།།རྒྱ་གར་སྐད་དུ། ཤྲཱི་ཙ་ཏུར་བཱི་ཐ་མ་ཧཱ་ཡོ་གི་ནི་ཏནྟྲ་རཱ་ཛ་ནཱ་མ། བོད་སྐད་དུ། རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་དཔལ་གདན་བཞི་པ་ཞེས་བྱ་བ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རྣལ་འབྱོར་མ་ཡི་དྲ་བ་སྡོམ། །ཡེ་ཤེས་སྟོང་པ་ཅན་དབང་ཕྱུག་།གནས་གཙང་མ་ན་བཞུགས་ནས་སུ། །ཐམས་ཅད་མཁྱེན་པས་འདི་སྐད་གསུངས། །སྦྱངས་པའི་ཡོན་ཏན་ཅན་དང ། མི་སྤུག་པ་དང ། འཕྱང་བ་དང ། མགྲིན་པ་གསུམ་པ་ཅན་དང།་རི་རབ་དང ། རི་རབ་གཙུག་ཏོར་དང ། པདྨ་ཅན་དང ། པདྨ་ཡངས་པ་ལ་སོགས་པ་རྣལ་འབྱོར་གྱི་དབང་ཕྱུག་བྱེ་བ་ཕྲག་བརྒྱད་ཅུའི་ནང་ནས་ཕྱག་ན་རྡོ་རྗེ་ལ་གཟིགས་ནས་འཛུམ་པ་མཛད་དོ། །འཛུམ་པ་མཛད་མ་ཐག་ཏུ་འདིར་ཕྱག་ན་རྡོ་རྗེ་སྟན་ལས་ལངས་ཏེ། བླ་གེས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལེ་བཙུགས་ཏེ།་ལག་པ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གསང་བ་སྦྱོར་བའི་མཚན་ཉིད་རྣམས། །ཡེ་ཤེས་དབང་ལ་ཉན་པར་འཚལ། །ས་དང་ 65a ༄#། །ནམ་མཁའ་ཇི་ལྟར་ལགས། །ཆུ་དང་མེ་ནི་ཇི་ལྟ་བུ། །འབྱུང་དང་འཇུག་པའི་དབུགས་དག་གིས། །བསམ་གཏན་ཇི་ལྟར་གཟུང་བར་བགྱི། །ཡུལ་འཁོར་སྐྱོང་བ་དང་པོ་ལྷ། །དཀྱིལ་འཁོར་དག་ནི་ཇི་ལྟར་ལགས། །ཡེ་ཤེས་རྣམ་ཤེས་ལུས་ཀྱི་ནི། །ལས་ལ་སོགས་པ་ཇི་ལྟར་སྦྱོར། །འཁོར་བ་ལས་སྒྲོལ་མཚན་ཉིད་ཀྱི། །དེ་ཉིད་ཇི་བཞིན་རྡོ་རྗེས་ཉོན། །དབུགས་ཀྱི་ལས་ལ་སོགས་ཐམས་ཅད། །ཡེ་ཤེས་ཅན་གྱི་ལས་སུ་སྦྱར། །ཉི་ཁྲི་དང་ནི་ཆིག་སྟོང་དང ། །དྲུག་བརྒྱ་རུ་ནི་བརྩི་བར་བྱ། །ཆུ་ཚོད་དྲུག་ཅུའི་དབུགས་རྣམས་ཀྱིས། །ཉིན་མཚན་དུ་ནི་གྲགས་པ་ཡིན། །འབྱུང་དང་འཇུག་པའི་དབུགས་རྣམས་ནི། །འབྱུང་བའི་གྲངས་ཀྱིས་བརྩི་བར་བྱ། ། བློ་དང་ལྡན་པས་དབུགས་གཉིས་ནི། །འཇུག་པ་འབྱུང་ལ་ཐིམ་པར་བྱ། །དེ་བཞིན་ས་ནི་བཅུ་གཉིས་ལ། །ཕྱི་རོལ་མཚན་མ་བཞག་བྱ་སྟེ། །ཚེས་གྲངས་མཚན་མ་ཇི་བཞིན་དུ། །རེ་མིག་བཅུ་གཉིས་རྣམས་སུ་བཞག་།གོ་རིམ་བཅུ་གཉིས་རབ་བརྩོན་པས། །ཤར་ནས་དཔྱིད་ཟླ་འབྲིང་སོགས་བཞག་།རོ་ཧི་ཏ་དང་མོ་ཧི་ཏ། །དེ་བཞིན་བྷ་དྲ་བྲི་ཥ་བྷ། །ཀུར་མ་མ་ཀ་ར་དྷ་དང ། །མི་ཀིར་དེ་བཞིན་བིད་ཏྲི་ག་།བྷྱ་ཀུ་སཝ་བན་ཀ་མ་ན། །ཀ་མ་ས་དང་བཅུ་དང་གཉིས། །འདི་དག་ཤར་སོགས་རེ་མིག་ལ། །གོ་རིམས་ 65b བཞིན་དུ་དགོད་པར་བྱ། །རོ་ཧི་ཏ་ལ་བཙས་པའི་བུ། །སྐལ་བ་བཟང་ལ་དེ་བཞིན་ཕྱུག་།གདུག་པའི་སེམས་ལ་ནད་བུ་ཅན། །རྟག་ཏུ་མཐའ་འཁོབ་གཙོ་བོ་སྟེ། །འཁྲིག་པ་ལ་ནི་རྟག་ཏུ་དགའ། །ཐམས་ཅད་དུ་ནི་སྙན་པར་སྨྲ། །རོ་ཧི་ཏ་ལ་ལྷ་མཆོད་ཅིང ། །དེ་བཞིན་ཚེ་ལོ་བདུན་ཅུ་ཐུབ། །རོ་ཧི་ཏ་ལ་ནོར་བཏང་ན། །མཛའ་བོ་ཐམས་ཅད་ལྡོག་པར་འགྱུར། །རོ་ཧི་ཏ་ལ་ལུས་རྨས་ན། །དཔལ་དང་ཀུན་ཏུ་ཕྲད་པར་འགྱུར། །རོ་ཧི་ཏ་ལ་གནས་རྟེན་ན། །གྲོགས་དང་ནོར་གྱིས་རྒྱས་པར་འགྱུར། །རོ་ཧི་ཏ་ལ་འགྲོན་ཞུགས་ན། །བསམ་པ་ཐམས་ཅད་མངོན་པར་འགྲུབ། །བག་མ་བླང་དང་མེ་ཡི་ལས། །ཞི་བའི་ལས་ནི་སྦྱར་བར་བྱ། །མོ་ཧི་ཏ་ཡི་དོན་སྦྱོར་བ། །བགྲང་བ་ཉིད་ཀྱིས་ཤེས་པར་བྱ། །མོ་ཧི་ཏ་ལ་བཙས་པའི་བུ། །ཚེ་ནི་དྲུག་ཅུ་རྩ་ལྔར་གྲགས། །མང་དུ་ཟ་ཞིང་སེམས་ཆུང་ལ། །འཁྲིག་པ་ལ་ནི་རྟག་ཏུ་དགའ། །རྟག་ཏུ་གདུག་ཅིང་ཅ་ཅོར་ལྡན། །མི་སྙན་པ་ངག་སྨྲ་ལ་དགའ། །ཁྲོ་ལ་ང་རྒྱལ་སྙིང་སྟོབས་མེད། །སྡིག་པ་བྱེད་ཅིང་ངང་ཚུལ་ང ། །འཁྱལ་བ་དང་ནི་ཚིག་རྩུབ་སྨྲ། །མཚོན་གྱིས་ངེས་པར་འཆི་བར་འགྱུར། །ཡང་ན་ཚེ་ལོ་བརྒྱད་ཅུ་ནི། །རྩ་བཞི་དག་ཏུ་རབ་ཏུ་བསྒྲགས། །རུང་བའི་ས་ནི་སྤོང་བྱེད་ཅིང ། །མི་རུང་བ་ལ་བརྩོན་པར་འགྱུར། །ལུས་ཀྱི་ཡན་ལག་སྨྲས་ན་ནི། །འཆི་བདག་དང་ནི་ཕྲད་པར་འགྱུར། །གལ་ཏེ་ཅུང་ཟད་ནོར་ 66a ༄#། །གཏོང་ན། །བཏང་བ་སླར་ནི་མི་ལྡོག་གོ་།བྷ་དྲ་ལ་ནི་སྐྱེས་པའི་བུ། །ཁ་ཟས་བཟང་པོ་ཟ་བ་དང ། །བཟང་པོའི་ལས་ནི་བྱེད་འགྱུར་ཞིང ། །ལོ་བརྒྱ་རུ་ནི་འཚོ་བར་འགྱུར། །དབུལ་ལ་ཆོས་ནི་སྤྱོད་པ་དང ། །བདེན་པར་སྨྲ་ཞིང་སྙན་པར་བརྗོད། །ཆུང་མ་གཅིག་གིས་ཚིམ་པའི་ལུས། །བཟང་པོར་སྨྲ་བའི་གཙོ་བོར་འགྱུར། །བཟོ་རྣམས་ཀུན་དང་དུས་ཚོད་རིག་།རྟག་ཏུ་རང་གི་གཉེན་དང་མཛའ། །ཆད་པ་གཅོད་པའི་རིགས་ཅན་ཏེ། །དེ་བཞིན་ལུས་ནི་ཆུ་རུ་འཆི། །བྲྀ་ཥ་བྷ་ལ་སྐྱེས་པའི་བུ། །བརྩོན་འགྲུས་ལྡན་ཞིང་དགྲ་ལ་དཔའ། །སྒེག་དང་ནོར་གྱིས་ཕྱུག་པ་སྟེ། །ཆུང་མ་མང་དུ་ལེན་པར་འགྱུར། །རྟག་ཏུ་གཉེན་ནི་མང་བ་སྟེ། །ཕ་ཡི་སྲོག་ནི་འཇོམས་པར་བྱེད། །སོ་ནམ་ཚོང་གིས་འཚོ་བྱེད་ཅིང ། །ཚེ་ནི་དྲུག་ཅུར་འཚོ་བར་འགྱུར། །སྙོམས་ལས་མུ་ཅོར་སྨྲ་བ་དང ། །གདུག་ཅིང་ལས་དང་ངང་ཚུལ་ངན། །མཚོན་གྱིས་འཆི་བར་འགྱུར་བ་འམ། །ཡང་ན་སྲོག་ཆགས་གདུག་པས་སོ། །ཀུར་མ་ལ་ནི་བཙས་པའི་བུ། །རྟག་ཏུ་སེམས་ཁྲལ་ཅན་དུ་གནས། །ཆུང་གིས་ཁྲོ་ཞིང་ཆུང་གིས་མགུ། །མང་དུ་སྨྲ་ཞིང་གཉེན་ལ་བྱམས། །དྲག་ཏུ་སྨྲ་ཞིང་ལྷག་པར་ཁྲོ། །ཕྱུག་ཅིང་ཐམས་ཅད་གཏོང་ལ་དགའ། །བུ་དང་ཆུང་མ་འཆི་བར་འགྱུར། །རྟག་ཏུ་རང་གི་ཡུལ་ན་གཙོ། །ཞིང་གི་ལས་ལ་སོགས་ 66b པས་འཚོ། །མཛེ་ཡི་ནད་ཀྱིས་འཛིན་པར་འགྱུར། །ཚེ་ལོ་བརྒྱད་ཅུ་ལོན་པ་ན། །དེ་བཞིན་རང་གི་ཡུལ་དུ་འཆི། །མ་ཀ་ར་ལ་བཙས་པའི་བུ། །ཚེ་ནི་དགུ་བཅུ་རྩ་དྲུག་སྟེ། །ཚུལ་ཁྲིམས་ཕུན་ཚོགས་བསོད་ནམས་ལྡན། །འདུལ་བ་དང་ནི་སྤྱོད་པ་སྲུང ། །ནོར་ལྡན་གཟུགས་བཟང་ཕུན་སུམ་ཚོགས། །སྐལ་བ་བཟང་ཞིང་གྲགས་པས་མཛེས། །བཟོ་དང་སྒྱུ་རྩལ་ཀུན་ལ་མཁས། །ཆུང་མ་གཅིག་ནི་ཤིན་ཏུ་གསལ། །རྟག་ཏུ་སེམས་ནི་ལྷོད་པ་སྟེ། །དུལ་བ་དང་ནི་སྲུང་བ་སྟེ། །གཉེན་གྱི་ནང་ན་གཅིག་པུ་གཙེ། །ཀུན་ལ་སྙན་སོགས་སྨྲ་བ་དང ། །དེ་བཞིན་གཡུལ་ངོར་འཆི་བར་འགྱུར། །ཚེ་ལོ་བརྒྱད་ཅུ་རྩ་ལྔ་དང ། །ཡང་ན་དྲུག་ཅུའམ་སུམ་ཅུའོ། །རཎྜ་ལ་ནི་བཙས་པའི་བུ། །རྟག་ཏུ་སྡིག་པའི་བློ་ཅན་ཏེ། །སེམས་ཅན་རྣམས་ལ་འཁྱལ་བར་སྨྲ། །རྟག་ཏུ་དབུལ་ཞིང་ཁ་གསག་སྨྲ། །དུས་ཀུན་དུ་ནི་ནད་བུ་ཅན། །རྒྱལ་པོས་ཆད་པ་གཅོད་པའི་བདག་།འཁྲིག་པ་ལ་ནི་རྟག་ཏུ་དགའ། །གཞན་དག་ལ་ནི་ཡིད་མི་རྟོན། །ཟོལ་དང་བཟོ་སོགས་ཀུན་རིག་པ། །བུད་མེད་རྣམས་ལ་སྐལ་བ་བཟང ། །ཚེ་ལོ་ལྔ་བཅུ་རྩ་ལྔའམ། །ཡང་ན་དྲུག་ཅུའམ་སུམ་ཅུར་ངེས། །མི་ཀི་ར་ལ་བཙས་པའི་བུ། །ཆོས་ཤེས་རང་གི་རིགས་ཀྱང་མཐོ། །ལུགས་ཀྱི་བསྟན་བཅོས་ཕུན་སུམ་ཚོགས། །བཟོ་དང་རིགས་བ་སྣ་ཚོགས་ལྡན། །ཚིག་རྩུབ་སྨྲ་ལ་དྲག་པ་སྟེ། །ཤིན་ཏུ་ཁྲོ་ཞིང་ 67a ༄#། །འཇིགས་སུ་རུང ། །ནོར་ཉུང་གཟུགས་ནི་བཟང་བ་སྟེ། །བྱ་བ་ཐམས་ཅད་མྱུར་བར་འགྲུབ། །དེ་ཡི་ལུས་ནི་རང་ཉིད་ཀྱིས། །ཆུ་རུ་མཆོངས་ཏེ་འཆི་བར་འགྱུར། །ཚེ་ལོ་བརྒྱད་ཅུ་རྩ་བརྒྱད་ན། །ཡང་ན་རྒྱལ་པོའི་ཁྲིམས་ཀྱིས་གསོད། །པི་ཏྲི་ཀ་ལ་བཙས་པའི་བུ། །སྐྱེས་མ་ཐག་ཏུ་མ་ནི་འཆི། །ཕ་ཡང་ལོ་ནི་བརྒྱད་ན་འཆི། །དེ་བཞིན་རང་གི་ཁྱིམ་ན་གཙོ། །ཁྲོ་ལ་རྫས་ནི་ཉུང་བར་འགྱུར། །སྡིག་པ་ལ་སོགས་བླུན་དང་ལྡན། །ལས་དང་སེམས་ཁྲལ་ཆུང་བ་སྟེ། །དཔུང་རྣམས་ཀྱི་ནི་གཙོ་བོ་ཉིད། །ཚེ་ལོ་བརྒྱ་དང་རྩ་བརྒྱད་ན། །རང་གི་ཁྱིམ་དུ་འཆི་བར་འགྱུར། །གཉེན་རྣམས་ཀུན་དང་མཛའ་བ་སྟེ། །སྡུག་ཕོངས་རྣམས་ལ་བརྩེ་བར་ལྡན། །བྷྱ་ཀུ་ལ་ནི་བཙས་པའི་བུ། །བློ་ཆུང་ངན་པར་སྨྲ་བ་དང ། །ཤེས་རབ་ཞན་ཅིང་ནད་བུ་ཅན། །རྟག་ཏུ་གྲོགས་པོ་ངན་དང་འགྲོགས། །རང་གི་གཉེན་བྱམས་སྐལ་བ་བཟང ། །སྡུག་ཕོངས་རྣམས་ལ་རྗེས་སུ་བརྩེ། །ནོར་དང་བ་ལང་ཤིན་ཏུ་ཕྱུག་།ཁྱིམ་དང་ཆུང་མ་གསུམ་ལ་སོགས། །སྐད་ཅིག་ཁྲོ་ཞིང་ང་རྒྱལ་ལྡན། །དགྲ་ཡིས་གཟིར་བས་འཇིགས་པར་འགྱུར། །ཕ་དང་མ་ནི་ཚེ་ཡང་རིང ། །དེ་བཞིན་ཚེ་ལོ་བདུན་ཅུ་ཐུབ། །ཚོང་གི་ལས་ཀྱིས་འཚོ་བར་བྱེད། །ལན་གཅིག་ཚོང་གི་རྒྱུ་ཡིས་འཆི། །སྦྱོར་བ་བརྩམས་པའི་མཚན་མ་ལ། །ཡེ་ཤེས་ཅན་གྱིས་བགྲང་བར་བྱ། །སཝཔྣ་ 67b ལ་ནི་བཙས་པའི་བུ། །དཔའ་རྟུལ་ཕ་རོལ་གནོན་པ་ཡིས། །དགྲ་རྣམས་ཐམས་ཅད་སྲེག་པར་བྱེད། །མགོན་མེད་རྣམས་ཀྱི་རྩ་ལག་སྟེ། །དུས་རྣམས་ཀུན་ཏུ་དབུལ་བ་དང ། །སྡིག་པའི་ལས་ལ་ནན་ཏན་བྱེད། །བདག་ཉིད་སེང་གེར་སེམས་པ་དང ། །ཚིག་རྩུབ་སྨྲ་ལ་ཐམས་ཅད་རིག་།དུས་ཀུན་དུ་ནི་ནད་མེད་ཅིང ། །རྟག་ཏུ་ལོངས་སྤྱོད་རྙེད་པར་འགྱུར། །གཞན་ལ་བརྟེན་པས་འཚོ་བ་དང ། །བུད་མེད་ཀུན་ལ་གནོད་ཅིང་སྤྱོད། །ཚེ་ལོ་ལྔ་བཅུ་ཐམ་པ་རུ། །དེ་ནི་ངེས་པར་འཚོ་བར་འགྱུར། །དགྲ་ཡི་མཚོན་གྱིས་བརྒྱབ་ནས་སུ། །འཆི་བར་འགྱུར་བར་གདོན་མི་ཟ། །ཀཱ་མ་སཝ་ལ་བཙས་པའི་བུ། །ཚེ་ནི་དྲུག་ཅུ་རྩ་བརྒྱད་འཚོ། །ནོར་དང་འབྲུ་དང་གྲོང་དང་ནི། །ཕྱུགས་དང་རྟ་སོགས་བཞོན་པར་ལྡན། །བདེན་པར་སྨྲ་ཞིང་ཆོས་ཀྱང་ཤེས། །སེམས་ཅན་ཀུན་ལ་ཕན་པར་བྱེད། །རིག་པ་དང་ནི་སྙན་པར་སྨྲ། །བསྟན་བཅོས་ཐམས་ཅད་ཤིན་ཏུ་རྒྱས། །སེམས་ཅན་ཀུན་ལ་སྐལ་བ་བཟང ། །རང་གི་ཡུལ་དུ་འཆི་བར་འགྱུར། །སྦྱོར་བའི་མཚན་མ་བསྟན་པ་རྣམས། །ངས་བསྟན་པ་ལ་ཐེ་ཚོམ་མེད། །རོ་ཧི་ཏ་ནི་ལྷ་ལ་མཆོད། །མོ་ཧི་ཏ་ནི་ནོར་ལ་བརྐམ། །བྷ་དྲ་ཁ་ཟས་བཟང་པོ་ཟ། །བྲི་ ་བྷ་ལ་མང་དུ་ཁྲོ། །ཀུར་མ་ལ་ནི་གཞན་དུ་སེམས། །མ་ཀ་ར་ལ་འབྲེལ་པར་སྨྲ། །རན་དྷ་ལ་ནི་སྡིག་སེམས་ཅན། །མི་ཀི་ར་ནི་འཁྲིག་ལ་བརྟེན། །བྷིད་ཏྲི་ཀ་ནི་གཉིད་ལོག་ཅིང ། །བྷྱ་ཀུ་ལི་ནི་བླ་རྡོལ་ལོ། །སཝཔྣ་ 68a ༄#། །ལ་ནི་རང་ཉིད་སེམས། །ཀཱ་མ་གླུ་དང་ཀློག་འདོན་བྱེད། །རོ་ཧི་ཏ་ལ་ཞི་བའི་ལས། །དེ་བཞིན་བྲྀ་ཥ་རྒྱས་པ་སྟེ། །མ་ཀ་ར་ནི་དབང་དང་འབྱོར། །བྷ་དྲ་ལ་ནི་མངོན་སྤྱོད་བྱ། །མོ་ཧི་ཏ་ཡིས་བསྐྲད་པ་སྟེ། །ཀུར་མ་ལ་ནི་བཅིང་བའི་ལས། །རན་དྷས་དབྱེ་བར་ཤེས་པར་བྱ། །བྷྱ་ཀུ་ལ་ནི་སྨན་སྤྱར་བྱ། །ར་ཡི་ཁྱུ་མཆོག་གྲུབ་པ་སྟེ། ། བདུད་རྩི་སྦྱོར་བས་སྐྱེ་མི་འགྱུར། །ཤར་ལ་སོགས་པའི་ཕྱོགས་བཞག་ནས། །སྔ་དྲོ་མཁས་པར་བརྩི་བར་བྱ། །རོ་ཧི་ཏ་ལ་ནོར་བྱིན་ན། །རྫུ་འཕྲུལ་དག་ནི་རྒྱས་པར་འགྱུར། །མོ་ཧི་ཏ་ལ་ནོར་བསྡུས་ན། །གཞན་གྱིས་དགག་པར་མི་ནུས་སོ། །བྷ་དྲ་ལ་ནི་ཁྱིམ་བརྩམས་ན། །དཔལ་དང་ཡང་དག་ཕྲད་པར་འགྱུར། །བྲི་ཥ་ལྷ་ཡི་རྣལ་འབྱོར་གྱིས། །སྔགས་ནི་ཀུན་ཏུ་འགྲུབ་པར་འགྱུར། །ཀུར་མའི་སྦྱོར་བས་བག་མ་བླང ། །ཐམས་ཅད་དུ་ནི་འབྲལ་མི་འགྱུར། །མ་ཀ་ར་ལ་ཞིང་བཏབ་ན། །གདོན་མི་ཟ་བར་འབྲུ་རྣམས་འཕེལ། །རན་དྷ་བུད་མེད་བགྲོད་བྱས་ན། །ཤི་བར་གྱུར་ཀྱང་མི་གཏོང་ངོ ། །མི་ཀི་ར་ལ་ཚོང་བྱས་ན། །གཏམས་པ་དེ་ལྟར་ལེན་པར་སྣང ། །རྟག་ཏུ་བརྟན་པར་བཞག་བྱ་བའི། །ལས་ཚེགས་བྷི་ཏྲི་ཀ་ལས་བཟུང ། །བྷྱ་ཀུ་ལི་ལས་མགྲོན་ཞུགས་ན། །འཚོ་བ་མེད་པར་གནས་སུ་ཕྱིན། །སཝཔྣ་ཐམས་ཅད་ཀུན་ཏུ་ 68b ནི། །ངེས་པར་རྟག་ཏུ་མངོན་པར་འོང ། །ཀ་མ་ལ་ནི་ནོར་བཏང་ན། །བཏང་བ་སླར་ལ་ལྡོག་མི་འགྱུར། །རོ་ཧི་ཏ་ལ་ནོར་རྒྱས་བུ། །མོ་ཧི་ཏ་ནི་འཇོག་པོ་ཡིན། །སྟོབས་ཀྱིས་རྒྱུ་བ་བྷ་དྲའི་གནས། །དེ་བཞིན་པདྨ་བྲྀཥ་བྷ། །ཀུར་མ་པདྨ་ཆེན་པོ་སྟེ། །མ་ཀ་ར་ནི་དུང་སྐྱོང་ངོ ། །རན་དྷ་དུང་སྐྱོང་ཆེན་པོ་སྟེ། །མི་ཀི་ར་ནི་རིགས་ལྡན་ནོ། །བྷི་ཏྲི་མགོ་བརྒྱ་པ་ཡིན་ཏེ། །བྷྱ་ཀུ་ལ་ནི་འཁྱིལ་ལྟུང་ཡིན། །སཝཔྣ་འཇིགས་པ་ཞེས་བྱ་སྟེ། །ཀ་མ་དུས་ཀྱིས་འཆི་བར་འདོད། །འདི་དག་དུས་སྦྱོར་རིམ་པ་བཞིན། །བྱེ་བྲག་ཏུ་ནི་ཤེས་པར་བྱ། །རཝ་ཡི་ཁྱུ་མཆོག་གྲུབ་པ་སྟེ། །བདུད་རྩི་སྦྱོར་བས་སྐྱེ་མི་འགྱུར། །གང་གིས་མཆེ་བས་མངོན་ཟིན་ན། །འཆི་བདག་དང་ནི་ཕྲད་འགྱུར་བའོ། །དུག་བསྡུ་བ་ཡི་སྦྱོར་བ་དག་།གཞན་ལ་དུག་ནི་སྦྱར་བར་བྱ། །དུས་ཀྱི་མཚན་མ་ཇི་བཞིན་དུ། །གོ་རིམས་རིམ་པ་བཞིན་དུ་བྱ། །དཔྱིད་ཟླ་འབྲིང་སོགས་རིམ་བཞིན་དུ། །ཉི་མ་བྱང་དུ་འགྲོ་བའི་ཚེ། །ཇི་ལྟའི་དུས་བཞིན་མཚན་མ་ནི། །རིམ་གྱི་རིམ་གྱིས་སྦྱར་བར་བྱ། །ཉིན་མོའི་ཆུ་ཚོད་སོ་སོར་ནི། །མཁས་པས་བཅུ་གཉིས་བཞི་བསྒྱུར་བྱ། །མཚན་མོ་དྲུག་དང་བཅུ་གསུམ་བསྒྱུར། །ཆུ་ཚོད་མཁས་བས་བརྩམ་པར་བྱ། །རེ་མིག་དག་ནི་གཉིས་པ་ལ། །དུས་ལ་མཁས་པས་དུས་ཚོད་བྱ། །ཉིན་མོ་དྲུག་དང་བཅུ་གཉིས་བསྒྱུར། །ཆུ་ཚོད་ཀྱི་ནི་མཚན་མར་བྱ། །བཞི་དང་བཅུ་ 69a ༄#། །གསུམ་བསྒྱུར་བ་ནི། །མཚན་མོ་ཆུ་ཚོད་དུ་ནི་བརྟག་།བདག་དང་བཅུ་གཉིས་བསྒྱུར་བ་དག་།ཉིན་མོ་རུ་ནི་བརྟག་པར་བྱ། །གཉིས་དང་བཅུ་ནི་གསུམ་བསྒྱུར་བ། །མཚན་མོའི་ཆུ་ཚོད་དུ་ནི་བརྟག་།ཆུ་ཚོད་སུམ་ཅུ་ཐམ་པ་ནི། །དབུས་ཀྱི་བི་ཤུ་གཉིས་པར་སྦྱར། །གཉིས་མཐའ་བཅུ་ནི་གསུམ་པོ་དག་།ཉིན་མོ་ཆུ་ཚོད་ཤེས་པ་སྟེ། །བརྒྱད་དང་བཅུ་ནི་གཉིས་པོ་དག་།དེ་ཡི་མཚན་མོའི་མཚན་མར་བྱ། །བཞི་དང་བཅུ་གསུམ་མཚན་མོ་ནི། །ཉིན་མོ་ཡི་ནི་ཆུ་ཚོད་ད། །དྲུག་དང་བཅུ་ནི་གཉིས་བསྒྱུར་བ། །མཚན་མོའི་ཆུ་ཚོད་མཚན་མ་བྱ། །དྲུག་དང་བཅུ་ནི་གསུམ་བསྒྱུར་བ། །ཉིན་མོ་ཡི་ནི་ཤེས་བྱ་སྟེ། །བཞི་དང་བཅུ་ནི་གཉིས་བསྒྱུར་བ། ། མཚན་མོའི་ཆུ་ཚོད་དུ་ནི་གྲགས། །བྱང་དུ་བགྲོད་པ་བཤད་ནས་ནི། །དེ་བཞིན་གཞན་གྱི་དུས་ཤེས་བྱ། །བཞི་དང་གསུམ་བསྒྱུར་ཆུ་ཚོད་ནི། །ཉིན་མོ་ཡི་ནི་བཤད་པ་ཡིན། །དྲུག་དང་བཅུ་ནི་གཉིས་བསྒྱུར་བ། །མཚན་མོ་ཡི་ནི་མཚོན་པར་བྱ། །གཉིས་དང་བཅུ་ནི་གསུམ་བསྒྱུར་བ། །དེ་བཞིན་ཉིན་མོའི་ཆུ་ཚོད་ཡིན། །བརྒྱད་དང་བཅུ་ནི་གཉིས་བསྒྱུར་བ། །ཆུ་ཚོད་མཚན་གྱི་རབ་ཏུ་གྲགས། །བཅུ་ནི་གསུམ་གྱི་བསྒྱུར་བ་དག་།བི་ཤུ་ཉིན་མོའི་ཆུ་ཚོད་དེ། །དེ་བཞིན་མཚན་གྱི་ཆུ་ཚོད་ཀྱང ། ། 69b བཅུ་ནི་གསུམ་དུ་བསྒྱུར་བར་བྱ། །དེ་བཞིན་བི་ཤུ་བར་མ་གཉིས། །བརྒྱད་དང་བཅུ་ནི་གཉིས་བསྒྱུར་ལ། །ཉིན་མོ་ཡི་ནི་བསམ་པར་བྱ། །གཉིས་དང་བཅུ་ནི་གསུམ་བསྒྱུར་བ། །མཚན་མོའི་ཆུ་ཚོད་དུ་ནི་བརྟག་།དྲུག་དང་བཅུ་ནི་གཉིས་བསྒྱུར་བ། །ཉིན་མོའི་ཆུ་ཚོད་རིམ་པ་ཡིན། །བཞི་དང་བཅུ་ནི་གསུམ་བསྒྱུར་བ། །དེ་བཞིན་མཚན་མོའི་ཆུ་ཚོད་དོ། །སུམ་བརྒྱ་ལྔ་བཅུ་རྩ་གཉིས་ཀྱིས། །ཆུ་ཚོད་ཀྱིས་ནི་དུས་རྣམས་འདའ། །ཆུ་ཚོད་དྲུག་ཅུའི་གྲངས་ཀྱིས་ནི། །ཉིན་མཚན་ཕྲུགས་གཅིག་ཏུ་ནི་སྦྱར། །ཟླ་བའི་གོ་རིམས་ཇི་བཞིན་དུ། །རིམ་པ་དེ་བཞིན་མཚན་མ་བྱ། །ཆུ་ཚོད་དབུགས་སོགས་རྫོགས་པ་དང ། །བི་ཤུ་མ་གཏོགས་རིམ་སྤེལ་བྲི། །ལས་དང་ལས་མིན་བྱེ་བྲག་བཞིན། །དབུགས་ཀྱི་རིམ་གྱིས་གཟུང་བར་བྱ། །ཁ་དང་ར་སོགས་དུས་ཚིགས་དང ། །བགྲོད་པ་གཉིས་ཀྱིས་མཚོན་པར་བྱ། །གཉིས་པོ་དག་ནི་བཅུས་བསྒྱུར་བ། །དེ་བཞིན་ལོ་ཡི་ཆུ་ཚོད་དོ། །དེ་ཡི་མཚན་མ་ལྡན་པ་ཡིས། །ཉིན་མཚན་གྱི་ནི་དབུགས་སུ་བརྩི། །ངག་གི་དབང་ཕྱུག་ཀུན་བཟུང་ནས། །དབྱངས་ཀྱི་མཚན་མར་མངོན་པར་གཞག་།མ་ནིང་གཉིས་ནི་སྤངས་ནས་སུ། །ས་ཡི་དབང་ཕྱུག་ཀུན་ཏུ་གཞག་། ཡི་རིམ་པ་ལ་བབ་ན། །དཔལ་དང་མངོན་པར་མཉམ་འགྲོགས་ཤིང ། །\?\་རྒོར་རྙེད་པ་ནི་སྣང་བ་སྟེ། །སྐལ་བ་བཟང་པོར་གདོན་མི་ཟ། །ཱ་ཡི་རི་མིག་ལ་བབ་ན། །རིམས་ 70a ༄#། །དང་ནད་ཀྱིས་གཟིར་བ་དང ། །འཇིགས་ཤིང་སྐྲག་པར་སྣང་བར་འགྱུར། །ཱ་ཞེས་བྱ་བར་ངེས་པར་སྟོན། །ཡི་གེ་ཨི་ལ་བབ་གྱུར་ན། །རྒྱལ་པོའི་དཔལ་ནི་སྟེར་འགྱུར་ཏེ། །ཀུན་ནས་ནོར་ནི་རྙེད་པ་དང ། །གང་ཞིག་བསམས་པ་ངེས་འགྲུབ་འགྱུར། །ཡི་གེ་ཨཱི་ལ་བབ་གྱུར་ན། །ཟླ་བ་དྲུག་ན་འཆི་བ་དང ། །དེ་བཞིན་དགྲས་ནི་གཟིར་བ་དང ། ། མེ་ཡིས་འཇིགས་པ་ཤེས་པར་བྱ། །ཡི་གེ་ཨུ་ལ་བབ་གྱུར་ན། །དཔལ་དང་གྲོགས་མོ་རྙེད་པ་དང ། །ནོར་དང་འབྲུ་ནི་འཕེལ་བར་འགྱུར། །དཔལ་རྣམས་ཀྱང་ནི་རྙེད་པར་འགྱུར།། ཨཱུ་ལ་གལ་ཏེ་བབ་གྱུར་ན། །དེ་ནི་དགྲ་ཡིས་འཚེ་བར་འགྱུར། །བྲན་བཟང་དང་ནི་གཉེན་མཚན་རྣམས། །འཇིགས་ཤིང་སྐྲག་པར་སྣང་བར་འགྱུར། །ཡི་གེ་ཨེ་ལ་བབ་འགྱུར་ན། །འཕྲལ་དུ་སྐྱེ་བོ་སྐལ་ཅན་འགྱུར། །སྐྱེས་པ་བུད་མེད་དག་གི་ནི། །མཆོད་པའི་གནས་ནི་ཐོབ་པར་འགྱུར། །ཻ་ཡི་མཚན་མ་ལ་ལྷུང་ན། །དགྲ་དང་རྒྱལ་པོའི་འཇིགས་པ་དང ། །ལུས་ཅན་རྐུན་པོས་གཟིར་འགྱུར་ཞིང ། །ནད་དང་རིམས་ཀྱིས་ཐེབས་པར་འགྱུར། །ོ་ཡི་མཚན་མ་ལ་བབ་ན། །གནས་ཀྱི་དབང་པོར་འགྱུར་བ་དང ། །ནོར་དང་འབྲུ་ནི་རྙེད་འགྱུར་ཞིང ། །ཡིད་འོང་རིག་པ་དེ་བཞིན་ནོ། །ཽ་ཡི་མཚན་མ་ལ་བབ་ན། །འཐབ་མོ་དང་ནི་དགྲས་འཚེ་ཞིང ། །གནས་ལས་ཉམས་དང་ 70b བརྡེག་འཚོག་དང ། །བྱས་པ་ཆུད་ནི་ཟོས་པར་འགྱུར། །ཡི་གེ་ཨཾ་ལ་བབ་གྱུར་ན། །བྲན་བཟང་དག་ནི་རྙེད་འགྱུར་ཞིང ། །བུ་དང་རིག་པ་རྙེད་འགྱུར་ཏེ། །དེ་བཞིན་གྲོགས་པོ་རྙེད་པར་འགྱུར། །ཇི་ལྟར་སྔོན་གྱི་ཨ་ཞེས་པ། །དེ་བཞིན་ཐ་མའང་གཟུང་བར་བྱ། །དྲུག་འགྱུར་དུ་ནི་བཞག་ནས་སུ། །ལྔ་པ་དེ་ནི་སུམ་འགྱུར་བྱ། །སུམ་བརྒྱ་དྲུག་ཅུ་བསྲེས་ནས་ནི། ། ས་བཞིན་དུ་ནི་བཅད་ནས་སུ། །ཡི་གེ་ལྷག་མ་བཟུང་བྱས་ཏེ། །དགེ་དང་མི་དགེ་མཚན་མ་བྱ། །ཡང་ན་རི་མོ་ཀྱག་ཀྱོག་བྲི། །དབྱངས་ཀྱི་དང་པོ་ལ་སོགས་བགྲང ། །ཡང་ན་མེ་ཏོག་གཏོར་ནས་ནི། །དེ་བཞིན་ས་ནི་མཚོན་པར་བྱ། །སྔ་དྲོ་རོ་ཧི་ཏ་དུས་སུ། །བདེན་པ་ཐམས་ཅད་བལྟ་བར་བྱ། །རྣལ་འབྱོར་བསྟན་བཅོས་རབ་ཏུ་བསྔགས། །བདག་གི་གདན་གྱི་རབ་ཏུ་བྱེད་པ་ལས། རིམ་པར་ཕྱེ་བ་སྟེ་དང་པོའོ།། །།ཡེ་ཤེས་དེ་ནི་བྱེ་བྲག་དག་།བཅོམ་ལྡན་འདས་ལ་ཉན་པར་འཚལ། །ལུས་ཀྱི་མཚན་མ་ཇི་ལྟ་བུ། ། དེ་ཉིད་གང་ལ་བརྟེན་པར་བགྱི། །ལུས་ཀྱི་མཚན་མ་སྟོན་པ་རྣམས། །ཉོན་ཅིག་རྡོ་རྗེ་རྒྱལ་པོ་ཆེ། །ལུས་ཀྱི་མཚན་མ་མངོན་བསྟན་གྱིས། །གང་ཞིག་ཤེས་པ་ཙམ་གྱིས་ནི། ། འཆི་བའི་དུས་ལ་བབ་པར་གནས། །དབུགས་ནི་རྣམ་པར་རྒོད་ཙམ་གྱིས། །ལུས་ཅན་ཟླ་བ་དྲུག་གིས་འཆི། །འཇིགས་པ་ཅུང་ཟད་མཐོང་མིན་པར། །འགྲམ་པའི་མཚམས་ 71a ༄#། །ནི་བྱེ་གྱུར་ན། །དེ་ཚེ་དུས་ལ་བབ་པར་འགྱུར། །དབུགས་ནི་ཆད་ཅིང་ཆད་འགྱུར་བ། །སྔ་དྲོ་རོ་ཧི་ཏ་དུས་སུ། །མཚན་མ་དག་ནི་བརྟག་པར་བྱ། །སྣ་ཡི་བར་ནི་ཆད་གྱུར་ན། །ཉི་མ་བདུན་ན་གདོན་མ་ཟི། །མིག་གི་ཆུ་ནི་ཆད་གྱུར་ན། །དེ་བཞིན་ཉི་མ་ལྔ་ཡིས་འཆི། །འགྲམ་པའི་ལོགས་ཀྱི་མཚན་མོ་ཡིས། །ཞག་གཅིག་ལས་ནི་མི་འཚོའོ། །རྣ་བའི་ཆོལ་ཟངས་ལྟེབས་པ་ཡིས། །ཆུ་ཚོད་ལྔ་ན་གདོན་མི་ཟ། །འདིར་ནི་ལྕེ་ཡི་ཐིག་ནག་གིས། །ལུས་ཅན་ཞག་གཉིས་འཆི་བར་འགྱུར། །སྟེང་འོག་སོ་ནི་འཐམས་པ་ན། །ཞག་གསུམ་འཆི་བདག་བྲད་པར་འགྱུར། །མགྲིན་པའི་ལོགས་ཀྱི་ཕྱི་རོལ་རྩས། །ཟླ་བ་ཕྱེད་ན་གདོན་མི་ཟ། །བྲང་གི་དྲ་བ་ཞོམ་གྱུར་ན། །ཟླ་ཕྱེད་སྨན་པས་གསོར་མི་རུང ། །སེན་མོ་ཁྲག་ནི་མེད་པ་ཡིས། །ལུས་ཅན་ཉི་མ་བརྒྱད་ན་འཆི། །འཆི་བའི་མཚན་མ་བརྒྱད་བཅས་པ། །འཆི་བའི་དུས་བབ་མཚོན་པར་བྱ། །སྣ་ཡི་བར་ཤ་ཆད་པ་ལ། །ཡེ་ཤེས་ས་བོན་གྱིས་གཟིར་བྱ། །མིག་གི་ཆུ་ནི་ཆད་པ་ན། །རྡོ་རྗེ་མ་ཡི་ས་བོན་གཟུང ། །མཁུར་ཆོས་ལོགས་ཀྱི་མཚན་མ་ལ། ། དྲག་མོའི་ས་བོན་གཟིར་བར་བྱ། །རྣ་བའི་ཆོས་བྲངས་ཞུམ་པ་ལ་།རོ་ལངས་མ་ཡི་ས་བོན་དགོད། །ལྕེ་ཡི་ཐིག་ནག་འདི་ལ་ནི། །གཏུམ་མོའི་ས་བོན་བསམ་པར་ 71b བྱ། །སོ་དང་སོ་ནི་འཐམས་པ་ལ། །སེང་གེ་མ་ཡི་ས་བོན་བརྡེག་།མགྲིན་པའི་ལོགས་ཀྱི་ཕྱི་རོལ་རྩ། །སྟག་མོའི་ས་བོན་བརྡེག་པར་བྱ། །བྲང་གི་དྲ་བ་ཞོམ་པ་ལ། །ལྕེ་སྤྱང་ས་བོན་གཟུང་བར་བྱ། །ལག་པའི་སེན་ཁྲག་མེད་པ་ལ། །འུག་པ་མ་ཡི་ས་བོན་གཟུང ། །འཆི་ལྟས་ཡན་ལག་མཚན་མ་ནི། །ས་བོན་དེ་དག་དགོད་པས་སྲུང ། །ཕྱི་ན་ཡེ་ཤེས་འཁོར་ལོ་ནི། །བྲི་བའི་ཆོ་གས་རྣམ་ཤེས་སྲུང ། །མ་བསྲེགས་ཁམ་ཕོར་གཉིས་བཟུང་ལ། །གུར་གུམ་རོ་ཙ་ན་ཡིས་ནི། །འོག་གི་ཆར་ནི་རེ་མིག་དགུ་།དེ་བཞིན་སྟེང་ལ་བཅུ་གཉིས་བྱ། །དབུས་སུ་མིང་ནི་བྲིས་ནས་སུ། །ས་བོན་གྱིས་ནི་མངོན་པར་བསྐོར། །ཕྱག་འཚལ་དབྱངས་ཀྱི་དང་པོ་སྟེ། །བསྲུང་བའི་ཚིག་ནི་སྔོན་དུ་བྱ། །སངས་རྒྱས་ལྔ་སོགས་ལྡན་པ་ཡི། །ས་བོན་མཐའ་རུ་གནས་པ་སྟེ། །སྲེག་བྱེད་ཡི་གེ་དེ་ཡི་མཐའ། །སྟེང་སོགས་མུ་ཁྱུད་དབྱངས་ཡིག་དགོད། །ཁ་པ་གཉིས་འགྱུར་ས་བོན་དང ། །ལྷ་མོ་རྡོ་རྗེ་མ་ཞེས་བྱ། །སངས་རྒྱས་ལྔ་ཡི་ས་བོན་ལྡན། །ཐམས་ཅད་ཕྱག་འཚལ་སྲེག་བྱེད་མཐའ། །དབྱུག་པ་འཇིག་རྟེན་དབང་ཕྱུག་མགོན། །གྱ་གྱུ་ཕྱག་ན་རྡོ་རྗེ་ཡིན། །དེ་བཞིན་ལུས་ནི་འཇམ་པའི་མཆོག་།མགོ་དང་དཔུང་པ་བྱམས་བ་སྟེ། །སྟེང་དུ་འབར་བ་མ་ཡི་སྟེ། །འཁོར་བ་ཐམས་ཅད་སྒྲོལ་བྱེད་པའོ། །དེ་ལ་ཤར་གྱི་ཕྱོགས་གནས་པ། །ལྷ་ 72a ༄#། །མོ་རྡོ་རྗེ་མཁའ་འགྲོ་མ། །བྱང་དུ་དྲག་མོ་ཞེས་བྱ་བའི། །ས་བོན་ཉིད་ནི་སྦྱར་བར་བྱ། །ནུབ་ཀྱི་ཕྱོགས་སུ་གནས་པ་ནི། །རོ་ལངས་མ་ཡི་ས་བན་སྦྱར། །ལྷོ་ཡི་ཕྱོགས་སུ་གང་གནས་པ། །གཏུམ་མོའི་ས་བོན་རྫོགས་པར་བསྟན། །ས་བོན་མངོན་དུ་བསྟན་པ་བཞིན། །དབང་ལྡན་དུ་ནི་སེང་གེ་མ། །མེ་མཚམས་སྟག་མོ་དགོད་བྱ་སྟེ། །བདེན་བྲལ་དུ་ནི་ཅེ་སྤྱང་མ། །རླུང་དུ་ཧཱུཾ་བྱེད་འུག་པ་མོ། །མཚམས་ན་གནས་པའི་ས་བོན་ནི། །བཞི་པོའི་དྲུག་པོའི་དངོས་སུ་ནི། ། ཕྱོགས་དང་ཕྱོགས་མཚམས་ཇི་བཞིན་དུ། །དེ་བཞིན་ས་བོན་དགོད་པར་བྱ། །སྟེང་གི་གནས་ནི་བཅུ་གཉིས་ལ། །དབྱངས་ཀྱི་ས་བོན་གཞག་བར་བྱ། །ཕྱག་འཚལ་བསྲོག་པ་མཐའ་དང་བཅས། །ཕྱོགས་སུ་མ་ནིང་གཞག་པར་བྱ། །འབར་མ་འཇིབ་མ་ཞེས་བྱ་དང ། །དེ་བཞིན་འཕྲོག་བྱེད་མཁའ་འགྲོ་མ། །ཕྱག་འཚལ་སྲེག་པ་མཐར་གནས་པ། །ཇི་ལྟའི་གནས་བཞིན་གཞག་པར་བྱ། །ཤར་ཕྱོགས་མཁའ་འགྲོ་མ་ཡི་གནས། །བྱང་དུ་གནས་པ་འབར་མ་སྟེ། །ནུབ་ཏུ་འཇིབ་མར་ཡང་དག་གསུངས། ། ལྷོ་རུ་འཕྲོག་བྱེད་དགོད་པར་བྱ། །དབུས་སུ་མི་\?\་ནི་བྲི་བྱ་སྟེ། །འོག་ཏུ་ཇི་བཞིན་སྟེང་དེ་བཞིན། །གཉི་ག་ཁ་ནི་སྦྱར་ནས་སུ། །སྐུད་པ་དམར་པོས་དཀྲི་བར་བྱ། ། 72b ཀུན་ནས་མཉམ་པའི་གནས་སུ་ནི། །ཙནྡན་དམ་པོས་བྱུགས་ནས་སུ། །སྣ་ཚོགས་མེ་ཏོག་བདུག་པ་དང ། །དྲིར་བཅས་ཉེར་སྤྱོད་གཏོར་མ་སྦྱིན། །དབུས་སུ་འཁྲུལ་འཁོར་བཞག་ནས་ནི། །མཁའ་འགྲོ་མ་ལྔས་བསྐོར་བར་བྱ། །བདག་ཉིད་རྡོ་རྗེ་ཅན་སྦྱོར་བས། །རྡོ་རྗེ་སེམས་དཔའ་བདག་ཅེས་བརྗོད། །རྡོ་རྗེ་ལག་ནི་ལག་རྩེ་རུ། །རྡོ་རྗེ་བསམས་ནས་རེག་བྱས་ལ། །དབུས་སུ་བསྟན་པའི་ས་བོན་ནི། །བརྒྱད་བརྒྱ་རུ་ནི་བཟླས་པར་བྱ། །ཚེ་རབས་སྔ་མའི་སྡིག་ལ་སོགས། །ལྷ་ལ་སོགས་ལ་བསྒོ་བར་བྱ། །ཡན་ལག་ཐམས་ཅད་གཟིར་བ་དང ། །འཆི་བའི་དུས་བབ་འབྱུང་མི་འགྱུར། །འཚེ་མེད་ནད་ནི་ཐམས་ཅད་དང ། །ནད་པ་གློར་བཞག་སྦྱར་ན་ནི། །དུས་རྣམས་ཀུན་ཏུ་ནད་མི་འབྱུང ། ། ལུས་ཅན་ཚེ་ནི་ཟད་པ་ཡང ། །ཟླ་བ་དྲུག་ཏུ་གནས་པར་འགྱུར། །གནས་གཞན་དུ་ནི་བཞག་ནས་སུ། །རྟག་ཏུ་མཆོད་ལ་བརྩོན་པར་བྱ། །རྡོ་རྗེ་རྒྱ་ལྡན་སྦྱོར་བ་ཡིས། ། རྣམ་ཤེས་གང་དུའང་འགྲོ་མི་འགྱུར། །གཞན་ཡང་བདག་གི་དབུགས་དག་ནི། །དེར་ནི་རབ་ཏུ་བརྟག་པར་བྱ། །དབུགས་ཀྱི་གནས་ནི་མཚུངས་པ་ན། །ཐམས་ཅད་གྲུབ་པར་གསུངས་པ་ཡིན། །གཡས་ལ་གཡས་སུ་གནས་བ་དང ། །བློ་ལྡན་གཡོ་ལ་གཡོན་དུ་གནས། །དེར་གནས་ན་ནི་སྨྲ་བྱེད་པ། །ཐམས་ཅད་འགྲུབ་པ་ཉིད་དུ་ 73a ༄#། །འགྱུར། །དབུགས་དང་འདྲི་བ་མི་མཐུན་པ། །དངོས་གྲུབ་རིང་བ་མཚོན་པར་བྱ། །སྐད་ཅིག་སྲོག་གི་རབ་སྦྱོར་བ། །སྦྱོར་བ་གཉིས་ནི་ཤེས་བྱ་སྟེ། ། སྐད་ཅིག་ལ་ནི་བྱ་བ་ཀུན། །རྒྱས་པར་འགྱུར་བར་རབ་ཏུ་གྲགས། །སྲོག་ལ་བྱ་བ་གང་བྱས་པ། །གྲུབ་པ་རིང་བར་ཐེ་ཚོམ་མེད། །མཆེ་བ་ལ་སོགས་བསམས་ནས་དུག ། དེར་ནི་གསོ་བ་དག་ཏུ་བྱ། །སྦྱོར་སོགས་སྔར་གྱི་མཚན་ཉིད་ཅན། །ཐམས་ཅད་རིག་པས་ཀླུ་ལ་བསྒོ། །སྦྱོར་བ་བཞི་ལ་སོས་བཏབ་པ། །འཆི་བར་འགྱུར་བ་ཐེ་ཚོམ་མེད། ། དུག་བསྡུ་བ་ཡི་སྦྱོར་བ་ཡིས། །གཞན་མ་ཐམས་ཅད་གསོ་བར་བྱ། །སོས་བཏབ་ལུས་ལ་ཀུན་རིག་པས། །ས་བོན་གྱིས་ནི་དགོད་པར་དགོད། །ཡི་གེ་བརྒྱད་ཀྱི་སྔགས་དག་ནི། །ཡན་ལག་བརྒྱད་པ་རྣམས་སུ་དགོད། །ཁ་དོག་དཀར་པོ་བསམས་པ་ཡིས། །ས་བོན་རྣམས་ཀྱིས་ཡིད་དུག་དབྲོག་།དཀྱིལ་འཁོར་དབུས་སུ་གནས་པ་ཡི། །ཡེ་ཤེས་ཀྱིས་ནི་རྣམ་ཤེས་ཅིང ། །ཡན་ལག་བསྒྱུར་བའི་སྦྱོར་བྱས་ནས། །དེ་འོག་ཕྱི་རོལ་བརྩམ་པར་བྱ། །ཆུ་དང་འོ་མ་བསྲེས་པ་ཡིས། །ས་སྣོད་ཡོངས་སུ་དགང་བར་བྱ། །ཟླ་བའི་དཀྱིལ་འཁོར་གྱིས་བརྒྱན་པའ་\?\། །དབུས་སུ་པདྨ་བསམ་པར་བྱ། །གདུགས་དཀར་པོ་ཡིས་བརྒྱན་པ་ཡི། །རྡོ་རྗེ་མཁའ་འགྲོ་མ་དེ་བསྒོམ། ། 73b ཕྱག་གཉིས་སེམས་དཔའི་སྐྱིལ་ཀྲུང་བཅས། །སྦྲུལ་གྱི་རྒྱན་གྱིས་རྣམ་པར་ཀླུབས། །ཁ་ཊྭཱཾ་ག་དང་ཐོད་པ་དང ། །ཤིན་ཏུ་མཛེས་པའི་ན་བཟས་ཀླུབས། །ཀླུ་བརྒྱད་ཀྱི་ནི་མགོ་བོ་བསྣམས། །པདྨ་ཡི་ནི་གདན་ལ་མནན། །ཤར་དུ་ནོར་རྒྱས་བུ་བསམ་བྱ། །དེ་བཞིན་བྱང་དུ་འཇོག་པོའོ། །ནུབ་ཏུ་སྟོབས་ཀྱིས་རྒྱུ་བ་སྟེ། །ལྷེ་རུ་པདྨ་བལྟ་བར་བྱ། །དབང་ལྡན་དུ་ནི་པདྨ་ཆེ། །མེ་མཚམས་སུ་ནི་དུང་སྐྱོང་ངོ ། །བདེན་བྲལ་རིགས་ལྡན་ཞེས་བྱ་བ། །རླུང་མཚམས་འཁྱིལ་བ་ལྟུང་བའོ། །ཀླུ་བརྒྱད་པོ་ནི་བསམས་ནས་སུ། །མགོ་བོ་རྣམས་ནི་མནན་པར་བསྒོམ། །རྫས་རྣམས་ཀུན་གྱིས་མཆོད་ནས་སུ། །མེ་ཏོག་སྤོས་སོགས་གཏོར་མ་སྦྱིན། །བདག་ཉིད་ལྷ་ཡི་རྣལ་འབྱོར་ནི། །རྡོ་རྗེ་མཁའ་འགྲོ་མ་རུ་བསམ། །རྨ་བྱ་སྒྲོ་ཡི་ཆུན་པོ་ཡིས། །ཆུ་ཡི་སྦྱོར་བས་དྲང་བར་དུ། །ཀུན་ནས་བཀང་བར་དྲངས་ནས་སུ། །རྐང་པ་ནས་ནི་ཆུར་ཐིམ་བྱ། །ོཾ་ཧྲཱིཾ་ཊཊྚཎྜ་ར་ཧཱུཾ་ཕཊ་སཝཱཧཱ། །རྡོ་རྗེ་སེམས་དཔར་མངོན་སྦྱོར་བས། །འབུམ་ཕྲག་ལ་སོགས་བསྙེན་པ་བྱ། །ོཾ་བཱ་སུ་ཀི་རི་ཧྲཱི་ཊཊྚཎྜ་ཌ་ར་ཧཱུཾ་ཧཱུཾ་ཕཊ་སཝཱཧཱ། ཨོཾ་ཏཀྵ་ཀ་ཧྲཱི་ཊཊྚཎྜ་ཌ་ར་སཝཱཧཱ། ཨོཾ་ཀརྐོཊ་ཀ་ཧྲཱི་ཊཊྚཎྜ་ཌ་ར་སཝཱཧཱ། ཨོཾ་པདྨ་ཧྲཱི་ཊཊྚཎྜ་ཌ་ར་སཝཱཧཱ། ཨོཾ་མ་ཧཱ་པདྨ་ཧྲཱི་ཊཊྚཎྜ་ཌ་སཝཱཧཱ། ཨོཾ་ཤཾ་ཁ་པ་ལ་ཧི་ཊནྟ་ར་\?