rKTs


H389

(e-text produced by ACIP)

see text in transliteration
1b
༄##། །རྒྱ་གར་སྐད་དུ། ཤྲཱི་མ་ཧཱ་སམྦ་རོ་ད་ཡ་ཏནྟྲ་རཱ་ཛཱ་ནཱ་མ། བོད་སྐད་དུ། དཔལ་བདེ་མཆོག་སྡོམ་པ་འབྱུང་བ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ། དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན།་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་
2a
༄#། །དང ། ཐུགས་རྡོ་རྗེའི་བཙུན་མོའི་བྷ་ག་ལ་བཞུགས་ཏེ། འཕགས་པ་དགའ་བོ་ལ་སོགས་པ་འདོད་ཆགས་དང་བྲལ་བ་རྣམས་ཀྱིས་བསྐོར་ཅིང ། འཕགས་པ་སྤྱན་རས་གཟིགས་ཀྱི་དབང་ཕྱུག་ལ་སོགས་པ་རྣལ་འབྱོར་གྱི་དབང་ཕྱུག་བྱེ་བ་ཕྲག་བརྒྱད་ཅུའི་དབུས་སུ་ཕྱག་ན་རྡོ་རྗེ་ལ་གཟིགས་ནས་འཛུམ་པ་མཛད་པ་དང ། ཕྱག་ན་རྡོ་རྗེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་ཐལ་མོ་སྦྱར་ནས་བཅོམ་
2b
ལྡན་འདས་ལ་གསོལ་བ་བཏབ་པ། ཀྱེ།་རྣམ་པ་ཀུན་མཆོག་སྡོམ་པ་ཡིས། །བསྐྱེད་པའི་རྣལ་འབྱོར་མཚན་ཉིད་དང ། །རྫོགས་པ་ཡང་ནི་ཇི་ལྟར་ལགས། །བཅོམ་ལྡན་ལྷ་ལས་མཉན་པར་འཚལ། །རླུང་དང་མེ་དང་ཆུ་དང་ས། །དེ་བཞིན་ནམ་མཁའ་ཇི་ལྟར་ལགས། །རྣམ་པ་ལྔ་ནི་ཇི་ལྟར་ལྷ། །གཙོ་བོ་ཡུལ་དྲུག་དེ་བཞིན་ཅི། །ཕྱི་དང་ནང་དུ་གནས་པ་ཡི། །སྐུ་གསུམ་བྱིན་རླབས་ཇི་ལྟ་བུ། །ལྷ་ཡི་སྐུ་ནི་ཇི་ལྟར་ལགས། ། གཙོ་བོས་དེ་བཞིན་ལྷ་མོ་གསུངས། །ཟླ་བ་ཉི་མ་ཅི་ཞིག་ལྷ། །ལམ་ལྔ་པོ་ནི་ཇི་ལྟར་ལགས། །ལུས་ཀྱི་རང་བཞིན་ཇི་ལྟ་བུ། །དེ་བཞིན་རྩ་ཡི་གཟུགས་ནི་ཅི། །རྩ་ཡི་གྲངས་ཀྱི་ཚད་ནི་དུ། །དེ་བཞིན་ལུས་ཀྱི་གོང་བུ་ཅི། །སྤས་པའི་དམ་ཚིག་གི་ནི་བརྡ། །གཙོ་བོས་བདག་ལ་བཤད་དུ་གསོལ། །ཕྱི་དང་ནང་གི་བདག་ཉིད་ཀྱི། །གནས་ལ་སོགས་པའི་བརྡ་དུ་ཞིག་།ཇི་ལྟར་ས་ལ་སོགས་པ་འཐོབ། །མཚན་མ་ཇི་ལྟར་མཐོང་
3a
༄##། །བར་འགྱུར། །ཁྱེད་ཀྱི་ལས་ནི་བཅུ་གཉིས་གང ། །སྔགས་ཀྱི་བཟླས་པ་ཇི་ལྟར་འགྱུར། །བགྲང་ཕྲེང་དག་ནི་ཇི་ལྟར་རིགས། །བཟླས་པའི་གྲངས་ནི་དུ་ཞིག་ལགས། །ལྷ་ཡི་རྣམ་པའི་རྣལ་འབྱོར་ཅི། །དཀྱིལ་འཁོར་བྲི་བ་དུ་ཞིག་མཆིས། །སྔགས་ཀྱི་དངོས་གྲུབ་ཅི་ཞིག་ལྷ། །གཞོན་ནུ་མ་ཡི་མཆོད་པ་ཅི། །བྱ་དང་བྱ་མིན་ཉི་མ་གང ། །གཙོ་བོ་མྱོས་བྱེད་གཏོར་མ་ཅི། །བདུད་རྩི་ལྔ་སོགས་ཇི་ལྟར་ལྷ། །ལྕགས་ཀྱུ་ལྔ་སོགས་ཇི་ལྟར་འགྱུར། །དཀྱིལ་འཁོར་བྲི་བ་བཤད་དུ་གསོལ། །ཐིག་གདབ་པ་ནི་ཇི་ལྟར་འགྱུར། །ཇི་ལྟར་ས་ནི་ཡོངས་སུ་སྦྱང ། །སྲུང་པའི་འཁོར་ལོ་ཇི་ལྟར་འགྱུར། །སློབ་དཔོན་གྱི་ནི་བྱ་བ་གང ། །ཇི་ལྟར་སློབ་མ་ཡོངས་སུ་གཟུང ། །དབང་བསྐུར་བ་ཡི་གྲངས་ནི་དུ། །བཞི་པ་ཡང་ནི་ཇི་ལྟར་འགྱུར། །དུས་ཀྱི་ངེས་པ་ཇི་ལྟ་བུ། །དེ་བཞིན་འཆི་བ་བླུ་བ་གང ། །དུས་བཞིའི་མིང་ནི་དུ་ཞིག་མཆིས། །གླིང་བཞི་པ་ནི་ཇི་ལྟར་
3b
ལགས། །དུས་དང་དུས་མིན་དངོས་གྲུབ་ཅི། །སྤྱོད་པ་ཇི་ལྟར་སྤྱད་པར་བགྱི། །རྣལ་འབྱོར་མ་ཡི་རྒྱུད་ནི་དུ། །རྣལ་འབྱོར་རྒྱུད་ནི་ཇི་ལྟར་འགྱུར། །མདོ་སྡེའི་གྲངས་ནི་ཇི་ལྟ་བུ། །དེ་བཞིན་ཕ་རོལ་ཕྱིན་པ་དུ། །རབ་གནས་སྦྱིན་སྲེག་མཆོད་སྦྱིན་དང ། །སྔགས་ཀྱི་དངོས་གྲུབ་ཇི་ལྟར་འགྱུར། །བཅུད་ཀྱིས་ལེན་ནི་ཇི་ལྟར་ལྷ། །མྱོས་བྱེད་བཏུང་བ་ཇི་ལྟར་འགྱུར། །གསང་སྔགས་ཇི་ལྟར་འབྱུང་འགྱུར་ལྷ། །སྔགས་བཏུ་བ་ནི་ཇི་ལྟར་འགྱུར། །ཚར་གཅད་པ་ནི་ཅི་ཞིག་ལྷ། །གཙོ་བོ་རྗེས་གཟུང་ཇི་ལྟ་བུ། །བཅོམ་ལྡན་དེ་ཉིད་རྣམས་ནི་ཅི། །སྟོང་པ་ཉིད་དང་སྙིང་རྗེ་གང ། ། སྟོང་པ་ཉིད་ཀྱི་རང་བཞིན་ཅི། །ཇི་ལྟར་དེ་བཞིན་ཉིད་རང་བཞིན། །ཆོས་རྣམས་ཐམས་ཅད་ཡོངས་ཤེས་པའི། །སྒོམ་པའི་མཚན་ཉིད་གཙོ་བོས་གསུངས། །དཔལ་བདེ་མཆོག་འབྱུང་བའི་རྒྱུད་ལས། ཞུས་པའི་ལེའུ་སྟེ་དང་པོའོ།། །།བཅོམ་ལྡན་འདས་ཀྱིས་བཀའ་སྩལ་པ། ཕྱག་ན་རྡོ་རྗེ། གསང་བ་འབྱུང་བ་འདི་ཞུས་པ་ལེགས་སོ། །ལེགས་སོ།། དེ་ནས་དེའི་ཕྱིར་བསྐྱེད་པ་ཡི། །རིམ་པའི་སྒོམ་པ་ཡང་དག་བཤད། །སྣ་ཚོགས་ལས་ཀྱི་རང་བཞིན་གྱིས། །སྐྱེ་གནས་བཞི་པོ་རྣམས་སུ་འགྱུར། །སྒོང་སྐྱེས་མངལ་ནས་སྐྱེས་པ་དང་།། དྲོད་གཤེར་དང་ནི་རྫུས་སྐྱེས་རྣམས། །ངང་པ་ཁྲུང་ཁྲུང་རྨ་བྱ་དང ། །ནེ་ཙོ་བཞད་ཚོགས་སྒོང་སྐྱེས་ཏེ། །གླང་པོ་མ་ཧེ་བ་ལང་རྟ། །བོང་བུ་མི་སོགས་མངལ་ནས་སྐྱེས། །སྲིན་བུ་འབྲུ་
4a
༄#། །དང་ཕྱེ་མ་ལེབ། །ཉ་ལ་སོགས་པ་དྲོད་གཤེར་སྐྱེས། །ལྷ་དང་དམྱལ་བའི་སེམས་ཅན་རྣམས། །དེ་བཞིན་བར་དོའི་སྲིད་པ་དང ། །བསྐལ་པ་དང་པོ་པ་ལ་སོགས། །འདི་རྣམས་རྫུས་སྐྱེས་སེམས་ཅན་ནོ། །ཤར་གྱི་ལུས་འཕགས་པ་ལང་སྤྱོད། །དེ་བཞིན་བྱང་གི་སྒྲ་མི་སྙན། །གླིང་གསུམ་པོ་ཡི་མི་རྣམས་ནི། །ལོངས་སྤྱོད་ཆེན་པོས་ཡང་དག་འཚོ། །བླུན་རྨོངས་བྱེ་བྲག་མི་ཕྱེད་ཅིང ། །རྟོག་མེད་རྣམ་པར་སྤྱོད་མེད་པའོ། །ཛམྦུའི་གླིང་དུ་ལེགས་སྐྱེས་པ། །ལས་ཀྱིས་པར་རབ་ཏུ་གྲགས། །ལེགས་བྱས་ཉེས་པར་བྱས་པའི་ལས། །མཆོག་དང་འབྲིང་དང་ཐ་མ་རྣམས། །སྐྱེ་བ་སྔོན་གྱི་རྣམ་སྨིན་འདིར། །སྐྱེ་བོ་རྣམས་ལ་སྣང་བར་འགྱུར། །རྒྱགས་དང་སེར་སྣ་གདུག་སེམས་རྣམས།། གཡོ་སྒྱུ་མངོན་པའི་ང་རྒྱལ་དང ། །ཆགས་སྡང་གཏི་མུག་ལ་སོགས་ཀྱིས། །རིམས་དང་ནད་ལ་སོགས་པས་གཟིར། །ཛམྦུ་གླིང་པའི་གཙོ་བོ་མཆོག་།ཡུལ་དབུས་སུ་ནི་སྐྱེས་པ་སྟེ།། སྔོན་གྱི་དགེ་བ་ལ་ལྟོས་ནས། །དབང་པོ་རྣོ་འབྲིང་རྟུལ་པོར་འགྱུར། །མི་རུ་སྐྱེས་པ་འབྲས་བུའི་དམ་པ་དང་པོ་སྟེ། །རང་གི་ཁྱིམ་ནས་ངེས་འབྱུང་རྙེད་པ་གཉིས་པ་ཡིན། །རབ་ཏུ་བྱུང་ནས་དགེ་བ་སྒྲུབ་པ་གསུམ་པ་སྟེ། །རྩེ་གཅིག་ཡིད་ནི་ཐོབ་པར་གྱུར་པ་བཞི་པར་གསུངས། །སྒྱུ་མ་ལྟ་བུའི་ཏིང་ངེ་འཛིན། །མི་རྣམས་ཀྱིས་རབ་མི་ཤེས་ཏེ། །ཐོག་མེད་དུས་ཀྱི་ཉོན་
4b
མོངས་ཀྱི། །བག་ཆགས་རབ་ཏུ་བསགས་བྱས་པ། །དེ་ཕྱིར་སྔོན་བྱས་ལས་ཀྱིས་ནི། །སྐྱེ་དང་འཆི་བ་ཡང་དག་འབྱུང ། །ཚོགས་པ་མ་རྙེད་དེ་སྲིད་དུ། །ཞག་བདུན་བར་དོའི་སྲིད་པར་གནས། །སྲིད་པ་བར་དོའི་སེམས་ཅན་ནི། །འགྲོན་པོའི་བགྲོད་པ་ཇི་བཞིན་དུ། །འདི་ལྟར་ལས་ཀྱི་ཞགས་པ་ཡིས། །འགྲོ་བ་དྲུག་ཏུ་རབ་ཏུ་སྐྱེ། །ཕ་མའི་ཀུན་དུ་སྦྱོར་སོགས་ནི། ། སྲེད་པའི་སྐྱེ་བོས་མཐོང་གྱུར་ནས། །རྟ་ལ་ཞོན་བཞིན་རྣམ་ཤེས་ནི། །རླུང་གི་བཞོན་པ་ཞོན་ནས་སུ། །སྐད་ཅིག་ཐང་ཅིག་ཉིད་ལ་ནི། །ཤིན་ཏུ་མྱུར་བར་འོངས་གྱུར་ནས། །ཤིན་ཏུ་དགའ་དང་བཅས་སྟོབས་ཀྱིས། །ཁ་ཡི་ལམ་ནས་འཇུག་པར་འགྱུར། །རྩ་ནི་སྟོང་ཕྲག་བདུན་ཅུ་གཉིས། །རབ་བསྐུལ་དེ་ཡི་སྐད་ཅིག་ལ། །ཱ་ལི་ཀཱ་ལི་ཞུ་བྱས་པས། །མཆོག་ཏུ་དགའ་བ་ཡང་དག་ཐོབ། །ཁུ་བ་ཁྲག་དེའི་དབུས་སུ་ནི། །ཐིག་ལེའི་གཟུགས་ཀྱིས་ཡང་དག་གནས། །དང་པོའི་རྣམ་པ་ནུར་ནུར་པོ། །མེར་མེར་པོ་ནི་གཉིས་པ་ཡིན། །ལྟར་ལྟར་པོ་སྐྱེས་གསུམ་པ་སྟེ། །དེ་བཞིན་བཞི་པ་གོར་གོར་པོ། །རླུང་རྣམས་ཀྱིས་ནི་བསྐུལ་ཙམ་གྱིས། །ཤ་ཡི་རྣམ་པ་ལྟ་བུར་འགྱུར། །ཟླ་བ་ལྔ་གྱུར་ས་བོན་ལས། །ཡན་ལག་ལྔ་ནི་རབ་ཏུ་སྐྱེ། །ཟླ་བ་བདུན་ན་སྐྲ་དང་སྦུ། །སེན་མོ་རྟགས་ནི་སྐྱེ་བར་འགྱུར། །ཟླ་བ་བརྒྱད་ན་དབང་བོ་དང ། །ལུས་ཀྱི་ཡན་ལག་འབྱུང་བར་འགྱུར། །ཟླ་བ་དགུན་ཡང་དག་རྫོགས། །ཟླ་བ་
5a
༄#། །བཅུ་ན་སེམས་དང་ལྡན། །ནུར་ནུར་རང་བཞིན་མི་བསྐྱོད་པ། །མེར་མེར་པོ་ནི་རིན་ཆེན་འབྱུང ། །འོད་དཔག་མེད་མགོན་ལྟར་ལྟར་པོ། །གོར་གོར་པོ་ནི་དོན་ཡོད་གྲུབ། །མཁྲང་འགྱུར་རྣམ་པར་སྣང་མཛད་དེ། །རྣམ་པ་ལྔར་ནི་བསྟན་པ་ཡིན། །དྲི་ཆུ་ཁྲག་ནི་མི་བསྐྱོད་པ། །ས་བོན་རང་བཞིན་འོད་དཔག་མེད། །གོང་བུ་རིན་ཆེན་འབྱུང་ལྡན་ཏེ། །རོ་གཅིག་འདྲེས་པ་རྣམ་སྣང་བཞུགས། །སྐྱེ་གནས་དབུས་སུ་རྩ་གཉིས་ནི། །གཡས་དང་གཡོན་ན་དེ་བཞིན་གནས། །གཡོན་ནས་ཁུ་བ་ཞེས་བཤད་དེ། ། གཡས་ནས་དེ་བཞིན་ཁྲག་ཡིན་ནོ། །དེ་དག་གཅིག་ཏུ་འདུས་གྱུར་པ། །ཆོས་ཀྱི་དབྱིངས་ཀྱི་རང་བཞིན་ནོ། །ལས་ཀྱི་ས་བོན་དབང་ཐོབ་པས། །རླུང་གིས་ཡང་དག་བསྒྱུར་ནས་སུ། །ཆོས་ཀྱི་འབྱུང་གནས་སྒོ་རུ་ནི། །གདོང་ནི་ངེས་པར་ཕྱོགས་པར་འགྱུར། །དཀུ་གཡས་སུ་ནི་བརྟེན་ནས་སུ། །ཙོག་པུར་མངོན་པར་ཕྱོགས་ཏེ་གནས། །དཀུ་གཡོན་ཡང་དག་བརྟེན་ནས་ནི། །ཤེས་རབ་ལྟོར་ནི་མངོན་ཕྱོགས་འགྱུར། །མཁས་པས་ས་བོན་ལྷུང་བའི་རིམ། །དུས་ཀྱི་སྐད་ཅིག་ཡང་དག་མཚོན། །གཡས་ནས་རླུང་ནི་རྒྱུ་བ་གང ། །ཐམས་ཅད་དུ་ནི་སྐྱེས་བུར་འགྱུར། །གཡོན་ནས་རླུང་ནི་རྒྱུ་བ་གང ། །ངེས་པར་བུད་མེད་རྣམས་སུ་འགྱུར། །གཉིས་ཀའི་དབུས་རྒྱུའི་ས་བོན་གང ། །རྟག་ཏུ་མ་ནིང་འགྱུར་བའོ། །ཆུ་
5b
ཁམས་པ་ཡིར་ཤེས་པར་བྱ། །མེ་ཡི་ཁམས་ནི་མ་ཡིའོ། །པགས་པ་ཤ་དང་ཁྲག་རྣམས་ནི། །མ་ལས་སྐྱེས་ཞེས་བཤད་པ་སྟེ། །རྒྱུས་པ་རྐང་དང་ཁུ་བ་རྣམས། །ཕ་ལས་སྐྱེས་ཞེས་བཤད་པ་ཡིན། །དྲུག་པོ་འདི་དག་བསྡུས་པའི་ལུས། །རྡོ་རྗེ་སེམས་དཔས་གང་གསུངས་པ། །གཟུགས་དང་ཚོར་བ་འདུ་ཤེས་དང ། །འདུ་བྱེད་རྣམ་ཤེས་དེ་བཞིན་ཏེ། །སངས་རྒྱས་ལྔ་ཡི་རང་བཞིན་དུ། །ཕུང་པོ་ངེས་པར་སྐྱེ་བ་ཡིན། །སྲིད་པ་བསྐྱེད་པའི་རིམ་ཤེས་པས། །རྫོགས་པའི་སངས་རྒྱས་ཐོབ་པའི་ཕྱིར། །འདི་ནི་ཕུང་པོ་ཡོངས་མཁྱེན་པའི། །དེ་ཉིད་གསུངས་པ་རྣམས་ཀྱིས་བཤད། །འདི་ནི་བསྐྱེད་པའི་རིམ་པ་ངེས་པར་བསྟན་པའི་རིམ་པར་དབྱེ་བ་སྟེ་གཉིས་པའོ།། །།དེ་ནས་གང་ཞིག་ཤེས་ཙམ་གྱིས། །མྱུར་དུ་དངོས་གྲུབ་ཐོབ་འགྱུར་བའི། །རྫོགས་པའི་རིམ་པའི་སྒོམ་པ་ནི། །ཡང་དག་རབ་ཏུ་བཤད་པར་བྱ། །ལུས་ཀྱི་དཀྱིལ་འཁོར་ལ་བརྟེན་ནས། །ཆོས་དང་ལོངས་སྤྱོད་རྫོགས་པའི་སྐུ། །རྫོགས་པའི་བྱང་ཆུབ་རིམ་བསྒྲུབས་པས། །ལུས་ཀྱི་དཀྱིལ་འཁོར་ཞེས་གསུངས་སོ། །དབང་པོ་དམན་པས་བསྐྱེད་རིམ་གྱི། །དཀྱིལ་འཁོར་བསྒོམ་ཞིང་བསམ་པར་བྱ། ། དབང་པོ་རྣོན་པོས་སྐད་ཅིག་གི་།རྣམ་པས་སེམས་ཙམ་དཀྱིལ་འཁོར་བསམ། །སྐད་ཅིག་རྣམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམས་པ་ནི། །ཁམས་གསུམ་
6a
༄#། །གཞལ་ཡས་ཁང་བདག་ཉིད། །སྲོག་ཆགས་རྣམས་ནི་དཀྱིལ་འཁོར་པ། །དེ་དབུས་སྐད་ཅིག་རྣམ་པ་ཡིས། །དཀྱིལ་འཁོར་བདག་པོ་རྣལ་འབྱོར་པའོ། །ོཾ་ཨཱཿ ཧཱུཾ་གི་སྔགས་ཀྱིས་ནི། །སྐུ་གསུང་ཐུགས་ཀྱི་དཀྱིལ་འཁོར་ཏེ། །མཐོ་རིས་ས་སྟེང་ས་འོག་ཏུ། །སྐད་ཅིག་གིས་ནི་སྐུ་གཅིག་འགྱུར། །སྐད་ཅིག་རྣམ་པས་རྣལ་འབྱོར་ཏེ། །སྐད་ཅིག་རྣམ་པས་གསང་སྔགས་འདོན། །དབང་པོ་ཀུན་དང་མཉམ་སྦྱོར་བ། །མཁའ་འགྲོ་དྲ་བའི་བདེ་བ་མཆོག་།ཁམས་བཞི་པ་དང་ཕུང་པོ་ལྔ། །དེ་བཞིན་ཡུལ་དྲུག་བདག་ཉིད་ནི། །ཁྲག་འཐུང་ལྷ་མོའི་ཡེ་ཤེས་ཏེ། །དེ་ལ་ཐ་དད་མི་བརྟག་གོ་།དཀྱིལ་འཁོར་དེ་བཞིན་ཉིད་རྒྱས་བཏབ། །དེ་བཞིན་མཁའ་མཉམ་སྟོང་པ་ཉིད། །སྣ་ཚོགས་དེ་བཞིན་ཉིད་བདག་ཉིད། །ཐབས་ནི་སྙིང་རྗེའི་སྟོབས་ཡིན་ཏེ། །ཟུང་དུ་འཇུག་པ་རྣམ་རྟོག་བྲལ། །དཀྱིལ་འཁོར་སྙིང་པོ་མཆོག་ཡིན་ནོ། །རྣམ་པར་མི་རྟོག་སྦྱོར་བསམས་ཀྱང ། །དེ་ཚེ་མི་རྟོག་བསམ་མི་ཁྱབ། །དེ་ཡང་རྣམ་པ་ཀུན་གྱི་མཆོག་།བདེ་བའི་དབང་པོ་རྣམ་པ་མེད། །དེ་ཉིད་དངོས་དང་དངོས་མིན་བདག་།རྟག་ཏུ་སྲིད་པས་འབྱུང་བར་མཛད། །སྣ་ཚོགས་སྤྲོས་པའི་རྟོག་པ་མེད། །རྟག་ཏུ་འབྱུང་བ་བདེ་བ་ཆེ། །སྐྱེ་བ་མེད་པའི་རང་བཞིན་གྱིས། །དེ་ལས་སྐྱེ་བ་ཡང་དག་འབྱུང ། །བེམས་པོ་མིན་ཕྱིར་བདག་ཉིད་རིག་།མི་ཤེས་རྣམ་པར་མི་མཐོང་
6b
བས། །གཟུགས་མེད་གང་དུའང་མི་གནས་ཤིང ། །འགྱུར་བ་མེད་ཅིང་བརྟན་པའོ། །ཀུན་རྫོབ་སྐྱེ་བ་འབྱུང་བས་ན། །ཆད་པ་མིན་ཕྱིར་དངོས་མེད་མིན། །ལྷན་ཅིག་སྐྱེས་དགའི་རང་དངོས་སུ། །ཆོས་རྣམས་ཐམས་ཅད་ལྷན་ཅིག་སྐྱེས། །བདག་བྱིན་བརླབ་པར་རབ་འབྱུང་བ། །མི་ཤིགས་འཇིག་པ་མེད་པ་སྟེ། །སྐྱེ་བ་མེད་པའི་རོ་མྱོང་བས། །སྒོམ་པ་ཡང་ནི་དེ་ཉིད་དེ། ། སྟོང་ཉིད་སོ་སོར་རྟོགས་པས་ན། །བསམ་གཏན་ཤེས་རབ་ཏུ་ཡང་འགྱུར། །ཆོས་ཀུན་ཡོངས་སུ་ཤེས་པ་ཡི། །སྒོམ་པ་དེ་ཉིད་སྒོམ་མེད་པའོ། །རྫོགས་པའི་བྱང་ཆུབ་བདེ་བ་ཆེ། །ཕྱག་རྒྱ་ཆེན་པོ་མཆོག་དེ་བཞིན། །དེ་ཉིད་ཆོས་ལ་འཇུག་པའི་ཕྱིར། །དེ་རྣམས་དབྱེ་བས་རབ་བསྟན་པ། །བླ་མ་དམ་པའི་མན་ངག་གིས། །གསལ་བར་འགྱུར་གྱི་གཞན་དུ་མིན། །སངས་རྒྱས་ཀུན་གྱི་སྡོམ་པ་ནི། །ེ་བཾ་ཡི་གེ་ལ་རབ་གནས། །སྐུ་དང་གསུང་དང་ཐུགས་ཀྱི་ལས། །རྣམ་ཀུན་མཆོག་གི་སྡོམ་པའོ། །སྡོམ་པ་བྱང་ཆུབ་བདེ་མཆོག་སྟེ། །བལྟར་མེད་བརྗོད་དུ་མེད་པའོ། །སངས་རྒྱས་ཀུན་གྱི་གསང་བ་ནི། །འདུས་པ་ཆེན་པོའི་མཆོག་ཡིན་ཏེ། །བདག་བྱིན་བརླབ་པའི་རིམ་པ་འདི། །བླ་མའི་དྲིན་གྱིས་གསལ་བར་འགྱུར། །འདི་ནི་རྫོགས་པའི་རིམ་པ་ངེས་པར་བསྟན་པའི་རིམ་པར་ཕྱེ་བ་སྟེ་གསུམ་པའོ།། །།དེ་ནས་དེ་ཕྱིར་འབྱུང་བ་བཞིའི། །མཚན་ཉིད་ཡང་དག་བཤད་པར་བྱ། །དངོས་པོ་དག་
7a
༄#། །ནི་མ་ལུས་གང ། །དེ་ནི་འབྱུང་བའི་རང་བཞིན་ཏེ། །ས་དེ་ལ་ནི་དངོས་བོ་རྟེན། །མེས་ནི་ཐམས་ཅད་འཚེད་པར་བྱེད། །ཆུ་ཡིས་འཇུ་བར་བྱེད་པ་སྟེ། །རླུང་གིས་ལྷན་ཅིག་སྐྱོད་པར་བྱེད། །ནམ་མཁའ་ཡུལ་གྱིས་སྟོང་པར་གནས། །དེར་ནི་ཐམས་ཅད་དེ་ལས་སྐྱེས། །གང་དུ་གཅིག་ནི་གནས་པ་དེར། །བཞི་པོ་ཀུན་ཀྱང་ཉེ་བར་གནས།། རྩ་ཤིང་ལྗོན་པ་འཁྲིལ་ཤིང་སོགས། །བེམས་པོ་ལྟ་བུའི་རྣམ་ཤེས་ཙམ། །གང་དག་འགྲོ་དྲུག་སེམས་ཅན་རྣམས། །ཚིག་དང་ཚིག་ནི་ཐམས་ཅད་དུ། །རྣམ་ཤེས་བཅས་པ་ལྟ་བུར་གནས། །དེ་ལྟར་སྲིད་པའི་དངོས་པོ་ཀུན། །བློ་དང་ལྡན་པས་ཤེས་པར་བྱ། །སེམས་ཅན་རྣམས་ནི་འཆི་བ་ན། །ཡན་ལག་ཉིད་ལག་ཐམས་ཅད་ཀྱི། །རླུང་ནི་ཐམས་ཅད་བསྐྱོད་པར་འགྱུར། །སྐད་ཅིག་དེ་ལ་མེ་དྲོད་འདོར། །ཆུ་ནི་རྟག་ཏུ་བསྐམས་གྱུར་ནས། །དེ་ནས་ཚོར་བ་མེད་པར་འགྱུར། །ལུས་ལ་སོགས་པའི་ས་ཁམས་ཀྱི། །སྲ་བ་ཉིད་ཙམ་གནས་པར་འགྱུར། །སྐྱེ་བ་དང་ནི་འཆི་བ་དག། ཐམས་ཅད་དུ་ནི་འབྱུང་བར་འགྲོ། །ལྷ་དང་ལྷ་མིན་མི་རྣམས་ནི། །འབྱུང་བ་མེད་པར་སྐྱེ་མི་འགྱུར། །ལྷ་ཡི་འཇིག་རྟེན་སྐྱོང་ལ་སོགས། །ཐམས་ཅད་ལ་ནི་ལྷན་ཅིག་གནས། །རིག་བྱེད་གྲུབ་མཐའ་ཐམས་ཅད་ཀྱིས། །རྟག་ཏུ་འདོད་ཅིང་སྒོམ་པ་སྟེ། །གང་ཕྱིར་ཐམས་ཅད་ཀུན་ཏུ་འགྲོ། ས་སྟེང་
7b
སྐྱེས་བུ་ཀུན་ལ་གནས། །འབྱུང་བ་བཞི་པོ་གཙོ་བོ་མཆོག་།བསྟན་བཅོས་ཀུན་ལས་ཡང་དག་བཤད། །རླུང་ནི་སྲོག་ཏུ་ཡང་དག་པ་ལྟ། །མེ་ནི་འཚོ་བའི་མཚན་ཉིད་དེ། །ཆུ་ནི་བདུད་རྩིའི་ངོ་བོ་ཉིད། །ས་ནི་ཞིང་ཙམ་ཉིད་དུ་གནས། །དེ་ལ་རྟག་ཏུ་གནས་པའི་ལྷ། །རྣམ་ཤེས་མཆོག་གི་དབང་ཕྱུག་སྟེ། །ལྷ་ལྔ་ཡི་ནི་རྣམ་པ་རུ། །རྣམ་ཤེས་དེ་ནི་ཡོངས་སུ་འགྱུར། ། གཟུགས་དང་ཚོར་བ་འདུ་ཤེས་དང ། །དེ་བཞིན་འདུ་བྱེད་རྣམ་པར་ཤེས། །མེ་ལོང་ལྟ་བུ་མཉམ་ཉིད་དང ། །སོ་སོར་ཀུན་ཏུ་རྟོག་པ་དང ། །དེ་བཞིན་བྱ་བ་གྲུབ་པ་དང ། །ཆོས་དབྱིངས་ཤིན་ཏུ་རྣམ་དག་སྟེ། །ཡེ་ཤེས་འདི་དག་རབ་ཏུ་གནས། །རྣམ་སྣང་མཛད་དང་རིན་ཆེན་འབྱུང ། །འོད་དཔག་མེད་དང་དོན་ཡོད་གྲུབ། །དེ་བཞིན་མི་བསྐྱོད་པ་ཉིད་དེ། ། རྣམ་ལྔར་རོ་གཅིག་རྫོགས་བྱང་ཆུབ། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཆོས་དེ་བཞིན། །ཡུལ་དྲུག་ཏུ་ནི་ཤེས་བྱ་སྟེ། །འདི་དག་རྣམ་པར་དག་པར་བཤད། ། ཁམས་ནི་བཅོ་བརྒྱད་ཤེས་བྱ་སྟེ། །དེ་དག་ཕུང་པོའི་རང་བཞིན་ཉིད། །ཡི་གེ་མཆོག་ནི་བསྒོམ་པར་བྱ། །སངས་རྒྱས་འབྲས་བུ་ཐོབ་བྱའི་ཕྱིར། །མིག་ལ་སོགས་པ་བསྒོམ་བྱ་སྟེ། །མིག་གི་དབང་པོའི་རྣམ་ཤེས་ནི། །ཐུགས་ཀྱི་རྡོ་རྗེའི་རྣམ་འཕྲུལ་ཡིན། །ངོ་བོ་ཉིད་གསུམ་རྣམ་དག་དོན། །འོད་གསལ་བ་ཡི་གོ་འཕང་འགྱུར། །སྒྲ་དང་རྣ་བ་རྣམ་ཤེས་
8a
༄#། །ནི། །དམིགས་པ་མེད་པའི་ངོ་བོ་ཉིད། །སྣ་དང་དྲི་དང་རྣམ་ཤེས་ཀྱང ། །དེ་བཞིན་རྣམ་དག་ཤེས་པར་བྱ། །རོ་དང་ལྕེ་དང་རྣམ་ཤེས་ནི། །དོན་དམ་ཉིད་དུ་རྣམ་པར་དག། ལུས་དང་རེག་བྱ་རྣམ་ཤེས་ཀྱང ། །སྒྱུ་མ་ལྟ་བུའི་ངོ་བོར་སྐྱེས། །ཡིད་དང་ཆོས་དང་ཡིད་རྣམ་ཤེས། །སྙིང་པོ་ཉིད་དུ་རྣམ་པར་དག། རྣམ་ཤེས་དྲུག་ནི་ཀུན་གཞི་རུ། །འཇུག་པས་དེ་བཞིན་གཤེགས་པ་ཡིན། །འོད་གསལ་བ་ཡི་གོ་འཕང་ཐོབ། །ཧེ་རུ་ཀ་དཔལ་ཡང་དག་གནས། །ཡུལ་དང་ཡུལ་ཅན་སྦྱོར་བ་ཡིས། །རྣམ་རྟོག་མེད་པའི་གོ་འཕང་འགྱུར། །རྣམ་དག་ཀུན་གྱི་མཆོག་གནས་པས། །ཡུལ་ནི་རྣམ་དག་ཤེས་པར་བྱ། །སངས་རྒྱས་ཆོས་དང་དགེ་འདུན་ཏེ། །གཅིག་ལ་དེ་བཞིན་གསུམ་དུ་བརྟགས། །སྐྱབས་གསུམ་དང་ནི་དེ་ཉིད་གསུམ། །སྐུ་གསུམ་རྣམ་པར་གྲོལ་བ་གསུམ། །ཞལ་གསུམ་ཡིག་གསུམ་ལྷ་གསུམ་སྟེ། །ཁམས་གསུམ་པ་ཡི་རང་བཞིན་ཉིད། །དཀྱིལ་འཁོར་གསུམ་དང་རྣལ་འབྱོར་གསུམ། །ལམ་གསུམ་དུ་ནི་བསྟན་པ་སྟེ། །དམ་ཚིག་གསུམ་དང་དགེ་བ་གསུམ། །དེ་བཞིན་སྐུ་དང་གསུང་དང་ཐུགས། །ཤེས་རབ་དང་ནི་ཐབས་ཉིད་དང ། །དེ་ཡི་སྦྱོར་བ་གསུམ་པ་སྟེ། །ཆོས་ཀྱི་འབྱུང་གནས་རང་བཞིན་གྱིས། །ཇི་ལྟར་གསང་གསུམ་མཐོང་བ་དང ། །འཁོར་
8b
གསུམ་མི་དམིགས་སྦྱོར་བ་ཡིས། །སྔགས་གསུམ་གྱི་ནི་རང་བཞིན་ཉིད། །ཕྱི་དང་ནང་གི་བདག་ཉིད་ཀྱི། །རྩ་གསུམ་གྱི་ནི་རང་གི་དངོས། །ཕྱི་རོལ་འཇིག་རྟེན་པ་ཡི་ཆོས། །ལྷ་ལ་སོགས་པའི་བདག་ཉིད་ནང ། །ཕྱི་ནང་དག་པ་ཉིད་ཀྱི་ཕྱིར། །རྣལ་འབྱོར་པས་ནི་སངས་རྒྱས་ཐོབ། །ཆོས་ཀྱི་དབྱིངས་ཀྱི་རང་བཞིན་དུ། །ལྷ་ནི་མངོན་སུམ་དམིགས་པར་བྱ། །རྣམ་པ་ཀུན་གྱི་མཆོག་རང་བཞིན། །ལྷ་མོར་ཡོངས་སུ་བརྟག་པར་བྱ། །དང་པོའི་ལྷ་ཡི་རང་བཞིན་དུ། །རྡོ་རྗེ་སེམས་དཔའ་རྣམ་པར་བཞུགས། །གནས་དང་ཞིང་ལ་སོགས་པའི་བརྡ། །དཔའ་པོ་རྣལ་འབྱོར་མ་འདུས་པ། །དེ་བཞིན་གཉིས་མེད་མཉམ་སྦྱོར་ལ། །ལྷ་རྣམས་ཡང་དག་འཕྲོ་བ་སྟེ། །ཚད་མེད་ལྔ་ནི་འཕྲོ་བ་ལས། །དཀྱིལ་འཁོར་ཚད་ཅན་རྣམ་པར་བརྟག ། ལྷ་ཡི་རྣལ་འབྱོར་བསམ་མི་ཁྱབ། །སངས་རྒྱས་རོལ་པའང་བསམ་མི་ཁྱབ། །མཁའ་འགྲོ་དྲ་བའི་གཟུགས་ཀྱིས་ནི། །ཧེ་རུ་ཀ་དཔལ་ཡང་དག་སྦྱོར། །དེ་དག་མི་ཕྱེད་ངོ་བོ་ཉིད། ། བསྒོམ་པར་ང་ཡིས་བཤད་པ་ཡིན། །དེ་དག་ཐམས་ཅད་གཉིས་མེད་ཐོབ། །གཟུང་དང་འཛིན་དང་རྣམ་བྲལ་བ། །རགས་པ་སྒྲ་ཞེས་བཤད་པ་སྟེ། །ཕྲ་བ་སེམས་ཀྱི་རང་བཞིན་འགྱུར། །བསམ་དང་བྲལ་བའི་དེ་ཉིད་ནི། །གོ་འཕང་མཆོག་ཅེས་ཡོངས་སུ་གྲགས། །འདི་ནི་འབྱུང་བ་བཞི་དང ། །རྣམ་པ་ལྔ་དང ། ཡུལ་དྲུག་ལྷའི་རྣམ་པར་དག་པ་རིམ་པར་
9a
༄#། །ཕྱེ་བ་སྟེ་བཞི་པའོ།། །།དེ་ནས་ཟླ་བ་ཉི་མ་ཡི། །རབ་ཏུ་དབྱེ་བ་ཡང་དག་བཤད། །གཡས་དང་གཡོན་དུ་སྦྱོར་བ་ཡིས། །རིམ་པ་ཇི་བཞིན་རྒྱུ་བ་སྟེ། །གཡོན་དུ་རྐན་ནས་བཟུང་ནས་ནི། །ལྟེ་བའི་དཀྱིལ་འཁོར་རབ་འཇུག་པའི། །ཟླ་བའི་རྩ་ནི་འོག་བལྟས་པར། །ཱ་ལི་ཟླ་བར་ཡང་དག་འབབ། །གཡས་སུ་ལྟེ་བ་ནས་བཟུང་ནས། །རྐན་གྱི་གནས་སུ་རབ་འཇུག་པའི། །ཉི་མའི་རྩ་ནི་སྟེང་གནས་ཏེ། །ཀཱ་ལི་ཉི་མར་རྟག་ཏུ་འབབ། །སྣ་ཡི་སྒོ་ནི་གཉིས་པོ་ནས། །རྩ་གཉིས་རྒྱུ་བའི་མཚན་ཉིད་ནི། །རྩ་གཡོན་འཇུག་པའི་ལམ་ཡིན་ཏེ། །གཡས་པ་འབྱུང་བའི་ལམ་ཡིན་ནོ། །ཉི་ཤར་ནས་བརྩམས་ཇི་སྲིད་དེ། །ནུབ་ཀྱི་བར་ནི་ཉིན་མོ་སྟེ། །ནུབ་པ་ནས་བརྩམས་ཇི་སྲིད་དེ། །ཤར་བའི་བར་ནི་མཚན་མོར་འགྱུར། །ཉིན་དང་མཚན་མོ་ཞག་ཡིན་ཏེ། །མེལ་ཚེ་ཐུན་ཞེས་བརྗོད་པ་ཡིན། །ཐུན་བཞི་ཉིན་མོར་ཤེས་བྱ་སྟེ། །དེ་བཞིན་མཚན་མོའང་ཐུན་བཞིའོ། །ཞག་གཅིག་ལ་ནི་འཕོ་བ་ཡི། །ཡན་ལག་བཅུ་དྲུག་རྣམས་ཡིན་ཏེ། །ཐུན་ནི་ཕྱེད་ཕྱེད་རྟག་ཏུ་རླུང ། །སྣ་ཡི་བུ་གར་ཡང་དག་རྒྱུ། །ཡར་ངོའི་ཚེས་གཅིག་ནས་བཟུང་ནས། །ཉིན་ཞག་གསུམ་གྱི་ཐུན་ཕྱེད་ལ། །ཟླ་བའི་རླུང་ནི་རྒྱུ་བ་སྟེ། །དེ་ནས་ཞག་གསུམ་ཉི་མའི་རླུང ། །གོ་རིམས་འདིས་ནི་ཇི་སྲིད་དུ། །ཡར་ཚེས་
9b
བཅོ་ལྔའི་བར་དུའོ། །མར་ངོའི་ཚེས་གཅིག་ནས་བཟུང་ནས། །ཉིན་ཞག་གསུམ་དུ་སྔ་དྲོ་ནི། །ཉི་མའི་རླུང་དུ་གྲགས་པ་རྒྱུ། །དེ་བཞིན་ཚེས་ནི་བཅོ་ལྔའི་པར། །ཐུན་རེ་ཡི་ནི་བཞི་ཆ་རྣམས།། ཆུ་ཚོད་དུ་ནི་བརྗོད་པས་ན། །ཉིན་ཞག་གཅིག་ལ་རྩ་རྣམས་ནི། །སུམ་ཅུ་རྩ་གཉིས་ཤེས་པར་བྱ། །ཉིན་ཞག་གཅིག་ལ་དབྱུག་གུ་ཡི། །དྲུག་ཅུ་རྩ་བཞིའི་ཚད་ཀྱིས་ནི། །རྩ་དང་ཆུ་ཚོད་ཕྱེད་དུ་བྱུག་གུ། །ཐུན་གྱི་བརྒྱད་ཆ་ཞེས་སུ་བཤད། །སྣ་སྒོའི་རླུང་ནི་འབྱུང་འཇུག་ལ། །དབུགས་གཅིག་ཏུ་ནི་རབ་ཏུ་གྲགས། །རླུང་གི་སྦྱོར་བ་ལ་མཁས་པས། །དབུགས་དྲུག་སྲོག་ཏུ་ཤེས་པར་བྱ། །སྲོག་ནི་ལྔ་བཅུ་ཐམ་པ་དང ། །དབུགས་གསུམ་རྐང་པའང་དེ་དང་ལྡན། །ཉི་མ་བྱང་དུ་རྒྱུ་དུས་ཀྱི། །ཉི་མ་དང་པོའི་དབྱུག་གུ་ཡིན། །ཉི་མ་ལྷོར་ནི་རྒྱུ་དུས་ཀྱི། ། མཚན་མོ་ཡང་ནི་དེ་བཞིན་འགྱུར། །དབྱུག་གུ་རེ་རེའི་འཕེལ་འགྲིབ་ནི། །དུས་ཀྱི་དབྱིབས་སུ་ཤེས་པར་བྱ། །དབུགས་ནི་དྲག་པོ་བཞི་ཆར་བཅས། །འཕོ་བ་སོ་སོའི་འཕེལ་འགྲིབ་ཡིན། །དབུགས་ཀྱི་སུམ་ཆ་དེའི་བཞི་ཆའི། །དྲུག་ཆས་ཉི་མ་རེ་རེར་འགྱུར། །ཐུན་ནི་ཕྱེད་ཕྱེད་རྒྱུ་བ་ལས། །ཕྱིན་ཅི་ལོག་ཏུ་འཕོས་འགྱུར་ན། །རྩོད་པ་ལ་སོགས་ངེས་འགྱུར་བས།། མཁས་པས་འདི་དག་ཡང་དག་བརྟག་།ཉི་མ་གཅིག་གཉིས་གསུམ་དང་བཞི། །ལྔ་དང་དྲུག་ཏུ་གང་ཚེ་རླུང ། །ཕྱིན་ཅི་ལོག་ཏུ་རྟག་རྒྱུ་ན། །དེ་ཚེ་རྩོད་པ་ཆེན་པོར་འགྱུར། །ཟླ་
10a
༄#། །ཕྱེད་རྟག་ཏུ་ལོག་པར་རྒྱུ། །ནད་ནི་ཆེན་པོ་ཡང་དག་འབྱུང ། །ཟླ་བ་གཅིག་ཏུ་ལོག་པར་རྒྱུ། །སྙིང་སྡུག་གཉེན་ནི་བརླག་པར་འགྱུར། །ཕྱེད་དང་གཉིས་སུ་ལོག་པར་རྒྱུ། །ཟླ་བ་དྲུག་ན་འཆི་བར་འགྱུར། །ཐུན་མོང་དུས་སུ་ཤེས་པར་བྱ། །གཞན་ཡང་ཁྱད་པར་བཤད་བྱ་སྟེ། །མཉམ་པོ་བདུན་དུ་ཉི་མ་སོང ། །གང་ཚེ་སྐྱེ་བའི་ཉིན་ཟླ་བ། །དེ་ཚེ་རྒྱས་པ་ཞེས་བྱའི་དུས། །འཆི་བའི་ངེས་པའི་དུས་ཡིན་ནོ། །མི་ནི་ཁྱིམ་གང་ལས་སྐྱེས་པ། །གང་ཞིག་གཞན་ཡང་བདུན་དེའི་ཕྱིར། །དེར་ནི་ཉི་མ་མཉམ་བདུན་སོང ། །མཉམ་པོ་བདུན་ཞེས་བྱ་བར་བཤད། །ཉི་མའི་ལམ་ནས་ཐམས་ཅད་དུ། །རླུང་ནི་རྟག་ཏུ་རྒྱུ་བ་དག་།རྒྱུན་མི་འཆད་པར་ཡང་དང་ཡང ། །མཁས་པས་དུས་ནི་མཚོན་པར་བྱ། །དུས་ཀྱི་སྐད་ཅིག་གང་ལ་རླུང ། །བགྲོད་པ་གཞན་དུ་འཇུག་འགྱུར་ན། །དུས་དེའི་སྐད་ཅིག་རྫོགས་པ་ན། །འཆི་འགྱུར་འདི་ལ་ཐེ་ཚོམ་མེད། །ཉི་ཕྱེད་དང་པོར་བྱས་ཏེ་ཉི་མ་རྫོགས་དང་དེ་བཞིན་ཉིན་ཞག་གཅིག་གི་བར། །དེ་ལས་ཞག་གཉིས་ཞག་གསུམ་དང་ནི་དེ་བཞིན་ཞག་ནི་བཞི་ཡི་བར་དག་ཏུ། །རླུང་ནི་གང་ཞིག་རྩ་ལ་བརྟེན་ཏེ་གཡས་པ་མིན་པའི་ཉི་མའི་ལམ་ནས་རྒྱུ། །དེ་ལས་ས་དང་ཉི་མ་ཕྱོགས་དང་བཀྲ་ཤིས་དྲུག་བཞི་འདི་དག་ཤེས་པར་བྱ། །ལྔ་ནས་ཉི་ཤུ་རྩ་ལྔར་ཉིན་ཞག་འདི་དག་ལྔ་ལྔར་སྦེལ་བས་བགྲོད་པར་
10b
འགྱུར། །དེ་ལས་རེ་རེས་སྤེལ་བས་བཅུ་ནི་སུམ་འགྱུར་ཇི་སྲིད་གསུམ་གྱིས་ལྷག་པའི་བར། །དེ་ལས་རྒྱས་པའི་དུས་སུ་གསུམ་མིག་ཟླ་བའི་ལོ་དང་དྲུག་གསུམ་ཟུང་ཟླའི་ཟླ། །ལྷག་མ་ཚེས་དང་ཕྱོགས་མདའ་ཡོན་ཏན་ཟུང་དང་ཟླ་བའི་ཞག་ཏུ་འཚོ་བ་ཡིན། །རེའུ་མིག་སུམ་ཅུ་བདུན་བཅས་པའི། །འཁོར་ལོ་རིམ་གསུམ་བྲིས་ནས་ནི། །ཚེ་དང་སྲོག་གི་རླུང་དག་དང ། ། ཉིན་ཞག་མཚན་མ་རིམ་བཞིན་བྲི། །ཞག་ལྔ་ནས་ནི་ཉི་ཤུ་ལྔའི། །བར་བར་གྱི་ནི་ཉིན་ཞག་ལ། །གྲངས་ནི་བཅུ་དྲུག་མ་བཤད་གང ། །དེ་རྣམས་ཚང་བར་བརྗོད་པར་བྱ། །ཞག་ནི་དྲུག་བདུན་བརྒྱད་དགུ་ཡི། །རིམ་པས་གལ་ཏེ་རླུང་རྒྱུ་ན། །ཡོན་ཏན་ལྡན་ཡང་ཉིན་ཞག་ནི། །ཉེར་བཞིས་མ་ཚང་ལོ་གསུམ་ནའོ། །དྲག་པོ་ཉི་མ་ཡན་ལག་སའི། །ཞག་ནི་རིམ་པས་རྒྱུ་ན་ནི། །ཡོན་ཏན་ལྡན་པའང་ཉིན་ཞག་ནི། །ཉེར་བཞིས་མ་ཚང་ལོ་གཉིས་ནའོ། །ཞག་ནི་བཅུ་དྲུག་དེ་བཞིན་དུ། །བཅུ་བདུན་དང་ནི་བཅོ་བརྒྱད་དང ། །བཅུ་དགུ་ཡི་ནི་རིམ་པ་ཡིས། ། རླུང་རྒྱུ་ཡོན་ཏན་ཅན་ཡང་ཞག། བཅུ་གཉིས་གཉིས་འགྱུར་མ་ཚང་བའི། །ལོ་གཅིག་ན་ནི་སྐྱབས་མེད་གང ། །དེ་ནི་གཤིན་རྗེའི་གྲོང་ཁྱེར་དུ། །ཐེ་ཚོམ་མེད་པར་འགྲོ་བར་འགྱུར།། ཉི་མ་ཉི་ཤུ་གཅིག་གཉིས་གསུམ། །ཉེར་བཞིའི་རིམ་པས་རླུང་རྒྱུ་ན། །ཡོན་ཏན་ལྡན་པའང་ཞག་དྲུག་ནི། །མ་ཚང་ཟླ་བ་དྲུག་ན་འཆི། །རེའུ་མིག་སུམ་ཅུ་གཉིས་ལྡན་པའི། །རིམ་
11a
༄#། །གཉིས་འཁོར་ལོ་བྲིས་ནས་ནི། །དེར་ནི་ཚེ་ཡང་ཡན་ལག་རླུང ། །གྲངས་ཀྱི་མཚན་མ་རིམ་བཞིན་བྲི། །འཆི་བའི་རྟགས་ནི་འདི་དག་ཀུན། །རྣམ་པ་ཐམས་ཅད་ཤེས་བྱས་ནས། །བློ་ལྡན་འཆི་བ་བླུ་བ་ཡིས། །གལ་ཏེ་བརྟན་པའི་གོ་འཕང་འདོད། །རྩ་ནི་ཡང་དག་སྦྱང་བྱས་པས། །དེ་སྲིད་རླུང་ནི་སྦྱངས་འགྱུར་ཏེ། །སོ་སོའི་རིམ་བཞིན་རྣལ་འབྱོར་པས། །ཡང་དང་ཡང་དུ་མནན་པར་བྱ། །གཡོན་པའི་བུ་གར་བཅུག་ནས་ནི། །རྩ་ནི་བསྡམས་ནས་མནན་བྱ་ཞིང ། །དེ་བཞིན་དུ་ནི་གཡས་པར་རླུང ། །བཀུག་སྟེ་དལ་བུས་མནན་པར་བྱ། །སེམས་ཅན་རྣམས་ཀྱི་ཞག་གཅིག་ལ། །རྒྱུ་བའི་དབུས་ཀྱི་གྲངས་ཀྱི་ཚུལ། །བརྒྱ་ཕྲག་དྲུག་གིས་ལྷག་པ་ཡི། །སྟོང་ཕྲག་ཉི་ཤུ་རྩ་གཅིག་གོ ། དབང་ཆེན་གྱིས་ནི་རྒྱལ་སྲིད་དེ། །ཆུས་ནི་དོན་རྣམས་ཡང་དག་འབྱུང ། །མེ་ཡི་རླུང་ནི་རྣམ་རྒྱུ་བས། །བཀྲེས་སྐོམ་དུ་བ་དང་སྡུག་བསྔལ་ནད། །བྱ་བ་ཐམས་ཅད་ཉམས་འགྱུར་ཞེས། །རྡོ་རྗེ་འཛིན་པ་མཆོག་གིས་གསུངས། །རླུང་གིས་རྩོད་དང་སྐྱོ་དང་རྨོངས། །ནོར་ཉམས་ཉོན་ནི་མོངས་པར་བྱེད། །དབང་ཆེན་ནོར་དང་འབྲུ་ལ་སོགས། །རྙེད་པ་ཐོབ་དང་སྡུད་བྱེད་པའོ། །ཆུ་ཡི་རླུང་ནི་རྣམ་རྒྱུ་བས། །འདོད་པའི་དངོས་གྲུབ་ཀུན་བྱེད་པས། །དེ་ཡི་སྦྱོར་བ་མཆོག་གཙོ་བོར། །རྡོ་རྗེ་སེམས་དཔའ་གང་གསུངས་པའོ། །
