།།རྒྱ་གར་སྐད་དུ། ཤྲཱི་མ་ཧཱ་མཱ་ཡཱ་ཏནྟྲ་རཱ་ཛ་ནཱ་མ། བོད་སྐད་དུ། དཔལ་སྒྱུ་འཕྲུལ་ཆེན་མོ་ཞེས་བྱ་བའི་རྒྱུད་ཀྱི་རྒྱལ་པོ། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང ། །འཇིག་རྟེན་བྱ་བར་རབ་འཇུག་པ། །དེ་སྙེད་རྣམས་ལ་ཕྱག་འཚལ་ལོ། །དེ་ནས་དེ་ལས་རྡོ་རྗེ་མཁའ་འགྲོ་མ་གསང་བའི་དབང་ཕྱུག་མ་རྣམས་ཀྱི་མཆོག་ཏུ་གསང་བ་ཞེས་བྱ་བའི་རྒྱུད་བཤད་པར་བྱ་སྟེ། གང་ཞིག་གིས་ནི་ཀུན་ཁྱབ་པ། །རྒྱུ་དང་མི་རྒྱུ་ཚངས་སྒོ་ང ། །ལྷ་མོ་ཐམས་ཅད་སྐྱེད་བྱེད་ཅིང ། ། ཚངས་ལ་སོགས་པའི་བདག་ཉིད་ཆེ། །དེ་རྣམས་ཀྱི་ནི་གསང་ཆེན་འདི། །སྒྱུ་འཕྲུལ་ཆེན་མོ་དབང་ཕྱུག་ཆེ། །སྒྱུ་འཕྲུལ་ཆེན་མོ་དྲག་ཆེན་མོ། །འབྱུང་བ་ཡང་དག་སྡུད་མཛད་མ། །གང་གིས་འདི་ཀུན་ལ་ཁྱབ་པ། །རྒྱུ་དང་མི་རྒྱུའི་འཇིག་རྟེན་གསུམ། །དེས་ནི་དེ་ནས་འདི་བསྡུས་ནས། །འཇིག་རྟེན་གསུམ་པོ་ཡང་སྤྲོའོ། །གསང་བ་པ་རྣམས་འདི་ཡི་ནི། །སྒྱུ་མའི་བདག་ཉིད་ཅེས་རྣམ་གྲངས། །འཇིག་རྟེན་གསུམ་སྒྲུབ་རིག་མ་སྟེ། །འདོད་པ་ཐམས་ཅད་རབ་སྟེར་བ། །གང་ཞིག་རྣམ་པར་ཤེས་ཙམ་གྱིས། །སྒྲུབ་པའི་དབང་ཕྱུག་རིག་པ་ 44a ༄#། །ཉིད། །ལྷ་དང་ནོར་བདག་དྲི་ཟ་དང ། །གནོད་སྦྱིན་ལྷ་མིན་མི་དང་བཅས། །རིག་པ་འཛིན་དང་གང་ཡང་རུང ། །མི་འམ་ཅི་དང་ལྟོ་ཕྱེ་ཆེ། །སྲིན་པོ་དང་ནི་ཤ་ཟ་རྣམས། །སྒྲུབ་པོ་རྣམས་ལ་འགྲུབ་པར་འགྱུར། །དབང་དུ་འདུ་འགྱུར་འབྱུང་པོ་རྣམས། །ཆུ་ལས་སྐྱེས་དང་ཐང་ལས་སྐྱེས། །ཆོས་རྣམས་རང་བཞིན་འོད་གསལ་བ། །གདོད་ནས་དག་ཅིང་རྙོག་པ་མེད། །ཐབས་བརྗོད་པ་ཡིས་དེ་ལས་ནི། །རང་བྱུང་ཡེ་ཤེས་ལྔ་ལྡན་འགྱུར། །རྣལ་འབྱོར་མ་རྣམས་སྦྱོར་བའི་མ། །ཁམས་གསུམ་པོ་ནི་མ་ལུས་ཀུན། །མ་ལུས་ལུས་པ་མེད་གྲུབ་ཅིང ། །སྒྱུ་མ་ཀུན་གྱིས་རྣམ་རོལ་པའོ། །སངས་རྒྱས་ཀུན་ལས་ཕྲོགས་ནས་སུ། །ལྷ་མཆོག་ལྷ་སྐྱེས་བུ་མོ་སྤྱོད། །རྣལ་འབྱོར་དབང་ཕྱུག་བྱེད་རིག་པ། །དེ་བཞིན་དུ་ནི་མིག་འཕྲུལ་བྱེད། །རྨོངས་པ་དང་ནི་རེངས་པ་དང ། །བསྐྲང་དང་གསད་པ་ལ་སོགས་པ། །དབང་དང་དགུག་པ་ལ་སོགས་དང ། །ནམ་མཁར་འགྲོ་བ་ཉིད་ཀྱང་ངོ ། །གཞན་གྱི་གྲོང་སོགས་བྱ་བ་དང ། །མི་སྣང་བ་དང་གང་ཡང་རུང ། །ཞེ་འགྲས་པ་དང་རྨུགས་པ་དང ། །དེ་བཞིན་ས་འོག་འགྲོ་བའོ། །རིག་འཛིན་འཁོར་ལོས་བསྒྱུར་ཉིད་འགྱུར། །འཆི་བ་མེད་ཅིང་རྒས་པ་མེད། །རྣལ་འབྱོར་སྒྱུ་མའི་རིག་པ་འདི། །འདི་ཡིས་ན་བ་མེད་པར་འགྱུར། །སྔགས་ཀྱི་ཡི་གེའི་གཟུགས་ཀྱིས་སུ། ། 44b རྣལ་འབྱོར་པས་ནི་རྣམ་རོལ་བྱེད། །བཀླགས་པ་དང་ནི་བསམ་པ་ཡིས། །བསྒོམ་པ་དང་ནི་ཏིང་འཛིན་རྣམས། །བཀླགས་པས་བྱེད་པའི་རིག་པ་སྟེ། །རིག་པའི་དངོས་གྲུབ་བྱེད་པར་འགྱུར། །བརྟུལ་ཞུགས་མེད་ཅིང་དཀའ་ཐུབ་མེད། །དཀའ་སྤྱོད་བསྙུང་བ་སྡོམ་མེད་པར། །རྟག་ཏུ་ཤེས་རབ་ཐབས་སོགས་ཀྱིས། །རྟག་ཏུ་དགའ་དང་བདེ་བས་འགྲུབ། ། ལྟེ་བའི་དབུས་གནས་དཔའ་བོ་སྟེ། །གེ་སེར་གསང་བའི་སྤྱོད་ཡུལ་ལ། །སེམས་དང་སེམས་མེད་སེམས་ཀྱི་གཟུགས། །ཡེ་ཤེས་ཤེས་བྱའི་རང་བཞིན་བདག་།དེ་ནི་བདག་གིས་བཤད་བྱ་སྟེ། །ཟབ་མོ་སངས་རྒྱས་བསྟན་པའོ། །ཱ་ལི་ཀཱ་ལི་མཉམ་བྱས་ཏེ། །རི་མོ་དེ་ལ་སྦྱར་བར་བྱ། །རི་མོ་སྟེང་དུ་འབར་བའི་མཐར། །འོག་ཏུ་འབབ་པར་བྱེད་པའོ། །ཁུ་བའི་ཚུལ་གྱིས་འབབ་པ་སྟེ། །བདུད་རྩིའི་ཐིགས་པའི་གཟུགས་ལས་སོ། །གང་གང་དབང་པོའི་ལམ་ནས་ནི། །དེ་དེའི་རང་བཞིན་སྐྱེ་བར་འགྱུར། །མཆོག་ཏུ་ཕན་པའི་རྣལ་འབྱོར་གྱིས། །སངས་རྒྱས་ཀུན་གྱི་རང་བཞིན་འབབ། །དམ་ཚིག་ཆེན་པོའི་དངོས་གྲུབ་དང ། །རིལ་བུ་ཆེན་པོའི་སྒྲུབ་པ་ཡང ། །སྒྱུ་འཕྲུལ་ཆེན་མོའི་རབ་སྦྱོར་པའི། །སྡོམ་པའི་སྦྱོར་བར་བྱེད་པར་འགྱུར། །མཆོད་པ་ལྔ་དང་ཡང་དག་ལྡན། །འདོད་པའི་ཡོན་ཏན་ལྔ་དང་བཅས། །སྒྲུབ་པའི་དབང་པོ་ཞེས་བྱ་བ། །དངོས་གྲུབ་ཤིན་ཏུ་ 