rKTs


H406

(e-text produced by ACIP)

see text in transliteration
174a
རྒྱ་གར་སྐད་དུ། ཤྲཱི་ཙ་ཏུརྤཱི་ཋ་བི་ཁྱཱ་ཏ་ཏནྟྲ་རཱ་ཛ་ནཱ་མ། བོད་སྐད་དུ། དཔལ་གདན་བཞི་པའི་རྣམ་པར་བཤད་པའི་རྒྱུད་ཀྱི་རྒྱལ་པོ་ཞེས་བྱ་བ། བཅོམ་ལྡན་འདས་རྣལ་འབྱོར་ནམ་མཁའ་དང ། །རྡོ་རྗེ་རྣལ་འབྱོར་དང ། རྡོ་རྗེ་རྣལ་འབྱོར་མའི་ཚོགས་གང་གཱ་ཀླུང་གི་བྱེ་མ་སྙེད་ཀྱི་གྲངས་དང་མཉམ་པ་ཐམས་ཅད་ལ་གུས་པས་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་གུས་པར་ཕྱག་འཚལ་ལོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྣལ་འབྱོར་རྣལ་འབྱོར་དབང་ཕྱུག་ཉིད། །དེ་བཞིན་རྣལ་འབྱོར་མཆོག་ཉིད་དང ། །དྲང་སྲོང་རྣམས་ཀྱི་ཡེ་ཤེས་དབང ། །རྣལ་འབྱོར་མ་ཡི་དྲ་མཆོག་བདེ། །གནས་གཙང་མ་ན་བཞུགས་ནས་སུ། །ཐམས་ཅད་མཁྱེན་པས་འདི་སྐད་གསུངས། །རྣལ་འབྱོར་གྱི་དབང་ཕྱུག་བྱེ་བ་ཕྲག་བརྒྱད་ཅུའི་དབུས་ནས་ཕྱག་ན་རྡོ་རྗེས་ཐལ་མོ་སྦྱར་ནས་བཅོམ་ལྡན་
174b
འདས་ལ་འདི་སྐད་ཅེས་གསོལ་ཏོ། །གསང་བ་སྦྱོར་བའི་ཁྱད་པར་དང ། །བདག་ནི་དེ་ཉིད་ཇི་ལྟར་ལྷ། །ཆུ་དང་མེ་ནི་ཇི་ལྟར་ལགས། །ཇི་ལྟར་རབ་མཛེས་ནམ་མཁའ་དང ། །ཡེ་ཤེས་ཇི་ལྟར་འཚལ་བགྱི་བ། །ཡེ་ཤེས་དབང་ལ་ཉན་པར་འཚལ། །འཁོར་བ་ལས་བསྒྲལ་མཚན་ཉིད་དག་།ཉོན་ཅིག་དཔལ་ལྡན་རྡོ་རྗེ་འཆང ། །དང་པོར་དབང་གི་མཚན་ཉིད་དང་།། གཉིས་པར་ཡི་གེ་གཅིག་དང་ནི། །གསུམ་པར་ས་བོན་བརྒྱད་པ་དང ། །བཞི་པར་རྩ་ཡི་ལྷ་ཉིད་དོ། །བདག་ཉིད་ལུས་ཀྱི་ཡེ་ཤེས་མེ། །བློ་ལྡན་རྣལ་འབྱོར་པས་ཤེས་བྱ། །ལྟོ་བ་མེ་ཡི་ཐབ་ཁུང་དུ། །དེ་ཡི་མེ་ལ་སྦྱིན་སྲེག་བྱ། །སྟེང་དང་འོག་དང་དབུས་སུ་ནི། །རྣམ་ཤེས་རྩ་ནི་བསྡམ་པར་བྱ། །ཐོག་མར་བདག་ཉིད་ལྟོ་བ་རུ། །རྩ་ཡི་ལྷ་ནི་རྣམ་པར་བསྒོམ། །ལྟེ་བའི་མེ་ནི་འབར་བ་ལ། །ཁྱད་པར་ཁ་དོག་བསྒོམ་པ་ནི། །ལྟེ་བའི་མེ་ནི་དཀར་པའོ། །གཡོན་པའི་མེ་ནི་དེ་བཞིན་སེར། །ལྷོ་ནི་སྔོན་པོའི་མིང་ཅན་ཏེ། །ལྷག་མ་འདི་ནི་དམར་པོར་སྦྱང་།། དེ་དབུས་ཁ་དོག་སྔོ་བསངས་སུ། །མེ་ཡི་དུ་བར་རབ་ཏུ་གྲགས། །མེ་ཡི་དབུས་སུ་པདྨ་ཉིད། །ཉི་མའི་དཀྱིལ་འཁོར་གྱིས་བརྒྱན་པ། །དེ་ཡི་དབུས་སུ་ཡེ་ཤེས་ལྷ། །འཁོར་བ་ཀུན་ལས་གྲོལ་བར་མཛད། །ཕྱག་གཉིས་སྦྱོར་བའི་གདན་ལ་ནི། །རྡོ་རྗེ་དྲིལ་བུས་རྣམ་པར་བརྒྱན། །གཡས་ཀྱི་ལག་ན་རྡོ་རྗེ་དང ། །རྒྱན་རྣམས་མཐོན་ཀའི་རྩེ་མོ་ཅན། །བཞད་དང་ཁྲོ་
175a
༄#། །བས་ཧཱུཾ་སྒྲོགས་ཤིང ། །འདི་ཡི་ཡེ་ཤེས་དབང་ཕྱུག་ལྷ། །དེ་ཡི་དབུས་སུ་རབ་ཏུ་གྲགས། །ཤར་དུ་ལྷ་མོ་སྒྲོལ་མ་དང ། །བྱང་དུ་དེ་བཞིན་གོས་དཀར་མོ། ། ནུབ་ཏུ་ལྷ་མོ་མཱ་མ་ཀཱི། སངས་རྒྱས་སྤྱན་ནི་ལྷོ་རུའོ། །གཟུགས་ནི་མཐེ་བོའི་ཚད་ཙམ་དུ། །བདག་ཉིད་ལྷ་ཡི་ལྷ་ཉིད་དོ། །ལྕེ་ལ་མཆུ་ནི་སྦྱར་བར་བྱ། །ནམ་མཁའ་རྣ་བ་སྣ་དག་ལའོ།། མིག་ལ་ས་འདི་རྣམ་པར་ཤེས། །དེ་བཞིན་ཚངས་པར་འབར་བའི་མེ། །མགྲིན་པར་རྨོངས་པའི་ས་ཉིད་དང ། །གཡོ་བ་སྙིང་ལ་གནས་པ་ཉིད། །ཐམས་ཅད་ཉོན་མོངས་བྲང་དང་ནི། ། ཕྱུགས་གཉིས་ལྟེ་བའི་རྩ་བར་རོ། །ཡན་ལག་བརྒྱད་དུ་བཀོད་ནས་ནི། །འདི་ཉིད་ལྷ་ནི་ཤེས་པར་བྱ། །རྣམ་ཤེས་རྩ་ནས་དྲངས་པ་ཡི། །དེ་བཞིན་དུ་ནི་བདུད་རྩི་དགུ་།སྟེང་གི་མཆེ་བ་གཉིས་པའི་རྩ། །ཀུན་ཏུ་ཚཝ་བཞིན་ཞུ་ལྟར་བབས། །ཇི་བཞིན་ཆུ་ནི་འོ་མའི་མིང ། །ལྕེ་ཡི་སྟེང་དུ་བསྟེན་པ་ཡི། །ཉི་མ་ཐིག་ལེ་འབར་བ་ཡིས། །འཁོར་ལོ་ཕྲ་རབ་རྡུལ་བཞིན་ནོ། ། སྟེང་གི་ནམ་མཁའ་ནམ་མཁའ་ནི། །བསྲེག་པའི་བདག་ཉིད་དུ་ནི་ཐིམ། །གཡོན་པའི་དབུགས་ནི་བུད་མེད་ཉིད། །གཡས་པ་དེ་བཞིན་སྐྱེས་བུའོ། །འོག་དང་སྟེང་ནི་འདི་ཡི་རྩ། །འོག་ནི་སྔོན་དུ་རབ་ཏུ་གྲགས། །དབུགས་དང་དྲི་ནི་མཉམ་དྲངས་ནས། །རྒྱས་པའི་ལྔ་ཡི་སྟེང་དུ་ནི། །རྣམ་ཤེས་གཉིས་ཀྱི་རྩ་ནས་དྲང ། །བདུད་རྩི་དེ་ལ་རྣམ་པར་ཐིམ། །ཡེ་ཤེས་དབང་ཕྱུག་
175b
དེའི་སྟེང་དུ། །དེ་ལ་བདུད་རྩིས་བཀྲུ་བར་བྱ། །དེ་ལྟར་ཀུན་ཏུ་བཞིན་རྡུབས་ནས། །དབུགས་མི་གཡོ་བར་བསྒོམ་པར་བྱ། །ལག་མཐིལ་ཟླ་བ་ཉི་མ་བསྒོམ། །ཡེ་ཤེས་ཡི་གེས་དེ་དབུས་སོ། ། རི་དྭགས་མགོ་བོའི་ཕྱག་རྒྱ་ཡིས། །ཁམས་ལྔའི་བདག་ཉིད་བསྲེག་པའོ། །སྔོན་དུ་ས་བོན་ཧཱུཾ་བྱས་ནས། །གཉིས་པར་དེ་བཞིན་གསུམ་དང་ནི། །གསུམ་པར་བཟོད་པས་བཟའ་བའོ། །དེ་བཞིན་རླུང་མིན་བཞི་པ་དང ། །ལྔ་པར་དད་པའི་ས་བོན་གྱིས། །མཁས་པས་ཁམས་ལྔའི་སྦྱིན་སྲེག་བྱ། །བདག་གི་དེ་ཉིད་མེ་ལ་ནི། །བདག་ཉིད་སྦྱོར་བས་བསྲེགས་པ་ཉིད། །ཇི་ལྟར་ཡེ་ཤེས་མེ་དེ་ནི། །བསྲེག་པའི་བདག་ཉིད་རབ་ཏུ་གྲགས། །སྦྱིན་སྲེག་བྱས་པའི་སྦྱོར་བའི་ལེའུ་ཞེས་བྱ་བ་དང་པོ་རྫོགས་སོ།། །།སྟོང་པའི་བདག་ཉིད་དགེ་བ་ཡིས། །སྐྱེ་བའི་དྲ་བ་རྣམ་འཇིག་པས། །འཁོར་བ་རུ་ནི་མི་གནས་པ། །བཅོམ་ལྡན་འདས་ལ་མཉན་པར་འཚལ། །སྟོང་པའི་དེ་ཉིད་རང་བཞིན་གྱིས། །ཉོན་ཅིག་རྒྱལ་པོ་རྡོ་རྗེ་འཆང ། །གླིང་གཞན་དེ་བཞིན་རི་རབ་དང ། །ས་ནི་ནམ་མཁར་ཀུན་ཏུ་བསམ། །རྒྱ་མཚོ་ཆུ་ཡི་དབྱིབས་དང་ནི། །ཡིད་འོང་པདྨ་འབྱུང་བར་ལྡན། །སྟོང་པའི་མཚན་ཉིད་སྔོན་འགྲོ་བས། །མེ་ཡི་བདག་ཉིད་བསྒོམ་པར་བྱ། །ཤར་དུ་ལྷ་མོ་སྒྲོལ་མ་འདི། །དེ་བཞིན་བྱང་དུ་གོས་དཀར་མོ། །མཱ་མ་ཀཱི་ནི་ནུབ་ཕྱོགས་སུ། །ལྷོར་ནི་ལྷ་མོ་སངས་རྒྱས་སྤྱན། །ཆུ་ནི་སྒྲོལ་མར་ཀུན་
176a
༄#། །ཏུ་ཐིམ། །མེ་ནི་གོས་དཀར་མ་ལ་ཐིམ། །མཱ་མ་ཀཱི་ནི་ནུབ་ནས་ས། །རླུང་ནི་སངས་རྒྱས་སྤྱན་ལ་ཐིམ། །ཆུ་ཤིང་མེ་ཏོག་པདྨ་འདི། །སྒོང་སྐྱེས་ཡེ་ཤེས་ཀྱི་ནི་གདན། །དེ་ཡི་ཡེ་ཤེས་རྒྱལ་དབང་མོ། །སྒོང་སྐྱེས་འོག་ཏུ་འབྱེད་པ་ཅན། །གཟུགས་མེད་སྲིད་པའི་དབྱིབས་ཅན། །ཡེ་ཤེས་རྒྱལ་པོ་ཉིད་དུ་ཐིམ། །དེ་ལྟར་བདག་ཉིད་སྟོང་པ་ཉིད། །དེ་ཉིད་དེ་ཉིད་སྟོང་པ་ཉིད། །འཇིགས་པ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་བྱ། །ཇི་ལྟར་སྟོང་ཉིད་དེ་བསྒོམས་ལ། །ལུས་ཀྱི་དྲི་མ་རབ་ཏུ་བཀྲུ། །ཕྱིས་ནི་ཆུ་ཡི་གཟུགས་སུ་བསྒོམ། །དམར་བོ་འདབ་མ་བརྒྱད་དང་ནི། །གེ་སར་ལྟེ་བར་བཅས་པ་ཡིས། །དབུས་སུ་པདྨས་རྣམ་པར་བརྒྱན། །འདབ་བརྒྱད་ལ་ནི་ལྷ་མོ་ཡི། །ས་བོན་བརྒྱད་ཀྱིས་རྣམ་པར་བརྒྱན། །ཤར་དུ་སི་ཀ་ཞེས་བྱ་དང ། །བྱང་དུ་བཟོད་པའི་ས་བོན་བཞིན། །ནུབ་ཏུ་རླུང་གི་ས་བོན་གསུངས། །ལྷོ་རུ་ཧཱུཾ་གི་དབང་ཕྱུག་གོ ། དབང་ལྡན་དུ་ནི་དབང་པོའི་དབྱངས། །མེ་ཕྱོགས་སྒྲ་དང་རྣམ་ཤེས་སོ། །བདེན་བྲལ་དབྱངས་ཡིག་བརྒྱད་པ་དང ། །རླུང་དུ་དབྱངས་ཡིག་ལྔ་པའོ། །དབུས་སུ་ཡེ་ཤེས་རྒྱལ་པོ་འདི། །སྒོང་སྐྱེས་ཡེ་ཤེས་དབང་ཕྱུག་ནི། །ཉི་མའི་དཀྱིལ་འཁོར་གྱིས་དཀྲིས་པ། །བདུད་རྩི་ས་བོན་འབར་བའོ། །ཁ་དོག་བདུན་པའི་མེ་འདི་ནི། །གོ་འཕང་མཆོག་གིས་
176b
བསྒོམ་པར་བྱ། །དབུགས་མི་གཡོ་བའི་སེམས་དཔའ་ཡིས། །དངོས་པོས་དངོས་པོ་བསྒོམ་བྱས་ནས། །ཕྱིས་ནི་རྩ་ཉིད་ལྷ་ཡི་གདན། །མིག་ལ་ས་ཡི་ས་བོན་དང ། །ནམ་མཁའ་སྣ་དང་རྣ་བ་ལའོ། །ལྕེ་ལ་བདུད་རྩིའི་ས་བོན་འདི། །སྙིང་གར་ཧཱུཾ་ཞེས་བྱ་བའི་མིང ། །ཡན་ལག་དྲུག་འཛིན་ས་བོན་གྱིས། །རྣལ་འབྱོར་ལུས་ནི་རྣམ་པར་བསྲུང ། །ཡེ་ཤེས་ལུས་འདི་ཤེས་བྱས་པས། །ཅི་ཡི་ཕྱིར་ན་སྐྱེ་བོའི་མིང ། །གཟུགས་མེད་ཡེ་ཤེས་གཟུགས་ཅན་དང ། །ཁ་དོག་མེད་ཅིང་མཚོན་ཀུན་དངོས། །གནས་མེད་གནས་ཀྱི་དབྱིབས་ཅན་དང ། །མི་རིགས་དེ་བཞིན་རིགས་པ་ཉིད། །སྟོང་པ་ཉིད་ཀྱི་ལེའུ་ཞེས་བྱ་བ་སྟེ་གཉིས་པ་རྫོགས་སོ།། །།བདག་ཉིད་ལྔ་ཡི་བྱེ་བྲག་ཉིད། །བཅོམ་ལྡན་འདས་ལ་མཉན་པར་འཚལ། །ཉོན་ཅིག་རྒྱལ་པོ་རྡོ་རྗེ་འཆང ། །གཉིས་དང་གཉིས་མེད་ལ་བརྟེན་ནས། །བསྐལ་པ་བཟང་པོ་བརྒྱ་ཡི་སྔོན། །དག་པའི་གནས་ལ་ཀུན་ཏུ་གནས། །རི་རབ་ལྷ་མོ་སངས་རྒྱས་སྤྱན། །མཱ་མ་ཀཱི་ནི་ལྷོ་ཕྱོགས་གནས། །ལྷ་མོ་སྒྲོལ་མ་ནུབ་ཀྱི་གླིང ། །དེ་བཞིན་བྱང་དུ་གོས་དཀར་མོ། །ཤར་དུ་ལྷ་མོ་སྙན་མ་འདི། །ལྷ་མོ་རྣམ་པ་ལྔ་ཡི་གནས། །དེ་ལྟར་སྙིང་ག་རི་རབ་དང ། །དེ་བཞིན་མགོ་བོ་མཱ་མ་ཀཱི། །སྒྲོལ་མ་ལྷོ་ཡི་གནས་དང་ནི། །གཡོན་པ་དེ་བཞིན་གོས་དཀར་མོ། །སྙན་པ་མོ་འདི་བདག་གིས་གནས། །ལྷ་མོ་ལྔ་ཡིས་བྱིན་གྱིས་
177a
༄#། །བརླབ། །པདྨའི་དབུས་སུ་རྡོ་རྗེ་དང ། །རྡོ་རྗེའི་དབུས་སུ་པདྨ་ཅན། །རྡོ་རྗེ་བདུད་རྩི་ཀུན་ཐིམ་པ། །ལུས་པོ་ཀུན་ནས་དཀྲིས་པའོ། །ཡན་ལག་བརྒྱད་ཀྱི་རྩ་ཉིད་དུ། །བདུད་རྩིའི་ཆུ་ནི་རྣམ་པར་ཐིམ། །ལྷ་ཡི་གནས་ནི་ནམ་མཁའ་ཉིད། །རྡོ་རྗེའི་ས་བོན་དུ་རབ་ཤེས། །བདག་ཉིད་ལུས་ལ་བསྒོམས་པ་ནི། །རྡོ་རྗེའི་རྩེ་ཞེས་རབ་ཏུ་གྲགས། །དེ་ཡི་ལུས་ཀྱི་ཁྲག་དང་ནི། །ལུས་དང་ལྷན་ཅིག་བཅས་པར་གནས། །ཁྲག་དང་ཆུ་ནི་ཀུན་སྦྱོར་བས། །བློ་ལྡན་ཡན་ལག་བརྒྱད་ནས་འཛག་།ཇི་ལྟར་བདག་གིས་ས་བོན་ལྔ། །དེ་ལྟར་པདྨ་ཡི་ཡང་བསྒོམ། །ཇི་ལྟར་བདག་ཉིད་ལུས་འདི་ནི། །ནམ་མཁའ་རྡོ་རྗེ་འཇིག་བྱེད་དོ། །རྐང་པས་རྐང་པ་དཀྲི་བྱ་ཞིང ། །མཆུ་ཡིས་མཆུ་ནི་བཙིར་བྱས་ལ། །གཉི་གའི་ལག་པ་ཕྱག་རྒྱ་ནི། །རྩེ་མོ་གསུམ་པའི་རྡོ་རྗེ་བརྟག་།རང་བཞིན་གྱིས་ནི་སོ་སྲ་དང ། །སྙིང་གའི་རྣམ་ཤེས་བསྒོམ་པ་ཡི། །ཡེ་ཤེས་རྒྱལ་པོའི་ལུས་ཅན་འདི། །སྐྱེས་བུས་ཁྲོས་པས་ཧཱུཾ་བྱས་ནས། །དེ་ལྟར་རྡོ་རྗེ་པདྨ་འདི། །རྣལ་འབྱོར་བསྡུས་པས་བསྐྱོད་པར་བྱ། །གཉི་ག་དགའ་ཞིང་ཚིམ་པ་ཡིས། །ལྷ་རྣམས་ཐམས་ཅད་མཆོད་པར་བྱ། །ཁྲག་དང་ཁུ་བ་ལས་བྱུང་བའི། །ས་བོན་མྱུ་གུས་འགྲོ་བ་ལ། །ལྷ་རྣམས་ལུས་ནི་ཡང་དག་འབྱུང ། །འདོད་ལ་དགའ་ཉིད་མ་ཡིན་ཏེ། །ལོངས་སྤྱོད་ཕྱིར་ཡང་གནས་
177b
མི་བྱ། །སེམས་ཅན་དོན་ཕྱིར་འདོད་པའི་ཕྱིར། །ཡོངས་སུ་རྫོགས་པའི་ཡིད་འོད་སྐུ། །གཉིས་མེད་སྦྱོར་བ་ལ་གནས་པར། །གཏོར་མ་སྔོན་དུ་སྦྱིན་པར་བྱ། །སྦྱོར་བའི་ལེའུ་ཞེས་བྱ་བ་གསུམ་པ་རྫོགས་སོ།། །།ཉོན་ཅིག་རྒྱལ་པོ་རྡོ་རྗེ་འཆང ། །དེ་ཉིད་བཅུ་ཡི་བྱེ་བྲག་ཉིད། །ཡི་གེ་བཅུ་རུ་སྔོན་སྦྱར་བྱ། །ལྔ་ཡི་བདག་ཉིད་དུ་རྫོགས་བྱ། །ལྔ་པ་ལྔ་ཡི་བདག་ཉིད་ཀྱི། །ལྔ་ཡི་ལུས་ནི་ཡོངས་སུ་བསྲུངས། །ཡི་གེ་བཅུ་ནི་ཇི་ལྟར་ལགས། །ཇི་ལྟར་བདག་ཉིད་ལ་འདི་སྦྱར། །ཇི་ལྟར་སྦྱང་ཞིང་བསྒོམ་པ་དང ། །ཇི་ལྟར་ས་བོན་མྱུ་གུ་སྟེ། །ཇི་ལྟར་ཐར་པ་ལ་གནས་གཉིས། །ངོ་མཚར་ལྷ་ལ་ཉན་པར་འཚལ། །གསང་བ་གསང་བ་ཞེས་བྱ་བ། །རྒྱལ་པོ་ཇི་བཞིན་དེ་ཉིད་ཉོན། །ཐོག་མར་སྟོང་པ་དེ་ཁོ་ན། །སྟོང་པར་ཆུ་ནི་བསམ་པར་བྱ། །ཁ་དོག་བདུན་གྱི་པདྨ་ནི། །གསར་དང་བཅས་ཡིད་འོང་བ། །སྟོང་ཕྲག་བརྒྱ་ཡི་ཁྱོན་ཙམ་གྱིས། །པདྨའི་གཟུགས་ནི་སྙིང་པོ་བཅས། །པདྨ་རྒྱ་ཆེར་རབ་མཛེས་པ། །རིན་ཆེན་བདུན་གྱིས་མངོན་པར་སྤྲས། །དྲིལ་བུ་དྲ་བའི་ཕྲེང་བ་དང ། །དར་དང་ན་བཟའ་མངོན་པར་འཕྱང ། །སེང་གེའི་གདན་ནི་མངོན་པར་བསམ། །དེ་སྟེང་ཉི་མའི་དཀྱིལ་འཁོར་རོ། །པདྨ་རྡོ་རྗེའི་ངོ་བོ་འདི། །འོད་ཟེར་ཉི་མ་བྱེ་བ་ཡི། །སངས་རྒྱས་ལྔ་ཡི་ས་བོན་གྱིས། །རྡོ་རྗེ་རྩེ་མོ་རྣམ་པར་བསམ། །དབུས་སུ་རྣམ་པར་སྣང་མཛད་དགྱེས། །ཤར་དུ་དེ་བཞིན་མི་བསྐྱོད་
178a
༄#། །པ། །རིན་ཆེན་ས་བོན་ལྷོ་ཉིད་དུ། །དེ་བཞིན་ནུབ་ཏུ་འོད་དཔག་མེད། །བྱང་ཕྱོགས་སུ་ནི་དོན་ཡོད་གྲུབ། །ས་བོན་ལྔ་ནི་རྣམ་པར་བསྒོམ། །པདྨ་བྱང་ཆུབ་ཡན་ལག་བརྒྱད། །ཇི་བཞིན་ས་ལ་རབ་ཏུ་བརྟག་།དབུས་སུ་སྙིང་པོ་སྒོ་ང་ལ། །རྣམ་པར་ཤེས་པའི་བདག་ཉིད་ཐིམ། །པདྨ་བརྒྱད་པའི་རྩེ་མོར་ནི། །མངའ་བདག་དེ་བཞིན་རྣམ་སྣང་མཛད། །ཤར་དུ་ལྷ་མོ་སྒྲོལ་མ་འདི། །བྱང་དུ་ལྷ་མོ་སངས་རྒྱས་སྤྱན། །ནུབ་ཏུ་བསམ་པ་གོས་དཀར་མོ། །དེ་བཞིན་ལྷོ་རུ་མཱ་མ་ཀཱི། །འོད་ཟེར་འབར་བ་རྣམ་མང་པོར། །འཇིགས་པ་མེད་པར་བསྒོམ་པར་བྱ། །རྡོ་རྗེ་ལས་ནི་ལྷ་ཡི་ལུས། །བཞུགས་པ་རུ་ནི་རྣམ་པར་བསམ། །སྤྱན་གསུམ་ཕྱག་ནི་དྲུག་པའོ། །ཁ་དོག་སྔོན་པོ་རབ་ཏུ་མཛེས། །རྡོ་རྗེ་ཡི་ནི་ཅོད་པན་ཅན། །དར་གྱིས་བཅིངས་ཤིང་རྣམ་པར་འཕྱང ། །རྒོད་ཅིང་ཁྲོ་དང་སྒེག་པ་དང ། །སེམས་དཔའི་སྐྱིལ་མོ་ཀྲུང་གིས་བཞུགས། །སྟེང་དུ་རལ་གྲི་འཕྱར་བ་དང ། །གཉིས་པ་ལ་ནི་དེ་བཞིན་གཞུ། །གསུམ་པར་རྡོ་རྗེ་གདེངས་པ་གསོར། །གཡོན་པའི་སྟེང་དུ་ཁ་ཊྭཱཾ་དང ། །གཉིས་པས་ལྷ་མོའི་ནུ་མ་འཚིར། །གསུམ་པས་དྲིལ་བུའི་སྒྲ་སྒྲོགས་ཤིང ། །རབ་ཏུ་མཛེས་པའི་ན་བཟའ་མནབས། །སྟག་གི་པགས་པའི་ཤམ་ཐབས་ཅན། །རྒྱན་ཀུན་ཕུན་སུམ་ཚོགས་པ་དང ། །མེ་ཏོག་ཕྲེང་བས་རབ་ཏུ་བརྒྱན། །གཡོན་དུ་ལྷ་མོ་སྒྲོལ་མ་ནི། །ཕྱག་གཅིག་
178b
གིས་ནི་འཁྱུད་པ་དང ། །གཅིག་གི་ཕྱག་ན་ཐོད་པ་ནི། །བདུད་རྩིའི་ཆུ་དང་ཡང་དག་ལྡན། །མཱ་མ་ཀཱི་ཡང་དེ་བཞིན་དུ། །གཅིག་གི་ཕྱག་གིས་མངོན་པར་འཁྱུད། །གཅིག་གི་ཕྱག་གི་ཐོད་པ་ན། །ཁྲག་དང་ཤ་ཡིས་གང་བའོ། །སྤྱན་མ་རྒྱབ་ཏུ་ཀུན་ནས་བསམ། །ཕྲེང་བས་ཕྱག་ནི་བརྒྱན་པ་དང ། །གཏོར་མ་སྦྱངས་པའི་ཕྱག་གཉིས་པ། །མདུན་དུ་སྣོད་ལ་རྣམ་པར་བལྟ། །དེ་ལྟར་བདག་ཉིད་ལྔ་ཡི་ལུས། །ལུས་ལ་ཀུན་ནས་ཡང་དག་གནས། །ཤར་དུ་ལྷ་མོ་མེ་ཏོག་མ། །ལྷོ་རུ་སྤོས་དང་ཡང་དག་ལྡན། །ནུབ་ཏུ་མར་མེའི་ལག་པ་མ། །བྱང་དུ་དྲི་ཡི་ལྷ་མོའོ། །དབང་ལྡན་དུ་ནི་སྒེག་མོ་ཉིད། །དེ་བཞིན་མེ་ཕྱོགས་ཕྲེང་བ་མ། །བདེན་བྲལ་ཕྱོགས་སུ་དབྱངས་མ་དང ། །རླུང་དུ་གར་མ་བརྒྱད་པའོ། །ཉི་མ་བྱེ་བ་བརྒྱ་སྟོང་གི་།འོད་ཟེར་རྣམ་པ་མང་པོའི་མདོག་།སངས་རྒྱས་སྤྲིན་ལྟར་འཕྲོ་བ་ནི། །སེམས་ཅན་སྒྲོལ་ལ་མཆོག་ཏུ་བརྩོན། །བདག་ཉིད་ལྷ་དང་ལྷ་གཞན་ནི། །བདག་ཉིད་ལྷ་ནི་མཆོག་ཡིན་ནོ། །བདག་ཉིད་གཟུགས་སུ་མི་ནུས་པས། །གཟུགས་བརྙན་ལ་སོགས་བསྒོམ་པར་བྱ། །ཕྱིས་ནི་དེ་ཡི་མདུན་ཉིད་དུ། །མཁས་པ་ཡིས་ནི་མཆོད་པར་བྱ། །དེ་ཉིད་པདྨ་བསམ་པ་དང ། །དེ་ཉིད་གཞལ་ཡས་ཁང་པ་བསམ། །སྔོན་དུ་གསུངས་པའི་གདན་ལ་ནི། །དེར་ནི་ཉི་མས་མངོན་པར་གཡོགས། །སྣ་ཚོགས་རིན་ཆེན་མཆོད་པ་དང ། །སྣ་ཚོགས་དར་ནི་མངོན་པར་དབྱངས། །ལག་
179a
༄#། །གཉིས་ཐལ་མོ་སྦྱར་བྱས་ནས། །པདྨའི་ཚུལ་དུ་ཁ་ཕྱེ་ལ། །ོཾ་ཀ་མ་ལ་ཨུད་བྷ་བི་ཤྲཱི་སཝཱཧཱ། པདྨའི་སྔགས་དང་ཕྱག་རྒྱ་འོ། །རང་གི་དབུགས་ལས་ཕྱུང་ནས་ནི། །རྡོ་རྗེ་མདུན་དུ་རྣམ་པར་བསྒོམ། །ལག་གཉིས་ཁུ་ཚུར་བཅངས་ནས་ནི། །སྡིགས་མཛུབ་གཡོན་པའི་མཐེའུ་ཆུང་དཀྲི། །ལྕགས་ཀྱུ་ཡི་ནི་རྣམ་པའོ། །ོཾ་བཛྲ་ཨཾ་ཀུ་ཤ་ཛཿ ་རྡོ་རྗེ་ལྕགས་ཀྱུའི་སྔགས་དང་ཕྱག་རྒྱའོ། །ལག་གཉིས་རྡོ་རྗེ་ཁུ་ཚུར་བྱས། །སྡིགས་མཛུབ་གཉིས་ནི་དཀྲི་བྱས་པ། །ཞགས་པ་ཡི་ནི་རྣམ་པའོ། །ོཾ་བཛྲ་པཱ་ཤ་ཧཱུཾ། ཞགས་པའི་སྔགས་དང་ཕྱག་རྒྱའོ། །ཇི་ལྟར་བདག་ཉིད་གཟུགས་བརྙན་བཞིན། །དེ་ལྟར་མདུན་དུའང་རབ་བསམ་བྱ། །ལྷ་མོ་བརྒྱད་ནི་ཀུན་རྫོགས་པ། །ཁྲོ་བོའི་རྒྱལ་པོ་བཞི་པར་རོ། ། ཤར་དུ་གཤིན་རྗེ་མཐར་བྱེད་དངོས། །ལྷོ་རུ་ད་བཞིན་བགེགས་མཐར་བྱེད། །ནུབ་ཏུ་པདྨ་མཐར་བྱེད་པ། །བྱང་དུ་ཁྲོ་བོ་སྐྱོང་བའོ། །ལག་གཉིས་རྡོ་རྗེ་ཁུ་ཚུར་བཅིངས། །རྒྱབ་དང་རྒྱབ་ཏུ་སྦྱར་བར་བྱ། །ོཾ་བཛྲ་སྥོ་ཊ་བཾ། རྡོ་རྗེ་ལྕགས་སྒྲོག་གི་སྔགས་དང་ཕྱག་རྒྱའོ། །ལག་གཉིས་རྡོ་རྗེ་ཁུ་ཚུར་བཅངས། །མཐེའུ་ཆུང་གཉིས་ནི་སྦྱར་བར་བྱ། །ོཾ་བཛྲ་གྷཎྜེ་ཧོཿ ་རྡོ་རྗེ་དྲིལ་བུའི་སྔགས་དང་ཕྱག་རྒྱའོ། །ལག་པ་ལྕགས་སྒྲོག་ཕྱག་རྒྱ་ལས། །སོར་མོ་དབུས་མ་བརྐྱང་བྱས་ལ། །ན་མོ་རཏྣ་ཏྲ་ཡཱ་ཡ། ཨོཾ་བཻ་རོ་ཙ་ན་ས་མཱ་དྷི། བི་ཤཝ་ཡེ་གྷུ་
179b
ཡ་བ་ཛ་བྷི་ཥཻ་སཝཱཧཱ། ཨོཾ་ཧཱུཾ་ཧཱུཾ་ཧཱུཾ། ཧོ་ཧོ་ཧོ་ཧོ་ཧོ་ཧོ། ཧྲི་ཧྲི་ཧྲི་ཧྲི་སཝཱཧཱ། བཅོམ་ལྡན་འདས་རྣལ་འབྱོར་ནམ་མཁའི་སྔགས་དང་ཕྱག་རྒྱའོ། །ོཾ་ཏཱ་རེ་ཏུཏྟཱ་རེ་ས་ཏ་ཀྵི་ཏ་ཧཱུཾ་སཝཱཧཱ། ལྷ་མོ་སྒྲོལ་མའི་སྔགས་སོ། །ོཾ་ཧི་ལི་ཧི་ལི་བ་ལི་སཝཱཧཱ། གོས་དཀར་མོའི་སྔགས་སོ། །ོཾ་ཏ་ར་སརྦ་ཏ་ན་ཧཱུཾ་ཕཊ། མཱ་མ་ཀཱིའི་སྔགས་སོ། །ོཾ་བུདྡྷ་བི་བུདྡྷ་ཡ་ཧཱུཾ། སངས་རྒྱས་སྤྱན་གྱི་སྔགས་སོ། །སྡིགས་མཛུབ་གཉིས་དང་གུང་མོ་ནི། །དབུས་དང་དབུས་སུ་སྦྱར་བར་བྱ། །མཐེ་བོང་དངོས་སུ་སྦྱར་བ་ནི། །ལྷ་མོ་བཞི་ཡི་ཕྱག་རྒྱ་འོ། །མ་ནིང་ཡི་གེ་བཞི་པ་ནི། །མེ་ཏོག་མ་ལ་སོགས་པ་དང ། །སྒེག་མོ་ཡི་ནི་སྔགས་ཉིད་ཡིན། །གཡས་བརྐྱང་རྐང་པ་ཡང་དག་གནས། །སྡིགས་མཛུབ་སྙིང་གར་སྤྱིན་བྱས་ནས། །དཔུང་པ་མདུན་ནས་བརྐྱང་བྱས་ནས། །སེ་གོལ་ཧཱུཾ་གི་རྣམ་པ་དང ། །ལྷན་ཅིག་ཏུ་ནི་སྦྱར་བྱས་པ། །འདི་ནི་ཁྲོ་བོའི་ཕྱག་རྒྱའོ། །ོཾ་ཨཱ་ཡུཿ ་པཱ་ལ་པྲ་ཏི་རཀྵ་དུཀྵ་བྷན་དྷ་ལ་ཧཱུཾ་ཕཊ། ཤར་ཕྱོགས་ཀྱི་སྒོར་ཞི་བ་ཡིའོ། །ོཾ་ཨཱ་ཀཪྵ་ཡ་སཝཏྭ་དྷཱ་ཏུ་ནཱ་ཀྲོ་སཝཱཧཱ། བྱང་དུ་རྒྱས་པ་ཡིའོ། །ོཾ་མོ་ཧ་ཡ་མོ་ཧ་ཡ། སརྦ་སཏྭ་ནཱཾ་ཤྲཱི་སཝཱཧཱ། ནུབ་ཏུ་དབང་གིའོ། །ོཾ་ཤཀྵ་སརྦ་དུཥྚ་གྷཱ་ཏ་ཡ་ཧྲི་ཕཊ། ལྷོ་རུ་མངོན་པར་སྤྱོད་པ་ཡིའོ། ། ོཾ་སུ་གན་དྷ་ཧཱུཾ་ཧཾ་སཝཱཧཱ། ལག་པ་གཡས་པ་བརྐྱང་པ་དྲིའི་ཕྱག་རྒྱའོ། །ོཾ་སུ་སོ་བིད་པུཥྤེ་བྷྱཿ ་སཝཱཧཱ། སྡིགས་མཛུབ་དང ། མཐེབ་མོ་སྦྱར་བ་ནི་མེ་ཏོག་གི་སྔགས་དང ། ཕྱག་རྒྱའོ། །
180a
༄#། །ོཾ་དྷཱུ་པ་མཱ་ལ་ཀུ་ལེ་སཝཱཧཱ། སོར་མོ་དབུས་མ་བསྒྲེང་བ་ནི། །བདུག་པའི་སྔགས་དང་ཕྱག་རྒྱའོ། །ོཾ་ཏཱིཀྵ་ཎ་དཱི་པེ་པྲ་ཏི་གྲྀཧྞ་སཝཱཧཱ། ཁུ་ཚུར་བཅངས་ནས་མཐེ་བེ་བསྒྲེང་བ་ནི། མར་མེའི་སྔགས་དང་ཕྱག་རྒྱའོ། །ོཾ་ཀུ་རུ་ཀུ་རུ་བི་ཛ་ཡེ་སཝཱཧཱ། ལག་པ་གཉིས་བརྐྱང་ནས་དབུས་སུ་སྦྱར་བ་ནི་གཏོར་མའི་སྔགས་དང་ཕྱག་རྒྱའོ། །ཇི་ལྟར་སྔོན་དུ་སྦྱོར་བ་ཡིས། །མཁས་པ་ཡིས་ནི་མཆོད་པར་བྱ། །ཧཱུཾ་གི་གླུ་ཡི་རྣམ་པ་ཡིས། །སངས་རྒྱས་ཀུན་ནས་མཉེས་པར་བྱ། །ལག་གཉིས་རྡོ་རྗེ་ཁུ་ཚུར་བྱས། །རྐེད་པའི་ཕྱོགས་སུ་གཟུང་བྱས་ལ། །པི་ཝང་ཚུལ་གྱིས་བསྒྲེང་བ་དང ། །གླིང་བུའི་ཚུལ་གྱིས་འབུད་པ་དང ། །སིལ་སྙན་ཚུལ་གྱིས་དཀྲོལ་བ་དང ། །བརྡབས་པའི་ཚུལ་གྱིས་རྫོགས་པ་དང ། །གར་གྱི་ཚུལ་གྱིས་བསྐྱོད་པ་དང ། །རླུང་གཡབ་ཚུལ་གྱིས་གཡོབ་པ་དང ། །རྒྱལ་མཚན་ཚུལ་གྱིས་བསྒྲེང་བ་དང ། །བླ་རེའི་ཚུལ་གྱིས་བྲེ་བ་དང ། །བ་དན་ཚུལ་གྱིས་འཕྱར་བ་དང་།། གདུགས་ཀྱི་ཚུལ་གྱིས་དགབ་པ་དང ། །ཅང་ཏེའུའི་ཚུལ་གྱིས་འཁྲོལ་བ་དང ། །འཁར་རྔའི་ཚུལ་གྱིས་བརྡུང་བ་དང ། །བཞད་པའི་ཚུལ་གྱིས་འཛུམ་པ་དང ། །ཁྲོ་བོའི་སྟངས་སྟབས་ཡན་ལག་བསྐྱོད། །དེ་ལྟར་དེ་ཉིད་རྣལ་འབྱོར་པས། །གླུ་ཡི་མཆོད་པའི་ཁྱད་པར་ཉིད། །ཧཱུཾ་ཧཱུཾ་ཧཱུཾ། བདག་མེད་རྣལ་འབྱོར་བསྒོམས་པ་ཡིས། །འབྱིན་པའི་ས་བོན་
180b
གཟུང་བྱས་པ། །སྤྱི་ཡི་རྣལ་འབྱོར་སྟོན་པའོ། །དབང་པོ་མཆོག་གི་མཆོད་པ་ཆེ། །ཐར་པ་ཆེན་པོ་གནས་ཆེན་པོ། །གསང་ཞིང་དེ་ཉིད་གསང་བ་ཡི། །གསང་བའི་བདག་པོ་དགའ་ཆེན་པོ། །རྣམ་སྣང་མཛད་ལ་ཕྱག་འཚལ་འདུད། །ལུས་ཀྱི་རྩ་ནི་ལྔ་ཉིད་ལས། །ལྷ་དང་ལྷ་མིན་མངོན་པར་སྤྲུལ། །བདེ་བ་བསྒྲུབ་པ་ཞེས་བྱ་བ། །སྦྱོར་བའི་སྐུ་ལ་ཕྱག་འཚལ་འདུད།། གླུ་དང་བསྟོད་པས་ཉེར་མཆོད་ནས། །ཇི་ལྟར་ལས་ལ་མངོན་བདེ་བར། །རང་གི་སྔགས་ཀྱི་ཡི་གེ་ཡིས། །ཕྲེང་བ་ལ་ནི་བཟླས་པར་བྱ། །ཇི་ལྟར་ནུས་པས་མཆོད་བྱས་ལ། །སླར་ཡང་གཤེགས་སུ་གསོལ་བའོ། །དབུགས་ཀྱིས་བདག་ཉིད་ལུས་བཀང་སྟེ། །ལྷན་ཅིག་ཐིམ་པར་བསམ་པར་བྱ། །ཇི་ལྟར་རྣལ་འབྱོར་ནམ་མཁའ་ཉིད། །དེ་ལྟར་རྣམ་པར་སྣང་མཛད་བདག་།ཇི་ལྟར་རྣམ་པར་སྣང་མཛད་ལྷ། །དེ་བཞིན་རྒྱབ་ཀྱི་རྩ་ཉིད་དོ། །ཇི་ལྟར་སྔོན་གྱི་རྩ་ཉིད་ལས། །དེ་བཞིན་ཡེ་ཤེས་སྐྱེ་བ་འདི། །ཆུ་ནི་སྒྲོལ་མ་ཞེས་སུ་བཤད། །མེ་ལ་གོས་དཀར་ཡང་དག་ལྡན། །རླུང་ལ་ལྷ་མོ་སངས་རྒྱས་འདི། །དེ་བཞིན་རབ་མཛེས་མཱ་མ་ཀཱི། །དཀར་པོ་ཆུ་ཡི་རྩ་དང་ནི། །དུད་པ་ཡང་ནི་མེ་ཡི་གནས། །དུང་གི་རྩ་འདི་རླུང་གི་འོ། །དེ་བཞིན་དུ་ནི་པདྨ་དང ། །ཡེ་ཤེས་འབྱིན་པ་ཡི་ནི་རྩ། །ལྔ་ཡི་བདག་ཉིད་ཁྱད་པར་ནི། །གདན་བཞི་ཉན་པར་མི་ནུས་པ། །གཞུང་ཉུང་བ་ནི་བསྟན་པ་ཡིས། །གཟུགས་བརྙན་གྱི་རབ་ཏུ་སྦྱོར་
181a
༄#། །བའི་ལེའུ་ཞེས་བྱ་བ་བཞི་པ་རྫོགས་སོ།། །།རྡོ་རྗེའི་ཆུ་ནི་ཇི་ལྟར་ལགས། །བདུད་རྩིའི་ཆུ་ནི་ཇི་ལྟར་སྐྱེ། །གང་གི་དབྱེ་བ་ཇི་ལྟར་མྱང ། །གང་གིས་ཇི་ལྟར་འཚལ་བར་བགྱི། །འདི་ཡི་རབ་ཏུ་དགོས་པའང་ཅི། །ངོ་མཚར་ལྷ་ལ་མཉན་པར་འཚལ། །ཉོན་ཅིག་རྒྱལ་པོ་རྡོ་རྗེ་འཆང ། །གཉིས་དང་གཉིས་མེད་སྤངས་པ་ཡི། །གསང་ཞིང་གསང་བ་རབ་སྦས་པའི། །འགྲོ་བའི་འབྲས་བུ་དེ་དེ་ཉིད། །བསྐལ་པ་བྱེ་བ་སྟོང་ཕྲག་ཏུ། །སངས་རྒྱས་ཡེ་ཤེས་ཀྱིས་བསྐུལ་བ། །སངས་རྒྱས་ལམ་ནི་མཐོང་བ་འོ། །ཡེ་ཤེས་སྣང་བ་དེ་བདུན་ཉིད། །ཇི་ལྟར་མེ་ཡིས་མཉམ་པར་བསྲེགས་པའི་སྤྱོད་པ་དང ། །ཉི་མ་ཇི་ལྟར་མཉམ་པར་ལྟ་བར་སྟོན་པ་དང ། །ཇི་ལྟར་རླུང་ནི་མཉམ་པ་ཉིད་དུ་ལེན་པར་ལྟར། །རྣམ་རྟོག་རྨོངས་པའི་རྒྱ་མཚོ་བསྲིངས་པའི་རྣལ་འབྱོར་པས། །པདྨའི་དབང་ཕྱུག་སྐུ་ནི་གསེར་གྱི་མདོག་།དྲི་ཆུའི་ངོ་བོ་ཤིན་ཏུ་སྣང་མཛད་དང ། །རོ་ནི་རྡོ་རྗེ་དབང་ཕྱུག་རྡོ་རྗེ་ཕྱག་།ལྷ་གསུམ་དག་གི་ཆོ་ག་ཤེས་པར་བྱ། །ཧ་ཞེས་པ་ཡིས་ཁ་དོག་འཕྲོག་།ཧོ་ཞེས་པ་ཡིས་དྲི་མེད་ཅིང ། །དཔའ་བོ་ཧྲཱིཿ ཡིས་བཅོམ་པ་ཡི། །དེ་དག་རིམ་བཞིན་ཤེས་པར་བྱ། །པདྨའི་གདན་ནི་རྟག་ཏུ་མཉམ་པ་ཉིད་དུ་བསྒོམ། །མཐེ་བོ་རྡོ་རྗེ་སྲིན་ལག་གཉིས་སུ་ཀུན་ལྡན་པས། །སྔགས་གསུམ་ཡི་གེ་གསུམ་གྱིས་ཆོ་ག་བསྲུང་བར་
181b
བྱ། །གང་ཞེས་རོ་འདི་མྱང་བ་བློ་ལྡན་རྣལ་འབྱོར་མའོ། །རྡོ་རྗེ་ཆུ་ཡི་ཁྱད་པར་ནི། །ཉོན་ཅིག་དཔལ་ལྡན་རྡོ་རྗེ་འཆང ། །འཛག་པ་ཡི་ནི་ལུས་ཀྱི་ཆུ། །བདག་ཉིད་ལྔ་ཡིས་བྱིན་གྱིས་བརླབས། །དྲོ་བའི་རང་བཞིན་མེ་རུ་མཐོང ། །ཞི་བ་ཆུ་རུ་རབ་ཏུ་བརྟག་།རླུང་དང་རླུང་ནི་དུ་བ་འོ། །ས་ནི་གཟུགས་སུ་སྣང་བ་འོ། །གང་ཞིག་དེ་ཉིད་ཀྱིས་མྱངས་ན། །དྲི་མ་ཅན་ལུས་དྲི་མེད་འགྱུར། །རིན་ཆེན་བཟང་དགའ་རྣལ་འབྱོར་པ། །སྦྱངས་པའི་རྡོ་རྗེ་འཇིགས་བྱེད་ཀྱི། །གཙང་དང་མི་གཙང་དེ་བཞིན་རྫས། །དང་པོ་རྣལ་འབྱོར་མཚན་ཉིད་དོ། །ཉོན་མོངས་དེ་བཞིན་མུན་པ་དེ། །རྣམ་ཤེས་ལྷན་ཅིག་སྣང་བ་འོ། །ཡེ་ཤེས་རྡོ་རྗེས་བཅོམ་ནས་ནི། །རྣལ་འབྱོར་པ་ནི་དེ་ལ་སྣང ། །བདུད་རྩི་བསྟེན་འདོད་ལུས་ཅན་གྱིས། །གཉིས་མེད་ཁ་སྦྱར་སྦྱར་བར་བྱ། །རྣལ་འབྱོར་ཆེན་པོའི་སྒྲུབ་པ་པོ། །སྔོན་དུ་ཨཱ་ལི་ཀཱ་ལི་བསམ། །ཱ་ལི་ཞེས་བྱ་བུང་བར་གསུངས། །ཀཱ་ལི་དེ་བཞིན་གཤེགས་མ་ཉིད། །སྦྱོར་བའི་ཡེ་ཤེས་སྒྲ་ཡིས་ནི། ། གཉི་གས་འཁྱུད་པར་བསམ་པར་བྱ། །ཇི་ལྟར་སྡེ་ཚན་གསུམ་པ་ཡི། །ཡི་གེ་གསུམ་པ་གཟུང་བྱས་ཏེ། །རྡོ་རྗེ་ར་བ་ཙམ་ཞིག་གིས། །འོད་དཔག་མེད་ནི་དཀྲི་བར་བྱ། །ལྷ་མོ་གསུམ་པ་ཉིད་ཀྱིས་ནི། །དབྱུག་པ་ཙམ་ཞིག་རྡོ་རྗེ་འཛིན། །དབུས་སུ་དམ་ཚིག་ཞགས་པ་ཡིས། །ཀུནད་མགོ་ལ་མཆོག་ཏུ་བརྩོན། །དེ་ལྟར་སྔགས་ཟློས་རྣལ་འབྱོར་པ། །པདྨ་རྡོ་རྗེ་ཅན་གྱིས་