11b
རླུང་ནི་བཅོམ་ལྡན་ཧེ་རུ་ཀའི། །རང་བཞིན་ཉིད་དེ་གསུམ་དུ་འགྱུར། །གཡོན་པ་ཤེས་རབ་རང་བཞིན་ཏེ། །གཡས་པ་སྙིང་རྗེའི་བདག་ཉིད་དོ། །གཉིས་པོ་མི་ཕྱེད་སྦྱོར་བར་ཡང ། ། གཉིས་ཀ་ནས་ནི་རྣམ་པར་རྒྱུ། །དེ་བས་དེ་ཉིད་རིག་པས་དེར། །དགེ་མི་དགེ་སོགས་ཤེས་པར་བྱ། །དུག་སོགས་གཞོམ་དང་ལྷག་མ་ནི། །བཀྲ་ཤིས་དཔལ་ནི་བསྐྱེད་པ་ལ། །ཤེས་རབ་བདག་ཉིད་རབ་ཏུ་བསྔགས། །རྟག་ཏུ་དཔལ་ལྡན་སྙིང་རྗེའི་སྟོབས། །གཡུལ་བཤམ་རོལ་རྩེད་སྟོན་མོ་དང ། །བཅད་པ་དང་ནི་དབུག་པ་དང ། །སྲེག་པར་བཙོ་བའི་ལས་ལ་ནི། །སྙིང་རྗེའི་བདག་ཉིད་རབ་ཏུ་བསྔགས། །གཞན་ཡང་གཉིས་བདག་རྡོ་རྗེ་ཅན། །ཐེ་ཚོམ་འགྱུར་བར་ཤེས་བྱ་སྟེ། །དགེ་དང་མི་དགེ་ངེས་མེད་པར། །རླུང་རིག་པས་ནི་འདིར་མཚོན་བྱ། །མགོན་པོ་ཇི་སྟེ་ཨཱ་ལིར་རྒྱུ། །འགའ་ཞིག་ཀཱ་ལིར་གནས་འདྲི་འམ། །ཀཱ་ལིའི་རྒྱུ་ལ་ཨཱ་ལིར་གནས། །དེ་ཡི་འདོད་དོན་ཉམས་པར་འགྱུར། །གང་ནས་མགོན་པོ་དེ་རྒྱུ་བ། །དེར་གནས་འགའ་ཞིག་འདྲི་བྱེད་ན། །དེ་ཡི་དོན་ཀུན་ཡང་དག་འགྲུབ། །གཉིས་ཀར་གནས་ལས་ཐེ་ཚོམ་འགྱུར། །རླུང་གི་བདག་ཉིད་ཀྱིས་མགོན་པོའི། །སྐུ་གསུམ་པོར་ཡང་ཤེས་པར་བྱ། །འཇུག་པ་ཆོས་ཀྱི་སྐུ་ཡིན་ཏེ། །གནས་པ་ལོངས་སྤྱོད་རྫོགས་པའི་སྐུ། །འབྱུང་བ་སྤྲུལ་པའི་སྐུ་ཞེས་བཤད། །འདི་དག་སྐུ་ནི་གསུམ་པོར་བཞེད། །འདྲི་བ་པོ་འམ་རང་
12a
༄#། །གིའང་རུང ། །ཆོས་སྐུས་ཐམས་ཅད་དགེ་བ་སྟེ། །ལོངས་སྤྱོད་རྫོགས་པ་ཐེ་ཚོམ་འགྱུར། །སྤྲུལ་པས་འཐབ་མོར་སྟོན་པའོ། །རྣལ་འབྱོར་པ་ཡི་སྲོག་རྩོལ་ནི། །སངས་རྒྱས་ལྔ་ཡི་ངོ་བོར་གནས། །གཡོན་དང་གཡས་ཀྱི་གནས་གང་ན། །རིམ་པ་ཇི་བཞིན་རྣམ་པར་རྒྱུ། །གཡས་ནས་རྣམ་པར་རྒྱུ་བའི་འོད། །མེ་ཡི་དཀྱིལ་འཁོར་ཉིད་ཡིན་ཏེ། །ནགས་ཀྱི་མེ་ཏོག་ལྟ་བུའི་མདོག། དེ་ནི་འོད་དཔག་མེད་པའི་ལྷ། །གཡོན་ནས་རྣམ་པར་རྒྱུ་བའི་འོད། །རྟག་ཏུ་རླུང་གི་དཀྱིལ་འཁོར་ཏེ། །ཁ་དོག་ལྗང་གུ་ལྟར་སྣང་བ། །ལྷ་ནི་དོན་ཡོད་མཆོག་ཡིན་ནོ། །གཉི་ག་ནས་ནི་རྒྱུ་བའི་འོད། །གསེར་གྱི་འོད་ལྟར་སྣང་བ་སྟེ། །དབང་ཆེན་དཀྱིལ་འཁོར་གྱི་ནི་རླུང ། །རྟག་ཏུ་རིན་ཆེན་འབྱུང་ལྡན་རྒྱུ། །འོག་ནས་དལ་བར་རབ་རྒྱུས་པ། །ཀུན་ད་ཟླ་བ་ལྟ་བུར་དཀར། །ཆུ་ཡི་དཀྱིལ་འཁོར་རྒྱུ་བ་སྟེ། །འོད་ཆེན་རྡོ་རྗེ་མགོན་པོའོ། །ལུས་ཀུན་ལ་ནི་རྗེས་འགྲོའི་རླུང ། །སེམས་ཀུན་རབ་ཏུ་འཇུག་བྱེད་པ། །མགོན་པོ་རྣམ་པར་སྣང་མཛད་ནི། །འབྱུང་བར་རབ་ཏུ་གྲགས་པ་ཡིན། །རྣལ་འབྱོར་མ་ནི་མཉམ་གཞག་པས། །འཇུག་པའི་རླུང་ནི་བགྲང་བར་བྱ། །ཇི་སྲིད་འབུམ་ལ་སོགས་པའི་གྲངས། །སྒྲ་དང་བྲལ་བར་རྟག་ཏུ་བཟླ། །སྒྲུབ་པོ་སྒྲ་དང་བྲལ་བར་ནི། །འབུམ་བཟླས་ཡོངས་སུ་རྫོགས་པ་ན། །ཚེ་ཉམས་པ་ཡང་ལོ་ལྔ་རུ། །འཚོ་བར་འདིར་ནི་
12b
ཐེ་ཚོམ་མེད། །རྟག་ཏུ་ནང་པར་ལངས་ནས་རླུང ། །སྟོང་ཕྲག་གཅིག་ཏུ་བགྲང་བྱ་སྟེ། །དེ་བས་རླུང་གི་རྣལ་འབྱོར་ལ། །རྟག་ཏུ་མཉམ་གཞག་གནས་པར་བྱ། །ཡང་ན་བུམ་པའི་རྣལ་འབྱོར་གྱིས། །རྟག་ཏུ་འཆི་བདག་ལས་རྒྱལ་བྱ། །བདག་ཉིད་རིག་པས་རྐང་མཐིལ་བར། །ཀུན་ཏུ་རླུང་གི་དགང་བྱ་སྟེ། །བུམ་པ་ཅན་ལ་བརྟན་བྱས་ནས། །དབྱེ་བ་གསུམ་གྱིས་གཞོམ་པར་བཤད། །ཐ་མ་སུམ་ཅུ་རྩ་དྲུག་ཙམ། །དེ་ཡི་ཉིས་འགྱུར་འབྲིང་དེ་བཞིན། །སུམ་འགྱུར་ཆེན་པོར་ཤེས་བྱ་སྟེ། །བུམ་པ་ཅན་དེས་རྒྱལ་བར་བྱ། །བུམ་པ་ཅན་ལྔར་ཤེས་བྱས་ནས། །བདག་ཉིད་སྐྱིལ་མོ་ཀྲུང་བཅས་ཏེ། །ལག་པ་ལན་གསུམ་མཉེས་ནས་ནི། །དེ་ནས་ལན་དྲུག་སེ་གོལ་བརྡབ། །ཇི་སྲིད་སུམ་ཅུ་རྩ་དྲུག་པར། །དེ་སྲིད་བུམ་པ་ཅན་གྱིས་བྱ། ། སུམ་འགྱུར་ཆེན་པོས་གཞོམ་པ་ནི། །བརྒྱ་ལས་རྩ་བརྒྱད་ལྷག་པས་སོ། །བརྟན་པའི་གོ་འཕང་འདོད་པས་ནི། །བརྩོན་པས་དེ་ཉིད་ཀྱིས་རྒྱལ་བྱ། །བུམ་པའི་སྦྱོར་བས་རྒྱལ་བས་ན།། འཆི་བདག་ལས་ནི་རིང་དུ་འཇུག་།བུམ་པ་ཅན་ནི་ཤེས་བྱས་ནས། །འགོག་ལ་བརྟན་པར་གནས་པ་ན། །དེ་ལ་བསྐལ་པ་སྟོང་དུ་ཡང ། །འཆི་བདག་ཉེ་བར་འོང་མི་འགྱུར། །སྙིང་གི་ཆུ་སྐྱེས་དབུས་སོན་རླུང ། །ཧཱུཾ་ཡིག་དཀར་པོའི་རྣམ་པར་ནི། །གང་གིས་མཉམ་པར་གཞག་བསམས་ན། །དེ་ལ་ཡུལ་སོགས་དམིགས་མི་འགྱུར། །རླུང་གིས་འཁོར་བའི་སྟེང་དུ་
13a
༄#། །འགྲོ། མྱ་ངན་འདས་པའི་འོག་ཏུ་བགྲོད། །སྙིང་ག་ཡི་ནི་ཆུ་སྐྱེས་ལ། །མི་གནས་མྱ་ངན་འདས་པར་གནས། །སྟེང་དང་འོག་དུ་རྒྱུ་བའི་རླུང ། །ཁ་སྦྱར་དུ་ནི་ཡིད་ཀྱིས་བྱས། །དེ་ཡི་སྦྱོར་བས་གོམས་བྱེད་ན། །དེས་ནི་བརྟན་པའི་གོ་འཕང་འཐོབ། །རླུང་གི་རྣལ་འབྱོར་མི་ཤེས་པའམ། །གང་ཞིག་ཤེས་ཀྱང་མི་བྱེད་པ། །དེ་ནི་འཁོར་བའི་སྡུག་བསྔལ་ཚོགས། །དུ་མས་གཙེས་པའི་སྲིན་བུར་འགྱུར། །གང་ཞིག་འགྲོ་དང་འོང་བའི་རླུང ། །བློ་དང་ལྡན་པས་བརྟག་བྱ་སྟེ། །རླུང་གིས་ཐམས་ཅད་བྱིན་གྱིས་བརླབ། །རླུང་ནི་ཀུན་ཏུ་འགྲོ་འགྱུར་བའོ། །འདི་ནི་ཟླ་བ་དང ། ཉི་མའི་མན་ངག་གི་རིམ་པར་ཕྱེ་བ་སྟེ་ལྔ་པའོ།། །།དེ་ནས་ལམ་ལྔ་བཟང་པོ་མཆོག་།རྣམ་པར་ངེས་པར་རབ་བཤད་བྱ། །བདག་གཞན་དོན་ནི་ཕུན་ཚོགས་པའི། །སྒྲུབ་པོས་དགེ་དང་མི་དགེ་བརྟག་།མེ་དང་རླུང་ནི་ཉིད་དག་དང ། །དེ་བཞིན་དབང་ཆེན་དང་ནི་ཆུའི། །དཀྱིལ་འཁོར་ཡང་དག་རྒྱུ་བ་ལས། །ཞི་དང་རྒྱས་དང་དབང་དང་དགུག་།དེ་བཞིན་བསད་དང་བསྐྲད་པ་ཡི། །མཚན་ཉིད་མཁས་པས་བརྟག་པར་བྱ། །དེ་ཡི་སྦྱོར་བ་མི་ཤེས་པ། །དེ་ནི་ངལ་བ་དོན་མེད་འགྱུར། ། མེས་ནི་འཆི་བར་འགྱུར་བ་སྟེ། །རླུང་གིས་ནོར་རྣམས་ཉམས་པར་འགྱུར། །དབང་ཆེན་གྱིས་ནི་རྒྱལ་སྲིད་འགྱུར། །ཆུས་ནི་ནོར་དང་འབྲུ་རྣམས་སྟེར། །གཡས་པ་ན་ནི་རྒྱུ་བའི་
13b
ཁམས། །བྱིན་ཟའི་དཀྱིལ་འཁོར་ཉིད་ཡིན་ཏེ། །ཁ་དོག་དམར་ཞིང་གསལ་བ་ནི། །པདྨའི་མགོན་པོའི་འབྱུང་བའོ། །གཡོན་པ་ནས་ནི་རྒྱུ་བའི་ཁམས། །རླུང་གི་དཀྱིལ་འཁོར་ཉིད་ཡིན་ཏེ། ། ཁ་དོག་ལྗང་ཞིང་གསལ་བ་ནི། །ལས་ཀྱི་མགོན་པོའི་འབྱུང་བའོ། །གཉི་ག་ནས་ནི་རྒྱུ་བའི་ཁམས། །གསེར་གྱི་མདོག་ལྟར་གསལ་བ་ནི། །དབང་ཆེན་དཀྱིལ་འཁོར་ཉིད་ཡིན་ཏེ། །རིན་ཆེན་མགོན་པོའི་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །ཆུ་ཡི་དཀྱིལ་འཁོར་ཉིད་ཡིན་ཏེ། །དག་པའི་ཤེལ་ལྟར་སྣང་བ་ནི། །རྡོ་རྗེ་མགོན་པོའི་རྒྱུ་བའོ། །ཁམས་རྣམས་ཀུན་ནི་ཡང་དག་བསྡུས། །རྟེན་དང་བརྟེན་པའང་ཡང་དག་འཛིན། །རྣམ་སྣང་མཛད་ནི་རླུང་ཆེན་ཏེ། །འཆི་བའི་ལུས་ལས་རྣམ་པར་རྒྱུ། །རླུང་གི་དེ་ཉིད་མི་ཤེས་པར། །ལས་དང་ལས་མིན་མི་འགྲུབ་སྟེ། ། རླུང་ནི་ཐམས་ཅད་བགྲོད་འགྱུར་བས། །རྟོག་གེ་པ་ཡིས་མི་ཤེས་སོ། །རླུང་གི་དེ་ཉིད་སྔོན་འགྲོ་བས། །སྔགས་ཀྱི་དེ་ཉིད་བསྒྲུབ་པར་བྱ། །སེམས་ཅན་རྣམས་ཀྱི་སྲོག་གྱུར་པ། །རླུང་ཞེས་བྱ་བ་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །སངས་རྒྱས་གོ་འཕང་འཐོབ་བྱེད་པ། །རྒྱུད་རྣམས་ཀུན་གྱིས་གསང་བ་སྟེ། །བྱང་ཆུབ་རྒྱུ་ཡི་ཐབས་ཡིན་ནོ། །འདི་ནི་ལམ་ལྔ་ངེས་པར་བརྟན་པའི་རིམ་པར་ཕྱེ་བ་སྟེ་དྲུག་པའོ།། །།དེ་ནས་རྩ་ཡི་འཁོར་ལོ་ནི། །རིམ་པ་བཞིན་དུ་རབ་བཤད་བྱ། །ལུས་ཀྱི་རྗེས་སུ་འགྲོ་བའི་རྩ། །སྟོང་ཕྲག་བདུན་
14a
༄#། །ཅུ་རྩ་གཉིས་འགྱུར། །རྩ་རྣམས་དང་ནི་ཉེ་བའི་རྩ། །དེ་དག་གནས་ལ་བརྟེན་པ་སྟེ། །བརྒྱ་ལས་ཉི་ཤུ་ལྷག་པའི་རྩ། །གཙོ་བོ་ཞེས་ནི་བྱ་བར་བརྗོད། །རྩ་ཡི་གནས་དང་ཡུལ་རྣམས་ནི། །ཉི་ཤུ་རྩ་བཞིའི་གྲངས་ཡིན་ཏེ། །དེ་རྣམས་དབུས་ཀྱི་རྩ་གསུམ་གང ། །ཐམས་ཅད་ཁྱབ་ཅིང་བརྟེན་པའོ། །མགོར་ནི་པུ་ལླི་ར་ཡིན་ཏེ། །སོ་དང་སེན་མོ་འབབ་པར་གནས། །སྤྱི་གཙུག་ཛའ་ལན་དྷ་ར་སྟེ། །སྐྲ་དང་སྤུ་ནི་འབབ་པར་གནས། །ོཌྱན་རྣ་བ་གཡས་པའི་རྩ། །པགས་པ་དང་ནི་དྲི་མ་འབབ། །མགོ་རྒྱབ་ཨར་བུ་ད་ཡིན་ཏེ། ། ཤ་ནི་ཡང་དག་འབབ་པའི་རྩ། །གོ་ད་བ་རི་རྣ་བ་གཡོན། །རྒྱུས་པ་ཡང་དག་འབབ་པའི་རྩ། །སྨིན་དབུས་ར་མེ་ཤཝ་རི་སྟེ། །རྟག་ཏུ་རུས་པ་འབབ་པའོ། །མིག་ནི་དེ་ཁི་ཀོ་ཊིར་གནས། །མཆིན་པ་འབབ་པའི་རྩ་ཡིན་ནོ། །མཱ་ལ་བ་ནི་དཔུང་པ་གཉིས། །སྙིང་འབབ་པ་ཡི་རྩ་གནས་སོ། །མཆན་ཁུང་ཀཱ་མ་རུ་པ་སྟེ། །རྟག་ཏུ་མིག་ནི་འབབ་པའོ། །ནུ་མ་གཉིས་ནི་ཨོ་ཌི་སྟེ། །རྟག་ཏུ་མཁྲིས་པ་འབབ་པའི་རྩ། །ཏྲི་ཤ་ཀུ་ནི་ལྟེ་བ་སྟེ། །རྩ་ནི་གློ་བ་འབབ་བས་གནས། །སྣ་རྩེ་ཀོ་ས་ལ་ཡིན་ཏེ། །རྒྱུ་མའི་ཕྲེང་བ་འབབ་པས་གནས། །ཁ་ནི་ཀ་ལིང་ག་ཡིན་ཏེ། །རྟག་ཏུ་གཉེ་མ་འབབ་པས་གནས། །མགྲིན་པ་ལམ་པཱ་ཀ་ཡིན་ཏེ། །རྟག་ཏུ་ལྟོ་བ་འབབ་པའི་རྩ། །ཀཉྩི་སྙིང་གའི་གནས་ཡིན་ཏེ། །བཤང་བ་འབབ་པའི་རྩ་
14b
ཡིན་ནོ། །འདོམས་པར་ཧི་མ་ལ་ཡ་སྟེ། །མཚོག་མའི་མཚམས་ནི་འབབ་པའི་རྩ། །པྲེ་ཏ་པུ་རི་མཚན་མ་སྟེ། །བད་ཀན་འབབ་པའི་རྩ་ཡིན་ནོ། །གྲི་ཧ་དེ་བ་ཏཱ་བཤང་ལམ་སྟེ། །རྟག་ཏུ་རྣག་ནི་འབབ་པའོ། །བརླ་གཉིས་སཽ་རཥྚ་ཡིན་ཏེ། །རྟག་ཏུ་ཁྲག་ནི་འབབ་པའོ། །བྱིན་པ་གཉིས་ནི་གསེར་གླིང་གནས། །རྡུལ་འབབ་པ་ཡི་རྩ་ཡིན་ནོ། །རྐང་པའི་སོར་མོ་ན་ག་ར། །རྟག་ཏུ་ཚིལ་འབབ་རྩར་ཤེས་བྱ། །རྐང་པའི་བོལ་ནི་སིན་དྷུ་སྟེ། །མཆི་མ་འབབ་པའི་གཟུགས་ཅན་མ། །མ་རུ་དེ་ཤ་མཐེ་བོང་སྟེ། །རྟག་ཏུ་མཆིལ་མ་འབབ་པས་གནས། །ཀུལླུ་ཏ་ནི་པུས་མོ་སྟེ། །རྟག་ཏུ་སྣ་ཆུ་འབབ་པས་གནས། །དེ་དག་དབུས་ན་གནས་པའི་རྩ། །ལ་ལ་ནཱ་ར་ནི་གཅི་བ་འབབ། །གཡས་སུ་ཁྲག་ནི་འབབ་པའི་རྩ། །ར་ས་ནཱ་ཞེས་གྲགས་པ་ཡིན། ། དབུས་ཀྱི་ཆར་ནི་ཡང་དག་འཇུག་།སྙིང་གའི་ཆུ་སྐྱེས་དབུས་སོན་པ། །ཆུ་ཤིང་སྙེ་མའི་མེ་ཏོག་བཞིན། །འཕྱང་བ་ཁ་ནི་ཐུར་དུ་བལྟས། །ཏིལ་གྱི་མར་མེ་ལྟར་འབར་ཞིང ། །བྱང་ཆུབ་སེམས་ནི་མཉམ་འབབ་སྟེ། ། བ་དྷུའི་ཏཱིར་ཤེས་བྱ་སྟེ། །ལྷན་ཅིག་སྐྱེས་པ་སྟེར་བྱེད་པའོ། །ལ་ལ་ནཱ་ལ་སོགས་པའི་རྩ། །རྩ་རྣམས་ཀུན་གྱི་གཙོ་བོ་སྟེ། །དེ་བས་འདིར་ནི་གཞན་བསྟེན་པ། །གངྒཱ་སིན་དྷུར་གཞན་འཇུག་བཞིན། །གཅིག་གྱུར་ཀ་ཀ་མུ་ཁ་སྟེ། །དེ་ཉིད་སྐྱེ་གནས་གཞན་མ་ཡིན། །ལོངས་སྤྱོད་རྫོགས་སྐུའི་རང་བཞིན་གྱིས། །ལུས་ལ་བརྟེན་པར་
15a
༄#། །ཤེས་པར་བྱ། །བུད་མེད་རྣམས་ལའང་གཙོ་བོ་གསུམ། །ལ་ལ་ནཱ་སོགས་རྩ་རྣམས་ཡིན། །ཤེས་རབ་རང་བཞིན་ལ་ལ་ནཱ། །ར་ས་ནཱ་ནི་ཐབས་སུ་གནས།། དབུས་ནས་ཨ་བ་དྷཱུ་ཏཱི་ནི། །གཟུང་དང་འཛིན་པ་རྣམ་སྤངས་པའོ། །ལོངས་སྤྱོད་རྫོགས་སྐུ་ལ་ལ་ནཱ། །ར་ས་ནཱ་ནི་སྤྲུལ་པའི་སྐུ། ། བ་དྷཱུ་ཏཱི་ཆོས་སྐུ་སྟེ། །སྐུ་གསུམ་པོར་ནི་བཤད་པ་ཡིན། །རྩ་རྣམས་དེ་དག་ཐམས་ཅད་ནི། །ལུས་ནི་དགེ་བར་བྱེད་པ་སྟེ། །དེ་ཡི་ཚོགས་ལས་ཡང་དག་བྱུང ། །གོང་བུ་ལྷ་ཡི་བདག་ཉིད་དོ། །གཟུགས་ལས་འདས་པ་གོང་བུར་འགྱུར། །གོང་བུ་ལས་འདས་ལྷ་ཉིད་དེ། །དེ་ཕྱིར་བསམ་མི་ཁྱབ་སྦྱོར་བས། །དེ་བཞིན་ཉིད་བདག་ཀུན་ཏུ་འགྲོ་།སྒྲུབ་པོས་ཆོ་ག་གང་གང་གིས། །གོང་བུ་ལས་འདས་གོ་འཕང་གནས། །དེས་ནི་དེ་ཡི་བདག་ཉིད་དུ། །གྱུར་བས་སངས་རྒྱས་ཉིད་ཐོབ་འགྱུར། །འདི་ནི་རྩ་ཡི་འཁོར་ལོའི་ཐབས་རིམ་པར་ཕྱེ་བ་སྟེ་བདུན་པའོ།། །།དེ་ནས་གང་ཞིག་ཤེས་ཙམ་གྱིས། །མྱུར་དུ་དངོས་གྲུབ་འགྱུར་བ་ཡི། །དམ་ཚིག་རྣམས་ཀྱང་རིམ་པ་བཞིན། །ཡང་དག་པར་ནི་བཤད་པར་བྱ། །རང་གི་ཁྱིམ་མམ་གསང་བའི་གནས། །དབེན་ཞིང་ཡིད་ནི་དགའ་བ་དང ། །རི་བོ་ཚང་ཚིང་རི་སུལ་དང ། །རྒྱ་མཚོ་ཆེན་པོའི་འགྲམ་དང་ནི། །མ་མོའི་ཁྱིམ་དང་དུར་ཁྲོད་དམ། །ཆུ་བོ་འདུས་པའི་དབུས་སུ་
15b
ནི། །བླ་མེད་འབྲས་བུ་འདོད་པ་ཡིས། །དཀྱིལ་འཁོར་ཡང་དག་བྲི་བར་བྱ། །ཡོན་བདག་དད་པ་ཆེན་པོ་ཡིས། །ཞིང་སྐྱེས་གནས་སྐྱེས་སྔགས་སྐྱེས་མའི། །རྣལ་འབྱོར་མ་དང་རྣལ་འབྱོར་པ། །སློབ་དཔོན་ལྷ་ཀུན་སྤྱན་དྲང་བྱ། །ཁྱིམ་པ་འམ་ནི་དགེ་ཚུལ་ལམ། །དེ་བཞིན་དགེ་སློང་སློབ་དཔོན་ཏེ། །སློབ་དཔོན་ཁ་ཅིག་འཇིག་རྟེན་པ། །བསྟན་ལ་གནས་པའི་དགེ་སློང་དམ། ཁ་ཅིག་ཡོན་ཏན་ལྡན་པའམ། །དེ་བཞིན་མངོན་ཤེས་ཐོབ་པའང་རུང ། །འདི་རྣམས་ནང་ན་ཡོན་བདག་ནི། །གང་ལ་དད་པས་གཙོ་མཆོག་བྱ། །སློབ་དཔོན་སྔོན་དུ་འགྲོ་བ་ཡིས།། དཀྱིལ་འཁོར་དགེ་བ་བྲི་བྱས་ཏེ། །སློབ་དཔོན་དབང་བསྐུར་ཡོན་ཏན་ལྡན། །འཇིག་རྟེན་རྣམས་ཀྱིས་མ་སྨད་ཅིང ། །མི་དགེ་བཅུ་ཡོངས་སྤངས་པ་ནི། །ཚོགས་ཀྱི་འཁོར་ལོའི་གཙོ་བོར་བྱ། །རྟག་ཏུ་ཡོན་བདག་བློ་ལྡན་གྱིས། །སྙིང་རྗེ་མེད་ཅིང་ཁྲོ་དང་གདུག་།ཁེངས་དང་བརྐམ་ཆགས་བདག་ཉིད་བསྟོད། །མཉམ་པར་མ་བཞག་གིས་མི་བྱ། །གང་ཞིག་ཁྱིམ་གནས་ལོངས་སྤྱོད་བསྟེན། །གཤོལ་འཛུགས་དང་ནི་ཚོང་པ་དང ། །རྨོངས་པས་དམ་ཆོས་འཚོང་པ་ནི། །ཚོགས་ཀྱི་འཁོར་ལོའི་གཙོ་བོར་མིན། །འདི་ལྟར་ཡོན་ཏན་ཀུན་ལྡན་ཞིང ། ། ཐམས་ཅད་མཁྱེན་པའི་རྒྱལ་མཚན་འཛིན། །དུལ་ཞིང་བརྩོན་འགྲུས་ཡང་དག་ལྡན། །སྲེད་པ་མེད་ཅིང་ང་རྒྱལ་མེད། །རྟག་ཏུ་སེམས་ཅན་བསྟན་པར་ནི། །ལྟོས་བཅས་རྒྱན་གྱི་
16a
༄#། །བརྒྱན་པ་དང ། །ཐོད་པའི་རྒྱན་ལ་དགའ་བ་དང ། །རྡོ་རྗེ་དྲིལ་བུ་མཉམ་ལྡན་པའི། །མཁས་པས་གཡོན་གྱི་ཕྱོགས་སུ་ནི། །གཡོན་པའང་རབ་ཏུ་གཞག་པར་བྱ། །འདི་ལྟར་ཡོན་ཏན་ལྡན་སློབ་དཔོན། །ལས་རྣམས་ཀུན་ལ་རབ་ཏུ་བསྔགས། །རིམ་པ་ཇི་བཞིན་སློབ་དཔོན་དང ། །ལྷ་རྣམས་སྤྱན་དྲངས་བྱོན་པ་ལ། །ཇི་ལྟར་རྙེད་པའི་དྲི་ཆུ་ཡིས། །ཞབས་བཀྲུ་བས་ནི་གཙང་བྱས་ནས། །ས་ཡོངས་བརྟག་པའི་གནས་སུ་ནི། །སློབ་དཔོན་སྔོན་དུ་འགྲོ་བ་ཡིས། །རྒན་དང་གཞོན་པའི་དབྱེ་བ་བཞིན། །ཞུགས་ནས་གདན་ལ་གནས་པར་བྱ། །སྐལ་བ་མེད་དང་ང་རྒྱལ་ཅན། །དེ་བཞིན་བླ་མ་སྨོད་པ་དང ། །དམ་ཚིག་མ་མཐོང་རང་གི་བུ། །དེ་བཞིན་སྐྱེས་པ་བུད་མེད་རྣམས། །སྒྲུབ་པོ་དངོས་གྲུབ་འདོད་པ་ཡིས། །དམ་ཚིག་དེར་ནི་གཞུག་མི་བྱ། །གལ་ཏེ་ཕྱུགས་ནི་དེ་རྣམས་ཞུགས། །དངོས་གྲུབ་རིང་དུ་འཇུག་པར་འགྱུར། །དམ་ཚིག་སྨད་པས་ལུས་སེམས་ནི། །སྡུག་བསྔལ་དེ་བཞིན་གནས་ཉམས་དང ། །དཔལ་ལས་རིང་ཞིང་སྣ་ཚོགས་པའི། །སྡུག་བསྔལ་གྱིས་ནི་ཉེར་འཚེར་འགྱུར། །དེ་ལྟར་ཤེས་ནས་སྤང་བྱ་སྟེ། །མཆོད་པའི་སྤྱོད་ཡུལ་ཅན་རྣམས་བསྡུ། །རྒན་དང་གཞོན་པའི་རིམ་བཞིན་དུ། །མེ་ཏོག་བདུག་སྤོས་མར་མེ་དང ། །ཙནྡན་དྲིས་ནི་ཁྱད་པར་དུ། །བློ་དང་ལྡན་པས་རྟག་མཆོད་བྱ། །གདུགས་དང་
16b
རྒྱལ་མཚན་གྱིས་བརྒྱན་པའི། །གཏོར་མ་སློབ་དཔོན་གྱིས་རབ་བརྟག་།ལྷ་ནི་བསྙེན་ཕྱིར་མཆོད་བྱ་ཞིང ། །ཡོན་བདག་ཡིད་ལ་འདོད་པ་ཡི། །གང་ཞིག་ཞི་དང་རྒྱས་པའི་ལས། །དངོས་གྲུབ་དོན་དུ་བྲིས་ནས་ནི། །གང་གང་མངོན་པར་འདོད་པ་ཡི། །ལས་དེ་བྱིན་གྱིས་བརླབ་པར་བྱ། །སྦྲང་ཆང་བུར་ཆང་ཁུ་བའི་ཆང ། །ཇི་ལྟར་རྙེད་པ་དབུལ་བར་བྱ། །གཙང་ཞིང་དུལ་དང་དཔའ་བའི་སེམས། །སྲེད་དང་གཏི་མུག་རྣམ་པར་སྤངས། །ཐམས་ཅད་མཚུངས་པར་ལྟ་བ་ནི། །ལས་ཀྱི་རྡོ་རྗེར་རབ་ཏུ་བརྟག་།བཟའ་དང་བཅའ་དང་དེ་བཞིན་བཏུང ། །སོ་རྩི་དང་ནི་སྤོས་དེ་བཞིན། ། དཀྱིལ་འཁོར་གྱི་ནི་མདུན་ཉིད་དུ། །ཡོན་བདག་གིས་ནི་དབུལ་བྱ་ཞིང ། །ཕྱི་ནས་ལས་ཀྱི་རྡོ་རྗེ་ནི། །མཁས་པས་རྫས་རྣམས་ཡོངས་སུ་སྤྱད། །ཐོག་མར་ལྕགས་ཀྱུས་མཉམ་ལྡན་པའི།། དམ་ཚིག་ཡོངས་སུ་སྤྱད་པར་བྱ། །དེ་ནས་ཐམས་ཅད་ཡོངས་རྫོགས་པར། །སློབ་དཔོན་གྱིས་ནི་བྱིན་གྱིས་བརླབ། །གནས་དང་ཉེ་གནས་ཞིང་དང་ནི། །འདུས་དང་དུར་ཁྲོད་གནས་པའོ།། དཔའ་མོའི་དབང་ཕྱུག་མ་ཀུན་ལ། །བདག་ནི་གུས་པས་ཕྱག་འཚལ་ལོ། །ལྷ་མོ་རྣམས་ཀྱི་ཚད་མ་དམ་ཚིག་ཚད་མ་དང ། །དེས་བཤད་གསུང་ནི་མཆོག་ཏུ་ཚད་མར་གྱུར་པ་སྟེ། །བདེན་པར་གྱུར་པ་དེས་ན་ལྷ་མོ་རྣམས་ཀྱིས་འདིར། །བདག་ནི་རྗེས་སུ་གཟུང་བའི་རྒྱུར་ནི་འགྱུར་བར་ཤོག་།གཞན་ཡང་དཀྱིལ་འཁོར་མདུན་དུ་ནི། །སྙིང་གར་ཐལ་མོ་རབ་སྦྱར་ཏེ། །ཡོན་བདག་
17a
༄#། །གིས་ཀྱང་སྨོན་ལམ་ནི། །ཡོངས་སུ་བསྔོ་བ་ཉིད་དུ་བྱ། །སྲིད་དང་ཞི་བ་མཉམ་པར་ཆགས་པ་བཅོམ་ཞིང་ཡང་དག་རྟོག་པ་འཇོམས། །ཁྱེད་ཀྱིས་དངོས་པོ་ཐམས་ཅད་མཁའ་དང་མཉམ་པའི་བདག་ཉིད་གཟིགས་པར་ལྡན། །མགོན་པོ་ཐུགས་རྗེ་ཆུ་ཡི་ལྗིད་ཀྱིས་བརླན་པར་གྱུར་པའི་ཐུགས་ཀྱི་ཆུས། །བདག་ལ་མཛོད་ཅིག་ལྷ་མོ་རྣམས་ཀྱིས་ཤིན་ཏུ་རྗེས་བརྩེར་མཛད་དུ་གསོལ། །རྣལ་འབྱོར་བདུད་རྩི་རོ་གཅིག་གསོལ་བས་ཐུགས་ནི་རྣམ་པར་དག་པ་སྟེ། །གནས་ལ་སོགས་པའི་ཡུལ་དུ་བགྲོད་པས་སྐུ་ནི་རྣམ་པར་དག་པ་ཡིས། །དཔལ་ལྡན་གནས་ཀྱི་དབུས་ཀྱི་དཀྱིལ་འཁོར་འཁོར་ལོ་མཆོག་གི་མགོན་པོ་ནི། །བླ་མ་མཆོག་ལ་རྟག་ཏུ་མགོ་བོས་བཏུད་དེ་གུས་པས་ཕྱག་འཚལ་ལོ། །དཔའ་བོ་ཀུན་གྱི་སྐུ་ནི་རྟག་ཏུ་མཛེས་པ་སྟེ། །ལྷ་མོ་རྣམས་ཀྱི་རིན་ཆེན་སྐུ་ཡིས་འཁྱུད་པས་བརྒྱན། །འཁོར་ལོར་གནས་མགོན་ལྷན་ཅིག་སྐྱེས་དགའ་དྲི་མེད་པའི། །རྣལ་འབྱོར་སྙིང་པོ་བདེ་མཆོག་ལ་ཡང་རྟག་ཕྱག་འཚལ། །སངས་རྒྱས་ཀུན་མཁྱེན་ཤིན་ཏུ་རྣམ་པར་དག་པའི་གནས། །ལྷ་མོ་རྣམས་ནི་ལྷན་ཅིག་སྐྱེས་པའི་གནས་ཀྱིས་མཛེས། །འདྲེན་པ་ལྷན་ཅིག་སྐྱེས་པའི་དགའ་བ་འབྱུང་བ་སྟེ། །དྲི་མེད་ལྷན་ཅིག་སྐྱེས་པ་མཆོག་ལ་བདག་ཕྱག་འཚལ། །ཚིགས་བཅད་གསུམ་གྱིས་ཡང་དག་བསྟོད། །ཇི་ལྟར་དེ་བར་ཕྱག་ཀྱང་བཙལ། །
17b
ཡིད་སྤྲོ་ཇི་ལྟར་བདེ་བར་ནི། །ཅ་ཅོའི་སྤྲོ་བ་ཆེན་པོ་ཡིས། །མེ་ཏོག་ཕྲེང་རྣམས་ཀྱིས་བརྒྱན་ཅིང ། །སྣ་ཚོགས་མེ་ཏོག་གིས་མཆོད་ལུས། །ཆང་གི་སྟོན་མོའི་དགའ་བཅས་པས། །རྡོ་རྗེའི་གླུས་ནི་དགའ་བར་བྱ། །མཆོག་ཏུ་དགའ་བས་གར་བྱ་ཞིང ། །གནས་ཀྱི་མཚན་མའི་སྟངས་སྟབས་གར། །ཕྱག་རྒྱ་སྔགས་ཀྱིས་གར་བྱའོ། །དེར་ནི་པ་ཊ་ཧ་སོགས་དང ། །ཅང་ཏེའུ་དང་ནི་བཀྲ་ཤིས་རྔ། །རྔ་རིང་ལ་སོགས་སྣ་ཚོགས་པའི། །རོལ་མོ་ཡིད་འོང་བསྒྲག་པར་བྱ། །ཧེ་རུ་ཀ་བཅས་དབང་པོ་དང ། །རྣལ་འབྱོར་མ་མཆོག་གཡོན་པ་སྟེ། །དེ་རྗེས་ཚོགས་ཀྱི་གཙོ་བོ་ཡིས། །ཡོན་བདག་གི་ནི་དགེ་བ་བསམ། །རྣལ་འབྱོར་རྣལ་འབྱོར་མ་འདུས་པས། །སྐད་ཅིག་ཤིས་པ་བརྗོད་པ་སྦྱིན། །བདེ་བ་ཕུན་ཚོགས་ལྡན་པ་དང ། །ནད་མེད་པ་དང་དགེ་བའི་སེམས། །འདོད་དང་གྲོལ་སོགས་ཡང་དག་འཐོབ། །དངོས་གྲུབ་ཕུན་སུམ་ཚོགས་པར་འགྱུར། །དཀྱིལ་འཁོར་རྣམ་པར་སྤྲོས་པ་ནི། །ཆོ་ག་བཤད་བཞིན་བསྡུ་བར་བྱ། །ལྷག་མའི་གཏོར་མ་བསྡུས་ནས་ནི། །འབྱུང་པོ་འཚོལ་བ་རྣམས་ལ་སྦྱིན། །གནས་དང་ཞིང་གནས་རྣལ་འབྱོར་མའི། །ཚོགས་ལ་དྲི་ཞིང་ཚིམ་པར་བྱ། །སྤྱན་དྲངས་དཔའ་བོ་ཐམས་ཅད་ནི། །བདེ་བ་ཆེན་པོར་གཤེགས་སུ་གསོལ། །འདི་ནི་དམ་ཚིག་གི་བརྡའི་ཆོ་ག་རིམ་པར་ཕྱེ་བ་སྟེ་བརྒྱད་པའོ།། །།དེ་ནས་ལག་པ་གཡོན་
18a
༄#། །པའི་བརྡ། །ཅུང་ཟད་ཙམ་ནི་བཤད་བྱ་སྟེ། །སྒྲུབ་པོས་གང་ཞིག་ཤེས་ཙམ་གྱིས། །མྱུར་དུ་དངོས་གྲུབ་འགྱུར་བའོ། །གང་ཞིག་སོར་མོ་གཅིག་སྟོན་པ། །དེ་ལ་གཉིས་བསྟན་ལེགས་འོངས་ལན། །གང་ཞིག་གཡོན་པའི་སོར་མོ་བསྡམས། །བདེ་འམ་ཞེས་པའི་རྒྱུར་ཤེས་བྱ། །གང་ཞིག་མིང་མེད་སྟོན་བྱེད་པ། །དེ་ལ་མཐེའུ་ཆུང་བསྟན་པར་བྱ། །གང་ཞིག་གུང་མོ་སྟོན་བྱེད་པ། །དེ་ལ་མཐེ་བོང་བསྟན་པར་བྱ། །གང་ཞིག་སྲིན་ལག་སྟོན་བྱེད་པ། །དེ་ལ་མགྲིན་པ་རབ་བསྟན་བྱ། །གང་ཞིག་པ་ཏི་ས་སྟོན་པ། །དེ་ལ་རྩེ་གསུམ་བསྟན་པར་བྱ། །གང་ཞིག་ནུ་མ་སྟོན་བྱེད་པ། །དེ་ལ་སྐྲ་མཚམས་བསྟན་པར་བྱ། །གང་ཞིག་སོ་ནི་སྟོན་བྱེད་པ། །དེ་ལ་འཁོར་ལོ་བསྟན་པར་བྱ། །གང་ཞིག་ཁྲོ་གཉེར་སྟོན་བྱེད་པ། །དེ་ལ་གཙུག་ཕུད་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་རོལ་པ་བསྟན་པར་བྱ། །བུད་མེད་གང་ཞིག་གཡོན་ནས་འགྲོ་།རྣལ་འབྱོར་མ་རྟག་གཡོན་ནས་ཏེ། །སྐད་ནི་ཆེན་པོས་རབ་ཏུ་སྨྲ། །གཡོན་པའི་ལྟ་བས་རྣམ་བལྟ་ཞིང ། །བུད་མེད་རྣམས་ལ་དགར་སྨྲ་བ། །དེ་ནི་དམ་ཚིག་ལྡན་ཤེས་བྱ། །བུད་མེད་རྣམས་ལ་གསོལ་བཏབ་ན། །རིགས་ཀྱི་ས་བོན་རབ་སྨྲ་ཞིང ། །རིགས་ཀྱི་བྱ་བ་མི་འདོར་ལ། །རང་གི་རིགས་ཀྱི་རིག་པ་ཟློས། །གང་ཞིག་རིག་པ་
18b
རྣམ་པར་འདྲི། །ལག་པ་གཡོན་པས་རང་གི་མགོར། །མགོ་ལ་འཕྲུག་པར་བྱེད་པ་དང ། །སྒྲུབ་པ་པོས་ནི་ཁྱད་པར་དུ། །དེ་ཡི་རང་རིག་དྲན་པར་འགྱུར། །མཁུར་བའམ་ནི་ཀོས་ཀོའམ་སྣ་དག་ཏུ་ནི་སོར་མོ་སྟོན། །ཟུར་གྱི་ལྟ་བས་དུས་རྟག་ཏུ། །རང་གི་རིག་ལ་རྣམ་པར་བལྟ། །བདེན་འབྱུང་འགྲོ་བའི་རྣལ་འབྱོར་མ། །རྙེད་དཀའ་ངེས་པར་དམ་ཚིག་ཅན། །རང་གི་ཁྱིམ་དུ་ཐོད་པ་དང ། །དགྲ་སྟ་རལ་གྲི་རྒྱལ་མཚན་དང ། །འཁོར་ལོ་དང་ནི་རྔ་ཡབ་དང ། །རྩེ་གསུམ་བྲིས་ནས་དགའ་བྱེད་ཅིང ། །རྟག་ཏུ་ཤ་དང་ཆང་ལ་དགའ། །འཇིགས་དང་ངོ་ཚ་འཇོམས་བྱེད་གང ། །མཁའ་འགྲོ་མའི་རིགས་ཡང་དག་འབྱུང ། །ལྷན་ཅིག་སྐྱེས་མ་ཞེས་བྱར་བཤད། །ཡུལ་དང་ཡུལ་དུ་མངོན་པར་སྐྱེ། །སྒྲུབ་པོ་རྣམས་ཀྱིས་རྟག་ཏུ་བསྟེན། །གནས་དང་ཉེ་བའི་གནས་དང་ནི། །དེ་བཞིན་ཞིང་དང་ཉེ་བའི་ཞིང ། །ཚན་དྷོ་ཉེ་བའི་ཚན་དྷོ་ཧ། །འདུས་པ་ཉེ་བའི་འདུས་པ་དང ། །དུར་ཁྲོད་ཉེ་བའི་དུར་ཁྲོད་དེ། །ཛམ་བུའི་གླིང་ན་ཡང་དག་གནས།། གནས་ནི་པུ་ལླི་རར་གྲགས་ཏེ། །དེ་བཞིན་ཛཱ་ལནྡྷཱ་རའང་གནས། །ུ་ཌྱན་དེ་བཞིན་གནས་ཡིན་ཏེ། །དེ་བཞིན་ཨར་བུ་ད་ཡང་གནས། །ཉེ་གནས་གོ་དཱ་བ་རཱི་སྟེ། །དེ་བཞིན་རཱ་མེ་ཤཝ་རིའི་མིང ། །དེ་བི་ཀོ་ཊིར་མངོན་བརྗོད་དང ། །མཱ་ལ་བ་ཡང་ཉེ་བའི་གནས། །ཞིང་ནི་ཀཱ་མ་རཱུའི་མིང་ཅན་ཏེ། །ོ་དྲིར་མངོན་པར་བརྗོད་པའང་ཞིང ། །ཉ་ཞིང་ཏྲི་ཤ་ཀུ་ནི་སྟེ། །ཀོ་ས་
19a
༄#། །ལཱ་ཡང་ཉེ་བའི་ཞིང ། །ཀ་ལིང་ག་དང་ལམ་པཱ་ཀའང ། །དེ་བཞིན་ཚན་དྷོ་ཧ་ཡིན་ཏེ། །ཀཱཉྩི་ཧི་མ་ལ་ཡ་ནི། །ཁྱད་པར་ཉེ་བའི་ཚན་དྷོ་ཧའོ། །འདུས་པ་པྲེ་ཏ་བ་སི་ནི། །གྲི་ཧ་དེ་བ་ཡང་དེ་བཞིན། །སཽ་རཱཥྚ་དང་གསེར་གླིང་གང ། །ཉེ་བའི་འདུས་པ་གཉིས་ཡིན་ནོ། །པ་ཏིལ་པུ་ཏྲ་དུར་ཁྲོད་དེ། །སིན་དྷུའང་དེ་བཞིན་དུར་ཁྲོད་དོ། ། མ་རུ་ཀུ་ལུ་ཏཱ་གཉིས་ནི། །ཉེ་བའི་དུར་ཁྲོད་གནས་སུ་བཤད། །དེ་ལྟར་ཕྱི་རོལ་གནས་སུ་གྲགས། །ནང་གི་གནས་ཉིད་ལུས་སུ་བརྗོད། །རང་ལུས་རྩ་ཡི་གཟུགས་ལ་འདིར། ། གནས་ཀྱི་མིང་དུ་རབ་ཏུ་གྲགས། །དེ་གཟུགས་ལྷ་ཡི་རྣམ་པ་སྟེ། །དེས་ན་ནང་གི་བདག་ཏུ་གནས། །དེ་ཕྱིར་དེ་ཡི་གོང་བུའི་དངོས། །ལུས་འདི་སངས་རྒྱས་ཀུན་མཚུངས་པའོ། ། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ས་ཡིན་ཏེ། །ཉེ་བའི་ཞིང་ནི་འོད་འཕྲོ་བ། །མངོན་དུ་གྱུར་པ་ཚན་དྷོར་ཤེས། །ཉེ་བའི་ཚན་དྷོ་སྦྱང་དཀའ་བའོ། །འདུས་པ་རིང་དུ་སོང་བ་སྟེ། །མི་གཡོ་བར་གྲགས་ཉེ་འདུས་པ། །དུར་ཁྲོད་དེ་བཞིན་ལེགས་བློ་གྲོས། །ཉེ་བའི་དུར་ཁྲོད་ཆོས་ཀྱི་སྤྲིན། །གནས་སོགས་ས་ཡི་རྣམ་དག་པ། །རིམ་པ་ཇི་བཞིན་བཤད་པ་ཡིན། །གནས་དང་ཉེ་གནས་སོགས་བསྟེན་པས། །མི་རྣམས་དྲི་མ་མེད་པར་འགྱུར། །བློ་ལྡན་རྣམ་རྟོག་མེད་པ་ནི། །རྒྱུ་
19b
ཞིང་མཚན་མ་ཡང་དག་བརྟག་།སྣ་ཚོགས་གཟུགས་དང་འཇིགས་གཟུགས་མ། །དྲག་ཅིང་མི་བཟད་དགོད་བརྟགས་ལ། །རང་འདོད་ལྷ་ཡི་རྣལ་འབྱོར་གྱིས། །ཧཱུཾ་གི་སྒྲ་ནི་བསྒྲག་པར་བྱ། །ཐེ་ཚོམ་ཐམས་ཅད་རྣམ་སྤངས་ནས། །སྒྲུབ་པོས་སེང་གེ་བཞིན་དུ་སྤྱད། །མཐོང་ངམ་རེག་ལ་ཐོས་པས་ཀྱང ། །མྱུར་དུ་དངོས་གྲུབ་རབ་འགྲོ་འགྱུར། །འདི་ནི་བརྡ་དང ། །གནས་ལ་སོགས་པའི་བརྡས། ས་རྣམས་ངེས་པར་བསྟན་པའི་རིམ་པ་ཕྱེ་བ་སྟེ་དགུ་པའོ།། །།དེ་ནས་གང་ཞིག་བྲིས་ཙམ་གྱིས། །སྒྲུབ་པོས་དངོས་གྲུབ་ཐོབ་འགྱུར་བའི། ། ཞི་བ་ལ་སོགས་རབ་སྦྱོར་བ། །ཡང་དག་རབ་ཏུ་བཤད་པར་བྱ། །གུར་གུམ་ཙནྡན་བསྲེས་པས་གང ། །ཡར་ངོ་ཡི་ནི་ཚེས་ལ་བྲི། །འཁོར་ལོ་རྩིབས་དྲུག་བྲིས་ནས་ནི། །ཡི་གེ་བདུན་པའི་སྔགས་སྦྱར་ཞིང ། །ཕྱི་རོལ་རྡོ་རྗེའི་ཕྲེང་བས་བསྐོར། །དབུས་སུ་མིང་ནི་རྣམ་སྤེལ་བའོ། །དར་རམ་རས་ནི་གཙང་མ་འམ། །ཡང་ན་ཁམ་ཕོར་ཁ་སྦྱར་ལ། །གསང་སྟེ་ལས་ནི་བྲིས་ནས་ཀྱང ། །སྲད་བུ་དཀར་པོས་དཀྲི་བར་བྱ། །ཁ་དོག་དཀར་པོས་ཤར་བལྟས་ཏེ། །མེ་ཏོག་དཀར་པོས་མཆོད་པར་བྱ། །མདུན་དུ་ཟླ་བའི་དཀྱིལ་འཁོར་གྱི་སྟེང་དུ་བསྒྲུབ་བྱ་གནས་པར་བལྟས་ལ། །བུམ་པ་དཀར་པོ་ཟླ་བའི་བདུད་རྩི་ཆུས་གར་བས་དབང་བསྐུར་བར་བྱའོ། །ཐེ་ཚོམ་མེད་པས་ཐུན་གསུམ་དུ། །ཡི་གེ་བདུན་པའི་སྔགས་བཟླས་ན། །དེ་མ་ཐག་ཏུ་ཞི་བ་དང ། །
20a
