
རྗེ་ཀི་ལི་ཀི་ལི་དང ། དགའ་བ་ཆེན་པོ་དཔལ་རྡོ་རྗེ་དོན་ཡོད་ལ་ཆགས་པའི་དམ་ཚིག་རྣམ་པར་རྒྱལ་བའི་རྡོ་རྗེ་མ་དང ། དགའ་བ་ཆེན་པོ་དཔལ་རྡོ་རྗེ་དོན་ཡོད་ལ་ཆགས་པའི་དམ་ཚིག་རྡོ་རྗེ་འདོད་པའི་དབང་ཕྱུག་མའོ། །འདི་རྣམས་གསང་བའི་མཚན་དག་ནི། །མཁས་པས་གང་ཞིག་དང་པས་བརྗོད། །དེ་ནི་ཕྱག་རྒྱ་ཐམས་ཅད་ཀྱི། །དངོས་གྲུབ་ཀུན་བདག་བདག་པོར་འགྱུར། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་གསེང་བས་གསུངས་པ་ཡིན་ནོ། །དེ་ནས་འདི་སྒྲུབ་བཤད་བྱ་བ། །དངོས་གྲུབ་ཤིན་ཏུ་བརྟག་པ་སྟེ། །སྡིག་པ་ཆེ་ལ་དགའ་བ་དང ། །སྒྲུབ་པ་གང་ཞིག་མ་གྲུབ་ཀྱང ། །རྡོ་རྗེ་སེམས་དཔས་གསུངས་པ་བཞིན། །དེ་དག་ཀྱང་ནི་མྱུར་དུ་འགྲུབ། །ཉིན་རེ་འམ་ནི་ཟླ་རེ་འམ། །དེ་བཞིན་ལོ་ནི་རེ་རེ་ལ། །ཅི་མངོན་མངོན་འདོད་བསྒྲུབ་པར་བྱ། །ཅི་རྙེད་པ་དང་ཅི་བདེ་བས། །རས་ལ་བཅོམ་ལྡན་འདས་བྲི་བར་བྱ། །ཀུན་བདག་དམ་ཚིག་དབང་ཕྱུག་སྟེ། །གང་ཞིག་བྲིས་པར་གྱུར་ན་ནི། །མཆོག་ཏུ་རྟག་པའི་ཐར་པ་ཐོབ། །བཞད་པ་དང་བཅས་ཟླ་བའི་འོད། །སྣ་ཚོགས་པདྨའི་འོད་འབར་བ། །སངས་རྒྱས་ཀུན་གྱི་དབང་བསྐུར་སོགས། །སྣ་ཚོགས་རྒྱན་དང་ན་བཟའ་ལྗང ། །སེམས་དཔའི་སྐྱིལ་མོ་ཀྲུང་གིས་བཞུགས། །རྡོ་རྗེ་བསྙེམས་པའི་མཆོག་འཆང་བ། །གཡོན་པ་དྲིལ་བུ་མཆོག་བསྙེམས་པ། །རྡོ་རྗེ་སེམས་དཔའ་རབ་ཏུ་བརྟག །
221a
༄#། །དེ་ཡི་ལོགས་ན་བཞུགས་པ་རྣམས། །དེ་ཡི་འོད་ཀྱི་དཀྱིལ་འཁོར་བརྟེན། །རབ་ཏུ་དགའ་དང་བདེ་བའི་སྐུ། །གསང་བ་ཆེན་པོ་དགོད་པར་བྱ། །དང་པོ་པདྨ་ལྟར་དཀར་དམར། །གཞན་ནི་པ་ལ་ཤ་ལྟར་དཀར། །གཞན་ནི་ཨུཏཔལ་འདབ་ལྟར་སྔོ། །རྡོ་རྗེ་བསྙེམས་མ་སེར་པོ་འཛིན། །དང་པོ་དང་ནི་གཉིས་པ་དག་།གཡས་ཀྱི་ལོགས་ལ་བརྟེན་པ་སྟེ། །གསུམ་པ་དང་ནི་བཞི་པ་དག་།གཡོན་གྱི་ལོགས་སུ་བཞུགས་པ་ཡིན། །རྡོ་རྗེ་ཀི་ལི་ཀི་ལ་མ། །དབུས་ཀྱི་རང་ལྷ་དགྱེས་པར་སྤྲོ། །དེ་ཡི་ལོགས་ལ་རྡོ་རྗེ་ཆེའི། །མདའ་ནི་གསོར་བ་ལ་བརྩོན་པ། །བསྙེམས་པའི་ཕྱག་གིས་ཡོངས་འཁྱུད་པའི། །ཆུ་སྲིན་རྒྱལ་མཚན་བསྒྲེང་དང་བཅས། །དེ་ཡི་ལོགས་ན་བཞད་དང་བཅས། །མཆོད་པས་བདག་པོ་ལ་ལྟ་བ། །སངས་རྒྱས་རིན་ཆེན་དབང་བསྐུར་མཚན། །ཐམས་ཅད་སྤྱན་གྱི་ཕྱག་རྒྱ་གཟིགས། །རང་ལ་བདག་ནི་ཐུགས་གཏད་པ། །ཟུར་དུ་བལྟ་ཞིང་བཞུགས་པའོ། །རས་རིས་འདི་ནི་མཐོང་བ་ཡིས། །རྟག་པའི་བསོད་ནམས་ཐོབ་པར་འགྱུར། །མཆོད་པ་དང་ནི་བརྟགས་པ་ཡིས། །མཆོག་ཏུ་དགའ་བའི་ཐར་པ་ཐོབ། །ཅེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལྟར་མཆོག་ཏུ་དགའ་བ་རབ་ཏུ་འདོད་པ་ནི། །མཆོག་ཏུ་དགའ་བ་དག་པ་དམ་
221b
པའི་དངོས་གྲུབ་འགྲུབ། །གསལ་ཞིང་རྣམ་པར་རྒྱལ་བ་ཡི། །རྒྱལ་བའི་རས་རིས་ཆེན་པོ་འདི། །ཐམས་ཅད་གཟིགས་པ་རྣམས་མཆོད་པ། །ཆེན་པོ་ཡིས་ནི་དཔལ་འདིར་རོལ། །འཁོར་ལོ་དེ་ནི་བརྟགས་བྱས་ནས། །མཆོག་ཏུ་གསང་བའི་དཀྱིལ་འཁོར་ནི། །རྣམ་པར་དབེན་པའི་ཁང་པར་རམ། །ཡང་ན་སྐྱེད་མོས་ཚལ་སོགས་སུ། །དེ་བཞིན་གཤེགས་མཆོག་ཆེན་པོ་ཡི། །རས་རིས་རྒྱལ་པོ་སོགས་ཀྱིས་བརྒྱན། །དྲིལ་བུ་དང་བཅས་ཡིད་དགའ་བའི། །བླ་རེ་ཕུལ་བས་མཆོག་གྱུར་བའི། །རྡོ་རྗེ་གླུ་ཡི་མཆོད་ཚོགས་དང ། །གླུ་དང་རོལ་མོ་རྣམ་འཕྲུལ་བ། །མེ་ཏོག་སྤོས་སོགས་རབ་སྦྱོར་བ། །མར་མེའི་སྦྱོར་བས་ཡང་དག་མཆོད། །ཁང་པ་སུམ་བརྩེགས་དཀྱིལ་འཁོར་དུ། །མཆོག་གི་གསང་བ་བསྒྲུབ་པར་བྱ། །ཡང་ན་བདག་ཉིད་ཁོ་ན་མཆོག་།རང་གི་ལྷག་པའི་ལྷར་བསྒོམ་བྱ། །དེ་ནས་འཁོར་ལོར་མ་ཞུགས་ཀྱང ། །རང་ཉིད་ཀྱིས་ནི་རྟག་ཞུགས་ནས། །རྡོ་རྗེ་ཀུན་འཆང་སློབ་དཔོན་ནི། །དངོས་གྲུབ་ཀུན་ལ་འགྲུབ་པར་འགྱུར། །རང་ཉིད་ཁྲུས་བྱས་དྲི་ཞིམ་བསྒོས། །ཇི་སྙེད་རྒྱན་དང་གོས་དང་ལྡན། །སྣ་ཚོགས་གོས་ཀྱིས་ཡང་དག་ཀླུབས། །ཕྲེང་བཅས་ཁ་ནི་དྲི་ཞིམ་པ། །རྡོ་རྗེ་སེམས་དཔའི་སྦྱོར་བ་ཡིས། །མེ་ཏོག་སྤོས་དང་དྲི་སྣོད་བཅས། །རྡོ་རྗེ་གླུ་ནི་འདི་དག་གིས། །གར་བྱེད་གྲོང་ཁྱེར་འཇུག་པར་བྱ། །དེ་ལ་མཆོག་ཏུ་གསང་བའི་
222a
༄#། །དཔལ་དམ་ཚིག་གསུམ་འཇུག་ལ་མཆོག་ཏུ་གསང་བའི་གླུའི་མཆོད་པ་མཆོག་ཏུ་གྲུབ་པ་འདི་ཡིན་ཏེ། །དངོས་གྲུབ་ཀུན་གྱི་བདེ་བ་ཉམས་དགའ་བའི། ། ཐར་པའི་གྲོང་དུ་བཅོམ་ལྡན་བདེ་ཆེན་འཇུག་།མཆོག་ཏུ་བདེ་བ་དམ་པའི་དངོས་གྲུབ་ཀྱིས། །ཛཿ ་ཧཱུཾ་བཾ་ཧོཿ ་རབ་ཏུ་གྲུབ་པར་མཛོད། །རབ་ཏུ་ཞུགས་ཏེ་གཡོན་པ་ཡིས། །རྡོ་རྗེའི་མིག་གིས་མགོན་ལ་འདུད། །གཡོན་པ་བསྙེམས་པ་ཅུང་ཟད་བཞད། །བསྟོད་ཅིང་མཛེས་པའི་མིག་བཙུམས་པ། །དེ་ལ་མཆོག་ཏུ་གསང་བ་དམ་པ་དཔལ་དམ་ཚིག་གསུམ་གྱི་ཕྱག་འཚལ་བའི་མེ་ཏོག་གི་སིལ་མ་དོར་བའི་མཆོག་ཏུ་གསང་བ་རྡོ་རྗེ་གླུའི་མཆོད་པ་མཆོག་ཏུ་གྲུབ་པ་འདི་ཡིན་ཏེ། །མཆོག་ཏུ་བདེ་བའི་སེམས་ནི་རོལ་བར་ལྡན། །སྒེག་པའི་ཕྱག་གིས་བཅོམ་ལྡན་འདས་ལ་འདུད། །ཛཿ ་ཧཱུཾ་བཾ་ཧོཿ ། ཧི་ཧི་ཧི་ཧི་ཧི། མགོན་པོ་སྙིམ་པའི་མེ་ཏོག་བཞེས་སུ་གསོལ། །དེ་ནས་མེ་ཏོག་སིལ་མ་དོར། ། རྡོ་རྗེ་སེམས་དཔའི་དབང་བསྐུར་བས། །རྡོ་རྗེ་དྲིལ་བུའི་ཕྱག་རྒྱ་དང ། །ལྡན་པའི་དོན་གསལ་སྦྱིན་པར་བྱ། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་རྡོ་རྗེ་སེམས་དཔའི་དབང་བསྐུར་བའི་མཆོག་ཏུ་གསང་བའི་རྡོ་རྗེའི་གླུའི་མཆོད་པ་མཆོག་ཏུ་གྲུབ་པ་འདི་ཡིན་ཏེ། ཨོཾ། སངས་རྒྱས་ཀུན་ལྡན་རིན་ཆེན་མཆོག་གིས་
222b
བརྒྱན། །ལྷ་ཡི་ཅོད་པན་དང་བཅས་ཁྱོད་ལ་འདུད། །རྡོ་རྗེ་འཆང་བདག་རིན་ཆེན་དབང་བསྐུར་བས། །རྡོ་རྗེ་སེམས་དཔའ་ས་མ་ཡ་སྟྭཾ་ཧཾ། །དེ་ཉིད་ཀྱིས་ནི་རྡོ་རྗེ་གཟུང ། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །རྡོ་རྗེ་ལ་སོགས་ཐོབ་བཟུང་བས། །རྡོ་རྗེ་སེམས་དཔའ་གཉིས་པ་འདྲ། །རྡོ་རྗེ་ཐམས་ཅད་འཛིན་རྒྱལ་པོ། །རྡོ་རྗེ་ཅན་གྱིས་བྱིན་བརླབས་འགྱུར། །ཞེས་བྱ་བ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱིས་བདག་ལ་བྱིན་གྱིས་བརླབས་པའི་སྒྲུབ་པ་གཅིག་པུའི་ཆོ་ག་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་འདིར་བསྒྲུབ་བཤད་བྱ་བ། །དངོས་གྲུབ་ཤིན་ཏུ་བརྟག་པ་ཡང ། །གང་གིས་སྒྲུབ་པོ་དམ་པ་དང། །སྡིག་ཆེན་བྱེད་པ་རྣམས་ཀྱང་ནི། །རྡོ་རྗེ་སེམས་དཔས་གསུངས་པ་བཞིན། །མ་གྲུབ་རྣམས་ཀྱང་གྲུབ་པར་འགྱུར། །ལུགས་མ་འམ་ནི་བརྡུངས་མ་འམ། །འདུས་བྱས་པ་འམ་བྲིས་པ་འམ། །དང་པོའི་སེམས་དཔའ་བཞུགས་གསོལ་ནས། །དེ་ཡི་མདུན་དུ་ཆོ་ག་བཞིན། །རྟག་ཏུ་རྡོ་རྗེ་དྲིལ་འཆང་ཞིང ། །དངོས་གྲུབ་མཆོག་ནི་བསྒྲུབ་པར་བྱ། །ཐམས་ཅད་དགུག་དང་མཆོད་པ་ཆེ། །བདག་བྱིན་རླབས་སོགས་བསྒྲུབ་རྣམས་སོ། །དེ་ལ་ཇི་ལྟར་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་དངོས་གྲུབ་ཐམས་ཅད་
223a
༄#། །དགུག་པའི་རྒྱུད་ནི་འདི་ཡིན་ཏེ། །རང་ལྷག་ལྷ་ཡི་སྦྱོར་བ་ལས། །ཐམས་ཅད་དགུག་པའི་སྦྱོར་བ་ཡིས། །ཡན་ལག་མཆོག་གི་རོལ་བཅས་པས། ། གར་བྱ་ཞིང་ནི་དགུག་པར་བྱ། །དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་མཆོག་ཏུ་གསང་བའི་དམ་ཚིག་གི་གླུའི་མཆོད་པ་ནི་འདི་ཡིན་ཏེ། ཛཿ ་མཆོག་དང་པོའི་རྡོ་རྗེ་འཆང་བ་རྡོ་རྗེ་སེམས་དཔའ་བདེ་བ་རབ་རྟོགས་རབ་ཏུ་དགའ་བ་ཁྱོད་བདག་སངས་རྒྱས་སོ་སོར་རྟོགས། །ཧཱུཾ་མཆོག་རྡོ་རྗེ་ལས་ནི་མཆོག་ཏུ་མི་འགྱུར་ཟད་མེད་སྲིད་པ་བར་བསྒྲུབ་བདེ་དང་ཡིད་བདེ་དམ་ཚིག་བདག་ལ་དེང་གྲུབ་མཛོད། །བཾ་མཆོག་བདག་གི་སྐུ་འཛིན་རྣལ་འབྱོར་ཐམས་ཅད་རྣམ་རྒྱལ་བསྒྲེང་བ་རབ་མཆོག་དག་པ་བདེ་བར་འགྱུར་བའི་པདྨའི་རྒྱལ་པོ་ཀྱེ། །ཧོཿ ་རབ་མཆོག་ནི་མཆོག་གི་དངོས་གྲུབ་དམ་པ་ཐམས་ཅད་དབང་ཕྱུག་དམ་པར་བདག་གྱུར་ཅིག་།རྟག་པར་བདག་འཕེལ་ནམ་མཁའི་སྙིང་པོ་ཁྱོད། །ཧུ་ལུ་ཧུ་ལུའི་སྒྲུབ་པས་དབབ་པར་མཛོད། །དམ་ཚིག་ཆེན་པོས་ཡང་དག་དགུག་པ་ཁྱོད། །དེ་བཞིན་གཤེགས་པ་ཀུན་གྱི་དམ་ཚིག་སྟེ། །རབ་ཏུ་དགའ་བ་མཆོག་བདག་པོ། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་དངོས་གྲུབ་ཐམས་ཅད་ཀྱི་མཆོད་པ་ཆེན་པོའི་ཆོ་ག་ཇི་ལྟར་ཡིན། རང་ལྷའི་རྣལ་འབྱོར་ཇི་
223b
བཞིན་དུ། །མཆོད་པ་ཀུན་མཆོག་སྐུ་རྣམས་ཀྱི། །མཆོད་དེ་སྔགས་པས་གླུ་རྣམས་ཀྱི་སྒྲ་རོལ་མོའི་རྣམ་འཕྲུལ་གྱིས་རྗེས་མཆོད། །དེ་ནས་དེ་བཞིན་གཤེགས་པ་ཐམས་ཅད་ཀྱིས་མཆོག་གི་དངོས་གྲུབ་ཀྱི་མཆོད་པ་ཆེན་པོའི་ཆོ་གའི་མཆོག་ཏུ་གསང་བའི་དམ་ཚིག་གི་རྡོ་རྗེའི་གླུའི་མཆོད་པ་ནི་འདི་ཡིན་ཏེ། །ཐམས་ཅད་རྗེས་སུ་ཆགས་པ་བདེ་བ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ཏུ་དགའ་བ་ཡིན། །བདེ་བ་ཆེན་པོ་གསལ་མཐོང་བདག་ལ་བརྟན་གྱུར་ཅིག་།མྱུར་དུ་སོ་སོར་མཁྱེན་ནས་རབ་ཏུ་འདོད་པ་བསྒྲུབས། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་དངོས་གྲུབ་ཐམས་ཅད་བྱིན་གྱིས་བརླབས་པའི་སྒྲུབ་པ་ཆེན་པོ་ཇི་ལྟར་ཡིན། རང་ལྷའི་སྦྱོར་བ་ཇི་བཞིན་དུ། །ཕྱག་རྒྱ་ཀུན་གྱིས་བྱིན་བརླབས་པ། །དེ་ཉིད་ཆེན་པོའི་མཆོག་གིས་ནི། །རང་ཉིད་བསྒྲུབས་ཏེ་སྙིང་པོ་བཟླ། །དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་བྱིན་གྱིས་བརླབས་པའི་གསང་བ་ཆེན་པོ་དམ་པའི་དམ་ཚིག་གི་རྡོ་རྗེ་གླུའི་མཆོད་པ་མཆོག་ཏུ་གྲུབ་པ་ནི་འདི་ཡིན་ཏེ། ཨོཾ། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག ། སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔལ་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་
224a
༄#། །ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀྱིས་ནི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག་།གདོད་ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད། ། བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག་།དབང་ཕྱུག་ཆེན་པོ་ཕྱག་རྒྱའི་མཆོག་།གྲུབ་པའི་རྡོ་རྗེ་ཆེར་བསྟོད་པས། །རྡོ་རྗེ་བསྙེམས་བདག་བདག་མཛོད་ཅིག་།དཔལ་མཆོག་དང་པོའི་བཅོམ་ལྡན་ཁྱོད། །གང་གིས་དོན་དང་གླུ་ཡིས་བསྟོད། །དེ་ནི་དངོས་གྲུབ་ཀུན་གྱི་མཆོག་།དབང་ཕྱུག་ཆེན་པོ་ཉིད་གྲུབ་འགྱུར། །ཞེས་བྱ་བ་མཆོག་གི་དེ་ཁོ་ན་ཉིད་ཀྱི་མཆོག་ཏུ་གསང་བའི་གླུ་ཆེན་པོ་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་འཆང་གིས་གསུངས་སོ། །དངོས་གྲུབ་ཆོ་ག་འདི་ཡིས་ནི། །རྡོ་རྗེ་སེམས་དཔའ་ཡང་དག་རྟོགས། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཉིད་ནི་རབ་བསྒྲུབ་པའོ། །ཀུན་ནས་འོད་ཟེར་སྟོན་སོགས་དང ། །སོ་སོར་སྟོན་པའི་རྨད་བྱུང་རྣམས། །རྡོ་རྗེའི་ཚིག་གིས་རང་ལྷ་ལས། །ངོ་མཚར་གྱུར་རྣམས་མཐོང་བར་གྱུར། །རྟོག་པ་ཀུན་གྱི་སྣ་ཚོགས་ཆེ། །དངོས་གྲུབ་དབང་ཕྱུག་བདེ་
224b
རྣམས་ཀྱིས། །མྱུར་དུ་རང་གིས་བྱིན་བརླབས་པས། །རྡོ་རྗེ་སློབ་དཔོན་གྱིས་ཐོབ་བོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་མཆོག་གི་དང་པོས་གསུངས་སོ། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱིས་ལྷ་ཐམས་ཅད་ཀྱིས་བདག་ལ་བྱིན་གྱིས་བརླབས་པའི་སྒྲུབ་པ་ཆེན་པོའི་རྒྱུད་ཅི་ལྟར་ཡིན། །རང་ལྷ་རྣལ་འབྱོར་ཇི་བཞིན་དུ། །ལྷ་ཀུན་བདག་ཉིད་སྐུ་རྣམས་ཀྱིས། །རང་ལྷའི་རྣལ་འབྱོར་བདག་ཉིད་ཀྱིས། །རང་ལྷ་ཉིད་བསྒྲུབ་པར་བྱ། །དེ་ནས་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་ཀུན་མཆོག་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་མི་འགྱུར་བ་དམ་པ་བླ་ན་མེད་པའི་དགའ་བ་དང ། རབ་ཏུ་དགའ་བ་དང ། བདེ་བ་དང ། ཡིད་བདེ་བ་ཐམས་ཅད་ཀྱི་དངོས་གྲུབ་དམ་པའི་ཆོ་ག་རྒྱས་པ་རྗེས་སུ་གྲུབ་པ་ནི་འདི་ཡིན་ཏེ། །རང་ལྷའི་རྣལ་འབྱོར་ཇི་བཞིན་དུ། །རྡོ་རྗེ་ཀུན་མཆོག་སྐུ་རྣམས་ཀྱིས། །གླུ་དང་རོལ་མོའི་ཆོ་ག་ནི། །རྡོ་རྗེ་ཉིད་ཀྱིས་རྗེས་ཆགས་འགྱུར། །རང་ལྷའི་སྦྱོར་བ་ཇི་བཞིན་དུ། །དབྱངས་ཀྱི་རྩ་བ་རྣམ་སད་པས། །གླུ་དང་རོལ་མོའི་ཆོ་ག་ནི། །དྲིལ་བུ་ཉིད་ཀྱིས་རྗེས་སུ་བརྗོད། །རང་ལྷའི་སྦྱོར་བ་ཇི་བཞིན་དུ། །སྣ་ཚོགས་ཕྱག་རྒྱའི་བདག་པོ་མཆོག་།གླུ་དང་རོལ་མོའི་ཆོ་ག་ནི། །དམ་ཚིག་གིས་ནི་
225a
༄#། །རྗེས་བསྒྲུབ་བྱ། །འདི་ཡིས་རྟོག་པ་ཐམས་ཅད་ལ། །རྡོ་རྗེ་འབེབས་པས་རབ་སད་པས། །རང་གི་ལྷ་ཡི་དམ་ཚིག་ནི། །ཐམས་ཅད་བཞི་འགྱུར་འགྲུབ་པར་འགྱུར། །མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་གླུ་ཆེན་པོ་དང ། རོལ་མོའི་ཆོ་ག་མཆོག་ཏུ་གསང་བ་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་དེ་རྗེས་གནས་ཅི་བཞིན། །ཇི་སྙེད་པ་ནི་ཅི་བདེ་བས། །མེ་ཏོག་སྤོས་ཀྱིས་མཆོད་ནས་ནི། །ཁང་པ་འམ་སྐྱེད་མོས་ཚལ་སོགས་སུ། ། བདག་ཉིད་ཅི་འདོད་རབ་བསྒྲུབས་ནས། །ཅི་སྙེད་རྒྱན་དང་གོས་དང་ལྡན། །སྣ་ཚོགས་གོས་ཀྱིས་ཡང་དག་ཀླུབས། །མེ་ཏོག་ཕྲེང་བཅས་ཁ་དྲི་ཞིམ། །ལུགས་མ་འམ་ནི་བརྡུངས་པའམ། །འདུས་པ་འམ་ནི་རི་མོར་བྲིས། །དང་པོའི་འཁོར་ལོ་དེ་མདུན་དུ། །ཆོ་ག་བཞིན་དུ་བཞུགས་གསོལ་ནས། །རང་ལྷའི་རྣལ་འབྱོར་ཇི་བཞིན་དུ། །རྡོ་རྗེ་དྲིལ་བུ་རབ་སད་པས། །ཐམས་ཅད་དགུག་དང་མཆོད་པ་ཆེ། །བདག་བྱིན་རླབ་སོགས་འགྲུབ་པར་བྱ། །སྔོན་དུ་ལན་གཅིག་བསྒྲུབ་བྱས་ནས། །དེ་ནས་དེ་རྗེས་ཅི་འདོད་པ། །ཅི་འདོད་ཅི་སྤྱོད་ཅི་སྨྲ་བ། །ཐམས་ཅད་བཟའ་ཞིང་ཐམས་ཅད་བྱེད། །ལངས་པ་འམ་ནི་འདུག་པ་འམ། །རབ་ཏུ་དགོད་དམ་སྨྲ་བ་འམ། །ཇི་བཞིན་དེ་བཞིན་
225b
དེ་དང་དེར། །ཇི་འདོད་པར་ནི་དེ་བཞིན་གཞག་།གསང་བ་མཆོག་གི་འཁོར་ལོ་ནི། །མེ་ཏོག་སོགས་ཀྱིས་མཆོད་ནས་ནི། །ཇི་བཞིན་དུ་ནི་རྗེས་བསྒྲུབ་བྱ། །འདིས་ནི་འདོད་པ་ཀུན་དབང་ཕྱུག ། འགྲོ་དང་འོང་དང་འདོད་ན་འཕུར། །དངོས་གྲུབ་ཀུན་གྱི་དབང་ཕྱུག་འགྲུབ། །རྒ་ཤི་མེད་པའི་གཙོ་བོར་འགྱུར། །རྡོ་རྗེ་སེམས་དཔའ་གྲུབ་ཆེན་པོ། །ཕྱག་རྒྱ་ཀུན་གྱི་དབང་ཕྱུག་བདག ། རྡོ་རྗེ་ཀུན་འཛིན་རྒྱལ་བ་ནི། །རྡོ་རྗེ་མཚོན་ཆ་ཐམས་ཅད་འཛིན། །མི་ཐུབ་པ་དང་མི་སོད་ཅིང ། །ཐམས་ཅད་བྱེད་ཅིང་ཀུན་གྱི་རྟེན། །སེམས་ཅན་ཀུན་གྱི་རྒྱལ་པོ་ཆེ། །ཚར་གཅོད་རྗེས་སུ་བཟུང་བར་ནུས། །ཀུན་མཆོག་རྗེས་སུ་ཆགས་པ་ཆེ། །འདོད་པ་གྲུབ་པ་བདེ་བ་མཆོག་།ཀུན་ལས་རྣམ་རྒྱལ་གྲུབ་འགྱུར་ཏེ། །ཀུན་མཆོག་དབང་ཕྱུག་དམ་པ་ཡིན། །དངོས་གྲུབ་ཆེན་པོ་ཀུན་གྱི་མཆོག་།དབང་ཕྱུག་ཆེན་པོའི་གོ་འཕང་ནས། །རྒྱལ་པོ་རྡོ་རྗེ་ཀུན་འཛིན་པ། །སངས་རྒྱས་ཐམས་ཅད་རབ་འགྲུབ་འགྱུར། །དེ་ལྟར་མཆོག་ཏུ་རྗེས་ཆགས་དགའ་བ་པདྨའི་ར་བ་ཆེ། །མཆོག་ཏུ་གསང་བ་གྲུབ་པའི་བླ་ན་མེད་པའི་དངོས་གྲུབ་སྩོལ། །མཆོག་གི་རྒྱལ་མཚན་བསྒྲེང་བས་གང་ཞིག་རྗེས་སུ་བསྟེན་པ་སྟེ། །མཆོག་གི་དངོས་གྲུབ་དབང་ཕྱུག་ཆེན་པོ་ཉིད་དེས་ཉམས་མྱོང་བ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་
226a
༄#། །པོ་ལས། གསང་བ་ཆེན་པོ་དམ་པའི་དཔལ་དམ་ཚིག་གསུམ་དང ། དངོས་གྲུབ་ཐམས་ཅད་དགུག་པ་དང ། མཆོད་པ་ཆེན་པོ་དང ། བདག་ལ་བྱིན་གྱིས་བརླབ་པ་ལ་སོགས་པའི་སྒྲུབ་པའི་ཆོ་ག་རྒྱས་པའོ།། །།གསང་བ་མཆོག་ནི་དགྱེས་པ་དང ། །སངས་རྒྱས་ཀུན་གྱི་རྗེས་བསྟན་པ། །རྡོ་རྗེ་སེམས་དཔའ་རང་གི་གནས། །ཐམས་ཅད་བདག་ཉིད་རྟག་ཏུ་བཞུགས། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག་།འདི་ནི་རང་བྱུང་བཅོམ་ལྡན་འདས། །ལྷག་པའི་ལྷ་ནི་གཅིག་པུ་ཉིད། །ཅེས་བྱ་བ་འགྲུབ་པར་འགྱུར་རོ། །དེ་ལྟར་མཆོག་ཏུ་རྗེས་ཆགས་དགའ་བ་པདྨ་ར་བ་ཆེ། །མཆོག་ཏུ་བསྔགས་པ་བླ་ན་མེད་པའི་དངོས་གྲུབ་སྩོལ། །མཆོག་གི་རྒྱལ་མཚན་བསྒྲེང་བ་གང་ཞིག་རྗེས་སུ་བསྟེན་པ་སྟེ། །མཆོག་གི་དངོས་གྲུབ་བདེ་བ་ཆེན་པོ་ཉིད་དེས་ཉམས་མྱོང་བ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས། དགའ་བ་ཆེན་པོའི་དཔལ་རྡོ་རྗེ་དོན་ཡོད་པའི་དགའ་བའི་དམ་ཚིག་རྣལ་འབྱོར་ཐམས་ཅད་ཀྱི་དབང་ཕྱུག་དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་དཀྱིལ་
226b
འཁོར་མཆོག་ཏུ་གསང་བ་ཡོངས་སུ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོའི་སློབ་མའི་ཆོ་ག་རྒྱས་པ་རྗེས་སུ་གཟུང་བ་བཤད་པར་བྱའོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་དང་པོ་ཁོ་ནར་རེ་ཞིག་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་དམ་པའི་སྔགས་འདི་ལན་གཅིག་བརྗོད་པས་སེམས་བསྐྱེད་དུ་བཅུག་སྟེ། ཨོཾ་སརྦ་ཡོ་ག་ཙིཏྟཾ་ཨུད་པཱ་ད་ཡཱ་མི། འདི་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་དང་མི་འབྲལ་ཞིང་ཕྱིར་མི་ལྡོག་པ་དང ། བདུད་ཐམས་ཅད་ཟིལ་གྱིས་གནོན་པའི་ཕྱག་རྒྱ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཉིད་དུ་ཡང་རྟོགས་པར་བྱའོ་ཞེས་བྱ་བ་ཡང་གསུངས་སོ། །བྱང་ཆུབ་སེམས་ནི་བླ་མེད་པ། །མཆོག་ཏུ་བསྐྱེད་པར་བྱས་ནས་ནི། །སྙིང་གར་རྡོ་རྗེ་རབ་བཞག་ནས། །སུ་ར་ཏ་ས་མ་ཡ་སྟྭཾ་ཧོ། ། སྙིང་པོས་རྡོ་རྗེ་ཅི་བདེར་བསྒྲུབ། །འདི་ཡིས་རྡོ་རྗེ་བསྐུལ་བ་ན། །འདོད་པ་ཀུན་ལས་འགྲུབ་པར་འགྱུར། །དེ་ཉིད་བསྐུལ་བས་མྱུར་དུ་ནི། །བྱང་ཆུབ་སེམས་ནི་བླ་མེད་པ། ། ཀུན་མཆོག་དངོས་གྲུབ་ཆེན་པོའི་ཕྱིར། །རྡོ་རྗེ་སེམས་དཔའ་ཉིད་དུ་འགྱུར། །ཞེས་བྱ་བའི་མཆོག་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །གར་བྱས་སྤྱི་བོར་
227a
༄#། །ཐལ་མོ་སྦྱར། །གོས་ཀྱིས་གདོང་ནི་གཡོགས་པ་རྣམས། །ཅི་འདོད་དངོས་གྲུབ་འདོད་པ་ཡིས། །སློབ་མ་ཐམས་ཅད་གཞུག་པར་བྱ། །ཅི་འདོད་དངོས་གྲུབ་སེམས་དཔའ་ཡིས། །སློབ་མ་མེ་ཏོག་འདོར་དུ་གཞུག། ཕྱག་རྒྱ་གང་ལ་དེ་བབས་པའོ། །དེ་དེའི་ལྷ་མོ་བསྒྲུབ་པར་བྱ། །དེ་ནས་གདོང་གཡོགས་དཀྲོལ་བྱས་ལ།། རྣམ་པ་ཀུན་གྱི་ཡོན་བླངས་ནས། །སངས་རྒྱས་རིན་ཆེན་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །དེ་ལ་རྡོ་རྗེ་ཆེན་པོ་མནའི་ཆུས་དབང་བསྐུར་ཏེ། འདི་ལྟར་བརྗོད་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །རྡོ་རྗེ་དྲིལ་བུའི་ཕྱག་རྒྱ་ནི། །གལ་ཏེ་དཀྱིལ་འཁོར་མ་མཐོང་སྨྲས། །སྐྱེ་བོ་འདུས་པའི་ནང་ན་གནས། །དད་པ་མེད་པས་བཞད་གད་སྨོད། །ཅེས་བྱ་བ་མནའ་བསྒག་གོ། །དེ་ལ་སངས་རྒྱས་ཀྱི་རིན་པོ་ཆེའི་དབང་བསྐུར་བའི་ཆོ་ག་ནི་འདི་ཡིན་ཏེ། རྡོ་རྗེ་ཆུ་ཡིས་དབང་བསྐུར་ནས་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་དབང་བསྐུར་བའི་གནས་སུ་བཞག་སྟེ། །ོཾ་སརྦ་ཏ་ཐཱ་ག་ཏ་མཧཱ་ས་མ་ཡ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་མ་ཧཱ་བཛྲ་དྷ་ར་ཞེས་བྱ་བའི་སྔགས་འདིས་རྡོ་རྗེ་ལག་ཏུ་སྦྱིན་པར་བྱའོ། །འདི་ནི་སངས་རྒྱས་
227b
ཐམས་ཅད་ཉིད། །རྡོ་རྗེ་འཆང་གི་རྡོ་རྗེ་སྟེ། །རྡོ་རྗེ་འཆང་གི་བརྟུལ་ཞུགས་ཆེ། །ཁྱོད་ཀྱིས་ཀྱང་ནི་རྟག་ཏུ་བཅང ། །དེ་བཞིན་གཤེགས་པ་ཐམས་ཅད་ཀྱི། །བྱང་ཆུབ་མཆོག་གི་སེམས་ཆེན་པོ། །ཡོངས་སུ་མི་སྤང་རྟག་ཏུ་བསྒྲུབས། །ཤིན་ཏུ་གསང་བདེ་འདི་ཡིན་ཏེ། །ོཾ་བཛྲ་ཀརྨ་བཱ་དྷི་དྷི་ཤྲཱི་བཛྲ་ནཱ་མ་སིད་དྷི་ས་མ་ཡ་སྟཾ་བྷཱུར་བྷུ་བ་སཝཿ ། གང་ལ་རྡོ་རྗེའི་མིང་བཏགས་པ་དེ་ལ་ཀྱེའི་སྒྲ་དང་པོར་སྦྱར་བར་བྱའོ། །དེའི་མིང་དེ་ཡང་ཇི་སྲིད་བྱང་ཆུབ་སྙིང་པོའི་མཐར་ཐུག་པའི་བར་གྱི་དེ་བཞིན་གཤེགས་པའི་ཡང་མིང་དུ་འགྱུར་རོ། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་སྦྱིན་པ་ནི་འདི་ཡིན་ཏེ། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག་།ཅེས་བྱ་བ་བཅོམ་ལྡན་འདས་དཔལ་མཆོག་དང་པོའི་སྐྱེས་བུ་མཆོག་གི་དེ་ཁོ་ན་ཉིད་ཀྱི་གསང་བ་ལྔའི་དེ་ཁོ་ན་ཉིད་བཤད་པར་བྱས་ནས་རྡོ་རྗེ་སྦྱིན་པར་བྱའོ། །འདི་བཅོམ་ལྡན་འདས་སྲིད་པའི་བདག་པོ་དམ་པ་ཀུན་གྱི་མཆོག་དབང་ཕྱུག་གི་དམ་པ་དེ་བཞིན་གཤེགས་པ་དེ་ཉིད་ཆོས་ཀྱི་མཆོག་གི་བཀའ་ཡང་དག་པར་སྩོལ་བར་མཛད་པ་ནི། །སྲིད་པ་རང་བཞིན་ཉིད་ཀྱིས་དག་།རང་བཞིན་གྱིས་ནི་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག་།སྲིད་
228a
༄#། །པ་མཆོག་ནི་མཛད་པ་ཡིན། །མཆོག་ཏུ་གསང་བའི་ཆོས་ཉིད་འབེབས་པ་ནི་དྲིལ་བུའོ། །དེ་བཞིན་གཤེགས་པ་ཐམས་ཅད་ལ་མཆོད་པར་བྱ་བ་འམ་ལྷ་སྒྲུབ་པའི་ཚེ་དཀྲོལ་བར་བྱའོ། །དེ་ནས་ཆོས་ཐམས་ཅད་ཀྱི་དེ་ཁོ་ན་ཉིད་རབ་ཏུ་སད་པའི་ཕབ་པ་རྣམས་ཀྱིས་སྒྲིབ་པ་ཐམས་ཅད་རྣམ་པར་དག་པར་བྱེད་པ་ཡིན་ནོ། །རྡོ་རྗེ་ཐམས་ཅད་འབེབས་པར་བྱེད་པ་དང ། རབ་ཏུ་སྒྲུབ་པར་བྱེད་པ་དང ། དབང་དུ་བྱེད་པ་དང ། རབ་ཏུ་དང་བར་བྱེད་པ་ཞེས་བྱ་བར་བསྒྲུབ་པར་འགྱུར་རོ། །དེ་ནས་སྲིད་པ་དག་པའི་ཐབས་ཀྱི་མཆོག་རྟོག་པ་ཐམས་ཅད་ཀྱི་གསང་བ་ཆེན་པོ་དམ་ཚིག་ལ་རྟག་ཏུ་བསྟེན་པར་བྱའོ་ཞེས་བྱ་བའོ། །དེ་ལ་འདི་ནི་དེང་ཁྱོད་ཀྱི། ། སྲིད་བདེ་ཤིན་ཏུ་མྱུར་བ་ནི། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་བསྐྱེད། །འདོད་པའི་ལོངས་སྤྱོད་ཐམས་ཅད་ལ། །ཅི་འདོད་པར་ནི་བརྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་མཆོག་ཏུ་གསང་བའི་ཐེག་པ་ཆེན་པོའི་ཡང་ཆེན་པོ་དམ་ཚིག་གི་སྦྱོར་བ་ནི་བཅོམ་ལྡན་འདས་ཀྱི་དམ་ཚིག་གོ་།འདི་ལྟར། དེ་བཞིན་གཤེགས་
228b
པ་ཀུན་གྱིས་ཀྱང ། །འདའ་པ་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་ནི་བསྒྲགས། །ཡིད་ཀྱི་སྐུ་ནི་བརྟན་ཕྱིར་རོ། །ཞེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་འདི་བརྗོད་པར་བྱ་སྟེ། །ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །ཇི་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །གསང་བ་དམ་པ་དམ་ཚིག་ཐབས། །བསོད་ནམས་བྱིན་གྱིས་བརླབས་བསྒྲུབས་པ། །རྟག་ཏུ་དངོས་གྲུབ་ཀུན་དབང་ཕྱུག་།སེམས་ཅན་དོན་ནི་བྱེད་པ་ཡིན། །དམ་ཚིག་འདིས་ནི་མཆོག་སྒྲུབ་ཅིང ། །ཅི་བདེ་བར་ནི་བསྒྲུབ་བྱེད་པ། །ཉེས་པ་སྤྱད་ཀྱང་སྡིག་ཀུན་གྱིས། །རྣམ་པ་ཀུན་ཏུ་གནོད་མི་འགྱུར། །འདོད་པ་ཆེན་པོ་གྲུབ་པར་འགྱུར། །ཀུན་བདག་དམ་ཚིག་དབང་ཕྱུག་དང ། །ཐམས་ཅད་རྡོ་རྗེ་འཛིན་རྒྱལ་པོ། །ཀུན་མཆོག་དབང་ཕྱུག་དམ་པའོ། །ལས་ཀྱི་ཚོགས་ཀྱི་དངོས་གྲུབ་ཀྱིས། །མ་ལུས་བསྒྲུབས་པས་འགྲུབ་པར་འགྱུར། །བདག་གཞན་ཐམས་ཅད་རྒྱས་བཏབ་པས། །ཡང་ན་བསྒྲུབ་བྱ་ཀུན་ལ་ཡང ། །དོན་ཡོད་མཆོག་ཏུ་གྲུབ་པ་དང ། །རྣལ་འབྱོར་ཐམས་ཅད་རྗེས་སྒྲུབ་བྱེད། །དཔལ་ལྡན་སྡུག་བསྔལ་ཀུན་འཕྲོག་བྱེད། །དམ་ཚིག་འདའ་བར་དཀའ་བའོ། །ཞེས་བྱ་བ་མཆོག་ཏུ་གསང་
229a
