rKTs


H380

(e-text produced by ACIP)

see text in transliteration
433b
།།རྒྱ་གར་སྐད་དུ། ཤྲཱི་མཧཱ་མུདྲཱ་ཏི་ལ་ཀཾ་ནཱ་མ་མཧཱ་ཡོ་གཱི་ནི་ཏནྟྲ་རཱ་ཛ་ཨ་དྷི་བ་ཏི། བོད་སྐད་དུ། དཔལ་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་མངའ་བདག། དཔལ་ཕྱག་རྒྱ་ཆེན་པོའི་ཐིག་ལེ་ལ་ཕྱག་འཚལ་ལོ། །བཅོམ་ལྡན་མཁའ་འགྲོ་ཡེ་ཤེས་ཉིད། །གསང་པར་སྙིང་པོའི་ཁ་འབྱེད་པ། །གསང་པད་ལྟེ་བའི་ནང་ན་བཞུགས། །བདག་གི་ཞུ་བ་ཁྱོད་གསོན་ཅིག། ཡེ་ཤེས་རྒྱ་མཚོའི་ཀྱེ་རྡོ་རྗེ། །འབུམ་ལྔ་ཡི་ནི་བདག་ཉིད་རྒྱུད། །གང་ཞིག་ཁྱོད་ཀྱིས་དེ་ཉིད་གསུངས། །སྦྱོར་དྲུག་རྣལ་འབྱོར་མ་ཡི་གཞུང ། །ཐམས་ཅད་མཁྱེན་པ་དབང་ཕྱུག་མཆོག། དེ་ནི་དཔའ་བོ་བདག་གིས་ཤེས། །དོན་དམ་པ་ནི་ཅི་ལྟ་བུ། །དེ་རུ་བདག་ནི་ཐེ་ཚོམ་སྐྱེས། །ཆར་དང་ཐིག་ལེ་ཚུལ་དང་ནི། །ཚུལ་ཙམ་མཆོག་གི་མཆོག་གཞན་ཡིན། །སྦྱོར་བ་དྲུག་གིས་རྣམ་པར་ཤེས། །དེ་ཡི་གནས་ནི་གང་ན་ཡོད། །སྲོག་ནི་གང་ནས་འབྱུང་བ་ཡིན། །རྡོ་རྗེ་འཛིན་པ་གང་དུ་བརླག་རྡོར་སེམས་མཚན་མོ་གང་ཉིད་ཅི། །མཚམས་གང་ཤར་བ་གང་ཞིག་ལགས། །གང་ན་ནུབ་པའི་དུས་དང་རྩ། །མཆོག་གི་དབང་ཕྱུག་དུ་ཙམ་མཆིས། །དུས་ཀྱི་མཚན་ཉིད་གང་ལགས་གསུངས། །དེ་ཡི་དུས་ཀྱིས་དོན་ཅི་བྱེད། །ཱ་ལི་ཀཱ་ལི་བྱ་བ་གང ། །མངའ་བདག་གང་ནས་འབྱུང་བ་ལགས། །རོ་ཡི་བྱེ་བྲག་དུ་ཞིག་བསྟན། །དགའ་བ་ཡང་ནི་དེ་བཞིན་ནོ། །གང་གི་
434a
༄#། །དུས་ཀྱི་དགའ་བ་རྣམས། །རྡོ་རྗེ་དབང་ཕྱུག་འབྱུང་བ་གསུངས། །ཆོས་ཀྱི་དབྱིངས་ནི་ཇི་ལྟར་བཤད། །རྡོ་རྗེ་ཡང་ནི་ཇི་ལྟར་བསྟན། །བདག་གི་སྒྲ་ནི་ཇི་ལྟར་གསུངས། །གསང་བ་ཞེས་བགྱི་ཇི་ལྟར་ལགས། །མཆོག་ཅེས་བགྱི་བ་ཇི་ལྟར་བཤད། །དགྱེས་པའི་དོན་ནི་གསལ་བར་མཛོད། །རིགས་ཀྱི་བྱེ་བྲག་དུ་ཙམ་བསྟན། ། ཕུང་པོ་ལ་སོགས་སྐྱེ་མཆེད་ཅི། །ཚངས་དང་ཁྱབ་འཇུག་དྲག་པོ་དང ། །དབང་ཕྱུག་རྟག་ཏུ་ཞི་བ་དང ། །གང་ནས་སྐྱེས་ཤིང་གང་དུ་གནས། །ཆེན་བོའི་ཆེན་པོ་དེ་ཇི་ལྟར། །ཕྱག་རྒྱའི་བྱེ་བྲག་དུ་ཞིག་བཤད། །ཕྱག་རྒྱ་ཆེན་པོ་ཇི་ལྟར་ལགས། །མགོན་པོ་མཆོད་པའི་བྱེ་བྲག་ཅི། །དེ་རུ་མེ་ཏོག་ཇི་ལྟར་ཡིན། །མགོན་པོ་ཆེན་པོ་མཆོད་སྦྱིན་ནི། །ཇི་ལྟ་བུ་ཞིག་འཚལ་བ་ལགས། །མཆོག་གི་དངོས་པོའི་དཀྱིལ་འཁོར་ནི། །བཅོམ་ལྡན་འདས་དེ་ཅི་ལྟ་བུ། །དེ་རུ་ལྷ་མོ་ཅི་འདྲ་བ། །ལྷ་མོ་བགྱི་བ་གང་ལགས་གསུངས། །བཅོམ་ལྡན་དུར་ཁྲོད་དུ་ཞིག་མཆིས། །དེ་རུ་ཤིང་ནི་ཇི་ལྟར་བཤད། །དུར་ཁྲོད་དང་ནི་ཤིང་རྣམས་ནི། །རྒྱལ་བའི་དབང་ཕྱུག་དེ་གནས་གསུངས། །མགོན་པོ་ནང་གི་སྦྱིན་སྲེག་དང ། །བདུད་རྩི་ལྔ་ཡི་ཆོ་ག་དང ། ། རྣལ་འབྱོར་མ་ཡི་འདུ་ཤེས་དང ། །དེ་རུ་སྐད་ནི་ཅི་ལྟ་བུ། །བདག་ཉིད་ཀྱི་ནི་རང་ངོ་བོ། །མགོན་པོ་ཆེན་པོ་ཁྱོད་ཀྱིས་གསུངས། །དཔལ་ཕྱག་རྒྱ་ཆེན་པོ་ཐིག་ལེ་ལས། རྒྱུད་ཐམས་
434b
ཅད་ཀྱི་རྒྱུ་ཞེས་བྱ་བའི་ལེའུ་སྟེ་དང་པོའོ།། །།བཅོམ་ལྡན་འདས་ཀྱིས་བཀའ་སྩལ་པ། དྲིས་བ་ཡང་དག་གཏིང་དཔག་དཀའ། །སྙིང་པོ་ཡི་ནི་སྙིང་པོ་མཆོག། སངས་རྒྱས་ཀུན་གྱི་གསང་ཆེན་པོ། །མཆོག་ལས་མཆོག་གི་ཡང་དག་མཆོག། ལྷ་ཆེན་པོ་ནི་ལ་སོགས་པ། །བཟང་མོ་དེ་རུ་བྱོལ་སོང་ཡིན། །དོན་དམ་དེ་ནི་ཁྱོད་གཅིག་པུ། །ཞལ་བཟང་མོ་ཡི་སྣོད་ཡིན་ནོ། །གསང་བའི་གསང་བ་ཡང་དག་རབ། །ཉོན་ཅིག་ཡང་དག་བདག་གིས་བཤད། །དང་པོ་རེ་ཞིག་སློབ་མ་ལ། །དབང་རྣམས་ལན་གཅིག་བསྐུར་བ་ཡིས། །དེ་ཚེ་གསང་ཆེན་བཤད་པ་ཡི། །ངེས་པར་སྣོད་དུ་གྱུར་པའོ། །དབང་མེད་ན་ནི་དངོས་གྲུབ་མེད། །བྱེ་མ་བཙིར་ཡང་མར་མེད་ལྟར། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་ལ་གསལ་བྱེད་པ། །སློབ་དཔོན་སློབ་མ་ཤི་མ་ཐག། དངོས་གྲུབ་ཐོབ་ཀྱང་དམྱལ་བར་འགྲོ། །དེ་བས་འབད་པ་ཐམས་ཅད་ཀྱིས། །བླ་མ་ལ་ནི་དབང་དོན་ཞུ། །དབང་བསྐུར་ཡོད་དང་དེ་ཉིད་ཤེས། །ཡེ་ཤེས་ཤེས་དང་ཐུགས་རྗེ་ཆེ། །ཡང་དག་རླབས་ཆེན་དཔའ་བོ་དང ། །སེར་སྣ་མེད་དང་རང་བཞིན་བཟང ། །སྐལ་ལྡན་མཚན་ཉིད་ཐམས་ཅད་རྫོགས། །ཕྲག་དོག་ཡུལ་ནི་རྣམ་པར་སྤངས། །རྟག་ཏུ་དགའ་བའི་ཡིད་ལྡན་པ། །འདོད་ཆགས་ཆེན་པོ་གཅིག་པུའི་ཡིད། །སྡོམ་པ་དེ་ནི་ཤེས་པ་ན། །བླ་མ་དེ་ལྟ་བུ་ལ་བྱ། །དེ་ལྟ་བུ་ཡི་བླ་མ་
435a
༄#། །ཡིས། །འབད་པས་སློབ་མ་བརྟག་པར་བྱ། །ཇི་ལྟར་བསྲེགས་ལ་སོགས་པས་གསེར། །ཇི་ལྟར་མཁས་པས་རིན་པོ་ཆེ། །ཇི་ལྟར་བདེ་ལྡན་བུ་མོ་ནི། །དེ་ལྟར་སློབ་མ་བརྟག་པར་བྱ། །དེ་བས་ཐམས་ཅད་རབ་འབད་དེ། །ཕན་ཚུན་སོ་སོར་བརྟག་པར་བྱ། །དེ་ལྟར་མིན་ན་སྐྱོན་དུ་འགྱུར། །ནམ་ཡང་དངོས་གྲུབ་ཐོབ་མི་འགྱུར། །ཇི་ལྟར་དུག་ལ་རབ་སྔགས་ཀྱིས། །དག་པ་བྱས་ནས་བདུད་རྩིར་འགྱུར། །དེ་བཞིན་སློབ་མ་དབང་སོགས་ཀྱིས། །ལུས་ནི་དྲི་མ་མེད་པར་འགྱུར། །གང་ཞིག་དབང་བསྐུར་སྦྱིན་བྱེད་པ། ། དེ་ནི་རྡོར་སེམས་ལྟ་བུར་བལྟ། །བླ་མ་སྤྲུལ་རྒྱལ་ལྟ་བུར་བལྟ། །དཔལ་ནི་བླ་མ་མེ་འདྲར་བལྟ། །བླ་མ་སྟོན་པ་བས་ལྷག་བལྟ། །ཡིད་བཞིན་རིན་ཆེན་མཉམ་པར་བལྟ། །ཇི་ལྟར་རབ་སྦྱེར་དང་སྔགས་ཀྱིས། །སྤྲུལ་གྱི་རྒྱལ་པོའི་སྤྱི་བོ་ལས། །ཚད་མེད་པ་ཡི་རིན་ཆེན་རྙེད། །དབུལ་བ་ཐམས་ཅད་མེད་པར་བྱེད། །རབ་སྦྱོར་ལོག་དང་སྔགས་ལོག་གི། དགའ་མོ་ངེས་པར་ཚིག་པར་བྱེད། །དེ་ལྟ་བུ་ཡི་ཆོ་ག་ཡི། །ཁྲིམས་ལ་སོགས་པའི་སྤྱོད་བ་ཡིས། །དཔའ་ཞལ་དེ་ཉིད་རིན་དབང་ཕྱུག། ཚེ་འདི་ཉིད་ཀྱིས་རྙེད་པར་འགྱུར། །དེ་ལྟར་མིན་ཏེ་མ་གུས་ན། །གསུང་གི་མེ་ཡིས་ངེས་ཚིག་བྱེད། །ཇི་ལྟར་མེ་ཡིས་ཤིང་ཚིག་པ། །སྐད་ཅིག་གིས་ནི་ཐལ་བར་བྱེད། །གལ་ཏེ་དེ་བཞིན་དཔལ་བླ་མ། །མཉེས་ན་སྐད་
435b
ཅིག་གིས་སྡིག་འཚིག། རྒྱུད་འདི་ལ་ནི་མཆོག་གི་ནི། །བཅོམ་ལྡན་དབང་བསྐུར་དུ་ཞིག་མཆིས། །བཅོམ་ལྡན་འདས་ཀྱིས་བཀའ་སྩལ་བ། དབང་བསྐུར་བཞི་ཡི་རིམ་པ་ལ། །འབྲས་བུ་ཡིས་ནི་གསུམ་དུ་བསྟན། །དང་པོར་སློབ་དཔོན་དབང་གཅིག་སྟེ། །གཉིས་པ་གསང་བའི་དབང་མཆོག་གོ། གསུམ་པ་ཤེས་རབ་ཡེ་ཤེས་དབང ། །དེ་ལྟར་དེ་བཞིན་བཞི་པའོ། །སློབ་དཔོན་དབང་ལ་བཅུ་གཅིག་དབྱེ། །གསང་བའི་དབང་དང་བཅུ་གཉིས་མཆོག། ཤེས་རབ་ཡེ་ཤེས་བཅུ་གསུམ་པ། །དེ་ལྟར་དེ་བཞིན་བཅུ་བཞིའོ། །དབང་རེ་ལ་ནི་ས་རེ་སྟེ། །དེ་རྣམས་ས་ཡི་དབང་ཕྱུག་བདག། །རྒྱུ་རྩ་གསུམ་གྱིས་ཤེས་པར་བྱ། །དེ་ཡི་འབྲས་བུ་བཞི་པའོ། །ཡང་ན་འབྲས་བུ་གསུམ་དང་བྲལ། །ཡང་ན་བདག་ཉིད་གསུམ་པོ་ཡིན། །དགའ་བའི་བྱེ་བྲག་ཤེས་པར་བྱ། །འཁོར་ལོ་རྣམས་ཀྱི་རིམ་པས་སོ། །ཡར་ངོ་ཡི་ནི་གསུམ་པའི་ཚེ། །སློབ་མ་རབ་ལ་དབང་བསྐུར་བྱ། །བཞིན་བཟང་མིག་གི་དཀྱུས་རིང་བ། །གཟུགས་བཟང་ལང་ཚོས་བརྒྱན་པ་ཡིས། །བཅུ་གཉིས་ཡང་ན་བཅུ་དྲུག་གམ། །མ་རྙེད་ཉི་ཤུ་ལོན་པའང་རུང ། །ཉི་ཤུ་ཡན་ཆད་ཕྱག་རྒྱ་གཞན། །དེས་ནི་དངོས་གྲུབ་ཐག་རིང་བྱེད། །སྲིང་མོ་ཡང་ན་བུ་མོའམ། །ཆུང་མ་བླ་མ་ལ་དབུལ་བྱ། །དེ་ནས་སྣ་ཚོགས་རྫས་ཀྱིས་ནི། །བླ་མ་དད་བས་མཆོད་པར་བྱ། །སྣ་ཚོགས་རས་ནི་བརྒྱ་སོགས་དང ། །རིན་ཆེན་སྣ་ཚོགས་རྒྱལ་མཚན་མཆོག་།མུ་ཏིག་ཕྲེང་བ་
436a
༄#། །རིན་ཐང་མེད། །གྲངས་མེད་གསེར་གྱིས་མཆོད་བྱའོ། །དེ་རིང་ཕན་ཆད་བདག་ནི་འབངས། །ཆེན་པོའི་ཆེན་པོ་མཆོད་པ་བཞེས། །དེ་ལྟ་བུ་ཡི་ཆོ་ག་ཡིས། ། འབད་དེ་བླ་མ་མཆོད་པར་བྱ། བླ་མའི་གཟུགས་ནི་བདག་རང་ཡིན། །བདག་མཆོད་བྱས་ན་དངོས་གྲུབ་ཐོབ། །དེ་ཡིས་སྐད་ཅིག་ཕྱག་རྒྱ་ཆེ། །མཆོད་པ་བྱས་ནས་བསྙེན་པར་བྱ། ། བསྙེན་པ་ལས་ནི་གནག་ཞིག་འབྱུང ། །སློབ་མའི་ཁ་རུ་དབབ་པར་བྱ། །སྤོམ་པོ་མཐའ་ལྟག་སྦྱར་བ་ཡིས། །ལོངས་སྤྱོད་ནང་དུ་གཞུག་པར་བྱ། །དེ་ཚེ་ཡང་དག་ཡེ་ཤེས་སྐྱེ། །བུ་མོའི་བདེ་བ་ཅི་ལྟ་བུ། །སྲོག་དང་རྩོལ་བ་མཉམ་བྱས་ནས། །ཤིན་ཏུ་ལེགས་དགྱེས་ཀྱིས་མཆོད་བྱ། །རིན་ཆེན་ཁ་ལ་ཧཱུཾ་ཕཊ་སྔགས། །བཀོད་ནས་མདའ་ལ་བསྐྱོན་པར་བྱ། །དེ་ཡི་དུས་སུ་དགའ་སྐད་ཅིག། ཇི་ལྟར་རང་བཞིན་སྐྱེ་བར་འགྱུར། །དེ་ལྟར་ཕྱག་རྒྱལ་བཤད་བྱ། །འདི་ནི་དགའ་བའི་མཚན་ཉིད་དོ། །དེ་ནས་སློབ་མའི་ལག་ཏུ་ནི། །བྱིན་ནས་འདི་སྐད་སྨྲ་བར་བྱ། །ང་ཡི་བཀའ་ལུང་རྟོག་མེད་པས། །པདྨའི་དོན་ལ་ཇི་བཞིན་གྱིས། །པདྨོའི་སྙིང་པོའི་དབུས་ན་ནི། །རྡོར་དབྱིངས་དབང་ཕྱུག་མི་ནི་བཞུགས། །དེ་མ་རྙེད་པའི་བར་དུ་ནི། །ཐབས་གཞན་ལ་ནི་བྱང་ཆུབ་མེད། །དེ་ནི་རང་བཞིན་དགའ་བའི་གཟུགས། །ཕྲ་མོའི་ཕྲ་མོ་ཡང་དག་མཆོད། །དཔལ་ཕྱག་རྒྱ་ཆེན་པོའི་ཐིག་ལེ་ལས། །སློབ་དཔོན་དང་སློབ་
436b
མ་བརྟག་པ་དང ། ཡོན་དབུལ་བ་དང ། དབང་བསྐུར་བ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་གསང་བ་བཤད་བྱ་བ། །མཆོག་དང་རབ་མཆོག་མཆོག་གི་མཆོག་།ཕུང་པོ་ལྔ་ཡི་བདག་ཉིད་སྐུ། །ལེགས་དགྱེས་དབང་པོ་འཁོར་ལོ་དྲུག་།ཟླ་ཕྱེད་བྱད་གཟུགས་ཆར་ཡང་ནི། །རླུང་གི་འཁོར་ལོའི་ནང་ན་བཞུགས། །ཕྱེད་མིན་གང་བ་ཡང་མ་ཡིན། །ཆུ་ཡི་ཟླ་བ་བཞིན་དུ་མཐོང ། །སྒྱུ་འཕྲུལ་ཆེན་པོ་འགྲོ་བའི་མ། །ཆར་ཡང་གྲངས་མེད་རྟེན་པ་ཡིན། །དེ་ནི་མཆོག་དང་གཞན་མཆོག་ཕྲ། །སྐྱེ་མེད་གཉིས་མེད་བསམ་དུ་མེད། །རླུང་གི་འཁོར་ལོ་སྐྱེད་བྱེད་མ། །སངས་རྒྱས་ཀྱིས་ཀྱང་རྙེད་དཀའ་བའོ། །མེ་ཡི་འཁོར་ལོའི་ནང་ན་ནི། །ཐིག་ལེ་གཅིག་པ་ཡི་གེ་མེད། །ཐམས་ཅད་ནང་ཡོད་ཡིག་ཀུན་ཡིན། །ཐམས་ཅད་ཁྱབ་དང་བདེ་བ་འབྱུང ། ། བདེ་བ་འཕེལ་བར་བྱེད་པའོ། །དབྱངས་དང་དཔེ་བྱད་དང་བྲལ་ལོ། །གྲངས་མེད་པ་ཡི་ཁམས་གསུམ་ནི། །རྒྱུ་དང་སྐྱེ་བར་བྱེད་པའོ། །ཚུལ་ནི་གློ་བུར་བ་ཡི་གནས། །རྣམ་པ་ཐམས་ཅད་དང་བྲལ་ལོ། །དངོས་པོ་སྦྲུལ་ལྕེ་འདྲ་བ་ཡིན། །མཐོ་རིས་ས་ནི་སྐྱེད་བྱེད་པའོ། །ཡི་གེ་མ་ཡིན་ཁམས་ཀྱང་མེད། །ཟླ་ཚེས་ཐིག་ལེ་རྒྱན་དང་བྲལ། །སྐྱེ་མེད་གྲངས་མེད་མི་ཟད་པ། །དེ་ནི་དོན་དམ་ཚུལ་ཡིན་ནོ། །སྤྲུལ་པ་ཡི་ནི་འཁོར་ལོའི་གནས། །ལྟེ་བའི་སྙོམས་པ་ཞེས་སུ་གྲགས་།ཆོས་ཀྱི་འཁོར་ལོའི་ཚུལ་ཙམ་ནི། །དྲི་མ་མེད་པའི་སྦྲུལ་མིག་འདྲ། །དྲི་མེད་མ་
437a
༄#། །བཅོས་པ་ཡི་གནས། །གནས་མེད་རྣམ་པ་མེད་པའོ། །གཡོ་བ་མེད་དང་བརྗོད་དུ་མེད། །དབུགས་ཀྱི་རྒྱུ་བ་མེད་པའོ། །མཆོག་གི་ཡེ་ཤེས་ཚུལ་ཙམ་ནི། །བཅུ་གསུམ་དབང་ཕྱུག་གིས་མ་ཤེས། །མཆོག་གི་ལོངས་སྤྱོད་འཁོར་ལོར་གནས། །མཆོག་གི་རྣམ་པ་བདུད་རྩི་མཆོག། ཐེག་མཆོག་མཆོག་གི་མཐའ་ན་ཡོད། །ཇི་ལྟ་ཆང་གི་མཐུ་བཞིན་ནོ། །ཐམས་ཅད་བདག་ཉིད་བྱད་གཟུགས་བྲལ། །གཟུགས་མེད་བདག་ཉིད་ཀྱིས་བཞུགས་སོ། །གཞན་མཆོག་བདེ་ཆེན་འཁོར་ལོ་ལ། །ཐམས་ཅད་མཐའ་ཡི་མཐའ་ན་བཞུགས། །ལྟ་བར་བྱེད་དང་བལྟ་བྱ་མེད། །མཚན་ངན་ཐམས་ཅད་མེད་པའོ། །བརྗོད་མེད་མི་ཟད་ཞི་བ་སྟེ། །རང་དགའ་ཉམས་མྱོང་རྣམ་པའོ། །བླ་མ་ཡི་ནི་བཀའ་དྲིན་གྱིས། ། ལེགས་དགྱེས་དབང་མོ་རྙེད་པར་འགྱུར། །དེ་ལྟ་བུ་ཡི་ཡེ་ཤེས་ཆེ། །རྣམ་པར་ཤེས་དྲུག་རང་བཞིན་ཅན། །འཁོར་ལོ་དྲུག་གི་དབུས་སུ་ནི། །དོན་དམ་བར་ནི་བཤད་པའོ། །སྟེང་དང་འོག་གི་སྦྱོར་བ་ཡིས། །ཁ་སྦྱར་བྱད་གཟུགས་ཀྱིས་ནི་ཡོད། །བཅུ་གཉིས་ཕྱེད་དང་དྲུག་གི་ཕྱེད། །དྲུག་ཅུ་རྩ་བཞི་དེ་བཞིན་བརྒྱད། །བརྒྱད་གཉིས་དང་ནི་བརྒྱད་བཞི་ནི། ། འདི་ནི་འཁོར་ལོ་ཆུ་སྐྱེས་དྲུག་།དཔལ་ཕྱག་རྒྱ་ཆེན་པོའི་ཐེག་ལེ་ལས། །སྦྱོར་བ་དྲུག་གི་མཚན་ཉིད་དང ། །འཁོར་ལོ་དྲུག་གི་རང་གི་ངོ་བོ་ཞེས་བྱ་བའི་ལེའུ་སྟེ་གསུམ་
437b
པའོ།། །།ཉོན་ཅིག་ལྷ་མོ་སྐལ་ཆེན་མོ། །རྩ་ཡི་འཁོར་ལོ་འབྱུང་བ་མཆོག་།སྟོང་ཕྲག་བདུན་ཅུ་རྩ་གཉིས་ཏེ། །རྩ་རྣམས་ཀྱི་ནི་རིགས་བཤད་དོ། །རིགས་ཆེན་པོ་ཡི་རྒྱུད་ཆེན་པོར། །རྒྱས་པར་བདག་གིས་གསལ་བར་བྱས། །འདི་རུ་འཁོར་ལོ་དྲུག་གི་གྲངས། །མདོར་བསྡུས་པ་ནི་བཤད་བར་བྱ། །རླུང་གི་འཁོར་ལོའི་རྩ་དྲུག་ནི། །གཡོ་བ་ནམ་མཁའ་མེད་དང་སྦུབས། །རབ་བསྐོར་དང་ནི་འཇིགས་ཆེན་པོ། །རྩ་དེ་རླུང་གི་འཁོར་ལོའི་གནས། །འཛིན་མ་དང་ནི་རོ་མ་དང ། །རྟོག་མེད་མ་ནི་གྲུ་གསུམ་གནས། །མེ་ཡི་འཁོར་ལོའི་ནང་དུ་ནི། ། རྩ་ཡི་དབང་མོ་ལྔར་ཤེས་བྱ། །མགྱོགས་མ་དང་ནི་ཡང་དག་མགྱོགས། །ཤིན་ཏུ་བཟང་དང་བཟང་འགྲོ་དང ། །སྟོབས་ཆེན་མ་དང་འཇིགས་ཆེན་མ། །ང་རྒྱལ་ཆེན་དང་འཇིགས་བྱེད་ཆེ། ། མཐུས་མྱུར་མ་དང་མཐུ་ཡི་ཆ། །མཐུ་ཡི་ཆུ་དང་མཐུ་དྲི་དང ། །མཐུ་མ་དང་ནི་མཐུས་འབབ་མ། །རྩུབ་དང་ནུར་དང་མཐུ་དུ་མ། །རྔམ་པ་ཟ་བ་ནམ་མཁར་འགྲོ། །བྱ་ཡི་ཡན་ལག་བྱ་འགྲོ་མ།། ཕྱུག་མོ་འཇིགས་མ་ང་རོ་དང ། །བརྟུལ་མ་མཆོད་མ་མྱོས་མ་དང ། །སྒྲ་མ་སྒྲ་འབྱུང་སྡིག་ཅན་མ། །པདྨའི་སྡོང་བུ་མ་སྔོན་མོ། །ཟིལ་པ་ཟིལ་འབྱུང་སྒྲ་མ་དང ། །ཕྱིན་ཕྱོགས་པ་ཁ་\?\་པ་དང ། །དབྱིག་པའི་ང་རྒྱལ་དང་པོ་མ། །ཚེའུ་ལྟོ་མ་དང་ཚེའུ་དྲུག་མ། །ཚེའུ་བདུད་མེ་དང་བརྩོན་འགྲུས་མ། །ཚེའུ་ཁྱིམ་མ་དང་ཚེའུ་ཁམ། །ཚེའུ་འོད་མ་དང་ཚེའུ་ལུས་རྒྱུད། འབུད།
438a
༄#། །མ་བདག་མ་འོད་མ་དང ། །དྲི་མེད་དང་ནི་དྲི་སྲེག་དང ། །ཐག་ལྟོ་མ་དང་ཐག་དགའ་མ། །ཐག་མོ་དང་ནི་ཐག་དུས་མ། །ཕུག་རོན་ཕུམ་སྐྱེ་གྲ་མ་དང ། །ལོ་མ་དང་ནི་ཚེར་ལོ་དང ། །གོས་གྱོན་མ་དང་གསལ་བྱེད་མ། །རྩ་འདི་བརྒྱད་པ་བརྒྱད་དུ་དྲན། །དྲུག་ཅུ་རྩ་བཞི་ཆུ་སྐྱེས་ནི། །ལྟེ་བའི་སྤྲུལ་པའི་འཁོར་ལོར་གནས། །རིན་ཆེན་མ་དང་པད་ཆེན་མོ།། གཤེ་ཆེན་མ་དང་སྟོབས་ཆེན་མ། །མགོ་ཆེན་མ་དང་མྱོས་ཆེན་མ། །དགའ་ཆེན་མ་དང་མི་དགའ་ཆེ། །དེ་བརྒྱད་ཆོས་འཁོར་འདམ་སྐྱེས་ན། །ཞལ་བཟང་སྙིང་གའི་རྒྱ་མཚོར་རོ། ། ཆགས་མ་ལོངས་སྤྱོད་ལོངས་སྤྱོད་མིན། །ཉི་འོད་འོད་མ་བྷ་ག་དང ། །ལུམ་དང་ནི་ཐལ་གདོང་མ། །བཟའ་སྟེར་རང་ཟ་ལྟོགས་མ་དང ། །ར་ས་ཡན་རོ་སྐྱུར་མ། རོ་འཛག་དང་ནི་རོ་མ་དང་།། སྒུར་མ་ལོངས་སྤྱོད་འཁོར་ལོའི་གནས། །བརྒྱད་གཉིས་འདམ་སྐྱེས་འདབ་མ་ནི། །མགྲིན་པ་ཡི་ནི་རིམ་པའི་རིགས། །འདོད་མ་འདོད་སྤྱོད་ཚེའུ་ལུས་མ། །ཟླ་འཐུང་ཟླ་ལྟོ་མཛོད་མ་དང་།། སྐད་སྙན་ལྐུགས་མ་དུར་བ་མ། །ལྕེ་སྤྱང་བརྒྱ་མ་སྐམ་པ་མ། །མེ་མ་རྡོན་མ་ཟླ་བ་མ། །གང་བ་གཉིས་མ་གཉིས་སྐྱེས་མ། །ཆང་ཚོད་ཆང་སྟེར་བདུད་རྩི་མ། །དུང་མ་དང་ནི་དུད་རྣམ། དུང་མིག་མ་དང་དུར་སྣ་མ། །མཐུས་ཕྱུག་མ་དང་མཐུ་སེར་མ། །མཐུ་རྨོངས་མ་དང་མཐུ་རྔམ་མ། །འགྱིང་མ་དང་ནི་རི་སྟེན་མ། །སུམ་ཅུ་རྩ་གཉིས་ཐོད་པའི་གནས། །བདེ་ཆེན་འཁོར་
