།།རྒྱ་གར་སྐད་དུ། བཛྲ་ཨཱ་ར་ལི་མ་ཧཱ་ཏནྟྲ་རཱ་ཛཱ་ནཱ་མ། བོད་སྐད་དུ། རྡོ་རྗེ་ཨཱ་ར་ལི་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ། ཀྱེའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་བྷ་ག་ལ་བཞུགས་སོ། །བཅོམ་ལྡན་འདས་ཀྱིས་སངས་རྒྱས་དང ། བྱང་ཆུབ་སེམས་དཔའ་དུ་མ་དང ། དེ་བཞིན་གཤེགས་པས་གསོལ་བ་བཏབ་པར་རིག་ཅིང་བྱང་ཆུབ་སེམས་དཔའ་རྣམས་ཀྱིས་ཡང་མཁྱེན་ནས་བདེ་བའི་ཏིང་ངེ་འཛིན་ལས་བཞེངས་ཏེ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཆུ་ 49b ཡིས་གདོང་ནི་བཀྲུས་ནས་ནི། །སྨན་ནི་བཟའ་བར་བྱས་ནས་སུ། །བདེ་བའི་སྟན་ལ་འདུག་ནས་ནི། །ཧེ་རུ་ཀ་ནི་རབ་བསྒྲུབ་བྱ། །རང་གི་སྙིང་གར་རེ་ཕ་ནི། །སྲེག་པའི་བསྐལ་པ་ལྟར་འབར་སྒོམ། །དེ་བྱུང་རྡོ་རྗེ་ཉི་མ་ནི། །འབར་བའི་ཕྲེང་བས་ཡང་དག་ཁྱབ། །དེ་ཡི་སྟེང་དུ་ཧཱུཾ་ཉིད་དེ། །བསྐལ་པའི་མེ་ནི་ལྟ་བུ་ཉིད། །དེ་ནི་རྡོ་རྗེར་ཡང་བསམས་ནས། །རྡོ་རྗེ་ལས་བྱུང་ཧེ་རུ་ཀ་།བགེགས་ནི་ཆེན་པོ་མནན་ནས་ནི། །སྐུ་ལ་ཐལ་བས་བྱུགས་པ་དང ། །ཕྱག་རྒྱ་ལྔ་དང་ཡང་དག་ལྡན། །འཇིགས་པ་ཡང་ནི་འཇིགས་པར་མཛད། །ིནྡྲ་ནཱི་ལའི་འོད་ལྟ་བུ། །དབུ་སྐྲ་སེར་པོ་སྟོབས་པོ་ཆེ། །གར་དགུའི་རོ་དང་ལྡན་པ་ནི། །རོལ་པའི་གར་གྱིས་གར་མཛད་ཅིང ། །རི་རབ་རི་རྒྱལ་མཐོན་པོ་ཡང ། །ས་ཡི་འོག་ཏུ་ཡང་དག་གནན། །ཕྱག་ཏུ་རྡོ་རྗེ་བསྣམས་བསྒོམས་ནས། །གཡོན་པས་སྐྱེས་པའི་ཐོད་པ་ནི། །བདུད་རྩི་ལྔ་དང་ཡང་དག་ལྡན། །ཤ་ལྔ་ཡང་དག་ལྡན་པར་སྒོམ། །ཀུན་ད་དང་ནི་ཟླ་བ་དང ། །ཆུ་སྐྱེས་དོ་ཤལ་ལྟ་བུར་ནི། །ཁ་ཊྭཱཾ་ག་ཡིས་ཕྲག་པ་བརྒྱན། །རྡོ་རྗེ་ཨཱ་ར་ལི་ལས། ལྷའི་ལེའུ་སྟེ་དང་པོའོ།། །།དེ་ནས་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་ཐམས་ཅད་དང ། མི་བསྐྱོད་པ་ལ་སོགས་པ་དེ་བཞིན་གཤེགས་པ་ཐམས་ཅད་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ 50a ༄#། །རྡོ་རྗེ་བཙུན་མོ་ཐམས་ཅད་དང ། ཛམྦྷ་ལ་ལ་སོགས་པའི་རྡོ་རྗེ་གནོད་སྦྱིན་ཐམས་ཅད་དང ། དབང་ལྡན་ལ་སོགས་པའི་འབྱུང་པོ་ཐམས་ཅད་དང ། དབང་པོ་ལ་སོགས་པ་རྡོ་རྗེ་ནམ་མཁའ་ལ་གནས་པ་ཐམས་ཅད་དང ། གླང་པོ་ཆེའི་རྣ་བ་ལ་སོགས་པ་ཞིང་སྐྱོང་བ་ཐམས་ཅད་དང ། ཀུན་དར་ལ་སོགས་པའི་ཡི་དྭགས་ཐམས་ཅད་དང ། དེ་དག་ལ་སོགས་པ་སེམས་ཅན་ཐམས་ཅད་ཀྱི་ཆོས་ཉན་པའི་སྦྱོར་བ་དེས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་ཨཱ་ར་ལི་ཆེན་པོ་ལ་ཞུས་པ། བཅོམ་ལྡན་འདས། གཏོར་མའི་སྔགས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བདེར་གཤེགས་ཀུན་གྱི་སྟོན་པ་ཡིས། །གཏོར་མ་ལས་ནི་རབ་ཏུ་ཕྱེ། །ཕྱག་རྒྱ་ཡང་ནི་ཁྱད་པར་དུ། །འདོད་པའི་དོན་ཀུན་སྒྲུབ་པའོ། །རྡོ་རྗེ་ཐལ་མོ་གྱེན་ཕྱེ་ནས། །ོཾ་ཛྭ་ལ་ཛྭ་ལ་བྷྱོ་ཧཱུཾ་ཕཊ་སཝཱཧཱ། འདི་ཉིད་སྔགས་ནི་ཆེན་པོ་ཉིད། །དེ་བཞིན་དུ་མའི་གཏོར་མའི་སྔགས། །ལས་ནི་ཐམས་ཅད་པ་ཡི་སྔགས། །ཡིན་པ་ཉིད་དུ་ཐེ་ཚོམ་མེད། །རྡོ་རྗེ་ཨཱ་ར་ལི་ལས། །གཏོར་མའི་བྱ་བའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཀྱིས་མིང་ཡང་དག་པར་རབ་ཏུ་ཕྱེ་བ། །གདོང་རིང་སྣ་ནི་མཐོ་བ་དང ། །དེ་བཞིན་དཔག་བསམ་ཤིང་ 50b ཉིད་དང ། །ཚངས་པར་སྤྱོད་པ་མང་པ་ཉིད། །དམ་ཚིག་འདིར་ནི་དངོས་གྲུབ་སྦྱིན། །གླང་པོ་རྟ་བོང་གླང་རྔ་མོ། །ཁྱི་ལས་བྱུང་བའི་མར་མེ་དང ། །མར་མེ་ཆེན་པོ་བསྲེགས་ནས་ནི། །ཚངས་སྤྱོད་འཛིན་པ་མཆོད་པར་བྱ། །དེ་ནས་སྡོམ་པ་བཀའ་སྩལ་པ། །ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །ཁྱོད་ཀྱིས་མ་བྱིན་པར་ཡང་ལོངས། །གཞན་གྱི་བུད་མེད་བསྟེན་པར་གྱིས། །མ་དང་སྲིང་མོ་ཉིད་དང་ཡང ། །བུ་མོ་སྲིང་མོའི་བུ་མོ་ནི། །ཐབས་དང་ཤེས་རབ་ཆོ་ག་ཡིས། །རྣལ་འབྱོར་རིག་པས་རྟག་ཏུ་མཆོད། །དེ་ནས་དབང་བསྐུར་བཀའ་སྩལ་པ། །ཕྱག་རྒྱ་ལྡན་པའི་སློབ་དཔོན་གྱིས། །དེ་ལ་དབང་བསྐུར་སྦྱིན་པར་བྱ། །དབང་བསྐུར་དེ་ཡི་ཕྱི་ནས་ནི། །དེ་ཉིད་འདི་ནི་རབ་ཏུ་དབྱེ། ། དེ་ཉིད་བདེ་བ་ཆེན་པོ་སྟེ། །ཐམས་ཅད་ལུས་ལ་རྣམ་པར་གནས། །འདི་ཉིད་ཡེ་ཤེས་ཆེན་པོ་སྟེ། །མཆོག་ཏུ་དགའ་བའི་རང་བཞིན་ཅན། །དེ་ནས་སྦྱིན་སྲེག་བཀའ་སྩལ་པ། ། ཁྲུ་གང་ཙམ་པའི་ཚད་དང་ནི། །ཁྲུ་ཕྱེད་ས་ལ་བརྐོ་བར་བྱ། །རྡུལ་ཚོན་དཀར་པོ་ལྡན་པར་ནི། །རྣམ་པར་མཁས་པས་ཐབ་ཁུང་བྱ། །གསུངས་པའི་སྔགས་ཀྱིས་ངེས་པར་ནི། ། དེར་ནི་ཤ་སོགས་སྦྱིན་སྲེག་བྱ། །མེ་ནི་ལྷ་ཡི་སྤྱན་ཉིད་དེ། །འདོད་པའི་དོན་ཀུན་སྒྲུབ་པའོ། །དེ་ནས་དཀྱིལ་འཁོར་བཀའ་སྩལ་པ། །གྲུ་བཞི་པ་ལ་སྒོ་བཞི་པ། །རྟ་བབས་ 51a ༄#། །བཞི་ཡིས་རྣམ་པར་བརྒྱན། །ཀ་བ་བརྒྱད་དང་ཡང་དག་ལྡན། །མཁས་པས་དཀྱིལ་འཁོར་བྲི་བར་བྱ། །དུར་ཁྲོད་སོལ་བ་སོ་ཕག་དང ། །ལྡོང་རོས་ཕྱེ་མ་ཉིད་དང་ཡང ། །ལྗང་གུ་ཡི་ཡང་ཕྱེ་མ་ཉིད། །དཀྱིལ་འཁོར་ལ་ནི་མཁས་པས་བསྔགས། །དབུས་སུ་གསུམ་ལ་རྡོ་རྗེ་བྲི། །ཤར་གྱི་སྒོ་རུ་མགོ་ཆེན་པོ། །ལྷོ་རུ་རྡོ་རྗེ་དྲིལ་བུ་ཉིད། །དེ་བཞིན་ནུབ་ཏུ་དགྲ་སྟ་སྟེ། །བྱང་དུ་གྲི་གུག་དགེ་བ་ཉིད། །རྡོ་རྗེ་དཀྱིལ་འཁོར་དུ་ནི་བྲི། །ཆོས་དོན་འདོད་དང་ཐར་པ་ལ། །དཀྱིལ་འཁོར་འདི་ནི་རབ་ཏུ་དབྱེ། ། དཀྱིལ་འཁོར་བཞེངས་པར་བྱས་ནས་ནི། །དེར་ནི་སློབ་མ་གཞུག་པར་བྱ། །རས་ཀྱིས་གདོང་ནི་བཅིངས་ནས་ནི། །བཀྲོལ་ནས་དཀྱིལ་འཁོར་བསྟན་པར་བྱ། །རྡོ་རྗེ་ཨཱ་ར་ལི་ལས། །ལས་ཐམས་ཅད་པའི་ལེའུ་སྟེ་གསུམ་པའོ།། །།མངོན་པར་ཤེས་པ་བཀའ་སྩལ་བ། །ལྷ་ཡི་མིག་དང་རྣ་བ་དང ། །དེ་བཞིན་གཞན་སེམས་ཤེས་པ་ཉིད། །སྔོན་གྱི་གནས་རྗེས་དྲན་པ་དང ། །དེ་བཞིན་རྫུ་འཕྲུལ་མངོན་ཤེས་ཉིད། །ཧེ་རུ་ཀ་ཡི་དབྱིབས་བསྒོམས་ན། །ཡོ་གི་མངོན་ཤེས་ལྔ་རུ་འགྱུར།། ཤིན་ཏུ་གོམས་པའི་རྣལ་འབྱོར་གྱིས། །ཧེ་རུ་ཀར་ནི་ངང་གིས་འགྱུར། །བསམ་གཏན་ལས་ནི་ནུས་སྐྱེས་ནས། །ཕྱིས་ནི་སྤྱོད་པ་ཡང་དག་བརྩམ། །ཡིད་ནི་བརྟན་ནམ་གཡོ་ 51b པའམ་ཅི། །རང་གི་སེམས་ནི་བསྐུལ་བའི་ཕྱིར། །གླུ་ནི་སྣ་ཚོགས་ལེན་པ་དང ། །དེ་བཞིན་གར་ནི་སྣ་ཚོགས་ཉིད། །སྣ་ཚོགས་རིམ་གྲོ་བྱེད་པ་དང ། །ལུས་ལ་རྒྱན་ནི་སྣ་ཚོགས་དང ། །དེ་བཞིན་སྣ་ཚོགས་དགའ་བ་ཡི། །གཟུགས་སྒྲ་དེ་བཞིན་དྲི་དང་ནི། །རོ་དང་རེག་བྱ་ཡང་དག་བརྩམ། །དེ་ནས་ལས་རྒྱས་བཀའ་སྩལ་པ། །རེའུ་མིག་བརྒྱད་ནི་བྲིས་ནས་ནི། །རྒྱུད་ཀྱི་སྔགས་ནི་རྒྱས་པར་བྱ། །ལས་ཀྱི་དབྱེ་བའི་རབ་དབྱེ་བས། །དེ་བཞིན་ཞི་རྒྱས་ལ་སོགས་ཀྱིས། །ོཾ་ནི་དབང་ལྡན་ལ་ནི་མེར། །དེ་བཞིན་བདེན་བྲལ་ཉིད་དུ་ལ། །རླུང་གི་མཚམས་སུ་ཧཱུཾ་ཉིད་དེ། །ཤར་དུ་ཛྭ་ནི་རྣམ་པར་གནས། །ལྷོ་རུ་ཛྲ་ཡི་རྣམ་པ་ཉིད། །ནུབ་ཏུ་བྷྱོ་ཡི་རྣམ་པ་སྟེ། །བྱང་དུ་ཕཊ་ཀྱི་རྣམ་པ་ཡིན། །དབུས་སུ་སཝཱཧཱ་རྣམ་པར་གནས། །ངོས་གསུམ་དུ་ནི་བསྒྲུབ་བྱའི་མིང ། །རྡོ་རྗེ་ཨཱ་ར་ལི་ལས། སྤྱོད་པའི་ལེའུ་སྟེ་བཞི་པའོ།། །།དེ་ནས་འཁོར་ལོ་བྲི་བ་བཀའ་སྩལ་པ། ཆེ་གེ་མོ་འདི་སོད་ཅིག་།ཆེ་གེ་མོ་འདི་དབང་དུ་མཛོད་ཅིག་།ཆེ་གེ་མོ་རེངས་བར་མཛོད་ཅིག་།ཆེ་གེ་མོ་རྨོངས་པར་མཛོད་ཅིག་།ཆེ་གེ་མོ་མ་ལུས་པར་གྱིས་ཤིག་།ཆེ་གེ་མོ་ལྐུགས་པར་མཛོད་ཅིག་།ཆེ་གེ་མོ་ཁུག་ཅིག་།ཆེ་གེ་མོ་སྐྲག་ཅིག་།ཆེ་གེ་མོ་སྡང་བར་མཛོད་ཅིག་།ཆེ་གེ་མོ་ཆིངས་ཤིག་།ཆེ་གེ་མོ་མ་ནིང་དུ་མཛོད་ཅིག་།ཆེ་ 52a ༄#། །གེ་མོ་སྒུར་པོར་མཛོད་ཅིག་ཅེས་སྔགས་ཀྱི་རྐང་པ་འདི་རྣམས་ཀྱི་ངོས་གཉིས་སུ་བྲིས་ཏེ། གྲོ་གའི་འདབ་མར་གུར་གུམ་གྱིས་བྲི་བར་བྱ་ཞིང ། འདི་དཔུང་པའི་རྩ་བར་གདགས་པར་བྱའོ། །དགུག་པ་ལ་ནི་ཟླ་མཚན་ཟགས་པའི་རས་ལ་རྒྱ་སྐྱེགས་ཀྱི་ཁུ་བས་བྲི་བར་བྱའོ། །གསད་པ་ལ་སོགས་པའི་ལས་ལ་དུར་ཁྲོད་ཀྱི་སོལ་བ་དང ། ཙིཏྲ་ཀ་ཡི་ཁུ་བ་དང ། ཡུངས་མར་དང ། དུག་དང ། སྐེ་ཚེ་དང ། ལན་ཚཝ་དང ། ཚ་བ་གསུམ་དང ། ཀ་ན་ཀ་ཡི་ཁུ་བ་དང ། རུས་པའི་སྨྱུག་གུས་སོ། ། དགུག་པ་ལ་ནི་སྐྱུ་རུ་རའི་ཚེར་མས་སོ། །རྨོངས་པ་ལ་ནི་དྷ་རུ་ཀའི་ཤིང་གིས་སོ། །རེངས་པ་ལ་ནི་པ་ཊའི་སྨྱུག་གུས་སོ། །མ་ལུས་པ་ལ་ནི་བོ་དེ་ཙེའི་ཤིང་གི་སྨྱུག་གུས་བྲི་བར་བྱའོ། །དེ་ནས་རྡོ་རྗེའི་མཆོད་པ་ལ་བཀའ་སྩལ་བ། བས་མཐའ་དང་ནི་དབེན་པ་དང ། །བདག་གི་ཁྱིམ་གྱི་ནང་དུ་ཡང ། །ལོ་ནི་བཅུ་གསུམ་དེ་བཞིན་དུ། །ལོ་ནི་བཅུ་དྲུག་བུ་མོ་དང ། །ཉི་ཤུ་རྩ་ལྔ་མ་མཆོད་བྱ། །བ་དང་དེ་བཞིན་མ་ཧེ་དང ། །སྤྲེའུ་མོ་དང་ཁྱི་མོ་དང ། །པོང་མོ་དེ་བཞིན་རྔ་མོ་དང ། །ཤ་བ་དང་ནི་ར་མ་ཉིད། །ཕག་དང་བ་མེན་ལས་བྱུང་བ། །གཞན་ཡང་ཧེ་རུ་ཀ་མཆོད་མ། །འགྲུབ་པ་ཉིད་དུ་ཐེ་ཚོམ་མེད། །ཉ་དང་ཟླ་བ་འཕོ་བ་ཡི། །ཆོས་ནི་མུ་སྟེགས་ཅན་གྱིས་བརྟག་།དྲི་མ་གཞིག་ 52b པར་བྱ་བའི་ཕྱིར། །རྣལ་འབྱོར་བས་ནི་མྱང་བར་བྱ། །སྲོག་ཆགས་རྣམས་ནི་གསད་མི་བྱ། །རྫུན་གྱི་ཚིག་ནི་སྨྲ་མི་བྱ། །མ་བྱིན་པར་ནི་བླང་མི་བྱ། །ཕ་རོལ་བུད་མེད་བསྟེན་མི་བྱ། །ཉིན་པར་ཉལ་ཞིང་མཚན་མོ་ལངས། །ཤིན་ཏུ་མཉམ་པར་བཞག་པས་འདུག་།ཤ་ཆེན་དང་ནི་རུས་པ་དང ། །ཁྲག་ནི་ཆེན་པོ་བཏུང་བ་དང ། །ཁུ་ཆེན་ཡང་དག་བཟའ་བ་དང ། །དེ་བཞིན་རྣམ་སྣང་ཆེན་པོ་ཉིད། །བྲམ་ཟེ་མ་དང་གཡུང་མོ་ཉིད། །གར་མ་དེ་བཞིན་བཙོ་བླག་མ། །ཐོད་ཅན་མ་དང་ཀོ་ལྤགས་མཁན། །གདོལ་པ་དེ་བཞིན་ཕྱག་དར་མ། །རྩཝ་འཚོང་མ་དང་བཤན་མ་ཉིད། །དེ་བཞིན་ཀླ་ཀློ་ལ་སོགས་དང ། །སྨྱིག་མཁན་དང་ནི་ཆང་འཚོང་མ། །གཞན་ཡང་ཟླ་མཚན་འཛག་པ་ཉིད། །མ་དང་སྲིང་མོ་བུ་མོ་དང ། །སྲིང་མོ་ལས་བྱུང་བུ་མོ་ཉིད། །གཞན་གྱི་བུ་མོ་སྤང་མི་བྱ། །རྗེའི་རིགས་མངོན་དགའ་མི་བྱ་སྟེ། །བགྲོད་བྱའི་བུ་མོ་རྟག་སྤངས་ནས། །བགྲོད་མིན་མཁས་པས་བསྟེན་པར་བྱ། །རྡོ་རྗེ་ཨཱ་ར་ལི་ལས། འཁྲུལ་འཁོར་དང ། ལས་ཀྱི་ཕྱག་རྒྱ་བསྟན་པའི་ལེའུ་སྟེ་ལྔ་པའོ།། །།དེ་ནས་དམ་ཚིག་གི་བག་དབབ་པ་བཀའ་སྩལ་པ། ཉན་ཐོས་སྐལ་པ་ངན་པ་ལ། །བག་ནི་དབབ་པར་མི་བྱ་ཞིང ། །དེ་བཞིན་གཅེར་བུ་ཐོད་དུམ་དང ། །རལ་པ་ཅན་ནི་ཐམས་ཅད་ལ། །དམ་ཚིག་བག་ནི་དབབ་མི་བྱ། །སྙིང་རྗེ་ཡི་ནི་ 53a ༄#། །བདག་ཉིད་ཅན། །གལ་ཏེ་ཡིན་ན་བཟའ་བར་བྱ། །གྲུབ་ཀྱང་ལྟ་བ་དམན་པ་ནི། །སེམས་ཅན་དོན་བྱེད་སྐྱེས་པ་ཉིད། །སྐལ་པ་ངན་པ་ཞེས་བྱར་བརྗོད། །བྲམ་ཟེ་དམ་ཚིག་རྣམ་པར་སྡང ། །དེ་ནས་སློབ་མའི་དམ་ཚིག་བཀའ་སྩལ་པ། དུལ་བྱེད་བློ་དང་ལྡན་པ་དང ། །བཟོད་ལྡན་དལ་བ་མི་བསླུ་བ། །བླ་མར་གུས་ཤིང་སྙིང་རྗེ་ལྡན། ། རྒྱུད་ནི་འདིར་ནི་རབ་ཏུ་བསྔགས། །དེ་ནས་སློབ་དཔོན་གྱི་མཚན་ཉིད་བཀའ་སྩལ་བ། སྔགས་དང་རྒྱུད་ཀྱི་སྦྱོར་བ་ཤེས། །སྙིང་རྗེ་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ནས་ཐུན་ཚོད་བཞི་བྱིན་གྱིས་བརླབ་པ་བཀའ་སྩལ་པ། ཇི་ལྟར་སྒོམ་པའི་སྦྱོར་བ་དེས། །དང་པོ་ཐུན་ཚོད་བྱིན་གྱིས་བརླབ། །དེས་ནི་ཅི་སྲིད་ཉི་ཕྱེད་ན། །ཉི་མ་ཕྱེད་ན་ཐུན་གསུམ་པ། །དུས་དང་བྲལ་ནས་ནམ་ཕྱེད་ན། །ཐུན་ཚོད་བྱིན་རླབས་རབ་ཏུ་གྲགས། །ཐུན་ཚོད་བྱིན་རླབས་རྣལ་འབྱོར་གྱིས། །བདག་གིས་རྣལ་འབྱོར་ལྡན་པས་འགྲུབ། །དེ་ནས་བདག་ཉིད་ཀྱི་དཀྱིལ་འཁོར་བཀའ་སྩལ་པ། འདོད་ཆགས་ཞེ་སྡང་གཏི་མུག་དང ། །ཕྲག་དོག་དང་ནི་སེར་སྣ་ཉིད། །བཅོམ་ལྡན་ཧེ་རུ་ཀ་ལ་མེད། །ཡོད་ན་རྣམ་པར་དག་པ་ཉིད། །དེ་ནས་དམ་ཚིག་སྒྲུབ་པ་བཀའ་སྩལ་པ། བགེགས་དང་བཙུགས་པའི་ཤིང་ལ་འམ། ། 53b ལྗོན་ཤིང་བཏགས་ཤིང་འཕྱང་བ་དང ། །གཡུལ་དུ་མཚོན་གྱིས་བསྣུན་པ་ཉིད། །བདག་ཉིད་རྣལ་འབྱོར་ལྡན་པས་སྒྲུབ། །དེ་ནས་ནང་དུ་མཛད་པ་བཀའ་སྩལ་པ། བཏུང་བ་རིན་པོ་ཆེ་ཡི་ཆུ། །གང་ཞིག་བཟང་དེ་དོན་ཡོད་ཉིད། །ཁྲུས་ནི་དཔག་མེད་རྡོ་རྗེ་ཡིས། །དྲིལ་སོགས་རིམ་པ་རྣམ་སྣང་མཛད། །དམ་ཚིག་ཆོས་ཀྱི་དེ་བཞིན་སྤྱད། །བཙོ་ནི་གང་ཟག་མཉམ་པས་ནི། །དམ་ཚིག་རོ་ནི་འདི་ཡིས་ནི། །གང་ཞིག་གླུ་ཡི་རང་བཞིན་ཉིད། །མཁའ་འགྲོ་ཐམས་ཅད་བཙུན་མོ་སྟེ། །བུ་ནི་འཇམ་དཔལ་ལ་སོགས་པ། །ཁྲོ་བོ་ཡི་ནི་བསྙེན་བཀུར་བ། ། བདག་ཉིད་ཧེ་རུ་ཀ་རུ་འགྱུར། །བརྗོད་པ་བཟླས་པ་ཡང་དག་བཤད། །ཡན་ལག་ཉིད་སོགས་ཕྱག་རྒྱ་སྟེ། །ལྷ་ཡི་རྣལ་འབྱོར་དམིགས་ནས་ནི། །གང་ཞིག་ཐམས་ཅད་དུ་ནི་གནས། ། མང་དུ་བརྗོད་པས་ཅི་ཞིག་བྱ། །གང་ཞིག་འཇིག་རྟེན་བྱ་གནས་པ། །རྡོ་རྗེ་སེམས་དཔའ་གནས་ཐོབ་ཕྱིར། །རྣམ་པར་བཟློག་པས་བྱ་བ་ཉིད། །རི་དྭགས་ཤོར་སོགས་བྱ་བ་ནི། ། འཇིག་རྟེན་དུ་ནི་མི་ཤེས་པས། །མཆོག་ཏུ་རབ་ཏུ་བསྔགས་འགྱུར་བ། །རྣམ་དག་དག་པ་དམ་པ་ནི། །དེ་ཉིད་ཐོབ་པས་རབ་ཏུ་སྤྱོད། །དེ་ནས་སྡོམ་པ་བཀའ་སྩལ་པ། རྡོ་རྗེ་དྲིལ་བུ་གཟུང་བྱ་ཞིང ། །བདུད་རྩི་མཁས་པས་བཟའ་བར་བྱ། །རང་གི་ཕྱག་རྒྱ་རྟག་བསྟེན་ཅིང ། །སྤྱོད་པ་འདའ་བ་ཉིད་མི་བྱ། །དེ་ནས་ལྷའི་མཆོད་པ་བཀའ་སྩལ་པ། །ཆུ་ཀླུང་ 