༄#། །བདེ་ལེགས་སྐྱིད་དང་ཚེ་རིང་འགྱུར། །རིམས་ནད་དུག་དང་འཚེ་བ་ལ། །ལག་པ་གཡོན་པར་བསྒོམ་བྱ་སྟེ། །འཁོར་ལོ་ཙནྡན་གྱིས་བྲིས་ལ། །མེ་ཏོག་བདུག་པས་མཆོད་པར་བྱ། །བསྒྲུབ་བྱ་ཤར་དུ་ཁ་བསྟན་ཏེ། །མཁས་པ་ཡིས་ནི་སྦྱར་བྱ་བ། །གཏོར་མ་ཆུ་དང་དེ་བཞིན་མེ། །དེ་ཡི་དབུས་སུ་དུར་བའམ། །རྨ་བྱའི་སྒྲོའམ་ཀུ་ཤའི། ཆུས།་ཁྱད་པར་དུ་ནི་དེ་ལ་བྱ་བ། །གསང་སྔགས་འདི་ནི་གཙོ་བོ་མཆོག་།ཞི་སོགས་ཆོ་ག་རིམ་བཞིན་བྱེད། །གུར་གུམ་དྲི་བཟང་བསྲེས་པ་ཡིས། །རྒྱས་པའི་འཁོར་ལོ་བྲི་བྱ་སྟེ། ། སཝཱ་ཧཱའི་ཡི་གེ་དང་སྦེལ་བར། ཁམ་ཕོར་གཉིས་ལ་བྲིས་ནས་ནི། །སྲད་བུ་སེར་པོས་དཀྲི་བྱས་ལ། །མར་དང་སྦྲང་རྩིའི་ནང་དུ་གཞུག་།བྱང་དུ་ཁ་བལྟས་ཐུན་གསུམ་དུ། །ཁ་དོག་སེར་པོ་བསྒོམ་བྱས་ལ། །ཟླ་བའི་དཀྱིལ་འཁོར་སེར་པོ་ལ། །བསྒྲུབ་བྱ་གནས་པར་མཁས་པས་བསམ། །བདུད་རྩི་སེར་པོས་དབང་བསྐུར་ཞིང ། །མེ་ཏོག་སེར་པོས་མཆོད་པར་བྱ། །རྣམ་པར་མི་རྟོག་སེམས་ཀྱིས་ནི། །རྒྱས་པའི་བསམ་པས་བཟླ་བྱ་སྟེ། །ཆེ་གེ་མོ་པུཥྚིཾ་ཀུ་རུ་སཝཱཧཱ། །བཽ་ཥཊ་སྔགས་ཀྱིས་སྤེལ་བར་བྱ། །ནོར་དང་འབྲུ་རྣམས་འཕེལ་བ་དང ། །དཔལ་དང་བཀྲ་ཤིས་མཉམ་པར་འཇུག། ལས་ཀྱི་སྦྱོར་བ་འདི་ཡིས་ནི། །རྒྱས་པར་འགྱུར་ཏེ་གཞན་དུ་མིན། །ཙནྡན་དམར་དང་སེན་རྩི་དང ། །མིང་མེད་
20b
ཀྱི་ནི་ཁྲག་བསྲེས་ཏེ། །རས་སམ་གྲོ་གའི་འདབ་མའམ། ཁམ་ཕོར་སོ་ནི་མ་བཏང་བཟུང ། །ཡི་གེ་ཧོཿ དང་སྤེལ་བ་ཡིས། །འཁོར་ལོ་གཉིས་ནི་མཉམ་པར་བྲི། །སྲད་བུ་དམར་པོས་བཅིངས་ནས་ནི། །མེ་ཏོག་དམར་པོས་མཆོད་པར་བྱ། །མར་དང་སྦྲང་རྩིའི་དབུས་གཞག་ལ། །ནུབ་ཀྱི་ཕྱོགས་སུ་ཁ་བལྟས་ཏེ། ཁ་དོག་དམར་པོར་བསྒོམ་བྱས་ལས། །དཀྱིལ་འཁོར་དམར་པོ་ལ་གནས་པའི། །བསྒྲུབ་བྱ་ཆགས་པར་རྣམ་པར་བསམ། །རྟག་ཏུ་ཡིག་བདུན་འབྱུང་བ་ནི། །རྒྱུན་མི་འཆད་པར་བཟླས་བྱ་སྟེ། །མྱོས་པར་འགྱུར་བས་ཞབས་དྲུང་ལྷུང ། ། དེ་ནི་གྲུབ་པར་རྣམ་པར་བསམ། །གལ་ཏེ་དབང་དུ་འོང་བར་མ་གྱུར་ན་མར་དང ། སྦྲང་རྩི་དང་བྲལ་བའི་འཁྲུལ་འཁོར་སེང་ལྡེང་གི་འདབ་མ་ལ་གདུང་བར་བྱས་ན། གང་སུ་ཡང་རུང་སྐལ་པ་ངན་པའང་སྐལ་པ་བཟང་པོར་འགྱུར་ཏེ། གཞན་དུ་མ་ཡིན་ནོ། །དུར་ཁྲོད་ཀྱི་རས་སམ། ཟླ་མཚན་འཛག་པའི་རས་ལ་རྒྱ་སྐྱེགས་ཀྱི་ཁུ་བ་དང་ལྡན་པས་ཡི་གེ་ཛཿ ཧྲཱི་དང་སྤེལ་བའི་འཁྲུལ་འཁོར་བྲི་བ་འམ། ཁམ་ཕོར་རམ། བུད་མེད་ཀྱི་ཐོད་པ་ལ་གྲུབ་པའི་འཁོར་ལོ་བྲིས་ལ་སྲད་བུ་དམར་པོས་དཀྲིས་ཏེ། མེ་ཏོག་དམར་པོས་མཆོད་ལ། བསྒྲུབ་བྱའི་སྙིང་ག་ནས་ལྕགས་ཀྱུས་བཀུག་ཅིང་མགྲིན་པ་ནས་ཞགས་པས་བཅིང་བར་བྱའོ། །གང་གིས་དེ་ལྟར་བསམས་ཀྱང་བསྒྲུབ་བྱ་ནམ་ཡང་འོངས་པར་མ་གྱུར་ན་སེང་ལྡེང་གི་ཤིང་ལ་
21a
༄#། །མེ་སྦར་ལ་བསྲོས་བས་འཁྲུལ་འཁོར་ཚར་བཅད་པར་བྱ་ཞིང ། ཆེ་གེ་མོ་ཨཱ་ཀཪྵ་ཡེ་ཧྲཱིཿ ཛཿ ཞེས་བྱ་བ་དེས་བསྒྲུབ་བྱ་སྐད་ཅིག་ཙམ་དེ་ཉིད་ལ་དགུག་པར་བྱ་སྟེ། རྐང་པས་དགུག་པ་བླ་ན་མེད་པའོ། །དེ་ནས་གཞན་ཡང་མནན་པ་ཡི། །ཆོ་ག་བླ་མེད་བཤད་པར་བྱ། །རི་མོ་བརྒྱད་བརྒྱད་མཉམ་སྦྱར་བས། །རེའུ་མིག་བཞི་བཅུ་རྩ་དགུ་སྟེ། །མཁས་པས་དེ་ཡི་བར་གྱི་ནི། །རེའུ་མིག་བཅུ་གསུམ་སྟོང་པར་བྱ། །ཟུར་དང་ཟུར་དུ་རིའུ་མིག་དགུ། །གྲཝ་བཞི་ལ་ནི་ཡང་དག་གནས། །གྲཝ་བཞི་ཀུན་གྱི་དབུས་གྱི་ནི། །རིའུ་མིག་སྟོང་པ་ཉིད་བྱས་ལ། །དུར་ཁྲོད་རས་ལ་ཞལ་བཞི་པའི། །སྔགས་ནི་ཡང་དག་སྦྱར་ཏེ་བྲི། །ཡུང་བ་ལྡོང་རོས་བསྲེས་པའི་ཆུས། །འཁོར་ལོ་གཉིས་ལ་བསྒྲུབ་བྱའི་མིང ། །ཡི་གེ་ལཾ་དང་སྤེལ་ཏེ་བྲི། །རི་རབ་བརྒྱད་གནས་བྲིས་པ་ཡིས། །ཁམ་ཕོར་ཁ་སྦྱར་ཉིད་དུ་བྱ། །རི་རབ་སྟེང་དུ་དབང་ཆེན་གྱི། །དཀྱིལ་འཁོར་དབུས་སུ་ལཾ་གྱིས་ནི། །མཚན་ཅིང་སྣ་ཚོགས་རྡོ་རྗེ་ཡིས། ། སྟེང་ནས་མནན་པར་རྣམ་པར་བསྒོམ། །སྲད་བུ་སེར་པོས་རྣམ་པར་དཀྲི། །ཧེ་རུ་ཀ་ནི་ཕྱག་གཉིས་པའི། །རྣམ་པར་བདག་ལུས་ཡང་དག་བསྒོམ། །རྣལ་འབྱོར་པས་ནི་ལྷོར་བལྟས་ཏེ། ། ཁ་དོག་དམར་པོར་རྣམ་པར་བསྒོམ། །བསྒྲུབ་བྱ་རི་རབ་དབུས་གནས་ཤིང ། །རི་རབ་ཀྱིས་ནི་མནན་པར་བསྒོམ། །དེ་སྟེང་སྣ་ཚོགས་རྡོ་རྗེ་ཡིས། །ཡོངས་སུ་མནན་པར་རྣམ་པར་
21b
བསྒོམ། །རང་གི་གནས་སུ་དེ་བྱས་ན། །དགྲ་ཡི་ཁ་ནི་གནོན་པ་དང ། །དཔུང་རྣམས་ཀུན་ཀྱང་གནོན་པར་བྱེད། །དགྲ་ཡི་སྙིང་ཡང་གནོན་པའོ། །ོཾ་སུམྦྷ་ནི་སུམྦྷ་ནི་ཧུཾ་ཧཱུཾ་ཕཊ། ལཾ་ལྷས་བྱིན་སྟཾ་བྷ་ཡ། ཨོཾ་གྲྀཧྞ་གྲྀཧྞ་ཧུཾ་ཧཱུཾ་ཕཊ། ལཾ་ལྷས་བྱིན་སྟཾ་བྷ་ཡ། ཨོཾ་གྲྀཧྞ་པ་ཡ་གྲྀཧྞ་པ་ཡ་ཧུཾ་ཧཱུཾ་ཕཊ། ལཾ་ལྷས་བྱིན་སྟཾ་བྷ་ཡ། ཨོཾ་ཨཱ་ན་ཡ་ཧོ་བིདྱཱ་རཱ་ཛ་ཧུཾ་ཧཱུཾ་ཕཊ། ལཾ་ལྷས་བྱིན་སྟཾ་བྷ་ཡ། སྔར་བཤད་རིམ་བཞིན་འཁོར་ལོ་ནི། །དེ་ཉིད་ཀྱིས་ནི་ངེས་པར་བྲི། །མེ་ཏོག་སེར་པོས་མཆོད་བྱ་སྟེ། །ངག་གནོན་པ་ཡི་མཆོག་ཡིན་ནོ། །རྟག་ཏུ་དུར་ཁྲོད་རས་ལ་ནི། །འཁོར་ལོ་གཉིས་ནི་མངོན་བྲིས་ཏེ། །ཡི་གེ་བཾ་ནི་བསྒྲུབ་བྱ་ཡི། །མིང་དང་སྤེལ་བས་ཁ་བཅིངས་པ། །དབང་ཆེན་དཀྱིལ་འཁོར་དབུས་སུ་ནི། །གའུ་ཁ་སྦྱར་བྱས་པ་ཡིས། །ལུག་གི་སྙིང་གར་བསྒྲུབ་བྱ་ནི། །རབ་ཏུ་ཞུགས་པ་རྣམ་པར་བསམས། །སྔགས་ནི་རྒྱུན་མི་འཆད་པར་བཟླ། །ངེས་པར་ལྐུགས་པ་ཉིད་དུ་འགྱུར། །དེ་ནས་གཞན་ཡང་ངེས་པར་ནི། །བསད་པའི་ཆོ་ག་མཆོག་བཤད་གྲ། །ལན་ཚཝ་སྐེ་ཚེ་ཚ་བའི་མར། །ནིམ་པའི་ལོ་མ་དེ་བཞིན་དུག་།དུར་ཁྲོད་སོལ་བ་དྷ་དུ་ར། །རང་གི་སྡིགས་མཛུབ་ཁྲག་ཀྱང་རུང ། །རྫས་འདི་དག་ནི་སྣག་ཚར་བྱ། །ལྷོ་ཕྱོགས་ཁ་བལྟས་སྦྱོར་བས་ནི། །ཁཝ་ཡི་གཤོག་པའི་སྨྱུ་གུ་ཡིས། །བསྒྲུབ་བྱ་དེ་ཡི་མིང་བཟུང་སྟེ། །ཡི་གེ་ཧཱུཾ་དང་རྣམ་སྤེལ་བའི། །འཁོར་ལོ་གཉིས་ནི་ཡང་དག་བྲི། །
22a
༄#། །ཁྲོ་ཞིང་དྲག་པོའི་ང་རོ་དང ། །གཡོན་བརྐྱང་པ་ཡི་ཞབས་ཀྱིས་ནི། །ཉི་མའི་དཀྱིལ་འཁོར་དབུས་གནས་པ། །བསྐལ་བའི་མེ་འདྲ་ཞལ་རྣམ་འགྱུར། །སྔོ་ཞིང་མི་བཟད་ཧཱུཾ་གི་སྒྲས། །མགུར་ནི་གང་བར་རྣམ་པར་བསྒོམ། །གྱོ་མོ་ཁྲོད་ཀྱི་སར་བསམས་པའམ། །དུར་ཁྲོད་སོལ་བྱ་ཡི་ནི་དབུས། །འདི་ལ་སོགས་པའི་ས་ཕྱོགས་སུ། །བསྒྲུབ་བྱ་གནས་པར་མཁས་པས་བསམ། །རིད་ཅིང་དྲི་མ་དང་བཅས་པ། །གོས་ཧྲུལ་གྱོན་པར་རྣམ་བསམ་སྟེ། །ཡན་ལག་ཀུན་དང་མགོ་བོ་དང ། །སྙིང་ག་དང་ནི་དཔུང་བར་ཡང ། །སྔགས་ཀྱིས་ཕུག་པར་བསམ་པར་བྱ། །བསྒྲུབ་བྱའི་ལུས་ལ་གནས་པའི་ལྷ། །རང་གི་ལུས་ལ་རབ་ཏུ་གཞུག་།ཁྱིམ་སྟོང་ལྟ་བུར་བལྟས་ནས་ནི། །ཕྱག་ན་སྣ་ཚོགས་མཚོན་ཆ་ཅན། །ཁྲོ་བོའི་ཚོགས་ནི་སྤྲོ་བྱས་ལ། །མཚོན་ཆས་གསོད་པར་རྣམ་བསམ་སྟེ། །དུམ་བུ་དྲུག་ཏུ་བཏུབས་ནས་ནི། །ཚིལ་དང་རྐང་དང་ཞག་དང་ཤ་།ཟ་དང་འཐུང་བར་བྱེད་པ་དང ། །དེ་བཞིན་དུ་ནི་ཁྲག་ཀྱང་འཐུང ། །རལ་གྲི་དབྱུག་ཐོ་གཏུན་ཤིང་དང ། །དགྲ་སྟ་འཁོར་ལོ་ཐོ་བ་ཡིས། །བསྒྲུབ་བྱ་ལ་ནི་རྡེག་ཅིང་བཏུབ། །དུམ་བུ་བརྒྱར་ནི་གཤེག་པར་བྱེད། །ཁཝ་དང་འུག་པ་བྱ་རྒོད་དང ། །ཅེ་སྤྱང་སྲིན་པོ་མཁའ་འགྲོ་མ། །དེ་རྣམས་ཁྲོས་པའི་ཡིད་ཀྱིས་ནི། །ཟ་བ་དེང་ནི་འཐུང་བར་བྱེད། །ཡི་གེ་ཧཱུཾ་ཕཊ་དང་སྤེལ་བའི། །སྔགས་དང་དེ་ཡིས་བཟླ་བྱས་
22b
ཏེ། །དཀོན་མཆོག་གསུམ་ལ་གནོད་བྱེད་པའི། །དགྲ་ཡི་ཚོགས་རྣམས་བསད་པར་བྱ། །ེ་མ་ཧོ་གང་ཕྱིར་བསད་པའི་ལས། །བསད་པར་གྱུར་ཀྱང་མ་བསད་དེ། །འཁོར་བའི་རྣམ་པར་རྟོག་པ་ཙམ། །དེ་བཞིན་ཉིད་དུ་ཡིད་ཀྱིས་རྟོགས། །དེ་ནས་ཡི་གེ་ཕཊ་སྤེལ་བའི། །འཁོར་ལོ་གཉིས་ནི་བྲི་བྱས་ཏེ། །བསྒྲུབ་བྱའི་མིང་ནི་ཡང་དག་བླང ། །སྔགས་ཀྱིས་སྦྱར་ཏེ་བྲི་བར་བྱ། །རྟ་དང་མ་ཧེ་མཉམ་ཞོན་པའི། །བསྒྲུབ་བྱ་བལྟས་ཏེ་ཡང་དག་བྲིས། །ཐོད་པ་ཁ་སྦྱར་ནང་བཞག་སྟེ། །སྲད་བུ་སྔོན་པོས་དཀྲི་བར་བྱ། །ཁྲོ་བའི་སེམས་ཀྱིས་ཉི་ཕྱེད་དམ། །མཚན་མོ་དེ་ཡི་ཁྱད་པར་ལ། །རབ་ཏུ་གཏུམ་པས་བཞི་མདོ་འམ། །དུར་ཁྲོད་འཇིགས་པའི་དབུས་སུ་ནི། །གསང་ནས་བརྐོས་ཏེ་གཞུག་པར་བྱ། །སྔར་བཤད་ཆོ་ག་བཞིན་དུ་མཆོད། །རྟ་དང་མ་ཧེ་དག་འཐབས་པས། །དེ་ཡི་མོད་ལ་འབྱེད་པར་བྱེད། །གཉི་ག་ཁྲོ་ཞིང་ཁྲོ་བས་འཇིགས། །གཡུལ་འགྱེད་པ་ཡི་བདག་ཉིད་ཆེ། །ཕན་ཚུན་རྩོད་པ་བྱེད་པས་ནི། །རྣམ་པར་སྡང་འགྱུར་གཞན་དུ་མིན། །ཡི་གེ་ཧཱུཾ་ཕཊ་རྣམ་སྤེལ་བའི། །ཆོ་ག་འདི་ཉིད་ཀྱིས་འདིར་བྲི། །སྔགས་དང་བསྒྲུབ་བྱ་མཉམ་ལྡན་པས། །དུར་ཁྲོད་རས་ལ་བྲིས་ནས་ནི། །ཐོད་པ་ཁ་སྦྱར་ནང་བཞག་སྟེ། །སྲད་བུ་ནག་པོས་དཀྲིས་ནས་ནི། །ཧེ་རུ་ཀར་ནི་བསྒོམས་ནས་སུ། །རོ་བསྲེགས་ས་བརྐོས་སྦ་བར་བྱ། །མདུན་དུ་ཡཾ་ལས་བྱུང་བའི་རླུང ། །གཞུ་ཡི་དབྱིབས་ཅན་
23a
༄#། །དབུས་གནས་ཤིང ། །ཁ་དོག་སྔོན་པོ་རྔ་མོ་ཞོན། །ལྷོ་ཕྱོགས་སུ་ནི་བསྐྱོད་པ་དང ། །ཁྲོ་བོའི་ཚོགས་ཀྱིས་ཁྲིད་པས་ན། །ས་སྟེང་སྨྱོན་པ་བཞིན་དུ་བྱེད། །ཡི་གེ་ཧཱུཾ་ཕཊ་སྦྱར་བ་ཡི། །སྔགས་ནི་རྒྱུན་མི་འཆད་པར་བཟླས། །གང་གི་ཆོ་ག་ཅི་བྱས་པ། །དེ་ཡི་མོད་ལ་སྐྲོད་པར་འགྱུར། །སྒྲུབ་པོ་ལྷོར་བལྟས་ཁྲོས་པ་ཡིས། །ར་ཁྲག་དུར་ཁྲོད་ཐལ་བ་དང ། །དུག་དང་ལན་ཚཝ་འབྲུ་མར་ཆེ། །མྱོས་བྱེད་འདང་མའི་ཁུ་བ་ནི། །སྐེ་ཚེ་མཉམ་པར་ཡང་དག་སྦྱར། །དུར་ཁྲོད་རས་ལ་དེ་བཞིན་དུ། །འཁོར་ལོ་གཉིས་པོ་ཉིད་རིམ་བཞིན། ། ཆོ་ག་རྫོགས་པར་བྲི་བར་བྱ། །བསད་པ་གཤིན་རྗེའི་ལུས་ལ་གནས། །དབྱེ་བ་རྟ་དང་མ་ཧེ་ལ། །བསྐྲད་པ་རྔ་མོ་ལ་གནས་པ། །ཞི་བ་ཟླ་བའི་དཀྱིལ་འཁོར་ལ། །མི་མོ་རྣམས་ཀྱི་སྙིང་གར་དབང ། །རྒྱས་པ་གླང་ཆེན་རྒྱབ་ཏུའོ། །ལྐུགས་པ་ལུག་གི་ལུས་ལ་གནས། །མནན་པ་རི་རབ་དབུས་ཏེ་དགུག་།ཤ་ར་བྷ་ཡི་སེང་གེ་ར་གནས། །འདི་ལྟར་ལས་ནི་བརྟག་པར་བྱ། །ལས་འདི་དག་དང་བྲལ་བའི་ལས། །བསྒྲུབས་ཀྱང་དེས་ནི་མི་འགྲུབ་སྟེ། །བླ་མའི་མན་ངག་མེད་པའི་ལས། །སྟོང་པ་བཞིན་དུ་འབྲས་མེད་འགྱུར། །འདི་ནི་ལས་རབ་འབྱམས་འབྱུང་བ་ཞེས་བྱ་བའི་རིམ་པར་ཕྱེ་བ་སྟེ་བཅུ་པའོ།། །།དེ་ནས་སྔགས་ཀྱི་བཟླས་པ་ཡིས། །མཚན་ཉིད་གསང་བ་བཤད་པར་བྱ། །རི་བོ་ཚང་
23b
ཚིང་རི་སུལ་དང ། །རྒྱ་མཚོ་ཆེན་པོའི་འགྲམ་དང་ནི། །བཞི་མདོ་དང་ནི་འདུན་ཁང་གནས། །དུར་ཁྲོད་དམ་ནི་ཡིད་དགའ་བ། །སྔོན་དུ་དཀྱིལ་འཁོར་བྲིས་ནས་ནི། །ཕྱི་ནས་ལྷ་ཡི་བདག་ཉིད་ཀྱིས། །སྔར་བཤད་ཆོ་གས་ཡང་དག་པར། །སྔོན་དུ་བསྙེན་པ་ལ་སོགས་བྱ། །རི་འམ་རི་བོའི་གནས་སུ་ནི། །སྙིང་པོའི་སྔགས་ནི་བཟླ་བར་བྱ། །ོཾ་ཤྲཱི་བཛྲ་ཧེ་ཧེ་རུ་རུ་ཀ་ཧུཾ་ཧཱུཾ་ཕཊ་སཝཱཧཱ། འབུམ་ཕྲག་གཅིག་ཏུ་བཟླས་ནས་ནི། །བཅུ་ཆ་ཡི་ནི་སྦྱིན་སྲེག་བྱ། །འཇིག་རྟེན་འཇིག་རྟེན་འདས་དངོས་གྲུབ། །མྱུར་དུ་འགྲུབ་སྟེ་གཞན་དུ་མིན། །ཚང་ཚིང་ལྗོན་ཤིང་གཏམས་པར་ནི། ། རྟག་ཏུ་དཀྱིལ་འཁོར་བྲིས་ནས་སུ། །ཉེ་བའི་སྙིང་པོའི་སྔགས་རྟག་ཏུ། །རྒྱུན་མི་འཆད་པར་བཟླ་ཞིང་སྒྲུབ། །ོཾ་ཧྲཱིཿ ཧ་ཧ་ཧུཾ་ཧཱུཾ་ཕཊ། འབུམ་ཕྲག་གསུམ་དུ་བཟླས་ནས་ནི། །བཟླས་བའི་བཅུ་ཆའི་སྦྱིན་སྲེག་བྱ། །ཆར་དབབ་པ་དང་གཏེར་དང་ནི། །ངག་གི་དངོས་གྲུབ་བསྒྲུབ་པར་བྱ། །རི་སུལ་དྲི་མེད་ཆུར་བཅས་པར། །དཀྱིལ་འཁོར་དགེ་བ་བྲིས་ནས་ནི། །རྒྱུན་མི་འཆད་པར་སྔགས་བཟླས་ཏེ། །ཞལ་བཞི་པ་ཡི་གསང་སྔགས་བཟླས། །ོཾ་སུམྦྷ་ནི་སུམྦྷ་ཧུཾ་ཧཱུཾ་ཕཊ། གྲྀཧྞཱ་གྲྀཧྞཱ་ཧུཾ་ཧཱུཾ་ཕཊ། གྲྀཧྞཱ་པ་ཡ་གྲྀཧྞཱ་པ་ཡ་ཧུཾ་ཧཱུཾ་ཕཊ། ཨཱ་ན་ཡ་ཧོ། བིདྱཱ་རཱ་ཛཱ་ཧུཾ་ཧཱུཾ་ཕཊ། རྣལ་འབྱོར་པ་ཡིས་བཞི་འབུམ་བཟླས། །བཅུ་ཆ་ཡི་ནི་སྦྱིན་སྲེག་བྱ། །ཞི་དང་རྒྱས་དང་བཅུད་ཀྱིས་ལེན། །དེ་བཞིན་སེམས་ཅན་དོན་སྒྲུབ་པའོ། །རྒྱ་མཚོ་ཆེན་
24a
༄#། །པོའི་འགྲམ་སོང་ནས། །དཀྱིལ་འཁོར་ཡང་དག་བྲིས་ནས་ནི། །ལྷ་མོའི་སྔགས་ནི་ཁྱད་པར་དུ། །འབུམ་ཕྲག་གསུམ་ནི་བཟླས་ནས་སུ། །ཇི་སྐད་གསུངས་བཞིན་ཆོ་ག་ནི། །རྫོགས་པས་བཅུ་ཆའི་སྦྱིན་སྲེག་བྱ། །ོཾ་བཛྲ་བཻ་རོ་ཙཱ་ནཱི་ཡེ་ཧཱུཾ་ཧཱུཾ་ཕཌ་སཝཱཧཱ། འཇིག་རྟེན་དངོས་གྲུབ་ཐམས་ཅད་དང ། །དེ་བཞིན་མཁའ་སྤྱོད་དངོས་གྲུབ་བོ། །དུར་ཁྲོད་དུ་ནི་སྔར་བཤད་པའི། །ཆོ་གའི་རིམ་པས་དཀྱིལ་འཁོར་བྲི། །ཡི་གེ་བདུན་པའི་གསང་སྔགས་ནི། །འབུམ་ཕྲག་གསུམ་དུ་བཟླས་ལ་སྒྲུབ། །བཅུ་ཆའི་སྦྱིན་སྲེག་བྱས་ནས་ལས། །རྣམ་པར་ངེས་པས་བསྒྲུབ་པར་བྱ། །དབྱེ་བ་དང་ནི་བསྐྲད་པའི་ལས། །ཁྱད་པར་དུ་ནི་བསད་པའི་ལས། །རྡོ་རྗེ་སེམས་དཔས་གང་གསུངས་བཞིན། །བཟླས་པ་ཙམ་གྱིས་འགྲུབ་པར་འགྱུར། ། བཞི་མདོར་དཀྱིལ་འཁོར་བྲིས་ནས་ནི། །མནན་པའི་ཆོ་ག་བསྒྲུབ་པར་བྱ། །མཁའ་འགྲོ་མ་ཡི་གསང་སྔགས་ནི། །ཁྲི་བཟླས་པས་ནི་འགྲུབ་པར་འགྱུར། །ོཾ་ཌཱ་ཀི་ནཱི་ཡེ་ཧུཾ་ཧཱུཾ་ཕཊ། བཅུ་ཆའི་སྦྱིན་སྲེག་བསྒྲུབས་ན་ནི། །འབྱུང་པོ་རོ་ལངས་འགྲུབ་པར་འགྱུར། །གཙུག་ལག་ཁང་ངམ་འདུན་ཁང་དུ། །དཀྱིལ་འཁོར་མཆོག་ནི་བྲི་བར་བྱ། །ལཱ་མའི་སྔགས་ནི་ངེས་པར་ཡང། །འབུམ་ཕྲག་གཅིག་ཏུ་བཟླས་ནས་ནི། །ལྷ་མོ་བཅུ་ཆའི་སྦྱིན་སྲེག་བྱ། །ོཾ་ལཱ་མེ་ཧུཾ་ཧཱུཾ་ཕཊ་སཝཱཧཱ། །མིག་སྨན་དང་ནི་རྐང་མགྱོགས་དང ། །དེ་བཞིན་དབང་དུ་བྱེད་པ་ནི། །
24b
འགྲུབ་པར་འདིར་ནི་ཐེ་ཚོམ་མེད། །དབེན་ཞིང་ཉམས་དགའི་གནས་སུ་ནི། །རྟག་ཏུ་དཀྱིལ་འཁོར་བྲི་བྱས་ལ། །ཁཎྜ་རོ་ཧི་སོགས་སྔགས་ཀྱིས། །ཆོ་ག་སྔོན་བཞིན་བསྒྲུབ་པར་བྱ། །ོཾ་ཁཎྜ་རོ་ཧེ་ཧཱུཾ་ཧཱུཾ་ཕཌ་སཝཱཧཱ། འབུམ་ཕྲག་གཉིས་ནི་བཟླས་ནས་ཀྱང ། །བཅུ་ཆ་ཡི་ནི་སྦྱིན་སྲེག་བྱ། །རྒྱུན་མི་འཆད་པར་སྔགས་བཟླས་ཏེ། །གནོད་སྦྱིན་གནོད་སྦྱིན་མོ་རྣམས་བསྒྲུབ། གཟུགས་ཅན་མ་ཡི་གསང་སྔགས་ནི། །ངེས་པར་འབུམ་ཕྲག་བཞི་བཟླས་ནས། །ལྷ་མོ་བཅུ་ཆའི་སྦྱིན་སྲེག་བྱ། །འགྲུབ་པར་འགྱུར་བར་ཐེ་ཚོམ་མེད། །ོཾ་རཱུ་པི་ཎཱི་ཡེ་ཧུཾ་ཧཱུཾ་ཕཊ་སཝཱཧཱ། མེ་ཏོག་དང་ནི་སྦོས་དང་དྲི། །ལྷ་བཤོས་གཏོར་མ་དེ་བཞིན་ཏེ། །བཟའ་དང་བཏུང་བས་ཁྱད་པར་དུ། །དཀྱིལ་འཁོར་མཆོག་ནི་མཆོད་བྱ་ཞིང ། །གླུ་དང་གར་གྱི་ཁྱད་པར་གྱིས། ། ཕྱག་རྒྱ་སྔགས་ནི་བསྒྲགས་པར་བྱ། །ཡིད་འོང་དམ་ཚིག་རྙེད་ནས་ནི། །ཕྱོགས་སུ་བཞག་ནས་བསྒྲུབ་བྱ་སྟེ། །ལས་ནི་གང་གིས་ཁྱད་པར་གྱིས། །དེ་ཡི་རིགས་སོགས་བརྟག་པར་བྱ།། ལྷ་ཡི་རྣམ་པ་ལ་གནས་ཏེ། །ཆོ་ག་ཇི་བཞིན་བཟླས་ཤིང་མཆོད། །དུས་གང་ཚེ་ན་མི་སྨྲ་ཞིང ། །དེར་ནི་སྔོན་དུ་བསྙེན་པ་བྱ། །མྱོས་བྱེད་གཏོར་མར་མཉམ་ལྡན་པས། །སྔགས་ཀྱི་ནུས་པ་བསྒྲུབ་བྱ་སྟེ། །བརྒྱ་དང་སྟོང་དང་འབུམ་གྱི་བར། །དེར་ནི་གྲངས་ཉིད་མཚོན་པར་བྱ། །གྲངས་མེད་སྔགས་ནི་བཟླས་པ་ཡིས། །བླ་ན་མེད་པའི་དགེ་བ་འབྱུང ། །དེ་དག་ངེས་པར་
25a
༄#། །སྦྱོར་བ་ཡིས། །བསྒྲུབས་ན་དངོས་གྲུབ་ཐོབ་པར་འགྱུར། །འདི་ནི་སྔགས་ཀྱི་བཟླས་པའི་ངེས་པ་བསྟན་པའི་རིམ་པར་ཕྱེ་བ་སྟེ་བཅུ་གཅིག་པའོ།། །། ཡང་དག་ཆོ་ག་གང་གིས་འདིར། །འགྲུབ་པར་ཐེ་ཚོམ་མེད་པ་ཡི། །བཟླས་པའི་ཕྲེང་བའི་མཚན་ཉིད་ནི། །གནོད་སྦྱིན་བདག་པོ་ལེགས་པར་ཉོན། །གསེར་དང་དངུལ་དང་ཟངས་མ་དང། །དེ་བཞིན་ཤེལ་དང་དུང་ལ་སོགས། །ཞི་དང་རྒྱས་པ་དགེ་ལ་སྦྱར། །ཞི་ལ་རིལ་བུ་བརྒྱ་པ་སྟེ། །རིལ་བུ་བརྒྱ་རྩ་བརྒྱད་པ་ནི། །རྒྱས་པའི་ལས་ལ་རབ་བསྔགས་ཏེ། །མཁས་པས་རྒྱལ་སྲིད་ཆེད་དམ་དཔལ། །བདེ་སྤྲོ་ཕུན་སུམ་ཚོགས་ཕྱིར་བཟླས། །དབང་དང་དགུག་པའི་རབ་སྦྱོར་ལ། །གུར་གུམ་ལ་སོགས་དྲིའི་རིལ་བུ། །བྱུ་རུ་ཙནྡན་དམར་པོའི་འབྲུ། །རྟག་ཏུ་རིལ་བུ་ལྔ་བཅུའོ། །རུ་རཀྵ་དང་ལུང་ཏང་འབྲས། །དེ་བཞིན་མི་རུས་རྔ་མོ་དང ། །བོང་བུ་མ་ཧེའི་རུས་པ་ནི། །དྲག་སྤྱོད་ལྐུགས་དང་མནན་པ་དང ། །དབྱེ་བས་དག་ནི་ཚར་བཅད་དང ། །གསད་དང་བསྐྲད་ལ་སྦྱར་བྱ་སྟེ། །ལས་ཀྱི་ཁྱད་པར་ཇི་ལྟ་བར། །བཟླས་པའི་ཕྲེང་བའང་བྱ་བ་ཡིན། །བོང་བུ་རྔ་མོའི་སྤུ་དང་ནི། །ཁཝ་ཡི་སྒྲོ་ནི་བསྲེ་བྱས་ལ། ། མནན་དང་བསྐྲད་པའི་ལས་ལ་ནི། །དེ་ཡི་སྲད་བུས་བརྒྱུ་བར་བྱ། །རྟ་དང་མ་ཧེའི་སྤུ་ཡིས་ནི། །རྣམ་པར་སྡང་ལ་སྲད་བུ་བྱ། །དུར་ཁྲོད་སྐྲ་ཡི་སྲད་བུ་དང ། །ཁྱི་ཡི་སྤུ་ནི་བསྲེ་
25b
བྱ་སྟེ། །དེ་ཡི་སྲད་བུ་དྲག་པོ་ཡི། །ལས་ལ་བསྔགས་ཕྱིར་སྦྱར་བར་བྱ། །དགེ་བའི་ལས་ལ་གཞོན་ནུ་མས། །བཀལ་བའི་སྲད་བུས་བརྒྱུ་བར་བྱ། །ཞི་བ་ལ་ནི་མཛུམ་ལ་བཞག་།རྒྱས་པ་རྟག་ཏུ་གུང་མོ་ཡིས། །མིང་མེད་ཀྱིས་ནི་དབང་ཞེས་གསུངས། །ཐ་མ་ཡིས་ནི་མངོན་སྤྱོད་ཡིན། །མཐེ་བོང་ལྷ་ཡིས་རང་བཞིན་གྱིས། །ལས་ཀུན་ལས་ནི་སྦྱར་བར་བྱ། །རིལ་བུ་དགྲ་བཅོམ་མདོ་འཛིན་ནི། །ཆོས་ཀྱི་དཀྱིལ་འཁོར་ཀྱི་རང་བཞིན་ཏེ། །བཟླས་པའི་ཕྲེང་བའི་ཁྱད་པར་གྱིས། །མཉམ་གཞག་བསྒོམ་ཞིང་བཟླས་པར་བྱ། །རྫོགས་ལྡན་དུས་སུ་གཅིག་བཟླས་པ། །གསུམ་ལྡན་དུས་སུ་གཉིས་འགྱུར་བཟླས། །གཉིས་ལྡན་དུས་ན་སུམ་འགྱུར་བཤད། །རྩོད་དུས་བཞི་འགྱུར་དུ་ནི་བཟླ། །སྔགས་ཀྱི་གྲངས་ནི་བཞི་པོ་ཡིས། །རྒྱུན་མི་འཆད་པར་གསང་སྔགས་བཟླས། །བཟླས་པའི་ཕྲེང་བ་སོགས་བསྡུས་པ། །འདི་ནི་ངག་གི་བཟླས་པ་སྟེ། །ལྷ་ཡི་གཟུགས་སུ་དམིགས་པ་ཡིས། །སྤྲོ་དང་བསྡུ་བའི་བདག་ཉིད་ཅན། །སྔགས་ཀྱི་དེ་ཉིད་བརྡ་ཡིས་ནི། །འགྲོ་དང་འོང་བ་ཡང་དག་བསམ། །མཐའ་གསུམ་ལས་ནི་རྣམ་གྲོལ་བ། །དོན་དམ་དེ་བཞིན་ཉིད་ཀྱི་དོན། །འདི་རྣམས་སྔགས་ཀྱི་བཟླས་པ་ཡི། །ཆོ་གའི་མཚན་ཉིད་གསུངས་པ་ཡིན། །འདི་ནི་སྔགས་ཀྱི་བཟླས་པའི་བགྲང་ཕྲེང་ངེས་པར་བསྟན་པའི་རིམ་པར་ཕྱེ་བ་སྟེ་བཅུ་གཉིས་པའོ།། །།དེ་ནས་གཞན་ཡང་བཤད་བྱ་བ། །ལྷ་ཡི་
26a
༄#། །དཀྱིལ་འཁོར་འབྱུང་བ་སྟེ། །གསང་བ་མཆོག་གི་དགྱེས་པ་ཅན། །དངོས་གྲུབ་ཡོན་ཏན་ཀུན་གྱི་གནས། །འདོད་པའི་ཡོན་ཏན་ཀུན་ཁྱབ་པའི། །ས་ཕྱོགས་མཁས་པས་ཡང་དག་བརྟག་།ཁྲག་འཐུང་ཕྱག་གཉིས་སྦྱོར་ལྡན་པས། །ཕུང་པོ་ལྔ་སོགས་ང་རྒྱལ་བྱ། །ཞལ་བཞི་པ་ཡི་སྔགས་བརྗོད་པས། །ཕྱོགས་ནི་བཅིང་ཞིང་ར་བ་སྟེ། །ོཾ་སུཾ་བྷ་ནི་སུཾ་བྷ་ཧཱུཾ་ཧཱུཾ་ཕཊ། ཤར་དུའོ། །ོཾ་གྲྀཧྞ་གྲྀཧྞ་ཧུཾ་ཧཱུཾ་ཕཊ། བྱང་དུའོ། །ོཾ་གྲྀཧྞ་པ་ཡ་གྲྀཧྞ་པ་ཡ་ཧུཾ་ཧཱུཾ་ཕཊ། ནུབ་ཏུའོ། །ོཾ་ཨཱ་ན་ཡ་ཧོ་བི་དྱ་རཱ་ཛཱ་ཧུཾ་ཧཱུཾ་ཕཊ། ལྷོ་རུའོ། །ཕྱོགས་སུ་སེ་གོལ་བརྡབས་པ་ཡིས། །གདུག་པའི་བདུད་ནི་བསྐྲད་པར་བྱ། །སྙིང་གའི་ཆུ་སྐྱེས་ཧཱུཾ་ཡིག་ལས། །འོད་ཟེར་ཕྲེང་བ་སྤྲོ་བར་བྱ། །དེ་ཡི་སྣང་བས་མདུན་དུ་ནི། །བླ་མ་སངས་རྒྱས་སོགས་བལྟས་ལ། །ཕྱག་བཙལ་མེ་ཏོག་བདུག་སོགས་པས། །མཆོད་དེ་རྗེས་ལ་སྡིག་པར་བཤགས། །དཀོན་མཆོག་གསུམ་ལ་སྐྱབས་འགྲོ་ཞིང ། །བྱང་ཆུབ་སེམས་ནི་རྣམ་པར་བསྐྱེད། །གཞན་ལ་ཕན་པའི་སེམས་ནི་བྱམས་པ་སྟེ། །གཞན་གྱི་སྡུག་བསྔལ་འཇོམས་བྱེད་སྙིང་རྗེ་ཡིན། །གཞན་གྱི་བདེ་བས་ཚིམ་པ་དགའ་བ་སྟེ། །སེམས་ཅན་ཀུན་སྙོམས་བཏང་སྙོམས་རྣམ་པར་བསམ། །ོཾ་སཝཱ་བྷཱ་ཝ་ཤུདྡྷཿ སརྦ་དྷརྨྨཿ སཝ་བྷཱ་ཝ་ཤུདྡྷོ་ཉ་ཧཾ། ཞེས་བྱ་བས། སེམས་ཙམ་ཉིད་ལ་རྣམ་གནས་ཤིང ། །བྱང་ཆུབ་ཚོགས་
26b
ནི་བསྒོམ་པར་བྱ། །ོཾ་ཤཱུ་ནྱ་ཏཱ་ཛྙཱ་ན་བཛྲ་སཝཱ་བྷཱ་ཝ་ཨཏྨ་ཀོ་ཉ་ཧཾ། རྟེན་དང་བརྟེན་པའི་གཟུགས་སུ་ནི། །བཻ་རཾ་བྷ་ལ་སོགས་པ་བསམ། །ཡཾ་ལས་བྱུང་བའི་རླུང་དཀྱིལ་འཁོར། །གཞུ་འདྲ་ཁ་དོག་སྔོན་པོ་སྟེ། །དེ་ཡི་སྟེང་དུ་རཾ་ལས་ནི། །མེ་ཡི་དཀྱིལ་འཁོར་གྱི་ནི་གཟུགས། །ཁ་དོག་དམར་པོ་ཟུར་གསུམ་པ། །རྡོ་རྗེ་རྩེ་གསུམ་གྱིས་མཚན་པའོ། །དེ་ཡི་སྟེང་དུ་བཾ་བྱུང་བའི། ། ཆུ་ཡི་དཀྱིལ་འཁོར་ཟླུམ་པོ་དཀར། །དེ་ཡི་སྟེང་དུའང་ལཾ་བྱུང་བའི། །ས་ཡི་དཀྱིལ་འཁོར་ཟུར་བཞི་པ། །ཁ་དོག་སེར་པོ་གྲཝ་བཞིར་ནི། །དེ་བཞིན་རྡོ་རྗེ་རྩེ་གསུམ་མཚན། །དེ་ཡི་སྟེང་དུ་སུམ་བྱུང་བའི། །ཟུར་བཞི་པ་ནི་རི་རབ་སྟེ། །རིན་ཆེན་བཞི་ཡི་བདག་ཉིད་མཛེས། །རྩེ་མོ་བརྒྱད་ཀྱིས་བརྒྱན་པའོ། །དེ་ཡི་སྟེང་དུ་ཧཱུཾ་བྱུང་བའི། །སྣ་ཚོགས་རྡོ་རྗེ་རྣམ་པར་བསྒོམ། །དེ་ཡི་སྟེང་དུ་པདྨ་ནི། །ལྟེ་བ་གེ་སར་ལྡན་པར་སྒོམ། །དེ་དབུས་ཨཱ་ལི་ཀཱ་ལི་ཡི། །དག་པའི་སྦྱོར་བ་བསྒོམ་པར་བྱ། །དེ་ཡི་དབུས་སུ་ཡི་གེ་ཧཱུཾ། །རྡོ་རྗེ་སེམས་དཔའི་རང་བཞིན་ལས། །ཉི་མའི་དཀྱིལ་འཁོར་དབུས་བཞུགས་པའི། །དཔལ་ཧེ་རུ་ཀ་རྣམ་པར་བསྒོམ། །དཔའ་བོ་ཞལ་གསུམ་ཕྱག་དྲུག་པ། །གཡས་བརྐྱང་པ་ཡིས་གདན་ལ་བཞུགས། །རྩ་བའི་ཞལ་ནི་ནག་པོ་སྟེ། །གཡས་པ་ཀུནད་ལྟ་བུ་སྟེ། །གཡོན་པ་དམར་པོ་ཆེར་འཇིགས་པའོ། །རལ་བའི་ཅོད་པན་གྱིས་བརྒྱན་པའི། །འཇིགས་བྱེད་དང་ནི་དུས་མཚན་དག་།མནན་ཅིང་བདེ་བ་ཆེན་
27a
༄#། །པོས་བཞུགས། །རྡོ་རྗེ་རྣམ་སྣང་མཛད་མས་འཁྱུད། །ཐུགས་རྗེའི་ཆགས་པས་ཤས་ཆེར་དགྱེས། །ཕྱག་གཉིས་རྡོ་རྗེ་དྲིལ་བུ་ནི། །མཉམ་པར་ལྡན་པས་ཡང་དག་འཁྱུད། །གཉིས་པའི་ཕྱག་ནི་མཆོག་གཉིས་ཀྱིས། །གླང་ཆེན་པགས་པ་གོས་སུ་འཛིན། །གཡས་ཀྱི་གསུམ་པས་ཅང་ཏེའུ་ནི། །ཆོས་ཀུན་ངོ་བོ་ཉིད་སྒྲ་སྒྲོགས། །གཡོན་གྱི་ཕྱག་ནི་གསུམ་པ་ཡིས། །ཁ་ཊྭཱཾ་ག་རྟེན་ཐོད་པ་བསྣམས། །ཐོད་པའི་ཕྲེང་བས་ཐོད་དུ་མཛད། །ཟླ་བ་ཕྱེད་པས་རྣམ་པར་བརྒྱན། །དབུ་ལ་སྣ་ཚོགས་རྡོ་རྗེས་མཚན། །རིགས་ཀྱི་བདག་པོ་སོ་ཅོད་པན་མཛད། །ཞལ་ནི་རྣམ་འགྱུར་ཆེར་འཇིགས་པ། །སྒེག་པའི་ཉམས་དང་ལྡན་པའོ། །སྟག་གི་པགས་པའི་ན་བཟའ་ཅན། །མ་མགོ་ཉི་ཤུ་ཕྱེད་ཀྱིས་བརྒྱན། །ལྷ་ནི་ཕྱག་རྒྱ་ལྔ་འཆང་ཞིང ། །གར་གྱི་ཉམས་ནི་དགུ་དང་ལྡན། །དེ་ལ་འཁྱུད་པའི་བཅོམ་ལྡན་མ། །ཞལ་གཅིག་ཕྱག་གཉིས་སྤྱན་གསུམ་མ། །གཅེར་བུ་བནྡྷུ་ཀ་ཡི་མདོག་དུམ་བུས་བརྒྱན་པའི་སྐ་རགས་ཅན། །སྐྲ་གྲེལ་བ་དང་རྣམ་པར་གཙིགས། །ཁྲག་ལ་དགྱེས་ཤིང་འཛག་པའོ། །ཕྱག་གཡོན་འཁྱུད་པས་གདུག་པ་ཡི། །བདུད་སོགས་ཁྲག་ཅན་ཐོད་པ་འཛིན། །གཡས་པ་སྡིགས་མཛུབ་རྡོ་རྗེ་ཅན། བསྐལ་བའི་མེ་འདྲའི་སྐུ་ཆེན་མ། །བྱིན་པ་གཉིས་ནི་མཉམ་འཁྱུད་ཅིང ། །རྟག་ཏུ་བདེ་བ་ཆེར་དགྱེས་
27b
པའོ། །མཁའ་འགྲོ་དེ་བཞིན་ལཱ་མ་དང ། །ཁཎྜ་རོ་ཧཱེ་གཟུགས་ཅན་མ། །དངོས་གྲུབ་ཀུན་གྱི་བདེ་འབྱུང་བ། །པདྨའི་ཕྱོགས་ཀྱི་གནས་སུ་དགོད། །ནག་དང་ལྗང་དང་དམར་བ་དང ། །སེར་སྐྱའི་མདོག་ཅན་སྤྱན་གསུམ་མ། །ཞལ་གཅིག་ཕྱག་ནི་གཉིས་མ་སྟེ། །ཁ་ཊྭཱཾ་ཐོད་པའི་ཕྱག་ལྡན་མ། །གཡས་པས་རྡོ་རྗེ་གྲི་གུག་སྟེ། །གཅེར་བུ་གཡས་བརྐྱང་པ་ཡི་ཞབས། །སྐྲ་གྲོལ་མཆེ་བ་གཙིགས་པའི་ཞལ། །ཕྱག་རྒྱ་ལྔས་ནི་རྣམ་པར་བརྒྱན། །མཚམས་ཀྱི་འདབ་མ་བཞི་ལ་ནི། །བྱང་ཆུབ་སེམས་ལ་སོགས་པའི་སྣོད། །བདུད་རྩི་ལྔ་དང་ལྡན་པ་དང ། །གླུ་དང་གར་གྱི་དགའ་བདེས་མཆོད། །སྒོ་བཞིར་ལྷ་ཚོགས་གནས་པ་སྟེ། །རྟག་ཏུ་ལྷ་རྣམས་བསྒོམ་པར་བྱ། །ཤར་གྱི་སྒོར་ནི་ཁཝ་གདོང་མ། །ཕྱག་གཉིས་སྔོན་མོར་བསྒོམ་པར་བྱ། །བྱང་གི་སྒོར་ནི་འུག་གདོང་མ། །ལྗང་གུ་སྐྲ་ནི་གྲོལ་བའོ། །དེ་བཞིན་ཁྱི་གདོང་མ་ནི་དམར། །ནུབ་ཀྱི་སྒོར་ནི་ཡང་དག་གནས། །ཕག་གདོང་མ་ནི་སེར་མོ་སྟེ། །ལྷོ་སྒོར་ཡི་དྭགས་གདན་ལ་གནས། །མེ་དང་དེ་བཞིན་བདེན་འབྲེལ་དང ། །རླུང་ལྷ་དབང་ལྡན་མཚམས་སུ་ནི། །གཤིན་རྗེ་བརྟན་མ་ཕོ་ཉ་མོ། །གཤིན་རྗེ་མཆེ་བ་འཇོམས་མ་སྟེ། །དེ་བཞིན་ཟུར་གནས་ལྷ་མོ་ནི། །ཡིད་འཕྲོག་གཟུགས་ནི་གཉིས་མ་སྟེ། །ཡི་དྭགས་ལ་གནས་དྲག་མོ་ཆེ། །ཕྱག་རྒྱ་ལྔས་ནི་རྣམ་པ་བརྒྱན་པའོ། །གཡོན་ན་ཐོད་པ་ཁ་ཊྭཱཾ་ག་
28a
༄#། །གཡས་ན་རྡོ་རྗེ་གྲི་གུག་སྟེ། །རྣལ་འབྱོར་མ་ནི་དེ་རྣམས་ཀུན། །དངོས་གྲུབ་ཐམས་ཅད་རབ་སྩོལ་བའོ། །དེ་ནས་གོ་ཆ་གཉིས་ཤེས་ནས། །ཡེ་ཤེས་འཁོར་ལོ་རྣམ་པར་བསྒོམ། །སྔགས་དང་ཕྱག་རྒྱའི་སྦྱོར་བ་ཡིས། །དམ་ཚིག་འཁོར་ལོར་མཉམ་པར་གཞུག་།དེ་ནས་གོ་ཆ་གཉིས་བཤད་པར་བྱ་སྟེ། །ོཾ་ཧ་སྙིང་གར་རོ།། ན་མཿ ཧི་མགོ་བོ་ལའོ། །སཝཱཧཱ་ཧཱུཾ། སྤྱི་གཙུག་ཏུའོ། །བཽ་ཥ་ཊ་ཧེ་ཕྲག་པ་གཉིས་ལའོ། །ཧཱུཾ་ཧཱུཾ་ཧོཿ མིག་གཉིས་ལའོ། །ཕཊ་ཧཾ་ཡན་ལག་ཐམས་ཅད་ལ་སྟེ། །མཚོན་ཆའོ། ། དང་པོ་རྡོ་རྗེ་སེམས་དཔའ་སྟེ། །གཉིས་པ་རྣམ་པར་སྣང་མཛད་བཞུགས། །གསུམ་པ་པདྨ་གར་དབང་སྟེ། །དཔལ་ཧེ་རུ་ཀ་བཞི་པར་གྲགས། །ལྔ་པ་རྡོ་རྗེ་ཉི་མ་ཡིན། ། དྲུག་པ་དེ་བཞིན་རྟ་མཆོག་སྟེ། །གོ་ཆ་དྲུག་པོ་རྣམས་ཀྱིས་བསྲུངས། །ོཾ་བཾ་ནི་རྡོ་རྗེ་རྣམ་སྣང་མཛད་མའོ། །ོཾ་ཧཾ་ཡཾ་ནི་གཤིན་རྗེ་མའོ། །ོཾ་ཧྲཱིཾ་མཾ་ནི་རྨོངས་བྱེད་མའོ།། ཨོཾ་ཧྲཱིཾ་ཧྲཱིཾ་ནི་བསྐྱོད་བྱེད་མའོ། །ོཾ་ཧཱུཾ་ཧཱུཾ་ནི་སྐྲག་བྱེད་མའོ། །ཕཊ་ཕཊ་ནི་གཏུམ་མོ་ལུས་ཐམས་ཅད་ལ་མཚོན་ཆ་སྟེ། ལྟེ་བ་དང ། །སྙིང་ག་དང ། །དེ་བཞིན་དུ་ཁ་དང ། མགོ་བོ་དང ། སྤྱི་གཙུག་ལ་དེ་བཞིན་དུ་ནི་མཚོན་ཆ་ཡིན་ནོ། །ོཾ་ཡོ་ག་ཤུདྡྷཱཿ སརྦ་དྷརྨཱ་ཡོ་ག་ཤུདྡྷོཉཧཾ། ལག་པ་གཡས་པ་དང ། གཡོན་པ་སྙིང་གར་བཞག་སྟེ། པདྨ་
28b