༄#། །བ་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །རྡོ་རྗེ་ལ་སོགས་ཐོབ་འཛིན་པས། །དངོས་པོ་ཀུན་གྱི་བདེ་བ་ཀུན། །ཕབ་པས་རྡོ་རྗེ་སློབ་མ་ཡིས། །དཀྱིལ་འཁོར་དུ་ནི་ཉམས་སུ་མྱོང ། །དེ་ནས་ཐམས་ཅད་གཟེངས་བ་སྟོད་པས། །སངས་རྒྱས་ཀུན་གྱི་བདག་ཉིད་དངོས། །རྡོ་རྗེའི་མིང་གིས་དབང་བསྐུར་བས། །དེ་བཞིན་གཤེགས་ནི་ལུང་བསྟན་བྱ། །དེ་ལ་དེ་བཞིན་གཤེགས་པ་ཐམས་ཅད་ཀྱི་ལུང་བསྟན་པའི་རྡོ་རྗེ་སེམས་དཔའི་ཆོ་ག་འདི་ཡིན་ཏེ། སངས་རྒྱས་ཀུན་གྱི་ཕྱག་རྒྱ་ཆེ། །གཟེངས་བསྟོད་པ་ཡི་གང་ལུང་བསྟན། །དེ་ནི་སངས་རྒྱས་ཐམས་ཅད་ཉིད། །རྡོ་རྗེ་མིང་གིས་དབང་བསྐུར་བའོ། །ོཾ་འདི་ནི་ངས་ཁྱོད་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་གྲུབ་པའི་ཕྱིར། །སྲིད་པའི་ངན་འགྲོ་ལས་ཁྱོད་བཏོན། །ཧེ་བཛྲ་ན་མཿ ་ཏ་ཐཱ་ག་ཏ་སི་དྡྷི་ས་མ་ཡ་སྟྭཾ། བྷུར་བྷུ་བ་སཝཿ ། གང་ལ་གཟེངས་བསྟོད་པ་འདི་དང ། ཕྱག་རྒྱ་ཆེན་པོ་པོར་ལུང་བསྟན་པ་མཆོག་ཏུ་གསང་བའི་ཆོ་གས་བྱས་པ་དེ་ལ་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་ཐམས་ཅད་དང ། རྡོ་རྗེ་འཆང་དང་བཅས་པའི་བྱང་ཆུབ་སེམས་དཔའི་དཀྱིལ་འཁོར་དང་བཅས་པ་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་གི་སློབ་དཔོན་རྣམས་དང ། མགྲིན་གཅིག་ཏུ་བླ་ན་མེད་པ་ཡང་དག་པར་རྫོགས་
229b
པའི་བྱང་ཆུབ་ཏུ་ལུང་བསྟན་པར་མཛད་དོ། །འདི་ལྟ་སྟེ། གཟེངས་བསྟོད་པ་འདི་ཉིད་ཀྱི་ཕྱག་རྒྱ་ཆེན་པོ་དང ། མཆོག་ཏུ་གསང་བ་དམ་པའི་དངོས་གྲུབ་ཀྱིས་བྱིན་གྱིས་བརླབས་པ་འདི་དང།་སྔགས་ཀྱི་སྟོབས་ལ་དད་པར་བྱའོ། །དེ་ནས་ཅི་ལྟ་བ་བཞིན་དུ་ཞུགས་པ་རྣམས་ལ་དེ་བཞིན་གཤེགས་པ་ཐམས་ཅད་འདུས་པ་ལ་སོགས་པའི་དབུགས་དབྱུང་བ་སྤྱིན་པར་བྱའོ། ། དེ་བཞིན་གཤེགས་པ་ཐམས་ཅད་རྡོ་རྗེ་འཆང་དང་བཅས་པ་ཅི་སྙེད་པ་བྱང་ཆུབ་སེམས་དཔའི་དཀྱིལ་འཁོར་དང་བཅས་པ་གང་ཡིན་པ་དེ་དག་ཐམས་ཅད་རང་གི་དམ་ཚིག་ལ་རྗེས་སུ་ཆགས་པ་འདིར་དགུག་པ་དང ། རབ་ཏུ་གཞུག་པ་དང ། དབང་དུ་བྱ་བ་དང ། བསྒྲུབ་པ་དང ། རྗེས་སུ་བསྒྲུབ་པ་རྣམས་ཀྱི་རྡོ་རྗེའི་དབྱིངས་ཐམས་ཅད་བརྟན་པར་འགྱུར་བ་ཉིང་ཀྱིས།་འདི་བརྟན་པར་འགྱུར་བ་ཆོས་ཀྱི་དབྱིངས་ཐམས་ཅད་ཀུན་ཏུ་ཁྱབ་པ་ཉིད་ཀྱིས་ཀུན་ཏུ་ཞུགས་པ། ནམ་མཁའི་ཁམས་ཐམས་ཅད་ཀྱི་རྒྱ་ཆེ་བ་ཉིད་ཀྱིས་འདིར་རབ་ཏུ་བཞུགས་ཤིང།་ལེགས་པར་རབ་ཏུ་བཞུགས་པ་གང་ཡིན་པ་དེ་དང་དེ་དག་།དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་ལ་རག་ལས་པའི་དེ་བཞིན་གཤེགས་པ་ཉིད་ལ་ལྷག་པར་དམིགས་ནས། དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་གི་སློབ་དཔོན་དེ་བཞིན་གཤེགས་པ་ཐམས་ཅད་འདི་ཡིན་ནོ་ཞེས་བྱ་བས་བྱིན་གྱིས་བརླབས་
230a
༄#། །ནས། དེ་བཞིན་གཤེགས་པ་ཐམས་ཅད་ཀྱིས་རང་གི་དམ་ཚིག་གི་སློབ་དཔོན་གྱིས་དམ་ཚིག་གི་མགྲིན་གཅིག་ཏུ་ཁྱེད་རྣམས་ལ་དབུགས་དབྱུང་བ་མཛད་པ་ཡིན་ཏེ་དད་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དབུགས་དབྱུང་བ་འདི་ཡིན་ཏེ། གསང་བའི་དཀྱིལ་འཁོར་དམ་པ་ནི། །མཐོང་བ་དང་ནི་ཞུགས་པས་ཀྱང ། །སྡིག་པ་ཀུན་ལས་ངེས་གྲོལ་ཞིང ། །ཁྱེད་རྣམས་དེར་ཉིད་ལེགས་པར་གནས། །བདེ་ཆེན་ཐེག་པ་འདི་ལས་ནི། །སླར་འཆི་བ་ནི་ཡོད་མིན་ཏེ། །མི་ཚུགས་པ་དང་མི་སོད་པས། །ཅིས་ཀྱང་མི་འཇིགས་རོལ་བར་གྱིས། །སྲིད་པའི་སྡུག་བསྔལ་ལྡོག་པ་ནི། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པ་མཆོག་ཏུ་གྱུར་པ་ཁྱོད། །སྲིད་པ་ཤིན་ཏུ་གྲུབ་པ་ཡིན། །དམ་ཚིག་སྡོམ་པ་གྲུབ་པ་འདི། །ཁྱོད་ཀྱིས་རྟག་ཏུ་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་རྟག་པའི་བཀའ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་གཏང་མི་བྱ། །ཕྱག་རྒྱ་རྡོ་རྗེ་གང་ཡིན་པ། །དམ་པའི་ཆོས་ནི་མི་སྨོད་ཅིང ། །ནམ་ཡང་བཏང་བར་མི་བྱའོ། ། མི་ཤེས་པ་འམ་རྨོངས་པ་ཡིས། །དེས་ནི་སྨད་པར་མི་བྱའོ། །རང་གི་བདག་ཉིད་ཡོངས་སྤངས་ནས། །དཀའ་ཐུབ་རྣམས་ཀྱིས་གདུང་མི་བྱ། །ཅི་བདེ་བར་ནི་བདེ་བར་གཟུང ། །འདི་ནི་མ་
230b
བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་ཡོངས་སུ་བྲང་མི་བྱ། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བླ་མ་ཡི།། སློབ་དཔོན་ལ་ནི་གང་སྨོད་པ། །དེས་ནི་སངས་རྒྱས་ཀུན་སྨད་པས། །རྟག་ཏུ་སྡུག་བསྔལ་ཐོབ་འགྱུར་ཏེ། །རིམས་དང་དུག་དང་སྦྱར་དུག་དང ། །མཁའ་འགྲོ་རྣམས་ཀྱིས་གཙེས་པ་དང ། ། གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་བར་ལྟུང ། །དེ་བས་འབད་པ་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་སྤྱོམས་པ། ། ནམ་ཡང་སྨད་པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རང་གི་དམ་ཚིག་སློབ་དཔོན་ནི། །སྦྱིན་མིན་བུ་དང་ཆུང་མ་དང ། །རང་སྲོག་གིས་རྟག་བསྟེན་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །གང་གིས་བསྐལ་བ་བྱེ་བར་ནི། །གྲངས་མེད་པར་ནི་རྙེད་དཀའ་བའི། །སངས་རྒྱས་ཉིད་ཀྱང་བརྩོན་ལྡན་ལ། །ཚེ་འདི་ཉིད་ལ་སྟེར་བར་བྱེད། །རྟག་ཏུ་རང་གི་དམ་ཚིག་བསྲུང ། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་སྦྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་
231a
༄#། །ཏུ་འགྱུར། །དེ་ཕྱིར་འདི་ནི་ལེགས་གནས་པས། །དེང་ཁྱོད་སྐྱེ་བ་འབྲས་བུར་བཅས། །རང་བྱུང་དམ་ཚིག་ལྷ་དང་མཉམ། །དེང་ཁྱོད་འགྱུར་བར་ཐེ་ཚོམ་མེད། །སངས་རྒྱས་རྡོ་རྗེ་འཛིན་བཅས་པས། །ཀུན་གྱི་དེང་ཁྱོད་དབང་བསྐུར་བས། །ཁམས་གསུམ་གྱི་ནི་རྒྱལ་པོ་ཆེ། །རྒྱལ་པོའི་བདག་པོར་བསྟན་པ་ཡིན། །དེ་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱིས་ནི་སངས་རྒྱས་ཉིད། །དེང་འདིར་ཐོབ་པ་ཐེ་ཚོམ་མེད། །ཅེས་བྱ་བ་དེ་བཞིན་གཤེགས་པ་ཐམས་ཅད་དང ། རྡོ་རྗེ་འཆང་དང ། །བྱང་ཆུབ་སེམས་དཔའ་ཆེན་པོའི་འཁོར་གྱི་དཀྱིལ་འཁོར་དང་བཅས་པའི་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་བདེན་པས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་སློབ་དཔོན་དང ། །སློབ་མའི་ཚོགས་རྣམས་ཀྱིས་དབུགས་དབྱུང་བ་ནི་འདི་ཡིན་ཏེ། །ཕྱིར་མི་ལྡོག་པའི་ཕྱག་རྒྱ་ཡིས། །བྱང་ཆུབ་སེམས་དང་ལྷན་ཅིག་བསྐྱེད། །སངས་རྒྱས་ཉིད་ཀྱང་རྟོགས་བྱ་སྟེ། །ཞེས་བྱ་བའོ། །དེའི་རྒྱུ་གང་ཡིན་ཞེ་ན། གང་གི་ཕྱིར་ཁྱེད་རྣམས་ཀྱི་བདག་ཉིད་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་ཆེན་པོ་བསྐྱེད་པ་ཙམ་གྱི་མཐུ་ཉིད་ཀྱིས་ཕྱིར་མི་ལྡོག་པར་འགྱུར་བ་ཡིན་ནོ། །ཕྱིར་མི་ལྡོག་པ་ཉིད་ཀྱི་ཕྱིར་ངེས་པའི་ཕུང་པོ་
231b
ལ་རྣམ་པར་གནས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ཉིད། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་རྗེས་སུ་རྟོགས་པར་བྱའོ། །ཞེས་བྱའོ། །དེ་ནས་ཐམས་ཅད་ཀྱི་དཔལ་དམ་ཚིག་གི་སློབ་དཔོན་གྱི་མཆོག་ཏུ་གསང་བའི་དབུགས་དབྱུང་བ་འདི་ཡིན་ཏེ། །རྡོ་རྗེ་སེམས་དཔའི་བདག་སྦྱོར་བ། རྣལ་འབྱོར་ཀུན་དང་རྗེས་སྦྱོར་ལྡན། །སངས་རྒྱས་ཉིད་དུ་རྟོགས་བྱ་སྟེ། །མཁས་པས་མཆོག་ཏུ་བརྟག་པའོ། །ཞེས་བྱའོ། །དེའི་རྒྱུ་གང་ཡིན་ཞེ་ན། གང་གི་ཕྱིར་ཁྱེད་རྣམས་ཀྱི་བདག་ཉིད་ཐམས་ཅད་འདི་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་ཡོངས་སུ་གཟུང་བ་གདོན་མི་ཟ་བ་ཉིད་ཀྱི་ཕྱིར། དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པ་ཉིད་དུ་རྟོགས་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་རྗེས་སུ་སྒྲུབ་པས་མཆོག་གི་དངོས་གྲུབ་རྣམས་དེ་བཞིན་གཤེགས་པ་ཐམས་ཅད་ཉིད་དུ་དེ་དག་རྟོགས་པར་བྱའོ། །དེའི་ཕྱིར་གནས་སྐབས་ཐམས་ཅད་དུ་ཡང་ཅི་ནུས་པས་སྡུག་བསྔལ་དང ། ཡིད་མི་བདེ་བ་ཐམས་ཅད་ཀྱི་སྐབས་མི་འབྱེད་པ་ཁྱེད་རྣམས་ཀྱིས་རང་གི་བདག་ཉིད་ཐམས་ཅད་ཁོ་ན་རྗེས་སུ་བསྲུང་ཞིང་གསད་པར་མི་བྱའོ། །ཅི་སྙེད་པའི་ལོངས་སྤྱོད་དང ། ཉེ་བར་སྤྱོད་པ་ཐམས་ཅད་ཀྱིས་དེ་བཞིན་གཤེགས་པ་ཐམས་
232a
༄#། །ཅད་ཀྱི་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོའི་དམ་ཚིག་གི་སྦྱོར་བས་ཡང་དག་པར་མཆོད་ལ། བདེ་བར་གཟུང་བ་དང ། ཡང་དག་པར་འཕེལ་བར་བྱའོ། །བདག་ཉིད་ལ་ཅི་ལྟ་བ་བཞིན་དུ་མངོན་པར་བརྩོན་པ་དེ་བཞིན་དུ་གཞན་རྣམས་ལ་ན་ཚོད་བསྐྱེད་པ་ཡིན་ནོ། །ལྟ་བ་ལོག་པ་དང ། ཕྱི་རོལ་མུ་སྟེགས་པ་དང ། ཉན་ཐོས་པ་ཐམས་ཅད་དང ། རང་སངས་རྒྱས་ཀྱི་སར་ལྟུང་བས་ལུས་འདི་ཤིན་ཏུ་གསང་བ་ཡིན་ནོ། །ངག་ནི་ཤིན་ཏུ་མི་སྨྲ་བས་སོ། །སེམས་ནི་ཤིན་ཏུ་འགོག་པས་སོ། །གང་གིས་ཀྱང་ཁྱོད་ཀྱི་ལུས་ངག་ཡིད་གསུམ་གྱི་རྡོ་རྗེ་རྣམས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་དཔལ་ལ་རང་གི་དམ་ཚིག་གི་བླ་ན་མེད་པའི་དངོས་གྲུབ་མཆོག་ཏུ་རྟོགས་པར་འགྱུར་བ་ཞེས་བྱ་བ་ཡང་གསུངས་སོ། །འདོད་པའི་ལོངས་སྤྱོད་ཐམས་ཅད་ཀྱིས། །ཅིས་ཀྱང་མི་འཇིགས་རོལ་བར་གྱིས། །དམ་ཚིག་འདི་ནི་འདའ་དཀའ་སྟེ། སྡིག་པ་མེད་ཀྱིས་མ་འཇིགས་ཤིག་།ཅེས་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་བདེན་པས་གསུངས་སྟེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་དགོངས་པ་ཡིན་ནོ། །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་པ་བདེ་སྟེར་བསྟེན་པར་གྱིས། །དེ་ནི་འགྲོ་ལ་མྱུར་བདེ་རྡོ་རྗེ་སེམས་དཔའ་དང ། །རབ་ཏུ་མཉམ་ཞིང་རྟག་པ་ཉིད་
232b
དུ་རྟོགས་པར་གྱིས། །དེ་ནས་རོ་དང་བཟའ་དང་སྤྱོད་པ་གར་དང་གླུ། །རོལ་མོའི་མཆོད་སོགས་ཀྱིས་ནི་མགོན་མཆོད་པ། །རྡོ་རྗེ་བླ་མ་ཆེན་པོས་དེ་ཕུལ་ནས། །རང་དང་གཞན་དག་ཅི་འདོད་མཆོད་པར་བྱ། །མྱོས་བྱེད་མྱོས་བྲལ་བཏུང་བ་ནི། །ཅི་འདོད་པར་ནི་བསྟེན་པ་ཡིས། །གླུ་དང་རོལ་མོའི་ཆོ་ག་སོགས། །ཇི་བཞིན་རྗེས་འགྲོའི་བཟླས་པ་བྱ། །རང་གསང་ཆོ་གས་བླངས་པ་ཡི། །གླུ་དང་རོལ་མོ་གར་རྣམས་ཀྱི། །སྣ་ཚོགས་ཕྱག་རྒྱའི་མཆོད་པ་དང ། །རྡོ་རྗེ་སེམས་དཔའི་རོལ་མོ་སོགས། །བུད་མེད་སོགས་དང་ལྡན་པའམ། །རང་གི་སློབ་མ་དང་བཅས་པ། །ཅི་འདོད་པ་ཡི་ལོངས་སྤྱོད་ཀྱིས། །མཆོད་པ་བྱས་པས་མྱུ་བ་འགྲུབ། །ཅེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་གསང་བའི་ཆོ་གའི་གླུའི་ཁྱད་པར་ནི་འདི་ཡིན་ཏེ། ཧཱུཾ། བཅོམ་ལྡན་འདས་མཆོག་དང་པོའི་རྡོ་རྗེ་སེམས་དཔའི་འོ། །། དེ་བཞིན་གཤེགས་པ་རྣམས་ཀྱིའོ། །ཧི། དཔལ་འཇིག་རྟེན་གསུམ་ལས་རྣམ་པར་རྒྱལ་བའི་འོ། ཨོཾ་པདྨའི་སྙིང་པོའི་འོ། །ཧ། ནམ་མཁའི་སྙིང་པོ་སྟེ། །བྱང་ཆུབ་སེམས་དཔའ་ཆེན་པོའི་རྒྱལ་པོ་ནམ་མཁའི་སྙིང་པོ་ཡིན་ནོ། །ཞེས་བྱ་བ་གསུངས་སོ། །རང་གསང་སྙིང་པོའི་གླུ་དག་ནི། །ཡི་གེ་ལྔ་པོས་བྱ་བ་སྟེ། །རང་གསང་ཆོ་གས་བླངས་པ་འདི། །མཆོག་ཏུ་གཤེགས་པ་ཀུན་གྱི་ཡིན། །དེ་ནས་མཆོག་ཏུ་གསང་བ་རྡོ་རྗེ་གླུ་ཡི་མཆོད་པ་ནི། །རྡོ་རྗེ་དྲིལ་བུ་མཉམ་སོགས་བཅས། །
233a
༄#། །རྣམ་པར་དབེན་པར་རོལ་མོ་དཀྲོལ། །རང་གསང་ཆོ་གས་གླུ་བླངས་པ། །གསང་བའི་རོལ་མོས་རབ་ཏུ་བསྒྲུབ། །དེ་ནས་མཆོག་ཏུ་ཤིན་ཏུ་གསང་བའི་རྡོ་རྗེ་གར་གྱི་མཆོད་པ་ནི། །འཛིན་པ་དང་བཅས་གཟུང་བ་ཆེའི། །གར་ནི་རབ་ཏུ་བྱས་ནས་ཀྱང ། །དཀྱིལ་འཁོར་འདྲ་བའི་གར་བྱས་ནས། །ཡོངས་སུ་བསྐོར་བས་རབ་མཆོད་བྱ། །དེ་ནས་མཆོག་ཏུ་གསང་བའི་ཕྱག་རྒྱ་སྣ་ཚོགས་པའི་མཆོད་པ་ནི། །རྡོ་རྗེ་སེམས་དཔའ་ལ་སོགས་ལྷའི། །རྟོག་པ་ཐམས་ཅད་རྣམ་འཕྲུལ་བ། །གཏམ་རྒྱུད་ཕྱག་མཚན་ཕྱག་རྒྱ་ཡིས། །གང་ཞིག་གར་དེ་རོལ་མོ་ཡིན། །གསེར་རམ་ཡང་ན་དངུལ་དང་ནི། །དེ་བཞིན་ཤིང་ལས་བྱས་པ་ཡི། །རང་གི་ལྷ་ཡི་གདོང་རྣམས་ཀྱིས། །གྲུབ་པའི་ཕྱག་རྒྱས་གར་རྣམས་བྱ། །དཀྱིལ་འཁོར་གང་དང་གང་བརྟེན་པ། །ཕྱག་རྒྱ་སྣ་ཚོགས་མཆོད་པ་ཡིས། །སློབ་མའི་ཚོགས་ནི་དེ་དང་དེ། །བཟླ་ཞིང་ཐམས་ཅད་མཆོག་ཏུ་གཞུག་།སྣ་ཚོགས་ཆོ་ག་འདི་ཡིས་ནི། །སྡིག་པ་ཀུན་ལས་རྣམ་གྲོལ་འགྱུར། །བསོད་ནམས་ཀུན་ཀྱང་འཕེལ་འགྱུར་ཏེ། །རྟག་ཏུ་སྲུང་བར་འགྱུར་བ་ཡིན། །རིམས་དང་གདོན་དང་དུག་དང་ནད། །སྦྱར་དུག་མཁའ་འགྲོའི་འཚེ་བ་དང ། །བདུད་དང་གསོད་པར་བྱེད་པ་རྣམས། །འདིས་ནི་རབ་ཏུ་ཞི་བར་འགྱུར། །དངོས་གྲུབ་དག་ནི་ཕུན་སུམ་ཚོགས། །དགའ་བ་དེ་བཞིན་བདག་པོ་
233b
རྣམས། །སངས་རྒྱས་ཀུན་གྱི་བདག་ཉིད་ཀྱི། །རྣལ་འབྱོར་དམ་པ་ཐོབ་པར་འགྱུར། །ཞེས་བྱ་བ་ཤིན་ཏུ་གསང་བའི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་ཕྱག་རྒྱ་སྣ་ཚོགས་པའི་མཆོད་པའི་ཆོ་ག་རྒྱས་པ་ལྷག་པའི་ལྷ་ཐམས་ཅད་རེ་རེའི་མཆོག་གསང་བ་འཇུག་པའི་རྡོ་རྗེ་གླུའི་མཆོད་པའི་ཆོ་ག་རྒྱས་པ་མངོན་པར་བརྗོད་ནས་རྡོ་རྗེ་སློབ་དཔོན་གྱིས་བྱས་པའམ་དེ་ལས་གཞན་ཅི་འདོད་པའི་གླུ་དང ། རོལ་མོ་རྣམས་ཀྱིས་རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་ཆེན་པོའི་མཆོག་ཏུ་གྲུབ་པ་ཞེས་བྱ་བ་སྟེ། དེ་རེ་ཞིག་ཐོག་མ་ཁོ་ནར་བཅོམ་ལྡན་འདས་དཔལ་མཆོག་དང་པོའི་རྡོ་རྗེ་སེམས་དཔའ་མཆོག་ཏུ་གསང་བའི་དམ་ཚིག་གི་འཇུག་པའི་གླུའི་མཆོད་པ་ནི། ཐམས་ཅད་རྗེས་སུ་ཆགས་པ་བདེ་བ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་དགའ་དམ་ཚིག་སྟེ། །བདེ་བ་ཆེན་པོ་བརྟན་ཞིང་མཐོ་བ་གསལ་གྱུར་ཅིག་།སོ་སོར་རྟོགས་ནས་མངོན་དུ་ཕྱོགས་ཤིང་མྱུར་སྒྲུབས་ཤིག་།དེ་ནས་དེ་བཞིན་གཤེགས་པ་ཐམས་ཅད་ཀྱིས་རིགས་ཀྱི་མཆོག་ཏུ་གསང་བའི་དམ་ཚིག་གི་འཇུག་པའི་རྡོ་རྗེ་གླུའི་མཆོད་པ་ནི། རྡོ་རྗེ་སེམས་དཔའ་བསྡུས་པས་ན། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་ནི་བྱེད་པར་འགྱུར། །དེ་ནས་རྡོ་རྗེ་རིགས་ཐམས་ཅད་ཀྱི་མཆོག་ཏུ་
234a
༄#། །གསང་བའི་དམ་ཚིག་གི་འཇུག་པའི་རྡོ་རྗེ་གླུའི་མཆོད་པ་ནི། ཧཱུཾ། རྡོ་རྗེ་མདའ་གཞུ་དང་བཅས་ཁྱོད་ལ་འདུད། །རྡོ་རྗེ་ཆགས་པའི་དམ་ཚིག་དཔལ་ཁྱོད་འདུད། །ཁ་ཊྭཱཾ་འཇིག་དུས་རྡོ་རྗེ་ཁྱོད་ལ་འདུད། །རྡོ་རྗེ་དྲིལ་བུ་བསྐྱོད་པའི་དཔལ་ཁྱོད་འདུད། །དེ་ན་པདྨའི་རིགས་ཐམས་ཅད་ཀྱི་མཆོག་ཏུ་གསང་བའི་དམ་ཚིག་གི་འཇུག་པའི་རྡོ་རྗེ་གླུའི་མཆོད་པ་ནི། །ལ་ལར་སྐྱེ་བོ་མ་རུངས་པ་ཡི་སྲོག་འཕྲོག་བྱེད་པ་ཤིན་ཏུ་དྲག་པོའི་སྐུ། །ལ་ལར་འགྲོ་བ་མཐའ་ཡས་འདུལ་ཕྱིར་ཤིན་ཏུ་རྣོ་བའི་འཁོར་ལོ་འཛིན་པའི་སྐུ། །ལ་ལར་པདྨའི་གདན་གྱི་ཤིན་ཏུ་ཞི་བའི་སྐུ་སྟེ་འགྱུར་བ་མེད་པ་སྟེ། །ལ་ལར་ཤིན་ཏུ་འབར་བའི་འདོད་པའི་དམ་ཚིག་པདྨའི་རྒྱལ་པོ་བདག་བསྒྲུབས་ཤིག་།དེ་ནས་ནོར་བུའི་རིགས་ཐམས་ཅད་ཀྱི་མཆོག་ཏུ་གསང་བའི་དམ་ཚིག་གི་འཇུག་པའི་རྡོ་རྗེའི་གླུའི་མཆོད་པ་ནི། །དབང་བསྐུར་ཐམས་ཅད་དབང་ཕྱུག་དམ་པ་ལས། །ཡང་དག་བསྒྲུབས་ཤིང་མི་ཟད་གཏེར་གྱི་མཆོག་།ཀུན་མཆོག་རྒྱལ་མཚན་རྣམ་རྒྱལ་བསྒྲེང་བ་ལས། །རྡོ་རྗེ་རིན་ཆེན་དཔལ་བདག་ལེགས་མཆོད་འགྱུར། །དེ་ནས་མིང་པོ་གསུམ་གྱི་ནི་བྷཱུར་བྷུ་བ་སཝཿ ། དེ་ནས་སྲིང་མོ་བཞི་རྣམས་ཀྱི། །ཧྲཱི་ཧཱུཾ་ཤྲཱི་བྷྱོ། །དེ་ནས་ཀླུའི་རིགས་ཐམས་ཅད་ཀྱི་དཀྱིལ་འཁོར་གྱི་ནི། ཕུ་ཕུ། དེ་ནས་གནོད་སྦྱིན་གྱི་སྡེ་དཔོན་
234b
ཆེན་པོ་ལག་ན་རྡོ་རྗེའི་སྡིག་པ་ཐམས་ཅད་ཀྱི་དཀྱིལ་འཁོར་གྱི་རྡོ་རྗེ་གླུའི་མཆོད་པ་ནི། སརྦ་མཾ་ག་མཎྜལ་མི་དཾ་བཛར་དྷ་རཱ་ཏྲ་མ་བི་མ་ར་དབི་སེར་བྷ་\?\་སུད་སཱ་ད་ཡ། །ནཱ་ཤ་ཡ། ཧ་ན་ད་ཧ། པ་ཅེ་བྷ་སྨིཾ་ཀུ་རུ་ཀྲོ་དྷ་ཧཱུཾ་ཀ་ར་མ་ནིཏྲི་ཎ། །དེ་ནས་ཐམས་ཅད་ཀྱི་མཆོག་དབང་ཕྱུག་དམ་པའི་དཀྱིལ་འཁོར་ཆེན་པོའི་མཆོག་ཏུ་གསང་བའི་དམ་ཚིག་གི་རྡོ་རྗེ་གླུའི་མཆོད་པ་ནི། ལ་ལར་དྲི་མེད་ཟླ་བའི་དཀྱིལ་འཁོར་སྟོང་གི་འོད་ཀྱི་སྐུ་ནི་རྣམ་པར་མཛེས། ལ་ལར་འཇིག་དུས་ཉི་མ་འཆར་ཀ་བྱེ་བའི་འོད་ཟེར་ཚོགས་ནི་འཇིགས་ཆེར་འབར། ། ལ་ལར་མདངས་དང་འོད་ཟེར་དང་ལྡན་བདེ་ཞིང་ཞི་བའི་རྒྱལ་པའི་སྐུ་འཛིན་པ། །ལ་ལར་ཤིན་ཏུ་མཛེས་པའི་གཟུགས་འཆང་མཆོག་གི་མདའ་དང་བཅས་པའི་གཞུ་འཛིན་པ། །ལ་ལར་གདུལ་བྱ་རྣམ་པར་སྦྱང་ཕྱིར་བརྩོན་པའི་རྡོ་རྗེ་སེམས་ཁྱོད་མཁའ་བཞིན་བཞུགས། །མ་ལུས་འདུལ་བ་མཁས་པའི་བདེ་བ་དམ་པ་ཉིད་ཕྱིར་བདག་ལ་གྲུབ་གྱུར་ཅིག་།དེ་ནས་མཆོག་ཏུ་གསང་བའི་ཆོ་ག་དམ་པའི་གསང་བའི་མཆོག་དཔལ་དམ་ཚིག་གསུམ་གྱི་འཇུག་པའི་རྡོ་རྗེ་གླུའི་མཆོད་པ་མཆོག་ཏུ་གྲུབ་པ་ནི་འདི་ཡིན་ཏེ། དངོས་གྲུབ་ཀུན་གྱི་བདེ་བ་ཉམས་དགའ་བའི། །ཐར་པའི་གྲོང་ཁྱེར་བཅོམ་ལྡན་བདེ་ཆེན་འཇུག་།མཆོག་ཏུ་བདེ་བ་དམ་པའི་དངོས་གྲུབ་ཀྱིས། །ཛཿ ་ཧཱུཾ་བཾ་ཧོཿ ་རབ་ཏུ་
235a
༄#། །གྲུབ་པར་མཛོད། །དེ་ནས་ཤིན་ཏུ་མཆོག་ཏུ་གསང་བའི་ཆོ་ག་མཆོག་ཏུ་གསང་བ་བླ་ན་མེད་པའི་དམ་པ་དཔལ་དམ་ཚིག་བླ་ན་མེད་པའི་མཆོག་ཏུ་ཤིན་ཏུ་གསང་བའི་རྡོ་རྗེའི་གླུའི་མཆོད་པ་མཆོག་ཏུ་ཤིན་ཏུ་གྲུབ་པ་ཞེས་བྱ་བ་མངོན་པར་བརྗོད་ནས་ཤིན་ཏུ་མཆོག་གི་དེ་ཁོ་ན་ཉིད་ཀྱི་རྡོ་རྗེ་གླུའི་མཆོད་པའི་གླུ་དང་གར་གྱི་ཆོ་གས་ཅི་ལྟ་བ་བཞིན་དུ་རྗེས་སུ་བསྒྲུབས་ནས་སོ་སོར་རྗེས་སུ་བསྒྲུབ་པར་བྱའོ་ཞེས་བྱ་བ་དང ། །དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་ཤིན་ཏུ་གསང་བ་བླ་ན་མེད་པའི་རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་ཆེན་པོའི་མཆོད་པ་མཆོག་ཏུ་ཤིན་ཏུ་གྲུབ་པ་ཡིན་ནོ། །ཞེས་བྱ་བ་ཡང་གསུངས་སོ། །སྣ་ཚོགས་ཆོ་ག་འདི་ཡིས་ནི། །རྡོ་རྗེ་སེམས་དཔའ་བསྡུས་པ་ཡིན། །ཀུན་མཆོག་སྣ་ཚོགས་ཆེན་པོ་ཡིན། །རྣལ་འབྱོར་དབང་ཕྱུག་རབ་ཏུ་གྲུབ། །ཅེས་བྱ་བ་ཤིན་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལྟར་དཔལ་མཆོག་དང་པོའི་རྟོག་པའི་ཆོ་ག་རྒྱས་པ་གཏམ་རྒྱུད་སྣ་ཚོགས་ཅན། །མཆོག་ཏུ་གསང་བའི་རོལ་མོ་བླ་ན་མེད་པའི་དངོས་གྲུབ་ཉམས་དང་ལྡན་པ་སྟེ། །གང་གིས་སྣ་ཚོགས་པའི་རྒྱལ་མཚན་མཐོན་པོ་དང་ལྡན་ཀུན་ཏུ་རྗེས་བསྟེན་པ། །མཆོག་གི་དངོས་གྲུབ་བདེ་བ་ཆེན་པོ་
235b
ཉིད་ནི་དེ་ཡིས་ཡང་དག་ཉམས་སུ་མྱོང ། །དོན་ཡོད་མཆོག་ཏུ་བསོད་ནམས་ལྡན། །ཆོ་ག་མཆོག་ཏུ་རྟག་པ་སྟེ། །ཀུན་མཆོག་གསང་བ་ཆེན་པོ་ནི། །དངོས་གྲུབ་ཐམས་ཅད་མྱུར་གྲུབ་བྱེད། །གང་ཞིག་གྲོང་མཆོག་རབ་དགྱེས་པར། །ཞུགས་ཏེ་སྒྲུབ་པར་བྱེད་རྣམས་ནི། །ཤིན་ཏུ་མཆོག་གི་འདོད་པ་ཡི། །དངོས་གྲུབ་དབང་ཕྱུག་བདེ་ངེས་ཐོབ། ། གང་གིས་དངོས་གྲུབ་མ་ཐོབ་དང ། །བསོད་ནམས་ཕུན་ཚོགས་བྱེད་པ་རྣམས། །དཀྱིལ་འཁོར་མཆོག་ཏུ་རབ་ཞུགས་ན། །སྒྲུབ་པོ་འདིར་ནི་རབ་གྲུབ་འགྱུར། །གལ་ཏེ་རྡོ་རྗེ་སེམས་དཔའ་མཆོག་།སྙིང་པོ་སོགས་ཀྱིས་མ་གྲུབ་དང ། །ཉེ་བའི་སྙིང་པོས་བསྒྲུབས་བྱས་ཀྱང ། །མ་གྲུབ་འདིར་ཞུགས་འགྲུབ་པར་འགྱུར། །དཔལ་མཆོག་དང་པོའི་རྩ་རྒྱུད་དུ། །དེ་བཞིན་མྱུར་དུ་གྲུབ་པ་ཡིན། །ཇི་ལྟར་དང་པོའི་ཁྱིམ་ཞུགས་ནས། །རྡོ་རྗེའི་དཀྱིལ་འཁོར་གྲུབ་པ་ལྟར། །དཀྱིལ་འཁོར་ཐམས་ཅད་གྲུབ་པ་ཡིས། །དེ་ལྟར་ཐམས་ཅད་གྲུབ་པ་མིན། ། ཇི་ལྟར་མཆོག་ཏུ་གསང་བ་ཡི། །ཁང་བཟང་དམ་པ་མཐོང་བ་ཡིས། །དམ་ཚིག་རྣམས་ལས་ཉམས་པ་དང ། །སྒྲིབ་པ་ཀུན་གྱིས་བསྒྲིབས་པ་དང ། །བདུད་སོགས་གདོན་གྱིས་རེག་པ་ཡང ། །རྟག་པའི་ཐར་པ་ཐོབ་པར་འགྱུར། །དཀྱིལ་འཁོར་དུ་ནི་མ་ཞུགས་པའམ། །ཡང་ན་དཀྱིལ་འཁོར་མ་གྲུབ་པ། །སླར་ཡང་མཆོག་ཏུ་རབ་ཞུགས་ན། །དེ་དག་
236a
༄#། །མྱུར་དུ་གྲུབ་པར་འགྱུར། །སྒྲུབ་མིན་ཡང་འདིར་ཅུང་ཟད་མེད། །དངོས་གྲུབ་ལས་དང་བདེ་དེ་བཞིན། །དངོས་གྲུབ་ཐམས་ཅད་བཞི་འགྱུར་དུ། །རྟོག་པ་ཀུན་ལས་བསྒྲུབ་པར་བྱ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས། དེ་བཞིན་གཤེགས་པ་ཐམས་ཅད་ཀྱི་དཔལ་དམ་ཚིག་ཆེན་པོའི་དཀྱིལ་འཁོར་གྱི་ཆོ་ག་ཤིན་ཏུ་གསང་བ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་འཇིག་རྟེན་གསུམ་གྱི་དམ་ཚིག་མཆོག་གི་གསང་བའི་ཆོ་གའི་མཆོག་ནི་འདི་ཡིན་ཏེ། །སངས་རྒྱས་ཆོས་དང་དགེ་འདུན་ཏེ། །དམ་ཚིག་ཆེན་པོ་གསུམ་འདི་ཡིན། ། བྱང་ཆུབ་སེམས་དཔའ་མཆོག་འཛིན་པའི། །རས་ལ་དཀོན་མཆོག་གསུམ་བྲི་བྱ། །གོ་ཆ་དང་བཅས་རྡོ་རྗེ་མཆོག་།གོ་ཆ་སོགས་ཀྱིས་ལེགས་པར་བརྒྱན། ། རྡོ་རྗེ་མཚོན་ཆ་བརྗོད་པ་དང ། །པདྨ་རིན་ཆེན་འཆང་བའོ། །འཁོར་ལོ་དེ་ནི་བརྟགས་ནས་སུ། །གསང་བའི་དཀྱིལ་འཁོར་དམ་པ་འོ། །ཅི་རིགས་པར་ནི་བསྒྲུབ་བྱས་ན། །སུམ་འགྱུར་དུ་ནི་འགྲུབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་ཞེས་བྱ་བའི་སྙིང་པོ་མཆོག་གི་དངོས་གྲུབ་མ་ལུས་པ་སྟེར་བ་འདི་
236b
ཡིན་ཏེ། ཨོཾ་བྷུ་ཁཾ། ཁྱིམ་མམ་ཡང་ན་ནགས་ཚལ་ལམ། །སྔ་མ་བཞིན་དུ་བརྒྱན་ནས་ནི། །མཚོན་ཆ་མཆོག་གི་ཆོ་ག་ཡིས། །ཐམས་ཅད་བྱས་ནས་འདི་བརྗོད་བྱ། ། དེ་ཉིད་ཀྱིས་ནི་བཅོམ་ལྡན་འདས། །བྱང་ཆུབ་སེམས་དཔའ་དེ་བཞིན་གཤེགས། །ལྟ་ངན་རྣམས་ལ་ཕན་པའི་ཕྱིར། །འདི་དག་མྱ་ངན་འདས་པ་སྟོན། །མ་ལུས་འདུལ་བ་ལ་བརྩོན་པས། །བརྟན་ཞིང་ངེས་པའི་ཆོ་ག་དགོས། །ཤིན་ཏུ་སྲིད་པ་ལ་གནས་མཆོག་།ཆོ་ག་ལ་སོགས་དགོས་པ་ཡིན། །སངས་རྒྱས་ཆོས་དང་དགེ་འདུན་ཞེས། །དཀོན་མཆོག་གསུམ་དུ་གྱུར་པ་ཡིན། །སྲིད་པ་ཤིན་ཏུ་གྲུབ་པ་ཡི། །རྣམ་པར་དག་པའི་དཔལ་མཛད་མཆོག་།ཅེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་རྡོ་རྗེའོ། །དེ་ནས་མཆོག་ཏུ་གསང་བའི་ཆོས་ཉིད་ཀྱི་དྲིལ་བུ་ནི། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་སྦྱོར་བ་ཡིས། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ནས་དམ་ཚིག་ཆེན་པོ་གསུམ་གྱི་སྡོམ་པ་ཞེས་བྱ་བ་ནི། །ལོངས་སྤྱོད་ཀུན་ལ་ལོངས་སྤྱོད་པ། །རང་ལྷ་བདག་ཉིད་ཀྱིས་བསྟེན་ན། །དཀོན་མཆོག་གསུམ་ལ་མཆོད་པའི་མཆོག་།བདག་གིས་བྱ་ཞེས་བརྗོད་ཅིང་མཆོད། །ཅེས་
237a
༄#། །བྱ་བ་ནི་དེ་བཞིན་གཤེགས་པའི་རྣལ་འབྱོར་བསྒྲུབ་པའོ། །ཐབས་ཀྱི་ཆོ་ག་འདི་ཡིས་ནི། །འདོད་པའི་ཡོན་ཏན་ལྔ་རྣམས་ཀྱང ། །བཟའ་མིན་པ་ཡང་བཟའ་བྱས་ན། །རྟག་པའི་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དམ་ཚིག་ཆེན་པོ་གསུམ་མོ། །དེ་ལྟར་བརྗོད་ནས་སྙིང་པོ་བྱིན་ལ་ཕྱག་རྒྱ་བཅིང་བ་སློབ་ཏུ་བཅུག་ནས་ཅི་ལྟར་མངོན་པར་འདོད་པ་བསྒྲུབ་པར་བྱའོ། །དེ་ནས་རྡོར་འཛིན་སློབ་དཔོན་གྱིས། །རྡོ་རྗེ་མཆོད་པས་མཆོད་ནས་ནི། །ཅི་འདོད་པ་ཡི་མཆོད་པ་ཡིས། །སློབ་མ་ཐམས་ཅད་མཆོད་དུ་གཞུག་།ལོངས་སྤྱོད་ཀུན་ལ་ལོངས་སྤྱོད་ཀྱང ། །དཀོན་མཆོག་གསུམ་པོ་ལ་ཕུལ་བ། །འདོད་པས་བདག་དང་གཞན་རྣམས་ལ། །མཆོད་པ་ཉིད་དུ་འགྲུབ་པར་འགྱུར། །དཔལ་མཆོག་དང་པོ་ལས། །མཆོག་ཏུ་གསང་བའི་ཆོ་གའོ།། །། དེ་ནས་རྡོ་རྗེ་ཆེན་པོ་ཁྲོ་བོའི་རྒྱལ་པོའི་མཆོག་ཏུ་གསང་བའི་ཆོ་ག་ནི། །རས་ལ་བཅོམ་ལྡན་བྲི་བྱ་སྟེ། །རྡོ་རྗེའི་རིགས་ཀུན་བདག་པོ་ནི། །རྡོ་རྗེ་ཉི་མ་མེ་ལྟར་འབར། ། ཆོ་ག་ཇི་བཞིན་མཆོག་ཏུ་འོ། །དེ་ཡི་པད་འདབ་གཅིག་བཞུགས་པ། །དེ་ཡི་འོད་ཀྱིས་དཀྱིལ་འཁོར་སྟེན། །གསང་བའི་རྡོ་རྗེ་རྣལ་འབྱོར་ཆེའི། །མཁའ་འགྲོ་མ་རྣམས་
237b
ལོགས་ལ་བྲི། །དང་པོར་དམར་དང་དཀར་བ་དང ། །གཞན་ནི་ཐལ་བ་ལྟར་དཀར་བ། །གསུམ་པོ་དཀར་དང་ལྟ་བ་སྟེ། །བཞི་བ་གསེར་ལྟར་དྲི་མེད་པའོ། །རྡོ་རྗེ་གཏུམ་པོའི་དབང་ཕྱུག་གྲུབ། །རྡོ་རྗེ་ཁ་ཊྭཱཾ་བསྒྲེངས་དང་བཅས། །རྡོ་རྗེ་འདོད་པ་མེ་ལྟར་འབར། །དེ་ཡི་ལོགས་ལ་མཚན་མ་གཏོད། །རྡོ་རྗེ་ཁྱབ་འཇུག་མ་རྡོ་རྗེའི། །འཁོར་ལོ་གཏོད་པ་དེ་བཞིན་གཞན། །རྡོ་རྗེ་དྲིལ་བུ་བ་དན་ནམ། །དེ་ཡི་ལོགས་ན་གཡོན་བསྙེམས་མ། །ཅུང་ཟད་མཆེ་བ་གཙིགས་པ་ཡིས། །ཁྲོ་དང་བཅས་པས་ཞལ་བཞད་པ། །རང་བདག་ལ་ནི་ཐུགས་གཏད་ཅིང ། །སྐུ་ནི་ཟུར་གྱི་ཕྱོགས་པ་བཞུགས། །དེ་ནས་འདི་ཡི་སྙིང་པོ་ནི། །ཧཱུཾ། དེ་ནས་ཉེ་བའི་སྙིང་པོ་ནི། །རྡོ་རྗེ་དྲིལ་སོགས་ལྷན་ཅིག་ཏུ། །རྣམ་དབེན་རོལ་མོ་བརྡུངས་པ་ཡིས། །ཧི་ཡི་གླུ་དང་རོལ་མོ་ནི། །བརྡུང་ཞིང་ཟུར་བཞི་རབ་ཏུ་བསྒྲུབ། །ཅེས་བྱ་བ་ནི་འདིར་བཟླས་པའི་ཆོ་གའོ། །འཁོར་ལོ་དེར་ནི་བསྟན་བྱས་ནས། །གསང་བའི་དཀྱིལ་འཁོར་དམ་པ་ནི། །མཚོན་ཆ་མཆོག་གི་ཆོ་ག་ཡིས། །ཆོ་ག་ཐམས་ཅད་རྒྱས་པ་འོ། །དེ་ནས་དེ་ཁོ་ན་ཉིད་དང ། ཆོས་དང ། དམ་ཚིག་གི་ཆོ་ག་སྦྱིན་པ་ནི། །རྟག་ཏུ་ཆགས་པ་ལས་བྱུང་ཁྲོ། །རྡོ་རྗེ་མེ་ཡི་ཕུང་བོའི་སྐུ། །འབར་བའི་རྡོ་རྗེ་ཁྲོ་བོ་ཆེ། །རབ་འབར་བ་ཡི་ཚོགས་ཀྱི་སྐུ། །རྡོ་རྗེ་འབར་བའི་རྣལ་འབྱོར་ཆེ། །མཁའ་འགྲོ་མ་རྣམས་