45a ༄#། །རྟག་པའོ། །གང་ཞིག་ཤེས་པའི་དངོས་གྲུབ་ཀྱིས། །ལྷ་ཡི་གནས་སུ་མྱུར་བར་འགྱུར། །དེ་ནི་བདག་གིས་བཤད་བྱ་སྟེ། །ལྷ་མོ་བདེན་པར་ང་སྨྲའོ། ། སྒྱུ་འཕྲུལ་ཆེན་མོ་ཁྱོད་ལ་ངས། །འཇིག་རྟེན་གསུམ་འགྲུབ་དེ་བཤད་བྱ། །རྣལ་འབྱོར་ཆེན་མོ་རྣམས་ཀྱི་ནི། །བཟང་པོའི་ཡི་གེའི་ཕྲེང་བ་རྣམས། །གང་ཞིག་བསམས་པ་ཙམ་གྱིས་ནི། །རྒྱུ་དང་མི་རྒྱུ་འགྲུབ་འགྱུར་བའོ། །འདོད་པས་ཀུན་ལ་ཉེར་སྤྱོད་པ། །ཇི་ལྟར་འདོད་བཞིན་བརྟེན་བྱས་ན། །རྣལ་འབྱོར་པ་ཆེན་རྟག་རོལ་ཏེ། །རྡོ་རྗེ་རྣལ་འབྱོར་མ་རྣམས་དང ། །རྣམ་པ་སྣ་ཚོགས་གཟུགས་སུ་ནི། །རྣལ་འབྱོར་བདག་ཉིད་སྟོན་པར་བྱེད། །དེ་བཞིན་གཤེགས་པ་ཀུན་གྱི་དཔལ། །དངོས་གྲུབ་ཆེན་པོ་སྟེར་བར་འགྱུར།། བཅུད་ལེན་རྣམ་པ་སྣ་ཚོགས་ཀྱིས། །རྟག་ཏུ་སེམས་ཅན་དོན་བྱེད་པའོ། །ཁུ་བ་དགུག་དང་ཆང་དང་ནི། །གོང་བུ་ཆེན་པོ་དགུག་པ་ཉིད། །ཤ་ཆེན་པོ་ནི་བཀུག་ནས་སུ། ། རྣལ་འབྱོར་མ་དང་ལྷན་ཅིག་སྤྱོད། །ཚེ་རིང་བརྩོན་འགྲུས་ཆེན་པོ་དང ། །གཟི་བརྗིད་ཆེ་ཞིང་སྟོབས་ཆེན་འགྱུར། །ལྷ་ཡི་མིག་དང་རྫུ་འཕྲུལ་ལྡན། །ཉིན་རེ་ཟླ་བ་འཐུང་བའོ། །དེ་ཡི་ཚེ་ནི་འཕེལ་འགྱུར་ཏེ། །བསྐལ་པ་ཆེན་པོའི་བར་དུ་གནས། །བལྟ་བས་མི་ངོམས་ལུས་དང་ནི། །ཆོ་འཕྲུལ་དག་ནི་སྟོན་པར་བྱེད། །ཡིད་ལ་བསམ་མ་ 45b ཐག་ཏུ་ནི། །རང་གི་གཟུགས་ནི་ཡོངས་བརྗེས་ཤིང ། །བཀླགས་པས་འགྲུབ་པའི་དོན་ཡོད་པ། །རིག་མའི་དབང་ཕྱུག་རྫུ་འཕྲུལ་ཆེ། །རིག་པ་འཇིག་རྟེན་གསུམ་པོ་ན། །ང་ཡི་རིག་དང་མཉམ་པ་མེད། །རྒྱུད་རྣམས་ཀུན་གྱི་ལུང་འདི་ནི། །མཛེས་མ་ཁྱོད་ལ་བཤད་པ་ཡིན། །རྣལ་འབྱོར་མའི་དབང་ཕྱུག་མའི་རིག་མ་ཆེན་མོ་ལས། །དངོས་གྲུབ་ཀྱི་མཚན་མ་བསྟན་པ་སྟེ་ལེའུ་དང་པོའོ།། །།དེ་ནས་དེ་ལས་རྣལ་འབྱོར་མའི་དབང་ཕྱུག་ཆེན་མོ་རྣམས་ཀྱི