rKTs


H418

(e-text produced by ACIP)

see text in transliteration
105b
རྒྱ་གར་སྐད་དུ། སིནྡྷ་བྱ་ཀ་ར་ཎ་ནཱ་མ་ཏནྟྲ། བོད་སྐད་དུ།་དགོངས་པ་ལུང་སྟོན་པ་ཞེས་བྱ་བའི་རྒྱུད། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ཉིད་འདི་སྐད་བདག་གིས་ཐོས། །ཤིན་ཏུ་གསང་བའི་དུས་གཅིག་ན། །གསང་གཙོ་རྡོ་རྗེ་བཅོམ་ལྡན་འདས། །དམ་ཚིག་མཆོག་ནི་རྡོ་རྗེ་གསུམ། །དེ་བཞིན་གཤེགས་ཀུན་ཡེ་ཤེས་ནི། །ཡོན་ཏན་ཕུན་ཚོགས་བསམ་མི་ཁྱབ། །ཡོད་མེད་མཐའ་གཉིས་ལས་འདས་པས། །གནས་མེད་པ་ལ་གནས་ཞེས་བྱ། །ནམ་མཁའ་རང་བཞིན་གཅིག་པ་འདིར། །ཀུན་མཁྱེན་ཡེ་ཤེས་རྣམ་སྒོམ་པ། །འགྲོ་སྙིང་རྣམ་དག་ཅེས་བྱ་ལ། །ཐུབ་པ་ཆེན་པོ་བཞུགས་པ་ཡིན། །མ་རིག་པ་དང་འདུ་བྱེད་དང ། །རྣམ་པར་ཤེས་དང་མིང་དང་གཟུགས། །སྐྱེ་མཆེད་དྲུག་དང་རེག་པ་དང ། །ཚོར་བ་དང་ནི་སྲེད་པ་དང། །ཉེར་ལེན་སྲིད་པ་སྐྱེ་བ་དང ། །རྒ་ཤི་ཞེས་བྱ་རིག་མ་ཡིན། །ང་རྒྱལ་ཆེ་བའི་ང་རྒྱལ་དང ། །ངའོ་སྙམ་ང་རྒྱལ་མངོན་ང་རྒྱལ། །གཞན་ཡང་ང་རྒྱལ་ལས་ང་རྒྱལ། །ཅུང་ཟད་ང་རྒྱལ་ལོག་པར་བཅས། །འདི་དག་རྡོ་རྗེ་མཐའ་ཅན་མཆོག་།བྱང་ཆུབ་སེམས་དཔའ་དེ་བཞིན་གཤེགས། །དེ་རྣམས་བརྗོད་མི་ལང་བའི་གྲངས། །བརྗོད་ཀྱིས་
106a
༄#། །ལང་ཉིད་དུ་གྱུར། །སངས་རྒྱས་ཞིང་ནི་གྲངས་མེད་པའི། །རི་རབ་རྡུལ་ཕྲན་གྲངས་མཉམ་པ། །བྱང་ཆུབ་སེམས་དཔའ་སེམས་དཔའ་ཆེ། །ཏིལ་གྱི་གང་བུ་མཚུངས་པ་དང ། །དེ་བཞིན་གཤེགས་པ་རྣམས་ཀྱིས་ཀྱང ། །ནམ་མཁའི་ཁམས་ཀུན་གང་བར་སྣང ། །དེ་ནས་དཔལ་ལྡན་རྣམ་སྣང་མཛད། །སྐུ་གསུང་ཐུགས་ཀྱི་རྡོ་རྗེ་ཅན། །འཁོར་གྱི་དཀྱིལ་འཁོར་ལ་གཟིགས་ནས། །དེ་ཉིད་གསུམ་སྐྱེས་སྐུར་མཛད་དོ། །ཚངས་པ་ཁྱབ་འཇུག་ལྷ་ཆེན་དང ། །འདོད་དང་རིག་བྱེད་དེ་བཞིན་ཟུང ། ། ཚངས་ལྷ་དེ་བཞིན་ཟླ་བ་སྟེ། །ཕུང་པོ་ལ་སོགས་གྲངས་དང་མཉམ། །སྒྲ་སྒྲོག་དེ་བཞིན་དགའ་བྱེད་དང ། །སྐྱ་བསེང་སྐེམ་བྱེད་ཐུབ་པ་དང ། །སྣ་ཡོན་དང་ནི་དཀོན་མཆོག་གསུམ། །དེ་བཞིན་གཤེགས་ཀུན་གཅིག་པུ་ཉིད། །དེ་ཚེ་ཕྱུང་ལ་གསོལ་བ་ཡི། །གསང་སྔགས་གསུངས་པ་དང་པོ་ཉིད། །ཐུབ་ཆེན་བྱང་ཆུབ་སེམས་ཚུལ་དུ། །མཛད་པ་གཉིས་པ་ཡིན་པར་བཤད། །རྣམ་ལྔ་མངོན་པར་བྱང་ཆུབ་པའི། །ཕྲ་མོ་རྣལ་འབྱོར་གསུམ་པ་ཡིན། །དབང་བསྐུར་བ་ནི་རྣམ་པ་བཞི། །གཟུགས་ཀྱི་དཀྱིལ་འཁོར་ཉིད་བཞི་པ། ། སྲུང་བའི་བསླབ་གཞི་རྣམ་བཞི་དང ། །སྤྱོད་པའང་འདིར་ནི་ལྔ་པ་སྟེ། །དྲུག་པ་རང་སངས་རྒྱས་ཉིད་ཀྱི། །ཏིང་འཛིན་ཕྲ་མོའི་རྣལ་འབྱོར་རོ། །བདུན་པ་དེ་ཉིད་མཆོད་པར་བཤད།
106b
གསང་བའི་དབང་དུ་གཙོ་བོས་མཛད། །ཕྱག་རྒྱས་དབང་བསྐུར་བརྒྱད་པ་བསྟན། །དམ་ཚིག་བཞི་པ་དགུ་པ་ཡིན། །རྣམ་པ་བཅུར་ཕྱེ་ཡང་དག་རྟོག། བཟླས་པའི་སྔགས་ཀྱང་གསུངས་པ་ཡིན། །བཅུ་གཅིག་མིང་དུ་བྱུང་བ་ན། །ཕྱག་རྒྱས་གཅིག་པར་བཤད་དཀྱིལ་འཁོར། །བཅུ་གཉིས་པ་ཡི་བདག་ཉིད་སྐུ། །ཉན་ཐོས་བྱང་ཆུབ་སྟོན་པར་མཛད། །དེ་བཞིན་རིག་པ་སྤྱོད་གྲུབ་པ། །མངོན་ཤེས་ལྔ་ནི་བཅུ་གསུམ་པ། །བཅུ་དང་བཞི་པར་བཞི་པོ་དང ། །ཕྲེང་སྔགས་བླ་མ་སྟོན་པར་མཛད། །ཕྱོགས་དང་སྐྱ་བསེང་ཉིད་འགྱུར་བ། །དངོས་གྲུབ་དཀྱིལ་འཁོར་བླ་མེད་པའོ། །སྒྲ་སྒྲོག་དུས་དང་ཡང་དག་ལྡན། །དཀྱིལ་འཁོར་རྡུལ་ཚོན་ལྡན་པ་འོ། །སློབ་མ་དབང་བསྐུར་ཉི་ཟླ་དག་།ཆགས་བྲལ་སྣ་ཚོགས་ཉིད་གྱུར་པ། ། སྣ་ཚོགས་ཚིག་གི་དོན་གྱི་བརྡ། །སྣ་ཚོགས་མིང་ཅན་མིང་གཅིག་པུ། །དེ་ལྟར་རྣམ་པ་སྣ་ཚོགས་པའི། །སོ་སོར་སྡུད་པ་རབ་ཏུ་བསྟན། །གཅིག་དང་དུ་མ་ལས་གྲོལ་བ། །ཡང་དག་མཐོང་ནས་ཡོངས་སུ་སྒོམ། །ཡོངས་སུ་བསྒོམས་པར་གྱུར་པའི་བདག་།རྟེན་འབྲེལ་དུ་ཡང་བསྟན་པར་བྱ། །དེ་ནས་མ་སྐྱེས་སྦྱོར་བ་ལ། །ཐུབ་པ་རྣམ་པར་སྣང་མཛད་ཆེ། ། རྟེན་འབྲེལ་ཡན་ལག་བཅུ་གཉིས་པའི། །ཏིང་འཛིན་དེ་འོག་སྟོན་པར་མཛད། །འདོད་པའི་ཡན་ལག་འགྲོ་བའི་ཚོགས། །གཉིས་པ་ཐམས་ཅད་དེ་བཞིན་གཤེགས། །འདོད་
107a
༄#། །ཆགས་ཆེ་ཚུལ་ཞེས་བྱ་བའི། །ཏིང་ངེ་འཛིན་ལ་སྙོམས་པར་ཞུགས། །དེ་བཞིན་གཤེགས་ཀུན་གཙོ་བོ་ཡི། །རང་གི་སྐུ་ལ་ཞུགས་པར་མཛད། །བྱང་ཆུབ་སེམས་དཔའ་སེམས་དཔའ་ཆེ། །རྒྱུན་དེ་ལ་ནི་སྦྱོར་བར་གྱུར། །དེ་ནས་དེ་བཞིན་གཤེགས་ཀུན་དང ། །དེ་བཞིན་བྱང་ཆུབ་སེམས་དཔའ་རྣམས། །དེ་བཞིན་གཤེགས་བདག་མཉེས་བྱའི་ཕྱིར། །དེ་རྣམས་ཞུགས་ནས་བྱུང་གྱུར་པ། །སྲོག་དང་གྱེན་རྒྱུ་ཐུར་སེལ་དང ། །མཉམ་གནས་ཁྱབ་བྱེད་ཅེས་བྱ་དང ། །ཀླུ་དང་རུས་སྦལ་རྩངས་པ་དང ། ། ལྷ་སྦྱིན་གཞུ་རྒྱལ་ཞེས་བྱ་བ། །འདི་དག་ཏུ་ནི་ཉིད་སྐུ་མཛད། །བུད་མེད་གཟུགས་སུ་སླར་སྤྲུལ་ཏེ། །རང་གི་ངོ་བོ་ཇི་བཞིན་དུ། །དེ་ཡི་སྐུ་ལས་བྱུང་བར་གྱུར། །དེ་ཉིད་གསུམ་ནི་མཉམ་སྦྱོར་ལས། །རང་གི་གསང་སྔགས་དེ་དག་སྒོམ། །ཡན་ལག་ཀུན་ལས་ངེས་གྲོལ་ཞིང ། །ཤིན་ཏུ་ཕྲ་བ་ཉིད་དུ་གྱུར། །དབུ་གོས་མིང་ལས་བྱུང་བ་ནི། །ཞི་གནས་དང་ནི་ལྷག་མཐོང་སྟེ། །དངོས་མེད་ངོ་བོ་ཉིད་ཡིན་པས། །རང་ཉིད་ཀྱང་ནི་མི་ཤེས་སོ། །འོན་ཀྱང་འདི་ལྟར་ཐུབ་པ་ལ། །དེ་བཞིན་གཤེགས་རྣམས་གསོལ་བ་འདེབས། །བཅོམ་ལྡན་དགོངས་པ་ལུང་བསྟན་པ། །ཆོས་ཀྱི་མཆོག་ནི་བསྟན་དུ་གསོལ། །ཁྱབ་བདག་ཁྱེད་ནི་ཆོས་འདི་རྣམས། །དངོས་མེད་ཉིད་ནི་ཐུགས་སུ་ཆུད། །འགྲོ་བའི་དོན་ནི་རབ་
107b
གྲུབ་པས། །ཡིད་བཞིན་ནོར་བུ་ལྟ་བུར་མཛེས། །གང་ཞིག་ཡང་དག་ཤེས་གྱུར་ན། །འཇིག་རྟེན་པ་དང་རྩོད་མེད་ཅིང ། །དེ་བཞིན་འཇིག་རྟེན་འདས་པ་དང ། །འཇིག་རྟེན་ཤིན་ཏུ་འདས་དེ་བཞིན། །གང་འདི་ཞི་བ་ཉིད་ཀྱི་ཆོས། །ཞི་གནས་ཤིན་ཏུ་སྔོན་འགྲོ་བ། །བྱང་ཆུབ་སེམས་དཔའ་ཐོས་ན་ཡང ། །དེ་བཞིན་ཉིད་ཀྱི་བདེ་བ་བྱེད། །དེ་ནས་ས་སྙིང་ལ་སོགས་པའི། །བྱང་ཆུབ་སེམས་དཔའ་སེམས་དཔའ་ཆེ། །མགོན་པོ་རྣམ་སྣང་ཆེན་པོ་ལ། །དེ་དག་གིས་ནི་ཞུས་གྱུར་པ། །གང་ཤེས་བླ་མེད་བྱང་ཆུབ་ནི། །མ་འོངས་སྐྱེ་བོས་ཐོས་འགྱུར་བའི། །གསང་སྔགས་དེ་ཉིད་དོན་འབྱུང་བ། །རྣལ་འབྱོར་བཅོམ་ལྡན་བཤད་དུ་གསོལ། །ལན་གཉིས་གསོལ་ཀྱང་མགོན་པོ་ནི། །མི་གསུང་བར་ནི་རྣམ་པར་བཞུགས། །རྡོ་རྗེ་ཅན་གྱིས་དེ་ཤེས་ནས། །དེ་ནས་སླར་ཡང་ཞུས་པར་གྱུར། །གང་འདི་ཞི་གནས་ལ་སོགས་པའི། །རྣལ་འབྱོར་ཟབ་མོ་བླ་མེད་པ། །དེ་ནི་འདི་ལྟར་བསྔགས་པས་བསྔགས། །འཚལ་འགྱུར་དེ་ནི་གཙོ་བོས་གསུངས། །བྱ་བ་དག་བྱའི་རྣལ་འབྱོར་དང ། །རྣལ་འབྱོར་འབའ་ཞིག་པ་ཉིད་དང ། །ལུང་ནི་ཡང་དག་གང་ཡིན་པ། །དེ་ནི་བསྟན་པར་མཛད་པའི་རིགས། ། ཞུས་པའི་དོན་ནི་མཁྱེན་ནས་ནི། །བཅོམ་ལྡན་རྡོ་རྗེ་ཅན་གྱིས་གསུངས། །གསང་སྔགས་ཚུལ་ནི་མཆོག་གྱུར་འདི། །གསང་བ་ཁྱོད་ལ་བསྟན་པར་བྱ། །འདི་སྐད་ཅེས་བྱའི་
108a
༄#། །གསང་སྔགས་ཆེ། །གསང་སྔགས་ཀུན་དོན་སྔར་སྟེར་བའོ། །དེར་ནི་ལྔ་ཡི་བདག་གྱུར་ཅིང ། །སྦྱོར་བ་བཞི་དང་བཅུ་ཡི་བདག་།ལྔ་པ་ལྔ་པོའི་མིང་འདི་ནི། ། གསལ་དང་མི་གསལ་དག་ཏུ་སྦྱར། །རྒྱ་མངོན་ཕྱོགས་པའི་སྦྱོར་བཤད་པ། །དཀྱིལ་འཁོར་ལྔ་ཡིས་བརྒྱན་པ་ཡིན། །བཅུ་བདུན་ཞེས་ནི་བཤད་པ་འདིའི། །གསུངས་པའི་དོན་དེ་མ་ཤེས་པས། །སྔགས་པས་གསང་སྔགས་སྦྱོར་བ་དག་།དེ་ཚེ་ཇི་ལྟར་བྱེད་པར་འགྱུར། །དོན་འདི་རྟོགས་པར་གྱུར་ནས་ནི། །སྣ་ཚོགས་དོན་ནི་སྟོན་པ་དང ། །འགྲོ་བའི་དོན་ནི་རབ་སྒྲུབ་པ། །གསང་སྔགས་རིག་པ་མཆོག་རྣམས་བྱེད། །བདག་ནི་སྟོང་དང་ཡང་དག་སྦྱར། །ཡི་གེ་ཨ་ནི་སྟེང་དུ་གནས། །ཕྱི་མ་ཞེས་བྱ་གནས་བྱས་ལ། །སྔགས་པས་སེམས་ཅན་དོན་རྣམས་བྱ། །ཡི་གེ་ཨ་གཉིས་སྦྱོར་བ་གང ། ། སྒོ་ལས་སྐྱེས་ཉིད་དུ་འགྱུར། །སྟེང་འོག་ཕྱོགས་ཀྱི་རྣམ་པ་དེ། །དངོས་པོ་མེད་པའི་ངོ་བོ་ཉིད། །གང་ཞིག་འདི་ལས་གསུངས་པ་ནི། །བསམ་མི་ཁྱབ་པའི་ཐབས་ཆོས་ཉིད། །བདག་གིས་ཞེས་རྟོགས་དེ་འགྱུར་བ། །ཐོགས་མེད་རྟོགས་པ་འདི་གནས་སོ། །སྟོན་པ་པོ་དང་བསྟན་དང་གནས། །ཕྲ་རབ་ཙམ་གྱི་ངོ་བོ་མེད། །ཀུན་རྫོབ་དུས་གསུམ་སྦྱོར་གཅིག་ལ། །སྔགས་པ་རྣམས་ཀྱིས་ཐོས་དེ་འགྱུར། །ཤིན་ཏུ་གྲངས་མེད་བསྐལ་པ་རུ། །སངས་རྒྱས་
108b
རྣམས་ཀྱིས་གང་མཁྱེན་པ། །སྔགས་པ་རྣམས་ཀྱིས་དུས་གཅིག་ན། །སྐད་ཅིག་ལ་རྫོགས་བྱང་ཆུབ་ཐོབ། །ཀུན་མཁྱེན་ཀུན་རིག་ཐུགས་ཆུད་པ། །གསང་སྔགས་སྟོན་པའི་ཆོས་ཅན་ཏེ། །དེ་ཉིད་ཁོ་ན་བཅོམ་ལྡན་མཆོག་།སྐུ་གསུང་ཐུགས་རྡོ་རྗེ་ལས་སྐྱེས། །མི་རྟོག་ནམ་མཁའ་ཇི་བཞིན་དེ། །གསང་སྔགས་ཐམས་ཅད་ཉི་མ་འདྲ། །ས་ལ་རླུང་བཞིན་སྔགས་པ་ནི། །འདོད་པ་ཀུན་ལ་ཉེ་བར་སྤྱོད། །ཐམས་ཅད་འགྱུར་བ་གང་གང་ཡིན། །དེ་དེ་སྟོང་པ་ཉིད་དུ་འགྱུར། །དེ་བཞིན་སྦྱོར་བ་དེ་མཐོང་བས། །ཀུན་རིག་དེ་ནི་དེ་བཞིན་གཤེགས། ། དེ་བཞིན་ཉིད་གཟུགས་བརྙན་གྱུར་པ། །དེ་ནི་སྐུ་ཡི་རྡོ་རྗེར་གྱུར། །འགྲོ་བ་ཡང་དག་ཚིམ་པར་འབྱུང ། །མི་ཕྱེད་གསུང་གི་རྡོ་རྗེར་གྱུར། །ནམ་མཁའི་གནས་ཀྱི་སྦྱོར་བ་གང ། །བསམ་མི་ཁྱབ་པར་སྤྲོ་བདག་ཉིད། །དེ་ཉིད་ཡེ་ཤེས་རྒྱ་མཚོ་ལ། །ཐུགས་ཀྱི་རྡོ་རྗེ་ཡང་དག་འབྱུང ། །སེམས་ཅན་ཀུན་གྱི་སེམས་གང་ཡིན། །ནམ་མཁའ་ཡོངས་སུ་བརྟགས་པ་སྟེ། །དེ་ཡང་དེ་རུ་ཀུན་གནས་པས། །བུད་མེད་ཆོས་གཅིག་པུ་ཡི་གཟུགས། །སངས་རྒྱས་ཀུན་གྱིས་གང་བརྟེན་པ། །སར་གྱུར་དེ་ནི་བཅུ་གསུམ་པ། །དེ་ནི་བུད་མེད་ཅེས་བཤད་དེ། །དེ་བས་ཆོས་དེ་བྷ་ག་ཡིན། །བྱ་བ་ལ་སོགས་ཇི་སྐད་བཤད། །དམ་ཚིག་གསུམ་པོ་གཅིག་ཏུ་གྱུར། །དངོས་མེད་ཆོས་ཉིད་གཅིག་པུ་རུ། །འདི་ནི་དེ་དག་མཉམ་པར་འགྱུར། །དམ་
109a
༄#། །ཚིག་སྐུ་གསུང་ཐུགས་དང་ནི། །ཏིང་འཛིན་དེ་བཞིན་རྒྱལ་བ་དང ། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཉིད་དག་དང ། །གཟུགས་དང་སྒྲ་དང་དྲི་དང་རོ། །རེག་དང་དེ་བཞིན་ཆོས་ཀྱི་དབྱིངས། །འདི་རྣམས་རྡོ་རྗེའི་མཐའ་ཅན་བྱུང ། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་ལྟར་བརྗོད་མི་ལང་ཞེས་པ། །བརྗོད་མི་ལང་བ་ཉིད་གྱུར་རྣམས། །སངས་རྒྱས་ཞིང་གི་རི་རབ་ཀྱི། །རྡུལ་ཕྲན་གྱི་ནི་གྲངས་མཉམ་པའི། །བྱང་ཆུབ་སེམས་དཔའ་སེམས་ཆེན་དང ། །ནམ་མཁའ་མཉམ་པའི་དེ་བཞིན་གཤེགས། །མི་བསྐྱོད་རྣམ་སྣང་མཛད་རིན་ཆེན། །དཔག་མེད་ཚེ་དང་གདོན་མི་ཟ། །འདི་དག་ནམ་མཁའི་ཁམས་མཉམ་པའི། །རྡོ་རྗེ་སྙིང་པོ་དེ་བཞིན་གཤེགས། །དཔེར་ན་ཏིལ་འབྲུ་མཚུངས་པ་ཡི། །དེ་བཞིན་གཤེགས་པ་ཐམས་ཅད་ཀྱིས། །ནམ་མཁའི་ཁམས་ནི་ཡོངས་ཁེབས་པ། །དེ་རྣམས་དེར་ནི་ཡང་དག་སྣང ། །དེ་ནས་མགོན་པོ་རྣམ་སྣང་མཛད། །དེ་བཞིན་ཉིད་དང་གཅིག་ཏུ་གྱུར། །གང་ཡང་དམ་ཚིག་སྔོན་འགྲོ་དང ། །སྐུ་རྡོ་རྗེ་སོགས་མིང་ཅན་གྱིས། །བྱང་ཆུབ་སེམས་དཔའ་སེམས་ཆེན་དང ། །དོན་ཡོད་ཐམས་ཅད་དེ་བཞིན་གཤེགས། །འདི་རྣམས་སྐུ་ཡི་ཡན་ལག་གྲགས། །ཞི་གནས་བསམ་མི་ཁྱབ་ལས་བྱུང ། །མ་སྐྱེས་གཅིག་པུ་གཟིགས་པ་ནི། །འདོད་ཆགས་
109b
ཆེན་པོའི་ཚུལ་དུ་གྱུར། །འདོད་ཆགས་ཆེན་པོའི་ཚུལ་མཆོག་གི་གཏིང་ངེ་འཛིན་ལ་སྙོམས་ཞུགས་ཏེ། །དེ་བཞིན་གཤེགས་པ་ཀུན་གྱི་ཚོགས། །དེ་ནི་ཉིད་ཀྱི་སྐུ་ལ་བཅུག་།དེ་ནི་དེ་བཞིན་གཤེགས་པ་ཀུན། །དེ་ནི་རྣམ་པར་སྣང་མཛད་ཆེ། །འདི་ཉིད་མཉེས་པར་བྱ་བའི་ཕྱིར། །ཉིད་སྐུ་བུད་མེད་ཉིད་དུ་མཛད། །དེ་ནས་མགོན་པོ་བསམ་ཡས་ལས། །བུད་མེད་གཟུགས་སུ་བྱུང་བར་གྱུར། །དེ་ནི་སངས་རྒྱས་སྤྱན་འདྲ་དང ། །མཱ་མ་ཀཱི་འདྲ་སྦྱོར་བ་དང ། །གོས་དཀར་མོ་འདྲའི་གཟུགས་དང་ནི། །སྒྲོལ་མའི་གཟུགས་སུ་ཡང་དག་གནས། །སྒྲ་ཡི་ངོ་བོའི་གཟུགས་ཅན་དང ། །དྲི་ཡི་ངོ་བོའི་གཟུགས་དང་ནི། །དེ་བཞིན་རོ་ཡི་ངོ་བོའི་གཟུགས། །རེག་གི་ངོ་བོའི་གཟུགས་ཅན་དང ། །ལ་ལ་གཟུགས་ཀྱི་ངོ་བོ་ཡིས། །དེ་བཞིན་གཤེགས་པ་དེ་རྣམས་བཞུགས། །དེ་ནས་ཚུལ་གསུམ་དོན་གཅིག་དང ། །མི་བསྐྱོད་པ་ཡང་བསྟན་ཕྱིར་དང ། །འཇིག་རྟེན་རྒྱང་ཕན་གདུལ་དོན་དུ། །འཇིག་རྟེན་འདས་པའི་ཚུལ་བྱུང་ངོ ། ། གཉིས་མེད་མཉམ་པ་ཉིད་རྣལ་འབྱོར། །རྡོ་རྗེ་བུད་མེད་བྷ་ག་མཆོག་།དམ་ཚིག་ཆེན་པོའི་དཀྱིལ་འཁོར་དུ། །དེ་ནི་མི་བསྐྱོད་ཡང་དག་བྲི། །ཟུར་བཞི་པ་ལ་སྒོ་བཞི་པ། །སྦྱོར་བཞི་གཅིག་ཏུ་སྦྱོར་བ་ཉིད། །དྲི་མ་མེད་པར་བྱིན་བརླབས་པ། །ཀུན་ནས་ཤིན་ཏུ་གསལ་བའི་གཟུགས། །སངས་རྒྱས་སྤྲིན་གྱིས་ཀུན་ཏུ་ཁྱབ། །འབར་བ་མང་པོའི་རྣམ་པར་འཁྲུག་།གསལ་བ་ལ་
110a
༄#། །སོགས་དཀྱིལ་འཁོར་ལྡན། །དེ་བཞིན་གཤེགས་པ་ཀུན་གྱི་གནས། །དེ་ནས་དེ་ནི་བཅོམ་ལྡན་འདས། །དེ་བཞིན་གཤེགས་ཀུན་བདག་པོ་འདི། །དཀྱིལ་འཁོར་ཆེན་པོའི་དབུས་སུ་ཡང ། །རྣམ་པར་བཞག་སྟེ་བཞུགས་པར་གྱུར། །མི་བསྐྱོད་རིན་ཆེན་དཔག་མེད་དང ། །དོན་གྲུབ་རྣམ་སྣང་དེ་བཞིན་གཤེགས། །དེ་རྣམས་བྱང་ཆུབ་སེམས་རྡོ་རྗེའི། །ཐུགས་ལ་རྣམ་པར་བཞུགས་པར་གྱུར། །དེ་རྣམས་ཟིལ་གྱིས་མནན་པའི་ཕྱིར། །དེ་བཞིན་གཤེགས་པ་བྱང་ཆུབ་སེམས། །དངོས་མེད་ངོ་བོར་གཅིག་པར་ནི། །མཁའ་འདྲ་རྡོ་རྗེ་ལས་བྱུང་གཟིགས། །ཤེས་རབ་ཏིང་འཛིན་གཞི་གཅིག་པུ། །དེ་ནི་གྲིབ་མ་ལྟར་ཐུགས་ཆུད། །རྡོ་རྗེའི་རང་བཞིན་སྐུར་མཛད་ནས། །འགྲོ་དོན་མཉམ་དང་མི་མཉམ་མཛད། །ཇི་ལྟར་མཚམས་གནས་ཉི་མ་ཡིས། །འགྲོ་བ་གཉིད་ལོག་སད་པར་བྱེད། །དེ་བཞིན་དེ་བཞིན་གཤེགས་པ་ཀུན། །བྱང་ཆུབ་སེམས་ཀྱིས་སྲུང་བར་བྱེད།། སྐུ་གསུང་ཐུགས་ནི་རྡོ་རྗེ་གཅིག་།དེ་རྣམས་སྐྱེ་བར་བཞེད་པ་ཡིས། །བྱང་ཆུབ་སེམས་ཀྱི་ངོ་བོ་ཡིས། །རྡོ་རྗེའི་སྔགས་སུ་མཛད་པར་གྱུར། །རིག་པ་སྐྱེས་བུའི་གཟུགས་དག་ནི། །སྔགས་ཀྱིས་བྱིན་རླབས་བླ་ན་མེད། །དེར་ནི་ཞལ་གསུམ་པ་ལྟ་བུར། །དེ་བཞིན་གཤེགས་པ་ཀུན་གྱིས་གཟིགས། །དེ་ནས་མགོན་པོ་བཅོམ་ལྡན་གྱིས། །ཐུགས་
110b
རྗེས་བཞུགས་པ་ལས་བྱུང་སྟེ། །བྱང་ཆུབ་སེམས་ནི་རབ་བསྐོར་ལ། །ལན་གསུམ་ཆེད་དུ་བརྗོད་པ་མཛད། །བསམ་མི་ཁྱབ་ཅིང་དཔག་མེད་གང ། །དེ་བཞིན་གཤེགས་པ་ཀུན་གྱི་གསང ། །རྡོ་རྗེ་བྱང་ཆུབ་སེམས་གཅིག་ལས། །སྤྱོད་ཡུལ་དེར་ནི་གྱུར་པ་ཡིན། །དེ་ནས་གསང་ཚུལ་ཐོས་པ་དང ། །དེ་འོག་གསང་བའི་བདག་པོས་ནི། །ཁྱབ་བདག་རྣམ་པར་སྣང་མཛད་ལ། །ཇི་བཞིན་ཚུལ་དུ་དེ་བཏུད་ཞུས། །ཕུང་པོ་ཁམས་ལ་སོགས་པའི་ཆོས། །འདུས་ལ་གང་ཞིག་གནས་པའི་རྣམས། །རྟེན་འབྲེལ་ལས་སྐྱེས་ཡིན་པར་ནི། །ཁྱད་ཆོས་སྟོན་པར་མཛད་པས་ཁུམས། །དམན་པའི་ཆོས་རྣམས་འདི་དག་ནི། །ཞེ་སྡང་ལ་སོགས་རྐྱེན་དང་ལྡན། །འདི་དག་ཇི་ལྟར་བདེ་གཤེགས་དང ། །རྫུ་འཕྲུལ་ཆེན་པོ་རིགས་མ་ལགས།། བྱང་ཆུབ་སེམས་དཔའ་སེམས་ཆེན་དེ། །ལུས་ལ་སོགས་པ་ཇི་ལྟར་འགྱུར། །གང་ཞིག་ཕྱི་དུས་སྐྱེ་བོ་ཡིས། །འདི་དག་འཚལ་བར་མི་འགྱུར་རོ། །དེ་ནས་བཅོམ་ལྡན་རྡོ་རྗེ་ཅན། ། འོད་ཆེན་ལྡན་པས་བཀའ་སྩལ་པ། །མ་འོངས་སྐྱེ་བོ་མཐོང་ནས་ནི། །གང་ཞིག་ཁྱོད་ཀྱིས་ང་དྲིས་པ། །ལེགས་སོ་ལེགས་སོ་སེམས་དཔའ་ཆེ། །གསང་བའི་བདག་པོ་ཁྱོད་ལེགས་སོ། །སྨྲས་དོན་ཇི་ལྟ་ཇི་ལྟ་བར། །དེ་ལྟར་ཁྱོད་ལ་ལུང་བསྟན་བྱ། །མ་འོངས་དུས་ན་མི་རྣམས་ནི། །འཇིག་རྟེན་རྒྱང་ཕན་མཆོག་གཞོལ་འགྱུར། །ལོག་པར་ལྟ་བ་ལ་གནས་
111a
༄#། །ཏེ། །ཅི་དགའ་བར་ཡང་སྤྱོད་པར་བྱེད། །ལ་ལ་གླུ་དང་གར་ལ་དགའ། །དགོད་དང་སྒེག་ལ་མཆོག་ཏུ་གཞོལ། །དྲི་དང་ཕྲེང་བ་ལ་དགའ་ཞིང ། །དེ་བཞིན་འཁྲིག་པ་ལ་དགར་འགྱུར། །རྨོངས་པ་ལ་སྡང་བ་དང ། །དེ་བཞིན་གཏི་མུག་ལ་རབ་གཞོལ། །ལ་ལ་དེ་བཞིན་འདོད་ཆགས་ཞེན། །ཤེས་པ་གཞན་དག་འདོད་པར་འགྱུར། །ཉ་དང་ཤ་དང་དེ་བཞིན་ཆང ། །བཤང་གཅི་ཁུ་བ་ཁྲག་རྣམས་ནི། །སྐྱེས་བུ་གླེན་པ་ཟ་བྱེད་ཅིང ། །མེད་པར་སྨྲ་བ་ཆོས་སུ་སྒྲོག་།མ་དང་སྲིང་མོ་ལ་སོགས་པ། ། བགྲོད་མིན་ལ་ནི་བགྲོད་པ་དང ། །ཕ་དང་མ་ཡང་གསོད་པ་དང ། །དེ་བཞིན་སྲོག་ཆགས་གཞན་རྣམས་གསོད། །རྫུན་གྱི་ཚིག་ཉིད་སྨྲ་བ་དང ། །ཁྱད་པར་དུ་ཡང་བརྐུ་བ་དང ། ། གཞན་གྱི་ཆུང་མའི་ཐད་འགྲོ་ཞིང ། །སྨད་པ་གཞན་ཡང་བྱེད་པར་འགྱུར། །ལ་ལ་དམ་ཆོས་སྤོང་བ་དང ། །དེ་བཞིན་མཚམས་མེད་བྱེད་པ་སྟེ། །སྣ་ཚོགས་སྡིག་པ་བྱས་ནས་ཀྱང ། །སྔགས་པ་དངོས་གྲུབ་འདོད་པར་འགྱུར། །གཟེར་ནད་དུག་དང་སྦྱར་བའི་དུག་།སྣ་ཚོགས་ནད་ནི་མི་བཟད་པ། །འདི་རྣམས་ཀྱིས་ནི་གཟིར་གྱུར་ནས། །ཞི་བ་ཉིད་ནི་འདོད་པར་འགྱུར། །འདོར་བར་བྱེད་པ་རྨོངས་པ་དེ། །མི་བཟད་སྡིག་པ་བྱས་པ་དང ། །ལོག་པར་ལྟ་ལ་མཆོག་གཞོལ་རྣམས། །ངན་སོང་གསུམ་དུ་འགྲོ་བར་འགྱུར། །
111b
དེ་རྣམས་རྗེས་སུ་གཟུང་བའི་ཕྱིར། །གསང་བ་འདི་ལྟར་བསྟན་པ་ཡིན། །གང་ཞིག་ཡང་དག་ཐོབ་པ་ཉིད། །འདིར་ནི་དེ་བཞིན་གཤེགས་པར་འགྱུར། །གསང་བའི་བདག་པོ་མཁས་རྣམས་ཀྱིས། །ཚུལ་མཆོག་འདི་ནི་རྙེད་གྱུར་ནས། །དོན་གསལ་ཡང་དག་རྙེད་པ་དང ། །དེ་ཡང་ང་རྒྱལ་དག་ཏུ་ལྟུང ། །དེ་རྣམས་ཏིང་འཛིན་ཞི་ཉིད་དང ། །ཤེས་རབ་ཉིད་ཀྱང་ཤིན་ཏུ་རིང ། །རབ་ཏུ་དགའ་དང་ལྡན་པ་ཡིས། །རྣལ་འབྱོར་པ་ནི་བདག་ཉིད་ཅེས། །མངོན་པའི་ང་རྒྱལ་ལ་རྟག་དགའ། །སྒྱུ་དང་བཅོས་མའི་ཆོས་དང་ལྡན། །མྱ་ངན་འདས་དང་གཞན་འགྲོ་བ། །ཕན་ཚུན་དག་ནི་སུན་ཡང་འབྱིན། །གསང་སྔགས་སྨྲ་བ་ལ་བརྟེན་ནས། །གཅིག་ལ་གཅིག་ནི་རྩོད་པར་འགྱུར། །དེ་རྣམས་བདུད་ཀྱི་བྱིན་རླབས་ཀྱིས། །གལ་ཏེ་དངོས་གྲུབ་ཕྲ་ཐོབ་ན། །དེས་ནི་མངོན་པར་ང་རྒྱལ་བས། །མཁས་པ་སྙམ་དུ་ཤེས་པར་འགྱུར། །ཚོགས་པའི་ནང་དུ་རྩོད་པ་དང ། །ཁྱི་བཞིན་ཁ་ཟས་ལ་སྤྱོད་འགྱུར། །རང་ལས་འབྲས་ལས་བྱུང་བ་ཡི། །ཕན་པ་ལ་ནི་གནོད་པ་བྱེད། །དེ་རྣམས་དགེ་དང་མི་དགེ་རྣམས། །བདག་ཅག་རྣམས་ཀྱི་སྟོབས་ཡིན་ཟེར། །མངོན་སུམ་སངས་རྒྱས་འདྲ་བ་ཡི། །སློབ་དཔོན་སྨོད་ཅིང་བསྙེན་བཀུར་མེད། །སྐད་ཅིག་གཅིག་གིས་སྡང་བྱེད་ཅིང ། །དེ་ལ་སྐད་ཅིག་གིས་རྗེས་ཆགས། །ཁྱི་དང་ཕག་དང་ཁཝ་རྣམས་ཀྱི། །སྤྱོད་པ་དག་ནི་སྟོན་པར་བྱེད། །
112a
༄#། །དེ་རྣམས་ཕན་ཚུན་རྣམ་འཚེ་བར། །མངོན་པར་དགའ་བར་བྱེད་པར་འགྱུར། །གསང་བ་འདུས་པ་མི་ཤེས་པར། །དམ་ཚིག་ལ་སོགས་བྱེད་པར་འགྱུར། ། གསང་བ་སྲུང་བར་མི་བྱེད་པར། །ཐམས་ཅད་དུ་ནི་སྟོན་པར་བྱེད། །འཇིག་རྟེན་ལ་ནི་སྨད་བྱས་ནས། །གཞན་དག་ལ་ཡང་རབ་གསལ་བྱེད། །བདག་ཉིད་རྩ་བ་མེད་པར་ནི། །དམ་ཚིག་འདས་པར་བྱེད་པར་འགྱུར། །སྒྲ་བཅས་སྦྲོར་ལྡན་གྱིས་བསྐུལ་བས། །རང་ལ་རང་གི་གླགས་རྙེད་མེད། །དེ་ཉིད་ཡེ་ཤེས་འབྱུང་བ་ཡི། །ཏིང་འཛིན་དེ་ཡིས་ཤེས་མི་འགྱུར། །ཉེས་པ་ཅུང་ཟད་ཙམ་གྱི་ཕྱིར། །མངོན་སྤྱོད་རབ་ཏུ་བྱེད་པར་འགྱུར། །རྣལ་འབྱོར་རབ་སྦྱོར་དམན་པ་ཡི། །སྔགས་པ་རྣམས་ནི་འགྲུབ་མི་འགྱུར། །ཕྱི་རོལ་བསྟན་བཅོས་ལ་རྟག་དགའ། །དེ་ཡི་སྦྱོར་ལ་གཅིག་ཏུ་མཁས། །རང་གི་དམ་ཚིག་ཡོངས་སྤངས་ནས། །ལྕགས་ཀྱུ་མེད་པ་བཞིན་དུ་སྤྱོད། །སྔགས་དང་ཕྱག་རྒྱའི་སྦྱོར་བ་ཡིས། །དེ་རྣམས་འཚོ་བ་སྒྲུབ་པར་འགྱུར། །གང་དུ་རྙེད་པ་ཐོབ་འགྱུར་བར། །དམ་པའི་ཆོས་ནི་སྟོན་པར་བྱེད། །དེ་རྣམས་ཡང་དག་སྡུད་བྱེད་པའི། །གསང་བ་དགོངས་པས་བཤད་པ་ཡིན། །དམ་ཚིག་ཉམས་ཏེ་གནས་པ་རྣམས། །འདི་ཡིས་ཐམས་ཅད་དགུག་པར་བྱ། །དེ་དག་རྗེས་རིག་མི་ཤེས་ན། །དེ་རྣམས་ཞི་བར་ག་
112b
ལ་འགྱུར། །དེ་ནས་རྗེས་སུ་གཟུང་དོན་དུ། །ཚུལ་འདི་དག་ནི་གྱུར་པ་ཡིན། །དེ་ནས་བཅོམ་ལྡན་དེ་བཞིན་གཤེགས། །གཅིག་ཏུ་འདུས་པར་གྱུར་ནས་སུ། །དེ་བཞིན་གཤེགས་ཀུན་བདག་པོ་ལ། །རང་མཆོད་དེ་ཉིད་དམ་ཚིག་སྤྲིན། །ཡང་དག་འབྱུང་བས་ལེགས་མཆོད་དེ། །ཕྱག་འཚལ་ནས་ནི་འདི་སྐད་གསོལ། །དེ་བཞིན་གཤེགས་པ་གསང་བ་མཆོག། དེ་བཞིན་གཤེགས་པ་ཀུན་བསྡུས་པ། །འདུས་པ་གཉིས་མེད་རྣལ་འབྱོར་བའི། །ཉམས་དགའ་རྡོ་རྗེ་སྙིང་པོ་འདི། །དེ་ཉིད་བསྡུས་པ་རྣམས་ཀྱི་མཆོག་།དེ་ཉིད་བཅོམ་ལྡན་བཤད་དུ་གསོལ། །དེ་ནས་དེ་བཞིན་གཤེགས་ཀུན་ལ། །བཅོམ་ལྡན་འདས་ཀྱིས་སླར་གསུངས་པ། །གང་ཡང་འདི་ལྟར་གསོལ་འདེབས་པ། །དེ་བཞིན་གཤེགས་རྣམས་ལེགས་སོ་ལེགས། །འདི་ནི་དེ་བཞིན་གཤེགས་རྣམས་ཀྱང ། །ཐེ་ཚོམ་སྐྱེ་བར་བྱེད་ཡིན་ན། །བྱང་ཆུབ་སེམས་གཞན་ཅི་སྨོས་ཤེས། །དེ་བཞིན་གཤེགས་རྣམས་ལ་གསུངས། །དེ་ནས་ངོ་མཚར་རྨད་བྱུང་ནས། །ཐེ་ཚོམ་ཐམས་ཅད་གཅོད་མཛད་པའི། །བཅོམ་ལྡན་དེ་བཞིན་གཤེགས་ཀུན་གྱིས། །བདག་པོ་ལ་ནི་འདི་སྐད་ཞུས། །བཅོམ་ལྡན་དེ་བཞིན་གཤེགས་ཀུན་གྱིས། །ཡོན་ཏན་ཀུན་གྱིས་ཕུལ་ཕྱུང་ཡང ། །གཙོ་བོ་འདིར་ནི་སྟོན་མཛད་པར། །ཇི་ལྟར་སྤྲོ་བ་མངའ་མ་གྱུར། །བྱིན་གྱིས་བརླབ་པའི་གནས་མཛད་དེ། །དེ་བཞིན་གཤེགས་
113a
༄#། །ཡིད་བདེ་ལ་སོགས། །ཡེ་ཤེས་རྒྱུ་འབྲས་ཐོབ་པའི་ཕྱིར། །དེ་ནི་ཡང་དག་བཤད་དུ་གསོལ། །དེ་བཞིན་གཤེགས་ཀུན་བདག་པོ་ནི། །དེ་རྣམས་ཞུ་པར་མཁྱེན་ནས་སུ། །ཡེ་ཤེས་སྒྲོན་མ་རྡོ་རྗེ་གྲགས། །ཏིང་འཛིན་ཞེ་སྡང་རིགས་འབྱུང་བ། །གཙོ་བོས་མི་བསྐྱོད་སྙིང་པོ་ནི། །སྐུ་གསུང་ཐུགས་ནི་དཔལ་ལྡན་པས། །དེ་ནས་ཡང་དག་ཕྱུང་བ་ནི། །བཛྲ་དྷརྀ་ཀ་ཅེས་བྱ་བའི་སྔགས། །དེ་ནས་འདི་ནི་གསུངས་ཙམ་གྱིས། །ཞེ་སྡང་རིགས་བྱུང་ལས་སྐྱེས་པ། །དེ་ནི་རིག་པ་སྐྱེས་བུར་འགྱུར། །མི་བསྐྱོད་རྒྱ་ཆེན་ཐབས་ཀྱིས་སྦྱོར། །ཞལ་གསུམ་ནག་དང་དཀར་དང་དམར། །བདག་ཉིད་ཆེན་པོ་དེ་ཞལ་ཡིན། །རྡོ་རྗེ་གསུམ་འདིར་དེ་བཞིན་གཤེགས། །བཞུགས་པ་ཡེ་ཤེས་ཞེས་བྱའོ། །དེ་ནས་དེ་བཞིན་གཤེགས་བདག་པོ། །དམ་ཚིག་འབྱུང་རྡོར་ཞེས་བྱ་ཡི། །ཏིང་ངེ་འཛིན་ལ་གཙོ་བོ་ནི། །སྙོམས་པར་ཞུགས་པ་ཉིད་དུ་མཛོད། །དེ་ནས་ཛི་ན་ཛི་ཀ་ཅེས་པའི། །སྙིང་པོ་དེ་བཞིན་ཡང་དག་ཕྱུང ། །དེ་ནས་གསུངས་པ་ཙམ་གྱིས་ཀྱང ། །གཏི་མུག་རིགས་བྱུང་ལས་སྐྱེས་པ། །རིག་བཅས་སྐྱེས་བུར་གྱུར་པ་ནི། །རྣམ་པར་སྣང་མཛད་དེ་བཞིན་གཤེགས། །དཀར་དང་ནག་དང་དམར་བཅས་པའི། །ཞལ་གྱིས་མདུན་དུ་བཞུགས་པར་གྱུར། །དེ་ནས་རིན་ཆེན་བྱུང་བ་ཡི། །དཔལ་ཞེས་བྱ་བའི་ཏིང་འཛིན་
113b
ལ། །སྙོམས་པར་ཞུགས་ནས་བདེ་གཤེགས་ཀུན། །བདེ་དང་ཡིད་བདེར་གྱུར་པའི་ཕྱིར། །ཡིད་བཞིན་ནོར་བུ་རིན་ཆེན་རིགས། །དེ་བཞིན་གཤེགས་ཀུན་བདག་པོ་འདི། ། དེ་ནས་རཏྣ་དྷརྀཀ་ཅེས་བྱའི། །སྙིང་པོ་དཔལ་ལྡན་དེ་ཚེ་ཕྱུང ། །དེ་ནི་ཕྱུང་བ་ཙམ་གྱིས་ནི། །རིག་དང་བཅས་པའི་སྐྱེས་བུར་གྱུར། །སེར་དང་དཀར་དང་ནག་པ་ཡི། །ཞལ་དང་རིན་ཆེན་འབྱུང་ལྡན་ནི། །རྡོ་རྗེ་གསུམ་གྱི་བདག་པོ་ཡི། །ལྷོ་ཕྱོགས་ལོགས་སུ་བཞུགས་པར་གྱུར། །དེ་ཡང་བྱང་དུ་གཟིགས་གྱུར་ཏོ། །མཉམ་ཉིད་ཡེ་ཤེས་ཞེས་བྱའོ། །ད་ནས་བཅོམ་ལྡན་བདག་པོ་དེ། །རྡོ་རྗེ་གསུམ་གྱི་དམ་ཚིག་བདག། འདོད་ཆགས་ཆེན་པོ་ལས་བྱུང་བ། །རྡོ་རྗེ་ཞེས་ནི་བྱ་བ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །འདོད་ཆགས་ཆེན་པོའི་རིགས་ལས་བྱུང ། །ཱ་རོ་ལྀ་ཀ་ཅེས་བྱ་སྙིང་པོ། །རྡོ་རྗེ་གསུམ་ལས་དེ་ནས་ཕྱུང ། །དེ་ནས་ཕྱུང་བ་ཙམ་གྱིས་ནི། །དེ་འོག་བཅོམ་ལྡན་གཙོ་བོ་ནི། །རིག་དང་བཅས་པའི་སྐྱེས་བུར་གྱུར། །འཇིག་རྟེན་དབང་པོ་འོད་དང་མཚུངས། །དམར་དང་དཀར་དང་ནག་པའི་ཞལ། །དཔལ་ལྡན་རིགས་ཆེན་པོ་ཡི་བདག་།དེ་བཞིན་གཤེགས་པའི་བདག་པོ་ཡི། །ནུབ་ཕྱོགས་སུ་ནི་བཞུགས་པར་གྱུར། །དེ་ནས་བཅོམ་ལྡན་སྣ་ཚོགས་པ། །དོན་ཡོད་དམ་ཚིག་ཅེས་བྱ་བའི། །ཏིང་འཛིན་རྡོ་རྗེ་ཡང་དག་ཕྱུང ། །གཙོ་
114a
༄#། །བོ་དེ་ལ་སྙོམས་ཞུགས་ནས། །སྙིང་པོ་མཆོག་གི་མཆོག་ཅེས་བྱའོ། །དམ་ཚིག་རྣམས་ནི་དགུག་པའི་རིགས། །སྙིང་པོ་པྲ་ཛྙཱ་དྷརྀ་ཀ་ཅེས་པ། །རྡོ་རྗེ་གསུམ་ཞེས་བྱ་ལས་བྱུང ། །དེ་ནས་ཕྱུང་བ་ཙམ་གྱིས་ནི། །དོན་ཡོད་རྡོ་རྗེ་སྦྱོར་བ་ཡི། །དེ་ཉིད་མགོན་པོ་བཅོམ་ལྡན་འདས། །སྐུ་གསུང་ཐུགས་ཀྱི་རྡོ་རྗེ་ཅན། །རིག་དང་བཅས་པའི་སྐྱེས་བུར་གྱུར། །ལྗང་དང་ནག་དང་དཀར་བའི་ཞལ། །དེ་བཞིན་གཤེགས་པའི་བདག་པོ་ཡི། །བྱང་ཕྱོགས་སུ་ནི་བཞུགས་པར་གྱུར། །ཞེ་སྡང་གཏི་མུག་རིགས་དང་ནི། །དེ་བཞིན་ཡིད་བཞིན་རིན་ཆེན་དང ། །འདོད་ཆགས་དམ་ཚིག་ཅེས་བྱ་བ། །འདོད་དང་ཐར་པ་རབ་བསྒྲུབས་པའོ། །དེ་ནས་ཁྱབ་བདག་རྡོ་རྗེ་འཛིན། །འདོད་ཆགས་དམ་ཚིག་འབྱུང་བ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །རྡོ་རྗེ་འཛིན་པ་བཙུན་མོ་མཆོག། སྐུ་གསུང་ཐུགས་ཀྱི་རྡོ་རྗེ་ལས། །དམ་པ་དག་ནི་ཕྱུང་བར་འགྱུར། ། སངས་རྒྱས་ཀུན་གྱི་ཡུམ་གཅིག་པུ། །ཡུམ་ཞེས་བྱ་བར་ཡང་དགེ་བཤད། །དེ་ནི་དེ་བཞིན་གཤེགས་བདག་པོ། །གང་ཕྱིར་ལྷ་མོ་བཙུན་མོ་མཆོག་།སྐུ་དང་གསུང་དང་ཐུགས་ལས་བྱུང ། །དྭེ་ཥ་ར་ཏི་ཞེས་བྱར་གྲགས། །རིག་པ་སྐྱེས་བུ་ཞེས་བྱ་བའི། །དེ་ནི་བུད་མེད་གཟུགས་འཛིན་མ། །ཞལ་གསུམ་ལྟ་བུའི་གཟུགས་ཀྱིས་
114b
ནི། །མེ་ཡི་ཕྱོགས་སུ་རྣམ་པར་བཞུགས། །དེ་ནས་རྗེས་མཉེས་རྡོ་རྗེ་གྲགས། །སྐུ་གསུང་ཐུགས་རྡོ་རྗེ་ལས་བྱུང ། །ཏིང་ངེ་འཛིན་ལ་སྙོམས་འཇུག་སྟེ། །རྡོ་རྗེ་གསུམ་ལས་བྱུང་བ་ནི། །དེ་ནི་མོ་ཧ་ར་ཏི་སྟེ། །གང་ཕྱིར་དེ་བཞིན་གཤེགས་པའི་ཡང ། །རིག་པ་སྐྱེས་བུ་བྱུང་བ་སྟེ། །ཞལ་གསུམ་ལྟ་བུའི་རྣལ་འབྱོར་མ། །གཉིས་མེད་མཉམ་པའི་རྣལ་འབྱོར་པས། །སངས་རྒྱས་ཀུན་གྱི་ཡིད་འོང་གཅིག་།གསང་བ་བསྡུས་པའི་སྦྱོར་བ་ཡིས། །བདེན་བྲལ་ཕྱོགས་སུ་རྣམ་པར་བཞུགས། །དེ་ནས་རྗེས་ཆགས་རྡོ་རྗེ་ཞེས། །བྱ་བ་རྡོ་རྗེ་གསུམ་ལས་སྐྱེས། །ཏིང་ངེ་འཛིན་ལ་སྙོམས་ཞུགས་ནས། །བདེ་བ་ཆེན་པོ་ཕྱུང་བ་ནི། །འདི་ལྟར་རཱ་ག་ར་ཏི་ཕྱུང ། །ཞལ་གསུམ་པ་ཡི་གཟུགས་ཅན་དེ། །གཙོ་བོ་བུད་མེད་གཟུགས་འཛིན་པ། །དེ་ནི་རིག་པ་སྐྱེས་བུར་གྱུར། །གོས་མེད་ཡེ་ཤེས་ལས་བྱུང་བ། །རྡོ་རྗེ་གསུམ་གྱི་དམ་ཚིག་མཆོག་།དེ་བཞིན་གཤེགས་པའི་བཙུན་མོ་སྟེ། །རླུང་གི་ཕྱོགས་སུ་རྣམ་པར་བཞུགས། །དེ་ནས་བཅོམ་ལྡན་འདས་བདག་པོ། །རྡོ་རྗེ་གསུམ་གྱི་དམ་ཚིག་ཅན། །སླུ་བ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ནས། །དེ་བཞིན་གཤེགས་ཀུན་བཙུན་མོ་མཆོག་།ཞལ་གསུམ་ལྟ་བུའི་གཟུགས་ཅན་མ། །བཛྲ་ར་ཏི་ཞེས་བྱ་བ། །རྡོ་རྗེ་གསུམ་ལས་ཕྱུང་བར་གྱུར། །དེ་ནི་ཕྱུང་མ་ཐག་ཏུ་ཡང ། །གཙོ་བོ་
115a
༄#། །རིག་མ་སྐྱེས་བུར་གྱུར། །བུད་མེད་ཀྱི་ནི་གཟུགས་འཛིན་ཏེ། །དབང་ལྡན་ཕྱོགས་སུ་རྣམ་པར་བཞུགས། །དེ་ནས་བཅོམ་ལྡན་མགོན་པོ་དེ། །རྣམ་སྣང་རྡོ་རྗེ་ལས་བྱུང་བའི། །ཏིང་ངེ་འཛིན་ལ་སྙོམས་ཞུགས་ཏེ། །སྐུ་གསུང་ཐུགས་ཀྱི་རྡོ་རྗེ་ལ། །དཀྱིལ་འཁོར་འདིར་ནི་གཤིན་རྗེ་གཤེད། །ཁྲོ་བོ་ཆེན་པོ་ཕྱུང་བ་དང ། །ཕྱུང་ནས་དེ་བཞིན་གཤེགས་པ་རྣམས། །བསྙེངས་པར་བྱ་བར་ཤར་ཕྱོགས་བཞུགས། །དེ་ནས་བདག་པོ་བཅོམ་ལྡན་འདས། །དེ་བཞིན་གཤེགས་པ་ཐམས་ཅད་ཀྱི། །མངོན་བྱང་རྡོ་རྗེ་ཞེས་བྱ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཁྲོ་བོ་ཆེན་པོ་ཕྱུང་བ་ནི། །པྲ་ཛྙཱ་ནྟ་ཀྲྀ་ཏ་རྡོ་རྗེ་ཅན། །དེ་ནས་དཔལ་ལྡན་ཕྱུང་བ་ནི། །རིག་པ་སྐྱེས་བུར་ཡང་དག་ཕྱུང ། །དཀྱིལ་འཁོར་ཆེན་པོའི་སྦྱོར་བ་ལས། །འོད་ཆེན་ཕུར་བུའི་གཟུགས་ལྟ་བུ། །རྡོ་རྗེ་དམ་ཚིག་བསྙེངས་བྱེད་པ། །ལྷོ་ཡི་སྒོར་ནི་རྣམ་པར་བཞུགས། །དེ་ནས་རིན་ཆེན་འབྱུང་གནས་གྲགས། ། ཏིང་ངེ་འཛིན་ལ་སྙོམས་ཞུགས་ཏེ། །གསུང་གི་དཀྱིལ་འཁོར་ཀུན་གྱི་གཙོར། །རྡོ་རྗེ་གསུམ་ལས་ཁྲོ་བོ་ཆེ། །པདྨ་ནྟ་ཀྲྀ་ཏ་འོད་པོ་ཆེ། །བདག་པོ་དེ་ནས་ཕྱུང་བར་གྱུར། །དེ་ནས་ཕྱུང་བ་ཙམ་གྱིས་འདིར། །གཙོ་བོའི་རིག་པ་སྐྱེར་བུར་བཅས། །དེ་བཞིན་གཤེགས་པ་ཐམས་ཅད་ཀྱི་རང ། །གསུང་གི་ཚུལ་དུ་རྣམ་སྦྲུལ་ཞིང ། །གོས་མེད་ཡེ་ཤེས་བླ་