238a
༄#། །ཀུན་ཏུ་འབར། །ཞེས་བྱ་བ་ནི་རྡོ་རྗེའོ། །དེ་ནས་ཆོས་ནི། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཆན་ཉིད་མེད། ། ནམ་མཁའ་དང་མཉམ་རྣལ་འབྱོར་པས། །ཐམས་ཅད་མྱུར་བ་ཉིད་དུ་སྒྲུབ། །ནམ་མཁའ་ཀུན་མཆོག་སྦྱོར་བ་ཡིས། །ཐམས་ཅད་ནམ་མཁའ་ཞེས་བརྗོད་ཅིང ། །རྡོ་རྗེའི་ཕྱག་རྒྱས་རྒྱས་བཏབ་པས། །འཇིག་རྟེན་གསུམ་ཡང་ཟ་བར་བྱེད། །ཅེས་བྱ་བ་ནི་རྡོ་རྗེ་རྣལ་འབྱོར་གྱི་མཁའ་འགྲོ་མའི་མཆོག་ཏུ་གསང་བའི་དམ་ཚིག་གོ་།ཆོ་ག་འདི་ཡིས་ཐམས་ཅད་དུ། །མཉམ་པར་གཞག་པས་བསྒྲུབ་པར་བྱ། །ཀུན་མཆོག་དངོས་གྲུབ་ཆེན་པོ་ཡིས། །ལས་ཀྱི་ཚོགས་རྣམས་མི་ཟད་པའོ། །ཞེས་བྱ་བའོ། ། དེ་ནི་ཅི་ལྟ་བ་བཞིན་དུ་དེ་བཞིན་གཤེགས་པའི་ཆོ་གས་རང་གི་ཕྱག་རྒྱ་རྣམས་ཀྱིས་གར་གྱི་མཆོད་པ་བྱས་ནས་འགྲུབ་པར་འགྱུར་རོ། །དཔལ་མཆོག་དང་པོ་ལས། རྡོ་རྗེ་རྣལ་འབྱོར་གྱི་ཆོ་གའོ།། །།དེ་ནས་མཆོག་ཏུ་ཕྲ་བ་དང ། །ཤིན་ཏུ་བཟད་པའི་རྡོ་རྗེ་ཡི། །གྲུབ་མཆོག་གསང་བའི་རྣལ་འབྱོར་གྱི། །མཁའ་འགྲོ་མ་ཡི་འཁོར་ལོར་བཤད། །གྲོང་ཁྱེར་སྐྱེད་མོས་ཚལ་སོགས་ནི། །ཇི་ལྟ་བ་བཞིན་རྒྱས་བྱས་ནས། །རྡོ་རྗེ་འཛིན་ཀུན་སློབ་དཔོན་གྱིས། །ཇི་བཞིན་དུ་ནི་རབ་བསྒྲུབས་པའི། །ཡིད་འོང་
238b
བཞི་དང་ལྷན་ཅིག་ཏུ། །རང་གི་ཕྱག་རྒྱས་མེ་ཏོག་གཏོར། །ཇི་ལྟ་བ་བཞིན་གྲོང་ཁྱེར་འཇུག་།གཡོན་པའི་ཁ་ནི་གྱེན་དུ་གཏོད། །རྡོ་རྗེ་དྲག་པོ་བཞད་ཆེན་པོ། །སྒྲ་སྒྲོགས་མཆོག་གི་ཕྱག་རྒྱ་ཡིས། །འཇུག་སྟེ་མགོན་ལ་ཕྱག་འཚལ་བྱ། །དེ་ལ་ཕྱག་ནི་འདི་ཡིན་ཏེ། །ོཾ་ཞེས་བྱ་བ་བརྗོད་བྱས་ལ། །ཤིན་ཏུ་དགའ་བའི་དབུགས་རླུང་གིས། །རུ་ལུ་རུ་ལུ་ལླཾ། དྲུག་ལྡན་པར་མའི་རུ་ལུ་རུ་ལུ་ལླཾ་སྟེ། འདི་ནི་རྡོ་རྗེ་དྲག་པོའི་ཕྱག་འཚལ་པའི་སྒྲ་སྒྲོགས་པའི་མཆོག་ཅེས་བྱ་བ་འདིར་རྡོ་རྗེ་ཕྱག་གི་ཕྱག་རྒྱ་སྟེ། ཕྱག་རྒྱ་ཐམས་ཅད་དང ། གཞན་རྨོངས་པ་དང ། ཐོགས་པ་མེད་པའི་དངོས་གྲུབ་ཐམས་ཅད་དང ། ལས་ཐམས་ཅད་ལ་དགོངས་ཤིང་མཆོག་ཏུ་གྲུབ་པ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་ཤིན་ཏུ་གསང་བས་འདི་གསུངས་སོ། །དེ་ནས་ཡིད་འོང་དམ་བཅས་པས། །མེ་ཏོག་སིལ་མ་དོར་ནས་ནི། །རྡོ་རྗེ་པདྨའི་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །དེ་ལ་རྡོ་རྗེ་སེམས་དཔའི་ཕྱག་རྒྱ་ནི་འདི་ཡིན་ཏེ། པདྨའི་ཐོད་པ་ལས་བྱ་སྟེ། དེ་ཡང་རྡོ་རྗེར་བྱིན་གྱིས་བརླབས་པས་ན་རྡོ་རྗེ་པདྨ་ཞེས་བྱ་བའོ། །དེ་ནས་འདིར་ཕྱག་རྒྱ་བཅིང་བ་ནི། སོར་མོ་ཐམས་ཅད་ཕན་ཚུན་སྦྱར། །ཀུན་མཆོག་རྩེ་མོ་དང་བཅས་པ། །མཐེ་བོ་རྡོ་རྗེས་བཀབ་པ་ནི། །རྡོ་རྗེ་པདྨ་ཞེས་འགྲུབ་བོ། །རྡོ་རྗེ་པདྨའི་ཕྱག་རྒྱ་འདིས་རྡོ་རྗེ་སེམས་དཔའི་དབང་བསྐུར་བའི་སྦྱོར་བ་དང ། རྡོ་རྗེ་པདྨའི་རིན་པོ་ཆེའི་ཅོད་པན་གྱི་དབང་བསྐུར་བར་
239a
༄#། །བྱའོ། །འདིས་དཔང་བསྐུར་བ་ཙམ་གྱིས་དེ་བཞིན་གཤེགས་པ་རྣམས་ཀྱིས་ཤིན་དུ་གདུག་པ་དང ། དྲག་པོ་དང ། རབ་ཏུ་གཏུམ་པ་དང ། མ་རུངས་པའི་སེམས་ཅན་ཐལ་བར་བརླ་ནས་ཐམས་ཅད་ལས་རྣམ་པར་རྒྱལ་བ་ཁམས་གསུམ་མ་ལུས་པའི་སྟོབས་ཆེན་པོ་དང་ལྡན་པའི་འཁོར་ལོས་བསྒྱུར་བའི་དེ་བཞིན་གཤེགས་པ་ཐམས་ཅད་ཅེས་བྱ་བར་བྱིན་གྱིས་རློབ་པར་འགྱུར་བ་དང ། མཆོག་ཏུ་རྟག་པའི་སྲུང་བར་ཡང་འགྱུར་རོ་ཞེས་མཆོག་ཏུ་ཤིན་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ཉིད་ཀྱིས་ནི་རྡོ་རྗེ་བཟུང ། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །རྡོ་རྗེ་ལ་སོགས་ཐོབ་པར་གཟུང ། །རྡོ་རྗེ་སེམས་དཔའ་གཉིས་པ་འདྲ། །རྡོ་རྗེ་རྣལ་འབྱོར་དབང་ཕྱུག་གྲུབ། །རྡོ་རྗེ་ཅན་གྱིས་བྱིན་རླབས་འགྱུར། །བུད་མེད་རྣམས་ཀྱང་འབེབས་གྱུར་ནས། །སྟོན་པའི་རྡོ་རྗེ་ཕབ་པ་ཡིས། །རྡོ་རྗེ་དང་བཅས་ཕྱག་མཚན་འཛིན། །རྣལ་འབྱོར་མ་རྣམས་རབ་ཏུ་འགྱུར། །དེ་ལ་ཐོག་མར་རེ་ཞིག་རྡོ་རྗེ་ཉི་མ་མེ་ལྟར་འབར་བ་ཆེན་པོ་ཐལ་བར་རབ་ཏུ་རློག་པ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆེན་པོའི་ཁྲོ་བོའི་རྒྱལ་པོའི་བདག་པོ་མཆོག་དང་པོ་ཡང་དག་པར་འབེབས་
239b
པར་བྱེད་པ་སྟེ། །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོའི་ཐབས་ཀྱིས་འཁོན་དུ་འཛིན་པའི་ཁྲོ་བོའི་མེ་འབར་བའི་རྡོ་རྗེ། རྡོ་རྗེ་དང་བཅས་པའི་ཁ་ཊྭཱཾ་གའི་རྒྱལ་མཚན་དང་ངེས་པར་སྦྱོར་བ། བ་དན་དང་བཅས་པའི་དྲིལ་བུ་འཆང་བ། རྡོ་རྗེ་བསྙེམས་པའི་བདག་པོ་ཤིན་ཏུ་ཁྲོ་བ་འབེབས་པས་སྒེག་པ་དང་བཅས་པའི་སྨིན་མཚམས་ཀྱི་ཁྲོ་གཉེར་ཤིན་ཏུ་འཇིགས་ཤིང་འཇིགས་པར་བྱེད་པའི་སྤྱན་སེར་པོ་དང་ལྡན་པའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་འཇིགས་པ་ཆེན་པོས་འཇིགས་པར་བྱེད་པའི་སྤྱན་གྱིས་ལྟ་བའི་ཕྱག་རྒྱ་འདིས་སྟོང་ཕྲག་བརྒྱ་བཟླས་པས་འགྲུབ་པར་མཛད་དོ། །དེ་བཞིན་གཤེགས་པ་ཐམས་ཅད་རྗེས་སུ་ཆགས་པ་དང ། དགུག་པ་དང ། གཞུག་པ་དང ། དབང་དུ་བྱ་བ་དང ། འབེབས་པར་ནུས་པའོ། །ཐམས་ཅད་ནམ་མཁར་སྦྱོར་བའི་ཏིང་ངེ་འཛིན་དང ། ལན་གཅིག་བརྗོད་པ་ཙམ་གྱིས་ཁམས་གསུམ་མ་ལུས་པའི་རྡོ་རྗེ་བདུད་རྩི་ལ་སོགས་པའི་བདུད་ཐམས་ཅད་དང ། དེ་བཞིན་གཤེགས་པ་ཐམས་ཅད་ལ་གདུག་པ་དང ། དྲག་པོ་དང ། རབ་ཏུ་གཏུམ་པ་དང ། མ་རུངས་པའི་སེམས་ཅན་རྣམས་དང ། མཁའ་འགྲོ་མ་དྲག་པོ་ཐམས་ཅད་དང ། གང་ཞིག་ཉན་ཐོས་དང ། རང་སངས་རྒྱས་རྣམས་ཏེ་དེ་དག་ཀྱང་ཐལ་བར་རློག་པར་འགྱུར་ན། དགྲ་བོ་ལ་སོགས་པ་གཞན་རྣམས་ལྟ་སྨོས་
240a
༄#། །ཀྱང་ཅི་དགོས། དོན་ཡོད་ཅིང་ཐོགས་པ་མེད་པ་དང ། དངོས་གྲུབ་ཐམས་ཅད་དང ། ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཐུགས་རྗེ་ཆེན་པོའི་ཐབས་ཤིན་ཏུ་དྲག་པོ་འདིའི་མན་ངག་གི་བཟླས་པ་ནི། སྣའི་དབུགས་ཕྲ་བ་ཉིད་ཀྱིས་བདེན་པའི་རྡོ་རྗེ་ཚིག་གིས་གྲུབ་པའི་ཡིད་ཀྱི་འདོད་པའི་ལས་ཐམས་ཅད་ཀྱི་དངོས་གྲུབ་ཀྱི་ཚོགས་རྣམས་ལ་དམ་པའི་མཆོག་ཏུ་གྲུབ་པའོ། །ཧཱུཾ། དེ་ནས་མཆོག་ཏུ་གསང་བའི་རྡོ་རྗེ་རྣལ་འབྱོར་གྱི་དབང་ཕྱུག་མའི་ལྷ་ཆེན་པོ་རྣམས་ཀྱིས་བཤད་པར་བྱ་སྟེ། དེ་ལ་ཐོག་མར་རེ་ཞིག་རྡོ་རྗེ་ཆེན་པོ་འདོད་པའི་མེ་འབར་བ་ཞེས་བྱ་བའི་ལྷ་མོ་ཆེན་མོ་རྡོ་རྗེ་གཞུ་དང་མདང་གཏོད་པའི་སྤྱན་གཡོན་པ་སྟེ། རྡོ་རྗེ་སྤྱན་གྱིས་ལྟ་བའི་ཕྱག་རྒྱ་འདིས་ཐམས་ཅད་སྒྲུབ་པར་མཛད་པ་དང ། སྒེག་པ་དང་བཅས་ཤིང་གཡོ་བའི་སྤྱན་གྱི་ཟུར་གྱིས་གཟིགས་པའི་ཕྱག་རྒྱས་བཏབ་བ་ཙམ་གྱིས་ཐམས་ཅད་ལ་རྒྱས་འདེབས་པར་མཛད་པ་དང ། དོན་ཡོད་ཅིང་ཐོགས་པ་མེད་པ་དངོས་པོ་ཐམས་ཅད་དང ། ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །དེ་བཅོམ་ལྡན་འདས་ཡུམ་འདིའི་རྡོ་རྗེ་ཕྲ་མོའི་གཡོན་པའི་ཁྲོ་བོའི་བཟླས་པ་ནི་ཡིད་ཀྱིས་འདོད་པས་དངོས་གྲུབ་ཐམས་
240b
ཅད་དང ། ལས་ཀྱི་ཚོགས་རྣམས་ལ་མཆོག་ཏུ་གྲུབ་པའོ། །ཧྲའིཿ ། གཉིས་པ་ནི་རྡོ་རྗེ་ཆེན་པོ་འདོད་པའི་མེ་འབར་བའི་དམ་ཚིག་གི་ལན་ཞེས་\?\་བྱ་བའི་ལྷ་མོ་སྟེ་དབུས་སུ་རང་གི་ལྷག་པའི་ལྷ་བསྟོད་པའི་ཞལ་འཛུམ་པའི་སྤྱན་ཅུང་ཞིག་འཛུམས་ཤིང ། དགའ་བ་ཆེན་པོ་རྡོ་རྗེའི་སྤྱན་གྱིས་ལྟ་བའི་ཕྱག་རྒྱ་འདིས་ཐམས་ཅད་སྒྲུབ་པར་མཛད་པ་དང་ཙུམ་པན་དང ། འཁྱུད་པ་ལ་སོགས་པའི་རེག་པའི་ཕྱག་རྒྱས་བཏབ་པ་ཙམ་གྱིས་ཐམས་ཅད་ལ་རྒྱས་འདེབས་པར་མཛད་པ་དང ། ཕྱག་རྒྱ་ཐམས་ཅད་འཇོམས་པར་མཛད་པ་དང ། ཐམས་ཅད་ཀྱིས་གསོད་པར་མཛད་པ་དང ། དོན་ཡོད་ཅིང་ཐོགས་པ་མེད་པར་དངོས་གྲུབ་ཐམས་ཅད་དང ། ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཡུམ་འདིའི་བྱ་རོག་གི་མགྲིན་པའི་དབྱངས་ཀྱིས་རྡོ་རྗེ་ངང་གི་ཁྲོ་བོའི་བཟླས་པ་ནི་ཡིད་ཀྱི་འདོད་པས་དངོས་གྲུབ་ཐམས་ཅད་དང ། ལས་ཀྱི་ཚོགས་རྣམས་ལ་མཆོག་ཏུ་གྲུབ་པའོ། །ཧཱུཾ། གསུམ་པ་ནི་རྡོ་རྗེ་ཆེན་པོའི་འདོད་པའི་མེ་འྤར་བ་ཐལ་བར་རློག་པ་ཞེས་བྱ་བའི་ལྷ་མོ་ཆེན་མོ་སྟེ། བཅོམ་ལྡན་འདས་ཀྱི་རྡོ་རྗེ་ཆེན་པོ་དང ། ཁ་ཊྭཱཾ་གའི་རྒྱལ་མཚན་འཆང་བ་དང ། སྒེག་པ་དང་བཅས་པའི་བཞད་པས་སྨིན་མཚམས་ཀྱི་ཁྲོ་གཉེར་གྱི་ཁྲོ་བོའི་སྤྱན་ཏེ། རྡོ་རྗེ་ཆེན་པོའི་ཁྲོ་བོ་ཀི་ལི་གི་
241a
༄#། །ལ་ཁྲོ་བོའི་སྤྱན་གྱིས་ལྟ་བའི་ཕྱག་རྒྱ་འདིས་ཐམས་ཅད་སྒྲུབ་པར་མཛད་པའོ། །བཛྲ་ཞེས་བྱ་བ་དང ། རུ་ལུ་རུ་ལུ་རུ་ལུ་ཧྣི་ཞེས་བྱ་བ་ཙམ་གྱིས་བདུད་ཐམས་ཅད་འཇོམས་པ་དང ། དོན་ཡོད་ཅིང་ཐོགས་པ་མེད་པའི་དངོས་གྲུབ་ཐམས་ཅད་དང ། ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །ཧི། བཞི་པ་ནི་རྡོ་རྗེ་ཆེན་པོ་འདོད་པའི་མེ་འབར་བ་ཐལ་བར་རློག་པ་འཆི་བ་སློང་བ་ཞེས་བྱ་བ་གཡོན་བསྙེམས་པ་གཡས་པས་རང་གི་སྤྱི་བོར་རྡོ་རྗེ་དྲིལ་བུ་བསྐྱོད་པར་མཛད་པ། སྒེག་པ་དང་བཅས་པའི་སྤྱན་ཤིན་ཏུ་གདངས་པ་སྟེ། རྡོ་རྗེ་རྒྱལ་པོ་དྲིན་གྱི་སྤྱན་གྱིས་ལྟ་བའི་ཕྱག་རྒྱས་ཐམས་ཅད་སྒྲུབ་པར་མཛད་པ། ཐལ་ལྕག་ལ་སོགས་པ་དང ། བཞད་གད་དང ། རྡེག་པ་དང ། ཕྱག་རྒྱས་རྒྱས་བཏབ་པའི་འཆི་བ་ཐམས་ཅད་སློང་བར་མཛད་པ། དོན་ཡོད་ཅིང་ཐོགས་པ་མེད་པ་དངོས་གྲུབ་ཐམས་ཅད་དང ། ལས་ཀྱི་ཚོགས་ལ་དགོངས་ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཡུམ་འདིའི་དྲིལ་བུའི་དབྱངས་ཀྱི་རྡོ་རྗེ་ཁྲོ་བོའི་བཟླས་པ་ནི་ཡིད་ཀྱི་འདོད་པས་དངོས་གྲུབ་ཐམས་ཅད་དང ། ལས་ཀྱི་ཚོགས་ཐམས་ཅད་ལ་མཆོག་ཏུ་གྲུབ་པའོ། །ཥྚ། དེ་ལ་སོགས་པ་མཐའ་ཡས་མཆོག་།ཆོས་དབྱིངས་མཉམ་དང་མི་མཉམ་པ། །
241b
ནམ་མཁའི་ཁམས་ལྟར་གྲངས་མེད་ཅིང ། །རྡོ་རྗེ་ཉི་མ་ལས་བྱུང་བ། །ནམ་མཁའ་ཀུན་གྱི་གནས་སྐབས་ཀྱི། །དཀྱིལ་འཁོར་འདི་ལ་རབ་ཞུགས་པ། །རྡོ་རྗེ་མཆོག་གི་རྣལ་འབྱོར་གྱི། །དབང་ཕྱུག་མ་ལུས་ཀུན་ནས་འབེབས། །དེ་ནས་རྡོ་རྗེ་རྣལ་འབྱོར་པ་སྟོན་པ་དེས་རྣལ་འབྱོར་པ་རང་གི་ལོགས་དག་ཏུ་དགོད་པ་ཡིན་ཏེ། །ཟླ་ཆེས་དཀྱིལ་འཁོར་རྣམ་པ་ཡི། །དཀྱིལ་འཁོར་དུ་ནི་དགོད་པར་བྱ། །བཀོད་ནས་ཐམས་ཅད་ཀུན་མཆོག་གི་།དངོས་གྲུབ་དམ་པ་བསྒྲུབ་པར་བྱ། །ཐམས་ཅད་དགུག་དང་མཆོད་པ་ཆེ། བདག་བྱིན་བརླབ་སོགས་གྲུབ་པ་ཡིས། །ཤིན་ཏུ་གསང་བའི་དཀྱིལ་འཁོར་དེ། །བརྟག་པ་དང་ནི་བསྒྲུབས་ནས་ཀྱང ། །རྡོ་རྗེ་འཛིན་ཀུན་སློབ་དཔོན་གྱིས། །རྡོ་རྗེ་སློབ་མ་རྣམས་གཞུག་བྱ། །དེ་ལ་རེ་ཞིག་ཐོག་མ་ཁོ་ནར་སློབ་དཔོན་གྱིས་བཅུག་སྟེ་ཚོགས་ཀྱི་དཀྱིལ་འཁོར་དུ་དམ་ཚིག་གསུམ་གྱི་བྱིན་གྱི་རླབས་ཀྱིས་རྡོ་རྗེ་རྣལ་འབྱོར་མ་རྣམས་ལོགས་དག་ཏུ་བཞག་ནས་སྐྱེས་པ་རྣམས་ཀྱང་གཞུག་ཅིང་བྱང་ཆུབ་ཀྱི་སེམས་ཀྱིས་རྡོ་རྗེ་ཆེན་པོའི་ཁྲོ་བོའི་དམ་ཚིག་དང་སྡོམ་པ་དག་ལེན་དུ་གཞུག་པར་བྱའོ། །ཁྱེའུ་དང ། བུ་མོ་རྣམས་རབ་ཏུ་བཞག་ལ་ཚོགས་དང་བཅས་པའི་རང་ཉིད་ཀྱིས་ཞུགས་ཏེ་བསྲུང་བ་དང ། བསྐྱབ་པ་དང ། སྦ་བ་ཐམས་ཅད་བྱའོ། །དེ་ནས་འདིར་སློབ་མ་
242a
༄#། །གཞུག་པའི་ཆོ་ག་རྒྱས་པ་ནི། །བྱང་ཆུབ་སེམས་ནི་བླ་མེད་པ། །མཆོག་ཏུ་བསྐྱེད་པ་བྱས་ནས་ནི། །གར་བྱས་སྤྱི་བོར་ཐལ་སྦྱར་མཆོད། ། སློབ་མ་ཐམས་ཅད་གཞུག་པར་བྱ། །ཅི་འདོད་པ་ཡི་དངོས་གྲུབ་བསྐྱེད། །སློབ་མ་མེ་ཏོག་དོར་དུ་གཞུང ། །རྣལ་འབྱོར་མ་ནི་གང་ལ་བབས། །དེ་དང་དེ་ཡི་ལྷ་མོ་འགྲུབ། །དེ་ནས་གདོང་གཡོགས་བཀྲོལ་ནས་ནི། །རྣམ་པ་ཀུན་ཏུ་ཡོན་བླངས་ནས། །རྡོ་རྗེ་པདྨའི་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །འདིར་མནའ་བསྒག་པ་དང ། དབང་བསྐུར་བ་ནི་དེ་ཉིད་དོ། །དེ་ལ་འདིར་དམ་ཚིག་གསུམ་སྦྱིན་པ་ནི་འདི་ཡིན་ཏེ། །མི་ཕྱེད་པ་དང་སོ་སོར་རྟོགས། །གདུག་པ་ཐམས་ཅད་གནོན་པ་དང ། །སངས་རྒྱས་ཀུན་དངོས་རྡོ་རྗེ་སྟེ། །བྱང་ཆུབ་སེམས་ནི་ཆེ་ཞིང་བརྟན། །མཚོན་ཆ་དེ་ནི་རྒྱལ་ཀུན་གྱིས། །ཀུན་ཏུ་བཟང་པོའི་ལག་ཏུ་སྦྱིན། །བསྟན་པ་ཐམས་ཅད་གྲུབ་པའི་ཕྱིར། །དེ་ཕྱིར་ཕྱག་ན་རྡོ་རྗེ་ཡིན། །དེ་ནས་རྡོ་རྗེ་ཉི་མ་མེ་ལྟར་འབར་བའི་མཆོག་ཏུ་གསང་བ་ནི། །རྟག་ཏུ་ཆགས་པ་ལས་བྱུང་ཁྲོ། །རྡོ་རྗེ་སེམས་དཔའ་གདུལ་བྱའི་ཕྱིར། །རྡོ་རྗེ་ཉི་མ་མེ་ལྟར་འབར། །མཆོག་ཏུ་འཇིགས་པར་བྱེད་པ་ཡིན། །དེ་ནས་མཆོག་ཏུ་གསང་བའི་རྡོ་རྗེ་རྣལ་འབྱོར་གྱི་མཁའ་
242b
འགྲོ་མ་རྣམས་ཀྱི་གསང་བ་མཆོག་གི་དེ་ཁོ་ན་ཉིད་ནི། །རྡོ་རྗེ་ཉི་མ་འཆར་ལས་བྱུང ། །དེ་བཞིན་གཤེགས་པའི་གྲིབ་མ་འདི། །སྤྲུལ་ཏེ་མ་ལུས་བདུང་ལ་སོགས། །གདུག་པའི་ཁྲག་ནི་གསོལ་བར་སྤྱོད། །ཅེས་བྱ་བ་ནི་གསང་བ་མཆོག་གི་དེ་ཁོ་ན་ཉིད་དོ། །དེ་ནས་འདིར་མཆོག་ཏུ་གསང་བའི་ཆོས་ཉིད་འབེབས་པའི་དྲིལ་བུ་ནི། །ཤིན་ཏུ་གདུག་ཅིང་དྲག་པ་དང ། །བདག་པོ་དྲག་པོའི་བུ་རྣམས་དང ། །ཤིན་ཏུ་གཉིད་ནི་ལོག་པ་དག་།རྡོ་རྗེ་མཆོག་ནི་འཛིན་པས་གསུངས། །ཞེས་བྱ་བ་ནི་བཅོམ་ལྡན་འདས་ཀྱིས་གསུངས་སོ། །མཆོག་ཏུ་གསང་པའི་ཆོས་ཉིད་འབེབས་པའི་རྡོ་རྗེ་ཁ་ཊྭཱཾ་གའི་རྒྱལ་མཚན་དང ། བ་དན་གྱི་དྲིལ་བུ་ཐམས་ཅད་འབེབས་པ་དང ། རབ་ཏུ་སྒྲུབ་པར་བྱེད་པ་དང ། ཐམས་ཅད་ལྟུང་བར་བྱེད་པ་དང ། སློང་བར་བྱེད་པའོ། །དེ་ནས་རྣལ་འབྱོར་མཆོག་གི་དམ་ཚིག་ནི། ཁྲག་ཆེན་ག་བུར་དང་བཅས་པ། །ཙནྡན་དམར་དང་སྦྱར་བ་ནི། །ཚོགས་ཀྱི་ནང་དུ་རབ་ཞུགས་ནས། །རྡོ་རྗེ་དང་བཅས་རྡོ་རྗེ་འཛིན། །སྲིན་ལག་མཐེ་བོའི་རྩེ་མོ་ཡིས། །ནམ་མཁའ་ཐམས་ཅད་སྦྱོར་མཆོག་ལྡན། །ཟླ་བའི་བཏུང་བ་བཞིན་མྱངས་ན། ། རྟག་པའི་དངོས་གྲུབ་ཐོབ་པར་འགྱུར། །འདོད་པ་ཀུན་ལ་ལོངས་སྤྱོད་ཅིང ། །ཅི་འདོད་པ་ནི་བསྟེན་བཞིན་དུ། །ནམ་མཁའ་ཀུན་མཆོག་སྦྱོར་པ་ཡིས། །དངོས་གྲུབ་ཐམས་
243a
༄#། །ཅད་ཐོབ་པར་འགྱུར། །ནམ་མཁའ་ཀུན་མཆོག་སྦྱོར་བ་ཡིས། །ནམ་མཁའ་ཐམས་ཅད་ཅེས་བརྗོད་ཅིང ། །རྡོ་རྗེའི་ཕྱག་རྒྱས་བཏབ་པ་ཡི། །འཇིག་རྟེན་གསུམ་ཡང་བཟའ་བར་བྱ། །དངོས་གྲུབ་ལས་དང་དེ་བཞིན་བདེ། །འདི་ལ་ཅུང་ཟད་མི་འགྲུབ་མེད། །ལས་ཀྱི་ཚོགས་ཀྱི་དངོས་གྲུབ་ཀྱིས། །དངོས་གྲུབ་མ་ལུས་སྒྲུབ་པར་འགྱུར། །དོན་ཡོད་མཆོག་ཏུ་གྲུབ་པ་དང ། །གདུག་པ་ཐམས་ཅད་གནོན་པར་བྱེད། །སྡུག་བསྔལ་ཀུན་འཕྲོག་དཔལ་དང་ལྡན། །རྣལ་འབྱོར་འདི་ནི་ལས་ཀུན་བྱེད། ། ཅེས་བྱ་བ་མཆོག་ཏུ་གསང་བའི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས། །རོ་དང་བཟའ་དང་སྤྱོད་པ་གར་དང་གླུ། །རོལ་མོའི་མཆོང་པ་སོགས་ཀྱིས་མགོན་ལ་མཆོད། །ཕུལ་བ་དེ་ཡིས་རྡོ་རྗེ་བླ་མ་ཆེ། །དད་བས་བདག་དང་གཞན་རྣམས་མཆོད་པར་བྱ། །མྱོས་བྱེད་མྱོས་བྱེད་བཏུང་བ་ནི། །ཅི་འདོད་པར་ནི་བསྟེན་པ་ཡིས། ། རྡོ་རྗེ་ཉི་མ་མེ་འབར་སོགས། །ཇི་བཞིན་རྗེས་འགྲོའི་བཟླས་པ་བཟླ། །རང་གསང་ཆོ་གས་བླངས་པ་ཡི། །གླུ་དང་རོལ་མོ་གར་རྣམས་དང ། །སྣ་ཚོགས་ཕྱག་རྒྱའི་མཆོད་པ་དང ། །ཁམས་གསུམ་རྣམ་རྒྱལ་ལ་སོགས་པ། །བུད་མེད་ཚོགས་དང་བཅས་པ་ཡི། །མཆོད་པ་རྒྱ་ཆེན་ཐམས་ཅད་དང ། །ཅི་འདོད་པ་ཡི་ལོངས་སྤྱོད་ཀྱིས། །
243b
མཆོད་པ་བྱས་ནས་རབ་ཏུ་བསྒྲུབ། །ཅེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་འདུས་པ་ལ་སོགས་པའི་དབུགས་དབྱུང་བ་སྦྱིན་པར་བྱ་སྟེ། །འགྲོ་བ་ཀུན་གྱི་ཁམས་རྣམས་ཀྱི། །ཕྲ་རབ་རྡུལ་དང་མཉམ་པ་ཉིད། །རྟོག་པའི་རྒྱལ་པོ་གྲུབ་པ་སྟེ། །སངས་རྒྱས་ལ་སོགས་མཆོག་གྲུབ་པའོ། །གང་ཞིག་བློ་ནི་དཔག་མེད་པའི། །ཁྱད་པར་དུ་ནི་དམིགས་མི་འགྱུར། །དེ་བཞིན་གཤེགས་པས་བདེ་བ་ནི། །དམ་པ་ཐམས་ཅད་བསྡུས་པའོ། །ཟད་པ་ཐམས་ཅད་ཟད་འགྱུར་དང ། །འཕེལ་བ་ཐམས་ཅད་འཕེལ་བར་འགྱུར། །གང་ཞིག་མཐོང་བས་མི་སྣང་འགྱུར། །གང་ནས་ཀྱང་ནི་འཇིགས་མེད་བྱེད། །དྲག་པོ་དབང་པོ་ཉེ་དབང་ཟླ། །ཉི་མ་མཁའ་འགྲོ་ཚོགས་དཀྱིལ་འཁོར། །ཁྲོས་ནས་ཡི་གེ་ཧཱུཾ་ཙམ་གྱིས། །མ་ལུས་པ་ནི་ཐལ་བར་བྱེད། །རྣལ་འབྱོར་མཁའ་འགྲོ་མའི་དཀྱིལ་འཁོར། །མཆོག་ཏུ་ཞུགས་ཏེ་མཐོང་ནས་ནི། །སྡིག་པ་ཀུན་ལས་རྣམ་གྲོལ་ཏེ། །ཁྱེད་རྣམས་དང་ནི་རབ་ཏུ་གནས། །སར་ཁྱོད་འཆི་བ་ཡོད་མི་ཏེ། །ཁྱད་པར་དུ་ནི་ངན་འགྲོ་མེད། །གཞན་གྱིས་མི་ཐུབ་མི་སོད་ཅིང ། །ཅིས་ཀྱང་མི་འཇིགས་དགའ་བར་གྱིས། །ཤིན་ཏུ་སྲིད་པའི་དངོས་གྲུབ་རྣམས། །སྟོན་པའི་མཆོག་ཏུ་གྱུར་
244a
༄#། །པ་ཡིན། །དམ་ཚིག་སྡོམ་པ་གྲུབ་པ་འདི། །རྟག་ཏུ་ཡང་ནི་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་བརྟག་པའི་བཀའ་ཡིན་ནོ། །བྱང་ཆུབ་སེམས་ནི་སྤང་མི་བྱ། །དམ་ཆོས་དེ་བཞིན་དམ་ཚིག་དང ། །སློབ་དཔོན་སྨད་པར་མི་བྱ་སྟེ། །གང་ཕྱིར་རྡོ་རྗེ་འཛིན་ཀུན་དེ། །སེམས་ཅན་ཀུན་ལ་ཕན་ཕྱིར་དང ། །ཐེག་པ་ཐམས་ཅད་འགྲུབ་པའི་ཕྱིར། །གདུག་པ་འདུལ་བས་དག་པ་ཞེས། །རྡོ་རྗེ་མཆོག་ནི་འཛིན་པས་གསུངས། །ཤིན་ཏུ་གདུག་ཅིང་གཏུམ་པ་དང ། །བདག་པོའི་གྲོགས་པོ་བུ་རྣམས་ཀྱང ། །ཕྱག་རྒྱའི་རྣལ་འབྱོར་མངོན་སྤྱོད་ཀྱིས། །ཤིན་ཏུ་གཉིད་ནི་ལོག་ཏུ་གཞུག་།རྟག་ཏུ་རང་གི་དམ་ཚིག་སྲུངས། ། རྟག་ཏུ་དེ་བཞིན་གཤེགས་རྣམས་མཆོད། །རྟག་ཏུ་བླ་མ་ལ་ཡང་དབུལ། །དེ་ལ་ཕུལ་ན་འབྲས་བུ་ཆེ། །དེ་བྱ་ནི་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། ། དེ་བྱིན་བསོད་ནམས་ཚོགས་རྫོགས་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །དེང་ཁྱོད་སྐྱེ་བ་འབྲས་བུར་བཅས། །གང་ཕྱིར་འདི་ལ་རབ་ཏུ་གནས། །དམ་ཚིག་རྒྱལ་པོ་དང་མཉམ་པར། །སངས་རྒྱས་ཀུན་གྱིས་བྱིན་གྱིས་བརླབས། །སངས་རྒྱས་རྡོ་རྗེ་འཛིན་རྣམས་ཀྱིས། །དེ་རིང་ཁྱོད་ལ་དབང་བསྐུར་བས། །ཁམས་གསུམ་
244b
གྱི་ནི་རྒྱལ་སྲིད་ཆེའི། །སྟོབས་དཔལ་འཁོར་ལོས་བསྒྱུར་བ་ཡིན། །རྡོ་རྗེ་དམ་པའི་གསང་མཆོག་རྣལ་འབྱོར་མའི། །མཆོག་གི་དམ་ཚིག་གསང་བ་མཐོང་ནས་ནི། །བདུད་ལ་སོགས་པའི་ཤ་ཡང་ཟོས་ནས་ནི། །དེ་བཞིན་གཤེགས་སྦྱོར་ཐོབ་ནས་ཁྱོད་གྲུབ་ཡིན། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས། མཆོག་ཏུ་གསང་བའི་རྡོ་རྗེ་རྣལ་འབྱོར་གྱི་མཁའ་འགྲོ་མའི་དཀྱིལ་འཁོར་གྱི་ཆོ་ག་ཤིན་ཏུ་གྲུབ་པའོ།། །།དེ་ནས་འཕགས་པ་སྤྱན་རས་གཟིགས་དབང་ཕྱུག་གི་མཆོག་ཏུ་གསང་བ་འགྲོ་བ་འདུལ་བའི་ཆོ་ག་ནི། །རས་ལ་བཅོམ་ལྡན་བྲི་བར་བྱ། །པདྨ་གར་གྱི་དབང་ཕྱུག་གཙོ། །གློག་གི་འཁོར་ལོ་ཡོངས་འཁོར་བའི། །འཁོར་བའི་རྣམ་འཕྲུལ་གར་རྣམས་ཀྱིས། །པདྨ་ལ་སོགས་ཕྱག་མཚན་བྲི། །ཕྱག་རྒྱ་འཁོར་ལོ་ལྟར་མཛད་པ། །དེ་ཡི་ལོགས་ནི་ཐམས་ཅད་ལ། །ཁྲོ་གཉེར་མ་སོགས་བྲི་བར་བྱ། །དྲག་པོ་ལ་སོགས་ཕྱག་མཚན་གཟུགས། །པདྨའི་ལྷ་མོ་པདྨར་བཅས། །དཀྱིལ་འཁོར་དེར་ནི་བརྟག་བྱས་ནས། །གསང་བའི་དཀྱིལ་འཁོར་དམ་པ་ནི། །མཚོན་ཆ་མཆོག་གི་ཆོ་ག་ཡིས། །ཐམས་ཅད་བྱས་ནས་འདི་བརྗོད་བྱ། །དེ་ཉིད་སངས་རྒྱས་བཅོམ་ལྡན་འདས། །སྤྱན་རས་གཟིགས་ཀྱི་དབང་ཕྱུག་སྟེ། །འདུལ་བའི་ཐབས་ཀྱིས་དག་པ་ཡི། །རོལ་བའི་གར་ནི་
245a
༄#། །མཛད་པ་ཡིན། །ཞེས་བྱ་བ་ནི་མཆོག་གི་རྡོ་རྗེ་སྟེ། །ཇི་ལྟར་པདྨ་དམར་པོ་ནི། །གནས་ཀྱི་ཉེས་པ་སྣ་ཚོགས་ཀྱིས། །ཚོན་གྱི་ཉེས་པས་མི་གོས་པ། ། དེ་བཞིན་ཁམས་གསུམ་དག་པའོ། །ཞེས་བྱ་བ་ནི་མཆོག་ཏུ་གསང་པའི་ཆོས་ཉིད་ཀྱི་དྲིལ་བུའོ། །ཆོ་ག་གང་དང་གང་དག་གིས། །འགྲོ་བ་རྣམས་ནི་འདུལ་འགྱུར་བ། །པདྨ་དག་མཆོག་རྣལ་འབྱོར་བདག་།དེ་དང་དེ་ཡིས་དག་པར་བྱ། །ཞེས་བྱ་བ་ནི་རྡོ་རྗེ་ཐམས་ཅད་ཀྱི་ཆོས་ཀྱི་དམ་ཚིག་གོ་།དེ་ནས་ཇི་ལྟ་བ་བཞིན་དུ་པདྨ་གར་གྱི་མཆོད་པས་མཆོད་ལ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་ནས་བཅོམ་ལྡན་འདས་ནམ་མཁའི་སྙིང་པོ་དོན་ཐམས་ཅད་གྲུབ་པའི་ཆོ་ག་སྟེ། །ཉི་མའི་དཀྱིལ་འཁོར་བྲིས་ནས་ནི། །རས་རིས་དེ་ནི་བློ་གྲོས་ཆེ། །ལྗང་གུ་བཻ་ཌཱུརྱ་དང་མཚུངས། །ནམ་མཁའི་སྙིང་པོ་བྲི་བར་བྱ། །དེ་ཡི་པདྨ་གཅིག་ལ་གནས། །དེ་ཡི་འོད་ཀྱི་འཁོར་ལོར་བརྟེན། །དབང་བསྐུར་མ་དང་གཏོར་མ་དང ། །རྒྱལ་མཆོག་མངའ་བདག་མཆོད་པ་འོ། །གསང་བའི་དཀྱིལ་འཁོར་དམ་པ་དེའི། །འཁོར་ལོ་བརྟག་པར་བྱས་ནས་ནི། །མཚོན་ཆ་མཆོག་གི་སྦྱོར་བ་ཡིས། ། ཆོ་ག་རྒྱས་པ་ཇི་བཞིན་པའོ། །དེ་ནི་རྡོ་རྗེ་མཆོག་གི་ནི། །ཉི་མ་འདི་ནི་དམ་པ་སྟེ། །དེ་བཞིན་གཤེགས་པ་ཐམས་ཅད་མཐོང ། །ནམ་མཁའི་སྙིང་པོ་བཅོམ་ལྡན་འདས། །
245b
བསམ་པ་ཐམས་ཅད་ཡོངས་རྫོགས་མཛད། དེ་ནས་ཆོས་ཀྱི་རིན་པོ་ཆེའི་དྲིལ་བུ་ནི། །བསམ་པ་གྲུབ་པ་ཐམས་ཅད་ཀྱི། །ནོར་གྱི་བསམ་པ་གྲུབ་པ་མཆོག་།དེ་ཡང་འདོད་པ་རབ་གྲུབ་ཕྱིར། །འདོད་ལས་ཐར་པ་བདེ་བ་ཆེ། །ཞེས་བྱ་བའོ། །དམན་མིན་རྣམས་ནི་སྦྱིན་བྱའོ། །འདོད་པ་ཀུན་གྱི་བདེ་བ་རྣམས། །བདག་ཉིད་དང་ནི་གཞན་རྣམས་ལ། །བསམ་པ་ཐམས་ཅད་རྫོགས་ཕྱིར་རོ། །ཞེས་བྱ་བ་ནི་དམ་ཚིག་གི་མཆོག་གོ་།དམ་ཚིག་འདི་ཡིས་མཆོག་ཏུ་ནི། །རྡོ་རྗེ་སེམས་དཔའ་བདེ་བ་ཆེན། །མྱུར་དུ་ཡང་དག་དམ་པ་མཆོག་།མི་འགྱུར་མཆོག་ནི་གྲུབ་པར་མཛོད། དེ་ལྟར་གསང་བ་མཆོག་གི་ཚུལ་དག་ནི། །ཇི་བཞིན་ཆོ་ག་མཆོག་ཏུ་རྒྱས་པ་སྟེ། །མཆོག་ཆེན་དེ་ནི་རྟོག་པ་ཐམས་ཅད་ཀྱི། །ཁྱད་པར་དངོས་གྲུབ་ཐམས་ཅད་འགྲུབ་པར་འགྱུར། །དཔལ་མཆོག་དང་པོ་ལས། །རྟོག་པ་ཐམས་ཅད་ཀྱི་བསྒྲུབ་པའི་ཆོ་གའོ།། །།དེ་ནས་གྲུབ་ཆེན་ཐམས་ཅད་ཀྱི། །སྒྲུབ་པའི་མཆོག་ནི་བདེ་བ་ཆེ། །རྡོ་རྗེ་སེམས་དཔའ་ཕྱག་རྒྱ་ཆེ། །རྟོག་པ་ཀུན་མཆོག་གྲུབ་པའི་ཕྱིར། །སྣོད་མ་ཡིན་པའི་སེམས་ཅན་གང ། །སྡིག་པ་ཐམས་ཅད་བྱེད་རྣམས་ལ། །མཐོང་བ་ལ་སོགས་སེམས་ཅན་དོན། །སེམས་དཔའ་ཆེན་པོས་མཛད་པ་ཡིན། །མཐོང་མེད་ལོང་བ་དེ་རྣམས་ནི། །བསོད་ནམས་མེད་སོགས་རྟགས་ལྡན་ལ། །རྡོ་
246a
༄#། །རྗེ་སེམས་སོགས་སེམས་དཔའ་མཆོག་།མཐོང་བའི་ཐབས་ཀྱི་རྒྱུ་རྣམས་ནི། །རྡོ་རྗེ་སེམས་སོགས་སེམས་མཆོག་གི་།སྐུ་གསུང་ཐུགས་ཀྱི་རྡོ་རྗེ་ཡིས། །དམ་ཚིག་མཆོག་ནི་བཅིང་བ་སྟེ། །དམ་ཚིག་འདའ་བར་དཀའ་བའོ། །རྡོ་རྗེ་སེམས་སོགས་སེམས་དཔའ་ཡི། །གང་ཕྱིར་སྐུ་རྣམས་བརྟན་པ་ནི། །དེ་ཡི་ཕྱག་རྒྱར་གྲགས་པ་སྟེ། །དངོས་གྲུབ་ཀུན་ཕྱིར་དེ་དག་སྤྲུལ། །གང་དག་གཟུང་བ་ཙམ་གྱིས་ནི། །རྡོ་རྗེ་སེམས་དཔའ་ལ་སོགས་མཆོག་།མཐོང་ཞིང་མངོན་པར་མཐོང་བ་ཉིད། ། མཆོག་བསྡུས་ཉིད་དུ་གྱུར་པ་ཡིན། །ཕྱག་རྒྱ་བཅིངས་པ་ཙམ་གྱིས་ནི། །གང་ཕྱིར་བསྡུས་པར་འགྱུར་བ་སྟེ། །རྡོ་རྗེ་སེམས་སོགས་སེམས་དཔའ་རྣམས། །ཉམས་པས་འཇིགས་པས་འགྲུབ་མི་འགྱུར། །ཅི་ལྟར་རྒྱལ་པོ་རྣམས་ཀྱི་བཀའི། །རྟགས་ཀྱི་ཕྱག་རྒྱ་འདའ་དཀའ་བ། །ཕྱག་རྒྱ་གསང་བ་ཀུན་གྱིས་ཀྱང ། །འདའ་བར་ནུས་པ་མ་ཡིན་ནོ། །སངས་རྒྱས་ཉིད་དམ་རྡོ་རྗེ་འཛིན། །དེ་ལྟར་བསྐལ་བ་བྱེ་བས་ཀྱང ། །ཐོབ་པར་མི་འགྱུར་མྱུར་དུ་ནི། །ཅི་ལྟར་ཕྱག་རྒྱ་མཆོག་གཟུང་བའོ། །ཇི་ལྟར་འདུལ་ལྡན་འཇིག་རྟེན་ནི། །དེ་ལྟར་དངོས་གྲུབ་གསུངས་པ་ཡི། །དེ་ཡི་ཐབས་ནི་ཕྱག་རྒྱ་སྟེ། །དངོས་གྲུབ་ཐམས་ཅད་མཆོག་ཏུ་བྱེད། །གང་ཞིག་བཅིངས་པ་ཙམ་གྱིས་ནི། །འདུས་པ་བདེ་བ་ཆེན་པོ་