་སྦྱོར་བའི་དངོས་གྲུབ་ཀྱི་འབྲས་བུ་རབ་ཏུ་སྟེར་བའི་གསང་བའི་ཡི་གེ་བཟང་པོ་བཤད་པར་བྱ་སྟེ། གང་ཞིག་བསམས་པ་ཙམ་གྱིས་ནི། །རྣལ་འབྱོར་མ་མཆོག་སྟེར་འགྱུར་པ། །དང་པོའི་ཡི་གེའི་སྦྱོར་བ་ཡིས། །རྟག་ཏུ་དབུགས་ནི་བཏང་བར་བྱ། །བརྒྱད་པོའི་མཐའ་དང་ཡང་དག་ལྡན། །ུ་དང་ཐིག་ལེར་བཅས་པ་ཡིས། །རྣལ་འབྱོར་པ་ཡི་དབུགས་རྡུབ་བྱེད། །དངོས་དང་དངོས་མེད་རྣམ་སྤངས་པའོ། །དེ་ལ་བརྟུལ་ཞུགས་མ་བཤད་དོ། །ཕྲེང་བ་སྔགས་དང་གཟུང་བ་དང ། །སྦྱིན་སྲེག་གི་ནི་ལས་རྣམས་ཀྱང ། །གཅིག་ནས་གཅིག་ཏུ་ལྡོག་པར་འགྱུར། །སྔགས་དང་དབྱིབས་དང་ཆོས་བདག་ཉིད། ། སྦྱོར་བ་རྣམ་གསུམ་ཞེས་བྱ་སྟེ། །ཡེ་ཤེས་རྣམ་པ་གསུམ་གྱིས་ནི། །སྲིད་པའི་ཉེས་པས་གོས་མི་འགྱུར། །དེ་ལྟར་རྒྱུན་དུ་རྣལ་འབྱོར་པ། །རྟག་ཏུ་གོམས་པ་ཉིད་ཀྱིས་ནི། །རྡོ་ 46a ༄#། །རྗེ་སེམས་དཔའ་དང་མཉམ་པའང ། །ཟླ་བ་གཅིག་གིས་དེ་འགྲུབ་འགྱུར། །དབང་པོའི་མདོག་དང་ཡང་དག་ལྡན། །དང་པོའི་ཡི་གེ་བསྒོམ་བྱ་སྟེ། །རང་གི་རིག་པ་རབ་སྦྱར་ན། །དེས་འདི་མོད་ལ་འགུག་པར་འགྱུར། །ཡི་གེ་གཉིས་པ་དང་ལྡན་པ། །བསམ་ཞིང་རྣམ་པར་སྒོམ་བྱས་ན། །ས་གསུམ་པོ་ནི་མ་ལུས་པ། །དེ་དག་ཐམས་ཅད་དབང་དུ་འགྱུར། །ཚངས་དང་ཁྱབ་འཇུག་དབང་པོ་དང ། །དེ་བཞིན་དབང་པོ་འདོད་དབང་ཕྱུག་།ཡེ་ཤེས་ཡི་གེས་བསྐུལ་བྱས་ནས། །དེ་དག་ཆུང་མར་བཅས་ཏེ་འགུགས། །ཡི་གེ་ཨ་དང་ཡང་དག་ལྡན། །སྐུ་གསུང་ཐུགས་ལ་ལེགས་གནས་པ། །སྦྱོར་བ་རྣམ་གསུམ་སྒོམ་བྱས་ན། །གོང་བུ་འགུགས་པའི་མཆོག་ཡིན་ནོ། །ཡི་གེ་ཁེ་དང་ཡང་དག་ལྡན། །སྐུ་མདོག་དམར་པོ་ཞལ་བཞི་པ། །ལག་ན་ཐོད་པ་ཆགས་པའི་བདག་།ཁུ་བ་འགུགས་པའི་མཆོག་ཡིན་ནོ། །ཡི་གེ་རྩི་དང་ལྡན་པ་ཡིས། །ཁ་དོག་སེར་པོ་ཀུན་ཏུ་འོད། །རྟ་ཡི་ཞལ་གྱི་ཚུལ་བྱས་ན། །ཆབ་འགུགས་པ་ཡི་དམ་པ་ཡིན། །ཡི་གེ་ར་དང་ཡང་དག་ལྡན། །ཁ་དོག་དམར་པོ་འོད་ཆེན་པོ། །ཕྱག་བཞི་པ་དང་ཞལ་བཞི་པ། །ལྕེ་སྦྱང་ཚུལ་དུ་ལེགས་གནས་པ། །ཁྲོ་བོའི་སེམས་ཀྱིས་བསྒོམ་བྱས་ནས། །ཁྲག་འགུགས་པ་ཡི་དམ་པའོ། །ཡི་གེ་དྲུག་དང་ཡང་དག་ལྡན། །གནས་ 