།།རྒྱ་གར་སྐད་དུ། ཤྲཱི་པ་ར་མཱ་དི་ནཱ་མ་མཧཱ་ཡཱ་ན་ཀལྤ་རཱ་ཛཱ། བོད་སྐད་དུ། །དཔལ་མཆོག་དང་པོ་ཞེས་བྱ་བ་ཐེག་པ་ཆེན་པོའི་རྟོག་པའི་རྒྱལ་པོ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱིས་བརླབས་དང ། དམ་ཚིག་དང ། །མཁྱེན་པའི་བྱེ་བྲག་རྣམ་པ་ཐ་དད་པ་ཐམས་ཅད་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེ་ཐམས་ཅད་ཀྱི་ཅོད་པན་གྱིས་ཁམས་གསུམ་དུ་དབང་བསྐུར་བ་བརྙེས་པ། དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་དང་ལྡན་པ། རྣལ་འབྱོར་ཅན་ཆེན་པོའི་དབང་ཕྱུག་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ཀྱི་མཉམ་པ་ཉིད་ཐུགས་སུ་ཆུད་པ་སྣ་ཚོགས་ཀྱི་བྱ་བ་མཛད་དེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་ཀྱི་རེ་བ་ཐམས་ཅད་ཡོངས་སུ་སྐོང་བའི་འཕྲིན་ལས་མཛད་པ། ཐུགས་རྗེ་ཆེ་བ། རྣམ་པར་སྣང་མཛད་ཆེན་ 97b པོ། རྟག་པ་དུས་གསུམ་གྱི་མཉམ་པ་ཉིད་ལ་བཞུགས་པ། སྐུ་དང ། གསུང་དང ། ཐུགས་ཐམས་ཅད་རྡོ་རྗེ་དེ་བཞིན་གཤེགས་པ་ཐམས་ཅད་བཞུགས་ཤིང་བསྔགས་པ། བསྟོད་པ། ནོར་བུ་ཆེན་པོ་དང ། རིན་པོ་ཆེས་སྦྲས་པ། ཁ་དོག་སྣ་ཚོགས་པའི་དྲིལ་བུ་བཏགས་པ། དར་གྱི་བ་དན་དང ། མེ་ཏོག་གི་ཕྲེང་བ་དང ། རྔ་མ་དང ། དྲ་བ་དང ། དྲ་བ་ཕྱེད་པ་དང ། ཟླ་བ་རླུང་གིས་བསྐྱོད་པ་རྣམས་ཀྱིས་ཉེ་བར་མཛེས་པར་བྱས་པའི་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན་བྱང་ཆུབ་སེམས་དཔའ་བྱེ་བ་ཕྲག་བརྒྱད་དང་ཐབས་གཅིག་ཏུ་བཞུགས་པ་ལ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཁུ་ཚུར་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་མཛོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་སྟོབས་ཐམས་ཅད་རབ་ 98a ༄#། །ཏུ་འཇོམས་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བརྒྱད་དང་ཐབས་གཅིག་སྟེ། ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏེ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་སྒོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཡང་དག་པར་སྟོན་ཏེ། འདི་ལྟར་རབ་ཏུ་དགའ་བ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །འདོད་ཆགས་ཀྱི་མདའ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །རིག་པ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྡུག་པའི་འཆིང་བ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །ཐམས་ཅད་ལ་དབང་ཕྱུག་དང་དབང་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །ལྟ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དགའ་བ་རྣམ་པར་དག་པའི་གནས་དེ་ནི། འདི་ལྟ་སྟེ། 98b བྱང་ཆུབ་སེམས་དཔའི་གནས་སོ། །སྲེད་པ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །བསྙེམས་པ་རྣམ་པ་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རྒྱན་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །ཡིད་ཚིམ་པར་བྱེད་པ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྣང་བ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །ལུས་བདེ་བ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །གཟུགས་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྒྲ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །དྲི་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །རོ་རྣམ་པར་དག་པའི་གནས་དེ་ནི། འདི་ལྟ་སྟེ། བྱང་ཆུབ་སེམས་དཔའི་གནས་སོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་ངོ་བོ་ཉིད་ཀྱིས་རྣམ་པར་དག་པ་སྟེ། ཆོས་ཐམས་ཅད་ངོ་བོ་ཉིད་ཀྱིས་སྟོང་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །བཛྲ་ཧཱུཾ། ལག་ན་རྡོ་རྗེ། སུ་ལས་ཆོས་ཐམས་ 99a ༄#། །ཅད་ཀྱི་ངོ་བོ་ཉིད་རྣམ་པར་དག་པའི་གནས་བསྒྲུབ་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ལན་གཅིག་ཐོས་ན་ཡང ། དེ་བྱང་ཆུབ་ཀྱི་སྙིང་པོའི་བར་དུ་ཤེས་བྱའི་སྒྲིབ་པ་ཐམས་ཅད་ཆོད་པ་དང ། ཉོན་མོངས་པའི་སྒྲིབ་པ་དང ། ཆོས་ཀྱི་སྒྲིབ་པ་དང ། ལས་ཀྱི་སྒྲིབ་པ་ཆེན་པོ་བསགས་ཀྱང་སེམས་ཅན་དམྱལ་བ་ལ་སོགས་པ་ངན་སོང་རྣམས་སུ་ནམ་ཡང་སྐྱེ་བར་མི་འགྱུར་རོ། །སྡིག་པ་ཡང་བྱས་མ་ཐག་ཏུ་སྡུག་བསྔལ་མེད་པར་བྱང་བར་འགྱུར་རོ། །སུ་ཞིག་འཛིན་པའམ། ཉིན་རེ་ཞིང་ཀློག་པ་དང ། ཁ་ཏོན་དུ་བྱེད་པ་དང ། ཚུལ་བཞིན་ཡིད་ལ་བྱེད་པ་དེ་ཚེ་འདི་ཉིད་ལ་ཆོས་ཐམས་ཅད་ཀྱི་མཉམ་པ་ཉིད་རྡོ་རྗེའི་ཏིང་ངེ་འཛིན་ཐོབ་པས་ཆོས་ཐམས་ཅད་ལ་དབང་ཕྱུག་ཏུ་འགྱུར་རོ། །ཆོས་ཐམས་ཅད་ལ་དགའ་བ་དང ། མགུ་བ་དང ། མཆོག་ཏུ་དགའ་བ་མྱོང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་བཅུ་དྲུག་གིས་དེ་བཞིན་གཤེགས་པ་ཉིད་དམ། རྡོ་རྗེ་འཛིན་པ་ཉིད་འཐོབ་པར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་དཀྱིལ་འཁོར་ཐམས་ཅད་པ། རྡོ་རྗེ་དབྱིངས་མཐའ་དག་གི་སེམས་དཔའི་མཆོག་ཁམས་གསུམ་པོ་མཐའ་ 99b དག་ན་འཇིག་རྟེན་གསུམ་པོ་མ་ལུས་པ་ལས་རྣམ་པར་རྒྱལ་བ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་འདུལ་བར་སྤྱོད་པ། དོན་ཐམས་ཅད་གྲུབ་པ། ལག་ན་རྡོ་རྗེ་མཐའ་ཡས་པ་ཐམས་ཅད་པ། དམ་ཚིག་ཆེན་པོ་པ། རྡོ་རྗེ་གསང་བའི་སེམས་ཅན་ཆེན་པོ་དུ་མས་གཡོག་བྱས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་དོན་འདི་སྟོན་ཏེ། བཞིན་རབ་ཏུ་འཛུམ་ཞིང་ལག་པ་གཡོན་པ་རྡོ་རྗེ་བསྒྱིངས་ཏེ་ཐོག་མའི་རྡོ་རྗེ་ཆེན་པོ་གསོར་ནས་རང་གི་སྙིང་གར་སྟོད་པའི་ཚུལ་གྱིས་འཛིན་ཅིང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ་རང་གི་དེ་ཁོ་ན་ཉིད་ཀྱི་སྙིང་པོ་འདི་སྨྲས་སོ། །ཧཱུཾ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཛིན་པ་དང་བཅས་པ་འཇིག་རྟེན་གྱི་ཁམས་ཐམས་ཅད་ཀྱི་ཁམས་གསུམ་ཐམས་ཅད་རྗེས་སུ་མཉེས་པ་བརྟན་པོས་མཉེས་པར་བྱས་ཏེ་བཀུག་ནས་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་ཆེན་པོར་བཅུག་སྟེ། དམ་ཚིག་གི་བཅིངས་ནས་དབང་དུ་བྱས་ཏེ་དངོས་གྲུབ་ཐམས་ཅད་གྲུབ་བོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བདེ་བ་ཆེན་པོའི་བསྙེམས་པའི་ཕྱག་རྒྱ་བཅིངས་ནས་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པས་བཞུགས་ 100a ༄#། །སོ། །དེ་ནས་ཕྱག་ན་རྡོ་རྗེ་གསང་བ་ཆེན་པོ་རྡོ་རྗེའི་དམ་ཚིག་འབྱུང་བ་དཀྱིལ་འཁོར་བྱིན་གྱིས་རློབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་དབྱིངས་ཀྱི་བྱིན་གྱིས་བརླབས་པ་ཆེན་པོ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །དེ་ཉིད་དང་པོ་དམ་ཚིག་ཆེ། །རྡོ་རྗེ་བྱིན་རླབས་ཞེས་བྱའོ། །གྲུ་བཞིར་བགྱི་ཞིང་སྒོ་བཞི་དང ། །ཁྱམས་རྣམས་ཀྱིས་ནི་ཡོངས་བསྐོར་བ། །རྟ་བབས་བཞི་དང་ཡང་དག་ལྡན། །འོད་ཟེར་འབར་བར་འཁྲིགས་བའི་འོད། །དཀྱིལ་འཁོར་གྱི་ནི་གྲཝ་རྣམས་དང ། །སྒོ་ཁྱུད་ཀྱི་ནི་མཚམས་རྣམས་སུ། །ཟླ་བ་ཕྱེད་ལ་རབ་གནས་པའི། །རིན་ཆེན་ཀུན་གྱིས་ཉེ་བར་མཛེས། །རྩེ་མོ་སྣ་ཚོགས་བ་དན་ནི། །དྲིལ་བུ་མཆོག་བཏགས་རླུང་གིས་བསྐྱོད། །མེ་ཏོག་ཆུན་འཕྱང་མེ་ལོང་སྤྲས། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་དུ་འཁོར་ལོ་ནི། །དཀྱིལ་འཁོར་བརྒྱད་དང་མཉམ་པ་རུ། །རྡོ་རྗེ་ཐིག་གིས་ཐིག་གདབ་པ། །རྡོ་རྗེ་འཁོར་ལོ་ཞེས་བྱར་བཤད། །དེ་ཡི་དབུས་སུ་ཅི་རིགས་པར། །སངས་རྒྱས་སྐུ་ནི་གཞག་བྱ་སྟེ། །འཛུམ་བཅས་ཟླ་བའི་མདོག་ཅན་ལ། །རྡོ་རྗེ་བསྙེམས་པ་འཛིན་པའི་མཆོག་།རྡོ་རྗེ་ཕྲེང་སོགས་ཀྱིས་སྤྲས་ཤིང ། །སྣ་ཚོགས་འབར་བ་འཁྲིགས་པའི་འོད། །པདྨའི་གདན་ 100b ལ་བཞུགས་པར་ནི། །ལུགས་མའམ་མངོན་པར་འདུས་བྱས་པའོ། །རང་གི་སྙིང་པོ་ཀུན་བཟླས་ཏེ། །དེ་ཚེ་དཀྱིལ་འཁོར་བརྟག་པར་བྱ། །རྡོ་རྗེ་སེམས་སོགས་སེམས་དཔའ་རྣམས། ། སྙིང་པོ་ཉིད་ཀྱིས་ཡང་དག་དགོད། །རྡོ་རྗེ་ཤུགས་ཀྱིས་བརྒལ་ནས་ནི། །དཀྱིལ་འཁོར་ཐམས་ཅད་ཡང་དག་བསྡུས། །གཞག་གམ་ཡང་ན་བྲི་བར་བྱ། །ཕྱོགས་རྣམས་ཀུན་ཏུ་སྟོན་པའོ། །མདུན་དུ་རྡོ་རྗེ་སེམས་དཔའ་ནི། །སངས་རྒྱས་ཀུན་གྱི་དབུ་རྒྱན་ཅན། །རྡོ་རྗེ་མཚོན་ནི་གསོར་བར་བརྩོན། །དམར་སྐྱ་དག་ཏུ་ངེས་པར་དགོད། །སངས་རྒྱས་ཀྱི་ནི་གཡས་ལོགས་སུ། །རྡོ་རྗེ་ཀཱི་ལི་ཀཱི་ལ་ནི། །ཡན་ལག་ཀུན་གྱིས་ཡོངས་འཁྱུད་པ། །རྡོ་རྗེ་ཅན་གཟུགས་ཉི་མའི་འོད། །རྒྱབ་ཏུ་རྡོ་རྗེ་འདོད་པ་ནི། །ཆུ་སྲིན་གྱི་ནི་རྒྱལ་མཚན་ཐོགས། །སྔོ་སྐྱའི་མདོག་ཅན་ཅི་རིགས་པར། །བློ་དང་ལྡན་པས་གཞག་པར་བྱ། །གཡོན་དུ་རྡོ་རྗེ་བསྙེམས་པ་ནི། །བསྙེམས་པའི་རྡོ་རྗེ་གཉིས་ཀྱིས་ནི། །རྡོ་རྗེ་བསྙེམས་པ་གཉིས་འཛིན་པ། །བཙོ་མའི་གསེར་དང་འདྲ་བར་དགོད། །སངས་རྒྱས་ཀྱི་ནི་མཚམས་རྣམས་སུ། །མེ་ཏོག་ལ་\ུ0f85སོགས་ཀྱིས་མཚན་ཅིང ། །ཐལ་མོ་སྤྱི་བོར་ལེགས་འཇོག་པའི། །མཆོད་པ་ཆེན་པོ་བཞག་པར་བྱ། །ཕྱི་ཡི་དཀྱིལ་འཁོར་མཚམས་རྣམས་སུ། །ལྷ་མོའི་ཚོགས་རྣམས་འདོད་པར་བྱ། །སྒོ་ཡི་དབུས་ནི་ཐམས་ཅད་དུ། །གཟུགས་མཚན་ལ་སོགས་བསྡུས་པ་དགོད། །སངས་རྒྱས་དཀྱིལ་ 101a ༄#། །འཁོར་ཅན་བརྒྱད་ནི། །རྡོ་རྗེ་འཛིན་སོགས་བྲི་བར་བྱ། །རྡོ་རྗེ་འཁོར་ལོ་ཐམས་ཅད་དུ། །སངས་རྒྱས་རྡོ་རྗེ་འཛིན་གྱིས་བསྐོར། །ཕྱི་ཡི་དཀྱིལ་འཁོར་གནས་རྣམས་སུ། །འདོད་པའི་དབང་ཕྱུག་བྲི་བྱ་སྟེ། །མདུན་དུ་འཇིག་རྟེན་གསུམ་རྒྱལ་ལོ། །འདོད་པའི་ཚངས་པ་ཞི་བྱེད་མཆོག་།དེ་ནས་དཀྱིལ་འཁོར་ཆེན་པོ་འདིར་འཇུག་པ་ལ་སོགས་པའི་ཆོ་ག་རྒྱས་པ་འབྱུང་སྟེ། དེ་ལ་དང་པོ་ཉིད་དུ་ཇི་སྐད་བཤད་པའི་ཆོ་ག་འདིར་ཞུགས་པའི་སློབ་དཔོན་ནི་རྡོ་རྗེ་ཆེན་པོའི་སློབ་དཔོན་དང ། དཀྱིལ་འཁོར་ཐམས་ཅད་ཀྱི་སློབ་དཔོན་དང ། དམ་ཚིག་ཐམས་ཅད་ཤེས་པ་དང ། ཆོས་ཐམས་ཅད་རིག་པ་དང ། ལས་ཐམས་ཅད་སྒྲུབ་པ་དང ། དངོས་གྲུབ་ཐམས་ཅད་གྲུབ་པ་དང ། བཅོམ་ལྡན་འདས་རྡོ་རྗེ་སེམས་དཔས་བྱིན་གྱིས་བརླབས་པ་དང ། དབང་བསྐུར་བ་ཐམས་ཅད་ཐོབ་པ་དང ། ཐམས་ཅད་ཤེས་པ་དང་ལྡན་པ་དང ། མཆོད་པ་ཐམས་ཅད་དང ། འཇིག་རྟེན་དང ། འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་འདིའི་དབང་དུ་འགྱུར་བ་དང ། འགྲུབ་པར་འགྱུར་བ་དང ། འདིའི་ཕྱག་རྒྱ་ཐམས་ཅད་ཀྱང་རང་ཉིད་ཀྱིས་བཅིངས་པས་འགྲུབ་པར་འགྱུར་རོ། །དམ་ཚིག་ཐམས་ཅད་ཀྱི་ལམ་ལ་ཉེས་པ་དང་བཅས་ཀྱང་ཉམས་པར་མི་འགྱུར་ཞིང་བྱིན་གྱིས་བརླབ་པར་རྟོག་པར་འགྱུར་རོ། །མ་ 101b བརླབས་པར་ཡང་ཐམས་ཅད་ཤེས་པར་འགྱུར་རོ། །མཆོད་པ་ལ་སོགས་པའི་བྱ་བ་ཐམས་ཅད་འགྲུབ་པར་འགྱུར་རོ། །མདོར་བསྡུས་ན་ཚེ་འདི་ཉིད་ལ་དངོས་གྲུབ་ཀྱི་མཆོག་ཇི་ལྟར་མངོན་པར་འདོད་པ་དེ་ལྟ་བུར་སངས་རྒྱས་ཉིད་དམ། རྡོ་རྗེ་འཛིན་པ་ཉིད་འཐོབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བཅོམ་ལྡན་འདས་རྡོ་རྗེ་སེམས་དཔའ་འདིའི་སྙིང་ལ་བཞུགས་ཤིང་དོན་ཡོད་པའི་ཕྱིར་བཀུག་ཅིང་དམ་ཚིག་གིས་བཅིངས་ལ་དབང་དུ་བྱས་ཏེ་རྗེས་སུ་མཉེས་པས་བདག་ཉིད་སློབ་དཔོན་དུ་གྱུར་ནས་འཇུག་ཅིང་བསྒྲུབས་ན་འགྲུབ་པར་འགྱུར་རོ། །དེ་ནས་རྡོ་རྗེའི་ཕྱག་རྒྱ་བཅིངས་ལ་དང་པོའི་རྡོ་རྗེའི་ལྟ་བས་བལྟས་ཏེ། སྙིང་པོ་ལན་གཅིག་བརྗོད་ནས། དཀྱིལ་འཁོར་ཆེན་པོ་བསྒྲུབ་པར་བྱའོ། །དེ་ནས་རྡོ་རྗེ་རྣམ་པར་སྒེག་པའི་ཕྱག་རྒྱས་བཟླས་བརྗོད་ལན་ཅིག་བྱས་ལ་ཕྱག་བྱས་ནས་གོས་དམར་པོ་གྱོན་ལ་མེ་ཏོག་གི་ཕྲེང་བ་ཐོགས་ཏེ་གདོང་དྲིས་བྱུག་པ་དང ། རྡོ་རྗེ་ཐལ་མོས་རྡོ་རྗེའི་གར་བྱེད་ཅིང་བསྐོར་བས་སྙིང་གར་མེ་ཏོག་ཐོགས་ཏེ་བདག་ཉིད་འཇུག་པར་བྱའོ། །ཞུགས་ནས་ཀྱང་རྣམ་པར་སྒེག་པ་དང ། བསྐོར་བས་གདུང་ཞིང་སྙིང་པོ་ཡང་བཟླས་བརྗོད་བྱའོ། །དེ་ནས་བཅོམ་ལྡན་འདས་ལ་རྡོ་རྗེའི་ལྟ་བས་བལྟས་ཏེ། དེ་བཞིན་དུ་འདུག་ནས་བཅོམ་ལྡན་འདས་བསྒྲུབ་པར་བྱའོ། །དེ་ནས་བཅོམ་ལྡན་འདས་རྡོ་རྗེ་འཛིན་པ་བདག་ཉིད་ལ་དགྱེས་ 102a ༄#། །པས་མཐོང་བ་སྩོལ་བར་འགྱུར་ཞིང་སྨིན་མ་བསྐྱོད་ལ་སྐུ་ཐམས་ཅད་དམ། ཡན་ལག་རྣམས་བསྐྱོད་ཅིང་ཁ་དོག་དམར་པོར་འགྱུར་རོ། །འོད་ཟེར་གྱི་རང་བཞིན་གྱི་ཞལ་ལམ། །སྐུ་ཐམས་ཅད་སྟོན་པར་འགྱུར་རོ། །ཆོ་འཕྲུལ་དཔག་ཏུ་མེད་པ་ཡང་སྟོན་པར་འགྱུར་རོ། །དེ་ནས་བཅོམ་ལྡན་འདས་བདག་ཉིད་མཐོང་བ་སྩོལ་བའམ། དངོས་གྲུབ་མཆོག་ཀྱང་སྩོལ་བར་འགྱུར་རོ། །དེ་ནས་བརྩམས་ཏེ་ཉིན་རེ་ཞིང་དངོས་གྲུབ་ཐམས་ཅད་འཐོབ་པར་འགྱུར་རོ། །གང་དུ་ཞུགས་པ་ཙམ་ཉིད་ཀྱིས་མི་ཚུགས་པ་དང ། མི་གསོད་པར་འགྱུར་རོ། །དངོས་གྲུབ་ཐམས་ཅད་དང ། ཕུན་སུམ་ཚོགས་པ་ཐམས་ཅད་དང ། ཡེ་ཤེས་ཐམས་ཅད་དང ། བྱ་བ་ཐམས་ཅད་བཅོམ་ལྡན་འདས་ཕྱག་ན་རྡོ་རྗེས་སྒྲུབ་པར་མཛད་དོ། །དེ་ནས་དེ་ཡང་དག་པར་མཆོད་དེ་རྡོ་རྗེའི་མིང་གིས་དབང་བསྐུར་ཞིང་དཔའ་བོའི་རྡོ་རྗེས་བཅོམ་ལྡན་འདས་ལ་མནོས་ལ། སྙིང་པོ་བཟླས་ནས་བཅོམ་ལྡན་འདས་མཐོང་བ་སྩལ་ནས་རང་ཉིད་ཀྱིས་སྩོལ་ཅིག་ཅེས་བརྗོད་ལ་རང་གིས་བླང་བར་བྱའོ། །དེ་ནས་སྐད་ཅིག་དེ་ཉིད་ལ་དངོས་གྲུབ་མཆོག་ཡིད་ལ་འདོད་པ་འགྲུབ་པར་འགྱུར་རོ། །ཡང་ན་བདག་ཉིད་ཀྱིས་ཟླ་བ་དྲུག་གིས་ཡིད་ལ་འདོད་པའི་དངོས་གྲུབ་མཆོག་འགྲུབ་པར་འགྱུར་རོ་ཞེས་བཅོམ་ལྡན་འདས་ཕྱག་ན་རྡོ་རྗེས་གསུངས་སོ། ། 102b དེ་ནས་རྡོ་རྗེ་མིང་གི་དབང་བསྐུར་བ་ལ་སོགས་པ་ཡང་དེ་བཞིན་ནོ། །དེ་ནས་བྱིན་གྱིས་བརླབ་པ་ལ་སོགས་པ་ཡང་བྱས་ནས་ཡང་ཇི་ལྟར་འདོད་པའི་ཆོ་གས་བསྒྲུབས་ལ་འབྱུང་བར་བྱ་ཞིང་དཀྱིལ་འཁོར་ཆེན་པོའི་གསང་བ་བསྒྲུབ་པ་ལན་གཅིག་བྱའོ། །དེ་ནས་སློབ་མ་གཞུག་པར་བྱ་སྟེ། དེ་ལ་དང་པོར་རྡོ་རྗེ་སློབ་དཔོན་གྱིས་དང་པོའི་རབ་ཏུ་དགའ་བའི་རྡོ་རྗེའི་ཕྱག་རྒྱ་བཅིངས་ལ་འཇུག་པར་བྱའོ། །ཞུགས་ནས་དེ་བཞིན་དུ་ཕྱག་བྱས་ལ་སྙིང་པོས་ཅི་ལྟར་མངོན་པར་འདོད་པའི་ཚིག་དང ། བཅོམ་ལྡན་འདས་བསྒྲུབས་པས་ཕྱག་རྒྱ་ཆེན་པོས་བསྒྲུབ་པར་བྱའོ། །དེ་ནས་བཅོམ་ལྡན་འདས་བསྒྲུབས་པས་མཚན་མ་དེ་ཉིད་འབྱུང་སྟེ། ཤེས་ནས་ཕྱག་རྒྱ་ཆེན་པོ་ཉིད་འགྲུབ་པར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་ཏེ། ཞུགས་པ་འདིས་ནི་རྡོ་རྗེ་སློབ་དཔོན་བདག་ཉིད་དེ་བཞིན་དུ་འགྲུབ་པར་འགྱུར་རོ། །དེ་ནས་དེ་བཞིན་དུ་རྡོ་རྗེ་བླང་བ་ལ་སོགས་པ་བྱས་ནས་རྡོ་རྗེ་སློབ་མ་ལ་ཆོ་ག་རྒྱས་པ་འདི་བཞིན་དུ་བྱས་ཏེ་ཕྱག་རྒྱ་བཅིང་བ་ཡང་བསླབ་པར་བྱའོ། །གང་ཡང་དེ་བཞིན་གཤེགས་པ་ཐམས་ཅད་ལ་སོགས་པའི་དམ་ཚིག་ལ་མོས་པ་དེ་རྣམས་ལ་ཡང་རང་གི་ལྷག་པའི་ལྷའི་འཇུག་པའི་ཆོ་ག་རྒྱས་པ་དང ། དེ་བཞིན་དུ་ཡིད་ལ་འདོད་པའི་དངོས་གྲུབ་ཐམས་ཅད་འགྲུབ་པར་འགྱུར་རོ། །དེ་ནས་ 103a ༄#། །ལྷ་གཞན་དག་ལ་དད་པ་རྣམས་ལ་དེ་བཞིན་དུ་འཇུག་པའི་ཆོ་ག་རྒྱས་པར་བྱས་ནས་དེ་བཞིན་དུ་འགྲུབ་པར་འགྱུར་རོ། །དེ་ནས་ཇི་ལྟར་ཞུགས་པ་རྣམས་ཟས་དང ། རོ་བཅུད་དང ། གནས་པ་ལ་སོགས་པ་ཐམས་ཅད་ཀྱིས་ཡང་དག་པར་ཚིམ་པར་བྱས་ལ། ཇི་ལྟར་ཤེས་པའི་གར་དང ། གླུ་དང ། དགོད་པ་དང ། བུ་དང ། བུ་མོ་དང ། མཛའ་བཤེས་དང ། ཉེ་དུ་དང ། གཉེན་མཚམས་དང་བཅས་པས་ཀྱང་མཆོད་པར་བྱའོ། །དེ་ལ་འདིར་ནི་སྣོད་དང ། སྣོད་མ་ཡིན་པ་བརྟག་པར་མི་བྱ་སྟེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་བདེ་བ་ཆེན་པོ་རྡོ་རྗེའི་དམ་ཚིག་འདི་དང ། འདོད་པའི་བསམ་པ་ཡོངས་སུ་རྫོགས་པར་བྱེད་པའི་རྡོ་རྗེའི་སྦྱོར་བས་རྡོ་རྗེ་ཆོས་ཀྱི་མཉམ་པ་ཉིད་ཀྱི་ཕྱག་རྒྱས་རྒྱས་བཏབ་པ་ཡིན་པའི་ཕྱིར་དཀྱིལ་འཁོར་ཆེན་པོའོ། །དེ་ནས་ཆོ་ག་འབྱུང་སྟེ། ཟླ་བ་ཉ་ནས་བརྩམས་ནས་ཕྱག་ན་རྡོ་རྗེའི་སྤྱན་སྔར་རབ་ཏུ་དགའ་བའི་རྡོ་རྗེའི་ཕྱག་རྒྱ་བཅིངས་ལ། ཇི་ལྟར་སྐྱོ་བར་མ་གྱུར་པར་དང་པོར་བྱིན་གྱིས་བརླབ་པ་ལ་སོགས་པ་བྱས་ལ་རྡོ་རྗེའི་ཚིག་གིས་བརྗོད་ཅིང་ཇི་སྲིད་ཟླ་བ་གཅིག་གི་བར་དེ་སྲིད་དུ་བཟླས་བརྗོད་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་བརྩམས་ཏེ་ཕྱག་ན་རྡོ་རྗེའི་བཀའ་ཇི་ལྟ་བ་བཞིན་དུ་དངོས་གྲུབ་ཐམས་ཅད་འགྲུབ་ 103b པར་འགྱུར་རོ། །དེ་ནས་རས་བྲིས་འདྲི་བའམ། འདྲིར་གཞུག་པར་འདོད་ན་དང་པོར་རྡོ་རྗེ་བྲི་བའི་ཕྱག་རྒྱས་བྲིས་ལ། དེའི་འོག་ཏུ་ནི་ཅི་བདེར་བྱའོ། །དཀྱིལ་འཁོར་ཐམས་ཅད་དུ་ཡང་དེ་ཉིད་ཀྱིས་དང་པོར་བརྩམ་པར་བྱ་སྟེ། དབུས་སུ་བཅོམ་ལྡན་འདས་ཆོ་ག་ཇི་ལྟ་བཞིན་དུ་བྲི་ཞིང་དཀྱིལ་འཁོར་ཆེན་པོའི་ཚུལ་གྱིས་སེམས་དཔའ་ཆེན་པོ་བརྒྱད་བྲི་བར་བྱའོ། །དེ་ནས་ཟླ་བ་ཉ་ནས་བརྩམས་ཏེ་ཕྱག་རྒྱ་ཆེན་པོ་བཅིངས་ལ། དེ་བཞིན་དུ་སྔོན་དུ་བསྙེན་པའི་ཚུལ་ལྟར་བཟླས་ནས་ཟླ་བ་ཉ་པའི་མཚན་མོ་ཐོག་ཐག་ཇི་ལྟ་བ་བཞིན་དུ་སྐྱོ་བར་མ་གྱུར་པས་ཕྱག་རྒྱ་མ་བཀྲོལ་བར་བཟླས་བརྗོད་བྱའོ། །དེ་ནས་ནང་པར་བཅོམ་ལྡན་འདས་ཀྱིས་ཞལ་འཛུམ་ཞིང་ཟླ་བ་དང་མཉམ་པའི་མདངས་ཅན་མཐོང་བ་སྩོལ་ཅིང་སངས་རྒྱས་ཉིད་དང ། རྡོ་རྗེ་འཛིན་པ་ཉིད་ལ་སོགས་པའི་དངོས་གྲུབ་མཆོག་རྣམས་སྩོལ་བར་འགྱུར་རོ། །ཆོ་ག་གཞན་ཡང་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་སེམས་དཔའ་ཆེན་པོ་བརྒྱད་ཀྱིས་ཡོངས་སུ་བསྐོར་བ་དང ། ཕྱོགས་ཐམས་ཅད་དུ་དེ་བཞིན་གཤེགས་པ་རྣམས་དང ། རྡོ་རྗེ་འཆང་བ་ཐམས་ཅད་བྲི་བར་བྱའོ། །དེ་ནས་དེ་བཞིན་དུ་བསྒྲུབས་པས་སངས་རྒྱས་ཀྱི་ཉིད་ལ་སོགས་པ་དངོས་གྲུབ་ཐམས་ཅད་འགྲུབ་པོ། །རས་ལ་བཅོམ་ལྡན་འདས་ཕྱག་ན་རྡོ་རྗེ་བསྙེམས་པ་དང་བཅས་པ་བྲིས་ལ། 104a ༄#། །དེའི་སྤྱན་སྔར་དང་པོའི་ཕྱག་རྒྱ་ཆེན་པོས་གནས་ནས་བཟླས་བརྗོད་འབུམ་བྱས་ཏེ། འབུམ་རྫོགས་ན་ཕྱག་ན་རྡོ་རྗེ་ཉིད་ཐོབ་པར་འགྱུར་རོ། ། དེ་བཞིན་གཤེགས་པ་དཔའ་བོ་གཅིག་པ་བྲིས་ནས་ཡང་མཐར་འཚང་རྒྱ་བར་འགྱུར་རོ། །དེ་ནས་བཀླགས་པ་ཙམ་གྱིས་འགྲུབ་པའི་ལས་རྣམས་དཀྱིལ་འཁོར་དུ་ཞུགས་པ་ཙམ་གྱིས་འགྲུབ་པར་འགྱུར་བ་ནི། འདི་ལྟ་སྟེ། དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱ་བ་ལ་ནི་འདོད་ཆགས་ལ་སོགས་པ་བདེ་བ་ཐམས་ཅད་ཕུལ་བས་སོ། །རྡོ་རྗེ་འཛིན་པ་ཆེན་པོ་མཉེས་པར་བྱ་བ་ལ་ནི་རྡོ་རྗེ་སེམས་དཔའ་དང་འཁྱུད་ཅིང་འོ་བྱེད་པས་སོ། །བྱང་ཆུབ་སེམས་དཔའ་ཐམས་ཅད་རྗེས་སུ་མཉེས་པར་བྱ་བ་ལ་ནི་དཔག་ཏུ་མེད་པའི་བཟླས་པས་སོ། །རྡོ་རྗེས་ཐམས་ཅད་རྗེས་སུ་མཉེས་པར་བྱ་བ་ལ་ནི་རང་གི་སྙིང་པོ་བཟླས་པས་སོ། །ལྷ་ལ་སོགས་པ་སེམས་ཅན་ཐམས་ཅད་རྗེས་སུ་ཆགས་པར་བྱ་བ་ལ་ནི་ཐམས་ཅད་དུ་འབུམ་བཟླས་པས་སོ། །བདག་བསྲུང་བ་ལ་ནི་ཡུངས་ཀར་ལ་ལན་གཅིག་བཟླས་པས་སོ། །གཞན་བསྲུང་བ་ལ་ནི་རྡོ་རྗེ་བསྐོར་བས་སོ། །ཐམས་ཅད་བསྲུང་བ་ལ་ནི་ཡིད་ཀྱིས་ལན་གཅིག་གོ་།མཚམས་དང ། ཕྱོགས་དང ། དཀྱིལ་འཁོར་ཐམས་ཅད་བཅིང་བ་ལ་ནི་བལྟ་བའམ། 104b ཡུངས་ཀར་ལ་སོགས་པས་སོ། །སེམས་ཅན་ཐམས་ཅད་རེངས་པར་བྱ་བ་ལ་ནི་དབུགས་མི་འབྱིན་པར་བཟླས་པས་སོ། །སེམས་ཅན་ཐམས་ཅད་རྨུགས་པར་བྱ་བ་ལ་ནི་རྡོ་རྗེ་བཙིར་བས་སོ། །སེམས་ཅན་ཐམས་ཅད་རྨོངས་པར་བྱ་བ་ལ་ནི་མིག་བཙུམ་ནས་བཟླས་པས་སོ། །ཐམས་ཅད་གསད་པ་ལ་ནི་རྡོ་རྗེ་བྲལ་བས་སོ། །སེམས་ཅན་ཐམས་ཅད་རྒྱས་གདབ་པ་ལ་ནི་རྡོ་རྗེ་མཁའ་འགྲོ་མའི་ཕྱག་རྒྱས་སོ། །སྙིང་ཐམས་ཅད་འདྲེན་ཅིང་འབྱིན་པ་ལ་ནི་ཡིད་ཀྱིས་བཟླས་པས་སོ། །སེམས་ཅན་ཐམས་ཅད་ཟ་བ་ལ་ནི་ལྡང་ཞིང་མྱུར་བས་ཟློས་པས་སོ། །སེམས་ཅན་ཐམས་ཅད་སྐྲག་པར་བྱ་བ་ལ་ནི་རྡོ་རྗེ་འཇིགས་བྱེད་ཀྱི་ཕྱག་རྒྱས་སོ། །ནོར་ཐམས་ཅད་དགུག་པ་ལ་ནི་གསེར་གྱིས་བཟླས་པས་སོ། །ནོར་དང ། འབྲུ་ཐམས་ཅད་དགུག་པ་ལ་ནི་རྡོ་རྗེ་རྣལ་འབྱོར་མའི་ཕྱག་རྒྱས་སོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་པི་ཝང་བརྡུང་བ་དང་བཅས་པའི་ཀ་ཀ་ལའི་གླུ་ལེན་པས་བཟླས་བརྗོད་བྱའོ། །ཐམས་ཅད་འབིགས་པ་དང ། རྗེས་སུ་ཆགས་པར་བྱ་བ་ལ་ནི་རྡོ་རྗེ་མདའི་ཕྱག་རྒྱས་སོ། །ཐམས་ཅད་ཆགས་པར་བྱ་བ་ལ་ནི་ཕྱོགས་ཐམས་ཅད་ཀྱི་དེ་བཞིན་གཤེགས་པ་མཉེས་པས་སོ། །གདུག་པའི་འཆིང་བ་བརྟན་པར་བྱ་བ་ལ་ནི་སྙིང་བརྟན་པོར་ངེས་པར་འཚིར་བས་སོ། །མ་རུངས་པ་རབ་ཏུ་བསྒྲུབ་པ་ལ་ནི་རྡོ་རྗེ་ 105a ༄#། །བསྙེམས་པས་སོ། །རྒྱན་ཐམས་ཅད་དབྲོག་པ་ལ་ནི་འབར་བའི་བལྟ་བས་དབྲོག་པས་སོ། །ཐམས་ཅད་ཡིད་ཚིམ་པ་ལ་ནི་རྡོ་རྗེ་ཁུ་ཚུར་སྙིང་ཁར་བཞག་པས་སོ། །མུན་པ་སྣང་བར་བྱ་བ་ལ་ནི་རྡོ་རྗེ་ཁ་ཤར་དུ་བལྟས་ཏེ་བསྐོར་བས་སོ། །ལུས་བདེ་བར་བྱ་བ་ལ་ནི་རང་གི་མཚན་གྱི་བཟླས་པས་སོ། །གཟུགས་ཐམས་ཅད་སྣང་བར་བྱ་བ་ལ་ནི་རྡོ་རྗེ་གཟུགས་ཀྱི་མཆོག་གི་ཕྱག་རྒྱས་སོ། །སྒྲ་ཐམས་ཅད་ཐོས་པར་བྱ་བ་ལ་ནི་རྡོ་རྗེ་པི་ཝང་གིས་སོ། །དྲི་ཞིམ་པོ་སྣ་ཚོགས་པའི་ཕྱིར་ནི་སྣའི་དབུགས་འབྱིན་པའི་གླུ་ཡིས་སོ། །ཟས་དང ། སྐོམ་ཐམས་ཅད་དང ། བཅུད་ཐམས་ཅད་སྤོ་བ་ལ་ནི་རྡོ་རྗེ་སྤོ་བར་བྱའོ། །དབབ་པ་ཐམས་ཅད་ལ་ནི་མཉམ་པའི་ཐལ་མོ་དང ། སེ་གོལ་དང ། གླུའི་བཟླས་པས་སོ། །ཐམས་ཅད་གར་བྱེད་དུ་གཞུག་པ་ལ་བདག་ཉིད་གར་བྱེད་ཅིང་བཟླས་པས་སོ། །ཐམས་ཅད་གླུ་ལེན་དུ་གཞུག་པ་ལ་ནི་ལྕེ་བསྐྱོད་ཅིང་བཟླས་པས་སོ། །ཐམས་ཅད་སྨྲར་གཞུག་པ་ལ་ནི་རྡོ་རྗེ་མ་ཆུ་ཡིས་སོ། །ཐམས་ཅད་བབས་ནས་ལན་སྟོན་པ་ལ་ནི་རྡོ་རྗེ་འབེབས་པས་སོ། །གདོན་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་མྱུ་གུའི་ཕྱག་རྒྱས་སོ། །གདོན་ཐམས་ཅད་འཛིན་དུ་གཞུག་པ་ 105b ལ་ནི་ཚོགས་ཀྱི་བདག་པོ་རབ་ཏུ་དགའ་བའི་ཁྲོ་བོས་བཟླས་པས་སོ། །རིམས་ནད་ཐམས་ཅད་འཛིན་དུ་གཞུག་པ་ལ་ནི་རྡོ་རྗེའི་རིགས་ཀྱི་གདོན་གྱིས་སོ། །རིམས་ཐམས་ཅད་བསལ་བ་ལ་ནི་རྡོ་རྗེའི་ལྟ་བས་བསལ་བས་སོ། །དུག་ཐམས་ཅད་སྦར་བ་ལ་ནི་རྡོ་རྗེ་ལྟ་བའི་དུག་གི་ཕྱག་རྒྱས་སོ། །དུག་ཐམས་ཅད་གཞིག་པ་ལ་ནི་རྨ་བྱའི་ཆུན་བོས་སོ། །དུག་ཐམས་ཅད་བཟའ་བ་ལ་ནི་རྡོ་རྗེ་བདུད་རྩིའི་ཕྱག་རྒྱས་སོ། །བདུད་ལ་སོགས་པ་མ་རུངས་པ་ཐམས་ཅད་བརླག་པ་ལ་ནི་འཁྲུགས་པས་དཔག་ཏུ་མེད་པར་བཟླས་པས་སོ། །མཁའ་འགྲོ་མའི་གདོན་ཐམས་ཅད་ལས་གྲོལ་བར་བྱ་བ་ལ་ནི་རྡོ་རྗེ་ཆེན་པོ་གསོར་བའི་ཕྱག་རྒྱས་སོ། །ཕྱག་རྒྱ་ཐམས་ཅད་གཞིག་པ་ལ་ནི་རྡོ་རྗེ་འཕེན་པས་སོ། །མཁའ་འགྲོ་མ་ཐམས་ཅད་དགུག་པ་དང ། གཞུག་པ་དང ། གདུལ་བ་ལ་ནི་རྡོ་རྗེ་ཁ་ཊྭཱཾ་གའི་ཕྱག་རྒྱ་འཛིན་པས་སོ། །མ་མོ་ཐམས་ཅད་ཀྱི་དཀྱིལ་འཁོར་དང ། དམ་ཚིག་དང ། སྙིང་པོ་དང ། ཕྱག་རྒྱ་དང ། གསང་སྔགས་དང ། རིག་པ་དང ། གསང་བ་གཞིག་པ་ལ་ནི་རྡོ་རྗེ་ཁྲོ་བོའི་ཡི་གེ་ཕཊ་ཀྱིས་སོ། །མ་མོ་དང ། མཁའ་འགྲོ་མ་ཐམས་ཅད་མངག་གཞུག་པར་བྱ་བ་ལ་ནི་མ་མོའི་གནས་སུ་ཁྲོས་པས་བཟླས་བརྗོད་འབུམ་བྱའོ། །བདུད་ཐམས་ཅད་ཀྱི་སྟོབས་གཞོམ་པ་ལ་ནི་རྡོ་རྗེ་དྲག་པོའི་ཧ་ཧ་ཞེས་བྱ་བའི་གད་རྒྱངས་ཀྱིས་སོ། ། 106a ༄#། །གཞན་གྱི་དཔུང་ཐམས་ཅད་གཞོམ་པ་ལ་ནི་རྡོ་རྗེ་ལ་ཡོངས་སུ་བཟླས་ལ་འཕང་ངོ ། །འཐབ་པ་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་རྒྱལ་མཚན་གྱི་ཕྱག་རྒྱས་སོ། །ཐམས་ཅད་བཅིང་བ་ལ་ནི་གོས་ལ་མདུད་པ་བྱའོ། །ཐམས་ཅད་དགྲོལ་བ་ལ་ནི་ཡི་གེ་མུ་ཡིས་སོ། །རོ་ལངས་དང ། འཁྲུལ་འཁོར་ཐམས་ཅད་གཞིག་པ་ལ་ནི་རྡོ་རྗེ་འཇིགས་བྱེད་ཀྱིས་སོ། །ལྕགས་སྒྲོག་ཐམས་ཅད་དགྲོལ་བ་ལ་ནི་རྡོ་རྗེ་ཁབ་ལོང་གིས་སོ། །མེ་ཡང་དག་པར་བསྐྱེད་པ་ལ་ནི་རྡོ་རྗེ་མེ་ཤེལ་གྱིས་སོ། །ཆུ་མེད་པར་ཆུ་ཡང་དག་པར་བསྐྱེད་པ་ལ་ནི་རྡོ་རྗེ་ཆུ་ཤེལ་གྱིས་སོ། །ནམ་མཁའ་ལས་ཟས་དང ། སྐོམ་དང ། གོས་དང ། རྒྱན་ཐམས་ཅད་ལ་སོགས་པ་ཡོ་བྱད་མང་པོ་འབྱུང་བ་ལ་ནི་ནམ་མཁའ་ལ་ལྟ་ཞིང་བཟླས་བརྗོད་འབུམ་བྱའོ། །ནམ་མཁའ་ལས་སངས་རྒྱས་ཀྱི་སྐུ་ལ་སོགས་པ་གཟུགས་ཐམས་ཅད་སྟོན་པ་ལ་ནི་སངས་རྒྱས་རྗེས་སུ་དྲན་ལ་ནམ་མཁར་ལྟ་ཞིང་བཟླས་པས་སོ། །ནམ་མཁའ་ལས་ཡི་གེས་འདས་པ་དང ། མ་འོངས་པ་དང ། ད་ལྟར་བྱུང་བའི་ལུང་བསྒོ་བ་བདེན་པར་སྟོན་པ་ལ་ནི་ཡི་གེ་ཨ་བྲིས་ལ་བཟླས་བརྗོད་འབུམ་བྱས་པས་སོ། །པྲ་སེ་ན་ཐམས་ཅད་ལས་འདས་པ་དང ། མ་འོངས་པ་དང ། ད་ལྟར་བྱུང་བའི་ལུང་བསྒོ་ 106b བ་བདེན་པར་སྟོན་པ་ལ་ནི་རྡོ་རྗེ་པྲ་སེ་ན་ཐམས་ཅད་དབབ་པས་སོ། །དེ་བཞིན་དུ་མིག་གིས་བདེན་པ་ཐམས་ཅད་མཐོང་བ་ལ་ནི་རང་གི་མིག་ལ་བཟླས་པ་འབུམ་བྱས་པས་སོ། ། རྣ་བས་ཐོས་པར་བྱ་བ་ལ་ནི་རང་གི་རྣ་བ་ལ་བཟླས་པ་འབུམ་བྱས་པས་སོ། །རྣས་མནམ་པར་བྱ་བ་ལ་ནི་སྣ་ལ་བཟླས་པས་སོ། །ལྕེས་རང་ཉིད་སྨྲ་བ་ལ་ནི་ལྕེ་ལ་བཟླས་པས་སོ། །ལུས་ཀྱིས་རེག་པར་བྱ་བ་ལ་ནི་ལུས་ལ་བཟླས་པས་སོ། །ཡིད་ཀྱིས་ཤེས་པར་བྱ་བ་ལ་ནི་ཡིད་ལ་འབུམ་བཟླས་པས་སོ། །རྨད་དུ་བྱུང་བ་ཐམས་ཅད་བསྟན་པ་ལ་ནི་སངས་རྒྱས་ཀྱི་སྐུ་བསྒྲུབས་པས་སོ། །སྒྱུ་མ་ཐམས་ཅད་བསྟན་པ་ལ་ནི་རྨ་བྱའི་སྒྲོའི་ཆུན་པོ་ལ་འབུམ་བཟླས་པས་སོ། །ཐམས་ཅད་གཡོག་པར་བྱ་བ་ལ་ནི་ཞི་བའི་གནས་སུ་འབུམ་བཟླས་པས་སོ། །ཐམས་ཅད་ལ་ལན་ལྡོན་པར་བྱ་བ་ལ་ནི་རྡོ་རྗེ་ཧཱུཾ་མཛད་ཀྱི་རྡོ་རྗེས་སོ། །རྫུ་འཕྲུལ་ཐམས་ཅད་བསྟན་པ་ལ་ནི་རྡོ་རྗེ་རྫུ་འཕྲུལ་གྱི་ཕྱག་རྒྱས་སོ། །ཆོ་འཕྲུལ་ཐམས་ཅད་བསྟན་པ་ལ་ནི་རྡོ་རྗེ་ཏིང་ངེ་འཛིན་གྱི་ཕྱག་རྒྱས་སོ། །རང་གི་ལུས་ལ་སོགས་པ་དངོས་པོ་ཐམས་ཅད་ལས་སངས་རྒྱས་དང ། རྡོ་རྗེ་སེམས་དཔའ་ལ་སོགས་པ་རྒྱུ་བ་དང ། མི་རྒྱུ་བའི་དངོས་པོ་ཐམས་ཅད་བསྟན་པ་ལ་ནི་རྡོ་རྗེ་རྫུ་འཕྲུལ་རྣམ་པར་འཕྲུལ་པས་སོ། །ལྷ་ཐམས་ཅད་དབབ་པ་ལ་ནི་རྡོ་རྗེ་བསྐོར་བས་ 107a ༄#། །སོ། །ཀླུ་ཐམས་ཅད་རྗེས་སུ་འབྲང་བར་བྱ་བ་ལ་ནི་ཀླུའི་རྒྱལ་པོའི་མཚོར་བཟླས་བརྗོད་བྱའོ། །གནོད་སྦྱིན་ཐམས་ཅད་མངག་གཞུག་པར་བྱ་བ་ལ་ནི་རྡོ་རྗེའི་བཀའ་བསྒོ་བས་སོ། །འབྱུང་པོ་ཐམས་ཅད་གདུལ་བ་ལ་ནི་ལྷ་ཆེན་པོ་མནན་ནས་ཁྲོས་པས་བཟླས་བརྗོད་བྱའོ། །སེར་བ་ཐམས་ཅད་བཟློག་པ་ལ་ནི་རྡོ་རྗེ་སྲིད་སྲུང་གི་ཕྱག་རྒྱས་སོ། །གློག་འབབ་པ་ཐམས་ཅད་བཟློག་པ་ལ་ནི་རྡོ་རྗེ་ཁྲོ་གཉེར་ཅན་གྱི་ཕྱག་རྒྱས་སོ། །ཆར་དབབ་པ་ལ་ནི་ཀླུའི་མཚོར་བཟླས་བརྗོད་བྱའོ། ། ཆར་གཅད་པ་ལ་ནི་དྲི་མ་མེད་པའི་ཆུའི་སྦྱིན་བླུག་བྱའོ། །སྤྲིན་བསྐྱེད་པ་ལ་ནི་ཀླུ་བྲིས་ནས་བདུག་པས་བདུག་པར་བྱའོ། །སྤྲིན་བཤིག་པ་ལ་ནི་རྡོ་རྗེ་ནམ་མཁའི་སྤྲིན་གྱིས་སོ། །ཆུ་མེད་པའི་ཕྱོགས་སུ་ཤིན་ཏུ་བསིལ་བའི་ཆུའི་ཚོགས་རྟག་ཏུ་འབྱུང་བ་ལ་ནི་རྡོ་རྗེ་ཀླུའི་ཕྱག་རྒྱས་སོ། །གཏེར་ཐམས་ཅད་ཤེས་པར་བྱ་བ་ལ་ནི་སྣོད་དུ་ཆུ་བླུག་པར་བྱའོ། །གཏེར་ཐམས་ཅད་བརྐོ་བ་ལ་ནི་རྡོ་རྗེ་འཇོར་གྱིས་སོ། །གཏེར་ཐམས་ཅད་རྙེད་པ་ལ་ནི་རྡོ་རྗེ་ནོར་གྱིས་སོ། །རྒྱལ་སྲིད་ཐམས་ཅད་ཐོབ་པར་བྱ་བ་ལ་ནི་རྡོ་རྗེ་དབང་བསྐུར་བའི་ཕྱག་རྒྱས་སོ། །སའི་བདག་པོར་བྱ་བ་ལ་ནི་རྡོ་རྗེ་སེམས་དཔའི་དབང་བསྐུར་བའི་ཕྱག་རྒྱས་སོ། །དཀྱིལ་འཁོར་ཐམས་ཅད་བསྒྲུབ་པ་ལ་ནི་རྡོ་རྗེ་ 107b འཁོར་ལོའི་ཕྱག་རྒྱས་སོ། །ཕྱག་རྒྱ་ཐམས་ཅད་བསྒྲུབ་པ་ལ་ནི་བདེ་བ་ཆེན་པོའི་དམ་ཚིག་གི་ཕྱག་རྒྱས་སོ། །དམ་ཚིག་ཐམས་ཅད་བསྒྲུབ་པ་ལ་ནི་རབ་ཏུ་དགའ་བའི་རྡོ་རྗེའི་ཕྱག་རྒྱས་སོ། །དངོས་གྲུབ་ཐམས་ཅད་བསྒྲུབ་པ་ལ་ནི་རྡོ་རྗེ་སྙེམས་པའི་ལྕགས་ཀྱུའི་ཕྱག་རྒྱས་སོ། །མ་གྲུབ་པ་ཐམས་ཅད་གྲུབ་པར་སྟོན་པ་ལ་ནི་རྡོ་རྗེ་གྲུབ་པའི་ཕྱག་རྒྱས་སོ། །རྡོ་རྗེ་རིག་པ་འཛིན་པ་ཐམས་ཅད་བསྒྲུབ་པ་ལ་ནི་རྡོ་རྗེ་རིག་པ་འཛིན་པའི་ཕྱག་རྒྱས་སོ། །རྡོ་རྗེ་ཐམས་ཅད་བསྒྲུབ་པ་ལ་ནི་རྡོ་རྗེ་ཐམས་ཅད་ཀྱི་མཆོག་གི་ཕྱག་རྒྱས་སོ། །བྱང་ཆུབ་སེམས་དཔའ་ཐམས་ཅད་བསྒྲུབ་པ་ལ་ནི་ཐུགས་ཀྱི་རྡོ་རྗེས་སོ། །རྡོ་རྗེ་འཛིན་པ་ཉིད་བསྒྲུབ་པ་ལ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོས་སོ། །སངས་རྒྱས་ཉིད་བསྒྲུབ་པ་ལ་ནི་རྡོ་རྗེ་ཡེ་ཤེས་ཀྱི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཐམས་ཅད་ཀྱི་རྟོག་པའི་རྒྱལ་པོ་ཆེན་པོ་ལས། དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་ཞེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །རྡོ་རྗེ་སེམས་དཔའི་རྟོག་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས། ཡང་དེ་བཞིན་གཤེགས་པ་ཐམས་ཅད་ཀྱིས་ཞི་བའི་ཆོས་ཉིད་མངོན་པར་རྫོགས་པར་བྱང་ཆུབ་པར་བསྒྲུབ་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་ཏེ། རྡོ་རྗེ་སྲ་ 108a ༄#། །བ་ཉིད་ཀྱི་ཕྱིར་རྡོ་རྗེ་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །དོན་གཅིག་པ་ཉིད་ཀྱི་ཕྱིར་དོན་གྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ངོ་བོ་ཉིད་རྣམ་པར་དག་པ་ཉིད་ཀྱི་ཕྱིར་ཆོས་ཀྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ཐམས་ཅད་ལ་རྣམ་པར་མི་རྟོག་པ་ཉིད་ཀྱི་ཕྱིར་ཐམས་ཅད་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ལག་ན་རྡོ་རྗེ། གང་ལ་ལ་ཆོས་མངོན་པར་བསྒྲུབ་པ་བཞི་པོ་འདི་དག་ཉན་པ་དང ། འཛིན་པ་དང ། ཀློག་པ་དང ། སྒོམ་པ་དེ་སྡིག་པ་ཐམས་ཅད་སྤྱོད་ཀྱང་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ངན་སོང་ཐམས་ཅད་ལས་ཡང་དག་པར་འདས་པར་འགྱུར་རོ། །དེ་ནས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཡེ་ཤེས་ཀྱི་ཁུ་ཚུར་ཡོངས་སུ་འཛིན་པའི་དོན་གྱི་གནས་འདིར་ཉིད་རྒྱ་ཆེར་སྟོན་ཅིང་བཞིན་འཛུམ་པ་དང་བཅས་ཏེ་ཆོས་ཐམས་ཅད་ཀྱི་མཉམ་པ་ཉིད་ཀྱི་སྙིང་པོ་འདི་གསུངས་སོ། །ཿ ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ཡང་དག་པར་འདུས་པར་མཛད་ནས། བཅོམ་ལྡན་འདས་ཀྱི་ཕྱོགས་ཐམས་ཅད་དུ་རྡོ་རྗེ་སེམས་དཔའི་དཀྱིལ་ 108b འཁོར་ཆེན་པོའི་ཚུལ་གྱིས་བཞུགས་པ་དང ། སེམས་དཔའ་ཆེན་པོ་བརྒྱད་ཕྱིའི་དཀྱིལ་འཁོར་དུ་ཕྱོགས་བརྒྱད་དུ་བཞད་པ་ཆེན་པོས་བཞད་ཅིང་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེའི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྡོ་རྗེ་ཞེས་བྱ་བའི་དམ་ཚིག་ཆེན་པོའི་དཀྱིལ་འཁོར་ཆེན་པོ་འདི་གསུངས་སོ། །རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་དུ་ཕྱིའི་དཀྱིལ་འཁོར་བྲིས་ལ། དེའི་དབུས་སུ་ཐིག་གསུམ་གྱི་འཁོར་ལོ་བྲིས་ནས་བཅོམ་ལྡན་འདས་ཀྱི་ཐད་ཀར་སྣ་ཚོགས་པདྨར་རབ་ཏུ་གནས་པ་དེའི་འཁོར་ལོའི་ལྟེ་བ་ལ་བཅོམ་ལྡན་འདས་དེ་བཞིན་གཤེགས་པ་རྟག་པ་ཆེན་པོ་ས་ལ་སོགས་པ་ལས་བྱས་པ་གཞག་པར་བྱའོ། །དེའི་ཕྱོགས་ཐམས་ཅད་དུ་ས་ལ་སོགས་པ་ལས་བྱས་པའི་དེ་བཞིན་གཤེགས་པ་བརྒྱད་གཞག་གམ་བྲི་བར་བྱའོ། །དེ་ནས་ཚོན་གྱི་ཐིག་ལེ་རྣམས་ཀྱི་དཀྱིལ་འཁོར་གྱི་འཁོར་ལོ་ལ་བཞུགས་པའི་དེ་བཞིན་གཤེགས་པ་རྣམས་རྡོ་རྗེ་འཛིན་པ་དང་བཅས་པ་བྲི་བར་བྱའོ། །ཕྱིའི་དཀྱིལ་འཁོར་གྱི་ཕྱོགས་བཞི་དང ། མཚམས་རྣམས་སུ་བྱང་ཆུབ་སེམས་དཔའ་ 109a ༄#། །བརྒྱད་ཅི་ལྟ་བ་བཞིན་བཞག་ནས་བུམ་པ་གང་བ་བཞི་སྒོ་རྣམས་སུ་དགོད་པར་བྱ་ཞིང ། བྱང་ཆུབ་ཀྱི་མཚན་མ་རྣམས་གཞག་པར་བྱ་སྟེ། ཤར་ནས་བརྩམས་ཏེ་ནེའུ་གསིངས་དང་བཅས་པའི་དུམ་བུ་དང ། རོ་དྲུག་གིས་ཡོངས་སུ་གང་ཞིང་དབྱིག་དང ། གསེར་དང ། རིན་པོ་ཆེ་དང ། གོས་ལ་སོགས་པས་ཡོངས་སུ་བཀང་བའི་སྣོད་དང ། འཇམ་ཞིང་ཤིན་ཏུ་བདེ་བའི་སྟན་དང ། སངས་རྒྱས་ཀྱི་སྐུ་གཟུགས་དགོད་དོ། །དེ་ནས་དེ་བཞིན་དུ་གོས་གྱོན་ལ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་བཅིངས་ནས་ཞུགས་ན། བདག་ཉིད་སློབ་དཔོན་མེད་པར་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རློབ་པར་འགྱུར་རོ། །དེ་ནས་བརྩམས་ཏེ་དེ་བཞིན་གཤེགས་པ་ཐམས་ཅད་ཀྱི་རྟོག་པ་དང ། དངོས་གྲུབ་ཐམས་ཅད་ལ་མི་ཚུགས་པ་དང ། མི་སོད་པ་དང ། སྒྲིབ་པ་ཐམས་ཅད་དང་བྲལ་བ་འཐོབ་པར་འགྱུར་རོ། །དེ་ནས་སློབ་མ་ཡང་དེ་བཞིན་དུ་གཞུག་གོ་།ཞུགས་ནས་རྡོ་རྗེ་རྩེ་ལྔ་པ་བྱིན་ལ་རྡོ་རྗེ་མིང་གིས་དབང་བསྐུར་བ་ཡང་སྦྱིན་པར་བྱའོ། །དེ་ནས་དམ་ཚིག་འདི་དག་བྱ་བར་བསྒོ་བར་བྱའོ། །སེམས་ཅན་ཀུན་ལ་ཕན་ཕྱིར་དང ། །བསྟན་པ་ཐམས་ཅད་བསྲུང་བའི་ཕྱིར། །རྣམ་པར་མི་རྟོག་ 109b སྦྱོར་བ་ཡིས། །ཅི་བདེ་བར་ནི་ཐམས་ཅད་ཀྱིས། །ཞེས་བྱའོ། །དེ་ནས་མཚན་མ་བཞི་འབྱོར་པ་ཇི་ལྟ་བས་སྐལ་བ་ཇི་ལྟ་བ་བཞིན་དུ་སྦྱིན་པར་བྱའོ། །དམ་ཚིག་ཆེན་པོའི་དཀྱིལ་འཁོར་རོ། །དེ་ནས་སྒྲུབ་པ་ནི་རས་ལ་བཅོམ་ལྡན་འདས་རྣམ་པར་སྣང་མཛད་འཛུམ་པ་དང་བཅས་ཤིང་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱི་ཕྱག་རྒྱ་ཡོངས་སུ་འཛིན་པར་བྱའོ། །གཞན་ཐམས་ཅད་ནི་དམ་ཚིག་ཆེན་པོའི་དཀྱིལ་འཁོར་གྱི་ཚུལ་དུ་བྱའོ། །དེ་ནས་དེ་བཞིན་དུ་སེམས་དཔའ་མཆོག་སྒྲུབ་པ་དང ། དངོས་གྲུབ་མཆོག་རྣམས་ཀྱང་དེ་བཞིན་ནོ། །གཞན་ཡང་རས་ལ་བཅོམ་ལྡན་འདས་དཔའ་བོ་གཅིག་པུ་བྲིས་ཏེ། འདིའི་མདུན་དུ་རྡོ་རྗེའི་ཚིག་གིས་བཟླས་བརྗོད་འབུམ་བྱས་ནས་ཡེ་ཤེས་ཀྱི་ཁུ་ཚུར་ཡོངས་སུ་འཛིན་པས་མཚན་མོ་ཐོག་ཐག་བཟླས་ན་ཤེས་རབ་ཀྱི་ཕ་རོལ་ཏུ་ཕྱིན་པ་འཐོབ་ཅིང་དངོས་གྲུབ་གྲུབ་པའི་བྱང་ཆུབ་སེམས་དཔའ་འགྱུར་ལ། དེ་ནས་དེ་བཞིན་གཤེགས་པར་འགྱུར་རོ། །དེ་ནས་མ་བསྒྲུབས་པས་ཀྱང་དཀྱིལ་འཁོར་དུ་ཞུགས་པ་ཙམ་ཉིད་ཀྱིས་ལས་རྣམས་འགྲུབ་པར་འགྱུར་ཏེ། འདི་ལྟ་སྟེ། དེ་བཞིན་གཤེགས་པ་ཐམས་ཅད་མཆོད་པ་ལ་ནི་ཇི་སྙེད་པའི་དེ་བཞིན་གཤེགས་པའི་བདེ་བ་ཐམས་ཅད་ཕུལ་བས་སོ། །སངས་རྒྱས་དང ། བྱང་ཆུབ་སེམས་དཔའ་ཐམས་ 110a ༄#། །ཅད་མཆོད་པ་ལ་ནི་བདག་ཕུལ་བས་སོ། །དཀོན་མཆོག་གསུམ་མཆོད་པ་ལ་ནི་མེ་ཏོག་ལ་སོགས་པ་ལ་བཟླས་པ་སོ། །སེམས་ཅན་ཐམས་ཅད་མཆོད་པ་ལ་ནི་ཐམས་ཅད་ལ་བྱམས་པའི་བཟླས་པས་སོ། །ཆོས་ཐམས་ཅད་བསྡུ་བ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་བཞི་པོ་གདོན་པས་སོ། །བདུད་ཐམས་ཅད་འདུལ་བ་ལ་ནི་བརྟན་ཞིང་ངེས་པའི་བཟླས་པས་སོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ཐོབ་པ་ལ་ནི་རྒྱན་ཐམས་ཅད་ཕུལ་ཞིང་རང་ཉིད་བཅིངས་པས་སོ། །ཆོས་ཉིད་ཐམས་ཅད་ཐོབ་པ་ལ་ནི་རྡོ་རྗེ་པདྨ་ལ་བལྟ་བས་སོ། །དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དངོས་གྲུབ་ཐོབ་པ་ལ་ནི་ཐམས་ཅད་རྡོ་རྗེའི་ལས་ཀྱི་མཆོག་གིས་སོ། །སངས་རྒྱས་ཉིད་རབ་ཏུ་ཐོབ་པ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱི་དེ་ཁོ་ན་ཉིད་ཀྱི་ཕྱག་རྒྱ་ཆེན་པོས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་རྫོགས་སོ། །དེ་བཞིན་གཤེགས་པའི་རྟོག་པའོ།། །།དེ་ནས་མ་རུངས་པ་ཐམས་ཅད་འདུལ་བ་དེ་བཞིན་གཤེགས་པ་ཤཱཀྱ་ཐུབ་པས་ཀྱང་ཡང་ 110b ཆོས་ཐམས་ཅད་ཀྱི་མཉམ་པ་ཉིད་ཀྱིས་རྣམ་པར་རྒྱལ་བ་བསྡུ་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབ་པ་འདི་གསུངས་སོ། །འདོད་ཆགས་ཀྱི་སྤྲོས་པ་མེད་པ་ཉིད་ཀྱིས་ཞེ་སྡང་གི་སྤྲོས་པ་མེད་པ་ཉིད་དོ། །ཞེ་སྡང་གི་སྤྲོས་པ་མེད་པ་ཉིད་ཀྱིས་གཏི་མུག་གི་སྤྲོས་པ་མེད་པ་ཉིད་དོ། །གཏི་མུག་གི་སྤྲོས་པ་མེད་པ་ཉིད་ཀྱིས་ཆོས་ཐམས་ཅད་ཀྱི་སྤྲོས་པ་མེད་པ་ཉིད་དོ། །ཆོས་ཐམས་ཅད་ཀྱི་སྤྲོས་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་དུ་རིག་པར་བྱའོ། །ལག་ན་རྡོ་རྗེ། གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང ། འཛིན་པ་དང ། ཀློག་པ་དང ། སྒོམ་པ་དེས་འདུལ་བའི་དབང་གི་ཕྱིར་ཁམས་གསུམ་དུ་སྐྱེས་པའི་སེམས་ཅན་ཐམས་ཅད་བསད་ཀྱང་ངན་སོང་གི་སྐྱེ་བར་མི་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། ། དེ་ནས་བཅོམ་ལྡན་འདས་ལག་ན་རྡོ་རྗེ་ཆོས་ཉིད་འདིའི་དོན་རྒྱ་ཆེར་སྟོན་ཅིང ། འཇིག་རྟེན་གསུམ་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་གྱི་ཕྱག་རྒྱ་བཅིངས་ལ། ཁྲོ་གཉེར་དང་བཅས་ཤིང་སྨིན་མ་བཏེག་སྟེ་འབར་བར་བལྟ་ལ་པདྨའི་གདོང་ཁྲོ་ཞིང་དགོད་དེ། མཆེ་བ་གཙིགས་ནས་རྐང་པ་གཡས་པ་བསྐུམ་པའི་ཚུལ་ 111a ༄#། །གནས་པས་གནས་ནས། རྡོ་རྗེ་ཧཱུཾ་ཞེས་བྱ་བའི་སྙིང་པོ་འདི་གསུངས་སོ། །ཧཱུཾ། དེ་ནས་འདི་གསུངས་པ་ཙམ་གྱིས་འཇིག་རྟེན་གསུམ་པོ་ཐམས་ཅད་ཀྱི་འདོད་པའི་དབང་ཕྱུག་ལ་སོགས་པ་འཇིག་རྟེན་གསུམ་གྱི་བདག་པོ་རྣམས་ཡང་དག་པར་བཀུག་སྟེ་ལྷུང་བར་མཛད་ནས་དཀྱིལ་འཁོར་དུ་བཅུག་ནས་རྣམ་པར་རྒྱལ་བར་མཛད་བཅིངས་ཏེ་དབང་དུ་བྱས་ནས་བཏུལ་ཞིང་རྗེས་སུ་བཏུལ་ཏེ་བསླང་ནས་ཡང་དམ་ཚིག་གིས་བཅིངས་ནས་འཇིག་རྟེན་གསུམ་གྱི་བདག་པོ་དབང་ཕྱུག་ཆེན་པོ་ཆུང་མ་དང་བཅས་པ་ཞབས་གཉིས་སུ་ཕབ་ནས་མནན་པ་མཛད་དོ། །དེ་ནས་དེ་རྣམས་ཀྱིས་འཇིག་རྟེན་གསུམ་པོ་ཐམས་ཅད་དུ་སྒྲ་ཆེན་པོ་བསྒྲགས་ཏེ། ཀྱེ། རྡོ་རྗེ་འཆང་ཆེན་པོ། ཡོངས་སུ་སྐྱོབ་པར་མཛོད་ཅིག་།བདག་ཅག་རྣམས་མ་གཟིར་ཅིག་།འདིར་ཁྱོད་ལ་བདག་ཅག་སྐྱབས་སུ་མཆིའོ། །དམ་ཚིག་དང ། བཀའ་བསྒོ་བ་ཡང་བསྒྲུབ་པར་བགྱིའོ། །མ་མོ་ཐམས་ཅད་ཀྱང་བཏུལ་ཞིང་དམ་ལ་བཏགས་ནས་དཀྱིལ་འཁོར་ཡང་རྣམ་པར་བཤིག་སྟེ། ཕྱག་རྒྱ་ཐམས་ཅད་དང ། དམ་ཚིག་ཀྱང་དྲལ་ཞིང་རྣམ་པར་བཤིགས་པ་དང ། གདོན་ཐམས་ཅད་ཀྱང་བཟློག་ཅིང་ནད་ཐམས་ཅད་དང ། རིམས་ཐམས་ཅད་དང ། 111b གནོད་པ་དང ། དུག་དང ། ངན་འགྲོ་རྣམས་དྲལ་ཅིང་རྣམ་པར་བཤིགས་པས་སྒྲ་ཆེན་པོ་སྒྲོགས་ཤིང་འཇིགས་པ་ཆེན་པོས་འཇིགས་པར་བྱེད་པའི་ཚིག་རྣམས་ཀྱིས་བཅོམ་ལྡན་འདས་ཉིད་ལ་སྐྱབས་སུ་སོང་ངོ ། །བཅོམ་ལྡན་འདས་ཀྱིས་ཀྱང་ཞལ་རྣམ་པར་བཞད་ནས་དེ་རྣམས་དཀྱིལ་འཁོར་དུ་བཅུག་སྟེ། དམ་ཚིག་གིས་བཅིངས་ནས་རྡོ་རྗེ་རིན་ཆེན་གྱིས་དབང་བསྐུར་ནས་རང་གི་མཚན་མ་རྣམས་རྡོ་རྗེས་བྱིན་གྱིས་བརླབས་ཏེ་རྡོ་རྗེ་མིང་གི་དབང་བསྐུར་བ་ཡང་རྗེས་སུ་སྩལ་ནས་སེམས་ཅན་མ་ལུས་པའི་དོན་དུ་ཕྱིའི་རྡོ་རྗེའི་རིགས་སུ་རབ་ཏུ་བཞག་གོ་།དེ་ནས་རྡོ་རྗེ་ཁྲོ་བོའི་རྡོ་རྗེ་ལས་ཕྱག་ན་རྡོ་རྗེ་དང་འདྲ་བའི་དངོས་པོའི་བདག་ཉིད་ཅན་ཁ་དོག་དང ། རྒྱན་དང ། མཚོན་ཆ་རྣམ་པ་སྣ་ཚོགས་བསྣམས་པ། རྣམ་པར་འགྱུར་བའི་རྡོ་རྗེའི་མཆེ་བ་གཙིགས་པ། ཚེམས་ཀྱིས་སྒྲོས་གནོན་པ། སྨིན་མ་མི་བཟད་ཅིང་ཁྲོ་གཉེར་བསྙེར་བ། སྤྱན་དང ། དབུ་སྐྲ་དང ། ག་ཙོམ་འབར་བ། ཞལ་འཇིགས་པ། རྡོ་རྗེ་དང ། ལྕགས་ཀྱུ་དང ། ཞགས་པ་དང ། མཚོན་ཆ་མདའ་དང ། དབྱིག་པ་དང ། རལ་གྲི་དང ། ཁ་ཊྭཱཾ་ག་དང ། གྲི་རིང་དང།་ཆུ་གྲི་ཕྱག་ན་བསྣམས་པ། ཁྲོ་བོ་ཆེན་པོ་ཧཱུཾ་མཛད་ལས་ཕྱུང་སྟེ། བཅོམ་ལྡན་འདས་ཕྱག་ན་རྡོ་རྗེའི་དང་པོའི་དཀྱིལ་འཁོར་གྱི་ཚུལ་གྱིས་བཞུགས་སོ། །ལྷ་ 112a ༄#། །ལ་སོགས་པ་དེ་རྣམས་ཀྱང་རང་གི་དཀྱིལ་འཁོར་གྱི་བྱིན་གྱིས་བརླབས་ནས་ཕྱིའི་དཀྱིལ་འཁོར་དུ་བཞག་གོ་།གདོན་ལ་སོགས་པ་དེ་དག་ཀྱང་དཀྱིལ་འཁོར་གྱི་ཕྱི་རིམ་ན་གནས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཐུགས་རྗེ་ཆེན་པོའི་ཐབས་ཀྱི་ཁྲོ་བོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་བར་ཞུགས་ནས་ཁམས་གསུམ་པོ་མཐའ་དག་ལས་རྣམ་པར་རྒྱལ་བ་རྡོ་རྗེའི་བྱིན་གྱིས་བརླབས་པ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་ཡང་དག་བཤད་བྱ་བ། །རྡོ་རྗེའི་དཀྱིལ་འཁོར་དམ་པ་སྟེ། །ཁམས་གསུམ་རྣམ་རྒྱལ་ཞེས་བྱ་བ། །འདུལ་བ་ཆེན་པོ་འདུལ་བྱེད་པའོ། །དཀྱིལ་འཁོར་དང་པོའི་སྦྱོར་བ་ཡིས། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་གི་འཁོར་ལོ་ནི། །དཀྱིལ་འཁོར་བརྒྱད་པ་དག་དང་མཚུངས། །དེ་ཡི་དབུས་སུ་ཁྲོ་བོ་ཆེ། །ཕྱག་ན་རྡོ་རྗེ་གཞག་པར་བྱ། །སངས་རྒྱས་ཕྲེང་ལ་སོགས་པས་སྤྲས། །ུཏྤལ་སྔོན་པོའི་མདོག་འདྲ་བ། །ཞལ་ནི་ཅུང་ཟད་མཆེ་བ་གཙིགས། །ཁྲོ་བཅས་བཞད་པའི་ཞལ་མངའ་བ། །གཡོན་བརྐྱང་བ་ཡིས་ལེགས་བཞུགས་པ། །རྡོ་རྗེ་ཧཱུཾ་མཛད་བསྡུས་པས་སོ། །གཡོན་གྱི་ཞབས་ཀྱིས་ལེགས་གནོན་པ། །དེ་ཡི་བྱ་བ་དབང་ཕྱུག་ཆེ། ། 112b གཡས་ནི་དཀའ་ཐུབ་ཟློག་མ་ཡི། །ནུ་མའི་སྟེང་དུ་རབ་ཏུ་འཇོག་།འབར་ཕྲེང་འཁྲིགས་པའི་འོད་ལྡན་པ། །ས་སོགས་བཅས་པའི་ཁམས་རྣམས་ཀྱིས། །ཁྲོ་བོ་ཀུན་ཏུ་གཞག་པར་བྱ། །འབར་ཕྲེང་འཁྲིགས་པའི་འོད་ལྡན་པའི། །འཁོར་ལོ་དེ་ཡང་མཁས་པ་ཡིས། །འབར་ཕྲེང་འཁྲིགས་པའི་འོད་ཅན་བྲི། །ཕྱི་ཡི་དཀྱིལ་འཁོར་གནས་རྣམས་སུ། ། ཕྱི་ཡི་དཀྱིལ་འཁོར་ཚོགས་རྣམས་སོ། །ཁྲོ་བོའི་མཚན་མ་བཞི་བོ་ནི། །གཞུ་དང་མདའ་དང་རལ་གྲི་དང ། །འཁོར་ལོ་དེ་བཞིན་རྩེ་གསུམ་བསྒྲེང ། །སྒོ་རྣམས་ཀུན་ཏུ་བྲི་བར་བྱ། །ཕྱི་རོལ་གནས་པའི་གདོན་རྣམས་ཀྱི། །སྣ་ཚོགས་གཏོར་མས་བཀང་བ་དང ། །བ་དན་སྔོན་པོ་དྲིལ་བཏགས་ཤིང ། །རྩེ་མོ་ཁ་དོག་སྣ་ཚོགས་པའོ། །དེ་ནས་འདིར་འཇུག་པ་ལ་ནི་ཡན་ལག་ཐམས་ཅད་རས་སྔོན་པོ་ཟུང་གིས་གཡོགས་ཤིང་ཁྲོས་པས་རྡོ་རྗེ་དམ་ཚིག་གི་ཕྱག་རྒྱ་དང་བཅས་པས་འཛིན་པར་གྱུར་པས་ཞུགས་ན། བཅོམ་ལྡན་འདས་ཀྱི་རྡོ་རྗེའི་རིགས་ཀྱི་སློབ་དཔོན་དུ་བྱིན་གྱིས་རློབ་པར་མཛད་དོ། །དེ་ནས་བརྩམས་ཏེ་སྡིག་པ་ལ་སོགས་པ་རྣམ་པར་གྲོལ་ཞིང་མི་སད་པ་དང ། མི་ཚུགས་པ་དང ། མུ་སྟེགས་ཐམས་ཅད་ལ་ཚར་གཅོད་པ་དང ། ཕན་འདོགས་ནུས་ཤིང་ཐམས་ཅད་ལས་རྒྱལ་བ་དང ། དངོས་གྲུབ་ཐམས་ཅད་འགྲུབ་ 113a ༄#། །པར་འགྱུར་རོ། །དེ་ནས་སློབ་མ་དེ་བཞིན་དུ་བཅུག་ལ་སྙིང་པོ་བྱིན་ཏེ་དཀྱིལ་འཁོར་ཐམས་ཅད་དུའང་བྱའོ། །དེ་ནས་རྡོ་རྗེ་རྣོན་པོ་རྩེ་བཞི་པ་འབར་བ་བྱིན་ལ་རྡོ་རྗེ་མིང་གི་དབང་བསྐུར་བས་དབང་བསྐུར་ནས་རྡོ་རྗེའི་བརྟུལ་ཞུགས་སྦྱིན་པར་བྱ་སྟེ། འདི་ནི་གདུག་པ་འདུལ་བྱེད་པའི། །ཕྱག་ན་རྡོ་རྗེའི་རྡོ་རྗེ་སྟེ། ། མ་རུངས་ཐམས་ཅད་འདུལ་བ་ལ། །ཁྱོད་ཀྱིས་ཀྱང་ནི་རྟག་ཏུ་བཅང ། །དེ་ནས་དེ་བཞིན་དུ་འགྱུར་བར་བྱའོ། །རྡོ་རྗེའི་དཀྱིལ་འཁོར་རོ། །དེ་ནས་སྒྲུབ་པ་ལ་ནི་རས་ལ་བཅོམ་ལྡན་འདས་ཁྲོ་བོའི་དབང་ཕྱུག་བྱས་ལ། རྡོ་རྗེའི་དཀྱིལ་འཁོར་གྱི་ཚོགས་ཀྱང་སེམས་དཔའ་ཆེན་པོ་ཐམས་ཅད་བྱའོ། །ཕྱོགས་ཐམས་ཅད་དུ་ནི་ལྷ་ལ་སོགས་པ་དང ། མ་མོ་རྣམས་བྲི་བར་བྱ་སྟེ། དེ་ནས་བསྒྲུབ་པ་ཆེན་པོ་ལ་ཡང་དེ་བཞིན་ཏེ། དེ་བཞིན་དུ་དངོས་གྲུབ་མཆོག་རྣམས་ལ་ནི་རས་ལ་བཅོམ་ལྡན་འདས་ཇི་ལྟ་བ་བཞིན་དུ་བྱས་ནས་དེའི་མདུན་དུ་ལག་པ་གཉིས་ཀྱིས་ཕྱག་རྒྱ་བཅིངས་ཏེ་བཟླས་བརྗོད་འབུམ་བྱའོ། །དེ་ནས་ཡི་གེ་ཧཱུཾ་ཙམ་གྱིས་འཇིག་རྟེན་དང ། འཇིག་རྟེན་ལས་འདས་པའི་ལས་ཐམས་ཅད་བྱེད་པར་འགྱུར་རོ། །མ་བསྒྲུབས་པར་ཡང་ལས་ཐམས་ཅད་དང ། དེ་བཞིན་དུ་ཐམས་ཅད་རྗེས་སུ་ཆགས་པར་བྱ་བ་དང ། 113b དགུག་པ་དང ། གཞུག་པ་དང ། བཅིང་བ་དང ། དགྲོལ་བ་དང ། དབང་དུ་བྱ་བ་དང ། ལྐུགས་པར་བྱ་བ་དང ། རེངས་པར་བྱ་བ་དང ། རྨོངས་པར་བྱ་བ་དང ། གཉིད་མེད་བར་བྱ་བ་དང ། རྒྱས་གདབ་པ་དང ། ལྟུང་བ་དང ། བརྡེག་པ་དང ། གསད་པ་དང ། གསོ་བར་བྱ་བ་ལ་སོགས་པའང་ལན་གཅིག་བཟླས་པས་བྱེད་པར་འགྱུར་རོ། །ཐམས་ཅད་གསད་པ་ལ་ནི་རྡོ་རྗེ་ཁྲོ་བོ་མཐར་བྱེད་ཀྱིས་སོ། །ཐམས་ཅད་རྒྱས་གདབ་པ་ལ་ནི་ཁྲོ་བོའི་ལྟ་བའི་བཟླས་པས་སོ། །ཐམས་ཅད་གཞིག་པ་ལ་ནི་རྡོ་རྗེ་ཁྲོས་པས་གཞིག་བར་བྱའོ། །ཐམས་ཅད་ངེས་པར་གནོན་པ་ལ་ནི་རྡོ་རྗེ་དང་ཁྲོས་པར་ཕྱོགས་དེར་བརྡེག་པར་བྱའོ། །གདོན་ཐམས་ཅད་དབུག་པ་ལ་ནི་རྡོ་རྗེ་ཕྲ་མོ་འབིགས་བྱེད་ཀྱིས་སོ། །ཐམས་ཅད་ཀྱི་སྙིང་འབྱིན་པ་ལ་ནི་ཁྲོས་པའི་ཡིད་ཀྱིས་དབྱུང་བར་བྱའོ། །གདུག་པ་ཐམས་ཅད་ཚད་གཅད་པ་ལ་ནི་ཁྲོས་པྶ་རྡོ་རྗེ་བསྐོར་བར་བྱའོ། །གདུག་ཅིང་ཁྲོས་པ་དོགས་པ་ལ་ནི། ། ཁྲོས་པས་ལྕགས་ཕྱེའི་སྦྱིན་སྲེག་གིས་སོ། །བདུད་ཐམས་ཅད་བརླག་པ་ལ་ནི་རང་གི་ས་བོན་གྱི་སྦྱིན་སྲེག་གིས་སོ། །གནོད་སྦྱིན་ཐམས་ཅད་བསྐྲད་པ་ལ་ནི་ཧ་ཧ་ཞེས་དགོད་ཅིང་བཟླས་པས་སོ། །ཀླུ་ཐམས་ཅད་གདོན་པ་ལ་ནི་རྡོ་རྗེ་ས་ལ་བརྡེགས་ཤིང་བཟླས་པས་སོ། །ལྷ་ཐམས་ཅད་ལྟུང་བར་བྱ་བ་ལ་ནི། ལྷ་མོ་རྡོ་རྗེ་ལྟུང་བྱེད་ཀྱིས་སོ། །ལྷའི་བདག་པོ་ཐམས་ 114a ༄#། །ཅད་དབང་དུ་བྱ་བ་དང ། གདུལ་བ་དང ། བསྣུན་པ་དང ། གསོད་པ་དང ། གདུལ་བར་བྱ་བ་ལ་ནི་རྡོ་རྗེ་སྲིད་པ་གསུམ་པོ་གདུལ་བར་བྱེད་པས་སོ། །རྣམ་ཐོས་སྲས་རྗེས་སུ་འབྲང་བར་བྱ་བ་ལ་ནི་རྣམ་ཐོས་སྲས་མནན་ནས་ཁྲོས་པས་བཟླས་བརྗོད་བྱའོ། །ལུས་ངན་པོ་མནན་ནས་དཔལ་དབྲོག་པར་བྱ་བ་ལ་ནི་རྡོ་རྗེ་སྐྱེས་བུས་སོ། །འདོད་པའི་ལྷ་དབང་དུ་བྱ་བ་ལ་ནི་འདོད་པའི་ལྷའི་མདུན་དུ་ཁྲོས་པས་བཟླས་བརྗོད་བྱའོ། །ཚངས་པ་ལྟུང་བར་བྱ་བ་ལ་ནི་རྡོ་རྗེ་རབ་ཏུ་དགའ་བའི་ཕྱག་རྒྱས་སོ། །ཁྱབ་འཇུག་གཞིག་པ་ལ་ནི་རྡོ་རྗེ་འཁོར་ལོ་དྲལ་བས་སོ། །དབང་ཕྱུག་ཆེན་པོ་འདུལ་བར་བྱ་བ་ལ་ནི་རྡོ་རྗེ་ཏྲི་ཤཱུ་དྲལ་བས་སོ། །མ་མོ་ཐམས་ཅད་གསད་པ་ལ་ནི་རྡོ་རྗེ་ཁྲོ་བོའི་ཚོགས་ཀྱི་སྲིན་མོས་སོ། །ཕྱིའི་དཀྱིལ་འཁོར་ཐམས་ཅད་ཀྱི་ཕྱག་རྒྱ་དང ། དམ་ཚིག་དང ། ཆོས་དང ། གསང་བའི་དངོས་གྲུབ་རྣམ་པར་གཏོར་ཞིང་རྣམ་པར་གཞིག་པ་ལ་ནི་རྡོ་རྗེ་ཁྲོ་བོའི་གདུག་པའི་དམ་ཚིག་འཇིགས་པར་བྱེད་པས་སོ། །རི་དང ། ཤིང་དང ། ཁྱིམ་དང ། གཙུག་ལག་ཁང་དང ། གྲོང་ཁྱེར་དང ། མཆོད་རྟེན་དང ། ལྷའི་ཁང་པ་དང ། སྐྱེས་པ་དང ། བུད་མེད་དང ། གླང་པོ་དང་བཅས་པའི་རྟ་ལ་སོགས་པ་ཐམས་ཅད་གཞོམ་པ་ 114b ལ་ནི་རྡོ་རྗེ་ཁྲོ་བའི་ལྷ་བས་མིག་ལ་རེག་པས་སོ། །ལྟུང་བ་ཐམས་ཅད་བསླང་བ་ལ་ནི་རྡོ་རྗེ་ཁྲོ་བོ་བསླང་བས་སོ། །ཐམས་ཅད་སྤོ་བ་ལ་ནི་རྡོ་རྗེ་ཁྲོས་པའི་རྣལ་འབྱོར་མས་སོ། །ཐམས་ཅད་དབྲོག་པ་ལ་ནི་རྡོ་རྗེ་ཁྲོ་བོའི་ཁུ་ཚུར་དང ། དབྲོག་པས་སོ། །འཇིགས་པ་ཐམས་ཅད་བསྐྱེད་པ་ལ་ནི་རྡོ་རྗེ་ཁྲོ་བོའི་ལྟ་བས་སོ། །དཔུང་ཐམས་ཅད་བསད་པ་ལ་ནི་རྡོ་རྗེ་ཁྲོ་བོའི་གནོད་སྦྱིན་མོས་སོ། །གཞན་གྱི་དཔུང་ཐམས་ཅད་གཞོམ་པ་དང ། གནོན་པ་དང ། རྨོངས་པར་བྱ་བ་དང ། ལོང་བར་བྱ་བ་དང ། རྒྱས་གདབ་པ་དང།་བསད་པ་ལ་ནི་རྡོ་རྗེ་ཁྲོ་བོ་མ་རུངས་པའི་སྲིན་མོས་སོ། །རྒྱལ་པོ་ལ་སོགས་པ་མི་ཆེན་པོ་ཐམས་ཅད་གསད་པ་ལ་ནི་དོང་ཀའི་ཤིང་ལ་རང་གི་ཁྲག་གིས་སྦྱིན་སྲེག་བྱས་པས་སོ། །ལྷ་ཐམས་ཅད་རྣམ་པར་གཞིག་པ་ལ་ནི་ལྷ་ཐམས་ཅད་ཀྱི་གཟུགས་བརྙན་ཕུར་བུས་གདབ་པས་སོ། །ལྷའི་བདག་པོ་ཐམས་ཅད་བསྲེག་པ་ལ་ནི་ལྷ་ཐམས་ཅད་ཀྱི་གཟུགས་བརྙན་གྱི་ཡམ་ཤིང་གིས་སོ། །རང་གི་ཁྲག་གི་རྒྱུན་འབབ་པས་ས་ཐམས་ཅད་ནུབ་པར་བྱ་བ་ལ་ནི་རྡོ་རྗེ་འཁྲོ་བོ་ས་འོག་གི་ཕྱག་རྒྱས་སོ། །ཁམས་གསུམ་ཐམས་ཅད་གསད་པ་ལ་ནི་རྡོ་རྗེ་འཇིག་པའི་ཕྱག་རྒྱས་སོ། །འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བ་ལ་ནི་འཇིག་རྟེན་གསུམ་ལས་རྣམ་པར་ 115a ༄#། །རྒྱལ་བའི་མཆོག་གི་རྡོ་རྗེའི་ཁྲོ་བོས་སོ། །ཁམས་གསུམ་ཐམས་ཅད་དབབ་པ་དང ། དགུག་པ་དང ། གཞུག་པ་དང ། དབང་དུ་བྱ་བ་དང ། ངེས་པར་གནོན་པ་ལ་ནི་རྡོ་རྗེ་སེམས་དཔའི་ཁྲོ་བོའི་ཕྱག་རྒྱས་སོ། །ཁམས་གསུམ་པོ་ཐམས་ཅད་རྗེས་སུ་ཆགས་པར་བྱ་བ་དང ། དགུག་པ་དང ། གཞུག་པ་དང ། བཅིང་པ་དང ། རྒྱས་གདབ་པ་དང ། དབང་དུ་བྱ་བ་དང ། གནོན་པར་བྱ་བ་དང ། བསྒྲུབ་པ་ལ་ནི་བདེ་བ་ཆེན་པོའི་རྡོ་རྗེ་ཁྲོ་བོ་རྡོ་རྗེའི་དམ་ཚིག་གི་ཁྲོ་བོས་སོ། ། བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཁམས་གསུམ་རྣམ་པར་རྒྱལ་བའི་རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །འཇིག་རྟེན་གསུམ་རྒྱལ་གྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ངོ་བོ་ཉིད་དག་པའི་ཆོས་ཉིད་ཐོབ་པས་ཡང་ཆོས་ཐམས་ཅད་ཀྱི་མཉམ་པ་ཉིད་སྤྱན་རས་གཟིགས་དབང་ཕྱུག་གི་ཡེ་ཤེས་ཀྱི་ཕྱག་རྒྱ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་ཏེ། འདོད་ཆགས་ཐམས་ཅད་རྣམ་པར་དག་པ་ཉིད་ཀྱིས་ཀྱང་འཇིག་རྟེན་ན་ཞེ་སྡང་ཐམས་ཅད་རྣམ་པར་དག་པར་འགྱུར་རོ། །དྲི་མ་ཐམས་ཅད་རྣམ་པར་དག་པ་ཉིད་ཀྱིས་ 115b འཇིག་རྟེན་ན་སྡིག་པ་ཐམས་ཅད་རྣམ་པར་དག་པར་འགྱུར་རོ། །ཆོས་ཐམས་ཅད་རྣམ་པར་དག་པས་འཇིག་རྟེན་ནས་སེམས་ཅན་ཐམས་ཅད་རྣམ་པར་དག་པར་འགྱུར་རོ། ། ཤེས་པ་ཐམས་ཅད་རྣམ་པར་དག་པས་འཇིག་རྟེན་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་འགྱུར་རོ། །ལག་ན་རྡོ་རྗེ། གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང ། འཛིན་པ་དང ། ཀློག་པ་དང ། སྒོམ་པ་དེ་འདོད་ཆགས་དང ། དྲི་མ་ཐམས་ཅད་ཀྱི་ནང་ན་འདུག་ཀྱང་པདྨོ་ལྟ་བུར་འདོད་ཆགས་ཀྱི་ཉེས་པ་རྣམས་དང ། དྲི་མ་རྣམས་དང ། གློ་བུར་གྱི་ཉོན་མོངས་པ་རྣམས་ཀྱིས་གོས་པར་མི་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དོན་གྱི་གནས་འདི་ཉིད་ཡང་རྒྱ་ཆེར་སྟོན་ཅིང་བཞིན་རབ་ཏུ་འཛུམ་དམུལ་ཏེ། པདྨའི་འདབ་མ་ཁ་འབྱེད་པས་འདོད་ཆགས་ལ་སོགས་པའི་དྲི་མས་མི་གོས་པ་ལ་བལྟ་ཞིང་འགྲོ་བ་ཐམས་ཅད་ཀྱི་ཕྱིར་པདྨའི་གཟུགས་སྣ་ཚོགས་ཞེས་བྱ་བའི་སྙིང་པོ་འདི་གསུངས་སོ། །ཧྲཱིཿ ། དེ་ནས་འདི་གསུངས་པ་ཙམ་གྱིས་པདྨ་ཆེན་པོ་ལས་དེ་བཞིན་གཤེགས་པ་ལ་སོགས་པའི་གཟུགས་བརྙན་ཐམ་ 116a ༄#། །ཅད་བཅོམ་ལྡན་འདས་དང་འདྲ་བའི་པདྨས་མཚན་པའི་གཟུགས་ཅན་ངེས་པར་ཕྱུང་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་རིམ་པ་དང་པོའི་དཀྱིལ་འཁོར་གྱི་ཚུལ་དུ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་ཆོས་ཐམས་ཅད་ལ་གཟིགས་པའི་ཡེ་ཤེས་ཀྱི་དབང་ཕྱུག་གི་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འགྲོ་བ་ཐམས་ཅད་འདུལ་བ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །ཕྱིའི་དཀྱིལ་འཁོར་ཅི་ལྟ་བའི་ནང་དུ་གཉིས་པ་ནི་ཟུར་བཞི་པ་ལ་དེ་བཞིན་དུ་སྒོ་དང ། མཚམས་སུ་བཅས་པར་བྲིའོ། །དེ་ནས་དཀྱིལ་འཁོར་བརྒྱད་པའི་ཚུལ་དུ་ཐིག་བཞིས་ཐིག་བཏབ་པ་ལ་ཚོན་དམར་པོས་པདྨ་འདབ་མ་བརྒྱད་པ་བྲི་བར་བྱའོ། །དེའི་དབུས་སུ་བཅོམ་ལྡན་འདས་དགོང་པར་བྱའོ། །དེའི་མདུན་དུ་བཅོམ་ལྡན་འདས་པདྨ་ཆེན་པོ་ཆགས་པ་སྐུ་མདོག་དམར་པོ་པདྨའི་གཟུགས་འཛིན་པ། པདྨ་ཆེན་པོ་དང ། མདའ་དང ། གཞུ་བསྣམས་པ། གཡས་སུ་བཅོམ་ལྡན་འདས་པདྨ་ཆེན་པོའི་གཏུམ་པོ་དབང་ཕྱུག་དབང་ཕྱུག་ཆེན་པོའི་གཟུགས་འཛིན་པ་གཞག་པར་བྱའོ། །རྒྱབ་ཏུ་པདྨ་ཆེན་པོ་ཁྱབ་འཇུག་གི་གཟུགས་འཛིན་པ་སྐུ་མདོག་ 116b