182a
༄#། །བསྐྱོད། །རང་བཞིན་གྱིས་ནི་ས་སྒྲ་དང ། །བདུད་རྩི་ཆུ་དང་འདྲེས་པ་ཡི། །དེ་ཉིད་འདི་ཡིས་མྱང་བྱས་པ། །རྣལ་འབྱོར་ཆོས་ལ་རབ་ཏུ་ཤིས། །བདེན་པའི་ཆོས་ནི་མཆོག་ཏུ་བདེན། །རྣལ་འབྱོར་ཆོས་ནི་རབ་ཏུ་བསྟོད། །དེ་ཉིད་དམན་པའི་རྣམ་རྟོག་ཡིད། །སྦྱོར་བ་ཇི་ལྟར་འགྲུབ་པར་འགྱུར། །བྱེ་བ་བརྒྱད་ཅུའི་རྣལ་འབྱོར་མ། །གདན་གཞི་པ་ཡི་རྒྱུད་འདི་ཉིད། །མཁས་པ་ཡིས་ནི་རྣམ་བལྟས་ལ། །སྦྱོར་བ་བརྒྱད་ཅུའི་རྣལ་འབྱོར་མ། །སྦྱོར་བའི་ཆོས་ཀྱིས་གཏོར་མ་སྦྱིན། །བདུད་རྩི་ལྔ་མདོར་བསྡུས་ལེའུ་ཞེས་བྱ་བ་ལྔ་པ་རྫོགས་སོ།། །།འབྱུང་བའི་དབུགས་ཀྱི་ཐེ་ཚོམ་ནི། །རྫོགས་པའི་སངས་རྒྱས་མངོན་པར་འདྲི། །འཆི་ལྟས་ཇི་ལྟར་འཚལ་བགྱི་ཞིང ། །གང་གིས་ཤེས་ནས་རབ་ཏུ་སྦྱར། །བཅོམ་ལྡན་འདས་ཀྱིས་བཀའ་སྩལ་པ། །འགྲོ་བ་ལུས་ཅན་སེམས་ཅན་དོན། །འཆི་བདག་ཀུན་ནས་བསླུ་བ་ནི། །ཉོན་ཅིག་རྒྱལ་པོ་རྡོ་རྗེ་བདག་།གང་ཞིག་རྣམ་པར་ཤེས་ཙམ་གྱིས། །འཆི་བདག་ལུས་ནི་གནས་པ་ཉིད། །དང་པོར་སྔ་དྲོའི་དུས་ཉིད་ལ། །དབུགས་ནི་རྣམ་པར་དགོད་བཤད་པ། །ལུས་ཅན་ཟླ་དྲུག་ནས་འཆི་བར། །ངས་གསུངས་པ་ལ་ཐེ་ཚོམ་མེད། །གལ་ཏེ་དུས་ལ་བབ་གྱུར་ན། །དབུགས་ནི་ཆད་ཅིང་འཆད་པར་འགྱུར། །དེ་བཞིན་འཇིགས་པ་ཆུང་མཐོང་ན། །འགྲམ་པའི་ཚིགས་ནི་ཡོ་བར་འགྱུར། །ལུས་ཀྱི་
182b
མཚན་མ་ཤེས་བྱས་ལ། །རྣལ་འབྱོར་པ་ཡིས་ཞི་བར་བྱ། །རྣ་བའི་ཨུ་ད་རྣམ་ཆད་ན། །ཆུ་ཚོད་ལྔ་ལས་མི་ཐུབ་བོ། །མིག་གི་ཨཾ་བ་ར་ཡི་རྩ། །ཏྲོ་ཏ་དེ་བཞིན་ཉི་མ་ལྔ། །སྣ་ཡི་མ་སི་ཀ་ཆད་ན། །ཉི་མ་བདུན་གྱིས་གདོན་མི་ཟ། །སྟེང་འོག་སོ་ནི་འཐམས་གྱུར་ན། །ཉི་མ་གསུམ་གྱིས་ཐེ་ཚོམ་མེད། །འདི་ཡི་ལྕེ་ལ་ཐིག་ནག་ན། །ཞག་གཉིས་ཀྱིས་འཆི་ལུས་ཅན་རྣམས།། མགྲིན་པའི་གློ་ཡི་ཕྱི་རོལ་རྩ། །ཟླ་ཕྱེད་ལས་ནི་མི་ཐུབ་བོ། །བྲང་གི་ལྷེའུ་འོག་ཞོམ་གྱུར་ན། །ཟླ་ཕྱེད་སྨན་པས་གསོ་སྤྱད་ཡོད། །སེན་མོ་ཁྲག་ནི་མེད་པ་ན། །ཆུ་ཚོད་ལྔ་ལས་མི་ཐུབ་བོ། །ཕོ་ཉ་བརྒྱད་ཀྱི་འཆི་ལྟས་ནི། །འཆི་བའི་རྨ་སོགས་རྣམ་པར་སྤངས། །རྣ་བའི་ཨུ་དའི་བདག་ཉིད་ནི། །རྣལ་འབྱོར་དབྱེ་བས་བསྟེན་པར་བྱ། །མིག་གི་ཨཾ་བ་ར་ཆད་ན། །མཁས་པས་དཀར་པོའི་ས་བོན་བཟླ། །སྣ་ཡི་མ་སི་ཀ་ལ་ནི། །དབུགས་བསྡམས་མེ་ཡི་དུད་པའོ། །སོ་དང་སོ་འཐམས་རྩ་ལ་ནི། །དུང་གི་ས་བོན་བཟླས་པས་འཕྲོག་།ལྕེ་ཡི་ཐིག་ནག་འདི་ལ་ནི། །བདག་ཉིད་སྦྱོར་བས་མནན་པར་བྱ། །མགྲིན་པ་གློ་ཡི་ཕྱི་རོལ་རྩ། །པདྨའི་ས་བོན་གྱིས་རྩེ་བྱ། །བྲང་གི་ལྷེའུ་ཞོམ་པ་ལ། །སྒོང་སྐྱེས་ཡེ་ཤེས་བསྒོམ་པ་འོ། །སེན་མོ་ཁྲག་ནི་མེད་པ་ལ། །ལག་པ་བསྡུས་ལ་བཟླས་པར་བྱ། །བུག་པ་དགུ་ཡི་སྒོ་རུ་ནི། །ས་བོན་དགུ་ཡིས་རྩེ་བར་བྱ། །རྩ་དགུ་ལ་ནི་ས་བོན་དགུ་།སྒོ་དགུ་ས་བོན་དགུ་ཡིས་བསྡམ། །དེ་
183a
༄#། །ལྟར་བསྡམས་པ་ཙམ་གྱིས་ནི། །རྣམ་པར་ཤེས་པ་མི་འགྲོ་འོ། །མ་བསྲེགས་སྣོད་ནི་གཉིས་གཟུང་སྟེ། །གུར་གུམ་དང་ནི་གི་ཝང་གིས། །བཅུ་གཉིས་ཚད་ནི་ཡང་དག་བྲི། །ས་བོན་དབྱངས་ཡིག་བསྐོར་བར་བྱ། །ལྷ་མོ་བརྒྱད་ཀྱིས་ས་བོན་འདི། །མཚམས་སུ་མ་ནིང་ས་བོན་དང ། །དབུས་སུ་ཡེ་ཤེས་ས་བོན་ནི། །མཁས་པ་ཡིས་ནི་བསྐོར་བར་བྱ། །དེ་བཞིན་མིང་ནི་དབུས་སུ་བྲི། །ཧཱུཾ་གི་དབུས་སུ་གནས་པ་ཉིད། །གཉི་ག་དང་ཡང་སྦྱར་བྱས་ནས། །སྐུད་པ་དམར་པོས་དཀྲི་བར་བྱ། །མཱ་མ་ཀཱི་ནི་འདབ་མར་བསམ། །སྟེང་དུ་དེ་བཞིན་རྡོ་རྗེའི་བདག་།གཉིས་མེད་གཏོར་མར་ལྡན་པ་ཡིས། །ནུས་པ་ཡི་ནི་མངོན་པར་མཆོད། །རྡོ་རྗེ་ཁུ་ཚུར་གཉིས་བཅིངས་ནས། །རྩེ་དང་རྩེ་ནི་སྤྲད་པར་བྱ། །རྣམ་ཤེས་ཡེ་ཤེས་ས་བོན་ནི། །བརྒྱད་བརྒྱ་རུ་ནི་བཟླས་པ་ཡིས། །རྣམ་ཤེས་བསྡམས་པའི་དངོས་པོ་དང ། །རྣལ་འབྱོར་བསྲུང་པའི་ཁྱད་པར་གྱིས། །ཡི་དྭགས་སྲིན་པོ་འབྱུང་པོ་དང ། །དུས་མ་ཡིན་པར་འཆི་བ་ཉིད། །རྣལ་འབྱོར་པ་ཡིས་བསྲུངས་ཙམ་གྱིས། །གྲོལ་བར་འདི་ལ་ཐེ་ཚོམ་མེད། །ཚེ་ཟད་པ་ཡི་ལུས་ཅན་ནི། །ཟླ་བ་དྲུག་ཏུ་གནས་པར་འགྱུར། །འཆི་བའི་མཚན་མ་ཡོངས་སུ་བརྟག་པའི་ལེའུ་ཞེས་བྱ་བ་བྱ་བ་དྲུག་པ་རྫོགས་སོ།། །།རྣལ་འབྱོར་བསྟན་བཅོས་ཆོ་གའི་རིམ། །དེ་ནས་ཡེ་ཤེས་དབང་
183b
གིས་བསྲུངས། །འཁྲིག་པའི་དངོས་པོ་བསྟེན་པ་ལས། །ཁྲག་དང་ཁུ་བ་འབྱུང་བར་འགྱུར། །ཡེ་ཤེས་ངོ་བོས་འབྱུང་བ་ཡི། །འབྱིན་པའི་རྩ་ནི་མངོན་པར་སེམས། །བདུན་པར་ཁུ་བར་གྱུར་པ་ཡིས། །དཀར་པོའི་རྩ་ནི་རབ་ཏུ་བསྐྱེད། །ཁྲག་གིས་མཚན་མོ་བརྒྱད་ན་ནི། །དུ་བའི་རྩ་ནི་མངོན་དུ་གསོ། །མཚན་མོ་ཕྱེད་དང་བཞིར་བསྙེན་པས། །དུང་གི་རྩ་ནི་བྱིན་གྱིས་བརླབ། །གོང་དུ་མཚན་མོ་བཅུ་གཉིས་ཀྱིས། །པདྨའི་རྩ་ནི་རབ་ཏུ་སྦྱར། །ཉི་མ་དྲུག་ཅུའི་གྲངས་འདི་ཡིས། །མཁས་པས་གི་ཝང་གི་ནི་རྩ། །མཁྲང་འགྱུར་དགུ་ཞེས་བཤད་པ་ནི།། དྲི་མེད་གསུམ་གྱི་རྩ་ནི་བསྐྱེད། །མཚན་མོ་བཅུ་དང་དྲུག་གི་རོ། །འབྱེད་པའི་རྩ་ནི་རབ་ཏུ་བསྐྱེད། །ས་གདུགས་ཡེ་ཤེས་རྣམ་ཤེས་ནི། །ཡོངས་སུ་རྫོགས་པའི་ལུས་ཅན་ནོ། །ས་གདུགས་བཅུ་དང་བརྒྱད་ཉིད་ཀྱིས། །མཁས་པ་ཟླ་དགུར་ཀུན་ཏུ་གནས། །སྐྱེ་བ་སྐྲ་བྲ་ལ་སོགས་ལྡན། །སེན་མོ་ཁོག་པ་རུས་པ་དང ། །ཞག་དང་སྲིན་བུ་གཅི་བ་དང ། །བཤད་པ་བད་ཀན་མཆི་མ་སོགས། །བརྒྱད་ནི་མངལ་ན་ང་རྒྱལ་བ། །རྩ་ཡི་བརྒྱད་པ་ཞེས་བྱ་ལ། །ལྷག་པར་ལྷ་དགུ་གནས་པ་ཉིད། །བདག་ཉིད་ལྷ་དང་ཕ་རོལ་མཆོད། །བདག་ཉིད་ལྷ་ནི་མཆོག་ཡིན་ནོ། །དཀར་པོ་ལྷ་མོ་སྒྲོལ་མ་འདི། །དུད་པ་ལ་ནི་གོས་དཀར་གནས། །ལྷ་མོ་སངས་རྒྱས་ངུ་ཉིད་ལ། །མཱ་མ་ཀཱི་ནི་པདྨར་གནས། །ལྷ་མོ་སྙན་མ་གི་ཝང་ལ། །རྡོ་རྗེ་སྒེག་མོ་དྲི་མེད་ལ། །འབྱེད་
184a
༄#། །པར་རིན་ཆེན་ཡིད་འོང་བ། །ས་ཡི་གདུགས་ལ་པདྨའི་རྩ། །འདི་ལྟར་སྤྲོས་པའི་ཡེ་ཤེས་རྩ། །ཐམས་ཅད་འབྱིན་ཅིང་སྡུད་པ་ཡི། །ཇི་ལྟར་རྒྱལ་པོ་རྣམ་སྣང་མཛད། །དེ་ལྟར་རྒྱབ་ཏུ་རབ་ཏུ་གྲགས། །མཉམ་པའི་ཆ་རུ་དེ་བྱས་པས། །མཉམ་པའི་གཟུགས་ནི་འོད་དང་བཅས། །སྟོང་ཕྲག་དགུ་ཡི་གྲངས་ཉིད་ནི། །རེ་རེ་ལས་ནི་གྱེས་པ་འོ། །སྟོང་ཕྲག་བདུན་ཅུ་རྩ་གཉིས་ནི། །ལུས་པོ་ཡི་ནི་རྩ་ཉིད་དོ། །དགུ་པ་ཡིས་ནི་འབྱིན་ཅིང་སྡུད། །དགུ་ཡི་རྩ་ནི་རྟག་པའི་ས། །དགུ་དང་ལྔ་ཡིས་དགའ་བར་བཅས། །ལྔ་པོའི་ལྷ་འདི་འགྲོ་བ་འོ། །གཅིག་གིས་འབྱིན་ཅི་སྡུག་པ་དང ། །གཅིག་གིས་ལྷ་ནི་ཡེ་ཤེས་ཅན། །ཆོས་ཀྱི་དབྱིངས་ཀྱི་རང་བཞིན་ཏེ། །གཅིག་གི་ལུས་དང་ལུས་ཅན་དང ། །གཟུགས་མེད་ཡེ་ཤེས་གཟུགས་ཅན་དང ། །མི་སྟོང་པ་དང་སྟོང་པ་ཉིད། །རིང་མིན་ཐུང་མིན་གཞན་མ་ཡིན། །དངོས་མེད་དངོས་པོ་ཙམ་མ་ཡིན། །ཁ་དོག་མེད་ལ་ཚོན་ཀུན་དངོས། །ཡེ་ཤེས་ལུས་ཅན་རྣལ་འབྱོར་པས། །ལམ་གཉིས་པ་ནི་སྲིད་པའི་སྐྱོན། །ལམ་གཅིག་པ་ཡི་རྣལ་འབྱོར་པས། །རྣམ་པར་རྟོག་པ་ཀུན་སྤངས་ལ། །གཅིག་གི་ལམ་ཉིད་ཤེས་པར་བྱ། །ཤེལ་ལྟར་དག་པའི་ལུས་ཀྱིས་ནི། །དག་པའི་ལམ་དུ་ཡང་དག་བགྲོད། །རྩ་བསྐྱེད་པའི་ལེའུ་ཞེས་བྱ་བ་བདུན་པ་རྫོགས་སོ།། །།སྦྱོར་བའི་མདོ་རུ་བསྡུས་པ་ཉིད། །བཅོམ་
184b
ལྡན་འདས་ལ་ཉན་པར་འཚལ། །ཕྱག་ན་རྡོ་རྗེ་ཁྱོད་ཉོན་ཅིག་།སྦྱོར་བའི་བསྟན་བཅོས་སྒྲུབ་པ་པོས། །གདན་བཞི་པ་ལས་བཏུས་པ་ཡིས། །སྟོང་ཕྲག་བཅུ་གཉིས་ཡང་དག་ལྡན། ། དེ་ཡི་དོན་ནི་མདོར་བསྡུས་པའོ། །གཞུང་མང་པ་ཡིས་འཇིགས་པ་ཡིས། །དེ་ཉིད་མདོར་བསྡུས་པ་ཡི་ཚིག་།སྦྱོར་བའི་རྣམས་ལ་ཉེ་བར་གསུངས། །རྣལ་འབྱོར་པ་ལ་རབ་དགོད་པའི།། དེ་ནས་ཞི་བ་ཡང་དག་བཤད། །ཐོག་མར་བྱ་བ་སྟོང་པ་ཉིད། །སྟོང་པའི་དབུས་སུ་པདྨ་ནི། །པདྨ་ས་བོན་མྱུ་གུ་ཅན། །ཁ་དོག་བདུན་པ་རྒྱ་ཆེན་པོ། །སྡེ་ཚན་བཞི་པའི་ཚིག་ལ་ནི། ། སྟེང་དུ་མ་ནིང་ཐིག་ལེར་བཅས། །དེ་ཡི་ས་བོན་མཉམ་བསྒོམས་ནས། །དེ་བཞིན་ཁྲོ་གཉེར་ཅན་མ་བསྐྱེད། །ཟླ་བའི་དཀྱིལ་འཁོར་གནས་ལ་ནི། །གདུགས་དཀར་པོ་ཡིས་མངོན་པར་གཡོགས། །དག་པའི་སྐུ་དང་སྤྱན་གསུམ་པ། །ཕྱག་བཞི་ཡིས་ནི་རྣམ་པར་སྤྲས། །མཆོག་སྦྱིན་དང་ནི་དབྱུག་པ་དང ། །བགྲང་ཕྲེང་རིལ་བ་སྤྱི་བླུགས་བསྣམས། །རྒྱན་རྣམས་ཀུན་གྱིས་བརྒྱན་པའི་སྐུ། །རབ་ཏུ་མཛེས་པའི་ན་བཟར་མནབས། །བཟླས་དང་བསྒོམ་པའི་སྦྱོར་བ་ཡིས། །མཁས་པ་མཆོག་གི་ཡི་གེ་གཅིག་།ཁྲོ་གཉེར་མཆོག་གི་ཡི་གེ་ནི།། འབུམ་ཕྲག་གཅིག་ཟློས་སྔགས་པ་ཡིས། །རྣལ་འབྱོར་པ་ཡིས་བརྩམས་ཙམ་གྱིས། །ཚེ་ནི་འཕེལ་བར་རབ་ཏུ་གྲགས། །ལྷ་ཉིད་དམིགས་པར་བྱ་བ་ཡིས། །དེ་ནས་རྒྱས་པའི་
185a
༄#། །ལས་འདི་ཉོན། །ཏི་སེ་གངས་ཀྱི་རྩེ་མོ་དང ། །གསེར་གྱི་རི་བོའི་ངོས་དང་ནི། །རིན་ཆེན་བདུན་རང་བཞིན་གནས་སུ། །གཞལ་ཡས་ཁང་པ་ཉེར་མཛེས་པའི། །སེང་གེའི་གདན་ལ་གནས་པ་ནི། །ཉི་མའི་དཀྱིལ་འཁོར་ལ་བཞུགས་པ། །གདུགས་དཀར་པོ་དང་བླ་རེ་དང ། །དྲིལ་བུ་དྲ་བས་མངོན་པར་མཛེས། །བདུན་པ་ཡི་ནི་མཐའ་བཟུང་སྟེ། །གསུམ་པ་ཡིས་ནི་སྦྱར་བར་བྱ། །སྡེ་ཚན་མཐའ་ཡིས་སྟེང་དུ་འོ། །ཡེ་ཤེས་ཅན་གྱིས་ས་བོན་གཅིག་།དབུགས་མི་གཡོ་ཞིང་འོད་ཟེར་བཅས། །སེར་པོའི་མདོག་ཏུ་རྣམ་པར་བསྒོམ། །ཕྱིས་ནི་ནོར་རྒྱུན་ཞེས་བྱ་བའི། །ལྷ་མོའི་གཟུགས་སུ་རྣམ་པར་བསམ། །ཕྱག་དྲུག་སེམས་དཔའི་སྐྱིལ་མོ་ཀྲུང ། །རྒྱན་ཀུན་གྱིས་ནི་རྣམ་པར་བརྒྱན། །ཁ་དོག་འབར་བར་བསྒོམ་པར་བྱ། །རིན་ཆེན་ཤིང་དང་ཟ་མ་ཏོག་།གཉིས་པ་ན་ནི་རབ་ཏུ་འཕེལ། །གསུམ་པས་མཆོད་སྦྱིན་ལག་པ་དང ། །སྟེང་དུ་ཤེས་རབ་ཕྱག་དང་ནི། །གཉིས་པ་ལ་ནི་བགྲང་ཕྲེང་དང ། །གསུམ་པ་རིལ་བ་སྤྱི་བླུགས་སོ། །བསྒོམ་དང་བཟླས་པའི་སྦྱོར་བ་ཡིས། །དབུགས་ནི་འདྲེན་པའི་ཁམས་ཉིད་དོ། །རྒྱས་པའི་ལེའུ་ཞེས་བྱ་བ་བརྒྱད་པ་རྫོགས་སོ།། །།དེ་ནས་གཞན་ཡང་བཤད་བྱ་བ། །དམར་པོའི་ལས་ཀྱི་ཁྱད་པར་ནི། །སྔོན་གྱི་མཚན་ཉིད་ཡང་དག་ལྡན། །སྟོང་
185b
པའི་མཚན་ཉིད་དམིགས་ནས་ནི། །སྟོང་པར་པདྨ་ཡང་དག་བཤད། །ཉི་མའི་དཀྱིལ་འཁོར་ལ་བརྟེན་ཅིང ། །གདུགས་དཀར་པོ་ཡིས་མངོན་པར་བརྒྱན། །དབྱངས་ཡིག་དང་པོའི་ཡི་གེ་གཅིག་།སྟེང་དུ་སྡེ་ཚན་ཐ་མ་དང ། །མཉམ་པར་གཞག་པས་ས་བོན་དམར། །འོད་ཟེར་དམར་པོ་འབར་བ་འདི། །སེམས་ཅན་འགུགས་པར་བྱེད་པའི་དངོས། །ལྷ་མོའི་གཟུགས་བརྙན་འདི་བསམས་ལ། །བཙོ་མ་གསེར་གྱི་མདོག་ལྟ་བུར། །མཱ་མ་ཀཱི་བསམ་ཡང་དག་འབྱུང ། །ཕྱག་གཉིས་རྒྱན་གྱིས་རྣམ་པར་མཛེས། །གཅིག་གིས་ལྕགས་ཀྱུ་ཡང་དག་འཛིན།། གཡོན་པས་དྲིལ་བུ་མངོན་སྒྲོགས་པ། །ཐམས་ཅད་རྒྱན་གྱིས་བརྒྱན་པའི་སྐུ། །ཤིན་ཏུ་མཛེས་པའི་ན་བཟའ་གསོལ། །བསྒོམ་ཞིང་བཟླས་པ་ཙམ་གྱིས་ནི། །སེམས་ཅན་དབང་དུ་འོང་བར་འགྱུར། །དེ་ནས་ནག་པོའི་ལས་འདི་ནི། །རླུང་གི་དཀྱིལ་འཁོར་ལ་བརྟེན་ཅིང ། །རླུང་གི་དབུས་སུ་རླུང་གི་ནི། །རླུང་གི་ས་བོན་བསམ་པར་བྱ། །དུ་བ་དུ་བ་རབ་འབར་བ། ། སྒྲ་དང་ཐིག་ལེས་རྣམ་པར་བརྒྱན། །ནག་པོ་དྲག་པོ་ཡི་ནི་གདན། །ཡི་དྭགས་གདན་ལ་ཀུན་གནས་པ། །བསམ་པ་རལ་གཅིག་མ་ཡི་གཟུགས། །ཁ་དོག་སྔོན་པོ་མཉམ་པའི་འོད། །དབུ་སྐྲ་གྱེན་བརྫེས་ལྷ་མོ་ཆེ། །དྲག་པར་རྒོད་པས་འཇིགས་པར་མཛད། །སྤྱན་གསུམ་ཞལ་ནི་གཅིག་པ་ལ། །ཕྱག་བཞི་ཡི་ནི་རྣམ་པར་སྤྲས། །གཅིག་ནི་ཕྱག་ན་རལ་
186a
༄#། །གྲི་དང ། །གཉིས་པ་ན་ནི་རྡོ་རྗེ་གསེར། །གཡས་ན་མདུང་ནི་འཛིན་མཛད་ཅིང ། །གཉིས་པར་དེ་བཞིན་སྡིགས་མཛུབ་བོ། །འཕན་པའི་རོལ་པས་རྣམ་པར་བཞུགས། །མེ་འབར་བ་དང་མཉམ་པའི་འོད། །ཞགས་པ་འཕེན་པས་འཆིང་མཛད་ཅིང ། །ཧཱུཾ་སྒྲའི་རྣམ་པར་འཇིགས་པར་བྱེད། །ས་བོན་དབུས་སུ་མིང་དང་ནི། །ཕཊ་ཀྱི་རྣམ་པ་དེ་བཞིན་མཐར། །དཀོན་མཆོག་གསུམ་ལ་གནོད་པ་དང ། །རྣལ་འབྱོར་བསྟན་པ་འཇིག་བྱེད་པ། །ལྷ་མོ་རལ་པ་གཅིག་མ་འདིས། །ནུས་པས་བརླག་པར་བྱེད་པར་གསུངས། །སྔགས་དང་རྒྱུད་ནི་མཉམ་བཟུང་ལ། །ལྷ་མོ་འོད་ཟེར་ཅན་ས་བོན། །དུག་དང་ཁྲག་ཏུ་བསྲེས་པ་ཡིས། །རྡོ་རྗེ་ཕག་མོ་ཀུན་ནས་བྲི། །དེ་ཡི་མཆུ་ལ་མིང་དང་ཡང་།། མགོ་ལ་ཡི་གེའི་ས་བོན་དང ། །སྟེང་དུ་མེ་ཡི་ཡི་གེ་དང ། །ཁ་ལ་རླུང་གཉིས་དེ་བཞིན་ནོ། །འདིས་ནི་སྐྲོད་པར་བྱེད་པར་གསུངས། །ལས་ཀྱི་དཀྱིལ་འཁོར་གྱི་ལེའུ་ཞེས་བྱ་བ་དགུ་པ་རྫོགས་སོ།། །།སེམས་ཅན་ཀུན་ལ་ཕན་མཛད་པ། །ཡེ་ཤེས་དབང་གིས་དེ་ནས་གསུངས། །ཉོན་ཅིག་རྒྱལ་པོ་རྡོ་རྗེ་འཛིན། །འཁོར་བའི་ལམ་ནས་གྲོལ་བ་ཡི། །མཐའ་ཡས་སྦྱོར་བ་མངོན་ཕྱོགས་པས། །མཐའ་ཡས་སྒོ་ཞེས་བྱ་བའི་མིང ། །སྟོང་པ་ཉིད་ཀྱི་བདག་ཉིད་ལུས། །ཇི་ལྟར་སྟོང་པ་དེ་ཉིད་འདིས། །ཕྱི་
186b
དང་ནང་དུ་བཅས་པ་ནི། །དེ་བཞིན་ནམ་མཁའི་ཁམས་སུ་ནི། །རྒྱ་མཚོའི་ཆུ་ཡི་དབྱིབས་དང་ནི། །དེ་ཡི་དབུས་སུ་རབ་གང་བའི། །ཀུན་ནས་ཇི་ལྟར་འདོད་བཞིན་དུ། །གཞལ་ཡས་ཁང་པ་རྣམ་པར་བསམ། །སེང་གེའི་གདན་ལ་བཞུགས་པ་ནི། །ཉི་མའི་དཀྱིལ་འཁོར་གྱིས་བརྒྱན་ཅིང ། །སྣ་ཚོགས་དར་ནི་རྣམ་པར་འཕྱང ། །ཡི་གེ་གཅིག་གིས་ས་བོན་ནི། །འོད་ཟེར་འབར་བ་ཚོན་གྱི་དངོས། །དང་པོའི་དབྱངས་ཡིག་ཀུན་བཟུང་ལ། །སྟེང་དུ་བདུད་རྩི་ཐིག་ལེ་ཅན། །ལྷ་མོ་བདག་ཉིད་ལྷན་ཅིག་དང ། །ཕྱི་ནས་གཟུགས་ནི་མཉམ་པར་བསམ། །ཕྱག་གཉིས་སེམས་དཔའི་སྐྱིལ་མོ་ཀྲུང ། །སངས་རྒྱས་ལྔ་ཡིས་མངོན་པར་བརྒྱན། །རྒྱན་ཀུན་གྱིས་ནི་བརྒྱན་པའི་སྐུ། །རབ་ཏུ་མཛེས་པའི་ན་བཟའ་གསོལ། །གཅིག་གི་ཕྱག་གིས་རྡོ་རྗེ་འཛིན། །གཡོན་པ་དྲིལ་བུ་མངོན་པར་སྒྲོགས། །ཡི་གེ་བརྒྱད་ཀྱི་ངོ་བོ་ཉིད། །སྤྱོད་བཅས་མི་སྤྱོད་གསང་བ་དང ། །ཆུ་དང་མེ་དང་དེ་བཞིན་རླུང ། །ས་ནི་མིག་གི་ཡི་གེ་འོ། །སྒོ་བཞི་དང་ནི་ཕུང་པོ་བཞི། །སྒོང་སྐྱེས་རྫི་ལིར་གནས་པ་ཉིད། །བཞི་པ་ཉོན་མོངས་མེ་དང་ནི། །ཡི་གེ་བཞི་པ་དེ་བཞིན་དུ། །རྨོངས་པ་ས་དང་ཉོན་མོངས་དང ། །སྔོན་དུ་ཕྱུགས་ནི་མཉམ་པ་དང་།། ཆུ་ཤིང་མེ་ཏོག་པདྨ་ནི། །འདི་ཡི་སྒོང་སྐྱེས་སྟན་ཉིད་དོ། །བ་ལང་རྨིག་པའི་སྟེང་དུ་ནི། །བདུད་རྩི་བརྒྱད་ཀྱིས་རྣམ་པར་དབྱེ། །ཤེལ་བཞིན་དུ་ནི་དག་པ་ཡི། །སྙིང་པོ་ཡི་ནི་སྙིང་པོའི་
187a
༄#། །མཆོག་།ལྕེ་ལ་ཆུ་ནི་འདི་ཉིད་དང ། །ནམ་མཁའ་རྣ་བ་སྣ་དག་ལའོ། །ས་ནི་མིག་ལ་སྦྱར་བྱས་ཏེ། །ཚངས་པར་མེ་ནི་དེ་བཞིན་འབར། །རྨོངས་པའི་ས་ནི་མགྲིན་པར་རོ། །གཡོ་བ་སྙིང་ལ་གནས་པ་དང ། །ཉོན་མོངས་སེམས་ཅན་བྲང་དང་ནི། །ཕྱུགས་ནི་ལྟེ་བའི་རྩ་བར་རོ། །ཡན་ལག་བརྒྱད་ལ་དགོད་པ་ཡིས། །ལྕེ་ལ་ཆུ་ནི་འདི་ཉིད་དང ། ། ནམ་མཁའ་རྣ་བ་སྣ་དག་ལའོ། །འདི་ཡིས་ལྷ་ཉིད་ཡང་དག་ཤེས། །ཡི་གེ་བརྒྱད་ཀྱི་སྔགས་འདི་ནི། །ཕྱག་རྒྱ་བརྒྱད་དུ་རབ་ཏུ་གྲགས། །དཀར་དང་སེར་དང་དེ་བཞིན་དམར། །གནག་ཅིང་འབར་བའི་ལས་འདི་ནི། །ལས་རྣམས་བཞི་ཡི་ལྷ་མོ་ནི། །མཁས་པས་འབུམ་ཕྲག་གསུམ་དུ་བཟླས། །ཡེ་ཤེས་ལས་བྱུང་སྙིང་པོ་ཉིད། །མཆོག་ཏུ་རྟག་ཅིང་ཞི་བ་དང ། ། ཕྲ་ཞིང་རགས་པའི་འགྲོ་བ་ཀུན། །ལས་དང་ལས་ཀྱི་ཁྱད་པར་ཉིད། །ཐམས་ཅད་ཆུ་ཡི་དབྱིབས་དང་ནི། །མཉམ་པར་འཇིགས་བྱེད་མི་དང་ཡང ། །ཇི་ལྟར་རྟག་པ་རླུང་དག་དང། །དད་པའི་དོན་དང་ས་དབང་པོ། །ལྷག་མ་བརྩེགས་པ་ལས་བྱུང་བ། །བཞི་པ་ཡི་གེ་དྲུག་པ་འོ། །འགྲོ་བའི་དོན་ཕྱིར་ཡི་གེ་བརྒྱད། །ལྷ་བརྒྱད་དུ་ནི་ཡོངས་སུ་གྲགས། །མཉམ་གཞག་བཟླས་ཤིང་བསྒོམས་པ་ཡིས། །འགྲུབ་པར་འདི་ལ་ཐེ་ཚོམ་མེད། །བ་དན་གསུམ་པའི་ཕྱག་རྒྱ་ཡིས། །སྔོན་དུ་རེག་ཅིང་རེག་པ་ཉིད། །འཇིག་རྟེན་འདིར་ནི་བདེ་བ་དང ། །
187b
རྟག་ཏུ་མཆོད་པ་རྙེད་པར་འགྱུར། །འཆི་བའི་དུས་སུ་ཡེ་ཤེས་ནི། །གཟུགས་མེད་སྲིད་པར་རབ་ཏུ་གནས། །བདག་གི་དེ་ཉིད་དམན་པ་ཡིས། །ཇི་ལྟར་སྔགས་ནི་འགྲུབ་པར་འགྱུར།། དེ་ཕྱིར་ནན་ཏན་ཐམས་ཅད་ཀྱིས། །སྦྱོར་བའི་བསྟན་བཅོས་རྟོགས་པར་བྱ། །དྲི་ཞིམ་རབ་གྲགས་མེ་ཏོག་ཀུན་ནས་གནས་པ་དང ། །ནག་པོའི་ཨ་ཀ་རུ་དང་གུ་གུལ་མར་མེ་དང ། ། གཉིས་མེད་གཏོར་མ་གཅིག་གིས་ཡང་དག་ཡིད་ལྡན་གྱིས། །ལྷ་མོ་མ་མོ་གཞན་རྣམས་ཀུན་ནས་རབ་ཏུ་མཆོད། །སྟེང་དུ་རྣམ་པར་སྣང་མཛད་བསམ། །མཆུ་ལ་ཕྱག་ན་རྡོ་རྗེ་འོ། །ཡིད་ཀྱིས་ནམ་མཁའི་སྙིང་པོ་ནི། །རྣ་བ་གཉིས་ལ་རབ་ཏུ་སྦྱར། །ལྕེ་ལ་འཇིག་རྟེན་མགོན་པོ་དང ། །མགྲིན་པར་འཇམ་པའི་དབྱངས་ཀྱི་སྲས། །བྱང་དུ་བྱམས་པ་ཡང་དག་སྦྱར། །སྙིང་གར་ཀུན་ཏུ་བཟང་པོ་གནས། །ལྟེ་བར་ཁྲོ་བོའི་རྒྱལ་པོ་ནི། །གཤིན་རྗེ་མཐར་བྱེད་རབ་ཏུ་གྲགས། །དེ་ཉིད་རྣམ་པའི་བྱེ་བྲག་ཉིད། །ལྷ་མོའི་གདན་ཉིད་དུ་ནི་བསྒོམ། །སྙིང་གར་སེམས་དང་ཡེ་ཤེས་ནི། །མཁས་པ་ཡི་ནི་བསམ་པར་བྱ། །འོད་ཟེར་བྱེ་བ་རྣམ་མང་པོ། །སངས་རྒྱས་སྤྲིན་ནི་རབ་ཏུ་འཕྲོ། །མཉམ་པར་བཞག་ཅིང་བསྒོམས་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །མཐའ་ཡས་པའི་སྒོའི་ལྷ་མོའི་གཟུངས་ཀྱི་ལེའུ་ཞེས་བྱ་བ་བཅུ་པ་རྫོགས་སོ།། །།རྡོ་རྗེ་སེམས་དཔའ་དེ་བཞིན་གཤེགས། །བཅོམ་ལྡན་རྡོ་རྗེ་འཛིན་པས་གསུངས།།
188a
༄#། །སྲིན་མོ་དང་ནི་རོ་ལངས་མོ། །མི་མེད་གནས་སུ་སྒྲུབ་པ་པོས། །ོཾ་བྷི་ཙ་མ་བ་ཏ་ཧཱུཾ་ཕཊ་སཝཱཧཱ། ཉེ་བར་སྤྱོད་པའི་སྔགས་སོ། །སྡིགས་མཛུབ་སྙིང་གར་སྦྱིན་བྱས་ལ། །གཡས་པ་རྡོ་རྗེ་ཁུ་ཚུར་བྱས། །རྐེད་པའི་ཕྱོགས་སུ་གཟུང་བྱས་ལ། །འདི་ནི་ཚམ་ངམ་མཆོག་གི་རྒྱ། །ར་ནག་པོ་ཡི་པགས་པ་ལ། །དུར་ཁྲོད་རས་ཀྱི་སྐུད་པ་ཡིས། །ཞལ་གསུམ་ཕྱག་ནི་དྲུག་པ་ཉིད། །ཁ་དོག་སྔོན་པོ་སྤྱན་གསུམ་པ། །དམར་པོའི་སྐྲ་ཡིས་རྣམ་པར་འཛིངས། །རྒྱན་རྣམས་ཀུན་གྱིས་བརྒྱན་པ་ཉིད། །རྒོད་ཅིང་མཆེ་བ་གཙིགས་པ་དང ། །འབར་བའི་མེ་ཡིས་རྣམ་པར་བརྒྱན། །དང་པོར་མདུང་གི་ལག་པ་དང ། །གཉིས་པར་དེ་བཞིན་མི་མགོ་འོ། །གསུམ་པ་ལ་ནི་རྡོ་རྗེ་གསེར། །གཡོན་པ་སྟེང་དུ་སྡིགས་མཛུབ་དང ། །གཉིས་པའི་ལག་ན་ཐོད་པ་འོ། །གསུམ་པར་དྲིལ་བུའི་སྒྲ་སྒྲོགས་ཤིང ། །ཤམ་ཐབས་སྟག་གི་པགས་པ་དང ། །གླང་ཆེན་པགས་པ་རབ་ཏུ་མནབས། །རོལ་པའི་སྟབས་ཀྱིས་བཞུགས་པ་ནི། །ཡི་དྭགས་གདན་ལ་རབ་ཏུ་བཞུགས། །འབར་བ་དམར་པོའི་རང་བཞིན་ལུས། །གདུགས་དཀར་པོ་ནི་རྣམ་པར་འཕྱང་།། རལ་པ་གཅིག་པའི་སྲིན་མོ་ནི། །རྡོ་རྗེ་ཕོ་ཉ་མངོན་པར་བྲི། །སེན་མོས་ཁྲག་ནི་མངོན་པར་བླང ། །ལྷ་མོའི་ལྟེ་བ་བྱ་བར་གསུངས། །དེ་ཡི་ཤ་ཡིས་སྦྱིན་སྲེག་བྱ། །དེ་བཞིན་
188b
དུར་ཁྲོད་ཀྱིས་ནི་བསྐོར། །མགོ་བོར་ཨོཾ། མིག་ཏུ་ཧཱུཾ། སྣ་ལ་ཧ། རྣ་བར་ཧྲི། ལྕེ་ལ་ཧྲ། སྙིང་གར་ཧྲིཿ ། རྡོ་རྗེ་ཁུ་ཚུར་མཉམ་བྱས་ཏེ། །དབུ་མ་གཉིས་ནི་རབ་ཏུ་བརྐྱང ། །ཡན་ལག་དྲུག་གི་སྔགས་དང་ཕྱག་རྒྱའོ། །སྙིང་གར་སྡིགས་མཛུབ་སྦྱིན་བྱས་ལ། །དཔུང་པ་གཡས་པ་རབ་ཏུ་བརྐྱང ། །ཧཱུཾ་གི་རྣམ་པས་སེ་གོལ་དང ། །ལྷན་ཅིག་ཉིད་དུ་སྦྱར་བྱས་ལ། །གཡས་བརྐྱང་བ་ཡི་རྐང་པས་མནན། །ོཾ་མ་ཐ་མ་ཐ་དུཥྚ་ཧཱུཾ་ཕཊ། འདི་ནི་ལྷ་མོའི་རྩ་བའི་སྔགས་དང་ཕྱག་རྒྱའོ། །ར་ཤ་འོ་མར་བསྲེས་པ་ཡིས། །དུར་ཁྲོད་གནས་པའི་ལྷ་མོ་ལ། །བརྒྱད་བརྒྱ་རུ་ནི་དབུལ་བྱ་ཞིང ། །སྣ་ཚོགས་མཆོད་པས་ཚིམ་བྱས་ལ། །ཕྱིས་ནི་ལས་རྣམས་བརྩམ་པར་བྱ། །སཱ་ལུའི་འབྲས་ལ་གཟུགས་བརྙན་བྱ། །མིང་གི་དབུས་སུ་གཞག་བྱས་ལ། །སེང་ལྡེང་ཕུར་བུ་སོར་བརྒྱད་པས། །ལྷན་ཅིག་དངོས་པོས་བརྡུང་བར་བྱ། །རྡོ་རྗེ་འང་དེ་རུ་གཞག་བྱས་ན། །གཅིན་ནི་མཆོག་ཏུ་སྡོམ་པར་འགྱུར། །བ་ལྕི་ལས་ནི་གཟུགས་བརྙན་བྱ། །ཁྱི་ཡི་སྤུ་ཡིས་དགང་བྱས་ལ། །མིང་ནི་ཧཱུཾ་གི་རྣམ་པར་སྦྱར། །བརྒྱད་བརྒྱ་རུ་ནི་བཟླས་བྱ་ཞིང ། །རྡོ་རྗེ་པདྨས་བརྡུང་བྱས་ལ། །གདུག་པ་ཇི་བཞིན་འཚེ་བར་འགྱུར། །ལྷ་དགྲ་ལས་ནི་པདྨ་བྱ། །མིང་གི་ས་བོན་གཞུག་\?\། །གང་ཞིག་བསམས་པའི་བུད་མེད་རྣམས། །དེ་བཞིན་ངེས་པར་དབང་དུ་འགྱུར། །རྡོ་རྗེ་སེམས་དཔའ་དེ་བཞིན་གཤེགས། །རྡོ་རྗེ་འཛིན་པས་སླར་ཡང་གསུངས་
189a
༄#། །གཞན་ཡང་ལས་ཀྱི་ཁྱད་པར་ཉིད། །ཕྱག་ན་རྡོ་རྗེ་ཉིད་ཉོན་ཅིག་།སྲོག་ཆགས་ཀྱིས་བརྐོས་ས་ལས་ནི། །བློ་དང་ལྡན་པས་གཟུགས་བརྙན་བྱ། །ལྷ་མོའི་ས་བོན་ཡི་གེས་བསྐོར། །སྙིང་གར་མིང་གི་རྣམ་པར་བྱ། །རྐང་པ་གཡོན་པས་མནན་ནས་ནི། །བློ་དང་ལྡན་པས་བརྒྱད་བརྒྱར་བཟླས། །སྦྲུལ་གྱི་པགས་པས་བཀང་བྱས་ན། ། སྦྲུལ་གྱིས་རབ་ཏུ་གང་བར་འགྱུར། །སྦལ་པའི་འདབ་\?\་མས་བཀང་བྱས་ན། །སྦལ་པས་རབ་ཏུ་གང་བར་འགྱུར། །ཏིལ་མར་ནག་པོས་བཀང་བྱས་ན། །སྦྲང་བུས་རབ་ཏུ་གང་བར་འགྱུར། །སེན་མོ་ཡིས་ནི་བཀང་བྱས་ན། །སྲིན་བུས་མངོན་པར་གང་བར་འགྱུར། །ཤ་ཡིས་ཀུན་ནས་བཀང་བྱས་ན། །མོད་ལ་གཟེར་བས་ཡོངས་སུ་འཛིན། །སྦྱོར་བས་འཇིག་པར་བྱེད་པ་དང ། །སློབ་དཔོན་དང་ནི་གསང་དམོད་པའི། །ཤིན་ཏུ་གདུག་པའི་སེམས་ཅན་རྣམས། །འདི་ཡི་ལམ་གྱིས་སྦྱར་བར་བྱ། །སྡིག་གིས་གོས་པར་མི་འགྱུར་རོ། །ལྷ་མོ་ཕོ་ཉ་རྡོ་རྗེ་འཆང ། །སྦྱོར་བ་བསྲུང་བའི་དོན་དུ་གསུངས། །ལས་འདི་ཡི་ནི་ཁྱད་པར་ཉིད། །ཉོན་ཅིག་རྒྱལ་པོ་རྡོ་རྗེ་འཆང ། །གདན་བཞི་པ་དང་མཉམ་ལྡན་པས། །ཡིད་མི་གཞུངས་པས་རྟོགས་བྱའི་ཕྱིར། །མདོར་བསྡུས་སྦྱོར་བ་བྱེད་པའོ། །སློབ་མས་ཤེས་པས་དོན་དམ་སྨྲ་བའི་སེང་གེ་ཡིས། །རྣལ་འབྱོར་ཆོ་གས་ཉོན་མོངས་གཡོས་པས་གཅད་པའི་ཕྱིར། །
189b
ཉོན་མོངས་སྲེད་པའི་ཉེས་པ་སྐྱེ་རྩ་འཇོམས་མཛད་པ། །རྣལ་འབྱོར་དོན་དམ་རྒྱལ་པོ་ཉིད་དུ་འགྲུབ་གྱུར་ཅིག་།སྦྱོར་བའི་ཚིག་གི་ལེའུ་ཞེས་བྱ་བ་བཅུ་གཅིག་པ་རྫོགས་སོ།། །། དཔལ་ལྡན་ཤེས་རབ་དབང་པོ་སྦས་པའི་ཉི་མའི་འོད་ཀྱིས་འཇིག་རྟེན་ཁམས་སུ་སྣང་བར་མཛད། །དངོས་པོ་དུ་མའི་ཁྱད་པར་བསགས་པའི་རབ་རིབ་གང་གི་མཐུ་ཡིས་འཇིག་མཛད་པ། །རྟག་ཏུ་ཀུན་ནས་རྡུབས་པའི་ང་རྒྱལ་མི་མཐུན་དགྲ་ཡི་དུས་དང་དུས་སུ་གཡུལ་འགྱེད་པའི། །ཆགས་པ་མེད་པའི་ཡེ་ཤེས་རི་བོ་མཉམ་ཉིད་མཉམ་པའི་ས་བོན་ཆེན་པོ་གཅིག་གིས་མཛད། ། འཁོར་བར་ཐིམ་པར་གསུངས་པ་ཡི། །རྩ་བའི་འཁོར་ལོ་ལ་ཕྱག་འཚལ། །གསང་བའི་ངོ་བོ་མཉམ་ཤེས་ཕྱིར། །གསང་བ་བསྒོམ་པའི་རྣལ་འབྱོར་པ། །ཧཱུཾ་གི་རྣམ་པ་འབྱིན་བྱེད་དངོས། །ཧཱུཾ་གི་རྣམ་པ་མཆོག་གི་ལྷ། །ཧཱུཾ་གི་རྣམ་པ་སྟོང་གྱུར་པ། །ཡི་གེ་ཧཱུཾ་ལ་ཕྱག་འཚལ་བསྟོད། །སྔོན་དུ་རྩ་ནི་ཀུན་སྦྱར་ལ། །ཕྱིས་ནི་ས་བོན་རྣམ་པར་འཕྲུལ། །ལྟེ་བར་ཕྱུགས་ཀྱི་ཞགས་པ་ནི། །ཕྱུགས་ཀྱིས་གྲོལ་ཞིང་ཤིན་ཏུ་གྲོལ། །ཤར་གྱི་ཕྱོགས་སུ་གཞུ་རྒྱལ་ནི། །པདྨ་ཡི་ནི་དཀྱིལ་འཁོར་ཉིད། །གཤེར་བ་ཡང་ནི་ནུབ་ཀྱི་ཕྱོགས། །རྣམ་པར་ཤེས་པའང་ལྷན་ཅིག་འབྱིན། །ནམ་མཁའི་དབུས་སུ་བདག་ཉིད་བྱ། །བདག་ཉིད་དབུས་སུ་ནམ་མཁའོ། །གཉི་གའི་དབུ་མ་ཤེས་བྱས་ལ། །གྲོལ་བ་ཉིད་དུ་ཐེ་ཚོམ་མེད། །སྟོང་པའི་དབུས་སུ་བདག་