54a ༄#། །ཚལ་གྱི་གནས་སུ་ནི། །བདག་ཉིད་ལྷ་ནི་མཆོད་པར་བྱ། །བདག་གི་སྔགས་ནི་བརྗོད་པར་བྱ། །མེ་ཏོག་ལ་སོགས་བྱིན་གྱིས་བརླབ། །རྡོ་རྗེ་ཨཱ་ར་ལི་ལས།་ལས་སྣ་ཚོགས་བསྟན་པའི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་ཀྱིས་བསོད་སྙོམས་ཀྱི་ལྷུང་བཟེད་བཀའ་སྩལ་པ། མཁས་པས་ཕྲུ་བ་ཆག་པར་ནི། །རིགས་བཞི་རུ་ནི་སློང་མོས་རྒྱུ། །ཆུ་བོའི་འགྲམ་དུ་བཟའ་བྱ་ཞིང ། །གཙང་སྦྲང་ཉིད་ནི་རབ་ཏུ་དབྱེ། །བྱི་ལའི་རྐང་པ་ཙམ་གྱི་ནི། །ཁམས་ནི་བློ་དང་ལྡན་པས་བླང། །ཕྱེ་བཏབ་བཟའ་བར་མི་བྱ་ཞིང ། །མི་སྟེར་བ་ལ་རྟག་ཏུ་བླང ། །གཡས་སུ་རབ་ཏུ་སྐྱེ་བོ་ནི། །གཡོན་ནས་བསྐོར་བ་རུ་ནི་བྱ། །ངེས་པ་མེད་པར་ཁྱིམ་དུ་གནས། །འགྲུབ་འགྱུར་འདི་ལ་ཐེ་ཚོམ་མེད། །རྡོ་རྗེ་ཤིང་གི་སྟོངས་བྱས་དང ། །དེ་བཞིན་དྲིལ་བུ་ཤིང་གི་བདག་།ཧེ་རུ་ཀ་ནི་རབ་གྲུབ་ཕྱིར། །བཟུང་ནས་རྟག་ཏུ་རྒྱུ་བར་བྱ། །དེ་ནས་རྡོ་རྗེ་གནོད་སྦྱིན་མོའི་སྒྲུབ་པ་བཀའ་སྩལ་པ། སེར་སྐྱའི་ཕྲུ་མ་བླངས་ནས་ནི། །སྔགས་ནི་འདིས་ནི་བཟླ་བར་བྱ། །བསྲུང་བར་བྱས་ཤིང་བསྐམས་བྱས་ནས། །དེ་ལ་གུ་གུལ་བསྲེག་པར་བྱ། །མཁས་པས་གནོད་སྦྱིན་མོ་སྔོན་དུ། །དེས་ནི་སྡུག་པ་སྦྱིན་པར་བྱ། །ཤིན་ཏུ་མཛེས་ཤིང་གོས་མཛེས་པ། །བྲིས་སྐུར་གནས་པ་ལེགས་གྲུབ་ཕྱིར། །འདི་ 54b ཉིད་ཀྱི་ནི་ཆོ་ག་ཡིས། །གནོད་སྦྱིན་མོ་ནི་དགུག་པར་བྱ། །བྲིས་སྐུ་ཉིད་ནི་གནོད་སྤྱིན་མོ། །སྔ་བར་བྱིན་ནས་འགྲོ་བར་འགྱུར། །དེ་ཡི་རྒྱན་རྣམས་ཐམས་ཅད་ནི། །གང་ཞིག་ཅུང་ཟད་རྒྱན་རྣམས་ཀུན། །སྔ་བ་རུ་ནི་བླང་བར་བྱ། །གལ་ཏེ་འདོད་ན་མཚན་མོ་ལ། །མེ་ཏོག་གིས་ནི་མཆོད་པར་བྱ། །དེ་ནས་རྡོ་རྗེ་རོ་ལངས་ཀྱི་སྒྲུབ་པ་བཀའ་སྩལ་པ། མ་ཆད་རྨ་མེད་གང་བ་ནི། །ལེགས་པར་བརྟུལ་ཞུགས་ཅན་གྱིས་བཀྲུ། །མར་ཁུ་ཆེན་པོས་བྱུག་པ་དང ། །བདུག་པ་ཆེན་པོས་བདུག་པར་བྱ། །དཀྱིལ་འཁོར་ཆེན་པོའི་ཤར་ཕྱོགས་སུ། །མར་ཁུ་ཆེན་པོའི་མར་མེ་དབུལ། །ང་ཡིས་ཁྱོད་ལ་ཅི་གསུངས་པའི། །དེ་ལ་དཀྱིལ་འཁོར་བཞེངས་པར་བྱ། །ཡུངས་ཀར་རོ་ལ་བརྡེག་བྱ་ཞིང ། །སྒྲ་ནི་རི་བོར་ཡང་དག་བརྗོད། །དེ་ལ་མཁས་པས་འཇིགས་མི་བྱ། །ོཾ་ཛྭ་ལ་ཛྭ་ལ་བྷྱོ་ཧཱུཾ་བརྗོད་པར་བྱའོ། །དེས་ནི་ཅི་ཞིག་སྦྱིན་ཞེས་སྨྲས། །སྒྲུབ་པོས་དེ་ལ་བླང་བར་བྱ། །རྐང་བྱུག་དང་ནི་མིག་སྨན་ཉིད། །རལ་གྲི་དང་ནི་ས་འོག་དང ། །རིལ་བུ་མཁའ་ལ་སྤྱོད་པ་ཉིད། །ཐམས་ཅད་སྦྱིན་པར་ཐེ་ཚོམ་མེད། །དེ་ནས་ཚོགས་ཀྱི་དཀྱིལ་འཁོར་བཀའ་སྩལ་པ། གོང་གི་བསམ་གཏན་བྱས་ནས་ནི། །དེ་ལ་སྔགས་ནི་བཟླ་བར་བྱ། །རང་གི་ཧེ་རུ་ཀ་ཡི་ནི། །རྣལ་འབྱོར་གྱི་ནི་བདག་ཉིད་དུ། །ཚོགས་ཀྱི་དཀྱིལ་འཁོར་འགྲུབ་པར་འགྱུར། །གཙང་ཞིང་དབེན་པའི་ས་ཕྱོགས་དང ། །ཞི་ 55a ༄#། །ཞིང་དགེ་བའི་གནས་སུ་ནི། །རྣལ་འབྱོར་པ་ཡིས་བཟའ་བར་བྱ། །ཚོགས་ཀྱི་དཀྱིལ་འཁོར་འདི་ཉིད་དུ། །དཔལ་ལྡན་ཧེ་རུ་ཀ་ཡི་ནི། །ཱ་ར་ལི་ཞེས་བྱ་བའི་མཚན། །ཟ་བ་ན་ནི་གཏམ་སྨྲ་བྱ། །རི་ཡི་རྒྱལ་པོའི་མགོར་གནས་པར། །ཚོགས་ཀྱིས་དག་པའི་སེམས་ཀྱིས་བསྐོར། །དེ་ཡང་ཚོགས་ཀྱི་དཀྱིལ་འཁོར་འདིར། །འགྲུབ་འགྱུར་གང་ཕྱིར་འདི་ཉིད་དུ། །མཆོད་པས་གྲུབ་པར་ཤེས་མི་འགྱུར། །དེ་ཡི་བཙུན་མོ་སྲུང་བ་ནི། །གཤིན་རྗེ་མཐར་བྱེད་དུ་ནི་འགྱུར། །ཤེས་རབ་མཐར་བྱེད་དཔུང་གི་མགོན། །པདྨ་མཐར་བྱེད་སྐུ་བསྲུངས་བདག་།དེ་ཡི་བགེགས་ཀྱི་མཐར་བྱེད་ནི། །དམག་དཔོན་དུ་ནི་བརྗོད་པ་ཡིན། །འདོད་པའི་རྒྱལ་པོ་ཞེས་བྱ་བ། །དེ་ཡི་གཤེད་མའི་བདག་པོ་ཉིད། །དཔལ་ལྡན་དབྱིག་པ་སྔོན་པོ་ནི། །སྒོ་སྲུང་བ་ཡི་བདག་པོ་ཉིད། །ཐམས་ཅད་ལ་ནི་དབང་བྱེད་པ། །ཞར་བ་མི་གཡོ་མགོན་པོ་ཉིད། །ཡི་གེ་བ་ཡི་བདག་པོ་ནི།། དེ་བཞིན་དུ་ནི་སྟོབས་པོ་ཆེ། །རྡོ་རྗེ་ཨཱ་ར་ལི་ལས། དངོས་གྲུབ་སྒྲུབ་པའི་ལེའུ་སྟེ་བདུན་པའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་སོགས་པ་ཐམས་ཅད་གཏམ་འདི་ཐོས་ནས་སྲིད་པའི་སྦྱོར་བ་ཀུན་དུ་བཅད་ཅིང་རྣམ་པར་དག་པར་གྱུར་བ་དང ། སྡིག་པ་ཟད་ཅིང་ཉོན་མོངས་པ་བསྲེགས་པར་གྱུར་ཏོ། །དེ་ནས་ 55b བྱང་ཆུབ་སེམས་དཔའ་དེ་དག་གིས་ཚིག་འདི་སྐད་ཅེས་གསོལ་ཏོ། །རྡོ་རྗེ་ཨཱ་ར་ལི་བརྩོན་ཆེ། །སྣ་ཚོགས་ཨེ་མ་རྨད་བྱུང་བ། །གང་ཞིག་བདག་ཅག་ཉོན་མོངས་ཁེ་བས།། གང་ཞིག་བདག་ཅག་གྲུབ་འགྱུར་བ། །དེ་ནས་བྱང་ཆུབ་སེམས་དཔའ་དེ་རྣམས་རྐང་གཉིས་ཀྱི་མཆོག་དམ་པ་ཐོབ་ནས་སངས་རྒྱས་ཀྱི་རོལ་པ་སྟོན་པར་བྱེད་དོ། །ལ་ལར་རྫོགས་པའི་བྱང་ཆུབ་མཛད། །ཁ་ཅིག་ཏུ་ནི་དཀའ་ཐུབ་སྤྱོད། །ལྷ་ལས་བབས་པའི་སྤྲུལ་པ་དང ། །དེ་བཞིན་ཁབ་ནས་འབྱུང་བ་དང ། །ཆོས་ཀྱི་འཁོར་ལོ་བསྐོར་བ་དང ། །ཁ་ཅིག་ཏུ་ནི་རབ་བྱུང་བྱེད། །འདུལ་བ་སྟོན་པར་བྱེད་པ་དང ། །མངོན་པའི་སེམས་ནི་ལྷག་པའི་སེམས། །ལ་ལར་སྔགས་ཀྱི་བདག་ཉིད་འཆང ། །ཁ་ཅིག་ཕ་རོལ་ཕྱིན་པའི་ཚུལ། །ཁ་ཅིག་བྱེ་བྲག་སྨྲ་བའི་ལམ། །ཁ་ཅིག་ཏུ་ནི་མདོ་སྡེ་པ། །ཁ་ཅིག་ཏུ་ནི་རྣམ་ཤེས་ཉིད། །ཁ་ཅིག་ཏུ་ནི་དབུ་མ་ཉིད། །ལ་ལར་དམྱལ་བ་ཆེན་པོར་འགྲོ། །ལ་ལར་སེམས་ཅན་རྗེས་སུ་སྐྱོང ། །སེམས་ཅན་འདུལ་བ་ལ་བལྟས་ནས། །སྙིང་རྗེའི་བསམ་པས་རོལ་པར་བྱ། །རྡོ་རྗེ་ཨཱ་ར་ལི་ལས། ཕན་ཡོན་གྱི་ལེའུ་སྟེ་བརྒྱད་པའོ།། །།དེ་ནས་དེ་བཞིན་གཤེགས་པ་ཐམས་ཅད་དང ། གང་ཡང་བྱང་ཆུབ་སེམས་དཔའ་དེ་དག་གིས་ལས་རྣམ་པར་འབྱེད་པ་བསྟན་པར་བྱའོ། །གང་ཞིག་རྒྱུད་གང་དུ་དམ་ཚིག་བྱེད་ 56a ༄#། །པ་དེས་ནི་འཇིག་རྟེན་གསུམ་པོ་ཀུན་གྱིས་བསྟོད་པར་འགྱུར་རོ། །གང་ཞིག་རྒྱུད་དེ་ཡིས་གང་གི་ཚེ་བྱེད་པ་དེ་ནི་སྲིད་པར་མཛེས་པར་འགྱུར་རོ། །གང་ཞིག་གླུ་ཡིས་མཆོད་བྱེད་ན། །དེས་ནི་རྟག་ཏུ་སྒྲ་སྙན་འགྱུར། །གང་ཕྱིར་གང་ཞིག་མར་མེ་འབུལ། །དེ་ནི་མིག་དང་ལྡན་པར་འགྱུར། །གང་ཞིག་གར་གྱི་མཆོད་བྱེད་པ། །དེ་ནི་རིག་འཛིན་ཆེན་པོར་འགྱུར། །གང་ཞིག་ཕྱག་འཚལ་བྱེད་པ་ནི། །དེ་ལ་སྐྱེ་བོ་ཕྱག་འཚལ་འགྱུར། །གང་ཞིག་དྲི་ཞིམ་འབུལ་བ་ནི། །ལུས་ནི་དྲི་ཞིམ་ལྡན་པར་འགྱུར། །གང་ཞིག་ཕྲེང་བ་བཟང་འབུལ་བ། །དེ་ནི་གསེར་གྱི་ཕྲེང་ལྡན་འགྱུར། །གང་ཞིག་གོས་ནི་འབུལ་བ་ནི། །དེས་ན་ལྷ་ཡི་གོས་རྙེད་འགྱུར། །གང་ཞིག་མཚན་ཙམ་འདོན་པ་དང། །དད་པ་ཙམ་ཡང་རབ་བྱེད་པ། །ལྷག་པར་མོས་པ་རབ་ཏུ་བྱེད། །གང་ཞིག་སྐྱེ་བོ་མཆོད་བྱེད་པ། །དེ་རྣམས་ཐམས་ཅད་རྣམ་དག་པའི། །སྲིད་པའི་ལོངས་སྤྱོད་རབ་ཏུ་བཟང ། །རྡོ་རྗེ་ཨཱ་ར་ལི་ལས། ཡོན་ཏན་རྗེས་སུ་བསྔགས་པའི་ལེའུ་སྟེ་དགུ་པའོ།། །།དེ་ནས་ཡང་གང་ཞིག་དེ་ལྟར་རྣམ་པར་དག་པའི་སྦྱིན་པ་བྱིན་པས་དེ་རྐང་གཉིས་ཀྱི་མཆོག་ཏུ་འགྱུར་རོ། །དེ་ནས་བྱང་ཆུབ་སེམས་དཔའ་དེ་དག་དགའ་བས་ཐེ་ཚོམ་སྐྱེས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ 56b ཉེ་བར་འདུག་སྟེ་ཞུས་པ། ཇི་ལྟ་བུ་ཡི་རྣལ་འབྱོར་བགྱི། །བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་མཐའ་གསུམ་ཡོངས་དག་པ། །ཧེ་རུ་ཀ་ནི་བསྒོམ་པར་བྱ། །སྦྱིན་པ་ཡང་ནི་ཧེ་རུ་ཀ་།གང་བ་སྦྱིན་པའང་དེ་ལྟ་བུ། །སྦྱིན་པ་འདི་ནི་རབ་ཏུ་བསྔགས། །སྦྱིན་པ་འདི་ནི་དཔེ་ཙམ་སྟེ། །ཚུལ་ཁྲིམས་ལ་སོགས་འདི་ལྟར་སྤྱད། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་ཨཱ་ར་ལི་ལས་དེ་སྐད་ཅེས་གསུངས་སོ། །རྡོ་རྗེ་ཨཱ་ར་ལི་ལས། རྣལ་འབྱོར་མའི་གོང་ན་མེད་པ་ཞེས་བྱ་བའི་ལེའུ་སྟེ་བཅུ་པ་རྫོགས་སོ།། །།རྒྱ་གར་གྱི་མཁན་པོ་ཀ་ཡ་སྠ་པ་ག་ཡ་དྷ་རའི་ཞལ་སྔ་ནས། བོད་ཀྱི་ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། |