246b
རྣམས། །རྡོ་རྗེ་སེམས་སོགས་སྐད་ཅིག་གིས། །བྱིན་གྱིས་བརླབ་པ་བརྟན་པར་མཛད། །ཅེས་བྱ་བའོ། །དེ་ནས་འདི་གསུངས་ནས་བཅོམ་ལྡན་འདས་ཀྱིས་མཁས་ཤིང་མཆོག་ཏུ་ཕྲ་བ་དང།་ཟབ་པ་དང ། རྒྱ་ཆེ་བ། བསམ་གྱིས་མི་ཁྱབ་པ། །མཆོག་ཏུ་དག་པ། ཐོག་མ་དང་ཐ་མ་མེད་པ། །མི་ཟད་ཅིང་ཟད་པ་མེད་པ། །དོན་ཡོད་ཅིང་ཐོགས་པ་མེད་པ། ཤིན་ཏུ་མཆོག་ཏུ་དགའ་བ་མ་ལུས་པའི་བདེ་བ་ཆེན་པོ་དང ། ཡིད་བདེ་བ་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་ཀྱི་དངོས་གྲུབ་ཆེན་པོའི་དབང་ཕྱུག་ཆེན་པོ་མཆོག་ཏུ་མི་འགྱུར་བའི་དངོས་གྲུབ་ཐམས་ཅད་ཀྱི་མཆོག་རྡོ་རྗེ་དབབ་པ་རྣམས་ཀྱིས་རབ་ཏུ་སད་པར་མཛད་ནས། །བདེ་བ་ཆེན་པོའི་རྡོ་རྗེ་གསང་བའི་དོན་ཡོད་པའི་མཆོག་གི་གསང་བ་ཞེས་བྱ་བའི་མཚོན་ཆ་མཆོག་འདི་མཆོག་ཏུ་གསང་བའི་ཆོ་ག་རྒྱུད་ཕྱི་མའི་མཆོག་བྱིན་གྱིས་རློབ་པར་མཛད་པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གིས་བདག་ལ་བྱིན་གྱིས་བརླབ་པ་བསྒྲུབ་པ་གཅིག་པུའི་ཆོ་ག་བཤད་པར་བྱའོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཉིན་རེ་སྔོན་དུ་ལན་གཅིག་ཏུ། །ཕྱག་རྒྱ་ཆེ་དང་སྙིང་པོ་བཟླས། །ཀུན་གྱི་ཕྱག་རྒྱ་རབ་གྲུབ་པའི། །བདག་བྱིན་བརླབ་པ་གཅིག་པུས་འགྲུབ། །ཅེས་བྱ་བ་ནི་མཆོག་ཏུ་གྲུབ་པའོ། །དེ་ནས་མཆོག་ཏུ་གསང་བ་
247a
༄#། །བདག་ལ་བྱིན་གྱིས་བརླབ་པ་གཅིག་པུ་བསྒྲུབ་པའི་ཆོ་ག་མཆོག་ཏུ་གྲུབ་པ་ནི། །ལན་ཅིག་དམ་ཚིག་གསུམ་མཆོག་ཏུ། །གསང་བ་དམན་པའི་ཁང་བར་ནི། །རྡོ་རྗེ་ལ་སོགས་ཐོབ་བཟུང་ན། །རྡོ་རྗེ་ཅན་གྱིས་བྱིན་བརླབ་འགྱུར། །དེ་ནས་ཤིན་ཏུ་མཆོག་ཏུ་གསང་བའི་བདག་ལ་བྱིན་གྱིས་བརླབ་པ་གཅིག་པུ་བསྒྲུབ་པའི་ཆོ་ག་རྒྱས་པའི་ཁྱད་པར་ཤིན་ཏུ་མཆོག་ཏུ་གྲུབ་པ་ནི། །རྡོ་རྗེ་དྲིལ་བུ་ཀུན་བདག་ཉིད། །སྣ་ཚོགས་ཕྱག་རྒྱའི་སྐུར་བདག་ལྡན། །ཕྱག་རྒྱ་ཀུན་གྱི་རྣལ་འབྱོར་བདག་།རྡོ་རྗེ་སེམས་དཔའ་ཉིད་དུ་འགྱུར། །གྲུབ་པའི་ཆོ་ག་འདི་ཡིས་ནི། །རྡོ་རྗེ་སེམས་དཔའ་ཡང་དག་བསྡུས། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ཉིད་བྱིན་བརླབས། །དོན་ཡོད་རབ་ཏུ་བདག་བྱིན་བརླབས། །རང་བཞིན་གྱིས་ནི་ཐམས་ཅད་དུ། །མདོར་ན་ཕྱག་རྒྱ་ཐམས་ཅད་ནི། །རང་ཉིད་བཅིངས་ནས་གྲུབ་པར་འགྱུར། །བདག་བྱིན་བརླབས་དང་དོན་ཡོད་ཕྱིར། །མྱུར་དུ་འབད་མེད་དངོས་གྲུབ་རྣམས། །ལས་ཀྱི་ཚོགས་ཀྱིས་བསྒྲུབས་པ་ཡིས། །དངོས་གྲུབ་ཀུན་མྱུར་འགྲུབ་པར་འགྱུར། །འདི་ཡིས་ཅུང་ཟད་མི་འགྲུབ་མེད། །དངོས་གྲུབ་ལས་དང་དེ་བཞིན་བདེ། །ཐམས་ཅད་བྱིན་བརླབ་བསྒྲུབས་པ་ཡིས། །མི་འགྱུར་བ་ནི་ཀུན་གྲུབ་བྱེད། །ཅེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་
247b
གསུངས་སོ། །དཔལ་མཆོག་དང་པོ་ལས། །དངོས་གྲུབ་ཐམས་ཅད་བྱིན་གྱིས་བརླབ་པའི་ཆོ་ག་མཆོག་ཏུ་གསང་བ་ཞེས་བྱ་བའོ།། །།དེ་ནས་ཡང་མཆོག་ཏུ་གསང་བའི་རྣལ་འབྱོར་ཐམས་ཅད་ཀྱི་ཆོ་ག་རྗེས་སུ་བཤད་པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཐོག་མ་ཁོ་ནར་རེ་ཞིག་དོན་ཡོད་པའི་ཕྱིར་ནི་རྣལ་འབྱོར་གྱི་སྐད་ཀྱི་དབྱིངས་སོ། །འདི་ཡང་བརྩོན་པ་ཡིན་ནོ་ཞེས་བྱ་བ་ནི་སྐད་ཀྱི་དབྱིངས་ཀྱི་དོན་ཏོ། །གང་གིས་བརྩོན་པ་ཞེ་ན། །སྨྲས་པ། རང་གི་ལྷག་པའི་ལྷ་རྗེས་སུ་དྲན་པར་སྦྱོར་བས་ན་རྣལ་འབྱོར་རོ། །སླར་ཡང་གཞན་ནི་ཡང་དག་པར་བསྡུ་བ་དང ། ཡང་དག་པར་ཀུན་ཏུ་སྦྱོར་བ་དང ། ཡང་དག་པར་སྦྱོར་བ་ཞེས་བྱ་བ་ནི་རྣལ་འབྱོར་བརྗོད་པའི་རྣམ་གྲངས་སོ། །གང་ཡང་དག་པར་ཀུན་ཏུ་སྦྱོར་བ་ཡིན་ཞེ་ན། །རང་གི་ལྷག་པའི་ལྷ་རྗེས་སུ་དྲན་པའི་རྣལ་འབྱོར་རྗེས་སུ་བསྒྲུབས་པས་རང་གི་ལྷག་པའི་རྣལ་འབྱོར་བསྒྲུབ་པའི་སྦྱོར་བ་ཞེས་བྱའོ། །དེ་ལ་ཅི་ལྟར་ཐམས་ཅད་ཀྱི་རྣལ་འབྱོར་ཡིན་ཞེ་ན། །དམ་ཚིག་གི་རྣལ་འབྱོར་ནི་ཐམས་ཅད་ཀྱི་རྣལ་འབྱོར་ཞེས་བྱ་བ་ཡིན་ནོ། །དེ་བཞིན་གཤེགས་པ་ཀུན་གྱིས་ཀྱང ། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་སུ་བསྒྲགས། །ཡིད་ཀྱི་གཟུགས་ནི་བརྟན་ཕྱིར་རོ། །ཞེས་བྱ་བ་ནི་དམ་ཚིག་གི་དོན་ཏོ། །དེ་ལ་རྗེས་
248a
༄#། །སུ་བསྒྲུབ་པའི་རྣལ་འབྱོར་ནི་དམ་ཚིག་གི་རྣལ་འབྱོར་ཏེ་ཐམས་ཅད་ཀྱི་རྣལ་འབྱོར་ཞེས་བྱའོ། །འདི་ལྟ་སྟེ། །རྫས་མང་པོ་ཡང་དག་པར་སྦྱར་བས་སྦྱོར་བ་ཞེས་བྱ་བ་གྲུབ་པ་དེ་བཞིན་དུ། ཐམས་ཅད་ཀྱི་བདག་ཉིད་ཀྱི་ཕྱག་རྒྱའི་སྦྱོར་བས་ཡང་དག་པར་ཀུན་ཏུ་སྦྱོར་བས་ན་ཐམས་ཅད་ཀྱི་རྣལ་འབྱོར་ནི་དམ་ཚིག་གི་རྣལ་འབྱོར་རོ། །དེ་ལ་ཅི་ལྟར་ན་ཐམས་ཅད་ཀྱི་བདག་ཉིད་ཀྱི་རྣལ་འབྱོར་ཡིན་ཞེ་ན། །སངས་རྒྱས་ཀུན་བདག་ཡང་དག་སྦྱོར། །ཅི་ལྟར་དབྱིབས་དང་སྐུ་དང་ལྡན། །བདག་ཉིད་བདག་ཉིད་ཉིད་ལ་ནི། །བཀོད་ནས་རྗེས་སུ་བསྒྲུབ་པར་བྱ། །ཞེས་བྱ་བ་ནི་རང་གི་དམ་ཚིག་རྣལ་འབྱོར་ཐམས་ཅད་ཀྱི་རྣལ་འབྱོར་ཞེས་བྱའོ། །དེ་ལ་རྗེས་སུ་བསྒྲུབ་པ་ནི། །ལྷག་པའི་ལྷ་ནི་གང་གང་གིས། །ཕྱག་རྒྱ་གང་དང་གང་འཆིང་བ། །དེ་དང་དེ་ཡི་རྣལ་འབྱོར་གྱིས། །ཕྱག་རྒྱ་དེ་དང་དེར་སྦྱོར་བྱ། །ཞེས་བྱ་བའོ། །དེ་ནས་མཆོག་ཏུ་གནས་པའི་རབ་མཆོག་གི་རྗེས་སུ་སྒྲུབ་པའི་ཆོ་ག་རྒྱས་པ་མཆོག་ཏུ་ཤིན་ཏུ་གྲུབ་པ་ནི། །བདག་ནི་སངས་རྒྱས་ཐམས་ཅད་ཉིད། །གཟི་བརྗིད་ཅན་ནི་ཉིད་ཀྱང་ཡིན། །རང་གི་ལྷའི་རྣལ་འབྱོར་གྱིས། །དེ་ཕྱིར་བདག་ཉིད་བརྟག་པར་བྱ། །ཕྱག་རྒྱ་ཐམས་ཅད་ཀྱི་རྣལ་འབྱོར་ཆེན་པོ་མཆོག་ཏུ་གསང་བ་ཞེས་བྱའོ། །དེ་ནས་མཆོག་ཏུ་ཤིན་ཏུ་གསང་བའི་
248b
མཆོག་གི་རྗེས་སུ་སྒྲུབ་པའི་ཆོ་ག་རྒྱས་པའི་ཁྱད་པར་ཤིན་ཏུ་མཆོག་ཏུ་གྲུབ་པ་ནི། རང་ལྷའི་སྦྱོར་བ་ཇི་བཞིན་དུ། །སྣ་ཚོགས་ཕྱག་རྒྱའི་དབང་བསྐུར་ལྡན། །ཕྱག་རྒྱ་ཀུན་བདག་རྣལ་འབྱོར་བདག་།མི་འགྱུར་མཆོག་ཏུ་གྲུབ་པར་འགྱུར། །རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་མཆོག་གི་རྣལ་འབྱོར་ནི་ཡང་དག་པར་ཀུན་ཏུ་སྦྱོར་བ་ཞེས་བྱའོ། ། དེ་ནས་གཞན་ཡང་སླར་མཆོག་ཏུ་ཤིན་ཏུ་གསང་བ་མཆོག་གི་རྗེས་སུ་སྒྲུབ་པའི་ཆོ་ག་རྒྱས་པའི་ཁྱད་པར་མཆོག་ཏུ་གྲུབ་པ་ལས་ཀྱང་ཤིན་ཏུ་མཆོག་ཏུ་གྲུབ་པ་ཞེས་བྱ་བ་ནི། །རྡོ་རྗེ་སེམས་དཔར་བདག་སྦྱོར་བའི། །ཇི་བཞིན་དབྱིངས་དང་སྐུར་ལྡན་པ། །ཀུན་བདག་ཕྱག་རྒྱའི་རྣལ་འབྱོར་བདག་།མི་འགྱུར་མཆོག་ནི་གྲུབ་པར་འགྱུར། །འདི་ནི་སངས་རྒྱས་ཐམས་ཅད་ཀྱི། །དམ་ཚིག་གསལ་བའི་རྗེས་འགྲོ་བ། །རྣལ་འབྱོར་ཀུན་བདག་གྲུབ་པ་སྟེ། །གསལ་ཞིང་ཤིན་ཏུ་གྲུབ་མཆོག་ཡིན། །འདི་ཡིས་མི་འགྲུབ་ཅུང་ཟད་མེད། །དངོས་གྲུབ་ལས་དང་དེ་བཞིན་བདེ། །ལས་ཀྱི་ཚོགས་ཀྱི་དངོས་གྲུབ་དང ། །དངོས་གྲུབ་མ་ལུས་མྱུར་དུ་འགྲུབ། །ཅེས་བྱ་བ་ནི་གསང་བའི་དམ་ཚིག་གི་རྣལ་འབྱོར་ཏེ་ཤིན་ཏུ་མཆོག་ཏུ་རབ་ཏུ་གྲུབ་པའོ། །འདོད་པ་ཀུན་ལ་ལོངས་སྤྱོད་ཅིང ། །ཅི་འདོད་པར་ནི་བསྟེན་པ་ཡིས། །རྣལ་འབྱོར་དག་ནི་འདི་དག་གིས། །རང་གི་བདག་
249a
༄#། །ཉིད་རབ་མཆོད་བྱ། །ཞེས་བྱ་བ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཤིན་ཏུ་གསང་བ་བླ་ན་མེད་པ་ཐེག་པ་ཆེན་པོའི་དམ་ཚིག་ཆེན་པོའི་རྣལ་འབྱོར་དེ་བཞིན་གཤེགས་པ་ཐམས་ཅད་ཀྱི་དཔལ་གྱི་རང་གི་དམ་ཚིག་གི་རྣལ་འབྱོར་དགའ་བ་ཆེན་པོའི་དཔལ་རྡོ་རྗེ་དོན་ཡོད་པའི་དགའ་བའི་དམ་ཚིག་རྣལ་འབྱོར་ཐམས་ཅད་ཀྱི་བླ་ན་མེད་པའི་བཅུད་ཀྱིས་ལེན་གྱི་མཆོག་གི་དངོས་གྲུབ་ཀྱི་རྣལ་འབྱོར་གྱི་རྒྱལ་པོ་དེ་བཞིན་གཤེགས་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་འོ། ། རྡོ་རྗེ་སེམས་དཔའི་མཆོག་གི་ཚེ་དང ། ན་ཚོད་གཞོན་པ་དང ། ནད་མེད་པ་དང ། གཟུགས་དང ། ཁ་དོག་དང ། གཟི་བརྗིད་དང ། མཐུ་དང ། སྟོབས་དང ། སྤྲོ་བ་དང ། དངོས་གྲུབ་མཆོག་ཐམས་ཅད་དང ། དཔལ་དང ། སྐལ་བ་བཟང་པོ་དང ། དགའ་བ་ཆེན་པོ་དང ། ཤིན་ཏུ་བདེ་བ་དང ། ཡིད་བདེ་བ་ཐམས་ཅད་ལ་དམ་པ་མཆོག་ཏུ་གྲུབ་པའོ། ། ཅི་སྲིད་མ་ལུས་ཤིང་ལུས་པ་མེད་པ་ལ་མ་ལུས་བའི་དངོས་གྲུབ་ཆེན་པོ་དམ་པ་ཐམས་ཅད་ཀྱི་དབང་ཕྱུག་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་གྲུབ་པ་སྟེ། རྒྱས་བཏབ་པ་ཙམ་གྱིས་སྐད་ཅིག་གིས་རབ་ཏུ་གྲུབ་བ་ཡིན་ནོ། །དེའི་རྒྱུ་གང་གི་ཕྱིར་ཞེ་ན། འདི་ལྟ་སྟེ། སྦྱོད་པ་ཕྱག་རྒྱ་ལ་རག་
249b
ལུས། །ཕྱག་རྒྱ་རྣལ་འབྱོར་ལ་གནས་པ། །རྣལ་འབྱོར་ཁྱད་པར་གྱིས་བསྒྲུབ་བྱ། །རྣལ་འབྱོར་དམ་ཚིག་གིས་སྒྲུབ་བྱེད། །སེམས་ནི་སྟོང་པ་སྒྱུ་མར་མཚུངས། །ལུས་དང་བྲལ་བར་མ་གྲུབ་སྟེ། །ལུས་དེ་ཡང་ནི་རྩིག་པ་འདྲ། །བྱ་བ་མེད་ཅིང་སེམས་དང་བྲལ། །སེམས་ཀྱང་ལུས་དང་བྲལ་བ་དང ། །ལུས་ཀྱང་སེམས་དང་བྲལ་བ་ནི། །གྲུབ་པ་མ་ཡིན་དེ་བཞིན་འདི། ། ཕྱག་རྒྱ་རྣལ་འབྱོར་ཆོས་གར་བརྗོད། །ཅི་ལྟར་ལུས་ནི་སེམས་ཀྱིས་དང ། །སེམས་ཀྱང་ལུས་ཀྱིས་འགྲུབ་འགྱུར་བ། །དེ་བཞིན་ཕྱག་རྒྱ་རྣལ་འབྱོར་གྱིས། །རྣལ་འབྱོར་དམ་ཚིག་བསྒྲུབས་པས་སོ། །དེ་ལྟར་དམ་ཚིག་རྣལ་འབྱོར་དག་།ཕན་ཚུན་དུ་ནི་བསྒྲུབ་པའི་ཕྱིར། །ཕན་ཚུན་དུ་ནི་རྟག་བདག་ཉིད། །དེ་བཞིན་གཤེགས་པར་གྲུབ་པར་འགྱུར། །ཞེས་བྱ་བ་ནི་ཤིན་ཏུ་མཆོག་ཏུ་གསང་བ་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཅི་ལྟར་ཕྱག་རྒྱ་ཐམས་ཅད་དང་རྣལ་འབྱོར་དག་རྗེས་སུ་སྒྲུབ་པ་ཡིན་ཞེ་ན། །ཕྱག་རྒྱ་སྐུ་ནི་བརྟན་པའི་ཕྱིར། །དེ་ཡང་བདེ་བས་བརྟན་པར་འགྱུར། །སྡུག་བསྔལ་གྱིས་ནི་གཡོ་འགྱུར་རམ། །ཡང་ན་འཆི་བ་ཐོབ་པར་འགྱུར། །དེ་ནི་རྣལ་འབྱོར་སེམས་ལས་བྱུང ། །ཡིད་བདེ་བ་ཡིས་རབ་ཏུ་བསྒྲུབ། །ཡིད་མི་བདེ་བས་གཡོ་བ་འམ། །ཡང་ན་འགོག་པ་ཐོབ་པར་འགྱུར། །དེ་ཕྱིར་འབད་པ་ཐམས་ཅད་ཀྱིས། །ཕྱག་རྒྱ་རྣལ་འབྱོར་རྗེས་སྒྲུབ་བྱེད། །དཀའ་ཐུབ་
250a
༄#། །མེད་ཅིང་ངེས་པ་མེད། །བདེ་བ་དགའ་བས་བསྒྲུབ་པར་བྱ། །ཞེས་བྱ་བ་ཤིན་ཏུ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དབས་གསུངས་སོ། །དེ་ལ་དམ་ཚིག་ཐམས་ཅད་ཀྱི་རྣལ་འབྱོར་རྗེས་སུ་སྒྲུབ་པའི་བདེ་བ་དེ་གང་ཡིན་ཞེ་ན། འདོད་པ་ཀུན་ལ་ལོངས་སྤྱོད་ཅིང ། །ཅི་འདོད་པར་ནི་བསྟེན་པ་ཡིས། །རང་གི་ལྷ་ཡི་རྣལ་འབྱོར་གྱིས། །བདག་དང་གཞན་རྣམས་མཆོད་པར་གྱིས། །ཞེས་བྱ་བའོ། །དེ་བཞིན་གཤེགས་པ་ཐམས་ཅད་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོའི་ཡང་དག་པར་རྫོགས་པའི་བྱང་ཆུབ་ཐེག་པ་ཆེན་པོའི་ཡང་ཆེན་པོའི་རྣལ་འབྱོར་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་བདེ་བ་ཞེས་བྱ་བའོ། །དེ་ལ་དམ་ཚིག་ཐམས་ཅད་ཀྱི་རྣལ་འབྱོར་རྗེས་སུ་སྒྲུབ་པ་དེ་གང་ཡིན་ཞེ་ན། །དཀའ་ཐུབ་ཉེས་པ་མི་བཟད་པས། །སྡུག་བསྔལ་ལྡན་པས་མྱུར་དུ་བསྐམ། །སྡུག་བསྔལ་གྱིས་ནི་སེམས་གཡེང་འགྱུར། །རྣལ་འབྱོར་ལ་ནི་སྦྱོར་བ་མིན། །དེ་ཕྱིར་ཅི་འདོད་ལ་སྤྱོད་པ། །ཀུན་ཟ་དེ་བཞིན་ཐམས་ཅད་བྱེད། །ཅི་འདོད་བྱ་བ་ལ་སྤྱོད་པ། །ཅི་འདོད་པར་ནི་སྤྱོད་པ་སྤྱོད། །གང་དང་གང་དུ་འཆག་པ་དང ། ། དགོད་པ་འམ་ནི་སྨྲ་བ་འམ། །གང་ཡང་དེ་རུ་ཇི་བཞིན་ཏེ། །དཀྱིལ་འཁོར་དུ་ནི་མ་ཞུགས་སམ། །སྒྲིབ་པ་རྣམས་དང་ལྡན་པ་འམ། །རང་གི་ལྷ་ཡི་རྣལ་འབྱོར་བདག་།ཚིག་
250b
གིས་ཀྱང་ནི་དེ་བཞིན་འགྱུར། །དེ་ཉིད་རྣལ་འབྱོར་འདི་ཡིས་ནི། །ཐམས་ཅད་ཉིད་ནི་བསྒྲུབ་པར་བྱ། །ངན་སྤྱོད་སྡིག་པ་ཐམས་ཅད་ཀྱིས། །རྣམ་པ་ཀུན་ཏུ་གནོད་མི་འགྱུར། །འདོད་པ་ཆེན་པོ་ཀུན་བདག་ཉིད། །དབང་ཕྱུག་དམ་པ་འགྲུབ་པར་འགྱུར། །ཐམས་ཅད་རྡོ་རྗེ་འཛིན་རྒྱལ་པོ། །ཀུན་མཆོག་དབང་ཕྱུག་དམ་པ་འོ། །སངས་རྒྱས་བྱང་ཆུབ་སེམས་དཔའ་ཉིད། །རྣལ་འབྱོར་འདི་ཡིས་རྙེད་སླ་ན། །དངོས་གྲུབ་རྣམས་དང་ལས་མཆོག་གི་།ཚོགས་རྣམས་གཞན་ལྟ་སྨོས་ཅི་དགོས། །དོན་ཡོད་མཆོག་ཏུ་གྲུབ་པ་དང ། །ཕྱག་རྒྱ་ཐམས་ཅད་རྗེས་གྲུབ་བྱེད། །དཔལ་ལྡན་སྡུག་བསྔལ་ཀུན་འཕྲོག་པའི། །རྣལ་འབྱོར་འདི་ནི་མི་འགྱུར་མཆོག་།ཅེས་བྱ་བ་མཆོག་ཏུ་ཡིད་བདེ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་རྣལ་འབྱོར་ཐམས་ཅད་བཅིང་བ་ཅི་ལྟར་ཡིན་ཞེ་ན། །བསམ་པ་མེད་ཅིང་ཐམས་ཅད་སྨྲ། །དེ་བཞིན་ཐམས་ཅད་བསམས་ནས་ཀྱང ། །ཡེ་ཤེས་ཙམ་ལ་སྙོམས་འཇུག་པ། །རང་བཞིན་ཉིད་དུ་སྙོམས་པར་ཞུགས། །དེ་ལ་ཅི་ལྟར་རྣལ་འབྱོར་ཐམས་ཅད་བཅིང་བ་དང ། །ལུང་བསྟན་པ་ཡིན་ཞེ་ན། །རང་གི་ལྷ་ཡི་སྦྱོར་བ་ཡིས། །དངོས་གྲུབ་ཐམས་ཅད་རབ་སྦྱོར་བས། ། ཡེ་ཤེས་ཙམ་ལ་སྦྱོར་བ་འདིར། །རྣལ་འབྱོར་ཞེས་ནི་བརྗོད་པ་ཡིན། །ཞེས་བྱ་བ་ནི་ཕྱག་རྒྱ་ཐམས་ཅད་ཀྱི་རྣལ་འབྱོར་གྱི་ཆོ་ག་མཆོག་ཏུ་ཤིན་ཏུ་གསང་བ་ཞེས་བྱ་བའོ། །དེ་ནས་
251a
༄#། །བཅོམ་ལྡན་འདས་ཀྱིས་ཐམས་ཅད་རྣལ་འབྱོར་དང ། རྣལ་འབྱོར་ཆེན་པོ་དང ། ཤིན་ཏུ་རྣལ་འབྱོར་བཅིང་བ་དང ། ལུང་བསྟན་པ་གསུངས་ཏེ། རྡོ་རྗེ་སེམས་དཔའ་བདག་སྦྱོར་བས། །མཆོད་པ་ཀུན་གྱིས་རྗེས་སྦྱོར་བ། །རྣལ་འབྱོར་ཐམས་ཅད་རབ་སྦྱོར་འདི། །རྣལ་འབྱོར་ཞེས་ནི་བརྗོད་པར་བྱ། །དེ་ལ་འདི་ལྟར་བརྗོད་བྱ་སྟེ། །དེ་ཉིད་ཆེན་པོ་འདི་གྲུབ་སྟེ། །མཆོག་གི་བདག་ཉིད་འདི་ཉིད་ནི། །ཤིན་ཏུ་མཆོག་ཏུ་གསང་བ་སྟེ། །སོ་སོའི་སྐྱེ་བོ་ལ་བརྗོད་མིན། །རྡོ་རྗེ་སློབ་དཔོན་སློབ་མ་མཆོག་།དེ་ཉིད་དད་པའི་རྗེས་འབྲང་ལ། །ཐམས་ཅད་རྣལ་འབྱོར་ཆོ་ག་སྦྱོར། །གཞན་རྣམས་ལ་ནི་རིམས་ཀྱིས་སོ། །འདི་ལ་སྒྲུབ་མེད་ཅུང་ཟད་མེད། །དངོས་གྲུབ་ལས་དང་བདེ་བ་དང ། །ཐམས་ཅད་རྣལ་འབྱོར་རྗེས་བསྒྲུབས་པས། །མི་འགྱུར་ཐམས་ཅད་སྒྲུབ་པར་བྱེད། །རྣལ་འབྱོར་ཆོ་ག་གསལ་བ་འདི། །གཅིག་པུའང་གང་ལ་ཡོད་གྱུར་ན། །གཞན་གྱིས་མི་ཐུབ་མི་སོད་ཅིང ། ། བདུད་ལ་སོགས་པས་ནོན་མི་འགྱུར། །དེ་ལ་རྒྱལ་པོ་རྡོ་རྗེ་འཛིན། །རྡོ་རྗེ་སེམས་དཔའ་དེ་བཞིན་གཤེགས། །ཀུན་མཆོག་དངོས་གྲུབ་ཆེན་པོ་ཡི། །རྣལ་འབྱོར་དབང་ཕྱུག་རབ་གྲུབ་འགྱུར། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས། །ཤིན་ཏུ་གསང་བའི་རྣལ་འབྱོར་ཐམས་ཅད་ཀྱི་ཆོ་ག་མཆོག་ཏུ་གསང་
251b
བའོ། །དེ་ནས་རྟོག་པ་ཐམས་ཅད་དོན་ཡོད་ཅིང་ཐོགས་པ་མེད་པ་མཆོག་ཏུ་མཁས་ཤིང་ཕྲ་ལ་རྒྱ་ཆེ་ཞིང་ཟབ་པ། བསམ་གྱིས་མི་ཁྱབ་ཅིང་ཤིན་ཏུ་ཚད་མེད་པ། མ་ལུས་ཤིང་ལུས་པ་མེད་པའི་མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པ་མཆོག་ཏུ་གྲུབ་པའི་ཕྱག་རྒྱའི་རྒྱུད་བཤད་པར་བྱའོ། །ཞེས་བྱ་བ་ཕྱག་རྒྱ་ཐམས་ཅད་ཀྱི་ཡེ་ཤེས་ཀྱི་རྒྱུད་བཤད་པར་བྱའོ། །ཞེས་བྱ་བ་ཕྱག་རྒྱ་ཐམས་ཅད་ཀྱི་ཡེ་ཤེས་ཀྱི་རྒྱུད་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །གཡོན་པའི་ཕང་པར་དགོད་པ་ཡི། །ཞབས་ཀྱི་པདྨ་ཅི་བདེ་བར། །སེམས་དཔའི་སྐྱིལ་མོ་ཀྲུང་བཅིངས་ཏེ། །རང་ཉིད་ལུས་ནི་དྲང་པོར་འཛིན། །རྡོ་རྗེ་གསོར་བས་ཀུན་ལས་རྒྱལ། །མཆོག་གི་དངོས་གྲུབ་ཀུན་གྱི་ཕྱིར། །སྐུ་གསུང་ཐུགས་ཀྱི་རྡོ་རྗེ་ཡིས། །རྡོ་རྗེ་སེམས་དཔའ་ཉིད་དུ་འགྱུར། །འདིས་ནི་རྡོ་རྗེ་སེམས་དཔའ་འམ། །སངས་རྒྱས་ཉིད་ནི་གཟི་ཅན་ཉིད། །དངོས་གྲུབ་ཀུན་གྱི་དབང་ཕྱུག་ཡིན། །ཚེ་འདི་ཉིད་ལ་འགྲུབ་པར་འགྱུར། །ཞེས་བྱ་བ་ཐམས་ཅད་ཀྱི་བདག་ཉིད་བསྟན་པའི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཀྱིལ་འཁོར་དུ་ནི་མ་ཞུགས་ཀྱང ། །ཕྱག་རྒྱ་ཆེན་པོ་ཡོངས་བཟུང་པར། །བདེ་བར་གཤེགས་པ་རྣམས་ཀྱིས་ཀྱང ། །ཕྱག་རྒྱས་མཆོད་ཅིང་བཀུར་བར་འགྱུར། །གང་གིས་འདི་མཐོང་ཕྱག་བྱེད་དང ། །བསྟོད་པ་དང་ནི་མཆོད་པར་བྱེད། །སྟོན་པ་
252a
༄#། །མཐོང་དང་ཕྱག་བྱེད་དང ། །དེ་ཡིས་བདག་པོ་མཆོད་པར་འགྱུར། །དངོས་གྲུབ་ཀུན་གྱི་ཚོགས་ཆེན་པོའི། །བདེ་བ་ཕུན་ཚོགས་དབང་ཕྱུག་ཆེ། ། ཕྱག་རྒྱ་ཆེན་པོས་གྲུབ་འགྱུར་ཏེ། །རྡོ་རྗེ་སེམས་དཔའ་གཉིས་པ་འདྲ། །ལྷ་ལ་སོགས་པའི་དངོས་གྲུབ་ཀུན། །ལས་ཀུན་གྱིས་ནི་བདེ་བ་ཡང ། །ཕྱག་རྒྱ་ཆེན་པོའི་བྱིན་རླབས་ཀྱིས། །ཁྱད་པར་དུ་ནི་རབ་ཏུ་འཇུག་།དེ་ཡིས་མི་འགྲུབ་གང་ཡང་མེད། །དངོས་གྲུབ་ལས་དང་དེ་བཞིན་ཏེ། །ཕྱག་རྒྱ་ཆེན་པོའི་བྱིན་རླབས་པས། །བསྒྲུབས་པའི་སྟོབས་ཀྱིས་མཆོག་ཀུན་འབྱུང ། །དེ་ནས་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ལ་སོགས་པའི་སེམས་དཔའ་ཆེན་པོ་ཀུན་གྱི་དཀྱིལ་འཁོར་ཆེན་པོ་ཐམས་ཅད་ཀྱི་དམ་ཚིག་དང།་ཆོས་དང ། ལས་དང ། གདོན་མི་ཟ་བར་དགུག་པ་དང ། གཞུག་པ་དང ། འབེབས་པ་དང ། རྗེས་སུ་ཆགས་པ་དང ། དབང་དུ་བྱེད་པ་དང ། སྒྲུབ་པ་ཐམས་ཅད་དང ། མཆོག་གི་སྒྲུབ་པ་དང ། མཆོག་གི་སྒྲུབ་པ་ཐམས་ཅད་ཀྱི་དམ་ཚིག་ཆེན་པོའི་ཕྱག་རྒྱ་བདེ་བ་ཆེན་པོའི་རྡོ་རྗེའི་གསང་བའི་དམ་ཚིག་ཅེས་བྱ་བའོ། །དེ་བཅིང་བ་ནི་འདི་ཡིན་ཏེ། །སོར་མོ་ཐམས་ཅད་མཉམ་སྦྱོར་བས། །རྡོ་རྗེ་ཐལ་མོ་ཞེས་བརྗོད་དོ། །ཀུན་མཆོག་ནང་དུ་བསྡམས་པ་ཡིས། །རྡོ་རྗེ་བསྡམས་པ་བཤད་པ་ཡིན། །རྡོ་རྗེ་བསྡམས་པའི་
252b
ནང་དུ་ནི། །མཛུབ་མོ་མཐེ་བོང་ཡང་དག་སྦྱར། །གཡས་པའི་མཐེ་བོང་རྟགས་ཀྱིས་ནི། །རྩེ་མོ་བཀུག་ནས་བཙིར་བར་བྱ། །མདའ་ལྔ་བསྡུས་པ་བཅིངས་ནས་ནི། །དབུས་མ་བཅིངས་པའི་ནང་དུ་གནས། །མཐེ་བོང་མཐེའུ་ཆུང་རྡོ་རྗེར་བསྡམས། །དེ་ཡི་དང་པོའི་རྡོ་རྗེ་མཆོག་།རྡོ་རྗེ་བསྡམས་པ་དེ་བཅིངས་ནས། །དབུས་མའི་རྡོ་རྗེ་ལྕགས་ཀྱུ་གཉིས། །དགུག་པའི་ཚུལ་ནི་དེ་ཉིད་ཀྱིས། །རང་གི་སྙིང་གར་ལྕགས་ཀྱུས་འདེབས། །ལྕགས་ཀྱུའི་རྒྱལ་པོ་འདི་ཡིས་ནི། །རྡོ་རྗེ་སེམས་དཔའ་རྒྱལ་པོ་ཆེ། །དགའ་བའི་རྡོ་རྗེ་ལྕགས་ཀྱུས་དགུག་།སླར་ཡང་ཉེ་བའི་སྙིང་པོ་སྒྲུབ། །སྙིང་གར་བརྡེག་པ་དྲག་པོ་ནི། །རྗེས་སུ་ཆགས་པའི་མེ་ཡིས་གདུངས། །སྙིང་པོ་འཕྲོག་པས་དབང་གྱུར་དགྱེས། །མྱུར་དུ་བྱོན་ནས་གྲུབ་པར་འགྱུར། །ཞེས་བཅོམ་ལྡན་འདས་ཆགས་པ་ཆེན་པོ་དང ། བདེ་བ་ཆེན་པོ་རྡོ་རྗེ་ཆེན་པོ་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་བཞིན་དུ་དེ་བཞིན་གཤེགས་པ་ཐམས་ཅད་དང ། བྱང་ཆུབ་སེམས་དཔའི་རྡོ་རྗེ་ལ་སོགས་པ་དང ། བརྟན་པ་དང ། གཡོ་བའི་དངོས་པོ་ཐམས་ཅད་རྒྱས་བཏབ་པས་འོངས་ཏེ་མྱུར་དུ་འགྲུབ་པར་འགྱུར་རོ། །གལ་ཏེ་མ་འོངས་ནས་འཇིག་པར་འགྱུར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བའི་སྙིང་བོ་མཆོག་གི་ཕྱག་རྒྱའོ། །རྡོ་རྗེ་མཆོད་ཡོན་རྡོ་རྗེ་ཐལ་མོ་ཤིན་ཏུ་རབ་ཏུ་བརྐྱང་བའི་ཐལ་མོའོ། །དེ་ནས་དང་
253a
༄#། །པོའི་རྡོ་རྗེའི་ཕྱག་རྒྱ་དབུས་མའི་རྡོ་རྗེ་གཟུང་བའི་མེ་ཏོག་གི་ལྕུག་མས་བཟླ་བར་བྱའོ། །རྡོ་རྗེའི་ཆུ་དང ། རྡོ་རྗེའི་ཁུ་ཚུར་གྱིས་དབང་བསྐུར་ན་ཐམས་ཅད་ཀྱི་བདག་པོ་ཉིད་དང ། ཚེ་འཕེལ་བ་ལ་སོགས་པའི་དངོས་གྲུབ་ཐམས་ཅད་ལ་དགོས་པ་ཡིན་པས་བཏུང་བ་བྱས་ན་སྡུག་བསྔལ་ཐམས་ཅད་འཇོམས་པ་ཡིན་ནོ། །དེ་ནས་དང་པོའི་དཀྱིལ་འཁོར་དུ་འཇུག་པའི་ཕྱག་རྒྱ་ནི། །བ་དན་གསུམ་དང་ཁ་ཊྭཱཾ་ག་།བཅིངས་ན་ཅི་ནུས་པར་ནི་དགའ། །རྡོ་རྗེ་གར་བསྐོར་དགྲོལ་བ་ཡི། །ཡོངས་སུ་བསྐོར་བར་འཛིན་པ་ཆེ། ། ཀ་པུ་ཏ་ཡི་ཁ་སྦྱོར་ནི། །སྤྱི་བོར་བཞག་སྟེ་ཕབ་ནས་ཀྱང ། །སྒེག་བཅས་མཛུབ་མོ་མཐེའུ་ཆུང་སོགས། །བཀྲོལ་ནས་རྡོ་རྗེ་ཅན་ལ་དབུལ། །འདི་ཡིས་དཀྱིལ་འཁོར་མ་ཞུགས་ཀྱང། །རྡོ་རྗེ་སློབ་དཔོན་ཉིད་ཐོབ་འགྱུར། །རང་ཉིད་ཞུགས་པ་ཙམ་གྱིས་ནི། །མཆོད་པས་དོན་ཡོད་གྲུབ་ཕྱིར་རོ། །ཡོངས་སུ་རྫོགས་པ་མ་ཚང་བ། །ཡང་ན་སླར་ཡང་ཅི་སྙེད་པའི། ། མེ་ཏོག་ལ་སོགས་མཆོད་པ་ཡིས། །ཐུན་མོང་དངོས་གྲུབ་ཀུན་འགྲུབ་པའི། །བ་དན་གསུམ་མཆོག་ཁ་ཊྭཱཾ་ག་།སྒེག་བཅས་མཐའ་མ་ལ་སོགས་བཀྲོལ། །གློག་འགྱུ་མཆོག་ཏུ་བསྐོར་བ་ཡིས། །རྡོ་རྗེ་གར་ཞེས་དེ་བཤད་དོ། །སྒེག་མོ་དགའ་བའི་རྡོ་རྗེ་ནི། །རྡོ་རྗེ་གར་གྱི་མཆོད་པས་མཆོད། །སྒེག་པ་དང་བཅས་པའི་འཛུམ་པའི་མིག་གིས་ཕྱག་འཚལ་
253b
པས་རྡོ་རྗེ་སེམས་དཔའ་དང་དེ་བཞིན་གཤེགས་པ་ཐམས་ཅད་ཀྱང་རྗེས་སུ་ཆགས་པར་བྱས་ནས་ཕྱག་བྱེད་དུ་གཞུག་པའོ། །རྡོ་རྗེ་ཐལ་མོ་བསྐོར་བས་མ་ལུས་པར་བྱས་ནས་ཐམས་ཅད་ལ་བསྟོད་པའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་ལྕགས་ཀྱུ་མཆོག་ནི་རྡོ་རྗེ་བསྡམས་པའི་མཐེ་བོ་བསྟན་པའི་སྐྱིལ་མོ་ཀྲུང་མཛུབ་མོ་གཉིས་བཀུག་པའི་ལུས་ཅན་དབུས་མ་མཉམ་པའི་ཁ་འབུས་པའི་མཆོག་གི་ཡན་ལག་སྤྱི་བོར་བཞག་ལ་གཡས་ལོགས་སུ་ཐམས་ཅད་ལ་ཅོད་པན་བཅིངས་ལ་མདུན་ལོགས་རྡོ་རྗེ་ཁུ་ཚུར་གཉིས་ཀྱིས་མདུད་པའི་ཚུལ་བྱས་ཏེ། ཕྲེང་བ་བཅིངས་པ་བྱས་ལ་སྒེག་པ་དང་བཅས་པས་མཐེའུ་ཆུང་ལ་སོགས་པ་བཀྲོལ་ཏེ་ལོགས་གཉིས་ལ་དར་དབྱངས་འཆིང་བའི་ཚུལ་བྱས་ལ་མཉམ་པའི་ཐལ་མོ་རྒྱས་བཏབ་པས་རྡོ་རྗེ་སེམས་དཔའི་དབང་བསྐུར་བར་འགྱུར་བ་ཡིན་ནོ། །དེ་ནས་བདེ་བ་ཆེན་པོའི་རྡོ་རྗེའི་བདུད་རྩིའི་ཆུས་དབང་བསྐུར་བར་བྱ་སྟེ། ཐམས་ཅད་ཀྱི་རྡོ་རྗེ་སློབ་དཔོན་ཉིད་དང་རྡོ་རྗེ་འཆང་ཆེན་པོ་ཉིད་དུ་འགྱུར་བ་ཡིན་ནོ། །རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་བ་རྡོ་རྗེའི་འོད་ཟེར་འབར་བའི་རྩེ་མོ་ཅན་ཁ་དོག་དམར་པོ་སྦྱིན་པར་བྱའོ། །སློབ་མས་ཀྱང་སློབ་དཔོན་ལ་ཡོན་ཕུལ་ལ་དེ་ནས་མེ་ཏོག་ལ་སོགས་པའི་དབང་བསྐུར་བ་ཐམས་ཅད་ཀྱི་སློབ་དཔོན་ལས་རྡོ་རྗེ་ཐལ་མོ་བསྐོར་བའི་ཕྱག་འཚལ་བའི་ཕྱག་རྒྱས་བླང་བར་བྱ་སྟེ།
254a
༄#། །དེ་ལྟར་ན་དཀྱིལ་འཁོར་ཐམས་ཅད་ཀྱི་ཆོ་གའོ།། །།དེ་ནས་དངོས་གྲུབ་ཐམས་ཅད་ཀྱི་དབང་ཕྱུག་གྲུབ་པའི་རྡོ་རྗེ་འཆང་ཆེན་པོ་རྒྱལ་པོ་སྒྲུབ་པའི་ཕྱག་རྒྱའི་རྒྱུད་ནི། བདེ་བ་ཆེན་པོའི་གསང་བ་ཆེན་པོའི་ལྕགས་ཀྱུ་རང་གི་སྙིང་པོའི་སྔགས་ལན་གཅིག་བརྗོད་པས་རྡོ་རྗེ་སེམས་དཔའ་སྤྱན་དྲང་བའོ། །སེམས་དཔའི་སྐྱིལ་མོ་ཀྲུང་དང་ལྡན་པས་རྡོ་རྗེ་གར་གྱི་མཆོད་པ་དབུལ་བས་གློག་འགྱུ་བའི་གར་དང ། རྡོ་རྗེ་ཁུ་ཚུར་ཡོངས་སུ་གཟུང་བས་བསྙེམས་པ་དང་བཅས་པའི་རྡོ་རྗེ་མཚོན་ཆ་ལ་སོགས་པ་བསྒྲེང་བར་བྱས་ལ་སྒེག་མོ་དགའ་བའི་རྡོ་རྗེ་མས་ཕྱག་བྱའོ། །རྡོ་རྗེ་གླུས་ནི་གླུ་ལེན་ཅིང ། །བཟླས་པའི་དོན་ནི་ཅི་བདེ་བར། །རྡོ་རྗེ་གར་གྱི་མཆོད་པ་ཡིས། །ཡང་དག་མཆོད་ན་མྱུར་དུ་འགྲུབ། །དེ་ལས་དང་པོའི་རྡོ་རྗེའི་གསང་བའི་གླུ་འདི་དང་པོ་ལ་སོགས་པ་རྣམས་ཀྱིས་བླང་བར་བྱ་སྟེ། །ཐམས་ཅད་བདེ་བ་དམ་པ་རྗེས་སུ་ཆགས་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ཏུ་དགའ་བ་ཡིན། །བདེ་བ་ཆེན་པོ་བརྟན་ཞིང་འཐོར་བར་བདག་གྱུར་ཅིག་།སོ་སོར་རྟོགས་ནས་མྱུར་དུ་བསྒྲུབས་ཤིང་ཕྱག་འཚལ་ལོ། །རྡོ་རྗེའི་གླུ་ནི་འདི་ཉིད་ཀྱིས། །བདེ་ཆེན་ལ་ནི་ལན་ཅིག་བསྟོད། །རྗེས་སུ་ཆགས་ནས་ཤིན་ཏུ་དགྱེས། །བརྟན་པར་གྱུར་ནས་སྒྲུབ་པར་འགྱུར། །ཕྱག་རྒྱ་ཆེན་པོ་ལན་གཅིག་ཏུ། །སྙིང་པོས་
254b