རྒྱས་པའི་གར་བྱའོ། །སྙིང་པོའི་ཕྱག་རྒྱ་ལ་སོགས་ལྷ། །བསྐོར་བ་མཁའ་འགྲོ་དྲ་བའི་སྡོམ། །རྣལ་འབྱོར་འདི་ནི་གཙོ་བོ་མཆོག་།ལྷ་ཡི་རྣལ་འབྱོར་རྣམ་པར་བསྒོམ། །ཆོས་དང་ལོངས་སྤྱོད་རྫོགས་སྤྲུལ་པ། །བདེ་ཆེན་འཁོར་ལོ་སྦྱར་བར་བྱ། །ཉི་ཤུ་རྩ་བཞིའི་རྩ་རྣམས་ནི། །ལུས་ཀུན་དག་པར་བྱེད་པ་སྟེ། །གནས་ནི་ཉི་ཤུ་རྩ་བཞི་ཡིས། །ལུས་ནི་སྡུད་ཅིང་འཛིན་པ་ཡིན། །ལུས་འདི་དཔའ་བོའི་རང་བཞིན་ཏེ། །འདི་དེ་སངས་རྒྱས་ཀུན་མཚུངས་པའོ། །གཉིས་མེད་རྣམ་པའི་རྣལ་འབྱོར་གྱིས། །བསམ་གྱིས་མི་ཁྱབ་གོ་འཕང་བསྟན། །རྗེས་མཐུན་རྣལ་འབྱོར་སེམས་ཀྱིས་ནི། །གོ་འཕང་མཆོག་ནི་བསྒོམ་པར་བྱ། །འདི་ནི་དཔལ་ཧེ་རུ་ཀའི་བསྐྱེད་པའི་རིམ་པར་ཕྱེ་བ་སྟེ་བཅུ་གསུམ་པའོ།། །།དེ་ནས་རྡོ་རྗེ་རྣལ་འབྱོར་མ། །མཆོད་པ་ཡང་དག་རབ་བཤད་བྱ། །གནས་སོགས་བགྲོད་པར་མི་ནུས་ན། །ཕྱི་ཡི་རྣལ་འབྱོར་མ་མཆོད་བྱ། །རང་གི་ཁྱིམ་དུ་རྣལ་འབྱོར་མ། །མཆོད་དེ་སྔོན་དུ་བསྙེན་སོགས་བྱ། །སྔོན་དུ་བསྙེན་པ་མེད་པ་ལས། །དེ་ཡིས་དོན་མེད་ཡོངས་སུ་ངལ། །མར་ངོ་ཡི་ནི་ཚེས་བཅུའམ། །ཡར་ངོ་ཡང་ནི་དེ་བཞིན་ཏེ། །ཁྲུས་དང་གཙང་སྦྲ་སོགས་ལྡན་པས། །དད་པའི་སེམས་ཀྱིས་སྤྱན་དྲངས་ཏེ། །རང་གི་ཁྱིམ་དུ་ཤར་བལྟས་པར། །ཡང་དག་གནས་པས་ལྷ་མོ་མཆོད། །གུར་གུམ་མིག་སྨན་དེ་བཞིན་དུ། །ལི་ཁྲི་ཡིས་ནི་
29a
༄#། །མགོ་ལ་བྱུག་།ལག་པ་རྐང་པ་གདོང་དེ་བཞིན། །བྱུག་པས་བྱུག་ཅིང་མཆོད་པར་བྱ། །མགོ་ལ་མེ་ཏོག་ཕྲེང་བ་དབྱངས། །དྲི་ཞིམ་པ་ཡི་བདུག་པས་བདུག་།གཅིག་དང་གསུམ་དང་བཞི་དང་ལྔ། །ཁྱད་པར་དུ་ནི་བདུན་དང་དགུ། །ཇི་སྲིད་ཉི་ཤུ་བཞི་ཡི་བར། །ཡོན་བདག་ངེས་པར་དད་པ་ཡིས། །བཟའ་དང་མྱོས་བྱེད་བཏུང་བ་དང ། །ཉ་དང་ཤ་ལ་སོགས་ལྡན་པས། །ཕྱག་རྒྱ་བྱིན་གྱིས་བརླབས་ནས་མཆོད། །དཔའ་བོས་བརྡ་ནི་བསྟན་པར་བྱ། །རྡོ་རྗེ་རྣམ་སྣང་མཛད་པའི་ཚོགས། །ལྷ་ཡི་བདག་ཉིད་རྟག་ཏུ་མཆོད། །གཏོར་མའི་བྱ་བ་སྔོན་འགྲོ་བས། །མར་མེ་ལྔ་དང་བཟའ་བ་དབུལ། །གླུ་དང་བསྟོད་པར་རབ་ལྡན་པས། །རྡོ་རྗེ་རྣལ་འབྱོར་མ་རྣམས་མཆོད། །འདིར་ནི་བརྩོན་པས་རྡོ་རྗེ་ལྷ་མོ་རྣམས། །མྱོས་བྱེད་ཤ་ཡིས་རབ་ཏུ་མཆོད་བྱས་ཏེ། །དཔལ་ལྡན་རྡོ་རྗེ་ཐེག་པར་མོས་འགྱུར་དེའི། །དད་པས་སྟོན་མོས་དེ་རྣམས་མཆོད་བྱས་ན། །ཐུགས་ནི་མཉེས་པས་མཆོག་ནི་སྩོལ་འགྱུར་ཏེ། །གང་ཕྱིར་མཆོག་ནི་དེ་ཡི་ལག་ན་གནས། །རྣལ་འབྱོར་མ་ནི་མཆོད་ནས་སུ། །ཞི་རྒྱས་མཚན་མ་བརྟག་བྱ་སྟེ། །གཞོན་ནུ་མ་མཆོད་སྐད་ཅིག་ལ། །དགེ་དང་མི་དགེའི་ལས་འབྲས་བརྟག་།གང་ཞིག་ལག་གཉིས་ཉེད་པ་ན། །ཡིད་ནི་མཉེས་པར་མ་གྱུར་ནས། །དེས་ན་ནད་རྣམས་འཕེལ་བ་དང ། །སྡུག་
29b
བསྔལ་ཐོབ་པ་ཉིད་དུ་འགྱུར། །མཆོད་བྱས་དེ་ཡི་སྐད་ཅིག་ལ། །གད་མོའི་སྒྲ་ནི་ཕྱུང་གྱུར་ན། །ནད་མེད་པ་ནི་མི་འགྲུབ་ཅིང ། །འཆི་བ་ཉིད་དུ་ཐེ་ཚོམ་མེད། །མཆོད་པའི་མོད་ལ་འདུ་བྱེད་ཅིང ། །མིག་གཉིས་ཉེད་པར་བྱེད་ན་ནི། །སྐད་ཅིག་ལ་ནི་འཆི་ཞེས་བརྗོད། །སྒྲུབ་པོས་རྟག་ཏུ་མཆོད་བྱས་པས། །སོ་སོ་སོ་སོར་ཟུང་རེར་ནི། །ཕན་ཚུན་གདོང་ནི་ཕྱོགས་གྱུར་ན། །ཐམས་ཅད་དུ་ནི་རྩོད་འགྱུར་བར། །གཞོན་ནུ་མས་ནི་རྟག་ཏུ་སྟོན། །རྣལ་འབྱོར་མ་ནི་རྒྱབ་ཕྱོགས་བལྟ། །སོ་ཡིས་སེན་མོ་འཆའ་བྱེད་ན། །ཤ་ཡི་བཟའ་བས་མ་ཚིམ་སྟེ། ། སླར་ཡང་ལས་ནི་དགོས་པར་འགྱུར། །བཟའ་དང་བཏུང་བ་ཐམས་ཅད་ཀྱི། །སྟོན་མོས་མཉེས་པར་མ་གྱུར་ན། །མཚོན་ལ་སོགས་པ་གློ་བུར་བའི། །ནད་ནི་འཕྲལ་དུ་སྐྱེ་བར་འགྱུར། ། འདི་ལྟར་གླུ་དང་རོལ་མོ་བྱེད། །ཡང་དང་ཡང་དུ་དགོད་པ་ན། །རྒྱལ་པོ་ཆོམ་རྐུན་འཇིགས་པ་དག་།གཞོན་ནུ་དེ་སྟོན་མཁས་པས་བརྟག་།མྱོས་བྱེད་འཐུངས་ནས་ཡང་དང་ཡང་།། རྣམ་པ་དུ་མས་གར་བྱེད་ན། །དེ་རྣམས་ལ་ནི་ནད་ཆེན་འབྱུང ། །མཆོད་པའི་དུས་སུ་བརྟག་པར་བྱ། །སྟོན་མོའི་བཟའ་བ་ཐམས་ཅད་ནི། །དོར་ནས་ཕྱོགས་སུ་ལྟ་བྱེད་ན། །སྤྱོད་པ་ཉམས་པར་བྱས་པའི་སྐྱོན། །ལྷ་རྣམས་བདག་ལ་འཁྲུགས་པའོ། །ཕན་ཚུན་གཏམ་ལ་འཇུག་པ་དང ། །གལ་ཏེ་ཕན་ཚུན་རྒོད་བྱེད་ན། །གཙོ་བོའི་ཆོ་ག་ཉམས་པར་ནི། །གཞོན་ནུ་དེ་
30a
༄#། །བསྟན་ཤེས་པར་བྱ། །ཟོས་མ་ཐག་ཏུ་སྐྱུག་བྱེད་ན། །སྨྱོ་བའི་ནད་ནི་འབྱུང་བར་སྟོན། །མཛེས་མ་གལ་ཏེ་འགྲོ་བའི་ཆེ། །རྒྱབ་ཀྱི་ཕྱོགས་སུ་ལྟ་བྱེད་ན། །སླར་ཡང་ལས་ནི་དགོས་པ་དང ། །ཡུན་རིང་ཞིག་ན་ནད་འབྱུང་སྟོན། །ས་ལ་རྐང་པས་ཉེད་པ་ན། །གནས་ནི་འཕོ་བའི་དོན་དུ་འགྱུར། །མཆོད་དུས་བབས་པར་གྱུར་ན་ནི། །ཕན་ཚུན་གཡུལ་ནི་འགྱེད་པར་སྟོན། །རྣམ་འགྱུར་འདི་དག་བྲལ་བས་ནི། །མཆོད་པ་འགྲུབ་པར་མཚོན་པར་བྱ། །དེ་བས་བརྩོན་པས་མཆོད་ནས་ནི། །སྒྲུབ་པོས་རྟག་ཏུ་བརྟག་པར་བྱ། །རྡོ་རྗེ་རྣལ་འབྱོར་མ་རྣམས་མཆོད། །འདོད་པའི་འབྲས་བུ་ཀུན་རབ་སྟེར། །འདི་ནི་རྡོ་རྗེ་རྣལ་འབྱོར་མ་མཆོད་པའི་ཆོ་ག་ངེས་པར་བསྟན་པའི་རིམ་པར་ཕྱེ་བ་སྟེ་བཅུ་བཞི་པའོ།། །། དེ་ནས་དེ་ཕྱིར་སྣོད་ཀྱི་ནི། །མཚན་ཉིད་མཆོག་ནི་ཡང་དག་བཤད། །འཇིམ་པའམ་དེ་བཞིན་རུས་སྦལ་སྣོད། །འཁར་བའམ་ཟངས་སམ་ལྕགས་ལས་བྱས། །གསེར་རམ་དངུལ་ལས་བྱས་པའམ། །དུང་ངམ་དེ་བཞིན་ཉ་ཕྱིས་ཏེ། །བལ་པོ་སེའུ་ཡི་འབྲས་བུ་མཆོག་།དེ་བཞིན་གཞན་ཡང་གསར་བྱུང་བ། །རཝ་ལས་བྱུང་དང་ཤིང་སྣོད་སོགས། །གཞན་ཡང་རྡོ་སྣོད་ཁྱད་པར་རོ། །དུམ་བུ་གཅིག་དང་དུམ་བུ་གཉིས། །དེ་བཞིན་གསུམ་དང་བཞི་དང་ལྔ། །དུམ་བུ་དྲུག་དང་དུམ་བུ་བདུན། །དུམ་བུ་བརྒྱད་པར་རབ་ཏུ་གྲགས། །བྲམ་ཟེ་རྒྱལ་རིགས་
30b
རྗེའུ་རིགས་སམ། །དམངས་རིགས་བུད་མེད་རིགས་མཐར་སྐྱེས། །དཀར་དང་དམར་དང་ལྗང་སྐྱ་དང ། །སེར་དང་དེ་བཞིན་སེར་སྐྱ་སྟེ། །ཐལ་བའི་མདོག་དང་མདོག་ངན་དང ། །སྣ་ཚོགས་མདོག་ཏུ་རབ་ཏུ་གྲགས། །ལྷག་པ་དམན་དང་ཐ་མ་སྟེ། །དེ་བཞིན་དབྱིབས་ནི་སྣ་ཚོགས་དབྱེ། །གཤོངས་གཉིས་གླང་པོའི་རྒྱབ་ལྟ་བུ། །དེ་བཞིན་རྡོ་རྗེའམ་ཁཝ་ཡི་རྐང ། །སོ་ནི་ལྗང་དང་སེར་བའམ། །ལྟོ་བའམ་སྲིན་བུས་ཟོས་དེ་བཞིན། །འདི་ཀུན་རྣམ་པར་བལྟས་ནས་ནི། །དེ་ལ་ཡོངས་སུ་བརྟག་པར་བྱ། །ས་གཞི་མཉམ་པའི་ཡུལ་རྣམས་སམ། །ཐང་ངམ་བྱེ་བའི་གཤོངས་དག་ཏུ། །སྔགས་པས་དེར་ནི་སྒྲུབ་བྱས་ལ། །དེ་ཡི་ལྟུང་བ་བརྟག་པར་བྱ། །ལྷོར་བལྟས་བྲམ་ཟེ་འཇིག་པར་འགྱུར། །བདེན་བྲལ་ལྷུང་བས་བ་ལང་དང ། །རིགས་མེད་པ་དང་རིགས་ངན་འཇིག་།རླུང་བལྟས་སྔགས་ནི་འཇིག་པ་སྟེ། །བྱང་དུ་བལྟས་ན་ཕྱུག་པོར་འགྱུར། །དབང་ལྡན་སྔགས་ཀྱི་དངོས་གྲུབ་སྟེ། །བརྟུལ་ཞུགས་རྒྱུན་ནི་ཉམས་པ་མེད། །མེར་བལྟས་ཉེ་བར་འཕྲོག་པ་སྟེ། །དེ་བཞིན་འོག་བལྟས་ཆོམ་རྒུན་མའོ། །སྟེང་བལྟས་གནས་པས་བུད་མེད་འཇོམས། །ལོགས་སུ་ལྷུང་བས་གཏུམ་མོ་སྟེ། །སྣོད་ཀྱི་མཚན་ཉིད་རྣམ་ཤེས་བྱ། །དུམ་བུ་གཅིག་པ་གནས་ལ་དབང ། །དུམ་བུ་གཉིས་པ་དཀྱིལ་འཁོར་དང ། །དུམ་གསུམ་སྒྲུབ་པོའི་དངོས་གྲུབ་འགྱུར། །དུམ་བུ་བཞི་པས་སྔགས་དངོས་གྲུབ། །ལྔ་པ་ཡིས་ནི་
31a
༄#། །ཞི་དང་རྒྱས། །དུམ་དྲུག་སློང་མོ་རྙེད་པར་ཤེས། །དུམ་བུ་བདུན་པས་དབང་དུ་བྱེད། །དངོས་གྲུབ་སྒྲུབ་པ་འབྲས་མེད་ཕྱིར། །དེ་བཞིན་དུམ་བུ་བརྒྱད་པ་སྤང། །བུ་ག་གཅིག་པ་བྲམ་ཟེར་འགྱུར། །བུ་ག་གཉིས་པ་རྒྱལ་རིགས་འགྱུར། །བུ་ག་གསུམ་པ་རྗེའུ་རིགས་ཤེས། །བུ་ག་བཞི་པ་དམངས་རིགས་རྣམས། །བུ་ག་མང་པོའམ་བུ་ག་མེད། །མཁས་པ་ཡིས་ནི་སྤང་བར་བྱ། །བུད་མེད་ཐོད་པའང་མི་བཟུང་སྟེ། །ཁྱད་པར་དུ་ནི་མདོག་ཉམས་དང ། །སོ་མེད་པའམ་སོ་ཉམས་པ། །དགེ་བ་འདོད་པས་བཅང་མི་བྱ། །སོ་ལྗང་བས་ནི་སྡུག་བསྔལ་མང ། །ཁཝ་ཡི་རྐང་འདྲས་རྩོད་པར་འགྱུར། །གཤོང་བུ་གཉིས་པས་རྒུད་པར་འགྱུར། །དེ་བཞིན་གླང་པོའི་རྒྱབ་ཀྱི་ནང ། །དབུས་ཀྱི་གནས་སུ་གཤོང་བུ་བཞི། །འདོད་འཇོའི་བར་ནི་བལྟ་བར་བྱ། །མདུན་ཕྱོགས་སུ་ནི་གཤོང་བུ་གཉིས། །ཡིད་བཞིན་ནོར་བུ་ཞེས་བྱར་བཤད། །དུང་དང་ཀུན་ད་ཟླ་བ་ཡི། །མདོག་མཚུངས་སྣུམ་པ་ཤིས་པར་བལྟ། །སྔགས་རྣམས་ཀུན་གྱི་དངོས་གྲུབ་སྟེར། །སྒྲུབ་པོས་དངོས་གྲུབ་ཐོབ་པར་བྱེད། །ཆེ་ཞིང་མདོག་ནི་སེར་པོའམ། །པདྨ་ལྟ་བུ་པདྨས་མཚན། །རྒྱས་ལ་བསྔགས་པར་གསུངས་པ་སྟེ། །ནོར་ནི་ཕུན་སུམ་ཚོགས་པ་འགྲུབ། །སྣོད་ནི་གང་ཞིག་ཁ་དོག་དམར། །གཞན་ཡང་ཐིག་ལེ་དམར་པོས་མཚན། །རྟག་ཏུ་དབང་དང་དགུག་
31b
པ་ཡི། །དངོས་གྲུབ་སྟེར་སྣོད་མཚན་ཉིད་དོ། །བ་ལང་ཁ་ལྟ་བུ་ཡི་དབྱིབས། །ཤིན་ཏུ་སྲ་ཞིང་མུ་ཏིག་བཅས། །བསད་དང་བསྐྲད་དང་དབྱེ་བ་ལ། །ཁྱད་པར་དུ་ནི་རབ་ཏུ་བསྔགས། ། སྣོད་ནི་རབ་བསྔགས་ཡང་དག་ཐོབ། །འདོད་པའི་འབྲས་བུ་ཀུན་རབ་སྟེར། །གནས་དང་ཞིང་དུ་བགྲོད་ནས་ནི། །སྒྲུབ་པོས་ལྷ་མོ་བསྒྲུབ་པར་བྱ། །མཚན་ཉིད་འདི་དག་ཡོངས་རྫོགས་པ། །བཅངས་ན་དངོས་གྲུབ་འགྲུབ་པར་འགྱུར། །འདི་ནི་སྣོད་ཀྱི་མཚན་ངེས་པར་བསྟན་པའི་རིམ་པར་ཕྱེ་བ་སྟེ་བཅོ་ལྔ་པའོ།། །།དེ་ནས་དེ་ཕྱིར་བདུད་རྩི་ལྔའི། ། སྒྲུབ་པ་ཡང་དག་རབ་ཏུ་བཤད། །ཡང་དག་ཆོ་ག་གང་གིས་ནི། །དངོས་གྲུབ་ཀུན་གྱི་འབྲས་འབྱུང་བའོ། །ཆོ་ག་སྦས་པས་བྲམ་ཟེ་ཡི། །མངལ་ནས་སྐྱེས་ལས་ཡང་དག་བླང ། །དེས་ན་རྣམ་སྣང་མཛད་པའི་མིང ། །གྲགས་ཏེ་དངོས་གྲུབ་ཡང་དག་བཞེད། །ཁ་དོག་ལྗང་ཞིང་རབ་བཟང་ལུས། །མིག་གི་འབྲས་བུ་གནག་པ་ཡི། །རིན་ཆེན་རིགས་མ་རྙེད་ནས་དེའི། ། དྲི་ཆུས་བསངས་ཏེ་བསྒྲུབ་པར་བྱ། །ཡོངས་སུ་རྫོགས་པའི་ལུས་ལྡན་ཞིང ། །ཡན་ལག་མཛེས་གཞོན་པདྨའི་རིགས། །བཟའ་དང་བཏུང་བས་ཡང་དག་མཆོད། །མཁས་པས་མཆོད་ཡོན་ཕུལ་ནས་ནི། །དེ་ཡི་མོད་ལ་སྙོམས་འཇུག་བྱས། །ཕན་ཚུན་གྱི་ནི་ཤུ་ཀྲ་བླང ། །དེས་ན་གར་མཁན་རིགས་མིང་ཅན། །དེ་བཞིན་གཤེགས་པ་དེ་བཞིན་
32a
༄#། །གྲགས། །སྔར་བཤད་པ་ཡི་ཆོ་ག་ཡིས། །དངོས་གྲུབ་ཡོངས་སུ་རྫོགས་བགྲོད་པ། །ཚོས་མཁན་ཞེས་ནི་རབ་གྲགས་པའི། །དང་པོའི་མེ་ཏོག་རབ་ཏུ་བསྔགས། །དམ་ཚིག་ཅན་མའི་གདོལ་པ་མོ། །གལ་ཏེ་རྙེད་ན་རྟག་བསྟེན་བྱ། །ཤ་དང་ཚིལ་དང་དེ་བཞིན་ཁྲག་།མཁས་པ་ཡིས་ནི་གཟུང་བར་བྱ། །སྒྲུབ་པོ་དངོས་གྲུབ་འདོད་པ་ཡིས། །ལྕགས་ཀྱུ་ལྔ་ནི་ཇི་སྙེད་པའམ། །འདིར་ནི་བསད་པ་གཙོར་བཤད་པས། །ཇི་སྟེ་ཡང་དག་རྙེད་ན་གཟུང ། །བ་ལང་ཤ་དང་རྟ་ཤ་དང ། །གླང་པོའི་ཤ་ཡང་དེ་བཞིན་ཏེ། །མི་ཡི་ཤ་དང་ཁྱི་ཡི་ཤ་།མཁས་པ་ཡིས་ནི་གཟུང་བར་བྱ། །རྡོ་རྗེ་སེམས་དཔས་གང་གསུངས་པའི། །སྒྲོན་མ་ལྔ་ཞེས་གྲགས་པའོ། །རྙེད་ནས་ཚེས་བཅུའི་དུས་སུ་ནི། །དངོས་པོ་འདི་དག་ཡང་དག་བསྡུ། །དྲི་ཞིམ་པ་དང་བསྲེས་ནས་ནི། །རབ་ཏུ་གསང་སྟེ་སྦྱར་བར་བྱ། །སྒྲུབ་པ་པོ་ཡིས་གསང་བ་ཡིས། །རིལ་བུའི་རྣམ་པ་ཡང་དག་བྱ།། དེ་ཡི་མོད་ལ་ཡོངས་རྫོགས་པའི། །བཟའ་དང་བཏུང་བའི་ཁྱད་པར་གྱིས། །ཚོགས་ཀྱི་དབུས་སུ་བྱིན་བརླབས་ནས། །ཕྱིས་ནས་ལས་ནི་ཡང་དག་བརྩམ། །སྔགས་བཟླས་དེ་བཞིན་བསམ་གཏན་དང ། །འདོད་པ་ཀུན་གྱི་འབྲས་འབྱུང་ཞིང ། །ལུས་ཀྱི་བཅུད་ཀྱིས་ལེན་དང་ནི། །མཆོག་ཏུ་གྲོལ་བའི་དངོས་གྲུབ་སྟེར། །རྟག་ཏུ་རིལ་བུ་བསྟེན་བྱེད་པ། །
32b
འདོད་པ་ཀུན་གྱི་འབྲས་རབ་སྟེར། །ལས་རྣམས་ཀུན་ལ་རབ་སྦྱར་ན། །མཁའ་སྤྱོད་གོ་འཕང་ཐོབ་པར་འགྱུར། །འདི་ནི་བདུད་རྩི་ལྔ་སྒྲུབ་པ་དེས་པར་བསྟན་པའི་རིམ་པར་ཕྱེ་བ་སྟེ་བཅུ་དྲུག་པའོ།། །།དེ་ནས་དཀྱིལ་འཁོར་བྲི་པ་ཡི། །ཆོ་ག་མཆོག་ནི་ཡང་དག་བཤད། །འདི་ལྟར་འགའ་ཞིག་གསོལ་འདེབས་པའམ། །རང་ཉིད་བསོད་ནམས་འདོད་པ་ཡིས། །དང་པོར་རང་ལྷའི་བདག་ཉིད་ཀྱི། །འཁོར་ལོ་ལ་གནས་སྔོན་བསྙེན་བྱ། །སྔོན་དུ་བསྙེན་པའི་དབང་བྱས་ནས། །དེར་ནི་གཏོར་མ་སྦྱིན་པར་བྱ། །བརྟན་ཞིང་ཟབ་མོའི་ཆོས་ཤེས་པ། །རབ་གནས་གཏོར་མའི་ཕ་རོལ་སོན། །སྦྱིན་སྲེག་དཀྱིལ་འཁོར་དེ་ཉིད་ཤེས། །རིག་པའི་གནས་ནི་ཐམས་ཅད་རིག་།གསང་སྔགས་ཚུལ་ལ་དད་ཅིང་མོས། །གཟུགས་བཟང་བལྟ་ན་སྡུག་པ་དང ། །བླ་མ་ལ་གུས་བརྩེར་ལྡན་ན། །སྡོམ་པ་འབྱུང་བར་རབ་བཤད་བྱ། །གཙུག་ལག་ཁང་དང་མཆོད་རྟེན་གནས། །གནས་ཁང་མདུན་ཁང་ས་ཕྱོགས་གཙང ། །གདོད་ནས་གྲུབ་པའི་དུར་ཁྲོད་དུ། །དེར་ནི་དཀྱིལ་འཁོར་བརྩམ་པར་བྱ། །སྔོན་དུ་ལས་ནི་བྱས་པའི་སར། །བརྐོ་བ་ལ་སོགས་མི་བྱ་སྟེ། །ལག་པས་རེག་ནས་ཧཱུཾ་ཡིག་གི།་སྔགས་བཟླས་པས་ནི་ས་སྦྱང་བྱ། །དཀྱིལ་འཁོར་གྱི་ནི་ས་ཡི་ཆའི། །ཉིས་འགྱུར་ས་ནི་སྦྱང་བར་བྱ། །རང་གི་སེམས་ནི་ཡོངས་དག་པ། །དེ་ཉིད་ཀྱིས་ནི་ས་དག་འགྱུར། །
33a
༄#། །སློབ་དཔོན་སངས་རྒྱས་ཀུན་རང་བཞིན། །ལྷ་ཡི་སྐུ་ཡི་བདག་ཉིད་ཅན། །དཔའ་བོ་རྡོ་རྗེ་དྲིལ་འཆང་བ། །མཁའ་འགྲོར་བཅས་ལ་གསོལ་བ་གདབ། །བློ་ལྡན་རྡོ་རྗེ་གསོར་བྱེད་ཅིང ། །དྲིལ་བུ་འཁྲོལ་བར་བརྩོན་པ་ཡིས། །ལྷ་དང་ལྷ་མིན་གསང་བ་དང ། །རབ་ཏུ་གདུག་པའི་བགེགས་ཚོགས་བསྐྲད། །ང་ནི་དཔལ་ལྡན་སྙིང་རྗེའི་སྟོབས། ། སྲུང་བའི་འཁོར་ལོ་རབ་སྦྱོར་བས། །ལུས་སྲུལ་ལ་སོགས་གང་ཅིའང་རུང ། །བགེགས་ཀྱི་ཚོགས་རྣམས་གཞན་དུ་དེངས། །ཇི་སྟེ་ངས་བསྒོ་སུ་ཞིག་འདའ། །རྡོ་རྗེའི་བདག་པོའི་སྐུ་ཡིས་ནི། །ལུས་གསུམ་ལས་བྱུང་དགས་བྱ་སྟེ། །འདིར་ནི་བརླག་འགྱུར་གཞན་དུ་མིན། །ས་ནི་ཡོངས་སུ་བཟུང་བྱས་ནས། །ར་བས་མཚམས་ནི་བཅིང་བར་བྱ། །ལག་གཡས་དམ་བཅས་ཕྱག་རྒྱ་ཡིས། །ཡི་གེ་བཾ་བྱུང་སའི་ལྷ་མོ། །མདོག་སེར་གསེར་གྱི་བུམ་འཛིན་ལ། །བསྟོད་ནས་རབ་ཏུ་བསྐུལ་བར་བྱ། །ཆེ་གེ་ཞེས་བྱ་བདག་དཀྱིལ་འཁོར། །འདྲི་ལ་ལྷ་མོ་ཁྱེད་དབང་གྱུར། །མེ་ཏོག་བདུག་པ་སོགས་པས་མཆོད། །མཁས་པས་མཆོད་ཡོན་ཕུལ་བྱས་ལ། །བཅོམ་ལྡན་ཁྲོ་མཆོག་རྡོ་རྗེ་ཅན། །དེ་བཞིན་གཤེགས་ལ་གསོལ་བ་གདབ། །རྫོགས་སངས་རྒྱས་རྣམས་དགོངས་སུ་གསོལ། །སློབ་མ་རྣམས་ལ་བརྩེ་བ་དང ། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ལྷན་ཅིག་སྐྱེས་འབྱུང་བའི། །
33b
དཀྱིལ་འཁོར་འདྲི་བར་འཚལ་ལགས་ན། །དེ་བས་བཅོམ་ལྡན་གུས་བདག་ལ། །བཀའ་དྲིན་གནང་བར་མཛད་དུ་གསོལ། །གང་གཞན་གསང་སྔགས་ལྷ་རྣམས་དང ། །འཇིག་རྟེན་སྐྱོང་བའི་ལྷ་རྣམས་དང ། །རྫོགས་པའི་བྱང་ཆུབ་ལ་བརྟེན་པའི། །འབྱུང་པོ་བསྟན་ལ་མངོན་དགའ་བ། །གང་སུ་རྡོ་རྗེའི་སྤྱན་ལྡན་ཀུན། །དཀྱིལ་འཁོར་བདེ་མཆོག་འབྱུང་བ་ཡི། །དཀྱིལ་འཁོར་འདྲི་བར་བགྱིད་ལགས་པས། །བདག་དང་དེ་བཞིན་སློབ་མ་ལ། །རྗེས་སུ་བརྩེ་བ་བསྐྱེད་དུ་གསོལ། །སྲད་བུ་ཡེ་ཤེས་ལྔ་ལྡན་ཞིང ། །ཉི་ཤུ་རྩ་ལྔར་རྣམ་དབྱེ་བས། །ཆོས་ཀུན་ངོ་བོ་ཉིད་ཀྱིས་ནི། །སྲད་བུ་ཕན་ཚུན་བསྒྲིལ་བར་བྱ། །སྒྲུབ་པོས་ཡི་གེ་ཧཱུཾ་བརྗོད་དེ། །བདུད་རྩི་ལྔས་ནི་བྱུག་པར་བྱ། །དཀྱུས་སུ་འཁོར་ལོའི་ཉིས་འགྱུར་ལ། །སྦོམ་སུ་སྒོ་ཡི་ཉི་ཤུ་ཆ། །ཛཿ གྶུམ་བརྗོད་ནས་ལྟེ་བར་ནི། །གཡོན་པའི་ཁུ་ཚུར་གྱིས་བཟུང་ནས། །བློ་ལྡན་ནམ་མཁར་ཐིག་གདབ་སྟེ། །དེ་བཞིན་ས་ལའང་གདབ་པར་བྱ། །གསལ་ཞིང་མཛེས་པར་ལྡན་པ་དང ། །ཚད་ལྡན་གཙང་མའི་སྲད་བུ་ཡིས། །དཔལ་ལྡན་ལྷན་སྐྱེས་འབྱུང་དཀྱིལ་འཁོར། །ཤེས་རབ་ཅན་གྱིས་ཐིག་གདབ་བྱ། །ཁྲུ་ཕྱེད་ལ་སོགས་ནས་བརྩམས་ནས། །ཇི་སྲིད་ཁྲུ་ནི་བརྒྱ་ཡི་བར། །དང་པོར་ཚངས་པའི་ཐིག་ཡིན་ཏེ། །གཉིས་པ་ལ་ནི་ཟུར་ཐིག་གདབ། །ནུབ་དང་ལྷོ་ཡི་གནས་སུ་ནི། །སློབ་དཔོན་ངེས་པར་ཡང་དག་གནས། །ཤར་དང་བྱང་
34a
༄#། །གི་ཕྱོགས་གནས་སུ། །སློབ་མ་གནས་ཏེ་མཉམ་གཞག་པས། །དང་པོར་བཞི་འགྱུར་བདག་ཉིད་དུ། །རེའུ་མིག་གཅིག་ནི་ཐིག་གདབ་བྱ། །དེ་ནས་བརྒྱད་འགྱུར་བདག་ཉིད་དུ། །རེའུ་མིག་གཅིག་གི་ཐིག་རབ་གདབ། །གཞན་ཡང་བརྒྱད་འགྱུར་ཉིད་དུ་ནི། །རེའུ་མིག་གཅིག་ནི་ཐིག་གདབ་བྱ། །དེ་ནས་གཞན་ཡང་ཉིས་འགྱུར་ཉིད།། རེའུ་མིག་གཅིག་ནི་ཐིག་རབ་གདབ། །དེ་ནས་བཞི་འགྱུར་ཉིད་དུ་ནི། །རེའུ་མིག་གཅིག་ནི་ཐིག་གདབ་བྱ། །གཞན་ཡང་ཉིས་འགྱུར་ཉིད་དུ་ནི། །རེའུ་མིག་གཅིག་ནི་ཐིག་རབ་གདབ། །དེ་ནས་མཁས་པས་བཞི་འགྱུར་ཉིད། །རེའུ་མིག་གཅིག་ནི་ཐིག་གདབ་བྱ། །དེ་ནས་གཉིས་འགྱུར་བདག་ཉིད་དེ། །རེའུ་མིག་གཉིས་ནི་ཐིག་གདབ་བྱ། །དེ་ནས་ཕྱེད་ནི་རིམ་གཉིས་བྲི། །འདི་ནི་དཀྱིལ་འཁོར་ཐིག་ཡིན་ནོ། །ཐིག་སྐུད་མཚན་མ་དྲུག་ཅུ་བཞི། །དཀྱིལ་འཁོར་ཐིག་གི་མཚན་ཉིད་དེ། །འཁོར་ལོའི་ཕྱི་རོལ་མཐར་ཐུག་བར། །ཆོ་ག་གསུངས་བཞིན་ཐིག་གདབ་བྱ། །རིན་ཆེན་ལྔ་ཡི་ཕྱེ་མ་འམ། །ཡང་ན་འབྲས་ལ་སོགས་པ་སྟེ། །དཀར་དང་སེར་དང་དེ་བཞིན་དམར། །ལྗང་གུ་ནག་པོའང་དེ་བཞིན་ཏེ། །སློབ་དཔོན་དབང་ལྡན་ཕྱོགས་སུ་ནི། །སོང་སྟེ་མཉམ་པར་གཞག་ནས་སུ། །ལེགས་སྦས་གཡོན་པའི་ཁུ་ཚུར་གྱིས། །རི་མོ་ལྔ་ནི་དགྱེ་བར་བྱ། །ཕན་ཚུན་
34b
བར་དུ་ནས་རེ་ཙམ། །ཤོང་པའི་ཚད་དུ་བྲི་བ་སྟེ། །རི་མོ་སྦོམས་ན་ནད་དུ་འགྱུར། །ཕྲ་བས་ནོར་ནི་ཉམས་པར་འགྱུར། །ཡོན་པོས་འདི་ནི་རྩོད་པར་འགྱུར། །ཆད་པས་འཆི་བ་འབྱུང་བར་འགྱུར། །ཤར་ཕྱོགས་སུ་ནི་དཀར་པོ་ཆེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་དུ་མར་གད་ཡང་དག་ལྡན། །དབུས་ཀྱི་ས་ཡི་ཆ་ཉིད་ནི། །ིནྡྲ་ནཱི་ལ་འོད་འབར་བའོ། །གྲ་ཡི་ཆ་ནི་ཐམས་ཅད་དང ། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་གྱིས་སྤྲས་པར། །མཉམ་པར་བཞག་སྟེ་ཡང་དག་བྲི། །རྡོ་རྗེར་བའི་ནང་དུ་ནི། །དུར་ཁྲོད་བརྒྱད་ཀྱིས་བརྒྱན་པ་སྟེ། །གཏུམ་དྲག་དེ་བཞིན་ཚང་ཚིང་དང ། །རྡོ་རྗེ་འབར་བ་ཀེང་རུས་ཅན། །དབང་ལྡན་དུ་ནི་མི་བཟད་བཞད། །བྱིན་ཟ་རུ་ནི་བཀྲ་ཤིས་མཆོག ། མུན་པ་དྲག་པོ་བདེན་བྲལ་དུ། །རླུང་ཕྱོགས་ཀི་ལི་ཀི་ལིའི་སྒྲ། །ཤར་གྱི་ཤིཪྵ་ཨ་ཤཝཏ་ཤིང ། །ཀང་ཀེལ་ཁྱད་པར་ཙཱུ་ཏའི་ཤིང ། །པ་ཊཱ་དེ་བཞིན་ཀ་རཉྫ། །ལ་ཏཱ་པརྐ་པརྠི་བ། ། དབང་པོ་དེ་བཞིན་སྦྱིན་བྱེད་དང ། །ཀླུ་ཡི་དབང་དང་གཤིན་རྗེའི་བདག་།དབང་ལྡན་དེ་ནས་བྱིན་ཟ་དང ། །སྲིན་པོའི་དབང་པོ་རླུང་གི་བདག་།བཱ་སུ་ཀི་དང་འཇོག་པོ་ཉིད། །ཀརྐོ་ཊ་དང་པདྨ་ཉིད། །པད་ཆེན་ཧུ་ལུ་ཧུ་ལུ་དང ། །རིགས་ལྡན་དང་ནི་དུང་སྐྱོང་ངོ ། །སྒྲོགས་པ་དང་ནི་ཆེར་སྒྲོགས་དང ། །དྲག་དང་གཡོ་དང་བརྟན་དེ་བཞིན། །གང་བ་དང་ནི་དེ་
35a
༄#། །བཞིན་འབེབས། །གཏུམ་པ་འདི་དག་སྤྲིན་དབང་ཕྱུག་།གཞན་ཡང་སྣ་ཚོགས་དུ་མ་ཡི། །ཁཝ་དང་འུག་པ་བྱ་རྒོད་དང ། །ལྕེ་སྦྱང་ལྕེ་སྤྱང་མོ་དང་ནི། །འོལ་བ་དང་ནི་འོལ་བ་མོ། །སེང་གེའི་གདོང་དང་སྟག་གི་གདོང ། །དྲག་ཅིང་འཇིགས་པའི་གདོང་ཅན་མ། །སྤྲུལ་ནི་བ་ལང་མགོ་ཅན་དང ། །གདོང་གཉིས་ལ་སོགས་ཕྱོགས་སུ་རྒྱུ། །ཀེང་རུས་དང་ནི་མདུང་གིས་ཕུག་།འཕྱང་དང་ཕྱེད་ཚིག་པ་དང་མགོ་།ཐོད་པ་བྱིན་པ་མགོ་རྡུམ་དང ། །གཙིགས་པའི་མགོ་དང་རུས་པ་དང ། །རིག་འཛིན་གྲུབ་པ་སྣ་ཚོགས་དང ། །དམ་ཚིག་སྤྱོད་པའི་རྣལ་འབྱོར་པ། །རྣལ་འབྱོར་མ་ཡི་ཚོགས་རྣམས་དང ། །གནོད་སྦྱིན་རོ་ལངས་སྲིན་པོ་སོགས། །ཀི་ལི་ཀི་ལིའི་སྒྲ་ཆེན་བདག། དངོས་གྲུབ་རྫུ་འཕྲུལ་ཡང་དག་པར། །ཐོབ་པའི་སློབ་དཔོན་གྱི་ནི་ཚོགས། །དུར་ཁྲོད་དབུས་སུ་བལྟ་བར་བྱ། །འདི་ནི་དཀྱིལ་འཁོར་གྱི་ཐིག་གདབ་པའི་མཚན་ཉིད་བསྟན་པའི་རིམ་པར་ཕྱེ་བ་སྟེ་བཅུ་བདུན་པའོ།། །།དེ་ནས་སློབ་དཔོན་མཚན་ཉིད་ནི། །ཡང་དག་རབ་ཏུ་བཤད་པར་བྱ། །ཞི་ཞིང་དུལ་བའི་ཆ་ལུགས་ཅན། ། སེམས་ཅན་ཀུན་རབ་མི་འཇིགས་སྟེར། །སྔགས་དང་རྒྱུད་ཀྱི་རབ་སྦྱོར་ཤེས། །བསྟན་བཅོས་རིག་ཅིང་སྙིང་རྗེར་ལྡན། །སེམས་ཅན་ཀུན་ལ་བུ་བཞིན་བལྟ། །ཐམས་
35b
ཅད་དུ་ནི་སྙན་པར་སྨྲ། །སྦྱིན་ལ་སོགས་ལ་རྟག་ཏུ་དགའ། །བསམ་གཏན་རྣལ་འབྱོར་མངོན་པར་བརྩོན། །ཀུན་ལ་མི་འཚེ་བདེན་པར་སྨྲ། །སྙིང་རྗེ་དང་ནི་ཕན་སེམས་ལྡན། །མཉམ་སེམས་དང་ནི་ཕྱག་རྒྱར་ལྡན། །སེམས་ཅན་རྣམས་ཀྱི་མགོན་འགྱུར་ཞིང ། །སེམས་ཅན་བསམ་པའི་ཁྱད་པར་ཤེས། །མགོན་མེད་པ་ནི་རྣམས་ཀྱི་གཉེན། །དབང་པོ་ཡོངས་སུ་རྫོགས་པའི་ལུས། །གཟུགས་དང་ལྡན་ཞིང་བལྟ་ན་སྡུག་།དབང་བསྐུར་དོན་གྱི་དེ་ཉིད་ཤེས། །ཚིག་གསལ་ཡོན་ཏན་རྒྱ་མཚོ་སྟེ། །རྟག་པར་རྒྱུན་ཏུ་གནས་བརྟེན་པ། །དེ་ནི་སློབ་དཔོན་རིག་པར་བྱ། །སློབ་མ་རིགས་བཟང་ཆོས་ལ་སྤྲོ། །སློབ་དཔོན་གྱིས་ནི་ཡང་དག་བསྡུ། །སྙིང་རྗེ་མེད་ཅིང་ཁྲོ་དང་གདུག་།ཁེངས་དང་བརྐམ་ཆགས་རྣམ་གཡེང་ཅན།། དྲག་དང་རྨོངས་དང་སྙོམས་ལས་ཅན། །གཞན་གྱི་སྲོག་ལ་སྙིང་བརྩེ་མེད། །གཞན་གྱི་ནོར་ལ་སྲེད་པ་ནི། །བླ་མས་རྟག་ཏུ་སྤང་བར་བྱ། །བརྟན་ཞིང་དུལ་ལ་བློ་གྲོས་ལྡན། ། བཟོད་ལྡན་དྲང་ཞིང་གཡོ་སྒྱུ་མེད། །མི་དགེ་བཅུ་ནི་ཡོངས་སུ་སྤངས། །སེམས་ཅན་རྣམས་ལ་བྱམས་པར་བལྟ། །འབར་བའི་མེ་དང་དུག་བཞིན་དུ། །གཞན་གྱི་ནོར་ལ་མི་རེག་ཅིང ། །རྟག་པར་རྒྱུན་ཏུ་བླ་མ་མཆོད། །དམ་ཆོས་ལྟ་བར་སྤྲོ་བ་དང ། །རྟག་ཏུ་སྦྱིན་པ་ལ་སོགས་དགའ། །འཇིག་རྟེན་ཕ་རོལ་མངོན་པར་འདོད། །དེ་དག་སློབ་མར་རབ་
36a
༄#། །བསྔགས་ཏེ། །དཀྱིལ་འཁོར་དགེ་བ་བསྟན་པར་བྱ། །ཐལ་མོ་སྦྱར་བ་བྱས་ནས་ནི། །གུས་པའི་ཡིད་ཀྱིས་གསོལ་གདབ་བྱ། །རྣལ་འབྱོར་མ་མཆོག་ཁ་སྦྱོར་བའི། །དཔའ་ཆེན་ཁྱོད་བདག་སྟོན་པ་བས། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །དཔའ་བོ་དཔའ་མོའི་དབང་མོ་དང ། །དེ་བཞིན་ཕག་མོ་ཧེ་རུ་ཀ་།གསང་བའི་གནས་སོགས་ཡང་དག་དགང ། །ལུས་ལ་རྣམ་གནས་བཤད་དུ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་མཛོད། །བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བཤད་པར་བྱ། །རྡོ་རྗེ་གསང་སྔགས་མཐུ་ཡིས་ནི། །མཉམ་མེད་ཡེ་ཤེས་ཡང་དག་ཐོབ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག་།བླ་མ་མཆོད་དང་དེ་བཞིན་བྱམས། །སངས་རྒྱས་ལ་གུས་འགྲོ་ལ་བརྩེ། །རྩ་བའི་ལྟུང་བ་ཡོངས་སྤངས་ཤིང། །སྦོམ་པོའི་ལྟུང་བའང་རྣམ་པར་སྤངས། །སེམས་ཅན་རྣམས་ནི་བསྟེན་པར་བྱ། །ཐེག་པ་དམན་ལ་འདོད་མི་བྱ། །མ་རྒལ་བ་རྣམས་བརྒལ་བར་གྱིས། །མ་གྲོལ་བ་
36b
རྣམས་གྲོལ་བར་གྱིས། །འཁོར་བའི་སྡུག་བསྔལ་གྱིས་དཀྲུགས་པའི། །སེམས་ཅན་དབུགས་ནི་དབྱུང་བར་གྱིས། །བསླབ་པ་དེ་དག་ཡང་དག་ལྡན། །སློབ་མ་རྣམས་ནི་ལྷག་གནས་བྱ། །ཆོ་ག་ཇི་བཞིན་ཁྲུས་དང་ནི། །བསང་བྱས་སོ་ཤིང་སྦྱིན་པར་བྱ། །སྲད་བུ་དམར་པོས་ཁྱད་པར་དུ། །དཔུང་པར་བཅིངས་ཏེ་རྟག་ཏུ་བསྲུང ། །ཡི་གེ་དྷཱིཿ ཡི་སྔགས་བཟླས་པའི། །ཀུ་ཤ་དེ་ལ་རབ་ཏུ་སྦྱིན། །རྨི་ལམ་དགེ་དང་མི་དགེ་བརྟག་།སྐུ་གསུང་ཐུགས་ཀྱི་སྡོམ་པའང་སྦྱིན། །ཡོན་དང་ལྷན་ཅིག་མཉམ་ལྡན་པའི། །མེ་ཏོག་སིལ་མ་རབ་བཟུང་ནས། །དེར་ནི་གདོང་གཡོགས་བཅིངས་ནས་སུ། །དཀྱིལ་འཁོར་དུ་ནི་རབ་ཏུ་གཞུག་།སྐྱེ་བ་སྔོན་བསགས་སྡིག་པ་རྣམས། །དཀྱིལ་འཁོར་མཐོང་བས་བྱང་བར་འགྱུར། །ཀྱེ་ཁྱོད་སུ་ཞེས་དྲི་བྱ་ཞིང ། །བདག་ནི་སྐལ་བཟང་ཞེས་ཀྱང་སྨྲ། །དམ་ཚིག་ཆུ་དང་མནའ་བསྒག་དང ། །མེ་ཏོག་དཀྱིལ་འཁོར་དོར་བ་སྟེ། །གང་དང་གང་དུ་མེ་ཏོག་བབས། །དེ་དང་དེ་ཡི་རིགས་སུ་འགྱུར། །ཆུ་དང་ཅོད་པན་རྡོ་རྗེ་དང ། །དྲིལ་བུ་དང་ནི་མིང་དབང་བསྐུར། །དེ་བཞིན་གཤེགས་ལྔའི་བདག་ཉིད་དབང ། །བརྟུལ་ཞུགས་དང་ནི་ལུང་བསྟན་ཉིད། །རྗེས་གནང་དང་ནི་དབུགས་དབྱུང་དང ། །ཕྱིར་མི་ལྡོག་པའང་སྦྱིན་བྱ་སྟེ། །གདུགས་དང་གདན་དང་རིག་པ་སོགས། །རྡོ་རྗེ་དྲིལ་སོགས་ཡང་དག་ལྡན། །སློབ་དཔོན་དབང་བསྐུར་ཡང་དག་རྫོགས། །བུམ་པ་ལས་ནི་བྱུང་བའོ། །གཉིས་པ་གསང་བ་
37a
༄#། །མཆོག་ཡིན་ཏེ། །གསུམ་པ་ཤེས་རབ་ཡེ་ཤེས་ཡིན། །བཞི་པ་དེ་ལྟར་ཡང་དེ་བཞིན། །དབང་བསྐུར་འདི་དག་ཡང་དག་ལྡན། །དེ་ནི་དམ་ཚིག་ཅན་ཞེས་བྱ། །གསང་བ་མཆོག་གི་དཀྱིལ་འཁོར་དུ། །མཆོག་ཏུ་རབ་ཞུགས་མཐོང་བས་ན། །དེང་ཁྱོད་སྡིག་པ་ཐམས་ཅད་ལས། །རྣམ་གྲོལ་བཟང་པོར་གྱུར་བས་གནས། །སངས་རྒྱས་ཀུན་གྱིས་མཉམ་གསུངས་པའི། །རྗེས་གནང་མཆོག་ཏུ་དབུགས་དབྱུང་བ། །དངོས་གྲུབ་དམ་ཚིག་སྡོམ་པ་ནི། །འདི་དག་རྟག་ཏུ་བསྲུང་བར་གྱིས། །སློབ་མ་དད་པའི་སྟོབས་ཀྱིས་ནི། །བླ་མའི་ཞབས་ལ་ཕྱག་བཙལ་ནས། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བགྱི་ཞེས་སྨྲ་བར་བྱ། །དེ་ནས་དེ་བཞིན་གཤེགས་གསུངས་པའི། །སྣ་ཚོགས་རྒྱན་དང་ན་བཟའ་སོགས། །ཁྱད་པར་དུ་ནི་རང་གི་ལུས། །བླ་མ་ལ་ནི་ཡོན་དུ་དབུལ། །དབང་བསྐུར་གཙོ་བོ་ཐོབ་པས་ནི། །བྱ་བ་བྱས་པའི་བློ་ཆེན་གྱིས། །གཞན་ཡང་རབ་དགས་འདི་སྐད་དུ། །སྨྲ་ཞིང་མཇུག་ནི་རྫོགས་པར་བྱ། །དེང་དུས་བདག་ཚེ་འབྲས་བུ་ཡོད། །བདག་གི་གསོན་པར་འབྲས་བུར་བཅས། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་པོར་བདག་གྱུར་ཏོ། །སྦྱིན་སྲེག་གིས་ན་རྫོགས་བྱས་ཤིང ། །དགེ་འདུན་ལ་ནི་སྟོན་མོ་དྲང ། །དེ་ནས་ཚོགས་ཀྱི་འཁོར་ལོ་བྱ། །ནད་པའམ་མགོན་མེད་རྣམས་ལའང་
37b