115b
མེད་པ། །ནུབ་ཀྱི་སྒོར་ནི་ཞུགས་པར་གྱུར། །བཅོམ་ལྡན་དེ་ཉིད་སྣ་ཚོགས་པ། །ཐུགས་ཀྱི་རྡོ་རྗེ་ཏིང་འཛིན་ལ། །ཀུན་ནས་སྙོམས་པར་ཞུགས་ནས་ནི། །དེ་ནས་གཙོ་བོས་ཕྱུང་བར་གྱུར། །ཁྲོ་བོ་ཆེན་པོ་རྣམ་ཕྱུང་བ། །ཀུན་ནས་བགེགས་མཐར་བྱེད་པ་སྟེ། །ཐུགས་ཀྱི་དཀྱིལ་འཁོར་སྦྱོར་བ་ཡིས། །བྱང་གི་སྒོར་ནི་རྣམ་པར་བཞུགས། །དེ་ནས་དཔལ་ལྡན་རྡོ་རྗེ་འཛིན། །དཀྱིལ་འཁོར་མཆོག་འདི་ཐོས་པ་དང ། །མགོན་པོ་རྣམ་པར་སྣང་མཛད་ཆེ། །དེ་ལ་སླར་ཡང་ཞུས་གྱུར་པ། །མཁའ་དང་དབྱེར་མེད་སྦྱོར་གཅིག་ཅིང ། །དངོས་མེད་དེ་བཞིན་གཤེགས་པ་རྣམས། །དགའ་བའི་མཆོག་སོགས་བགྱིས་ནས་ནི། །ཇི་ལྟར་དེ་རྣམས་ཞུ་བར་འགྱུར། །འདི་དག་ཐོག་མཐའ་ཡོད་མིན་ན། །འདི་ཡི་གཙོ་བོ་ཇི་ལྟར་འགྱུར། ། ཕྱོགས་ཀྱི་ཆ་རྣམས་བཞག་པ་ལ། །འདི་ནི་གང་གིས་རྣམ་པར་སྦྱང ། །གསང་བ་འདི་ནི་མི་སྲིད་ཅེས། །ཐེག་པ་གསུམ་པོ་རྟོག་པ་དང ། །སོ་སོའི་སྐྱེ་བོའི་ཚིག་གིས་ཀྱང ། །སྤང་བ་དག་ཀྱང་བགྱིད་པར་འགྱུར། །གང་ཞིག་ཉན་ཐོས་རྣམས་དང་ནི། །དེ་བཞིན་མདོ་སྡེ་ལས་སྤངས་པའི། །ཞེ་སྡང་སོགས་དང་འདོད་ལྔ་སོགས། །དེ་བཞིན་གཤེགས་རྣམས་བསྟེན་མཛད་པ། །རྗེས་སུ་སྤྱོད་དང་ཐུན་མོང་བའི། །བྱ་བ་དེ་དག་ཕྱིན་ཅི་ལོག་།དགའ་མཐའི་སྤྱོད་པ་དེ་རྣམས་ནི། །དེ་བཞིན་གཤེགས་དེ་རྣམ་མཛད་པ། །ཚིག་གཅིག་ལ་
116a
༄#། །ནི་དཔག་མེད་དོན། །གསང་བ་དམ་པ་འདི་དག་ནི། །མགོན་པོ་གང་ཞིག་མ་འོངས་པའི། །སྐྱེ་བོས་ཇི་ལྟར་འཚལ་བར་འགྱུར། །དེ་ནས་བཅོམ་ལྡན་བཀའ་སྩལ་པ། །ཕྱག་ན་རྡོ་རྗེ་ཚུལ་འདི་ནི། །དགོངས་པ་གསང་བ་བླ་མེད་པ། །དྲིས་པ་རྣམས་ནི་བཤད་པར་བྱ། །ཞེ་སྡང་གཏི་མུག་དེ་བཞིན་ཆགས། །ལུས་ལ་སོགས་པའི་ཕུང་པོ་ལྔ། ། འདི་དག་བདག་མེད་རྟོགས་ནས་ནི། །རྫོགས་སངས་རྒྱས་ནི་ཚུལ་གསུམ་གནས། །ཕ་ནི་ཞི་གནས་ཡིན་ཞེས་བྱ། །མ་ནི་ལྷག་མཐོང་ཡིན་པར་བཤད། །དེ་བཞིན་ཉིད་ཤེས་ལུས་སུ་འགྱུར། །ཞི་བ་རྣལ་འབྱོར་པ་ཡི་ཟས། །ཇི་ལྟར་བཟོ་བོས་བདེར་གཤེགས་ཀྱི། །སྐུ་ཡི་གཟུགས་བརྙན་བྱས་པ་ལྟར། །གང་ཞིག་སྐུ་ལྟ་བུ་ཡི་སྐུ། །དེ་བཞིན་གསུང་གི་རྣམ་པས་གསུང ། །ཐུགས་ཀྱི་རྣམ་པས་ཐུགས་སུ་ནི། །ཞི་གནས་ལ་སོགས་པ་ལས་བྱུང ། །ཕུང་པོ་ལ་སོགས་ཆོས་རྣམས་ནི། །སྟོང་ཞིང་རྟེན་འབྲེལ་ལས་བྱུང་མཐོང ། །ཡེ་ཤེས་ཉི་མ་ཤར་བའི་གཟུགས། །ཞི་ལས་རྣལ་འབྱོར་པ་རྣམས་བྱེད། །དེ་བས་སྐུ་གསུང་ཐུགས་རྡོ་རྗེ། །གྲིབ་མ་ལྟ་བུར་བྱུང་བ་ཡིན། །དེ་བཞིན་ཕུང་པོ་ཁམས་ལ་སོགས། །དམ་ཚིག་གཅིག་ལ་རྣམ་པར་གནས། །དེ་ནས་ཚུལ་གསུམ་དོན་གཅིག་པ། །ཞི་གནས་ལ་སོགས་པ་ལས་བྱུང ། །དེ་ནས་རྡོ་རྗེ་ཚུལ་ཡིད་འོང ། །གསང་
116b
བའི་བདག་པོ་མཉན་པར་གྱིས། །སྟོང་པ་རྟེན་འབྲེལ་ལས་བྱུང་བར། །རྣལ་འབྱོར་བ་ཡི་རྡོ་རྗེ་ཞེས། །ནམ་མཁའ་མཐའ་ཡས་རྣལ་འབྱོར་ནི། །ཕུང་པོ་ལ་སོགས་ཆོས་བྱུང་བ། །ལུས་དང་ངག་སེམས་ཀུན་རྟོག་ནི། །ཕུང་པོ་སོགས་བྱུང་འབྱུང་ལས་གྱུར། །འདི་དག་དངོས་མེད་ཡང་དག་སྦྱར། །དེ་ལས་ཏིང་འཛིན་སྐྱེ་བར་འགྱུར། །འདི་དག་ཏིང་འཛིན་གཉིས་མེད་སྦྱོར། །མི་ཕྱེད་རྡོ་རྗེ་ཉིད་དུ་འགྱུར། །ཟབ་དང་རྒྱ་ཆེན་རྟོག་བྱང་ཆུབ། །དེ་རྟོགས་པས་ནི་སེམས་དཔར་གྱུར། །འདི་དག་ནམ་མཁའ་མཚུངས་གྱུར་པ། །ཆེན་པོ་ཞེས་བྱ་ཤེས་བྱེད་པའོ། །དེ་ལ་རྟོགས་པ་མཐའ་ཡས་པ། །རྡོ་རྗེ་ཐེག་པར་སྟོན་པ་ཡིན། །ཏིང་ངེ་འཛིན་ནི་དེ་ཉིད་ལས། །རྡོ་རྗེའི་ཐེག་པ་བྱུང་བ་ཡིན། །འདི་ལས་འཇིག་རྟེན་འདས་འགྱུར་ཞིང ། །དེ་བཞིན་འཇིག་རྟེན་ཤིན་ཏུ་འདས། །དགོངས་དོན་དེ་བཞིན་ཉིད་གཅིག་པུ། །གསང་བ་འཇིག་རྟེན་པ་ཞེས་བཤད། །མ་སྐྱེས་པ་ལས་བྱུང་བ་ནི། ། ཀུན་རྫོབ་དང་ནི་དོན་དམ་ཡིན། །བདུད་གྱུར་ལྷ་ཡི་བུར་བཤད་དེ། །ཕུང་པོ་ཉོན་མོངས་འཆི་བདག་བཅས། །འདི་ལས་དངོས་མེད་པས་རྒྱལ་བས། །རྒྱལ་བའི་རྡོ་རྗེར་རྣམ་པར་བཤད། །ལུས་སོགས་ཕྱི་ཡི་ཕུང་པོར་བཤད། །འབྱུང་དང་འབྱུང་ལས་གྱུར་བཤད་གང ། །བྱང་ཆུབ་སེམས་དཔའ་སེམས་དཔའ་ཆེ། །འདི་དག་རྡོ་རྗེའི་རིགས་ཅན་
117a
༄#། །འགྱུར། །དངོས་པོ་གང་དང་གང་དག་གིས། །ཕུང་པོ་ལྔ་པོ་བརྟགས་གྱུར་བ། །དེ་རྣམས་དེ་བཞིན་ཡང་དག་དམིགས། །དེ་བཞིན་གཤེགས་པ་རྣམས་སུ་འགྱུར། །ཇི་ལྟར་མེ་ལོང་མཚུངས་གསལ་བ། །དངོས་པོ་ཀུན་གྱི་བདག་ཉིད་ཅན། །དེར་ནི་བདག་གིས་བདག་ཉིད་མཐོང ། །དཀྱིལ་འཁོར་མཆོག་འགྱུར་རྣལ་འབྱོར་པ། །ཕུང་པོ་དེ་བཞིན་གཤེགས་པར་འགྱུར། །དེ་བཞིན་ཉིད་ལས་སྤྲོས་བྱས་པ། །ཆོས་ཀྱི་སྐུ་ཅན་རྒྱལ་བ་ཡི། །མཆོད་པ་ཆེན་པོར་དེ་འགྱུར་རོ། །འདི་ནི་སྤྲོས་དང་བསྡུས་པ་དག་།དེ་ནི་དགའ་བར་ཡོངས་སུ་གྲགས། །སེམས་ཅན་གང་ཞིག་ལོངས་སྤྱོད་ཅིང ། །དེ་ནི་གསོལ་འདེབས་ཞེས་བཤད་དོ། །ཡང་དག་ཤེས་རབ་ཐབས་གཉིས་ཏེ། ། མཁའ་དབྱིངས་དབྱེར་མེད་རབ་སྦྱོར་བ། །དེ་ནི་འདོད་ཆགས་ཆེ་ཚུལ་འགྱུར། །རྣལ་འབྱོར་པ་ནི་མངོན་བཞུགས་པའོ། །རྡོ་རྗེ་ཐེག་ཕ་རྣལ་འབྱོར་ཆེར། །བདག་ཉིད་ངེས་པར་སྦྱོར་བ་གང ། །དབང་པོ་ཐམས་ཅད་བདེ་བསྐྱེད་པའི། །ཡིད་བདེ་བ་ནི་སྐྱེ་བར་འགྱུར། །ཞལ་གསུམ་རྣམ་ཐར་གསུམ་དུ་གང ། །མཐོང་ཞིང་དེ་ལ་ཕུང་པོ་སོགས། །ལྷ་ཡི་བདག་ཉིད་རིག་འགྱུར་བ། །དེ་ཉིད་གསུམ་དུ་བཤད་པ་ཡིན། །དངོས་མེད་པ་ནི་ལམ་གྱི་མཆོག་།མྱ་ངན་འདས་པར་གཉིས་མེད་འཇུག་།འོན་ཀྱང་སོ་སོར་གྱུར་པ་དེ། །ཆོས་ཀྱི་སྐུ་ལས་
117b
ཞེ་སྡང་གྱུར། །བཅོམ་ལྡན་བདག་པོ་དེ་ཉིད་ནི། །དེ་བཞིན་གཤེགས་པའི་རིགས་འབྱུང་ཞིང ། །མྱ་ངན་འདས་ཚུལ་རྡོ་རྗེ་ཅན། །དེ་ཉིད་དབང་པོ་ཀུན་བྱེད་པའོ། །དམ་ཚིག་ལ་སོགས་འབྱུང་བའི་ཆོས། །རང་གིས་རིག་པར་མ་གྱུར་ཀྱང ། །དེར་ནི་གནས་པ་ཡང་དག་བཤད། །དེ་ནི་གཏི་མུག་དེ་བཞིན་སེམས། །གང་གི་ཇི་ལྟར་བརྟགས་ཆོས་ཀྱིས། །ལོངས་སྤྱོད་རྫོགས་ཞེས་བྱ་བྱེད་པ། །དེ་ནི་ཡིད་བཞིན་རིན་ཆེན་འབྱུང ། །རིན་ཆེན་ཆེན་པོའི་རིགས་ཀྱི་གཙོ། །དེ་ཉིད་བཅོམ་ལྡན་འདོད་ཆགས་ནི། །ཀུན་མཁྱེན་ཡེ་ཤེས་ལས་བྱུང་བ། །གནས་མེད་གནས་པའི་སྦྱོར་གྱུར་པ། །འདོད་ཆགས་ཆེན་པོའི་ཚུལ་གྱི་མཆོག་།ཇི་ལྟར་འདམ་དབུས་པདྨ་ནི། །དེ་ཡི་ཉེས་པས་གོས་མི་འགྱུར། །དེ་བཞིན་རྣལ་འབྱོར་རིག་པ་མཆོག། འདོད་པ་ཀུན་ལ་ཉེ་བར་སྤྱོད། འགྲོ་བ་གཅིག་ཏུ་འདོད་པ་ཁྱབ། །དེ་ཉིད་རྡོ་རྗེ་རིགས་མཆོག་ཡིན། །ཆོས་དང་ལོངས་སྤྱོད་སྤྲུལ་པ་སྟེ། །གསུམ་པོ་དེ་དག་མདོར་བསྡུས་པའི། །ཞེ་སྡང་གཏི་མུག་དེ་བཞིན་ཆགས། །རྡོ་རྗེ་དགའ་བའི་མཐའ་ཅན་གཙོ། །ངན་འགྲོ་གསུམ་འདོན་པས་བུད་མེད། །གཅིག་པུ་ཡིན་ཡང་དུ་མར་གྱུར། །གསུམ་པོ་ཡང་དག་འདུག་གྱུར་པ། །གཤིན་རྗེ་ཤེས་རབ་གྱུར་དེ་བཞིན། །པདྨ་བགེགས་གྱུར་ཁྲོ་བོ་སྟེ། །མཐར་བྱེད་མཐའ་ཡི་མིང་ཅན་ནོ། །འཇུག་པ་ལ་སོགས་གསུམ་ཉིད་ལ། །ཕུང་པོར་གྲགས་ཏེ་དེ་བཞིན་གཤེགས། །སྐྲག་བྱེད་གཤིན་རྗེ་གཤེད་ཀྱིས་ཀྱང ། །
118a
༄#། །ཐམས་ཅད་འབྱུང་བའི་དཀྱིལ་འཁོར་རོ། །རྡོ་རྗེ་དམ་ཚིག་སྐྲག་པར་བྱེད། །དེ་བཞིན་ཤེས་རབ་མཐར་བྱེད་གཙོ། །པདྨོའང་གསུང་ཞེས་བྱ་བར་གྱུར། །འཆི་བྲལ་རྣལ་འབྱོར་གྲུབ་པ་ཡིན། །བགེགས་མཐར་བྱེད་ཀྱང་ཐུགས་ཀྱི་གཙོ། །རིགས་པའི་བདག་ཉིད་རང་བདག་པོ། །འདི་ལྟར་རྟག་སྤྱོད་རྣལ་འབྱོར་པ། །གསང་བའི་ལུས་ཀྱིས་རྣམ་པར་སྤྱོད། །དགོངས་པ་ལུང་སྟོན་ལ་གནས་པར། །གང་ཞིག་ཡིད་ནི་བཟོད་གྱུར་པ། །དེས་ནི་དེ་བཞིན་བྱ་བ་དང ། །དེ་ནས་གསང་བ་ཡང་དག་འབྱུང ། །ནུ་ཞོ་ཟས་ཀྱིས་བུ་བསོ་བཞིན། །སྲིད་པ་གསུམ་ན་བཅོམ་ལྡན་གཙོ། །སེམས་ཅན་བསམ་དབང་ཇི་བཞིན་དུ། །ཆོས་ཀྱི་བདུད་རྩིས་ཚིམ་པར་མཛད། །ཆོས་དང་ལོངས་སྤྱོད་སྤྲུལ་པ་ཡིས། ། སྐུ་གསུམ་གཅིག་ཏུ་སྦྱོར་བ་ལས། །བཅོམ་ལྡན་གསང་བ་དགོངས་མཛད་པ། །བདེན་པ་མ་ཡིན་རྫུན་པའང་མིན། །ཞེ་སྡང་གཏི་མུག་རིན་ཆེན་དང ། །འདོད་ཆགས་སྣ་ཚོགས་རིགས་བྱུང་བ། །དགོངས་པའི་རིགས་ཀྱི་བརྡར་ཐུར་\?\་པས། །གླེང་གཞི་ཡིན་ཏེ་དང་པོའོ།། །།དེ་ནས་དེ་བཞིན་གཤེགས་བདག་ལ། །སླར་ཡང་དེ་བཞིན་གཤེགས་པ་ཀུན། ལྷག་པར་མཆོད་པ་བྱས་ནས་ནི། །ཐུབ་ཆེན་དེ་ལ་འདི་སྐད་གསོལ། །དགོངས་པའི་རྡོ་རྗེ་དམ་པ་ནི། །དེ་བཞིན་གཤེགས་པ་ཀུན་ཡེ་ཤེས། །བྱང་ཆུབ་སེམས་ནི་བླ་མེད་
118b
པ། །གསང་བ་བཅོམ་ལྡན་བཤད་དུ་གསོལ། །བཅོམ་ལྡན་འདས་ཀྱིས་དེ་རྣམས་ཀྱི། །ཞུ་བ་ཡང་དག་ཐུགས་ཆུད་ཅིང ། །བྱང་ཆུབ་སེམས་དཔའ་ཡོངས་རྟོག་པ། །ཐུབ་ཉིད་ཀྱི་ནི་རྣམ་མཁྱེན་པ། །དེ་ནས་བྱང་ཆུབ་སེམས་ཀུན་ལ། །བཅོམ་ལྡན་འདས་ཀྱིས་དེ་སྐད་གསུངས། །ལུས་སེམས་དེ་དང་འདྲ་བ་དང ། །དེ་བཞིན་ངག་ནི་ཚིག་བརྗོད་བལྟའི། །བྱང་ཆུབ་སེམས་ནི་བླ་མེད་པ། །ཁྱེད་ཀུན་གྱིས་ནི་བསྐྱེད་པར་བྱ། །དེ་ལྟར་བྱང་ཆུབ་སེམས་དཔའ་ལ། །སྟོན་པས་ཇི་བཞིན་སྟོན་པར་མཛད། །དེ་ནས་དེ་བཞིན་གཤེགས་རྣམས་ཀྱིས། །སྐུ་དང་ཐུགས་དང་དེ་བཞིན་གསུང ། །དེ་འདྲའི་ཚུལ་དུ་སྦྱར་ནས་ནི། །བྱང་ཆུབ་སེམས་དཔའ་སེམས་དཔའ་ཆེ། །སྐུ་གསུང་ཐུགས་རྡོ་རྗེ་ཅན་ལ། །ཆེད་དུ་བརྗོད་པ་ཆེད་དུ་བརྗོད། །ེ་མ་ཀུན་ཏུ་བཟང་པོ་ཡི། །རྟེན་ཅིང་འབྲེལ་འབྱུང་ལས་སྐྱེས་པ། །སྐྱེ་བ་མེད་པའི་ཚུལ་གྱིས་ནི། །སྐྱེ་བ་འདིར་ནི་རབ་ཏུ་བསྒྲགས། །དེ་ནས་དེ་བཞིན་གཤེགས་བདག་པོ། །དེ་བཞིན་གཤེགས་པའི་རྡོ་རྗེ་གསུམ། །དེ་བཞིན་གཤེགས་པ་ཐམས་ཅད་ཀྱི། །མངོན་རྫོགས་བྱང་ཆུབ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ནས། །དཔལ་ལྡན་བྱང་ཆུབ་སེམས་འདི་གསུངས། དངོས་པོ་མེད་པའི་དངོས་གནས་ན། །དངོས་དང་དངོས་མེད་གཉི་གའང་མིན། །དེ་ལྟར་དངོས་པོ་དངོས་མེད་པས། །སྒོམ་པ་དངོས་པོར་ཡོད་མ་ཡིན། །དེ་ནས་དཔལ་ལྡན་རྣམ་
119a
༄#། །སྣང་མཛད། །དེ་བཞིན་གཤེགས་པ་ཐམས་ཅད་ཀྱི། །གཉིས་མེད་དམ་ཚིག་རྡོ་རྗེ་གྲགས། །ཏིང་ངེ་འཛིན་ལ་སྙོམས་པར་ཞུགས། །དེ་བཞིན་གཤེགས་པ་ཀུན་གྱི་མཆོད ། གསང་བ་དགོངས་པ་རྡོ་རྗེ་ཅན། །བྱང་ཆུབ་སེམས་ནི་ཐམས་ཅད་ནས། །དེ་ནི་ཡང་དག་བཀའ་སྩལ་ཏོ། །དག་པ་དེ་བཞིན་གཤེགས་ཀུན་གྱི། །ཕུང་པོ་ཁམས་སོགས་རྣམ་སྤངས་ཤིང་།། གཟུང་དང་འཛིན་པ་ལས་གྲོལ་བ། །ཆོས་བདག་མེད་པའི་སྟོང་ཉིད་ཅན། །བྱང་ཆུབ་སེམས་ནི་འདི་གསུངས་པ། །རྟེན་ཅིང་འབྲེལ་འབྱུང་མིང་ཅན་ཏེ། །ཐོག་མ་མེད་ནས་མ་སྐྱེས་བདག། རང་སེམས་མཉམ་པ་ཉིད་ཀྱང་ཡིན། །དེ་ནས་མི་བསྐྱོད་དེ་བཞིན་གཤེགས། །ཀུན་གྱི་གཉིས་མེད་མི་བཟད་པའི། །ཡེ་ཤེས་ཏིང་འཛིན་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །དངོས་པོ་འདི་དག་མ་སྐྱེས་པས། །ཕུང་པོར་གྲགས་པའི་ཆོས་ཉིད་མེད། །ནམ་མཁའ་ལྟ་བུར་བལྟ་དཀའ་བའི། །བདག་མེད་བྱང་ཆུབ་ཅེས་བྱའོ། །དེ་ནས་བཅོམ་ལྡན་དཀོན་མཆོག་དཔལ། །བདག་མེད་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ནས། །བྱང་ཆུབ་སེམས་འདི་རབ་ཏུ་གསུངས། །ཆོས་རྣམས་ཐམས་ཅད་དངོས་མེད་ཅིང ། །ཆོས་ཀྱི་མཚན་ཉིད་རྣམ་སྤངས་པ། །བདག་མེད་ཆོས་ལས་ཡང་དག་འབྱུང ། །བྱང་ཆུབ་ཚུལ་འདི་བསྟན་པའོ། །དེ་ནས་འོད་དཔག་མེད་མཚན་ཅན། །ཡེ་ཤེས་འབར་བ་སྒྲོན་རྡོ་རྗེའི་
119b
ཏིང་ངེ་འཛིན་ལ་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །མ་སྐྱེས་པ་ཡི་ཆོས་རྣམས་ལ། །དངོས་པོ་མེད་ཅིང་སྐྲོམ་པའང་མེད། །ནམ་མཁའི་ཚུལ་དུ་སྦྱོར་བ་ཡིས། །དངོས་པོ་ཞེས་ནི་རབ་ཏུ་བཤད། །དེ་ནས་དེ་བཞིན་གདོན་མི་ཟ། །ཟིལ་གྱིས་གནོན་པའི་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །ཆོས་འདི་རང་བཞིན་འོད་གསལ་ཞིང ། །གཟོད་ནས་དག་པས་མཁའ་དང་མཚུངས། །བྱང་ཆུབ་མེད་ཅིང་མངོན་རྟོགས་མེད། །བྱང་ཆུབ་སེམས་ནི་ཡིན་པར་བཤད། །དེ་ནས་དཔལ་ལྡན་རྡོ་རྗེ་འཛིན། །བྱང་ཆུབ་སེམས་ནི་ཐོས་པ་དང ། །དགོངས་པའི་དོན་ནི་རབ་བཤད་པར། །རྣམ་པར་སྣང་མཛད་ཆེ་ལ་གསུངས། །དངོས་པོ་མེད་ཅིང་དམིགས་མེད་པ། །བྱང་ཆུབ་སེམས་དཔའ་མཁའ་དང་མཚུངས། །གསང་བའི་ཚུལ་ནི་འདི་ཐོས་ནས། །དངོས་པོ་ཡི་ནི་རྟོག་པ་སྐྱེ། །ལུས་ལ་སོགས་པ་གསུང་སྦྱོར་བས། །སེམས་ནི་དེ་རྣམས་སྐྱེད་པར་བྱེད། །ཡང་དག་བྱང་ཆུབ་དུ་མའི་མཐར། །འདི་ལ་སོ་སོ་སྐྱེ་བོ་སྨྲ། །ཐུབ་པའི་གསུང་ནི་དོ་རྣམས་ལ། །རང་གི་སྒྲ་བཞིན་འཛིན་པར་བྱེད། །བསམ་པའི་དབང་ནི་ཇི་བཞིན་དུ། །འགྲོ་བའི་དོན་དུ་བཀའ་སྩོལ་ཅིག། དེ་ནས་བཅོམ་ལྡན་བདག་པོ་འདི། །རྣམ་པར་སྣང་མཛད་ཐུབ་པ་ཆེ། །ལེགས་ཞེས་ལན་གསུམ་གསུངས་ནས་ནི། །ལག་ན་རྡོ་རྗེ་ལ་འདི་གསུངས། །རྣམ་པར་མི་རྟོག་དོན་དེ་
120a
༄#། །ཉིད། །རབ་ཏུ་ཕྱེ་སྟེ་བཤད་པར་བྱ། །ཚིག་ཏུ་བརྗོད་པ་དམིགས་པར་བཤད། །བརྡ་དང་དོན་དམ་པ་ཡིན་ནོ། །རྐྱེན་དང་ཉན་ཐོས་རྣམས་ཀྱིས་ཀྱང ། །མདོ་དང་གསང་སྡགས་སྤྱོད་རྣམས་ཀྱིས། །དེ་བཞིན་གཤེགས་པས་གསུངས་པ་ཡི། །བྱང་ཆུབ་སེམས་འདི་བླ་ན་མེད། །དེ་བཞིན་ཡང་དག་སྦྱོར་བ་འདི། །དགོངས་པའི་གསང་བ་བླ་ན་མེད། །གཉིས་མེད་དམ་ཚིག་རྡོ་རྗེ་དང ། །པདྨ་དེ་ལས་སྐྱེད་པར་བྱེད། །ཚིག་ཏུ་བརྗོད་པ་ཐུན་མོང་སྟེ། །སངས་རྒྱས་སྐུ་ནི་དམིགས་ཅན་ཡིན། །གསང་སྔགས་དེ་ཉིད་ཅེས་བྱ་བརྡ། །དེ་བཞིན་ཉིད་ནི་དོན་དམ་པའོ། །དང་པོ་གཅིག་ནི་དགུ་དབུས་ན། །གང་ཞིག་བཅུ་ཡིས་མ་བཅིངས་པ། །དེ་ནི་བཅིངས་མེད་ཅེས་བྱ་སྟེ། །དེ་ཤེས་པ་ནི་མཆོག་གི་གནས། །དབྱངས་དང་གསལ་བྱེད་ཡི་གེ་སྟེ། །གྲངས་དགུ་ཡི་ནི་རྗེས་འཇུག་པ། །ས་བཅིངས་ཕན་ཚུན་སྦྱོར་བ་ལས། །གང་གིས་ཤེས་ཏེ་འགྲོ་བའི་བླ། །གང་ཞིག་ཤེས་པ་རྣམ་གྲོལ་བ། །འབྲས་བུ་ཕུན་ཚོགས་གྲུབ་འདོད་པ། །དེ་ནི་དེ་ཉིད་གྲུབ་འདོད་དེ། །གཟུགས་མེད་པས་ནི་གཟུགས་སྤངས་པ། །འབྱུང་བའི་མཐའ་ནི་ཡང་དག་ལྡན། །ཆ་ལ་སོགས་པ་བཅུ་དྲུག་གནས། །ལྔ་པ་ལྔ་དང་ཡང་དག་ལྡན། །བཞི་ནི་གསུམ་དུ་ངེས་པར་སྦྱར། །ཡི་གེ་ཨཾ་བཅས་རིང་པོར་བཅས། །ཡོན་ཏན་སྦྱོར་སོགས་ཕྱིས་
120b
དང་མཚུངས། །ཐུང་ངུ་མ་ལུས་དག་ཏུ་འགྱུར། །གཅིག་མིན་དུ་མ་མ་ཡིན་ནོ། །ཡ་ཡི་དོན་གྱིས་གང་ཡང་རུང ། །བྱ་བའི་དངོས་གྲུབ་འདོད་གྱུར་པ། །ར་ལ་སོགས་པ་གསུམ་ཉིད་ཀྱིས། །འགྲོ་བའི་དོན་ལ་རབ་ཏུ་འཇུག་།ཡི་གེ་གང་ཞིག་སྔར་བཤད་དང ། །གང་ཡང་མངོན་དུ་ཕྱོགས་པ་རྣམས། །བུད་མེད་སྐྱེས་པ་མ་ནིང་སྟེ། །ཁམས་ལ་སོགས་པར་རབ་ཏུ་བརྟག་།འོག་ནས་སྟེང་དུ་བཅས་པར་ནི། །ཤེས་ནས་བློས་ནི་ངེས་པར་སྦྱར། །དྲུག་བཤད་བཞི་དང་གསུམ་དང་གཅིག་།དངོས་མེད་དོ་བོ་གཅིག་ལས་བྱུང ། །དེ་ནི་ཡ་སོགས་དོན་སྦྱར་ན། །དུས་གསུམ་ཤེས་པའང་འབྱུང་བར་འགྱུར། །མཁས་པས་སྒྱུ་མ་མིག་འཕྲུལ་བཞིན། །འགྲོ་བ་རྣམས་ནི་སྒྱུ་མཐར་བྱ། །བརྗོད་པ་ཡི་ནི་སྔགས་འདི་དག་།དངོས་མེད་ངོ་བོ་ལས་བྱུང་བ། །དེ་ནི་ཡོངས་སུ་གྱུར་པའི་གཟུགས། །ལྷ་རུ་ཉེ་བར་མཚོན་པ་གང ། །བརྡ་ཡིས་དེ་ཉིད་གསུམ་གནས་པ། །རང་བཞིན་བཟླས་པའི་མཚན་ཉིད་དོ། །མིང་མེད་བརྗོད་དུ་མེད་པ་སྟེ། །བྱང་ཆུབ་སེམས་མཆོག་འདི་ཡིན་ནོ། །གསུམ་པོ་དེ་ཉིད་གཅིག་གྱུར་པ། །འགྲོ་བ་མེད་ཅིང་འོང་བ་མེད། །འགག་མེད་རབ་ཏུ་ཞི་བ་སྟེ། །རྟག་དང་ཆད་པ་རྣམ་སྤངས་པ། །དུས་གསུམ་མཁྱེན་པས་མ་བྱས་པའི། །རྟོག་པ་ནམ་མཁའ་དབྱེར་མེད་མཚན། །འདི་ཉིད་ཁོ་ན་དོན་དམ་སྟེ། །སོ་སོར་རང་རིག་
121a
༄#། །མཚན་ཉིད་དོ། །དེ་འདི་སེམས་ཅན་ཀུན་ཞེས་བྱའི། །སངས་རྒྱས་བྱང་ཆུབ་ངོ་བོ་ཉིད། །བྱང་ཆུབ་སེམས་དཔའ་གཅིག་འབྱུང་ཡང ། །རྟེན་ཅིང་འབྲེལ་འབྱུང་རང་བཞིན་ཅན། །གང་འདི་བྱང་ཆུབ་སེམས་དག་ཉིད། །རྣལ་འབྱོར་པ་ནི་ཉི་འདྲར་འགྱུར། །འདི་ནི་རྣམ་རྟོག་ཀུན་བྲལ་ཡང ། །རིགས་ཀུན་ལ་ནི་འཇུག་པར་འགྱུར། །སྲེག་དང་སྐེམ་དང་བདེ་ཅན་དང ། །ཀུན་ཟར་འཇུག་པའི་མེ་བཞིན་ནོ། །འདི་ནི་ལྷས་ཀྱང་མཆོད་བྱ་བར། །སེམས་ཅན་ཀུན་ལ་རྣམ་པར་གནས། །བྱང་ཆུབ་སེམས་འདོད་བདག་ཉིད་དེ། །འགྲོ་བ་བུ་གཅིག་བཞིན་ལྟ་ཞིང་།། གང་ཞིག་བདག་དང་མཉམ་གནས་པ། །བྱམས་པ་ཆེན་པོ་དེ་བསྐྱེད་བྱ། །ཕྱིན་ཅི་མ་ལོག་འདི་མཐོང་ནས། །བྱང་ཆུབ་སེམས་ནི་ཡང་དག་འབྱུང ། །དེས་ནི་སྙིང་རྗེ་ཆེར་གྱུར་ནས། །དེས་ནི་འཁོར་བ་ངེས་པར་འཇོམས། །སེམས་ཅན་ཀུན་དང་དེ་བཞིན་བདག་།བྱང་ཆུབ་སེམས་ལ་མཐོང་ན། །འོན་ཀྱང་འགྲོ་བའི་དོན་བྱེད་བ། །དེ་ལས་དགའ་བ་སྐྱེ་བར་འགྱུར། །འཁོར་བ་དངོས་པོ་ཡོད་མིན་ལ། །སེམས་ཅན་རྣམས་ཀྱང་དེ་དང་འདྲ། །བྱང་ཆུབ་སེམས་ནི་མཐོང་ནས་ནི། །བཏང་སྙོམས་ཆེན་པོར་གྱུར་པ་ཡིན། །དེ་ནས་རྡོ་རྗེ་འཛིན་པ་ཡིས། །ཐོས་པའི་བྱང་ཆུབ་སེམས་དྲན་ཞིང ། །སླར་ཡང་དེ་དོན་མཚན་ཉིད་ནི། །རྣམ་པར་སྣ་བ་མཛད་ཆེ་ལ་ཞུས། །འཁོར་དང་གཅིག་ཤོས་ཞེས་བྱ་བ། །འདི་ཀུན་བྱང་ཆུབ་སེམས་ཡིན་ན། །ཇི་ལྟར་སོ་སོར་གྱུར་ནས་ནི། །ཕན་ཚུན་
121b
འགལ་བར་རབ་ཏུ་གནས། །བདག་ཉིད་ཀྱིས་ནི་བདག་ཉིད་ལ། །གཉིས་སུ་འགོག་བྱེད་གང་ཡང་མེད། །གང་ཞིག་ནོར་བུ་གཅིག་ལས་བྱུང ། །མི་མཐུན་ཕྱོགས་སུ་ཇི་ལྟར་སྣང ། །དམན་དང་བར་མ་དེ་བཞིན་མཆོག་།འཁོར་བར་ཉོན་མོངས་མི་ཟད་པས། །སེམས་ཅན་ཁ་ཅིག་གཟིར་བ་དང ། །བྱང་ཆུབ་སེམས་ལའང་སྦྱར་བར་འགྱུར། །དེ་ལྟའི་རྣམ་རྟོག་ཀུན་རྟོག་པར།། མ་འོངས་སྐྱེ་བོ་བགྱིད་འགྱུར་གྱི། །རྟེན་ཅིང་འབྲེལ་འབྱུང་ལས་བྱུང་བ། །འདི་དག་འཚལ་བར་མི་འགྱུར་རོ། །དངོས་པོ་མེད་པའི་ཆོས་རྣམས་ལ། །བྱིས་པ་རྣམས་ནི་རྩོད་པར་འགྱུར། །དེ་རྣམས་རྩོད་པ་མེད་པའི་ཕྱིར། །དགོངས་པ་བཤད་པར་མཛད་དུ་གསོལ། །དེ་ནས་བདག་པོ་བཅོམ་ལྡན་འདས། །རྡོ་རྗེ་ཅན་ལ་གསང་དགོངས་པ། །ཤིན་ཏུ་རྙེད་དཀའ་བྱང་ཆུབ་སེམས། །དེ་ནི་ཡང་དག་བཀའ་སྩལ་ཏོ། །ཕྱི་མའི་མཐའ་གང་སྟོང་པ་གཅིག་།སྔོན་གྱི་མཐར་ཐུག་དེ་བཞིན་ཏེ། །སེམས་དེ་མངོན་དུ་བྱས་ནས་ནི། །ཅི་དགའ་བར་ནི་བྱ་བ་ཡིན། །སེམས་ནི་དེ་ཡིས་མ་མཐོང་བས། །ལྟ་བ་སོ་སོར་གྱུར་པ་ཡིན། །དེ་བས་དེ་རྣམས་འཁོར་བ་རུ། །འགྲོ་བ་དྲུག་གི་མིང་དུ་གྱུར། །དེས་ན་ཚངས་པ་ཁྱབ་འཇུག་དང ། །དབང་ཕྱུག་ཆེ་ལ་ཀུན་ཏུ་བརྟེན། །ཟླ་བ་ཉི་མ་བྱ་བ་ཡི། ། ཀུན་ཏུ་སྤྱོད་པ་དེ་རྣམས་བྱེད། །སུམ་ཅུ་རྩ་གསུམ་པར་བཤད་དང ། །དགའ་ལྡན་གྱི་ནི་གནས་དག་དང ། །དེ་བཞིན་གཞན་དག་དམྱལ་བར་ཡང ། །ལྟ་བས་སྐད་ཅིག་དག་གིས་འགྲོ། །ཡི་
122a
༄#། །དྭགས་སུ་ཡང་འགྲོ་བ་དང ། །འགྲོ་བ་སྣ་ཚོགས་དག་ཏུ་འགྲོ། གང་ཚེ་མ་རིག་ཀུན་བསྟེན་པས། །བདག་ཉིད་ཀྱང་ནི་མི་ཤེས་སོ། །འདུ་ཤེས་ཅན་དང་འདུ་ཤེས་མེད། ། སེམས་ཅན་དུ་བརྟགས་འདི་གནས་པ། །དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཉིན་དང་མཚན་མོའི་ཆ་ཡིས་ཀྱང ། །རང་གི་རྣམ་པར་རྟོག་པར་ལྷུང ། ། དེ་ནས་འཁོར་བར་སྐྲག་བཞིན་དུ། །སྣ་ཚོགས་འགྲོ་བར་དེ་དག་འགྲོ་།མི་རྟོག་པ་ཡི་སེམས་དེ་ནི། །འཁོར་བའི་རྒྱ་མཚོར་གནས་གྱུར་ཀྱང ། །དེ་ནི་ཕྱིན་ཅི་ལོག་གྱུར་པས། །ཁྱི་དང་ལྕེ་སྤྱང་གླང་པོ་དང ། །སེམས་དེ་ལྟར་ཡང་འགྲོ་བར་འགྱུར། །དེ་བཞིན་དུ་ནི་ཕག་ཉིད་དང ། །མི་ཡི་རིགས་ནི་སྨྱིག་མཁན་དང ། །སྨེ་ཤ་ཅན་དང་རིགས་ངན་དང ། །བཟའ་དང་མི་བཟའ་བྱ་ཀུན་ཏུ། །བྱང་ཆུབ་སེམས་དེ་སྐྱེ་བར་འགྱུར། །བྲམ་ཟེ་ལ་སོགས་འཇིག་རྟེན་ཤེས། །བྱང་ཆུབ་སེམས་ལས་འབྱུང་བར་འགྱུར། །ཕུང་སོགས་དངོས་པོ་མེད་གྱུར་ལས། ། རང་གི་མྱོང་བ་ཤེས་པར་འགྱུར། །དེ་ནི་འཇིག་རྟེན་ཤེས་ཞེས་བཤད། །འཇིག་རྟེན་པ་ནི་བྱང་ཆུབ་སེམས། །ཉེ་བར་དམིགས་པའི་སྦྱོར་བ་ཡིས། །སངས་རྒྱས་སྐུ་རུ་འདི་འབྱུང་སྟེ། ། སྒྱུ་མ་ལྟ་བུའི་རང་བཞིན་ཉིད། །ཚིག་གིས་བརྗོད་པ་ཙམ་དུ་འགྱུར། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་སྙིང་པོའི་དོན་གསུངས་པ། །འགྲོ་བའི་བླ་མ་གཅིག་པུ་ལ། །ཕྱག་འཚལ་
122b
ནས་ནི་སླར་གསོལ་པ། །འཇིག་རྟེན་པ་ཡི་ལུང་ཉིད་ནི། །བྱང་ཆུབ་སེམས་ནི་རབ་གསུངས་ན། །ཇི་ལྟར་འཇིག་རྟེན་ལས་འདས་པ། །མ་འོངས་པ་ཡིས་ཇི་ལྟར་རྟོགས། །ལྟ་བ་ཐམས་ཅད་རབ་སྤང་ཕྱིར། །ཁྱེད་ཀྱིས་ཆོས་རྣམས་སྟོན་མཛད་ན། །ཇི་ལྟར་བྱང་ཆུབ་སེམས་དེ་ཉིད། །ལྟ་བ་དེ་ནི་རབ་བསྟན་འགྱུར། །དགོངས་པའི་ཚིག་ལ་རྨོངས་པ་རྣམས། །གསུངས་པའི་དོན་ནི་མ་རྟོགས་ནས། །གསུངས་པ་འདི་ལས་གཞན་མིན་ཞེས། །དེ་ནི་ཇི་བཞིན་སྒྲར་འཛིན་ཏོ། །དེ་ནས་བཅོམ་ལྡན་སྣ་ཚོགས་པས། །ལག་ན་རྡོ་རྗེ་ལ་གསུངས་པ། །ཁྱེད་གསུངས་དགོངས་པ་མ་རྟོགས་པ། །འདྲི་བར་བྱེད་པ་ལེགས་སོ་ལེགས། །བྱང་ཆུབ་སེམས་ནི་རླུང་གྱུར་ཅིང ། །ནམ་མཁའ་ལ་ནི་རྣམ་གནས་པ། །སེམས་ཅན་ཀུན་གྱི་སྲོག་གྱུར་གང ། ། ལྔ་ཡི་བདག་ཉིད་བཅུ་མིང་ཅན། །རྟེན་འབྲེལ་བཅུ་གཉིས་ཞེས་གྲགས་པ། །ངོ་བོ་ཉིད་རྣམ་གསུམ་དུ་འགྱུར། །རླུང་ཞེས་བྱ་བའི་བྱང་ཆུབ་སེམས། །དབང་པོ་ཀུན་གྱི་གཙོ་འདི་ཡིན། །ཇི་ལྟར་མི་མངོན་ཕྲ་བ་ལས། །རྟག་ཏུ་གསལ་བར་བརྗོད་པ་ཡིན། །འགྲོ་བ་ཡུལ་སོགས་ལས་བྱེད་པ། །འདིར་ནི་དེ་ལ་བརྟེན་པ་ཡིན། །ཞི་བ་དང་ནི་རྒྱས་པ་དང ། །དབང་དང་དེ་བཞིན་མངོན་སྤྱོད་རྣམས། །དེ་ཉིད་གསུམ་གནས་ལ་བརྟེན་ནས། །དེ་ཀུན་བྱང་ཆུབ་སེམས་ཀྱིས་བྱེད། །ཇི་སྲིད་འཇིག་རྟེན་གདགས་པ་དང ། །དེ་བཞིན་བཏགས་པ་སྣ་ཚོགས་
123a
༄#། །རྣམས། །རྣམ་རྟོག་བྱང་ཆུབ་སེམས་ཞེས་པའི། །རླུང་ལས་རྟག་ཏུ་འབྱུང་བ་ཡིན། །བདེ་སྡུག་ལ་སོགས་ཆེས་རྣམས་ཀྱི། །ས་བོན་ལྟ་བུར་བཤད་པ་ཡིན། ། བྱང་ཆུབ་སེམས་ཀྱི་ངོ་བོ་འདི། །ཕུང་སོགས་གཉིས་མེད་མཁའ་དང་མཉམ། །ཤེས་རབ་ཐབས་དང་སྦྱོར་བ་ཡིས། །བྱང་ཆུབ་སེམས་ནི་འགྲོ་བར་འགྱུར། །ཀློག་དང་བསམ་གཏན་རྣམ་སྤང་པར། །བདག་པོར་བདག་ཉིད་ཟློས་པ་དེ། །ཉིན་དང་མཚན་མོའི་དབྱེ་བ་ཡིས། །ཉི་ཟླ་རབ་ཏུ་སྦྱོར་བ་ཡིས། །དངོས་པོ་མེད་པར་འགྲོ་ཁྱབ་པ། །བྱང་ཆུབ་སེམས་ཀྱི་རླུང་གཅིག་པུ། །དགེ་དང་མི་དགེ་འབྲས་སྤངས་ནས། །ནམ་མཁའ་འདྲ་བར་འགྱུར་བ་ཡིན། །འགྲོ་བའི་དོན་ནི་ཤེས་པས་ཀྱང ། །མིང་ནི་དེ་བཞིན་ཉིད་ཅེས་བྱ། །དབྱངས་ཀྱི་ཐུང་ངུ་ཉིན་མོར་བཤད། །རིང་པོ་མཚན་མོ་ཡིན་པར་བཤད། །དབྱངས་དང་གསལ་བྱེད་དབྱེ་བ་ལས། །དེ་ཉིད་མིང་ལས་སྦྱར་བར་བྱ། །ེ་མའོ་འགྲོ་བའི་བྱ་བ་བྱུང ། །དེ་ཉིད་གཞན་ལས་དེ་ཉིད་གསལ། །དེ་ལས་འཇིག་རྟེན་པ་ཡི་བརྡ། །མྱུར་དུ་མངོན་པར་ཤེས་པར་འགྱུར། །དེ་ནས་གསང་བའི་བདག་པོས་ནི། །བྱང་ཆུབ་སེམས་འདི་ཐོས་པ་དང ། །གཙོ་བོ་རྣམ་སྣང་ཆེན་པོ་ལས། །ཁྱབ་བདག་ལ་ནི་སླར་གསོལ་བ། །སེམས་ཅན་ཐམས་ཅད་སྐྱེད་པ་པོ། །སྣ་ཚོགས་གཟུགས་ཅན་སེམས་འདི་ནི། །དེ་བས་དངོས་པོ་མེད་གྱུར་ཀྱང ། །སྲིད་པ་དག་
123b
ཏུ་རབ་ཏུ་གྲགས། །བྱང་ཆུབ་སེམས་ནི་མཁའ་མཉམ་པ། །ལེགས་པར་རྗེས་སུ་མྱོང་མཛད་པ། །འགྲོ་བའི་དོན་ནི་མཛད་པ་པོ། །སྐྱེ་བོ་མཆོག་ལ་དེ་བསྟན་གསོལ། །སྒྲུབ་པ་ཡི་ནི་ཐབས་ཙམ་ཞིག་།ཤེས་ནས་རྒྱུད་ལ་རྒྱབ་ཀྱིས་ཕྱོགས། །འདི་ལྟར་བདག་ནི་སློབ་དཔོན་ཞེས། །མ་འོངས་པ་ན་སྨྲ་བར་འགྱུར། །བདག་གི་ཚིག་ནི་འདི་ཉིད་དག་།ཡིན་ཞེས་སྨྲ་ཞིང་བྱས་པ་འཇིག་།དེས་ནི་དགོངས་པའི་བྱང་ཆུབ་སེམས། །ཇི་བཞིན་དོན་དུ་མི་ཤེས་སོ། །དེ་བཞིན་འཇིག་རྟེན་པ་རྣམས་ནི། །སྐལ་མེད་ཆོས་ཀུན་རྣམ་སྤངས་ལ། །རིག་པ་ཡང་ནི་མི་མཐོང་བས། །དེ་རྣམས་ལ་ཡང་གནས་མེད་འགྱུར། །དེ་བས་བྱང་ཆུབ་སེམས་བདུད་རྩི། །དེ་ནི་སྨྲ་བར་རིགས་པ་ཡིན། །འབྲེལ་བའི་ཉི་མ་ཐོབ་པ་ནི། །མ་འོངས་པ་ན་འབྱུང་བར་འགྱུར། །དེ་ནས་བཅོམ་ལྡན་སྣ་ཚོགས་པས། །གྲགས་ལྡན་རྡོ་རྗེ་འཛིན་པ་ལས། །བྱང་ཆུབ་སེམས་ཀྱི་ངེས་པའི་དོན། །སླར་ཡང་དེ་ཉིད་ལ་གསུངས་པ། །ནང་ན་མ་ཡིན་ཕྱི་རོལ་མིན། །གཉི་ག་མིང་དུའང་འགྱུར་མ་ཡིན། །རྟག་པ་མ་ཡིན་སྐད་ཅིག་མིན། །དེ་ནི་སོ་སོ་རང་རིག་ཡིན། །མི་རྟོག་ནམ་མཁའ་ཇི་བཞིན་དུ། །བྱང་ཆུབ་སེམས་ནི་རྡོ་རྗེ་འཛིན། ། དེ་བཞིན་གཤེགས་པ་འགྲོ་བའི་དོན། །ཡིད་བཞིན་ནོར་བུ་ལྟ་བུར་འབྱུང ། །འདས་དང་མ་འོངས་པ་ཉིད་དང ། །ད་ལྟར་ཞེས་ནི་བྱ་བ་དང ། །སངས་རྒྱས་སྐུ་ཡང་འབྱུང་འགྱུར་བ། །
124a
༄#། །དོན་དམ་གཅིག་ནི་ཀུན་རྫོབ་ཡིན། །རིག་བྱེད་དུས་དང་མེ་ཡི་སྒྲ། །ཉི་ཟླ་རླུང་གི་གཟུགས་ཅན་ཏེ། །བཞི་ཕྱེད་གསུམ་པ་དག་ལས་བྱུང ། །བྱང་ཆུབ་སེམས་གཅིག་དབྱེ་བ་ཉིད། །དེ་ནི་ཤེས་རབ་ཐབས་ཟུང་འབྲེལ། །དེ་བཞིན་བདེ་བྱེད་འཛིན་པ་དང ། །ཧ་ནི་སོ་ལ་གནས་པ་ཡང ། །གནས་སྐབས་ཇི་སྙེད་དེ་བཞིན་དུ། །མིང་ནི་ཡོད་པ་མ་ཡིན་པ། །དེ་འདི་བྱང་ཆུབ་སེམས་སུ་འགྱུར། །རྡོ་རྗེ་ནང་དུ་ཞུགས་གྱུར་པ། །བསམ་བྱའི་སྙིང་པོའང་དེ་ཉིད་ཡིན། །ལྷོད་པ་གནས་ཞེས་བྱ་བ་ནི། །ཚེག་དྲག་བཅས་པའི་རླུང་ཡིན་ནོ། ། རང་ཉིད་ལྷོད་པར་བྱེད་པའི་མཆོག་།དེ་ནི་སྲོག་དབང་ཡིད་ཀྱང་ཡིན། །ང་རྒྱལ་དང་ནི་དེ་བཞིན་བློ། །དེ་དང་ལྡན་པ་བྱང་ཆུབ་སེམས། །བཞིར་གྲགས་ཆ་ལས་ཡང་དག་བྱུང ། །ཡོད་མེད་རབ་ཏུ་ཞི་བ་ཅན། །དངོས་པོ་མེད་པའི་སེམས་འདི་ནི། །རང་རིག་གཅིག་པུའི་སྤྱོད་ཡུལ་ཡིན། །དེ་ཉིད་དོན་ནི་རིག་བྱེད་པ། །དགོངས་པས་ཡང་དག་བཤད་པ་ཡིན། །དེ་ནས་གསང་བའི་དགོངས་པ་འདི། །ཆོས་ཀྱི་ཡི་གེ་མཆོག་ཐོས་ནས། །བྱམས་པ་ཞེས་ལ་སོགས་པ་ཡི། །བྱང་ཆུབ་སེམས་དཔའ་སེམས་དཔའ་ཆེ། །ངོ་མཚར་རྨད་བྱུང་ལེགས་སྐྱེས་ནས། ། ཆེད་དུ་བརྗོད་པ་ཆེད་དུ་བརྗོད། །ེ་མའོ་སངས་རྒྱས་ཨེ་མའོ་ཆོས། །ེ་མའོ་ཆོས་ནི་སྟོན་མཛད་པ། །དངོས་ཀུན་དག་པའི་དོན་གཅིག་པུ། །དག་པ་དེ་ཉིད་དོན་དག་སྟེར། །རྣམ་པར་
124b
མི་རྟོག་མཁའ་མཚུངས་བཤད། །བྱང་ཆུབ་སེམས་ལ་ཕྱག་འཚལ་ལོ། །བདག་མེད་ཆོས་ལས་ཡང་དག་བྱུང ། །བྱང་ཆུབ་ཚོགས་ན་རྫོགས་བྱེད་པ། །ངོ་བོ་མེད་ཅིང་དམིགས་སུ་མེད། ། བྱང་ཆུབ་སེམས་ལ་ཕྱག་འཚལ་ལོ། །ཀུན་བཟང་གཅིག་ལས་ཡང་དག་བྱུང ། །དགོངས་དོན་བྱང་ཆུབ་སྟེར་བ་པོ། །བྱང་ཆུབ་སྤྱོད་མཆོག་རྡོ་རྗེ་མཆོག་།བྱང་ཆུབ་སེམས་ལ་ཕྱག་འཚལ་ལོ། །དག་པ་དེ་བཞིན་གཤེགས་པའི་ཐུགས། །སངས་རྒྱས་བྱང་ཆུབ་རབ་སྒྲུབ་པ། །རྡོ་རྗེ་གསུམ་ནི་རང་བཞིན་གཅིག་།བྱང་ཆུབ་སེམས་ལ་ཕྱག་འཚལ་ལོ། །དགོངས་པ་ལུང་སྟོན་ལ་དད་པར། །གང་གང་ཡིད་ནི་བཟོང་གྱུར་པ། །དམ་ཚིག་གསུམ་གྱི་རྡོ་རྗེ་ལས། །དེས་ནི་དེ་བཞིན་བྱ་བ་ཡིན། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་གསུམ་གྱི་གསང་བ་ལས། །ཡང་དག་བྱང་ཆུབ་སེམས་བཤད་པ། །ལེའུ་གཉིས་པ་ཡིན་པར་བཤད།། །།དེ་ནས་དེ་ཉིད་གསང་རྡོ་རྗེ། །གསུམ་དང་ཚུལ་གསུམ་ལམ་གསུམ་མཆོག་།རྣམ་ཐར་གསུམ་དང་དཀོན་མཆོག་གསུམ། །དེ་བཞིན་གཤེགས་པ་ཀུན་བདག་པོ། །དེ་བཞིན་གཤེགས་པ་ཀུན་བཀོད་པ། །འཕྲོ་བའི་སྤྲིན་གྱི་རྡོ་རྗེ་དང ། །ཏིང་ངེ་འཛིན་ལ་སྙོམས་ཞུགས་ཏེ། །དེ་ནས་རྡོ་རྗེ་འཛིན་ལ་གསུངས། །རྡོ་རྗེ་བཀོད་པ་མཆོག་འདི་ཡི། །ལེའུ་བརྟུལ་ཞུགས་བཟང་པོ་ཉོན། །འདི་ནི་དེ་བཞིན་གཤེགས་པ་ཀུན། །ཕྲ་མོ་རྣལ་འབྱོར་དག་ལ་བཞུགས། །
125a