190a
༄#། །གི་ནི། །བདག་ཉིད་རྟགས་ནི་མཚོན་པའོ། །རྟགས་ཀྱི་བདག་ཉིད་འབྱིན་པ་ནི། །བསྒོམས་པས་ས་ཡི་འབྱིན་པའོ། །གཞུ་ལས་རྒྱལ་ཞིང་གཤེར་བ་ཉིད།། སྐམ་པོ་པདྨ་འབྱིན་པ་ལས། །བདུན་ཅུ་རྩ་གཉིས་མཉམ་འབྱིན་པ། །རྩ་དགུ་ཡི་ནི་མིང་འདི་ཉིད། །རྩ་དགུའི་ས་ནི་རྟག་གྱུར་པ། །གསུམ་པོ་འབྱིན་ཅིང་ཡང་དག་སྡུད། །གཤེར་དང་སྐམ་པོ་ཞེས་བྱ་བ། །རྩ་བ་གཞུ་ལས་རྒྱལ་བ་ཉིད། །དངོས་པོ་ཡི་ནི་མཚན་ཉིད་པའི། །འདི་ཡིས་འབྱིན་ཅིང་ཡང་དག་སྡུད། །པདྨ་དགུར་ནི་མཉམ་བཤད་པ། །རྣམ་པར་ཤེས་པ་ལྷན་ཅིག་གནས། །སྟེང་འོག་ཕྱོགས་ཀྱང་སྟོང་པ་ཉིད། །དབུ་མ་སྟོང་པ་ཉིད་དུ་ནི། །རྟག་ཏུ་སྟོང་པ་གསུམ་བསྒོམ་པ། །གང་གིས་དེ་ཤེས་མཁས་པའོ། །གཡོན་གྱི་གློ་རུ་སེར་སྐྱ་དང ། །གཡས་པར་ནག་པོ་ཆེན་པོ་གནས། །རྩ་ལྔ་ལས་ནི་མཉམ་འབྱིན་པ། །ལྔ་ཉིད་དུ་ནི་སྦྱར་བར་བྱ། །ཆུ་དང་མེ་དང་ནམ་མཁའ་དང ། །ས་ཉིད་བཞི་སྟེ་མཉམ་པའི་གདན། །ཆུ་ཤིང་མེ་ཏོག་ལྟ་བུ་ནི། །ལྟ་བའི་དབུས་སུ་རྣམ་པར་གནས། །རྟག་ཏུ་ཁ་ནི་རབ་ཟླུམ་པ། །མཁས་པ་ཡིས་ནི་རྒྱས་པར་བྱ། །འདབ་མ་བརྒྱད་པར་རྟག་ཏུ་གྱུར།། གསུངས་པའི་གེ་སར་དང་ལྡན་པར། །དེ་ཡི་དབུས་སུ་བཤད་པ་ནི། །རྣམ་ཤེས་ལྷན་ཅིག་བསྒོམ་པ་ནི། །ཕྲ་རབ་རྡུལ་གྱི་རྣམ་པ་ལྟར། །རྣམ་པར་ཤེས་པ་མཚོན་པར་བྱའོ། །སྐྲ་
190b
ཡི་རྩེ་མོ་བརྒྱ་ཡི་ཆར། །འོད་ཟེར་གཡོ་བ་མེད་པར་གནས། །ཀུན་ནས་སྦྱོར་བ་གསུམ་པས་དཀྲི། །དཀྲིས་པའི་མཚན་ཉིད་འཁོར་ལོ་འདྲ། །རྫ་མཁན་འཁོར་ལོ་ལྟ་བུར་འཁོར། །གནས་སུ་བཟློག་པ་ཡེ་ཤེས་སོ། །རང་བཞིན་བརྒྱད་པའི་དབྱེ་བ་ཡིས། །སྐྱེས་བུ་དབུས་སུ་སྦྱར་བའི་དོན། །དབུས་མས་འབྱིན་ཅིང་ཡང་དག་སྡུད། །ཐམས་ཅད་ལྟ་བ་འཇོམས་པར་བྱེད། །རྩ་བརྒྱད་མངོན་པར་ཀུན་ནས་ལྡན། །དཀར་པོ་དུད་པ་པདྨ་དུང ། །གི་ཝང་དྲི་མེད་འབྱེད་པ་དང ། །ས་གདུགས་བརྒྱད་པའི་དབྱེ་བའོ། །བདག་མེད་ཆོས་དང་ཡང་དག་སྦྱོར། །བདག་མེད་པས་ནི་རྣམ་པར་དཀྲིས། །ཁམས་གསུམ་སྐྱེས་པ་ཟད་བྱེད་རྣམས། །ཡེ་ཤེས་ནུས་པ་ཡིས་ནི་འཇོམས། །དང་པོར་དཀར་པོར་ཡང་དག་བསྒོམ། །གཉིས་པར་སེར་པོར་བསྒོམ་པ་དང ། ། གསུམ་པར་ཀུན་ནས་དམར་པོར་བསྒོམ། །བཞི་པ་ལ་ནི་ནག་པོ་ཉིད། །རྩའི་འཁོར་ལོ་བསྒོམ་པ་སྟེ་ལེའུ་དང་པོ་ཞེས་བྱ་བ་རྫོགས་སོ།། །།དེ་ན་གཞན་ཡང་རབ་བཤད་པ། །དཀྱིལ་འཁོར་ས་བོན་བསྒོམ་པ་ནི། །ས་བོན་ངེས་པར་དེ་བཞིན་གཤེགས། །དབྱངས་ཀྱི་ཡི་གེའི་མཚན་ཉིད་དོ། །རྣམ་རྟོག་རྨོངས་པ་ཆེན་པོ་སྟེ། །འཁོར་བའི་རྒྱ་མཚོ་ཕ་རོལ་འགྲོ། །དག་པའི་ལུས་ཀྱི་ངོ་བོ་ཡིས། །ཡེ་ཤེས་ལུས་ནི་དག་པའི་དངོས། །དག་ཅིང་དག་པ་དེ་བཞིན་དངོས། །དང་པོའི་རྣལ་འབྱོར་མཚན་ཉིད་དོ། །དེ་བཞིན་ཉོན་མོངས་མུན་པ་ནི། །རྣམ་
191a
༄#། །ཤེས་ལྷན་ཅིག་སྣང་བའོ། །ཡེ་ཤེས་རྡོ་རྗེས་བཅོམ་ནས་ནི། །སྣང་བ་ལ་སོགས་ཐོབ་པར་འགྱུར། །དག་པའི་ལུས་དང་སེམས་ཀྱིས་ནི། །བློ་ལྡན་དཀྱིལ་འཁོར་མཚོན་པར་བྱ། །སློབ་དཔོན་དང་བྲལ་འདི་ཡིས་ནི། །རྟག་ཏུ་ས་སྟེང་དངོས་གྲུབ་མེད། །སློབ་དཔོན་ཡོན་ཏན་གཟུང་བྱ་ཞིང ། །སྐྱོན་ནི་ནམ་ཡང་མ་ཡིན་ནོ། །དཀྱིལ་འཁོར་ཆོ་གའི་མཚན་ཉིད་ནི། །དེ་བཞིན་མཉམ་པར་བརྟགས་ལ་བྱ། །གྲཝ་ཞི་པ་ལ་སྒོ་བཞི་པ། །རྟ་བབས་བཞི་ཡི་རྣམ་པར་བརྒྱན། །དེ་དབུས་པདྨ་མཉམ་པར་བྲི། །དབུས་སུ་མཆོག་གི་ཡི་གེ་ནི། །ཡི་གེའི་གཟུགས་དང་དབྱིབས་སུ་ནི། །ཡི་གེ་རུ་ནི་རྣམ་ཤེས་བྱ། །ཤར་དུ་དཀར་པོ་ཀུན་ནས་བསམ། །ནུབ་ཏུ་དུ་བའི་ས་བོན་བཞིན། །ལྷོར་ནི་དུང་གི་ས་བོན་དང ། ། བྱང་དུ་པདྨའི་ས་བོན་ནོ། །དབང་ལྡན་མཚམས་སུ་རོ་ཙ་ན། །མེ་རུ་དྲི་མེད་གསུམ་འབྱུང་བའོ། །བདེན་བྲལ་དུ་ནི་འབྱེད་པ་ཤེས། །ཐམས་ཅད་ལས་ལ་རླུང་ཉིད་དོ། །འདི་ལྟར་དཀྱིལ་འཁོར་མཉམ་ཤེས་བྱ། །རྟག་ཏུ་དཀྱིལ་འཁོར་བསམ་པར་བྱ། །དཀྱིལ་འཁོར་བསམས་པ་ཙམ་གྱིས་ནི། །སྡིག་པ་སྤངས་ཤིང་རྣམ་པར་གྲོལ། །རྣལ་འབྱོར་སྦྱོར་བ་ཙམ་གྱིས་ནི། །བཟའ་བ་རྣལ་འབྱོར་བརྟག་པར་བྱ། །དབང་པོ་ལྔ་ནི་ཚིམ་བྱས་པས། །མི་འཆི་མཛེས་པར་གྱུར་པ་འོ། །དང་པོར་བདག་ཉིད་སྦྱང་བ་དང ། །གཉིས་པར་རྟག་ཏུ་དཀྱིལ་འཁོར་
191b
ཉིད། །གསུམ་པར་བདག་གི་གདན་དང་ནི། །བཞི་པ་ལ་ནི་སྦྱོར་བའི་གདན། །ས་བོན་གྱི་དཀྱིལ་འཁོར་བསྒོམ་པའི་རབ་ཏུ་བྱེད་པ་ཞེས་བྱ་བ་ལེའུ་གཉིས་པ་རྫོགས་སོ།། །། དེ་ནས་གཞན་ཡང་རབ་བཤད་པ། །ཡི་གེའི་མཚན་ཉིད་ཅེས་བྱ་བ། །ཡིག་དོན་དབྱངས་ལས་ཡང་དག་འབྱུང ། །ཡི་གེ་རུ་ནི་རྣམ་ཤེས་བྱ། །མགྲིན་པ་མཆུ་དང་རྐན་\?\་དང་ནི། །ཡི་གེ་ལྕེ་ཡིས་ཡོངས་བསྒྱུར་པའོ། །ཀ་ཚན་དུད་པ་ལས་བྱུང་ཉིད། །ཙ་ཚན་དཀར་པོ་ཡང་དག་མཚུངས། །ཊ་ཚན་དུང་ལས་ཡང་དག་འབྱུང ། །པདྨ་ཉིད་ལས་ཏ་ཡི་ཚོགས། །དབྱངས་བཞི་ཡི་ནི་འདུ་ཤེས་སུ། །སོ་སོར་དབྱངས་ནི་འབྱུང་བའོ། །ཡི་གེ་གཉིས་ལས་ཀུན་འབྱུང་བ། །དབྱངས་ཀྱི་ཡི་གེ་དམན་པ་ཉིད། །ཁ་དོག་མེད་ཅིང་ཁ་དོག་འབྱུང ། །གཟུགས་མེད་གཟུགས་ཀྱི་ངོ་བོ་ཉིད། །རིང་བ་མ་ཡིན་ཐུང་བ་མིན། །རིགས་པ་དང་ནི་རིགས་མིན་ཉིད། །སྟོང་མིན་སྟོང་པའི་ཡང་དག་དངོས། །གང་གིས་དེ་ཤེས་མཁས་པའོ། །གཟུགས་དང་སྟོང་པ་དེ་བཞིན་དབུས། །བློ་དང་ལྡན་པས་གཟུང་བར་བྱ། །སྲོག་གི་ཡེར་ལྷན་ཅིག་བས། །ཇི་ལྟ་གཟུགས་དོན་མཛེས་པ་དང ། །ཡིད་འོང་འོད་ཟེར་ཡི་གེ་ནི། །དུས་ལས་འདས་པ་ཕྱག་འཚལ་འདུད། །སྟོང་པ་དང་ནི་པདྨ་རྒྱལ། །པདྨ་དཀར་པོའི་ཡི་གེ་ནི། །དེ་བཞིན་གང་ཤེས་རྣལ་འབྱོར་བ། །སྦྱོར་བའི་གདན་གྱི་མིང་ཉིད་ཡིན། །སྟོང་པས་ལུས་ནི་སྦྱང་བྱས་ལ། །
192a
༄#། །སྟོང་པ་ཉིད་དུ་ལྷན་ཅིག་བསྐྲུན། །ས་བོན་བསྐྲུན་པ་ཙམ་གྱིས་ནི། །ཡི་གེའི་མཚན་ཉིད་ལྷན་ཅིག་གོ་།ཡི་གེའི་མཚན་ཉིད་རབ་ཏུ་བྱེད་པ་ཞེས་བྱ་བ་སྟེ་ལེའུ་གསུམ་པ་རྫོགས་སོ།། །།བརྫུན་གྱི་ཚིག་ནི་མི་སྨྲ་སྟེ། །བརྫུན་དུ་སྨྲ་བར་རབ་གོམས་པས། །བསླབ་པ་ཐམས་ཅད་རྣམ་པར་མནན། །ཉེས་པ་ཐམས་ཅད་ཀུན་གྱི་གནས། །ཆགས་པའི་ཐག་པའི་རང་བཞིན་གྱིས། །འཁོར་བའི་ཕུར་པ་ལ་རབ་བཏགས། །མི་གཙང་བུམ་པའི་མར་ལྟ་བུ། །ཐམས་ཅད་དུ་ནི་རྟག་ཏུ་སྤང ། །ལུས་ཀྱི་རྣམ་པ་གསུམ་ཉིད་དང ། །ངག་གི་ཡང་ནི་རྣམ་པ་བཞི། །ཡིད་ཀྱི་རྣམ་པ་གསུམ་ཉིད་ནི། །མཁས་པ་ཡིས་ནི་རྟག་ཏུ་བསྡམ། །ངག་གི་མཆོད་པ་མངོན་རྫོགས་པའོ། །དེ་ཉིད་དམན་པའི་སྒྲུབ་པ་པོས། ། བསྒྲུབ་བྱ་འགྲུབ་པར་མི་འགྱུར་བས། །རྣལ་འབྱོར་སྦྱོར་བའི་མཚན་ཉིད་ཀྱིས། །དེ་ཕྱིར་དེ་ཉིད་ལ་མཉམ་བརྟེན། །བླ་མ་བསྙེན་བཀུར་བསྟེན་ལ་རིག་།ཅི་འབྱོར་པ་ཡི་རྫས་ཉིད་དང ། །ཡང་ན་རིག་དང་རིག་པར་བརྗེ། །བཞི་པ་ཉེ་བར་རྙེད་མི་འགྱུར། །བཅུ་བཞི་དང་ནི་བཅོ་ལྔ་དང ། །ཁྱད་པར་དུ་ནི་ཚེས་བརྒྱད་ལ། །དངོས་གྲུབ་འདོད་པའི་རྣལ་འབྱོར་པས། ། འབད་པས་གཏོར་མ་སྦྱིན་པར་བྱ། །བདུན་གྱི་སྡེ་ཚན་ཙ་མུཎྜི་།ཁྲོ་གཉེར་ཅན་ལ་ཉི་ཤུ་ལྔ། །སྡེ་ཚན་བརྒྱད་པ་མཱ་མ་ཀཱི། །སྒྲོལ་མ་སྡེ་ཚན་ལྔ་པར་བཤད། །མཁའ་འགྲོ་མ་ཡང་
192b
ལྔ་པར་བཤད། །འབྱུང་བ་སྡུད་པ་དྲུག་པའོ། །རི་ཁྲོད་མ་ནི་དགུ་པར་བཤད། །སངས་རྒྱས་སྤྱན་མ་བཅོ་བརྒྱད་དེ། །རྣལ་འབྱོར་མ་ནི་བརྒྱད་ཅུ་ཉིད། །ཕྱི་ཡི་མཆོད་པས་མཚུངས་པའོ།། དབུས་སུ་བདེ་བ་ཆེན་པོར་བཤད། །རྣལ་འབྱོར་མ་ནི་བརྒྱད་ཀྱིས་བསྐོར། །ཧ་ཡི་རྣམ་པ་ཁ་དོག་འཕྲོག་།ཧ་ཡི་རྣམ་པ་དྲི་མ་མེད། །དཔའ་བོ་ཧྲཱིཿ ་ཡིས་འཇོམས་པ་ནི། །རིམ་པ་འདི་ལྟར་ཤེས་པར་བྱ། །ཁ་ཅིག་དྲི་ཡི་རང་བཞིན་དང ། །ཁ་ཅིག་མེ་ཏོག་གི་རང་བཞིན། །ཁ་ཅིག་སྤོས་ཀྱི་རང་བཞིན་དང ། །ཁ་ཅིག་གཏོར་མའི་རང་བཞིན་དུ། །དེ་བཞིན་བྱང་ཆུབ་སེམས་དཔའ་བརྒྱད། །ཕྱི་ཡི་མཆོད་པར་གནས་པ་ཉིད། །དམ་ཚིག་དང ། གཏོར་མ་དང ། མཆོད་པའི་ལེའུ་སྟེ་བཞི་པ་རྫོགས་སོ།། །།དེ་ནས་གཞན་ཡང་རབ་བཤད་པ། །ཡི་གེ་ལས་ཀྱི་མཚན་ཉིད་ནི། ། རང་བཞིན་མཉམ་པར་བཤད་པ་ཉིད། །ཁྱད་པར་ཉིད་དུ་སྦྱར་བར་བྱ། །ོཾ་ནི་ལྟེ་བར་མངོན་པར་དགང ། །ོཾ་ནི་རང་བཞིན་མེད་པ་ཉིད། །ོཾ་ནི་གཟུང་འཛིན་དང་བྲལ་བ། །ོཾ་ནི་སྟོང་པ་ཉིད་དུ་བཤད། །ོཾ་ནི་ཡིག་གེ་བརྒྱད་ཅུའོ། །ཀ་ནི་འགུགས་པའོ། །ཁ་ནི་ཟ་བའོ། །ག་ནི་དྲི་བའོ། །གྷ་ནི་འཇོམས་པའོ། །ང་ནི་སྐྱོང་བའོ། །ཙ་ནི་གཡོ་བའོ། །ཚ་ནི་ཚིག་དོར་རོ། །ཛ་ནི་འགུགས་པའོ། །ཛྷ་ནི་འདར་པའོ། །ཉ་ནི་ཤེས་པའོ། །ཊ་ནི་དཀར་པོའོ། །ཋ་ནི་འབར་བའོ། །ཌ་ནི་དབུལ་བའོ། །ཌྷ་ནི་རྣམ་པར་གཡེང་བའོ། །ཎ་ནི་སྐྲག་པའོ། །ཏ་ནི་འབར་
193a
༄#། །བའོ། །ཐ་ནི་ཞི་བའོ། །ད་ནི་བསྐྲུན་པའོ། །དྷ་ནི་རྒྱས་པའི་འོ། །ན་ནི་སྐྲག་པའོ། །པ་ནི་ཚོད་པའོ། །ཕ་ནི་སྤྱན་ནོ། །བ་ནི་འབར་བའོ། །བྷ་ནི་འཇིགས་པ་ཡང་དག་པར་བྱེད་པའོ། །མ་ནི་ཟ་བའོ། །ཡ་ནི་འཁྲུལ་འཁོར་འཇིག་པའོ། །ཝ་ནི་རྩོད་པའོ། །ར་ནི་སྐེམ་པའོ། །ལ་ནི་དབང་དུ་བྱེད་པའོ། །ས་ནི་དགྲ་འཇོམས་པའོ། །ཥ་ནི་གནོད་པའོ། །ཤ་ནི་ལྟུང་བའོ། །ཧ་ནི་དྲག་པོའོ། །ཀྵ་ནི་བསྐྱོད་པའོ། །ཱི་ནི་དབང་ཕྱུག་གོ་།སཝཱཧཱ་ནི་རྣམ་པས་རྒྱས་པའོ། །ཕཊ་ཀྱིས་རྣམ་པས་འཇོམས་པ་དང ། །མ་ཌའི་རྣམ་པས་འཇོམས་པར་བྱེད། །ག་ཧ་ཡིས་ནི་དབང་དུ་བྱེད། །བོ་ཥ་ཧྲི་ཡིས་རྒྱས་པར་བྱེད། །རེ་ཊ་ཡིས་ནི་ཞི་བའོ། །གྷ་ཏ་ཡིས་ནི་གཅོད་པའོ། །སྔགས་ལ་སྔགས་ཀྱི་རྣམ་པར་སྦྱར། །དོན་གཞི་ལས་དང་ལྷན་ཅིག་ཏུ། །དེ་ཡི་མིང་ནི་རབ་ཏུ་སྦྱར། །ལས་ནི་འདི་ལྟར་བཤད་པ་ཡིན། །སྔགས་ཀྱི་ལེའུ་སྟེ་ལྔ་པ་རྫོགས་སོ།། །།དེ་ནས་གཞན་ཡང་རབ་བཤད་བྱ། །སངས་རྒྱས་ལ་ནི་སྐྱབས་སུ་མཆི། །དམ་པའི་ཆོས་ལ་སྐྱབས་སུ་མཆི། །དགེ་འདུན་ལ་ཡང་སྐྱབས་སོང་བས། །དེ་ནི་ངན་འགྲོར་མ་ཡིན་ནོ། །བསོད་ནམས་ཡི་རང་སྡིག་པ་བཤགས། །ཚུལ་ཁྲིམས་ཚད་མེད་ཡན་ལག་དང ། །དེ་བཞིན་བརྟུལ་ཞུགས་ཡན་ལག་ཉིད། །རྣལ་འབྱོར་བསྟན་བཅོས་རྗེས་རིག་པས། །འདི་ལྟ་བུ་ནི་རྟག་ཏུ་སྤང ། །དེ་
193b
ལྟར་ལན་གཉིས་ལན་གསུམ་དུ། །བྱང་ཆུབ་སྙིང་པོར་བྱས་ནས་ནི། །སྙིང་རྗེ་མཆོག་དང་ལྡན་པ་ཡིས། །འགྲོ་དྲུག་འཁོར་ལོ་ཉེ་བར་བཤད། །སྲིད་པའི་ཉེས་པ་ལ་ཞེན་པའི། །དེ་ལྟའི་སེམས་ནི་རྣམ་པར་སྤང ། །དེ་ཡི་སྡིག་པ་ཞི་བ་དང ། །བསོད་ནམས་རབ་ཏུ་འཕེལ་བར་གྱུར། །ོཾ་མཧཱ་དེ་བི། མཧཱ་སུ་ཁེ། མཧཱ་ཏེ་ཛ། མཧཱ་ཕོ་ཏ། མཧཱ་བ་ལ། མཧཱ་ཡཛྙེ། ཨོཾ་སེ་ཏ་བྷི་ཛ་གྲྀཧྞཱ་ནི། ཨོཾ་སི་ཏི་བྷི་ཛ་ཡ་དྷཱ་ར་ཡཱ་མི། ཨོཾ་དྷཱུ་མ་བི་ཛ་ཛ། །ོཾ་དྷཱུ་མ་བི་ཛ་བྷྱོ་བཏྟ་ན། དེ་རིང་བདག་ལ་དགོངས་སུ་གསོལ། །གསོད་དང་རྐུ་དང་འདོད་ཆགས་དང ། །དེ་བཞིན་རྫུན་དང་ཕྲེང་བ་དང ། །བྱུག་པ་གར་ལ་སོགས་པ་དང ། །ལྷག་པའི་བཟའ་བ་བསྡམ་པར་བྱ། །ལོངས་སྤྱོད་ལ་དགའ་ཆོས་མི་རྙེད། །སཝ་བྷཱ་ཝ་ཤུད་དྷཱཿ སརྦ་དྷརྨཱཿ ་སཝ་བྷཱ་བ་ཤུདྡྷོཉྷཾ། བཛྲ་ཤུད་དྷཱཿ སརྦ་དྷརྨཱ་བཛྲ་ཤུདྡྷོཉྷཾ། ཡོ་ག་ཤུད་དྷཱཿ སརྦ་དྷརྨཱ་ཡོ་གི་ཤུདྡྷོཉྷཾ། དེ་རིང་བདག་ལ་དགོངས་སུ་གསོལ། །བདག་ནི་རྣལ་འབྱོར་མཆོག་རབ་སྟེར། །བདག་གིས་རྣམ་ཤེས་རྒྱལ་པོ་བསྐྱེད། །བདག་གིས་རྣམ་ཤེས་འཕྲོ་བ་ཤེས། །དེ་རིང་སློབ་མ་དོན་དམ་དེ་ཉིད་རྒྱལ་པོ་ཉིད་ཀྱིས་དབང་བསྐུར་གསོལ་།བཀྲ་ཤིས་མངོན་པར་འདོད་ཕྱིར་དམྱལ་བ་ལས་བྱུང་རྟགས་བརྟན་པས། །འགྲོ་བའི་འཁོར་ལོ་ཐམས་ཅད་ལས་ནི་རྣམ་པར་ལྡོག་པ་ཡི། །རྣལ་འབྱོར་དོན་དམ་རྒྱལ་པོ་མཆོག་ཏུ་གྲུབ་གྱུར་ཅིག་།བསླབ་པའི་ལེའུ་སྟེ་དྲུག་པ་
194a
༄#། །རྫོགས་སོ།། །།དེ་ནས་གཞན་ཡང་རབ་བཤད་བྱ། །མདོར་ན་ལྕགས་ཀྱུ་རྣམ་པ་གསུམ། །སྦྱིན་པ་སྦྱིན་པར་མི་བྱའོ། །འཁྲིག་པའི་དངོས་པོ་བསྟེན་པ་ལས། །ཁྲག་དང་ཁུ་བ་ཡང་དག་འབྱུང ། །སྔོན་གྱིས་ལ་མ་རིག་པས། །རྟགས་སུ་གཟུགས་ཀྱིས་དཀྲིས་པའོ། །ཞག་བདུན་པ་ན་ཁུ་བ་ཡིས། །རྣམ་ཤེས་ལྔར་ནི་ཡང་དག་འབྱུང ། །བཅུ་གཉིས་ཞག་ན་ཤེས་བྱ་བ། །བརྒྱད་པར་རྟག་ཏུ་མཁྲང་འགྱུར་ཉིད། །རོ་ནི་ཉིན་ཞག་བཅུ་དྲུག་ན། །ར་བུ་ཏར་ནི་ཞག་ལྔར་རོ། །ཕྱོགས་གསུམ་ལ་བརྟག་གཟུགས་བརྙན་ཉིད། །དེ་ཡི་ངོ་གདོང་རྐང་ལག་དང ། །བ་སྤུ་སོར་ནི་འགྱུར་བའོ། །ཟླ་གསུམ་རྐང་པ་རྣ་བའོ། །ཟླ་དྲུག་གཟུགས་ཕྱེད་བཅས་པར་འགྲོ་།རྣམ་ཤེས་ལྔ་དང་སེམས་པ་འོ། །གནས་སྐབས་བཅུ་ནི་རྣམ་བཤད་པ། །མངལ་ནས་སྐྱེས་པའི་སྐྱེ་བ་པོ། །རྣལ་འབྱོར་རིག་པའི་སྦྱོར་བ་ཡིས། །མངལ་གྱི་གནས་སྐབས་རྣམ་པར་བཤད་སྐྲ་དང་སྤུ་དང་སེན་མོ་སོ། །རྡུལ་དང་དེ་བཞིན་དྲི་མ་ཤ་།རུས་པ་མགོ་བོ་ལྟོ་བ་དང ། །གཉེ་མ་བཤང་དང་གཅི་བ་དང ། །མཆིལ་མ་སྣབས་དང་སྐྱུགས་པ་དང ། །རབ་འཛག་མི་གཙང་རྣམ་པ་གང ། །འདུ་བྱེད་ཆོ་གས་སྐྱེ་བའོ། །རྣལ་འབྱོར་པ་ཡིས་ཀུན་ཤེས་ནས། །སྔོན་གྱི་ལས་ཀྱི་འབྱིན་པའོ། །མ་རིག་པའི་རྐྱེན་གྱིས་འདུ་བྱེད། །འདུ་བྱེད་ཀྱི་
194b
རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང ། གཟུགས། མིང་དང ། གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང་སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་སྡུག་བསྔལ་གྱི་ཕུང་པོ་འབའ་ཞིག་ལས་སྐྱེ་ཞིང་འབྱུང་བར་འགྱུར་རོ། །མངལ་ན་གནས་པའི་རབ་ཏུ་བྱེད་པ་ཞེས་བྱ་བའི་ལེའུ་སྟེ་བདུན་པ་རྫོགས་སོ།། །།དེ་ནས་གཞན་ཡང་རབ་བཤད་པ། །ཡོན་ཏན་ལས་ནི་ཡོན་ཏན་སྐྱེ། །རྣམ་ཤེས་གཟུགས་ཀྱི་ངོ་བོ་ནི། །ཁ་དོག་བདུན་པའི་འོད་ཟེར་ནི། །དབང་པོ་ལྔ་ཡི། །དབང་པོ་ལྔ་ཡི་འོད་ཟེར་ཉིད། །མིག་དང་རྣ་བ་སྣ་དང་ལྕེ། །རྩ་དགུ་ལས་ནི་རྣམ་པར་འབྱུང ། །གཟུགས་དང་དབང་པོ་ལྷན་ཅིག་ཚོགས།། འོད་ཟེར་འབྱིན་ཅིང་སྡུག་པའོ། །དེ་ལ་དབུགས་ཀྱང་སྦྱར་བར་བྱ། །མཐེ་བོང་ལྷན་ཅིག་ཙམ་གྱིས་ནི། །གཟུགས་ནི་དབུས་སུ་རྣམ་པར་འགྲོ། །ཀླུ་དགུས་རྟག་ཏུ་པདྨ་ལ། །ཉིན་ཞག་ཅིག་ལ་བརྒྱད་དུ་ནི། །གཟུགས་དང་ཁ་དོག་ཡོན་ཏན་དུ། །དེ་ཡི་གཟུགས་ནི་རྟག་ཏུ་འགྲོ། །གཉིས་པའི་སྦྱོར་བའི་དབུས་སུ་ནི། །ཞི་བ་ལྷན་ཅིག་བརྩམ་པར་བྱ། །དྲུག་ཅུ་རྩ་
195a
༄#། །བཞིར་སྐྱེ་བ་ནི། །སྦྱོར་བ་རྩེ་མོར་འཛིན་པའོ། །བརྒྱད་པ་དབང་ལ་མཉམ་གནས་པ། །སྦྱོར་བ་དཔུ་མར་མཚུངས་པའོ། །བརྒྱད་ལ་ནག་པོར་ཀུན་ནས་སྦྱོར། །སྦྱོར་བ་སྔོན་དུ་གཟུང་བར་བྱ། །རྩ་དགུ་ཡི་ནི་གདན་ཉིད་ལ། །ཀླུ་ཡི་གདེངས་ཀ་ཀུན་ནས་མནན། །རྩ་ཡིས་གཡོགས་ཤིང་རབ་ཏུ་བསྐོར། །ཐམས་ཅད་འབྱིན་ཅིང་ངེས་པར་རྒྱལ། །བྱང་དུ་དཀར་པོ་ཞེས་བྱ་བ། །དུད་པ་དེ་བཞིན་དེ་ཡི་ལྷོར། །དབུགས་ནི་མདོར་བསྡུས་བཤད་པའོ། །གཡོན་པའི་དབུགས་ནི་དྲི་མེད་གསུམ། །ཉིན་དང་མཚན་གྱི་དངོས་པོ་ཡིས། །འཕོ་བ་བརྒྱད་དུ་བཤད་པའོ། །དེ་ཡི་སྦྱོར་བས་འཕོ་བ་ནི། །འཕོ་བའི་སྦྱོར་བས་གཟུང་བར་བྱ། །འབྱིན་པ་པདྨའི་རྣམ་པར་མཉམ། །རྩ་ཡི་འཁོར་ལོ་རྣམ་པར་གནས། །གང་ཞིག་གལ་ཏེ་ཡང་དག་མིས། །ཤི་བར་གྱུར་ཀྱང་མི་གཏང་ངོ ། །འདི་ལྟར་རླུང་གི་རྒྱུན་ཚོགས་ནི། །དུ་བར་ཀུན་ཏུ་ཡང་དག་གནས། །པདྨའི་རྣམ་པ་ལྟར་མཉམ་པ། །རྩ་ཡི་འཁོར་ལོ་རྣམ་པར་གནས། །དཀར་པོ་དབང་པོ་ལྔ་བཤད་པ། །དེ་བཞིན་དུ་ནི་རུས་པའོ། །འབུ་དང་སྲིན་བུ་པདྨའོ།། རུས་པའི་མཚམས་སུ་གནས་པ་ནི། །དུ་བ་རུ་ནི་གྱུར་པ་འོ། །རོ་ཙ་ན་ནི་རླུང་དུ་མཚུངས། །དྲི་མེད་གསུམ་ནི་ལག་པའི་མཐའ། །དབྱེ་བ་རྐན་དང་མགྲིན་པའོ། །ས་གདུགས་
195b
རྐེད་པ་རྒྱབ་ལ་ནི། །རང་བཞིན་མེད་པའི་འབྱིན་བྱེད་པའོ། །གང་ཞིག་རྣམ་པར་ཤེས་ཙམ་གྱིས། །འཆི་བའི་དུས་སུ་གནས་པ་ཉིད། །གལ་ཏེ་དུས་ལ་བབ་ཙམ་གྱིས། །དབུགས་ནི་ཆེད་ཅིང་འཆད་པར་འགྱུར། །དེ་བཞིན་འཇིགས་པ་ཆུ་མཐོང་ན། །འགྲམ་པའི་མཚམས་ནི་གཡོ་བར་འགྱུར། །བཅུ་གཉིས་ཞག་ལ་ཁྲི་ཕྲག་གཅིག་།ཆུ་ཚོད་དབུགས་ནི་ཆད་པའོ། །གང་ཞིག་མཚན་མོའི་མཚན་ཉིད་ནི། །ལྷོ་ཕྱོགས་བགྲོད་པར་ཡང་དག་བཤད། །བྱང་དུ་བགྲོད་པར་བཤད་པ་ནི། །ཇི་ལྟར་ཉིན་མོའི་རྣམ་པའི་འོད། །སོར་མོ་དྲུག་པ་ཙམ་ཉིད་དུ། །ནང་གི་རྣམ་ཤེས་འཕོ་བའོ། །གསང་ཞིང་གསང་བ་གསང་ཆེན་པོ། །སྦྱོར་བ་གསང་བར་མཚུངས་པའོ། །རྣལ་འབྱོར་ཤེས་པའི་རྣལ་འབྱོར་པས། །དེ་ཕྱིར་གསང་བ་ལ་མཉམ་བསྟེན། །ནང་གི་ལེའུ་ཞེས་བྱ་བ་སྟེ་བརྒྱད་པ་རྫོགས་སོ།། །།དེ་ནས་གཞན་ཡང་རབ་བཤད་པ། །རྡོ་རྗེ་སྦྱོར་བའི་མཚན་ཉིད་ནི། །པདྨའི་གཟུགས་ཉིད་གཟུང་བ་ཉིད། །མཆོག་དང་རྡོ་རྗེ་མཆོག་མཉམ་པའི། །པདྨ་མཉམ་པར་བྱས་ནས་ནི། །འཁྲིག་པ་བདུད་རྩིའི་སྦྱོར་བ་འོ། །ཐིག་ལེ་ཡི་ནི་རང་བཞིན་ཉིད། །རྣལ་འབྱོར་པ་ཡི་ཐིག་ལེ་གསང ། །ཀུ་ཤའི་རྩེ་མོ་བདུན་གྱི་ཆས། །རྣལ་འབྱོར་མ་ནི་བརྒྱད་ལ་དབུལ། །བདུད་རྩི་སྲུབ་པ་བླང་བྱས་ལ། །གློ་རུ་ཐིག་ལེ་བཞིན་དུ་དབུལ། །ཉོན་མོངས་རྟག་ཏུ་སྐད་ཅིག་གིས། །
196a
༄#། །རྫ་ཀ་ཡི་དོག་པ་བཞིན། །རྣལ་འབྱོར་བསྟན་བཅོས་བལྟས་ནས་ནི། །འདུལ་བ་འདི་ནི་རྟག་ཟློས་པའི། །སེམས་ཅན་འཇིག་རྟེན་འདས་པ་ཐོབ། ། ངན་པར་སྤྱད་པའི་དྲི་མ་འདམ། །བློ་ལྡན་གང་ཞིག་གིས་བཀྲུས་ནས། །དགེ་བ་འདི་ཡིས་དྲི་མ་འདི། །གང་གི་ལམ་ནས་འགྲོ་བ་ཡི། །དེས་བྱས་བདེ་གཤེགས་ཉིད་དུ་འགྱུར། །རྩའི་འཁོར་ལོ་ཞེས་བྱ་བ་ལེའུ་དགུ་པ་རྫོགས་སོ།། །།སྟོང་ཉིད་དངོས་པོའི་གཟུགས་ཀྱིས་ནི། །དབུས་སུ་ལྷན་ཅིག་བསྒོམ་པར་བྱ། །སྟོང་པའི་དེ་ཉིད་ཀྱིས་བཀྲུས་ལ། །སྟོང་པ་སྟོང་པའི་ས་བོན་བཞིན། །ཕྱོགས་སྟོང་ཆུར་ནི་བཤད་པ་ཉིད། །དེར་ནི་པདྨ་གཟུགས་བཅས་པ་འོ། །པདྨའི་དབུས་སུ་པདྨ་དེ། །ཡིད་འོང་ལྷན་ཅིག་འབྱུང་བ་འོ། །རྣམ་ཤེས་གདན་དུ་རེ་ཕའོ། །དེ་ཉིད་རེ་ཕ་དང་ལྷན་ཅིག་།དེ་བཞིན་སྟེང་དུ་ཐིག་ལེ་བཤད། །དབུས་སུ་རྣམ་ཤེས་ལྷན་ཅིག་བཞིན། །ས་ནི་འོད་ཟེར་གཟུགས་ཅན་དུ། །ཁྲུ་ཕྱེད་དུ་ནི་བསྒོམ་པར་བྱ། །རྣམ་ཤེས་དཀར་པོར་བསྒོམ་བྱ་བ། །གང་ཞིག་སྦྱོར་བ་ཤེས་ལ་སྣང ། །སྣང་བའི་ལེའུ་ཞེས་བྱ་བ་སྟེ་བཅུ་པ་རྫོགས་སོ།། །། དེ་ནས་གཞན་ཡང་རབ་བཤད་བྱ། །གཞན་གྱི་ཡེ་ཤེས་མཆོག་འགྲོ་བ། །དཀར་པོ་མདུན་དུ་རབ་ཏུ་བཤད། །དུད་པ་ཕྱི་རོལ་ནུབ་ཏུ་འོ། །དེ་ཡི་གཡོན་པ་གཟུང་བྱས་ལ། །
196b
དབུས་སུ་རྣམ་ཤེས་ལྷན་ཅིག་ཏུ། །རྣམ་པར་ཤེས་པ་སེར་པོར་བསྒོམ། །དེ་ཡི་མིང་ཅན་རོ་ཧི་ཏ། །མིང་ནི་སྟོང་པར་དེ་བཞིན་བཤད། །དུང་གི་ཕྱི་རོལ་རྣམ་བསྐོར་བས། །དེ་ཡི་སེམས་ཀྱང་བསྒོམ་པར་བྱ། །བློ་ལྡན་ཕ་རོལ་སེམས་ཤེས་པས། །གཞན་སེམས་རྟག་ཏུ་ཡི་གེ་རུ། །མཉམ་པར་བཞག་ཅིང་བསྒོམས་ཙམ་གྱིས། །གཞན་སེམས་ཤེས་པར་འགྱུར་བའོ། །གཞན་གྱི་སེམས་ཀྱི་ལེའུ་ཞེས་བྱ་བ་སྟེ་བཅུ་གཅིག་པ་རྫོགས་སོ།། །།དེ་ནས་གཞན་ཡང་བཤད་བྱ་བ། །རྡུབ་པར་ལྷན་ཅིག་མཚུངས་པ་ཡིས། །རྩ་རྣམས་དགུ་ནི་བསྡམ་པར་བྱ། །རྡུབས་ཤིང་བཀང་བའི་བདག་ཉིད་ཀྱིས། །རང་ཉིད་སྦྱོར་བས་ཡང་དག་བཀྲུ། །དབུགས་ཀྱི་འབྱིན་བྱེད་གཡོ་བ་ཉིད། །བློ་ལྡན་སྒོ་ནི་སྡོམ་པ་པོས། །གཡོ་བའི་ཡི་གེ་སྦྱར་བར་བྱ། །དབུགས་ཀྱི་མཐར་ནི་སྦྱར་བ་ཡིས། །འབྱུང་བ་སླར་ནི་མི་བཟློག་གོ་།དབུགས་ཀྱི་མཐར་ནི་འབྱུང་བ་ཡིས། །བློ་དང་ལྡན་པས་དགང་ཞིང་སྟོང ། །གང་བ་ལ་ནི་ལྷ་ཉིད་ཀྱི། །རྩ་ཉིད་དགུ་ཡི་ཡི་གེའོ། །བློ་ལྡན་ལྷན་ཅིག་རྡུབ་པ་ཡིས། །སྡུད་པའི་གཟུགས་ནི་གཅིག་གིས་སོ། །རྡུབ་དང་འབྱིན་དང་བཀང་བ་ཡིས།། འཕོ་བར་སྦྱོར་བ་ལྷན་ཅིག་གནས། །རིག་པས་དུས་ལ་བབ་པའི་ཚེ། །འཕོ་བར་ལྷན་ཅིག་སྦྱོར་བ་བརྩམ། །འཕོ་བ་སྦྱར་བའི་ལེའུ་ཞེས་བྱ་བ་སྟེ་བཅུ་གཉིས་པ་རྫོགས་སོ།། །།
197a
༄#། །དེ་ནས་གཞན་ཡང་རབ་བཤད་པ། །ཚིགས་དགུ་ལས་ནི་འབྱིན་པའོ། །དེ་བཞིན་ཚིགས་དགུ་གང་དུ་བཤད། །ལྷན་ཅིག་འཕོ་བ་བསྟེན་པར་བྱ། ། དུད་པའི་ས་བོན་གྱིས་གཡོ་ཞིང ། །དེ་བཞིན་ཐམས་ཅད་མཁྱེན་པར་འགྲོ། །ནག་པོའི་སྦྱོར་བའི་བསྒོམ་པ་ཡིས། །ཚངས་པའི་བུག་ལས་རྣམ་པར་འབྱུང ། །རྣམ་ཤེས་ཡང་དག་སྦྱོར་ཞེས་བྱ། །གདན་དུ་རླུང་གི་དཀྱིལ་འཁོར་དང ། །རླུང་གི་ས་བོན་མཉམ་པར་བཤད། །དེ་ཡི་ཅོད་པན་བཞིན་དུ་འཕོ། །དེ་བཞིན་ཚིགས་དགུ་ལས་ནི་སྟེང ། །ཚངས་པའི་བུག་པ་དང་མཚུངས་པའོ། །ཚངས་པའི་བུག་པ་ལས་བྱུང་ནི། །མོད་ལ་འཕོ་བའི་འབྱུང་ཉིད་ཡིན། །མོད་ལ་འཕོ་བ་ཞེས་བྱ་བའི་ལེའུ་སྟེ་བཅུ་གསུམ་པ་རྫོགས་སོ།། །།དེ་ནས་གཞན་ཡང་རབ་བཤད་པ། །དེ་ཉིད་མཚན་ཉིད་ཡང་དག་ལྡན། །དེ་ཉིད་ལྷན་ཅིག་བསྒོམས་པ་ཡིས། །གདན་ནི་དཀར་པོར་ཡང་དག་གྱུར།། སྟོང་པའི་མིང་ཞེས་བྱ་བར་བཤད། །ཞི་བའི་དུས་སུ་ཀུན་སྦྱར་བས། །ཞི་བར་ལྷན་ཅིག་བརྩམ་པར་བྱ། །ཞི་བའི་ལེའུ་ཞེས་བྱ་བ་སྟེ་བཅུ་བཞི་པ་རྫོགས་སོ།། །། དེ་ནས་གཞན་ཡང་རབ་བཤད་པ། །བདག་ཉིད་རྟགས་ནི་སྦྱང་བ་བཞིན། །སྦྱང་ཞིང་བདག་ཉིད་ཆེན་པོར་སྦྱར། །སྟོང་ཉིད་ལྷན་ཅིག་སྦྱང་བར་བྱ། །རླུང་གི་དཀྱིལ་འཁོར་
197b
དབུས་སུ་ནི། །མེ་ཡི་དཀྱིལ་འཁོར་མཚུངས་པ་འོ། །མེ་ཡི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་མཚུངས་པའོ། །ཉི་མའི་དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་མཚུངས་པ་འོ། །དེ་དབུས་དེ་ཉིད་གསུངས་པ་ནི། །ལྷན་ཅིག་མྱུ་གུའི་མཚན་ཉིད་དོ། །གསང་ཞིང་གསང་བའི་གསང་ཆེན་པོ། །སྙིང་པོ་སྙིང་པོ་ཆེན་པོ་ཡིས། །དེ་ཉིད་མི་ཤེས་ཐམས་ཅད་ཀྱི། །རྣམ་ཤེས་ལྷན་ཅིག་སྦྱང་བར་བྱ། །བཅོ་ལྔ་པ་བདུན་གྱི་བདུན་པ་ཞེས་བྱ་བ་རྫོགས་སོ།། །།དེ་ནས་གཞན་ཡང་རབ་བཤད་བྱ། །དཀར་པོའི་ས་བོན་བརྒྱད་པ་མཐོང ། །དགུ་མཐའ་དུ་བའི་ས་བོན་བཞིན། །དུང་གི་ས་བོན་ཡན་ལག་དྲུག་།དང་པོ་སྒྲ་ཡིག་པད་ས་བོན། །མགོ་ཡང་དེ་བཞིན་དབྱངས་ཡིག་མཐའ། ། དང་པོའི་ཆ་ནི་དྲི་མེད་གསུམ། །དབྱེ་བ་སྡེ་ཚན་ཐ་མ་འོ། །མཐའ་ཡི་སྒྲ་ཡིག་ས་ཡི་གདུགས། །ཡི་གེའི་ས་བོན་གེར་ཤེས་བྱ། །སྡུག་པ་ལས་ནི་མྱ་ངན་དང ། །སྡུག་པ་ལས་ནི་འཇིགས་པ་སྐྱེ། །སྡུག་པ་དང་ནི་རྣམ་བྲལ་བས། །མྱ་ངན་མེད་ཅིང་འཇིགས་པ་མེད། །འདོད་པ་ལས་ནི་མྱ་ངན་དང ། །འདོད་པ་ལས་ནི་འཇིགས་པར་འགྱུར། །འདོད་པ་དང་ནི་རྣམ་བྲལ་བས། །མྱ་ངན་མེད་ཅིང་འཇིགས་པ་མེད། །སྔོན་གྱི་མཚན་ཉིད་ལྡན་བྱས་ཏེ། །དེ་ཉིད་ལྷན་ཅིག་གདན་ལ་ནི། །དེ་ཡི་བདག་ཉིད་ཆེར་ལྡན་པའི། །དེ་ཉིད་འོད་ཟེར་བདུན་པ་འོ། །རླུང་གི་དཀྱིལ་འཁོར་