ནག་པོ་གཞག་པར་བྱའོ། །གཡོན་དུ་པདྨ་ཆེན་པོ་མི་མཇེད་ཀྱི་བདག་པོ་ཚངས་པའི་གཟུགས་འཛིན་པ་སྐུ་མདོག་དཀར་པོ་བཞག་པར་བྱའོ། །གཡས་ཀྱི་མཚམས་སུ་པདྨ་ཆེན་པོ་ས་འཛིན་པ་གཞག་པར་བྱའོ། །མཚམས་གཉིས་པར་པདྨ་ཆེན་པོ་རྒྱ་མཚོ་ཆུ་ལྷའི་གཟུགས་འཛིན་པ་གཞག་པར་བྱའོ། །གསུམ་པར་པདྨ་ཆེན་པོ་ཉི་མའི་གཟུགས་ཅན་གཞག་པར་བྱའོ། །བཞི་པར་པདྨ་ཆེན་པོ་རླུང་གི་གཟུགས་འཛིན་པ་གཞག་པར་བྱའོ། །ཕྱིའི་དཀྱིལ་འཁོར་གྱི་མཚམས་རྣམས་སུ་ཤྲཱི་ཧཱི་གཱི་དྷཱི་ལྷ་མོ་བཞི་གཞག་པར་བྱ་སྟེ། ཐམས་ཅད་ཀྱང་གཡས་ན་རང་གི་མཚན་མ་འཛིན་པ། གཡོན་པ་པདྨ་འཛིན་པར་བྱའོ། །སྒོ་རྣམས་སུ་ནི་འདོད་ཆགས་དང ། ཞེ་སྡང་དང ། གཏི་མུག་དང ། མྱ་ངན་ལས་འདས་པའི་མཚན་མ་རྣམས་གཞག་པར་བྱ་སྟེ། འདི་ལྟ་སྟེ། བུད་མེད་ཀྱི་གཟུགས་དང ། སྦྲུལ་གྱི་གཟུགས་དང ། ཕག་གི་གཟུགས་དང ། པདྨའི་གཟུགས་ཞེས་བྱའོ། ། དེ་ནས་གོས་དཀར་པོ་བགོས་ཏེ། གོས་དཀར་པོས་གདོང་གཡོགས་ལ་པདྨ་ཆེན་པོའི་ཕྱག་རྒྱ་ཆེན་པོ་མེ་ཏོག་དང་བཅས་པར་བཅིངས་ཏེ་ཞུགས་ལ་མེ་ཏོག་དོར་བར་བྱ་སྟེ། གང་དུ་བབས་པ་དེ་དེས་བསྒྲུབ་པར་བྱའོ། །དེ་ནས་པདྨ་བླངས་ལ་པད་མའི་མིང་གིས་དབང་བསྐུར་བས་དབང་བསྐུར་ལ་འདི་སྐད་ཅེས་བརྗོད་པར་བྱ་ཞིང་པདྨའི་འདབ་ 117a ༄#། །མ་ལ་བལྟ་བར་བྱ་སྟེ། ཅི་ལྟར་པདྨ་དམར་པོ་འདི། །ཚོན་གྱིས་ཉེས་པས་མི་གོས་ཏེ། །འདམ་གྱི་ནང་ན་དག་པ་ལྟར། །འདོད་ཆགས་ཞེ་སྡང་སོགས་དེ་བཞིན། །དེ་ལྟར་ཆོས་རྣམས་བསྒོམས་ན་ནི། །བློ་ལྡན་ཉོན་མོངས་བཅས་གྱུར་ཀྱང ། །ཉོན་མོངས་ཀུན་ལས་རྣམ་གྲོལ་ནས། །མྱུར་དུ་སངས་རྒྱས་ཉིད་འཐོབ་འགྱུར། །ཞེས་བྱ་བའི་ཏིང་ངེ་འཛིན་འདི་ལ་གཟིགས་པས་དེ་བཞིན་གཤེགས་པ་ཐམས་ཀྱི་དབང་ཕྱུག་ཉིད་ཐོབ་པར་འགྱུར་ཏེ། དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་ཅེས་མཚན་བཏགས་སོ། །དེ་ནས་བརྩམས་ཏེ་བདག་ཉིད་ཀྱི་དངོས་པོ་ཐམས་ཅད་ཤིན་ཏུ་ཡོངས་སུ་དག་པ་དང ། བཀྲ་ཤིས་ཤིང་དངོས་གྲུབ་ཐམས་ཅད་བྱང་ཆུབ་ཀྱི་སྙིང་པོའི་བར་དུ་རྗེས་སུ་མྱོང་བར་འགྱུར་ཞིང་མྱུར་དུ་སངས་རྒྱས་ཉིད་འཐོབ་པར་འགྱུར་ཏེ། སློབ་མ་གཞུག་པའི་ཆོ་ག་རྒྱས་པ་ཡང་དེ་བཞིན་ནོ། །ཡེ་ཤེས་ཀྱི་དཀྱིལ་འཁོར་རོ། །བསྒྲུབ་པ་ལ་ནི་དེ་བཞིན་དུ་རས་ཀྱི་རི་མོ་གཉིས་ཀྱིས་དངོས་གྲུབ་ཐམས་ཅད་འཐོབ་པར་འགྱུར་རོ། །དེ་ནས་མ་བསྒྲུབས་ཀྱང་ཐམས་ཅད་རྗེས་སུ་ཆགས་པར་བྱ་བ་ལ་ནི་པདྨ་ལ་ལན་སྟོང་བཟླས་ཏེ་སྦྱིན་པར་བྱའོ། །ཐམས་ཅད་གསད་པ་ལ་ནི་པདྨ་ཆེན་པོའི་ཁྲོ་བོའི་ཕྱག་རྒྱས་སོ། །ཐམས་ 117b ཅད་རྨོངས་པར་བྱ་བ་ལ་ནི་པདྨ་ཆེན་པོ་ཕག་གིས་སོ། །ཉོན་མོངས་པ་ཐམས་ཅད་རྣམ་པར་དག་པར་བྱ་བ་ལ་ནི་པདྨ་ཆེན་པོ་རྣམ་པར་གཟིགས་པའི་ཏིང་ངེ་འཛིན་གྱི་ཕྱག་རྒྱས་སོ། །ས་ཐམས་ཅད་ཀྱི་བདག་པོ་ཉིད་དུ་བྱ་བ་ལ་ནི་ས་ལ་སྐྱིལ་མོ་ཀྲུང་བཅས་པས་བཟླས་བརྗོད་འབུམ་བྱས་ནས་མཐར་མཚན་མོ་ཐོག་ཐག་བཟླས་བརྗོད་བྱའོ། །ཆུ་ཐམས་ཅད་དབབ་པ་ལ་ནི་ཀླུ་བྲིས་ནས་དེའི་སྟེང་དུ་འདུག་ནས་བཟླས་བརྗོད་འབུམ་བྱའོ། །ཐམས་ཅད་སྣང་བར་བྱ་བ་ལ་ནི་མུན་པར་ཉི་མ་ཆེན་པོའི་འོད་ཀྱིས་སོ། །རླུང་ཐམས་ཅད་དགུག་པ་དང ། གཞུག་པ་དང ། བཅིང་བ་དང ། དབང་དུ་བྱ་བ་ལ་ནི་པདྨ་ཆེན་པོ་རླུང་གི་མཆོག་གིས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཉོན་མོངས་པ་ཐམས་ཅད་རྣམ་པར་དག་པའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །འགྲོ་བ་འདུལ་བའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཁམས་གསུམ་ཐམས་ཅད་ཀྱི་དབང་པོས། ཡང་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ལས་བྱུང་བ་ཡེ་ཤེས་ཀྱི་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དེ། དབང་བསྐུར་བ་སྦྱིན་པ་ནི་ཁམས་གསུམ་ཐམས་ཅད་ཀྱི་རྒྱལ་སྲིད་ཐོབ་པར་འགྱུར་རོ། །ནོར་ 118a ༄#། །སྦྱིན་པ་ནི་རེ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཆོས་སྦྱིན་པ་ནི་ཆོས་ཐམས་ཅད་ཀྱི་མཉམ་པ་ཉིད་འཐོབ་པར་འགྱུར་རོ། །ཟང་ཟིང་སྦྱིན་པ་ནི་ལུས་དང ། ངག་དང ། སེམས་ཀྱི་བདེ་བ་ཐམས་ཅད་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་བཞིན་རབ་ཏུ་འཛུམ་པ་དང་བཅས་ཏེ། རང་གི་མགོ་ལ་རྡོ་རྗེ་རིན་པོ་ཆེས་དབང་བསྐུར་བའི་ཕྲེང་བ་འཆིང་ཞིང་དོན་ཡོད་པ་འདི་ཉིད་རྒྱ་ཆེར་སྟོན་ཏེ། དབང་བསྐུར་བ་ཐམས་ཅད་ཀྱི་དམ་ཚིག་རིན་པོ་ཆེ་ཞེས་བྱ་བའི་སྙིང་པོ་འདི་སྨྲས་སོ། །ཏྲཱཾ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་ཀྱི་རིན་པོ་ཆེ་དེ་ལ་ཐམས་ཅད་དབང་བསྐུར་བ་ལ་སོགས་པ་ཡོ་བྱད་དང་གཏེར་ཐམས་ཅད་བྱུང་སྟེ། བཅོམ་ལྡན་འདས་དང་པོའི་དཀྱིལ་འཁོར་གྱི་ཚུལ་གྱིས་བྱང་ཆུབ་སེམས་དཔའི་གཟུགས་ཉིད་ཀྱིས་བཞུགས་སོ། །དེ་ནས་བཅོམ་ལྡན་འདས་ནམ་མཁའི་སྙིང་པོ་དབང་བསྐུར་བ་ཐམས་ཅད་ཀྱི་རིན་པོ་ཆེ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ནོར་བུ་རིན་པོ་ཆེའི་དམ་ཚིག་ཅེས་བྱ་བའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ནི་དང་པོའི་ 118b དཀྱིལ་འཁོར་གྱི་ཚུལ་དུ་བྱས་པའི་ནང་དུ་རིན་པོ་ཆེ་ཟུར་བརྒྱད་པ། རིན་པོ་ཆེའི་ཀ་བ་བརྒྱད་ལ་གནས་པ། དཀྱིལ་འཁོར་བརྒྱད་པའི་ཚུལ་ལས་རིན་པོ་ཆེའི་ལྕུགས་མས་ཡོངས་སུ་བསྐོར་བ། རྡོ་རྗེ་རིན་པོ་ཆེའི་ར་བ་དང ། ལྕོག་དང ། མེ་ཏོག་གི་ཕྲེང ། བ་དན་དང ། གདུགས་དང ། རྔ་ཡབ་ཀྱིས་ཉེ་བར་མཛེས་པ་བྲི་བར་བྱའོ། ། དེའི་དབུས་སུ་བཅོམ་ལྡན་འདས་རྟའི་ཁྲི་ལ་བཞུགས་པ་དབང་བསྐུར་བའི་ཕྲེང་བ་རང་ཉིད་འཆིང་བར་མཛད་ཅིང་ཞལ་རྣམ་པར་བཞད་པ་མྲྒད་ཀྱི་མདོག་ཅན་གཞག་པར་བྱའོ། །དེའི་མདུན་དུ་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རིན་པོ་ཆེ་ཞེས་བྱ་བ་རྡོ་རྗེ་རིན་པོ་ཆེའི་ཅོད་པན་འཛིན་པ་གཞག་པར་བྱའོ། །གཡས་སུ་རིན་པོ་ཆེ་ཆེན་པོའི་ནོར་སྦྱིན་པ་དབྱིག་གི་གཏེར་འཛིན་པ་གཞག་པར་བྱའོ། །རྒྱབ་ཏུ་ཆོས་ཆེན་པོ་རིན་པོ་ཆེའི་གླེགས་བམ་འཛིན་པ་གཞག་པར་བྱའོ། །གཡོན་དུ་རིན་པོ་ཆེ་ཆེན་པོ་རོ་མྱོང་བ་ཟས་དང་སྐོམ་ཐམས་ཅད་འཛིན་པ་གཞག་པར་བྱའོ། །མཚམས་རྣམས་སུ་མཆོད་པའི་ལྷ་མོ་རྣམས་རིན་པོ་ཆེའི་གདུགས་དང ། རྒྱལ་མཚན་དང ། རྔ་དང ། སྲོག་ཤིང་རྣམས། འཛིན་པ་གཞག་པར་བྱའོ། །ཕྱི་རོལ་གྱི་མཚམས་སུ་བུམ་པ་གང་བ་རྣམས་སོ། །སྒོ་རྣམས་སུ་ནི་དབང་ 119a ༄#། །བསྐུར་བ་ལ་སོགས་པའི་མཚན་མ་རྣམས་གཞག་པར་བྱའོ། །ཕྱི་རོལ་དུ་ནི་གདུགས་དང ། རྒྱལ་མཚན་དང ། བ་དན་དང ། བླ་རེ་རྣམས་ཀྱིས་ཀུན་ཏུ་ཁྱབ་པར་བྱའོ། །དེ་ནས་དེ་བཞིན་དུ་རྡོ་རྗེ་རིན་ཆེན་གྱི་ཕྱག་རྒྱ་འཛིན་པས་ཞུགས་ནས། དེ་ནས་བརྩམས་ཏེ་ནོར་ཐམས་ཅད་འགྲུབ་པ་ལ་སོགས་པའི་དངོས་གྲུབ་ཐམས་ཅད་འཐོབ་པར་འགྱུར་རོ། །དེ་ནས་ཞུགས་ནས་ཀྱང་དབང་བསྐུར་བའི་ཕྲེང་བ་བཅིངས་ཏེ་རིན་པོ་ཆེ་བླངས་ནས་རིན་པོ་ཆེའི་མིང་གི་དབང་བསྐུར་བས་དབང་བསྐུར་ལ་སྦྱིན་པ་ཐམས་ཅད་ཕུལ་ནས་སླར་དབྱུང་བར་བྱའོ། །སློབ་མ་གཞུག་པའི་ཆོ་ག་རྒྱས་པ་ཡང་དེ་བཞིན་ནོ། །རྡོ་རྗེ་རིན་པོ་ཆེའི་དཀྱིལ་འཁོར་རོ། །སྒྲུབ་པ་དང་དངོས་གྲུབ་རྣམས་ཀྱང་དེ་བཞིན་ནོ། །དེ་ནས་མ་བསྒྲུབས་པར་དབང་བསྐུར་བ་ཐམས་ཅད་ཐོབ་པ་ལ་ནི་རྡོ་རྗེ་རིན་པོ་ཆེའི་དབང་བསྐུར་བའི་ཕྲེང་བས་སོ། །བསམ་པ་ཐམས་ཅད་ཡོངས་སུ་རྫོགས་པ་ལ་ནི་ཉིན་རེ་ཞིང་ཉི་མ་འཆར་ཀར་བཟླས་བརྗོད་དཔག་ཏུ་མེད་པ་བྱས་པས་སོ། །ཆོས་ཐམས་ཅད་ཀྱི་དོན་ཤེས་པ་ལ་ནི་དྲི་མ་མེད་པའི་ནམ་མཁའ་ལ་བལྟ་ཞིང་བཟླས་བརྗོད་བྱའོ། །ཟས་དང ། སྐོམ་ཐམས་ཅད་ལ་སོགས་པ་དང ། རོ་ཐམས་ཅད་ཐོབ་པར་བྱ་ 119b བ་ལ་ནི་ནམ་མཁའ་ལས་ཡིད་ལ་འདོད་པ་བཞིན་དུ་ཉིན་རེ་ཞིང་བཅོམ་ལྡན་འདས་ཀྱི་བཟླས་བརྗོད་སྟོང་བྱས་པས་སོ། །ཤིན་ཏུ་མཐོན་པོ་ཐོབ་ཕར་བྱ་བ་ལ་ནི་གདུགས་བཟུང་ནས་བཟླས་བརྗོད་འབུམ་བྱའོ། །རྣམ་པར་རྒྱལ་བ་ཆེན་པོ་ཐོབ་པ་ལ་ནི་རིན་ཆེན་རྒྱལ་མཚན་མཆོག་གིས་སོ། །གྲགས་པ་དང ། སྙན་པ་ཆེན་པོ་དང ། མིང་ཐོབ་པར་བྱ་བ་ལ་ནི་ཉིན་རེ་ཞིང་ཁ་ཐམས་ཅད་དུ་བལྟས་ནས་བཟླས་བརྗོད་བྱའོ། །བདག་པོ་ཆེན་པོ་ཐོབ་པ་ལ་ནི་རིན་པོ་ཆེའི་སྲོག་ཤིང་གི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། དབང་བསྐུར་བ་ཐམས་ཅད་ཀྱི་རིན་པོ་ཆེའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །རིན་པོ་ཆེའི་རིགས་ཀྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཕྱག་རྒྱ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་འཛིན་པ། དེ་བཞིན་གཤེགས་པ་རྟག་པས་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་བྱིན་གྱིས་རློབ་པ་རྡོ་རྗེ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་ཡོངས་སུ་འཛིན་པ་ནི་དེ་བཞིན་གཤེགས་པ་ཐམས་ཅད་ཉིད་དུ་ 120a ༄#། །འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསུང་གི་ཕྱག་རྒྱ་ཡོངས་སུ་འཛིན་པ་ནི་ཆོས་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཕྱག་རྒྱ་ཡོངས་སུ་འཛིན་པ་ནི་ཏིང་ངེ་འཛིན་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་ཡོངས་སུ་འཛིན་པ་ནི་ལུས་དང ། ངག་དང ། སེམས་ཐམས་ཅད་རྡོ་རྗེར་རྡོ་རྗེའི་དངོས་གྲུབ་དམ་པ་ཐོབ་པར་འགྱུར་རོ། །སུ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང ། འཆང་བ་དང ། ཀློག་པ་དང ། ལུང་འབོག་པ་དང ། སྒོམ་པ་དེས་དངོས་གྲུབ་ཐམས་ཅད་དང ། ཕུན་སུམ་ཚོགས་པ་ཐམས་ཅད་དང ། ཤེས་པ་ཐམས་ཅད་དང ། དགོས་པ་ཐམས་ཅད་དང ། ལུས་དང ། ངག་དང ། སེམས་ཐམས་ཅད་རྡོ་རྗེར་རྡོ་རྗེའི་དངོས་གྲུབ་དམ་པ་ཐོབ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཁུ་ཚུར་དམ་ཚིག་ཆེན་པོའི་རྡོ་རྗེའི་ཕྱག་རྒྱ་ཡོངས་སུ་འཛིན་པས་དོན་གྱི་གནས་འདི་རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་རྡོ་རྗེ་སྲ་བའི་ཕྱག་རྒྱ་ཐམས་ཅད་ཀྱི་དངོས་གྲུབ་ 120b ཀྱི་དམ་ཚིག་ཅེས་བྱ་བའི་སྙིང་པོ་འདི་གསུངས་སོ། །ཿ ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་སེམས་ཅན་ཐམས་ཅད་བཅོམ་ལྡན་འདས་རྡོ་རྗེ་སེམས་དཔས་ཕྱག་རྒྱ་ཐམས་ཅད་ཀྱིས་རྡོ་རྗེ་སེམས་དཔའ་ཉིད་དུ་དེ་བཞིན་གཤེགས་པ་ཐམས་ཅད་ལ་སོགས་པ་དངོས་གྲུབ་མཆོག་གི་རྒྱུས་རྒྱས་གདབ་བོ། །བཅོམ་ལྡན་འདས་རྡོ་རྗེ་ཁུ་ཚུར་གྱིས་ཀྱང་སྐུ་དང ། གསུང་དང ། ཐུགས་རྡོ་རྗེ་ཐམས་ཅད་ལས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ཀྱི་དམ་ཚིག་གི་སེམས་དཔའ་ཕྱུང་ནས་ཀྱང་དང་པོའི་དཀྱིལ་འཁོར་གྱི་ཚུལ་གྱིས་བཞུགས་པར་གྱུར་ཏོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེ་ཁུ་ཚུར་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྱག་རྒྱ་ཐམས་ཅད་ཀྱི་རྡོ་རྗེ་དམ་ཚིག་ཅེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །ཕྱིའི་དཀྱིལ་འཁོར་དང་པོའི་སྦྱོར་བས་བྲིས་ལ་ནང་དུ་རྡོ་རྗེའི་ཐིག་གི་འཁོར་ལོ་བྲིའོ། །དེ་བཞིན་དུ་དེའི་དབུས་སུ་དཀྱིལ་འཁོར་བརྒྱད་པར་ཐིག་བཏབ་ལ། དབུས་སུ་བཅོམ་ལྡན་འདས་རྡོ་རྗེ་ཁུ་ཚུར་ཕྱག་གཉིས་དམ་ཚིག་གི་ཕྱག་རྒྱ་བཅིངས་པ་ཞལ་རྣམ་པར་བཞད་པ་གཞག་པར་བྱའོ། །དེའི་མདུན་དུ་རྡོ་རྗེ་སྐུའི་མཆོག་ཅེས་བྱ་ 121a ༄#། །བ་རྡོ་རྗེ་བསྙེམས་པར་འཛིན་པའོ། །གཡས་སུ་རྡོ་རྗེ་ལྗགས་ཞེས་བྱ་བ་རྡོ་རྗེ་ལྕེའི་མཆོག་འཛིན་པའོ། །རྒྱབ་ཏུ་ཏིང་ངེ་འཛིན་རྡོ་རྗེ་ཞེས་བྱ་བ་རྡོ་རྗེ་འཛིན་པའོ། །གཡོན་དུ་རྡོ་རྗེ་རྡོ་རྗེ་ཞེས་བྱ་བ་བསྙེམས་པར་འཛིན་པའོ། །ཤར་ལྷོའི་མཚམས་སུ་ཕྱག་རྒྱའི་ཁུ་ཚུར་ཞེས་བྱ་བ་དང ། གཉིས་པ་ལ་ནི་ནོར་གྱི་ཁུ་ཚུར་ཞེས་བྱ་བ་དང ། གསུམ་པ་ལ་ནི་ཆོས་ཀྱི་ཁུ་ཚུར་ཞེས་བྱ་བ་དང ། བཞི་པ་ལ་ནི་ལས་ཀྱི་ཁུ་ཚུར་ཞེས་བྱ་བ་དང ། རང་གི་ཕྱག་རྒྱ་དང་ཕྱག་མཚན་ཡང་འཛིན་པར་བྱའོ། ། སྒོ་རྣམས་སུ་ནི་རྡོ་རྗེ་བསྙེམས་མ་ལ་སོགས་པའི་ཕྱག་རྒྱའི་ལྷ་མོ་རྣམས་བྲི་བར་བྱའོ། །དེ་ནས་དམ་ཚིག་གི་ཕྱག་རྒྱ་ཡོངས་སུ་བཟུང་ལ་རང་ཉིད་ཞུགས་ནས་ཕྱག་རྒྱ་ཐམས་ཅད་ཀྱི་སློབ་དཔོན་ཏུ་འགྱུར་རོ། །དེ་ནས་བརྩམས་ཏེ་དངོས་གྲུབ་ཐམས་ཅད་དོན་ཡོད་པས་འཐོབ་པར་འགྱུར་རོ། །ཕྱག་རྒྱ་ཐམས་ཅད་ཀྱི་ཡེ་ཤེས་ཀྱི་དབང་ཕྱུག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་བ་མྱུར་བར་མངོན་པར་རྫོགས་པར་འཚང་རྒྱ་བར་འགྱུར་རོ། །དེར་ཞུགས་ནས་ཕྱག་རྒྱ་བཅིངས་པ་བཅོམ་ལྡན་འདས་ལས་བསླབ་པ་བྱ་ཞིང་རྡོ་རྗེ་མིང་གི་དབང་བསྐུར་བས་དབང་བསྐུར་ལ་འདི་སྐད་ཅེས་བརྗོད་པར་བྱའོ། །སྐུ་གསུང་ཐུགས་ཀྱི་རྡོ་རྗེ་ཡི། །གཟུགས་བརྙན་ལྟ་བུར་ 121b