\་སཝཱཧཱ། ཨོཾ་བྷྱོ་ཀུ་ལི་ཀཱ་ཡ་ལཾ་ཧྲཱི་ཊ་ཊྚཎྜ་ར་སཝཱཧཱ། ཨོཾ་ཧུ་ལུ་ན་ 74a ༄#། །དྷ་ཀེ་ཧྲི་ཊཊྚཎྜ་ཌ་ར་སཝཱཧཱ། ཨོཾ་ཧྲཱི་ཊཊྚཎྜ་ཌ་ར་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཨ་མུ་ཀེ་སྱ་ནི་ར་བི་ཤཾ་ཀུ་རུ་ཧཱུཾ་ཕཊ་སཝཱཧཱ། ཞེས་བརྗོད་ཅིང ། འོ་མའི་དབུས་སུ་དྲངས་པ་ཡིས། །འཕྲལ་དུ་འོ་མ་ནག་པོར་འགྱུར། །ཡུངས་ཀར་མེ་ཏོག་དཀར་པོ་དང ། །ཙནྡན་དག་གིས་བསྲེས་པ་ཡིས། །འཆི་བས་ཟིན་པའི་སྙིང་ག་རུ། །གསང་སྔགས་ཟློས་ཤིང་བརྡེག་པར་བྱ། །སྙིང་ནི་འཕར་མ་ཐག་ཏུ་ཡང ། །ཡེ་ཤེས་བསྡམས་ཏེ་བསྲུང་བར་བྱ། །རྣམ་ཤེས་བསྡམས་པ་ཙམ་གྱིས་ཀྱང ། །དེ་བཞིན་དབུགས་ནི་གཡོ་བར་འགྱུར། །དབུགས་ནི་རྣམ་པར་གཡོས་པ་ཡིས། །བདག་གིས་དབུགས་ཀྱིས་གཟིར་བར་བྱ། །དབུགས་ཀྱིས་གཟིར་མ་ཐག་ཏུ་ཡང ། །རྐང་ལག་ལ་སོགས་འདར་བར་འགྱུར། །ཡན་ལག་ཐམས་ཅད་འདར་བ་ན། །བདག་ཉིད་དབྱངས་ནི་བླང་བར་བྱ། །ཧཱུཾ་གི་གླུ་ནི་བླངས་ནས་སུ། །སེ་གོ་ལ་གསུམ་གྱིས་བསླང་བར་བྱ། །འཆི་བས་ཟིན་པ་བསླང་ནས་ནི། །དེ་ཡི་ཡན་ལག་བསྲུང་བར་བྱ། །བསྡུས་ནས་ཀླུ་ཡི་གནས་སུ་ནི། །འོ་མ་དེ་ནི་དབོ་བར་བྱ། །ཟླ་བའི་དཀྱིལ་འཁོར་དབུས་གནས་པའི། །རྡོ་རྗེ་སེམས་དཔར་མངོན་སྤྲུལ་ལ། །འབུམ་ཕྲག་གསུམ་ནི་བཟླས་པ་ཡི། །སྔོན་དུ་བསྙེན་པ་ལ་སོགས་བྱ། །དེ་ནས་སྒྲུབ་པོས་དུག་བསྡུས་ན། །འགྲུབ་འགྱུར་འདི་ལ་ཐེ་ཚོམ་མེད། །ཁ་ 74b དང་ཐིག་ལེ་གཉིས་དག་དང ། །སྟེང་དང་མགྲིན་པ་སྣ་རྩེ་དང ། །སྙིང་ག་ལྟེ་བ་གསང་བ་དང ། །རྐང་པའི་མཐེ་བོ་དག་ཏུ་ནི། །ཟིན་པ་གསོ་བར་མི་བྱ་སྟེ། །འཆི་བ་ཉིད་ཀྱི་རྒྱུ་རུ་གསུངས། །ཉོན་ཅིག་རྒྱལ་པོ་རྡོ་རྗེ་ཆེ། །ཆར་པ་དབབ་པའི་ཆོ་ག་མཆོག་།ཆུ་འགྲམ་དང་ནི་ཉེ་བ་ཡི། །ས་ཕྱོགས་ཉམས་ནི་དགའ་བ་རུ། །བླ་རེ་དག་ནི་བྲེས་ནས་སུ། །དར་དཔྱངས་སྣ་ཚོགས་དཔྱངས་པ་རུ། །ཁ་དོག་སྣ་ལྔར་བཙོས་པ་ཡི། །ཚོན་གྱི་ལས་ནི་བརྩམ་པར་བྱ། །གྲུ་བཞི་པ་ལ་སྒོ་བཞི་བ། །ཀླུ་བརྒྱད་ཀྱིས་ནི་རྣམ་པར་ཀླུབས། །མགོ་བོ་གཉིས་ནི་སྒོར་བཅས་ཏེ། །མཇུག་མ་གཉིས་ཀྱིས་གྲཝ་རུ་མདུད། །ཤར་དུ་རྒྱལ་བ་བཟང་པོ་སྟེ། །དཔལ་དང་དགའ་བོ་བྱང་དུའོ། །ནུབ་ཏུ་ཆར་འབེབས་སྡུག་པ་སྟེ། །བརྟན་དང་དྲག་པོ་ལྷོ་རུའོ། །ཀླུ་བརྒྱད་ཀྱི་ནི་ར་བ་སྟེ། །ཕྱོགས་ལ་སོགས་པར་རིགས་བརྒྱད་དགོད། །ནོར་རྒྱས་བུ་ནི་ཤར་དུ་སྟེ། །འཇོག་པོ་བྱང་དུ་དགོད་པར་བྱ། །ནུབ་ཀྱི་ཕྱོགས་སུ་སྟོབས་ཀྱི་རྒྱུ། །ལྷོ་ཡི་ཕྱོགས་སུ་པདྨ་སྟེ། །དབང་ལྡན་དུ་ནི་པདྨ་ཆེ། །མེ་མཚམས་དུང་སྐྱོང་དགོད་པར་བྱ། །བདེན་བྲལ་དུ་ནི་རིགས་ལྡན་ཏེ། །རླུང་མཚམས་འཁྱིལ་བ་ལྟུང་བའོ། །སྦྲིན་གྱི་དབང་ཕྱུག་རྒྱལ་པོ་བརྒྱད། །ཕྱོགས་བརྒྱད་ནས་ནི་དགུག་པར་བྱ། །སྒྲ་སྒྲོགས་རྨུགས་པ་དེ་བཞིན་དུ། །དྲག་པོ་འཁྱིལ་པ་སྟུག་པོ་དང ། །གཏུམ་པོ་ཆར་འབེབས་རབ་ 75a ༄#། །གང་བ། །བརྒྱད་པོ་རྒྱལ་པོ་ཞེས་བྱའོ། །ཤར་ལ་སོགས་པའི་ཕྱོགས་དགོད་པ། །ཇི་བཞིན་ཕྱོགས་ཀྱི་མདོག་ཏུ་བསམ། །དབུས་སུ་རྡོ་རྗེ་མཁའ་འགྲོ་མ། །པདྨའི་གདན་ལ་ཡང་དག་བཞུགས། །ཁ་ཊྭཱཾ་ག་དང་རྣལ་འབྱོར་སྣོད། །སྦྲུལ་གྱི་རྒྱན་གྱིས་རྣམ་པར་ཀླུབས། །སྐུ་མདོག་དཀར་པོ་ཤིན་ཏུ་འབར། །ཤིན་ཏུ་མཛེས་པའི་ན་བཟའ་བསྣམས། །པདྨ་སྤྲུལ་གྱིས་བསྐོར་ནས་སུ། །སྤྲུལ་ནི་གདན་དུ་སྦྱར་བར་བྱ། །མཆོད་པ་རྒྱ་ཆེན་བཤམས་ནས་ནི། །འོ་མ་ལ་སོགས་སྣོད་བརྒྱད་བཞག་།མེ་ཏོག་བདུག་སྤོས་དྲི་དང་ནི། །མར་མེ་སྣ་ཚོགས་རིགས་ལས་མཆོད། །ཡེ་ཤེས་མཁའ་འགྲོ་བདག་བསྒོམས་པའི། །ཡེ་ཤེས་ཅན་གྱི་རྣལ་འབྱོར་པའི། ། ོཾ་བྷུར་བྷུ་བ་སཝཱཧཱ། ཉེ་བར་སྤྱོད་པའི་སྔགས་སོ། །ོཾ་བཱ་སུ་ཀི་ཧཱུཾ་སཝཱཧཱ། ཨོཾ་ཏཀྵ་ཀ་ཧཱུཾ་སཝཱཧཱ། ཨོཾ་ཀརྐོ་ཊ་ཧཱུཾ་སཝཱཧཱ། ཨོཾ་པདྨ་ཧཱུཾ་སཝཱཧཱ། ཨོཾ་མ་ཧཱ་པདྨ་ཧཱུཾ་སཝཱཧཱ། ཨོཾ་ཤཾ་ཁ་པ་ལ་ཧཱུཾ་སཝཱཧཱ། ཨོཾ་ཀུ་ལི་ཤ་པཱ་ལ་ཧཱུཾ་སཝཱཧཱ། ཨོཾ་ཧུ་ལུཾ་དྷ་ཧཱུཾ་སཝཱཧཱ། ཀླུའི་རྒྱལ་པོ་བརྒྱད་ཀྱི་སྔགས་སོ། །ོཾ་གྷི་ལི་གྷི་ལི། བྷ་ཥ་བྷ་ཥ་པ་ཡ། ཧཱུཾ་ཧཱུཾ་ཧཱུཾ། ཧོ་ཧོ་ཧོ། ཋ་ཋ་ཋ་སཝཱཧཱ། སྤྲིན་གྱི་རྒྱལ་པོ་བརྒྱད་ཀྱི་སྔགས་སོ། །ལག་པ་ཀུན་ཏུ་བསྐོར་ནས་སུ། །ཕྱོགས་བརྒྱད་དུ་ནི་བསྟན་པར་བྱ། །སྤྲིན་གྱི་རྒྱལ་པོ་བརྒྱད་ཀྱི་ཕྱག་རྒྱའོ། །གཡོན་ 75b པ་ཁུ་ཚུར་བཅངས་ནས་སུ། །མཐེའུ་ཆུང་དང་མཐེ་བོང་བརྒྱད། །གཡས་པ་སྤྲུལ་མགོ་གདེངས་ནས་སུ། །མཐེ་བོང་སྟེང་དུ་གུང་མོར་སྦྱར། །ཀླུའི་རྒྱལ་པོ་བརྒྱད་ཀྱི་ཕྱག་རྒྱའོ། ཨོཾ་བཛྲ་ཌཱ་ཀི་ནཱི་བཪྵ་བཪྵ་པ་ཡ་ཧཱུཾ་ཕུ་སཝཱཧཱ། རྩ་བའི་སྔགས་སོ། །སྔོན་དུ་བསྙེན་པ་འབུམ་ཕྲག་ནི། །གསུམ་དུ་བྱས་ནས་བཟླས་པ་བྱ། །རྣལ་འབྱོར་ཅན་གྱི་ལས་འདི་རྣམས། ཆར་འབེབས་པ་ཡི་ཆོག་མཆོག་།གཞན་ཡང་དགེ་དང་སྡིག་པ་ཡི། །ཕོ་ཉའི་མཚན་མ་བཤད་པར་བྱ། །མིག་ཡོན་མགོ་དཀར་སྒུར་པོ་དང ། །འཇིགས་པའི་གོས་དང་དབྱུག་པ་ཐོགས། །བུད་མེད་རྣམས་དང་འགྲོགས་སྟེ་འོང ། །དུ་ཞིང་སྐྲ་ནི་ལྷུག་པ་སོགས། །གཅེར་བུ་ངན་གྱིས་སྨྲ་བ་དང ། །སྦྱོར་བ་ཞིས་འཆི་བ་སྟོན་པ་ཡིན། །ཕོ་ཉ་ཇི་བཞིན་བདག་ཉིད་ལ། །བརྟགས་ནས་རྣམ་པ་གཉིས་སུ་བྱ། །དེ་ཚེ་སྔགས་པ་འགྲོགས་འདོད་ན། །གྲུབ་པ་ཉམས་པར་ཐེ་ཚོམ་མེད། །བདག་གི་གདན་གྱི་རབ་ཏུ་བྱེད་པ་ཞེས་བྱ་བ་ལས། རིམ་པར་ཕྱེ་བ་གཉིས་པའོ།། །།རྣལ་འབྱོར་བརྩོན་པའི་ཁྱད་པར་དག་།བཅོམ་ལྡན་འདས་ལ་ཉན་པར་འཚལ། །གང་གིས་སྔགས་རྣམས་འཚལ་བར་བགྱི། །ཡེ་ཤེས་གཟུང་བ་ཇི་ལྟར་ལགས། །ཉོན་ཅིག་རྡོ་རྗེ་དེ་ཁོ་ན། །དེ་བཞིན་ལྷ་ཡི་བདག་ཉིད་དོ། །དང་པོར་སྟོང་ཉིད་བསྒོམས་པ་ཡིས། །ལུས་ཅན་ 76a ༄#། །དྲི་མ་བཀྲུ་བར་བྱ། །དང་པོར་གཟུགས་ནི་སྟོང་སོགས་བྱ། །ཇི་སྲིད་རྩ་བརྒྱད་ཉིད་ཡིན་ཏེ། །གཟུགས་ཁམས་ཞེས་བྱ་སྟོང་པ་སྟེ། །དེ་ཉིད་དུ་ནི་སྒྲ་ཡང་བྱ། །དྲི་ཁམས་ཞེས་བྱ་སྟོང་པ་སྟེ། །དེ་ཉིད་དུ་ནི་རོར་ཡང་བྱ། །རེག་བྱའི་ཁམས་ནི་སྟོང་པ་སྟེ། །དེ་ཉིད་དུ་ནི་གཟུགས་ཀྱང་བྱ། །མིག་གི་བདག་ཉིད་སྟོང་པ་ལ། །དབུས་ན་རྣམ་ཤེས་ཇི་ལྟར་ཡོད། །ཉན་པའི་བདག་ཉིད་སྟོང་པ་ལ། །དབུས་ན་རྣམ་ཤེས་ཇི་ལྟར་ཡོད། །སྣོམ་པའི་བདག་ཉིད་སྟོང་པ་ལ། །དབུས་ན་རྣམ་ཤེས་ཇི་ལྟར་ཡོད། །ལྕེ་ཡི་བདག་ཉིད་སྟོང་པ་ལ། །དབུས་ན་རྣམ་ཤེས་ཇི་ལྟར་ཡོད། །ལུས་ཀྱི་བདག་ཉིད་སྟོང་པ་ལ། །དབུས་ན་རྣམ་ཤེས་ཇི་ལྟར་ཡོད། །ཡིད་ཀྱི་རང་བཞིན་སྟོང་པ་ལ། །དབུས་ན་ཇི་ལྟར་བརྟག་པར་བྱ། །ཡིད་ནི་ནམ་མཁར་ཐིམ་ནས་སུ། །ཐམས་ཅད་སྟོང་པར་བསམ་པར་བྱ། །གླིང་དང་རི་རབ་ལ་སོགས་པ། །སྟེང་དང་འོག་དང་བར་གྱི་ནི། །ཁམས་གསུམ་སྟོང་པར་བསྒོམས་པ་ཡིས། །ཐམས་ཅད་ཟད་པ་ཉིད་དུ་བྱ། །ཕྱོགས་བཅུའི་འཇིག་རྟེན་ཁམས་ཀུན་གྱི། །གཟུགས་ལ་སོགས་པ་ཟད་པར་སྒོམ། །བདག་གི་དངོས་པོ་ཟད་བྱ་སྟེ། །དངོས་པོ་འདྲེས་པར་དམིགས་པར་བྱ། །སྦྱོར་བ་མཉམ་པར་ཀུན་བསམས་ཏེ། །རྣལ་འབྱོར་པ་ནི་མཁས་པ་ཡིས། །མཉམ་ཉིད་སྟོང་བར་བསམས་ནས་སུ། །དེ་ 76b ཡི་དབུས་སུ་བལྟས་ནས་ཀྱང ། །དེ་ལ་མཚན་མ་བརྟག་པར་བྱ། །མར་མེའི་འོད་ཀྱིས་ཞི་བ་སྟེ། །སེར་པོ་དངུལ་གྱིས་རྒྱས་པར་འགྱུར། །ཉི་མའི་དཀྱིལ་འཁོར་སྣང་བ་ནི། །ཆགས་པ་ལ་སོགས་འགྲུབ་པར་འགྱུར། །མཐར་ནི་དུ་བ་གནག་མཐོང་ན། །མངོན་སྤྱོད་དུ་ནི་རབ་ཏུ་གྲགས། །རླུང་གི་མདོག་ལྟར་འཁྲུགས་པ་ཡིས། །དེ་ཡི་མོད་ལ་བསྐྲད་པར་འགྱུར། །ཟླ་བ་དཀར་པོའི་འོད་ཟེར་ལྟར། །ཐམས་ཅད་དུ་ནི་དཀར་མཐོང་ནས། །རྣལ་འབྱོར་གྲུབ་པར་ཤེས་པར་བྱ། །བློ་ལྡན་འགྲོ་བའི་ཡང་དག་གནས། །དེ་འོག་རྣལ་འབྱོར་ལས་བྱུང་བའི། ། མྱུ་གུ་ལ་སོགས་མངོན་པར་བསམ། །གང་ཞིག་སྟོང་ཤེས་བསྒོམ་པ་ཡི། །མྱུར་དུ་སེམས་དཔའ་གྲོལ་བར་འགྱུར། །ཡེ་ཤེས་ཀྱིས་ནི་ཤེས་བྱ་བལྟ། །ཤེས་བྱས་འགྲོ་བ་བརྟག་པར་བྱ། །ཕ་དང་མ་ནི་བསད་བྱ་སྟེ། །བྲམ་ཟེ་གཙང་མ་གཉིས་བཟུང་ནས། །རྒྱལ་པོ་ཡུལ་འཁོར་བཅས་བཅོམ་ན། །མི་དེ་དག་པར་འགྱུར་ཞེས་བྱ། །བདག་གི་གདན་གྱི་རབ་ཏུ་བྱེད་པ་ལས།་རིམ་པར་ཕྱེ་བ་གསུམ་པའོ།། །།ཉོན་ཅིག་རྡོ་རྗེ་ཇི་བཞིན་ལམ། །གཉིས་སྤངས་གཉིས་སུ་མེད་པ་སྟེ། །འཁོར་བའི་རྒྱ་མཚོར་རབ་འཇིགས་པས། ། ཆུ་ཡི་དགྲ་ནི་དམ་པས་གང ། །དབུས་སུ་བྱིང་བའི་ལུས་ཅན་རྣམས། །སྒྲོལ་བའི་མཚན་ཉིད་ཅེས་བྱར་བརྗོད། །མཚོན་བྱས་མཚན་ཉིད་མཚོན་པ་པོ། །རྣམ་ཤེས་ཀྱི་ནི་ཡེ་ཤེས་ 77a ༄#། །ཏེ། །ཡེ་ཤེས་ཀྱིས་ནི་ཤེས་བྱ་བལྟ། །ཤེས་བྱས་འགྲོ་པ་བརྟག་པར་བྱ། །འགྲོ་བ་བརྟགས་བའི་སེམས་ཀྱིས་ནི། །ཇི་ལྟར་འདོད་བཞིན་མངོན་པར་འགྲོ་།ཞགས་པས་གླང་ཆེན་མྱོས་བཅིངས་ལྟར། །འཁོར་བའི་ཞགས་པས་གནོད་རྨོངས་པས། །རྣལ་འབྱོར་པ་ནི་སྟོང་ཕྲག་གཅིག་།ཚེ་རབས་སྔ་མའི་འགྲོ་བར་འགྲོ ། སྔོན་དུ་མཚན་ཉིད་བསྟན་པ་བཞིན། །མཉམ་ཉིད་སྟོང་པར་བསམས་ནས་སུ། །སྟོང་པའི་ཞིང་ལ་སོགས་ལུས་ལ། །བློ་དང་ལྡན་པས་ས་བོན་གདབ། །དཔེར་ན་གདོལ་པའི་ཁང་པ་མེར་བསྲེགས་པ། །ལྷ་ཡི་བྱིན་གྱིས་བརླབས་པར་རབ་ཏུ་བརྗོད། །རིགས་ཅན་དགེ་དང་མཁས་པ་ཀུན་ཏུ་གནས། །དེ་བཞིན་ཏིང་ངེ་འཛིན་གྱིས་ཀུན་བཤིག་ནས། །ས་བོན་དགོད་པས་རབ་ཏུ་དགོད་པར་བྱ། །སྟེང་དུ་མེ་ཡི་ས་བོན་བརྟག་།ས་ཡི་ས་བོན་རྣམ་པ་གཉིས། །མིག་གཉིས་སུ་ནི་སྦྱར་བར་བྱ། །སྟོང་སོགས་རླུང་གི་ས་བོན་ནི། །སྣ་དང་རྣ་བ་དག་ལ་བསམ། །བདུད་རྩིའི་ཆུ་ཡི་ས་བོན་ནི། །ལྕེ་ཡི་དབང་པོ་དབང་ཕྱུག་གཙོ། །གང་གིས་བརྩེགས་པ་རིམ་བཞིན་གཟུང ། །གནས་བཞི་རུ་ནི་སྦྱར་བར་བྱ། །མགྲིན་པར་གཏི་མུག་ས་བོན་ཏེ། །དེ་བཞིན་དཔུང་པར་ཉོན་མོངས་སོ། །སྙིང་གའི་ཕྱོགས་སུ་གཡོ་བ་སྟེ། །ལྟེ་བའི་རྩ་བར་ཕྱུགས་ཡིན་ 77b ནོ། །ཡན་ལག་བརྒྱད་དུ་ས་བོན་ནི། །བརྒྱད་པོ་བཀོད་པས་བསྲུང་བར་བྱ། །ཡེ་ཤེས་མཁའ་འགྲོར་བདག་བྱས་ཏེ། །ལུས་ནི་ས་བོན་ལྡན་པར་བྱ། །ཉི་མའི་དཀྱིལ་འཁོར་གྱིས་བརྒྱན་པ། །པདྨ་ཡི་ནི་སྟན་ལ་བཞུགས། །གདུགས་ནི་དཀར་པོས་སྟེང་དུ་གཡོགས། །བཙོ་མའི་གསེར་ལྟར་འབར་བའི་འོད། །ཞལ་གསུམ་ཕྱག་ནི་དྲུག་པ་སྟེ། ། སེམས་དཔའི་སྐྱིལ་ཀྲུང་ཡང་དག་བཞུགས། །སྟེང་དུ་རྡོ་རྗེ་དབུ་རྒྱན་ཅན། །དར་གྱི་ཐོད་ནི་མཛེས་པར་བཅིངས། །སྤྱན་གསུམ་ཁྲོ་ཞིང་བཞད་པ་སྟེ། །ཤིན་ཏུ་མཛེས་པའི་ན་བཟའ་གསོལ། །རལ་གྲི་དགྲ་སྟ་རྡོ་རྗེ་དང ། །གཡོན་པའི་སྡིགས་མཛུབ་ཉིད་དང་ནི། །ཤཀྟི་ཁ་ཊྭཱཾ་བསྒྲེང་བ་ནི། །མཚན་མའི་ཕྱག་རྒྱ་མངོན་པར་བསྣམས། །སངས་རྒྱས་སྤྲིན་ནི་འཕྲོས་པ་ཡིས། །སེམས་ཅན་རྣམས་ཀྱི་དོན་མཛད་བརྩོན། །འོད་ཟེར་སྣ་ཚོགས་འབར་བ་རུ། །དབུགས་མི་གཡོ་བར་བསྒོམ་པར་བྱ། །ཡིད་ཀྱི་ཡེ་ཤེས་རྣམ་ཤེས་དག།་ཤེལ་དང་འདྲ་བར་བསམ་པར་བྱ། །ཱ་ལི་ཀཱ་ལི་རབ་སྦྱོར་བས། །དེ་ཡི་ས་བོན་བཟུང་བྱས་ཏེ། །སྨིན་པར་ཐིགས་པའི་གནས་དག་ཏུ། །ཡེ་ཤེས་ཅན་གྱི་ས་བོན་བསྒོམ། །སངས་རྒྱས་ལྔ་ཡིས་བརྒྱན་པ་ཡིས། །ཡི་གེའི་ས་བོན་བཟླས་པར་བྱ། །རླུང་དང་མེ་ཡི་མདུན་དོན་ལ། །རྡོ་རྗེ་མེ་ཡི་ས་བོན་བསྐུལ། །སྒྲ་དང་ཐིག་ལེས་ཡང་དག་ 78a ༄#། །མནན། །ཆར་པའི་རྒྱུན་ཞེས་བྱ་བར་བརྗོད། །ཐོག་མར་བླ་མའི་ཡི་གེ་བཞག་།སྲེག་བྱེད་ཡི་གེ་མཐར་བཟླས་བྱ། །ཏིང་ངེ་འཛིན་དང་ལྡན་པ་ཡི། །བློ་གྲོས་ཅན་གྱིས་སུམ་འབུམ་བཟླ། །བཟླས་དང་ལྡན་པའི་རྣལ་འབྱོར་པ། །དེ་ཡིས་བསམ་པ་ཐམས་ཅད་འགྲུབ། །ལས་བརྒྱད་ལ་སོགས་དངོས་གྲུབ་རྣམས། །སྔོན་དུ་བསྙེན་པ་ལ་སོགས་བྱ། །དེ་འོག་ལས་རྣམས་བརྩམས་བྱས་ན། །འགྲུབ་འགྱུར་འདིར་ནི་ཐེ་ཚོམ་མེད། །རྨོངས་པར་བྱ་བའི་བྱེ་བྲག་ནི། །ཉོན་ཅིག་རྡོ་རྗེ་དེ་ཁོ་ན། །བཅིང་བ་རྣམས་ཀྱི་བྱེ་བྲག་དག་།སྔོན་དུ་རྡོ་རྗེའི་ཚིག་བརྗོད་ལ། །སྡེ་ཚན་དང་པོའི་དང་པོ་བཟུང ། །དེ་བཞིན་སྡེ་ཚན་བཞི་པ་ཡི། །ཡི་གེ་དང་པོ་བཟུང་ནས་ནི། །ཉིས་འགྱུར་རེ་ཕ་སྟེང་དུ་བཞག་།དེ་བཞིན་ཨི་དང་རེ་ཕར་སྦྱར། །གང་ཞིག་སྡེ་ཚན་གཉིས་པ་ཡི། །ཡི་གེ་གཉིས་པ་ཐིག་ལེ་ཅན། །ལྕགས་ཀྱུ་ཡིས་ནི་གཟིར་བར་བྱ། །བཞི་པ་ཡི་ནི་གསུམ་པར་བཅས། །ལན་གཉིས་སུ་ནི་བཟླས་པར་བྱ། །སངས་རྒྱས་ལྔ་ཡིས་བརྒྱན་པ་དང ། །སྔོན་དུ་ཕྱག་འཚལ་ཡི་གེ་སྟེ། །ཡི་གེ་དྲག་པོ་མཐའ་རུ་སྦྱར། །ས་བོན་འདི་བཟླས་རྣལ་འབྱོར་པས། །དངོས་པོ་ཐམས་ཅད་ཅིང་བར་འགྱུར། །ལག་གཉིས་སོར་མོ་བསྣོལ་ན་ས་ནི། །དེ་ཉིད་བཟའ་བ་ལྟ་བུར་སྦྱར། །ཁྲོ་བ་དང་ནི་དབུ་མ་བརྐྱང ། ། 78b གཉིས་ཀ་ཕན་ཚུན་དྲུད་པར་བྱ། །འདི་ནི་ཆེན་པོའི་ཕྱག་རྒྱ་སྟེ། །འོད་ཟེར་འབར་བའི་འཕྲེང་བ་འཁྲུག་།དགྲ་ཡི་མགྲིན་པ་ལ་སོགས་པ། །དངོས་པོ་ཐམས་ཅད་ཡིད་ཀྱིས་རོལ། །དེ་ནས་ཆུ་ལ་སོགས་པ་ཀུན། །རབ་ཏུ་བཅིང་བར་བཤད་པར་བྱ། །གང་ཡང་སྡེ་ཚན་ཐ་མ་ནི། །ཡི་གེ་གསུམ་པ་གཟུང་བར་བྱ། །དེ་བཞིན་སྡེ་ཚན་གསུམ་པ་ཡི། །ཡི་གེ་གསུམ་པ་ཉིད་དང་ནི། །དེ་ཡི་ས་བོན་གསུམ་པ་ལ། །སྟེང་དུ་ཨེ་ཞེས་བྱ་བར་སྦྱར། །སྡེ་ཚན་ལྔ་པའི་དང་པོ་ལ། །ལྕགས་ཀྱུ་ཡིས་ནི་གཟིར་བར་བྱ། །གསུམ་པ་ཆུ་ཡི་ས་བོན་དང ། །ཚེག་དྲག་ཡི་གེ་དབུས་བྱ་སྟེ། །མཐའ་མ་རྡོ་རྗེ་ཅན་དང་སྦྱར། །རེ་ཕ་གློ་ན་ལྕགས་ཀྱུ་ཅན། །མཐར་ནི་དྲག་པོའི་ཡི་གེ་དང ། །དང་པོར་ཕྱག་འཚལ་བཞག་པར་བྱ། །བཅིང་བ་ཡི་ནི་སྔགས་སུ་གྲགས། །ལག་གཉིས་ཐལ་མོ་སྦྱར་ནས་སུ། །སྲིན་ལག་གཉིས་ནི་ཕན་ཚུན་དཀྲི་།ཁྲོ་བོ་གཉིས་ཀྱིས་མནན་པར་བྱ། །མཐེ་བོ་གཉིས་ནི་དབུས་སུ་བྱར། །དེ་ཉིད་དུ་ནི་མཐེ་ཆུང་སྦྱར། །རྒོད་མ་ཁ་ཡི་ཕྱག་རྒྱ་འདི། །འོད་ཟེར་འབར་བའི་ཕྲེང་བ་ཅན། །ཕྱོགས་བཅུའི་གནས་སུ་འབར་བ་ཡིས། །སྤྲིན་གྱི་ལྷ་ཚོགས་སྲེག་པར་བྱེད། །ཆར་པ་བཅིང་ལ་སོགས་དུས་སུ། །ཕྱག་རྒྱ་འདི་ནི་སྦྱར་བར་བྱ། །སྒྲུབ་པོས་འབུམ་ཕྲག་གཅིག་བཟླས་བས། །སྔོན་དུ་བསྙེན་པ་ལ་སོགས་བྱ། །བདག་གི་གདན་ཞེས་བྱ་བའི་རབ་ཏུ་བྱེད་པ་ 79a ༄#། །བཞི་པའོ།། །།ལྷ་ཡི་གཟུགས་ནི་ཇི་ལྟ་བུ། །བཅོམ་ལྡན་འདས་ལས་ཉན་པར་འཚལ། །ཞི་བའི་སྦྱིན་སྲེག་ལ་སོགས་དང ། ། གཏོར་མ་ལྡན་པ་ཇི་ལྟར་ལགས། །གཟུགས་སོགས་བསམ་པ་རྩེ་གཅིག་པ། །ཉོན་ཅིག་རྡོ་རྗེ་དེ་ཁོ་ན། །སྔགས་དང་ཕྱག་རྒྱ་སྦྱིན་སྲེག་གི་།བཟླས་དང་བསམ་གཏན་བསྒོམ་པ་རྣམས། །སྔོན་དུ་མི་ཡི་ལས་སོགས་ལ། །བློ་ལྡན་བཟླས་པ་ཤེས་པར་བྱ། །ས་ནི་སྦྱངས་མ་ཐག་ཏུ་ཡང ། །སྟེགས་བུའི་མཚན་ཉིད་འབད་དེ་བྱ། །སོར་བརྒྱད་ལྷག་ནི་ཡན་ཆད་དུ། །ཁྲུ་གང་ཙམ་ནས་བརྩམས་ནས་སུ། །ཇི་སྙེད་ཁྲུ་སྟོང་བར་དུ་གཟུང ། །བརྒྱད་པ་དགྲ་ནི་འཇོམས་པ་སྟེ། །དེ་བཞིན་བཅུ་པས་རྒྱས་པར་འགྱུར། །བཅུ་གཉིས་པས་ནི་དབང་དུ་སྡུད། །བཅུ་བཞིས་དེ་བཞིན་ཞི་བ་ཉིད། །མཐེ་པ་སོར་བཅུ་དྲུག་ཚད་ཀྱིས་ནི། །རིགས་རྣམས་མངོན་པར་འཕེལ་བར་བྱེད། །མཐེབ་སོར་བཅོ་བརྒྱད་གནས་ཀྱིས་ནི། །བ་ལང་རིགས་སོགས་མངོན་པར་འཕེལ། །ཐབ་ཁུང་སོར་ནི་ཉི་ཤུ་པས། །གྲོང་ཁྱེར་དང་ནི་ཡུལ་འཁོར་ཞི། །རྒྱར་ནི་ཆ་གསུམ་བགོས་པ་ལས། །ཆ་གཉིས་སུ་ནི་བརྐོ་བར་བྱ། །བརྐོས་པ་ཡི་ནི་བརྒྱད་ཆ་ཡིས། །ཁུང་བུ་ཡི་ནི་ཁ་ཁྱེར་བྱ། །ཁ་ཁྱེར་གྱི་ནི་ཕྱེད་པ་ཡིས། །ཕྱི་རོལ་གྱི་ནི་མུ་ཁྱུད་བྱ། །མུ་ཁྱུད་ཆ་ 79b བརྒྱད་ལྡན་པ་ལ། །པདྨའི་འདབ་དེ་ཆ་བརྒྱད་བྱ། །པདྨ་ཡི་ནི་ཕྱི་རོལ་དུ། །སོར་གཅིག་པ་ཡི་ར་བ་བྱ། །ཐབ་ཁུང་ནང་དུ་རྡོ་རྗེ་རྣམས། །པདྨའི་ནང་དུ་གཞག་པར་བྱ། །མངོན་སྤྱོད་ལ་ནི་གྲུ་གསུམ་སྟེ། །ཞི་བ་ལ་ནི་གྲུ་བཞིའོ། །ཀུན་ནས་ཟླུམ་པོ་དབང་དུ་སྡུད། །རྒྱས་པ་ལ་ཡང་དེ་བཞིན་ནོ། །བསྐྲད་ལ་ཟླ་བ་ཕྱེད་པ་སྟེ། །དགུག་དང་བཅིང་ལ་ཟུར་བརྒྱད་པའོ། །རིམ་གྱི་རིམ་གྱིས་སྦྱར་བར་བྱ། །ཞི་དང་རྒྱས་དང་དབང་སོགས་རྣམས། །སངས་རྒྱས་ལྔ་ཡི་མཚོན་པ་རྣམས། །ཇི་བཞིན་ཕྱོགས་སུ་དགོད་པར་བྱ། །ཁ་ཁྱེར་གྱི་ནི་གནས་བཞི་རུ། །སངས་རྒྱས་མཚན་མས་བརྒྱན་པར་བྱ། །ཟླ་ཕྱེད་རྡོ་རྗེས་ཤིན་ཏུ་མཛེས། །གྲཝ་དང་གྲཝ་རུ་རྣམ་པར་བཞག་།ཇི་བཞིན་སྟན་གྱི་གནས་སུ་ཡང ། །མཐེབ་སོར་བཅུ་གཉིས་དག་དང་ནི། །དཔངས་སུ་ཁྲུ་ཕྱེད་ལྡན་པ་ཡི། །ཏི་སེའི་གངས་ནི་མཛེས་པར་གཞག་།འདབ་མ་བརྒྱད་ཀྱི་གནས་རྣམས་སུ། །ལྷ་མོ་རྣམས་ནི་རིམ་བཞིན་དགོད། ། རྣལ་འབྱོར་པ་ཡིས་དེ་ཡི་ཚད། །ཁྱད་པར་དུ་ནི་སྦྱར་བར་བྱ། །ོཾ་ཧི་ལི་ཧི་ལི་ཀི་ལི་བེ་ཏཱ་ལི་ཧཱུཾ་ཕཊ། ཉེ་བར་སྤྱོད་པའི་སྔགས་སོ། །ཡེ་ཤེས་མཁའ་འགྲོར་སྒོམ་པ་ཡིས། ། རང་གི་ལུས་ནི་བསྲུང་བར་བྱ། །བདག་གི་ཡན་ལག་བརྒྱད་པོ་རུ། །ཐམས་ཅད་བཀོད་པས་བསྲུང་བྱ་སྟེ། །ལྕེ་ལ་ཆུ་འདི་ཉིད་དང་ནི། །ནམ་མཁའ་རྣ་བ་སྣ་དག་ལ། །ས་ནི་མིག་ཏུ་ 80a ༄#། །སྦྱར་བར་བྱ། །དེ་བཞིན་མེ་ནི་ཚངས་པ་ལ། །མགྲིན་པར་རྨོངས་པའི་དེད་དཔོན་ཏེ། །གཡོ་བ་སྙིང་ལ་གནས་པའོ། །ཉོན་མོངས་ཐོང་ཀ་ཀུན་ཏུའོ། །ལྟེ་བའི་རྩ་བར་ཕྱུགས་ཡིན་ནོ། །ཡན་ལག་བརྒྱད་ཀྱིས་སྲུང་བ་འདི། །ལྷ་རྣམས་སུ་ནི་ཤེས་བྱས་ལ། །བ་དན་གསུམ་གྱི་ཕྱག་རྒྱ་ཡིས། །ཡན་ལག་བརྒྱད་དུ་གཏུགས་ཏེ་སྲུང ། །ཡེ་ཤེས་མཁའ་འགྲོའི་བདག་ཉིད་དུ། །བདག་ཉིད་ལུས་ནི་སྦྲུལ་བྱས་ཏེ། །ཀུན་ད་ཟླ་བ་ལྟར་དཀར་ཞིང ། །རྒྱན་རྣམས་ཀུན་གྱི་ས་རྣམ་པར་ཀླུབས། །སེམས་དཔའི་སྐྱིལ་ཀྲུང་ཕྱག་གཉིས་པ། །ཤིན་ཏུ་མཛེས་པའི་ན་བཟའ་མནབས། །ཕྱག་ན་ཁ་ཊྭཱཾ་རྡོ་རྗེ་སྟེ། །འབར་བའི་ཕྲེང་བ་ཀུན་ཏུ་གསལ། །རང་གི་ལུས་ནི་མཉམ་བཞག་པས།། དབུགས་མི་གཡོ་བར་བསྒོམ་པར་བྱ། །དེ་ནས་ས་ནི་སྦྱང་བྱ་སྟེ། །ོཾ་ཧ་ན་ཧ་ན་ཧཱུཾ་ཕཊ། ལག་པ་གཡས་པ་བརྐྱང་བྱས་ཏེ། །རྡོ་རྗེ་བསྒོམས་ནས་ས་ལ་བསྣུན། །ས་སྦྱང་བའི་སྔགས་དང ། ཕྱག་རྒྱའོ། །ལག་གཉིས་ཁུ་ཚུར་ཁ་སྦྱར་ཏེ། །གུང་མོ་གཉིས་བརྐྱང་ཀུན་ཏུ་བསྟན། །ཕྱག་རྒྱ་འདི་ནི་དག་བྱེད་པའོ། །ོཾ་ཤྲཱིཿ ་སཝཱཧཱ། མར་སྦྱང་བ་བའི་སྔགས་སོ། །ོཾ་ཨ་སཝཱཧཱ། རྫས་བཀྲུ་བའི་སྔགས་སོ། །ོཾ་བཛྲིཾ་སཝཱཧཱ། འབྲུ་སྦྱང་བའི་སྔགས་སོ། །ོཾ་ཀུ་རུ་ཀུ་རུ་སཝཱཧཱ། ཟས་མཆོག་ལ་སོགས་པའི་རྫས་ 80b སྦྱང་བའི་སྔགས་སོ། །ོཾ་ཨ་སཝཱཧཱ། ཡམ་ཤིང་སྦྱང་བའི་སྔགས་སོ། །མེ་དབུས་པདྨ་བསམས་ནས་སུ། །མེ་ཡི་ལྷ་ནི་དགུག་པར་བྱ། །གཡོན་པ་ཁུ་ཚུར་བཅིངས་ནས་སུ། ། ཁྲོ་བོ་དང་ནི་དབུ་མ་བརྐྱང ། །དབུ་མའི་ཚིགས་ནི་གསུམ་པ་ལ། །ཁྲོ་བོ་བསམས་ཏེ་བཙུགས་པས་དགུག་།ོཾ་ཨཱ་གཙྪ་ཨཱ་གཙྪ་ཨགྣེ་ཛཿ ་སཝཱཧཱ། པདྨའི་གདན་ལ་བཞུགས་པ་རུ། །ཐབ་ཁུང་དབུས་སུ་བསྒོམ་པར་བྱ། །བགྲང་ཕྲེང་སྤྱི་བླུགས་བུ་རམ་མདོག་།རལ་བའི་ཐོར་ཚུགས་སེར་སྐྱར་ལྡན། །ཤིན་ཏུ་མཛེས་པའི་ན་བཟའ་ཀླུབས། །འོད་ཟེར་མེ་ལྟར་ཀུན་ཏུ་འབར། །མེ་ཡི་དབུས་སུ་བསྒོམ་པར་བྱ། །དེར་ནི་ཇི་ལྟར་འབྱོར་བ་དང ། །དངོས་པོ་ལྔ་ཡིས་མཆོད་ནས་སུ། །མེ་དབུས་མེ་ལྷའི་ལྕེ་ལ་ནི། །ཀུན་ནས་སྲེག་བླུགས་གསུམ་གསུམ་བྱ། །ལག་གཉིས་ཐལ་མོ་སྦྱར་ནས་སུ། །པདྨའི་ཚུལ་དུ་ཅུང་ཟད་དབྱེ། །དབུ་མ་ཀུན་ཏུ་བརྐྱང་བར་བྱ། །ོཾ་ཛུ་ཧུ་ཛུ་ཧུ་ཨགྣེ་སཝཱཧཱ། མེའི་སྙིང་པོའི་སྔགས་དང་ཕྱག་རྒྱའོ། །དེ་ནས་འབད་པས་སེ་གོལ་གསུམ། །གཏོགས་པས་འབར་བར་ཐིམ་བར་བསྒོམ། །མ་ཡི་གནས་སུ་ཀུན་རིག་པས། །དེ་ནས་སྦྱང་པ་བརྩམ་པར་བྱ། །ོཾ་ཧཱུཾ་ཊ་ཊི་ཧཱུཾ་ཕཊ། རྡོ་རྗེར་བཅས་པའི་ལག་པ་ཡིས། །མེ་ཏོག་ཡུངས་ཀར་ཆུ་ཡིས་ནི། །ཕྱོགས་ཀུན་ཏུ་ནི་གཏོར་ནས་སུ། །མེ་ཡི་ནང་དུ་བླུགས་པར་བྱ། །སྦྱང་བའི་སྔགས་དང་ཕྱག་རྒྱའོ། །ོཾ་བཛྲ་པྲཱ་ཀཱ་ར་ཧཱུཾ་ཕཊ་ 81a ༄#། །ལག་གཡོན་ཐལ་མོ་ཕར་བསྟན་ཏེ། །གཡས་པ་ཚུར་བསྟན་རྒྱབ་སྦྱར་ནས། །དབང་ལྡན་ཕྱོགས་སོགས་བསྐོར་བར་བྱ། །ར་བའི་སྔགས་དང་ཕྱག་རྒྱའོ། །ལག་བ་གཉིས་ནི་བརྐྱང་ནས་སུ། །ཕན་ཚུན་རྩེ་མོ་རེག་པར་བྱ། །ོཾ་ཛྲུཾ་སཝཱཧཱ། རྡོ་རྗེའི་དྲ་བའི་སྔགས་དང ། ཕྱག་རྒྱའོ། །གཡོན་པའི་ཁུ་ཚུར་བཅངས་ནས་སུ། །མཐེ་བོང་འོག་ཏུ་བརྐྱང་བར་བྱ། །ོཾ་བྲུཾ་སཝཱཧཱ། ཕུར་བུའི་སྔགས་དང ། ཕྱག་རྒྱའོ། །ཉི་མའི་དཀྱིལ་འཁོར་གྱིས་བརྒྱན་བའི། །མེ་དབུས་པདྨ་བསམས་ནས་སུ། །གདུགས་དཀར་པོ་ཡི་གཡོགས་བ་ཡི། །རྡོ་རྗེ་དབུས་སུ་བསྒོམ་པར་བྱ། །རྡོ་རྗེ་རྩེ་མོ་ལྔ་པ་སྟེ། །ཁ་དོག་དམར་སོགས་བསམ་པར་བྱ། །འོད་ཟེར་སྣ་ཚོགས་འབར་བ་ལས། །ཉི་མའི་དཀྱིལ་འཁོར་དབུས་སུ་ནི། །རྡོ་རྗེའི་གཟུགས་སུ་བསྐྱེད་ནས་སུ། །རང་གི་དབུགས་ལས་བྱུང་བ་ཡི། །སྦྱོར་བའི་གདན་ལ་བྱུང་བ་ཡི། །ལས་ཀྱི་མདོག་ཏུ་བསྒོམ་པར་བྱ། །ཕྱག་གཉིས་ཁ་ཊྭཱཾ་རྡོ་རྗེ་བསྣམས། །ཐམས་ཅད་རྒྱན་གྱིས་རྣམ་པར་ཀླུབས། །རྡོ་རྗེའི་གཟུགས་ནི་བསྐྱེད་ནས་སུ། །རང་གི་དབུགས་ལས་བྱུང་བ་ཡི། །བདག་གི་ལུས་ནི་གང་ཡིན་ལ། །ཡེ་ཤེས་མཁའ་འགྲོ་བསྟིམ་པར་བྱ། །མེ་ཡི་དབུས་སུ་ཀུན་རིག་བས། །སྣ་ཚོགས་དངོས་པོ་མཆོད་པར་བྱ། །ོཾ་ཋཿ ་ཋཿ ་ཋཿ ་སཝཱཧཱ། དགང་བླུགས་ཀྱི་སྔགས་ 81b སོ། །གཡས་སུ་དབྱུག་པ་བསམ་པར་བྱ། །དེ་བཞིན་གཡོན་དུ་སྣོད་ནི་སྦྱར། །ོཾ་ཧཱུཾ་སཝཱཧཱ། རྩ་བའི་སྔགས་དང ། ཕྱག་རྒྱའོ། །ལག་པ་གཡས་པ་བརྐྱང་པ་དང ། །ོཾ་པྲ་ཏཱིཙྪ་སུ་གནྡྷ་ཧཱུཾ་སཝཱཧཱ། ཞེས་བྱ་བ་ནི་དྲིའི་སྔགས་དང ། ཕྱག་རྒྱའོ། །བརྐྱང་བ་དེ་ཉིད་ཀྱི་མཐེ་བོང་དང ། ཁྲོ་བོ་སྦྱར་བ་དང ། ོཾ་པུཥྤེ་མཱ་ལེ་སཝཱཧཱ། ཞེས་བྱ་བ་ནི་མེ་ཏོག་གི་སྔགས་དང་ཕྱག་རྒྱའོ། །ཁུ་ཚུར་དེ་ཉིད་ལས་མཐེ་བོང་བརྐྱང་བ་དང ། ོཾ་ཏིཀྵ་དཱི་པེ་ཧཱུཾ་སཝཱཧཱ། ཞེས་བྱ་བ་ནི་མར་མེའི་སྔགས་དང ། །ཕྱག་རྒྱའོ། །མེ་ཏོག་གི་ཕྱག་རྒྱ་དེ་ཉིད་ལས་དབུ་མ་སྒྲེང་པ་དང ། ོཾ་དྷཱུ་པེ་ཤཝ་རི་ཧཱུཾ་སཝཱཧཱ། ཞེས་བྱ་བ་ནི་བདུག་པའི་སྔགས་དང ། ཕྱག་རྒྱའོ། །ལག་པ་གཉིས་ཀ་བརྐྱང་སྟེ་མཐེ་བོང་དང ། གུང་མོ་བསྐྱོད་པ་དང ། ོཾ་ཀུ་རུ་ཀུ་རུ་མཧཱ་བ་ལིཾ་ཧཱུཾ་སཝཱཧཱ། ཞེས་བྱ་བ་ནི་གཏོར་མའི་སྔགས་དང ། ཕྱག་རྒྱའོ། །མེ་ཡི་ཁ་ཡི་ནང་དུ་ནི། །ལན་རེ་བཟླས་ཤིང་ལན་རེ་བཞིན། །དབུས་སུ་གོང་བུ་བསྲེག་པར་བྱ། །བདུན་ལས་ལྷག་མ་ཀུན་བཟུང་ནས། །དབུས་སུ་གོང་བུ་རན་པར་ནི། །གོང་མའི་ཚུལ་གྱིས་གནས་བ་ནི། །འབད་དེ་རྫོགས་པའི་མཐའ་རུ་ནི། །ལྷག་མ་དག་ནི་བསྲེག་པར་བྱ། །བསྲེགས་བ་ཟིན་ནས་ལྷ་རྣམས་ནི། །བདག་གི་ལུས་ལ་ཐིམ་པར་བསྒོམ། །དགང་ལུགས་ཀུན་ལ་རྫོགས་བ་རུ། །སྔགས་དང་ཕྱག་རྒྱས་རྫོགས་པར་བྱ། །སྣོད་ནི་མར་གྱིས་བཀང་ནས་སུ། །མེ་ཡི་ 82a ༄#། །དབུས་སུ་བླུགས་ནས་ཀྱང ། །དྲངས་ནས་དབུགས་ནི་སྟོངས་འགྱུར་ཏེ། །རང་གི་ལུས་ལ་ཐིམ་བར་བྱ། །དེ་ནས་རང་གི་ལུས་ཉིད་དུ། །མཁས་པ་ཡིས་ནི་བསྒོམ་པར་བྱ། །དབུས་སུ་མེ་ཡི་ལྷ་ཉིད་ནི། །མཁས་པ་ཡིས་ནི་བསམས་ནས་ཀྱང ། །ལྷག་མ་ལན་གསུམ་བསྲེགས་ནས་སུ། །མཆོད་དེ་གཏོར་མ་སྦྱིན་པར་བྱ། ། བཀྲ་ཤིས་དབྱངས་ནི་བླངས་ནས་སུ། །དེར་ནི་ཕྱག་རྒྱ་སྦྱར་བར་བྱ། །སྦྱིན་སྲེག་ལས་ཀྱི་ཕྱེ་བ་གཞན། །མདོར་བསྡུས་རྒྱས་བ་མིན་པར་བཤད། །སཱ་ལུ་འབྲས་དང་སོ་བ་དང། །ཏིལ་དཀར་པོ་ལ་ཡུངས་ཀར་དང ། །ནས་དང་དཱུར་བའི་ས་བོན་བཅས། །མར་དང་འོ་མར་བསྲེས་ནས་སུ། །སྦྲང་རྩི་བསྲེས་པའི་འོ་ཐུག་ནི། །ཁྱད་པར་དུ་ནི་བསྲེག་པར་བྱ། །འོ་མ་ཅན་གྱི་ཤིང་ལྔ་ལས། །སོར་མོ་བཅུ་བཞིར་ལྡན་པའི་ཚད། །ཞི་བའི་དུས་ལ་བབ་པ་ན། །བསྲེགས་པའི་ཆོ་གའི་མཆོག་ཡིན་ནོ། །ཏིལ་ནག་པོ་དང་མ་ཤ་དང ། །སཱ་ལུ་དམར་པོའི་ཟན་དང་ནི། །དྲི་དང་གུར་གུམ་འོ་མ་ནི། །མར་དང་སྦྲང་རྩིར་བསྲེས་པ་དང ། །མར་དང་ལྡན་པའི་འོ་ཐུག་དག་།ཁྱད་པར་དུ་ནི་བསྲེག་པར་བྱ། །འོ་མ་ཅན་གྱི་ཤིང་ལྔ་ལས། །ཡམ་ཤིང་སོར་བཅུའི་ཚད་དང་བཅས། །གལ་ཏེ་རྒྱས་པའི་ལས་འདོད་ན། །སྒྲུབ་པོས་ཁྱད་པར་བསྲེག་པར་བྱ། །ཏིལ་ནི་ 82b དམར་དང་གནག་པ་དང ། །ནཱ་ག་གེ་སར་པྲི་ཡང་ཀུ། །དེ་བཞིན་སྐེ་ཚེ་འུ་སུ་དང ། །སྦྲང་རྩི་དང་ནི་མར་སར་སྦྱར། །ཐང་ཤིང་དང་ནི་ནྱ་གྲོ་དང ། །ཀླུ་ཤིང་དང་ནི་བ་ཤ་ཀ། །ཡམ་ཤིང་སོར་མོ་བཅུ་གཉིས་པ། །ཆགས་པའི་ལས་ལ་མཆོག་ཡིན་ནོ། །ཏིལ་ནག་པོ་དང་མ་ཤ་དང ། །འབའ་ལ་ཏ་ཀ་ནག་ཆེན་འབྲས། །ཚ་བའི་མར་ནག་ཁྲག་དང་ནི། །བསྲེས་པ་ཡིས་ནི་བྱུགས་པ་དང ། །ལུང་ཏང་ཤིང་དང་སྒུར་པོའི་ཤིང ། །བ་ལོ་ཏ་ཀ་ཀུ་ལའི་ཤིང ། །ཡམ་ཤིང་སོར་བརྒྱད་པ་ཡི་ཚད། །མངོན་སྤྱོད་ལས་ལ་རབ་ཏུ་གྲགས། །ཡུངས་ཀར་མོ་སྲན་གྲེའུ་དང ། །ལམ་གྱི་རྡུལ་དང་བསྲེས་པ་དག་།ཁྲག་དང་ཁ་བའི་མར་ནག་གིས། །དེ་ནི་བསྒོ་བར་རབ་ཏུ་བྱ། །གསེར་ཤིང་དང་ནི་བ་ཤ་ཀའི། །ཡམ་ཤིང་དེར་ནི་བཟུང་ནས་ནི། །དེ་ཉིད་ལས་ལ་བསྲེག་བྱ་བ། །བསྐྲད་པ་དག་ལ་རབ་ཏུ་གྲགས། །ཉ་དང་ཤ་ལ་སོགས་པའི་རྫས། །བག་ཕྱེ་འབྲུ་རྣམས་ཐམས་ཅད་དག། ཁྲག་དང་སྦྲང་རྩིས་བསྒོས་པ་དང ། །བྱ་རོག་གི་ནི་སྒྲོ་དག་དང ། །བྱ་རོག་ཚང་གི་ཤིང་བུ་དང ། །སོ་ཤིང་འཆོས་ནས་བོར་བ་སྟེ། །འདི་དག་བཅང་བའི་ལས་རྣམས་ལ། །བརྩོན་དང་ལྡན་པས་སྦྱོར་བར་བྱ། །དེ་ནས་གཞན་ཡང་ཁྱད་པར་དུ། །སྦྱིན་སྲེག་མཚན་ཉིད་བཤད་པར་བྱ། །ཞོ་དང་མར་དང་སྦྲང་རྩི་ཡིས། །བསྒོས་པ་ཡི་ཤྲི་བ་ལ་ནི། །བྱང་ཆུབ་ཤིང་གི་ཡམ་ 83a ༄#། །ཤིང་ལ། །ལྔ་བརྒྱ་རུ་ནི་བསྲེག་པར་བྱ། །དེ་ཡི་དབུས་སུ་མཉམ་བཞག་ནས། །སྨོན་ལམ་བཏབ་སྟེ་ཁྲུས་བྱས་ན། །རྒྱལ་སྲིད་ཉམས་པ་འམ་མྱུར་དུ་ནི། །ས་གསུམ་རྒྱལ་པོ་དབང་དུ་འགྱུར། །མར་དང་འོ་མ་སྦྲང་རྩིར་བཅས། །ལོ་ཏའི་ཡམ་ཤིང་མེ་ལ་ནི། །བརྒྱ་ཕྲག་བརྒྱ་རུ་མངོན་བསྲེགས་ན། །ཤིན་ཏུ་མྱུར་བར་དཔལ་ལྡན་འགྱུར། །བྱ་བ་གང་དང་གང་བསམས་པ། །དེ་དེ་ཐམས་ཅད་འདིར་འགྲུབ་འགྱུར། །དེ་ནས་ཡོངས་བཟུང་སློབ་མ་ཡི། །མཚན་ཉིད་དག་ནི་བཤད་པར་བྱ། །ཡན་ལག་ཐམས་ཅད་ཡོངས་སུ་རྫོགས། །དུལ་ཞིང་སྤྱོད་པ་ཞི་བ་དང ། །ཆོས་གསུམ་ལ་ནི་མངོན་པར་དང ། །ཐེག་པ་ཆེ་ལ་རྟག་ཏུ་དགའ། །སྔགས་དང་རྒྱུད་ཀྱི་སྦྱོར་བ་ཤེས།། བཟོ་དང་སྒྱུ་རྩལ་ཐམས་ཅད་མཁས། །བསམ་གཏན་སྦྱོར་བ་མངོན་པར་དགའ། །ཐོས་དང་ཀློག་སོགས་གུས་དང་བཅས། །དུས་རྣམས་ཀུན་ཏུ་བླ་མར་གུས། ། སྦྱིན་སོགས་དགེ་བའི་ལས་ལ་བརྩོན། །འདོད་ལ་དགའ་བ་མ་ཡིན་ཞིང ། །ལོངས་སྤྱོད་ལ་ནི་བརྟེན་པ་མིན། །ཁྲོ་དང་ང་རྒྱལ་མེད་པ་དང ། །ངང་ཚུལ་ངན་མིན་ཚིག་རྩུ་བ་མིན། །སེམས་ཅན་ཀུན་ལ་སྨོན་པ་དང ། །ལྷ་དང་བླ་མ་དེ་བཞིན་ཏེ། །གདུག་སེམས་ཅན་དང་ངང་ཚུལ་ཅན། །རྟག་ཏུ་སྡིག་པའི་བློ་དང་ལྡན། །འཁྱལ་ 83b བ་དང་ནི་ཚིག་རྩུབ་སྨྲ། །འདི་ལྟ་བུ་དག་སྤང་བར་བྱ། །གཞན་གྱི་རབ་ཏུ་བྱེད་པ་ལས། །རིམ་པར་ཕྱེ་བ་དང་པོའོ།། །།ཆུ་ཡི་སྦྱིན་སྲེག་ཇི་ལྟ་བུ། །ལྷ་ལས་གཟིགས་མོ་ཉན་པར་འཚལ། །ཆུ་ཡི་སྦྱིན་སྲེག་ལ་སོགས་པའི། །མཚན་ཉིད་དག་ནི་ཇི་ལྟར་ལགས། །ཆུ་སོགས་ཡང་དག་མཚན་ཉིད་རྣམས། །ཉོན་ཅིག་རྡོ་རྗེ་དེ་ཁོ་ན། །བླ་རེ་དག་ནི་བྲིས་ནས་སུ། །སྣ་ཚོགས་གོས་རྣམས་རབ་ཏུ་དཔྱངས། །ཤིན་ཏུ་ཡངས་ཤིང་གྲུ་བཞི་པར། །ཀུན་ནས་དྲི་ཡིས་བྱུག་པར་བྱ། །དབུས་སུ་ཆུ་ཡི་སྣོད་སོགས་ལ། །དྲི་ནི་དཀར་པོས་བྱུགས་ནས་སུ། །ཆུ་དང་འོ་མར་བསྲེས་པ་ཡིས། །སྣོད་ནི་མཛེས་པར་དག་པར་བྱ། །བུམ་པ་དག་ནི་བརྒྱད་པོ་ཡང ། །ཕྱོགས་བརྒྱད་དག་ཏུ་གཞག་པར་བྱ། །དྲི་ཡི་ཆུ་ཡིས་རབ་ཏུ་དགང ། །ཁ་ནི་ཤིང་ལོ་སར་པས་བརྒྱན། །བདག་ཉིད་ཡེ་ཤེས་མཁའ་འགྲོ་རུ། །སྐད་ཅིག་གིས་ནི་བསྐྱེད་ནས་སུ། །མེ་ཏོག་བདུག་སྤོས་དྲི་སོགས་པའི། །དངོས་པོས་བདག་ཉིད་མཆོད་བྱས་པའི། །དེ་འོག་ཕྱི་རོལ་བཞག་པ་ཡི། །ཆུ་ཡི་ལས་རྣམས་སྦྱར་བར་བྱ། །ལག་གཉིས་ཐལ་མོ་སྦྱར་ནས་སུ། །པདྨའི་ཚུལ་དུ་ཅུང་ཟད་དབྱེ། །ོཾ་ཀ་མ་ལེ་བྷེ་སཝཱཧཱ། པདྨའི་སྔགས་དང ། ཕྱག་རྒྱའོ། །ཟླ་བའི་དཀྱིལ་འཁོར་གྱིས་བརྒྱན་པའི། །པདྨ་ཆུ་ཡི་ནང་བཀོད་ལ། །གདུགས་དཀར་པོ་ཡིས་གཡོགས་པ་ཡི། །ས་བོན་དབུས་སུ་བསྒོམ་པར་ 84a ༄#། །བྱ། །རང་གི་དབུགས་ལས་བྱུང་བ་ཡི། །ས་བོན་ལས་ནི་གཟུགས་སུ་བསྐྱེད། །སེམས་དཔའི་སྐྱིལ་ཀྲུང་ཕྱག་གཉིས་ལྡན། །རྒྱན་རྣམས་ཀུན་གྱིས་རྣམ་པར་ཀླུབས། །ཕྱག་གཉིས་རྡོ་རྗེ་དབྱུག་པ་རྣམས། །ཁ་དོག་དཀར་པོ་ཤིན་ཏུ་མཛེས། །བཞད་ཅིང་ཁྲོ་ལ་སྒེག་དང་བཅས། །ཤིན་ཏུ་མཛེས་པའི་ན་བཟའ་གསོལ། ། དམ་ཚིག་ཕྱག་རྒྱ་སོགས་བསྟན་ཞིང ། །དམ་ཚིག་སྔགས་དང་སྦྱར་བར་བྱ། །ལག་གཉིས་ཕན་ཚུན་ཁུ་ཚུར་བཅིངས། །མཛུབ་མོ་གཉིས་ནི་བརྐྱང་ནས་སུ། །མཛུབ་མོ་གཉིས་ཀྱིས་མདུད་པར་བྱ། །དམ་ཚིག་ཕྱག་རྒྱར་རབ་ཏུ་གྲགས། །ོཾ་ས་མ་ཡེ་ཏིཥྛ་ཧཱུཾ་ཕཊ། དམ་ཚིག་གི་སྔགས་དང་ཕྱག་རྒྱའོ། །ཤར་གྱི་བུམ་པ་རྡོ་རྗེ་མ། །བྱང་དུ་དྲག་མོ་ཤེས་བྱ་བ། །ནུབ་ཏུ་རོ་ལངས་མ་ཡིན་ཏེ། །ལྷོ་ཕྱོགས་སུ་ནི་གཏུམ་མོ་གནས། །སེང་གེ་ཞེས་བྱ་དབང་ལྡན་དུ། །དེ་བཞིན་མེ་མཚམས་སྟག་མོའོ། །བདེན་བྲེལ་ན་ནི་ལྕེ་སྤྱང་མོ། །ཧཱུཾ་བྱེད་འུག་པ་རླུང་གི་ཕྱོགས། །སོ་སོ་སོ་སོར་མཚན་མ་དང ། །དམ་ཚིག་ཕྱག་རྒྱར་བསྟན་པར་བྱ། །རང་གི་གཟུགས་ཀྱི་སྐུ་མདོག་ལྡན། །སྔགས་དང་ཕྱག་རྒྱ་བསྟན་པའོ།། མེ་ཏོག་བདུག་སྤོས་དྲི་ལ་སོགས། །མཁས་པ་ཡིས་ནི་མཆོད་པར་བྱ། །རྡོ་རྗེ་ཁུ་ཚུར་གཉིས་བཅིངས་ལ། །གཡོན་པ་སྙིང་གར་བཞག་ནས་སུ། །གཡས་པས་སྟེང་ 84b ནས་དབུབ་པར་བྱ། །རྩ་བའི་ཕྱག་རྒྱར་རབ་ཏུ་གྲགས། །ོཾ་ཛྲིཾ་ཧཱུཾ་སཝཱཧཱ། རྩ་བའི་སྔགས་དང ། ཕྱག་རྒྱའོ། །ཀུན་ད་ལ་སོགས་མེ་ཏོག་དཀར། །རྩེ་མོར་དཱུར་བ་བཙུགས་ནས་སུ། །ལྷ་མོའི་དབུ་སྟེང་རྡོ་རྗེ་ཡི། །ཅོད་པན་ལ་ནི་གཏོར་བར་བྱ། །གསང་སྔགས་ལན་རེ་བཟླས་ནས་སུ། །ལན་རེའི་སྦྱོར་བས་དབུལ་བར་བྱ། །ལན་གྲངས་ཁྲི་ཡི་ལས་ཀྱིས་ནི། །ཐམས་ཅད་རིག་ཅིང་ཚེ་འཕེལ་འགྱུར། །ཀ་ར་བའི་རའི་མེ་ཏོག་དམར། །དཱུར་བ་དང་ནི་ལྡན་པ་ཡིས། །ལས་ནི་ཁྲི་ཕྲག་བྱས་པ་ཡིས། །ཁྱིམ་རྣམས་ཞི་བར་རབ་ཏུ་གྲགས། །ན་ག་པུཥྤའི་ཡམ་ཤིང་གི་།འོ་མར་སྤགས་ཏེ་དབུལ་བར་བྱ། །ལས་འདི་ཁྲི་ཕྲག་བྱས་པ་ཡིས། །གྲོང་ནི་ཞི་བར་བྱེད་པར་འགྱུར། །པདྨ་ཡི་ནི་ཡམ་ཤིང་རྣམས། །ཁྲི་ཕྲག་ཏུ་ནི་བཟླས་ནས་སུ། །ལས་རྣམས་ཀུན་ལ་སྦྱར་བྱས་ན། །ཡུལ་ཕྱོགས་ཞི་བར་བྱེད་པར་འགྱུར། །པྲི་ཡང་ཀུ་དང་བིལ་བ་དང ། །དེ་བཞིན་ཨུཏྤལ་ཀུ་མུ་ད། །རྒྱལ་པོའི་ལས་ལ་སོགས་སྦྱར་ནས། །ཕ་རོལ་ཡུལ་འཁོར་འཇོམས་པར་འགྱུར། །སྔགས་པས་རྟག་ཏུ་སྐྱོར་ཆུ་གཏོར། །བྱེ་བྲག་ཏུ་ནི་རྒྱས་པར་འགྱུར། །གཞན་གྱི་གདན་གྱི་རབ་ཏུ་བྱེད་པ་ལས ། རིམ་\?