༄#། །ོཾ་ནི་གཅིག་དང་ཡང་དག་ལྡན། །ཤཱུ་ནྱ་ཏཱ་ནི་གཉིས་པ་སྟེ། །ཛྙཱ་ན་ཞེས་ནི་གསུམ་པ་ཡིན། །བཛྲ་ཞེས་བྱ་བཞི་པའོ། །སཝ་བྷཱ་བཱཏྨ་ཀཿ ་ལྔ་པ། ། ཧཾ་ཞེས་པ་དྲུག་པར་བརྗོད། །དེ་ལྟར་བདེར་གཤེགས་དྲུག་པ་ནི། །སྐྱེ་བོ་མཆོག་ལ་བསྟན་པ་ཡིན། །ོཾ་ཤཱུ་ནྱ་ཏཱ་ཟུང་དང་པོའོ། །ཛྙཱ་ན་བཛྲ་གཉིས་པ་ཡིན། །སཝ་བྷཱ་བཱཏྨ་ཀོཉཧཾ་གྱུར། །དེ་ཉིད་གསུམ་ནི་འདིར་བརྟགས་པའོ། །དེ་ཉིད་གསུམ་ནི་གཅིག་གྱུར་པར། །མི་གསལ་གསལ་བའི་མིང་ཅན་ནོ། །མཁའ་དབུས་སངས་རྒྱས་དཀྱིལ་འཁོར་ནི། །འོད་ཟེར་སྤྲིན་གྱི་ཚོགས་ཆེན་པོ། །ཡི་གེ་མ་ཡི་འོད་ཀྱིས་ཁྱབ། །ཀུན་ནས་ཡོངས་སུ་ཟླུམ་པོའོ། །འདོད་ཡོན་ལྔ་ཡིས་ཀུན་ཏུ་ཁྱབ། །མཆོད་པ་རྣམ་པ་ལྔས་བརྒྱན་པ། །མདོར་ན་དེ་ལྟར་བསྒོམས་ནས་སུ། །དབུས་སུ་གཟུགས་ནི་བསྒོམ་པར་བྱ། །རྣམ་པར་སྣང་མཛད་ཕྱག་རྒྱ་མཆོག་།དེ་ཉིད་གསུམ་གྱི་རྡོ་རྗེས་མཚན། །ཡང་ན་རྡོ་རྗེ་གསུམ་མགོན་གྱི། །ཕྱག་རྒྱ་ཡང་ནི་རྣམ་པར་བསྒོམ། །མི་བསྐྱོད་པ་ཡི་ཕྱག་རྒྱ་ཆེ། །ཚོགས་ནི་གཉིས་མེད་སྦྱོར་བ་དང ། །དཀོན་མཆོག་དཔལ་གྱི་རྒྱ་ཆེན་དང ། །ཚེ་དཔག་མེད་པའི་འོད་བྱེད་དང ། །དེ་བཞིན་དོན་ཡོད་གཟུགས་ཅན་རྒྱ། །སངས་རྒྱས་དཀྱིལ་འཁོར་དག་ཏུ་བསྒོམ། །རྡོ་རྗེ་གསུམ་གཅིག་རྡོ་རྗེ་ཅན། །ིནྡྲ་ནཱི་ལའི་མདོག་འདྲ་བ། །རབ་འབར་ཕྱག་ན་རྡོ་རྗེ་བསྣམས། །རྣམ་པར་
125b
གཙིགས་པ་འཇིགས་འཇིགས་ལྟ། །ཛམྦུ་ཆུ་བོའི་གསེར་འོད་འདྲ། །སངས་རྒྱས་སྤྲིན་གྱིས་རབ་ཏུ་འཁྲིགས། །དེ་ནི་ཕྱག་ན་རྡོ་རྗེ་ཆེ། །རྩེ་མོ་དགུ་པ་རྣམ་པར་བསྒོམ། །ཤེལ་དང་ཟླ་བའི་འོད་འདྲ་བ། །ཐོར་ཚུགས་ཅོད་པན་དག་གིས་བརྒྱན། །རབ་འབར་ལག་ན་འཁོར་ལོ་བསྣམས། །སྣ་ཚོགས་རྒྱན་གྱིས་རྣམ་པར་བརྒྱན། །མྲྒད་ཏེ་ཡི་འོད་འདྲ་བ། །རྡོ་རྗེ་འབར་བས་རྣམ་པར་བརྒྱན། །འབར་ཞིང་འབར་བའི་ཚོགས་ཀྱིས་ཁྱབ། །རིན་ཆེན་དེ་ལ་རྣམ་པར་བསྒོམ། །འདོད་ཆགས་ཆེན་པོ་རྡོ་རྗེ་ཅན། །པདྨ་རཱ་གའི་མདོག་འདྲ་ཞིང ། །ཐོར་ཚུགས་ཅོད་པན་དག་གིས་བརྒྱན། །ཕྱག་ན་པདྨ་བསྣམས་པར་བསྒོམ། །སྣ་ཚོགས་རྡོ་རྗེ་གདོན་མི་ཟ། །འོད་ཆེན་སྣ་ལྔའི་འོད་འདྲ་བ། །ཞི་བ་སངས་རྒྱས་དཀྱིལ་འཁོར་དུ། །ཕྱག་ན་རལ་གྲི་བསྣམས་པར་བསྒོམ། །དེ་ལྟར་རྣལ་འབྱོར་བཤད་པ་དག་།གསང་བའི་བདག་པོས་ཐོས་ནས་ནི། །ཕྲ་མོའི་རྣལ་འབྱོར་ཆ་དག་ཀྱང ། །དེ་བཞིན་གཤེགས་བདག་ལ་ཞུས་པ། ། ཕུང་པོ་ཁམས་སོགས་སྦྱོར་བ་ཡིས། །དེ་བཞིན་གཤེགས་པས་བཀའ་སྩལ་ན། །མཁའ་དབུས་སངས་རྒྱས་དཀྱིལ་འཁོར་དུ། །དེ་རྣམས་ཀྱང་ནི་ཇི་ལྟར་འགྱུར། །གཅིག་ཤོས་ཕྱི་རོལ་ཏུ་སྒོམ་པ། །དཀྱིལ་འཁོར་སངས་རྒྱས་མིང་ཅན་ནི། །དངོས་པོ་མེད་པའི་དངོས་པོ་ལ། །སྒོམ་པ་པོ་རྣམས་ཇི་ལྟར་བརྟག་།མགོན་པོ་ཕྲ་མོའི་རྣལ་འབྱོར་འདི། །
126a
༄#། །དཀྱིལ་འཁོར་གང་ཞིག་བཀའ་སྩོལ་ཅེས། །གང་ཞིག་མ་འོངས་པ་རྣམས་ནི། །འདི་ལྟར་མཆོག་ཏུའང་སོམ་ཉི་འཚལ། །ལག་ན་རྡོ་རྗེ་གྲགས་ལྡན་པ། །ཕྲ་མོའི་རྣལ་འབྱོར་དེ་ཉིད་སྐྱེས། །འགྲོ་བ་གཉིས་མེད་སྦྱོར་བ་ཡིས། །ཕྲ་བ་དགོངས་པས་གསུངས་པ་ཡིན། །རྣམ་ལྔ་མངོན་པར་བྱང་ཆུབ་འདི། །མ་འོངས་སྐྱེ་བོའི་རྒྱུར་གྱུར་ཏེ། །ཆོས་ནི་ཡང་དག་སྡུད་འགྱུར་གང ། །ཇི་ལྟ་ཇི་ལྟར་སྟོན་པར་བྱེད། །ཕུང་པོ་ཉིད་ནི་སངས་རྒྱས་གྱུར། །བྱང་ཆུབ་དོན་གྱི་རྐྱེན་ལས་བྱུང ། །དེ་ཡང་དེ་བཞིན་གཤེགས་བཤད་པ། །དེ་ཉིད་གཉིས་མེད་སྦྱོར་བས་སོ། །སྟོན་དང་འཇོག་པ་པོ་འདི་ནི། །བློ་ཡི་དངོས་གྲུབ་སྟོན་པ་པོ། །ཐོག་མཐའ་མེད་པ་རྣལ་འབྱོར་ནི། །ཕྲ་མོ་ཞེས་ནི་བྱ་བར་བརྟག་།མི་གསལ་གསལ་བར་ཡང་དག་སྦྱོར། །དངོས་མེད་ངོ་བོ་ལས་སྐྱེས་པའོ། །གཟོད་མ་ཉིད་ནས་རབ་གྲུབ་པ། །གཅིག་དང་དུ་མ་རྣམ་སྤངས་པ། །རྟེན་འབྲེལ་ཆོས་ཞེས་གྲགས་པ་སྟེ། །དངོས་པོ་ཐམས་ཅད་གཅིག་ཏུ་བྱུང ། །བདག་ཉིད་འདི་འདྲར་བྱས་ནས་ནི། །ཆོས་ཀྱི་དཀྱིལ་འཁོར་ཡང་དག་བྲི། །དམར་དང་ནག་དང་དེ་བཞིན་སེར། །དཀར་པོ་ཉིད་ནི་མདོ་རུ་སྟེ། །བཞི་བཞི་གཅིག་ཏུ་སྦྱོར་བ་ཡང ། །གོས་དཀར་ལ་སོགས་ཡང་དག་བྲི། །དེ་རྣམས་དབུས་སུ་ལྷ་མོར་བཅས། །ཞི་སྦྱོར་མཆོག་དང་མཆོག་
126b
མིན་དང ། །སྟེང་དང་ཐད་ཀ་མཉམ་དང་འོག་།ཇི་ལྟར་གོས་དཀར་སོགས། །མེ་དང་རླུང་དང་དབང་ཆེན་དང ། །ཆུ་སྟེ་སོ་སོའི་དཀྱིལ་འཁོར་ལ། །བཅོ་བརྒྱད་དག་ཏུ་ཡང་དག་བཤད། དེ་ཡང་འདི་ཉིད་དག་ལ་བཤད། །ཇི་ལྟར་འོ་མ་ཁྱད་པར་ནི། །མར་གསར་གནས་པར་གྱུར་བ་ཡིན། །དེ་བཞིན་གོས་དཀར་ལ་སོགས་ལ། །ཞི་བ་ཉིད་ནི་དེ་གནས་སོ། །གཟུགས་ལ་སོགས་པ་ནང་གི་ཆོས། །མཐོང་བ་དེ་ནི་ལྷག་མཐོང་ཡིན། །མི་བསྐྱོད་ལ་སོགས་གྲངས་ཇི་བཞིན། །རྟོག་པ་དག་ནི་ཞི་གནས་ཡིན། །འདི་གཉིས་དངོས་པོ་མེད་པའི་བདག་།དེ་བཞིན་ཉིད་ནི་ཞི་ཞེས་བྱ། །དེ་བཞིན་ཉིད་ཀྱི་དཀྱིལ་འཁོར་དུ། །སངས་རྒྱས་ཐམས་ཅད་གཞུག་པར་བྱ། །རྣལ་འབྱོར་པ་ཡི་དབུགས་རྡུབ་དབྱུང ། །སྦྱོར་བ་དེ་ཉིད་གཅིག་པ་ཉིད། །ཤེས་རབ་ཐབས་ལ་གནས་ནས་ནི། །སྔགས་ཀྱི་ཡན་ལག་མ་ཉམས་བཟླས། །བྱ་བ་ཐམས་ཅད་ཉིད་དུ་ཡང ། །རྣལ་འབྱོར་རིག་པས་ཉལ་སོགས་ལ། །མིང་མེད་བརྗོད་དུ་མེད་པ་དང་།། དུས་གསུམ་འདས་པ་རྟག་ཏུ་བཟླ། །གོས་དཀར་ལ་སོགས་བཟླས་བཤད་པ། །བརྒྱ་ཕྲག་གཉིས་དང་ཉི་ཤུ་ལྔ། །བཞི་པ་ལེགས་པར་བསྒྲེས་པ་ཡི། །སྦྱོར་བཞིས་བསྡུས་པས་བརྒྱ་ཕྲག་དགུ་།དགུ་བརྒྱ་དག་ཏུ་གང་བསྟན་པ། །ཉི་ཤུ་རྩ་བཞིའི་རིམ་གྱིས་ནི། །དེ་ནི་སོ་སོར་འབྱུང་པ་ལས། །ཉི་ཁྲི་ཆིག་སྟོང་དྲུག་བརྒྱའོ། །དེ་འདིར་གསང་བ་དགོངས་པ་ཡིས།།
127a
༄#། །ཕྲ་མོའི་རྣལ་འབྱོར་བསྟན་པ་ཡིན། །ཀློག་དང་བསམ་གཏན་མེད་མོད་ཀྱི། །འོན་ཀྱང་བཟླས་པ་ཡིན་པར་བཤད། །དེ་ལྟར་རྣམ་པ་མང་པོ་ཡི། །འགྲོ་ལ་ཕན་པའི་གསུང་ཐོས་ནས། །དེ་བཞིན་གཤེགས་ཀུན་བདག་པོ་ལ། །རྡོ་རྗེ་ཅན་གྱིས་སླར་ཡང་ཞུས། །གང་ཞིག་བསྒོམས་ན་མ་འོངས་འགྲོ། །ཐམས་ཅད་མི་རྟོག་པར་འགྱུར་བ། །རྡོ་རྗེ་གསུམ་གྱི་སྙིང་པོ་མཆོག་།སྙིང་པོ་བཅོམ་ལྡན་བཤད་དུ་གསོལ། །དེ་ཉིད་གསུམ་གཉིས་མེད་སྦྱོར་བ། །དེ་ནི་ཕྲ་མོའི་རྡོ་རྗེ་བསྒོམ། །མྱུར་བ་ལ་སོགས་གསུམ་སྤངས་པའི། ། རྣལ་འབྱོར་བར་ཡང་བདག་ཅག་འགྱུར། །དེ་ནི་བདག་རིག་ཡིད་ཆེས་ཤིང ། །ཞི་བ་ཉིད་ནི་མི་ཤེས་འགྱུར། །ཕྲ་མོའི་རྣལ་འབྱོར་གཙོ་སྤངས་ཏེ། །ལོག་པའི་རྣལ་འབྱོར་ཀུན་ཏུ་བསྟེན། །སྟོན་པ་པོ་ཡི་སྦྱོར་སྨྲ་ཞིང ། །ཕྲ་མོ་ཞེས་བྱ་དེ་ཉིད་ནི། །མ་འོངས་དུས་ན་སྤོང་འགྱུར་བ། །དེ་ཉིད་དེ་ནི་ངེས་པར་བྱེད། །དེ་ནས་རྡོ་རྗེ་འཛིན་སྨྲ་བའི། །ལུང་བསྟན་པ་ནི་གསན་པ་དང ། །དེ་བཞིན་གཤེགས་པ་ཀུན་བདག་པོ། །ཆོས་ཉིད་ངོ་བོ་ཉིད་ཅེས་བྱ་ཡི། །ཏིང་ངེ་འཛིན་དེ་ཀུན་ནས་ནི། །སྙོམས་པར་ཞུགས་པ་ཉིད་དུ་མཛད། །དཔལ་ལྡན་སྙོམས་པར་ཞུགས་མཛད་ནས། །གསང་སྔགས་འདི་ནི་བཀའ་སྩལ་ཏོ། །སྐུ་གསུང་ཐུགས་ནི་རྡོ་རྗེར་བཤད། །ཁྱད་པར་དུ་ནི་བྱིན་རློབ་པ། །གཉིས་མེད་རྡོ་རྗེ་གསུམ་སྦྱོར་བས། །དེ་
127b
ནི་ཡང་དག་བཤད་པར་བྱ། །ོཾ་ནི་དང་པོར་ཤེས་པར་བྱ། །དྷརྨ་ཞེས་བྱ་གཉིས་པའོ། །དྷཱུ་ཏུ་ཞེས་བྱ་གསུམ་པར་བཤད། །སཝཱབྷཱ་བར་གྲགས་པ་བཞི་པའོ། །ཱཏྨ་ཀ། །ནི་ལྔ་པ་ཡིན། ། ཧཾ་དུ་གྱུར་དྲུག་པར་འདོད། །སྔགས་འདི་བརྗོད་ནས་དེ་འོག་ཏུ། །སྒོམ་པ་བདག་ཉིད་ཅན་གྱིས་བསྒོམ། །རིན་ཆེན་ཁ་དོག་སྣ་ལྔ་པ། །ཡུངས་ཀར་གྱི་ནི་འབྲུ་ཚད་ཙམ། །ཉམས་དགའི་འདི་རབ་རྩེ་མོ་རུ། །རྣལ་འབྱོར་པ་ཡིས་རྟག་པར་བསྒོམ། །རིན་ཆེན་མི་གཡོར་གྱུར་ནས་སྤྲོ། །མི་གཡོར་མ་གྱུར་སྤྲོ་མི་བྱ། །སངས་རྒྱས་འབར་བའི་འོད་འདྲ་བ། །མཆོག་རབ་སྤྲིན་རྣམས་སྤྲོ་བར་བྱ། །འཁོར་ལོ་རྡོ་རྗེ་སྤྲིན་ཆེན་དང ། །པདྨ་རལ་གྲི་མཚོན་ཆ་མཆོག་།བྱང་ཆུབ་སེམས་དཔའི་སྤྲིན་ཆེན་རྣམས། །སྤྲོ་བའི་བདག་ཉིད་ཅན་གྱིས་སྤྲོ། །ཕྲ་མོའི་དཀྱིལ་འཁོར་དབུས་གནས་པར། །རྡོ་རྗེ་དཀྱིལ་འཁོར་བསྒོམ་པར་བྱ། །བཟླས་དང་སྒོམ་པའི་སྦྱོར་བ་ཡང ། །པདྨའི་དཀྱིལ་འཁོར་དག་ཏུ་བསྒོམ། །རིན་ཆེན་ལྟ་བུའི་དཀྱིལ་འཁོར་དུ། །དངོས་ལ་བརྩོན་པས་རིན་ཆེན་སྒོ། །དཀྱིལ་འཁོར་སྦྱོར་བ་ལས་བྱུང་བ། །ནམ་མཁའི་དཀྱིལ་འཁོར་དུ་བྲི་བྱ། །འདི་དག་སངས་རྒྱས་རབ་མཆོག་གི། ཕྲ་མོ་རྡོ་རྗེ་གསུམ་སྒྲུབ་པའོ། །རྡོ་རྗེ་དཀྱིལ་འཁོར་ལས་བྱུང་བ། །ཐམས་ཅད་མཁྱེན་པའི་ཚུལ་ཐོབ་པའོ། །དགོངས་པ་གསང་བ་ཞེས་པ་ཡི། །ལུང་སྟོན་དམ་པ་འདི་ལ་ནི། །གང་གིས་སེམས་ནི་བཟོད་གྱུར་པ། །དེ་ནི་དེ་བཞིན་བྱེད་པ་
128a
༄#། །ཡིན། །དེ་བཞིན་གཤེགས་པ་ཀུན་གྱི་གསང ། །རྡོ་རྗེ་ཕྲ་མོ་དེ་ཉིད་ལས། །འདི་ནི་རྡོ་རྗེ་བཀོད་པའི་མཆོག་།ལེ་འུ་གསུམ་པ་ཉིད་ཡིན་ནོ།། །།དེ་ནས་བཅོམ་ལྡན་འདས་ཐམས་ཅད། །གཉིས་སུ་མེད་པར་གྱུར་ནས་ནི། །སླར་ཡང་རྡོ་རྗེ་གསུམ་བདག་ལ། །བསྟོད་པས་དེ་རྣམས་གསོལ་བ་འདེབས། །དེ་བཞིན་གཤེགས་པ་ཐམས་ཅད་ཀྱི། །ཞི་བ་གནས་རྣམས་མཆོག་གྱུར་པ། །ཆོས་ཀུན་གཅིག་ཏུ་བདག་མེད་པ། །དཀྱིལ་འཁོར་མཆོག་འདི་བཤད་དུ་གསོལ། །ཡོངས་སུ་རྫོགས་པར་ཡང་དག་བརྒྱན། །མཚན་རྣམས་ཀུན་གྱིས་མཚན་པའོ། །ཀུན་ཏུ་བཟང་པོ་སྐུ་ཡི་མཆོག་།དཀྱིལ་འཁོར་དམ་པ་བཤད་དུ་གསོལ། །ཡེ་ཤེས་སྤྱོད་པའི་དོན་ལས་བྱུང ། །ཞི་བའི་ཆོས་ནི་སྦྱོང་བ་པོ། །ཀུན་ཏུ་བཟང་པོ་གསུང་གི་མཆོག་།དངོས་མཆོག་དཀྱིལ་འཁོར་བཤད་དུ་གསོལ། །རང་བཞིན་གྱིས་ནི་དྲི་མེད་དག་།སེམས་ནི་ཀུན་ཏུ་བཟང་པོ་ཉིད། །སེམས་ཅན་ཀུན་གཅིག་ཆེ་བའི་མཆོག་།དཀྱིལ་འཁོར་སྙིང་པོ་བཤད་དུ་གསོལ། །དེ་ནས་སྟོན་པ་བཅོམ་ལྡན་འདས། །ཁམས་གཅིག་ཁམས་ནི་གསུམ་པ་པོ། །འཇིག་རྟེན་གསུམ་མཆོག་རྡོ་རྗེ་མཆོག་།འཇིག་རྟེན་གསུམ་གྱི་སྟོན་པ་པོ། །ཉམས་དགའ་དེ་བཞིན་གཤེགས་པའི་གནས། །དེ་བཞིན་གཤེགས་པ་ཀུན་དག་ལ། །ཐུགས་དེ་དཀྱིལ་འཁོར་འདྲ་བ་སྟེ། །དཀྱིལ་འཁོར་དམ་པ་
128b
བཀའ་སྩལ་ཏོ། །དེ་ནས་སེམས་ཀྱི་དཀྱིལ་འཁོར་མཆོག་།རྡོ་རྗེ་ཡེ་ཤེས་རབ་འདྲ་བ། །སྐུ་དང་གསུང་དང་ཐུགས་རྣམས་ཀྱི། །དཀྱིལ་འཁོར་རབ་ཏུ་བཤད་པར་བྱ། །འདི་ནི་གསད་པའི་བདག་ཉིད་མཆོག་།ལེགས་བསྒྲིལ་དེ་བཞིན་ཉིད་བསྟན་པའོ། །སྣ་ཚོགས་ལུང་གི་མཚན་མ་ནི། །མཚན་མ་བཟང་པོར་དེ་བཤད་དོ། །ཀུན་རྫོབ་དང་ནི་དོན་དམ་དག་།གཉིས་སུ་མེད་པ་མཛེས་པ་ཡིན། །ཤེས་རབ་འདི་ནི་ཐིག་ཡིན་ཏེ། །ཐབས་ནི་དེ་ཡི་རྗེས་སུ་འཇུག་པའོ། །ཤེས་རབ་ཐབས་ཀྱི་ཐིག་གཅིག་གིས། །ཆོས་དང་ལོངས་སྤྱོད་རྫོགས་མཆོག་ནི། །སེམས་ཀྱི་དཀྱིལ་འཁོར་ཐིག་གདབ་སྟེ། །རྟེན་འབྲེལ་ཡན་ལག་བཅུ་གཉིས་པ། །འཕགས་པའི་བདེན་བཞི་ངོས་བཞིས་ཏེ། །ཚངས་བའི་གནས་བཞི་གྲ་བཞི་ཡིན། །བསྡུ་བའི་དངོས་གྲགས་སྒོ་ཡིན་ཏེ། རེ་རེའང་བཞི་ཡི་མིང་ཅན་ནོ། །ཆོས་ཀྱི་དེ་ཉིད་དོན་གྱི་བརྡ། །འཁོར་ལོ་ནང་གི་དཀྱིལ་འཁོར་རོ། །མི་ཕྱེད་ཡེ་ཤེས་མཚན་མ་སྟེ། །རྡོ་རྗེ་ཨིནྡྲ་ནཱི་ལ་རྒྱ། །རྣམ་པ་ལྔ་ཡིས་རབ་ཕྱེ་བའི། །རྩེ་མོ་འཁོར་བ་འཇིག་བྱེད་པའོ། །ཤར་ནས་མེ་ལོང་ངོ་བོ་ནི། །འཁོར་ལོ་འབར་བའི་འོད་ཀྱིས་བརྒྱན། །ལྷོ་རུ་ཀུན་མཉམ་ཡེ་ཤེས་ཡིན། །གཅིག་གི་མིང་ཅན་རིན་པོ་ཆེ། །ནུབ་ཏུ་སོ་སོར་རྟོག་པདྨ། །པདྨ་རཱ་གའི་འོད་འདྲ་བ། །བྱང་དུ་གོང་མའི་སེམས་གང་ཡིན། །འགྲོ་བའི་རྣམ་རྟོག་འཇོམས་བྱེད་པ། །བྱ་བ་སྒྲུབ་པ་རལ་གྲིར་འགྱུར། །འོད་འཕྲོ་འབར་བ་འདྲ་བའི་མདོག་།ཤར་
129a
༄#། །ལྷོ་བྱམས་པའང་སྤྱན་ཡིན་ཏེ། །སྤྲིན་སྔོན་དང་ནི་མཉམ་པའི་འོད། །ལྷོ་ནུབ་སྙིང་རྗེ་ཞེས་བྱ་བ། །མཱ་མ་ཀཱི་ནི་རིགས་རྡོ་རྗེ། །ནུབ་བྱང་པདྨ་ཞེས་བྱ་བ། །དགའ་བ་ལེགས་པར་གནས་པ་བཞིན། །བྱང་ཤར་ཨུཏྤལ་ལྟར་སྣང་བའི། །བཏང་སྙོམས་བཅས་པ་སྔོན་པོ་འདྲ། །དེ་བཞིན་ཤར་སྒོར་སྦྱིན་པ་ནི། །ཐ་བ་མདངས་ལྡན་འོད་དང་བཅས། །དེ་བཞིན་སྙན་སྨྲ་ཞེས་གྲགས་པ། །དབྱིག་པ་འོད་བཟང་རྡོ་རྗེ་འབར། །ནུབ་ཏུ་དོན་སྤྱོད་ཅེས་བྱ་བ། །རྟ་མགྲིན་གྱི་ནི་པདྨའོ། །དོན་མཐུན་པ་ནི་རྡོ་རྗེ་སྟེ། །རྡོ་རྗེ་འཁྱིལ་བའི་རྡོ་རྗེ་ཅན། ཕྱག་རྒྱ་དགོད་པའི་མཚན་ཉིད་དེ། །འདི་ནི་ལེགས་པར་བཤད་པ་ཡིན། །ཇི་ལྟར་དབྱིབས་ཀྱིས་མཆོད་པ་ནི། །རྣམ་གསུམ་བསྒོམས་པས་འགྱུར་བ་ཡིན། །དང་པོར་ཆེན་པོ་ཡོད་པ་ཡི། །ཕྱག་རྒྱའི་དཀྱིལ་འཁོར་ཡིན་པར་བཤད། །དེ་ལྟར་མཁའ་དང་མཚུངས་གྱུར་དང ། །ཤེས་ནས་འགྲོ་ལ་ཕན་པར་འགྱུར། །རྡོ་རྗེ་གསུམ་དང་ལྷན་ཅིག་འབྱུང ། །དེ་ཚེ་ཟླ་ཟེར་ཕྲེང་བ་ཡི། །སྐད་ཅིག་ལ་སོགས་དུས་དབྱེ་བས། །ལོ་གྲངས་བཅུ་དྲུག་པ་ཡི་མིང ། །མ་སྐྱེས་པར་འབྱུང་ཞི་བ་ནི། །བུད་མེད་ཅེས་ནི་ངེས་པར་བཤད། །ཞི་བའི་ཆོས་དང་རྗེས་དྲན་པ། །མདངས་བཟང་འོད་ནི་ཡིན་པར་གསུངས། །རྟེན་འབྲེལ་བག་ཆགས་དྲི་ཡིན་ཏེ། །ཡེ་ཤེས་ཁ་ཕྱེ་མེ་ཏོག་གོ་།དངོས་པོ་མེད་པ་རིགས་ཡིན་ཏེ། །ཀུན་མཁྱེན་ཡེ་ཤེས་
129b
དབུས་ཉིད་དོ། །ཆོས་དབྱིངས་ཉིད་ནི་བུད་མེད་ནི། །ཤེས་རབ་འདི་འདྲས་མཉེས་པར་བྱས། །ནང་ནམ་ཡིན་ཕྱི་མ་ཡིན། །གཉི་གར་མ་ཡིན་གཞན་ནས་མིན། །གནས་མེད་གནས་པའི་རྣ་འབྱོར་གྱུར། །དེ་བས་མཱ་མ་ཀཱིར་བཤད་དོ། །དེ་ཡི་ངོ་བོ་ཉིད་གཅིག་པ། །བྱིན་གྱིས་བརླབས་པས་དེ་བཤད་དོ། །ནམ་མཁའ་དང་ནི་གཅིག་ཏུ་གནས། །སངས་རྒྱས་ཞི་བའི་གནས་འགྱུར། །དེ་བས་ཡུལ་དུ་རྣམ་བརྟགས་པ། །བསྡུ་བ་དག་ནི་བཤད་བ་ཡིན། །ཡེ་ཤེས་དབང་པོ་སྟོང་པ་གཅིན། །རྣམ་དག་ཆོས་ཉིད་ཁུ་བ་ཡིན། །ཐམས་ཅད་མཁྱེན་པའི་ཡེ་ཤེས་ཁྲ་རང་བཞིན་ཆོས་སུ་ཡོངས་བརྟགས་པ། །དེ་ཉིད་ལྷ་རྣམས་ཞེས་བྱ་སྟེ། །དངོས་མེད་པ་ནི་དབུལ་བ་ཡིན། །དེ་བྱས་སངས་རྒྱས་སྲས་པོ་རྣམས། །ཁྱད་པར་དུ་ནི་མཉེས་པར་འགྱུར། །གང་ཡང་འཇིག་རྟེན་པས་བརྟགས་པ། །དེ་རྣམས་ཇི་སྐད་བཤད་པ་ཉིད། །མི་ཕྱེད་རྡོ་རྗེ་གསུམ་བསྒོམས་པ། །གསར་པ་ཉིད་དུ་བཀལ་བ་ལེགས་དང ། །ཤིན་ཏུ་ཚད་ལྡན་མཛེས་པ་ཡི། །ཐིག་གིས་མཁས་པས་ཐིག་གདབ་བོ། །བློ་ལྡན་དཀྱིལ་འཁོར་བརྟག་བྱ་བ། །ཁྲུ་ནི་བཅུ་གཉིས་ཚད་ཙམ་ལ། །ངོས་བཞི་དང་ནི་གྲ་བཞིར་ལྡན། །རྟ་བབས་ཀྱིས་ནི་མཛེས་པར་བྱ། །དེ་ཡི་དབུས་སུ་འཁོར་ལོ་ནི། །དགོངས་པས་དང་པོ་བཤད་པ་སྟེ། །དེ་ལས་ལྡོག་པའི་ཚུལ་གྱིས་ནི། །འདི་ན་འཇིག་རྟེན་པ་རྣམས་རྟོག་གང་ཞིག་འཇིག་རྟེན་འདས་ལ་གནས། །དེ་ནི་གཟུངས་ཀྱིས་
130a
༄#། །དབང་བསྐུར་བ། །དངོས་མེད་པ་ནི་འཛིན་པ་དག་།ཡིད་ནི་རྟག་ཏུ་མཁའ་དང་མཚུངས། །དམ་པ་འཇིག་རྟེན་ཤིན་ཏུ་འདས། །འཁོར་བ་དང་ནི་གཅིག་ཤོས་སྤང་ལེན་པ་མ་ཡིན་གཏོང་བ་མིན། །མེད་པ་མ་ཡིན་གནས་མ་ཡིན། །བློ་ལྡན་ཀུན་ཏུ་འདི་ཤེས་པ། །རྣལ་འབྱོར་ཐམས་ཅད་རིག་པ་མཆོག་།ཐུགས་ཀྱི་དཀྱིལ་འཁོར་ལེའུ་འདི་ནི། །ངེས་པའི་རྣལ་འབྱོར་པ་ཞེས་བཤད། །དགོངས་པ་ལུང་བསྟན་ཡིད་འོང་ལ། །གང་ཞིག་ཡིད་ནི་བཟོད་གྱུར་པ། །དེ་རྣམས་ཤེས་རབ་ཐབས་དག་ནི། །ཇི་ལྟར་གནས་པ་དེ་ལྟར་བྱེད།། གསང་བའི་དགོངས་པ་ལུང་བསྟན་ལས། །དེ་ལས་ཐུགས་ཀྱི་དཀྱིལ་འཁོར་གྱི། །ལེའུ་བཞི་པ་ཉིད་ཡིན་ནོ།། །།དེ་ནས་དེ་བཞིན་གཤེགས་པ་མཆོག་།རྡོ་རྗེ་གསུང་བདག་འགྲོ་བའི་བླ། །སླར་ཡང་རྡོ་རྗེ་འཛིན་པ་ལ། །སྔགས་སྤྱོད་དོན་གྱི་དེ་ཉིད་ཞུས། །སྔགས་ཀྱི་བརྟུལ་ཞུགས་སྤྱོད་པ་གཅིག་།ཁྱད་པར་དུ་ནི་བསྲུང་བསླབ་པ། །དེ་རྣམས་ཀྱི་ནི་དགོངས་པའི་གསུང ། །སྤྱོད་པ་བཅོམ་ལྡན་བཤད་དུ་གསོལ། །དེ་ནས་བདག་པོ་དེ་བཞིན་གཤེགས། །རྡོ་རྗེ་འཛིན་པ་དག་གི་ཚིག་།གསན་ནས་འགྲོ་བའི་དོན་གཅིག་པུ། །གསུངས་པའི་དོན་ཅན་བཀའ་སྩལ་ཏོ། །མི་རྟོག་དོན་ལས་ཡང་དག་བྱུང ། །ཞེ་སྡང་ལ་འཇུག་མཚན་ཉིད་ཡིན། །དངོས་མེད་ལ་གནས་གཏི་མུག་སྟེ། །འདོད་ཆགས་འདོད་ཆགས་ལས་བྱུང་བ། །འདོད་
130b
ཆགས་ལྡན་པའི་མིང་ཅན་ཡིན། །ཐེག་པ་མཆོག་ནི་བླ་མེད་པ། །འདོད་ཆགས་ཞེ་སྡང་གཏི་མུག་སྟེ། །འདི་དག་རིགས་སུ་ཡང་དག་བཤད། །དངོས་གྲུབ་དེ་ནི་འདི་བསྒྲུབ་བོ། །རིགས་རན་མྱུར་བར་ཤེས་པར་བྱ། །སྨྱིག་མཁན་དག་ནི་དལ་བ་ཡིན། །མཚམས་མེད་བྱེད་པ་གཉི་ག་སྟེ། །གསོད་པ་དོན་གཉེར་སེམས་པ་པོ། །ཐེག་པ་ཆེན་པོ་བླ་མེད་པའི། །ཐེག་པ་མཆོག་འདི་འགྲུབ་པར་འགྱུར། །སེམས་ཅན་སྡིག་ཆེན་བྱས་པ་དང ། །གཞན་ཡང་མཚམས་མེད་བྱེད་པ་པོ། །གང་ཡང་སློབ་དཔོན་སྨོད་པ་ཡིས། །བསྒྲུབས་ཀྱང་གྲུབ་པར་མི་འགྱུར་རོ། །འདི་གཉིས་དད་པས་མྱུར་དུ་ནི། །ཞེ་སྡང་དག་ལ་གནས་པས་གནས། །གང་གིས་ཕུང་སོགས་དངོས་མེད་པར། །ཞི་གནས་ལས་བྱུང་སེམས་ཀྱིས་བྱས། །དེ་ནི་སྲོག་གཅོད་བྱེད་པ་སྟེ། །ཐེག་པ་མཆོག་ལ་གནས་པ་ཡིན། །ནང་དང་དེ་བཞིན་ཕྱི་རོལ་དག་།རྟེན་འབྲེལ་གཉིས་སུ་སྟོན་པ་ནི། །དེ་ནི་རྫུན་སྨྲ་དགའ་བ་སྟེ། །གནས་མེད་ལ་གནས་རྣལ་འབྱོར་པའོ། །རྫོགས་སངས་རྒྱས་ཀྱི་ཡེ་ཤེས་གང ། །དེ་ནི་རྫས་སུ་ཤེས་བྱ་སྟེ། །དེ་འཕྲོག་ངང་ཚུལ་གང་ཡིན་པ། །གཞན་གྱི་ནོར་ལ་ཆགས་པར་འདོད། །གང་ཞིག་དེ་ཉིད་དངོས་གཅིག་པ། །དེ་བཞིན་ཉིད་ལ་རྟག་སྦྱོར་བ། །སེམས་ཅན་དེ་དེ་འདོད་ལ་དགའ། །སྒྲུབ་པ་མཆོག་ལ་དམ་ ་འགྱུར། །དེ་ཡི་སྟོང་ཉིད་གཏི་མུག་ལ། །ཡུལ་ནི་བཤང་བ་ཞེས་གྲགས་ཏེ། །དབང་པོ་གཅིག་བ་ཞེས་བྱ་ལ།
131a
༄#། །དེ་དག་ཞི་བ་ཟ་བ་ཡིན། །ཐེག་པ་ཆེན་པོ་ཆོས་མཆོག་འདིར། །དེ་དག་བསྒྲུབ་པའི་སྣོད་དུ་འགྱུར། །དེ་ཚེ་རྫུན་དེ་འདོད་པ་དང ། །བཤང་གཅི་ཟས་སུ་བྱེད་པ་པོ། །ཤེས་རབ་ཕ་རོལ་ཕྱིན་ཤེས་རབ། །ཆོས་ཀྱི་སྐུ་ནི་མ་གཅིག་པུ། །གཉིས་མེད་དེ་བཞིན་ཉིད་སྦྱོར་བ། །དངོས་མེད་ཅེས་བྱ་འདོད་སྤྱོད་པ། །ལོངས་སྤྱོད་རྫོགས་དང་མཉམ་གང་ཡིན། །དེ་ཉིད་སྲིང་མོ་ཡིན་པར་འདོད། །རང་ལྷའི་རྣལ་འབྱོར་ལྡན་པ་ཡིས། །གསང་སྔགས་ལུས་ཀྱིས་མཉེས་པར་བྱ། །བཤང་གཅི་ཟས་སུ་བྱེད་པ་ཡི། །སྤྲུལ་སྐུའི་གཟུགས་ཅན་བུ་མོ་དེ། །སྒྲུབ་པ་པོས་ནི་བསྒོམ་པར་བྱ། །མ་དང་སྲིང་མོ་བུ་མོ་ནི། །འདི་འདྲ་རྣལ་འབྱོར་པས་མཉེས་བྱས། །ཐེག་པ་མཆོག་གི་ཆོས་ཉིད་ལ། །དེ་ཉིད་འཇིག་རྟེན་པར་བྱུང་བ། །རྟོག་བོ། །ཇི་ལྟར་མི་རྟོག་ནམ་མཁའ་ནི། །ཀུན་ཏུ་ཁྱབ་པར་གནས་གྱུར་པ། །འདི་ནི་སྒོམ་པ་ཞེས་བཤད་དེ། །ཏིང་འཛིན་བསམ་ཁྱབ་ཅེས་བྱ་བ། །དེ་ཉིད་འཇིག་རྟེན་པར་བྱུང་བ། །རྟོག་པ་དགའ་བའི་མིང་ཅན་ནོ། །སངས་རྒྱས་ཡུམ་གྱི་ཡེ་ཤེས་ལ། །འདོད་སྤྱོང་གོས་པར་མི་འགྱུར་ཏེ། །རྣམ་པར་མི་རྟོག་སྦྱོར་གཅིག་གིས། །མྱུར་དུ་སངས་རྒྱས་དེས་ཐོབ་འགྱུར། །དེ་ནས་བཅོམ་ལྡན་འདས་གསུང་ནི། །སྒྲིབ་ཀུན་སེལ་བ་ལ་སོགས་པའི། །བྱང་ཆུབ་སེམས་དཔའ་སེམས་དཔའ་ཆེས། །ཐོས་ནས་ངོ་མཚར་རྨད་དུ་གྱུར། །འདི་ནི་བདག་པོ་བཅོམ་ལྡན་
131b
འདས། །དེ་བཞིན་གཤེགས་པ་ཀུན་གྱི་བདག་།ཅི་ཡི་སླད་དུ་ཚིག་ངན་པ། །དེ་བཞིན་གཤེགས་འཁོར་ནང་དུ་གསུང ། །འདོད་ཆགས་བྲལ་དང་ཆགས་བཅས་དང ། །གཏི་མུག་བྲལ་བ་རྨོངས་བཅས་དང ། །ཞེ་སྡང་བྲལ་བ་སྡང་བཅས་པའི། །རིགས་ཀྱི་དངོས་གྲུབ་སྟོན་མཛད་ཅིང ། །གང་གཞན་སྡིག་པའི་ཉེས་པ་དང ། །འཚེ་བ་ལ་སོགས་ཡོངས་སྤངས་པ། །འདི་ནི་དེ་བྱེད་སེམས་ཅན་རྣམས། །སྣོད་ཡིན་ཞེས་ནི་ཐུབ་གསུང་ངམ། །དེ་ནས་མགོན་པོ་ཐུགས་རྗེ་ཅན། །སེམས་ཅན་ཀུན་ལ་ཕན་དགྱེས་པས། །དེ་བཞིན་གཤེགས་པ་ཐམས་ཅད་དང ། །བྱང་ཆུབ་སེམས་དཔའ་ལ་གསུངས་པ། །འདི་ནི་ས་ཁམས་དང་མཉམ་པ། །སེམས་ཅན་ཀུན་འཛིན་གཅིག་པུ་པ། །ཆུ་ཁམས་རྟོག་དང་བྲལ་བ་པོ། །སྣ་ཚོགས་གསལ་བར་འགྱུར་བ་ཡིན། །བདག་པོ་མེ་ཡི་གཟུགས་ཅན་ཏེ། །ཐམས་ཅད་ཟ་བར་ཉེ་བར་སྦྱོར། །དེ་བཞིན་ཕྱི་ནང་བདག་ཉིད་མཆོག་།འགྲོ་ལ་གོས་པའི་དྲི་གཅིག་པུ། །བཅོམ་ལྡན་སྣ་ཚོགས་ནམ་མཁའ་མཚུངས། །ཐམས་ཅད་སྣང་ཞིང་ཟབ་མོ། །དེ་ཉིད་བདག་ཉིད་བདག་ཡིན་པར། །བསྒོམས་ན་རྐང་གཉིས་མཆོག་ཏུ་འགྱུར། །སྙིང་པོ་ཞེས་བྱ་སངས་རྒྱས་ཀྱི། །ཆོས་ཉིད་དག་པ་འདི་ཡིན་ཞིང ། །སྔགས་ཀྱི་སྤྱོད་དོན་སྤྱོད་རྣམས་ཀྱི། །བྱང་ཆུབ་སྤྱོད་པའི་མཆོག་འདི་ཡིན། །དེ་ནས་བརྗོད་མི་ལང་ཞེས་པ། །བརྗོད་མི་ལང་པ་ཉིད་གྱུར་པ། །སངས་རྒྱས་ཞིང་རྡུལ་གྲངས་མཉམ་དེ། །སྒྲིབ་པ་ཐམས་
132a
༄#། །ཅད་སེལ་ལ་སོགས། །བྱང་ཆུབ་སེམས་དཔའ་སེམས་དཔའ་ཆེ། །ཀུན་ནས་འཇིགས་ཤིང་སྐྲག་གྱུར་ནས། །འཁོར་གྱི་དཀྱིལ་འཁོར་དེ་ཐམས་ཅད། །གཅིག་ཏུ་བརྒྱལ་བ་ཉིད་གྱུར་ཏོ། །དེ་ནས་གསང་དབང་རྡོ་རྗེ་གསུང ། །གཉིས་མེད་དེ་བཞིན་གཤེགས་ཀུན་གྱིས། །བྱང་ཆུབ་སེམས་དཔའ་བརྒྱལ་བ་རུ། །གཟིགས་ནས་གཙོ་ལ་འདི་སྐད་གསོལ། །མགོན་པོ་སྒྲིབ་ཀུན་སེལ་ལ་སོགས། །བྱང་ཆུབ་སེམས་དཔའ་སེམས་དཔའ་ཆེ། །རང་བཞིན་ཆོས་ཉིད་ཇི་ལྟ་བར། །འདི་རྣམས་བསླང་བར་མཛད་དུ་གསོལ། །མི་གཡོ་བ་འདི་གསང་བ་སྟེ། །ཞི་བ་གཅིག་པུ་བདེ་བའི་མཆོག་།རྫོགས་པའི་བྱང་ཆུབ་ཐོབ་བྱེད་པ། །འདི་ནི་དགོངས་པས་གསུངས་པ་ཡིན། །དངོས་པོ་མེད་ཅིང་འཁྲུག་པ་མེད། །ཡིད་འོང་རྡོ་རྗེ་ཚིག་གཅིག་པུ། །འགྲོ་བའི་བསམ་པའི་དབྱེ་བ་ཡིས། །བྱེ་བྲག་མང་པོར་གྱུར་པ་ཡིན། །ནམ་མཁའ་མཐའ་ཡས་སྦྱོར་བ་ཡིས། །གཟུགས་ལ་སོགས་པ་མཐའ་ཡས་ཏེ། །དེ་ཡང་དེ་བཞིན་གཤེགས་མཆོག་དང ། །བྱང་ཆུབ་སེམས་དཔའ་ཉིད་དུ་གྱུར། །དེ་ལས་སྤྲོ་ཞིང་བསྡུ་བ་དང ། །ཞི་བ་ཉིད་ལས་རབ་སྦྱོར་བས། །ཡེ་ཤེས་ལུས་ཅན་ཡེ་ཤེས་ཅན། ། བརྒྱལ་ལོ་ཞེས་ནི་ཤེས་པ་ནི། །ཡན་ལག་དབྱེ་བ་གང་དང་གང ། །འགྲོ་བ་ཞེས་ནི་གྲགས་བདག་པ། །དེ་དེ་རང་ལྷའི་སྦྱོར་བ་ལས། །དཀྱིལ་འཁོར་མཆོག་ནི་འབྱུང་བར་འགྱུར།།
132b
དཀྱིལ་འཁོར་རང་ལུས་གང་ཡིན་པ། །དེ་ཉིད་བསྡུས་པ་འདི་ལྟ་བུ། །འདི་ནི་འཇིག་ཚོགས་ལུས་རྟོག་ལ། །བྱང་ཆུབ་སེམས་དཔའ་བརྒྱལ་བར་གྱུར། །དེས་ནི་བདེན་འདི་མ་ཤེས་པས། ། དབྱངས་བཅས་བརྒྱལ་ལ་བསྐུལ་བ་ནི། །བྱང་ཆུབ་སེམས་དཔའ་སེམས་དཔའ་ཆེ། །བརྒྱལ་བ་ཞེས་ནི་བཤད་པ་ཡིན། །དེ་ནས་གསུང་བ་རྡོ་རྗེ་གསུམ། །དགོངས་པའི་ཚིག་གིས་བཤད་པ་དག་།རྡོ་རྗེ་འཛིན་པའི་ཚིག་གསན་ནས། །ཏིང་ངེ་འཛིན་ནི་མངོན་དུ་མཛད། །གཉིས་སུ་མེད་པ་མཉམ་རྡོ་རྗེ། །འགྲོ་ལ་གཟིགས་པ་ཞེས་བྱ་བའི། །འདི་ཉིད་གསུམ་ཡུལ་འཇིགས་པ་པོ། ། ཏིང་ངེ་འཛིན་ལ་སྙོམས་པར་ཞུགས། །མགོན་པོ་སྙོམས་པར་ཞུགས་པ་ཡི། །འོད་གང་ཆེན་པོར་གྱུར་པ་ཡིན། །བྱང་ཆུབ་སེམས་དཔའ་དེས་རེག་པས། །རང་གི་སྟན་ལ་གནས་པར་གྱུར། །དེ་ནས་དེ་བཞིན་གཤེགས་པ་ཀུན། །ངོ་མཚར་རྨད་དུ་གྱུར་སྤྱན་དང ། །དགྱེས་ཤིང་མགུ་བ་སྐྱེས་གྱུར་ནས། །ཆོས་ཀྱི་དབྱངས་ནི་འདི་སྐད་གསུངས། །ེ་མའོ་ཆོས་ཨེ་མའོ་ཆོས། །ེ་མའོ་ཆོས་ཀྱི་དོན་བྱུང་བ། །བདག་མེད་ཆོས་ནི་ཡང་དག་ངག་།ཆོས་ཀྱི་རྒྱལ་པོ་ལ་ཕྱག་འཚལ། །རྡོ་རྗེ་གསུང་གཅིག་དག་པའི་དོན། །དྲི་མེད་མཁའ་དང་མཉམ་པའོ། །མི་འགྱུར་དོན་ལས་ཡང་དག་བྱུང ། །རྡོ་རྗེ་སྐུ་ལ་ཕྱག་འཚལ་ལོ། །ཐུབ་མཆོག་གཅིག་པུ་དེ་བཞིན་གཤེགས། །དུས་གསུམ་དག་གི་ལམ་དུ་བྱུང ། །རྡོ་རྗེ་དབྱིངས་གཅིག་རྫོགས་ལོངས་སྤྱོད། །ནམ་མཁའི་
133a
༄#། །ལམ་གཅིག་ཕྱག་འཚལ་ལོ། །སྐུ་གསུང་ཐུགས་ནི་ནམ་མཁའ་སྟེ། །སྤྱོད་པའི་མཆོག་སྟེ་ཆོས་གཅིག་ལྡན། །དེ་ཉིད་གསུམ་སྟོན་སྣ་ཚོགས་པ། །སྤྱོད་པའི་གནས་ལ་ཕྱག་འཚལ་ལོ། །དགོངས་པ་ལུང་བསྟན་ལ་གནས་ནས། །གང་ཞིག་སྤྱོད་མཆོག་འདི་སྟོན་པ། །གསང་བ་ཡང་དག་སྲུང་བ་དག་།དེ་ནི་ཅི་དགའ་བར་ཡང་བྱེད། །དེ་བཞིན་གཤེགས་པ་ཐམས་ཅད་ཀྱི། །དམ་ཚིག་གསུམ་གྱི་རྡོ་རྗེ་མཆོག་།སྔགས་རྣམས་ཀུན་གྱི་དམ་པ་ཡི། །སྤྱོད་པའི་ལེའུ་ལྔ་པ་ཡིན།། །།དེ་ནས་དཔལ་ཆེན་མི་བསྐྱོད་པ། །སྐུ་གསུང་ཐུགས་ཀྱི་གསང་བ་ཅན། །ཏིང་ངེ་འཛིན་ལ་སྙོམས་ཞུགས་ནས། །ཐུགས་བྱིན་བརླབ་པ་ཞེས་བྱ་བའི། །གསང་སྔགས་འདི་ནི་གསུངས་པ་ཡིན། །ོཾ་ཞེས་བྱ་བ་དང་པོ་ཡིན། །སརྦ་ཏ་ཐཱ་ག་ཏ་གཉིས། །ཙིཏྟ་གསུམ་པར་ཡོངས་སུ་བརྟག་།བཛྲ་བཞི་པའི་གོང་མར་ལྡན། །སཝ་བྷཱ་ཝཱཏྨ་ཀཿ ལྔ་པ། ། ཧཾ་དུས་ཀྱི་མིང་ཅན་ཡིན། །སྐུ་དྲུག་གསུམ་པའི་མིང་ཅན་ནོ། །དེ་ནས་དཔལ་ལྡན་རྣམ་སྣང་མཛད། །རྡུལ་ཕྲ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ནས། །སྐུ་ནི་བྱིན་གྱིས་བརླབ་པ་གསུང ། །ོཾ་ཞེས་བྱ་བ་ཚངས་པར་བཤད། །སརྦ་ཏ་ཐཱ་ག་ཏ་གཉིས། །ཀ་ཡ་ཆགས་ཐོགས་དབང་ཕྱུག་སྟེ། །བཛྲ་རིག་བྱེད་ཡིན་པར་བསྒྲགས། །སཝ་བྷཱ་ཝཱཏྨ་ཀཿ འྡོད་ལྷ། ། ཧཾ་སྐམ་བྱེད་
133b
ཅེས་བརྗོད་དེ། །དགོངས་པ་ཡིས་ནི་ཡང་དག་བརྟགས། །ཤེས་རབ་དབྱེ་བས་དབྱེ་བར་བྱ། །དེ་ནས་ཚེ་དཔག་མེད་ཅེས་པའི། །ཀུན་ཏུ་མི་གཉིས་རྡོ་རྗེ་ཅན། །ཏིང་ངེ་འཛིན་ལ་སྙོམས་ཞུགས་ནས། །གསུང་ནི་བྱིན་གྱིས་རློབ་པ་གསུང ། །ོཾ་ནི་དང་པོར་བསྒྲགས་པ་ཡིན། །སརྦ་ཏ་ཐཱ་ག་ཏ་གཉིས། །ཝཱཀ་ཅེས་བྱ་བ་གསུམ་པ་ཡིན། །བཛྲ་དུས་ཀྱི་མིང་དུ་འགྱུར། །སཝ་བྷཱ་ཝཱཏྨ་ཀཿ ལྔ་པ། ། ཧཾ་ཞེས་པ་དྲུག་པ་སྟེ། །གསུམ་པོ་འདི་དག་བཤད་པ་རྣམས། །རེ་རེ་ཞིང་དྲུག་གསུམ་དུ་བཤད། །ཐུགས་དང་སྐུ་དང་དེ་བཞིན་གསུང ། །རིམ་དང་རིམ་པ་མིན་པས་གསུངས། །བདག་པོ་ལས་ནི་གཅིག་པུ་ལས། །རྡོ་རྗེ་གསུམ་ཞེས་བྱ་བ་འབྱུང ། །ཡོན་ཏན་ཆོས་འདི་རྡོ་རྗེ་གསུང ། །དེ་ཉིད་གསུམ་གྱི་དམ་ཚིག་མཆོག་།དེ་བས་འདི་ནི་སྒོམ་པ་མཆོག་།གཡེལ་བ་མེད་པར་རྫོགས་པར་བྱ། །འདི་བཤད་པ་ཡི་བློ་ལྡན་པ། །རབ་མཆོག་རྡོ་རྗེ་གསུམ་བྱུང་བས། །བསྒོམ་པའི་བདག་ཉིད་ཅན་གྱུར་ཅིང ། །སྔགས་ཀྱི་མཚན་ཉིད་མཚན་མར་བྱ། །དེ་ནས་དཀོན་མཆོག་དཔལ་འདི་ཡང ། །སྒྲོན་མ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ཏེ། །དེ་ནས་གསང་སྔགས་འདི་གསུངས་སོ། །ོཾ་ནི་ཟུང་གི་དང་པོར་ལྡན། །སརྦ་ཏ་ཐཱ་ག་ཏ་ཟུང ། །དེ་བཞིན་ཉིད་ནི་ཡེ་ཤེས་ཚོགས། །ཐམས་ཅད་མེ་ལོང་མིང་ཅན་ནོ། ། ནུ་རཱ་ག་སྐྱེ་མེད་དེ། །དེ་ནི་གསུམ་པ་ཡིན་པར་གསུངས། །རྐྱེན་དང་ཉན་ཐོས་ཀྱིས་
134a
༄#། །བཤིག་དཀའི། །བཛྲ་ཡང་ནི་བཞི་པར་གྱུར། །དངོས་མེད་བདག་ཉིད་ཅན་ཡེ་ཤེས། །སཝ་བྷཱ་ཝཱཏྨ་ཀཿ ཞེས་བཤད། །ཡེ་ཤེས་ལྔ་པོ་ཉིད་ཀྱི་མིང ། །ཆོས་ཀྱི་དབྱིངས་ཀྱི་ངོ་བོ་ཉིད། ། ཧཾ་སོ་སོ་རྫོགས་ལོངས་སྤྱོད། །དངོས་པོ་མེད་པའི་རང་བཞིན་ཅན། །བདེ་བ་ཆེན་པོའི་མིང་གྱུར་པ། །མཚོན་པ་དྲུག་པའི་མིང་ཅན་ནོ། །དངོས་མེད་གནས་པའི་བདག་ཉིད་ཅན། །དེ་ཡི་རྗེས་སུ་མཉེས་བྱའི་མཆོག་།དེ་ལྟའི་ཆགས་པའི་དེ་བཞིན་གཤེགས། །མགོན་པོ་ཐམས་ཅད་མཉེས་པར་བྱ། །དེ་ནས་དཔལ་ཆེན་གདོན་མི་ཟ། །དོན་ཡོད་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ཏེ། །དེས་ནི་གསང་སྔགས་འདི་གསུངས་སོ། །ོཾ་ཞེས་བྱ་བ་དང་པོར་ལྡན། །སརྦ་ཏ་ཐཱ་ག་ཏ་གཉིས། །པཱུ་ཛ་རྣམ་པར་ཐར་པའི་མིང་།། བཛྲ་སེམས་ནི་རྣམ་སྒོམ་པ། །སཝ་བྷཱ་ཝཱཏྨ་ཀཿ ་ཞེས་བཤད། ། ཧཾ་ཕ་རོལ་ཕྱིན་ཞེས་བྱ། །ལྔ་པོ་དྲུག་དང་གསུམ་དུ་བཤད། །གཟུགས་དང་སྒྲ་དང་དྲི་དང་རོ། །རེག་བྱ་དང་ནི་ཆོས་ཀྱི་དབྱིངས། །དེ་དག་དངོས་མེད་གྱུར་བྱས་པ། །དེ་ནི་སངས་རྒྱས་མཆོད་མཆོག་ཡིན། །མིག་སོགས་ཤེས་ལས་ཡང་དག་བྱུང ། །མངོན་ཤེས་ལྔ་ཡིས་ཉེ་བར་མཛེས། །མཆོད་པ་ལྔ་བཤད་འདི་རྣམས་ཀྱིས། །མྱུར་དུ་སངས་རྒྱས་ཉིད་ཐོབ་འགྱུར། །དེ་ནས་དཔལ་ལྡན་རྡོ་རྗེ་འཆང ། །སོ་སོར་བྱང་ཆུབ་སྟོན་མཛད་པ། །རྡོ་རྗེ་གསུམ་རིག་གསང་དབང་པོ། །ཐུབ་པ་
134b