སྦྱོར་བ་ཡིས། །ཕྱག་རྒྱ་ཀུན་ཞེས་བྱ་བར་བསྒྲགས། །དམ་ཚིག་དངོས་གྲུབ་ཀུན་སྟེར་བའོ། །སློབ་མ་གཞུག་པ་ཡང་དེ་བཞིན་ནོ། །ཕྱག་རྒྱ་ཐམས་ཅད་ཀྱི་དཀྱིལ་འཁོར་རོ། ། སྒྲུབ་པ་དང་དངོས་གྲུབ་རྣམས་ཀྱང་དེ་བཞིན་ནོ། །དེ་ནས་མ་བསྒྲུབས་པའི་ལས་རྣམས་ཀྱང་དེ་བཞིན། ཕྱག་རྒྱ་ཐམས་ཅད་བཅིང་བ་བསྒྲུབ་པ་ལ་ནི་སྙིང་གར་རྡོ་རྗེའི་ཁུ་ཚུར་གྱིས་སོ། །ཕྱག་རྒྱ་ཐམས་ཅད་བསྒྲུབ་པ་ལ་ནི་རྡོ་རྗེ་ཆེན་པོའི་ཁུ་ཚུར་གྱིས་སོ། །དམ་ཚིག་ཐམས་ཅད་བསྒྲུབ་པ་ལ་ནི་རྡོ་རྗེ་འདོད་པའི་ཁུ་ཚུར་གྱིས་སོ། །སེམས་ཅན་རྗེས་སུ་ཆགས་པར་བྱ་བ་ལ་ནི་རྡོ་རྗེ་ཆགས་པ་ཆེན་པོའི་ཁུ་ཚུར་གྱིས་སོ། །ཐམས་ཅད་དབང་དུ་བྱ་བ་ལ་ནི་རྡོ་རྗེ་བཞད་པའི་ཁུ་ཚུར་གྱིས་སོ། །ཐམས་ཅད་བཅིང་བ་ལ་ནི་རྡོ་རྗེ་བསྡམས་པའི་ཁུ་ཚུར་གྱིས་སོ། །ཐམས་ཅད་བསྡམ་པར་བྱ་བ་ལ་ནི་རྡོ་རྗེ་ལུ་གུ་རྒྱུད་ཀྱི་ཁུ་ཚུར་གྱིས་སོ། །ཐམས་ཅད་ལྐུགས་པར་བྱ་བ་ལ་ནི་རྡོ་རྗེ་ཞལ་ཞལ་གྱི་ཁུ་ཚུར་གྱིས་སོ། །ཐམས་ཅད་བཙིར་བ་ལ་ནི་རྡོ་རྗེ་བསྡམས་པའི་ཁུ་ཚུར་གྱིས་སོ། །ཐམས་ཅད་གསད་པ་ལ་ནི་རྡོ་རྗེ་ཁྲོ་བོའི་ཁུ་ཚུར་གྱིས་སོ། །ཐམས་ཅད་བཟའ་བ་ལ་ནི་རྡོ་རྗེ་གནོད་སྦྱིན་གྱི་ཁུ་ཚུར་གྱིས་སོ། །ཐམས་ཅད་གཞིག་པ་ལ་ནི་རྡོ་རྗེ་ངེས་པར་འཚིར་བའི་ཁུ་ཚུར་གྱིས་སོ། །ཐམས་ཅད་དྲལ་བ་ལ་ནི་རྡོ་རྗེ་དྲལ་བའི་ཁུ་ཚུར་གྱིས་སོ། །ཐམས་ 122a ༄#། །ཅད་དབབ་པ་ལ་ནི་རྡོ་རྗེ་འབེབས་པའི་ཁུ་ཚུར་གྱིས་སོ། །ཐམས་ཅད་གར་བྱེད་དུ་གཞུག་པ་ལ་ནི་རྡོ་རྗེ་གར་གྱི་ཁུ་ཚུར་གྱིས་སོ། །ཐམས་ཅད་སྨྲར་གཞུག་པ་ལ་ནི་རྡོ་རྗེ་བརྡུང་བའི་ཁུ་ཚུར་གྱིས་སོ། །ཐམས་ཅད་རེངས་པར་བྱ་བ་ལ་ནི་རྡོ་རྗེ་དམིགས་པའི་ཁུ་ཚུར་གྱིས་སོ། །གཞན་གྱི་དཔུང་ཐམས་ཅད་ལྐུགས་པ་དང ། འཕྱེ་བོར་བྱ་བ་ལ་ནི་རྡོ་རྗེ་ཆེན་པོ་འཕྱེ་བའི་ཁུ་ཚུར་གྱིས་སོ། །ཕྱག་རྒྱས་ཐམས་ཅད་དགྲོལ་བ་ལ་ནི་རྡོ་རྗེ་ཐར་པའི་ཁུ་ཚུར་གྱིས་སོ། །རྡོ་རྗེ་མཁའ་འགྲོ་མ་ཐམས་ཅད་ཀྱི་ཕྱག་རྒྱས་གཞིག་པ་ལ་ནི་རྡོ་རྗེ་ཧཱུཾ་མཛད་ཀྱི་རྡོ་རྗེ་ཁུ་ཚུར་གྱིས་སོ། །གདུག་པ་ཐམས་ཅད་ཀྱི་ཕྱག་རྒྱ་དབྱེ་བ་ལ་ནི་ཧཱུཾ་མཛད་ཀྱི་རྡོ་རྗེ་ཁུ་ཚུར་གྱིས་སོ། །ཕྱག་རྒྱ་ཐམས་ཅད་བཅིང་པ་ལ་ནི་རྡོ་རྗེ་ཁུ་ཚུར་གྱིས་སོ། །ཕྱག་རྒྱ་ཐམས་ཅད་རྡོ་རྗེར་བྱ་བ་ལ་ནི་རྡོ་རྗེ་ཁུ་ཚུར་གྱིས་སོ། །ཐམས་ཅད་རྒྱས་གདབ་པ་ལ་ནི་རྡོ་རྗེ་མ་མོའི་ཁུ་ཚུར་གྱིས་སོ། ། ཐམས་ཅད་ཕྱེ་མར་བྱ་བ་ལ་ནི་རྡོ་རྗེ་བཟང་པོའི་ཁུ་ཚུར་གྱིས་སོ། །ཐམས་ཅད་རྣམ་པར་གཞིག་པར་བྱ་བ་ལ་ནི་རྡོ་རྗེ་གདུག་པའི་ཁུ་ཚུར་གྱིས་སོ། །ཐམས་ཅད་གཞིག་པ་དང ། རྣམ་པར་གཞོམ་པ་ལ་ནི་དབང་པོའི་རྡོ་རྗེ་ཁུ་ཚུར་གྱིས་སོ། །ཆུའི་ནང་དུ་གནས་ཤིང་འཆགས་པ་ལ་ནི་རྡོ་རྗེ་གནོན་པོའི་ཁུ་ཚུར་གྱིས་སོ། །གཟུགས་མང་པོར་སྟོན་པ་ལ་ནི་ 122b རྡོ་རྗེ་སྣ་ཚོགས་པའི་རྡོ་རྗེའི་ཁུ་ཚུར་གྱིས་སོ། །མི་སྣང་བའི་དངོས་གྲུབ་ལ་ནི་མི་སྣང་བའི་རྡོ་རྗེ་ཁུ་ཚུར་གྱིས་སོ། །རྒྱུ་བ་དང་མི་རྒྱུ་བའི་དངོས་པོ་རྣམས་འབྱུང་བ་ལ་ནི་རྡོ་རྗེ་ནམ་མཁའི་ཁུ་ཚུར་གྱིས་སོ། །ནམ་མཁའ་ལ་འགྲོ་བའི་དངོས་གྲུབ་ལ་ནི་བསྡམས་པའི་ཁུ་ཚུར་གྱིས་སོ། །རིག་པ་འཛིན་པའི་དངོས་གྲུབ་ལ་ནི་རྡོ་རྗེ་རལ་གྲིའི་ཁུ་ཚུར་གྱིས་སོ། །དེ་བཞིན་གཤེགས་པ་ཐམས་ཅད་མཆོད་པའི་དངོས་གྲུབ་ལ་ནི་རྡོ་རྗེ་ལས་ཀྱི་ཁུ་ཚུར་གྱིས་སོ། །ཐམས་ཅད་མཁྱེན་པ་གྲུབ་པ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱིས་སོ། །ནོར་ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་ནོར་གྱི་ཁུ་ཚུར་གྱིས་སོ། །ཕྱག་རྒྱ་ཐམས་ཅད་ཀྱི་བདག་པོ་ཉིད་ལ་ནི་རྡོ་རྗེ་ཕྱག་རྒྱའི་ཁུ་ཚུར་གྱིས་སོ། །ལས་ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་ཐམས་ཅད་ཀྱི་ཁུ་ཚུར་གྱིས་སོ། །དཀྱིལ་འཁོར་ཐམས་ཅད་གྲུབ་པ་ལ་ནི་རྡོ་རྗེ་འཛིན་པའི་ཁུ་ཚུར་གྱིས་སོ། །རང་ཉིད་འདས་པ་དང ། མ་འོངས་པ་དང ། ད་ལྟར་གྱི་དངོས་གྲུབ་རྣམས་སྟོན་པ་ལ་ནི་རྡོ་རྗེ་ལྕགས་ཀྱུ་མཆོག་གི་ཁུ་ཚུར་གྱིས་སོ། །རྡོ་རྗེ་འཛིན་པ་ཉིད་ལ་ནི་རྡོ་རྗེ་བསྙེམས་པའི་ཁུ་ཚུར་གྱིས་སོ། ། སངས་རྒྱས་ཉིད་ལ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཁུ་ཚུར་གྱིས་སོ། །བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། 123a ༄#། །ཕྱག་རྒྱ་ཐམས་ཅད་ཀྱི་ཁུ་ཚུར་གྱི་དམ་ཚིག་ཅེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །ཁུ་ཚུར་གྱི་རྟོག་པའོ།། །།དེ་ནས་བཅོམ་ལྡན་འདས་ཆོས་ཐམས་ཅད་སྤྲོས་པ་མེད་པའི་དེ་བཞིན་གཤེགས་པས་ཡང་འཁོར་ལོ་ལྟར་ཡི་གེ་བསྐོར་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ངོ་བོ་ཉིད་མེད་པའི་ཚུལ་གྱིས་ཆོས་ཐམས་ཅད་སྟོང་པའོ། །མཚན་མ་མེད་པའི་ཚུལ་གྱིས་ཆོས་ཐམས་ཅད་མཚན་མ་མེད་པའོ། །སྨོན་པ་མེད་པའི་ཚུལ་གྱིས་ཆོས་ཐམས་ཅད་སྨོན་པ་མེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་ཆོས་ཐམས་ཅད་རང་བཞིན་གྱིས་འོད་གསལ་བའོ། །དེ་ནས་བཅོམ་ལྡན་འདས་འཇམ་དཔལ་གཞོན་ནུར་གྱུར་པས་དོན་འདི་རྒྱ་ཆེར་སྟོན་ཏེ། བཞིན་འཛུམ་བཞིན་དུ་རལ་གྲི་དེས་དེ་བཞིན་གཤེགས་པ་ཐམས་ཅད་ལ་འདེབས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མཆོག་འདི་གསུངས་སོ། །། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་འདུས་པ་མཛད་ནས་དང་པོའི་དཀྱིལ་འཁོར་གྱི་ཚུལ་གྱིས་བཞུགས་སོ། །དེ་ནས་འཇམ་དཔལ་གཞོན་ནུར་གྱུར་པ་ཆོས་ཐམས་ཅད་ངོ་བོ་ཉིད་མེད་པས་སྤྲོས་པ་མེད་པའི་རལ་གྲི་ཞེས་བྱ་ 123b བའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་ལོ་ལྟར་ཡི་གེ་བསྐོར་བ་ཞེས་བྱ་བའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ཅི་ལྟ་བའི་ནང་དུ་འཁོར་ལོ་བྲིས་ལ། ཨ་ལ་སོགས་པའི་ཡི་གེའི་ཕྲེང་བ་གོ་རིམས་བཞིན་དུ་བྲི་བར་བྱའོ། །དེ་ནས་དཀྱིལ་འཁོར་བརྒྱད་པའི་ཚུལ་གྱིས་ཐིག་བཏབ་ལ་དེའི་ལྟེ་བ་ལ་བཅོམ་ལྡན་འདས་འཇམ་དཔལ་གཞོན་ནུ་གཞོན་ནུའི་ཆ་ལུགས་འཆང་ཞིང་འཛུམ་པ་དང་བཅས་པ་ནམ་མཁའི་མདོག་ཅན་ཕྱག་བཞི་དང ། རལ་གྲིས་དེ་བཞིན་གཤེགས་པ་ཐམས་ཅད་ལ་འདེབས་པར་གཞག་པར་བྱའོ། །དེའི་མདུན་ལ་སོགས་པར་དེ་བཞིན་གཤེགས་པའི་སྐུ་རྣམས་གཞག་པར་བྱའོ། །ཕྱིའི་མཚམས་རྣམས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་བཞི་ལུང་ཇི་ལྟར་ཐོབ་པ་བཞིན་དུ་གཞག་པར་བྱའོ། །སྒོ་རྣམས་སུ་ནི་མཚན་མ་བཞི་གཞག་པར་བྱའོ། །འདི་ལྟ་སྟེ། རལ་གྲི་དང ། མདུང་དང ། ལྷུང་བཟེད་དང ། གླེགས་བམ་རྣམས་སོ། །དེ་ནས་རལ་གྲི་དང ། གླེགས་བམ་གྱི་ཕྱག་རྒྱ་དེ་བཞིན་དུ་ཆོས་ཀྱི་སློབ་དཔོན་དུ་བྱིན་གྱིས་བརླབ་བོ། །དེ་ནས་རལ་གྲི་བླངས་ཏེ་རལ་གྲིའི་མིང་གི་དབང་བསྐུར་བས་དབང་བསྐུར་ལ་འདི་སྐད་ཅེས་ཆོས་འདི་བཤད་པར་བྱ་སྟེ། རལ་གྲི་འདི་ནི་རྟག་ཟུངས་ལ། །ཤེས་རབ་ཚུལ་འདི་བཀར་སྨྲ་ཞིང ། །ནམ་མཁར་སངས་རྒྱས་ 124a ༄#། །སྦྱོར་བ་ཡིས། །འདེབས་ན་མྱུར་དུ་འགྲུབ་པར་འགྱུར། །སངས་རྒྱས་བསྟན་པ་བསྲུང་ཕྱིར་དང ། །སེམས་ཅན་མང་པོ་བསྲུང་བའི་ཕྱིར། ། འདིས་བསད་སྡིག་པར་མི་འགྱུར་ཞིང ། །བསོད་ནམས་དག་ཀྱང་ཐོབ་པར་འགྱུར། །སློབ་མ་རྣམས་ལའང་དེ་བཞིན་ཏེ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་དངོས་གྲུབ་རྣམས་ཀྱིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཆོས་ཀྱི་དཀྱིལ་འཁོར་རོ། །སྒྲུབ་པའང་དེ་བཞིན་ནོ། །མ་བསྒྲུབས་པར་ཡང་དེ་བཞིན་དུ་ལས་རྣམས་འགྲུབ་པར་འགྱུར་བ་ནི་སྟོང་པ་ཉིད་ཀྱི་ཏིང་ངེ་འཛིན་ཐོབ་པ་ལ་ནི་ཐམས་ཅད་ནམ་མཁའ་བསྒོམས་པས་སོ། །མཚན་མ་མེད་པའི་ཏིང་ངེ་འཛིན་ཐོབ་པ་ལ་ནི་མཚན་མ་དང་བྲལ་བའི་ཏིང་ངེ་འཛིན་བསྒོམས་པས་སོ། །སྨོན་པ་མེད་པའི་ཏིང་ངེ་འཛིན་ཐོབ་པ་ལ་ནི་སྨོན་པ་མེད་པ་བསྒོམས་པས་སོ། །རང་བཞིན་གྱིས་འོད་གསལ་བའི་ཆོས་ཀྱི་ཡེ་ཤེས་ཐོབ་པ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་སོ། །ཉོན་མོངས་པ་ཐམས་ཅད་གཅོད་པ་ལ་ནི་ཆོས་བསྒོམས་པས་སོ། །ཡི་གེ་ཐམས་ཅད་ཀྱི་ངེས་པའི་ཚིག་གི་ཡེ་ཤེས་ལ་ནི་སྤྲོས་པ་མེད་པའི་ཡེ་ཤེས་བསྒོམས་པས་སོ། །གནས་ཐམས་ 124b ཅད་དུ་ཡི་གེས་ཆོས་ཀྱི་བྱ་བ་མཐོང་བས་ནི་ཨ་ལ་སོགས་པའི་ཡི་གེའི་ངོ་བོ་ཉིད་བསྒོམས་པས་སོ། །དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་པ་ཐོབ་པ་ལ་ནི་རྡོ་རྗེའི་རལ་གྲིའི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་རྟོག་པའི་རྒྱལ་པོ་ཆེན་པོ་ལས། འཁོར་ལོ་ཆེན་པོ་ལྟར་ཡི་གེ་བསྐོར་བའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །འཇམ་དཔལ་གྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་ནང་དུ་འདུས་བའི་དེ་བཞིན་གཤེགས་པས་ཡང་འཁོར་ལོ་ཆེན་པོ་ལ་འཇུག་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །རྡོ་རྗེ་མཉམ་པ་ཉིད་ལ་འཇུག་པ་ནི་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ལ་འཇུག་པར་འགྱུར་རོ། །དོན་གྱི་མཉམ་པ་ཉིད་ལ་འཇུག་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་ལ་འཇུག་པར་འགྱུར་རོ། །ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པ་ནི་དམ་པའི་ཆོས་ཀྱི་འཁོར་ལོ་ལ་འཇུག་པར་འགྱུར་རོ། །ཐམས་ཅད་ཀྱི་མཉམ་པ་ཉིད་ལ་འཇུག་པ་ནི་འཁོར་ལོ་ཐམས་ཅད་ལ་འཇུག་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཆོས་ཉིད་ཀྱི་དོན་འདི་རྒྱ་ཆེར་ 125a ༄#། །སྟོན་ཅིང་བཞིན་རབ་ཏུ་འཛུམ་ནས་རྡོ་རྗེའི་འཁོར་ལོ་བསྐོར་ཞིང་རྡོ་རྗེ་འཁོར་ལོ་ཐམས་ཅད་ལ་འཇུག་པའི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཧཱུཾ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཅན་ཁམས་གསུམ་ཏུ་གཏོགས་པའི་སེམས་ཅན་ཐམས་ཅད་ཀྱི་དཀྱིལ་འཁོར་ཐམས་ཅད་དུ་ཞུགས་ནས་བཅོམ་ལྡན་འདས་ཀྱི་ཐུགས་ལས་དཀྱིལ་འཁོར་ཐམས་ཅད་ཀྱི་དམ་ཚིག་གི་སེམས་དཔའ་རྣམས་ངེས་པར་བྱུང་ནས་དཀྱིལ་འཁོར་གྱི་ཚུལ་གྱིས་ཅི་ལྟ་བ་བཞིན་དུ་བཞུགས་སོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེ་ཁྲོ་བོའི་འཁོར་ལོ་ཐམས་ཅད་ལ་རབ་ཏུ་འཇུག་པའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དཀྱིལ་འཁོར་ཆེན་པོ་ཐམས་ཅད་དུ་འཇུག་པའི་དམ་ཚིག་ཅེས་བྱ་བའི་འཁོར་ལོའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ཇི་ལྟ་བ་བཞིན་དུ་བྱས་ཏེ། ནང་གི་དཀྱིལ་འཁོར་དུ་རྡོ་རྗེ་འཁོར་ལོ་བྲིས་ལ། དབུས་སུ་རྡོ་རྗེའི་འཁོར་ལོ་བསྐོར་བ་གཞག་པར་བྱའོ། །ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་ཐམས་ཅད་རྣམ་པ་ཐམས་ཅད་དུ་དཀྱིལ་འཁོར་དང་པོའི་ཚུལ་དུ་གཞག་པར་བྱའོ། །ཕྱིའི་མཚམས་རྣམས་སུ་རྡོ་རྗེའི་ 125b རིགས་ཀྱི་དཀྱིལ་འཁོར་བཞི་བྲི་བར་བྱའོ། །སྒོ་རྣམས་སུ་མཚན་མ་བཞི་གཞག་པར་བྱ་སྟེ། འདི་ལྟ་སྟེ། རྡོ་རྗེ་སེམས་དཔའི་སྐུ་དང ། རྡོ་རྗེ་ཁྲོ་བོའི་སྐུ་དང ། སྤྱན་རས་གཟིགས་དབང་ཕྱུག་གི་སྐུ་དང ། ནམ་མཁའི་སྙིང་པོའི་སྐུ་རྣམས་སོ། །དེ་ནས་རྡོ་རྗེ་འཁོར་ལོའི་ཕྱག་རྒྱས་ཇི་ལྟ་བ་བཞིན་དུ་དཀྱིལ་འཁོར་ཐམས་ཅད་དུ་སངས་རྒྱས་ཉིད་དང ། རྡོ་རྗེ་འཛིན་པ་ཉིད་དུ་འགྲུབ་པར་འགྱུར་རོ། །དེ་ནས་འཁོར་ལོ་བླངས་ལ་འཁོར་ལོའི་མིང་གི་དབང་བསྐུར་བ་བླང་བར་བྱ་ཞིང་གསང་བའི་དཀྱིལ་འཁོར་བཞིའི་ཐིག་བཏབ་པའི་རིགས་རྣམས་སུ་འཇུག་པར་བྱའོ། །སློབ་མ་གཞུག་པ་ཡང་དེ་བཞིན་ནོ། །རྡོ་རྗེ་འཁོར་ལོའི་དཀྱིལ་འཁོར་རོ། །སྒྲུབ་པ་ཡང་དེ་བཞིན་ནོ། །མ་བསྒྲུབས་པར་ཡང་དཀྱིལ་འཁོར་ཐམས་ཅད་དུ་འཇུག་པ་ལ་ནི་རྡོ་རྗེ་འཁོར་ལོས་ཏེ། རང་གི་ཁར་བཅུག་ལ་གཞག་པར་བྱའོ། །དཀྱིལ་འཁོར་ཆེན་པོར་འཇུག་པ་ལ་ནི་རྡོ་རྗེ་འཁོར་ལོ་ཆེན་པོས་སོ། །དེ་བཞིན་དུ་ཕྱག་རྒྱའི་དཀྱིལ་འཁོར་དུ་འཇུག་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་ཕྱག་རྒྱས་སོ། །དེ་བཞིན་དུ་དམ་ཚིག་གི་དཀྱིལ་འཁོར་དུ་འཇུག་པ་ལ་ནི་དམ་ཚིག་ཆེན་པོའི་འཁོར་ལོས་སོ། །ལས་ཀྱི་དཀྱིལ་འཁོར་དུ་འཇུག་པ་ལ་ནི་རྡོ་རྗེ་ཐམས་ཅད་ཀྱི་འཁོར་ལོས་སོ། །དེ་བཞིན་དུ་ 126a ༄#། །རྗེས་སུ་ཆགས་པར་བྱ་བ་དང ། དབང་དུ་བྱ་བ་དང ། དོན་ཐོབ་པ་དང ། རྒྱས་གདབ་པ་དང ། གཅད་པ་དང ། འཇུག་པ་དང ། མཆོད་པ་དང ། གདུག་པ་འདུལ་བའི་ལས་རྣམས་ལ་ནི་སེམས་དཔའ་ཆེན་པོ་བརྒྱད་ཀྱི་ཕྱག་རྒྱ་གཡོན་ན་འཁོར་ལོ་དང་བཅས་པ་རྣམས་ཀྱིས་སོ། །བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། དཀྱིལ་འཁོར་ཐམས་ཅད་ཀྱི་རྡོ་རྗེའི་དམ་ཚིག་ཅེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །རྡོ་རྗེ་འཁོར་ལོའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ལ་མཆོད་པ་ཐམས་ཅད་ཀྱི་ཆོ་ག་རྒྱས་པ་སྣོད་ཀྱི་མཆོད་པ་ཐམས་ཅད་ཀྱི་མཆོག་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །བྱང་ཆུབ་ཀྱི་སེམས་བསྐྱེད་པ་ཉིད་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། ། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་ཉིད་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །དམ་པའི་ཆོས་ཡོངས་སུ་འཛིན་པ་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འདྲི་བ་དང ། ཡི་གེར་འདྲིར་འཇུག་པ་དང ། འཛིན་པ་དང ། 126b ཀློག་པ་དང ། བརྗོད་པ་དང ། སྟོན་པ་དང ། ཉན་པ་དང ། སེམས་པ་དང ། སྒོམ་པ་དང ། མཆོད་པ་བྱེད་པ་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་མཛོད་དོན་དེ་ཉིད་རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་ལས་ཐམས་ཅད་དོན་ཡོད་པའི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ོཾ། དེ་ནས་འདི་གསུངས་པ་ཙམ་གྱིས་ནམ་མཁའ་ཐམས་ཅད་ལས་མཆོད་པ་ཐམས་ཅད་ཀྱི་ཆོ་ག་རྒྱས་པ། ནམ་མཁའི་ཁམས་མ་ལུས་པར་སྤྲོས་པར་གྱུར་ནས། བཅོམ་ལྡན་འདས་ནམ་མཁའི་མཛོད་ཀྱི་བྱང་ཆུབ་སེམས་དཔའི་ཚུལ་གྱིས་དཀྱིལ་འཁོར་ཆེན་པོའི་ཚུལ་དུ་བཞུགས་སོ། །དེ་ནས་བྱང་ཆུབ་སེམས་དཔའ་ནམ་མཁའི་མཛོད་མཆོད་པ་ཐམས་ཅད་ཀྱི་ཆོ་ག་རྒྱས་པར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེའི་མཆོད་པའི་མཆོག་དོན་ཡོད་པའི་དམ་ཚིག་ཅེས་བྱ་བའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ཇི་ལྟ་བ་དེ་བཞིན་དུ་ནང་དུ་རིན་པོ་ཆེའི་ཀ་བ་བརྒྱད་བྱས་ལ། དབུས་སུ་བཅོམ་ལྡན་འདས་མཚོན་ཆ་སྣ་ཚོགས་འཛིན་པ། ཞལ་འཛུམ་པ། སྐུ་དང ། ཡན་ལག་ཟླ་བའི་མདོག་ལ་སོགས་པའི་ཁ་དོག་ལྔ་པའི་མདོག་ཅན་གཞག་པར་བྱའོ། ། 127a ༄#། །དེའི་ཕྱོགས་ཐམས་ཅད་དུ་དམ་ཚིག་སེམས་དཔའ་རྣམས་གཞག་པར་བྱའོ། །འདི་ལྟ་སྟེ། ཕྱག་ན་རྡོ་རྗེ་དང ། འཇིག་རྟེན་དབང་ཕྱུག་ལ་སོགས་པ་བྱང་ཆུབ་སེམས་དཔའ་བརྒྱད་པོ། བྱང་ཆུབ་ཀྱི་སེམས་དང ། ཏིང་ངེ་འཛིན་དང ། དབང་བསྐུར་བ་དང ། ཕྱག་རྒྱ་ཡོངས་སུ་འཛིན་པ་དང ། སྟོང་པ་ཉིད་དུ་སྨྲ་བ་དང ། དཀྱིལ་འཁོར་འདྲི་བ་དང ། མཆོད་པ་ཐམས་ཅད་དང ། སེམས་ཅན་རྣམས་ཡོངས་སུ་སྐྱོབ་པ་ནི་བླ་ན་མེད་པའི་མཆོད་པའི་ཆོ་ག་རྒྱས་པ་ཕྱག་ན་འཛིན་པའི་ཚུལ་གྱིས་ཅི་ལྟ་བ་བཞིན་དུ་གཞག་གོ་།ཕྱིའི་མཚམས་རྣམས་སུ་ནི་མེ་ཏོག་ལ་སོགས་པ་རྣམས་དང ། སྒོ་རྣམས་སུ་ནི་དབྱིག་དང ། གསེར་དང ། མུ་ཏིག་དང ། རིན་པོ་ཆེ་སྟེ་མཚན་མ་བཞི་གཞག་པར་བྱའོ། །དེ་ནས་དེ་བཞིན་དུ་རྡོ་རྗེ་ཐམས་ཅད་ཀྱིས་མཆོད་པ་ཐམས་ཅད་འཐོབ་པར་འགྱུར་རོ། །ཞུགས་ནས་སྣ་ཚོགས་རྡོ་རྗེ་བླངས་ལ། སྣ་ཚོགས་རྡོ་རྗེའི་མིང་གིས་དབང་བསྐུར་བས་དབང་བསྐུར་ནས་མཆོད་པ་རྣམ་པ་བཞི་བྱ་སྟེ། འདི་ལྟ་སྟེ། ལུས་ཀྱི་ལས་ཐམས་ཅད་དང ། ཕྱག་བྱ་བ་དང ། ངག་དང ། ཡིད་དང ། སེམས་ཀྱིས་ཆོས་ཀྱི་དབྱིངས་སུ་སྤྲོས་པས་མཆོད་པའི་ཆོ་ག་རྒྱས་པ་ཐམས་ཅད་ཀྱིས་མཆོད་པར་བྱ་ཞིང ། རྡོ་རྗེ་དང ། ཕྱག་རྒྱས་མཆོད་པ་གཅིག་ཏུ་བྱས་ 127b པའོ། །སློབ་མ་རྣམས་ཀྱི་གཞུག་པའི་ལས་ཀྱང་དེ་བཞིན་ནོ། །ལས་ཀྱི་དཀྱིལ་འཁོར་རོ། །དེ་ནས་སྒྲུབ་པ་དང ། དངོས་གྲུབ་དག་ཀྱང་དེ་བཞིན་ནོ། །དེ་ནས་མ་བསྒྲུབས་པར་ཡང་བྱང་ཆུབ་ཀྱི་སེམས་ཀྱི་མཆོད་པ་ལ་ནི་རང་གི་སྙིང་གར་རྡོ་རྗེ་བསྒོམས་པས་སོ། །ཏིང་ངེ་འཛིན་གྱི་མཆོད་པ་ལ་ནི་ཐམས་ཅད་དག་པར་བསྒོམས་པས་སོ། །དབང་བསྐུར་བའི་མཆོད་པ་ལ་ནི་རྡོ་རྗེ་དབང་བསྐུར་བ་སྣ་ཚོགས་ཀྱིས་སོ། །ཕྱག་རྒྱའི་མཆོད་པ་ལ་ནི་སྣ་ཚོགས་རྡོ་རྗེ་ཐམས་ཅད་ཀྱིས་སོ། །སྟོང་པ་ཉིད་ཀྱི་མཆོད་པ་ལ་ནི་ཨ་ལ་སོགས་པའི་ཡི་གེའི་ལུང་བསྟན་པས་སོ། །དཀྱིལ་འཁོར་གྱི་མཆོད་པ་ལ་ནི་རྡོ་རྗེ་འཁོར་ལོ་སྣ་ཚོགས་ཀྱིས་སོ། །མཆོད་པ་ཐམས་ཅད་ལ་ནི་སྣ་ཚོགས་རྡོ་རྗེས་སོ། །གདུག་པ་འདུལ་བའི་མཆོད་པ་ལ་ནི་ཁྲོ་བོས་སོ། །མེ་ཏོག་ལ་སོགས་པ་དོར་བ་ལ་ནི་བཟླས་པས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། སྣ་ཚོགས་རྡོ་རྗེ་དོན་ཡོད་པའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་རྫོགས་སོ། །ནམ་མཁའི་མཛོད་ཀྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་གདུག་པ་ཐམས་ཅད་འདུལ་ནུས་པས་ཡང ། ཡེ་ཤེས་ཀྱི་ཁུ་ཚུར་ཡོངས་སུ་འཛིན་པ་སེམས་ཅན་ཐམས་ཅད་འདུལ་བ་ཡེ་ཤེས་ཀྱི་སྙིང་པོ་ཞེས་བྱ་བ། ཤེས་རབ་ཀྱི་ཕ་རོལ་ཏུ་ཕྱིན་པའི་ 128a ༄#། །ཚུལ་འདི་བཤད་དོ། །སེམས་ཅན་ཐམས་ཅད་མཉམ་པ་ཉིད་པས་ཁྲོ་བ་མཉམ་པ་ཉིད་དོ། །སེམས་ཅན་ཐམས་ཅད་དུལ་བ་ཉིད་པས་ཁྲོ་བོ་དུལ་བ་ཉིད་དོ། །སེམས་ཅན་ཐམས་ཅད་ཆོས་ཉིད་པས་ཁྲོ་བ་ཆོས་ཉིད་དོ། །སེམས་ཅན་ཐམས་ཅད་རྡོ་རྗེ་ཉིད་པས་ཁྲོ་བ་རྡོ་རྗེ་ཉིད་དོ། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་ཐམས་ཅད་འདུལ་བ་ནི་བྱང་ཆུབ་བོ། །དེ་ནས་བྱང་ཆུབ་སེམས་དཔའ་བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དོན་དེ་ཉིད་རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་རྡོ་རྗེ་མཆེ་བའི་ཕྱག་རྒྱ་དང ། རྡོ་རྗེ་གནོད་སྦྱིན་གྱི་གཟུགས་ཀྱིས་རྡོ་རྗེ་ཁྲོ་བོའི་གད་མོ་ཞེས་བྱ་བ་སྙིང་པོ་འདི་སྨྲས་སོ། །ཧ། དེ་ནས་འདི་གསུངས་པ་ཙམ་གྱིས་གདུག་པ་ཐམས་ཅད་འདུལ་བའི་སེམས་དཔའ་རྣམས་བཅོམ་ལྡན་འདས་རྡོ་རྗེ་གནོད་སྦྱིན་གྱི་ཐུགས་ལས་བྱུང་སྟེ། དང་པོའི་དཀྱིལ་འཁོར་གྱི་ཚུལ་དུ་བཞུགས་སོ། །དེ་ནས་བྱང་ཆུབ་སེམས་དཔའ་རྡོ་རྗེ་གནོད་སྦྱིན་ཐབས་ཐམས་ཅད་ཀྱིས་འདུལ་བ་ཁྲོ་བོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གདུག་པ་ཐམས་ཅད་འདུལ་ཞིང་བྱིན་གྱིས་རློབ་པ་རྡོ་རྗེ་ཞེས་བྱ་བའི་གནོད་སྦྱིན་གྱི་དཀྱིལ་འཁོར་འདི་གསུངས་སོ། །ཕྱི་ཡི་དཀྱིལ་འཁོར་ཚུལ་དུ་ནི། །ཕྱི་ཡི་དཀྱིལ་འཁོར་བྲི་བར་ 128b བྱ། །དེ་ཡི་ནང་རིམ་ཉིད་དུ་ནི། །དཀྱིལ་འཁོར་བཟང་པོ་གྲུ་བཞི་པ། །སྒོ་བཞི་པ་ལ་ཐིག་བཞིར་ལྡན། །མཚོན་སྣ་ལྔས་ནི་རྣམ་པར་བྲི། །ཀ་བ་བརྒྱད་ནི་མདུན་གནས་པར། ། འབར་བའི་དཀྱིལ་འཁོར་ཡང་དག་ལྡན། །དེ་ཡི་དབུས་སུ་ཅི་རིགས་པར། །རྡོ་རྗེ་གནོད་སྦྱིན་གཞག་བྱ་སྟེ། །རྡོ་རྗེ་མཆེ་བ་གཙིགས་པ་དང ། །འབར་བའི་ཕྲེང་བ་འཁྲིགས་པའི་འོད། །འཇིག་བྱེད་ཁ་དོག་སྔོ་བ་དང ། །ཧ་ཧ་ཞེས་བཞད་གསལ་བའི་ཞལ། །དེ་ཡི་ཀུན་ཏུ་གནོད་སྦྱིན་ནི། །ཤིན་ཏུ་འཇིགས་པ་གཞག་པར་བྱ། །དེ་ཉིད་དང་པོ་ལ་སོགས་མཆོག་།ཕྱག་ན་རྡོ་རྗེ་སོགས་མཚན་འཆད། །ཕྱི་ཡི་དཀྱིལ་འཁོར་མཚམས་རྣམས་སུ། །མཆེ་བའི་ཕྱག་རྒྱ་བྲི་བར་བྱ། །སྒོ་ཡི་གནས་ནི་ཐམས་ཅད་དུ། །རྡོ་རྗེའི་མཚན་མ་གཞག་པར་བྱ། །དེ་ནས་འཇུག་པ་ལ་སོགས་པ་འབྱུང་སྟེ། །རྡོ་རྗེ་མཆེ་བའི་ཕྱག་རྒྱ་དང ། །ཧ་ཧ་ཞེས་བཞད་པ་དང་བཅས་པས་ཞུགས་ནས་གདུག་པ་ཐམས་ཅད་འདུལ་ནུས་ཤིང་མྱུར་དུ་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །དེ་ནས་ཞུགས་ནས་རྡོ་རྗེ་མཆེ་བ་བླངས་ནས་རྡོ་རྗེ་མིང་གིས་དབང་བསྐུར་ལ་རྡོ་རྗེས་རྡོ་རྗེ་གནོད་སྦྱིན་ཉིད་ལ་བསྣུན་ནོ། །དེ་ནས་རྡོ་རྗེ་གནོད་སྦྱིན་གྱི་ཞལ་ནས་ཧ་ཧ་ཞེས་བྱ་བའི་སྒྲ་འབྱུང་བར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྲུང་བ་པོ་གནོད་སྦྱིན་གྱི་ 129a ༄#། །བདག་པོ་ཕྱག་ན་རྡོ་རྗེ་གཏུམ་པོར་བདག་གྲུབ་པ་ཡིན་ནོ་ཞེས་ཤེས་པར་བྱའོ། །དེ་ནས་ཕྱག་རྒྱ་ཐམས་ཅད་བཅིང་བར་བྱ་ཞིང་བསྒྲུབ་པར་བྱའོ། །དེ་ནས་མཆོད་ལ་དེ་བཞིན་དུ་ཡང་དག་པར་ཚིམ་པར་བྱས་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ལན་གཅིག་བརྗོད་ལ་སླར་དབྱུང་བར་བྱའོ། །དེ་བཞིན་དུ་ཕྱག་རྒྱ་བཅིང་བ་ལ་སོགས་པའི་ཆོ་ག་རྒྱས་པ་ནི་དང་པོ་ལ་སོགས་པའི་དཀྱིལ་འཁོར་ཐམས་ཅད་དུ་བྱའོ། །ཕྱག་ན་རྡོ་རྗེའི་དཀྱིལ་འཁོར་རོ། །སྒྲུབ་པ་དང ། དངོས་གྲུབ་ཀྱང་དེ་བཞིན་ཏེ། མ་བསྒྲུབས་པར་ཡང་དང་པོ་ཅི་ལྟ་བ་བཞིན་ནོ། །གདུག་པ་ཐམས་ཅད་འདུལ་བ་ལ་ནི་རྡོ་རྗེ་མ་ཆེ་བའི་ཕྱག་རྒྱས་སོ། །སེམས་ཅན་ཐམས་ཅད་འདུལ་བ་ལ་ནི་ཁྲོ་བོས་ཧ་ཧ་ཞེས་དགོད་ཅིང་ཟློས་པས་སོ། །ཉན་ཐོས་དང ། རང་སངས་རྒྱས་ཀྱི་འདོད་ཆགས་དང་བྲལ་བ་ལས་ལྟུང་བར་བྱ་བ་ལ་ནི་ཆོས་གོས་དང ། སྣམ་སྦྱར་གྱི་སྦྱིན་སྲེག་གིས་སོ། །དབང་བསྐུར་བ་ཐམས་ཅད་ད་བྲོག་པ་ལ་ནི་ཁམས་ཐམས་ཅད་ཀྱི་ཕྱེ་མའི་སྦྱིན་སྲེག་གིས་སོ། ། ཐམས་ཅད་རྒྱས་གདབ་པ་ལ་ནི་རྡོ་རྗེ་ཁུ་ཚུར་གྱི་ཕྱག་རྒྱས་སོ། །ཐམས་ཅད་བཅད་པ་ལ་ནི་གཟུགས་བརྙན་བྱས་ནས་གཏུབ་པས་སོ། །མ་རུངས་པ་ཐམས་ཅད་ཀྱི་ 129b དཀྱིལ་འཁོར་རྣམ་པར་གཞིག་པ་ལ་ནི་རྡོ་རྗེ་བཟུང་ནས་འཇུག་པར་བྱའོ། །མཆོད་པ་ཐམས་ཅད་རྣམ་པར་གཞིག་པ་ལ་ནི་ཁྲོས་ནས་བཟླས་བརྗོད་བྱའོ། །ཐམས་ཅད་སྐྲག་པར་བྱ་བ་ལ་ནི་འཇིགས་བྱེད་ཀྱི་ལྟ་བས་བལྟ་བར་བྱའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །རྡོ་རྗེ་གནོད་སྦྱིན་གྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཐམས་ཅད་ཀྱི་མཉམ་པ་ཉིད་ལ་གནས་པས་ཡང་ཆོས་ཐམས་ཅད་ཀྱིས་མཆོག་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ཆོས་ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཐམས་ཅད་དོན་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དོན་ཉིད་དོ། །ཐམས་ཅད་ཆོས་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཉིད་དོ། །ཐམས་ཅད་ལས་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཉིད་དུ་རིག་པར་བྱའོ། །དེ་ནས་བཅོམ་ལྡན་འདས་ལག་ན་རྡོ་རྗེ་དེ་བཞིན་གཤེགས་པ་དང ། བྱང་ཆུབ་སེམས་དཔའ་ཐམས་ཅད་ཀྱི་དོན་ཡོད་པའི་དམ་ཚིག་གི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དོན་ 130a ༄#། །ཡོད་པ་ཐམས་ཅད་ཀྱི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཧཱུཾ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་དཀྱིལ་འཁོར་ཐམས་ཅད་ཐུགས་ལས་བྱུང་སྟེ། དམ་ཚིག་གི་དེ་ཁོ་ན་ཉིད་ཀྱི་རྡོ་རྗེའི་དཀྱིལ་འཁོར་ཆེན་པོ་དེར་ཞུགས་པར་གྱུར་ཏོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་ངེས་པར་བཏུད་དེ་དམ་ཚིག་ཆེན་པོའི་དཀྱིལ་འཁོར་འདི་གསུངས་སོ། །དཀྱིལ་འཁོར་ཆེན་པོ་བྲིས་ལ་དཀྱིལ་འཁོར་གྱི་གནས་བརྒྱད་དུ་རྡོ་རྗེ་ཁམས་གསུམ་རྣམ་པར་རྒྱལ་བ་ལ་སོགས་པའི་དཀྱིལ་འཁོར་སོ་སོར་གཞག་གོ་།དེ་ནས་བཅོམ་ལྡན་འདས་ཕྱག་ན་རྡོ་རྗེ་དམ་ཚིག་ཐམས་ཅད་ཀྱི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཐམས་ཅད་ཀྱི་རྡོ་རྗེ་ཞེས་བྱ་བའི་དཀྱིལ་འཁོར་འདི་གསུངས་སོ། །དཀྱིལ་འཁོར་ཆེན་པོའི་ཚུལ་དུ་ཕྱིའི་དཀྱིལ་འཁོར་བྲིས་ལ། དེའི་དབུས་སུ་རྡོ་རྗེ་འཁོར་ལོ་བྲིས་ནས། འཁོར་ལོའི་གནས་རྣམས་སུ་དཀྱིལ་འཁོར་ཆེན་པོ་ལ་སོགས་པ་བྲི་བར་བྱའོ། །ཐམས་ཅད་ཀྱང་དཀྱིལ་འཁོར་བརྒྱད་པའི་ཐིག་གིས་བཏབ་ཅིང་སེམས་དཔའ་ཆེན་པོ་གཞག་པར་བྱའོ། །ཕྱིའི་དཀྱིལ་འཁོར་དུ་ཕྱི་རོལ་གྱི་རྡོ་རྗེའི་ 130b རིགས་ཅི་ལྟར་རྗེས་སུ་མཐུན་པར་བྲི་བར་བྱའོ། །སྒོ་རྣམས་སུ་ནི་རིགས་རྣམ་པ་བཞིའི་མཚན་མ་རྣམས་གཞག་པར་བྱའོ། །དེ་ནས་དམ་ཚིག་ཆེན་པོའི་དེ་ཁོ་ན་ཉིད་ཀྱི་རྡོ་རྗེའི་དཀྱིལ་འཁོར་ཆེན་པོའི་ཚུལ་གྱིས་དཀྱིལ་འཁོར་གྱི་ཆོ་ག་ཐམས་ཅད་རྒྱས་པར་བྱའོ། །དམ་ཚིག་ཆེན་པོའི་རྡོ་རྗེའི་དེ་ཁོ་ན་ཉིད་ཀྱི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་ལས། བདེ་བ་ཐམས་ཅད་ཀྱི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །རིགས་བསྡུས་པའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྣམ་པར་སྣང་མཛད་ཀྱིས་ཡང་སེམས་ཅན་ཐམས་ཅད་བྱིན་གྱིས་རློབ་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ཐམས་ཅད་ཀྱི་རང་བཞིན་ཡིན་པས་སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཐམས་ཅད་རྡོ་རྗེའི་སྙིང་པོས་དབང་བསྐུར་བ་ཉིད་པས་སེམས་ཅན་ཐམས་ཅད་ནི་རྡོ་རྗེའི་སྙིང་པོ་ཅན། ངག་ཐམས་ཅད་རབ་ཏུ་བྱུང་བས་སེམས་ཅན་ཐམས་ཅད་ནི་ཆོས་ཀྱི་སྙིང་པོ་ཅན་ནོ། །སེམས་ཅན་ཐམས་ཅད་ཀྱི་བྱ་བ་བྱེད་པ་ལ་སྦྱོར་བས་སེམས་ཅན་ཐམས་ཅད་ནི་ལས་ཀྱི་སྙིང་པོ་ཅན་ནོ། །དེ་ནས་ཕྱི་རོལ་གྱི་རྡོ་རྗེའི་རིགས་ 131a ༄#། །རྣམས་ཀྱིས་ཅ་ཅོའི་སྒྲ་ཕྱུང་ནས་ཆོས་ཉིད་ཀྱི་དོན་རྒྱ་ཆེར་སྟོན་ཅིང་སྙིང་པོ་ཕུལ་ཏེ། དེ་ནས་རྡོ་རྗེ་དབང་ཕྱུག་ཆེན་པོ་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །ཏྲི། དེ་ནས་དཀྱིལ་འཁོར་བཤད་པར་བྱ་སྟེ། ཀུན་ནས་ཟླུམ་པོ་ཐིག་གསུམ་པ་དཀྱིལ་འཁོར་ཆེན་པོ་སྒོ་བཞི་པ་མཚམས་རྣམས་སུ་མདུང་རྩེ་གསུམ་པ་བྲི་བར་བྱའོ། །དེའི་དབུས་སུ་དབང་ཕྱུག་ཆེན་པོ་བྲི་བར་བྱའོ། །དེའི་ལོགས་ཐམས་ཅད་དུ་ཚོགས་བརྒྱད་པེ་བྲི་བར་བྱ་སྟེ། འདི་ལྟ་སྟེ། ནག་པོ་ཆེན་པོ་དང ། དགའ་བྱེད་དབང་ཕྱུག་དང ། དྲིལ་ཆེན་དང ། གར་གྱི་དབང་ཕྱུག་རྣམས་ནི་ཕྱོགས་རྣམས་སུའོ། །མཚམས་སུ་ནི་ཐོད་པ་བཟང་པོ་དང ། གཏུམ་པོའི་དབང་ཕྱུག་དང ། ལག་ན་ཁ་ཊྭཾ་ག་དང ། བ་ལང་རྣ་བའི་དབང་ཕྱུག་གོ་།ཐིག་གི་མཆམས་སུ་ནི་མ་མོའི་ཚོགས་ཐམས་ཅད་གནས་ཇི་ལྟ་བ་བཞིན་དུ་བྲི་བར་བྱའོ། །སྒོ་རྣམས་སུ་ནི་དབྱུག་པའི་དབང་ཕྱུག་དང ། མགོའི་དབང་ཕྱུག་དང ། དྲིལ་རྣ་དང ། དྲག་པོ་ཆེན་པོའོ། །ཕྱི་རོལ་ཏུ་ནི་འབྱུང་པོ་རྣམས་དང ། ཡི་གེ་རྣམས་བྲི་བར་བྱའོ། །དེ་ནས་སློབ་དཔོན་ཐལ་བ་གཙང་མས་ལུས་བསྐུས་ཤིང་གོས་གཙང་མ་བགོས་ཏེ། མདུང་རྩེ་གསུམ་གྱི་མཚན་མ་གཞག་པར་བྱའོ། །ཞུགས་ནས་ཀྱང་སྙིང་པོ་བཟླས་པར་བྱའོ། །དེ་ནས་སློབ་ 131b མ་དེ་བཞིན་དུ་བཅུག་ལ་ལག་པར་མདུང་རྩེ་གསུམ་པ་བྱིན་ནས་ཆོས་བཤད་པར་བྱའོ། །སེམས་ཅན་ཀུན་ལ་ཕན་ཕྱིར་དང ། །བསྟན་པ་ཐམས་ཅད་བསྲུང་ཕྱིར་དང ། །འདོད་ཀུན་བདག་པོ་ཉིད་ཀྱི་ཕྱིར། །དྲག་པོའི་ལས་ལ་གནས་པར་གྱིས། །དེ་ནས་ཕྱག་རྒྱའི་ཡེ་ཤེས་བསླབས་ཏེ་གཏོར་མ་སྦྱིན་པར་བྱའོ། །དེ་ནས་བརྩམས་ཏེ་འཇིགས་པ་མེད་པར་དངོས་གྲུབ་ཐམས་ཅད་དང ། ཕུན་སུམ་ཚོགས་པ་ཐམས་ཅད་ཀྱི་བདེ་བ་དང ། ཡིད་བདེ་བ་ཐམས་ཅད་རྗེས་སུ་མྱོང་ནས་དྲག་པོའི་འཇིག་རྟེན་དུ་མཆོད་པར་འགྱུར་རོ། ། དཀྱིལ་འཁོར་ཆེན་པོ་ཞི་བའི་མདུང་ཐུང་གིས་མཚན་མ་ཞེས་བྱ་བའོ། །དེ་ནས་མ་མོ་ཐམས་ཅད་ཀྱིས་བཅོམ་ལྡན་འདས་ལ་ཕྱག་བཙལ་ཏེ། དང་པོ་མགྲིན་གཅིག་ཏུ་ཐམས་ཅད་དགུག་པ་དང ། གཞུག་པ་དང ། གསད་པ་དང ། བསྒྲུབ་པའི་དམ་ཚིག་ཅེས་བྱ་བ་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །བྷྱོ། དེ་ནས་འདིར་དཀྱིལ་འཁོར་བཤད་པར་བྱ་སྟེ། ཟུར་བཞི་པ། བྱང་གི་སྒོ་ཅན་ཀྱི་དཀྱིལ་འཁོར་ཐིག་བཏབ་ལ། དབུས་སུ་ནག་པོ་ཆེན་པོ་གར་བྱེད་བཞིན་པ་གཞག་པར་བྱའོ། །དེའི་ཕྱོགས་དང ། མཚམས་ཐམས་ཅད་དུ་མ་མོ་བརྒྱད་བྲི་བར་བྱའོ། །འདི་ལྟ་སྟེ། དྲག་མོ་དང ། ཚངས་པ་མོ་དང ། ཁྱབ་འཇུག་མོ་དང ། གཞོན་ནུ་མོ་དང ། ནག་མོ་དང ། ནག་མོ་ཆེན་མོ་དང ། ཟ་ 132a ༄#། །བ་མོ་དང ། སྲིན་མོའོ། །དཀྱིལ་འཁོར་གྱི་ཕྱིའི་མཚམས་རྣམས་སུ་ནི་དྲག་པོའི་མཁའ་འགྲོ་མ་བཞི་བྲི་བར་བྱ་སྟེ། ཞི་བ་མོ་དང ། བེ་རུཎྚ་དང ། གཏུམ་མོ་དང ། འཇིགས་བྱེད་མོ་རྣམས་སོ། །དེ་རྣམས་ཀྱི་མཚན་མ་ནི་མདུང་རྩེ་གསུམ་པ་དང ། ཕྲེང་བ་དང ། འཁོར་ལོ་དང ། དྲིལ་བུ་དང ། ཐོད་པ་ཁྲག་དང་བཅས་པ་དང ། མཁར་གསིལ་དང ། མཆེ་བ་དང ། ཁ་ཊྭཱཾ་གའོ། །སྒོ་སྲུང་རྣམས་ཀྱི་ནི་ཐོད་པ་དང ། རུས་པའི་ལུ་གུ་རྒྱུད་དང ། བྱ་རྒོད་དང ། བྱི་ལའོ། །དེ་ནས་ཕྱག་རྒྱའི་སློབ་དཔོན་ཆོས་སྤྱོད་པ། གཙང་བ། གོས་གཙང་མ་བགོས་པ་ཐམས་ཅད་ཟ་བའམ། ཐམས་ཅད་སྤྱད་པ་ལ་ཡང་སྨད་པ་མེད་དེ། ཞི་བའི་ཕོ་ཉའི་ཕྱག་རྒྱས་ཞུགས་ལ་སྙིང་པོ་བཟླས་པར་བྱའོ། །དེ་ནས་དཀྱིལ་འཁོར་གྱི་དབུས་ནས་བྷྱོ་ཆེན་པོ་ཐོས་པར་འགྱུར་རོ། །དེ་ནས་སློབ་དཔོན་མ་གཏོགས་པ་གཞན་ཐམས་ཅད་ཅི་ལྟར་འོངས་པ་ཞུགས་པར་འགྱུར་ཞིང་འཐོབ་པར་འགྱུར་ཏེ། གདུག་པའི་དམ་ཚིག་ནི་མ་གཏོགས་སོ། །དེ་ནས་སློབ་མ་ལག་ན་མེ་ཏོག་ཐོགས་པས་རས་ཀྱིས་མིག་བཀབ་ལ་ནག་པོ་ཆེན་པོའི་ཕྱག་རྒྱས་བཅུག་སྟེ། རྣ་བར་དམ་ཚིག་ཆེན་པོ་བྷྱོ་ཞེས་བྱ་བ་དང་སྦྱར་བར་བྱའོ། །དེ་ནས་སྐྲག་ནས་མེ་ཏོག་དོར་རོ། །དེ་ནས་གང་དུ་ 132b ལྷུང་བ་དེ་ལྷག་པའི་ལྷར་བསྒྲུབ་པར་བྱའོ། །གལ་ཏེ་ལྷུང་བར་མ་གྱུར་ན་ཡང་དོར་དུ་གཞུག་གོ་།དེ་ནས་ནི་འཇིགས་པར་བྱེད་པར་ནུས་ཤིང་རྣལ་འབྱོར་ཡང་སོ་སོར་འཐོབ་པར་འགྱུར་རོ། །དེ་ནས་གདོང་གཡོགས་བཀྲོལ་ལ་དཀྱིལ་འཁོར་བསྟན་པར་བྱའོ། །གདུག་པ་ལ་སོགས་པའི་ཕྱག་རྒྱས་མཆོད་ནས་སྙིང་པོ་དང ། རང་རང་གི་མཚན་མ་སྦྱིན་པར་བྱའོ། །དེ་ནས་དམ་ཚིག་བསྟན་པར་བྱ་སྟེ། །སེམས་ཅན་ཐམས་ཅད་རྒྱས་གདབ་ཅིང ། །དམ་ཚིག་སྡང་རྣམས་བཟའ་བར་བྱ། །སྔགས་རྣམས་བསྟན་པར་མི་བྱ་སྟེ། །དམ་ཚིག་རྣལ་འབྱོར་གྲུབ་སྟེར་བྱའོ། །དྲག་པོའི་དམ་ཚིག་མདུང་རྩེ་དང ། །མ་མོ་རྣམས་ཀྱི་རྒྱས་འདེབས་པས། །གལ་ཏེ་འདས་ན་ཁྱོད་ཀྱི་སྙིང ། །རྟག་ཏུ་འཇིག་པར་བྱེད་པར་འགྱུར། །དེ་ནས་བརྩམས་ཏེ་གང་ཤ་ཆེན་པོ་ཟ་བ་ནི་དེ་རིང་པོ་མི་ཐོགས་པར་རྣལ་འབྱོར་འགྲུབ་པར་འགྱུར་རོ། །གང་ཟ་བར་མི་འགྱུར་བ་དེའི་དངོས་གྲུབ་མེད་དོ། །གལ་ཏེ་དམ་ཚིག་ལས་འདས་པར་མ་གྱུར་ན་ཚོགས་ཐམས་ཅད་ཀྱིས་ཀྱང་མི་གསོད་པར་འགྱུར་རོ། །ཕྱག་རྒྱའི་ཡེ་ཤེས་བསླབ་པར་བྱ་སྟེ། ཕྱག་རྒྱའི་གར་དང་མཆོད་པ་བྱས་ནས་གཏོར་མ་སྦྱིན་ཞིང་བཟའ་བ་དང ། བཏུང་བ་དང ། ལོངས་སྤྱོད་ལ་སོགས་པའི་ཚིམ་པར་བྱས་ནས་ཕྱིར་འབྱུང་བར་བྱའོ། །དངོས་གྲུབ་ཐམས་ཅད་ཀྱི་དམ་ 133a ༄#། །ཚིག་ཅེས་བྱ་བའི་ཕྱག་རྒྱའི་དཀྱིལ་འཁོར་རོ། །དེ་ནས་སྦྲང་རྩིར་བྱེད་པ་ལ་སོགས་པ་མིང་པོ་གསུམ་གྱིས་བཅོམ་ལྡན་འདས་ལ་ཕྱག་བཙལ་ཏེ་མགྲིན་གཅིག་ཏུ་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །སཝ། དེ་ནས་འདིའི་དཀྱིལ་འཁོར་བཤད་པར་བྱ་སྟེ། །ཟུར་བཞི་པ་དང ། སྒོ་བཞི་པར། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་དུ་དཀྱིལ་འཁོར་ནི། །གཞུ་ཡི་དབྱིབས་ཅན་བྲི་བར་བྱ། །དེ་ཡི་དབུས་སུ་མིང་པོ་ནི། །མཆོག་གསུམ་དག་ནི་གཞག་པར་བྱ། །སྦྲང་རྩིར་བྱེད་དང་རྒྱལ་བྱེད་དང ། །དོན་ཀུན་གྲུབ་བྱེད་ཅེས་བྱ་བའོ། །གོ་ཆ་ཡ་ལད་བགོས་པ་དང ། །དེ་བཞིན་ཐོད་པ་མཚན་མ་འཛིན། །ལྷ་མོའི་གོས་དང་ཕྲེང་བ་འཆང ། །ཅུང་ཟད་དགོད་ཅིང་ཁྲོ་བ་དང ། །སེང་གེའི་ཁྲི་ལ་འདུག་པ་དང ། །འོད་ཀྱི་དཀྱིལ་འཁོར་གྱིས་མཛེས་པའོ། །དངོས་གྲུབ་ཀུན་སྟེར་དག་པ་སྟེ། །གསུམ་ནི་སྲིད་གསུམ་དག་དང་མཚུངས། །སྒོ་དང་མཚམས་ནི་ཐམས་ཅད་དུ། །ཚོགས་ལ་སོགས་པ་ལེགས་པར་བཞག་།སྒྲུབ་དང་འཕེལ་ཆེན་གནོད་སྦྱིན་དང ། །གཏུམ་དང་ཁྲོ་མཆོག་གསོད་པའོ། །ཕྱི་རོལ་བ་དན་རྩེ་མོ་ལ། །དྲིལ་བུ་ཕྲེང་བཅས་ཐམས་ཅད་དུ། །བུམ་པ་གང་བ་རོལ་མཆོག་བཅས། །འབྱུང་པོ་མ་ལུས་གཏོར་མར་བཅས། །གླུ་ 133b རྣམས་གླུ་རུ་ལེན་པ་དང ། །རོལ་མོ་རྡུང་བར་བྱེད་པ་དང ། །དེ་བཞིན་སློབ་དཔོན་གར་བྱེད་པས། །ཕྱག་རྒྱ་ཀུན་གྱིས་འཇུག་པར་བྱ། །ཞུགས་ནས་སྒྲུབ་ལ་དད་པ་ཡིས། ། ཡང་ནས་ཡང་དུ་འདུད་བྱ་ཞིང ། །མེ་ཏོག་ཀུན་གྱིས་མཆོད་པ་ཡིས། །བསྒྲུབ་དང་དེ་ཉིད་དག་ཀྱང་བརྗོད། །འཇིག་རྟེན་གསུམ་པོ་སྲིད་གསུམ་མཆོག་།ངན་སོང་གསུམ་མཆོད་གསུམ་རྣམ་གསུམ། །ལེགས་ལྡན་སྦས་པས་གྲུབ་པ་ནི། །དངོས་གྲུབ་ཀུན་ལ་རྟག་ཏུའོ། །དེ་ནས་སྙིང་པོ་ལན་གཅིག་བརྗོད་ཅིང་ཕྱག་རྒྱ་ཐམས་ཅད་ཀྱི་གཡས་པའི་མཛུབ་མོ་ལྕགས་ཀྱུར་བྱས་ལ་དགུག་པར་བྱའོ། །དེ་ནས་དྲིལ་བུ་དང་བཅས་པའི་ཕྲེང་བ་རྣམས་གཡོའོ། །ཐམས་ཅད་ཕབ་ནས་དེ་བཞིན་དུ་གཞུག་པར་བྱའོ། །དེ་ནས་དམ་ཚིག་འདི་བརྗོད་པར་བྱ་སྟེ། །གལ་ཏེ་དམ་ཚིག་འདས་གྱུར་ན། །ཕ་གསོད་འགྲོ་བ་གང་ཡིན་དང ། །མ་གསོད་པ་ཡི་འགྲོ་བ་གང ། །འགྲོ་བ་དེར་ནི་འགྲོ་བར་འགྱུར། ། རྟག་ཏུ་དམ་པ་བསྟེན་པར་བྱ། །དམ་པ་མིན་པ་ཡོངས་སུ་སྤང ། །གཞན་ལ་དེ་ཉིད་བསྟན་མི་བྱ། །རྟག་ཏུ་མིང་པོ་གསུམ་པོ་བསྒྲུབ། །འདི་ནི་དམ་ཚིག་གོ་།དེ་ནས་གླུ་དང ། གར་དང ། རོལ་མོ་དང ། དགོད་པ་དང ། དགའ་བ་དང ། ཟ་བ་དང ། མགུ་བས་མེལ་ཚེ་བྱའོ། །ཕྱག་རྒྱ་དང ། གར་གྱི་རོལ་མོའི་མཆོད་པ་ཡང་བྱས་ལ་སློབ་དཔོན་ 134a ༄#། །གྱིས་ཀྱང་ཕྱག་རྒྱ་དེ་དང་བཅས་པས་བྱུང་བ་དང ། འབྱུང་བར་འགྱུར་བའི་ཡེ་ཤེས་བརྗོད་པར་བྱ་འོ། །དེ་ནས་བརྩམས་ཏེ་དངོས་གྲུབ་ཐམས་ཅད་དང ། ཕུན་སུམ་ཚོགས་པ་ཐམས་ཅད་དང ། འབྱོར་པ་ཐམས་ཅད་འགྲུབ་པར་འགྱུར་རོ། །དམ་ཚིག་གི་དཀྱིལ་འཁོར་རོ། །དེ་ནས་སྲིང་མོ་བཞིས་བཅོམ་ལྡན་འདས་ལ་ཕྱག་བཙལ་ཏེ། རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །ཧཱུཾ། དེ་ནས་འདིའི་དཀྱིལ་འཁོར་བཤད་པར་བྱ་སྟེ། དཀྱིལ་འཁོར་ཀུན་ནས་ཟླུམ་པོར་ཐིག་བཏབ་ལ་ཐིག་བཞི་ལ་འཁོར་ལོ་བཞི་པ་བྱས་ལ། དཀྱིལ་འཁོར་དེ་རྣམས་སུ་སྒོ་བཞིར་བལྟ་བའི་ལྷ་མོ་བཞིའི་གཟུགས་བརྙན་བཞག་པར་བྱ་སྟེ། འདི་ལྟ་སྟེ། དགའ་བ་མོ་ནི་ཤར་དུ་ལྟ་བ། །མདའ་དང ། གཞུ་ཐོགས་པ་ལ་བརྩོན་པ། སྒེག་མོ་མདོག་དམར་བའོ། །གསོད་མ་ལྷོ་ཕྱོགས་སུ་ལྟ་བ། ལག་ན་གྲི་དང ། ཕུབ་ཐོགས་པ། མདོག་ནག་པོ་འོ། །ཕག་མོ་ནུབ་ཏུ་ལྟ་བ། ལག་ན་གསེར་གྱི་གཏེར་ཐོགས་པ། གསེར་གྱི་མདོག་ཅན་ནོ། །གྲུབ་པ་མོ། ཞི་བ་མོ་ཞེས་བྱ་བ་བྱང་དུ་ལྟ་བ། ལག་ན་གྲི་དང ། ཤ་ཁ་ར་ཐོགས་པ། མདོག་དཀར་མོའོ། །ཕྱི་རོལ་གྱི་སྒོ་བཞིར་མཚན་མ་དགོད་པ་གཞག་པར་བྱ་འོ། །དེ་ནས་སློབ་དཔོན་དྲིལ་བུ་དཀྲོལ་ཞིང་ལག་པ་ 134b གཡོན་པ་ཁ་ཊྭཱཾ་ག་དང་བཅས་པས་འཇུག་པར་བྱའོ། །ཞུགས་ནས་སྙིང་པོ་བཟླས་པར་བྱ་འོ། །དེ་ནས་ཕྱག་རྒྱ་དང ། གར་གྱི་མཆོད་པ་བསྟབ་པར་བྱ་འོ། །དེ་ནས་ཡིད་ལ་འདོད་པའི་དངོས་གྲུབ་ཐམས་ཅད་སྟེར་བར་འགྱུར་རོ། །ཐམས་ཅད་ཀྱིས་མཆོད་པར་འགྱུར་རོ། །མཁའ་འགྲོ་མ་ལ་སོགས་པ་གདོན་རྣམས་ཀྱིས་མི་ཚུགས་པ་དང ། འདི་ནི་ནོར་རྣམས་ཀྱང་བསྐྱེད་པར་འགྱུར་རོ། །ཇི་ལྟར་མངོན་པར་འདོད་པ་ཐམས་ཅད་ཀྱིས་མཉེས་པར་བྱེད་པ་དང ། གཏེར་ཐམས་ཅད་འབྱིན་པ་དང ། དངོས་གྲུབ་ཐམས་ཅད་བསྒྲུབ་པར་ནུས་པར་འགྱུར་རོ། །སློབ་མ་གཞུག་པ་ཡང་དེ་བཞིན་ནོ། །དེ་རྣམས་དང་འདི་དག་ཐམས་ཅད་འགྲུབ་པར་འགྱུར་རོ། །ལས་ཀྱི་དཀྱིལ་འཁོར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཕྱི་རོལ་གྱི་རྡོ་རྗེའི་རིགས་ཀྱི་རྟོག་པ་རྫོགས་སོ། །ཕྱི་རོལ་རྡོ་རྗེ་རིགས་ཀྱི་དཀྱིལ་འཁོར་བཞིའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་མཐའ་ཡས་མུ་མེད་པས་མཐར་ཐུག་ཅིང་མུ་མེད་པའི་ཆོས་དང་ལྡན་པས་ཡང་ཆོ་ག་འདི་མཐར་ཐུག་པར་བྱིན་གྱིས་བརླབ་པའི་ཕྱིར་ཆོས་ཐམས་ཅད་མཉམ་པ་ཉིད་ཀྱི་མཐར་ཐུག་པ་བྱིན་གྱིས་བརླབ་པ་རྡོ་རྗེ་ཞེས་བྱ་བ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ 135a ༄#། །མཐའ་ཡས་པ་ཉིད་པས། དེ་བཞིན་གཤེགས་པ་ཐམས་ཅད་མཐའ་ཡས་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་པས་རྡོ་རྗེ་ཐམས་ཅད་མུ་མེད་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་པས་ཆོས་ཐམས་ཅད་དུ་མ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མཐར་ཐུག་པ་མེད་པ་ཉིད་པས་ལས་ཐམས་ཅད་མཐར་ཐུག་པ་མེད་པ་ཉིད་དོ། །གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང ། འཆང་བ་དང ། ཀློག་པ་དང ། སྟོན་པ་དང ། བརྗོད་པ་དང ། སྒོམ་པ་དེས་སངས་རྒྱས་དང ། བྱང་ཆུབ་སེམས་དཔའི་སྤྱོད་པ་མཐར་ཐུག་པ་མེད་པའི་མཐར་ཕྱིན་ཏེ་སྒྲིབ་པ་ཐམས་ཅད་ཟད་ནས། དེ་བཞིན་གཤེགས་པའམ་རྡོ་རྗེ་འཛིན་པར་མྱུར་དུ་འགྱུར་རོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ། ཆོས་ཀྱི་རྣམ་གྲངས་འདི་དོན་ཡོད་པ་དང ། ཐོགས་པ་མེད་པར་མྱུར་དུ་འགྲུབ་པར་བྱ་བའི་ཕྱིར་ལག་ན་རྡོ་རྗེ་ལ། ལེགས་སོ་ཞེས་བྱ་བ་བྱིན་ནོ། །སེམས་ཅན་ཆེན་པོ་ལེགས་སོ་ལེགས། །བདེ་བ་ཆེན་པོ་ལེགས་སོ་ལེགས། །ཐེག་པ་ཆེན་པོ་ལེགས་སོ་ལེགས། །བློ་གྲོས་ཆེན་པོ་ལེགས་སོ་ལེགས། །ཆོ་ག་འདི་ནི་ལེགས་པར་སྨྲས། །སངས་རྒྱས་རྡོ་རྗེ་འཛིན་ཀུན་ 135b གྱིས། །འབྲས་བུ་ཡོད་ལ་འདུལ་བའི་མཆོག་།རྡོ་རྗེའི་མདོ་འདི་བྱིན་གྱིས་བརླབས། །ཆོ་གའི་རྒྱལ་པོ་བླ་ན་མེད། །གང་རྣམས་འདི་དག་འཛིན་པ་ནི། །བདུད་ལ་སོགས་པ་ཐམས་ཅད་ཀྱིས། །དེ་དག་མི་སོད་མི་ཚུགས་སོ། །སངས་རྒྱས་བྱང་ཆུབ་སེམས་དཔའ་དང ། །དངོས་གྲུབ་དམ་པ་ཐམས་ཅད་ཀྱང ། །སངས་རྒྱས་ཀུན་གྱིས་གསུངས་པ་བཞིན། །རིང་པོར་མི་ཐོགས་འཐོབ་པར་འགྱུར། །དེ་སྐད་གསུངས་ནས་གསང་གྲུབ་ཕྱིར། །རྡོ་རྗེ་ཅན་གྱིས་བཤད་པ་ལ། །ཀུན་མཆོག་སངས་རྒྱས་མཁའ་བཅས་པ། །ཐམས་ཅད་ཀྱིས་ནི་མངོན་པར་བསྟོད། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཱརྱ་ཤྲད་དྷཱ་ཀ་ར་བརྨ་དང ། ཞུས་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕ་བ་པའོ།། |