བདག་བྱིན་བརླབ་པར་བྱའོ། །ཤིན་ཏུ་གཡོ་མེད་ལྕེ་རྩེ་དང ། །སོ་དང་མཆུ་གཉིས་ཡང་དག་ལྡན། །རྡོ་རྗེ་ངག་ནི་དབྱངས་དང་བྲལ། །རིགས་ཀུན་རབ་ཏུ་སྒྲུབ་པར་བྱེད། །རི་བི་ཏ་སོགས་ཧཱུཾ་གི་གླུ། །རྒྱན་ལྡན་ཅི་འདོད་ཅི་ནུས་པར། །དྲུག་ལྡན་ལ་སོགས་སྙན་པའི་གླུ། །ཅི་འདོད་གྲ་མ་རཱ་གའི་གླུ། །རབ་དགའ་རྡོ་རྗེ་མཆོག་གིས་ནི། །གན་དར་བ་ཡི་གླུ་མཆོག་བླང ། །ངག་འདི་ནི་མཆོག་ཏུ་གྲུབ་པ་ཡིན་ཏེ་བཟླས་པ་ཐམས་ཅད་ལ་དགོས་པ་ཇི་སྲིད་མངོན་པར་འདོད་པའི་བཟླས་པའོ། །བཟླས་པའི་དོན་ནི་ཉེ་བའི་སྙིང་པོར་ཤེས་པ་ཡིན་ཏེ། རྡོ་རྗེ་སེམས་དཔའི་སྒྲུབ་པའོ། །ཕྱག་རྒྱ་ཆེན་པོས་རང་ལ་བྱིན་གྱིས་བརླབས་ནས། རྡོ་རྗེའི་ལྟ་བས་དེ་བཞིན་དུ་བལྟ་ཞིང་རྡོ་རྗེ་བསྙེམས་པས་འཛིན་ཅིང་ཡི་གེ་ཧཱུཾ་གིས་གླུའི་བཟླས་པས་བཅོམ་ལྡན་འདས་པ་བསྒྲུབ་པར་བྱའོ། །ལན་གཅིག་བསྒྲུབ་པ་ནི་ཇི་ལྟ་བ་བཞིན་མངོན་པར་འདོད་པའི་བཟླས་པས་སོ། །དེ་ནས་དེའི་འོག་ཏུ་ཇི་ལྟར་མངོན་པར་བརྩོན་པ་དང ། ཇི་ལྟར་འདོད་པ་དང ། །ཇི་ལྟར་མངོན་པར་འདོད་པ་དང ། ཇི་ལྟར་བྱིན་གྱིས་བརླབས་ནས་ཡི་གེ་ཧཱུཾ་གི་གླུའི་བཟླས་པས་དགའ་བ་ཆེན་པོ་རྡོ་རྗེ་དོན་ཡོད་པའི་དགའ་བའི་ཤུགས་ཀྱི་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་ཇི་ལྟ་བ་བཞིན་དུ་འདོད་པ་དང ། ཇི་ལྟར་དགའ་བ་སྒྲུབ་པའོ། །དེ་ནས་ཕྱག་རྒྱ་ཆེན་པོ་ནི། །སྐུ་གསུང་ཐུགས་ཀྱི་རྡོ་རྗེ་ཡིས། །ཇི་བཞིན་གཟུགས་ཀྱི་རྗེས་
255a
༄#། །འབྲངས་པས། །མཚན་མའི་ཕྱག་རྒྱ་ཡང་དག་ལྡན། །སེམས་དཔའ་ཆེན་པོ་རང་ཉིད་འགྱུར། །དེ་ནས་དམ་ཚིག་གི་ཕྱག་རྒྱ་ནི་བདེ་བ་ཆེན་པོ་རྡོ་རྗེ་བཤད་པའོ། །འདི་ལས་རྡོ་རྗེ་མདའ་ལ་སོགས་པའི་འབྱུང་བ་ཡིན་ནོ། །འདི་ལྟ་སྟེ། །ཕྱི་རོལ་དུ་ཁ་བལྟས་པའི་མཛུབ་མོ་གཉིས་བཀུག་པ་ཙམ་ནི་རྡོ་རྗེའི་མདའ་འོ། །མཐེ་བོང་ཡོངས་སུ་བཅིང་བ་ནི་རྡོ་རྗེ་ཀི་ལི་ཀི་ལའོ། །མཐེ་བོང་གཉིས་ཁ་ཕྱེ་ནས་མཛུབ་མོ་གཉིས་ཀྱི་རྩེ་མོས་དབུས་མ་འདྲེན་པའི་སྲིན་ལག་དང ། །མཐེ་ཆུང་མཉམ་པའི་ཁ་ཕྱེ་བ་ནི་རྡོ་རྗེ་ཆུ་སྲིན་ནོ། ། བརླ་གཉིས་ལ་བསྐོར་ཞིང་གནས་པ་ནི་རྡོ་རྗེ་འདོད་པའི་དབང་ཕྱུག་མའོ། །རྡོ་རྗེ་ཐལ་མོ་རང་གི་སྙིང་གར་བསྐོར་བས་སྒེག་པ་དང་བཅས་པའི་མིག་གིས་བལྟ་ཞིང་མགོ་པོས་ཕྱག་བྱས་ལ་སྤྱི་བོར་བཞག་ལ་ཕབ་སྟེ་གྱེན་དུ་གཏོར་བ་དང ། འོག་ཏུ་བླུགས་པ་དང ། མཐེ་བོང་སྦྱར་ནས་བསྐོར་བ་དང ། རབ་ཏུ་བྱུག་པ་ནི་མེ་ཏོག་དང ། སྤོས་དང ། མར་མེ་དང ། དྲིལ་བུ་དང་ལྡན་པའི་རྡོ་རྗེ་མཆོད་པ་རྣམས་སུ་བརྗོད་པ་ཡིན་ནོ། །ཕྱིའི་མཚམས་རྣམས་སུ་རྡོ་རྗེ་ཐལ་མོ་སྙིང་གར་བསྐོར་བས་སྒེག་པའོ། །ཁ་ལ་ཡོངས་སུ་བསྐོར་ནས་སྤྱི་བོར་འཇོག་པའོ། །གཡོན་པའི་མཛུབ་མོ་བཀུག་པས་གཡོན་པ་གཡས་པས་བཀུག་པས་རྡོ་རྗེ་པི་ཝང་སྒྲེང་ཞིང་རྡོ་རྗེ་གླུས་མངོན་པར་བསྟོད་པའོ། །རྡོ་རྗེ་ཁུ་ཚུར་གཉིས་
255b
ཀྱིས་གར་བྱས་ལ་སྤྱི་བོར་རྡོ་རྗེ་ཐལ་མོ་བཅིང་བའོ། །རྡོ་རྗེ་བསྡམས་པ་ནང་དུ་བཅིངས་པའི་གཡས་པའི་མཛུབ་མོ་ལྕགས་ཀྱུའོ། །མཐེ་བོང་གཉིས་ཀྱིས་མདུད་པའོ། །མཛུབ་མོ་དང་མཐེ་བོང་གཉིས་ཀྱིས་མདུད་པའོ། །གཉིས་ཀྱིས་ནང་དུ་མཐེ་བོང་བཅིངས་པའོ། །དེ་ནས་གསང་བའི་དམ་ཚིག་རྣམས་ནི་བདེ་བ་ཆེན་པོ་རྡོ་རྗེ་དམ་ཚིག་གི་གསང་བའི་ལྕགས་ཀྱུ་སྟེ།་དེ་ལས་བྱུང་བ་ནི། །མཐེ་མཛུབ་རྩེ་སྦྱར་དབུས་མའི་རྩེ། །མིག་འབྲས་ལྟར་བྱས་འཛིན་པའོ། །དབུས་མ་རྡོ་རྗེའི་འོག་ཏུ་ནི། །མཐེ་བོང་གིས་མནན་བཙིར་བར་བྱ། །རྡོ་རྗེ་འདྲེན་པ་དང་འདྲ་བ། །སྲིན་ལག་མཐེའུ་ཆུང་ཁ་ཕྱེ་བ། །བསྐོར་ནས་པུས་མོར་བཞག་པ་སྟེ། །གཞན་རྣམས་ཐམས་ཅད་ཇི་བཞིན་བཤད། །དམ་ཚིག་གི་རྡོ་རྗེ་འབེབས་པ་མཛུབ་མོ་གཉིས་བཀུག་པ་རྡོ་རྗེ་ཁུ་ཚུར་རོ། །དེ་ལས་དམ་ཚིག་གི་ཕྱག་རྒྱ་ནི་རྡོ་རྗེ་དང་བཅས་པའི་ཁུ་ཚུར་གཉིས་ཀྱིས་སོ། །འདི་ལྟ་སྟེ། གཡོན་པ་བསྙེམས་པས་གཡས་པ་གཏད་པའི་ཚུལ་གྱིས་སྙིང་གར་གཟུང་བ་ནི་རྡོ་རྗེ་བསྙེམས་པའོ། །གཏོད་པ་དང་བཅས་པའི་སྙིང་གར་འཛིན་པའོ། །རྡོ་རྗེ་གཏོད་པའི་ཚུལ་ནི་ཀི་ལི་ཀི་ལའོ། །རྒྱལ་མཚན་སྒྲེང་བའོ། །བསྙེམས་པ་གཉིས་གཏོད་པ་ནི་འདོད་པ་ཐམས་ཅད་ཀྱི་རྡོ་རྗེ་དབང་ཕྱུག་མའོ། །མཚམས་རྣམས་སུ་རྡོ་རྗེ་གར་མ་བཤད་པའོ། །སྒེག་མོ་ལ་སོགས་པ་ཡང་དེ་བཞིན་ནོ། །རྡོ་རྗེ་སྒོ་བ་རྣམས་ཀྱི་ནི་གཡོན་པའི་
256a
༄#། །མདུད་པ་ལག་པ་གཡས་པ་སྟེང་དུ་བྱུང་བས་རྡོ་རྗེ་བཀའ་བསྒོ་བ་བྱེད་པའོ། །དེས་གཡས་པ་བསྟོད་པའོ། །མཛུབ་མོ་དང ། མཐེ་བོང་མཁྲིག་མར་བཟུང་སྟེ་མདུད་དེ་བཙིར་བའོ། །རང་གི་སྙིང་གར་དྲིལ་བུ་དཀྲོལ་བའི་ཚུལ་ལོ། །འདི་རྣམས་ཀྱིས་ཐམས་ཅད་དགུག་པ་དང ། བཅིང་བ་དང ། གཞུག་པ་དོན་ཡོད་པར་བསྒྲུབ་པར་བྱའོ་ཞེས་བྱ་བ་ཡང་གསུངས་སོ། །ཇི་བཞིན་གྲུབ་པའི་མཚན་མ་རྣམས། །དངོས་གྲུབ་ཆེན་པོ་མྱུར་དུ་སྩོལ། །དང་པོའི་ཕྱག་རྒྱ་དགེ་འདི་དག། །དཀྱིལ་འཁོར་མེད་པ་རྣམས་ཀྱང་འགྲུབ། །དེ་ནས་དངོས་གྲུབ་མེད་པ་སྒྲུབ་པའི་ཕྱག་རྒྱ་ཆེན་པོ་བཅིང་བ་ནི། །དང་པོའི་རྡོ་རྗེ་ཕྱག་རྒྱ་བཞིའི་ཕྲེང་བའི་ཚུལ་དུ་བསྒྲུབ་པར་བྱའོ། །གཞུག་པ་དང ། དགུག་པ་དང ། བརྟན་པ་དང ། ལས་རྣམས་ལྟ་བས་སོ། །རྟགས་དང ། ལྟེ་བ་དང ། སྙིང་ག་དང ། དབང་བསྐུར་བ་དང ། སྤྱི་བོར་གཞག་པར་བྱའོ། །དབུས་མའི་རྡོ་རྗེ་སྙིང་ག་དང ། རྟགས་དང ། ཁ་དང ། དབང་བསྐུར་བའི་གནས་སུ་གཞག་ནས་བཏུང་བར་བྱའོ། །མཛུབ་མོ་དང ། དབུས་མ་དང ། སྲིན་ལག་དང ། མཐེའུ་ཆུང་གི་རྡོ་རྗེའོ། །དཔུང་པ་དང ། སྙིང་ག་དང ། ལྕེ་དང ། སྤྱི་བོར་གཏོད་པའོ། །ནམ་མཁར་བསྐྱེད་པ་དང ། མཛུབ་མོ་དང ། སྲིན་ལག་འབར་བ་དང ། སྙིང་གར་དགའ་བ་དང ། རང་གི་ལུས་ལ་བསྐོར་བའོ། །ཐམས་ཅད་
256b
བསྐོར་ནས་དབང་པོ་ཀུན་ལ་གཞག་པར་བྱའོ། །དབུས་མའི་རྡོ་རྗེ་དབང་པོ་ཐམས་ཅད་ལ་རེག་པའོ། །རང་གི་ལས་བྱས་པས་སོ། །དབང་བསྐུར་ནས་དེ་བཞིན་དུ་དངོས་གྲུབ་བྱེད་པའོ། ། ས་ལ་བཞག་ནས་བྱའོ། །ཐམས་ཅད་དུ་བསྐོར་ནས་ཡིད་ཀྱིས་སྤྲུལ་པར་བྱའོ། །འཛུམ་པ་མེད་པའི་ཁྲོ་ཞིང་འབར་ལ་གཡོ་བ་ནི་ལྟ་བས་བལྟ་བའོ། །བཟའ་བ་དང ། བཏུང་བ་དང ། རྐེད་པ་བསྐྱོད་པ་དང ། སྤྱི་བོར་བཀའ་བསྒོ་བའོ། །ཐམས་ཅད་དུ་བསྐོར་ཞིང་ཐམས་ཅད་དུ་དྲན་པས་སོ། །མཐེའུ་ཆུང་དང ། མཐེའུ་བོང་དང ། དབུས་མའི་རྡོ་རྗེ་བཞི་སྙིང་གར་བྱའོ། ། མཛུབ་མོ་གཉིས་ཀྱིས་ཡི་གེ་ཧཱུཾ་དང་བཅས་པས་དགུག་པར་བྱའོ། །དབུས་མའི་རྡོ་རྗེས་དཔྲལ་བར་འཕྲེད་ལ་མིག་བྱེད་པས་སོ། །རང་གི་སྙིང་གར་བཅིངས་ལ་གཡོ་བ་མེད་ཅིང་མ་བཙུམས་པའི་ལྟ་བས་ས་འོག་ཏུ་བལྟ་ཞིང་ཧ་ཧཱུཾ་དྷཾ་ཞེས་བརྗོད་པར་བྱའོ། །གནོད་སྦྱིན་ལ་སོགས་པའི་གདོང་པ་བྲིས་ནས་རྡོ་རྗེ་དགུག་པར་བྱའོ། །འོག་གི་ཕྱོགས་སུ་བཞག་ན་རྟག་པར་འགྱུར་རོ། །ཁའི་དབུས་སུ་བཞག་ན་རབ་ཏུ་ཞུགས་པར་འགྱུར་རོ། །ཕྱག་བྱས་ན་མཆོད་པར་འགྱུར་རོ། །སྙིང་གས་གྲུབ་པར་འགྱུར་རོ། །ཅིག་ཆར་དུ་སོར་མོ་ཐམས་ཅད་དྲལ་བ་ནི་ཡིད་ཀྱི་ལས་སོ། །བཅིངས་ནས་ཛཿ ་ཧཱུཾ་བཾ་ཧོཿ ། དབུས་མའི་ཕྱི་རོལ་ཏུ་བཅིངས་པས་སྤྱི་བོ་དང ། སྙིང་ག་དང ། ཁ་དང ། ཕྱོགས་རྣམས་བསྐོར་བའོ། །སྙིང་གར་བཞག་
257a
༄#། །ནས་རང་གི་རྡོ་རྗེར་བསྒོམ་པའོ། །རང་ཉིད་བྱང་ཆུབ་སེམས་དཔར་བསྒོམ་པའོ། །རང་ཉི་དེ་བཞིན་གཤེགས་པ་རྗེས་སུ་དྲན་པའོ། །རང་ཉིད་རྡོ་རྗེ་འཆང་ཆེན་པོར་རྗེས་སུ་དྲན་པའོ། །དེ་ནས་ལས་ཀྱི་ཚོགས་ཐམས་ཅད་བསྒྲུབ་པའི་ཕྱག་རྒྱའི་རྒྱུད་ནི། རྡོ་རྗེ་གར་ལས་བྱུང་བའི་ཕྱག་རྒྱ་རྡོ་རྗེ་འཆང་བདག་དང་དེ་བཞིན་གཤེགས་པ་ཐམས་ཅད་ཀྱིས་ཀྱང་དོན་ཡོད་ཅིང་ཐོགས་པ་མེད་པའོ། །རྡོ་རྗེ་སྐུ་མཆོག་གི་གཙུག་ཏོར་གྱི་ལས་ནི་རྡོ་རྗེ་བསྡམས་པ་བཙིར་བ་དང ། དབུས་མའི་ནོར་བུ་དང ། བསྐོར་བ་དང ། སོར་མོ་ཐམས་ཅད་ཀྱི་རྡོ་རྗེ་དང ། སོར་མོ་ལྷག་མའི་འོད་ཟེར་གྱི་འཁོར་ལོའོ། །ཁྲོ་བོ་རྡོ་རྗེ་ཁུ་ཚུར་གཉིས་ཀྱི་ཕྱོགས་ཀྱི་འཁོར་ལོ་བསྐོར་ཞིང་བསྐོར་བའོ། །ཁར་བསྐོར་བའོ། །སྙིང་གར་ཕབ་ཅིང་འབར་བར་བྱེད་པས་ཕྱོགས་ཐམས་ཅད་དུ་རྡོ་རྗེ་འབར་བའི་ར་བ་སྟེ། ཁྲོ་བོ་ཆེན་པོ་འབར་བའི་རྡོ་རྗེ་དག་གིས་ཀྱང་འཇུག་པར་ནུས་སོ། །དམ་ཚིག་བརྗོད་པར་བྱའོ། །བསྒྲུབ་པ་ལ་བརྩམ་མོ། །རྡོ་རྗེ་སེམས་དཔའི་རྡོ་རྗེ་ལྟ་བུའི་འཕྲོག་པ་རྣམས་ཀྱིས་གསུམ་དང ། བཞི་དང ། ཕྱིར་ལྡོག་པ་དང ། རྟག་ཏུ་འབྱུང་བ་དང ། དཔག་ཏུ་མེད་པ་ནི་བསྐོར་ཞིང་བཙུམ་པ་མེད་པའི་མིག་གིས་རབ་ཏུ་ཞི་བའོ། །རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་གི་ལྕགས་ཀྱུའི་མདུད་པ་དང ། མཛུབ་མོ་གཉིས་མཉམ་པའི་ལས་ནི་སྙིང་གར་རབ་ཏུ་བཞག་པའོ། །བྱ་བ་པའོ། །
257b
མཛུབ་མོའི་རྩེ་མོས་གནན་པར་བྱའོ། །དགོད་པས་རབ་ཏུ་བཞག་པའོ། །ཡོངས་སུ་བསྐོར་ནས་དེ་བཞིན་དུ་མཛོད་སྤུར་བཞག་པར་བྱའོ། །ཁ་ཊྭཾ་ག་གཉིས་ཀྱིས་རྡོ་རྗེ་བཅིངས་པས་མཐེའུ་ཆུང་རྡོ་རྗེའི་ལེགས་པར་བྱེད་པའི་ཚུལ་གྱིས་ཉེ་བར་འཕེལ་བའོ། །བསྡུས་པའི་དོན་གྱིས་ཚུལ་ལོ། །རྡོ་རྗེས་བཏེག་པའོ། །ཐལ་མོས་འཕྲོག་པའོ། །རྡོ་རྗེས་བརྡུང་བའོ། །རྡོ་རྗེ་བསྡམས་པའི་མཛུབ་མོ་གཉིས་བཀུག་ཅིང་བསྙམས་ལ་ནང་དུ་བཞག་སྟེ་མཐེའུ་ཆུང་གཉིས་ཁ་ཕྱེ་བའི་མཆེ་བ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །དེས་མཐིལ་དཔྲལ་བར་བརྡབ་པའོ། །མཛུབ་མོའི་སེན་མོ་བྲུད་པའོ། །དབུས་མའི་རྡོ་རྗེ་བརྟན་པའོ། །བྱབས་ནས་མྱུར་དུ་ཕྱག་རྒྱ་བཀྲོལ་བའོ། །སོར་མོ་སྦྱར་ནས་རྡོ་རྗེ་གཙུག་ཏོར་རོ། །བ་དན་གསུམ་པ་གཉིས་ཁ་གྱེན་དུ་ཁ་བལྟས་པ་དང ། འོག་ཏུ་ཁ་ལྟ་བའི་མཛུབ་མོ་དང ། དབུས་མའི་མདུད་པ་བྱས་ལ་མཛུབ་མོ་དང ། དབུས་མ་དེ་དག་འདུས་པའོ། །རྡོ་རྗེ་ཧཱུཾ་མཛད་ཀྱི་ལས་སོ། །མདུད་པ་བཙིར་བའོ། །ཅིག་ཆར་དུ་ཕྱག་རྒྱ་བཀྲོལ་བའོ། །བཙིར་ནས་དྲལ་བའོ། །དབུས་མས་བསྣུན་ཏེ་ནམ་མཁའ་ལས་ལྟུང་བའི་ཚུལ་ལོ། །སློང་བའི་ཚུལ་ཡང་ངོ ། །བ་དན་གསུམ་པ་གཉིས་མཉམ་པའི་མཐེའུ་ཆུང་རྩེ་མོའི་རྡོ་རྗེ་དབུས་མ་མདུད་པས་ཡོངས་སུ་བསྐོར་བ་ལ་དབང་བསྐུར་བའི་གནས་སུ་མཛུབ་མོའི་རྩེ་མོ་བཞག་པའོ། །དབྱེ་བ་ནི་ཡི་གེ་ཧཱུཾ་གིས་སོ། །གདོན་ལས་དགྲོལ་བ་ནི་ཡི་གེ་ཧཱུཾ་གིས་སོ། །འཆི་
258a
༄#། །བ་སློང་བ་ནི་ཡི་གེ་ཨ་ཡིས་སོ། །ཚེ་འཕེལ་བ་ནི་ཡི་གེ་ཧཱུཾ་གི་གླུས་སོ། །ཤིན་ཏུ་བསྲུང་བ་ནི་ཡི་གེ་ཧཾ་གི་ཆོས་ཀྱི་ངག་གིས་སོ། །པདྨ་ཆེན་པོ་བཅིངས་ནས་ཇི་སྲིད་འདོད་པའི་བཟླས་པ་འམ། ཡང་ན་པདྨའི་ཁུ་ཚུར་གཡོན་པ་བསྙེམས་པས་མར་དང ། ཏིལ་མར་དང ། ཏིལ་དང ། འབྲས་དང ། ཁམས་ཀྱི་ཕྱེ་མ་སྦྱིན་སྲེག་མཆོག་ཏུ་གྲུབ་པ་སྟེ། ཨོཾ་ནི་བ་ར་ཎ་སརྦ་དྷརྨ་ཏཱ་བཛྲ་ཧ་ནི་ཧཾ། ཨོཾ་བི་ར་ཛོ་བི་ག་ཏ། སརྦདྷརྨ་བཛྲ་ཧ་རི་ཎི་ཧཾ། ཨོཾ་སཾ་ནོ་པ་སརྦདྷ་པྲ་ཏི་བི་དྷ་བཛ་ཧ་རི་ཎི་ཧཾ། །ོཾ་ནི་རི་མི་ཏ་སརྦདྷ་རྨ་ཏཱ་བཛ་ཧ་ར་ཎི་ཧཾ། ཨོཾ་སཝ་བྷཱ་ཝ་བྷ་ས་ར་སརྦ་དྷ་རྨ་ཧ་ར་ཎི་ཧཾ། །ཀ་ཏ་གཉིས་ཀྱི་རྡོ་རྗེ་བསྡམས་པ་ལེགས་པར་བྱེད་པའི་ཚུལ་གྱིས་སེན་མོ་བྲུད་པའོ། །འོག་དང་སྟེང་དུ་རྡོ་རྗེ་བདམས་པས་བསྐྱོད་པའོ། །རྡོ་རྗེ་བསྡམས་པའི་མཐེའུ་ཆུང་ལ་སོགས་པ་བཀྲོལ་བས་གར་རོ། །རྡོ་རྗེ་བསྡམས་པའི་མཛུབ་མོས་ངག་འབྱིན་པའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་ལྕགས་ཀྱུས་བརྟན་པ་དང ། གཡོ་བའི་དངོས་པོ་ཐམས་ཅད་ལ་རྡོ་རྗེ་སེམས་དཔའ་ལ་སོགས་པ་རྣམས་གཟུགས་བརྙན་གྱི་ཚུལ་གྱིས་གསལ་བར་སྟོན་པ་དང ། སྒྲ་བརྙན་གྱི་ཚུལ་གྱིས་སེམས་ཅན་ཐམས་ཅད་དང་བདག་ཉིད་ལ་བདེན་པ་ཐོས་སུ་གཞུག་པའོ། །རྡོ་རྗེ་ཁྲོ་བོའི་ཁུ་ཚུར་གཉིས་བཅེངས་ནས་རྡོ་རྗེ་ལྟ་བའི་ལས་སོ། །འདི་ལྟ་སྟེ། འཛུམ་མེད་པའི་ལྟ་བ་
258b
སྦྱིན་པའོ། །མིག་འབྲས་སྟེང་དུ་ཡོངས་སུ་བསྐོར་བའོ། །བཙུམ་པས་མྱུར་དུ་ལྟུང་བའོ། །འོག་ནས་བླང་བའོ། །བྱབ་པ་ཡང་ངོ ། །རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་བཀུག་ཅིང་ཡོངས་སུ་བསྐོར་ཏེ་མཆེ་བ་རྣམ་པར་གཙིགས་པའི་འཇིགས་པའི་གདོང་གི་གཡོ་བ་མེད་པ་ཉིད་དོ། །ཡན་ལག་ཐམས་ཅད་གློད་པར་འགྱུར་བའོ། །རབ་ཏུ་གཉིད་ལོག་ཅིང་ཁ་གདངས་པའོ། །རང་གི་སྙིང་གར་བརྡེག་པའོ། །མྱུར་དུ་མྱང་བའོ། །རྡོ་རྗེ་ཁུ་ཚུར་གཉིས་བཅིངས་ནས་ཁ་གདངས་ཏེ་འཇིགས་པར་བྱེད་པའི་ཁ་དང་ལྡན་པས་སྐྲ་གྱེན་དུ་བརྫེས་པའི་སྤྱི་བོས་འོག་ནས་གྱེན་དུ་བསླང་བར་བྱ་བའི་ལས་ནི་ཡི་གེ་བྷོ་དང ། རྡོ་རྗེ་ཁུ་ཚུར་མནན་པ་དང ། ཡི་གེ་ཧཱུཾ་དང་བཅས་པའི་ཡན་ལག་གི་མཆོག་གི་སྡིགས་མཛུབ་དང ། རང་ཉིད་མྱུར་དུ་ཁྲོས་པས་ལྟུང་བའོ། །རྡོ་རྗེ་གནོད་སྦྱིན་གྱི་ཕྱག་རྒྱ་སྲིན་ལག་དང ། མཐེའུ་ཆུང་མཉམ་པ་ཁ་ཕྱེ་བའི་བ་དན་རྒྱལ་མཚན་མཆོག་གི་དཔུང་རྒྱན་གྱི་ལས་ནི་ཕྱག་འཚལ་བ་དང ། དགོད་པ་དང ། ལྕེ་བསྐྱོད་པ་དང ། དཔུང་བ་གཉིས་བསྙེམས་པས་བསྟོད་པ་དང ། རྒྱལ་མཚན་བསྒྲེང་བའོ། །སེམས་དཔའི་སྐྱིལ་མོ་ཀྲུང་གིས་གནས་ཤིང་རྡོ་རྗེ་གསར་བ་ཉིད་ཀྱིས་ནི་ནམ་མཁའ་དབུགས་གཏོར་བ་དང ། ཀུན་ཏུ་གཡོ་ཞིང་བཙུམས་པའི་ལྟ་བས་ཆར་འབེབས་པའི་ཚུལ་དང ། ཁྲོ་བོ་རྡོ་རྗེ་ཉི་མ་མེ་ལྟར་འབར་བའི་བཟླས་པ་དང ། ལྟ་བ་དཔྲོག་པ་དང ། དྲང་བས་ཡན་ལག་བསྐོར་
259a
༄#། །ཞིང་ཐམས་ཅད་རབ་ཏུ་འབར་བར་བྱེད་པ་འབེབས་པའོ། །རྡོ་རྗེ་བསྡམས་པའི་རྡོ་རྗེ་དྲན་མའོ། །རྡོ་རྗེ་བསྡམས་པའི་གཡོན་པའི་མཛུབ་མོ་བཀུག་པའི་ཤིང་བུ་གཡས་པའི་མཛུབ་མོས་བསྡུས་པ་ནི་རྡོ་རྗེ་པི་ཝང་ངོ ། །རྡོ་རྗེ་བསྡམས་པའི་ལག་མཐིལ་དག་མཉེ་བའོ། །ཁ་འབུས་མཉམ་པའི་དབུས་མ་ལྕེའོ། །རབ་ཏུ་དགའ་བའི་རྡོ་རྗེའི་ཕྱག་རྒྱའོ། །བདེ་བ་ཆེན་པོ་རྡོ་རྗེ་མཆོད་པའི་ལས་ནི་དང་པོའི་གླུའི་བཟླས་པ་ཇི་སྲིད་མངོན་པར་འདོད་པའོ། །གཡོ་བ་མེད་ཅིང་དགོད་པ་དང ། དགུག་པ་ནི་རབ་ཏུ་དགའ་བའི་རྡོ་རྗེའི་ལྟ་བའི་ལྕགས་ཀྱུ་མས་སོ། །རང་གི་མ་མཆུ་སོ་དག་གིས་ནང་དུ་ཡོངས་སུ་བཟུང་བའོ། །རང་གི་དབང་པོ་བསྐྱོད་པའོ། །རབ་ཏུ་དགའ་བའི་རྡོ་རྗེའི་གར་གྱིས་ཡིད་ཀྱིས་འདོད་པའི་བཀའ་བསྒོ་བ་ཡང་སྟེ། བཅོམ་ལྡན་འདས་རྡོ་རྗེ་སེམས་དཔའ་ལ་སྦྱོར་བ་དེས་ཀྱང་འདའ་བར་མི་ནུས་ན་བརྟན་པ་དང ། གཡོ་བའི་དངོས་པོ་གཞན་ལྟ་སྨོས་ཀྱང་ཅི་དགོས། རྡོ་རྗེ་ཐལ་མོའི་མཐེ་བོ་གཉིས་སེམས་དཔའི་སྐྱིལ་མོ་ཀྲུང་གི་མཛུབ་མོ་སྒྲེང་བ་ནི་བཅོམ་ལྡན་འདས་རྡོ་རྗེ་སེམས་དཔའི་རྡོ་རྗེའི་སྐུ་མཆོག་སྟེ། འདི་སྐད་ཅིག་གཅིག་ཙམ་བཟུང་བས་ཤིན་ཏུ་བྱིན་གྱིས་བརླབས་ནས་བཅོམ་ལྡན་འདས་བཟུང་ཞིང་མཆོད་ནས་སྒྲུབ་པར་འགྱུར་བ་དང ། དངོས་གྲུབ་ཐམས་ཅད་ལ་གྲུབ་པ་དང ། དགོས་པ་ཡིན་ནོ། །སྤྱི་བོར་
259b
བཞག་སྟེང་ནས་གཡས་སུ་བསྐོར་བར་བྱའོ། །ས་ལ་བཞག་ནས་ཁྲོ་གཉེར་གྱིས་གྱེན་དུ་དྲང་བར་བྱའོ། །གནོད་སྦྱིན་གྱི་གཟུགས་བརྙན་བྲིས་ལ་དེའི་སྙིང་གར་གཞག་པར་བྱས་ནས་མངག་གཞུག་ཏུ་འགྱུར་རོ། །དབང་ཕྱུག་ཆེན་པོའི་གནས་སུ་ཁྲོ་ཞིང་བཟླས་པར་བྱའོ། །མ་མོའི་གནས་སུ་བཅིང་བ་ལ་ཡི་གེ་བྷྱོ་སྦྱར་བར་བྱ་སྟེ། མ་མོ་འཁོར་དང་བཅས་པ་ཐམས་ཅད་ཀྱིས་བསྙེན་བཀུར་བ་དང ། རོལ་མོ་ལ་སོགས་པའི་བཀའ་བསྒོ་བ་ཐམས་ཅད་བྱེད་པར་འགྱུར་རོ། །རྡོ་རྗེ་གསོར་བའི་ཕྱག་རྒྱས་ཁྲོ་བ་དང་བཅས་པའི་བཞད་པའི་གདོང་གིས་ལས་བལྟས་ཏེ་བསྒྲུབ་པ་བྱའོ། །དབང་ཕྱུག་ཆེན་པོ་རྐང་བ་གཡོན་པས་མནན་ལ་ཡི་གེ་ཧཱུཾ་སྦྱར་བར་བྱའོ། །འདོད་པའི་དབང་ཕྱུག་རྡོ་རྗེའི་མདས་བསྣུན་ཏེ། དེ་ནས་འོག་ཏུ་ཁ་བལྟ་བར་བཞག་སྟེ་གསོར་བར་བྱེད་པའོ། །རྡོ་རྗེ་གསང་བའི་མཆོད་པས་བདེ་བ་ཆེན་པོའི་དམ་ཚིག་གཅེས་བྱ་བའི་བཤད་པའོ། །ཐམས་ཅད་རྡོ་རྗེར་བྱེད་པ་ནི་རྡོ་རྗེ་ཁུ་ཚུར་གཉིས་ཀྱིས་གོ་ཆ་བཅིང་བར་བྱས་ལ་སྤྱི་བོ་དང ། དབང་བསྐུར་བའི་གནས་སུ་གཉིས་གཉིས་བཞག་ལ་ལོགས་གཉིས་ལ་གཉིས་དང ། ཕྲེང་བའི་ཚུལ་གྱིས་དེ་བཞིན་དུ་དར་དཔྱངས་བཅིངས་\Lིནེ་མིསསིང?\་
260a
༄#། །པས་སོ། །གཡོན་དུ་རྡོ་རྗེ་མདའ་འཕང་བའོ། །རྡོ་རྗེ་བསྙེམས་མའོ། །ཕྱག་རྒྱ་ཆེན་པོ་ཡང་ངོ ། །དཔལ་མཆོག་དང་པོ་ལས། ཕྱག་རྒྱ་ཐམས་ཅད་ཀྱི་རྒྱུད་ཀྱི་ཆོ་ག་རྒྱས་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་རྒྱུད་ནི་སེམས་དཔའི་རྡོ་རྗེ་མའོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་རོ། །རྡོ་རྗེ་རིན་ཆེན་གྱི་དབང་བསྐུར་བ་བྱས་ན་རྡོ་རྗེ་རྩེ་ལྔ་པ་འོད་ཟེར་དང་བཅས་པ་སྦྱིན་པར་བྱའོ། །མཆོད་པ་ནི་མཉམ་པའི་ཐལ་མོ་ཇི་ལྟ་བ་བཞིན་དུ་གྱེན་དུ་གཏོར་བ་ལ་སོགས་པ་རྣམས་ཀྱིས་སོ། །དེ་བཞིན་གཤེགས་པའི་ཁུ་ཚུར་གཉིས་བཅིང་པ་ནི་གཡོན་པའི་མཛུབ་མོ་ཕྱིར་རོལ་ཏུ་ཁ་བལྟས་པ་གཡས་པའི་ཁུ་ཚུར་ཁ་བལྟས་པས་བཟུང་སྟེ། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་མངོན་པར་རྫོགས་པའི་བྱང་ཆུབ་མཆོག་གི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཞེས་བྱ་བར་བརྗོད་པ་སྟེ། དོན་ཡོད་ཅིང་ཐོགས་པ་མེད་པ་འདི་བཅིངས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང ། འབྲས་བུ་དང་ལྡན་པ་དང ། བདུད་ལ་སོགས་པ་གཞན་གྱིས་ཐུབ་པར་མི་འགྱུར་རོ། །ཕྱག་རྒྱ་འདི་གང་གིས་བཅིངས་པ་དེ་ནི་དེ་བཞིན་གཤེགས་པ་ཉིད་དུ་རྟོགས་པར་བྱེད་པའོ། །དེ་མཆོད་ན་དེ་བཞིན་གཤེགས་པ་ཐམས་
260b
ཅད་མཆོད་པར་འགྱུར་རོ། །དེ་ལ་ཕྱག་རྒྱ་ཆེན་པོ་ཐམས་ཅད་ཀྱི་ཆོ་ག་རྒྱས་པའོ། །དམ་ཚིག་གི་ཕྱག་རྒྱ་ནི་པདྨ་ཆེན་པོའི། །རྡོ་རྗེའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་དུ་རྟོགས་པར་བྱེད་པའོ། །དེ་མཆོད་ན་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །སྐུ་མཆོག་ནི་བཤད་དོ། །རྡོ་རྗེ་ལས་ཀྱི་ཕྱག་རྒྱ་བཤད་པའོ། །རྡོ་རྗེ་ཐལ་མོ་འོག་ཏུ་བརྐྱང་ལ་མཐེ་བོང་དང ། མཛུབ་མོ་རྩེ་མོ་བཅིངས་པ་སྙིང་ག་ལས་བཏེག་སྟེ་དབང་བསྐུར་བའི་གནས་སུ་རྩེ་མོ་རབ་ཏུ་བཞག་པ་ནི་རིན་ཆེན་མའོ། །དེ་ཉིད་གྱེན་དུ་ཁ་ལྟ་བའི་མཛུབ་མོ་གཉིས་ཕྱིར་བཀུག་པས་རྡོ་རྗེ་པདྨའོ། །སེམས་མ་རྡོ་རྗེ་མ་ནི་ཕྱི་རོལ་ཏུ་དབུས་མ་བཅིངས་པའོ། །ཆོས་ཀྱི་ཕྱག་རྒྱའོ། །དེ་ནས་ལས་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་ཞེས་བཤད་དོ། །གཡོན་པ་ཆོས་གོས་དང་བཅས་པ་རང་གི་སྙིང་གར་གཏོད་པའི་ཚུལ་གྱིས་བཟུང་སྟེ། གཡས་པས་ས་གནོན་ཞིང་རབ་ཏུ་རྒྱལ་བར་བྱེད་པ་ཞེས་བྱ་བ་སྟེ་དེས་བདུད་ཀྱི་སྟོབས་རྣམས་འཇོམས་པའོ། །དེ་ཉིད་ཡོངས་སུ་བསྐོར་ཏེ་གྱེན་དུ་ཁ་ལྟ་བར་བཟུངས་ནས་གཟེངས་བསྟོད་པ་ཞེས་བྱ་བ་ལྟུང་བ་སློང་བར་བྱེད་ཅིང་ལུང་སྟོན་པར་བྱེད་པའོ། །དེ་ཉིད་ཆོས་གོས་མཐའ་མར་པདྨའི་འདབ་མ་ཁ་འབྱེད་པར་བྱེད་པ་ཆོས་འབྱུང་སྟེ། ཆོས་ཐམས་ཅད་སྦྱོང་བར་བྱེད་པའོ། །དེ་ཉིད་བ་དན་གསུམ་གྱིས་བཟུང་བ་སློང་བར་བྱེད་པ་སྟེ་གདོན་མི་ཟ་བར་དངོས་གྲུབ་རྩོལ་བའོ། །འདི་
261a
༄#། །རྣམས་གཡས་པས་ལས་བྱེད་ཅིང་དོན་ཡོད་པ་དང ། བཅིངས་པ་ཙམ་གྱིས་འགྲུབ་པའོ། །ལྷག་མ་ནི་ཅི་ལྟ་བ་བཞིན་དུ་བཟུང་བས་སོ། །དེ་ནས་ལས་ཀྱི་ཕྱག་རྒྱ་རྣམས་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནད་གཟིར་བའོ། །མིག་ཡོངས་སུ་སྦྱོང་བའོ། །སྙིང་གར་གཞག་པའོ། །བྱབ་པའོ། །ཁུ་ཚུར་གྱིས་འཕྲོག་པའོ། །བཟའ་བའོ། ། ཁྲོས་ནས་གཏོར་བར་བྱའོ། །ཕུར་བུ་གདོན་པའོ། །རྟིང་པ་ལ་བརྡེག་པའོ། །ཡི་གེ་ཨོཾ་བྲིས་ནས་དབྱི་བར་བྱའོ། །སོ་རྣམས་ཀྱིས་གཟུང་བར་བྱའོ། །ཡི་གེ་ཧཱུཾ་དང་བཅས་པས་བརྡེག་པར་བྱའོ། །མཚོན་ཆ་བྲིས་ནས་དབྱི་བར་བྱའོ། །ཀུན་ཏུ་སྦྱིན་སྲེག་བྱའོ། །དུར་བའི་སྦྱིན་སྲེག་བྱའོ། །སྤྱི་བོར་བཞག་ལ་ལྟ་བས་བྱ་བར་བྱའོ། །སྟེང་དུ་ཁ་ཊྭཱཾ་ག་གཟུང་བའོ། །རང་གི་ཁྱིམ་དུ་བསྐོར་བར་བྱའོ། །རང་གི་ཁྱིམ་དུ་གཞག་པར་བྱའོ། །འཇུག་པར་བྱའོ། །སྙིང་ག་ལས་གདོན་པར་བྱའོ། །ལུས་ལ་བསྐོར་བར་བྱའོ། །ངག་འབྱིན་པའོ། །སྙིང་གར་བཙིར་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་ནི་སྐུ་མཆོག་གོ་།བརྟན་པར་བྱའོ། །དབང་པོ་ལ་གཞག་པར་བྱའོ། །ཁ་ལའོ། །དེ་ཉིད་དུ་བསྐོར་བར་བྱའོ། །དཔྲལ་བར་གཞག་པར་བྱའོ། །སྙིང་གར་རོ། །དཔུང་པ་གཉིས་ལའོ། །བརླ་གཉིས་ལའོ། །ཕྲེང་བ་བཅིང་བའོ། །དབང་པོ་རྣམས་ལའོ། །སྤྱི་བོ་ལའོ། །གདོང་པ་
261b
ལའོ། །ཁ་ལས་བཏོན་ནས་སོ། །ཐམས་ཅད་དུ་བསྐོར་བར་བྱའོ། །ཕྱོགས་རྣམས་སུ་བསྐོར་བར་བྱའོ། །རང་དང ། གཞན་དག་དེ་བཞིན་གཤེགས་པ་རྗེས་སུ་དྲན་པའོ། །སྙིང་ག་ལས་རྗེས་སུ་དྲན་པའོ། །སྙིང་གར་བཞག་ནས་དགའ་བ་བསྐྱེད་པར་བྱའོ། །སངས་རྒྱས་ཉིད་བསྐྱེད་པར་བྱའོ། །སངས་རྒྱས་ཐམས་ཅད་ཉིད་བསྒོམ་པའོ། །ཕུང་པོ་ལྔ་ལ་བཞག་པར་བྱའོ། །རྫ་མཁན་གྱི་འཁོར་ལོ་ལྟར་བསྐོར་བར་བྱའོ། །ལུས་རྗེས་སུ་དྲན་པའོ། །ལྕེ་གཞག་པར་བྱའོ། །ཡིད་ཀྱིས་མངོན་པར་གདུང་བར་བྱའོ། །གཏོང་པ་རྗེས་སུ་དྲན་པའོ། ། ཚུལ་ཁྲིམས་སོ། །བྱམས་པའོ། །བརྩོན་འགྲུས་སོ། །ཏིང་ངེ་འཛིན་ནོ། །ཤེས་རབ་བོ། །ཡེ་ཤེས་སོ། །སྟོབས་སོ། །ཐབས་སོ། །ངེས་པར་བརྗོད་པའོ། །གཟུངས་སོ། །སའོ། །སྤྱོད་པའོ། ། སོ་སོར་ཡང་དག་པར་རིག་པའོ། །མ་འདྲེས་པའོ། །ཆོས་སོ། །ལས་སོ། །ལུས་སྣ་ཚོགས་སོ། །སེམས་ཅན་གྱི་དོན་ནོ། །སངས་རྒྱས་ཀྱང་དོན་ནོ། །ལུས་སོ། །དག་གོ་།ཡིད་དོ། །རྡོ་རྗེ་ཆེན་པོའོ། །ོཾ་བོ་དྷི་ཙིཏྟ་བྫྲེ། ཨོཾ་ས་མནྟ་བྷ་དྟེ་ཙཱ་རྱེ་བྷི། ཨོཾ་ཙིནྟཱ་མ་ཎི། ཨོཾ་ཨ་ནི་རོ་དྷེ། ཨོཾ་ཛི་ཏི་བི་ར་བ་ར་ཏེ། ཨོཾ་སརྦ་ཛྙ་ནེ། ཨོཾ་མེཧཱ་རཱ་ག་དྷ་རྨ་ཏེ། ཨོ་བིདྱ་ཀ་བ་ཙེ། ཨོཾ་བྫྲ་དྲྀ་ཌྷ་ཙིཏྟེ་ཧཱུཾ། ཨོཾ་སརྦ་ཏ་ཐཱ་ག་ཏ། ཨོཾ་སཝ་བྷཱ་བ་བི་ཤུདྡྷ་དྷ་རྨ་ཏཱ་ཛྙ་ན་བི་ཤུདྡྷེ། ཨོཾ་ཀརྨ་བི་སུདྡྷེ། ཧཱུཾ་སུམྦྷ་བྫཱི་ཎི་ཕཊ། ཨོཾ་ཀརྨ་རཱ་གེ་།ོཾ་བྫྲ་བྫྲི་ཎི། ཨོཾ་ཧཱུཾ་སརྦ་དྷརྨ་ནི། ཨོཾ་
262a
༄#། །ཧྲཱིཿ ་ཨོཾ་ཨ་ཀཱ་རོ་མུ་ཁཾ། ཨོཾ་པྲྫྙ་བཱ་ར་མི་ཏཱ་ཡེ། བཾ་ཧཱུཾ། ཨོཾ་ཨཾ། ཨོཾ་སརྦ་ཏ་ཐཱ་ག་ཏ་ཀཱ་ཡཱ་གྲེ། ཨོཾ་སརྦ་ཏ་ཐཱ་ག་ཏཱ་བྷ་བི་ཤུདྡྷེ། ཨོཾ་སརྦ་ཏ་ཐཱ་ག་ཏ་ཙིཏྟ་བྫྲ། ཨ། དེ་ནས་དེ་བཞིན་གཤེགས་པ་ཐམས་ཅད་ཀྱི་ངག་གི་ཕྱར་རྒྱ་ནི་དབྱངས་ཤིན་ཏུ་ཟབ་པའི་སྒྲ་དང་ལྡན་པའི་ཕྱག་རྒྱའི་ཆོས་ཀྱི་ངག་སྟེ། དེ་བཞིན་གཤེགས་པ་ཐམས་ཅད་ཀྱི་ངག་ཐོགས་པ་མེད་པར་འགྲུབ་པའོ། །དེ་ནས་བཟླས་པ་ནི་རྗེས་སུ་དྲན་པས་སོ། །བསྒྲུབ་པ་ལ་དེ་བཞིན་ནོ། །ལས་ལ་ཉེ་བར་སྦྱོར་བ་ནི་དེ་བཞིན་གཤེགས་པ་ཐམས་ཅད་རྗེས་སུ་དྲན་པས་སོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བཅིང་བའོ། །དེ་ནས་རྡོ་རྗེ་ཉི་མ་མེ་ལྟར་འབར་བའི་ཕྱག་རྒྱ་བཅིང་བ་ནི་དེ་ལ་ཕྱག་རྒྱ་ཆེན་པོ་ནི་བདག་ཉིད་ཐམས་ཅད་ཀྱི་རྗེས་སོ། །དམ་ཚིག་གི་ཕྱག་རྒྱའི་རྒྱུད་ནི་རྡོ་རྗེ་བསྡམས་པ་ནང་དུ་བཅིངས་ལ་སོར་མོ་ཐམས་ཅད་ཀྱི་འབར་བའི་དཀྱིལ་འཁོར་གྱི་ནང་མཐེ་བོང་གི་རྡོ་རྗེ་བཞག་ལ་ཁམས་གསུམ་པ་ཐམས་ཅད་བསྲེག་པ་དང ། འཚེད་པ་དང ། ཐལ་བར་བྱེད་པར་ནུས་ཏེ་བཅོམ་ལྡན་འདས་ཀྱིས་ཀྱང་དབང་དུ་བྱེད་པར་འགྱུར་རོ། ། དེ་ཉིད་ཀྱི་གཡོན་པའི་སོར་མོ་སྡིགས་མཛུབ་བྱ་ཞིང་གཡས་པའི་ལྕགས་ཀྱུས་དགུག་པར་བྱས་ན་ཐམས་ཅད་དགུག་པའོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་ནི་ཁྲོ་བོའི་རྡོ་རྗེ་ཁུ་ཚུར་
262b
