རྒྱ་གར་སྐད་དུ། ཡོ་གི་ནཱི་སཉྩཱ་རྱཾ། བོད་སྐད་དུ། རྣལ་འབྱོར་མའི་ཀུན་ཏུ་སྤྱོད་པ། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་དྲིན་གྱིས་བདེ་ཆེན་གནས།། སྐད་ཅིག་གིས་ནི་ཐོབ་གྱུར་པ། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །དེ་ནས་ཡང་དག་བཤད་བྱ་བ། །ཀུན་ཏུ་སྤྱོད་པའི་ཆོ་ག་མཆོག་།འཁོར་ལོ་གསུམ་བདག་འདི་སྒོམ་པ། །རྣལ་འབྱོར་ལམ་ལ་གནས་པ་ཡིན། །ལུགས་འབྱུང་ལུགས་ལས་བཟློག་པར་ནི། །རྒྱུད་དུ་སྦས་པར་གནས་གང་དེ། །བསྟན་པ་འདི་རུ་ཇི་སྐད་གསུངས། ། བཤད་པ་ཡང་ནི་དེ་བཞིན་ནོ། །སོ་སོར་བསྟན་པ་མ་ལུས་ཉིད། །བརྡ་ཡི་ཆོ་ག་རྒྱས་པ་ཡིན། །གང་གིས་ཤེས་པ་ཙམ་གྱིས་ནི། །སྒྲུབ་པ་པོ་ཡིས་གྲུབ་ཐོབ་པ། །སུམ་ཅུ་རྩ་བདུན་ཚུལ་གྱིས་ནི། །བྱང་ཆུབ་ཕྱོགས་ལ་གནས་པ་ཡིན། །འཇིག་རྟེན་དུ་ནི་བསྒོམ་བྱར་བཤད། །ཧེ་རུ་ཀ་དཔལ་འགྲོ་བའི་མཆོག་།དེ་ལ་ཐོག་མར་རྣལ་འབྱོར་གྱི་དབང་ཕྱུག་གིས་ཕུང་པོ་ལྔ་ལ་ལྷའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དོ། །ཚོར་བའི་ཕུང་པོ་ལ་ནི་རྡོ་རྗེ་ཉི་མའོ། །འདུ་ཤེས་ཀྱི་ཕུང་པོ་ལ་ནི་པདྨ་གར་གྱི་ 327a ༄#། །དབང་ཕྱུག་གོ་།འདུ་བྱེད་ཀྱི་ཕུང་པོ་ལ་ནི་རྡོ་རྗེ་རྒྱལ་པོའོ། །རྣམ་པར་ཤེས་པའི་ཕུང་པོ་ལ་ནི་རྡོ་རྗེ་སེམས་དཔའ་སྟེ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་ནི། ཤྲཱི་ཧེ་རུ་ཀ་རྡོ་རྗེའོ། །མིག་གཉིས་ལ་ནི་གཏི་མུག་རྡོ་རྗེའོ། །རྣ་བ་གཉིས་ལ་ནི་ཞེ་སྡང་རྡོ་རྗེའོ། །སྣ་དག་ལ་ནི་ཕྲག་དོག་རྡོ་རྗེའོ། །ལྕེ་ལ་ནི་འདོད་ཆགས་རྡོ་རྗེའོ། ། ལུས་ལ་ནི་སེར་སྣ་རྡོ་རྗེའོ། །སྐྱེ་མཆེད་ཐམས་ཅད་ལ་ནི་དབང་ཕྱུག་རྡོ་རྗེའི་དབྱིངས་སོ། །སའི་ཁམས་ལ་ནི་ལྟུང་བྱེད་མའོ། །ཆུའི་ཁམས་ལ་ནི་གསོད་བྱེད་མའོ། །མེའི་ཁམས་ལ་ནི་འགུགས་མའོ། །རླུང་གི་ཁམས་ལ་ནི་གར་དབང་མའོ། །ནམ་མཁའི་ཁམས་ལ་ནི་པདྨའི་དྲ་བ་མོ་སྟེ། དེ་ལྟར་ཕུང་པོ་དང ། ཁམས་དང ། སྐྱེ་མཆེད་རྣམས་ལ་ལྷ་ཉིད་ཀྱི་ང་རྒྱལ་བསྐྱེད་པར་བྱའོ། །རྣལ་འབྱོར་པའི་ཀུན་ཏུ་སྤྱོད་པ་ལས། ལྷ་རྣམས་ཀྱི་གནས་ཀྱི་རྣམ་པར་དག་པ་གནས་པ་སྟེ་དང་པོའོ།། །།དེ་ནས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལྷའི་སྦྱོར་བས་སྦྱར་བར་བྱ་སྟེ། དེ་ཐམས་ཅད་ཀྱང་གང་ཞེ་ན། ལུས་དྲན་པ་ཉེ་བར་གཞག་པ་དང ། ཚོར་བ་དྲན་པ་ཉེ་བར་གཞག་པ་དང ། ཆོས་དྲན་པ་ཉེ་བར་གཞག་པ་དང ། སེམས་དྲན་པ་ཉེ་བར་གཞག་པ་དང ། འདུན་པའི་རྫུ་འཕྲུལ་གྱི་རྐང་པ་དང ། བརྩོན་འགྲུས་ཀྱི་རྫུ་འཕྲུལ་གྱི་རྐང་པ་དང ། དཔྱོད་པའི་རྫུ་ 327b འཕྲུལ་གྱི་རྐང་པ་དང ། སེམས་ཀྱི་རྫུ་འཕྲུལ་གྱི་རྐང་པ་དང ། དད་པའི་དབང་པོ་དང ། བརྩོན་འགྲུས་ཀྱི་དབང་པོ་དང ། དྲན་པའི་དབང་པོ་དང ། ཏིང་ངེ་འཛིན་གྱི་དབང་པོ་དང ། ཤེས་རབ་ཀྱི་དབང་པོ་དང ། དད་པའི་སྟོབས་དང ། བརྩོན་འགྲུས་ཀྱི་སྟོབས་དང ། དྲན་པའི་སྟོབས་དང ། ཏིང་ངེ་འཛིན་གྱི་སྟོབས་དང ། ཤེས་རབ་ཀྱི་སྟོབས་དང ། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང ། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང ། དགའ་བ་ཡང་དག་བྱང་ཆུབ་ཀྱི་ཡན་ལག་དང ། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང ། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང ། དྲན་པ་ཡང་དག་བྱང་ཆུབ་ཀྱི་ཡན་ལག་དང ། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང ། ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་པ་དང ། ཡང་དག་པའི་ཏིང་ངེ་འཛིན་དང ། དགེ་བའི་ཆོས་མ་སྐྱེས་པ་རྣམས་བསྐྱེད་པ་དང ། དགེ་བའི་ཆོས་སྐྱེས་པ་རྣམས་ཡང་དག་པར་སྲུང་བ་དང ། མི་དགེ་བའི་ཆོས་སྐྱེས་པ་རྣམས་སྤོང་བ་དང ། མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའོ། །དེ་ལྟར་ན་དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་ 328a ༄#། །རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། འཕགས་པའི་ལམ་ཡན་ལག་བརྒྱད་པའི་མཐར་ཐུག་པ་རྣམས་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡིན་ནོ། །རྣལ་འབྱོར་མའི་ཀུན་ཏུ་སྤྱོད་པ་ལས། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་བསྟན་པ་སྟེ་གཉིས་པའོ།། །། དེ་ལ་དེ་རྣམས་ཀྱི་ལྷའི་སྦྱོར་བ་གྲངས་ཇི་ལྟ་བར་མདོར་བསྡུས་ནས་བཤད་པར་བྱ་སྟེ་ལུས་དྲན་པ་ཉེ་བར་གཞག་པ་ནི་མཁའ་འགྲོ་མའོ། །ཚོར་བ་དྲན་པ་ཉེ་བར་གཞག་པ་ནི་ལཱ་མའོ། །ཆོས་དྲན་པ་ཉེ་བར་གཞག་པ་ནི་ཁཎྜ་རོ་ཧིའོ། །སེམས་དྲན་པ་ཉེ་བར་གཞག་པ་ནི་གཟུགས་ཅན་མའོ། །འདུན་པའི་རྫུ་འཕྲུལ་གྱི་རྐང་པ་ནི་རབ་གཏུམ་མའོ། །བརྩོན་འགྲུས་ཀྱི་རྫུ་འཕྲུལ་གྱི་རྐང་པ་ནི་གཏུམ་པའི་མིག་ཅན་མའོ། །དཔྱོད་པའི་རྫུ་འཕྲུལ་གྱི་རྐང་པ་ནི་འོད་ལྡན་མའོ། །སེམས་ཀྱི་རྫུ་འཕྲུལ་གྱི་རྐང་པ་ནི་སྣ་ཆེན་མའོ། །དད་པའི་དབང་པོ་ནི་དཔའ་བོའི་བློ་གྲོས་མའོ། །བརྩོན་འགྲུས་ཀྱི་དབང་པོ་ནི་མིའུ་ཐུང་མའོ། །དྲན་པའི་དབང་པོ་ནི་ལང་ཀའི་དབང་ཕྱུག་མའོ། །ཏིང་ངེ་འཛིན་གྱི་དབང་པོ་ནི་ཤིང་གྲིབ་མའོ། །ཤེས་རབ་ཀྱི་དབང་པོ་ནི་ས་སྲུང་མའོ། །དད་པའི་སྟོབས་ནི་འཇིགས་བྱེད་ཆེན་མོའོ། །བརྩོན་འགྲུས་ཀྱི་སྟོབས་ནི་རླུང་གི་ཤུགས་ཅན་མའོ།། 328b