438b
ལོ་རྒྱལ་པོ་འདི། །དེས་ནི་འཁོར་ལོ་རྣམས་ལ་ཁྱབ། །ཐམས་ཅད་ཕྲ་མོ་རེག་བྱ་མེད། །གཟུང་དང་འཛིན་པ་རྣམ་པར་སྤངས། །བདེ་ཆེན་བདེ་བའི་རྣམ་པ་ཅན། །བདེ་ཆེན་ལ་སོགས་སྦྱིན་པར་བྱེད། །དེ་ཡི་རྩ་བའི་འབྱུང་བ་ནི། །ཡང་དག་ཐར་འདོད་པས་ཤེས་བྱ། །ལྷ་མོ་རྩ་འབྱུང་མེད་གྱུར་ན། །ཕུང་པོའི་འབྱུང་བ་ཇི་ལྟར་འགྱུར། །ཕུང་པོ་མེད་ན་ཡེ་ཤེས་ཆེ། །རྣལ་འབྱོར་རྣམས་ཀྱིས་ཇི་ལྟར་རྙེད། །ཕུང་པོ་ལྔ་ནི་བདག་ཉིད་སྐུ། །མཁའ་འགྲོ་ལྔར་ནི་རབ་ཏུ་གྲགས། །མཁའ་འགྲོ་ལྔ་ནི་ཡེ་ཤེས་ལྔ། །འབྱུང་བ་ལྔ་ནི་རང་བཞིན་ཅན། །རྩ་ཉིད་འབྱུང་བ་མེད་གྱུར་ན། ། ཕུང་པོ་རྣམས་ནི་འབྱུང་བ་མེད། །ཕུང་པོ་མེད་ན་དངོས་གྲུབ་ནི། །རྣལ་འབྱོར་ཆེན་པོས་རྙེད་མི་འགྱུར། །དེ་བས་འབད་བ་ཐམས་ཅད་ཀྱིས། །རྩ་ཡི་འཁོར་ལོ་བཙལ་བར་བྱ། །ཇི་ལྟར་སྤྲིན་གྱི་ཆར་གྱིས་ནི། །རྟག་པར་དེ་ནི་ཆེ་བར་འཕེལ། །འབྲས་བུ་མང་ཞིང་མཐའ་ཡས་ནི། །ཐེ་ཚོམ་མེད་པར་སྦྱིན་པར་བྱེད། །དེ་ལྟར་ཕུང་པོའི་ཤིང་ཞེས་བྱ། །རྩ་ཡི་ཆུ་ཡིས་ཆེ་བར་འཕེལ། །ཆེར་གྱུར་འབྲས་བུ་ཐར་པ་ནི། །ཐེ་ཚོམ་མེད་པར་སྦྱིན་པར་བྱེད། །ལྷ་མོའི་དངོས་པོ་གཟུགས་སུ་ནི། །རྩ་ཡི་བྱད་གཟུགས་ཡིན་པར་འགྱུར། །རེག་ཁམས་རྒྱལ་མཚན་སྦྱོར་བ་ཡིས། །མེ་འཁོར་ནང་དུ་ཆུ་སྐྱེས་པ། །གང་ཚེ་རྡོ་རྗེས་བསྐྱོད་པར་བྱེད། །དེ་ཚེ་མེ་ནི་ཁོང་དུ་ཆུད། །འཁོར་ལོ་ཆུ་སྐྱེས་ཐམས་ཅད་ནི། །ཇེ་གསལ་ཇེ་གསལ་ཁ་འབྱེར་འགྱུར། །དེ་ནས་
439a
༄#། །རྩ་ཀུན་འཛག་འགྱུར་ཏེ། །སྣོད་འཛག་པ་ཡི་ཆུ་ཐིགས་བཞིན། །དེ་ནས་སྤྲུལ་བའི་འཁོར་ལོར་ནི། །འདུས་ནས་གཅིག་ཏུ་གྱུར་པའོ། །རྩ་གཉིས་ཁ་ཡི་རྩེ་མོ་ལས། །ཟླ་བ་དང་ནི་ཉི་མ་འཛག། མངལ་གྱི་དབུས་ན་རྩ་གནས་པ། །ཐག་པའི་རྣམ་པའི་གཟུགས་སུ་ཡོད། །དེ་ནི་གཅིག་པུ་རྒྱུ་ཞེས་བྱ། །འབྲས་བུའི་བྱེ་བྲག་གཉིས་སུ་འགྱུར། །གཡོན་ནས་ཁུ་བ་འབྱུང་བ་དང ། །གཡས་ནས་ཁྲག་ནི་འབྱུང་བའོ། །གང་ཚེ་གཡས་ཕྱོགས་ཉི་མ་ནི། །དེ་ཚེ་བདེ་བ་དམར་བོར་འགྱུར། །གཡོན་ནས་ཟླ་བ་འབྱུང་བའི་ཕྱིར། །དེ་ནི་བདེ་བ་དཀར་པོར་འགྱུར། །དེ་གཉིས་ནང་ན་མི་གནས་བར། །སྒོང་སྐྱེས་གཉིད་ལོག་ཇི་བཞིན་ནོ། །སྔོན་གྱི་ལས་རླུང་རྣམ་ཤེས་ནི། །གང་ཚེ་འཁོར་བར་གྱུར་བ་ན། །དེ་ཡི་ཚེ་ན་བྷ་གའི་ནང ། །འདོད་ཆགས་ཆེན་བོས་ཡིད་འགྱུར་རོ། །གང་ཚེ་མ་ཡི་ཟླ་མཚན་འབྱུང ། །མེ་དང་ཉི་མ་གསལ་བར་འབྱུང ། །དེ་ཚེ་འདོད་ཆགས་ཆེན་པོའི་ཡིད། །རེག་བྱ་འདུན་པ་མཆོག་ཏུ་འགྱུར།། བོ་ལ་ཀཀྐོ་ལ་ཞུགས་ནས། །ཇི་ལྟར་ཆུ་ལ་ཆུ་བཞག་བཞིན། །དེ་ཚེ་ས་བོན་འབྱུང་བ་ཡིན། །ས་བོན་ལས་ནི་གོང་བུ་འབྱུང ། །ལྷ་མོ་དེ་ལས་རྩ་རྣམས་འབྱུང ། །འབྲས་བུ་ངེས་པར་འབྱུང་བའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། འཁོར་ལོ་དྲུག་གི་རྩ་འབྱུང་བ་ཞེས་བྱ་བའི་ལེའུ་སྟེ་བཞི་པའོ།། །།སྲོག་ནི་འབྱུང་བར་ཐིམ་
439b
ཚུལ། །ཉོན་ཅིག་ལྷ་མོ་བདག་གིས་བཤད། །མ་སྐྱེས་པ་ཡི་ཆར་ཡང་ནི། །གསང་བའི་མངའ་གྱི་ནང་དུ་བཞུགས། །དེ་ནི་རྣམ་ཤེས་མེད་བ་དང ། །བདག་ཉིད་མེད་པའི་ཡེ་ཤེས་སྐུ། ། དེ་ཡི་གནས་ནས་སྲོག་འབྱུང་སྟེ། །སྲོག་ཅན་རྣམས་ཀྱི་སྲོག་ནི་མཆོག། རྟག་ཏུ་བདག་ཉིད་སྲོག་ཆེན་པོ། །གནས་ལྔའི་གནས་ན་གཞུགས་པའོ། །ནམ་མཁའ་ལྔ་ཞེས་བྱ་བར་གྲགས། །ནམ་མཁའ་ལྔ་ཡི་ནང་དུ་ཐིམ། །འབྱུང་བ་ཆེན་པོ་བཞི་བོ་ནི། །སྲོག་གི་རྟེན་དུ་ཤེས་པར་བྱ། །ཡང་ན་སྲོག་ནི་དེ་རྣམས་རྟེན། །ལེགས་དགྱེས་དབང་མོ་ཤེས་པར་འགྱུར། །རྣམ་ཤེས་ལས་ནི་རླུང་སྐྱེའོ། །དེ་ལས་མེ་ནི་སྐྱེ་བར་འགྱུར། །དེ་ལས་ཆུ་ནི་སྐྱེ་འགྱུར་ཏེ། །དེ་ལས་ས་ནི་སྐྱེ་བའོ། །དེ་རྣམས་ཀུན་ལས་ཕུང་པོ་འབྱུང ། །དེ་ནས་སྐྱེ་མཆེད་འབྱུང་བར་འགྱུར། །དེ་ནས་ཡེ་ཤེས་རང་བཞིན་སྐྱེ། །བརྒྱ་རྩ་བརྒྱད་ཀྱི་རིམ་པས་སོ། །རྡོ་རྗེ་ཕྲེང་བའི་རྒྱུད་ཆེན་ལས། །སྔར་ནི་བདག་གིས་བསྟན་བའོ། །མཚན་མོ་གང་ཡིན་ཉི་གང་ཡིན། །མཚན་མོ་བདག་གིས་བཤད་བར་བྱ། །མཚན་མོ་ཤེས་རབ་ཏུ་ནི་གྲགས། །ཤེས་རབ་མཚན་མོ་ཡིན་པར་འགྱུར། །མཚན་མོའི་རྣམ་པ་ཟླ་བར་འགྱུར། །ཟླ་བ་མྱ་ངན་འདས་རང་བཞིན། །ཀུན་རྫོབ་དང་ནི་དོན་དམ་བར། །ཤེས་རབ་གཉིས་ཀྱིས་ཤེས་པར་བྱ། །ཀུན་རྫོབ་རེག་བྱར་ཤེས་པར་བྱ། །གང་ཞིག་རེག་བྱ་མེད་པར་བདེ། །བལྟ་བར་དཀའ་བའི་མཚན་ཉིད་དོ། །རང་བཞིན་
440a
༄#། །མེད་པའི་རང་བཞིན་ཅན། །དེ་ནི་བདག་གིས་མཚན་མོར་བཤད། །ཉིན་མོ་ཐབས་སུ་གྲགས་པ་སྟེ། །ཐབས་ནི་ཉི་མ་ཡིན་པར་འགྱུར། །བྷ་གའི་འབྱུང་བ་ཉི་མ་ཡིན། ། ཉི་མ་བྷ་གའི་བདག་པོར་འགྱུར། །སྲིད་བའི་རྣམ་པ་ཉི་མ་ཡིན། །ཟླ་བ་མྱ་ངན་འདས་པའི་གཟུགས། །སྲིད་པ་དེ་ནི་རིགས་ཞེས་བསྟན། །ཉི་ལས་འབྱུང་བ་ཟླ་བ་རིགས། །དྲི་མ་མེད་ཕྱིར་ཉི་མ་སྟེ། །རྟོག་པའི་དྲ་བ་མེད་པའོ། །དྲི་མ་མེད་པ་མཆོག་ཕྲ་བ། །ཤིན་ཏུ་གསལ་བ་སྟོང་སྐུའོ། །ཡང་དག་དྲི་མེད་གནས་ཞི་བ། །ཐམས་ཅད་ཀུན་ན་བཞུགས་པའོ། །རྒྱུད་རྣམས་ཀུན་ཏུ་སྦས་པ་ཡི། །དེ་ལྟའི་ཉིན་མོའི་བདག་གིས་བཤད། །མཚམས་ནི་གཉིས་ཀ་ཕྲང་བ་སྟེ། །རྡོ་རྗེ་པདྨ་ཉི་ཟླ་འབྱུང ། །ལྟེ་བ་གཉིས་ཀ་ཕྲད་པ་ནི། །ཕྲ་ལྟར་སྐད་ཅིག་མཚན་ཉིད་དོ། །ཉོན་མོངས་ལས་གྲོལ་མཚམས་ཡིན་ཏེ། །རྣམ་པ་མེད་པ་མཆོག་གི་མཆོག། སྦྱོར་གཉིས་དབུས་ན་ཡོད་པ་སྟེ། །བྱུག་པ་དང་ནི་སྲེད་པ་མེད། །དེ་མཚམས་སེམས་ཅན་ཐམས་ཅད་ཀྱི། །འཁོར་བའི་ལམ་རབ་དག་པར་བྱེད། །ཤར་ནི་མཆོག་ཏུ་གྲགས་པ་སྟེ། །དགའ་བྲལ་ལ་སོགས་དང་བྲལ་བ། །མདུད་བའི་རྩེ་མོ་མཆོག་གི་གནས། །རྩ་ན་ཀ་ཡི་རུས་རྣམས་གཟུགས། །དེ་ཡི་ཁ་ནི་གཉིས་ཡོད་དོ། །ཤར་ནི་ཟླ་བའི་བདག་བོར་ཤེས། །ཟླ་བ་གྱེན་དུ་འགྲོ་བའི་ཕྱིར། །ཟླ་བ་ཐིག་ལེ་མཉམ་པར་གྲགས། །ཐིག་ལེ་བཞིར་
440b
གྱེས་བསྟན་པའོ། །ཐོག་མཐའ་མའི་དབུས་གནས་ན། །བཞི་པ་གང་ནའང་མེད་པའོ། །རང་གི་རིག་པའི་བདག་ཉིད་ཕྱིར། །དེ་བས་བརྗོད་དུ་མེད་པའོ། །དེ་ནི་གསང་བར་བསྟན་པ་སྟེ། །ཞར་བའི་དོན་ནི་འདུས་པའོ། །ཉོན་ཅིག་ལྷ་མོ་བདེ་སྦྱིན་མ། །ནུབ་པའི་ཡང་དག་བདག་གིས་བསྟན། །གང་ཚེ་སེམས་ནི་ནུབ་པ་ན། །སྔར་ནི་ཟླ་བའི་རྣམ་པར་འགྱུར། །དེ་ཚེ་ནུབ་པའི་གནས་སུ་འགྲོ། །མི་འགྲོ་བ་ནི་འགྲོ་བར་འགྱུར། །གང་ཚེ་ཐོག་མ་ཐ་མར་འགྲོ། །དེ་ཚེ་ནུབ་པར་བསྟན་པའོ། །ཐ་མ་ནུབ་པར་བསྟན་པ་ནི། རྟེན་པའི་གནས་ལས་རྟེན་མེད་གནས། །རྟེན་བ་ཡིས་ནི་མཆོག་བདེ་ལ། །རྟེན་མེད་བདེ་བ་ག་ལ་ཡོད། །དཔལ་ཕྱག་རྒྱ་ཆེན་པོའི་ཐིག་ལེ་ལས། །སྲོག་དང ། མཚན་མོ་དང ། ཉིན་མོ་དང ། མཚམས་དང ། ཤར་པ་དང ། ནུབ་པ་བསྟན་པ་ཞེས་བྱ་བའི་ལེའུ་སྟེ་ལྔ་པའོ།། །།རྩ་ཡི་འབྱུང་བ་ཐོག་མར་བསྟན། །དུས་ནི་ཉོན་ཅིག་བདག་གིས་བཤད། །དུས་ནི་ཚོད་ཅེས་བསྟན་པ་སྟེ། །དུས་ལ་བྱེ་བྲག་གཉིས་སུ་དབྱེ། །དུས་ནི་བསམ་དུ་མེད་བ་དང ། ཤིན་ཏུའི་དུས་ནི་དུས་ཡིན་ནོ། །ཤིན་ཏུ་དུས་དང་ངན་དུས་དང ། །སྣ་ཡི་འཕར་མ་བུ་ག་གཉིས། །འོང་བ་དེ་ནི་བཟང་དུས་བསྟན། ། འགྲོ་བ་བཟང་མིན་དུས་སུ་བཤད། །བཟང་བ་མིན་དུས་ཆད་ཅེས་བྱ། །བཟང་བ་དེ་ནི་མཆོག་ཏུ་དྲན། །གཉི་ག་དང་བྲལ་དེ་ཁོ་ཉིད། །དེ་ནི་སྔར་མེད་འདི་རུ་དུས། །ལྟ་བ་མེད་དང་བལྟ་
441a
༄#། །རུ་མོད། །མཚན་ངན་ཐམས་ཅད་དང་བྲལ་ལོ། །ད་ལྟའི་དུས་ནི་བདག་གིས་གཞན། །ཞལ་བཟང་ཡང་དག་བཤད་པ་ཡིན། །དེ་ཡི་དུས་སུ་གཞན་དུ་ཡིད།། རྣལ་འབྱོར་བ་དེ་མི་བགྱིད་ན། །དམ་ཚིག་དབང་མོ་བདག་ཇི་ལྟར། །གཞན་མིན་རྡོ་རྗེ་འཛིན་པར་འགྱུར། །ཱ་ལི་ཀཱ་ལི་གང་ལས་འབྱུང ། །ཉོན་ཅིག་དེ་ནི་བདག་གིས་བཤད། །ཡང་དག་དྲི་མེད་གནས་ནས་འབྱུང ། །སྣང་བ་མཆེད་པའི་གཟུགས་ཅན་ནོ། །དཔེ་བྱད་སུམ་ཅུ་གསུམ་དང་ལྡན། །ཀཱ་ལིའི་དཀྱིལ་འཁོར་ཤིན་ཏུ་གསལ། །སྣང་བ་མཆེད་པའི་གནས་ནས་ཏེ།། སྣང་བ་དེ་ནི་གསལ་བར་འབྱུང ། །དབྱངས་ཀྱི་ཡི་གེ་བཅུ་དྲུག་ལྡན། །རྒྱས་པ་ཨཱ་ལིའི་དཀྱིལ་འཁོར་རོ། །དེ་གཉིས་མཉམ་པར་སྦྱོར་བ་ཡིས། །དལ་བུས་རོ་ཆེན་སྐྱེ་བར་འགྱུར། །མཆོག་གི་བདུད་རྩི་རྣམ་པ་ནི། །བདེ་བ་ཆེན་པོའི་བདེ་བའི་གནས། །རིགས་མའི་སྣ་རྩེའི་གནས་ན་བཞུགས། །ཆུ་སྐྱེས་འཁོར་ལོ་དྲུག་གསལ་བྱེད། །དེ་ཡི་རེག་བྱ་བདེ་སྦྱིན་པ། །རོ་ཆེན་བརྒྱད་ནི་ཤེས་པར་བྱ། །འདར་དང་རྡུལ་དང་བ་སྦུ་ལངས། །སྐད་འགག་པ་དང་མདོག་གསལ་དང ། །ཁ་དོག་འགྱུར་ཞིང་མཆི་མ་མྱོས། །དེ་ནི་སྙིང་པོའི་རོ་བརྒྱད་དོ། །རོ་ཡིས་དགུག་བྱས་དགའ་བ་རྣམས། །ཤིན་ཏུ་བཟང་པོ་སྐྱེ་བར་འགྱུར། །དགའ་དང་མཆོག་གི་དགའ་བ་དང ། །དགའ་བྲལ་ལྷན་སྐྱེས་དེ་བཞིན་ནོ། །དགའ་བ་ཞེས་བྱ་སྣང་བ་ཡིན། །མཆོག་དགའ་
441b
སྣང་བ་མཆེད་པར་བསྟན། །དགའ་བྲལ་སྣང་བ་ཐོབ་ཅེས་བྱ། །ལྷན་སྐྱེས་དེ་ནི་ཡང་དག་འོང ། །དེ་ཡི་དུས་ན་སྐད་ཅིག་སྐྱོ། །སྣ་ཚོགས་ལ་སོགས་མཚན་ཉིད་དོ། །སྣང་བ་ཟླ་བ་ཞེས་སུ་བསྟན།། སྣང་བ་མཆེད་པ་ཉི་མ་འོ། །མཚམས་ནི་སྣང་བ་ཐོབ་པར་གྲགས། །གསུམ་དང་བྲལ་བ་ཡང་དག་འོད། །གང་ཚེ་མདུད་པའི་ནང་དུ་སེམས། །དེ་ཆོ་དགའ་བ་འབྱུང་བར་འགྱུར། །མདུད་པའི་མཚམས་ནས་ནས་གསུམ་ཙམ། །མཆོག་གི་དགའ་བ་འབྱུང་བར་འགྱུར། །གསུམ་གྱི་གནས་ནས་གསུམ་དུ་འགྲོ། །དགའ་བྲལ་འབྱུང་བར་འགྱུར་བའོ། །གང་ཞིག་གསུམ་དང་གསུམ་སྤངས་པ། །དེ་ཁོ་ན་ཉིད་རང་བཞིན་ཤར། །དེ་ནི་གསང་བ་ཆེན་པོའི་མཆོག། །གསང་བའི་གསང་བ་ཡང་དག་མཆོག། །འདུས་པ་ལ་སོགས་རྒྱུད་རྣམས་སུ། །ལེགས་དགྱེས་དབང་མོ་སྦས་པར་བྱ། །སྔོམ་པ་འམ་ནི་ཀྱཻ་རྡོ་རྗེ། །དེར་ཡང་གསལ་བར་མ་བྱས་སོ། །ཁྱོད་ཀྱི་ངོར་མཛད་མཆོག་དེ་ནི། །གསང་ཆེན་བདག་གིས་གསལ་བར་བྱས། །སངས་རྒྱས་བྱང་ཆུབ་སེམས་དཔའ་དང ། །གཞན་མ་ཤི་མེད་ཀུན་ཉོན་མོངས། །དེ་ལྟའི་མཆོག་གི་དེ་ཁོ་ན། །བདག་མིན་ན་ནི་དེ་མི་ཤེས། །གཞན་ཡང་ཆོས་ཀྱི་དབྱིངས་གྲགས་པ། །དེ་ཉིད་ཉོན་ཅིག་བདག་གིས་བཤད། །ནམ་མཁའ་ཆོས་ཀྱི་དབྱིངས་ཡིན་ཏེ། །དབྱིངས་ནི་ས་བོན་ཞེས་སུ་དྲན། །ཆོས་རྣམས་ཀུན་གྱི་ནང་ན་ཡོད། །རྒྱུ་དང་མཆོག་གི་གནས་ཡིན་ནོ། །ཇི་ལྟར་
442a
༄#། །ཏིལ་ལ་མར་ཡོད་དང ། །ཇི་ལྟར་ཤིང་ལ་མེ་ཡོད་པ། །དེ་བཞིན་ཆོས་རྣམས་ཀུན་ལ་ཡང ། །ཆོས་ཀྱི་དབྱིངས་ཀྱིས་ཁྱབ་པར་ནི། །ཡོད་ན་ཡང་ནི་མཐོང་མི་འགྱུར། ཆོས་ཀྱི་དབྱིངས་ནི་བྷ་གར་གྲགས། །བྷ་ག་རིན་ཆེན་སྣོད་ཡིན་ནོ། །དབང་ཕྱུག་ལ་སོགས་ཡོན་ཏན་ལྡན། །དེ་ནི་བྷ་གར་ཀུན་ཏུ་གྲགས། །ཆོས་ནི་བྷ་ག་ཞེས་བྱར་བསྟན། །དབྱིངས་ནི་སེམས་སུ་ཤེས་པར་དྲན། །ཁམས་གསུམ་གྱི་ནི་མཐའ་ཡས་ལ། །སེམས་ནི་དེ་ཡི་རྒྱུ་ཡིན་ནོ། །ཀུན་རྫོབ་རྣམ་པའི་གཟུགས་སུ་ནི། །ཆུ་ཟླ་ལྟ་བུར་མཐོང་བར་འགྱུར། །དོན་དམ་དེ་ནི་མཐོང་བ་མེད། །མཐོང་མེད་མ་ཡིན་དངོས་མེད་མིན། །རང་རིག་པ་ནི་མཆོག་ཞི་བ། །དངོས་དང་དངོས་མེད་དང་བྲལ་བ། །དེ་ནི་མཆོག་གི་དེ་ཁོ་ན། །ཆོས་ཀྱི་དབྱིངས་བདག་ཞི་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། ཨཱ་ལི་ཀཱ་ལི་འབྱུང་བ་དང ། དུས་ཀྱི་མཚན་ཉིད་དང ། ཆོས་ཀྱི་དབྱིངས་བསྟན་པ་ཞེས་བྱ་བའི་ལེའུ་སྟེ་དྲུག་པའོ།། །། གཞན་ཡང་ཉོན་ཅིག་བདག་གིས་བཤད། །ཇི་བཞིན་རྡོ་རྗེའི་མཚན་ཉིད་ཅན། །མི་ཕྱེད་རྡོ་རྗེ་ཞེས་སུ་བསྟན། །ཡེ་ཤེས་ལྔ་ཡི་བདག་ཉིད་མཆོག་།ནམ་མཁའ་ལྔ་ཡི་དབུས་སུ་ཐིམ། །ནམ་མཁའ་ལྔ་ཡི་བདག་ཉིད་དོ། །པདྨའི་ལྟེ་བའི་ནང་ན་བཞུགས། །ཐིག་ལེ་གཅིག་པུ་ཡི་གེ་མེད། །རྣམ་པ་ཐམས་ཅད་རྣམ་པ་མེད། །དེ་ནི་རྡོ་རྗེར་ཀུན་ཏུ་གྲགས། །
442b
བདག་གི་སྒྲ་ཡི་ངེས་པའི་དོན། །ཉོན་ཅིག་བདག་གིས་དེ་ཉིད་བཤད། ། ནི་ཡིག་འབྲུ་གཟུགས་ཀྱི་མཆོག། །ཐམས་ཅད་ཀུན་ཀྱི་ལུས་ནང་ཡོད། །རྣམ་པ་ཐམས་ཅད་མཆོག་ནི་རྫོགས། །ཀུན་ཡོང་མ་སྐྱེས་ཐམས་ཅད་མཁྱེན། །རྟག་ཏུ་སྟོང་པ་ཐམས་ཅད་ཁྱབ། །ཐམས་ཅད་ཀུན་གཅིག་བྱེད་པའི་རྒྱུ། །སྲིད་པ་སྲིད་མཆོག་ཉིན་མོ་ནི། །སྤྲུལ་བའི་སྐུ་ཡི་བདེ་བའོ། །ལུས་ནི་དེ་བཞིན་གཤེགས་སྐྱབས་སྦྱིན། །ཐམས་ཅད་དོན་ནི་བྱེད་ནུས་པའོ། །ཧཾ་གི་ཡིག་འབྲུ་གཟུགས་དང་བྲལ། །ལུས་གནས་ལུས་ལས་མ་སྐྱེས་པའོ། །རྣམ་པ་ཀུན་ལས་རྣམ་པར་གྲོལ།། བྱད་གཟུགས་དཔེ་བྱད་ཀུན་དང་བྲལ། །དངོས་དང་དངོས་མིན་རྣམ་པར་གྲོལ། །སྐྱེ་དང་འཇིག་པའི་བྱེད་པ་པོ། །དངོས་པོ་ཐམས་ཅད་ནུབ་པ་པོ། །ཆོས་ཀྱི་སྐུ་ཡི་རང་བཞིན་ཅན། །སེམས་ནི་རྡོ་རྗེ་འཛིན་སྐྱབས་སྦྱིན། །ཡི་གེ་ཐམས་ཅད་དང་བྲལ་ལ། །སྟོང་པའི་རྣམ་པ་མྱ་ངན་འདས། །ཡེ་ཤེས་སྐུ་ཡི་རང་བཞིན་ཅན། །དྲི་མེད་བརྗོད་མེད་ཞི་བ་སྟེ། །དེ་ནི་ཧཾ་དུ་ཀུན་ཏུ་གྲགས།། བདག་ནི་ཐམས་ཅད་ཀུན་གྱི་ནང ། །ཐམས་ཅད་བདག་ཉིད་རྟག་ཏུ་བཞུགས། །དངོས་པོ་ཀུན་གྱི་བདག་ཉིད་ལ། །དེ་ནི་ཁྱབ་པར་ཡོད་པ་སྟེ། །བདག་ནི་མེད་ན་འགྲོ་བ་ཀུན། །ཇི་ལྟར་རྩ་བཅད་ཤིང་བཞིན་ནོ། །ཧཾ་གི་ཡིག་འབྲུ་མཚམས་ཀྱི་མཐར། ། ནི་ཡིག་འབྲུ་མགོ་བོའི་རྩེར། ། ནི་ཡིག་འབྲུ་ཟླ་བ་དག་།ཧཾ་གི་ཡིག་འབྲུ་ཉི་མའི་འོད། ། ནི་ཡིག་འབྲུ་རྟེན་ཡིན་
443a
༄#། །ཏེ། །ཧཾ་གི་ཡིག་འབྲུ་བརྟེན་པའོ། ། ཡི་ཡིག་འབྲུ་སྲོག་ཅེས་བཤད། །ཧཾ་གི་ཡིག་འབྲུ་རྩོལ་བར་དྲན། །གང་ཞིག་གནས་སུ་དེ་གཉིས་སྦྱོར། །དེ་ནི་བདག་ཉིད་གསལ་བར་འགྱུར། །རྒྱུད་རྣམས་ཀུན་ལས་རྙེད་དཀའ་བ། །དེ་ནི་ཡང་དག་བདག་སྒྲར་བཤད། །དཔལ་ཕྱག་རྒྱ་ཆེན་པོའི་ཐིག་ལེ་ལས། རྡོ་རྗེའི་མཚན་ཉིད་དང ། བདག་སྒྲའི་ངེས་པའི་དོན་ཞེས་བྱ་བའི་ལེའུ་སྟེ་བདུན་པའོ།། །།གསང་བའི་དོན་ནི་བཤད་བྱ་བ། །གསང་བ་ཞེས་བྱ་ཅི་ཞེས་བརྗོད། །གསང་བ་ཞེས་བྱ་དགའ་བར་བསྟན། །མཆོག་ཅེས་བྱ་བ་མཆོག་ཡིན་ནོ། །དགྱེས་པ་ཞེས་བྱ་དགའ་བྲལ་བསྟན། །ཐམས་ཅད་བདག་ཉིད་ལྷན་སྐྱེས་དྲན། །གསང་བ་ཉིད་ནི་གསང་བ་ཡིན། །གསང་བ་ཁུ་བར་བསྟན་པའོ། །ཁུ་བ་སྲོག་ཅེས་བསྟན་པ་སྟེ། །སྲོག་ནི་རྟེན་དུ་དྲན་པའོ། །རྟེན་ནི་སར་ནི་ཤེས་པར་བྱ། །ཁམས་གསུམ་ཀུན་ནི་འབྱུང་བའོ། །མཆོག་ནི་ཆུ་ཞེས་བསྟན་པ་སྟེ། །ཆུ་ནི་སྲོག་གི་ཚེ་ཡིན་ནོ། །ཆ་དལ་དེ་ནི་འོད་ཅེས་བསྟན། །འོད་ནི་རྣམ་པར་དག་ཅེས་དྲན། །རྣམ་པར་དག་པ་བདེ་ཆེན་དངོས། །དེ་ནི་རང་བཞིན་བསྟན་པའོ། །རྣམ་པར་དག་པ་འབྱུང་མིན་གནས། །བབས་པ་རྣམ་དག་བརྗོད་པ་ཡིན། །བབས་པ་དངོས་མིན་ཞེས་བྱར་བསྟན། །དངོས་མིན་རྣམ་དག་བརྗོད་མ་ཡིན། །རྣམ་དག་ཕྲ་བའི་ཕྲ་མོ་སྟེ།