46b དྲུག་ཏུ་ནི་ངེས་སྦྱར་བྱ། །རྣལ་འབྱོར་མཁའ་འགྲོ་མ་ཡི་ཚོགས། །རྡོ་རྗེ་རྣལ་འབྱོར་མ་རྣམས་འགྲུབ། །མིག་གཉིས་དང་ནི་རྣ་བ་དང ། །དེ་བཞིན་སྣ་དང་ཡིད་ཀྱི་ཉིད་དག་།སེང་གེ་རྣལ་འབྱོར་ཕྱག་རྒྱ་ཡིས། །རྣལ་འབྱོར་པ་ཡིས་བཅིང་བར་བྱ། །སྲོག་དང་རྩོལ་བ་བསྡམས་ནས་སུ། །བསྒོམ་ན་སྐད་ཅིག་དེ་ལ་འབར། །འོག་མིན་སྲིད་པའི་མཐར་ཐུག་པར། ། རྒྱུ་དང་མི་རྒྱུའི་འཇིག་རྟེན་བདུན། །ཐམས་ཅད་ཀྱིས་ནི་དེ་བསྒོམས་ཀྱང ། །དེ་ནི་རྟོགས་པ་མ་ཡིན་ནོ། །གལ་ཏེ་ཐམས་ཅད་རབ་རྟོགས་ན། །འགྲོ་བའི་རོལ་པ་རྣམ་པར་འཇིག ། དེ་ཕྱིར་ཡེ་ཤེས་འདི་གསང་ཞིང ། །མི་གསལ་ཡི་གེ་མེད་པའོ། །གང་ཕྱིར་སངས་རྒྱས་རྣམས་ཀྱིས་མཁྱེན། །རྣལ་འབྱོར་གཉིད་དང་ཡང་དག་ལྡན། །གོང་བུར་སོང་བའི་ཡིད་དེ་ཡིད། །གཟུགས་གཅིག་ཏུ་ནི་སྒོམ་པར་བྱེད། །སྒོ་དགུ་ལས་ནི་གང་བྱུང་བ། །རྫས་ཀྱི་བདག་ཉིད་རྣམ་བསྒོམས་ལ། །རང་བཞིན་མེད་པའི་བློ་ལྡན་པའི། །རྣམ་པར་མི་རྟོག་པ་ཡིས་བཟའ། །མཐེ་བོང་དང་ནི་སྲིན་ལག་གིས། །ཁ་རུ་ཡིད་བཞིན་ནོར་བུ་ནི། །བདུད་རྩིའི་རང་བཞིན་ལས་བྱུང་བ། །རྟག་པའི་དངོས་གྲུབ་ཐོབ་པར་འགྱུར། ། རྣལ་འབྱོར་མའི་དབང་ཕྱུག་མའི་རིག་པ་ཆེན་མོ་ལས། སྦྱོར་བ་གཏན་ལ་དབབ་པའི་ལེའུ་སྟེ་གཉིས་པའོ།། །།དེ་ནས་ཡང་དག་བཤད་བྱ་བ། །དམ་ 47a ༄#། །ཚིག་སྒྲུབ་པའི་དམ་པ་སྟེ། །རྫས་གཞན་ཚོགས་ནི་བཟའ་བྱ་བ། །ཐམས་ཅད་མཁྱེན་པའི་འབྲས་སྟེར་བའོ། །གང་ཞིག་ཟོས་པ་ཙམ་གྱིས་ནི། ། འབྱུང་པོའི་མི་རྣམས་འགྲུབ་འགྱུར་བ། །བརྟན་པ་དང་ནི་མྱུར་འགྲོ་ཉིད། །དེ་བཞིན་དུ་ནི་བ་ལང་ཁྱི། །ཆེན་པོར་ཡང་དག་ལྡན་པ་ནི། །དེ་བཞིན་ཡེ་ཤེས