གཉིས་པའི་རྡོ་རྗེས་མཐེའུ་ཆུང་གི་ལྕགས་ཀྱུས་བཅིངས་ཏེ། དེས་བསྡིགས་མཛུབ་བྱ་ཞིང་ལས་ཐམས་ཅད་དང ། དངོས་གྲུབ་ཐམས་ཅད་ཉམས་སུ་མྱོང་བ་ཡིན་ནོ། །རྡོ་རྗེ་ཐལ་མོས་མཛུབ་མོ་བཅིངས་ལ་ཁྲོ་གཉེར་ཐུར་དུ་གཞག་པར་བྱ་ཞིང་མེ་སྟག་ཏུ་མྱུར་དུ་འཕྲོ་ཞིང་གཡོ་བ་ནི་རྡོ་རྗེ་ཁྲོ་གཉེར་རོ། །ཐམས་ཅད་སྲེག་པར་བྱེད་པ་དང ། ཐམས་ཅད་འདུལ་བར་བྱེད་པ་དང ། རབ་ཏུ་འདུལ་བར་བྱེད་པ་ནི་ཁྲོ་གཉེར་གྱི་ཕྱག་རྒྱའོ། །རྡོ་རྗེ་ཐལ་མོ་ལེགས་པར་བསྐོར་བས་གཡོན་པའི་མཛུབ་མོ་ལྕགས་ཀྱུ་སྟེ། དགུག་པ་དང ། གཞུག་པ་དང ། བསྒྲུབ་པ་ཐམས་ཅད་ལ་དོན་ཡོད་པའོ། །རྡོ་རྗེ་པདྨ་དབུས་མཉམ་པའི་ཁ་འབུས་ཀྱི་མཛོད་དོ། །རྡོ་རྗེ་པདྨ་ནི་ཐམས་ཅད་གཅོད་པར་བྱེད་པའོ། །རྡོ་རྗེ་བསྡམས་པ་ནི་མཐེ་བོང་དང་མཛུབ་མོའི་གདུ་བུས་གཡས་པའི་ཧཱུཾ་གིས་མཛུབ་མོ་བཟུང་སྟེ། ཐམས་ཅད་དགུག་པ་དང ། གཞུག་པ་དང ། མཆོག་ཏུ་གྲུབ་པའོ། །རྡོ་རྗེ་ཧཱུཾ་མཛད་ལས་བྱུང་བ་ནི་གཡས་པའི་མཛུབ་མོས་གཡོན་པའི་ཡི་གེ་ཧཱུཾ་བཟུང་བ་སྟེ་གཞུ་རྒྱུད་འདྲེན་པ་ཞེས་བྱ་བ་ཐམས་ཅད་རྗེས་སུ་ཆགས་པར་བྱེད་པ་དང ། འབིགས་པར་བྱེད་པའོ། །རྡོ་རྗེ་བསྡམས་པ་ལས་རྡོ་རྗེ་ཧཱུཾ་མཛད་ཀྱི་མཆོག་གོ་།རྡོ་རྗེ་བསྡམས་པའི་གཡོན་པའི་རྡོ་རྗེ་ཁུ་ཚུར་གཡས་པའི་རྩེ་གསུམ་གྱིས་མཚན་པས་ཡོངས་སུ་བཟུང་བ་སྟེ། ཐམས་ཅད་དྲལ་བར་བྱེད་པའོ། །རྡོ་རྗེ་ཧཱུཾ་མཛད་ཀྱིས་
263a
༄#། །གཡས་པའི་ཁུ་ཚུར་གྱི་མཐེའུ་ཆུང་ཡང་དག་པར་བརྐྱང་བ་གཡོན་གྱི་ལག་པའི་སྟེང་དུ་བཞག་པ་ནི་ཁ་ཊྭཱཾ་ག་སྒྲེང་བ་སྟེ། གདུག་པ་ཐམས་ཅད་ཀྱི་ཕྱག་རྒྱ་ཕྱེ་ཞིང་དྲལ་བར་བྱེད་པ་དང ། རྒྱས་འདེབས་པ་དང ། གསོད་པ་དང ། ཟ་བ་ལ་སོགས་པའི་ཡོ་བྱད་ཐམས་ཅད་གཡས་པས་འཁོར་ལོ་བཟུང་བའི་ཚུལ་གྱིས་གཏོད་ཅིང་དོར་བ་སྟེ། ཐམས་ཅད་གཅོད་པ་དང ། གཅོད་པར་བྱེད་པའོ། །རྡོ་རྗེ་ཆེན་པོའི་ཁྲོ་བོའི་རྡོ་རྗེའོ། །གཡས་པའི་རྡོ་རྗེ་འབེབས་པ་དང ། སྦྱོར་བ་སྤྲོ་ཞིང་གཡོ་བའི་འདབ་མ་ཅན་གྱི་བ་དན་གསུམ་པའོ། །རྡོ་རྗེ་བསྡམས་པའི་མཐེ་བོང་དང ། མཛུབ་མོ་གཉིས་ཀྱིས་རྡོ་རྗེ་ལས་བྱུང་བའི་སྲིན་ལག་མཉམ་པར་སྦྱར་ཞིང་མཐེའུ་ཆུང་ཁ་ཕྱེའོ། །དཔལ་ཐམས་ཅད་བྱེད་པ་དང ། རྣམ་པར་རྒྱལ་བར་བྱེད་པ་དང ། གདུག་པ་ཐམས་ཅད་འཇོམས་པར་བྱེད་པ་དང ། ཐམས་ཅད་འབེབས་པར་བྱེད་པའོ། །རྡོ་རྗེ་སེམས་དཔའི་དབང་བསྐུར་བཤད་པའོ། །རྡོ་རྗེའི་རིགས་ཐམས་ཅད་ཀྱི་ནི་།རྡོ་རྗེ་ཐལ་མོ་མཉམ་བྱས་ལ། །མཛུབ་མོ་གཉིས་ཀྱིས་དར་དཔྱངས་བཅིང ། །མཐེ་བོང་སྲིན་ལག་རྡོ་རྗེ་ནི། །ཡོངས་སུ་བསྐོར་ཏེ་དབང་བསྐུར་རོ། །འབར་བའི་རྡོ་རྗེ་རྩེ་ལྔ་པ་ཕྱག་ནས་བཟུང་བར་བྱའོ། །ཅི་འབྱོར་པས་སློབ་དཔོན་ལ་ཡོན་ཕུལ་ཏེ་དངོས་གྲུབ་ཐམས་ཅད་ཀྱི་མཆོག་ཕུན་སུམ་
263b
ཚོགས་པ་རྣམས་འགྲུབ་པར་འགྱུར་རོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྡོ་རྗེ་ཕྱག་རྒྱ་རྡོ་རྗེ་ཏི་རིན་ཏི་རི་ལས་འབྱུང་བ་སྟེ། དོན་ཡོད་ཐམས་ཅད་སྒྲུབ་པར་བྱེད་པའོ། །དེ་ནས་ལས་ཀྱི་ཕྱག་རྒྱ་བཞི་ནི་དམ་ཚིག་གི་ཕྱག་རྒྱའི་ལྷ་མོ་རྣམས་སོ། །དེ་ནས་བཅོམ་ལྡན་འདས་ཀྱི་ལས་ཀྱི་དམ་ཚིག་ནི་རྡོ་རྗེ་ཁུ་ཚུར་གཡོན་པས་བསྙེམས་པ་ཐམས་ཅད་སྒྲུབ་པ་དང ། གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་གསོར་བ་སྟེ་འདིས་ཐམས་ཅད་བརྒྱལ་བ་དང ། འབར་བ་དང ། སྲེག་པ་དང ། ལྟུང་བ་དང ། རྒྱས་བཏབ་པ་དང ། གསད་པ་དང ། སློང་བ་དང ། ཁམས་གསུམ་ལས་རྣམ་པར་རྒྱལ་བ་དང ། བརྟན་པ་དང ། གཡོ་བ་ཐམས་ཅད་ལ་ངེས་པར་སྦྱོར་བ་དང ། དངོས་གྲུབ་དང ། མཆོག་ཐམས་ཅད་བསྒྲུབ་པའོ། །དེ་ནས་ལས་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་སྡིགས་མཛུབ་དང་བཅས་པའི་མཛུབ་མོ་ནི་ཁྲོ་བོའི་རྡོ་རྗེ་ཁུ་ཚུར་རོ། །དེ་དག་གི་ལས་དམ་ཚིག་གི་ཕྱག་རྒྱའོ། །མཛུབ་མོའི་སོར་མོ་གཉིས་ཀྱིས་ཐམས་ཅད་དགུག་པའོ། །སྙིང་གར་ཅིག་ཤོས་དང ། གཡས་པས་གདུག་པ་ཐམས་ཅད་གཅོད་པའོ། །མཁྲིག་མའི་མདུད་པས་གཡས་པའི་ཁྲོ་བོ་འགུགས་པས་ཐམས་ཅད་དགུག་པ་དང ། རབ་ཏུ་གཞུག་པའོ། །གཏོད་པ་དང་བཅས་པའི་མདའ་འཕངས་པའོ། །དེ་བཞིན་དུ་རྡོ་རྗེ་རྩེ་གསུམ་པ་ལ་སོགས་པའི་རྡོ་རྗེ་གར་གྱི་སྦྱོར་བས་རང་གི་ཕྱག་
264a
༄#། །རྒྱ་གྱེན་དུ་འཕངས་པའོ། །ལས་ཀྱི་དམ་ཚིག་གི་ཕྱག་རྒྱ་གྱེན་དུ་འཕངས་པའོ། །ལས་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ལ་རྡོ་རྗེ་ཐལ་མོ་རྣམས་ཀྱི་ལས་ཀྱི་ཕྱག་རྒྱ་སྟེ། རྡོ་རྗེ་གར་གྱི་སྦྱོར་བས་རང་གི་དམ་ཚིག་གི་ཕྱག་རྒྱ་སྟེང་དུ་དོར་བ་སྟེ། ཐམས་ཅད་ལས་རྒྱས་གདབ་པ་དང ། བསྒྲུབ་པ་དང ། གསོད་པ་དང ། འབེབས་པ་དང ། འཚོ་བར་བྱེད་པ་ནི་རྡོ་རྗེ་གར་གྱི་མཆོད་པའོ། །དེ་ནས་ངག་གི་ཕྱག་རྒྱ་ནི་སྤྲིན་གྱི་སྒྲ་སྒྲོགས་པའི་ཧཱུཾ་ཡི་གེ་ཧཱུཾ་ཕྲ་བའི་སྒྲ་དང་བཅས་པ་ཁྲོ་ཞིང་གསལ་བའི་ཁྲོ་བོའི་རྡོ་རྗེ་ངག་གོ། སྒྲུབ་པའི་དོན་བསྒྲུབ་པར་བྱའོ། །དེ་ནས་མ་གྲུབ་ན་ལས་ཀྱི་ཕྱག་རྒྱ་བཅིང་བའོ། །སྒྲུབ་པ་ནི་དེ་བཞིན་དུ་ཕྱག་རྒྱ་ཆེན་པོ་ལན་ཅིག་ཏུ་བྱ་བའོ། །ལས་ལ་ངེས་པར་སྦྱོར་བ་ནི་ཁྲོ་གཉེར་གྱིས་སོ། །རྡོ་རྗེ་ཧཱུཾ་མཛད་ལས་བྱུང་བའོ། །སྐེ་ཚེ་དང་བཅས་པའི་ཏིལ་མར་རྣོན་པོའི་སྦྱིན་སྲེག་ནི་གཡས་པས་སོ། །དེ་ཉིད་ཀྱིས་བཏང་བའོ། །དེ་ཉིད་ཀྱིས་ཐམས་ཅད་འཆིང་བའོ། །གཡོ་བ་མེད་པ་ཉིད་དོ། །གཉིད་ལོག་པ་བསྟན་པའོ། །ཁྲོ་བོའི་རྡོ་རྗེ་ལྟ་བའི་སྡིགས་མཛུབ་བོ། །ཕྱག་རྒྱ་གློད་པར་གྱུར་བའོ། །མཛུབ་མོ་གཉིས་ཡང་དག་པར་སྦྱར་ནས་ཕྱེ་བའོ། །དེ་དག་ཉིད་ཀྱིས་གདུ་བུ་བཅིང་བའོ། །མཆེ་བས་བཙིར་བའོ། །དེ་ནས་དྲལ་བའོ། །གཡས་པས་བརྡེག་པའོ། །མཛུབ་མོ་གཉིས་ཀྱིས་འབར་བའོ། །གཡས་པའི་
264b
མཛུབ་མོ་གཡོན་པ་ལྟུང་བའི་ཚུལ་ལོ། །མཛུབ་མོ་གཉིས་ཀྱི་འབར་བར་ཕྱེ་བའོ། །གཅོད་པའོ། །མཛུབ་མོ་གཉིས་ཀྱིས་སོར་མོ་སྤྱར་བའི་རྩེ་མོ་གཅོད་པའོ། །ལག་པ་གཉིས་དྲག་ཏུ་མཉེ་བའོ། །ཐམས་ཅད་དུ་སོར་མོ་ཐམས་ཅད་དོར་བའོ། །གཅིག་ཆར་དུ་ཕྱག་རྒྱ་དགྲོལ་བའོ། །དྲང་ཞིང་གཡོ་བས་སྡིགས་མཛུབ་བོ། །གཡས་པའི་མཛུབ་མོ་གདེངས་ཀ་བསྐྱོད་པས་སྡིགས་མཛུབ་བོ། །གཡས་པའི་མཛུབ་མོ་མཆེ་བས་བཟུང་བའོ། །དུ་བ་དང ། དགོད་པ་དང ། རྒྱུད་པ་ལ་སོགས་པས་བསྟན་པའོ། །མཛུབ་མོ་གཉིས་ཀྱིས་སེ་གོ་ལ་རྡེབས་པའོ། །གཡོན་པའི་སྟེང་དུ་གཡས་པ་ཉེ་བར་གཞག་པའོ། །སོ་ལ་རབ་ཏུ་གཞག་པའོ། །བསྐྱོད་པར་བྱའོ། །གར་བྱ་བའོ། །འབྱིན་པའོ། །བརླབ་པར་བྱའོ། །ཐམས་ཅད་དུ་བརླབ་པར་བྱའོ། །ཧ་ཧར་དགོད་པའོ། །བསྐོར་བའི་དགུག་པར་བྱའོ། །དྲང་བར་བྱའོ། །གཏང་བར་བྱའོ། །ཡོངས་སུ་བསྐོར་ནས་ནུབ་པར་བྱའོ། །དེ་ནས་དོར་བའོ། །མྱུར་དུ་དོར་བའོ། །དེ་བཞིན་དུ་ཀུན་ནས་འདྲེན་པའོ། །དེ་བཞིན་དུ་གྱེན་དུ་དྲང་བའོ། །རང་ཉིད་ཀྱིས་ང་རོ་བྱའོ། །ངུ་བར་བྱའོ། །བདག་ཉིད་ལ་བརྡོག་པར་བྱའོ། །སྙིང་གར་བརྡེག་པར་སྦྱིན་པར་བྱའོ། །རང་ཉིད་ཀྱིས་རང་གི་སྐྲ་འབལ་བར་བྱའོ། །སྡང་བར་སྡོམ་པའོ། །རང་གི་གོས་བསྟོད་པར་བྱའོ། །ཁྲོ་བོས་དེ་བཞིན་དུ་འབར་བ་སྟོན་པའོ། །གཡས་པས་མཛུབ་མོ་ལྕགས་ཀྱུའོ། །དེ་ཉིད་ཀྱིས་རབ་ཏུ་གཞུག་པའོ། །
265a
༄#། །གཡས་པའི་སེ་གོལ་ལོ། །གཡོན་པའི་སེ་གོལ་ལོ། །ལྕེ་རེག་པ་ནི་མཛུབ་མོ་གཉིས་ཀྱིས་སོ། །ཡན་ལག་ལ་བ་སྤུ་གཡས་སུ་བསྐོར་བས་འཁྱིལ། བའོ། །ལྟུང་བ་ལ་སོགས་པ་བྱེད་པའོ། །དུས་སུ་བསྒོམ་པའོ། །ཁྲོ་བོའི་ལྟ་བས་ཤིང་དྲུང་རྣམས་ལ་ཡིད་ཀྱིས་འདོད་པའོ། །དེ་བཞིན་དུས་ལའོ། །ལྟེ་བའོ། །སྨིན་མའོ། །སོའོ། །ཕུའོ། ། ཕྱག་རྒྱས་བརྡེག་པའོ། །རྒྱལ་མཚན་བསྒྲེང་བའོ། །ཁྲོ་བོ་དང་བཅས་པའི་འཇིགས་བྱེད་ཀྱི་ལྟ་བས་སོ། །མཛུམ་པ་མེད་པས་ལྟ་བས་སོ། །དེ་བཞིན་དུ་འབར་བ་འཆིང་བས་སོ། ། ཕྱག་རྒྱ་བསྐོར་བའོ། །གཙུག་ཏོར་ལས་མཛུབ་མོའི་རྡོ་རྗེ་གཞག་པར་བྱའོ། །དེ་བཞིན་དུ་སྙིང་གར་རོ། །ཕྱག་རྒྱ་དེ་དགྲོལ་བའོ། །ཕྱག་རྒྱ་ཟུར་དུ་བསླང་བའོ། །མཛུབ་མོའི་རྩེ་མོ་བརྟན་པར་སྦྱར་བའོ། །ལྟ་བས་སྟེང་ནས་འོག་ཏུ་ལྟུང་བའོ། །འོག་ནས་གྱེན་དུ་འདྲེན་པའོ། །ཡི་གེ་ཧཱུཾ་ཁྲོས་པའོ། །འཇིགས་བྱེད་ཀྱི་ལྟ་བས་སོ། །རྡོ་རྗེ་ཁ་ཊྭཱཾ་ག་དྲལ་བ་ཁྲོ་བས་སོ། ། རྡོ་རྗེ་སྙིང་གར་བསྒོམ་པའོ། །རྡོ་རྗེ་རྩེ་གསུམ་དྲལ་བའོ། །གདུག་པའི་དཀྱིལ་འཁོར་གཞིག་པར་བྱའོ། །ཡི་གེ་ཧཱུཾ་གིས་སོ། །ཧའོ། །གཡས་སུ་དབུགས་དབྱུང་བའོ། །དེ་ཉིད་ཀྱི་དོང་རྩེ་གསོར་བའོ། །ཁྲོ་བོའི་ལྟ་བས་བཞིན་དུའོ། །ཁུ་ཚུར་གཡས་པས་མནན་ཏེ་གཡོན་པས་སོ། །བཟུང་ནས་དགུག་པར་བྱའོ། །དོང་རྩེ་གསོར་བ་ནི་གཉིས་ཀྱིས་སོ། །
265b
གཡོན་པའི་དྲིལ་བུ་དྲལ་བའོ། །དེ་བཞིན་དུ་རྡོ་རྗེ་ཧཱུཾ་མཛད་ཀྱི་གཡས་པའི་ཁུ་ཚུར་གཡོན་པའི་རྡོ་རྗེ་ཁྲོ་པོས་མནན་ཏེ། མཐེའུ་ཆུང་གི་གདུ་བུ་དཀྲོལ་བའི་ཁུ་ཚུར་གྱིས་འཕྲོག་པར་བྱའོ། །གཡས་པའི་དྲིལ་བུ་དྲལ་བའོ། །ཚེགས་དང་བྲལ་བ་ལྟུང་བ་ནི་ཡིད་ཀྱིས་སོ། །འཁོར་ལོ་དྲལ་བའོ། །རྩེ་གསུམ་དྲལ་བའོ། །རྡོ་རྗེ་ཧཱུཾ་མཛད་ཀྱི་གཡོན་པ་གཡས་པའི་རྡོ་རྗེ་ཁུ་ཚུར་གྱིས་མནན་ཏེ། དེ་བཞིན་དུ་གདུ་བུ་བཀྲོལ་བས་འཕྲོག་པར་བྱའོ། །རྡོ་རྗེ་དང ། བྱང་ཆུབ་སེམས་དཔའ་དང ། དེ་བཞིན་གཤེགས་པ་ཐམས་ཅད་དང ། རྡོ་རྗེ་འཆང་ཆེན་པོ་རྗེས་སུ་དྲན་པས་མདུན་དུ་བསྒྲུབ་པར་བྱའོ། །རྡོ་རྗེ་ཁྲོ་བོ་རྒྱལ་པོའི་ཕྱག་རྒྱའི་རྒྱུད་དོ།། །།དེ་ནས་འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་ནི་པདྨ་ཆེན་པོ་རྡོ་རྗེའི་ཐལ་མོ་ཁ་སྤུབ་པ་དབུ་མ་དང ། མཐེ་བོང་དང ། མཐེའུ་ཆུང་ཁ་ཕྱེ་བའི་འདབ་མ་བཞིན་པ་ཆོས་ཉིད་ཐམས་ཅད་ཐོབ་པ་དང ། ཐམས་ཅད་རྗེས་སུ་ཆགས་པར་བྱེད་པའོ། །ཕྱག་རྒྱ་ཆེན་པོ་རྣམས་ནི་དེ་བཞིན་ནོ། །དམ་ཚིག་ཕྱག་རྒྱ་རྡོ་རྗེ་པདྨ་བཤད་པའོ། །པདྨའི་རིགས་རྣམས་ཀྱི་རྡོ་རྗེ་བསྡམས་པ་ལས་བྱུང་བའོ། །དེ་ལ་པདྨ་དེ་བཞིན་གཤེགས་པ་རྣམས་ནི་ནང་གི་རྡོ་རྗེ་བསྡམས་པ་ལས་བྱུང་བའོ། །དེ་བཞིན་གཤེགས་པའི་པདྨ་པང་པར་གྱེན་དུ་ཁ་ཕྱེ་བ་ལྟ་བུའི་ཏིང་ངེ་འཛིན་གྱི་མིང་ཅན་གྱི་ཕྱག་རྒྱ་པདྨའི་
266a
༄#། །སྤྱན་ཞེས་བྱའོ། །རྡོ་རྗེ་པདྨ་ཆེན་པོའི་རྡོ་རྗེ་པདྨ་སྙིང་གར་རྡོ་རྗེ་བཅིང་བ་རྡོ་རྗེ་པདྨའི་ཆགས་པ་ཞེས་བྱའོ། །པདྨ་ཆེན་པོའི་བདག་པོའི་མཛུབ་མོ་མཉམ་པ་འོག་ཏུ་ཁ་ལྟ་བ་པང་བར་བཟུང་བ་པདྨའི་སྒྲོལ་མ་ཞེས་བྱ་བའི་ཕྱག་རྒྱའོ། །པདྨ་ཆེན་པོའི་བ་དན་རིན་པོ་ཆེ་གཉིས་བཟུང་ཞིང་དེས་པདྨ་སྦྱིན་པའོ། །འདི་རྣམས་ཀྱི་ཆོས་ཉིད་ཐམས་ཅད་ལས་ཐོབ་པ་དང ། ཐམས་ཅད་རྗེས་སུ་ཆགས་པ་དང ། སྲིད་པའི་སྡུག་བསྔལ་གྱི་ཚོགས་ཐམས་ཅད་ལས་སྒྲོལ་བ་དང ། བསམ་པ་ཐམས་ཅད་ཡོངས་སུ་རྫོགས་པའི་ཤིན་ཏུ་གྲུབ་པ་ཞེས་བྱའོ། །རྡོ་རྗེ་རྩེ་གསུམ་དྲལ་བའོ། །དེ་ནས་པདྨའི་ལྷའི་བདག་པོ་རྣམས་ཀྱི་ཕྱི་རོལ་གྱི་བསྡམས་པ་ལས་བྱུང་བའོ། །དེ་ལ་དོན་ཡོད་པའི་རྒྱལ་པོ་ནི་འོག་ཏུ་མཛུབ་མོ་གཉིས་ཀྱི་ཁ་འབུས་པ་ཁྲོ་གཉེར་ལ་གཞག་པར་བྱ་སྟེ། པདྨོའི་ཁྲོ་གཉེར་གྱི་སྤྱན་ནོ། །རྡོ་རྗེ་བསྡམས་པ་ཁ་གྱེན་དུ་འབར་བ་ནི་མགྲིན་སྔོན་གྱིའོ། །གཡོན་པའི་མཛུབ་མོ་བཀུག་པ་མཐེ་བོང་ཡོངས་སུ་བཟུང་སྟེ། དུང་གི་དབྱིབས་དེ་གཡས་པའི་མཐེ་བོང་བསྒྲེང་བ་བཏེག་སྟེ། མཐེའུ་ཆུང་མཉམ་པའི་ཁ་འབུས་པའི་པདྨ་དང ། སོར་མོ་ལྷག་མ་ཡང་དག་པར་བརྐྱང་བའི་འཁོར་ལོ་ནི་ཁྱབ་འཇུག་མའོ། །པདྨ་ལས་བྱུང་བའི་མཛུབ་མོ་གཉིས་བཀུག་པའི་ལྕགས་ཀྱུ་དང ། སོར་མོ་ལྷག་མ་ཁ་ཕྱེ་བའི་པདྨ་ལས་བྱུང་
266b
བའི་ཞེས་བྱ་བྱའོ། །རྟ་མགྲིན་གྱི་ནི་མཛུབ་མོ་གཉིས་ཤིན་ཏུ་སྦྱར་བའི་ལྕགས་ཀྱུ་རྒོད་མའི་ཁ་ཤིན་ཏུ་རབ་ཏུ་བརྐྱང་བའི་སྲིན་ལག་གི་རྩེ་མོ་དང ། མཐེའུ་ཆུང་དང་གཉིས་རབ་ཏུ་བརྐྱང་བ་སོ་སོར་ཕྱེ་ལ་གཡོན་གཡོ་ཞིང་བཟུང་བ་ནི་པདྨའི་ལྕགས་ཀྱུ་ཞེས་བྱ་བའོ། །འདི་རྣམས་ཀྱིས་དབང་བསྐུར་བ་ཐམས་ཅད་དང ། ལས་ཐམས་ཅད་དང ། གྲོལ་བ་ཐམས་ཅད་དང ། དགུག་པ་ཐམས་ཅད་ཀྱི་དངོས་གྲུབ་དོན་ཡོད་པའོ། །དེ་བཞིན་གཤེགས་པའི་སྐུ་མཆོག་གི་ཏིང་ངེ་འཛིན་གྱི་ཕྱག་རྒྱ་བཤད་པའོ། །དེ་ནས་ལས་ཀྱི་ཕྱག་རྒྱ་ནི་ཁ་ཊྭཱཾ་ག་བཅིངས་ནས་པདྨའི་རིགས་ཐམས་ཅད་ཀྱི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་གཟུང་བས་སོ། །ངག་གི་ཏིང་ངེ་འཛིན་གྱིས་གཟུངས་དགུག་པ་ནི་ཆོས་ཀྱི་ངག་གིས་བཟླས་པའི་དོན་ཤེས་པའོ། །པདྨ་ཆེན་པོ་བཅིངས་ནས་ཡིད་ཀྱིས་སྦྱིན་སྲེག་བྱའོ། །སེམས་ཀྱིས་ཞི་བར་བྱའོ། །དངོས་པོ་བསྲུང་བར་བྱའོ། །རྣམ་པར་སྦྱང་བར་བྱའོ། །ཞེས་བྱ་བ་བསྒྲུབ་པར་བྱའོ། །ལས་ཐམས་ཅད་པའི་ཕྱག་རྒྱའི་ཚོགས་སོ། །འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་དོ།། །།དེ་ནས་ནམ་མཁའི་སྙིང་པོའི་ཕྱག་རྒྱ་ཆེན་པོ་དེ་བཞིན་ནོ། །དམ་ཚིག་གི་ནི་ཕྱག་རྒྱ་རྡོ་རྗེ་རིན་ཆེན་ཏེ་མཐེ་བོང་དང ། མཛུབ་མོའི་སོར་བཞིའི་རྩེ་མོ་བསྙམས་ནས་འོག་ཏུ་རབ་ཏུ་བསྡུས་ཏེ། །དབང་བསྐུར་བའི་རྡོ་རྗེ་ཐལ་
267a
༄#། །མོས་དབང་བསྐུར་བ་ཐམས་ཅད་ཐོབ་པའོ། །དེས་ཇི་ལྟ་བ་བཞིན་དུ་དབང་བསྐུར་བའོ། །རྡོ་རྗེ་དེ་ཉིད་སྙིང་གར་རོ། །གྱེན་དུ་ཁ་བལྟ་བའོ། །དེ་ཉིད་ཁུ་ཚུར་རོ། །ཁུ་ཚུར་སྤྱི་བོར་བཞག་ལ་མེ་ཏོག་ལ་སོགས་པའི་མཆོད་པ་དབུལ་བར་བྱའོ། །འདི་ཉིད་དབུས་སུ་བཞག་ནས་ལས་ཀྱི་ཕྱག་རྒྱར་གཟུང་བའོ། །དབང་བསྐུར་བ་ཐམས་ཅད་ཀྱི་རིན་པོ་ཆེའི་གཏེར་གྱི་མཆོད་པ་ཐོབ་པའི་དོན་དུ་ཡང་དག་པར་རྫོགས་པའོ། །བཅོམ་ལྡན་འདས་ཀྱི་ལས་ཀྱི་དམ་ཚིག་ནི་གསལ་བ་ཡོངས་སུ་རྫོགས་པར་བྱེད་པའོ། །གཡོན་པའི་ཁུ་ཚུར་སྙིང་གར་བསྟོད་ནས་གཡས་པ་ནོར་སྦྱིན་པ་བཀྲོལ་བའོ། །ནོར་བུའི་ཁུ་ཚུར་གྱི་ཕྱག་རྒྱའི་ཉིད་ཀྱིས་སོ། །སྙིང་པོའི་ངག་ཀླུའི་རྒྱལ་པོས་བཟླ་བ་སྟེ་བཀའ་བསྒོ་ཞིང་དེ་བཞིན་དུ་ལས་ལ་ཉེ་བར་སྦྱོར་བའོ། །གལ་ཏེ་མ་གྲུབ་ན་དབང་བསྐུར་བར་གནས་པའི་རྡོ་རྗེ་རིན་ཆེན་གྱིས་ནམ་མཁར་ལས་ཐམས་ཅད་ཀྱི་བཀའ་བསྒོ་བའོ། །ཆོས་ཀྱི་ཕྱག་རྒྱ་ཐམས་ཅད་ཀྱི་ཚོགས་ནི་འདིའོ། །དོན་ཡོད་ཐོགས་མེད་གྲུབ་པ་དང ། །ལས་ཀྱི་ཚོགས་ནི་སྒྲུབ་པ་དང ། །ངག་གི་ཕྱག་རྒྱའི་བཀའ་བསྒོ་བ། །ཐམས་ཅད་མྱུར་དུ་མཁའ་ལས་བྱུང ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དབང་བསྐུར་བ་ཐམས་ཅད་ཀྱི་ཆོ་ག་རྒྱས་པའོ།། །།དེ་ནས་ཕྱིའི་རྒྱུད་ནི་ཕྱག་རྒྱ་ཆེན་པོ་ནི་
267b
གཡོན་པར་ཁམ་ཕོར་དང་གཡས་ན་མདའ་གཏོད་པའོ། །དེ་རྣམས་ཀྱི་དམ་ཚིག་ནི་འཇུག་པ་ལ་བྱ་སྟེ། ལག་པ་གཉིས་ཀྱི་མཐེ་བོ་དང ། མཐེའུ་ཆུང་གི་གདུ་བུས་ལུ་གུ་རྒྱུད་བཅིང་བར་བྱས་ལ་མཛུབ་མོ་དང ། དབུས་མ་དང ། སྲིན་ལག་བསྙམས་ཏེ་རྩེ་གསུམ་པས་མཚན་པ་ནི་མིང་པོ་རྣམས་ཀྱིའོ། །ཇི་ལྟ་བ་བཞིན་དུ་བཟུང་བས་ལྷ་མོ་རྣམས་ཀྱིའོ། །རྡོ་རྗེ་བསྡམས་པའི་དབུས་མ་དང ། སྲིན་ལག་གིས་སོར་མོའི་རྩེ་མོ་བཞི་ལ་མཛུབ་མོ་དང ། མཐེའུ་ཆུང་བཞིའི་རྩེ་མོ་འདུས་པ་ནི་ལྷ་མོ་རྣམས་ཀྱིས་འདའ་བར་དཀའ་བའི་དམ་ཚིག་གོ ། སྲིང་མོ་བཞིའི་དཀྱིལ་འཁོར་གྱི་ཕྱག་རྒྱའོ། །གང་གི་ཚེ་དཀྱིལ་འཁོར་གྱི་བརྟག་པར་མ་ནུས་ན་དེའི་ཚེ་འདི་བཅིངས་ཏེ་བལྟས་ན་དཀྱིལ་འཁོར་བརྟག་པ་དང ། མཐོང་བ་དང ། མཆོད་པ་ཅི་དགར་འགྲུབ་པར་འགྱུར་རོ། །གདེངས་ཀ་ཅན་གྱི་དབང་པོ་རྣམས་ཀྱི་ནི་མཐེ་བོང་བཅིངས་ནས་ཕྱི་རོལ་ཏུ་ཁ་བལྟས་པའི་སོར་མོའི་གདེངས་ཀ་སྒྲེང་བ་སྟེ། ཀླུ་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བའི་དམ་ཚིག་སྟེ། གལ་ཏེ་འདའ་བར་བྱེད་ན་འཆི་བར་འགྱུར་རོ། །ལྟོ་འཕྱེ་ལག་པ་སྟེ་ཐམས་ཅད་སྒྲུབ་པར་བྱེད་པའོ། ། དབུས་མ་སྲིན་ལག་བཞིའི་མདུད་པ་ལེགས་པར་བྱེད་པའི་སྦྱོར་བས་ཉེ་བར་གཏོད་ཅིང་བསྡུས་ལ་མཐེའུ་ཆུང་གཉིས་ཀྱི་རྩེ་མོ་གཉིས་ཀྱིས་བརྡེག་པར་བྱ་སྟེ། ཉེ་བར་འཕེལ་བ་དུག་
268a
༄#། །ཐམས་ཅད་འབར་བའོ། །ཀུན་ནས་བསྡུས་ན་དུག་ཐམས་ཅད་འཆིང་བའོ། །འདི་ཉིད་ཀྱིས་དུག་ཐམས་ཅད་བཟའ་བ་དང ། འཕོ་བ་དང ། དུག་མེད་པར་བྱ་བའོ། །གདུག་པའི་དཀྱིལ་འཁོར་ནི་རྡོ་རྗེ་ཁུ་ཚུར་གྱིས་བཟུང་བའི་རྡོ་རྗེས་ཁྲོས་ནས་མྱུར་དུ་གཞིག་པར་བྱའོ། །ཕྱིའི་ཕྱག་རྒྱའི་རྒྱུད་དོ།། །།དེ་ནས་བཅོམ་ལྡན་འདས་ཐམས་ཅད་མཆོག་དབང་ཕྱུག་དམ་པ་སྣ་ཚོགས་པའི་ཕྱག་རྒྱ་ནི། །རྡོ་རྗེ་ཐལ་མོ་མཉམ་གཞག་ནས། །བ་དན་གསུམ་ནི་ཡོངས་སུ་བཟུང ། །རྡོ་རྗེ་ཁྱབ་འཇུག་ཅེས་བྱ་བ། །དོར་ན་ཐམས་ཅད་གཅོད་པར་བྱེད། །རྡོ་རྗེ་འཁོར་ལོའི་ཕྱག་རྒྱས་ཉོན་མོངས་པའི་དགྲ་ཐམས་ཅད་ཀྱི་མགོ་རྣམས་བཅད་ནས་མཆོག་ཏུ་བྱུང་བ་ཐམས་ཅད་གྲུབ་པའོ། །མཐེའུ་ཆུང་མཐེ་བོང་དང་སྤྲེལ་བའི། །ལག་གཉིས་སྟེང་དང་འོག་ཏུ་ནི། །དབུས་མ་གསུམ་གྱི་རྩེ་གསུམ་མཚན། །རྡོ་རྗེ་འཛིན་མ་ཞེས་སྒྲུབ་པའོ། །རྡོ་རྗེ་དམ་ཚིག་ཕྱག་རྒྱ་རྡོ་རྗེ་གཏུམ་པའི་དབང་ཕྱུག་མ་ཞེས་བྱ་བ་དོན་ཡོད་པའི་དམ་ཚིག་གོ་།རྡོ་རྗེ་པདྨ་མཉམ་གཞག་ནས། །གང་དེར་ཅི་བཞིན་དེ་བཞིན་དུ། །ཤིན་ཏུ་ཐོབ་དཀའི་སངས་རྒྱས་ཀྱང ། །བསྒྲུབ་པ་བཟླས་པས་སྒྲུབ་པར་བྱེད། །རྡོ་རྗེ་ཆོས་ཉིད་ཅེས་བྱ་བའི་ཕྱག་རྒྱ་སྒྲོལ་མའོ། །མཛུབ་མོ་བསྡམས་པའི་ཕྱི་རོལ་དགུག་།མཐེ་བོ་རྡོ་རྗེ་བཀབ་པ་སྟེ། །རྡོ་རྗེ་ཆེན་པོའི་ནོར་བུ་སྟེར། །ཞེས་
268b
བྱ་བ་ནི་རྡོ་རྗེ་ནོར་བུ་ཞེས་བྱ་བའི་ཕྱག་རྒྱའོ། །དེ་ནས་ཐམས་ཅད་ཀྱི་དབང་ཕྱུག་དམ་པས་བསྒྲུབས་པའི་དངོས་གྲུབ་ཐམས་ཅད་ཀྱི་ཚོགས་ཀྱི་ཕྱག་རྒྱའི་རྒྱུད་ནི་འདི་ཡིན་ཏེ། །དེ་ལ་དང་པོར་རེ་ཞིག་དང་པོའི་དངོས་གྲུབ་བརྒྱ་རབ་ཏུ་སྒྲུབ་པར་བྱེད་པའི་ཕྱག་རྒྱ་རབ་ཏུ་སྒྲུབ་པར་བྱེད་པའི་ཕྱག་རྒྱ་ཆེན་པོ་སྟོང་དུ་འགྱུར་ཏེ། ཅི་ལྟ་བ་བཞིན་དུ་དམ་ཚིག་ཕྱག་རྒྱ་མཚན་རྣམས་ཀྱིས་ལག་པ་གཡས་པ་དང ། གཡོན་པ་དག་གི་རྡོ་རྗེ་ཆེན་པོའི་སྦྱོར་བས་ལས་ཐམས་ཅད་ཀྱི་དངོས་གྲུབ་སྒྲུབ་པར་བྱེད་པའི་སྟོང་པ་ཉིད་དུ་འགྱུར་ཏེ། རྡོ་རྗེ་བསྡམས་པ་ནང་དུ་བཅིངས་པས་སོ། །དེ་ལྟར་རང་གི་ཕྱག་མཚན་གྱི་ཁུ་ཚུར་རྡོ་རྗེ་གར་ལས་བྱུང་བའི་ཕྱག་རྒྱ་སྟོང་དང་པོའི་ལས་ཀྱི་ཚོགས་བརྒྱ་སྒྲུབ་པར་བྱེད་པའི་རྡོ་རྗེ་ལས་བྱེད་པ་གསུམ་མོ། །དེ་ལྟར་ལག་པ་གཡས་པ་དང ། གཡོན་པའི་གཅིག་ཤོས་ཀྱིས་ལས་ཐམས་ཅད་རབ་ཏུ་སྒྲུབ་པར་བྱེད་པའི་ལས་ཀྱི་ཕྱག་རྒྱ་སྟོང་བཞི་པའོ། །དེ་ལྟར་མ་ལུས་པའི་ཕྱག་རྒྱ་བཅིང་བ་ནི་ལག་པ་གཅིག་གིས་ཕྱག་རྒྱ་ཐམས་ཅད་བཅིང་བ་རབ་ཏུ་སྒྲུབ་པའོ། །དེ་ལྟར་འགྲོ་བ་དོན་ཀུན་ཏུ། །འཁོར་དང་དམ་ཚིག་ལས་དང་བཅས། །ཀུན་མཆོག་དབང་ཕྱུག་དམ་པ་ནི། ། རྡོ་རྗེ་སེམས་དཔས་སྒྲུབ་པར་མཛད། །དེ་ལྟར་གསང་བ་རྒྱ་ཆེན་རྨད་དུ་བྱུང ། །མཆོག་ཏུ་འགྲོ་བ་ཐམས་ཅད་སྦྱོང་བྱེད་པ། །མཆོག་དང་པོ་ཡི་བླ་མ་བླ་ན་མེད། །གསལ་བའི་རྒྱུད་ནི་ང་
269a
༄#། །ཡིས་ཡང་དག་བཤད། །དཔལ་མཆོག་དང་པོའི་རྟོག་པའི་རྒྱལ་པོ་ལས། རིགས་ཐམས་ཅད་ཀྱི་ཕྱག་རྒྱའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །གསང་བ་ཀུན་གྱི་བདག་བརྟན་པས། །དེ་ཉིད་ཕྱག་རྒྱའི་རྒྱུད་ཆེན་པོའི། །མཚོན་ཆ་དམ་པ་འདི་གསུངས་སོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའི་རྟོག་པ་ཐམས་ཅད་ཀྱི་གསང་བའི་དཀྱིལ་འཁོར་གྱི་རྟོག་པའི་ཚོགས་མཆོག་ཏུ་མཁས་ཤིང་ཕྲ་བ། རྒྱ་ཆེ་ལ་ཟབ་པ། བསམ་གྱིས་མི་ཁྱབ་པ། ཚད་མེད་པ། གསལ་ཞིང་མཉམ་པ་མེད་པ། བླ་ན་མེད་པའི་བླ་མ། མཐར་ཐུག་པ་མེད་པའི་དངོས་གྲུབ་ཀྱི་གསང་བ་བསྒྲུབ་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་རྣམས་སྒྲུབ་པ་པོ་དོན་ཡོད་ཅིང་ཐོགས་པ་མེད་པ་བཤད་པར་བྱའོ། །ཞེས་བྱ་བ་བཅོམ་ལྡན་འདས་མཆོག་ཏུ་གསང་བས་གསུངས་སོ། །མ་མཆུ་སོ་རྣམས་ཀྱིས་བཟུང་ལ་དགའ་བ་ཆེན་པོས་དང་པོའི་རྡོ་རྗེའི་ལྟ་བས་བལྟ་ཞིང་བྱེད་པ་དག་གིས་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་སྒྲུབ་པར་བྱེད་པའོ། །བདེ་བ་ཆེན་པོའི་གསང་བ་ཆེན་པོའི་རྡོ་རྗེ་རྡོ་རྗེ་ཅན་ཞེས་བྱ་བའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་ཀྱི་བཞད་པ་ཆེན་པོས་དགོད་ཅིང་བརྟན་པའི་རྡོ་རྗེ་ལྟ་བུའི་བྱེད་པ་དག་
269b
གིས་དེ་བཞིན་གཤེགས་པ་ཐམས་ཅད་ཀྱི་ལས་རྣམས་སྒྲུབ་པར་བྱེད་པ་སྟེ། དེ་བཞིན་གཤེགས་པ་ཐམས་ཅད་ཀྱི་སྤྱན་ཞེས་བྱ་བའི་ཕྱག་རྒྱའོ། །ཁྲོ་གཉེར་དང་བཅས་པ། ཁྲོ་བོའི་རྡོ་རྗེ་ལྟ་བ་དང་བཅས་པའི་བྱེད་པ་དག་།སྣའི་དབུགས་ཆེན་པོའི་ཡི་གེ་ཧཱུཾ་གིས་རྡོ་རྗེ་ཐམས་ཅད་ཀྱི་དངོས་གྲུབ་སྟེ། རྡོ་རྗེ་ཉི་མ་ལྟར་མེ་འབར་བའི་ལྟ་བའི་སྤྱན་ཞེས་བྱ་བའི་ཕྱག་རྒྱའོ། །དེ་བས་ཅུང་ཟད་འཛུམ་པས་དངོས་གྲུབ་ཐམས་ཅད་ཀྱི་ལས་ཀྱི་ཡེ་ཤེས་ཀྱི་རྡོ་རྗེ་ལྟ་བའི་བྱེད་པ་རྣམས་ཀྱིས་མཆུ་མཉམ་པའི་ཏིང་ངེ་འཛིན་རྡོ་རྗེ་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཡེ་ཤེས་ཀྱི་ཚོགས་རྣམས་སྒྲུབ་པར་བྱེད་པ་སྟེ། པདྨ་ཆེན་པོའི་སྤྱན་ཞེས་བྱ་བའི་ཕྱག་རྒྱའོ། །བསྙེམས་པ་དང་བཅས་པའི་ཏིང་ངེ་འཛིན་གྱིས་ཕྲ་བར་འཛུམ་པའི་ལྟ་བའི་བྱེད་པ་རྣམས་དང ། བཞིན་མཛུམ་པ་དང་བཞད་པས་ནམ་མཁའ་ལ་དངོས་གྲུབ་ཐམས་ཅད་ཀྱི་ལས་ཀྱི་ཚོགས་སྒྲུབ་པར་བྱེད་པ་སྟེ། རྡོ་རྗེ་ཆེན་པོ་ནི་ནོར་བུའི་སྤྱན་ཞེས་བྱ་བའི་ཕྱག་རྒྱའོ། །དོན་ཡོད་ཐོགས་མེད་གྲུབ་པ་དང ། །བདེན་པའི་བདག་ཉིད་འཇིག་པ་མེད། །སངས་རྒྱས་ཀུན་དང་བདག་ཉིད་ཀྱང ། །གསང་བའི་ཕྱག་རྒྱ་ལེགས་གྲུབ་སྩོལ། ། དཀྱིལ་འཁོར་དུ་ནི་མ་ཞུགས་ཀྱང ། །དེ་ནས་དེ་ཕྱིར་མཆོག་དང་པོ། །བཅོམ་ལྡན་རྡོ་རྗེ་སེམས་དཔའ་མཆོག་།དང་པོ་ཤིན་ཏུ་མཁས་ཤིང་ཕྲ་ལ་ཟབ་ཅིང་རྒྱ་ཆེ་བ་བསམ་གྱིས་
270a
༄#། །མི་ཁྱབ་པ་སྟེ། །མཆོག་གི་མཆོག་ནི་དང་པོ་དང ། །མཆོག་ཏུ་གསང་བ་དམ་པ་སྟེ། །འཛུམ་པའི་ཕྱག་རྒྱ་ལ་སོགས་ཚོགས། །རྡོ་རྗེ་སེམས་དཔས་གསུངས་པ་ཡིན། །རྡོ་རྗེ་འཆང་ཆེན་སློབ་དཔོན་ནི། །མཆོག་ཏུ་དང་ཞིང་རབ་དགའ་བས། །སྙིང་པོ་ལ་སོགས་རྣམས་མེད་ཀྱང ། །མྱུར་དུ་ཐམས་ཅད་སྒྲུབ་པར་བྱེད། །སྙིང་པོ་ཕྱག་རྒྱ་སྔགས་རིག་པ། །སྒྲུབ་པ་འདི་ནི་རྨད་བྱུང་སྟེ། །དངོས་གྲུབ་ཐམས་ཅད་རབ་སྒྲུབ་པས། །མ་གྲུབ་རྣམས་ཀྱང་འགྲུབ་པར་འགྱུར། །གང་ཞིག་གྲུབ་པར་མ་གྱུར་དང ། བསོད་ནམས་ཕུན་ཚོགས་མི་ལྡན་ན། །བདག་ཉིད་དམ་ནི་རྡོ་རྗེ་སེམས། །བསྒྲུབས་ན་དེ་ནི་མྱུར་དུ་འགྲུབ། །གལ་ཏེ་རྡོ་རྗེ་སེམས་དཔའ་མཆོག་།སྙིང་པོ་སོགས་དང་ཉེ་སྙིང་པོས། །བསྒྲུབ་པ་བྱས་ཀྱང་མ་གྲུབ་ན། །འཛུམ་པའི་ཕྱག་རྒྱས་བསྒྲུབ་པར་བྱ། །དེ་ཕྱིར་གསང་བའི་བཙུན་མོ་འདི། །རྡོ་རྗེ་སེམས་དཔས་རབ་དགའ་བྱེད། །རྡོ་རྗེ་སེམས་དཔའ་དགའ་བ་ཆེ། །དགྱེས་པ་དེ་ཡིས་མྱུར་དུ་འགྲུབ། །དེ་ཉིད་ཆེན་པོ་འདི་གྲུབ་པ། །དམ་པ་མཆོག་གི་བདག་ཉིད་ནི། །གསང་བ་མཆོག་ཏུ་བསོད་ནམས་ལྡན། །སོ་སོའི་སྐྱེ་བོ་ལ་བརྗོད་མིན། །དེ་ཉིད་གྲུབ་པའི་རྗེས་འབྲང་བའི། །རྡོ་རྗེ་སེམས་དཔའི་གྲུབ་པ་གང ། །གལ་ཏེ་དངོས་གྲུབ་མཆོག་འདོད་ན། །དེ་བཞིན་གཞན་ལ་སྦྱིན་མི་
270b
བྱ། །གང་གིས་གྲུབ་པར་མ་གྱུར་ན། །དེ་ལ་དེ་ཉིད་སྦྱིན་པར་བྱ། །དེ་ཉིད་འཛུམ་པས་མྱུར་དུ་ནི། །བདག་བྱིན་བརླབས་པས་འགྲུབ་པར་འགྱུར། །དེ་ཉིད་ཆེན་པོ་དག་པ་འདི། །རྡོ་རྗེ་ཅན་གྱི་མཚོན་ཆ་མཆོག་།ཕྱག་རྒྱའི་རྒྱུད་ནི་བླ་མེད་པ། །མཆོག་ཏུ་གསང་བ་བཤད་པ་ཡིན། །དེ་ཉིད་དད་པའི་རྗེས་འབྲང་བའི། །རྡོ་རྗེ་སློབ་དཔོན་ཀུན་མཆོག་ལ། །གལ་ཏེ་དངོས་གྲུབ་མཆོག་འདོད་ན། །གཞན་རྣམས་ལ་ཡང་དེ་བཞིན་སྦྱིན། །ཕྱག་རྒྱའི་རྒྱུད་ནི་གཅིག་པུ་འདི། །བདག་ཉིད་གང་ལ་ཡོད་གྱུར་ན། །བདུད་ལ་སོགས་པ་རྣམས་ཀྱིས་ནི། །མི་ཐུབ་པ་དང་མི་སོད་འགྱུར། །དེ་ལ་རྒྱལ་བ་རྡོ་རྗེ་འཛིན། །ཀུན་མཆོག་དངོས་གྲུབ་ཀུན་གསོལ་བ། །ཀུན་གསོལ་ཀུན་བྱེད་ཐམས་ཅད་དུ། །བཀའ་བསྒོ་བ་ཀུན་གྲུབ་པར་འགྱུར། །དཔལ་མཆོག་དང་པོ་གསང་བའི་བླ་མ་དམ་པའི་དཔལ་རང་གི་དམ་ཚིག་གི་བླ་ན་མེད་པའི་མཆོག་ཏུ་གསང་བའི་ཕྱག་རྒྱའི་ཆོག་གའོ།། །།དེ་ནས་བཅོམ་ལྡན་འདས་དཔལ་མཆོག་དང་པོ་རྡོ་རྗེ་སེམས་དཔའི་མཆོག་དང་པོ་མཆོག་ཏུ་མཁས་ཤིང་ཕྲ་ལ་ཟབ་ཅིང་རྒྱ་ཆེ་བ་བསམ་གྱིས་མི་ཁྱབ་ལ་མཐའ་མེད་ཅིང་ཤིན་ཏུ་མཐའ་ཡས་པ་ཚད་མེད་ཅིང་གཞལ་དུ་མེད་པ། བླ་ན་མེད་པ། དོན་ཡོད་ཅིང་ཐོགས་པ་མེད་པའི་མཆོག་གི་དེ་ཁོ་ན་ཉིད་ཀྱི་སྙིང་པོ་མཆོག་ཏུ་གསང་བའི་སྙིང་པོ་མཆོག་ཏུ་གསང་བ་ཞེས་བྱ་བ་ཐམས་ཅད་ཀྱི་མཆོག་