198a
༄#། །དབུས་སུ་ནི། །ཟླ་བའི་དཀྱིལ་འཁོར་འདྲ་བའོ། །པདྨ་ཉིད་དང་གཞལ་ཡས་ཁང ། །རྣམ་པར་ཤེས་པ་ལྷན་ཅིག་བསྐྱེད། །མདུན་དུ་རེ་ཕ་སེར་པོ་ཡང་།། སྡེ་ཚན་ལྷན་ཅིག་སེམས་བཞིན་ནོ། །ས་ཡི་མཚམས་སུ་བསྒོམ་བྱ་བ། །རང་ལུས་ས་བོན་ལྷན་ཅིག་བཅས། །སེམས་དཔའི་སྐྱིལ་ཀྲུང་མིང་དང་ནི། །གློར་ནི་གསང་བའི་རི་རབ་གཉིས། །མིག་ནི་སྣ་རྩེར་བལྟ་བྱ་ཞིང ། །དབུགས་ཀྱིས་ལྟེ་བའི་དྲུང་བར་རོ། །མཉམ་གཞག་སྦྱོར་བའི་ངོ་བོ་ཡིས། །གསང་བའི་གདན་ལ་མཉམ་པར་ཞོན། །ཞོན་པས་སྡིག་ལས་གྲོལ་བར་བྱེད། །གདན་ལ་ཀུན་ཏུ་ཞོན་ཙམ་གྱིས། །རྒྱལ་པོ་དབང་དུ་འགྱུར་བའོ། །ཡང་ན་སྔགས་ཀྱི་བཟླས་པ་ཡིས། །འདི་ནི་དབང་གི་བརྩམ་པར་བྱ། །ཡང་ན་སྨན་དང་ལྡན་པ་ཡིས། །སྔགས་ནི་གཞན་གྱི་གདན་ཉིད་དོ། །ལེའུ་དང་པོའོ།། །།དེ་ནས་གཞན་ཡང་རབ་བཤད་པ། །ཚིགས་དགུ་ལས་ནི་འབྱིན་པ་པོ། །འབྱིན་པ་སྟོང་པ་མཉམ་པར་བཤད། །ཚིགས་ཉིད་རྐེད་པ་ཉིད་དང་ནི། །ཆིགས་དང་ལྟེ་བ་དཀར་པོ་འོ། །དཀར་པེས་ཁོག་པ་དཀྲིས་པ་འོ། །སྙིང་གི་སྟོང་པ་དུ་བ་ཉིད། །ཤི་ཡང་དུ་བར་འགྱུར་བ་འོ། །སྙིང་ལ་དུང་ཉིད་ཡང་དང་ནི། །དུང་གི་ཚིགས་ལ་གནས་པ་ཉིད། །སྙིང་གི་སྟེང་དུ་པདྨ་ཉིད། །བྲང་ལ་པདྨ་རྣམ་པར་བཤད། །དེ་བཞིན་མགྲིན་པར་གི་ཝང་དང ། །
198b
དབང་པོ་ལྔ་ལ་གི་ཝང་བཤད། །དྲི་མེད་གསུམ་ནི་སོ་ཡི་མཚམས། །ས་ཡི་གདུགས་ནི་ཕོ་ཉ་ཙར། །འབྱེད་པ་གནག་དང་གཡོན་པ་ལ། །ས་གདུགས་ཕོ་ཉའི་རྩ་བ་ལ། །འབྱིན་པ་ཚངས་པའི་བུག་པའོ། །འདི་ཡིས་སྒོ་རྣམས་བསྡམས་ན་ནི། །རྣམ་པར་ཤེས་པ་གང་ཞེས་བརྗོད། །ལེའུ་གཉིས་པའོ།། །།དེ་ནས་གཞན་ཡང་བཤད་བྱ་བ། །ཆོ་ག་འདིས་ནི་བརྩམ་པ་དང ། །ཡི་གེ་འདིས་ནི་སྦྱར་བ་དང ། །འདིས་ནི་བསྒོམ་པ་ཙམ་ཉིད་ཀྱིས། །ཚད་མར་སྦྱོར་བའི་རྣལ་འབྱོར་གང ། །ད་བཞིན་ཡི་གེའི་ཚད་མ་གང ། །ལྷ་ཉིད་ལྡན་པའི་ཚད་མ་གང ། །འགྲོ་བ་རྩོམ་པའི་ཚད་མ་གང ། །ལན་གཅིག་བསྒོམས་པ་ཙམ་གྱིས་ནི། །དགྲ་ཡི་མཐར་ནི་འགྲོ་བ་འོ། །དེ་བཞིན་དགྲ་ཡི་མིང་བཤད་པ། །ནག་པོ་ལྷན་ཅིག་སྦྱར་བར་བྱ། །ལེའུ་གསུམ་པའོ།། །།དེ་ནས་གཞན་ཡང་རབ་བཤད་པ། །སྦྱོར་བ་མཆོག་གི་ཚིག་བྱ་བ། །ལྷ་ཉིད་ལྷན་ཅིག་ངོ་བོ་ཡིས། །དུད་པའི་ས་བོན་གྱིས་སྤྱན་དྲངས།། ཨོཾ་དྷཱུ་མ་དྷཱུ་མ་བི་ཛ་ཡཀྵ་ར་དྷུ་མ་བྷྱོ་མནྟྲ་པཱ་ལ་ཡཾ་སཝཱཧཱ། མཐའ་ཡི་ཡི་གེ་ལྡན་པ་ཡི། །མཆོག་གི་ཡི་གེ་དགྱེས་པར་བྱ། །དམ་ཚིག་སེར་པོ་བསྒོམས་པ་ཡིས། །ོཾ་ས་མ་ཡ་ཨཱ་ཀཪྵ་ཡ་ཨཱ་ཀཪྵ་ཡ་དྷུ་མ་བཱི་ཛ་སཝཱཧཱ། ལེའུ་བཞི་པ་འོ།། །།དེ་ནས་གཞན་ཡང་རབ་བཤད་པ། །སྐྱེ་བ་བཞི་ཡི་ཁྱད་པར་ཉིད། །དུང་ཅན་མ་དང་པདྨ་ཅན། །དེ་བཞིན་རི་མོ་གླང་པོ་ཅན།།
199a
༄#། །པདྨ་ཅན་ན་པད་དྲི་དང ། །གླང་ཆེན་མྱོས་པའི་འགྲོས་སུ་འགྲོ། །རྟག་ཏུ་སྙན་པར་སྨྲ་བ་དང ། །ཆུང་དང་འབྲིང་གིས་ནུས་པའོ། །ཡན་ལག་ཐམས་ཅད་སྨད་པ་དང ། །པདྨའི་འདབ་མ་འདྲ་བའི་མིག་།ཇི་སྲིད་སྐྲ་ནི་དེ་བཞིན་འཁྱིལ། །བཞིན་ངང་སོ་ནི་ཕྲ་བ་དང ། །སོར་མོ་ཕྲ་ཞིང་ཡན་ལག་དམན། །སོར་མོ་དམར་ཞིང་ཆུང་བ་ཉིད། །ཞི་བའི་གཟུགས་ཅན་དབུ་མར་བཤད། །པདྨ་ཅན་གྱིས་དཔལ་འགྲུབ་ཅིང ། །ཞི་བའི་ལོངས་སྤྱོད་ལ་རབ་སྦྱར། །ལེའུ་ལྔ་པའོ།། །།དེ་ནས་གཞན་ཡང་བཤད་བྱ་བ། ། གླང་ཅན་མ་ནི་ཆང་དྲི་དང ། །དམན་དང་འབྲིང་གི་རྩོལ་དང་བཅས། །མཆུ་འཕྱང་བྱིན་པ་སྒོམ་པ་དང ། །གླང་ཆེན་མྱོས་པའི་འགྲོས་སུ་འགྲོ། །གཟུགས་རིང་སེན་མོ་རིང་བ་དང ། ། ནུ་མ་འཕྱང་ཞིང་སྐྲ་རྩུབ་པའོ། །གདོང་པ་ཆུང་ཞིང་བྱིན་པ་སྦོམ། །དེ་བཞིན་དཔུང་པ་མཐོ་བའོ། །མིག་དང་སེན་མོ་ཕྲ་བ་དང ། །སྦྲང་རྩི་ལ་དགའ་སྙན་པར་སྨྲ། །བཞིན་ནི་རབ་ཏུ་དགོད་པར་དང ། །དབྱངས་སྙན་འདོད་ལ་སྲེད་པ་ཉིད། །གསང་བའི་ཁ་ཁྱེར་རྒྱས་པ་དང ། །ས་ལ་རྐང་མཐིལ་མཉམ་པར་གནས། །རྟག་ཏུ་ཆང་ལ་དགའ་བ་དང ། །དོན་འདོད་པ་ཡང་གླང་པོ་མ། །རྒྱས་པའི་ལས་ལ་སྦྱར་བར་བྱ། །ལེའུ་དྲུག་པའོ།། །།དེ་ནས་གཞན་ཡང་རབ་བཤད་པ། །དུང་ཅན་མ་ནི་དུང་གི་མདོག་།ཞིབ་མའི་
199b
གདོང་ཅན་བྱིན་པ་རིང ། །བྱ་རོག་སྐད་དང་བྱ་རོག་དྲི། །སོར་སྦོམ་སོར་མོ་རིང་བ་ཅན། །སྐྲ་རྩུབ་ཡན་ལག་འཇམ་པ་དང ། །བོང་ཆེན་རི་དྭགས་མགྱོགས་འགྲོས་འགྲོ། །མགྲིན་པ་རིང་ཞིང་སོ་སྒོ་ཅན། །སྣ་མཐོ་མ་ཆན་ཁུང་སྤུ་དང་ནི། །གདུགས་ཀྱི་རྣམ་པ་མཆུ་འདྲ་བའི། །འདི་ལྟའི་མཚན་ཉིད་ལྡན་པ་ནི། །བློ་དང་ལྡན་པས་ལྷན་ཅིག་སྤང ། །དབང་ལ་སྦྱར་བའི་བུད་མེད་དོ། །ལེའུ་བདུན་པའོ།། །།དེ་ནས་གཞན་ཡང་རབ་བཤད་པ། །རི་མོ་ཅན་ལ་རི་མོ་དགའ། །རི་མོའི་གཟུགས་དང་ཁ་དོག་བཞིན། །ནུ་མ་ཆུང་ཞིང་སོར་མོ་ཕྲ། །སྒྲ་ཆུང་ཡན་ལག་ཆུང་བ་དང ། །བྱང་ཆུབ་སྐྲ་ཡང་ཆུང་བ་དང ། །བྱ་རོག་རང་བཞིན་བྱ་རོག་སྐད། །ཤལ་དགའ་ཞིང་དྲག་ཏུ་སྨྲ། །འདི་ནི་མཐའ་ཡི་མཚན་ཉིད་དེ། །བུད་མེད་ནག་མོའི་ལས་ལ་སྦྱར། །མིག་གཡོན་མ་དང་འོག་མིན་མ། །ཙུ་ཏའི་གདོང་པ་བཀྲ་བའི་ལུས། །རྟག་ཏུ་སྐྲ་དང་སོ་སྟོ་བ། །འདོད་པ་དྲག་ཅིང་དྲག་པར་འབབ། །མདོག་སྐྱ་སྒུར་ཞིང་ཐུང་བ་དང ། །ནུ་མ་མཐོ་ཞིང་དཔུང་པ་མཐོ། །འདི་ཡི་སྨིན་མ་རྗེ་ངར་ཙམ། །འདི་ཡིས་བྲན་ཀུན་ཟ་འཇོམས་ཤིང ། །ཡང་ན་བདག་པོ་གསོད་བྱེད་པས། །འདི་འདྲའི་བུད་མེད་རྣམ་པར་སྦང ། །པདྨ་ཅན་ནི་ལྷ་ཡི་རིགས། །གླང་པོ་ཅན་མ་གནོད་སྦྱིན་རིགས། །དུང་ཅན་མ་ནི་མི་ཡི་རིགས། །རི་མོ་ཅན་ནི་རི་དྭགས་ཆ། །ལེའུ་བརྒྱད་
200a
༄#། །པའོ།། །།མིར་སྐྱེས་པ་ནི་ཀུན་སྦྱོར་བས། །སྔོན་དུ་རིགས་ཀྱི་ཆ་ཉིད་ནི། །བ་ཌ་བ་ནི་གླང་པོར་བཤད། །ཡི་དྭགས་ཅན་མ་རྩ་ཡི་རིགས། །བ་ཌ་བ་ནི་ལྷ་ཡི་རིགས། །གདུགས་ལྟར་དཔུང་པ་མགྲིན་པ་རིང ། །སོ་སྟོ་མཆུ་ནི་སྣུམ་པ་དང ། །པདྨ་འམ་ནི་དམར་པོའི་རིགས། །དཔྲལ་བ་སྨིན་མ་རྒྱ་ཆེ་ཞིང ། །སྐྲ་ནི་འཇམ་ཞིང་སེར་སྐྱའོ། །གཟུགས་ནི་འཚམ་ཞིང་རྗེ་ངར་རིང ། །སྣ་མཐོ་སྣ་ནི་འཕྲང་བ་དང ། །ཡན་ལག་འཇམ་ཞིང་དཔུང་པ་རིང ། །ངང་པའི་འགྲོས་དང་ངང་པའི་སྐད། །དྲི་དང་མེ་ཏོག་ལ་དགའ་ཞིང་།། འོ་མ་ལ་དགའ་སྦྱིན་པ་གཏོང ། །བསོད་ནམས་ཆེ་དང་སྒེག་པར་བཅས། །དབང་ཕྱུག་དཔལ་ནི་རབ་སྟེར་ཞིང ། །སེམས་བརྟན་ཁ་ཟས་ཉུང་དུས་འཚོ། །ལེའུ་དང་པོ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །གླང་པོ་ཅན་མ་ལུས་བོང་ཆེ། །བྱིན་པར་རིང་ཞིང་ངོ་གདོང་ཆེ། །མིག་ཕྲ་རྣ་བ་འཕྱང་བ་དང ། །སྐྲ་རྩུབ་པ་དང་བུམ་པ་ཅན། །མཆུ་འཕྱང་ཡན་ལག་རྒྱས་པ་ཉིད། །ཟས་ནི་དྲག་ཏུ་ཟ་བ་དང ། །ཞིབ་མའི་གདོང་ཅན་རྣ་བ་འཕྱང ། །འདོད་པ་ཆུང་ཞིང་འདུས་ལ་དགའ། །དཔུང་མགོ་རས་འཕྱང་ཡན་ལག་ཕྲ། །སྐྲ་རིང་སོ་ནི་སྟོ་བ་དང ། །སེན་མོ་ཆུང་ཞིང་རྐང་པ་འཇམ། །སྣ་དང་ལྟོ་བ་རིང་པ་དང ། །ཕུབ་མའི་སྐད་དང་ལུས་པོ་རྩུབ། །འདོད་ལ་དགའ་ཞིང་གཏི་མུག་དངོས།།
200b
ཕྱུག་ཅིང་ཐམས་ཅད་བདག་པོ་འོ། །ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །རི་དྭགས་ཅན་མ་རི་དྭགས་རྐང ། །མིག་དཀྱུས་རིང་ཞིང་ལུས་བོང་ཆེ། །སྐྲ་ཕྲ་སོ་ནི་ཆུང་བ་དང ། །མཆུ་བསྙུང་ལུས་ནི་མཛེས་པ་དང ། །ཏིལ་གྱི་བཞིན་དྭང་པགས་པ་སྲབ། །མང་ལ་དགའ་ཞིང་མང་དུ་སྨྲ། །བྱ་རོག་སྐད་དང་རྐང་པ་འགྱུར།། རྟག་ཏུ་དབུལ་ཞིང་མི་བརྟན་པ། །གདུག་སེམས་ལྡན་པའི་བདག་ཉིད་ཅན། །སྡིག་བྱེད་ཚིག་འདོང་སྨྲ་བའི་ས། །དུད་འགྲོ་འམ་ཡང་ན་ཡི་དྭགས་རིགས། །ལེའུ་གསུམ་པ་ཞེས་བྱ་བའོ།། དེ་ནས་གཞན་ཡང་རབ་བཤད་པ། །མཁས་ཤིང་བརྩོན་འགྲུས་བརྟན་པ་དང ། །ཤེས་རབ་བརྟུལ་ཞུགས་བརྟན་པ་ཉིད། །སྙིང་སྟོབས་བརྟན་ཞིང་སྟོང་པ་ཉིད། །མགྲིན་པ་བུམ་པ་འདྲ་བ་ཉིད། །ལུས་པོ་འཚམ་ཞིང་ཡན་ལག་ཕྲ། །པགས་པ་སྲབ་ཅིང་སེན་མོ་དམར། །སྙན་པར་སྨྲ་ཞིང་སྙིང་རྗེ་ཆེ། །སྦྱིན་པའི་བདག་ཉིད་ལ་རྟག་དགའ། །མེ་ཏོག་དྲི་ལ་དགའ་བ་ཉིད། །སྦྱོར་དང་ཡེ་ཤེས་ལ་དགའ་བ། །སྙིང་རྗེར་མངོན་དགའི་བདག་ཉིད་སེམས། །བུད་མེད་ལས་ནི་ཁྱད་པར་འཕགས། །ལེའུ་བཞི་པ་ཞེས་བྱ་བའོ།། །།ཆང་མ་མངོན་དུ་དགའ་བ་དང ། །རྟག་སྲེད་ལ་ནི་དགའ་བ་ཡི། །རྟག་ཏུ་ས་སྟེང་སྦྱོར་བ་དམན། །འདི་ལྟ་བུ་ནི་།སྤང་བར་བྱ། །ལེའུ་ལྔ་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །ཐབ་ཁུང་ཐབ་ཁུང་མཉམ་
201a
༄#། །ཤེས་བྱ། །ཀུ་རུ་མེ་ནི་ཀུན་ཏུ་བརྟགས། །རྩ་བའི་འཁོར་ལོ་པདྨ་མཉམ། །དུ་བ་མེར་ནི་རབ་ཏུ་བརྟག་།དཀར་བའི་ས་བོན་གྱིས་ནི་ཤིང ། །དུང་གི་ས་བོན་མེ་ཏོག་བཞིན། །གཏོར་མ་སྤོས་ནི་པདྨར་བཤད། །ཁམས་ལྔ་ཉེ་བར་ལོངས་སྤྱོད་བྱ། །གི་ཝང་དྲི་མ་གསུམ་བྱེད་པ། །ས་གདུགས་འབྱིན་བྱེད་ས་བོན་བཞིན། །སྲིན་ལག་མཐེ་བོང་གུང་མོ་ནི། །ལྷན་ཅིག་ཕྱག་རྒྱར་སྦྱར་བྱས་ལ། །བདུད་རྩིའི་ཡི་གེའི་ངོ་བོ་ཡིས། །བདག་ཉིད་མཆོད་སྦྱིན་སྲེག་པར་བྱེད། །བསྲེག་རྫས་འོ་མ་བཏུང་བ་འོ། །བཅོ་ལྔ་དང་ནི་བཅུ་བཞི་ལ། །ཁྱད་པར་དུ་ཡང་ཚེས་བརྒྱད་ལ། །མཉམ་པར་སྦྱོར་བས་ཆ་སྤངས་ལ། །བདག་བཞིན་བླ་མ་སྦྱིན་སྲེག་བྱ། །དེ་བཞིན་ལྷ་འཇོམས་ཇི་ལྟ་བར། །ཡང་ན་གསང་བ་འཇིག་བྱེད་པ། །ཡང་ན་བླ་མ་མཉེས་པར་ཡང ། །དེ་བཞིན་བླ་མ་བླངས་པ་དང ། །ཆོ་ག་རྫོགས་པར་བླང་བ་དང ། །བདག་ཉིད་མེ་ལ་ལྷན་ཅིག་སྦྱར། །རྣལ་འབྱོར་པ་ཡིས་སྡིག་འཇོམས་པར། །འགྱུར་བ་འདི་ལ་ཐེ་ཚོམ་མེད། །ལེའུ་དྲུག་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །ཕྱག་རྒྱ་ཡི་ནི་ཆོ་ག་མཆོག་།གཡས་བརྐྱང་རྐང་པས་མནན་ནས་ནི། །སྡིགས་མཛུབ་སྙིང་གར་རྣམ་པར་སྦྱིན། །རྣལ་འབྱོར་པ་ཡིས་སྡིག་འཇོམས་པར། །འགྱུར་བར་འདི་ལ་ཐེ་ཚོམ་མེད། །སེ་གོལ་ཧཱུཾ་གི་རྣམ་པ་དང ། །ལྷན་ཅིག་ཏུ་ནི་སྦྱར་བྱས་བས།།
201b
ཀླུ་རྣམས་སྐྲག་པར་བྱེད་པ་དང ། ལོག་འདྲེན་འདར་བར་བྱེད་པ་དང ། སྒོ་འཕར་འབྱེད་པ་དང ། འབྱུང་པོ་གསོད་པ་དང ། ཤ་ཟ་འདུལ་བ་དང ། ཡི་དྭགས་སྐྲོད་པ་དང ། འདི་ནི་ཚམ་ངམ་གྱི་ཆོ་གའི་སྔགས་དང ། ཕྱག་རྒྱའོ། །གཞན་ཡང་རྡོ་རྗེ་ཚམ་ངམ་གྱི་སྔགས་དང་ཕྱག་རྒྱས་མི་བརླག་པར་བྱེད་པ་དང ། སྟེང་དུ་འཕེན་པ་དང ། འབྱུང་པོ་འཇོམས་པ་ལ་དུ་བའི་ས་བོན་གྱིས་རབ་ཏུ་སྦྱར་བར་བྱའོ། །འཇིག་རྟེན་ལས་འདས་པའི་བྱང་ཆུབ་སེམས་དཔའ་ནི་རྡོ་རྗེ་ལྕགས་ཀྱུའི་ཕྱག་རྒྱས་སྤྱན་དྲང་པར་བྱའོ། །པདྨའི་གདན་དབུལ། འཇིག་རྟེན་པ་ཡི་གནས་ཙམ་ནི། །དུང་བའི་ལྕགས་ཀྱུས་སྤྱན་དྲངས་ལ། །རྡོ་རྗེ་ཞགས་པས་བཅིང་བར་བྱ། །རྡོ་རྗེ་ལྕགས་སྒྲོག་གིས་དགྱེས་བྱ། །རྡོ་རྗེ་དྲིལ་བུས་མཆོད་པར་བྱ། །མེ་ཏོག་གི་སོར་མོ་དང་།། དྲིའི་སོར་མོ་དང ། སྦོས་ཀྱི་སོར་མོ་དང ། མར་མེའི་སོར་མོ་དང ། གཏོར་མའི་སོར་མོ་རྣམས་ཀྱིས་མཆོད་པ་ལྔ་མཉམ་པར་བྱས་ཏེ་མཆོད་པར་བྱའོ། །ར་བའི་ཕྱག་རྒྱ་དང ། དྲ་བའི་ཕྱག་རྒྱ་དང ། ཕུར་པའི་ཕྱག་རྒྱ་དང ། ུཏྤ་ལའི་ཕྱག་རྒྱ་དང ། ཤག་ཏིའི་ཕྱག་རྒྱ་དང ། པདྨའི་ཕྱག་རྒྱས་རྒྱས་པའོ། །ཆུའི་སྦྱིན་སྲེག་གི་ཕྱག་རྒྱ་དང ། མེ་ལ་པདྨའི་ཕྱག་རྒྱ་དང ། རྡོ་རྗེ་གྲི་གུག་གིས་གཅོད་པ་དང ། ལོག་པའི་གྲི་གུག་གིས་གསོད་པ་དང ། ཕག་མོའི་ཕྱག་རྒྱས་སྐྲོད་པ་དང ། སྙིང་གར་བསྡུ་ཞིང་གཤེགས་སུ་གསོལ་བའོ། །ཕྱག་རྒྱའི་ལེའུ་ཞེས་བྱ་བ་སྟེ་
202a
༄#། །ལེའུ་བདུན་པ་ཞེས་བྱའོ།། །།ཀྱེ་མའོ་འདུ་བྱེད་རྣམས་མི་རྟག་།སྐྱེ་ཞིང་འཇིག་པའི་ཆོས་ཅན་ཡིན། །དེས་ན་དེ་བཞིན་འདོད་པ་སྤང་བར་བྱ། །འདོད་པ་རྣམས་ནི་དུག་ལྟར་ཉེས་མཐའ་ཡས། །དམྱལ་བར་ལྟུང་ཞིང་ཡི་དྭགས་གནས་སུ་སྐྱེ། །སྐད་ཅིག་དབང་དུ་མི་འགྱུར་འདོད་པ་ཡི། །ཡོན་ཏན་འདི་དག་སྨིག་རྒྱུ་ལྟ་བུ་དང། །སྙིང་པོ་མེད་ཅིང་ཆུ་བུར་དབུ་བར་མཚུངས། །ཐོག་མ་ལང་ཚོ་མཆོག་གི་གཟུགས་འཛིན་པ། །སྡུག་ཅིང་ཡིད་འོང་འདི་ནི་བྱིས་པའི་དུས། །གཟུགས་མཛེས་གཟུགས་ནི་མི་སྡུག་གཟུགས་སུ་འགྱུར། །མཛའ་མེད་འཆི་དང་མཚུངས་པར་འགྱུར་བ་ཡི། །འགྲོ་འདི་ནོར་གྱིས་དབུལ་ཞིང་སློང་མོ་པའོ། །དེ་ཕྱིར་འབད་པས་རྣལ་འབྱོར་པས། །ཐམས་ཅད་དུ་ནི་ལུས་བསྡམ་ཞིང ། །བཟའ་བ་བཅའ་བ་བསྡམས་པར་བྱའོ། །སྤྱོད་པའི་དུས་ལ་འདི་ཡིས་བསྡམ། །ལེའུ་བརྒྱད་པ་སྟེ་བསྟན་བཅོས་བཞི་པ་ཞེས་བྱ་བ་རྫོགས་སོ།། །། སོར་བརྒྱད་ལས་ནི་ལྷག་པ་རུ། །ཇི་སྲིད་ཁྲུ་སྟོང་བར་དུ་ནི། །བརྒྱད་པ་དགྲ་ནི་འཇོམས་པ་དང ། །བཅུ་པར་རྟག་ཏུ་རྒྱས་པའོ། །བཅུ་གཉིས་དབང་དུ་ཡང་དག་ལྡན། །བཅུ་བཞི་དེ་བཞིན་ཞི་བར་དི་\?\། །བཅུ་དྲུག་ཏུ་ནི་ཀུན་ཏུ་བརྐོ། །ཁ་ཁྱེར་གསུམ་བར་མངོན་པར་སྤྱོད། །བཞི་པ་ལ་ནི་གྲུ་བཞི་པ། །ཡོངས་སུ་དགོད་པ་དབང་དུ་ལྡན། །ཡང་ན་རྒྱས་པ་ལ་ཡང་
202b
ཡིན། །དང་པོར་ས་ནི་སྦྱང་བར་བྱ། །བཛྲ་སྥོ་ཊ་མ་ཧཱ་ཏེ་ཛ་ཧཱུཾ་ཕཊ། རྡོ་རྗེའི་ཕུར་བུ་ལ་ཧྲཱིཿ ཧ་ཧ་ཞེས་སོ། །རྡོ་རྗེའི་ར་བ་ལ་ནི་ཧ་ཞེས་དང ། །རྡོ་རྗེའི་ཆོ་ག་ལ་ནི་ཧེ་ཧེ་འོ། །ཅེ་སྦྱང་བ་ལ་ནི་སའོ། །ལག་པ་སྦྱང་བ་ལ་ནི་ཨཱཿ ཧཱུཾ་ངོ ། །རྡོ་རྗེའི་ཕྱག་རྒྱའི་བདག་ཉིད་ཀྱིས་ནི་དགོད་པའོ། །མེ་ཡི་དབུས་སུ་པདྨ་ཉིད། །དེ་ཡི་དབུས་སུ་མེ་ཡི་ལྷར། །དུ་བའི་ལྕགས་ཀྱུས་གཞུག་བྱས་ལ། །རྡོ་རྗེ་ཞགས་པས་བཅིང་བར་བྱ། །ཞལ་གསུམ་ཕྱག་ནི་དྲུག་པ་ཉིད། །སྤྱན་གསུམ་དེ་བཞིན་ལྟོ་བ་དང ། །རལ་པ་དམར་སེར་ཡང་དག་ལྡན། །བུ་རམ་མདོག་ཅན་གསུས་\?\་པ་འཕྱང་།། སྐྱབས་སྦྱིན་དང་ནི་དབྱུག་པ་དང ། །སྡིགས་མཛུབ་དང་ནི་རྩེ་གསུམ་ཉིད། །ོཾ་ས་སཝཱཧཱ་མེའི་སྙིང་པོའོ། །ོཾ་ཧུ་ཏ་ཧཱུཾ་ཏ་བྷ་ཧེ་ས་སཝཱཧཱ། ནོར་གྱི་ཕྱག་རྒྱས་མཆོད་པར་བྱ། །དངོས་པོ་ལྔ་ཡིས་དེ་བཞིན་བསྲེག་།ཇི་ལྟར་འབྱོར་པ་གསུམ་གྱིས་མཆོད། །གང་ཕྱིར་དེ་ནི་གཤེགས་སུ་གསོལ། །དེ་བཞིན་པདྨར་བསྒྱུར་བ་ལྔས། །ོཾ་ཀ་མ་ལ་ཨཏྤ་ལོ་ཧྲཱིཿ ལྷ་ཉིད་རྩ་དང་ལྷན་ཅིག་བཞིན། །སྒྲ་ཡིས་ལྷ་ནི་དབྱུང་བྱ་བ། །ཞི་བ་དཀར་པོར་ཡང་དག་ལྡན། །རྒྱས་པར་སེར་པོར་རྣམ་པར་བསྒོམ། །དབང་ལ་དམར་པོ་ཡང་དག་ལྡན། །ནག་པོ་ཉིད་ནི་དྲག་པོའོ། །ལྷ་ཡི་གཟུགས་ནི་བསྒོམ་པར་བྱ། །སྦྱོར་བའི་གདན་གྱི་རྣལ་འབྱོར་དང ། །ཧཱུཾ་ཧཱུཾ་ས་ཡམ་ཤིང་སྦྱང་བའོ། །ཧཱུཾ་འབྲུཾ་སྦྱང་བའོ། །ོཾ་འོ་མ་སྦྱང་པའོ། །ཧྲི་དྲི་ཡིའོ།། ཨོཾ་
203a
༄#། །ཤུ་སུ་བི་ཏ་པུཥྤེ་བྷྱོ་སཝཱཧཱ། ཨོཾ་དྷུ་པ་མཱ་ལ་ཀུ་ལེ་སཝཱཧཱ། ཨོཾ་ཏཱི་ཀཥ་ཎཱ་དི་བེ་སཝཱཧཱ། ཨོཾ་ཀུ་རུ་ཀུ་རུ་བི་ཛ་ཡ་སཝཱཧཱ། ལྷན་ཅིག་ལྷ་དང་དབུས་སུ་ནི། །བཟླས་པ་གཅིག་གིས་བསྡུ་བར་བྱ། །དཔའ་བོ་འབར་བའི་བདག་ཉིད་ཆེ། །ཕྱག་གཉིས་སྦྱོར་བའི་གདན་ལ་ནི། །དེ་ཡི་ཞལ་དུ་སྲེག་བླུགས་ནི། །ཀུན་ན་ས་ལྷ་ཉིད་ཚིམ་པར་བྱ། །དངོས་པེ་བརྒྱད་ཀྱི་མཆོད་པ་ནི། །ཧཱུཾ་གི་གླུ་ཡི་རྣམ་པ་ཡིས། །སངས་རྒྱས་ཀུན་ནས་མཉེས་པར་བྱ། །རྡོ་རྗེ་ཁུ་ཚུར་གཉིས་བྱས་ནས། །དཀུ་ཡི་ཕྱོགས་སུ་གཟུང་བར་བྱ། །མེ་ཏོག་ཚུལ་གྱིས་གཏོར་བ་དང ། །གླིང་བུའི་ཚུལ་གྱིས་འབུད་པ་དང ། །སིལ་སྙན་ཚུལ་གྱིས་དཀྲོལ་བ་དང ། །གར་གྱི་ཚུལ་གྱིས་ཡན་ལག་བསྐྱོད། །འབུད་པའི་ཚུལ་གྱིས་འབུད་པ་དང ། །རྒྱལ་མཚན་ཚུལ་གྱིས་བསྒྲེང་བ་དང ། །བླ་རེའི་ཚུལ་གྱིས་བྲེ་བ་དང ། །བ་དན་ཚུལ་གྱིས་འཕྱར་བ་དང ། །རླུང་གཡབ་ཚུལ་གྱིས་གཡབ་པ་དང ། །ལྷ་ཉིད་ལ་མཆོད་ཕྱིར་ནི་མཆོག་ཏུ་འདུད། །ཞི་ཕྱིར་ཕྱག་འཚལ་འདུད་པས་ཞི་བར་བྱེད། །སྤྲོ་ཕྱིར་ཕྱག་འཚལ་འདུད་ལ་ཕྱག་འཚལ་འདུད། །བདག་མེད་རྣལ་འབྱོར་གྲུབ་ཕྱིར་ཧཱུཾ་འབྱིན་ས་བོན་འཛིན་པར་མཛད། །བདག་མེད་པར་སྦྱོར་རྣམ་པར་སྣང་མཛད་དངོས་ལ་ཕྱག་འཚལ་འདུད། །ཁྱད་པར་གླུ་དང་མཆོད་པས་མེ་ལ་མཆོད་པར་བྱ་སྟེ་སྒྲས་
203b
འཇུག་པར་བྱའོ། །དེ་བཞིན་དུ་ཕྱིས་སྲེག་བླུགས་ཕྱེད་དང་བཞིས་མེ་ལྷ་མཆོད་པར་བྱའོ། །ལེའུ་དང་པོ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སླར་ཡང་མེ་ཡི་བརྟག་པ་ནི། །མཐོ་བར་འབར་བས་ཞི་པའོ། །དམའ་བར་འབར་བས་རྒྱས་པ་ཉིད། །འཁོར་བར་འབར་བས་དབང་དང་ལྡན། །དུ་བར་འབར་བས་བདག་ཉིད་འཇོམས། །དེ་བཞིན་མེ་ཡི་དེ་ཉིད་ནི། །བློ་ལྡན་རྣལ་འབྱོར་པས་ཤེས་བྱེད། །དབང་ལྡན་དུ་ནི་ཞི་བ་ཉིད། །ཤར་དུ་དཔལ་དང་མངོན་པར་འགྲོགས། །མེ་ཡི་ཕྱོགས་སུ་རྒྱས་པ་ཉིད། །ལྷོ་ཕྱོགས་སུ་ནི་ནོར་བརླག་གོ་།བདེན་བྲལ་འཆི་བའི་ཕོ་ཉ་ཉིད། །ནུབ་ཏུ་དབང་ནི་བརྩམ་པར་བྱ། །རླུང་དུ་ནོར་ནི་ཉམས་པ་དང ། །བྱང་དུ་རིགས་ནི་རྣམ་པར་འཕེལ། །ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཡམ་ཤིང་གི་ནི་བརྟག་པ་ནི། །ཡམ་ཤིང་གི་ནི་བྱེ་བྲག་ཉིད། །ཞི་བ་ལ་ནི་སོར་མོ་བཅུ། །རྒྱས་པ་ལ་ནི་སྐྱེས་བུ་ཉིད། །མངོན་སྤྱོད་ལ་ནི་བརྒྱད་པ་པོ། །དབང་ལ་བཅུ་གཉིས་པ་ཉིད་དང ། །དབྱེ་བ་དེ་བཞིན་འོ་མའི་ཤིང ། །དེ་བཞིན་པདྨ་བྲི་ཡང་ཀུན། །ཁྱད་པར་དུ་ནི་ཞི་བ་ལ། །ཡམ་ཤིང་འདི་ནི་ཆོ་གའི་མཆོག་།ཐང་ཤིང་དེ་བཞིན་ཤིང་དང་ནི། །འོ་མ་འཛག་པའི་ཤིང་ཇི་བཞིན། །ཡམ་ཤིང་གི་ནི་ཆོ་ག་མཆོག་།རྒྱས་པ་ལ་ནི་སྦྱར་བར་བྱ། །བྷ་ལ་ཏ་ཀ་སྒུར་པོའི་ཤིང ། །བྱ་རོག་ཚང་གི་
204a
༄#། །ཤིང་ཇི་བཞིན། །ཡམ་ཤིང་གི་ནི་ཆོ་ག་མཆོག་།ཤིང་གི་ནག་པོའི་ལས་ལ་སྦྱར། །འོ་མར་ལྡན་པའི་བཏུང་བ་དང ། །དེ་བཞིན་འབྲས་དང་འབྲུ་མཉམ་པས། །ཞི་བ་ལ་ནི་སྦྱར་བར་བཤད། །སྦྱིན་སྲེག་གི་ནི་ཆོ་ག་མཆོག་།གི་ཝང་དང་ནི་གུར་གུམ་ཉིད། །ཐམས་ཅད་འབྲུ་དང་མཉམ་ལྡན་པ། །དེ་བཞིན་རྒྱས་པའི་སྦྱིན་སྲེག་གོ་།ཡང་ན་གསེར་གྱི་ལྷ་དང་ནི། །པུཎྜ་རཱི་ཀ་གུར་གུམ་དང ། ། རུ་ར་ཡི་མེ་ཏོག་བརྒྱ། །དབང་ལ་སྦྱར་བར་ཡང་དག་མཚུངས། །བྷ་ལ་ཏ་ཀ་ལུང་ཏང་དང ། །དུག་དང་དེ་བཞིན་ཁྲག་ཉིད་དང ། །ཚ་བའི་མར་ཁུ་དེ་བཞིན་སྐྲ། །ནག་པོའི་ཕྱོགས་ལ་སྦྱར་བ་ཉིད། །ལེའུ་གསུམ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །འབྱུང་པོ་གནོད་སྦྱིན་དེ་བཞིན་ཀླུ། །ལྷ་དང་ནམ་མཁའ་ལྡིང་དང་ནི། །སྨྱོ་དང་འཁོར་བྱེད་གནོད་སྦྱིན་དང ། །ལྷ་མོ་མ་མོའི་བདག་ཉིད་ནི། །དཀྱིལ་འཁོར་དགུ་ནི་མངོན་བྱས་ནས། །རེའུ་མིག་དགུ་དང་ཆ་དགུ་དང ། །དབུས་སུ་བདག་གི་ལྷ་ཉིད་དང ། །དབང་ལྡན་དུ་ནི་ལྷ་ཡི་རིས། །ཤར་དུ་ཀླུ་ཡི་ཆ་དང་ནི། །མེ་ཡི་ཕྱོགས་སུ་གནོད་སྦྱིན་ཉིད། །ལྷོ་ཕྱོགས་སུ་ནི་འབྱུང་པོའོ། །དེ་བཞིན་སྨྱོ་བྱེད་བདེ་ན་བྲལ་དུའོ། །ནུབ་ཏུ་ནམ་མཁའ་ལྡིང་ཉིད་དང ། །རླུང་གི་ཕྱོགས་སུ་གཏོར་མ་མཚུངས། །བྱང་དུ་འཁོར་བྱེད་གནོད་སྦྱིན་ནོ།།
204b
བདག་ཉིད་ཆ་ཡིས་མཆོད་པར་བྱ། །ལེའུ་བཞི་པ་ཞེས་བྱ་བའོ།། །།དཀར་པོའི་འོད་མཆོག་མི་བཟད་མངོན་པར་རོལ་པ་གསང་བ་ལ་མཁས་ལྕེའོ། །སྟེང་གི་མཆེ་བ་གཉིས་ལ་ཆུ་འབྱིན་རོ་ནི་འོ་མའི་ཆུ་ཞེས་པ། །འཕྱར་བའི་ཆུ་ཡི་ཁ་དོག་དང་མཚུངས་མཆེ་བ་གཉིས་ནི་རྩ་བཞིན་ནོ། །ལྕེ་ཡི་གདུང་བ་སེལ་བའི་ཆུ་ནི་བདུད་རྩི་དཀར་པོའི་བདུད་རྩི་ལྔ། །རྒྱས་པ་ལྔ་ལ་བདུད་རྩིའི་རོ་བཞིན་སྦྱོར་བ་མཁས་པས་མི་ཤེས་སོ། །ལྕེ་ལ་དེ་བཞིན་དཀར་པོའི་ས་བོན་དེ་ནི་དུད་པའི་ལྕགས་ཀྱུས་དྲངས། །སྣ་ལ་རོ་ཡི་དགོད་པའི་བདུད་རྩི་རླུང་གི་ལྕགས་ཀྱུ་ཡིས་ནི་འདྲེན། །རིག་པས་རིག་པ་མཐོང་བ་དེ་ལྟར་དེ་ཡི་བདུད་རྩི་རྣམ་པར་ཐིམ། །ཇི་སྲིད་རིང་དུ་འཚོ་ཞིང་ཆོས་སྤྱོད་པ། །དེ་སྲིད་དགེ་བའི་རྒྱུན་ནི་རབ་ཏུ་འཕེལ། །རླུང་གིས་འབྱིན་ཅིང་ཡིད་ནི་མངོན་ང་རྒྱལ། །རླུང་གི་ས་བོན་གྱིས་ནི་རྟག་སྦྱོར་བྱེད། །ཀ་བ་གཅིག་དང་ཚིག་དགུ་དང ། །སྒོ་ལྔ་བུག་པ་གསུམ་པ་ཉིད། །རྩ་ཡི་འཁོར་ལ་ཕྲ་བ་འདི།། གཡོ་དང་མི་གཡོ་གསང་བར་བཅས། །གཟུགས་གཅིག་ལ་ནི་སྡུད་པ་ཉིད། །རྩ་ཡི་རང་བཞིན་གྱིས་མི་རྟག་།དང་པོའི་གདན་ལ་བཤད་པ་ཡིས། །སྔོན་དུ་བདག་ཉིད་བཤད་པར་བྱ།། ཆུ་ཤིང་མེ་ཏོག་ལྟ་བུ་ནི། །ལྟེ་བའི་དབུས་སུ་རྣམ་པར་གནས། །དེ་དབུས་དེ་བཞིན་གསུངས་པ་ནི། །ཡེ་ཤེས་རྣམ་ཤེས་སེམས་པ་འོ། །བདུད་རྩི་སྦྱོར་བའི་ལེའུ་ཞེས་བྱ་བ་
205a
༄#། །སྟེ་ལྔ་པའོ།། །།དེ་ནས་གཞན་ཡང་རབ་འཆད་བྱེད། །གང་ལ་ལྕེ་བའི་སྐྱེ་བ་ཐོབ། །འཁོར་བ་དེ་ལ་འཁོར་ལོ་ཆེ། །འཁོར་ལོའི་འཁོར་ལོ་ལྡན་གྱུར་པ། །དམངས་རིགས་ཕྱུགས་བཞིན་འགྲོ་བ་ཡི། །སྟོང་ཕྲག་བདུན་ཅུ་རྩ་གཉིས་ནི། །ལུས་པོ་ཡི་ནི་རྩ་ཉིད་དོ། །བཞི་བརྒྱ་དང་ནི་ལྔ་བཅུ་ཡང ། །ཁྲག་དང་རུས་པ་མ་ལུས་པའོ། །ཆུ་ནི་བྲེ་ཕྱེད་དང་བཅས་པ། །དེ་བཞིན་སྲིན་བུ་ཁྲི་ཉིད་དང ། །ཁྲི་ཕྲག་གསུམ་དང་སྟོང་ཕྲག་གཅིག་།སྐྱེས་པ་ཡི་ནི་བ་སྤུ་ཉིད། །ཤ་ཁྲག་དྲུག་ཅུ་ཐམ་པ་ནི། ། སྐྱེས་བུ་བར་མར་འགྱུར་བ་འོ། །སུམ་བརྒྱ་དེ་བཞིན་དྲུག་ཅུ་ཡི། །ཆུ་ཚོད་དབུགས་དང་རྩ་གཞན་ནོ། །མཉམ་པོ་ཆ་རུ་འཕེལ་བ་ཡི། །མཉམ་པའི་གཟུགས་དང་མཉམ་པའི་འོད།། རྩ་ནི་འཁོར་ལོ་བཞིན་དུ་བསྒྱུར། །འཁོར་ལོ་བརྒྱད་པ་བརྒྱད་པ་བཞིན། །སྲོག་དང་རྩོལ་བ་ལྔ་ཟད་དང ། །བདག་ཉིད་ཡང་དག་མཉན་པར་མཛད། །དབུས་སུ་མེ་ཡི་ཕུང་པོ་ཉིད། །འབྱིན་པའི་ས་བོན་དེ་དབུས་སུ། །དྲི་མེད་རྟག་ཏུ་མཉམ་ཞིང་དམའ། །ཕྱི་རོལ་དུ་ནི་བཅུ་གཉིས་འགྱུར། །འཁོར་ཞིང་ས་བོན་མཉམ་པ་དང ། །དབུགས་ནི་མཉམ་པར་འཁོར་བའོ། །མེ་དང་རླུང་གི་བདུན་དོན་ལ། །དུ་བའི་ས་བོན་བསྒོམ་པར་བྱའོ། །སྒྲ་དང་ཐིག་ལེར་ཡང་དག་ལྡན། །ཆར་གྱི་རྒྱུན་ཞེས་བཤད་པ་ཡིན། །འཁོར་ལོའི་ལེའུ་
205b
ཞེས་བྱ་བ་སྟེ་དྲུག་པའོ།། །།དེ་ནས་གཞན་ཡང་བཤད་བྱ་བ། །ོཾ་ནི་རེ་ཕའི་ཐིག་ལེ་རྫོགས། །བླ་མའི་ཡི་གེར་ཀུན་ཏུ་བརྟག་།ཉིན་མོ་དབུགས་ནི་མཉམ་པར་ཆད། །དེ་བཞིན་ལྷོ་ཡི་ཡི་གེའོ། །མཚན་མོ་ཆེན་པོ་ལྔ་ཆད་ན། །ཆུ་ཤིང་དུས་ནི་མཉམ་པ་བཞིན། །ཟླ་བ་དྲུག་ནི་མཚན་མོ་ཉིད། །ཟླ་དྲུག་ཉིན་མོར་རྣམ་པར་བརྟག་།ཆུ་ཚོད་དང་ནི་ཟླ་ཕྱེད་དང ། ། ཉིན་ཞག་བཅུ་གཉིས་བདག་ཉིད་ནི། །དྲུག་ཅུ་རྩ་བཞིའི་ཆ་ཉིད་ལ། །དཀར་པོའི་བླ་ན་མེད་དང་ནི། །དེ་ནི་དཀར་པོའི་ས་རང་བཞིན། །མགོ་དང་རྐང་གི་སྟེང་དང་ནི། །དེ་བཞིན་མིག་དང་སྣ་དང་ནི། །ལྕེ་དང་རྣ་བ་བཅས་པ་དང ། །དཔྲལ་བ་ཚངས་པ་འི་བུ་ག་དང ། །ཐིག་ལེ་དཀར་པོའི་ས་ཅན་པའོ། །དགུན་གྱི་ཕྱོགས་ནི་སྔ་མ་དང ། །མཀྒ་ཡི་ནི་རང་དོན་དང ། །ཁྱུ་མཆོག་བུམ་པ་ཀརྐ་ཊ། །མི་དང་ཆུ་སྲིན་སྲང་གིས་ཁྱབ། །དེ་ནི་དུད་པ་ས་ཡི་དངོས། །དགུན་གྱི་དབུས་སུ་སྔ་མ་བཞིན། །ལག་མཐིལ་སེན་མོའི་ཚོགས་དང་ནི། །ངེས་པར་དེ་བཞིན་མཆན་ཁུང་དང ། །མགྲིན་པ་མཆུ་དང་བྲང་གི་ཚོགས། །ཕུར་བུར་མཉམ་པར་འཕྲོ་བ་འོ། །འཇིག་རྟེན་སྤྲུལ་དང་དགའ་བའི་རིག་།དེ་བཞིན་འཇིག་རྟེན་ཕྱེད་བཅས་སྦྱིན། །ལྷོ་ཕྱོགས་ཀྱི་ནི་འཁོར་ལོ་བསྐོར། །དེ་ནི་དུས་ཀྱི་ས་གཞིའོ། །སོ་ག་དང་པོའི་དབུས་ཉིད་དང ། །ལག་མཐིལ་སེན་མོའི་ཚོགས་དང་ནི། །དེ་བཞིན་མཆན་ཁུང་ས་དང་ནི། །མགྲིན་པ་ཆུ་དང་བང་གི་
