རྒྱ་གར་སྐད་དུ། བཛྲ་ཨ་མྲྀ་ཏ་ཏནྟྲ། བོད་སྐད་དུ། རྡོ་རྗེ་བདུད་རྩིའི་རྒྱུད། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། 261b བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་སྙིང་པོ་རྡོ་རྗེ་བདུད་རྩི་གསང་བའི་པདྨ་ལ་བཞུགས་སོ། །གཞལ་ཡས་བརྩེགས་པའི་ཁང་པ་ན། །མཱ་མ་ཀཱི་དང་ཐབས་ཅིག་ཏུ། །བཅོམ་ལྡན་རྡོ་རྗེ་ཅན་རོལ་ཏེ། །དེ་ནས་ལྷ་མོས་དེ་ཞུས་པ། །གསང་ཆེན་ཞེས་བྱ་ཆེར་གནས་པའི། །རྡོ་རྗེ་བདུད་རྩི་རྒྱུད་ཀྱི་མཆོག་།སྔོན་དུ་ལྷ་ཁྱོད་ཀྱིས་གསུངས་པ། །བདུད་རྩི་ཡི་ནི་སྒྲུབ་པའི་ཐབས། །བདེ་བ་ཆེན་པོས་བཀའ་སྩལ་འཚལ། །དེ་ནས་བཅོམ་ལྡན་རྡོ་རྗེས་བཤད། །རྡོ་རྗེ་བདུད་རྩི་བདེ་ཆེན་པོ། །བསམ་མེད་ཟད་མེད་ཕྲ་མོ་སྟེ། །དོན་ཡོད་དབང་པོ་ལས་འདས་པ། །དམ་པ་ཞི་བ་རྣམ་དག་པ། །རྡོ་རྗེ་བདུད་རྩི་བརྗོད་པ་ཡིན། །དེ་ནས་བཅོམ་ལྡན་རྡོ་རྗེ་ཡིས། །མཱ་མ་ཀཱིར་ཆགས་དང་ལྡན་ནས། །རྡོ་རྗེ་བདུད་རྩིའི་ཏིང་འཛིན་གྱིས། །གསང་ཆེན་མངོན་སུམ་དུ་ནི་མཛད། །རྒྱུད་རྣམས་ཀུན་ལ་གསང་བ་ཡི། །ཡེ་ཤེས་རྡོ་རྗེ་བདུད་རྩི་མཆོག་།དེ་ནི་བདག་གིས་བཤད་པར་བྱ། །བརྟན་པོར་འཁྱུད་དང་འོ་བྱེད་དང ། །དགའ་བའི་རོལ་ལས་མཉམ་སྦྱོར་དང ། །དབྱངས་དང་སིལ་སྙན་གར་རྣམས་ཀྱིས། །རྡོ་རྗེ་བདུད་རྩི་རྒྱུད་ཀྱི་མཆོག་།དེ་ལྟར་མྱུར་དུ་འགྲུབ་པར་འགྱུར། །བདུད་རྩི་ཁུ་བ་ཞེས་གསུངས་ཏེ། །འགྲོ་བ་གསུམ་ནི་ངེས་བསྐྱེད་དོ། །ཁྱོད་ལ་དགའ་མ་ཞལ་བཟང་མ། །དེ་ཡི་སྒྲུབ་པ་བདག་གིས་བཤད། །ཉོན་ཅིག་དེ་ཡི་སེམས་ཀྱིས་ 262a ༄#། །ཚིག་།མདོར་བསྡུས་ནས་ནི་བཤད་པར་བྱ། །སེམས་ཅན་དོན་དུ་ཕན་དོན་དུ། །སྦྱོར་བའི་རྡོ་རྗེ་བདུད་རྩི་མཆོག་།རྣལ་འབྱོར་གང་གིས་ཤེས་གྱུར་ན། ། འཁོར་བའི་བཅིངས་ལས་མྱུར་བར་གྲོལ། །བསྟན་དུ་མེད་ཅིང་ཡེ་ཤེས་ཆེ། །དངོས་གྲུབ་འཇིག་རྟེན་གསུམ་སྒྲུབ་བོ། །སྐུ་གསུང་ཐུགས་ཀྱི་སྒྲུབ་དོན་དུ། །སྒྲུབ་པ་པོས་ནི་བདེ་བ་སྤྱོད། །རྡོ་རྗེ་པདྨ་མཉམ་སྦྱོར་བས། །རྡོ་རྗེ་བདུད་རྩི་ཕྱུང་བར་བྱ། །བྷ་གའི་པདྨར་འོ་བཏབ་སྟེ། །རྡོ་རྗེ་མཱ་མ་ཀཱིས་འོ་བཏབ། །རྡོ་རྗེ་བདུད་རྩི་བདེ་བ་ཆེ། །བཅོམ་ལྡན་རྡོ་རྗེས་དེ་གསུངས་སོ། །བྷ་གའི་པདྨར་འོ་བཏབ་པས། །དེ་ཚེ་དགའ་བའི་ལྷ་མོ་དེས། །རྡོ་རྗེ་བདུད་རྩི་ལས་བྱུང་བའི། །ཉམས་དགའ་གསང་བའི་དཀྱིལ་འཁོར་ཞུས། །ཆོ་གའི་རིམ་པ་གང་གིས་ནི། །མཆོད་པ་དཀྱིལ་འཁོར་བརྩམ་པར་བྱ། །འདིར་ནི་མཆོད་པ་ཇི་ལྟར་ཏེ། །དེ་བཞིན་དཀྱིལ་འཁོར་ཇི་ལྟར་ལགས། །དགའ་བ་ཆེན་པོ་ཐོབ་དགའ་བ། །རབ་ཏུ་དགྱེས་ནས་བཀའ་སྩལ་འཚལ། །དེ་ནས་བཅོམ་ལྡན་རྡོ་རྗེ་ཡིས། །རྡོ་རྗེ་བདུད་རྩི་བདེ་བ་ཆེ། །འོ་བཏབ་པས་ནི་དགར་འགྱུར་ཏེ། །བཞད་ནས་འདི་སྐད་བཀའ་སྩལ་ཏེ། །སྐུ་གསུང་ཐུགས་ཀྱི་སྒྲུབ་དོན་དང ། །འཁོར་བའི་རྒྱ་མཚོ་སྒྲུབ་པའི་ཕྱིར། །དགའ་བ་ཆེན་པོ་སྦྱོར་བ་ཡིས། །མཱ་མ་ཀཱིས་ནི་འདིར་དྲིས་པ། །ཟུར་གསུམ་དཀྱིལ་འཁོར་བྲིས་ནས་སུ། །གསང་བའི་ 262b པདྨ་མཱ་མ་ཀི་།ནང་དུ་སྙིང་པོ་དང་ལྡན་པའི། །པདྨ་འདབ་བརྒྱད་པ་ནི་བྱ། །དེ་དབུས་གསང་ཆེན་རིག་མ་དང ། །གཙོ་བོ་ཞལ་གསུམ་ཕྱག་དྲུག་པ། །དང་པོའི་ཞལ་ནི་ནག་པོ་སྟེ། ། གཡས་པ་ལ་ནི་དཀར་པོ་འདོད། །གཡོན་དུ་དམར་པོར་རབ་གསུངས་ཏེ། །ལྷ་ཡི་རྒྱན་གྱིས་བརྒྱན་བྱས་པ། །ལྷ་ཡི་ན་བཟའ་མེ་ཏོག་ཕྲེང ། །ལྷ་ཡི་དྲི་ཡིས་བྱུག་བྱེད་པ། །ལྷ་ཡི་དངོས་གྲུབ་བྱེད་ཞི་བ། །སྐུ་གསུང་ཐུགས་ཀྱི་རྡོ་རྗེ་ཅན། །ཕྱི་རོལ་དུ་ནི་དཀྱིལ་འཁོར་ཡང ། །སྒོ་བཞི་པ་ནི་རབ་ཏུ་བརྟགས། །ཤར་དུ་ཁྲོ་གཉེར་མ་གཞག་སྟེ། །ལྷོ་ན་འཇིགས་པར་འཇིགས་བྱེད་མ། །ནུབ་ན་རྟ་ཡི་གཟུགས་ཅན་མ། །བྱང་དུ་ཚོགས་ཀྱི་འདྲེན་མ་མོ། །མཁས་པས་པདྨ་འདབ་བརྒྱད་ལ། །རིག་མ་བརྒྱད་ནི་མཉམ་པར་བྲི། །མཛེས་པ་མོ་དང་ཞི་བའི་ཞལ།། ཟླ་མོ་དང་ནི་དུང་ཅན་མོ། །རི་བོང་འཛིན་དང་དཀྱིལ་འཁོར་མོ། །རི་བོང་འཛིན་རི་མོ་ཡིད་དགའ། །ཡིད་ལ་བདེ་བར་བྱེད་མ་དག་།རིག་མ་བརྒྱད་དང་དགེ་མ་བརྒྱད། །ཐམས་ཅད་ཞལ་གསུམ་ཕྱག་དྲུག་པ། །སྣ་ཚོགས་གཟུགས་ནི་ཡིད་དགའ་མ། །ཕྱོགས་རྣམས་དང་ནི་མཚམས་དག་ལ། །རྟག་པ་རུ་ནི་བྲི་བར་བྱ། །མཆོད་པ་པི་ཝང་རྔ་དེ་བཞིན། །དེ་བཞིན་སྦོས་དང་མེ་ཏོག་སོགས། །དབྱངས་དང་གར་དང་མཆོད་པ་ནི། །དགའ་བ་རོལ་པ་སྦྱོར་བ་ཡིས། །རྡོ་རྗེ་བདུད་རྩི་བདེ་བ་ཆེ། །གསང་བའི་འཁོར་ལོ་བསྒྲུབ་པར་བྱ། །མ་དང་བྲན་མོ་ 263a ༄#། །བུ་མོ་དང ། །སྲིང་མོ་གཉེན་མོ་དེ་བཞིན་ཏེ། །རྡོ་རྗེ་བདུད་རྩི་དེ་དག་ལས། །བླངས་ནས་གསང་བའི་དཀྱིལ་འཁོར་མཆོད། །མ་ལས་བདུད་རྩི་བླངས་པས་ནི། །རྡོ་རྗེ་བདུད་རྩི་དང་མཉམ་འགྱུར། །སྲིང་མོ་ནད་མེད་ན་སོ་གཞོན། །བུ་མོ་ཡི་ནི་འདོད་ཀུན་སྦྱིན། །བྲམ་ཟེ་མོའི་ནི་དོན་ཡོད་གྲུབ། །གསང་བའི་དཀྱིལ་འཁོར་ལ་འདོད་བྱས། །ལྕེ་ནི་དྲིལ་བར་བྱས་ནས་སུ། །ཁ་ཡིས་པདྨར་བླང་བར་བྱ། །རྡོ་རྗེ་བདུད་རྩི་བདེ་བ་ཆེ། །དེ་ནས་མྱུར་བར་དངོས་གྲུབ་བོ། །བུང་བརྩེ་བའི་ཚུལ་གྱིས་ནི། །བུད་མེད་ཐམས་ཅད་འདོད་པ་སྤྱོད། །འདུས་དང་གྲུབ་མོ་དང་བརྐྱང་བ། །ཡར་བཏེག་ཟེར་ནི་ཤིན་ཏུ་བརྐྱང ། །བྱེད་པའི་བཅིང་བ་སྦྱོར་བ་ཡིས། །ས་གསུམ་དག་ནི་བསྒྲུབ་པར་བྱ། ། ཤ་ཆེན་དང་ནི་ཁྲག་ཆེན་གྱིས། །དེ་བཞིན་བཤང་གཅི་ཁུ་བ་དག་།དེ་དག་རྡོ་རྗེ་བདུད་རྩི་ལྔ། །ཉིན་དང་ཉིན་དུ་བསྒྲུབ་པར་བྱ། །རྡོ་རྗེ་བདུད་རྩི་བདེ་བ་ཆེ། །གལ་ཏེ་དངོས་གྲུབ་བདག་འདོད་ན། །དེ་ཡིས་དོན་རྣམས་ཐམས་ཅད་ནི། །སྒྲུབ་པ་པོས་ནི་མཆོག་ཏུ་སྒྲུབ། །དབང་དང་དགུག་དང་འཐབ་པ་དང ། །གསོད་དང་བསྐྲད་པ་ལ་སོགས་པ། །རྡོ་རྗེ་བདུད་རྩི་བདེ་ཆེན་པོས། །བྱ་བ་ཐམས་ཅད་ཀུན་ཏུ་བྱ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་ 