དྲན་པའི་སྟོབས་ནི་ཆང་འཐུང་མའོ། །ཏིང་ངེ་འཛིན་གྱི་སྟོབས་ནི་སྔོ་བསངས་ལྷ་མོའོ། །ཤེས་རབ་ཀྱི་སྟོབས་ནི་ཤིན་ཏུ་བཟང་མོའོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་རྟ་རྣ་མའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་བྱ་གདོང་མའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་ཤུགས་ཅན་མའོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་ཁཎྜ་རོ་ཧིའོ། །ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཆང་ཚོང་མའོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་གོ་ཆ་མའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་ཤིན་ཏུ་དཔའ་མོའོ། །ཡང་དག་པའི་ལྟ་བ་ནི་སྟོབས་ཆེན་མའོ། །ཡང་དག་པའི་རྟོག་པ་ནི་འཁོར་ལོས་བསྒྱུར་མའོ། ། ཡང་དག་པའི་ངག་ནི་བརྩོན་འགྲུས་ཆེན་མོའོ། །ཡང་དག་པའི་ལས་ཀྱི་མཐའ་ནི་ཁཝ་གདོང་མའོ། །ཡང་དག་པའི་འཚོ་བ་ནི་འུག་གདོང་མའོ། །ཡང་དག་པའི་རྩོལ་བ་ནི་ཁྱི་གདོང་མའོ། །ཡང་དག་པའི་དྲན་པ་ནི་ཕག་གདོང་མའོ། །ཡང་དག་པའི་ཏིང་ངེ་འཛིན་ནི་བཅོམ་ལྡན་འདས་དཔལ་ཧེ་རུ་ཀ་ཀའོ། །དགེ་བའི་ཆོས་མ་སྐྱེས་པ་རྣམས་བསྐྱེད་པ་ནི་གཤིན་རྗེ་བརྟན་མའོ། །དགེ་བའི་ཆོས་སྐྱེས་པ་རྣམས་ཡང་དག་པར་སྲུང་བ་ནི་གཤིན་རྗེ་ཕོ་ཉ་མའོ། །མི་དགེ་བའི་ཆོས་སྐྱེས་པ་རྣམས་སྤོང་བ་ནི་གཤིན་རྗེ་མཆེ་བ་མའོ། །མི་དགེ་ 329a ༄#། །པའི་ཆོས་མ་སྐྱེས་པ་རྣམས་མི་སྐྱེད་པ་ནི་གཤིན་རྗེ་འཇོམས་མའོ། །རྣལ་འབྱོར་མའི་ཀུན་ཏུ་སྤྱོད་པ་ལས། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལྷ་རྣམས་ཀྱི་རྣམ་པར་དག་པ་བསྟན་པ་སྟེ་གསུམ་པའོ།། །།དེ་ནས་ཡང་དག་བཤད་བྱ་བ། །དཔའ་བོ་གཉིས་མེད་དམ་པ་སྟེ། །ཧེ་རུ་ཀ་དཔལ་སྐུའི་ཡན་ལག་།ཡན་ལག་ཀུན་ནི་ཆ་ཤས་གནས། །སེན་མོ་དང ། །སོ་ལ་ན་ཐོད་པ་ཕྱེད་པའོ། །སྐྲ་དང ། ཁ་སྤུ་ལ་ནི་ཀེང་རུས་ཆེན་པོའོ། །པགས་པ་དང་དྲི་མ་ལ་ནི་ཀེང་རུས་སོ། །ཤ་ལ་ནི་མཆེ་བ་རྣམ་པར་གཙིགས་པའོ། །རྒྱུས་པ་ལ་ནི་ལྷ་དགྲའོ། །རུས་པ་ལ་ནི་འོད་དཔག་མེད་དོ། །མཁལ་མ་ལ་ནི་རྡོ་རྗེ་འོད་དོ། །སྙིང་ལ་ནི་རྡོ་རྗེ་སྐུའོ། །མིག་གཉིས་ལ་མྱུ་གུ་ཅན་ནོ། །མཁྲིས་པ་ལ་ནི་རྡོ་རྗེ་རལ་པ་ཅན་ནོ། །གློ་བ་ལ་ནི་དཔའ་བོ་ཆེན་པོའོ། །རྒྱུ་མ་ལ་ནི་རྡོ་རྗེ་ཧཱུཾ་མཛད་དོ། །གཉེ་མ་ལ་ནི་རབ་བཟང་ངོ ། །ལྟོ་བ་ལ་ནི་རྡོ་རྗེ་བཟང་པོའོ། །བཤང་བ་ལ་ནི་འཇིགས་བྱེད་ཆེན་པོའོ། །མཚོག་མའི་སྦུ་བས་ལ་ནི་མིག་མི་བཟང་ངོ ། །བད་ཀན་ལ་ནི་སྟོབས་པོ་ཆེའོ། །རྣག་ལ་ནི་རིན་ཆེན་རྡོ་རྗེའོ། །ཁྲག་ལ་ནི་རྟ་མགྲིན་ནོ། །རྡུལ་ལ་ནི་ནམ་མཁའི་སྙིང་པོའོ། །ཚིལ་ལ་ནི་དཔལ་ཧེ་རུ་ཀའོ། །མཆི་མ་ལ་ནི་པདྨ་གར་གྱི་དབང་ཕྱུག་གོ། །མཆིལ་མ་ལ་ནི་རྣམ་པར་སྣང་མཛད་དོ། །སྣབས་ལ་ནི་རྡོ་རྗེ་སེམས་ 329b དཔའོ། །རྣལ་འབྱོར་མའི་ཀུན་ཏུ་སྤྱོད་པ་ལས། དཔའ་བོའི་ཡན་ལག་རྣམ་པར་དག་པ་བསྟན་པ་སྟེ་བཞི་པའོ།། །།དེ་ནས་གཞན་ཡང་བཤད་བྱ་བ། །དངོས་གྲུབ་ཐམས་ཅད་སྒྲུབ་བྱེད་པ། །གང་ཞིག་ཤེས་པ་ཙམ་གྱིས་ནི། །སྒྲུབ་པོས་དངོས་གྲུབ་ཐོབ་འགྱུར་བའོ། །ཇི་ལྟར་ནང་གི་བདག་ཉིད་ཤེས། །ཕྱི་ཡི་དཀྱིལ་འཁོར་དམ་པ་ཡིན། །རྣམ་དགོད་ཇི་ལྟར་སྦྱར་བ་ནི། །སྙིང་པོ་ཐམས་ཅད་བསྡུས་པ་སྟེ། །རྟེན་དང་བརྟེན་པའི་ཚུལ་གྱིས་ནི། །བྷཻ་རཾ་བྷ་སོགས་ཡང་དག་གནས། །བླ་མ་ལས་བརྒྱུད་རིམ་བཞིན་དུ། །གང་ཞིག་ཆོ་ག་འདི་ཤེས་པས། །རི་སྟེང་པདྨ་གེ་སར་གྱི། །སྣ་ཚོགས་འདབ་མ་འཇམ་པ་ལ། །དེ་ཡི་དབུས་བཞུགས་དཔའ་བོ་ནི། །འདོད་པའི་དོན་ཀུན་སྒྲུབ་མཛད་པ། །མཁའ་འགྲོ་མ་དང་ལཱ་མ་དང། །ཁཎྜ་རོ་ཧི་གཟུགས་ཅན་མ། །པདྨའི་ཕྱོགས་ཀྱི་གནས་ལ་དགོད། །དངོས་གྲུབ་ཐམས་ཅད་སྒྲུབ་བྱེད་ཡིན། །ཕྱག་གཉིས་པ་ལ་ཞལ་གཅིག་པ། །སྣ་ཚོགས་གཟུགས་དང་རྣམ་རོལ་མའོ། །མཚམས་ཀྱི་བཞི་པོ་དག་ལ་ནི། །ལྔ་པས་གང་བའི་ཐོད་པ་བཞག་།པཱུ་ལླ་སོགས་དང་ཡང་དག་སྦྱར། །ཡུལ་དང་ཡུལ་དུ་གནས་པ་ཡིན། །སྤྱན་དྲང་འཁོར་ལོའི་དབུས་གནས་ལ། །རྣལ་འབྱོར་རིག་པས་རྟག་ཏུ་མཆོད། །པུ་ཞེས་བྱ་བ་ནི་པཱུ་ལླིར་མ་ལ་ཡན་ལག་ཁཎྜ་ཀ་པཱ་ལ་དང ། པྲ་ཙཎྜའོ། །ཛཱ་ཞེས་བྱ་བ་ནི་ཛཱ་ལན་དྷ་ར་ན་མ་ཧཱ་ཀངྐཱ་ལ་དང ། 330a ༄#། །ཙཎྜཱ་ཀྵཱིའོ། །ོ་ཞེས་བྱ་བ་ནི་ཨོཌྱན་ན་ཀངྐཱ་ལ་དང ། པྲ་བྷཱ་བ་ཏཱིའོ། ། ཞེས་བྱ་བ་ནི་ཨར་བུ་ད་ན་བི་ཀ་ཊ་དཾ་ཥྚི་ཎ་དང ། མཧཱ་ནཱ་སཱ་སྟེ་གནས་སོ། །གོ་ཞེས་བྱ་བ་ནི་གོ་དཱ་བ་རི་ན་སུ་རཱ་བཻ་རི་ཎ་དང ། བཱི་ར་མ་ཏཱིའོ། །རཱ་ཞེས་བྱ་བ་ནི་རཱ་མེ་ཤཝ་རི་ན་ཨ་མི་ཏཱ་བྷ་དང ། ཁ་ར་ཝ་རཱིའོ། །དེ་ཞེས་བྱ་བ་ནི་དེ་ཝི་ཀོ་ཊ་ནི་བཛྲ་པྲ་བྷ་དང ། ལང་ཀེ་ཤཝ་རཱིའོ། །མཱ་ཞེས་བྱ་བ་ནི་མཱ་ལ་བ་ན་བཛྲ་དེ་ཧ་དང ། དྲུ་མཙྪ་ཡའོ། །ཉེ་བའི་གནས་སོ། ཐུགས་ཀྱི་འཁོར་ལོ་སྟེ། ནམ་མཁའ་ལ་རྒྱུ་བའོ། །ཀ་ཞེས་བྱ་བ་ནི་ཀཱ་མ་རུ་པ་ན་ཨང་ཀུ་རི་དང ། ཻ་རཱ་བ་ཏཱིའོ། །ོ་ཞེས་བྱ་བ་ནི། ཨོ་ཌི་ན་བཛྲ་ཛ་ཏཱི་ལ་དང ། མཧཱ་བྷཻ་ར་བཱའོ། །ཞིང་ངོ ། །ཏྲི་ཞེས་བྱ་བ་ནི་ཏྲི་ཤ་ཀུ་ནི་ན་མ་ན་མཧཱ་བཱི་ར་དང ། བཱ་ཡུ་བེ་གཱའོ། །ཀོ་ཞེས་བྱ་བ་ནི་ཀོ་ས་ལ་ན་བཛྲ་ཧཱུཾ་ཀཱ་ར་དང ། སུ་རཱ་བྷཀྵིའོ། །ཉེ་བའི་ཞིང་ངོ ། །ཀ་ཞེས་ཡ་བ་ནི་ཀ་ལྀམ་ག་ན་སུ་བྷ་དྲ་དང ། ཤྱ་མཱ་དེ་བཱིའོ། །ལ་ཞེས་བྱ་བ་ནི་ལཾ་པཱ་ཀ་ན་བཛྲ་བྷ་དྲ་དང ། སུ་བྷ་དྲའོ། །ཙྪནྡོ་ཧའོ། །ཀཱ་ཞེས་བྱ་བ་ནི་ཀཱཉྩི་ན་མཧཱ་བེ་ར་བ་དང ། ཧ་ཡ་ཀརྞཱ་འོ། །ཧི་ཞེས་བྱ་བ་ནི་ཧི་མཱ་ལ་ཡ་ན་བི་རཱུ་པཀྵ་དང ། ཁ་གཱ་ན་ནཱིའོ། །ཉེ་བའི་ཙྪནྡོ་ཧའོ། །གསུང་གི་འཁོར་ལོ་སྟེ། ས་ལ་རྒྱུ་བའོ། །པྲེ་ཞེས་བྱ་བ་ནི་པྲེ་ཏ་པུ་རིན་མ་ཧཱ་བ་ལ་དང ། ཙཀྲ་བེ་གཱའོ། །གྲྀ་ཞེས་བྱ་བ་ནི་གྲྀཧ་དེ་ཏཱི་ན་རཏྣ་བཛྲ་དང ། ཁཎྜ་རོ་ཧཱའོ། །འདུ་བ་ཅན་ 330b ནོ། །སཽ་ཞེས་བྱ་བ་ནི་སཽ་རཱཥྚ་ན་ཧ་ཡ་གྲྀ་བ་དང ། ཤཽཎྜི་ནཱིའོ། །སུ་ཞེས་བྱ་བ་ནི་སུ་བརྞ་དཱི་པ་ན་ཨཱ་ཀཱ་ཤ་གརྦྷ་དང ། ཙཀྲ་བརྨི་ཎཱིའོ། །ཉེ་བར་འདུ་བ་ཅན་ནོ། །ནཱ་ཞེས་བྱ་བ་ནི་ནཱ་ག་ར་ན་ཤྲཱི་ཧེ་རུ་ཀ་དང ། སུ་བཱི་རཱའོ། །སི་ཞེས་བྱ་བ་ནི་སིནྡྷུ་དེ་ཤ་ན། པདྨ་ནརྟྟེ་ཤཝ་རི་དང ། མཧཱ་བ་ལཱའོ། །དུར་ཁྲོད་དེ། །མ་ཞེས་བྱ་བ་ནི་མ་རུ་དེ་ཤ་ན། བཻ་རོ་ཙ་ན་དང ། ཙཀྲ་བརྟི་ནཱིའོ། ། ཀུ་ཞེས་བྱ་བ་ནི་ཀུ་ལུ་ཏཱ་ན་བཛྲ་སཏྭ་དང ། མཧཱ་བཱི་རྱཱའོ། །ཉེ་བའི་དུར་ཁྲོད་དོ། །སྐུའི་འཁོར་ལོ་སྟེ། ས་འོག་ན་སྤྱོད་པའོ། །ཀཱ་ཀཱ་སྱཱ་དང ། ུ་ལཱུ་ཀཱ་སྱ་དང ། ཤཝ་ནཱ་སྱ་དང ། སཱུ་ཀ་རཱ་སྱཱ་ནི་ཕྱོགས་སུའོ། །ཡ་མ་དང ། ཡ་མ་དཱུ་ཏཱི་དང ། ཡ་མ་དཾཥྚི་ཎཱི་དང ། ཡ་མ་མ་ཐ་ནཱི་ནི་མཚམས་སུའོ། །དེ་ལྟར་ཕྱི་དང་ནང་གི་བདག་ཉིད་ཇི་སྲིད་ངེས་པར་རྟོགས་པའི་སྤྱོད་ཡུལ་དུ་གྱུར་གྱི་བར་དུ་དམིགས་པར་བྱའོ། །རྣལ་འབྱོར་མའི་ཀུན་ཏུ་སྤྱོད་པ་ལས། །ལྷའི་གནས་ཀྱིས་བསྟན་པ་སྟེ་ལྔ་པའོ།། །།དེ་ནས་བདག་པོ་སོགས་ཀུན་གྱི། །མཚན་མ་ཕྱག་རྒྱའི་ཚོགས་རྣམས་དང ། །རང་མདོག་ཕྱག་མཚན་བཞུགས་ཚུལ་རྣམས། །རྒྱུད་དུ་སྦས་པ་ངེས་པར་བྱ། །རྒྱལ་ཆེན་ཤྲཱི་ཧེ་རུ་ཀ་ནི། བདུག་པ་ཐམས་ཅད་རབ་འཇོམས་པ། ། ཕྱག་གཉིས་ཡང་དག་འཁྱུད་པ་དང ། །གཉིས་ཀྱིས་གླང་པོའི་པགས་པ་འཛིན། །གཡས་པའི་ལྷག་མར་དགྲ་སྟ་མདུང ། །རྩེ་གསུམ་གྲི་གུག་ཌཱ་མ་རུ། །གཡོན་གྱི་ལྷག་མར་ཁ་ 331a ༄#། །ཊྭཱཾ་སྒྲེང ། །ཐོད་པ་དམར་ཆེན་ཞགས་པ་དང ། །ཚངས་བའི་མགོ་བོ་རྣམས་བཤད་དེ། །བཅུ་གཉིས་ཀྱིས་ནི་བརྒྱན་པ་ཡིན། །ཐོད་པའི་ཕྲེང་བའི་མཆོད་ཕྱིར་ཐོགས། །བརྒྱ་ཕྱེད་པར་ནི་ཤེས་པར་བྱ། །བཅོམ་ལྡན་ཡུམ་ནི་མདུན་ཞུ་བཞུགས། །ཞལ་གཅིག་འབར་བ་ཆེན་བོ་སྟེ། །འཁྱུད་པ་ཡིས་ནི་ཐོད་པ་དག་།གདུག་པའི་བདུད་ཀྱི་ཁྲག་བཀང་བསྣམས། །གཡས་པས་རྟག་ཏུ་སྡིགས་མཛུབ་དང ། །མ་རུངས་པ་ཡི་གྲི་གུག་བསྣམས། །སྐུ་མདོག་དམར་ཞིང་ཆེར་འབར་བ། །ཐོད་དུམ་བརྒྱན་པའི་སྐུ་རགས་ཅན། །དབུ་སྐྲ་གྲོལ་ཞིང་སྦྱན་གསུམ་སྐུ། །མཆེ་བ་གཙིགས་པ་འཇིགས་སུ་རུང ། །བྱིན་པ་ཞབས་ཀྱིས་ལེགས་པར་འཁྱུད། །གཉིས་ཀ་ཁ་སྦྱར་ཚུལ་གྱིས་བཞུགས། ། མཁའ་འགྲོ་མ་སོགས་བཞི་པོ་ནི། །ཁ་ཊྭཱཾ་ག་སྣོད་གྲི་གུག་བསྣམས། །སྐུ་ལ་སྤྱན་གསུམ་རྒྱ་ལྔ་སོགས། །སྐྲ་གྲོལ་བས་ནི་རྣམ་པར་བརྒྱན། །དཔའ་བོ་ཉི་ཤུ་རྩ་བཞི་ནི། །ཕྱག་རྒྱ་ལྔ་ལ་སོགས་པས་བརྒྱན། །ཕྱག་གཉིས་ཞལ་གཅིག་སྤྱན་གསུམ་པ། །རལ་པའི་ཅོད་པན་དར་གྱིས་བཅིངས། །རྡོ་རྗེ་དྲིལ་བུས་ལེགས་འཁྱུད་ཅིང ། །ཆགས་པ་ཆེན་པོ་རྗེས་ཆགས་མཛད། །རྣལ་འབྱོར་མ་ནི་ཉི་ཤུ་བཞི། །དབུ་སྐྲ་གྲོལ་བས་རྣམ་པར་བརྒྱན། །ཕྱག་རྒྱ་ལྔ་ལ་སོགས་པ་དང ། །སྤྱི་བོར་ནོར་བུས་རྣམ་པར་བརྒྱན། །རྣལ་འབྱོར་སྣོད་ 331b དང་བཅས་པས་འཁྱུད། །སྡིགས་མཛུབ་ཀྱིས་ནི་གྲི་གུག་བསྣམས། །ཧེ་རུ་ཀ་དཔལ་ལ་སོགས་ཀུན། །གཡས་བརྐྱང་པ་ཡི་གནས་པས་བཞུགས། །མགུར་ཆུ་དབུང་རྒྱན་རྣ་ཆ་དང་།། ཐོད་པའི་ཕྲེང་བས་རྣམ་པར་བརྒྱན། །མཆོད་ཕྱིར་ཐོགས་དང་ཐལ་བ་ནི། །ཕྱག་རྒྱ་དྲུག་པར་རབ་ཏུ་བཤད། །ཕ་རོལ་ཕྱིན་དྲུག་རྣམ་དག་པས། །ཕྱག་རྒྱ་དྲུག་གིས་བརྒྱན་པ་ཡིན།། སྐུ་གསུང་ཐུགས་ཀྱི་རྡོ་རྗེ་ནི། །སྤྱན་གསུམ་འོག་ཕག་དག་གིས་བརྒྱན། །སྐུ་གསུང་ཐུགས་ཀྱི་དབྱེ་བ་ཡིས། །ཡི་གེ་གསུམ་གྱི་དངོས་གྲུབ་ཀྱི། །ངོ་བོར་བདག་ཉིད་བསྒོམ་བྱ་ཞིང ། ། དངོས་གྲུབ་འདོད་པས་གཞན་མི་བྱ། །དེ་ཡི་བསོད་ནམས་གང་འགྱུར་བ། །སྒྲུབ་པའི་ཡོན་ཏན་རྒྱ་ཆེན་པོ། །ལྕེ་ནི་བརྒྱ་སྟོང་དུ་མ་ཡིས། །བསོད་ནམས་བརྗོད་པར་ནུས་མ་ཡིན།། ཁཝ་གདོང་ལ་སོགས་རྣམ་པ་བཞི། །ཐམས་ཅད་ཀྱང་ནི་སྒོ་སྐྱོང་སྟེ། །ཁ་ཊྭཱཾ་ག་དང་ཐོད་པ་ཐོགས། །སྐུ་ལ་ཕྱག་རྒྱ་ལྔ་སོགས་ལྡན། །གཤིན་རྗེ་བརྟན་སོགས་མཚམས་བཞིར་ཏེ། ། དེ་དག་ཞབས་གཉིས་བརྐྱང་བ་དང ། །གཟུགས་གཉིས་ལྡན་ཞིང་ཡིད་འཕྲོག་མ། །མཁའ་འགྲོ་མ་བསྐྱེད་ཇི་བཞིན་དུ། །ཁཝ་གདོང་ལ་སོགས་དབྱེ་བ་ཉིད། །དེ་ལྟར་མ་ལུས་འཁོར་ལོ་གནས། །མདོག་དབྱེའི་ཆོ་གའི་རིམ་བཞིན་ནོ། །རྣལ་འབྱོར་མའི་ཀུན་ཏུ་སྤྱོད་པ་ལས། །རང་གི་མཚན་མ་དང ། ཞལ་དང ། ཕྱག་རྒྱ་དང ། སྐུ་མདོག་དང ། མཚོན་ཆ་བསྟན་ 332a ༄#། །བ་སྟེ་དྲུག་པའོ།། །།དེ་ནས་གོ་ཆ་གཉིས་པོ་ནི། །གང་ཤེས་པས་ནི་མྱུར་བ་རུ། །སྒྲུབ་པ་པོ་ཡིས་གྲུབ་ཐོབ་པ། །རྒྱུད་དུ་སྦས་པ་ངེས་བཤད་བྱ། །ོཾ་ཧ། ན་མ་ཧི། སཝཱ་ཧཱ་ཧུ། བཽ་ཥ་ཊ་ཧེ། ཧཱུཾ་ཧཱུཾ་ཧོ། ཕཊ་ཧཾ། སྙིང་ག་སྤྱི་བོ་སྤྱི་གཙུག་དང ། །དཔུང་པ་མིག་གཉིས་གོ་ཆ་སྦྱར། །དང་པོ་རྡོ་རྗེ་སེམས་དཔའ་སྟེ། །གཉིས་པ་རྣམ་པར་སྣང་མཛད་གནས། །གསུམ་པ་པདྨ་གར་དབང་རྒྱལ། །བཞི་པ་ཧེ་རུ་ཀ་དཔལ་བཤད། །ལྔ་པ་རྡོ་རྗེ་ཉི་མ་སྟེ། །དྲུག་པ་ལ་ནི་རྟ་མཆོག་ཡིན། །དེ་ནི་གོ་ཆ་རྣམ་དྲུག་གིས། །ཤིན་ཏུ་བསྲུངས་པ་ཉིད་ཡིན་ནོ། །ོཾ་བཾ། ཧཾ་ཡོཾ། ཧྲིཾ་མོཾ། ཧྲིཾ་ཧྲིཾ། ཧཱུཾ་ཧཱུཾ། ཕཊ་ཕཊ། ལྟེ་བ་སྙིང་ག་དེ་བཞིན་ཁ། །སྤྱི་བོ་སྤྱི་གཙུག་གོ་ཆ་ཉིད། །དང་པོ་རྡོ་རྗེ་ཕག་མོའོ། ། གཉིས་པ་ཡ་མི་ནཱི་རུ་བརྗོད། །གསུམ་པ་རྨོངས་བྱེད་མ་ཉིད་དེ། །བཞི་པ་སྦྱིན་མ་ཡིན་པར་བཤད། །ལྔ་པ་ཀུན་ཏུ་སྐྲག་པར་གྲགས། །དྲུག་པ་གཏུམ་མོ་ཡིན་པར་བཤད།། གོ་ཆ་དྲུག་ཉིད་ཕག་མོ་དང ། །དཔའ་བོ་གཉིས་མེད་རྣལ་འབྱོར་མའོ། །རྣལ་འབྱོར་མའི་ཀུན་ཏུ་སྤྱོད་པ་ལས། །གོ་ཆ་གཉིས་བསྟན་པ་སྟེ་བདུན་པའོ།། །།དེ་ནས་གོ་ཆ་གཉིས་ཤེས་ནས། །ཡེ་ཤེས་འཁོར་ལོ་རྣམ་བསྒོམས་ནས། །སྔགས་དང་ཕྱག་རྒྱའི་སྦྱོར་བ་ཡིས། །དམ་ཚིག་འཁོར་ལོར་མྱུར་གཞུག་བྱ། །རྐང་པ་མནན་ལ་སྟེང་དུ་ 