།།རྒྱ་གར་སྐད་དུ། ནཱི་ལཱམྦར་དྷ་ར་བཛྲ་པཱཎི་བཛྲ་ཕཱ་ཎ་ཀསྟནྟྲ་ཏྲཻ་ལོ་ཀྱ་བི་ཛ་ཡ་ནཱ་མ། བོད་སྐད་དུ། ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་གདེངས་པའི་རྒྱུད་ཁམས་གསུམ་ལས་རྣམ་པར་རྒྱལ་བ་ཞེས་བྱ་བ། དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་གསང་བའི་བདག་པོ་འཁོར་དེ་དག་ལ་རྣམ་པར་གཟིགས་ནས་རང་ཉིད་མཁའ་དབྱིངས་ 208b རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་བར་བཞུགས་སོ། །ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་སྲིད་པ་གསུམ་ཡང་རྣ་པར་གཡོས་སོ། །དེ་ནས་རང་ཉིད་སྐུ་དང་གསུང་དང་ཐུགས་རྣམ་པར་དག་པའི་རྡོ་རྗེ་ལས་སྔགས་འདི་ཕྱུང་ངོ ། །ོཾ་ན་མོ། གསང་སྔགས་རྒྱལ་པོ་སྨྲས་ཙམ་གྱིས། །ས་སྟེང་རྣམས་བརྒྱལ་བར་གྱུར། །ཀླུ་རྣམས་ཀུན་ཏུ་སྐྲག་ནས་ནི། །གསང་བདག་ཉིད་ལ་ཕྱག་འཚལ་ལོ། །སྙིང་རྗེ་ལྡན་ཞིང་མོས་པ་བརྟན། །གུས་ཤིང་བྱང་ཆུབ་སེམས་ལྡན་པའི། །ཕྱོགས་སུ་འགྲོ་བས་ཡིད་གནས་པའི། །ལྷ་དང་བླ་མ་མཉམ་མཆོད་ཅིང ། །བརྩོན་འགྲུས་ཤེས་རབ་ཆེ་བ་དེས། །རང་ཉིད་དང་ནི་གཞན་དག་ཏུ། །བདེ་ཞིང་ཉམས་དགའི་རི་ཕུག་གམ། །ཚལ་ལམ་མཚོ་འམ་ལྗོངས་རྣམས་སུ། །ས་ཡི་དཀྱིལ་འཁོར་རྣམ་དག་པར། །བྱས་ནས་དྲི་ཆུས་ལེགས་བྱུགས་ནས། །བདེ་བའི་སྟན་ལ་འདུག་བྱས་ཏེ། །གསང་བའི་བདག་པོ་བསྒྲུབ་པར་བྱ། །གཞན་དུ་རི་ཁྲོད་རྩུབ་པའམ། །དུར་ཁྲོད་ཡ་མའི་ཁང་པ་ཡང ། །འཁྲུག་ཅིང་གཡེང་དང་བཅས་པ་དང ། །རྒྱལ་པོས་བཟུང་ཞིང་གཏུམ་མོ་རྒྱུ། །འཇིགས་པའི་ཕྱོགས་ནས་གང་དག་རྣམས། །རྒྱལ་བ་བསྒྲུབ་པའི་གནས་ཡིན་ནོ། །དུས་འདིར་བྱུང་བའི་བློ་ཞན་རྣམས། །འཇིག་རྟེན་འདི་ཡི་གཡེང་བ་དང ། །ཚོགས་པ་ཐམས་ཅད་སྐྱེད་པར་བྱེད། །ཆགས་པའི་སྟོབས་ཀྱི་ཆོས་ཉིད་ནི། །ཡང་དག་མི་རྟོག་དེ་ནི་སྐྱོན། །སྤྲུལ་པའི་གླང་པོ་དང་མཚུངས་སོ། །སྟོང་ཉིད་སྤྲོས་མེད་རང་བཞིན་ལས། །སྒྱུ་མའི་སྐུ་ནི་ཡོངས་འབྱུང་ཞིང ། །དང་པོ་སྟོང་ཉིད་ 209a ༄#། །རྡོ་རྗེ་སྟེ། །གཉིས་པ་ལ་ནི་ཡི་གེ་ཧཱུཾ། །གསུམ་པ་རྡོ་རྗེ་རྩེ་དགུ་པ། །བཞི་པ་བཅོམ་ལྡན་གསང་བའི་བདག་།ལྔ་པ་ལྷ་ནི་ཡོངས་སུ་རྫོགས། །མེ་ལོང་དང་ནི་མཉམ་ཉིད་དང ། །ཆོས་དབྱིངས་ཡེ་ཤེས་ལས་གྲུབ་པའི། །སྐུ་ནི་ཡེ་ཤེས་བདག་ཉིད་དོ། །དེ་རྫོགས་ཡེ་ཤེས་ཆེན་པོའོ། །ཡེ་ཤེས་སྐུ་ལས་ཡེ་ཤེས་ཀྱིས། །སྤྲུལ་པའང་ཡེ་ཤེས་ཉིད་དུ་གནས། །འཁོར་བའི་ཉོན་མོངས་ལས་འདས་ནས། །མི་རྟོག་ཡེ་ཤེས་མེ་ཕུང་ལ། །གསང་བའི་བདག་ཉིད་ལེགས་པར་བཞུགས། །རྣམ་གྲོལ་རྣམ་དག་གྲོལ་བའི་རྒྱུ། །སྔགས་དབྱིབས་ཆོས་བདག་དོན་རྣལ་འབྱོར། །སྐད་ཅིག་སྐད་ཅིག་ཡེ་ཤེས་ལས། །སྒྱུ་མ་ལྟ་བུའི་སྒྱུ་མའི་སྐུ། །སྒྱུ་མ་ཉིད་ལ་རྣམ་གྲོལ་ཚེ། །ཀྱེ་ཀྱེ་ཧ་ཧ་དཔའ་བོ་ཆེ། །ཀླུ་ཡི་སྒྲར་གྱུར་འཇིགས་བྱེད་པོས། །གསང་བའི་བདག་པོ་རྡོ་རྗེ་ཅན། །ཉོན་མོངས་ལས་རྒྱལ་འཇིགས་སུ་རུང ། །དབང་ཕྱུག་ཁམས་གསུམ་ལས་རྒྱལ་བའི། །དེ་བས་བརྩོན་ལྡན་གང་ཡིན་དེས། །ཤིན་ཏུ་སྒྲུབ་པས་བསྒྲུབ་པར་བྱ། །བསྟན་པའི་ཡིད་སོས་པར་བྱེད་པས། །རྒྱལ་བ་གསང་བའི་བདག་པོའོ། །དེ་ནས་གསང་བའི་བདག་པོ་ཉིད་དངོས་གྲུབ་ངེས་པར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་དང་གསུང་དང་ཐུགས་རྣམ་པར་དག་པའི་རྡོ་རྗེ་ལས་བྱུང་བ། ཨོཾ་བཛྲ་པཱཎི་སརྦ་ཨརྠ་སིདྷྷི་ཀུ་རུ་ཀུ་རུ་སཝཱཧཱ། ལྷ་ཀླུ་མི་མིན་དྲི་ཟ་ 209b འམ། །ཡང་ན་མི་ཡི་བུ་མོ་ཡི། །དཔྲལ་བར་ཐིག་ལེ་བྲིས་ནས་ནི། །ལག་ཏུ་ལྕགས་ཀྱུ་ཐོགས་ལ་བཞག་།དཀྱིལ་འཁོར་གྲུ་བཞི་ལྷམ་པ་ལ། །བརྟེན་ནས་བུམ་པས་བསྒྲུབ་པར་བྱ། །རྣམ་པར་རྒྱལ་བའི་བུམ་པ་ནི། །སྨན་ལ་སོགས་པས་ལེགས་བཀང་ནས། །རས་ཀྱིས་དཀྲིས་ལ་གཞག་པར་བྱ། །རྒྱུན་དུ་དེ་ལས་བསྒྲུབས་གྱུར་ན། །ཞི་དང་རྒྱས་སོགས་དངོས་གྲུབ་དང ། །གཞན་ཡང་དངོས་གྲུབ་འགྲུབ་པར་འགྱུར། །དེ་ནས་ཡང་གསང་བའི་བདག་པོ་མི་འ་གྱུར་བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དུག་ཐམས་ཅད་ཞི་བར་བྱེད་པའི་སྔགས་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ཡང་དག་པ་ལས་ངེས་པར་ཕྱུང་ངོ ། །ོཾ་ན་གུ་ནཱ་གེ་པྲོ་ཏཾ་ག་མ་ཎི། ཙ་ར་པོ་རཾ་ཡ་རཱ་པཱ་ར་ཧྱཻ་ཧ་རི་ནཾ་བྲཾ། རིན་ཆེན་སྣོད་དུ་ཆུ་བླུགས་ནས། ། སྔགས་ཀྱི་རྒྱལ་པོ་འདི་ལ་ནི། །བརྒྱ་ནས་ཇི་སྲིད་སྟོང་གི་བར། །བརྗོད་ན་འགྲོ་བའི་དུག་ནད་སེལ། །གཞན་ཡང་གསང་སྔགས་རྒྱལ་པོ་ནི། །གསང་བའི་བདག་པོ་སྦྱོར་བ་དང ། །བཅས་པས་མང་དུ་བརྗོད་བྱས་ན། །སྒྲུབ་པ་ཅི་ཡང་འགྲུབ་པར་འགྱུར། །ཟླ་བ་སྤྱང་ཀིས་བཟུང་དུས་དབྲལ་བར་གོར་ཙ་ནས་ཐིག་ལེ་བྱས་ཏེ་ཁ་ཤར་ཕྱོགས་སུ་གྱུར་ནས་གསང་སྔགས་འདི་བརྗོད་ན། ཅི་འདོད་པ་དབང་དུ་བྱེད་དོ། །ཡང་ཟླ་བའམ་ཉི་མ་གཟས་བཟུང་བའི་ཚེ་ཀླུའི་གན་ནས་མི་ཁྲག་གིས་ལུས་བྱུགས་ཏེ་བསྔགས་འདི་བརྗོད་ན། ཀླུ་ཐམས་ཅད་དབང་དུ་འགྱུར་རོ།། 210a ༄#། །འདི་ལ་ཐེ་ཚོམ་མེད་དོ། །གཞན་ཡང་སྦྱོར་བ་བཤད་བྱ་བ། །གུར་གུམ་དང་ནི་གི་ཝང་གིས། །རྩིབས་བརྒྱད་པ་ཡི་འཁོར་ལོ་ལ། །དང་པོའི་སྔགས་བཞི་ངག་དང་ནི། །ཐ་མའི་སྔགས་རྣམས་བྲི་བར་བྱ། །མུ་ཁྱུད་གཉིས་ལ་རྩ་བ་ཡིས། །གསང་སྔགས་རྒྱལ་པོ་རིམ་གྱིས་བྲི། །རིན་ཆེན་སྣོད་བཞག་མཆོད་བྱས་ནས། །གསང་སྔགས་སྟོང་སོགས་བརྗོད་ནས་ནི། །རྒྱལ་མཚན་རྩེ་ལ་གདགས་པར་བྱ། །གཞན་གྱི་རིག་སྔགས་གཅོད་པར་བྱེད། །གལ་ཏེ་ཆར་པ་དབབ་པར་འདོད་ནས་སའི་དཀྱིལ་འཁོར་གྲུ་བཞི་པར་བྱས་ཏེ། དབུས་སུ་པདྨ་འདབ་མ་བརྒྱད་པ་བྲིས་ལ་དེའི་སྟེང་དུ་ཀླུའི་རྒྱལ་པོ་བརྒྱད་ཀྱི་གཟུགས་བྱས་ཏེ་བཞག་ལ་རང་ཉིད་ཁྲོ་བོ་གོས་སྔོན་པོ་ཅན་དུ་བྱས་ཏེ་སྨན་སྣ་ཚོགས་དང ། འོ་མ་དང ། འབྲས་ཅན་དང ། ཞོ་ལ་སོགས་པ་རྣམས་དང ། ཀ་ར་དང་བུ་རམ་ལ་སོགས་པས་མཆོད་ནས་གོས་དཀར་པོ་བགོས་ཏེ་ཧཱུཾ་འབྲུག་གི་སྒྲ་ལྟ་བུ་བརྗོད་པས་མགོ་འདྲེན་པའི་གསང་སྔགས་ཀྱི་རྒྱལ་པོ་བརྗོད་པས་ཆར་འབེབས་པར་བྱེད་དོ། །གལ་ཏེ་མི་འབེབས་ན། ཀླུ་རྣམས་བསྡིགས་པའི་ཕྱིར་དཀྱིལ་འཁོར་དེའི་སྟེང་དུ་ཁྲག་སྣ་ཚོགས་དང ། དུག་ཤིང་ལ་སོགས་པས་སྦྱིན་སྲེག་བྱའོ། །དེས་མྱུར་དུ་ཆར་འབེབས་པར་བྱེད་དོ། །གལ་ཏེ་ཆར་ཆེས་པའམ། སེར་བ་གཅོད་པར་འདོད་པས་ཉེར་ཤིང་དང་དུག་ཀ་ད་པའི་རྩ་བ་ལ་ཡི་གེ་བྲིས་ཏེ་དཀྱིལ་འཁོར་ 210b དཀར་པོའི་དབུས་སུ་བཙུགས་ལ་ཡུངས་ཀར་དང་ཐལ་བ་ལ་མང་དུ་བཟླས་པར་བྱའོ། །གལ་ཏེ་མི་འདོད་ན། བསྔགས་པ་ཙམ་གྱིས་ཀྱང་ངེས་པར་འབྱུང་ངོ ། །རྟའི་ཁྲག་དང་དུག་སྣ་ཚོགས་ཀྱིས་བརྒྱལ་བ་སོས་པར་བྱེད་དོ། །རླུང་ཞི་བར་འདོད་ན། དབང་ཕྱུག་གི་གོས་ལ་ཙ་ཏ་བ་ལ་རི་རྩེ་བས་སྔགས་བྲིས་ཏེ་དཀྱིལ་འཁོར་གྱི་སྟེང་དུ་བཞག་ནས་སྔགས་ཀྱི་རྒྱལ་པོ་སྟོང་ལ་སོགས་པ་ཅི་ནུས་པ་བརྗོད་ནས་ཁང་པའི་སྟེང་དུ་བཞག་ན་རླུང་ཞི་བར་བྱེད་དོ། །གལ་ཏེ་ཡམས་ཞི་བར་འདོད་པས་གུར་གུམ་དང ། གི་ཝང་གི་རྩེ་མོ་བཅུ་གཉིས་པར་བྲིས་ནས་དང་པོའི་སྔགས་རྣམས་དང ། ཐ་མའི་སྔགས་རྩིབས་ལ་བྲིས་ཏེ། མུ་ཁྱུད་ལ་སྔགས་ལྷག་མ་བྲིས་ཏེ་མེ་ཏོག་དང་འབྲས་བུ་སེར་པོ་ཐམས་ཅད་མཆོད་ཅིང་གསོལ་བ་བཏབ་ནས་གཙུག་ལག་ཁང་གི་རྩེ་མོའམ། དགེ་འདུན་གྱི་འདུ་བའི་སྒོ་གོང་ལ་བཏགས་ན། ཅི་འདོད་པ་འགྲུབ་ཅིང་ནད་ཡམས་ཐམས་ཅད་འཆད་པར་འགྱུར་རོ། །གལ་ཏེ་བུ་འདོད་པས་སེའུ་སྐྱ་དམར་པོའི་གདོང་བུ་ལ་སྟེང་དུ་སྦྱིན་སྲེག་བྱས་ན་བུ་སྟེར་བར་ངེས་སོ། །གལ་ཏེ་གཏེར་འདོད་པས་སའམ། རིན་པོ་ཆེར་རྣམ་ཐོས་སྲས་ཀྱི་གཟུགས་ཁྲུ་གང་པ་བྱས་ནས་རིན་པོ་ཆེའམ་སྤང་ལེབ་ཀྱི་སྟེང་དུ་བཞག་ནས་མཆོད་པ་རྣམ་པ་སྣ་ཚོགས་ཕུལ་ནས་གསོལ་བ་བཏབ་ན། ཞག་བདུན་ནས་རིན་པོ་ཆེ་སྟེར་བར་བྱེད་དོ། །གལ་ཏེ་ཤི་བར་དོགས་པས་དཀྱིལ་འཁོར་ཁྲུ་གང་ཟླུམ་པོ་ 211a ༄#། །སེར་པོར་བྱས་ནས་དབུས་སུ་བུམ་པ་ལེགས་པར་བཞག་པའི་ནང་དུ་སྨན་སྣ་ཚོག་བླུགས་ནས་རས་དཀར་པོས་ཁ་བཀབ་པར་བྱས་ཏེ་གསང་སྔགས་ཀྱི་རྒྱལ་པོ་མང་པོ་བརྗོད་ནས་ཕྱིས་བུམ་པ་ལ་དངོས་གྲུབ་བླངས་ན། ཅི་འདོད་པ་འགྲུབ་བོ། །དེ་ལྟར་ཡང་ཡང་བྱས་པས་ཚེའི་དངོས་གྲུབ་ཐོབ་པར་འགྱུར་རོ། །གལ་ཏེ་མཆོག་གྲུབ་པར་འདོད་པས་སའམ་རིན་པོ་ཆེ་ལ་ཕྱག་ན་རྡོ་རྗེ་ཞལ་གཅིག་ཕྱག་གཉིས་པ་གདན་པདྨ་དང་ཉི་མ་ལ་གནས་པར་བྱས་ནས་དེ་རིན་པོ་ཆེའི་སྣོད་དུ་བཞག་ལ་མཎྜལ་དཀར་པོ་ཁྲུ་གང་བ་བྱས་པའི་སྟེང་དུ་ཁྲིའུའི་སྟེང་དུ་བཞག་ལ་མེ་ཏོག་དང་གོས་དཀར་པོས་མཆོད་ཅིང་ཙནྡན་དཀར་པོའི་ཆུས་ཅི་ནུས་པར་བྱེད་ཅིང ། ཡང་ཚེས་བརྒྱད་དང ། བཅུ་བཞི་དང ། བཅོ་ལྔ་དང ། གནམ་སྟོང་ལ་དེའི་དུས་སུ་སྨྱུང་བ་བྱས་ནས་ཕྱིས་ནི། བརྒྱད་སྟོང་གི་གྲངས་སུ་གསང་སྔགས་འདོན་པར་བྱེད་ཅིང་རང་ཉིད་ཀྱི་སྤྱི་བོར་ཡི་གེ་ཨ་དཀར་པོ་འོད་དང་ལྡན་པས་བདུད་རྩིའི་ཆུ་འབབས་པར་བསམས་པས་ཁམས་གསུམ་པའི་ནད་ཐམས་ཅད་ཟད་པར་བསམ་ཞིང ། སླར་དང་ཉིད་ལ་རིམ་གྱིས་ཞུ་བར་བྱེད་པ་ནི། རྒྱུད་ལས་གྲུབ་པའི་བསམ་གཏན་ཏེ། འདི་གོམས་པས་གང་དང་གང་འདོད་པ་ཐམས་ཅད་འགྲུབ་ཅིང་ཁམས་གསུམ་གྱི་དབང་ཕྱུག་ཏུ་འགྱུར་རོ། །གསང་བའི་བདག་པོ་ང་ལ་ཉོན། །འཇིག་རྟེན་ཀུན་ལས་རྣམ་རྒྱལ་ 211b པའི། །སྐུ་ནི་སངས་རྒྱས་ཀུན་བདག་ཉིད། །གང་གིས་བགོས་པར་གྱུར་པ་ལས། །ཅི་འདོད་རྙེད་པར་བྱེད་པ་མཆོག་།གལ་ཏེ་རྟོག་མེད་དྲི་བྲལ་ན། །ཡེ་ཤེས་ཉིད་ནི་བླ་ན་མེད། །རྒྱལ་བའི་སྟོབས་ཀྱིས་རྟོགས་པར་བྱེད། །ཉོན་མོངས་ཀུན་ལས་རྒྱལ་བྱེད་ཅིང ། །ནད་རྣམས་ཐམས་ཅད་ཟད་བྱེད་ཅིང ། །གལ་ཏེ་ནད་མེད་ནད་བཅས་བྱེད། །དབང་དང་རེངས་དང་དགུག་པ་དང ། །བརྒྱལ་དང་བསད་དང་དབང་ཕྱུག་དང ། །ཞི་དང་སྲུང་དང་དཔལ་བྱེད་དང ། །ཕྱིར་རྒོལ་བ་རྣམས་བརླག་པ་ཡི། །ཕྲ་མོ་འགྲུབ་པ་སྨོས་ཅི་དགོས། །འཇིག་རྟེན་ལས་གྲོལ་བདེ་བའི་ལུས། །རྒྱལ་བའི་གསུང་གིས་ལེགས་ཐོབ་བོ། །སྐུ་ནི་འདིར་བརྗོད་མེད་པས་ཏེ། །སྤྱོད་ཚུལ་རྣམས་ལས་འདས་པའོ། །མིང་དང་ཚོགས་རྣམས་ལས་འདས་ན། །ཉེར་ཞི་སྤྲོས་ལས་ཤིན་ཏུ་འདས། །ཚིག་གི་ཡུལ་ནི་རྣམ་པར་བྲལ། །རྡོ་རྗེ་སྒོ་ལ་དེ་དག་ནི། །ཇི་བཞིན་དོན་ནི་ཤེས་འགྱུར་གྱི། །གཞན་དུ་བསྐལ་པ་སྟོང་དུ་ཡང ། །ཅིས་ཀྱང་ཤེས་པར་ག་ལ་ནུས། །གལ་ཏེ་དམིགས་པ་ཟད་འདོད་པས། །མི་དམིགས་སྤྲོས་མེད་གང་ཞིག་ལ། །རང་གི་སེམས་ཉིད་གཞག་པར་བྱ། །དེ་ལ་ཐར་པས་གྲོལ་བའོ། །གལ་ཏེ་དགའ་འགྱུར་ཡིད་ཡོད་ན། །དངོས་འདི་ཤེས་པས་ཅི་སྟེ་སྟོང ། །དེ་སྟོང་སྤྲོས་དང་བྲལ་བ་ལ། །ཤེས་པ་ཉིད་ནི་ཅི་ལ་བརྟེན། །གསང་སྔགས་དྲག་པོའི་སྦྱོར་པ་འདི། །དབང་བསྐུར་སྣང་བ་མེད་པ་དང ། །ཚུལ་ངན་ལ་ཚོ་ཕྲ་བ་དང ། །ང་རྒྱལ་དྲེགས་ཤིང་ 212a ༄#། །ཁེངས་པ་དང ། །ཐེག་པ་ཆེ་ལམ་མོས་ལ། །ཡི་གེ་ཙམ་ཡང་བསྟན་པ་མིན། །གལ་ཏེ་བརྒྱ་ལམ་རྨོངས་པ་འགས། །བསྟན་ན་རང་ཉིད་ཕུང་བར་བྱེད། །དེ་སྐད་དུ་ཁམས་གསུམ་ལས་རྣམ་པར་རྒྱལ་བ་ཞེས་བྱ་བའི་འོད་ཟེར་དེ་སླར་རང་གི་ཐུགས་ཀར་བསྡུས་ནས་ཞལ་ཐམས་ཅད་ཞལ་ལ་ཐིམ་ཞིང་ཕྱག་ཐམས་ཅད་ཕྱག་ལ་ཐིམ་ནས་ཞལ་གཅིག་ཕྱག་གཉིས་པར་གྱུར་ཏེ་ཧཱུཾ་ཧཱུཾ་ཧཱུཾ་ཞེས་པའི་གླུ་བླངས་སོ། །འདི་ལ་ཇི་ལྟར་དམིགས་བྱས་བཞིན། །ལྷ་རྣམས་ཀུན་ལ་དམིགས་པར་འགྱུར། །གསང་སྔགས་འབུམ་དུ་བརྗོད་བྱས་ན། །བསྙེན་པའི་དམ་པ་འདི་འགྲུབ་བོ། །འདས་དང་མ་འདས་འོང་འགྱུར་བའི། །སངས་རྒྱས་རྣམས་ཀྱིས་སྔགས་འདི་བཤད། །འདི་ནི་སངས་རྒྱས་ཀུན་གྱི་གསང ། ། ཡེ་ཤེས་ཆེན་པོས་ཞེས་བརྗོད་དོ། །དེ་ནས་འཁོར་དེ་དག་ཐམས་ཅད་ནི། །གཙོ་བོའི་ཐུགས་ཀར་ཐིམ་པར་གྱུར་ཏོ། །ཀཝ་ཡེ་རྡོ་རྗེ་ཆེན་པོ་ནི། །ལག་ན་རྡོ་རྗེ་སྟོབས་པོ་ཆེ། །དུས་གསུམ་སངས་རྒྱས་ཐམས་ཅད་ཀྱི། །གསང་བའི་མཛོད་འཛིན་གྱུར་པའོ། །བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་གྱི་རྡོ་རྗེ་གདེངས་པའི་རྒྱུད་ལས། ཁམས་གསུམ་རྣམ་པར་རྒྱལ་བ་ཞེས་བྱ་བའི་ལེའུ་རྫོགས་སོ།། །།པཎྜི་ཏ་ཨ་ཌ་ཡ་ཤྲཱི་མ་ཏི་ཞེས་བྱ་བ་དང ། བོད་ཀྱི་ལོཙྪ་བ་བནྡྷེ་ཆོས་ཀྱི་དབང་ཕྱུག་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་ 212b པའོ།། |