443b
ཕྲ་\?\་མོའི་རྣམ་དག་གཞན་ན་གནས། །ཕྲ་མོའི་རང་བཞིན་ཞེས་བྱར་བསྟན། །གཟུང་དང་འཛིན་བ་རྣམ་པར་སྦངས། །རང་དངོས་བདེ་བ་ཆེན་པོ་ནི། །ཡེ་ཤེས་རླུང་དུ་རབ་ཏུ་གྲགས། །དེ་ནི་ནམ་མཁའ་ཞེས་སུ་བཤད། །ནམ་མཁའ་སྟོང་པར་བསྟན་པའོ། །སྟོང་པ་ལས་ནི་ཐམས་ཅད་འབྱུང ། །སྟོང་པའི་ནང་དུ་ཐམས་ཅད་ཐིམ། །སྟོང་པ་ཡང་དག་དྲི་མེད་གནས། །རྣམ་པ་ཐམས་ཅད་དང་བྲལ་བ། །མཆོག་གི་རྣམ་པ་སྐྱེ་མེད་དག། རང་དགའི་ཉམས་སུ་མྱོང་བ་དངོས། དེ་ནི་རང་བཞིན་ཞེས་སུ་བཤད། །ཐམས་ཅད་བདག་ཉིད་རྟག་ཏུ་བཞུགས། །རིགས་ལྔ་ཡི་ནི་མཚན་ཉིད་དེ། །ཉོན་ཅིག་བདག་གིས་བཤད་པར་བྱ། །རིགས་ནི་ཀ་པཱ་ལ་ཞེས་བརྗོད། །ཀ་པཱ་ལ་ནི་ཀ་རུ་བཤད། །ཀ་ནི་རྩ་བ་ཞེས་བྱར་གྲགས། །རྩ་བ་བྱེ་བྲག་ལྔ་རུ་དྲན། །དེ་བཞིན་གཤེགས་པ་ལྔ་ཡི་སྐུ། །དེ་ནི་ཕུང་པོ་ལྔ་ཞེས་དྲན། །ཕུང་པོ་ལྔ་ནི་གྲུབ་པའི་སྐུ། །འབྱུང་བ་ལྔ་ཡི་རང་བཞིན་ཅན། །ཚངས་པ་ཁྱབ་འཇུག་དྲག་པོ་དང ། །དབང་ཕྱུག་རྟག་ཏུ་ཞི་བ་ལ། །ལྔ་ལ་ཁྱབ་པ་གཅིག་པུ་སྟེ། །བདག་ནི་དོན་དམ་པ་ཡི་ཕ། །ཐམས་ཅད་ཁྱབ་པའི་སྟོང་ཆེན་པོ། །བདག་ནི་འཕོ་མེད་མ་སྐྱེས་པ། །ཀ་ནི་གང་ཞིག་ཐུགས་རྗེ་འཐུང ། །བཱ་ནི་དམ་ཚིག་སྐྱོང་བ་ཡིན། །ལ་ནི་ངན་འགྲེའི་ཕ་རོལ་ཕྱིན། །དེ་ནི་ཀ་པཱ་ལ་རུ་བཤད། །ཀ་ཡི་སྒྲ་ནི་རང་བཞིན་ཡིན། །ཀྲ་ནི་གང་དུའང་མི་གནས་པའོ། །དངོས་པོ་ཐམས་ཅད་ཁྱབ་པའོ། །དེས་ན་ཀ་ཞེས་བསྟན་པའོ། །དེ་བདག་
444a
༄#། །ཧེ་རུ་ཀ་ཡི་དངོས། །ཆོས་ཀྱི་འཁོར་ལོའི་གནས་ན་བཞུགས། །རྟག་ཏུ་ཞི་བ་ལོངས་སྤྱོད་འཁོར། །དབང་ཕྱུག་བདེ་ཆེན་འཁོར་ལོ་འོ། །དྲག་པོ་ལྟེ་བའི་འཁོར་ལོར་གནས། །ཁྱབ་འཇུག་མེ་ཡི་འཁོར་ལོར་རོ། །ཚངས་པ་རླུང་གི་འཁོར་ལོར་ཏེ། །རླུང་ནི་ཐམས་ཅད་ནང་ཡོད་ཚེ། །བདག་ནི་འཁོར་ལོ་དྲུག་གི་དབུས། །ཀུན་ལ་དེ་ནི་ཁྱབ་པར་བཞུགས།། སྟོང་ཉིད་གཞན་མཆོག་སྟོང་པ་ཉིད། །བདག་དཔལ་ཧེ་རུ་ཡི་མཆོག། མཁའ་འགྲོ་ལྔ་ཡི་གཙོ་བོ་སྟེ། །ཡེ་ཤེས་མཁའ་འགྲོ་དབང་ཕྱུག་བདག། འབྱུང་བ་ལྔ་ཡི་རང་བཞིན་ཅན།། མཁའ་འགྲོ་མ་ཡིས་ཀུན་ཏུ་བསྐོར། །དཔལ་ཕྱག་རྒྱ་ཆེན་པོའི་ཐིག་ལེ་ལས། གསང་བ་དང ། དགའ་བ་བཞི་དང ། རིགས་ལྔའི་མཚན་ཉིད་ཅེས་བྱ་བའི་ལེའུ་སྟེ་བརྒྱད་པའོ།། །། དེ་ནས་གཞན་ཡང་བཤད་བྱ་བ། །ཕྱག་རྒྱའི་བརྡ་ནི་རབ་ཡིན་ཏེ། །རྣ་ཆ་གདུ་བུ་འཁོར་ལོ་དང ། །འགུལ་དོ་དེ་བཞིན་ཐལ་བ་དང ། །ཚངས་པའི་སྐུད་པ་ཕྱག་རྒྱ་དྲུག། ཕ་རོལ་ཕྱིན་དྲུག་དྲན་པའོ། །སྦྱིན་པ་ཚུལ་ཁྲིམས་བཟོང་བརྩོན་འགྲུས། །བསམ་གཏན་ཤེས་རབ་དྲུག་ཡིན་ནོ། །སྦྱིན་པ་ཆོས་ཞེས་བསྟན་པ་སྟེ། །ཚུལ་ཁྲིམས་ལས་ཞེས་དྲན་པའོ། །བཟོད་པ་དམ་ཚིག་ཅེས་སུ་དྲན། །བརྩོན་འགྲུས་ཏིང་འཛིན་ཤེས་པར་བྱ། །བསམ་གཏན་ཡེ་ཤེས་ཞེས་བྱར་དྲན། །ཤེས་རབ་ཞེས་བྱ་ཕྱག་རྒྱ་ཆེ། །དོན་དམ་པར་ནི་ཤེས་པར་བྱ། །སྐྱེ་མཆེད་
444b
དྲུག་ནི་དག་པར་བྱ། །ཕྱག་རྒྱ་དྲུག་ཏུ་རབ་ཏུ་གྲགས། །རིགས་དྲུག་རིམ་པར་ཤེས་པར་བྱ། །ལྷ་མོའི་བདག་ཉིད་ཕྱག་རྒྱ་དྲུག། ཡཾ་རཾ་ལཾ་བཾ་ཨཾ་ཧཾ་སྟེ། །ལྷ་མོ་ཡི་ནི་རིམ་པས་སོ། །དེ་རུ་མཆོད་པ་རབ་ཏུ་བྱ། །མཆོད་པ་རོ་མཉམ་རིམ་པའོ། །ཐིམ་དང་ལོངས་སྤྱོད་དབང་གིས་ནི། །གནས་ཀུན་གྱི་ནི་དེ་བཞིན་ནོ། །གཏུམ་མོ་བཙོ་བླག་ཌོཾ་བྷི་དང ། །གར་མཁན་ཐོད་པ་བྲམ་ཟེ་མོ། །གཏུམ་མོ་པདྨའི་རིགས་ཡིན་ཏེ། །བཙོ་བླག་རིན་ཆེན་རིགས་སུ་དྲན། །ཌོཾ་བྷི་རྡོ་རྗེའི་རིགས་ཞེས་བྱ། །གར་མཁན་རལ་གྲིའི་རིགས་སུ་དྲན། །ཐོད་པ་ཅན་ནི་འཁོར་ལོའི་རིགས། །དེ་ལྔ་དག་པ་ཕྱག་རྒྱའོ། །ཡེ་ཤེས་ཕྱག་རྒྱ་བྲམ་ཟེ་མོ། །རྡོ་རྗེ་སེམས་དཔའི་རིགས་སུ་དྲན། །བྲམ་ཟེ་མོ་ནི་མ་ཡིན་ཏེ། །ཐོད་པ་མ་ནི་སྲིང་མོར་དྲན། །གར་མཁན་བུ་མོར་ཤེས་པར་བྱ། །ཌོཾ་བྷི་ཆུང་མར་རབ་ཏུ་གྲགས། །བཙོ་བླག་མཁན་ནི་མནའ་མ་ཡིན། །གཏུམ་མོ་སྒྱུག་མོར་དྲན་པའོ། །ཤེས་རབ་ཐབས་ཀྱི་ཆོ་ག་ཡིས། །རྟོག་པ་མེད་པས་མཆོད་པར་བྱ། །རྣམ་རྟོག་མེད་པས་དངོས་གྲུབ་འགྲུབ། ཇི་ལྟར་བསྙེན་པ་སྐད་ཅིག་གིས། །མ་ནི་སེམས་ཞེས་བསྟན་པ་སྟེ། །གསུང་ནི་འདི་རུ་སྲིང་མོར་དྲན། །བུ་མོ་སྐུ་རུ་རྣམ་པར་གྲགས། །ཆུང་མ་སྲོག་ཅེས་བྱ་བར་དྲན། །མནའ་མ་རྩོལ་པར་དྲན་པ་སྟེ། །སྒྱུག་མོ་མཉམ་པར་དྲན་པའོ། །མ་ནི་མཐུ་ཡི་རྩ་ཡིན་ཏེ། །སངས་རྒྱས་རིན་པོ་ཆེ་ཡི་སྣོད། །སྲིང་མོ་ཁུ་བའི་རྩ་ཡིན་ཏེ། །མཚོག་མའི་གནས་ན་ཡོད་པའོ། །བུ་མོ་ཁྲག་གི་རྩ་
445a
༄#། །ཡིན་ཏེ། །ཁུ་བའི་རྩ་ཡི་འོག་ན་ཡོད། །ཆུང་མ་དྲི་ཆུའི་རྩ་ཡིན་ཏེ། །གཉིས་ཀྱི་བར་ན་ཡོད་པའོ། །མནའ་མ་མཆི་མའི་རྩ་ཡིན་ཏེ། །མགྲིན་པའི་གནས་ན་ཡོད་པའོ། །སྒྱུག་མོ་སྣབས་ཀྱི་རྩ་ཡིན་ཏེ། །དཔྲལ་བའི་གནས་ན་ཡོད་པའོ། །མ་ནི་ས་རུ་ཤེས་པར་བྱ། །སྲིང་མོ་ཆུ་རུ་དྲན་པའོ། །བུ་མོ་མེ་ནི་ཡིན་པར་དྲན། །ཆུང་མ་རླུང་དུ་རབ་ཏུ་གྲགས།། མནའ་མ་དེ་ནི་ནམ་མཁའ་སྟེ། །སྒྱུག་མོ་ནམ་མཁའ་མ་ཡིན་ནོ། །མ་ནི་མངར་བ་ཡིན་པར་འགྱུར། །སྲིང་མོ་དེ་ནི་སྐྱུར་བར་དྲན། །བུ་མོ་ཁ་བར་ཤེས་བྱ་སྟེ། །ཆུང་མ་ལན་ཚཝར་འདི་རུ་དྲན།། ཚ་བ་དེ་ནི་མནའ་མ་སྟེ། །སྒྱུག་མོ་བསྐ་བར་དྲན་པའོ། །དེ་རྣམས་འབད་པས་མཆོད་པར་བྱ། །མྱུར་དུ་དངོས་གྲུབ་ཐོབ་པར་འགྱུར། །རྣལ་འབྱོར་རྒྱུད་ལས་རྙེད་དཀའ་བ། །ཕྱག་རྒྱའི་རིགས་སུ་བདག་གིས་བཤད། །དཔལ་ཕྱག་རྒྱ་ཆེན་པོའི་ཐིག་ལེ་ལས། །ཕྱག་རྒྱའི་བརྡ་དང ། མཆོད་པའི་ཆོ་ག་ཞེས་བྱ་བའི་ལེའུ་སྟེ་དགུ་པའོ།། །།དེ་ནས་མཆོད་པའི་ཆོ་ག་ནི། །ཕྱི་དང་ནང་ནི་བདག་གིས་བསྟན། །ས་རྡོ་ལ་སོགས་མཆོད་རྟེན་ལ། །ནམ་ཡང་དེ་ལ་ཕྱག་མི་བྱ། །རབ་གནས་དཀྱིལ་འཁོར་སྦྱིན་སྲེག་རྣམས། །ནམ་ཡང་དེ་ནི་མི་བྱའོ། །དྲི་ཆེན་དོར་\?\་ཆུ་ས་བོན་སོགས། །རྟག་ཏུ་བདག་ཉིད་མཆོད་པར་བྱ། །འགྲོ་དང་མི་འགྲོ་གྲང་ཞིག་ནི། །དེ་ནི་ཐམས་ཅད་སེམས་ཡིན་ནོ། །དེ་ཡི་གཟུགས་གྲུབ་སེམས་མ་
445b
ཡིན། །སེམས་ནི་སྟོང་པའི་རང་བཞིན་ནོ། །ངོ་བོ་ཉིད་བྲལ་སྟོང་པ་སྟེ། །དེ་བས་འགྲོ་བ་སེམས་སུ་གྲུབ། །དེ་ལྟ་བུ་ཡི་དག་བྱས་ན། །རྩ་སོགས་ལ་ཡང་མཆོད་པ་བྱ། །ཉིད་ནི་མངའ་བདག་རྡོ་རྗེ་སེམས། །སེམས་ནི་བདག་ཉིད་དྲན་པའོ། །སེམས་མ་ཡིན་པ་ལྷ་ཡི་དངོས། །ཕྱི་རོལ་གཞན་མ་མེད་པའོ། །དེ་ལྟར་ཤེས་ནས་བདག་ཉིད་ནི། །དང་པོ་དེ་ཉིད་མཆོད་པར་བྱ། །རིགས་ལྔ་དག་ཏུ་ཀུན་སྤྱོད་པ། །རིགས་གཅིག་ཏུ་ནི་རྣམ་པར་བརྟག། བྱམས་དང་སྡང་པའི་བྱེ་བྲག་དང ། །བཏུང་དང་མི་བཏུང་སྦང་བར་བྱ། །བུད་མེད་གང་ཡང་སྣོད་མིན་མེད། །དགེ་དང་མི་དགེ་སྨྲ་མི་བྱ།། དངོས་གྲུབ་རྣལ་འབྱོར་མེད་པ་དང ། །སྔགས་མེད་སྔགས་པ་མེད་པར་ནི། །དངོས་གྲུབ་ཆེན་པོ་ཐོབ་འདོད་ན། །དེ་ལྟ་བུ་ཡི་སེམས་མི་བྱ། །རླབས་ཆེ་གཏིང་རིང་ཡང་དག་པའི། །སྐྱེས་བུ་ཆེན་པོས་སེམས་དེ་བྱ། །ཉན་ཐོས་རྣམས་དང་མཉམ་པའི་སེམས། །ནམ་ཡང་དེ་ལྟར་མི་བྱ་འོ། །བསྟན་མེད་ཉན་ཐོས་སྐལ་ལྡན་མིན། །ལོག་པའི་མུན་པས་ཡེ་ཤེས་གཡོགས། །དེ་རྣམས་ལ་ནི་གཏམ་ཙམ་ཡང ། །སྐྱེས་བུ་ཆེན་པོས་མི་སྦྱིན་ནོ། །སྨད་པར་ཡང་ནི་ཡོད་མི་བྱ། །དེ་ལ་ནམ་ཡང་ཕྱག་མི་བྱ། །ཕྱི་དང་ནང་གི་སྦྱོར་བ་ཡི། །འདི་རུ་གནས་ནི་བདག་གིས་བཤད། །རྡོ་རྗེའི་གནས་ནི་ཨུ་རྒྱན་དང ། །གནས་ནི་ཛཱ་ལནྡྷ་རར་དུན། །གནས་ནི་པུ་ལཱི་ར་མ་དང ། །གནས་ནི་ཀཱ་མ་རཱུ་པའོ། །ཉེ་བའི་གནས་ནི་མཱ་ལར་བསྟན། །སིནྡྷུ་ནཱ་གར་སིངྒ་ལ། །ཞིང་ནི་མུམྨ་ནི་རུ་
446a
༄#། །གྲགས། །དེ་བཞིན་དེ་ཝི་ཀོ་ཊི་དང ། །ཉེ་བའི་ཞིང་ནི་ཀུ་ལུ་ཏ། །རྦུ་དར་ནི་དེ་བཞིན་དྲན། །ཧ་རི་ཀེ་ལ་ཚནྡོ་ཧར། །གོ་དཱ་ཝ་རི་དེ་བཞིན་ནོ། །ལཾ་པ་ཀ་དང་ཀཱཾ་ཙི་སྟེ། །ཉེ་བའི་ཚ་ནྡོར་བསྟན་པའོ། །འདུས་པ་དེ་ནི་ཀར་མར་ཏེ། །དེ་བཞིན་དུ་ནི་གསེར་གླིང་ངོ ། །ཀོངྐ་དང་ནི་བྷིནྡ་སྟེ། །ཉེ་བའི་འདུས་པར་དྲན་པའོ། །ཡི་དྭགས་འདུས་པའི་དུར་ཁྲོད་དང ། །དུར་ཁྲོད་རྒྱ་མཚོའི་དོགས་སུའོ། །ཉེ་བའི་དུར་ཁྲོད་ཙ་རི་ཏྲ། །དེ་བཞིན་ཀོ་མར་པར་འོ། །ཀསྨིར་པཱི་ལ་ཝ་རུ་གྲགས། །དེ་བཞིན་ཀེ་རང་ཡུལ་ཡིན་ནོ། །ཉེ་བའི་པཱི་ལ་ནེ་པ་ལ། ། ཉེ་བའི་པཱི་ལ་ཀརྣོ་ཛོ། །ོ་ཌི་ཡ་ན་སྤྱི་བོའི་གནས། །ཛ་ལནྡྷ་ར་སྤྱི་གཙུག་དྲན། །པུལླཱི་ར་ནི་མཚོག་མ་སྟེ། །ཀཱ་མ་རཱུ་ནི་སྨིན་ཕྲག་དབུས། །མཱ་ལ་བ་ནི་སྣ་རྩེ་སྟེ། །སིནྡྷུ་མིག་གཉིས་ཡིན་པར་གྲགས། །ནཱ་གར་རྣ་བ་གཉིས་སུ་དྲན། །སིངྒ་ནམ་མཁའི་པདྨར་གནས། །མུམྨུ་ནི་ནི་ཀོས་ཀོ་འོ། །དེ་བི་ཀོ་ཊི་མགྲིན་གླིང་དུ། །ཀུ་ལུ་ཏ་ནི་རྒྱབ་གླིང་དུ། །རྦུ་ད་ནི་ནུ་གཉིས་སུ། །ཧ་རི་ཀེ་ལ་སྙིང་ག་འོ། །གོ་དཱ་ཝ་རི་ལྟེ་བའི་གནས། །ལཱཾ་པ་ཀ་ནི་གསང་བར་རོ། །ཀཱཾ་ཙི་ལིངྒའི་དབུས་སུ་གནས། །ཀར་མ་ལིངྒའི་རྩེ་མོར་རོ། །གསེར་གླིང་གཞང་གའི་གནས་ས་སྟེ། །ཀོངྐ་ན་ནི་བརླ་གཉིས་དྲན། །བྷིནྡ་པུས་མོ་གཉིས་ཡིན་ནོ། །ཡི་དྭགས་འདུས་པ་བྱིན་པ་སྟེ། །རྐང་བོལ་གཉིས་སུ་རྒྱ་མཚོའི་དོགས། །ཀཽ་མཱ་རི་ནི་མཐེ་བོང་སྟེ། །ཙ་རི་ཏྲ་ནི་
446b
སོར་མོར་རོ། །ཁ་ཆེའི་ཡུལ་ནི་ལུས་རྣམས་ཀུན། །ཀེར་ཏ་ནི་རྐང་མཐིལ་ལོ། །ནཻ་བ་ལ་ནི་ལྟག་པ་སྟེ། །ཀཾ་པོ་ཇི་ནི་རྐེད་པའོ། །དེ་ནི་དོན་དམ་པ་ཡི་གནས། །རི་བོང་ཅན་འོད་མེ་ཏོག་དང ། །མེ་ཏོག་དམར་པོ་ཉི་མཉམ་གྱིས། །མཆོད་པའི་དུས་སུ་མཆོད་པར་བྱ། །སྲོག་གཅོད་པ་ཡི་མཆོད་སྦྱིན་ནི། །འབད་པས་དེ་རུ་དབུལ་བར་བྱ། །པདྨ་ཆེན་པོའི་མཚོག་གནས་སུ། །སྲོག་ནི་གཅད་པར་བྱ་བའོ།། ཆད་པ་ནམ་ཡང་མི་བྱ་སྟེ། །དེ་ལ་བརྩོན་འགྲུས་ཆེན་པོ་བྱ། །སྲོག་གཅོད་པ་ཡི་བསོད་ནམས་བྱ། །མཆོག་གི་མཆོག་ནི་ཡང་དག་རྙེད། །གྲུ་གསུམ་དྲི་མེད་དག་པར་ནི། །དེ་རུ་དཀྱིལ་འཁོར་འཕར་མ་གཉིས། །ནང་གི་འཕར་མར་དཔལ་བཅོམ་ལྡན། །བྱང་ཆུབ་སེམས་ཉིད་ལྡན་པའོ། །ཕྱི་རོལ་རིགས་གསུམ་རྣལ་འབྱོར་མ། །འཛིན་མ་ལ་སོགས་མཆོག་ཆེན་ནོ། །ལུས་ཀྱི་ནང་ནས་འབྱུང་བའི་ཕྱིར། །དེ་ནི་ལྷ་མོ་ཞེས་སུ་བསྟན། །དཀྱིལ་འཁོར་ལུས་སུ་བསྟན་པ་དང ། །བྷ་ག་དཀྱིལ་འཁོར་ཡིན་པར་བཤད། །དཀྱིལ་འཁོར་བྱང་ཆུབ་ཀྱི་ནི་སེམས། །དཀྱིལ་འཁོར་གསུམ་ནི་རྟོགས་པའོ། །དུར་ཁྲོད་བརྒྱད་ཀྱི་དབུས་གནས་སུ། །དཀྱིལ་འཁོར་གསུམ་ནི་སྒོམ་པའོ། །དབུགས་འབྱུང་དུར་ཁྲོད་ཅེས་སུ་བཤད། །སྒོ་དགུ་དང་ནི་ལྡན་པའོ། །ཡང་དག་ཉོན་ཅིག་ཞལ་བཟང་མོ། །དེ་ཡི་འབྱུང་བ་བདག་གིས་བཤད། །གཏུམ་དྲག་གཞང་གའི་དབྱིབས་ཅན་ནི། །གསང་བའི་ཚད་ཚིང་ཁ་རུ་འོ། །འབར་བ་ཞེས་བྱའི་དུར་ཁྲོད་ནི། །སྣ་ཡི་བུ་ག་གཉིས་
447a
༄#། །ན་གནས། །དམྱལ་སོགས་དེ་བཞིན་མི་བཟད་པ། །མིག་གཉིས་ལ་ནི་གནས་པ་འོ། །ཧ་ཧར་དགོད་དང་གཡེར་ཀ་ཅན། །རྣ་བ་གཉིས་ལ་གནས་པའོ། །དུར་ཁྲོད་རེ་རེའི་ཤིང་རེ་ནི། །དབང་བྱེད་པ་ནི་དེ་ན་ཡོད། །གཏུམ་དྲག་པ་ཏ་ལ་ཡི་ཤིང ། །དབྱིབས་ཅན་ནང་ན་ཤི་ཀ་རའོ། །ཚང་ཚིང་ས་ལི་ཤིང་ཡིན་ནོ། །འབར་བ་ཞེས་བྱ་སོ་རི་ཤའོ། །དམྱལ་སོགས་ཨུ་དུམ་ཝ་ར་སྟེ། །མི་བཟད་པ་ནི་བ་ཏའི་ཤིང ། །ཧ་ཧ་དགོད་ན་ཨ་ཤཝཏྠ། །གཡེར་ཀའི་ནང་ན་གེ་སར་ཤིང ། །ཤིང་གི་རྣམ་པ་རྩ་བརྒྱད་ནི། །ཡན་ལག་མང་པོ་ཡོད་པའོ། །གཞང་མཐུ་རྩི་མོ་མཐུས་བྱེད་མ། །རོ་ཡི་རྩེ་མོར་རོ་ལུས་མ། །ནམ་མཁའ་མ་དང་ཆར་སྦྱིན་མ། །རུ་ལ་པ་མ་དང་ལྟོགས་མ་སྟེ། །བྱེ་བྲག་བརྒྱད་དུ་གྱེས་བར་དྲན། །ཤིང་གི་སྒྲ་ནི་རྩ་ཡིན་ཏེ། །ཤིང་ནི་མེ་ཏོག་ཡོད་ཕྱིར་རོ། །མཆོག་གི་དཀྱིལ་འཁོར་སྟེང་དུ་ནི། །མེ་ཏོག་མེད་ན་ཇི་ལྟར་མཆོད། །དཔལ་ཕྱག་རྒྱ་ཆེན་པོའི་ཐིག་ལེ་ལས། དཀྱིལ་འཁོར་དང ། ལྷ་མོ་དང ། གནས་དང ། དུར་ཁྲོད་དང ། ཤིང་དང ། མཆོད་པ་ཞེས་བྱ་བའི་ལེའུ་སྟེ་བཅུ་པའོ།། །།ཉོན་མོངས་ཐམས་ཅད་མེད་བྱེད་པ། །ཉོན་ཅིག་སྦྱིན་སྲེག་བདག་གིས་བཤད། །ལྟེ་བའི་གནས་ན་ཚུལ་ཡོད་པ། །ཚུལ་གྱི་མཐའ་ན་གསང་བད་དོ། །དེ་རུ་རང་འབར་གྱི་ནི་རླུང ། །བསྐོར་བ་བྱས་ནས་ངལ་བསོ་སྟེ། །དབང་པོ་གཉིས་ཤིང་སྦྱོར་བ་ཡིས། །རླུང་གི་མེ་ནི་སྦར་
447b
བའོ། །མར་ཡོད་པ་ནི་སྟེང་འཁོར་ལོ། །དེ་ནི་མར་སྣོད་ཅེས་སུ་དྲན། །ཧ་ནི་བླུགས་གཟར་ཞེས་སུ་བཤད། །དགང་གཟར་འདི་རུ་རྡོ་རྗེར་བསྟན། །ཧོ་མ་ཁུད་བྷ་ག་ཞེས་སུ་བཤད། །འབྲུ་ནི་དབང་པོ་ལྔ་རུ་དྲན། ཡམ་ཤིང་ཕུང་པོ་ཞེས་བྱར་བསྟན། །བྱང་ཆུབ་སེམས་ནི་མར་དུ་བསྲེག། མར་ངོ་ཡི་ནི་མན་ཆད་དུ། །ཉ་ལ་ཐུག་ནས་གཤེགས་སུ་གསོལ། །ཐིགས་པ་ཕྱེད་ཙམ་དགང་གཟར་ལས། །ཧོམ་ཁུང་ཕྱི་རོལ་ཡང་མི་བྱ། །སངས་རྒྱས་བྱང་ཆུབ་སེམས་དཔའ་དང ། ལྷ་དང་ལྷ་མིན་སྲིན་པོ་དང ། །འཇིག་རྟེན་སྐྱོང་བ་བརྒྱད་རྣམས་ལ། བསྲེག་བྱ་ཡིས་ནི་རབ་ཚིམ་བྱ། །མཆོད་བ་གང་ཞིག་རྡོར་སེམས་ལ། །བསྲེག་རྫས་གང་བས་དབུལ་བར་བྱ། །ཧཱུཾ་ཕཊ་རྣམ་པའི་སྔགས་ཀྱིས་ནི། །མཁས་པས་བསྲེག་རྫས་སྦྱིན་པར་བྱ། །དེ་ཡིས་མཁའ་འགྲོ་མ་རྣམས་དང ། །གཞན་ཡང་རྣལ་འབྱོར་མ་མོ་མཉེས། །གང་ཞིག་ཡིད་ལ་ཅི་བསམ་པ། །དངོས་གྲུབ་ཆེན་པོ་མཐའ་ཡས་སྟེར། །རེ་བ་ཐམས་ཅད་འགྲུབ་བྱེད་བ། །དེ་ལྟའི་སྦྱིན་སྲེག་བདག་གིས་བཤད། །དཔལ་ཕྱག་རྒྱ་ཆེན་པོའི་ཐིག་ལེ་ལས། དོན་དམ་པའི་སྦྱིན་སྲེག་གི་ཆོ་ག་ཞེས་བྱ་བའི་ལེའུ་སྟེ་བཅུ་གཅིག་པའོ།། །།བདུད་རྩི་ལྔ་ཡི་ཆོ་གའི་རབ། །མདོར་བསྡུས་པ་ནི་བདག་གིས་བཤད། །རྣམ་སྣང་མི་བསྐྱོད་དོན་ཡོད་གྲུབ། །དཔག་མེད་རིན་འབྱུང་ཞེས་སྔར་བསྟན། །རིན་ཆེན་འབྱུང་ལྡན་ཁྲག་ཅེས་བསྟན། །སྣང་བ་མཐའ་ཡས་ཁུ་བར་བརྗོད།
448a
༄#། །དོན་ཡོད་གྲུབ་པ་ཤ་ཆེན་ཏེ། །མི་བསྐྱོད་པ་ནི་རྡོ་རྗེ་ཆུའོ། །རྣམ་པར་སྣང་མཛད་དྲི་ཆེན་བཤད། །དེ་ནི་བདུད་རྩི་ལྔ་ཡིན་ནོ། །དབེན་དང་མི་མེད་དགྱེས་པ་ཡིས། །གནོད་པ་ཐམས་ཅད་དང་བྲལ་བའི། །དེ་རུ་ཁང་པ་རབ་ཏུ་བྱ། །ཉིས་བརྩེགས་དད་ནི་སྒོ་དང་ལྡན། །གཅིག་ནི་ས་ཡི་འོག་ཏུ་བྱ། །དེ་ཡི་སྟེང་ནི་གཉིས་པའོ། །འཇིག་རྟེན་པ་ཡིས་གཅིག་ཏུ་ཤེས། །དེ་ལྟར་མཁས་པས་ཁང་པ་བྱ། །རེ་ཞིག་སྒྲུབ་དབང་སྐལ་ལྡན་པ། །ཐོས་པ་ཆེ་ཤིང་སེར་སྣ་མེད། །སྙིང་རྗེ་ཆེན་པོའི་རླན་དང་ལྡན། །ཞེ་སྡང་ཕྲག་དོག་བྲལ་བ་དང ། །དཔའ་བ་ཆེ་དང་རླབས་ཆེ་བ།། སྒྲུབ་པའི་གྲོགས་དང་དེ་བཞིན་ཏེ། །འདོད་ཆགས་ཆགས་བྲལ་གཉིས་མེད་པ། །སེར་སྣ་མེད་ཅིང་བརྩོན་འགྲུས་ལྡན། །ཁྲོ་བ་མེད་ཅིང་དཔའ་ཆེན་པོ། །བླ་མ་ལ་གུས་ཐོས་པ་ཆེ། །འབྲས་བུ་གསུམ་ལ་སོགས་པས་ལུས། །དང་པོར་ཡང་དག་དེས་དག་བྱ། །དེ་ནས་སྔགས་པས་འབུམ་ཕྲག་གཅིག་།སུཾ་བྷའི་སྡགས་ནི་གསལ་བར་བཟླ། །ོཾ་སུ་བྷ་ནི་སུཾ་བྷ་ཧཱུཾ་ཧཱུཾ་ཕཊ། ཨོཾ་གྲྀཧྣ་གྲྀཧྣ་ཧཱུཾ་ཧཱུཾ་ཕཊ། ཨོཾ་གྲྀཧྣ་པ་ཡ་གྲྀཧྣ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་བིབྱ་རཱ་ཛ་ཧཱུཾ་ཧཱུཾ་ཕཊ། དེ་ནི་ཡི་གེ་གསུམ་གྱི་སྔགས། །སྒྲུབ་པའི་དབང་པོས་ཡིད་ཀྱིས་བཟླ།། རྨི་ལམ་ན་ནི་འདི་ལྟར་མཐོང ། །རྣལ་འབྱོར་མ་ཡི་ཚོགས་ཀྱི་འདུས། །དེ་ཡི་གསུང་གི་སྦྱིན་པ་ནི། །ཡིད་འཕྲོག་མ་ཡི་བུ་མོ་ཁྱེར། །སེམས་ཅན་དོན་ནི་ཚད་མེད་གྱིས། །ཇི་ལྟར་རྡོ་རྗེ་འཛིན་