206a
༄#། །མཚམས། །དེ་བཞིན་བློ་ལྡན་འགྲོ་བ་འོ། །ལེའུ་བདུན་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཚིགས་ཀྱི་དབུས་དང་ནུ་མའི་སྟེང ། །སྙིང་དང་སྙིང་ནི་ཤིན་ཏུ་མཆོག་།དེ་ནི་པདྨའི་གནས་རང་བཞིན། །རྣམ་པར་ཤེས་པའི་ཆ་བརྒྱད་ཉིད། །སོ་ག་དང་པོའི་དབུས་ཉིད་དང ། །དགུན་གྱི་ཟླ་བ་བརྒྱད་པ་བཞིན། །གི་ཝང་ཕྲ་ཞིང་ཡང་བ་ཉིད། །ཆུ་ཡི་མདོག་དང་སྦྱངས་དེ་བཞིན། །བྷརྀ་དྷི་པ་ལ་མཉམ་པའི་ས། །གཟའ་ནི་བུམ་པས་བསྒྱུར་བ་དང ། །གཞུང་ཚིགས་ངོས་དང་ནུ་མའི་སྟེང ། །སྙིང་དང་སྙིང་ནི་ཤིན་ཏུ་མཆོག་།དེ་ནི་གི་ཝང་གནས་རང་བཞིན། །རིམ་བཞིན་ཟླ་བ་ཕྱེད་དང་ནི། །རུས་སྦལ་རུས་སྦལ་མཉམ་རུས་སྦལ། །མཚམས་དང་མཚམས་ནི་མཉམ་པ་དང ། །པདྨ་པདྨ་པདྨར་མཉམ། །དྲི་མེད་གསུམ་གྱི་སར་གནས་པའོ། །སྲིན་བུ་སྐྱེ་བ་མཉམ་པར་བཟའ། །དཀུ་དང་རུས་པའི་མཚམས་སུ་ནི།། རྐད་པར་པདྨ་པདྨ་ཡང ། །མཉམ་པའི་ཆ་ཡིས་གནས་པ་ཉིད། །དེ་ནི་དྲི་མེད་གསུམ་གྱི་ས། །རྣམ་ཤེས་ལྷན་ཅིག་གནས་པའོ། །ལེའུ་བརྒྱད་པ་ཞེས་བྱ་བའོ།། །། རེ་པ་ཟླུམ་པོ་རེ་ཕར་མཉམ། །མངལ་གྱི་སྟེང་དང་འོག་ཏུ་ཡང ། །ལྷ་དང་ལྷ་མོའི་ཡེ་ཤེས་བཞིན། །བརླ་དང་པུས་མོ་མཉམ་པའི་བརླ། །སྟེང་དང་འོག་ཏུ་རིགས་ཉིད་ནི།།
206b
སོར་མོའི་མཚམས་དང་ལོགས་སུ་ཡང ། །འབྱེད་པའི་རྩ་ནི་རྣམ་པར་གནས། །དེ་ནི་དབྱེ་བའི་གནས་རང་བཞིན། །བློ་དང་ལྡན་པས་ཤེས་པར་བྱ། །རེ་ཕ་རེ་ཕ་ཟླུམ་པོར་མཉམ།། བཅུ་ཡི་སྟེང་དང་འོག་ཏུ་ཡང ། །བརླ་དང་པུས་མོའི་སྟེང་དུ་མཉམ། །སྟེང་དང་འོག་ཏུ་རིགས་ཉིད་དུ། །སོར་མོའི་ཚིགས་དང་ལོགས་སུ་ཡང ། །ས་གདུགས་རྩ་ནི་གནས་པ་བཞིན། ། དེ་རྣམས་ས་གདུགས་གནས་རང་བཞིན། །གནས་པར་བློ་དང་ལྡན་པས་ཤེས། །ལེའུ་དགུ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྟེང་དུ་ཆུ་ཚོད་དབུགས་དང་ནི། །ཡེ་ཤེས་གལ་ཏེ་འབྱུང་གྱུར་ན། །སུམ་བརྒྱ་དེ་བཞིན་སུམ་ཅུ་དང ། །ཇི་སྲིད་བདུན་དུ་འདྲེས་གྱུར་ན། །གཉིས་གཅིག་བཅུ་ཕྱེད་བཅས་པ་ཡི། །ཆུ་ཚོད་དབུགས་ནི་ཆད་པ་བཞིན། །ཡེ་ཤེས་འགྱུར་བ་རྣམ་ཤེས་བྱ། །བློ་ལྡན་སྤྱི་ཡི་བསྟན་བཅོས་བཞིན། །སྦྱོར་བའི་དུས་ལ་ཕན་པའི་ཕྱིར། །བསྟན་བཅོས་ལས་ནི་བཤད་པའོ། །དྲུག་ཅུ་རྩ་བཞི་དབུགས་མཉམ་པས། །རྟག་ཏུ་ས་ནི་བསྲུང་བར་བྱ། །ལེའུ་བཅུ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཡིད་ནི་སྔོན་དུ་འགྲོ་བའི་ཆོས། །ཡིད་དག་ཅིང་ནི་ཡིད་འགྲོ་བས། །དེ་ཕྱིར་ཡིད་མངོན་ཐམས་ཅད་དུ། །བློ་དང་ལྡན་པས་ཡིད་བསྒྲིམ་བྱ། །ས་བོན་གྱི་ནི་ཁྱད་པར་ཉིད། །སྔགས་ཀྱིས་ཕ་རོལ་གནོན་བྱ་མེད། །ཕྱག་རྒྱ་མངོན་བར་ལྡན་
207a
༄#། །པ་ནི། །དགོང་ཅིང་མངོན་པར་རྩེ་བ་མེད། །དེ་ལ་ཁྲུས་ཀྱི་ཆོ་ག་མིན། །སྨྱུང་བ་མཆོག་ཏུ་བཟོད་པ་མེད། །མཆོད་རྟེན་ལས་ནི་མི་བྱ་ཞིང ། །གླེགས་བམ་གྱི་ནི་ཚིག་མེད་པའོ། །ལག་པའི་ཕྱག་རྒྱ་མི་བཅིང་ཞིང ། །སྔགས་ཀྱི་ཡི་གེ་མི་བཟླའོ། །སྐད་ཅིག་རྣལ་འབྱོར་བལྟ་བྱ་ཞིང ། །རྣལ་འབྱོར་སྦྱོར་བས་འགྲོ་བ་བརྩམ། །ཤེལ་བཞིན་དུ་ནི་དག་པ་ཡི། །དག་པ་ཡི་ནི་སྦྱོར་བ་མཆོག་།ཡེ་ཤེས་རྣམ་ཤེས་ལྡན་པའོ། །ཡེ་ཤེས་ཀྱིས་ནི་གནས་བརྩམ་མོ། །ལེའུ་བཅུ་གཅིག་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཤེས་བཞིན་དུ་ནི་དག་པ་ཡི། །དྲི་མེད་ཟླ་བའི་དཀྱིལ་འཁོར་ནི། །གངས་དང་ཁ་བའི་ཆུ་ལྟ་བུར། །རྣམ་པར་ཤེས་པའི་ཁ་དོག་བཞིན། །པདྨ་དཀར་པོའི་གདན་ལ་ནི། །ཟླ་བའི་དཀྱིལ་འཁོར་གྱིས་མནན་པའོ། །མཆོད་པ་རྣམ་པ་བརྒྱད་དང་ནི། །སྔགས་བརྒྱད་ཀྱི་ནི་ས་བོན་བཞིན། །བདུད་རྩི་དཀར་པོའི་ཟས་དང་ནི།། དག་པའི་ཆུ་ནི་བརྩམ་པར་བྱ། །པདྨའི་གདན་དང་གདན་ལ་ནི། །ཟླ་བའི་དཀྱིལ་འཁོར་གྱིས་མནན་པའོ། །གི་ཝང་བླ་མར་བཤད་པ་ནི། །རྣམ་པར་སྣང་མཛད་ཡེ་ཤེས་ལྷ།། དཀར་པོ་ཉིད་ནི་མི་བསྐྱོད་པའོ། །དོན་ཡོད་གྲུབ་པ་དུ་བར་བཤད། །སྣང་བ་མཐའ་ཡས་དུད་ཉིད་དང ། །པདྨ་ཉིད་ནི་རིན་ཆེན་ནོ། །གི་ཝང་ལྷ་མོ་མཱ་མ་ཀཱི། །དྲི་མེད་གསུམ་ནི་
207b
སྒྲོལ་མ་འོ། །གོས་\?\་དཀར་མོ་ནི་འབྱེད་པར་འགྱུར། །ས་ཡི་གདུགས་ནི་སངས་རྒྱས་སྤྱན། །ལེའུ་བཅུ་གཉིས་པ་ཞེས་བྱ་བའོ།། །།ཐམས་ཅད་མཁྱེན་པ་ལ་ཕྱག་འཚལ་ལོ། །ཁམས་བཞི་རྣམ་པར་མཉམ་པ་ཉིད། །ཁམས་བཞི་རུ་ནི་རྣམ་པར་འགྲོ་།མེ་དང་ཆུ་ནི་འདི་བཤད་པ། །ནམ་མཁའ་ཡང་ནི་སྟོང་པ་ཉིད། །སྲ་བ་ཉིད་ནི་ས་ཡིན་ནོ། །དྲོ་བའི་དངོས་བོ་མེ་དང་ནི། །ོཾ་ནི་རྣམ་པར་སྣང་མཛད་དངོས། །སྤྱི་བོར་དཀར་པོ་ཡི་ས་བོན། །ཤར་དུ་མི་\?\་བསྐྱོད་པ་ཉིད་ནི། ། ཡི་རྣམ་པ་དེ་ཉིད་ལྷ། །ཧཱུཾ་གིས་དོན་ཡོད་རྣམ་པར་གྱུར།། ལྷོ་ཡི་ཕྱོགས་སུ་བརྩམ་པར་བྱ། །ཏྲཾ་གི་རྣམ་པ་མངའ་བདག་ལྷ། །དེ་ཉིད་སྣང་བ་མཐའ་ཡས་ལྷ། །ཅོད་པན་ནུབ་ཀྱི་ཕྱོགས་སུ་འོ། །དེ་ཉིད་མཆོད་པ་མཉམ་པ་དང ། །ཏྲཾ་གི་རྣམ་པས་མངའ་བདག་ལྷ། །བྱང་དུ་རིན་ཆེན་འབྱུང་བ་འོ། །སྤྱི་གཙུག་ལ་སོགས་ལྷ་ལྔ་ནི། །བློ་དང་ཤེས་པས་རྣམ་པར་དགོད། །ཏྲཾ་གི་རྣམ་པས་མངའ་བདག་ལྷ། །དཔྲལ་བ་ཁྲོ་བོའི་ཕྱག་ཅན་ནོ། །ཀ་ཡི་རྣམ་པ་ཡེ་ཤེས་ལྷ། །མི་གཡོ་ས་ཡི་མགོན་པོ་བཞིན། །ཧྲཱིཿ ་ཡི་རྣམ་པས་མངའ་བདག་ལྷ། །དེ་བཞིན་ཟླ་བ་མིག་གཉིས་སུའོ། །ལེའུ་དང་པོ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཛཾ་གྱི་རྣམ་པས་བདག་པོའི་ལྷ། །རྣ་བར་བྱམས་པ་ཉིད་ཡིན་ནོ། །ཀྵཾ་གི་རྣམ་པས་བདག་པོའི་ལྷ། །མཁུར་ཚོས་ཡི་དྭགས་
208a
༄#། །སྐྱོང་བ་པོ། །ས་ཡི་རྣམ་པས་བདག་པོའི་ལྷ། །ལྕེ་ལ་ཡང་ནི་མཱ་མ་ཀཱི། །ཧཱུཾ་གི་རྣམ་པས་མངའ་བདག་ལྷ། །མགྲིན་པར་རྟ་མགྲིན་ཁྲོ་བོ་བཞིན། །ཤྲཱིཾ་གི་རྣམ་པས་མངའ་བདག་ལྷ། །ཡེ་ཤེས་ལྷ་ནི་མཆོག་ཏུ་གཙོ། །སྙིང་པོ་ཡི་ནི་ཡེ་ཤེས་མཆོག་།སོར་མོ་ལྔ་དང་མཉམ་པའི་ལྷ། །ལྔ་ནི་སངས་རྒྱས་ཉིད་ཡིན་ནོ། ། ཡིས་བདུད་རྩི་ལྷ་མོ་ནི། །ལག་མཐིལ་རྡོ་རྗེ་སྒེག་མོ་བཞིན། །ཤྲིཾ་གི་རྣམ་པས་མངའ་བདག་ལྷ། །ལྟེ་བར་རྣམ་པར་སེལ་བ་ཉིད། །ཙུཾ་གི་རྣམ་པས་མངའ་བདག་ལྷ། །དེ་བཞིན་བདག་ཉིད་ཧེ་རུ་ཀ། །ལཾ་གྱི་རྣམ་པས་མངའ་བདག་ལྷ། །དེ་བཞིན་བརླ་གཉིས་ས་སྙིང་པོ། །ཡུམ་གྱི་རྣམ་པས་མངའ་བདག་ལྷ། །པུས་མོ་ཡི་དྭགས་ལྷ་མོ་འོ། །ཏྲཾ་གི་རྣམ་པས་ཡི་དྭགས་ལྷ། །འོག་ཏུ་འབྱུང་པོའི་གཙོ་བོ་འོ། །ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །ོཾ་ཧྲཱི་ཧེ་ཧ་ཧ་ཧ་ཧཱུཾ་ཕཊ། འདི་ནི་ཉེ་བའི་ཆོ་གའི་སྔགས་སོ། །སྐུ་མདོག་སྔོན་པོ་ཁྲོ་གཉེར་ལྡན་པའི་ཞལ་དང་ནི། །སྤྱན་གསུམ་ཞལ་དང་རྐེད་པ་སྤྱི་བོ་ཅོད་པན་ཅན། །སྦྱོར་བའི་གདན་བདུན་མངོན་པའི་ཕྱག་རྒྱ་དབང་དང་ནི། །དར་གྱིས་མངོན་པར་གང་བའི་གདེང་ས་ཀའི་རྣ་ཆ་དང ། །སྤྲུལ་གྱི་མཆོད་ཕྱིར་ཐོགས་ནི་ལྷག་པར་ལྡན། །དམར་པོའི་གོས་དང་སྦྲུལ་གྱི་པགས་པ་བསྣམས། །གཡོན་གྱི་ཕྱག་ན་སྣོད་
208b
ནི་རབ་གང་མཛེས། །གཉིས་པར་དབྱུག་པ་གསུམ་པར་དགྲ་སྟ་དང ། །གྱེན་དུ་བ་དན་དང་ནི་དྲིལ་བུ་གཡས་པ་འོ། །རྡོ་རྗེ་གསོར་དང་ལྕགས་ཀྱུ་དྲིལ་བུའི་ཕྱག་།པད་གདན་ཉི་མའི་ཕྱག་ཅན་མེ་དཀྱིལ་ལ། །ཧེ་རུ་ཀ་དཔལ་མགོན་པོ་ཤིན་ཏུ་འཇིགས། །ཤར་གྱི་ཆར་ནི་མཱ་མ་ཀཱི། །ཐོད་པ་ཕྱག་ན་བསྣམས་པའོ། །ལྷོ་ཡི་ཆར་ནི་སངས་རྒྱས་སྤྱན། །ཕྱག་གི་འཁྱུད་པའི་ཚུལ་བཞིན་ནོ། །ནུབ་ཏུ་སྒྲོལ་མ་དྲིར་བཤད་པ། དེ་བཞིན་ཕྱག་ན་མེ་ཏོག་ཕྲེང ། །གོས་དཀར་གཏོར་མ་ཡང་དག་ལྡན། །བྱང་གི་ཕྱོགས་སུ་དགོད་པར་བྱ། །དབང་ལྡན་རྡོ་རྗེ་སྒེག་མོ་དང ། །མེ་རུ་བིལ་བ་ལག་པ་མ། །བདེན་བྲལ་དུ་ནི་གླུ་མ་དང ། །རླུང་དུ་གར་མ་བསྐྱོད་པ་བཞིན་པའོ། །ལེའུ་གསུམ་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །ས་ཤྲི་སཝཱཧཱ། ཤར་གྱིའོ། །ས་ཧཱུཾ་ཧཱུཾ་ཧཱུཾ་སཝཱཧཱ། ལྷོ་ཡི་འོ། །ས་ཀྵཾ་སཝཱཧཱ། ནུབ་ཀྱིའོ། །སཾ་ཀྵུཾ་ཀྵུཾ་ཀྵུཾ་སཝཱཧཱ། བྱང་གིའོ། །ཧཱུཾ་དབང་ལྡན་གྱིའོ། །ཧེ་མེ་ཡིའོ། །ཧེ་བདེན་བྲལ་གྱིའོ། །ཧྲི་རླུང་གིའོ། །ོཾ་བཛྲ་ཨཾ་ཀུ་ཤ་ཛཿ ། ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་གྷཎྜེ་ཧོཿ ་ཨོཾ་པདྨ་ཨུད་བྷཱ་བ་ཡ་སཝཱཧཱ། གདན་གྱིའོ། །ོཾ་པུཥྤཾ་བྷྱོ་ས། ཨོཾ་དྷུ་པེ་བྷྱོ་ཤ། །ོཾ་དཱི་པཾ་བྷྱོ་ཧྲི། གྷཙྪ་ནྟེ་སཝཱཧཱ། བྷཱ་བེ་ན་སུ་ར་ཨ་ག་མ་ནཱ་ཡ་སཝཱཧཱ། ལེའུ་བཞི་པ་ཞེས་བྱ་བའོ།། །།པདྨའི་དབང་ཕྱུག་སྐུ་ནི་གསེར་གྱི་མདོག་།དྲི་ཆུའི་དངོས་
209a
༄#། །པོ་ཤིན་ཏུ་སྣང་མཛད་དང ། །རོ་ནི་བདུད་རྩི་ཆུ་ཡི་ངོ་བོ་ཉིད། །མཐེབ་མཛུབ་ཀྱིས་ནི་ས་ཡི་སྟེང་དུ་དོར། །དབུས་མའི་རི་རབ་ཀྱིས་ནི་བདུད་རྩི་བསྲུབ།། ཇི་བཞིན་གནས་བརྒྱད་འཐོར་འཐུང་དབུལ་བར་བྱ། །ཧ་ཡི་རྣམ་པས་ཁ་དོག་འཕྲོག་།ཧོ་ཞེས་བྱ་བས་དྲི་མེད་བྱེད། །དཔའ་བོ་ཧྲཱིཿ ་ཡི་རྣམ་པས་འཇོམས། །རིམ་པ་འདི་ལྟར་ཤེས་པར་བྱའོ། །ལྷ་རྣམས་ཀུན་ནས་ལྕགས་ཀྱུ་ཡིས། །བདུད་རྩིའི་ཡི་གེས་ཚིམ་པར་བྱ། །ལྕགས་ཀྱུ་ཀུན་ནས་སྐྱོད་བྱེད་ཅིང ། །རྣལ་འབྱོར་བདག་ཉིད་མཚན་ཉིད་ཡིན། །དཔལ་ལྡན་རྡོ་རྗེ་འཛིན་དེ་ཉིད། །དུད་པའི་ས་བོན་གྱིས་ནི་སྦྱང ། །གཏོར་མ་སྦྱང་བ་བྱས་པ་ཡིན། །དེ་ཡི་ས་བོན་གྱིས་དེ་སྦྱང ། །ལོགས་སུ་ཁ་ཁྱེར་གསུམ་བྱས་ལ།། ཕོ་ཉ་རྣལ་འབྱོར་མས་སྤྱན་དྲངས། །ཀ་ཌ་ཀ་ཌ་བནྡྷ་བནྡྷ་ན་ཧྲྀ་ཁ་ཁ་ཁ་ཤ་ཏྲུཾ་ཛ་ཛ་ཤ་ཏྲུཾ་མཱ་ར་ན་བ་ལི་བ་ཏ་ལི་དྷེ་བ་ཏི་ཤེ་སཝ། ལེའུ་ལྔ་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །འཇིམ་པ་ལས་ནི་གཟུགས་བརྙན་བྱ། །ཞལ་གསུམ་སྤྱན་གསུམ་རྐང་པ་གསུམ། །ཕྱག་གསུམ་རབ་ཏུ་བཞད་པ་དང ། །གླང་པོའི་མིག་ཅན་རོ་ལངས་མ། །རྟག་ཏུ་རལ་གྲི་ཞགས་པ་དང ། །གོས་དམར་པགས་པ་དམར་པོ་མནབས། །ཞབས་གཉིས་སྐད་ཅིག་ས་ལ་མནན་པ་དང ། །རོ་ལངས་ཕྱག་རྒྱ་སྙིང་
209b
གར་མངོན་པར་བསྡིགས། །ཧཱུཾ་གི་སྒྲ་ཡི་ས་བོན་བཟླས་པ་ཡིས། །བསྟན་པ་སྲུང་ཞིང་སྐེམས་པ་ཡིས། །མངོན་དུ་ཕོ་ཉ་ཆེན་པོ་འོང ། །ཀཱརྱ་ཀཱརྱ་བནྡྷ་བནྡྷ། ནཱ་ད་ནཱ་ད་ཧཱུཾ་ཧཱུཾ་ཕཊ་ཕཊ། འདི་ནི་ཕོ་ཉ་མཆོག་གི་སྔགས། །དབང་དང་མངག་ལ་དེ་བཞིན་མིང ། །དུག་དང་ལྷན་ཅིག་སྦྱར་བྱས་པའི། །ཁྲག་གིས་མངོན་པར་བྲི་བར་བྱ། །རྐང་པས་མངོན་དུ་མནན་བྱས་ལ། །བློ་དང་ལྡན་པས་རིམ་བཞིན་བཟླས། །ལན་གཅིག་བཟླས་ཤིང་ལན་གཅིག་མིན། །ལན་གཅིག་ཕྱག་རྒྱ་བསྣུན་པར་བྱ། །མིང་ནི་བརྒྱ་ཕྲག་བརྒྱ་ཕྲག་གསུམ། །ནག་མོ་སེར་སྐྱ་ཙནྡན་དང ། །དམར་པོའི་མེ་ཏོག་ས་བོན་གྱིས། །དཀྱིལ་འཁོར་གསུམ་ནི་བྲི་བར་བྱ། །གུ་གུལ་ནག་པོའི་བདུག་པ་བྲི། །དེ་ཡི་གཏོར་མ་ལྡན་དབུལ་བཞིན། །སེར་སྐྱའི་ཕོ་ཉ་མོ་ཞེས་བྱ། །ལེའུ་དྲུག་པ་ཞེས་བྱ་བའོ།། །།དེ་ནས་ཡང་དག་བཤད་བྱ་བ། །མི་ཤེས་མུན་པ་ཉིད་དང་འབུ་དང་སྲིན་བུའི་འཁོར་ལོས་ཁྱབ།། མི་རྣམས་སྡིག་པའི་ཁྱད་པར་ཉིན་རེ་བཞིན་དུ་སྤྱོད་པ་ནི། །དགེ་བའི་ལམ་ཆེན་དག་ནས་མི་ནི་དབུ་མའི་སྐྱེ་བར་སྐྱེ། །ཐོས་ལ་མངོན་པར་དགའ་ཞིང་སྤྲོ་ཞིང་རྣམ་པར་ལྟ་བ་ཡིས། །མི་ཡི་ཡེ་ཤེས་མཆོག་དང་མཆོག་ཏུ་འགྱུར་བ་ཉིད། །རྒྱལ་བའི་ཐར་པ་དོན་དམ་མཆོག་ཏུ་རྣམ་པར་ཤེས། །ཕྲ་ཞིང་ཤིན་ཏུ་ཕྲ་བ་དེ་ཉིད་རབ་ཏུ་ཕྲ། །དངོས་པོ་མེད་ཅིང་དངོས་པོ་དང་བྲལ་བ། །སྦྱོར་
210a
༄#། །བའི་དངོས་པོ་བདེ་བར་རྟོགས། །ཤེས་པས་བསྒོམས་པ་དག་པ་ཡིས། །མཉམ་པར་དག་པ་དབུ་མའོ། །རྟག་ཏུ་བདག་མེད་རྣམ་པར་དག་།འདོད་པས་རྣམ་པར་མི་གོས་པ་འོ། །ལེའུ་བདུན་པ་ཞེས་བྱ་བའོ།། །།སངས་རྒྱས་ལྔ་ཡི་དངོས་པོ་ཡིས། །རྟག་ཏུ་སྤྱི་བོར་བརྒྱན་པ་འོ། །གཉིས་མེད་ཕྱག་རྒྱའི་གནས་སུ་ནི། །དེ་ལ་རྒྱ་མཚོ་ཆུ་ཉིད་བསྒོམ། །སྤྱི་གཙུག་རྣམ་ཤེས་ཚིམ་པར་བྱ། །གཡོན་གྱི་ཕྱོགས་སུ་མི་བསྐྱོད་པ་འོ། །དོན་ཡོད་གྲུབ་པ་གཡས་སུ་བཞུགས། །རིན་ཆེན་གྱི་ཀྱང་གཡོན་པར་བརྒྱན། །རྒྱབ་ཏུ་སྣང་བ་མཐའ་ཡས་དགོད། །སངས་རྒྱས་ལྔ་ནི་གཟུང་བར་བྱ། །གཞན་དུ་ནམ་ཡང་མ་བཤད་པ། །སངས་རྒྱས་བསྟན་བཅོས་ཉིད་དུ་གསུངས།། སྔ་དྲོ་ཕྱི་དྲོ་ཉིན་ཕྱེད་དུས། །དུས་གསུམ་དུ་ནི་རྟག་ཏུ་བཟུང ། །ས་བོན་འདི་ཡིས་བཀྲུས་པ་ཡིས། །འཐོར་འཐུང་རྣམ་པར་སྦྱངས་པ་འོ། །ལྔ་པ་ཡང་དག་སྦྱར་བས་དབུལ། །ཚི་ལིང་ག་ཡི་ཐིག་ལེ་སྦྱང ། །གོང་དུ་བསྒོམས་པ་ཙམ་གྱིས་ནི། །རྣམ་ཤེས་ལྷན་ཅིག་དཀར་བ་འོ། །ལེའུ་བརྒྱད་པ་ཞེས་བྱ་བའོ།། །།ེ་མའོ་ལས་ནི་མཆོག་ཏུ་གཙོ། ། མའོ་རྣལ་འབྱོར་རྨད་དུ་བྱུང ། །ེ་མའོ་ཆོས་ནི་མཆོག་ཐོབ་པས། །དྲང་སྲོང་ལྷན་ཅིག་ངོ་མཚར་སྐྱེས། །ཡེ་ཤེས་མཆོག་གི་ཆོས་འདི་ནི། །བྱང་ཆུབ་
210b
སེམས་དཔའ་འདུས་ནས་གསུངས། །ཡེ་ཤེས་ཡིད་ཀྱི་ཆོས་ཅན་ནི། །ཚིག་གིས་ཁྱོད་ལ་བཤད་པ་ཡིན། །ཡེ་ཤེས་ཕྱག་རྒྱ་མཆོག་ཉིད་ནི། །ཡེ་ཤེས་རྩ་བ་ཡང་དག་འབྱུང ། ། ཤེལ་བཞིན་དུ་ནི་དག་པ་ཡི། །དག་པ་གཉིས་སུ་མེད་པའི་རྟགས། །ལྷ་ཡི་ཡན་ལག་མཆོད་པ་པོས། །གཉིས་མེད་དགོད་པར་ཡང་དག་ལྡན། །གཉིས་མེད་རྣམ་ཤེས་ངོ་བོ་ཡིས།། བློ་ལྡན་བདུད་རྩི་ཤེས་པར་བྱ། །བདུད་རྩི་ཆུ་ནི་དབུལ་བ་ཡིས། །ཕྱི་རོལ་རྣལ་འབྱོར་མ་མཆོད་དོ། །གཉིས་མེད་ཕྱག་རྒྱའི་རྡོ་རྗེ་འདི། །རྩ་གསུམ་གཉིས་མེད་ཕྱག་རྒྱས་བཞིན། ། རྐང་པས་པདྨར་མཉམ་ཞོན་པས། །འཁྲིག་པ་བདུད་རྩིའི་སྦྱོར་བའོ། །རྡོ་རྗེ་པདྨ་མཉམ་པའི་དངོས། །སྐྱེས་བུས་ཧཱུཾ་གི་སྒྲ་བྱས་ནས། །རང་བཞིན་གྱིས་ནི་སྒྲ་འབྱིན་ཅིང ། །གཉིས་གའི་ཡེ་ཤེས་དཀར་པོ་བཞིན། །དེ་ཡི་རང་བཞིན་གྱིས་ནི་རྡུལ། །དུ་བའི་ས་བོན་གྱིས་སྦྱར་བྱ། །དབང་པོ་རུ་རྟ་བིལ་བར་མཉམ། །ཁ་ར་སྦྲང་རྩི་བ་ལ་ཤ། །བདུད་རྩི་ཆུ་དང་ཡང་དག་ལྡན། །རྒྱུ་སྐར་ཟླ་བ་ལྷ་ཉིད་ལ། །བྱིན་ནས་དོན་ཆེན་དབང་དུ་བྱེད། །ལེའུ་དང་པོ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྟོང་ཉིད་ངོ་བོའི་ཚུལ་གྱིས་ནི། །ཕྱི་དང་ནང་དུ་བཅས་པར་རོ། །ཡེ་ཤེས་ཆོས་ཀྱི་སྦྱོར་བ་ལས། །ཡེ་ཤེས་ཀྱི་ནི་སྦྱོར་བ་མཆོག་།ཐམས་ཅད་ལུས་ལ་གནས་པ་ནི། །རྨོངས་པས་ཀུན་ཏུ་མི་ཤེས་པས། །དེ་
211a
༄#། །ཕྱིར་རྨོངས་པ་ཡོངས་སྤངས་ལ། །ཡེ་ཤེས་ཀྱི་ནི་གནས་བརྩམ་བྱ། །འདུ་འཛི་ལས་ནི་རྨོངས་པའི་ཚུལ། །དེ་ཕྱིར་འདུ་འཛི་ཡོངས་སུ་སྤང ། ། གཅིག་པུའི་སྦྱོར་བས་གྲུབ་པ་ཡི། །གཅིག་པུས་འགྲོ་བ་བརྩམ་པར་བྱ། །པྱིས་པའི་སྐྱེ་བོས་མཐོང་བ་ཡི། །དེ་ཕྱིར་དེ་ཉིད་གཅིག་པུ་ནི། །གནས་མེད་གནས་ནི་ཤེས་བྱས་ལ། ། དངོས་པོ་མེད་པའི་ངོ་བོ་ལ། །གཉིས་སུ་མེད་པའི་བདག་ཉིད་ཀྱི། །གཉིས་ཀྱི་ཤེས་པ་རྣམ་པར་སྤངས། །དེ་ཉིད་རིག་པ་མཆོག་ཏུ་ཕྲ། །སྦྱོར་བའང་མཆོག་ཏུ་ཕྲ་བ་ཉིད། ། མགྲིན་པ་རྐན་གྱི་སྟེང་དུ་བཟླ། །སྨིན་མའི་དབུས་དང་མིག་གི་རྩར། །སྒོར་ནི་ཐིག་ལེ་ཕྲར་གྱུར་པ། །འཁོར་ལོ་ཕྲ་རབ་རྡུལ་ལྟ་བུར། །དང་པོ་མཆོག་དང་ཡང་དག་ལྡན།། བླ་མས་བསྟན་ལས་ཤེས་པར་བྱ། །རྡུལ་ཕྲན་ཡེ་ཤེས་དེ་ཁོ་ན། །དེ་ཕྱིར་བློ་ལྡན་གྱིས་ཤེས་བྱ། །ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྐྱོན་དང་ཡོན་ཏན་དངོས་པོ་སྤང ། །ཁ་གའི་སྒོ་ནི་ཇི་བཞིན་བསྔམ། །བུག་པ་དགུ་དང་ཁ་ག་ཉིད། །བུ་ག་དགུ་ལས་དུད་པ་འབྱུང ། །སྐྱེས་བུ་གོང་གི་སྒོ་ལ་ནི།། དེར་ནི་པདྨ་དཀར་པོ་བཞིན། །ལུས་ཀུན་ལ་ནི་དགོད་བྱ་ཞིང ། །ལྷ་ཉིད་སོ་སོར་བསྒོམ་པར་བྱ། །ལྷ་ཡི་ས་བོན་དེ་ཉིད་ཀྱིས། །རྡོ་རྗེའི་ཕྱག་རྒྱ་དགོད་པ་བཞིན། །རླུང་གི་
211b
དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་འདྲ་བའོ། །ཡེ་ཤེས་རྣམ་ཤེས་མཆོག་ཏུ་དྲང ། །དངོས་དང་དངོས་པོ་ཕྲ་བའི་དེ་ཁོ་ན། །དངོས་དང་ཤིན་ཏུ་འབྲེལ་བར་མཚུངས་པ་འོ། །སྙིང་གར་གནས་པའི་སྙིང་པོ་མཆོག་མིང་བརྗོད། །སེམས་ཀྱི་རྩ་ནས་དེ་བཞིན་དུ་ཧི་ཀ་།སྟེང་དང་འོག་དང་དེ་བཞིན་སྟེང ། །ཡི་གེ་ཕྱེད་དང་གཉིས་ཀྱིས་སྦྱང ། །བཟློག་པར་བྱ་བའི་ས་བོན་གྱིས། །ལྷན་ཅིག་བློ་དང་ལྡན་པར་སྦྱང ། །ལེའུ་གསུམ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཐམས་ཅད་ལུས་ལ་གནས་པ་ཡི། །ཡེ་ཤེས་ཀྱི་ནི་ཡེ་ཤེས་མཆོག་།ས་དང་རི་དང་དེ་བཞིན་ཤིང ། །བོང་བ་ཆུ་དང་དེ་བཞིན་སྲིན། །འབུ་སྲིན་རྣམ་པར་སྤངས་ནས་ནི། །ཡེ་ཤེས་ལུས་ལ་སེམས་མེད་པ་འོ། །འབུ་དང་སྲིན་བུ་ཡེ་ཤེས་བླུན། །ཁྱད་པར་ཉིད་དུ་སྤང་བ་འོ། །རྣམ་གསུམ་ལྷ་དང་གནོད་སྦྱིན་དག་།ལྷ་མིན་ཡི་དྭགས་མཁའ་འགྲོ་མ། །གཟུགས་དང་ཡེ་ཤེས་དེ་བཞིན་ཁྲོ། །ཞི་ཞིང་ཞི་བའི་ཡེ་ཤེས་བཞིན། །ལུས་ལ་ཐམས་ཅད་གནས་པ་ནི། །བློ་དང་ལྡན་པར་ཁྱད་པར་ཤེས། །ལེའུ་བཞི་པ་ཞེས་བྱ་བའོ།། །།དེ་ནས་གཞན་ཡང་བཤད་པར་བྱ། །དྲང་སྲོང་ངོ་མཚར་སྐྱེ་བ་ནི། །ཀ་བ་གཅིག་དང་སྒོ་དགུ་དང ། །བུ་ག་གསུམ་དང་ཡེ་ཤེས་ལྔ། །རྣམ་ཤེས་ཡེ་ཤེས་ལུས་ལ་ནི། །ཆོས་ཀྱི་དབྱིངས་ནི་ཇི་ལྟར་
212a
༄#། །གྲགས། །ཐར་པ་ཐོབ་པའི་དུས་སུ་ནི། །མི་ཤེས་ཡེ་ཤེས་ལུས་ཇི་བཞིན། །ཇི་ལྟར་ཆོས་ཀྱི་དབྱིངས་ཉིད་དང ། །ཡེ་ཤེས་དང་ནི་གཟུགས་ཀྱི་ཆ། །ཡེ་ཤེས་ཇི་ལྟར་མཐོང་བ་དང ། །ཇི་ལྟར་ན་ནི་ཡེ་ཤེས་གཟུགས། །དེ་ཉིད་གཟུགས་ལ་སེམས་མེད་པ། །བདུད་རྩིའི་ཡི་གེར་རྣམ་པར་བརྟག་།ཡེ་ཤེས་ལྷ་དང་མཉམ་པའི་དངོས། ། སྔོན་གྱི་མཚན་ཉིད་ལྟ་བུར་རོ། །ལེའུ་ལྔ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྔགས་དང་རྒྱུད་ཀྱི་དབྱེ་བ་ཉིད། །ཏི་ལ་ཏི་ལ་ཡི་ནི་མཐའ། ། སྟོང་པ་སྒྲ་དང་ཡང་དག་ལྡན། །སྟེང་དུ་བདུད་རྩིའི་ཐིག་ལེ་སྦྱིན། །མཆོག་གི་ཡི་གེར་ཡང་དག་ཤེས། །སྟོང་ཕྲག་གཅིག་དང་སུམ་བརྒྱ་བརྒྱད། །དེ་ཡི་མཚན་ཉིད་བཟླས་པའོ།། བདག་ཉིད་ལུས་ལ་དགོད་པ་ནི། །དེ་བཞིན་ལྷ་ནི་བསྐྱེད་ཅིང་བསྐྲུན། །ལས་བརྒྱད་དང་ནི་མཉམ་པ་ཡིས། །རེའུ་མིག་བརྒྱད་ཀྱི་དབྱེ་བའོ། །ལས་བཞི་ཡི་ནི་བློ་ཅན་གྱི། །དེ་བཞིན་ས་བོན་སྔོན་དུ་བསྙེན། །ོཾ་ཨཱ་གཙྪཾ་ཏུ་དེ་བ་སམ་ཡེ་ཨཱ་ཀཪྵ་ཡ་ཧཱུཾ་ཕཊ། སྤྱན་དྲང་བའི་སྔགས་སོ། །ལེའུ་དྲུག་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཡེ་ཤེས་ཅན་གྱིས་སྤྱན་དྲང་བ། །ོཾ་ཨ་ཀྵོ་ནི་ཏྱཾ་མཧཱ་ནཱ་ག་ཏཱ་ཀྵ་ཀ་ཝ་ས་ཝ་ཏ་ན་ཧཱུཾ་ག་ཧཱུཾ་ག་སཝཱཧཱ། ཀླུའི་འོ། །ོཾ་དྷ་ནཱ་དྷི་བིཾ་ཨཱ་ཛྙཱ་ན་ཡཀྵ་ཎོ། མཱ་གྩྪ་ས་མ་ཡ་ཨུད་བྷཱ་བ་
212b
ཀྲུཾ་ཀྲུཾ་ཀྲུཾ་ཧྲཱིཿ ་སཝཱཧཱ། གནོད་སྦྱིན་གྱི་སྔགས་སོ། །ོཾ་བྷཱུ་ཏ་ཀྲོ་དྷེ་ནཱ་བྷེ་ཨཱ་གྩྪ་ས་མ་ཡ་ཨུད་མ་ཧེ་ཕུ་ཕུ་ཕུ་ཛཿ ་འབྱུང་བོའི་སྔགས་སོ། །ོཾ་གྷུ་རུ་གྷུ་རུ་ཨཱ་ཀཪྵ་ཡ་ཧཱུཾ་ཧྲི་ཛཿ ་འབྱུང་པོ་དགུག་པའི་དམ་ཚིག་གི་སྔགས་སོ། །ལེའུ་བདུན་པ་ཞེས་བྱ་\?\་བའོ།། །།དེ་ནས་གཞན་ཡང་བཤད་བྱ་བ། །གང་གིས་མཆོག་གི་ཆོས་ཤེས་ཤིང ། །གང་གིས་རྣམ་པར་མི་ལོག་\?\་ཤེས། །གང་ཞིག་ལྷ་ཉིད་རྣམ་ཤེས་པ། །གང་ཤེས་དེ་ནི་རྣལ་འབྱོར་པའོ། །གང་ཞིག་གསང་བ་མི་ཤེས་པ། །མཆོག་གི་ཆོས་ནི་མཆོག་ཕྲ་བ། །ཐམས་ཅད་ལུས་ལ་གནས་པའི་མཆོག་།རང་ལུས་མཆོད་པས་ཕ་རོལ་མཆོད། །གཞན་དུ་བྱས་ན་ལྷ་ཉིད་བརླག་།མཆོད་པའི་བདག་ཉིད་དེ་ཉིད་མཆོད། །ཐམས་ཅད་ལུས་ལས་ཤེས་འགྱུར་བས། །ཐམས་ཅད་ལྷ་ཉིད་ཚིམ་པ་འོ། །དེ་ཉིད་ཡེ་ཤེས་ལྷར་གྱུར་པས། །བདག་ཉིད་ལས་ནི་ཐམས་ཅད་པའི། །རྟག་ཏུ་ཉོན་མོངས་རྣམ་སྤངས་ནས། །ཡེ་ཤེས་ཅན་གྱི་སྐུ་རུ་གྱུར། །དེ་ཡི་མིང་ནི་དེ་བཞིན་དགུ་།རྣལ་འབྱོར་སྦྱོར་བའི་བློ་ལྡན་པས། །ཚེ་རབ་གཞན་དུ་བྱས་པའི་སྡིག་།བཀླགས་པ་ཙམ་གྱིས་ཐག་བསྲིངས་པའོ། །བརྒྱད་པ་སྟེ་དེ་རྣམས་ཀྱི་བདེ་བར་གཤེགས་པས་གསུངས་པ་རབ་ཏུ་བྱེད་པ་བཅོ་བརྒྱད་ལས་རྩ་བའི་འཁོར་ལོ་ཞེས་བྱ་བ་དྲུག་ཅུ་རྩ་བཞིའི་རྣམ་པར་དབྱེ་བ་རྫོགས་སོ།། །།ཐམས་ཅད་མཁྱེན་པ་
213a
༄#། །ལ་ཕྱག་འཚལ་ལོ། །རྣལ་འབྱོར་རྣལ་འབྱོར་དབང་ཕྱུག་ཉིད། །དེ་བཞིན་སྦྱོར་བའི་བསྟན་བཅོས་དང ། །དྲང་སྲོང་རྣམས་ཀྱི་ཡེ་ཤེས་དབང ། །གནས་གཙང་གནས་ན་བཞུགས་ནས་སུ། །ཐམས་ཅད་མཁྱེན་པས་འདི་སྐད་གསུངས། །རྩ་ཡི་འཁོར་ལོ་རྣམ་བཤད་པ། །སྟོང་པ་ཉིད་ལ་མཆོག་ཏུ་བརྩོན། །ཡེ་ཤེས་དབང་ཕྱུག་ཡང་དག་ལྡན། །གཉིས་མེད་གཉིས་མེད་ལ་བརྟེན་པ། །ཁམས་བཞི་ཡི་ནི་ངོ་བོ་དང ། །རྩ་དགུ་ཡི་ནི་དབྱེ་བ་དང ། །དེ་བཞིན་ལྷ་དགུ་ལྷག་པ་ཉིད། །སྔགས་དང་ལས་ནི་གསུམ་ཉིད་ཀྱིས། །རྒྱལ་བོ་དབང་དུ་འགྱུར་བའོ། །ཡུལ་འཁོར་སྐྱེ་མཆེད་ལུས་རྒྱལ་ཉིད། །སྒོ་ལྔ་ལས་ནི་དྲང་པར་བྱ། །ཆུ་དང་མེ་དང་ནམ་མཁའ་རླུང ། །འདི་ནི་ལུས་ལ་གནས་པ་ཉིད། །ཆུ་ནི་དབང་ཕྱུག་རྒྱལ་ཆེན་པོ། །དེ་བཞིན་བདུད་རྩི་དཀར་པོའི་རྩ། །མེ་ནི་དུ་བར་འབར་བཞིན་དྲག་།དེ་བཞིན་མྱ་ངན་འབར་བའོ། །དབང་ཆེན་དུང་གི་རང་བཞིན་རྩ། །མི་རྟག་པས་ནི་ཡང་དག་གནས། །ནམ་མཁའ་ནམ་མཁའི་རྩ་ཉིད་ནི། །པདྨ་དེ་བཞིན་བརྟན་ཞིང་རྟག་།གི་ཝང་རྣམ་པར་རྨོངས་པའི་རྩ། །ལུས་པོ་བསྐྱེད་ཅིང་སྡུག་བསྔལ་གནས། །དྲི་མེད་གསུམ་ནི་གཡོ་བའི་རྩ། །སྐྲ་ནི་བསྒྲུབ་པར་དཀར་བའོ། །འབྱེད་པ་ཉོན་མོངས་ཉིད་ཀྱི་རྩ། །སྡིག་པའི་རྩ་དང་སྡིག་པའི་གནས།།
213b
མི་ཤེས་པ་དང་ཕྱུགས་ཉིད་ཡིན། །ས་གདུགས་རྩ་ནི་དབང་ཕྱུག་མཆོག་།དཀར་པོ་མྱུ་གུ་རབ་དབྱེ་དང ། །དེ་བཞིན་དུད་པས་མི་བཟད་ཕྱིར། །ས་ནི་དུང་དུ་གསུངས་བའོ། །ནམ་མཁའ་གཡོ་ཞིང་འགྲོ་བའོ། །རྨོངས་པས་སྲེད་ཅིང་འཇིགས་པའི་དངོས། །དེ་བཞིན་ཉོན་མོངས་སྡིག་པའི་གནས། །གཡོ་ཞིང་གཡོ་བའི་བློ་ཉིད་ནི། །མི་ཤེས་ཕྱུགས་ཀྱི་རྩ་ཉིད་ལ། །དགུ་ཡི་ལྷ་ནི་ཅི་ཞེས་བརྗོད། །དབྱེ་བས་རྣམ་པ་བཅོ་བརྒྱད་ནི། །དེ་བཞིན་འཕགས་པ་ཡེ་ཤེས་དབང ། །འགྲོ་བའི་བསོད་ནམས་སྡིག་གི་གཞི། །དེ་བཞིན་སེམས་ཅན་སྲིད་པའི་ལས། །དེ་བཞིན་ཉོན་མོངས་དམྱལ་བར་བཤད། །སྲིད་པ་ཕ་དང་མ་ཡི་དངོས། །གཞན་དུ་དུ་མའི་ཤེས་པ་ཉིད། །རྒྱལ་པོ་ཞེས་པ་ཅི་ཞེས་བརྗོད། །དབང་པོའི་ཡུལ་ནི་རྒྱལ་པོའོ། །ཕན་ཚུན་བསྟེན་ཅིང་བསྟེན་པ་ལས། །ལུས་ཀྱི་འཁྲུལ་འཁོར་རྣམ་པར་སྐྱེ། །ཉོན་མོངས་བ་སྤུ་སོགས་པའི་ལུས། །ལུས་པོ་ཡི་ནི་གཞི་ཉིད་དོ། །འཁོར་བར་འགྱུར་བའི་ཞགས་པ་ཡིས། །གླང་ཆེན་གནད་དུ་བརྒྱབ་པ་བཞིན། །ཚེ་རབས་སྔ་མར་སྟོབས་ཆུང་བའི། །རྣལ་འབྱོར་པ་ནི་སྟོང་ལ་དགའ། །རབ་ཏུ་བྱེད་པ་ཞེས་བྱ་བའི་ལེའུ་སྟེ་དང་པོའོ།། །།དེ་ནས་གཞན་ཡང་རབ་བཤད་པ། །རྩ་ཡི་ལྷ་ནི་དེ་བཞིན་རིམ། །བཅུ་གཉིས་པ་ནི་མངོན་དུ་དྲི། །དཀར་པོ་འབྱུང་བའི་དབྱིབས་ཀྱི་ནི། །ཆ་བཞི་