332b བལྟ། །སྟང་དུ་ཕཻཾ་གྱི་སྒྲ་སྒྲོགས་ལ། །ཕྱོགས་བཅུའི་འཇིག་རྟེན་ཁམས་གནས་པའོ། །དཔའ་བོ་རྣལ་འབྱོར་མ་རྣམས་དགུག་།སྔགས་ཀྱིས་ཡང་དག་བསྐུལ་བ་དང ། །སྐད་ཅིག་དེ་ལ་སྤྱན་དྲང་བྱ། །མཛུབ་མོ་དགུག་བྱས་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་པོར་ཡང་དག་སྦྱར། །དེ་ནི་དཔྲལ་བའི་ཕྱོགས་ཀྱི་དབུས་གཞག་ལ། །བཅུ་ཞིང་བཅུ་ཞིང་བསྐོར་བ་བྱས་པ་ཡིས། །སྔགས་པས་དཔའ་བོ་རྣལ་འབྱོར་མ་བྱིན་བརླབ། །ཡི་གེ་དྱཱ་ནི་སྣ་རྩེར་ཡང་དག་སྦྱར། །བྱཱ་ནི་མཚན་གྱི་ལྟེ་བར་ཡང་དག་དགོད། །ལྟེ་བ་སྙིང་ག་ཁ་དང་དཔྲལ་བ་རུ། །སྔགས་ཀྱི་ཚོགས་དང་བཅས་པས་བྱིན་གྱིས་བརླབ། །ལྟེ་བ་སྙིང་ག་དག་ཏུ་རྣལ་འབྱོར་མ། །སངས་རྒྱས་མཁའ་འགྲོ་མ་ཡི་སྔགས་ཀྱིས་ནི། ། བ་དྷཱུ་ཏཱི་གཉིས་ཀྱིས་དཔའ་བྱིན་བརླབ། །རྣལ་འབྱོར་མ་དང་དཔའ་བོ་གཉིས་མེད་ཡིན། །དང་པོ་དགའ་བ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །བདེ་བའི་ཐབས་ཏེ་ཀུན་རིག་པའོ། །ལྷ་ཡུལ་ས་སྟེང་ས་འོག་ཏུ། །སྐད་ཅིག་གིས་ནི་གཟུགས་གཅིག་འགྱུར། །སྒོམ་པ་བདག་གིས་བཤད་པ་ཡི། །བསྡུ་བ་དེ་ཉིད་བཤད་པ་ནི། །གཡས་དང་གཡོན་གྱི་ལག་གཉིས་ཀྱིས། །བསྐོར་བ་མཁའ་འགྲོའི་བདེ་དེ་ཡིན། །རྣལ་འབྱོར་མའི་ཀུན་ཏུ་སྤྱོད་པ་ལས། །ཡེ་ཤེས་ཀྱི་འཁོར་ལོ་སྤྱན་དྲང་བ་དང ། བསྡུ་བ་བསྟན་པ་སྟེ་བརྒྱད་པའོ།། །། 333a ༄#། །དེ་ནས་སྤྲུལ་པར་ཤེས་བྱ་དང ། །ལོངས་སྤྱོད་རྫོགས་པར་འདོད་པ་ཉོན། །ཐེག་པ་ཆེན་པོ་ཕྱག་རྒྱ་ཆེ། །རྣལ་འབྱོར་མ་ཡི་གྲུབ་སྟེར་བཤད། །ཕྱག་རྒྱ་ཆེན་པོ་ལས་ལྷག་པའི། །རྣལ་འབྱོར་ཀུན་ལས་མཆོག་གཞན་མེད། །ཧེ་རུ་ཀ་དཔལ་རྒྱལ་པོ་ཆེ། །རྣལ་འབྱོར་ཀུན་དབང་དབང་ཕྱུག་ཡིན། །མཁའ་འགྲོ་མ་ཡི་དྲ་བ་སྡོམ། །ནམ་མཁའ་དང་མཉམ་ལས་བླངས་པ། །ཀུན་མཁྱེན་ཡེ་ཤེས་དེའི་རང་བཞིན། །ཧེ་རུ་ཀ་པ་དཔའ་བོ་མཆོག་།སྐྱེ་བོ་དམ་པ་ཀུན་འདུས་པ། །ཞི་བའི་བཏུང་བས་གྲུབ་འགྱུར་བ། །རྟག་པའི་གོ་འཕང་མཆོ་ག་ཡིན་ཏེ། །སྐྱོན་མེད་པ་ནི་རྟག་པའི་གནས། །པུ་ལ་སོགས་པ་ཡང་དག་སྦྱར། །ཡུལ་དང་ཡུལ་དུ་རྣམ་པར་གནས། །ཧེ་རུ་ཀ་དཔལ་བདག་ཉིད་དགོད།། ཡི་གེ་ཉི་ཤུ་རྩ་བཞི་ནི། །ལོངས་སྤྱོད་རྫོགས་པར་ཤེས་བྱ་སྟེ། །རྣལ་འབྱོར་ཆེ་ལ་གནས་པ་ཡིན། །མདོར་བསྡུས་ནས་ནི་རབ་འཇུག་པ། །བློ་གྲོས་བརྩོན་པས་ཤེས་པར་བྱ། ། ལྡོག་པའང་ཇི་ལྟར་བསྟན་པ་ནི། །བཤད་བྱ་སྒྲུབ་པ་པོ་རྣམས་ཉོན། །ཤྲི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་བཀོད་དང་བྲལ་བ་སྟེ། །ཀ་ནི་གང་དུ་ཡང་མི་གནས་པའོ། །དེ་ནི་རང་བཞིན་སྟོང་པ་སྟེ། །ཀུན་ཏུ་འགྲོ་ཞིང་མིང་ཤིགས་པར། །མདོར་བསྡུས་ནས་ནི་སྒོམ་བྱེད་པ། །འདོད་པའི་དངོས་གྲུབ་ཐོབ་པར་འགྱུར། ། 333b ཆོས་དང་ལོངས་སྤྱོད་སྤྲུལ་པ་ཡི། །སྐུ་གསུམ་དག་ནི་རྣམ་སྒོམ་པ། །བྱང་ཆུབ་ཕྱོགས་ནི་སུམ་ཅུ་བདུན། །དེར་ནི་ངེས་པར་བསྒོམ་པར་བྱ། །རྣལ་འབྱོར་མའི་ཀུན་ཏུ་སྤྱོད་པ་ལས། ། འཇུག་པ་བསྟན་པ་སྟེ་དགུ་པའོ།། །།དེ་ནས་བསྒོམས་པས་དུབ་གྱུར་ན། །བསྡུས་པ་སྤྱོད་ཚུལ་ཁྱད་པར་གྱིས། །སྦྱོར་དང་བྲལ་བར་མི་བྱ་སྟེ། །སྤྱོད་པའི་རྣལ་འབྱོར་པ་འདི་ཡིན། །སྔར་ནི་ཇི་སྐད་བཤད་པ་བཞིན། །བསམ་གཏན་ཆོ་ག་རྒྱས་བྱས་ལ། །རང་འདོད་ལས་ལ་གཏོར་མ་ནི། །ཁྱད་པར་དུ་ཡང་སྦྱིན་པར་བྱ། །ཟླ་བ་མར་ངོའི་ཚེས་བཅུ་དང། །ཟླ་བ་ཡར་ངོའི་དེ་ཉིད་ལ། །འབད་པས་དཔའ་བོ་ཆང་སོགས་དང ། །རྡོ་རྗེ་ལྷ་མོ་རབ་མཆོད་ཅིང ། །སྔར་བཤད་སྔགས་དང་རྒྱ་སྦྱར་བ། །ཆོ་ག་བཞིན་དུ་ཡང་དག་སུང ། །ོཾ་ཨཱ་ར་ལི་ཧོ། ཛཿ ་ཧཱུཾ་བཾ་ཧོཿ ། བཛྲ་ཌཱ་ཀི་ནྱ། ས་མ་ཡ་སྟྭཾ་དྲྀ་ཤྱ་ཧོཿ ། དེ་ལྟར་ལས་གསུམ་བཞི་ལྔར་བརྗོད། །དམ་ཚིག་སོགས་རྫས་ལེགས་གནས་པར། །རྡོ་རྗེ་ཐལ་མོ་གྱེན་ཁ་ཕྱེ། །དཔའ་པོ་རྣལ་འབྱོར་མས་མངོན་བཟླ། །ོཾ་ཁ་ཁ། ཁཱ་ཧི་ཁཱ་ཧི། སརྦ་ཡཀྵ། རཱཀྵ་ས། བྷུ་ཏ། པྲེ་ཏ། པི་ཤཱ་ཙི། ཨུནྨཱ་ད། ཨ་པསྨཱར་བཛྲ་ཌཱ་ཀཌཱ་ཀི་ནྱཱ་ད་ཡ། ཨི་མཾ་བ་ལིཾ་གྲྀཧྞནྟུ་ས་མ་ཡ་རཀྵནྟུ་མ་སརྦ་སིདྡྷིམ་མེ་པྲ་མཙྪནྟུ། ཡ་ཐཻ་བཾ་ཡ་ཐེཥྚཾ་བྷུ་ཉྫ་ཐ། ཛི་གྷྲ་ཐ། པི་པ་ཐ། མཱ་ཏི་ཀྲ་མ་ཐ། མ་མ་སརྦྦཱ་ཀཱརྟྟ་ཡ། ས་ཏ་སུ་ཁཾ་བི་ཤུདད་དྷ་ཡེ། ས་ཧ་ཡི་ཀཱ་བྷ་བཾ་ཏུ་ཧཱུཾ་ཧཱུཾ་ཕཊ་ཕཊ་སཝཱཧཱ། དཔའ་ 334a ༄#། །བོའི་འཁོར་ལོ་ལ་སོགས་སྔགས། །དུར་ཁྲོད་ལ་སོགས་ཀྱིས་ཀྱང་བརྒྱན། །ལྷོ་ཕྱོགས་ཁ་བལྟས་རྣལ་འབྱོར་པས། །གནས་ནི་མཐོན་པོར་རབ་ཏུ་མཆོད། །ཉེ་བར་མཚོན་པ་ཇི་ལྟ་བར། །བདག་གིས་ནུས་པས་དབུལ་བར་བྱ། །དགུན་ཟླ་འབྲིང་པོ་ལ་སོགས་པའི། །ཚེས་བཅུ་ལ་ནི་དད་པས་མཆོད། །སྐྱེ་བོ་དམ་པ་ཀུན་འདུས་ལ། །བདེ་བ་ཐམས་ཅད་དབུལ་བར་བྱ། །དེར་ནི་བཤོས་རྣམས་བཟའ་བྱ་སྟེ། །ལྷག་མ་སྣོད་དུ་གཞག་པར་བྱ། །དེ་ཡི་ལག་ཏུ་འོངས་པའི་དཔལ། །གང་གིས་ཀྱང་ནི་གཞོམ་མི་ནུས། །དེ་ནི་སྐྱེ་བོ་དད་ལྡན་རྣམས་ཀྱིས་མཆོད། །ཧེ་རུ་ཀ་དཔལ་མངོན་པར་དགྱེས་གྱུར་ནས། །ཀུན་ཏུ་དགྱེས་པས་མཆོག་ནི་སྩོལ་འགྱུར་ཏེ། །གང་ཕྱིར་མཆོག་ནི་དེ་ཡི་ལག་ན་གནས། ། མཚན་མོ་སྐྲ་ནི་གྲོལ་གྱུར་པས། །བརྟུལ་ཞུགས་གོས་མེད་གཏོར་སྦྱིན་ན། །ཧེ་རུ་ཀ་དཔལ་རྣལ་འབྱོར་བདག་།དེས་ནི་མ་མོ་དགའ་བར་འགྱུར། །རྣལ་འབྱོར་མའི་ཀུན་ཏུ་སྤྱོད་པ་ལས། གཏོར་མ་དང ། མཆོད་པ་ཚེས་བཅུར་བྱ་བ་སྲུང་བ་བསྟན་པ་སྟེ་བཅུ་པའོ།། །།དེ་ནས་ཕ་རོལ་ཕྱིན་དྲུག་དང ། །བྱང་ཆུབ་ཕྱོགས་ནི་སུམ་ཅུ་བདུན། ། གནས་སོགས་ས་ནི་བཅུ་པོ་རྣམས། །ཆེ་མཆོག་ལྷ་ཡི་བདག་ཉིད་ཅན། །དངོས་པོ་གང་དང་གང་གིས་ནི། །མི་རྣམས་ཡིད་ནི་ཡང་དག་སྦྱོར། །དེ་ཡིས་དེ་ཡི་དངོས་འགྱུར་ཏེ།། 