སྦྱིན། །ཕྱི་ནས་མན་ངག་ཇི་བཞིན་དུ། །དམ་ཚིག་སྤྱོད་པ་ལ་བརྩོན་པས། །སྣོད་དུ་བྱས་པའི་རྒྱུན་གྱིས་ནི། །འཁོར་ལོ་ལ་སོགས་སྒོམ་པའི་རིམ། །ཡང་དག་མན་ངག་ཕུན་ཚོགས་པས།། དངོས་གྲུབ་འགྱུར་གྱི་གཞན་དུ་མིན། །འདི་ནི་དབང་བསྐུར་བའི་རིམ་པར་ཕྱེ་བ་སྟེ་བཅོ་བརྒྱད་པའོ།། །།དེ་ནས་འཆི་བར་ངེས་པ་ཡི། །མཚན་ཉིད་མཆོག་ཏུ་བཤད་པར་བྱ། །རང་གི་ལུས་སམ་ཕྱི་རོལ་གྱི། །ལྟས་ནི་མཁས་པས་བརྟག་པར་བྱ། །རྐང་མཐིལ་དག་ཏུ་ཕུག་སྙམ་དང ། །གང་ཚེ་ལྟེ་བར་ཕུག་སྙམ་འགྱུར། །དེ་ཚེ་ཉིན་ཞག་གསུམ་ཕ་རོལ། །ལྔ་ཡི་གོང་དུ་འགྲོ་བར་འགྱུར། །བཤང་དང་གཅི་བའི་དུས་དག་ཏུ། །དུས་མཚུངས་སྦྲིད་པ་བྱུང་གྱུར་ན། །ལོ་གཅིག་ན་དུས་དེ་ཉིད་ཀྱི། །དུས་ཚོད་ལ་ནི་འཆི་ཞིང་བརླག ། མཚན་ཉིད་མཉམ་པར་སྦྱོར་བ་ཡི། །བར་དང་ཐ་མར་སྦྲིད་པ་ནི། །དུས་མཚུངས་བྱུང་ན་དེ་ཡི་ཚེ། །ཟླ་བ་ན་ནི་ངེས་པར་འཆི། །སྙིང་ག་ལྐོག་མའི་དབུས་དག་ཏུ། །དུས་མཚུངས་གལ་ཏེ་ཟུག་གཟེར་གྱུར། །ཅི་སྟེ་ཆོས་ལ་མི་བརྟན་ན། །ཟླ་བ་ཕྱེད་དང་གཉིས་ན་འཆི། །གལ་ཏེ་མིག་གཡོན་འབྲས་བུ་ཡི། །གཟུགས་བརྙན་མེ་ལོང་ལ་མ་མཐོང ། །ཅི་སྟེ་ཟློག་པར་མི་བྱེད་ན། །ཞག་བདུན་ན་ནི་ངེས་པར་འཆི། །རྣ་རྩེ་དང་ནི་སྨིན་མའི་དབུས། །སྤྱི་བོའི་རྩེ་མོར་ཟུག་པ་སྟེ། །བཞི་པོ་མཚུངས་པར་ཟུག་གྱུར་ན། །དེ་ཆེ་འཕྲལ་དུ་འཆི་བར་འགྱུར། །
38a
༄#། །གློ་བུར་དུ་ནི་ཚོར་གྱུར་ཅིང ། །རིང་དང་ཁྲོ་དང་འཇིགས་པས་འཁྲུགས། །གལ་ཏེ་ཆོས་ནི་མ་བསྟེན་གང ། །དེ་ནི་ལོ་གཅིག་དག་ན་འཆི། །ཡར་ངོ་ཡི་ནི་ཚེས་གཅིག་ལ། །གལ་ཏེ་ཁུ་བ་ནག་པོར་མཐོང ། །དེ་ཚེ་ཟླ་བ་དྲུག་ན་འཆི། །དམར་པོས་ནད་ཀྱིས་འདེབས་པར་སྟོན། །མིག་ལས་རྟག་ཏུ་འཛག་པ་དང ། །གཟུགས་མཐོང་བ་ཡང་རྣམ་འཁྲུལ་དང ། །མེ་ལོང་ངམ་ནི་ཆུར་གང་ཞིག་།རང་གི་གྲིབ་མ་མ་མཐོང་དང ། །མཚན་མོའི་ཚེ་ན་དབང་པོའི་གཞུ། །ཉིན་པར་སྐར་མའི་དཀྱིལ་འཁོར་མཐོང ། །སྤྲིན་མེད་པར་ནི་ལྷོ་ཕྱོགས་སུ། །བརྟེན་པའི་གློག་འགྱུ་མཐོང་བ་དང ། །ཉིན་པར་གྲིབ་མའི་ལམ་དང་ནི། །དེ་བཞིན་སྐར་མདའ་ལྷུང་བ་མཐོང ། །ངང་པ་བྱ་རོག་རྨ་བྱ་ནི། །གཅིག་ཏུ་འདྲེས་པ་མཐོང་བ་དང ། །ཟླ་བ་གཉིས་དང་ཉི་མ་གཉིས། །དེ་བཞིན་རང་གི་མགོ་བོ་འབར། །ཤིང་རྩེ་རི་ཡི་རྩེ་ལ་ནི། །དྲི་ཟའི་གྲོང་ཁྱེར་མཐོང་བ་དང ། །ཡི་དྭགས་ཤ་ཟ་འཇིགས་རུང་བ། །གཞན་དག་ཀྱང་ནི་མཐོང་བ་དང ། །གློ་བུར་དུ་ནི་རབ་འདར་དང ། །ཡང་དང་ཡང་དུ་བརྒྱལ་བ་དང ། །དེ་ཡིས་གཅིག་ཅིག་མཐོང་གྱུར་ནའང ། །ཟླ་བ་གཅིག་གིས་འཆི་བར་འགྱུར། །ཟླ་བར་རི་མེད་པ་དང ། །ཉི་མ་འོད་དང་བྲལ་བ་དང ། །མཚན་མོ་ཉི་མ་ཉིན་པར་ནི། །ཟླ་བ་དེ་བཞིན་རང་མིག་འབར། །སྐར་མ་རི་རབ་དག་གི་ཚད། །རྒྱ་མཚོ་ཆུ་བོ་ལྟ་བུ་དང ། །ཁུ་བ་དང་
38b
ནི་བཤང་གཅི་རྣམས། །དུས་མཚུངས་པར་ནི་འབབ་འགྱུར་ན། །གལ་ཏེ་ཆོས་ལ་མ་བརྟེན་ན། །ཟླ་བ་ཕྱེད་ན་འཆི་བར་འགྱུར། །དེར་ཡང་ཉིན་མོ་གྲིབ་མ་ནི། །སྐྱེ་བོའི་གཟུགས་ཅན་བལྟ་བྱ་སྟེ། །དེ་ཡི་མགོ་བོ་མ་མཐོང་ན། །ལོ་གཅིག་གི་ནི་ནང་དུ་འཆི། །ལག་པ་གཡོན་པ་མ་མཐོང་ན། །བུ་དང་ཆུང་མ་ངེས་བརླག་འགྱུར། །ལག་པ་གཡས་པ་མ་མཐོང་ནའང ། །ཕ་དང་བུ་སོགས་ཚེགས་ཆེན་འཆི། །གཅིན་ནི་རྒྱུན་ལྔར་འགྱུར་བ་དང ། །གཡོན་ནས་འཁོར་ཞིང་དྲི་ང་དང ། །སྐྱུར་པ་ལ་སོགས་གཅིན་བྱུང་ན། །ཟླ་དྲུག་ནང་དུ་འཆི་བར་འགྱུར། །གང་ཞིག་གི་ནི་རྨི་ལམ་མཐར། །བྱེ་མའམ་ཐལ་བའི་ཕུང་པོ་འམ། །ལྷ་ཁང་ངམ་ནི་མཆེད་སྡོང་འཛེག་།དེ་ནི་སྔོན་བཞིན་འཆི་བར་འགྱུར། །གལ་ཏེ་བོང་བུའམ་སྤྲེའུ་ཞོན་ནས། །གྲོག་མཁར་ཕྱག་དར་ཕུང་པོ་ལ། །མངོན་འཛེག་ལྷོ་ཕྱོགས་འགྲོ་བར་ནི། །གང་གིས་རྨི་ལམ་མཐར་མཐོང་ན། །བུད་མེད་གང་ཞིག་གོས་གནག་ཅིང ། །མདོག་གནག་མི་ནི་འདོད་སྤྱོད་པ། །དེ་ནི་དུས་མཚན་ཡིན་ཞེས་བྱ། །གཤིན་རྗེའི་ལྟོ་བར་འགྲོ་བར་འགྱུར། །བྱ་རྒོད་ལྕེ་སྤྱང་ཁྱི་དང་ཁཝ། །དྲེད་དང་ཡི་དྭགས་ཤ་ཟ་ཡིས། །ཟ་བར་རྨི་ལམ་མཐོང་ན་ནི། །ལོ་གཅིག་ན་ནི་ངེས་པར་འཆི། །གོས་ནི་དམར་པོས་གཡོགས་པ་དང ། །ཕྲེང་བ་དམར་པོས་བརྒྱན་པ་དང ། །ཏིལ་མར་གྱིས་བསྐུས་རྨི་ལམ་མཐོང ། །ཟླ་བ་དྲུག་ན་གསོན་མི་འགྱུར། །མན་ངག་ཇི་
39a
༄#། །བཞིན་ལྡན་པ་ཡིས། །འཆི་བ་བླུ་བར་འགྱུར་བ་སྟེ། །དེ་ཉིད་ཀྱིས་ནི་འཆི་ལས་རྒྱལ། །ཆོས་ཀྱིས་འཆི་ལས་རྒྱལ་བ་སྟེ། །རྫོགས་པའི་བྱང་ཆུབ་རིམ་སྒྲུབ་པས། །དེ་བས་ཆོས་ནི་མཆོག་ཏུ་བསམ། །གཞན་ཡང་བསྒོམ་པའི་ཁྱད་པར་ནི། །མཛེས་པས་ཡང་དག་བཤད་པར་བྱ། །དབུགས་ནི་སྐད་ཅིག་འཆད་པ་དང ། །སྣ་ཚོགས་ལྟས་ནི་ཡང་དག་མཐོང ། །འཐོར་དང་དགང་བའི་སྦྱོར་བ་ཡིས། །ལུས་ཀྱི་དཀྱིལ་འཁོར་སྦྱང་བར་བྱ། །འཆི་བའི་དུས་ལ་ཡང་དག་བབ། །འཕོ་བའི་རྣལ་འབྱོར་མཆོག་བྱ་སྟེ། །བུ་ག་དགུར་ནི་སོན་པའི་རྩ། །པཱུ་རི་ཀས་ནི་དགང་བར་བྱ། །རི་ཙ་ཀས་ནི་དབུགས་མནན་བྱ། །ཀུམྦྷ་ཀས་ནི་བསྡམ་བྱས་ཏེ། །བུ་གའི་སྒོ་ནི་སྦྱང་བར་བྱ། །རབ་ཏུ་ཞི་བས་ཞི་བར་འགྱུར། །རྣམ་ཤེས་དཔྲོག་པའི་སྦྱོར་པ་དང ། །གཞན་ཡང་ཕ་རོལ་བགྲོད་པ་ལ། །ཱ་ལི་ཀཱ་ལི་མཉམ་ལྡན་པར། །མཁས་པ་ཡིས་ནི་སྦྱར་བར་བྱ། །སྙིང་གར་ཡི་གེ་ཧཱུཾ་སྦྱར་ཏེ། །ཡི་གེ་ཕྱེད་དང་གཉིས་པོ་ནི། །འོག་དང་སྟེང་དུ་གཞག་པར་བྱ། །དེ་ཡི་འོག་གི་ཆར་རླུང་གི། ས་བོན་འོག་ཏུ་བལྟས་པའོ། །རླུང་གི་ས་བོན་གཉིས་བྱས་ཏེ། །རྣལ་འབྱོར་ལྡན་པས་ཁ་སྦྱར་བྱ། །ཉི་ཤུ་རྩ་གཅིག་རིམ་པ་ཡིས། །ཡི་གེ་ཕྱེད་དང་གཉིས་སྔགས་བརྗོད། །རྣམ་ཤེས་བཞོན་པ་རླུང་ཡིན་ཏེ། །གང་དང་གང་དུ་བགྲོད་པ་ཡིས། །རླུང་གི་སྒོར་ནི་
39b
བསམ་བྱས་ན། །གྲོལ་བའི་དངོས་གྲུབ་སྟེར་བྱེད་པའོ། །མཆོག་དང་ཐ་མའི་དབྱེ་བ་ནི། །བཤད་ཀྱི་གསང་བའི་བདག་པོ་ཉོན། །ལྟེ་བས་འདོད་ཁམས་བདེ་འགྲོ་སྟེ། །ཐིག་ལེ་ལས་ནི་གཟུགས་ཅན་ལུས། །སྟེང་ནས་གཟུགས་མེད་ཁམས་སུ་སྟེ། །དེར་ནི་བདེ་བར་འགྲོ་བྱེད་པའོ། །སྣ་ལས་གནོད་སྦྱིན་རྣམས་སུ་འགྱུར། །རྣ་བ་ལས་ནི་མིའམ་ཅི། །ལྷ་མོ་གལ་ཏེ་མིག་ལས་ནི། །མི་ཡི་རྒྱལ་པོར་འགྱུར་བ་ཡིན། །ཁ་ཡི་སྒོ་ལས་ཡི་དྭགས་རྣམས། །གཅི་ལས་དེ་བཞིན་དུད་འགྲོའོ། །བཤང་ལམ་ནས་ནི་དམྱལ་བར་འགྲོ། །གྲོལ་བ་ལས་ནི་གཞན་དུ་འགྲོ་།དུས་ལ་བབ་ན་འཕོ་བྱ་ཡིས། །དུས་མིན་ལྷ་རྣམས་གསོད་པར་འགྱུར། །ལྷ་རྣམས་བསད་པ་ཙམ་གྱིས་ནི། །མི་ནི་དམྱལ་བར་འཚེད་པར་འགྱུར། །དེས་ན་མཁས་པས་འཆི་བ་ཡི། །མཚན་མ་ཡང་དག་ཤེས་པར་བྱ། །འདི་ནི་འཆི་བའི་ལྟས་ལྟ་བ་དང ། འཕོ་བའི་རྣལ་འབྱོར་རིམ་པར་ཕྱེ་བ་སྟེ་བཅུ་དགུ་པའོ།། །།དེ་ནས་དེ་ཕྱིར་དུས་བཞི་ཡི། །ཚད་ནི་ཡང་དག་རབ་བཤད་བྱ། །གང་ཞིག་རྣམ་པར་ཤེས་ཙམ་གྱིས། །བསྐལ་པ་མྱུར་དུ་ཤེས་འགྱུར་བའོ། །ཉི་ཁྲི་དང་ནི་བརྒྱད་སྟོང་དང ། །ས་ཡ་ཕྲག་གཅིག་བདུན་འབུམ་སྟེ། །དེ་དག་ལ་ནི་རྫོགས་ལྡན་གྱིས། །བསྐལ་པ་ཞེས་ནི་གྲགས་པར་བཤད། །རྫོགས་ལྡན་གསུམ་ལྡན་གཉིས་མཚམས་སུ། །དེ་བཞིན་སྟོང་ཕྲག་
40a
༄#། །བརྒྱད་ཡིན་ནོ། །ས་ཡ་ཕྲག་གཅིག་འབུམ་ཕྲག་གཉིས། །དགུ་ཁྲི་དང་ནི་དྲུག་སྟོང་སྟེ། །གསུམ་ལྡན་བསྐལ་པ་ཞེས་གྲགས་པ། །དེར་ནི་མཁས་པས་ཤེས་པར་བྱ། །གསུམ་ལྡན་གཉིས་ལྡན་པར་མཚམས་སུ། །སྟོང་ཕྲག་དྲུག་ནི་ཤེས་པར་བྱ། །དྲུག་ཁྲི་དང་ནི་བཞི་སྟོང་དང ། །འབུམ་ཕྲག་བརྒྱད་ནི་གཉིས་ལྡན་ཏེ། །བསྟན་བཅོས་ཀུན་ལས་བསྡུས་ནས་ནི། །གཉིས་ལྡན་བསྐལ་པར་ཡང་དག་གྲགས། །གཉིས་ལྡན་རྩོད་པའི་བར་མཚམས་སུ། །དེ་བཞིན་སྟོང་ཕྲག་བཞི་ཡིན་ཏེ། །སུམ་ཁྲི་དང་ནི་ཉིས་སྟོང་དང ། །བཞི་འབུམ་རྩོད་དུས་ཤེས་པར་བྱ། །རྩོད་དུས་རྫོགས་ལྡན་གཉིས་མཚམས་སུ། །སྟོང་ཕྲག་དག་ནི་བཞི་དང་ལྡན། །དེ་རྣམས་དུས་ཤེས་གྲགས་པ་སྟེ། །འགྲུབ་པར་འདིར་ནི་ཐེ་ཚོམ་མེད། །གླིང་བཞི་པ་ཡི་དངོས་པོ་ནི། །མགོན་པོ་ཡིས་ནི་བཤད་དུ་གསོལ། །ཤར་གྱི་ལུས་འཕགས་སྒྲ་མི་སྙན། །དེ་བཞིན་ནུབ་ཀྱི་བ་ལང་སྤྱོད། །གླིང་ནི་གསུམ་པོ་དེ་དག་རྣམས། །འབྲས་བུའི་ས་པར་ཡང་དག་གནས། །ཛམྦུའི་གླིང་དུ་ལེགས་སྐྱེས་པ། །དངོས་གྲུབ་ས་པར་ཤེས་པར་བྱ། །གླིང་གསུམ་པོར་ནི་སྐྱེ་བ་ཡི། །འབྲས་བུ་འབྱུང་བའི་བསོད་ནམས་གནས། །འཛམ་བུའི་གླིང་པས་གྲོལ་པ་དང ། །དངོས་གྲུབ་ཉིད་ནི་སྒྲུབ་པ་སྟེ། །དེ་དག་སྔོན་གྱི་སངས་རྒྱས་ཀྱིས། །གསུངས་
40b
པའི་གླིང་དུ་ཤེས་པར་བྱ། །འདི་ནི་དུས་བཞི་པོ་ངེས་པར་བསྟན་པའི་རིམ་པར་ཕྱེ་བ་སྟེ་ཉི་ཤུ་བའོ།། །།དེ་ནས་སྤྱོད་པ་ཕ་རོལ་སོན། །མཆོག་ནི་ཡང་དག་རབ་བཤད་བྱ། །སྒྲུབ་པོ་དངོས་གྲུབ་རྒྱུ་ཉིད་ཀྱིས། །གང་གིས་དངོས་གྲུབ་མཐར་བགྲོད་པའོ། །ཐུན་མོང་རྣལ་འབྱོར་རྒྱུད་རྣམས་སུ། །གསང་བ་རྣམ་པར་མ་བཤད་པ། །དངོས་གྲུབ་རྣམས་ལས་མཆོག་དངོས་གྲུབ། །བརྟུལ་ཞུགས་རྣམས་ལས་མཆོག་བརྟུལ་ཞུགས། །བླ་མ་དམ་པ་བསྙེན་བཀུར་ནས། །བླ་མེད་རྒྱུད་ནི་མང་ཐོས་ཏེ། །དེ་ཉིད་ཇི་བཞིན་བླ་མ་ཡི། །ཞལ་ལས་ཐོས་ནས་རྟག་ཏུ་སྒོམ། །ནོར་དང་ཆུང་མ་དེ་བཞིན་སྲོག་།སྦྱིན་པ་ཉིད་དུ་གཏང་བར་བྱ། །མདུད་པ་འདི་གསུམ་ལས་གྲོལ་ན། །རྟག་ཏུ་སྤྱོད་པ་སྤྱད་པར་འགྱུར། ། སྤྲོ་བ་ཆེན་པོས་རིག་པ་བཟླས། །དེ་བཞིན་བདེན་པར་སྨྲ་ལ་དགའ། །དམ་བཅས་པ་ལ་རབ་གནས་ཏེ། །ཇི་ལྟར་དད་པས་སྔོན་དུ་བརྩམ། །འདོད་དང་ཁྲོ་བ་འཇིགས་པ་དང ། ། སྲེད་དང་གཏི་མུག་ང་རྒྱལ་སྤང ། །སློབ་མ་བརྟག་དང་བཤད་དེ་བཞིན། །གཞུང་རྣམས་བསྡུ་བ་རྟག་ཏུ་སྤང ། །གཙང་དང་མི་གཙང་དག་བྱེད་དང ། །བཏུང་དང་བཏུང་མིན་བརྟག་མི་བྱ། །སྨད་དང་བསྟོད་ལ་ཁྲོ་བ་དང ། །མངོན་པའི་ང་རྒྱལ་རྣམ་པར་སྤང ། །རྟག་ཏུ་མི་ཆགས་དགའ་མེད་པར། །ཐམས་ཅད་ལ་ནི་མཉམ་པར་གནས། །སྦྱིན་སྲེས་
41a
༄#། །མེད་ཅིང་མཆོད་པ་མེད། །ཕྲེང་བ་མེད་ཅིང་བཟླས་པ་མེད། །ཉི་མ་གཟའ་དང་སྐར་མ་དང ། །ཚེས་གྲངས་ཀྱང་ནི་བརྟག་མི་བྱ། །བདག་གཞན་བདག་ཉིད་གཟུགས་ཀྱི་ནི། །ཐེ་ཚོམ་མེད་པར་གནས་པར་བྱ། །འདོད་བ་མེད་པར་མི་སྤྱད་དེ། །ཀུན་ལ་འདོད་པ་ཅུང་ཟད་སྤྱད། །སྟག་གི་པགས་པ་གོས་སུ་བྱས། །ཕྱག་རྒྱ་ལྔས་ནི་རྣམ་པར་བརྒྱན། ། ཤེས་རབ་ཐབས་བདག་རྣལ་འབྱོར་པས། །ཧེ་རུ་ཀ་དཔལ་རྣམ་པར་བསྒོམ། །ཀུན་ཏུ་བཟང་པོའི་སྤྱོད་པ་ཡིས། །ཡིད་ནི་བདེ་བར་གནས་པར་བྱ། །གྲོང་དུ་མཚན་མོ་གཅིག་གནས་ཤིང ། །གྲོང་ཁྱེར་དུ་ནི་ལྔར་གནས་བྱ། །ཡིད་དང་རྗེས་མཐུན་སྦྱོར་བ་ཡིས། །ས་ཡི་སྟེང་དུ་གནས་པར་བྱ། །ཡང་ན་རླུང་ཞེས་བྱ་བ་ཡིས། །སྤྱོད་པ་བདེ་ཞིང་དགའ་བར་སྤྱད། ། རྟག་ཏུ་གྲོགས་པོ་མེད་པར་རྒྱུ། །གཅིག་པུ་ཡིད་ནི་རྩེ་གཅིག་པས། །སྨྱོན་པའི་བརྟུལ་ཞུགས་ལ་བརྟེན་ནས། །ལོ་མ་རླུང་གིས་བསྐྱོད་བཞིན་འཁྱམ། །དུར་ཁྲོད་དམ་ནི་མཚན་གཅིག་གམ། །ཤིང་གཅིག་གམ་ནི་ནགས་ཚལ་ལམ། །རི་ཡི་རྩེའམ་ཆུ་བོའི་འགྲམ། །རྒྱ་མཚོ་ཆེན་པོའི་འགྲམ་ཡང་རུང ། །སྐྱེད་མོས་ཚལ་ལམ་རི་ཕུག་གམ། །ཁང་བཟང་དམ་ནི་ཁང་སྟོང་ངམ། །བཞི་མདོ་དང་ནི་སྒོ་མདུན་ནམ། །དེ་བཞིན་རྒྱལ་པོའི་ཕོ་བྲང་སྒོར། །གདོལ་པའི་གནས་སམ་ཕྱུགས་ལྷས་སམ། །བཟོ་ཡི་ཁང་པར་སྦས་པས་གནས།།
41b
ཚོང་སྲང་དོར་བའི་མེ་ཏོག་ཕྲེང ། །མེ་ཏོག་རྙིང་པ་གང་ཅི་འང་རུང ། །དུར་ཁྲོད་མཚན་གཅིག་མེ་ཏོག་ཕྲེང ། །དེ་དག་གིས་ནི་ལུས་རབ་མཆོད། །རང་གི་མགྲིན་པར་མེ་ཏོག་ཕྲེང ། །ཁྱད་པར་དུ་ནི་ཚངས་སྐུད་དང ། །སྐ་རགས་དག་ཀྱང་བཅིང་བར་བྱ། །རྐང་པ་གཉིས་ལ་རྐང་གདུབ་བྱ། །སྨྲ་བ་བཟླས་པའི་བདག་ཉིད་གྲགས། །ལག་པ་བསྐྱོད་པ་ཕྱག་རྒྱ་སྟེ། །རྣམ་པར་མི་རྟོག་རབ་སྦྱོར་བས། །རྣལ་འབྱོར་པ་ནི་ཅི་བདེར་གནས། །དོགས་པ་ཐམས་ཅད་རྣམ་སྤང་སྟེ། །སྒྲུབ་པོས་སེངྒེ་བཞིན་དུ་སྤྱད། །ཡང་ན་གཡོ་མེད་བརྟུལ་ཞུགས་ལ། །བརྟེན་ནས་རྣལ་འབྱོར་སྤྱོད་པ་སྤྱད། །སྐྱེད་མོས་ཚལ་ལམ་ཁྱིམ་སྟོང་གནས། །གྲོང་དམན་ངན་པའི་ཁྱིམ་དུ་ནི། །ཇི་སྲིད་ནུས་པ་ཐོབ་དེ་སྲིད། །མི་སྨྲའི་སྦྱོར་བས་གནས་པར་བྱ། །ཇི་ལྟར་གཉིད་ལོག་འགྲོ་དང་འདུག་།སད་དམ་ཡང་ན་མ་སད་པའམ། །ཅི་རྙེད་པ་ཙམ་ཟ་བ་དང ། །མི་བཀྲེས་པ་ནི་བཟང་པོར་གནས། །གལ་ཏེ་སློང་མོས་གནས་པས་ན། །ལག་པའི་སྣོད་དུ་ཟ་ཞིང་གནས། །རྣམ་པར་མི་རྟོག་རང་བཞིན་གྱིས། །འདིར་ནི་འགྲུབ་འགྱུར་ཐེ་ཚོམ་མེད། །གསུམ་པོ་དེ་དག་ནང་ནས་ནི། །གང་འདོད་བརྟུལ་ཞུགས་ལ་བརྟེན་ནས། །ཅུང་ཟད་ནུས་པ་རབ་ཐོབ་པས། །ཇི་ལྟར་འདོད་པའི་སྤྱོད་པ་སྤྱད། །ལུས་ནི་སྦྱིན་པར་བྱིན་ནས་སུ། །ཕྱི་ནས་སྤྱོད་པ་ཡང་དག་བརྩམ། །སྤྱོད་པས་རྒྱུ་བའི་རྣལ་འབྱོར་པ། །ངེས་པར་དྲི་མ་མེད་འགྱུར་བ། །འདི་ལ་འཁྲུལ་
42a
༄#། །བར་མི་བྱ་སྟེ། །སངས་རྒྱས་རྫུ་འཕྲུལ་བསམ་མི་ཁྱབ། །འདི་ནི་སྤྱོད་བ་ངེས་པར་བསྟན་པའི་རིམ་པར་ཕྱེ་བ་སྟེ་ཉི་ཤུ་རྩ་གཅིག་པའོ།། །།དེ་ནས་གཞན་ཡང་བཤད་བྱ་བ། །རྣལ་འབྱོར་རྒྱུད་ཀྱི་ངེས་པ་དང ། །རྣལ་འབྱོར་མ་ཡི་རྒྱུད་ཀྱི་ཚད། །བཤད་ཀྱི་གསང་བའི་བདག་པོ་ཉོན། །རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་ཕྲག་ནི་དྲུག་ངེས་ཏེ། །དེ་བཞིན་རྣལ་འབྱོར་མ་རྒྱུད་གྲགས། །བྱེ་བ་ཕྲག་ནི་བཅུ་དྲུག་གྲངས། །ཐེག་ཆེན་ལས་གཞན་མདོ་སྡེ་རྣམས། །དུང་ཕྱུར་ཕྲག་བརྒྱད་གསུངས་པ་ཡིན། །དེ་བཞིན་ཕ་རོལ་ཕྱིན་པའི་ཚུལ། །ས་ཡ་དང་ནི་དུང་ཕྱུར་ལྔ། །འདི་དག་ཐམས་ཅད་ཐུབ་དབང་པོ། །སྐུ་གསུམ་བདག་ཉིད་ཅན་གྱིས་གསུངས། །བདེ་བར་གཤེགས་པས་བསྟན་པའོ། །འདུལ་བའི་གནས་ལ་སོགས་པ་ཀུན། །ཉན་ཐོས་བདག་ཉིད་ལ་བསྟན་པའོ། །སྣ་ཚོགས་མདོ་སྡེའི་རྣམ་བཤད་ཚེ། །བྱང་ཆུབ་སེམས་དཔའི་བསྟན་པའོ། །རྣལ་འབྱོར་རྣལ་འབྱོར་མ་ཡི་རྒྱུད།། གསང་བ་སངས་རྒྱས་སྤྱོད་ཡུལ་ཏེ། །ཤེས་རབ་ཐབས་བདག་རྣལ་འབྱོར་གྱིས། །བདེ་བ་ཆེན་པོ་བསྒོམ་པ་ཡི། །ཆོས་དང་ལོངས་སྤྱོད་རྫོགས་སྤྲུལ་པའི། །སངས་རྒྱས་མྱུར་དུ་ཐོབ་པའི་ཕྱིར། །སེམས་ཅན་བསོད་ནམས་དམན་རྣམས་ལ། །ལྷ་ཡི་བདག་ཉིད་ཅན་གྱིས་གསུངས། །དེ་ནས་གཞན་ཡང་རབ་གནས་ཀྱི། །ཆོ་ག་ཕ་རོལ་སོན་བཤད་བྱ། །སྔར་བཤད་
42b
མཚན་ཉིད་དང་ལྡན་པ། །སློབ་དཔོན་དུ་ནི་ཡོངས་སུ་བརྟག་།ལུགས་མའམ་མངོན་པར་འདུས་བྱས་པའི། །སྐུ་གཟུགས་ལ་སོགས་པ་རྣམས་ནི། །རབ་གནས་དོན་དུ་ས་སྦྱང་ཞིང ། །བླ་རེ་རྒྱལ་མཚན་བ་དན་རྣམས། །བརྒྱན་ཅིང་ས་ནི་ཡོངས་སུ་གཟུང ། །སྐུ་གཟུགས་ཀྱིས་ནི་གླེགས་བམ་མམ། །བྲིས་སྐུ་ཡོངས་སུ་རྫོགས་པ་རྣམས། །མདུན་རོལ་དུ་ནི་གཞག་པར་བྱ། །དཀྱིལ་འཁོར་འཁོར་ལོ་ནམ་མཁར་གནས། །ཉེར་སྤྱོད་ལྔ་ཡིས་ཡང་དག་མཆོད། །ས་མ་ཡ་སྟཾ་ས་མ་ཡ་ཧོ། །ལན་གསུམ་དུ་ནི་བརྗོད་པར་བྱ། །ཇི་ལྟར་རྫོགས་པའི་སངས་རྒྱས་ཀུན། །དགའ་ལྡན་ཡང་དག་བཞུགས་ནས་ནི། །ལྷ་མོ་སྒྱུ་འཕྲུལ་ལྷུམས་འཇུག་ལྟར། །དེ་བཞིན་འདིར་ནི་བཞུགས་སུ་གསོལ། །ཆེ་གེ་ཞེས་བྱའི་དོན་དུ་ནི། །བྱང་ཆུབ་སེམས་ནི་ཡོངས་འཕེལ་ཕྱིར། །མེ་ཏོག་ལ་སོགས་འདི་བཞེས་ཏེ། །མགོན་པོ་འདིར་ནི་རྟག་བཞུགས་མཛོད། །ཚིག་འདིས་དེ་བཞིན་གཤེགས་པ་རྣམས། །ལྷག་པར་གནས་པར་བྱས་ནས་ནི། །མཁས་པ་ཡིས་ནི་བསྟོད་བྱས་ནས། ། ཡུངས་ཀར་གྱིས་ནི་བསྐོར་ནས་སུ། །ལན་གསུམ་དུ་ནི་སྦྱང་བར་བྱ། །དྲི་ཞིམ་ལྡན་པའི་མར་གྱིས་བྱུག། །འདག་ཆལ་གྱིས་ནི་ཁྲུས་ཀྱང་བྱ། །སླར་ཡང་བུམ་པ་སོ་སོ་ཡི། །སྐུ་གཟུགས་རྣམས་ནི་ཁྲུས་ཀྱང་བྱས། །ཕྱི་ནས་ནམ་མཁར་གནས་པ་ཡི། །དཀྱིལ་འཁོར་འཁོར་ལོ་བཅོམ་ལྡན་འདས། །ལུགས་མ་སོགས་ལ་རབ་གཞུག་བྱ། །ཡུལ་ཆོས་ལ་སོགས་ཇི་བཞིན་དུ། །ལས་བཅུ་
43a
༄#། །ཡི་ནི་བྱ་བ་བྱ། །སྤྱན་ནི་དབྱེ་བ་བྱས་ནས་སུ། །རྡོ་རྗེ་སྤྱན་ནི་བྱིན་གྱིས་བརླབ། །དེ་བཞིན་མེ་ཏོག་སྤོས་མར་མེ། །བྱུག་པ་ཞལ་ཟས་དེ་བཞིན་ཏེ། །དེ་ལྟར་ལས་ནི་ཀུན་བྱས་ཕྱིར། །སྦྱིན་སྲེག་ལས་ཀྱིས་རྫོགས་པར་བྱ། །ལྷ་ཀུན་ཞལ་ནི་མེ་ཡིན་པས། །མཁས་པས་རབ་ཏུ་གནས་པར་བྱ། །རབ་གནས་ཡང་དག་རྫོགས་དུས་སུ། །བསྟོད་དང་བཀྲ་ཤིས་བརྗོད་བྱ་ཞིར། །མྲྀ་དང་ག་སོགས་སིལ་སྙན་སྒྲ། །ཇི་ལྟར་རྙེད་པས་རབ་ཏུ་མཆོད། །སྟོན་མོ་དང་ནི་ཡོན་འབུལ་བས། །སྐྱེ་བོ་ཚིམ་ཞིང་རྒྱས་པར་བྱ། །རྒྱས་པས་སྐྱེ་བོ་སྐལ་པ་བཟང ། །བཀྲ་ཤིས་ཞི་བར་བཅས་འགྱུར་ཏེ། །ཞི་བའི་སྦྱོར་པ་ལ་སྨོད་པ། །སྡུག་བསྔལ་སྣ་ཚོགས་འཚེ་བར་འགྱུར། །ཇི་ལྟར་རབ་ཏུ་མི་གནས་ལྷ། །རབ་ཏུ་གནས་པར་བྱ་བ་འཇུག། སློབ་མ་དང་བས་གསོལ་འདེབས་པས། །བསོད་ནམས་ཕྱིར་ནི་བྱ་བ་སྟེ། །རྣམ་རྟོག་མེད་པའི་རང་བཞིན་གྱིས། །རབ་གནས་ལྷ་ནི་བཞུགས་པ་ཡིན། །འཇིག་རྟེན་སྐྱོང་བའི་ལྷ་ལ་སོགས། གང་ཚེ་རྟག་ཏུ་གནས་གྱུར་པ། །མཆོད་དང་མཆོད་བྱ་མཉམ་ལྡན་པར། །དེ་ཚེ་ལྷ་ཡང་ཡང་དག་བཞུགས། །འདི་ནི་ལྷ་རྣམས་རབ་ཏུ་གནས་པའི་རིམ་པར་ཕྱེ་བ་སྟེ་ཉི་ཤུ་རྩ་གཉིས་པའོ།། །།དེ་ནས་མེ་ཐབ་ལ་སོགས་པའི། །མཚན་ཉིད་ཡང་དག་བཤད་པར་བྱ། །ས་ནི་སྦྱང་བ་བྱས་རྗེས་ལ། །མེ་ཐབ་དག་ནི་བྱ་བ་སྟེ། །སོར་བརྒྱད་པ་ནས་
43b
བརྩམས་ནས་ནི། །ཇི་སྲིད་ཁྲུ་ནི་སྟོང་གི་བར། །སོར་བརྒྱད་པས་ནི་དགྲ་རྣམས་གསོད། །སོར་བཅུས་དེ་བཞིན་རྒྱས་པ་སྟེ། །བཅུ་གཉིས་སོར་གྱིས་དབང་དང་དགུག་།བཅུ་བཞི་དེ་བཞིན་ཞི་བའོ། །ཐབ་ཁུང་སོར་ནི་བཅུ་དྲུག་པས། །རིགས་ནི་མངོན་པར་འཕེལ་བར་བྱེད། །སོར་ནི་བཅོ་བརྒྱད་བདག་ཉིད་ཀྱིས། །ཡུལ་དང་བ་ལང་རིགས་འཕེལ་འགྱུར། །ཐབ་ཁུང་སོར་ནི་ཉི་ཤུ་པས། །ཡམས་ཀྱི་ནད་ནི་ཞི་བར་བྱེད། །འདི་དག་ཐབ་ཀྱི་ངེས་པ་སྟེ། །བསྲེག་བྱའི་རྫས་ཀྱི་ཚད་རྣམས་ནི། །ལས་དང་རྗེས་སུ་མཐུན་བྱ་བར། །མཁས་པ་ཡིས་ནི་ཤེས་པར་བྱ། །རྒྱ་ཡི་ཚད་ཀྱི་ཆ་གསུམ་གྱི། །ཆ་གཉིས་ཟབས་སུ་བརྐོ་བྱ་སྟེ། །མེ་ཐབ་དག་ནི་ཐམས་ཅད་ཀྱི། །བརྐོ་བའི་ཐུན་མོང་མཚན་ཉིད་དོ། །ཐབ་ཁུང་གི་ནི་བརྒྱད་ཆ་ཡིས། །ཁ་ཁྱེར་ཉིད་ནི་མཐོ་བར་བྱ། །ཁ་ཁྱེར་དཔངས་ཀྱི་ཕྱེད་ཚད་ཉིད། །དེ་ཉིད་དུ་ནི་དམའ་བར་སྦྱར། །ཇི་ལྟར་ཕྱི་རོལ་དམའ་བའི་ཚད། །དེ་བཞིན་ཁ་ཁྱེར་ནང་ཉིད་དོ། །དེ་ཡི་ཕྱི་ཡི་ཁ་རན་ཡང ། །དཔངས་ཀྱི་ཚད་ནི་ཇི་བཞིན་བྱ། །ཐབ་ཁུང་ནང་གི་ཁྱད་པར་དུ། །རྡོ་རྗེ་ཡིས་ནི་མཚན་པར་བྱ། །དཀར་དང་སེར་དང་དམར་བ་དང ། །དེ་བཞིན་གནག་དང་ལྗང་བ་སྟེ། །ཇི་ལྟར་ལས་ཀྱི་རྗེས་འགྲོ་བས།། ཐབ་ཀྱི་ཁ་དོག་མཚན་ཉིད་ཡིན། །འོན་ཀྱང་ལས་ཀུན་བྱེད་པའི་ཐབ། །ཞི་བའི་ཐབ་ཀྱི་ཁྱད་པར་མཚུངས། །ཁ་ཁྱེར་པདྨའི་རྣམ་པར་ཏེ། །དམའ་བ་རྡོ་རྗེའི་ཕྲེང་བས་བསྐོར། །དེ་ཡི་ཕྱི་
44a
༄#། །རོལ་ཁ་ཁྱེར་ནི། །གྲུབ་ཞི་ཁ་ཁྱེར་དཔངས་ཚད་བྱ། །ཞི་ལ་ཟླུམ་པོའི་རྣམ་པ་སྟེ། །ཤར་བལྟས་ཁ་དོག་དཀར་པོར་འགྱུར། །རྒྱས་པ་ལ་ནི་གྲུ་བཞི་སྟེ། །བྱང་དུ་བལྟས་པས་སེར་པོས་བྱ། །བསྐྲད་དང་མངོན་པར་སྤྱོད་པ་ལ། །ཟླ་བ་ཕྱེད་པ་ནུབ་བལྟས་བྱ། །དབྱེ་དང་བསད་པའི་ལས་ལ་ནི། །ཟུར་གསུམ་ལྷོ་ནི་བལྟས་ཏེ་བྱ། །དབང་དང་དགུག་དང་དབྱེ་བ་གསུམ། །ཁ་དོག་དམར་པོ་ཟུར་གསུམ་པའོ། །མནན་དང་རྨོངས་པའི་ལས་ལ་ནི། །བདེན་བྲལ་དུ་ནི་བལྟས་ཏེ་བྱ། །བསྐྲད་ལ་དུད་པའི་མདོག་ལྟ་བུ། །དེ་བཞིན་རླུང་ཕྱོགས་བལྟས་ཏེ་བྱ། །རིམས་ཀྱི་གདུངས་སོགས་དམན་པའི་ལས། །རྟག་ཏུ་མེ་ཕྱོགས་བལྟས་ཏེ་བྱ། །ལྷ་དང་གདན་དང་མདོག་རྣམས་ནི། །ལས་ཀྱི་གཟུགས་ཀྱིས་འགྱུར་བ་ཡིན། །ཡི་གེ་ཧཱུཾ་གི་སྦྱོར་བ་ཡིས། །ཕྱག་གཉིས་པ་ཡི་རྣམ་པར་བསྒོམ། །སྐད་ཅིག་རྣམ་པས་གསང་སྔགས་བརྗོད། །སྐད་ཅིག་རྣམ་པས་ལྷའི་བདག་ཉིད། །རྒྱས་ལ་དགའ་བའི་སེམས་ཀྱིས་བྱ། ། ཞི་ལ་ཞི་བའི་སེམས་ཀྱིས་བྱ། །དབང་ལ་རྗེས་ཆགས་སེམས་ཀྱིས་སོ། །ཁྲོ་བའི་སེམས་ཀྱིས་གསད་པ་སྟེ། །རྣམ་འགྱུར་དྲག་པོའི་སེམས་ཀྱིས་ནི། །བསྐྲད་པ་དང་ནི་མངོན་སྤྱོད་འགྱུར།། མཆོད་ཡོན་ཞབས་སིལ་ལ་སོགས་བཞག་།དེ་ནས་མེ་ནི་སྤྱན་དྲངས་བྱ། །རང་སྙིང་ཆུ་སྐྱེས་ཧཱུཾ་ཡིག་ལས། །རྡོ་རྗེ་སེམས་དཔའ་རྣམ་པར་བསྒོམ། །ཡིག་གསུམ་ལས་བྱུང་གཞུའི་རྣམ་
44b
པ། །དེར་དབུས་རཾ་གྱི་ས་བོན་ལས། །ཁ་དོག་དམར་པོ་མཛེས་པའི་ཞལ། །དབྱུག་གུ་རིལ་བ་སྤྱི་བླུགས་གཡོན། །གཡས་ཀྱི་བགྲང་ཕྲེང་མི་འཇིགས་སྦྱིན། །གསུས་འཕྱང་རལ་པའི་ཅོད་པན་ཅན། །རྒྱན་རྣམས་ཀུན་གྱིས་བརྒྱན་པ་ནི། །སྔགས་པ་མཁས་པས་བལྟ་བར་བྱ། །ོཾ་ཛཿ ་ཧཱུཾ་གི་ཡི་གེས་ནི། །ཐབ་ཁུང་ལོགས་སུ་བལྟ་བྱ་སྟེ། །བསང་གཏོར་འཐོར་འཐུང་མཆོད་ཡོན་སོགས། །བྱིན་ནས་ཐབ་ཀྱི་དབུས་སུ་གཞག་།དམ་ཚིག་སེམས་དཔའ་བསམས་ནས་ནི། །ཡེ་ཤེས་སེམས་དཔའ་གཞུག་པར་བྱ། །མེ་ཏོག་སྤོས་དང་མར་མེ་དང ། །དེ་བཞིན་དྲི་དང་ཞལ་ཟས་མཆོད། །ལག་གཉིས་པུས་མོའི་ནང་གཞག་སྟེ། །དགང་གཟར་དང་ནི་བླུགས་གཟར་བཟུང ། །ོཾ་ཨགྣ་ཡེ་སཝཱཧཱ་ཞེས་པས། །དགང་བླུགས་བདུན་ནམ་གསུམ་བྱིན་ན། །དེ་ནས་མེ་ནི་ཚིམ་གྱུར་པས། །མི་འཇིགས་པ་ནི་ཆེན་པོ་སྟོན། །མེ་ཏོག་སོ་རྩི་ན་བཟའ་སོགས། །བསྟོད་པས་ཀྱང་ནི་མཉེས་བྱ་སྟེ། །དེ་ནས་འཐོར་འཐུང་བྱིན་ནས་ནི། །མེ་ནི་ཡང་དག་གནས་པར་བསམ། །ོཾ་བོ་དྷི་བྲྀཀྵཱ་ཡ་སཝཱཧཱ།་ཨ་ཤཝཏྠའི་འོ། །ོཾ་བཛྲ་ལ་ཏཱ་ཡ་སཝཱཧཱ། བླག་ཤའོ། །ོཾ་བཛྲ་ཡཛྙཱ་ཡ་སཝཱཧཱ། ཨུ་དུམ་བཱ་རའི་འོ། །ོཾ་བཛྲ་ཀུ་བེ་རཱ་ཡ་སཝཱཧཱ། །ཤིང་འོ་མ་ཅན་རྣམས་ཀྱིའོ། །ོཾ་སརྦ་པཱ་པཾ་ད་ཧ་ན་བཛྲཱ་ཡ་སཝཱཧཱ། ཏིལ་རྣམས་ཀྱིའོ། །ོཾ་བཛྲ་པུཥྚ་ཡེ་སཝཱཧཱ། འབྲས་མ་གྲུགས་པ་རྣམས་ཀྱིའོ། །ོཾ་སརྦ་སམྦ་དེ་སཝཱཧཱ། ཞོ་དང ། ཟས་ཀྱིའོ། །ོཾ་བཛྲ་ཨཱ་ཡུ་ཁེ་སཝཱཧཱ། དུར་བའི་འོ། །ོཾ་ཨ་
45a
༄#། །པྲ་ཏི་ཧ་ཏ་བཛྲ་ཡེ་སཝཱཧཱ། ཀུ་ཤ་རྣམས་ཀྱིའོ། །དེ་ནས་སྙིང་གའི་པདྨའི་གདན་ལ་རང་གི་ལྷའི་ས་བོན་དང ། །མཚན་མ་ཡོངས་སུ་གྱུར་བ་ལས་རྫོགས་པའི་དཀྱིལ་འཁོར་གྱི་འཁོར་ལོ་རྣམ་པར་བསྒོམ་པར་བྱ་སྟེ། དེ་ནས་དམ་ཚིག་གི་འཁོར་ལོ་ལ་ཡེ་ཤེས་ཀྱི་འཁོར་ལོ་གཞུག་པར་བྱའོ། །མེ་ཡི་སྙིང་གའི་དབུས་སུ་ནི། །སྐད་ཅིག་རྣམ་པས་རྣམ་པར་བསམ།། བསང་གཏོར་འཐོར་འཐུང་སོགས་མཆོད་དང ། །མཆོད་ཡོན་ཞབས་བསིལ་བསྟོད་པས་མཆོད། །རང་ལྷའི་ས་བོན་བཟླས་པ་ཡི། །ཐེ་ཚོམ་མེད་པར་སྦྱིན་སྲེག་བྱ། །ལྷ་རྣམས་སོ་སོར་ཕུལ་ནས་ནི། །ཕྱི་ནས་ཅི་འདོད་སྦྱིན་སྲེག་བྱ། །གསུམ་དང་བདུན་དང་ལྷག་པར་ནི། །ཇི་སྲིད་བརྒྱ་སྟོང་བར་དེ་བཞིན། །ཇི་ལྟར་ལས་ཀྱི་རྗེས་མཐུན་པར། །མཁས་པ་ཡིས་ནི་སྦྱིན་སྲེག་བྱ། །དེ་བཞིན་ཞུ་བའི་རྫས་ཀུན་ནི། །དེ་ལྟར་མེ་ཡི་ཞལ་དུ་དབུལ། །ཡམ་ཤིང་དང ། ཀུ་ཤ་ལ་སོགས་པ་ནི་འོད་ཀྱི་དཀྱིལ་འཁོར་ལའོ། །ཞལ་ཟས་དང ། འཐོར་འཐུང་ལ་སོགས་པ་ནི་ཕྱག་ཏུའོ། །མེ་ཏོག་ནི་དབུ་ལའོ། །བདུག་པ་ནི་འོད་ལའོ། །བྱུག་པ་ནི་ཐུགས་ཀར་རོ། །བསང་གཏོར་ནི་སྐུ་ལའོ། །ཞབས་བསིལ་ནི་ཞབས་ལའོ། །མར་མེ་མཆོད་ཡོན་ཞལ་ཟས་རྣམས། །རིམ་པ་བཞིན་དུ་མདུན་དུ་དབུལ། །སྔར་བཤད་ཆོ་ག་ཇི་ལྟ་བས། །དཀྱིལ་འཁོར་མཆོག་ནི་གཤེགས་སུ་གསོལ། །འཇིག་རྟེན་སྦྱིན་སྲེག་ཡང་དག་རྫོགས། །གལ་ཏེ་
45b
འཇིག་རྟེན་འདས་སྦྱིན་སྲེག་།ཉིན་མོ་འཇིག་རྟེན་སྦྱིན་སྲེག་སྟེ། །དེ་བཞིན་མཚན་མོ་འཇིག་རྟེན་འདས། །རྣལ་འབྱོར་རྣལ་འབྱོར་མ་རྣམས་འདུས། །བཟའ་དང་བཏུང་བའི་ཁྱད་པར་དང ། །ཅ་ཅོའི་སྒྲ་ཡི་སྤྲོ་བ་ཆེ། །གླུ་དང་གར་གྱི་དགའ་བདེ་བ། །རང་གི་ལྷ་ཡི་རྣལ་འབྱོར་གྱིས། །དེར་ནི་ཙ་རུའི་སྦྱིན་སྲེག་བྱ། །མངོན་འདོད་བྱ་བ་གསོལ་བཏབ་ན། །འགྲུབ་འགྱུར་འདིར་ནི་ཐེ་ཚོམ་མེད། །ོཾ།་ཁྱོད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང ། །ཇི་ལྟར་བདེ་བར་བཞུགས་སུ་གསོལ། །གང་ཡང་ཚངས་པ་ལ་སོགས་པའི། །ལྷ་འམ་འབྱུང་པོ་གང་ཞིག་ལ། །དང་པོར་སྦྱིན་སྲེག་སྦྱིན་པར་བྱ། །ོཾ་ན་མཿ ་ས་མནྟ་བུདྡྷཱ་ནཱཾ། ཨ་མུ་ཀ་སྱ་ཤཱནྟིཾ་ཀུ་རུ་སཝཱཧཱ། །མངོན་འདོད་བྱ་བ་གསོལ་བཏབ་ན། །འགྲུབ་འགྱུར་འདིར་ནི་ཐེ་ཚོམ་མེད། །དེ་ནས་སྔགས་པ་མཉམ་གཞག་ཅིང ། །མཁས་པས་མདོག་དང་སྒྲ་དང་ནི། །དྲི་དང་འབར་བའི་དབྱིབས་བརྟགས་ཏེ། །དེ་ལྟར་མེ་ཡི་དགེ་མི་དགེའི། །ལྟས་ནི་ཉེ་བར་མཚོན་པར་བྱ། །མེ་ནི་རྩེ་མོ་གཅིག་ཏུ་འབར། །ཕུན་སུམ་ཚོགས་པ་ཀུན་བྱེད་པའོ། །རྩེ་མོ་གཉིས་རབ་མི་གཡོ་བར། །མཚུངས་པར་འབར་ན་བར་མར་ཤེས། །རྩེ་མོ་བཞི་ནི་མཉམ་དུ་འབར། །རྒྱས་ཤིང་དངོས་གྲུབ་བརྟན་པར་གནས། །ཀུན་ད་ཟླ་བ་ལྟ་བུའི་མདོག་།སྣུམ་ཞིང་བཻ་ཌཱུརྱ་ཡི་འོད། །དྲི་མེད་མེ་ནི་དུ་བ་མེད། །ནད་མེད་རིགས་
46a
༄#། །ནི་འཕེལ་བར་བྱེད། །ཟླ་བ་ཆུ་ཤེལ་ནོར་བུའི་འོད། །ཁ་བ་ཡི་ནི་མདོག་ལྟ་བུ། །ནོར་བུ་པུཥྤ་རཱ་གའི་མདོག་།སྡིག་པ་ཐམས་ཅད་འཇིག་བྱེད་ཡིན། །མེ་ཏོག་བན་དུ་ཀ་ལྟ་བུ། །ཛ་བའི་མེ་ཏོག་གི་ནི་མདོག་།བཙོ་མ་གསེར་གྱི་མདོག་ལྟ་བུས། །དབང་ཕྱུག་རྒྱལ་སྲིད་རབ་ཏུ་སྟེར། །ཙམ་པ་པདྨ་ཨུཏྤལ་དྲི། །ུ་ཤི་ར་དང་མ་ལ་ཏི། །ཤི་ཏ་གནྡྷའི་དྲི་མཚུངས་པ། །ག་བུར་ཨ་ག་རུ་ཡི་དྲིས། །དགེ་ཞིང་གནས་ཀྱི་བདག་པོ་མཆོག་།པི་ཝང་རྒྱུད་མང་རྫ་རྔ་དང ། །དུང་དང་ཟངས་དུང་ལྟར་སྒྲ་སྙན། །ཤིན་ཏུ་ཟབ་པའི་སྒྲ་སྙན་པའི།། མེ་མཐོང་བདེ་བ་འབྱུང་བར་བྱེད། །དཔལ་བེའུ་གདུགས་དང་དུང་ལྟ་བུ། །གང་ཞིག་རྩེ་གསུམ་བུམ་པའི་དབྱིབས། །རྒྱལ་མཚན་རྔ་ཡབ་རྡོ་རྗེ་བཟང ། །གཡུང་དྲུང་རྟ་དང་གླང་པོའི་དབྱིབས། །སྒྲ་མེད་གཡས་སུ་འཁྱིལ་བ་དང ། །མེ་ལྕེ་གཅིག་འབར་དོན་ཆེར་སྟེར། །འདི་དག་དགེ་བ་ཕུན་སུམ་ཚོགས། །ཚེ་དང་ནད་མེད་རབ་སྟེར་བའོ། །གཡོ་ཞིང་མདུན་གྱི་ཕྱོགས་སུ་འབར། །རྩེ་གསུམ་དུ་བའི་ཚོགས་མང་དང ། །འཁོར་ཞིང་མེ་སྟག་དང་བཅས་པ། །རྣམ་པར་འཕྲོ་བས་ནད་འཕེལ་བྱེད། །མེ་གང་ཡང་ཡང་རབ་ཏུ་འདར། །ཡང་ཡང་རྩུབ་པར་རྒོད་པ་དང ། །ཡང་ཡང་གཡོན་དུ་འཁོར་བ་དང ། །ཡང་ཡང་ས་ལ་མེ་ལྕེ་རེག་།ཐིག་ལེ་ནག་པོ་སོལ་བའི་མདོག་།མྱུར་དུ་རིགས་ནི་ཟད་འགྱུར་ཞིང ། །གང་ཞིག་