ཆེན་པོས་ཡང་གསུངས་པ། །སྐུ་གསུང་ཐུགས་ལ་དམིགས་པ་ལ། །གང་ཚེ་ཡིད་ནི་མགུ་གྱུར་པ། །དེ་ཉིད་གསུམ་ལ་ཉེར་སྦྱོར་བ། །དངོས་གྲུབ་རབ་མཆོག་དེ་ཐོབ་འགྱུར། །བདག་མེད་པར་ནི་སེམས་དམིགས་ཤིང ། །ལུས་དང་ངག་ཀྱང་རྣམ་པར་བསྒོམ། །མཁའ་དང་མཉམ་པའི་གནས་སྒོམ་ཞིང ། །སྦྱོར་བ་རྣམ་གསུམ་རྫོགས་པར་བྱ། །རྡོ་རྗེ་དེ་ཉིད་གསུམ་དམིགས་ན།། ཤིན་ཏུ་ཕྲ་བའང་ཡོད་མ་ཡིན། །སྔགས་ཀྱི་རང་བཞིན་སྦྱོར་བ་ཡིས། །སྒོམ་པ་མེད་ཅིང་བྱང་ཆུབ་མེད། །རྡོ་རྗེ་གསུམ་གཅིག་མཚན་ཉིད་དུ། །མདོར་ན་རྣམ་པར་བརྟགས་ནས་སུ། ། སྔགས་ལ་སྦྱོར་བའི་ཏིང་ངེ་འཛིན། །གནས་ལ་གནས་མེད་བསྒོམ་པར་བྱ། །དེ་ནས་དེ་བཞིན་གཤེགས་དབང་པོའང ། །དེ་བཞིན་གཤེགས་པ་ཀུན་གྱིས་མཆོད། །ཀུན་མཁྱེན་སངས་རྒྱས་ཀུན་མཆོག་གིས། །སྒོམ་པའི་མཆོག་འདི་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་བསྒོམ་པར་བྱ། །སངས་རྒྱས་གཟུགས་ནི་རྣམ་བསྒོམས་ནས། །ཕྲ་མོའི་རྣལ་འབྱོར་བརྩམ་པར་བྱ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོའི་བདག་ཉིད་ཅན། །རྒྱུ་དང་མི་རྒྱུར་ཡང་དག་ལྡན། །དེ་རུ་གནས་པར་མཁས་བས་བསམ། །བློ་ལྡན་ཡེ་ཤེས་ཀྱིས་བརྟགས་པའི། །གསང་བའི་ཡེ་ཤེས་གནས་བསྒོམ་མོ། །གསང་བ་མཆོག་ཅེས་བཤད་པ་སྟེ། །དེ་ཉིད་གསུམ་ནི་དམ་ཚིག་མཆོག་།ནམ་མཁའི་
135a
༄#། །དབྱིངས་ཀྱི་དབུས་གནས་པར། །ཉི་མ་ཞེས་བྱའི་དཀྱིལ་འཁོར་བསྒོམ། །སངས་རྒྱས་སྐུ་ནི་རྣམ་བསྒོམས་ཏེ། །དེ་ཡི་སྟེང་དུ་གནས་བཞག་གོ་།དབང་ཕྱུག་ཆེན་པོ་སྐེམ་བྱེད་དེ། །གཞི་ཕྱེད་ནམ་མཁའི་མཚོན་པ་དག་།བདུད་རྩི་ཞེས་ནི་བརྟགས་པ་གང ། །དེ་ནི་ཧཱུཾ་ཞེས་བྱ་བར་འགྱུར། །ནམ་མཁའི་དབྱིངས་ཀྱི་དབུས་གནས་པར། །འཁོར་ལོ་དཀྱིལ་འཁོར་ཡིད་འོང་བསྒོམ། །སྤྱན་གྱི་གཟུགས་སུ་ཡང་དག་སྦྱོར། །རྡོ་རྗེ་པདྨོ་གཉིས་བསྒོམ་པའོ། །ནམ་མཁའི་དབྱིངས་ཀྱི་དབུས་གནས་པར། །རིན་ཆེན་དཀྱིལ་འཁོར་བསྒོམ་པར་བྱ། །དང་པོའི་སྦྱོར་བ་ནན་ཏན་གྱིས། །དེ་ཡི་སྟེང་དུ་རྣམ་པར་བསྒོམ། །ནམ་མཁའི་དབྱིངས་ཀྱི་དབུས་གནས་པར། །འོད་ཀྱི་དཀྱིལ་འཁོར་འདི་ཉིད་བསྒོམ། །སངས་རྒྱས་ཞི་བའི་གནས་དགོད་པ། །འཁོར་རྣམས་ཀྱིས་ནི་ཀུན་ནས་བསྐོར། །ུཏྤལ་མཐོན་ཀའི་མདོག་འདྲ་བ། །རྩེ་མོ་ལྔ་པ་འོད་པོ་ཆེ། །ནས་ཀྱི་འབྲུ་ཙམ་ནན་ཏན་གྱིས། །རི་རབ་རྩེ་མོར་རྣམ་པར་བསམ། །ཙ་ན་ཀ་ཡི་ཚད་ཙམ། །འདབ་མ་བརྒྱད་པ་གེ་སར་བཅས། །སྣ་ཡི་རྩེ་མོ་རི་རབ་རྩེ། །བྱང་ཆུབ་འདོད་པས་འདི་བསྒོམ་བྱ། །འཁོར་ལོ་ལ་སོགས་སྒོམ་པ་ནི། །དེ་ཡི་ཁྱད་པར་དག་ཏུ་བརྟག་།ཡིད་འོང་དངོས་གྲུབ་ཀུན་གྱི་གནས། །བྱང་ཆུབ་གནས་མཆོག་བླ་མེད་པའོ། །སངས་རྒྱས་ཡང་དག་བྱང་ཆུབ་བཞུགས། །མདོར་ན་དེ་ནི་
135b
སྤྲོ་བར་བྱ། །གང་ཚེ་ཆོས་ནི་ལེགས་མཚན་པ། །རྡོ་རྗེ་གཅིག་ནི་བསྒོམ་པར་བྱ། །དེ་ནས་དེ་བཞིན་གཤེགས་དབང་པོ། །དག་པ་ཆོས་རྣམས་ཀུན་གྱི་མཆོག་།འགྲོ་ཀུན་དོན་དུ་སྟོན་པ་པོས། །གསང་བ་མཆོག་ནི་བཀའ་སྩལ་ཏོ། །སྐད་ཅིག་ཐང་གཅིག་ཡུད་ཙམ་དང ། །ཟླ་ཕྱེད་ཟླ་བ་ལོ་ཡི་དུས། །བསྐལ་པ་གྲངས་མེད་གསུམ་པོ་ནི། །སྐད་ཅིག་གཅིག་ཏུ་མཉམ་པར་བཤད། །ཟླ་བ་དྲུག་བཤད་དེ་ཉིད་ཡིན། །དངོས་མེད་རྫོགས་པར་ལོངས་སྤྱོད་པའོ། །སྐད་ཅིག་གཅིག་ཏུ་བསྔགས་པ་སྟེ། །དུས་གསུམ་ལས་འདས་ཡིན་པར་དགོངས།། གཟུགས་དང་སྒྲ་དང་རོར་ལྡན་པ། །རྣལ་འབྱོར་པས་ནི་ཟླ་དྲུག་བསྒོམ། །མཆོད་ཆེན་དེ་ནི་བྱས་ནས་སུ། །གསང་བའི་དེ་ཉིད་རྣམ་པར་བསྒོམ། །ཡུལ་དང་དབང་པོ་སེམས་པ་ནི། ། བཤང་གཅི་ཟས་སུ་བྱེད་པ་པོ། །བྱས་ན་དེ་འདྲའི་དངོས་གྲུབ་ནི། 9།བཟའ་བ་རྣམ་རྟོག་མེད་པ་འོ། །དེ་ཉིད་འདི་ནི་བླ་མེད་པ། །བྱང་ཆུབ་སེམས་གཅིག་ལས་བྱུང་བའོ། །རྟོག་མེད་འདུས་ནི་མ་བྱས་ཤིང ། །མི་རྟོག་དོན་ནི་འགྲུབ་པར་འགྱུར། །མ་ནི་མཱ་མ་ཀཱིར་བཤད་དེ། །ས་ནི་མངོན་པར་བྱང་ཆུབ་པའོ། །བསམ་གཏན་དེ་ནི་དགའ་སྤྱོད་པ། །ཤ་ཞེས་བྱ་བར་དེ་བཤད་དོ། །ནམ་མཁའ་མཐའ་ཡས་རྣལ་འབྱོར་ནི། །ཤ་ཆེན་དེ་ནི་ཡིན་པར་བཤད། །གསང་བ་པ་ཡི་གོ་འཕང་མཆོག་།རྡོ་རྗེ་གསུམ་ནི་མྱུར་དུ་འགྲུབ་།དམ་ཚིག་ཆེན་པོ་གླང་ཆེན་རྟ། །དེ་
136a
༄#། །བཞིན་ཁྱི་ལ་སོགས་པའི་ཤ་།ཕུང་པོ་ལ་སོགས་རིགས་དབྱེ་བས། །གང་གསུང་མཉམ་པའི་གྲངས་ཀྱིས་སོ། །གང་ཞིག་རྣལ་འབྱོར་གཉིས་མེད་ཟས། །བསམ་གཏན་དགའ་བའི་མིང་གཅིག་པུ། །འཇིག་རྟེན་རྒྱང་པན་འཇིག་རྟེན་པ། །བཟའ་བའི་རང་གི་ངོ་བོར་གྱུར། །དགེ་བའི་བཤེས་གཉེན་བརྟག་པ་དང ། །དེ་བཞིན་དྲོད་གཤེར་ལས་སྐྱེས་པ། །འཇིག་རྟེན་འདས་དང་འཇིག་རྟེན་པའི། །འདི་དག་ཟས་སུ་ཀུན་ཏུ་བཤད། །དེ་ནས་རྡོ་རྗེ་གསུམ་དགོངས་པ། །བཅོམ་ལྡན་འདས་ལས་ཐོས་པ་དང ། །དེ་བཞིན་གཤེགས་པ་ཀུན་བདག་པོ། །ལག་ན་རྡོ་རྗེས་ཚིག་གསོལ་པ། །ཉན་ཐོས་རྣམས་ཀྱི་དམ་ཚིག་ཀྱང ། །ཕྲ་མོའི་རྣལ་འབྱོར་སྟོན་མཛད་ཅིང ། །མགོན་ཁྱོད་འཇིག་རྟེན་པ་དང་ནི། །འཇིག་རྟེན་འདས་པ་དག་ཀྱང་གསུངས། །ཆུ་དང་འོ་མ་གཅིག་འགྱུར་བཞིན། །ཁྱོད་ནི་ཆོས་རྣམས་སྟོན་པར་མཛད། །འཇིག་རྟེན་འགའ་ལས་ཡང་དག་པ། །ངང་པས་འོ་མ་ཇི་བཞིན་ལེན།། ཇི་ལྟར་སྐོམ་པས་གདུངས་པ་ཡི། །སྐྱེས་བུ་ལ་ལ་དེ་བསྲེས་འཐུང ། །དེ་བཞིན་འཇིག་རྟེན་ཤིན་ཏུ་འདས། །ཆོས་ཀྱི་བདུད་རྩི་དེ་རྣམས་འཐུང ། །དགོངས་པས་སྔགས་ཀྱི་དེ་ཉིད་དུ། །གང་ཞིག་གསུམ་དུ་གསུངས་པ་འདི། །ཇི་ལྟ་ཇི་ལྟར་འཇིག་རྟེན་སོགས། །མགོན་པོ་གསལ་བར་བཤད་དུ་གསོལ། །དེ་ནས་དེ་བཞིན་གཤེགས་མཆོག་གིས། །གྲགས་
136b
ལྡན་ལག་ན་རྡོ་རྗེ་ལ། །བུ་ཁྱོད་ལེགས་སོ་ཆེར་ལེགས་ཏེ། །བྱེ་བྲག་གསུམ་ཁྱོད་ལ་བཤད་བྱ། །རྐྱེན་དང་ཉན་ཐོས་ཞེས་གྲགས་དང ། །དེ་བཞིན་མདོ་སྡེ་ལ་སྤྱོད་རྣམས། །འདི་དག་འཇིག་རྟེན་པ་རྣམས་ཏེ། །བྱ་བ་སྦྱོར་བའི་བྱ་བར་གནས། །རྣལ་འབྱོར་གྲུབ་ནས་འཇིག་རྟེན་གནས། །འཇིག་རྟེན་འདས་པར་གྱུར་པ་ཡིན། །དེ་ནི་ཏིང་འཛིན་རྣལ་འབྱོར་ཡང ། །དེ་དང་འདྲ་བར་བྱེད་མ་ཡིན། །གང་ཡང་འཇིག་རྟེན་ཤིན་ཏུ་འདས། །རྣམ་པར་མི་རྟོག་འཇིགས་མེད་པ། །དེ་ནི་དེ་བཞིན་ཉིད་དངོས་གཅིག་།འཁོར་བ་དང་ནི་གཅིག་ཤོས་སྤངས། །བརྟུལ་ཞུགས་བཟང་པོའི་རྣལ་འབྱོར་འདིས། །སངས་རྒྱས་རྣམས་ནི་མཉེས་འགྱུར་ཞིང ། །བློ་ལྡན་བྱང་ཆུབ་སེམས་རྣམས་ཀྱིས། །བྱང་ཆུབ་མྱུར་དུ་ཐོབ་པར་འགྱུར། །འདོད་ཁམས་ཀྱི་ནི་དབང་ཕྱུག་དང ། །རྣལ་འབྱོར་གོ་འཕང་འཐོབ་པར་འགྱུར། །གཟི་ལྡན་སྟོབས་ཀྱིས་ཕྱུག་པ་དང ། །མདངས་བཟང་མཐོང་ན་དགའ་བ་དང ། །མཐོང་ངམ་ཚིག་གིས་བསྐུལ་བ་ཡིས།། འཇིག་རྟེན་འདི་དག་དབང་དུ་བྱེད། །གསང་བ་འདི་ནི་མཆོག་ཡིན་ཏེ། །སངས་རྒྱས་བྱང་ཆུབ་དམ་པ་ཡིན། །དེ་ཉིད་སྔགས་ཀྱི་གསང་བ་འདི། །རྡོ་རྗེ་གསུམ་ལས་འདས་པའི་མཆོག། དགོངས་པ་ལུང་བསྟན་ཡིད་འོང་ལ། །སྐྱེས་བུ་གང་ཞིག་གནས་གྱུར་པ། །གསང་བ་ཡང་དག་སྲུང་བ་པོ། །དེ་རྣམས་ཅི་དགར་བྱེད་པར་འགྱུར། །དེ་བཞིན་གཤེགས་ཀུན་དམ་པ་སྟེ། །
137a
༄#། །དམ་ཚིག་ལས་ནི་དམ་ཚིག་མཆོག་།རྡོ་རྗེ་གསུམ་གྱིས་བྱིན་བརླབས་པའི། །ལེའུ་དྲུག་པ་ཡིན་པར་བཤད།། །།དེ་ནས་རྡོ་རྗེ་གསུམ་གསང་དབང ། །དམ་ཚིག་ཆེན་པོ་དེ་ཉིད་གཅིག་།ཏིང་འཛིན་གསང་སྔགས་སྤྱོད་པའི་མཆོག་།མངོན་རྫོགས་བྱང་ཆུབ་འདི་གསུངས་སོ། །དེ་ཉིད་དམ་ཚིག་བཞི་པོ་གང ། །འདོད་པ་ཐམས་ཅད་ཅེས་ཏེ་བཤད། །དེ་རྣམས་ལོངས་སྤྱོད་ལྡན་པ་ཡི། །ཅི་འདོད་པར་ནི་བསྟེན་པར་བྱ། །རང་གི་ལྷར་ནི་བདག་སྦྱོར་བས། །བདག་དང་གཞན་ནི་མཆོད་པར་བྱ། །དེ་ནི་འཇིག་རྟེན་མཆོད་འགྱུར་བ། །འཇིག་རྟེན་འདས་པ་ཞི་བ་ཉིད། །དཀའ་ཐུབ་མྱུར་བ་དེ་ཡིན་ལ། །སྡོམ་པ་དམ་པ་ཡིན་པར་འདོད། །མི་ཟད་པ་ནི་གཉི་ག་སྟེ། །འདོད་པའི་ལོངས་སྤྱོད་ཐམས་ཅད་ཀྱང ། །གཟུགས་སོགས་ལྷ་རྣམས་ཡིན་པར་འདོད། །དེ་དག་བསྒོམས་པའི་སྦྱོར་བ་ཡིས། །སྒྲུབ་པ་པོ་རྣམས་མྱུར་དུ་འགྲུབ། །ཐ་དད་ཡི་གེ་སློང་མོ་ཡིན། །དེ་འདོད་པ་ནི་ཟ་བ་སྟེ།། གང་ཞིག་ཟློས་ལ་དགའ་བ་དེ། །དེ་དག་སློང་མོ་ཟ་བར་འདོད། །དཀའ་ཐུབ་དག་ནི་མི་བྱ་ཞིང ། །སྔོམ་པ་མི་བཟད་ཉིད་ཀྱང་མིན། །འདོད་གསུམ་དེ་ཉིད་ལོངས་སྤྱོད་ཅིང ། །སྔགས་ཀྱི་དེ་ཉིད་མ་ཉམས་བཟླས། །རྡོ་རྗེ་གསུམ་དབྱེ་བ་དེ་གནས་ནི། །སྔགས་རིག་བྱང་ཆུབ་ཐོབ་པར་འགྱུར། །གཞན་དུ་དུས་མིན་འཆི་བ་དང ། །ཤི་ནས་དམྱལ་བར་འགྲོ་བར་འགྱུར། །སངས་
137b
རྒྱས་བྱང་ཆུབ་སེམས་དཔའ་དང ། །གསང་སྔགས་སྤྱོད་པའི་མཆོག་རྣམས་གང ། །མི་འགྱུར་ཆོས་ནི་བརྙེས་པ་ཡང ། །རྫོགས་པའི་སངས་རྒྱས་རྐང་གཉིས་མཆོག་།ཀུན་མཁྱེན་ཡེ་ཤེས་ཆགས་ལྡན་པས། །འདོད་པའི་ཡོན་ཏན་ལྔ་རྣམས་བསྟེན། །བྱང་ཆུབ་སེམས་དཔའ་མཉེས་བྱ་ཞིང ། །བྱང་ཆུབ་ཕ་རོལ་ཕྱིན་ཆགས་བྱ། །དེ་ལྟར་གཟུགས་ལ་གསུམ་ཤེས་ནས། །མཁས་པ་ཡིས་ནི་མཆོད་པར་བྱ། །དེ་ཉིད་གཙོ་བོ་བཅོམ་ལྡན་འདས། །སྣ་ཚོགས་རྣམ་པར་སྣང་མཛད་ཆེ། །སྒྲ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། ། འདི་ནི་བཅོམ་ལྡན་སྣ་ཚོགས་པ། །སངས་རྒྱས་རིན་ཆེན་འབྱུང་གནས་གཙོ། །དྲི་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། ། འདོད་ཆགས་ཆོས་ནི་འཛིན་པའི་གཙོ། །དྲི་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་དོན་ཡོད་རྡོ་རྗེ་གྲགས། །སྣ་ཚོགས་གཙོ་བོ་བཅོམ་ལྡན་འདས། ། རེག་ལ་རྣམ་གསུམ་ཤེས་བྱས་ནས། །རང་གི་རིགས་ལ་དབུལ་བར་བྱ། །དེ་ཉིད་བཅོམ་ལྡན་རྡོ་རྗེ་ཅན། །མི་བསྐྱོད་མེ་ལོང་གཟུགས་ཅན་ནོ། །ནང་དང་དེ་བཞིན་ཕྱི་རོལ་དང ། །གཉི་ག་རྗེས་སུ་མི་དམིགས་པ། །གཟུགས་ལ་རྫོགས་གསུམ་དེ་ཡིན་ཏེ། །ལྷ་རྣམས་ལ་ནི་དབུལ་བར་བྱ། །གཟུགས་སྒྲ་རོ་ལ་སོགས་པ་ལ། །སེམས་ནི་རྟག་ཏུ་སྦྱར་བར་བྱ། །གསང་བ་
138a
༄#། །བསྡུས་པར་གྱུར་པ་ནི། །སྙིང་པོ་སངས་རྒྱས་ཀུན་བསྐྱེད་དེ། །མཁས་པས་གཟུགས་སྒྲ་ལ་སོགས་པ། །ལྷ་ཉིད་དུ་ནི་རྟག་ཏུ་བསྒོམ། །དེ་བཞིན་རིགས་སུ་སྒོམ་པ་ནི། །སྒོམ་པས་དེར་ནི་བསྒོམ་པར་བྱ། །ནམ་མཁའི་རྡོ་རྗེ་སྦྱོར་བ་ནི། །སངས་རྒྱས་རྗེས་སུ་དྲན་པར་བཤད། །སངས་རྒྱས་རྗེས་དྲན་སྦྱོར་བས་ཀྱང ། །ཆོས་ནི་རྗེས་སུ་དྲན་པ་བསྒོམ།། རྡོ་རྗེ་གསུམ་སྒོམ་རྣལ་འབྱོར་པས། །རྡོ་རྗེ་རྗེས་དྲན་སྒོམ་པ་འོ། །རིགས་དབྱེ་ཇི་སྐད་བཤད་པས་ཀྱང ། །ཆོས་དང་ལོངས་སྤྱོད་སྤྲུལ་སྐུར་བྱུང ། །རིགས་ནི་རྗེས་དྲན་སྦྱོར་གྱུར་པ། །དེ་བཞིན་ཁྲོ་བོ་རྗེས་དྲན་པའོ། །དེ་ཉིད་གསུམ་ཡོངས་གྱུར་པ་གཅིག་།རྡོ་རྗེ་གསུམ་ཉིད་མེད་ཆོས་ཉིད། །ལྷ་རྣམས་རྗེས་དྲན་སྦྱོར་བ་སྟེ། །དེ་བསྒོམ་བྱང་ཆུབ་ཐོབ་པར་འགྱུར། །བཞི་པོ་དག་ནི་རེ་རེ་བཞི། །ཇི་ལྟ་ཇི་ལྟར་མགུ་བཅས་སོགས། །དེ་ཉིད་ལོ་ཡི་གྲངས་ཡིན་ཏེ། །བཅུ་དྲུག་པར་ནི་ཡོངས་སུ་བརྟག་།སངས་རྒྱས་ཀུན་གྱིས་བསྟེན་པ་ཡིན། །བུད་མེད་ལོ་གྲངས་བཅུ་དྲུག་པ། །གཟུགས་བཟང་ཕྲ་དང་མཆོད་པ་ནི། །དབེན་པ་ཞེས་བྱར་བརྩམ་པར་བྱ། །བྱིན་གྱིས་བརླབས་ནས་ཡིད་འོང་བ། །ཁྱད་པར་གསུམ་ཞེས་བྱ་བ་ཡི། །དེ་བཞིན་གཤེགས་པ་བཙུན་མོ་ཆེ། །སྤྱན་སོགས་ཉིད་ནི་བསྒོམ་པར་བྱ། །བསྒྲུབ་བྱ་དེ་ཉིད་ཡང་དག་སྦྱོར། །དབང་པོ་གཉིས་ནི་མཉམ་སྦྱོར་བའི། །དང་པོར་སྦྱོར་བ་འདི་བསྒོམས་
138b
ན། །སངས་རྒྱས་དངོས་གྲུབ་ཐོབ་པར་འགྱུར། །ཡི་གེ་ཧཱུཾ་དང་དེ་བཞིན་ཨོཾ། །ཕཊ་ཀྱང་དེར་ནི་བསྒོམ་པར་བྱ། །དེ་ཉིད་གསུམ་ཚུལ་གསུམ་བདག་ཉིད། །ཅི་རིགས་པར་ནི་རྣམ་པར་སྤྲོ། ། འོད་ཟེར་རྣམ་པ་ལྔས་ཁྱབ་པའི། །རྡོ་རྗེ་པདྨ་འདི་མཆོག་སྟེ། །གསང་དང་སྙིང་ག་སྣ་རྩེ་རུ། །རྣལ་འབྱོར་པས་ནི་འདི་བསྒོམ་བྱ། །འབར་བཅས་ཟླ་འོད་བཞིན་དཀར་བར། །ཤེས་རབ་དེ་ནི་རྟག་ཏུ་བསྒོམ། །གང་ཕྱིར་ཡིད་ནི་དགར་གྱུར་པས། །དེ་བས་དེ་ནང་ཡིད་འོང་བའོ། །གནས་མེད་གནས་པར་ལེགས་སྦྱོར་བས། །བཞི་མཚུངས་གཅིག་ཏུ་སྦྱོར་བ་རིགས། །སངས་རྒྱས་རྗེས་དྲན་སྦྱོར་ལ་སོགས། །བྱང་ཆུབ་འདོད་པས་བསྒོམ་པར་བྱ། །ཉམས་དགའ་སངས་རྒྱས་ཀུན་གྱིས་བསྟན། །བྷ་ག་ཞི་བ་གཅིག་པུའི་མིང ། །རང་གི་དེ་ཉིད་གཉིས་མེད་བྱུང ། །རྡོ་རྗེ་དེ་བདག་ཉིད་དུ་སྡོར། །སངས་རྒྱས་རྗེས་དྲན་སྦྱོར་བ་སྟེ། །བྷ་ག་ལིངྒ་ཡིན་པར་བསྒྲགས། །གཞུག་པ་གཉིས་མེད་སྦྱོར་བ་སྟེ། །སངས་རྒྱས་གཟུགས་སུ་སྒོམ་པ་འོ། །དེ་ལས་བློ་ལྡན་གྱིས་སྤྲོ་བ། །བ་སྤུའི་བུ་གའི་རྩེ་མོར་གནས། །མཉམ་པ་མེད་པས་ཁྱད་པར་དུ། །སངས་རྒྱས་སྤྲིན་རྣམས་དེར་སྤྲོ་འོ། །ཆོས་རྗེས་དྲན་པའི་སྦྱོར་བ་ཡང ། །རྡོ་རྗེ་ཆོས་ཀྱི་རབ་སྦྱོར་བས།། རྡོ་རྗེ་པདྨ་ཡང་དག་སྦྱར། །བྷ་གའི་ལིངྒར་བརྟག་པ་འོ། །དེ་ནས་བ་སྤུའི་བུ་ག་ལས། །འབད་པས་ཆོས་ཀྱི་སྤྲིན་རྣམས་སྤྲོ། །དེ་ཉིད་བསམ་ཀུན་རྫོགས་བྱེད་པའི། །འདི་ནི་ཆོས་ཀྱི་བདག་
139a
༄#། །པོ་ཡིན། །རྡོ་རྗེ་རྗེས་སུ་དྲན་པ་བསྒོམ། །དངོས་མེད་གཅིག་པ་ལ་སྦྱོར་བ། །སྟོང་ལ་རྡོ་རྗེ་རབ་སྦྱོར་འགྱུར། །བྷ་ག་ལིངྒ་ཞེས་བཤད་དོ། །དེ་ནས་བ་སྤུའི་བུ་ག་ནས། །རྡོ་རྗེ་སྤྲིན་རྣམས་ཀུན་ཏུ་སྤྲོ། །རྡོ་རྗེ་བྱང་ཆུབ་སེམས་སྒོམ་ཉིད། །མྱུར་དུ་དངོས་གྲུབ་འཐོབ་པར་འགྱུར། །རིགས་རྗེས་དྲན་པའི་སྦྱོར་བ་ཡིས། །མཁས་པས་སྟོང་ཉིད་རྡོ་རྗེ་ལས། །དེ་བཞིན་རྣལ་འབྱོར་པས་སྤྲོས་ན། །རིགས་ཀྱི་དངོས་གྲུབ་འཐོབ་པར་འགྱུར། །ཁྲོ་བོ་རྗེས་དྲན་སྦྱོར་བ་ལའང ། །སྟོང་དང་རྡོ་རྗེ་གཉིས་ལྡན་པའི། །ཁྲོ་བོའི་བ་སྤུའི་བུ་ག་ནས། །ཁྲོ་བོའི་སྤྲིན་རྣམས་སྤྲོ་བར་བྱ། །དེ་ནས་དཔལ་ལྡན་རྡོ་རྗེ་འཛིན། །ཁྱབ་བདག་རྣམ་སྣང་མཛད་ཆེན་ལ། །རྗེས་དྲན་སྦྱོར་བའི་དགོངས་པ་ནི། །ཐུབ་པ་ཆེ་ལ་སླར་ཞུས་པ། ། ཐུབ་ཁྱོད་ཀྱིས་ནི་གང་གསུངས་པ། །བྷ་གའི་ལིངྒའི་སྦྱོར་བ་ནི། །འཇིག་རྟེན་འདས་པའི་སྦྱོར་འདི་ལས། །སངས་རྒྱས་ལ་སོགས་སྤྲོ་གྱུར་པ། །ཚུལ་འདི་མ་འོངས་སྐྱེ་བོ་ལ། །ཕྱི་དུས་ཀུན་རྨོངས་སྐྱེད་པ་སྟེ། །བདེ་གཤེགས་རྣམས་ཀྱི་བདག་པོས་ནི། །ཅི་ཕྱིར་གསུངས་ཞེས་དེ་རྣམས་སྨྲ། །འགྲོ་བས་ནམ་མཁའ་མཚན་མ་ཅན། །རྟེན་འབྱུང་ཁྱོད་ཉིད་མི་ཤེས་ཤིང ། །དེ་རྣམས་ཤིན་ཏུ་རྨོངས་དབྱེ་བས། །ཇི་བཞིན་པར་ནི་རྟོགས་པར་བྱེད། །མགོན་ཁྱོད་བདེ་བ་ཆེན་པོ་སྟེ། །སངས་རྒྱས་ཀུན་གྱི་སྟོན་གཅིག་པུ། །སྐུ་མེད་སྲིད་གསུམ་
139b
བདག་ཉིད་ཅན། །དགོངས་པ་གཉིས་ཀའི་མཚན་དང་ལྡན། །དེ་བས་ཁྱོད་ནི་ཆོས་ཀུན་གྱི། །ཡོན་ཏན་གསུམ་བདག་དེ་ཉིད་གསུམ། །དགོངས་པ་བྱ་བ་དྲི་མེད་གསུམ། །སངས་རྒྱས་ཀྱི་ནི་བདུད་རྩི་འབྱུང ། །ཁྱོད་འདིར་བྷ་ག་ཁྱབ་འཇུག་སྟེ། །ལིངྒ་དྲག་པོའི་མིང་ཅན་ཉིད། །ཁྱོད་ནི་ས་བོན་ཚངས་ལ་བརྟགས། །ཁྱོད་ནི་རྟེན་འབྱུང་འགྲོ་བ་འབྱུང ། །དུས་གསུམ་ལས་འདས་རྣལ་འབྱོར་ཆེ། །དུས་དང་རྩིས་སུ་གྱུར་པ་ཉིད། །ཤེས་དང་ཤེས་བྱ་རྣམ་པར་གྲོལ། །དེ་བས་ཁྱོད་ནི་འགྲོ་བའི་བླ། །དེ་ནས་རྡོ་རྗེ་འཛིན་པ་ཡིས། །དེ་ལ་སོགས་པའི་ཚིག་གསན་ནས། །དམ་ཚིག་རྗེས་སུ་དྲན་སྒོམ་པ། །བཅོམ་ལྡན་འདས་ནི་སྟོན་པར་མཛད། །རང་གི་རྡོ་རྗེ་པདྨར་ལྡན། །དབང་པོ་གཉིས་ནི་རབ་སྦྱོར་ལས། །རང་གི་ཁུ་བའི་ཐིགས་སྐྱེས་པའི། །སངས་རྒྱས་རྡོ་རྗེ་སེམས་དཔའ་བསྒོམ། །དཀྱིལ་འཁོར་རྗེས་སུ་དྲན་བདག་ཉིད། །དབང་པོ་གཉིས་ཉིད་སྦྱོར་བ་ལས། །རང་གི་ཚངས་པ་རྟག་དྲངས་ཏེ། །རྣལ་འབྱོར་པས་ནི་དཀྱིལ་འཁོར་བྱ། །སྐུ་རྗེས་དྲན་པའི་སྦྱོར་བ་ཡང ། །སངས་རྒྱས་རྣམས་ཀྱི་ཕུང་པོ་ལྔ། །སངས་རྒྱས་དེ་ཉིད་སོགས་བརྟག་པ། །བདག་ཀྱང་དེ་དང་འདྲ་བར་རིག་།གསུང་རྗེས་དྲན་པའི་སྦྱོར་བ་ལྔ། །རྡོ་རྗེ་ཆོས་གསུང་ཕུན་སུམ་ཚོགས། །དེ་ཡི་གསུང་ཅི་འདྲ་བར་འགྱུར། །བདག་ཀྱང་དེ་དང་འདྲར་ཆོས་འཛིན། །ཐུགས་རྗེས་དྲན་པའི་སྦྱོར་བ་གང ། །རྡོ་རྗེ་འཛིན་པའི་
140a
༄#། །ཐུགས་དང་ནི། །ཀུན་ཏུ་བཟང་པོའི་ཐུགས་གང་ཡིན། །བདག་ཀྱང་དེ་དང་འདྲ་བར་འགྱུར། །སེམས་ཅན་རྗེས་དྲན་སྦྱོར་བ་གང ། །སེམས་ཅན་རྗེས་དྲན་རྡོ་རྗེ་ཉིད་སྤྱོད་པ་མཁའ་མཚུངས་ཇི་བཞིན་དུ། །བདག་ཀྱང་དེ་དང་འདྲ་བར་འགྱུར། །སྔགས་སྐུ་རྡོ་རྗེ་གསུམ་ཞེས་པ། །དེ་སྦྱོར་དྲན་པ་སྒོམ་པ་ནི། །རྡོ་རྗེ་སྔགས་ཀྱི་སྐུ་གང་ཡིན། །གསུང་དང་སྐུ་ནི་རྣམ་སྒོམ་པ། །དེ་ཉིད་གསུམ་མཉམ་གཅིག་པ་ཉིད། །རྟག་ཏུ་གསུམ་འདས་གྱུར་པ་ཡི། །སྔགས་འཛིན་མཆོག་ནི་ཅི་འདྲ་བ། །བདག་ཀྱང་དེ་དང་འདྲ་བར་འགྱུར། །དམ་ཚིག་རྗེས་དྲན་རྣམས་ཀྱིས་ནི། །དེ་བས་ཚངས་པར་ཤིན་ཏུ་དབྱུང ། །དངོས་མེད་གཅིག་ཏུ་སྦྱོར་བ་ཡིས། །མཁས་པས་ཆོ་ག་བཞིན་དུ་གསུང ། །དེ་བཞིན་གཤེགས་མཆོག་ཆེ་བ་ནི། །དངོས་མེད་ཅེས་བྱ་བསད་པ་སྟེ། །བློ་དང་ལྡན་པས་འདི་བསད་ན། །དངོས་གྲུབ་སྔགས་མཆོག་ཐོབ་པར་འགྱུར། །ཤེས་རབ་དམ་ཚིག་སྦྱོར་གྱུར་པ། །རྗེས་སུ་དྲན་པ་ཞེས་བཤད་དོ། །ཕ་རོལ་ཕྱིན་པ་ཞེས་གྲགས་པ། །ཡོད་མེད་གཉིས་དང་བྲལ་པའོ། །ཐམས་ཅད་རང་བཞིན་དྲི་མ་མེད། །མ་སྐྱེས་པ་དང་ཟད་པ་མེད། །བྱང་ཆུབ་མེད་ཅིང་མངོན་རྟོགས་མེད། །ཁམས་མེད་འབྱུང་བའང་མེད་པ་འོ། །མ་སྐྱེས་རྗེས་སུ་སྦྱོར་བ་གང ། །དེར་ནི་ཅི་ཡང་བརྗོད་མིན་ཞིང ། །མ་སྐྱེས་མིང་ནི་གཅིག་བུ་པ། །དྲན་པ་དེ་ནི་ཡིན་པར་བཤད། །ཇི་ལྟར་ནམ་མཁའ་འོད་གསལ་བ།།
140b
མཚན་མ་མེད་ཅིང་འགྱུར་བ་མེད། །རང་བཞིན་མཁའ་དང་འདྲར་གྱུར་ཅིང ། །གཉིས་མེད་གཉིས་སུ་ཡོད་མིན་ཞིང ། །ཡན་ལག་བཅུ་གཉིས་སྦྱོར་གཅིག་གང ། །ཞེ་སྡང་རྫོགས་ལོངས་སྤྱོད་པའི་མིང ། །སངས་རྒྱས་ཀུན་གྱིས་བསྟེན་གྱུར་ཅིང ། །དེ་ནི་རིགས་རྗེས་དྲན་ཞེས་བྱ། །རྟེན་འབྱུང་ལས་སྐྱེས་རྫོགས་སངས་ཏེ། །བུད་མེད་ལོ་གྲངས་བཅུ་གཉིས་པ། །བརྟན་པའི་སེམས་ནི་ཐོབ་པ་ལས། །རང་གི་ཁུ་བས་མཆོད་པར་བྱ། །དངོས་མེད་བདག་ཉིད་དག་པ་གང ། །དེ་ནི་དག་པར་བཤད་པ་ཡིན། །དེ་ཉིད་ཀྱིས་ནི་མཆོད་པར་བསྔགས། །ཤེས་རབ་ཕ་རོལ་ཕྱིན་པས་འགྲོ། །འདི་ཡིས་ལུས་ལ་མཆོད་པ་དང ། །ཁྱད་པར་དུ་ནི་དེ་བཞིན་གཤེགས། །རྡོ་རྗེ་འཛིན་བཤད་དེ་བཞིན་ཐུགས། །ཆོས་འཛིན་པ་ཡི་སྐུ་གསུང་ཐུགས། །སྐུ་གསུང་ཐུགས་ནི་ཡང་དག་གྲུབ། །ཚེ་འདི་ཉིད་ལ་ཐོབ་པར་འགྱུར། །གང་བཤད་རིགས་ནི་དམན་བཤད་པ། །དེ་ལའང་ཚུལ་དེ་གྲུབ་པར་འགྱུར། །དེ་ཉིད་མཆོད་པར་བཤད་པ་ཉིད། །དེ་བཞིན་སོ་སོར་རབ་ཏུ་བརྟག་།མི་ཕྱེད་རྡོ་རྗེའི་སྦྱོར་བ་ཡང ། །གསུང་གི་དབང་བསྐུར་བ་ཉིད་གསལ། །དགོངས་པ་ལུང་བསྟན་ལ་གནས་ནས། །གང་ཞིག་སེམས་ནི་མ་རྨོངས་པ། །མཁའ་ལ་གནས་པའི་ཉི་མ་བཞིན། །དེ་ནི་ཅི་དགར་སྤྱོད་པར་བྱེད། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་གསུམ་གྱི་གསང་བ་སྟེ། །སྔགས་སྤྱོད་པ་ནི་མཆོག་གྱུར་པ། །ལེའུ་བདུན་པར་རབ་ཏུ་
141a
༄#། །བསྟན།། །།དེ་ནས་དཔལ་ལྡན་དེ་བཞིན་གཤེགས། །དཀོན་མཆོག་དཔལ་ནི་འོད་ཆེན་པོ། །དེ་བཞིན་གཤེགས་པ་ཐམས་ཅད་ཀྱི། །བླ་མ་རྡོ་རྗེ་གསུམ་གྱི་བདག། མགོན་པོ་རྡོ་རྗེ་འཛིན་ཆེན་པོ། །དབང་ཕྱུག་དབང་ཕྱུག་དམ་པ་དང ། །སངས་རྒྱས་ཀུན་གྱི་སྟོན་པ་ལ། །བསྟོད་པ་འདི་ཡིས་གསོལ་བ་བཏབ། །ནམ་མཁའི་སྤྱོད་པ་རྡོ་རྗེ་མཆོག་།རྡོ་རྗེ་སེམས་དཔའ་ཐུབ་པ་ཆེ། །ཐེག་པ་ཆེན་པོའི་རྣམ་སྣང་བ། །ཀུན་ཏུ་བཟང་པོ་བརྟུལ་ཞུགས་བཟང ། །དངོས་ཀུན་དངོས་པོ་གཅིག་པའི་མཆོག་།རིགས་མཆོག་ཐམས་ཅད་ཡང་དག་འབྱུང ། །རྒྱལ་བའི་དམ་པའི་མཆོད་པའི་མཆོག་།མཆོད་པའི་ཀུན་མཆོག་བཤད་དུ་གསོལ། །འདོད་ཆགས་ཆེན་པོ་ཞེ་སྡང་ཆེ། །གཏི་མུག་ཆེན་པོ་བློ་གྲོས་ཆེ། ། ཐེག་པ་གསུམ་པོ་རབ་སྟོན་ཅིག་།རྡོ་རྗེ་ཐེག་པ་སྟོན་པ་པོ། །ནམ་མཁའ་གཅིག་པུ་དངོས་པོའི་མཆོག་།ཡེ་ཤེས་རྒྱ་མཚོ་བླ་མ་ཆེ། །རྡོ་རྗེ་གསུམ་པོ་ཆགས་མེད་པ། །རྒྱལ་གནས་མཆོད་པར་བཤད་དུ་གསོལ། །རྡོ་རྗེ་གསུམ་པོ་ལམ་གྱི་མཆོག། །ཐར་ལམ་གཅིག་བུ་སྟོན་པ་པོ། །སངས་རྒྱས་སྐལ་མཆོག་ཤིན་ཏུ་དག། མི་མཆོག་མཆོད་པ་བཤད་དུ་གསོལ། །དངོས་པོ་ཀུན་གཅིག་ཤིན་ཏུ་དག་།བྱང་ཆུབ་སེམས་ནི་རྒྱ་མཚོ་ཆེ། །ཆོས་ཀྱི་འཁོར་ལོ་གཅིག་བསྐོར་བ། །རྟེན་འབྲེལ་ཡེ་ཤེས་ལས་བྱུང་བ། །རྡོ་རྗེ་གསུམ་གཅིག་རྣམ་
141b
དག་དོན། །སྣ་ཚོགས་སངས་རྒྱས་བྱ་བ་མཛད། །བདག་མེད་མེད་ཆོས་ཤིན་ཏུ་དག་།ཕྱག་འཚལ་རྡོ་རྗེ་ཐེག་པ་ལའོ། །དེ་ནས་དེ་བཞིན་གཤེགས་བདག་པོ། །ཐམས་ཅད་ནམ་མཁའ་མི་འགྱུར་ཆེ། །ཐམས་ཅད་དབང་བསྐུར་ཀུན་དབང་པོ། །ཀུན་དོན་རིན་ཆེན་མཆོག་འཛིན་པའང ། །ན་ཆུང་མིག་ཡངས་བཙལ་ནས་ནི། །གཟུགས་དང་ན་ཚོད་རྣམས་ཀྱིས་བརྒྱན། །ལོ་གྲངས་ཉི་ཤུ་ལྔ་ལོན་པ། །རྙེད་ནས་མི་ཡི་སྐྱེ་གནས་བརྟག་།རྣམ་པར་དབེན་ནམ་གཙང་བ་ཡི། །ས་ཕྱོགས་སུ་ནི་རྒྱལ་བདག་ཉིད། །ཞི་བ་ཞི་བའི་གནས་ཡིད་འོང ། །བཤད་གཅི་ཆུ་ཡིས་བྱུགས་ནས་ནི། །སངས་རྒྱས་བྱང་ཆུབ་རབ་སྟེར་བའོ། །རྟག་ཏུ་མཆོད་པ་ཉིད་བྱའོ། །དེ་བཞིན་གཤེགས་པ་མཆོད་པ་ཡི། །ཕུང་པོ་ཞེས་བྱ་སྣ་ཚོགས་སྐྱེས། །རྡོ་རྗེ་གསུམ་པོ་མི་ཕྱེད་ཁམས། །རྒྱལ་བ་ཞེས་ནི་བྱ་བར་བཤད། །ཀུན་མཁྱེན་ཡེ་ཤེས་ལང་ཚོ་སྟེ། །ལེན་པ་མི་གསལ་ལ་སྦྱོར་ལ། །དེ་ཉིད་ན་ཆུང་ཡིན་པར་བརྟག་།འཇིག་རྟེན་པ་རྣམས་འཐོབ་བྱེད་རྒྱ། །འགྲོ་བའི་དོན་ནི་རབ་གྲུབ་པ། །གང་ཞིག་དངོས་མེད་ཅེས་བཤད་པ། །མཐའ་སྐྱེས་བཞིན་དུ་བརྟག་པ་ཡིན། །གཙང་བ་རྣམ་དག་སེམས་ཡིན་ཏེ། །རྣམ་པར་དབེན་པ་དངོས་མེད་པ། །ས་ནི་སྤྱན་ཞེས་བྱ་བ་ཡིན། །ས་ཕྱོགས་རྒྱལ་བ་འབྱུང་བ་ཡིན། །ཞི་བ་སྣ་ཚོགས་ངེས་འབྱུང་བ། །ཞི་བའི་གནས་ནི་མྱུར་ལ་སོགས། །བཤད་གཅི་ཡུལ་དང་དབང་པོར་གྲགས། །ཆུ་ནི་
142a
༄#། །ཤེས་རབ་ལ་སོགས་དྲུག་།འདི་དག་གིས་གང་བྱུགས་གྱུར་པ། །རྫོགས་ལོངས་སྤྱོད་པའི་འདོད་འབྱུང་བ། །དེ་དག་རྒྱལ་བའི་ཆོས་བཤད་པ། །དགོངས་པ་སྦྱོར་བ་ཆོས་ཉིད་དོ། །མཆོད་པའི་ཡན་ལག་གཉིས་པ་ཡི། །བཀོད་པའི་ཡན་ལག་མཚན་ཉིད་བཤད། །འཇིག་རྟེན་ཤིན་ཏུ་འདས་སྤྱི་འོ། །འཇིག་རྟེན་འདས་པའི་སྙིང་ག་རུ། །རྐང་པའི་བར་དང་ལྟེ་བ་དང ། །རྐེད་པ་གསང་བ་འཇིག་རྟེན་པ། །རྒྱལ་སྲས་རྣམས་ཀྱི་བཀོད་པ་ནི། །རིགས་ནི་ལྔ་པོ་བྱ་བ་ཡིན། །ནམ་མཁའི་ཁམས་ཀྱི་དབུས་གནས་པར། །ཡེ་ཤེས་རྒྱ་མཚོ་རྣམ་པར་བསྒོམ། །བདག་ཉིད་ཟླ་བའི་ནང་གནས་པར། །བརྟུལ་ཞུགས་ཅན་གྱིས་སྙིང་གར་བསྒོམ། །ཆུ་དེ་སྦྱོར་བར་གྱུར་པ་ནི། །མཱ་མ་ཀཱི་ར་ནི་ཡོངས་སུ་བརྟག་།ཞི་བ་རྡོ་རྗེ་འཛིན་འདོད་པས། །བསྡུ་བ་དེ་ཡང་རབ་ཏུ་བྱ། །རིན་ཆེན་རང་བཞིན་མཆོད་རྟེན་ནི། །འོད་ཟེར་སྣ་ཚོགས་རྣམས་ཀྱིས་བརྒྱན། །ཡེ་ཤེས་རྒྱ་མཚོ་དུས་གསུམ་པ། །གནས་དེ་རུ་ནི་བསམ་བྱ་བ། །བློ་ལྡན་པ་སྤུའི་བུ་ག་ལས། །ཇི་ལྟ་ཇི་ལྟར་སྤྲོ་བར་བྱ། །རྣལ་འབྱོར་རྣལ་འབྱོར་མཆོག་གཞོལ་བས། །མཆོད་པའི་སྤྲིན་ནི་དེས་སྤྲོ་བྱ། །གོས་དཀར་པདྨར་ཡང་དག་དགོད། །རྣམ་ལྔ་གཅིག་ལ་རྣལ་འབྱོར་མ། །མེ་ཡི་སྦྱོར་བ་བཤད་པ་ནི། །དེ་ཡང་མི་གསལ་ཞི་ལ་གནས། །སྒྲོན་མར་ཨུཏྤལ་ཉིད་གྱུར་པ། །རླུང་སྟེ་སྦྱོར་བ་ལྔ་པའོ། །
142b
འཇུག་དང་གནས་དང་སྐྱེ་བ་དང ། །དེ་བཞིན་ལྡང་བའི་མིང་ཅན་ནོ། །དེ་ཉིད་རྣམ་པ་གསུམ་བྱས་པས། །རྡོ་རྗེ་གསུམ་གྱི་དམ་ཚིག་གནས། །དེ་ནས་བློ་ལྡན་གྱིས་དབུལ་བ། །ལྷ་རྣམས་ཀྱི་ཡང་དངོས་མེད་ཉིད། །དེ་ནས་དེ་བཞིན་གཤེགས་བ་མཆོག་།ཁྱབ་བདག་རྣམ་སྣང་ཆེན་པོ་ལས། །མེ་ཏོག་དགོངས་པ་ཐོས་ནས་ནི། །རྡོ་རྗེ་ཅན་གྱིས་ཐུབ་ཆེན་ཞུས། །མེ་དང་རླུང་དང་དབང་ཆེན་དང ། །ཆུ་རུ་ཡོངས་སུ་བརྟགས་པ་ཡིན། །རེ་རེའང་དང་པོ་སྦྱོར་ཞེས་བྱ། །མེ་ཏོག་དེ་ལྔ་གསུམ་དུ་བཤད། །བྱ་རྒོད་མེ་ཏོག་ཟ་བ་དང ། །བུང་བ་ཤ་ཟ་ཞེས་ཟེར་ཞིང ། །མེ་ཏོག་འདི་ཡི་དགོངས་པ་ནི། །མ་འོང་སྐྱེ་ཐོབས་མི་ཤེས་སོ། །མ་རྟོས་པས་ནི་དེ་རྣམས་ཀྱི། །དངོས་གྲུབ་རིང་དུ་གནས་པར་འགྱུར། །འདི་ལྟར་བདག་ནི་སྐལ་མིན་ཞེས། །སྨྲ་ཞིང་དེ་རྣམས་བདག་ཉིད་སྨོད། །དེ་ལྟར་བདག་ཉིད་ཀྱིས་སྨད་པས། །སངས་རྒྱས་ཐམས་ཅད་སྨད་པར་འགྱུར། །སངས་རྒྱས་ཐམས་ཅད་སྨད་གྱུར་པས། །མི་ལས་འདས་ནས་གཞན་དུ་འགྲོ། །གཙོ་བོ་སངས་རྒྱས་ནང་ན་མིན། །ཕྱི་རོལ་ན་མིན་གཉི་གར་མིན། །ཚོགས་པ་ལས་ནི་མ་ཡིན་ཏེ། །རྐྱེན་གྱིས་འགྲོ་བ་དག་ལ་གནས། །དེ་བཞིན་དེ་བཞིན་གཤེགས་སངས་རྒྱས། །ལུས་ལ་གསང་སྔགས་འདི་ཉིད་ལས། །གསང་སྔགས་འགྲུབ་པར་དཀའ་བའི་རྒྱུས། །དེས་ནི་བདག་དང་དེ་དག་སྨོད། །དེ་རྣམས་རྗེས་སུ་གཟུང་བའི་ཕྱིར། །དགོངས་པས་དེ་ནི་
143a
༄#། །བཤད་དུ་གསོལ། །རང་གི་ངོ་བོ་མ་འཚལ་ན། །མཁས་པ་དག་ནི་ཉམས་པར་འགྱུར། །དེ་ནས་བཅོམ་ལྡན་སྣ་ཚོགས་པས། །གསང་བའི་བདག་པོ་ལ་གསུངས་པ། །ཉིན་དང་མཚན་མོ་དབྱེ་བ་ཡིས། །མེ་ཏོག་དོན་ནི་བཤད་པར་བྱ། །པདྨ་ཨུཏྤལ་ཉིན་མོར་བཤད། །ཛའ་ཏི་མཚན་མོ་ཡིན་ཞེས་བཤད། །ལྔ་ཡི་བདག་ཉིད་གསུམ་དང་གཅིག། གཉིས་ལྔ་གཅིག་དང་གསུམ་དུ་འགྱུར། །དེ་ཡི་ཐབས་ནི་ཉིན་མོར་བཤད། །མཚན་མོ་ཤེས་རབ་ཅེས་བཤད་དོ། །ཉིན་དང་མཚན་མོའི་དབྱེ་བ་ཡིས། །མཇུག་ཏུ་འབྱུང་བ་ཉིད་དུ་འགྱུར། །དེ་གཉིས་དབུས་ཀྱི་སྦྱོར་བ་གང ། །དགོངས་པས་ཡོངས་སུ་བརྟགས་པ་ཡིན། །དེ་ནི་སངས་རྒྱས་སྙིང་པོར་འགྱུར། །དེ་བས་ལྷ་ཚོགས་ཀྱིས་དེ་མིན། །རྣལ་འབྱོར་པ་དང་སྔགས་པ་རྣམས། །དགོངས་པའི་ཆོས་ལ་རབ་བརྩོན་བྱ། །དགོངས་པ་བྱིན་བརླབས་རྒྱུ་ཡིས་ནི། །དེ་རྣམས་ཀྱིས་ནི་འགྲུབ་པར་འགྱུར། །གང་ཞིག་རླུང་ནི་བཅུར་གྲགས་པ། །དེ་ནི་པདྨ་ཨུཏྤལ་མེད། །དེ་ཉིད་ཅེས་གྲགས་རྡོ་རྗེ་གསུམ། །ཛཱ་ཏི་གཅིག་པུ་གསུམ་དུ་འདོད། །ཀར་ནི་ཀ་དང་མ་ལི་ཀ་།ཡུག་ཏི་ཀཱ་ར་བཱི་ར་ནི། །གོ་རིམ་བཞིན་དུ་སྤྱན་སོགས་ཏེ། །ས་ལ་སོགས་པར་འདིར་སྦྱར་རོ། །དངོས་མེད་གོ་འཕང་ལ་བཀོད་པས། །ལྷ་རྣམས་ཀྱི་ནི་སྐུར་སྦྱོར་བས། །གཅིག་ཏུ་སངས་རྒྱས་ཀུན་མཉེས་པའི། །མཆོད་པ་ཆེན་པོར་དེ་འགྱུར་རོ། །ལྔ་པོའི་བདག་
143b
ཉིད་ཡང་དག་གཞག་།ལྔ་བཅུ་དག་ནི་ཉིས་འགྱུར་བྱ། །དེ་ཉིད་གསུམ་སྦྱོར་འཁོར་ལོ་ནི། །དཔག་ཚད་བརྒྱ་ཡི་དཀྱིལ་འཁོར་རོ། །དེར་ནི་མཁས་པས་རྟག་པར་ནི། །རིགས་རྣམས་རབ་ཏུ་དགོད་པར་བྱ། །པདྨ་འཁོར་ལོ་རྡོ་རྗེ་དང ། །དེ་བཞིན་ཨུཏྤལ་རྟག་ཏུ་བསྒོམ། །དཔག་ཚད་བཞི་པོ་སྦྱོར་གཅིག་པ། །དཔག་ཚད་རྒྱ་ཁྱོན་དེ་ཉིད་གསུམ། །བྱམས་པ་ལ་སོགས་གྲུ་བཞིར་འགྱུར། ། མཛེས་པ་ཕུང་པོས་བརྒྱན་པ་ཡིན། །གྲུ་བཞི་དེ་ནི་རིགས་སུ་གྱུར། །ཞི་བ་སྦྱོར་བ་གཅིག་མིང་ཅན། །མཆོད་རྟེན་ཡེ་ཤེས་སེམས་རང་བཞིན། །གསལ་ཞིང་རང་བཞིན་དྲི་མ་མེད། །རིགས་རྣམས་མཆོད་ཕྱིར་དེ་ཉིད་ནི། །ཤེས་རབ་ཅན་གྱིས་གནས་བསྒོམ་མོ། །མངོན་ཤེས་ལྔ་ཡི་གནས་འདོད་རྣམས། །དེ་ཡི་མཆོད་པ་རྒྱ་མཚོ་གསལ། །རིན་ཆེན་ཡེ་ཤེས་སྤྲོ་བདག་ཉིད། །གོས་ནི་བསྡུ་བ་ཞེས་བྱའོ། །མཆོད་པ་མཆོག་རྣམས་དེ་དག་གིས། །བྱང་ཆུབ་འདོད་པས་མཆོད་པར་བྱ། །ཤེས་རབ་ཅན་གྱིས་མཆོད་མཆོག་ལས། །ལྷ་རྣམས་རྟག་ཏུ་མཉེས་པར་བྱ། །སྦྱོར་གཅིག་དེ་ལས་ཡང་དག་བྱུང ། །རིན་ཆེན་འབྱུང་གནས་ན་ཆུང་ཡིན། །དགའ་མགུ་ཡང་དག་ལྡན་པ་ཡིན། །དངོས་གྲུབ་ཤིན་ཏུ་གྲུབ་པའི་ཕྱིར། །ང་རྒྱལ་ལ་སོགས་བདུན་ཞེས་བྱ། །རིན་ཆེན་ཐམས་ཅད་དབུལ་བར་བྱ། །ཆོས་དང་རྫོགས་ལོངས་སྤྱོད་ལས་བྱུང ། །རིན་ཆེན་བདུན་གྱི་ནོར་དེ་ནི། །དེས་བཀང་བ་ཡི་ཞིང་འདི་ནི། །ཤེས་རབ་ཐབས་གཅིག་ལས་བྱུང་བའི། །དངོས་གྲུབ་
144a
