།།རྒྱ་གར་སྐད་དུ། ཙ་ཏུར་ཡོ་གི་ནཱི་སཾ་པུ་ཊ་ཏནྟྲ་ནཱ་མ། བོད་སྐད་དུ། རྣལ་འབྱོར་མ་བཞིའི་ཁ་སྦྱོར་གྱི་རྒྱུད་ཅེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ནས་ཡང་དག་བཤད་བྱ་བ། །རྣལ་འབྱོར་བཞི་ཡི་ཁ་སྦྱོར་ཏེ། །ཞལ་བཞི་ཞེས་ནི་རྣམ་པར་བཤད། །རྒྱུད་རྣམས་ཀུན་ཏུ་སྦས་པ་སྟེ། །ཞལ་རྣམས་ཀྱང་ནི་ཁ་སྦྱོར་མ། །འདི་རུ་རྒྱས་པར་བརྗོད་པ་ཡིན། །འོག་དང་སྟེང་དུ་རྣམ་བཤད་དང ། །དེ་བཞིན་གཡོན་དང་གཡས་པའོ། །ཱ་ལི་ཀཱ་ལི་བྱེ་བྲག་གིས། །ལྟེ་བའི་དབུས་སུ་རྣམ་པར་གནས། །ཟླ་བ་ཉི་མར་རྣམ་པར་བཤད། །ས་དང་རླུང་གི་ཉིད་དག་དང་།། ཆུ་མེ་དེ་བཞིན་ནམ་མཁའ་དང ། །ཁམས་ལྷ་དག་དང་ཡང་དག་ལྡན། །གཟུགས་དང་རེག་པ་དེ་བཞིན་སྒྲ། །མིག་གཉིས་དང་ནི་སྣ་དག་དང ། །ལུས་ཀྱི་སྟེང་འོག་ཏུ་ཡང་གསལ།། 343a ༄#། །རྟག་ཏུ་རྡོར་ཅན་རྣམ་པར་གནས། །ཆ་དང་ཆ་མིན་རྣམ་པར་གྲོལ། །སྟོང་པའི་ངང་ལས་ཡང་དག་གནས། །ཡ་ཡི་སྡེ་མཐའ་ཡང་དག་རྫོགས། །ུ་ཡིག་དག་ནི་ཐིག་ལེར་བཅས། །འབྱོར་ཞིང་གསལ་བར་འགྱུར་བ་སྟེ། །ཁ་སྦྱོར་རྣམ་པ་རྣལ་འབྱོར་གྱི། །རྡོར་ཅན་ཅི་ལྟར་ཆང་གིས་མྱོས། །འཁོར་ནས་སེམས་ནི་རྣམ་པར་གྲོལ།། ཁམས་གསུམ་པོ་ནི་མ་ལུས་པ། །རྡོ་རྗེ་མིག་གིས་མཐོང་བར་འགྱུར། །བདུན་གྱི་རྒྱལ་པོའི་དངོས་གྲུབ་ཀྱིས། །མ་ལུས་ལུས་པ་མེད་པ་མཐོང ། །ཚངས་པ་ཁྱབ་འཇུག་དབང་ལྡན་དང ། །དབང་པོ་དེ་བཞིན་འདོད་དབང་ཕྱུག་།ཕ་རོལ་སྟོབས་ཀྱིས་མནན་ན་ནི། །རྣལ་འབྱོར་དབང་ཕྱུག་གིས་ནི་ཆོད། །ཚངས་པ་ལ་སོགས་ལྷ་རྣམས་ཀྱིས། །དམ་ཚིག་སྒྲ་ཡིས་བཤད་པ་སྟེ། །སྲོག་དང་རྩོལ་བ་ཀུན་ཏུ་བྱ། །དེ་ཡིས་འདི་ནི་དམ་ཚིག་སྡོམ། །དེ་ལ་ཁ་སྦྱོར་རྣམ་པ་བཤད། །ཞལ་བཞི་རུ་ནི་རབ་ཏུ་གནས། །རྣལ་འབྱོར་མ་བཞི་དེ་ཤེས་བྱ། །སྦྱོར་བ་བཞི་དང་ཡང་དག་ལྡན། །གང་གང་དབང་པོའི་ལམ་ནས་བྱུང ། །དེ་དང་དེ་ཡི་རང་བཞིན་ཉིད། །འདོད་པ་ཀུན་ལ་ལོངས་སྤྱོད་པ། །སངས་རྒྱས་ཀུན་གྱི་རང་བཞིན་འགྱུར། །གཟུགས་ནི་ཇི་ལྟར་རྫོགས་པ་ལས། །དེ་ལ་སྒོམ་པ་ཇི་ལྟ་བུ། །སྔགས་རྣམས་ཇི་ལྟར་བསྐྱེད་པར་བགྱིད། །རྫོགས་པར་ཡང་ནི་ཇི་ལྟར་འགྱུར། ། 343b དེ་དག་ཐམས་ཅད་ཐ་སྙད་ཙམ། །སྔགས་དང་རྒྱུད་རྣམས་ཡང་དག་འབྱུང ། །བྱང་ཆུབ་སེམས་ནི་འདི་རུ་བསྔགས། །འདོད་པ་ལྔ་དང་ཡང་དག་ལྡན། །མཚོན་བྱ་མཚན་ཉིད་ཀྱིས་ནི་མཚོན། །མཚོན་བྱ་དུ་མའང་མཚོན་མི་བྱ། །སྔགས་རྣམས་རྒྱས་པར་བཤད་ནས་ནི། །ལྷ་རྣམས་ཀྱི་ནི་སྒོམ་པ་ཉོན། །སྟེང་གི་སྒོ་ནི་གསུམ་ཡིན་ཏེ། །ལྟེ་བ་རླུང་གི་གཟུགས་ཅན་མ། །དེ་ཡི་དབུས་སུ་རྟག་ཏུ་སྟོང ། །དག་པ་ཡི་ནི་ཤེལ་ལྟ་བུ། །ལོངས་སྤྱོད་ཆེན་པོ་ངེས་པར་འགྱུར། །དགུ་པ་བཅུ་ཡིས་ལྡན་པ་སྟེ། །ཆ་བརྒྱད་དེ་ཡི་ཡན་ལག་གིས། །སྒོ་དགུའི་ས་བོན་ཡིན་པ་སྟེ། །ལུས་ལ་ས་བོན་རྗེས་སུ་བརྗོད། །ཡེ་ཤེས་མཁའ་འགྲོ་བདག་ཉིད་ཀྱིས། །སྟེང་གི་ཆར་ནི་ཤེས་རབ་སྟེ། །རྡོ་རྗེ་འཛིན་དང་བཅས་པར་འབྱུང ། །སེམས་ཀྱི་རྡོ་རྗེ་ཞེས་ནི་བཤད། །འདིར་ནི་སྟེང་གི་པདྨར་བཤད། །དེ་ལ་གནས་ནི་བྷ་གར་བཤད། །ཤེས་རབ་དེ་ཉིད་རྡོར་ཅན་བཅས། །རྟེན་དང་བརྟེན་པ་འབྱུང་བ་ཡིས། །རྩ་རྣམས་ཀུན་ལ་རྣམ་པར་གནས། །ཁུ་བའི་གཟུགས་སུ་གྱུར་པ་ཡིས། །སྤྲོ་དང་སྡུད་པར་བྱེད་པས་སོ། །བསྐྱེད་པའི་རིམ་པའི་རྣལ་འབྱོར་གྱིས། །སྒོམ་པའི་རིམ་པ་ཕྱེ་བས་སོ། །གདམས་ངག་རིམ་པའི་རྣལ་འབྱོར་གྱིས། །ལྷ་རྣམས་སྒོམ་པར་བརྗོད་པ་སྟེ། །དེ་རྣམས་སྣ་ཚོགས་རྣལ་འབྱོར་གྱིས། །ཟླ་བ་ཉི་མར་བཤད་པ་ཡིན། །གཞན་ཡང་གཞན་མིན་རྣམ་པར་གྲོལ། །སངས་རྒྱས་ 344a ༄#། །གཟུགས་ནི་གཡོ་བ་མེད། །དེར་ནི་གཟུང་བར་བྱ་བ་སྟེ། །གང་ཞིག་དེ་རུ་ཇི་ལྟར་གནས། །ཉིན་མོ་བཅོམ་ལྡན་རྡོ་རྗེ་ཅན། །མཚན་མོ་ཤེས་རབ་ཏུ་ནི་བརྗོད། །ནམ་མཁའི་ནང་སོང་མཆོག་ཏུ་ཞི། །དག་ཅིང་དགེ་ལ་ཡིད་དུ་འོང ། །སངས་རྒྱས་ལ་སོགས་མུ་སྟེགས་ཀུན། །ལྷ་མིན་གནོད་སྦྱིན་སྲིན་པོ་དང ། །དེ་ཉིད་འདོད་ཆགས་ཆགས་བྲལ་དང ། །འདོད་པས་ཐར་བར་གྱུར་པ་འདི། །དེ་ཉིད་བུད་མེད་རྣམས་ལ་ཆགས། །དེ་ཉིད་མངལ་ནི་རབ་ཏུ་ལེན། །དེ་ཉིད་འཆི་སྟེ་རིལ་པོའི་གནས། །དེ་ཉིད་བསྐམས་པས་མཐོང་བ་ཡིན། །དེ་ཉིད་གོང་དུ་གྱུར་པ་སྟེ། །དེ་ཉིད་དྲི་རུ་རྣམ་པར་གནས། །དེ་ཉིད་སྡུག་བསྔལ་རིག་པ་སྟེ། །རིག་པས་བདེ་བ་ཉིད་དག་ལ། །དེ་ཉིད་གཅིག་པུས་ཁྱབ་པ་ཡིན། །བདུད་རྩི་ཐིགས་པའི་གཟུགས་ཀྱིས་ནི། །གཟུགས་བཟང་གཟུགས་དང་ལྡན་པའི་མཆོག་།སྣ་ཚོགས་གཟུགས་རྣམས་ཡིད་དུ་འོང ། །གཟུགས་ཀུན་གསལ་བར་བྱེད་པའི་དཔལ། །གཟུགས་བརྙན་མ་ལུས་འཆང་བའོ། །བཅུ་དྲུག་ཕྱེད་ཕྱེད་དེ་ཡི་ཕྱེད། །རྟག་ཏུ་དེ་ཉིད་རིག་པ་པོ། །སྣ་ཚོགས་རྟག་ཏུ་ཞི་བའི་གཟུགས། །ནམ་མཁའ་ལྔ་དང་ཡང་དག་ལྡན། །དེ་ཉིད་རབ་ཏུ་ཞུགས་པར་བརྗོད། །འགྲོ་ལ་གསལ་བར་མར་མེ་བཞིན། །སྣ་ཡི་རྩེ་མོར་རྣམ་པར་འབྱུང ། །འབར་བའི་ཕྲེང་བའི་འོད་ 344b ཟེར་ཏེ། །འདི་རྣམས་ཀུན་ནི་བདག་གིས་བརྗོད། །རྟེན་དང་བརྟེན་པའི་མཚན་ཉིད་དུ། །གང་གིས་ཤེས་པས་ཆོ་ག་ཤེས། །དེ་ཡི་དཔལ་ནི་རྒྱས་པར་འགྲུབ། །གཞན་ཡང་སྔགས་ཀྱི་ཚིགས་བཤད་དེ། །གསང་བའི་སྦྱོར་པ་སྦས་པ་སྟེ། །སྡེ་ཚན་བརྒྱད་ཀྱིས་མཐའ་མ་གཟུང ། །ས་བོན་ལྔ་དང་ཡང་དག་ལྡན། །དེ་བས་བྷྲུ་ཡིག་སྦྱིན་པར་བྱ། །དང་པོར་ཨོཾ་ཡིག་ཡང་དག་ལྡན། ། ནི་ཡིག་འབྲུ་ཀུན་གྱི་མཆོག་།ཐིག་ལེ་ཆེན་པོ་ཡི་གེ་མེད། །ནམ་མཁའ་ནམ་མཁའི་དབུས་གནས་པར། །སྔགས་དང་རྒྱུད་ནི་ཡང་དག་འབྱུང ། །ཇི་ལྟར་དེ་ལྟར་སྔགས་ཀྱང་ནི། །དེ་བཞིན་ཉིད་ཀྱི་ཚུལ་ལྟ་བུར། །ཡི་གེ་ཙམ་དང་ཡང་དག་ལྡན། །དེ་ལ་དབུས་སུ་རབ་ཏུ་གྲགས། །སངས་རྒྱས་བྱང་ཆུབ་སེམས་དཔའ་དང ། །གང་ཡང་གཞན་གྱི་ལྷ་ཚོགས་དང ། །འབྱུང་པོ་མ་ལུས་ཐམས་ཅད་དང ། །ལྷ་དང་ལྷ་མིན་གསང་བ་པ། །དེ་ཡི་དབུས་སུ་ཡང་དག་རྫོགས། །ཡི་གེ་ལ་སོགས་གཟུགས་ཅན་གྱིས། །གཟུགས་ཅན་རྣལ་འབྱོར་ལཱ་མ་དང ། །དུམ་སྐྱེས་མ་ཡི་བྱེ་བྲག་གིས། །ཞལ་བཞི་ཞེས་ནི་རྣམ་པར་བཤད། །རྣལ་འབྱོར་བཞི་དང་ཡང་དག་ལྡན། །ལྟེ་བ་དང་ནི་གེ་སར་ལྡན། །འདབ་མ་བཞི་དང་ཡང་དག་ལྡན། ། དེ་ལ་དབུས་སུ་དཔའ་བོ་ཆེ། །ཕྱག་བརྒྱད་ཀྱིས་ནི་རྣམ་པར་བརྒྱན། །དང་པོ་ལ་ནི་ཤ་ཡིས་གང ། །གཉིས་པ་ཁྲག་གིས་བཀང་བ་ཉིད། །གསུམ་པ་བཞི་པ་ལུས་ཕྱག་རྒྱ། །ཁ་ཊྭཱཾ་ག་དང་ཌཱ་མ་རུ།། 345a ༄#། །དེ་བཞིན་ཁ་དོག་དཀར་པོ་འཕྲོ། །དྲི་མེད་སྟོན་ཀའི་ནམ་མཁའ་བཞིན། །དཀར་དང་དམར་དང་དེ་བཞིན་གནག་།ལྗང་གུའི་ཞལ་ཏེ་གཙིགས་པའོ། །ཕྱག་རྒྱ་བརྒྱད་ནི་མདོ་རུ་བཤད། །ཕྱག་གིས་མཚོན་ཆར་རབ་ཏུ་གྲགས། །དང་པོར་འཇུག་པའི་ཕྱག་རྒྱ་སྟེ། །གཉིས་པ་སྙིང་ནི་འབྱིན་པའོ། །གསུམ་པ་རྨོངས་བྱེད་ཕྱག་རྒྱ་ཡིན། །བཞི་པར་ལྟུང་བྱེད་དེ་བཞིན་ནོ། །ལྔ་པར་གར་མའི་ཕྱག་རྒྱའོ། །དྲུག་པར་གསོད་བྱེད་མར་ནི་བརྗོད། །བདུན་པར་ཟ་བྱེད་མའི་ཕྱག་རྒྱ། །བརྒྱད་པར་སྟེང་དུ་ལེན་པར་ངེས། །གཤིན་རྗེ་མོ་དང་སྐྲག་བྱེད་དྲག་།གཏུམ་མོ་དང་ནི་བཟང་ཟ་དང ། བྷ་སུ་མ་དང་འདོད་པ་ཉིད། །དེ་ཉིད་བརྒྱད་པོ་ཕག་མོ་ཉིད། །མི་བཟད་རྣམ་པར་འགྱུར་བའི་གཟུགས། །ཁྲག་དང་ཁུ་བ་ཟ་བ་མོ། ། འོད་ཟེར་འབར་བ་སྣ་ཚོགས་འབར། །རྡོ་རྗེ་མཁའ་འགྲོ་མ་བསྒོམ་བྱ། །མང་པོར་རྣམ་བཤད་ཡེ་ཤེས་ནི། །དེ་ལ་དབུས་སུ་རྣམ་པར་འབྱུང ། །དཔག་ཚད་འབུམ་གྱི་རྒྱ་ཁྱོན་དུ། །དེ་ཡི་གསལ་བར་བྱེད་པ་ཡིན། །སེམས་ཅན་ཐོག་མ་ཐ་མ་མེད། །རྡོ་རྗེ་སེམས་དཔའ་ཆགས་པ་ཆེ། །ཐིག་ལེ་རྡོ་རྗེ་ཅན་དུ་འགྱུར། །ཟླ་བ་ཕྱེད་པ་ལྟ་བུར་གསལ། །གདན་ནི་པདྨ་རཱ་ག་སྟེ། །རྒྱལ་པོའི་གཟུགས་ནི་གསལ་བ་ཡིན། །རྒྱལ་པོ་ཉིད་ཅེས་རྣམ་པར་བཤད། །སྟེང་དུ་འབྱུང་བར་རབ་ཏུ་གྲགས། །ཡང་ནི་དགོད་པར་བྱ་བ་སྟེ། །རིགས་ཀྱི་དབྱེ་བས་བརྗོད་པའོ།། 345b ཤར་དུ་རྡོ་རྗེ་སེམས་དཔར་འགྱུར། །ལྷོ་རུ་རྣམ་པར་སྣང་མཛད་བརྗོད། །ནུབ་ཏུ་རྟ་བདུན་རྒྱལ་པོའོ། །བྱང་དུ་པདྨ་གར་དབང་སྟེ། །འཁོར་ལོའི་དབུས་སུ་ཧེ་རུ་ཀ་།སྟེང་གི་སྒྲ་ནི་རྟ་གདོང་ཡིན། །འདི་རྣམས་འདི་རུ་དགོད་པར་གསུངས། །རིགས་ཀྱི་དབྱེ་བས་རྣམ་པ་ལྔ། །དེ་རུ་བསྒོམ་པར་བྱ་བ་ཡིན། །གཞོམ་མེད་གཞིག་ཏུ་མེད་པ་སྟེ། །དེ་ཡི་དབུས་སུ་ཡང་དག་རྫོགས། །མགོན་པོ་རྣམ་པར་སྣང་མཛད་སོགས། །རྣལ་འབྱོར་མའི་ཚོགས་ཀྱིས་བསྒྱིངས་པའི་རྒྱུད་ཆེན་པོ་ལས། རྣལ་འབྱོར་མ་བཞིའི་ཁ་སྦྱོར་ཞེས་བྱ་བ་སྟེ་བརྟག་པ་དང་པོའོ།། །།དེ་ནས་རྡོ་རྗེ་ཕག་མོ་དེ། །རྐང་རྒྱན་དང་ནི་དོ་ཤལ་རྒྱན། །དེ་ཡི་དཀྱིལ་འཁོར་ལ་གར་བྱེད། །དབང་བསྐུར་བ་ནི་སྟེར་བ་ཡིན། །དམ་ཚིག་ལ་ནི་ལེགས་གཞག་ཕྱིར། །ཕག་མོ་དེ་བཞིན་རྡོ་རྗེ་ཅན། ། ཅི་འདོད་དེ་བཞིན་རྡོ་རྗེ་ཅན། །དྲི་ཆེན་དྲི་ཆུ་ཟ་བ་དང ། །ཁྲག་དང་ཁུ་བ་དེ་བཞིན་ཤ་།རྟག་ཏུ་བུད་མེད་དང་ནུས་སམ། །བྷ་གའི་པདྨར་འོ་བྱེད་དམ། །སྨོས་ཤིག་རྡོར་ཅན་བདེ་བ་ཆེ། །དེ་ནས་བཅོམ་ལྡན་རྡོ་རྗེ་ཅན། །བཞད་པར་གྱུར་ནས་འདི་དག་སྨྲས། །ལྷ་མོ་ཅི་སྟེ་བདག་མི་སྤྲོ། །ཁྲག་དང་ཁུ་བ་ལ་སོགས་བཟའ། །རྟག་ཏུ་བུད་མེད་གུས་པར་བགྱི། །བྷ་གའི་པད་མར་འོ་བགྱིད་དོ། །ཡང་ནི་ལེགས་སོ་ལེགས་སོ་བྱིན། །སྒོ་སྐྱོང་དེ་བཞིན་རྡོ་རྗེ་ཅན། །ཐོད་པ་ཡང་དག་བླངས་ནས་ནི། །རྡོ་རྗེ་ཅན་ལ་བཟའ་བ་དབུལ། །ཞི་ཞིང་གཅེར་བུར་ 346a ༄#། །འདུག་པ་དང ། །རྡོ་རྗེ་ཅན་ནི་སྐྲ་གྲོལ་བས། །ལེགས་པར་དབང་བསྐུར་སྟེར་བར་བྱེད། །བྷ་གར་འོ་བྱེད་རྡོ་རྗེ་ཅན། །དེ་ནས་བརྩམས་ཏེ་རྡོ་རྗེ་ཁྱོད། ། སེམས་ཅན་དོན་གྱིས་བརྟུལ་ཞུགས་བཟུང ། །བཟའ་བ་དྲི་ཆེན་དྲི་ཆུ་དང ། །ཁྲག་དང་ཁུ་བ་ཤ་དག་གོ་།བྷ་གའི་པདྨར་འོ་བྱ་སྟེ། །བདུད་རྩི་རྣམས་ནི་བསྒྲུབ་པར་བྱ། །རྡོ་རྗེ་རྣལ་འབྱོར་ཕོ་ཉ་མོས། །དེ་ནས་རྟག་ཏུ་དབང་བསྐུར་རོ། །ཧུཾ་ཧཱུཾ་ཧཱཿ ཧཱཿ ཿ ཱཿ ཧཱིཿ ཧྲཱིཿ ་སཝཱཧཱ། །དེ་ནས་དེ་མ་ཐག་ཏུ་ཀུན། །རྡོ་རྗེ་མཁའ་འགྲོ་མ་ཉིད་ཀྱིས། །སྒྲ་ཆེན་པོ་ནི་རབ་ཏུ་བསྒྲགས། །རྡོ་རྗེ་ཅན་དེ་དབང་བསྐུར་རོ། །སྣ་ཚོགས་གཟུགས་ཅན་དྲག་པོ་ཆེ། །ཐོད་པའི་གདན་ལ་ཡང་དག་བཞུགས། །ཤ་དང་ཁྲག་དག་འཐུང་བ་སྟེ། །གསང་བའི་དཀྱིལ་འཁོར་དུ་ནི་སྦྱོར། །ལ་ལ་རོལ་མོའི་ཆ་བྱད་རྡུང ། །པ་ཊ་ཧ་སོགས་མུ་ཀུཎ་ཌ། །ལ་ལ་རབ་ཏུ་གླུ་ལེན་ཅིང ། །ལ་ལ་པི་ཝང་སྒྲེང་བ་སྟེ། །ལ་ལ་དོར་ཅན་གར་བྱེད་དོ། །ལ་ལ་དྲིལ་བུའི་སྒྲ་སྒྲོགས་བྱེད། །ལ་ལ་སྒྲ་དག་རབ་ཏུ་སྒྲོགས། །ཕྱོགས་བཅུར་ཕེཾ་གྱི་སྒྲ་དག་གོ་།ལ་ལ་གར་དག་རབ་ཏུ་བྱེད། །ལ་ལར་དཀྱིལ་འཁོར་དུ་གླུ་ལེན། །ལ་ལ་མེ་ཏོག་རབ་ཏུ་འགྲེམས། །དེ་ཡིས་རྡོར་ཅན་ལ་དབང་བསྐུར། །ལ་ལ་སྤོས་ཀྱིས་རབ་སྦྱིན་བྱེད། །ལ་ལ་དྲི་ཡིས་དེ་བཞིན་ནོ། །འདི་ལྟར་གྱུར་པའི་མཆོད་པ་ཡིས། །གསང་བའི་དཀྱིལ་ 346b འཁོར་ལ་ནི་བྱ། །དེ་ནས་རྡོར་ཅན་ལྷ་མོ་དེ། །ཚིག་འདི་དག་ནི་བརྗོད་པ་སྟེ། །ཚོགས་ཀྱི་དཀྱིལ་འཁོར་ཉིད་དག་དང ། །དབང་དག་ལེགས་པར་བརྗོད་ནས་ནི། །ང་ཡིས་གཞན་ཡང་བཤད་བྱ་བ། །ལྷ་རྣམས་དགོད་པ་མཆོག་དག་གོ། རྒྱ་རུ་ཀུན་ཏུ་ཁྲུ་བརྒྱད་དོ། །གྲུ་བཞི་པ་ལ་སྒོ་བཞི་པ། །སྔགས་པས་དེ་ཡིས་ཉིས་འགྱུར་དཔྱད། །གང་དུ་མཁའ་འགྲོའི་ཚོགས་འགྱིང་བ། །ནམ་མཁའ་འོད་ཀྱི་རྒྱ་ཁྱབ་པར། །གང་དེ་དཀྱིལ་འཁོར་མཆོག་ཡིན་ནོ། །དབུས་སུ་འཁོར་ལོ་ཡང་དག་བྲི། །ལྟེ་བ་དག་ནི་གེ་སར་ལྡན། །འདབ་མ་བཞི་དང་ཡང་དག་བཅས། །ཁ་དོག་དཀར་པོར་ཡང་དག་ལྡན། །དེ་ལ་དབུས་སུ་དཔའ་བོ་དགོད། །དག་པའི་ཤེལ་དང་འདྲ་བ་སྟེ། །དང་པོའི་ཞལ་ནི་རྣམ་པར་བཞད། །དང་པོའི་སྤྱན་གྱིས་རྣམ་པར་གཟིགས། །སྨིན་མ་ཁྲོ་གཉེར་རབ་ཏུ་གསལ། །མཆེ་བ་གཙིགས་ཤིང་འཇིགས་པ་ནི། །ལྷོ་རུ་བལྟས་པའི་ཞལ་དག་གོ་།གཡོན་པ་རྨད་དུ་བྱུང་བ་སྟེ། །རྒྱབ་ནི་འཇིགས་པ་ཆེན་པོ་ཡིན། །མདུན་རྒྱབ་རྟ་ཡི་ཞལ་གྱིས་བརྒྱན། །དཀར་པོ་དམར་པོ་དེ་བཞིན་གནག་།ལྗང་གུ་ཡི་ནི་ཁ་དོག་གོ་།ཕྱག་བརྒྱད་པ་ཡང་བྲི་བར་བྱ། །ཐོད་པའི་ཕྲེང་བས་རྣམ་པར་བརྒྱན། །དཔལ་ལྡན་མགོ་བོའི་ཕྲེང་བ་འཛིན། །འཇིགས་བྱེད་ལྗགས་ནི་འདྲིལ་བ་སྟེ། །འཇིག་དུས་ཆེན་པོའི་མེ་དང་མཚུངས། །དུར་ཁྲོད་ལྟ་བུར་འཇིགས་སུ་རུང ། །བརྩེགས་ 347a ༄#། །པར་དགོད་ཅིང་བཞད་པ་ཆེ། །ཕཻཾ་གྱི་སྒྲ་ནི་སྒྲོགས་པའོ། །ཞལ་གཅིག་ཕྱག་ནི་གཉིས་པ་རུ། །ལྷ་བཞི་རྣམས་ནི་བརྗོད་པར་བྱ། །ཁ་ཊྭཱཾ་ག་དང་ཐོད་པའི་ལག་།ཁྲག་དང་ཁུ་བ་དག་འཐུང་ངོ ། །འཁོར་ལོ་གཉིས་པ་ཡང་དག་བཤད། །ཟླ་བའི་དཀྱིལ་འཁོར་ཟླུམ་པོ་ལ། །འཁོར་ལོ་ཆེན་པོ་ཡི་གེ་བརྒྱད། །འོད་ཟེར་དམར་པོ་འབར་བ་སྟེ། །གཟུགས་ཅན་མ་དང་འོ་བྱེད་མ། །ལམ་མཆོག་འཕེལ་དང་ས་མ་ལི། །ཕྱིར་མི་ལྡོག་དང་ཨི་ཧི་ཀི་།རྡོར་ཅན་བརྒྱད་པར་བརྗོད་པ་ཡིན། །ལྷ་མོ་བརྒྱད་པོ་འདི་རུ་དགོད།། ཁ་དོག་དཀར་པོ་ཤིན་ཏུ་འབར། །ལག་པས་ཁ་ཊྭཱཾ་ག་བཟུང་ཞིང ། །ཐོད་པ་ཁྲག་གིས་བཀང་བ་འོ། །ཕྱི་རོལ་འཁོར་ལོ་ཡང་དག་བརྗོད། །ལྷ་རྣམས་བཀོད་པ་མཆོད་དང་ནི། ། ས་ཀི་ནཱི་དང་པུཀྐ་སི། །གསོད་མ་དཀར་མོ་སྒྲོག་མ་དང ། །གཏུམ་མོ་རི་ཁྲོད་མ་ཉིད་དང ། །སྒྲོལ་མ་དེ་བཞིན་ཁྲོ་གཉེར་མ། །ཁམས་གསུམ་རྣམ་རྒྱལ་གླང་ཆེན་མོ། །དེ་བཞིན་གྷསྨ་རཱི་དག་དང ། །དུག་ཙ་མུནྡྲ་དག་དང ། །དེ་བཞིན་ཚངས་མ་ཁྱབ་འཇུག་མ། །སྒོ་སྐྱོང་ཡང་དག་བཤད་པ་ནི། །སྒོ་བཞི་དག་ཏུ་སྦྱར་བར་བྱ། །འཁོར་ལོ་ཆེན་པོ་ཁ་དོག་ལྔ། ། འབར་བའི་ཕྲེང་བ་ཚོགས་ཀྱི་འོད། །ལྷ་མོ་ཆེན་པོ་ཁ་དོག་དཀར། །ཁ་ཊྭཱཾ་ག་དང་ཉ་ཕྱིས་འཛིན། །དཀྱིལ་འཁོར་འདི་ནི་རྒྱལ་པོ་སྟེ། །རྣལ་འབྱོར་མ་བཞིའི་སྡོམ་པ་ནི། །རང་ 347b གི་རྒྱུད་དུ་ཐུན་མོང་སྟེ། །དཀྱིལ་འཁོར་བླ་མའི་བླ་མ་ཡིན། །སྲུབ་པ་ཆེན་པོའི་སྡོམ་པ་ནི། །དེ་ཡི་བླ་མ་ཞེས་སུ་གསུངས། །རྣལ་འབྱོར་མ་བཞིའི་ཁ་སྦྱོར་ལས། དཀྱིལ་འཁོར་གྱི་བརྟག་པ་ཞེས་པ་སྟེ་གཉིས་པའོ།། །།དེ་ནས་གཞན་ཡང་བཤད་བྱ་བ། །དམ་ཚིག་ཆེན་པོའི་སྒྲུབ་ཐབས་སོ། །གླང་པོ་རྟ་དང་བོང་བུ་དང ། །བ་ལང་རྔ་མོ་དག་དང་ནི། །ཁྱི་ཡི་སྒྲོན་མ་རབ་ཏུ་འབྱུང ། །སྒྲོན་མ་ཆེན་མོ་རབ་ཏུ་བཤད། །འགྲོ་བ་དགའ་བས་གསོ་བར་བྱེད། །བྱ་རོག་འུག་པ་ཁྲ་དང་ནི། །ཆུ་སྐྱར་བྱ་རོག་ལྔ་པོ་ཡིས། །སྤོས་ཆེན་པོ་ནི་རབ་ཏུ་བཤད། །སྤོས་སུ་འབུལ་བར་བྱེད་པའོ། །འདི་རྣམས་དབང་དུ་བྱེད་པར་འགྱུར། །ས་གསུམ་པོ་རུ་རྣམ་པར་སྤྱོད། །ཇི་སྲིད་སྦྱོར་བ་ཚོགས་པ་ཡིས། །དངོས་གྲུབ་ཐམས་ཅད་བྱེད་པའི་མཆོག་།བདུད་རྩི་ལྔ་ནི་རྣམ་བརྗོད་པ། །འཆི་མེད་དངོས་པོ་མེད་པའོ། །རྟོག་པ་མེད་པར་བཟའ་བར་བྱ། །བློ་ལྡན་རང་བཞིན་མེད་པས་སོ། །སྡེ་ཚན་ཐ་མའི་སྔགས་བཏུས་ཏེ། །བཅུ་དྲུག་ཆ་ཡིས་ཡང་དག་ལྡན། །པྲ་ཎ་བ་སྦྱོར་སྟེང་དུ་སྟེ། །ཐིག་ལེས་མནན་ཅིང་བརྒྱན་པ་ཡིན། །དྲི་ཞེས་ཀུན་ཏུ་བརྗོད་པ་ཡིན། །ཀུན་ནས་ཐུགས་ཀྱི་འཁོར་ལོའོ། །ཉི་ཤུ་བདུན་པ་འོག་ཏུ་སྦྱིན། །སྔགས་ལ་སོགས་པས་ཕྱེ་བ་ཡིན། །སྤྱི་བོ་དེ་རུ་ཡང་དག་སྦྱར། །ཡི་གེ་ལྷ་ཡི་གཟུགས་ཀྱི་ནི། །ཉི་ཤུ་རྩ་དྲུག་ཡང་ནི་སྦྱར། །དབྱངས་ཡིག་གཉིས་ 348a ༄#། །པས་བརྒྱན་པ་ཡིན། །ཉི་ཤུ་རྩ་གསུམ་ཡང་ནི་བླང ། །འོག་གི་ཆར་ནི་སྦྱར་བར་བྱ། །དབྱངས་ཀྱི་གསུམ་པ་ཡང་དག་ལྡན། །བཞི་པས་སྦྱར་བར་བྱ་བ་ཡིན། །དེ་ཡི་དབུས་སུ་ཡང་དག་གསུངས། །ཡི་གེ་དབང་ཕྱུག་གིས་ནི་བརྒྱན། །བཅུ་དྲུག་མཐའ་ནི་ཡང་དག་བཤད། །སྟེང་དང་འོག་ཏུ་ཁྱབ་པ་ཡིན། །དེ་ལ་དབུས་སུ་ཡང་དག་གསུངས། །སྟོང་པ་ཆེན་པོའི་ཡི་གེ་སྟེ། །རྡོ་རྗེ་སེམས་དཔའ་གཞིག་ཏུ་མེད། །དག་པ་ཡི་ནི་ཤེལ་ལྟ་བུ། །རྫས་འདི་རྣམས་ནི་བཟའ་བ་ཡིན། །རྣལ་འབྱོར་འདི་རྣམས་མཆོག་ཡིན་ཏེ། །རྣལ་འབྱོར་ཀུན་ལས་མཆོག་ཏུ་འཕགས། །ཁྱོད་ལ་མདོ་རུ་བསྡུས་པར་བཤད། །བཟའ་བ་རྣམས་ནི་ཡང་དག་བརྗོད། །གང་གི་རིགས་པས་ཐམས་ཅད་བཟའ། །དངོས་པོ་རོ་མཉམ་བསྲེས་ནས་ནི། །དག་དང་མ་དག་མི་བྱེད་པར། །དེ་བཞིན་ཉིད་རྣམས་ཐམས་ཅད་དང ། །བཟའ་བ་ཐམས་ཅད་བཟའ་བར་བྱ། །དེ་ཉིད་བཅུ་ཡིས་རབ་དབྱེ་བས། །གཟུང་དང་འཛིན་པ་རྣམ་པར་གྲོལ། །སྦྱིན་པའི་སྙིང་པོ་སྦྱིན་པར་བྱ། །སེམས་ཀྱིས་རྣལ་འབྱོར་རྫོགས་ནས་ནི། །ཐམས་ཅད་རྩཝ་སོགས་བཞིན་དུ་བཏང ། །སངས་རྒྱས་རྣམས་ཀྱི་ཚུལ་ཁྲིམས་གྱུར། །དེ་ཉིད་ཀུན་གྱིས་མི་འཇིགས་པ། །སྐྱེ་བོ་ཐམས་ཅད་འཚེ་མི་བྱེད། །དང་པོར་སྙིང་རྗེ་བླ་ན་མེད། །བཟོད་པ་ཚུལ་ཁྲིམས་ 348b བགེགས་མེད་དང ། །གཞན་གྱི་གནོད་པ་འགེགས་པ་སྟེ། །གུར་དང་ཕུར་བུ་དྲ་བ་དག་།གདུག་པའི་བདུད་ནི་འཇོམས་པ་སྟེ། །བདུད་མེད་འཆི་བ་མེད་པ་ཡིན། །བདག་གི་སེམས་ནི་བཅིང་བར་བྱ། །གང་གིས་རང་སེམས་བཏུལ་བ་ཡིས། །བདུད་ཀྱིས་གནོད་པ་སྨོས་ཅི་དགོས། །མཉམ་པའི་སེམས་ཀྱིས་དྲི་ཡིས་ནི། །གྲུ་བཞི་བ་རུ་ཡང་དག་བྲི། །ལུས་ལ་སྟེའུ་དང་ཙནྡན་དང ། །སེམས་ཀྱིས་མཉམ་པར་གནས་པ་ན། །མཉམ་པ་ཉིད་ཀྱི་ཡེ་ཤེས་བརྗོད། །དངོས་པོ་བདག་མེད་བསྲེས་པ་སྟེ། །གང་ཞིག་རྣལ་འབྱོར་རྒྱལ་བར་འགྱུར། །གང་དག་རྣལ་འབྱོར་མ་ཡི་ནི། །ཞུ་བ་རྣམས་ལ་ཟ་བ་དག་།དེ་ཡིས་ས་སྟེང་མཐའ་དག་ཏུ། །རྒ་དང་ན་བ་རྣམ་པར་འཇོམས། །རྣལ་འབྱོར་མ་བཞིའི་ཁ་སྦྱོར་ལས། དམ་ཚིག་ཆེན་པོའི་བདུད་རྩི་ལྔ་ཞེས་བྱ་བའི་བརྟག་པ་སྟེ་གསུམ་པའོ།། །།དེ་ནས་ཡང་དག་བཤད་བྱ་བ། །སྦྱོར་བ་དང་པོའི་སྒྲུབ་ཐབས་ཏེ། །སྦྱོར་བ་རྣམ་བཞིར་ཤེས་པར་བྱ། །དམ་ཚིག་བཞི་ནི་སྒྲུབ་པ་སྟེ། །དང་པོ་ཁུ་བ་རྣམས་ཤེས་བྱ། །གཉིས་པ་དེ་བཞིན་ཁྲག་ཉིད་དོ། །རྡོ་རྗེ་ཆུ་དང་དྲི་ཆེན་ནོ། །དམ་ཚིག་བཞི་ནི་བསྟེན་པ་སྟེ། །འདོད་ཆགས་ཁུ་བར་རྣམ་པར་བཤད། །ཕྲག་དོག་ཁྲག་ནི་ཉིད་དག་གོ་།གཏི་མུག་རྣམ་སྣང་རྒྱལ་པོ་སྟེ། །ཞེ་སྡང་དྲི་ཆུར་བཅས་པ་ཡིན། །དམ་ཚིག་བཞི་ཡི་རྣལ་འབྱོར་གྱིས། །དམ་ཚིག་བཞི་ལ་ 349a ༄#། །སྤྱོད་པ་པོས། །དང་པོ་སྦྱོར་བ་འགྲུབ་འགྱུར་ཞིང ། །རྡོ་རྗེ་སེམས་དཔའ་དང་མཉམ་འགྱུར། །བྲིས་སྐུ་གཞུག་པའི་རྣལ་འབྱོར་གྱིས། །དམ་ཚིག་དེ་ཉིད་བསྒྲུབ་བྱ་སྟེ། །སྟོང་པའི་རྡོ་རྗེ་བརྗོད་བྱ་སྟེ། །ཡེ་ཤེས་སེམས་དཔའ་རྣམ་པར་བསམ། །མདོར་བསྡུས་པ་ནི་སྔགས་བཟླས་བྱ། །ཧཱུཾ་དག་སྔགས་ནི་བརྗོད་པར་བྱ། །དངོས་པོས་བསྒོམ་པས་བསྒོམ་པར་བྱ། །སྤྲོ་དང་སྡུད་དང་བྱེད་པ་པོ། །བདུད་བཞི་གཞན་ལས་རྒྱལ་བ་ཡི། །གོ་ཆ་མཚོན་ཆ་འདི་ཡིས་བཅིང ། །ར་བ་ཕུར་བུ་གུར་སོགས་ཀྱིས། །ཕྱོགས་བཞི་ལ་སོགས་བཅིང་བར་བྱ། །ཁམས་བཞི་པོར་ནི་ཡང་དག་འབྱུང ། །བདུད་བཞི་པོ་ནི་རྣམ་པར་བརྗོད། །བད་ཀན་ཤ་དང་རྐང་དག་དང ། །རུས་པའི་ཁམས་ལ་ཡང་དག་འབྱུང ། །སྤྱན་དང་བདག་མ་སྒྲོལ་མ་དང ། །གོས་དཀར་ལ་སོགས་བཞི་པོ་འོ། །ཁམས་བཞི་དང་ནི་རྣམ་དག་པ། །སྦྱོར་བ་དང་པོར་བརྗོད་པའོ། །བརྩོན་ཆེན་ཞེས་སུ་རྣམ་བཤད་པ། །རླུང་དང་མེ་ནི་མཆོག་ཡིན་ཏེ། །དེ་ལ་དབུས་སུ་ཡང་དག་གནས། །ཛཱ་ཏ་རི་ཡི་རང་བཞིན་མིང ། །དབྱིབས་དང་ཁ་དོག་སྣ་ཚོགས་པ། །ཁ་དོག་མེད་པར་རབ་ཏུ་གྲགས། །དབྱངས་དང་ཡི་གེའི་ཚུལ་དག་ཏུ། །དབྱངས་མེད་ཡི་གེ་མེད་པའོ། །ཚངས་མིན་ཁྱབ་འཇུག་དྲག་པོ་མིན། །ནམ་མཁའ་མིན་ཞིང་འདོད་པ་མིན། །ཟླ་བ་མིན་ 349b ཞིང་སྐར་མ་མིན། །ཉི་མ་མིན་ཞིང་རླུང་ཡང་མིན། །གནོད་སྦྱིན་སྲིན་པོ་ལྷ་མིན་མིན། །འབྱུང་པོ་ཡི་དྭགས་ཉིད་མིན་ཅིང ། །སྣོད་དང་བཅུད་ནི་སྣ་ཚོགས་དང ། །ཁམས་གསུམ་པོ་ནི་མ་ལུས་ལ། །བདག་ཉིད་ཆེན་པོ་དེ་ཡིས་ཁྱབ། །བེམས་པོ་ཉིད་ལ་ཡིད་ཀྱིས་རྟོགས། །དེ་ཉིད་འཇིག་རྟེན་པ་རུ་འགྱུར། །ཚངས་པ་ཁྱབ་འཇུག་དབང་ཕྱུག་ཆེ། །ཟླ་བ་གཟའི་ཟིན་སྐར་མ་ལྷ། །དེ་ཉིད་ཐམས་ཅད་བདེ་བ་ཆེ། །རྡོ་རྗེ་འཛིན་པ་རྣམ་སྣང་མཛད། །པདྨ་ཉི་མ་ཁྲག་འཐུང་རྟ། །རྡོ་རྗེ་རྣལ་འབྱོར་ཕོ་ཉ་མོ། །དེ་ཉིད་རྡོ་རྗེ་བདེ་བ་ཆེ། །རྡོ་རྗེ་རྡོ་རྗེ་འཛིན་པ་ཉིད། ། དེ་བཞིན་པདྨ་པདྨ་འཛིན། །ནོར་བུ་ནོར་བུ་འཛིན་པ་ཉིད། །རིགས་འདི་རྣམས་སུ་བསྒྱུར་བའོ། །དེ་ཉིད་དཀྱིལ་འཁོར་བྲི་བ་ཉིད། །རྡུལ་ཚོན་ཁ་དོག་ལྔ་བ་འོ། །དེ་ཉིད་སྔགས་སུ་རབ་ཏུ་བྱ། །ཧཱུཾ་ཧཱུཾ་ཕཊ་ཀྱི་ཡི་གེ་ཉིད། །དམྱལ་པ་དུད་འགྲོ་ཡི་དྭགས་དང ། །ལྷ་དང་མི་དང་ལྷ་མིན་དང ། །རྨོངས་པའི་སེམས་སུ་གྱུར་པ་ཡིས། །འཁོར་བ་འདི་རུ་འཁོད་པར་འགྱུར། །རྣལ་འབྱོར་ཆེན་པོ་མདོར་བསྡུས་པ། །རྡོ་རྗེ་ཅན་ལ་གནས་པའོ། །ལྷ་མོ་ཆེན་མོ་སླར་ཡང་བྲི། །འགྲོ་དང་འོང་བ་ཇི་ལྟར་འགྱུར། །གནས་ནས་འདི་ཡི་སེམས་དག་ནི། ། སྐྱེ་བ་ཇི་ལྟར་བརྗོད་པ་ཡིན། །ཁུ་བ་ཇི་ལྟར་གཟུགས་སུ་འགྱུར། །སྐྱེ་བོའི་སྐྱེ་བ་ཇི་ལྟར་ཡིན། །དེ་ཡི་གཟུགས་ཀྱི་སྐྱེ་མལ་ནི། །ཁྲག་ལས་ཇི་ལྟར་འབྱུང་བ་ལགས། །འབྱུང་བ་རྣམས་ 350a ༄#། །གྱི་འབྱུང་བ་ཅི། །དེ་ཡི་སྐྱེ་བ་ཇི་ལྟར་ལགས། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཉིད་དང་ནི། །སྐྱེ་གནས་ཀུན་ལ་ཆགས་པ་ནི། །དངོས་པོ་རྣམ་པ་ཇི་ལྟར་ཁྱབ། །ཞི་བའི་གཟུགས་ནི་ཇི་ལྟར་ཡིན། །ཐམས་ཅད་དུ་ནི་ཇི་ལྟར་སྐྱེ། །འདི་རྣམས་ཡང་དག་བཤད་པ་ནི། །ལྷ་མོ་བདེན་པར་བདག་ལ་གསུངས། །ཇི་ལྟར་དེ་བཞིན་རྡོ་རྗེ་ཉོན། །སེམས་ཅན་ཀུན་གྱིས་བསྐྱེད་པ་དག་།འཁོར་བར་ཡང་དག་བསྲུབས་པ་ལས། །དེང་འདིར་ཐབས་ཀྱིས་འདི་འགྱུར་རོ། །ཐོག་མ་ཐ་མ་མེད་དུས་སུ།། སེམས་ཅན་ཐམས་ཅད་ཡང་དག་འབྱུང ། །རྒྱ་མཚོ་འཁྲུགས་སོགས་གཏིང་གི་བར། །བློ་གྲོས་ཆེན་པོ་བསྲུབས་པ་ཡིན། །དེ་ལས་དེ་དག་སྐྱེ་བར་འགྱུར། །ས་ཡི་ཁམས་དང་ཡང་དག་ལྡན། །མེ་ཡིས་མཉམ་པར་ངེས་པར་བསྲུབས། །ཆུ་དང་རླུང་གིས་བྱེ་བྲག་གོ་།ཡིད་ཀྱི་དེ་རུ་རབ་ཞེན་པ། །མངལ་ནི་བཟུང་ཞིང་བླངས་པ་སྟེ། །དེ་ནི་འཁོར་བར་འཁོར་བར་འགྱུར། །དགའ་བ་མྱ་ངན་ལྡན་པ་སྟེ། །དེ་ལས་འབྱུང་བར་འགྱུར་བ་ནི། །སོ་སོར་སྐྱེ་བ་སྨྲ་བ་སྟེ། །དེ་བཞིན་ཆོས་དག་ཟབ་མོ་ཉིད། །སངས་རྒྱས་རྣམས་ཀྱིས་སངས་རྒྱས་བརྗོད། །དེ་ཉིད་འདི་རྣམས་མཉམ་བཤད་པ། །སུམ་ཅུ་པ་སྟེ་རྙེད་པར་དཀའ། །རྣལ་འབྱོར་མ་བཞིའི་ཁ་སྦྱོར་ལས། དེ་ཁོ་ན་ཉིད་ཀྱི་མན་ངག་སྦྱོར་བ་བཞིའི་ 350b ཆ་ཞེས་བྱ་བ་སྟེ་བརྟག་པ་བཞི་པའོ།། །།དེ་ནས་ཡང་དག་བཤད་བྱ་བ། །སྦྱིན་སྲེག་ལས་ནི་རབ་ཏུ་སྒྲུབ། །སྦྱིན་སྲེག་རྣམ་པ་གཉིས་སུ་གསུངས། །ཕྱི་དང་ནང་དུ་ཡང་དག་གནས། །ཕྱི་རུ་ཇི་ལྟར་གསུངས་པ་ལགས། །ནང་དུ་ཡང་ནི་ཇི་ལྟར་འགྱུར། །ཉོན་ཅིག་རྡོ་རྗེ་ནང་གི་ནི། །ཇི་བཞིན་སྦྱིན་སྲེག་རབ་བསྒྲུབ་བྱ། །མེ་ཆེན་པོ་དག་རབ་ཏུ་སྦང་།། རྣམ་རྟོག་མེད་པའི་སྦྱིན་སྲེག་བྱ། །བཟའ་དང་བཏུང་བ་གང་ཡང་རུང ། །དེ་རུ་ཐམས་ཅད་སྦྱིན་སྲེག་བྱ། །སྲེག་རྫས་རང་བཞིན་གསུངས་པ་དག་།གཟུགས་ཕུང་ལ་སོགས་ལྔ་པོ་དག ། རྣམ་རྟོག་མེད་པའི་སྦྱིན་སྲེག་བྱ། །དེ་དག་ཐམས་ཅད་སེམས་ལས་བྱུང ། །ཁྲག་དང་ཁུ་བ་དེ་བཞིན་ཤ་།དྲི་ཆེན་དྲི་ཆུ་ལྔ་པོ་དག་།རྣམ་རྟོག་མེད་པར་བཟའ་བར་བྱ། །བློ་ལྡན་རང་བཞིན་མེད་པས་སོ། །གཏི་མུག་ང་རྒྱལ་དེ་བཞིན་ཆགས། །ཞེ་སྡང་དེ་བཞིན་འདོད་ཆགས་ཉིད། །ཕྲག་དོག་སེར་སྣ་ཕྲ་མ་དག་།དམ་ཚིག་དེ་ཉིད་དྲི་མ་མེད། །ཇི་ལྟར་ཉི་མ་འབར་བ་བཞིན། །དེ་ལྟར་དྲི་མ་མེད་པར་འགྱུར། །ཇི་ལྟར་སྟོན་གྱི་ཟླ་གསལ་བ། །དེ་ལྟར་འདི་ཡི་དབུས་གསལ་ཡིན། །འདོད་ཆགས་ཆེན་པོར་འགྱུར་བ་ཡིན། །རྡོ་རྗེ་སྣང་བྱེད་སྒྲོན་མ་བཞི། །དེ་ཉིད་ཐར་པར་གསུངས་པ་སྟེ། །བླ་མེད་གོ་འཕང་ཐོབ་པར་འགྱུར། །སྦྱིན་སྲེག་འདི་ལ་རབ་གནས་ན། །ལྷ་རྣམས་དགའ་བས་ཚིམ་པ་ཡིན། །སྦྱིན་སྲེག་ལས་ནི་རབ་ 351a ༄#། །གསུངས་ནས། །རབ་གནས་དག་ནི་བརྗོད་པར་བྱ། །སྔོན་གྱི་རྣལ་འབྱོར་ལ་གནས་ནས། །དེ་ནས་རབ་གནས་བྱ་བ་སྟེ། །རབ་གནས་སྐུ་སོགས་ཐང་ཀ་དང་།། རྣལ་འབྱོར་ཅན་གྱིས་གླེགས་བམ་སྟེ། །དཔལ་ལྡན་གཡོན་གྱིས་དྲིལ་བུ་འཛིན། །གཡས་ཀྱི་རྡོ་རྗེ་ཡོངས་སུ་བཟུང ། །དོན་ཀུན་རྣལ་འབྱོར་ཀུན་གྱིས་ནི། །མཛེས་པར་སྐུ་གཟུགས་མཆོད་པར་བྱ། །ཤ་དང་ཆང་དག་རབ་ཏུ་བཀང ། །རོ་ཡི་སྟེང་དུ་ཡང་དག་གནས། །པར་པ་ཊི་ཀཱ་ཤཾ་ཀུ་ལི། །མཆོད་པ་ཀུན་གྱིས་དགྱེས་བར་བྱ། །མེ་ཏོག་སྤོས་དང་མར་མེ་དང ། ། དྲི་ཉིད་དང་ནི་རྣམ་པ་བཞི། །གླུ་དབྱངས་དེ་བཞིན་གར་དག་དང ། །སྒྲུབ་པོས་པ་ཊ་ཧ་སོགས་ཏེ། །སྐུ་ལ་སོགས་པ་འདི་རྣམས་ལ། །རབ་གནས་ཆེན་པོ་བྱ་བ་ཡིན། །ཡ་ཨིཾ་ཨཾ་ཧིཾ་ཡ་ཨི་ཨཾ། །ཛེ་ཨིཛྫ་ཨི་མཱ་ཨ་ཨུཾ། །མཱ་ཨ་ཨུཾ་མཱ་ཨ་དྷ་མམུ་པཱ། །པིཛྫ་ཨི་ཙིཏྟ་ཡཾ་མུ། །ཙིཎྚི་ཛྫ་ཨཻ་ས་ཨེ་ལ། །སཏྟྲཱཏྠུ་ཀི་རི་ཛྫ་ཨི། །གླུ་འདི་དག་ནི་བླངས་པ་ཡིས། །དབང་རྣམས་ཀུན་ཀྱང་བླང་བ་སྟེ། །ཆོས་རྣམས་ཐམས་ཅད་ཡང་དག་རྫོགས། །དེ་བཞིན་གཤེགས་པ་ཀུན་གྱི་གཞི། །མཆོད་པ་ཀུན་གྱི་སྤྲིན་ཆེན་པོ། །སྤྲོ་ཞིང་བསྡུ་བར་བརྗོད་པ་འོ། །ང་ཡིས་རབ་གནས་བཤད་པ་ནི། །རྒྱུད་རྣམས་ཀུན་ལས་རྙེད་པར་དཀའ། །རྣལ་འབྱོར་མ་བཞི་འི་ཁ་སྦྱོར་ལས། སྦྱིན་སྲེག་རབ་གནས་ཀྱི་བརྟག་པ་སྟེ་ལྔ་ 351b པའོ།། །།དེ་ནས་མདོར་བསྡུས་རབ་བཤད་པ། །དེ་ཉིད་གཏན་ལ་དབབ་པའི་མཆོག་།རྟག་ཏུ་སེམས་ནི་རྣམ་རྟོག་མེད། །རྣམ་རྟོག་བཅས་པས་ཅི་ལྟར་འགྱུར། །ཇི་ལྟར་མེ་ངག་རབ་འབར་བ། །རྟག་ཏུ་ཤིང་རྣམས་ཚིག་པར་བརྗོད། །དེ་ལ་ཚིག་པ་ཤིང་རྣམས་ཏེ། །འདི་ཡིས་ཚིག་པར་མཐོང་བ་ཡིས། །དེ་ཡིས་ཚིག་པ་ཇི་བཞིན་དུ། །བློ་ལྡན་རྣམ་རྟོག་མེད་པ་ཡིས། །ཕུང་པོ་ལྔ་ཡི་ཤིང་རྣམས་ཏེ། །དེ་བཞིན་གཟུགས་ཀྱི་ཕུང་པོ་ཉིད། །རུས་པ་རྐང་དང་བད་ཀན་དང ། །ཁྲག་དང་ཁུ་བ་དྲི་ཆེན་དག་།མིག་གཉིས་དེ་བཞིན་རྣ་བ་དང། །དེ་བཞིན་དུ་ནི་སྣ་ཉིད་དང ། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཉིད་དག་དང ། །འབྱུང་བ་ལྔ་པོ་ཐམས་ཅད་ལ། །དེ་ཉིད་ཉི་ཤུ་རྩ་ལྔ་དག་།དེ་ཡི་གནས་ནི་བྱེ་བྲག་ཏུ། །ང་ཡིས་བྱེ་བྲག་བརྗོད་པ་སྟེ། །ལྟེ་བར་གནས་པའི་འཁོར་ལོ་ཆོས། །འདབ་མ་དྲུག་ཅུ་བཞི་དང་ལྡན། །ཤེས་རབ་གནས་སུ་རབ་ཏུ་གསུངས། །ཟླ་བའི་གཟུགས་བཞིན་གསལ་བ་སྟེ། །དེ་ཡིས་དཔུས་སུ་གནས་པ་དང ། །མེ་ལྟ་བུར་ནི་འབར་བ་ཡིན། །མེ་ཆེན་དེ་ནི་འབར་བ་སྟེ། །དེ་ཡི་རྩེ་མོ་མཐོང་བ་ནི། །དེ་ཡི་དེ་ནི་གཟུགས་མཐོང་ཡིན། །དངོས་པོ་ཐམས་ཅད་གཟུགས་འཛིན་པ། །བློ་ཡི་གནས་སུ་གསུངས་ཤིང་བརྗོད། །ཧཱུཾ་ཡིག་ང་རོ་ཚུལ་འཛིན་པ། །རྡོ་རྗེ་ཅན་ནི་རྟག་ཏུ་འབྱུང ། །རྡོ་རྗེ་འཛིན་ཆེན་གཟུགས་བཞིན་ནོ།། 352a ༄#། །རླུང་གི་བསྐྱོད་པ་མེ་ཡིན་ཏེ། །དེ་ཡི་དབུས་སུ་རབ་ཏུ་གྲགས། །གང་ཞིག་རི་བོང་ཅན་གཟུགས་གསུངས། །ཤེས་རབ་དེ་ཉིད་མདོར་བསྡུས་སོ། །ཇི་ལྟར་ཉི་མར་རབ་ཏུ་བརྗོད། །རྡོ་རྗེ་འཛིན་དང་བཅས་པར་འགྱུར། །སྡེ་ཚན་བརྒྱད་ཀྱིས་ཐ་མ་གསུངས། །ཐིག་ལེ་དང་ནི་ཞབས་ཀྱིས་བཅས། །དེ་ཉིད་ཉི་མ་ཞེས་སུ་གསུངས། །འོད་ཟེར་འབར་བའི་ཕྲེང་བ་ཅན། །དེ་ཡི་དབུས་སུ་ཡང་དག་འབྱུང ། །རྡོ་རྗེ་ཅན་གནས་མཉམ་པར་འགྱུར། །ཇི་ལྟར་གཉིད་ཀྱིས་བཟུང་བ་ནི། །ཅུང་ཟད་ཀྱང་ནི་མཐོང་བ་མེད། །གཟུགས་ལ་སོགས་པའི་གཟུང་བ་དག་།ལངས་ན་རྟག་ཏུ་མཐོང་བ་ཡིན། །དེ་རུ་ཐབས་ནི་བསྒོམ་པ་ཡིས། །དེ་ཡི་རང་བཞིན་མཆོག་ཏུ་གྲགས། །སེམས་ཅན་ཐོགས་མེད་བདེ་ཆེན་བརྗོད། །དེ་རུ་དེར་གནས་དངོས་པོ་ཡིས། །ཤེས་རབ་ཕ་རོལ་ཕྱིན་པ་གསལ། །དེ་ཕྱིར་དེ་ཉིད་དངོས་པོ་ཡིས། །བློ་ལྡན་སེམས་ཀྱིས་དེ་ཉིད་གསུམ། །སེམས་ནི་རྣམ་པར་དག་པ་སྟེ། །འཁོར་བའི་རྒྱ་མཚོར་འཁྱམས་པར་འགྱུར། །སྔགས་པ་གར་འདོད་འགྲོ་བ་ཡིན། །སྐད་ཅིག་གིས་ནི་གནས་པར་འགྲོ་།འདོད་ཆེན་རྣམས་ནི་ཆགས་པར་འགྱུར། །དྲག་པོ་རྣམས་ལ་དྲག་པོ་མཚོན། །ཞི་བ་རྣམས་ལ་ཞི་བ་སྟེ། །འདི་ནི་མདུན་རྒྱབ་རྒྱལ་བ་རིམ། །ཇི་ལྟར་འདི་རུ་པདྨ་རིམ། །འདོད་ཆགས་སྐྱོན་གྱིས་གོས་མི་འགྱུར། །སྣ་ཚོགས་བག་ཆགས་སྐྱོན་ 352b མི་ཆགས། །ཁམས་གསུམ་པོ་ནི་དེ་བཞིན་དག་།སྟོང་པ་མ་ཡིན་མི་སྟོང་མིན། །དབུ་མ་ཉེ་བར་ཐོབ་པའོ། །ཤེས་རབ་ཕ་རོལ་ཕྱིན་རྣལ་འབྱོར། །ཐབས་ནི་སྙིང་རྗེའི་བདག་ཉིད་དོ། །འདི་ནི་བྱང་ཆུབ་སེམས་རྡོ་རྗེ། །སེམས་དང་སེམས་བྱུང་རང་བཞིན་གྱིས། །དངོས་པོ་མེད་པར་སྒོམ་པའི་དངོས། །དེ་ལ་སོགས་པར་བརྗོད་པ་ཡིན། །ཕྲེང་བ་མེད་ཅིང་བྱ་བ་མེད། །སྤུངས་པ་མེད་པར་བརྗོད་པ་སྟེ། །རྣལ་འབྱོར་འདི་ལ་གནས་པ་ནི། །དབུ་མའི་མཆོག་གི་གོ་འཕང་ངོ ། །བླ་ན་མེད་པའི་ཡེ་ཤེས་ནི། །བླ་མེད་ཅེས་ནི་རིམ་པ་མེད། །འདིས་ནི་འཁོར་བ་རྣམ་པར་གྲོལ། །ཕྱིར་མི་ལྡོག་པའི་གོ་འཕང་མཆོག་།རྡོ་རྗེ་སེམས་དཔའ་ཞེས་སུ་གསུངས། །དེ་ཡིས་རྡོ་རྗེ་སེམས་དཔའ་འགྲུབ། །སྐྱེ་བ་འདི་ལ་འགྲུབ་པ་སྟེ། །རྡོ་རྗེ་སེམས་དཔའ་དང་མཉམ་འགྱུར། །ཁྲག་དང་ཁུ་བ་བཟའ་བ་སྟེ། །དྲི་ཆེན་དྲི་ཆུ་ཤ་དང་ལྔ། །དེ་ཡི་ཚེ་ནི་རྒྱས་པར་འགྲོ་།རྡོ་རྗེ་སེམས་དཔའ་དང་མཉམ་འགྱུར། །བ་ཧཱུ་བི་ཧ་ཧཱུཾ་ཀཱ་ར་ག་ཏི་བ་ཧཱུཾ་བི་ཧ། རཱུ་པ་དྷཱ་རི་ཎི་བ་ཧཱུཾ་བི་དྷ་ནཱ་ནཱ་རཉྫི་ཧ། བ་ཧཱུ་བི་ཧ་བྲྀཏྱ་གཱི་ཏ་ཏྱ། །བ་ཧུ་བི་ཧ་ཛི་བ་སནྟ་ཏྱ་ཤེ། །ཥཿ ནི་ཤེ་ཥ་སཏྭ་བི་ན་ཡ་བི་དིཥྦྷན་ས་མ་ར་སྟུ་བི་ཤུདྡྷེ་ཧཿ ཧཿ ཧཿ ཧཿ ཧོཿ ། ཨ་ཧཻ་སམྦ་རེ་སིཛྫྷ་མ་ཧཱུཾ་ཨ་ཧོ། ཤུཾ་ཧ་ཧཱུཾ་རེ་ཨུ་པ་རཱུ་ཨ་ལ་ལ་ལ་ལ་ཧོཿ ། གླུ་འདི་དག་ནི་བླངས་པ་སྟེ། །བརྟག་པ་ཀུན་གྱི་བླ་ན་མེད། །དེ་ཡི་ཚེ་ན་རྒྱས་པར་འགྲོ་།རྡོ་རྗེ་སེམས་དཔའ་དང་མཉམ་འགྱུར། །རྣལ་འབྱོར་མ་བཞིའི་ཁ་སྦྱོར་ 353a ༄#། །ལས། དེ་ཁོ་ན་ཉིད་གཏན་ལ་དབབ་པའི་བརྟག་པ་སྟེ་དྲུག་པའོ།། །།དེ་ནས་ཡང་དག་བཤད་བྱ་བ། །དེ་ཉིད་རྣལ་འབྱོར་ཐམས་ཅད་ནི། །སྦྱིན་དང་ཚུལ་ཁྲིམས་དེ་བཞིན་བརྩོན། །བསམ་གཏན་བཟོད་པ་ཤེས་རབ་དང ། །སྟོབས་དང་དེ་བཞིན་ཐབས་དང་ནི། །སྨོན་ལམ་ཡེ་ཤེས་ཡང་དག་འབྱུང ། །ཕ་རོལ་ཕྱིན་པ་བཅུ་རྫོགས་པ། །བྱང་ཆུབ་སེམས་དཔའི་སྡོམ་པ་ཡི། །སྦྱིན་པ་རྣམ་པ་བཞི་རུ་གསུངས། །ཚུལ་ཁྲིམས་གསུམ་གྱི་ངོ་བོ་ཉིད། །བསམ་གཏན་རྣམ་བཞིར་གསུངས་པ་སྟེ། །བརྩོན་འགྲུས་རྣམ་པ་ལྔ་རུ་འགྱུར། །བཟོད་པ་རྣམ་པ་བཅུར་ཤེས་བྱ། །ཤེས་རབ་རྣམ་པ་དྲུག་ཏུ་འགྱུར། །སྟོབས་ནི་རྣམ་བཅུ་རབ་ཏུ་གསུངས། །ཐབས་ནི་རྣམ་པ་ལྔར་འགྱུར་ཏེ། །སྨོན་ལམ་གཉིས་སུ་ཤེས་བྱ་སྟེ། །ཡེ་ཤེས་རྣམ་ལྔར་གནས་པ་འོ། །ཆོས་དང་མི་འཇིགས་རྫས་དང་བྱམས། །སྦྱིན་པ་རྣམ་པ་བཞི་པོ་ནི། །སྦྱིན་པའི་ཕ་རོལ་ཏུ་ཕྱིན་པའོ། ། ངར་འཛིན་མེད་ཅིང་ཁེངས་པ་བྲལ། །བདེན་པ་གཉིས་མེད་གནས་པ་ནི། །ཚུལ་ཁྲིམས་རྣམ་གསུམ་བརྗེད་པ་ནི། །ཚུལ་ཁྲིམས་ཕ་རོལ་ཕྱིན་པར་གསུངས། །གང་གིས་རྣལ་འབྱོར་མ་གཉིས་དང ། །ཕྱི་ཡི་རྣམ་པ་གཉིས་སུ་གསུངས། །བསམ་གཏན་ཕ་རོལ་ཕྱིན་པ་ནི། །དྲི་ཆེན་དྲི་ཆུ་དེ་བཞིན་ཤ། །ཁྲག་དང་ཁུ་བར་ཡང་དག་འབྱུང ། །འདི་རྣམས་ 353b བརྩོན་འགྲུས་ལྔ་པོ་ནི། །དམ་ཚིག་སྒྲ་ཡིས་བརྗོད་པ་འོ། །ཚིག་རྩུབ་རྫུན་དང་དག་འཁྱལ་དང ། །ཆགས་སྡང་ཞེ་སྡང་ཕྲག་དོག་དང ། །ང་རྒྱལ་ཁྲོ་དང་དེ་བཞིན་དབྱེན། །འདི་བཅུ་རྣམ་པར་བཤད་པ་ནི། །རྡོ་རྗེ་ཅན་ནི་བཟོད་བཅས་འགྱུར། །ཡང་དག་ལྟ་བ་ཡང་དག་རྟོག་།ཡང་དག་ངག་དང་ཡང་དག་ལས། །ཡང་དག་འཚོ་དང་ཡང་དག་རྩོལ། །བདག་གིས་མདོ་རུ་བསྡུས་ནས་ནི། །ཤེས་རབ་རྣམ་པ་དྲུག་ཏུ་བརྗོད། །དད་པའི་སྟོབས་དང་དྲན་པའི་སྟོབས། །ཏིང་འཛིན་སྟོབས་དང་ཤེས་རབ་སྟོབས། །ལུས་ཀྱི་སྟོབས་དང་ངག་གི་སྟོབས། །ཡེ་ཤེས་སྟོབས་དང་སྨོན་ལམ་སྟོབས། །བརྩོན་འགྲུས་ཀྱི་ནི་སྟོབས་རྣམས་ཏེ། །འདི་རྣམས་སྟོབས་ནི་བཅུ་པའོ། །མ་སྐྱེས་པ་ཡི་དགེ་བ་བསྐྱེད། །སྐྱེས་པའི་མི་དགེ་ཡང་དག་སྤོང ། །མི་དགེ་མ་སྐྱེས་མི་བསྐྱེད་དང ། །དགེ་བ་སྐྱེས་པ་འཕེལ་བ་སྟེ། །བཞི་པོ་ཐམས་ཅད་ཆོས་རྣམས་ཀྱི། །དགེ་བའི་ཆོས་རྣམས་གསུངས་པ་ནི། །རྫོགས་པར་བྱེད་པ་ཉིད་དག་གོ། །སྨོན་ལམ་རྣམ་པ་གཉིས་སུ་གནས། །མེ་ལོང་མཉམ་ཉིད་སོ་སོར་རྟོག་།བྱ་གྲུབ་ཆོས་དབྱིངས་རྣམ་པར་དག་།ཡེ་ཤེས་རྣམ་པ་ལྔ་རུ་འགྱུར། །འདི་རྣམས་བཅུ་བཞི་པོ་དག་ནི། །ཕ་རོལ་ཕྱིན་པ་མདོར་བསྡུས་པ། །བདག་གིས་དེ་ཉིད་བརྗོད་པ་སྟེ། །རྡོར་ཅན་ཉོན་ཅིག་གཏན་ལ་དབབ། །བཅུ་གཉིས་མཐའ་དང་རྒྱ་ཡི་མཐའ། །མགོ་ནས་རྐང་པའི་མཐིལ་བར་དུ། །དེ་ཡི་དབུས་སུ་ 354a ༄#། །ངེས་འགྱུར་བ། །ལྟེ་བའི་དབུས་སུ་རྣམ་པར་གནས། །རྟག་ཏུ་ཤར་བར་འགྱུར་བ་སྟེ། །འདི་རུ་རྡོ་རྗེ་ཅན་གྱིས་མཐོང ། །ལུས་ངག་སེམས་ཀྱིས་དབུས་དག་ཏུ། །འབར་བའི་ཕྲེང་བ་འབར་བ་འོ། །སྟེང་གི་སྒོ་རུ་རྟག་གནས་པ་འོ། །ཉི་མའི་འོད་ཟེར་ཕྲེང་བ་ཅན། །ཅུང་ཟད་ལུས་ལས་མཐོང་བ་མེད། །མགལ་མེའི་འཁོར་ལོའི་གཟུགས་ཅན་ཏེ། །དེ་ཉིད་རྣལ་འབྱོར་ལམ་གྱིས་ནི། །རྟག་པའི་དུས་སུ་རྣམ་པར་གནས། །དེ་ཡི་དབྱར་གྱི་དུས་མེད་ཅིང ། །དཔྱིད་མེད་སྟོན་ཡང་ཡོད་མ་ཡིན། །དགུན་མེད་སོས་ཀྱང་མེད་པ་རུ། །རྣལ་འབྱོར་པས་ནི་རྟག་ཏུ་བསྒོམ། །སྔགས་པས་སེང་གེ་བཞིན་དུ་སྤྱོད། །སྔགས་དང་རྒྱུད་ལ་ཇི་ལྟར་གནས། །ཉ་དང་ཤ་ནི་བཟའ་བར་བྱ། །ཆང་གི་བཏུང་བ་མཆོག་ཡིན་ནོ། །བཅུད་ཀྱི་ལེན་གྱི་ཆོ་ག་ཡིས། །སྔགས་ནི་བརྗོད་པར་མི་བྱ་འོ། །མཚོན་ཆའི་གནས་ལ་དུས་རྟག་ཏུ། །མཚོན་བྱའི་མཚན་ཉིད་མཚོན་པར་བྱ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་ལྷ་དང ། མི་དང ། ལྷ་མ་ཡིན་རྣམས་དང་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།རྣལ་འབྱོར་མ་བཞིའི་ཁ་སྦྱོར་ཞེས་བྱ་བ་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།དཔལ་ཨོཌྜྱཱན་ནས་ངེས་པར་འབྱུང་བའི་རྣལ་འབྱོར་མའི་རྒྱུད་ 354b ཆེན་པོ་སྟོང་ཕྲག་བཅུ་གཉིས་པ་ལས། འཇིག་རྟེན་པ་དང ། འཇིག་རྟེན་ལས་འདས་པའི་རྒྱལ་བོ་ཆེན་པོ་དཔལ་ཨིནྡྲ་བྷཱུ་ཏིའི་ཞབས་ཀྱིས་བཀོད་ཅིང་གསལ་བར་མཛད་པའོ།། བོད་ཀྱི་ལོཙྪ་བ་ལ་ཆིངས་ཡོན་ཏན་འབར་གྱིས་བསྒྱུར་ཏེ། སླད་ཀྱིས་དེ་ཉིད་ཀྱི་ཚེ་པཎྜི་ཏ་གཉིས་ལ་འང་གཏུགས་ཏེ་གཏན་ལ་ཕབ་པའོ།། |