271a
༄#། །གི་དངོས་གྲུབ་ཆེན་པོའི་བདག་པོ་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་མི་འགྱུར་བའི་དམ་པ་བླ་ན་མེད་པའི་གསང་བ་དང ། རབ་ཏུ་དགའ་བ་ཐམས་ཅད་དང ། བདེ་བ་དང ། ཡིད་བདེ་བའི་དངོས་གྲུབ་ཀྱི་མཆོག་སྒྲུབ་པར་བྱེད་པ་དང ། མཆོག་གི་ཕྱག་རྒྱའི་རྒྱུད་བཤད་པར་བྱའོ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཙུམ་པ་ན་དང ། འཁྱུད་པ་ལ་སོགས་པའི་བཅོམ་ལྡན་འདས་མཆོག་དང ། རྡོ་རྗེ་སེམས་དཔའི་ཕྱག་རྒྱ་ཐམས་ཅད་ནི་དགའ་བ་ཆེན་པོ་དཔལ་རྡོ་རྗེ་དོན་ཡོད་པའི་དགའ་བའི་དམ་ཚིག་རྣལ་འབྱོར་ཞེས་བྱ་བ་སྟེ་ཐམས་ཅད་རྣལ་འབྱོར་ཞེས་བྱ་བར་གང་བརྗོད་པའོ། །དེ་གང་དང ། གང་ལ་ཉེ་བར་སྦྱོར་བ་དེ་དང ། དེར་བཅོམ་ལྡན་འདས་ནི། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ལྷག་པའི་ལྷ། །བྱིན་རླབས་མཆོག་ནི་བརྟགས་མཛད་ནས། །རྡོ་རྗེ་སེམས་དཔའ་མྱུར་དུ་གྲུབ། །ཙུམ་པ་ན་དང ། འཁྱུད་པ་ལ་སོགས་པའི་རེག་བྱའི་རྒྱས་བཏབ་པ་ཙམ་གྱིས་ཀྱང་མ་ལུས་ཤིང་ལུས་པ་མེད་པ་དང ། ལྷག་མ་མེད་པ་ཐམས་ཅད་ཀྱི་མཆོག་དབང་ཕྱུག་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཡིད་ཀྱིས་འདོད་པ་གྲུབ་པར་བྱེད་པ་ཡིན་ནོ། །ཞེས་བྱ་བ་ཤིན་ཏུ་མཆོག་
271b
ཏུ་གསང་བའི་ཕྱག་རྒྱའོ། །རྣམ་པར་འཕྲུལ་བ་དང་བཅས་པའི་འཛུམ་ཞིང་གཡོ་བའི་མིག་གི་ཟུར་གྱིས་ལྟ་བའི་ཕྱག་རྒྱ་སྟེ། །བཅོམ་ལྡན་འདས་ཀྱི་དགའ་བ་ཆེན་པོའི་རྡོ་རྗེ་དོན་ཡོད་པའི་མདའ་ཞེས་བྱ་བས་རྒྱས་བཏབ་པས་ཐམས་ཅད་རྗེས་སུ་ཆགས་པ་དང ། དགུག་པ་དང ། དབང་དུ་བྱ་བ་དང ། དངོས་གྲུབ་མཆོག་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཡིད་ཀྱིས་འདོད་པ་རྣམས་སྒྲུབ་པར་བྱེད་པའོ། །འཛུམ་ཞིང་ཆུང་ཟད་ཕྱེ་བའི་མིག་གི་ལྟ་བ་ནི་མཆོག་ཏུ་དགའ་བའི་དཔལ་རྡོ་རྗེ་སྤྱན་ཞེས་བྱའི་ཕྱག་རྒྱ་ཐམས་ཅད་སྒྲུབ་པར་བྱེད་པ་སྟེ་འདིས་ལྟ་ཞིང་བཏུང་བར་བྱའོ། །འདི་ནི་བཅོམ་ལྡན་འདས་ཀྱིས་རབ་ཏུ་དགའ་བ་ཆེན་པོ་དཔལ་རྡོ་རྗེ་དོན་ཡོད་དགའ་བའི་བཅུད་ཀྱིས་ལེན་གྱི་མཆོག་གི་དངོས་གྲུབ་ཅེས་བྱ་བའི་ཕྱག་རྒྱ་སྟེ། ཚེ་ཟད་པ་ཐམས་ཅད་ཀྱང་འདིས་རྡོ་རྗེ་སེམས་དཔའི་ན་ཚོད་གཞོན་པ་དང ། ནད་མེད་པ་དང ། གཟུགས་དང ། སྟོབས་དང ། གཟི་བརྗིད་ཀྱི་སྟོབས་དང ། སྤྲོ་བ་དང ། དངོས་གྲུབ་ཀྱི་མཆོག་ཐམས་ཅད་དང ། དཔལ་དང ། སྐལ་པ་བཟང་པོ་དང ། དགའ་བ་ཆེན་པོ་དང ། ཤིན་ཏུ་བདེ་བ་ཐམས་ཅད་དང་ཡིད་བདེ་བ་དང ། དངོས་གྲུབ་ཀྱི་མཆོག་ཐོབ་པ་སྟེ། ཇི་སྲིད་དངོས་གྲུབ་ཀྱི་མཆོག་ཐམས་ཅད་ཀྱི་ལས་ཀྱི་ཚོགས་མཆོག་ཏུ་དམ་པ་གྲུབ་སྟེ། བཅོམ་ལྡན་འདས་ཡུམ་གྱི་རྒྱས་
272a
༄#། །བཏབ་པ་ཙམ་གྱིས་སྐད་ཅིག་མ་གཅིག་གིས་གྲུབ་པའོ། །བསྙེམས་པ་དང་བཅས་པའི་གཡོན་པའི་མིག་དགོད་ཅིང་གཏོད་པ་ནི། བཅོམ་ལྡན་འདས་དགྱེས་པ་ཆེན་པོའི་དཔལ་རྡོ་རྗེ་དོན་ཡོད་པའི་དགའ་བའི་རྒྱལ་མཚན་མཆོག་གི་དཔུང་རྒྱན་ཞེས་བྱ་བའི་ཕྱག་རྒྱ་སྟེ། འདིས་རྒྱས་བཏབ་པས་ཐམས་ཅད་ལས་རྣམ་པར་རྒྱལ་པར་བྱེད་པ་དང ། ཕྱག་བྱེད་དུ་བཅུག་པ་དང ། རབ་ཏུ་སྒྲུབ་པར་བྱེད་པ་དང ། ཇི་སྲིད་མཆོག་ཐམས་ཅད་གྲུབ་ཅིང་དངོས་གྲུབ་ཆེན་པོའི་དབང་ཕྱུག་ཉིད་རབ་ཏུ་སྒྲུབ་པར་བྱེད་པའོ། །སྒེག་པ་དང་བཅས་པའི་ལྟ་བ་དང ། འཛུམ་པ་དང ། གསོད་ཞིང་ཕྱག་འཚལ་བ་དང་ལྡན་པ་ནི་བཅོམ་ལྡན་འདས་ཀྱི་ཕྱག་རྒྱ་ཕྱག་འཚལ་བའི་ཕྱག་རྒྱ་སྟེ། དགའ་བ་ཆེན་པོ་དཔལ་དོན་ཡོད་པའི་དབང་ཕྱུག་གི་ཀི་ལི་ཀི་ལ་ཞེས་བྱ་བའི་ཕྱག་རྒྱ་སྟེ། འདིས་རྡོ་རྗེ་སེམས་དཔའ་ལ་སོགས་པའི་བརྟན་པ་དང ། གཡོ་བའི་དངོས་པོ་ཐམས་ཅད་ལ་རྒྱས་བཏབ་པས་འདུད་པར་གྱུར་ནས་དངོས་གྲུབ་མཆོག་ཐམས་ཅད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཀྱི་མཆོག་གི་དམ་པའི་དངོས་གྲུབ་ཀྱིས་འགྲུབ་པར་འགྱུར་རོ། །རྣམ་པར་འཕྲུལ་པ་དང་སྒེག་པ་དང་བཅས་པའི་འཛུམ་པའི་ཞལ་ཉིད་ནི་བཅོམ་ལྡན་འདས་མཆོག་དང་པོ་རྡོ་རྗེ་སེམས་དཔའི་
272b
དགའ་བ་ཆེན་པོའི་དཔལ་རྡོ་རྗེ་དོན་ཡོད་དགའ་བས་རྣམ་པར་འཕྲུལ་པ་བརྩོན་བ་ཞེས་བྱ་བ་མཆོག་ཏུ་གསང་བའི་རྡོ་རྗེ་འཛུམ་པའི་ཕྱག་རྒྱ་སྟེ། འདིས་བཅོམ་ལྡན་འདས་རྡོ་རྗེ་འཛིན་པ་ཐམས་ཅད་ཀྱི་སློབ་དཔོན་མཆོག་དང་པོའི་གླུ་ནི། །ཀུན་མཆོག་དངོས་གྲུབ་ཆེན་པོ་ནི། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་ཀུན་རྒྱལ་པོ་སྟེ། །མི་འགྱུར་མཆོག་ནི་འགྲུབ་པར་འགྱུར། །རྣམ་པར་འཕྲུལ་པ་དང་བཅས་པའི་སྒེག་པའི་འཛུམ་པའི་ཕྱག་རྒྱས་རྒྱས་བཏབ་པ་ཙམ་གྱིས་ཐམས་ཅད་ཀྱི་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་པོ་ཉིད་ལ་སོགས་པའི་དངོས་གྲུབ་ཐམས་ཅད་ལས་ཀྱི་ཚོགས་ཡིད་ཀྱི་འདོད་པ་རྣམས་གྲུབ་པར་བྱེད་དོ། །སརྦ་ཀུ་རུ་ཡ་ཐཱ་སུ་ཁཾ་ཞེས་བྱ་བ་བརྗོད་དེ། །དེ་བཞིན་གཤེགས་པ་ཐམས་ཅད་ཀྱི་གསང་བ་ཐེག་པ་ཆེན་པོའི་མདོ་སྡེའི་དབང་པོའི་རྒྱལ་པོ་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་སྟེ། དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་གསང་བའི་རྡོ་རྗེ་བྱིན་གྱིས་བརླབས་པ་ཞེས་བྱ་བ་འདི་རང་བཞིན་གྱིས་འོད་གསལ་བའི་ཕྱིར། ཆོས་ཐམས་ཅད་རྣམ་པར་དག་པ་ལ་སོགས་པ་མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་ཐོབ་པའི་ཡེ་ཤེས་དང ། མངོན་པར་ཤེས་པ་དང ། མཆོག་གི་
273a
༄#། །དངོས་གྲུབ་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཚོགས་རྣམས་སྒྲུབ་པར་བྱེད་པའོ། །རྣམ་པར་འཕྲུལ་བ་དང་བཅས་པའི་འཛུམ་ཞིང་སྨིན་མའི་ཁྲོ་གཉེར་རྡོ་རྗེ་ལྟ་བའི་ཕྱག་རྒྱ་ནི་བཅོམ་ལྡན་འདས་ཀྱི་ཁྲོ་བོ་ཀི་ལི་ཀི་ལ་ཞེས་བྱ་བའི་ཕྱག་རྒྱ་སྟེ། འདིས་རྒྱས་བཏབ་པས་རྡོ་རྗེ་སེམས་དཔའ་ལ་སོགས་པའི་བརྟན་པ་དང་གཡོ་བའི་དངོས་པོ་ཐམས་ཅད་རྗེས་སུ་ཆགས་པ་དང ། དགུག་པ་དང ། དབང་དུ་བྱ་བ་དང ། འབེབས་པ་དང ། གཞུག་པ་དང ། གར་དང ། གླུ་དང ། རྣམ་པར་འཕྲུལ་པ་སྟོན་པ་དང ། བདེན་ངག་ཐམས་ཅད་དང ། གྲོལ་བ་དང ། པྲ་དབབ་པ་ཐམས་ཅད་བསྒྲུབ་པ་དང ། སྒྱུ་མ་ཐམས་ཅད་དང ། རྨད་དུ་བྱུང་བ་ཐམས་ཅད་སོ་སོར་སྟོན་པ་དང ། སྣ་ཚོགས་པའི་གཟུགས་ཐམས་ཅད་ཀྱིས་བྱ་བ་སྟོན་པ་དང ། ཐམས་ཅད་ལ་རྒྱས་བཏབ་པ་དང ། གནོད་པ་དང ། གདུལ་བ་དང་གསོད་པ་དང ། ཐམས་ཅད་ཕྱིར་འདྲེན་པ་དང ། ཐམས་ཅད་སྒྲུབ་པ་དང ། མཆོག་གི་དངོས་གྲུབ་ལ་སོགས་པ་གཞོམ་དུ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་སྒྲུབ་པར་བྱེད་པའོ།། །།ཐམས་ཅད་དག་པའི་ཏིང་འཛིན་གྱིས། །ཐམས་ཅད་མཉམ་པ་ཉིད་ཀྱི་གཟུགས། །སྣ་ཚོགས་པ་ཡི་བྱ་བ་ལ། །རབ་འཇུག་མཆོད་པ་བྱིན་
273b
གྱིས་བརླབ། །རྡོ་རྗེ་པདྨ་ཞེས་བྱ་བ་ནི། །བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་དབང་ཕྱུག་གི་ཕྱག་རྒྱ་སྟེ། ཐམས་ཅད་རྣམ་པར་སྦྱོང་བ་དང ། སྲུང་བ་དང ། ཡོངས་སུ་སྦྱོང་བ་དང ། རིམས་ཐམས་ཅད་དང ། དུག་དང ། སྦྱར་བའི་དུག་དང ། གདོན་དང ། ནད་དང་མཁའ་འགྲོ་མའི་ཕྱག་རྒྱ་ཉེ་བར་ཞི་བ་དང ། ཤི་བ་ཡང་དག་པར་གསོ་བ་དང ། དབང་ཕྱུག་ཐམས་ཅད་ཐོབ་པ་དང ། གཟུགས་སྣ་ཚོགས་པའི་བྱ་བ་ཐམས་ཅད་ལ་རབ་ཏུ་འཇུག་པ་ལ་སོགས་པའི་དོན་གྲུབ་པའི་དངོས་གྲུབ་མཐའ་ཡས་པ་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱིས་རབ་ཏུ་བྱེད་པའོ། །ནམ་མཁའ་ཕྲ་བར་བསྐྱོད་པ་དག་གིས་རོལ་ཞིང་རྣལ་འབྱོར་ཐམས་ཅད་ཀྱིས་རྗེས་སུ་ཆགས་པར་བྱ་སྟེ། འདི་ལ་བཅོམ་ལྡན་འདས་ནམ་མཁའི་སྙིང་པོའི་རྡོ་རྗེ་བྱིན་གྱིས་བརླབས་པ་ཞེས་བྱ་བའི་ཕྱག་བྱ་བའི་ཕྱག་རྒྱ་སྟེ། འདིས་རྒྱས་བཏབ་པས་བཅོམ་ལྡན་འདས་རྗེས་སུ་ཆགས་ཤིང་དགྱེས་པ་དང ། བརྟན་པར་རྗེས་སུ་ཆགས་ནས་ནམ་མཁའ་ཐམས་ཅད་ཀྱི་བདག་ཉིད་ཀུན་གྱིས་དངོས་པོ་ཉིད་ཀྱི་ཕྱིར་བསམ་པ་ཐམས་ཅད་ཡོངས་སུ་རྫོགས་པ་དང ། མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཡིད་ལ་འདོད་པ་རྣམས་སྒྲུབ་པར་བྱེད་པའོ། །ཞེས་བྱ་བ་ཡང་གསུངས་སོ། །མཆོག་དང་པོ་
274a
༄#། །ནི་མཆོག་ཉིད་དུ། །གསང་བ་དམ་པ་གསུངས་པ་ཡིན། །མིག་སོགས་ཕྱག་རྒྱ་རྒྱས་བཏབ་པའོ། །རྡོ་རྗེ་སེམས་དཔས་གསུངས་པ་ཡིན། །རྡོ་རྗེ་ཀུན་འཛིན་སློབ་དཔོན་གྱི། །ཙུམ་པ་ན་དང་འཁྱུད་སོགས་ཀྱིས། །ཐམས་ཅད་རྣལ་འབྱོར་རྗེས་བསྒྲུབ་སྟེ། །མྱུར་དུ་ཀུན་ལ་རྒྱས་གདབ་བྱ། །སྙིང་པོ་ཕྱག་རྒྱ་སྔགས་རིག་པའི།། སྒྲུབ་པ་འདི་ནི་རྨད་བྱུང་སྟེ། །གྲུབ་པ་མེད་པ་རྣམས་ལ་ཡང ། །དངོས་གྲུབ་ཐམས་ཅད་རབ་སྒྲུབ་བྱེད། །གང་ལ་དངོས་གྲུབ་མེད་གྱུར་དང ། བསོད་ནམས་ཕུན་ཚོགས་མེད་པ་ཡང ། །བདག་ཉིད་རྡོ་རྗེ་སེམས་དཔའ་འམ། །རྒྱས་གདབ་མྱུར་དུ་འགྲུབ་པར་འགྱུར། །གལ་ཏེ་རྡོ་རྗེ་སེམས་དཔའ་མཆོག་།སྙིང་པོ་ལ་སོགས་ཉེ་སྙིང་པོས། །བསྒྲུབ་བྱ་གྲུབ་པར་མ་གྱུར་ན། །ཙུམ་པ་སོགས་ཀྱིས་རྒྱས་གདབ་བྱ། །གང་ཕྱིར་གསང་བའི་ཕྱག་རྒྱ་ནི། །དངོས་གྲུབ་ཀུན་གྱི་བདེ་དམ་པ། །རྡོ་རྗེ་སེམས་དཔའི་མཆོད་པ་མཆོག་དེ་ཡིས་མྱུར་དུ་འགྲུབ་པར་འགྱུར། །དེ་ཉིད་ཆེན་པོ་འདི་གྲུབ་པ། །མཆོག་གི་བདག་ཉིད་དམ་པ་སྟེ། །མཆོག་ཏུ་གསང་བ་བསོད་ནམས་ལྡན། སོ་སོའི་སྐྱེ་བོ་ལ་བརྗོད་མིན། ། རྡོ་རྗེ་སློབ་དཔོན་སློབ་མ་མཆོག། །དེ་ཉིད་དད་པའི་རྗེས་འབྲང་ལ། །གལ་ཏེ་དངོས་གྲུབ་མཆོག་འདོད་ན། །སྦྱིན་ཏེ་གཞན་ལ་སྦྱིན་མི་བྱ། །ཕྱག་རྒྱའི་རྒྱུད་འདི་འབའ་ཞིག་
274b
གི་།བདག་ཉིད་གང་ལ་ཡོད་གྱུར་ན། །བདུད་ལ་སོགས་པ་ཐམས་ཅད་ཀྱིས། །མི་ཐུབ་པ་དང་སོད་མི་འགྱུར། །དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་དངོས་གྲུབ་ཀུན་སྩོལ་བ། ཐམས་ཅད་མཛད་ཅིང་ཐམས་ཅད་མཁྱེན། །ཐམས་ཅད་སྒྲུབ་པར་མཛད་པ་ཡིན། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས། མཆོག་ཏུ་གསང་བ་ཞེས་བྱ་བའི་ཕྱག་རྒྱའི་རྒྱུད་ཕྱག་རྒྱ་བཅུ་པ་རྫོགས་སོ།། །།དེ་ནས་མཆོག་ཏུ་མཁས་ཤིང་ཕྲ་ལ་ཟབ་ཅིང་རྒྱ་ཆེ་བ་བསམ་གྱིས་མི་ཁྱབ་པ་ཤིན་ཏུ་མཐའ་ཡས་པ་ཚད་མེད་ཅིང་གཞལ་དུ་མེད་ཅིང་བརྗོད་ཀྱིས་མི་ལང་ཞིང་རབ་ཏུ་ཁྱབ་པ་མཆོག་ཏུ་གྲུབ་པ་ཞེས་བྱ་བའི་ཕྱག་རྒྱའི་རྒྱུད་བཤད་པའོ། །ཞེས་བྱ་བ་བཅོམ་ལྡན་འདས་མཆོག་ཏུ་གྲུབ་པའི་རྡོ་རྗེས་གསུངས་སོ། །དེ་ལ་ཕྱག་རྒྱ་བཅུ་ནི་བདག་ཉིད་ཐམས་ཅད་བསྐྱེད་པར་བྱེད་པའོ། །རྡོ་རྗེ་སེམས་དཔའི་ཕྱག་རྒྱ་ཆེན་པོའི་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་ལས་བྱུང་བའོ། །སྔོན་དུ་དང་པོའི་དངོས་གྲུབ་ཐམས་ཅད་མཆོག་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མྱུར་དུ་སྒྲུབ་པར་བྱེད་པ་སྟེ། དེ་ལ་འདི་ནི་སྐུའི་ཕྱག་རྒྱ་སྟེ་བ་དན་གསུམ་པ་དང ། ཁ་ཊྭཱཾ་གའི་ཕྱག་རྒྱ་བཅིངས་ནས་གཡོན་བ་དྲིལ་བུ་དང་བཅས་ཤིང་གཡས་པ་བསླང་བའི་ཚུལ་དུ་བྱེད་པ་སྟེ། སྒེག་པ་དང་
275a
༄#། །བཅས་པའི་མཛུབ་མོ་ལ་སོགས་པ་བཀྲོལ་བའི་གར་གྱིས་རྡོ་རྗེ་འདོད་པའི་དབང་ཕྱུག་མ་གཏོད་བ་སྟེ། ཐམས་ཅད་ཀྱི་མཆོག་དངོས་གྲུབ་ཆེན་པོ་དབང་ཕྱུག་ཆེན་པོའི་མཆོག་གི་ཕྱག་རྒྱས་དགའ་བ་ཆེན་པོའི་དཔལ་རྡོ་རྗེ་དོན་ཡོད་པའི་དགྱེས་པའི་དམ་ཚིག་དངོས་གྲུབ་ཀྱི་རྣལ་འབྱོར་གྱི་དབང་ཕྱུག་མ་ཞེས་བྱ་བ་སྟེ། དེས་རྡོ་རྗེ་བསྙེམས་མ་ཡོངས་སུ་བཏང་བར་བྱས་ན་དངོས་གྲུབ་བཞིར་འགྱུར་རོ། །རྡོ་རྗེ་བསྙེམས་མ་དེ་ཉིད་ཀྱིས་རྒྱས་བཏབ་ན་ཐམས་ཅད་ཀྱི་མཆོག་གི་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་ཉིད་མི་འགྱུར་བའི་མཆོག་གོ་།མདའ་གསོར་བས་རྒྱས་བཏབ་ན་རྡོ་རྗེ་ལྷ་མོ་རྣམས་ཀྱང་རྗེས་སུ་ཆགས་པར་བྱེད་ན་བུད་མེད་གཞན་རྣམས་ལྟ་སྨོས་ཀྱང་ཅི་དགོས། རྡོ་རྗེ་ཀི་ལི་ཀི་ལས་རྒྱས་བཏབ་ན་ལྷ་དང ། ལྷ་མ་ཡིན་གྱི་བུད་མེད་ཐམས་ཅད་ཀྱི་བུད་མེད་ཐམས་ཅད་རོལ་བར་བྱེད་ཅིང་མ་གྲུབ་ན་ཡང་ཐམས་ཅད་སྒྲུབ་པར་ནུས་པ་ཡིན་ནོ། །ཆུ་སྲིན་གྱི་རྒྱལ་མཚན་སྒྲེང་བའི་ཕྱག་རྒྱ་འདིས་ཐམས་ཅད་ལས་རྣམ་པར་རྒྱལ་བ་དང ། གསོད་པའོ། །རྡོ་རྗེ་འདོད་པའི་དབང་ཕྱུག་མས་ཡོངས་སུ་དགོད་ཅིང་ཕྲེང་བ་དོར་བའི་སྔགས་དང ། ཕྱག་རྒྱས་བཏབ་པ་ཙམ་གྱིས་འདོད་པ་ཐམས་ཅད་ཀྱི་དབང་ཕྱུག་ཐོབ་པའོ། །མཆོག་ཏུ་གསང་བའི་རས་རིས་ཀྱི་ཕྱག་རྒྱ་ཅི་ལྟ་བ་བཞིན་དུ་
275b
བརྗོད་པར་བྱའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་མཆོད་པས་རབ་ཏུ་དགའ་བ་ལ་སོགས་པའི་མཆོད་པ་ཐམས་ཅད་ཐོབ་པ་མི་ཟད་པའོ། །རྡོ་རྗེ་གཏོད་པའི་ཕྱག་རྒྱས་སྲིད་པ་གསུམ་ཐམས་ཅད་བསྐྱོད་པ་དང ། དབང་ཏུ་བྱེད་པའོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་དང ། རྐང་པས་ལྷའི་གཟུགས་བརྙན་མནན་ཅིང་རྒྱས་བཏབ་ནས་སྡིགས་མཛུབ་བྱས་ཏེ། ལྷ་ལ་སོགས་པའི་སེམས་ཅན་དེ་དང་དེ་རིང་པོར་མི་ཐོགས་པར་རྒྱས་བཏབ་པས་བཀའ་བསྒོ་བ་ཐམས་ཅད་དང་ལས་རྣམས་བྱེད་པར་འགྱུར་རོ། །སྟན་མཐོན་པོ་ལ་སྐྱིལ་ཀྲུང་ཕྱེད་པས་འདུག་སྟེ། རྐང་པ་གཡོན་པས་རྡོ་རྗེ་སེམས་དཔའི་གཟུགས་བརྙན་ཡང་མནན་ནས་རྡོ་རྗེ་གསོར་ཞིང་རྡོ་རྗེ་སེམས་དཔའ་མནན་ནས། དངོས་གྲུབ་ཡིད་དུ་འོང་བ་ཐམས་ཅད་དང་ཕུན་སུམ་ཚོགས་པ་རྣམས་ཉམས་སུ་མྱོང་ན་ལྷ་ལ་སོགས་པའི་སེམས་ཅན་རྣམས་ལྟ་སྨོས་ཀྱང་ཅི་དགོས། །གཡོན་པའི་རྡོ་རྗེ་ཁུ་ཚུར་གྱིས་རང་གི་རྟགས་བཟུང་ནས་གཡས་པ་རྡོ་རྗེ་ལ་སོགས་པ་གཏོད་པའི་ཚུལ་གྱིས་འཛིན་ཅིང ། ཡིད་ལ་འདོད་པའི་ལྷའི་བུ་མོ་ཐམས་ཅད་ལ་རྒྱས་འདེབས་ཤིང་སྟོབས་ཀྱིས་རོལ་བར་བྱེད་པའམ། སྒྲུབ་པར་བྱེད་པ་སྟེ་རྡོ་རྗེ་སེམས་དཔའི་ཕྱག་རྒྱ་ཆེན་པོའོ། །དེ་ནས་དམ་ཚིག་གི་ཕྱག་རྒྱ་ནི་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ལས་བྱུང་བ་ནི་བཅུ་སྟེ་
276a
༄#། །སྙིང་གར་སེན་མོ་འདྲུད་པའོ། །ལྕགས་ཀྱུ་བརྡེག་པའོ། །གཡོན་པའི་ལྕགས་ཀྱུ་ལ་གཡས་པ་དེ་གཞུག་པའོ། །ལྕགས་ཀྱུའི་རྩེ་མོ་བཙིར་བའོ། ། ཕན་ཚུན་སེམས་བྲུད་པའི་སྙིང་གར་བྱས་པའོ། །ལྕེ་མཉམ་པར་བྱིན་པའོ། །སྙིང་གར་རྡོ་རྗེ་བརྟན་པར་རབ་ཏུ་བཞག་པའོ། །རྡོ་རྗེས་བྱབ་པའོ། །རྩེ་བའི་ཕྱག་རྒྱ་ཡང་ངོ ། །འདི་རྣམས་ཀྱི་དངོས་གྲུབ་དང ། ཕུན་སུམ་ཚོགས་པ་དང ། བདེ་བ་དང ། ཕྱག་རྒྱ་དང ། དམ་ཚིག་དང ། དཀྱིལ་འཁོར་དང ། ཆོས་དང ། ཡེ་ཤེས་དང ། ལས་དང ། བདེ་བ་ཆེན་པོ་ཐམས་ཅད་ཀྱི་དངོས་གྲུབ་རྣམས་དོན་ཡོད་པར་ཐོབ་པར་འགྱུར་རོ། །དེ་ནས་གསང་བའི་དམ་ཚིག་གི་རྡོ་རྗེ་བསྡམས་པ་ལས་བྱུང་བའི་ལས་བཅུ་ནི་དབུས་མའི་ལྕགས་ཀྱུས་སོ། །ཁ་སྦྱོར་གྱི་ནང་དུ་རྡོ་རྗེ་སོར་མོ་རྣམས་ཐམས་ཅད་ཀྱི་ལས་སོ། །མཐེ་བོ་རྡོ་རྗེའོ། །དེ་ཉིད་ཀྱིས་མཐིལ་གཉིས་སུ་བྲུད་པའོ། །མཛུབ་མོ་རྡོ་རྗེའོ། །དེ་ཉིད་ཀྱི་ལྕགས་ཀྱུ་གཉིས་སོ། །དབུས་མའི་རྡོ་རྗེའོ། །དེ་ཉིད་ཀྱིས་སོར་མོའི་རྩེ་མོ་བཅིང་བར་བྱའོ། །སྲིན་ལག་གི་རྡོ་རྗེའོ། །དེ་ཉིད་ཀྱིས་སོར་མོའི་རྩེ་མོ་དག་གི་རོལ་མོའོ། །མཐེའུ་ཆུང་གི་རྡོ་རྗེའོ། །དེ་ཉིད་ཀྱིས་མཐེ་བོ་གཉིས་ཀྱི་སེན་མོ་བཅིང་བའོ། །འདི་རྣམས་ཀྱིས་བཏབ་པས་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་སྒྲུབ་པ་དང །
276b
རྗེས་སུ་ཆགས་པ་དང ། དབང་དུ་བྱེད་པ་དང ། དགུག་པ་དང ། རོལ་པ་དང ། ཆགས་པས་བཅིང་བ་དང ། ཐམས་ཅད་སྨྲར་གཞུག་པ་དང ། གར་བྱེད་དུ་གཞུག་པ་དང ། དགོད་དུ་གཞུག་པ་དང ། གསོད་པའོ། །དེ་ནས་ལས་ཀྱི་དམ་ཚིག་གི་ཕྱག་རྒྱ་བཅུ་ནི་རྡོ་རྗེ་གར་གྱི་མཆོད་པ་ལྷ་དང ། ལྷ་མ་ཡིན་གྱི་བུ་མོ་ཐམས་ཅད་དང ། བུ་མོ་གཞོན་ནུ་མ་ཐམས་ཅད་བརྟན་པར་རྗེས་སུ་ཆགས་པ་ནི་རྡོ་རྗེ་ལྟ་བས་སོ། །རབ་ཏུ་དགའ་བའི་སྒྲུབ་པ་ནི་མ་མཆུ་ནང་དུ་གཡོ་བར་བྱེད་པས་མྱང་བ་དང ། བཏུང་བའོ། །ཆགས་པ་བརྟན་ཞིང་ལྟུང་བ་ནི་དབུགས་རིང་པོར་གཏོང་བས་སོ། །དེ་ནས་ལས་འདོད་པ་ཐམས་ཅད་ཀྱིས་དབང་ཕྱུག་ཐོབ་པ་ནི་དཔུང་བ་གཉིས་གཏོད་པས་སོ། །ཐམས་ཅད་ཀྱིས་མཆོད་པར་འགྱུར་བ་ནི་སྙིང་གར་གཞུག་པས་སོ། །ཡོད་པ་ཐམས་ཅད་རྙེད་པ་ནི་མིག་དགུག་པས་སོ། །འདོད་པའི་ཆགས་པ་བསྐྱེད་པ་ནི་དབུས་དང་བཅས་པའི་སྨིན་པའི་གདོང་གིས་ལྟ་བས་སོ། །ཐམས་ཅད་འབེབས་པའི་ཆོ་ག་ནི་རང་གི་སྙིང་ཕྲ་བར་བསྐྱོད་པའི་ལས་རྣམས་ཀྱིས་སོ། །འདོད་པའི་ཆགས་པ་གསད་པ་ནི་དབུགས་བཏང་བས་རང་ཉིད་ལྡང་བར་བྱེད་པས་སོ། །འདོད་པ་ཐམས་ཅད་ཀྱི་རྗེས་སུ་སྤྱོད་པ་ལ་སོགས་པའི་ལས་ཐམས་ཅད་ཀྱི་བྱེད་པ་ནི་བཀའ་བསྒོ་བས་སོ། །དེ་རྣམས་རྡོ་རྗེ་སེམས་དཔའ་ལ་
277a
༄#། །སོགས་པའི་བརྟན་པ་དང ། གཡོ་བའི་དངོས་པོ་ཐམས་ཅད་ལ་ཡང་ཉེ་བར་སྦྱོར་ན་དོན་ཡོད་གྲུབ་པས་སྐད་ཅིག་ཉིད་ཀྱིས་བརྟན་ཞིང་མི་འགྱུར་བའི་དངོས་གྲུབ་ཀྱིས་རྒྱས་བཏབ་ན་འགྲུབ་པར་འགྱུར་རོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་ལས་ཀྱི་ཕྱག་རྒྱ་བཅུ་ནི་རྡོ་རྗེ་བསྙེམས་མའི་ཕྱག་རྒྱས་ཐམས་ཅད་བསྒྲུབ་པའོ། །རྡོ་རྗེ་མཚོན་ཆ་མས་ཐམས་ཅད་ལས་རྣམ་པར་རྒྱལ་བ་དང ། རྗེས་སུ་ཆགས་པའོ། །རྡོ་རྗེ་ཀི་ལི་ཀི་ལས་རབ་ཏུ་དགའ་བའི་རེག་བྱ་དང ། དངོས་གྲུབ་ཐམས་ཅད་བདེ་བར་གྲུབ་པའོ། །རྒྱལ་མཚན་སྒྲེང་བས་འཐབ་མོ་ཐམས་ཅད་ལས་རྣམ་པར་རྒྱལ་བའོ། །རྡོ་རྗེ་འདོད་པའི་དབང་ཕྱུག་མས་བདག་པོ་ཆེན་པོ་ཉིད་དོ། །དུས་ཀྱིས་མཆོད་པས་མཆོད་པར་འགྱུར་བ་ཉིད་དོ། །རྡོ་རྗེ་གསོར་བས་ཐམས་ཅད་འདུལ་བའོ། །རྡོ་རྗེ་དོར་བས་ཐམས་ཅད་གསོད་པ་དང ། ཐམས་ཅད་འཕྲོག་པའོ། །གཡོན་པ་བསྙེམས་ཤིང་གཡས་པའི་རྡོ་རྗེ་ཁུ་ཚུར་གྱི་ལས་རྣམས་ཀྱིས་སྒྱུ་མ་དང ། རྫུ་འཕྲུལ་ཐམས་ཅད་དང ། སོ་སོར་སྟོན་པ་དང ། རྨུགས་པ་དང ། རེངས་པ་དང ། གཉིད་ལོག་ཏུ་གཞུག་པ་དང ། བསྐོར་བ་དང ། བསྐྲད་པ་དང ། འབྲུ་དང ། ལྟུང་བ་འཕོ་བ་དང ། དབང་དུ་བྱེད་པ་ལ་སོགས་པའི་ལས་
277b
ཐམས་ཅད་སྒྲུབ་པར་བྱེད་པའོ། །རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་བཅུ་ནི་རྡོ་རྗེ་ཐལ་མོ་ལས་བྱུང་བའོ། །རྡོ་རྗེ་སྐུ་མཆོག་གི་དངོས་གྲུབ་ཐམས་ཅད་དོ། །མཛུབ་མོ་གཉིས་ཀྱི་ལྕགས་ཀྱུས་དངོས་གྲུབ་ཐམས་ཅད་དོ། །རྡོ་རྗེ་གནོད་སྦྱིན་གྱིས་བདུད་ཐམས་ཅད་ལ་སོགས་པའི་གདུག་པ་འདུལ་བའི་དེ་ཉིད་ཀྱིས་མཐེ་བོའི་རྡོ་རྗེས་བཀབ་པས་ཐམས་ཅད་རྙེད་པའོ། །དེ་ཉིད་ཀྱི་མཐེ་བོ་གཉིས་བཅུག་པའི་གཙུག་ཏོར་རྡོ་རྗེས་ཐམས་ཅད་བསྲུང་བའི་མཐེ་བོ་རྡོ་རྗེ་ནང་དུ་བཅུག་པ་དེ་ཉིད་ཀྱིས་རྡོ་རྗེ་སེམས་དཔའ་ལ་སོགས་པའི་སེམས་ཅན་ཐམས་ཅད་རྗེས་སུ་ཆགས་པ་དང ། དགུག་པ་དང ། དབང་དུ་བྱེད་པ་བསྒྲུབ་པའོ། །མཐེའུ་ཆུང་རྡོ་རྗེ་སོར་མོ་གཉིས་ཀྱི་རྩེ་མོ་གཉིས་མཛུབ་མོ་གཉིས་ཀྱིས་ལེགས་པར་བཟུང་བས་མཐེ་བོ་ནི་དཔལ་དགུག་པ་དང་དབང་དུ་བྱེད་པའོ། །རྡོ་རྗེ་གནོད་སྦྱིན་གྱི་རྒྱལ་མོ་དེ་ཉིད་ཀྱིས་ནོར་ཐམས་ཅད་དང ། དཔལ་དབྲོག་པའོ། །དེ་ཉིད་ཀྱི་དབུས་མ་གཉིས་ཀྱིས་སྲིན་ལག་གཉིས་ཀྱི་རྩེ་མོ་ཡོངས་སུ་བཙིར་བས་བདུད་ལ་སོགས་པའི་གདོན་ལས་གྲོལ་བ་དང ། དབང་དུ་བྱས་ནས་ལས་ཐམས་ཅད་ལ་སྦྱོར་བའོ། །རབ་ཏུ་དགའ་བའི་རྡོ་རྗེས་ཡུལ་ཐམས་ཅད་ཀྱི་མཆོག་སྒྲུབ་པའོ། །དེ་ནས་གསང་བའི་ཕྱག་རྒྱ་རབ་ཏུ་དགའ་བའི་རྡོ་རྗེ་ལས་བྱུང་བའོ། །སེམས་དཔའ་མནན་
278a
༄#། །ནས་རྡོ་རྗེ་ལྷ་མོ་རོལ་ཏུ་གཞུག་པའོ། །དེ་ཡང་རབ་ཏུ་དགའ་བའི་རྡོ་རྗེ་ཆེན་པོས་རྒྱས་བཏབ་པས་སོ། །རྡོ་རྗེ་དང་བཅས་པའི་རབ་ཏུ་དགའ་བའི་རྡོ་རྗེས་སོ། །དེ་བཞིན་གཤེགས་པ་ཐམས་ཅད་ཀྱི་ཆགས་པ་དང་བྲལ་བའི་འཁོར་ལོས་སོ། །མཛུབ་མོ་དང ། དབུས་མ་དང ། སྲིན་ལག་གི་འཁོར་ལོ་བསྒྲེང་བར་བྱས་ལ་མཐེ་བོ་དང་མཐེའུ་ཆུང་མཉམ་ལ་དྲལ་བར་བྱ་སྟེ། རབ་ཏུ་དགའ་བའི་རྡོ་རྗེ་བསྒྲུབ་པ་དེ་ཁོ་ན་ཉིད་ཀྱིས་རྒྱས་བཏབ་ཅིང་བསྒྲུབ་པར་འགྱུར་རོ། །བཙིར་བས་འདོད་པ་ཐམས་ཅད་རབ་ཏུ་སྒྲུབ་པར་བྱེད་པའོ། །མཛུབ་མོ་ལྕགས་ཀྱུས་འདོད་པ་ཐམས་ཅད་ཀྱི་བདེ་བ་དགུག་པའོ། །མཛུབ་མོས་ཕྲག་དོག་ལ་སོགས་པའི་འདོད་པས་ཐམས་ཅད་ཀྱི་སྡུག་བསྔལ་རབ་ཏུ་ཞི་བའོ། །རྟག་ཏུ་བསྐྱོད་པས་རབ་ཏུ་དགའ་བ་འབེབས་ཤིང་དེ་ནས་བསྒྲུབ་པའོ། །སྐྱེ་གནས་གཡོ་བས་བུད་མེད་དང ། སྐྱེས་པ་དག་གི་རབ་ཏུ་དགའ་བ་ལ་འཇིག་རྟེན་ལས་འདས་པའི་འདོད་པ་ཐམས་ཅད་ཀྱི་བདེ་བ་ཆེན་པོ་ཤིན་ཏུ་མཐའ་ཡས་པའོ། །ཁ་སྦྱོར་བཙིར་བས་ཇི་སྲིད་འཚོའི་བར་དུ་འདུས་པ་དང་བྲལ་བ་ཡང་ངོ ། །རྟགས་ཀྱི་སེན་མོ་གཡོན་པའི་མཐིལ་བྲུད་པས་ཤིན་ཏུ་བརྟན་པའི་འདོད་པ་ལ་ཆགས་པ་ཉིད་དུ་འགྱུར་རོ། །གཞན་གྱི་འདོད་པ་ལ་མི་
278b
ལྟ་ཞིང་གཞན་ལ་མི་འགྲོ་བར་ཤིན་ཏུ་བདེ་བ་དང ། ཡིད་བདེ་བ་སྟེར་བའི་བུད་མེད་ཐམས་ཅད་འགྲུབ་པར་འགྱུར་རོ། །སྐྱེ་གནས་སུ་སེན་མོ་བྲུད་པས་སྐྱེས་བུ་རྣམས་སོ། །དེ་ནས་ཐམས་ཅད་ཀྱི་བདག་ཉིད་ཀྱི་གསང་བའི་ཕྱག་རྒྱ་བཅུ་སྟེ། དེ་ལ་ལུས་ཐམས་ཅད་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་གཉིས་ཀྱིས་འཁྱུད་ལ་མ་མཆུ་སོ་རྣམས་ཀྱིས་བཟུང་སྟེ། རྨོངས་པས་བདེ་བ་སྟེར་དུ་གཞུག་།བསྒྲུབ་པས་རབ་ཏུ་དགའ་བའི་དངོས་གྲུབ་ཀྱིས་རྡོ་རྗེ་སེམས་དཔའ་ཤིན་ཏུ་འགྲུབ་པར་འགྱུར་རོ། །མཆོག་དང་པོའི་དངོས་གྲུབ་ཀྱིས་སུ་ར་ཏ་སྟྭཾ་ཞེས་བཅོམ་ལྡན་འདས་ལ་བརྗོད་ཅིང་དེ་ཁོ་ན་ཉིད་བསྐུལ་བས་གྲུབ་པར་འགྱུར་རོ། །རབ་ཏུ་དགའ་བའི་ཡེ་ཤེས་ཀྱིས་ཐམས་ཅད་སྒྲུབ་པའོ། །ལག་པ་གཡོན་པའི་ཁུ་ཚུར་གསང་བར་རེག་ན་ཐམས་ཅད་བསྒྲུབ་པའོ། །བདེ་བ་ཆེན་པོ་རྡོ་རྗེ་ལས་བྱུང་བའི་རྡོ་རྗེ་ཆེན་པོའི་ལྟ་བས་ཐམས་ཅད་གྲུབ་པའོ། །སྨིན་མ་གྱེན་དུ་བཏེག་པས་ལྟུང་བ་སློང་བའོ། །རང་གི་མ་མཆུ་ནང་དུ་མྱང་བས་སྐལ་བ་བཟང་པོ་ཆེན་པོ་སྒྲུབ་བའོ། །རང་གི་ལྕེ་བསྐྱོད་པས་རང་ཉིད་ཀྱི་བདེན་པ་ཐམས་ཅད་དང ། དེ་ཁོ་ན་ཉིད་གསལ་ཞིང་མི་སླུ་བར་སྨྲ་བའོ། །རང་གི་ལུས་ལ་འབེབས་པས་གཟུགས་ཐམས་ཅད་ཡོངས་སུ་བསྒྱུར་བ་སྟེ། རྡོ་རྗེ་སེམས་དཔའ་འམ། སངས་རྒྱས་སུ་ཡང་འགྱུར་བ་ཡིན་ནོ། །རང་གི་བདག་
279a
༄#། །ཉིད་རྡོ་རྗེ་བསྒོམས་པས་ནམ་མཁའ་ལ་འགྲོ་བའོ། །དེ་ནས་དང་པོ་ལས་ཐམས་ཅད་ཀྱི་ཕྱག་རྒྱ་བཅུ་ནི་རྡོ་རྗེ་ཐལ་མོ་ཁ་ཊྭཱཾ་གསོ། །དངོས་གྲུབ་ཐམས་ཅད་རྡོ་རྗེ་ཁུ་ཚུར་དག་གིས་སོ། །དེ་བཞིན་གཤེགས་པའི་ཁུ་ཚུར་དག་གིས་དངོས་གྲུབ་ཐམས་ཅད་དོ། །ཐམས་ཅད་གསོད་པ་ནི་ཁྲོ་བོའི་ཁུ་ཚུར་དག་གིས་སོ། །ཐམས་ཅད་སྦྱར་བ་ནི་པདྨའི་ཁུ་ཚུར་དག་གིས་སོ། །ནོར་ཐམས་ཅད་དབྲོག་པ་ནི་ནོར་བུའི་ཁུ་ཚུར་གྱིས་སོ། །ཐམས་ཅད་འབེབས་པ་ནི་ཐམས་ཅད་འབེབས་པའི་ཁུ་ཚུར་གྱིས་སོ། ། ཐམས་ཅད་གར་བྱེད་དུ་གཞུག་པ་ནི་ཁ་ཊྭཱཾ་ག་གཏོར་བའི་ཁུ་ཚུར་དག་གིས་སོ། །ཐམས་ཅད་སྨྲར་གཞུག་པ་ནི་མཛུབ་མོ་མཉམ་པའི་ལྕེའི་ཁུ་ཚུར་དག་གིས་སོ། །ཐམས་ཅད་བསྐྱོད་པ་ནི་བརྟན་པའི་ཁུ་ཚུར་དག་གིས་སོ། །ཐམས་ཅད་གཞུག་ཅིང་དོན་ཡོད་པར་བསྒྲུབ་པ་ནི་རྡོ་རྗེ་ལྕགས་ཀྱུའི་ཁུ་ཚུར་གྱིས་སོ། །དེ་ནས་རྡོ་རྗེ་ཁུ་ཚུར་གཉིས་ཀྱིས་ཅི་འདོད་པའི་ལག་པའི་སོར་མོའི་ཕྱག་རྒྱ་བཅུ་སྟེ། དོན་ཡོད་ཅིང་ཐོགས་པ་མེད་པར་སྐད་ཅིག་མས་མྱུར་དུ་གྲུབ་པར་བྱེད་པ་འདི་ལྟ་སྟེ། །པི་ཝང་དང ། གླིང་བུ་དང ། རྫ་རྔ་དང ། མུ་ཀུཎྜ་དང ། ཆ་ལང་དང ། རྔ་བོ་ཆེ་དང ། རྔ་ཟླུམ་དང ། རྔ་པ་ཊ་ཧ་དང ། གུཉྫ་དང ། ཏི་མི་ལི་སྟེ། འདི་རྣམས་ཀྱིས་རྒྱས་བཏབ་ན་ཐམས་ཅད་དུ་