་བདུད་རྩི་ལྔ། ། ཚེས་གྲངས་བཅུ་བཞི་བརྒྱད་ལ་ནི། །ལྷན་ཅིག་བསྒོས་ཏེ་སྦྱར་བྱས་ནས། །ཉི་མ་བདུན་དུ་ཅེ་སྦྱང་གི་།དབུས་སུ་བཞག་ལ་དེ་ནས་བཏོན། །ལྔ་པོ་དག་ལས་ཡུངས་ཀར་གྱི། ། འབྲས་བུའི་ཚད་ཙམ་རིལ་བུ་བྱ། །དེ་ནི་རྒྱུད་འདིར་གསུངས་མོད་ཀྱིས། །ཚེས་བརྒྱད་དང་ནི་བཅུ་བཞིའི་བར་དག་ཏུ། །ཉི་མ་བདུན་དུ་ལྷན་ཅིག་མིན་སྒོམ་སྟེ། །སྦྱར་ནས་ཅེ་སྤྱང་དབུས་སུ་ལེགས་བཞག་ལ། །དེ་ལས་བཏོན་ཏེ་ལྔ་པོ་དག་ལས་ནི། །དངོས་གྲུབ་འབྲས་བུའི་ཚད་ཙམ་རིལ་བུ་བྱ། །འབྲས་བུ་ཆེན་པོ་རབ་ཏུ་རྟོགས་པས་ན། །དེ་ནི་རྒྱུད་འདིར་གསུངས་ཀྱི་ཀུན་ཏུ་སྦས། །འབྲས་བུ་ཆེན་པོ་སངས་རྒྱས་ཀྱིས། །ཐམས་ཅད་དུ་ནི་སྦས་པའོ། །དེ་ནས་སྒྲུབ་ཐབས་འབྱུང་བའོ། །ཡིད་ཀྱིས་པདྨ་བསམ་བྱ་བ། ཁ་དོག་དམར་པོ་ཀུན་འོད་ལ། །ལྷ་མོ་བཞི་དང་ཡང་དག་ལྡན། །སངས་རྒྱས་གཟུགས་ཀྱིས་ཉེར་བརྒྱན་པའོ། །ཤར་དུ་ཨུཏྤལ་སྔོ་འོད་མདོག་།ལྷོ་རུ་སེར་པོ་ 47b ལྟ་བུའོ། །ནུབ་ཏུ་དཀར་དང་དམར་བའི་འོད། །བྱང་དུ་མྲྒད་འོད་ཡིན་ནོ། །འབར་བའི་ཕྲེང་བས་འཁྲིགས་པ་དང ། །ཞལ་བཞི་ཕྱག་བཞི་སྤྱན་གསུམ་མཛེས། །ཤར་ཕྱོགས་ཀྱི་ལྷ་མོན་སྤྱིན་གསུམ་པ་ཕྱག་གཡོན་ན་ཁ་ཊྭཱཾ་ག་དང ། དྲིལ་བུ། གཡས་ན་རྡོ་རྗེ་དང ། ཐོད་པ་བསྣམས་པ་བསམ་མོ། །ལྷོ་ཕྱོགས་ཀྱི་ལྷ་མོའི་ཕྱག་ན་མདུང་རྩེ་གསུམ་དང ། རིན་པོ་ཆེ་དང ། བ་དན་དང ། ཅེ་སྤྱང་བསྣམས་པའོ། །ནུབ་ཕྱོགས་ཀྱི་ལྷ་མོའི་ཕྱག་ན་གཞུ་དང ། མདའ་དང ། སྣ་ཚོགས་པདྨ་དང ། ཐོད་པ་བསྣམས་པའོ། །བྱང་ཕྱོགས་ཀྱི་ལྷ་མོའི་ཕྱག་ན་རལ་གྲི་དང ། ཞགས་པ་དང ། རྡེའུ་ཆུང་དང ། ཐོད་པ་བསྣམས་པའོ། །སྐུ་གསུང་ཐུགས་ཀྱི་རྡོ་རྗེ་ནི། །དེ་ཡི་དབུས་སུ་བསམ་པར་བྱ། །ཐོད་པ་ཉིད་དང་ཁ་ཊྭཱཾ་ག་།དེ་བཞིན་གཞུ་དང་མདའ་ཉིད་དོ། །དང་པོའི་སྔགས་དང་ཡང་དག་ལྡན། །བསྒོམས་ན་སྐད་ཅིག་དེ་ལ་འབར། །དེ་ལྟར་རྣལ་འབྱོར་པས་བསྒྲུབས་ན། །རྫས་ཀྱི་དངོས་གྲུབ་རབ་ཏུ་སྟེར། །རྣལ་འབྱོར་མ་ཡི་སྒྲུབ་སྦྱོར་བས། །འཕྲལ་དུ་ཡིད་ཆེས་ཡང་དག་འཇུག་།ཐམས་ཅད་ཀྱིས་ནི་མི་མཐོང་ཞིང ། །སྟོང་ཕྲག་གཅིག་ཏུ་སྣང་བར་འགྱུར། །སངས་རྒྱས་ཀུན་ལས་ཕྲོགས་པ་དང ། །ལྷ་ཡི་བུ་མོ་མཆོག་ལ་སྤྱོད། །གངྒཱའི་བྱེ་སྙེད་སངས་རྒྱས་རྣམས། །ཉིད་ཀྱི་རྡོ་རྗེའི་གནས་བཞུགས་པ། །ལག་ཏུ་སྐྱུ་རུ་ར་བཞག་བཞིན། །རྡོ་རྗེའི་ 48a ༄#། །མིག་གིས་མཐོང་བར་འགྱུར། །གངྒཱའི་བྱེ་སྙེད་ཞིང་དག་ཀྱང ། །སྐུ་གསུང་ཐུགས་ཀྱི་མཚན་ཉིད་དང ། །དངོས་པོ་ཀུན་གྱི་བདག་ཉིད་གནས། ། སེམས་ཀྱི་གར་ལས་བྱུང་བ་མཁྱེན། །ཡི་གེ་གོ་བཟློག་སྦྱོར་བ་ཡིས། །སྔགས་ནི་དེ་རུ་རྣམ་བསྒོམ་བྱ། །རྡོ་རྗེ་ཆུ་དང་ཡང་དག་ལྡན། །རིལ་བུ་རེ་རེ་བཟའ་བར་བྱ། །ཡི་གེ་བརྒྱད་ཀྱི་མཐའ་ལྡན་པ། །ཱུ་དང་ཐིག་ལེར་བཅས་པ་ནི། །མཐའ་རུ་ཡང་དག་སྦྱོར་བྱས་ལ། །སྔགས་ནི་ཀུན་ཏུ་བརྗོད་བྱ་སྟེ། །གུ་ཧྱ་བྷཀྵ་ཨ་བྷཀྵེ་ཧཱུཾ་ཞེས་བྱའོ། །རྣལ་འབྱོར་མ་ཀུན་སྦྱོར་བ་ཡིས། །དང་པོའི་ཡི་གེ་ཡང་དག་ལྡན། །གལ་ཏེ་རྡོ་རྗེ་ཅན་གྱིས་གྲུབ་འདོད་ན། །ལན་བདུན་མངོན་བསྔགས་རྣལ་འབྱོར་བ་ཡིས་བཟའ། །ཡི་གེ་གསུམ་མཐའ་ཞེས་བྱ་སྟེ། །བརྒྱད་ཀྱི་མཐའ་མར་ལེགས་གནས་པ། །ཱུ་དང་ཐིག་ལེ་ཡང་དག་ལྡན། །ཡི་གེ་མཆོག་ཏུ་གྱུར་པའི་གནས། །ཡི་གེ་དང་པོར་སྦྱོར་བ་ཡི། །ཧྲའི་ཞེས་བྱ་བ་ཡང་དག་སྦྱོར། །ཡི་གེ་རྣམས་ཀྱི་མཐར་སྦྱོར་ལ། །ས་བོན་ལྔས་ནི་རབ་དགང་བྱ། །ཡི་གེ་ཡིས་ནི་རྣམ་བསྒོམས་ཏེ། །པདྨ་རབ་ཏུ་རྒྱས་པར་བྱ། །ཅི་སྟེ་རྡོ་རྗེ་ཅན་འགྲུབ་འདོད། །ད་ལྟའི་སྦྱོར་བ་ཀུན་ཤེས་བྱ། །དེ་ནས་འདིར་རྡོ་རྗེ་རྣལ་འབྱོར་མ་རྣམས་ཀྱིས་དགོངས་པ་དཔལ་རྡོ་རྗེའི་གླུས་སྲིད་པ་ཤིན་ཏུ་སྒྲུབ་པ་བླངས་པ། ཀྱེ་གྲོགས་ 48b