448b
ས་མཛད། །མིག་མཛེས་བུ་མོ་རྙེད་པ་ནི། །གཟུགས་དང་ལང་ཚོ་རྒྱན་དང་ལྡན། །འདོད་ཆགས་ཆེན་པོས་རྒྱགས་པ་དང ། །ལེགས་དགྱེས་རིངས་པར་གཡོ་བ་དང ། །སྔོ་བསངས་ནུ་སྲ་དཔའ་མོ་དང་།། རྟོག་མེད་པ་དང་ཐོས་པ་ཆེ། །དེ་འདྲའི་བུ་མོ་ཆེན་མོ་ལ། །གང་ཚེ་ཟླ་མཚན་འབྱུང་བར་འགྱུར། །དེ་ལ་གྲོང་པའི་སྦྱོར་བ་ཡིས། །ཤེས་རབ་ཐབས་ཀྱི་ཆོ་ག་བྱ། །གང་ཚེ་རོ་ནི་འབྱུང་བར་འགྱུར། །དེ་ཙམ་དེ་ཙམ་རབ་ཏུ་བྱ། །དེ་ཚེ་ཁ་ཡི་པདྨ་ཡིས། །ཞག་བདུན་བར་དུ་བླང་བར་བྱ། །ཤིན་ཏུ་གསལ་བའི་པད་སྣོད་དུ། །རིན་ཆེན་འདྲ་བའི་རཀྟ་གཞག། ཉི་མ་གསུམ་དུ་ཁ་ཡིས་ནི། །དག་པའི་པད་རྒྱལ་གཞིབ་པར་བྱ། །ཤེས་རབ་ཐབས་ཀྱི་ཆོ་ག་ནི། །ཡང་ནི་རྣལ་འབྱོར་བ་ཡིས་བརྩམ། །དེ་རུ་ཆང་ནི་བཏུང་བར་བྱ། །སྟོབས་ཀྱི་སཱ་ལུ་བཟའ་བར་བྱ། །ཡང་ན་ར་ཡི་འོ་མ་འམ། །ཡང་ན་ནམ་མཁའི་སྟོབས་བཟའ་འོ། །མཚན་མོ་ཉིན་མོ་སྦྱར་བ་ཡིས། །སྲུབ་ཐབས་ཆེན་པོ་དཔྱད་པར་བྱ། །གང་ཚེ་ཁུ་ཆེན་འོད་འགྱུར་བས། །བུ་མོ་མྱོས་པར་གྱུར་པ་ན། །དེ་ཚེ་ཁ་ཡིས་བླང་བར་བྱ། །ལྕེ་ལ་སོགས་པའི་གཙག་བུ་ཡིས། །སྐྱོན་མེད་པ་ཡི་གནས་སུ་ནི། །པདྨའི་སྣོད་དུ་གཞག་པར་བྱ། །བརྒྱད་དང་ཡང་ན་བཅུ་བཞི་དང ། །ཡང་ན་བཅུ་ནི་མར་གྱི་ངོ ། །མདུང་རྩེ་ཡང་ནི་རལ་གྲིས་གསད། །རིགས་ལྔའི་ནང་ན་རིགས་གཅིག་གོ་།ན་ཚ་མེད་དང་བདེ་བ་འགྲུབ། །གཟུགས་དང་ལང་ཚོ་ལྡན་པ་དང ། །སྐྱེ་བ་བདུན་ནམ་ཡང་ན་གསུམ། །སྒྲུབ་པའི་གྲོགས་
449a
༄#། །ཀྱིས་ཁྱེར་ནས་འོང ། །སྣ་ཚོགས་མཆོད་སྦྱིན་མཆོད་པ་ཡིས། །རྩེ་གཅིག་གིས་ནི་མཆོད་བར་བྱ། །དེ་ཡི་ཡན་ལག་རབ་ནི་བླང ། །པདྨའི་སྣོད་ནི་དེ་ལ་བྱ། །ཤེས་རབ་དང་ལྡན་ཐབས་ཀྱིས་ནི། །དེ་ཡི་སྣོད་དུ་ཆང་བཏུང་བྱ། །སྟོབས་ཆེན་རང་ཉིད་ཅུང་ཟད་ཙམ། །དངོས་གྲུབ་ཕྱིར་ནི་བཟའ་བར་བྱ། །པདྨའི་སྣོད་དུ་བསྲུབས་པ་ལས། །ཅུང་ཟད་འབད་དེ་གཞག་པར་བྱ། །གཞན་མ་སྨན་གྱིས་འབད་དེ་ནི། །གྲོགས་ཀྱི་དབང་པོས་བཙོ་བར་བྱ། །ར་ཡི་འོ་མ་ཏིལ་མར་དང ། །མར་ནི་ཤ་ཀ་ར་དང་བཅས། །ཁ་ར་ལ་སོགས་མཉམ་པའི་ཆ། ། སྟོབས་ནི་ལྔ་རུ་གྱུར་དྲན་པ་འོ། །ཁ་རུ་ཚཝ་དང་ཚ་བ་གསུམ། །སུག་སྨེལ་ནཱ་ག་གེ་སར་དང ། །ཛཱ་ཏི་ཕ་ལ་དྭ་ཚཝ་དང ། །གྤུར་རིམ་པར་ཆེ་བར་བྱ། །ཤིན་ཏུ་འཛེམ་པའི་དྲི་མེད་སྣོད། ། ག་རུ་སོགས་ཀྱིས་བདུག་བྱ། །འབད་དེ་གཞན་གྱི་སྣོད་དུ་བཙོ། །བདུག་པ་བྱས་པར་གཞག་པར་བྱའོ། །ཉི་མ་བདུན་གྱི་བར་དུ་ནི། །སྟོབས་ཆེན་སཱ་ལུ་བཟའ་བར་བྱ། །དེ་ནི་ཟོས་པ་ཙམ་གྱིས་ནི། །གང་ཞིག་མི་བསྐྱོད་སྔར་འོང་འགྱུར། །དེ་ནི་པདྨའི་སྣོད་དུ་བླང ། །སྟེང་དང་འོག་ནི་མཁས་པས་བོར། །ཐོ་རངས་ཅུང་ཟད་ཙམ་ནི་བཏུང ། །ཅུང་ཟད་ཙམ་ནི་སྣོད་དུ་གཞག། ཤེས་རབ་ཐབས་ཀྱི་གཉིས་འབྱུང་བ། །དེ་ཡི་སྣང་མཛད་འདུས་པ་ནི། །རྣལ་འབྱོར་པ་ཡིས་རྩེ་གཅིག་བྱ། །རྣལ་འབྱོར་གྲོགས་པོའི་སྒྲུབ་པའོ།།
449b
འབྲས་བུ་ཨུར་ཤིང་མན་ཤིང་དང ། །ཏི་ཀར་ཀུཏ་པུས་ཀར་མ། །འོ་མ་དང་ནི་ཆང་རོར་ལྡན། །རྩེ་གཅིག་གིས་ནི་བཙོ་བ་ནི། །ལྕགས་ཀྱི་སྣོད་དུ་བཙོ་བར་བྱ། །མ་རྙེད་ན་ནི་རྫ་སྣོད་དུ། །དག་པའི་རིགས་ཀྱི་མེ་ཏོག་གིས། །ཉི་མ་བདུན་དུ་བདུག་པར་བྱ། །དེ་ནས་སྙིང་པོའི་སྨན་དེ་ནི། །རིམ་པས་ཆེ་བར་བླུགས་པར་བྱ། །ལི་ཤི་ག་པུར་ལ་ཏ་དང ། །གླ་རྩི་ཙནྡན་ཛཱ་ཏི་དང ། །ཛཱ་ཏི་ཕ་ལ་སུག་སྨེལ་དང ། །དྭ་ཚཝ་ཚ་བ་གསུམ་དང་རོ། །དཀར་པོའི་ཤ་ཀར་དང་ལྡན་པའི། །མར་དང་བཅས་ནས་བཙོ་བར་བྱ། །མེ་ནི་འཇམ་པར་སྨིན་པ་ཡིས། ། གྲོགས་ཀྱི་དབང་པོས་བཙོ་བར་བྱ། ། ག་རུ་སོགས་ཀྱིས་བདུག་གི། རྡོ་ཡི་སྣོད་དུ་གཞག་བར་བྱ། །ཉིན་རེ་ཞིང་ནི་ཞོ་གཉིས་ནི། །ཞུ་བ་ཡིན་ན་བཟའ་བར་བྱ། །ཞུ་བ་ཡིན་ན་ཞོ་བཞི་དང ། །དེ་ནས་ཞོ་དྲུག་རྟག་ཏུ་བཟའ། །བདུད་རྩི་ལྔ་ཡི་ཆོ་ག་དེ། །གསང་ཆེན་བདག་གིས་བཤད་པའོ། །གཞན་མ་ཡན་ལག་ལྔ་ཡི་སྨན། །མཁས་པས་དེ་ལ་རིལ་བུ་བྱ། །སྐྱུ་རུ་ར་ཙམ་དུ་བྱས་ཏེ། །གྲིབ་མ་ལ་ནི་བསྐམ་པར་བྱ། །རས་དང་ཡན་ལག་བཀྲུས་བྱས་ཏེ། །དེ་བཞིན་ཐིག་ལེ་བྱ་བའོ། །འབད་དེ་ཁ་ལ་གཞག་པར་བྱ། །ཚོགས་ཀྱི་དཀྱིལ་འཁོར་སྤོས་ཀྱང་བྱ། །ཞི་དང་རྒྱས་དང་དབང་བྱེད་དང ། །དྲག་པོ་དྲེགས་ལ་སོགས་པ་ཡིན། །རིལ་བུ་ཡིས་ནི་བྱས་ཙམ་ན། །ཐེ་ཚོམ་མེད་པར་
450a
༄#། །འགྲུབ་པར་འགྱུར། །དཔལ་ཕྱག་རྒྱ་ཆེན་པོའི་ཐིག་ལེ་ལས། བདུད་རྩི་ལྔ་བསྟན་པ་ཞེས་བྱ་བའི་ལེའུ་སྟེ་བཅུ་གཉིས་པའོ།། །།ུ་རྒྱན་གནས་ལ་སོགས་པར་ནི། །རྣལ་འབྱོར་མ་ནི་འདུས་པ་འོ། །དེ་ཡི་གནས་སུ་སྐད་སྨྲ་བ། །གསང་བའི་སྒྲ་ནི་ཡོད་པའོ། །ཉོན་ཅིག་སེམས་ནི་རྩེ་གཅིག་གིས། །དེ་ནི་ཡང་དག་བདག་གིས་བཤད། །མ་ད་ན་ཆང་བ་ལ་ཤ། ཨ་མ་ལ་ཙ་འདུས་པར་དྲན། །འགྲོ་བ་ཁེ་ཊ་རོ་ཤྲཱ་བ། །ནི་རཾ་ཤུ་ཀ་རུས་པའི་རྒྱན། །ཕྲེང་ཁ་ན་ནི་འོང་བ་ཡིན། །ཀུན་ཏུ་རུ་ནི་དབང་པོ་སྦྱོར། །དུ་དུར་སྐལ་ལྡན་མིན་པར་བཤད། །ཀཱ་ལིནྫ་ར་སྐལ་ལྡན་གཞུང ། །རིཎྜི་རེག་བྱ་མིན་པར་བསྟན། །ཐོད་པ་པདྨ་བྷ་ཛ་ན། །དྲི་ཆེན་བཞི་མཉམ་ཡིན་པར་བསྟན། །དྲི་ཆུ་གླ་རྩིར་དྲན་པའོ། །ཁུ་པ་ག་པུར་བསྟན་པ་སྟེ། །ཤ་ཆེན་སཱ་ལི་ཛ་རུ་དྲན། །བྷ་ཧ་ཀ་ནི་ཆུ་ཞེས་བྱ། །སྒྲོ་ནི་ཡན་ལག་ཅེས་བྱར་དྲན། །ཤ་ཀ་བཟང་པོ་ཞེས་སུ་བཤད། །ཧོ་ཞེས་བྱ་བ་འགྲངས་བར་བཤད། །ཛེ་གྷྲེ་ཀྵ་བ་ལཾ་ཀར་བཀྲེས། །དབྱུང་མ་གྷ་ན་ཚོགས་འཁོར་ལོ། །ཀ་པོ་ལཾ་ནི་གྱིས་སུ་འགྱུར། །ནཱ་ག་རཾ་ནི་བདག་བྱིན་བཤད། །བྷ་ཏ་ཀ་ནི་ཁྱོད་ཁྱེར་འགྱུར། །གྣི་བོར་བ་ཞེས་སུ་བསྟན།། གསང་བ་རིན་ཆེན་ཞེས་སུ་དྲན། །བཟའ་བ་དུང་དུ་ཤེས་པར་བྱ། །ཤ་དབ་བཟའ་བ་མིན་དུ་དྲན། །དག་པ་ཞེས་བྱ་སྔགས་སུ་བཤད། །དག་པ་མིན་པ་ཉི་མར་བརྗོད། །རཾ་བ་ཚངས་
450b
པ་གྲགས་པ་སྟེ། །རྒྱལ་རིགས་ལུས་སུ་བསྟན་པའོ། །ཆགས་བྲལ་རྗེ་ཞེས་བསྟན་པ་སྟེ། །ཆགས་པ་དམངས་རིགས་ཞེས་བྱར་དྲན། །ཙཎྜཱ་ལི་ནི་གཞུ་ཞེས་བཤད། །ཤཝ་པ་ཙ་ན་མདའ་རུ་བཤད།། ཙམ་ཀ་ར་སྲིད་འཁོར་ལོ། །པུཀྐ་སཱི་ནི་རལ་གྲིར་བསྟན། །འདའ་བ་ཀ་ནི་སྟོང་ཞེས་བཤད། །ཧ་རི་ཀ་ནི་ཐལ་བར་བཤད། །ར་ཙ་རྒྱ་མཚོ་ཞེས་སུ་བཤད། །མི་ནཾ་ཤི་བར་བསྟན་པའོ། །རྒྱས་པ་ཕག་ཅེས་བྱ་བར་དྲན། །ཕག་ནི་བྲམ་ཟེར་བསྟན་པའོ། །ཉ་ནི་པ་ལ་ཤ་ཞེས་བསྟན། །ར་ནི་ཉི་ན་མོར་བསྟན་པའོ། །ལུག་ནི་མཚན་མོར་ཤེས་པར་བྱ། །བྱ་ལ་སོགས་པ་ཉི་མ་ཕྱེད། །མེ་ཏོག་གསེར་ནི་ཞེས་སུ་བསྟན། །སྤོས་ནི་ཤར་དུ་ལ་རུ་བརྗོད། །དྲི་ནི་མ་ལ་ཏི་རུ་བཤད། །མེ་མར་ཤ་ཀོ་ནི་ཀར་དྲན། །གོས་ནི་ཀ་ཤི་ཀ་རུ་བཤད། །བདེ་བ་ཀཱ་མ་ལ་རུ་བསྟན། །དཔྲལ་པ་ཆུ་ཞེས་བྱ་བར་བརྗོད། སྨིན་མ་ཕྲེང་བ་ཞེས་སུ་དྲན། །མིག་ནི་ཨུཏྤལ་ཤེས་པར་བྱ། །སོ་ནི་ཨ་ད་ན་རུ་བསྟན། །ཆུ་ནི་པ་ལ་ཝ་རུ་ཤེས། །མགྲིན་པ་གླིང་བུར་བསྟན་པའོ། །ཕུང་པོ་ང་པ་ཞེས་སུ་བསྟན། །ལག་དར་མྱུར་གུར་བསྟན་པའོ། །ལག་པ་མཚོ་སྐྱེས་བསྟན་པར་གྲགས། །ནུ་མ་དཔལ་འབྲས་བརྗོད་པའོ། །དབུས་ནི་རི་འབྱུང་ཤེས་པར་བྱ། །ལྟེ་བ་མ་ད་ན་རུ་བསྟན། །བརླ་ནི་ཀ་ཏམྤ་རུ་གྲགས། །པདྨ་ཛ་ག་ན་རུ་དྲན། །བྱིན་པ་ཛ་ན་བི་རུ་བརྗོད། །རྐང་པ་ཨ་ཙ་ཤི་རར་དྲན། །སེན་མོ་ཡན་ལག་གེ་སར་རབ། །སྣ་ནི་མ་ད་ཤ་བ་རི། །སྟན་ནི་ཤ་ཏ་ཀུ་སུཾ་སྟེ། །ནུས་པ་བུ་ནི་ཞེས་སུ་དྲན། །མི་ནུས་པ་ནི་
451a
༄#། །པདྨའི་སྡོང ། །ཐམས་ཅད་མིང་གི་རྫ་མར་དྲན། །གཞོན་ནུ་རྫིང་ཞེས་བྱ་བར་གྲགས། །འབར་མ་མཚོ་ཞེས་བྱ་བར་དྲན། །རྒན་པོ་རྒྱ་མཚོ་ཞེས་བར་དྲན། །མྱོང་བ་མི་སྨྲ་ཞེས་སུ་འགྱུར། །མྱོང་བ་མ་ཡིན་གསལ་བར་དྲན། །མི་སྨྲ་རི་དྭགས་ཞེས་སུ་བརྗོད། །གླུ་ནི་བག་ཆགས་ཞེས་སུ་བཤད། །གར་ནི་གྲོགས་པོ་ཞེས་པར་དྲན། །སྒྲ་ནི་ཚུལ་འཆོས་ཞེས་སུ་བཤད། །རེག་བྱ་ཞགས་པ་ཞེས་སུ་དྲན། །རོ་ནི་སྒེག་པོ་ཞེས་སུ་བསྟན། །གཟུགས་ནི་རི་ཞེས་བརྗོད་པའོ། །གསོད་པ་སྒྲ་ནི་ཞེས་སུ་བརྗོད། །ཚེ་ནི་ཕུག་རོན་དྲན་པའོ། །གྲོང་ནི་ཏ་ལའི་མེ་ཏོག་སྟེ། །གྲོང་ཁྱེར་འབྲས་བུ་ཡིན་པར་བརྗོད། །ལྗོངས་ནི་འདོད་པ་ཞེས་བྱར་བསྟན། །འདོད་པ་སྲོག་ཅེས་བྱ་བར་དྲན། །མི་ཤེས་དེ་ནི་འདུལ་བར་དྲན། །ཤེས་པ་སྤང་པར་ཤེས་པར་བྱ། །དགོད་པ་ཞེས་བྱ་བྱིས་པར་བསྟེན། །དུ་བ་ཁྲག་ཏུ་དྲན་པའོ། །ཉིན་མོ་གཞོན་ནུར་ཤེས་པར་བྱ། །མཚན་མོ་བུ་མོར་རབ་ཏུ་གྲགས། །མཚམས་ནི་བུད་མེད་ཤེས་པར་བྱ། ། ཉིན་ཕྱེད་བྲན་དུ་བསྟན་པའོ། །འདུས་པ་ཡི་ནི་དབུས་གནས་སུ། །རྣལ་འབྱོར་མ་ནི་རྟག་ཏུ་བརྗོད། །དཔལ་ཕྱག་རྒྱ་ཆེན་པོའི་ཐིག་ལེ་ལས། །རྣལ་འབྱོར་མ་འདུས་པའི་གནས་སུ་གསང་བའི་སྐད་བསྟན་པ་ཞེས་བྱ་བའི་ལེའུ་སྟེ་བཅུ་གསུམ་པའོ། །དེ་ནས་གཞན་ཡང་བཤད་བྱ་བ། །ཡན་ལག་ཕྱག་རྒྱ་སོགས་མཚན་ཉིད། །གང་ཞིག་སོར་
451b
མོ་གཅིག་ནི་སྟོན། །སྙུན་རྨེད་པ་ཞེས་སྤྱན་འདྲེན་ནོ། །སོར་མོ་གཉིས་ནི་བསྟན་པ་ཡིས། །ལེགས་པར་སྙན་ལན་ལྡོན་པ་ཡིན། །གང་ཞིག་གུང་མོ་སྟོན་བྱེད་པ། །དེ་ལ་སྲིན་ལག་བསྟན་པར་བྱ། །གང་ཞིག་སྲིན་ལག་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་གཞིབས་པ་སྟོན་བྱེད་པ། །དེ་ལ་རྩེ་གསུམ་བསྟན་པར་བྱ། །གང་ཞིག་གཙུག་ཕུད་སྟོན་བྱེད་པ། །དེ་ལ་མཚོག་མ་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་མཁུར་ཚོས་བསྟན་པར་བྱ། །གང་ཞིག་ལྟག་ཁུང་སྟོན་བྱེད་པ། །དེ་ལས་གཞི་བསྟན་པར་བྱ། །གང་ཞིག་ལག་གཉིས་སྟོན་བྱེད་པ། །དེ་ལ་ལག་ངར་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ལྟོ་བ་བསྟན་པར་བྱ། །གང་ཞིག་མ་མཆུ་སྟོན་བྱེད་པ། །དེ་ལ་ཀོས་ཀོ་བསྟན་པར་བྱ། །གང་ཞིག་སོ་ནི་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་ནུ་མ་སྟོན་བྱེད་པ། །དེ་ལ་ཀོས་ཁུར་བསྟན་པར་བྱ། །གང་ཞིག་ལྟོ་བ་སྟོན་བྱེད་པ། །དེ་ལ་ལྟེ་བ་བསྟན་པར་བྱ། །གང་ཞིག་གསང་བསྟོན་བྱེད་པ། །དེ་ལ་ལིངྒ་བསྟན་པར་བྱ། །གང་ཞིག་བྤྲལ་ནི་སྟོན་བྱེད་པ། །དེ་ལ་གཞང་ནི་བརྟན་\?\་པར་བྱ། །གང་ཞིག་རྐང་པ་སྟོན་བྱེད་པ། །དེ་ལ་རྐང་མཐིལ་བསྟན་པར་བྱ། །གང་ཞིག་སོར་མོ་སྟོན་བྱེད་པ། །དེ་ལ་སེན་མོ་བསྟན་པར་བྱ། །གང་ཞིག་གཙང་པོ་སྟོན་བྱེད་པ། །དེ་ལ་རྒྱ་མཚོ་བསྟན་པར་བྱ། །གང་ཞིག་ནམ་མཁའ་སྟོན་བྱེད་པ། །དེ་ལ་ཉི་མ་བསྟན་པར་བྱ། །གང་ཞིག་ས་ནི་སྟོན་བྱེད་པ། །དེ་
452a
༄#། །ལ་ནམ་མཁའ་བསྟན་པར་བྱ། །གང་ཞིག་ཁྲོ་གཉེར་སྟོན་བྱེད་པ། །དེ་ལ་མཚམས་ནི་བསྟན་བར་བྱ། །གང་ཞིག་སོ་ནི་སྟོན་བྱེད་པ། །དེ་ལ་ཆུ་ནི་བསྟན་པར་བྱ།། གང་ཞིག་མགྲིན་པ་སྟོན་བྱེད་པ། །དེ་ལ་ཁ་ནི་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་རྒྱབ་ནི་བསྟན་པར་བྱ། །འདི་ནི་ཐམས་ཅད་རྣལ་འབྱོར་མའི། །ཡན་ལག་རྒྱ་སོགས་མཚན་ཉིད་དོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། །རྣལ་འབྱོར་མ་ཐམས་ཅད་ཀྱི་ཡན་ལག་གི་ཕྱག་རྒྱལ་སོགས་པ་ཞེས་བྱ་བའི་ལེའུ་སྟེ་བཅུ་བཞི་པའོ།། །། དེ་ནས་གཞན་ཡང་བཤད་བྱ་བ། །གཟུགས་དང་རྟགས་སོགས་མཚན་ཉིད་ནི། །དམར་ཞིང་སེར་བའི་བུད་མེད་གང ། །པདྨའི་དྲི་ནི་རྣམ་པར་གཏོང ། །ལྟ་སྟངས་རང་བཞིན་ཞི་བ་དང ། །ཞེན་པས་ལྟ་བའི་རྗེས་འགྲོ་བ། །སེར་པོ་དམར་པོ་པདྨ་འདྲ། །མིག་ནི་ཉི་མའི་འོད་དང་ལྡན། །དེ་ལ་ཁྱིམ་ན་པདྨ་ཡོད། །རྟག་ཏུ་མཆོད་པའི་ཆོ་ག་བྱེད། །པདྨ་གར་གྱི་དབང་ཕྱུག་རིགས། །པདྨའི་གཙོ་མོར་དེ་ཤེས་བྱ། །སྨིན་མཚམས་བར་ན་རྩེ་གསུམ་ཡོད། །ལུས་ནི་སྔོ་བསངས་སྐྱ་བ་དང ། །དེ་ཡི་ཁྱིམ་ན་རྡོ་རྗེ་ཡོད། །ཏངྐུ་དམར་པོས་མཆོད་པ་བྱ། ། ཧེ་རུ་ཀ་དཔལ་རིགས་འབྱུང་བའི། །ཀུན་གྱི་མ་མོར་ཤེས་པར་བྱ། །རྩེ་གསུམ་གང་གི་དཔྲལ་བ་འམ། །ཡང་ན་ཤཀྟི་གསལ་འགྱུར་བ། །མིག་དམར་གདོང་ནི་དམར་བ་དང ། །དེ་
452b
བཞིན་རྐང་པ་ལག་པ་དམར། །རྟག་ཏུ་ཕུག་རོན་ལ་རྩེད་ཙ། །དེ་བཞིན་ཁྱི་དང་ཁྱིམ་བྱའོ། །དེ་ཡི་ཁྱིམ་དུ་རྡོ་རྗེའི་མཚན། །རྟག་ཏུ་གང་ཞིག་མཆོད་བྱེད་པ། །དཔལ་ལྡན་རྡོ་རྗེའི་རིགས་སུ་བྱུང་།། མཁའ་འགྲོ་མ་ཡིན་དཔའ་བོ་གཅེས། །སྤྲིན་སྔོ་དག་དང་འདྲ་བ་ནི། །རྟག་ཏུ་དཔྲལ་བར་ཐོད་ཡོད་པ། ཁྱིམ་དུ་འཁོར་ལོ་འབྲི་བྱེད་ཅིང ། །རྟག་ཏུ་དེ་ལ་མཆོད་བྱེད་པ། །རྡོ་རྗེ་ཕག་མོའི་རིགས་བྱུང་བའི། །མཁའ་འགྲོ་མི་ནི་སྟོབས་ཀྱིས་དྲེགས། །མིག་སྨན་ནམ་མཁའ་སྔོན་པོའི་མདོག། སོ་ནི་མཐོ་བ་དྲག་མོ་དང ། །རྟག་ཏུ་ཁྲུས་ལ་དགའ་བ་དང ། །མང་དུ་སྨྲ་བར་མི་བྱེད་ཅིང་།། ཁྱིམ་དུ་རྡོ་རྗེ་འབྲི་བ་དང ། །མཚན་མོ་ཕྱེད་ན་མཆོད་པ་བྱེད། །རྡོ་རྗེ་ཕག་མོའི་རིགས་འབྱུང་བའི། །དཔལ་ལྡན་རྡོ་རྗེ་མཁའ་འགྲོ་མ། །བཙོ་མ་གསེར་དང་མཉམ་པའི་འོད། །མིག་མི་གཡོ་ཞིང་བ་སྤུ་མང ། །རྡོ་རྗེ་གང་གི་དཔྲལ་བའམ། །ཁྱིམ་དུ་ཡང་ནི་གསལ་འགྱུར་བ། །རྒྱལ་བོའི་བཙུན་མོ་རྟག་ཏུ་སྒེག། སྐལ་ལྡན་མཆོག་ནི་བདེན་སྨྲ་དང ། །མཱ་ལི་ཀ་ཡི་དྲི་འབྱུང་ཞིང ། །ཁྱིམ་དུ་རྡོ་རྗེ་མཆོད་བྱེད་པ། །ཁཎྜ་རོ་ཧིའི་རིགས་འབྱུང་བའི། །མཁའ་འགྲོ་མ་ནི་ཡེ་ཤེས་རྒྱལ། །ཤིན་ཏུ་ཤ་ལི་དགའ་བ་དང ། །མིག་སྨན་ནག་པོའམ་ནམ་མཁའ་འདྲ། །རྩེ་གསུམ་རྣམ་པ་ཕྲ་བ་རུ། །གདུག་པའི་ལས་ལ་རྟག་ཏུ་དགའ། །དུར་ཁྲོད་རྟག་ཏུ་འགྲོ་བ་དང ། །འཇིགས་པ་མེད་ཅིང་སྙིང་རྗེ་མེད། །དེ་ལ་ཁྱིམ་དུ་མཆོད་པ་ནི། །ཆང་ལ་སོགས་པས་མཆོད་
453a