\་ཕྱེ་བ་གཉིས་པའོ།། །།འཁོར་བའི་ཕ་རོལ་སྒྲོལ་མཚན་ཉིད། །ཉོན་ཅིག་རྡོ་རྗེ་རྒྱལ་མཚན་པོ། །དངོས་དང་དངོས་མེད་རྣམ་པར་གྲོལ། །དག་དང་ 85a ༄#། །མ་དག་རབ་ཏུ་སྤངས། །དངོས་པོ་གཉིས་ནི་རབ་སྤངས་པས། །གཉིས་མེད་ཆོས་ཞེས་བྱ་བ་སྟེ། །གཟུགས་སྟོང་ཐོག་མར་མཐར་ཐུག་དང ། །དབུ་མ་མཉམ་པར་གནས་པའོ། །དག་དང་མ་དག་དབུ་མ་ནི། །འབའ་ཞིག་གིས་ནི་མཉམ་པར་བལྟ། །བསྟེན་དང་བསྟེན་མེད་དབུ་མ་ཡི། །མཉམ་ཉིད་ཡེ་ཤེས་ལས་བྱུང་བ། ། ལུས་ནི་མཉམ་པར་གནས་པ་སྟེ། །ངག་ཀྱང་མཉམ་པར་གནས་ནས་སུ། །མཉམ་ཉིད་ཡེ་ཤེས་ལས་བྱུང་བས། །མཉམ་པའི་བལྟ་བས་བལྟ་བར་བྱ། །མཉམ་པའི་ལྟ་བ་ཇི་ལྟ་བུ། །བཅོམ་ལྡན་འདས་ལ་ཉན་པར་འཚལ། །གཉིས་མེད་ཆོས་ཤེས་བགྱི་བ་ཡི། །བདག་ཉིད་ཇི་ལྟར་འཚལ་བར་བགྱི། །གཉིས་མེད་ཡེ་ཤེས་མཚན་ཉིད་ནི། །ཇི་བཞིན་དེ་ཉིད་རྡོ་རྗེས་ཉོན། །དངོས་པོ་གཉིས་ནི་རབ་སྤུངས་ལ། །ཡེ་ཤེས་ཅན་གྱིས་གཉིས་མེད་ཆོས། །རྣལ་འབྱོར་ཀུན་གྱི་ཐོག་མ་རུ། །དག་པ་རྣམ་གསུམ་བརྗོད་པར་བྱ། །ོཾ་སཝ་བྷཱ་ཝ་ཤུདྡྷཿ ་སརྦ་དྷརྨཱ་སཝ་བྷཱ་བ་ཤུདྡྷོཉྷཾ། ཨོཾ་བཛྲ་ཤུདྡྷཿ ་སརྦ་དྷརྨཱ་བཛྲ་ཤུདྡྷོཉྷཾ། ཨོཾ་ཡོ་ག་ཤུདྡྷཿ ་སརྦ་དྷརྨཱ་ཡོ་ག་ཤུདྡྷོཉྷཾ། བླ་མེད་ཉིད་དུ་བྱ་བའི་ཕྱིར། །ཐལ་སྦྱར་ནས་དེ་དག་བརྗོད། །ཡིད་དུ་འོང་བའི་ས་ཕྱོགས་ཀྱི། །གནས་དག་ཏུ་ནི་བརྟེན་ནས་སུ། །བླ་རེ་དག་ནི་བྲེ་བར་བྱ། །སྣ་ཚོགས་གོས་ནི་དབྱངས་ནས་སུ། །བ་དན་ 85b རྒྱལ་མཚན་བསྒྲེང་བར་བྱ། །གཡེར་ཀ་དྲ་བས་མཛེས་བྱས་ལ། །གནས་བཅུ་དག་ནི་ཀུན་ཏུ་ཡང ། །དེ་བཞིན་དྲི་ཡ་དཀྱིལ་འཁོར་བྱ། །སྐད་ཅིག་རྣལ་འབྱོར་ཚུལ་གྱིས་ནི། །རང་གི་ལུས་ནི་བསམ་པར་བྱ། །ཡེ་ཤེས་མཁའ་འགྲོ་བཟུང་ནས་ནི། །བདག་ཉིད་མཆོད་པས་མཉེས་པར་བྱ། །ལག་པ་གན་རྐྱལ་བཞག་ནས་སུ། །དེར་ནི་རྡོ་རྗེ་བརྟག་བར་བྱ། ། གནས་ལྔ་དག་ཏུ་བསྟིམ་པར་བྱ། །ས་འོག་ཏུ་ནི་སྦྱང་བར་བྱ། །ཕྱག་འཚལ་འཇོམས་པའི་མཐའ་ལྡན་པའི། །ཧཱུཾ་ཞེས་བྱ་བ་སྦྱར་བར་བྱ། །ལྷུན་པོའི་སྟེང་དུ་བསམ་བྱ་བ། །ཁ་དོག་བཞི་སོགས་ལྡན་པ་ཡིས། །གསེར་ལས་བྱུང་བའི་གྲོང་ཁྱེར་ནི། །རིན་ཆེན་བདུན་ལ་སོགས་པས་སྤྲས། །གཡེར་ཀ་དྲ་བའི་ཕྲེང་བ་ཅན། །མཉམ་ཞིང་ཇི་ལྟར་འདོད་པས་དཔྱངས། །ཕྱག་རྒྱ་ཀུན་གྱི་ཐོག་མར་ནི། །དམ་ཚིག་ཕྱག་རྒྱ་བཅིང་བར་བྱ། །རྡོ་རྗེ་ཁུ་ཚུར་གཉིས་བཅིངས་ལ། །གཡོན་པ་སྙིང་གར་བཞག་ནས་སུ། །གཡས་པ་མཆན་ཁུང་བཞག་བར་བྱ། །དམ་ཚིག་ཕྱག་རྒྱ་ཤེས་པར་བྱ། །ཕྱག་འཚལ་སྲེག་པའི་མཐའ་ལྡན་པའི། །ཇི་ལྟར་རྡོ་རྗེའི་དངོས་ས་བོན། །སྔགས་དང་ཕྱག་རྒྱ་འདི་ཡིས་ནི། །དེ་བཞིན་དམ་ཚིག་བསྟན་པར་བྱ། །སེང་གེའི་གདན་ནི་རྣམ་པ་ལྔ། །གནས་ལྡན་དག་ཏུ་སྦྱར་བར་བྱ། །ཉི་མའི་གདན་ནི་བསམས་ནས་སུ། །གདུགས་དཀར་པོ་ཡིས་བརྒྱན་ 86a ༄#། །པར་བྱ། །རང་གི་དབུགས་ལས་བྱུང་བ་ཡི། །ཡེ་ཤེས་མཁའ་འགྲོ་དབུས་སུ་བསམ། །ཞལ་གསུམ་ཕྱག་ནི་དྲུག་པ་སྟེ། །སེམས་དཔའ་ཡི་ནི་སྐྱིལ་ཀྲུང་ཅན། །སྐྲ་གྲོལ་བས་ནི་གཡོགས་པ་སྟེ། །སངས་རྒྱས་ལྔ་ཡིས་མཛེས་པར་བྱས། །ཁ་དོག་སྔོན་མོ་དྲག་ཆེན་མོ། །སྦྲུལ་གྱི་རྒྱན་གྱིས་རྣམ་བར་ཀླུབས། །བཞད་དང་ཁྲོ་དང་སྒེག་པ་ཡི། །ཞལ་གསུམ་པོ་ནི་སྤྱན་གསུམ་པོ། །ཧ་ཧར་བཞད་ཅིང་གཅིགས་པ་སྟེ། །ན་བཟའ་དམར་པོས་ཤིན་ཏུ་མཛེས། །ཁ་ཊྭཱཾ་གྱེན་དུ་བསྒྲེང་བ་དང ། །གཉིས་པ་ན་ནི་དགྲ་སྟ་ཉིད། ། གསུམ་པ་ཡིས་ནི་རྡོ་རྗེ་ཐོགས། །གཡོན་པས་དྲིལ་བུ་སྒྲ་སྒྲོགས་ཤིང ། །གཉིས་པ་ན་ནི་སྣོད་ཉིད་དེ། །གསུམ་པས་དེ་བཞིན་རལ་གྲི་འཕྱར། །འོད་ཟེར་སྣ་ཚོགས་འབར་བ་རུ།། དབུས་སུ་མཁས་པས་བསྒོམ་པར་བྱ། །ཡེ་ཤེས་ཀྱི་ནི་ཤར་ཕྱོགས་སུ། །བདག་གི་ཆུ་ལས་བྱུང་བ་སྟེ། །ཁ་དོག་དཀར་པོ་ཤིན་ཏུ་མཛེས། །སྐྲ་གྲོལ་བས་ནི་རྣམ་པར་ཀླུབས།། ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་རྣམས་ཀུན་གྱིས་བརྒྱན་བ་སྟེ། །ཕྱག་ན་ཁ་ཊྭཱཾ་རྣལ་འབྱོར་སྣོད། །ཤིན་ཏུ་མཛེས་བའི་ན་བཟའ་ཀླུབས། །འོད་ཟེར་སྣ་ཚོགས་འབར་བ་ཡི། །རྡོ་རྗེ་མཁའ་འགྲོམ་བསྒོམ་བྱ། །ཡེ་ཤེས་ཀྱི་ནི་བྱང་གི་ཆར། །བདག་གི་མེ་ལས་བྱུང་བ་ཡི། །ཁ་དོག་སེར་པོ་ཤིན་ཏུ་མཛེས། །སེམས་དཔའ་ཡི་ནི་ 86b སྐྱིལ་ཀྲུང་ཅན། །སྐྲ་གྲོལ་བས་ནི་ཤིན་ཏུ་བརྒྱན། །སྦྲུལ་གྱི་རྒྱན་གྱིས་རྣམ་བར་ཀླུབས། །སྐུ་ལ་ན་བཟའ་མཛེས་པ་མནབས། །ཕྱག་གཉིས་ཁ་ཊྭཱཾ་རྣལ་འབྱོར་སྣོད། །མཁའ་འགྲོ་དྲག་མོ་ཞེས་བྱ་བསྒོམ། །ཡེ་ཤེས་ཀྱི་ནི་ནུབ་ཕྱོགས་ཆར། །བདག་གི་རླུང་ལས་བྱུང་བ་ཡིས། །ཕྱག་གཉིས་སེམས་དཔའི་སྐྱིལ་ཀྲུང་ཅན། །ཁ་དོག་དམར་པོ་ཀུན་ཏུ་འདི། །ཁ་ཊྭཱཾ་རྣལ་འབྱོར་སྣོད་བསྣམས་ཤིང ། །སྐྲ་གྲོལ་བས་ནི་མཛེས་པ་སྟེ། །ལུས་ཀུན་སྦྲུལ་གྱི་རྒྱན་གྱིས་བརྒྱན། །ཤིན་ཏུ་མཛེས་པའི་ན་བཟའ་གསོལ། །འོད་ཟེར་སྣ་ཚོགས་འབར་བ་ཡི་།མཁའ་འགྲོ་རོ་ལངས་མ་བསྒོམ་བྱ། །ཡེ་ཤེས་ཀྱི་ནི་ལྷོ་ཡི་ཆར། །ས་ཡི་ཡེ་ཤེས་ལས་བྱུང་བ། །ཕྱག་གཉིས་སེམས་དཔའི་སྐྱིལ་ཀྲུང་ཅན། །ཁ་དོག་སྔོན་པོ་ཤིན་ཏུ་མཛེས། ཁ་ཊྭཱཾ་རྣལ་འབྱོར་སྣོད་བསམས་ཤིང ། །རྒྱན་རྣམས་ཀུན་གྱིས་ཀླུབས་པ་སྟེ། །སྐྲ་གྲོལ་བས་ནི་ཤིན་ཏུ་མཛེས། །ཧ་ཧར་རྒོད་བས་འཇིགས་པར་མཛད། །འོད་ཟེར་སྣ་ཚོགས་འབར་བ་ཡི། ། མཁའ་འགྲོ་གཏུམ་མོ་ཞེས་བྱར་བསྒོམ། །བདག་དངོས་ལྔ་ཡིས་བྱུང་བ་ཡི། །མཁའ་འགྲོ་མ་ནི་ལྔ་ཞེས་བྱ། །ལྔ་པོ་ལྔ་རུ་བསྒོམ་པར་བྱ། །གཟུགས་སོགས་ཤིན་ཏུ་མཛེས་པ་ཡིན། །དབང་ལྡན་གྱི་ནི་ཕྱོགས་ཀྱི་ཆར། །སེང་གེའི་གདོང་ནི་བསམ་པར་བྱ། །ཁ་དོག་དཀར་ཞིང་སེར་བ་སྟེ། །གླང་པོ་ཡི་ནི་སྟན་ལ་བཞུགས། །རྡོ་རྗེ་ལྕགས་ཀྱུ་སྡིགས་མཛུབ་ 87a ༄#། །ཅན། །ཤིན་ཏུ་མཛེས་བའི་ན་བཟའ་གསོལ། །འོད་ཟེར་སྣ་ཚོགས་འབར་བ་ཡི། །འབར་བའི་ལུས་ཅན་བསྒོམ་པར་བྱ། །མེ་མཚམས་སྟག་མོ་ཞེས་བྱ་བ།། རིན་ཆེན་བདུན་གྱི་སྟན་ལ་བཞུགས། །ཕྱག་གཉིས་ཁ་དོག་དཀར་ཞིང་སྔོ། །ཤིན་ཏུ་མཛེས་བའི་ན་བཟའ་གསོལ། །ལག་ན་ལྕགས་ཀྱུས་བརྒྱན་པ་སྟེ། །གཡོན་པ་སྡིགས་མཛུབ་ཞགས་པ་ཅན། །འོད་ཟེར་སྣ་ཚོགས་འབར་བ་ཡི། །འབར་བའི་ལུས་ཅན་བསྒོམ་པར་བྱ། །བདེན་བྲལ་ལྷ་མོ་ལྕེ་སྤྱང་མོ། །ཧ་ཧ་བཞད་པས་འཇིགས་པར་མཛད། ། མ་ཧེ་ཡི་ནི་གདན་ལ་བཞུགས། །མདོག་ནི་དམར་ཞིང་སྔོ་བ་སྟེ། །སྐུ་ལ་ན་བཟའ་མཛེས་པར་གསོལ། །ཕྱག་གཉིས་ལྕགས་ཀྱུ་ཞགས་པ་དང ། །སྡིགས་མཛུབ་ཀྱིས་ནི་ཤིན་ཏུ་མཛེས། །སྦྲུལ་གྱི་རྒྱན་གྱིས་རྣམ་པར་ཀླུབས། །འོད་ཟེར་སྣ་ཚོགས་འབར་བ་ཡི། །འབར་བའི་ལུས་ཅན་བསྒོམ་པར་བྱ། །རླུང་མཚམས་ལྷ་མོ་འུག་པ་མོ། །ཁ་དོག་སེར་ཞིང་དམར་པ་སྟེ། །ཀླུ་ཡི་སྟན་ལ་ཡང་དག་བཞུགས། །རྒྱན་དུའང་དེ་ཉིད་སྦྱར་བར་བྱ། །ཕྱག་གཉིས་སེམས་དཔའི་སྐྱིལ་ཀྲུང་ཅན། །སྡིགས་མཛུབ་ལྕགས་ཀྱུ་ཞགས་པ་བསྣམས། །འོད་ཟེར་སྣ་ཚོགས་འབར་བ་ཡི། །འབར་བའི་ལུས་ཅན་བསྒོམ་བར་བྱ། །དབུས་ཀྱི་མཁའ་འགྲོམ་བརྒྱད་ཀྱིས། །ཕྱི་རོལ་དག་ནི་རྣམ་བཞི་ལ། །ཤར་དུ་མཁའ་ 87b འགྲོ་རྒྱལ་དབང་མོ། །ཕྱག་གཉིས་ཁ་དོག་དཀར་པོ་སྟེ། །ཡི་དྭགས་ཀྱི་ནི་སྟན་ལ་བཞུགས། །སྦྲུལ་གྱི་རྒྱན་གྱིས་ཀླུབས་པ་སྟེ། །ཤིན་ཏུ་དྲག་ཅིང་སྐྲ་གྲོལ་བས། །འོད་ཟེར་སྣ་ཚོགས་ཡང་དག་འབར། །ལག་གཉིས་ཁ་རུ་བཅུག་ནས་ནི། །ཧ་ཧ་ར་བཞད་པས་ཤིན་ཏུ་འབར། །བྱང་ན་འབར་མ་རྒྱལ་དབང་མོ། །ཁ་དོག་སེར་མོ་ཤིན་ཏུ་འབར། །སྤྱི་བོའི་སྟེང་དུ་ལག་པ་གཉིས། །ཐལ་སྦྱར་མར་མེ་ལྟ་བུར་འབར། །དྲག་མོའི་གཟུགས་ཅན་ཚིག་པ་སྟེ། །ཤིན་ཏུ་མཛེས་པའི་ན་བཟས་བརྒྱན། །ཡི་དྭགས་ཀྱི་ནི་སྟན་ལ་བཞུགས། །འོད་ཟེར་མེ་ལྟར་འབར་བསྒོམ། །ནུབ་ཀྱི་ལྷ་མོ་འཇིབ་བྱེད་མ། །ཁ་དོག་དམར་མོ་འཇིགས་བྱེད་ཅན། །ཡི་དྭགས་ཀྱི་ནི་སྟན་ལ་བཞུགས། །རབ་ཏུ་མཛེས་པའི་གོ་བགོས་ཤིང ། །ཡི་དྭགས་སྟན་ལ་ཀུན་ཏུ་གནོན། །ལག་ཏུ་སྐུད་པ་དམར་ཁྱེར་ཞིང ། །ཐལ་མོ་སྦྱར་ཏེ་ཁྲག་འཐུང་མ། །དྲག་མོ་མེ་ལྟར་འབར་བའི་འོད། །ལྷ་མོ་འཇིགས་བྱེད་རབ་ཏུ་གྲགས། །ངག་འཕྲོག་མ་ནི་ལྷོ་ཕྱོགས་སུ། །ཁ་དོག་ནག་མོ་མཉམ་པའི་འོད། །ཡི་དྭགས་སྟན་ལ་གནས་པ་ཡི། །སྐྲ་ནི་གྱེན་དུ་འབར་བརྒྱན་པའི། །རབ་ཏུ་མཛེས་པའི་དམར་པོའི་གོས། །སྦྲུལ་གྱི་རྒྱན་གྱིས་བརྒྱན་པ་ཡི། །སྡིགས་མཛུབ་གཏུན་ཤིང་ལག་ན་ཐོགས། །རྣམ་པར་རྨོངས་བའི་སེམས་ཅན་སྒྲོལ། །དྲག་མོ་མེ་ལྟར་འབར་བའི་འོད། །ཐམས་ཅད་ཀུན་ནས་ 88a ༄#། །མཁས་པས་སྒོམ། །དེ་དག་གི་ནི་གཟུགས་མདུན་དུ། །དམ་ཚིག་དག་ནི་བསྟན་པར་བྱ། །རླུང་དང་མེ་ཡི་བདུན་དོན་ལ། །རྡོ་རྗེ་མ་ཡི་ས་བོན་དབྱེ། །སྒྲ་དང་ཐིག་ལེ་ཡང་དག་མནན། །ཆར་པའི་རྒྱུན་ཞེས་བྱ་བར་བརྗོད། །ཕྱག་འཚལ་དང་པོ་སྲེག་བྱེད་མཐའ། །ཡེ་ཤེས་མཁའ་འགྲོའི་ས་བོན་ཡིན། །དབྱངས་ཐོག་དང་པོའི་ས་བོན་ནི། །ཕྱག་འཚལ་དང་པོ་སྲེག་བྱེད་མཐའ། །ཤར་ཕྱོགས་རྡོ་རྗེ་མཁའ་འགྲོ་མའི། །ས་བོན་དུ་ནི་རབ་ཏུ་གྲགས། །དབྱངས་ཡིག་ཡི་གེ་གཉིས་པོ་ནི། །ཕྱག་འཚལ་སྲེག་བྱེད་སྦྱར་བར་བྱ། ། འདི་ནི་བྱང་གི་ཕྱོགས་གནས་པ། །མཁའ་འགྲོ་དྲག་མོའི་ས་བོན་ཡིན། །ས་བོན་དག་ནི་འདི་ཉིད་ལ། །དབྱུག་པ་གློ་རུ་གཞག་པར་བྱ། །ཕྱག་འཚལ་དང་པོ་སྲེག་བྱེད་མཐའ།། ནུབ་ཕྱོགས་རོ་ལངས་མ་ཡི་ཡིན། །ས་བོན་དག་ནི་འདི་ཉིད་ལ། །སྟེང་དུ་ཐིག་ལེ་སྦྱིན་པར་བྱ། །ཕྱག་འཚལ་སྲེག་པ་མཐར་སྦྱར་བ། །ལྷོ་ཕྱོགས་གཏུམ་པ་མོ་ཡི་ཡིན། །མ་ནིང་ས་བོན་དང་པོ་ནི། །ཕྱག་འཚལ་སྲེག་བྱེད་མཐའ་དང་སྦྱར། །དབང་ལྡན་ལྷ་མོ་སེང་གེ་མའི། །ས་བོན་དུ་ནི་རབ་ཏུ་གྲགས། །མ་ནིང་ས་བོན་གཉིས་པ་ནི། །ཕྱག་འཚལ་སྲེག་བྱེད་མཐའ་དང་སྦྱར། །མེ་མཚམས་ལྷ་མོ་སྟག་མོ་ཡི། །དེ་ཁོ་ན་ཉིད་ས་བོན་བཤད། །དེ་བཞིན་མ་ནིང་ས་བོན་གསུམ། །ཕྱག་འཚལ་སྲེག་བྱེད་མཐའ་དང་སྤེལ། །བདེན་ 88b བྲལ་ལྷ་མོ་ཅེ་སྦྱང་མ། །ཁྱད་པར་གྱི་ནི་ས་བོན་ཡིན། །མ་ནིང་ཡི་གེ་བཞི་པ་ལ། །ཕྱག་འཚལ་སྲེག་བྱེད་མཐའ་དང་སྦྱར། །རླུང་མཚམས་ཧཱུཾ་བྱེད་འུག་པ་མོའི། །ས་བོན་དུ་ནི་རབ་ཏུ་སྦྱར། །སྡེ་ཚན་དག་ནི་ལྔ་པ་ཡི། །ཡི་གེ་དག་ནི་གཉིས་པ་བཟུང ། །ས་བོན་རྩ་བར་སྒྲ་དང་སྦྱར། །ཕྱག་འཚལ་ཐོག་མར་སྲེག་བྱེད་མཐའ། །ཤར་གྱི་མཁའ་འགྲོ་རྒྱལ་དབང་མོའི། ། ས་བོན་དུ་ནི་ཤེས་པར་བྱ། །སྡེ་ཚན་དག་ནི་ལྔ་པ་ཡི། །དེ་བཞིན་ཡི་གེ་གཉིས་པ་བཟུང ། །ེ་དང་ཐིག་ལེར་སྦྱར་བར་བྱ། །ཕྱག་འཚལ་ཐོག་མ་སྲེག་བྱེད་མཐའ། །བྱང་ཕྱོགས་ལྷ་མོ་འབར་བྱེད་མའི། །ས་བོན་ཡི་གེ་སྦྱར་བར་བྱ། །སྡེ་ཚན་དག་ནི་ལྔ་པ་ཡི། །ཡི་གེ་གཉིས་པ་གཟུང་བར་བྱ། །ོ་དང་རེ་ཕ་ཐིག་ལེར་བྱ། །ཕྱག་འཚལ་ཐོག་མར་སྲེག་བྱེད་མཐར། ། ནུབ་ཕྱོགས་ལྷ་མོ་འཇིབ་བྱེད་མའི། །ཁྱད་པར་གྱི་ནི་ས་བོན་ཡིན། །སྡེ་ཚན་དག་ནི་ལྔ་པ་ཡི། །ཡི་གེ་གཉིས་པ་བཟུང་ནས་སུ། །རེ་ཕའི་ཡི་གེ་ལྕགས་ཀྱུ་སྦྱར། །ཕྱག་འཚལ་སྲེག་པའི་མཐའ་སྦྱར་བ། །ལྷོར་གནས་ལྷ་མོ་འཕྲོག་བྱེད་མའི། །ས་བོན་དུ་ནི་རབ་ཏུ་གྲགས། །ཁུ་ཚུར་གཉིས་ནི་བཅིངས་ནས་སུ། །དབུ་མ་གཉིས་ནི་བརྐྱང་ནས་ཀྱང ། །རྩེ་མོ་ཕན་ཚུན་སྤྲད་ནས་ནི། །ཡེ་ཤེས་ལྷ་མོར་བསྟན་པར་བྱ། །ལག་གཉིས་ཕན་ཚུན་སྦྱར་ནས་སུ། །དབུ་མ་དག་ནི་མཐེ་བོང་སྤྲད། །ཅུང་ཟད་ཅིག་ནི་བསྐྱོད་པར་བྱ། །ཤར་ཕྱོགས་རྡོ་རྗེ་མ་ལ་ 89a ༄#། །བསྟན། །ཁུ་ཚུར་མཉམ་པར་བཅིངས་ནས་སུ། །མཐེ་བོང་གཉིས་ནི་བརྐྱང་བྱས་ལ། །བྱང་གི་ཕྱོགས་ནས་བརྩམས་ནས་སུ། །རྒྱ་འདི་དྲག་མོ་ལ་ཡང་བསྟན། །ཕྱག་རྒྱ་འདི་ནི་བཅིངས་ནས་སུ། །མཐེ་ཆུང་གཉིས་ནི་བརྐྱང་བར་བྱ། །ལྷོ་ཕྱོགས་སུ་ནི་བཤད་པ་སྟེ། །དེ་ནི་ཕྱག་རྒྱ་བཞི་པའོ། །རྡོ་རྗེ་ཁུ་ཚུར་གཉིས་བཅིངས་ནས། །ཁྲོ་བོར་གཉིས་ནི་བརྐྱང་ནས་སུ། །རྩེ་མོ་སྤྲད་དེ་གནས་པ་ནི། །མཚམས་བཞི་ཡི་ནི་ཕྱག་རྒྱ་ཡིན། །ལག་གཉིས་ཐལ་མོ་ཁར་བཅུག་ནས། །ཕུ་ཞེས་བྱ་བ་སྦྱར་བར་བྱ། །ཤར་ཕྱོགས་མཁའ་འགྲོའི་ཕྱག་རྒྱ་ཡིན། །ལག་གཉིས་ཐལ་མོ་ཁ་སྦྱར་ནས། །སྤྱི་བོ་རུ་ནི་གཞག་པར་བྱ། །བྱང་དུ་གནས་པའི་འབར་མ་ལ། །ཕྱག་རྒྱ་འདི་ནི་བསྟན་པར་བྱ།། ཕྱག་འཚལ་ཐལ་མོ་སྦྱར་ནས་སུ། །ཁ་རུ་བཞག་སྟེ་ཧཱུཾ་ཞེས་བྱ། །ནུབ་ཕྱོགས་ལྷ་མོ་འཇིབ་བྱེད་མའི། །ཕྱག་རྒྱ་རུ་ནི་སྦྱར་བར་བྱ། །ལག་གཉིས་ཀུན་ཏུ་བསྐོར་བྱས་ནས། ། སོར་མོ་རྣམས་ཀྱི་རྩེ་མོར་སྦྱར། །གསང་བའི་གནས་སུ་བཞག་ནས་ཀྱང ། །ལྷོ་ཕྱོགས་འཕྲོག་བྱེད་མ་ལ་བསྟན། །ཕྱག་འཚལ་དང་ནི་སྲེག་པ་ཡི། །དབུས་སུ་ཧཱུཾ་ཞེས་བྱ་བ་སྦྱར། །ལག་པ་ཀུན་ཏུ་བརྐྱང་ལ་སོགས། །དྲི་སྔགས་ཕྱག་རྒྱར་རིག་པར་བྱ། །བདུད་རྩི་རོ་དང་ཐིག་ལེར་བཅས། །ཕྱག་འཚལ་དང་ནི་སྲེག་པ་མཐའ། །དྲི་ཡི་ཕྱག་རྒྱ་བརྐྱང་ནས་ 89b སུ། །ཁྲོ་བོ་དང་ནི་མཐེ་བོང་སྦྱར། །སྔགས་དང་ཕྱག་རྒྱ་འདི་ཡིས་ནི། །ཐམས་ཅད་རིག་པས་ཐམས་ཅད་དབུལ། །སྡེ་ཚན་དང་པོའི་དང་པོ་ནི། །ཕྱག་འཚལ་ཐོག་མ་སྲེག་བྱེད་མཐའ་ཕྱག་རྒྱ་དེ་ཉིད་སྦྱར་ནས་སུ། །དབུ་མའི་སོར་མོ་བསྒྲེང་བར་བྱ། །བདུག་པའི་སྔགས་དང་ཕྱག་རྒྱ་ཡིས། །ལྷ་རྣམས་ཐམས་ཅད་མཆོད་པར་བྱ། །དགུ་མཐའ་ཡི་ནི་ས་བོན་བཟུང་ཕྱག་འཚལ་དང་ནི་སྲེག་བྱེད་མཐའ། །ཁུ་ཚུར་བཅིངས་ནས་མཐེ་བོང་སྒྲེང ། །མར་མེའི་སྔགས་དང་ཕྱག་རྒྱའོ། །ལྷ་རྣམས་ཐམས་ཅད་མཆོད་པར་བྱ། །སྡེ་ཚན་དང་པོ་འི་གསུམ་པ་གཟུང ། །སྒྲ་དང་ཐིག་ལེར་སྦྱར་བ་དང ། །ཕྱག་འཚལ་དང་ནི་སྲེག་བྱེད་མཐའ། །གཏོར་མའི་ཕྱག་རྒྱ་དང་ ་སྦྱར། །ལག་པ་གཉིས་ནི་སྦྱར་ནས་སུ། །མཐེ་བོང་གུང་མོ་སྤྱར་བྱ་བ། །ཐམས་ཅད་དུ་ནི་སྐད་ཅིག་བསྐྱོད། །གཏོར་མའི་སྔགས་ནི་སྔ་མར་སྦྱར། །གཉིས་མེད་གཏོར་མ་སྔ་མ་བཞིན། །དེ་ཉིད་འདི་ཡི་མཆོད་པར་བྱ། །སྔོན་དུ་རྫས་ནི་རྣམ་པ་ལྔ། །སྣ་ཚོགས་པ་ཡི་ལྕགས་ཀྱུ་དང ། །དྲི་དང་མེ་ཏོག་བདུག་པ་སོགས། །སྔགས་དང་ཕྱག་རྒྱ་ཕུལ་ནས་ཀྱང ། །ཕྱི་ནས་མཆོད་པ་ཉི་ཤུ་ཡིས། །ཤེས་གཉེན་ཅན་གྱིས་མཆོད་པར་བྱ། །ཧཱུཾ་ཞེས་པ་ཡི་གླུ་བླངས་ནས། །རྣལ་འབྱོར་མ་ལུས་མཉེས་པར་བྱ། །རྡོ་རྗེ་ཁུ་ཚུར་གཉིས་བཅིངས་ལ། །རྐེད་པའི་མཚམས་སུ་བཞག་ནས་ནི། །ཡན་ 90a ༄#། །ལག་གསུམ་དུ་ཧཱུཾ་གིས་བསྐྱེད། །པི་ཝང་ཚུལ་དུ་སྒྲེང་བ་དང ། །གླིང་བུའི་ཚུལ་དུ་འབུད་པ་དང ། །ཟངས་དུང་ཚུལ་དུ་འབུད་པ་དང ། །ཅང་ཏེའི་ཚུལ་གྱིས་བརྡུང་བ་དང ། །དཀྲོལ་བའི་ཚུལ་གྱིས་དཀྲོལ་བ་དང ། །པ་ཏ་ཧ་ལྟར་བརྡུང་བ་དང ། །གར་གྱི་ཚུལ་གྱིས་བསྐྱོད་པ་དང ། །བསིལ་གཡབ་ཚུལ་གྱིས་གཡོབ་པ་དང་།། རྒྱལ་མཚན་ཚུལ་གྱིས་སྒྲེང་བ་དང ། །བླ་རེའི་ཚུལ་དུ་བྲེས་པ་དང ། །བ་དན་ཚུལ་དུ་འཕྱར་བ་དང ། །གདུགས་ཀྱི་ཚུལ་དུ་དབུབ་པ་དང ། །རྫ་རྔའི་ཚུལ་དུ་བརྡུང་བ་དང ། །རྡ་ཟླུམ་ཚུལ་དུ་བརྡུང་བ་དང ། །འཛུམ་པའི་ཚུལ་དུ་བཞད་པ་དང ། །ཁྲོ་བོའི་ཚུལ་དུ་ཁྲོ་བ་དང ། །སྒེག་པའི་ཚུལ་དུ་སྒེག་པ་དང ། །འགྱིང་བའི་ཚུལ་གྱིས་རོལ་པ་དང ། ། མདའ་འདྲེན་ནུ་མར་འཁྲུད་པ་དང ། །རྡོ་རྗེ་གསོར་ཞིང་ཕྱག་འཚལ་བའི། །ཕྱག་འཚལ་ཚུལ་དུ་འདུད་པ་སྟེ། །རྣལ་འབྱོར་མ་བརྒྱད་དེ་ཉིད་ཀྱིས། །དངོས་པོ་ཀུན་གྱིས་མཆོད་པར་བྱ། །དེ་ཉིད་དབྱངས་སུ་བླངས་ནས་སུ། །ཧཱུཾ་ཞེས་བྱ་བ་བདག་གིས་སྤྲུལ། །ཧཱུཾ་གིས་གླུ་ནི་བླང་བར་བྱ། །རྡོ་རྗེ་དགའ་བའི་མཐུ་དང་སྤྱན་གྱིས་གཟིགས། །ཡི་གེའི་དངོས་པོ་རང་བཞིན་སྟོང་པར་རོལ། །དངོས་དང་དངོས་མེད་ལས་གྲོལ་དབུ་མ་མཁྱེན། །མི་འགྱུར་དགྲ་བཅོམ་ལྷག་མ་སེམས་པའོ། །གཉིས་སྤྲོད་གཉིས་འཁྱུད་ཆུ་ཡི་བྱ་བ་ཅན། །གཉིས་མེད་ 90b ཆོས་སྐྱེས་ཐར་པའང་བརྙེས་པའོ། །བདེ་བས་འཁོར་མནན་ཐར་པའང་བཏང་བའོ། །ཐམས་ཅད་དངོས་ཀྱིས་རྣལ་འབྱོར་མ་རྣམས་རོལ། །རྣལ་འབྱོར་མ་ལྔ་སངས་རྒྱས་དེ་ཉིད་མཁྱེན། ། གཟུགས་མང་སྒྱུ་མར་སེམས་ཅན་སྨིན་མཛད་པ། །རྡོ་རྗེ་ཀུན་རྟོགས་ཆོས་ཀྱི་རྨོངས་པ་གཅོད། །རྣལ་འབྱོར་མ་རྨོངས་སྙིང་ཆོས་ཚོགས་ལ་འདུད། །རྣལ་འབྱོར་མ་ཡི་ཆོས་གྲོལ་ངེས་པའི་གཙོ་ལ་འདུད། །སེམས་ཅན་གྲོལ་མཛད་རྣལ་འབྱོར་བདག་ལ་བསྟོད་ཕྱག་འཚལ། །ཐམས་ཅད་བདག་སྐྱེས་གཅིག་དངོས་དེ་ལ་བསྟོད་ཕྱག་འཚལ། །འཁོར་བའི་རྒྱ་མཚོ་རྨོངས་པ་གཅོད་ལ་བསྟོད་ཕྱག་འཚལ། །དེ་ཉིད་གཅིག་ལ་རྟག་ཏུ་བདག་འདུན་བསྟོད་ཕྱག་འཚལ། །ཞེས་བྱ་བས་ཁྱད་པར་དུ་བསྟོད་ཅིང་གླུ་དང ། བསྟོད་པས་ཉེ་བར་མཆོད་པར་བྱའོ། །བར་བར་དུ་ཧཱུཾ་གི་སྒྲ་དང ། དྲིལ་བུ་བསྒྲགས་ལ་སྨོན་ལམ་རྣམ་པ་གསུམ་གདབ་པར་བྱའོ། །རྡོ་རྗེ་ཐལ་མོ་དམ་བཅིངས་ནས། །སྙིང་གའི་ཕྱོགས་སུ་བཙིར་བར་བྱ། །ོཾ་སཝ་བྷཱ་ཝ་ཤུདྡྷཿ ་སརྦ་དྷརྨྨ་སཝ་བྷཱ་ཝ་ཤུདྡྷོཉྷཾ། ཨོཾ་བཛྲ་ཤུདྡྷཿ ་སརྦ་དྷརྨྨཱ་བཛྲ་ཤུདྡྷོཉྷཾ། ཨོཾ་ཡོ་ག་ཤུདྡྷཿ ་སརྦྦ་དྷརྨ་ཡོ་ག་ཤུདྡྷོཉྷཾ། གཡས་པ་པདྨ་བསམས་ནས་སུ། །གཡོན་པ་རྡོ་རྗེ་བསྒྲེངས་ནས་ཀྱང། །པདྨའི་བསྐོར་བས་བསྐོར་ནས་ནི། །ཕྱག་རྒྱ་ཆེན་པོ་བསྟན་པར་བྱ། །ོཾ་ཧ་ཧོ་ཧྲཱིཿ ་སཝཱཧཱ། ཕྱག་རྒྱ་ཆེན་པོ་བྱིན་གྱིས་བརླབས་པའི་སྔགས་དང་ཕྱག་རྒྱའོ། །རྣལ་འབྱོར་ 91a ༄#། །ཅན་གྱིས་མཚུངས་པ་རུ། །ལྷ་རྣམས་ཐམས་ཅད་བསམ་པར་བྱ། །འཇིག་རྟེན་པ་སོགས་ཡེ་ཤེས་ཅན། །ཕྱི་ཡི་དཀྱིལ་འཁོར་བརྟག་པར་བྱ། །སོ་སོར་དྲི་ཡིས་མཆོད་པ་དང ། །སོ་སོར་མེ་ཏོག་གཏོར་བ་དང ། །སོ་སོར་བདུག་པས་བདུག་པ་སོགས། །སོ་སོར་སྦྱོར་བར་དབུལ་བར་བྱ། །བདུད་རྩི་ལྔ་ནི་བསྲེས་ནས་སུ། །ཉ་ཕྱིས་ལ་སོགས་དབུལ་བར་བྱ། །ཧ་ཞེས་བྱ་བས་ཁ་དོག་དབྲོག་།ཧོ་ཞེས་བྱ་བས་དྲི་གཞོམ་སྟེ། །ཧྲཱིཿ ཞེས་བྱ་བས་ནུས་པ་གཞོམ། །གོ་རིམ་དེ་ལྟར་མངོན་པར་བརྗོད། །རྣམ་གསུམ་ལན་གསུམ་བརྗོད་ནས་སུ། །ལྷ་གསུམ་དུ་ནི་བསམ་པར་བྱ། །པདྨའི་དབང་ཕྱུག་གཟུགས་མཛེས་གསེར་གྱི་མདོག་།དྲི་ཆུའི་ངོ་བོ་ཤིན་ཏུ་རྣམ་སྣང་མཛད། །མྱང་བ་རྡོ་རྗེའི་དབང་ཕྱུག་ཕྱག་རྡོ་རྗེ།། ལྷ་གསུམ་དབང་ཕྱུག་ཏུ་ནི་བསྒོམ་པར་བྱ། །གཡོན་པ་ཟླ་བའི་ལག་པ་ཡི། །ཟླ་བའི་དབུས་སུ་བདུད་རྩི་ཡི། །ཡི་གེ་ཀུན་རིག་གུག་སྐྱེད་བཅས། །མཐེ་བོང་སོར་མོ་ས་ཉིད་དེ། ། སྲིན་ལག་དག་ནི་རི་རབ་བོ། །བསྲུབས་པའི་སྟོབས་ཀྱིས་བདུད་རྩི་ཡི། །ཆུ་ནི་རྣམ་གསུམ་ཤེས་པར་བྱ། །རྣལ་འབྱོར་མ་ནི་ཐམས་ཅད་ལ། །མཐེ་བོང་འཐོར་འཐུང་སོ་སོར་དབུལ། །དེ་འོག་རང་གི་དངོས་པོ་ཡིས། །བདག་ཉིད་ལ་ནི་བསམ་བྱ་བ། །རྒྱས་པ་ལྔ་ཡི་མཆོད་རྟེན་ནི། །རྣམ་པ་གསུམ་གྱིས་བཀྲུ་བར་བྱ། །ལྕེ་རྩེ་ཐིག་ལེ་སྟེང་དུ་ཡང ། །བློ་ 91b དང་ལྡན་པས་གནས་གསུམ་མཆོད། །ལྟོས་ཤིག་ཤིན་ཏུ་མཛེས་པའི་ཆོས། །འདི་ལ་རྟོག་པ་ཡོད་མིན་ཐོང ། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་པས་ལྷན་ཅིག་བཟའ། ། རྣལ་འབྱོར་ཕོ་མོའི་འཁོར་ལོ་ལ། །ཚིགས་བཅད་འདི་ཡིས་སྦྱིན་པར་བྱ། །པདྨའི་བསྐོར་བ་སྔོན་འགྲོ་བས། །སེམས་ནི་ཤེལ་ལྟར་བསམས་ནས་སུ། །གཡས་པ་པདྨའི་གདན་ལ་ནི། ། རྡོ་རྗེ་རྩེ་གསུམ་བསྒྲེང་བར་བྱ། །འདོད་ཆགས་དྲི་མ་དང་བྲལ་བའི། །རིན་ཐང་མེད་ལས་ལེགས་འོངས་ཆོས། །གཟུང་དང་འཛིན་མེད་རྣམ་སྤངས་པ། །དེ་ཁོ་ན་ཉིད་བདག་ཕྱག་འཚལ། །ཚིགས་བཅད་འདི་ཡིས་བླངས་བྱས་ཏེ། །སྦྱོར་བའི་དངོས་གྲུབ་དོན་དུ་ནི། །ཀུན་སྤྱོད་དེ་ཉིད་ཇི་བཞིན་དུ། །རྣལ་འབྱོར་པ་ཡིས་ཀུན་ཏུ་སྦྱར། །ཇི་ལྟར་བདེ་བས་ཀུན་ཞེས་བརྗོད། །དམར་པོ་ཡི་ནི་རྫས་རྣམས་ཀྱིས། །མཎྜལ་གྲུ་གསུམ་གསུམ་དུ་བྱ། །རྡོ་རྗེ་ཁུ་ཚུར་གཉིས་བཅིངས་ལ། །རྒྱབ་དང་རྒྱབ་ཏུ་སྦྱར་བར་བྱ། །མཐེ་ཆུང་གཉིས་ནི་བསྒྲེངས་ནས་སུ། །མཛུབ་མོ་གཉིས་ནི་བསྒྲེང་བར་བྱ། །གཡས་པ་ཅུང་ཟད་བསྐུམས་ནས་སུ། །སྦྱར་བས་ཕྱག་རྣམས་སྤྱན་དྲང་ངོ ། །ོཾ་ཀུ་རུ་ཀུ་རུ་ས་མ་ཡ་ཨ་དྷི་པ་དྷི་ཧཱུཾ་ཛཿ སཝཱཧཱ། སྤྱན་དྲང་བའི་སྔགས་དང་ཕྱག་རྒྱའོ། །མེ་ཏོག་དམར་པོ་བདུག་པ་དང ། །དྲི་དང་མར་མེ་ལ་སོགས་དབུལ། །རྒྱས་པའི་གཏོར་མའི་སྣོད་ལ་ནི། །ཉེ་བའི་ལོངས་སྤྱོད་གཏོར་མར་ 92a ༄#། །ལྡན། །ཤ་རློན་དང་ཉ་ལ་སོགས། །བཟའ་བའི་རྫས་རྣམས་ཐམས་ཅད་ལ། །བདུད་རྩི་ལྔ་དང་བཅས་པར་དགོད། །གཡོན་གྱི་ཆ་རུ་སྣོད་བཞག་ལ། །གཡས་སུ་ཁྲོ་བོ་བསྟན་པར་བྱ། །ོཾ། ཤིང་གཅིག་དང་ནི་དུར་ཁྲོད་དང ། །རི་བོ་དང་ནི་རི་སུལ་དང ། །གྲོང་དང་བཞི་མདོ་ཞིང་དང་ནི། །ཁྱད་པར་དུ་ནི་ཁང་སྟོང་དང ། །གདོལ་པ་སྣོད་དང་ཐང་དང་ནི། །ཁྱད་པར་དུ་ནི་ཆུ་ལ་གནས། །ནག་པོ་དྲག་པོ་དྲག་ཆེན་པོ། །ལྷ་བཞིན་མཉམ་དུ་བསྟེན་པ་དང ། །ནག་པོ་གཙིགས་དང་མི་སྡུག་དང ། །རྒ་ལས་འདས་དང་ལོག་འདྲེན་རྣམས། །རྒན་བྱེད་མ་དང་དྲག་མོ་དང ། །མི་སྡུག་མ་དང་ནི་ཟླ་བ་མོ། །དྲག་ཏུ་སྡང་དང་འཕྱང་བ་མེ། །འཕྲོག་བྱེད་མ་དང་མར་མེ་མ། །འཇིག་བྱེད་བགྲོང་ནས་རྣལ་འབྱོར་མ། །དྲག་མོ། །ནག་སྦོམ་མ་དང་རྣལ་འབྱོར་མ། །དབང་མོ་དང་ནི་ཟླ་བ་མོ། །དྲག་ཏུ་སྡང་དང་འཕྱང་བ་མོ། །འཕྲོག་བྱེད་མ་དང་མར་མེ་མ། །འཇིག་བྱེད་གྲོང་ནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མོ། །མཆེ་བ་གཙིགས་དང་ཐོད་ཆེན་མོ། །ཐོད་ཕྲེང་ཕྲེང་ཅན་ཁ་ཊྭཱཾ། །སྤྲུལ་ཆུན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་གཞུ་ཅན་མ། །ལྷ་ཡི་དབང་ཕྱུག་མ་རྣམས་ནི། །དེ་བཞིན་ཆེན་མོ་མཁའ་འགྲོ་ལྔ། །ལས་ཀུན་རྗེས་སུ་སྒྲུབ་བྱེད་མ། །སྦྱོར་བའི་དཀྱིལ་འཁོར་རྒྱལ་ཆེན་མོ། །དེ་བཞིན་རྡོ་རྗེ་དབང་ཕྱུག་ 92b གཙོ། །དེ་བཞིན་གཤེགས་པའི་སྐུ་ཆེན་ཏེ། །རྡུལ་མེད་རྣལ་འབྱོར་འབྱིན་པ་མོ། །རྡོ་རྗེ་དབང་མོའི་བཀའ་འདི་ཡིས། །ཐམས་ཅད་ཀུན་ནས་འདིར་སྤྱོན་ཅིག་།ོཾ་ཀ་ཀ་ཀ་ཌྷྱ་ན། །བ་བ་བནྡྷ་ན། ཁ་ཁ་ཁཱ་ད་ན། སརྦྦ་དུཥྚཱན་ཧ་ན་གྷཱ་ཏ་ཡ་གྷཱ་ཏ་ཡ་ཨ་མོ་ཀ་སྱ་ཤཱནྟི་ཀུཾ་རུ་ཧཱུཾ་ཧཱུཾ་ཕཊ་ཛ་སཝཱཧཱ། བདུད་རྩི་ཡིས་ནི་ཁ་བཀང་ནས། །ལས་ཀྱི་གོ་འཕང་མངོན་པར་བསམ། །རྣལ་འབྱོར་རྣལ་འབྱོར་མ་བསྒོམས་ཏེ། །ལས་རྣམས་ཐམས་ཅད་རྗེས་སུ་འགྲུབ། །རྡོ་རྗེ་ཁུ་ཚུར་གཉིས་བཅིངས་ལ། །རྒྱབ་དང་རྒྱབ་ཏུ་སྦྱར་བར་བྱ། །ོཾ་ཏིཥྛཧཱུཾ་བྷཀྵ་བྷཀྵ་ཛ་ཕཊ་སཝཱཧཱ། ཇི་བཞིན་ལས་སྦྱོར་སྔགས་སྦྱར་ནས། །གཏོར་མའི་ལས་ལ་སོགས་པ་སྦྱར། །ཞི་རྒྱས་དབང་དང་དགུག་པ་དང ། །གསད་བསྐྲད་དབྱེ་བ་བཅིང་བ་ལ། །ཕྱི་རལ་གཏོར་མ་དེ་ཉིད་ཀྱིས།། གཏོར་མའི་ལས་ལ་སོགས་པས་སྒྲུབ། །དེ་ནས་མཆོད་པའི་ཁྱད་པར་ལས། །རུང་དང་མི་རུང་རྣམ་པར་སྤང ། །ལྕགས་ཀྱུ་ལ་སོགས་རྣམ་པ་ལྔ། །དེ་ཉིད་ལྔ་རུ་བྱ་བ་སྟེ། །ལྕགས་ཀྱུ་ཆེ་ལ་དགོད་པ་ནི། །ཡེ་ཤེས་ལྷར་ནེ་འདོད་པས་ཏེ། །རྡོ་རྗེ་ལྕགས་ཀྱུ་མི་བསྐྱོད་པ། །གནས་ཀྱི་ལྕགས་ཀྱུ་རིན་ཆེན་པ། །རྒྱལ་པོའི་ལྕགས་ཀྱུར་དོན་ཡོད་གྲུབ། །གཡོ་བའི་ལྕགས་ཀྱུར་འོད་དཔག་མེད། །ལྕགས་ཀྱུ་ལྔ་ལ་སོགས་པ་ལ། །དེ་ཉིད་ཐམས་ཅད་སྦྱར་བར་བྱ། །གང་ཞིག་འདོད་ལ་ལྷ་ཀུན་དང ། །རྣལ་འབྱོར་མ་ཀུན་ཚིམ་པར་བྱ། །འདོད་ལ་དགའ་བ་མ་ 93a ༄#། །ཡིན་ཞིང ། །ལོངས་སྤྱོད་ཕྱིར་ནི་བསྟེན་མི་བྱ། །རང་འདོད་ཐམས་ཅད་དེ་ཉིད་དེ། །མཆོད་པའི་ལས་ལ་སོགས་པ་བྱ། །དེ་ཡི་དབུགས་སུ་དཔའ་བོ་རྣམས། །ཱ་ལི་ཀཱ་ལི་སྦྱར་བར་བྱ། །ཱ་ལི་ཀཱ་ལིའི་རབ་སྦྱོར་གྱིས། །ལྷ་རྣམས་ཐམས་ཅད་ཚིམ་པར་བྱ། །དེ་ཡི་དབུས་སུ་བྱུང་བ་ཡི། །བདུད་རྩིའི་རོ་ཀུན་མྱང་བར་བྱ། །རྫས་རྣམས་ཀུན་གྱི་ལྷག་མ་དག་།ཕྱི་ཡི་དཀྱིལ་འཁོར་དུ་ནི་བརྟག་།ཧཱུཾ་ཞེས་བྱ་བའི་གླུ་ཡིས་ནི། །བཀྲ་ཤིས་སྒྲ་ཡིས་དགང་བར་བྱ། །ལུས་ཅན་དོན་ཕྱིར་ཤེས་རབ་གསོལ་བཏབ་པ། །ཀུན་འཁྱུད་ལ་སོགས་གཉིས་ཀྱིས་གཉིས་སྤྲོད་ཅིང ། །སྒྱུ་མ་ལྟ་བུར་སྦྱོར་བས་ཤིན་ཏུ་བརྒྱན། །སྲིད་པ་ལས་སྒྲོལ་ཁྱོད་ལ་ཕྱག་འཚལ་ལོ། །རང་འདོད་བཀྲ་ཤིས་སྒྲ་དང་ནི། ཧཱུཾ་ཧཱུཾ་བརྗོད་ཅིང་དྲིལ་བུ་གསིལ། །རྡོ་རྗེ་ཐལ་མོ་བཅིངས་ནས་ནི། །སྙིང་གའི་གནས་སུ་རབ་བཞག་ལ། །མ་ལུས་སེམས་ཅན་ཀུན་གྱི་ཕྱིར། །སྨོན་ལམ་དག་ནི་གདབ་པར་བྱ། །སེམས་ཅན་ཐམས་ཅད་ནད་མེད་ཅིང ། །སེམས་ཅན་ཐམས་ཅད་བདེ་གྱུར་ཅིག་།གང་གི་ལམ་ནས་འགྲོ་བ་ཡིས། །སངས་རྒྱས་ཉིད་དང་ཕྲད་པར་ཤོག་།མ་བརྒལ་བ་རྣམས་བསྒྲལ་བ་དང ། །མ་གྲོལ་བ་རྣམས་བདག་གིས་གྲོལ། །དེ་ལྟ་ཉིད་དུ་རྗེས་བརྩེ་བས། །རྣལ་འབྱོར་བསྟན་བཅོས་གནས་ལ་དགོད། །རྡོ་རྗེ་ཁུ་ཚུར་དམ་བཅིངས་ནས། །གཡོན་པའི་སྙིང་ 93b གར་བཞག་པར་བྱ། །གཡས་པ་ས་ལ་བརྐྱང་ནས་ནི། །དེ་ཡི་འོག་ཏུ་གཤེགས་སུ་གསོལ། །ོཾ་ཨཱཏྨ་ཏིཥྛ་ཧཱུཾ་སཝཱཧཱ། དེ་ནས་རང་གི་དབུགས་ཀྱིས་ནི། །བདག་གིས་ལུས་ལ་བསྟིམ་པར་བྱ། །སྐད་ཅིག་ཚུལ་གྱི་རྣལ་འབྱོར་གྱིས། །བདག་གིས་དངོས་པོ་མཆོད་པར་བྱ། །ོཾ་སརྦྦ་དུཥྚཾ་གྲྀཧྞཱ་གཙྪ་ཧཱུཾ་ཕཊ། སེ་གོ་ལ་གསུམ་ནི་གཏོགས་པ་ཡིས། །ཕྱི་རོལ་ལྷ་རྣམས་གཤེགས་སུ་གསོལ། ། གཞན་གྱི་གདན་གྱི་རབ་ཏུ་བྱེད་པ་ལས། རིམ་པར་ཕྱེ་བ་གསུམ་པའོ།། །།བདུད་རྩི་ལྔ་ཡི་ཁྱད་པར་དང ། །གང་གི་ལྕགས་ཀྱུ་ལྔ་པོ་བརླབས། །དངོས་དང་དངོས་མེད་རྣམ་པར་རྟོག། །གཉིས་མེད་གཉིས་སུ་མེད་པའི་ཆོས། །གཉིས་ཀྱི་རྟོག་པ་ཇི་ལྟར་སྤང ། །ཱ་ལི་ཀཱ་ལི་ཇི་ལྟར་ལགས། །རྣལ་འབྱོར་བསྟན་བཅོས་ཚུལ་རྣམས་ནི། །ཕྱི་རོལ་ཕྱག་རྒྱའི་སེམས་ནི་ཅི། ། བཅོམ་ལྡན་འདས་ལ་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། །དང་པོའི་རྡོ་རྗེ་བདུད་རྩིའི་ཆུ། །ལྔ་ཡི་བདག་ཉིད་རབ་ཏུ་འཇུག་།རེག་ན་དྲོ་བ་མེ་ཡིན་ཏེ། །དུ་བ་ལྟར་སྣང་རླུང་ཡིན་ནོ། །སླ་བའི་རང་བཞིན་ཆུ་ཞེས་བྱ། །གཟུགས་སུ་སྣང་བ་ས་ཡིན་ནོ། །ཡེ་ཤེས་བྱིན་བརླབས་རྡོ་རྗེའོ། །ལྷ་ལྔ་རུ་ནི་བསྒོམ་པར་བྱ། །མ་ལུས་ཆུ་ཡི་དབྱིབས་དང་ནི། ། ཟད་པར་བྱ་བ་མེ་ཉིད་དང ། །དེ་བཞིན་རྟག་ཏུ་རླུང་དང་ནི། །དད་པ་མཚུངས་དོན་ས་དབང་པོ། །ཡེ་ཤེས་ཀྱི་ནི་ཡི་གེ་ལྔ། །སྒྲ་དང་ཐིག་ལེར་སྦྱར་བར་བྱ།། དེ་ཡི་དབུས་སུ་ཟླ་བ་ཡི། ། 94a ༄#། །དབུས་སུ་བདུད་རྩིའི་ཡི་གེའོ། །ལྔ་པོ་རུ་བརྗོད་པར་བྱ། །དངོས་དང་དངོས་མེད་ལས་གྲོལ་བའི། །རྡོ་རྗེ་ནི་སྦྱངས་པ་ཡིས། །དེས་ནི་གཏི་མུག་བསྲིངས་པ་ཡིན། ། ཕྱི་རོལ་བདུད་རྩི་རྫས་བཟང་པོ། །མེ་ཡིས་བཙོས་ནས་སྦྱངས་པ་ལྟར། །ལྷ་ཚོགས་མེ་ཡིས་བཙོས་ནས་ནི།། ལྷག་མ་བཤང་དང་གཅི་བ་ཡིན། །མེ་ཡིས་བཙོས་ནས་སྦྱངས་མེ་ཡི། དབུས་སུ་སྦྱིན་སྲེག་རྟག་ཏུ་དབུལ། །རྡོ་རྗེ་ཆུ་ཡི་ས་བོན་ནི། །ས་བོན་བབས་པས་བཟླས་ནས་ཀྱང ། །དེ་ཡི་དབུས་སུ་ཉི་མ་ལ། །དུར་ཁྲོད་ཡི་གེ་བསམས་ནས་སྲེག་།དངོས་དང་དངོས་མེད་ལས་གྲོལ་བས། །དེ་ཕྱིར་རྨོངས་ལས་རིང་དུ་འགྱུར། །པདྨའི་དབང་ཕྱུག་གཟུགས་མཛེས་ཤིན་ཏུ་སྡུག་།དྲི་ཆུའི་ངོ་བོ་ཤིན་ཏུ་རྣམ་སྣང་མཛད། །མྱང་བ་རྡོ་རྗེ་དབང་ཕྱུག་ཕྱག་རྡོ་རྗེ། །ལྷ་གསུམ་རྣམ་གསུམ་དུ་ནི་ཤེས་པར་བྱ། །ཧ་ཞེས་པ་ཡིས་ཁ་དོག་དབྲོག་།ཧོ་ཞེས་པ་ཡིས་དྲི་གཞོམ་སྟེ། །ཧྲཱིཿ ཞེས་བྱ་བས་ནུས་པ་གཞོམ། །གོ་རིམ་དེ་ལྟར་མངོན་པར་བརྗོད།། བདུད་རྩི་ཆུ་ཞེས་བྱ་བ་སྟེ། །ལྷ་ནི་རྣམ་པ་གསུམ་དུ་གྲགས། །དངོས་དང་དངོས་མེད་ལས་གྲོལ་བས། །དེ་ཕྱིར་རྨོངས་པ་རིང་དུ་སྤོང ། །ཱ་ལི་བུང་བ་ཞེས་བརྗོད་དེ། །བུང་བ་རྡོ་རྗེ་འཇིགས་བྱེད་ཡིན། །ཱ་ལི་ནམ་མཁའི་མཐའ་གཏུགས་པའི། །ཆོས་ཀྱི་དབྱིངས་ནི་རང་བཞིན་ཏེ། །རྒྱུ་དང་མི་རྒྱུ་གསང་བློ་ཅན། །ལུས་ནི་མ་ལུས་བསྐྱེད་པའོ། །བཅུ་དང་བརྒྱད་ཀྱིས་རྩ་ 94b རྣམས་ནས། །དབང་པོ་ཀུན་གྱི་བདུད་རྩི་རྣམས། །དེ་ཡི་དབུས་ནས་དྲངས་ནས་སུ། །ཱ་ལིའི་དབུས་སུ་ཐིམ་པར་འགྱུར། །འཇིགས་བྱེད་རྡོ་རྗེ་སྒྲ་ཡིས་ཏེ། །སྦྱོར་བའི་རྫས་རྣམས་སྐྱེ་བ་ཡིན། ། རླུང་དང་མེ་ཡི་བདུན་དོན་ལ། །རྡོ་རྗེ་མ་ཡི་ས་བོན་སྦྱར། །སྒྲ་དང་ཐིག་ལེས་ཡང་དག་མནན། །མཆར་པའི་རྒྱུན་ཞེས་བྱ་བར་བརྗོད། །དབྱངས་ཡིག་དང་པོ་མཆོག་ས་བོན། །དེ་ཡི་དབུས་སུ་གཟུང་བར་བྱ། །དངོས་དང་དངོས་མེད་ལས་གྲོལ་བ། །དེ་ཕྱིར་རྨོངས་ལས་རིང་དུ་འགྱུར། །ཀཱ་ལི་མེ་ཏོག་ཀུན་ཏུ་མནན། །རྡོ་རྗེ་ཅན་གྱི་ལུས་མ་ཏོག་།འཁོར་བ་ཐམས་ཅད་བསྐྱེད་པ་སྟེ། །ས་དང་ཀུན་གྱི་མ་ཞེས་བྱ། །ཡེ་ཤེས་ཆུ་ཡི་རྒྱ་མཚོ་འདིར། །དེ་བཞིན་གཤེགས་རབ་ཆུ་སྲིན་ཉ། །གཉིས་མེད་འདམ་གྱི་དབུས་སུ་ནི། །ཐབས་ཀྱི་མྱུ་གུ་དེ་བཞིན་ཏེ། །བན་དུ་ཀ་ལྟར་ཁ་ཕྱེ་བའི། །སྦྲང་རྩི་བདུད་རྩི་ཡི་གེར་གནས། །ཀཱ་ལི་བདུད་རྩིའི་དེ་ཉིད་ནི། །མེ་ཏོག་ཆུ་ཡི་དེ་བཞིན་བསྐོར། །ཡི་གེ་གཉིས་འགྱུར་ཐིག་ལེ་དང ། །རྩ་བར་སྒྲ་ནི་ཡང་དག་སྦྱར། །ཡི་གེའི་ས་བོན་དེ་ཉིད་ནི། །ལྷ་རྣམས་ཀྱི་ནི་རིགས་ཀྱི་ཡུམ། །ཟླ་བའི་དབུས་སུ་བསམ་པར་བྱ། །བདུད་རྩིའི་ས་བོན་བསྒོམས་པ་ཡིས། །དངོས་དང་དངོས་མེད་ལས་གྲོལ་བ། །དེ་ཕྱིར་རྨོངས་པ་ཀུན་ཏུ་སྤོང ། །ཱ་ལི་བུང་བ་ཞེས་བྱར་\?\་བརྗོད། །ཀཱ་ལི་དེ་བཞིན་གཤེགས་མ་ཡིན། །ལུས་གཉིས་པོ་ལས་སྐྱེས་པ་དག་།བདུད་རྩི་ཡི་ནི་ཆོ་ག་མཆོག་།སྡེ་ཚན་གསུམ་པ་གང་ཡིན་པའི། །ཡི་གེ་གསུམ་པ་གཟུང་བྱ་བ། ། 95a ༄#། །དབྱུག་པ་ཕྱི་མོ་རྡོ་རྗེ་ཅན། །ལུ་གུ་རྒྱུད་ཀྱིས་དཀྲི་བར་བྱ། །བདུད་རྩི་ལྔ་ཡི་དེ་ཉིད་ཀྱིས། །ལུས་ཅན་བདག་ཉིད་བཀྲུ་བར་བྱ། །བདུད་རྩི་ལྔ་ཡི་ཁྱད་པར་དང ། །གང་གིས་ཤེས་འགྱུར་འཆི་མི་འགྱུར། །འགྲོ་བའི་སྒོ་ནི་མཐོང་འགྱུར་ཞིང ། །དག་པའི་ལུས་ནི་སྐྱོན་མེད་པར། །བདུད་རྩིའི་སྦྱོར་བ་ཀུན་ཤེས་པས། །རང་དགར་བདུད་རྩི་མྱང་བར་བྱ། ། བཟའ་བ་ལྔ་ཡི་བྱེ་བྲག་གི་།དེ་ཉིད་ཇི་བཞིན་རྡོ་རྗེར་ཉོན། །གང་ཞིག་ཤེས་ནས་ཟོས་པ་ཡིས། །མྱུར་དུ་འགྲོ་བ་མཐོང་བར་འགྱུར། །བློ་ཆེན་དང་ནི་ངག་དང་ནི། །རིགས་ལ་འགྲན་དང་རེག་འགྲོ་དང ། །ལྕགས་ཀྱུ་ཆེན་པོ་རྣལ་འབྱོར་པས། ཤེས་དང་འདྲ་བས་ལོངས་སྤྱད་བྱ། །རྣམ་ཤེས་ས་བོན་བཟླས་ནས་ནི། །དེ་ཡི་ས་བོན་གཟུང་བར་བྱ། །ཤེལ་གྱི་སེམས་ཀྱིས་ལོངས་སྤྱོད་ན། །རྣལ་འབྱོར་རྨོངས་པ་གཅོད་པར་འགྱུར། །དག་པའི་སེམས་ཀྱིས་བཟའ་བར་བྱ། །བགེགས་ཀྱི་ལྕགས་ཀྱུ་གཅིག་ཡིན་ཏེ། །དེ་ཡི་ཡན་ལག་ལ་སྦྱར་བ། །ཧཱུཾ་ཞེས་བྱ་བའི་ས་བོན་གྱིས། །ལྕགས་ཀྱུ་རུ་ནི་སྦྱར་བར་བྱ། །གནས་ཀྱི་བདག་པོའི་ལྕགས་ཀྱུ་ནི། །གྲི་ཞེས་བྱ་བའི་ས་བོན་ཉིད། །རབ་ཏུ་སྦྱར་ནས་བསམས་ནས་སུ། །རྣམ་པར་རྟོག་པ་རིང་དུ་སྤང ། །རྟ་ཡི་ལྕགས་ཀྱུའི་དབུས་གནས་པ། །ཐམས་ཅད་རིག་པས་དགོད་བྱ་བ། །རྣལ་འབྱོར་པ་ཡིས་ཛཾ་ཞེས་པ། །དག་པའི་ཤེལ་ལྟར་བསམས་པར་བྱ། །རྡོ་རྗེ་ལྕགས་ཀྱུ་ 95b བྱིན་བརླབས་པས། །རྡོ་རྗེའི་ལུས་སུ་བརྗོད་པ་སྟེ། །སྲི་ཞེས་བྱ་བ་བཀོད་དེ་བཟའ། །རྣལ་འབྱོར་པ་རྣམས་སྡིག་འབྱང་ངོ ། །བཅུ་བཞི་དང་ནི་བཅོ་ལྔ་དང ། །ཁྱད་པར་རུ་ནི་ཚེས་བརྒྱད་ལ། །དངོས་གྲུབ་འདོད་པའི་རྣལ་འབྱོར་པས། །རབ་ཏུ་འབད་དེ་གཏོར་མ་སྦྱིན། །སྒྲུབ་པོས་རྣལ་འབྱོར་བསྟན་བཅོས་ལ། །རྟག་ཏུ་མཆོད་པའི་ལས་བྱས་ན། །སྤྱོད་དང་གྲོལ་བ་གང་འདོད་དང ། །ལས་རྣམས་ཐམས་ཅད་འགྲུབ་པར་འགྱུར། །རྒྱལ་པོའི་ཕོ་བྲང་འགྲོན་ཡང ། །མྱུར་དུ་དཔལ་དང་ལྡན་པར་འགྱུར། །མཛའ་བོ་སྡུག་ཅིང་ཡིད་འོང་བར། །མཐོང་བ་ཙམ་གྱིས་འགྲུབ་པར་འགྱུར། །དབུལ་པོ་ནོར་གྱིས་ཕོངས་པ་ཡང ། །ཁྱིམ་ནི་འབྱོར་ཞིང་རྒྱས་པར་འགྱུར། །འཆི་བའི་ཚེ་ན་རྣལ་འབྱོར་པ། །བདེ་བ་ཅན་དུ་སྐྱེ་བར་འགྱུར། །དྲི་ཞིམ་དང་ནི་སྦྱར་བ་ཡི། །རྫས་བཅུ་པོ་དག་ལྡན་པ་ལ། །ཡི་གེ་བཅུ་ཡི་སྔགས་དག་ནི། །ཕྱག་འཚལ་སྲེག་པའི་མཐའ་དང་ལྡན། །རྣལ་འབྱོར་པ་ཡིས་འབུམ་བཟླས་ཏེ། །མཁའ་འགྲོ་གཏོར་མའི་བྱིན་རླབས་ལ། །སྒྲུབ་པོས་འདི་ཡི་དུ་བས་བདུག་།འགྲོ་བ་ཐམས་ཅད་རྨོངས་པར་འགྱུར། །གུར་གུམ་དང་ནི་སྦྱར་བ་ཡི། །རྫས་བཅུད་ཕན་ཚུན་ལྡན་པ་ཡི། །རྣལ་འབྱོར་པ་ཡིས་ཐིག་ལེ་བྱ། །སྐྱེས་བུ་འགྲོ་ལ་སྐལ་བཟང་འགྱུར། །ཙནྡན་དང་ནི་སྦྱར་བ་ཡི། །རྫས་དབང་དག་ནི་ལྡན་པ་ཡི། །ཡན་ལག་དག་ནི་བྱུགས་ནས་སུ། །རེག་ན་ཤི་ཡང་མི་གཏོང་ངོ ། །དབང་པོ་ལག་དང་སྦྱར་བ་ཡི། །རྫས་བཅུ་དག་དང་ལྡན་པ་རུ། །བཟའ་དང་བཏུང་བར་སྦྱིན་ 96a ༄#། །བྱས་ན། །དབང་མེད་དབང་དུ་འདུ་བར་འགྱུར། །སྔགས་ནི་ལན་འབུམ་བཟླས་ནས་ཀྱང ། །མཁའ་འགྲོའི་གཏོར་མ་བྱིན་རླབས་ནས། །དེ་དག་ལས་སུ་སྦྱར་བར་བྱ། །ངས་བསྟན་པ་ལ་ཐེ་ཚོམ་མེད། །གཉིས་མེད་དེད་དཔོན་གནས་སུ་ནི། །ཐིག་ལེ་བྱས་ན་གོ་ཆར་འགྱུར། །དེ་ཉིད་ཐེག་པའི་སྙིང་པོ་འདིར། །འཁོར་བ་ལས་ནི་རྒྱལ་བར་འགྱུར། ། བདུད་རྩི་འོད་དང་སྐལ་བཟང་མ། །སེམས་ཅན་རྣམས་ལ་སྡུག་པར་ལྟ། །བདེ་སྡུག་དག་ནི་འཕྲོག་བྱེད་མ། །དེ་བཞིན་སྒེག་པའི་ཉམས་ཀྱིས་མཛེས། །ཐུན་མོང་ང་རྒྱལ་བདག་འཛིན་མ།། མི་བརྩོན་མ་དང་བརྩོན་སེམས་ཅན། །སྐལ་བཟང་ལྷ་ཀུན་རྨོངས་བྱེད་མ། །ཀུན་ནས་འཇོམས་པ་ཉིད་དང་ནི། །བློ་ངན་སྲིད་པའི་ངོ་བོ་འཇོམས། །ལྷ་མོ་བྱམས་མ་ཉིད་དང་ནི། །ཡིད་འོང་བདུད་རྩི་ལྡན་གྲགས་མ། །ཡོན་ཏན་ལྡན་པའི་ལྷ་མོ་ཉིད། །ལྷ་མོ་འདི་དག་ལས་ཀྱིས་ནི། །སྤྱོད་དང་གྲོལ་བའི་འདོད་པ་སྩོལ། །དེ་ལྟར་ཡོན་ཏན་ལྡན་ལྷ་མོ། །མཁས་པ་ཡིས་ནི་མཆོད་པར་བྱ། །ཕོ་ཉའི་ལས་ཀྱི་བྱ་བ་ཡིས། །གྲུབ་པའི་རྣལ་འབྱོར་དོན་གྱི་ཕྱིར། །རྣལ་འབྱོར་མ་བཞིའི་སྒྲུབ་ཐབས་ནི། །བཅོམ་ལྡན་འདས་ལས་ཉན་པར་འཚལ། །ཕོ་ཉའི་ལས་སུ་སྦྱར་བ་ཡི། །དེ་ཉིད་ཇི་བཞིན་རྡོ་རྗེས་ཉོན། །ལས་རྣམས་ཀུན་གྱི་སྙིང་པོ་བས། །རབ་ཏུ་འབད་དེ་ཕོ་ཉ་སྒྲུབ། །ཤིང་གཅིག་གི་ནི་དྲུང་དག་ཏུ། །ཆོ་ག་བཞིན་དུ་འབུམ་དུ་བཟླས། ། 96b ཁྲུ་གང་བཞི་ཆར་བཅས་པ་ཡི། །ཐང་ཀ་ལ་ནི་བྲི་བྱ་སྟེ། །མཐེབ་སོར་བཅུ་གཉིས་ཚད་དུ་ནི། །ཁ་དོག་སེར་པོ་ཤིན་ཏུ་མཛེས། །ཕྱག་གཉིས་མགོ་བོར་ཐལ་སྦྱར་བའི། །འོད་ཟེར་མེ་འབར་ལྷ་མོ་བྲི། །སྒྲུབ་པའི་མདུན་དུ་བཀྲམ་ནས་སུ། །འབད་དེ་མཆོད་པའི་ཆོ་ག་བརྩམ། །དྲི་དང་མེ་ཏོག་དམར་པོ་དང ། །ཤ་སྐམ་གྱིས་ནི་བདུག་པར་བྱ། །ཤ་དང་ཉ་ཤ་བཙོང་ལ་སོགས། །ཉེ་བར་སྤྱད་པའི་གཏོར་མ་སྦྱིན། །རྫས་ལྔ་དག་ནི་དངོས་པོ་ལྔ། །མཆོད་ནས་དེ་བཞིན་འབུམ་དུ་བཟླས། །དང་པོ་ལ་ནི་སྒྲ་འབྱུང་སྟེ། །གཉིས་པ་ལ་ནི་ཉ་དྲི་མ་ནམ། །གསུམ་པར་ཤིང་ནི་འགུལ་འགྱུར་ཏེ། །བཞི་པ་ལ་ནི་མདུན་དུ་གནས། །དེ་ཡི་སྔགས་ནི་བརྗོད་ནས་ཀྱང ། །དམ་ཚིག་ཕྱག་རྒྱ་བསྟན་པར་བྱ། །ོཾ་དཱི་པེ་ཤཝ་རི་ཧཱུཾ་ཕུཿ ་ལག་གཉིས་ཐལ་མོ་སྦྱར་ནས་སུ། །སྤྱི་བོར་བཞག་སྟེ་བརྗོད་པར་བྱ། །དམ་ཚིག་གི་སྔགས་དང་ཕྱག་རྒྱའོ། །བདུད་རྩི་ལྔ་ཡིས་བཀང་བ་ཡི། །དམ་ཚིག་ཆུ་ནི་སྦྱིན་པར་བྱ། །འབད་དེ་དམ་ཚིག་བྱིན་ནས་ནི། །ལག་པ་གཡོན་པས་བཟུང་ནས་སུ། །རྣལ་འབྱོར་མ་དང་གཉིས་མེད་པར། །བྱིན་གྱིས་རློབས་ལ་བདག་སྒྲུབས་ཤིག་།དེ་ནས་རང་གི་གཟུགས་བཟུང་ནས། །བཟའ་དང་བཏུང་སོགས་སྟོན་མོ་དང ། །གསེར་ལ་སོགས་པ་ཅི་ཡང་རུང ། །བཀའ་བཞིན་མྱུར་དུ་སྟེར་བར་འགྱུར། །ཐུན་ཕྱེད་དུ་ནི་ལྷན་ཅིག་སྤྱད། །འཁྲིག་ལ་སྲེད་པའི་རྣལ་འབྱོར་ལ། །གལ་ཏེ་གྲུབ་པར་མ་ 97a ༄#། །གྱུར་ན། །དེ་ཚེ་དྲག་མོའི་ས་བོན་བཟླ། །ས་བོན་གཉིས་ནི་གཟིར་ཙམ་གྱིས། །འབར་བྱེད་མ་ཡི་སྤྱི་བོ་འགེམས། །སེམས་ཅན་དོན་འབད་སྒྲུབ་པ་པོས། །འབར་བ་ཆུང་མར་བསྒྲུབ་པར་བྱ། །གྲུབ་པའི་མཁའ་འགྲོ་མ་གཞན་གྱི། །དེ་ཉིད་ཇི་བཞིན་རྡོ་རྗེས་ཉོན། །ཐང་ག་ཁྲུ་གཉིས་དམན་པ་ལ། །མཆོད་དང་གཏོར་མ་བྱིན་བརླབས་ཏེ། །དེ་འོག་གཟུགས་ནི་བྲི་བར་བྱ། །དཀར་ཞིང་དམར་ལ་ཤིན་ཏུ་མཛེས། །ཕྱག་གཉིས་རོལ་པའི་སྟབས་ཀྱིས་བཞུགས། །ཤིན་ཏུ་མཛེས་པའི་ན་བཟའ་གསོལ། །ཕྱག་ན་སྡིགས་མཛུབ་ལྕགས་ཀྱུ་བསྣམས། །སྐྲ་གྲོལ་བས་ནི་རྣམ་པར་བརྒྱན། །འོད་ཟེར་མེ་ལྟར་འབར་ཞིང་གསལ། །མིག་གཡོན་ཧ་ཧར་བཞད་པ་དྲི། །དུར་ཁྲོད་ཀྱི་ནི་ས་ཕྱོགས་སུ། །སྒྲུབ་པ་པོ་ཡིས་བྲིས་སྐུ་དགྲམ། །ཀུན་ཏུ་ཁྲག་གིས་བྱུགས་ནས་ནི། །མེ་ཏོག་དམར་ལ་སོགས་པས་མཆོད། །མེ་ཏོག་དྲི་དང་བདུག་པ་དང ། །ཤ་དང་ཉ་ཤ་བཙོང་ལ་སོགས། །བདུད་རྩི་ལྔ་ཡིས་བཀང་བ་ཡི། །ཉེ་བར་སྤྱོད་པའི་གཏོར་སྦྱིན་ཅིང ། །རྣལ་འབྱོར་སྒོམ་པས་བཟླས་ནས་ནི། །འབུམ་གྱིས་དངོས་གྲུབ་སྐྱེ་བར་འགྱུར། །ལག་གཉིས་ཐལ་མོ་བཅིངས་ནས་སུ། །ཁ་རུ་བཅུག་སྟེ་བགད་པར་བྱ། །ོཾ་ཌཱ་ཀི་ནཱི་ཧཱུཾ་ཕྲུཾ་ཕུཿ ་སྒྲུབ་པའི་སྔགས་དང་ཕྱག་རྒྱའོ། །དང་པོ་ས་ནི་གཡོ་འགྱུར་ཏེ། །གཉིས་པ་མདུན་དུ་གད་རྒྱངས་སྒྲོགས། །གསུམ་པ་མདུན་དུ་སྣང་གྱུར་ 97b ནས། །བཞི་པ་ལ་ནི་བཀའ་ལུང་ནོད། །བདུད་རྩི་ལྔ་ཡི་ཁྱད་པར་གྱི། །དམ་ཚིག་འབད་དེ་བྱིན་ནས་ནི། །གཡོག་མོ་རུ་ནི་སྒྲུབ་པ་ཡིས། །ཅི་འདོད་བཀའ་ནི་བསྒོ་བར་བྱ། །དགྲ་རྣམས་བསད་ཅིང་གཙེ་བ་དང ། །ཡན་ལག་གཟིར་བ་གང་འདོད་པའི། །ལས་ལ་སོགས་པ་ཐམས་ཅད་ནི། །གཡོག་མོའི་ལས་ཀྱིས་བསྒྲུབ་པར་བྱ། །གལ་ཏེ་འབུམ་གྱིས་གདོན་ཟ་ན། །རྡོ་རྗེ་མ་ཡི་ས་བོན་གྱིས། །སྔོན་དུ་བསྟན་པའི་ཆོ་ག་བཞིན། །མཁས་པས་གཟིར་བར་བྱས་ཏེ་བཟླ། །ར་དག་གི་ནི་པགས་པ་ལ། །འབད་དེ་ཐང་ཀ་བརྐྱང་བར་བྱ། །འཇིབ་བྱེད་མ་དེ་བྲི་རུ་གཞུག ། ཁ་དོག་དམར་པོ་ཤིན་ཏུ་མཛེས། །ལུས་ལ་རྒྱན་གྱིས་བརྒྱན་པ་དང ། །མཛེས་པའི་གོས་ནི་གྱོན་པ་བྲི། །གཡོན་པ་སྡིགས་མཛུབ་ཞགས་པ་དང ། །གཡས་སུ་དགྲ་སྟ་དགོད་པར་བྱ། ། ལམ་གྱི་བཞི་མདོ་ཡིད་འོང་བར། །མཁས་པ་ཡིས་ནི་བསྒྲུབ་བྱ་སྟེ། །ལྕི་བ་ཡིས་ནི་བྱུགས་བྱས་ལ། །མེ་ཏོག་སྣ་ཚོགས་དགྲམ་པར་བྱ། །མེ་ཏོག་བདུག་པ་མར་མེ་སོགས། །འབྱུང་པོ་ཀུན་གྱི་གཏོར་མ་སྦྱིན། །ཁྲག་དང་ཉ་དང་ཤ་དང་བཙོང ། །བཟའ་བ་དག་དང་སྣ་ཚོགས་དང ། །བདུད་རྩི་ལྔ་ཡིས་དགང་བ་སྦྱིན། །འབད་དེ་གནས་པས་འབུམ་གཅིག་བཟླ། ། ོཾ་ཙུ་ཥཱི་ཎི་ཨཱ་ཀཪྵ་ཡ་ཕུཿ ་ཕཊ། ལག་གཉིས་མཉམ་པར་བྱས་ནས་ནི། །སྙིམ་པའི་ཚུལ་གྱིས་གར་བསྐྱོད་བྱ། །སྙིང་པོའི་སྔགས་དང་ཕྱག་རྒྱའོ། །རྣལ་འབྱོར་པ་ཡིས་འབུམ་བཟླས་ 98a ༄#། །པས། །འཇིགས་བྱེད་མ་ནི་འགྲུབ་འགྱུར་ཏེ། །དང་པོ་ཁྱི་ནི་ངུར་བའི་སྒྲ། །གཉིས་པ་ལ་ནི་གསལ་བར་དགོད། །གསུམ་པ་ལ་ནི་མཚོན་ཐོགས་ནས། །བསྡིགས་པའི་ཕྱིར་ནི་འོང་བར་བྱེད། །བཞི་པར་མདུན་དུ་གནས་ནས་ནི། །བདག་གིས་ཅི་བགྱི་བཀའ་སྩོལ་སྨྲ། །བདུད་རྩི་ལྔ་ཡི་ཁྱད་པར་གྱིས། །དམ་ཚིག་དག་ནི་བྱིན་ནས་སུ། །སེམས་ཅན་རྣམས་ལ་ཕན་པའི་ཕྱིར། །དབུལ་པོ་བདག་གིས་ཁྱོད་བསྒྲུབས་སོ། །དེ་ནས་ཉི་མ་རེ་རེ་ཞིང ། །གསེར་སྲང་ཕྱེད་ཕྱེད་སྟེར་བར་འགྱུར། །གལ་ཏེ་འབུམ་གྱིས་མ་གྲུབ་ན། །རོ་ལངས་སྙིང་པོ་གཟིར་ཏེ་བཟླ། །ས་བོན་འདི་ཡིས་གཟིར་ཙམ་གྱིས། །འཇིབ་བྱེད་མ་ཡི་མགོ་འགེམས་སོ། །ཆུ་འགྲམ་གྱི་ནི་ས་ཕྱོགས་སུ། །ཀམ་པོ་ཙི་ནི་བསྒྲུབ་པར་བྱ། །བ་ལང་ལ་སོགས་ཀོ་བ་ནི། །བརྐྱང་སྟེ་འཕྲོག་བྱེད་འདྲི་རུ་གཞུག་།ལུས་ནི་སྤྲུལ་གྱིས་བརྒྱན་པ་སྟེ། །ཁ་དོག་སྔོན་པོ་འབར་བའི་འོད། །སྐྲ་གྲོལ་བས་ནི་རྣམ་པར་བརྒྱན། །གོས་དམར་བགོས་ཤིང་ཕྱག་གཉིས་མཛེས། །རལ་གྲི་དང་ནི་ཞགས་པ་ཐོགས། །ཧ་ཧར་བཞད་ཅིང་རྣམ་གཙིགས་པ། །ཁྲག་གིས་མཎྜལ་བྱུགས་ནས་ནི། །དྲི་དང་མེ་ཏོག་བདུག་པས་བདུག། །རྒྱས་པའི་གཏོར་མ་སྦྱིན་པར་བྱ། །ཤ་དང་ཉ་དང་བཙོང་ལ་སོགས། །ཉེ་བར་སྤྱོད་པའི་གཏོར་མ་སྦྱིན། །བདུད་རྩི་ལྔ་དང་ལྡན་པ་ཡི། །སྔོན་བཞིན་ལྷ་ཡི་གཏོར་མ་སྦྱིན།། 98b རྣལ་འབྱོར་པ་ནི་བསྒོམ་ཞིང་བཟླས། །འབུམ་གཅིག་གིས་ནི་འགྲུབ་འགྱུར་ཏེ། །དང་པོ་ཆུ་ནི་གཡོ་བར་འགྱུར། །གཉིས་པ་ལ་ནི་ཆར་ཆེན་འབེབས། །མདུན་དུ་རྡོ་རྗེའི་སྒྲ་འབྱིན་ཅིང ། ། གསུམ་པར་ཐོག་ནི་འབབ་འགྱུར་ཏེ། །བཞི་པ་ལ་ནི་མདུན་དུ་གནས། །བདུད་རྩི་ལྔ་ཡི་ཁྱད་པར་གྱིས། །དམ་ཚིག་དེ་ནས་འབད་དེ་སྦྱིན། །ོཾ་ཀྵཱཾ་ཀྲུཾ་ཕྲཾ་ཕུཿ ་ཕཊ། ལག་གཉིས་ཁུ་ཚུར་བཅིངས་ནས་སུ། །དེ་ཡི་སྔགས་ནི་བརྗོད་པར་བྱ། །སྙིང་པོ་སྔགས་དང་ཕྱག་རྒྱ་འོ། །མདུན་ན་ཐལ་མོ་སྦྱར་ནས་ནི། །ཅི་ཞིག་བགྱི་ཞེས་བརྗོད་པར་འགྱུར། །ཏི་སེ་གངས་ཀྱི་རྩེ་རུ་ནི། །རྩེ་ཕྱིར་ཁྱོད་ཀྱིས་ང་ཁྲིད་ལ། །སླར་ཡང་འདིར་ནི་འོང་བ་དང ། །རྒྱལ་པོའི་བུ་མོ་འམ་གཞན་ཡང་རུང ། །ང་འདོད་པ་དེ་ཁྲིད་དེ་ཤོག་།གསེར་དང་དངུལ་དང་ཟངས་ལ་སོགས། །བཟའ་དང་བཏུང་དང་བགོ་བ་ནི། །ཇི་ལྟར་འདོད་བཞིན་ཁྱེར་ཏེ་འོང ། །ལྷ་མིའི་ཆུང་མ་གང་ཡང་རུང ། །ཏི་སེ་གངས་ཀྱི་རྩེ་རུ་ནི། །ཇི་ལྟར་འདོད་བཞིན་ཁྲིད་པར་བྱེད། །བསྟན་པའི་ལས་ཀྱིས་མ་གྲུབ་ན། །ལས་གཞན་གྱི་ནི་བསྒྲུབ་པར་བྱ། །བདག་ཉིད་ཡེ་ཤེས་མཁའ་འགྲོ་མ། །མཁས་པ་ཡིས་ནི་བསྒོམས་ནས་སུ། །དེ་ཡི་རྐང་པ་གཡོན་པ་ཡིས། །མནན་ཏེ་ལྔ་བརྒྱ་བཟླས་ནས་ནི། །གདོན་མི་ཟ་བར་འགྲུབ་པར་འགྱུར། །གལ་ཏེ་དེས་ཀྱང་མ་གྲུབ་ན། །དཔའ་བོའི་དབུས་སུ་བཀུག་ནས་ནི། །དུམ་བུ་དུམ་བུར་གཏུབ་པར་བྱ། །ཀྲིཾ་ 99a ༄#། །ཞེས་བྱ་དང་གསོད་པ་མཐའ། །ཧཱུཾ་གི་ས་བོན་བསྒོམས་པ་ཡིས། །ཐམས་ཅད་དུ་ནི་བཟའ་བར་བསམ། །དེས་ནི་བསྒྲུབ་བྱའི་རྣལ་འབྱོར་མ། །ཐམས་ཅད་ཀྱི་ནི་དབང་ཕྱུག་མའང ། །གལ་ཏེ་མ་འགྲུབ་འཆི་བར་འགྱུར། །བསྟན་པའི་ལས་ཀྱིས་མ་གྲུབ་ན། །བྷ་ལ་ཏ་ཀ་ནག་པོའི་ཤིང ། །མེ་འབར་བ་ཡི་དབུས་སུ་ནི། །ཁྲག་དང་བཅས་པའི་ཡུངས་ཀར་ནི། །ཉི་མ་ཕྱེད་ན་ཧཱུཾ་ཞེས་ནི། །བརྗོད་ཅིང་བརྒྱ་རྩ་བརྒྱད་བསྲེགས་ན། །མཁའ་འགྲོ་མ་རྣམས་འཆི་འགྱུར་བའམ། །ཆོ་ངེས་འདེབས་ཤིང་འོངས་ནས་སུ། །ངེས་པར་ལས་རྣམས་སྒྲུབ་བྱེད་པར། །ངས་བསྟན་པ་ལ་ཐེ་ཚོམ་མེད། །ཁྲོ་བོ་སྔོན་པོ་མཛེས་པ་སྟེ། །ཁྱོད་ནི་དམ་ཚིག་ཡིད་དུ་འོང ། །ནོར་བུ་རིན་ཆེན་ཆེས་བཅིངས་པའི། །དབྱུག་པ་ཕྱག་ན་བསྣམས་པ་སྟེ། །བདག་ནི་འཁོར་བ་ལས་བསྒྲལ་ཕྱིར། །དཔའ་བོས་གནང་གི་གཏང་དུ་གསོལ། །རྣལ་འབྱོར་མ་ཡི་ཚོགས་དབུས་སུ། །བཟང་པོ་སྒོ་འདི་ཕྱེ་སྟེ་ཐོངས། །རྣལ་འཕྱོར་རྣལ་འབྱོར་མ་གསང་ཆེ། །གསང་དང་གསང་བས་ཤེས་བྱ་བ། །ངག་གི་ཕྱག་རྒྱའི་མཚན་ཉིད་ནི། །བཅོམ་ལྡན་འདས་ལ་ཉན་པར་འཚལ། །ངག་གི་ཕྱག་རྒྱའི་མཚན་ཉིད་ནི། །དེ་ཉིད་ཇི་བཞིན་རྡོ་རྗེས་ཉོན། །གཡས་ཀྱི་ཆ་རུ་རྣལ་འབྱོར་པ། །གཡོན་དུ་རྣལ་འབྱོར་མ་ཉིད་དེ། །སོར་མོ་ཁར་ནི་འཇུག་བྱེད་པ། །མཁའ་འགྲོ་མ་ཡི་མཚན་ 99b མའོ། །ཐལ་མོ་སྤྱི་བོར་འཇོག་བྱེད་པ། །གྷོ་གྷུ། འབར་བྱེད་མ་ཡི་མཚན་མ་ཡི། །གུ་གྷུ། མཐེ་བོ་འཚིར་བར་བྱེད་པ་ཡི། །འཇིབ་བྱེད་མ་ཡི་མཚན་མའོ། །མུ་གྷུ། ལག་པ་རྣ་བར་བརྡེབས་པ་ནི། །བློ་ལྡན་འཕྲོག་བྱེད་རྟགས་ཡིན་ནོ། །ལུ་གྷུ། སྣ་རྩེར་སྐྱོར་མོ་བརྡབས་པ་ནི། །ཐུགས་བདེ་མི་བདེ་འདྲི་བ་ཡིན། །ཌ་ཥྚ། ཤ་བའི་མགོ་ལྟར་སྟོད་བྱེད་པ། །རྣལ་འབྱོར་བྱེད་པའི་མཚན་མའོ། །གནྡྷོ་དེ། གང་ཞིག་སྨིན་མ་དབུས་རེག་པ། །ང་ཡི་སྙིང་སྡུག་གྲོགས་པོའོ། ། ལི་ནི་ད་ཧ། སོ་ཡིས་ལྕེ་ནི་འཚིར་བྱེད་པ། །ལུས་ནང་གཏོར་མ་བཟའ་ཞེས་པའོ། །བྷ་ཀྵ་སོ། །ལག་པ་སྐྲ་ལ་འཇུ་བྱེད་པ། །ཁྱོད་ཀྱི་ཁྱིམ་དུ་ངས་ཕྱིན་པའོ། །དྭེ་ར་ཏི། ལག་པ་སྙིང་གར་རེག་བྱེད་ན། །ད་ནི་ང་ཡི་ཡིད་འོང་བའོ། །རུ་ཙ་ཊ་པ་ཏ། སྣ་རྩེར་ཁུ་ཚུར་འཆང་བ་ནི། །མེད་དོ་ཞེས་ནི་སྟོན་པའོ། །ཤཱུ་ནྱ་ཏཱ། ལག་པ་བརྐྱང་སྟེ་ལྟོར་རྡེབས་ན། །ཕུན་སུམ་ལྡན་པར་ཡོང་ཞེས་པའོ། །བི་པ་དྷ་ཀ་སི་ཌ། ལྟེ་བ་རུ་ནི་ཉེད་བྱེད་ན། །ཁ་ཟས་བཟའ་བར་འདོད་པའོ། །ཙཎྜ་ལི་ཀ། མཛུབ་མོ་མདུན་དུ་སྟོན་བྱེད་ན། །ཉེ་གནག་གཏུམ་ལ་དྲག་པ་ཡིན། །ནཱི་ལ་དཎྜ་པ་ཏ། སྨིན་མ་ལ་ནི་རེག་བྱེད་ན། །འདིར་འདོད་པ་ནི་ང་ལ་སྟོན། ། ནམ་གཱ་ཡུདྡྷ། ལྕེ་ནི་འདྲིལ་བར་བྱེད་པ་དག་།ད་ལྟར་འཆི་ཞེས་བྱ་བའོ། །དུར་ཀ་ཏི། ཀུན་ཏུ་ལྟ་བར་བྱེད་པ་ནི། །ཚེས་གྲངས་ཤེས་པར་ 100a ༄#། །འདོད་པའོ། །ཏཱ་ར་ག་ཎཿ ་ཚེས་གཅིག་ནས་ནི་བརྩམས་ནས་སུ། །མཐེ་བོས་རི་མོ་བྲི་བར་བྱ། །ཉི་ཚོད་ཡི་གེ་ལ་སོགས་པ། །སྔར་བསྟན་བཞིན་དུ་མདུན་དུ་རེག་།གི་རི་ཏོ། །སྟེང་དུ་ལྟ་བར་བྱེད་པ་ནི། །ཉིན་ཕྱེད་དགའ་བར་རོལ་པའོ། །ས་མ་ཙྪ་ཡཱ། འཛུམ་དང་བཅས་པས་ལྟ་བྱེད་ཅིང ། །ལག་པ་ལག་པས་བཟུང་ནས་སུ། །རྒྱ་མཚོ་ལྟ་བུར་སྟོན་བྱེད་པ། །ནོར་བཟང་བྱིན་ཞེས་བྱ་བའོ། །ཛྲཱི་ཎྞ་བ་ཏ། ལག་གཉིས་ཁུ་ཚུར་འཆང་བྱེད་ན། །སལྱ་པ་ཏ། མཐེ་བོང་གི་ནི་སྲིན་ལག་ལ། །རེག་པ་འཆི་བར་མི་འགྱུར་རོ། །སོ་མ། མཐེ་བོང་ཁྲོ་བོ་བཟའ་ལ་སོགས། །སུརྱ་བད། རྣལ་འབྱོར་ཕ་དང ། རྣལ་འབྱོར་མ་རྣམས་ཀྱི་དགའ་བ་ལ་རོལ་པའི་ངག་གི་ཕྱག་རྒྱ་དང ། བརྡའི་མཚན་ཉིད་དོ། །གཞན་གྱི་གང་ན་ཞེས་བྱ་བའི་རབ་ཏུ་བྱེད་པ་བཞི་པའོ།། །།མཚོན་བྱའི་མཚན་ཉིད་གཞན་དག་ནི། །བཅོམ་ལྡན་འདས་ལ་ཉན་པར་འཚལ། །དེ་ཉིད་བཞི་པོ་ཇི་ལྟ་བུ། །ཤེས་ནས་ཇི་ལྟར་སྦྱར་བར་བགྱི། །འཁོར་བ་ལས་སྒྲོལ་མཚན་ཉིད་ནི། །ཡང་དག་ཇི་བཞིན་རྡོ་རྗེས་ཉོན། །དང་པོ་དེ་ཉིད་རྡོ་རྗེ་ནི། །དྲིལ་བུ་ཡང་ནི་གཉིས་པའོ། །བགྲང་བའི་ཕྲེང་བ་གསུམ་པ་སྟེ། །ཡེ་ཤེས་མཚན་ཉིད་བཞི་པའོ། །དེ་ཉིད་བཞི་ཡི་རྦ་རླབས་གྱིས། །ཇི་ལྟར་འདོད་བཞིན་ཕ་རོལ་སྒྲོལ། །དབུས་ཀྱི་ལྷ་ནི་རྣམ་སྣང་མཛད། །ཐམས་ཅད་ཐོག་མར་མི་བསྐྱོད་པ། །ལྷོ་ཡི་རྩེ་མོར་རིན་ཆེན་འབྱུང ། །ནུབ་ཏུ་སྣང་བ་ 100b མཐའ་ཡས་དགོད། །བྱང་གི་ཕྱོགས་སུ་དོན་ཡོད་གྲུབ། །རྩེ་མོ་ལྔ་ནི་ལྷ་རྣམས་སོ། །པདྨ་བྱང་ཆུབ་ཡན་ལག་བརྒྱད། །ཇི་བཞིན་ས་རུ་གཞག་པར་བྱ། །ཕྱག་ན་པདྨ་བྱམས་པ་དང ། །ནམ་མཁའ་དང་ནི་ཀུན་ཏུ་བཟང ། །གནོད་སྦྱིན་བདག་དང་གཞན་གྱི་དཔལ། །སྒྲིབ་པ་རྣམ་པར་སེལ་བ་དང ། །ལྷ་ནི་བརྒྱད་པོ་འདི་དག་ཉིད། །ཤར་ལ་སོགས་པར་ཇི་བཞིན་བསམ། །དབུས་ཀྱི་བཅུ་གསུམ་སྒོང་རུ། །ཡེ་ཤེས་ལྔ་ནི་ཐིམ་པར་བྱ། །པདྨ་བརྒྱད་ལ་ལྷ་མོ་བརྒྱད། །ཇི་བཞིན་གནས་སུ་སྦྱར་བར་བྱ། །རྡོ་རྗེ་ལྕགས་ཀྱུ་དེ་བཞིན་དུ། །ཞགས་པ་ལྕགས་སྒྲོག་སྒྲོལ་མ་སྟེ། །དེ་ལྟར་ལྷ་མོ་བཞི་པོ་དག་།དེ་བཞིན་ཕྱོགས་བཞིར་རོལ་པ་ཡིན། །མཚམས་ཀྱི་ཆ་ནི་རྣམ་པ་བཞིར། །མཁས་པ་ཡིས་ནི་བསམ་བྱ་བ། །སྐུལ་བྱེད་རིན་ཆེན་སྒྲོལ་མ་དང ། །རྡོ་རྗེ་ལྕགས་སྒྲོག་མིང་ཅན་དེ། །གཞན་གྱིས་མི་ཐུབ་ཞེས་བྱ་སྟེ། །མཚམས་ཀྱི་འདབ་མ་ཀུན་ལ་དགོད། །རྩེ་མོ་ལྔ་ནི་མཁའ་འགྲོ་མ། །སྔ་མ་ཇི་བཞིན་བསམ་པར་བྱ། །ཤར་དུ་རྡོ་རྗེ་མཁའ་འགྲོ་མ། །བྱང་དུ་དྲག་མོ་ཞེས་བྱ་སྟེ། །ནུབ་ཏུ་དེ་བཞིན་རོ་ལང་སྨ། །ལྷོ་ཡི་ཕྱོགས་སུ་གཏུམ་མོ་གནས། །དབུས་སུ་ཡེ་ཤེས་མཁའ་འགྲོ་མ། །རྡོ་རྗེ་དེ་ཁོ་ན་ཡི་ལྷ། །མཁས་པ་ཡིས་ནི་ཤེས་པར་བྱ། །ཆ་གསུམ་གསལ་བར་བཟུང་བ་ལ། །སྐ་རགས་ཀྱིས་ནི་ཤིན་ཏུ་བརྒྱན། །ུཏྤལ་ཀུ་མུ་ད་ལྟར་མཛེས། །རིན་ཆེན་པདྨ་ཡང་དག་གནས། །ཕྱོགས་ལ་སོགས་པ་བརྒྱད་དང་ནི། །དབུ་མའི་སངས་རྒྱས་ཉིད་དང་དགུ། །རྩེ་ 101a ༄#། །མོ་དགུ་ཡི་ལྷ་ཉིད་དེ། །ལྷ་དགུ་ཡིས་ནི་བྱིན་གྱིས་བརླབས། །ཆུ་སྲིན་ལས་ནི་བྱུང་བ་ཡི། །རྩེ་མོ་འོད་ཟེར་ཟླ་བར་གནས། །རྩེ་མོ་དགུ་པ་ཞེས་བྱ་བ། །ཡེ་ཤེས་རྡོ་རྗེ་འགྲོ་བ་སྒྲོལ། །རྡོ་རྗེའི་དེ་ཉིད་གང་ཡིན་པས། །བདག་ཉིད་རྡོ་རྗེའི་བདག་ཉིད་བསམ། །རྡོ་རྗེའི་སྙིང་པོའི་རྣལ་འབྱོར་པ། །རྡོ་རྗེ་ཡི་ནི་སེམས་སུ་བྱ། །རྡོ་རྗེ་དག་པས་བརྟན་བྱས་ནས། །ཆོས་རྣམས་རྡོ་རྗེ་ལས་གཞན་མེད། །ཐམས་ཅད་རྡོ་རྗེ་དེ་ཉིད་ཡིན། །རྡོ་རྗེ་ལས་ཀྱི་སྙིང་པོ་ཡིས། །རྡོ་རྗེ་འཕོ་བ་སྦྱོར་བའི་བདག་།རྡོ་རྗེ་འཁོར་བ་སྒྲོལ་བར་བྱེད། །རྡོ་རྗེ་འགུགས་པ་སྦྱོར་བའི་བདག ། རྡོ་རྗེ་བཅིང་པའི་སྦྱོར་བར་ལྡན། །བདུན་པ་དེ་བཞིན་ཉོན་མོངས་ལྡན། །རྣམ་ཤེས་བཅས་པའི་སྒྲོན་མ་ནི། །ཡེ་ཤེས་རྡོ་རྗེས་བཅོམ་ནས་སུ། །ཕྱོགས་ཀུན་དུ་ནི་སྣང་བར་བྱེད། །རྡོ་རྗེའི་སྒྲུབ་པ་ལ་སོགས་ཀུན། །རྡོ་རྗེའི་བདག་ཉིད་བལྟ་བར་བྱ། །ཆོས་ཀྱི་འཆིང་བ་རྡོ་རྗེ་སྟེ། །ཐར་པ་མཆོག་འབད་རྡོ་རྗེ་འོ། །རྡོ་རྗེ་པདྨ་བཟུང་ནས་སུ། །དེ་ཉིད་ཐམས་ཅད་བསྒྲུབ་པར་བྱ། །རྡོ་རྗེ་པདྨོར་ཞུགས་པ་ནི། །མཁས་པ་ཡིས་ནི་བསྒྲུབ་པར་བྱ། །དྲིལ་བུ་ཡི་ནི་མཚན་ཉིད་རྣམས། །ཉོན་ཅིག་རྡོ་རྗེ་འཛིན་རྒྱལ་པོ། །ཤེས་རབ་སྒྲ་ཡི་དེ་ཉིད་ནི། །ཐོས་པས་སྲིད་པ་ལས་སྒྲོལ་བའི། ། ནམ་མཁའི་ཁམས་ཀྱི་མཐས་གཏུགས་པར། །བྱང་ཆུབ་སྙིང་པོར་རྣམ་པར་གནས། །ཐམས་ཅད་རིག་པས་ཕྱོགས་ཀུན་ཏུ། །གནས་པའི་འཇིག་རྟེན་ཁམས་མཐར་ཐུག་།ཕྱོགས་ 101b བརྒྱད་ཅེས་ནི་བྱ་བ་རྣམས། །ལྷ་མོ་བརྒྱད་དུ་རབ་ཏུ་གྲགས། །ཡི་གེ་བརྒྱད་ཀྱི་ས་བོན་ནི། །ཕྱོགས་བརྒྱད་དུ་ནི་དགོད་པར་བྱ། །ཤར་དུ་ལྷ་མོ་སྒྲོལ་མ་སྟེ། །བྱང་གི་ཕྱོགས་སུ་གོས་དཀར་མོ། །ནུབ་ཀྱི་ཕྱོགས་སུ་མཱ་མ་ཀཱི། །ལྷོ་ཡི་ཕྱོགས་སུ་སངས་རྒྱས་སྤྱན། །མདོག་བཟང་དབྱངས་སྙན་མཛེས་པ་དང ། །བཞི་པ་རྡོ་རྗེ་ཕྲེང་བ་མོ། །དབུས་སུ་ནམ་མཁའི་རང་བཞིན་ལ། །གཟུགས་ཀུན་རྫོགས་ཤིང་ཤིན་ཏུ་མཛེས། །པདྨ་རྒྱས་ལ་ཡང་དག་འབྱུང ། །གཟུགས་མེད་གནས་ཀྱི་ཕྱོགས་སུ་ནི། །ཤེས་རབ་བདུད་རྩི་བུམ་པ་འདྲ། །ཤེས་རབ་བདུད་རྩི་གནས་དག་ལ། །དེ་ཡི་དབུས་ཀྱི་སྟན་དག་ལ། །ཤེས་རབ་ཕ་རོལ་ཕྱིན་ལྷ་མོ། །གཟུགས་མཛེས་ཡོན་ཏན་རྣམས་ཀྱི་གནས། །སྟེང་གི་པདྨ་རྡོ་རྗེ་རྣམས། །སྔ་མ་བཞིན་དུ་བསམ་པར་བྱ། །དབུས་ཀྱི་ཡེ་ཤེས་དབྱུག་པ་སྟེ། །ཐམས་ཅད་སྤྲོ་དང་སྡུད་པ་པོའོ། །ཱ་ལི་ཀཱ་ལིའི་རབ་སྦྱོར་གྱིས། །ཕྱོགས་བརྒྱད་དུ་ནི་བསྐྱོད་པར་བྱ། །ཱ་ལི་ཀཱ་ལིའི་རབ་སྦྱོར་བས། །འཁོར་བ་ཐམས་ཅད་གཅོད་པ་སྟེ། །རྡོ་རྗེ་དྲིལ་བུའི་ཐབས་ཡིན་ཏེ། །ཐབས་ཀྱིས་རྡོ་རྗེའི་དབུས་གནས་སོ། །གཡས་པར་ཉི་མ་བསམས་ནས་སུ། །གཡོན་པ་རུ་ནི་ཟླ་བ་དགོད། །ལག་པ་གཉིས་ནི་བརྐྱང་ནས་སུ། །པདྨའི་རྣམ་པ་ལག་ཏུ་བསྐོར། །ལུས་རྣམས་ལ་ནི་ཐབས་དང་སྦྱར། །རང་འདོད་ལྷ་རྣམས་བསམ་པར་བྱ། །རྡོ་རྗེ་གསོར་བས་སྒྲོལ་བ་སྟེ། །འཁོར་བ་སྒྲོལ་བ་ཡང་དག་བྱུང ། །ཧཱུཾ་ཞེས་བྱ་བའི་གླུ་ཡིས་ནི། །སངས་རྒྱས་ཐམས་ཅད་ 102a ༄#། །རྗེས་ཆགས་བྱ། །རྡོ་རྗེ་གསོར་བ་མཛེས་པ་ཡིས། །སེམས་ཅན་ཐམས་ཅད་མཛེས་པར་བྱ། །རྣམ་ཐར་ཆོས་སུ་བྱ་བ་སྟེ། །རྡོ་རྗེ་ཤིན་ཏུ་སྙིང་པོ་མཆོག་།ོཾ་བཛྲ་གྷཎྜེ་ཧོ་ཧཱུཾ། ཨོཾ་བཛྲ་དྷརྨཱ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦ་བུདྡྷ་ཀྵེ་ཏྲ་པྲ་ཙཱ་ལི་ཏེ། པྲཛྙཱ་པཱ་ར་མི་ཏཱ་ནཱ་དཱ་སཝ་བྷཱ་བ་ན་བཛྲ་དྷརྨ་ཧྲྀ་ད་ཡ་ཨ་བ་སནྟོ་ཥ་ཎི་ཧཱུཾ་ཧཱུཾ་ཧཱུཾ། ཧོ་ཧོ་ཧོ། ཨ་ཨ་ཨ་སཝཱཧཱ། ཤེས་རབ་ཐབས་ཀྱི་གཟུགས་བརྙན་གྱིས། །ཤེས་རབ་ཐབས་ཀྱིས་དཀྲོལ་བར་བྱ། །ཤེས་རབ་ཐབས་ཀྱི་ཆོས་ཀྱིས་ནི། །འགྲོ་བ་རྣམས་ཀྱིས་རྟོགས་བྱ་འམ། །མི་ཤེས་འདམ་དུ་བྱིང་བ་ཡི། །སེམས་ཅན་དོན་ཕྱིར་དཀྲོལ་བར་བྱ། །རྡོ་རྗེ་དེ་ཁོ་ན་ཡིས་བཟུང ། །ཆོས་ཀྱི་དྲིལ་བུ་དཀྲོལ་བར་བྱ། །སེམས་ཅན་དོན་བྱེད་རྣལ་འབྱོར་པས། །ཤེས་རབ་ཐབས་སུ་བལྟ་བར་བྱ། །དེ་ཉིད་མེད་པའི་རྣལ་འབྱོར་པ། །གླང་ཆེན་དྲིལ་བུའི་སྒྲ་དང་མཚུངས། །རྣལ་འབྱོར་དེ་ཉིད་དམན་པ་ཡི། །དངོས་གྲུབ་རིང་བར་ཤེས་པར་བྱ། །དེ་ནས་གསང་དང་ཕྲ་བ་ཡི། །རྡོ་རྗེའི་མཚན་ཉིད་བཟུང་བ་སྟེ། །ཡང་དག་ཆོ་ག་གང་གིས་ནི། །འདོད་པའི་དངོས་གྲུབ་སྒྲུབ་བྱེད་པ། །དབུ་མའི་ཚིག་ནི་བསྐོར་བ་ལ། །གསང་བའི་རྡོ་རྗེ་ཆ་གསུམ་བྱ། །དེ་ཉིད་ཀྱིས་ནི་ཆ་གཅིག་གི། ཕྲ་བའི་རྡོ་རྗེ་རབ་ཏུ་བརྟག་།སྤྱི་གཙུག་ལག་པ་ལ་སོགས་པ། །རྟག་ཏུ་དག་བྱེད་ཁུ་ཚུར་བཅང ། །སློབ་དཔོན་རྡོ་རྗེ་བརྟུལ་ཞུགས་འཛིན། །འདོད་དོན་ཐམས་ཅད་སྒྲུབ་པའི་མཆོག་།བགྲང་ཕྲེང་ 102b ལ་སོགས་གཟུང་བ་ནི། །ཡང་དག་ཇི་བཞིན་རྡོ་རྗེས་ཉོན། །ཡང་དག་ཆོ་ག་གང་གིས་ནི། །འགྲུབ་འགྱུར་འདིར་ནི་ཐེ་ཚོམ་མེད། །ཤེལ་དང་ཉ་ཕྱིས་མུ་ཏིག་དང ། །གཞན་ཡང་ནོར་བུ་དཀར་པོ་སོགས། །ཞི་སོགས་ལས་ལ་ཁྱད་པར་གྱི། །བགྲང་ཕྲེང་གི་ནི་ཁྱད་ཉིད་ནི། །གསེར་དང་དངུལ་དང་ཟངས་མ་དང ། །པདྨ་ས་བོན་ཁྱད་པར་དུ། །རྒྱས་པ་ཡི་ནི་བགྲང་ཕྲེང་སྟེ། ། མཁས་པ་རྣམས་ཀྱིས་བགྲང་བར་བྱ། །གུར་གུམ་ལ་སོགས་དྲི་ཞིམ་པའི། །དྲི་རྣམས་ཀུན་གྱི་ཁྱད་པར་ལས། །རིལ་བུར་བྱས་ཏེ་དམར་པོར་བཙོས། །དབང་དུ་སྡུད་པར་རབ་ཏུ་གྲགས། །རུ་འདྲཱ་ཀྵ་དང་ལུང་ཏང་དང ། །མི་ཡི་རུས་པ་དེ་བཞིན་ཏེ། །དྲག་པོའི་ལས་ལ་སྦྱར་བར་བྱ། །མངོན་སྤྱོད་དུ་ནི་རབ་ཏུ་གྲགས། །ཞི་དང་རྒྱས་དང་དབང་དྲག་ལ། །བོ་དེ་ཙེ་ནི་ལས་ཀུན་བྱེད། །སྔགས་སྒྲུབ་པ་ལ་ལྔ་བཅུ་སྟེ། །དབང་ལ་དེ་ཡི་ཕྱེད་དུ་བྱ། །ཞི་ལ་བརྒྱ་ཕྲག་གཅིག་ཡིན་ཏེ། །རྒྱས་པ་ལ་ནི་བརྒྱད་ལྷག་པའོ། །མངོན་སྤྱོད་ལ་ནི་དྲུག་ཅུ་འོ། །ལས་ཀྱི་བྱེ་བྲག་གིས་ནི་སྦྱར། །ལས་ཀྱི་བྱེ་བྲག་ཇི་བཞིན་དུ། །བགྲང་ཕྲེང་དག་ནི་བརྟག་པར་བྱ། །ཕྱོགས་དང་ཕྱོགས་མཚམས་བརྒྱད་དང་ནི། །དབུ་མ་ཉིད་དང་སངས་རྒྱས་དགུ། །ལྷ་དགུ་ཡི་ནི་སྐུད་པ་ལ། །ལྷ་དགུས་བྱིན་གྱིས་བརླབ་པར་བྱ། །གཟུགས་རྫོགས་ཤིན་ཏུ་མཛེས་པ་དང ། །གཙང་ཞིང་དད་ལྡན་སྙན་པར་སྨྲ། །དེ་ཡིས་བཀལ་བའི་བགྲང་ཕྲེང་གིས། །གྲོལ་བའི་དངོས་གྲུབ་སྐྱེ་བར་འགྱུར། །སྐུད་\?\་ 103a ༄#། །པ་ཐམས་ཅད་སངས་རྒྱས་ཚུལ། །རིལ་བུ་རྣམས་ནི་དགྲ་བཅོམ་ཡིན། །འོག་མ་མཆོད་རྟེན་དུ་ནི་བསྟན། །སྟེང་མ་ཆོས་ཀྱི་དབྱིངས་ཡིན་ནོ། །མཆོད་རྟེན་ཆོས་ཀྱི་དབང་པོའོ། །ལག་པར་ཉི་མ་བསམས་ནས་སུ། །དབྱངས་ཀྱི་དང་པོ་ཡི་གེ་ནི། །ལག་པ་ཡི་ནི་དབུས་དག་ཏུ། །དམར་པོ་ལ་ནི་དམར་པོ་སྒོམ། །གཡོན་པ་ཟླ་བའི་དབུས་སུ་ནི། བདུད་རྩིའི་ཡི་གེ་བསམ་བྱ་བ། །འོད་ཟེར་སྣ་ཚོགས་འབར་བ་ཡི། །ཁ་དོག་དཀར་པོ་བསྒོམ་པར་བྱ། །གཡས་པའི་སོར་མོ་རྡོ་རྗེར་བསམ། །གཡོན་པ་པདྨའི་འདབ་མར་སྒོམ། །རྡོ་རྗེ་པདྨ་སྦྱོར་བ་ཡིས། ། ཁ་སྦྱོར་དབུས་སུ་ཕྲེང་བཞག་ལ། །དེ་ཉིད་ཐམས་ཅད་བསྒོམས་པ་ཡིས། །བགྲང་ཕྲེང་བྱིན་གྱིས་བརླབ་པར་བྱ། །སོར་མོ་དག་གི་བྱེ་བྲག་གིས། །དེ་ནས་སྔགས་པས་བཟླས་པ་བྱ། །རྡོ་རྗེ་མ་དངོས་གཡོན་པ་སྟེ། །གཡས་པ་རྡོ་རྗེའི་ངོ་བོའོ། །དཀར་པོ་དུད་པ་དུང་དང་ནི། །པདྨ་གཡས་ཀྱི་སོར་མོ་སྟེ། །གི་ཝང་དྲི་གསུམ་འཇིགས་པ་དང ། །ས་གདུགས་གཡོན་པར་དགོད་པ་དང་།། ཡེ་ཤེས་རྣམ་ཤེས་མཐེ་བོང་གཉིས། །ལག་ལ་སོགས་པའི་ལས་ཅན་མ། །ཞི་བ་ལ་ནི་ཁྲོ་བོ་བགྲང ། །རྒྱས་པ་ལ་ནི་གུང་མོ་སྟེ། །སྲིན་ལག་ལ་ནི་དབང་དུ་བསྟན། །མཐའ་མར་མངོན་པར་སྤྱོད་པ་སྟེ། །མཐེ་བོང་རྡོ་རྗེ་ལྕགས་ཀྱུ་ནི། །ལྷ་ཉིད་དགུག་པའི་བསམ་པ་ཡིན། །མཉམ་པར་གཞག་སྟེ་བཟླས་བསྒོམས་ན། །འགྲུབ་འགྱུར་འདི་ལ་ཐེ་ཚོམ་མེད། །དེ་ཉིད་མེད་པའི་ 103b རྣལ་འབྱོར་པ། །དེ་ཉིད་མེད་པའི་སྔགས་བཟླས་དང ། །དེ་ཉིད་མེད་པའི་རྡོ་རྗེ་དྲིལ། །ཕྱག་རྒྱ་དེ་ཉིད་མེད་འབྱུང་བ། །རྣལ་འབྱོར་པ་ཡིས་གྲུབ་པ་མེད། །རྣལ་འབྱོར་དེ་ཉིད་དམིགས་ན་ནི། །དེ་ཉིད་ཐམས་ཅད་ཀུན་བྱའོ། །ཡི་གེའི་རྒྱུ་ལས་བྱུང་བའི་དངོས། །སྔགས་ཀྱི་སྙིང་པོ་མཛེས་པ་སྟེ། །རང་བཞིན་མེད་པའི་གྲངས་བཟླས་ན། །རྣལ་འབྱོར་མ་ཡི་སྙིང་པོ་འགྲུབ། །བྲམ་ཟེ་རྒྱལ་རིགས་དམངས་རིགས་གཅིག། རྣལ་འབྱོར་མ་ཡ་དྲི་བ་འགྲུབ། །ོཾ་པ་དེ་པ་དེ་མཧཱ་བདེ་ཛྙཱ་ན་སརྦ་བུདྡྷ་མཧཱ་བྷཱ་བེ་ཧཱུཾ་ཧཱུཾ་ཧཱུཾ། ཧོ་ཧོ་ཧོ། ཨཱཿ སཝཱཧཱ། སྔགས་འདི་ཡིས་ནི་སྦྱང་བྱས་ན། །བགྲང་ཕྲེང་གིས་ནི་ལྷ་རྣམས་འགྲུབ། ། ལས་རྣམས་ཐམས་ཅད་འགྲུབ་འགྱུར་ཏེ། །མི་གསལ་བ་ནི་རིང་བར་འགྱུར། །ཡེ་ཤེས་དེ་དག་བྱེ་ཕྲག་དག། ཡང་དག་རྡོ་རྗེ་ཆེན་པོས་ཉོན། །ཡེ་ཤེས་བྱེ་བྲག་རིང་དུ་གནས། །ཐུན་མོང་ཡེ་ཤེས་བརྗོད་པ་སྟེ། །དམན་དང་རབ་དམན་དམན་པ་ཅན། །གནོད་སྦྱིན་ལྷ་མིན་གྲུབ་པ་པོ། །ཀླུ་དང་བྱོལ་སོང་གསང་བ་པ། །ལྟོ་འཕྱེ་དང་ནི་མི་འམ་ཅི། །མི་དང་ཡི་དྭགས་མཁའ་འགྲོ་མ། །དམྱལ་བར་འཚེད་པའི་སེམས་ཅན་དང ། །བྱོལ་སོང་གཟུགས་སུ་བརྗོད་པ་སྟེ། །ཕྲ་མོ་སྒོ་ང་གཟུང་མི་ནུས། །ཆུ་དང་མེ་དང་རླུང་དང་ནི། །དེ་བཞིན་དུ་ནི་ས་ཡི་ཁམས། །བསྟན་པ་དེ་ཉིད་ཐམས་ཅད་དང ། །རྩཝ་དང་འདབ་མ་ཕྲ་བ་དང ། །བོང་བ་རྡོ་དང་བྲག་ལ་སོགས། །ཐམས་ཅད་ཡེ་ཤེས་བྱིན་གྱིས་བརླབས། །ཡེ་ཤེས་མེད་ན་སྐྱེ་མི་འགྱུར། །ཡེ་ཤེས་ཐམས་ཅད་ཀུན་རིག་པའོ། །ཡེ་ཤེས་ཐར་པར་ 104a ༄#། །གང་གིས་ནི། །ཡེ་ཤེས་ཐུན་མོང་བྱིན་བརླབས་པ། །བྱེ་བྲག་གཞན་ནི་ཇི་ལྟ་བུ། །ལྷ་ལས་རོལ་མོ་ཉན་པར་འཚལ། །བཅོམ་ལྡན་འདས་ཀྱིས་བཀའ་སྕལ་པ། །ཉི་ཤུ་རྩ་གསུམ་ལྷ་ཡི་གནས། །གོང་ནས་གོང་དུ་ཉིས་འགྱུར་ཏེ། །འདོད་པ་ལྔ་ཡི་ཡེ་ཤེས་དག། གོང་མའི་ཡེ་ཤེས་ཡེ་ཤེས་འཕེལ། །གསང་བའི་ཡེ་ཤེས་རེག་པ་སྟེ། །ལྷ་མིན་ཡེ་ཤེས་ཁྲོ་བོའོ། །ཡི་དྭགས་ཡེ་ཤེས་ཞེན་པ་སྟེ། །དམྱལ་བའི་ཡེ་ཤེས་འཇིགས་ཤིང་ངུ ། །བྱོལ་སོང་ཡེ་ཤེས་གླེན་པ་སྟེ། །བསྟན་པ་རྣམས་ནི་སེམས་མེད་པའོ། །མི་རྣམས་ཡེ་ཤེས་རྣམ་པ་ལྔ། །བྱེ་བྲག་ཏུ་ནི་ཤེས་པར་བྱ།། གླེན་པས་བསྒྲིབས་དང་ལྐུགས་པ་དང ། །བུད་མེད་ཡེ་ཤེས་སླུ་བྲིད་དོ། །བྱིས་པའི་ཤེས་པའི་ཤེས་པ་ཅན། །ཡེ་ཤེས་དེ་ཉིད་བྱེ་བྲག་དག། རྣལ་འབྱོར་བསྟན་བཅོས་ཀྱིས་སྦྱངས་པ། །སྐྱེ་བ་བྱ་བ་སྟོང་ཕྲག་ཏུ། །སངས་རྒྱས་ཡེ་ཤེས་ཀྱིས་བསྐུལ་ཡིན། །རྣལ་འབྱོར་བསྟན་བཅོས་རྗེས་འབྲངས་ནས། །འབད་དེ་དད་པ་བསྐྱེད་པར་བྱ། །སྒྲ་སྒྲོགས་ཕྱི་རོལ་བསྟན་བཅོས་ནི། །གར་གྱི་གནས་དང་མཚུངས་པ་སྟེ། །བློ་ལྡན་རྣལ་འབྱོར་བསྟན་བཅོས་ཀྱིས། །སྤྱོད་དང་གྲོལ་བའི་འབྲས་བུ་ཐོབ། །སྙིང་པོ་སྙིང་པོ་བསྟན་བཅོས་ཏེ། །རྣལ་འབྱོར་གསང་བའི་རིམ་ཡིན་ནོ། །སྦྱོར་བའི་གདན་གྱི་རབ་ཏུ་བྱེད་པ་ལས། རིམ་པར་ཕྱེ་བ་དང་པོའོ།། །།འཁོར་ལོས་སྒྲུབ་པའི་ཁྱད་པར་དང ། །དེ་ཉིད་ཇི་བཞིན་རྡོ་རྗེས་ཉོན། །ཞི་དང་རྒྱས་དང་དབང་རྣམས་དང ། །སྲུང་ 104b དང་མངོན་པར་སྤྱོང་\?\་པ་དང ། །རེ་མིག་དགུ་སོགས་འཁོར་ལོ་ནི། །ཕྱི་རོལ་མུ་ཁྱུད་བསྐོར་བར་བྱ། །འཁོར་ལོ་ལས་ཀྱི་ཁ་དོག་གིས། །མཁས་པ་ཡིས་ནི་བསྒོམ་པར་བྱ། །ོཾ་ཏཱ་རེ་ཏུཏྟཱ་རེ་ཏུ་རེ་སཝཱཧཱ། །ས་བོན་དེ་དག་ཐམས་ཅད་ནི། །ཕྱག་འཚལ་ཐ་མ་དབུས་སུ་བྱ། །དབུས་སུ་མིང་དང་སྲུང་བ་ཡི། །ཚིག་ཀྱང་དེ་བཞིན་སྦྱར་བར་བྱ། །མཉམ་ཉིད་སྟོང་པའི་རང་བཞིན་ཆུས། །བདག་གིས་ལས་ནི་བཀྲུ་བར་བྱ། །མཉམ་ཉིད་ཐམས་ཅད་རིག་པས་གནས། །སྲུང་བའི་འཁོར་ལོས་བསྲུང་བར་བྱ། །ཡེ་ཤེས་ཅན་གྱིས་སྲུང་བསྒོམས་ན། །འཇིགས་པ་ཀུན་ལས་རིང་བར་འགྱུར། །སེམས་ཅན་དངོས་པོ་མེད་པ་རུ། །སྦྱོར་བའི་དངོས་པོས་འཇིགས་པ་ལ། །ཟླ་བའི་དཀྱིལ་འཁོར་དབུས་གནས་པར། །པདྨའི་གདན་ནི་བསམ་པར་བྱ། །སྒྲོལ་མའི་རྒྱུད་དུ་བསྒོམས་པ་ཡིས། །བདག་གི་ལུས་ནི་རྣམ་པར་སྤྲུལ། །ོཾ་ཏཱ་རེ་སཝཱཧཱ། མིག་\?\་ལའོ། །ོཾ་ཏུཏྟཱ་རེ་སཝཱཧཱ། །མིག་ལའོ། །ོཾ་ཏུ་རེ་སཝཱཧཱ། །སྣ་ལའོ། །ོཾ་ཏུ་སཝཱཧཱ། རྣ་བ་ལའོ། །ོཾ་རེ་སཝཱཧཱ། ལྕེ་ལའོ། །ོཾ་ཏཱ་རེ་ནི་སཝཱཧཱ། སྙིང་གར་རོ། །ཡན་ལག་དྲུག་ཏུ་རྟག་ཏུ་དགོད། །འཕགས་མ་སྒྲོལ་མ་བསམ་བྱ་བ། །ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་རྣམས་ཐམས་ཅད་ཀྱིས་ནི་ཀླུབས། །ཀུན་ཏུ་མི་འཇིགས་སྦྱིན་པ་དང ། །གཞན་གྱི་སྣ་རུ་ཨུཏྤལ་བསྣམས། །ཐམས་ཅད་འོད་ཟེར་རྣམ་བསྒོམས་ནས། །ཁྱད་པར་དུ་ནི་སྔགས་བཟླས་བྱ། །ཐམས་ཅད་ཡོན་ཏན་ཅན་དུ་སྒོམ། །ོཾ་ཏུ་རེ་ཏུཏྟཱ་རེ་ཏུ་རེ་སཝཱཧཱ། །སྲུང་བའི་ལས་ཐམས་ཅད་ཀྱི་སྔགས་སོ། །རྒྱལ་པོའི་ 105a ༄#། །བཙོན་ར་དགྲ་ཕྱོགས་དང ། །ཉམ་ངའི་ལམ་དུ་འགྲོ་བ་དང ། །ཡན་ལག་སྣ་ཚོགས་རིམས་དང་ནི། །ཆུ་དང་དུག་གིས་འཆི་ལ་སོགས། །གང་དང་གང་དུ་འཇིགས་པའི་གནས། །དེ་དང་དེར་ནི་བསམ་པར་བྱ། །ཤེས་རབ་ཞན་དང་ལེ་ལོ་སོགས། །འཁོར་ལོ་བྲིས་ནས་བཅང་བར་བྱ། །སྲུང་བ་བཟང་པོ་འདི་ཡིས་ནི། །འཇིགས་པ་ཀུན་ལས་གྲོལ་བར་འགྱུར་སྲུང་བ་འདི་དག་ཐམས་ཅད་ནི། །དེ་ཉིད་སྦྱོར་བས་བསྒྲུབ་པར་བྱ། །འཁོར་ལོ་འདབ་མ་བརྒྱད་པ་ལ། །ཕྱི་རོལ་མུ་ཁྱུད་བསྐོར་ནས་སུ། །དབུས་སུ་ཐོག་མ་ཐ་མ་སྟེ། །བཟླས་པ་ཐམས་ཅད་བཞག་པར་བྱ། །མུ་ཁྱུད་དབྱངས་ཀྱིས་བསྐོར་ནས་སུ། །འཁོར་ལོ་དཀར་པོ་བསམ་པར་བྱ། །ཡན་ལག་ཐམས་ཅད་ཕྱེ་བ་ཡིས། །མཉམ་ཉིད་སྟོང་པར་བསམ་ནས་སུ། །སྔོན་གྱི་མཚན་ཉིད་ལྡན་པ་ཡིས། །སྔར་བསྟན་བཞིན་དུ་སྦྱར་བར་བྱ། །འཁོར་ལོ་འདི་ལྟར་བསྒོམས་པ་ཡིས། །ལས་འདིས་ཤེས་རབ་འབར་བར་འགྱུར། །ོཾ་པྲཛྙེ་པྲཛྙེ་མཧཱ་པྲཛྙེ་ཧཱུཾ་སཝཱཧཱ། །འོད་ཟེར་སྣ་ཚོགས་འབར་བས་སུ། །དངོས་པོ་བསྒོམས་པས་བསྒོམ་པར་བྱ། །ཟླ་བའི་དཀྱིལ་འཁོར་དབུས་གནས་པར། །ཤེས་རབ་བདག་ཉིད་བསྒོམས་ནས་སུ། །ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་རྣམས་ཀུན་གྱིས་རྣམ་པར་ཀླུབས། །ཁ་དོག་དཀར་པོ་ཤིན་ཏུ་འབར། །ཤེས་རབ་དངོས་པོ་བསྒོམས་ནས་སུ། །ས་བོན་འདི་ནི་བཟླས་བྱས་ནས། །ཤེས་རབ་མྱུར་དུ་འབལ་ 105b བར་འགྱུར། །གླེན་དང་སྙོམས་ལས་བླུན་པོ་ཡང ། །སྦྱོར་བ་འདི་ཡིས་ཤེས་རབ་འཕེལ། །སྙིང་པོ་རེ་མིག་དགུ་རུ་བྱ། །དེ་བཞིན་བར་མ་བཅུ་གཉིས་ཏེ། །ཕྱི་རོལ་རེ་མིག་བཅུ་དྲུག་གོ། མཐར་ཐུག་མུ་ཁྱུད་དེ་བཞིན་ཏེ། །ཕྱག་འཚལ་སྲེག་པའི་མཐར་སྦྱར་བའི། །དབུས་སུ་བདག་གི་སེམས་བཞག་ལ། །སྒྲ་དང་ཐིག་ལེ་ལྡན་པ་ཡི། །ཡི་གེ་བརྒྱད་པོ་སྙིང་པོར་དགོད། །བཅུ་གཉིས་པ་ལ་དབྱངས་ས་བོན། །མ་ནིང་སྤངས་པ་བྲི་བར་བྱ། །སྡེ་ཚན་གསུམ་གྱི་ཡི་གེ་རྣམས། །ཡི་གེ་ལྷག་མ་གཅིག་དང་བཅས། །སྒྲ་དང་ཐིག་ལེར་ལྡན་པ་དག། བཅུ་དྲུག་གནས་སུ་གཞག་པར་བྱ། །གསོད་པའི་ཡི་གེ་མུ་ཁྱུད་ལ། །ཐམས་ཅད་རིག་པས་ཀུན་ཏུ་བསྐོར། །དང་པོ་དཀར་པོར་བསམ་བྱ་སྟེ། །གཉིས་པ་སེར་པོར་བསྒོམ་པར་བྱ། །གསུམ་པ་དག་ནི་དམར་པོ་སྟེ། །དེ་བཞིན་བཞི་པ་སྔོན་པོ་འོ། །སྔོན་བཞིན་མཚན་ཉིད་ལྡན་པ་ཡིས། །མཉམ་ཉིད་སྟོང་པར་ཡང་དག་གནས། །མཉམ་ཉིད་ལྟ་བ་བསྐྱེད་ནས་སུ། །འཁོར་ལོ་འདི་ནི་བསྒོམ་པར་བྱ། །མཉམ་གཞག་དངོས་པོ་བསྒོམས་པ་ཡི། །འགྲུབ་འགྱུར་འདི་ལ་ཐེ་ཚོམ་མེད། །ཀུན་ནས་ཐམས་ཅད་འབར་བ་སྟེ། །མེ་ལྟར་འབར་བའི་འོད་ཀྱིས་ནི། །བདུད་རྣམས་ཐམས་ཅད་སྲེག་པར་བྱེད། །ཡེ་ཤེས་འཁོར་ལོ་བསྒོམས་པ་ཡིས། །ཀུན་ནས་ཉོན་མོངས་གཡོགས་པ་ཡང ། །སངས་རྒྱས་འབྲས་བུ་ཐོབ་པར་འགྱུར། །མཉམ་ཉིད་ཡེ་ཤེས་བསྐྱེད་ནས་སུ། །བདག་ཉིད་ནམ་མཁའ་བསྒོམས་བྱས་ལ། །འོད་ཟེར་སྣ་ཚོགས་འབར་བ་ཡིས།། 106a ༄#། །ཉི་མའི་དཀྱིལ་འཁོར་བསྒོམ་པར་བྱ། །དེ་ཡི་དབུས་སུ་ས་བོན་ནི། །མཁས་པ་ཡིས་ནི་གཟུང་བྱ་སྟེ། །སྡེ་ཚན་དང་པོ་གང་ཡིན་པའི། །ཡི་གེ་དང་པོ་བཟུང་ནས་སུ། །ལྕགས་ཀྱུ་ཡི་ནི་གཟིར་བྱ་བ། །རྩ་བར་རེ་ཕ་སྦྱར་བྱ་བ། །བདུད་རྩིའི་ཐིག་ལེ་སྟེང་དུ་དགོད། །ཉི་མའི་དཀྱིལ་འཁོར་དབུས་གནས་པར། །འོད་ཟེར་སྣ་ཚོགས་འཕྲོ་བ་ནི། །ཤིན་ཏུ་མཉམ་པར་གཞག་པས་བསྒོམ། །རྒྱལ་པོ་རྒྱལ་པོའི་ཕོ་བྲང་དང ། །ཡིད་ཅན་གྱིས་ནི་བསམ་པར་བྱ། །ཡི་གེ་ཉིས་འགྱུར་ཐིགས་པ་དང ། །རྩ་བར་སྒྲ་ནི་སྦྱར་བར་བྱ། །བདུད་རྩིའི་མཐའ་ཞེས་བྱ་བ་སྟེ། །འབུམ་ཕྲག་གཅིག་གིས་དབང་དུ་སྡུད། །བུ་མོ་རྣམས་ཀྱི་གང་བསམས་པ། །མིང་དང་བཅས་ནས་བསྒྲུབས་ནས་ནི། །བསམས་པ་ཙམ་གྱིས་འགྲུབ་པར་འགྱུར། །ངས་བསྟན་པ་ལ་ཐེ་ཚོམ་མེད། །སྔོན་གྱི་མཚན་ཉིད་ཐམས་ཅད་ནི། །སྔར་བཞིན་དུ་ནི་སྟོན་པ་ཉིད། །ཐམས་ཅད་བདག་ཉིད་བསམས་ནས་སུ། །ཟླ་བའི་དཀྱིལ་འཁོར་དབུས་གནས་པར། །བདུད་རྩི་ཀུན་རིག་ཕྱི་མོར་བཅས། །འོད་ཟེར་སྣ་ཚོགས་རྣམ་པར་འཕྲོ། །འོད་ཟེར་སེར་པོ་ཤིན་ཏུ་མཛེས། །གཟུགས་སྡུག་འོད་ཟེར་འཕྲོ་བར་བསམ། །རིན་ཆེན་ལ་སོགས་གང་འདོད་པ། །ཐམས་ཅད་རང་གི་དབུགས་ཀྱིས་དགུག། སྒྲུབ་པ་པོ་ཡི་ལུས་ལ་ནི། །དེ་ཡི་དཀྱིལ་འཁོར་དབུས་གནས་པར། །རླུང་གི་ས་བོན་གྱིས་བསྐོར་བའི། །ལྕགས་ཀྱུའི་ཡི་གེ་བསྒོམ་པར་བྱ། །ཁ་དོག་ལ་སོགས་དམར་བསམ་ཞིང ། །གཟུགས་ཀྱང་ཁ་དོག་ 106b དམར་པོར་བསྒོམ། །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་མཁའ་འགྲོ་བསྒོམ་པར་བྱ། །གཟུགས་མཛེས་ཤིན་ཏུ་རྫོགས་པ་སྟེ། །རྒྱན་རྣམས་ཀུན་གྱིས་རྣམ་པར་ཀླུབས། །གཡོན་པ་ལྕགས་ཀྱུའི་ཚུལ་གྱིས་ནི། །ཡིད་ནི་འགུགས་པ་བསྒོམ་པར་བྱ། །ལྕགས་ཀྱུའི་ཡི་གེ་བསྒོམས་པ་ཡི། །མཛུབ་མོ་ལྕགས་ཀྱུ་བསྐྱོད་པར་བྱ། །ཡི་གེ་ཉིས་འགྱུར་ཐིགས་པ་དང ། །རྩ་བར་སྒྲ་ནི་སྦྱར་བར་བྱ།། བདུད་རྩིའི་མཐའ་ཞེས་བྱ་བ་སྟེ། །འབུམ་ཕྲག་གཅིག་གིས་དབང་དུ་འགྲུབ། །དེ་ལྟར་བསྒོམ་ཞིང་བཟླས་ནས་སུ། །སོར་མོ་ཡང་ནི་བསྐྱོད་བྱས་ནས། །བསྒྲུབ་བྱའི་ཡིད་ནི་བསྐྱོད་འགྱུར་བར། །འབུམ་ཕྲག་གཅིག་གིས་འགྲུབ་པར་འགྱུར། །འཁོར་ལོ་འདབ་མ་མེད་པ་ལ། །མུ་ཁྱུད་ཀྱིས་ནི་བསྐོར་བར་བྱ། །དབྱངས་ཀྱི་ཡི་གེ་ཐམས་ཅད་ཀྱིས། །མུ་ཁྱུད་མཁས་པས་བསྐོར་བར་བྱ། །སྡེ་ཚན་ལྔ་པ་གང་ཡིན་པ། །ཡི་གེ་གསུམ་པ་བཟུང་ནས་སུ། །ི་དང་རེ་ཕ་སྦྱར་ནས་སུ། །འབད་པས་དབུས་སུ་བཞག་ནས་ཀྱང ། །ཡེ་ཤེས་ཅན་གྱི་ས་བོན་འདི། །སྒྲ་ཡི་བདུན་པ་དང་སྦྱར་ལ། །འདབ་མ་རྣམས་ལའང་དེ་ཉིད་བྱ། །འདབ་མར་འདི་ཉིད་གཞག་པར་བྱ། །རྣལ་འབྱོར་མ་ཡི་གྲུབ་འདོད་པས། །འོད་ཟེར་སྣ་ཚོགས་རབ་འབར་བས། །གསེར་གྱི་མདོག་ཏུ་བསྒོམ་པར་བྱ། །སྔོན་བཞིན་མཚན་ཉིད་ལྡན་པ་རུ། །སྔར་བསྟན་བཞིན་དུ་མཁས་པས་བསྒོམ། །དེ་འོག་ལྷ་མོ་ནོར་རྒྱུན་གྱི། །གཟུགས་སུ་བདག་ཉིད་བསྐྱེད་པར་བྱ། །གཟུགས་མཇེས་ཤིན་ཏུ་ཡོངས་སུ་རྫོགས། །རྒྱན་རྣམས་ཀུན་ 107a ༄#། །གྱིས་རྣམ་པར་ཀླུབས། །ཐམས་ཅད་ལག་གཡས་མི་འཇིགས་སྦྱིན། །གཡོན་པ་འབྲས་ཀྱི་སྙེ་མ་བསྣམས། །དབུས་སུ་བསྟན་པའི་ས་བོན་ནི། །ཕྱག་འཚལ་སྲེག་པའི་མཐའ་སྦྱར་ཏེ། །དེ་ལྟར་བསྒོམས་ཤིང་བཟླས་པ་ཡིས། །རྒྱས་པའི་སྦྱོར་བ་འགྲུབ་པར་འགྱུར། །ལྷ་མོ་ནོར་ལྡན་རྣལ་འབྱོར་གྱིས། །རྒྱས་པ་རུ་ནི་གྲགས་པ་ཡིན། །བདག་ཉིད་བྱེ་བྲག་གཞན་དག་ཏུ། །རྣམ་གཞག་ཐམས་ཅད་དེ་བཞིན་ནོ། །བདག་ཉིད་སྔོན་གྱི་མཚན་ཉིད་ཀྱིས། །སྟོང་པའི་དེ་བཞིན་བསྒོམས་ནས་སུ། །ཉི་མའི་དཀྱིལ་འཁོར་དབུས་གནས་པར། །ས་ཡི་དཀྱིལ་འཁོར་བསྒོམ་པར་བྱ། །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་རྣམ་ཤེས་དངོས་པོ་བསྒོམ། །འདབ་མ་བརྒྱད་པའི་འཁོར་ལོར་ནི། །དབུས་སུ་ས་བོན་བསྒོམས་ནས་ནི། །ཕྱི་རོལ་འཁོར་ལོའི་མུ་ཁྱུད་ལ། །དབྱངས་ཀྱི་ས་བོན་བསྐོར་བར་བྱ། །ཕྱོགས་ཀྱི་འདབ་མར་བདུད་རྩི་བཞི། །གུག་སྐྱེད་ཀུན་དང་སྦྱར་བར་བྱ། །མཚམས་ཀྱི་འདབ་མ་བཞི་ལ་ཡང ། །སངས་རྒྱས་ལྔ་ཡིས་མངོན་པར་བརྒྱན། །ཟླ་བའི་དཀྱིལ་འཁོར་རྫོགས་པ་ནི། །འོད་ཟེར་སྣ་ཚོགས་འབར་བ་ཅན། །རིན་ཆེན་བདུན་གྱིས་མཛེས་པ་སྟེ། །རང་གི་ལུས་ལ་བསྒོམ་པར་བྱ། །གང་འདོད་ཡིད་ནི་རྟོགས་བྱའི་ཕྱིར། །དེ་ཡི་འོད་ཟེར་སྦྱར་བར་བྱ། །འཇིགས་པ་མེད་ཅིང་འཚེ་མེད་པས། །དངོས་པོས་དངོས་པོ་བསྒོམ་པར་བྱ། །རྨུགས་དང་གླེན་དང་སྙོམས་ལས་དང ། །ཤེས་རབ་ཞན་ཅིང་ལྟ་ངན་རྣམས།། 107b རྣལ་འབྱོར་པ་ཡིས་སྐད་ཅིག་ལ། །སྙོམས་ལས་ལ་སོགས་རིང་དུ་སྤོང ། །མཉམ་གཞག་ཅུང་ཟད་བལྟས་ནས་སུ། །རྡུལ་ཕྲན་དཀར་པོ་སྤྲོ་བར་བྱ། །ཕྱོགས་བཅུར་སོང་སྟེ་ཁྱབ་ནས་ནི། །ཐམས་ཅད་རིམ་པས་ཀུན་སྣང་བྱ། །ཡེ་ཤེས་སེམས་ལ་བལྟས་ནས་ནི། །རྣལ་འབྱོར་ཕ་རོལ་སེམས་ཤེས་འགྱུར། །སེམས་ནི་མཉམ་པར་བཅིངས་ནས་སུ། །མཉམ་གཞག་འཁོར་ལོར་བལྟ་པར་བྱ། །མཉམ་ཉིད་ཡེ་ཤེས་མཐོང་བ་ཡིས། །འཁོར་བའི་ཕ་རོལ་སྒྲོལ་བར་འགྱུར། །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་ས་བོན་གྱིས་སྤྲུལ་ཏེ། །པདྨའི་གདན་ལ་བཞུགས་པ་ཡི། །ཁ་དོག་དཀར་པོ་བསྒོམ་པར་བྱ། །ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་རྣམས་ཀུན་གྱིས་ཀླུབས་པ་སྟེ། །ཕྱག་གཉིས་ཕྱག་རྒྱ་ཆེ་བཅིངས་ནས། །སྙིང་གའི་ཕྱོགས་སུ་འཚིར་བར་མཛད། །ཁ་དོག་དཀར་པོ་མཛེས་པ་ཡི། །འཕགས་པ་རྣམ་པར་སྣང་མཛད་གཙོ། །སངས་རྒྱས་སྤྲིན་ནི་རྣམ་པར་སྤྲོ། །སྤྲོ་བ་སྣ་ཚོགས་མི་ཟད་པས། །སེམས་ཅན་ཁམས་ནི་སྒྲོལ་བར་མཛད། །ཤེས་རབ་རྡོ་རྗེས་འགྲོ་སྒྲོལ་བ། །དབྱངས་ཡིག་དང་པོ་མཆོག་ས་བོན། །མཐའ་རུ་ཚེག་དྲག་སྦྱར་བར་བྱ། །ཕྱག་འཚལ་སྲེག་པའི་མཐའ་དང་ལྡན། །ས་བོན་འདི་ནི་བསྒོམས་ནས་སུ། །མཉམ་གཞག་དངོས་པོར་བཟླས་ནས་\?\་ནི། །བྱང་ཆུབ་རིམ་པ་མཐོང་བར་འགྱུར། །སྦྱོར་བའི་གདན་གྱི་རབ་ཏུ་བྱེད་བ་ལས། རིམ་པར་བྱེ་བ་གཉིས་པའོ།། །།བྱིན་རླབས་སྦྱོར་བའི་ངོ་བོ་དག། གང་གིས་སེམས་ 108a ༄#། །ཅན་རྣམས་ལ་བསྟན། །བྱིན་རླབས་རིམ་པ་ཇི་ལྟ་བུ། །ལྷ་ལས་གཟིགས་མོ་ཉན་པར་འཚལ། །སེམས་ཅན་རྨོངས་པ་གསོ་བའི་ཕྱིར། །བྱིན་གྱིས་རློབ་པའི་ཆོས་བསྟན་པ། །ཡང་དག་འཁོར་བ་སྒྲོལ་བ་ཡི། །དེ་ཉིད་ཇི་བཞིན་རྡོ་རྗེ་ཉོན། །སྙིང་གར་ཟླ་བ་བསམ་ནས་སུ། །ཧཱུཾ་གི་ས་བོན་དབུས་སུ་བསམས། །འོད་ཟེར་མེ་ལྟར་འབར་ཞིང་གསལ། །ཉི་མའི་དབུས་སུ་གཞག་པར་བྱ། །ཕྱོགས་བཅུའི་འཇིག་རྟེན་ཁམས་རྣམས་སུ། །མེ་ཡི་དཀྱིལ་འཁོར་བསམ་པར་བྱ། །གནས་རྣམས་ཐམས་ཅད་འབར་བ་ཡིས། །ཀུན་ནས་ཐམས་ཅད་བསྲེགས་ནས་སུ། ། སྔོན་བཞིན་མཚན་ཉིད་བསྟན་པ་ཡི། །དང་པོ་སྟོང་པ་ཉིད་དུ་བྱ། །མེ་ཡི་དཀྱིལ་འཁོར་དབུས་གནས་པའི། །སངས་རྒྱས་ལྔ་ནི་བསམ་པར་བྱ། །དབྱུག་པ་འཇིག་རྟེན་དབང་ཕྱུག་མགོན། །གྱ་གྱུ་ཕྱག་ན་རྡོ་རྗེ་སྟེ། །ལུས་ནི་འཇམ་པའི་མཆོག་ཡིན་ནོ། །མགོ་དང་བུམ་པ་བྱམས་པ་སྟེ། །སྟེང་དུ་འབར་བའི་མ་ཡིག་ནི། །འཁོར་བ་ཐམས་ཅད་སྒྲོལ་བ་པོ། །འཇིག་རྟེན་གསུམ་གྱི་གྲུབ་འདོད་ན། །ས་བོན་དེ་ནི་བསྒོམ་པར་བྱ། །པདྨའི་སྟན་ལ་གནས་པ་ཡི། །ཉི་མའི་དཀྱིལ་འཁོར་བསྒོམས་ནས་སུ། །ཡེ་ཤེས་མཁའ་འགྲོའི་རང་བཞིན་དུ། །བདག་ཉིད་ཡེ་ཤེས་ཀྱིས་བསྲུང་བྱ། །ཕྱག་གཉིས་སེམས་དཔའི་སྐྱིལ་ཀྲུང་\?\་ཅན། །ཁ་དོག་དམར་པོ་ཤིན་ཏུ་མཛེས། །སྟེང་གི་རྡོ་རྗེ་ཅོད་པན་ལ། །སངས་རྒྱས་ལྔ་ཡིས་རྣམ་པར་བརྒྱན། །ཁ་ཊྭཱཾ་ག་དང་རྣལ་འབྱོར་སྣོད།། 108b རྒྱན་རྣམས་ཀུན་གྱིས་རྣམ་པར་ཀླུབས། །འོད་ཟེར་སྣ་ཚོགས་འབར་བ་རུ། །དབུགས་མི་གཡོ་བར་བསྒོམ་བར་བྱ། །སྡེ་ཚན་གསུམ་པ་གང་ཡིན་པའི། །རྡོ་རྗེ་དབྱུག་པ་གུག་སྐྱེད་བཅས། །ལུ་གུ་རྒྱུད་ལ་སོགས་པས་དཀྲི་།ཕྱག་འཚལ་སྲེག་པའི་མཐའ་དང་ལྡན། །འབུམ་ཕྲག་གསུམ་ནི་བཟླས་ནས་སུ། །གཉིས་མེད་གཏོར་མའི་ལས་ཀྱིས་ནི། །དེ་ཡི་འོག་ཏུ་ལས་རྣམས་བྱ། །བདུད་རྩི་ལྔ་དང་ལྡན་པ་ལ། །བརྒྱད་བརྒྱ་རུ་ནི་བཟླས་པར་བྱ། །ཆོ་གར་ལྡན་པས་སྦྱིན་པར་བྱ། །དེ་ཡི་མོད་ལ་འབབ་པར་འགྱུར། །བབས་ནས་རྣལ་འབྱོར་པ་ཡིས་ནི། །རྡོ་རྗེའི་གླུ་ནི་བླང་བར་བྱ། །རོལ་ཅིག་རོལ་ཅིག་རྡོ་རྗེ་ཁྱོད། །ཞན་དང་དྲག་པོ་སྦྱོར་བ་ཡིས། །ཐམས་ཅད་ཀུན་ནས་ཁྱོད་ཀྱིས་གསོལ། །སྐད་ཅིག་འཁོར་ལས་བདག་མཉམ་བསྒྲལ། །གླུ་འདི་ཡིས་ནི་གར་བྱེད་དེ། །རྡོ་རྗེ་དྲིལ་བུ་དཀྲོལ་བར་བྱ། །ོཾ་ཏིཥྛ་ཡོ་ག་མཧཱ་ཀྲོ་དྷ་ཧཱུཾ་ཧཱུཾ་ཧཱུཾ་སཝཱཧཱ། །འདི་ནི་ཚིམ་བྱ་ཐམས་ཅད་བྱ། །རྣལ་འབྱོར་མ་ཀུན་བསྟན་པར་བྱ། །དམན་དང་བར་དང་མཆོག་རྣམས་ལ། །དེ་ཡི་འོག་ཏུ་ཆོས་བསྟན་བྱ། །ོཾ་ཡོ་ག་ཨ་བེ་ཤ་ཡ། ། ཤིན་ཏུ་མཉམ་གཞག་རྣལ་འབྱོར་པས། །འདི་ཡིས་སྔོན་དུ་བསྙེན་པ་བྱ། །གཉིས་མེད་གཏོར་མ་ལྡན་པ་ཡིས། །རྣལ་འབྱོར་པ་ཡིས་ཡུངས་ཀར་དང ། །ཧཱུཾ་གི་སྒྲ་ནི་འཇིགས་པ་ཡིས། །སྒྲུབ་པ་པོ་ཡིས་འདིས་གདབ་བྱ། །སྔར་གྱེ་སྨོས་པའི་སྔགས་ཀྱིས་ནི། །བདག་ཉིད་ཇི་ལྟར་འདོད་བཞིན་བྱེད། །ོཾ་མ་ན་གྷུ་རུ་གྷུ་རུ། དྷི་སྟི་ཙི་ལི་ཙི་ལི་ཧཱུཾ་ཧཱུཾ་ཕཊ། རྣལ་འབྱོར་པ་ཡིས་འབུམ་བཟླས་ན། ། 109a ༄#། །བལྟས་པས་འབེབས་པ་འགྲུབ་པར་འགྱུར། །མཆོད་ཅིང་གང་ལ་བལྟས་པ་ཡི། །མཐོང་བར་བྱས་ཏེ་གར་བྱེད་དོ། །ོཾ་མ་ལམ་ལ་ཧཱུཾ་ཕཊ། འབུམ་ཕྲག་གསུམ་གྱིས་འགྲུབ་འགྱུར་ཏེ། །འགྲོ་བ་ཐམས་ཅད་འབེབས་བར་འགྱུར། །ོཾ་མཧཱ་ཅི་ལི་ཙི་ལི་ཧཱུཾ་ཧཱུཾ་ཕྲུཾ་ཕཊ། །འབུམ་ཕྲག་གཅིག་ནི་བཟླས་པ་ཡིས། །སྐྱེས་སོགས་རིང་བོ་ནས་ཀྱང་འབེབས། །ོཾ་བ་ཏ་ལི་བ་ཏ་ལི་ཧཱུཾ་ཕཊ། རྣལ་འབྱོར་འབུམ་ཕྲག་གསུམ་དུ་ནི། །བཟླས་པས་སྔོན་དུ་བསྙེན་པ་བྱ། །ཡི་དྭགས་འབྱུང་པོ་གསང་བ་སོགས། །ལྷ་རྣམས་ཐམས་ཅད་འབེབས་པར་བྱེད། །ོཾ་པ་ཏ་ནི་པ་ཏ་ནི་ཧཱུཾ་ཕཊ། རྣལ་འབྱོར་པ་ཡིས་འབུམ་ཕྲག་གཅིག་།བཟླས་པས་སྔོན་དུ་བསྙེན་པ་བྱ། །ཆུ་དང་བོང་བ་རྡོ་དང་ནི། །ཤིང་རྣམ་ཀུན་ལ་འབེབས་པར་བྱེད། །དཀྱིལ་འཁོར་སྔོན་དུ་སློབ་དཔོན་གྱིས། །སྔོན་དུ་བསྙེན་པ་བྱས་ནས་ནི། །ཤིན་ཏུ་ངུལ་ཞིང་བརྟགས་པ་ཡིས། །དེ་འོག་དཀྱིལ་འཁོར་དེ་ཉིད་བསམ། །ལྷ་ནི་མཉེས་པར་མ་བྱས་ན། །བདག་ཉིད་ལ་ནི་ཅོ་འདྲི་ཡིན། །ོཾ་བེ་ཏ་ལི་རཀྵ་རཀྵ་ཧཱུཾ་ཧཱུཾ་ཧཱུཾ་གྷྲཾ་ཕུཿ ་ཕཊ། ཐལ་བར་ལན་བདུན་བར་དུ་ནི། །མངོན་པར་བཟླས་ཏེ་རོ་ལ་གཏོར། །ཉིན་ཞག་བདུན་དུ་བཞག་ན་ཡང ། །ཅིས་ཀྱང་ཟ་བར་མི་འགྱུར་རོ། །ོཾ་ཕུ་རུ་ཕུ་རུ། མཾ་ཏྲེ་ཛཿ ཧཱུཾ་ཕུཿ ཕཊ། །སྐུད་པ་དམར་ལ་བརྒྱད་བརྒྱ་རུ། །ཡོངས་སུ་བཟླས་དང་ལྡན་པ་ཡིས། །གང་གི་མགྲིན་པར་བཅིངས་གྱུར་ན། །ལྕེ་སྤྱང་བཞིན་དུ་འཁྱམ་པར་འགྱུར། །སྐུད་པ་དང་ནི་བྲལ་གྱུར་ན། བདག་ཉིད་ 109b འདོད་པ་བཞིན་དུ་བྱེད། བྱིན་རླབས་རིམ་པའི་རྣལ་འབྱོར་གྱིས། །མཉམ་པར་གཞག་པས་བསྒོམ་ཞིང་བཟླས། །ཟླ་བའི་དཀྱིལ་འཁོར་དབུས་གནས་པར། །རྡོ་རྗེ་མཁའ་འགྲོ་མ་བསམ་བྱ། །རྒྱན་རྣམས་ཀུན་གྱིས་བརྒྱན་པའི་སྐུ། །འོད་ཟེར་སྣ་ཚོགས་ཤིན་ཏུ་འབར། །རླུང་གི་དཀྱིལ་འཁོར་དབུས་གནས་པར། །མངོན་དུ་འགྲུབ་པ་བྱ་བར་བསམ། །རྐང་མཐིལ་གཉིས་སུ་རླུང་གི་ནི། །ས་བོན་སྟན་དུ་བསྒོམ་པར་བྱ། །སྒྲ་དང་ཐིག་ལེར་ལྡན་པ་ནི། །རླུང་གི་ས་བོན་དབུས་གནས་པར། །རླུང་གིས་བསྐོར་བ་སྙིང་གར་བཞག། ཐམས་ཅད་ཁ་དོག་སྔོན་པོར་བསམ། །རང་གི་དབུགས་ཀྱི་རྩེ་མོ་ཡི། །རླུང་གི་བརྡ་རུ་སྦྱར་བར་བྱ། །ོཾ་ཡུཾ་པྲེ་ཏ་བཱ་ཡུ་ཨ་མོ་ཀ་སྱ་ཡུཾ་ཕཊ། རྣལ་འབྱོར་པ་ཡི་གསང་སྔགས་འདི། །བརྒྱད་བརྒྱར་བཟླས་ན་འགྲུབ་པར་འགྱུར། །འགྲོ་བ་ལ་སོགས་བཟུང་ནས་སུ། །དུག་དང་ཁྲག་གིས་བྲི་བར་བྱ། །རྣལ་འབྱོར་མཆོག་ནི་བཟུང་ནས་སུ། །ཐམས་ཅད་གནས་ནས་བྲི་བར་བྱ། །བརྒྱད་བརྒྱ་རུ་ནི་བཟླས་པ་ཡི། །སྐུད་པ་དམར་པོས་དཀྲིས་ནས་ནི། །ཤིང་གི་རྩེ་མོར་གདགས་པར་བྱ། །རླུང་གིས་སྤུར་བར་བསྒོམ་པ་སྟེ། །གང་དུ་རླུང་ནི་གཞོལ་འགྱུར་བ། །དེ་ཡི་ཕྱོགས་སུ་འགོ་བར་འགྱུར། །རྣལ་འབྱོར་པ་ཡིས་བསྐྲད་པས་ནི། །འགྲུབ་འགྱུར་འདི་ལ་ཐེ་ཚོམ་མེད། །ཟླ་བའི་དཀྱིལ་འཁོར་དབུས་གནས་པར། །རྡོ་རྗེ་མཁའ་འགྲོ་མར་བསམས་ཏེ། །བདག་གི་ལུས་ནི་བསྒོམས་ནས་སུ། །བློ་དང་ལྡན་པས་སྔགས་བཟླས་ན། །གཉིས་མེད་གང་ 110a ༄#། །བའི་གཏོར་མ་ནི། །དེ་ཡི་དབུས་སུ་སྦྱར་བར་བྱ། །ོཾ་བཇྲ་\?