214a
༄#། །ལག་པའི་རིགས་པ་ཡིས། །སྤྱི་བོར་དཀར་པོའི་གནས་རང་བཞིན། །རྒྱས་པ་ལྔ་ཡི་སྟེང་དུ་ནི། །འབར་བའི་རྩ་ནི་སྟེང་དུའོ། །སྨིན་དབུས་དེ་བཞིན་ཐིག་ལེ་དང ། །མིག་ནི་བཅིངས་པ་ཉིད་དང་ཡང ། །རྣ་བ་ཉན་པ་ཡི་ནི་རྩ། །གཡོན་པའི་དབུགས་ནི་བུད་མེད་ཉིད། །དེ་བཞིན་སྐྱེས་བུ་གཡས་པ་ཉིད། །དུད་པ་སྔོན་གྱི་དབུགས་དང་ནི། །ལྕེ་དང་རོ་ཡི་རྩ་ཉིད་དོ། །བདུད་རྩི་རྣམ་པ་དགུར་བཤད་པ། །དཀར་པོའི་རྩར་ནི་ཡོངས་སུ་གྲགས། །སྔོན་དུ་དུ་བའི་མཚན་ཉིད་ནི། །དུད་པ་འབར་བའི་རྩ་ཆེན་པོ། །དཔུང་པའི་ངོས་སུ་ཡང་དག་ནས། །བྲང་དང་རུས་སྦལ་མཚམས་སུ་ནི། །རྩ་ནི་མཚམས་ཀྱི་དབུས་སུ་འོ། །ལག་པའི་སོར་མོའི་དབྱིབས་ལྟ་བུ། །སོར་མོ་དང་ནི་སེན་མོའི་རྒྱབ། །དུད་པ་ལྷག་པའི་རྩ་ཉིད་ནི། །བྲང་ཉིད་དུ་ནི་ཡོངས་སུ་གྲགས། །ལོགས་དང་དེ་བཞིན་ཉེ་བ་ཡི། །དེ་བཞིན་ཇི་ལྟར་ཚིགས་དང་ཚིགས། །ལུད་པ་དྲི་པ་མཆན་ཁུང་མཉམ། །རོ་སྟོད་ལག་པའི་རྩ་བ་དང ། །རྐེད་པའི་རྒྱབ་ཀྱི་རྩ་ཉིད་ནི། །དུང་ཉིད་དུ་ནི་ཡོངས་སུ་གྲགས། །དང་བའི་མཚམས་དང་རྐེད་པ་ཉིད། །བརླ་དང་བརླར་ནི་ཉེ་བར་མཚོན། །འགྲོ་བ་ཡི་ནི་ལྟོ་བའི་རྩ། །རྐང་པ་དུས་ཀྱི་མེ་དང་ནི། །པདྨ་རྐང་པ་མངའ་བདག་ཉིད། །རྩར་ནི་བློ་དང་ལྡན་པས་ཤེས། །གི་ཝང་འདོད་པའི་གནས་ཀྱི་
214b
གནས། །རྟག་ཏུ་ལྕི་བར་མཚན་པར་གསུངས། །བླ་མའི་ཕ་རོལ་འགྲོ་བའི་རྩ། །དེ་བཞིན་སྲིན་བུ་འབྱུང་བ་འོ། །གི་ཝང་དཀུ་ཡི་གནས་སུ་ནི། །གཙོ་བོའི་དབྱིངས་སུ་གྲགས་པ་ཉིད།། རི་མེད་རྐང་པ་གཡོན་པར་གནས། །རྐང་པའི་གནད་དང་སྣ་ཡི་རྩེ། །པུས་མོའི་རྗེས་སུ་སྐྱོད་པ་འོ། །ཡི་དྭགས་བརྟུལ་ཞུགས་མེར་བཤད་པའོ། །རྩ་ཉིད་དུ་ནི་ཡོངས་སུ་གྲགས།། གཙོ་བོའི་འགྱེད་པ་གཡོན་པའི་རྩ། །མཆན་ཁུང་དང་ནི་མཆན་ཁུང་མིང ། །དྲག་པོའི་ཚོགས་ཀྱི་དེ་བཞིན་རྩ། །དྲ་བར་གནས་པའང་དེ་བཞིན་ནོ། །ནུ་མའི་ཁུང་གི་གྲངས་ཀྱིས་ནི། །སྟོང་གི་ཆ་རུ་དེ་བཞིན་བཤད། །དེ་རྣམས་འབྱེད་པའི་རང་བཞིན་རྩས། །ལུས་སུ་ཡོངས་སུ་གྲགས་པ་ཉིད། །ས་གདུགས་དཔུང་པ་གཡོན་པ་དང ། །དེ་བཞིན་བྲང་དུ་ཡང་དག་གནས། །མཚམས་དང་ཚིགས་ཀྱི་རྩ་ཡི་མཐའ། །དེ་བཞིན་འགྲོ་བའི་ལག་པ་དང ། །སྐྱ་མཆེད་དྲུག་གི་དབྱེ་བ་ཡིས། །རང་བཞིན་གྱིས་ནི་གྲུ་བཞི་དང ། །རང་བཞིན་གྱིས་ནི་འབབ་པའི་གནས། །རང་དང་སྐྱེ་བུ་ལ་ཡང་སྐྱེ། །དོན་དམ་ཉིད་དུ་དངོས་མེད་ཅིང ། །འཇིག་རྟེན་ལ་ཕན་སྙིང་བརྩེ་བས། །ཀུན་ཏུ་འབྱུང་བ་སྐྱོན་མེད་པ་འོ། །འགྲོ་བའི་གནས་ཀྱི་ཡེ་ཤེས་ཆོ་ག་མཆོག་།དངོས་མེད་དག་པ་དོན་དམ་དབུ་མ་པ། །མ་རིག་ནས་བརྩམས་བཅུ་གཉིས་ས་དབང་ཕྱུག་།བྲི་ཥ་བྷ་སོགས་རེ་བ་ནི། །བདུད་རྩི་སྦྱོར་བ་མི་སྐྱེ་འོ། །
215a
༄#། །དབུས་སུ་ཡང་དག་སྦྱོར་བ་གནས། །སྲིད་པའི་ཉེས་པ་རྣམ་པར་སྤངས། །བཅུ་གཉིས་སྦྱོར་བའི་གནས་སུ་ན། །རྣལ་འབྱོར་པ་ནི་མཁས་པས་ཤེས། །རྩའི་འཁོར་ལོ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་གཞན་ཡང་བཤད་བྱ་བ། །ཀུན་ནས་སྐྱེ་བའི་དབྱེ་བའི་ཆ། །སྐྱེས་བུ་སོ་སོར་གནས་པ་དང ། །རྩ་དང་དབུགས་ནི་སོ་སོ་ཡི། །གཞན་གྱི་རྐང་པ་ཆད་པ་ན། །རྣམ་པ་མང་དུ་བདག་པོའི་རླུང ། །འབྱུང་བའི་རླུང་ནི་ཆད་པར་འགྱུར། །བྲང་གི་འོག་དང་རྐེད་པའི་གོང ། །རླུང་གི་དཀྱིལ་འཁོར་གྱིས་བསྐོར་བ། །དངོས་མེད་དངོས་པོ་ཡང་དག་གནས། །ཁ་དོག་མེད་ལ་མཚོན་ཀུན་དངོས། །གཟུགས་མེད་ཡེ་ཤེས་གཟུགས་ཅན་དང ། །སྟོང་དང་སྟོང་མིན་དོན་གྱི་གནས། །ཡེ་ཤེས་དབང་ཕྱུག་རྒྱལ་པོ་ཆེ། །རླུང་གི་དཀྱིལ་འཁོར་ལ་བརྟེན་ཅིང ། །རྣམ་ཤེས་ལས་ནི་བྱེད་པ་ཉིད། །བཅུ་གཉིས་དངོས་པོ་བསྒྱུར་བའི་བདག་།སུམ་བརྒྱ་དེ་བཞིན་དྲུབ་ཅུ་ཡི། །ཆུ་ཚོད་དབུགས་ནི་རྩ་བཞིན་ནོ། །སྔ་དྲོ་དཀར་པོ་རྒྱུ་བ་ནས། །ཉིན་དང་མཚན་དུ་ཤེས་པར་བྱ། །འཕོ་བ་བཅུ་གཉིས་བདག་ཉིད་ནི། །ཉིན་མཚན་དུ་ཡང་དེ་བཞིན་ནོ། །བཅུ་གཉིས་ས་ལ་ཆད་པ་ཡིས། །བྱང་དུ་བགྲོད་པའི་མཚན་མོའོ། །ལྷོ་ཕྱོགས་སུ་ཡང་སྔོན་བཞིན་དུ། །ཉིན་མོའི་རླུང་ནི་ཆད་པའོ། །བི་ཤུའི་བར་དུ་ཟས་
215b
སྦྱར་བ། །རིམ་བཞིན་རབ་ཏུ་གྲགས་པ་ཉིད། །དབུགས་ཀྱི་སྦྱོར་བའི་རིམ་པ་འདི། །ཡེ་ཤེས་ཅན་གྱིས་ལས་ལ་སྦྱར། །མཐའ་མའི་ཡུལ་དང་ཡུལ་འཁོར་གྱི། །རིམ་བཞིན་འཁོར་ལོས་བསྒྱུར་བའོ། །རོ་ཧི་ཏ་དང་མོ་ཧི་ཏ། །བཟང་པོ་ཁྱུ་མཆོག་བླ་མ་དང ། །ཀུར་མ་མ་ཀ་རནྡྷ་དང ། །དེ་བཞིན་རྨི་ལམ་ལྐུགས་པ་དང ། །ཀུན་རྨོངས་འཇིགས་དང་འདོད་པ་ཡི། །བཅུ་གཉིས་ས་ན་སྲིད་པའི་སྐྱོན། །རོ་ཧི་ཏ་ལ་ལྷ་མཆོད་བྱ། །མོ་ཧི་ཧ་ལ་ནོར་རྙེད་ཅིང ། །བཟང་པོ་ལ་ནི་མཛེས་པར་བཟའ། །མང་དུ་ཁྲོ་བ་བྷེ་ཥ་བ། །ཀུར་མ་མཆོག་ཏུ་སེམས་ཁྲལ་ཅན།། མ་ཀ་ར་ལ་གཏམ་གྱི་གཞི། །བླ་མ་བསྒྲུབ་པའི་དངོས་པོ་ནི། །རནྡྷ་ལ་ནི་སྡིག་པའི་བློ། །བྱཱ་ཀུ་ལི་དང་ཉིད་དང་ནི། །སཝ་པྣ་ལ་རྨི་ལམ་ཚུལ། །རྨོངས་པ་སེམས་ཁྲལ་མཆོག་དང་ནི། །གླུ་དང་རིག་པ་ཀློག་ལ་མཁས། །འདོད་པ་ལ་ནི་འཁྲིག་པར་བཤད། །བཅུ་གཉིས་སྲིད་པའི་ཉེས་སྐྱོན་ནོ། །ཤེལ་ལྟ་བུར་ནི་གཅིག་གིས་གཙོ། །རྒྱས་པར་ཚོན་རྩི་བདུན་གྱིས་སོ། །དེ་ཡི་རྣམ་ཤེས་སྲིད་པའི་དངོས། །ཡུལ་ནི་དངོས་པོ་མེད་པར་གནས། །ཡེ་ཤེས་ཀྱི་ལེའུ་ཞེས་བྱ་སྟེ་གསུམ་པའོ།། །།དེ་ནས་གཞན་ཡང་བཤད་བྱ་བ། །སྐུ་གསུམ་ཇི་ལྟར་སྟོང་པ་ནི། །འདི་ནི་དམིགས་པ་བཅས་པས་གཟུང ། །རང་བཞིན་དང་བྲལ་མ་ཡིན་པ། །དངོས་པོ་ནམ་མཁའ་བརྟག་པར་བྱ། །དངོས་པོའི་ཉེས་པ་
216a
༄#། །སྤངས་པ་ཡིས། །གཟུགས་སུ་མི་གནས་ཟད་པའོ། །ལམ་ལ་གནས་པའི་རྣལ་འབྱོར་པས། །གཟུགས་ནི་མི་གནས་ཟད་པར་བྱེད། །ཕྱི་སྟོང་འོག་ཀྱང་སྟོང་པ་ཉིད། །སྐྱོན་མེད་དབུས་ནི་སྟོང་པའོ། །ཐམས་ཅད་སྟོང་པ་ཉིད་དང་ནི། །འགྲོ་བའང་སྟོང་པ་ལྔ་པའོ། །ཡུལ་ལྔ་ཡང་ནི་སྟོང་པ་ཉིད། །དེ་བཞིན་དབང་པོ་ལ་སོགས་པའང ། །སྟོང་པར་མི་བརྟག་ཡང་དག་གནས། །དེ་ཕྱིར་རྡུལ་མེད་སྟོང་པའི་ཚུལ། །ཇི་ལྟར་ཞིང་པས་ཞིང་ནི་ཐབས་ཀྱིས་ཡང་སྦྱངས་ནས། །ཐོང་པས་རྨོ་ཞིང་ཐོང་པས་ཀུན་དུ་རབ་བསྒྱུར་པས། །ཞིང་ལ་གནོད་པའི་རྩཝ་དང་ལྗོན་ཤིང་རྒྱ་ཆེར་སེལ། །དེས་ན་རྣམ་དག་གཙང་སྦྲ་ཅན་ཞེས་བརྗོད་དེ་བཞིན། །དེ་བས་མཆོག་ཏུ་སྦྱོར་བའི་བདག ། གཉིས་པ་ཡང་ནི་གཞག་པར་བྱ། །དེ་ལྟར་དེ་བཞིན་ཕྱི་ཉིད་བཀྲུ། །དེ་ཕྱིར་མཁས་པས་སྟོང་པ་ཉིད། །གསུམ་གྱི་ཚུལ་གྱིས་དགག་པར་བྱ། །དེ་བཞིན་གཟུགས་དང་སྟོང་པ་བཞིན། །དབུས་སུ་རྣམ་ཤེས་ས་བོན་ནོ། །ས་བོན་ས་བོན་མྱུ་གུ་དང ། །གཟུགས་དང་དབང་པོ་རྩ་ཡི་གཞི། །རང་བཞིན་ཚུལ་གྱིས་ཆ་ཤས་མཚན་ཉིད་ནི། །སྐྱོན་མེད་རྡོ་རྗེའི་རང་བཞིན་མིང་དག་གནས། །དབང་པོ་དྲུག་དང་ཆོ་ག་དྲུག་ནི་ཡང་དག་འབྱུང ། །ལྷ་གནས་བཅུ་གཉིས་ས་ནི་སརྦ་དང ། །སྔགས་ཀྱི་ཡི་གེ་མཆོག་ཉིད་ནི། །ཡིད་
216b
ཀྱི་འཕྲུལ་པས་བསྒྲུབ་པར་བྱ། །ེ་མའོ་སེམས་ཅན་ཉོན་རེ་མོངས། །སྔགས་ནི་ཨུ་གུ་ཨུ་གུ་དང ། །ཉམས་པའི་གཟུགས་བརྙན་མཉམ་བསྒོམ་པ། །སྙིང་པོ་ཉིད་ཀྱིས་རྣམ་པར་སྤངས།། སྔགས་ཀྱི་ཡི་གེ་དམ་པ་ནི། །དེ་ཕྱིར་ཡིད་ཀྱིས་རྗེས་སུ་འབྲང ། །སེམས་ཅན་ཐམས་ཅད་བསྐྱེད་ཅིང་གཡོ་ཞིང་བསྐྱེད་པ་ཡི། །སྔགས་ནི་བློ་དང་ལྡན་པས་ངེས་པར་ཤེས་པར་བྱ། །དེ་ཉིད་མེད་པའི་སྔགས་ཀྱིས་འགྲོ་བ་རྨོངས་པར་མཐོང ། །ལོག་པར་སྨྲ་བ་ཡི་ནི་གཟུགས་བརྙན་སེམས་དང་ནི། །སྔགས་ཀྱི་བདག་ཉིད་དོན་དམ་མཆོག་གི་ཡི་གེ་ཡིས། །ལས་བཞི་ཡི་ནི་ཆོ་ག་མོངས་སུ་གྲགས་པའོ། །སྟོང་པ་ཉིད་ཀྱི་ལེའུ་ཞེས་བྱ་སྟེ་བཞི་པའོ།། །།དེ་ནས་གཞན་ཡང་བཤད་བྱ་བ། །སྐྱོན་དང་ཡོན་ཏན་སྤངས་གྱུར་པའོ། །དབུ་མའི་གནས་ནི་སྐྱོན་མེད་པའོ། །རང་བཞིན་དག་པའི་ཡིད་ལས་འབྱུང་བའི་ལུས། །བདག་མེད་རྣལ་འབྱོར་གཅིག་གི་ཡིད་ཀྱིས་སྦྱར་བར་བྱ། །ཇི་ལྟར་མ་བསྲེགས་སྣོད་ཀྱི་ཆུ་བཞིན་དུ། །ཁྱོད་ཀྱིས་ནང་གི་རྣལ་འབྱོར་མང་དུ་འཇིག་པའོ། །ཇི་ལྟར་རྫ་མཁན་གྱིས་ནི་མེ་ནི་ཀུན་ཏུ་གང་བས་འགེངས། །དུ་མ་དབུས་སུ་ཟད་པར་བྱས་པས་རང་གི་གཟུགས་བཞིན་ནོ། །ནང་གི་ཡེ་ཤེས་དབང་ཕྱུག་མེ་ནི་འབར་བ་ཡིས། །དེ་ཡི་གཞིག་པས་འདིར་ནི་གཟུགས་ནི་གྲོལ་བ་བཞིན། །རང་བཞིན་དག་པས་དག་པའི་ཆོས། །
217a
༄#། །དག་པའི་དབྱངས་ཀྱི་ལམ་ཆེན་པོ། །མ་དག་རྨོངས་བའི་རྒྱ་མཚོ་ནི། །རྣམ་རྟོག་བཅས་པ་རྣམ་པར་སྤང ། །དག་པའི་ཆོས་ནི་མཆོག་ཏུ་ཞི། །དག་པའི་ཆོས་ནི་སྐྱོན་མེད་པའོ། །དག་པས་བྱང་ཆུབ་ཐོབ་པའི་ཕྱིར། །དག་པའི་ཆོས་ནི་རབ་ཏུ་བསྟན། །དང་པོར་གཞུ་ལས་རྒྱལ་བ་ཉིད། །གཤེར་བ་ནུབ་ཏུ་མཆོག་ཏུ་བརྩོན། །སྐུ་གསུམ་མ་ནི་ལྷན་ཅིག་གནས། །བློ་དང་ལྡན་པས་ས་བོན་བསྐྲུན། །དེ་ཡི་གནས་སུ་སྲོག་གསུངས་པ། །སྔ་དྲོ་སྐྱེས་བུ་གནས་པ་ཉིད། །དབུགས་ནི་ཡང་དག་འཕོ་བའི་ཚེ། །རིམ་བཞིན་བཅུ་གཉིས་སྦྱར་བར་བྱ། །ལྟེ་བར་ཕྱུགས་ཀྱི་ཞགས་པ་ནི། །དེ་ཡི་ས་བོན་ཕྱུགས་སུ་གསུངས། །ཆུ་ཤིང་མེ་ཏོག་ལྟེ་བར་གནས། །སྙིང་གར་འགྲེང་བར་གནས་པ་ཉིད། །ཁ་ནི་འོག་ཏུ་ཟླུམ་པ་ཉིད། ། མཁས་པ་ཡིས་ནི་རྒྱས་པར་བྱ། །བདུད་རྩིའི་ཡི་གེ་སྒྲ་ཡིས་ནི། །ཡིད་འོང་ལྷན་ཅིག་དགྲམ་པར་བྱ། །དེ་ཡི་དབང་ཕྱུག་ཡེ་ཤེས་རྒྱལ། །སྒོང་སྐྱེས་བཅུ་གསུམ་དབང་ཕྱུག་གོ་།ཁ་དོག་བདུན་པར་རྣམ་མང་པོ། །དེ་བཞིན་འོད་ཟེར་ཉི་མ་བརྒྱ། །ཡེ་ཤེས་ཀྱིས་ནི་ཤེས་བྱ་བརྟག་།ཤེས་བྱས་འགྲོ་བ་བརྟག་པའོ། །ཇི་ལྟར་དར་གྱི་མིག་གི་བར། །བློ་མེད་ཐ་དད་འགྱུར་བའོ། །ཇི་ལྟར་རྨོངས་པའི་མི་ཤེས་པ། །ཡེ་ཤེས་ཀྱིས་ནི་ཉོན་མོངས་གཅོད། །དེ་དག་མར་མེའི་རྒྱ་མཚོ་ཡིས། །ཡེ་ཤེས་ཅན་གྱིས་རང་འདོད་ལམ། །དེ་ནས་སེམས་ཅན་ཀུན་རང་བཞིན། །ཡན་ལག་
217b
རླུང་གིས་གཟིར་བ་དང ། །རང་དབང་ཉིད་དང་རླུང་དང་ནི། །དེ་བཞིན་བ་སྤུའི་བུ་ག་འདི། །རླུང་དང་མཉམ་པའི་ལུས་མེད་ཅིང ། །རླུང་གི་སེམས་ལའང་མེད་པའོ། །ལུས་ཀྱི་དབྱིངས་ཉིད་ལ་ཡང་ནི། །སྟོང་པ་ཡན་ལག་ཀུན་ལ་གནས། །ཐམས་ཅད་ཆུ་ཡི་རང་བཞིན་ཉིད། །ལུས་པོ་ཡང་ནི་སེམས་ཀྱི་ནི། །ཐམས་ཅད་ཤ་ནི་ཆུ་རང་བཞིན། །ཆུ་ཡིས་ཐམས་ཅད་ཁྱབ་པའོ། །ས་དང་ཆུ་ཡང་མཚུངས་པར་ནི། །ཕྱི་རོལ་ཁྱབ་པར་བརྟགས་པའོ། །དེ་བཞིན་ལུས་པོ་ཡི་ནི་ཆུ། །ཐམས་ཅད་ཁྱབ་པར་ཡང་དག་གནས། །ལུས་ལ་མེ་ནི་དྲོད་བཅས་པས། །དབྱིབས་ལ་ཐམས་ཅད་ཀུན་ནས་འབར། །ས་ཡིས་ཐམས་ཅད་ཀུན་དུ་ནི། །གཟུགས་ལ་ཡོན་ཏན་དབང་པོས་བརྒྱན། །དེ་ཕྱིར་འབྱུང་བ་བཞི་ཡི་ལུས། །ཁམས་དང་རྩ་ཡི་ཁྱབ་པའོ། །རྩ་ནི་མཉམ་པའི་ཆ་ཡི་དངོས། །མཉམ་པའི་དབྱིབས་སུ་རྣལ་འབྱོར་པས། །ལྷ་བསྒོམ་པའི་ལེའུ་ཞེས་བྱ་སྟེ་ལྔ་པའོ།། །།དེ་ནས་གཞན་ཡང་བཤད་བྱ་བ། །ལྷ་རྣམས་ལྔ་ནི་གང་དུ་གནས། །བུག་པ་གསུམ་དང་སྒོ་དགུ་ཡི། །དེ་བཞིན་བདག་ཉིད་ལྷ་ཡི་གནས། །རླུང་བསྔམས་སྐུ་ཡི་མེར་བཅས་པའི། །སྙིང་གའི་སྒོང་སྐྱེས་ཀྱི་ནི་གནས། །ཕྲ་རབ་རྡུལ་གྱི་རྣམ་པ་ལྟར། །དེ་བཞིན་སྒོ་ནས་མཚོན་པའོ། །སྒོ་དགུ་ཡི་ནི་དབྱིབས་ཉིད་དང ། །འདབ་མ་བརྒྱད་པར་ཡང་དག་གྲགས། །ཕྲ་རབ་རྡུལ་གྱི་རྣམ་པ་བཞིན། །དེ་ལྟར་ལྷ་ནི་ཕྲ་ཞིང་ཕྲ། །ལྔ་པ་ལྔ་ཡི་ལྔ་བདག་ལྷ། །རང་བཞིན་གྱིས་ཁྱབ་རྣམ་པར་
218a
༄#། །སྤང ། །སོ་ཏི་ཀེ་ནི་གཅིག་ཉིད་དང ། །དེ་བཞིན་ཆུ་དང་ཆུ་མིན་གཉིས། །དེ་བཞིན་ཇི་ལྟར་བུག་པ་ཉིད། །ཚིགས་དགུ་དང་ནི་སྒོ་དགུ་དང ། །རྩ་དགུར་ཡང་དག་གྲགས་པ་ཉིད། །དང་པོར་སྟོང་པ་ཉིད་ཀྱི་དངོས། །སྟེང་དང་དབུས་དང་མཉམ་པའི་གནས། །གཟུགས་དང་ཚོར་བ་མཉམ་པ་ཡང ། །དངོས་མེད་སྟོང་པའི་ངོ་བོའོ། །རྒྱ་མཚོ་ཆུ་ཡི་དབྱིབས་དང་ནི། །དེ་དབུས་གེ་སར་བཅས་པའོ། །དགུ་རུ་ཆུ་ནི་སྦྱར་བར་བྱ། །དེ་བཞིན་པདྨ་ཆུ་ཤིང་གི་།དེ་ཡི་ཡེ་ཤེས་དབང་ཕྱུག་ལྷ། །སྒོང་སྐྱེས་ཁྱིམ་པ་མཉམ་པར་བརྟེན། ། འདབ་མ་བརྒྱད་ལ་ས་བོན་ནི། །རིམ་པ་ཇི་བཞིན་རྩ་ཡི་ལྷ། །དེ་ཡི་རྒྱབ་ཀྱིས་རྩ་ལ་ཡང ། །བདག་ཉིད་སྒོ་ནི་ཕྲ་བ་བཞིན། །ཕྱེ་ནས་བདག་ཉིད་བརྒྱན་པ་ནི། །ཀུན་ནས་ལྷ་ཡིས་ལྷག་པར་བརྒྱན། །དེ་ཡི་བདག་ཉིད་ལྷར་སྦྱངས་པ། །སྦྱོར་བའི་ལུས་སོགས་ཉིད་ཀྱི་དབྱིབས། །སྦྱོར་མེད་གལ་ཏེ་སྦྱོར་བྱས་པས། །སྔོན་བཞིན་ཕུན་སུམ་ཚོགས་པར་འགྱུར། །རྡོ་རྗེ་སྙིང་པོའི་ལུས་ལ་ནི། །ལྷག་པར་ལྷ་དང་ལྷ་ཡིས་བརྒྱན། །ཇི་ལྟར་གདོལ་པའི་ཁང་པ་མེས་བསྲེགས་ན། །ལྷ་ལ་སོགས་པའི་གནས་སུ་རབ་བྱེད་པ། །དགེ་དང་རིགས་ཅན་མཁས་པ་མཉམ་པར་བསྟེན། །དེ་བཞིན་རྨོངས་བ་རྒྱ་མཚོ་ལྔ་ཡི་གཞི། །སྒོང་སྐྱེས་ཀྱི་ལེའུ་ཞེས་བྱ་སྟེ་དྲུག་པའོ།། །།དེ་ནས་གཞན་ཡང་བཤད་བྱ་བ། །ངེས་པར་རྣལ་
218b
འབྱོར་པས་རྡུབ་པ། །ཇི་ལྟར་རྡུབ་པའི་བདག་ཉིད་ནི། །སྒོ་ནི་ས་བོན་གྱིས་བསྡམས་བྱ། །ས་བོན་དགུ་ཡིས་བསྡམས་པ་ཡིས། །རྣལ་འབྱོར་དགུ་ཡི་བདག་ཉིད་དོ། །ཇི་ལྟར་ཚངས་པའི་སྒོ་བསྔམ་ཞིང ། །མཆོད་རྟེན་གྱི་ཡང་སྒོ་དགུ་ཡང ། །དབུགས་མི་གཡོ་བའི་དངོས་པོ་ཡིས། །བདུད་རྩིའི་ཡི་གེ་བསྡམ་པར་བྱ། །བསྡུས་ནས་གནས་པའི་མཐའ་རུ་ནི། །རང་བཞིན་གྱིས་ནི་གཡོ་བ་ཉིད། །གཞན་ཡང་དྲག་པོའི་མིང་གཉིས་ནི། །དུད་པའི་ས་བོན་གྱིས་ནི་རྩེ། །དེ་ལྟར་རྡུབ་པ་མཉམ་པ་ཉིད། །ཡི་གེ་ཕྱེད་དང་གཉིས་སྤྱད་བྱ། །ཧཱུཾ་གི་རྣམ་པ་གཡོ་བའི་དབྱིབས། །མཉམ་པར་རྡུབ་པའི་འབར་བ་ཉིད། །འཚེ་མེད་རྣམ་པར་རྩེ་བ་ཡིས། །འཁོར་བ་འཇིགས་པ་བསྟེན་པར་བྱ། །བཅུ་གཉིས་ས་ཡི་དབང་ཕྱུག་མ། །དེ་བཞིན་དབུགས་ནི་རྡུབས་པ་ཡིས། །ཚེ་རབས་སྔོན་གྱི་སྡིག་པ་དང ། །ཡུལ་དང་དབང་པོ་ཉེ་གནས་པ། །བདེ་སྦྱོར་རྡུབ་པའི་རྒྱ་མཚོ་ཡིས། །ཡེ་ཤེས་ཅན་གྱིས་སྡིག་པ་གཅོད། །ཇི་བཞིན་སྔོན་དུ་མཉམ་དྲངས་ནས། །མཐའ་ཡི་གཅིག་ནི་གཟུང་བྱས་ལ། །ས་བོན་ཡི་གེ་གཅིག་བཟུང་པས། །དེ་ཡིས་སྒོ་བརྒྱད་མཉམ་པའོ། །བཅུ་གཉིས་སྤངས་པའི་བསྒོམ་པ་ཡིས། །སྒོ་བརྒྱད་རྣམ་པར་རྩེ་བའོ། །ཇི་ལྟར་རྒྱལ་པོ་སྦྱངས་པས་རབ་བསྒྱུར་བ། །དྲོད་དང་བ་ལང་རང་བཞིན་ལུས་ཀྱི་ལས། །ཕྱིས་ནི་རང་འདོད་རྦ་རླབས་རྒྱ་ཆེན་པོ། །དེ་བཞིན་ལུས་ནི་རང་འདོད་མཚོན་གྱི་གཙོ། །འཕོ་
219a
༄#། །བ་སྦྱོར་བའི་ལེའུ་ཞེས་བྱ་སྟེ་བདུན་པའོ།། །།དེ་ནས་གཞན་ཡང་བཤད་བྱ་བ། །འབྱིན་བྱེད་ཚོགས་ནི་དགུ་བ་ཉིད། །ཕྲ་བའི་རྣམ་པར་བཤད་པ་ཉིད། །རླུང་གི་དཀྱིལ་འཁོར་གྱིས་བསྐོར་བའོ། །བཅུ་གཉིས་དགུ་ཡི་རིམ་པ་ནི། །དགུ་ཡི་སྦྱོར་བ་ལ་རབ་བརྟེན། །འདི་ནི་དགུ་ཡི་རླུང་ཇི་བཞིན། །རྣམ་ཤེས་རླུང་གི་དཀྱིལ་འཁོར་ལ། །རླུང་གི་དབུས་སུ་མེ་ཡི་དབྱིབས། །མེ་ཡི་དུ་བའི་ཡིག་དེ་བཞིན། །ུ་ནི་རེ་ཕར་ཡང་དག་ལྡན། །སྒྲ་ནི་རྒྱ་མཚོལ་བཤད་པའོ། །དེ་བཞིན་ཐིག་ལེ་ཡེ་ཤེས་གནས། །སྒྲ་དང་སྒྲ་ཡིས་བསྒོམ་པའོ། །བཤད་པའི་སྒོ་ནས་དེ་བཞིན་དུ། །སྲིད་པའི་ཉེས་ལས་ཡང་དག་འཕོ། །སྣ་དང་རྣབ་མིག་ལས་མི། །མི་རྣམས་ཀྱི་ནི་རྒྱལ་པོར་འགྱུར། །ལྟེ་བའི་ཐིག་ལེ་དེ་བཞིན་སྟེང། །གོང་གི་གནས་ནི་ཤེས་པར་བྱ། །སེམས་ཀྱི་རྩ་དང་འདྲ་བ་ཡི། །སྙིང་གར་དེ་བཞིན་སྦྱོང་བའོ། །འཕྱར་བར་རླུང་གི་ས་བོན་ནི། །མཉམ་པའི་གནས་སུ་ཤེས་པར་བྱ། །དེ་ལྟར་ང་ཡིས་མཚན་ཉིད་བཤད། །གཞན་དུ་བླ་མ་སྟོན་པའོ། །སྟེང་དུ་ཚངས་པའི་སྒོ་འདི་ནི། །མོད་ལ་འཕོ་བའི་མིང་དུ་བཤད། །ཇི་ལྟར་བུང་བ་མེ་ཏོག་བུ་གར་ནི། །རྒྱགས་པས་མྱོས་ནས་སེམས་མི་ཞུ་བ་ལྟར། །དེ་བཞིན་ཡེ་ཤེས་དབང་ཕྱུག་སྒོར་གནས་ལ། །ུད་\?\་ཏྲ་ཡི་རབ་ཏུ་པས་འཇིག་པའོ། །ེ་མའོ་ཆོས་ནི་མཆོག་གི་ལམ། །ེ་མའོ་འཁོར་བ།
219b
གཅོད་བྱེད་པ། །ེ་མའོ་གྲོལ་བའི་གོ་འཕང་གནས། །ེ་མའོ་ཡེ་ཤེས་ངོ་མཚར་ཆེ། །འཕོ་བ་སྦྱོར་བའི་ལེའུ་ཞེས་བྱ་སྟེ་བརྒྱད་པའོ།། །།དེ་ནས་གཞན་ཡང་བཤད་བྱ་བ།། སྔོན་དུ་གསུངས་པའི་མཚན་ཉིད་ལྡན། །དང་པོར་གཟུགས་ནི་སྦྱང་བར་བྱ། །བདག་ཉིད་མདུན་དུ་ཡང་དག་གནས། །བདག་ཉིད་ལྟ་དང་དེ་བཞིན་གཞན། །ཤེས་པ་གཞན་ལ་རྨོངས་པ་རྣམས། །མིང་གི་ཡི་གེ་མཉམ་པོར་དྲང ། །འདི་ཡི་ཡེ་ཤེས་དབང་ཕྱུག་ལྷ། །སྒོང་སྐྱེས་ཀྱི་ནི་དབུས་སུ་ཐིམ། །ཡེ་ཤེས་ལུས་ལ་བསྒོམ་བྱས་པས། །བློ་ལྡན་ལུས་ནི་རྣམ་པར་འཕོ། ། སྔོན་དུ་རྡུབ་ཅིང་འབྱིན་པ་ཡིས། །སྔོན་བཞིན་ལྷན་ཅིག་འཕོ་བའོ། །སྡིག་བྲལ་སྤྱོད་པ་མེད་པ་ཉིད། །སྡིག་སྤངས་སྤྱོད་པས་ཡང་དག་གནས། །ཉོན་མོངས་རྒྱ་མཚོའི་སྡིག་པ་སྦྱོང ། ། སྡིག་སྤོང་དེ་བཞིན་རྨོངས་པ་དང ། །སྦྱོར་བ་ཡིས་ནི་སྡིག་པ་སྦྱོང ། །སྤྱོད་མེད་སྡིག་པ་སྦྱོང་བའོ། །རྟག་ཏུ་སྡིག་སྦྱོང་ལམ་ལ་གནས། །སྦྱོར་བའི་ལུས་ནི་སྐྱོན་མེད་པའོ། །དབུགས་ཀྱི་མཐར་ནི་གནས་པ་ཡིས། །འདི་ཡིས་སྟེང་དུ་གྲོལ་བར་གནས། །དབུགས་ནི་ལྟེ་བར་གཏོང་བ་ཡིས། །སེམས་ནི་གཟུགས་མེད་སྲིད་པར་རོ། །སྡིག་པ་ཀུན་ནས་མི་གནས་པའོ། །ཉེས་པ་ཀུན་གྱི་གོས་པ་ནི། །འཕོ་བའི་སྦྱོར་བ་སྦྱར་བར་གྲོལ། །ཕ་དང་མ་ནི་གསད་བྱ་ཞིང ། །རྒྱལ་པོ་དང་ནི་གཙང་སྦྲ་གཉིས། །ཡུལ་འཁོར་བཅས་པ་བཅོམ་བྱས་ན། །མི་དེ་དག་པ་
220a
༄#། །ཞེས་སུ་བརྗོད། །དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ཇི་སྲིད་ཡུན་རིང་འཚོ་ཞིང་ཆོས་སྤྱོད་པ། །དེ་སྲིད་དགེ་བའི་རྒྱུན་ནི་འཕེལ་བའོ། །ཇི་ལྟར་བུམ་པ་མཁན་ནི་མཁས་པ་ཡིས། །ལོ་ཟླས་གནས་ནི་སྣོད་ནི་དུ་མས་འགེངས། །མིག་དང་དབྱིབས་མེད་འཁོར་ལོ་འཇི་བའང་མེད། །རྣམ་ཤེས་ཡེ་ཤེས་རྣམ་པ་ཀུན་དུ་བརྟག་།ལུས་ཡང་དག་པར་འཕོ་བའི་ལེའུ་ཞེས་བྱ་སྟེ་དགུ་པའོ།། །།དེ་ནས་གཞན་ཡང་བཤད་བྱ་བ། །སྦྱོར་བའི་བསྟན་བཅོས་སྒྲུབ་པ་པོས། །རྡུབ་པའི་བདག་ཉིད་དབྱེ་བ་ནི། །སོར་བཞི་ལས་ནི་ནམ་མཁའ་འོ། །འགེངས་པའི་ལས་ནི་སྐར་མ་དང ། །གོང་བུ་མེ་ཡི་ཕུང་པོ་ཉིད། །མེ་ཡི་དབུས་སུ་ཡི་གེ་ཨ། །ནམ་མཁའ་དང་ནི་ཟླ་བ་འདི། །དབུས་སུ་བདུད་རྩིའི་ཐིག་པའོ། །འཁོར་ལོ་ཉི་མའི་དྲ་བ་ཅན། །བདུད་རྩིའི་ཐིགས་པ་རྣམ་པར་འཕྱིན། །ས་བོན་འབར་ཞིང་འབར་བ་ཡིས། །དབུས་སུ་བདུད་རྩིའི་ཡི་གེའོ། །དབུས་སུ་ཨ་ཡིག་སྔོན་བོའོ། །འོད་ཟེར་ལ་ནི་དེ་བཞིན་ཕྱོགས། །རི་རབ་དབུས་སུ་འབར་བ་ནི། །ཐིག་ལེའི་སྒོ་རུ་སྣང་བའོ། ། ཡིག་རྣམ་པའི་བདུད་རྩིའི་ཆུ། ། ཁ་དོག་གཉིས་པའི་ལྷ་ཉིད་དོ། །ཇི་ལྟར་བུག་པར་སྟོང་པ་ཉིད། །རྟག་ཏུ་སྟོང་པའི་ལྷ་ཉིད་དོ། །སྣ་བུག་ཇི་ལྟར་བཟོད་པ་ཡིས། །ལྕེ་ཡི་ཡང་ནི་བདུད་རྩིའོ། །ཡི་གེ་གསུམ་
220b
ནི་སྦྱར་བར་བྱ། །རྨོངས་པ་མགྲིན་པ་དབྱངས་ཡིག་སྦྱར། །ུ་ནི་རྣམ་པ་རིམ་བཞིན་མཆོག་།ཀུན་ནས་ཉོན་མོངས་ལྷག་པར་སེལ། །ཧཱུཾ་གི་ཡི་གེ་དབང་ཕྱུག་མཆོག་།སྔོན་དུ་པདྨ་མཉམ་པ་ཉིད། །སྒོང་སྐྱེས་སྔོན་དུ་བཟོད་པའོ། །དེ་ཡི་ལྷ་ནི་ལྷག་པར་རྫོགས། །འོད་ཟེར་བྱེ་བ་རྣམ་མང་པོ། །དེ་ཡི་ཡེ་ཤེས་དབང་ཕྱུག་རྒྱལ། །དབུགས་མི་གཡོ་བར་བསྒོམ་པར་བྱ། །སྟོབས་འཇིགས་པ་ཡི་དབྱུག་པ་ཅན། །ཧཱུཾ་གི་རྣམ་པ་མངའ་བདག་དབང ། །ལྟེ་བར་ཇི་ལྟར་གཙོ་བོ་ཉིད། །ེ་ཡི་རྣམ་པ་བརྡ་ཡི་ལུས། །ཀུན་ནས་དགོད་པ་རྣམ་པར་བཤད།། བདག་ཉིད་ལྷ་དང་ལྷ་གཞན་ནི། །བདག་ཉིད་ལྷ་ནི་མཆོག་ཡིན་ནོ། །བདག་ཉིད་གདན་དུ་གྲགས་པ་ཡིས། །བདག་ཉིད་ལྷ་ནི་མཆོད་པར་བྱ། །བདག་གི་གདན་གྱི་ལེའུ་བྱ་བ་སྟེ་བཅུ་པའོ།། །།དེ་ནས་གཞན་ཡང་བཤད་བྱ་བ། །འོད་ཟེར་གྱི་ནི་མཚན་ཉིད་དག་།རྡོ་རྗེ་ལྕགས་སྒྲོག་གི་ཕྱག་རྒྱས། །ས་ནི་སྦྱང་བར་བྱ་བའོ། །ཧཱུཾ་གི་རྣམ་པས་པདྨ་བསྒྱུར། །ཉི་མའི་དཀྱིལ་འཁོར་གཞི་ལ་ནི། །ཅོད་པན་རབ་ཏུ་འགོད་པར་བྱ། །གལ་ཏེ་བདག་ཉིད་ལྷར་འདོད་པས། །དབུགས་ལས་ལྷ་ནི་དབྱུང་བར་བྱ། །གཟུགས་རྫོགས་ཡིད་དུ་འོང་བ་ཉིད། །མཆོག་གི་གོ་འཕང་བསྒོམ་པར་བྱ། །གནས་བརྒྱད་སོ་སོ་ལྷ་ལ་ནི། །ཕྱག་རྒྱ་བརྒྱད་ནི་བསྟན་པར་བྱ། །ལས་དང་ལས་ཀྱི་ཁྱད་པར་ལ། །སྔགས་པས་འདི་
221a
༄#། །ཡི་ས་བོན་བཟླས། །ས་ཡི་རྣམ་པ་ཞི་བ་ཉིད། །དེ་བཞིན་ཀྵ་ཡི་རྣམ་པས་རྒྱས། །དབང་ལ་ཡཾ་གི་ཡི་གེ་ཤིས། །ཧ་ཡི་རྣམ་པ་མངོན་པར་སྤྱོད། །མཆོད་པ་ཆོ་ག་ཀུན་རྫོགས་པ། །གཞན་དུ་བལྟས་ནས་ཤེས་པར་བྱ། །ཕྱིས་ནི་ལས་ལ་རབ་ཏུ་འཇུག་།རང་གི་ལུས་ལ་ཐིམ་པར་བྱ། །གཞན་གྱི་གདན་གྱི་ལེའུ་ཞེས་བྱ་བ་སྟེ་བཅུ་གཅིག་པའོ།། །།དེ་ནས་གཞན་ཡང་རབ་བཤད་པ། །སྟོང་ཕྲག་བདུན་ཅུ་རྩ་གཉིས་ཉིད། །ལུས་ཀྱི་རྩར་ནི་རབ་ཏུ་ངེས། །སྟོང་ཕྲག་དགུ་ཡི་གྲངས་ལས་ནི། །བྱེ་བ་བརྒྱ་སོགས་དགའ་བར་གནས། །སྟོང་བའི་དབྱིབས་ནི་སྔོན་འགྲོ་བས། །བློ་དང་ལྡན་པས་ས་བོན་བསྐྲུན། །ཟག་པའི་ལུས་ནི་བཅོམ་ནས་ཀྱང ། །དེ་ཡི་སྙིང་གར་པདྨ་ཉིད། །སྒོང་སྐྱེས་སྟོང་པ་ཡི་ནི་གཞི། །དེ་ལྟར་གནས་ལ་མཉམ་སྦྱོར་བས། །དེ་ཡི་གནས་སུ་ཤེས་པར་བྱ། །ཉི་མ་འཆར་བའི་འོད་ཟེར་གྱིས། །ཕྲ་རབ་རྡུལ་བཞིན་གནས་པ་ཉིད། །པདྨའི་རྩ་ནི་སོ་སོར་བསྡམ། །དེ་བཞིན་འོད་ཟེར་འབར་བ་དང ། །ཀུན་ཏུ་རྫོགས་པའི་ལུས་པོ་འབྱུང ། །ཀུན་ཏུ་རྫོགས་པ་ལྷ་ཡི་སྐུ། །རྣལ་འབྱོར་པ་ཡིས་ཀུན་དུ་བལྟ། །འདོད་ཁམས་སྲིད་པའི་གཟུགས་ཅན་སོགས། །རྒྱུན་དུ་རྣལ་འབྱོར་ལ་བརྟེན་པས། །རྟེན་གྱི་ཡེ་ཤེས་དེས་མཐོང་ངོ ། །རླུང་གི་དཀྱིལ་འཁོར་དབུས་གནས་པར། །མེ་ཡི་དཀྱིལ་འཁོར་འདྲ་བའོ།།
221b
མེ་ཡི་དཀྱིལ་འཁོར་དབུས་གནས་པར། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་གནས་པར། །ཟླ་བའི་དཀྱིལ་འཁོར་མཚུངས་པའོ། །དེ་དབུས་ཇི་སྐད་གསུངས་པ་ཡི། །སྦྱོར་བའི་གདན་ཞེས་བྱ་བའི་མིང ། །དངོས་པོ་མི་གཡོ་བར་བསྒོམས་པས། །ཉོན་མོངས་སྲིད་པའི་རྒྱ་མཚོ་ཟད། །ཡེ་ཤེས་ཉོན་མོངས་ཀྱིས་བསྒྲིབས་པས། །དེ་ཡི་ཡེ་ཤེས་དེ་དབང་ཕྱུག་།ཇི་ལྟར་བྱིས་པ་ཕ་མའི་གནས་སུ་རྩེ་བ་ནི། །ཚིག་ཉིད་དང་ནི་ལུས་ནི་འབར་ཞིང་གཡོ་བ་ཡིས། །ཕྱི་ནས་འདི་ཡི་ཡེ་ཤེས་དེ་ནི་ཤིན་ཏུ་བསྒྲིམ། །དེ་ལྟར་རྣལ་འབྱོར་བླ་མས་བསྟན་བདེ་ཡང ། །སྦྱོར་བའི་གདན་གྱི་ལེའུ་ཞེས་བྱ་བ་སྟེ་བཅུ་གཉིས་པའོ།། །།དེ་ནས་གཞན་ཡང་བཤད་བྱ་བ། །སྦྱོར་བ་མཆོག་ནི་མཉམ་བཤད་པ། །རང་བཞིན་མེད་པ་བྱ་བའི་ཚིག་།ལྷག་པའི་གནས་སུ་ལུས་བྲལ་བ། །ཕྲ་བའི་དངོས་པོ་གོས་པ་མེད། །རྒྱས་པའི་སྒོ་ནི་བསྔམ་པར་བྱ། །དེ་བཞིན་མཆོད་རྟེན་དབང་ཕྱུག་གོ་།ཆུ་མིན་ནས་ནི་གྱེན་དུ་དབུགས། །དེ་བཞིན་ལྟོ་བ་རླུང་གིས་གང ། །ཡེ་ཤེས་ཐིག་ལེ་གནས་ནས་གནས། །རྣམ་པར་ཤེས་པ་ངེས་པར་ཐིམ། །འཇིག་པ་མེད་ཅིང་འཚེ་མེད་པར། །མཉམ་པར་གཞག་པའི་ངོ་བོས་སྒོམ། །རླུང་གི་དཀྱིལ་འཁོར་རྡུབས་པ་ཡིས། །དབུས་སུ་ཡེ་ཤེས་སྐྱོན་མེད་པའོ། །བླ་མས་བཤད་པའི་ལམ་གྱིས་ནི། །རྟག་ཏུ་ངེས་པར་བལྟ་བའོ། །ཇི་ལྟར་བུ་མོ་གཞོན་