༄#། །བྱེད་པ། །ཧེ་རུ་ཀ་དཔལ་རིགས་འབྱུང་བའི། །མཁའ་འགྲོ་ཡིན་པར་གདོན་མི་ཟ། །གསར་པ་སྤྲིན་གྱི་མདོག་འདྲ་བ། །གཡོན་གྱི་མཆེ་བ་གཙིགས་པ་དག། དེ་ཡི་ཁྱིམ་དུ་དགྲ་སྟ་ནི། །འབྲི་ཞིང་རྟག་ཏུ་མཆོད་བྱེད་པ། །ཧེ་རུ་ཀ་དཔལ་རིགས་འབྱུང་བའི། །མཁའ་འགྲོ་མར་ནི་ཐེ་ཚོམ་མེད། །མཁའ་འགྲོ་མ་ནི་ཐམས་ཅད་ཀྱི། །མདོག་དང་མཚན་མ་རིགས་འབྱུང་བ། །མདོར་བསྡུས་པ་ནི་འདི་རུ་བཤད། །རྒྱས་པར་ཡེ་ཤེས་སྙིང་པོར་རོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། མཁའ་འགྲོ་མའི་གཟུགས་དང ། མཚན་ཉིད་དང།་རིགས་འབྱུང་བ་ཞེས་བྱ་བའི་ལེའུ་སྟེ་བཅོ་ལྔ་པའོ།། །།གང་ཞིག་གཞན་མིན་བདག་ཉིད་བཞུགས། །ཉོན་ཅིག་དཀྱིལ་འཁོར་རྒྱལ་དབང་པོ། །ཧཱུཾ་གི་རྣམ་པའི་རྣམ་པ་ཅན། །བདག་ཉིད་ཧཱུཾ་གི་དངོས་པོ་ཡིན། །ཧཱུཾ་གི་རྣམ་པ་ལས་གཟུགས་འབྱུང ། །མཚན་དང་དཔེ་བྱེད་ལྡན་པ་དག། ཉི་མའི་དཀྱིལ་འཁོར་སྟེང་ན་བཞུགས། །ཉི་མ་བྱེ་བའི་འོད་དང་མཉམ། །ཁྱོད་དང་ལྷན་ཅིག་སྦྱོར་བ་ཡིས། །ཆུ་སྐྱེས་སྔོན་པོའི་གཟུགས་དང་ལྡན། །ཞལ་བཞི་སྤྱན་གསུམ་ཕྱག་བརྒྱད་དེ། །གཡས་བརྐྱངས་པས་ནི་གནས་ན་བཞུགས།། རྡོ་རྗེ་དྲིལ་བུ་ཉི་ཟླ་དང ། །མདའ་གཞུ་དག་ནི་འགེངས་པ་དང ། །ཁ་ཊྭཱཾ་ག་དང་ཀ་པཱ་ལ། །ཁྲག་ཆེན་པོ་ཡིས་གང་བའོ། །བདེ་བའི་གནས་སུ་བདག་དང་ཁྱོད། །ལེགས་
453b
དགྱེས་དགྱེས་པར་རོལ་བགྱིད་དེ། །དེ་ནས་དང་པོའི་རོ་ལངས་ནི། །སྤྲོ་ནས་རྡོ་རྗེ་རོ་ལངས་མ། །གཟུགས་ནག་པ་ལ་ཕྱག་བཞི་བ། །མདའ་གཞུ་ལ་ག་ན་འགེངས་པ་དང ། །ཆུ་སྲིན་གཡས་ན་ཐོགས་པ་དང ། །ཀ་པཱ་ལ་དང་ཁ་ཊྭཱཾ་ག། གཡོན་གྱི་ལག་ན་ཐོགས་པ་སྟེ། །ཤར་གྱི་སྒོ་ན་གནས་པ་སྟེ། །ཡང་ནི་སྲུབ་ཐབས་སྦྱོར་བ་ཡིས། །གཉིས་པ་ཡི་ནི་རོ་རབ་ལས། །རྡོ་རྗེ་དྲ་བ་འཕྲོས་པ་ནི། །གཅེར་པུ་དང་ནི་སྤྱན་གསུམ་པ། །མདོག་དམར་ལག་ན་ཉ་ཐོགས་ཏེ། །བྱང་གི་སྒོ་ཡི་གནས་ན་བཞུགས། །ཡང་ནི་རོ་ནི་གསུམ་པ་ལས། །རྡོ་རྗེ་རྩེ་མོ་སྤྲོས་པ་ནི། །མདོག་སེར་ལག་ན་སེངྒེ་ཐོགས། །ནུབ་སྒོ་ཡི་ནི་གནས་ན་བཞུགས། །ཡང་ནི་རོ་ནི་བཞི་པ་ལས། །རྡོ་རྗེ་ཟླུམ་པོ་འཕྲོས་པ་ནི། །མདོག་དཀར་ལག་ན་བྱ་ཁྱུང་སྟེ། །ལྷོ་ཡི་སྒོ་ན་བཞུགས་པའོ། །རོ་ལྔ་དེ་ནི་རྙེད་པ་ཡིས། །རྡོ་རྗེ་སྐ་རགས་མ་ནི་སྤྲོས། །རྫ་རྔ་གླིང་བུ་ལག་ན་ཐོགས། །ཤར་ལྷོ་མཚམས་ན་གཟུགས་གཉིས་པའོ། །ཡང་ནི་དྲུག་པའི་འབྱུང་བ་ལས། །རྡོ་རྗེ་སོར་མོ་སྤྲོ་བ་ནི། །རྒྱུད་མང་རྔ་ཆེན་ལག་ན་ཐོགས། །ལྷོ་ནུབ་མཚམས་ན་བཞུགས་པའོ། །ཡང་དག་བདུན་པས་རྙེད་པ་ནི། །རྡོ་རྗེ་རྒོད་མ་འཕྲོ་བ་སྟེ། །རྫ་རྡ་དང་ནི་ཆ་ལང་ཐོགས།། ནུབ་བྱང་མཚམས་ན་བཞུགས་པའོ། །རོ་བརྒྱད་པ་ནི་རྙེད་པ་ཡིས། །རྡོ་རྗེ་ཉི་མ་སྤྲོ་བ་ནི། །ཏམྦུ་ར་དང་ཀ་ར་ཐོགས། །ཕྱག་གཉིས་རྟག་ཏུ་འཛིན་པའོ། །སྤྲོས་ནས་བྱང་ཤར་མཚམས་
454a
༄#། །སུ་ནི། །བདུད་ཀུན་བཅོམ་ནས་བཞུགས་པའོ། །ཡང་ནི་སྲུབ་དང་སྲུབ་ཐབས་ལས། །དང་པོ་དགའ་བ་འབྱུང་བ་ཡིས། །རྡོ་རྗེ་ལེགས་དགྱེས་འཕྲོས་པ་ནི། །རོ་ཡི་སྣོད་ནི་ལག་ན་འཛིན། །སྤྲོས་ནས་ཤར་གྱི་ཕྱོགས་ཀྱི་གྲཝར། །ཆོས་འབྱུང་གི་ནི་གྲཝ་ན་བཞུགས། །བྷ་གའི་ཕྱག་རྒྱ་སྤྱི་པོར་ནི། །མཛུབ་མོ་ཚངས་པའི་བུ་གའི་གནས། །ཡང་ནི་མཆོག་གི་དགའ་བ་ལས། །རྡོ་རྗེ་མཚོ་མ་འཕྲོས་པ་ནི། །ཁྲག་གི་སྣོད་ནི་ལག་ན་བྲེལ། །ལྷོ་ནུབ་གྲ་ན་བཞུགས་པའོ། །ཡང་ནི་དགའ་བྲལ་འབྱུང་བ་ལས། །རྡོ་རྗེ་གླང་ཆེན་མ་འཕྲོས་པ། །ཁུ་བའི་སྣོད་ནི་ལག་ན་ཐོགས། །ནུབ་བྱང་ཕྱོགས་ཀྱི་གྲཝ་ན་བཞུགས། །དེ་རྣམས་ནག་དང་སེར་དང་དམར། །གཡོན་བརྐྱང་བས་ནི་བཞུགས་པའོ། །ཡང་ནི་ཡང་དག་སྲུབ་ཐབས་ལས། །ལྷན་ཅིག་སྐྱེས་དགའ་འབྱུང་བ་སྟེ། །ལྷན་ཅིག་སྐྱེས་དགའ་འདོད་ཆགས་ཆེ། །མེ་ཆེན་རབ་ཏུ་འབར་བའོ། །ཁྱོད་དང་ལྷན་ཅིག་དེ་རུ་བདག། །རང་བཞིན་གྱིས་ནི་ཡོངས་སུ་འགྱུར། །དངོས་པོ་མེད་པར་བདག་མི་འགྱུར། །བདག་ནི་རང་བཞིན་གནས་སུ་བཞུགས། །བདག་གི་ངོ་བོ་བརྗོད་མི་ནུས། །སངས་རྒྱས་ཀུན་གྱིས་ཀྱང་རྙེད་དཀའ། །ཡང་དག་རྫོགས་པའི་སངས་རྒྱས་ཀྱིས། །གལ་ཏེ་ཀུན་རྫོབ་གཟུགས་སུ་རྙེད། །འཇིག་རྟེན་ཁམས་ནི་གྲངས་མེད་པ། །གཞན་ནི་མ་ཡིན་བདག་གིས་ཁྱབ། །ཁྱོད་དང་ལྷན་ཅིག་ཀུན་རྫོབ་ཏུ། །འབྱུང་བའི་རྒྱུ་ཕྱིར་རོལ་
454b
པ་བྱེད། །བདག་ནི་རོལ་པ་མི་བྱེད་ན། །སངས་རྒྱས་ཐམས་ཅད་འབྱུང་མི་འགྱུར། །འདི་ནི་ཐམས་ཅད་མི་གཡོ་བར། །འགྲོ་འགྱུར་བར་ནི་ཐེ་ཚོམ་མེད། །རང་བཞིན་ལས་ནི་མཆོག་གནས་སུ།། དེ་དུས་བདག་ནི་ཅང་མི་སྨྲ། །བདེ་ཆེན་ལེགས་དགྱེས་མགོན་པོ་བཞེངས། །རྡོ་རྗེ་བཟང་དགྱེས་བདག་དགའ་མཛོད། །མགོན་པོ་ཁྱོད་མིན་བདག་རོ་འདྲ། །ཐུགས་རྗེ་རོ་ཡིས་བདག་སྐྱེ་མཛོད།། ཀྱེ་མགོན་ཆད་པའི་སྟོང་བར་མིན། །མགོན་པོ་སྟོང་པའི་རང་བཞིན་མིན། །རྡོ་རྗེ་མཚོ་མ་བདག་དགའ་མཛོད། །པདྨ་ཁ་ཕྱེ་རོལ་ཅིག་རོལ། ། ལ་ལ་ལ་ཨ་ལ་ལ། ། ལ་ལ་ལ་ལེགས་དགྱེས་མགོན། །རྡོ་རྗེ་གླང་ཆེན་མ་དགའ་མཛོད། །ཁྱེད་རང་གིས་གསུངས་བདག་མིན་ན། །སངས་རྒྱས་འབྱུང་བར་མི་འགྱུར་རོ། །ཡེ་ཤེས་སྐུ་ལས་ཨོཾ་ཧཱུཾ་འདིར། །བདག་དང་ཁྱོད་ནི་ལྷན་ཅིག་བཞེངས། །འཁོར་ལོ་དང་བཅས་ཁྲོ་སྐུ་མཆོག། སུམ་ཅུ་རྩ་གཉིས་ཡན་ལག་ལྡན། །བདེ་བའི་གནས་སུ་བདག་དང་ཁྱོད། །དུར་ཁྲོད་བརྒྱད་ཀྱི་དབུས་སུ་ནི། །སྐྱེ་བའི་རྒྱུ་ཡི་དོན་ཕྱིར་རོལ། །བསྐྱེད་པའི་རིམ་པ་ཡི་ནི་ཕྱོགས། །མདོག་ནག་པ་ལ་འོད་ཆེ་བ། །དབུ་སྐྲ་མེ་བཞིན་འབར་བ་དང ། །ཞལ་ནི་བཅུ་དྲུག་སྤྱན་གསུམ་པ། །ཕྱག་ནི་བཅུ་དྲུག་ལྡན་པ་དང ། །ཞབས་ནི་རྣམ་པ་བཞི་ཡིས་ནི། །བདུད་བཞི་ཡི་ནི་སྟེང་ན་བཞུགས། །ལེགས་དགྱེས་དབང་ཕྱུག་མ་ཁྱོད་བཅས། །ཡེ་ཤེས་མཁའ་འགྲོ་དབང་ཕྱུག་བདག། ཁྱོད་ཀྱང་ང་ཡི་གཟུགས་
455a
༄#། །དང་མཉམ། །འཇིགས་བྱེད་ཆུད་མར་བཅས་པའི་སྟེང ། །གྲུ་གསུམ་དབུས་སུ་ཉི་མའི་གདན། །གྱེན་དུ་ཞབས་ནི་གར་དང་ལྡན། །འཇིགས་མ་དཔའ་མོ་ཆང་འཐུང་མ། །འཇིགས་བྱེད་ཕོ་ཉ་སྟོབས་མ་དང ། །རྟ་མགྲིན་མ་དང་རྟ་རྣམ། །གླང་ཆེན་སྣ་དང་ལྟོ་བ་མ། །མེ་མ་དང་ནི་ཆུ་རྒྱུན་མ། །ཟླ་བ་མ་དང་ཉི་འོང་མ། །དུང་རྣམ་དང་དུང་གཙུག་མ། །དུང་ལྟེ་མ་དང་སྟོབས་ཆེན་མ། །བྱ་རྒོད་རྒོད་ཁ་ཧོར་པ་མ། །ཧོར་མིག་མ་དང་ཧོར་མགོ་མ། །མིག་དམར་སྐྲ་དམར་རིན་ཆེན་མ། །ཕུག་རོན་དམར་མོ་ནག་མོ་མ། །རི་བོང་རི་དྭགས་ར་མ་མོ། །ཕྱག་བཞི་མ་ལ་སྣ་ཚོགས་གཟུགས། །སྤྱན་གསུམ་པ་ལ་བཞིན་ཡང་འཇིགས། །ཕྱག་གཉིས་མདའ་གཞུ་འགེངས་པར་ལྡན། །གཞན་གྱིས་གྲི་དང་ཐོད་པ་འཛིན། །རྡོ་རྗེ་ཕྲེང་བ་དཔྲལ་བ་རུ། །ཕྱག་རྒྱ་ལྔ་ཡིས་ཡན་ལག་བརྒྱན། །དེ་ལྟ་བུ་ཡི་འཁོར་ལོ་ཆེ། །ཁྱོད་དང་བཅས་པ་བདག་གི་གནས། །གང་ཞིག་ཉི་ཤུ་རྩ་བརྒྱད་གནས།། དེ་ནི་ཚོགས་ཀྱི་གནས་སུ་དྲན། །རྡོར་དྲིལ་རིན་ཆེན་འཁོར་ལོ་དང ། །རལ་གྲི་རྩེ་གསུམ་མདའ་ཉི་མ། །ཟླ་བ་དགྲ་སྟ་ཌཱ་མ་རུ། །གཞུ་དང་ཐོ་བ་ཀ་པཱ་ལ། །བྷཱུ་ཏའི་པགས་པ་གྱེན་དུ་འཕྱར། །གཤིན་རྗེའི་པགས་པ་རྐེད་ལ་དཀྲིས། །ཞལ་གཅིག་པ་ལ་ཕྱག་གཉིས་ཏེ། །ཁྱོད་ཀྱང་བདག་གི་མདོག་ཡིན་ནོ། །ཐམས་ཅད་རྒྱན་གྱིས་བརྒྱན་པ་དང ། །ཕྱག་
455b
གཉིས་མདའ་གཞུ་འགེངས་པའོ། །དེ་ནས་རྫོགས་པའི་རིམ་པ་ནི། །རྩ་ཡི་འབྱུང་བ་རིམ་པ་མཆོག། ལྷ་མོ་རེ་རེ་རྩ་རེ་སྟེ། །དེ་ཡི་བདེ་བ་བདག་དང་ཁྱོད། །འཛུམ་པ་དང་ནི་འབྱེད་པ་ཡིས། །རླུང་གིས་མེ་ནི་ཁོང་དུ་ཆུད། །ཡང་དག་པ་ཡི་དབང་པོའི་ཤིང ། །དེ་ཡིས་གཏུམ་མོ་འབར་བའོ། །རྣམ་པར་རྟོག་པའི་ཕུང་པོའི་གཟུགས། །ཐམས་ཅད་ལུས་ནི་སྲེག་བའོ། ། དེ་ཡི་མེ་འབར་ཡང་དག་གིས། །བདེ་ཆེན་འཁོར་ལོ་བཞུ་བར་འགྱུར། །བཞུ་བས་རྩ་ནི་ཐམས་ཅད་ལས། །མཆོག་གི་བདུད་རྩི་འཛག་པའོ། །ཡང་ན་ལུས་ནི་སོས་འགྱུར་ཏེ། །ལྷ་ཡི་སྐུ་ནི་ཐོབ་པར་འགྱུར། །དེ་ནི་གོམས་པའི་སྦྱོར་བ་ཡིས། །རྩེ་གཅིག་གིས་ནི་གོམས་པར་བྱ། །ཕྱི་ཡི་ཕྱག་རྒྱ་མེད་ན་ཡང ། །བདེ་བ་འབྱུང་བར་འགྱུར་བ་ཡོད། །བལྟ་བ་ཙམ་ནི་དགོས་པ་སྟེ། །དེ་བཞིན་ཐམས་ཅད་ཐམས་ཅད་མིན། །ཕྱི་ནས་རྣམ་པར་རྟོག་པ་སྐྱེས། །དེ་ལ་དངོས་གྲུབ་མེད་པར་འགྱུར། །ཇི་ལྟར་མུན་པའི་སྣོད་རྣམས་ནི། །མར་མེ་མེད་ན་མཐོང་མི་འགྱུར། །མར་མེས་མཐོང་བར་གྱུར་ཙམ་ན། །ཕྱི་ནས་མར་མེ་དོར་བར་བྱ། །སྣོད་ནི་འབད་དེ་བསྲུང་བྱ་སྟེ། །མར་མེས་དོན་བྱ་མི་དགོས་སོ། །མར་མེའི་མཚན་ཉིད་འདི་རུ་རྩ། །རྩ་ནི་ཤེས་རབ་མཚན་ཉིད་དོ། །ཐབས་ནི་བདེ་བ་ཞེས་སུ་བསྟན། །བདེ་བ་ཡེ་ཤེས་ཞེས་བྱར་དྲན། །བདེ་བའི་ཡེ་ཤེས་རང་བཞིན་ནི། །གང་ཞིག་ཤེས་རབ་མ་ལས་
456a
༄#། །རྙེད། །དེ་ནི་ཤེས་རབ་ཡེ་ཤེས་དབང ། །དེ་ནི་རྫོགས་པའི་རིམ་པའོ། །དེ་དངོས་བདེ་ཆེན་ཡེ་ཤེས་ནི། །དཀྱིལ་འཁོར་ནང་དུ་ཡང་དག་བཞུགས། །བདེ་བ་ཆེན་པོ་གཉིས་སུ་གྱེས། །ཀུན་རྫོབ་དང་ནི་དོན་དམ་མོ། །དགའ་བ་ལ་སོགས་ཉིད་ལས་ནི། །བདེ་བ་གཉིས་གྱེས་ཤེས་པར་བྱ། །དེ་ཡི་རིམ་པ་ཡང་དག་གཉིས། །དད་པས་ཉོན་ཅིག་བདག་གིས་བཤད། །སྣང་བ་རེག་བྱ་སྦྱོར་བ་དང ། །འགྲོ་བ་དེ་ནི་བཞི་པའོ། །རིམ་པ་ཡིས་ནི་ཤེས་པར་བྱ། །བསྐྱེད་པའི་རིམ་པའི་ཕྱོགས་ཀྱི་ནི། །ཤེས་རབ་མ་ཡི་ལྟ་བ་ཡིས། ། གཉིས་ཀའི་འདོད་ཆགས་འབྱུང་བར་འགྱུར། །དེ་ཚེ་དགའ་བ་བྱུང་བ་སྟེ། །རྣམ་པ་སྣ་ཚོགས་སྐད་ཅིག་ལྡན། །གང་ཚེ་དེ་དང་ལྷན་ཅིག་ཏུ། །དད་པས་རེག་བྱ་ཡོད་གྱུར་ན། །དེ་ཚེ་མཆོག་གི་དགའ་བ་ནི། །དྲི་མ་མེད་པ་འབྱུང་བར་འགྱུར། །ཡང་ནི་དབང་པོ་གཉིས་ཕྲད་ལས། །གང་ཚེ་དེ་དང་ལྷན་ཅིག་སྦྱོར། །དེ་ཡི་ཚེ་ན་དགའ་བྲལ་ནི། །གསལ་བར་འབྱུང་བར་འགྱུར་བའོ། །གང་ཚེ་དབང་པོ་གཉིས་ཤིང་ལས། །ཡང་དག་པ་ཡི་མེ་འབར་ན། །དེ་ཚེ་ལྷན་ཅིག་སྐྱེས་དགའ་ནི། །སྲིད་པ་མེད་པ་འབྱུང་བར་འགྱུར། །ནུ་མས་རེག་པས་བལྟ་བ་ནི། །འདོད་པ་དེ་ནི་དད་པོར་དགའ། །ཕྱི་ནས་དེ་དངོས་རྒྱས་པ་ནི། །གང་ཚེ་ངེས་པར་ཡིན་པར་འགྱུར། །དེ་ཚེ་སྐད་ཅིག་གིས་དེ་རྒྱས། །མཆོག་གི་
456b
དགའ་བ་བྱེད་པའོ། །གང་ཚེ་དེ་ཉིད་ཤིན་ཏུ་ཡིས། །འདོད་ཆགས་མེ་ནི་འབར་འགྱུར་ན། །དེ་ཚེ་འབར་བའི་ཐིག་ལེ་ནི། །དགའ་བྲལ་དགའ་བ་འབབ་པའོ། །རྡོ་རྗེ་པདྨ་རོལ་བྱེད་པ། །དེ་བཞི་དགའ་བྲལ་དགའ་བའོ། །དེ་ནི་སྐྱེས་པའི་རིམ་པ་ཡིན། །ུ་ཏའི་ཡེ་ཤེས་དང་བྲལ་ལོ། །ཡང་ནི་གང་ཚེ་ཨུ་ཏ་ནི། །སྐད་ཅིག་གཅིག་ལས་གཅིག་ཏུ་འགྲོ། །དེ་ཡི་ཨུ་ཏའི་ཐིག་ལེ་ནི། །གསུམ་གྱིས་རྣམ་པར་དག་པར་འགྲོ། །དེ་ནས་དེར་ནི་ལྷན་ཅིག་སྐྱེས། །རྡོ་རྗེ་ལྟ་བུའི་བདེ་བ་བྱེད། །དེ་ནི་བཅོམ་ལྡན་ཤེས་རབ་མ། །རྫོགས་པའི་རིམ་པའི་ཕྱོགས་ཡིན་ནོ། །ུ་ཏིའི་སྒྲས་ནི་བདེ་བར་བསྟན། །ལེགས་དགྱེས་དབང་མོ་དེ་ནི་བདག་།དེ་རུ་སྦྱོར་བ་བཞི་རྣམས་ནི། །རྒྱས་པར་བདག་གིས་བཤད་པར་བྱ། །འདོད་དང་འདར་དང་འགྲོ་བ་དང ། །དགའ་བ་དང་ནི་བཞི་ཡིན་ཏེ། །དེ་ནི་དང་པོ་སྦྱོར་བ་ཡིན། །དེ་ནི་དགའ་བའི་དོན་ཡིན་ནོ། །རྒྱས་དང་འདུན་དང་འབྱུང་བ་དང ། །མཆོག་གི་དགའ་བ་བཞི་ཡིན་ཏེ། །དེ་ནི་སྦྱོར་བ་གཉིས་པ་ཡིན། །མཆོག་གི་དགའ་བའི་དོན་ཡིན་ནོ། །འབར་དང་ཐིག་ལེ་མྱོས་པ་དང ། །དགའ་བྲལ་དང་ནི་བཞི་ཡིན་ཏེ། །དེ་ནི་སྦྱོར་བ་གསུམ་པ་ཡིན། །དགའ་བྲལ་དགའ་བའི་དོན་ཡིན་ནོ། །ུ་ཏ་དང་ནི་ཚུལ་དང་གཉིད། །ལྷན་ཅིག་སྐྱེས་དགའ་བཞི་པའོ། །དེ་ནི་སྦྱོར་བ་བཞི་པ་ཡིན། །དགའ་བའི་བྱེ་བྲག་
457a
༄#། །བཅུ་དྲུག་གོ། བཞི་རྣམས་གཞན་མིན་འདི་རུ་ནི། །རབ་ཀྱི་དོན་ནི་འདི་ལྟར་འགྱུར། །འདོད་པ་འདུན་པ་ཡིན་པར་བཤད། །དཔལ་ལྡན་ཤེས་རབ་མས་སྤྲུལ་ལོ། །དེ་ནི་འདུན་པ་ལས་ནི་དཀྲུག། །རང་གི་ཡིད་ཀྱིས་བྱེད་པའོ། །འདོད་པའི་སྒྲས་ནི་དགའ་བ་ཡིན། །མཐོང་བ་ལས་ནི་བྱེད་པའོ། །དེ་ཉིད་བཅོམ་ལྡན་ཤེས་རབ་མ། །འདོད་ཆགས་ཆེན་པོས་རྒྱས་པ་ན། །དེ་ཚེ་རྒྱས་པ་ཡིན་པར་འགྱུར། །མཆོག་གི་དགའ་བ་གཉིས་པའོ། །རྒྱས་པའི་དུས་སུ་ཕྱི་དང་ནང ། །གང་ཚེ་ཤིན་ཏུ་འབར་གྱུར་ན། །དེ་ཚེ་ཡན་ལག་རབ་དེ་ནི། །སྐད་ཅིག་གིས་ནི་ཞུ་བར་འགྱུར། །དེ་ནི་འབར་བའི་ཐིག་ལེས་ནི། །མིང་ནི་གསལ་བར་གྱུར་པའོ། །དེ་ནི་དགའ་བྲལ་དགའ་བ་སྟེ། །གསུམ་པ་ཞེས་བྱར་བཤད་པའོ། །ཡང་ནི་དེ་ཉིད་གཙོ་མོ་ནི། །མཆོག་གི་རྣམ་པ་རབ་བདེ་བ། །དེ་ཚེ་ཨུ་ཏའི་དགུག་པ་ནི། །སྦིད་པ་དང་བྲལ་བྱེད་པའོ། །དེ་ནི་བཞི་པ་ཡང་དག་མཆོག། ལྷན་ཅིག་སྐྱེས་དགའ་བསྟན་པའོ། །དེ་ནི་ཨུ་ཏིའི་དགུག་པ་ནི། །ཐིག་ལེའི་ཐར་པ་གསུམ་གྱི་མཐའ། །ལྷན་སྐྱེས་ཀྱི་ནི་གནས་སུའོ། །དགའ་བ་ལ་སོགས་བྱེ་བྲག་གིས། །ལྷན་ཅིག་སྐྱེས་རིམ་ཤེས་པར་བྱ། །བདེ་བ་ཆེན་པོའི་གཙུག་ཏོར་ནས། །སྨིན་ཕྲག་འཁོར་ལོའི་དབུས་ཡན་ཆད། །དེ་ཙམ་དགའ་བའི་གནས་ཡིན་ཏེ། །ཐིག་ལེ་གཅིག་པུའི་མཚན་ཉིད་དོ། །སྨིན་
457b
ཕྲག་འཁོར་ལོས་མགྲིན་འཁོར་ལོ། །དེ་ཙམ་མཆོག་གི་དགའ་བའོ། །མགྲིན་པའི་གནས་ནས་སྙིང་འཁོར་ལོ། །དེ་ཙམ་དགའ་བྲལ་དགའ་བའོ། །དེ་ནས་ཡང་ནི་རིམ་པ་ཡིས། །རིམ་པའི་གནས་ནི་རབ་ཏུ་བཤད། །ལྟེ་བའི་འཁོར་ནས་རྒྱུ་ཞབས་སུ། །དེ་ཙམ་དུ་ནི་དགའ་བ་ཡིན། །རྒྱུ་ཞབས་སུ་ནི་མདུད་པའི་རྩར། །དེ་ཙམ་མཆོག་གི་དགའ་བའོ། །མདུད་པའི་གནས་ནས་རིན་ཆེན་ཁར། །དེ་ཙམ་དགའ་བྲལ་དགའ་བའོ། །རྡོ་རྗེ་རིན་ཆེན་རྩེ་ནང་ཡོད། །ལྷན་སྐྱེས་དེ་ནི་དོན་དམ་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། དཀྱིལ་འཁོར་དང ། དགའ་བའི་བྱེ་བྲག་དང ། ཐིག་ལེའི་མཚན་ཉིད་དང ། བསྐྱེད་པ་དང ། རྫོགས་པའི་རིམ་པ་ཞེས་བྱ་བའི་ལེའུ་སྟེ་བཅུ་དྲུག་པའོ།། །།ཡེ་ཤེས་མཁའ་འགྲོ་བཅོམ་ལྡན་འདས། །བདག་ནི་ཐེ་ཚོམ་ཅུང་ཟད་སྐྱེས། །ཆར་ཡང་དག་ནི་ཐིག་ལེའི་ཚུལ། །ཡེ་ཤེས་གང་ནས་ཤེས་པར་བྱ། །བཅོམ་ལྡན་འདས་ཀྱིས་བཀའ་སྩལ་པ། ཚུལ་ནི་དཔྲལ་བའི་གནས་སུ་སྟེ། །ཐིག་ལེ་མགྲིན་པའི་གནས་སུ་བཞུགས། །ཆར་ཡང་སྙིང་གའི་གནས་སུ་ཤེས། །ཡེ་ཤེས་ལྟེ་བའི་གནས་སུ་བཞུགས། །རྟོག་པ་ལས་ནི་རྟོག་པ་མེད། །གང་དུ་ཕྱིན་ནས་འགྲོ་བ་ན། །དེ་ནི་དེ་རྣམས་རང་བཞིན་གནས། །ལྟེ་བའི་གནས་སུ་རབ་ཏུ་གྲགས། །གང་ཚེ་བདུད་རྩི་གནས་སུ་འགྲོ། །དེ་ཚེ་ཡེ་ཤེས་ཞེས་
458a