46b
རྒྱལ་པོའི་དྲུང་གནས་པའི། །སྡེ་དང་བདག་པོ་འཇོམས་པར་སྟོན། །མདོག་མེད་དུ་བའི་མདོག་ལྟར་གནག་།མདོག་ལྗང་སྣ་ཚོགས་མདོག་རྩུབ་པ། །པ་ལ་ཤ་དང་འབྲུ་མར་མདོག་།འདིས་ནི་དོན་རྣམས་ཉམས་པར་བྱེད། །རོའི་དྲི་ཉ་ཡི་དྲ་ལྟར་ངན། །ཆུ་སྐྱེས་སྲོག་ཆགས་དྲི་དང་ལྡན། །ཇི་སྟེ་མེ་ནི་འདི་ལྟར་མཐོང ། །གཙོ་བོ་རྣམ་པར་ལྟུང་ཞེས་སྟོན། །ཙེག་ཙེག་ཅེས་པའི་སྒྲ་འབྱུང་ཞིང ། །ཧུར་ཧུར་གྱི་ནི་སྒྲ་གང་ལྡན། །སིམ་སིམ་གྱི་ནི་སྒྲ་བདག་ཉིད། །རྡོ་རྗེའི་སྒྲས་ནི་དོན་ཉམས་བྱེད། །མདུང་དང་རལ་གྲི་མདའ་དང་སྦྲུལ། །རྔ་མོ་བ་ལང་མགོ་འདྲ་གང ། །འཇིགས་པའི་རྣམ་པ་འདི་ལྟར་མཐོང ། །དེའི་མདུན་བཟོད་པར་མཛོད་ཅིག་ཅེས། །འདི་ལྟར་ལན་གསུམ་བརྗོད་ནས་ནི། །ཡོན་བདག་ཁྱིམ་དུ་ཞི་བདེ་དང ། །བདེ་ལེགས་ཆོ་གའི་རིམ་པ་བྱ། །དེ་ནས་གཞན་ཡང་སྦྱིན་སྲེག་གི་།ཡན་ལག་ཀུན་འབྱུང་འབྲས་རབ་བཤད། །ས་དང་ས་གཞི་ཞིང་བྱས་པའི། །ཐབ་ཀྱི་ཡན་ལག་ཡོན་བདག་རྒྱས། །མར་གྱིས་འབྱོར་པ་ཐམས་ཅད་བྱེད། །ཡམ་ཤིང་གཟི་བརྗིད་རྣམ་འཕེལ་བའོ། །བུད་ཤིང་ལྷག་པར་དཔའ་བར་བྱེད། །ཀུ་ཤས་ཐམས་ཅད་སྲུང་བར་བྱེད། །ཡུངས་ཀར་དཀར་མོས་ཞི་བར་བྱེད། །འབྲས་ཀྱིས་རྒྱས་པར་བྱེད་པར་བཤད། །ཏིལ་གྱིས་སྡིག་པ་འཇོམས་རིག་བྱ། །སོ་བས་ནོར་དང་འབྲུ་རྣམས་འགུགས། །མཱ་ཤས་སྟོབས་ནི་ཆེན་པོར་བྱེད། །ནས་ཀྱིས་རླུང་གི་ཤུགས་རབ་སྟེར། །འདུར་བས་
47a
༄#། །ཚེ་ནི་འཕེལ་བར་བྱེད། །གྲོ་ཡིས་ནད་ནི་འཇོམས་པར་བྱེད། །འོ་མ་སྦྲང་རྩིས་ཤེས་རབ་འཕེལ། །ལག་པན་གྱིས་ནི་བདེ་ཀུན་སྟེར། །མེས་ནི་འདོད་དོན་དངོས་གྲུབ་སྟེར། །རང་འདོད་ལྟས་ནི་གྲོལ་བར་རྩོལ། །ལྷག་མ་ལས་ཀྱི་རྗེས་མཐུན་པའོ། །ཞི་སོགས་ལས་བྱས་ཤེས་པར་བྱ། །དགང་གཟར་ཤེས་རབ་བླུགས་གཟར་ཐབས། །དེ་གཉིས་སྦྱར་བ་གཉིས་མེད་བསྒོམ། །དེ་ལས་ངེས་འབྱུང་མར་གྱི་རྒྱུན། །ཡེ་ཤེས་ཆེན་པོའི་བདུད་རྩིར་འདོད། །རྒྱུ་དང་མི་རྒྱུའི་བདག་ཉིད་ཀྱི། །མི་ནི་དེ་ཡིས་ཡང་དག་མཆོད། །འདི་ལྟར་སྦྱིན་སྲེག་གང་བྱེད་ལ། །སྐལ་བཟང་དངོས་གྲུབ་རབ་ཏུ་སྟེར། །འདི་ནི་སྦྱིན་སྲེག་ངེས་པར་བསྟན་པའི་རིམ་པར་ཕྱེ་བ་སྟེ་ཉི་ཤུ་རྩ་གསུམ་པའོ།། །། དེ་ནས་ལས་ནི་རབ་འབྱམས་འབྱུང ། །དངོས་གྲུབ་སྣ་ཚོགས་གོ་འཕང་བསྔགས། །སྣ་ཚོགས་ལས་ཀྱི་འབྲས་འབྱུང་བ། །ཡང་དག་པར་ནི་རབ་ཏུ་བཤད། །ོཾ་ན་མཿ ་ཤྨ་ཤཱ་ན་བཱ་སི་ནེ།་མཧཱ་ཀཱ་ལ་ཨ་ནུ་ཙཱརྱ། ཏདྱ་ཐཱ། ཨོཾ་ཙ་ལ་པྲ་ཙ་ལ། ལཱ་ལ་ལཱ་ལ་ཡ། དེ་བ་ལིངྒ་སཝཱཧཱ། བསྙེན་པ་ཁྲི་བྱས་ཏེ། མཚན་ཕྱེད་ན་ལིངྒ་བཟུང་ལ་ཇི་སྲིད་འོངས་ཀྱི་བར་དེ་སྲིད་དུ་བཟླས་པར་བྱ་སྟེ། གོང་བུ་དགུག་པའོ། །ོཾ་ཙ་མུཎྜེ། དྷུ་མ་ཀེ་ཤི། དྷཱུ་མ་བི་ཏྱུ་ཛྫེ་ཧཱི། ཧ་ན་ཧ་ན། པ་ཙ་པ་ཙ། དེ་བ་ད་ཏཱཾ་ཨཱ་ན་ཡ་སཝཱཧཱ། རྐང་པ་གཡོན་པའི་མཐིལ་དུ་
47b
སེན་རྩིས་རི་རབ་བྲིས་ལ། དེའི་ནང་གི་ཟུར་གྱི་ཆ་ལ་ཡི་གེ་ཧྲཱིཿ ་བཞི་དབུས་སུ་སྔགས་ཀྱི་ཚིག་བྲིས་ཏེ། གནོན་ཅིང་བཟླས་ན་དབང་དུ་བྱེད་པའི་མཆོག་ཡིན་ནོ། །ོཾ་བཛྲ་ཀྲོ་དྷ་མྷཱ་བ་ལ་ཧ་ན་ད་ཧ་\?\་པ་ཙ་བི་དྷྭཾ་ས་ཡ་ལོ་སཽ་མཱ་ར་ཡ་ཧཱུཾ་ཕཊ། གྲོགས་མཁར་གྱི་ས་པའི་རྣམ་པ་ལྔ་དང་བསྲེས་པ་ལས་མཐོ་གང་ཙམ་གྱི་བཱ་སུ་ཀི་བྱས་ཏེ། ཀ་ར་བཱི་རའི་ལྕུག་མས་ཆུ་གཏོར་ཞིང ། གུ་གུལ་གྱིས་ཁར་\?\་མ་ཆད་པར་བདུགས་ཏེ། དཀར་གསུམ་གྱི་གཏོར་མ་བྱིན་ན་ཉི་མ་བདུན་ན་ཆུའི་རྒྱུན་འབེབས་པར་བྱེད་དོ། །ཇི་སྟེ་མི་འབབས་ན་ཉི་མ་བདུན་པ་ལ་དུམ་བུ་དུམ་བུར་བྱས་ཏེ་བུམ་པར་བཅུག་སྟེ་ཆུ་བོ་ལ་བསྐུར་ན་ཆར་འབེབས་པར་འགྱུར་རོ། །ཆར་དབབ་པའི་ཆོ་གའོ། །ོཾ་ག་ག་ཨ་རི་ག་ག་སཝཱཧཱ། སྔགས་འདིས་གདོང་བཀྲུས་ཏེ། རྡོ་བ་ལ་ལན་བདུན་བཟླས་པ་བྱས་ནས་སུའང་རུང་བའི་སྒོའི་བུ་གར་བཅུག་ན། ཁ་བཅིང་བ་བྱེད་པར་འགྱུར་རོ། །ོཾ་མཱུ་ཀཱ་ཏིཥྛནྟི། མཱུ་ཀཱ་གྩྪནྟི་མཱུ་ཁ་ཀཱ་དྷནྟི། ལཱཾ་ག་ལཾ། མཱུ་ཀཱ་ནཱཾ། མཱུ་ཏྲ་པུ་རི་ཥེ་ན། དེ་བ་དཏྟ་སྱ་མུ་ཁཾ་བནྡྷ་མི་སཝཱཧཱ། ཁྱུ་མཆོག་གི་ལྕི་བ་ས་ལ་མ་ལྷུང་བ་བླངས་ཏེ། གང་སུའང་རུང་བའི་བུ་གར་གཞུག་པ་བྱས་ན་ཐ་སྙད་བརྗོད་པའི་ཁ་བཅིང་བར་འགྱུར་ཏེ་བཀླག་པས་འགྲུབ་པའོ། །ོཾ་ན་མོ་ནི་ཁཱ་བྷཻ་ར་བཱ་ཡ། ཙི་རི་ཙི་རི་ཀི་རཱ་ཏཱ་རཱུ་བ་ཎ། མུ་ཥི་ཀཱ་ནཱཾ་ཏུཎྜཾ་བནྡྷ་མི། ཨརྐྐ་ཊོ། ཤྲིཾ་གཱ་ལ། ས་རྤཽ་པ། རྀ་ཀྵོ། བཱ་ར་ཧཱ་དཱི་ཎཱཾ། སི་རི་སི་རི། ཁི་ལི་ཁི་ལི་སཝཱཧཱ། སྔགས་འདིས་ལག་པ་ཡ་
48a
༄#། །གཅིག་གམ། རྡོ་བ་ལ་ལན་ཉི་ཤུ་རྩ་གཅིག་ཡོངས་སུ་བཟླས་ནས་ཁྱིམ་མམ། ཞིང་ངམ། ལྡུམ་རའི་ཟུར་བཞིར་རྡོ་བ་བཅུག་ན་ཉེ་བར་འཚེ་པ་མེད་པར་འགྱུར་རོ། །ཡང་ན་དུག་དང ། ལན་ཚཝ་དང ། སྐེ་ཚེ་དང ། ཡུངས་ཀར་དང ། ལ་ཕུག་གི་ས་བོན་དང ། ད་དུ་རའི་ས་བོན་དང ། ནག་པོ་ཆེན་པོའི་ས་བོན་གྱི་རྗེས་འདི་དག་མ་ཧེ་དང ། ཕག་པ་དང ། ལྕེ་སྤྱང་རྣམས་ཀྱི་ཁྲག་དང་བསྲེས་ཏེ། ཡང་དག་པར་སྦྱར་ནས་བཅུ་བཞིའི་ཉི་མ་ལ་མེ་ཏོག་དང ། བདུག་པ་ལ་གཏོར་མ་བྱས་ཏེ། དེའི་རྗེས་ལ་ལག་པ་གཡས་པས་ཡང་དག་པར་བཟུང་སྟེ། གཡོན་པས་སྡིགས་མཛུབ་བྱས་ནས་ཁྲོ་བོའི་ངག་གིས་བཟླས་ཏེ། ཕྱོགས་བཞིར་སྦས་ན་མཚམས་བཅད་པ་དང ། ར་བ་བྱས་པར་འགྱུར་རོ། །ོཾ་ཧྲཱིཾ་པྲཱིཾ་ཧཱུཾ་ཕཊ། བི་ཊ་བི་ཊ་སཝཱཧཱ། སྔགས་འདི་བ་ལང་གི་ལྕི་བ་ལ་མངོན་པར་སྔགས་ཏེ་ཆུའི་གནས་སུ་བཅུག་ན་ཞོ་རྣམས་རྣམ་པར་ཆུད་ཟོས་པར་འགྱུར་ཏེ། འོ་མ་གཏོར་བས་ནི་གྲོལ་བར་འགྱུར་རོ། །ོཾ་རེ་བནྟ་སཝཱ་མ་ནི། ཏྲཻ་ལོ་ཀྱ་ཨ་དྷི་པ་ཏ་ཡེ། ཀུ་རུ་ཀུ་རུ། གྩྪ་གཙྪ། བྷཀྵ་ཡ་བྷཀྵ་ཡ། ནེ་ཏྲ་རོ་གཱ། སི་རི་སི་རི། ནཱ་ཤ་ཡ་ནཱ་ཤ་ཡ། ཧཱུཾ་ཕཊ་ཕཊ། ཧྲཱིཾ་ཧྲཱིཾ་སཝཱཧཱ། མིག་ནད་ལ་བྱ་བ་པའི་སྔགས་སོ། །ོཾ་ཨ་རུ་ནེ་ཧཱུཾ་ཕཊ་སཝཱཧཱ། ཆུ་ལ་ཡོངས་སུ་བཟླས་ཏེ། མིག་བཀྲུས་ན། མིག་ནད་འཇོམས་པར་འགྱུར་རོ། །སྨན་པ་ལའི་རྩ་བ་དུམ་བུ་
48b
བདུན་དུ་བྱས་ཏེ། ལག་པ་ལ་བཅིངས་ན་རིམས་འཇོམས་པར་འགྱུར་རོ། ། བཱ་མ་གའི་རྩ་བ་བཅིངས་ན་རིམས་ཉིན་བཞི་པ་འཇོམས་པར་འགྱུར་རོ། །ཤིང་སབྟ་པརྞ་བླངས་ཏེ།་སྒོ་རྩའམ། །ལམ་དུ་སྦས་ན་ཆང་རྣམ་པར་ཉམས་པར་འགྱུར་ཏེ། བཏོན་ན་ནི་གྲོལ་བར་འགྱུར་རོ། །ོཾ་ན་མ་ཀུ་ལུ་ཀུ་ལུ་སཝཱཧཱ། ཕུག་རོན་གྱི་བྲུན་དང ། ལྷམ་བུ་ཆུ་གཤེར་དང།་སྟང་ཟིལ་དང ། གུ་གུལ་དང ། ཤིང་ཚ་དང ། ཆུ་སྲིན་སེན་མོ་དང ། རུ་རྟ་དང ། གསེར་ཤིང་གི་འབྲས་བུ་སྟེ། འདི་རྣམས་དེ་བཞིན་དུ་བུ་རམ་དང་སྦྱར་ལ་སྤོས་སུ་བྱས་ཏེ།་ཟོང་གི་སྣོད་ཐམས་ཅད་ལ་བདུགས་ན་ཚོང་པ་རྣམས་རྙེད་པ་བཟང་བར་འགྱུར་རོ། །ོཾ་ན་མོ་བྷ་ག་ཝ་ཏི་སུ་ཥྐ་མུ་ཥི་ཙཱ་མུཎྜེ་ཙི་རི་མི་ར་པཱ་ཏཱ་ཀེ་། མུ་ཀཾ་བ་ཤཾ་མཱ་ན་ཡ་སཝཱཧཱ། རུ་རྟ་ཤུ་དག་དབང་པོའི་གནས། །ཡུངས་ཀར་ཏ་ཀ་རའི་མེ་ཏོག་།སུག་སྨེལ་དེ་བཞིན་ཀླུའི་མེ་ཏོག། །སརྫ་ར་ས་ཆ་མཉམ་བྱས། །དེ་དག་གིས་ནི་རྫས་ལ་བདུགས། །ཚོང་ནི་མྱུར་བར་འོང་བར་འགྱུར། །ཡི་གེ་ཡ་གཉིས་ཁ་སྦྱར་བྱས། །དབུས་སུ་མིང་ནི་སྦྱར་བྱས་ཏེ། །རླུང་གིས་ཁྱེར་པའི་ཤིང་ལོ་བཟུང ། །དེ་ཡི་ལོ་མ་ལ་བྲི་བྱ། །ཁཝ་ཡི་སྒྲོ་ཡི་སྨྱུག་གུ་དང ། །སྣག་ཚ་དུག་དང་སྐེ་ཚེ་དང ། །དུར་ཁྲོད་སོལ་བ་མཉམ་ལྡན་པས། །ལེགས་པར་བསང་སྟེ་བྲིས་ནས་མཆོད། །སྐག་དང་མིག་དམར་ཉིན་མོ་ལ། །ཚུབ་མའི་རླུང་ལ་ཕྱར་བའམ། །ཆུ་བོའི་
49a
༄#། །རྒྱུན་ལ་བསྐུར་བྱས་ན། །དགྲ་ནི་སྐྲོད་པ་ཉིད་དུ་འགྱུར། །མཚན་མ་གཅིག་པའི་སར་མཚན་མོ་སོང་སྟེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཞེས་པ་བདག་ཉིད་ཆེན་པོས་སྔགས་བཟླས་པར་བྱ་སྟེ། བསྐྲད་པའི་རབ་ཏུ་སྦྱོར་བའོ། །བའི་ལྕི་བ་ས་ལ་མ་ལྷུང་བ་ལས་སོར་བཅུ་དྲུག་པའི་གཟུགས་བརྙན་བྱས་ཏེ། དུར་ཁྲོད་ཀྱིས་རས་ལ་མིང་མངོན་པར་བྲིས་ལ། དེའི་ནང་དུ་བཅུག་སྟེ། ཁྲོ་བ་དང་བཅས་པས་དེའི་ཁ་ཟན་གྱིས་བཀག་ལ། རོའི་སྐྲའི་སྲད་བུས་དཀྲིས་ཏེ། ཡང་ཁྲོ་བས་ལན་བདུན་བཟླས་པའི་གཏུན་ཤིང་གིས་དེའི་ཁར་བསྣུན་པར་བྱས་ན་མནན་པར་འགྱུར་རོ། །ལག་པ་གཡོན་པ་ལ་ལྡོང་རོས་ཀྱིས་གཟུགས་བརྙན་བྲིས་ཏེ། མར་མེའི་རྩེ་མོ་ལ་གདུང་ན། དབང་དུ་བྱེད་པའི་ཆོ་གའོ། །རླུང་གི་ཕྱོགས་སུ་མཎྜལ་ལ་ཉེ་བར་བྱུགས་ཏེ། གྲོ་གའི་འདབ་མ་ལ་ལྷས་བྱིན་གྱི་མིང་དང་སྤེལ་བ་བྲིས་ལ་ཟན་གྱི་གོང་བུའི་དབུས་སུ་བཅུག་སྟེ། བྱ་རོག་ལ་བྱིན་ན་བསྐྲད་པར་འགྱུར་རོ། །རྫ་མཁན་གྱི་ལག་པ་ཕྱིས་པའི་འཇིམ་པ་ལ་སྣོད་བྱས་ཏེ། སྟོང་རྩ་བརྒྱད་ཡོངས་སུ་བཟླས་ནས། དབུགས་མི་འབྱིན་པར་ཆུའི་ནང་དུ་བཞག་ན། གྲོང་བརྟན་པར་འགྱུར་རོ། །དེ་ནས་དགྲ་བསད་པར་འདོད་ན་སྤྲ་ཚིལ་ལམ། བ་གཟན་ལས་གཟུགས་བརྙན་བྱས་ལ་ཆོས་གོས་ཀྱི་རས་ཀྱིས་གཟུགས་བརྙན་དེའི་གདོང་ནས་བརྩམས་ཏེ་རྐང་པའི་བར་དུ་དཀྲིས་ལ་ལེགས་
49b
བར་སྦས་ཏེ། དེའི་སྟེང་དུ་ལག་པ་བཞག་ལ་མིང་སྤེལ་བའི་སྔགས་སྟོང་དུ་གཅིག་གིས་མ་ཚང་བ་བཟླས་ནས། ལྷའི་ཁང་བའི་ཕྱོགས་གཅིག་ཏུ་བཞག་སྟེ། སྙིང་གར་སེང་ལྡེང་གི་ཕུར་བུ་བཏབ་ལ། ཕུར་བུའི་སྟེང་དུ་དུས་གསུམ་དུ་ཆུ་ཚན་བླུགས་ཤིང་ཁྲོ་བས་ཡོངས་སུ་བཟླས་ན་བརླག་པར་འགྱུར་རོ། །ཡུངས་ཀར་ལྔ་རྣམས་ཁྲག་དང་བསྲེས་པ་དང ། འབྲུ་མར་ཚཝ་བ་དང ། བྷ་ལ་ཏ་ཀ་བསྲེས་པ་དང ། ལྕགས་ཀྱི་ཕྱེ་མ་རྣམས་བསྲེས་ཤིང་སྦྱར་ཏེ། དགྲའི་མིང་ནས་བཟུང་ནས་སྦྱིན་སྲེག་སྟོང་ཕྲག་གཅིག་བྱས་ན་དེ་སྐད་ཅིག་ལ་གསོད་པར་འགྱུར་རོ། །ཡུངས་ཀར་སེར་སྐྱ་ཁྲག་དང་བསྲེས་པ་དང ། འབྲུ་མར་ཚ་དང ། བྷ་ཏ་ལ་ཀ་བསྲེས་ལ་དགྲའི་མིང་ནས་བཟུང་ནས། དུར་ཁྲོད་ཀྱི་མེ་ལ་ལན་བརྒྱད་སྟོང་སྦྱིན་སྲེག་བྱས་ན་བསྒྲུབ་བྱ་བརྗེད་བྱེད་ཀྱིས་གསོད་པར་འགྱུར་ཏེ། ཁྲག་སྐྱུག་པར་འགྱུར་ཞིང་རིམས་སམ། གཟེར་ནད་ཀྱིས་འཆི་བར་འགྱུར་རོ། །དུར་ཁྲོད་ཀྱི་ཐལ་བ་ལས་དགྲའི་གཟུགས་བརྙན་བྱས་རྐང་པ་གཡོན་པས་མནན་ལ།་སྐྲ་གྲོལ་ཞིང་ཁྲོས་པས་ལྷོར་བལྟས་ཏེ། གང་གི་མིང་ནས་བཟུང་ནས་ལན་བརྒྱད་སྟོང་སྦྱིན་སྲེག་བྱས་ན་དགྲ་མྱུར་དུ་འཆི་བར་འགྱུར་རོ། །ཏིལ་དམར་པོ་དང ། མེ་ཏོག་པྲ་ཡེ་ཀུ་མར་དང་བསྲེས་ཏེ། ལན་བརྒྱད་སྟོང་སྦྱིན་སྲེག་བྱས་ན་མཆོག་ཏུ་སྐལ་བ་བཟང་པོར་འགྱུར་རོ། །ཏིལ་དཀར་པོ་དང ། འབྲས་དཀར་པོ་མར་དང་བསྲེས་པས་ལན་བརྒྱད་སྟོང་སྦྱིན་སྲེག་བྱས་ན་ནོར་
50a
༄#། །དང།་འབྲུ་འཕེལ་བར་འགྱུར་རོ། །ཐམས་ཅད་དུ་བླ་མ་དང་བྲལ་བས་ནི་མ་ཡིན་ནོ། །ཀ་ར་བཱི་རའི་མེ་ཏོག་གཉིས། །དེ་བཞིན་དུ་ནི་ཙནྡན་གཉིས། །རུ་རྟ་ཤིང་ཚ་ཡུང་ང་སེར། །མེ་ཏོག་ཤིང་དང་ཡུང་བ་གནག་།དེ་བཞིན་དུ་ནི་ཨུཏྤལ་གསུམ། །པདྨའི་གེ་སར་དེ་བཞིན་ཏེ། །པྲི་ཡང་ཀུ་དང་མེ་ཏོག་བརྒྱ། །དེ་བཞིན་དོན་གྲུབ་དཀར་པོ་དང ། །ནིར་གུཎྜི་དང་འབྱུང་པོའི་སྐྲ། །གིའུ་ཝང་གེ་སར་ཚ་བ་གསུམ། །དེ་བཞིན་ཆུ་ཡི་ས་བོན་ཏེ། །ལྡོང་རོས་དང་ནི་འབྲས་བུ་གསུམ། །ནིམ་པའི་ལོ་མ་ཨུ་ཤི་ར། །ཀ་རཉྫ་ཡི་འབྲས་ས་བོན། །ཤིང་ཀུན་བཱ་ལ་ཏ་ཀ་སྟེ། །འདི་ལྟར་ཉི་ཤུ་རྩ་ལྔ་ནི། །ཆ་མཉམ་དུ་ནི་བྱས་ནས་སུ། །རྒྱལ་དང་ཉི་མ་ལ་སྦྱར་ནས། །བ་ཡི་རྣམ་ལྔ་དང་བཏགས་ཏེ། །ཅི་འདོད་རིལ་བུ་བྱས་ནས་ནི། །ཉི་མ་ལ་ནི་བསྐམ་པར་བྱ། །མར་ངོའི་ཚེས་བརྒྱད་ཁྱད་པར་ལ། །མཆོག་ཏུ་སྨྱུང་བར་གནས་གྱུར་པས། །རང་འདོད་ལྷ་ཡི་མདུན་དུ་ནི། །བརྒྱད་སྟོང་དུ་ནི་བཟླ་བར་བྱ། །ཆོ་ག་འདི་ལྟར་སྔར་བྱས་ནས།། རབ་གནས་སྦྱིན་སྲེག་གིས་རྫོགས་བྱ། །བཅང་དང་མིག་སྨན་བྱུག་པ་དང ། །མགོ་ལ་སྔར་ནི་སྦྱར་བྱས་ན། །དེ་ཡི་མོད་ལ་སྐྱོན་ཀུན་ལས། །གྲོལ་བར་འདིར་ནི་ཐེ་ཚོམ་མེད། །བྱིས་པ་རྣམས་ཀྱི་མགོ་ལ་བསྐུས་ན་བྱིས་པའི་གདོན་ལས་ཡོངས་སུ་གྲོལ་བར་འགྱུར་རོ། །གདུག་པའི་གདོན་གྱིས་ཟིན་པ་ལ་བདུག་པ་བྱས་ན་རབ་ཏུ་གྲོལ་བར་འགྱུར་རོ། །རིམས་ཐམས་
50b
ཅད་ལ་མ་གོ་ལ་བྱུག་པ་བྱས་ན་ནི་རིམས་མེད་པར་འགྱུར་རོ། །མང་པོའི་དབུས་སུ་རྩོད་པའི་ཚེའམ། རྒྱལ་པོའི་སྒོར་འགྲོ་བ་ན། དབྲལ་བར་བྱུགས་ན་དེ་རྒྱལ་བར་འགྱུར་རོ། །སྐྲའི་རྩེ་མོ་ལ་བྱུགས་ན་བུད་མེད་དབང་དུ་འགྱུར་བས། གཞོན་ནུ་མ་རྣམས་འཛིན་ཅིང་སྐལ་བ་བཟང་པོར་འགྱུར་རོ། །བུད་མེད་བུ་མི་ཕྱིན་པ་རྣམས་ཀྱི་ལྟེ་བ་དང ། སྐྱེ་གནས་སུ་བྱུགས་ན་མྱུར་དུ་འབྱུང་བར་འགྱུར་རོ། །མཛེའི་ནད་ཐམས་ཅད་ལ་བ་ལང་གི་ཆུ་དང་ལྷན་ཅིག་འཐུངས་ན་བདེ་ལེགས་སུ་འགྱུར་རོ། །མངལ་མི་ཆགས་པ་རྣམས་ལ། དཔྱིད་ཀྱི་དུས་སུ་བའི་རྣམ་ལྔ་དང་ལྷན་ཅིག་འཐུངས་ན། མངལ་ཆགས་ཤིང་བུ་དང་ལྡན་པར་འགྱུར་རོ། །ཁྲག་གིས་གཟེར་བ་ལ་འབྲས་ཀྱི་ཆུ་དང་ལྷན་ཅིག་འཐུངས་ན་ཟུག་གཟེར་རབ་ཏུ་ཞི་བར་འགྱུར་རོ། །མིག་ན་བ་ལ་མགོ་ལ་བྱུགས་ན་མིག་ནད་འཇོམས་པར་འགྱུར་རོ། །མཆེ་བའི་དུག་གིས་ཟིན་པ་ལ་མཆིལ་མས་བསྐུས་ན་དུག་མེད་པར་འགྱུར་རོ། །རྟག་ཏུ་བཅངས་ན་སེང་གེ་དང ། སྟག་དང ། དོམ་ལ་སོགས་པ་ནགས་ཀྱི་བདག་པོ་རྣམས་དང ། སྡིག་པ་དང ། རྟ་བླ་མོ་ལ་སོགས་པ་དང ། གདོན་ཐམས་ཅད་ལས་ཡོངས་སུ་ཐར་བར་འགྱུར་ཏེ། ཐམས་ཅད་དུ་སྲུང་བའི་མཆོག་དང ། སྐྱེ་བོ་ཐམས་ཅད་ལ་སྡུག་པ་དང ། སྐལ་བ་བཟང་པོར་འགྱུར་རོ། །འདི་ནི་ལས་རབ་འབྱམས་ཀྱི་སྨན་གྱི་རབ་ཏུ་སྦྱོར་བ་ངེས་པར་བསྟན་པའི་རིམ་པར་ཕྱེ་བ་སྟེ་ཉི་ཤུ་རྩ་བཞི་པའོ།། །།
51a
༄#། །དེ་ནས་གཞན་ཡང་བཅུད་ལེན་གྱི། །ཆོ་ག་མཆོག་ནི་ཡང་དག་བཤད། །གང་ཞིག་རྣམ་པར་ཤེས་ཙམ་གྱིས། །ལུས་ནི་རྒྱས་པའི་མཚན་ཉིད་འགྱུར། །ཟླ་བ་སིཧལ་གླ་རྩི་དང ། །སྨན་དང་ཙནྡན་སེར་པོ་སྟེ། །སོ་སོ་འམ་ནི་ལྷན་ཅིག་གིས། །རྒས་དང་འཆི་བླུ་བྱེད་པའོ། །རིགས་ལྔ་ལས་བྱུང་མཆོག་ཡིན་ཏེ། །རང་རིགས་ལས་བྱུང་འབྲིང་དུ་འདོད། །ཐ་མལ་བུད་མེད་ལས་བྱུང་དམན། །རྒན་དང་བྱིས་པའི་རྣམ་པར་སྤང ། །མདོག་ནག་ལུས་ནི་རབ་ཏུ་བཟུང ། །གཞོན་ཞིང་སྐྲ་ནི་སྣུམ་པ་དང ། །མིག་འབྲས་གནག་ཅིང་དྲི་ཞིམ་གང ། །དེ་ཡི་མེ་ཏོག་རབ་བསྔགས་ཏེ། །མར་གྱི་ངོ་ཡི་དུས་འཚལ་ནི། །མངོན་འདོད་དངོས་གྲུབ་ཐམས་ཅད་སྟེར། །ཡར་ངོར་འཛག་པ་མི་བསྔགས་ཏེ། །རྒས་པ་ལ་སོགས་བྱེད་པ་ཡིན། །ཐོག་མ་ཐ་མ་རྣམ་སྤངས་པ། །དག་པའི་ཤེལ་དང་མཚུངས་ཤིང་དག་།རི་དྭགས་ལྟེ་བ་རབ་བསྔགས་ཏེ། །མཛེས་པའི་གླ་རྩི་ཡང་དག་བླང ། །བསད་པར་གྱུར་པ་ཡང་དག་གཙོ། །མཆོག་གི་སྨན་ནི་གཟུང་བར་བྱ། །འོ་མའི་སྟོན་མོ་སོགས་སྐྱེས་པའི། །ཙནྡན་སེར་པོ་ཡང་དག་གཟུང ། །མར་ནི་གསུམ་སྟེ་མགོ་སྐྱེས་དང ། །སྦུབས་ལས་སྐྱེས་དང་ཤ་སྐྱེས་སོ། །མགོ་སྐྱེས་མར་ནི་མཆོག་ཡིན་ཏེ། །སྦུབས་ལས་བྱུང་བ་བར་མ་ཡིན། །ཤ་ལས་བྱུང་བ་ཐ་མ་སྟེ། །བཅུད་ཀྱིས་ལེན་གྱི་ཆོ་ག་མཆོག་།ཟླ་བས་ལུས་ནི་རྒྱས་པར་བྱེད། །
51b
དུ་རུ་སྐས་ནི་ཐམས་ཅད་སྲུང ། །རི་དྭགས་ལྟེ་བས་ནད་འཇོམས་ཏེ། །སྨན་གྱིས་ཞི་བར་བྱེད་པ་ཡིན། །རྟག་ཏུ་བཞི་མཉམ་གྱུར་བ་ནི། །སྔ་དྲོའི་དུས་སུ་རྒྱུན་ཏུ་བསྟེན། །ཟླ་བའི་རླུང་ནི་རྒྱུ་བ་ན། །ཟླ་བའི་རྒྱུ་བ་བཏུང་བར་བྱ། །ཉི་མའི་རླུང་ནི་རྒྱུ་བ་ན། །ཉི་མས་ཉི་མ་བཏུང་བར་བྱ། །རྫས་འདི་དག་ནི་མཉམ་སྦྱར་བྱས། །རྟག་ཏུ་སྣར་ནི་བླུགས་པར་བྱ། །ཟླ་བ་དྲུག་ཏུ་སྦྱར་བྱས་ན། །རྟག་པའི་ཚེ་ནི་འཕེལ་བར་འགྱུར། །སྣ་སྒོ་གཡོན་དུ་རབ་བླུགས་ན། །ལས་ནི་ཡོངས་སུ་དག་གྱུར་པས། །ཡར་ངོ་ཟླ་བ་ཇི་བཞིན་དུ། །ནད་ཀུན་མེད་ཅིང་འཚོ་བར་འགྱུར། །གནག་དང་སེར་བ་དང་བྲལ་ཞིང ། །དྲི་མ་དྲི་མེད་རྣམ་པར་སྤངས། །དང་པའི་ཆུ་ལྟར་གྱུར་གང་ལ། །སྐྱོན་བཞི་དང་ནི་རྣམ་བྲལ་བའོ། །རབ་མཛེས་དྲི་མ་མེད་ཅིང་དགེ་།ཅུང་ཟད་ཤེལ་དང་མཚུངས་པའི་འོད། ། དག་པའི་ཤེལ་ལྟར་གྱུར་པ་ཉིད། །ལུས་ནི་བཅིང་བའི་མཆོག་ཡིན་ཏེ། །ཉ་དང་ཤ་དང་དེ་བཞིན་ཆང ། །བུད་མེད་ཉལ་པོ་རྣམ་པར་སྤང ། །བརྟན་ཞིང་དུལ་ལ་སྦས་པ་ཡིས། །རང་གི་ལུས་ནི་ཡོངས་སུ་སྲུང ། །སློབ་མ་དད་ལྡན་ལྷན་ཅིག་བཅས། །དབེན་པའི་ཕུག་ཏུ་རབ་ཞུགས་དེར། །མྱོས་བྱེད་གཏོར་མ་མཉམ་ལྡན་པས། །ལྷ་རྣམས་ལ་ནི་མཆོད་པར་བྱ། །རང་གི་ལྷག་པའི་ལྷར་སྦྱོར་བས། །སྔགས་ནི་རྒྱུན་མི་འཆད་པར་བཟླ། །སྦྱིན་དང་བསོད་ནམས་བྱ་བ་བྱ། །སློབ་མ་རྣམས་ནི་ཚིམ་པར་བྱ། །ཁ་ན་མ་ཐོ་མེད་པའི་གནས། །རྙེད་ནས་བགེགས་མེད་
52a
༄#། །བྱས་ཏེ་གནས། །བདེ་བའི་སྟན་རང་ཐོབ་ནས་སུ། །བློ་དང་ལྡན་པས་སྨྲ་མི་བྱ། །ཇི་སྲིད་ཉི་མ་བདུན་གྱི་བར། །རང་ལུས་ཡང་དག་དག་པར་བྱ། །དེ་རྗེས་ལོ་ནི་བཅུ་སོགས་ཀྱི། །བར་དུ་ལས་ནི་བསྟེན་པར་བྱ། །དངོས་གྲུབ་དུས་སུ་ལོ་གཉིས་ཀྱང ། །མཁས་པས་རྟག་པར་ཡང་དག་བསྲུངས། །ལོ་བཅུ་གཉིས་ནི་ཡང་དག་རྫོགས། །གཉེར་མ་སྐྲ་དཀར་རྣམ་པར་སྤངས། །སྣ་ཚོགས་ནད་ལས་རྣམ་པར་གྲོལ། །ཟླ་བ་སྐར་མ་ཡོད་པར་འཚོ། །ལྷ་དང་ལྷ་མིན་མི་རྣམས་ཀྱི། །བུད་མེད་རྣམས་ལ་ཡིད་འོང་འགྱུར། །རྫས་ནི་ལྔ་པོ་འདི་རྣམས་ཉིད། །རྟག་པར་རྒྱུན་དུ་བཟའ་ཞིང་བཏུང ། །ལས་འདི་དག་ནི་ཡང་དག་རྫོགས། །འདོད་པའི་དངོས་གྲུབ་རབ་ཏུ་འཇུག་།འདོད་འཇོའི་བ་དང་མཉམ་པའི་ལུས། །མཁའ་སྤྱོད་དངོས་གྲུབ་ཐོབ་པར་འགྱུར། །སོ་ཕག་ཚོས་འགྱུར་འདུག་གུ་དང ། །ནིར་གུནྜི་དང་བལ་གུལ་ཛ། །སྨྱོ་བྱེད་འདབ་དང་ནི་རྱཱ་ས། །གླ་རྩི་ཙནྡན་ལྡན་པ་དང ། །བཱ་ལི་ཀ་དང་ཙོ་རར་ལྡན། །རང་གི་ལུས་ནི་དྲིལ་བྱས་ན། །ནད་རྣམས་ཀུན་ལས་རྣམ་གྲོལ་ཞིང ། །དུག་མེད་མདངས་དང་ལྡན་པར་འགྱུར། །འབྲས་བུ་གསུམ་དང་ཙནྡན་གྱི། །ཕྱེ་མར་བཅས་དང་གླ་རྩི་ནི། །བསིལ་དང་ལྷན་ཅིག་ལོ་གཅིག་འཐུངས། །ནད་མེད་རྒས་པའང་མེད་པར་འགྱུར། །འབྲས་བུ་གསུམ་དང་ཙནྡན་ཕྱེ། །གླ་རྩིར་ལྷན་ཅིག་བསྟེན་བྱས་ཏེ། །ཟོས་ན་ཟླ་བ་དྲུག་
52b
ཙམ་གྱིས། །ཚེ་རིང་གཟུགས་དང་ལྡན་པར་འགྱུར། །གླ་རྩི་འབྲས་བུ་གསུམ་དང་བཅས། །རྡོ་ཡི་སྣོད་དུ་ཡང་དག་གཞག་།བགྲངས་ཏེ་གང་གིས་རྟག་འཐུངས་ན། །རྒས་དང་ནད་མེད་ཡང་དག་འབྱུང ། །ཙནྡན་ཀ་ས་ཡི་སྨན་གསུམ། །མི་གང་གིས་ནི་ཟླ་དྲུག་ཟོས། །དེ་ལ་འདོད་པའི་དངོས་གྲུབ་ནི། །འབྱུང་བར་འདིར་ནི་ཐེ་ཚོམ་མེད། །འདི་ནི་བཅུད་ཀྱིས་ལེན་གྱི་ཆོ་ག་རིམ་པར་ཕྱེ་བ་སྟེ་ཉི་ཤུ་རྩ་ལྔ་པའོ།། །།དེ་ནས་གཞན་ཡང་མྱོས་བྱེད་དང ། །བཙོ་བ་ཡང་དག་རབ་བཤད་བྱ། །རྒྱུད་རྣམས་ཀུན་ཏུ་གསང་ཆོ་ག་།ཇི་བཞིན་གཞན་ལ་བརྗོད་མི་བྱ། ། བདུད་རྩི་བསྐྱེད་པའི་ཆེད་དུ་ནི། །བཤད་ཀྱི་གནོད་སྦྱིན་བདག་པོ་ཉོན། །ཡེ་ཤེས་རྡོ་རྗེ་མན་ད་རར། །གྲགས་ཏེ་མཁའ་དབྱིངས་འོ་མའི་མཚོ། །འོ་མའི་རྒྱ་མཚོ་མཛེས་པ་ཡི། །བདུད་རྩི་བསྲུབས་པ་ཙམ་གྱིས་ནི། །དེ་ལས་སྐྱེས་པའི་ལྷ་མོ་ཆང ། །བུ་མོ་འདོད་པའི་གཟུགས་ཅན་མ། །ཉི་མ་འཆར་ཀའི་མདོག་འདྲ་ཞིང ། །རྒྱ་སྐྱེགས་ཁུ་བ་ལྟ་བུའི་འོད། །རིན་ཆེན་ཀུན་གྱིས་བརྒྱན་པའི་ལུས། །པདྨའི་མདོག་དང་མཚུངས་པའི་འོད། །ཡི་གེ་མུཾ་ལས་བྱུང་བའི་སྐུ། །མཛེས་པའི་ཕྱག་ནི་བཅོ་བརྒྱད་དེ། །ལྷ་མོ་སྣ་ཚོགས་བཅུད་འཛིན་ཅིང ། །འཇིག་རྟེན་གསུམ་པོ་དབང་སྡུད་མ། །གཡས་པས་རལ་གྲི་མདའ་ལྕགས་ཀྱུ། །ཐོད་པ་རྡོ་རྗེ་རྒྱལ་མཚན་དང ། །དེ་བཞིན་མུ་ཏིག་ཕྲེང་དྲིལ་བུ། །དགུ་པས་མཆོག་ནི་རབ་སྟེར་བའོ། །གཡོན་པའི་ཕྱག་གིས་ཕུབ་དང་
53a
༄#། །གཞུ། །ཞགས་པ་དང་ནི་ཁ་ཊྭཱཾ་ག་།རིལ་བ་སྤྱི་བླུགས་མདུང་དང་ནི། །ཐོ་བ་པི་ཝང་བགྲང་ཕྲེང་བཅས། །གཞོན་ཞིང་ལང་ཚོ་ཕུན་སུམ་ཚོགས། །ལྷ་མོ་མཛེས་པའི་སྤྱན་གསུམ་ཅན། །མན་ད་ར་ཡི་དབུས་ཕྱུང་ནས། །ཆུ་བོ་ཀུན་ཏུ་གྱུར་ནས་ནི། །འོ་མའི་རྒྱ་མཚོ་ཞེས་བྱ་བར། །མར་དང་སྦྲང་རྩི་ལྟ་བུར་འབབ། །ཞི་བའི་བཏུང་བའང་ལྷ་མོ་དེ། །རྡོ་རྗེ་རྣམ་སྣང་མཛད་གཟུགས་ཅན། །རྣམ་སྣང་མཛད་མའི་སྐུའི་དབུས་སུ། །ཧེ་རུ་ཀ་ནི་ཞུ་བར་འགྱུར། །དཔའ་བོ་ཀུན་དང་མཉམ་སྦྱོར་བའི། །མཁའ་འགྲོ་མ་ཡི་དྲ་མཆོག་བདེ། །ཐམས་ཅད་རོ་གཅིག་གྱུར་པ་ཡི། །བདུད་རྩི་དྲག་པོའི་གཟུགས་ཅན་མ། །འཕྲོག་དང་བྱ་བ་ལོངས་སྤྱོད་ལ། །དེ་ཕྱིར་སྙིང་པོ་བདུད་རྩི་ཡིན། །དེ་བཞིན་ཐབ་ནི་ཆོས་འབྱུང་གྲགས། །གླུམ་ནི་བདུད་རྩིར་བསྒྲགས་པ་སྟེ། །ཆང་གང་རྡོ་རྗེ་རྣལ་འབྱོར་མ། །གང་ཞིག་དྲེགས་ཏེ་ཧེ་རུ་ཀ་།མདོག་ནི་པདྨའི་དབང་ཕྱུག་བདག་།གང་ཞིག་དྲི་དེ་རིན་ཆེན་འབྱུང ། །རོ་གང་དོན་ཡོད་གྲུབ་པ་སྟེ། །གང་ཞིག་རླུང་གི་ཤུགས་བདག་ཉིད། །ཆང་མེད་པ་ལ་ཡེ་ཤེས་ཅི། །རྣམ་ཤེས་ཀྱང་ནི་ཅི་ཞིག་འགྱུར། །རྣམ་ཤེས་ཡེ་ཤེས་ཕུན་ཚོགས་པས། །ཆང་གིས་འགྲོ་ཀུན་རྨོངས་པར་འགྱུར། ། གནས་དང་ཞིང་དང་ཚན་དྷོ་ཧ། །འདུས་པ་དང་ནི་དུར་ཁྲོད་དུ། །མཆོད་བྱ་མཆོད་བྱེད་འབྲེལ་བ་ཡིན། །བདུད་རྩི་མཆོད་ཡོན་མཆོག་ཡིན་ཏེ། །རྒྱུད་དང་རྒྱུད་གཞན་གསུངས་པ་
53b
\?\། །བཀྲ་ཤིས་བདེ་བའི་དགའ་བའོ། །མཚུན་གྱི་ལྷ་དང་མི་རྣམས་དང ། །བག་མ་བླང་དང་མཆོད་སྦྱིན་ལས། །མཁས་པའི་མཆོད་སྦྱིན་དག་ལའང་སྟེ། །རྒྱལ་རིགས་གཡུལ་ངོར་འཇུག་བ་དང ། །རྗེའུ་རིགས་བཀྲ་ཤིས་དོན་དུ་སྟེ། །དམངས་རིགས་རྣམས་ནི་དངོས་གྲུབ་བསྒྲུབ། །རང་བྱུང་མཆོད་པའི་དུས་དག་ལ། །ཡུན་རིང་བཤད་པའི་སྤྱོད་ཡུལ་དང ། །རབ་གནས་སྦྱིན་སྲེག་དུས་དག་ཏུའང ། །གནས་རྣམས་རྒྱུ་བའི་སྤྱོད་ཡུལ་དུ། །རྣལ་འབྱོར་མ་རྣམས་སྤྱན་དྲངས་ཏེ། །མཆོད་གནས་གསང་སྔགས་སྒྲུབ་དེའི་དུས། །འདི་ལྟར་སྣ་ཚོགས་ཤེས་ནས་སུ། །དེ་ཡི་སྐྱོན་རྣམས་མི་རྟག་གོ་།དབང་དུ་བྱ་བ་བཤད་པར་བྱ། །གསང་བ་པ་ཡི་བདག་པོ་ཉོན། །བླ་མ་དཔའ་བོ་རྣལ་འབྱོར་མ། །མཆོད་ཅིང་རྗེས་སུ་སྤྱད་པར་བྱ། །ོཾ་ཨཱཿ ཧཱུཾཿ ཞེས་བྱ་སྔགས་ཀྱིས། །རྟག་ཏུ་བྱིན་གྱིས་བརླབ་པར་བྱ། །ཧ་ཧོ་ཧྲཱིཿ ཞེས་བྱ་སྔགས་ཀྱིས། །སྦྱང་བ་དང་ནི་རྟོགས་བྱ་སྟེ། །ཡི་གེ་ཧས་ནི་ཁ་དོག་འཕྲོག་།ཧོ་ཡིས་དྲི་ནི་འཇོམས་པ་སྟེ། །ཡི་གེ་ཧྲཱིཿ ཡིས་ནུས་པའང་བཅོམ། །བདུད་རྩིའི་རྣམ་པར་བསྟེན་པར་བྱ། །ལྷ་གསུམ་ལ་སོགས་དང་བྲལ་བར། །ཅི་སྟེ་དམ་ཚིག་ཅན་གྱིས་འཐུངས། །དེ་ལས་དུག་འགྱུར་ཐེ་ཚོམ་མེད། །སྔགས་ཀྱི་དངོས་གྲུབ་མི་སྐྱེའོ། །སུ་ཞིག་ཆང་གིས་མྱོས་འགྱུར་བ། །དེ་ལ་བགེགས་ནི་མང་པོ་འབྱུང ། །སྔགས་པ་ཆང་གིས་རྣམ་འགྱུར་བས། །འདོད་ལ་བརྐམ་ཞིང་འཁིག་པར་སྲེད། །རྒོད་ཅིང་གླུ་ནི་
54a
༄#། །དེ་བཞིན་ལེན། །འཐབ་མོ་ལ་སྤྲོ་རྣམ་པར་འཁྲུལ། །སྨོད་ཅིང་ཉམས་པར་བྱེད་པས་ཀྱང ། །དུ་འབོད་དམྱལ་བར་འཚེད་པར་འགྱུར། །རྣལ་འབྱོར་མ་རྣམས་ཁྲོས་ནས་ནི། །དེ་ལ་ནད་དང་མྱ་ངན་འཇིགས། །འཇིགས་པར་བྱེད་པས་རྣམ་གཙེས་ནས། །སྡིག་ཅན་དམྱལ་བར་འཁྲིད་པར་འགྱུར། །བླ་མ་ལ་འཁུ་བླ་མ་སྨོད། །སེམས་ཅན་འཁུ་ལ་སྦྱིན་མི་བྱ། །བདུད་རྩི་དེ་ཉིད་དུག་དེ་ཉིད། །དངོས་གྲུབ་སྒྲུབ་པ་འབྲས་བུ་མེད། །སྔགས་པས་འདི་དག་སྤང་བར་ནི། །སྔོན་གྱི་སངས་རྒྱས་རྣམས་ཀྱིས་གསུངས། །ཙ་རུའི་བཟའ་བར་ལྡན་པ་དང། །ཆོ་གར་ཡང་དག་ལྡན་པས་སྤྱད། །རྣལ་འབྱོར་རྣལ་འབྱོར་མའི་འདུས་པ། །ཆོ་གར་གསུངས་བཞིན་མི་སླུ་སྟེ། །དངོས་པོ་ཐམས་ཅད་མཉམ་པས་ན། །སྐལ་དང་སྐལ་མིན་བརྟག་མི་བྱ། །དེས་ན་འདུས་པ་ཞེས་གསུངས་ཏེ། །དངོས་གྲུབ་དང་ནི་རྗེས་གནང་འཐོབ། །ཤེས་རབ་བློ་དང་སྟོབས་དང་ནི། །བདེ་དང་སྐལ་བཟང་འབྲས་རབ་སྟེར། །དབང་ཕྱུག་བརྒྱད་ཀྱི་ཡོན་ཏན་ཀུན། །བླ་མེད་འབྲས་བུ་འཐོབ་པར་འགྱུར། །རྫས་སྐྱེས་དེ་བཞིན་རྩ་བ་སྐྱེས། །གཽ་ཎྜི་པེཥྚི་ཆང་གི་རིགས། །ཤིང་སྐྱེས་དེ་བཞིན་བུར་ཤིང་སྐྱེས། །ས་སྟེང་གང་དག་སྐྱེས་རྣམས་ཏེ། །མཱ་དྷྭཱི་རྣམ་པ་ལྔར་བཤད་དེ། །བཻཥྚི་རྣམ་པ་བརྒྱད་དུ་བརྗོད། །གཽཎྜཱི་རྣམ་པ་བདུན་ཡིན་ཏེ། །རིམ་པ་འདི་དག་ཤེས་པར་བྱ། །རྣོ་དང་ཁ་དང་ཚ་བ་དང ། །མངར་དང་
54b
འཇམ་པར་སྐྱེ་བ་སྟེ། །སྣ་ཚོགས་ཡུལ་དུ་རྣམ་སྐྱེས་ནས། །ཆང་གི་མིང་དུ་རབ་ཏུ་གྲགས། །ཆུ་ལ་དགའ་བོ་བཱ་སུ་ཀི། །དེར་ནི་གདན་དུ་བསྒེམ་བྱ་སྟེ། །མེ་ཏོག་དང་ནི་གུར་གུམ་བདུག་།གཏོར་མ་བྱིན་ནས་བརྩམ་པར་བྱ། །ཆོ་ག་རྫོགས་པས་བྱས་ན་ནི། །མྱོས་བྱེད་མཆོག་ནི་སྐྱེ་བར་འགྱུར། །གང་ཚེ་གྲུབ་པའི་ཆང་སེམས་པས། །ཉིན་རེ་ཉིན་རེ་བྱ་བ་ཡིན། །སྦྱོར་བ་འདི་ནི་མཆོག་ཏུ་མཛེས། །གྲུབ་པའི་མྱོས་བྱེད་ཡིད་དགའ་བ། །ཤྲི་གོའི་སྨན་ནི་ཞོ་གཉིས་དང ། །སྐྱུ་རུ་ར་ཡང་ཆ་བཅུ་དང ། །དེ་བཞིན་ཆུ་ནི་བྲེ་གང་ཉིད། །ཕོ་བ་རིས་ནི་དྲུག་ཅུ་གསུམ། །བུ་རམ་སྲང་ནི་གཅིག་བཟུང་སྟེ། །འདི་དག་གཅིག་ཏུ་སྦྱར་བྱས་པ། །འདི་ནི་གྲུབ་པའི་ཆང་ཞེས་བརྗོད། །ཉི་མའི་འོད་ལ་བཙོ་བར་བྱ། །སྐྱུ་རུ་ར་ཡི་མྱོས་བྱེད་དོ། །དྷཱ་ཏ་ཀ་ཡི་མེ་ཏོག་བཟུང ། །ཙཱུ་ཏའི་མེ་ཏོག་སོ་བ་དང། །མ་ལ་ཡང་དང་ས་རི་བ། །རྡོ་དྲེག་ཤྲི་ཀུ་བལ་ཀ་ལམ། །འདི་དག་ཆ་ནི་མཉམ་པའམ། །བཞི་ཆ་རུ་ནི་རབ་ཏུ་བརྟག་།ཆུ་སྲང་སུམ་ཅུ་རྩ་གཉིས་དང ། །བུ་རམ་སྲང་ནི་བརྒྱད་དུ་འགྱུར། །ཉི་མ་གསུམ་ན་ཆང་འདི་ཉིད། །འབྱུང་བ་རུ་ནི་ཤེས་པར་བྱ། །མེ་ཏོག་དྷཱ་ཏ་ཀའི་ཆང་ངོ ། །བ་ཏྲ་ཀ་དང་ཕོ་བ་རིས། །བཙོད་དང་ནཱ་ག་གེ་སར་གཟུང ། །ད་ཌཱི་མ་འབྲས་བུ་དེ་བཞིན་ཚ། །པི་པི་ལིཾ་དང་འོ་མར་བཅས། །བུ་རམ་སྲང་ནི་གཅིག་ཉིད་དེ། །ཆུ་ནི་བདུན་འགྱུར་སྦྱིན་པར་བྱ། །མྱོས་བྱེད་དྲི་ནི་ཞིམ་པ་དང ། །བསིལ་བའི་བདག་ཉིད་དུ་ནི་འགྱུར། །པ་ཏྲ་