279b
རྗེས་སུ་ཆགས་པ་དང ། དབང་དུ་བྱེད་པ་དང ། འབེབས་པ་དང ། རིམས་དང ། དུག་དང ། སྦྱར་དུག་དང ། གདོན་ལས་གྲོལ་བ་དང ། གསོད་པ་དང ། འཐབ་མོ་ལས་རྣམ་པར་རྒྱལ་བ་དང ། ཕུན་སུམ་ཚོགས་པ་ཐམས་ཅད་ཐོབ་པ་ཡིན་ནོ་ཞེས་བྱ་བ་གསུངས་སོ། །འདོད་ཆགས་ཆེན་པོ་རྣམ་དག་ཕྱིར། །རྡོ་རྗེ་སེམས་དཔའ་ཆེན་པོ་ཡིན། །ཕྱག་རྒྱའི་རྟོག་པ་རབ་ཏུ་བརྟགས། །རྡོ་རྗེ་སློབ་དཔོན་སློབ་མ་མཆོག་།དེ་ཉིད་དད་པའི་རྗེས་འབྲང་ལ། །རྟོགས་པ་ཙམ་གྱིས་སྐད་ཅིག་གིས། །དོན་ཡོད་ཀུན་གྲུབ་བདེ་བར་གསོལ། །ཞེས་བྱའོ། །དཔལ་མཆོག་དང་པོ་ལས། མཆོག་ཏུ་གྲུབ་པ་ཞེས་བྱ་བའི་ཕྱག་རྒྱའི་རྒྱུད་རྫོགས་སོ།། །།དེ་ནས་མཆོག་ཏུ་མཁས་ཤིང་མཐའ་ལས་འདས་པ་ཚད་མེད་ཅིང་གཞལ་དུ་མེད་པ་མ་ལུས་ཤིང་ལུས་པ་མེད་པའི་མཆོག་གི་དངོས་གྲུབ་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱིས་ལས་ཀྱི་ཚོགས་མཆོག་ཏུ་དམ་པ་གྲུབ་པ་ཞེས་བྱ་བ་རྡོ་རྗེ་གར་ལས་བྱུང་བའི་ཚོགས་ཐམས་ཅད་ཀྱི་ཕྱག་རྒྱ་སྟོང་བཤད་པར་བྱའོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། ། ཕྱག་རྒྱ་ཆེན་པོ་མཉམ་གཞག་ནས། །སྒེག་བཅས་མཛུབ་སོགས་བཀྲོལ་བ་ཡིས། །ལས་ཀྱི་ཕྱག་རྒྱ་ཆེན་པོ་རྒྱ། །ཐམས་ཅད་གར་གྱིས་བསྒྲུབ་པར་བྱ། །བདེ་བ་ཆེན་པོ་རྡོ་
280a
༄#། །རྗེ་གསང་བའི་ལྕགས་ཀྱུས་ཁྱད་པར་དུ་ལས་ཀྱི་ཕྱག་རྒྱ་བཅིང་བ་སྟེ་བརྒྱ་ཕྲག་དང་པོ་མཆོག་ཏུ་བསྒྲུབས་ཏེ་རྡོ་རྗེ་དམ་ཚིག་ལྷ་མོ་རྣམས་ཀྱི་ཕྱག་རྒྱའོ། །རྡོ་རྗེ་བསྡམས་པ་བཅིངས་ནས་ནི། །ཁ་སྦྱོར་ནང་དུ་གསལ་བ་སྟེ། །མཆོག་དང་པོ་ཡི་གསང་ཆེན་གྱིས། །ལས་ཀྱི་ཕྱག་རྒྱ་རྒྱ་གཞན་ཡིན། །ཞེས་བྱ་བ་རྡོ་རྗེ་ལྷ་མོ་གསང་བ་ཐམས་ཅད་ཀྱི་ཕྱག་རྒྱའོ། །རྡོ་རྗེ་ལས་ཀྱི་མཆོད་པ་ཆེའི། །ཐལ་མོས་སྦྱི་བོར་བཟུང་ནས་ནི། །ལས་ཀྱི་ཕྱག་རྒྱ་གྲུབ་པས་ན། །དབང་པོ་རྣམས་དང་སྦྱར་བར་བྱ། །ཞེས་བྱ་བ་རྡོ་རྗེ་ཐམས་ཅད་ཀྱི་མཆོད་པ་ཆེན་པོའི་ལྷ་མོ་རྣམས་ཀྱི་ཕྱག་རྒྱའོ། །རྡོ་རྗེ་བསྙེམས་མས་གར་བྱ་ཞིང ། །སྒེག་བཅས་མཐེའུ་ཆུང་སོགས་བཀྲོལ་བས། །དེ་ཉིད་བཅིངས་ནས་གར་བྱ་ཞིང ། །ཕྱི་མ་འདི་ནི་འབྱུང་བ་ཡིན། །ཞེས་བྱ་བ་རྡོ་རྗེ་ཐམས་ཅད་ཀྱི་ལས་དོན་ཡོད་པའི་དམ་ཚིག་གྲུབ་པའི་དབང་ཕྱུག་ཆེན་པོའི་མཆོག་གི་ཕྱག་རྒྱ་བརྒྱའོ། །རྡོ་རྗེ་ཐལ་མོ་མཉམ་གཞག་ནས། །ཐམས་ཅད་ཀྱིས་ནི་བསྒྲུབ་པར་བྱ། །མཆོག་དང་པོ་ཡི་ལས་ཆེན་པོའི། །ཕྱག་རྒྱ་མཆོག་ནི་གཞན་ཡིན་ནོ། །ཞེས་བྱ་བ་རྒྱལ་མོ་ཐམས་ཅད་ཀྱི་ཕྱག་རྒྱ། མདའ་ལྔ་བསྡུས་པ་བཅིངས་ནས་ནི། །ལས་ཀྱི་ཕྱག་རྒྱ་བདེ་བ་བརྒྱ། །རབ་ཏུ་དགའ་མཆོག་སྒྲ་བཀྲོལ་བར། །བདེ་བ་
280b
ཉིད་དུ་མངོན་པར་སྦྱར། །ཞེས་བྱ་བ་རྡོ་རྗེ་ཐམས་ཅད་ཀྱི་མཆོག་ཏུ་གསང་བའི་འདོད་པ་མའི་ཕྱག་རྒྱའོ། །སྐུ་གསུང་ཐུགས་ཀྱི་རྡོ་རྗེ་ཡིས། །ཇི་བཞིན་ཕྱག་རྒྱ་མཆོག་སྦྱོར་བས། ། ལས་ཀྱི་ཕྱག་རྒྱ་སྣ་ཚོགས་བརྒྱ། །མཆོག་དང་པོ་ནི་རབ་ཏུ་བརྟག་།ཅེས་བྱ་བ་རྡོ་རྗེ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་ལྷ་མོའི་ཕྱག་རྒྱའོ། །རྡོ་རྗེ་ལྷ་མོའི་ཁ་ཊྭཱཾ་ག་།ལུས་ཀུན་གྱིས་ནི་གར་བྱ་ཞིང ། །རྡོ་རྗེ་གར་མཆོག་གླུ་བླང་ཞིང ། །དང་པོའི་ཕྱག་རྒྱ་ཆེན་པོ་ཞེས་བྱ་བའོ། །ཇི་ལྟར་གོང་དུ་རྒྱས་གསུངས་པ། །རོལ་མོ་མཆོག་གི་ཕྱག་རྒྱའི་ཚོགས། ། རོལ་མོ་བརྡུང་ཞིང་གླུ་ལེན་པ། །ཕྱག་རྒྱ་ཀུན་གྱི་གསལ་བ་བརྒྱ། །ཞེས་བྱ་བ་རྡོ་རྗེ་ཐམས་ཅད་ཀྱི་ལྷའི་བུ་མོའི་ཚོགས་ཀྱིས་ཕྱག་བྱ་སྟེ་ཕྱག་རྒྱ་སྟོང་མཆོག་ཏུ་གྲུབ་པའོ། །དེ་ལ་སོགས་པ་མཐའ་ཡས་མཆོག་།ཆོས་དབྱིངས་མཉམ་དང་མི་མཉམ་པ། །ནམ་མཁའི་མཐའ་ལྟར་གྲངས་མེད་པའི། །ཕྱག་རྒྱའི་རྒྱལ་མོ་གྲུབ་མཆོག་སྟེར། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་མཆོག་གྲུབ་ཕྱིར། །ནམ་མཁའ་ཀུན་གྱི་གོ་སྐབས་ཀྱིས། །དཀྱིལ་འཁོར་འདིར་ནི་རབ་ཏུ་ཞུགས། །དམ་པ་མཆོག་ཏུ་གྲུབ་པར་བྱེད། །མཆོག་གི་དམ་པ་རྒྱུད་ཆེན་པོ། །དམ་པ་མཆོག་གི་དངོས་གྲུབ་སྟེར། །རྡོ་རྗེ་སློབ་དཔོན་སློབ་མ་མཆོག་།དེ་ཉིད་དད་པའི་རྗེས་འབྲངས་ལ། །ཕྱག་རྒྱ་ཀུན་གྱི་ཚུལ་
281a
༄#། །འདི་ནི། །བསྟན་པར་བྱ་སྟེ་གཞན་ལ་མིན། །དེ་ལྟར་མཆོག་ཏུ་མི་འགྱུར་དམ་པའི་དངོས་གྲུབ་བདེ་བ་ཡི། །མཆོག་ཏུ་རྣམ་དག་རྡོ་རྗེ་བདེ་གྲུབ་མཐའ་ཡས་འབྲས་བུར་ལྡན། །དཔལ་མཆོག་དང་པོའི་གསང་བའི་དེ་ཉིད་མཆོག་གི་སྐུའི་ཚུལ་ལོ། །མཆོག་ཏུ་རྟག་པའི་རྟོག་པའི་ཚུལ་འདི་ཡོངས་སུ་མཐར་ཐུག་པའོ། །དཔལ་མཆོག་དང་པོ་ལས། དམ་པ་མཆོག་ཏུ་གྲུབ་པ་ཞེས་བྱ་བའི་ཕྱག་རྒྱའི་རྒྱུད་རྫོགས་སོ།། །།དེ་ནས་སེམས་དཔའ་ཆེན་པོ་ཀུན། །རྡོ་རྗེ་འཛིན་དང་བཅས་པའི་མཆོག་།རྡོ་རྗེ་འཆང་ཆེན་གཙོ་བོ་ནི། །མགོན་ལ་བདེ་གཤེགས་རྣམས་ཀྱིས་གསོལ། །ཀུན་མཆོག་ནམ་མཁའ་ཆེན་པོ་ཡི། །དངོས་གྲུབ་དབང་ཕྱུག་རབ་གྲུབ་ཕྱིར། །རྟོག་པ་ཐམས་ཅད་ཀུན་བསྡུས་པའི། །དེ་ཉིད་སེམས་དཔའ་ཆེན་པོས་གསུངས། །རྣམ་རྟོག་མེད་པའི་ཆོས་རྣམས་ལ། །རྟོག་པའི་དོན་འདི་གང་བརྗོད་པ། །གང་གིས་རྒྱུད་འདི་ཕྱི་མ་ལ། །དང་པོའི་གནས་མཆོག་ཇི་ལྟར་ལགས། །དེ་བཞིན་རྡོ་རྗེ་སེམས་དཔའ་ཉིད། །རབ་དགའ་ཉིད་དང་བཟང་བ་ཉིད། །རྡོ་རྗེ་བསྙེམས་བདག་ཇི་ལྟར་ལགས། །སེམས་དང་སེམས་དཔའ་ཏིང་འཛིན་དང ། །དེ་བཞིན་རྡོ་རྗེ་རྡོ་རྗེ་འཛིན། །རྡོ་རྗེ་འཆང་ཆེན་ཉིད་དང་ནི། །བྱང་ཆུབ་སྤྱོད་པ་ཇི་ལྟར་ལགས། །བདུད་
281b
དང་བདུད་ལས་རྒྱལ་བ་ཉིད། །བྱང་ཆུབ་སངས་རྒྱས་ཇི་ལྟར་ལགས། །རྡོ་རྗེ་གཏུམ་པོ་མཐར་བྱེད་ཉིད། །ཕྱག་ན་རྡོ་རྗེ་ཇི་ལྟར་ལགས། །ཇི་ལྟར་དང་པོའི་རིགས་བྱུང་དང ། ། འདོད་པ་ཐར་པ་ཇི་ལྟར་ལགས། །ཇི་ལྟར་མགོན་པོ་རྣམ་གསུམ་དང ། །ཁྱོད་ནི་ཇི་ལྟར་ཐམས་ཅད་ཉིད། །དང་པོའི་སྙིང་པོ་ཇི་ལྟར་བྱུང ། །དེ་ཅི་ཉེ་སྙིང་ཇི་ལྟར་ལགས། །བདེ་ཆེན་རྡོ་རྗེ་ཆེན་པོ་ཡི། །དོན་ཡོད་དམ་ཚིག་ཇི་ལྟར་ལགས། །དཀྱིལ་འཁོར་ཞེས་བྱ་ཇི་སྐད་གསུངས། །དེ་ཡི་རྣམ་སྨིན་ཇི་ལྟར་བུ། །ཐིག་གདབ་བ་དང་བརྟག་པ་ཡིས། །དངོས་གྲུབ་ཇི་ལྟར་གསུངས་པ་ལགས། །གསང་བ་ལྔ་ཡི་དེ་བདེ་བ། །ཇི་ལྟར་གྱུར་པ་ཇི་ལྟ་བུ། །དཀྱིལ་འཁོར་བདག་པོ་རྣམས་དང་ནི། །རིགས་རྣམས་གསལ་བ་ཇི་ལྟར་ལགས།། ཐམས་ཅད་དབང་བསྐུར་དེ་ཉིད་དང ། ཕྱག་མཚན་ཚོགས་ཀྱི་དེ་ཉིད་དང ། །ཐམས་ཅད་དགུག་གཞུག་མཆོད་པ་ཆེ། །བདག་བྱིན་བརླབས་སོགས་སྒྲུབ་པ་ཆེ། །དེ་ནི་དེ་ཉིད་གསང་བ་དང ། །དོན་ཡོད་པ་ནི་མཆོག་ཉིད་དེ། །མི་འགྱུར་དམ་པ་འགྲུབ་པའི་ཕྱིར། །ཐམས་ཅད་བདག་ཅག་རྣམས་ལ་གསུངས། །ཞེས་བྱ་བ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་མཆོག་གི་མདོ་གསུངས་སོ། །དེ་ནས་སྟོན་པ་རྡོ་རྗེ་འཛིན། །རྟོག་པ་ཀུན་གྱི་བདག་པོ་ནི། །ཐེ་ཚོམ་ཚོགས་རྣམས་གསན་ནས་སུ། །འདི་ཡི་ལན་
282a
༄#། །ནི་གསུངས་པ་ཡིན། །དེ་ལ་རྟོག་པའི་དོན་གྱི་རྒྱུད་ཇི་ལྟར་ཡིན་ཞེ་ན། རྣམ་རྟོག་མེད་པའི་ཆོས་རྣམས་ལས། །སེམས་ཅན་དོན་ཡོད་ཡོངས་བརྟགས་བས། །དེས་ན་རྟོག་པར་གསུངས་པ་སྟེ། །རྟོག་པ་ཡོངས་སུ་དག་ཕྱིར་རོ། །དེ་ནས་རྒྱུད་ཕྱི་མ་ཇི་ལྟར་ཡིན་ཞེ་ན། རྒྱུད་ནི་རྒྱུན་ཞེས་བྱ་བར་བཤད། །ཕྱི་མ་སྔར་དང་ཡང་དག་བྱུང ། །དེ་ཉིད་གསང་བའི་གསང་བ་དང ། ཕྱི་མ་དང་བཅས་རྒྱུད་དུ་འདོད། །དེ་ལ་དང་པོ་གནས་ཞེས་བྱ་བའི་རྒྱུད་ཇི་ལྟར་ཡིན་ཞེ་ན། ནམ་མཁའ་ཀུན་ལ་རབ་ཏུ་གནས། །རྡོ་རྗེ་ཀུན་མཆོག་རང་བཞིན་མཆོག་།བདེ་བ་ཆེན་པོ་དགའ་བ་ཆེའི། །གྲོང་ཁྱེར་དེར་ནི་མི་འགྱུར་མཆོག་།ཅེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་རྟོག་པ་ཐམས་ཅད་ཀྱི་རྟོག་པའི་དེ་ཁོ་ན་ཉིད་ཅེས་བྱ་བ་འདི་གསུངས་སོ། །དེ་ལ་ཐོག་མ་ཐ་མ་མེད་པའི་རྡོ་རྗེ་སེམས་དཔའ་ཇི་ལྟར་ཡིན་ཞེ་ན། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག། །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔའ་ཞེས་བྱར་བརྗོད། །དེ་ནས་བཅོམ་ལྡན་འདས་དེ་གང་ཡིན་ཞེ་ན། དཀོན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །རབ་ཏུ་དགའ་བ་མི་འགྱུར་མཆོག་
282b
དེ་ལ་བཅོམ་ལྡན་འདས་དགའ་བ་ཆེན་པོ་ཉིད་ཇི་ལྟར་ཡིན་ཞེ་ན། ཉེས་པ་མེད་ཅིང་ཤིན་ཏུ་རྟག། འདོད་ཆགས་ཀུན་གྱི་རྗེས་ཆགས་པ། །དེ་ཉིད་འདི་ཡིས་གསང་བ་འདི། ། འདོད་ཆགས་ཆེན་པོ་དགའ་བ་ཆེ། །དེ་ལ་ཅི་ཀུན་ཏུ་བཟང་པོ་ཉིད་ཇི་ལྟར་ཡིན་ཞེ་ན། ཤིན་ཏུ་དག་པ་ཀུན་གྱི་མཆོག་།གདོད་ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད།།བྱང་ཆུབ་སེམས་དཔའི་ཆོ་ག་མཆོག་།དེ་ལ་རྡོ་རྗེ་བསྙེམས་པའི་བདག་པོ་བཅོམ་ལྡན་འདས་ཇི་ལྟར་ཡིན་ཞེ་ན། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་ཕྱག་རྒྱའི་མཆོག་།རྡོ་རྗེ་དབང་ཕྱུག་ཆེན་བསྟོད་པས། །རྡོ་རྗེ་བསྙེམས་པའི་བདག་པོའི་བདག་།ཅེས་བྱ་བ་ནི་བཅོམ་ལྡན་འདས་མཆོག་དང་པོའི་སྐྱེས་བུའོ། །མཆོག་དང་པོ་ཡི་དེ་ཉིད་འདི། །རྡོ་རྗེ་སེམས་དཔའ་གང་གང་བརྗོད། །དངོས་གྲུབ་ཀུན་གྱི་འབྱོར་བ་རྣམས། །དེ་ལ་ཐམས་ཅད་འགྲུབ་པར་འགྱུར། ཞེས་བྱ་བ་མཆོག་གི་དེ་ཁོ་ན་ཉིད་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་དེའི་འོག་ཏུ་ལས་ཀྱི་བྱ་བས་བཅོམ་ལྡན་འདས་ཐམས་ཅད་ཀྱི་མཆོག་ཉིད་དུ་བཤད་པར་བྱའོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་བཅོམ་ལྡན་འདས་ཐམས་ཅད་ཀྱི་སེམས་ཅན་ཇི་ལྟར་ཡིན་ཞེ་ན། བསམ་
283a
༄#། །གྱིས་མི་ཁྱབ་རྒྱ་ཆེ་བ། །ཐབ་དངོས་ཀུན་བདེ་མི་འགྱུར་བ། །ཐམས་ཅད་ཁྱབ་ཅིང་དྲི་མ་མེད། །བྱང་ཆུབ་སེམས་ནི་བདག་བརྟན་པ། །དེ་ནས་འདིའི་ལས་ཀྱི་ཁྱད་པར་ནི། །སེམས་ཉིད་བརྟན་པ་ཉིད་སེམས་པས། །ཏིང་འཛིན་དེ་ལ་མཉམ་པར་གཞག་།རྣམ་ཤེས་ལས་ནི་རྡོ་རྗེ་ཀུན། །རྡོ་རྗེ་ལས་ནི་འཛིན་གྱུར་ཏེ། །བཅོམ་ལྡན་འདས་རྡོ་རྗེ་འཛིན་ཇི་ལྟར་ཡིན་ཞེ་ན། སེམས་དཔའི་བྱིན་རླབས་སྦྱོར་བ་ནི། །བདག་ལ་བྱིན་རླབས་མཆོག་བསྒྲུབ་པ། །ཉིན་རེ་སྒྲུབ་པར་བྱེད་ན་དེས། །རྡོ་རྗེ་སེམས་དཔའ་ཉིད་ཐོབ་འགྱུར། །དེ་ལ་བཅོམ་ལྡན་འདས་ཀུན་ཏུ་བཟང་པོའི་སྤྱོད་པ་ཇི་ལྟར་ཡིན་ཞེ་ན། སྙིང་སྟོབས་རྡུལ་དང་མུན་པས་ཀྱང ། །གང་ཕྱིར་སེམས་ཅན་དོན་གྱུར་པས། །དེ་ཕྱི་ང་ནི་ཀུན་ཏུ་བཟང ། །བྱང་ཆུབ་སྤྱོད་པའི་\?\འཇུག་པའོ། །དེ་ལ་ཇི་ལྟར་བཅོམ་ལྡན་འདས་བདུད་ཉིད་དང་འདུལ་བས་རྒྱལ་བ་ཇི་ལྟར་ཡིན་ཞེ་ན། སེམས་ཉིད་ཁོ་ན་བདུད་ཉིད་དེ། །སེམས་ཉིད་དེ་བཞིན་གཤེགས་པའོ། །རང་སེམས་གདུལ་བར་བྱ་བའི་ཕྱིར། །བདག་ནི་བདུད་ཉིད་གྱུར་པ་ཡིན། །དེ་ལ་ཇི་ལྟར་བཅོམ་ལྡན་འདས་མངོན་པར་རྫོགས་པའི་བྱང་ཆུབ་དང ། སངས་རྒྱས་ཡིན་ཞེ་ན། རང་སེམས་སོ་སོར་རྟོག་པའི་ཕྱིར། །བྱང་ཆུབ་སེམས་མཆོག་རྡོ་རྗེ་ཉིད། །དེ་ཕྱིར་དེ་ཉིད་སངས་
283b
རྒྱས་ཉིད། །བདག་བྱིན་རླབས་མཆོག་གྲུབ་ཕྱིར་རོ། །དེ་ལ་ཇི་ལྟར་བཅོམ་ལྡན་འདས་ཕྱག་ན་རྡོ་རྗེ་ཡིན་ཞེ་ན། མི་ཕྱེད་སོ་སོར་རྟོགས་པ་དང ། །གདུག་པ་ཐམས་ཅད་ངེས་པར་གནོན། །སངས་རྒྱས་ཀུན་དངོས་རྡོ་རྗེ་སྟེ། །བྱང་ཆུབ་སེམས་ནི་བརྟན་པ་བདག། །ཀུན་ཏུ་བཟང་པོའི་ལག་ཏུ་ནི། །མཚོན་ཆ་དེ་ནི་རྒྱལ་བས་བྱིན། །བརྟན་པ་ཐམས་ཅད་གྲུབ་པའི་ཕྱིར། །དེས་ན་ཕྱག་ན་རྡོ་རྗེ་དེས། །དེ་ལ་ཇི་ལྟར་དང་པོའི་རིགས་ལས་བྱུང་བ་ཤེས་པའི་རྒྱུད་ཡིན་ཞེ་ན། ཤེས་རབ་ཕ་རོལ་ཕྱིན་པ་ཡུམ། །ཡབ་ནི་ཐབས་ལ་མཁས་པ་སྟེ། །རྡོ་རྗེ་སེམས་དཔའ་གདུལ་བྱའི་ཕྱིར། །རིགས་རྣམས་རབ་ཏུ་བྱུང་བའོ། །དེ་ལ་ཇི་ལྟར་བཅོམ་ལྡན་འདས་འདོད་དང ། ཐར་བ་ཡིན་ཞེ་ན། བཅོམ་ལྡན་འདས་ནི་ཆགས་པ་ཆེ། །དངོས་གྲུབ་ཐམས་ཅད་རྗེས་ཆགས་ཕྱིར། །དངོས་གྲུབ་ཐམས་ཅད་མི་འགྱུར་བདེ། །བདེ་བ་ཆེན་པོ་ཞེས་བརྗོད་པའོ། །དེ་ལ་ཇི་ལྟར་བཅོམ་ལྡན་འདས་རྣམ་པ་གསུམ་ཡིན་ཞེ་ན། བདག་ནི་དུས་གསུམ་མཐའ་ཡས་ཕྱིར། །ང་ནི་སྲིད་གསུམ་གདུལ་བྱའི་ཕྱིར། །གསུམ་མཆོག་འཇིག་རྟེན་གསུམ་ཀུན་ཕྱིར། །འཇིག་རྟེན་གསུམ་པ་ཁམས་གསུམ་ང ། །དེ་ལ་ཇི་ལྟར་བཅོམ་ལྡན་འདས་ཐམས་ཅད་ཉིན་ཡིད་ཞེ་ན། ང་ཉིད་བརྟན་པ་ཐམས་ཅད་བདེ། །བསོད་ནམས་ཀུན་མཆོག་ཆེ་བའི་ཕྱིར། །གཡོ་
284a
༄#། །བ་སེམས་ཀྱིས་འདུས་བྱས་ཕྱིར། །སྒྱུ་མ་ཐམས་ཅད་ང་ཡིན་ནོ། །ཞེས་བྱ་བ་རང་གི་ལས་ཀྱི་བྱ་བའི་དེ་ཁོ་ན་ཉིད་རྡོ་རྗེ་སེམས་དཔས་གསུངས་སོ། །དེ་ལ་ཇི་ལྟར་དང་པོའི་གླུ་བྱུང་བ་ཤེས་པ་ཡིན་ཞེ་ན། སྲིད་པ་ཤིན་ཏུ་གྲུབ་པ་ཡི། །དབང་ཕྱུག་ཆེན་པོ་མཆོག་གྲུབ་ཕྱིར། །གཟི་ཅན་སེམས་ཅན་དོན་མཛད་ཕྱིར། ། བསྐལ་བ་ཐོག་མར་བཅོམ་ལྡན་གསུངས། །དེ་ནས་དེ་གང་ཡིན་ཞེ་ན། འདོད་ཆགས་ཆེན་པོ་བཅོམ་ལྡན་འདས། །རབ་ཏུ་དགའ་བ་མི་འགྱུར་མཆོག་།གསང་བའི་ཕྱིར་ནི་སྙིང་པོར་བརྗོད། །ཡི་གེ་ཧཱུཾ་ནི་མི་འགྱུར་མཆོག་།དེ་ནས་ཉེ་བར་སྙིང་པོ་ཡི། །དེ་ཁོ་ན་ཉིད་ཤེས་པ་ནི། །དེ་ཉིད་གསང་ཞིང་གསང་བ་དང ། སྙིང་པོ་རབ་ཏུ་བརྗོད་པར་བྱ། །སྙིང་པོའི་རྗེས་སུ་སྒྲུབ་པར་འགྲུབ། །ཉེ་བའི་སྙིང་པོ་ཉིད་དུ་བརྗོད། །དེ་ལ་ཇི་ལྟར་བདེ་བ་ཆེན་པོའི་རྡོ་རྗེ་དོན་ཡོད་པ་དམ་ཚིག་གི་བཤད་པའི་རྒྱུད་ཡིན་ཞེ་ན། །དངོས་གྲུབ་ཀུན་གྱི་མི་འགྱུར་བདེ། །བདེ་བ་ཆེན་པོ་ཞེས་བརྗོད་དོ། །རྡོ་རྗེ་དེ་ཉིད་དོན་ཡོད་གྲུབ། །དམ་ཚིག་འདའ་བར་དཀའ་བའོ། །ཞེས་བྱ་བའི་མཆོག་གི་དམ་པའི་གླུ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཇི་ལྟར་དཀྱིལ་འཁོར་གྱི་དོན་ཤེས་པ་ཡིན་ཞེ་ན། ཇི་ལྟ་གནས་དང་འཁོར་ལོ་དང ། ཇི་ལྟར་དགོད་པར་འགྲོ་བ་
284b
དང ། །འཁོར་དང་བཅས་པ་དགོད་པ་གང ། །དེ་འདྲའི་འཁོར་ལོ་མཆོག་གིས་སྤྲུལ། །དེ་ནས་རྣམ་པར་ཤེས་པ་ནི། །རྡོ་རྗེ་སེམས་སོགས་ལྷ་རྣམས་ཀྱིས། །འཁོར་ལོ་མངོན་སུམ་མཐོང་བ་ཡིས། །རྟག་པའི་བསོད་ནམས་ཅི་འདྲ་བ། །ཕྱིར་ན་བྲིས་ནའང་དེ་བཞིན་ནོ། །དེ་ནས་ཐིག་གདབ་པའི་ཆོ་ག་ནི། །ཤེས་རབ་ཅན་གྱིས་དཀྱིལ་འཁོར་བྲིས། །ཕྱོགས་ཀུན་མཉམ་པ་ཉིད་དམིགས་ལ། །ཤར་དང་ནུབ་དང་བྱང་དང་ལྷོར། །ཐིག་བཞི་བཏབ་པས་དཀྱིལ་འཁོར་བརྒྱད། །རྡོ་རྗེ་ཐིག་གིས་ཡོངས་བསྐོར་བར། །ཀ་བ་བརྒྱད་ཀྱིས་ཉེར་མཛེས་ཤིང ། །སྒོ་བཞི་རྟ་བབས་ཁ་ཁྱེར་དང ། །དྲ་བ་དྲ་ཕྱེད་ལ་སོགས་བརྒྱན། །དེར་བདག་པོའི་དོན་ཤེས་པ་ནི་རྡོ་རྗེ་སེམས་དཔའ་ཇི་ལྟ་བུ་ཞེ་ན། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག་།སེམས་དཔའ་རྡོ་རྗེ་ཆེ་རང་བཞིན། །དཔལ་མཆོག་དང་པོ་ཞེས་བྱར་བརྗོད། །དེ་ནས་བཅོམ་ལྡན་འདས་དེ་གང་ཞེ་ན། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒལ། །རབ་ཏུ་དགའ་བ་མི་འགྱུར་མཆོག་།ཅེས་བྱ་བ་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །དེ་ནས་སྤྱན་རས་གཟིགས་དབང་གི་།པདྨ་རཱ་ག་དང་མཚུངས་པ། །ཐམས་ཅད་དག་པ་བླ་ན་མེད། །རྡོ་རྗེ་སེམས་དཔའ་རང་བདག་ཉིད། །སྤྱན་རས་གཟིགས་ཀྱི་
285a
༄#། །དབང་ཕྱུག་ཉིད། །དེ་ནས་པདྨའི་རིགས་ཀྱི་དེ་ཁོ་ན་ཉིད་ནི། །རྡོ་རྗེ་ཆོས་ནི་རབ་གྲུབ་ཕྱིར། །སེམས་ཅན་ཐམས་ཅད་རྣམ་དག་ཕྱིར། །པདྨ་ཆེན་པོའི་རིགས་དག་པའི། །ཏིང་འཛིན་ཡེ་ཤེས་ཀུན་ནས་བསྡུས། །ཞེས་བྱའོ། །དེ་ལ་ཇི་ལྟར་ནམ་མཁའི་སྙིང་པོ་ཡིན་ཞེ་ན། །ཐམས་ཅད་ནམ་མཁའི་བཅོམ་ལྡན་འདས།། སེམས་ཅན་བསོད་ནམས་མཐོང་ཞིང་ཆེ། །ནམ་མཁའི་སྙིང་པོ་སེམས་དཔའ་དང ། །དེ་ནས་ནོར་བུའི་རིགས་ཀྱི་ནི། །དབང་བསྐུར་བ་དང་གཏེར་དང་ནི། །རྡོ་རྗེ་རྒྱལ་མཚན་མཆོད་པ་ཆེ། །ནོར་བུ་ཆེན་པོའི་རིགས་གྲུབ་པ། །བསམ་པ་ཐམས་ཅད་ཡོངས་རྫོགས་པའོ། །ཞེས་བྱ་བ་དཀྱིལ་འཁོར་ཐམས་ཅད་ཀྱི་དེ་ཁོ་ན་ཉིད་ཆེན་པོ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྡོ་རྗེ་རིགས་ཐམས་ཅད་ཀྱི་དབང་བསྐུར་བ་ཤེས་པ་ནི། སངས་རྒྱས་རིན་ཆེན་རྡོ་རྗེ་ཕྱེད། །རྡོ་རྗེ་རིན་ཆེན་རྡོ་རྗེ་ལ། །སྤྱན་རས་གཟིགས་ལ་རྡོ་རྗེ་སྐུ། །ནོར་བུ་ནོར་བུ་འཛིན་པའོ། །དེ་ནས་མཆོག་དང་པོའི་ཕྱག་མཚན་གྱི་དེ་ཁོ་ན་ཉིད་དོ། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་མཚོན་ཆ་ཆེ། །གསང་བ་ལྔ་ཡི་དེ་ཉིད་ཆེ། །རྡོ་རྗེ་རྩེ་ལྔ་ཞེས་བརྗོད་དོ། །དེ་ནས་རིགས་ཐམས་ཅད་ཀྱི་ཕྱག་མཚན་གྱི་དེ་ཁོ་ན་ཉིད་ཤེས་པ་ནི། སངས་རྒྱས་ཐམས་
285b
ཅད་སངས་རྒྱས་ཉིད། །སྣ་ཚོགས་བྱ་བ་རྡོ་རྗེ་ཅན། །འཇིག་རྟེན་དབང་ཕྱུག་རྡོ་རྗེ་ཆོས། །ནོར་བུ་ནོར་བུ་བསགས་པའོ། །ཞེས་བྱ་བ་དབང་བསྐུར་བ་ཐམས་ཅད་ཀྱི་ཕྱག་མཚན་གྱི་དེ་ཁོ་ན་ཉིད་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཇི་ལྟར་ཐམས་ཅད་དགུག་པའི་རྒྱུད་ཡིན་ཞེ་ན། རྟོག་པ་ཀུན་གྱི་གསང་ཆེན་གྱི། །རྡོ་རྗེ་ལྕགས་ཀྱུ་དྲིལ་བཅས་པས། །བཀུག་ཏེ་དེ་ནས་རྗེས་བསྒྲུབས་པ། །དྲིལ་བུ་ཉིད་ཀྱི་བ་བ་ཡིན། །ཇི་ལྟར་མཆོད་པ་ཐམས་ཅད་ཀྱི་ཆོ་ག་ཡིན་ཞེ་ན། རྟོག་པ་ཀུན་གྱི་གསང་ཆེན་གྱིས། །རབ་ཏུ་དགའ་བས་མཆོད་ནས་ནི། །གླུ་དང་རོལ་མོ་རྣམ་འཕྲུལ་བས། །མཆོད་དེ་སླར་ཡང་རྣལ་འབྱོར་མཆོད། །དེ་ལ་ཇི་ལྟར་དངོས་གྲུབ་ཐམས་ཅད་ཀྱི་བྱིན་གྱིས་བརླབས་པའི་དམ་ཚིག་ཆེན་པོའི་དེ་ཁོ་ན་ཉིད་ཡིན་ཞེ་ན། རྟོག་པ་ཀུན་གྱི་གསང་ཆེན་གྱིས། །ཕྱག་རྒྱ་ཀུན་གྱིས་ལེགས་བྱིན་བརླབས། །དམ་ཚིག་ཆེན་པོ་འདི་ཉིད་ཀྱིས། །རང་ཉིད་བསྒྲུབས་ནས་སྙིང་པོ་བཟླས། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་པའི་བདག་པོའི་བདག་།ཅེས་བྱ་བ་མཆོག་དང་པོའི་སྐྱེས་བུའོ། །དེ་ལ་ཇི་ལྟར་རང་ལྷག་པའི་ལྷ་ཐམས་ཅད་ཀྱི་སྒྲུབ་པ་ཆེན་པོའི་རྒྱུད་ཡིན་ ་ན། །བརྟན་པ་དང་ནི་གཡོ་བ་དང ། །རྟོག་
286a
༄#། །པ་ཀུན་ལས་བསྒྲུབ་བྱ་གང ། །རང་གི་ལྷག་པའི་ལྷ་སྦྱོར་བས། །དེ་དག་ཐམས་ཅད་བསྒྲུབ་པར་བྱ། །དེ་ནས་ཐམས་ཅད་རྗེས་སུ་སྒྲུབ་པའི་རྒྱུད་ནི། རྡོ་རྗེ་དྲིལ་བུ་འཛིན་གྱུར་ནས། །རྡོ་རྗེ་དྲིལ་བུས་རབ་སད་ཅིང ། །རྟོག་པ་ཐམས་ཅད་རྗེས་བསྒྲུབས་པས། །མཆོག་དང་ལ་སོགས་འགྲུབ་པར་འགྱུར། །དེ་ལ་ཇི་ལྟར་འབད་པ་མེད་པ་ཐམས་ཅད་སྒྲུབ་པའི་རྒྱུད་ཡིན་ཞེ་ན། བསྒྲུབ་བྱ་ཅི་འདོད་བསྒྲུབས་ནས་ནི། །ཕྱི་ནས་ཇི་ལྟར་འདོད་པ་ཡི། །ཅི་འདོད་སྤྱོད་པ་ལ་སྤྱོད་ཅིང ། །ཐམས་ཅད་བྱེད་ཅིང་ཐམས་ཅད་བཟའ། །ལངས་པའམ་ནི་འདུག་པ་འམ། །གང་དང་དེ་རུ་འཆག་པ་འམ། །དགོད་པ་དང་ནི་སྨྲ་བ་འམ། །གང་དེར་ཇི་བཞིན་དེ་བཞིན་ནོ། །དབང་པོ་གང་དང་གང་ལམ་གྱུར། །དེ་དང་དེ་ཡི་ངོ་བོར་བྱ། །མཉམ་པར་བཞག་ནས་རྣལ་འབྱོར་གྱིས། །རང་གི་ལྷག་པའི་ལྷ་སྦྱོར་བྱ། །དེ་ཉིད་རྣལ་འབྱོར་འདི་ཡིས་ནི། །ཐམས་ཅད་ཉིད་ནི་བསྒྲུབ་པར་བྱ། །སངས་རྒྱས་ཀུན་དངོས་ཐམས་ཅད་ནི། །རྟག་ཏུ་མཐོང་ཞིང་གྲུབ་པར་འགྱུར། །དམ་ཚིག་ཆེན་པོ་དེ་ཉིད་ནི། །མཁས་པ་གང་ཞིག་དད་པས་ཀློག་།དེ་ནི་སྡིག་ཀུན་དང་བྲལ་བས། །དངོས་གྲུབ་ཀུན་གྱི་དབང་ཕྱུག་འགྱུར། །ཞེས་བྱ་བ་དམ་ཚིག་ཆེན་པོའི་དེ་ཁོ་ན་ཉིད་དོ། །དེ་ལྟར་དཔལ་མཆོག་དང་པོའི་ཆོ་ག་མ་ཉམས་
286b
མཆོག་གི་བླ་མ་གསོལ། །མཆོག་ཏུ་གསང་བ་བསྒྲུབ་པའི་ཆོ་ག་བདེ་མཆོག་མྱུར་དུ་གྲུབ་ཕྱིར་གསོལ། །རྡོ་རྗེ་མཆོག་འཛིན་དང་བཅས་བདེ་གཤེགས་སྲས་བཅས་རྣམས་ཀྱིས་བྱིན་བརླབས་པ། །བདེ་ཆེན་དམ་པ་རྡོ་རྗེ་འཛིན་པ་དགའ་ཆེན་མཆོག་གིས་དེ་གསུངས་སོ། །དཔལ་མཆོག་དང་པོ་ལས། མཆོག་ཏུ་གསང་བའི་ཆོ་ག་།དེ་ནས་སྟོན་པ་རྡོ་རྗེ་འཛིན། །མཁའ་ལྟར་ཐུག་མེད་ཀུན་ཏུ་འགྲོ། །སངས་རྒྱས་ཀུན་གྱིས་བསྟོད་ནས་ནི། །རྟོག་པའི་མཐར་ཐུག་དོན་གསུངས་སོ། །བདག་གི་སྙིང་པོ་དང་འདི་མཆོག་ཆེན་གསོ་བ་ཡིན། །མཐའ་ཡས་པ་དང་ཐོག་མེད་མཐར་ཐུག་མེད་པ་ནི། །མཆོད་བྱ་ཆེན་པོ་ཐམས་ཅད་རྣམས་ཀྱི་ཚུལ་ཆེན་པོ། །ནམ་མཁའ་དང་མཚུངས་མཆོག་གི་དངོས་འཕེལ་གསོལ། །དེ་ནི་སུས་ཀྱང་མཐར་ཐུག་བྱེད་པར་ནུས་པ་མིན། །སེམས་ཅན་རྣམས་ནི་དམན་ལ་ཞེན་ཅིང་ཉུང་ལ་དགའ། །དད་པ་མེད་ཅིང་སླུ་བ་བྱེད་ལ་མ་སྦྱངས་པ། །རྟག་ཏུ་རྗེས་སུ་ཆགས་ཤིང་ཆགས་བྲལ་ལ་ཆགས་པ། །དེ་རྣམས་ལ་ནི་ཕན་ཕྱིར་འདི་ནི་མཐར་ཐུག་པའོ། །གང་གི་ཁྱིམ་ན་འདི་གནས་གང་གིས་རབ་ཏུ་བསྒྲུབ་པ་\Lིནེ་མིསསིང?\་
287a
༄#། །འམ། །ཡང་ན་ཇི་བཞིན་གསུངས་པ་རྟག་ཏུ་འདིར་སྒྲུབ་བྱེད། །སོ་སོར་ཉམས་སུ་མྱོང་བའི་མཐུ་ཡིས་ཐམས་ཅད་དུ། །བདུད་ཀྱི་ལས་ཚོགས་རྣམས་ཀྱིས་དེ་ནི་གནོད་མི་ནུས། །རྡོ་རྗེ་འཆང་སོགས་སྐུ་ནི་གང་གིས་སྒྲུབ་བྱེད་པ། །གཟུགས་བརྙན་ལ་སོགས་ཐམས་ཅད་འདིར་ནི་ཇི་བཞིན་གསུངས། །དེས་ནི་ཐམས་ཅད་སོ་སོར་ཉམས་མྱོང་ནུས་པར་ལྡན། །བདུད་ཀྱི་ལས་ཚོགས་རྣམས་ཀྱིས་དེ་ནི་གནོད་མི་ནུས། །གང་ཞིག་རྡོ་རྗེ་ལ་སོགས་གཟུགས་བརྙན་ལ་སོགས་པ། །ཇི་ལྟར་འདོད་པ་འདི་དག་ཐམས་ཅད་སྒྲུབ་པར་བྱེད། །རབ་ཏུ་འདོད་པས་ཡི་གེ་ཧཱུཾ་ལས་བྲིས་ནས་ནི། །འདོད་པའི་དངོས་གྲུབ་དེ་ཡིས་སྟེར་ཞིང་ཐོབ་པར་འགྱུར། །རྒྱལ་པོ་རྣམས་ཀྱིས་རྣམ་པར་སྦྱངས་པར་མཛད་པ་ནི། །གང་ལ་དོན་ཀུན་དག་ཕྱིར་མཛད་པར་མི་འགྱུར་མིན། །འདི་ནི་བགེགས་བྱེད་བདུད་རྣམས་ཀྱང་ནི་ཡོད་མ་ཡིན། །རྟོགས་པས་དངོས་གྲུབ་འཕེལ་ཞིང་བྱིན་གྱིས་བརླབས་པ་ཡིན། །ང་ནི་བདུད་ཉིད་མི་འགྱུར་བརྟན་མེད་ཉིད་མི་འགྱུར། །བརྟན་པ་ཉིད་ཕྱིར་ང་ནི་བརྟན་པར་མཛད་པ་ཡིན། །རྟག་པ་འདི་ནི་མཆོག་ཆེན་གང་གིས་སྒྲུབ་བྱེད་པ། །དེ་ལ་ང་ནི་དངོས་གྲུབ་མྱུར་དུ་སྒྲུབ་པར་བྱེད། །དངོས་གྲུབ་ཆེན་པོ་ལ་ཐམས་ཅད་དུ་རྗེས་སུ་ཆགས་ཤིང་ཤིན་ཏུ་མཉེས་པ་དང ། ཤི་ན་
287b
ཏུ་བརྟན་པ་དང ། ཤིན་ཏུ་རྒྱས་པ་དང ། རྟག་ཏུ་རྒྱ་ཆེ་བར་འགྱུར་བ་ཡིན་ནོ། །གང་ཞིག་མཆོག་གི་རྒྱལ་པོའི་སྙིང་པོ་སྒྲུབ་བྱེད་པ། །རྒྱལ་བ་ཐམས་ཅད་དགྱེས་ཤིང་རྒྱལ་བ་དགྱེས་པར་མཛད། །དེ་དག་གྲགས་པ་ཆེན་པོ་ཐོབ་ནས་བདེ་བའང་ཐོབ། །དེ་ཕྱིར་འདི་ལ་དད་ཅིང་གུས་པར་བྱ་བ་ཡིན། །དེ་ནས་རྒྱལ་བ་རྣམས་ཀྱིས་བཅོམ་ལྡན་འདས་ལ་ལེགས་སོ་ཞེས་བྱ་བ་བྱིན་ཏེ། ཡབ་མཆོག་སངས་རྒྱས་སྲས་ནི་ལེགས་སོ་ལེགས། །སྲས་མཆོག་སངས་རྒྱས་སྲས་ནི་ལེགས་སོ་ལེགས། །རྡོ་རྗེ་མཆོག་ནི་རྡོ་རྗེ་འབྱུང་བ་ལེགས། །དམ་པའི་ཆོས་ཀྱི་བདག་ཉིད་ལེགས་སོ་ལེགས། །སངས་རྒྱས་རྣམས་ཀྱིས་ཡང་དག་བྱིན་བརླབ་པ། །རྟག་ཏུ་མི་འགྱུར་དོན་ཡོད་གྲུབ་པ་ཆེ། །ཇི་ལྟར་དང་པོའི་གྲུབ་པ་དེ་བཞིན་དུ། །ཕྱི་ནས་ཀྱང་ནི་དེ་བཞིན་གྲུབ་པར་འགྱུར། །དེ་ལྟར་དག་ཆེན་གསུངས་ནས་ནི། །སྲས་དང་བཅས་པའི་སངས་རྒྱས་རྣམས། །རྡོ་རྗེ་སེམས་དཔའ་ཆེན་པོ་ཡི། །གསུངས་ལ་རྗེས་སུ་ཡི་རང་མཛད། །དཔལ་མཆོག་དང་པོ་ལས། རྟོག་པའི་རྒྱལ་པོ་ཐམས་ཅད་ཀྱི་མཆོག་རྫོགས་སོ།། །།ཐུགས་དམ་པའི་སྙིང་པོ་ཐོ་ལྡིང་དུ་རྒྱ་གར་གྱི་མཁན་པོ་པཎྚི་ཏ་མཁས་པ་ཆེན་པོ་མཎྟྲ་ཀཱ་ལ་ཤ་དང ། སྒྲུབ་བསྒྱུར་གྱི་ལོ་ཙྪ་བ་ལྷ་བཙན་པོ་དགེ་སློང་བླ་མ་ཞི་བའི་འོད་ཀྱི་ཞལ་སྔ་ནས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
288a
༄#། །ལོ་ཙྪ་ཆེན་པོ་རིན་ཆེན་བཟང་པོ་ཡིས། །དཔལ་མཆོག་དང་པོའི་རྒྱུད་འདི་བསྒྱུར་བ་ལ། །བར་བར་དཔེ་མ་རྙེད་པས་མ་འགྱུར་ནས། །བདག་གིས་འབད་པས་དཔེ་བཙལ་རྙེད་པས་བསྒྱུར།།