༄#། །འདོད་པས་སྦྱིན་བའི་ཕྱིར། །ཞིང་དེ་ཉིན་རེ་དབུལ་བར་ནི། །ནམ་མཁའ་མཐའ་ཡས་རྣལ་འབྱོར་པའི། །སྦྱིན་པའི་ཕ་རོལ་ཕྱིན་འདིར་འགྱུར། །སངས་རྒྱས་དཀྱིལ་འཁོར་དབུས་སུ་དེ། །ཕྱག་རྒྱའི་བདག་པོར་མཉམ་བཞག་སྟེ། །འདོད་ཆགས་བློ་ལྡན་སངས་རྒྱས་ལ། །རེག་པར་ཡང་དག་སྦྱོར་བ་དབུལ། །ནམ་མཁའི་དབྱིངས་ཀྱི་དབུས་གནས་པར། །བཀོད་པའི་དཀྱིལ་འཁོར་དམ་པ་བསྒོམ། །བདག་ཉིད་དེ་བཞིན་གཤེགས་པའི་སྐུ། །ཡུལ་དང་དབང་པོ་སུན་འབྱིན་པ། །དངོས་མེད་གཅིག་པར་ཡང་དག་འབྱུང ། ། ཡུལ་དང་དབང་པོ་ཞེས་བྱ་བའི། །བཤང་གཅི་ཇི་ལྟ་ཇི་ལྟ་བར། །དེ་ཉིད་མཆོད་པ་རྣམས་ཀྱིས་མཆོད། །སྐལ་བཟང་བཞིན་ནི་མཛེས་པ་ཡི། །བུད་མེད་གཟུགས་བཟང་རྙེད་པ་དང ། ། གསང་སྔགས་ཡི་གེའི་གནས་འགྱུར་བས། །རྣལ་འབྱོར་མ་དེ་བྱིན་བརླབས་ལ། །བྱས་ནས་གཉིས་མེད་སྦྱོར་གཅིག་པུ། །རང་གི་ལུས་ཀྱི་ནང་དུ་གཞུག་།སྤྱན་སོགས་ཇི་ལྟ་ཇི་ལྟ་བར། །བྱིན་གྱིས་བརླབ་པའི་གནས་བཀོད་དེ། །མིག་བཟང་དག་པའི་བྱ་བ་ཡི། །རང་བྱུང་ཁུ་བ་བླངས་ནས་མཆོད། །གང་ཞིག་དེ་ལྟར་རྟོགས་པ་དེ། །བླངས་པས་རྡོ་རྗེ་འཆད་བར་འགྱུར། །ས་ལ་སོགས་པའི་དཀྱིལ་འཁོར་གང ། །སྤྱན་ལ་སོགས་པར་རབ་བརྟགས་པ། །དེ་ནི་འཇུག་སོགས་སྦྱོར་བ་ཡང ། །དེ་ནི་ཁུ་བ་ཟ་བར་འགྱུར། །འདི་ནི་སྔགས་རྣམས་
144b
ཐམས་ཅད་ཀྱི། །སྐུ་གསུང་ཐུགས་ཀྱི་མཆོད་པ་སྟེ། །རྡོ་རྗེ་ཡེ་ཤེས་ཅན་གསང་གི་།གསང་སྔགས་དངོས་གྲུབ་བྱེད་པའི་མཆོག་།རིན་ཆེན་ཀུན་གྱི་འབྱུང་གནས་མཆོག་།དགོངས་པ་ལུང་བསྟན་ལ་གནས་ནས། །གང་ཞིག་སེམས་ནི་བཟོད་གྱུར་བྱ། །དེ་ནི་ཇི་བཞིན་ཉིད་དུའང་བྱེད། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་གསུང་གི་གསང་བ་ལས། །བཤང་གཅིའི་དམ་ཚིག་ཅེས་བྱ་བའི། །ལེའུ་བརྒྱད་པ་ཡིན་པར་བཤད།། །།དེ་ནས་དེ་བཞིན་གཤེགས་མཆོག་གཙོ། །ཐམས་ཅད་ནམ་མཁའ་མི་འགྱུར་ཆེ། །སངས་རྒྱས་དབང་བསྐུར་སྤྱོད་པའི་མཆོག ། གཟུགས་དོན་དབང་ཕྱུག་དམ་པ་ཡིན། །རྡོ་རྗེ་གསུམ་ཉིད་ལོངས་སྤྱོད་པ། །རྡོ་རྗེ་མི་ཕྱེད་གསུམ་དཀྱིལ་འཁོར། །སངས་རྒྱས་ཡེ་ཤེས་སྦྱོར་གཅིག་པའོ། །གསང་བ་ཉམས་ནི་དགའ་བར་བཤད། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒྲུབ་པར་བྱ། །རྡོ་རྗེ་རྩེ་གཅིག་རྡོ་རྗེ་ཡང ། །སྒོམ་པའི་བདག་ཉིད་ཅན་གྱིས་བསྒོམ། །འོད་འཕྲོ་མང་པོ་འབར་བ་དང ། །འོད་ཟེར་སྣ་ལྔས་རབ་ཏུ་གང ། །དུས་གསུམ་སངས་རྒྱས་ཡང་དག་འབྱུང ། །བསྒོམས་ལ་རྡོ་རྗེས་ཕྱེ་མར་བརླག་།རྡོ་རྗེ་གསུམ་གཅིག་ལོངས་སྤྱོད་ནི། །རྡོ་རྗེས་ཕྱེར་བརླགས་མེད་གྱུར་པའི། །ཐུགས་ཀྱི་དངོས་གྲུབ་བྱེད་བསམ་གཏན། །བསྒོམས་ན་མྱུར་དུ་ཐོབ་པར་འགྱུར། །རྡོ་རྗེ་མཆོག་ཅེས་བྱ་བ་ཡི། །རྡོ་རྗེ་གསང་བ་འདི་ལྟ་བུ། །རྡོ་རྗེས་རྡོ་རྗེ་འཛིན་པ་ནི། །སེམས་ཅན་
145a
༄#། །ཐམས་ཅད་བསད་ན་ནི། །དེ་ནི་མྱུར་བར་མི་བསྐྱོད་པའི། །རྒྱལ་བའི་སྲས་སུ་སྐྱེ་བར་འགྱུར། །ཞེ་སྡང་རིགས་ཆེན་དེ་ཉིད་ཀྱིས། །ཞིང་དེ་འགེངས་པར་བྱེད་པར་འགྱུར། །དེ་ནས་དགོངས་པ་ཆོས་གཅིག་པུ། །གཙོ་བོ་ཀུན་མཁྱེན་ཐམས་ཅད་རིག་།དམ་ཚིག་དེ་ཉིད་གསུངས་པ་ཡི། །མགོན་ལ་ཕྱག་ན་རྡོ་རྗེས་གསོལ། །འདི་ལྟར་དངོས་མེད་མཆོག་གྱུར་པ། །ཁྱོད་ནི་ཆོས་རྣམས་སྟོན་མཛད་པ། །འཇིག་རྟེན་པ་དང་འགལ་ཚིག་གིས། །མགོན་ཁྱོད་ཅི་ཕྱིར་སྟོན་པར་མཇེད། །གང་ཞིག་དེ་བཞིན་ཉིད་དངོས་གཅིག། །དུས་གསུམ་བྱུང་བའི་སངས་རྒྱས་རྣམས། །ཆོས་སྐུ་གཅིག་པུ་ལས་འཁྲུངས་པ། །\?\་རྡོ་རྗེས་ཕྱེ་མར་བརླག། དེ་ནི་ཕྱེར་བརླགས་གྱུར་པ་ལས། །ཇི་ལྟར་ཡང་དག་སེམས་འགྲུབ་འགྱུར། །ཆོས་སྐུ་གཅིག་པུ་ལས་བྱུང་ལས། །ལྷག་པ་ཞེས་བྱ་གྱུར་ནས་\?\་དུས་གསུམ་འབྱུང་བའི་སངས་རྒྱས་རྣམས། །ཕྱེ་མར་བརླག་པར་ཇི་ལྟར་ནུས། །ཕྱེར་བརླག་བྱེད་པ་མདངས་མེད་པས། ། ཕྱེ་མ་ཉིད་ཀྱང་ཁྱད་པར་དུ། །སངས་རྒྱས་སྔགས་དོན་རྣལ་འབྱོར་པ། །ནུས་པ་བསམ་མི་ཁྱབ་ལྡན་ལ། །དེ་འདྲ་བར་ནི་ཕྱེར་བརླག་པར། །སྔགས་པ་གཞན་གྱིས་མི་ནུས་སོ། །སེམས་ཅན་གྱིས་ནི་སེམས་ཅན་བཞིན། །སངས་རྒྱས་སངས་རྒྱས་ཕྱེར་བརླགས་པས། །འདི་གཉིས་ཁྱད་པར་མེད་དོ་ཞེས། །མ་འོངས་སྐྱེ་བོ་སྨྲ་བར་འགྱུར། །སངས་རྒྱས་གཅིག་པུ་མཐར་
145b
ཐུག་པ། །མིན་ཞེས་མི་རྣམས་ངེས་སྨྲ་ཞིང ། །གང་ཞིག་སངས་རྒྱས་ཀྱིས་གསུངས་བཞིན། །རབ་ཏུ་སྤོང་བར་བྱེད་པར་འགྱུར། །ཐེག་བཟང་བསྒྲུབས་ན་འཚང་རྒྱ་བ། །དགོངས་པའི་བུམ་པ་བཟང་པོ་མཆོག་།དེ་ནི་བཅོམ་ལྡན་མྱུར་སྦྱོར་བས། །མི་བསྐྱོད་ཞིང་དུ་སྐྱེ་འགྱུར་རམ། །སེམས་ཅན་འཁོར་བར་འཁོར་གྱུར་བ། །དེ་ཚེ་ཞེ་སྡང་ཆེ་སྐྱེ་འམ། །སྙིང་རྗེས་གསད་པར་བྱའོ་ཞེས། །སྔགས་པ་རྣམས་ནི་དེ་མི་སྤོང ། །འདས་ཚེ་སྟོན་པར་གྱུར་པ་དང ། །ད་ལྟར་རྗེས་སུ་སྟོན་མཛད་དང ། །མཉེས་བྱ་མ་འོངས་སངས་རྒྱས་རྣམས། །སངས་རྒྱས་བྱང་ཆུབ་སྩོལ་བའོ། །མི་བསྐྱོད་གཟུགས་ཅན་རྡོ་རྗེ་ཡིས། །དེ་རྣམས་ཇི་ལྟར་གཞོམ་པར་བགྱི། །དེ་ཉིད་སྣ་ཚོགས་དོན་ལྡན་ཚིག་།དེ་རྣམས་ཀྱིས་ནི་ཇི་ལྟར་རྟོགས། །གང་ཞིག་ཤེས་པས་རྒྱལ་སྲས་རྣམས། །དགོངས་པའི་དོན་ལ་རྟོག་མེད་འགྱུར། །མ་འོངས་སྐྱེ་བོའི་དོན་དུ་ནི། །དེ་ཉིད་བཅོམ་ལྡན་བཤད་དུ་གསོལ། །དེ་ནས་རྡོ་རྗེ་འཛིན་སྨྲ་བའི། །འགྲོ་ལ་ཕན་པའི་ཚིག་གསན་ནས། །དེ་ནས་གཙོ་བོ་རྡོ་རྗེ་འཆང ། །ཁྱབ་བདག་གིས་ནི་སླར་གསུངས་པ། །ལེགས་སོ་བུ་ཁྱོད་ཆེར་ལེགས་ཏེ། །ཀུན་ཏུ་བཟང་པོ་ཁྱོད་ལེགས་སོ། །དགོངས་པས་བཤད་པའི་དོན་དུ་ནི། །ཁྱོད་ཀྱིས་ང་ལ་གང་དྲིས་པ། །གསུངས་དོན་ཇི་ལྟ་ཇི་ལྟ་བར། །དེ་ནི་ང་ཡིས་བཤད་པར་བྱ། །ཕུང་སོགས་ཡན་ལག་གང་གྱུར་པ། །སངས་རྒྱས་སེམས་ཅན་རབ་བརྟན་ཞིང ། །སྔགས་དང་ཕྱག་
146a
༄#། །རྒྱའི་སྦྱོར་བ་ཡང ། །དབྱེ་བ་སྣ་ཚོགས་རབ་ཏུ་བརྟན། །འཁོར་བ་མི་བསྐྱོད་མིང་ཅན་ཏེ། །དེའི་སྔགས་རྡོ་རྗེ་ཞེས་བྱ་བ། །མི་གསལ་རྡོ་རྗེ་ཞེས་བཤད་དེ། །དངོས་མེད་གཅིག་པུ་རྡོ་རྗེ་ཉིད། །དེས་བཤིག་པ་ནི་བསད་པ་སྟེ། །སངས་རྒྱས་སེམས་ཅན་ཁྱད་པར་དུ། །སྣ་ནི་ཚོགས་ཀྱི་དབང་པོ་ཡི། །ཁ་ནི་རང་བཞིན་ཉིད་དུ་གཡོ། །རྣལ་འབྱོར་པ་ཡི་ལག་གྱུར་པ། །འགྲོ་བ་རླུང་གི་མིང་ཅན་ནོ། །མི་བསྐྱོད་རྡོ་རྗེའི་སྤྱོད་པ་ཉིད། །ལག་ཏུ་རྡོ་རྗེ་བཞག་ནས་ནི། །དེ་ཚེ་མྱུར་ལ་སོགས་བྱ་བ། །ཀླུ་ཡི་རང་བཞིན་སྣ་ཚོགས་ཉིད། །ཕུང་སོགས་བརྟགས་པའི་སངས་རྒྱས་རྣམས། །སྐུ་གསུང་ཐུགས་ལས་ཡང་དག་བྱུང ། །དེ་ཡི་ཡན་ལག་ཕུང་པོར་བཤད། །དེ་ནི་ཕྱེར་གྱུར་བསད་པ་ཡིན། །འདི་ནི་ཞེ་སྡང་རིགས་ཡིད་འོང ། །མི་བསྐྱོད་ཡེ་ཤེས་རྡོ་རྗེ་ཉིད། །དེ་བཞིན་སྐྱེ་བ་དམ་པ་ཡིན། །དངོས་གྲུབ་ཆེན་པོ་དེས་འཐོབ་འགྱུར། །དེ་ནས་དཔལ་ལྡན་བདེ་ཆེན་པོ། །ཡེ་ཤེས་ཐར་པ་རབ་སྒྲུབ་པ། །རང་བཞིན་དག་གིས་གོས་མེད་པ། །བྱང་ཆུབ་སྤྱོད་པ་རབ་སྒྲུབ་པས། །ཕྱག་ན་རྡོ་རྗེ་འོད་ཆེན་པོ། །གསང་བ་གསུམ་གྱི་གཙོ་བོ་ལ། །བོས་ནས་ཡང་དག་རྫོགས་སངས་རྒྱས། །སྒྲུབ་པའི་དམ་ཚིག་དེ་ཉིད་གསུངས། །ནམ་མཁའི་དབྱིངས་ཀྱི་དབུས་གནས་པར། །རྡོ་རྗེ་དཀྱིལ་འཁོར་དམ་པ་ལ། །རྣམ་པར་སྣང་མཛད་བསྒོམ་བྱ་ཞིང ། །སངས་རྒྱས་ཐམས་ཅད་རྣམ་པར་བསྒོམ། །
146b
རིན་ཆེན་ཀུན་གྱི་སྦྱོར་བ་ཡིས། །རྡོ་རྗེ་གཟུགས་ནི་རྣམ་པར་བསྒོམ། །རྡོ་རྗེ་གསུམ་མཉམ་སྦྱོར་བ་ཡིས། །རྫས་རྣམས་ཐམས་ཅད་དབྲོག་པར་བྱ། །ཤེས་དང་དབང་པོ་ལྡོག་པར་འགྱུར། །རྣམ་སྨིན་དངོས་པོ་མེད་པ་ཡི། །དེ་ཉིད་དབྲོག་པའི་རྡོ་རྗེ་དང ། །སངས་རྒྱས་ཐམས་ཅད་རབ་སྒྲུབ་པའི། །རིན་ཆེན་རྡོ་རྗེ་མཆོག་སྦྱོར་བ། །རྒྱལ་བའི་སྲས་སུ་འགྱུར་བ་དང ། །ནོར་གྱི་རྒྱ་མཚོས་གང་བ་ཡི། །ཡིད་བཞིན་ནོར་བུ་འདྲ་བར་འགྱུར། །འདི་ནི་གཏི་མུག་རིགས་དེ་ཉིད། །དམ་ཚིག་ཡིན་པར་ཡོངས་སུ་བསྒྲགས། །རིགས་ཀུན་རྒྱ་མཚོ་ཞེས་བྱ་སྟེ། །དེ་ལས་ཐུབ་པའི་སྐྱེས་མཆོག་འགྱུར། །དེ་ནས་བདག་པོ་བཅོམ་ལྡན་འདས། །འདོད་ཆགས་ཐར་པར་རབ་འཇུག་པ། །གསང་བ་དག་པ་གནས་མེད་པ། །དཀྱིལ་འཁོར་མཆོག་ནི་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །རིན་ཆེན་དཀྱིལ་འཁོར་བསྒོམ་པར་བྱ། །དཔག་མེད་ཆོས་ནི་རྣམ་བསྒོམས་ཏེ། །སངས་རྒྱས་ཀུན་གྱིས་རབ་ཏུ་དགང ། །བུད་མེད་ལྟ་བུའི་སྦྱོར་བ་ཡང ། །ཏིང་ངེ་འཛིན་གྱི་སྦྱོར་བ་ཡིས། །ཐམས་ཅད་དེ་རུ་བསྒོམ་པར་བྱ། །འདི་ནི་རྡོ་རྗེ་ཚུལ་མཆོག་ཡིན། །དངོས་མེད་བསམ་པའི་སྦྱོར་བ་ཡིས། །གསལ་མི་གསལ་ལ་ཡང་དག་སྦྱར། །ཆོས་དང་རྫོགས་ལོངས་སྤྱོད་སྦྱོར་བ། །གསང་སྔགས་ཀྱིས་སྤྲུལ་དབང་པོ་གཉིས། །སྦྱོར་བ་བཞི་ཡི་སྦྱོར་བ་ཡིས། །དབང་པོ་གཉིས་ནི་རབ་སྦྱོར་བའི། །སྙོམས་ཞུགས་སྦྱོར་བ་དེ་ཡིས་ནི། །དེ་དག་ཐམས་ཅད་ཉེ་
147a
༄#། །བར་སྤྱོད། །སྐུ་གསུམ་མི་ཕྱེད་སྔགས་རྣམས་ཀྱི། །འདི་ནི་སྒོམ་པ་མཆོག་དེ་ཡིན། །དེ་ཉིད་དམ་ཚིག་སྦྱོར་བ་འདི། །འདོད་ཆགས་རིགས་གཅིག་སྒོམ་པའོ། ། འདི་ནི་སངས་རྒྱས་ཐམས་ཅད་ཀྱི། །འདོད་ཆགས་ཆེན་པོའི་ཚུལ་མཆོག་སྟེ། །སྔགས་པ་རྣམས་ཀྱིས་ཉིན་རེ་ཞིང ། །རབ་ཏུ་འབད་པས་བསྒོམ་པར་བྱ། །དེ་ནས་གསང་དབང་རྡོ་རྗེ་གསུམ།། རྡོ་རྗེ་སྔགས་དོན་སྒྲུབ་པ་པོ། །བདག་མེད་ཡེ་ཤེས་ལས་བྱུང་བས། །གསུང་ནི་འདི་སྐད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །དོན་ཡོད་རྡོ་རྗེ་རྣམ་བསྒོམས་ཏེ། །སངས་རྒྱས་ཐམས་ཅད་བསྒོམ་པར་བྱ། །རྡོ་རྗེ་ཚིག་གི་རྫུན་སྨྲ་བ། །རྒྱལ་བ་ཐམས་ཅད་སླུ་བ་སྟེ། །འདི་ནི་སངས་རྒྱས་ཐམས་ཅད་ཀྱི། །ནམ་མཁའི་གསུང་ནི་དྲི་མེད་པའོ། །གང་ཞིག་བརྫུན་དུ་སྨྲ་བཤད་པ། །རྫུན་དེ་ཉིད་ནི་དམ་པ་སྟེ། །དཔའ་བོ་གང་ཞིག་སྒོམ་བྱེད་པ། །དེ་ནི་རྒྱལ་བའི་མཆོག་ཏུ་འགྱུར། ། གསང་པའི་ཡེ་ཤེས་དམ་པ་སྟེ། །སངས་རྒྱས་དངོས་གྲུབ་བྱེད་བའི་མཆོག་།དམ་ཚིག་འགུགས་པར་གང་གྱུར་པའི། །རིགས་ཀྱི་དམ་ཚིག་ལ་འཇུག་པའོ། །ཀུན་ཏུ་ཀུན་ནས་འབབ་པ་ཡིས། །ཇི་བཞིན་དོན་དུ་དྲངས་བྱས་ཏེ། །སོ་སོར་རྟོག་པའི་སྦྱོར་བ་ཡིས། །དེ་ནི་དངོས་གྲུབ་རྒྱ་ཆེན་འཐོབ། །དེ་ནས་བཅོམ་ལྡན་སྣ་ཚོགས་པ། །མི་ཕྱེད་རྡོ་རྗེ་གསུམ་རྒྱལ་བདག་།རྡོ་རྗེའི་
147b
དངོས་གྲུབ་རབ་སྟོན་པས། །གསུང་ནི་འདི་སྐད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །དེར་ནི་དཀྱིལ་འཁོར་བསྒོམ་པར་བྱ། །སངས་རྒྱས་སྐུ་རུ་རབ་བརྟགས་པའི། ། དམ་ཚིག་དེ་ནི་ཡང་དག་བཤད། །དཀོན་མཆོག་དཔལ་ནི་རབ་བསྒོམས་ཏེ། །གཟུགས་རྣམས་ཀུན་གྱིས་ས་འདི་གང ། །ཕུང་པོ་ལ་སོགས་གྲངས་མཉམ་པའི། །སངས་རྒྱས་ཀུན་གྱིས་ཐམས་ཅད་དུ། །རྩུབ་པའི་ངག་ལ་སོགས་པ་ནི། །ས་རྣམས་དམན་པ་ཞེས་བྱ་བའི། །བསྒོམས་ན་དངོས་གྲུབ་ཐོབ་འགྱུར་ཞེས། །བཅོམ་ལྡན་ཐུབ་པས་དེ་སྐད་གསུངས། །དེ་བཞིན་གཤེགས་པ་ཀུན་བཀོད་པ། །སྣ་ཚོགས་གཟུགས་ཅན་འོད་པོ་ཆེ། །བསམ་པས་དཔལ་ལྡན་གཅིག་པུ་ཉིད། །དཔག་ཏུ་མེད་པར་གྱུར་བ་ཡིན། །དེ་ནས་གང་ཞིག་དམ་ཚིག་སོགས། ། ཆོས་དབྱིངས་རྡོ་རྗེ་གསུམ་ཉིད་ནི། །དེ་བཞིན་གཤེགས་པ་ཐམས་ཅད་ཀྱིས། །དམ་ཚིག་རྡོ་རྗེ་དཔལ་ལ་སོགས། །བྱང་ཆུབ་སེམས་དཔའ་སེམས་དཔའ་ཆེ། །ངོ་མཚར་རྨད་དུ་གྱུར་ནས་ནི། ། ཚིག་ལམ་རྡོ་རྗེ་ཞེས་བྱ་འདི། །དེ་ནི་དེ་རྣམས་རྗོད་པར་བྱེད། །ཅི་འདི་མགོན་པོ་བཅོམ་ལྡན་འདས། །དེ་བཞིན་གཤེགས་པ་ཀུན་གྱི་བདག་།གང་ཞིག་ཁམས་གསུམ་ལས་འདས་ཤིང ། ། འཇིག་རྟེན་ཐམས་ཅད་ལས་འདས་པ། །དེ་བཞིན་གཤེགས་པ་ཀུན་མཆོག་དང ། །བྱང་ཆུབ་སེམས་དཔའི་ཚོགས་ཆེན་གྱི། །འཁོར་གྱི་དཀྱིལ་འཁོར་དབུས་སུ་ནི། །ངོ་མཚར་ཆེ་བའི་ཚིག་
148a
༄#། །གི་ལམ། །གཙོ་བོའི་ཡང་དག་རྡོ་རྗེའི་ཚིག་།དགོངས་པས་ཅི་སླད་གང་གསུངས་ཞེས། །བརྗོད་ཀྱིས་མི་ལང་བ་ཡི་ཡང ། །བརྗོད་མི་ལང་བ་རྣམས་ཀྱིས་གསོལ། ། དེ་ནས་དེ་བཞིན་གཤེགས་ཀུན་གྱིས། །བརྗོད་ཀྱིས་མི་ལང་བ་ཡི་ཡང ། །བརྗོད་ཀྱིས་མི་ལང་གྲངས་ཀྱི་ནི། །རི་རབ་རྡུལ་ཕྲན་དང་མཉམ་པའི། །དེ་བཞིན་གཤེགས་པ་ཐམས་ཅད་དང ། །དམ་ཚིག་རྡོ་རྗེ་དཔལ་སོགས་པའི། །བྱང་ཆུབ་སེམས་དཔའ་སེམས་ཆེན་ལ། །དངོས་མེད་ལས་བྱུང་གསལ་བ་གསུངས། །དམན་དང་སྨད་པའི་འདུ་ཤེས་ནི། །རྒྱལ་བའི་སྲས་རྣམས་མ་སྐྱེད་ཅིག་།ཅིའི་ཕྱིར་ཞེ་ན་དེ་བཞིན་གཤེགས། །འབྱུང་བ་གང་འདི་སྤྱོད་མཆོག་ཡིན། །འདི་ལྟར་སྔགས་ཀྱི་སྤྱོད་མཆོག་འདི། །རྣམ་པར་དག་ཡིན་རིགས་ཀྱི་བུ། །སངས་རྒྱས་མཉམ་མེད་འབྱུང་འགྱུར་འདི། །གསང་བའི་སྔགས་དོན་སྤྱོད་པ་ཉིད། །འདི་ལྟར་དཔེར་ན་རིགས་ཀྱི་བུ། །ནམ་མཁའ་ཀུན་ཏུ་སོང་བ་སྟེ། །ཆོས་རྣམས་ཀུན་ཀྱང་དེར་རྟོགས་ཤིང ། །རབ་དབྱེའི་སྦྱོར་བར་གྱུར་པ་ཉིད། །འདོད་པའི་ཁམས་ན་མི་གནས་ཤིང ། །ད་ནི་གཟུགས་ཀྱི་ཁམས་མི་གནས། །དེ་བཞིན་གཟུགས་མེད་ཁམས་ནའང་མིན། །འབྱུང་བ་བཞི་ལ་དེ་མི་གནས། །རིགས་ཀྱི་བུ་ཆོས་ཐམས་ཅད་ཀྱང ། །དེ་ལྟར་དོན་གྱི་དབང་མཁྱེན་ནས། །དགོངས་པའི་དབང་གིས་རྒྱལ་བ་རྣམས། །དེ་བཞིན་གཤེགས་རྣམས་དགོངས་ཉིད་ཀྱིས།།
148b
ཆོས་རྣམས་སྟོན་པར་མཛད་པ་ཡིན། །དེ་བཞིན་དུ་ནི་ཁྱེད་རྣམས་ཀྱིས། །མདོར་ན་ཁོང་དུ་ཆུད་པར་བྱ། །ཡང་དག་བྱང་ཆུབ་དོན་རྣམས་ཀྱིས། །ནམ་མཁའི་ངེས་ཚིག་སྦྱོར་བས་ནི། །དེ་བཞིན་གཤེགས་པའི་སྦྱོར་བ་བྱུང ། །དམ་ཚིག་རྗེས་སུ་རིག་པར་བྱ། །འདི་ལྟར་དཔེར་ན་རིགས་ཀྱི་བུ། །གཙུབ་ཤིང་གཙུབ་སྟན་བཅས་པ་དང ། །སྐྱེས་བུའི་ལག་པ་བསྐྱོད་པ་ཡི། །རྐྱེན་ལས་དུ་བ་འབྱུང་བར་འགྱུར། །དེ་ནས་མེ་ཡང་འབྱུང་མོད་ཀྱི། །གཙུབ་ཤིང་ལ་སོགས་རེ་རེ་ནས། །འདི་ལྟར་སོ་སོར་བརྟགས་ན་གོ་།མེ་དེ་གང་ནའང་མི་གནས་སོ། །བྲག་ཅ་དང་ནི་གཟུགས་བརྙན་\?\་དང ། །སྒྱུ་མ་དང་ནི་སྨིག་རྒྱུ་དང ། །དེ་བཞིན་ཆུ་ཟླ་རྨི་ལམ་སྟེ། །ཆོས་རྣམས་ཐམས་ཅད་དེ་དང་འདྲ། །མགོན་པོ་པི་ཝང་སྒྲ་ལྟ་བུ། །རྐྱེན་དོན་ལས་ཚིག་ཡང་དག་བྱུང ། །དེ་བཞིན་འགྲོ་འོད་གནས་པ་རྣམས། །ཅུང་ཟད་ཙམ་ཡང་ཡོད་མ་ཡིན། །གནས་མེད་གནས་པའི་སྦྱོར་བ་ཡིས། །གནས་པ་ནམ་མཁའི་མཚན་ཉིད་ཡིན། །དེས་ན་ཁྱེད་ཀྱིས་རྡོ་རྗེ་ཡི། །དམ་ཚིག་རྗེས་སུ་རིག་པར་བྱ། ། དེ་ལྟར་ཆོས་རྣམས་དངོས་མེད་ཅེས། །གསང་བའི་དེ་ཉིད་དོན་མཁས་པས། །རྣམ་པར་སྨིན་པ་ལྡོག་བྱའི་ཕྱིར། །ཕུང་པོ་དེ་བཞིན་གཤེགས་པས་གསུངས། །དེ་ནས་བྱང་ཆུབ་སེམས་དཔའ་རྣམས། །ངོ་མཚར་རྨད་དུ་བྱུང་ནས་ནི། །ངམ་པ་ཡིས་ནི་མིག་གདངས་ཏེ། །ཚིག་ནི་འདི་སྐད་ཅེས་གསོལ་ཏོ། །ཆོས་འདི་ངོ་མཚར་རྨད་བྱུང་སྟེ། །ནམ་མཁའ་དང་ནི་མཚུངས་པ་ཡི། །མི་རྟོག་
149a
༄#། །རྣམ་པར་དག་པ་ཡང ། །ཀུན་རྫོབ་ཏུ་ནི་བཤད་བར་མཛད། །དམ་ཚིག་ཆེན་པོ་ཡང་དག་གནས། །དགོངས་པ་ལུང་སྟོན་མཆོག་ལ་ནི། །གང་ཞིག་ཡིད་འོང་བཟོད་གྱུར་པ། །དེ་ནི་དེ་བཞིན་སྤྱོད་པ་ཡིན། །མཆོག་ཏུ་ངག་པའི་དེ་ཉིད་དོན། །གསང་བ་ཆེན་པོ་ཞེས་བྱ་བ། །དམ་ཚིག་ཚུལ་ནི་ཡང་དག་བཤད། །ལེའུ་དགུ་པ་རྫོགས་པ་ཡིན།། །། དེ་ནས་དེ་བཞིན་གཤེགས་པ་ཀུན། །རྡོ་རྗེ་གསུམ་འབྱུང་བཅོམ་ལྡན་འདས། །སླར་ཡང་དགོངས་པ་འདུས་ནས་ནི། །བླ་མ་ཆེན་པོ་བཅོམ་ལྡན་འདས། །དམ་ཚིག་རྡོ་རྗེ་དེ་ཉིད་གནས། ། མངོན་པར་བྱང་ཆུབ་དེད་དཔོན་ཉིད། །སྐུ་དང་གསུང་ཐུགས་གཙང་གཙོ་ལ། །བཏུད་དེ་དེ་བཞིན་གཤེགས་པས་གསལ། །སྙིང་པོ་སྔགས་ནི་ཀུན་བསྡུས་པས། །གསང་བ་ཡང་དག་རྡོ་རྗེ་གསུམ། །དངོས་གྲུབ་ཆེན་པོའི་ཚུལ་གྱི་མཆོག་།དེ་ཉིད་བཅོམ་ལྡན་བཤད་དུ་གསོལ། །དེ་བཞིན་གཤེགས་པ་ཀུན་ཡེ་ཤེས། །སྐུ་གསུང་ཐུགས་ཀྱི་དངོས་གྲུབ་སྩོལ། །གསུང་གཅིག་དུ་མའི་རྣམ་པར་རྟོག་།ཡང་དག་བསྡུས་དོན་དེ་བཞིན་གསུངས། །དེ་ནས་བདག་པོ་བཅོམ་ལྡན་འདས། །ཉོན་མོངས་ཀུན་གྱི་རྒྱ་མཚོ་གཙོ། །འབར་བ་དྲག་པོ་སྤྱན་ཡངས་པས། །གསུང་ནི་འདི་སྐད་བཀའ་སྩལ་ཏོ། །སྐུ་ལ་སོགས་པའི་རྡོ་རྗེ་གསུམ། །སྐུ་དང་གསུང་ཐུགས་སྒོམ་པ་ནི། །མཉམ་ཞིང་རྣམ་པར་མི་རྟོག་པ། །དམིགས་པ་མེད་ཅིང་གནས་མེད་པའོ། །དེ་ནས་
149b
མགོན་པོ་བཅོམ་ལྡན་འདས། །རང་བཞིན་དག་པའི་དེ་བཞིན་གཤེགས། །ཕ་རོལ་ཕྱིན་པ་སྔགས་ཚུལ་གྱི། །རྡོ་རྗེ་ཞེས་བྱའི་ཏིང་འཛིན་ལ། །དཔའ་བོ་ཆེན་པོ་སྙོམས་ཞུགས་ཏེ། །ད་བཞིན་གཤེགས་ཀུན་ལ་གསུངས་པ། །གང་ཕྱིར་སངས་རྒྱས་བཅོམ་ལྡན་འདས། །དེ་བཞིན་གཤེགས་པ་ཀུན་འདི་ནི། །མགོན་པོ་མི་བསྐྱོད་ལ་སོགས་པའི། །དེ་བཞིན་གཤེགས་པ་དུ་མ་དང ། །རིག་པ་བྱེ་བ་ཁྲག་ཁྲིག་ནི། །བརྒྱ་སྟོང་དུ་མ་ཞེས་བྱ་དང ། །སེམས་ཅན་དོན་བྱ་ལ་རོལ་པར། །མཆོག་ནི་དེ་རྣམས་སྟོན་པར་མཛད། །ཕྱོགས་བཅུའི་འཇིག་རྟེན་ཁམས་མཆོག་ཏུ། ། འདོད་པའི་ཡོན་ཏན་ལྔར་ལྡན་པས། །རོལ་ཅིང་དགྱེས་པར་གྱུར་པ་དང ། །ཡོངས་སུ་སྤྱོད་པ་ཡོད་ཀྱང་ནི། །སྔགས་སྤྱོད་པ་ལ་བརྩོན་རྣམས་ལ། །ཀྱེ་མ་དཔའ་བོ་དེ་བཞིན་གཤེགས། །རང་གཙོ་གསང་སྔགས་སྤྱོད་ཚུལ་མཆོག་།ཆོས་བདག་མེད་པའི་རང་བཞིན་ཅན། །འདི་དག་རྫོགས་པར་གྱུར་མཉམ་ནས། །སྤྱན་རས་ཀྱིས་ནི་འཚོ་མི་མཛད། །དེ་ལྟར་རྣམ་པར་སྤྱད་པའི་དོན། །གསང་སྔགས་བརྟུལ་ཞུགས་སྤྱོད་རྣམས་ལ། །ཡང་དག་པར་ནི་བྱིན་བརླབས་ཕྱིར། །དེ་ནི་སྟོན་པར་མཛད་འདི་ཡིན། །དེ་ནས་དེ་བཞིན་གཤེགས་པ་མཆོག་།ཐུབ་ལ་ཕྱག་ན་རྡོ་རྗེ་གསོལ། །མགོན་པོ་དེ་བཞིན་གཤེགས་དེ་རྣམས། །སོ་སོ་སྐྱེ་བོར་གྱུར་པ་ལ། །དངོས་པོ་མེད་ཅིང་དམིགས་སུ་མེད། །ནམ་མཁའི་ཁམས་དང་མཉམ་གྱུར་ནས། །འདོད་པའི་
150a
༄#། །ཡོན་ཏན་ལྡར་ལྡན་ནས། །ཇི་ལྟར་དེ་རྣམས་རོལ་པར་མཛད། །དེ་རྣམས་ཕྱོགས་བཅུའི་འཇིག་རྟེན་དུ། །ངེས་པར་གྱུར་བའི་འཁོར་རྣམས་དང ། །སེམས་ཅན་དོན་གྱི་བྱ་བ་ཀུན། །འདོད་པས་སྟོན་པར་མཛད་པ་ཡིན། །མགོན་པོ་འདོད་པའི་ཡོན་ཏན་རྣམས། །སྦྱིན་སོགས་དྲུག་ཅེས་བྱ་བར་འབྱུང ། །ཐམས་ཅད་དག་ཀྱང་དེ་ཉིད་འབྱུང ། །ཕ་རོལ་ཕྱིན་པར་མཉམ་བཞག་ཉིད། །དེ་ལྟར་ཕ་རོལ་ཕྱིན་འབྱུང་བའི། །འདོད་པའི་ཡོན་ཏན་ལྔ་དང་ལྡན། །འགྲོ་བའི་དོན་གྱི་བྱ་བ་ཡང ། །འདོད་པ་ལྔ་པོ་འདི་ཡིས་མཛད། །འདི་རྣམས་ཀྱིས་ནི་མགོན་པོ་འདི། །མི་བསྐྱོད་ལ་སོགས་རྒྱལ་བ་རྣམས། །རོལ་ཅིང་དགྱེས་པར་མཛད་པ་དང ། །འགྲོ་བའི་དོན་ཀྱང་མཛད་གྱུར་ཅིང ། །འཇིག་རྟེན་པ་དང་འགལ་བྱ་རྣམས། །དེ་ཡང་དེ་བཞིན་མཛད་གྱུར་པ། །དག་པ་རྡོ་རྗེའི་ཚིག་མཆོག་འདི། །དེ་རྣམས་ཀྱིས་ནི་རྟོགས་པར་འགྱུར། །ཕྱག་བྱར་འོས་པའི་རིགས་པ་ནི། །ངེས་པར་ལྡན་པ་ངེས་པར་འདོད། །ཡོད་མེད་ལ་སོགས་བྱེད་པ་ནི། །ཉིས་འགྱུར་མཚན་མ་ཅན་དུ་འགྱུར། །ཕྱོགས་བཅུ་ལམ་དུ་ཆོས་གསུངས་པ། །གང་ཞིག་འཇིག་རྟེན་ཕུང་པོ་ལྔ། །ཁམས་ལ་སོགས་པར་མཚོན་ཕ་གང ། །གཟུགས་སོགས་ཞེས་བྱའི་མིང་ཅན་ཡིན། །འདི་ནི་ཡན་ལག་ཐམས་ཅད་ནི། །བྱ་བ་ཉན་ཐོས་ཐེག་པའོ། །དེ་ཉིད་རྐྱེན་གྱི་ཐེག་པ་སྟེ། །ཚིག་དེ་སྟོན་པར་མཛད་
150b
པ་འདི། །གང་ཞིག་རྡོ་རྗེ་ཐེག་པར་གནས། །དེ་བཞིན་ཇི་བཞིན་སྒྲ་རུ་འཛིན། །ཤེས་རབ་ཕ་རོལ་ཕྱིན་པ་ལ། །ངེས་པར་འབྱུང་བའི་ཚུལ་གསུམ་པོ། །ཆོས་སྐུ་ངོ་བོ་ལ་སོགས་པ། ། མཁའ་དབྱངས་མཐའ་ཡས་རྣལ་འབྱོར་པ། །གནས་མེད་གནས་པར་སྦྱོར་བ་ཡིས། །འགྲོ་བའི་སྙིང་དུ་རྣམ་རོལ་པ། །ཞི་བ་གཅིག་ལ་གནས་པའི་མགོན། །འཁོར་བ་དང་ནི་གཅིག་ཤོས་སྤངས། །སྔགས་ལས་ཡང་དག་འབྱུང་བ་དེ། །མི་བསྐྱོད་ལ་སོགས་པར་བརྟགས་རྣམས། །དངོས་མེད་གནས་ལ་གནས་པས་ན། །སྒྲུབ་པ་པོ་རྣམས་གཟིགས་མི་འགྱུར། ། གསང་སྔགས་རྐྱེན་གྱི་སྦྱོར་བ་ཡིས། །དེ་ནི་རྫོགས་ལོངས་སྤྱོད་གཟིགས་འགྱུར། །བཅོམ་ལྡན་གསང་བ་གསུངས་པ་འདི། །དོན་དེ་འཚལ་བར་མ་གྱུར་པས། །རྣམ་རྟོག་དུ་མའི་ཀུན་རྟོག་ལས། །ཆོས་ཉིད་དེ་ཡིས་ཤེས་མི་འགྱུར། །ཇི་སྐད་གསུངས་པ་མི་ཤེས་པས། །ཕྱི་དུས་སྐྱེ་བོ་ལ་ལ་སྨྲ། །འཇིག་རྟེན་པ་རྣམས་དྲང་བྱའི་ཕྱིར། །གསང་བར་གྱུར་པ་བསྟན་དུ་གསོལ།། དེ་ནས་བཅོམ་ལྡན་སྣ་ཚོགས་པས། །ལག་ན་རྡོ་རྗེ་གྲགས་པ་ཆེ། །དགོངས་པའི་དོན་ནི་རྟོགས་གྱུར་པ། །བུ་ཁྱོད་ཤེས་རབ་ཆེན་པོ་ལེགས། །གང་ཞིག་ཤེས་པས་མ་འོངས་པའི། །སྐྱེ་བོ་རྣམ་པར་མི་རྟོག་འགྱུར། །ཚིག་གཅིག་ལ་ཡང་སྣ་ཚོགས་དོན། །ཡང་དག་བསྡུས་ནས་ཁྱོད་ཀྱིས་བཤད། །དེ་ནས་དམ་པ་བཅོམ་ལྡན་འདས། །བླ་མ་ཀུན་མཁྱེན་ཐམས་ཅད་རིག །
151a
༄#། །སྐྱེས་བུ་དམ་པ་དེ་དག་ལ། །སྤྱན་རས་ཀྱིས་ནི་འཚོ་བྱའི་ཕྱིར། །རྡོ་རྗེ་གསུམ་གྱི་གསང་བ་འདི། །དེ་བཞིན་གཤེགས་པ་ཀུན་གྱི་མཆོག་།སྐུ་གསུང་ཐུགས་ཀྱི་རྡོ་རྗེ་ཡི། །གསང་བ་ཡི་ནི་མཆོག་གི་གནས། །སྙིང་པོ་སྔགས་རྣམས་ཐམས་ཅད་ཀྱི། །བསྐུལ་བ་གཅིག་པུ་ཞེས་བྱ་བ། །དེ་བཞིན་གཤེགས་ཀུན་གསང་གཅིག་པུ། །མཆོག་ལས་མཆོག་ཏུ་གསུངས་གྱུར་པ། །སྐུ་གསུང་ཐུགས་ཀྱི་ཡང་དག་རྟོགས། །དམ་ཚིག་ལ་ནི་དམིགས་པ་དང ། །རྡོ་རྗེ་འཛིན་པའི་སྐུ་གསུང་ཐུགས། །དམ་ཚིག་ལ་ནི་དམིགས་པ་དང ། །ཆོས་འཛིན་པ་ཡི་སྐུ་གསུང་ཐུགས། །དམ་ཚིག་ལ་དམིགས་དེ་བཞིན་ནོ། །ཉིད་སྐུ་གསུང་ཐུགས་རྡོ་རྗེ་ལས། །ཚིག་ལམ་ངེས་པར་བརྗོད་པ་ནི། །དེ་ཉིད་སྔགས་སུ་ཡང་དག་བསྡུས། །སྣ་ཚོགས་གསུང་བ་གཟུགས་གཅིག་པུ། །ཡི་གེ་ཧཱུཾ་ནི་གཅིག་གསུངས་ལ། །དེ་ནས་ཡི་གེ་ཨོཾ་གསུངས་ཏེ། །དེ་བཞིན་མགོན་པོས་ཡི་གེ་ཨཱཿ ། །སཝཱ་ནི་དེ་བཞིན་བཞི་པ་ཡིན། །ཧཱ་ཡང་འདོད་ལྷར་གྱུར་པ་སྟེ། །དེ་ནི་འདི་ལྟར་སངས་རྒྱས་ལྔ། །ཧཱུཾ་ཨོཾ་ཨཱཿ ་སཝཱ་དེ་བཞིན་ཧཱ། །འདི་ནི་གསུངས་པ་ཙམ་གྱིས་ནི། །སངས་རྒྱས་སྲས་དང་བཅས་པ་ཀུན། །རབ་ཏུ་འདར་ཞིང་བརྒྱལ་བར་འགྱུར། །དེ་རྣམས་གཉིས་མེད་སྦྱོར་ལ་གནས། །རྡོ་རྗེ་སེམས་དཔའ་རྗེས་སུ་དྲན། །ཞི་བའི་སྦྱོར་བར་ཆོས་གཅིག་པའི། །རྣམ་པར་མི་རྟོག་
151b
ཆོས་གཅིག་སྐྱེས། །དེ་ནས་བཅོམ་ལྡན་འདས་དེ་ཡང ། །དེ་བཞིན་གཤེགས་ཀུན་བདག་པོ་ཡིས། །དེ་ཡི་བྱིན་རླབས་སྦྱོར་དོན་དུ། །དམ་ཚིག་འདི་དག་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །དཀྱིལ་འཁོར་བཀོད་པ་ཞེས་བྱ་བ། །རེ་རེའང་གསུམ་གྱི་སྦྱོར་བ་ཡིས། །སྒོམ་པའི་སྦྱོར་བ་བསྒོམ་པར་བྱ། །བྱེ་བྲག་གསུམ་པོ་གཅིག་བརྟགས་པའང་།། བཀོད་པ་མི་གསལ་བ་ཉིད་དོ། །ཟླ་བའི་དབུས་གནས་ཡི་གེ་ཧཱུཾ། །རང་གི་གཟུགས་གཅིག་རབ་ཏུ་བརྟག་།རྡོ་རྗེ་འོད་ཟེར་རབ་འབར་བ། །རྣམ་པར་འཕྲོ་བ་བསམ་པར་བྱ། །སངས་རྒྱས་རྣམས་ཀྱི་སྐུ་གསུངས་ཐུགས། །སྙིང་ལ་དེ་ཡིས་རྣམ་བསྒོམས་ནས། །དཔལ་ལྡན་དེ་ཉིད་སྐད་ཅིག་དེར། །རྡོ་རྗེ་གསུམ་གྱི་རྡོ་རྗེ་འཛིན། །རྡོ་རྗེ་སེམས་དཔའ་དབང་ཆེན་གཙོ། །འདི་ནི་ཀུན་མཆོག་ཆེན་པོར་སྐྱེ། །རང་གི་སྔགས་ཀྱིས་བསྐྱེད་བྱ་བ། །སྔགས་ཀྱི་ཆོ་ག་དམ་པའོ། །སྙིང་པོ་རང་གི་རྡོ་རྗེ་སྔགས། །རྡོ་རྗེ་བསྡུས་པ་ཞས་བཤད་དོ། །རང་སྔགས་ཚུལ་ལས་བྱུང་བ་འོ། །སྐྱེས་བུའི་གཟུགས་སུ་བསྒོམ་པར་བྱ། །སྦྱོར་བ་བཞི་པོ་སྦྱོར་གཅིག་པུས། །གནས་བཞི་དག་ཏུ་དེ་དགོད་དོ། །ཁ་དོག་གསུམ་པོ་ཞལ་གསུམ་ལྟའི། །དེ་ཉིད་གསུམ་གཅིག་རྣམ་བསྒོམ་ཞེས།། བཅོམ་ལྡན་འདས་མཆོག་ནམ་མཁའ་ནི། །རྡོ་རྗེ་དམ་ཚིག་གཙོ་བོས་གསུངས། །དེ་ནས་དེ་བཞིན་གཤེགས་པ་མཆོག་།ཞི་བའི་བདག་ཉིད་ཐུབ་པ་ཆེ། །གཙོ་ལ་ཕྱག་ན་རྡོ་རྗེ་ཡིས། །
152a
༄#། །གསང་བ་འདི་ནི་སླར་ཞུས་པ། །ཧཱུཾ་ཨོཾ་ཨཱཿ དང་སཝཱཧཱ་ཞེས། །དེ་ནས་འདི་ནི་གསུངས་གྱུར་བས། །སངས་རྒྱས་སྲས་དང་བཅས་པ་ཀུན། །དེ་ནས་རབ་འདར་བརྒྱལ་གྱུར་ཅིང ། །རྡོ་རྗེ་སེམས་དཔའ་རྗེས་དྲན་པ། །ཐུབ་ཆེན་དེ་འདིར་ཇི་ལྟ་བུར། །མགོན་པོ་དེ་ནི་ཕྱི་དུས་ན། །ཇི་སྐད་གསུངས་པ་མི་རྟོགས་པ། །གཅིག་པུ་མཁའ་མཉམ་སངས་རྒྱས་དང ། །བྱང་ཆུབ་སེམས་དཔའ་མཐུ་ཆེན་རྣམས། །རབ་ཏུ་འདར་ཞིང་བརྒྱལ་འགྱུར་ཞེས། །བྱིས་པ་རྣམས་ཀྱིས་མི་རྟོགས་སོ། །ལན་བརྒྱ་སྟོང་དང་བྱེ་བ་ཡི། །གྲངས་དག་ཏུ་ནི་སྟོན་མཛད་ཅིང ། །སྟོན་པ་སྣ་ཚོགས་སྟོན་མཛད་ཀྱང ། །འདར་ཞིང་བརྒྱལ་བར་དེ་མ་གྱུར། །མ་འོངས་དུས་ནའང་འབྱུང་འགྱུར་བ། །མི་ ་\?\་མཁས་པ་ཡི་ང་རྒྱལ་ཅན། །བླ་མའི་ལུང་ནི་བླངས་ནས་སུ། །རྟགས་ནི་རང་ཉིད་འཛིན་པར་བྱེད། །དེ་ནི་སྔགས་དོན་གསུངས་པ་ཡི། །མཚན་ཉིད་གསང་འདི་མི་ཤེས་པར། །སྔགས་དོན་དེ་ཉིད་མཁས་པ་ཡིས། །གཞན་རྣམས་ལ་ནི་མི་སྙན་སྒྲོག་།འཁྲུལ་བ་ཅུང་ཟད་ཙམ་མཐོར་ན། །བཞད་གད་དག་ནི་བྱེད་པར་འགྱུར། །རེག་ན་དུག་དང་མཚུངས་པ་ཡི། །མི་དེ་ཞི་བར་མི་འགྱུར་རོ། །གང་ཞིག་ཡིད་ནི་རིན་ཆེན་འདྲའི། །འགྲོ་ལ་ཕན་པའི་སྔགས་པ་རྣམས། །འདི་ནི་མ་འོངས་དུས་སུ་ཡང ། །དངོས་གྲུབ་མཆོག་ནི་ཐོབ་པར་འགྱུར། །དེ་རྣམས་ཡང་དག་བསྡུ་བའི་ཕྱིར། །སྐད་ཅིག་རྗེས་གསུང་གྲུབ་དོན་དུ། །སྦྱོར་
152b
བར་དགོངས་པའི་བསམ་པ་ཅན། །བཅོམ་ལྡན་འདི་ནི་བཤད་དུ་གསོལ། །དེ་ནས་སྟོན་པ་བཅོམ་ལྡན་འདས། །འགྲོ་ཕན་ཕྱག་ན་རྡོ་རྗེ་ལ། །དེ་ལྟར་སྦྱར་བ་ཡང་དག་སྦྱོར། །སྒོམ་པའི་དངོས་པོ་རྟོགས་བྱེད་པ། །དབང་པོ་ཉི་མ་ཐུབ་པ་ཉིད། །གང་ཞིག་ཕྱོགས་བཅུར་གནས་པ་རྣམས། །སྲས་བཅས་སངས་རྒྱས་ཞེས་བྱ་བའི། །དེ་བཞིན་གཤེགས་པ་ཐམས་ཅད་གྱུར། །ཕུང་པོ་ལ་སོགས་གྲངས་མཉམ་པའི། །ལུས་ལས་སྐྱེས་ཏེ་ཡོད་པ་འདི། །སྟོང་པའི་རྐྱེན་དུ་སྦྱོར་བ་ལས། །སངས་རྒྱས་སྲས་དང་བཅས་གྱུར་འདོད། །སྔགས་དེ་སྔགས་པ་སངས་རྒྱས་དེ། །བདག་ཉིད་དེ་སྲས་ཡང་དག་སྦྱོར། །ཞི་སོགས་མཉམ་པའི་སྦྱོར་བ་ལས། །ཞི་བའི་བདེ་བ་དེ་ནས་བརྩམ། །བདག་ཉིད་རང་བཞིན་གྱིས་དག་ཅིང ། །རང་བཞིན་དྲི་མ་མེད་བྱས་ལ། །དལ་དང་མྱུར་དང་གནས་པ་ཡི། །སྣ་ཚོགས་དེ་གཅིག་དག་ལ་གཞུག་།ཡིད་དམན་རིམ་ལ་སོགས་པས་ཀྱང ། །སྦྱོར་བ་དེ་ཉིད་དག་ལ་གནས། །དེ་ནས་དབང་པོ་མེད་གྱུར་པ། །གང་ཚེ་ཞི་བའི་བདེ་གཅིག་པུ། །རང་བཞིན་དག་པའི་སྦྱོར་བ་སྟེ། །དེ་ཡི་ཆོས་ནི་ལྟ་བ་པོ། །དེ་ནས་རྫོགས་ལོངས་སྤྱོད་པའི་སྔགས། །སངས་རྒྱས་ཐམས་ཅད་འཇམ་ལས་བྱུང ། །གང་ཕྱིར་རང་ནི་ཟློ་གྱུར་པ། །ཡི་གེ་ཧཱུཾ་གི་གསང་སྔགས་ལྔ། །དེ་ཚེ་སྙིང་ལས་རབ་འདར་ཅིང ། །དབང་པོ་ཐམས་ཅད་བརྒྱལ་བར་འགྱུར། །གང་ཡང་ཕུང་སོགས་ཡན་ལག་ནི། །སྲས་བཅས་སངས་རྒྱས་ཐམས་ཅད་དེ། །དེ་ཉིད་ཀྱི་ནི་
153a
༄#། །གྲངས་མཉམ་པའི། །རྣལ་འབྱོར་བ་ཡི་ལུས་རབ་འདར། །ཉེ་བར་མཚོན་སོགས་ཚིག་རྣམས་ནི། །ཕུང་པོ་ལ་སོགས་བཤད་པ་གང ། །སངས་རྒྱས་སྲས་བཅས་པར་གྱུར་ཏེ། །དེ་ནི་བརྒྱལ་ཞིང་འདར་བར་འགྱུར། །དེ་གཉིས་ལ་ནི་སྙོམས་འཇུག་བ། །སངས་རྒྱས་ཐམས་ཅད་སྲས་དང་བཅས། །རྡོ་རྗེ་སེམས་དཔའ་ཉིད་དྲན་ཏེ། །དེ་སྔགས་བདག་ཉིད་དངོས་ལས་བྱུང ། །དེ་འདིར་མཆོག་ཏུ་བཤད་པ་ཡིན། །རྡོ་རྗེ་གསང་བ་རྨད་བྱུང་པ། །ཕྲ་མོའི་སྙིང་གང་དབུས་གནས་པར། །དཀྱིལ་འཁོར་རྣམ་པར་བསམ་པ་འོ། །དེ་ཡི་དབུས་གནས་ཞི་བ་ཡི། །གོ་འཕང་མཆོག་ནི་བསམ་པར་བྱ། །དེ་ཧཱུཾ་ཞེས་བྱའི་འོད་པོ་ཆེ། །དེ་ཡོངས་གྱུར་པའི་རྡོ་རྗེ་ནི། །འདི་ནི་མཆོག་གྱུར་རྩེ་ལྔ་པ། །རྣལ་འབྱོར་པ་ཡིས་རྟག་ཏུ་བསྒོམ། །རྡོ་རྗེ་ལྕགས་ཀྱུའི་སྦྱོར་བ་ཡིས། །རྡོ་རྗེ་གསུམ་ནི་བསམ་པར་བྱ། །དེ་ཡི་སྙིང་གར་བསྡམས་ནས་ནི། །ལྷ་རྣམས་རབ་ཏུ་བསྐུལ་བར་བྱ། །འདི་ནི་སངས་རྒྱས་ཐམས་ཅད་ཀྱི། ། རྡོ་རྗེ་ཐམས་ཅད་རབ་སྒྲུབ་པའོ། །འཁོར་ལོ་པདྨའི་རིགས་སོགས་པའང ། །རོལ་མོ་འདི་ནི་དམ་པ་སྟེ། །རྡོ་རྗེ་ལྕགས་ཀྱུ་རྣམ་བསྒོམས་ནས། །སྙིང་ག་རུ་ནི་བསྐུལ་བར་འགྱུར། །རྡོ་རྗེ་ཡི་ནི་ཚུལ་མཆོག་འདི། །ཞག་བདུན་པར་དུ་བྱས་ནས་ནི། །ཡེ་ཤེས་རྡོ་རྗེ་ཅན་གྱི་གསང ། །རྡོ་རྗེ་གསུམ་པོ་ཡང་དག་སྒྲུབ། །ཕུང་པོ་ལ་སོགས་སངས་རྒྱས་གང ། །དེ་ནི་དངོས་པོ་མེད་
153b