55a
༄#། །ཀའི་ཆང་ངོ ། །ཤིང་ཚ་ཨེ་ལ་ནེ་ལ་དཾ། །ལེགས་མཐོང་ཏམ་ལ་རུ་པ་ཏི། །ཤ་ཀ་ར་དང་ལྷན་ཅིག་སྦྱར། །མཁས་པས་གཅིག་ཏུ་བསྲེས་བྱས་ལ། །ཉི་མའི་འོད་ལ་ལན་བདུན་བཙོ། །གྲུབ་པའི་ཆང་ནི་བླ་ན་མེད། །ཁ་རའི་ཆང་ངོ ། །ཤྲི་གུའི་རྩ་བ་ལས་བྱུང་ཆུ། །སྦྲང་རྩི་དང་ནི་ལྷན་ཅིག་ལྡན། །མཁས་པས་རྫས་ནི་དག་བྱའི་ཕྱིར། །ཆ་བརྒྱད་དུ་ནི་རབ་ཏུ་སྦྱིན། །སྦྲང་རྩི་ལྷག་པར་སྦྱར་ལ་བཙོ། །དེར་ཡང་འབྲས་བུ་གསུམ་གུར་གུམ། གླ་རྩི་དང་ནི་ག་བུར་དང ། །གན་ད་པ་ཏྲ་ཨ་ག་རུ། །དབྱེ་བས་རབ་ཏུ་སྦྱར་བྱ་སྟེ། །ཐམས་ཅད་བརྒྱད་ཆར་ཕྱེ་ནས་ནི། །དབྱེ་བའི་དོན་དུ་སྦྱར་བར་བྱ། །ཉིན་ཞག་བཞིར་ནི་ཁྱད་པར་དུ། །འབྲུ་ཡི་དབུས་སུ་གཞག་པར་བྱ། །ཆང་ནི་སྨིན་པར་བྱུར་པ་ན། །མྱངས་ན་གླ་རྩིའི་དྲིར་འགྱུར་རོ། །སོ་བྷཉྫ་ནའི་ཤུན་པ་དང ། །སྦྲང་རྩི་བཞི་འགྱུར་འགྲུབ་པར་འགྱུར། །དབྱེ་བ་གཉིས་པར་ག་བུར་དང ། །གླ་རྩི་ཛཱ་ཏི་ཕ་ལར་བཅས། །རི་དྭགས་དྲེགས་པར་བཅས་པས་ནི། །ཆང་ནི་དྲི་མ་མེད་པར་འགྱུར། །དྷཱ་ད་ཀ་ཡི་མེ་ཏོག་དང ། །བཱ་ལིའི་ཕྱེད་དང་སྦྲང་རྩིར་བཅས། །དེ་ལ་སླར་ཡང་མཚན་ཉིད་འདིས། །བཞི་ཆས་ལྷག་པས་འགྲུབ་པར་འགྱུར། ། གན་དྷེ་པ་ཏྲ་སྲང་ཕྱེད་ནི། །བརྒྱ་ཆ་དང་ནི་སྦྱར་བར་བྱ། །འདི་ལྟར་འདི་ཉིད་སྒྲུབ་པ་ཡིས། །ཟླ་རེ་ཟླ་རེར་སྦྱར་བར་བྱ། །སྣ་ཚོགས་ཆང་གི་དབྱེ་བ་ནི། །ཡུལ་དང་རྗེས་མཐུན་འགྱུར་ཞེས་
55b
བྱ། །འདི་ལྟར་ཆང་གི་དབྱེ་བ་ནི། །རྒྱུ་དང་རྒྱུད་གཞན་ལས་ཤེས་བྱ། །མྱོས་བྱེད་ལས་གཞན་མཆོད་པ་མེད། །མར་མེ་སྦྱིན་སྲེག་མཆོག་མ་ཡིན། །བླ་མ་དང་བྲལ་ཆོས་མེད་དེ། །ཆོས་དང་བྲལ་པའི་གྲོལ་བ་མེད། །མྱོས་བྱེད་ལས་གཞན་དམ་ཚིག་ནི། །གར་ཡང་འབྱུང་བར་འགྱུར་མ་ཡིན། །བདག་ཉིད་བསོད་ནམས་དབང་གིས་སམ། །ལ་ལར་བླ་མ་མཉེས་པས་རེང ། །འདི་ནི་མྱོས་བྱེད་ངེས་པར་བསྟན་པའི་རིམ་པར་ཕྱེ་བ་སྟེ་ཉི་ཤུ་དྲུག་པའོ།། །།དེ་ནས་གཞན་ཡང་སྔགས་བཏུ་བའི། །ཆོ་ག་མཆོག་ནི་རབ་ཏུ་བཤད། །ས་ཡི་ཆ་ནི་ཡིད་འོང་བར།། དྲི་ཡི་ཆུས་ནི་ཉེ་བར་བྱུག་།དབེན་པའི་གནས་སུ་ལེགས་སྦས་ཏེ། །མེ་ཏོག་སྤོས་ཀྱིས་ཉམས་དགའ་བྱ། །སྔགས་པས་ཙ་རུའི་བཟའ་བ་སྤྱད། །དེ་བཞིན་བདུད་རྩི་བཏུང་བར་སྤྱད། །རང་གི་ལྷག་པའི་ལྷར་སྦྱོར་བས། །སྔོན་དུ་གཏོར་མ་སྦྱིན་བྱ་སྟེ། །མཁའ་འགྲོ་མ་ཀུན་མཉམ་སྦྱོར་བའི། །སློབ་དཔོན་ལེགས་པར་མཉམ་བཞག་པས། །གྲུ་གསུམ་དཀྱིལ་འཁོར་མཉམ་དག་པ། །རི་མོ་གསུམ་གྱིས་ཕྱི་རོལ་བསྐོར། །ཆོས་འབྱུང་སྐྱེད་མོས་ཚལ་ཆེན་པོ། །སྣ་ཚོགས་མེ་ཏོག་གིས་རྣམ་མཛེས། །དེར་ནི་ཨཱ་ལི་ཀཱ་ལི་དབྱེ། །སྡེ་ཚན་བརྒྱད་པོ་རིམ་བཞིན་བྲི། ། འདོད་པ་དྲག་པོ་དེ་བཞིན་ཉིད། །ཐུབ་པ་མདའ་དང་མེ་གཟུགས་ཉིད། །རེའུ་མིག་བཞི་བཅུ་རྩ་དགུར་ནི། །མན་ངག་བཞིན་དུ་དགོད་པར་བྱ། ། སོགས་ཡི་གེ་ནས་བརྩམས་ཏེ། །ཡི་
56a
༄#། །གེ་ཧ་ཡི་བར་དུ་སྔགས། །གཡས་བསྐོར་རྣམ་པར་སྦྱར་བར་ནི། །གསང་བའི་བདག་པོས་ཤེས་པར་གྱིས། །རེའུ་མིག་དང་པོའི་ལྔ་པ་གཟུང ། །དེར་ནི་རེའུ་ཡིག་བཅུ་པ་ཉིད། །སྟེང་དུ་ཡང་དག་སྦྱིན་པར་བྱ། །རེའུ་མིག་དགུ་པའི་གསུམ་པ་ཡིས། །སྟེང་དུ་ཐིག་ལེས་རྣམ་པར་བརྒྱན། །རེའུ་མིག་བདུན་པའི་དང་པོ་གཟུང ། །མེ་ཡི་ས་བོན་འོག་ཏུ་བརྒྱན། །དང་པོ་ཡི་ནི་བཞི་པ་ཡིས། །བརྒྱན་པ་འདོད་པ་མོ་ཡི་མཆོག་།བདུན་པའི་གཉིས་པའི་ཡི་གེ་གཟུང ། །རེའུ་མིག་དང་པོའི་བཅུ་གཅིག་བླང ། །རེའུ་མིག་དགུ་པའི་ལྔ་པ་གཟུང ། །ཡི་གེ་ཨུ་ཡིས་འོག་ཏུ་བརྒྱན། །རེའུ་མིག་བདུན་པའི་བཞི་པ་གཟུང ། །རེའུ་མིག་དང་པོའི་བཅུ་གཅིག་པ། །མགོ་པོ་ལ་ནི་བརྒྱན་པར་བྱ། །རེའུ་མིག་དགུ་པའི་ལྔ་པ་གཟུང ། །དང་པོའི་ལྔ་པས་འོག་ཏུ་བརྒྱན། །རེའུ་མིག་ལྔ་པའི་ལྔ་པ་གཟུང ། །རེའུ་མིག་བདུན་པའི་བཞི་པ་བླང ། །རེའུ་མིག་བཅུ་གཅིག་པས་བརྒྱན་ཅིང ། །ལྔ་པ་ཡིས་ནི་འོག་ཏུ་བརྒྱན། །རེའུ་མིག་དགུ་པའི་གསུམ་པ་ཡི། །སྟེང་དུ་ཐིག་ལེས་རྣམ་པར་བརྒྱན། །ལན་གཉིས་སུ་ནི་བཟླས་པར་བྱ། །རེའུ་མིག་ལྔ་པའི་གཉིས་པ་གཟུང ། །རེའུ་མིག་གི་ནི་བཅུ་གཅིག་པའི། །བཞི་པ་དང་ནི་ཡང་དག་ལྡན། །སྙིང་པོའི་སྔགས་ནི་རྟག་བཟླས་ན། །དངོས་གྲུབ་ཡོན་ཏན་ཀུན་གྱི་གནས། །རེའུ་མིག་དག་ནི་བདུན་པ་ཡི། །ཡི་གེ་བཞི་པ་གཟུང་བར་བྱ། །
56b
རེའུ་མིག་དག་ནི་དགུ་པ་ཡི། །ལྔ་པ་ཡིས་ནི་འོག་ཏུ་བརྒྱན། །དང་པོའི་བཞི་པས་རྣམ་པར་བརྒྱན། །བདུན་པ་ཡི་ནི་བདུན་པ་ཡིས། །ལོགས་སུ་ཐིག་ལེ་གཉིས་སྦྱིན་བྱ། །རེའུ་མིག་དག་ནི་བདུན་པ་ཡི། ། ཡི་གེ་བཞི་པ་གཟུང་བྱ་སྟེ། །ལན་གཉིས་སུ་ནི་བཟླས་པར་བྱ། །སླར་ཡང་ཡི་གེ་དེ་ཉིད་གཟུང ། །དབྱངས་ཀྱི་ལྔ་པས་འོག་ཏུ་བརྒྱན། །རེའུ་མིག་དགུ་པ་གསུམ་པ་ཡིས། །ཐིག་ལེ་ཡིས་ནི་རྣམ་པར་བརྒྱན། །ལན་གཉིས་སུ་ནི་བཟླས་པར་བྱ། །རེའུ་མིག་དག་ནི་ལྔ་པ་ཡིས། །ཡི་གེ་གཉིས་པ་གཟུང་བར་བྱ། །རེའུ་མིག་བཅུ་གཅིག་པ་དག་གི་།བཞི་པ་ཉིད་ནི་གཟུང་བར་བྱ། །སྔོན་དུ་ཕྱག་འཚལ་སྦྱིན་པར་བྱ། །རྟག་པར་རྒྱུན་དུ་བཟླས་ན་ནི། །སྐལ་བཟང་དངོས་གྲུབ་བྱེད་པའོ། །རེའུ་མིག་དག་ནི་བདུན་པ་ཡི། །ཡི་གེ་གཉིས་པ་ཡང་དག་གཟུང ། །བཅུ་གཅིག་དང་པོའི་ཡི་གེ་ནི། །མེ་ཡི་བུས་ནི་འོག་ཏུ་བརྒྱན། །བདུན་པའི་གཉིས་པའི་ཡི་གེ་གཟུང ། །དབྱངས་ནི་བཅུ་གཅིག་པ་ཡིས་བརྒྱན། །རེའུ་མིག་དག་ནི་དགུ་པ་ཡི། །ཡི་གེ་ལྔ་པ་ཡང་དག་གཟུང ། །དབྱངས་ནི་བཅུ་གཉིས་པ་ཡིས་བརྒྱན། །བདུན་པའི་དང་པོའི་ཡི་གེ་ནི། །ཡང་དག་མཆོག་གི་གོ་འཕང་གཟུང ། །རེའུ་མིག་དག་ནི་ལྔ་པ་ཡི། །ཡི་གེ་བཞི་པ་ཡང་དག་གཟུང ། །དབྱངས་ཀྱི་བཞི་པས་བརྒྱན་པའོ། །རེའུ་མིག་དག་ནི་དགུ་པ་ཡི། །ཡི་གེ་བཞི་པ་གཟུང་བར་བྱ། །དབྱངས་ཡིག་བཅུ་གཅིག་པ་ཡིས་བརྒྱན། །བདུན་པའི་བཞི་པའི་ཡི་གེ་གཟུང ། །དབྱངས་ཀྱི་ལྔ་པས་མཛེས་
57a
༄#། །པར་བྱ། །དགུ་པ་ཡིས་ནི་གསུམ་པ་ཡི། །དེ་བཞིན་མགོ་ལ་མཛེས་པར་བྱས། །དེ་ནི་ལན་གཉིས་བརྗོད་པར་བྱ། །ཡི་གེ་མཆོག་ནི་གྲོལ་བ་སྟེ། །ལྔ་པའི་ཡི་གེ་གཉིས་པ་གཟུང ། །རེའུ་མིག་བཅུ་གཅིག་པ་ཡི་ནི། །བཞི་པ་ཉིད་ནི་སྦྱར་བར་བྱ། །རེའུ་མིག་དག་ནི་བདུན་པ་ཡི། །ཡི་གེ་གསུམ་པ་གཟུང་བར་བྱ། །རེའུ་མིག་དག་ནི་དགུ་པ་ཡི། །ཡི་གེ་བདུན་པས་འོག་ཏུ་བརྒྱན། །དབྱངས་ཡིག་གཉིས་པས་བརྒྱན་པར་བྱ། །རེའུ་མིག་དག་ནི་བདུན་པ་ཡི། །ཡི་གེ་བཞི་པ་བསྡུ་བར་བྱ། །དབྱངས་ཀྱི་གཉིས་པས་བརྒྱན་པའོ། །ཐོག་མར་ཡང་ནི་གསལ་བྱེད་སྦྱིན། །མཁའ་འགྲོ་མ་ཡི་སྙིང་དགའ་བ། །རྟག་ཏུ་བསྒོམ་ཞིང་བཟླས་བྱས་ན། །དངོས་གྲུབ་ཀུན་གྱི་མཆོག་རབ་སྟེར། །ཐོག་མར་ཡི་གེ་ཨོཾ་སྦྱིན་བྱ། །བདུན་པའི་གསུམ་པ་ཡང་དག་གཟུང ། །དབྱངས་ཀྱི་ལྔ་པས་ཡང་དག་བརྒྱན། །རེའུ་མིག་དག་ནི་དགུ་པ་ཡི། །ཡི་གེ་གཉིས་པ་གཟུང་བར་བྱ། །དེ་ཉིད་ལ་ནི་གསུམ་པ་ཡིས། །མགོ་ལ་རྒྱན་དུ་བྱས་པ་ཡིན། །རེའུ་མིག་དག་ནི་ལྔ་པ་ཡིས། །ཡི་གེ་བཞི་པ་ཡང་དག་བླང ། །དབྱངས་ཀྱི་གསུམ་པས་བརྒྱན་པའོ། །རེའུ་མིག་དག་ནི་བདུན་པ་ཡི། །ཡི་གེ་གསུམ་པ་གཟུང་བར་བྱ། །དབྱངས་ཡིག་ལྔ་པས་ཡང་དག་བརྒྱན། །རེའུ་མིག་དག་ནི་དགུ་པ་ཡི། །ཡི་གེ་གཉིས་པ་གཟུང་བྱ་སྟེ། །དེ་ཉིད་ལ་ནི་གསུམ་པས་བརྒྱན། །རེའུ་མིག་ངག་ནི་བདུན་པ་ཡི། །ཡི་གེ་གསུམ་པ་གཟུང་བར་བྱ། །
57b
དབྱངས་ཡིག་ལྔ་པས་འོག་ཏུ་སྦྱར། །དགུ་པའི་གསུམ་པའི་ཡི་གེ་ཡིས། །ཐིག་ལེ་རུ་ནི་བརྒྱན་པ་ཡིན། །དེ་ནི་རིམ་བཞིན་གཉིས་སུ་བཟླས། །རེའུ་མིག་དག་ནི་ལྔ་པ་ཡིས། །ཡི་གེ་གཉིས་པ་ཡང་དག་བླང། །རེའུ་མིག་དག་ནི་བཅུ་གཅིག་པའི། །བཞི་པའི་ཡིག་སྦྱར་མཆོག་དབང་ཕྱུག་།རེའུ་མིག་གཅིག་གི་ཡི་གེ་གཟུང ། །དབྱངས་ཀྱི་བདུན་པ་འོག་ཏུ་སྦྱིན། །རེའུ་མིག་དག་ནི་བདུན་པ་ཡི། །ཡི་གེ་མཉམ་པ་ཡང་དག་བླང ། །རེའུ་མིག་དག་ནི་ལྔ་པ་ཡི། །ཡི་གེ་བཞི་པ་སྦྱར་བས་མཛེས། །སྔགས་ནི་ལན་གཉིས་བརྗོད་པར་བྱ། །རེའུ་མིག་དག་ནི་བདུན་པ་ཡི། །ཡི་གེ་བཞི་པ་གཟུང་བར་བྱ། །དབྱངས་ནི་ལྔ་པས་འོག་ཏུ་སྦྱར། །ཟླ་བ་ཕྱེད་པ་ཐིག་ལེས་བརྒྱན། །དེ་ཡི་ཚིག་ནི་ལན་གཉིས་བརྗོད། །རེའུ་མིག་དག་ནི་ལྔ་པ་ཡི། །ཡི་གེ་གཉིས་པ་གཟུང་བར་བྱ། །རེའུ་མིག་དག་ནི་བཅུ་གཅིག་པའི། །བཞི་པ་སྦྱར་བས་བདེ་མཆོག་སྟེར། །གསལ་བྱེད་དང་པོར་ཡང་དག་གཞག། རེའུ་མིག་གཅིག་གི་ཡི་གེ་གཟུང ། །དབྱངས་ཀྱི་བདུན་པས་སྦྱར་བར་བྱ། །རེའུ་མིག་དག་ནི་བདུན་པ་ཡི། །ཡི་གེ་བཞི་པ་གཟུང་བར་བྱ། །རེའུ་མིག་དག་ནི་ལྔ་པ་ཡི། །བཞི་པ་ཡིས་ནི་སྦྱར་བར་བྱ། །དབྱངས་ཡིག་གཉིས་པས་རྣམ་པར་བརྒྱན། །རེའུ་མིག་ལྔ་པའི་དང་པོ་གཟུང ། །རེའུ་མིག་དྲུག་པའི་དང་པོ་བླང ། །ཚིག་ནི་ལན་གཉིས་བརྗོད་པར་བྱ། །རེའུ་མིག་དག་ནི་བདུན་པ་ཡི། །ཡི་གེ་བཞི་པ་གཟུང་བར་བྱ། །དབྱངས་ཀྱི་ལྔ་པས་འོག་ཏུ་སྦྱར། །
58a
༄#། །ཟླ་བ་ཕྱེད་པ་ཐིག་ལེས་བརྒྱན། །ཐམས་ཅད་ལན་གཉིས་བརྗོད་པར་བྱ། །རེའུ་མིག་དག་ནི་ལྔ་པ་ཡི། །ཡི་གེ་གཉིས་པ་གཟུང་བར་བྱ། །རེའུ་མིག་དག་ནི་བཅུ་གཅིག་པའི། །བཞི་པས་སྦྱར་བ་དབང་ཕྱུག་མཆོག་།ཐོག་མར་གསལ་བྱེད་ཡང་དག་སྦྱར། །ཡི་གེ་མཆོག་ནི་སྒྲུབ་པར་བྱེད། །རེའུ་མིག་བཅུ་གསུམ་པ་ཉིད་ཀྱི། །དབྱངས་ཡིག་དང་པོ་གཟུང་བར་བྱ། །དབྱངས་ཡིག་གཉིས་པར་སྦྱར་བར་འགྱུར། །རེའུ་མིག་དག་ནི་ལྔ་པ་ཡི། །ཡི་གེ་བཞི་པ་གཟུང་ནས་ནི། །བཞག་པས་གོ་འཕང་མཆོག་ཏུ་འགྱུར། །རེའུ་མིག་དག་ནི་དགུ་པ་ཡི། །ཡི་གེ་བཞི་གཟུང་མཆོག་དབང་ཕྱུག་།རེའུ་མིག་དག་ནི་བདུན་པ་ཡི། །ཡི་གེ་བཞི་པ་གཟུང་བར་བྱ། །དབྱངས་ཀྱི་བཅུ་གསུམ་པ་ཡིས་ནི། །མགོ་བ་ལ་ནི་བརྒྱན་པར་འགྱུར། །མཁས་པས་བདུན་པའི་བདུན་པ་ནི། །ལོགས་སུ་ཐིག་ལེ་གཉིས་སུ་བཞག་།རེའུ་མིག་དག་ནི་བདུན་པ་ཡི། །ཡི་གེ་གཉིས་པ་གཟུང་བར་བྱ། །དབྱངས་ཀྱི་གསུམ་པས་སྤྱི་པོར་བརྒྱན། །རེའུ་མིག་དག་ནི་དགུ་པ་ཡི། །ཡི་གེ་བརྒྱད་པ་བླང་པར་བྱ། །དེ་ཉིད་ཀྱི་འོག་བཞི་པ་སྦྱིན། །དབྱངས་ཀྱི་གཉིས་པ་སྦྱར་བར་བྱ། །ཡི་གེ་མཆོག་ནི་ཡིན་པར་བརྗོད། །རེའུ་མིག་དག་ནི་དགུ་པ་ཡི། །ཡི་གེ་ལྔ་པ་གཟུང་བར་བྱ། །དབྱངས་ནི་གཉིས་པས་མཛེས་པར་བྱ། །རེའུ་མིག་བདུན་པའི་དང་པོ་ནི། །བཞག་པས་དངོས་གྲུབ་ཐམས་ཅད་སྟེར། །རེའུ་
58b
མིག་གི་ནི་བདུན་པ་ཡི། །ཡི་གེ་བཞི་པ་བླང་བར་བྱ། །དབྱངས་ནི་ལྔ་པ་སྦྱར་བྱ་སྟེ། །ཟླ་བ་ཕྱེད་ནི་ཐིག་ལེས་བརྒྱན། །ལན་གཉིས་བརྗོད་པ་མཆོག་དབང་ཕྱུག་།ལྔ་པའི་ཡི་གེ་གཉིས་པ་གཟུང་རེའུ་མིག་བཅུ་གཅིག་པ་ཉིད་ཀྱི། །བཞི་པ་ཡིས་ནི་སྦྱར་བྱ་སྟེ། །ཡང་དག་གོ་འཕང་མཆོག་ཡིན་ནོ། །བླ་མའི་མན་ངག་ལམ་གྱིས་ནི། །སྔགས་བཏུ་བ་ནི་ཤེས་པར་བྱ། །ཡང་དག་བསྟན་དང་རྣམ་བྲལ་བའི། །གླེགས་བམ་བཀླགས་ཙམ་གྱིས་སྔགས་ལ། །བསྐལ་པ་བྱེ་བ་བརྒྱ་རུ་ཡང ། །དངོས་གྲུབ་གོ་འཕང་འབྱུང་མི་འགྱུར། །ཚེས་བཅུ་ཡི་ནི་དུས་དག་ལ། །སྣ་ཚོགས་མེ་ཏོག་ལ་སོགས་དང ། །བཟའ་དང་བཏུང་བ་མཉམ་ལྡན་པས། །རྡོ་རྗེ་རྣལ་འབྱོར་མ་མཆོད་བྱ། །སྔགས་ཉིད་རྣལ་འབྱོར་མ་ཡི་གཟུགས། །རྣལ་འབྱོར་མ་ཉིད་སྔགས་ཀྱི་གཟུགས། །ཇི་སྟེ་གོ་འཕང་མཆོག་ཐོབ་ན། །དེ་དག་དབྱེ་བར་མི་བྱའོ། །ཇི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་བླ། །འཆི་བར་མཉམ་པར་འགྲོ་ཡང་བླའི། །རྟག་ཏུ་དམ་ཚིག་བསྲུང་བར་བྱ། །འཇིག་རྟེན་གསུམ་པོ་རྒྱུ་མི་རྒྱུའི། །འགྲོ་ཀུན་གཡོན་ལས་བྱུང་བས་ན། །རྣལ་འབྱོར་མ་རྟག་གཡོན་ལ་སྤྱོད། །རྐང་པ་གཡོན་པ་སྔོན་དུ་འདོར། །ལག་པ་གཡོན་གྱིས་མཆོད་པར་བྱ། །གཡོན་པ་ཡིས་ནི་ཚིམ་དང་ཟ། །རིགས་ལྔ་ལ་ནི་ཀུན་སྤྱོད་པ། །རིགས་གཅིག་ཏུ་ནི་རྣམ་པར་རྟག་།ཀུན་རྟོག་ཀུན་ལས་རྣམ་གྲོལ་ཞིང ། །གཉིས་པ་ཐམས་ཅད་རྣམ་
59a
༄#། །པར་སྤངས། །བླ་མ་སངས་རྒྱས་བླ་མ་ཆོས། །བླ་མ་དགེ་འདུན་དེ་བཞིན་ཏེ། །སངས་རྒྱས་ཀུན་དང་མཉམ་སྦྱོར་བའི། །མཁའ་འགྲོ་མ་ཡི་དྲ་བ་སྡོམ། །དེའི་ཕྱིར་སངས་རྒྱས་གོ་འཕང་ནི། །འདོད་པས་བླ་མ་མཉེས་པར་བྱ། །འདི་ནི་སྔགས་བཏུ་བའི་ཆོ་ག་རིམ་པར་ཕྱེ་བ་སྟེ་ཉི་ཤུ་རྩ་བདུན་པའོ།། །།དེ་ནས་དེ་ཕྱིར་སྦྱིན་སྲེག་གི ། ལས་ཀྱི་ཁྱད་པར་རབ་བཤད་བྱ། །སྒྲུབ་པོས་རྒྱལ་སྲིད་ཆེད་དུ་ནི། །སྔགས་ནི་སྟོང་ཕྲག་བཅུ་རུ་བཟླས། །སྔར་བཤད་པ་ཡི་ཆོ་ག་ཡིས། །སྦྱིན་སྲེག་ལས་ནི་བརྩམ་པར་བྱ། །བསྒྲུབ་བྱའི་མིང་དང་རྣམ་སྤེལ་ཏེ། །ཤ་ཆེན་འོ་མར་སྦྱར་བ་ཡིས། །རྣམ་རྟོག་མེད་པས་སྦྱིན་སྲེག་བྱས། །ཡོངས་རྫོགས་རྒྱལ་པོ་ཉིད་དུ་འགྱུར། །བ་ལང་མི་དང་ལྕེ་སྤྱང་ཤ་།ཆང་དང་འོ་མར་མཉམ་བསྲེས་པས། །སྲེག་བླུགས་མཆོག་ནི་སྦྱིན་བྱས་ཏེ། །རྟག་ཏུ་འབུམ་གཅིག་སྦྱིན་སྲེག་བྱས། །གྲོང་ཁྱེར་མཆོག་ནི་ཐོབ་འགྱུར་ཏེ། །དཔལ་ལྡན་རྒྱལ་པོ་ཆེན་པོར་འགྱུར། །ཚེར་མའི་མེ་ནི་རབ་སྦར་ལ། །དུག་ཁྲག་འབྲུ་མར་ཚ་བ་དང ། །དེ་བཞིན་སྐྲ་དང་ཕུབ་མར་ལྡན། །མི་ཡི་རུས་པས་སྦྱིན་སྲེག་བྱ། །སྐྲ་གྲོལ་ཁྲོས་པའི་དབང་གྱུར་པས།། ལྷོ་ཕྱོགས་ཁ་བལྟས་གཅེར་བུ་འམ། །སྔགས་པ་གོས་ནི་ནག་པོ་གྱོན། །དྲག་པོའི་ལས་ལ་ཉིན་ཕྱེད་དམ། །མཚན་ཕྱེད་ན་སྟེ་གདོལ་པའི་མེར། །བསྒྲུབ་བྱའི་མིང་དང་སྦྱང་
59b
བའི་སྔགས། །ང་རོ་དྲག་པོས་བརྗོད་བྱ་ཞིང ། །རྩེ་གཅིག་སེམས་ཀྱིས་སྦྱིན་སྲེག་བྱས། །དཔུང་བཅས་སྟོབས་ཀྱང་བརླག་འགྱུར་ན། །གཞན་རྣམས་ལ་ནི་མོས་ཅི་དགོས། །དེ་ནས་སྟོབས་ཀྱིས་དྲེགས་པ་ཡི། །དགྲ་བོ་བསྐྲད་པ་བཤད་པར་བྱ། །རླུང་གི་ཕྱོགས་སུ་ཁ་བལྟས་ཏེ། །ཤ་ཟའི་མེ་ནི་རབ་སྦར་ལ། །ཁ་ཡི་གཤོག་པ་ཞག་ནིམ་པ། །ནིར་ཡ་ས་ཡི་འབྲུ་མར་བསྲེས། །ལས་ནི་མཚན་མོ་བདུན་སྦྱར་ན། །ཐེ་ཚོམ་མེད་པར་སྐྲོད་པར་འགྱུར། །དབྱེ་བའི་ལས་ཞེས་གྲགས་པ་ནི། །སྨྱོ་བྱེད་ཤིང་ལ་མེ་སྦར་ལ། །གསང་སྔགས་རིག་པས་ནིམ་པ་ཡི། །ལོ་མ་སྦྲུལ་གྱི་ཤུན་པར་བཅས། །ཁཝ་དང་འུག་པའི་ཚང་བསྲེས་ཏེ། །བརྒྱ་རྩ་བརྒྱད་ནི་སྦྱིན་སྲེག་བྱས། །འཇིག་རྟེན་ཐམས་ཅད་འབྱེད་འགྱུར་ཏེ། །སྙིང་སྡུག་སྐྱེ་བོའི་གཉེན་གྱིས་སྤོང ། །དེ་ནས་དགུག་པ་བཤད་པར་བྱ། །ལི་ཁྲི་མཚུངས་པའི་འོད་བསྒོམས་ཏེ། །བསྒྲུབ་བྱ་གཅེར་བུ་རླུང་ཕྱོགས་ནས། །སྟེང་བལྟས་གཡོ་བར་དམིགས་ནས་སུ། །སྟན་ལ་རོལ་བའི་གནས་པས་གནས། །གསང་སྔགས་ཡི་གེ་ཛཿ བྯལས་ཏེ། །ཞགས་པ་ལྕགས་ཀྱུ་རབ་སྦྱོར་བས། །བསྒྲུབ་བྱའི་སྙིང་གི་པདྨར་དབུག་།སྐྱེ་གནས་པདྨ་དབུག་བྱས་ན། །ངེས་པར་ཁམས་གསུམ་དབང་དུ་འགྱུར། ། ཐོད་པ་དུམ་བུ་གཅིག་པའམ། །མ་ཆག་སྡུག་ཅིང་མཛེས་པ་ལ། །བསྒྲུབ་བྱའི་གཟུགས་ནི་རྣམ་པར་བྲི། །དེ་ནས་བསྒྲུབ་བྱའི་མིང་བརྗོད་དེ། །ད་དུ་ར་ཡི་ཤིང་ཉིད་དང ། །ཀ་ར་བཱི་ར་ཁྲག་
60a
༄#། །ཏུ་ནི། །ཡང་དག་སྦྱར་བས་སྦྱིན་སྲེག་བྱ། །གྲོ་ག་ལ་ནི་སྒྲུབ་བྱའི་གཟུགས། །རང་ཁྲག་གིའུ་ཝང་བསྲེས་པས་བྲི། །བསྒྲུབ་བྱ་གོས་ཀྱིས་གཡོགས་ནས་ནི། ། གསང་སྔགས་བཟླ་ཞིང་སྦྱིན་སྲེག་བྱ། །སྔགས་ཀྱི་ང་རོར་བཅས་ལུས་ཀྱི། །མེ་ཏོག་རེ་རེ་རབ་བཟུང་ནས། །ཉི་མ་བདུན་དུ་སྦྱིན་སྲེག་བྱས། །གང་ཞིག་ཡིད་ལ་འདོད་པ་འགུགས། །དེ་ནས་གཞན་ཡང་བཤད་པར་བྱ། །ཙནྡན་དམར་པོའི་ཤིང་ལས་ནི། །གཟུགས་བརྙན་བྱས་ནས་རང་ཁྲག་དང ། །གི་ཝང་གིས་ནི་མིང་བྲིས་ཏེ། །དེ་བཞིན་བསྒྲུབ་བྱའི་སྙིང་གར་གཞུག ། ཚ་བ་གསུམ་གྱིས་ལུས་ལ་བྱུག་།ཟངས་མའི་ཁབ་ཀྱིས་དབུག་བྱ་བ། །སྙིང་ག་ལྟེ་བ་གསང་བ་སྟེ། །བསྒྲུབ་བྱའི་གནས་གསུམ་དུ་ནི་དབུག་།གང་ཞིག་ཡིད་ལ་འདོད་པ་དེ། །མཚན་ཕྱེད་ནས་ནི་འགུགས་པར་འགྱུར། །གསེར་མདོག་ཅན་གྱི་བཙག་གིས་སྐྱེ་གནས་ཀྱི་མཚན་མ་མངོན་པར་བྲིས་ལ་དེའི་སྟེང་དུ་ལག་པ་གཡོན་པས་བཀབ་ནས་བརྒྱ་རྩ་བརྒྱད་བཟླ་བར་བྱ་སྟེ།་གང་གི་མིང་ནས་བརྗོད་དེ་སྔགས་བཟླས་ན་སྐད་ཅིག་དེ་ཉིད་ལ་འོང་བར་འགྱུར་རོ། །ཚུབ་མས་ཁྱེར་བའི་ཤིང་ལོ་བླངས་ལ་ཁཝའི་སྒྲོ་རྩ་དང ། །མཆིམས་བསྒྲུབ་བྱའི་མིང་བྲིས་ཏེ།་གྱེན་དུ་ལངས་པའི་ཚུབ་མ་ལ་བསྐུར་ན་དེའི་མོད་ལ་སྐྲོད་པར་འགྱུར་རོ། །སྤྲེའུའི་རུས་པ་ལ་སོར་དྲུག་པའི་ཕུར་པ་བྱས་ཏེ། །སྔགས་ལན་བདུན་མངོན་པར་བཟླས་ནས་གང་གི་
60b
སྒོར་སྦས་པ་དེའི་རིགས་རྒྱུད་ཆད་པར་འགྱུར་རོ། །བ་ལང་དང ། གླང་པོ་དང ། རྟ་དང ། བོང་བུ་དང ། རྔ་མོ་དང ། མ་ཧེའི་གནས་རྣམས་སུ་སྦས་ན་དེ་དག་བརླག་པར་འགྱུར་རོ། །ཡི་དྭགས་ཀྱི་གོས་མ་ལྷུང་བ་བླངས་ལ་མར་ཁུ་ཆེན་པོ་དང་ལྷན་ཅིག་ཞ་ཉེའི་སྣོད་དུ་སྦྱར་ཏེ། མར་ངོའི་བཅུ་བཞིའི་ཁྱད་པར་ལ། སྙིང་པོའི་སྔགས་བཟླས་ཤིང ། མིག་སྨན་དབབ་པ་བྱས་ལ་མིག་ལ་བྱུགས་པ་དེས་མཁའ་འགྲོ་མ་ཐམས་ཅད་མཐོང་བར་འགྱུར་རོ། །ོཾ་བྷཱུ་ཏ་ལིཾ་གེ་སཝཱཧཱ། །མེ་དཔལ་བྱབ་པའི་སྔགས་སོ། །གླང་པོ་ཆེའི་ལྕི་བ་བླངས་ཏེ། རུས་སྦལ་གྱི་ཁོག་པའི་ནང་དུ་བཞག་ལ་ཁྱིམ་དུ་འདུག་པར་བྱིན་ན་འདིས་ནི་འདྲེ་ཤིག་ལ་སོགས་པའང་ངེས་པར་རབ་ཏུ་ཞི་བར་འགྱུར་རོ། །ོཾ་ཨུ་ད་ཀེ་མ་ཤཾ་ཀཱ་ཛཱ་ཏཱ། ཨུ་ད་ཀ་སཾ་བྷ་བཱཾ། ཏེ་ཥཱཾ་དུ་ཏཾ་ཤྩ་པཀྵཾ་ཤྩ། ཨིནྡྲེ་བནྡྷ་ཏི་མཧཱ་བ་ལཿ ་མ་ཤ་ཀཱ་ཨིནྡྲ་པཱ་ཤ་བདྡྷཱ་ཨིནྡྲ་བ་ཤ་ག་ཏཱ་གཙྪནྟེ། སཱུ་རྱོ་ད་ཡ་སཝཱཧཱ། བཞི་མདོའི་རྡོ་ཡི་དུམ་བུ་བླངས། །འདི་ཡིས་ལན་ནི་ཉི་ཤུ་བཟླས། །ཕྱོགས་བཞི་རུ་ནི་གཞུག་པར་བྱ། །སྤྲང་བུ་མཆུ་རིང་བཟློག་བྱས་པས། །ཡིད་ཅན་རྣམས་ནི་བདེ་བར་འགྱུར། །བདེ་བས་ཆོས་ནི་ཐོབ་འགྱུར་ཏེ། །ཆོས་ཀྱིས་ཀྱང་ནི་བླ་མེད་འགྱུར། །འདི་ནི་སྦྱིན་སྲེག་གི་ཆོ་ག་རིམ་པར་ཕྱེ་བ་སྟེ་ཉི་ཤུ་རྩ་བརྒྱད་པའོ།། །།དེ་ནས་དེ་ཉིད་ཇི་བཞིན་དོན། །སྒོམ་པ་ཡང་དག་རབ་བཤད་བྱ། །སྒོམ་པ་དངོས་མེད་རང་བཞིན་ཏེ། །དངོས་མེད་
61a
༄#། །སྤྲོས་དང་བྲལ་བ་ཡིན། །རང་རིག་བདག་ཉིད་ཅན་གྱི་ལས། །སྒོམ་པའང་སྒོམ་དུ་མེད་པའོ། །གཅིག་དང་དུ་མ་རྣམས་བྲལ་འདི། །སྐད་ཅིག་དེ་ཉིད་རབ་ཏུ་སྐྱེ། །ཡེ་ཤེས་འདི་ནི་རང་རིག་པ། །ངག་གི་སྤྱོད་ཡུལ་ལས་འདས་ཤིང ། །ཀུན་མཁྱེན་ཡེ་ཤེས་དེ་ཡི་དངོས། །རྨད་དུ་བྱུང་བའི་རྣམ་པར་སྐྱེས། །སྲིད་པ་ཐམས་ཅད་དངོས་མེད་མཉམ། ། ཡངས་ཤིང་གཏིང་དཔག་དཀའ་བ་སྟེ། །རྒྱུ་དང་རྣམ་པར་བྲལ་བ་ནི། །ལྷན་ཅིག་སྐྱེས་པའི་སྣང་བརྙན་ཙམ། །རང་བཞིན་གྱིས་ནི་འོད་གསལ་བ། །རྣམ་པར་སྤྱད་པའི་སྤྱོད་ཡུལ་འདས། །ཁན་མ་ཐོ་མེད་ཅིང་ཞི། །ངེས་པར་བསྐུལ་དུ་མེད་པ་སྟེ། །བརྗོད་དུ་མེད་ཅིང་བགྲང་དུ་མེད། །སྟོང་པ་ཉིད་ཀྱི་རྣམ་པ་ནི། །དངོས་པོ་ཀུན་གྱི་རང་བཞིན་གནས། །སྒྲ་སོགས་ཡོན་ཏན་ཀུན་རྣམ་བྲལ། །འདི་ནི་སངས་རྒྱས་བདེ་འབྱུང་ངོ ། །བྱང་ཆུབ་གནས་ནི་དཔེ་མེད་པ། །གང་ཞིག་འགྲོ་ལ་རྣམ་གནས་པ། །ལ་ལར་ངས་ནི་མ་བཤད་དོ། །སོ་སོར་མཉམ་པའི་དེ་ཉིད་ནི། །རྒྱལ་བ་ཡིས་ནི་གསུངས་པ་ཡིན། །གཉིས་པའི་རྣམ་པ་ལས་འདས་གསལ་བར་རིག་ཅིང་སྐལ་བ་བཟང ། །སྣ་ཚོགས་ནམ་མཁའི་དཀྱིལ་ཁྱབ་རོ་ནི་ཡང་དག་རྫོགས་པའི་སྟོབས། །ཐམས་ཅད་སེམས་ཀྱི་ནང་སོན་སྣ་ཚོགས་རྣམ་པའི་གཟུགས་འཕྲོ་བ། །འཇིག་རྟེན་གསུམ་པོར་ནམ་མཁར་ཐིམ་ལྟར་ཡིད་ལ་སྣང་བར་འགྱུར། །
61b
རྣམ་ཀུན་གཅིག་པའི་བདོ་མཆོག་གི་།རང་བཞིན་ལྷན་ཅིག་སྐྱེས་ཞེས་བརྗོད། །རྣམ་ཀུན་མཆོག་ལྡན་མཚན་ཉིད་ཀྱིས། །དེ་ཉིད་དཀྱིལ་འཁོར་ཤེས་པར་བྱ། །རྩ་ཀུན་མཁའ་འགྲོ་མ་རྣམས་ཏེ། །སྐྱེ་མཆེད་ཡན་ལག་དཀྱིལ་འཁོར་ཡིན། །ཐམས་ཅད་རོ་གཅིག་ཐོབ་པ་ཡིས། །ཧེ་རུ་ཀ་དཔལ་རང་བཞིན་རྒྱས། །སྣང་བ་མེད་ཅིང་ཐོགས་པ་མེད། །གནས་མེད་ལུས་པ་མེད་པ་སྟེ། །དངོས་པོ་ཀུན་གྱི་རང་བཞིན་ཕྱིར། །དངོས་པོ་ཀུན་ལ་རྟག་ཏུ་གནས། །རྣལ་མ་ཉིད་དུ་ཤེས་བྱ་སྟེ། །གང་ལ་བསྒོམ་པའང་རྣལ་མ་ཉིད། །ངོ་བོ་ཉིད་ཀྱིས་དགའ་བྱས་པས། ། འདི་ནི་རང་འབྱུང་འཆར་བའོ། །དེ་བས་བསམ་མི་ཁྱབ་བསམ་པས། །སྣ་ཚོགས་གཅིག་ཏུ་ཤེས་པར་བྱ། །གང་ལ་དངོས་དང་དངོས་མེད་ཀྱི། །བྱེ་བྲག་རྣམ་སྤངས་བདག་ཉིད་ནི། ། དགའ་བའི་བདག་ཉིད་བརྟན་གསལ་བས། །ནམ་མཁའི་མཐའ་ཀླས་ཁྱབ་པར་ནི། །བདག་ཉིད་ཆེན་པོས་རྟོགས་པར་བྱ། །རྣམ་པ་སྣ་ཚོགས་དྲི་མེད་པའི། །དཀྱིལ་འཁོར་དག་ནི་འཕྲོ་བར་སྣང ། །ལྷན་ཅིག་སྐྱེས་དགའ་བཞི་པའི་མིང ། །བདེ་བ་ཀུན་གྱི་གནས་དེ་ཡིན། །ཡང་དག་དེ་ཉིད་རིག་པ་ལ། །འདིར་ནི་ཐབས་མེད་ཤེས་རབ་མེད། །སྒྲུབ་པོ་ས་གསུམ་དཀྱིལ་འཁོར་ནི། །རྣམ་རྟོག་ཉིད་དུ་ཤེས་པར་བྱ། །ཆོས་དང་ལོངས་སྤྱོད་རྫོགས་སྤྲུལ་པ། །བདེ་བ་ཆེན་པོ་ཞེས་པའི་རིམ། །བདེ་བ་ཆེན་པོ་རང་བཞིན་གྱིས། །འཁོར་ལོ་བཞི་པོ་མཉམ་
62a
༄#། །པ་ཡིན། །རྟག་ཏུ་དངོས་པོ་ཐམས་ཅད་ལ། །སྒྲུབ་པོ་ཆགས་པ་མེད་པར་སྤྱད། །འཁོར་བའི་འདམ་གྱི་དབུས་སུ་ནི། །གོས་མེད་མྱ་ངན་འདས་པའོ། །མཛེས་པའི་ཡོན་ཏན་ལེགས་ཐོབ་པ། །ཡེ་ཤེས་ལྡན་ཞིང་བརྩོན་འགྲུས་ལྡན། །དེ་ནས་བླ་མའི་སྐྱེ་བོ་ལ་གུས་སངས་རྒྱས་དང་ནི་མཉམ་བལྟ་ཞིང ། །རྒྱལ་བའི་ཆོས་ནི་ཤིན་ཏུ་རྟོགས་ཤིང་བརྟན་ལ་ལེགས་པར་རབ་དང་བ། །དེ་འདིར་སྣོད་དུ་གྱུར་པ་ཡིན་ཕྱིར་དེ་ལ་བཀའ་དྲིན་སྦྱིན་པར་བྱ། །དེ་ནས་གཟུགས་སོགས་དབྱེར་མེད་ཅིང ། །ཁམས་གསུམ་གཅིག་ཏུ་ཤེས་པས་ན། ། རྒྱུན་མི་འཆད་པར་སྒྲུབ་པོ་དེས། །དགའ་བས་ཀྱང་ནི་མཆོད་ཆེན་བྱ། །ཇི་སྲིད་བྱང་ཆུབ་ཚོགས་ལྡན་པ། །དེ་སྲིད་དྲི་མ་མེད་ཉིད་འགྱུར། །སྒྲུབ་པོ་ཐབས་དང་ཤེས་རབ་དག་།བླ་མེད་འབྲས་བུ་ཐོབ་པར་འགྱུར། །འདི་ནི་དེ་ཁོ་ན་ཉིད་བསྟན་པའི་རིམ་པ་ཕྱེ་བ་སྟེ་ཉི་ཤུ་རྩ་དགུ་པའོ།། །།དེ་ནས་ཡང་དག་བཤད་བྱ་བ། །རི་མོའི་ལྷ་ཡི་གཟུགས་རྣམས་ཀྱི། །སྐུ་ཡི་ཚད་ཀྱི་མཚན་ཉིད་ནི། །གསང་བ་པ་ཡི་བདག་པོ་ཉོན། །ཚངས་པའི་རི་མོ་སོགས་གཟུགས་ཀྱི། །ཆ་ལྔ་ཡང་ནི་གདན་ཡིན་ནོ། །དུམ་བུ་གསུམ་ཅན་སྐུ་ལུས་ཀྱི། །ཆ་མཉམ་པས་ནི་ཞལ་བྱས་ཏེ། །ཞལ་ནི་བཅུ་གཉིས་ཆ་ཡིན་ནོ། །མགྲིན་པ་སོར་ནི་བཞི་པ་སྟེ། །མཁས་པས་སྐྲ་མཚམས་དབུས་དང་ནི། །སྙན་གཉིས་ལའང་དེ་ཉིད་སྦྱར། །དཔྲལ་
62b
བ་ཞལ་དང་ཤངས་ཀྱི་ཚད། །ཆ་གསུམ་ཞལ་གྱི་དཀྱིལ་འཁོར་རོ། །སྨིན་མའི་དབུས་དང་ཞལ་གྱི་སྟེང ། །སྤྱན་གྱི་ཞེང་ཡང་སོར་གཉིས་སོ། །དེ་དག་དཀྱུས་ནི་སོར་བཞི་ཡི། །ཚད་ཉིད་དུ་ནི་ཤེས་པར་བྱ། །མགྲིན་པའི་རྩ་བའི་དབུས་ཀྱི་ཚད། །དཔུང་པ་གཉིས་ཀྱིའང་ཆ་ཡིན་ནོ། །ཐམས་ཅད་དུ་ནི་ཐུགས་ཀ་དང ། །ལྟེ་བའི་གནས་ཀྱི་ཚད་གཅིག་གོ་།ནུ་མའི་བར་གྱི་ཚད་ཀྱིས་ནི། །ནུ་མ་དཔུང་པའི་བར་གྱི་ཚད། །ལག་ངར་གཉིས་ཀྱི་ཚད་ཀྱིས་ནི། །དཔུང་པ་གཉིས་ཀྱིའང་ཚད་དེ་ཉིད། །བརླ་དང་བྱིན་པའི་མཚམས་སུ་ནི། །སོར་བཞི་པ་དང་ཡང་དག་ལྡན། །པུས་མོའི་ལྷ་ང་སོར་བཞིའི་ཚད། །ཞབས་ཀྱི་བོལ་གྱིའང་དེ་ཉིད་དོ། །ཆ་ནི་བཅུ་གཉིས་ཚད་ཀྱིས་ནི། །ལྷ་ཡི་སྐུ་གཟུགས་བྲི་བར་བྱ། །ལྷག་མ་སོར་ནི་བཞི་པ་སྟེ། །གདན་ནི་གཙོ་བོའི་བརྒྱད་ཆ་ཡིན། །གདན་གྱི་དགུ་ཆ་ཉིད་ཀྱིས་ནི། །སོར་ནི་གཉིས་གཉིས་བྱ་བ་སྟེ། །ཟླ་བའི་དཀྱིལ་འཁོར་སྙིང་པོར་ནི། །ཕྱག་མཚན་ན་བཟའ་ལ་སོགས་བྱ། །ཟབ་མོ་རྡོ་རྗེ་ཅན་གྱི་ལྷ། །ཆ་ནི་བཅུ་གཉིས་མཚན་ཉིད་དོ། །དམན་པའི་ཆ་སོགས་ཆུ་རྣམས་ནི། །ཉེ་བར་མཛེས་བཞིན་ལེགས་པར་བྲི། །དེར་ཡང་ཞལ་གྱི་ཚད་མཚུངས་པའི། །ཕྱག་གཉིས་ཅུང་ཟད་བྲི་བར་བྱ། །སོར་གཉིས་ངོར་བ་བྱས་ནས་ནི།། ཞི་བའི་ལྷ་ནི་བྲི་བར་བྱ། །དེར་ཡང་ཞལ་ནི་མཐོ་གང་ཚད། །བྱས་ཏེ་ཕྱག་ནི་རྟག་མཛེས་བྲི། །ཡན་ལག་ཉིང་ལག་ཐམས་ཅད་ལ། །སོར་ནི་གཉིས་གཉིས་དོར་བ་བྱ། །ཁྲོ་བོ་ཁྲོ་མོའི་དབང་
63a
༄#། །ཕྱུག་མ། །བྲན་ཕོ་བྲན་མོ་ཅི་བགྱི་མ། །དྲག་ཅིང་འཇིགས་པའི་གཟུགས་རྣམས་ནི། །ཆ་བཅུ་པར་ནི་རྣམ་པར་བྲི། །ཡིད་དུ་འོང་བའི་རང་གཟུགས་ནི། །ཆ་དགུ་པར་ནི་མངོན་པར་བྲི། །དཀྱིལ་འཁོར་འཁོར་ལོའི་ལྷ་རྣམས་ནི། །རིམ་བཞིན་རིམ་གྱིས་སྦྱར་བར་བྱ། །དབུས་ཀྱི་རྡོ་རྗེ་རྒྱལ་པོ་ནི། །མཚན་ཉིད་གཅིག་ཏུ་རྣམ་པར་བྲི། །ཀོས་ཀོ་མགྲིན་པ་བྱིན་པ་རྣམས། །གསུམ་པོ་རིང་ན་སྐྱོན་ཆེན་པོ། །སྔགས་པ་རང་ཉིད་ངེས་པར་ནི། །གནས་ལས་ཉམས་ཤིང་བསྐྲད་པར་འགྱུར། །ཤངས་དང་སྙན་དང་ཕྱག་སོར་རྣམས། །གསུམ་པོ་ཐུང་ན་སྐྱོན་ཆེན་པོ། །དངོས་གྲུབ་ངེས་པར་འཇོམས་པ་དང ། །དེ་བཞིན་དཔལ་ཡང་ཉམས་པར་འགྱུར། །བྱིན་པ་ཞལ་དང་མཁུར་ཚོས་ཏེ། །གསུམ་པོ་སྦོམ་པ་སྐྱོན་ཆེན་པོ། །སྒྲུབ་པོ་བདག་ཉིད་ངེས་པར་ཡང ། །དཔལ་ལས་རིང་ཞིང་བདུད་བགེགས་འབྱུང ། །འགྲམ་པ་བྲང་དང་རྩིབ་ལོགས་ཏེ། །གསུམ་པོ་ཞོམ་ན་སྐྱོན་ཆེན་པོ། །དོན་ནི་ཉམས་པར་འགྱུར་བ་དང ། ། འདིར་ནི་བགེགས་འབྱུང་ཐེ་ཚོམ་མེད། །ནུ་མ་སྙན་དང་དཔྲལ་བ་རྣམས། །གསུམ་པོ་ཡོན་སྐྱོན་ཆེན་པོ། །སྒྲུབ་པ་པོ་ཉིད་མྱུར་བར་ནི། །དགྲ་ཡི་རྩོད་པས་གདུང་བར་འགྱུར། །བརླ་དང་དཀུ་དང་ནམ་ཚོང་གཉིས། །གསུམ་པོ་ཉམས་ན་སྐྱོན་ཆེན་པོ། །ཆོམ་རྐུན་རྣམས་ཀྱིས་འཇིགས་པ་དང ། །འཆི་བར་འགྱུར་བར་ཐེ་ཚོམ་མེད། །སྙན་དང་མཆུ་དང་དཔྲལ་བ་