263b དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཀྱི་རྒྱལ་པོ་ལས། གསང་བའི་དཀྱིལ་འཁོར་བྱེད་པའི་མངོན་ཚུལ་བསྟན་པའི་ལེའུ་སྟེ་དང་པོའོ།། །།དེ་ནས་མགུ་བའི་ལྷ་མོ་དེ། །པདྨ་རྒྱས་པའི་མཱ་མ་ཀཱི་།བརྟན་པོ་འཁྱུད་པ་བྱས་ནས་ནི། །དབང་པོ་ཐམས་ཅད་ལ་འོ་བཏབ། །མ་མཆུ་སོས་བཟུང་འོ་བཏབ་སྟེ། །སིད་སྒྲ་སྔགས་ནི་བརྗོད་པར་བྱ། །རྡོ་རྗེ་བཅིངས་པས་སྐུ་ཡང་འཛིན། །རྡོ་རྗེ་ཅན་གྱིས་གསང་བྱས་ཏེ། །པདྨར་རྡོ་རྗེ་བཅུག་ནས་སུ། །ཆགས་ན་དགའ་སྟེ་འདོད་པར་བྱ། །སིད་སྒྲ་སྙན་པོ་སྒྲ་རྣམས་དང ། །ཀོ་ཀི་ལ་དང་གླིང་བུ་སོགས། །ལྷ་མོ་མཱ་མ་ཀཱི་དང་རྩེ། །རྡོ་རྗེ་བདུད་རྩི་བདེ་ཆེན་པོས། །ནུ་མ་ཟུང་ལ་གཟིར་བྱས་ཏེ། །སེན་མོ་རེ་མོས་གདབ་པར་བྱ། །དེ་ཡང་གོས་ནི་ཕུད་བྱས་ཏེ། །སྟེང་འོག་ལ་ཡང་བལྟ་བར་བྱ། །རྒྱས་པའི་པདྨར་འོ་བཏབ་ནས། །དགའ་བའི་ཚིག་ཀྱང་བརྗོད་པར་བྱ། །རྒྱས་པའི་པདྨ་མཱ་མ་ཀཱི། །ལྷ་མོ་ཆེན་མོ་ལེགས་སོ་ལེགས་\?\། །གཏན་དུ་འདོད་ལ་ཆགས་པ་ཡིས། །བདག་གིས་ཁྱོད་ལ་དགའ་བར་བྱ། །གང་ཞིག་འདོད་པ་ཁྱོད་ཀྱིས་ཞུས། །ཁྱོད་ལ་བདག་གིས་མཆོག་ཏུ་སྦྱིན། །དེ་ནས་ལྷ་མོ་མཱ་མ་ཀཱི། །ཚིག་འདི་དག་ནི་ཆེད་དུ་གསོལ། །བཅོམ་ལྡན་ཉིད་ཀྱིས་དེ་བཞིན་ཉིད། །བྱང་ཆུབ་སེམས་ཀྱི་རྣམ་སྤྲུལ་པ། །ཕྲ་བས་ཤིན་ཏུ་ཕྲ་ 264a ༄#། །བ་ཡིས། །ཟད་མེད་ཡེ་ཤེས་ཇི་ལྟར་རོལ། །དེ་འདྲ་ལྷ་ཡིས་དཔྱོད་པ་ནི། །དབང་པོ་གཉིས་ཀྱི་སྙོམས་འཇུག་པས། །དེ་དག་ཐེ་ཚོམ་འབྱུང་བས་ན། །བདག་ནི་ངོ་མཚར་དམ་པར་གྱུར། །དེ་ནས་བཅོམ་ལྡན་རྡོ་རྗེ་ཡིས། །རྡོ་རྗེ་བདུད་རྩི་བདེ་ཆེན་བཤད། །ཉོན་ཅིག་དེ་ཉིད་མཱ་མ་ཀཱི། །ཡེ་ཤེས་སྦྱོར་བ་འབིགས་བྱེད་པ། །ཤིན་ཏུ་ཕྲ་བ་གསང་ཆེན་པོ། །ཡེ་ཤེས་ཞེས་བྱ་ངོ་བོ་ཉིད། །དེ་ནི་བདག་གིས་བཤད་བྱ་སྟེ། །སངས་རྒྱས་བྱང་ཆུབ་རབ་སྒྲུབ་པ། །མི་འཇིགས་ཟད་མེད་རྟག་པ་ནི། །གདོད་མ་མེད་ཅིང་དབང་པོ་སྤངས། །ཡོད་ཉིད་དང་ནི་མེད་ཉིད་ཀྱང ། །དབང་པོ་དང་བཅས་དབང་པོ་མེད། །འབྱུང་བ་ཀུན་ཏུ་མ་མཐོང་བ། །སྦྱོར་བ་ལམ་གྱིས་མཐོང་བ་འོ། །སྦྱོར་བ་རྣམ་པ་གཉིས་གསུངས་ཏེ། །ཕྱི་དང་ནང་དུ་བཅས་པ་འོ། །ཕྱི་ནི་གཟུགས་ཀྱི་ཕུང་པོ་སོགས། །འབྱུང་བ་རྣམ་པ་ཀུན་རྫོབ་སྟེ། །སྣ་ཚོགས་གཡོ་དང་མི་གཡོ་བ། །ཁམས་གསུམ་དང་ནི་མ་ལུས་པར། །དེ་གཅིག་པོས་ནི་ཁྱབ་པ་སྟེ། །ཐམས་ཅད་རྣམ་ཤེས་ཁོ་ནའོ། །ཅི་ཕྱིར་སེམས་ཅན་བདག་མེད་རྣམས། །རྣམ་ཤེས་ཕུང་པོ་བརྟེན་པ་ཡིན། །བླུན་སེམས་སྙིགས་མའི་མི་རྣམས་ཀྱིས། །འགའ་ཡང་ཤེས་པ་མ་ཡིན་ནོ། །སེམས་ལས་མ་བྱུང་སེམས་ཀྱི་ངོས། །ཡེ་ཤེས་ཤེས་བྱ་ 264b ངོ་བོ་ཉིད། །ཐམས་ཅད་རྣམ་ཤེས་གཅིག་ཉིད་དོ། །གང་ཚེ་ལུས་ལ་རྐྱེན་ཉིད་འགྱུར། །ཆོས་རྣམས་དང་ནི་ཆོས་གཅིག་འགྱུར། །དངོས་པོ་བདག་ནི་དེ་ཚེ་འགྱུར། །ཅི་ཡི་ཕྱིར་ན་ཆོས་རྣམས་ཀྱི། །མང་པོ་ཉིད་དུ་ཆོས་རྣམས་ཀྱང ། །ཆུ་རྒྱུན་བཞིན་དུ་རྒྱ་མཚོ་ལ། །ཐར་པ་ནི་གཅིག་ཁོ་ན་སྟེ། །མང་པོ་ཉིད་དུ་མི་རྙེད་དེ། །ཅི་ལྟར་ནང་དུ་ཆེར་གནས་པ། །བླ་མའི་ཞལ་ཁོ་ན་ལས་ཐོབ། །བྷ་གའི་པདྨར་ནམ་མཁའ་གང ། །ནམ་མཁའ་ལྔ་ཡིས་བརྒྱན་པ་སྟེ། །སྙིང་དང་སྙིང་པོ་རྣམ་ལྡན་ཞིང ། །འདབ་མ་བརྒྱད་ཀྱིས་རྣམ་པར་ཀླུབས། །དེ་དབུས་རྡོ་རྗེ་ཅན་བཞུགས་ཏེ། །བྱང་སེམས་བདུད་རྩི་དང་ལྡན་པ། །ཆ་ཤས་ཆོས་མིན་རྣམ་གྲོལ་བར། །ཐིག་ལེ་དེ་ཡིས་རྣམ་པར་སྤངས། །དེས་གནས་རྟག་ཏུ་ཟག་པ་ནི། །བདུད་རྩི་བྱང་ཆུབ་སེམས་ཀྱི་གཟུགས། །ཁམས་རྣམས་ཀུན་གྱི་གཞི་ཡིན་པ། །སྟེང་འོག་ཏུ་ཡང་རྣམ་པར་ཁྱབ། །དེས་ནི་མཐོང་བ་ཐོས་པ་ཡང ། །མནམས་པ་དང་ནི་མྱང་བ་ཡང ། །རེག་དང་བདེ་བའི་ལོངས་སྤྱོད་ནི། །ཟས་དང་མེ་ཏོག་ཕྲེང་བ་དང ། །རྒྱན་དང་གོས་ཀྱིས་བརྒྱན་པ་སྟེ། །ངག་གིས་སྣ་ཚོགས་གྲགས་པ་ཡང ། །བླངས་པ་དང་ནི་བཟུང་བ་རྣམས། །རོལ་དང་ཀུན་ཏུ་འགྲོ་བ་དང ། །འདུག་དང་དེ་བཞིན་ཉལ་བ་དང ། །སད་པ་དང་ནི་ལོག་པ་དང ། །ཐམས་ཅད་རྨི་ལམ་མཐོང་བ་སྟེ། །བཞད་དང་ 265a ༄#། །དེ་བཞིན་ཆོ་ངེ་དང ། །ཤིན་ཏུ་ཡིད་འཕྲོག་གར་དང་ནི། །རྔ་རྣམས་དག་ཀྱང་བརྡུང་བ་སྟེ། །སྣ་ཚོགས་པ་དག་འདིར་བརྗོད་པས། །སྨྱོན་པ་དང་ནི་མྱོས་པའི་གཟུགས། །གཏི་མུག་འདོད་ཆགས་དེ་དེ་ཉིད། །གཟུགས་མེད་མང་པོའི་གཟུགས་ཅན་དེ། །ཕོ་དང་མོ་དང་མ་ནིང་རྣམས། །དུ་མའི་གཟུགས་ཅན་ཀུན་གྱི་བདག་།སྣ་ཚོགས་གཟུགས་ནི་ནོར་བུ་བཞིན། །ཁྱབ་པའི་དངོས་ཀྱིས་ཁྱབ་ནས་སུ། །དེ་ཉིད་དམ་པ་ཆེར་གནས་སོ། །དེ་བཞིན་ཉིད་དེ་མཱ་མ་ཀཱི། །བཟླས་མེད་འཛིན་པ་ཡང་མེད་དེ། །བགྲང་ཕྲེང་བྱ་བ་འགའ་ཡང་མེད། །ཟས་སྤངས་པ་ཡང་མི་བྱ་འོ། །བྷ་གའི་པདྨ་མཆོད་བྱས་ཏེ། །མཁས་པས་བདུད་རྩི་བཟའ་བར་བྱ། །རྡོ་རྗེ་བདུད་རྩི་བདེ་བ་ཆེ། །དེ་ཡིས་དེ་ཉིད་འགྲུབ་པ་འོ། །གང་དེ་བདུད་རྩི་འབབ་པའི་རྩ། །བྷ་གའི་དབུས་སུ་པདྨ་སྟེ། །རྩ་གཞན་སུམ་ཅུ་རྩ་གཉིས་ལ། །དེ་ཡི་དབུས་སུ་དེ་གཙོ་སྟེ། །དེ་དག་ལས་གཞན་ཤིན་ཏུ་མཆོག་།རྩ་དག་དགུ་ནི་རྣམ་པར་གནས། །སྒོ་དགུ་ལ་གནས་རིག་པ་དག་།སྒྲུབ་པ་པོས་ནི་མཆོད་པར་བྱ། །འདོད་པའི་ཡོན་ཏན་ལྔ་ལྷ་མོ། །རྟག་ཏུ་རྡོ་རྗེ་ཅན་མཉམ་བལྟ། །དེ་བས་དེ་དག་རབ་བྱེད་ན། །ཆགས་བྲལ་ཞེས་གསུངས་ཀུན་རིག་པས། །དེ་དག་གསང་ཆེན་མཆོག་རབ་ 265b ནི། །ཞལ་བཟང་མ་ཀྱེ་སྦྱོར་བར་བཤད། །སྣ་ཚོགས་རྣམ་སྣང་མཛད་སོགས་པ། །དེ་བཞིན་གཤེགས་པས་མི་ཤེས་ཏེ། །གཏན་ཏུ་དགའ་བའི་ཡིད་བདེ་བ། །སྦྱོར་བས་དམ་པ་རབ་བསྟན་ཏོ། །གསང་བའི་པདྨ་མཐོང་ནས་དང ། །ཤིན་ཏུ་རྒྱས་པའི་མཱ་མ་ཀཱི། །རྡོ་རྗེའི་བདུད་རྩི་བདེ་བ་ཆེ། །དེ་ཉིད་བདག་གིས་བཤད་པར་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། དེ་བཞིན་ཉིད་སྦྱོར་བ་ཡེ་ཤེས་བསྟན་པ་ཞེས་བྱ་བ་ལེའུ་གཉིས་པའོ།། །།དེ་ནས་མགུ་བའི་ལྷ་མོ་དེས། །ཧ་ར་ནུ་པུར་གྱིས་བརྒྱན་ཏེ། །འདི་དག་དབྱངས་ནི་བླངས་ནས་སུ། །སེམས་དཔའ་ཆེན་པོ་དགྱེས་པར་བྱེད། །ཕྱུང་མཛད་བདེ་ཆེན་རྡོ་རྗེ་ལས། །བདག་གིས་མཆོག་གི་ཡིག་འབྲུ་འཚལ་བར་བགྱི། །བྷ་གའི་པདྨར་བདེ་བ་ཆེན་པོ་སྟེ། །རྡོ་རྗེའི་དོན་དེ་བདེ་བ་ཆེན་པོ་ལགས། །ས་འཛིན་པ་དང་སྐད་ཕྲེང་དང ། །དྲུག་ལྡན་ལ་སོགས་མཐའ་འཁོབ་ཚུལ། །སྣ་ཚོགས་ཐུན་མོང་རྣམ་དག་གི། །སྙན་པའི་སྒྲ་ཡིས་བླང་བར་བྱ། །དེ་རྣམས་དབྱངས་དག་བླངས་ནས་སུ། །དགའ་བ་ཡིད་བདེ་རྣམ་སྤྲུལ་གྱིས། །རྡོ་རྗེ་བདུད་རྩི་བདེ་བ་ཆེ། །སངས་རྒྱས་བྱང་ཆུབ་བསྒྲུབ་པར་བྱ། །གསང་བའི་དཀྱིལ་འཁོར་བཀའ་སྩལ་པས། །དེ་བཞིན་ཉིད་ 266a ༄#། །ཀྱིས་ཐེ་ཚོམ་བཅད། །རྡོ་རྗེ་ཅན་ཁྱོད་བཀའ་དྲིན་གྱིས། །རྟག་པར་ཡེ་ཤེས་བྱ་བ་བགྱི། །བཅོམ་ལྡན་ཆགས་པ་དང་བྲལ་བའི། །རྡོ་རྗེ་བདུད་རྩི་འབྱུང་བ་འདི། །རྡོ་རྗེ་ཐེག་པ་འབྱུང་བ་ཡི། །སྦྱོར་བ་བདག་གིས་བསྟན་པར་བགྱི། །ད་དུང་བདག་ལ་ཐེ་ཚོམ་མཆིས། །ཕྱག་རྒྱ་གཉིས་ཀྱི་རྣམ་སྤྲུལ་པ། །ཇི་ལྟར་ཕྱག་རྒྱ་ཡང་དག་འབྱུང ། །དེ་དག་གི་སྔགས་ཇི་ལྟར་ལགས། །སྔགས་རྣམས་གང་ལས་སྐྱེ་བ་ལགས། །ཁྱད་པར་དུ་ནི་ལྷ་རྣམས་ཀྱང ། །ལྷ་ནི་དེ་དག་ཐེ་ཚོམ་ན། །མདོར་བསྡུས་ནས་ནི་བདག་ལ་གསུངས། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེ་ཅན་འདི་གསུངས། །ཕྱག་རྒྱ་སྔགས་དག་འབྱུང་པ་ནི། །བཤད་དེ་ཅིག་མཱ་མ་ཀཱི། །ཕྱག་རྒྱ་རྣམ་པ་གསུམ་གསུངས་ཏེ། །སྐུ་དང་གསུང་དང་ཐུགས་ལས་འབྱུང ། །སྐུ་ནི་ཕྱག་རྒྱ་མཆོག་འགྱུར་ཏེ། །གསུང་ནི་ཕྱག་རྒྱ་སྔགས་ཀྱི་ལས། །ཐུགས་ཀྱི་མཚན་མའི་ཕྱག་རྒྱ་ནི། །བསམ་གཏན་རི་མོ་གཉིས་མེད་གནས། །རྡོ་རྗེ་བདུད་རྩི་རྒྱུད་ཆེན་ལ། །སྦྱོར་བའི་ཕྱག་རྒྱ་ཞེས་བྱ་སྟེ། །མཚན་མའི་ཕྱག་རྒྱ་མི་བྲི་འོ། །ཕྱག་རྒྱ་མངོན་སུམ་གཟུགས་ཡིན་ཏེ། །ལྷ་ནི་ལྷ་མོ་བུད་མེད་དོ། །དབང་པོ་ཐམས་ཅད་བདེ་བ་རུ། །བྷ་གའི་པདྨར་མཆོད་པར་བྱ། །རྡོ་རྗེའི་པདྨ་མཉམ་སྦྱོར་ཞིང ། །ལས་ཐམས་ཅད་ནི་འགྲུབ་པར་བྱ། །ཇི་ལྟར་ 266b དཔག་བསམ་ཤིང་ཆེན་གྱི། །ཡལ་ག་བརྒྱ་ཕྲག་སྟོང་ཅན་དང ། །རྩ་དང་དེ་ལ་གཟུང་བ་ནི། །སྐྱེ་བའི་རྐྱེན་དུ་འགྱུར་བ་བཞིན། །དེ་ལྟར་བདུད་རྩི་འབབ་པའི་རྩ། །སྔགས་དང་ཕྱག་རྒྱའི་ཡུམ་ཡིན་ཏེ། །སྔགས་འདི་རྣམས་ཀྱི་སྐྱེ་བ་ནི། །བྷ་གའི་དབུས་སུ་གནས་པ་འོ། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །རྡོ་རྗེ་བཅུག་ནས་མཱ་མ་ཀཱི། །ཉོན་ཅིག་སྔགས་རྣམས་མཚན་ཉིད་ནི། །དང་པོ་རྣམ་སྣང་མཛད་སྦྱོར་ཏེ། །ོཾ་བཛྲ་ཨ་མྲྀ་ཏ་མཧཱ་སུ་ཁ། །ས་བོན་བཞི་དང་མཉམ་ལྡན་ལ། །སཝཱ་ཧཱ་ཡི་གེ་ཡང་སྦྱོར་རོ། །རྣམ་པར་སྣང་མཛད་ཡང་འབུལ་ཏེ། །ཡི་གེ་གཉིས་དང་བཞི་པ་སྟེ། །བཞི་པ་ཡིས་ནི་མཉམ་ལྡན་པ། །མཱ་མ་ཀཱི་ཡི་སྙིང་པོའི་མཆོག་།བརྒྱད་དག་ཁོ་ནའོ་དབུས་མ་གང ། ། བརྒྱད་ལ་རྒྱན་གྱིས་རྣམ་པར་བརྒྱན། །འདབ་བརྒྱད་ལ་ནི་སྦྱར་བྱས་ཏེ། །ལྷ་མོ་སྔགས་ཀྱིས་སྔགས་ཕྱུང་ངོ ། །སྒོ་སྲུང་དག་གི་སྔགས་རྣམས་ནི། །ཉོན་ཅིག་སྐལ་བཟང་མཱ་མ་ཀཱི།། སྡེ་ཡི་ཐ་མ་སྔགས་ཕྱུང་སྟེ། །ས་བོན་བརྒྱད་ནི་སྔགས་རིགས་པས། །སྟོང་པའི་ལྷ་ཡིས་གནོན་བྱས་ཏེ། །རྣམ་པར་སྣང་མཛད་དང་ལྡན་ལ། །སཝཱ་ཧཱ་ཡི་གེ་མཉམ་པོར་ལྡན། ། དངོས་གྲུབ་ཐམས་ཅད་རབ་སྦྱིན་རྣམས། །བཞི་ནི་སྒོ་སྲུང་གི་ཡིན་ཏེ། །བཞི་ནི་སྤོས་དང་པུཥེཔ་སོགས། །མ་ནིང་ཡི་གེ་གྲ་བཞི་ལ། །སཝཱཧཱ་རྣམ་པར་སྣང་མཛད་ཡང ། ། 267a ༄#། །ལྷ་མོ་གསང་བའི་མཱ་མ་ཀཱི། །རྔ་སོགས་ཀུན་གྱིས་མཆོད་པར་བྱ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། །གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩེ་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། སྔགས་ཕྱུང་བའི་རིམ་པ་བསྟན་པ་ཞེས་བྱ་བ་ལེའུ་གསུམ་པའོ།། །།དེ་ནས་སྦྱིན་སྲེག་ལས་དག་གི་།ཆོ་གའི་རིམ་པ་བཤད་པར་བྱ། །སྦྱོར་བའི་རྒྱུད་ཀྱི་ཆོ་ག་ཡིས། །སྐུ་གསུང་ཐུགས་ནི་སྒྲུབ་པ་ཡིན།། ཞི་བ་དང་ནི་རྒྱས་པའི་ལས། །དེ་བཞིན་དབང་དང་མངོན་སྤྱོད་དང ། །འཐབ་དང་བསྐྲད་ཀྱང་དེ་བཞིན་དུ། །སྔགས་དང་ཕྱག་རྒྱའི་སྒྲུབ་པ་རྣམས། །དེ་ཀུན་བདག་གིས་བཤད་པར་བྱ། །རྡོ་རྗེ་བདུད་རྩི་འབྱུང་བ་འོ། །རྡོ་རྗེ་སེམས་དཔའ་འགྱིང་བྱེད་པ། །སྐུར་བརྟེན་བཅས་པས་གཉིས་གནས་ནས། །རྒྱན་ཐམས་ཅད་ཀྱིས་བརྒྱན་བྱས་ཏེ། །སློབ་དཔོན་དཀྱིལ་འཁོར་འཇུག་པར་བྱ། །ཁམས་གསུམ་རྣམ་པ་རྒྱལ་གྱུར་ནས། །རྐང་གཉིས་གཡས་བརྐྱང་བྱ་བ་དང ། །གཡོན་བརྐྱང་བྱ་བ་ཡང་བྱས་ཏེ། ། རྐང་མཉམ་དང་ནི་ས་ག་ཡི། །ས་ནི་སྦྱོང་བར་བྱེད་མ་ཐག་།ས་ལ་རེག་ན་འཇམ་སྐྱེའོ། །དེ་ནས་བགེགས་རྣམས་བསྐྲད་ནས་སུ། །གཞན་ཡང་སྲུལ་པོ་ལ་སོགས་པ། ། 267b གོང་དུ་བླ་མ་ཕྱག་འཚལ་ལོ། །ཕྱི་ནས་ས་ཡི་ལྷ་མོ་དགུག་།ོཾ་ཨེ་ཧྱེ་ཧི་ལྷ་མོ་ཆ། །ས་ཡི་བརྟན་མ་འཇིག་རྟེན་ཡུམ། །རིན་ཆེན་ཐམས་ཅད་རབ་རྫོགས་པ་འོ། །ལྷ་ཡི་རྒྱན་གྱིས་བརྒྱན་བྱེད་མ། །ཧ་ར་ཎུ་པུར་སྒྲ་འབྱིན་པ། །རྡོ་རྗེ་སེམས་དཔའ་རབ་ཏུ་མཆོད། །ཡོན་འདི་དག་ནི་བཞེས་ནས་སུ། །སྦྱིན་སྲེག་ལས་ནི་འགྲུབ་པར་མཛོད། །ཧི་ཧི་ཧི་ཧཱ་སཝཱཧཱ། བཤང་གཅི་ཁྲག་དང་ཁུ་བ་ཡིས། །དཀྱིལ་འཁོར་ས་ལ་གཏོར་བར་བྱ། །བྱིན་རླབས་བྱ་བའི་ཕྱིར་སྤོས་ནི། །ཤ་ཆེན་གྱིས་ནི་དབུལ་བར་བྱ། །དེ་ནས་རིག་མ་འཇུག་བྱས་ཏེ། །གདོལ་པ་མོ་དང་སྨེ་ཤ་མ། །གར་མཁན་མ་དང་བྲམ་ཟེ་མོ། །དེ་ཁོ་ན་བཞིན་རྒྱལ་མོ་དང ། །དམངས་རིགས་མོ་དང་རྒྱལ་རིགས་མོ། །དྲི་དང་སྤོས་ཀྱི་མཆོད་བྱས་ཏེ། །ལྷ་ཡི་རྒྱན་གྱིས་བརྒྱན་པར་བྱ། །ཡན་ལག་ལྔ་ལ་ཡི་གེ་ཧྲི། །བྷ་གའི་དབུས་སུ་ཡི་གེ་བྲུཾ། །སྤྱན་མ་སྒྲོལ་མ་གོས་དཀར་མ། །ཡིད་དགའ་མ་བདག་བསྒོམ་པར་བྱ། །བྷ་གའི་དབུས་སུ་སློབ་དཔོན་གྱིས། །མེ་ཏོག་གཏོར་བ་ཁོ་ནར་བྱ། །དེ་ནས་སྔགས་པས་ཧོཾ་ཁུང་ནི། །ཚད་མར་ཀུན་ཏུ་བྲི་བྱ་སྟེ། །ཞི་ལ་ཟླུམ་པོར་བྱ་བ་སྟེ། །ཁྲུ་གང་ཙམ་དུ་ཐིག་གདབ་བོ། །ཁྲུ་ཕྱེད་ས་ལ་བརྐོས་ནས་སུ། །དཀར་རྩི་ཚོན་གྱིས་བྱུག་པར་བྲི། །ཀུན་ཏུ་འཁོར་ལོ་ཚུལ་ལྟར་ཡང ། །གློ་སུམ་མཉམ་པོར་བྲི་བའོ། །རྒྱས་པ་ལ་ནི་ཁྲུ་དོ་སྟེ། །དེ་ལ་ཁྲུ་གང་བརྐོ་བར་བྱ། །གྲུ་བཞི་པ་ནི་མཐའ་ 268a ༄#། །མཉམ་དུ། །མུགས་དང་བཙག་གིས་གི་བ་འོ། །མངོན་སྤྱོད་ལ་ནི་ཟུར་གསུམ་སྟེ། །སོར་ཉི་ཤུ་ནི་ཡངས་པའི་ཚད། །ཉི་ཤུ་ཕྱེད་ནི་བརྐོ་བྱས་ན།། དབུས་སུ་རྡོ་རྗེ་རྒྱ་གྲམ་ཡང ། །འབར་བ་ཕྲེང་གིས་འཁྲུག་པ་བྲི། །དེ་བཞིན་དབང་དང་དགུག་པ་ལ། །ཟླ་ག་མ་ཡང་དག་བྲི་པའོ། །ཧོཾ་ཁུང་ཡང་དག་སྟོན་ནས་སུ། །ཕྱོགས་ཀྱི་ཆ་ཡང་བསྟན་པར་བྱ། །བྱང་དུ་མངོན་དུ་ཁ་བསྒྱུར་ཏེ། །སྔགས་པས་ཞི་བ་བརྩམ་པར་བྱ། །རྒྱས་པ་ལ་ནི་ཤར་དུ་ཡང ། །མངོན་སྤྱོད་ལ་ནི་ལྷོ་ན་སྟེ། །དབང་ནི་ནུབ་ཏུ་ཁོ་ན་བཤད། །དགུག་དང་བསྐྲད་ཀྱང་དེ་བཞིན་ནོ། །མངོན་སྤྱོད་རྟག་པར་ནག་པོ་སྟེ། །ཚོན་ལྔ་ཡིས་ནི་དབང་སོགས་བྱ། །འབྲས་དང་ཏིལ་དང་འོ་མ་དང ། །མར་དང་སྦྲང་རྩི་ལྷན་ཅིག་པར། །བདུད་རྩི་ལྔ་དང་ལྡན་པ་ཡིས། །ཞི་བ་རྒྱས་པ་སྦྱིན་སྲེག་བྱ། །སྲེག་ཤིང་རྣམས་ཀྱང་ཐམས་ཅད་ལ། །དྲི་ཞིམ་འོ་མ་ཅན་ཤིང་ངོ ། །སྣ་ཚོགས་ཟས་སམ་གཏོར་མ་ཡང ། །འབྱུང་པོ་ཐམས་ཅད་སྦྱིན་པར་བྱ། །གཏོར་མ་གང་ཡང་སྒྲུབ་པ་པོས། །ཁྲག་འཐུང་ཕྱག་རྒྱ་ཆེན་པོས་སྦྱིན། །གང་ཞིག་ཡིད་ཀྱིས་འདོད་པ་ནི། ། རྟག་ཏུ་རྣལ་འབྱོར་པ་ཡིས་འགྲུབ། །དབྱར་གྱིས་དུས་ནི་ཞི་བ་སྟེ། །རྒྱས་པ་དེ་བཞིན་དགུན་གྱི་དུས། །དཔྱིད་ཀ་མངོན་སྤྱོད་ལས་རྣམས་ནི། །སྒྲུབ་པ་པོས་ནི་ཐམས་ 268b ཅད་བྱ། །ཤར་དུ་ཞེ་བ་རབ་ཏུ་གསུངས། །རྒྱས་པ་དེ་བཞིན་སྲོད་ལ་སྟེ། །ཉིན་ཕྱེད་ལ་འམ་ནམ་ཕྱེད་ལ། །རྟག་པར་མངོན་སྤྱོད་བྱ་བ་འོ། །ཧོཾ་ཁུང་དབུས་སུ་ཡི་དམ་ལྷ། །ཡི་གེ་ཧཱུཾ་གིས་བསྐྱེད་ནས་སུ། །ཞལ་ནི་གདངས་པ་བསམ་བྱས་ཏེ། །སྦྱིན་སྲེག་དེ་ལ་དབུལ་བར་བྱ། །སྦྱིན་སྲེག་འབུམ་ཕྲག་འབུལ་འགྱུར་ན། །མདུན་དུ་མངོན་སུམ་ཁོ་ནར་འགྱུར། ། དང་པོ་མེ་ནི་དགུག་བྱ་བ། །ལྷ་ཐམས་ཅད་ཀྱི་མཆོད་པའི་གནས། །འོད་ཟེར་ཕྲེང་འཁྲུགས་དྲག་པོ་ལྷ། །སངས་རྒྱས་བྱང་ཆུབ་འགྲུབ་པ་འོ། །ོཾ་ཨེ་ཧྱེ་ཧི། འདིར་གཤེགས་གདོན་མི་ཟ་བར་ཁྱོད། །མེ་ལྷ་མངོན་སུམ་དངོས་གྲུབ་སྦྱིན། །དྲག་པོ་ཁམས་གསུམ་གྱིས་མཆོད་པ། །ཁྱབ་འཇུག་ཚངས་པས་ཕྱག་འཚལ་བ། །འདི་དག་ཡོན་ཡང་བཞེས་ནས་སུ། །ཞབས་གཡོན་བརྗེས་ཀྱང་རྡོ་རྗེ་ཅན། །ོཾ་ཧཱུཾ་ཧཱུཾ་ཧཱུཾ་ཕཊ་ཕཊ་སཝཱཧཱ། དང་པོ་ལ་ནི་ཡོན་འབུལ་ཏེ། །ཕྱི་ནས་ལྷ་བཤོས་མེ་ཏོག་འབུལ། །ོཾ། ལྷ་ཡི་མེ་ཏོག་ཤིན་ཏུ་དམར། །དྲི་ཞིམ་ཤིན་ཏུ་མཛེས་པ་ནི། །མེ་ཏོག་དེ་རིང་བཞེས་ནས་སུ། །འདི་ལ་བྱིན་གྱིས་བརླབ་པར་གསོལ། །ཧཱུཾ་མེ་ཏོག་གི་སྔགས་སོ། །ོཾ།་མར་མེ་འོད་ཟེར་འབར་བ་ནི། །ངན་འགྲོ་འཇིགས་པ་འཇོམས་བྱེད་པ། །ལྷ་ཡི་མིག་བྱེད་བཀྲ་ཤིས་པས། །མར་མེ་ཁྱོད་ཀྱིས་བཞེས་སུ་གསོལ། །ཧཱུཾ་མར་མེའི་སྔགས་སོ། །ོཾ།་ཙནྡན་ག་བུར་དང་ 269a ༄#། །བཅས་པའི། །དྲི་ཞིམ་སྤོས་མེ་འགྲེ་བ་ནི། །མཐུ་དང་བཅས་པར་བྱ་བ་འདི། །བཞེས་ནས་བྱིན་གྱིས་བརླབ་ཏུ་གསོལ། །ཧཱུཾ་སྤོས་ཀྱི་སྔགས་སོ།། ཨོཾ་སྣ་ཚོགས་ལྷ་ཡི་དྲི་ཞིམ་པ། །སྣ་ཚོགས་ག་བུར་རྣམ་བརྒྱན་པས། །སྣ་ཚོགས་ཡི་གེ་ཧཱུཾ་ལས་བྱུང ། །དྲི་འདི་འབུལ་ཏེ་བཞེས་སུ་གསོལ། །ཧཱུཾ་དྲིའི་སྔགས་སོ། །དང་པོར་མཆོད་པའི་ཆོ་ག་ནི། །ཐེ་ཚོམ་མེད་པར་མེ་ལ་བྱ། །ཕྱི་ནས་རང་གི་ཡི་དམ་ལྷའི། །བཟླས་སྔགས་རིག་པར་བརྗོད་པར་བྱ། །དབྱངས་དང་གར་དང་ཟས་རྣམས་ཀྱིས། ། རྣམ་པ་དུ་མར་རོལ་བྱས་ཏེ། །རིག་པ་དང་ནི་སྒྲུབ་པ་པོས། །ཚོགས་ལ་མཆོད་པས་མཉེས་པར་བྱ། །གལ་ཏེ་དངོས་གྲུབ་དག་འདོད་ན། །སྐུ་གསུང་ཐུགས་ནི་འགྲུབ་པའོ།། བླ་མ་མེ་ལྷ་རྡོ་རྗེ་འཛིན། །མཆོད་པར་བྱས་ནས་རྫོགས་པར་བྱ། །ོཾ། མེ་ལྷ་ལས་ནི་གྲུབ་པར་མཛད། །སེམས་ཅན་ཐམས་ཅད་བདེ་བ་འདྲེན། །སྐུ་གསུང་ཐུགས་དངོས་གྲུབ་དོན་དུ། །ལྷ་རྣམས་ལས་ནི་རྗེས་སུ་སྐྱོབས། །མེ་ལྷ་ཞི་བར་གཤེགས་ནས་སུ། །ས་གཞི་ཞི་བར་མཛད་མཛོད་ཅིག་།རྒྱུ་དང་མི་རྒྱུ་བཅས་པ་ཡིས། །སྒྲུབ་པ་པོ་དང་ཐམས་ཅད་དང། །བདག་གི་བསོད་ནམས་འབྲས་འགྱུར་དང ། །སྔགས་ཀྱི་དངོས་གྲུབ་རབ་སྦྱིན་ཅིག་། ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨེ། ཨོ་ཨཽ། ཨཾ་ཨཿ ཧཱུཾ་སཝཱཧཱ། རྡོ་རྗེ་ 269b བདུད་རྩི་བདེ་བ་ཆེ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་ཆེན་པོ་ལས། སྦྱིན་སྲེག་གི་ཆོ་ག་བསྟན་པ་ཞེས་བྱ་བའི་ལེའུ་བཞི་པའོ།། །།ཁྱོད་ལ་མག་སྨན་བཤད་པར་བྱ། །ཚིལ་ཆེན་གྱི་ནི་སྙིང་པོ་ཡི། །བན་ད་ལ་ནི་དུད་པ་བླངས། །འུག་པའི་མགོ་བོ་བསྲེགས་ནས་སུ། །ཁྲག་ཆེན་དང་ནི་བསྲེགས་པར་བྱས། །མཚན་མོ་ལ་ནི་བཏགས་ནས་སུ། །ཞི་བ་མོར་ཕྱེ་མར་ཁོ་ནར་བྱ། །བྱ་རྒོད་རྗེ་ངར་བཀང་ནས་སུ།། མི་ཡི་རུས་པའི་ཐུར་མང་གིས། །མིག་ལ་བསྐུས་ནས་གཟུགས་ཀུན་གྱི། །རྟག་ཏུ་རྣལ་འབྱོར་པ་ཡིས་བྱེད། །རྡོ་རྗེ་བདུད་རྩི་ལས་བྱུང་བའི། །མིག་སྨན་དངོས་གྲུབ་སྦྱོར་བ་ནི། ། ནག་པོའི་ཚེས་བརྒྱད་བཅུ་བཞི་ལ། །བྷ་གའི་དབུས་སུ་བསྒྲུབ་པར་བྱ། །ཞི་བ་དང་ནི་རྒྱས་པ་དང ། །དེ་བཞིན་དབང་དགུགས་ལས་བྱེད་དོ། །སྣ་ཚོགས་དྲག་པོའི་གདོན་རྣམས་དང། །ཞག་བཞི་པ་ཡི་རིམས་དང་དུག་།ཐམས་ཅད་མེད་པར་བྱེད་ལྷ་མོ། །དགའ་མ་ཁྱོད་ལ་བདེན་པར་བཤད། །རྒྱལ་པོའི་ཁབ་ན་ཆེན་པོར་མཆོད། །དགྲ་བོ་རྣམས་ཀྱང་ཟད་བྱེད་དོ། །དེ་བཞིན་བགེགས་ཀྱང་འགག་པར་བྱེད། །མིག་སྨན་ལྡན་པར་བཟླ་བར་བྱ། །ོཾ།་འདོད་པའི་གཟུགས་ཅན་མིག་ཡངས་མ། །བཤང་གཅི་ཁྲག་ལ་དགའ་བྱེད་མ། །ཞལ་ 270a ༄#། །གསུམ་ཕྱག་དྲུག་པའི་ལྷ་མོ། །དྲག་པོའི་གཟུགས་ཅན་མཱ་མ་ཀཱི། །ཧྲཱིཾ་ཧྲཱིཾ་ཧཱུཾ་ཧཱུཾ། ཨ་ཨཾཿ ་ཨེ་ཧཱ་ཧཱ་སཝཱཧཱ། དང་པོའི་ཞལ་ནི་ནག་པོ་སྟེ། །དེ་ཁོ་ན་བཞིན་གཡས་ནི་དཀར། །གཡོན་ནི་དམར་པོར་དེ་རིག་ནས། །གཡས་ཕྱོགས་རལ་གྲི་འཁོར་ལོ་ཅན། །གཡོན་དུ་ཞགས་པ་དང་ལྕགས་ཀྱུ། །དེ་བཞིན་རྡོ་རྗེ་དྲིལ་བུ་ཡང ། ། བྷ་གའི་དབུས་སུ་བསྒོམས་བྱས་ཏེ། །དེ་ལ་མིག་སྨན་བསྒྲུབ་པར་བྱ། །བྷ་ག་གུར་གུམ་གྱིས་བཀང་ནས། །ཕྱི་ནས་ལིང་ག་གཞུག་པར་བྱ། །དེ་ལ་བརྗོད་པར་བྱ་སྔགས་ནི། ཨོཾ་ཡིག་སྒྲ་ཡིག་ཕྱེ་བ་དང ། །བཛྲ་ཨ་མྲྀ་ཏ་ཞེས་བྱའོ། །སྒྲ་སྒྲོགས་སྤྲིན་དང་ཕཊ་ཡིག་གོ་།བདུད་རྩི་དང་ནི་མཉམ་ལྡན་པས། །བྷ་གའི་དབུས་ནས་དབྱུང་བར་བྱ། །དེ་ལ་སྔགས་འབུམ་བཟླས་ནས་སུ། །དེ་ཡིས་ཐིག་ལེ་ཁོ་ནར་བྱ། །བུད་མེད་ཀྱིས་ཁྱོ་འཁོལ་འགྱུར་ཏེ། །མདུན་ན་འདོན་བཅས་རྒྱལ་པོ་ཡང ། །སྐྱེས་པ་གང་གིས་དེ་བྱས་ནས། །བུད་མེད་གང་ལ་སྐལ་ཅན་འགྱུར། །རྒྱལ་པོའི་ཁབ་ཅན་ཆེན་པོར་ཚེད། །དགྲ་བོ་རྣམས་ནི་ཟད་བྱེད་དོ། །དུར་དུར་ཨརྐའི་འབྲས་བླངས་ཏེ། །བདུད་རྩི་དང་ནི་བསྲེས་བྱས་ན། །ཞལ་གསུམ་དྲག་པོའི་གཟུགས་དང་ནི། །གཤིན་རྗེ་གཤེད་ཁྲོ་བཟླས་ནས་སུ། །ཤ་ཆེན་དང་ནི་ལྡན་བྱས་ཏེ། །ཆང་དང་བསྲེས་ལ་སྦྱིན་པར་བྱ། །རྟག་ཏུ་མྱོས་ནས་འཁོར་ནས་སུ།། 270b མི་ནི་བསྐམས་ནས་ཤི་འགྱུར་རོ། །ོཾ་ཧྲཱིཿ ཥྚྲཱིཿ ཝི་ཀྲི་ཏཱ་ན་ན་སརྦ་ཤ་ཏྲུཾ་བི་ནཱ་ཤ་ཡ། སྟམ་བྷ་ཡ། །མཱ་ར་ཡ་ཧཱུཾ་ཧཱུཾ་ཕཊ། སྔགས་པས་གིའུ་ཝང་བླངས་ནས། །བྷ་ག་ལ་ནི་ཡིག་འབྲུ་བྲི། །ཙནྡན་གྱིས་ནི་མཉམ་བྱུགས་ནས། །ཁྱོད་དང་ལྷན་ཅིག་གནས་པར་བྱ། །གནས་མ་དག་ནི་བདེ་ཆེན་ཏེ། །འཁོར་གཡོག་དངོས་པོར་འགྱུར་བར་རོ། །བཤང་གཅི་གཟུགས་བརྙན་བྱས་ནས་སུ། །ཤ་ཆེན་གྱིས་ནི་སྤོས་དབུལ་ཏེ། །དགྲ་ཡི་སྐྲ་ཡིས་དཀྲིས་བྱས་ནས། །རུས་པའི་ཕྱེ་མས་བྱུག་པར་བྱ། །དགྲ་སྒོར་བརྐོས་ནས་སྤང་བྱས་ན། །ཞག་བདུན་གྱིས་ནི་ཤི་འགྱུར་རོ། །བཤང་གཅི་ཁྲག་དང་བསྲེས་པ་ཡི། །ཤ་ཆེན་གྱིས་ནི་སྦྱིན་སྲེག་བྱ། །དུར་ཁྲོད་ཀྱི་ནི་སྲེག་ཤིང་ཡང ། །ཤིང་གཅིག་པ་དང་ལམ་མདོ་ན། །མེ་ཡི་ཧོམ་ཁུང་བྲིས་ནས་སུ། །ཉིན་ཕྱེད་ནམ་ཕྱེད་སྦྱིན་སྲེག་བྱ། །ཁྲོ་ཆེན་གཤིན་རྗེའི་གཤེད་པོ་ཡི། །སྐུ་ལ་ཐལ་བས་བསྐུས་པས་ནི། །བསྒོམས་ནས་དགྲ་ལ་ཆེར་གནོད་ན། །གདོན་མི་ཟ་བར་ཤི་འགྱུར་རོ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་འདས་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། ལས་ཆེན་པོ་བསྟན་པ་ཞེས་བྱ་བའི་ལེའུ་ལྔ་པའོ།། །།རྡོ་རྗེ་བདུད་རྩི་རྒྱུད་ཆེན་ལས། །དཔལ་ལྡན་རྡོ་རྗེ་ 271a ༄#། །ཧཱུཾ་མཛད་ཀྱི། །སྒྲུབ་པ་མདོར་བསྡུས་བཤད་པར་བྱ། །དཀྱིལ་འཁོར་ཆོ་གའི་རིམ་པ་ཡང ། །དེ་ཡི་དཀྱིལ་འཁོར་ཆོ་ག་ཞེས། །ཁམས་གསུམ་རྣམ་རྒྱལ་ལས་བྱུང་ཡིན། །གྲུ་བཞི་པར་ནི་ཐིག་གདབ་སྟེ། །ཁྲུ་གང་ཡང་ན་ཁྲུ་དོའོ། །ཟླ་བའི་དཀྱིལ་འཁོར་དང་འདྲ་བ། །འོད་ཟེར་འབར་བ་ལ་འཁྲུགས་བ་ལ། །དཔལ་ལྡན་རྡོ་རྗེ་ཧཱུཾ་མཛད་བཞག་།ཞལ་གསུམ་དེ་བཞིན་ཕྱག་དྲུག་སྟེ། །རྒྱན་ཐམས་ཅད་ཀྱིས་ཡོངས་རྫོགས་པ། །ཕྱག་རྒྱ་ཡིས་ནི་ཕྱག་བརྒྱན་པ། །རིག་མ་བཞི་དང་མཉམ་ལྡན་པ། །ུ་མའི་སྲ་བའི་ནུ་མར་བཞུགས། །ཅུང་ཟད་མཆེ་བ་གཙིགས་པ་པོ། །ཁྲོ་དང་ལྡན་པར་བཞད་བྱེད་ཞལ། །གཡས་པ་ལ་ནི་མདའ་བྲིས་ཏེ། །དེ་ཁོ་ན་བཞིན་གཡོན་ན་གཞུ། །ཕྱག་བཞི་པ་ནི་བྲིས་པ་ལ། །ཕྱག་གཉིས་པས་ནི་ནུ་མར་བསྣམས། །རིག་མ་ཐམས་ཅད་ཞལ་གསུམ་སྟེ། །དེ་བཞིན་མེ་ཏོག་སྤོས་མེ་མ། །དྲི་ཡང་ཡང་དག་བྲི་བར་བྱ། །སྒེག་མོ་ཕྲེང་བ་དེ་བཞིན་དབྱངས། །གར་མཁན་ཡང་ཕྱག་དྲུག་ཉིད། །དེ་བཞིན་གླིང་བུ་མ་བྲི་སྟེ། །བི་ཝང་མ་དང་རྔ་ཆེན་མ། །རྫ་རྔ་མ་དང་སིལ་སྙན་ཀུན། ། དཀྱིལ་འཁོར་ལ་ནི་ཕྲ་བའོ། །བདུད་ཀྱི་རྒྱུད་ཆེན་ལས། །གལ་བ་བཟང་པོ་ཡང་བཞག་སྟེ། །ཕྱག་གཉིས་བ་ལ་ཞལ་གཅིག་བ། །བཟང་པོ་དེ་དག་ཁོ་ནའོ། །རྒྱན་ནི་ཐམས་ 271b ཅད་ཀྱིས་བརྒྱན་པ། །སྒྲུབ་པ་པོ་ཡང་མདུན་བྲིའོ། །བགྲང་ཕྲེང་དེ་བཞིན་རྡོ་རྗེ་དང ། །དྲིལ་བུ་འཛིན་པ་བྲི་བར་བྱ། །གཏོར་མའི་གཏོར་མ་མཆོད་རྫས་དང ། །ཆང་སྐྱེམས་རོ་དང་དགའ་སྟོན་མཆོད། །ནག་པོའི་བརྒྱད་དང་བཅུ་བཞི་ལ། །དཀྱིལ་འཁོར་ལ་ནི་རྡུལ་ཚོན་གདབ། །དབུས་སུ་གྲུ་བཞི་བྲི་བའོ། །གལ་ཏེ་དངོས་གྲུབ་མཆོག་འདོད་ན། །སྔགས་ཡིག་གཅིག་པ་གཙོ་བོ་ནི། །རྡོ་རྗེ་ཧཱུཾ་མཛད་བསྒྲུབ་པར་བྱ། །ཕྱི་ནས་སློབ་དཔོན་ལ་མཆོད་པ། །བདག་གམ་རྒྱལ་སྲིད་དབང་ཉིད་དམ། །བྲན་མོ་བུ་མོ་དེ་བཞིན་དུ། །མ་དང་སྲིང་མོ་དབུལ་བར་བྱ། །སྐུ་གསུང་ཐུགས་ཀྱི་སྒྲུབ་པ་ཡི། །དངོས་གྲུབ་གལ་ཏེ་བདག་འདོད་ན། །ཁམས་གསུམ་རྣམ་རྒྱལ་ལས་བྱུང་ནི། །སྔགས་པས་རྟག་ཏུ་བསྒྲུབ་པར་བྱ། །རྡོ་རྗེ་སེམས་དཔའི་དཀྱིལ་འཁོར་ནི། །རྡོ་རྗེ་བདུད་རྩི་ལས་བྱུང་ངོ ། །བདུད་རྩི་ལྔ་དང་མཉམ་ལྡན་པ། །ངན་སོང་ཐམས་ཅད་མེད་བྱེད་པ། །རྡོ་རྗེ་སེ་གོལ་མཉམ་སྦྱོར་གྱིས། །དཔལ་ལྡན་རྡོ་རྗེ་ཧཱུཾ་མཛད་འགྲུབ། །རྣལ་འབྱོར་པ་དང་རྣལ་འབྱོར་མའི། །བྱང་སེམས་རྣམ་པར་སྤྲུལ་པར་གསུངས། །ལན་གྲངས་དུ་མར་རིག་མ་དང ། །དཀྱིལ་འཁོར་དུ་ནི་རོལ་པར་བྱ། །བྷ་གའི་དབུས་ལ་མྱང་བྱས་པ། །གང་དག་དཔའ་བོ་སྔགས་ལ་གནས། །པདྨར་ཁ་ཡིས་འོ་བྱས་ནས། །བདུད་རྩི་ཁུ་བ་ཁོ་ནར་བླང ། །ལག་པ་ཡི་ནི་སོར་མོ་ལ། །གནས་དེ་ལ་ 272a ༄#། །ནི་བླང་མི་བྱ། །བླང་བར་གྱུར་ན་འཇིག་འགྱུར་ནས། །མཐུ་ཡང་འཇིགས་ནས་འབྲས་བུ་མེད། །རིག་མ་ཆེན་མོས་ཀྱང་ཕྱུང་ནས། །རྡོ་རྗེ་ཡང་འོ་གདབ་བོ། །དེ་ནི་སངས་རྒྱས་ཉིད་དུ་འགྲུབ། །ཁུ་བའི་གཟུགས་ཅན་བདུད་རྩི་ནི། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེ་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། རྡོ་རྗེ་ཧཱུཾ་མཛད་ཀྱི་བསྒྲུབ་པ་བསྟན་པ་ཞེས་བྱ་བ་ལེའུ་དྲུག་པའོ།། །། དེ་ནས་ལྷ་མོ་མཱ་མ་ཀཱི། །དགའ་བའི་རོལ་པར་ཆེར་བཞུགས་པས། །ཐལ་མོ་སྦྱར་ནས་ཕྱག་བྱས་ནས། །དབྱངས་འདི་དག་ནི་ཆེད་དུ་བརྗོད། །དཔའ་བོ་ཆུ་སྐྱེས་སྔོན་པོའི་སྐུ། །དཔའ་བོ་གཞན་གྱིས་ཡོངས་བསྐོར་ཞིང ། །ཕྱག་རྒྱ་མོ་ཚོགས་མཉམ་ལྡན་པའི། །རྡོ་རྗེ་བདུད་རྩི་བདག་ཕྱག་འཚལ། །སྟོན་གྱི་ནམ་མཁའ་དང་འདྲ་བ། །ད་རོ་བུང་བ་སྒྲ་སྒྲོགས་ལྟར། །བསྐལ་པར་བཞུགས་པ་སྐལ་བཟང་བ། །རྡོ་རྗེ་བདུད་རྩི་བདག་ཕྱག་འཚལ། །ཐམས་ཅད་མཁྱེན་པ་ཐམས་ཅད་མཛེས། །ཡང་དག་དབང་པོ་ལམ་གྱིས་ནི། །རྡོ་རྗེ་བདུད་རྩི་བདག་ཕྱག་འཚལ། །མ་ལུས་པ་ཡི་ཁམས་གསུམ་ལ། །རྡོ་རྗེ་བདུད་རྩི་དཔེ་མེད་བས། །ཉི་ཤུ་རྩ་བཞི་རིགས་ཆེན་མོ། །ཤིན་ཏུ་ཆགས་པས་དགའ་བྱེད་ 272b བ། །སེན་མོ་རྗེས་དང་བཅས་བའི་སྐུ། །རྡོ་རྗེ་བདུད་རྩི་བདག་ཕྱག་འཚལ། །ུཔྟལ་སྔོན་པོའི་འདབ་མ་ལྟ་བུར་ཕྱག་སྔོ་བ། །སངས་རྒྱ་སྡེ་བཞིན་གཤེགས་པ་རྡོ་རྗེ་ཁྱོད་ཀྱིས་བདག་དང་ནི། །ཤིན་ཏུ་དགའ་བའི་རྗེས་སུ་ཆགས་པས་ལོངས་སྤྱོད་ཅིག་།ཁམས་གསུམ་ལ་ནི་བསྒྲུབ་པར་བྱ་བའི་དོན་གྱི་ཕྱིར། །ཁྱོད་ནི་སྐྱོན་མེད་དམ་པའི་སྟོང་པ་ལས། ། ཡིག་འབྲུས་རྡོ་རྗེས་གྱུར་པའི་མགོན་པོ་ཁྱོད། །རྒྱུ་དང་མི་རྒྱུ་གང་གིས་ཁྱོད་མཐོང་ནས། །དེ་དག་འཁོར་བ་རུ་ནི་ག་ལ་འགྲོ། །དེ་ལྟར་དབྱངས་ནི་བླངས་ནས་སུ། །རྡོ་རྗེ་གར་ནི་རྣམ་པར་བྱེད། །རྐེད་པ་དང་ནི་རྐང་པ་དང ། །དཔུང་པ་དང་ནི་མགོ་བོའི་གར། །གར་གྱི་གཞུང་གི་མཚན་ཉིད་དོ། །རྗེས་ཐབས་རྗེས་སུ་རིམ་པ་དང ། །བསྟོད་པ་དང་ནི་འགྱིང་བག་སྟེ། །རྒྱས་དང་འདུད་དང་གསལ་པོ་རུ། །རྒྱས་པ་དང་ནི་སྨིན་བསྐྱོད་གར། །ལག་པའི་ཕྱག་རྒྱ་སྦྱོར་བ་ཡིས། །སྟབས་བརྒྱད་ཀྱིས་ནི་གར་བྱེད་བྱ། །རྒྱས་པའི་པདྨ་མཱ་མ་ཀཱི། །གར་བྱས་ནས་ནི་ལྷ་མོ་དེས། །རྡོ་རྗེ་\?\་གིས་རྡོ་རྗེ་ནི། །རྡོ་རྗེ་བེ་ཅོན་འོ་བཏབ་བྱེད། །དེ་ནས་བཅོམ་ལྡན་རྡོ་རྗེས་ཀྱང ། །འོ་བཏབ་མཱ་མ་ཀཱི་པདྨར། །སྟོན་ཅིག་ལྷ་མོ་པདྨ་ནི། །དེ་ལ་མཆོད་པ་བརྩམ་པར་བྱ། །བཞུགས་ཤིག་མི་གཡོ་བར་རིག་མོ། །བདུད་རྩི་བསམ་གཏན་བརྩམ་པར་བགྱི། །དེ་བཞིན་ཉིད་མཆོག་བརྩམ་པ་ནི། །བདུད་རྩི་ཐིག་ལེའི་གཟུགས་ 273a ༄#། །ཅན་ཏེ། །མཁའ་ཡི་དབུས་སུ་ཟླ་བ་འདྲ། །སྟོང་པ་དེ་ཉིད་ཆེད་དུ་བརྗོད། །འཇིགས་མེད་ཟད་མེད་ཕྲ་མོ་ནི། །རྡོ་རྗེ་སེམས་དཔའ་འཇོམས་བྱེད་པ། །ལྟེ་བའི་དབུས་སུ་གནས་ལྷ་མོ། །སྙིང་པོ་གསང་བའི་སྤྱོད་ཡུལ་ལ། །ཁུ་བའི་གཟུགས་ཀྱིས་ཟགས་ནས་སུ། །བྷ་ག་ལིང་གའི་དཀྱིལ་དུ་གནས། །འདི་ནི་སྲོག་ཆགས་རྣམས་ཀྱི་སྲོག་།རྣམ་པར་ཤེས་པའི་ཕུང་པོ་བརྟེན། །སངས་རྒྱས་དེ་བཞིན་རྡོ་རྗེ་འཛིན། །ཚངས་པ་ཁྱབ་འཇུག་དབང་ཕྱུག་ཆེ། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཁོ་ན་ཡང ། །གཡོ་དང་མི་གཡོ་སྣ་ཚོགས་པའི། །ཁམས་གསུམ་ལ་ནི་མ་ལུས་པར། །དེ་ནི་བདག་གིས་རྟག་ཏུ་བསམ། །དེ་ལས་བསྐྱེད་དེ་བདག་དང་ཁྱོད། །ཚངས་པ་ལྷ་དབང་ཁྱབ་འཇུག་སོགས། །བྱང་ཆུབ་སེམས་དཔའ་དེ་བཞིན་གཤེགས། །ཤེས་བྱ་ཤེས་པའི་བདག་ཉིད་གཙོ། །དེ་ཉིད་དམ་པ་དེ་བསམ་མོ། །སྐྱེ་བ་དང་ནི་ཤི་བ་དང ། །ཐམས་ཅད་དེ་ལ་འདུས་པ་ཡིན། །སྐྱེད་པ་བྱེད་པ་པོ་དེ་གཅིག་།རང་བདག་གྱུར་པ་ལྷན་ཅིག་པ། །ཐམས་ཅད་མཁྱེན་པ་ཀུན་ནས་ཀུན། །ཞི་ནས་ཞི་བ་ཁྱབ་པ་པོ། །ཅི་ཕྱིར་ཁང་པ་དེ་བཀང་བས། །དེ་བས་སྐྱེས་བུར་བཤད་པ་ཡིན། །ལུས་ལ་གནས་ཕྱིར་ལུས་ཅན་ཏེ། །ཤེད་བྱེད་ཕྱིར་ན་ཤེས་པར་འདོད། །བདག་ལ་བདག་གིས་ 273b རིག་པའི་ལྷ། །དེ་ཕྱིར་ལྷ་ཞེས་འདོད་པ་ཡིན། །འཇུག་ལས་ཁྱབ་འཇུག་ཅེས་གསུངས་ཏེ། །ངག་གིས་རྡོ་རྗེ་འཛིན་དུ་འགྱུར། །སྟོན་དུ་མེད་པ་གསང་བ་འདི། །ནན་ཏན་དུ་ནི་གསང་བར་བྱ། །སྐྱོན་ཅན་མིན་དང་གཡོན་ཅན་མིན། །དམ་ཚིག་ལ་ནི་མི་སྡང་བ། །ཆད་པར་ལྟ་བ་མེད་པ་ལ། །བླ་མ་ལ་ཆགས་འདུལ་བ་ཅན། །ཕྲག་དོག་ཆགས་པ་སྤོང་བྱེད་པ། ། དཀྱིལ་འཁོར་ལ་ནི་ཞུགས་པ་དང ། །རྡོ་རྗེ་བསྟན་པའི་སློབ་མ་དག་།དེ་ལ་རྒྱས་པའི་བསྟན་པ་འདི། །དེ་བཞིན་ཉིད་མཆོག་བཤད་པར་བྱ། །སློབ་དཔོན་རིག་མ་དང་ལྡན་ནས། །དེ་ལ་དབང་བསྐུར་སྦྱིན་པར་བྱ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། །གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། དབྱངས་དང ། གར་དང ། དབང་བསྐུར་བ་དང ། དེ་བཞིན་ཉིད་ཆེར་དམིགས་པ་དག་བསྟན་པ་ཞེས་བྱ་བ་ལེའུ་བདུན་པའོ།། །།དེ་ནས་ལྷ་མོ་ཡང་ལངས་ནས། །བཞད་ནས་འདི་དག་ཞུ་བ་སྟེ། །བཅོམ་ལྡན་འདི་ལ་ཐེ་ཚོམ་ཟོས། །དམ་པའི་ངོ་མཚར་བདག་བསྐྱེད་དེ། །ཞི་གཟུགས་རྡོ་རྗེ་ཅན་དེ་ལས། །ཁྲོ་བོའི་གཟུགས་ནི་ཅི་ལྟར་འགྱུར། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །རྡོ་རྗེ་པདྨ་ 274a ༄#། །མཉམ་སྦྱོར་ཏེ། །ཁྲོ་བོའི་གཟུགས་ནི་རྣམ་པར་ཕྱུང ། །འབར་བའི་ཕྲེང་འཁྲུགས་དྲག་པོ་ཅན། །འཇིགས་བྱེད་ལ་ཡང་འཇིགས་པར་བྱེད། །ཞལ་བཞི་ལ་ནི་ཕྱག་བརྒྱད་དེ། །ཐོད་པའི་དབུ་རྒྱན་འཇིགས་པར་བརྒྱན། །ཁ་ཊྭཱཾ་ག་དང་མགོ་བསྣམས་ཏེ། །ཐོད་པ་དང་ནི་ཁྲག་དགའ་བ། །གཏུམ་པོ་རྒྱུ་མའི་ཕྲེང་འཁྲུགས་བ། །རིག་མ་བརྒྱད་ཀྱིས་ཡོངས་སུ་བསྐོར། །དུར་ཁྲོད་ཆེན་པོ་བཞིར་བཞུགས་པ། །ཕཊ་ཡིག་སྔགས་ཀྱི་ང་རོ་ཅན། །འབྱུང་པོ་རོ་ལངས་ཚོགས་པ་དང ། །དུར་ཁྲོད་ལ་ནི་རོལ་མཛད་པས། །དེ་འོག་དབང་དང་བཅས་པའི་ལྷ། །ཚངས་པ་ཁྱབ་འཇུག་དབང་ཕྱུག་ཆེ། །བཟའ་བྱེད་རྡོ་རྗེ་ཅན་ཆེན་མོ། །དཔལ་ལྡན་ཁྲག་འཐུང་གཟུགས་ནི་ཕྱུང ། །དང་པོའི་རིག་མ་འཇིགས་ཅན་མ། །མི་སྡུག་གདོལ་པ་སྨེ་ཤ་ཅན། །སེར་མོ་རིགས་ཅན་དྲག་མོ་དང ། །འཇིགས་པར་བྱེད་མ་བརྒྱད་དུ་འདོད། །སྔགས་འདི་དག་ནི་བཟླ་བྱས་ཏེ། ། གར་ཡང་བྱེད་ནས་དབྱངས་བླང་ངོ ། །འཇིགས་བྱེད་ཆེན་པོ་མཆེ་བ་གཙིགས། །རྒྱུ་མ་ཕྲེང་གི་རྒྱན་སྐུད་བརྒྱན། །ཤ་ཆེན་དག་ནི་གསོལ་བྱེད་པ། །དཔལ་ལྡན་ཁྲག་འཐུང་བདག་ཕྱག་འཚལ། །སྒྲུབ་པ་པོ་རྣམས་ཕན་བྱེད་ཕྱིར། །བཟླས་པའི་སྔགས་ནི་བཤད་པར་བྱ། །གསུམ་པ་ཡི་ནི་གསུམ་པ་ལ། །བདུན་པ་ཡི་ནི་བཞི་པ་སྦྱོར། །བདུན་པ་ 274b ཡི་ཡང་གསུམ་པ་སྟེ། །གཉིས་ཀྱི་ཚིག་ནི་གཉིས་སུ་སྦྱོར། །ཀུན་ལ་དེ་བཞིན་ཉིད་ལྡན་ཏེ། །ཡི་གེ་ཕྱེད་ཀྱིས་རྣམ་པར་བརྒྱན། །དྲུག་པའི་བཞི་པ་ཕྱུང་བྱས་ཏེ། །བདུན་པའི་དངོས་པོས་གདན་དུ་བྱ། །བཅུ་གསུམ་པ་ཡིས་སྟེང་གནོན་པའི། །སཝཱཧཱ་མཐར་བཞག་སྔགས་ནི་ཕྱུང ། །དང་པོ་རྣམ་པར་སྣང་མཛད་དབུལ། །ཁྲག་འཐུང་རྩ་བའི་སྔགས་ཡིན་ནོ། །སྔགས་ཀྱི་རྒྱལ་པོ་འདི་ཉིད་ཀྱི། །མཐུ་ཆེན་ཉོན་ཅིག་མཱ་མ་ཀཱི། །ལན་ཅིག་ཙམ་གྱིས་སྔགས་བཟླས་ན། །སྐད་ཅིག་འཇིག་རྟེན་གསུམ་འཇིག་གོ་།ཁམས་གསུམ་མ་ལུས་པ་རྣམས་ཀྱང ། །ཟོས་པར་བྱེད་པར་ཐེ་ཚོམ་མེད། །དེ་ཡིས་འདོད་པ་ཐམས་ཅད་སྦྱིན། །དཔལ་ལྡན་ཁྲག་འཐུང་མཉམ་འགྱུར་རོ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྒྱུད་ལས། དཔལ་ལྡན་ཁྲག་འཐུང་བསྐྱེད་པ་བསྟན་པ་ཞེས་བྱ་བ་ལེའུ་བརྒྱད་པའོ།། །།དེ་ནས་བདུད་རྩི་འཁྱིལ་པ་ཡི། །གཟུགས་ནི་ཡང་དག་བཤད་པར་བྱ། །ཞལ་གསུམ་པ་ལ་ཕྱག་དྲུག་སྟེ། ། པོ་ནག་པོ་དུད་པའི་འོད། །འོད་ཟེར་ཕྲེང་བ་འཁྲུགས་པ་དང ། །ཏུམ་མོས་སྤྱན་ནི་དམར་པོ་ཅན། །དམར་བའི་སྨིན་མ་ཨག་ཚོམས་འབར། །དྲག་ཆེན་པོ་ནི་ཟིལ་གྱིས་ 275a ༄#། །གནོན། །ཕྱག་ན་དགྲ་སྟ་བསྣམས་བརྩོན་པ། །གཏུན་ཤིང་རྡོ་རྗེ་ཞགས་པ་དང ། །གཡོན་གྱི་ཕྱག་གི་སྡིགས་མཛུབ་ཀྱིས། །སྡང་བ་ཐམས་ཅད་བསྡིགས་པར་བྱེད། །རལ་གྲི་ཕྱག་མཚན་བསྒོམ་པར་བྱ། །རིག་མ་བརྒྱད་དང་མཉམ་ལྡན་ཞིང ། །སྒོ་སྲུང་དང་ཡང་ཡང་དག་ལྡན། །གསང་བའི་པདྨ་བསྒོམ་བྱས་ཏེ། །འདབ་མར་རིག་མ་བརྒྱད་ནི་བཀོད། །བདུད་རྩི་མ་དང་བདུད་རྩི་ཞལ། །བདུད་རྩི་ཅན་དང་བདུད་རྩི་སྤྱན། །གྲངས་མེད་མ་དང་གཟུགས་བཟང་མ། །མཛེས་པའི་གཟུགས་ཅན་བདེ་གྲུབ་མ། །ཐམས་ཅད་ཞལ་གསུམ་ཕྱག་དྲུག་སྟེ། །ཕྱོགས་དང་མཚམས་ལ་དགོད་པར་བྱ། །ཕྱག་གིས་པདྨ་བསྣམས་པར་བརྩོན། །དེ་དག་ལྷ་མོ་གར་བྱེད་ནས། །སྣ་ཚོགས་གཟུགས་རྣམས་མཆོག་སྦྱིན་མ། །བཞད་ཅིང་རོལ་པར་མཛད་བྱེད་དོ། །སྔགས་ཀྱི་རྒྱལ་པོ་དབྱུང་བར་བྱ། །རྣམ་པར་སྣང་མཛད་ཡང་འབུལ་ནས། །ཚིག་འདི་ཡིས་ནི་ཡོངས་སུ་དགང ། །དང་པོ་ཡི་ནི་གཉིས་པ་སྟེ། །སྟོང་པ་ཉིད་ནི་གདན་ལྡན་པ། །སྟོང་པས་སྟེང་ནས་གནོན་པའི་སྔགས། །མཐའ་ནས་སཝཱཧཱ་སྦྱོར་བྱེད་དོ། །གཏན་དུ་ཤིན་ཏུ་དགའ་འབྱོར་ནས། །བདུད་རྩི་བདུད་རྩི་ཕྱུང་ནས་སུ། །བདུད་རྩི་བདུད་རྩི་སྦྱོར་བ་ཡི། །བདུད་རྩི་འཁྱིལ་པ་བསྒྲུབ་པར་བྱ། །དོན་ཀུན་དངོས་གྲུབ་ཐམས་ཅད་ཀྱང ། ། 275b དེ་ཡིས་མྱུར་བར་བསྒྲུབ་པར་འགྱུར། །ཕོ་འམ་གལ་ཏེ་མོ་དག་གིས། །བདུད་རྩི་འཁྱིལ་པ་དྲན་བྱེད་ན། །རྒྱུ་དང་མི་རྒྱུ་འཇིག་རྟེན་གསུམ། །དེ་ཡི་ཕྱག་མཐིལ་ལ་ཀུན་གནས། ། རྡོ་རྗེ་བདུད་རྩི་བདེ་ཆེན་པོ། །དུས་རྟག་པར་ནི་བསྒོམ་པར་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། དཔལ་བདུད་རྩི་འཁྱིལ་པ་འབྱུང་བ་ཞེས་བྱ་བ་ལེའུ་དགུ་པའོ།། །།དེ་ནས་རོ་ལངས་ཆེན་པོ་ཡིས། །སྒྲུབ་པ་གཞན་ཡང་བཤད་པར་བྱ། །ནག་པོའི་ཚེས་བརྒྱད་བཅུ་བཞི་ལ། །ལིངྒ་གཅིག་དང་ལམ་མདོ་དང ། །ཤིང་གཅིག་དང་ནི་དུར་ཁྲོད་དང ། །རི་དང་ཆུ་འགྲམ་དེ་རྣམས་ལ། །ལས་ཐམས་ཅད་ནི་བསྒྲུབ་བྱ་སྟེ། །དེ་བཞིན་རོ་ལངས་སློང་བ་ནི། །འགགས་ནས་ཤི་བ་མོ་རྣམས་ནི། །མཚན་ཐམས་ཅད་ནི་ཀུན་རྫོགས་པ། །གདོལ་པ་མ་དང་སྨེ་ཤ་ཅན། །ཁྱིམ་ཚོས་མ་རྣམས་དེ་དག་ནི། །མཛེས་པ་བཟང་བ་རྨ་མེད་པ། །སུམ་ཅུ་རྩ་གཉིས་བསྔགས་པ་སྟེ། །ལོ་ནི་ཉི་ཤུ་རྩ་ལྔ་བསྐྱེད། །བུད་མེད་རོ་ཡི་སྐྲ་བཟུང་སྟེ། །གཙང་བའི་ཆུ་ཡིས་བཀྲུ་བར་བྱ། །སྔགས་དང་སྨན་གྱི་རྡོ་ལེབ་ལ། །ག་བུར་ཙནྡན་དམར་པོ་ཡིས། །དེ་ལ་བྱུག་པར་བྱ་བྱས་ཏེ། །སྣ་ཚོགས་མེ་ཏོག་སྤོས་རྣམས་ཀྱིས། །མཆོད་ཅིང་གཏོར་མ་ 276a ༄#། །དབུལ་བར་བྱ། །མར་ཁུ་ཆེན་པོས་བསྐུས་ནས་སུ། །ཡུངས་ཀར་དོ་ལ་བརྡེག་བར་བྱ། །ཁྲག་འཐུང་ཞེས་བྱ་སྒྲུབ་པ་པོས། །དེ་ལ་དཀྱིལ་འཁོར་ཡང་བྲི་སྟེ། །ཐོད་པ་ཞེས་བྱ་ཟླ་གམ་མམ། །གཞུ་ཡི་ཚུལ་གྱིས་བཀང་བར་བྱ། །ཐོད་པས་ཉེ་བར་རྒྱན་བྱེད་ཅིང ། །རིག་མ་བརྒྱད་དང་ལྡན་པར་བྱ། །ཤ་ཡི་ཁམས་ཅན་ཐོད་པ་དབང ། ། ཁ་ཊྭཱཾ་ཐམས་ཅད་ཀྱིས་འཛིན་ཏེ། །ཞལ་གསུམ་པ་ལ་དྲག་པོའི་གཟུགས། །ཕྱག་དྲུག་རལ་གྲི་ཕྱག་ན་འཛིན། །དཀྱིལ་འཁོར་དེ་ཡི་ཕྱི་རོལ་དུ། །སྒོ་སྲུང་མ་ནི་རབ་ཏུ་བརྟགས། ། གླང་རྣ་དང་ནི་གླང་ཆེན་རྣ། །ཞལ་མཛེས་དེ་བཞིན་ཞལ་གདུག་མ། །དྲག་མོ་ཞགས་པ་ལྕགས་ཀྱུ་འཛིན། །མི་སྡུག་འཇིག་པས་འཇིག་བྱེད་རྣམས། །ཞལ་གཅིག་པ་ལ་ཕྱག་གཉིས་པ། །མེ་ཏོག་མཆོད་པ་ཡང་དག་བྲི། །རྣམ་པ་སྣ་ཚོགས་རིག་མ་ཡང ། །དཀྱིལ་འཁོར་ལ་ནི་མཆོད་པ་བྲི། །དེ་ནས་དཔའ་བོ་སྒྲུབ་པ་པོས། །དུང་ཆེན་གྱིས་ནི་བརྒྱན་བྱས་པ། །ཐོད་པའི་ཕྲེང་ཐོད་བཅིངས་པ་ཡི། །ཁྲག་འཐུང་གཟུགས་ནི་སྒོམ་བྱེད་པས། །དེ་ལ་ཅང་ཏེའུ་བརྡུངས་ནས་སུ། །གར་བྱེད་ཅིང་ནི་ཁང་པར་འཇུག་།དེ་ཡི་སྙིང་གར་མནན་པའི་སྔགས། །བྷྱོ་ཡིག་དེ་ལ་བཟླ་བྱ་སྟེ། །ལྷ་ཡི་དཀྱིལ་འཁོར་མཆོད་ནས་སུ། །ཁྲག་ཆེན་གྱིས་ནི་གཏོར་བར་བྱ། །དཔལ་ལྡན་ཁྲག་འཐུང་སྔགས་ཆེན་ནི། །སྒྲུབ་པ་ 276b པོས་ནི་བཟླས་མ་ཐག་།ཁྲོ་དང་ལྡན་པའི་ཨག་བཙར་བྱ། །རོ་ལངས་ཀྱིས་ནི་གང་སྒྲོགས་བྱེད། །དེ་ཚེ་སྔགས་པས་མི་འཇིགས་ཏེ། །ཁྲག་འཐུང་སྔགས་ནི་དྲན་པར་བྱ། །ལངས་པའི་རོ་ལངས་དེ་ཡིས་ཡང ། །སྒྲུབ་པ་པོ་ལ་འདི་སྐད་སྨྲས། །དཔའ་ཆེན་པོ་ཀྱེ་ལས་གང་ཡང ། །བདག་ལ་བཀའ་སྩོལ་རྡོ་རྗེ་ཅན། །རལ་གྲི་མིག་སྨན་ས་འོག་དང ། །མཁའ་ལ་རྒྱུ་བར་འདོད་པ་དག་།སྒྲུབ་པ་པོས་ནི་གང་འདོད་པ། །ལས་དེ་དག་ནི་བསྒྲུབ་པར་བགྱི། །དེ་ནས་སྒྲུབ་པ་པོ་ལ་ནི། །ཡིད་ལ་གང་དང་གང་འདོད་བསླང ། །དེ་ལྟར་ཐམས་ཅད་བསྒྲུབ་བྱ་བ། །རྒྱས་པའི་པདྨ་མཱ་མ་ཀཱི། །རོ་ལངས། སྒྲུབ་པའི་མཆོག་གྱུར་པ། །རྡོ་རྗེ་བདུད་རྩི་ལས་བྱུང་ཡིན། །སྐུ་གསུང་ཐུགས་ཀྱི་བསྒྲུབ་དོན་དུ། །སྒྲུབ་པ་པོ་ཡི་བདེ་ཡང་འདྲེན། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེ་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། །གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས། རོ་ལངས་སྒྲུབ་པ་བསྟན་པ་ཞེས་བྱ་བ་ལེའུ་བཅུ་པའོ།། །།དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །རྡོ་རྗེ་པདྨ་མཉམ་སྦྱོར་ཏེ། །ཅང་མི་གསུང་བར་ཆེར་བཞུགས་སོ། །དབུགས་དགག་ཕྱིར་ནས་མི་གཡོ་ནས། །མི་འཇིགས་པ་དང་མི་གསུང་བར། །ཏིང་འཛིན་ 277a ༄#། །མཆོག་ལ་བཞུགས་པ་ལ། །མཱ་མ་ཀིས་ནི་ཡང་ཞུས་ཏེ། །བཅོམ་ལྡན་རྡོ་རྗེ་ཕྲ་མོ་ནི། །སེམས་ཅན་ཀུན་གྱི་ཡིད་ལ་གནས། །ཅི་ལྟར་རྣམ་པ་གང་གིས་ནི། །དེ་བཞིན་ཉིད་དེ་ཐོབ་པར་བགྱི། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །བཞད་པ་མཛད་ནས་གསུང་འདི་ནི། །སྤྱན་ཡང་ཕྱེ་ནས་བཀའ་སྩལ་པ། །དེ་ཉིད་སྔོན་བཞིན་བཤད་པ་སྟེ། །བདུད་རྩི་གཟུགས་ནི་ཁུ་བ་ཡིན། །བདུད་རྩི་ལྔ་དང་ལྡན་བྱས་ཏེ། །རྟག་པར་རྒྱུན་དུ་མྱང་བར་བྱ། །རྫས་ནི་རེ་རེའི་མཐུ་དག་ནི། ། བཤད་པ་ཉོན་ཅིག་མཱ་མ་ཀཱི། །ཡེ་ཤེས་ཞེས་བྱ་སྒྲུབ་བྱེད་པའི། །ཁུ་བ་དྭངས་པར་བཟའ་བར་བྱ། །སྐུ་གསུང་ཐུགས་ཀྱི་བསྒྲུབ་དོན་དུ། །ཁྲག་ཆེན་རབ་ཏུ་བསྒྲུབ་བྱ་སྟེ། ། གང་ཞེ་བུད་མེད་རྣམས་ཀྱི་འམ། །བུ་མོ་ཡི་ནི་རྟག་ཏུ་བླང ། །ཁྲག་ཆེན་དེས་ནི་མཱ་མ་ཀཱི་།དོན་ནི་ཐམས་ཅད་བྱེད་པ་པོ། །དྲག་ཤུལ་ཤི་བ་རྙེད་ན་ནི། །ཤ་ཆེན་པོ་ཡང་བཟའ་བྱ་སྟེ།། གསལ་ཤིང་བཙུགས་དང་འགགས་པའམ། །གཡུལ་དུ་བསད་པ་གང་དེ་ནི། །ཟབ་ཅིང་བརྟན་པས་ཟ་བྱེད་ན། །ཚེ་དང་ནད་མེད་འཕེལ་བར་འགྱུར། །དེ་བཞིན་འདོད་པའི་བདེ་པ་དང ། །སངས་རྒྱས་བྱང་ཆུབ་གྲུབ་པ་དང ། །རྡོ་རྗེ་སེམས་དཔའ་བཞིན་དུ་འཚོ། །འདོད་ཀུན་འབྲས་བུ་དེས་སྦྱིན་ནོ། །རྡོ་རྗེ་ཆུ་དང་བཤང་གཅི་ནི། །རང་གིས་བཟའ་བར་རིག་པར་ 277b བྱ། །ཕྱེ་མ་ཞི་བ་མོར་བྱས་པ་ལ། །ཁྲག་ཆེན་གྱིས་ནི་བསྲེ་བར་བྱ། །སྔ་དྲོ་དེ་བཞིན་ཉིན་ཕྱེད་དང ། །ཕྱི་དྲོ་ལ་ནི་བཟའ་བར་བྱ། །དུས་གསུམ་ཟོས་ནས་རྣལ་འབྱོར་པས། །དེ་ནས་རྡོ་རྗེ་ཆུ་ནི་བཏུང ། །ཉིན་དང་ཉིན་དུ་མཱ་མ་ཀཱི། །སྒྲུབ་པ་པོ་གང་སྒྲུབ་བྱེད་པ། །ལུས་ལ་ནད་ནི་མེད་འགྱུར་ཞིང ། །རྒས་པའི་ནད་ཀྱང་མེད་པར་བྱེད། །སྐལ་བཟང་རྒྱས་པའི་མདངས་ལྡན་པ། །རྒྱལ་བའི་སྒོར་ཡང་རྒྱལ་བར་འདྲེན། །དེས་ནི་འདོད་པ་ཀུན་སྦྱིན་པས། །མཆོག་རབ་དེ་ཉིད་ཐོབ་པ་ཡིན། །རྣལ་འབྱོར་དེ་ཡང་ཀུན་ཤེས་ཏེ། །རྡོ་རྗེ་སེམས་དཔའི་ཡོན་ཏན་ལྡན། །འདོད་ཆགས་ཞེ་སྡང་ལས་གྲོལ་ནས། །བརྐམ་པ་ཕྲག་དོག་རྣམ་སྤངས་ནས། །རྡོ་རྗེ་བདུད་རྩི་བདེ་ཆེན་པོ། །དེ་ཡིས་སྒྲུབ་པ་འགྲུབ་པའོ། །རྡོ་རྗེ་བདུད་རྩི་རྒྱུད་འདི་ནི། །དོན་མང་གསང་བའི་རིམ་པ་ཅན། །མ་ལུས་རྡོ་རྗེ་ཐེག་པ་འདི། །འདི་ལས་བྱུང་གྱུར་ལྷ་མོ་ཀྱེ། །རྒྱས་པའི་པདྨ་མཱ་མ་ཀཱིས། །འདོད་ཆགས་ཀྱིས་ནི་བདེ་འགྱུར་བས། །ཁྱོད་ལ་དམ་པའི་དངོས་སྟོན་ན། །བདག་གིས་གང་ལ་ཡང་མི་སྟོན། །འདི་ནི་གསང་ཆེན་དམ་པ་ཡིན། །ཡི་དྭགས་ཀུན་གྱི་བདག་ལ་གནས། །བྱང་ཆུབ་སེམས་དཔའ་མ་ཤེས་ཏེ། །གཟུགས་མེད་སྟོང་པ་མི་འགྱུར་པས། །དེ་ན་དེ་ཉིད་རིག་ཆེན་པོ། །རྡོ་རྗེ་སྤྱི་གཙུག་ནོར་བུར་འདོད། །ཤིན་ཏུ་གསང་ནས་གཟུགས་ལྷ་མོ། །ཕ་དང་བུ་ལའང་བསྟན་མི་བྱ། །གལ་ཏེ་དངོས་གྲུབ་མཆོག་འདོད་ 278a ༄#། །ན། །གདན་དུ་གསང་བ་བསྟན་པ་དང ། །བླ་མ་ལ་བརྟུལ་\?\ཞུགས་བསྟན། །དེ་ལ་སྦྱིན་ནས་དེ་ཉིད་བསྟན། །རྡོ་རྗེ་བདུད་རྩི་རྒྱུད་འདི་ནི། །བདེ་འགྲུ་བ་ཤིན་ཏུ་ཐོབ་དགའ་བ། །ཡང་དག་རྫོགས་པས་བསྐལ་བཟང་ཞི། །སྙིང་པོ་ཡེ་ཤེས་འདུས་པ་ཡིན། །རྡོ་རྗེ་བདུད་རྩི་རྒྱུད་ཆེན་ལས། །སྒྲུབ་པ་པོ་གང་དབང་བསྐུར་བ། ། སངས་རྒྱས་བྱང་ཆུབ་སེམས་རྣམས་ཀྱི། །དེ་ལ་ཀུན་གྱིས་ཕྱག་བྱེད་དེ། །ཕྱག་ནི་ལན་གསུམ་བྱས་ནས་སུ། །རྡོ་རྗེ་སློབ་དཔོན་སྐལ་བཟང་མཆོག་།དེ་ཉིད་སེམས་ཅན་ཐམས་ཅད་གྱི། །འཁོར་བ་ལས་འདྲེན་གཙོ་ཞེས་གསུངས། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །རྡོ་རྗེ་བདུད་རྩི་རྒྱུད་ཆེན་པོ། །སྟོན་པས་དགའ་མ་ལ་བསྟན་ནས། །ཕྲ་མོའི་གཟུགས་སུ་རྡོ་རྗེ་ཅན། །དེ་ནས་བྷ་གར་བཞུགས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྒྱུད་ལས་བདུད་རྩི་ལྔ་སྒྲུབ་པའི་ཐབས་བསྟན་པ་ཞེས་བྱ་བའི་ལེའུ་སྟེ་བཅུ་གཅིག་པ་རྫོགས་སོ།། །།རྡོ་རྗེ་བདུད་རྩིའི་རྒྱུད་ལོ་ཙཱ་བ་གྱི་ཇོ་ཟླ་བའི་འོད་ཟེར་གྱིས་བསྒྱུར་ཅིང་ཞུས་ཏ་གཏན་ལ་ཕབ་པའོ།། |