ལྟ་བ། །དེ་ཉིད་མཆོག་གི་གསང་སྔགས་ཀྱིས། །སྐྲག་པ་རྣམ་སྨིན་མཐོང་བ་ལ། །སྐྲག་བ་མི་རྣམས་འདི་དག་སྟེ། །གསང་སྔགས་གཉིས་མེད་སྦྱོར་གཅིག་བྱུང ། །མཐོང་བས་སྐྲག་སྟེ་མཆོག་སྟེར་ཅིང ། །འདི་དག་འདི་ཉིད་བརྟགས་པ་ཡིན། །ཞི་བ་གཅིག་པུའི་སྦྱོར་བ་ལས། །སྔགས་ལུས་རྫོགས་པ་ཉིད་གྱུར་ནས། །ཡིད་ལ་མགུ་ཞིང་དགའ་གྱུར་པའི། །དངོས་གྲུབ་རྒྱ་ཆེར་སྟེར་བར་འགྱུར། །ཕུང་བོ་ལ་བཏགས་སངས་རྒྱས་དང ། །དེ་བཞིན་བྱང་ཆུབ་སེམས་དཔའ་རྣམས། །སྔགས་ཀྱིས་སྦྱོར་བའི་དོན་སྒྲུབ་པས། །རྨོངས་པས་འདའ་བ་བྱས་ནས་ནི། །དེ་ཡི་སྲོག་ནི་དེར་ཟད་འགྱུར། །ཞི་བ་ཉིད་ཀྱི་སྦྱོར་གཅིག་ལས། །འདི་ནི་འཇིག་རྟེན་འདས་པ་མཆོག་།དེ་ལས་ལྡོག་པ་འཇིག་རྟེན་པའོ། །དེ་ནས་བདག་པོ་བཅོམ་ལྡན་འདས། །འཇིག་རྟེན་གསུམ་གཙོ་སྟོན་པ་པོ། །འཇིག་རྟེན་གསུམ་མཆོག་རྡོ་རྗེ་གཙོས། །གསུང་ནི་འདི་སྐད་བཀའ་སྩལ་ཏོ། །གང་ཞིག་སྔགས་ཀྱི་སྐྱེས་བུར་བཤད། །རྡོ་རྗེ་གསུམ་གྱི་ཡེ་ཤེས་གཟུགས། ། དེ་ནི་དབང་པོ་གཉིས་སྦྱོར་བའི། །གཅིག་པར་སྒོམ་པ་རྟག་ཏུ་བྱེད། །བདག་དམིགས་སེམས་ཅན་ཡོད་མིན་པའི། །སྔགས་ཀྱི་དབང་པོ་རྣམ་སྒོམ་པ། །དབང་པོ་གཉིས་སྦྱོར་བཟང་པོ་སྟེ། ། དངོས་བོ་ཐམས་ཅད་རྣམ་བརྟགས་པའོ། །འདི་ནི་སངས་རྒྱས་ཐམས་ཅད་ཀྱི། །སྔགས་ཀྱི་དམ་ཚིག་མཆོག་སྒོམ་པའོ། །རང་གཟུགས་རྡོ་རྗེ་ཡང་དག་སྦྱོར། །རིག་མ་དབང་ཕྱུག་བདག་
154a
༄#། །ཀྱང་བསྒོམ། །གཉིས་མེད་གཉིས་སུ་མེད་ཆགས་པ། །ལྟ་བ་དམ་ཚིག་དཀྱིལ་འཁོར་རོ། །གསང་བ་ཞེས་བྱ་དེར་སྦྱར་བ། །དེ་ཉིད་མཉམ་པའི་བདག་ཉིད་དོ།། དེ་ནས་སྟོན་པ་བཅོམ་ལྡན་འདས། །ཐམས་ཅད་དབང་བསྐུར་དམ་པ་ནི། །མི་ཕྱེད་རྡོ་རྗེ་གསུམ་གྲུབ་པ། །གསང་བའི་དགོངས་པ་བཀའ་སྩལ་ཏོ། །ནམ་མཁའ་མཐའ་ཡས་སྦྱོར་བ་ཡིས། །ཕུང་པོ་བདག་ཉིད་མི་དམིགས་པ། །ཆོས་ཀྱི་དབྱིངས་ལ་སོགས་པའི་རིམ། །བུད་མེད་དེ་ནི་རྒྱ་ཆེན་འགྱུར། །རབ་ཏུ་སྦྱོར་བ་འདི་ཡིས་ནི། །འགྲོ་བའི་བུད་མེད་ཅེས་བྱ་བ། ། གསང་སྔགས་དེ་ཉིད་དོན་གསང་ཉིད། །དེ་ནི་གསང་བར་ཉེ་བར་སྤྱོད། །དེར་ནི་ཡིད་འོང་སངས་རྒྱས་རྣམས། །བྱེ་བ་གྲངས་མེད་རྡོ་རྗེ་འཛིན། །སྔགས་རིག་དམ་པ་སྤྲོ་འོ་ཞེས། ། དེར་ནི་བཅོམ་ལྡན་གཙོ་བོས་གསུངས། །བྱང་ཆུབ་སེམས་དཔའ་དམ་ཚིག་ནི། །སྟོན་པ་འདིར་ནི་བླ་མ་ཆེར། །འཇིག་རྟེན་པ་ལ་འདིར་བཤད་དེ། །འཇིག་རྟེན་འདས་པ་ལྡོག་པའོ། ། ནམ་མཁའ་ལྟ་བུའི་བྱང་ཆུབ་ནི། །འདི་ཡིས་ཤིན་ཏུ་འཐོབ་པར་འགྱུར། །བྱང་ཆུབ་སེམས་ཀྱི་ཡོན་ཏན་མཚོ། །རྡོ་རྗེ་སེམས་དཔའ་མཆོག་དེས་འཐོབ། །དགོངས་པ་ལུང་བསྟན་གསང་བ་ལ། །གང་ཞིག་སེམས་ནི་དད་གྱུར་པ། །གསང་བ་འབད་དེ་དེ་ཡང་དག་བསྲུང ། །དེ་ནི་རྟག་ཏུ་ལེགས་པར་བྱེད། །རྡོ་རྗེ་གསུམ་གྱི་གསང་བ་ལས། །དེ་བཞིན་གཤེགས་པ་
154b
ཀུན་གྱི་ཡང ། །དེ་ཉིད་བསྐུལ་བ་ཞེས་བྱ་བ། །ལེའུ་བཅུ་པ་ཡིན་པར་བཤད།། །།དེ་ནས་སྟོན་པ་བཅོམ་ལྡན་འདས། །རྡོ་རྗེ་གསུམ་མཆོག་མཆོག་གསང་བ། །དེ་བཞིན་གཤེགས་པ་ཀུན་མཆོག་གཅིག། །ཉི་ཤུ་རྩ་ལྔ་མཆོག་ཅེས་བྱའི། །ཏིང་ངེ་འཛིན་ལ་སྙོམས་ཞུགས་ནས། །དེ་བཞིན་གཤེགས་ཀུན་རྡོ་རྗེ་ཡིས། །སྔགས་རིག་སྐྱེས་བུ་ཞེས་བྱ་བའི། ། ལེ་འུ་འདི་ནི་བཀའ་སྩལ་ཏོ། །སྔགས་མཆོག་དེ་ནི་ཕྱག་རྒྱ་ཆེ། །རྡོ་རྗེ་གསུམ་གྱི་ཡེ་ཤེས་བསྒོམ། །རྟོགས་དང་བྲི་བ་འཐོབ་པའི་ཕྱིར། །རྡོ་རྗེ་ཡེ་ཤེས་དག་གིས་ཀྱང ། །ཚངས་པ་ལ་སོགས་ཡང་དག་བཤད། །ཡེ་ཤེས་སྙིང་པོ་དམ་པ་སྟེ། །རྡོ་རྗེ་གསུམ་སོགས་བཤད་གྱུར་པ། །སྐུ་ཡི་རྡོ་རྗེ་འཐོབ་བྱེད་པའོ། ། དང་ཟུང་ན་གསུང་རྡོ་རྗེ། །བྱང་ཆུབ་བདག་མེད་འཐོབ་བྱད་པའོ། །ཧཱུཾ་ནི་རྡོ་རྗེ་གསུམ་མཐའ་ཉིད། །སྐུ་གསུང་ཐུགས་ནི་འཐོབ་བྱེད་པའོ། །དེ་ནི་འཇུག་པ་སོགས་གནས་ཉིད་དོང ། །ལྡང་བ་དག་ཏུ་རབ་ཏུ་བཤད། །ཉི་ཤུ་ལྔ་སོགས་མིང་ཅན་གྱི། །སྐྱེས་བུའི་གཟུགས་སུ་འདི་འགྱུར་རོ། །དེ་བས་རེ་རེའང་གསུམ་ཉིད་དེ། །རྡོ་རྗེ་གསང་སྔགས་ཉིད་དུ་གྱུར། །བརྗོད་མེད་ས་བོན་བརྒྱད་པ་ལས། །དེ་ནི་ནམ་མཁའ་ལས་བརྒྱལ་འགྱུར།། བརྒྱ་ཕྱེད་རླུང་ནི་གཅིག་བུ་ལ། །དེ་ལས་ངེས་བར་ཉི་ཤུ་ལྔ། །སྐྱེས་བུ་ཉིད་དུ་བྱུང་བ་ན། །མགྲིན་བཅུ་ཞེས་བྱའི་མིང་ཅན་དང ། །སྒྲ་སྒྲོག་གསོད་པའི་དགའ་བྱེད་འགྱུར། །དེ་ནས་ཚངས་པ་
155a
༄#། །གཅིག་ཉིད་གྱུར། །ཚངས་པ་ཁྱབ་འཇུག་དྲག་པོ་སྟེ། །འཇུག་བ་ལ་སོགས་རིམ་དུ་བཤད། །འདི་དག་བསྙེངས་མེད་དེ་གཅིག་པུ། །དེ་ནི་ཞི་བ་དངོས་མེད་ཉིད།། དེ་ལས་ཀྱང་ནི་ཡང་དག་འབྱུང ། །ལོངས་སྤྱོད་རྫོགས་སྐུ་དམ་པའོ། །དེ་ནས་སྔགས་གཅིག་སྤྲུལ་པ་ལས། །འགྲོ་བའི་དོན་གྱི་བྱ་བར་འགྱུར། །མཚམས་དང་སྐྱེ་མཆེད་ནོར་ལྷ་འོ། །ཟླ་བ་ཟུང་གཅིག་རིག་བྱེད་དེ། །དེ་ལ་སོགས་པའི་གྲངས་གྱུར་རྣམས། །དེ་ནི་རིག་པའི་སྐྱེས་བུར་གནས། །འདི་རྣམས་ལས་གཅིག་བཟུང་ནས་ནི། །སངས་རྒྱས་རོལ་མོ་བསྟན་པར་བྱ། །རྡོ་རྗེ་སེམས་དཔའ་དེ་ཉིད་འདི། །ནམ་མཁའ་རྡོ་རྗེ་དབུས་སུ་བསམ། །དཀྱིལ་འཁོར་བརྒྱན་པ་ཞེས་བཤད་པ། །ཡི་གེ་བྷྲཱུཾ་ནི་དེས་བསམ་མོ། །རྡོ་རྗེ་སྤྲིན་ནི་སྤྲོ་བསྐྱེད་པའི། །དེ་བཞིན་གཤེགས་པ་དྲུག་གི་སྐུ། །དེ་དབུས་གནས་བའི་རྣལ་འབྱོར་པར། །སྒོམ་པའི་བདག་ཉིད་ཅན་གྱིས་བསྒོམ། །སྔགས་རྣམས་ཀུན་གྱི་གཙུག་ཏོར་ནི།། སྔགས་ཀྱི་སྐྱེས་བུ་གསང་བ་པ། །གཅིག་པུ་ཉིད་ནི་བདག་པོར་འགྱུར། །སྔགས་སྤྱོད་དོན་ནི་སྒྲུབ་པ་པོ། །ཆོས་ལ་འཁོར་ལོ་གཅིག་འཁོར་ལོ་མཆོག་།རྒྱལ་དང་རྨད་བྱུང་ཆེ་གཙུག་ཏོར། །ལུས་དང་རྣམ་པར་རྒྱལ་དེ་བཞིན། །བྱ་བ་མཆོག་ཏུ་ཡང་དག་བཤད། །སྦྱོར་དང་བྱ་བ་གཉིས་མེད་བཞིན། །སྦྱོར་བ་འབའ་ཞིག་ཉིད་ལ་འདི། །བྷྲཱུཾ་ནི་གཙུག་ཏོར་
155b
ཆེན་པོར་བསྟན། །ཡེ་ཤེས་རྡོ་རྗེ་སྙིང་པོ་འདི། །དུས་སྦྱོར་གཅིག་གི་མིང་ཅན་ནོ། །ནམ་མཁའི་ཁམས་དང་མཉམ་ཉིད་ལྡན། །སྔགས་ཀྱི་སྐྱེས་བུ་དངོས་གྲུབ་སྩོལ། །རྡོ་རྗེའི་དཀྱིལ་འཁོར་དབུས་གནས་པར། །ོཾ་ཞེས་བྱ་བ་དེ་རུ་བསྒོམ། །ཕྭ་མོའི་དཀྱིལ་འཁོར་དབུས་གནས་པར། །ཡི་གེ་ཨཱཿ ནི་རྣམ་པར་བསྒོམ། །ཆོས་ཀྱི་དཀྱིལ་འཁོར་སྦྱོར་བ་ལའང ། །ཡི་གེ་ཧཱུཾ་ནི་དེ་རུ་བསྒོམ། །ཡི་གེ་བྲུཾ་ནི་གནས་མིང་ཅན། །རྡོ་རྗེ་གསུམ་འབྱུང་བསྒོམ་པར་བྱ། །གསང་བའི་དམ་ཚིག་འདི་ཉིད་དེ། །རྡོ་རྗེ་གསུམ་འབྱུང་བཀའ་སྩལ་ཏོ། །སྙིང་པོ་དུས་གསུམ་སངས་རྒྱས་ཀྱི། །རྡོ་རྗེ་གསུམ་ནི་མཉེས་བྱེད་མཆོག་།སྐུ་དང་གསུང་ཐུགས་ཐོག་མ་མཐའ། །ོཾ་ཨཱཿ ་ཧཱུཾ་གི་གྲངས་དང་མཉམ། །སངས་རྒྱས་སྐུ་མཆོག་གསུང་གི་ལམ། །ཐུགས་ཀྱི་ཡེ་ཤེས་འཇིངས་སུ་བྱ། །རང་ཉིད་འདོན་པ་ཉིད་དུ་ནི། །རེ་རེ་ཞིང་ནི་ཡང་དག་བཤད། །སྔགས་ཀྱི་སྐྱེས་བུའི་སྦྱོར་བ་ཡང ། །རྒྱུ་ཡི་བདག་ཉིད་མིང་ཅན་ཡིན། །བྱང་ཆུབ་ཚུལ་མཆོག་འདི་ཡིན་ཏེ། །སངས་རྒྱས་བྱང་ཆུབ་རབ་སྒྲུབ་པའོ། །རྡོ་རྗེ་ཡེ་ཤེས་སྤྲུལ་བ་སྟེ། །སངས་རྒྱས་འབྲས་བུ་ཐོབ་བྱེད་པའོ། །སྔགས་ཀྱི་རིག་པ་ཞེས་བསྒྲགས་པ། །འདི་ནི་སངས་རྒྱས་སྐྱེས་བུ་ཡིན། །རྡོ་རྗེ་གསུམ་མཉམ་མི་ཕྱེད་པ། །རྫོགས་པ་ལ་སོགས་སྒོམ་པ་ཡི། །དེ་བཞིན་གཤེགས་ཀུན་རྡོ་རྗེ་ནི། །གསུམ་པོ་ཡེ་ཤེས་རྡོ་རྗེ་སྩོལ། །བྱིན་རླབས་དཔལ་ཆེན་ཞེས་བྱ་བའི།
156a
༄#། །དམ་ཚིག་ཏིང་འཛིན་གྱུར་པ་ཡིན། །རྣམ་པར་དབེན་དང་ཅི་རིགས་པའི། །སྟན་དག་ལ་ནི་སྦྱོར་བ་བཞི། །རིག་པའི་སྐྱེས་བུར་ཡང་དག་སྦྱོར། །བརྟུལ་ཞུགས་ཅན་གྱིས་ཀུན་ཏུ་བརྩམ། །ཐབས་དང་ཤེས་རབ་ཉི་ཟླ་ཕྱེད། །ཐུན་གཅིག་ཏུ་ནི་རབ་ཏུ་བརྟག། །དེ་ཡི་ཕྱེད་ཉིད་ཟླ་ཕྱེད་ཀྱིས། །རྡོ་རྗེ་གསུམ་ནི་ངེས་པར་འགྲུབ། །འཇིག་རྟེན་འདས་པའི་རང་བཞིན་ཉིད། །འཇིག་རྟེན་པའི་ཡང་ཕྱིན་ཅི་ལོག་།རྡོ་རྗེ་གསུམ་སྦྱོར་སྩོལ་དངོས་གྲུབ། །འགྲུབ་པར་འགྱུར་བ་ཐེ་ཚོམ་མེད། །ནམ་མཁའི་རྡོ་རྗེ་དབུས་གནས་པར། །ཕྲ་མོའི་དཀྱིལ་འཁོར་བསམ་པར་བྱ། །རང་གི་སྔགས་ཀྱི་དམ་ཚིག་དུས། །བསྐྱེད་པ་ཡི་གེ་ཨོཾ་བསྒོམ་བྱ། །སྦྱོར་བ་བཞི་ཡི་གཏན་ཚིགས་གང ། །སྙིང་པོར་ཡོངས་སུ་བརྟགས་པ་ཡིན།། སྣ་རྩེ་དང་ནི་རྩ་བ་ཉིད། །སྤྱི་བོ་མཐའ་ནི་དགའ་ལྡན་གནས། །གཅིག་དང་གསུམ་གྱི་དངོས་པོར་འགྱུར། །དག་པའི་གནས་ཀྱི་གྲོང་ཁྱེར་བ། །ཕྱེད་པ་གསུམ་གྱི་མིང་ཅན་ནི། །རིགས་ཀྱི་དབྱེ་བ་རྡོ་རྗེ་གསུམ། །སྣ་ཡི་རྩེ་མོ་སྦྱོར་བ་ཡིས། །རྡོ་རྗེ་གསུམ་སྦྱོར་བརྟུལ་ཞུགས་ཅན། །མཱ་མ་ཀཱི་དང་གོས་དཀར་མོ། །སྒྲོལ་མ་གཏོགས་པ་སངས་རྒྱས་སྤྱན། །འོད་ཟེར་ལྔ་ཡི་སྤྲིན་ཆེན་པོ། །རྣམ་པར་སྣང་མཛད་གཉིས་མེད་གནས། །རྡོ་རྗེ་རྣམ་སྣང་དེ་ལས་ནི། །དངོས་གྲུབ་རྒྱ་ཆེན་སྩོལ་བར་འགྱུར། །སངས་རྒྱས་སྐུ་ཡི་འོད་འདྲ་བ། །སྐད་ཅིག་དེར་
156b
འགྲུབ་རྣལ་འབྱོར་པ། །ཡེ་ཤེས་ལྔ་པོ་བསྟེན་ནས་ནི། །རྡོ་རྗེ་བསྐལ་པ་གསུམ་དུ་གནས། །ཡེ་ཤེས་འདས་དང་མ་འོངས་དང ། །ད་ལྟར་བྱུང་བ་རྡོ་རྗེ་གསུམ། །དེ་འདིར་བསྐལ་བར་བརྟགས་གྱུར་པ། །གྲངས་མེད་ཅེས་བྱ་དེ་ཉིད་དོ། །སྐུ་ཡི་གསང་བ་དེ་ཉིད་འདི། །འཇིག་རྟེན་འདས་པའི་རིམ་པར་གསུངས། །ཞི་བའི་བདེ་ལས་ཤེས་བྱ་བ། །རང་མྱོང་སྦྱོར་བ་གཅིག་ལས་དེ། །སྐུ་ཡི་གསང་བ་མཆོག་འདི་ནི། །དེ་བཞིན་གཤེགས་པ་ཀུན་གྱིས་གསུངས། །རྡོ་རྗེ་འོད་ཟེར་བཀོད་པ་ཡིས། །ཏིང་འཛིན་ཡང་དག་བཀའ་སྩལ་ཏོ། ། དང་ཨུ་ནི་ལྐོག་མའི་དབུས། །རྐན་གྱི་སྟེང་གི་མིང་ཅན་ནོ། །ི་དང་ཙ་ནི་ལག་གཡོན་ཉིད། །ུ་དང་མུ་ནི་གཡས་པར་བརྟག་།རི་ཛུ་འདི་ནི་གསང་བར་དགོད། །ལི་ཏི་རྐང་པ་གཅིག་ཤོས་ལ། །དཀྱིལ་འཁོར་གཅིག་ནི་དེ་ཉིད་དོ། །དཀྱིལ་འཁོར་ལྔ་ལས་རྒྱལ་གྱུར་པ། །ཧ་ནི་ལུས་སྐྱེས་གཙུག་ཏོར་དང ། །གཅོད་ནི་གསུམ་པོ་གཅོད་པ་ཅན། །ཡོན་ཏན་བཞི་ཡི་བཞི་པོ་དེ། །ལྔ་པོའི་ལྔ་པར་དེ་འགྱུར་རོ། །ནམ་མཁའི་རྡོ་རྗེ་གཅིག་ཕྱེད་སྦྱོར། །དེ་ནི་འོད་ཟེར་ལྔར་འགྱུར་རོ། །རིག་པ་ཆེན་པོ་དེ་ཉིད་འདི། །ཆ་ཞེས་བྱ་བར་དེ་ཡོངས་བསྒྲགས། །དུས་ཅན་བདག་ཉིད་སྦྱོར་དབང་པོ། །དེ་ཡི་རང་སྦྱོར་གཟུགས་ཅན་གཅིག་། ནི་ཐབས་འགྱུར་སྦྱོར་བ་ནི། །དབང་པོ་གཉིས་པོ་གཅིག་ཏུ་འོ། །ནམ་མཁའི་རྡོ་རྗེ་དབུས་གནས་པར། །ཆོས་ཀྱི་དཀྱིལ་འཁོར་
157a
༄#། །མཆོག་བསམ་པ། །རང་སྔགས་སྐྱེས་བུ་བསམས་ནས་ནི། །ཱཿ ་ནི་ངག་གི་ལམ་དུ་བཞག་།ཁ་དོག་ལྔ་ཡིས་ཀུན་ནས་ནི། །བརྒྱན་པའི་རྡོ་རྗེ་ཆེན་པོ་དག། འཇིག་རྟེན་དབང་ཕྱུག་མཆོག་སྒོམ་པས། །དམ་ཚིག་ཡེ་ཤེས་བསྒོམ་པར་བྱ། །གསུང་གི་དམ་ཚིག་སྤྲོས་པར་བཤད། །ཁྱབ་བདག་མི་ཟད་རྟག་པ་སྟེ། །ཐོག་མཐའ་མེད་པའི་མཐར་ཐུག་པ། །ཞི་བ་མྱ་ངན་འདས་ཞེས་བྱ། །ཆོས་ཀྱི་གསུང་ལས་རྣལ་འབྱོར་དབང ། །རྡོ་རྗེ་ཆོས་དང་འདྲ་བར་འགྱུར། །ཡེ་ཤེས་ལྔ་ལྡན་བསྟེན་ན་ནི། །རྡོ་རྗེ་གསུམ་གྱིས་བསྐལ་བར་གནས། །གསུང་གི་གསང་བ་འདི་ཉིད་ནི། །དེ་བཞིན་གཤེགས་པ་ཀུན་གྱིས་གསུངས། །དམ་ཚིག་འབྱུང་བ་ཞེས་བྱ་བ། །ཏིང་ངེ་འཛིན་དུ་ཡོངས་སུ་བསྒྲགས། །ནམ་མཁའ་རྡོ་རྗེ་དབུས་གནས་མཆོག་།རྡོ་རྗེའི་དཀྱིལ་འཁོར་དམ་པ་ནི། །དེར་ནི་རང་སྔགས་སྐྱེས་བུ་དག་།ཧཱུཾ་ནི་སེམས་ལ་གནས་རྫོགས་བྱ། །དམ་ཚིག་ཆེན་པོ་དེ་ཉིད་ཅན། །ཁ་དོག་རྣམ་ལྔ་བསྒོམ་པར་བྱ། །རྡོ་རྗེ་ཀུན་དང་རྒྱལ་བའི་གནས། །ཡེ་ཤེས་རྡོ་རྗེ་དག་གིས་བྱ། །སྟོན་པ་རྡོ་རྗེའི་ཐུགས་འདྲ་བ། །ཡང་དག་ཡེ་ཤེས་ཡོན་ཏན་མཚོ། །ཡེ་ཤེས་ལྔ་ལྡན་བསྟེན་ན་ནི།། རྡོ་རྗེ་བསྐལ་པ་གསུམ་དུ་གནས། །ལྐོག་མ་རྐན་དང་དེ་ནས་མཆུ། །སྤྱི་བོ་ས་ཡི་མིང་ཅན་ཏེ། །རྡོ་རྗེ་གསུམ་ཐུགས་གསང་བ་གཅིག་།དེ་ནས་ཧཾ་ལས་ཞུགས་པ་ཡིས། །དེ་བཞིན་
157b
གཤེགས་ཀུན་ཡེ་ཤེས་ནི། །དམ་ཚིག་རྡོ་རྗེ་ཞེས་བྱ་བ། །རྡོ་རྗེ་ཡེ་ཤེས་གཅིག་ལས་བྱུང ། །ཏིང་འཛིན་གསང་བར་བཤད་པ་ཡིན། །ཡེ་ཤེས་དཀྱིལ་འཁོར་དབུས་གནས་པར། །རྡོ་རྗེ་ཆེན་པོར་བསམ་ནས་ནི། །ལུས་ཀུན་ལ་ནི་ཁཾ་དམིགས་ན། །རྡོ་རྗེ་ཡེ་ཤེས་སྐྱེ་བར་འགྱུར། །དངོས་པོ་མེད་དོན་གསལ་བྱེད་པ། །ཁཾ་ཉིད་ཀྱིས་ནི་ཐམས་ཅད་བཤད། །རླུང་གི་རྐྱེན་དང་ཀུན་སྦྱོར་ལས། །ཁཾ་དུའང་འགྲོ་བར་གྱུར་པ་ཡིན། །སངས་རྒྱས་བྱང་ཆུབ་སེམས་དཔའ་ཡིས། །ཡང་དང་ཡང་དུ་མཆོད་པ་དང ། །རྡོ་རྗེ་གསུམ་གྱི་དམ་ཚིག་གནས། །གཉིས་མེད་ལྷུན་གྱི་ངོ་བོ་ཉིད། །སངས་རྒྱས་དེ་བཞིན་ཉིད་སྦྱོར་བ། །སོ་སོ་རུ་ནི་ཡང་དག་གནས། །ནམ་མཁའི་རྡོ་རྗེ་དམ་ཚིག་ཆེ། །ཆོས་རྣམས་དེས་ནི་མི་གཟིགས་སོ། །སངས་རྒྱས་ཀུན་ནི་གཉིས་མེད་དང ། །མི་སྣང་འདི་ཡི་དམ་ཚིག་ཡིན། །དངོས་པོ་མེད་པའི་གནས་ཐོབ་ན། །སངས་རྒྱས་ཀྱིས་ཀྱང་མི་གཟིགས་སོ། །སྐུ་གསུང་ཐུགས་ལས་ཡང་དག་བྱུང ། །མི་སྣང་རྡོ་རྗེ་གསུམ་འདི་ཡིན། །དེ་ཡི་བཀོད་ཕྲེང་ཞེས་བྱ་བ། །ཏིང་ངེ་འཛིན་ནི་ཡང་དག་གསུངས། །མ་འདྲེས་པ་ཡི་ཆོས་བདག་ཉིད། །སྐུ་དང་ལྡན་པའི་འོད་པོ་ཆེ། །རྡོ་རྗེ་དཀྱིལ་འཁོར་དབུས་གནས་པའི། །རང་སྔགས་སྐྱེས་བུ་བསམ་པར་བྱ། །ཧཾ་ནི་རྡོ་རྗེ་བཞིར་བཤད་པ། །སྙིང་ག་རུ་ནི་ཡཾ་མཛེས་པ། །རྟག་ཏུ་སྦྱོར་བས་གཞུག་པ་ནི། །འོད་ཟེར་རྣམ་པར་བསྒོམ་པར་བྱ། །སྐུ་གསུང་ཐུགས་ཀྱི་ལོངས་
158a
༄#། །སྤྱོད་ནི། །འཇམ་པའི་དམ་ཚིག་རྡོ་རྗེ་ཅན། །ས་བཅུར་རབ་ཏུ་གནས་ན་ནི། །དགོངས་དོན་དེ་ཚེ་ཀུན་ཏུ་བྱུང ། །ཡེ་ཤེས་ཉིད་ནི་ཟླ་བ་འདི། །བྱང་ཆུབ་སེམས་དཔའ་རྡོ་རྗེ་ཅན། །སྣང་བ་ཅན་ཞེས་བྱ་བ་ཡིས། །ཏིང་ངེ་འཛིན་ནི་ཡང་དག་བཤད། །ནམ་མཁའི་དབྱིངས་ཀྱི་དབུས་གནས་པར། །ཐལྷཱིཾ་ནི་འབར་བའི་འོད་བཟང་བ། །མཚོན་ཆ་མཆོག་ནི་རྡོ་རྗེ་ཡིས། །རྡོ་རྗེ་སྐུ་དང་འདྲ་བར་འགྱུར། །འདི་ནི་རྡོ་རྗེ་མཁའ་འདྲ་སྦྱོར། །དམ་ཚིག་བཀོད་པའི་གནས་གྱུར་པ། །ཏིང་འཛིན་དམ་ཚིག་མི་སྣང་བའི། །ཐལྷཱིཾ་ནི་ཡང་དག་འབྱུང་བ་བཤད། ། སངས་རྒྱས་མངོན་པར་ཤེས་གནས་པ། །དམ་ཚིག་ཏུ་ནི་ཡང་དག་བཤད། །མངོན་ཤེས་ལྔ་དང་འདྲ་བ་འདི། །དེ་ནི་སྐྱེས་བུ་མཆོག་ཏུ་འགྱུར། །སངས་རྒྱས་མངོན་ཤེས་མཆོག་སྒྲུབ་པ། །འདི་ནི་དམ་པ་ཡིན་པར་བཤད། །དེ་ཡི་དངོས་གྲུབ་ཐམས་ཅད་ཀྱི། །དངོས་གྲུབ་ཆེན་པོ་སྒྲུབ་པའི་མཆོག་།ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །སངས་རྒྱས་དགོངས་པའི་མཆོག་བསྒོམས་ལ། །ཡི་གེ་ཨོཾ་ནི་བསྒོམ་པར་བྱ། །རྡོ་རྗེ་གསུམ་གྱི་གསང་བ་འདི། །ཡི་གེ་ཨོཾ་ནི་མི་ཟད་གཙོ། །འདི་ནི་མི་ཕྱེད་སྦྱོར་བ་ཡིས། །བསྒོམས་བས་མི་བསྐྱོད་འདྲ་བར་འགྱུར། །མི་བསྐྱོད་པ་ཡི་དམ་ཚིག་མཆོག། དེ་སྐུ་བྱང་ཆུབ་རྡོ་རྗེ་ཅན། །ཏིང་ངེ་འཛིན་དུ་ཡང་དག་བཤད། །དེ་ནི་སྐྱེས་བུ་དམ་
158b
པ་ཡིན། །མི་བསྐྱོད་མཚུངས་པའི་སྐུ་དང་ནི། །གསུང་ཐུགས་རྩེ་གཅིག་འཛིན་པ་ལས། །འཇིག་རྟེན་ཁམས་ནི་ཐམས་ཅད་དུ། །རྡོ་རྗེ་ཅན་གྱིས་མཆོད་པར་འགྱུར། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བརྒྱན་པ་བསམ། །ནམ་མཁའི་རྡོ་རྗེ་རབ་བསྒོམས་ཏེ། །དེ་ནས་རྡོ་རྗེ་རྣམ་པར་བསྒོམ། །རྡོ་རྗེ་དམ་ཚིག་གསུམ་བསྒོམས་པས། །དཀོན་མཆོག་དཔལ་དང་འོད་འདྲ་ཞིང ། །དཀོན་མྖྒོ་གསུམ་དཔལ་མཚུངས་པ་ཡི། །བཅོམ་ལྡན་དཀོན་མཆོག་དཔལ་འདྲ་ཞིང ། །སྐུ་གསུང་ཐུགས་སྦྱོར་རྡོ་རྗེ་ཡིས། །ཡེ་ཤེས་གསང་བའི་གནས་སུ་འགྱུར། །ཏིང་འཛིན་དཔག་མེད་ལས་བྱུང་བ། །རྡོ་རྗེ་ཡེ་ཤེས་འཛིན་དེ་འགྱུར། །ལོངས་སྤྱོད་དམ་ཚིག་ཅེས་བྱ་བ། །རིན་ཆེན་རྡོ་རྗེ་གཅིག་ཏུ་འབྱུང ། །དེ་ཉིད་གསུམ་གསང་དགོངས་པ་ལས། །རིན་ཆེན་རྡོ་རྗེ་དེ་གནས་འགྱུར། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསམ་པར་བྱ། །འཇིག་རྟེན་དབང་ཕྱུག་རབ་བསྒོམས་ལ་དེར་ནི་ཆོས་ཀྱི་ཨོཾ་བསྒོམ་མོ། །ཆོས་ཀྱི་ཨོཾ་ནི་དེ་ཚེ་ཡང ། །རྡོ་རྗེ་གསུམ་མཉམ་སྦྱོར་བ་ཡིས། །རྡོ་རྗེ་དཔག་མེད་འདྲ་བ་ནི། །བཅོམ་ལྡན་དཔག་མེད་རྡོ་རྗེ་ཅན། །ལུས་དང་ངག་སེམས་རྡོ་རྗེ་ཡིས། །དཔག་མེད་ཚེ་དང་འདྲ་བར་འགྱུར། །ཐེག་པ་ཆེན་པོ་ལམ་གྱི་མཆོག་།འགྲོ་བའི་དོན་ནི་རབ་སྒྲུབ་པ། །ཡེ་ཤེས་རྒྱ་མཚོ་དཔལ་དང་ལྡན། །འགྲོ་དོན་གཅིག་ཏུ་འབྱུང་བར་འགྱུར།།
159a
༄#། །དོན་ཡོད་པ་ཡི་དམ་ཚིག་མཆོག་།སེམས་ཅན་དོན་ནི་སྒྲུབ་གྱུར་པ། །འོད་ཟེར་ཡེ་ཤེས་མཆོག་ཅེས་བྱའི། །ཏིང་ངེ་འཛིན་དུ་ཡང་དག་བཤད། །སེམས་ཅན་ཁམས་ནི་མ་ལུས་པའི། །ལོངས་སྤྱོད་ཀུན་ཏུ་འགྱུར་བ་ཡི། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །དེ་ནི་རྣམ་སྣང་རྡོ་རྗེར་བཤད། ། འོད་ཟེར་དེ་ནི་རབ་ཏུ་བསྒོམ། །རྣམ་པར་རྒྱལ་བའི་ཡི་གེ་ཨོཾ། །འོད་ཆེན་དེར་ནི་རབ་ཏུ་བསྒོམ། །དེ་ནས་འདི་ནི་རྡོ་རྗེ་གསུམ། །རྣམ་པར་སྣང་མཛད་འདྲ་བར་འགྱུར། །དེ་ནི་བཅོམ་ལྡན་མགོན་པོས་བཤད། །རྣམ་སྣང་རྡོ་རྗེ་ཅན་དེ་ཡིན། །རྡོ་རྗེ་གསུམ་གཉིས་མེད་སྦྱོར་ལས། །རྣམ་པར་སྣང་མཛད་འདྲ་བའི་འོད། །དེ་ཉིད་ཡེ་ཤེས་རྫོགས་བྱང་ཆུབ། །རྡོ་རྗེ་སྐུ་གསུམ་སྒྲུབ་པ་པོ། །སྐུ་དང་གསུང་ཐུགས་རྫོགས་བྱང་ཆུབ། །དེ་ལ་དམིགས་པའི་རྡོ་རྗེ་ཅན། །ཏིང་འཛིན་ཞི་བ་ཉིད་སྦྱོར་བ། །འགྲོ་བའི་དོན་ནི་རབ་སྒྲུབ་པའོ། །ཚིག་གཅིག་ལ་ནི་སྣ་ཚོགས་དོན། །སྔགས་ཀྱི་དེ་ཉིད་གསལ་གྱུར་པའོ། །དེ་ནས་དེ་བཞིན་གཤེགས་མཆོག་ལ། །དེ་ནས་གསང་བའི་བདག་པོ་ནི། །གསང་དགོངས་རྡོ་རྗེ་ཞེས་བྱ་བ། །ཐུབ་པ་ཆེ་ལ་སླར་ཡང་ཞུས། །ོཾ་ཨཱ་ཧཱུཾ་ནི་གསུམ་ལ་སོགས། །བྷྲཱུཾ་སོགས་ཐོག་\?\མར་གནས་པ་ཡིས། །སྐུ་གསུང་ཐུགས་ཀྱི་རྡོ་རྗེ་ཅན། །སྔགས་ཀྱི་སྐྱེས་བུར་དེ་འགྱུར་རོ། །ོཾ་ནི་རྣམ་སྣང་རྡོ་
159b
རྗེར་འགྱུར། །ཱཿ ་ནི་འཇིག་རྟེན་དབང་ཕྱུག་གཙོ། །ཧཱུཾ་ནི་རྡོ་རྗེ་སེམས་དཔར་བཤད། །སྐྱེས་བུ་རྡོ་རྗེ་ཅན་དུ་འགྱུར། །བྷྲཱུཾ་ནི་གནས་ཀྱི་མཆོག་ཏུ་འགྱུར། །ཁཾ་ནི་ངེས་པར་མི་སྣང་བ། །ཧཾ་ནི་འཇམ་དཔལ་ཡང་དག་བཤད། །ཀྵཾ་ནི་རྡོ་རྗེ་བཀོད་ཅེས་བྱ། །རྡོ་རྗེ་སེམས་དཔའ་རིན་པོ་ཆེ། །འཇིག་རྟེན་དབང་ཕྱུག་དངོས་གྲུབ་སྩོལ། །དེ་བཞིན་མགོན་པོ་རྣམ་སྣང་མཛད། །ོཾ་ལ་སོགས་པ་ལྔ་ལས་སྐྱེས། །ོཾ་ཨཱཿ ་ཧཱུཾ་ནི་དེ་ཉིད་གསུམ་\?\་རྣམ་སྣང་རྡོ་རྗེ་ཅན་གྱུར་པ། །སྐུ་གསུང་ཐུགས་ཀྱི་རྡོ་རྗེ་གྲགས། །ཤིན་ཏུ་རྣམ་པར་ངེས་པར་བཤད། །གསང་སྔགས་དཀྱིལ་འཁོར་རྣལ་འབྱོར་པ། །ལྔ་པོ་བཅོ་ལྔར་ཡང་དག་བཤད། །ཁྲག་གི་སྦྱོར་བ་ལས་བྱུང་བ། །གསང་སྔགས་སྐྱེས་བུ་ཞེས་བྱ་བ། །གསང་སྔགས་ཆེན་པོའི་སྦྱོར་བ་ཡང ། །ཏིང་འཛིན་སྐྱེས་བུ་དམ་བ་ཡིན། །སྣ་ཚོགས་སྔགས་དོན་དེ་ཉིད་འགྱུར། །ཕྱག་རྒྱ་གཅིག་པར་དཀྱིལ་འཁོར་ཏེ། །དེ་དག་གསང་བར་བཤད་པ་ནི། །དགོངས་པ་གཅིག་ལས་ཡང་དག་འབྱུང ། །དགའ་བ་གཅིག་ཅིང་དགའ་བའི་མིང ། །དེ་དག་ཇི་ལྟར་རྟོགས་པར་འགྱུར། །མགོན་པོ་རྐྱེན་དང་བྲལ་བའི་མི། །པི་ཝང་སྒྲ་ནི་མཆིས་མ་ལགས། །དེ་བཞིན་ཕྱག་རྒྱ་མེད་པ་ནི། །གསང་སྔགས་དངོས་གྲུབ་མི་འབྱུང་ངོ ། །བརྡ་གསུམ་གྱི་ནི་དེ་ཉིད་འདི། །གང་གི་དོན་དུ་རབ་གསུངས་པ། །ལག་པའི་སྦྱོར་བས་རབ་བསྒྲུབས་པའི། །ཕྱག་རྒྱ་ཇི་ལྟར་གནས་པར་མཛད། །སྔགས་དང་ཕྱག་རྒྱ་སྦྱོར་
160a
༄#། །བ་ནི། །ཕྱག་རྒྱ་གཅིག་པུའི་སྦྱོར་བ་དང ། །གསང་སྔགས་གཅིག་པུས་མི་འགྲུབ་ཅེས། །ཁྱོད་ནི་ཆོས་རྣམས་སྟོན་པར་མཛད། །འདིར་ནི་སྔགས་སྦྱོར་གཅིག་པུ་ལས། །ཕྱག་རྒྱ་བསྟན་པར་མ་མཛད་ན། །གསང་སྔགས་གཅིག་སྐྱེས་དངོས་གྲུབ་ནི། །འཇིག་རྟེན་པ་རྣམས་ཇི་ལྟར་སྒྲུབ། །སྔགས་ལ་དམིགས་པའི་སྦྱོར་གྱུར་པ། །ལྷ་རྣམས་ཀྱི་ཡང་སྦྱོར་ལས་བྱུང ། །འགྲོ་བའི་དོན་ནི་རབ་སྒྲུབ་པ། །ཡིད་བཞིན་ནོར་བུ་ལྟ་བུར་འགྱུར། །འཇིག་རྟེན་འདས་པ་ཞེས་བྱ་དང ། །ཡང་ན་ཤིན་ཏུ་འཇིག་རྟེན་ལས། །མགོན་པོ་འཇིག་རྟེན་པ་རྣམས་ཀྱི། །ཇི་ལྟར་དེ་ལ་འགྲོ་ཕན་འགྱུར། །སྤྱན་དང་པ་དང་གཤེགས་སུ་གསོ། །འདིར་ནི་ཇི་ལྟར་ལེགས་པར་བརྗོད། །གང་གིས་འདིར་ནི་དངོས་གྲུབ་འགྲུབ། ། ལྷ་རྣམས་མངོན་ཕྱོགས་ཇི་ལྟ་བུ། །འདི་དག་མ་འོངས་སྐྱེས་བོ་ཡིས། །གང་ཞིག་ཤེས་ན་ཡང་དག་པར། །ངེས་པར་རྣམ་རྟོག་མེད་འགྱུར་བ། །མེ་ཡི་སྐྱེས་བུ་འདི་དག་གསུངས། །དེ་ནས་མགོན་པོ་བཅོམ་ལྡན་འདས། །དགོངས་པའི་གསང་བ་དམ་པ་སྟེ། །ཕྱག་རྒྱའི་ངེས་པར་འཇིག་རྟེན་པའི། །ཕྱག་ན་རྡོ་རྗེ་ལ་གསུངས་སོ། །རྣམ་རྟོག་སྣ་ཚོགས་ལྕགས་ཞེས་བྱ།། ཉེས་པ་གསུམ་ཚོགས་བདག་ཉིད་ལས། །གསང་སྔགས་སྐྱེས་བུའི་སྦྱོར་བ་ཡིས། །དེ་ནི་མི་མཆོག་དག་ཏུ་འགྱུར། །གསེར་འགྱུར་རྩི་ཡི་རྣམ་པ་ཡིས། །ལྕགས་ནི་གསེར་དུ་བྱེད་པ་
160b
ཡིན། །དེ་བཞིན་སྔགས་ཀྱི་དེ་ཉིད་ཀྱིས། །མི་ནི་བདེར་གཤེགས་བྱེད་པ་ཡིན། །ངེས་བྱས་སྦྱོར་བའི་གསང་སྔགས་ནི། །ཞི་བདེ་དངོས་གྲུབ་སྟེར་བར་འགྱུར། །ཕྱག་རྒྱ་མེད་པའི་སྔགས་གཅིག་པུས། །སྔགས་ཀྱི་སྐྱེས་བུར་འགྱུར་བ་ཡིན། །དངོས་མེད་པ་ལས་ཡང་དག་སྐྱེ། །སྔགས་ཀྱི་སྐྱེས་བུ་འབྱུང་བ་སྟེ། །འདི་ནི་ཕྱག་རྒྱ་ཆེན་པོ་སྟེ། །འགྲོ་བའི་དོན་ནི་རབ་སྒྲུབ་པའོ། །སྤྱན་དྲང་བར་ནི་བཞུགས་པ་ཡིས། །མྱུར་བ་ཡིས་ནི་གཤེགས་སུ་གསོལ། །གནས་པ་ཡིས་ནི་དེ་སྒྲུབ་པའོ། །ཡིད་སྟོན་དངོས་གྲུབ་དམ་པ་ཡིན། །དེ་ནི་སྐྱེས་བུའི་སྦྱོར་བ་ཡིས། །ཕྱག་རྒྱ་ཆེ་དང་གཅིག་སྒྲུབ་ལས། །མྱུར་བ་ལ་སོགས་གསུམ་ལྡན་པ། །དེ་ནི་ཕྱག་རྒྱ་ཡིན་པར་བཤད། །འབད་དེ་བླ་མས་སློབ་མ་ཡི། །རྣ་བའི་དྲུང་དུ་བཤད་པར་བྱ། །མྱུར་བ་དང་ནི་འཇུག་པ་དང ། །གནས་པའི་རྗེས་སུ་སྦྱོར་བ་རྣམས། །སྤྱན་དྲང་བ་དང་གཤེགས་སུ་གསོལ། །འདི་དག་ཕྱག་རྒྱར་ཡང་དག་གྱུར། །སྒྲུབ་པ་ལ་ནི་མྱུར་ལ་སོགས། །ཅི་རིགས་བ་ནི་ངེས་པར་སྦྱར། །ཕུང་པོ་ལ་སོགས་ཆོས་རྣམས་ཀུན། །སྟོང་ཞིང་རྟེན་འབྲེལ་ལས་བྱུང་བ། །མཐོང་ཞིང་དེ་བཞིན་སྦྱོར་བ་ལས། །ཆོས་ཀྱི་སྐུར་ནི་དེ་གནས་འགྱུར། །འདིར་ནི་གསང་སྔགས་སྦྱོར་འགྱུར་མེད། །ཕྱག་རྒྱའང་ཆོས་སྐུ་འདི་ཉིད་ཡིན། །དེ་ལྟ་ན་ཡང་འགྲོ་བའི་དོན། །ཡིད་བཞིན་ནོར་བུ་ལྟ་བུར་བྱེད། །འོན་ཏེ་རྡོ་རྗེ་འཛིན་གང་ཞིག་།སྦྱོར་བ་གསུམ་དང་ལྡན་པའི་མི། །
161a
༄#། །སྤྱན་དྲང་བ་དང་གཤེགས་སུ་གསོལ། །དེ་བཞིན་དུ་ནི་གནས་གྱུར་པའོ། །ཉེ་བའི་ཚིག་ནི་སྤྱན་དྲང་བ། །རིང་ནས་ལག་པར་རབ་ཏུ་སྦྱོར། །དེ་བཞིན་གསང་སྔགས་དེ་ཉིད་ཀྱང ། །གཉི་ག་ལ་ནི་ཡང་དག་སྦྱོར། །རིགས་ཀྱི་དབྱེ་བ་སྦྱོར་བ་ཡིས། །ཕྱག་རྒྱ་བུད་མེད་ཡིན་པར་བཤད། །སེམས་ཀྱི་རྐྱེན་སྦྱོར་བདག་ཉིད་ནི། །འཇིག་རྟེན་པ་ནི་རབ་ཏུ་བརྟག། རང་གི་མཚན་མར་ཡང་དག་སྦྱོར། །རིགས་ཀྱི་དབྱེ་བའི་སྦྱོར་བ་ཡིས། །ཕྱག་རྒྱས་ས་གསུམ་ལ་གནས་པ། །ས་འོག་ཀླུ་ཡི་བུ་མོ་ཡང ། །བརྟུལ་ཞུགས་ཅན་གྱི་སེམས་ཀྱིས་དགུག། གཞུག་པའི་རིམ་པ་ཉིད་དང་ནི། །དེ་རྣམས་གནས་པའི་སྦྱོར་བ་ཉིད། །དངོས་མེད་དེ་ཉིད་གཅིག་པུ་ཡིས། །འགྲོ་བ་ཐམས་ཅད་དགུག་པར་བྱ། །གཞན་ཡང་གསང་བ་པ་ཡི་མཆོག། སེམས་ཀྱི་རྐྱེན་ནི་ཉིད་ལྟོས་དང ། །དངོས་མེད་བྱང་ཆུབ་འཐོབ་པ་ལ། །གསང་སྔགས་མེད་ཅིང་ཕྱག་རྒྱ་མེད། །འཇིག་རྟེན་ན་ནི་རྟོག་ཅི་རྙེད། །དུས་གསུམ་དུ་ནི་ཀུན་འབྱུང་བ། །དེ་ནི་དངོས་མེད་སེམས་གཅིག་ལས། །རྣལ་འབྱོར་པས་ནི་སྐད་ཅིག་རྟོགས། །བྱང་ཆུབ་ཀུན་རྫོབ་མ་ཡིན་ལ། །དེ་ལས་གཞན་དུའང་རྙེད་མི་འགྱུར། །གཉི་ག་ལས་མིན་གཞན་ལས་མིན། །མུན་པའི་སྒྲོན་མ་མཚུངས་པར་འགྱུར། །སེམས་ཅན་བསམ་པའི་དབང་གིས་སྔགས། །གསང་བ་འདི་ནི་རབ་སྟོན་ཏེ། །དེ་ནི་སྒྲུབ་དང་བསྒྲུབ་བྱ་དང ། །རྣམ་པར་མི་རྟོག་བརྟགས་
161b
པ་འོ། །སེམས་ཅན་ཀུན་གྱི་ལོངས་སྤྱོད་དུ། །སྔགས་ཀྱི་སྐྱེས་བུ་རབ་ཏུ་གནས། །ནམ་མཁའ་མཉམ་པའི་སྦྱོར་བ་ནི། །རྣམ་པར་དབེན་པར་རབ་ཏུ་བརྟག་།གསལ་དང་མི་གསལ་ཡང་དག་ལྡན། །ཀླུང་དང་འབབ་ཆུ་ལ་སོགས་ཡིན། །མྱ་ངན་འདས་པ་གནས་སྦྱོར་བ། །དུར་ཁྲོད་ལ་སོགས་པ་ཡི་མིང ། །འདི་ནི་སྔགས་རིགས་མཆོག་རྣམས་ཀྱི། །བསམ་གཏན་བསྡུས་ལས་སྤྱོད་པ་འོ། །འཇིག་རྟེན་འདས་པ་དེ་ཉིད་འདིར། །འཇིག་རྟེན་པ་ནི་ལྡོག་པའོ། །མི་བསྐྱོད་ཡེ་ཤེས་ལ་སོགས་པ། །རྡོ་རྗེ་ནམ་མཁའི་དཀྱིལ་དུ་བསམ། །མངོན་ཤེས་ལྔ་ཡི་སྦྱོར་བ་ཡིས། ། སངས་རྒྱས་མཆོག་གི་གནས་སུ་བསྒོམ། །རྡོ་རྗེ་མངོན་ཤེས་རྡོ་རྗེ་ཆེ། །དམ་ཚིག་མཆོག་ཏུ་བཀའ་སྩལ་ཏོ། །རྡོ་རྗེ་ཆེན་པོ་རབ་མཛེས་པ། །རྩེ་ལྔ་པ་ལ་དེ་བཞིན་འབར། །རང་བཞིན་ལྔ་རུ་སྦྱོར་བ་ཡིས། །མངོན་ཤེས་ལྔ་པོར་འགྱུར་བ་ཡིན། །མངོན་ཤེས་ལྔ་ཡི་ཏིང་འཛིན་ལ། །གནས་ནས་བླ་ན་མེད་པ་བརྟག་།གཙོ་བོ་མེ་སྟག་མང་པོ་འཁྲུག་།རང་སྔགས་འཁོར་ལོ་བསྒོམ་པར་བྱ། །རྡོ་རྗེ་ལ་ནི་རབ་དགོད་པས། །རྡོ་རྗེ་མངོན་ཤེས་སྐྱེ་བར་འགྱུར། །ནམ་མཁའ་རྡོ་རྗེ་དབུས་གནས་པར། །འཁོར་ལོ་རྡོ་རྗེ་འབར་འོད་འདྲ། །སངས་རྒྱས་འཇུག་པར་རབ་བསྒོམས་ན། ། སངས་རྒྱས་མཆོག་དང་འདྲ་བར་འགྱུར། །སངས་རྒྱས་དཀྱིལ་འཁོར་དབུས་གནས་པར། །ལུས་ལ་རྣམ་པར་སྣང་མཛད་བཞག་།སྙིང་གར་ཡི་གེ་ཨོཾ་བསམས་ནས། །སྔགས་ལ་མངོན་
162a
༄#། །ཤེས་སྒོམ་པར་འགྱུར། །འགོག་པ་རྡོ་རྗེ་གྱུར་པའི་སེམས། །ནམ་ཞིག་བདག་ཉིད་བདག་ལས་སྐྱེས། །སངས་རྒྱས་ཀུན་མཆོག་འབྱུང་བ་ཡི། །དཔལ་ལྡན་ཡིད་བཞིན་ནོར་བུར་འགྱུར། །སངས་རྒྱས་དཀྱིལ་འཁོར་དབུས་གནས་པར། །དེར་ནི་མི་བསྐྱོད་རབ་ཏུ་བསྒོམ། །ཧཱུཾ་ནི་སྙིང་གའི་ཟླ་གནས་པར། །བསམས་ལ་སེམས་ནི་དེ་རུ་བཞག་།སངས་རྒྱས་དཀྱིལ་འཁོར་དབུས་གནས་པར། །ཚེ་དཔག་མེད་པ་རབ་ཏུ་སྦྱོར། །ཱ་ནི་སྙིང་གའི་ཐིག་ལེར་གནས། །བསམས་ལ་རྡོ་རྗེའང་ཡང་དག་བཞག་།འདི་ནི་དགོངས་པའི་མཆོག་གི་མཆོག་།རྡོ་རྗེ་མི་ཕྱེད་གསུམ་སྦྱོར་སྐྱེས། །འགོག་པའི་དམ་ཚིག་ཡེ་ཤེས་ཏེ། །སངས་རྒྱས་དངོས་གྲུབ་ཆེར་འབྱུང་བའོ། །ནམ་མཁའ་རྡོ་རྗེ་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །སྐུ་གསུང་ཐུགས་ཀྱི་ཡི་གེ་ཨོཾ། །བསམས་ན་བསྐལ་པ་གཅིག་ཏུ་གནས། །ནམ་མཁའ་རྡོ་རྗེ་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །ལུས་དང་ངག་སེམས་ཡི་གེ་ཨཱཿ ། །བསམས་ན་བསྐལ་པ་དག་ཏུ་གནས། །མཁའ་དབྱིངས་རྡོ་རྗེ་དབུས་གནས་པར། །རྡོ་རྗེ་དཀྱིལ་འཁོར་བསྒོམ་པར་བྱ། །ལུས་དང་ངག་སེམས་ཡི་གེ་ཧཱུཾ། །བསམས་ན་དེ་ནི་བསྐལ་པར་གནས། །བཅོམ་ལྡན་བདག་པོ་རྡོ་རྗེ་གསུམ། །དམ་ཚིག་རྟོག་པས་དེ་སྐད་གསུངས། །དབུས་མཐའ་ཅན་གྱི་ཡི་གེ་འདི། །སྔགས་ཀྱི་སྐྱེས་བུ་
162b
མཆོག་ཏུ་འགྱུར། །བརྗོད་དུ་མེད་ཅིང་མིང་མེད་ལ། །ཤེས་དང་ཤེས་བྱ་རྣམ་སྤངས་པའང ། །ཀུན་རྫོབ་ལ་ནི་ལེགས་གནས་ན། །ཚིག་གི་སྔགས་སུ་འདི་བརྗོད་དོ། །རྡོ་རྗེ་གསུམ་གྱི་རྡོ་རྗེ་ཅན། །རྣལ་འབྱོར་འདིར་འགྱུར་ཕྱིན་ཆད་ནི། །གང་ཞིག་ཀློག་གམ་སེམས་ཀྱང་རུང ། །རྡོ་རྗེ་ཡེ་ཤེས་ལྟ་བུར་འགྱུར། །ཇི་ལྟར་གསང་བའི་རྒྱལ་དབང་པོ། །དགོངས་པ་ལུང་སྟོན་འདི་གྱུར་པ། ། སངས་རྒྱས་ཀུན་གྱི་དེ་ལུང་སྟོན། །ཁྱད་པར་དུ་ཡང་བྱིན་གྱིས་རློབ། །ཀློག་ཅིང་སྒོམ་དང་ལྡན་པར་ནི། །བྲིས་ནས་གང་དུ་འཇོག་གྱུར་པ། །དེ་ནས་སངས་རྒྱས་ཐམས་ཅད་ཀྱི། །རིགས་སྐྱེས་རྒྱལ་བའི་སྲས་སུ་འགྱུར། །ཁམས་གསུམ་ཐམས་ཅད་བཅོམ་ནས་ནི། །མྱུར་བར་དེ་བཞིན་གཤེགས་འགྱུར་ཞིང ། །འཁོར་ལོས་བསྒྱུར་བའི་བུ་བཞིན་དུ། །བྱང་ཆུབ་མྱུར་དུ་དེས་འཐོབ་བོ། །ཁམས་གསུམ་སྐུ་དང་གསུང་ཐུགས་ཀྱི། །སྔགས་པའི་ཡན་ལག་གྱུར་པ་ནི། །སངས་རྒྱས་འདུས་ལ་བརྟེན་པ་ཡིས། །དེ་ནི་དངོས་པོ་མེད་པར་འཇོམས། །དངོས་མེད་གཅིག་པུ་རྫོགས་ལོངས་སྤྱོད། །ཕུང་སོགས་ཡན་ལག་དོན་ལས་བྱུང ། །བདེ་གཤེགས་སེམས་ཅན་སྤངས་པ་ནི། །སྔགས་པ་སྔགས་ལས་གྱུར་པ་ཡིན། །ཇི་ལྟར་ནམ་མཁའ་རང་མཚན་ཉིད། །སྐད་གཅིག་ཀྱང་ནི་འདོར་མི་བྱེད། །དེ་བཞིན་སངས་རྒྱས་ཐམས་ཅད་ཀྱང ། །རིགས་ལས་སྐྱེས་ལ་བྱིན་གྱིས་རློབ། །དགོངས་པ་ལུང་སྟོན་ལ་གནས་ནས། །གསང་བའི་རིན་ཆེན་ཡང་དག་བསྲུང ། །མིག་གཟུགས་