༄#། །སུ་དྲན། །བདུད་རྩི་བྱང་ཆུབ་སེམས་སུ་གྲགས། །ཚུལ་ལ་སོགས་པའི་ཐིག་ལེ་བཞི། །དེ་ཡི་གནས་ནི་བཞི་ཡིན་ཏེ། །དགའ་བའི་བྱེ་བྲག་འགྲོ་བར་འགྱུར། །དཔྲལ་བར་དགའ་བའི་ཐིག་ལེ་དང ། །མགྲིན་པར་མཆོག་ཏུ་དྲན་པའོ། །སྙིང་ག་རུ་ནི་དགའ་བྲལ་ཏེ། །ལྟེ་བ་རུ་ནི་ལྷན་ཅིག་སྐྱེས། །རྩ་ཡི་ཀུན་སྤྱོད་སྦྱོར་བ་ཡིས། །དགའ་བ་ལ་སོགས་རྙེད་པར་འགྱུར། །དཔྲལ་བའི་སྟེང་ན་པདྨ་ཡོད། །དེ་ཡི་སྟེང་ན་གཙུག་ཏོར་རོ། །དེ་ནི་གསང་ཆེན་ཡེ་ཤེས་ཏེ། །རྒྱལ་བ་ཡིས་ཀྱང་མི་ཤེས་སོ། །ལྟེ་བའི་འོག་གི་གསུམ་གནས་སུ། །དེ་ཡི་སྟེང་དུ་རྒྱུ་ཞབས་སོ། །གསུམ་དངོས་འོག་གི་ལྟེ་བའི་དབྱིབས། །དེ་རུ་རྡོ་རྗེ་བྱད་གཟུགས་གསལ། ། གསུམ་དངོས་གནས་ན་རྩ་རྣམས་ཀྱི། །ཡང་དག་མཆོག་གི་གནས་ཡིན་ནོ། །རོ་མ་འཛིན་མ་གཉིས་ཡིན་ཏེ། །གསུམ་པ་དེ་ནི་རྟོག་མེད་ན། །རྟོག་མེད་དེ་ནི་གཅིག་པུ་སྟེ། །ཀུན་རྫོབ་ཏུ་ནི་གསུམ་དུ་འགྱུར། །དེ་ནི་གཅིག་ཏུ་ལུ་གུ་རྒྱུད། །ཇི་ལྟར་སྦྲུལ་འཁྱིལ་བཞིན་དུའོ། །སྐུ་གསུང་ཐུགས་ཀྱི་དབྱེ་བ་ཡིས། །རྩ་ནི་བྱེ་བྲག་གསུམ་དུ་འགྱུར། །རྡོ་རྗེ་རྩེ་མོ་ཐུགས་རྡོ་རྗེ། །གསུམ་གྱི་དངོས་པོ་གསུང་ཡིན་ནོ། །ལྟེ་བ་སྐུ་ཞེས་བྱ་བར་གྲགས། །དེ་ནི་རྡོ་རྗེ་གསུམ་ངེས་དོན། །སྙིང་གར་ཐུགས་ཀྱི་རྡོ་རྗེ་སྟེ། །མགྲིན་
458b
བ་གསུང་གི་རྡོ་རྗེའོ། །དཔྲལ་བ་སྐུ་ཡེ་རྡོ་རྗེ་སྟེ། །རྒྱས་པར་བདག་གིས་རབ་ཏུ་གསལ། །དེ་ཡི་དབུས་སུ་སྲོག་ཡོད་པ། །དེ་བཞིན་དུ་ནི་ཉེ་བའི་སྲོག། སྙིང་གའི་སྟེང་ལས་སྲོག་གི་རླུང་ལྟེ་བའི་འོག་ལས་གསོ་བའི་རླུང ། །གང་ཚེ་རྐང་མཐིལ་ལས་གསོ་རླུང ། །གལ་ཏེ་འབྱུང་བ་ཡིན་པར་འགྱུར། །དེ་ཡི་ཚེ་ན་སྲོག་གི་རླུང ། །གྱེན་དུ་ལམ་དུ་འགྲོ་བའོ། །གསོ་རླུང་ལྟེ་བའི་གནས་སུ་ནི། །ངེས་པ་ཡིས་ནི་གནས་བྱེད་དོ། །ཡང་ནི་གང་ཚེ་སྲོག་གི་རླུང ། །གཙུག་ཏོར་ལས་ནི་ཕྱིར་འགྲོ་ན། །དེ་ཚེ་གསོ་བའི་རླུང་དེ་ནི། །རང་གི་གནས་སུ་འགྲོ་བའོ། ། དེ་ནི་སྲོག་གི་རླུང་ཡིན་ཏེ། །ལྟེ་བའི་གནས་སུ་འདུགས་བྱེད། །དཔལ་ཕྱག་རྒྱ་ཆེན་པོའི་ཐིག་ལེ་ལས། ཚུལ་དང ། ཆར་ཡང་དང ། ཐིག་ལེ་དང ། ཡེ་ཤེས་ཀྱི་གནས་དང ། རྩའི་ཀུན་སྤྱོད་ཅེས་བྱ་པའི་ལེའུ་སྟེ་བཅུ་བདུན་པའོ།། །།བཅོམ་ལྡན་དེ་རུ་བདག་ཞུ་སྟེ། །དེ་ཡི་བསམ་གཏན་ཅི་ལྟ་བུ། །ཁ་སྦྱར་རྣམ་པའི་སྦྱོར་བ་ཡི། །པད་རྣམས་འདུག་སའི་མཚན་ཉིད་དོ། །རིམ་པ་གང་གིས་སམས་དེ་ནི། །འགྲོ་དང་འོང་བ་ཇི་ལྟར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། དྲིས་པ་ཡང་དག་གསང་བ་སྟེ། །འདི་ནི་སུས་ཀྱང་མི་ཤེས་སོ། །གང་གིས་ཁྱོད་ཀྱིས་གསལ་བར་ཤེས། །ཉོན་ཅིག་ཡང་དག་བདག་གིས་བཤད། །གང་ཚེ་ལེགས་དགྱེས་ཤིན་ཏུ་བདེ། །ཤེས་རབ་ཐབས་ཀྱི་སྦྱོར་བ་ལས། །
459a
༄#། །དེ་ཚེ་རྟོག་པ་མེད་པའི་ལམ། །བྱང་ཆུབ་སེམས་ནི་འབྱུང་བར་འགྱུར། །ལྟེ་བའི་རྩ་བར་སྲོག་རླུང་ནི། །སྐད་ཅིག་ཙམ་ཡང་མི་བྱེད་ན། །གང་ཞིག་པདྨ་ཁས་སྦུབས་འདི། །སྐད་ཅིག་གིས་ནི་གྱེན་དུ་འགྱུར། །དེ་ཡི་ལྟེ་བའི་དབུས་སུ་ནི། །སེམས་ནི་བརྟན་པར་འགྱུར་བའོ། །དེ་ཚེ་ཐུར་དུ་འགྲོ་མི་འགྱུར། །ཇི་ལྟར་མ་རྡོལ་སྣོད་དུ་ནི། །ཆུ་ནི་འཇེག་པ་མེད་པར་གནས། །དེ་བཞིན་ངེས་པར་སེམས་འགྱུར་རོ། །དེ་ནི་སྐད་ཅིག་སྒོམ་བྱེད་དོ། །སངས་རྒྱས་ཉིད་འགྱུར་ཐེ་ཚོམ་མེད། །དཔལ་ཕྱག་རྒྱ་ཆེན་པོའི་ཐིག་ལེ་ལས། བྱང་ཆུབ་ཀྱི་སེམས་བརྟན་པར་བྱེད་པ་དང ། བསམ་གཏན་བརྟན་པ་ཞེས་བྱ་བའི་ལེའུ་སྟེ་བཅོ་བརྒྱད་པའོ།། །།དབང་བསྐུར་ཡེ་ཤེས་མཚན་ཉིད་ནི། །བཅོམ་ལྡན་དེ་ཉིད་དོན་ནི་གསུངས། ། བཅོམ་ལྡན་འདས་ཀྱིས་བཀའ་སྩལ་པ། །དབང་བསྐུར་བ་ཡི་ཡེ་ཤེས་དོན། །ཉོན་ཅིག་ཡང་དག་བདག་གིས་བཤད། །གཟུགས་བཟང་བཅུ་དྲུག་ལོན་པ་དང ། །སིཧལ་ག་པུར་ཡོད་པ་ཡི། །ཕྱག་རྒྱ་གཅེར་བུར་བྱས་ནས་ནི། །ལེགས་དགྱེས་ཀྱིས་ནི་མཆོད་པར་བྱ། །པདྨ་ཁ་སྦྱར་སྦྱོར་བ་ཡིས། །ཡང་དང་ཡང་དུ་འདོད་པ་བྱ། །རིམ་པ་ཡིས་ནི་བསྐྱོད་པར་བྱ། །ཁུ་བ་ཇི་ལྟར་འབྱུང་འགྱུར་བ། །ཐམས་ཅད་འབྱུང་བར་གྱུར་པ་ན། །པདྨའི་ནང་དུ་སྤང་བར་བྱ། །ལེགས་དགྱེས་ཀྱི་ནི་དབང་ཕྱུག་མ། །འདི་ནི་སློབ་དཔོན་དབང་གི་རབ། །ཡང་ནི་གསང་བའི་དབང་
459b
འདི་ནི། །དད་པས་ཉོན་ཅིག་བདག་གིས་བཤད། །གང་ཚེ་གསང་གནས་ན་སེམས་ཡོད། །དེ་ནི་གསང་བར་རབ་ཏུ་གྲགས། །གསང་བ་པདྨའི་ཁུ་བ་ཡིན། །མདུད་པའི་ནང་དུ་གསང་བ་འོ། །དེ་ཡི་གནས་སུ་བརྟན་པར་བྱ། །སེམས་ནི་ནམ་མཁའི་པདྨར་མིན། །ཐམས་ཅད་རྒྱུད་ལས་རྙེད་དཀའ་བའི། །ཤེས་རབ་ཡེ་ཤེས་བདག་གིས་བཤད། །ཤེས་རབ་མྱ་ངན་འདས་ཞེས་བཤད། །ཡེ་ཤེས་སྲིད་པ་ཞེས་བྱར་དྲན། །འཁོར་བ་དེ་ནི་མཆོག་དགའ་བ། །མྱ་ངན་འདས་པ་དགའ་བྲལ་དྲན། །ཡང་ན་མྱ་ངན་འདས་གྲགས་པ། །སངས་རྒྱས་རིན་ཆེན་པདྨའི་སྣོད། །བུད་མེད་བྷ་གའི་ཕྱག་རྒྱའོ། །དེ་ནི་ཤེས་རབ་ཅེས་བྱར་དྲན། །ཡེ་ཤེས་སྣོད་ནི་ཡིན་པར་གྲགས། །ཐམས་ཅད་བདེ་བའི་མཆོག་གི་གནས། །ཁུ་བ་ཤེས་རབ་ཅེས་སུ་ཤེས། ། ཡེ་ཤེས་བདེ་བ་ཞེས་སུ་དྲན། །དབང་བསྐུར་འོད་དུ་ཞུ་པར་འགྱུར། །ཡེ་ཤེས་དུས་ལས་གཞན་པའོ། །དེ་ནི་འགོག་པ་བཞི་པ་སྟེ། །རང་བཞིན་ཡེ་ཤེས་མཚན་ཉིད་དོ། །འོང་དང་སྟོབས་དང་སྤྲིན་དང་ཚུལ། །དབུགས་དང་ཨུཏྤལ་ས་དང་ཡིད། །སྙིང་པོ་ཟླ་ཉི་མུན་པ་དང ། །མཆོག་དང་སྒྲ་དང་རོ་དང་གློག་།དེ་ནི་བཅུ་དྲུག་ཤེས་པར་བྱ། །བདེ་བའི་ཐིག་ལེ་དྲི་མེད་དོ། །ཚངས་བུ་གནས་ནི་མགྲིན་གནས་སུ། །དེ་ཙམ་དུ་ནི་ཐིག་ལེ་བཞི། །དེ་ཡི་གནས་སུ་དགའ་བ་བཞི། །རོ་གཉིས་དང་ནི་ལྡན་པའོ། །མགྲིན་པ་ནས་ནི་སྙིང་གར་གནས། །ཡང་ནི་དེ་ཙམ་བཞི་
460a
༄#། །ཡིན་ནོ། །མཆོག་གི་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །སྙིང་གའི་གནས་ནས་རིན་ཆེན་སྐེར། །ཡང་ནི་དེ་ཙམ་བཞི་ཡིན་ནོ། །དགའ་བྲལ་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །རིན་ཆེན་སྐེ་ནས་སྟེང་གི་གནས། །ཡང་ནི་དེ་ཙམ་བཞི་ཡིན་ནོ། །ལྷན་ཅིག་སྐྱེས་དགའ་བཞི་ཡིན་ཏེ། །རོ་གཉིས་དང་ནི་ལྡན་པའོ། །དགའ་བ་བཅུ་དྲུག་ཐིག་ལེ་སྟེ། །ཐིག་ལེ་ཟླ་བའི་ཆ་རུ་དྲན། །ཱ་ལི་ཐིག་ལེར་ཤེས་པར་བྱ། །འཁོར་ལོ་བཞི་ཡི་རིམ་པས་སོ། །ཚངས་པ་ཡི་ནི་ཞལ་དང་བྲལ། །རོ་དང་བཅས་པ་བདག་གི་ཞལ། །བཅུ་གཉིས་དེ་ནི་ཉི་ཞེས་ཤེས། །ཀཱ་ལི་ཐིག་ལེར་རབ་ཏུ་གྲགས། །བཅུ་གཉིས་ཕྱེད་ནི་བདེ་ཐིག་ལེ། །དགའ་དང་མཆོག་གི་དགའ་བར་དྲན། །དགའ་བྲལ་དགའ་བའི་ཐིག་ལེ་གསུམ། །རང་བཞིན་གསུམ་དང་བྲལ་བའོ། །ཡང་ནི་ཐམས་ཅད་བདག་ཉིད་ཉིད། །བཞི་པོའི་དོན་ནི་བདག་གིས་བཤད། །གནས་བཞི་ལ་ནི་དབང་བཞི་སྟེ། །ལེགས་དགྱེས་དབང་མོར་ཤེས་པར་བྱ། །རྒྱུ་དང་འབྲས་བུའི་རིམ་པ་ཡིས། །མདོར་བསྡུས་པ་ནི་བཞི་ཡིན་ཏེ། །སྤྲུལ་དང་ཆོས་དང་ལོངས་སྤྱོད་དང ། །བདེ་བ་ཆེན་པོ་བཞི་པའོ། ། དེ་དག་སྐུ་ནི་བཞི་ཡིན་ཏེ། །དོན་དམ་པར་ནི་ཤེས་བྱའོ། །སུམ་ཅུ་གཉིས་ཕྱེད་རྩ་ནང་དུ། །ཱ་ལི་ཐིག་ལེ་བཅུ་དྲུག་གོ་།གཞན་ཕྱེད་ཀཱ་ལི་ཐིག་ལེ་སྟེ། །རྟག་ཏུ་ལམ་ནས་འབབ་པའོ། །
460b
ཱ་ལི་ཡེ་ཤེས་སེམས་སུ་འགྱུར། །ཀཱ་ལི་ཡེ་ཤེས་སེམས་ལས་འབྱུང ། །བདེ་བ་ཆེན་པོ་གཅིག་པུ་སྟེ། །ཀུན་རྫོབ་གཉིས་སུ་འབྱེད་པར་འགྱུར། །ཤེས་རབ་རང་བཞིན་ཟླ་བ་སྟེ། །ཐབས་ནི་ཉི་མའི་རང་བཞིན་ནོ། །ཟླ་རྒྱུ་ཨཱ་ལི་འབྲས་བུ་སྟེ། །ཱ་ལི་རྒྱུ་སྟེ་ཟླ་འབྲས་བུ། །ཉི་མ་རྒྱུ་སྟེ་ཀཱ་ལི་འབྲས། །ཀཱ་ལི་རྒྱུ་སྟེ་ཉི་འབྲས་བུ། །ཉི་མའི་དབུས་ལས་ཟླ་འབྱུང་སྟེ། །ཁུ་བའི་གཟུགས་ནི་བདེ་ཆེན་པོ། །ཀཱ་ལི་བདེ་བ་གསང་བའི་དབང ། །ཱ་ལི་ཤེས་རབ་ཡེ་ཤེས་དང ། །དེ་གཉིས་དབུས་སུ་བདེ་ཆེན་པོ། །རང་བཞིན་དེ་ལྟར་དྲན་པའོ། །རེག་བྱ་འཁྱུད་པ་ལ་སོགས་པས། སློབ་དཔོན་གྱི་ནི་དབང་བསྐུར་རོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། དབང་གི་ཡེ་ཤེས་དང ། ཱ་ལི་ཀཱ་ལིའི་རྒྱུ་འབྲས་དང ། ཟླ་བ་འབྱུང་བ་དང ། རྩ་དང ། ཐིག་ལེ་དང ། དགའ་བ་བསྟན་པ་ཞེས་བྱ་བའི་ལེའུ་སྟེ་བཅུ་དགུ་པའོ།། །།རྣལ་འབྱོར་དབང་ཕྱུག་སྤྱོད་པ་ནི། །ཡང་ནི་བཅོམ་ལྡན་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། རྣལ་འབྱོར་དབང་ཕྱུག་སྤྱོད་པ་ནི། །སྐལ་བ་ལྡན་མ་ཁྱོད་ཉོན་ཅིག་།ཟླ་བ་གཅིག་ཏུ་གསང་བ་སྤྱོད། །ཡུལ་གྱི་མཐའ་འམ་ཡང་ན་ཚལ། །ཐམས་ཅད་དོན་འགྲུབ་འགྱུར་བ་ཡི། །སྔགས་འདི་རྟག་ཏུ་བཟླ་བར་བྱ། །ཧཱ་སཝཱ་ཀ་རོ་རོ་ཏ་ཏཾ་བ་དཻ་རོ་དྷ་ཎ་ལ་མ་ཏ་ཙི་ཀོ་ར་དྷ་ད་མརྐལཱ་ན་ཛྲཱ་བ་ཨོཾ། དེ་ནས་མཁའ་ལ་རྣལ་འབྱོར་མ། །འདུས་ནས་བཀའ་སྩལ་སྦྱིན་པར་བྱ། །བུ་ཀྱེ་བུ་མོ་འདི་ཁྱོད་
461a
༄#། །ཁྱེར། །སྤྱོད་པ་རབ་ནི་ཁྱོད་ཀྱིས་གྱིས། །བུ་མོ་བཅུ་དྲུག་ལོན་པ་དང ། །སི་ཧལ་ག་པུར་ཡོད་པ་དང ། །ུཏྤལ་སྔོན་པོའི་མདོག་འདྲ་བ། །ཙནྡན་གསར་བའི་དྲི་ཡོད་ཅིང ། །སྒེག་པ་ཡི་ནི་རྒྱན་དང་ལྡན། །ལས་རྣམས་ཀུན་ལ་མཁས་པའོ། །འབད་དེ་གསང་བའི་གཟུགས་སུ་ནི། །དེ་དང་ལྷན་ཅིག་བདེ་བར་སོང ། །དོན་ཟིན་ནས་ནི་སོ་སོར་ནི། །སྣ་ཚོགས་ཀྱི་ནི་གཟུགས་ཉིད་ཀྱིས། །ལ་ལར་འདོད་ཆགས་སྤྱོད་པ་དང ། །ལ་ལར་འདོད་ཆགས་ཕྲལ་བའི་ཡིད། །ལ་ལར་ཞི་བའི་གཟུགས་དང་ནི། །ལ་ལར་བརྒྱལ་ལྡན་པའི་ཡིད། །ལ་ལར་ན་བས་ཟོས་པ་དང ། །ལ་ལར་བདེ་བའི་ལུས་ནི་རབ། །ལ་ལར་སློང་མོ་བྱེད་པ་དང ། །ལ་ལར་རྒྱལ་པོ་ཆེན་པོ་རྒྱལ། །ལ་ལར་གཅེར་བུ་དྲི་མ་ཅན། །ལ་ལར་དག་པ་གཙང་སྒྲ་ཅན། །ལ་ལར་ཅུང་ཟད་ཙམ་གྱིས་འགྲངས། །ལ་ལར་མང་པོས་འགྲངས་པར་བྱེད། །ལ་ལར་ངོ་ཚར་བྱེད་པ་དང ། །ལ་ལར་ངོ་ཚ་མེད་པའི་ཡིད། །ལ་ལར་ལྐུགས་པར་འདུག་པ་དང ། །ལ་ལར་སྒྲ་ཆེན་སྒྲོག་པ་དང ། །ལ་ལར་དྲི་ཆེན་ཟ་བ་དང ། །ལ་ལར་འོ་མ་འཐུང་བར་བྱེད། །ལ་ལར་སྡིག་པ་བྱེད་པ་དང ། །ལ་ལར་བསོད་ནམས་ཆེན་པོར་བྱེད། །ལ་ལར་དུ་བར་བྱེད་པ་དང ། །ལ་ལར་དགོད་པ་ལ་གཅིག་ཏུ་དགའ། །ལ་ལར་ཆོ་ལོང་རྩེ་བ་དང ། །ལ་ལར་གར་ནི་གཅིག་པུ་བྱེད། །ལ་ལར་ཆང་གིས་ར་རོ་དང ། །ལ་
461b
ལར་བྲམ་ཟེའི་སྤྱོད་པ་དང ། །ལ་ལར་ཐོད་པའི་སྤྱོད་པ་དང ། །ལ་ལར་གཏུམ་པའི་བྲན་བྱེད་དང ། །ལ་ལར་ཆོས་ནི་སྟོན་པ་དང ། །ལ་ལར་ཆོས་ནི་ཉན་པ་དང ། །ལ་ལར་སྒྱུ་མ་བྱེད་པ་དང ། ལ་ལར་སྒྱུ་མ་བྲལ་བ་དང ། །ལ་ལར་རྫུན་ནི་སྨྲ་བ་དང ། །ལ་ལར་བྱིས་པའི་གཟུགས་ནི་སྟོན། །ལ་ལར་རྒན་པོ་ལོ་མང་དང ། །ལ་ལར་སྨད་ཚོང་མ་ཡི་གཟུགས། །ལ་ལར་འདོད་པ་མཆོག་སྤྱོད་དང ། །ལ་ལར་སེར་སྣ་ཡིས་ནི་འགུགས། །ལ་ལར་སེར་སྣ་དང་བྲལ་ཡིད། །ལ་ལར་བྱོལ་སོང་ཡན་ལག་ཉིད། །ལ་ལར་རྣམ་ཤེས་མེད་པ་དང ། །ལ་ལར་བརྗོད་དུ་མེད་པ་དང ། །ལ་ལར་ཡང་དག་གཟུགས་ཅན་སྟོན། །དེ་ལྟའི་རྣལ་འབྱོར་དབང་ཕྱུག་ནི། །རང་དབང་གིས་ནི་ཀུན་ཏུ་སྤྱོད། །དཔལ་ཕྱག་རྒྱ་ཆེན་པོའི་ཐིག་ལེ་ལས། །རྣལ་འབྱོར་གྱི་དབང་ཕྱུག་ཆེན་པོའི་སྤྱོད་པ་ཞེས་བྱ་བའི་ལེའུ་སྟེ་ཉི་ཤུ་པའོ།། །།བཅོམ་ལྡན་འདས་ཡེ་ཤེས་རྒྱ་མཚོ་ཁྱེད། །བདག་ལ་ཐེ་ཚོམ་མ་སྐྱེས་པ་མཆིས། །སྔར་གསུངས་པ་ཡི་འཁོར་ལོ་དྲུག་།དེ་ཡི་ས་བོན་ཇི་ལྟ་བུ། །གང་གི་སྔགས་ཀྱིས་བདུད་རྩི་ལྔའི། །བཟའ་བ་དང་ནི་སྤྱོད་པའོ། །ཁྱོད་དང་བདག་གི་སྙིང་པོ་ནི། །ཇི་ལྟར་དེ་ནི་ངེས་པར་ཡོད། །སེམས་ཅན་རྣམས་ནི་བསྲུང་དོན་དུ། །འདུས་པའི་གནས་ཀྱི་དབུས་སུ་ནི། །ཚོགས་ཀྱི་འཁོར་ལོ་ཇི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་བ། །ཉོན་ཅིག་ལྷ་མོ་སྤྱན་བཟང་མོ། །འཁོར་ལོ་དྲུག་གི་ས་བོན་ནི། །ཀྵལིཾ་མལཾ་པལཾ་ཛལཾ་རླཾ་ཧལཾ།
462a
༄#། །དབུས་སུ་རེ་རེ་དགོད་པར་བྱ། །ཁཾ་རཾ་ཤཾ་བཾ་སཾ་མཾ་པཾ་ནི། རླུང་གི་འཁོར་ལོའི་ས་བོན་དྲུག་།བླིཾ་ཀླིཾ་ཛལིཾ། མེ་འཁོར་ལོ། །མཁས་པས་གྲུ་གསུམ་དགོད་པར་བྱ། ཀ་ཁ་ག་གྷ་ང ། །ཙ་ཚ་ཛ་ཛྷ་ཉ། ཊ་ཋ་ཌ་ ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས། སྤྲུལ་པའི་འཁོར་ལོའི་འདབ་མ་ལ། །གཉིས་སུ་བྱས་པའི་ས་བོན་གདབ། ཏྲཾ་ཧྲཱིཿ ་ཨཾ་ཁཾ་དང ། ལཾ་མཾ་པཾ་ཏཾ། ཆོས་ཀྱི་འཁོར་ལོའི་ས་བོན་བརྒྱད། ། ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ ། ལོངས་སྤྱོད་འཁོར་ལོ་བརྒྱད་གཉིས་འདི། །གཡོན་བསྐོར་དུ་ནི་བྲི་བར་བྱ། །དེ་ནི་གཉིས་སུ་བྱས་པ་ནི། །བདེ་ཆེན་འཁོར་ལོའི་ས་བོན་ནོ། །མཉམ་པ་ཡི་ནི་ས་ཡི་ཆ། །ཆང་ལ་སོགས་པས་བྱུག་པར་བྱ། །ཙནྡན་དང་ནི་གུར་གུམ་མཆོག། སྣ་ཚོགས་མཆོག་གི་མེ་ཏོག་དང ། །སྣ་ཚོགས་མཆོད་པ་ལ་སོགས་ཀྱིས། །མཁས་པས་ས་ལ་མཆོད་པར་བྱ། །བུ་མོ་ཡིད་འཕྲོག་ལྷ་ཡི་གཟུགས། །ཉི་ཤུ་ཡོན་པ་གཡོ་བ་མེད།། གནས་ནི་གང་དུ་སྔགས་རྒྱལ་བཏུ། །རེ་ཞིག་དང་པོ་དེ་རུ་གཞུག་།མཆོག་གི་དགའ་བའི་སྦྱོར་བ་ཡིས། །རྩེ་གཅིག་གིས་ནི་བསྙེན་པར་བྱ། །བསྙེན་པའི་ལས་ནི་རྫོགས་པ་དང ། །དེ་ནས་ས་ལ་བསང་གཏོར་བྱ། །སློབ་མ་དེ་ཡིས་ཐིག་ལེ་བྱ། །བུ་མོ་ལ་ཡང་དེ་ལྟར་རོ། །ཤ་ཆེན་ལ་སོགས་ཀྱིས་གང་བའི། །གཏོར་མ་ཕྱོགས་བཞིར་གཏང་བར་བྱ། །ཚོགས་ལ་འབད་དེ་
462b
མཆོད་པར་བྱ། །མེད་ན་ཡང་ནི་འབད་པས་སོ། །སྔགས་བཏུ་བ་ཡི་དུས་སུ་ནི། །འབད་དེ་བླ་མ་མཆོད་པར་བྱ། །བླ་མ་དགྱེས་ན་སྔགས་རྒྱལ་ནི། །ཐེ་ཚོམ་མེད་པར་ཐོབ་པར་འགྱུར། །དེ་ལྟར་མིན་ན་སྐྱོན་ཡོད་དེ། །སྔགས་ཀྱང་ཐོབ་པར་མི་འགྱུར་རོ། །རྡོ་རྗེ་ཕྲེང་བས་བསྐོར་བ་ཡི། །འདབ་མ་བརྒྱད་པའི་པདྨ་བྲི། །དབུས་སུ་ཀྵ་ཡི་ས་བོན་ནི། །རྡོ་རྗེ་སེམས་དཔའི་རང་བཞིན་ཅན། །ཱ་ལི་ཀཱ་ལི་མཉམ་སྦྱར་ནས། །ཐུབ་པ་བདུན་ནི་བཏུ་བར་བྱ། །དང་པོར་རྣམ་པར་སྣང་མཛད་བྲི། །ལྔ་པ་ཡི་ནི་ལྔ་པ་དང ། །ུཥྨ་ཡི་ནི་བཞི་པ་དང ། །བཅུ་དྲུག་པ་ཡི་གཉིས་པར་ལྡན། །དང་པོ་ཡི་ནི་དང་པོ་དང ། །མེ་ཡིས་འོག་ཏུ་བརྒྱན་པའོ། །དབྱངས་ཡིག་བཅུ་གསུམ་པ་དང་ལྡན། །གཏི་མུག་ཐམས་ཅད་མཚོན་ཆའོ། །བཞི་པ་ཡི་ནི་བཞི་པ་དང ། །དབྱངས་ཡིག་བཅུ་གཅིག་པ་དང་ལྡན། །ུཥྨ་ཥ་ཡི་དང་པོ་དང ། །ནྟསྠ་ཡི་བཞི་པར་ལྡན། །དེ་ནས་མེ་ཡི་ས་བོན་དང ། །གཉིས་པ་ཡི་ནི་གསུམ་པ་དང ། །ནྟ་སྠ་ཡི་དང་པོ་དང ། །ནྟ་སྠ་ཡི་བཞི་པ་དང ། །དབྱངས་ཡིག་གསུམ་པ་དང་ལྡན་པ། །ཐམས་ཅད་ཀྱི་ནི་སྙིང་པོ་བཅོམ། །གཉིས་པ་ཡི་ནི་གསུམ་པ་དང ། །དེ་ནས་བརྒྱད་པའི་དང་པོ་དང ། །དབྱངས་ཡིག་གཉིས་པ་དང་ལྡན་པ། ། ཡི་གེ་མཆོག་ཉིད་གནས་ཡིན་ནོ། །གསུམ་པ་ཡི་ནི་དང་པོ་དང ། །དེ་ཉིད་ཀྱི་ནི་འོག་ཏུ་བརྒྱན། །ཡང་ན་དེ་ཉིད་བྲི་བར་བྱ། །ུཥྨ་ཡི་ནི་བཞི་པ་དང ། །དབྱངས་ཡིག་གཉིས་པ་དང་ལྡན་པ། །
463a