\་ཌཱ་ཀི་ནཱི་དེ་ཤ་མཱ་ཀཪྵ་ཡ་ཨཱ་ཀཪྵ་ཡ་ཨོཾ་ཧྲཱིཿ ཧཱུཾ་ཕེཾ་ཕྲུང་ཕུཿ ཕཊ། མཎྜལ་དམར་པོར་བྱུགས་ནས་ནི།། སེང་ལྡེང་ཕུར་བུ་བརྒྱད་ཀྱིས་གདབ། །དབུས་སུ་མིང་ནི་བྲིས་ནས་སུ། །གཏོར་མ་ཡོངས་སུ་གང་བར་ལྡན། །སྐུད་པ་དམར་ལ་བཟླས་ནས་ཀྱང ། །ལན་བདུན་བསྐོར་བས་དྲང་བར་བྱ། །རྡོ་རྗེ་ལྕགས་ཀྱུས་དྲང་ནས་སུ། །གསང་སྔགས་འདིས་ནི་བཟླས་བྱས་ན། །དཔག་ཚད་བརྒྱ་ཡི་ཕྱི་རོལ་ནས། །ལས་འདིས་བཟློག་ནས་འགུགས་པར་འགྱུར། །མཎྜལ་གྱི་ནི་དབུས་དག་ཏུ། ། ལས་འདིས་འགྲུབ་འགྱུར་ཐེ་ཚོམ་མེད། །ཉི་མའི་དཀྱིལ་འཁོར་དབུས་གནས་པར། །མཁའ་འགྲོ་དྲག་མོར་བསམ་བྱ་བ། །རང་གི་ལུས་ནི་རྣལ་འབྱོར་མར། །མཁས་པ་ཡིས་ནི་བསྒོམས་ནས་སུ། །ཉ་མོ་གཅིག་ནི་བཟུང་ནས་སུ། །མཁའ་འགྲོའི་གཏོར་མ་བྱིན་གྱིས་བརླབ། །སྔགས་དང་བཅས་པའི་མིང་བྲིས་ལ། །ཉ་ཡི་ཁ་རུ་བཅུག་ནས་ནི། །རྐང་པས་མགོ་ནི་རབ་མནན་ལ། །བརྒྱད་བརྒྱ་རུ་ནི་བཟླས་པར་བྱ། །ོཾ་ཕྲུཾ་ཕྲུཾ་ཨ་མུ་ཀ་སྱ་མུ་ཁཾ་བནྡྷ་བནྡྷ། ཧྲཱི་ཧྲཱི་ཧྲཱི། པུཾ་ཕཊ། དེ་ནི་བཟླས་པ་ཙམ་གྱིས་ནི། །བྱ་བ་ཐམས་ཅད་བཅིང་བར་འགྱུར། །ཐམས་ཅད་ཆུ་ལ་བྱ་བ་སྟེ། །ལས་གཞན་ཆོ་ག་བཤད་པར་བྱ། །སྔགས་འདི་རབ་ཏུ་སྦྱར་ནས་ནི། །བག་ཟན་གྱིས་ནི་དྲིལ་བར་བྱ། །གང་དུ་ཉ་ནི་གནས་པ་ཡི། །ཉ་ཡི་ཁ་རུ་གཞུག་པར་བྱ། 110b མཁའ་འགྲོའི་གཏོར་མ་བྱིན་བརླབས་ཏེ། །རིལ་བུ་བརྒྱད་བརྒྱ་བྱས་ནས་ནི། །ལན་རེ་བཟླས་ཏེ་ཟར་བཅུག་ན། །བྱ་བ་ཐམས་ཅད་བཅིངས་པར་འགྱུར། །རླུང་གི་དཀྱིལ་འཁོར་དབུས་གནས་པར། ། བདག་ཉིད་ཙཎྜ་ལི་ཡི་གཟུགས། །གཟུགས་རྣམས་ཐམས་ཅད་ཡོངས་རྫོགས་ཤིང ། །མེ་ལྟར་འབར་བ་བསམས་ནས་སུ། །གཉིས་མེད་གཏོར་མའི་ལས་རྣམས་ནི། །དེ་ཡི་དབུས་སུ་རབ་ཏུ་བྱ། ། ལྕི་བས་པདྨའི་གཟུགས་བྱས་པ། །མིང་དང་སྔགས་ཀྱིས་བཞག་པར་བྱ། །ོཾ་སྟམྦྷ་ཡ་སྟམྦྷ་ཡ་ཧཱུཾ། བྷ་གྒཾ་མུ་ཏྲཱཾ་ཕྲུ་ཕྲུཾ་ཕཊ། གསང་སྔགས་འདི་དང་མིང་དག་ནི། །རྐང་པ་གཡོན་པས་མནན་ནས་སུ།། ལན་གྲངས་བརྒྱད་བརྒྱར་བཟླས་ནས་སུ། །འགྲུབ་འགྱུར་འདི་ལ་ཐེ་ཚོམ་མེད། །ཆུང་མ་ཤིན་ཏུ་གཡོན་ཅན་རྣམས། །ལས་འདི་ཡིས་ནི་གདུལ་བར་བྱ། །མཐར་ནི་ཆུ་དང་འོ་མ་ཡིས། །བཀྲུས་ན་བཅིངས་པ་ལས་གྲོལ་འགྱུར། །རླུང་གི་དཀྱིལ་འཁོར་དབུས་གནས་པར། །ལྷ་མོ་རྡོ་རྗེ་མ་རུ་བསྒོམ། །ཁ་དོག་སྔོན་པོ་ཤིན་ཏུ་མཛེས། །འོད་ཟེར་མེ་དང་མཚུངས་པར་འབར། །ཡོངས་སུ་རྫོགས་ཤིང་མཛེས་པར་ལྡན། །རྒྱན་རྣམས་ཀུན་གྱིས་ཀླུབས་པ་སྟེ། །ཡི་དྭགས་ཀྱི་ནི་གདན་ལ་བཞུགས། །ཧ་ཧར་བཞད་པས་འཇིགས་སུ་རུང ། །གཉིས་མེད་གང་བའི་གཏོར་མ་ཡི། །ལས་ནི་དེ་རུ་བྱས་ནས་ཀྱང ། །འབྲས་ཕྱེ་ལ་སོགས་ཁྱད་པར་ལས། །པདྨའི་དབྱིབས་ནི་བྱས་ནས་སུ། །ཁྱི་ཡི་སྤུ་ཡིས་དགང་བར་བྱ། །མིང་དང་སྔགས་སུ་སྦྱར་ནས་སུ། །གཉིས་མེད་གཏོར་མའི་ལས་རྣམས་ 111a ༄#། །ནི། །ལས་དེར་བྱིན་གྱིས་བརླབ་པར་བྱ། །ོཾ་ཀྲོ་དྷེ་ཤཝ་རི་ཕྲུ་ཕྲུཾ་ཕཊ། བརྒྱད་བརྒྱ་རུ་ནི་བཟླས་ནས་སུ། །རྡོ་རྗེ་གསང་བར་གཞུག་པར་བྱ། །ལས་འདི་སྦྱར་ཞིང་གཟིར་བ་ཡིས། །བྷ་ག་དག་ནི་བཟློག་པར་འགྱུར། །ལས་འདིས་ཤིན་ཏུ་འགྲུབ་པ་སྟེ། །ཕྱུང་ན་དེ་ལས་ཐར་བར་འགྱུར། །ཆུང་མ་ཤིན་ཏུ་གདུལ་དཀའ་ལ། །ལས་ནི་དེ་ལྟར་སྦྱར་བར་བྱ། ། ཟླ་བའི་དཀྱིལ་འཁོར་དབུས་གནས་པར། །ལྟེ་བར་བདུད་རྩིའི་ཡི་གེ་བསྒོམ། །རྩ་རྣམས་ཀུན་ལས་དྲངས་ནས་སུ། །བདུད་རྩིའི་ཆུ་ནི་འཛག་པར་བྱ། །བནྡུའི་མེ་ཏོག་རྒྱས་པ་ཡི། །དབུས་སུ་ལྕགས་ཀྱུའི་ཡི་གེ་སྟེ། །ཁ་དོག་དམར་པོ་ཤིན་ཏུ་འབར། །གསང་ཞིང་གསང་བས་བསྒོམ་པར་བྱ། །ཁྲོ་བོའི་སོར་མོ་རྩེ་མོ་རུ། །བདུད་རྩིའི་ཡི་གེ་བསམས་ནས་ནི། །སོར་མོ་འདི་ཡིས་བསྐྱོད་པར་བྱ། །སྦྱོར་པ་གསུམ་ནི་བསམས་པ་ཡིས། །དེ་ཡི་དབུས་ཀྱི་གནས་རྣམས་སུ། །བདུད་རྩིའི་ཆུ་ནི་འཛག་བར་བྱ། །ཆུང་མ་ཤིན་ཏུ་གདུལ་དཀའ་ལ། །འདི་ཡིས་བྷ་ག་བརྟག་པར་བྱ། །འོད་ཟེར་ཅན་དང་བླ་མར་བྱ། །སྨྱོ་བྱེད་ཡན་ལག་ལྔ་དང་བཅས། །གུ་གུལ་ཆེན་པོའི་ཆ་དང་བསྲེས། །མར་ནག་ཆེན་པོས་བསྐོལ་བར་བྱ། །སྔགས་པས་བདུད་རྩིའི་ཆུ་དང་ནི། །ལྕེ་ཡི་དབང་པོས་མྱང་བར་བྱ། །འདིར་ནི་སྨྱེ་འགྱུར་ཐེ་ཚོམ་མེད། །མར་ཟོས་པས་ནི་གྲོལ་བར་འགྱུར། །ཡི་དྭགས་གོས་ནི་མ་ལྷུང་བས། །མར་མེ་ཡི་ནི་སྡོང་དུ་བྱ། །ཀླུ་དབང་\?\་ 111b གི་ནི་གོང་དུ་བཟུང ། །རྐང་གི་མར་གྱིས་སྤར་བར་བྱ། །གཏོར་མ་ཡི་ནི་གནས་དག་ཏུ། །མཁའ་འགྲོ་མ་ཡི་སྙིང་སྔགས་ཀྱིས། །དུ་བ་དག་ནི་དབབ་པར་བྱ། །དུར་ཁྲོད་དུ་ནི་གཏོར་བྱིན་ལ། །བརྒྱད་བརྒྱ་རུ་ནི་བཟླས་ནས་སུ། །ལམ་གྱི་བཞི་མདོར་ཤིང་གཅིག་དྲུང ། །གང་ལ་དུ་བ་བྱུགས་པ་དེས། །མཁའ་འགྲོ་མ་ཀུན་མཐོང་བར་འགྱུར། །ལྷག་མའི་སྣོད་ནི་གཉིས་བཟུང་ལ། །དུར་ཁྲོད་ཀྱི་ནི་སོལ་བ་ཡིས། །ཚ་བའི་རྫས་ལ་སྦྱར་ནས་ནི། །བྱ་རོག་སྒྲོ་རྩས་བྲི་བར་བྱ། །ོཾ་ཀི་རི་ཀི་རི་ཀྲོ་དྷེ་ཨ་མུ་ཀཾ་ཕྲུཿ ་ཕྲུཾ་ཕཊ། སྣོད་ནི་གཉིས་ལ་སོ་སོ་རུ། །གཟུགས་གཉིས་མིང་དང་བཅས་བྲིས་ལ། །གཉིས་མེད་གཏོར་མ་བྱིན་ནས་ནི། །ཁྲོ་བོས་བཀང་སྟེ་དྲུད་པར་བྱ། །ོཾ་ཀ་ལི་བརྟཱ་ལི་བརྟཱ་ལི་ཀྲོ་དྷ་མུ་ཁེ་ཨ་མུ་ཁེ་ཨ་མུ་ཀ་སྱ་ཧི་ལི་ཧི་ལི་བཛྲ་ཏིཥྛ་མུ་ཁི་ཕྲུཾ་ཕྲོཾ་ཕྲོཾ་ཕཊ། བརྒྱ་ཕྲག་གཅིག་ཏུ་བཟླས་ནས་ནི། །མྱུར་དུ་འཐབ་རྩོད་འབྱུང་བར་འགྱུར། །གཉིས་མེད་གཏོར་མར་ལྡན་པ་ཡི། །དབང་བསྐུར་ན་ནི་ཞི་བར་འགྱུར། །སྦྱོར་བའི་གདན་གྱི་རབ་ཏུ་བྱེད་པ་ལས། རིམ་པར་ཕྱེ་བ་གསུམ་པའོ།། །།གཉིས་མེད་སྦྱོར་བའི་སྙིང་པོ་སྟེ། །གཉིས་མེད་མིང་གིས་བརྗོད་པ་ཡིན། །སྦྱོར་བ་ཇི་ལྟར་བརྩམ་བགྱི་བ། །རོལ་མོ་དག་ནི་ཉན་པར་འཚལ། ། གཉིས་མེད་སྦྱོར་བ་དེ་ཉིད་ཀྱི། །རྡོ་རྗེ་དྲིལ་བུའི་ཕྱག་རྒྱ་དག། སོ་སོར་བཟུང་བའི་དེ་ཁོ་ན། །ཡང་དག་ཇི་བཞིན་རྡོ་རྗེས་ཉོན། །དེ་ཉིད་ཇི་བཞིན་བདག་ཉིད་དང ། །ཆོས་ཀྱི་དྲིལ་བུ་ལྷ་མོ་འོ། ། 112a ༄#། །ཁ་སྦྱོར་སྦྱོར་བ་ཕྱག་རྒྱ་སྟེ། །ཐབས་ནི་དེ་རུ་ཐིམ་པའོ། །དང་པོར་རེ་ཞིག་རྣལ་འབྱོར་བས། །རྡོ་རྗེ་ཐལ་མོ་དམ་བཅིངས་ནས། །སེམས་ཅན་ཀུན་ལ་རྗེས་བརྩེ་བས་དག་པ་རྣམ་གསུམ་བརྗོད་པར་བྱ། །ོཾ་སཝཱ་བྷཱ་ཝ་ཤུདྡྷཿ ་སརྦྦ་དྷརྨཱཿ ་སྲ་བྷཱ་ཝ་ཤུདྡྷོཉྷཾ། ཨོཾ་བཛྲ་ཤུདྡྷཿ ་སརྦྦ་དྷརྨྨཱ་བཛྲ་ཤུདྡྷོཉཧཾ། ཨོཾ་ཡོ་ག་ཤུདྡྷཿ ་སརྦྦ་དྷརྨྨ་ཡོ་ག་ཤུདྡྷོཉྷཾ། གཟུང་དང་འཛིན་པ་ལས་གྲོལ་བས། །སྦྱིན་པའི་ར་བས་སྦྱིན་པར་བྱ། །རྣལ་འབྱོར་ལྡན་པའི་སེམས་ཀྱིས་ནི། །ཐམས་ཅད་རྩ་བཞིན་བལྟ་བར་བྱ། །སེམས་ཅན་ཀུན་ལ་མི་འཇིགས་སྦྱིན། །འགྲོ་རྣམས་གཙེ་བར་མི་བྱ་སོགས། །སེམས་ཅན་དོན་ནི་དགག་མི་བྱ། །སྟེང་དུ་ཚུལ་ཁྲིམས་དྲ་བའོ། །གཞན་ལ་གནོད་པ་འགོག་ལ་སོགས། །བཟོད་པའི་ཕུར་བུ་འོག་ཏུ་གདབ། །ཕུར་བུར་བ་དྲ་བ་ཡིས། །སྡང་བའི་བདུད་དང་དགྲ་རྣམས་བསྐྲད། །བདུད་ནི་བདུད་དུ་འཆར་མི་འགྱུར། །རང་གི་སེམས་ཀྱིས་བསྡམས་པའོ། །རང་གི་རང་སེམས་བཏུལ་བ་ན། །བདུད་ཀྱིས་འཚེ་བར་ག་ལ་འགྱུར། །མཉམ་ཉིད་སེམས་ཀྱི་དྲི་ཡིས་ནི། །གྲུ་བཞི་པ་རུ་བྱུག་པར་བྱ། །ལུས་ལ་སྟེ་འཇོག་ཙནྡན་བྱུག་།སེམས་ནི་མཉམ་པར་གནས་པ་སྟེ། །བཟོད་པའི་མེ་ཏོག་རྣལ་འབྱོར་པས། །འབད་དང་ལྡན་པས་དགྲམ་པར་བྱ། །མཉམ་ཉིད་བསྒོམས་པའི་བདུག་པ་ཡིས། །རང་བཞིན་དག་པས་བདུག་པར་བྱ། །ཤེས་རབ་མར་མེའི་སྣང་བ་སྟེ། །ཁམས་གསུམ་གྱི་ནི་ 112b མུན་པ་རྣམས། །མར་མེ་འདི་ཡིས་བཅོམ་ནས་སུ། །ཇི་ལྟར་འདོད་བཞིན་སྣང་བར་བྱ། །སེམས་ཀྱིས་མི་འཇིགས་སྦྱིན་པ་ཡིས། །དབུགས་མ་ཕྱིན་པ་དབུགས་དབྱུང་བྱ། །མཆོད་པའི་དུས་དང་ཁྱད་པར་དུ། །གཏོར་མའི་དུས་སུ་རབ་ཏུ་སྦྱར། །ཡིད་དུ་འོང་བའི་ས་ཕྱོགས་སུ། །བདེ་བའི་སྟན་ལ་འདུག་ནས་སུ། །བདག་ཉིད་རྡོ་རྗེར་བསྐྱེད་ནས་ནི། །ཤེས་རབ་དྲིལ་བུ་ཞེས་བྱར་སྤྲུལ། །བར་དུ་ཁྲུ་གང་བཞག་ནས་སུ། །མཉམ་ཉིད་ལྟ་བས་བལྟ་བར་བྱ། །སྙིང་གར་ཧཱུཾ་ནི་བསྒོམ་བྱས་ལ། །ཐམས་ཅད་རིག་པས་ཀུན་སྟོང་བྱ། །ཁམས་གསུམ་ཟད་པར་བྱས་ནས་ནི། །ཐམས་ཅད་ནམ་མཁར་ཡང་དག་གནས། །སྔོན་བཞིན་མཚན་ཉིད་ཡང་དག་ལྡན། །མཉམ་ཉིད་སྟོང་པར་བསམས་ནས་སུ། །ཕོ་བྲང་ཡངས་པར་ཅི་འདོད་པར། །རི་རབ་རྩེ་མོར་བསམ་པར་བྱ། །ལྷ་ནི་ཉི་ཤུ་རྩ་བརྒྱད་ལྡན། །རྡོ་རྗེ་སྔོན་དུ་བསྟན་པ་བཞིན། །འོད་ཟེར་སྣ་ཚོགས་འབར་བ་ཡི། །ཧཱུཾ་གི་ཐིག་ལེ་ལས་བྱུང་བ། །ཟླ་བའི་དཀྱིལ་འཁོར་དབུས་སུ་ནི། །མི་གཡོ་རྡོ་རྗེ་བསྒོམས་ནས་སུ། །རྡོ་རྗེ་སེམས་དཔའི་རང་བཞིན་དུ། །བདག་གི་ལུས་ནི་སྤྲུལ་པར་བྱ། །ཡི་གེའི་དགོད་པས་བཀོད་ནས་སུ། །མཁས་པས་གོ་ཆ་བྱས་ནས་ཧཱུཾ། །སངས་རྒྱས་ལྔ་ཡིས་བརྒྱན་པ་སྟེ། །གངས་དང་ཀུན་ད་ཟླ་བའི་མདོག། ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་རྣམས་ཀུན་གྱིས་ཀླུབས་པ་སྟེ། །ཕྱག་རྒྱ་ཆེན་པོ་སྙིང་པོར་བཅས། །གོ་འཕང་མཆོག་ནི་བསྒོམ་པར་བྱ། །འོད་ཟེར་སྣ་ཚོགས་འབར་བ་ 113a ༄#། །ལ། །སངས་རྒྱས་སྤྲིན་ནི་རྣམ་པར་འཕྲོ། །དངོས་པོ་སྒོམ་པ་བསྒོམས་ནས་སུ། །ཧཱུཾ་གི་སྒྲ་ཡིས་དགང་བར་བྱ། །རང་ཉིད་ཇི་ལྟར་འདོད་སེམས་ཀྱིས། །ཡེ་ཤེས་ས་བོན་བཟླས་པར་བྱ། །བཙོ་མའི་གསེར་ལྟར་ཤིན་ཏུ་འབར། །སེམས་ཅན་ཀུན་གྱི་དོན་ལ་ཆགས། །དེ་ནས་སྟོང་པའི་མཚན་ཉིད་ནི། །སྔར་གྱི་མཚན་ཉིད་བདག་ཉིད་ཅན། །ཟླ་བའི་དཀྱིལ་འཁོར་དབུས་གནས་པར། །སྔར་\?\་མཚན་ཉིད་ཀུན་རིག་པས། །ཉི་ཤུ་རྩ་གསུམ་ལྷ་རྣམས་ཀྱིས། །དྲིལ་བུའི་བདག་ཉིད་བསྒོམ་པར་བྱ། །འོད་ཟེར་སྣ་ཚོགས་འབར་བ་ལས། །སངས་རྒྱས་འོད་ནི་རྣམ་པར་སྤྲོ། །དེ་ལྟར་བསྐྱེད་\?\་ལུས་རྣམས་ནི། །ཤེས་རབ་ཕ་རོལ་ཕྱིན་མས་བསྐྱེད། །ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་རྣམས་ཀུན་གྱིས་རྣམ་པར་ཀླུབས། །ཁ་དོག་ཅུང་ཟད་འདྲེས་པའི་སྐུ། །སངས་རྒྱས་ལྔ་ཡིས་མངོན་པར་བརྒྱན། །ཡི་གེ་བརྒྱད་ཀྱི་སྔགས་རྣམས་ནི། །ཡན་ལག་བརྒྱད་དུ་དགོད་པར་བྱ། །ཕྱག་གཉིས་ཕྱག་རྒྱ་ཆེན་པོ་སྟེ། །གོ་འཕང་མཆོག་ནི་བསྒོམ་པར་བྱ། །ཱ་ལི་ཀཱ་ལི་ལས་བྱུང་བའི། །དེ་ཡི་ས་བོན་བཟླས་བར་བྱ། །འདོད་ཆགས་སེམས་ཀྱི་སྟོབས་ཀྱིས་ནི། །བཙོ་མ་གསེར་གྱི་འོད་དང་བཅས། །སེམས་ཅན་བསྒྲལ་ཕྱིར་ཀུན་ཏུ་འཁྱུད། །ནུ་མ་འཁྱུད་ཅིང་ཞལ་གཉིས་འཇིབ། །རྡོ་རྗེ་སོར་མོའི་རྩེ་མོར་ནི། །བདུད་རྩིའི་ཡི་གེ་བསམས་ནས་ནི། །ལྷ་མོའི་གཡོན་གྱི་ཆ་རུ་ནི། །བསྟན་པའི་རྩེ་མོར་གཟུང་བར་བྱ། །བཅུ་དང་ 113b བརྒྱད་ཀྱི་གནས་རྣམས་ནི། །ཀུན་ནས་བདུད་རྩི་གང་གནས་པ། །མཛུབ་མོ་འདི་ཡིས་བསྐྱོད་པ་ཡིས། །བདུད་རྩིའི་ཆུ་ནི་འཛག་པར་འགྱུར། །གཉིས་ཀྱི་ཀུན་སྤྲོད་བཏང་ནས་སུ། །ཤར་གྱི་ཕྱོགས་སུ་བལྟ་ཞིང་བསྐྱོད། །རོལ་པའི་སྟོབས་ཀྱིས་ལྷ་མོ་ནི། །རྡོ་རྗེ་རྐང་པའི་སྟོབས་ཀྱིས་མནན། །དྲིལ་བུ་གཡོན་གྱི་རླུང་མནན་པ། །ནུ་མ་ལག་པ་གཉིས་ཀྱི་གཟིར། །སྒེག་ཅིང་བཞད་པའི་བཞིན་ཅན་ཏེ། །འོག་མས་གནོན་པོ་བཙིར་བར་བྱ། །དྲིལ་བུ་ལག་གཉིས་གསང་བར་སྦྱོར། །དེ་བཞིན་ས་བོན་གཉིས་མེད་བཟླས། །ཤར་ཕྱོགས་སུ་ནི་བསྐྱོད་པ་ཡིས། །སེམས་ཅན་ཕ་རོལ་སྒྲོལ་བར་འགྱུར། །ལྷ་མོ་གཡོན་པ་\?\་ནས་སུ། །ལྷོ་རུ་ཁ་ནི་བལྟ་བར་བྱ། །རྡོ་རྗེ་ཡང་ནི་བསྐྱོད་ནས་སུ། །རྐང་མཐིལ་གཉིས་ཀྱི་དེ་བཞིན་བཙིར། །དྲིལ་བུ་ལག་པ་གཉིས་ཀྱིས་ནི། །རྐེད་པ་བསྡམས་ཏེ་བཙིར་བར་བྱ། །རྡོ་རྗེ་གཡས་\?\་ནུ་མ་དང ། །དེ་བཞིན་གསང་བར་རྩེ་བར་བྱ། །རྡོ་རྗེ་དྲིལ་བུའི་ལུས་དག་ནི། །ཡང་དང་ཡང་དུ་སྤྲད་པར་བྱ། །ས་བོན་གཉིས་ནི་བཟླས་པ་ཡིས། །ལྷོ་ཕྱོགས་སེམས་ཅན་སྒྲོལ་བར་འགྱུར། །ནུབ་ཕྱོགས་སྙིང་པོའི་རྐང་སྟབས་ཀྱིས། །ལྷ་མོ་ནུབ་ཏུ་བལྟ་བར་བྱ། །རྡོ་རྗེ་ཡི་ནི་ཕྱོགས་གཅིག་གིས། །གཡས་ཀྱི་བརླ་ནི་མནན་པར་བྱ། །མགྲིན་པའི་རྒྱབ་ནས་གཉིས་འཁྱུད་དེ། །དྲིལ་བུའི་ལྕེ་ནི་བསྐྱོད་ནས་སུ། །རྡོ་རྗེ་ལྕེ་ལ་རེག་པར་བྱ། །དེ་བཞིན་སྦྱར་ནས་གཉིས་ཀ་བཟླས། །རྡོ་རྗེ་མཉམ་པའི་དབུས་སུ་ནི། །ལག་པ་གཉིས་ཀྱིས་བསྡམ་པའོ།། 114a ༄#། །དྲིལ་བུའི་ལག་པ་གཉིས་ཀྱིས་ཀྱང ། །རྣ་བའི་དྲུང་བར་གཟུགས་པར་བྱ། །གཉིས་ཀའི་མཆུ་ནི་ཀུན་སྦྱར་ནས། །དེ་ཡི་བདུད་རྩི་བཏུང་བར་བྱ། །རྣལ་འབྱོར་པ་ཡིས་སྔགས་བཟླས་ནས། །རྡོ་རྗེ་དྲིལ་བུ་དཀྲོལ་བར་བྱ། །སེམས་ཅན་ཐམས་ཅད་བདེ་གྱུར་ཅིག་།ཀུན་ཀྱང་འཚེ་བ་མེད་པར་ཤོག། གང་གི་ལམ་ནས་འགྲོ་བ་ཡིས། །སངས་རྒྱས་ཉིད་དུ་འགྲུབ་གྱུར་ཅིག་།སྐད་ཅིག་ཚུལ་གྱི་རྣལ་འབྱོར་དང ། །སྐད་ཅིག་ཚུལ་གྱིས་ཕྱག་རྒྱ་ཅན། །ཀུན་ནས་ཀུན་ཏུ་སྐད་ཅིག་སྟེ། །སྐད་ཅིག་གིས་ནི་གསང་སྔགས་སྟོན། །དྲིལ་བུ་ལྷ་རུ་སྦྱོར་བ་ཡིས། །མཁས་པ་ཡིས་ནི་བསྒོམ་པར་བྱ། །ཡི་གེ་བརྒྱད་ཀྱི་སྔགས་དག་ནི། །གནས་རྣམས་ཀུན་གྱི་ལྷ་ཉིད་དེ། །རང་ཉིད་ལྷ་མོད་བསམ་པ་བྱ། །སླར་ཡང་འདི་ཉིད་རབ་ཏུ་བྱ། །རང་གི་རྗེས་སུ་ཆགས་པའི་སེམས། །དེ་ནས་རྡོ་རྗེས་ཀུན་ཏུ་འཁྱུད། །དེ་ནས་བདག་ཉིད་རྡོ་རྗེ་རུ། །ཀ་ར་ནར་བཅས་བསམ་པར་བྱ། །རྡོ་རྗེ་ཡི་ནི་ང་རྒྱལ་གྱིས། །རྡོ་རྗེ་སེམས་དཔའ་བདག་ཅེས་བརྗོད། །ཆུ་ལས་བྱུང་བའི་མེ་ཏོག་ནི། །གསང་བའི་ནང་གི་མཚན་ཉིད་ལས། །རྩ་བ་མྱུ་གུ་མེ་ཏོག་སྟེ། །བན་དུ་ཀ་ནི་རྒྱས་པ་འདྲ། །ཐོང་ག་གཉིས་ཀྱི་ས་བོན་རྣམས། །ས་དང་རླུང་དག་ཉིད་ཡིན་ནོ། །འོག་ཏུ་ཆུ་ཡི་རང་བཞིན་ལ། །མྱུ་གུ་མེ་ཡི་ས་བོན་ནོ། །སྡེ་ཚན་གསུམ་པ་གང་ཡིན་པའི། །ཡི་གེ་གསུམ་པ་བཟུང་ནས་སུ། །དབྱུག་པ་ཕྱི་མོ་རྡོ་རྗེ་ཅན། །སྐ་བོ་ཆེ་ལ་སོགས་པས་དཀྲི། །ལྷ་མོའི་ 114b གཟུགས་སུ་བསམས་ནས་སུ། །ས་ཡི་ནང་དུ་ཐིམ་པར་བྱ། །དུས་མེའི་ཡི་དྭགས་མེར་སྦྱོར་ཅིང ། །ཡི་དྭགས་མེ་དང་དུས་མེ་སྦྱོར། །ལག་པ་གཉིས་ཀྱིས་ཁ་སྦྱར་བ། །མཐེ་ཆུང་མཐེ་བོས་མནན་ནས་སུ། །གསུམ་བོ་དག་ནི་རྩེ་མོར་སྦྱོར། །ཕྱག་རྒྱ་གཉིས་ཀྱི་མགོར་བཙུགས་ནས། །བདུད་རྩི་བཟའ་བའི་བསམ་བ་ཡིས། །གནོན་པོས་འོག་མ་བཙིར་བར་བྱ། །བཅུ་དང་བརྒྱད་ཀྱི་ལམ་དག་ནས།། དྲིལ་བུའི་བདུད་རྩི་བསྐུལ་བར་བྱ། །གཡོན་གྱི་ཆ་ནི་བན་དུ་ཀ། །ཆུ་འཛག་པ་ཡི་ཆ་བྱད་ཅན། །ཆུ་འཛག་\?\་བྱ་མཆུའི་དབྱིབས་ལྟ་བུ། །མཁའ་འགྲོ་མ་ཡི་ཚུལ་དག་ལ། །དེར་ནི་ཕྱག་རྒྱས་བསྐུལ་བར་བྱ། །རྡོ་རྗེ་གཡས་ཀྱི་ཆུ་དག་ནི། །རང་བཞིན་མཉམ་པའི་ཚུལ་དུ་བྱ། །ཐོང་ཀ་ལ་སོགས་གནས་ཀུན་ཏུ། །དེ་ནས་སོར་མོ་གདབ་པར་བྱ། །དེ་ནས་རྡོ་རྗེ་རྩེ་མོ་ནི། །ཕྱག་རྒྱ་གློ་རུ་སྦྱར་ནས་བྱ། ། གཉིས་ཀ་ཀུན་ཏུ་སྦྱར་ནས་ནི། །རྡོ་རྗེ་པདྨོ་བསྒུལ་བར་བྱ། །ཧཱུཾ་གི་སྒྲ་ཡིས་བཀང་ནས་སུ། །ལྷ་མོ་ཐམས་ཅད་ཚིམ་པར་བྱ། །དྲིལ་བུ་ཡི་ནི་དངོས་པོ་ཡིས། །ཱ་ལི་ས་བོན་ཀུན་ཏུ་སྦྱིན། །ཡེ་ཤེས་ས་བོན་རྡོ་རྗེ་རྩེ། །བདག་གི་ལྷ་ནི་མཉེས་པར་བྱ། །རྡོ་རྗེ་དྲིལ་བུ་ལུས་ཡིན་ཏེ། །ཕྱག་རྒྱ་ཁ་སྦྱོར་སྦྱར་བར་བྱ། །རྡོ་རྗེ་དྲིལ་བུའི་ཕྱག་རྒྱ་ཡང ། །དེ་ཁོ་ན་ཡིས་སོ་སོར་བཟུང ། །རྡོ་རྗེ་དེ་ཁོ་ན་བསྐྱོད་ལ། །དྲིལ་བུ་རང་\?\་དགར་དཀྲོལ་བར་བྱ། །རྡོ་རྗེ་སྦྲལ་\?\་བུ་རབ་སྦྱོར་ཏེ། །ཕྱག་རྒྱའི་དེ་ཉིད་སྦྱོར་བ་ཡིན། །ལུས་ནི་གཉིས་ཀ་མཉེས་པར་ཡིས། །སེམས་ཅན་ཕ་རོལ་སྒྲོལ་བར་འགྱུར། །གཉི་ག་ཡི་ནི་བདག་ཉིད་ 115a ༄#། །སེམས། །ཆུ་དེ་བྱིན་གྱིས་བརླབ་པར་བྱ། །སྒེག་ཅིང་བསྐྱོད་པར་གནས་བ་སྟེ། །བདེ་བའི་སྟན་ལ་འདུག་ནས་ནི། །རྡོ་རྗེ་རོལ་པའི་རྐང་པ་སྟེ། །དྲིལ་བུ་གཡོན་གྱི་བརླ་ཡིས་རོལ། །ལག་གཡོན་འཁྱུད་ཅིང་ནུ་མ་བཟུང ། །གཡས་ཀྱི་རྡོ་རྗེ་གསོར་བར་བྱ། །བཞད་ཅིང་ཁྲོ་དང་སྒེག་པ་ཡིས། །ཡང་དང་ཡང་དུ་སྤྲོ་བར་བྱ། །དྲིལ་བུ་བསྐྱོད་པའི་ཚུལ་གྱིས་ནི། །བརླ་ཡི་སྟན་ལ་འདུག་ནས་སུ། །རྐང་པ་གཡས་པས་དཀྲིས་ནས་ནི། །དཀུ་ཡི་གནས་སུ་གཞག་པར་བྱ། །མགྲིན་པ་གཅིག་གིས་འཁྱུད་ནས་ནི། །གཡོན་པས་དྲིལ་བུ་གསིལ་བར་བྱ། །ངོ་མཚར་བཅས་བཞད་སྒེག་པ་ཡིས། །ཡང་དང་ཡང་དུ་སྤྲད་པར་བྱ། །དེ་ནས་རྡོ་རྗེ་གླུ་བླང་ཞིང ། །སྣ་ཚོགས་ཧཱུཾ་ཞེས་བྱ་བར་འདོད། །བདུད་རྩིའི་ཆུ་ནི་བཟུང་ནས་སུ། །སླར་ཡང་གླུ་ནི་བླང་བར་བྱ། །འཁོར་ལོ་སྟོང་པ་སྙིང་པོ་མེད་པ་ནི། །སྙིང་པོ་དག་ནི་ཤིན་ཏུ་བསམས་པ་སྟེ། །རྣམ་པར་ཐར་པས་རབ་ཏུ་བསྒྲལ་བ་སྟེ། །དངོས་ལས་རྣམ་པར་གྲོལ་བ་རབ་ཏུ་འགྲུབ། །ཕན་ཚུན་ཀུན་ཏུ་འཁྱུད་པའི་སྦྱོར་བྱས་པ། ། དེ་ཡིས་དོན་ནི་ཡང་དག་བྱེད་པར་འགྱུར། །འཁོར་བའི་སྙིང་པོ་དག་ནི་མེད་པ་ལ། །རྣལ་འབྱོར་མ་ཡི་དབུས་སུ་སྙིང་པོ་འགྲུབ། །རྡོ་རྗེ་དྲིལ་བུའི་སྒྲར་བཅས་པས། །དེ་ནས་དེ་ལྟར་གླུ་བླང་བྱ། ། མཉམ་གཞག་སྒོམ་ཞིང་བཟླས་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ལས་ནི་གང་ཞིག་བསམ་པ་རྣམས། །དེ་ཡིས་ཐམས་ཅད་འགྲུབ་པར་འགྱུར། །སྨན་ལ་སོགས་པའི་ཁྱད་པར་ 115b རྣམས། །བསྐྱོད་པའི་སྦྱོར་བར་ལྡན་པར་བྱ། །གུར་གུམ་དང་ནི་གི་ཝང་དང ། །ཀ་ར་སྦྲང་རྩི་པ་ལ་ཤ། ཡུང་བ་རུ་རྟ་ཆ་མཉམ་པ། །སྦྱོར་བའི་གནས་སུ་བཟུང་བར་བྱ། །རྫས་དེ་དག་ནི་བསྒོས་ནས་སུ། ། རྟག་ཏུ་ཐིག་ལེ་བྱས་གྱུར་ན། །རྒྱལ་པོ་བློན་པོ་ཕོ་བྲང་བཅས། །ཐམས་ཅད་དུ་ནི་དགའ་བར་འགྱུར། །དབང་པོ་ལག་དང་རུ་རྟ་དང ། །རྨོངས་བྱེད་མ་དང་རངས་བྱེད་མ། །བདག་གི་ལྔ་དང་ཡན་ལག་ལྔ།། ལྔ་པོ་ཐམས་ཅད་ཆ་བསྙམས་ལ། །བཟའ་དང་བཏུང་དང་སོ་རྩི་དང ། །ཞིབ་ཏུ་བཏགས་ཏེ་སྦྱར་ལ་སྦྱིན། །ཐམས་ཅད་དུ་ནི་དབང་འགྱུར་ཏེ། །འཆི་བ་ན་ཡང་གཏོར་མི་འགྱུར། །ཁྲག་ནི་གཏོར་བའི་སྦྱོར་བ་ཡིས། །དབང་ལ་སོགས་པའི་ལས་རྣམས་འགྲུབ། །སྔགས་ནི་འབུམ་དུ་བཟླས་པ་ཡིས། །འགྲོ་བ་ཐམས་ཅད་རྨོངས་པར་འགྱུར། །བདག་གིས་ལུས་ལ་གཤེགས་གསོལ་བ། །བདག་ཉིད་ཇི་ལྟར་དགའ་བར་བྱ། །སེམས་ཅན་དོན་ཕྱིར་བློ་ལྡན་པས། །ཐམས་ཅད་དབང་དུ་འདུ་བར་སྒྲུབ། །བརྟུལ་ཞུགས་བྲམ་ཟེའི་ཉེ་དུ་མོས། །ཞི་བའི་ལས་ནི་སྐྱེ་བར་འགྱུར། །རྒྱལ་པོ་བླ་མ་གསང་བ་མོས། །རྒྱས་པའི་ལས་ནི་སྦྱར་བར་བྱ། །རྗེ་རིགས་དམངས་མོ་ཐམས་ཅད་ཀྱིས། །དབང་གི་ལས་ནི་བསྒྲུབ་པར་བྱ། །ལྷམ་མཁན་བཤན་པ་ཉ་པ་མོས། །མངོན་སྤྱོད་དུ་ནི་རབ་ཏུ་གྲགས། །ཀླ་ཀློ་གདོལ་པ་ཚོས་མཁན་མས། །སྦྱོར་བའི་དངོས་གྲུབ་བཤད་པ་ཡིན། །དེ་བས་འབད་པ་ཐམས་ཅད་ཀྱིས། །རྣལ་འབྱོར་བསྟན་བཅོས་གཟུང་བར་བྱ། །གཞན་ཡང་རྐང་སྟབས་བཅིང་པར་བྱ། །སེམས་ཅན་བསྒྲལ་ 116a ༄#། །བའི་གནས་ཡིན་ཏེ། །གཉིས་ནི་ཀུན་ཏུ་འདུས་ནས་བསྐྱོད། །དེ་ཉིད་ཕྱག་རྒྱ་ཞེས་བྱ་བཅིང ། །མཉམ་པའི་རྐང་སྟབས་དང ། །དབྱེ་བའི་སྟབས་དང ། ཟླུམ་པོའི་སྟབས་དང ། གསུམ་གནོན་པའི་སྟབས་དང ། རུས་སྦལ་གྱི་སྟབས་དང ། གཡས་བརྐྱང་དང ། གཡོན་བརྐྱང་དག། གནས་གཅིག་པ་དང ། འདུག་པ་དང ། བུང་བའི་ཆོ་གས་དང ། རྒྱ་མཚོའི་རླབས་པ་དང ། རི་བོ་དཔུང་པ་དང ། རྐང་པའི་འཕེན་པ་དང ། མཆོད་སྡོང་གི་ཚུལ་དང ། པུས་མོ་བཙིར་\?\་བ་དང ། བསྡུ་བའི་ཚུལ་དང ། མཉམ་དུ་གནས་པ་དང ། དུས་ཀྱི་མེ་དང ། སྙིང་པོ་དང ། དགའ་བས་གནས་པ་དང ། གཅིག་ཏུ་བསྡུ་བའོ། །རྐང་སྟབས་བསྐྱོད་པ་བཅོ་བརྒྱད་ནི། །མཆོད་པའི་དུས་སུ་སྦྱར་བར་བྱ། །ཡོན་ཏན་ཐམས་ཅད་འབྱུང་བའི་གནས། །རྣལ་འབྱོར་པ་ཡིས་མཚོན་པར་བྱ། སྙིང་གར་བཙིར་བ་དང ། རྐང་པ་སྦྱར་བ་དང ། ཕྲེང་བའི་ཚུལ་དང ། ནུ་མའི་ཚུལ་དང ། གཉི་ག་སྦྱར་ཏེ་བཟའ་བ་དང ། ཕྱེད་ཀྱིས་འཁྱུད་པ་དང ། །ལག་པ་གཉིས་སྦྱར་བ་དང ། གསང་པར་རེག་པ་དང ། ལུས་མཉེ་བ་དང ། ཀོས་ཀོ་ལ་རེག་པའོ། །ལག་པའི་ཐབས་ཉིད་བཅུ་དང་ནི། །ཞལ་ནི་བཞད་ཅིང་སྒེག་པ་དང ། །མཚན་ཉིད་སྣ་ཚོགས་ལྡན་པ་ཡིས། །དེ་ཡིས་ལས་རྣམས་འགྲུབ་པར་བྱ། །རྡོ་རྗེ་དྲིལ་བུའི་ཕྱག་རྒྱ་དག་།དེ་ཁོ་ན་ཡིས་སོ་སོར་བཟུང ། །གསང་བའི་རྡོ་རྗེ་དང་བྲལ་ན། །དྲིལ་བུས་ཇི་ལྟར་འབྲས་ 116b བུ་འགྲུབ། །རྡོ་རྗེའང་དྲིལ་བུ་དང་བྲལ་ན། །རྡོ་རྗེ་སྒྲུབ་པའང་རིང་བར་འགྱུར། །རྡོ་རྗེ་དྲིལ་བུའི་ཕྱག་རྒྱ་དག། དམིགས་ན་ཕ་རོལ་སྒྲོལ་བར་འགྱུར། །མཚན་མོ་ཟླ་བ་མེད་པ་དང ། ཉི་ན་མོ་ཟླ་བས་ཅི་ཞིག་ནུས། །དེ་བས་རྡོ་རྗེ་དྲིལ་བུ་དང ། །མཉམ་པ་དེ་ཉིད་གསལ་བར་བྱེད། །ཱ་ལི་ཀཱ་ལི་མཉམ་བསྒོམ་ནས། །རྣལ་འབྱོར་ཆེན་པོ་སྒྲུབ་པ་བོས། །ཱ་ལི་རྡོ་རྗེ་ཞེས་བྱར་བརྗོད། །ཀཱ་ལི་དེ་བཞིན་གཤེགས་མ་ཡིན། །ཱ་ལི་ཀཱ་ལི་མཉམ་སྦྱོར་བས། །དགོས་པ་ཐམས་ཅད་སྒྲུབ་པར་བྱེད། །སེམས་ཅན་དོན་རྣམས་མ་ལུས་པ། །ལྷ་ཡི་གཟུགས་ཀྱིས་བྲི་བར་བྱ། །ཕྱི་རོལ་ཤེས་རབ་ཐབས་རྣམས་ཀྱིས། ། ཇི་ལྟར་འཁོར་བ་སྒྲོལ་བར་འགྱུར། །རྨོངས་པ་ཕྱི་རོལ་སེམས་ལྡན་པས། །དེ་ཡི་དམ་ཚིག་བསྟན་པ་ཡིན། གསང་བའི་གསང་བ་གསང་བ་ཆེ། །རྟག་ཏུ་གབ་ཅིང་གསང་བ་ཡིན། །གང་ཞིག་ལུང་ནི་ཤེས་གྱུར་པ། །དེ་ཡི་རྣལ་འབྱོར་པ་རུ་གྲགས། །ཤེལ་ལྟར་དག་པའི་སེམས་ལ་ནི། །དེ་ཡི་ཆོས་ནི་བསྟན་པར་བྱ། །གལ་ཏེ་སེམས་ནི་ཐེ་ཙོམ་ན། །སྐད་ཅིག་གིས་ནི་དམྱལ་བར་ལྟུང་འདོད་ལ་དགའ་བ་མ་ཡིན་ཅིང ། །ལོངས་སྤྱོད་ཕྱིར་ནི་བསྟེན་མི་བྱ། །སེམས་ཅན་དོན་བྱའི་ཕྱིར་དུ་ནི། །རབ་ཏུ་འབད་པའི་དེ་ཉིད་དམིགས། །གལ་ཏེ་འདོད་དགའི་རྣལ་འབྱོར་པ། །ཐབས་ཀྱི་མཚན་ཉིད་གཅིག་ཡིན་ཏེ། །རང་དགའ་སྐད་ཅིག་ཡང་དག་འབྱུང ། །རྡོ་རྗེ་དྲིལ་བུ་སྦྱོར་བའོ། །སྐད་ཅིག་ཚུལ་གྱིས་བསྐྱེད་ནས་ནི། །བདག་གི་རྣལ་འབྱོར་བདག་ཅེས་བརྗོད། །གསང་ 117a ༄#། །བའི་ནང་གི་དབུས་གནས་པར། །ཱ་ལིའི་ས་བོན་གཟུང་བར་བྱ། །བདག་ཉིད་སྐད་ཅིག་རྣལ་འབྱོར་ནི། །ཧཱུཾ་ཞེས་བྱ་བ་འབད་དེ་བཟླ། །གང་ཡང་ཅུང་ཟད་ལུས་དང་ངག། ལྷ་ཡི་སྦྱོར་བར་ཐིམ་པར་བྱ། །ཐལ་སྦྱོར་ཕྱོགས་ནི་ཐམས་ཅད་དུ། །རྣལ་འབྱོར་རྣལ་འབྱོར་མ་དབང་གསོན། །དགྱེས་ཤིང་ཐུགས་ནི་ཚིམ་པ་ཡིས། །འགྲོ་བ་ཐར་བ་དེ་རིང་ཐོབ། །ེ་མ་ཆོས་ཀྱི་མཆོག་གི་ལམ། །ེ་མའོ་འཁོར་བ་གཅོད་པ་པོ། །ེ་མའོ་རྣལ་འབྱོར་གྲོལ་བའི་གནས། །ེ་མའོ་ངོ་མཚར་རྣལ་འབྱོར་ལམ། །ཚེས་གྲངས་མེད་ཅིང་རྒྱུ་སྐར་མེད། །སྨྱུང་བ་མེད་པར་བསྟན་པ་སྟེ། །འདི་ནི་བདེ་བའི་སྒྲུབ་པར་བརྗོད། །བདེ་བས་འཁོར་ལོ་གཅོད་པར་བྱེད། །ལས་ཀྱི་འཁོར་ལོའི་ཆོ་ག་རྣམས། །སྒྲུབ་པ་པོ་ཡི་སྣ་ཚོགས་འདོད། །ཟླ་བའི་དཀྱིལ་འཁོར་དབུས་གནས་པར། །དྲག་མོའི་གཟུགས་སུ་སྤྲུལ་པར་བྱ། །དེ་ཡི་གཟུགས་སུ་བསམས་ནས་ནི། །སྔོན་བཞིན་དེ་ཉིད་བསྒོམ་པར་བྱ། །སྔགས་པས་སུམ་འབུམ་བཟླས་ནས་སུ། །ཕྱི་ནས་ལས་ནི་བསྒྲུབ་པར་བྱ། །ཡི་གེ་ཉིས་འགྱུར་ཐིག་ལེ་དང ། །རྩ་བའི་སྒྲ་ནི་སྦྱར་བར་བྱ། །ཕྱག་འཚལ་སྲེག་པའི་མཐར་བཞག་པ། །རྣལ་འབྱོར་པ་ཡིས་སུམ་འབུམ་དུ། ། བཟླས་པས་སྔོན་དུ་བསྙེན་ནས་ནི། །དེ་ཉིས་ལས་རྣམས་འབད་དེ་སྒྲུབ། །ཡི་དྭགས་གོས་ལ་སོགས་བཟུང་ལ། །ལྷ་མོ་སེར་མོ་ཚོན་རྩི་བྲི། །ཕྱོགས་གཉིས་རོལ་པའི་རྐང་སྟབས་ཅན།། 117b དཀར་དང་སེར་ལ་འབར་བའི་ལུས། །ཧ་ཧར་བཞད་ཅིང་གཙིགས་པ་སྟེ། །སྐྲ་ནི་ལྷུག་པས་རྣམ་པར་བརྒྱན། །ཡི་དྭགས་ཀྱི་ནི་སྟན་ལ་བཞུགས། །སྐྱེས་བུའི་པགས་པའི་ན་བཟའ་མནབས། །དོན་ཡོད་གྲུབ་པའི་དབུ་རྒྱན་ཅན། །སྦྲུལ་གྱི་རྒྱན་གྱིས་རྣམ་པར་ཀླུབས། །གླང་པོའི་པགས་པའི་ཤམ་ཐབས་ཅན། །ཁ་ཊྭཾ་མཆོག་གིས་བརྒྱན་པ་སྟེ། །གཡོན་པ་ཆང་གི་ཐོད་པ་བསྣམས། །ཧཱུཾ་གི་སྒྲ་ཡིས་འཇིགས་པར་མཛད། །འོད་ཟེར་མེ་ལྟར་འབར་ཞིང་གསལ། །ལྷ་མོ་སེང་གེ་བསྒོམ་པར་བྱ། །ས་ཡི་དབུས་སོགས་སྦྱོར་བར་བྱ། །མཁས་པ་ཡིས་ནི་བསྒྲུབ་པར་བྱ། །སྔོན་གྱི་མཚན་ཉིད་ལྡན་པ་ཡིས། །གཉིས་མེད་གཏོར་མས་དགང་བར་བྱ། །གལ་ཏེ་འབྱོར་ན་ཡི་དྭགས་མོ། །ཐ་མལ་མེ་འབར་དབུས་སུ་ནི། །ཡམ་ཤིང་ཐང་ཤིང་ལས་བྱས་པའམ། །ཞོ་ཅན་ལྔ་ཡི་ཤིང་ལས་བྱ། །མཆོད་པ་སྣ་ཚོགས་རྒྱ་ཆེན་དང ། །ཤ་ཆེན་ལ་སོགས་བསྲེག་པར་བྱ། །སྦྲང་རྩི་ཁྲག་ལ་སྦགས་པ་དག། བརྒྱད་བརྒྱ་རུ་ནི་སྦྱིན་སྲེག་བྱ། །དེ་ལྟ་བསྲེགས་པ་ཙམ་གྱིས་ནི། །དེས་ནི་མཚན་མ་སྟོན་པར་འགྱུར། །ོཾ་སྨྲཾ་ཕྲུཾ་ཕུཿ ཕཊ། སྦྱིན་སྲེག་གི་རྩ་བའི་སྔགས་སོ། །ཐམས་ཅད་སྔར་བསྟན་བཞིན་དུ་བྱ། །དང་པོས་ནི་འགུལ་འགྱུར་ཏེ། །གཉིས་པ་ལ་ནི་བྲིས་གཟུགས་འགུལ། །གསུམ་པ་ལ་ནི་དྲི་ཆེན་འབྱུང ། །བཞི་པར་སེང་གེ་སྒྲ་སྒྲོགས་ཏེ། །ལྔ་པར་སྒྲུབ་པའི་གྲོགས་པོར་ནི། །སེང་གེའི་ཚུལ་དུ་བབས་ནས་སུ། །དྲག་པོའི་གཟུགས་ཅན་རྣམ་པར་གཙིགས། །འཇིགས་པའི་ 118a ༄#། །སྒྲ་ནི་སྒྲོགས་པར་བྱ། །དམ་ཚིག་ཕྱག་རྒྱ་སོགས་བྱིན་ནས། །གཏོར་མའི་མཆོད་པས་མཉེས་པར་བྱ། །ཇི་ལྟར་འདོད་བཞིན་གནས་རྣམས་དང ། །སྟན་ནི་བདག་གིར་མཛད་དུ་གསོལ། །དེ་ནས་ལྷ་མོ་དངོས་བསྟན་ནས། །བདག་གིས་བུ་ཡི་ཅི་ཞིག་སྒྲུབ། །འབད་དེ་དམ་ཚིག་བྱིན་ནས་སུ། །དེ་ལ་ཕྱག་རྒྱ་བསྟན་པར་བྱ། །དཔའ་བོས་དེ་ལྟར་བྱིན་ནས་སུ། །དེ་ལྟར་བདག་གི་འདི་མཛོད་ཅིག། བདག་ཉིད་ལ་ནི་ལྷ་མོ་འགྲུབ། །ོཾ་ཏིཥྛ་མ་མ་ཀུ་རུ་ཧཱུཾ་ཧཱུཾ་ཧཱུཾ་ཛ་ཛ་ཛ་སཝཱཧཱ། །སྤྱི་བོར་ལག་པ་བཞག་ནས་ནི། །གསང་སྔགས་འདིར་ནི་བརྗོད་པར་བྱ། །ཤ་དང་ཁྲག་དང་སྲན་ཆེན་བཅས། །གཉིས་མེད་གཏོར་མ་དེ་ལ་སྦྱིན། །ཡི་དྭགས་བགྲོད་པར་གནས་ནས་སུ། །རྟག་པའི་དུས་སུ་བྱིན་གྱིས་བརླབ། །ལྷ་མིན་ཀླུ་མོ་གནོད་སྦྱིན་མོ། །དྲི་ཟ་མིའམ་ཅི་དང་ནི། །ཡི་དྭགས་མི་མོ་གང་འདོད་པ། །བཀའ་བཞིན་སྐད་ཅིག་གིས་འགུགས་ན། །ཕྲན་ཚེགས་མི་མོ་སྨོས་ཅི་དགོས། །བཀའ་ནི་བསྒོ་བཙམ་གྱིས་སུ། །ལྷ་མིན་ཀླུ་ཡི་གནས་རྣམས་ཀྱང ། །གང་ཞིག་དོན་དུ་གཉེར་བ་རྣམས། །མྱུར་དུ་ཁྲིད་ནས་འོང་བར་འགྱུར། །གང་ཡང་དགྲ་རྣམས་གསད་པ་དང ། །བཀའ་བཞིན་དུ་ནི་སྐྲོད་པར་འགྱུར། །ལས་རྣམས་ཀུན་བྱེད་ལྷ་མོ་སྟེ། །མཁས་པ་ཡིས་ནི་བསྒྲུབ་པར་བྱ། །སྟག་མོ་ལྕེ་སྤྱང་འུག་པ་མོ། །ལས་དེ་ཉིད་ཀྱིས་བསྒྲུབ་བྱ་སྟེ། །དངོས་གྲུབ་དེ་ལྟར་ཤེས་བྱས་ལ། །མཁས་པ་ཡིས་ནི་བསྒྲུབ་པར་བྱ། །རྡོ་རྗེ་དྲིལ་ 118b བུའི་ཕྱག་རྒྱ་ནི། །དེ་བཞིན་ཉིད་ཀྱིས་སོ་སོར་བཟུང ། །རྡོ་རྗེ་དེ་ཉིད་ཀྱིས་སྦྱར་ཞིང ། །དྲིལ་བུ་ཆོས་ཀྱི་ལྷ་མོའོ། །ཕྱག་རྒྱ་གཉིས་སུ་ལྡན་པ་ཡིན། །ཀུན་རིག་པས་ནི་ཐམས་ཅད་སྒྲུབ། །སྦྱོར་བའི་གདན་ཞེས་བྱ་བའི་རབ་ཏུ་བྱེད་པ་བཞི་པའོ།། །།རྣལ་འབྱོར་ཕྱག་རྒྱ་སོགས་མཚན་པའི། །སློབ་དཔོན་དག་ནི་གཟུང་བྱ་བ། །སྔགས་དང་ཕྱག་རྒྱ་སྦྱོར་སོགས་ལྡན། །འཁོར་བ་ལས་སྒྲོལ་མཉམ་ཉིད་ཀྱི། །ཇི་བཞིན་ལམ་གྱི་འཁོར་བ་ལས། །སྒྲོལ་བའི་མཚན་ཉིད་རྡོ་རྗེ་ཉོན། །སློབ་དཔོན་ཡོན་ཏན་ཇི་འདྲ་ཞིང ། །བླ་མ་ཞེས་བགྱི་ཇི་ལྟར་ལགས། །སློབ་དཔོན་ཇི་ལྟར་སྦྱར་བར་བགྱི།། བཅོམ་ལྡན་ཇི་ལྟར་བལྟ་བར་བགྱི། །ཐམས་ཅད་བྱང་ཆུབ་མཚན་ཉིད་ཀྱི། །དེ་ཉིད་ཕྱག་ན་རྡོ་རྗེས་ཉོན། །བྱང་ཆུབ་རྫོགས་པའི་མཚན་ཉིད་དང ། །ལུས་ནི་སངས་རྒྱས་ཐམས་ཅད་ཀྱི། །ཆ་ཤས་བྱང་ཆུབ་ཡན་ལག་གནས། །དབུ་རྒྱན་རིགས་ནི་ལྔ་ཉིད་དེ། །བ་སྦུ་རྣམས་ནི་དགྲ་བཅོམ་མོ། །འཇིག་རྟེན་པ་ནི་ཞབས་ཀྱི་གདན། །འོད་ཟེར་གནོད་སྦྱིན་གསང་ལ་སོགས། །དེ་ལྟར་ཡོན་ཏན་ལྡན་པའི་སྐུར། །རྣལ་འབྱོར་ཅན་ནི་རྟག་ཏུ་བལྟ། །ཡེ་ཤེས་ཅན་ནི་ཤེས་བྱ་བ། །མཚན་ཉིད་གང་ཡིན་བསྟན་པར་བྱ། །ཤིན་ཏུ་དུལ་ཞིང་ཞི་བའི་གཟུགས། །སེམས་ཅན་ཀུན་ལ་མི་འཇིགས་སྦྱིན། །སྔགས་དང་རྒྱུད་ཀྱི་སྦྱོར་བ་མཁས། །རྣལ་འབྱོར་བཟོ་དང་བསྟན་བཅོས་རིག། །ཐམས་ཅད་དུ་ནི་སྙན་པར་སྨྲ། །སེམས་ཅན་ཀུན་ལ་བུ་བཞིན་ལྟ། །སྦྱིན་པ་ལ་ 119a ༄#། །སོགས་རྟག་ཏུ་དགའ། །རྣལ་འབྱོར་བསམ་གཏན་མངོན་པར་བརྩོན། །སྙིང་རྗེ་ཕན་པའི་སེམས་ཀྱིས་ནི། །བདེན་པར་སྨྲ་ཞིང་འཚེ་མི་བྱེད། །མཉམ་ཉིད་སེམས་ནི་བསྐྱེད་པས་ན། །སེམས་ཅན་རྣམས་ཀྱི་མགོན་སྐྱོབ་ཡིན། །དེ་ཉིད་བཅུ་ནི་ཡོངས་ཤེས་པ། །འདི་ནི་སློབ་དཔོན་ཞེས་བྱར་བརྗོད། །གཞན་ཡང་སློབ་མས་སྤྱོད་པ་ཡི། །དེ་ཉིད་མཚན་ཉིད་མཉན་པར་གྱིས། །རྣལ་འབྱོར་མ་ཡི་སྦྱོར་བལྟ། །དམ་ཚིག་སྤྱོད་པ་དང་ལྟ་ཉིད། །གཏོར་མ་གསང་བ་ལ་སོགས་ལྡན། །སློབ་དཔོན་གསང་བ་སྨད་མི་བྱ། །སྨད་ན་མྱུར་དུ་མནར་མེད་འགྲོ། །ཀུན་ཏུ་དམ་ཚིག་མེད་པ་དང ། །སྟན་དང་མལ་དང་ལྷམ་སོགས་དང ། །གདུགས་དང་ན་བཟའ་ཉེར་སྤྱོད་རྣམས། །གྲིབ་མ་འགོམ་ཞིང་བརྫི་མི་བྱ། །བཟློག་དང་གཟིར་བའི་ཚིག་བརྗོད་མིན། །འདས་ན་དེ་ནི་དུས་ཀུན་ཏུ། །གདོན་གྱིས་འཚེ་བར་འགྱུར་བ་དང ། །ནོར་ཉམས་དཔལ་ལས་རིང་དུ་འགྱུར། །བདུད་དང་སྡང་བས་འཇོམས་པར་བྱེད། །དེ་ཡི་གྲིབ་མ་འགོམས་གྱུར་ན། །མཆོད་རྟེན་བཤིག་པའི་སྡིག་འདྲར་བརྗོད། །སློབ་དཔོན་སྨོད་པར་གང་བྱེད་པ། །རྨི་ལམ་ན་ཡང་དངོས་གྲུབ་མེད། །སློབ་དཔོན་ཡོན་ཏན་གཟུང་བྱ་ཡི། །སྐྱོན་རྣམས་ནམ་ཡང་གཟུང་བྱ་མིན། །སྔགས་དང་ཕྱག་རྒྱའི་སྦྱོར་ལ་སོགས། །དེ་ཡི་ལམ་གྱིས་འགྲུབ་ཕྱིར་རོ། །བསླབ་བ་སྦྱིན་པ་སྔོན་འགྲོ་བས། །དེ་ནས་མཎྜལ་ལ་སོགས་བྱ། །སྔར་བསྟན་ཡི་ 119b གེ་གཅིག་པ་ཡིས། །སངས་རྒྱས་ལྔ་རུ་བསྟན་པར་བྱ། །དེ་ཡི་རྣལ་འབྱོར་ལྡན་པ་ཡིས། །ལས་རྣམས་འདོད་བཞིན་འགྲུབ་པར་འགྱུར། །སྔགས་ཀྱི་དབང་བསྐུར་ལྡན་པ་ཡིས། །ཡི་གེ་བརྒྱད་པོ་བསྒོམ་པར་བྱ། །གཉིས་མེད་གཏོར་སྦྱིན་དབང་བསྐུར་བའི། །དེ་ཡི་ཆོས་ནི་ཤེས་པར་བྱ། །སྦྱོར་བའི་དབང་བསྐུར་ལྡན་པ་ལ། །ཡེ་ཤེས་རྣམ་ཤེས་བསྟན་པར་བྱ། །སློབ་དཔོན་དབང་ནི་བསྐུར་ནས་སུ། །ཐམས་ཅད་གསང་བ་ལ་སོགས་བསྟན། །དང་པོར་སློབ་མས་བྱ་བ་ནི། །བླ་གོས་ཕྲག་པར་གཟར་ནས་སུ། །པུས་མོ་གཡས་པའི་ལྷ་ང་དག། །ས་ལ་ལེགས་པར་བཙུགས་ནས་ནི།། ཐལ་མོ་སྙིང་གར་སྦྱར་བར་བྱ། །བླ་མ་སྟན་ལ་འདུག་ནས་ནི། །རང་གི་ལྷ་རུ་རབ་བསྒོམས་ལ། །ལག་པས་ལག་པ་བཟུང་ནས་ནི། །མཁས་པས་བསླབ་པ་སྦྱིན་པར་བྱ། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །ཐེག་པ་གསུམ་པོ་ཐམས་ཅད་དང ། །རྣལ་འབྱོར་གསང་སོགས་མཁའ་འགྲོ་མ། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །རྟག་ཏུ་སྐྱབས་སུ་མཆི་བར་བགྱི། །རྣམ་སྣང་མཛད་དང་མི་བསྐྱོད་པ། །རིན་ཆེན་མཆོག་དང་འཇིག་རྟེན་དབང ། །དོན་ཡོད་གྲུབ་པ་ལ་སོགས་པ། །སངས་རྒྱས་བྱང་ཆུབ་སེམས་དཔའ་ཀུན། །ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ནི། །དུས་ཚོད་འདི་ནས་བཟུང་ནས་སུ། །བྱང་ 120a ༄#། །ཆུབ་སྙིང་པོར་མཆིས་པར་དུ། །མ་བསྒྲལ་བ་རྣམས་བསྒྲལ་བགྱི་ཞིང ། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་བརྩེ་བའི་ཕྱིར། །བདག་གིས་ཆོས་ཁྲིམས་འདི་བགྱིའོ། །དེ་ལྟར་ལན་གཉིས་ལན་གསུམ་དུ། །མཉམ་ཉིད་བརྟན་པའི་སེམས་ལྡན་བརྗོད། །ོཾ་སཝ་བྷཱ་བ་ཤུདྡྷཿ སརྦྦ་དྷརྨཱཿ སཝ་བྷཱ་བ་ཤུདྡྷོཉཧཾ། ཨོཾ་བཛྲ་ཤུདྡྷཿ སརྦྦ་དྷརྨཱ་བཛྲ་ཤུདྡྷོཉཧཾ། ཨོཾ་ཡོ་ག་ཤུདྡྷཱཿ ་སརྦྦ་དྷརྨཱ་ཡོ་ག་ཤུདྡྷོཉཧཾ། ལུས་ཀྱི་ལས་ནི་རྣམ་གསུམ་དང ། །ངག་གི་ལས་ནི་རྣམ་པ་བཞི། །ཡིད་ཀྱི་རྣམ་པ་གསུམ་དག་ནི། །ལུས་བསྡམས་པས་ནི་དམ་ཚིག་སྲུང ། །སེམས་ནི་མཉམ་ཉིད་ཤེས་ནས་སུ། །ཇི་སྐད་གསུངས་པའི་ཆོས་བཤད་བྱ། །དེ་ནས་རས་ཀྱིས་མིག་བཀབ་ནས། །གཏོར་མའི་གནས་སུ་གཞུག་པར་བྱ། ། ལག་པས་ལག་པ་བཟུང་ནས་སུ། །སླར་ཡང་བསླབ་པ་བསྟན་པར་བྱ། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །དཔའ་བོ་དཔའ་མོ་འཁོར་ལོ་ཡི། །སྦྱོར་བའི་གདན་ལ་བདག་ཕྱག་འཚལ། །དོན་དམ་རྟོགས་མཆོག་སེང་གེ་སློབ་མ་རྣམ་ཤེས་ནས། །རྣལ་འབྱོར་ལྡན་བས་སྒྲིབ་གཡོགས་རྣམས་སུ་དྲལ་བའི་ཕྱིར། །སྲིད་པའི་ཉེས་དམིགས་བསྐྱོད་པའི་ཉོན་མོངས་བཅོམ་ནས་སུ། །རྣལ་འབྱོར་དོན་དམ་གྲུབ་བྱེད་དེ་ཉིད་རྒྱལ་བོར་འགྱུར། །ཱཿ ་ནི་ཡིག་འབྲུ་ཀུན་གྱི་མཆོག་།གསུང་གི་རྡོ་རྗེར་བྱིན་གྱིས་བརླབ། །ཧཱུཾ་ནི་ཉོན་ 120b མོངས་སྲེག་པ་སྟེ། །ཐུགས་ཀྱི་རྡོ་རྗེར་བྱིན་གྱིས་བརླབ། །ོཾ་ནི་ཡེ་ཤེས་འགུགས་པ་སྟེ། །སྐུ་ཡི་རྡོ་རྗེར་བྱིན་གྱིས་བརླབ། །དེ་ནས་མིག་ཕྱེ་མཐོང་མ་ཐག། ཀུན་ལ་ཡན་ལག་ལྔས་བཏུད་ནས། །བདག་གི་རང་བཞིན་ལུས་འདི་ཉིད། །སྦྱོར་བའི་གདན་དུ་གདིང་བར་བྱ། །དེ་ནས་མཚན་ཉིད་ཅི་འདྲ་བར། །ལུས་ནི་ཇི་ལྟར་བསྟན་པ་བཞིན། །མཁས་པ་ཡིས་ནི་སྦྱིན་པར་བྱ། །ཇི་ལྟར་བསྟན་བཞིན་མཚོན་བྱས་ལ། །དེ་ནས་བསླབ་སོགས་ཡང་བྱ་སྟེ། །ཇི་ལྟར་བསྟན་པའི་ཡིད་ཀྱིས་བརྟག། བདུད་རྩི་ལྔ་དང་ལྡན་པ་ཡིས། །དམ་ཚིག་ཆུ་ནི་དེ་ནས་སྦྱིན། །ཧ་ཞེས་པ་ཡིས་ཁ་དོག་འཕྲོག་།ཧོ་ཡིས་དྲི་ནི་འཇོམས་པར་བྱེད། །ཧྲཱིཿ ་ཡིས་ནུས་པ་གཞོམ་བྱ་སྟེ། །ལ་ལར་སྔགས་ནི་བཟླས་པར་བྱ། །བླ་མའི་ཞབས་ཀྱི་དྲུང་དུ་ནི། །མགོ་བོས་བཏུད་དེ་དབུལ་བར་བྱ། །ོཾ་པཉྩ་ཌཱ་ཀི་ནཱི་པཱུ་ཛོ་པ་སྠཱ་ནཱ་ཡ་ཨཱཏྨཱ་ནཾ་ནི་རྱ་ཏ་ཡཱ་མི། ཨོཾ་ཨཱ་ཙཱརྱ་པཱུ་ཛོ་བསྠཱ་ནཱ་ཡ་ཨཏྨཱ་ནི་ནི་རྱ་ཏ་ཡཱ་མི། ཨོཾ་སརྦ་སཏྭ་པ་རི་ཏྲཱ་ཎ་ཨརྠཱ་ཡ་ཨཱཏྨཱ་ནཾ་ནི་རྱ་ཏ་ཡཱ་མི། ང་རྒྱལ་དང་ནི་ཁྲོ་བ་དང ། །བརླང་དང་ཚིག་རྩུབ་སྤང་བར་བྱ། །སྡིག་པའི་གྲོགས་པོ་སྦང་བྱ་སྟེ། །སྲོག་གཅོད་རྐུ་བ་དེ་བཞིན་ནོ། །ལོངས་སྤྱོད་ཀུན་ལ་མི་ཆགས་ཤིང ། །བདག་ཉིད་ངེས་བར་ཆོག་ཤེས་བྱ། །གར་གྱི་གནས་དང་ཚུལ་འདྲ་བའི། །ཕྱི་རོལ་བསྟན་བཅོས་ཞེས་ནི་བྱ། །ས་མ་ཡ་སྟྭཾ། ས་མ་ཡ་ཧོཿ ་ཨ་ཨཱ། ཨཾ་ཨཿ ་ཧཱུཾ་ཛ། རྡོ་རྗེ་ཕྱག་རྒྱ་ལྡན་པ་ཡིས། །ཡན་ལག་དྲུག་གི་ས་བོན་བཟུང་ 121a ༄#། །གཞན་ཡང་ཆོས་རྣམས་ཐམས་ཅད་ཀྱི། །རྫོགས་པའི་བྱང་ཆུབ་རིམ་པར་བསྟན། །དེ་ནས་སློབ་མ་འབྱོར་ལྡན་པས། །རྟག་ཏུ་བླ་མ་ཡོན་དབུལ་བྱ། །རང་གི་བུ་དང་ཆུང་མ་དང ། །གཉེན་འདུན་བྲན་ཁོལ་བཅས་པ་དང ། །གླང་ཆེན་རྟ་དང་བགླང་ཁྱུ། །རིན་ཆེན་ཁྱིམ་དང་ཞིང་ཡུལ་བཅས། །གསེར་དང་དངུལ་དང་ཟངས་དང་ནི། །གོས་དང་འབྲུ་ལ་སོགས་པའི་ནོར། །སྟན་དང་མལ་ཆ་ལྷམ་ལ་སོགས། །གདུགས་སོགས་ཉེ་བའི་ལོངས་སྤྱོད་དབུལ། །མཐར་ནི་རང་ག་ལུས་ཉིད་ཀྱང ། །བླ་མའི་ཡོན་དུ་ཕུལ་ནས་སུ། །ཆོས་རྣམས་རང་བཞིན་དག་པ་ཉིད། །དངོས་པོས་རང་བཞིན་མེད་པ་རུ། །རྫོགས་པའི་བྱང་ཆུབ་རིམ་པར་བསྟན། །སྔོན་དུ་བཟོད་པའི་ཚུལ་གྱིས་ནི། །སེམས་ཅན་རྣམས་ལ་གཟིར་མི་བྱ། །གཞན་ལ་ཚིག་རྩུབ་སྨྲ་མི་བྱ། །ཐམས་ཅད་མི་དགར་བྱ་བ་མིན། །ཚུལ་ཁྲིམས་སྡོམ་པ་སྲུང་བ་དང ། །སྐྱེ་བོ་རྣམས་ལ་གནོད་མི་བྱ། །སྲོག་ཆགས་གསད་པར་མི་བྱ་སྟེ། །དེ་བས་ཤི་བར་གྱུར་ཀྱང་བླ། །རབ་ཏུ་འབར་མེ་མཚུངས་པས་ན། །གཞན་གྱི་ནོར་ལ་རེག་མི་བྱ། །དངོས་ལ་སྲེད་པའི་བླུན་པོ་རྣམས། །བདག་ཉིད་སྲིད་བ་མི་བཟད་ལྟུང ། །རགས་དང་ཕྲ་མོ་ཙམ་ལ་ཡང་།། རྣལ་འབྱོར་པ་ཡིས་རྫུན་སྲུང་ངོ ། །རྣལ་འབྱོར་སྤྱོད་པའི་རྣལ་འབྱོར་པའི། །དེ་ལ་རྫུན་སྨྲ་ཡོད་པ་མིན། །སྤྱོད་ལ་ལེགས་པར་བསྡམས་པ་དང ། །བཟའ་བཅའ་སོགས་ལའང་ལེགས་ 121b པར་བསྡམ། །དགའ་དང་རྩེ་ལའང་ལེགས་པར་སྡོམས། །གཏོར་མའི་དུས་སུའང་ལེགས་བསྡམ་བྱ། །རྣལ་འབྱོར་དངོས་གྲུབ་འདོད་པ་རྣམས། །སེམས་ཅན་དགའ་བས་འགྲུབ་བར་འགྱུར། ། གང་ཞིག་ཀུན་ཤེས་སློབ་མ་ལ། །སེམས་ཅན་སྤྲོ་བ་བསྟན་པར་བྱ། །མཉམ་ཉིད་ཡེ་ཤེས་བསྐྱེད་ནས་ནི། །ཐམས་ཅད་མཉམ་པར་བལྟ་བར་བྱ། །རྟག་ཏུ་མཉམ་པར་སྤྱོད་པར་བྱ། །རྣལ་འབྱོར་བསམ་གཏན་འབད་པར་བྱ། །སེམས་ཅན་དམན་པ་སྲེད་པའི་གཞིས། །ཚོང་བྱེད་མྱུ་གུ་འཕེལ་འགྱུར་ཏེ། །དེ་ཡི་མྱུ་གུ་ལྗོན་ཤིང་གིས། །འགྲོ་བའི་འབྲས་ལམ་འགོག་པར་བྱེད། ། མཐོ་རིས་ལོངས་སྤྱོད་འདོད་པ་ཡི། །ལུས་ཅན་རྣམས་ནི་བྱམས་པས་ན། །དགའ་ཞིང་རྩེ་བའི་ཆོས་སྤྱོད་ཀྱིས། །བདག་ཉིད་སྲིད་པར་ལྟུང་བར་འགྱུར། །མཆོད་རྟེན་ལས་ནི་མི་བྱ་ཞིང ། །གླེགས་བམ་བཀླག་པར་མི་བྱའོ། །ལག་པའི་ཕྱག་རྒྱ་མི་བཅིང་ཞིང ། །སྔགས་ཀྱི་ཡེ་ཤེས་བཟླ་མི་བྱ། །བསྟན་བཅོས་དག་ན་རྙེད་སླ་སྟེ། །དེ་ཡི་སྦྱོར་བ་རྙེད་པ་བཀའ། །སློབ་དཔོན་དག་གི་ལུང་གིས་ནི། །ཁས་པ་ཡིས་ནི་བལྟ་བར་བྱ། །བདག་གི་ལྷ་དང་གཞན་ལས་ནི། །བདག་གི་ལྷ་ནི་ལྷ་ཡི་མཆོག། །བདག་གི་གཟུགས་སུ་མི་ནུས་པས། །གཟུགས་བརྙན་ལ་སོགས་བྲི་བར་བྱ། །གསང་བའི་གདན་གྱི་རབ་ཏུ་བྱེད་པ་ལས། །རིམ་པར་ཕྱེ་བ་དང་པོའོ། །།དེར་ནི་སྦྱོར་བ་རྙེད་དཀའ་བ། །ཉོན་ཅིག་རྡོ་རྗེ་རྒྱལ་པོ་གཙོ། །དེ་ཉིད་མེད་པའི་སྔགས་པ་ 122a ༄#། །རྣམས། །སྲིད་པ་འཕེལ་བྱེད་འོག་ཏུ་ལྟུང ། །ལུས་པོ་ངོ་མཚར་སྐྱེས་གྱུར་པས། །དེ་ཉིད་ཆོས་ནི་སྟན་དུ་གསོལ། །རྣལ་འབྱོར་གྱི་ནི་ཚད་མ་ཅི། །སྔགས་དང་ཕྱག་རྒྱ་ཇི་ལྟ་བུ། །ཆུ་དང་མེ་དང་རླུང་རྣམས་ཀྱི། །ལུས་ཀྱི་ཚད་ནི་ཇི་ལྟར་ལགས། །རྣལ་འབྱོར་པ་ཡི་གཏོར་མའི་ལས། །རབ་ཏུ་སྦྱར་བའི་ཚད་མ་གང ། །གང་གིས་འགྲོ་བ་སྒྲུབ་པ་ཡི། །མཚན་ཉིད་ཚད་མས་ཇི་ལྟར་ལགས། །མཚོན་བྱའི་ལུས་དང་སེམས་ཀྱི་ཚད། །ཇི་བཞིན་དེ་ཉིད་རྡོ་རྗེས་ཉོན། །བདག་གི་ཁམས་ནི་མི་བརྟན་པས། །གཏོར་མའི་ལས་དང་བཟླས་པ་དང ། །དཀྱིལ་འཁོར་མེ་དང་ཆུ་ཡི་ལས། །ཕྱག་རྒྱ་གདུགས་སོགས་མཆོད་པ་ཡི། །འབྲས་བུ་ཐོབ་པའི་རྣལ་འབྱོར་པའང ། །སྲིད་པའི་རྒྱུ་མཚོར་ལྟུང་བར་འགྱུར། །ཕྱག་ན་རྡོ་རྗེས་ཡང་གསོལ་པ། ། སྲིད་པ་སོ་སོར་འབྱུང་བ་རྣམས། །གང་གིས་དེ་ཡི་ཚད་མ་སྟེ། །སེམས་ནི་ཇི་ལྟར་བལྟ་བར་བགྱི། །ཡིད་ནི་ཐེ་ཚོམ་སྐྱེས་པར་འགྱུར། །འཁོར་བ་ཁྱོད་ཀྱིས་དྲིས་པ་ཉོན། །སེམས་ནི་ཡིད་ཀྱིས་བཀྲུས་ནས་སུ། །རང་དགའ་ཡེ་ཤེས་དངོས་མེད་པ། །མཁའ་འགྲོ་རླུང་གིས་བཅིངས་པ་ཡིས། །སེམས་ནི་གཟུགས་དང་གཟུགས་མེད་པར། །བསམ་གཏན་དམིགས་པས་འགྲུབ་པར་འགྱུར། །འདོད་ལྷ་ལ་སོགས་འདོད་ཅན་རྣམས། །རྟག་ཏུ་འདོད་ཡོན་སྤྱོད་པ་སྟེ། །དེ་ལྟར་འཁོར་བའི་མི་རྣམས་ནི། །རང་འདོད་ས་ལ་སོགས་པ་འགྲུབ། །དེ་ལས་སྒྲོལ་ 122b བའི་དངོས་པོ་རྣམས། །དེ་ཡི་དོན་ནི་གང་ཡིན་པ། །ང་ཡིས་ལེགས་པར་བཤད་པར་བྱ། །རྡོ་རྗེ་འཛིན་གྱིས་མདོར་བསྡུས་ཉོན། །རྣལ་འབྱོར་ཅན་གྱི་རྣམ་ཤེས་དང ། །ལྷན་ཅིག་འགྲོ་བས་འགྲོ་བར་འགྱུར། །རྣམ་ཤེས་རྣམ་པར་ཤེས་པ་ཡིས། །ཕྱོགས་ཀུན་གྱིས་ནི་གསལ་བར་འགྲུབ། །སེམས་ཀྱི་ངོ་བོ་ཐེ་ཚོམ་པས། །བཅོམ་ལྡན་དེ་ཡང་བཤད་དུ་གསོལ། །ཤེས་རབ་རྣམ་ཤེས་དངོས་རང་བཞིན། །མི་ཤེས་ཡེ་ཤེས་ཇི་ལྟར་ལགས། །རྣམ་ཤེས་ཡེ་ཤེས་མཚན་ཉིད་ཀྱིས། །ཐེ་ཚོམ་གྱུར་པ་ཉན་པར་འཚལ། །ཤེལ་དང་མཚུངས་པ་དག་པའི་སེམས། །སེམས་ལ་སྐྱོན་དང་ཡོན་ཏན་མེད། །ཡུལ་རྣམས་དང་ནི་སྤྲད་པ་ཡིས། །སྲིད་པའི་སྐྱོན་གྱིས་གོས་པ་ཡིན། །གང་གིས་འདི་ཡི་སྲིད་པའི་དངོས། །ཡུལ་གནས་པ་ཡི་ཞི་གྱུར་ནས། །ཇི་ལྟར་གནས་བཞིན་རབ་སྦྱོར་བ། །བུ་གའི་སྒོ་རུ་གཟིར་བར་བྱ། །དེ་ཡི་དབུས་སུ་ཤེས་བྱ་བ། །རྟག་ཏུ་རྣམ་ཤེས་ནམ་མཁའ་འདྲ། །ཁ་དོག་མེད་ཅིང་ཐམས་ཅད་མཚོན། །མི་ལྡན་ལུས་ཅན་ལྡན་པ་སྟེ། །གཟུགས་མེད་པོ་ནི་ཀུན་གྱི་གཟུགས། །དེ་བཞིན་ཐུང་དུ་རིང་པོ་མིན། །སེམས་ཀྱི་དེ་ཁོ་ན་ཉིད་ཀྱིས། །དངོས་མེད་རྫུ་འཕྲུལ་འགྲུབ་པར་འགྱུར། །མཚན་ཉིད་མེད་པའི་སེམས་ཀྱིས་ནི། །མཚན་ཉིད་ཐམས་ཅད་སྟེར་བའོ། །དངོས་པོ་མེད་པར་བསྒོམ་པ་ཡིས། །བསྒོམ་པ་དག་ནི་མཚོན་པར་བྱ། །གཟུགས་དང་སྟོང་པའི་དབུས་སུ་ནི། །སེམས་ནི་མཁས་པས་ཤེས་བྱ་སྟེ། །ཐམས་ཅད་ཀུན་ནས་ 123a ༄#། །དམིགས་པ་ཡིས། །རྣལ་འབྱོར་ལུས་ནི་སྐྱོན་མེད་པ་འོ། །གསང་ལས་གསང་བ་གསང་ཆེན་པོ། །རྣམ་ཤེས་ཡེ་ཤེས་གསང་བ་དག། བསྟན་བཅོས་ཀློག་ལ་སོགས་སྦས་ཤིང ། །ཡུལ་གྱི་མཚན་ཉིད་ལས་ཀྱང་རིང ། །མཚོན་བྱའི་མཚན་ཉིད་དེ་ཉིད་ནི། །བླ་མའི་ལམ་གྱིས་མཐོང་བར་འགྱུར། །སེམས་དང་ལུས་སུ་བཅས་མཉམ་ཞིང ། །སེམས་ཀྱང་གདུང་བར་མི་བྱ་འོ། །ལུས་ནི་གདུང་བར་མི་བྱའོ། །ཡིད་དུ་འོང་བའི་ས་ཕྱོགས་སུ། །མཁས་པ་ཡིས་ནི་བསྒྲུབ་པར་བྱ། །བདེ་བའི་སྟན་ལ་གནས་ནས་ནི། །སེམས་དཔའི་སྐྱིལ་ཀྲུང་བཅས་ནས་ནི། །ལག་གཉིས་གསང་བའི་གནས་སུ་གཞག་།མིག་ནི་སྣ་རྩེར་བལྟས་ནས་སུ། །དབུགས་ནི་ལྟེ་བའི་རྩ་བར་གཟུང ། །ཐོང་ག་ཀུན་ཏུ་སྤངས་པ་ནི། །དཀྱིལ་འཁོར་ལྟ་བུར་སྦྱར་བར་བྱ། །འབད་དེ་མཉམ་ཉིད་སེམས་ཀྱིས་ནི། །དེ་ཉིད་རང་བཞིན་དག་བྱས་ལ། །ཡིད་ཀྱི་དྲི་ཡིས་བྱུག་པ་དང ། །ཡིད་ཀྱི་མེ་ཏོག་མཆོད་པར་བྱ། །རང་བཞིན་དྲི་ཡིས་བྱུགས་ནས་སུ། ། ཤེས་རབ་སྒྲོན་མས་སྣང་བར་བྱ། །བདུད་རྩིའི་གཏོར་མས་ཚིམ་པའི་ལུས། །ཀུན་ནས་དྲངས་ཏེ་བཟའ་བར་བྱ། །ཁ་དོག་སེར་པོ་འབར་བའི་འོད། །ཀ་ཤ་གཉིས་འགྱུར་ཡི་གེ་སྟེ། །དྲག་པོར་ལྡན་པའི་ས་བོན་ཉིད། །ཚངས་པའི་སྒོ་རུ་ཤིན་ཏུ་བསྲུང ། །ཐམས་ཅད་གཟུགས་ཀྱི་འཇིག་བྱེད་པ། །དྲིལ་བུ་ཆུ་ཡི་ཡི་གེ་སྟེ། །སྟོང་པར་ལྡན་པའི་ས་བོན་ནི། །སྣ་དང་རྣ་བ་དག་ལ་ 123b དགོད། །བདུད་རྩིའི་ཆུ་ཡི་ས་བོན་ནི། །ལྕེ་དབང་རྩེ་མོར་གཟུང་བར་བྱ། །སེང་གེའི་ས་བོན་བརྩེགས་པ་ཡིས། །རྒྱས་པའི་སྒོ་ནི་བསྲུང་བར་བྱ། །སྟག་མོའི་ས་བོན་བརྩེགས་པ་ཡིས། །ཐོང་ག་ཀུན་ཏུ་གཟུང་བར་བྱ། །ཅེ་སྦྱང་ས་བོན་བརྩེགས་པ་ནི། །སྙིང་གའི་གནས་སུ་གཞག་པར་བྱ། །ལྟེ་བའི་ཚིགས་ནི་གདན་གྱི་སྒོར། །ཕྱུགས་ཀྱི་ས་བོན་གྱིས་བསྲུང་ངོ ། །ལྷ་མོ་བརྒྱད་དུ་སྦྱར་ནས་ནི། ས་བོན་བརྒྱད་པོ་གཟུང་བར་བྱ། །དེ་ཡི་མདོག་ནི་དཀར་མོ་སྟེ། །ལུས་ཀུན་དུ་ནི་ཤིན་ཏུ་འབར། །སྟེང་གི་མཆེ་བ་གཉིས་ལས་ནི། །དངུལ་ཆུའི་རྒྱུན་དང་འདྲ་བར་དབབ། །འོ་མའི་ཆུ་ཞེས་བྱ་བ་ཡིན། །འཇུག་པས་བརླབས་པའི་མདོག་ལྟ་བུ། །སྟེང་གི་མཆེ་བ་གཉིས་ཀྱི་ནི། །ལྕེ་ཡིས་བསྟན་པའི་བདུད་རྩིའི་ཆུ། །ལྕེ་ཆུང་གསང་བའི་ནང་དུ་དབབ། །དཔྲལ་བའི་སྡེ་དང་སྣ་དང་ནི། །རྣ་བ་གཉིས་ཀྱི་རྒྱབ་དག་ཏུ། །ཁ་ཟས་ལྟ་བུའི་དངོས་པོ་ནི། །ཀུན་ནས་དྲངས་ཏེ་གཞག་པར་བྱ། །མཆོད་རྟེན་སྒོ་རུ་ས་བོན་ནི། །ཧཱུཾ་ཞེས་བྱ་བ་དབང་ཕྱུག་མཆོག། བདུད་རྩིའི་ཆུ་ཡིས་བཀྲུས་ནས་སུ། །ལྷག་མ་འོག་ཏུ་ཐིམ་པར་བྱ། །འོག་ཏུ་རླུང་གི་ས་བོན་གྱིས། །འཁྲུལ་འཁོར་ལྟ་བུར་ཀུན་ནས་དྲངས། །ཆུ་ནི་མཇུག་དོ་རྩིབས་ལོགས་དང ། །དེ་བཞིན་མཆན་ཁུང་གཉིས་དང་ནི། །དུས་དང་ཡི་དྭགས་མེ་རྐང་པ། །ཚིགས་རྣམས་ཀུན་དང་སྙིང་གནས། །བདུད་རྩི་བཏུང་བ་གང་ཡིན་པ། །བ་ལང་རྨིག་པར་ཐིམ་ནས་ནི། །སྒོ་གཅིག་ནས་ནི་སྒོ་དགུར་བཞག་།ལུས་ཀུན་ལ་ནི་གནས་པ་ཡི། ། 124a ༄#། །བདུད་རྩི་གང་གིས་ཤེས་པ་དག། ལུས་རྣམས་ཐམས་ཅད་སྐྱེ་འགྱུར་བས། །དེ་ཡི་རྣལ་འབྱོར་བརྟགས་པ་ཡིན། །སྙིང་དབུས་ཟླ་བ་བསམ་བྱ་བ། །མདངས་ལྡན་ཤིན་ཏུ་མཛེས་ཤིང་གསལ། །གངས་དང་ཀུན་ད་ཟླ་བ་འདྲ། །ཟླ་བ་དེ་དབུས་འོ་མའི་རྒྱུན། །བདུད་རྩིའི་ཀུན་རིག་གུག་སྐྱེད་བཅས། །བདུད་རྩིའི་འོད་ནི་ཤིན་ཏུ་བསིལ། །མ་ནིང་རྣམས་ནི་སྤངས་པ་ཡིས། །དབྱངས་ཀྱི་ཡི་གེ་ཐམས་ཅད་ཀྱིས། །ཟླ་བའི་དཀྱིལ་འཁོར་དངོས་རྣམས་ཀྱི། །གནས་རྣམས་ཀུན་ཏུ་བསྐོར་བར་བྱ། །བ་ལང་རྨིག་པའི་སྟེང་དུ་ནི། །རྟག་ཏུ་བདུད་རྩི་བཞག་ནས་སུ། །གཟུགས་དང་ཁ་དོག་མཛེས་པ་ཡི། །ཡེ་ཤེས་ལུས་སུ་བསྒོམ་པར་བྱ། །མི་གཡོ་འཚེ་བ་མེད་པ་རུ། །དངོས་པོས་དངོས་པོ་བསྒོམ་བྱས་ལ། །འོ་མའི་ཟླ་བ་ས་བོན་དག། ཕྱག་འཚལ་སྲོག་པའི་མཐའ་ལྡན་པ། །མཉམ་གཞག་དངོས་པོས་བཟླས་བྱས་ནས། །འགྲུབ་འགྱུར་འདིར་ནི་ཐེ་ཚོམ་མེད། །དབང་པོ་རྣམས་ཀྱི་སྲེད་པ་དང ། །བཀྲེས་སྐོམ་ལ་སོགས་མེད་པར་འགྱུར། །ལོ་ནི་བརྒྱ་ཕྲག་དུ་མར་འཚོ། །གཟུགས་དང་གཟི་བརྗིད་ན་ཚོད་ལྡན། །རིམས་དང་དུག་ལ་སོགས་པ་དང ། །གྲང་དང་ཚ་སོགས་གནོད་པ་རྣམས། །ཡེ་ཤེས་ཅན་གྱི་ཡེ་ཤེས་ལུས། །ཡན་ལག་ཀུན་ལ་གནས་མི་འགྱུར། །བདུད་རྩིའི་རྩ་བ་དམིགས་པ་ཡིས། །མྱུ་གུ་སྐྱེ་ཞིང་འབྱུང་བར་འགྱུར། །དེ་དང་དེ་ནི་འཕེལ་འགྱུར་པས། །གཟུགས་དང་ཡེ་ཤེས་བདག་ཉིད་ 124b ཆེ། །དེ་ཡི་རྣལ་འབྱོར་གནས་རྣམས་ནི། །སྟོང་པའི་བྲག་ལ་སོགས་པར་བརྟེན། །བདུད་རྩི་གང་གིས་ཤེས་པ་ཡིས། །བདུད་རྩིའི་འབྲས་བུ་སྟེར་བར་འགྱུར། །ཇི་ལྟར་བདག་ཉིད་ཀྱི་ནི་སེམས། །ཡེ་ཤེས་ཅན་གྱི་དེ་ཁོ་ནས། །དག་བྱ་འཁོར་བའི་ཕ་རོལ་མཚན། །ཡེ་ཤེས་དབང་ལས་ཉན་པར་འཚལ། །གཉིས་མེད་སྔོན་གྱི་སེམས་ཀྱིས་ནི། །འདོད་ཆགས་ཉོན་མོངས་རྒྱ་མཚོ་ཡི། །རང་གི་ལུས་ནི་བཀྲུ་བྱ་བ། །ཡེ་ཤེས་སེམས་དཔའ་མཉན་པར་གྱིས། །རྒྱ་མཚོ་ཟབ་མོ་ལྟ་བུ་ཡི། །སྟོང་ཉིད་ཡེ་ཤེས་དེ་ཉིད་ཀྱིས། །ཕྱི་ནང་དྲི་མ་བཀྲུས་པས་ན། །ལུས་ནི་ཤེལ་དང་མཚུངས་པར་འགྱུར། ། ཤེལ་དང་འདྲ་བའི་ལུས་ཀྱི་དངོས། །དྲི་མེད་དུང་དང་ཀུན་འདྲ། །ཡེ་ཤེས་དབང་པོ་སྣ་ཚོགས་ཀྱི། །ཆོས་ཀྱི་ཚོན་གྱིས་བཙོ་བར་བྱ། །རང་བཞིན་གྱིས་ནི་རྣལ་འབྱོར་པ། །ཉེས་བྱས་ལེགས་བྱས་ལས་བྱུང་བ། །གང་གིས་རང་བཞིན་ལས་རྒྱལ་བ། །ཡེ་ཤེས་ཀྱིས་ནི་སྣང་བར་བྱ། །སྔོན་གྱི་མཚན་ཉིད་སྟོང་པ་ཡིས། །འགྲོ་བའི་དངོས་ཀུན་ཟད་པར་བྱ། །མཉམ་ཉིད་སེམས་ནི་བསྐྱེད་པ་ཡིས། །གཟུགས་སོགས་ཐམས་ཅད་ཟད་པ་ན། །དེ་གཉིས་དབུས་སུ་བསམ་བྱ་བ། །ཟླ་བ་འོ་མའི་ས་བོན་ཏེ། །ཱ་ལི་ཀཱ་ལི་རབ་སྦྱོར་བས། །དེ་ཡི་དབུས་སུ་བཏུ་བར་བྱ། །དེ་ཡི་ས་བོན་དེ་ཉིད་ཀྱིས། །འོད་ཟེར་ཕྲེང་བ་བསམ་པར་བྱ། །ས་བོན་དེ་ཉིད་གང་གིས་ནི། །མྱུར་དུ་ཡེ་ཤེས་སྣང་བར་འགྱུར། །གཟུགས་མཛེས་ཡོངས་སུ་མཛེས་པ་ཡི། །ཡེ་ཤེས་སྐུ་རུ་དེ་ནས་བསྒོམ། ། 125a ༄#། །ཕྱོགས་བཅུའི་འཇིག་རྟེན་ཁམས་སུ་ནི། །སངས་རྒྱས་སྤྲིན་རྣམས་སྤྲོ་བར་བྱ། །ཕྱག་འཚལ་སྲེག་པའི་མཐའ་ལྡན་པའི། །ས་བོན་གང་ཞིག་བཟླ་བ་ནི། །སྡེ་ཚན་གསུམ་པ་གང་ཡིན་པའི། །ཡི་གེ་གསུམ་པ་གཟུང་བར་བྱ། །དབྱུག་པ་སྤྱི་བོ་རྡོ་རྗེ་དང ། །སྐ་བོ་ཆེ་ལ་སོགས་པ་དཀྲི། །སེམས་ནི་མཉམ་ཉིད་བསྒོམས་ནས་སུ། །རྣལ་འབྱོར་ཅན་གྱིས་བཟླས་པར་བྱ། །མི་གཡོ་འཚེ་བ་མེད་པ་རུ། །དངོས་པོས་དངོས་པོ་སྒོམ་བྱས་ལ། །རྣལ་འབྱོར་བསམ་གཏན་ལ་འབད་པས། །འོག་མིན་ལ་སོགས་སྣང་བར་བྱ། །འོད་ཟེར་འཕྲོ་བ་སྤྲོས་པ་ཡིས། ། ས་འོག་རིམ་པ་བདུན་ཡང་བསམ། །རྣལ་འབྱོར་སྣང་བར་འདོད་པ་ཡིས། །རྟག་ཏུ་སེམས་ཀྱིས་བསྒོམ་པར་བྱ། །སྙིང་གར་དཀྱིལ་འཁོར་དབུས་གནས་པར། །ཧཱུཾ་ཞེས་བྱ་བ་དབང་ཕྱུག་མཆོག་།སྔོན་གྱི་མཚན་ཉིད་ཀུན་རིག་པས། །ཐམས་ཅད་ཀུན་ནས་ཟད་པར་བྱ། །རླུང་གི་དཀྱིལ་འཁོར་དབུས་གནས་པར། །ཟླ་བའི་དཀྱིལ་འཁོར་བསྒོམ་པར་བྱ། །འོད་ཟེར་སྣ་ཚོགས་འབར་བ་ཡི། །ཡེ་ཤེས་ས་བོན་དེ་དབུས་བསམ། །དེ་ལས་བྱུང་བའི་ཡེ་ཤེས་ལུས། །ཡེ་ཤེས་མཁའ་འགྲོའི་བདག་ཉིད་དེ། །ཟླ་བའི་དཀྱིལ་འཁོར་དབུས་གནས་པར། །པདྨའི་སྟན་ལ་བཞུགས་པ་སྟེ། །སྔོན་གྱི་མཚན་ཉིད་ཀུན་རིག་པས། །ཡན་ལག་རྫོགས་པའི་སྐུར་བསྒོམས་ལ། །སྙིང་གི་དཀྱིལ་འཁོར་དབུས་གནས་པར། །ཟླ་བའོ་མའི་ས་བོན་བསམ། 125b ཀུན་ནས་མཉམ་པའི་སེམས་ཀྱིས་ནི། །རྟག་ཏུ་དེ་ཉིད་བསྒོམ་པར་བྱ། །ཁ་དོག་དཀར་པོ་འོད་འབར་ལས། །ཀུན་ཏུ་རྡུལ་ཕྲན་དཀར་པོས་དགང ། །ཕ་རོལ་དངོས་པོ་དམར་པོ་རུ། །ཟླ་བའི་དཀྱིལ་འཁོར་དབུས་གནས་པར། །པདྨའི་སྟན་ལ་བཞུགས་པ་ཡི། །རྡོ་རྗེ་སེམས་དཔར་བསམས་ནས་སུ། །གང་གི་སྙིང་གི་དབུས་སུ་ནི། །དེ་ཡི་རྣམ་ཤེས་གཟུང་བར་བྱ། །ཧཱུཾ་ཞེས་བྱ་བའི་ཕྱོགས་བརྒྱད་དུ། །ཁ་དོག་དམར་པོ་བསམས་ན་ནི། །རྟག་ཏུ་མཉམ་ཉིད་ལྟ་བ་ཡིས། །བློ་ལྡན་ཕ་རོལ་སེམས་ཤེས་བྱ། །ཀུན་ནས་དཔག་ཚད་ཕྱི་རོལ་དུ། །རྣལ་འབྱོར་བས་ནི་གང་བསམས་ན། ། དེ་ཡི་བསམ་པ་ཐམས་ཅད་ནི། །ཡི་གེ་དེ་ཡིས་སྟོན་པར་འགྱུར། །གལ་ཏེ་ཕ་རོལ་ཆ་ཡིས་ནི། །སེམས་ཀྱི་མཚན་ཉིད་ཤེས་འདོད་པས། །གཞན་གྱི་སེམས་ནི་རིག་པ་ཡིས། །ཀུན་ནས་ཐམས་ཅད་ཤེས་བྱས་ལ། །དཔའ་བོ་སེམས་ཅན་ཀུན་དོན་ཕྱིར། །རྣལ་འབྱོར་འདི་ཡིས་སྦྱར་བར་བྱ། །དེ་ནས་མེ་ཡི་ལས་ཀྱི་བདག་།སྦྱོར་བ་ཇི་ལྟར་འཚལ་བར་བགྱི། །ཡེ་ཤེ་སྨེ་ཡི་བདག་ཉིད་ལ། །སྦྱིན་སྲེག་མཚན་ཉིད་ཇི་ལྟར་ལགས། །ཐམས་ཅད་སེམས་ཀྱིས་བྱིན་བརླབས་པས། །སྐྱེ་བོའི་ལུས་ཅན་ཡེ་ཤེས་མེ། །ཐམས་ཅད་ཡེ་ཤེས་བྱིན་བརླབས་པ། །མེ་ཡི་དེ་ཉིད་མཉན་པར་གྱིས། །བདག་ཉིད་སེམས་ཀྱིས་བསྲེགས་པས་ནི། །རྣལ་འབྱོར་ཅན་གྱིས་སྦྱིན་སྲེག་བྱ། །མདུད་པའི་ལྟེ་བའི་དབུས་ཉིད་ཀྱི། །དངོས་སུ་སོར་ནི་བདུན་པ་སྟེ། །མེ་ཡི་ཐབས་ཀྱི་གནས་ 126a ༄#། །ཡིན་ལ། །ཀླུ་དབང་འཁྱིལ་བའི་བསྐོར་བ་ཡིན། །ཡི་གེ་ཐམས་ཅད་འབར་བར་བྱ། །དེ་དབུས་པདྨ་རིག་པ་ཡིས། །ཉི་མའི་དཀྱིལ་འཁོར་དབུས་གནས་པར། ། ཡེ་ཤེས་ལུས་ནི་འབར་བར་གཟུང ། །མདུད་པའི་མེ་ལ་དཀར་པོ་རུ། །རྡོ་རྗེ་མཁའ་འགྲོ་ཐིམ་པར་བྱ། །གཡས་ཀྱི་ཆ་མི་ལོགས་སུ་ནི། །དྲག་མོ་ཐིམ་བྱ་མེ་དང་འདྲ། །ལྟེ་བ་དམར་པོ་འབར་བ་ལ། །ལྷ་མོའི་རྩེ་མོ་རོ་ལངས་མ། །གཡོན་ཕྱོགས་ཆ་ནི་སྔོན་པོ་ལ། །དྲག་ཏུ་འབར་བ་གཏུམ་མོ་སྟེ། །མེ་ལྔ་ཡི་ནི་བདག་ཉིད་རྣམས། །གཟུགས་མཛེས་མཐེ་བོའི་ཚད་དུ་བལྟ། །ཆུ་དང་མེ་དང་རླུང་དང་ནི། །ས་དང་ཡེ་ཤེས་རྣམ་པ་ལྔ། །ལྷ་མོ་ལྔ་ཡི་བདག་ཉིད་ལ། །སྦྱིན་སྲེག་ཆོ་གའི་མཆོག་ཡིན་ནོ། །བཅུ་དང་བརྒྱད་ཀྱི་རྩ་རྣམས་ནས། །དུས་སུ་བདུད་རྩི་དམིགས་པར་བྱ། །བ་ལང་རྨིག་པའི་དབུས་སུ་ནི། །འཛག་པ་དེར་ནི་ཐིམ་པར་བྱ། །མེ་ཡི་དབུས་སུ་བསྲེག་པའི་གཞི། །དབྱངས་ཡིག་དང་པོ་སོགས་ས་བོན། །འདི་ལྟར་ད་ཁྱོན་བསྒོམས་ནས། །བདག་ཉིད་རྒྱས་ཕྱིར་བསྲེག་པར་བྱ། །ཅུང་ཟད་བཟང་དང་བཏུང་ལ་སོགས། །རུང་བར་བྱས་ནས་བཟའ་བར་བྱ། །འདི་ལྟར་སྤྱོད་པའི་རྣལ་འབྱོར་པ། །བུ་ལོན་དུ་ཡང་མི་འགྱུར་རོ། །གསང་བའི་གདན་གྱི་རབ་ཏུ་བྱེད་པ་ལས། །རིམ་པར་ཕྱེ་བ་གཉིས་པའོ།། །།སྤྲེའུ་འདྲ་བར་མི་གནས་པ། །མཉམ་ཉིད་གང་གིས་སྦྱར་བར་བགྱི། །ལུས་ཀྱི་སྦྱོར་བའི་མཚན་ 126b ཉིད་རྣམས། །ལྷ་ལ་རོལ་མོ་ཉན་པར་འཚལ། །འབྱུང་བ་ཡི་ནི་ཁྱད་པར་དང ། །གསང་བ་རྡོ་རྗེ་ཆེན་པོས་ཉོན། །སེམས་ནི་མཉམ་པར་གནས་པ་སྟེ། །ཉེ་བར་ཞི་ནས་ཀཱ་ལིར་འཇུག། ལུས་ལས་སྤུ་རྣམས་སྐྱེ་བ་ནི། །ཀུན་ཏུ་ཆུ་ཡི་ཚད་མ་སྟེ། །ཆུ་ལ་ལུས་ནི་མ་ཡིན་ཏེ། །ལུས་ལ་ཆུ་ཡི་ཚད་མ་ཡིན། །ལུས་ཀུན་ལ་ནི་ཁྱབ་པས་ན། །བློ་ལྡན་ཆུ་ནི་ཚད་མའོ། །ལུས་ནི་རྡོ་རྗེ་ལྷ་མོ་ཡིན། །ལུས་ཀྱི་ཡན་ལག་ཐམས་ཅད་ལ། །མེ་འབར་ལྟ་བུར་དྲོ་བ་སྟེ། །ཁ་ཟས་སྨིན་པའི་ཚད་མ་ཡིན། །མེ་ནི་ཚད་མར་རབ་ཏུ་གྲགས། །ཡན་ལག་ཐམས་ཅད་ཁྱབ་པ་ཡི། །མེ་ནི་ཀུན་རིག་དམར་ཡིན་པས། །ལུས་ནི་དྲག་མོར་བསྟན་པ་སྟེ། །བདག་ཉིད་ཚད་མར་རབ་ཏུ་གྲགས། །བུ་གར་ཟླ་བ་འདྲ་གནས་པས། །རང་གི་ལུས་ཀུན་ཁྱབ་པ་སྟེ། །དབུགས་རྒྱུ་བ་ཡི་ཚད་མ་ཡིས། །མཁས་པས་སེམས་ནི་ཚད་མར་གྲགས། །ལུས་ལ་བརྟེན་པའི་སྦྱོར་བ་ཡིས། །དབུགས་ནི་གང་གིས་ཤེས་ནས་སུ། །ཐམས་ཅད་ལྷ་མོ་རོ་ལངས་མར། །མཁས་པ་ཡིས་ནི་ཤེས་པར་བྱ། །ས་ནི་ཀུན་གྱི་གནས་ཡིན་ཏེ། །གཟུགས་སོགས་དབང་པོ་ཡོན་ཏན་ལྡན། །གཟུགས་ལ་སོགས་པ་སྣང་བ་ན། །ས་ནི་ཚད་མའི་གནས་ཡིན་ནོ། །མཛེས་མ་ཞེས་བྱ་རབ་ཏུ་གྲགས། །དེ་ནི་ལྷ་མོ་གཏུམ་མོ་སྟེ། །ཀུན་གྱི་གཙོ་མོར་རབ་ཏུ་གྲགས། །ཡིད་ནི་ཐེ་ཚོམ་གཅོད་པ་སྟེ། །བྱེད་པོ་སྡུད་པོ་ཟ་པོའང་ཡིན། །དབང་པོ་ཀུན་གྱི་སེམས་རྣམས་ཀྱིས། །མཚན་གཞི་མཚན་ཉིད་ཤེས་པར་བྱ། །དབང་རྒྱལ་ཉེར་སྦྱོར་ལོངས་སྤྱོད་པ། ། 127a ༄#། །ཡུལ་ལ་སོགས་པ་ཉེར་སྤྱོད་ཀྱི། །རྣལ་འབྱོར་ཚད་མ་མཁས་པ་ཡིས། །ལུས་ལ་ཡེ་ཤེས་བསྟན་པར་བྱ། །སེམས་ལས་ཆུ་ནི་བྱུང་བས་ན། །རྣམ་ཤེས་ཆུ་རུ་གྱུར་པ་སྟེ། །གལ་ཏེ་ཆུ་ནི་གཞན་ཡིན་ན། །ཅི་ཕྱིར་ཞེ་ན་ཆུ་མི་འབྱུང ། །ལུས་ལ་ངེས་པར་དྲོད་ཡོད་ན། །ཆུ་ཡི་ནང་དུ་བྱིང་མི་འགྱུར། །ལུས་ལ་ཚད་མ་ལྔ་ཡོད་པས། །ལྔ་པོ་གཅིག་གི་བདག་ཉིད་འགྱུར། །མཚན་ཉིད་གཅིག་ཏུ་ཤེས་བྱས་ནས། །རྣལ་འབྱོར་བ་ཡིས་འགྲོ་བ་བརྟག། དེ་ཡི་མཚན་ཉིད་ཤེས་བྱའི་ཕྱིར། །དགེ་བའི་བཤེས་གཉེན་བསྟེན་པར་བྱ། །དེ་ཉིད་རྣལ་འབྱོར་གྲོགས་ཀྱི་ནི། །འཁོར་བའི་ཕ་རོལ་བརྒལ་བར་འགྱུར། །ཡུལ་དང་དབང་པོའི་ཡེ་ཤེས་ནི། །གཟིར་དང་བཅས་པས་སྡོམ་པར་འགྱུར། །སྒོང་སྐྱེས་ཁྱིམ་གྱི་གནས་སུ་ནི། །དབུས་སུ་གནས་པ་བཅིང་བ་བྱ། །འབྱུང་དང་འབྱུང་མིན་སེམས་ཀྱི་ནི། །གཡོ་བའི་དངོས་པོ་བསྐོར་བར་བྱ། །བཅིང་བའི་གནས་དང་སྟན་དག་ནི། །རྣམ་ཤེས་པདྨའི་སྟན་ལའོ། །རྣལ་འབྱོར་པ་ཡིས་དེ་ཡི་ཕྱིར། །རྣམ་ཤེས་རང་བཞིན་མཚོན་པར་བྱ། །གཟུགས་ཞེས་བྱ་བའི་དངོས་པོ་ཡི། །རྣལ་འབྱོར་གྲུབ་པར་བྱ་བའི་ཕྱིར། །རང་བཞིན་ཞེས་བྱའི་དངོས་པོར་འགྱུར། །ལྟེ་བར་ཆུ་ཤིང་མེ་ཏོག་ནི། །སྙིང་གར་ཡང་ནི་འགྲེང་སྟེ་གནས། །རྟག་ཏུ་སྟོང་པའི་སྒོ་ཡིན་ཏེ། །མཁས་པས་རྟག་ཏུ་བཟློག་པར་བྱ། །གེ་སར་དང་ནི་ལྡན་པ་ཡི། །རྟག་ཏུ་འདབ་མ་བརྒྱད་དུ་ 