163a
༄#། །རང་གི་ངོ་བོ་ཉིད། །སྤྱོད་པ་ཅི་དགའ་བྱེད་པར་འགྱུར། །དེ་བཞིན་གཤེགས་ཀུན་ཡེ་ཤེས་ནི། །གསང་བའི་དགོངས་པའི་མིང་ཅན་ཏེ། །སྐུ་དང་གསུང་ཐུགས་གསང་བ་དང ། །གསང་སྔགས་དམ་ཚིག་དེ་ཉིད་བྱུང ། །དེ་ནི་རིག་པ་སྐྱེས་བུ་མཆོག་།བཅུ་གཅིག་པར་ནི་ཡང་དག་བཤད། །རས་ནི་བྲིས་དང་མཚུངས་པར་འབྱུང ། །འཐོབ་པའི་ཕྱིར་ནི་ལེའུར་གྱུར།། །།དེ་ནས་དཔལ་ལྡན་རྣམ་སྣང་མཛད། །སྐྱེད་པ་ཡེ་ཤེས་བླ་མ་གཙོ། །དེ་ཉིད་དམ་ཚིག་མཆོག་གྱུར་པ། །རྡོ་རྗེ་གསུང་གིས་བཀའ་སྩལ་ཏོ། །མཁའ་དང་མཚུངས་ཤིང་མི་རྟོག་ལ། །རང་བཞིན་གྱིས་ནི་དམ་ཆོས་ཅན། །དངོས་མེད་ཤིན་ཏུ་དྲི་མེད་ལ། །དམ་ཚིག་གཅིག་ཏུ་གྱུར་ཀྱང་ནི། །གར་དང་གླུ་དང་རོལ་མོ་དང ། །དགོད་དང་སྒེག་པས་རབ་མཛེས་པས། ། འཇིག་རྟེན་སངས་རྒྱས་གར་མཁན་གྱི། །རོལ་མོ་འདི་དག་རབ་ཏུ་བསྒོམ། །གཞོན་ནུས་བསྒྲུབས་པའི་སེམས་ཅན་ནི། །ཇི་ལྟ་ཇི་ལྟར་སྟོན་པ་བཞིན། །གར་སོགས་རྩེད་མོས་བྱང་ཆུབ་ནི། །མྱུར་དུ་དེ་ཉིད་ལས་འཐོབ་འགྱུར། །འདོད་པའི་ཡོན་ཏན་ལྔར་ལྡན་བ། །དེ་ཡི་མིང་ནི་ཡིད་ལྡན་པ། །དཀོན་མཆོག་གསུམ་ལ་སྐྱབས་སུ་གནས། །ལྷུན་གྱིས་གྲུབ་པའི་སངས་རྒྱས་འགྱུར། །སེམས་ཅན་གང་འདི་མཐོང་བ་དང ། །ཐོས་ཤིང་རེག་པར་གྱུར་པ་ནི། །དེ་ནི་ཨུ་དུམ་བ་ར་ཡི། །མེ་ཏོག་འདྲ་བར་གྱུར་པ་ཡིན། །སེམས་ཅན་ཀུན་གྱི་གཙོ་བོ་འདི། །གསུང་
163b
གི་རྡོ་རྗེ་ཆོས་ཉིད་སྐྱེས། །གཅིག་དང་དུ་མ་ལས་གྲོལ་བ། །རྟེན་འབྱུང་གསལ་བར་བྱེད་པ་ཡིན། །དེ་ནས་གསང་བའི་བདག་མཆོག་དེ། །ཆོས་ཀྱི་དེ་ཉིད་རབ་སྟོན་པ། །ཐུབ་ཆེན་རྣམ་པར་སྣང་མཛད་ལ། །ཐལ་མོ་སྦྱར་བ་བྱས་ནས་ཞུས། །མགོན་པོ་དེ་ཉིད་བསྡུས་པ་ལས། །རོལ་མོ་འདིར་ནི་གྱུར་པ་དང ། །འཇིག་རྟེན་པ་དེ་གར་བྱེད་པ། །གསུངས་ཏེ་མ་འོངས་སྐྱེ་བོ་ནི། །ཆོས་དབྱིངས་དེ་ནི་གར་མིན་ན། །གཙོ་བོ་ཇི་ལྟར་གར་བགྱིད་ལགས། །རྨོངས་པའི་འཇིག་རྟེན་རྒྱང་པན་གར། །གསང་མཐོན་མྱོས་པས་བསྐུལ་བ་ཡིན། །ཆོས་དབྱིངས་དེ་ནི་གླུ་མིན་ན། །གཙོ་བོ་ཇི་ལྟར་གླུ་ལེན་འགྱུར། །རྨོངས་པའི་འཇིག་རྟེན་རྒྱང་པན་གླུ། །གསང་མཐོན་མྱོས་པས་བསྐུལ་བ་ལགས། །ཆོས་དབྱིངས་དེ་ནི་རོལ་མོ་མིན། །གཙོ་བོ་ཇི་ལྟར་རོལ་མོར་འགྱུར། །འཇིག་རྟེན་རྒྱད་པན་རྨོངས་རོལ་མོ། །གསང་མཐོན་མྱོས་པས་བསྐུལ་བ་ལགས། །ཆོས་དབྱིངས་དེ་དགོད་མ་ལགས་ན། །གཙོ་བོ་ཇི་ལྟར་རྒོད་པར་འགྱུར། །རྨོངས་པའི་འཇིག་རྟེན་རྒྱང་པན་རྒོད། ། གསང་མཐོན་མྱོས་པས་བསྐུལ་པ་ལགས། །ཆོས་དབྱིངས་དེ་སྒེག་མ་ལགས་ན། །གཙོ་པོ་ཇི་ལྟར་སྒེག་པར་འགྱུར། །རྨོངས་པའི་འཇིག་རྟེན་རྒྱང་པན་སྒེག་།གསང་མཐོན་མྱོས་པས་བསྐུལ་བ་ལགས། །དེ་ལྟར་རྣམ་པ་མང་པོ་ལ། །གཞན་རྣམས་ཀྱང་ནི་སྦྱོར་བྱེད་ཅིང ། །བཟའ་དང་མིན་ལས་སྦྱོར་བ་ཡིས། །རྣལ་འབྱོར་པ་ནི་བདག་ཡིན་སྙམ། །རྡོ་རྗེ་ཡི་ནི་ཚིག་མཆོག་འདི། །ཡོད་
164a
༄#། །མེད་རབ་ཏུ་ཞི་བ་ཉིད། །དེ་ཡི་རང་བཞིན་གཅིག་སྦྱོར་བདག་།ཡང་དག་མཆོག་བསྡུས་དེ་ཉིད་མཆོག་།དེ་ནས་དེ་ཉིད་ཡང་དག་གཟུང ། །རྣལ་འབྱོར་རིགས་མཆོག་རྣལ་འབྱོར་པ། །དེ་ཉིད་གསུམ་མཉམ་ཉིད་སྦྱོར་བ། །སངས་རྒྱས་ཀྱི་ནི་རོལ་མོ་སྟོན། །སྣ་ཚོགས་ཚུལ་གྱིས་རྣམ་དགོད་པས། །ནོར་ཅན་མིང་ནི་ཉམས་ལ་སོགས། །གཅིག་པུའང་དཔག་མེད་དངོས་བཤད་པའི། །གར་གྱིས་སྐྱེ་རྒུ་དགའ་བར་བྱེད། །རྫོགས་པའི་བྱང་ཆུབ་སོགས་དངོས་གྲུབ། །སྣ་ཚོགས་ཁྱེད་ཀྱིས་གསུངས་པ་རྣམས། །སེམས་ཞི་བ་ཡི་རྣལ་འབྱོར་པ། །དེ་རྣམས་ལྷུན་གྱིས་གྲུབ་པར་འགྱུར། །མགོན་པོ་ཤེས་རབ་འདི་སྲིད་དུ། །ཐབས་ཀྱིས་མཆིལ་བར་ཉེ་བར་སྦྱོར། །སྔགས་ཀྱི་གཟན་གྱི་སྦྱོར་བ་ཡིས། །ཁྱེད་ནི་འཇིག་རྟེན་པ་རྣམས་འཛིན། །བཤད་དུ་ཟིན་ཀྱང་མི་རིག་པ། །དགོངས་པའི་གསང་བ་དམ་པ་ནི། །གཞན་རྣམས་ལ་ནི་སྟོན་མཛད་པ། །ངོ་བོ་ཉིད་ནི་གཞན་མིན་པའོ། །ཕྱི་རོལ་སྔགས་དོན་དངོས་གྲུབ་ནི། །དེ་ཉིད་དུ་ནི་ཚོལ་མོད་ཀྱི། །འགལ་བའི་རྗེས་འཇུག་ཆོས་ཉིད་ཅན། །དེར་ཡང་འགྲུབ་པར་འགྱུར་མ་ཡིན། །དེ་རྣམས་གསང་བ་མི་སྲུང་ཞིང ། །སྲེད་པ་ཡིས་ནི་སྟོན་པར་བྱེད། །བཅོམ་ལྡན་འདས་གསུང་གསང་བ་ནི། །གསང་མཆོག་ཚིག་གིས་སྒྲོག་པར་བྱེད། །ཁྱོད་བཀའ་ལས་འདས་དམན་པ་རྣམས། །སྔགས་ཀྱི་ནུས་པ་རྣམ་སྤངས་པ། །
164b
འཇིག་རྟེན་པ་རྣམས་སྡང་འགྱུར་ཞིང ། །དེ་རྣམས་འགྲུབ་པར་འགྱུར་མ་ཡིན། །སྲེད་པའམ་དད་པ་དག་གིས་ཀྱང ། །རྐྱེན་དང་དེ་བཞིན་ཉན་ཐོས་རྣམས། །གསང་བ་ལ་ནི་སྨིག་རྒྱུ་བཞིན།། རིགས་སྐྱེས་གཞན་ཡང་ལྟུང་བར་འགྱུར། །མགོན་པོ་དེ་ནི་དེར་གནས་ཤིང ། །ཉམས་ཤིང་བློ་གྲོས་དམན་པར་གནས། །དེ་ནས་ཚིག་མིན་གྱུར་པར་འབྱུང ། །ཚིག་གི་བདུད་རྩི་སྦྱོར་བ་ལས། ། ཆོས་ཀྱི་ཚུལ་འདི་ཐོས་པ་དང ། །ཕྱི་ནས་འཇིགས་ཤིང་སྐྲག་པར་འགྱུར། །བྱང་ཆུབ་སེམས་དཔའ་ལྟུང་འགྱུར་བར། །བདག་ཉིད་ཆེ་དེ་བྱེད་པར་འགྱུར། །དེ་བཞིན་བྱང་ཆུབ་འགྱུར་བ་དང ། ། སྔགས་པ་རྣམས་ཀྱང་གསང་བ་ལགས། །ཤེས་རབ་ཕ་རོལ་ཕྱིན་སྦྱོར་བ། །གསང་བ་མདོ་སྡེ་རྣམ་སྨྲ་བ། །གདོང་གཡོགས་པ་ཡི་སྦྱོར་བ་ཡིས། །དེ་ཚེ་ཚིག་གིས་རིག་སྐྱེས་པ། །གསང་སྔགས་ལ་སོགས་ཆོས་རྣམས་ལ། །དད་པ་རྣམས་ནི་སྐྱེད་མི་བྱེད། །ལོག་པས་མཁས་པའི་ང་རྒྱལ་ནི། །བྱིས་པ་ཕྱི་ནས་བྱེད་པར་འགྱུར། ། ཡི་དོག་པའི་རས་འདི་ནི། །སྦྱོར་ཤེས་རྣམས་ཀྱི་འདི་མ་ཡིན། །དེ་རྣམས་དད་པས་རྗེས་འཇུག་པ། །གཏམ་དག་ཀྱང་ནི་བྱེད་པར་འགྱུར། །སྒྱུ་ནི་གཡོ་ཡི་ཚུལ་གྱིས་ན། །རྒྱལ་པོ་རྣམས་ནི་སླུ་བར་བྱེད། །སྟེང་དུ་གཡོགས་པ་དག་གིས་ནི། །བརྒྱད་གཉིས་པ་ལ་ཚུལ་དུ་བྱེད། །དེ་ནི་མ་སྐྱེས་པ་ཡི་བདག་།རས་ཀྱི་རྒྱུ་མེད་པ་ཉིད་ནི། །ཱཿ ཡི་དོག་རས་ཉིད་རྒྱལ་པོའི། །ཡང་དག་དངོས་གྲུབ་བྱེད་པའི་མཆོག་།དམ་པའི་སྐྱེ་བ་
165a
༄#། །ཉིད་མཐོང་ན། །དེ་ནི་ལོངས་སྤྱོད་ལམ་སྐྱེད་མིན། །དེ་བས་སྐྱེ་བོ་མེད་གཅིག་པུ། །བྱ་བའི་སེམས་ནི་རབ་ཏུ་འཇུག་།དེར་ནི་མཆེ་བ་ཅན་མི་འགྲོ་།དེ་ལ་བཙལ་བ་འབའ་ཞིག་ཡིན། །རྒྱལ་པོ་དངོས་གྲུབ་ཆེན་པོའི་རས། །བར་ཆད་ཤིན་ཏུ་མང་པོ་པ། །བྱ་བ་དེ་ནི་རྣམ་པར་འཇོམས། །སྒྲིབ་པ་མེད་པའི་རྣལ་འབྱོར་ཅན། །དེ་ནི་ཚིག་དེ་ཐོས་པ་དང ། །རྒྱལ་པོའི་བར་དུ་ཡིད་དགའ་ཞིང ། །དངོས་གྲུབ་ཆེན་པོའི་རིགས་མཆོག་ལས། །སུ་ཞིག་བདག་ནི་ཟློག་པར་བྱེད། །རས་ཀྱི་བར་ཆད་བྱེད་པ་དག་།དེ་ལ་ཆད་པས་གཅད་པར་བྱ། །འདི་ལ་འཇིགས་པའི་སེམས་བོར་ལ། །སྐྱེ་བོ་མེད་པར་ཁྱེད་ཀྱིས་ནི། །རྒྱལ་རིགས་དག་གམ་རིགས་བཟང་ངམ། །གང་ཞིག་མི་སྲུན་རིགས་ཅན་རྣམས། །དོག་པ་མེད་པ་རས་འཇིག་པ། །དེ་དག་ཐམས་ཅད་བརླག་པར་བྱ། །དེ་ནས་རྒྱལ་པོ་སྦྱིན་པ་ནི། །རྒྱུད་ཀྱི་སློབ་དཔོན་བདག་ཉིད་ཆེ། །རིན་ཆེན་རིན་ཐང་མེད་ལྔ་སོགས། །བདེ་བ་ཀུན་གྱི་འབྲས་བུ་འོ། །འདི་ཡིས་གདོང་ནི་གཡོགས་ནས་སུ། །རྒྱལ་པོ་འབྲས་བུ་ལོངས་སྤྱོད་ཅིག་།ཱཿ ་ཡི་དོག་པ་རས་དེ་བྱིན། །ཇི་ལྟར་སྐྱེ་བཞིན་རྒྱལ་པོ་བྱས། །རིན་ཆེན་རིན་ཐང་མེད་བླངས་རྣམས། །འདི་ནི་ཇི་ལྟར་བཞག་ནས་སུ། །དེ་ནས་དེ་ནི་མི་སྣང་བ། །རྒྱུན་ཅན་དེས་ནི་དེ་ཚེ་བྱས། །དེ་ལ་སོགས་པའི་སྣ་ཚོགས་ཚིག་།རིགས་སྐྱེས་པ་ལ་དེ་རྣམས་སྨྲ། །རང་ཉིད་འཇིགས་ཤིང་གཞན་
165b
རྣམས་ཀྱང ། །སྐྲག་པར་བྱེད་ཅིང་ཐེ་ཚོམ་མེད། །དེ་ནས་དེ་བཞིན་གཤེགས་བདག་པོ། །འབྱིན་པ་སྟོན་བ་མངའ་བདག་གཙོ། །ཕྱག་ན་རྡོ་རྗེ་གོ་བྱེད་པ། །སྙན་པའི་གསུང་གིས་བཀའ་སྩལ་པ། །རྡོ་རྗེ་རྡོ་རྗེ་ཆེན་པོ་ལེགས། །རྡོ་རྗེ་ཐལ་མོ་བསྟན་བྱས་ཏེ། །རྡོ་རྗེ་འདི་ནི་ཞུས་གྱུར་པ། །དེ་ཉིད་བསྡུས་པ་དམ་པ་འོ། །རྡོ་རྗེ་ཐལ་མོ་དེ་ཉིད་འདི། །ལུང་བསྟན་བྱ་ཡི་དེ་ཉོན་ཅིག་།དེ་ཉིད་གསུམ་དུ་གྱུར་པ་དེ། །རྡོ་རྗེ་ཐལ་མོར་ཡོངས་སུ་བརྟག་།དེ་ཉིད་གསུམ་ནི་ལྷ་གསུམ་སྟེ། །ཚངས་དང་ཁྱབ་འཇུག་དབང་ཕྱུག་ཆེ། །དེ་རུ་ང་ནི་ལྷ་གསུམ་འགྱུར། །ོཾ་ཨཱཿ ་ཧཱུཾ་དང་གྲངས་མཉམ་པའི། །གསང་སྔགས་འཇུག་པ་ཐམས་ཅད་ནི། །སྣ་ཚོགས་ལུས་ཅན་གཅིག་མིང་ཅན། །ཞི་བ་ཉིད་ནི་གང་དུ་སྟོན། །དེར་ནི་ང་ཡང་གནས་པ་ཡིན། །དཔྲལ་ཡོན་དེ་ལ་བཞིན་མི་སྡུག་།དེ་ཡི་སྐྱེས་བུ་མིང་ལྡན་མིང ། །དེ་རྣམས་ལག་པའི་དབུས་ནས་ནི། །མཐེབ་སོགས་ཇི་བཞིན་གྲངས་སུ་བཤད། །ལག་པ་གཡོན་ནི་དྲག་པོར་འགྱུར། །གཡས་པ་དེ་བཞིན་ཁྱབ་འཇུག་སྟེ། །གཉིས་པོ་སྦྱོར་བ་ཚངས་པ་ཡིན། །དེ་བས་ཡོན་ཏན་གསུམ་བདག་དང ། །རིག་དང་མཆོད་སྦྱིན་སྙན་ཚིག་སྟེ། །རིག་བྱེད་དེར་གྱུར་གསུམ་དུ་བཤད། །སྲིད་སྲུང་ཞི་བ་ང་ཡིན་ཏེ། །མཐར་ནི་འགྲོ་བ་གནས་པ་ཡིན། །ལག་པ་གཉིས་པ་འདི་དག་ནི། །བཞི་པོའི་ཕྱེད་ཕྱེད་རྣམ་བརྒྱད་པ། །ཕྱེད་པོའི་ཙམ་གྱི་ཧཾ་མཆོག་ནི། །རབ་ཏུ་ཞི་བར་རབ་ཏུ་བསྒྲགས། །ཉི་མ་ཟླ་བ་མི་རྣམས་དེར། །སོ་སོ་
166a
༄#། །ཡོངས་སུ་བསྒྲགས་པ་ཡིན། །ཡི་གེ་ཕྱེད་ཙམ་མཆོག་གྱུར་དང ། །ཤིས་པ་ཞི་བ་སྐྱོན་མེད་པ། །ཡོན་ཏན་ཨོཾ་དང་ཡི་གེ་ཕྱེད། །ོཾ་ཞེས་གསལ་བར་བརྗོད་པ་ཡིན།། སྣ་ཡི་རྩེ་མོ་ར་ཡང་དག་ལྡན། །གཙུག་མཐའ་དང་ནི་ལག་པར་གནས། །ཉི་མ་ཟླ་བའི་སྦྱོར་བ་ལས། །ཡེ་ཤེས་མེ་ནི་ངེས་པར་སྐྱེ། །ལྕེ་དང་རྐན་གྱི་མཚན་མ་ནི། །སྦྱོར་ལས་ཐར་པར་དེ་བཤད་དེ། །ཱཿ ། འོག་ཏུ་ཨ་དང་ཡང་དག་ལྡན། །དེ་སྟེང་ཡི་གེ་ཨཱཿ ཉིད་དེ། །ཐད་ཀ་རུ་ནི་མ་བཤད་དེ། །ཁྱོད་ནི་ཡིག་ཕྱེད་ཞི་བ་ཉིད། །ཡི་གེ་ཨོཾ་ནི་ཚངས་པ་སྟེ། །ཱཿ ནི་ཁྱབ་འཇུག་ཡིན་པར་བཤད། །ཧཱུཾ་ནི་རླུང་དུ་གྱུར་པ་ཡིན། །དེ་ཉིད་དྲག་པོ་ཞེས་བྱ་འོ། །ཞི་བའི་ཕྱེད་ཕྱེད་ཅེས་བྱ་བ། །དེར་ནི་བདག་ཡོངས་བསྒྲགས་པ་ཡིན། །གནས་དང་འཕོ་དང་སྐྱེ་བ་དང ། །གཞན་གྱི་ལུས་ལས་ཡང་དག་འཕོ། །ཡེ་ཤེས་རང་ཉིད་མེ་ཡིན་ཏེ། །ཁྱབ་པར་འཛིན་པ་དེ་བཞིན་ནོ། །རལ་གྲི་ལ་སོགས་དངོས་གྲུབ་དེར། །བྱང་ཆུབ་ཕྱི་རོལ་ཉིད་འགྲུབ་འགྱུར། །གཉིས་པོ་འདི་དག་གནས་པ་ཡི། །རྣམ་དག་འདི་དག་རབ་ཏུ་བརྟག་།ཚངས་པ་ལ་སོགས་པ་རྣམས་དེར། །མ་འོངས་པ་རྣམས་སྒོམ་པར་འགྱུར། །དེ་ནི་མཐོ་རིས་སོགས་འགག་པས། །དེ་བཞིན་འབྱུང་བ་སེམ་པ་ཡིན། །རྣལ་འབྱོར་པ་རྣམས་སོགས་སྤངས་ནས། །གཉིས་སྤྱད་པར་ནི་རྣམ་པར་གནས། །ཤིན་ཏུ་སྦྱོར་གཅིག་གྱུར་སོང་བས། །འཇུག་
166b
འགྱུར་པ་ནི་དྲག་པོ་ཡིན། །ནམ་མཁའ་དགག་པའི་སྦྱོར་བ་ཡང ། །ཚངས་པར་གཞོལ་བའི་བདག་ཉིད་ཅན། །མངལ་གྱི་གཟུགས་གྱུར་ཁྱབ་འཇུག་སྟེ། །དེ་ཡི་དབུས་ན་དབུས་བཟུང་བ། །སྤུ་ཡི་ཆ་ནི་སྟོང་ལས་གཅིག་།ཞི་དེ་རྣམ་པར་མི་རྟོག་ཉིད། །ཐར་པ་གཅིག་པུར་དེ་སྟོན་བྱ། །ཐར་པའི་ངོ་བོ་ཉིད་མ་ཡིན། །དེ་ལྟ་བས་ན་འདི་ལོག་བྱ། །ཞི་བ་ཉིད་ནི་སྒྲོག་པ་འོ། །སྟོན་པ་དེ་རྣམས་ཕྱེ་ནས་ནི། །ཞི་བའི་ཆོས་རྣམས་སྨྲ་བར་འགྱུར། །ཐབས་ཆེན་དེ་བཞིན་ཤེས་རབ་དག་།འདི་འདྲ་མཐོང་བར་མི་འགྱུར་རོ། །ཚངས་ལ་སོགས་པའི་ལྷ་རྣམས་ཀུན། །ཁྱེད་ཀྱི་ཐལ་མོ་དག་ལ་གནས། །དེ་རྣམས་ཕྱག་རྒྱ་སྟོན་བྱེད་ཅིང ། །སྔགས་ནི་བྱེ་བ་མཐའ་ཡས་པ། །འདི་ཉིད་དུ་ནི་ཉི་ཟླ་དང ། །སྦྱིན་སྲེག་ལས་ཅན་མེ་དང་ནི། །ལོ་དང་ཟླ་བའི་སྦྱོར་བ་དང ། ། རྟག་ཏུ་འཆར་དང་འཕེལ་འགྲིབ་དང ། །དེ་ཉིད་གསུམ་གྱི་སྦྱོར་སྐྱེས་འདི། །དེ་ཉིད་གཅིག་པུ་རྣམ་པར་གནས། །ཞི་བ་ཉིད་ཀྱི་སྦྱོར་ཆོས་ལ། །དེ་ཡང་གཅིག་དང་དུ་མ་སྤངས། །ཁྱེད་ཀྱི་ཐལ་མོ་ལས་བྱུང་བ། །དེ་བས་དེ་ནི་འདའ་མི་བྱ། །དེ་བཞིན་གཤེགས་ཀུན་སྤངས་འགྱུར་བས། །དེ་ནི་སྤངས་བར་མི་བྱ་ཞིང ། །འདི་དག་དངོས་མེད་ལ་ལྟོས་པས། །རྣལ་འབྱོར་པ་ནི་མཆོག་ཏུ་འདོད། ། གཞན་དུ་རྣམ་རྟོག་ཉིད་ལས་ནི། །དངོས་གྲུབ་འབྲས་བུའི་སྣོད་མི་འགྱུར། །དེ་བས་ཐལ་མོ་སྦྱོར་བ་འདི། །སེམས་ཅན་རྗེས་བཟུང་དམ་པ་ཡིན། །མ་བསྡུས་པ་ཡི་སེམས་ཅན་རྣམས། །
167a
༄#། །བསྡུ་བའི་དོན་དུ་ཁྱོད་ཀྱིས་བྱ། །སྨད་བྱ་འོན་པ་ལྐུག་པ་དང ། །དེ་བཞིན་ལོང་བར་གྱུར་པ་དང ། །གང་ཞིག་འཕྱེ་བོ་ལ་སོགས་གྱུར། །དེ་རྣམས་ལ་ནི་ཕན་ཕྱིའོ་བྱ། །དེ་ལ་སོགས་པ་མདོར་བསྡུས་པ། །དེ་ནི་ཁྱེད་ཀྱི་ཐལ་མོར་གནས། །དེ་ནི་འཇིག་རྟེན་འདས་གཙོར་གྱུར། །དེ་ཉིད་བསྡུས་པའི་རྒྱུ་ཅན་ནོ། །དེ་ནི་ནང་མིན་ཕྱི་མ་ཡིན། །གཉིས་མིན་གཞན་གྱི་རྒྱུ་ལས་མིན། །ཕྱག་རྒྱ་ཚོགས་པ་ལས་སྐྱེས་མིན། །འཇིག་རྟེན་རྐྱེན་ལས་བྱུང་བ་མིན། །རྡོ་རྗེ་ཐལ་མོ་བསྡམས་པས་ན། །མིང་ནི་རྡོ་རྗེ་ཐལ་མོར་གྱུར། །སེམས་ཅན་རྣམས་ཀྱིས་རྟོགས་དཀའ་བའི། །སྙིང་པོ་བརྟག་པར་བྱ་བའི་མཆོག་།ཕྱག་རྒྱ་འདི་ལྟ་བུ་འདི་ཡིན། །ཕྱི་ནང་གཉིས་ཀྱི་མིང་ཅན་ནོ། །མི་བསྐྱོད་རིན་ཆེན་དཔག་མེད་དེ། །དངོས་གྲུབ་རྣམ་སྣང་དེ་བཞིན་གཤེགས། །འདི་དག་ལག་པ་གཡས་པ་ཡི། །མཐེའུ་ཆུང་ལ་སོགས་རྣམས་ལ་གནས། །གཉིས་པོར་གཅིག་གྱུར་དགེ་འདུན་ཏེ། །དེ་འདི་སྐྱབས་ནི་གསུམ་ཡིན་ཏེ། །སངས་རྒྱས་ཆོས་དང་དགེ་འདུན་རྣམས། །གཅིག་དང་གསུམ་དུ་བརྟགས་པ་ཡིན། །ཕན་ཚུན་བཅིངས་པའི་རྡོ་རྗེ་ཉིད། །ཤེས་རབ་ཐབས་ཀྱི་གནས་མཆོག་ཡིན། །ཐལ་མོ་བཅིངས་པ་ཙམ་གྱིས་ཀྱང ། །སངས་རྒྱས་ཐམས་ཅད་ཉིད་ཐོབ་འགྱུར། །སྐྱབས་མཆོག་གསུམ་དང་དེ་ཉིད་གསུམ། །རྡོ་རྗེ་གསུམ་དང་རྣམ་ཐར་གསུམ། །ཞལ་གསུམ་མདོག་གསུམ་སྤྱན་གསུམ་
167b
དང ། །ལྷ་གསུམ་དང་ནི་ཁམས་གསུམ་དང ། །དུས་གསུམ་དམ་ཚིག་མཆོག་གྱུར་གསུམ། །ཚུལ་གསུམ་དཀྱིལ་འཁོར་གསུམ་དུ་འགྱུར། །སྦྱོར་བ་གསུམ་དང་ལམ་གསུམ་སྟེ། །ཇི་སྲིད་རྟོགས་པས་བརྗོད་པ་རྣམས། །དེ་ནི་ཐལ་མོ་སྦྱོར་འདི་ཡིན། །འདོད་ནོར་ཡོན་ཏན་གསུམ་གྱི་མཆོག་།རིམ་དང་བསླབ་པ་སྟེར་བ་དག་།མ་འོངས་སྐྱེ་བོས་འཐོབ་པར་འགྱུར། །དེ་ཉིད་དུ་ནི་དེར་འགྱུར་ན། །གཅིག་དང་དུ་མ་རྣམ་པར་སྤངས། །ཆོས་བཤད་བཤད་པ་དངོས་མེད་པ། །འགྲོ་བ་རྐྱེན་གྱིས་ཡང་དག་སྡུད། །འདི་ནི་མཁའ་ལྟར་རང་བཞིན་གཅིག་།གནས་མེད་གནས་པ་ཞེས་བྱ་བ། །བསྡུ་བ་བྱས་པར་གྱུར་པས་ཀྱང ། །སྐུ་གསུང་དོན་གྱི་ཆོས་ཉིད་དོ། །འདི་ནི་ཐོག་མཐའ་མེད་པ་སྟེ། །དངོས་པོ་མེད་ཅིང་གནས་མེད་པ། །མཐའ་མེད་ཟད་པ་མེད་པར་འབྱུང ། །སྐུ་གསུང་ཐུགས་ཀྱི་རྐྱེན་ལས་ནི། །རྣམ་པའི་འཇུག་པའི་ཡེ་ཤེས་ཏེ། །དེ་ལས་སངས་རྒྱས་སྙིང་པོར་གྱུར། །ཧཱུཾ་གིས་སེམས་ཅན་ཡང་དག་འབྱིན། །སངས་རྒྱས་སྐུར་ནི་རབ་ཏུ་བརྟག། ཨོཾ་ནི་ཐམས་ཅད་སྡུད་པ་སྟེ། །ཱཿ ནི་གནས་པ་པོར་འགྱུར་རོ། །གཅིག་པུ་རྣམ་གསུམ་དེ་བཞིན་ལྔ། །གསལ་དང་མི་གསལ་སྦྱོར་བ་ནི། །རྟེན་འབྲེལ་ཆོས་ཉིད་འདི་ཡིན་ཏེ། །དེ་ཉིད་ཀྱི་ནི་སྔགས་བཤད་པའོ། །ཟློས་ན་བསམ་གཏན་རྣམ་བྲལ་བར། །དེ་ཡི་ལྷུན་གྲུབ་འབྲས་བུ་སྟེ། །རང་བཞིན་གྲུབ་པ་འདི་ཡིན་ཏེ། །འདོད་པའི་བཟླས་པར་དེ་བཤད་དོ། །རྣལ་འབྱོར་པ་ལ་དེ་
168a
༄#། །གསལ་ཏེ། །བྱིས་རྣམས་དེ་ལ་ཕྱིན་ཅི་ལོག་།རྐྱེན་ལས་བྱུང་བ་དེ་ཉིད་གསུམ། །དངོས་པོ་མེད་བར་དེ་བཤད་དོ། །དེ་ཉིད་བསྡུས་པ་བཤད་པ་ནི། །ཡིད་མིན་པ་\?\་བཟླས་པར་འགྱུར། །ཡིད་སྟོན་གཅིག་ནི་མདོར་བསྡུས་ལས། །རིངས་དང་དལ་དང་གནས་པ་རྣམས། །ཞི་བའི་ཆོས་ཉིད་ལ་སྐྱེ་སྟེ། །ནམ་མཁའི་དབྱིངས་དང་མཉམ་པར་ཐིམ། །དངོས་པོ་མེད་པའི་དེ་ཉིད་འདི། །རྟེན་འབྱུང་ཆོས་ཞེས་བྱ་བ་ཡིན། །ལོངས་སྤྱོད་རྫོགས་པའི་བསྡུས་ཏེ་གྱུར། །སྤྲུལ་པ་བསམ་མི་ཁྱབ་ཅེས་དང་\?\་སྡུད་པ་པོ་ནི་གང་གྱུར་པ། །དེ་ཡང་ཕུལ་དུ་གྱུར་པའི་མིང ། །རྡོ་རྗེ་ལ་སོགས་ཡང་དག་སྦྱར། །སེམས་ཅན་རྣམས་ནི་དེ་སྦྱོར་བྱེད། །དམ་ཚིག་ལ་སོགས་སྔོན་དེ་ནི། །དེ་ཉིད་ཀྱིས་ནི་རྡོ་རྗེ་སྦྱར། །སེམས་ཅན་དགོངས་པའི་སྦྱོར་བ་ཡིས། །དེ་ཡི་ཆོས་རྣམས་སྟོན་པར་བྱེད། །རྣམ་པ་དགུ་པོ་ཐོག་མཐའ་ཅན། །སྡུད་པ་པོ་རྣམས་བྱས་པ་ཡིན། །གསང་སྔགས་དེ་ཉིད་གནས་དགོད་པས། །སེམས་ཅན་རྣམས་ནི་དེར་འཇོག་སྟེ། །གསོལ་བ་འདེབས་དང་ཕྱག་འཚལ་དང ། །འཇིག་རྟེན་རྣམས་ལ་གསོལ་བ་དང ། །རྫོགས་སངས་རྒྱས་རྣམས་མཉེས་བྱེད་དེ། །ཁྱོད་ཀྱི་ཐལ་མོར་གནས་པ་ཡིན། ། གང་ཞིག་སེམས་ཅན་སངས་རྒྱས་གྱུར། །དེ་བཞིན་གཉིས་མེད་ཆོས་ཉིད་ཅན། །གནས་མེད་གནས་པའི་སྦྱོར་བ་ཡིས། །ཐམས་ཅད་སངས་རྒྱས་རྣམས་གནས་སོ། །སྣ་ཚོགས་
168b
མཚོན་པ་དེ་ཉིད་དོ། །མཐོང་བ་གསལ་བྱེད་ཐལ་མོ་ཡིན། །དེ་བས་དེ་རྣམས་མགུ་གྱུར་པ། །ཆོས་ཀྱི་དེ་ཉིད་རྐྱེན་ལས་སོ། །རྒྱུ་མེད་རང་གི་དེ་ཉིད་འདི། །ཁྱེད་ཀྱི་ཕྱག་རྒྱའི་སྦྱོར་ལས་བྱུང་།། གང་ཞིག་ཤེས་པས་འདོད་འགྲུབ་པའི། །དངོས་གྲུབ་དེས་ནི་འཐོབ་པར་འགྱུར། །ཱཿ ་ཉིད་དེར་ནི་མི་གསལ་བའི། །རྒྱུ་ལས་སྦྱོར་བར་གྱུར་པ་ཡིན། །དོག་པར་དེ་ནི་ཡོངས་བཤད་དེ། །དངོས་པོ་མེད་པར་རས་ཀྱི་མིང ། །འཕགས་པ་གཤིན་རྗེ་གཤེད་བསྒོམས་ལ། །གཞོན་ནུའི་གཟུགས་སུའང་བསྒོམ་པར་བྱ། །དོག་པ་དེ་ཡི་རས་དོན་ལས། །མི་སྣང་བ་ལ་སོགས་གྲུབ་ཅིང ། །ཡིད་བཞིན་ནོར་བུ་འདྲ་བའི་མཆོག་།འགྲོ་བའི་དོན་གཅིག་ཡང་དག་བྱུང ། །ཱཿ ་ཡི་དོག་རས་མཚོན་པས་ནི། །འཇིག་རྟེན་པ་ལ་དགོངས་པས་བཤད། །འདི་ནི་ཆོས་དང་རྫོགས་ལོངས་སྤྱོད།། སྤྲུལ་པས་དེ་ནི་གསུམ་དུ་འགྱུར། །བྱིས་པ་རྟོག་པར་བྱ་བའི་ཕྱིར། །དེ་ནི་རྣམ་པ་ལྔར་ཡང་འགྱུར། །ཐ་མལ་བྱིས་པའི་ཆོས་རྣམས་གང ། །རྣམ་ལྔ་གཅིག་པའི་རྣལ་འབྱོར་པ། །དེ་ཡང་ཤིན་ཏུ་ལྡན་སེམས་ཅན། །སེམས་ཅན་སོགས་ལ་རྣམ་པར་གནས། །རྟག་པ་ལྟར་ནི་སོ་སོར་སྣང ། །འགྲོ་བ་དུས་གསུམ་མཚན་ཉིད་གཅིག་།སྐྱེ་བ་མེད་ལས་སྐྱེས་པས་ན། ། གཅིག་དང་དུ་མ་རྣམ་སྤངས་པའོ། །ཤེས་འདོད་དེ་ཚེ་སྔགས་པ་ནི། །འགྲོ་བ་བྱིས་པ་དེ་ཚེ་སྤྱོད། །དེ་ནས་གསང་སྔགས་གྲུབ་འགྱུར་བ། །རྣམ་པར་མི་རྟོག་གཅིག་ཤེས་ཉིད། །ཡ་ཡི་
169a
༄#། །སྡེ་སོགས་གནས་བྱས་ཏེ། །སྔགས་ནི་ན་རི་བྲི་བར་བྱ། །རང་གི་སྡེ་བཅས་གནས་དག་ནི། །ཡི་གེ་ཨ་བཞིན་སྔོན་འགྲོ་བ། །སོ་སོ་གཞན་པའི་བཞི་པ་ནི། །ི་ཨུ་དང་ནི་རིང་པོར་བཅས། ། ཨཻ་ཨཽ་ཨུ་ཡ་སྟེ་མཐའ། །བཞི་པོ་དང་བཅས་ཟླུམ་པོར་བྲི། །བསམ་གྱིས་མི་ཁྱབ་སྦྱོར་ལྡན་པའི། །འགྲོ་བ་མཉམ་གཞག་བསྐྱེད་པ་ཡིན། །འདི་དག་རང་སྐྱེས་གནས་གཟུགས་ཀྱི། །ཆུ་ཡི་ཡི་གེར་ཞུགས་པར་འགྱུར། །དེ་ནས་གཞོན་ནུའི་གཟུགས་ཉིད་ཀྱང ། །རྣམ་པར་བསྒོམས་པས་སྐྱེ་བར་འགྱུར། །ཆ་བཅས་དབང་གནས་སྔགས་པ་ནི། །བླ་མེད་དངོས་གྲུབ་འཐོབ་པར་འགྱུར། །ན་ག་ཡི་ནི་གྲངས་བཞིན་དུ། །སྐུད་སོགས་སྦྱོར་ལ་གང་གནས་པ། །ཉི་ཤུ་ཡི་ནི་སྔོན་མ་ཡང ། །དེ་ནི་རས་ཏེ་བཞི་པའང་ཡིན།། སྔོན་མེད་ཆ་ལུགས་གཟུགས་གྱིས་ནི། །ཁམས་གསུམ་དག་ནི་ལྟ་བར་འདོད། །འགྲོ་བའི་དོན་ནི་བྱེད་གྱུར་པའམ། །མཉམ་ཉིད་ཡེ་ཤེས་དེ་ཉིད་ལས། །ཡོན་ཏན་གསུམ་ནི་བརྡ་བྱས་པ། །ཡོན་ཏན་མེད་པའི་ཡོན་ཏན་མིང ། །གཞོན་ནུའི་སྤྱོད་པའི་ལུས་ཀྱི་མིང ། །ལྟ་བ་འདི་ནི་བར་སྐྱེས། །དེ་ནི་སྒོ་གླེགས་མཐའ་ཡིན་ཏེ། །ེ་ཨུ་ངང་ནི་རིང་པོར་བཅས། །ཡི་གེ་གསུམ་བཅས་ཐིག་ལེར་ལྡན། །ཚེག་དྲག་མཐའ་ཡི་རིང་སྡེ་ཅན། །ཡི་གེ་ཨ་ནི་ཡིག་སྦྱོར་བའང ། །བཅུ་གཅིག་པར་ཡང་གྱུར་པ་ཡིན། །དེ་ཉིད་རིང་པོ་རིང་པོའི་མཐས། །བཅུ་གཉིས་
169b
བ་མི་གྲངས་སུ་འགྱུར། །དེ་ཉིད་ཡི་གེ་ཨུར་སྦྱོར་ལས། །ཡི་གེ་ཨོཾ་ཞེས་བརྗོད་པ་ཡིན། །སྔ་མའི་རི་མོའི་སྦྱོར་བ་ཡིན། །མིང་ནི་བཅུ་བཞི་པར་འགྱུར་རོ། །ཅི་སྟེ་ཨ་ལས་སྔགས་པས་ནི། །ཱཿ ་ཉིད་དུ་ནི་བལྟ་བར་བྱ། །དེ་བཞིན་ཨཱ་ཡི་སྦྱོར་བ་ལས། །ཡི་གེ་ཨ་ནི་ཅི་འདོད་པར། །ཇི་བཞིན་གྲངས་ཀྱིས་ཡང་དག་བལྟ། །རེ་རེའང་ཨ་ཡི་སྦྱོར་བས་བསྒོ། །ི་རྀ་ལྀ་ཨུའི་ཚོགས་ལས་ཀྱང ། །སྔགས་པ་ཡ་ར་ལ་ཝའི་གཟུགས། །ལྐོག་མ་ཁ་དང་བར་དང་ནི། །རྐན་དང་སྤྱི་བོར་གང་གནས་པ། །གང་ཚེ་ཨ་ཀའི་སྡེ་གྲངས་ལས། །ཱ་ཡི་ཁ་ཡི་རྒྱབ་ན་གནས། །ི་ཚན་ཕྲག་པ་ལག་པ་དང ། །ཚིགས་རྣམས་ལ་ནི་དེ་བཞིན་ནོ། །དཔུང་པ་དང་ནི་ལག་པ་དང ། །ལག་པ་གཡོན་པར་རབ་ཏུ་བརྟག་།དཔྱི་དང་བརླ་དང་བྱིན་པ་དང ། །རྐང་པ་གཡས་གཡོན་དེ་བཞིན་ནོ། །གཟུགས་དེ་ཡི་ནི་གྲངས་མཉམ་པས། །ཏ་ཚན་ཤིན་ཏུ་དངོས་གྲུབ་སྟེར། །ུ་ཚན་དེ་བཞིན་དབུས་དང་ནི། །ལག་པ་རུ་ནི་ཡོངས་སུ་བཤད། །རྐང་པ་ཡང་ནི་རི་ཏིའི་ཚན། །འདས་པའི་ཚུལ་དུ་བཞུགས་པ་ཡིན། །དེ་བཞིན་ཉིད་ཀྱི་སྦྱོར་ལྡན་པའི། །སྔགས་པ་རྣམས་ཀྱིས་ཤིན་ཏུ་མཐོང ། །ལྷུན་གྱིས་གྲུབ་པས་དངོས་གྲུབ་པ། །མེ་ཏོག་གིས་མཛེས་ཕྲེང་བ་བཞིན། །རང་རྒྱུད་ཀྱི་ནི་ནང་ཉིད་དུ། །ལྷ་མཆོག་དག་ནི་བྱ་བ་ཡིན། །དགོངས་པ་ལ་སོགས་རྣམ་པ་ཀུན། །དེ་ཉིད་ལས་ནི་བདག་འགྲུབ་འགྱུར། །ཚ་བའི་བཞི་བཞི་སྡེ་སྦྱོར་བས། །
170a
༄#། །མཁས་པ་ཡི་ནི་སྒོ་རྣམས་བྱ། །ཀ་ཙ་ཊ་ཏ་པ་ཚན་ཡང ། །དབུས་དང་ཤར་ལ་སོགས་སྔོན་འགྲོ། །འགྲོ་ལ་ཕན་པའི་འདོད་པ་ཡང ། །མ་སྤེལ་བར་ནི་མཐོང་བ་ཡིན། །ཐམས་ཅད་ཀྱང་ནི་རྫོགས་ཡི་གེ་།ཡི་གེ་ཧཱ་ཡིས་མཆོད་པར་བྱ། །སྣ་ཚོགས་པ་ནི་འབྱིན་བྱེད་ཅིང ། །འགྲོ་བ་དུས་གསུམ་གཅིག་པའི་དངོས། །ཡི་གེ་ཨ་ནི་ལུས་སུ་བྱ། །ལྷག་མ་རྣམ་པ་དང་བཅས་པ། །མཚམས་མེད་ལྔ་ཡི་སྦྱོར་བ་ལས། །སྔགས་པ་འགྲོ་བ་ཕན་པར་སྟོན། །ཤ་ཐོག་མཐའ་གནས་སྔགས་ལས་སྐྱེས། །དབང་བསྐུར་གསུམ་པོ་སྤྱི་ལས་སྐྱེས། །གཟུགས་མེད་རྟོགས་པའི་ཆོས་རྣམས་ནི། །སྐད་ཅིག་གཅིག་གིས་ངེས་སྦྱོར་གྱུར། །དེ་ཚེ་དཀྱིལ་འཁོར་མེད་བྱས་པ། །འཇིག་རྟེན་པ་རྣམས་ཆོས་དགར་འགྱུར། ། ཀུ་ཧ་གནས་བྱང་ཕྱོགས་གནས། །ཡོད་པ་ཉིད་ཀྱང་དུས་གསུམ་འདས། །གང་དང་གང་ནས་བྱུང་བ་ཡི། །གསང་སྔགས་བསམ་གྱིས་མི་ཁྱབ་གསུངས། །དེ་དང་དེ་ནི་བཞུགས་གྱུར་པ། །རང་གི་མཚན་མ་གཅིག་ཤོས་ཉིད། །གཟུགས་མེད་འདི་ལ་གནས་ཡོད་པ། །ཆ་ནི་གསུམ་ཞེས་བྱ་བར་འགྱུར། །སྟེང་འོག་ཕྱོགས་ཀྱི་ཆ་རྣམས་སུ། །དངོས་མེད་པ་ནི་རྣམ་པར་གནས། །དངོས་པོ་གཅིག་གྱུར་མཐོང་བ་དང ། །འགྲོ་བཅས་ཚངས་པ་འགྲོ་བདག་ཉིད། །ཚངས་པའི་གནས་པ་བཞི་པོ་ལས། །སྨོན་ལམ་ལ་སོགས་བསྒོམ་བྱ་བའོ། །འགྲོ་བ་དོན་གཏོགས་འདོད་
170b
བའི་ཡོན་ཏན་གྱུར་རྣམས་ལ། །དགྱེས་པའི་བདེ་མཆོག་དགའ་བའི་འདོད་པ་མཛོད། །སྔོན་ཆད་མཛད་པའི་སྨོན་ལམ་རབ་མཆོག་དགོངས་ནས་ནི། །ཐུབ་པ་རྡོ་རྗེའི་ཚིག་མཆོག་རྣམ་པར་དབྱེ་བར་གསོལ། །ནོར་བུ་རིན་ཆེན་དག་གིས་རྣམ་བརྒྱན་སྐུ་ཡི་མཆོག་།འགྲོ་བའི་དོན་བྱེད་སྲིང་མོ་བདག་ལ་བརྟེན་པར་མཛད། །ལྷག་པའི་སྙིང་རྗེ་ལས་བྱུང་རབ་མཆོག་ལྡན་པའི་སྐུ། ། བདག་ནི་ཡོངས་སུ་བཟུང་ལ་ཆོས་རྣམས་དོན་ཡོད་མཛོད། །སྲིང་མོས་ཀྱང་ནི་ཁྱད་པར་དུ། །དེ་ལྟར་བསྐུལ་བ་ཙམ་གྱིས་ནི། །དེ་ནས་ཡོངས་སུ་འཛིན་མཛད་དེ། །རིག་པའི་པདྨ་དཔལ་དུ་མཛད། །ཤིན་ཏུ་སྙན་ཅིང་ཡིད་འོང་དབྱངས་ཀྱིས་ནི། །ཕན་པས་མྱུར་དུ་འགྲོ་བ་གཉིས་མེད་འདིར་སྣོད་གྱུར། །བླ་མ་བདག་ནི་གལ་ཏེ་གསོན་པར་མཆིས་བཞེད་ན། །དགའ་བ་ལས་བྱུང་ཆོས་དགའ་བདག་ལ་དགྱེས་པར་མཛོད། །འགྲོ་བ་དང་ནི་འོད་དང་གནས་པ་ཙམ་འདི་ནི། །ནམ་ཡང་ལྟོས་པར་གྱུར་པ་དག་གི་མངའ་བ་ལགས། །ཀུན་ཏུ་སོང་བའི་བདག་ཉིད་ཅན་གྱི་དམ་ཚིག་སྟོན། །འདོད་པའི་ཡོན་ཏན་རྣམས་དང་ཁྱེད་བདག་འདོད་པ་མཛོད། །དགོངས་པའི་ཡེ་ཤེས་རྡོ་རྗེ་ཡིས། །སངས་རྒྱས་ཡོན་ཏན་གཅིག་ལ་བཞུགས། །བཟླས་བརྗོད་སྦྱིན་སྲེག་དེ་བཞིན་ཁྲུས། །དཀྱིལ་འཁོར་ཡོངས་སུ་བརྟགས་པ་མཛད། །འདོད་པ་མེད་ཅིང་ཆགས་ལ་ཞི། །དེ་ཡང་དོན་དམ་དག་གྱུར་ཡིན། །སྤྱོད་དུས་དེ་བཞིན་།སྔགས་པ་ནི། །བཟླས་བརྗོད་དངོས་པོ་མེད་པ་ཡིན།
171a
༄#། །བསྙེངས་པ་ཡང་ནི་ཡིད་བཟང་ལྡན། །མདའ་དང་རིག་བྱེད་ཡོན་ཏན་དང ། །ཟུང་དང་ཟླ་དཀྱིལ་རྣལ་འབྱོར་པ། །དབྱངས་ཀྱི་ཡི་གེ་གཞག་བར་བྱ། །ཧ་ཡི་སྡེ་ཚན་\?\་སྡེ་དང ། །བཅུ་གཉིས་ཕྱེད་ཕྱེད་དག་ཏུ་སྦྱར། །གཤིན་རྗེ་གཤེད་ཀྱི་གཟུགས་འདི་ནི། །ཉི་མའི་དཀྱིལ་འཁོར་དག་ལ་དགོད། །དེ་ནས་སྔགས་པ་མདུན་འདུག་སྟེ། །དགོངས་བའི་དོན་གྱིས་བརྟག་པར་བྱ། །ཕུང་པོ་ཁམས་ལ་སོགས་ལྟ་བ། །བརྡ་ལས་ཇི་ལྟར་ལུས་ཡིན་བཞིན། །མ་བྱིན་ལེན་པ་བྱང་ཆུབ་སེམས། །ཀུན་རྫོབ་བསྟན་པ་རྫུན་སྨྲ་བ། །ཕུང་པོ་སྲོག་ཆགས་གྱུར་བ་སྟེ། །ཚངས་བའི་གནས་བཞི་བུད་མེད་ཡིན། །མི་སྦྱིན་ཚིག་དང་རྐང་པ་སྟེ། །དེ་བཞིན་རྟེན་པ་ཉིད་ཀྱང་ནི། །དུས་གསུམ་སྦྱོར་བ་གཅིག་པུ་རུ། །སྔགས་བ་ཡིས་ནི་དེ་བྱའོ། ། བཤང་བ་ཞེས་ནི་ཡུལ་ལ་བཤད། །གཅི་བ་ཞེས་ནི་དབང་པོ་ཡིན། །དེ་དག་ཟ་བར་བཤད་པ་ནི། །མ་སྐྱེས་གཅིག་པུར་མཐོང་བ་འོ། །ཁྲག་ནི་པགས་བར་ཡང་དག་བཤད། །ས་བོན་ལུས་ཞེས་བྱ་བ་ཡིན། །རྐང་ནི་སེམས་ཀྱི་ཀུན་རྟོག་པ། །ཟ་བ་དངོས་མེད་གྱུར་པ་འོ། །སྨོན་ལམ་དབང་གིས་འདི་རྣམས་ནི། །བི་མུ་ར་ཤུ་པ་ས་འདི། །ལྷ་རྣམས་སྦྱོར་བའི་ཆོས་ཉིད་དུ། །བདུད་རྩི་ཞེས་ནི་བརྗོད་བ་ཡིན། །དགོངས་པ་ཡིས་ནི་བཤད་པ་ལ། །བྱིས་པ་རྣམས་ནི་ཡི་གེར་རྟོག། རྡོ་རྗེ་ཐེག་ལ་གནས་ཁྱོད་ཀྱང ། །ཆོས་ཉིད་དེ་ཡང་མི་ཤེས་སོ། །རྟོག་
171b
པ་ཀུན་ལས་རྣམ་འདས་པས། །ཆོས་ཀྱི་དབྱིངས་ཏེ་མཁའ་དང་མཚུངས། །དེ་འདྲ་འཇིག་རྟེན་རྒྱང་པན་པ། །མཐོན་པོའི་གསང་གིས་རྟོག་པར་བྱེད། །ཡི་གེ་གང་གིས་མི་གང་ཞིག་།འགྲོ་ལ་གསལ་བར་རྟོག་བྱེད་པ། །འགྲོ་དོན་གཅིག་པའི་སྦྱོར་བ་ལས། །དེ་ཉིད་ཀྱིས་ནི་དེ་ཉིད་མཐོང ། །གང་ཞིག་རྣམ་སྨིན་སྨིན་པ་ཡིས། །སེམས་ནི་དངོས་གྲུབ་ལ་གཞོལ་བ། །རྫོགས་ལོངས་སྤྱོད་པའི་སྐུར་སྦྱོར་ལས། །དངོས་པོ་མེད་པ་ཉིད་དུ་བྱུང ། །བདག་ཉིད་བསམ་གྱིས་མི་ཁྱབ་གཟུགས། །ཀུན་རྫོབ་དོན་གྱི་གཉེན་པོར་འབྱུང ། །སྤྲུལ་པའི་ལུས་ལས་སྔགས་པས་ནི། །སྒྱུ་མ་བཞིན་དུ་སྟོན་པར་བྱེད། །གསང་བའི་དགོངས་པ་དེ་ཉིད་འདི། །འཇམ་དཔལ་ཡེ་ཤེས་དམ་པ་འོ། །རྡོ་རྗེ་གསུམ་གནས་སྦྱོར་བ་ཡིས། །སྒོམ་པའི་བདག་ཉིད་ཅན་གྱིས་བསྒོམ།། ནམ་མཁར་བརྟགས་པའི་རྣལ་འབྱོར་ལ། །ཕུང་པོ་དགོན་པ་ཆེན་པོར་འདོད། །གནས་མེད་གནས་བའི་སྦྱོར་བ་ཡིས། །དེ་བཞིན་ཉིད་གནས་ས་ཕྱོགས་ཡིན། །ལོངས་སྤྱོད་རྫོགས་པའི་དཔག་བསམ་ཤིང ། །དངོས་གྲུབ་སྣ་ཚོགས་མེ་ཏོག་ལྡན། །སྤྲུལ་པའི་འབྲས་བུ་ཤིན་ཏུ་མཛེས། །ཡང་དག་རྫོགས་པའི་བྱང་ཆུབ་རི། །དངོས་མེད་དབེན་པ་ཉམས་དགའ་བ། །རྡོ་རྗེ་ཞེས་བྱ་དེས་བསྒྲུབ་བྱ། །ཕུང་སོགས་ཡན་ལག་ཐམས་ཅད་དེ། །སངས་རྒྱས་འབྱུང་བ་དངོས་གྲུབ་གྱུར། །སྔགས་འདོན་བར་ནི་གང་གྱུར་བ། །བསྡུས་བ་སྔགས་ནི་གཅིག་པུ་པ། །ལུས་སོགས་
172a
༄#། །རྡོ་རྗེ་གསུམ་ལ་ནི། །རྡོ་རྗེ་འཇམ་པ་བསྒོམ་པར་བྱ། །ལུས་ལ་སོགས་པ་རྡོ་རྗེ་གསུམ། །དེ་ཉིད་གསུམ་ནས་སྤྲོ་བར་བྱ། །རྡོ་རྗེ་གསུམ་དང་ལེགས་སྦྱོར་ལས། །འཇམ་པའི་རྡོ་རྗེ་འདྲ་བར་འགྱུར། །ནམ་མཁའ་མཐའ་ཡས་ཡང་དག་རྟོག་།སེམས་སྦྱོར་བ་ནི་དཔག་ཚད་ཡིན། །ལྔ་བཅུ་གཉིས་གྱུར་གང་ཡིན་པ། །བརྒྱ་བརྒྱ་པ་ནས་མངོན་ཕྱོགས་ལ། །ཅི་རིགས་གཅིག་པའི་ཡང་དག་རྟོགས། །སྣ་ཚོགས་རྡོ་རྗེ་འབར་ཅིག་སྩོལ། །དཔག་ཚད་བརྒྱ་ཡི་ཁྱོན་ཙམ་དུ། །འབར་བའི་རྡོ་རྗེ་སྣང་བ་ཡིས། །ས་ལ་སོགས་པ་བརྒྱན་པ་ནི། །དེ་ནི་སྣང་བ་ཞེས་བཤད་དོ། །ཚངས་པ་དབང་པོ་ལ་སོགས་ལྷ། །དད་བས་དེ་ལ་ཕྱག་ཀྱང་བྱེད། །འདི་ནི་མི་སྣང་བྱེད་པ་སྟེ། །ཏིང་འཛིན་འཇམ་པའི་རྡོ་རྗེ་ཉིད། །རྣམ་པར་སྨིན་པ་ལྡོག་གྱུར་ཅིང ། །ཇི་སྐད་གསུངས་པ་འགྲུབ་པར་འགྱུར། །ཕུང་པོ་ལ་སོགས་གྲངས་མཉམ་པར། །མི་བསྐྱོད་ལ་སོགས་རབ་ཏུ་བརྟག་།བཤང་གཅི་སྦྱངས་ལས་དེར་གྱུར་པ། །གང་ཞིག་དམ་ཚིག་ཅེས་བྱའོ། །དམ་ཚིག་ཅེས་བྱ་དེ་དག་མཆོག་།མི་ཕྱེད་རྡོ་རྗེ་གསུམ་འབྱུང་བས། །དཀོན་མཆོག་གསུམ་ནི་མཉམ་བྱས་ཏེ། །བདག་མེད་པ་ཡང་བསྒོམ་པར་བྱ། །དཀོན་མཆོག་གསུམ་ནི་ལྕགས་གསུམ་ཡིན། །བདག་མེད་ཅེས་བྱ་ཁ་ཡིན་ཏེ། །གང་འདི་རྣམ་རྟོག་གཅིག་ཉིད་དུ། །བཅུག་པ་རིལ་བུ་ཡིན་པར་འདོད། །སངས་རྒྱས་རྣམས་ཀྱིས་