༄#། །རྡོ་རྗེ་སེམས་དཔའི་རང་བཞིན་ཅན། །ུཥྨ་ཡི་ནི་གསུམ་པ་དང ། །ལྔ་པ་ཡི་ནི་ལྔ་པ་དང ། །ུཥྨ་ཡི་ནི་བཞི་པ་དང ། །དབྱངས་ཡིག་གཉིས་པས་བརྒྱན་པའོ། ། དང་པོ་ཡི་ནི་དང་པོ་དང ། །ནྟསྠ་ཡི་གསུམ་པ་དང ། །ལྔ་པ་ཡི་ནི་དང་པོ་དང ། །དབྱངས་ཡིག་གཉིས་པས་བརྒྱན་པའོ། །དང་པོ་ཡི་ནི་གསུམ་པ་དང ། །ཉི་ཤུ་པ་ཡིས་བརྒྱན་པའོ། ། དབྱངས་ཡིག་གསུམ་པ་དང་ལྡན་པ། །ཁྲོ་བོ་ཡི་ནི་གཟུགས་ཆེན་ཆེ། །ུཥྨ་ཡི་ནི་གསུམ་པ་དང ། །བཞི་པ་ཡི་ནི་ལྔ་པ་དང ། །དེ་ཉིད་འོག་ཏུ་ལྡན་པར་བྱ། །དབྱངས་ཡིག་གསུམ་པས་བརྒྱན་པ་སྟེ། །ལྷ་རྣམས་ཀུན་གྱི་བྱེད་པའོ། །ལྔ་པ་ཡི་ནི་བཞི་པ་དང ། །དབྱངས་ཡིག་གཉིས་པས་བརྒྱན་པའོ། །བརྒྱད་པ་ཡི་ནི་དང་པོ་དང ། །ཐམས་ཅད་ཀུན་གྱི་ཕ་ཡིན་ནོ། །ུཥྨ་ཡི་ནི་བཞི་པ་དང ། །དབྱངས་ཡིག་དྲུག་པས་བརྒྱན་པ་ནི། །ཟླ་ཚེས་ཐིག་ལེ་དང་ལྡན་པ། །སེམས་ཀྱི་དབང་ཕྱུག་ཡི་གེ་མཆོག་།དེ་ཉིད་ཡང་ནི་བྲི་བར་བྱ། །དེ་ནས་ལྔ་པའི་གཉིས་པ་དང ། ། གསུམ་པ་ཡི་ནི་དང་པོ་དང ། །ུཥྨ་ཡི་ནི་གསུམ་པ་དང ། །ནྟ་སྠ་ཡི་བཞི་པར་ལྡན། །དབྱངས་ཡིག་གཉིས་པས་བརྒྱན་པའོ། ། ཡི་སྡེ་ཚན་བརྒྱད་པ་དང ། །དབྱངས་ཡིག་གཉིས་པ་དང་ལྡན་པ། །ཐམས་ཅད་དོན་གྲུབ་མཆོག་ཡིན་ཏེ། །བདག་གི་སྙིང་པོའི་སྔགས་རྒྱལ་ལོ། །དབང་པོ་གཟུགས་ཀྱི་བདག་པོ་དང ། །ནྟ་སྠ་ཡི་བཞི་པ་དང ། །གཉིས་པ་ཡི་ནི་གསུམ་
463b
པ་དང ། །མེ་ཡིས་འོག་ཏུ་བརྒྱན་པའོ། །བཞི་པ་ཡི་ནི་དང་པོ་དང ། །དབྱངས་ཡིག་བཅུ་གཅིག་དང་ལྡན་པ། །གཉིས་པ་ཡི་ནི་གསུམ་པ་དང ། །དབྱངས་ཡིག་བཅུ་གསུམ་པས་བརྒྱན་པ།། དང་པོ་ཡི་ནི་གསུམ་པ་དང ། །མེ་ཡིས་འོག་ཏུ་བརྒྱན་ལྡན་པ། །ུཥྨ་ཡི་ནི་བཞི་པ་དང ། །རི་ཡིག་འོག་ཏུ་བརྒྱན་པ་ནི། །དབྱངས་ཡིག་བཞི་པ་དང་ལྡན་པ། །སེམས་ཅན་ཐམས་ཅད་དབང་དུ་བྱེད། །ཡང་ནི་དེ་ཉིད་བྲི་བར་བྱ། །དེ་བཞིན་ལྔ་པའི་གཉིས་པ་དང ། །གསུམ་པ་ཡི་ནི་དང་པོ་དང ། །ཉེ་བའི་སྙིང་པོ་མཆོག་གི་སྔགས། །དང་པོར་རྣམ་པར་སྣང་མཛད་དང ། །དེ་ནས་ཨུཥྨའི་གསུམ་པ་དང ། །དབྱངས་ཡིག་ལྔ་པ་དང་ལྡན་པ། །ལྷ་རྣམས་ཀྱི་སེམས་གཏི་མུག་བྱེད། །དེ་ནས་མེ་ཡི་ས་བོན་དང ། །དེ་ནས་བཞི་པའི་དང་པོ་དང ། །ུཥྨ་ཡི་ནི་གསུམ་པ་དང ། །དེ་ནས་ཉི་ཤུ་རྩ་ལྔ་པ། །དེ་ནས་རླུང་གི་ས་བོན་བྲི། །དབྱངས་ཡིག་བཅུ་གཅིག་པ་དང་ལྡན། །གཞན་གྱི་ཕྱག་རྒྱ་རབ་ཏུ་འཇོམས། །ུཥྨ་ཡི་ནི་དང་པོ་དང ། །ནྟསྠ་ཡི་བཞི་པར་ལྡན། །དེ་ནས་ཉི་མའི་ས་བོན་དང ། །དབྱངས་ཡིག་གསུམ་པས་བརྒྱན་པའོ། །ུཥྨ་ཡི་ནི་བཞི་པ་དང ། །དབྱངས་ཡིག་དྲུག་པ་དང་ལྡན་པ། །ཟླ་ཚེས་ཐིག་ལེས་བརྒྱན་པའོ། །ཡང་ན་དེ་ཉིད་བྲིས་པ་ནི། །གཞན་གྱི་སྔགས་ནི་འཇོམས་པའོ། །ལྔ་པ་ཡི་ནི་གཉིས་པ་དང ། །དེ་ནས་གསུམ་པའི་དང་པོ་དང ། །ུཥྨ་ཡི་ནི་གསུམ་པ་དང ། །ནྟསྠ་ཡི་བཞི་པར་ལྡན། །དབྱངས་ཡིག་གཉིས་པར་ལྡན་པ་ནི། །
464a
༄#། །སྡུག་བསྔལ་ཐམས་ཅད་མེད་བྱེད་པ། །ཡ་ཡི་སྡེ་ཚན་བརྒྱད་པ་དང ། །དབྱངས་ཡིག་གཉིས་པ་དང་ལྡན་པ། །དངོས་གྲུབ་ཐམས་ཅད་འགྲུབ་པ་སྟེ། །ཁྱོད་ཀྱི་སྙིང་པོའི་སྔགས་རྒྱལ་ལོ། །དང་པོ་ལྷ་ཡི་བདག་པོ་དང ། །དེ་ནས་དང་པོའི་དང་པོ་དང ། །འོག་ཏུ་ས་ཡིག་དང་ལྡན་པ། །དབྱངས་ཡིག་གི་ནི་བཞི་པས་བརྒྱན། །ཟླ་ཚེས་ཐིག་ལེ་ཡིས་ནི་བརྒྱན། །ཐམས་ཅད་ཀུན་གྱི་བྱེད་པ་པོ། །ནྟསྠ་ཡི་བཞི་པ་དང ། །ས་ཡིག་འོག་ཏུ་ལྡན་པ་དང ། །དབྱངས་ཡིག་གི་ནི་བཞི་པ་ལྡན། །ཟླ་ཚེས་ཐིག་ལེ་ཡིས་ནི་བརྒྱན། །གཉིས་པ་ཡི་ནི་གསུམ་པ་དང ། །ས་ཡི་ཡི་གེ་འོག་ཏུ་ལྡན། །དབྱངས་ཡིག་བཞི་པ་དང་ལྡན་པ། །ཟླ་ཚེས་ཐིག་ལེས་བརྒྱན་པའོ། །ལྔ་པ་ཡི་ནི་གཉིས་པ་དང ། །གསུམ་པ་ཡི་ནི་དང་པོ་དང ། །སཝཱཧཱ་ཐ་མར་ལྡན་པ་ནི། །ཁྱོད་ཀྱི་ཉེ་བའི་སྙིང་པོའོ། །དེ་ནས་སྔགས་ཀྱི་གསང་ཆེན་པོ། །སུ་ལ་ཡང་ནི་མི་སྦྱིན་ཏེ། །ལྷ་མོ་དེ་བཞིན་མན་ངག་འདི། །སུ་ལ་ཡང་ནི་མི་སྦྱིན་ནོ། །བྱེ་བ་འབུམ་གྱི་ནང་ནས་གཅིག་།དེ་ནི་མན་ངག་གི་ནི་སྣོད། །སྔགས་ས་མ་ཡང་ན་མན་ངག་འདི། །བརྟགས་པར་བྱས་ཏེ་དེ་ནས་སྦྱིན། །བསྐལ་པ་བྱེ་བ་བརྒྱ་ཡིས་ཀྱང ། །དེ་ལྟར་མིན་ན་འགྲུབ་པ་མེད། །བླ་མའི་ཁ་ལས་མན་ངག་འདི། །ལེགས་དགྱེས་དབང་པོ་རྙེད་པར་འགྱུར། །བསྟན་བཅོས་ལུང་ལས་ཡང་དག་ནི། །ནམ་ཡང་རྙེད་པར་མི་འགྱུར་རོ། །མན་ངག་དོན་དུ་དང་བླ་མ་
464b
མཆོག་།ཡང་དང་ཡང་དུ་ཞུ་མི་བྱ། །བླ་མ་མཉེས་ན་ཡང་དག་ཉིད། །མན་ངག་དེ་ལ་སྦྱིན་པར་བྱེད། །ཇི་ལྟར་བུ་མོ་ལང་ཚོ་བབ། །ལ་ཞུ་བར་མི་བྱེད་ན། །ཕ་རང་ཉིད་ཀྱིས་ཤེས་ནས་ནི། །ད་ནི་བུ་མོ་སྦྱིན་དུས་སྙམ། །ཏྲཱཾ་ཧྲཱི་ཁཾ་གི་སྔགས་རྒྱལ་གྱིས། །བདུད་རྩི་ལྔ་ནི་སྤྱད་པར་བྱ། །ས་ཆུ་མེ་རླུང་རྣམས་ཀྱིས་ནི། །ས་བོན་གྱིས་ནི་བཟའ་བར་བྱ། །དཔལ་ཕྱག་རྒྱ་ཆེན་པོའི་ཐིག་ལེ་ལས་འཁོར་ལོ་དྲུག་གི་ས་བོན་དང ། སྔགས་བཏུ་བ་དང ། །བདུད་རྩི་ལྔ་བཟའ་བ་དང ། །སྤྱད་པ་ཞེས་བྱ་བའི་ལེའུ་སྟེ་ཉི་ཤུ་གཅིག་པའོ།། །།འབྱུང་པོ་རྣམས་ནི་བསྲུང་དོན་དུ། ཉོན་ཅིག་གཏོར་མ་བདག་གིས་བཤད། །དུར་ཁྲོད་ཡང་ན་ཆུ་ངོགས་སམ། །ཡུལ་གྱི་མཐའ་འམ་ཡང་ན་ནི། །ཤིང་གཅིག་དང་ནི་ཁང་སྟོང་དུ། །གཏོར་མ་འབད་དེ་སྦྱིན་པར་བྱ། ། ཚངས་པ་མ་དང ། །དྲག་མོ་དང ། དབང་ཕྱུག་ཆེན་མོ་དང ། ཁྱབ་འཇུག་མ་དང ། ཕག་མོ་དང ། མིའི་སེངྒེ་མོ་དང ། །བརྒྱ་བྱིན་མོ་དང ། མེ་མོ་དང ། ཆུ་ལྷ་མོ་དང ། རླུང་ལྷ་མོ་དང ། གཞོན་ནུ་མོ་དང ། གནོད་སྦྱིན་མོ་དང ། མཁའ་ལྡིང་མོ་དང ། སྤྲུལ་མོ་དང ། གླུང་ཆེན་མོ་དང ། གཤིན་རྗེ་མོ་དང ། ནོར་སྦྱིན་མོ་དང ། ཉི་མ་མོ་དང ། གཏུམ་མོ་དང ། དེ་ལྟ་བུའི་རྣལ་འབྱོར་མ་འཁོར་དང་བཅས་པ་ཐམས་ཅད་རྣལ་འབྱོར་པས་འདིར་ཕྱག་རྒྱ་འདིས་དགུག་པར་བྱའོ། །རྡོ་རྗེ་ཁུ་ཚུར་གཉིས་བྱས་ཏེ། །རྒྱབ་དང་རྒྱབ་ཏུ་བསྣོལ་བར་བྱ། །མཐའུ་ཆུང་ལུ་གུ་
465a
༄#། །རྒྱུད་དུ་སྦྲེལ། །མཛུབ་མོ་དྲང་པོར་བསྒྲེངས་བྱས་ཏེ། །གཡས་དང་གཡོན་གྱི་ཕྱག་གཉིས་ནི། །ཅུང་ཟད་ཙམ་ནི་དགུག་པར་བྱ། །རྣལ་འབྱོར་མ་ཐམས་ཅད་དང ། །མཁའ་འགྲོ་མ་ཐམས་ཅད་དང ། །འབྱུང་པོ་དང ། ཡི་དྭགས་དང ། ཤ་ཟ་དང ། །དྲག་པོ་ཆེན་པོ་དང ། །བརྗེད་བྱེད་རྣམས་ཚུར་ཤོག་།ཚུར་ཤོག་།ཉ་དང ། ཤ་དང ། ཁྲག་ཆེན་པོ་དང ། བཟའ་བ་སྣ་ཚོགས་དང་ལྡན་པ། མེ་ཏོག་དང ། སྤོས་དང ། མར་མེ་དང ། དྲི་དང ། བདུད་རྩི་ལྔ་དང ། ཆང་དང ། རྒྱལ་མཚན་དང ། བ་དན་ལ་སོགས་པ་དང ། གདུགས་དང ། རྡུལ་ཡབ་ཀྱིས་བརྒྱན་པའི་གཏོར་མ་འདི་སྣོམས་ཤིག་།དམ་ཚིག་འདི་སྲུངས་ཤིག་།བདག་གི་དོན་ཐམས་ཅད་ཀྱི་གྲོགས་ཀྱིས་ཤིག་།རྒྱུད་འདི་ལ་གང་ཞིག་དད་པ་ཡོད་པ་དེ་རྣམས་བསྲུང་བའི་དོན་དུ་གསོལ་ཅིག་།འཐུང་ཞིག་།རོལ་ཅིག་།ཧཱུཾ་ཧཱུཾ་ཕཌ་ཕཌ་སཝཱཧཱ། བྷ་གའི་ཕྱག་རྒྱ་མགོ་སྟེང་བཅའ། །ཕྱག་རྒྱ་འདི་ཡིས་གཏོར་མ་སྦྱིན། །རྐང་པ་མནན་ཅིང་སྟེང་དུ་བལྟ། །ཧ་ཧའི་སྒྲ་ནི་སྒྲོག་བྱེད་ཅིང ། །རུས་པའི་རྒྱན་དང་ལྡན་པ་ཡི། །ཧེ་རུ་ཀར་ནི་བདག་ཉིད་བསམ། །བརྒྱ་བྱིན་འདྲ་བའི་ལྷ་མ་ཡིན། །མདུན་དུ་བྱུང་བར་གྱུར་ན་ཡང ། །དེ་ལ་འཇིགས་པར་མི་བྱ་སྟེ། །གཞན་རྣམས་སྨོས་ཀྱང་ཅི་ཞིག་དགོས། །དཔལ་ཕྱག་རྒྱ་ཆེན་པོའི་ཐིག་ལེ་ལས། །གཏོར་མའི་ལས་ཞེས་བྱ་བའི་ལེའུ་སྟེ་ཉི་ཤུ་རྩ་གཉིས་པའོ། །
465b
ཚོགས་ཀྱི་འཁོར་ལོའི་ཆོ་ག་ནི། །ཉོན་ཅིག་ལྷ་མོ་སྤྱན་བཟང་མོ། །གསང་བ་མཆོག་གི་དགྱེས་པ་ཡི། །དེ་རུ་འཁོར་ལོ་རབ་ཏུ་བསྐོར། །ཐམས་ཅད་དམ་ཚིག་གཅིག་པ་དང ། །ཐམས་ཅད་རྟོག་པ་མེད་པ་དང ། །སེར་སྣ་ང་རྒྱལ་སྤངས་པ་དང ། འདོད་ཆགས་ཞེ་སྡང་བྲལ་བ་དང ། །བླ་མ་ལ་གུས་བསམ་གཏན་ལྡན། །ཕྲག་དོག་མེད་ཅིང་རྩེ་གཅིག་པ། །དེ་ལྟར་དགྱེས་པ་ཚོགས་འཁོར་ལོ། །མཁས་པས་འབད་དེ་གཞུག་པར་བྱ། །དེ་ལྟར་མིན་ན་སྐྱོན་ཡོད་དེ། །འཁོར་ལོ་ཡང་ནི་འགྲུབ་མི་འགྱུར། །ཐབས་དང་མཉམ་པ་ཤེས་རབ་མ། །ཉི་ཤུ་རྩ་ལྔ་ཡན་ཆད་སྤང ། །ཐབས་རེ་ཤེས་རབ་རེ་རེར་ལྡན། །ཀུན་ལ་གཅིག་ནི་མི་མཛེས་སོ། །དང་པོ་ཡིད་འཕྲོག་དགྱེས་པ་ཡི། །མེ་ཏོག་དཀྱིལ་འཁོར་བྲི་བར་བྱ། །དེ་རུ་སྣ་ཚོགས་མཆོད་པ་ནི། ། རྩེ་གཅིག་གིས་ནི་ལེགས་པར་བྱ། །བླ་མ་དངོས་པོ་ཐམས་ཅད་ཀྱིས། །དད་པ་ཡིས་ནི་མཆོད་པར་བྱ། །ཚོགས་པ་ལ་ཡང་འབད་དེ་མཆོད། །མཉམ་ཉིད་བལྟ་བ་སེམས་ཀྱིས་སོ། །ཇི་ལྟར་བླ་མས་ཕྱག་རྒྱ་འཛིན། །ཚོགས་ཀྱིས་ཀྱང་ནི་དེ་ལྟར་རོ། །རྩེ་གསུམ་ཡང་ན་རལ་གྲིས་བསད། །ནམ་ཕྱེད་ན་ནི་བླང་བར་བྱ། །སྣ་ཚོགས་མཆོད་པའི་མཆོད་སྦྱིན་གྱིས། །མཆོད་ནས་བླ་མའི་གདན་བྱའོ། །དབུས་སུ་བདག་ཉིད་ཧེ་རུ་ཀར། །ཕྱག་རྒྱ་ཆེན་པོ་དང་ལྡན་པ། །དེ་ནི་བླ་མ་ཞེས་སུ་བསྟན། །ལེགས་དགྱེས་དབང་མོ་བདག་ཉིད་དོ། །ཚོགས་ཀྱི་འཁོར་ལོའི་དབུས་སུ་ནི།
466a
༄#། །མཆིལ་མ་ལ་སོགས་དོར་མི་བྱ། །གཏམ་ཡང་སྨྲ་བར་མི་བྱ་སྟེ། །རྐང་པ་ལ་སོགས་བརྐྱང་མི་བྱ། །ཕྱག་རྒྱའི་བརྡ་དང་གསང་བའི་སྐད། །དེ་ལ་འབད་པས་བྱ་བའོ། །བཀའ་ལུང་མེད་ན་གར་དང་གླུ། །ནམ་ཡང་ཚོགས་ཀྱིས་མི་བྱའོ། །དུམ་བུ་གཅིག་པའི་མཚན་ལྡན་སྣོད། །བླ་མའི་མདུན་དུ་གཞག་པར་བྱ། །ཡང་ན་དུམ་བུ་གསུམ་པ་ནི། །ལྷ་ཡི་ཆང་གིས་བཀང་བར་བྱ། །སྣ་ཚོགས་མཆོད་པའི་མཆོད་སྦྱིན་གྱིས། །སྣོད་དེ་ལ་ནི་མཆོད་པར་བྱ། །ཚོགས་ཀྱི་འཁོར་ལོ་སྣོད་གཞན་ནི། །མེ་ཏོག་རྒྱན་གྱིས་བརྒྱན་པའོ། །གཟའ་བ་སྣ་ཚོགས་དང་ལྡན་པའི། །དང་པོ་གཏོར་མ་ཆེན་པོ་བཞིན། །ཇི་ལྟར་དགའ་བ་མེད་མི་འགྱུར། །རྗེ་མང་ཇེ་མང་བཏུང་བར་བྱ། །ཡང་དང་ཡང་དུ་ཕྱག་བྱ་ཞིང ། ཕྱག་རྒྱ་བཅིངས་ལ་བཏུང་བར་བྱ། །དེ་ནས་བཟའ་བ་ཐམས་ཅད་ཀུན། །དག་པར་བྱས་ནས་བཟའ་བར་བྱ། །ལྟེ་བར་རི་བོང་འཛིན་དཀར་དང ། །རྟ་མགྲིན་མཆོག་དང་ལྡན་པ་དང ། །ཧཱུཾ་གིས་རྡོ་རྗེས་དཀར་ལེགས་སྦྱངས། །ཱ་ལི་ས་རབ་ཏུ་རྟོགས་བྱས་ཤིང ། །ོཾ་གྱི་འོད་ཀྱི་འབར་འགྱུར་བར། །བྱིན་གྱིས་བརླབས་ནས་མངོན་པར་བཟའ། །རང་ལྕེ་པད་འདབ་དབུས་མ་རུ། །ཧཱུཾ་བྱུང་རྡོ་རྗེ་དཀར་པོ་དགོད། །ཕྱི་ནང་བདག་ཉིད་ཐམས་ཅད་ཀུན། །འཁོར་ལོ་དེ་ཡིས་རབ་ཚིམ་བྱ། །འཁོར་ལོ་བཞི་ཡི་དབྱེ་བ་ཡིས། །འཁོར་ལོ་
466b
མ་ལུས་ཀུན་སྦྱང་བྱ། །དཔའ་བོའི་ལྕེ་ལ་དཔའ་བོ་ནི། །དཔའ་བོའི་དཔའ་བོ་དབུས་སུའོ། །དཔའ་བོའི་ཁ་ལ་དཔའ་བོ་ནི། །མཆོད་པའི་དུས་སུ་མཆོད་པར་བྱ། །ལྟེ་བ་གཉིས་ཀྱི་དབུས་སུ་ནི། །དཔའ་བོ་ཀུན་གྱི་མཆོག་གི་གནས། །དཔའ་བོ་རྣམས་ཀྱི་མཆོག་གི་དོན། །དཔའ་བོ་དེ་ཀུན་མི་ཤེས་ན། །དེ་ཡིས་ཚོགས་ཀྱི་འཁོར་ལོ་ནི། །རྣམ་ཡང་ཐོབ་པར་མི་འགྱུར་རོ། །གང་ཅི་དེ་ལྟའི་རྣམ་པ་ཡིས། །ཕྱི་དང་ནང་གི་བྱ་བའོ། །དེ་ལྟར་བྱས་ན་དངོས་གྲུབ་འཐོབ། །མཁའ་འགྲོ་མ་ཡང་ལྷན་ཅིག་འདུས། །གལ་ཏེ་གཞན་མའི་རྣལ་འབྱོར་མ། །བརྟག་པའི་དོན་དུ་འོང་འགྱུར་ན། །དེ་ལ་རེ་ཞིག་ཐེ་ཚོམ་ནི། །མཁས་པས་ནམ་ཡང་མི་བྱའོ། །གཏམ་ནི་སྨྲ་བར་མི་བྱ་སྟེ། །ཕྱག་རྒྱས་སྙུན་ནི་གསོལ་བར་བྱ། །གང་ཞིག་དེ་རུ་བླ་མ་ཡིས། །གསུང་བ་དང་ནི་མཛད་པའང་དེ། །ཡང་ན་ལས་ཀྱི་རྡོ་རྗེས་ནི། །ཐམས་ཅད་དོན་ཀུན་བྱེད་པའང་རུང ། །ཇི་ལྟར་རྡོ་རྗེ་སེམས་དཔའ་རོལ། །ལས་ཀྱི་རྡོ་རྗེ་ས་དེ་ལྟར་རོ། །སྣ་ཚོགས་གཟུགས་ཀྱིས་རྣལ་འབྱོར་མ། །ཡང་དང་ཡང་ནི་འོང་འགྱུར་ན། །དེ་རུ་རེ་ཞིག་འཇིགས་མི་བྱ། །དཔའ་བོ་ཡི་ནི་གཟུགས་སུ་སྤྱོད། །བསྡམ་པ་ལ་ལར་བྱེད་པ་ནི། །དེ་ལ་ཆད་པ་རབ་རྟོགས་བྱ། །ཡང་དག་དགའ་བ་བྱུང་གྱུར་ན། །ཐར་པའི་རྒྱུ་ཕྱིར་གར་བྱའོ། །འོན་ཀྱང་རྡོ་རྗེ་རྐང་པའི་གར། །ཇི་ལྟར་རྣལ་འབྱོར་མ་མཉེས་པའོ། །མའམ་སྲིང་མོ་ཆུང་མ་དང ། །སྒྱུག་མོ་དང་ནི་མནའ་མ་ལ། །ཤེས་རབ་
467a
༄#། །ཐབས་ཀྱིས་ཆོ་ག་ཡིས། །འབད་དེ་ལ་མཆོད་པར་བྱ། །དེ་རྣམས་མཆོད་པས་དངོས་གྲུབ་ནི། །གང་ཞིག་སེམས་ལ་བསམ་པ་ཡོད། །ལྷག་པའི་གཏོར་མ་བཟུང་ནས་ནི། །དགོན་པ་ཆེན་པོར་གཏང་བར་བྱ། །གལ་ཏེ་དེ་རུ་རྣལ་འབྱོར་མ། །བལྟ་བ་དེ་ནི་སྟོན་བྱེད་ན། །དེ་རྣམས་མཚན་ཉིད་འདི་ལྟ་བུ། །མཁས་པས་འབད་པས་ཤེས་པར་བྱ། །གང་ཞིག་བཞིན་གྱི་དཀྱིལ་འཁོར་ནི། །ཀུན་ཏུ་ཟླུམ་པོར་སྣང་འགྱུར་ཞིང ། །ཁ་ནི་སྨྲ་རྟག་པར་ཡོད། །སྤུ་དང་མཚན་མ་རིང་བ་དང ། །གོས་བཟང་གཙང་ཞིང་ཞི་བ་དང ། །མི་གཡོ་བདེན་པར་སྨྲ་བ་དང ། །རྟག་ཏུ་དམ་པའི་ཆོས་ལ་དགའ། །དཔའ་བོའི་སྲིང་མོ་དེ་ནི་དྲན། པདྨའི་ཕྱག་རྒྱ་སྦྱིན་པར་བྱ། །དེ་བཞིན་རུས་སྤལ་ཕྱག་རྒྱའོ། །ཕགས་པ་བུམ་པ་སྤྱི་བླུགས་ཉིད། །ཕྱག་རྒྱའི་ལན་དུ་ཤེས་པར་བྱའོ། །དེ་ནི་ཚེས་བཅུའི་རེས་དག་ལ། །ཁྱིམ་དུ་པདྨ་འབྲི་བར་འགྱུར། །ལླ་མ་ཡི་ནི་བུད་མེད་ཀྱི། མཚན་ཉིད་གྱུར་བ་འདི་ཉིད་ནི། །མ་མཆུ་འཕྱང་ཞིང་མིག་དཀྱུས་རིང ། །མིག་ནི་དམར་ཞིང་སེར་སྐྱ་གནས། །ཕྱུག་ཅིང་སྐལ་བཟང་ཡོན་ཏན་ཅན། །སེར་ཞིང་ཙམ་པ་ལྟ་བུར་སྣང་།ཤིན་ཏུ་རིང་དང་ཐུང་བའང་མིན། །སྣ་ཚོགས་པ་ཡི་གོས་ལ་དགའ། །དབྲལ་བར་རི་མོ་གསུམ་ཡོད་ཅིང ། །མཚན་ངན་གྱེན་དུ་བལྟས་པ་ལས། །རྒོད་ཅིང་དགའ་བ་ཉིད་དག་དང ། །ལམ་ནི་རྣམ་ཕར་མནན་ཅིང་གནས། །གཡུལ་དུ་
467b
ཤི་བ་རྣམས་ཀྱི་ནི། །གཏམ་དག་ལ་ནི་རྟག་ཏུ་དགའ། །དེ་ལྟར་རབ་དྲེགས་མཐོང་ན་ནི། །རྩེ་གསུམ་ཕྱག་རྒྱ་བསྟན་པར་བྱ། །རྐང་པ་གཡོན་པ་བསྐུམ་པ་ཡིས། །གར་ཉིད་ཀྱང་ནི་བསྟན་པར་བྱ། །གཡོན་པ་དག་ནི་ཡོངས་བཟློག་པ། །ཕྱག་རྒྱའི་ལན་ནི་ཡིན་པར་བཤད། །ཚེས་བཅུ་དང་ནི་བཅོ་བརྒྱད་ནི། །དེ་ཡི་དུས་ཚིག་ཡིན་པར་བསྟན། །ཁྱིམ་དུ་མདུད་རྩེ་གསུམ་པ་ཡང ། ། བྲིས་ནས་དེ་ནི་རྟག་ཏུ་མཆོད། །འཇིག་རྟེན་དབང་ཕྱུག་བླ་མ་ཡི། །མཚན་ཉིད་གྱུར་བ་འདི་དག་ཡིན། །གང་གི་མཁུར་ཚོགས་དག་ཏུ་ནི། །ཁུང་བུར་སྣང་བར་གནས་གྱུར་ཅིང ། །དེ་བཞིན་དམར་སེར་ལག་པ་དམར། །མིག་ནི་ལྗང་སེར་དག་ཏུ་སྣང ། །སྐྲ་ནི་དེ་བཞིན་འཁྱིལ་པ་དང ། །མགོ་ལ་དར་ནི་བཅིངས་བ་དང ། །དཔྲལ་བ་ལ་ནི་གསལ་བར་ནི། །གཞུ་ཡི་དངོས་པོ་རབ་ཏུ་གནས། །དེ་བཞིན་མགྲིན་རིང་སྣ་རིང་བ། །རྟག་ཏུ་གོས་དམར་ལ་དགའ་ཞིང ། །དགོད་ཅིང་གླུ་ནི་ལེན་པ་དང ། །ལན་འགའ་ཞིག་ནི་ཁྲོ་བ་དང ། །སེམས་ནི་རྣམ་པར་དག་གཡོ་བ་དང ། །རྩོད་པ་ལ་ནི་དགའ་བ་སྟེ། །འདི་འདྲའི་རབ་དྲེགས་མཐོང་ནས་ནི། །ཤ་ག་ཏིའི་ཕྱག་རྒྱ་བསྟན་པར་བྱ། །གཉིས་པ་ཉིད་ནི་འབད་པ་ཡིས། །དྲིལ་བུའི་ཕྱག་རྒྱ་བསྟན་པར་བྱ། །གཡོན་གྱི་ཕྱོགས་སུ་ལྡོག་པ་ནི། །ཕྱག་རྒྱའི་ལན་ནི་ཡིན་པར་བསྟན། །ཐུང་ཞིང་བྱིན་པ་སྡོམ་པ་དང ། །རྟག་ཏུ་གོས་སེར་ལ་དགའ་ཞིང ། །ཕྲག་པ་དག་ནས་གོས་ཀྱང་འཕྱང ། །དེ་འདྲའི་བུད་མེད་མཐོང་ནས་ནི།།
468a