334b སྣ་ཚོགས་གཟུགས་ཅན་ནོར་བུ་འདྲ། །དེ་བཞིན་འཇིགས་དང་བཅས་པ་འམ། །འཇིགས་མེད་ཇི་ལྟ་ཇི་ལྟར་གནས། །བསམ་གཏན་དག་གམ་སེམས་ཅན་གྱིས། །ལས་རྣམས་ཐམས་ཅད་རབ་སྒྲུབ་བྱེད། །སྤྱོད་དང་གྲོལ་བའི་འབྲས་རབ་སྩོལ། །ཚེ་འདི་ཉིད་ལ་ཐོབ་འགྱུར་བ། །སྒོམ་པ་བདག་གིས་བཤད་པར་བགྱི། །སྙིང་པོ་ཀུན་ལས་བཏུས་པ་ཡིན། །ལོག་པའི་ཤེས་པ་ཤེས་པ་ཅན། །གང་ཡང་ཁྱོད་ཀྱིས་བཤད་མི་བྱ། །བླ་མའི་རིམ་ལས་ཇི་ལྟར་བསྟན། །གང་གིས་མྱུར་དུ་ཤེས་འགྱུར་བ། །སྐྱེ་བ་བྱེ་བ་སྟོང་ཕྲག་ཏུ། །སྒྱུ་འཕྲུལ་ཡེ་ཤེས་ཀྱིས་བསྐུལ་བ། །དད་པ་ཡང་དག་སྐྱེས་པ་དང ། །རྣལ་འབྱོར་སྤྱོད་ཚུལ་གནས་པ་ཡིན། །ལྐུག་ཅིང་གླེན་ལ་ཐབས་ངན་ལྡན། །བྱིས་པའི་ཤེས་པའི་ཤེས་པ་ཅན། །སེམས་ཅན་ཡོངས་སུ་མ་སྨིན་དང ། །ཕྱི་རོལ་བསྟན་བཅོས་ཀྱིས་འཆལ་བ། །དེ་དག་ཀུན་གྱིས་མི་ཤེས་ཏེ། །མི་ཤེས་མུན་པས་ཁེབས་པ་དང ། །ཁེངས་པ་ལ་ནི་རྟེན་པར་དགའ། །ང་རྒྱལ་ལ་སོགས་བདུན་སེམས་ལྡན། །དེ་ཀུན་གྱིས་ཀྱང་སངས་རྒྱས་ཀྱི། །སྤྱོད་ཡུལ་གསང་བ་མི་ཤེས་སོ། །ཧེ་རུ་ཀ་དཔལ་ཡང་དག་འཇུག་།སློབ་དཔོན་བདག་ཉིད་ཆེན་པོ་ཡིས། །མྱུར་དུ་དངོས་གྲུབ་སྐྱེད་བྱེད་དེ། །འཕྲལ་དུ་ཡིད་ཆེས་བྱེད་པ་ཡིན། །ཀུན་སྤྱོད་ཆོ་གའི་རྣལ་འབྱོར་ཤེས། །ཆོ་གའི་བྱ་བ་བསྟན་པར་བྱ། །སྲིད་པ་གསུམ་པོ་མ་ལུས་ན། །དེ་ནི་ཀུན་མཁྱེན་ 335a ༄#། །བསྟན་པ་ཤེས། །མཐོང་བ་དང་ནི་རེག་པ་དང ། །ཐོས་པ་དང་ནི་དྲན་པ་ཡིས། །སྡིག་པ་ཀུན་ལས་གྲོལ་འགྱུར་བ། །དེ་ལྟར་དེ་ནི་ཐེ་ཚོམ་མེད། །ལྷ་རྣམས་བཟློག་སྟེ་དགོད་པ་དང ། །སྔགས་ཀྱི་དབྱེ་བ་བཟློག་པ་དང ། །སྒོམ་པ་གསང་བ་བཟློག་པ་ནི། །སྙིང་པོ་ཐམས་ཅད་སྒྲུབ་པ་ཡིན། །རྒྱུད་རྣམས་ཀུན་གྱི་སྤྱི་ཡི་ནི། །སེམས་ནི་ཡོངས་སུ་སྨིན་བ་དག་།འདིར་ནི་སྦྱོར་སོགས་སྔགས་རྣམས་ཀྱིས། །དམ་ཚིག་དེ་ལྟར་བསྟན་པ་ཡིན། །བདེ་གཤེགས་དབུགས་འབྱིན་གསུངས་པ་ནི། །དག་པའི་ལུས་ནི་སྐྱོན་མེད་པ། །བསོད་ནམས་ཆུང་བའི་སྔགས་པས་ཀྱང ། །ང་དགའ་བས་ནི་རྙེད་པར་འགྱུར། །རྣལ་འབྱོར་མའི་ཀུན་ཏུ་སྤྱོད་པ་ལས། ཐམས་ཅད་རྣམ་པར་དག་པ་བསྟན་པ་སྟེ་བཅུ་གཅིག་པའོ།། །།དེ་ནས་བསྲུང་མིན་བཟའ་མིན་དང ། །དཀྱིལ་འཁོར་པ་མིན་དཀྱིལ་འཁོར་མིན། །བཟླས་བརྟུལ་སྦྱིན་སྲེག་མེད་མོད་ཀྱི། །མདོར་ན་སེམས་འདུལ་ཚུལ་ཅན་ཡིན། །གཟུང་བྱ་རྣམ་ཤེས་ཡེ་ཤེས་ནི། །བླ་མས་བསྟན་ལ་རྩོལ་བྱ་སྟེ། །ཕྱི་རོལ་གྱི་ནི་བསྟན་བཅོས་པ། །ལམ་དེ་ཤིན་ཏུ་རིང་བ་ཡིན། །རྣལ་འབྱོར་པ་རྣམས་ཐབས་ཀྱིས་ནི། །བླ་མའི་བསྙེན་བཀུར་ལ་བརྩོན་པ། །སྟོན་པའི་མཚན་ཉིད་བསྟན་པ་དང ། །དཔའ་བོས་དེ་ཉིད་བསྟན་པ་ཡིན། །སྐད་ཅིག་རྣམ་པའི་རྣལ་འབྱོར་ 335b བདག་།སྐད་ཅིག་རྣམ་པའི་ཕྱག་རྒྱར་ལྡན། །ཀུན་ནས་ཐམས་ཅད་སྐད་ཅིག་སྟེ། །སྐད་ཅིག་གིས་ནི་གསང་སྔགས་བརྗོད། །སྤས་དང་ལྟ་དང་ལག་བཅངས་དང ། །འཁྱུད་དང་གཉིས་གཉིས་ལ་སོགས་པ། །དེ་བཞིན་གཤེགས་པས་དབུགས་འབྱིན་གསུངས། །གོང་ནས་གོང་དུ་བསྟེན་པར་བྱ། །ཐམས་ཅད་འདིར་ནི་བསྟན་པ་ཡིན། །རྣམ་པ་གཞན་དག་རྩཝ་དང་འདྲ། །དེ་ཉིད་སྲོག་ཆགས་རྣམས་ཀྱི་སྲོག་།དེ་ཉིད་མི་འགྱུར་དམ་པ་ཡིན། །དེ་ཉིད་ཐམས་ཅད་ཁྱབ་བྱེད་དེ། །ལུས་ཀུན་ལ་ནི་རྣམ་པར་གནས། །དེ་ཉིད་སངས་རྒྱས་ཡེ་ཤེས་ཏེ། །ཧེ་རུ་ཀ་དཔལ་ཡིན་པར་བཤད། །སྐྱེས་པ་མ་ནིང་ལ་སོགས་ཉིད། །ཕྲ་བའི་སྙིང་པོའང་འཛིན་པ་ཡིན། །ཡེ་ཤེས་དག་ཏུ་བྱུང་དེ་ལ། །གང་ཞིག་ས་ལ་གནས་རྣམས་དང་།། བསྟན་བཅོས་དག་ནི་མ་ལུས་དང ། །རིག་བྱེད་གྲུབ་མཐར་གནས་པ་རྣམས། །འཇིག་རྟེན་འདི་དང་གཞན་དག་ཏུ། །དེ་མེད་པར་ནི་གྲུབ་མི་འགྱུར། །རིག་བྱེད་གྲུབ་པའི་མཐའ་རྣམས་ལས། །འདི་ནི་སྙིང་པོར་རབ་ཏུ་བཤད། །འགྲོ་བ་འདི་ཀུན་སངས་རྒྱས་ལྔའི་བདག་ཉིད། །གར་མཁན་དག་དང་རི་མོ་བཟང་ལྟར་སྣང ། །གང་དུ་བདེ་ཆེན་ཞེས་བྱ་གཅིག་པུ་ཉིད། ། གཅིག་པུའི་ཉམས་ནི་དུ་མས་གར་མཛད་དོ། །འདུག་དང་ལྡན་པ་ཉིད་དག་དང ། །འཇུག་དང་རྫོགས་པ་ཉིད་དག་དང ། །བྱིན་གྱིས་བརླབ་དང་དབང་བསྐུར་དང ། །ཏིང་ངེ་འཛིན་མཆོ་ 336a ༄#། །བསྡུས་པ་ཡིན། །དེ་ནས་ཆོ་གའི་མིང་གཞན་པ། །ཐབས་དང་ཤེས་རབ་གཉིས་མེད་པ། །དེ་ཉིད་དུ་ནི་ཀུན་སྐྱེས་པ། །འབྱིན་དང་སྡུད་པར་བྱེད་པ་ཡིན།། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ་ཀ་ཁ་ག་གྷ་ང ། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵ། འདི་ནི་བཅོམ་ལྡན་ལྷ་དེ་ཡིན། །མཆོག་ཉིད་ལྷག་པར་གནས་པ་ཡིན། །ལྷ་ཀུན་གྱི་ནི་བསྐྱེད་པ་དང ། །སྔགས་རྣམས་ཀྱི་ནི་རྒྱུད་ཉིད་ཡིན། །གང་ཞིག་འདི་རྟག་སྒོམ་པ་དང ། ། རྟག་ཏུ་ཀློག་དང་སེམས་པ་དང ། །རྣལ་འབྱོར་པ་ཡིས་དང་པོར་བརྗོད། །ཧེ་རུ་ཀ་དཔལ་གཉིས་མེད་འགྱུར། །དེར་ནི་ལག་སོགས་རྒྱན་ཡིན་ཏེ། །སྐ་རགས་གནས་རྣམས་ཐམས་ཅད་ཡིན། །འདི་ནི་རྟག་ཏུ་འཛིན་བྱེད་པ། །ཆོས་ཀུན་རྟོགས་པར་བྱེད་པ་ཡིན། །ཱ་ལི་ཀཱ་ལི་མདུན་བསམས་ཏེ། །རྣལ་འབྱོར་ཆེན་པོས་རྣམས་གནས་ལ། །ཟླ་བའི་དཀྱིལ་འཁོར་ལེགས་རྫོགས་པ། །ལྟེ་བའི་རྩ་བར་གནས་པར་སྒོམ། །དེ་ཡི་དབུས་གནས་བསམ་པ་ནི། །དམ་པའི་གནས་མཆོག་ཡི་གེ་སྟེ། །སྐུ་གསུང་ཐུགས་ཀྱི་རྡོ་རྗེ་སྟེ། །ལྷ་ཡི་སྐུ་ནི་བསྒོམ་པར་བྱ། །དེ་ནི་གཟུགས་ལས་འདས་པ་སྟེ། །དངོས་པོ་མེད་པའི་སེམས་ཉིད་ཡིན། །བསམ་མི་ཁྱབ་པ་ཉིད་བསམས་ཏེ། །བསམ་དེ་མཚན་ 336b