63b
དང། །ཤངས་ཉམས་སྤྱན་ནི་ཡོ་གྱུར་ན། །སྔགས་པ་བདག་ཉིད་ངེས་པར་ཡང ། །སྣ་ཚོགས་བགེགས་འབྱུང་འཆི་བར་འགྱུར། །གྱེན་དུ་གཟིགས་ཤིང་དབུགས་བསྐྱོད་ཚུལ། །གདན་ལས་ཡོ་ཞིང་བསྐྱོད་ལྟ་བུས། །རང་གི་གནས་ལས་རྟག་འཕྲོ་ཞིང ། །དོན་རྣམས་འཇོམས་པ་ཉིད་དུ་འགྱུར། །མགྲིན་པ་ནམ་ཚོང་ལ་སོགས་སྐུའི། །སྐྱོན་ནི་གྲངས་མེད་ཞིག་ཏུ་གྲགས། །འདིར་ནི་སྤྱན་ཚོགས་ཡོ་བའམ། །ཕྱག་རྒྱ་ཕྱག་མཚན་ནོར་གྱུར་ན། །མྱ་ངན་སྡུག་བསྔལ་གྱིས་རབ་གདུང ། །སྣ་ཚོགས་སྐྱོན་སོགས་བརྟག་པར་བྱ། །རྒྱབ་ཡོལ་གདུགས་དང་གདན་རྣམས་ཏེ། ། གསུམ་པོ་ཆུང་ཞིང་དོག་པའི་སྐྱོན། །མཛའ་བོས་མི་སྙན་བརྗོད་པ་དང ། །དཔལ་ཉམས་འཆི་བར་འགྱུར་བ་ཡིན། །སྐྱོན་ནི་འདི་དག་སྐྱོན་ཆེན་པོས། །མཁས་པས་ལེགས་པར་བལྟ་བར་བྱ། ། དུལ་ཞིང་བཟོ་རྣམས་ཀུན་ཤེས་ལ། །ཆོ་ག་མཐོང་ཞིང་མཉམ་གཞག་པས། །མཚན་ཉིད་ཐམས་ཅད་ཡོངས་རྫོགས་ཤིང ། །གཟུགས་མཛེས་པས་ནི་བྲི་བར་བྱ། །ཞི་ལ་ཞི་བའི་ཚུལ་གྱི་སྐུ། ། དྲག་ལ་དྲག་ཅིང་འཇིགས་བྱེད་པ། །དཔའ་ལ་དཔའ་ཞིང་ང་རྒྱལ་སྐུ། །སྒེག་པ་ལ་ནི་བཞད་པའི་ཞལ། །མཚན་ཉིད་འདི་ལྟར་མཚོན་ནས་ནི། །སྔགས་པ་རྣམས་ཀྱིས་བྲིས་སྐུ་བྲི། །སྔགས་པ་ལས་ནི་དང་པོ་བས། །གཟུགས་བརྙན་ལ་སོགས་བྱ་བ་སྟེ། །བྲིས་སྐུ་བསྒྲུབས་ན་མྱུར་བར་ནི། །དངོས་གྲུབ་ཆེན་པོ་ཐེབ་པར་འགྱུར། །འདི་ནི་རི་མོ་ལ་སོགས་པའི་སྐུའི་མཚན་ཉིད་ངེས་པར་
64a
༄#། །བསྟན་པའི་རིམ་པར་ཕྱེ་བ་སྟེ་སུམ་ཅུ་པའོ།། །།དེ་ནས་རྣལ་འབྱོར་མའི་མཚན་ཉིད། །དགེ་བ་ཡང་དག་རབ་བཤད་བྱ། །མཁའ་འགྲོ་མ་ནི་པདྨི་ནཱི། །ལཱ་མཱ་ཧ་སྟི་ནི་ཉིད་འགྱུར། །ཁཎྜ་རོ་ཧཱ་ཤང་ཁི་ནཱི། །གཟུགས་ཅན་ཙི་ཏྲི་ཎི་ཉིད་འགྱུར། །རིགས་ནི་བཞི་པོ་རང་དངོས་སུ། །མཁས་པ་ཡིས་ནི་བརྟག་པར་བྱ། །པདྨི་ནི་ཡི་མཚན་ཉིད་བཤད། །བཞིན་ནི་དཀྱིལ་འཁོར་ལྟ་བུ་སྟེ། །སྣ་ནི་ཏིལ་གྱི་མེ་ཏོག་མཚུངས། །སེན་མོ་ཟངས་འདྲ་རུས་སྦལ་རྒྱབ། །རྐང་པའི་མཐིལ་ནི་མཉམ་པར་གནས། །ནུ་མ་ཏ་ལའི་འབྲས་བུ་བཞིན། །དེ་བཞིན་བ་སྤུ་འཁྱིལ་བ་དང ། །ཁྲོ་གཉེར་གསུམ་ཅན་སྐྱེ་གནས་མཆོག་།དེ་ཡི་བྲང་ཡང་ཤིན་ཏུ་མཛེས། །གླང་ཆེན་མྱོས་པ་ལྟ་བུའི་འགྲོས། །པདྨའི་དྲི་ལྡན་དང་བའི་དབྱངས།། རེག་བྱ་པདྨ་ལྟ་བུ་སྟེ། །པདྨའི་བཅིང་བ་འདོད་བསྟེན་བྱ། །སྐྲ་དང་ནུ་མ་ནས་བཟུང་ནས། །མཆུ་ནི་སོ་ཡིས་བཙིར་བར་བྱ། །བྷ་གར་སོར་མོ་གཞུག་དེ་ལྟར། །པདྨ་ལ་ནི་འདོད་པར་བྱ། ། དེ་ནས་ཧསྟི་ནཱིའི་མཚན་ཉིད། །དེ་བཞིན་ཡང་དག་བཤད་པར་བྱ། །ཆང་གི་དྲི་ཅན་བྱིན་པ་སྦོམ། །སྣ་ཡོན་བ་སྤུ་འཁྱིལ་བ་ཡང ། །འདོད་པས་མྱོས་ཤིང་སྲེད་པ་དང ། །ལུས་ནི་སྦོམ་ཞིང་མི་སྲུན་པ། །ུར་སྥོ་ཊའི་བཅིང་བ་ཡིས། །དེ་ལ་རོལ་བར་བྱ་བ་སྟེ། །རིལ་བུའི་རྣམ་པ་ཧསྟི་ནཱི། །མགོར་ནི་སོར་མོས་བསྣུན་བྱ་ཞིང ། །དྲག་ཏུ་འཁྱུད་ཅིང་ནུ་མ་མཉེ། །ཁ་ལ་
64b
རེག་ཅིང་སོས་གདབ་བྱ། །མཁས་པས་སོན་མོས་དྲང་བར་བྱ། །བཞད་ཀྱི་ང་རོ་ཧ་སྟི་ནཱི། །གླུ་དང་རོལ་མོ་མངོན་པར་དགའ། །མཚན་ཉིད་འདི་དག་ཡང་དག་ལྡན། །ཧ་སྟི་ནཱི་ར་ནི་ཤེས་པར་བྱ། ། ཤང་ཀི་ནི་ཡང་བཤད་བྱ་སྟེ། །སྐྲ་རིང་སྣ་ཡང་རིང་བ་སྟེ། །ཧ་ཅང་སྐེམ་མིན་སྦོམ་པ་མིན། །ནུ་མ་ན་རང་ཀའི་འབྲས་མཚུངས། །ཞོ་དང་འོ་མའི་སྟོན་མོར་དགའ། །ལག་པ་གཡོན་པས་སྐྲ་ནས་ནི། །བཟུང་བས་དགའ་བ་བསྐྱེད་བྱ་ཞིང ། །སོ་ཡིས་མཆུ་ནི་བཙིར་བར་བྱ། །ཤིན་ཏུ་དགའ་བས་དྲག་པར་ནི། །གཞིབ་དང་སྙིང་གར་སེན་མོས་བྲུད། །བོང་བུ་ཡི་ནི་དྲི་ལྡན་དང ། །བ་ལང་ལྕེ་ལྟར་རྩུབ་པ་སྟེ། །བྱ་རོག་སྒྲ་ཅན་ཤང་ཀི་ནཱི། །མཚན་ཉིད་འདི་དག་ཡང་དག་ལྡན། །རྟག་ཏུ་ཤང་ཁི་ནཱི་ཞེས་བཤད། །དེ་ནས་ཙི་ཏྲི་ནཱི་ཡང་བཤད། །ལུས་ཐུང་དེ་ཡི་བྲང་རྣམས་མཛེས།། ནུ་མ་དཔལ་འབྲས་ལྟ་བུ་སྟེ། །ཤིན་ཏུ་ཁྲོ་ཞིང་ངོ་ཚ་སྤངས། །རྟག་ཏུ་རྩོད་པ་ལ་དགའ་ཞིང ། །བྱིན་པ་ཕྲ་ཞིང་གན་རྒྱལ་ཉལ། །མཆུ་འཕྱངས་ཕུག་རོན་གྱི་ནི་སྐད། །ཤ་ཡི་དྲི་དང་ལྡན་པ་དང ། ། དཔུང་པ་རྒྱས་པ་ཙི་ཏྲི་ཎཱི། །དགའ་བས་རོལ་པ་བཤད་བྱ་སྟེ། །ཐོག་མར་ལག་པས་བྷ་ག་བཙིར། །འོ་བྱ་ནུ་མ་མཉེ་བ་དང ། །མགོ་ལ་སོར་མོས་བསྣུན་བྱ་ཞིང ། །ལུས་ནི་བསྐུམ་པས་དགའ་བ་དང ། །དྲག་པ་ཉིད་དུ་འཁྱུད་པར་བྱ། །མཆུ་ནི་འཇིབ་ཏུ་གཞུག་པར་བྱ། །སྡེབ་སྦྱོར་ཚིགས་བཅད་ལས་བཤད་པའི། །མཚན་ཉིད་འདི་དག་ཡང་དག་ལྡན། །ཙི་ཏྲི་ཎཱི་ནི་གཟུགས་ཅན་
65a
༄#། །འགྱུར། །དེ་ནས་གཞན་ཡང་འཕོ་བ་ཡི། །དབྱེ་བའི་མཚན་ཉིད་ཡང་དག་བཤད། །ཕྱི་ཡི་འཕོ་བ་རགས་པ་སྟེ། །ནང་གི་བདག་ཉིད་ཕྲ་བར་བཤད། །སྤྱི་བོར་བདེ་ཆེན་འཁོར་ལོ་སྟེ། །པདྨ་འདབ་མ་བཞི་པ་ནི། །ཕྲ་བ་བྱང་ཆུབ་སེམས་ཀྱི་གནས། །ཐམས་ཅད་བརྟེན་པའི་གཟུགས་ཡིན་པས། །བྱང་ཆུབ་སྙིང་པོའི་ངོ་བོ་ཉིད། །ས་བོན་གྱུར་པའི་ཕ་རོལ་ཏུ། །པདྨ་འདབ་མ་སུམ་ཅུ་གཉིས། །དེ་ཡི་དབུས་ཀྱི་ཡི་གེ་ཧ། །འོག་ཏུ་བལྟས་པ་བདེ་བ་འཛག། །བྱང་ཆུབ་སེམས་བདག་ཟླ་བ་ནི། །ཆ་ནི་བཅོ་ལྔའི་བདག་ཉིད་ཅན། །རྟག་ཏུ་བདེ་བ་ཆེན་པོར་འབབ། །རྣལ་འབྱོར་མ་ནི་ཆ་བཅུ་དྲུག་།དེ་ཡི་ལོགས་ནི་གཉིས་པོ་རུ། །ལ་ལ་ནཱ་དང་ར་ས་ནཱ། །ཱ་ལི་ཀཱ་ལི་རང་གི་དངོས། །རྒྱུ་དང་འབྲས་བུའི་རང་བཞིན་གྱིས། །དགའ་བ་བཞི་ཡི་གཟུགས་ཅན་མ། །ལྷན་ཅིག་སྐྱེས་དགའི་རང་བཞིན་དང ། །གཉིས་མེད་མཆོག་གི་དབང་ཕྱུག་མ། །ཀུན་རྫོབ་ཀུནད་ལྟ་བུ་སྟེ། །དོན་དམ་བདེ་བའི་གཟུགས་ཅན་མ། །སངས་རྒྱས་བྱང་ཆུབ་སེམས་རྣམས་ཀྱི། །རྟེན་དེ་རྡོ་རྗེ་འཛིན་པའོ། །མགྲིན་པར་ལོངས་སྤྱོད་འཁོར་ལོ་སྟེ། །དམར་པོ་འདབ་མ་བཅུ་དྲུག་པ། །དེ་ཡི་དབུས་སུ་ཡི་གེ་ཨོཾ། །དེ་ཡི་སྟེང་གི་ལྕེའུ་ཆུང་གི ། བུ་གའི་ལམ་ནས་བདུད་རྩི་ནི། །རྒྱུན་མི་འཆད་པར་འབབ་པ་ཡིན། །སྙིང་གར་ཆོས་ཀྱི་འཁོར་ལོ་སྟེ། །སྣ་ཚོགས་པདྨ་འདབ་མ་བརྒྱད། །དེ་ཡི་དབུས་སུ་ཡི་གེ་ཧཱུཾ། །འོག་ཏུ་
65b
བལྟས་པས་གནས་པ་སྟེ། །དེའི་སྟེང་ཕྲ་བའི་པདྨ་ནི། །ཚངས་པའི་གནས་ཀྱི་རྣམ་པ་འདྲ། །དེ་ཡི་དབུས་ཀྱི་རྣམ་ཤེས་ནི། །རྟག་ཏུ་འཆར་པ་ཐམས་ཅད་ཁྱབ། །རང་བྱུང་ཡེ་ཤེས་ཀྱི་ནི་རྟེན། །རྣམ་ཤེས་མཆོག་གི་དབང་ཕྱུག་གོ་།ལྟེ་བར་པདྨ་མདོག་སྔོན་པོ། །འདབ་མ་དྲུག་ཅུ་རྩ་བཞི་པ། །དེ་ཡི་དབུས་ཀྱི་ཡི་གེ་ཨཾ། །ནོར་བུ་བཞིན་དུ་འབར་བ་ཡིན། །དེ་འོག་ཕྲ་བའི་པདྨ་ནི། །མདུད་པའི་གནས་སུ་གཞག་པར་བྱ། །སྟོང་ཕྲག་བདུན་ཅུ་རྩ་གཉིས་ཀྱི། །རྟེན་དང་རྩ་བར་བརྗོད་པ་ཡིན། །ཤེས་རབ་རང་བཞིན་ལ་ལ་ནཱ། །ཐབས་ནི་ར་ས་ནཱ་རུ་གནས། ། དེ་དག་དབུས་སུ་སོན་ལྷ་མོ། །ཾ་ཡིག་སྣ་ཚོགས་གཟུགས་ཅན་མ། །ལྷ་མོ་སྐུ་བཞིའི་བདག་ཉིད་ཅན། །དངོས་གྲུབ་ཐམས་ཅད་རབ་སྩོལ་མ། །ཀུན་ལ་བདེ་ཆེན་རབ་སྩོལ་ལ། །རྟག་ཏུ་ཡང་དག་བདག་ཕྱག་འཚལ། །དངོས་པོ་གང་དང་གང་གིས་ནི། །མི་རྣམས་ཡིད་ནི་ཡང་དག་སྦྱོར། །དེས་དེའི་བདག་ཉིད་འགྱུར་ལྷ་མོ། །སྣ་ཚོགས་གཟུགས་ཅན་ནོར་བུ་བཞིན། །ཤེས་རབ་མེ་ཡིས་བསྐྱོད་པས་ཡུལ་གྱི་དངོས་པོ་རྣམ་པར་དཔྱད་ན་རྒྱུན་དང་བྲལ། །གཏུམ་མོ་འབར་ཞིང་རྣམ་པར་འཕྲོ་བས་དྲི་མ་མེད་ཉིད་ཡང་དག་རིག་ཅིང་གསལ། །ཕུང་པོའི་རྣམ་པར་རྟོག་པ་བསྲེགས་ཤི་ལ་དམིགས་པ་མེད་པའི་རང་རིག་འཛག་པ་དང ། །དངོས་པོ་ཐམས་ཅད་མཉམ་ཉིད་བདུད་རྩི་ནམ་མཁའ་ཁྱབ་ཅིང་ཡང་དག་གོ་འཕང་ལྡན། །དེ་ནས་གཞན་ཡང་ཐིག་ལེའི་གཟུགས། །འཕོ་བ་
66a
༄#། །ཡང་དག་བཤད་པར་བྱ། །ཡར་ངོའི་ཚེས་གཅིག་ནས་བཟུང་ནས། །ཇི་སྲིད་ཉ་ཡི་བར་དུ་སྟེ། །ཡར་ངོ་ཡི་ནི་ཚེས་གཅིག་ལ། །རྐང་པའི་སོར་མོ་ཡི་གེ་ཨ། ། ཚེས་གཉིས་བྱིན་པར་ཡི་གེ་ཨཱ། །ཚེས་གསུམ་བརླ་ལ་ཡི་གེ་ཨི། །བཞི་པ་སྐྱེས་གནས་ཡི་གེ་ཨཱི། །ལྔ་པ་ལྟེ་བར་ཡི་གེ་ཨུ། །དྲུག་པ་སྙིང་གར་ཡི་གེ་ཨཱུ། །བདུན་པ་ནུ་མར་ཡི་གེ་རྀ། །བརྒྱད་པ་མགྲིན་པར་ཡི་གེ་རཱྀ། །དགུ་པ་ལག་མཐིལ་ཡི་གེ་ལྀ། །བཅུ་པ་མཁུར་ཚོས་ཡི་གེ་ལཱྀ། །བཅུ་གཅིག་མིག་ཏུ་ཡི་གེ་ཨེ། །བཅུ་གཉིས་སྣ་རྩེར་ཡི་གེ་ཨཻ། །བཅུ་གསུམ་དཔྲལ་བར་ཡི་གེ་ཨོ། །བཅུ་བཞི་མཚོག་མར་ཡི་གེ་ཨཽ། །ཉ་ལ་སྤྱི་གཙུག་གཡས་གཡོན་དུ། །ཡི་གེ་ཨཾ་ཨཿ འི་ངོ་བོ་ཉིད། །མར་ངོའི་ཚེས་གཅིག་ནས་བཟུང་སྟེ། །ཇི་སྲིད་གནམ་སྟོང་གི་ནི་བར། །དེ་ཉིད་ཀྱིས་ནི་འཕོ་བར་འགྱུར། །གཡོན་པར་ཨཱ་ལི་ཟླ་བ་སྟེ། །ཕྲ་བ་ཡི་ནི་རང་བཞིན་ཉིད། །གཡས་པར་ཀཱ་ལིའི་ཉི་མ་སྟེ། །རགས་པ་ཡི་ནི་རང་བཞིན་ནོ། །བྱང་ཆུབ་སེམས་བདག་དབྱེ་བ་ཡིས། །དེ་བཞིན་འཕོ་བ་བཅུ་དྲུག་ཡིན། །ཐུན་ཕྱེད་ཀུན་སྤྱོད་དབྱེ་བ་ཡིས། །འཕོ་བ་བཅུ་དྲུག་དག་ཏུ་བཤད། །ཟླ་བ་འཛིན་དང་ཉི་མ་འཛིན། །ཐིག་ལེ་འགོག་དང་ནམ་མཁའ་འགོག་།འདི་དག་དང་ནི་ཡང་དག་ལྡན། །འཕོ་བ་བཅུ་དྲུག་ཤེས་པར་བྱ། །རྣམ་པར་མི་རྟོག་བདེ་བ་ཆེ། །མངོན་འདོད་ཡེ་ཤེས་ཀྱི་ནི་གཟུགས། །འདི་ནི་དགའ་ཞིང་
66b
བདེ་བའི་ཁྱིམ། །སྒོ་ཡི་ཐེམ་སྐས་དང་མཚུངས་པའོ། །འདི་ནི་རྣལ་འབྱོར་མ་བཞི་དང ། །འཁོར་ལོ་བཞི་ཡི་རིམ་པ་དང ། བྱང་ཆུབ་ཀྱི་སེམས་འཕོ་བ་བསྟན་པའི་རིམ་པར་ཕྱེ་བ་སྟེ་སོ་གཅིག་པའོ།། །།དེ་ནས་གཏོར་མའི་དེ་ཉིད་ནི། །ཇི་བཞིན་གསལ་བར་རབ་ཏུ་བཤད། །དཀྱིལ་འཁོར་སྦྱིན་སྲེག་བཟླས་པ་དང ། །རབ་གནས་དང་ནི་ཞི་རྒྱས་དང ། །དབང་དང་བསྐྲད་དང་བསད་པ་དང ། །འབྱུང་པོ་གནོད་སྦྱིན་མོ་སྒྲུབ་དང ། །གནས་ཀྱིས་སྒྲུབ་པའི་དུས་ངག་སྟེ། །ལས་རྣམས་ཀུན་ལ་མཆོག་ཡིན་ནོ། །ཆང་དང་གཏོར་མ་མེད་པར་ནི། །ལས་རྣམས་མྱུར་དུ་འགྲུབ་མི་འགྱུར། །དེས་ན་གཏོར་མ་རབ་བསྔགས་ཏེ། །སྔོན་གྱི་སངས་རྒྱས་རྣམས་ཀྱིས་གསུངས། །དང་པོར་བདེ་མཆོག་ཕྱག་གཉིས་པའི། །ལྷ་ཡི་རྣམ་པའི་རྣལ་འབྱོར་ལྡན། །སྲུང་བ་གཉིས་ཀྱིས་ཡང་དག་བསྲུངས། །ཧཱུཾ་གི་སྒྲ་ནི་བསྒྲགས་པར་བྱ། །ཉི་ཤུ་རྩ་བཞིའི་གནས་ཀྱིས་ནི། །ལུས་ཀྱི་ཡན་ལག་བརྒྱན་པར་བྱ། །སྐད་ཅིག་རྣམ་པའི་རྣལ་འབྱོར་གྱིས།། སྐད་ཅིག་གིས་ནི་གསང་སྔགས་བརྗོད། །དང་པོར་རེ་ཞིག་བཟའ་བ་དང ། བཏུང་བ་དང ། སྟོན་མོ་ལ་སོགས་པ་མདུན་དུ་ཡང་དག་པར་གཞག་ལ་རྣམ་པར་སྦྱང་བར་བྱ་སྟེ། དེ་ལ་མདུན་དུ་ཡི་གེ་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་ཡི་གེ་རཾ་ལས་བྱུང་བའི་མེའི་དཀྱིལ་འཁོར། དེར་ཡི་གེ་ཨ་དཀར་པོ་ལས་བྱུང་བའི་པདྨའི་སྣོད་ཐོད་པ་གསུམ་གྱི་སྒྱེད་བུ་ལ་གནས་
67a
༄#། །པ། དེའི་དབུས་ཀྱི་བཟའ་བ་ལ་སོགས་པ་རྣམས་ལ། ཨོཾ་ཨཾ་ཏྲཾ་ཁཾ་ཧཱུཾ། ལཱཾ་མཱཾ་པཱཾ་ཏཱཾ་བཱཾ་གི་ཡི་གེ་ལས་བྱུང་བའི་བདུད་རྩི་ལྔ་དང ། སྒྲོན་མ་ལྔའི་གཟུགས་རྫོགས་པར་བྱིན་གྱིས་བརླབས་ལ། རླུང་གིས་བསྐྱོད་པས་མེ་རབ་ཏུ་སྦར་ཏེ། བསྐོལ་བས་ས་བོན་གྱི་ཡི་གེ་ལ་སོགས་པ་བཞུ་སྟེ། ཉི་མ་འཆར་ཀ་ལྟ་བུའི་བཅུད་ཀྱི་གཟུགས་སུ་བལྟས་ལ། དེའི་སྟེང་དུ་དངུལ་ཆུའི་མདོག་ཅན་གྱི་ཧཱུཾ་ལས་བྱུང་བའི་ཁ་ཊྭཱཾ་ག་དཀར་པོ་བདུད་རྩིའི་རང་བཞིན་ཅན་ཐུར་དུ་བལྟས་པ་རྣམ་པར་ཞུ་བར་བསམས་ཏེ། དེ་བཅུད་ཀྱི་རང་བཞིན་དུ་རོ་གཅིག་པར་གྱུར་པར་བལྟས་ལ། ཨཱ་ལི་ཀཱ་ལི་ཡོངས་སུ་གྱུར་པ་ལས་ཨོཾ་ཨཱཿ ་ཧཱུཾ་གི་ཡི་གེ་རྩེག་མར་ཡོངས་སུ་གནས་པ་སྟེ། དེ་དག་ལས་དཀྱིལ་འཁོར་གྱི་འཁོར་ལོའི་ལྷ་རྣམས་སྦྲོས་ལ། འགྲོ་བའི་དོན་བྱས་ཏེ། མཉམ་པར་སྦྱོར་བ་སྔོན་དུ་འགྲོ་བས་ཞུ་བར་གྱུར་ཅིང་ཇི་ལྟ་ཇི་ལྟ་བའི་ས་བོན་ལ་རབ་ཏུ་བཅུག་སྟེ། ཡི་གེ་གསུམ་ཅི་འདོད་པར་བརྗོད་པས་བྱིན་གྱིས་བརླབས་པར་བྱའོ། །མཛུབ་མོ་མདུད་བྱས་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་པར་རབ་ཏུ་སྦྱར། །དེ་ནི་དཔྲལ་བའི་དབུས་སུ་རབ་བཞག་ནས། །བསྐོར་ཞིང་བསྐོར་བས་ཀུན་ཏུ་བསྐོར་བ་བྱ། །རྐང་པ་མནན་ཅིང་སྟེང་དུ་བལྟ། །གྱེན་དུ་ཕེཾ་གྱི་སྒྲ་སྒྲོགས་ཤིང ། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་རྣམས་འགུགས། །དེ་ནས་
67b
ཡང་ལག་པ་གཡས་བ་དང ། གཡོན་པ་བསྐོར་བར་བྱ་ཏེ། ས་མ་ཡ་སྟྭཾ། ས་མ་ཡ་ཧ། ས་མ་ཡ་ཧོཿ ། ཞེས་པ་ལན་གསུམ་བརྗོད་ཅིང ། གཡས་དང ། གཡོན་དུ་བསྐོར་ཞིང་བསྐོར་བས། མཆོད་བྱ་དང།་མཆོད་བྱེད་ཀྱི་དབྱེ་བ་མེད་ཅིང་ཤིན་ཏུ་གྲོལ་བ་སྔོན་དུ་འགྲོ་བ་ཡིས། མཁའ་འགྲོ་མའི་དྲ་བའི་བདེ་བའི་དམ་པས་ལྷ་རྣམས་ལ་མཆོད་པར་བྱས་ཏེ། ཤར་དུ་ཨིནྡྲ་ས་པ་རི་པཱ་ར་ནཱ་ཀཪྵ་ཡ་ཛཿ ་ལྷོར་ཡ་མ་ས་པ་རི་བཱ་ར་ནཱ་ཀཪྵ་ཡ་ཛཿ ་ནུབ་ཏུ་བ་རུ་ཎ་ས་པ་རི་བཱ་ར་ནཱ་ཀཪྵ་ཡ་ཛཿ ་བྱང་དུ་ཀུ་བེ་ར་ས་པ་རི་བཱ་ར་ནཱ་ཀཪྵ་ཡ་ཛཿ ་དབང་ལྡན་དུ་མཧཱ་བྷཱུ་ཏ་ས་པ་རི་བཱ་ར་ནཱ་ཀཪྵ་ཡ་ཛཿ ་མེར་ཨགྣི་ས་པ་རི་བཱ་ར་ནཱ་ཀཪྵ་ཡ་ཛཿ ་བདེན་བྲལ་དུ་རཀྵ་ས་ས་པ་རི་བཱ་ར་ནཱ་ཀཪྵ་ཡ་ཛཿ ་རླུང་དུ་བཱ་ཡུ་དེ་བ་ས་པ་རི་བཱ་ར་ནཱ་ཀཪྵ་ཡ་ཛཿ ་སྟེང་དུ་ཙནྡྲ་སཱུརྱ་བྲཧྨཱ་དྱཱ་དེ་བ་ཏཱ་ས་པ་རི་བཱ་ར་ནཱ་ཀཪྵ་ཡ་ཛཿ ་ས་འོག་ཏུ་བཻ་མ་ཙི་ཏྲཱི་ཕྲྀ་ཐི་བཱ་དེ་བ་ཏཱ་ས་པ་ར་བཱི་ར་ནཱ་ཀཪྵ་ཡ་ཛཿ ཛཿ ་ཧཱུཾ་བཾ་ཧོཿ ་སཾ་ཏྲི་པྟ་སརྦ་དེ་བ་ཏཱ་སཱདྷ་ཀ་སྱ་ཤཱིནྟཾ་ཀུ་རུ། པུཥྚི་ཀུ་རུ། སརྦ་ཀཱ་རྱཾ་ཏུ་སིདྡྷི་རྦྷ་བ་ཏུ། ཡ་ཐཱ་སུ་ཁཾ་མུ་ཁེ། ཨོཾ་ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ། ཀྵོ་བྷ་ཡ། ཧྲཽཾ་ཧྲཽཾ། ཧྲཿ ཧྲཿ ་ཕཻཾ་ཕཻཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷཀྵ་བྷཀྵ། བ་སུ་རུ་དྷི་རཱནྟྲ་མཱ་ལཱ་བ་ལཾ་བི་ནེ་གྲྀཧྣ་གྲྀཧྣ་སཔྟ་པཱ་ཏཱ་ལ་ག་ཏ་བྷུ་ཛཾ་ག་སརྦ་མྤཱ། ཏརྫྫ་ཡ་ཏརྫྫ་ཡ། ཨཱ་ཀཌྜྷྱ་ཨཱ་ཀཌྜྡྷྱ། ཧྲཱིཾ་ཧྲཱིཾ། ཛྣཽཾ་ཛྣཽཾ། ཀྵྨཱཾ་ཀྵྨཱཾ། ཧཱཾ་ཧཱཾ། ཧཱིཾ་ཧཱིཾ་ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུཾ་
68a
༄#། །ཧཱུཾ་ཕཊ། ཅེས་བྱ་བ་འདི་ལན་གཅིག་བརྗོད་པས་བཅོམ་ལྡན་འདས་ཤེས་རབ་དང་བཅས་པ་དང ། མཁའ་འགྲོ་མ་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་རིམ་བཞིན་དུ་བསྐོར་བ་བྱས་ཏེ། ཨོཾ་ཨཱ་རལླི་ཧོཿ ་ཛཿ ་ཧཱུཾ་བཾ་ཧོཿ ་བཛྲ་ཌཱ་ཀི་ནི་ས་མ་ཡ་སྟྭཾ་དྲི་ཤྱ་ཧོཿ ཞེས་བྱ་བ་འདིས་ལན་གཅིག་གམ། གཉིས་སམ། གསུམ་མམ། བཞི་འམ།་ལྔར་བརྗོད་དེ་དབུལ་བར་བྱའོ། །དེ་ནས་ཉེ་རེག་དང ། སོ་རྩི་ལ་སོགས་པ་ཕྱག་ཏུ་ཕུལ་ལ་པདྨའི་ལག་བསྐོར་སྔོན་དུ་འགྲོ་བས་ཡང་དག་པར་མཆོད་དེ་བསྟོད་ནས། སྲིད་དང་ཞི་བ་མཉམ་པས་ཆགས་པ་བཅོམ་ཞིང་ཡང་དག་རྟོག་པ་འཇོམས། །ཁྱེད་ཀྱིས་དངོས་པོ་ཐམས་ཅད་མཁའ་དང་མཉམ་པའི་བདག་ཉིད་གཟིགས་པར་ལྡན། །མགོན་པོ་ཐུགས་རྗེའི་ཆུ་ཡི་ལྗིད་ཀྱིས་བརླན་པར་འགྱུར་བའི་ཐུགས་ཀྱི་ཆུས། །བདག་ལ་མཛོད་ཅིག་ལྷ་མོ་རྣམས་ཀྱིས་ཤིན་ཏུ་རྗེས་བརྩེར་མཛད་དུ་གསོལ། །ཞེས་བྱ་བ་འདིས་དངོས་གྲུབ་བླང་བར་བྱའོ།། དེ་ནས་དུར་ཁྲོད་བརྒྱད་ཀྱི་ཕྱོགས་སྐྱོང་ལ་སོགས་པ་རྣམས་ལ་སྔོན་བཞིན་བསྐོར་བར་བྱས་ཏེ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ། རཱཀྵ་ས། བྷཱུ་ཏ། པྲེ་ཏ། པི་ཤཱ་ཙ། ཨུནྨཱ་ད། ཨ་པསྨཱ་ར་ཌཱ་ཀ་ཌཱ་ཀི་ནྱཱ་ཡཿ ི་མཾ་བ་ལིཾ་གྲྀཧྣཾ་ཏུ། ས་མ་ཡ་རཀྵཾ་ཏུ། མ་མ་སརྦ་སིདྡྷིམྨེ་པྲ་ཡཙྪ་ནྟུ། ཡ་ཐཻ་བཾ། ཡ་ཐེཥྚཾ། བྷུཉྫ་ཐ། ཛིགྷྲ་ཐ། མཱ་ཏི་ཀྲ་མ་ཐ། མ་མ་སརྦ་ཀཱ་རྱཱཾ་སྟ་སུ་ཁཾ་བི་
68b
ཤུདྡྷ་ཡེ། སཧཱ་ཡི་ཀ་བྷ་ཝནྟུ་ཧུཾ་ཧཱུཾ་ཕཊ་ཕཊ་སཝཱཧཱ། རྐང་པ་བརྒྱད་ཀྱི་སྔགས་ཀྱིས་ཡང་དག་པར་བསྟོད་ལ་མངོན་པར་འདོད་པའི་དངོས་གྲུབ་བླང་བར་བྱ་ཞིང་བརྡའི་ལག་པས་བརྡ་བསྟན་པར་བྱ་སྟེ།་ཨོཾ་ཡོ་ག་ཤུདྡྷཱཿ སརྦ་དྷརྨཱ་ཡོ་ག་ཤུདྡྷོཉཧཾ། ཞེས་བྱ་བ་བརྗོད་ཅིང ། པདྨ་བསྐོར་བའི་ཕྱག་རྒྱས་མཉེས་པར་བྱའོ། །ཉེ་བར་བསྡུ་བའི་ཕྱག་རྒྱ་མི་ཕྱེད་པར་འཁྱུད་པ་སྔོན་དུ་འགྲོ་བས་མཐེ་བོད་དང ། སྲིན་ལག་སེ་གོལ་བརྡབ་པར་བྱ་སྟེ། ཨོཾ།་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པར་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང ། །ཇི་ལྟར་བདེ་བར་བཞུགས་སུ་གསོལ། །ོཾ་བཛྲ་མུཿ ་ཞེས་བརྗོད་པས་གཤེགས་སུ་གསོལ་བར་བྱའོ། །དཀྱིལ་འཁོར་པའི་ལྷ་རྣམས་ཐམས་ཅད་བདག་ཉིད་ལ་གཞུག་པར་བྱའོ། །དེའི་རྗེས་ལ་ལྷག་མའི་གཏོར་མ་བསྡུས་པས་དམ་ཚིག་བསྒྲུབ་པ་བསྟན་པར་བྱ་སྟེ། ཁ་ནི་མྱོས་བྱེད་ཀྱིས་བཀང་ནས། །འབར་བའི་ཕྱག་རྒྱ་བཅིང་བར་བྱ། །ཧཱུཾ་གི་སྒྲ་ནི་དྲག་པོ་ཡིས། །ལྷག་མའི་སྣོད་དུ་སྦྱིན་པར་བྱ། །མེ་ཏོག་སྤོས་ལ་སོགས་བྱིན་པས། །མཉེས་བྱས་སྔགས་ནི་བརྗོད་པར་བྱ། །ོཾ་སརྦ་ཁ་ཁ་ཁཱ་ཧི་ཁཱ་ཧི། ཨུཙྪིཥྚ་པ་ལིཾ། ཨུཙྪིཥྚ་བྷཀྵེ་བྷྱ་སཝཱཧཱ། སྙིང་རྗེ་ལ་སོགས་ཉམས་ལྡན་པས། །དེ་བཞིན་བཀྲ་ཤིས་གླུ་བླང་བྱ། །རྣམ་ཀུན་དོན་ནི་ཡོངས་དག་ཅིང ། །རྣམ་པ་མེད་པའི་བདེ་བ་ཆེ། །སྒྲུབ་པོ་ཤེས་རབ་ཐབས་བདག་ཉིད། །ལས་
69a
༄#། །རྣམས་ཐམས་ཅད་འགྲུབ་པར་འགྱུར། །འབྱོར་ན་ཉི་མ་རེ་རེའམ། །དེ་བཞིན་ཟླ་བའམ་ལོ་རེར་ནི། །རྫོགས་པའི་བྱང་ཆུབ་སེམས་ཀྱི་གཟུགས། །དེ་བཞིན་ཉིད་དུ་ཡོངས་སུ་བསྔོ། །སྦྱིན་པ་ལ་སོགས་ཐམས་ཅད་ཀྱིས་ནི་འགྲོ་བ་ཉིད་ཀྱིས་འདོད་པ་མཆོག་ནི་ཀུན་རྫོགས་མཛད། །ཧེ་རུ་ཀ་དཔལ་མཁའ་འགྲོ་མ་སོགས་རྣམ་རྟོག་གཏི་མུག་གྲོང་ཁྱེར་ཐམས་ཅད་ཕྱེ་མར་བརླག་།གང་ཞིག་འཁོར་ལོ་རབ་ཏུ་བསྐོར་བའི་བླ་མ་རྒྱལ་བའི་ཡེ་ཤེས་འབྱུང་གནས་མཐར་སྦྱིན་མཛད། །དེ་ནི་སྙིང་རྗེ་ཆེན་པོའི་དབང་གྱུར་འཕགས་པ་རྣམས་ཀྱི་རྟག་ཏུ་མྱུར་བར་བཀྲ་ཤིས་ཡིན། །འདི་ནི་གཏོར་མའི་མཆོད་པ་བསྟན་པའི་རིམ་པར་ཕྱེ་བ་སྟེ་སོ་གཉིས་པའོ།། །།དེ་ནས་ཡེ་ཤེས་འབྱུང་བ་ཡི། ། དངོས་གྲུབ་སྡོམ་པ་བཤད་པར་བྱ། །སྣ་ཚོགས་ཚུལ་གྱི་ཐབས་རྣམས་ནི། །དངོས་གྲུབ་རྣམས་ཀྱི་གྱུ་ཡི་མཆོག་།ཕྱི་དང་ནང་དུ་བཅས་པའི་ལུས། །ནམ་མཁའ་ལྟ་བུར་དྲི་མ་མེད།། འདི་ལྟར་བདག་ཉིད་མཁའ་མཚུངས་པར། །རྟག་ཏུ་གྲོལ་བའི་བདག་ཉིད་མཐོང ། །ལུས་མེད་ཐོག་མ་ཐ་མ་མེད། །སྒྲ་ལ་སོགས་པའི་ཡོན་ཏན་བྲལ། །གཉིས་པ་ལས་ནི་རྣམ་གྲོལ་བ། །རྣམ་པ་ཀུན་ཏུ་ཅིར་ཡང་གནས། །དངོས་མེད་དངོས་པོ་ལ་བརྟེན་ནས། །བརྟེན་པ་མེད་པར་དངོས་པོར་བྱ། །ཡིད་མེད་ཡིད་ནི་བྱས་ནས་སུ། །ཅུང་ཟད་ཙམ་
69b
ཡང་མི་བསམ་མོ། །སྟན་ལ་གནས་ནས་བླ་མ་ཡི། །བརྒྱུད་པར་བརྟན་པར་བྱས་ནས་ནི། །དེ་བཞིན་མཁའ་དང་མཚུངས་པ་ཡི། །རོ་གཅིག་སེམས་ནི་བསྒོམ་པར་བྱ། །བསམ་གཏན་གཟུགས་ལས་རྣམ་པར་གྲོལ། །རྟོག་གེའི་སྦྱོར་བ་རྣམ་པར་སྤངས། །སེམས་བྱུང་སེམས་སུ་བརྟན་གྱུར་པ། །འགྲོ་བའང་རང་བཞིན་ཚུལ་དེ་བཞིན། །མཁའ་མཚུངས་ནམ་མཁའ་ཡང་དག་གནས། །ཤེལ་གྱི་ནོར་བུ་དག་པ་བཞིན། །ཐོག་མ་ཐ་མ་མེད་པའི་གཟུགས། །སྤྲོས་བྲལ་དབང་པོའི་སྤྱོད་ཡུལ་མིན། །འགྱུར་བ་མེད་ཙང་སྣང་བ་མེད། །ཐམས་ཅད་སྟོང་པ་ཉོན་མོངས་མེད། །འགྲོ་བའི་སྒྲོན་མ་སྲིད་པ་ཡི། །འཆིང་བ་འཇོམས་ཤིང་ཚིག་བརྗོད་བྲལ། །ཡིད་ཀྱིའང་སྤྱོད་ཡུལ་མ་ཡིན་ཏེ། །གཉིས་ལྡན་རྣམ་གྲོལ་ཉོན་མོངས་མེད། །དོན་དམ་གྲོལ་བ་རབ་སྩོལ་བའི། །འཕོ་མེད་དེ་ཉིད་ལ་ཕྱག་འཚལ། །ཇི་ལྟར་དེ་ཉིད་ལ་རེག་ནས། །བསམ་པ་ཀུན་གྱིས་བསམ་དུ་མེད། །གང་ཚེ་བསམ་དུ་མེད་སེམས་པ། ། དེ་ཚེ་བསམ་གྱིས་མི་ཁྱབ་འགྱུར། །སེམས་ཅན་ཇི་བཞིན་བསམ་མེད་དེ། །བསམ་མེད་ཇི་བཞིན་རྒྱལ་བའང་དེ། །གང་ཕྱིར་བསམ་བྲལ་སངས་རྒྱས་ཀྱིས། །བསམ་པ་འདི་ནི་རབ་ཏུ་བཤད། །བསམ་གྱིས་མི་ཁྱབ་སེམས་དེ་ལ། །བསམ་པ་ཀུན་གྱི་བགྲང་ལས་འདས། །སྣ་ཚོགས་རྟོག་པའི་རྟོག་པ་མེད། །ཆགས་མེད་བདེ་བ་ཆེན་
70a
༄#། །པོ་སྟེ། །རྣམ་པ་ཐམས་ཅད་ཀྱི་ནི་མཆོག་།དབང་པོ་ཀུན་འདས་རྣམ་བ་མེད། །དངོས་དང་དངོས་མེད་བདག་ཉིད་དེ། །དངོས་དང་དངོས་མེད་རྣམ་པར་སྤངས། །བེམས་པོ་མིན་ཕྱིར་བདག་ཉིད་རིག་།མི་ཤེས་རྣམ་པར་མི་མཐོང་བའོ། །གཟུགས་མེད་གར་ཡང་མི་གནས་པ། །འགྱུར་བ་མེད་ཅིང་བརྟན་པའོ། ། དངོས་པོ་མེད་པའི་ཆོས་རྣམས་ལ། །བླང་དང་དོར་བ་གང་ལ་ཞིག་།བླང་བྱ་དང་ནི་དོར་བྱ་ཡི། །ཆོས་ཀུན་རྨི་ལམ་ཇི་བཞིན་ནོ། །དགའ་བ་ཡོངས་སུ་ཤེས་པ་ཡིས། །ཤེས་རབ་ཕ་རོལ་ཕྱིན་པ་མཆོག་།དགའ་བའི་འབྲས་བུ་ལ་གནས་པ། །འདི་ནི་དངོས་མེད་བྱང་ཆུབ་བོ། །གཉིས་པོ་རོ་གཅིག་དབྱེར་མེད་པ། །དགའ་བའི་བདེ་བ་ཆེན་པོ་ཉིད། །ཤེས་རབ་སྙིང་རྗེའི་དབྱེ་བ་ནི། །སྒྲོན་མེ་དང་ནི་འོད་ཟེར་བཞིན། །འདི་གཉིས་མི་ཕྱེད་བདག་ཉིད་ནི། །རོ་གཅིག་དངོས་པོའི་སེམས་ཡིན་ནོ། །ཤེས་རབ་ཐབས་ནི་མཉམ་སྦྱོར་བས། །རྫོགས་པའི་བྱང་ཆུབ་སྒྲུབ་བྱེད་པ། །དེ་ཉིད་ལ་ནི་བླ་མེད་པའི། །སངས་རྒྱས་ཀུན་རྣམས་རབ་ཏུ་ཞུགས། །དབྱེར་མེད་རྣམ་པར་ཡང་དག་རིག་།གང་ཞིག་གནས་པ་རྡོ་རྗེ་སེམས། །ཇི་སྲིད་རྫོགས་པའི་བྱང་ཆུབ་རྒྱུར། །བདེ་བས་སྡོམ་པར་བྱས་ན་ནི། །སྒྲུབ་པོས་བདེ་
70b
མཆོག་རྫོགས་པར་རུ། །དེ་སྲིད་དེ་ནི་མྱོང་བར་འགྱུར། །མཛེས་པའི་སྒྱུ་མ་རྣམ་འཕྲུལ་དག་ལ་དེ་ཤེས་ཇི་བཞིན་ཉིད། །དགའ་དང་སྐྱོ་བ་ཐམས་ཅད་མཉམ་པ་ཉིད་དུ་རབ་ཏུ་སྤྱད། །འཇིགས་པར་བྱེད་པའང་མེད་ཅིང་བདེ་བ་འབྱུང་བའང་ཡོད་མ་ཡིན། །དེ་ཉིད་ཀྱིས་ནི་སྒྲུབ་པོ་དེ་བཞིན་ཉིད་བདག་རྗེས་སུ་འགྲོ་།ེ་མའོ་བདེ་ཆེན་འདོད་པ་ཡིས། །ས་གསུམ་པོ་ནི་གང་བ་སྟེ། །ེ་མའོ་ཞི་བའི་བདེ་བ་འབབ། །སྣ་ཚོགས་མངོན་པར་བྱང་ཆུབ་རྒྱས། །ེ་མའོ་བདེ་བའི་བདེ་ཆེན་པོ། །ེ་མའོ་ཇི་ལྟར་ཇི་ལྟར་བཟའ།། ཨེ་མའོ་ལྷན་སྐྱེས་བདག་ཉིད་ཆེ། །ཆོས་རྣམས་ཀུན་གྱི་ངོ་བོ་ཉིད། །འགྲོ་བ་ཆུ་ཡི་ཟླ་བ་བཞིན་དུ་མཐོང་བ་དང ། །ཐོས་པ་བྲག་ཆ་དང་ནི་མཚུངས་པར་ཡང་དག་འཇུག་།སེམས་ཀྱང་མྱ་ངན་སྨིག་རྒྱུ་ལྟ་བུར་བལྟ་བྱ་ཞིང ། །འདི་ལྟར་བཟའ་དང་བཏུང་བ་ནམ་མཁའ་ལྟ་བུ་སྟེ། །དྲི་ནི་ནམ་མཁའི་མེ་ཏོག་མཚུངས་པར་མནམ་པ་དང ། །ཡིད་ནི་ཉི་མ་ཟླ་བ་བཞིན་དུ་ཁྱབ་པར་བྱ། །ཡང་དག་གནས་དེའང་རི་རབ་དང་ནི་མཚུངས་པ་ཡིན། །གཞོན་ནུ་མ་ཡི་རྨི་ལམ་དེ་བཞིན་དམིགས་པར་བྱ། །ཐ་སྙད་དག་ནི་སྒྱུ་མ་མིག་འཕྲུལ་ལྟ་བུར་བགྲོད། །འདི་དག་ཇི་བཞིན་ལྷན་སྐྱེས་བདེ་འབྱུང་དེ་བཞིན་ཏེ། །སྲིད་པ་རང་བཞིན་བྲལ་ཞིང་བསམ་གྱིས་མི་ཁྱབ་གཟུགས། །རྟག་ཏུ་འཆར་བ་བདེ་
71a
༄#། །གཤེགས་ལམ་མཆོག་ཕྱག་འཚལ་བསྟོབ། །མཆོད་པ་\?\་ཐམས་ཅད་ཡོངས་སྤངས་ཏེ། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་མཛད་པའི་སློབ་དཔོན་ནི། །རྡོ་རྗེ་སེམས་དཔའ་རབ་མཆོད་ན། །དེ་ཡི་བསོད་ནམས་མ་བྱས་ཅི། །དཀའ་ཐུབ་མ་བསྟན་ཅི་ཞིག་ཡོད། །འཇིགས་དང་སྡིག་པ་སྤངས་པ་དང ། །བདེ་བ་དང་ནི་ལྡན་པ་ཉིད། །དམ་ཚིག་སྤྱོད་པ་སྲུང་བྱེད་པ། །དེ་ལ་རིམ་པ་རབ་བསྟན་བྱ། །ཧ་རུ་ཀ་དཔལ་མངོན་བརྗོད་རྒྱུད། །ཀློག་གམ་འཆང་ངམ་བྲིས་ནས་ནི། །དངོས་གྲུབ་རྫུ་འཕྲུལ་སྐལ་བཟང་དང ། །བྱང་ཆུབ་སེམས་དཔའང་ཐོབ་པར་འགྱུར། །དཔའ་བོ་ཀུན་དང་མཉམ་སྦྱོར་བའི། །མཁའ་འགྲོ་མ་ཡི་དྲ་བ་སྡོམ། །དཔལ་སྡོམ་འབྱུང་བའི་རྒྱུད་ལ་ནི། །གང་ཚེ་སྒོམ་ཞིང་སེམས་བྱེད་ན། །ལོངས་སྤྱོད་ཆེ་ཞིང་བདེ་བ་ཆེ། །དབུལ་བའི་སྡུག་བསྔལ་འཇོམས་པར་འགྱུར། །མོས་པ་དུ་མའི་སེམས་ཅན་ལ། །སྤྱོད་པ་སྣ་ཚོགས་སྟོན་མཛད་དེ། །སྣ་ཚོགས་ཚུལ་གྱིས་འདུལ་བ་ལ། །ཐབས་གྱང་ཡང་དག་བསྟན་པ་ཡིན། །ཟབ་མོའི་ཆོས་ནི་བསྟན་པ་ལ། །གང་ཞིག་མོས་པར་མ་གྱུར་ཀྱང ། །སྨད་པ་དག་ཏུ་མི་བྱ་སྟེ། །སྟོང་ཉིད་སྙིང་རྗེ་མི་ཕྱེད་
71b
པའི། །ཆོས་ཉིད་ཐམས་ཅད་བསམ་མི་ཁྱབ། །སངས་རྒྱས་རོལ་པ་བསམ་མི་ཁྱབ། །མཁའ་འགྲོ་མ་ཡི་ཚོགས་བརྟེན་པའི། །ཧེ་རུ་ཀ་དཔལ་ཡང་དག་སྦྱོར། ། སེམས་ཅན་མོས་པས་འཇུག་པ་རྣམས། །དེ་དག་ཀུན་ལ་དགའ་བ་སྟེ། །མཁའ་འགྲོ་ཀུན་དང་མཉམ་སྦྱོར་པའི། །ཧེ་རུ་ཀ་དཔལ་གོ་འཕང་གནས། །འདི་ནི་རིམ་པར་ཕྱེ་བ་སྟེ་སོ་གསུམ་པའོ།། །།དཔལ་ཧེ་རུ་ཀ་མངོན་པར་བརྗོད་པའི་རྒྱུད་ཆེན་པོ་འབུམ་ཕྲག་གསུམ་པ་ལས། ལྷན་ཅིག་སྐྱེས་བ་འབྱུང་བའི་རྟོགས་པ་ལས་བཏུས་པ་རྣལ་འབྱོར་མ་ཐམས་ཅད་ཀྱི་གསང་བ་བཀླགས་པས་འགྲུབ་པ་དཔལ་སྡོམ་པ་འབྱུང་བའི་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།ཤེས་རབ་དམན་ཞིང་སྦྱངས་པ་ཆུང་མོད་ཀྱི། །རྒྱུད་ཀྱི་གཞུང་ལ་དད་པ་བརྟན་སྐྱེས་པས། །རང་དོན་ཙམ་དུ་བསྒྱུར་པ་གང་ལགས་པ། འཕགས་དང་མཁས་པ་རྣམས་ཀྱིས་བཟོད་པ་མཛོད། །རྒྱ་གར་གྱི་མཁན་པོ་གཞན་ལ་ཕན་པ་མཐའ་ཡས་དང ། བོད་ཀྱི་ལོཙྪ་བ་རྒྱུས་བནྡེ་སྨོན་ལམ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སླར་ཡང་ཡོངས་སུ་རྫོགས་པའི་པཎྜི་ཏ་ཆེན་པོ་ཤྲཱི་བ་ན་རཏྣའི་རྒྱ་དཔེ་ལ་གཏུགས་ནས་ལོ་ཙཱ་བ་གཞོན་ནུ་དཔལ་གྱིས་ཀྱང་ཞུས་སོ།། །།