222a
༄#། །ནུ་གཏམ་གྱིས་རྨོངས་ནས་སུ། །གཉི་ག་འཐམ་པ་སྲེད་ནས་གཏམ་གྱིས་སྨྲས་པ་དང ། །ལམ་ནི་ཇི་ལྟར་བསྟན་ཀྱང་བཟུང་བར་མི་ནུས་པ། །དེ་ལྟར་རྣལ་འབྱོར་པ་ནི་ལམ་ངན་བསྟན་པ་བཞིན། །གསང་བའི་གདན་གྱི་ལེའུ་ཞེས་བྱ་བ་སྟེ་བཅུ་གསུམ་པའོ།། །།དེ་ནས་གཞན་ཡང་བཤད་བྱ་བ། །མ་བསྒྲལ་བ་རྣམས་བསྒྲལ་བར་བྱ། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་བརྩེ་བའི་ཕྱིར། །བདག་གི་སྦྱོར་བའི་བསམ་གཏན་བྱ། །ལུས་ནི་རྣམ་པ་གསུམ་ཉིད་དང ། །ངག་གི་ཡང་ནི་རྣམ་པ་བཞི། །ཡིད་ཀྱི་རྣམ་པ་གསུམ་ཉིད་ནི། །ལུས་ཀྱིས་བསྲུང་ཞིང་རབ་ཏུ་བསྡམ། །གཉིས་ཀྱི་གནས་ནི་མངོན་པར་སྤང ། །ཡེ་ཤེས་ཅན་གྱིས་ཐར་པ་བསྟེན། །སྐད་ཅིག་ལོངས་སྤྱོད་དེ་བཞིན་སྡུག་།གཉིས་མེད་ལྷན་ཅིག་བསྟན་པར་བྱ། །ཚེ་འདི་ཉིད་ལ་སེམས་ཅན་རྣམས། །སྐད་ཅིག་ཕུན་ཚོགས་སྐད་ཅིག་རྒུད། །དེ་བཞིན་རྨོངས་པའི་ལོངས་སྤྱོད་ནི། །རྣལ་འབྱོར་པ་ཡིས་ལོས་མི་བྱ། །དེ་ཕྱིར་ཉེས་པ་ཡི་ནི་གནས། །འགྲོ་བའི་ཉེས་པ་སྲིད་པའི་དངོས། །ལོངས་སྤྱོད་ལྷག་པའི་གནས་གཅིག་གི་།འབྲས་བུ་འདོད་པ་གོ་བཟློག་པའོ། །སེམས་ཅན་སྦྱིན་ལ་སྲེད་པ་ཡི། །ལོངས་སྤྱོད་ཀྱི་ནི་གནས་སུ་བརྗོད། །དེ་ཕྱིར་གཉིས་པའི་ལམ་སྤངས་ལ། །རྣལ་འབྱོར་པ་ཡིས་དེ་བཞིན་དབུས། །སྦྱོར་བའི་
222b
ཆོས་ནི་མཉམ་དམིགས་པས། །སྤྱོད་པའི་ཆོས་ནི་སྐྱོན་མེད་པའོ། །བདག་མེད་ལུས་ནི་ཡང་དག་གནས། །བདག་མེད་ལ་ནི་མཉམ་པར་བརྟེན། །བསླབ་བྱ་རྟོགས་པའི་ལེའུ་ཞེས་བྱ་བ་སྟེ་བཅུ་བཞི་པའོ།། །།དེ་ནས་གཞན་ཡང་བཤད་བྱ་བ། །སྙིང་གར་ཟླ་བ་གཞག་བྱས་ལ། །དེ་དབུས་བདུད་རྩི་ཡི་གེ་ནི། །རྣམ་པ་ཀུན་ཏུ་བདུད་རྩི་སྔགས། །འོད་ཟེར་འབར་བ་བསྒོམ་པར་བྱ། །ཞི་བའི་གནས་སུ་སྦྱར་བ་ཡིས། །རྣལ་འབྱོར་པར་ནི་ཡོངས་སུ་གྲགས། །ཇི་ལྟར་དེ་ཡི་ཟླ་བ་ཉིད། །ཙི་ཙའི་ཡི་གེས་རྣམ་པར་བརྒྱན། །གསེར་གྱི་མདོག་ལྟར་ཡིད་འོང་གཟུགས། །འོད་ཟེར་སྣ་ཚོགས་བསྒོམ་པ་ཡིས། །དོན་འདོད་པ་ཡི་རྣལ་འབྱོར་པས། །དེ་ལྟར་སངས་རྒྱས་སྦྱོར་བའོ། །ཧཱུཾ་གི་རྣམ་པ་དབང་གི་དངོས། །ཉི་མའི་དཀྱིལ་འཁོར་ལ་བརྟེན་པ། །འོད་ཟེར་དུ་མའི་ཆོ་ག་ཉིད། །དབང་ཉིད་དུ་ནི་ཡོངས་སུ་གྲགས། །རླུང་གི་དཀྱིལ་འཁོར་དབུས་སུ་ནི། །རླུང་གི་དཀྱིལ་འཁོར་མཉམ་པའི་གཞི། །ཇི་བཞིན་འོད་ཟེར་སྔོན་པོ་འབར། །མངོན་པར་སྤྱོད་པར་རབ་ཏུ་གྲགས། །ལས་ཀྱི་ལེའུ་ཞེས་བྱ་སྟེ་བཅོ་ལྔ་པའོ།། །།དེ་ནས་གཞན་ཡང་བཤད་བྱ་བ། །སྦྱོར་བའི་ཟས་སྨན་ཞེས་བྱ་ཡོད་\?\། །འདབ་མ་འོ་མ་འཛག་པ་དང ། །དེ་བཞིན་མེ་ཏོག་ཨ་ཛ་ག་།དྲི་ནི་དྲི་ཞིམ་རྣམ་པར་འབྱེད། །མདོག་ནི་ལྗང་དང་སེར་བ་ཉིད། །རྩ་བ་གཅིག་གི་དབང་ཉིད་དང ། །ཇི་ལྟར་མེ་
223a
༄#། །བཞིན་འཚེར་བའོ། །བདུད་རྩིའི་ཡི་གེ་སྒོམ་པ་ཡིས། །མཆོད་དང་བཟླས་པའི་ཆོ་གར་སྦྱར། །མར་དང་སྦྲང་རྩི་མཉམ་པའི་ཆར། །སྲང་ནི་རེ་རེ་བཟའ་བ་ཉིད། །བརྒྱ་དང་དེ་བཞིན་བརྒྱད་ཅུ་ཉིད། །མཁས་པ་ཡིས་ནི་བཟའ་བར་བྱ། །རྣལ་འབྱོར་པ་ཡིས་ལོ་བརྒྱ་རུ། །དབེན་པའི་རིལ་གནས་ན་ནི། །ཡེ་ཤེས་ཅན་གྱིས་ཡེ་ཤེས་ལུས། ། ངེས་པར་ཡོངས་སུ་རྒྱས་པར་འགྱུར། །དབང་པོ་རྣམས་ཀྱི་སྲེད་པ་དང ། །བཀྲེས་པ་ལ་སོགས་མེད་པར་འགྱུར། །གནས་ནི་ངེས་པ་ཉིད་ཀྱི་མཆོག་།རྩ་བ་རྣལ་འབྱོར་སྦྱོར་བར་བཅས། །དེ་ལྟར་ཐོས་པའི་བདག་ཉིད་ཆེ། །སྦྱོར་བའི་བསྟན་བཅོས་སྐྱོན་མེད་པའོ། །ཐ་མལ་འགྲོ་བར་ངེས་པ་ནི། །བདེ་བར་གཤེགས་པའི་གོ་འཕང་འཛིན། །དེ་ནི་ཡང་སོས་རྣལ་འབྱོར་པ། །ཡེ་ཤེས་ཅན་གྱིས་ཡེ་ཤེས་རྟོག་།ལྔ་པའི་ལྔ་བ་ཞེས་བྱ་བའི་ལེའུ་སྟེ་བཅུ་དྲུག་པ་རྫོགས་སོ།། །།མཁའ་འགྲོ་མ་ལ་ཕྱག་འཚལ་ལོ། །དཔལ་ལྡན་ཤེས་རབ་དབང་པོ་སྤས་པ་ཉི་མའི་འོད་ཀྱིས་འཇིག་རྟེན་ཁམས་སུ་སྣང་བར་མཛད། །དངོས་བོ་དུ་མའི་ཁྱད་པར་བསགས་པའི་རབ་རིབ་གང་གི་མཐུ་ཡིས་འཇིག་མཛད་པ། །རྟག་ཏུ་ཀུན་ནས་རྡུབས་པའི་ང་རྒྱལ་མི་མཐུན་དགྲ་ནི་དུས་དང་དུས་སུ་གཡུལ་འགྱེད་པའོ། །ཆགས་མེད་ཡེ་ཤེས་རི་བོ་མཉམ་ཉིད་མཉམ་པའི་ས་བོན་ཆེན་པོ་གཅིག་གིས་མཛད། །ཧཱུཾ་
223b
གི་རྣམ་པ་འབྱིན་བྱེད་དངོས། །ཧཱུཾ་གི་རྣམ་པ་མཆོག་གི་ལྷ། །ཧཱུཾ་གི་རྣམ་པ་སྟོང་གྱུར་པ། །ཡི་གེ་ཧཱུཾ་ལ་ཕྱག་འཚལ་བསྟོད། །ཡི་གེ་བརྒྱད་ཀྱི་ངོ་བོ་ཉིད། །སྤྱོད་བཅས་མི་སྤྱོད་གསང་བ་དང ། །ཆུ་དང་མེ་དང་དེ་བཞིན་རླུང ། །ས་ནི་མིག་གི་ཡི་གེ་འོ། །སྒོ་བཞི་དང་ནི་ཕུང་པོ་བཞི། །སྒོང་སྐྱེས་ཛ་ལར་གནས་པ་ཉིད། །བཞི་པོ་ཉོན་མོངས་མིང་དང་ནི། །ཡི་གེ་བཞི་པ་དེ་བཞིན་དུ། །རྨོངས་པས་ས་དང་ཉོན་མོངས་དང ། །སྔོན་དུ་ཕྱུགས་ནི་མཉམ་པ་དང ། །ཆུ་ཤིང་མེ་ཏོག་པདྨ་ནི། །འདི་ཡིས་སྒོང་སྐྱེས་སྟན་ཉིད་དོ། །བ་ལང་རྨིག་པའི་སྟེང་དུ་ནི། །བདུད་རྩི་བརྒྱད་ཀྱིས་རྣམ་པར་དབྱེ། ། ཤེལ་བཞིན་དུ་ནི་དག་པ་ཡི། །སྙིང་པོ་ཡི་ནི་སྙིང་པོའི་མཆོག་།ལྕེ་ལ་ཆུ་ནི་འདི་ཉིད་དང ། །ནམ་མཁའ་རྣ་བ་སྣ་དག་ལའོ། །ས་ནི་མིག་ལ་སྦྱར་བྱ་སྟེ། །ཚངས་པར་མེ་ནི་དེ་བཞིན་འབར། ། རྨོངས་པ་ཡིས་ནི་མགྲིན་པར་རོ། །གཡོ་བའི་སྙིང་ལ་གནས་པ་དང ། །ཐམས་ཅད་ཉོན་མོངས་བྲང་དང་ནི། །ཕྱུགས་ནི་ལྟེ་བའི་རྩ་བར་རོ། །ཡན་ལག་བརྒྱད་ལ་དགོད་པ་ཡིས། །འདི་ཡིས་ལྷ་ཉིད་ཡང་དག་ཤེས། །ཡི་གེ་བརྒྱད་ཀྱི་སྔགས་འདི་ནི། །ཕྱག་རྒྱ་བརྒྱད་དུ་རབ་ཏུ་གྲགས། །དཀར་དང་སེར་དང་དེ་བཞིན་དམར། །གནག་ཅིང་འབར་བའི་ལས་ལ་ནི། །ལས་རྣམས་བཞི་ལ་ལྷ་མོ་ཡིས། །མཁས་པས་འབུམ་ཕྲག་གསུམ་དུ་བཟླས། །ཡེ་ཤེས་དབང་ཕྱུག་སྙིང་པོ་ཉིད། །མཆོག་ཏུ་རྟག་ཅིང་ཞི་བ་དང ། །ཕྲ་ཞིང་རགས་པའི་འགྲོ་བ་ཀུན། །ལས་དང་ལས་
224a
༄#། །ཀྱི་རྣམ་པར་གྲོལ། །ཐམས་ཅད་ཆུ་ཡི་དབྱིབས་དང་ནི། །མཉམ་པར་འཇིག་བྱེད་མེ་དང་ཡང ། །ཇི་ལྟར་རྟག་པ་རླུང་དག་དང ། །དད་པའི་དོན་དང་ས་དབང་པོ། །ལྷག་མ་ས་བཞིན་བརྩེགས་པ་ནི། །བཞི་པ་ཡི་གེ་དྲུག་པའོ། །འགྲོ་བའི་དོན་ཕྱིར་ཡི་གེ་བརྒྱད། །ལྷ་བརྒྱད་དུ་ནི་ཡོངས་སུ་གྲགས། །མཉམ་གཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་ཚོམ་མེད། །བ་དན་གསུམ་པའི་ཕྱག་རྒྱ་ཡིས། །སྔོན་དུ་རེག་ཅིང་རེག་པ་ཉིད། །འཇིག་རྟེན་འདིར་ནི་བདེ་བ་དང ། །རྟག་ཏུ་མཆོད་པ་རྙེད་པར་འགྱུར། །འཆི་བའི་དུས་སུ་ཡེ་ཤེས་ནི། །གཟུགས་མེད་སྲིད་པར་རབ་ཏུ་གནས། །བདག་གི་དེ་ཉིད་མནན་པ་ཡིས། །ཇི་ལྟར་སྔགས་འདི་འགྲུབ་པར་འགྱུར། །དེ་ཕྱིར་ནན་ཏན་ཐམས་ཅད་ཀྱིས། །སྦྱོར་བའི་བསྟན་བཅོས་རྟོགས་པར་བྱ། །དྲི་ཞིམ་རབ་གྲགས་མེ་ཏོག་ཀུན་ནས་གནས་པ་དང ། །ནག་པོའི་ཨ་ཀ་རུ་དང་གུ་གུལ་མར་མེ་དང ། །གཉིས་མེད་གཏོར་མ་གཅིག་གིས་ཡིད་ནི་ལྡན་པ་ཡིས། །ལྷ་མོ་མ་མོ་རྣམ་པ་ཀུན་ནས་རབ་ཏུ་མཆོད། །ཡི་གེ་བརྒྱད་པའི་ལེའུ་ཞེས་བྱ་སྟེ་དང་པོའོ།། །།དེ་ནས་གསང་བའི་ཡན་ལག་གི་།ཐིག་ལེ་ལ་ནི་བདག་ཕྱག་འཚལ། །ཁམས་གསུམ་སྐྱེས་བ་ཟད་བྱས་ནས། །ཡེ་ཤེས་དངོས་པོ་གནས་པ་བཞིན། །ལྷ་ཡི་དངོས་པོ་དབྱེར་མེད་པས། །སྟེང་དང་འོག་དང་དབུས་སུ་ནི། །ཐམས་ཅད་
224b
ཀུན་ནས་སྟོང་པ་ཉིད། །རི་རབ་གླིང་གཞན་ཟད་བྱས་ནས། །མཉམ་ཉིད་སྦྱོར་བ་ཀུན་དུ་བསམ། །ཐམས་ཅད་སྡོམ་པའི་དབྱེ་བ་ཡིས། །དེ་ཡིས་མེ་ཏོག་ཐིག་ལེ་ཡི། །ཐིག་ལེའི་དབུས་སུ་གསལ་བའོ། །ཡེ་ཤེས་རྡུལ་ནི་རྣམ་པར་ཐིམ། །ཡེ་ཤེས་བློ་དང་ལྡན་པས་ཤེས། །ཁ་དོག་མེད་ཅིང་མཚོན་ཀུན་དངོས། །གཟུགས་མེད་ཡེ་ཤེས་གཟུགས་བཞིན་ནོ། །རིང་བ་མ་ཡིན་ཐུང་བ་མིན། །མི་ལྡན་པ་དང་ལྡན་པ་ཉིད། །གཟུགས་དང་སྟོང་པའི་དེ་བཞིན་དབུས། །ལྷན་ཅིག་ཡེ་ཤེས་གཟུང་བར་བྱ། །ཉོན་མོངས་དེ་བཞིན་མུན་པ་ནི། །རྣམ་ཤེས་ལྷན་ཅིག་སྣང་བའོ། །ཡེ་ཤེས་རྡོ་རྗེ་བཅོམ་བྱས་ནས། །སྣང་བའི་དངོས་གྲུབ་ཐོབ་པར་འགྱུར། །རླུང་གི་དཀྱིལ་འཁོར་དབུས་སུ་ནི། །མེ་ཡི་དཀྱིལ་འཁོར་འདྲ་བའོ། །མེ་ཡི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་སུ་ནི། །ཟླ་བའི་\?\དཀྱིལ་འཁོར་བསྒོམ་པར་བྱ། །དེ་དབུས་ཇི་སྐད་གསུངས་པ་ཡི། །ཡེ་ཤེས་དང་ནི་རྣམ་ཤེས་སེམས། །འཇིགས་པ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་བྱ། །ཡེ་ཤེས་ཀྱི་ཐིག་ལེའུ་སྦྱོར་བའི་ལེའུ་ཞེས་བྱ་སྟེ་གཉིས་པའོ།། །།ཀ་བ་གཅིག་དང་སྒོ་གསུམ་གྱིས། །ཡེ་ཤེས་དབུས་སུ་ཐིམ་པ་ཉིད། །བཟློག་པར་བྱ་བའི་ས་བོན་ཉིད། །སྦྱང་བྱའི་ཡི་གེ་ཕྱེད་དང་གཉིས། །བརྒྱད་ཀྱི་མཐའ་ལ་གསུམ་པས་དྲང ། །ས་བོན་འདི་ནི་དྲག་པོའི་མེ། །རླུང་གི་
225a
༄#། །དཀྱིལ་འཁོར་ལ་བརྟེན་པ། །སྔོན་གསུངས་མཚན་ཉིད་དང་ལྡན་པས། །སྔོན་དུ་ལྷན་ཅིག་བསྒོམས་བ་ཡིས། །དཀར་པོས་ལུས་ནི་བསྡམ་པར་བྱ། །མཉམ་པའི་གནས་སུ་འབར་བ་ཡིས། །ཇི་སྐད་སྔོན་དུ་གསུངས་པའི་རླུང ། །དབུས་སུ་མཆོད་རྟེན་སྦྱང་བར་བྱ། །རླུང་དང་མེ་ཡི་བདུན་དོན་ལ། །རྡོ་རྗེའི་ས་བོན་བསྒོམ་བྱས་ལ། །སྒྲ་དང་ཐིག་ལེས་རྣམ་པར་བརྒྱན། །ཆར་གྱི་རྒྱུན་ཞེས་བཤད་པ་ཡིན། །རྒྱས་པ་ལྔ་ཡི་སྒོ་ཉིད་ལ། །ཁ་དོག་དཀར་པོ་བསྒོམ་པར་བྱ། །སྒོ་གཉིས་མངོན་པར་བསྟན་པ་ནི། །དེ་བཞིན་ཆུ་དང་ཆུ་མིན་གཉིས། །ཡི་གེ་ཉིས་འགྱུར་ཐིགས་པ་དང ། །རྩ་བར་སྒྲ་ནི་སྦྱར་བར་བྱ། །འདི་ཡིས་ལུས་ནི་སྡམ་བྱ་ཞིང ། །མེ་ནི་སྒོ་རུ་བསམ་པར་བྱ། །སེམས་འདི་ཡིས་ནི་དམིགས་པར་བྱ། །སྟེང་དུ་ཚངས་པའི་སྒོ་འདི་ནི། །ཚིགས་དགུ་ཡི་ནི་མཆོག་གི་གདན། །ལུས་མེད་སེམས་ཀྱི་ངོ་བོ་ཡིས། །དངོས་པོས་དངོས་པོ་བསྒོམ་པར་བྱ། །དུས་ལ་བབ་ན་འཕོ་བྱ་སྟེ། ། དུས་མིན་ལྷ་རྣམས་གསོད་པ་ཉིད། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་སྒྲོལ། །འཕོ་བར་སྦྱོར་བའི་ལེའུ་ཞེས་བྱ་བ་སྟེ་གསུམ་པའོ།། །། སྔོན་གསུངས་མཚན་ཉིད་ལྡན་པར་ནི། །སྔོན་དུ་སྟོང་པའི་མཚན་ཉིད་ཀྱིས། །དེ་ཡི་ལུས་ནི་སྦྱང་བར་བྱ། །སྦྱོར་བས་བསྒོམ་པའི་ལུས་ཅན་ནི། །དངོས་པོ་མེད་པར་བསྒོམ་
225b
པའི་དངོས། །གང་ཞིག་དངོས་པོ་རྣམ་རྟོག་པའི། །དངོས་པོར་བསྒོམ་པའི་ས་བོན་གྱིས། །སྟོང་པའི་དབུས་སུ་བསྒོམ་པར་བྱ། །དགོད་བྱའི་ཡི་གེ་རྣམ་བཀོད་པ། །སངས་རྒྱས་ལྔ་ཡིས་མངོན་པར་བརྒྱན། །དབྱིག་པ་འཇིག་རྟེན་དབང་ཕྱུག་གིས། །ཞབས་སྐྱེད་ཕྱག་ན་རྡོ་རྗེ་དང ། །ལུས་ནི་དྲིལ་བུ་འཇམ་པའི་དབྱངས། །དེ་བཞིན་མགོ་ནི་བྱམས་པ་དང ། །མེ་ཡི་རྣམ་པ་སྟེང་འབར་བ། །འཁོར་བ་རྣམ་པར་གྲོལ་བར་མཛད། །འོད་ཟེར་འབར་བ་རྣམ་མང་པོར། །ཀུན་ནས་སྟོང་པའི་དབུས་སུ་བསམ། །རྣམ་ཤེས་ཡེ་ཤེས་ས་བོན་གྱིས། །དབུས་དང་དབུས་སུ་རྣམ་པར་དཀྲིས། །བཟླས་དང་བསམ་གཏན་མཆོག་བརྩོན་པས། །རླུང་གི་སྟེང་དུ་བསམ་པར་བྱ། །དང་པོ་དཀར་པོ་ཀུན་ནས་བསམ། །གཉིས་པ་དེ་བཞིན་སེར་པོའོ། །གསུམ་པར་གང་ཞིག་དམར་པོ་དང ། །བཞི་པ་ལ་ནི་སྔོན་པོ་ཉིད། །མཉམ་གཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་ཚོམ་མེད། །སྦྱོར་བའི་གདན་གྱི་མིང་ཞེས་པ། །གསང་ཞིང་གསང་བ་གསང་ཆེན་པོ། །བདག་གི་གདན་གྱི་ལེའུ་ཞེས་བྱ་སྟེ་བཞི་པའོ།། །།དེ་ནས་གཞན་ཡང་བཤད་བྱ་བ། །ཚ་བའི་ས་བོན་བྱེ་བྲག་ནི། །ལྟོ་བའི་ཐབ་ཁུང་འདི་ཡི་མེ། །ལྟོ་བའི་མེ་རུ་ཤེས་པར་བྱ། །ཤར་གྱི་ཆ་ནི་དཀར་པོའོ། །བྱང་གི་དེ་བཞིན་སེར་པོ་ཉིད། །ནུབ་ཀྱི་ཕྱོགས་སུ་དམར་པོ་སྟེ། །ལྷོ་ཕྱོགས་སུ་ནི་ནག་པོར་གྲགས། །དབུས་སུ་མཉམ་པའི་ཁ་དོག་
226a
༄#། །ཉིད། །མེ་ལྔ་རུ་ནི་བསམ་པར་བྱ། །རྡོ་རྗེ་མཁའ་འགྲོའི་མིང་ཞེས་པ། །ཤར་གྱི་མེར་ནི་རབ་ཏུ་བརྟག་།དྲག་པོ་མཁའ་འགྲོ་ཞེས་བྱ་བ། །བྱང་གི་ཕྱོགས་སུ་རྣམ་པར་བརྟག་།རོ་ལངས་མ་ཞེས་བཤད་པ་ནི། །ནུབ་ཀྱི་ཕྱོགས་སུ་རབ་ཏུ་དགོད། །མཁའ་འགྲོ་གཏུམ་མོ་ཞེས་བྱའི་མིང ། །ལྷོ་ཕྱོགས་ཀྱི་ནི་མེ་ཡི་མིང ། །དབུས་སུ་ཡེ་ཤེས་མེ་འདི་ནི། །ཡེ་ཤེས་མཁའ་འགྲོ་ཞེས་བྱའི་མིང ། །པདྨའི་གདན་ལ་བཞུགས་པ་ནི། །ཉི་མའི་དཀྱིལ་འཁོར་གྱིས་བརྒྱན་ཅིང ། །ལག་ན་རྡོ་རྗེ་ཁ་ཊྭཱཾ་དང ། །མེ་འབར་བ་དང་མཉམ་པའི་འོད། །གཟུགས་ནི་མཐེ་བོའི་རྣམ་པ་ཙམ། །ཁྲོ་བོའི་གཟུགས་སུ་བསྒོམ་པར་བྱ། །ན་ལི་ལས་ནི་ཡི་གེ་བརྒྱད། །འཕྱང་བ་པོ་ཡི་སྒོ་ནི་ཐིམ། །མཁས་པས་ཕྱིས་ནི་བདག་ཉིད་ལྡས། །གནས་ལྔ་རུ་ནི་སྦྱིན་སྲེག་བྱ། །སེམས་ཀྱིས་དབུགས་ནི་རབ་བསྡམས་ནས། །དངོས་པོས་དངོས་པོ་བསྒོམ་པར་བྱ། །གང་ཞིག་ཅུང་ཟད་བཟའ་བཏུང་རྣམས།། སྦྱིན་སྲེག་ཏུ་བརྟགས་བཟའ་བར་བྱ། །དང་པོ་སྒྲ་ཡི་ཡི་གེ་དང ། །དེ་བཞིན་གཉིས་པ་གཉིས་འགྱུར་གཉིས། །གསུམ་པ་གློ་རུ་རེ་ཕ་དང ། །བཞི་པའི་སྟེང་དུ་ཐིག་ལེར་བཅས།། ལྔ་པ་ལྟེང་དུ་འབར་བ་ཉིད། །ས་བོན་ལྔ་ལ་བཟླས་ཤིང་བསྲེག་།དེ་ལྟར་བསྒོམས་པའི་བདག་ཉིད་ཀྱིས། །རྒྱས་པའི་སྦྱོར་བར་གྲགས་པའོ། །སྦྱིན་སྲེག་གི་ལེའུ་སྟེ་དང་
226b
པོའོ།། །།དེ་ནས་དག་པ་རྣམ་གསུམ་བྱ། །སཝ་བྷཱ་བ་ཤུདྡྷཱཿ སརྦ་དྷརྨཱཿ སཝ་བྷཱ་བ་ཤུདྡྷོཉཧཾ། བཛྲ་ཤུདྡྷཱཿ སརྦ་དྷརྨཱ་བཛྲ་ཤུདྡྷོཉཧཾ། ཡོ་ག་ཤུདྡྷཱཿ སརྦ་དྷརྨཱ་ཡོ་ག་ཤུདྡྷོཉཧཾ། དེ་ལྟར་སྤྱོད་པའི་སྦྱོར་བས་ནི། །ཡིད་ནི་དག་པར་བྱེད་པའོ། །ཐམས་ཅད་ཀུན་ནས་སྟོང་ཉིད་ཀྱིས། །དེར་ནི་ཆུ་འདི་བསམ་པར་བྱ། །ཀུན་ནས་ཆུ་ཡི་གཟུགས་དང་ནི། །དེ་ཡི་དབུས་སུ་པདྨ་ནི། ། རྒྱ་ཆེན་ཡིད་ལ་འདོད་བཞིན་དུ། །གསེར་གྱི་གྲོང་ཁྱེར་འབྱུང་བ་ནི། །རིན་ཆེན་བདུན་གྱིས་རྣམ་པར་བརྒྱན། །སེང་གེ་གདན་གྱི་གདན་གྱི་ནི། །ཉི་མའི་དཀྱིལ་འཁོར་གྱིས་བརྒྱན་པ། ། དབུས་སུ་ཡེ་ཤེས་བསམ་པ་ནི། །ཡེ་ཤེས་མཁའ་འགྲོའི་མིང་ཉིད་དེ། །ཁ་ཊྲྭཱཾ་ག་དང་རྣལ་འབྱོར་སྣོད། །རབ་ཏུ་བཞད་པས་འཇིགས་པར་བྱེད། །ན་བཟའ་དམར་པོ་གཙིགས་པའོ།། དབུ་སྐྲ་སིལ་བུ་རབ་ཏུ་དྲག་།ཡེ་ཤེས་མཁའ་འགྲོ་ཞེས་བྱའི་མིང ། །སེམས་དཔའི་སྐྱིལ་མོ་ཀྲུང་གིས་བཞུགས། །ཇི་སྐད་གསུངས་པའི་ཕྱི་རོལ་དུ། །དེ་ཡི་གཟུགས་ཀྱི་ལོགས་གཉིས་སུ། །ཇི་ལྟར་ཕྱོགས་ཀྱི་མདོག་ཉིད་ནི། །ཀུན་ནས་དེ་ཡི་ཕྱག་རྒྱ་རིགས། །ལྔ་པའི་བདག་ཉིད་བསྒོམས་ནས་ནི། །རྟག་ཏུ་མཆོད་དང་གཏོར་མ་དབུལ། །ཆུ་ཉ་ཡི་ནི་བདག་ཉིད་རྣམས། །ཆུ་དང་མེ་དང་དེ་བཞིན་གཡོ། །ཇི་ལྟར་རླུང་དུ་དུ་བ་བཟུང ། །ཡེ་ཤེས་རྡོ་རྗེས་དཀྲིས་པ་ནི། །ལྔ་པའི་ལྷ་ཉིད་འབྱུང་བ་ནི། །ལྔ་པ་ཉིད་དུ་བསྒོམ་པར་བྱ། །གི་
227a
༄#། །ཝང་གཉིས་ནི་མཱ་མ་ཀཱི། །དེ་ཡི་གཅིག་ནི་བདུད་རྩིའོ། །ཱ་ལི་ཀཱ་ལི་རབ་སྦྱོར་བས། །གཉིས་ཀྱི་དེ་ཉིད་རབ་ཏུ་བྱ། །ཱ་ལི་ཞེས་བྱ་བུང་བར་གསུངས། །ཀཱ་ལི་དེ་བཞིན་གཤེགས་མ་ཉིད། །ཇི་ལྟར་སྡེ་ཚན་གསུམ་པ་ཡི། །ཡི་གེ་གསུམ་པ་གཟུང་བྱས་ཏེ། །རྡོ་རྗེ་ཡིས་ནི་དབྱུག་པ་ཉིད། །འོག་པག་སོགས་པས་དཀྲི་བར་བྱ། །ས་བོན་ཧེ་ནི་མཆོག་བསམ་པ། །རྣལ་འབྱོར་པ་ཡིས་སྡིག་པ་གཅོད། །པདྨའི་དབང་ཕྱུག་སྐུ་ནི་གསེར་གྱི་མདོག་།དྲི་ཡི་ངོ་བོ་ཤིན་ཏུ་སྣང་མཛད་དང ། །རོ་ནི་རྡོ་རྗེ་དབང་ཕྱུག་རྡོ་རྗེའི་ཕྱག་།ལྷ་གསུམ་དག་གི་ཆོ་ག་ཤེས་པར་བྱ། །ཧ་ཞེས་བྱ་བས་ཁ་དོག་འཕྲོག་།ཧོ་ཞེས་བྱ་བས་དྲི་མེད་ཅིང ། །དཔའ་བོ་ཧྲཱིཿ ཡིས་འཇོམས་པ་ནི། །རིམ་པ་འདི་བཞིན་ཤེས་པར་བྱ། །ཐབས་ཤེས་སྦྱོར་བའི་ལེའུ་སྟེ་གཉིས་པའོ།། །།དེ་ནས་གཞན་ཡང་གཞན་གྱི་གདན། །དང་པོར་རེ་ཞིག་མཚན་ཉིད་ཀྱིས། །བདག་ཉིད་རབ་ཏུ་སྦྱར་བར་བྱ། །ཇི་ལྟར་མེ་ཡིས་ཐམས་ཅད་མཉམ་པར་བསྲེག་པ་དང ། །ཇི་ལྟར་ཉི་མས་ཁྱབ་པར་འཆར་བར་སྟོན་པ་དང ། །ཇི་ལྟར་རླུང་གིས་དྲི་ནི་མཉམ་པར་ལེན་པ་ལྟར། །རྣམ་རྟོག་རིང་དུ་སྤངས་པའི་རྣལ་འབྱོར་པས། །སྔོན་གསུངས་མཚན་ཉིད་ལྡན་པར་ནི། །ཉི་མའི་དབུས་སུ་ཆུ་དཀྱིལ་འཁོར། །ཆུ་ཡི་
227b
དབུས་སུ་པདྨ་ནི། །རབ་འདོད་པདྨ་བསམ་པར་བྱ། །གཞལ་ཡས་ཁང་ནི་མཛེས་པའི་དངོས། །རིན་ཆེན་བདུན་གྱིས་རྣམ་པར་བརྒྱན། །སེང་གེའི་གདན་གྱི་གདན་ལ་ནི། །ཉི་མའི་དཀྱིལ་འཁོར་གྱིས་བརྒྱན་པའོ། །ན་བཟའ་སྣ་ཚོགས་རབ་ཏུ་འཕྱང ། །གདུགས་དཀར་པོ་ཡིས་མངོན་པར་གཡོགས། །དགོད་བྱའི་ཡི་གེ་རྣམ་པར་བཀོད། །ཉི་མའི་དཀྱིལ་འཁོར་དབུས་སུ་ཡང ། །དབུས་སུ་ཡེ་ཤེས་རྣམ་ཤེས་ནི། །གཟུགས་ལ་ཡོན་ཏན་དབང་པོས་བརྒྱན། །དང་པོའི་སྒྲ་ཡིག་དང་པོ་དང ། །དེ་བཞིན་གཉིས་པར་ཉིས་འགྱུར་ཉིད། །གསུམ་ལ་ལོགས་སུ་རེ་ཕ་དང ། །བཞི་པའི་སྟེང་དུ་ཐིག་ལེར་བཅས། །ཕྱོགས་ཀྱི་མདོག་ཏུ་དགོད་པ་ནི། །འོད་ཟེར་འབར་བ་རྣམ་མང་པོ། །མཚམས་སུ་ཡི་དྭགས་གདན་ལ་ནི། །མ་ནིང་ཡི་གེ་བཞི་པ་ཉིད། །དབང་ལྡན་སེང་གེ་ཞེས་བྱ་བ། །དེ་བཞིན་མེ་རུ་སྟག་མོ་དང ། །བདེན་བྲལ་འུག་པ་ཧཱུཾ་སྒྲོགས་པ། །ཅེ་སྦྱང་རླུང་དུ་དགོད་པར་བྱ། །དབུགས་ཀྱིས་དངོས་པོ་ཐམས་ཅད་དང ། །དེ་ཡི་ཕྱག་རྒྱའང་བརྟག་པར་བྱ། །དངོས་པོས་དངོས་པོ་བསྒོམ་པ་ཡིས། །མཁའ་འགྲོ་བརྒྱད་ཀྱིས་རྣམ་པར་བསྐོར། །ལོགས་སུ་ལྔ་པའི་བདག་ཉིད་དང ། ། དབུས་སུའང་ཡེ་ཤེས་རྣམ་པར་དགོད། །བདག་ཉིད་ལུས་ཀྱི་ལུས་ཅན་ནི། །གཉིས་མེད་མཆོད་པས་མཆོད་པར་བྱ། །ཡིད་ཀྱི་མེ་ཏོག་དཀྲམ་པ་དང ། །ཡིད་ཀྱི་བདུག་པས་
228a
༄#། །བདུག་པ་དང ། །ཡིད་ཀྱིས་བྱུག་པས་མངོན་པར་བྱུག་།ཡིད་ཀྱི་མར་མེ་སྦར་བར་བྱ། །སྔོན་དུ་རྫས་ནི་ལྔ་པ་ལ། །སངས་རྒྱས་ལྔ་ཡིས་བྱིན་གྱིས་བརླབས།། སྔོན་དུ་གསུངས་པའི་བདུད་རྩི་ནི། །དཔའ་བོའི་ལུས་ལ་གཟུང་བར་བྱ། །ལྕགས་ཀྱུས་ལྷ་རྣམས་ཐམས་ཅད་ནི། །བདུད་རྩིའི་ཡི་གེ་ཚིམ་པར་བྱ། །ཱ་ལི་ཀཱ་ལི་རབ་སྦྱོར་ལས།། དཔའ་བོའི་དབུས་སུ་བྱིན་གྱིས་བརླབས། །ཱ་ལིར་ཤེས་པ་མཱ་མ་ཀཱི། །སྐྱེས་བུ་རྡོ་རྗེ་འཇིགས་བྱེད་དོ། །ལྷ་མོ་གཡོན་པ་ལ་བརྟེན་ཅིང ། །སྐྱེས་བུའི་རྐང་པ་ཧཱུཾ་བྱས་པ། །དེ་ཡི་རྫས་ནི་རབ་བསྟན་པས། །དཔའ་བོས་ཐམས་ཅད་བྱིན་གྱིས་བརླབས། །བདག་ཉིད་ལྔ་ཡི་ལུས་ལ་ནི། །མཁའ་འགྲོ་ལྔ་ནི་རྣམ་པར་ཐིམ། །འདོད་ལ་དགའ་ཉིད་མ་ཡིན་ཞིང་ལོངས་སྤྱོད་ཕྱིར་ཡང་བརྟེན་མི་བྱ། །གཉིས་མེད་གཏོར་མ་ལྡན་པ་ཡིས། །དུས་ཀུན་ཏུ་ནི་མཆོད་པར་བྱ། །གཞན་གྱི་གདན་ཞེས་བྱ་བའི་ལེའུ་སྟེ་གསུམ་པའོ།། །། དེ་ནས་ཕྱི་ཡི་གཏོར་མ་བཤད། །སྙིང་པོའི་གནས་སུ་མཁའ་འགྲོ་མ། །དེ་བཞིན་བྱང་དུ་འབར་བྱེད་མ། །འཇིབ་བྱེད་མ་ནི་ནུབ་ཏུ་གསུངས། །དག་འཕྲོག་ལྷོ་ཕྱོགས་རྣལ་འབྱོར་མ། །རྣལ་འབྱོར་ཕོ་ཉ་བཞི་པོ་ནི། །དྲག་པོའི་གཟུགས་སུ་བསྒོམ་པར་བྱ། །བདུད་རྩི་ལྔ་ནི་སྦྱིན་བྱ་ཞིང ། །དམ་པའི་སྤྱོད་པས་མཆོད་པར་བྱ། །མཉམ་ཉིད་ལྟེ་བའི་ཡེ་ཤེས་
228b
ཀྱིས། །མཁས་པས་གཏོར་མ་སྦྱིན་པར་བྱ། །རྡོ་རྗེ་ཁུ་ཚུར་གཉིས་བཅིངས་ནས། །རྒྱབ་དང་རྒྱབ་ཏུ་སྦྱར་བར་བྱ། །མཐེའུ་ཆུང་གཉིས་ནི་སྤྲེལ་བྱས་ནས། །སྡིགས་མཛུབ་གཉིས་ནི་བསྒྲེང་བྱས་ནས། །འདི་ལྟར་གསང་བའི་ཕྱག་རྒྱ་སྟེ། །མཁའ་འགྲོ་ལྔ་ནི་ཀུན་གྱི་འོ། །བ་དན་གསུམ་པའི་སྙིང་གར་སྦྱིན། །སྟེང་དུ་ཁུ་ཚུར་ཐམས་ཅད་བཅས། །འདི་ནི་ཕོ་ཉའི་ཕྱག་རྒྱ་འོ། །བརྒྱད་མཐའ་དང་པོའི་ས་བོན་དང ། །དགུ་ཡི་མཐའ་ནི་བྱང་དུ་ཤར། །ཤར་དང་ནུབ་ཀྱི་ས་བོན་དང ། །ལྷོ་ཡི་གསུམ་པར་མངོན་པར་གཟུང ། །ཕོ་ཉ་བཞི་ཡི་ས་བོན་འདི། །སྒྲ་དང་ཐིག་ལེར་སྦྱར་བར་བྱ། །ཤར་དུ་བདུད་རྩི་དྲག་པོ་ཡི། །ས་བོན་དབུས་སུ་སྦྱར་བར་བྱ། །ཇི་ལྟར་ལས་ལ་སོགས་སྦྱར་བ། །འབུམ་ཕྲག་གསུམ་གྱིས་མངོན་པར་འགྲུག། ཚེས་གྲངས་མེད་ཅིང་རྒྱུ་སྐར་མེད། །སྨྱུང་བར་གནས་པའང་མེད་པ་འོ། །ཡིད་དུ་འོང་བའི་ས་ཕྱོགས་སུ། །རྟག་ཏུ་འབད་པས་མཆོག་ཏུ་བསྒྲུབ། །དམ་ཚིག་ལ་གནས་དཔའ་བོ་ཆེ། །འདོད་ཆགས་ལ་སོགས་ཉོན་མོངས་བཅོམ། །དག་པའི་ཆོས་ལ་དམིགས་པ་ཡི། །དག་པའི་དབྱངས་ནི་ལམ་པོ་ཆེ། །ཆོས་ཆེན་པོ་ནི་ལེགས་པར་འོངས། །རོ་མཆོག་མཆོག་ཏུ་ཞིམ་པའོ། །སྲིད་པའི་མགོན་པོ་རྒྱ་ཆེ་བ། །སངས་རྒྱས་གང་ལ་ཕྱག་འཚལ་ལོ། །ཚིགས་བཅད་འདི་ཡིས་དབུལ་བར་བྱ། །སྦྱོར་བའི་གདན་གྱི་བདག་ཉིད་ལྷ་ལ་
229a
༄#། །ཕྱག་འཚལ་འདུད། །འདི་ཉིད་ཚེ་ལ་འཁོར་བ་གཅོད་ལ་ཕྱག་འཚལ་ལོ། །ཚིགས་བཅད་འདི་ཡིས་བླང་བྱ་ཞིང ། །ཚིགས་བཅད་འདི་ཡིས་རབ་ཏུ་ཟེད། །པདྨར་བསྒྱུར་བའི་གདན་ལ་ནི། །སྟེང་དུ་རྡོ་རྗེ་བསྟན་པར་བྱ། །དབུས་སུ་བདུད་རྩི་རི་རབ་ཀྱིས་བསྲུབས་ནས། །མཐེ་མཛུབ་གཉིས་ནི་ས་ཡི་སྟེང་དུ་འཐོར་འཐུང་དབུལ། །རྒྱས་པའི་མཆོད་རྟེན་ལྔ་ལ་རོ་ཡིས་ལན་ལྔ་རུ། །བདུད་རྩི་ཆུ་ཡིས་མཆོད་རྟེན་དབུས་སུ་བསམ་པར་བྱ། །གཞན་གྱི་གདན་གྱིས་བདག་ཉིད་དབྱེ་བའི་ལེའུ་ཞེས་བྱ་བ་སྟེ་བཞི་པའོ།། །།གཞན་ཡང་གཏོར་མའི་ལས་བཤད་པ། །ལོགས་སུ་གྲུ་གསུམ་བྱ་བ་ནི། །ཁྲག་སོགས་གྱིས་ནི་བྱ་བའམ། །གཡོན་པ་ཁུ་ཚུར་བཅིངས་བྱས་ལ། །དབུ་མ་ཁྲོ་བོ་བརྒྱང་བར་བྱ། །དབུས་མ་ཡི་ནི་གསུམ་པ་ལ། །སྡིགས་མཛུབ་བཀུག་ལ་སྦྱར་བར་བྱ། །དུ་བའི་ལྕགས་ཀྱུའི་ཕྱག་རྒྱས་སྤྱན་དྲང་བར་བྱའོ། །ོཾ་ཨཱ་ཀཪྵ་ཡ། ཨཱ་ཀཪྵ་ཡ། མཧཱ་བཱུ་ཛ་བྷཀྵ་བྷཀྵ། ཧཱུཾ་ཧཱུཾ་ཧཱུཾ་སཝཱཧཱ། སྤྱན་དྲང་བའི་སྔགས་དང ། ཕྱག་རྒྱའོ། །ཀུན་ནས་གཏོར་མ་རྫོགས་བྱས་ལ། །ལྔ་པའི་རྫས་ཀྱིས་སྦྱར་བར་བྱ། །ོཾ་ཤིང་གཅིག་དང་ནི་དུར་ཁྲོད་དང ། །རི་དང་བྲག་དང་ཕུག་གི་ས། །ཡུལ་གྱི་མདོ་དང་ལམ་དང་ཞིང ། །ཁྱད་པར་དུ་ནི་ཁྱིམ་སྟོང་ཉིད། །ཤིང་ཆེན་ཤིང་གི་བདག་པོ་དང ། །ཁྱད་
229b