127b འགྱུར། །དེ་དབུས་རྟག་ཏུ་གསུངས་པ་ནི། །ཡེ་ཤེས་རྣམ་ཤེས་སྦྱོར་བ་སྟེ། །སྦྱོར་བ་ཡི་ནི་ཤར་ཕྱོགས་ཆར། །དེ་དང་མཐུན་པའི་སོར་དྲུག་པའོ། །མདུད་པ་ཡི་ནི་ནུབ་ཕྱོགས་ཆར། །འོག་ཏུ་སོར་ནི་ལྔ་པའོ། །ཞིང་དེ་ལ་ནི་ས་བོན་དང ། །འོད་ཟེར་ཚོགས་ཀྱི་མྱུ་གུར་འགྱུར། །ས་བོན་དེ་ཡི་འོད་ཟེར་གྱིས། །ཆུ་ཤིང་ལྟ་བུར་བསྐོར་བར་བྱ། །རྒྱས་པ་ལྔ་ཡི་ས་བོན་ལ། །ལྟོ་ཡི་འོག་ནས་དགར་བར་བྱ། །པདྨོ་མཛེས་པ་བཀས་པ་ཡིས། །འདབ་མ་བརྒྱད་ཀྱིས་རྣམ་པར་བརྒྱན། །པདྨོ་དེ་ཡི་སྟན་ལ་ནི། །སྒོང་སྐྱེས་ཡེ་ཤེས་གནས་དག་ལ། །དབུས་སུ་ཤེལ་ལྟར་དག་པ་ཡིས། །ཡེ་ཤེས་རྣམ་ཤེས་དབུ་མ་ཉིད། །མཁའ་འགྲོ་མ་བཞིའི་ས་བོན་རྣམས། །ཕྱོགས་ཀྱི་འདབ་མར་གནས་པ་སྟེ། །དབྱངས་ཡིག་དང་པོ་སོགས་ས་བོན། །མཚམས་སུ་སེན་མོ་ལ་སོགས་པའི། །མ་ནིང་ཡི་གེ་སྔར་བསྟན་བཞིན། །སྙིང་གར་དངོས་པོ་དངོས་པོ་ཡིས། །སྙིང་གར་ཡི་གེ་བལྟ་བར་བྱ། །བ་ལང་རྨིག་པའི་སྟེང་དུ་ནི། །སྒོ་དགུ་པ་ཡིས་བདུད་རྩི་ཡིས། །རྣལ་འབྱོར་ཅན་གྱིས་རྟག་ཏུ་བཀྲུ། །ཡི་གེ་དཀར་པོ་བརྒྱད་པོ་རྣམས། །བདུད་རྩིའི་ཡི་གེ་དཀར་པོ་ཡི། །འོད་འབར་བ་སྤུའི་ཁུང་ནས་སྤྲོ། །རྣལ་འབྱོར་ཅན་གྱིས་ཐམས་ཅད་དུ། །འགྲོ་དང་འཆག་དང་འདུག་པ་དང ། །ཉལ་བ་ལ་སོགས་དུས་ཀུན་དུ། །ཡེ་ཤེས་རྣམ་ཤེས་ས་བོན་བཟླ། །ཤིན་ཏུ་མཉམ་གཞག་སེམས་ཀྱིས་ནི། །རྣལ་འབྱོར་ཅན་གྱིས་བསྒོམ་བཟླས་ན། །ཡེ་ཤེས་ལས་བྱུང་རྣལ་འབྱོར་པ། །འཁོར་བའི་ཕ་རོལ་ 128a ༄#། །བརྒལ་བར་འགྱུར། །གཡོ་བ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་བྱ། །གོང་དུ་འཕོ་བའི་སྦྱོར་མཚན་ཉིད། །ཇི་བཞིན་རྡོ་རྗེས་མཉན་པར་གྱིས། །ལམ་བཟང་པོ་ཡི་རྣལ་འབྱོར་པ། །འགྲོ་བ་མཛེས་པ་བལྟ་བར་བྱ། །སྒོ་དགུ་པོ་ནི་ཇི་ལྟ་བུ། །ཡེ་ཤེས་སྒོ་ཡི་བྱེ་བྲག་གིས། །ཡོན་ཏན་སྐྱོན་རྣམས་ཇི་ལྟ་བུ། །ཡེ་ཤེས་དབང་ལས་མཉན་པར་འཚལ། །འཆི་བའི་དུས་ཀྱི་ཚད་མ་རྣམས། །ཡང་དག་པར་སྦྱོར་མཉན་པར་གྱིས། །ལམ་བཟང་པོ་ཡིས་མཛེས་པའི་གནས། །ལམ་ངན་སྲིད་པའི་སྐྱོན་གྱིས་གོས། །ཐིག་ལེ་ལྟེ་བ་སྤྱི་གཙུག་དང ། །མིག་དང་སྣ་དང་རྣ་སྲིད་སྒོ། །ཆུ་དང་ཆུ་མིན་སྒོ་ཡིན་ཏེ། །སྒོ་དགུ་ཡི་ནི་མཚན་ཉིད་ཡིན། །ལྟེ་བ་འདོད་ཅན་མཐོ་རིས་ཏེ། །ཐིག་ལེས་གཟུགས་ཁམས་ཀྱི་ལུས་ཅན། ། སྟེང་ནས་སྟེང་དུ་གནས་དེ་རུ། །མི་གདུང་ལ་སོགས་དེ་རུ་འགྲོ། །སྣ་ནས་གནོད་སྦྱིན་གནས་སུ་སྟེ། །རྣ་བ་དག་གིས་གྲུབ་པའི་ལྷ། །གལ་ཏེ་མིག་ལས་ཡེ་ཤེས་འགྲོ། །མི་རྣམས་ཀྱི་ནི་བདག་པོར་འགྲོ། །སྲིད་པའི་སྒོ་ཡིས་ཡི་དྭགས་ཏེ། །དེ་བཞིན་གཅི་བས་དུད་འགྲོའོ། །ཆུ་མིན་རྣམ་ཤེས་མྱུར་བ་རུ། །དམྱལ་བ་བརྒྱད་དུ་ཤེས་བྱའོ། །སྒོ་རྣམས་ཀྱི་ནི་བྱེ་བྲག་གིས། །འཁོར་བའི་བྱེ་བྲག་འབྱུང་བ་ཡིན། །དེ་བས་སྒོ་ཡི་བྱེ་བྲག་ལས། །སྒྲུབ་པོས་ལམ་ནི་བཟང་པོ་སྟེ། །འཆི་བའི་མཚན་མ་སྟོན་པ་དང ། །འཆི་བའི་དུས་ལ་བབ་པ་ནི། །རིམས་ལ་སོགས་པས་མ་ཕོག་ 128b པར། །གོང་དུ་འཕོ་བ་སྦྱོར་བའི་མཆོག། སྔོན་དུ་བུམ་པ་བརྩམས་པ་ཡི། །སྒོ་རྣམས་ཐམས་ཅད་བཅིང་བར་བྱ། །རྒྱས་པ་ལྔ་ཡི་མཆོད་རྟེན་གྱིས། །སྒོ་ནི་དགག་པ་བསྒོམ་བྱ་སྟེ། །དེ་ལ་འོག་གི་སྒོ་རུ་ནི། །ཆུ་ཡི་ས་བོན་དཀར་པོ་བསམ། །ཆུ་དང་ཆུ་མིན་སྒོ་ལ་ནི། །མེ་ཡི་ས་བོན་འབར་བ་སྟེ། །དེ་ལ་ཤིན་ཏུ་མཉམ་གཞག་པས། །དབུགས་ནི་བུམ་པ་ཅན་དུ་སྒོམ། །ལུས་ནི་རླུང་གི་མདོག་ཏུ་སྟེ། །སེམས་ནི་རླུང་གི་དཀྱིལ་འཁོར་ལ། །རྩ་བ་རླུང་གི་ས་བོན་ནོ། །རླུང་གི་མཐའ་ནི་རྩ་བ་ཅན། །ཐིག་ལེ་སྒྲ་དང་ལྡན་པ་ཡི། །རྩ་བའི་ས་བོན་དྲང་བར་བྱ། །རྡོ་རྗེའི་ས་བོན་དྲག་མོ་ཡིས། ། ལྕགས་ཀྱུ་ལ་སོགས་སྦྱར་བར་བྱ། །ཉི་ཤུ་རྩ་གཅིག་དབུགས་རྣམས་ཀྱིས། །གནས་ནས་དྲག་ཏུ་དྲང་བར་བྱ། །གནས་དད་གནས་ནས་སྟེང་དུ་དབྱེ། །ཚིགས་དགུ་ལས་ནི་སྟེང་དུ་བྱ། །སྟེང་དུ་སྨིན་པའི་ས་བོན་དང ། །ཡི་གེ་ཕྱེད་དང་གཉིས་ཀྱིས་སྦྱང ། །དྲག་མོའི་ང་རོར་བརྗོད་བྱ་སྟེ། །བརྒྱད་ནི་མཐའ་ཡི་ས་བོན་ལ། །སྡེ་ཚན་དང་པོའི་དང་པོ་ནི། །ཡི་གེ་ཕྱེད་དུ་སྦྱར་བར་བྱ། །འོག་ཏུ་རླུང་གི་དཀྱིལ་འཁོར་གྱིས། །སྒྲ་ཡི་དབྱེ་བས་བསྐུལ་བར་བྱ། །རླུང་གི་ས་བོན་ལྡན་པ་ཡི། །རླུང་གི་དཀྱིལ་འཁོར་བསམས་ནས་ནི། །ཉི་ཤུ་རྩ་གཅིག་གནས་རྣམས་ནས། །གོང་ནས་དེ་བཞིན་སྟེང་གནས་སུ། །རྣལ་འབྱོར་པ་ཡིས་སྨིན་བྱས་ལ། །སྟེང་གི་རྩ་ལ་བཟླ་བར་བྱ། །ཚིགས་དགུ་ལས་ནི་སྟེང་གཞན་གྱིས། །མོད་ལ་འཕོ་བར་ཤེས་བྱ་སྟེ། །ཉིན་རེ་བྲམ་ཟེ་གསོད་པ་དང ། ། 129a ༄#། །མཚམས་མེད་ལྔ་ནི་བྱེད་པ་དང ། །རྐུ་འཕྲོག་འདོད་ལ་སྤྱོད་པ་དག། ལམ་འདི་ཡིས་ནི་དག་འགྱུར་ཏེ། །སྡིག་པས་གོས་པར་མི་འགྱུར་ཞིང ། །སྲིད་པའི་སྐྱོན་ལས་རིང་དུ་འགྲོ། ཇི་ལྟར་འདམ་ནས་སྐྱེས་པ་ཡི། །པདྨ་དྲི་མེད་ཡིད་འོང་བ། །དེ་བཞིན་ལུས་ཀྱི་འདམ་ལས་ནི། །ཡེ་ཤེས་སྐུ་ནི་འདོད་བཞིན་འགྲོ། །དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །དེ་བས་ལུས་ལ་མཚན་མ་རྣམས། །མཐོང་ནས་མཁས་པས་སྦྱོར་བ་བརྩམ། །རྣལ་འབྱོར་སྒྲུབ་པའི་ཁྱད་པར་གྱིས། །དེ་ཉིད་ཇི་བཞིན་རྡོ་རྗེས་ཉོན། །སྔར་གྱི་མཚན་ཉིད་ཀུན་རིག་པས། །མཉམ་ཉིད་སེམས་ནི་བསྒོམ་པར་བྱ། །སྙིང་གའི་དཀྱིལ་འཁོར་དབུས་གནས་པར། །སངས་རྒྱས་ལྔ་ཡི་ས་བོན་བསམ། །དེ་འོད་ཉི་མར་འབར་བ་ཡིས། །གཟུགས་རྣམས་ཟད་པར་བསམས་ནས་ནི། །སྔོན་བཞིན་མཚན་ཉིད་ལྡན་པ་ཡི། །སྔར་བསྟན་སྟོང་ཉིད་བསམ་པར་བྱ། །གཟུགས་སོགས་ཐམས་ཅད་བཅོམ་ནས་ནི། །ཧཱུཾ་ཞེས་བྱ་བ་གནས་པར་བསམ། །ས་བོན་གྱིས་ནི་བསྐྱེད་བྱ་བ། །ཟླ་བའི་དཀྱིལ་འཁོར་དབུས་གནས་པར། །པདྨའི་སྟན་ལ་བཞུགས་པ་ཡི། །ཡེ་ཤེས་མཁའ་འགྲོའི་བདག་ཉིད་ནི། །ཞལ་གསུམ་ཕྱག་ནི་དྲུག་པ་སྟེ། །སྤྱན་གསུམ་ཅོད་པན་གྱིས་བརྒྱན་ཞིང ། །བཞད་དང་ཁྲོ་དང་སྒེག་པ་སྟེ། །རྒྱན་རྣམས་ཀུན་གྱིས་ཀླུབས་པ་ཡི། །ཀུན་ད་ཟླ་བ་ལྟར་དཀར་ཞིང ། །ཤིན་ཏུ་མཛེས་པའི་ན་བཟའ་བསྣམས། །སེམས་ 129b དཔའི་སྐྱིལ་ཀྲུང་གནས་ནས་ནི། །སངས་རྒྱས་སྤྲིན་རྣམས་སྤྲོ་བ་མཛད། །གཡས་ཀྱི་དང་པོ་མདའ་ཡིན་ཏེ། །གཉིས་པ་ཡིས་ནི་ལྕགས་ཀྱུ་རྣམས། །གསུམ་པ་ན་ནི་རྡོ་རྗེ་ཉིད། །གཡོན་པ་ཁྲོ་བའི་སྡིགས་མཛུབ་སྟེ། །གཉིས་པ་འཇིགས་པའི་ཞགས་པ་ཐོགས། །གོ་ཆའི་གཞུ་ནི་སྟེང་ན་བསྣམས། །འོད་ཟེར་སྣ་ཚོགས་འབར་བ་རུ། །དབུགས་མི་གཡོ་བར་བསྒོམ་པར་བྱ། །ཡན་ལག་བརྒྱད་དུ་རབ་འབད་ནས། །ས་བོན་བརྒྱད་ཀྱི་ཡི་གེ་དགོད། །ཱ་ལི་ཀཱ་ལི་རབ་སྦྱོར་བས། །ས་བོན་ཇི་བཞིན་བ་ཏུ་བར་བྱ། །འོད་ཟེར་ལྡན་པའི་ས་བོན་རྣམས། །ཀུན་ཏུ་ཁ་དོག་དཀར་པོར་བྱ། །ཆུ་ཤིང་མེ་ཏོག་པདྨོ་ལ། །སྙིང་གར་སྒོང་སྐྱེས་གཞག་པར་བྱ། །དེ་ཡི་དབུས་སུ་རྣམ་ཤེས་དང ། །ཡེ་ཤེས་ལྷན་ཅིག་ལྡན་པར་ནི། །མི་གཡོ་འཚེ་བ་མེད་པ་རུ། །དངོས་པོས་དངོས་པོ་བསྒོམ་པར་བྱ། །དེ་ནས་ཕྱི་རོལ་སྦྱོར་བ་ནི། །མཁས་པ་ཡིས་ནི་གཟུང་བར་བྱ། །གནས་གཉིས་དག་ནི་བསམས་པ་ནི། །རླུང་གི་དཀྱིལ་འཁོར་བསྒོམ་པར་བྱ། །དེ་ཡི་དབུས་སུ་མེ་ཡིན་ཏེ། །མེ་ཡི་དབུས་སུ་ཉི་མ་ལ། ། ཱ་ལི་ཀཱ་ལིར་ལྡན་པ་ཡི། །དེ་ཡི་ས་བོན་དམར་པོར་དགོད། །རྣལ་འབྱོར་པ་ཡིས་ཁྱད་པར་དུ། །འབྱུང་དང་འཇུག་པར་བཟླས་པར་བྱ། །འབྱུང་བ་ཡེ་ཤེས་ས་བོན་གྱིས། །དབུས་སུ་བསྣུན་དང་ལྡན་པར་བྱ། །འཇུག་པས་སྙིང་གི་རྣམ་ཤེས་ལ། །མེ་ཏོག་ལྟ་བུར་བསྣུན་པར་བྱ། །འབྱུང་བ་འཇུག་མིན་བཟླས་བྱ་ཞིང ། །འཇུག་པ་འཇུག་པ་མིན་ལ་བཟླ། །རྣལ་འབྱོར་པ་ཡིས་འབྱུང་ 130a ༄#། །འཇུག་དང ། །བདག་ཉིད་དང་ནི་ཕྱི་རོལ་བྱ། །འབྱུང་བའི་མཚན་ཉིད་མཚོན་པ་དང ། །འཇུག་པ་ཡིས་ནི་མཚོན་བྱས་ལ། །རྣལ་འབྱོར་པ་ཡིས་འབྱུང་འཇུག་དག ། དེ་ཁོ་ན་ཉིད་མཉམ་པར་སྒོམ། །མཉམ་གཞག་དངོས་པོ་བསྒོམས་ནས་ནི། །འགྲུབ་འགྱུར་འདིར་ནི་ཐེ་ཚོམ་མེད། །དེ་ནས་ཕྱི་རོལ་ལུས་ལ་ནི། །སྒྲུབ་པ་པོ་ཡིས་རྣམ་པར་སྤྲུལ། །ཕ་རོལ་སེམས་དང་རྗེས་མཐུན་པར། །མཁས་པ་ཡིས་ནི་ཤེས་པར་བྱ། །བསྒོམ་དང་བཟླས་པའི་ཁྱད་པར་གྱིས། །ཤིན་ཏུ་མཉམ་པར་གཞག་སྟི་བསམ། །གང་གི་ལམ་ནས་བསམས་ནས་ནི། ། འགྲུབ་འགྱུར་འདིར་ནི་ཐེ་ཚོམ་མེད། །གསང་བའི་གདན་གྱི་རབ་ཏུ་བྱེད་པ་ལས། རིམ་པར་ཕྱེ་བ་གསུམ་བའོ།། །།གསང་བའི་གདན་གྱི་གསང་བ་ཉིད། །སེམས་དང་ཡེ་ཤེས་འདྲེས་པ་ཡི། །རྫོགས་པའི་བྱང་ཆུབ་རིམ་ཅི་འདྲ། །ཡེ་ཤེས་དབང་ལས་མཉན་པར་འཚལ། །གསང་བའི་གསང་བ་ཆོས་ཀྱི་དོན། །བྱང་ཆུབ་རིམ་པ་རྡོ་རྗེ་ཉོན། །འདོད་ཆགས་ལ་སོགས་རིམ་སྤངས་ནས། །མཉམ་ཉིད་སེམས་ནི་བསྐྱེད་པར་བྱ། །ཡིད་དུ་འོང་བའི་ས་ཕྱོགས་སུ། །བདེ་བའི་སྟན་ལ་གནས་ནས་ནི། །ཁམས་དང་སེམས་ནི་བདེ་བ་ཡིས། ། སྙིང་རྗེས་ཕན་པ་བསམ་པར་བྱ། །ཡང་དག་བསྟན་བཅོས་དེ་ཉིད་ཐོས། །སློབ་དཔོན་ལུང་གིས་རྗེས་འགྲོ་ཞིང ། །གསང་ཆེན་དེ་ཉིད་དོན་སྒོམ་པ། །གཅིག་ནས་གཅིག་བརྒྱུད་དེ་ཉིད་ 130b ཅན། །ཐམས་ཅད་སྔོན་བཞིན་མཚོན་བྱས་ནས། །ཐམས་ཅད་སྟོང་པ་ཉིད་དུ་བྱ། །དྲི་མ་བཀྲུས་པའི་ལུས་ལ་ནི། །བྱང་ཆུབ་རིམ་པས་བཙོ་བར་བྱ། །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་མཁའ་འགྲོ་བསམ་བྱས་ཏེ། །ཟླ་བའི་འོད་ཟེར་འཕྲོ་བ་ཡི། །ཀུན་ད་ཟླ་བ་ལྟར་དཀར་མདོག། ཞབས་གཉིས་སེམས་དཔའི་སྐྱིལ་ཀྲུང་བཅས། །པདྨ་ཡི་ནི་སྟན་ལ་བཞུགས། །རྒྱན་རྣམས་ཀུན་གྱིས་བརྒྱན་པའི་སྐུ། །སངས་རྒྱས་ལྔ་ཡིས་བརྒྱན་པ་སྟེ། །ཕྱག་གཉིས་ཕྱག་རྒྱ་ཆེ་བཅིངས་ནས། །ཉིད་ཀྱི་ཐུགས་ཀར་འཚིར་བར་མཛད། །གཟུགས་མཛེས་ཤིན་ཏུ་རྫོགས་པ་སྟེ། །ཡེ་ཤེས་སེམས་དཔའ་བདག་ཅེས་བརྗོད། །ཆུ་ཤིང་མེ་ཏོག་ལྟེ་བ་ནས། །སྙིང་གི་བར་དུ་འགྲེང་སྟེ་གནས། །སྔར་གྱི་མཚན་ཉིད་ཀྱིས་བཟློག་ནས། །སྔོན་བཞིན་པདྨ་རྒྱས་པར་བྱ། །གེ་སར་དང་ནི་ལྟེ་བར་བཅས། །འདབ་བརྒྱད་ཤིན་ཏུ་མཛེས་པ་སྟེ། །དབུས་ཀྱི་སྒོང་སྐྱེས་ལ་གནས་པར། །ཡི་གེའི་དགོད་པ་དགོད་པར་བྱ། ཁ་དོག་དམར་པོ་དག་ཅིང་གསལ། །དབུས་སུ་བསྒོམ་བྱ་ཞུ་བའི་གཙོ། །དེ་ཡི་དབུས་སུ་རྣམ་ཤེས་དང ། །ཡེ་ཤེས་དག་ནི་སྦྱར་བར་བྱ། །ཤར་དུ་བྱམས་པར་ལྡན་པ་ཡི། །མི་བསྐྱོད་པ་ཡི་ས་བོན་བསམ། །ལྷོ་ཡི་སྒོ་རུ་སྙིང་རྗེ་སྟེ། །རིན་ཆེན་ས་བོན་དེ་ཉིད་དོ། །ནུབ་ཀྱི་སྒོ་ཡི་འདབ་མ་ལ། །འོད་དཔག་མེད་ཀྱི་ས་བོན་དགོད། །བྱང་གི་ཆ་ཡི་འདབ་མ་ལ། །དོན་ཡོད་གཙོ་བོ་བསམ་པར་བྱ། །དབྱངས་ཡིག་ཐོག་མ་སོགས་ས་བོན། །ཐིག་ལེ་ 131a ༄#། །དབྱུག་པར་ལྡན་རིམ་བཞིན། །འོད་ཟེར་དཀར་པོས་བརྒྱན་པ་སྟེ། ཡི་གེ་བཞི་ནི་དགོད་པར་བྱ། །ཕྱོགས་མཚམས་དག་ནི་བཞི་པོ་རུ། །སྔོན་དུ་བསྟན་པའི་མ་ནིང་དགོད། །དེ་ཡི་དབུས་སུ་དེ་ཡི་སེམས། །ཡི་གེ་རུ་ནི་མཚོན་པར་བྱ། །སྟོང་པ་མཚན་ཉིད་མེད་པ་ལས། །ཇི་ལྟར་ཡི་གེ་སྦྱར་བར་བགྱི། །སེམས་ནི་ཡ་མཚན་སྐྱེས་པར་གྱུར། །བཅོམ་ལྡན་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །སྟོང་པའི་མཚན་ཉིད་མཚོན་པ་ལས། །ཆུ་ཤིང་སྙིང་མའི་བདུད་རྩི་བཞིན། །སྙིང་པོ་མེད་པའི་སྙིང་པོར་གྱུར།། དེ་ཉིད་ཇི་བཞིན་རྡོ་རྗེས་ཉོན། །དབུས་ན་གནས་པ་ཡེ་ཤེས་ཏེ། །ཡེ་ཤེས་རང་བཞིན་གཟུགས་མེད་ཅིང ། །མཚན་ཉིད་མེད་པའི་མཚན་ཉིད་ཅན། །དྲི་མ་མེད་པའི་ཡེ་ཤེས་སྐུ། །དངོས་དང་དངོས་མེད་རྣམ་པར་གྲོལ། །ཡི་གེའི་གཟུགས་ནི་ཡི་གེ་མེད། །གཟུགས་དང་སྟོང་པའི་དབུས་སུ་ནི། །རྣལ་འབྱོར་ཅན་ཀྱིས་དེ་ཉིད་བཟུང ། །གང་གི་མཚན་ཉིད་ཤེས་བྱས་ནས། ། མཉམ་ཉིད་ཡེ་ཤེས་ལྡན་པ་དང ། །དེ་ཡིས་རྫོགས་པའི་བྱང་ཆུབ་ལམ། །མྱུར་བ་ཉིད་དུ་མཐོང་བར་འགྱུར། །བླ་མ་ཉིད་ཀྱི་ལམ་གྱིས་ནི། །ཡེ་ཤེས་རྣམ་ཤེས་རང་བཞིན་ཉིད། ། བསྟན་བཅོས་ལ་ནི་མཚན་ཉིད་བསྟན། །དེ་ཁོ་ན་ཉིད་དཔའ་བོས་བཤད། །འོད་ཟེར་དཀར་པོས་རྒྱས་པ་རུ། །འདི་ནི་ཀུན་ཏུ་བསྒོམ་པར་བྱ། །རྒྱས་པའི་ལྔ་ཡི་མཆོད་རྟེན་ཏེ། །བདུད་ 131b རྩིའི་ས་བོན་བསམས་ནས་ནི། །འོད་ཟེར་དཀར་པོ་གསལ་བའི་མདངས། །བདུད་རྩིའི་ཆུ་རྒྱུན་འཛག་པས་བཀྲུ། །ཐིགས་པའི་དབུས་སུ་ས་བོན་ནི། །མཐེ་བོང་ཙམ་གྱི་ཟླུམ་པོར་བྱ། །དེ་ཡི་དབུས་ཀྱི་ས་བོན་ནི། །ཱ་ལི་ཀཱ་ལི་དག་ལས་བཏུ། །ཁ་དོག་དཀར་པོ་ཤིན་ཏུ་མཛེས། །ཟླ་བའི་འོད་ཟེར་ཀུན་ཏུ་འཕྲོ། །དེ་ཡི་དབུས་ཀྱི་ས་བོན་ནི། །ཐིག་ལེ་བསམ་པར་རབ་ཏུ་གྲགས། །སྐྲ་ཡི་རྩེ་མོ་བརྒྱ་ཡི་ཆ། །རྡུལ་ཕྲན་གཟུགས་སུ་ཀུན་ཏུ་བསམ། །རྣམ་པར་ཤེས་པའི་དངོས་པོ་ཡི། །མཚན་ཉིད་མཚོན་པའི་ཡེ་ཤེས་ཅན། །སེམས་ཀྱི་མཚན་ཉིད་མི་ཤེས་པས། །ཐིག་ལེ་གནས་ཀྱི་གོ་འཕང་བལྟ། །སྙིང་དང་ཚངས་པའི་སྒོ་ང་ནི། །ཐིགས་པའི་ལམ་གྱི་སྒོ་དག་ཏུ། །བླ་མའི་ལུང་ལ་གུས་པ་ཡིས། །རྣམ་ཤེས་ཡེ་ཤེས་གཟུང་བར་བྱ། །ཕྱི་རོལ་གྱི་ནི་ལམ་དག་དང ། །བསྟན་བཅོས་ལས་ཀྱང་\?\་རིང་བ་ཡིན། །བསྟན་བཅོས་དག་ནི་རྙེད་སླ་སྟེ། །དེ་ཡི་སྦྱོར་པ་རྙེད་པར་དཀའ། །བླ་མའི་བསྙེན་བཀུར་ལ་གུས་པའི། །ཐབས་དང་ལྡན་ན་སྒྲུབ་པ་བོ། །བླ་མའི་ལུང་གི་ལམ་གྱིས་ནི། །མཁས་པ་ཡིས་ནི་བལྟ་བར་བྱ། །མི་གཡོ་འཚེ་བ་མེད་པ་རུ། །མཉམ་པར་གཞག་པས་དངོས་པོ་སྒོམ། །ཆོས་ཀྱི་སྔོན་འགྲོ་ཡིད་ཡིན་ཏེ། །ཡིད་ཀྱིས་འཇུག་ཅིང་ཡིད་ཀྱིས་འདག ། དེ་བས་ཐམས་ཅད་ཡིད་རང་བཞིན། །བློ་ལྡན་ཡིད་ལས་འབྱུང་ཞེས་བྱ། །གལ་ཏེ་བཟླས་འདོད་རྣལ་འབྱོར་པས། །སྙིང་གི་སྡོམ་པ་བསམ་པར་བྱ། །ས་བོན་གྱི་ནི་རྒྱུར་གྱུར་པ། །དེ་ཁོ་ནར་ནི་གཟུགས་\?\་ 132a ༄#། །མིན་ནོ། །རྒྱུ་དང་འབྲས་བུའི་ས་བོན་ནི། །དེ་ཁོ་ན་ཉིད་མཐོང་བ་མིན། །གཟུགས་སོགས་སྲིད་པའི་ལོངས་སྤྱོད་ལ། །ས་བོན་དམིགས་ཤིང་བཟླས་པར་བྱ། །ཀུན་ནས་ཀུན་ཏུ་འཇུག་པ་དང ། །འོག་དང་འོག་མིན་ཡང་དག་གནས། །རྩ་བར་རྟག་ཏུ་གཟེར་བར་བྱ། །ཡེ་ཤེས་རྣམ་ཤེས་ས་བོན་ནི། །ཐིག་ལེ་སྒྲ་དང་ཡང་དག་ལྡན། །སྲིད་པའི་ལོངས་སྤྱོད་འདོད་པ་ཡིས། །ཕྱི་རོལ་དག་ནི་སྤངས་ནས་སུ། །ཡིད་ཀྱིས་བཟླས་དང་ལྡན་པར་བྱ། །རྟག་པ་ཆོས་ཀྱི་དབྱིབས་ཉིད་ཀྱིས། །མི་གཡོ་གོ་འཕང་རྒྱུན་དུ་གནས། །རྟག་ཏུ་ཕྲ་ཞིང་གོས་མེད་པས། །ཡེ་ཤེས་ལ་ནི་རྣམ་ཤེས་ཐིམ། །རྣམ་ཤེས་ཡེ་ཤེས་ཉིད་གྱུར་ནས། །བྱང་ཆུབ་རིམ་པ་མཐོང་བར་འགྱུར། །མར་མེ་ལྟ་བུར་ཐམས་ཅད་དུ། །སྣང་གྱུར་མཚན་མ་དང་པོ་སྟེ། །སྲིན་བུ་མེ་ཁྱེར་ལྟ་བུའི་རྡུལ། །མཐོང་བའི་མཚན་མ་གཉིས་པ་ཡིན། །གསུམ་པ་ལ་ནི་རྣལ་འབྱོར་པས། །ཉོན་མོངས་འཇོམས་པའི་མཚན་མ་སྟེ། །རྡུལ་ཕྲན་དཀར་པོའི་ཚུལ་གྱིས་ནི། །དེ་བཞིན་ཕྱོགས་བཅུར་མཐོང་བར་འགྱུར། །འདོད་པ་ལྷ་ཡི་ལོངས་སྤྱོད་རྣམས། །སེམས་ཀྱིས་མཐོང་བ་བཞི་པ་སྟེ། །མཐོ་རིས་གཟུགས་ཀྱི་ལྷ་རྣམས་ནི། །སེམས་ཀྱིས་མཐོང་བ་ལྔ་པ་ཡིན། །གཟུགས་མེད་ལོངས་སྤྱོད་དྲུག་པ་སྟེ། །བདུན་པ་ཆོས་ཀྱི་ས་ལ་འོ། །སངས་རྒྱས་འབྲས་བུ་བརྒྱད་པ་སྟེ། །རྣལ་འབྱོར་པ་ནི་རང་དགར་སྤྱོད། །མཆོད་རྟེན་གཟུགས་ཀྱི་ཁྱད་པར་ལས། །དབྱིབས་ཀྱི་གཟུགས་ནི་ཇི་ལྟ་བུ། །ལྷ་ཡི་རྣམ་དག་བསྒོམས་པ་རྣམས། །བཅོམ་ལྡན་འདས་ལ་ཉན་པར་འཚལ། །ལུས་ཅན་རྣམས་ལ་ཡང་དག་བལྟ། །ཡང་དག་དེ་ཉིད་ཤེས་ནས་སུ།། 132b དེ་ཉིད་སྦྱོར་བས་ཅམ་པ་ཡི། །རབ་སྦྱོར་རྡོ་རྗེ་མཉན་པར་གྱིས། །སྙིང་གར་ཟླ་བ་བསམས་ནས་སུ། །དབུས་སུ་ཧཱུཾ་ནི་བསྒོམ་པར་བྱ། །མེ་ལྟར་འབར་བའི་འོད་ཟེར་གསལ། །སྤྱི་གཙུག་དཀར་པོར་ཡང་དག་ལྡན། །མེ་ལྕེ་འབར་བས་བཅོམ་ནས་ནི། །ཐམས་ཅད་ཀུན་ནས་ཟད་པར་བྱ། །སྔོན་གྱི་མཚན་ཉིད་དེ་ཁོ་ནས། །དེ་ཉིད་སྟོང་པ་ཉིད་དུ་བྱའི། །དེ་ནས་ཟླ་བར་ས་བོན་ནི། །མཁས་པ་ཡིས་ནི་བསམས་ནས་སུ། །མཆོད་རྟེན་ཕོ་བྲང་གནས་ཉིད་ནི། །དེ་ལ་སེམས་ཀྱིས་བསྐྱེད་པར་བྱ། གྱ་གྱུ་ས་ཞེས་བརྗོད་པ་སྟེ། །ཕྱོགས་བརྒྱད་དག་ནི་ཁམས་ཡིན་ན། །དྲིལ་བུ་ནམ་མཁའི་དབུས་གནས་པར། །ལྷུན་པོའི་ལྷ་ཡི་གནས་ཉིད་དོ། །འདོད་ན་སྤྱོད་པའི་ལུས་ཅན་རྣམས།། པྲེ་རུ་ངེས་པར་བརྟག་པར་བྱ། །འོག་དང་སྟེང་དང་དབུས་ཉིད་ཀྱི། །དབུས་སུ་གནས་པ་བདག་མེད་ཆོས། །གཟུགས་ཁམས་ཞེས་བྱའི་མཐོ་རིས་རྣམས། །འཁོར་ལོའི་ཕྲེང་བས་རྣམ་པར་བརྒྱན། །གཟུགས་ཅན་བཅུ་དང་བརྒྱད་པོར་ནི། །གོ་རིམས་ཇི་བཞིན་རྣམ་པར་གནས། །གཟུགས་མེད་སྲིད་པའི་སེམས་ཅན་ནི། །ཆོས་ཀྱི་སྲོག་ཤིང་ཉིད་དུ་ཐིམ། །ལྷ་རྣམས་ཀུན་གྱི་ཕོ་བྲང་ནི། །གཟུགས་སུ་མཆོད་རྟེན་བསྐྱེད་པར་བྱ། །སྟེང་གི་སྒོ་ང་སྐྱེས་གནས་སུ་ནི།་བདག་གི་སེམས་ནི་མཉམ་བྱ་སྟེ། །སེམས་དང་ཡེ་ཤེས་འདྲེས་པས་ན། །གཉིས་མེད་མཉམ་པའི་ཁྱད་པར་གྱིས། །གཟུགས་དང་སྟོང་པའི་མཐའ་དང་ནི། །དེ་བཞིན་དངོས་དང་དངོས་མད་ཉིད། །གཟུངས་དང་འཛིན་པ་ལ་\?\་གཞན། །ལེགས་བྱས་དང་ནི་བཟློག་པ་རྣམས། །མཚན་བཞི་མཚན་ཉིད་དུ་སྟོན་པའོ། །དེ་ཡི་དབུས་སུ་བསྒོམ་པར་བྱ། །སྦྱིན་དང་ཚུལ་ཁྲིམས་བཟོད་སོགས་པའི། །རྫས་འདི་ཡིས་ནི་མཆོད་ནས་སུ། །མི་གཡོ་འཚེ་ 133a ༄#། །བ་མེད་པ་རུ། །དངོས་པོས་དངོས་པོ་བསྒོམ་པར་བྱ། །མཉམ་བཞག་དངོས་པོ་བསྒོམས་ནས་ནི། །འགྲུབ་འགྱུར་འདིར་ནི་ཐེ་ཚོམ་མེད། །ཆོས་ཀྱི་དབྱིངས་ཀྱི་རང་བཞིན་གྱི། །དེ་ཉིད་བསྟན་བཅོས་ལུང་ལ་སོགས། །རྣལ་འབྱོར་དམིགས་པ་གོམས་བྱས་པའི། །སློབ་མ་ཆེན་པོའི་ལུས་ཅན་རྣམས། །གདན་བཞི་པ་ཡི་དེ་ཁོ་ན། །བླ་མའི་མན་ངག་ལྡན་པ་ཡིས། །རིམ་གྱིས་རང་དགར་ལོངས་སྤྱོད་དེ། །བདག་མེད་བལྟ་ཞིང་མྱང་བར་བྱ། །བདུད་རྩི་མྱོང་བའི་རྣལ་འབྱོར་པས། །ཡེ་ཤེས་སྐུ་ནི་མྱུར་དུ་འཐོབ། །ཡེ་ཤེས་སྐུ་ཡི་རྣལ་འབྱོར་པས། །བདག་དང་གཞན་དོན་མཆོག་ཏུ་འགྱུར། །ཤིན་ཏུ་རྣམ་པར་དག་པ་ཡི། །ཆོས་ཀྱི་དབྱིངས་ཀྱི་རྣལ་འབྱོར་རོ། །གསང་ཆེན་སྦྱོར་བའི་མཚན་ཉིད་ཀྱི། །དེ་ཉིད་དེ་ཉིད་མཆོག་དེ་ཉིད། །གང་གིས་བྱང་ཆུབ་ལམ་གྱུར་པ། །བཅོམ་ལྡན་འདས་ལ་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་རེ་ཞིག་རྣལ་འབྱོར་པས། །བདག་ཉིད་རང་དགར་བྱེད་པ་ཡི། །རྟ་རྒོད་ལྟ་བུའི་སེམས་དེ་ཉིད། །མཁས་པ་ཡིས་ནི་བསྔོམ་པར་བྱ། །ཇི་ལྟར་བུང་བ་མེ་ཏོག་བསྙུང་བ་ཡི། །ཆང་གིས་མྱོས་ཤིང་སེམས་ནི་བརྟན་གྱུར་ཏེ། །ལོངས་སྤྱོད་ཞུགས་ཤིང་སྡུག་བསྔལ་རྨོངས་དང་བྲལ། །དེ་བཞིན་བསྒོམ་པའི་ལམ་གྱིས་ཡིད་བཅིངས་བྱ། །ཡིད་བསྔོམས་པས་ནི་འགྲུབ་འགྱུར་བས། །དང་པོར་ཡིད་ནི་བསྡམས་པར་བྱ། །ཡིད་ཀྱིས་སྒྲུབ་པའི་བྱེ་བྲག་གིས། །བྱང་ཆུབ་ཡེ་ཤེས་མཚོན་པར་བྱ། །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་མཁའ་འགྲོ་སྤྲུལ་བྱ་སྟེ། །ཕྱག་རྒྱ་ཆེན་པོ་སྙིང་གར་བཅིང ། །སྟོན་གྱི་མཚན་ཉིད་ཀུན་རིག་པས། །ཡི་གེ་བརྒྱད་ཀྱི་ས་བོན་རྣམས། །ཡི་གེའི་གནས་སུ་དགོད་པར་བྱ། །རྒྱལ་བ་ལྔ་ཡི་མཆོད་རྟེན་གྱི།། 133b སྒོ་ནི་དགག་པར་བསམ་བྱ་སྟེ། །བདུད་རྩིའི་སྔགས་ཀྱི་ཡི་གེ་ཡིས། །རྒྱས་པའི་སྒོ་ནི་བསྲུང་བར་བྱ། །མེ་ཡི་ཡི་གེ་འབར་བ་ཡིས། །ཆུ་དང་ཆུ་མིན་དེ་བཞིན་བསྲུང ། །ཆུ་ཤིང་མེ་ཏོག་པདྨ་ནི། །མཛེས་ཤིང་འཁྱིལ་བ་རྒྱས་པ་དབྱེ། །དེ་ཡི་དབུས་ཀྱི་སྒོ་ངར་ནི། །དུད་དང་ཟླ་བ་ལྟར་དཀར་བ། །ཕྱོགས་ཕྱོགས་གནས་སུ་ས་བོན་དེ། །ཕྱོགས་བཞིར་ཁམས་ནི་བཞི་པོ་ཡི། །ཕྱོགས་མཚམས་ས་བོན་བརྩེགས་པ་བཞི། །ཤིན་ཏུ་མཉམ་པར་གཞག་པས་བསྒོམས། །འོད་ཟེར་ཀུན་ནས་དཀར་ཞིང་དག། ལྷ་མོའི་ཡི་གེ་བསྒོམ་པར་བྱ། །ཡེ་ཤེས་རྣམ་ཤེས་ངོ་བོ་འོ། །དེ་ཉིད་དབུས་སུ་དམིགས་ནས་ནི། །སེམས་ནི་རང་དགར་བསྒོམས་པ་ཡིས། །ཕྱི་ནས་གཟུགས་ནི་གཞོམ་པར་བྱ། །ཕྱོགས་དང་ཕྱོགས་ཀྱི་མཚམས་དག་ཏུ། །ཕྱོགས་ཕྱོགས་གནས་སུ་བཞག་ནས་སུ། །རང་བཞིན་ཐམས་ཅད་བཅོམ་པ་ཡི། །ལྷག་མ་རྣམ་ཤེས་ཡེ་ཤེས་ཉིད། །ཤར་གྱི་ཕྱོགས་སུ་ཆུ་ཡིན་ཏེ། །ཁ་དོག་དཀར་པོ་ཀུནདའི་འོད། །མེ་ནི་སེར་པོ་འོད་འབར་བར།། རྟག་ཏུ་བྱང་དུ་བསམ་པར་བྱ། །རླུང་གི་ས་བོན་དམར་པོ་ནི། །ནུབ་ཀྱི་ཕྱོགས་སུ་བརྟག་པར་བྱ། །ས་ཡི་ས་བོན་ལྗང་གུ་ནི། །ལྷོ་ཡི་ཕྱོགས་སུ་བསམ་པར་བྱ། །ཕྱོགས་མཚམས་འདྲེས་པའི་ཁ་དོག་གིས། །གྲཝ་བཞི་དག་ཏུ་སྦྱར་བར་བྱ། ། ལྷག་མ་དབུས་ཀྱི་ཡེ་ཤེས་ཏེ། །སྒོང་སྐྱེས་བཅས་པ་གཞོམ་པར་བྱ། །དེ་ཡི་མཚན་ཉིད་མཚོན་པར་བྱ། །མཚོན་བྱ་མཚན་ཉིད་དངོས་མེད་པའོ། །སེམས་ཀྱི་དངོས་པོ་སྟོང་པ་བས། །རང་བཞིན་གནས་རྣམས་ཟད་པར་བྱ། །རྣམ་རྟོག་སྟོང་པའི་དབུས་དག་ཏུ། །རྡུལ་ཕྲན་ཙ་ན་ལྟ་བུའི་གཟུགས། །ཱ་ལི་ཀཱ་ལི་ས་བོན་ནི། །རྡུལ་ཕྲ་ན་ཞེས་བྱ་དབུས་སུ་སྟེ། །རྣམ་པ་མེད་ཅིང་བརྗོད་དུ་མེད། །ཐམས་ཅད་རྡུལ་ཞེས་བྱ་བ་ལ། །སྟོང་ཉིད་དུའང་མི་དམིགས་ཏེ། །གཟུགས་ 134a ༄#། །ལ་སོགས་པར་མི་ལྟའོ། །རྡུལ་ནི་ས་བོན་མ་ཡིན་ལ། །རང་བཞིན་མེད་ཅིང་མཚན་ཉིད་མེད། །རླུང་དང་ནམ་མཁའ་མ་ཡིན་ཏེ། །མཉམ་ཉིད་དབུ་མར་མཚོན་པར་བྱ། །གཟུགས་དང་སྟོང་པ་དེ་བཞིན་དབུས། །དེ་བཞིན་རྣལ་འབྱོར་ཅན་གྱིས་གཟུང ། །བླ་མའི་ལུང་གིས་རྟོགས་བྱ་སྟེ། །ལུང་གི་དམ་པ་དག་དང་ནི། །བསྟན་བཅོས་མཚན་ཉིད་དཔྱད་ནས་སུ། །ལུང་དང་བཅས་པས་འགྲུབ་པར་འགྱུར། །མི་གཡོའང་འཚེ་བ་མེད་པ་རུ། །དངོས་པོས་དངོས་པོ་བསྒོམ་པར་བྱ། །མཉམ་གཞག་དངོས་པོས་དཔྱད་ནས་ནི། །བྱང་ཆུབ་རིམ་པ་འགྲུབ་པར་འགྱུར། །ཡེ་ཤེས་ཐིམ་པའི་རྣལ་འབྱོར་བས། །སེམས་ཅན་དོན་བྱེད་མཆོག་ཏུ་བརྩོན། །ཀུན་རྟོག་ལུས་དང་སེམས་ཀྱི་ནི། །གང་ཚེ་ཡུལ་འཁོར་སྲུང་འདོད་ན། །ཡེ་ཤེས་དབང་པོའི་ལོངས་སྤྱོད་ཅན། །རང་འདོད་ལུས་ཀྱི་དངོས་གྲུབ་ཀྱིས། །རྒྱུན་དུ་ཞུགས་པའི་འབྲས་འདོད་ཅིང ། །ཁམས་གསུམ་ཡེ་ཤེས་ཀྱིས་བལྟ་དང ། །རང་འདོད་ཡིད་ཀྱི་གནས་དང་ནི། །ནམ་མཁའ་རྒྱུ་བའི་ལུས་ཅན་དང ། །སེམས་ཅན་ཀུན་གྱི་གཞན་དོན་གཉེར། །མཆོག་ནི་མྱུར་དུ་སྟེར་བར་འགྱུར། །ལུས་དང་དབང་པོ་དོན་གཉེར་བས། །བདག་མེད་པ་ཡིས་རང་དགར་བྱ། །ཆོས་ཀྱི་དབྱིངས་ཀྱི་རང་བཞིན་གྱིས། །སྦྱོར་བས་འཁོར་བ་སྒྲོལ་བར་འགྱུར། །སངས་རྒྱས་འདྲེན་པ་རྣམས་ཀྱི་ཡང ། །སྦྱོར་བ་གཞན་ནི་དོན་གཉེར་འགྱུར། །སྒྲུབ་པོ་འདུ་འཛི་མེད་པ་དང ། །སྒྲ་སྒྲོགས་སྐྱེ་བོས་དབེན་པ་ཡི། །ཚལ་དང་རི་སུལ་བྲག་ཕུག་ཏུ། །གནས་ནས་དེ་རུ་བསྒོམ་པར་བྱ།། ནཱ་ག་མུ་ལབ་ལ་ཤ། །རུ་རྟ་ཆ་ནི་གསུམ་པོ་དག། མ་ག་དཱ་ནི་སྲང་གཅིག་སྟེ། །ཆ་བསྙམས་ཕྱེ་མར་བྱས་ནས་ནི། །བ་ཡི་འོ་མར་ཡང་དག་བཅས། །ཕྱེ་མ་བཞི་ཆར་བསྲེས་ནས་སུ། །འདི་ནི་ཉེན་རེ་རྣལ་འབྱོར་པ། །མཁས་པ་ཡིས་ནི་ 134b བཟའ་བར་བྱ། །རྣལ་འབྱོར་ཅན་གྱི་ལོ་བརྒྱ་རུ། །བྲག་ཕུག་སྟོང་སོགས་གནས་ནས་ནི། །ངེས་པར་ཤིན་ཏུ་སྨིན་པ་ཡིས། །གྲངས་དང་བཀྲེས་སྐོམ་ལ་སོགས་གྲོལ། །སྨན་འདི་དག་ནི་ལྡན་པ་རུ། །བྲག་ཕུག་སྟོང་སོགས་གནས་ནས་ནི། །འདུལ་བ་སྲུང་བའི་རྣལ་འབྱོར་པ། །ལུས་ནི་རྟག་ཏུ་བསྲུངས་པར་འགྱུར། །ཇི་ལྟར་བུད་མེད་བྱིས་གཏམ་རྗེས་ཡི་རང ། །གཉིས་སྤྲོད་གཏམ་ཏུ་སྨྲ་ཞིང་སྟོན་པ་སྟེ། །དེ་ལྟར་ལམ་བཤད་འཆི་བ་ཡོད་མ་ཡིན། །རྣལ་འབྱོར་ལམ་ངན་དེ་ལྟར་བསྟན་པ་མིན། །རིག་བྱེད་ཆུ་དང་དེ་བཞིན་དཱུར་བ་རྣམས། །བྲམ་ཟེས་སྤྱིར་བཞག་སངས་རྒྱས་པས་གཟུང་མིན། །དབང་བསྐུར་སྔགས་སོགས་ཉམས་ཀྱིས་འཇིགས་པས་ནི། །གནས་ངན་ལྷ་ཚོགས་རིགས་ལ་ཕྱག་མི་བྱ། །དེ་ནས་རྣལ་འབྱོར་པ་དང ། རྣལ་འབྱོར་མ་དང ། མཁའ་འགྲོ་དང ། མཁའ་འགྲོ་མ་དང ། བྱང་ཆུབ་སེམས་དཔའི་དགེ་འདུན་བྱེ་བ་ཕྲག་བརྒྱད་ཅུ་དུ་མའི་འཁོར་རྣམས་སེམས་ཚིམ་ནས། ཐམས་ཅད་ཀྱི་ཡེ་ཤེས་ཐོབ་པར་གྱུར་ཏེ། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་དང ། སེམས་ཅན་རྣམས་ཀྱིས་ཐལ་མོ་སྦྱར་ཏེ་གླུ་བླངས་པ། རང་དགར་སེམས་ཅན་སྒོལ་བ་ཡི། །རྒྱུ་མེད་དངོས་ལ་འདུད་པར་བགྱི། །ཏེ་ན་ཧཱུཾ་ཏེ་ན་ཧཱུཾ་ཏེ་ན་ཏེ་ཏེ་ཧཱུཾ། སྟོན་ཀའི་ཟླ་ལྟར་ཞལ་མཛེས་ཤིང ། ། དུང་ལྟར་དཀར་བའི་སྐུ་འཛིན་པ། །ཏེ་ན་ཧཱུཾ་ཏེ་ན་ཧཱུཾ་ཏེ་ན་ཏེ་ཏེ་ཧཱུཾ། །རྡོ་རྗེ་དྲིལ་བུའི་ཕྱག་རྒྱ་ཅན། །གཉིས་སུ་སྦྱར་བ་འཛིན་པ་པོ། །ཏེ་ན་ཧཱུཾ་ཏེ་ན་ཧཱུཾ་ཏེ་ན་ཏེ་ཏེ་ཧཱུཾ། སྒྱུ་མའི་ལུས་སུ་ཐིམ་པ་ཡི། ། 135a ༄#། །འགྲོ་བ་མཛེས་པ་རྒྱུ་མེད་དངོས། །ཏེན་ཧཱུཾ་ཏེ་ན་ཧཱུཾ་ཏེ་ན་ཏེ་ཏེ་ཧཱུཾ། །སྲིད་པ་གསུམ་འབར་སྐུ་ནི་རྗེས་ཆགས་འདུལ་བར་ལྡན། །འོད་ཟེར་རྣོན་པོ་སྟོང་ཕྲག་ཉི་མ་སྟོང་འདྲར་ལྡན། །རྣམ་མང་སྐུ་དང་ཆ་བྱད་རྗེས་ཆགས་སེམས་དཔར་ལྡན། །རྡོ་རྗེ་སེམས་དཔའ་དབང་ཕྱུག་མཆོག་དང ། །རོལ་པས་གར་མཛད་ཅེས་བྱ་བའི། །བཀྲ་ཤིས་སྒྲ་ཡིས་བཀང་ནས་སུ། །ཐམས་ཅད་ཀུན་ནས་གླུར་བླངས་སོ། །ཇི་བཞིན་ལམ་ནི་རྡོ་རྗེས་ཉོན། །བསྟན་བཅོས་ཤིན་ཏུ་མཉམ་གཞག་པས། །གང་ཞིག་སུ་ཡང་རུང་བ་ལས། །ཡི་གེའམ་ཚིག་ཙམ་ཉན་བྱེད་ན། །མཐོ་རིས་ལོངས་སྤྱོད་ཐོབ་འགྱུར་ཏེ། །ཡང་ན་འཁོར་ལོས་བསྒྱུར་བར་རོ། །འདྲི་འམ་འདྲིར་འཇུག་ཀློག་པ་དང ། །ཤིན་ཏུ་དད་ལྡན་སྔགས་ཟློས་པའི། །རྣལ་འབྱོར་པ་རྣམས་འཕོ་བའི་ཚེ། །སྲིད་པའི་གཟུགས་ཀུན་བསམ་བཞིན་འགྲུབ། །རྣལ་འབྱོར་བསམ་གཏན་བྱེད་པ་རྣམས། །མྱུར་དུ་བྱང་ཆུབ་རིམ་པ་ཐོབ། །ཅེས་བདག་ཉིད་ཀྱིས་བཀའ་སྩལ་པས། ཕྱོགས་བཅུའི་འཇིག་རྟེན་གྱི་ཁམས་ཀྱི་རྣལ་འབྱོར་པ་དང ། རྣལ་འབྱོར་མ་འདུས་པ་དེ་དག་དང ། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་ལ་སོགས་པ་ཐམས་ཅད་དང་ལྡན་པའི་འཁོར་གྱིས་དགའ་ཞིང་མགུ་ནས།། 135b བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དཔལ་གདན་བཞི་པ་ཞེས་བྱ་བའི་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་བཅོམ་ལྡན་འདས་རྡོ་རྗེ་འཛིན་པས་འབུམ་ཕྲག་བཅོ་བརྒྱད་པ་ལས་སྙིང་པོ་ལྟ་བུར་གསུངས་བརྫོགས་སོ།། །།རྒྱ་གར་གྱི་མཁན་པོ་ཆེན་པོ་ག་ཡ་དྷ་ར་དང ། ཞུ་ཆེན་གྱི་ལོཙྪ་བ་འགོས་ཁུག་པ་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། |