པར་བརྟག་མི་བྱ། །ཡང་ན་བདག་ཉིད་སེམས་བསམ་པ། །དེ་ལ་གཟུགས་ནི་ཐོབ་པར་འགྱུར། །རྣལ་འབྱོར་མའི་ཀུན་ཏུ་སྤྱོད་པ་ལས། །རྒྱུད་ཐམས་ཅད་ལས་ངེས་པར་བྱས་པའི་དེ་ཁོ་ན་ཉིད་ཀྱི་གནས་གཅིག་པུ་བསྟན་པ་སྟེ་བཅུ་གཉིས་པའོ།། །།དེ་ནས་གཞན་ཡང་བཤད་བྱ་བ། །དཔའ་བོ་རྣལ་འབྱོར་མ་གཉིས་མེད། །ཧེ་རུ་ཀ་དཔལ་རྣལ་འབྱོར་ཆེའི། །གནས་ནི་ཡི་གེའི་ས་པ་ཡིན། །པུལླཱི་ར་མ་ཡ་མགོ་བོ་ལ། །ཛཱ་ལན་དྷ་ར་སྤྱི་གཙུག་ཉིད། །ུརྒྱན་རྣ་བ་གཡས་པ་སྟེ། །ར་བུ་ད་ནི་རྒྱབ་ཕྱོགས་ལའོ། །གནས་སོ། ། གོ་ངཱ་བ་རི་རྣ་བ་གཡོན། །རཱ་མེ་ཤཝ་རི་སྨིན་མའི་མཚམས། །དེ་བཱི་ཀོ་ཊ་མིག་གཉིས་ཏེ། །མཱ་ལ་ཡ་ནི་དཔུང་མགོར་རོ། །ཉེ་བའི་གནས་སོ། །ཀཱ་མ་རཱུ་པ་མཆན་ཁུང་དགོད། །ོ་ཊེ་ནུ་མ་གཉིས་ལའོ། །ཞིང་ངོ ། །ཏྲི་ཤ་ཀུ་ནི་ལྟེ་བའི་དབུས། །ཀོ་ས་ལ་ནི་སྣ་རྩེར་རོ། །ཉེ་བའི་ཞིང་ངོ ། །ཀཱ་ལིངྐ་ནི་ཁ་ལ་དགོད། །ལམ་པ་ཀ་ནི་མགྲིན་དབུས་ཉིད། །ཚནྡོ་ཧའོ། །ཀཉྩི་སྙིང་ལ་དགོད་པར་བྱ། །ཧི་མ་ལ་ཡ་མཚན་རྩར་རོ། །ུ་པ་ཚནྡོ་ཧའོ། །པྲེ་ཏ་པུ་རི་མཚན་ལ་སྟེ། །གྲྀ་ཧ་དེ་བ་བཤང་ལམ་ལའོ། །འདུ་བ་ཅན་ནོ། །སོ་རཱཥྚ་བརླ་གཉིས་སམ། །གསེར་གླིང་\?\་ངར་གཉིས་ལའོ། །ཉེ་བར་འདུ་བ་ཅན་ནོ། །ནཱ་ག་ར་ནི་སོར་མོར་རོ། །སིནྡྷུ་རྐང་པའི་བོལ་གཉིས་ལའོ། །དུར་ཁྲོད་དོ། །མ་རུ་མཐེ་བོང་གཉིས་ལ་དགོད། །ཀུ་ལུ་ཏ་ནི་པུས་ 337a ༄#། །མོར་གནས། །ཉེ་བའི་དུར་ཁྲོད་དེ། །པུ་ཛ་ཨོ་ཨ་གོ་རཱ་དེ་མ། །ཀཱ་ཨོ་ཏྲི་ཀོ་ཀ་ལ་ཀཱ་ཧི། །བྲེ་གྲྀ་སཽ་སུ་ནཱ་སི་མ་ཀུ། །གཉིད་ལོག་མ་ལོག་ལྡང་པ་དང ། །བཟའ་འམ་འགྲོ་བའི་ཆོས་སྤྱོད་པའམ། །གང་ཡིན་དེར་ནི་རྣམ་བཀོད་ན། །འཇིག་རྟེན་གསུམ་གྱིས་མི་གཡོ་འོ། །མིང་གི་རྒྱུད་ནི་འབུམ་སྡེ་ལས། །སྙིང་པོ་བསྡུས་པར་གྱུར་པ་ཡིན། ། ནམ་མཁའ་དང་ནི་མཉམ་པའི་རྒྱུད། །འབུམ་གཅིག་ནང་ནས་དེ་བཞིན་བཤད། །ཤེས་རབ་རྒྱུད་ནི་གསང་བ་སྟེ། །མིང་འབྱུང་བ་ལ་གནས་པ་ཡིན། །བསྟན་པ་ཡིས་ནི་སྤྲུལ་པ་ཡིན། །བཤད་པས་ལོངས་སྤྱོད་རྫོགས་པར་འདོད། །སོ་སོར་བསྟན་པ་མ་ལུས་ཉིད། །མྱ་ངན་འདས་པའི་དེ་ཉིད་བསྟན། །སྐུ་གསུམ་འཁོར་ལོ་གསུམ་དུ་བཤད། །ཆོས་སོགས་ལོངས་སྤྱོད་རྫོགས་པ་ཉིད། །བསོད་ནམས་ཡེ་ཤེས་ཚོགས་དག་ནི། །བདེན་པ་གཉིས་ལ་གནས་པ་ཡིན། །བློ་ངན་གླེན་ཞིང་ལྐུགས་པ་དང ། །ཤེས་རབ་དམན་ཞིང་ལོག་ལྟ་ཅན། །ཕྱི་རོལ་བསྟན་བཅོས་ཀྱིས་འཚལ་བ། །བླ་མ་ལ་ནི་སུན་འབྱིན་ཡིན། །དེ་དག་ཀུན་ཀྱང་རྣམ་སྤངས་ཏེ། །གུས་ཀྱང་བཤད་པར་མི་བྱ་འོ། །ཆ་དང་ཆ་ཡི་ཁྱད་པར་ལ། །དེར་ནི་གཉིས་སུ་མེད་པར་བཤད། །དག་བྱེད་དབང་གི་ལྷ་མོ་དང ། །བཀའ་བསྒོའི་ལྷ་མོ་དཔའ་བོ་སྐྱེས། །དེ་འོག་མ་ལུས་ཀུན་སྤྱོད་པ། །འཁོར་བ་ལས་ 337b གྲོལ་གཙོ་བོ་ཡིན། །མ་ལུས་རིག་བྱེད་ལས་སྤྲུལ་པ། །གྲུབ་པའི་མཐར་ནི་དེ་རབ་བསྒྲགས། །དཔའ་བོ་ཁྱོད་ཀྱི་ས་ང་ལ་བཤད། །སངས་རྒྱས་མུ་སྟེགས་ཅན་ལ་སྦ། །སྒྲ་དང་སྒྲ་ཉམས་བརྡ་རྣམས་ཀྱི། །ལམ་འདི་ཉིད་ཀྱི་རྗེས་སུ་འབྲང ། །བསྡུས་དོན་ཡང་དག་བླངས་པ་དང ། །བརྡ་ཡི་ཚིག་ནི་རྒྱས་པ་ཡིན། །གང་གིས་ཀུན་སྤྱོད་མི་ཤེས་པར། །རྣལ་འབྱོར་པ་ནི་རྣལ་འབྱོར་སྟོན། །དེ་ཡི་ངལ་བ་དོན་མེད་དེ། །འབྲས་བུ་དེ་ནི་ཐོབ་མི་འགྱུར། །འགྲོ་ལ་ཕན་པས་སྔོན་གསུངས་པ། །སྦས་ཏེ་གཞན་དུ་གསུངས་པ་ཡིན། །ཀུན་སྤྱོད་འདིར་ནི་བཤད་པ་ལས། །སྒྲུབ་པ་པོས་ནི་རབ་མཉམ་གཞག་།རྒྱལ་བས་སྔོན་ནི་རྒྱུད་ཆེན་པོའི། །སྔགས་ཀྱི་ཡི་གེ་སྒྲུབ་མཛད་པ། །ལས་ཀྱི་བྱ་བ་གང་ཡང་རུང ། །དགེ་དང་མི་དགེ་བརྟགས་ཏེ་བྱ། །ཡི་གེ་མཐའ་དང་དབུས་དག་ཏུ། །དེར་ནི་ཐམས་ཅད་རབ་ཏུ་གྲུབ། །རྣལ་འབྱོར་མའི་ཀུན་ཏུ་སྤྱོད་པ་ལས། ཨཱ་ལི་ཀཱ་ལི་དང ། ལས་ཐམས་ཅད་ཀྱི་ངེས་པ་གཉིས་སུ་མེད་པར་བསྟན་པ་སྟེ་བཅུ་གསུམ་པའོ།། །།དེ་ནས་རྒྱུད་རྣམས་ཐམས་ཅད་དུ། །སྦས་གསང་ཆོ་ག་བཤད་བྱ་སྟེ། །སངས་རྒྱས་བཞི་ཡི་གདན་བཞུགས་པ། །རྡོ་རྗེ་ལ་སོགས་དཔའ་རྣལ་འབྱོར། །མཁའ་འགྲོ་ལ་སོགས་རྡོ་རྗེ་ཡི། །དཔའ་བོ་རྣལ་འབྱོར་དབང་ཕྱུག་གཙོ། །མེ་ལོང་ལ་སོགས་རྣམ་པ་བཞི། །གཉིས་མེད་གཉིས་སུ་མེད་སྦྱོར་ཉིད། །གཉིས་ 338a ༄#། །མེད་རྫས་ནི་མེ་ཏོག་སོགས། །རེ་རེ་ནས་ནི་དབུལ་བར་བྱ། །ཕྱག་རྒྱ་ལྔ་སོགས་མཆོག་ལུས་ཀྱི། །ཕ་རོལ་སོན་པས་ཕར་ཕྱིན་དྲུག་།ལག་པའི་མཆོད་སོགས་ཡེ་ཤེས་ཅན། །བློ་ལྡན་དཔའ་བོས་ཤེས་པར་བྱ། །རྣལ་འབྱོར་མ་དྲུག་གོ་རིམས་བཞིན། །རྡོ་རྗེ་སེམས་སོགས་བཅུ་གཉིས་དང ། །དཔའ་བོ་ཆེན་པོར་སྦྱར་བྱ་ལ། ། ལག་པའི་མཆོད་ལ་སོགས་པས་བསྟོད། །ལྔ་པོ་ལྔ་དང་ཡང་དག་བསྲེ། །འོ་མ་དང་ཡང་བསྲེ་བར་བྱ། །མཆོད་པ་དེས་ནི་ལེགས་གནས་ལ། །སྤྱོད་དང་གྲོལ་བའི་འདོད་དང་ལྡན།། ལག་པའི་མཆོད་པས་རྣལ་འབྱོར་པ། །དབུལ་བའི་འདོད་དོན་འགྲུབ་པར་འགྱུར། །སེམས་ནི་གཞན་དུ་གྱུར་པ་དང ། །བཟའ་བཏུང་གོས་སོགས་ཐོབ་པར་འགྱུར། །ལྷ་ཡི་མཆོད་པ་བྱས་ན་ནི། །དེ་ལ་བསམ་པ་རྣམ་གྲུབ་འགྱུར། །དཔའ་བོ་འདི་ནི་དཔའ་ཆེན་པོ། །ས་སྟེང་རྣལ་འབྱོར་མ་རྙེད་དཀའ། །རྣལ་འབྱོར་པ་ཡི་སྤྱོད་བརྟུལ་ཞུགས། །རྣལ་འབྱོར་དབང་ཕྱུག་ཀུན་གྱི་གཙོ། །གང་ཞིག་རྟག་ཏུ་འདིར་རང་མཆོད། །འདོད་པའི་འབྲས་བུ་ཀུན་རབ་སྟེར། །རྣལ་འབྱོར་མའི་ཀུན་ཏུ་སྤྱོད་པ་ལས། །དཔའ་བོ་བཞི་དང་ཡང་དག་པར་སྦྱོར་བའི་ལག་པའི་མཆོད་པ་བསྟན་པ་སྟེ་བཅུ་བཞི་པའོ།། །།དེ་ནས་དཔའ་བོ་རྣལ་འབྱོར་མ། །གཉིས་མེད་སྤྱོད་པའི་ཆོ་ག་བཤད། །དང་ 338b པོར་མཉམ་གཞག་རྣལ་འབྱོར་པས། །འབད་དེ་ནུས་པ་བསྐྱེད་པར་བྱ། །ནུས་པ་བསྐྱེད་པའི་རྗེས་ཐོགས་ལ། །ཡིད་འདོད་པ་ཡི་བརྟུལ་ཞུགས་སྤྱད། །སེམས་ཅན་རྗེས་སུ་གཟུང་དོན་ཕྱིར། །དཔའ་བོ་ཆེན་པོ་འགྲོ་བྱ་ཞིང ། །སྲོག་ཆགས་ཡན་ལག་གོ་བགོས་ལ། །བདེ་དོན་གཉེར་བས་བདེ་བ་སྲུང ། །མཆོད་ཕྱིར་ཐོགས་ནི་ཀུན་སྤངས་ལ། །ཧེ་རུ་ཀ་དཔལ་གཙང་སྦྲར་གནས། །གྲོལ་བའི་འབྲས་བུ་འདོད་པ་ཡིས། །རྣལ་འབྱོར་མ་ཀུན་མཉེས་པར་བྱ། །རྩ་བའི་སྔགས་ཀྱི་དཔའ་བོ་གང ། །ཚངས་པའི་སྐུད་པ་ལ་སོགས་བརྟག་།ལྷ་ཡི་སྙིང་པོའི་གསང་སྔགས་ཀྱི། །བརྒྱ་ཕྱེད་ཕྲེང་བས་བརྒྱན་པ་ཡི། །ཐོད་པའི་དུམ་བུ་ལ་སོགས་ཀུན། །ལུས་ཀྱི་ཁམས་སུ་བརྟག་པར་བྱ། །དཔའ་བོའི་གོ་ཆ་དྲུག་གི་ནི། །རྒྱ་འདིས་ལུས་ནི་མཛེས་པ་ཡིན། །རྡོ་རྗེ་ཕག་མོ་སོགས་སྔགས་གང ། །མགུར་ཆུས་རྐེད་པ་མཛེས་པ་ཡིན། །སངས་རྒྱས་ཀུན་གྱི་མཁའ་འགྲོ་མའི། །པགས་པའི་གོས་ནི་འཛིན་པའི་མཆོག ། ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་རུ་བརྟག་།ཐོད་པ་དྲིལ་བུ་ལ་སོགས་ཀུན། །ལུས་ཀྱི་ཁམས་སུ་བརྟག་པར་བྱ། །ཡི་གེ་བདུན་གྱི་གསང་སྔགས་ཀྱིས། །རྣ་བཅས་སྙན་ནི་མཛེས་པ་ཡིན། །རྣལ་འབྱོར་མ་དྲུག་གསང་སྔགས་གང ། །སྐ་རགས་བྱས་པ་བརྒྱན་པ་ཡིན། །འཁོར་ལོ་ཀུན་གྱི་རྣལ་འབྱོར་མའི། །སྔགས་ནི་ལག་པའི་ཐོད་པ་ཡིན། །རྣམ་ 339a ༄#། །པར་སྣང་མཛད་ཡུལ་སྔགས་དང ། །ཐོད་པས་མགོ་བོ་བརྒྱན་པ་ཡིན། །དེ་ལྟར་བདག་ཉིད་རྣམ་བསམས་ནས། །ཚམ་ངམ་སྔགས་ཀྱིས་ལེགས་པར་སྲུང་།། རྟག་ཏུ་ཚངས་པར་སྤྱོད་འགྱུར་བ། །གསང་སྔགས་རྐང་པ་བརྒྱད་མཆོད་བའོ། །ཉིན་མོ་བཅོམ་ལྡན་དཔའ་བོ་སྟེ། །མཚན་མོ་བཅོམ་ལྡན་མ་བརྟག་བྱ། །མི་བྱ་ཅི་ཡང་ཡོད་མིན་ཏེ། །རྟག་ཏུ་མི་བསམ་ཡོད་མ་ཡིན། །མི་བཟའ་ཅི་ཡང་ཡོད་མིན་ལ། །དགེ་དང་མི་དགེ་མི་སྨྲ་མེད། །བདག་ཉིད་ཇི་བཞིན་འགྲོ་དེ་བཞིན། །བདག་ཅི་འདྲ་བ་གཞན་དེ་བཞིན། །དེ་ལྟར་རྣམ་བསམ་རྣལ་འབྱོར་བདག་།འཇིགས་པ་ཐམས་ཅད་ཡོངས་སྤངས་ཏེ། །དཔའ་བོ་སེང་གེ་བཞིན་དུ་སྤྱོད། །བསམ་པ་ཐམས་ཅད་རྫོགས་བྱེད་ཡིན། །ཧེ་རུ་ཀ་དཔལ་གཞིར་གནས་པའི། །ཡན་ལག་བསྐྱོད་པ་ཇི་སྙེད་དང ། །ཚིག་ཏུ་བརྗོད་པ་ཇི་སྙེད་པ། །དེ་སྙེད་ཕྱག་རྒྱ་གསང་སྔགས་ཡིན། །རིགས་ལྔའི་ཀུན་ཏུ་སྤྱོད་པ་ནི། །རིགས་གཅིག་ཉིད་དུ་སྤྱད་པར་བྱ། །དེ་ལྟར་ཤེས་པའི་བདག་ཉིད་ཅན། །གོ་འཕང་མཆོག་ཏུ་འགྲོ་བར་འགྱུར། །གཉིས་མེད་ཡེ་ཤེས་སེམས་ལྡན་ལ། །མི་བྱ་བ་ནི་ཅི་ཡང་མེད། །མི་རྟོག་བདག་ཉིད་སེམས་ཀྱིས་ནི། །འདོད་པའི་ཡོན་ཏན་ལྔ་རྣམས་སྤྱད། །རྣལ་འབྱོར་མའི་ཀུན་ཏུ་སྤྱོད་པ་ལས། གཉིས་སུ་མེད་པའི་བརྟུལ་ཞུགས་དང ། །གསང་སྔགས་བསྟན་པ་སྟེ། 339b བཅོ་ལྔ་བའོ།། །།གཞན་ཡང་ཕྱི་མའི་དུས་ཀྱི་ཚེ། །དུས་མཐར་དངོས་གྲུབ་མི་ཐོབ་སྟེ། །བློ་ནི་གཞན་དུ་རྣམ་འཁྲུགས་པས། །ཕྱག་རྒྱ་དཀྱིལ་འཁོར་བཟླས་པ་ཡིས། །བདེ་བར་འགྲུབ་པར་མི་འགྱུར་གྱི། །བཀྲེས་དང་སྐོམ་གྱི་སྡུག་བསྔལ་འགྱུར། །འབད་དེ་འདོད་བྱ་དམིགས་ནས་ནི། །དེ་ཉིད་ཀྱིས་བདག་རྣལ་འབྱོར་བ། །ཇི་ལྟར་ཧེ་རུ་ཀའི་ཡེ་ཤེས། །ཇི་འདོད་པར་ནི་ཡོངས་སུ་རྒྱུ། །རྣ་བས་རིང་ནས་ཐོས་པ་དང ། །སྐད་ཅིག་གིས་མཐོང་རྣལ་འབྱོར་པས། །ཆོས་འདི་དེ་ལྟར་ཤེས་ནས་ནི། །བསམ་པ་ཐམས་ཅད་རྫོགས་བྱེད་ཡིན། ། ཤེས་རབ་ཆེན་པོར་བྱས་པ་ཉིད། །གཉིས་མེད་ཡེ་ཤེས་བརྟུལ་ཞུགས་བཟང ། །ཱ་ལི་ཀཱ་ལི་མ་གཏོགས་པར། །གལ་ཏེ་ཆོས་འདི་འདོད་ན་ནི། །དེ་ཡི་ངལ་བ་དོན་མེད་དེ། །འབྲས་བུ་ཐོབ་པར་མི་འགྱུར་རོ། །མདོ་དང་བྱ་བའི་སྤྱོད་པ་རྣམས། །རྣལ་འབྱོར་གསང་སོགས་དབྱེ་བ་ཉིད། །འཇིག་རྟེན་ཀུན་ལ་བཤད་པ་ནི། །བྱང་ཆུབ་དོན་གྱི་རྒྱུ་ཉིད་ཡིན། །ང་ཡིས་འཇུག་པར་བཤད་པ་ནི། །ཚོགས་གཉིས་གཉིས་སུ་མེད་པ་ཡིན། །དེ་ཉིད་ཆོས་ཀྱི་རང་བཞིན་ཞེས། །མྱ་ངན་འདས་པ་འབའ་ཞིག་འདོད། །ཐམས་ཅད་བདེན་པ་གཉིས་ལ་ནི།། བརྟེན་པར་ངས་ནི་སྔོན་བཤད་པ། །རྣལ་འབྱོར་པ་ཡི་དངོས་གྲུབ་ཀྱིས། །སྒོམ་པ་མངོན་དགར་གྱུར་པ་ཡིན། །སྤྲོས་པ་ཀུན་ལ་དམིགས་ནས་ནི། །སྤྲོས་པས་སྤྲོས་པ་མེད་པར་ 340a ༄#། །བྱ། །རྒྱུད་རྣམས་ཀུན་ཏུ་གསང་བ་གང ། །སྤྲུལ་པ་རྣམས་ཀྱི་དེ་ཉིད་བསྟན། །རྒྱུ་འདི་ཡིས་ནི་རྣལ་འབྱོར་པ། །བདེན་པ་གཉིས་ལ་ཡང་དག་རྟེན། །སེམས་རྣམས་ཐམས་ཅད་གསལ་ནས་ནི། །ལོངས་སྤྱོད་ཀུན་ལ་ཉེར་སྤྱོད་བྱ། །བློ་ལྡན་ཆེན་པོ་འཁོར་ལོ་སྡོམ། །སྡོམ་པ་ལ་ནི་རྣམ་པར་སྤྱོད། །རྣལ་འབྱོར་མ་ཡི་མཚན་མ་གང ། ། གཟུགས་དང་བརྡ་དང་ཐ་སྙད་དག་།ཁྱིམ་ལྔ་ལ་སོགས་ཡུལ་རྣམས་སུ། །རྣལ་འབྱོར་མ་ནི་ལྔ་ཉིད་གནས། །བསྒྲུབ་པར་བྱ་བའི་གནས་ཀུན་ཏུ། །གཡོན་ནས་བསྐོར་བ་ལ་རབ་བརྩོན། །ཇི་ལྟར་སྔར་བཤད་འཁོར་ལོ་ཡི། །གྲངས་ཀྱི་ཆོ་གས་བརྟུལ་ཞུགས་ཅན། །དཔའ་བོའི་སྔགས་སོགས་རྣལ་འབྱོར་མའི། །ཡིད་ལ་འདོད་པ་དགོད་པར་བྱ། ། ཤར་གྱི་འདབ་མར་མཁའ་འགྲོ་མ། །བོང་བུའི་རྣམ་པར་བསྒོམ་པར་བྱ། །ཧེ་རུ་ཀ་དཔལ་ཞེས་བྱ་བ། །ལས་རྣམས་ཐམས་ཅད་བྱེད་པ་ཡིན། །ཧེ་རུ་ཀ་དཔལ་གོ་འཕང་གནས། །ལུས་ངག་ཡིད་ཀྱི་ལས་རྣམས་ལ། །བཤད་དང་མ་བཤད་གང་བསམས་པ། །དེ་དག་ཐམས་ཅད་མྱུར་དུ་འགྲུབ། །རྣལ་འབྱོར་མའི་ཀུན་ཏུ་སྤྱོད་པ་ལས། དངོས་གྲུབ་ཀྱི་ངེས་པ་དང ། །དཔལ་ཧེ་རུ་ཀའི་མཛད་པ་བསྟན་པ་སྟེ་བཅུ་དྲུག་པའོ།། །།དེ་ནས་ཧེ་རུ་ཀ་དཔལ་རྒྱུད། །སེམས་ནི་དྲི་མེད་ཡིན་པར་བཤད། །དག་པའི་ 340b ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ཐབས་དང་ཤེས་རབ་སྦྱོར་བ་ལས། །དེ་ཉིད་དང་ནི་ཐམས་ཅད་འབྱུང ། །མེ་ལོང་ལ་སོགས་རྣམ་པ་བཞི། །པདྨའི་འདབ་གནས་རྣལ་འབྱོར་མ། །མཁའ་འགྲོ་མ་བཞི་པདྨར་གནས། །མཱ་མ་ཀཱི་སོགས་བཟང་མོ་ཡིན། །ཐོད་པའི་དུམ་སོགས་འཁོར་ལོར་གནས། །ཉི་ཤུ་རྩ་བཞི་གཉིས་མེད་ཡིན། ། སེམས་ཅན་འཁོར་བ་ལས་གྲོལ་བ། །དཔའ་བོ་ཉིད་ནི་ཡིན་པར་བརྟག་།ཁྲོ་བོ་རྣམ་རྒྱལ་ལ་སོགས་ཀུན། །སྒོ་དང་མཐའ་ཡི་མཚམས་རྣམས་སུ། །སྣ་ཚོགས་གདུལ་བའི་ཐབས་ཆེན་གྱིས། །སེམས་ཅན་དོན་ལ་བརྩོན་པར་མཛད། །གསང་བའི་གནས་ཀྱི་རྣམ་གནས་པ། །རབ་ཏུ་འབད་དེ་སྦ་བར་བྱ། །རྣལ་འབྱོར་མ་དང་དཔའ་བོ་ཡིས། །ཇི་ལྟར་འདོད་པའི་དངོས་གྲུབ་སྟེར། །རྣལ་འབྱོར་འབྲས་བུ་ཐོབ་ནས་ནི། །སྲིད་མཚོར་ལྟུང་བར་མི་འགྱུར་རོ། །འཁོར་བ་ལས་ནི་སྒྲོལ་བའི་ཐབས། །རྒྱུད་ཀྱི་སྙིང་པོ་བསྡུས་པ་ཡིན། །བླ་མ་སློབ་མས་རྟོགས་སླའི་ཕྱིར། །ཆོ་ག་རྒྱ་ཆེར་མ་བཤད་དེ། །སེམས་ནི་ངལ་གསོ་རྣལ་འབྱོར་པ། །མྱ་ངན་འདས་པ་བསྟན་མི་བྱ། །དེ་ལྟར་སྤྱོད་པའི་སྐྱེས་མཆོག་འདི། །སྡིག་པ་ཐམས་ཅད་རྣམ་དག་འགྱུར། །འཇིག་རྟེན་འདི་འམ་ཕ་རོལ་ཏུ། །འདིས་ནི་སངས་རྒྱས་ཉིད་མཐོང་འགྱུར། །ཇི་ལྟར་སྔར་བཤད་སྡིག་པ་རྣམས། །སྤང་བར་བྱ་བའི་མཚན་ཉིད་ཡིན། །གང་ཞིག་ 341a ༄#། །འདི་སྒོམ་རྣལ་འབྱོར་པ། །འདོད་པའི་བདེ་བ་ཐམས་ཅད་སྟེར། །ཧེ་རུ་ཀ་དཔལ་མཚན་བརྗོད་པས། །ལྷ་སོགས་ཀུན་གྱི་གསང་གང་དང ། །མི་ལ་སོགས་ལ་གང་ཞིག་ཡོད། །དེ་ཡི་བསོད་ནམས་དེས་འཐོབ་བོ། །བསམ་གཏན་གྱིས་ནི་བསམས་ཙམ་མམ། །འདོད་ཅིང་ཀློག་གམ་བྲིས་པ་ཡིས། །མཐོ་རིས་ལོངས་སྤྱོད་འཐོབ་འགྱུར་ཏེ། །ཡང་ན་འཁོར་ལོས་བསྒྱུར་ཉིད་འགྱུར། །རྣལ་འབྱོར་པ་ནི་འཕོ་བའི་ཚེ། །དཔལ་ལྡན་ཧེ་རུ་ཀ་ལ་སོགས། །དཔའ་བོ་དག་ནི་ཐམས་ཅད་དང ། །རྣལ་འབྱོར་མ་ནི་ཇི་སྙེད་པ། །ལག་ན་སྣ་ཚོགས་མེ་ཏོག་བསྣམས། །བ་དན་རྒྱལ་མཚན་སྣ་ཚོགས་དང ། །རོལ་མོའི་སྒྲ་ནི་སྣ་ཚོགས་དང ། །སྣ་ཚོགས་གླུས་ནི་ཉེ་བར་མཆོད། །འཆི་བ་ཞེས་བྱ་རྣམ་རྟོག་སྟེ། །མཁའ་ལ་སྤྱོད་པའི་གནས་སུ་འཁྱེར། །དེ་ལྟའི་དཔའ་པོ་ཆེན་པོ་དང ། །རྣལ་འབྱོར་མ་ནི་ས་སྟེང་དཀོན། །ཇི་ལྟར་བུད་མེད་བྱིས་གཏམ་རྗེས་ཡི་རང ། །ཀུན་སྨྲ་བསྟེན་པའི་གཏམ་ཡང་རྗོད་པར་བྱེད། །ལམ་ཡང་བཤད་ཅིང་འཆི་བར་འགྱུར་བ་ཡིན། །རྣལ་འབྱོར་ལམ་ངན་དེ་དང་འདྲ་བར་བཤད། །དེ་ནས་གཞན་ཡང་བཤད་བྱ་བ། ། གནས་སོགས་རྣལ་འབྱོར་མ་ཡི་གནས། །ཧེ་རུ་ཀ་དཔལ་སོགས་རྣལ་འབྱོར། །དཔའ་བོ་གཉིས་མེད་རྣལ་འབྱོར་མ། །པཱུལླཱི་མ་ལ་ཡར་རབ་གཏུམ། །ཛཱ་ལན་དྷ་ 341b རར་གཏུམ་པའི་མིག་།ོཌྱན་ན་ནི་འོད་ལྡན་མ། །ར་བུ་དར་ནི་སྣ་ཆེན་མོ། །གོ་དཱ་བ་རིར་དཔའ་བློ་མ། །རཱ་མེ་ཤཝ་རར་མིའུ་ཐུང་ངམ། །དེ་བི་ཀོ་ཊར་ལང་དབང་ཕྱུག་།མཱ་ལ་བར་ནི་ཤིང་གྲིབ་མ། །ཀཱ་མ་རཱུ་པར་ས་སྲུང་མོ། །ོ་ཏྲེར་འཇིགས་བྱེད་ཆེན་མོ་ཡིན། །ཏྲི་ཤ་ཀུ་ནིར་རླུང་ཤུགས་མ། །ཀོ་ས་ལར་ནི་ཆང་འཐུང་མ། །ཀ་ལིང་ལྷ་མོ་སྔོ་བསང་མ། །ལམ་པ་ཀར་ནི་རབ་བཟང་མོ། །ཀཉྩི་ནར་ནི་རྟ་རྣ་མོ། །ཧི་མ་ལ་ཡར་བྱ་གདོང་མ། །པྲེ་ཏ་པུ་རིར་འཁོར་ལོའི་ཤུགས། །གྲྀ་ཧ་དེ་བར་དུམ་སྐྱེས་མ། །སཽ་རཥྚར་ཆང་འཚོང་མ། །གསེར་གླིང་འཁོར་ལོའི་གོ་ཆ་མོ། །ནཱ་ག་རར་ནི་རབ་དཔའ་མོ། །སིནྡྷུའི་ཡུལ་དུ་སྟོབས་ཆེན་མོ། །མྱ་ངན་ཡུལ་དུ་འཁོར་བསྒྱུར་མ། །ཀུ་ལུ་ཏཱར་ནི་བརྩོན་ཆེན་མོ། །ཡུལ་འདི་རྣམས་ཀྱི་བུ་མོ་གང ། །དཔའ་མོ་གཉིས་མེད་རྣལ་འབྱོར་མའོ། །གསང་བའི་སྔགས་ལ་རྟག་གནས་ནས། །རབ་ཏུ་འབད་དེ་བསྒྲུབ་པར་བྱ། །རྣལ་འབྱོར་མ་ནི་རེ་རེ་ཞིང ། །བྱེ་བ་གྲངས་སྙེད་དག་གིས་བསྐོར། །མཚན་མ་མཚན་ཉིད་ཕྱག་རྒྱ་སོགས། །གཡོན་པའི་སྒྲུབ་པ་པོ་ཡིས་སྦ། །མི་བཟད་ལས་ནི་གང་གང་གིས། །སྐྱེ་བོ་རྣམས་ནི་འཆིར་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །འཁོར་བའི་ཕ་རོལ་བརྒལ་ནས་འདི། །ཅི་འདོད་ཡེ་ཤེས་ཅན་དུ་འགྱུར། །མགུར་ཆུ་གཙུག་རྒྱན་དཔུང་རྒྱན་དང ། །རྣ་རྒྱན་ 342a ༄#། །ཚངས་པའི་སྐུད་པ་དང ། །མགུལ་པ་བརྒྱན་ཅིང་སྤྱི་བོར་ཕྲེང ། །སྐ་རགས་རྐང་གདུབ་སྒྲ་ཉིད་དོ། །རི་སྟེང་སྣ་ཚོགས་པདྨ་ཡི། །གེ་སར་ཨཱ་ལི་ཀཱ་ལི་ལས། །ཉི་ཤུ་རྩ་བཞིར་ཡང་དག་ལྡན། །དཔའ་བོ་རྣལ་འབྱོར་མ་ཚོགས་བཅས། །ུ་མའི་བདག་པོ་ཡང་དག་མནན། །རྡོ་རྗེ་དྲིལ་བུ་སྐུ་ལ་འཁྱུད། །ཧེ་རུ་ཀ་དཔལ་རྒྱལ་པོ་ཆེ། །གོ་འཕང་མཆོག་ནི་བསྒོམ་པར་བྱ། །དེ་ནས་རྟག་ཏུ་སྤོས་ཆུས་འདིར། །རྟག་ཏུ་ལུས་ནི་ཡན་ལག་དྲིལ། །དྲི་ཞིམ་ཡན་ལག་གིས་བརྒྱན་ཅིང ། །ཐལ་བའི་ཕྱག་རྒྱ་སོགས་པས་བསྒོས། །ཁ་དོག་ལ་སོགས་གཡོགས་པའི་གཟུགས། །རང་གི་ལུས་ནི་ཡོངས་སུ་བསྒྱུར། །སྤྱོད་པའི་བརྟུལ་ཞུགས་ལ་ཞུགས་པར། །ཤེས་ནས་རྣལ་འབྱོར་ལ་ལེགས་གནས། །ཡན་ལག་ཅན་དང་ཚིགས་ཅན་དང ། །སྡུད་དང་དེ་བཞིན་སྙིང་སྟོབས་དང ། །གར་གྱི་ཚུལ་ནི་བཞི་པོ་འདི། །དེ་ཉིད་མཐོང་བས་ཤེས་པར་བྱ། །བཏུང་བའི་ཚུལ་ཞེས་བྱ་བ་ནི། །རྣལ་འབྱོར་ཤེས་པ་ཡིན་པར་བཤད། །དེ་ལ་འབད་དེ་བྱ་བ་ནི། །སྐལ་བ་བཟང་པོའི་གར་ཆེན་ཡིན། །གར་གྱི་གནས་སུ་གནས་པ་ཀུན། །རྒྱན་རྣམས་དེ་ནི་ཡིན་ཞེས་བྱ། །ཀུན་ཏུ་དགུག་དང་བཅིང་བྱ་དང ། །གཞུག་དང་དེ་བཞིན་བསྐྱོད་པ་དང ། །འབེབས་དང་འདི་ནི་འཁྱིལ་བ་དང ། །དེ་བཞིན་འདིར་ནི་བརྒྱན་པ་དང ། །ཚངས་སྐུད་ལུས་ལས་དགྲོལ་བ་དང ། །རྣམ་པ་ཀུན་ཏུ་ 342b བཅིང་བ་དང ། །རྐང་གདུབ་རབ་ཏུ་ཞུགས་པ་དང ། །ལག་པའི་རྒྱན་ནི་ཉིད་དག་དང ། །སྲོག་ཤིང་གཅིག་གྱུར་སྲད་བུ་ཡིན། །འོག་པག་དྲུག་ཅུ་རྩ་བརྒྱད་དང ། །རོལ་ལྡན་བཅུ་དྲུག་པར་ཤེས་བྱ། །ཕྲེང་བ་ཉི་ཤུ་རྩ་ལྔ་ཡིན། །རྣལ་འབྱོར་མའི་ཀུན་ཏུ་སྤྱོད་པ་ལས། དེ་ཁོ་ན་ཉིད་དག་པ་ལ་སོགས་པ་བསྟན་པ་སྟེ་བཅུ་བདུན་པའོ།། །།རྣལ་འབྱོར་མའི་ཀུན་ཏུ་སྤྱོད་པ་རྫོགས་སོ།། །།ཞུ་ཆེན་གྱི་ལོཙྪ་བ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། |