པོ་རྡོ་རྗེས་པདྨ་ཁ་འབྱེད་སད་མཛད་མང་ཨཱ་ལ་ལ་ཧོ། བདེ་བ་ཆེན་པོ་གར་གྱིས་རབ་ཏུ་མཉེས་མཛོད་ཅིག་།ཉི་མའི་དཀྱིལ་འཁོར་པདྨའི་ཁ་ནི་རབ་བྱེ་བ། །བདེ་བ་ཆེན་པོའི་གར་གྱིས་རབ་ཏུ་མཉེས་པར་མཛོད། །རྡོ་རྗེ་འཛིན་པ་ཆེན་པོ་ལ། །དེ་ནས་འདིར་གླུ་བླངས་ཙམ་གྱིས། །རྡོ་རྗེ་མཁའ་འགྲོ་མ་རྣམས་གར། །རྡོ་རྗེ་སེམས་དཔའ་ཡང་དག་བསྐུལ། །དེ་ལྟར་རྟག་ཏུ་གུས་ལྡན་པས། །སྦྱོར་བའི་དངོས་གྲུབ་འགྱུར་བ་ཡིན། །དུས་བཞིར་རབ་ཏུ་སྦྱར་བ་ཡི། །འགྲུབ་པར་འགྱུར་བ་སྒོམ་པའི་མཆོག་།རྒྱན་རྣམས་ཐམས་ཅད་ཡོངས་རྫོགས་ཤིང ། །སྤོས་དང་མེ་ཏོག་རྣམས་ཀྱིས་བརྒྱན། །ཇི་ལྟར་སྐུ་གསུམ་མཆོག་སྟེར་བའི། །དངོས་གྲུབ་ངེས་པར་ཐོབ་པར་འགྱུར། །དཔག་ཚད་རྒྱ་ཡི་ཁྱོན་ཙམ་དུ། །འདི་ནི་རབ་ཏུ་སྣང་བར་བྱེད། །དབང་པོ་གཉིས་ནི་རབ་སྦྱོར་བས། །སྒོ་དགུ་ལས་ནི་བྱུང་བའི་རྫས། །སངས་རྒྱས་བྱང་ཆུབ་གནས་ཞི་བའི། །དེ་ཉིད་བླ་ན་མེད་པ་འགྲུབ། །འདིར་ཚིགས་བཅད་དུ་འགྱུར་བ་ནི། །གཟུགས་རྣམས་དང་ནི་དེ་བཞིན་ཕྱག་རྒྱ་མཚན་མ་དང ། །རྫས་རྣམས་དང་ནི་བསམ་གཏན་རྣམ་སྒོ་མ་པའི། །ཆོ་གའི་ཐབས་ནི་སྣ་ཚོགས་བསྟན་པ་དང ། །ལྷ་མོ་ཡིད་འདོད་རྣམས་ནི་གསུངས་པའོ། །གང་གི་ཁྱིམ་དུ་རྒྱུད་འདི་གནས་པ་དང ། །རྒྱུན་དུ་འཆང་བ་དང ། ཀློག་པ་དང ། རྣམ་པར་སྒོམ་པ་དེ་ལ་ནད་རྣམས་ 49a ༄#། །འབྱུང་བར་མི་འགྱུར་ཞིང ། རྒས་པ་དང ། བགེགས་མི་འབྱུང་ལ་འཆི་བར་མི་འགྱུར་ཏེ། རྒྱུན་དུ་ཐམས་ཅད་དུ་རྣལ་འབྱོར་མའི་དབང་ཕྱུག་མ་རྣམས་ཀྱིས་བགེགས་བསྲུང་བར་འགྱུར་རོ། །རྡོ་རྗེ་རྣལ་འབྱོར་མ་ཆེན་མོ་རྣམས་ཀྱི་དགོངས་པ་མཆོག་ཏུ་གསང་བ་གསང་བ་ཆེན་པོ་ཉེ་བར་སྤྱོད་པ་དང་བཅས་པའི་སྒྲུབ་ཐབས་ཏེ་ལེའུ་གསུམ་པའོ།། །།སྒྱུ་འཕྲུལ་ཆེན་མོའི་རྒྱུད་ཅེས་བྱ་བ་རྫོགས་སོ།། །།རྒྱ་གར་གྱི་མཁན་པོ་འཛིན་པར་དང ། བོད་ཀྱི་ལོ་ཙྪ་བ་ཆེན་པོ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། |