༄#། །འཁོར་ལོའི་ཕྱག་རྒྱ་བསྟན་བྱ་ཞིང ། །འབད་པ་ཡིས་ནི་གཉིས་པ་ཡང ། །དུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་ལྡོག་པ་ནི། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དེ་ཡི་དུས་ཡིན་ཏེ། །དེ་ཡི་ཁྱིམ་དུ་རྡོ་རྗེ་འབྲི། །ཧེ་རུ་ཀ་དཔལ་བླ་མ་ཡི། །མཚན་ཉིད་གྱུར་པ་འདི་དག་ཡིན། །ལུས་ཀུན་ལ་ནི་བ་སྦུ་ཡོད། །མིག་ནི་ནག་ཅིང་སེར་བ་དང ། །སྦོམ་ཞིང་རྣམ་འགྱུར་མི་བཟད་པ། །བཞིན་འཕོ་ཆེན་ཞིང་ཁ་ཆེ་ལ། །མཆུ་ནི་འཕྱང་ཞིང་ཁ་དོག་ནས་།མི་ག་ཟླུམ་སྣ་ནི་ཉག་པ་དང ། །རྟག་ཏུ་གླུ་དང་གར་ལ་མཁས། །སྤྲིན་གྱི་གཟུགས་ཅན་གསུམ་པ་ཆེ། །འདི་འདྲའི་རབ་དྲེགས་མཐོང་ནས་ནི། །གླུ་ཡི་ཕྱག་རྒྱ་བསྟན་པར་བྱ། །གཉིས་པ་ཡང་ནི་འབད་པ་ཡིས། །མདུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་ལྡོག་ན་ནི། །ཕྱག་རྒྱའི་ལན་ནི་ཡིན་པར་བཤད། །ཚེས་གྲངས་བཅུ་གཅིག་དེ་ཡི་དུས། །ཁྱིམ་དུ་མཆེ་བ་འབྲི་བྱེད་པ། །རྡོ་རྗེ་ཕག་མོ་ལཱ་མ་ཡི། ། མཚན་ཉིད་གྱུར་པ་འདི་དག་ཡིན། །མཚན་མོའི་དུས་སུ་ལམ་དུ་ནི། །དེ་ལྟར་འབད་དེ་ཤེས་པར་བྱ། །དེ་ཀུན་འཇིགས་པར་ཡོངས་མི་བྱ། །ཕྱག་རྒྱ་རྣམས་ཀྱིས་མཉེས་པར་བྱ། །ཇི་ལྟར་བསམ་པ་བཞིན་དུ་ནི། །མཉེས་ནས་དངོས་གྲུབ་སྟེར་བའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། །ཚོགས་ཀྱི་འཁོར་ལོའི་ཆོ་ག་དང ། །མཁའ་འགྲོ་མའི་ཡན་ལག་གི་མཚན་ཉིད་
468b
ཅེས་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གཞན་ཡང་བཤད་བྱ་བ། །དེ་རུ་ལས་ནི་རབ་ཡིན་ཏེ། །གང་ཞིག་བསྟེན་པ་ཙམ་གྱིས་ནི། །མྱུར་དུ་དངོས་གྲུབ་ལ་འཇུག་པ། །ཡན་ལག་དྲི་ཞིམ་ཤིན་ཏུ་འཇམ། །རྡུལ་ནི་དྲི་ཞིམ་གྱུར་པ་དང ། །དོ་ཚ་ཆེ་ཞིང་བདེན་པར་སྨྲ། །ཡུན་རིང་མིག་ནི་མི་འཛུམ་པ། །ཁྲོ་བ་མེད་ཅིང་སྙིང་རྗེ་ཆེ། །སྐད་ཅིག་འཇམ་པར་སྨྲ་བ་དང ། །སྐྱེ་བ་བདུན་ནམ་ཡང་ན་གསུམ། །འབད་པ་ཡིས་ནི་བཙལ་བར་བྱ། །བསོད་ནམས་དང་ལྡན་སེམས་པ་ཡི། །དེས་ནི་ལག་ཏུ་རྙེད་པར་འགྱུར། །དེ་ཡང་ཟོས་པར་བྱས་ནས་ནི། །དེ་ཡི་སྙིང་གར་རོ་ཙ་ན། །རྩེ་གཅིག་པ་ཡི་སེམས་ཀྱིས་ནི། །ཧེ་རུ་ཀ་ཡི་སྔགས་ལན་བདུན། །བཟླས་ནས་འབད་པས་ཐིག་ལེ་བྱ། །འཕྲལ་དུ་སྟེང་དུ་ལྡིང་འགྱུར་ཞིང ། །དཔག་ཚད་བྱེ་བར་འགྲོ་བའོ། །དེ་ནི་ཟོས་པ་ཙམ་གྱིས་ནི། །ཁམས་གསུམ་ཡེ་ཤེས་ཅན་དུ་འགྱུར། །དཔག་ཚད་བྱེ་བ་ལྔ་བཅུར་ནི། །ཉིན་མཚན་ཀུན་ཏུ་འགྲོ་བའོ། །ལྷ་ཡི་ལུས་ཀྱང་ཐོབ་འགྱུར་ཏེ། ། བསྐལ་བ་སྟོང་དུ་གནས་པར་འགྱུར། །བརྒྱ་བྱིན་གྱིས་ནི་སྟོབས་འདྲའོ། །བུད་མེད་བལྟས་པ་ཙམ་གྱིས་ནི། །ཇི་ལྟར་མེ་ཡིས་མར་བཞུ་ལྟར། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལས་ཀྱི་ཆོ་ག་ཞེས་བྱ་བའི་ལེའུ་སྟེ་ཉི་ཤུ་རྩ་བཞི་པའོ།། །།བཅོམ་ལྡན་འདས་ཡེ་ཤེས་རྒྱལ་དབང་པོ། །བདག་ལ་ཐེ་ཚོམ་སྐྱེས་པ་མཆིས། །སྔགས་པ་སྔགས་རྣམས་འགྲུབ་
469a
༄#། །དོན་དུ། །བཟླས་བརྗོད་དེ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །རྣལ་འབྱོར་རྣམས་ཀྱིས་བཟླས་དང་སྒོམ། །ཉོན་ཅིག་ལྷ་མོ་འགྲོ་བ་མ། །སྲོག་དང་རྩོལ་པ་མཉམ་བྱས་ནས། །སྲོག་དང་རྩོལ་བ་བཟའ་བར་བྱ། །སྲོག་དང་རྩོལ་བར་འགོག་བྱས་ཏེ། །སྲོག་དང་རྩོལ་བ་ལ་བལྟའོ། །པདྨའི་ཁ་སྦྱར་སྦྱོར་བ་ལས། ། ཤེས་རབ་ཐབས་ཀྱི་སྤྱད་པར་བྱ། །ལྟེ་བ་གཉིས་ཀྱི་ནམ་མཁའ་ལས། །ཁབ་རྩེ་དབྱེ་བ་མེད་པ་ཡི། །ཡི་གེ་ཤེལ་གྱི་འོད་ལྡན་པ། །ཱ་ལིའི་ཕྲེང་བ་དྲེན་པར་བྱ། །ཡི་གེ་རེ་རེ་ཡིད་ཀྱིས་ནི། ། རྟག་ཏུ་རྒྱུན་མི་འཆད་པར་བཟླས། །འཁོར་ལོ་རྣམས་ཀྱི་ལྟེ་བའི་ནང ། །བཟློག་པ་བྱས་ནས་དྲང་བར་བྱ། །ཧ་ཧའི་སྒྲ་ནི་འཇམ་པ་ཡིས། །མགྲིན་པ་ཡར་རྐང་མགུལ་མེད་པས། །ནང་གི་རེག་བྱ་འཇམ་པ་ཡིས། །སྙིང་གེ་ཁོ་ནའི་གནས་སུ་བྱ། །ཤེས་རབ་གཏུམ་མོའི་གཟུགས་སུ་གྲགས། །རྣམ་པ་དང་བྲལ་བ་དེ་སྦྱིན་མ། །རེག་བྱ་མེད་པའི་རེག་སྐྱེད་མ། །དེ་ལྟའི་ཤེས་རབ་དང་ལྡན་པ་གཅིག་།རྡོ་རྗེ་སྐྱིལ་ཀྲུང་སེམས་ཀྱིས་ནི། །སེམས་ནི་གཡོ་བ་མེད་པར་བྱ། །ཐིག་ཚུལ་ཆར་ཡང་དང་བྲལ་བ། །ཐིག་ཚུལ་ཆར་ཡང་བདག་ཉིད་དང ། །ཐིག་ལེ་ཚུལ་དང་ཆར་ཡང་ནང ། །རྣལ་འབྱོར་གྱིས་ནི་དེར་སེམས་བྱ། །ཆར་ཡང་གི་ནི་ནང་དུ་སེམས། །ཡང་ནི་ཚུལ་གྱི་ནང་དུ་སེམས། །ཚུལ་ནི་ཐིག་ལེར་འགྲོ་བར་བསྒོམ། །ཐིག་ལེ་ཡང་ནི་སྟོང་པར་འགྲོ། །སྟོང་པར་རང་བཞིན་ཞེས་སུ་
469b
བསྟན། །གསུམ་དང་བྲལ་བ་མ་སྐྱེས་མཆོག་།འདི་ཡི་ཆོ་གའི་ཐབས་ཀྱིས་ནི། །གང་ཞིག་རྩེ་གཅིག་གིས་ནི་བཟླས། །དེས་ནི་དངོས་གྲུབ་ཆེན་པོ་འཐོབ། །ཟླ་བ་གཅིག་གི་སྔོན་མི་ཟ།། དཔལ་ཕྱག་རྒྱ་ཆེན་པོའི་ཐིག་ལེ་ལས། །རང་བཞིན་གྱི་བཟླས་པ་ཞེས་བྱ་བའི་ལེའུ་སྟེ་ཉི་ཤུ་རྩ་ལྔ་པའོ།། །།བཅོམ་ལྡན་འདས་དཔའ་བོ་དཔའ་དབང་ཕྱུག་།སྔར་ནི་ཁྱོད་ཀྱིས་དུས་བཀའ་སྩལ། །ཐམས་ཅད་མཁྱེན་པ་མཆོག་དབང་ཕྱུག་།དེ་ཡི་དོན་ནི་བཤད་དུ་གསོལ། །དེ་ཡི་དུས་ཀྱི་དོན་འདི་ནི། །སྤྱན་རིང་ལྷ་མོ་ཁྱོད་ཉོན་ཅིག་།དུས་ནི་ཆར་ཡང་ཞེས་སུ་བཤད། ། དེ་རྣམས་ཀྱི་ནི་སྦྱོར་བའི་དོན། །སྦྱོར་བ་བཞི་ཡང་བཞི་བཞིར་གྱིས། །ཡན་ལག་གཅིག་གི་སྤངས་པའོ། །རྒྱལ་བ་རྣམས་ཀྱིས་རྙེད་དཀའ་བ། །དེ་ཡི་སྐྱེ་བ་བདག་གིས་བཤད། །རྟེན་གྱིས་སྲོག་གི་དབྱིག་པ་ལ། །དེ་རུ་སྦྱོར་བ་བསྟན་པའོ། །སྲོག་གི་དབྱིག་པ་དབུས་སུ་གནས། །ཕྲ་བའི་ཕྲ་བ་ཡང་དག་མཆོག་།སུམ་ཅུ་རྩ་གཉིས་མདུད་དང་ལྡན། །དེ་ནི་ཕྱི་རོལ་ནང་དུ་མིན། ། མདུད་པ་ཡི་ནི་གནས་སུ་སྦྱོར། །དེ་ནི་ཆར་ཡང་རྣམས་ཀྱི་དོན། །ཆར་ཡང་སྦྱོར་བ་ནང་དུ་མིན། །ནང་དུ་དེ་ནི་རྟོག་མེད་མ། །མདུད་པའི་ནང་དུ་གཡས་དང་གཡོན། །རོ་མ་དང་ནི་རྐྱང་མ་གནས། ། མདུད་པ་གཉིས་དབུས་གཅིག་གཅིག་སྟེ། །སུམ་ཅུ་གཉིས་ཀྱིས་བཅུ་དྲུག་དྲང ། །བདེ་ཆེན་འཁོར་ལོ་མགྲིན་པ་གནས། །ལྟ་བའི་སྟེང་ནི་ཡན་ཆད་དོ། །སོར་བཅུ་གཉིས་ཀྱི་སྐུད་པ་ནི། །མདུད་
470a
༄#། །པ་མེད་པ་གཅིག་པུའོ། །དེ་འོག་མདུད་པ་དང་ལྡན་པ། །རླུང་གི་འཁོར་ལོ་ཡན་ཆད་དོ། །སྤྱི་བོ་ནས་ནི་མགྲིན་ཡན་ཆད། །དེ་ཙམ་སྦྱོར་བ་བཞི་ཡིན་ནོ། །མགྲིན་པའི་འོག་ནས་སྙིང་གའི་གནས། །དེ་ཙམ་གཞན་ནི་བཞི་ཡིན་ནོ། ། །སྙིང་གའི་གནས་ནས་ལྟེ་བའི་བར། །དེ་ཙམ་གཞན་ཡང་བཞི་ཡིན་ནོ། །ལྟེ་བ་ནས་ནི་ནོར་བུའི་མགྲིན། །དེ་ཙམ་གཞན་ནི་བཞི་ཡིན་ནོ། །དེ་ནི་སྦྱོར་བ་བཞི་རུ་བཤད། །ཆར་ཡང་དགའ་བ་དང་ལྡན་པ། །འདོད་དང་རྡུལ་དང་འདར་དང་སྟོབས། །འགྲོ་དང་བདུད་རྩི་ཡང་ཡིན་ཏེ། །དགའ་དང་པདྨོ་དེ་བཞིན་ཏེ། །དེ་ནི་དང་པོའི་སྦྱོར་བ་བཞི། །རྒྱས་དང་རྡུལ་དང་མདུད་དང་མྱོས། །འབྱུང་བ་དང་ནི་མཚན་མོ་དང ། །མཆོག་གི་དགའ་དང་རོ་ཡིན་ཏེ། །དེ་ནི་གཉིས་པའི་སྦྱོར་བའོ། ། འབར་དང་ཞི་དང་ཐིག་ལེ་གནས། །མྱོས་དང་འོག་མ་དེ་བཞིན་ནོ། །དགའ་བྲལ་དགའ་བ་འགུགས་པ་སྟེ། །དེ་ནི་གསུམ་པའི་སྦྱོར་བའོ། །ུ་ཏ་འདབ་མ་ཚུལ་རླུང་མ། །གཉིད་དང་མེ་མ་དེ་བཞིན་ནོ། །ལྷན་ཅིག་སྐྱེས་དགའ་མ་སྐྱེས་པ། །དེ་ནི་སྦྱོར་བ་བཞི་པའོ། །རིན་ཆེན་སྐེ་རུ་ཕྱིན་ཙམ་ན། །དེ་ནི་ཟླ་བ་གང་བར་དྲན། །དགའ་བ་ཡོད་པའི་སྦྱོར་བ་ནི། །དེ་ནི་ཤར་བར་ཤེས་པར་བྱ། །བཅོ་ལྔ་པ་ནི་འབྱུང་བའི་རྒྱུ། །བཅུ་དྲུག་པ་ལ་རྟོག་མི་བྱེད། །སྐྱེ་དང་འཇིག་པ་མེད་པའི་ཕྱིར། །དེ་ལ་སྦྱོར་བ་མེད་པའོ། །ཆར་ཡང་རྣམ་སྐྱེད་སྦྱོར་བ་ནི། །རྩེ་
470b
གཅིག་གིས་ནི་ཁྱོད་ཉོན་ཅིག་།བཅུ་དྲུག་དེ་བཞིན་ཉི་མ་དང ། །གང་དུ་གཉིས་ཀ་སྦྱོར་བར་འགྱུར། །དེ་ལམ་སྐྱེས་ཆ་ཞེས་བྱ། །དེ་རང་ངོ་བོ་རང་བཞིན་ནོ། །བཅུ་དྲུག་དེ་བཞིན་ཉི་མ་དང ། ། ཆར་ཡང་འབྱུང་བ་རྒྱུ་ཡིན་ནོ། །དེ་ནི་འབྱུང་བ་ཀུན་གྱི་ཕ། །ཐབས་དང་ཤེས་རབ་མཉམ་པར་ལྡན། །བཅུ་དྲུག་པ་ནི་ཤེས་རབ་ཡིན། །ཉི་མ་ཐབས་སུ་བསྟན་པའོ། །བཅུ་དྲུག་ཕན་ཆད་ཤེས་པར་བྱ། །ཉི་མ་མཆོག་ཏུ་དྲན་པའོ། །དེ་ཉིད་དབུས་བཞུགས་རང་བཞིན་ནི། །དག་གི་ལམ་གྱིས་རྙེད་པར་དཀའ། །དེ་ལྟ་བུ་ཡི་དུས་ཀྱི་དོན། །ཡང་དག་པར་ནི་བདག་གིས་བཤད། །འདི་ལས་གཞན་མཆོག་གསང་བ་ནི། །ཞལ་བཟང་ཡང་དག་མེད་པའོ། །འབད་པ་ཡིས་ནི་སྦ་བར་བྱ། །སུ་ལ་ཡང་ནི་མི་སྦྱིན་ནོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། །དུས་ཀྱི་དོན་གྱི་རང་བཞིན་གྱི་དོན་ཞེས་བྱ་བའི་ལེའུ་སྟེ་ཉི་ཤུ་རྩ་དྲུག་པའོ།། །།སྔར་སྦས་སྔགས་ཀྱི་གསལ་བ་དེ། །ཉོན་ཅིག་ལྷ་མོ་བདག་གིས་བཤད། །དད་ལྡན་རྣམས་ཀྱིས་ཤེས་དོན་དུ། །དད་པ་མེད་ལ་ནམ་ཡང་མིན། །ཧཱ་སཝཱ་ཊ་པ་ཧཱུཾ་ཧཱུཾ་ཨ་བྷ་ཉིས་ནི་པཱ་ལ་ཀ་ཧཱ་མ་ས་ཧཱཊྚ་ཊྚཱ་རཱ་ཡ་ཛ་བི་ཛ་ཡ་རཱ་ཤཝ་དྷེ་ཀོ་ཧཱ་མ་ཨོཾ། །གསང་ཆེན་བོ་ཡི་སྔགས་འདི་ནི། ཐམས་ཅད་དོན་ཀུན་གྲུབ་བྱེད་པ། །ཊ་ཕ་ཧྲཱིཾ་ཧྲཱི་གྲི་ཛོ་ཏེ་ཛྲ་བ་ཨོཾ། །ཉེ་བའི་སྙིང་པོའི་སྔགས་ཆེན་པོ། །ཐམས་ཅད་ཀུན་གྱི་དབང་དུ་བྱེད། །ཧཱ་སཝཱ་ཊ་ཕ་ཧཱུཾ་ཧཱུཾ་རི་ཤཝོ་ཡེ་མ་ཏ་ར་སུ་ཨོཾ། །ཁྱོད་ཀྱི་སྙིང་པོའི་
471a
༄#། །སྔགས་དབང་པོ། །གྲངས་མེད་ཡོན་ཏན་དང་ལྡན་ནོ། །སྔགས་པའི་ཡེ་ཤེས་གྲུབ་དོན་དུ། །གསང་བའི་སྔགས་ནི་གསལ་བྱས་སོ། །ཧཱ་སཝཱ་ཊ་ཕ་ཇལིཾ་བིཾ་ཀིཾ་ཨོཾ། ། ཁྱོད་ཀྱི་ཉེ་བའི་སྙིང་པོ་འདི། །སངས་རྒྱས་ཀྱིས་ཀྱང་རྙེད་དཀའ་བ། །བདག་གིས་དེ་ཡི་སྔགས་ཀྱིས་ནི། །གྲངས་མེད་དབང་དུ་བྱས་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། སྦས་པའི་སྔགས་གསལ་བ་ཞེས་བྱ་བའི་ལེའུ་སྟེ་ཉི་ཤུ་རྩ་བདུན་པའོ།། །།ཡང་དམ་དུ་འཁྱུད་པ་བྱས་ནས་སྐད་སྙན་པས་བཅོམ་ལྡན་འདས་མ་ལེགས་དགྱེས་དབང་ཕྱུག་མས་འདི་སྐད་ཅེས་ཞུས་སོ། །བཅོམ་ལྡན་ཡེ་ཤེས་མཁའ་འགྲོ་ཉི། །མི་ཤེས་མུན་པ་འཇིག་བྱེད་པ། །གསང་བ་ཀུན་ནི་གསུངས་པ་ལས། །ཕྱག་རྒྱ་ཆེན་པོ་དེ་མ་གསུངས།། ཕྱག་རྒྱ་ཆེན་པོ་ཇི་ལྟར་ལགས། །རྒྱལ་བའི་དབང་ཕྱུག་ཡང་དག་གསུངས། །བཅོམ་ལྡན་འདས་ཀྱིས་བཀའ་སྩལ་པ། །རབ་ཏུ་བདེ་བའི་རྣམ་པ་མཆོག་།ཉོན་ཅིག་ལྷ་མོ་ཕྱག་རྒྱ་ཆེ། །ཕྱག་རྒྱ་ཆེན་པོ་གསང་བ་ཆེ། །བརྗོད་མེད་མི་ཟད་མ་སྐྱེས་པ། །ཐམས་ཅད་གཟུགས་ཅན་གཟུགས་དང་བྲལ། །གཟུགས་མེད་གཟུགས་ཀྱི་བདག་ཉིད་མཆོག་།སྦོམ་ཕྲ་ལ་སོགས་དང་བྲལ་བ། །གཞལ་དུ་མེད་པའི་རང་བཞིན་ནོ། །ཡང་དག་དྲི་མེད་རྣམ་པའི་འོད། །གང་དུ་ཡང་ནི་གནས་མེད་པ། །ཤར་བ་མ་ཡིན་ནུབ་པ་མིན། །རྟག་ཏུ་ཤར་བ་ཆར་
471b
ཡང་མཆོག་།དུས་དང་གནས་སྐབས་གྲོལ་བ་སྟེ། །སྐྱེ་དང་འཇིག་པར་བྱེད་པའོ། །རྣལ་འབྱོར་མ་རྣམས་རྙེད་མི་དཀའ། །རྣལ་འབྱོར་ཅུང་ཟད་རྙེད་དཀའ་བ། །ཐབས་མཆོག་གིས་ནི་རྙེད་འགྱུར་ཏེ། །ཐབས་མཆོག་མེད་ན་ནམ་ཡང་མིན། །དཔའ་བོ་ཆེན་པོ་བཅོམ་ལྡན་འདས། །དེ་ལ་ཐབས་ནི་བཀའ་སྩོལ་ཅིང ། །བཅོམ་ལྡན་འདས་ཀྱིས་བཀའ་སྩལ་པ། །རྩ་ཡི་ཀུན་སྤྱོད་སྦྱོར་བ་ཡིས། །སློབ་དཔོན་ཁ་ལས་རྙེད་པར་འགྱུར། །རླུང་འཁོར་ཆར་ཡང་གནས་ན་ནི། །རླུང་མ་གཉིད་མ་ཡོད་པའོ། །གཡས་པ་དང་ནི་གཡོན་གྱི་ཆ། །ཆར་ཡང་ལ་ནི་ཤིན་ཏུ་བསྐོར།། དེ་གཉིས་ཁོང་དུ་ཆུད་པ་ཡིས། །དེ་ལས་མཆོག་གི་བདེ་བ་འབྱུང ། །བདེ་བའི་ནད་ནས་ཕྱག་རྒྱ་ཆེ། །ཐེ་ཚོམ་མེད་པར་རྙེད་པར་འགྱུར། །ཆར་ཡང་དབུས་ན་རྩ་ཡི་གནས། །ཕྲ་མོའི་ཕྲ་མོ་ཡང་དག་མཆོག་།རྩ་ཡི་གནས་ན་རྩ་ཡི་གནས། །དེ་ཙམ་ལ་ནི་ངེས་ཁྱབ་བོ། །ཕྱག་རྒྱ་ཆེན་པོའི་རང་བཞིན་ནི། །ལྷ་མོ་ཆེན་མོ་དེ་ནི་ཁྱོད། །ང་ཡི་འོད་ནི་ཡང་དག་ཁྱོད། །ཕྱི་དང་ནང་མ་ཡོད་པའོ། །གང་ཞིག་ཕྱག་རྒྱ་མི་ཤེས་པ། །སངས་རྒྱས་ཡིན་ཡང་རྣལ་འབྱོར་མིན། །ཕྱག་རྒྱ་ཆེན་པོའི་ཐིག་ལེ་འདི། །གང་ཞིག་དྲི་མེད་ཤེས་པ་མིན། །རྣལ་འབྱོར་རྣལ་འབྱོར་མ་ཡི་རྒྱུད། །འབུམ་གཅིག་རྣལ་འབྱོར་དེས་ཤེས་ཀྱང ། །དེ་ལྟ་མོད་ཀྱི་འབྲས་རབ་དེས། །ནམ་ཡང་འབྱུང་བར་མི་འགྱུར་རོ། །ཐམས་ཅད་ཆོས་ཀུན་རབ་ཤེས་ན། །དེ་ནི་ངེས་པར་
472a
༄#། །སངས་རྒྱས་ཡིན། །ཕྱག་རྒྱ་ཆེན་པོ་རབ་ཤེས་ན། །དེ་ནི་དཔལ་རྡོར་སེམས་དཔར་འགྱུར། །དེ་ཡི་རང་བཞིན་ཡེ་ཤེས་ནི། །ཕྱག་རྒྱ་ཆེན་པོའི་མཚན་ཉིད་དོ།། དེ་སྐད་ཅེས་ཐོས་ནས་བཅོམ་ལྡན་འདས་མ་བྱེ་བ་འབུམ་ཕྲག་བདུན་ཅུ་རྩ་གཉིས་ཀྱི་མཁའ་འགྲོ་མ་དང་བཅས་པས་བསྐོར་བ་ལན་གསུམ་བྱས་ནས་ཕྱག་འཚལ་ཏེ་ཁྲག་དྲོན་མོས་མཆོད་དོ། །བཅོམ་ལྡན་འདས་ལ་མཁའ་འགྲོ་མ་ཐམས་ཅད་ཀྱིས་ཕྱག་རྒྱ་ཆེན་པོ་ཐིག་ལེའི་རྒྱུད་ཐོས་ནས་དགའ་མགུ་ཡིད་རངས་ཏེ་ཅང་མི་སྨྲ་བར་བཞུགས་སོ། །ཡང་དམ་དུ་འཁྱུད་པ་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་རྣལ་འབྱོར་མ་ཡི་བདག་།ཅུང་ཟད་བདག་ལ་ཐེ་ཚོམ་སྐྱེས། །གང་ཞིག་དཀྱིལ་འཁོར་ཆོ་ག་ནི། །རྩ་བ་ཡི་ནི་རྒྱུད་དུ་བཤད། །བདག་དང་གཞན་གྱི་གནས་དེ་ནི། །སྔར་ནི་བདག་གིས་མ་ཤེས་སོ། །བཅོམ་ལྡན་འདས་ཀྱིས་བཀའ་སྩལ་པ། བདག་གི་གནས་དང་གཞན་དེ་བཞིན། །ཉོན་ཅིག་ཡང་དག་བདག་གིས་བཤད། །གཞན་གྱི་གནས་ནི་བྷ་གར་བརྗོད། །བདག་གི་གནས་ནི་སྙིང་པོའོ། །སྒོ་ཡི་ཕྱི་རོལ་གཞན་གྱི་གནས། །བདག་གི་གནས་ནི་དཀྱིལ་འཁོར་རོ། །ཡང་ན་གཞན་གནས་སྦྱོར་བ་ཡིན། །ཉེ་བའི་སྦྱོར་བ་བདག་གནས་སོ། །སྦྱོར་བ་མཐོ་རིས་ཞེས་སུ་བསྟན། །དེ་བཞིན་དུ་ཡང་མི་ཡུལ་སྦྱོར། །ཉེ་བའི་སྦྱོར་བས་འོག་སྟེ། །མཐོ་རི་ས་ཆོས་
472b
ཀྱི་སྙིང་པདྨ། །ཉེ་བའི་སྦྱོར་བ་རི་རབ་རྩེ། །མི་ཡུལ་ལྟེ་བའི་ལྟེ་བ་འོ། །ས་འོག་སྤྲུལ་པའི་སྙིང་པོ་སྟེ། །རི་རབ་རྩེ་མོ་གསང་སྣ་འོ། །དེ་ལྟར་གཞན་ནི་གསང་ཆེན་པོ། །ཡང་དག་གཞན་དུ་ངས་མ་བཤད། །འབད་དེ་དེ་ནི་བསྲུང་བྱ་སྟེ། །སུ་ལ་ཡང་ནི་མི་སྦྱིན་ནོ། །རྣལ་འབྱོར་མ་རྒྱུད་དབང་ཕྱུག་རྒྱལ། །རྣལ་འབྱོར་མ་ལ་བཤད་པར་བྱ། །ཡང་ན་སེམས་དཔའ་ཆེན་པོ་འདི་ལེགས་པར་བརྟགས་ནས་གསལ་བར་བྱ། །དཔལ་ཧེ་རུ་ཀ་ཆེན་པོའི་དང་པོའི་དང་པོ་གྲུབ་པ། དེ་བཞིན་གཤེགས་པ་ཐམས་ཅད་ཀྱི་གསང་བ་ལས་ཀྱང་ཆེས་གསང་བའི་རྒྱུད་ཕྱི་མ། དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མ་ཆེན་པོའི་རྒྱུད་ཀྱི་རྒྱལ་པོའི་མངའ་བདག་།ཐམས་ཅད་མཁྱེན་པས་ཀྱང་རྙེད་པར་དཀའ་བ། རྨད་དུ་བྱུང་བའི་རྨད་དུ་བྱུང་བ་ཞེས་བྱ་བའི་ལེའུ་སྟེ་ཉི་ཤུ་རྩ་བརྒྱད་པའོ།། །།དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མ་ཆེན་པོའི་རྒྱུད་ཀྱི་རྒྱལ་པོའི་མངའ་བདག་ཅེས་བྱ་བ་རྫོགས་སོ།། །།རྒྱ་གར་གྱི་སློབ་དཔོན་རྣལ་འབྱོར་གྱི་དབང་ཕྱུག་ཆེན་པོ་དཔལ་ཤེས་རབ་གསང་བའི་ཞལ་སྔར་ཀཾ་ཆོས་ཀྱི་ཡེ་ཤེས་དང ། ཕྱུག་མཚམས་དགྲ་བཅོམ་གྱིས་དད་ཅིང་གུས་པས་ཞུས་ཏེ་བསྒྱུར་ཅིང་གཏན་ལ་ཕབ་པ།།