བར་དུ་ནི་ཆུ་མིག་ཉིད། །སྣོད་དང་ཐང་དང་ས་སྟོང་དང ། །ཁྱད་པར་ས་སྟེང་གདོལ་ཁྱིམ་གནས། །ནག་པོ་དྲག་པོ་དྲག་ཆེན་པོ། །ལྷ་སྦྱིན་མཉམ་དུ་བསྟེན་པ་དང ། །ནག་པོ་གཙིགས་བྱེད་འཇིགས་བྱེད་པ། །དགའ་ལས་འདས་པ་བགེགས་རྒྱལ་པོ། །རྒན་བྱེད་མོ་དང་དྲག་མོ་དང ། །འཇིགས་བྱེད་མ་དང་ཨུ་མས་བསྟོད། །རྒྱལ་མོ་རྣམ་པར་རྒྱལ་མོ་དང ། །ཐུབ་ཆེན་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་མོ། །ནག་མོ་ནག་མོ་རྣལ་འབྱོར་མ། །དབང་བྱེད་མ་དང་ཟླ་བ་མོ། །དྲག་མོ་སྡང་བའི་ལམ་པ་ཀི། །འཕྲོག་བྱེད་མ་དང་མེ་མར་མ། །འཇིབ་བྱེད་ཡུལ་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་པོ། །མཆེ་བ་གཙིགས་དང་ཐོད་ཅན་མ། །ཐོད་ཕྲེང་ཐོད་པའི་ཕྲེང་ཅན་མ། །ཁ་ཊྭཱཾ་ག་མ་རྫུ་འཕྲུལ་ཆེ། །རལ་གྲི་དགྲ་སྟའི་ལག་པ་དང ། །རྡོ་རྗེ་དེ་བཞིན་གཞུ་ལག་མ། །མཁའ་འགྲོ་མ་ལྔའི་དེ་ཉིད་ཆེ། །ལས་ཀུན་རྗེས་སུ་སྒྲུབ་བྱེད་པའི། །སྦྱོར་བའི་དཀྱིལ་འཁོར་རྒྱལ་ཆེན་པོ། །རྡོ་རྗེ་དབང་ཕྱུག་དེ་བཞིན་གཙོ། ། དེ་བཞིན་གཤེགས་པའི་སྐུ་ཆེན་མོ། །གོས་མེད་སྦྱོར་བའི་ལྷ་བྱེད་མ། །རྡོ་རྗེ་དབང་ཕྱུག་མ་ཀ་ཡིས། །ཐམས་ཅད་ཐམས་ཅད་འགུགས་པའོ། །ོཾ་ཨཱ་ཀཪྵ་ཡ། ཨཱ་ཀཪྵ་ཡ། སརྦ་དེ་བ་ལོ་ཀི་ནི་ན་ཀ་ཀྐ་ཀ་ཌ་ནི། ཁ་ཁྑ་ཁ་ཌ་ནི། བབྦ་བནྡྷ་\?\་ནི་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སཝཱཧཱ། ཤ་དང་ཉ་ཡིས་སྦྱར་བ་ཡིས། །ོཾ་གྱིས་སྤྱན་དྲངས་གཏོར་མ་སྦྱིན། །ཇི་ལྟར་ལས་ལ་སོགས་བརྩན་
230a
༄#། །པ། །བཅོ་ལྔ་དང་ནི་བཅུ་བཞི་དང ། །ཁྱད་པར་དུ་ནི་ཚེས་བརྒྱད་ལའོ། །དངོས་གྲུབ་འདོད་པའི་རྣལ་འབྱོར་པས། །ནན་ཏན་དུ་ནི་གཏོར་མ་སྦྱིན། །ཡེ་ཤེས་ཅན་གྱི་དཔལ་འདོད་པས། །ལྷག་མའི་གཏོར་མ་སྦྱིན་པར་བྱ། །ོཾ་ཧི་ལི་ཧི་ལི་བཛྲཱི། མ་ཐ་མ་ཐ་ཡོ་གི་ནཱི་ཧཱུཾ་ཛཿ གྮན་གྱི་གདན་གྱི་ལེ་འུ་ཞེས་བྱ་བ་སྟེ་ལྔ་པའོ།། །། སྔགས་ཀྱི་ཡི་གེ་ཡི་གེ་ནི། །ཡིད་ཀྱིས་སྤྲུལ་བས་བསྒྲུབ་པར་བྱ། །སྙིང་པོའི་སེམས་ནི་རྣམ་སྤངས་ནས། །ཉམས་པའི་གཟུགས་བརྙན་རྣམ་པར་བསྒོམ། །སྔགས་ནི་དུར་དུར་ཞེས་བརྗོད་པ། །ེ་མ་སེམས་ཅན་ཉོན་རེ་མོངས། །དེས་ན་ཡིད་ལ་མངོན་འདོད་པའི། །སྔགས་ཀྱི་ཡི་གེ་མཆོག་ཉིད་ནི། །འགྲོ་བ་རྨོངས་པའི་དེ་ཉིད་མེད་སྔགས་དང ། ། ལོག་པར་སྨྲ་ཞིང་གཟུགས་བརྙན་སེམས་དང་བྲལ། །སྔགས་ཀྱི་བདག་ཉིད་བློ་ལྡན་གྱིས་ཤེས་བྱ། །ལས་བཞིའི་རྣམ་པར་ཡོངས་སུ་གྲགས་པ་ཉིད། །སྐྱེས་པ་དུ་མའི་གཟུགས་དང་རྣམ་པ་སྣ་ཚོགས་པ། །ནས་མཐུའི་མཚན་ཉིད་ཀུན་ནས་ཐམས་ཅད་ནི། །གཡོ་ཞིང་འཐབ་པ་ཕྲ་ཞིང་གོས་པ་མེད། །སྔགས་དང་རྒྱུད་ཀྱི་བདག་ཉིད་མཆོག་གི་ཡི་གེའོ། །གཟུགས་ལ་སོགས་པ་ཀུན་འཇིག་པས། །ཐམས་ཅད་ནམ་མཁའི་བསྒོམ་པ་འོ། །ཁམས་དྲུག་དང་ནི་དབང་པོ་དྲུག་།དབུས་མའི་ཁམས་ཉིད་འཇིག་པ་
230b
དང། །སྟོང་པ་བཅོ་བརྒྱད་བློ་ལྡན་གྱིས་བསྒོམ་པ། །སེམས་ཅན་བསྒོམ་པའི་དངོས་པོ་ཡིས། །སྟོང་པས་ཐམས་ཅད་འཇིག་པ་འོ། །ཤར་དུ་ཁ་དོག་དཀར་པོ་དང ། །བྱང་ཕྱོགས་སུ་ནི་སེར་པོའོ། །རིན་ཆེན་ཉི་མའི་འོད་འབར་བ། །ལྷོ་ཕྱོགས་སུ་ནི་སྔོན་པོ་ཉིད། །དབུས་སུ་མཉམ་པའི་གནས་སུ་ཡང ། །མཁས་པ་ཡིས་ནི་བསྒོམ་པར་བྱ། །ཱ་ལི་ཀཱ་ལིར་རབ་སྦྱོར་པ། །དེ་ཡི་ས་བོན་དབྱུང་བར་བྱ། །ནམ་མཁའི་དབུས་ནི་མཆོག་ཉིད་དུ། །གང་ཞིག་དབུས་སུ་ཟླ་བ་དང ། །ཟླ་བའི་དབུས་སུ་ས་བོན་ནི། །འོད་ཟེར་འབར་བ་བསྒོམ་པར་བྱ། །ཚོན་སྣ་བདུན་ནི་སྣ་ཚོགས་པ། །འོད་ཟེར་འབར་བ་མཉམ་པའི་འོད། །གོང་དུ་བླ་མའི་ཡི་གེ་དང ། །ཐ་མ་བསྲེག་པའི་ཡི་གེ་དང ། །དབུས་སུ་ས་བོན་གཞག་བྱས་པ། །མཉམ་གཞག་བཟླས་སུ་འོང་བ་ཡིས། །འབུམ་ཕྲག་གསུམ་དུ་མཁས་པས་བཟླ། །སྦྱོར་བའི་གདན་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བ་ཞེས་བྱ་བ་ལེའུ་དང་པོའོ།། །།སྔོན་གསུངས་མཚན་ཉིད་དང་ལྡན་པས། །སྔོན་བཤད་སྟོང་པ་ཉིད་ཀྱི་གཞི། །ཡེ་ཤེས་ཅན་གྱིས་མཉམ་གཞག་པས། །གཟུགས་ལ་སོགས་པ་གཞིག་པར་བྱ། །ཀུན་ནས་སྟོང་པའི་དབུས་སུ་ནི། །མཁས་པ་ཡིས་ནི་བལྟ་བར་བྱ། །འཁོར་ལོ་ཉི་མ་འདྲ་བ་བཞིན། །འོད་ཟེར་ཀུན་ནས་ཡང་དག་གནས། །ཕྱོགས་བཅུ་འཇིག་རྟེན་ཁམས་ཀུན་ཏུ། །དཔག་ཏུ་མེ་
231a
༄#། །པར་གཞག་པར་བྱ། །ཐིག་ལེ་ཐིག་ལེ་ཕྲ་བའི་གནས། །འཇིག་རྟེན་འཇིག་རྟེན་ཀུན་མཁྱེན་བཅས། །རླུང་གི་དཀྱིལ་འཁོར་དབུས་སུ་ནི། །མེ་ཡི་དཀྱིལ་འཁོར་འདྲ་པ་འོ། །མེ་ཡི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་འདྲ་བ་འོ། །ཉི་མའི་དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་བསམ་པར་བྱ། །དེ་དབུས་ཇི་སྐད་གསུངས་པ་ཡི། །རྣམ་ཤེས་ཡེ་ཤེས་སེམས་དཔའ་འོ། །སྤྱི་བོར་ཐམས་ཅད་བསམ་པ་འོ། །ཡི་གེ་ཡི་གེ་སྟེང་དུ་བཅས། །སྨྲ་བའི་ས་བོན་ཐམས་ཅད་ནི། ། དེ་ནི་རྒྱལ་པོ་ཞེས་སུ་བརྗོད། །ཡེ་ཤེས་དང་ནི་རྣམ་ཤེས་དབྱིབས། །རླུང་གི་དབུས་སུ་བཏུང་བར་བྱ། །ས་བོན་དེ་ཡི་སྦྱར་བྱ་བ། །སྒྲ་ནི་སྟེང་དང་སྟེང་དུ་འོ། །དེ་ལྟར་ས་བོན་མཆོག་བསམ་པ། །ཡེ་ཤེས་རྣམ་ཤེས་མིང་ཉིད་དོ། །འོད་ཟེར་འབར་བ་རྣམ་དམར་པོ། །ཟླ་བའི་དབུས་སུ་བསྒོམ་པར་བྱ། །བདུན་པའི་མཐའ་ནི་ཡང་དག་བླང ། །གང་གིས་བདུད་རྩི་ས་བོན་བཞིན། །གང་ཞིག་བཟླས་པས་དཀྲིས་པ་ནི། །ཁ་དོག་དཀར་པོར་བསམ་པར་བྱ། །སྒྲ་ཡིག་དང་པོ་བླང་བྱས་ལ། །ཉི་མའི་དཀྱིལ་འཁོར་གྱིས་དཀྲིས་པའོ། ། དགུ་མཐའི་ས་བོན་ཡི་གེ་ནི། །ལོགས་སུ་མེ་ཡིས་སྤྱར་བར་བྱ། །གཞན་དུ་རླུང་གི་ས་བོན་དང ། །རླུང་གི་ངོས་སུ་མངོན་པར་བསམ། །ཐམས་ཅད་ཀུན་ནས་བསྒོམ་པ་
231b
ནི། །ཡེ་ཤེས་ཐིག་ལེ་ཞེས་བྱའི་མིང ། །སྡིག་བྱེད་བླུན་པོའི་སེམས་ཅན་རྣམས། །སྦྱོར་བ་འདི་ཡིས་དག་པར་བྱ། །ས་བོན་ལས་ནི་རྡོ་རྗེ་བསྐྱེད། །དེ་བཞིན་རྡོ་རྗེའི་མཚན་ཉིད་ཤེས། །དབུས་སུ་རྣམ་པར་སྣང་མཛད་ལུས། །རབ་ཏུ་མཛེས་པའི་ན་བཟས་བརྒྱན། །འདི་ནི་བསྒོམས་པ་ཙམ་གྱིས་ནི། །ཏིང་འཛིན་ཀུན་ནས་ཡང་དག་གནས། །དབུས་སུ་འདི་གཟུགས་བསམ་པར་བྱ། །རིན་ཆེན་འབར་བས་འབིགས་པ་ཡི། །མགྲིན་པར་རེ་ཕའི་ཐིག་ལེ་དང ། །བསྒྲུབ་བྱའི་མདུན་དུ་བསྒོམ་བྱ་བ། །ལན་བདུན་པ་ཡིས་འབྱེད་པ་ནི། ། མངའ་ཡི་རྩེ་མོར་ས་བོན་བསམ། །ཁ་དོག་དཀར་པོ་ཀ་ཤ་བཞིན། །མངའ་འདྲེན་པ་ཡིས་དབྱིག་པ་ཡིས། །སྔགས་པས་ས་བོན་བཟླས་པར་བྱ། །ཕྱག་རྒྱའི་རྣམ་པ་བཅིང་བ་དང་།། ས་བོན་སེམས་ཀྱིས་བཟླ་བར་བྱ། །འབུམ་ཕྲག་གཅིག་བཟླས་རྣལ་འབྱོར་པས། །དེ་བཞིན་མྱུར་དུ་མངོན་པར་འགུགས། །ཡི་གེ་གཉིས་འགྱུར་ཐིག་ལེ་དང ། །རྩ་བར་ང་རོ་སྦྱར་བར་བྱ། །དེ་ནི་བདུད་རྩི་ཡིད་འོང་མིང ། །འབུམ་ཕྲག་གཅིག་གིས་འགྲུབ་པར་འགྱུར། །འབྱུང་པོ་བཞིན་དུ་དྲི་ཟ་དང ། །མཁའ་འགྲོ་གནོད་སྦྱིན་མ་བཤད་པ། །གནོད་སྦྱིན་ཡི་དྭགས་གྲུལ་བུམ་དང ། །རྡོ་རྗེ་ལྷ་མོ་རྣལ་འབྱོར་མ་།གལ་ཏེ་འདོད་ན་ཕྲན་ཚེགས་མི། །སྦྱོར་བས་མྱུར་དུ་འགུགས་པར་བྱེད། །སྦྱོར་བའི་གདན་ལས། །དམར་པོ་ཆེན་པོས་ཀུན་
232a
༄#། །ཏུ་རྨོངས་པ་ཞེས་བྱ་བའི་ཏིང་ངེ་འཛིན་གྱི་ལེའུ་སྟེ་གཉིས་པའོ།། །།གཟུགས་ཀུན་ཟད་པར་བྱས་ནས་ནི། །གཟུགས་ནི་མི་གནས་ཟད་པར་འགྱུར། །སྐར་མའི་རྣམ་པའི་དབྱིབས་སུ་ནི། །དང་པོར་སྟོང་པ་མངོན་བསམ་བྱ། །མཉམ་ཉིད་ལྟ་བ་བསྐྱེད་བྱས་ནས། །རླུང་གི་དཀྱིལ་འཁོར་དབུས་སུ་ནི། །དབྱུག་པ་འཇིག་རྟེན་དབང་ཕྱུག་མགོན། །གུ་གུལ་ཕྱག་ན་རྡོ་རྗེ་དང ། །ཡན་ལག་འཇམ་དབྱངས་དྲིལ་བུ་མཆོག་།བྱམས་པ་ཟླ་བའི་རི་མོ་ཉིད། །མ་ཞེས་བྱ་བ་སྟེང་འབར་བ། །རྣམ་པར་འཁོར་བ་སྒྲོལ་བར་མཛད། །ས་བོན་འདི་ཡིས་འབྲས་བུ་ནི། །ཉི་མའི་དཀྱིལ་འཁོར་དབུས་སུ་ཡང ། །འོད་ཟེར་འབར་བ་རྣམ་མང་པོར། །ལྷ་ཉིད་ལྔ་ནི་བསྒོམ་པར་བྱ། །རི་རབ་རྩེ་རུ་གཞལ་ཡས་ཁང ། །རིན་ཆེན་ཀུན་གྱིས་རྣམ་པར་བརྒྱན། །གདན་དུ་མེ་ཏོག་སྔོན་པོ་འདི། །བུང་བའི་ཟས་སུ་ཟ་བ་ཉིད། །མེ་ཏོག་མྱུར་དུ་ཟ་བ་རྣམས། །སྦྲང་རྩི་མཉམ་པའི་གནས་ཉིད་དོ། །སྟེང་དུ་འཕྲོ་བའི་ཡི་གེ་ནི། །སངས་རྒྱས་ཀུན་དུ་འཐོན་པ་འོ། །ཆུ་དང་ནམ་མཁའ་རླུང་གི་ནི། །ས་བོན་བཞི་ཡིས་ལྷ་ཉིད་དོ། །དབྱིབས་ནི་བན་དུ་ཀ་ལྟར་གྱིས། །ཁ་དོག་ལི་ཁྲིའི་སེམས་ཀྱིས་ནི། །ལྷ་མོ་མཱ་མ་ཀཱིར་སྦྱོར་བས། །རི་རབ་རྩེ་མོར་བསམ་པར་བྱ། །དཔའ་བོ་རྡོ་རྗེ་དབང་ཕྱུག་མགོན། །ལྷ་རྣམས་ཀུན་གྱི་
232b
བདག་ཉིད་དོ། །ཕྱག་རྒྱ་གཉིས་དང་མངོན་ལྡན་པའི། །རྩེ་མོ་གསུམ་གྱིས་ཀུན་འཇིག་པའོ། །ས་ནི་གནས་སུ་གནོན་པ་ནི། །རྐང་པ་གཉིས་ཀྱིས་རྣམ་པར་མནན། །ཚེམས་ཀྱི་མ་མཆུ་བཙིར་ནས་ནི། །གཟུགས་དང་གཟུགས་ལ་ལྟ་བ་ཉིད། །ཧཱུཾ་གི་གླུ་ཡི་རྣམ་པ་དང ། །སྒྲ་ཡང་དེ་རུ་སྦྱར་བར་བྱ། །བདུད་རྩི་རེ་ཕ་ཐིག་ལེ་དང ། །ལྕགས་ཀྱུ་ཡིས་ནི་རྩེ་བར་བྱ། ། ལྷ་མོ་སྔགས་ཀྱི་ཀུན་ནས་ཟློས། །རྡོ་རྗེ་ཅན་དང་པདྨའི་གདན། །ཇི་ལྟར་སྡེ་ཚན་གསུམ་པ་ཡི། །ཡི་གེ་གསུམ་པ་བཟུང་བྱས་ལ། །གླུ་རུ་རྡོ་རྗེ་དབྱུག་པ་དང ། །གཉིས་པར་འོག་པག་གིས་ནི་དཀྲི། །སྔགས་པ་མཆོག་གི་ས་བོན་འདི། །ཀུན་ནས་བཟླ་ཞིང་སྔོན་དུ་གཟུང ། །ལྷ་རྣམས་ཀུན་ནས་མཉེས་བྱས་ནས། །འདི་ཡི་རྫས་ནི་བཟའ་བར་བྱ། །རྒྱལ་པོས་སྤྲོ་ཞིང་བརྟེན་པ་ཡིས། །དབང་གི་ལས་ནི་མངོན་དུ་བརྩམ། །རབ་མིན་དམན་པའི་རིགས་ལ་ནི། །མངོན་དུ་ལས་ནི་སྦྱར་བར་བྱ། །མཉམ་པའི་རིགས་ཀྱི་མེ་ཏོག་ལ། །རྒྱས་པའི་ལས་ནི་བྱ་བར་བྱ། །བྲམ་ཟེ་དང་ནི་རྒྱལ་རིགས་ཀྱིས། །ཞི་བའི་ལས་ནི་དེ་ལས་མཆོག་།ལས་བཞི་མངོན་པར་སྦྱོར་བ་ཡིས། །རིགས་ཀྱི་བྱེ་བྲག་བརྩམ་པར་བྱ། །བདུད་རྩིའི་གསང་བའི་རྣལ་འབྱོར་པས། །རྫས་གཞན་དག་ནི་བསྒོམ་པར་བྱ། །དབང་པོ་ལག་པ་ཤུ་དག་རུ་རྟ་དང ། །རྨོངས་བྱེད་དང་ནི་དེ་བཞིན་གུར་གུམ་དང ། །ཀུ་ཏན་ཙ་རི་ཟླ་བ་དུང་
233a
༄#། །ཉིད་ཀྱིས། །འདི་ཉིད་ཀྱིས་ནི་རབ་ཏུ་སྦྱར་བར་བྱ། །དཀོན་མཆོག་གསུམ་ལ་གནོད་པ་ལ། །གཉིས་མེད་གཏོར་མ་སྦྱིན་པར་བྱ། །སྡུག་ཕོངས་ལ་ནི་རྗེས་བཙེ་བས། །སེམས་ཅན་དོན་དུ་ལས་བརྩམ་བྱ། །འདོད་ལ་དགའ་ཉིད་མ་ཡིན་ཏེ། །ལོངས་སྤྱོད་ཕྱི་རུ་བསྟེན་པ་མིན། །ཁྲོ་མེད་རྨོངས་པ་མེད་པ་ཡིས། །སེམས་ཅན་དོན་དུ་སྦྱང་བར་བྱ། །སྦྱོར་བའི་གདན་ལས། །དབང་དུ་བྱེད་པ་ཞེས་བྱ་བ་སྟེ་ལེའུ་གསུམ་པའོ།། །།ལྕེ་ལ་ཆུ་ནི་རྣམ་པར་སྦྱར། །ནམ་མཁའ་རྣ་བ་སྣ་གཉིས་ལ། ། ས་ནི་ཆུ་ལ་ཡང་དག་གསུངས། །མགྲིན་པར་རྨོངས་པའི་ས་དང་ནི། །གཡོ་བ་སྙིང་ལ་གནས་པ་འོ། །ཉོན་མོངས་ཀུན་ནས་ཐོང་ཀ་དང ། །ཕྱུགས་ནི་ལྟེ་བའི་རྩ་བར་རོ། །ཡན་ལག་བརྒྱད་ལ་དགོད་པ་ནི། །ལྷ་ཉིད་དང་ནི་སྦྱར་བར་བྱ། །ཡེ་ཤེས་མཁའ་འགྲོ་བསམ་བྱ་བ། །རྒྱན་ཀུན་གྱིས་ནི་རབ་ཏུ་བརྒྱན། །ལུས་ཀྱི་ས་སོགས་རབ་སྦྱར་བ། །ཁ་དོག་གཅིག་པའི་རྣམ་པར་བྱ། །མཐེབ་མོ་སུམ་ཅུ་རྩ་གཉིས་ཚང ། །རྣམ་པར་ཤེས་པའི་ནང་དུ་འཕོ། །ཕྱི་རོལ་ཉིས་འགྱུར་ས་དག་ལ། །དབུགས་ཀྱི་ལས་ལ་སོགས་པ་བྱ། །ལྟོ་བར་མེ་ཡི་ལྷ་བསམ་པ། །ཡེ་ཤེས་མཁའ་འགྲོའི་མིང་ཉིད་དོ། །དབུགས་ལ་བདུད་རྩི་ཡང་དག་ཐིམ། །ཀུན་ནས་སྔོན་གྱི་མཚན་ཉིད་ཀྱིས། །ལྷ་རྣམས་ལ་ནི་སྲེག་བླུགས་དབུལ། །རླུང་གི་
233b
དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་རྣམ་པར་བརྒྱན། །མཆོག་གི་དབུས་ནས་ས་བོན་ནི། །ཱ་ལི་ཀཱ་ལི་ལས་བྱུང་བ། །ཁ་དོག་དམར་པོ་འོད་འབར་བ། །ས་ལ་སོགས་པའི་ཕྱི་རོལ་དུ། །འབྱུང་དང་འཇུག་པའི་དབུགས་ཀྱིས་ནི། །སྦྱོར་བ་གཉི་གའི་ཕྱི་རོལ་དུ། །ས་བོན་མདའ་ཡི་རྩེ་མོར་བསམ། །ཁ་དོག་ནག་པོ་འོད་འབར་བ། །སྔོན་གྱི་ཀ་ཤའི་ས་བོན་ནི། །ོཾ་དང་རེ་ཕའི་ཐིག་ལེ་ཅན། །མདའ་ལ་གོམས་པས་བརྡེག་པར་བྱ། །ས་བོན་དབུས་སུ་སོན་བྱས་ནས། །བདུད་རྩིར་དབུགས་ནི་འཕྲོག་པར་བྱ། །བདུད་རྩི་ཡི་གེར་སྦྱར་བྱས་ལ། །འཇིགས་པ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་བྱ། །ཕྱི་ནས་བདག་གི་ལས་ལ་ནི། །ཡེ་ཤེས་མཁའ་འགྲོའི་སྦྱོར་བ་བཞིན། །ོཾ་ཨཱ་ཀཪྵ་དཾ་ཧཱུཾ་སཝཱཧཱ། རྒྱུད་ཆེན་པོ་ཡི་ས་བོན་བཟླས། །འཇིག་རྟེན་གསུམ་པོ་འཕྲལ་དུ་བསྒྲུབ། །སྦྱོར་བའི་གདན་ལས་འབྱུང་བ་དང ། །འཇུག་པའི་ལེའུ་ཞེས་བྱ་བ་སྟེ་བཞི་པའོ།། །། ཡོངས་རྫོགས་གཟུགས་ནི་འོད་ཟེར་བཅས། །དཔྲལ་བར་ཟླ་བ་བསམ་པར་བྱ། །དབུས་སུ་ས་བོན་ཧཱུཾ་རང་བཞིན། །ཁ་དོག་དཀར་པོ་རབ་མཛེས་པ། །རྒྱ་མཚོ་ལྟ་བུར་རབ་ཏུ་འཇིགས། །ཁ་དོག་བདུན་པ་རྒྱ་ཆེན་པོ། །ཕྱོགས་བཅུ་འཇིག་རྟེན་ཁམས་ཀུན་གྱི། །གཟུགས་རྣམས་ཐམས་ཅད་བཅོམ་ནས་སུ། །བདག་ཉིད་ནམ་མཁའི་ནམ་མཁའ་
234a
༄#། །ཉིད། །དབྱིབས་དང་གཟུགས་ནི་ཐམས་ཅད་པ། །སྔོན་གྱི་མཚན་ཉིད་ཀུན་གྱིས་སོ། །ཆུ་ཡི་དབུས་སུ་པདྨ་འོ། །གཞལ་ཡས་ཁང་པ་བསམ་པར་བྱ། །རིན་ཆེན་བདུན་གྱིས་མངོན་པར་མཛེས། །ཟླ་བའི་དཀྱིལ་འཁོར་དབུས་གནས་པར། །ཧཱུཾ་གི་རྣམ་པ་མེ་བཞིན་འབར། །སྤྱི་བོའི་སྟེང་དུ་རྫོགས་པར་བྱ། །བྲང་དུ་དྲི་མེད་ཟླ་བ་དང ། །དྲིལ་བུ་སྙིང་གི་ངོས་ཉིད་དུའོ། །ལྟེ་བར་དབྱུག་པ་གསང་བ་འཛིན། །གྱ་གྱུ་རྐང་པའི་གདན་ཉིད་དུ། །པདྨའི་གདན་ལ་རྣམ་པར་སྤྲུལ། །གཟུགས་རྫོགས་པ་ལས་རྡོ་རྗེ་ནི། །རྡོ་རྗེ་སེམས་དཔའ་བདག་ཅེས་བརྗོད། །དར་གྱིས་བཅིངས་ཤིང་ཅོད་པན་ཅན། །སངས་རྒྱས་ལྔ་ཡིས་མངོན་པར་བརྒྱན། །ཁ་དོག་དཀར་པོ་མཆོག་ཏུ་འབར། །རྒྱན་ཀུན་གྱིས་ནི་རྣམ་པར་བརྒྱན། །ན་བཟའ་སྔོན་པོ་རབ་ཏུ་མཛེས། །རྡོ་རྗེ་དྲིལ་བུ་ཕྱག་གཉིས་ན། །དེ་ལྟར་བསམས་པ་ཙམ་གྱིས་ནི། །རྡོ་རྗེ་སེམས་དཔའ་བདག་ཅེས་བརྗོད། ། བརྒྱད་ཀྱི་མཐའ་ལ་རྩ་བར་རླུང ། །དེ་བཞིན་རྩ་བར་རེ་ཕ་སོགས། །གསུམ་པ་ཡིས་ནི་རྣམ་པར་འདྲེན། །སྟེང་དུ་ཐིག་ལེའི་ས་བོན་གྱིས། །འདི་ཡི་འཇིག་རྟེན་གསུམ་པོ་སྐྲག ། རྡོ་རྗེའི་ས་བོན་རྣལ་འབྱོར་པས། །ཁམས་གསུམ་ཐམས་ཅད་འདྲེན་པ་དང ། །རླུང་གི་བདག་ཉིད་ཐམས་ཅད་པའོ། །ས་བོན་དབུས་སུ་གནོད་སྦྱིན་མིང ། །དེ་བཞིན་ལྷ་
234b
ཡི་མིང་ཉིད་དོ། །ས་བོན་དབུས་སུ་མིང་རྣམས་ནི། །ཐམས་ཅད་མེ་ཡི་དབང་ཕྱུག་ཉིད། །འབུམ་ཕྲག་གསུམ་བཟླས་རྣལ་འབྱོར་པས། །རྒྱས་པར་ཡོངས་སུ་གྲགས་པ་ཉིད། །མཉམ་གཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་ཚོམ་མེད། །ཕྱག་འཚལ་བསྲེག་པ་མཐར་བཞག་པ། །སྔོན་དུ་བསྙེན་པའི་རྣམ་བ་བྱ། །གསང་བའི་གདན་ཞེས་བྱ་བ་རྒྱས་པ་བཤད་པའི་ལེའུ་སྟེ་དང་པོའོ།། །།སོར་བཞི་པར་ནི་ནམ་མཁའ་འོ། །གང་ཕྱིར་ནམ་མཁའ་སྐར་མ་ཉིད། །ཀུན་ནས་འབར་བའི་འོད་ཟེར་མེས། །ཕྱོགས་བཅུའི་འཇིག་རྟེན་ཁམས་ཀུན་དང ། །ཁམས་གསུམ་སྐྱེས་པ་ཟད་བྱས་ནས། །ཐམས་ཅད་ཀུན་ནས་འབར་བ་ཡི། །མེ་ཡི་གཟུགས་ཀྱང་དེ་བཞིན་ཟད། །དེ་ཉིད་ལྔ་ཡི་ཁྱད་པར་ཉིད། ། ཤར་དུ་རྡོ་རྗེ་དཀར་པོ་འོ། །སེར་པོ་རྡོ་རྗེ་བྱང་དུ་འོ། །ནུབ་ཏུ་རྡོ་རྗེ་དམར་པོ་ཉིད། །ལྷོ་རུ་སྔོན་པོའི་རྡོ་རྗེ་ཅན། །ཀུན་ནས་རྡོ་རྗེ་འབར་བའི་འོད། །དབུས་སུ་མཉམ་པའི་ཁ་དོག་ཉིད། ། ཐམས་ཅད་ཀུན་ནས་སྔོན་པོ་ཡི། །དབང་པོའི་གཟུགས་ནི་རྡོ་རྗེ་འཛིན། །སོར་བཞི་པ་ཡི་ནམ་མཁར་ནི། །སྒྲོལ་མ་ཡི་ནི་མཚན་ཉིད་ནི། །ཱ་ལི་ཀཱ་ལིར་རབ་སྦྱོར་བའི། །དེ་ཡི་ས་བོན་འབྱུང་བའོ། །དབུས་སུ་སྒྲོལ་མ་གཞག་བྱ་བ། །ཕྱག་རྒྱ་འདི་ཡིས་མཆོད་པར་བྱ། །ཆུ་ཤིང་མེ་ཏོག་ལྟེ་བར་གནས། །སྙིང་གར་ཕྲེང་བར་གནས་པ་ཉིད། །རྟག་ཏུ་ཁ་ནི་
235a
༄#། །མར་ཕྱོགས་པ། །མཁས་པ་ཡིས་ནི་རྒྱས་པར་བྱ། །རྟག་ཏུ་འདབ་མ་བརྒྱད་པར་འགྱུར། །གསུངས་པའི་གེ་སར་གྱིས་ནི་བརྒྱན། །དེ་དབུས་ཟླ་བ་དཀར་པོ་ནི། །འོ་མ་ཟླ་བ་དེ་ཡི་དབུས། །འདི་ལྟར་ཤེས་པའི་རྣལ་འབྱོར་པ། །གསང་བའི་གདན་གྱི་མིང་ཉིད་ཡིན། །གཟུགས་ལ་སོགས་པ་མི་གཟུང་ཞིང ། །སྟོང་པའི་སེམས་ཀྱང་མ་ཡིན་ནོ། །གཟུགས་དང་སྟོང་པ་དེ་བཞིན་དབུས། །ཡེ་ཤེས་ཅན་གྱིས་དེ་བཞིན་གཟུང ། །མཉམ་ཉིད་ཡེ་ཤེས་ཐམས་ཅད་ཀྱིས། །ཀུན་ནས་བལྟ་བ་ཐམས་ཅད་རིག་།བླ་མས་བསྟན་པའི་ལམ་གྱིས་ནི། །རྟག་ཏུ་ངེས་པར་བལྟ་བར་བྱ། །ཇི་ལྟར་བུ་མོ་གཞོན་ནུ་གཏམ་གྱིས་རྨོངས་ནས་སུ། །གཉི་ཀ་འཐབ་པ་ཕྲད་ཅིང་གཏམ་ནི་སྨྲས་པ་དང ། །ལམ་ནི་ཇི་ལྟར་བསྟན་ཀྱང་གཟུང་བར་མི་ནུས་པ། །དེ་བཞིན་རྣལ་འབྱོར་པ་ནི་གཞོན་ནུས་བསྟན་པ་བཞིན། །རྣལ་འབྱོར་པ་ཡིས་ཐོས་ཙམ་གྱིས། །ཉོན་མོངས་རིང་དུ་སྤོང་བར་བྱེད། །གང་ཞིག་སྦྱོར་བ་བསྟེན་པ་ཡིས། །སངས་རྒྱས་འབྲས་བུ་མྱུར་དུ་འཐོབ། །གང་གིས་སྣ་ཚོགས་བསྟེན་པ་ཡིས། །དེ་ཡིས་ལས་ནི་འགྲུབ་པར་འགྱུར། །ཐམས་ཅད་རྒྱུད་དུ་བཤད་པ་ནི། ། རྣམ་ཤེས་ལྷན་ཅིག་སྤྲད་པར་བྱེད། །ཇི་ལྟར་སེམས་ཀྱི་ཀུན་ནས་ནི། །ནན་ཚན་གྱིས་ནི་ཡེ་ཤེས་སྦྱར། །གསང་བའི་གདན་གྱི་ལེའུ་གཉིས་པ་ཞེས་བྱ་བའོ།། །།
235b
ཟླ་བའི་དཀྱིལ་འཁོར་དབུས་གནས་པར། །རྡོ་རྗེ་སེམས་དཔའ་མངོན་པར་སྤྲུལ། །དེ་ཡི་སྙིང་གར་ཡི་གེ་ཧཱུཾ། །ཁ་དོག་དཀར་པོ་བསམ་བར་བྱ། །བདུད་རྩི་རེ་ཕ་ཐིག་ལེ་དང ། །དེ་ཡི་ས་བོན་སྦྱར་བར་བྱ། །ཞི་བར་རྒྱལ་ཞིང་མཆོག་ཏུ་བརྩོན། །ཞི་བའི་དུས་ལ་བབ་ནས་ནི། །བདག་ཉིད་སྦྱིན་སྲེག་རབ་ཏུ་བྱ། །ཞི་བའི་འོ། །སྙིང་ག་དཀྱིལ་འཁོར་དབུས་སུ་ནི། །ཁ་དོག་ཞི་བར་མཚུངས་པ་འོ། །བདུད་རྩི་ཀུན་ནས་རིག་པ་ཡི། །ཟླ་བའི་དབུས་སུ་བསྒོམ་པར་བྱ། །དེ་ལྟར་བསྒོམས་པའི་རྣལ་འབྱོར་པའི། །རྒྱས་པར་ཡོངས་སུ་གྲགས་པ་ཉིད། །སྙིང་གར་ཉི་མའི་དཀྱིལ་འཁོར་ལ། །རྐེད་པར་རེ་ཕ་ཐིག་ལེ་ཅན། །དམར་ཞིང་དམར་བར་བསམས་པ་ཡིས། །དབང་ཉིད་དུ་ནི་ཡོངས་སུ་གྲགས། །སྙིང་གའི་དཀྱིལ་འཁོར་དབུས་སུ་ཡང ། །རླུང་གི་དཀྱིལ་འཁོར་ཀུན་ནས་བསམ། །དངོས་སུ་རླུང་གི་ས་བོན་ནི། །དབུས་སུ་དགྲ་ཡི་མིང་ཉིད་ཀྱང ། །ཇི་ལྟར་དུ་བ་དུ་བའི་མདོག་།མངོན་སྤྱོད་པར་ནི་རབ་ཏུ་གྲགས། །ཀུན་ནས་ཐམས་ཅད་སྟོང་པ་ཉིད། །སྔོན་གྱི་མཚན་ཉིད་སྦྱར་བར་བྱ། །རླུང་གི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་བསྒོམ་པར་བྱ། །དེ་དབུས་ཧཱུཾ་གི་རྣམ་པ་ནི། །འབར་བའི་ཕྲེང་བ་མཉམ་པའི་འོད། །རླུང་གི་ས་བོན་གྱིས་ནི་དཀྲི། །དབུས་སུ་མིང་ཉིད་སྦྱར་བྱས་ལ། །རླུང་གིས་བསྐྱོད་པའི་ལུས་སུ་ནི། །སྒྲུབ་པ་པོ་ཡིས་བསམ་པར་བྱ། །གང་བསམས་དེ་ནི་བསྐྲད་པར་འགྱུར།།
236a
༄#། །རླུང་གི་དཀྱིལ་འཁོར་དབུས་སུ་ནི། །མཁའ་འགྲོ་དྲག་མོ་བསམ་པར་བྱ། །སྔོན་གྱི་མཚན་ཉིད་ཀུན་རིག་པས། །གཟུགས་དང་དབྱིབས་བཞིན་བསྒོམ་པར་བྱ། །མེ་འབར་བ་དང་མཉམ་པའི་འོད། །མདུན་དུ་ཟློས་ཤིང་ཀུན་དུ་བསམ། །བསྒྲུབ་བྱ་ཡི་ནི་ལུས་ཀྱི་ཁར། །རླུང་གི་ས་བོན་གྱིས་ནི་གཙོ། །མཐར་ནི་འཇོམས་པའི་ཡི་གེ་དང ། །སྔོན་བཞིན་མེ་ཡི་ཡི་གེ་ཉིད། །དབུས་སུ་བསྒྲུབ་བྱའི་མིང་འདི་ནི། །འབུམ་ཕྲག་གཅིག་ཏུ་བཟླས་པ་ཡིས། །གང་ཕྱིར་སྦྱོར་བ་བསྙེན་པ་ཡིས། །ལུས་ནི་ཀུན་ནས་སྡོམ་པའོ། །རླུང་གི་དཀྱིལ་འཁོར་དབུས་སུ་ཡང ། །གཏུམ་མོའི་རྣལ་འབྱོར་བསྟེན་པར་བྱ། །ཁ་དོག་སྔོན་པོ་འཇིགས་ཆེན་པོ། །ཤིན་ཏུ་བཞད་པས་འཇིགས་པར་བྱེད། །ལག་ན་ལྷུང་བཟེད་ཁ་ཊའྭཾ་ག་།རྒྱན་ཀུན་གྱིས་ནི་རྣམ་པར་བརྒྱན། །དགྲ་ཡིས་ཀུན་ནས་གདན་དུ་ནི། །བདག་ཉིད་རྐང་པས་མནན་པར་བྱ། །རྡོ་རྗེའི་ས་བོན་རེ་ཕ་ལ། །ལྕགས་ཀྱུའི་ཡི་གེས་སྦྱར་ནས་ནི། ། མཐའ་རུ་འཇོམས་པའི་ཡི་གེ་ནི། །འབུམ་ཕྲག་གཅིག་གིས་འགྲུབ་པར་འགྱུར། །གསང་བའི་གདན་གྱི་ལེའུ་གསུམ་པ་ཞེས་བྱ་བའོ།། །།ཇི་ལྟར་ལུས་ལས་བྱུང་བ་ཡི་ནི་པདྨ་ལ། །བུང་པ་གཉིས་ཀྱིས་བདུད་རྩི་ཟ་བའི་སེམས་དང་ཡང ། །ཡང་དག་སྦྱོར་བས་བྱང་ཆུབ་ཡན་ལག་ལྡན་པ་ཡི། །མཆོག་གི་ཆོས་གསུམ་ཕ་རོལ་ཕྱིན་
236b
ལ་ཕྱག་འཚལ་ལོ། །སྲིན་མོ་དང་ནི་རོ་ལངས་མ། །མི་མེད་དུར་ཁྲོད་གནས་སུ་ནི། །ཡི་དྭགས་ཆེས་དང་སྐར་མ་ལ། །བརྟན་པའི་སེམས་ཀྱིས་བསྒྲུབ་པར་བྱ། །ར་ནག་པོ་ཡི་པགས་པ་བླང། །མཚོན་གྱིས་མ་བསྣུན་སྦྱར་བར་བྱ། །རས་ནི་བརྐྱང་ལ་ཐིག་གིས་གདབ། །རྫས་ལྔ་དང་ནི་ཡང་དག་ལྡན། །གཉིས་མེད་གཏོར་མ་བྱིན་གྱིས་བརླབ། །ལྕགས་ཀྱུ་ལྔ་དང་ལྡན་པ་ཡི། །སྔོན་དུ་གསུངས་བཞིན་དབུལ་བར་བྱ། །མཁའ་འགྲོའི་གཏོར་མ་བྱིན་བརླབས་ནས། །དེ་ཡི་ར་ཡི་ཤ་ཡིས་ནི། །སྦྱིན་སྲེག་བརྒྱ་རྩ་བརྒྱད་དུ་བྱ། །བྲིས་སྐུ་གནས་སུ་གཟུང་བྱས་ལ། །གཏོར་མས་མཆོད་ལ་བྲི་བར་བྱ། །ཁ་དོག་ནག་པོ་འཇིགས་ཆེན་པོ། །རོལ་པའི་འཕེན་པས་ཡང་དག་གནས། །ཡན་ལག་བརྒྱད་དུ་ཀུན་གྱིས་བརྒྱན། །སྐྲ་ནི་དགྱེས་པས་རྣམ་པར་བརྒྱན། །སྤྱན་གསུམ་ཁྲོ་བོ་མཆེ་བ་ཅན། །ཕྱག་བཞི་ཡིས་ནི་རྣམ་པར་སྤྲོས། །ཁ་ཊའྭཾ་ག་དང་རྡོ་རྗེའི་ལག་།དེ་བཞིན་རལ་གྲི་ཐོད་པ་དང ། །གླང་པོའི་པགས་པས་མངོན་པར་བགོས། །སྟག་གི་པགས་པའི་ཤམ་ཐབས་ཅན། །དེ་ལྟར་སྲིན་མོ་རོ་ལངས་མ། །རྣལ་འབྱོར་མཆོག་ཏུ་བརྩོན་པས་བྲི། །ཀུན་ནས་གཏོར་མ་ཡང་དག་ལྡན། །མི་མེད་དུར་ཁྲོད་གནས་སུ་ནི། །ནག་པོའི་ར་ཡི་ཤ་དང་ནི། །ཞོ་དང་མར་དུ་མངོན་པར་སྦྱར། །བརྒྱ་རྩ་བརྒྱད་བཅུ་\?\་བསྲེག་བྱས་པས། །ཕོ་ཉ་རོ་ལངས་མ་རབ་འགྲུབ། །མགོ་ལ་ཧཱུཾ། སྤྱི་བོར་ཧ། མིག་ལ་ཧྲཱི།
237a
༄#། །སྣ་ལ་ཧེ། རྣ་བ་ལ་ཧཾ། ལྕེ་ལ་ཧོ། སྙིང་གར་ཧཱུཾ། ཡན་ལག་དྲུག་ཏུ་བཀོད་པའི་སྔགས་སོ། །ོཾ་ཧྲཱིཿ ཧ་ན་ཧ་ན། སརྦ་ཤ་ཏྲཱུཾ་མ་ཐ་མ་ཐ། བནྡྷ་བནྡྷ་ཧཱུཾ་ཨ་མུ་ཀ་།སང་གྷཱ་ཏ་ཡ་གྷཱ་ཏ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཕུ་ཕུ། འདི་ནི་བསྒྲུབ་པ་ཐམས་ཅད་ཀྱི་སྔགས་སོ། །བ་དན་གསུམ་པའི་ཕྱག་རྒྱས་ནི། །ཡན་ལག་དྲུག་ཏུ་དགོད་པར་བྱ། །བ་དན་གསུམ་པས་སྙིང་གར་སྦྱིན། །དཔུང་པ་ཀུན་ནས་བརྐྱང་བྱས་ལ། །སེ་གོལ་གྱི་ནི་སྒྲ་དང་ནི། །ཧཱུཾ་གི་རྣམ་པར་ལྷན་ཅིག་སྦྱར། །གཡས་བརྐྱང་བ་ཡིས་ཡང་དག་གནས།། འདིར་ནི་མཆོག་གི་ཕྱག་རྒྱའོ། །སློབ་དཔོན་ལ་ནི་དམོད་པ་དང ། །དམ་ཚིག་སྤྱོད་ལ་འཕྱ་བ་དང ། །དཀོན་མཆོག་གསུམ་ལ་གནོད་བྱེད་པ། །སྡིག་གིས་གོས་པར་མི་འགྱུར་རོ། །སྐྱེ་བ་བྱེ་བ་བརྒྱ་སྟོང་དུ། །སངས་རྒྱས་ཡེ་ཤེས་ཀྱིས་བསྐུལ་ཞིང ། །དགེ་བའི་བཤེས་གཉེན་བསྟེན་པ་ཡིས། །རྣལ་འབྱོར་གཙུག་ལག་ཕྲད་པའོ། །སེམས་ཅན་ཐམས་ཅད་སྐྱོན་མེད་ཅིང ། །སེམས་ཅན་ཐམས་ཅད་བདེ་གྱུར་ཅིག་།གང་གིས་ལམ་ནས་འགྲོ་བ་ཡིས། །སངས་རྒྱས་ཉིད་དུ་གྲུབ་གྱུར་ཅིག་།མ་བསྒྲལ་བ་རྣམས་བསྒྲལ་བ་དང ། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་བརྩེ་བའི་ཕྱིར། །རྣལ་འབྱོར་བསྟན་བཅོས་འདི་བགྱིས་སོ། །གདན་བཞི་པ་ལས། སྦྱོར་བའི་རབ་ཏུ་བྱེད་པ་གདན་བཞིའི་
237b
ལེའུ་ཞེས་བྱ་བ་རྫོགས་སོ།། །།དཔལ་གསང་བ་ཐམས་ཅད་ཀྱི་རྒྱུད་ཅེས་བྱ་བ་འདི་ནི། པཎྜི་ཏ་སྨྲྀ་ཏི་ཛྙཱ་ན་ཀཱི་རྟིས་གསར་དུ་བསྒྱུར་ནས་བཤད་ཅིང་གཏན་ལ་ཕབ་པ། །དེ་ལྟར་ན་རྒྱུད་འདིའི་ལེའུ་སིལ་བུ་རྣམས་ཕྱོགས་གཅིག་ཏུ་བསྡོམས་ན་ལེའུ་བརྒྱ་དང་བཞི་བཞུགས་སོ། །སླད་ནས་བུ་སྟོན་ཐམས་ཅད་མཁྱེན་པའི་ཐུགས་དམ་རྒྱུད་འབུམ་དང ། དཔེ་དབང་རྙིང་པ་དག་དང་ཡང་གཏུགས་ཏེ་སྡེབས་ཞུས་དང་བཅས་པ་ཆེས་ཤིན་ཏུ་དག་པར་བགྱིས་སོ།།