172b
མི་བྱེད་པའི། །སྒོམ་པ་སེམས་ཀྱི་དམ་པའོ། །དེ་ལྟར་དེ་ཉིད་ཤེས་བསྒོམས་ནས། །སྐད་ཅིག་གིས་འཇམ་རྡོ་རྗེར་འགྱུར། །འཁོར་ལོ་འོད་འཕྲོ་མཚུངས་པར་འགྱུར། །རང་གི་སྔགས་ཀྱིས་རྣམ་བསྒོམས་ནས། །སངས་རྒྱས་ཀུན་གྱི་གནས་བསྒོམས་ན། །སངས་རྒྱས་འདྲ་བར་འགྱུར་བར་བཤད། །སུམ་ཅུ་རྩ་དྲུག་གནས་སྦྱོར་བའི། །རི་རབ་ཀྱི་ནི་རྡུལ་ཕྲན་རྣམས། །དེ་སྙེད་དེ་ཡི་རྗེས་འབྲང་རྣམས། །དམ་ཚིག་རྡོ་རྗེ་ཞེས་བྱ་བའོ། །གནས་ནི་ལྷ་ཡི་སྦྱོར་བ་སྟེ། །སྣ་ནི་རི་རབ་ཅེས་བྱའོ། །བདག་ཉིད་ཆེན་པོ་སུམ་ཅུ་བདུན། །ནམ་མཁར་སྤྲོ་བ་བསམ་མི་ཁྱབ། །འཇམ་པའི་རྡོ་རྗེ་བདག་པོ་སྟེ། །འདི་དག་འཁོར་དུ་གྱུར་པ་ཡིན། །འཇིག་རྟེན་པ་ཡི་རང་ངོ་བོ། །ཕྱི་ཡི་རི་རབ་བརྟག་པ་ཡིན། །དམ་ཚིག་རྡོ་རྗེ་ཞེས་བྱ་བའི། །འཁོར་ལོའི་ཏིང་ངེ་འཛིན་ཅེས་བྱ། །འཁོར་ལོ་དངོས་གྲུབ་རྙེད་སླ་བ། །སྐད་ཅིག་སྦྱོར་བས་སྒྲུབ་བ་འོ། །རྡོ་རྗེ་ཆེན་པོ་རང་སྔགས་ཀྱིས། །དཀྱིལ་འཁོར་དབུས་སུ་རབ་བསྒོམས་ན། །རྡོ་རྗེ་ཀུན་གྱི་གནས་མཆོག་སྟེ། །ཐུགས་ཀྱི་རྡོ་རྗེ་འདྲ་བར་འགྱུར། །རི་རབ་སུམ་ཅུ་རྩ་དྲུག་གི། །རྡུལ་ཕྲན་ཇི་སྙེད་ཡོད་བ་ཡི། །དེ་སྙེད་བུད་མེད་དེ་ཡི་ནི། །སུམ་འགྱུར་གནས་སུ་འགྱུར་བ་ཡིན། །ཁམས་གསུམ་གྱི་ནི་རྡོ་རྗེ་ཆེ། །དྲག་པོ་ཡིས་ནི་ཕྱག་བྱས་འགྱུར། །རྡོ་རྗེ་དམ་ཚིག་ཅེས་བྱ་བའི། །ཏིང་འཛིན་འདི་ནི་ཡང་དག་བཤད། །པདྨ་ཆེན་པོ་འདབ་བརྒྱད་པ། །རང་སྔགས་རྡོ་རྗེ་ལས་བྱུང་བ། །ཆོས་
173a
༄#། །རྣམས་ཀུན་གྱི་གནས་བསྒོམས་ན། །རྡོ་རྗེ་ཆོས་དང་འདྲ་བར་འགྱུར། །སུམ་ཅུ་རྩ་དྲུག་གནས་སྦྱོར་བའི། །རི་རབ་རྡུལ་ཕྲན་གྲངས་སྙེད་ཀྱི། །སངས་རྒྱས་རྡོ་རྗེ་མཆོག་གི་ནི། །དཀྱིལ་འཁོར་ལ་ནི་བདག་ཉིད་འཇོག་།གོས་མེད་མཉམ་ཉིད་ཡེ་ཤེས་ཀྱི། །རྡོ་རྗེ་པདྨོ་གྲུ་བཅས་སྦྱིན། །སོ་སོར་རྟོག་པ་ཞེས་བྱ་བའི། །ཏིང་ངེ་འཛིན་ནི་ཡང་དག་བཤད། ། ཤིན་ཏུ་གྲངས་མེད་བསྐལ་པར་ནི། །གྲངས་ཀྱི་མིང་གིས་གནས་པར་ནི། །གནས་ཤིང་སྒོམ་པར་བྱེད་པ་ཡིན། །དེ་ཡི་ཡེ་ཤེས་ལྔར་ལྡན་པ། །སངས་རྒྱས་ཀུན་གྱི་དགོངས་པ་ནི། ། འཇིག་རྟེན་ཕན་ཕྱིར་གསུངས་པ་རྣམས། །ཕྱོགས་བཅུའི་སངས་རྒྱས་མཐའ་ཡས་པའི། །ཡོན་ཏན་གསུམ་ནི་ཡོངས་སུ་བསྟེན། །འོད་ཟེར་ལྔ་ཡི་མདོག་འདྲ་བའི། །རང་སྔགས་ལས་བྱུང་རལ་གྲི་ནི། །བློ་ལྡན་ལག་པར་དེ་བཞག་ན། །རྡོ་རྗེ་རིག་པ་འཛིན་པར་འགྱུར། རང་གི་སྔགས་ཀྱི་ཁོང་ཆུད་འདི། །ཧོ་ཧོ་ཧཱུཾ་དེ་ཁམས་གསུམ་པ། །པདྨ་སྤངས་པའི་ཚངས་པ་ཆེར། །རྣལ་འབྱོར་པ་དེ་འགྱུར་བ་ཡིན། །ཁམས་གསུམ་ཀུན་གྱིས་ཆེར་མཆོད་ཅིང ། །ཚངས་དང་ལྷ་མིན་ཕྱག་བྱས་པ། །སྟོང་གསུམ་མི་ཡི་མཆོག་གཅིག་པུ། །དབང་ཆེན་པོ་ཡི་ཚངས་པར་འགྱུར། །ཐུགས་ཀྱི་རྡོ་རྗེ་མཆོག་བསྒོམས་པས། །དངོས་གྲུབ་ཇི་ལྟར་འདོད་པ་དག་།སྐུ་གསུང་ཐུགས་ཀྱི་རྡོ་རྗེ་ལས། །དེ་ནི་དེ་མ་ཐག་ཏུ་འཐོབ། །རང་གི་རྡོ་
173b
རྗེ་ཏིང་འཛིན་འདི། །དངོས་མེད་གཅིག་པུ་ཡང་དག་བྱུང ། །བྱང་གྲོལ་ལ་ཡང་དེ་མི་གནས། །རལ་གྲིའི་ཁ་དང་འདྲ་བར་འགྱུར། །ོཾ་ནི་རིལ་བུ་ཙ་ན་ཀའི། །འབྲུ་ཚད་ཙམ་དུ་བསམས་ནས་ནི། །དབུས་སུ་རང་གི་ལྷ་ཡི་གཟུགས། །བསམས་ཏེ་ཁར་བཅུག་རྣམ་བསྒོམས་ན། །བྱང་ཆུབ་ཡེ་ཤེས་འོད་པོ་ཆེ། །བློ་ལྡན་དེ་མ་ཐག་ཏུ་འགྱུར། །ཛམྦུ་ཆུ་བོའི་གསེར་མདོག་གམ། །ཉི་མ་འཆར་ཀའི་མདོག་འདྲ་བའི། །ཙ་ན་ཀ་ཡི་འབྲུ་ཚོད་ཙམ། །ཡི་གེའི་དམ་པ་ཨཱཿ ་བསམ་མོ། །དེ་ཡི་དབུས་སུ་ལྷ་ཡི་གཟུགས། །ཁར་བཅུག་ནས་ནི་རྣམ་བསྒོམས་ན། །བྱང་ཆུབ་ཡེ་ཤེས་འོད་པོ་ཆེ། །དེ་ནི་དེ་མ་ཐག་ཏུ་འགྱུར། །ཛམྦུ་ཆུ་བོའི་གསེར་མདོག་དང ། །ཉི་མ་འཆར་ཀའི་མདོག་འདྲ་བའི། །ནམ་མཁའི་དབུས་ན་གནས་པ་ཡི། །ཙ་ན་ཀ་ཡི་འབྲུ་ཚད་ཙམ། །ཡི་གེ་ཧཱུཾ་ནི་རྣམ་བསམས་ཏེ། །དབུས་སུ་རང་གི་ལྷ་བསམས་ནས། །ཁར་བཅུག་ནས་ནི་རྣམ་བསམས་ན། །རྡོ་རྗེ་སེམས་དཔའ་འོད་པོ་ཆེ། །དཔལ་ལྡན་དེ་མ་ཐག་ཏུ་འགྱུར། །ཛམྦུ་ཆུ་བོའི་གསེར་མདོག་དང ། །ཉི་མ་འཆར་ཀའི་མདོག་འདྲ་བའི། །རྣམ་བར་སྣང་མཛད་མཁའ་དབྱིངས་ཀྱི། །དཀྱིལ་འཁོར་དབུས་སུ་རབ་བསྒོམས་ལ། །ལག་ཏུ་འཁོར་ལོ་རྣམ་བསྒོམས་ན། ། འཁོར་ལོའི་རིག་པ་འཛིན་པར་འགྱུར། །རྡོ་རྗེའི་སྐུ་མདོག་སྦྱོར་བ་ཡང ། །འདི་ནི་ཡེ་ཤེས་མཆོག་སྒྲུབ་པའོ། །འཁོར་ལོ་ཆེན་པོའི་རིགས་བསྒོམས་ཏེ། །ཡེ་ཤེས་རྡོ་རྗེ་དག་གིས་བྱ། །ཛམྦུ་
174a
༄#། །ཆུ་བོའི་གསེར་མདོག་གམ། །ཉི་མ་འཆར་ཀའི་འོད་འདྲ་བའི། །ནམ་མཁའི་དབྱིངས་ཀྱི་དབུས་གནས་པར། །རྡོ་རྗེ་མི་ཕྱེད་རབ་བསྒོམས་ཏེ། །ལག་ཏུ་རྡོ་རྗེ་བསྒོམས་ན་ནི། །རྡོ་རྗེའི་རིག་པ་འཛིན་པར་འགྱུར། །རྡོ་རྗེ་མཆོག་གི་སྒྲུབ་པ་འདི། །རྡོ་རྗེ་སྐུ་ཡི་སྦྱོར་བ་ལས། །རྡོ་རྗེ་རིགས་ཀྱི་མཆོག་བསྒོམས་པས། །ཡེ་ཤེས་རྡོ་རྗེ་དག་གིས་བྱ། ། ནམ་མཁའི་ཁམས་ཀྱི་དབུས་གནས་པར། །རིན་ཆེན་ལ་ནི་རིན་ཆེན་བསྒོམས། །དེ་ཉིད་ལག་ཏུ་ལེགས་བཞག་ན། །རིན་ཆེན་རིག་པ་འཛིན་པར་འགྱུར། །རིན་ཆེན་མཆོག་གི་སྒྲུབ་པ་འདི། །རིན་ཆེན་སྐུ་ཡི་སྦྱོར་བ་ལས། །རིན་ཆེན་རིགས་ཀྱི་མཆོག་བསྒོམས་པ། །ཡེ་ཤེས་རྡོ་རྗེ་དག་གིས་བྱ། །ནམ་མཁའི་དབྱིངས་ཀྱི་དབུས་གནས་པར། །ཚེ་དཔག་མེད་པ་རབ་བསྒོམས་ལ། །ལག་ཏུ་པདྨ་བསྒོམས་ན་ནི། །པདྨའི་རིག་པ་འཛིན་པར་འགྱུར། །པདྨ་མཆོག་གི་སྒྲུབ་པ་འདི། །པདྨའི་སྐུར་ནི་སྦྱོར་བ་ལས། །པདྨའི་རིགས་ཆེན་བསྒོམས་པ་ནི། །ཡེ་ཤེས་རྡོ་རྗེ་དག་གིས་བྱ། །ནམ་མཁའི་དབྱིངས་ཀྱི་དབུས་གནས་པར། །དོན་ཡོད་མཆོག་ནི་རབ་བསྒོམས་ལ། །ལག་ཏུ་རལ་གྲི་རབ་བསྒོམས་ན། །རལ་གྲིའི་རིག་བ་འཛིན་པར་འགྱུར། །དམ་ཚིག་མཆོག་ནི་འདི་སྒྲུབ་པ། །སྐུ་ཡི་དམ་ཚིག་སྦྱོར་བ་ལས། །དམ་ཚིག་རྡོ་རྗེ་རིགས་བསྒོམས་པ། །ཡེ་ཤེས་རྡོ་རྗེ་དག་གིས་བྱ། །བསྒྲུབ་བྱ་རྡོ་རྗེའི་དབྱེ་བ་ཡིས། །མདུང་ཐུང་རྡོ་རྗེ་ལྕགས་ཀྱུ་སོགས། །
174b
སྐུ་གསུང་ཐུགས་ཀྱི་སྒྲུབ་པ་ཡིས། །བསམ་གཏན་ཉིད་ཀྱིས་སྒྲུབ་པར་འགྱུར། །དམ་ཚིག་ཆེན་པོ་འབྱུང་བ་ཡི། །དམ་ཚིག་དངོས་གྲུབ་ཅེས་བྱ་བའི། །མི་ཕྱེད་རྡོ་རྗེ་གསུམ་དབང་ཕྱུག་།སྣ་ཚོགས་བཅོམ་ལྡན་འདས་ཀྱིས་གསུངས། །སྡུག་བསྔལ་དང་ནི་ཀུན་འབྱུང་ཉིད། །འགོག་དང་ལམ་སྟེ་བཞི་པོ་ནི། །ལམ་གྱི་བཞི་མདོར་ཡང་དག་བཤད། །སྒྲུབ་པ་པོ་ནི་གནས་མིང་ཅན། །ཤིང་གཅིག་དྲུང་དུ་ཡང་དག་རྟོག་།ཆོས་དང་རྫོགས་ལོངས་སྤྱོད་མིང་ཅན། །སྣ་ཚོགས་མཚན་གཅིག་ཡང་དག་དགོང ། །མཚན་མ་རྐྱེན་གྱི་གཟུགས་ཅན་ནོ། །འབྱིན་དང་རྔུབ་པ་ཉིད་དང་ནི། །གནས་པ་ཡིས་ནི་ཉེར་མཛེས་པ། །ཡིད་སྟོན་པ་ཡི་མཉམ་སྦྱོར་ལ། །རབ་ཏུ་ཞི་བའི་ཞི་གནས་སུ། །དུས་གསུམ་རྟོག་པ་གཅིག་ལས་འདས། །རྡོ་རྗེ་ལྕགས་ཀྱུ་ཁྱད་པར་དང ། །སྒྲུབ་པ་པོ་ནི་རྟག་ཏུ་སྒྲུབ། །སྦྱོར་གསུམ་སྔགས་ཀྱི་སྐྱེས་བུ་ནི། །སྦྱོར་གསུམ་རྡོ་རྗེ་ཅན་བསམས་པ། །སྐུ་གསུང་ཐུགས་ཀྱི་ལྕགས་ཀྱུ་འོ། །སངས་རྒྱས་ཡེ་ཤེས་བློ་ཅན་གྱི། །མི་གསལ་གསལ་བར་ཡང་དག་ལྡན། །དེ་བཞིན་ཉིད་ཀྱི་ངོ་བོ་ལས། །འགྲོ་བ་ཐམས་ཅད་དགུག་པར་བྱ། །རླུང་གི་དཀྱིལ་འཁོར་མཆོག་གནས་པ། །སངས་རྒྱས་དགུག་པ་དམ་པ་ཡིན། ། གནས་མེད་གནས་པའི་སྦྱོར་བ་ཡིས། །དེ་ཉིད་སྔགས་དོན་རྣལ་འབྱོར་པས། །འགྲོ་བ་འདོད་པའི་ལོངས་སྤྱོད་ཀྱང ། །མི་གསལ་སྦྱོར་བས་སྦྱོར་བར་བྱེད། །གང་ཡང་དམ་ཚིག་ཕྱོགས་
175a
༄#། །རྣམས་ནི། །མཁའ་དབྱིངས་དབྱེ་བས་གནས་པ་རྣམས། །དེ་ཉིད་རྡོ་རྗེ་བཀུག་ནས་ནི། །སྔགས་རིག་པས་ནི་སྤྱད་པར་བྱ། །ནམ་མཁའི་ཁམས་ནི་དགུག་པ་འདི། །དམ་ཚིག་ཆེན་པོ་རྡོ་རྗེ་ཅན། །སྔགས་ཀྱི་དེ་ཉིད་གཅིག་སྦྱོར་ལས། །ལྕགས་ཀྱུ་དེ་རྣམས་འགྲུབ་པར་འགྱུར། །དམ་ཚིག་རྣམས་ནི་དགུག་པའི་མཆོག་།རྒྱལ་གནས་ལྕགས་ཀྱུ་བསམས་ནས་ནི། །རྣམ་པར་སྣང་མཛད་འཁོར་ལོ་ཆེ། །རྡོ་རྗེ་པདྨ་ལ་སོགས་བྱ། །མེ་ལོང་ལྟ་བུའི་སྔགས་པས་ནི། །སངས་རྒྱས་སྐུ་ནི་རྣམ་པར་བསྒོམ། །ལག་ཏུ་སྐུ་དང་གསུང་ཐུགས་ཀྱི། །ལྕགས་ཀྱུ་ལ་སོགས་རབ་ཏུ་བསྒོམ། །དེ་ནི་སྦྱོར་བ་འདི་ཉིད་ཀྱིས། །དེ་ཉིད་ལས་ནི་ལྷ་རྣམས་དགོད། །དེ་ནི་དེ་མ་ཐག་ཏུ་ཡང ། །དངོས་གྲུབ་ཀུན་སྟེར་ལས་བྱེད་འགྱུར། ། སྐུ་དང་གསུང་ཐུགས་ཐམས་ཅད་ནི། །མཚན་ཉིད་གཅིག་པར་བསྒོམ་པར་བྱ། །ལྕེ་ཡི་རྡོ་རྗེ་སྦྱོར་བ་ཡིས། །གསུང་གི་རྡོ་རྗེར་དེ་མཉམ་བསྒོམ། །བརྟུལ་ཞུགས་ཅན་གྱིས་ཕྱི་ནང་གཉིས། །གསང་བའི་རྡོ་རྗེ་མཆོག་མཆོད་དོ། །དངོས་མེད་དམ་ཚིག་སྦྱོར་བ་ཡིས། །ཇི་ལྟ་ཇི་ལྟར་རབ་སྒྲུབ་པ། །དམ་ཚིག་གསུམ་གྱི་རྣལ་འབྱོར་བའི། །དེ་ནི་ཡང་དག་ཡིན་པར་བཤད། །གསང་བའི་སྙིང་པོ་བསྡུས་པ་ཡི། །དངོས་གྲུབ་ཀུན་གྱི་མཆོག་ཏུ་འདོད། །བཅོམ་ལྡན་དམ་ཚིག་ཆེན་པོ་ཡི། །རྣལ་འབྱོར་པས་ནི་དེ་སྐད་གསུངས། །དེ་ནས་ཕྱག་ན་
175b
རྡོ་རྗེ་ནི། །གོ་བྱེད་གསང་བ་ཡང་དག་གསུངས། །གྲང་ཞིག་ཤེས་ན་རྣལ་འབྱོར་པའི། །མཉམ་གཞག་མཆོག་ནི་ཐོབ་འགྱུར་བའི། །གསང་དབང་དེ་ཉིད་དམ་པ་ཡི། །དེ་ནི་དེ་ཡིས་ཡང་དག་བཤད། །རྣལ་འབྱོར་ཆེན་པོ་གཅིག་བདག་ཉིད། །ནམ་མཁའ་དང་ནི་མཉམ་བའི་གནས། །བྱས་ན་དམ་ཚིག་ཡང་དག་པ། །ཤ་ཆེན་ལ་ནི་ཡང་དག་སྦྱར། །དངོས་མེད་བ་ཡི་ཤ་ཆེན་གྱི། །དམ་ཚིག་མཆོག་ལ་གནས་ནས་ནི། །བློ་ལྡན་བདག་ཉིད་སྒོམ་བ་ནི། །རྡོ་རྗེ་དངོས་གྲུབ་ལོངས་སྤྱོད་སྟེར། །རྫོགས་ལོངས་སྤྱོད་ཡུལ་བཤང་བ་ཡིན། །དེ་ཉིད་ཡེ་ཤེས་དབང་པོ་གཅི། །དམ་ཚིག་འདི་དག་ཉིད་ཀྱིས་ནི། །རིག་པ་འཛིན་པའི་གཙོ་བོར་འགྱུར། །ལོངས་སྤྱོད་རྫོགས་ཕུང་ལས་བྱུང་བ། །གླང་པོའི་ཤར་ནི་དེ་རབ་བརྟག་།དམ་ཚིག་གཅིག་ཏུ་ལེགས་སྦྱོར་ལས། །མངོན་ཤེས་ལྔ་དག་ཐོབ་པར་འགྱུར། །དབང་པོ་གཉིས་ནི་རྟ་ཤ་སྟེ། །དངོས་མེད་དེ་ཉིད་ལས་སྦྱོར་ལས། །དམ་ཚིག་གཅིག་ཏུ་ལེགས་སྦྱོར་ན། །མི་སྣང་གནས་ཀྱི་མཆོག་ཏུ་འགྱུར། །དགོངས་བས་གཅིག་ཤོས་བཟློག་པ་ཡིན། །ཕུང་སོགས་ཡན་ལག་གང་གྱུར་པ། །དངོས་མེད་དེ་ནི་ཁྱི་ཤ་ཡིན། །དམ་ཚིག་གཅིག་ཏུ་ཡང་དག་སྦྱོར། །དངོས་གྲུབ་ཐམས་ཅད་རབ་སྒྲུབ་པ་འོ། །རྫོགས་སངས་རྒྱས་ཅན་བ་ལང་ཤ་།ཁྲོ་བོའི་རྒྱལ་པོ་འགྲུབ་པར་འགྱུར། །དམ་ཚིག་གཅིག་ཏུ་ཡང་དག་སྦྱོར། །རྡོ་རྗེ་དགུག་པའི་དམ་པ་འོ། །འདི་ནི་འཇིག་རྟེན་
176a
༄#། །པར་གྱུར་ལས། །དགོངས་པས་གཅིག་ཤོས་བཟློག་པ་ཡིན། །ཤ་ཆེན་དང་ནི་བཤང་གཅི་དང ། །གླང་པོ་རྟ་ཁྱི་བ་ལང་དག་།མི་རྟོག་གཅིག་པའི་སྒྲུབ་པ་ཡིས་དམ་ཚིག་གཅིག་ཏུ་དེ་འགྲུབ་འགྱུར། །བསྟན་པས་འདི་ནི་སྒྲུབ་པ་ནི། །སྔགས་ཀྱི་ལོངས་སྤྱོད་རྣལ་འབྱོར་པ། །རྡོ་རྗེ་སྦྱོར་བའི་གསང་བ་ཡིས། །སྒྲུབ་པ་འདི་དང་ལྡན་པར་འགྱུར།། དེ་ནི་སངས་རྒྱས་བྱིན་རློབ་ཅིང ། །རྣམ་ཀུན་རྡོ་རྗེ་ཅན་གསུམ་དང ། །སྙིང་གར་ཡེ་ཤེས་དམ་ཚིག་དང ། །དབུ་རྒྱན་ལ་ནི་རྡོ་རྗེ་འཛིན། །སངས་རྒྱས་ཐམས་ཅད་ཚིམ་འགྱུར་བའི། །འདི་ནི་དམ་ཚིག་སྡོམ་པའོ། །དངོས་གྲུབ་ཐམས་ཅད་སྟེར་བའི་མཆོག་།དམ་ཚིག་མཆོག་འདིས་རབ་ཏུ་བྱ། །དམ་ཚིག་ཀུན་གྱི་དམ་པ་སྟེ། །རྡོ་རྗེ་ཟས་ཀྱི་ཏིང་འཛིན་ཏོ། །དེ་ནས་འགྲོ་ལ་ཕན་པའི་མགོན། །གཙོ་བོ་རྣམ་སྣང་ཆེན་པོ་ལ། །གསང་བའི་དགོངས་པ་དམ་པ་ནི། །རྡོ་རྗེ་འཛིན་པས་སླར་ཡང་ཞུས། །གང་ཞིག་སྤྱི་བོར་བརྟགས་པ་ནི། །གཅིག་པུ་ཉིད་དུ་གྱུར་པ་དེས། །རི་རབ་སུམ་ཅུ་རྩ་དྲུག་ཏུ། །མུ་སྟེགས་རྣམས་ཀྱིས་འཚལ་མི་འགྱུར། །རང་གི་བསྟན་བཅོས་བརྡ་ཡིས་ནི། །ཕྱི་རོལ་བ་དེ་རྣམ་རྟོག་ལ། །ཏིང་འཛིན་བརྟགས་པ་འདི་དག་ཀྱང་།། འདི་ལ་རང་གི་ངོ་བོ་མེད། །ཚངས་སྒོ་མཛོད་ཀྱི་རྒྱུད་ལས་ནི། །རི་རབ་གཅིག་དང་བཅས་པར་བཤད། །བྱིས་པ་མཆོག་ནི་རྨོངས་བྱེད་པ། །གསུང་འདི་སྐྱེ་བོ་ལྟུང་བར་འགྱུར། །དེ་ནས་
176b
བཅོམ་ལྡན་བདག་པོ་འདིས། །རྡོ་རྗེ་ཅན་ལ་སླར་གསུངས་པ། །ལེགས་སོ་རྡོ་རྗེ་ལེགས་པ་ཆེ། །སྐྱེས་བུ་དམ་པ་ཁྱོད་ལེགས་པ། །རྐྱེན་དང་ཉན་ཐོས་ཐེག་པ་དང ། །འདིར་ནི་ང་ཡིས་གསལ་བཤད་པ། །སངས་རྒྱས་ཀྱིས་བཤད་ཡེ་ཤེས་དག་།ཐེག་པ་ཆེན་པོ་མི་མཐོང་ངོ ། །ཚད་ཡོད་དང་ནི་ཡོངས་ཆད་པའི། །རང་གི་ལུས་ལ་གང་བཤད་དེ། །ཡེ་ཤེས་དེ་རྣམས་དྲི་མེད་འདོད། །ཁྲོན་པའི་རུས་སྦལ་ཞེས་བྱའོ། །ནམ་མཁའ་དང་ནི་མཉམ་ཡེ་ཤེས། །རྡོ་རྗེ་ཐེག་པ་བླ་མེད་པ། །མཆོག་སྦྱིན་ང་ནི་ཁྱེད་བཞིན་དུ། །རྒྱ་ཆེན་དེ་ཡིས་མི་མཐོང་ངོ ། །རྡོ་རྗེ་ཐེག་པ་རྒྱ་མཚོ་སྟེ། །དེ་ཡིས་ཡང་དག་མ་མཐོང་བས། །རང་གི་ལུང་ནི་ཚད་མ་ཡིས། །གཞན་ཡོད་པ་ནི་མིན་ཞེས་སྨྲ། །ཐེག་པ་ཆེན་ལ་གསང་བ་རྣམས། །སྲང་ལ་བཅལ་ཏེ་དེ་སྨྲ་བ། །དེ་རྣམས་སྔོན་བཞིན་གསལ་མིན་ཞེས། །ང་ཡི་ཚིག་ལས་བལྟས་ཏེ་སྨྲ། །དེ་ཉིད་རྗེས་སུ་གཟུང་བའི་ཕྱིར། །རྫོགས་སངས་རྒྱས་ལ་སྒོམ་པ་རྣམས། །གང་གིས་ཤེས་ན་རྟོག་མེད་འགྱུར། །གསང་བ་དགོངས་པས་གསུངས་པ་ཡིན། །སྔགས་ཀྱི་དེ་ཉིད་དོན་བྱང་ཆུབ། །སྣ་ཚོགས་དངོས་གྲུབ་འབྲས་བུ་སྟེར། །དགོངས་དོན་ཇི་ལྟ་ཇི་ལྟ་བར། །དེ་ནི་ང་ཡིས་ཡང་དག་བཤད། །དམ་ཚིག་རྡོ་རྗེ་ལྕེ་ལ་ནི།། རྡོ་རྗེ་ཅན་གྱིས་ཧཱུཾ་བསམས་ཏེ། །རྣལ་འབྱོར་པས་ནི་བདུད་རྩི་ལྔ། །ཟོས་ན་རྡོ་རྗེ་གསུམ་ཐོབ་འགྱུར། །ཱཿ དང་ཨོཾ་གྱི་གསང་བ་དག་།འདི་ནི་རྡོ་རྗེ་གསུམ་མཆོག་སྟེ། །འདི་ལྟ་བུ་ཡི་སྦྱོར་བ་
177a
༄#། །ཡིས། །རྡོ་རྗེ་སེམས་དཔའི་འོད་ཆེན་འགྱུར། །འདི་ནི་རྡོ་རྗེའི་བདུད་རྩི་ཡི། །ཕྲེང་འགྱུར་དམ་ཚིག་རྡོ་རྗེར་བཤད། །རྡོ་རྗེ་སེམས་དཔའ་ཡང་དག་འབྱུང ། །ཏིང་ངེ་འཛིན་ནི་བཤད་པ་ཡིན། །རྡོ་རྗེ་གསུམ་གྱི་དམ་ཚིག་མཆོག་།སྐུ་གསུང་རྡོ་རྗེ་ཅན་དུ་འགྱུར། །དེ་ཉིད་སེམས་ཅན་ཐམས་ཅད་ཀྱི། །ཡིད་བཞིན་ནོར་བུའི་རྒྱ་མཚོ་ཆེ། །འཇིག་རྟེན་ཁམས་ནི་ཐམས་ཅད་དུ། །སངས་རྒྱས་སྐུ་དང་འདྲ་བར་འགྱུར། །རྡོ་རྗེ་དམ་ཚིག་དངོས་གྲུབ་མཆོག་།རྡོ་རྗེ་བདག་ཉིད་དེ་སྣང་བྱེད། །གངྒཱའི་ཀླུང་གི་བྱེ་མ་སྙེད། །སངས་རྒྱས་ཞིང་ནི་ཐམས་ཅད་དུ། །གྲུབ་ནས་འདི་ནི་དེར་སྦྱོར་བའི། །རིག་པ་འཛིན་པར་དེ་འགྱུར་རོ། །སྐུ་ཡི་རྡོ་རྗེ་བསྒོམ་བདག་ཉིད། །གྲུབ་མཆོག་དམ་ཚིག་ལ་གནས་པ། །མི་སྣང་གྱུར་པ་ཀུན་གྱི་མཆོག་།སྟོང་གསུམ་དག་ནི་སྣང་བར་བྱེད། །ལྷ་ཡི་བུ་མོ་མཆོག་འཕྲོགས་ནས། །སངས་རྒྱས་རྣལ་འབྱོར་མར་ལེགས་སྦྱོར། །གངྒཱའི་བྱེ་སྙེད་ཅེས་བྱ་བའི། །རྫོགས་པའི་སངས་རྒྱས་མ་ལུས་ཀུན། །དཔེ་དེ་དང་ནི་གྲངས་གཅིག་པ། །སངས་རྒྱས་དུས་གསུམ་རྣམ་སྤངས་པ། །ལག་ཏུ་སྐྱུ་རུ་ར་བཞག་བཞིན། །རྡོ་རྗེ་མིག་གིས་དེ་མཐོང་འགྱུར། །སངས་རྒྱས་ཞིང་ནི་གང་དག་ཏུ།། སྒྲ་གྲགས་པ་ནི་ཇི་སྙེད་བ། །རྣམ་པ་ལ་གནས་མ་ནོར་བར། །སྐད་ཅིག་གིས་ནི་དེ་ཀུན་ཐོས། །གངྒཱའི་བྱེ་སྙེད་ཞིང་དག་དང ། །སྐུ་ལ་སོགས་པ་གསུམ་གྱིས་མཚན། །སེམས་ཞེས་བཤད་པའི་
177b
སྒོམ་པ་མཆོག་།སེམས་ཅན་རྣམས་ཀྱི་དེ་ཉིད་རིག་།བསྐལ་པ་གངྒཱའི་བྱེ་སྙེད་དུ། །སངས་རྒྱས་རྡོ་རྗེ་མཆོག་གིས་འགེངས། །རྡོ་རྗེ་བསམ་མི་ཁྱབ་སྔོན་འགྲོ། །རང་གི་རྣ་བ་སེམས་བཅས་བ། །གངྒཱའི་བྱེ་མའི་མིང་ཅན་གྱི། །གནས་ཀྱི་དངོས་པོ་བཤད་པ་ཡིན། །སངས་རྒྱས་རྣམས་ཀྱིས་མངོན་ཤེས་གནས། །འདི་ནི་ཡང་དག་བཀའ་སྩལ་ཏོ། །མངོན་ཤེས་དྲུག་ནི་དོན་གྲུབ་བོ། ། དེ་ནི་སངས་རྒྱས་འདྲ་བར་འགྱུར། །གངྒཱའི་ཀླུང་གི་བྱེ་སྙེད་ཀྱི། །འཁོར་རྣམས་ཀྱིས་ནི་རབ་མཛེས་པས། །སྐུ་སོགས་རྡོ་རྗེ་གསུམ་འདི་ནི། །འཇིག་རྟེན་ཁམས་རྣམས་ཀུན་ཏུ་སྤྱོད། །ཡིད་རྟོན་བདེན་གཅིག་བསྙེན་པ་སྟེ། །དེ་ཉིད་གསུམ་མཉམ་གཉིས་མེད་པ། །བརྟེན་ཏེ་དམ་ཚིག་གཅིག་གྱུར་པ། །ཡེ་ཤེས་ཉེ་བར་སྒྲུབ་པའོ། །ཡིད་རྟོན་མཉམ་པའི་སྦྱོར་བ་ལས། །སྒྲུབ་པ་ཡི་ནི་དམ་ཚིག་འགྱུར། །འབྲས་བུ་མངོན་སུམ་བྱས་སྦྱོར་བ། །སྒྲུབ་པ་ཆེན་པོ་བཞི་པའོ། །རྐྱེན་དང་ཉན་ཐོས་མདོ་སྡེ་བ། །འདི་དང་ལྡན་པ་རབ་ཏུ་བསྔགས། །སེམས་ལ་དམིགས་དང་འདིར་སྦྱོར་བ། །སྐད་ཅིག་གིས་ཀྱང་དེ་འགྲུབ་འགྱུར། །བསྙེན་པའི་དམ་ཚིག་སྦྱོར་གཅིག་དང ། །ཉེ་བར་སྒྲུབ་བར་གང་གྱུར་དང ། །སྒྲུབ་པའི་དམ་ཚིག་ཉིད་དང་ནི། །སྒྲུབ་པ་ཆེན་པོ་བཞི་པ་ཡིན།། འདི་ལ་ཡང་དག་འཇུག་འགྱུར་བ། །ཇི་ལྟ་ཇི་ལྟར་འཇིག་རྟེན་སོགས། །ས་དང་ཤིང་གི་རིན་ཆེན་སོགས། །ལྷ་ཉིད་དུ་ནི་རབ་ཏུ་བརྟག་།ཆོས་ཀྱི་དབྱེ་བས་ཤེས་པར་བྱ། །རྡོ་རྗེ་ཡེ་ཤེས་
178a
༄#། །སྒྲུབ་པ་པོ། །བསྙེན་པའི་དམ་ཚིག་ཡང་དག་སྦྱོར། །བྱང་ཆུབ་མཆོག་ནི་རྣམ་པར་བསྒོམ། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཆོས་རྣམས་ལ། །དངོས་གྲུབ་མཆོག་ནི་རྣམ་དཔྱད་པ། །དེ་ནི་ཉེ་བར་སྒྲུབ་པར་འགྱུར། །སྔགས་བདག་གང་ཡིན་བསྒོམས་ནས་ནི། །བསྐུལ་བ་སྒྲུབ་པར་འགྱུར་བ་ཡིན། །རང་སྔགས་རྡོ་རྗེ་ཅན་གྱི་གཟུགས། །དེ་ནི་སྒྲུབ་པ་ཆེན་པོར་འདོད། །བསྙེན་པ་རྡོ་རྗེ་བདུད་རྩི་དག་།སྔགས་པས་ཀུན་ཏུ་བརྟག་པར་བྱ། །དངོས་གྲུབ་འདོད་པས་གནས་པ་ནི། །དབུ་རྒྱན་ལ་ནི་མཆོག་གང་བསམ། །འདི་ནི་སྔགས་རྣམས་ཐམས་ཅད་ཀྱི། །དེ་ཉིད་གསུམ་གསང་ཡང་དག་འབྱུང ། །སྔགས་ཀྱི་དེ་ཉིད་དོན་གཉེར་བའི། །སྒྲུབ་པ་པོས་ནི་དབེན་པ་བསྟན། །སྣ་ཚོགས་ལུང་གི་ཡང་དག་རྟོག་།སྔགས་ནི་དགོན་པ་ཆེན་པོར་འདོད། །དེ་ཡི་དཔག་བསམ་ཤིང་ལོངས་སྤྱོད། །ས་ཕྱོགས་ཞེས་ནི་ཡོངས་སུ་བསྒྲགས། །མཁའ་དང་མཉམ་པའི་སྦྱོར་བ་ནི། ། རྣམ་པའི་དབེན་པ་ཆེན་པོར་བཤད། །རི་འོར་རྫོགས་པའི་སངས་རྒྱས་དང ། །དེ་རིགས་དངོས་མེད་ལས་བྱུང་བའོ། །དེ་འདྲའི་དབེན་པའི་མཚོན་པ་རུ། །དེར་ནི་འོད་ཆེན་རྣམ་གནས་ཏེ། །གནས་མེད་པ་ཡི་སྦྱོར་བ་ཡིས། །རྟག་ཏུ་དངོས་གྲུབ་ཐོབ་པར་འགྱུར། །བཅོམ་ལྡན་རྡོ་རྗེའི་སྒྲུབ་པ་ནི། །ཆེན་པོས་དེ་སྐད་བཀའ་སྩལ་ཏོ། །དགོན་པ་ཆེན་པོའི་ས་ཕྱོགས་སོགས།
178b
འཇིག་རྟེན་པ་རྣམས་སྨྲ་བ་གསལ། །བསྙེན་པ་སྐུ་ཡི་བརྟུལ་ཞུགས་མཆོག་།བློ་དང་ལྡན་པས་རྡོ་རྗེ་བཞིས། །རྡོ་རྗེ་གསུམ་གཉིས་མེད་སྦྱོར་བ། །བསྒོམས་ན་དངོས་གྲུབ་འཐོབ་པར་འགྱུར། །མེ་ལོང་ཞེས་བྱ་དགོན་པ་ཆེ། །རིན་ཆེན་ཞེས་བྱ་དབེན་པའོ། །ཆེན་པོ་ཞེས་བྱ་འོད་དཔག་མེད། །དོན་ཡོད་པ་ནི་རི་འོར་ཡིན། །ཆུ་ངོགས་དག་པའི་ཆོས་ཀྱི་ཆ། །གནས་ལྔ་དག་ཏུ་རབ་ཏུ་བརྟག་།ཇི་སྲིད་དོན་ནི་སྦྱོར་བ་བཞིས། །ཡི་གེ་ཨོཾ་ནི་སྡོམ་པར་འགྱུར། །ཇི་ལྟར་ནམ་མཁའི་མཚན་ཉིད་གཅིག་།རང་གི་མཚན་ཉིད་འདོར་མི་བྱེད། །དེ་བཞིན་དེ་ཉིད་གསུམ་བཞིའི་ཕྱེད། །ཡི་གེ་ཨོཾ་གཅིག་སྡོམ་པའོ། །གནས་མེད་གནས་པ་ཞེས་བྱ་བའི། །ོཾ་གཅིག་གིས་ནི་འགྲོ་ལ་ཁྱབ། །དེ་ཉིད་མི་གསལ་སྦྱོར་དབང་པོ། །གཙོ་བོ་རང་ཉིད་ཟློག་པ་ཡིན།། ལ་ལ་གླང་པོ་སྤངས་ནས་ནི། །རྗེས་ལ་དབྱིབས་ནི་ཚོལ་བར་བྱེད། །དེ་བཞིན་མ་འོངས་སྔགས་པ་ནི། །ོཾ་ལས་སྡོམ་པ་གཞན་དུ་འདོད། །གཅིག་གཉིས་གསུམ་དང་བཞི་དང་ལྔ། །དུས་ཐུབ་དེ་བཞིན་ནོར་ཅན་དང ། །ཕན་ཚུན་སྦྱོར་གནས་བརྗོད་པ་ལ། །བསམ་མི་ཁྱབ་པའི་གྲངས་སུ་འགྱུར། །བཅོམ་ལྡན་གཅིག་ཀྱང་དུ་མ་སྟེ། །ཚིག་ཏུ་བརྗོད་པ་རྣམ་པར་སྤངས། །བརྡ་ཙམ་དུ་ནི་ཨོཾ་ཞེས་བྱ། །དངོས་མེད་སྦྱོར་བའི་ཆོས་ཉིད་ཡིན། །ཆོས་དང་ལོངས་སྤྱོད་སྤྲུལ་པ་སྟེ། །སྐུ་གསུམ་དུ་ནི་ཡང་དག་བཤད། །གསུམ་པོ་ཡང་དག་འཛིན་པས་ནི། །དེས་ན་ཨོཾ་ནི་སྡོམ་པ་
179a
༄#། །ཡིན། །དང་པོ་གཅིག་པུ་མི་བསྐྱོད་དགོད། །དེ་ཉིད་སྡོམ་པར་གྱུར་བ་ཡིན། །བརྡ་རུ་བརྗོད་པ་སྣ་ཚོགས་པ། །བསམས་ནས་སྡོམ་པ་ཀུན་ཏུ་བཤད། །མི་ཕྱེད་ནམ་མཁའི་སྦྱོར་བ་ཡིས། །བསམ་དང་གདོན་དང་རྣམ་པར་བྲལ། །རྟེན་འབྲེལ་རིག་ལས་ཡང་དག་འབྱུང ། །རྗེས་བཅས་ཞེས་བྱ་དེ་བསྒོམ་བྱ། །རྟག་ཏུ་འབྱུང་བའི་ཡེ་ཤེས་གཞག་།མིག་ལ་སོགས་པ་བདུན་བརྒྱ་ལ། །གཡས་དང་གཅིག་ཤོས་ཟླ་ཕྱེད་དེ། །ཤེས་རབ་ཐབས་ཀྱང་སྒྲུབ་པའོ། །འདི་དག་ཟུང་གྱུར་ཟླ་བ་སྟེ། །རྡོ་རྗེ་མིང་ཅན་ཕྱེད་དང་གཉིས། ། དེ་ནི་སྦྱོར་བ་འདི་ཉིད་ཀྱིས། །དངོས་གྲུབ་མྱུར་དུ་ཐོབ་པར་འགྱུར། །ཞག་ནི་ཐུབ་པ་ཟླ་ཕྱེད་དང ། །ཟླ་གཅིག་ཟླ་བ་ཕྱེད་གཉིས་པས། །འཇིག་རྟེན་པ་ཡི་ཞག་དབྱེ་བས། །རྒྱ་ཆེར་ངས་ནི་བཤད་པ་ཡིན། །གསང་བ་མཆོག་ལས་བྱུང་བ་ནི། །ཟླ་བ་ཕྱེད་ཀྱིས་སྒྲུབ་པར་གསུངས། །དེ་ཉིད་ཉེ་བར་འགྲུབ་བཤད་པའི། །སྡོམ་པའི་ཡུལ་ནི་དམ་པ་ཡིན། །གང་ཚེ་ཤེས་རབ་ཐབས་ཡེ་ཤེས། །དེ་བཞིན་ཉིད་ཤེས་ལས་བྱུང་བ། །སངས་རྒྱས་སྐུ་འཛིན་དཔལ་དང་ལྡན། །རྡོ་རྗེ་མི་ཕྱེད་འོད་པོ་ཆེ། །བྱང་ཆུབ་སྐད་ཅིག་གིས་སྦྱོར་བ། །རྡོ་རྗེ་སྐུ་ནི་བྱེད་པར་འགྱུར།། སྲོག་ལ་སོགས་དང་གྲངས་མཉམ་པའི། །བདག་མེད་ཕྱོགས་བཞུགས་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །རྡོ་རྗེ་བྱིན་རླབས་མཛད་པར་འགྱུར། །འདས་དང་མ་
179b
འོངས་སངས་རྒྱས་དང ། །གང་ཞིག་ཕྱོགས་བཅུར་བཞུགས་པ་རྣམས། །ཆོས་སྐུ་མཆོག་གི་རྣལ་འབྱོར་པ། །སངས་རྒྱས་དེ་རྣམས་བྱིན་གྱིས་རློབ། །འདས་པ་རྣམས་ནི་ཆོས་སྐུ་ཡིས།། བསམ་མི་ཁྱབ་པའི་ཕྱོགས་ན་བཞུགས། །སྔགས་ཕྱོགས་བསམ་གྱིས་མི་ཁྱབ་པས། །མ་འོངས་རྣམས་ཀྱིས་བྱིན་གྱིས་རློབ། །སངས་རྒྱས་གསུམ་ལ་དབྱེ་བ་ནི། །ཅུང་ཟད་ཙམ་ཡང་ཡོད་མ་ཡིན།། འོན་ཀྱང་དངོས་མེད་ལས་བྱུང་བའི། །སྔགས་པ་རྣམས་ལ་བྱིན་གྱིས་རློབས། །ཕྱོགས་བཅུར་བཞུགས་པའི་སངས་རྒྱས་རྣམས། །མི་ཕྱེད་རྡོ་རྗེ་གསུམ་བསྒོམས་ལ། །སྐུ་ནི་ཇི་ལྟ་བར་འཚམ་པ།། དེ་ལྟར་བྱིན་གྱིས་རློབ་པར་མཛད། །རིག་དང་མ་རིག་ཡང་དག་ལྡན། །སྲོག་ལ་སོགས་ཏེ་བཅུ་གཉིས་བཤད། །དུས་ཀྱི་ཉིས་འགྱུར་ལམ་ལ་སོགས། །དེ་ཉིད་ཟླ་བ་ལ་སོགས་འགྱུར། །ཟླ་བ་ལ་སོགས་གྲངས་མཉམ་པས། །ཉི་མ་བཅུ་གཉིས་མིང་ཅན་ཡིན། །ཁྱབ་འཇུག་དེ་ཉིད་དབྱེ་བ་ཡིས། །ལམ་རྩོམ་པ་ནི་བརྟགས་པ་ཡིས། །དེ་ཉིད་དུ་ནི་སྒྲུབ་པ་མཆོག་།སྡོམ་པ་ཡུལ་ཞེས་བཤད་པ་ཡིན། །སྔགས་དང་དངོས་མེད་དེ་བྱེད་པ། །མགལ་མེའི་འཁོར་ལོ་བསྐོར་དང་མཚུངས། །རྟོག་པ་ལས་བྱུང་དེ་འདི་ནི། །དངོས་མེད་པ་ནི་སྒོམ་པས་སོ། །མ་འོངས་པ་ཡི་སྐྱེ་བོ་ནི། །ལྷ་ཡི་གཟུགས་ལ་འདུད་པར་བྱེད། །མིག་དང་དེ་བཞིན་རྣ་བ་དང ། །ལྕེ་དང་དེ་བཞིན་ལུས་དག་དང ། །པགས་པ་རྐང་པར་ཡང་དག་ལྡན། །འཛིན་པ་དག་ནི་མི་ནུས་པ། །ལྟ་དང་ཉན་དང་དྲི་དང་
180a
༄#། །རོ། །རེག་བྱ་རྣམས་ནི་དངོས་མེད་པ། །རང་བཞིན་སེམས་མེད་གྱུར་བ་ཡི། །འཇིམ་གཟུགས་སངས་རྒྱས་སྐུ་ཅན་ཏེ། །འོན་ཀྱང་འགྲོ་བའི་བླ་མའི་སྐུ། །སངས་རྒྱས་བྱིན་གྱིས་བྱིན་རླབས་གྱིས། །དེ་བཞིན་སྔགས་སྦྱོར་བདག་ཉིད་ཅན། །དངོས་མེད་རྡོ་རྗེའི་སྐུ་ཉིད་ཡིན། །ཤིང་དང་ས་དང་རིན་ཆེན་སོགས། །རང་གི་ལྷ་ཡི་གཟུགས་བྱས་ལ། །རང་གི་ཆོས་ནི་སྤངས་ནས་སུ། །ཚིག་གི་ལམ་དེ་སྟོན་པར་བྱེད། །སྐུ་གསུང་ཐུགས་དང་ལྡན་པ་མཆོག་།ཆོ་འཕྲུལ་དེ་འདྲ་ག་ལས་བྱུང ། །དེ་ནས་དད་སོགས་ཡང་དག་པས། །སླར་ཡང་དེ་ལ་གསོལ་འདེབས་ཀྱང ། །གསོལ་བ་འདེབས་པ་ཙམ་གྱིས་ནི། །དེ་དང་འདྲ་བར་ག་ལ་འགྱུར། །ཕྱི་རོལ་ཆོས་ལ་གང་ཞིག་དགའ། །ལྷ་རྣམས་ཐམས་ཅད་སྤོང་བ་ཡིན། །དེ་ལྟར་སྐུ་ལས་སྐུ་བྱུང་བ། །དཔལ་ལྡན་ཆོས་འདིའང་གསུམ་གྱི་ལམ། །བྱིན་རླབས་པ་དག་ལོངས་སྤྱོད་ན། །གསུང་གི་རྡོ་རྗེ་ཅན་དུ་བྱེད། །འདས་དང་མ་འོངས་སངས་རྒྱས་རྣམས། །ཕྱོགས་བཅུ་ན་ནི་གང་བཞུགས་པ། །བྱུང་དང་འབྱུང་འགྱུར་དེ་རྣམས་ནི། །མི་ཕྱེད་གསུམ་གྱི་ལམ་དུ་འགྱུར། །ཡིད་རྟོན་བདེ་བ་ཞི་བདག་ཉིད། །དེ་བཞིན་ཉིད་ཤེས་ལས་བྱུང་བ། །ཡི་གེ་གཅིག་ནི་གསུམ་དྲུག་འདི། །རང་ཉིད་འགྲོ་བའི་ཁར་བརྗོད་དོ། །དེ་ཡི་བྱིན་གྱིས་བརླབ་པའི་གནས། །རྡོ་རྗེ་མི་ཕྱེད་རྡོ་རྗེ་ཅན། །གང་གཞན་སངས་རྒྱས་ཀྱིས་གསུངས་དང ། །འགྲོ་བའི་སྒྲར་ནི་
180b
འདི་གྱུར་ཏེ། །དུས་གསུམ་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་རྣལ་འབྱོར། །གསུང་གི་རྡོ་རྗེ་མི་ཕྱེད་པ། །རྡོ་རྗེ་ཅན་མཆོག་དེ་བྱིན་རློབ། །འཇུག་པ་གནས་པའི་སྦྱོར་བ་དང ། །ལྡང་བ་དང་ནི་ཡང་དག་ལྡན། །གསུང་གི་རྡོ་རྗེ་དངོས་མེད་པ། །དེ་ནི་སངས་རྒྱས་བྱིན་གྱིས་རློབ། །ཇི་ལྟར་འཁོར་ལོས་བསྒྱུར་རྒྱལ་ནི། །ཚིག་གི་ལམ་གྱིས་ལས་བྱེད་འཇུག་།གསུང་བྱིན་རླབས་པས་སྔགས་པ་ནི། །དེ་བཞིན་དོན་ཡོད་ཉིད་དུ་བྱེད། །དེར་ནི་ཡང་དག་བཤད་པ་འདི། །སྒྲུབ་པ་ཆེན་པོ་ཞེས་བྱ་བའོ། །སངས་རྒྱས་དེ་རྣམས་བྱིན་རློབ་པ། །སྡོམ་པ་ཡུལ་ནི་དམ་པའོ། །རྡོ་རྗེ་ཐུགས་ནི་འཛིན་རྒྱལ་པོ། །དེ་ནི་བདག་ལ་བྱིན་རློབ་མཛད། །མི་ཕྱེད་རྡོ་རྗེ་གསུམ་སྦྱོར་བས། །ནམ་མཁའི་ཁམས་དང་མཉམ་པའི་གནས། །གང་ཞིག་བྱུང་དང་འབྱུང་འགྱུར་བའི། །ཕྱོགས་བཅུར་བཞུགས་པའི་སངས་རྒྱས་རྣམས། །དེ་ཡི་བྱིན་གྱིས་བརླབ་པའི་གནས། །ལན་གསུམ་ལས་ནི་བྱུང་བ་མཛད། །སྐུ་ཡིས་སྟོན་པའི་མཛད་པ་མཆོག་།རང་སངས་རྒྱས་ནི་སྒོམ་པ་ཡིན། །མདོ་སྡེ་བ་དང་ཉན་ཐོས་ཀྱིའང ། །སྨྲ་བ་སྒྲུབ་པ་པོར་གྱུར་ཡིན། །སེམས་ནི་རྣལ་འབྱོར་ལྡན་མཆོག་གིས། །འགྲོ་བའི་དོན་ནི་རབ་སྒྲུབ་པའོ། །འགྲོ་འོང་གནས་དང་བྲལ་བ་ནི། །རྡོ་དང་ས་དང་དབྱིག་བྱེད་པ། །ལུས་ལ་སོགས་པ་མཚོན་པ་ཡིས། །འོན་ཀྱང་དེ་ནི་གསུང་དུ་འགྱུར། །སེམས་དང་ལུས་དང་མི་ལྡན་པའི། །དེ་བཞིན་ཉིད་ནི་འགྲོ་དོན་ཅན། །སྐུ་གསུང་
181a
༄#། །ཐུགས་ཀྱི་རྡོ་རྗེ་གཅིག། གྱུར་ཀྱང་སོ་སོར་བསྟན་པ་ཡིན། །སངས་རྒྱས་རྡོ་རྗེ་ཆོས་དག་གམ། །དེ་བཞིན་རྡོ་རྗེ་སེམས་དཔའང་རུང ། །སྐུ་གསུང་ཐུགས་ཀྱི་སངས་རྒྱས་སོགས། །རྡོ་རྗེ་གསུམ་པོ་མི་ཕྱེད་བརྟག་།དེ་འདས་རྨོངས་པའི་བདག་ཉིད་ཅན། །སོ་སོར་རྟོག་པ་འགག་པར་འགྱུར། །སྐུ་ལ་སོགས་པའི་གྲངས་མཉམ་པར། །སངས་རྒྱས་ཀྱང་ནི་གང་རྟོག་གྱུར། །སྟོང་པ་ཉིད་དུ་སྦྱོར་བ་ཡང ། །དེ་ནི་གསལ་བར་ཐེ་ཚོམ་མེད། །སྣ་ཚོགས་སྦྱོར་གྱུར་སྔགས་རྣམས་ནི། །གང་ཞིག་སྟོང་པར་མངོན་སུམ་བྱེད། །འདས་པ་དག་ནི་དེ་ཐམས་ཅད། །རྨོངས་པའི་བདག་ཉིད་དེ་འགག་འགྱུར། །ཉན་ཐོས་རང་སངས་རྒྱས་རྣམས་ཀྱི། །བྱང་ཆུབ་བསྡུས་ནས་བཤད་པ་ཡིས། །འཇིག་རྟེན་པ་ཡི་གང་བཤད་པ། །མདོར་བསྡུས་པ་ནི་འདི་ཡིན་ནོ། །སངས་རྒྱས་ཡང་ན་རྡོ་རྗེ་ཆོས། །ཡང་ན་རྡོ་རྗེ་སེམས་དཔའང་རུང ། །རྨོངས་པས་འདི་ལས་འདས་ན་ནི། །དེ་ནི་འགག་པར་ཐེ་ཚོམ་མེད། །དགོངས་པ་ལུང་བསྟན་ལ་གནས་ནས། །གསང་བ་དམ་པ་ཡང་དག་སྲུང ། །ལྷུན་གྱིས་གྲུབ་པའི་སྦྱོར་བ་ཡིས། །དངོས་གྲུབ་མཆོག་ནི་བསྒྲུབ་པར་བྱ། །སྐུ་ལ་སོགས་པའི་གསང་བ་མཆོག་།རྡོ་རྗེ་སྦྱོར་བ་ཞེས་བྱ་བའི།། དམ་ཚིག་སྒྲུབ་པའི་མཆོག་བསྟན་པའི། །ལེའུ་བཅུ་གཉིས་གསུངས་པ་ཡིན། །དགོངས་པ་ལུང་བསྟན་པ་ཞེས་བྱ་བའི་རྒྱུད་རྫོགས་སོ།། །།རྒྱ་གར་གྱི་མཁན་པོ་
181b
དྷརྨཱ་ཤྲཱི་བྷ་དང ། ཞུ་ཆེན་གྱི་ལོཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།