།།རྒྱ་གར་སྐད་དུ། ཨཱརྱ་གོ་ཤྲྀ་ང་ག་བྱཱ་ག་ར་ཎ་ནཱ་མ་མ་ཧཱ་ཡཱ་ན་སཱུ་ཏྲ་།བོད་སྐད་ 349b དུ།་འཕགས་པ་རི་གླང་རུ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གཅིག་གོ་།བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན་ལྷའི་ཡང་ལྷ་སངས་རྒྱས་ཤཱཀྱ་ཐུབ་པ། བསྐལ་པ་གྲངས་མེད་པ་གསུམ་ནས་བསོད་ནམས་ཀྱི་ཚོགས་ཀྱིས་རྣམ་པར་སྨིན་པས་ཡང་དག་པར་རྫོགས་པའི་སངས་རྒྱས་བརྙེས་ཏེ། འཛམ་བུའི་གླིང་གི་ལྗོངས་ཀྱི་ཡུལ་གཞན་དུ་འདུལ་བའི་སེམས་ཅན་ཡོངས་སུ་སྨིན་པར་མཛད་ནས། ཡུལ་ཡངས་པ་ཅན་གྱི་ཕྱོགས་ཐུབ་པ་དྲང་སྲོང་ཆེན་པོའི་གནས་རྒྱལ་པོའི་ཁབ་ན། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་བྱམས་པ་ལ་སོགས་པ་བྱང་ཆུབ་སེམས་དཔའ་དུ་མ་དང ། གནས་བརྟན་ཤཱ་རིའི་བུ་དང ། མོའུ་དགལ་གྱི་བུ་ལ་སོགས་པ་ཉན་ཐོས་ཆེན་པོ་སྟོང་ཉིས་བརྒྱ་ལྔ་བཅུ་དང ། ཚངས་པ་དང ། བརྒྱ་བྱིན་ལ་སོགས་པ་ལྷ་དུ་མ་དང ། ལྷའི་རྒྱལ་པོ་རྣམ་ཐོས་ཀྱི་བུ་ལ་སོགས་པ་འཇིག་རྟེན་སྐྱོང་བ་དུ་མ་དང ། ཀླུ་ཡི་རྒྱལ་པོ་ཆེན་པོ་དུ་མ་དང ། གནོད་སྦྱིན་མཐུ་ཆེན་པོ་མང་པོ་དང ། དྲི་ཟའི་རྒྱལ་པོ་གཙུག་ཕུད་ལྔ་པ་ལ་སོགས་པ་དྲི་ཟ་མང་པོ་དང ། མིའམ་ཅིའི་རྒྱལ་པོ་ཡིད་འོང་ལ་སོགས་པ་མིའམ་ཅི་དུ་མ་དང ། རྒྱལ་པོ་གཟུགས་ཅན་སྙིང་པོ་ལ་སོགས་པ་འཛམ་བུའི་གླིང་གི་མིའི་རྒྱལ་པོ་མང་པོའི་འཁོར་དུ་མ་ 350a ༄#། །དང་ཐབས་གཅིག་ཏུ་བཞུགས་སོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་ཤཱཀྱ་ཐུབ་པས། ཕྱི་མའི་དུས་ཀྱི་ཡུལ་དགེ་བ་ལ་རྗེས་སུ་དགོངས་ཤིང ། མངོན་སུམ་དུ་མཛད་ནས། འཁོར་མང་པོ་ལ་བཀའ་སྩལ་པ། རིགས་ཀྱི་བུ། བྱང་ཕྱོགས་ལོགས་ན་རི་གླང་རུ་དང་ཉེ་བ་ཆུ་བོ་གོ་མའི་འགྲམ་ན། ཐུབ་པ་དྲང་སྲོང་ཆེན་པོའི་ཕོ་བྲང་མཆོད་རྟེན་གོ་མ་ས་ལ་གན་ད་ཞེས་བྱ་བ་ཞིག་ཡོད་དེ། དེ་གདོན་མི་ཟ་བར་བྱ་དགོས་པའི་འཕྲིན་ལས་ཞིག་ཡོད་པས་ད་གཤེགས་པའི་དུས་ལ་བབ་བོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་འཁོར་ཕལ་པོ་ཆེ་དང་ནམ་མཁའ་ལ་འཕགས་ཏེ། དྲི་ཟའི་རྒྱལ་པོ་གཙུག་ཕུད་ལྔ་པ་ལ་སོགས་པ་དྲི་ཟ་གྲངས་མེད་པ་ནི་མདུན་ན་ལྷའི་རོལ་མོ་སྣ་ཚོགས་བྱེད། མིའམ་ཅིའི་རྒྱལ་པོ་ཡིད་འོང་ལ་སོགས་པ་མིའམ་ཅི་དུ་མ་ནི་སྟེང་ནས་མཆོད་པའི་ལས་བྱེད་ཅིང ། སངས་རྒྱས་བཅོམ་ལྡན་འདས་ལ་དབྱངས་དང ། ལྷའི་སྐད་ཡིད་དུ་འོང་བས་བསྟོད་བཞིན་དུ་འཁོར་དེ་དག་དང ། མཆོད་པ་དེ་དག་དང་བཅས་ཏེ། རི་རླང་རུ་ག་ལ་བ་དེར་གཤེགས་སོ། །གཤེགས་ནས་ལྷའི་ཡང་ལྷ་སངས་རྒྱས་བཅོམ་ལྡན་འདས་བཞེངས་བཞིན་དུ། ཞལ་བྱང་ཕྱོགས་སུ་མཚོ་ཆེན་པོ་ཡུན་རིང་པོ་ནས་རྒྱ་མཚོ་ལྟར་འདུག་པ་ལ་གཟིགས་ཏེ། སྐུ་དྲང་པོར་བསྲུང་ནས། 350b དེ་བཞིན་གཤེགས་པའི་ཏིང་ངེ་འཛིན་བྱེ་བ་བརྒྱ་ཕྲག་བརྒྱ་སྟོང་དུ་མ་ལ་སྙོམས་པར་ཞུགས་ཏེ། བསྐལ་པ་གྲངས་མེད་པ་གསུམ་ནས་བདག་ཉིད་ཀྱི་སངས་རྒྱས་ཀྱི་སྤྱོད་པ་སྨོན་ལམ་དང ། བསོད་ནམས་མངོན་དུ་མཛད་དོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་ཀྱིས། རི་གླང་རུ་དང ། ཡུལ་དགེ་བ་དང ། གསེར་གྱི་དཀྱིལ་འཁོར་ནས་སྲིད་པའི་རྩེ་མོའི་བར་དུ་བྱིན་གྱིས་བརླབས་ཏེ། བསྲུང་བ་དང ། གཙང་བ་དང ། བཀྲ་ཤིས་དང ། མཚམས་བཅད་པ་དང ། བཟླས་བརྗོད་དང ། ཡུལ་དགེ་བར་མཛད་དོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་ཀྱིས་འཁོར་དེ་དག་ཐམས་ཅད་ལ་བཀའ་སྩལ་པ། རི་གླང་རུ་བཅོམ་ལྡན་འདས་ཀྱི་ཕོ་བྲང་མཆོད་རྟེན་གོ་མ་ས་ལ་གནད་དང་བཅས། ཡུལ་དགེ་བ་དང་བཅས་པ་འདི་ནི། བསྐལ་པ་བཟང་པོའི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཕྱག་མཚན་དང ། མ་འདྲེས་པ་དང ། ཐུན་མོང་མ་ཡིན་པ་དང ། དབེན་པ་ཡིན་ཏེ། རྒྱུ་དེས་ན་ཡུལ་འདི་ནི་དགེ་བ་ཞེས་བྱའོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་ཀྱིས་ཡུལ་དགེ་བ་དང ། མཁར་དགེ་བ་ཅན་དང ། དགེ་འདུན་སོ་སོའི་ཀུན་དགའ་ར་བ་དང ། གཙུག་ལག་ཁང་དང ། དགོན་པའི་གནས་དང ། ཡུལ་དེར་སོ་སོར་ནས་བསོད་ནམས་བྱ་བའི་དངོས་པོ་དགེ་བ་བྱེད་པར་འགྱུར་བའི་རྒྱལ་པོ་དང ། ཆོས་ 351a ༄#། །དང་ལྡན་པའི་དད་པ་ཅན་དང ། སྦྱིན་བདག་དང ། ལི་ཐམས་ཅད་འབྱུང་བར་ལུང་བསྟན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱི་བུ། ཁྱེད་རྣམས་ཀྱིས་ཀྱང་མ་འོངས་པའི་དུས་ན་འབྱུང་བའི་ཡུལ་འདིར་ཅི་ནས་ཀྱང ། སེམས་ཅན་རྣམས་དམ་པ་ཆེན་པོ་མྱུར་དུ་ཐོབ་པར་འགྱུར་བ་དང ། ཏིང་ངེ་འཛིན་འགྲུབ་པར་འགྱུར་བར་བྱིན་གྱིས་རློབས་ཤིག་།དེ་ནས་དེའི་ཚེ་བཅོམ་ལྡན་འདས་མཚོ་རོལ་ནས་ཅུང་ཟད་ཅིག་སླར་བསྐྱེད་དེ། དེའི་མོད་ལ་རི་གླང་རུའི་སྟེང་དུ་གདན་ཁྲི་བཤམས་པ་ལ་སྐྱིལ་མོ་ཀྲུང་བཅས་ཏེ་བཞུགས་ནས། ཞལ་ནུབ་ཕྱོགས་སུ་བཅོམ་ལྡན་འདས་ཀྱི་ཕོ་བྲང་མཆོད་རྟེན་གོ་མ་ས་ལ་གན་ད་གང་ན་བ་དེ་ལོགས་སུ་གཟིགས་སོ། །དེ་ནས་དེའི་ཚེ་འཇིག་རྟེན་གྱི་ཁམས་གཞན་དང ། གཞན་ནས་བྱང་ཆུབ་སེམས་དཔའ་ཉི་ཁྲི་མངོན་པར་ཤེས་པ་ལྔ་དང་ལྡན་པའི་དྲང་སྲོང་མང་པོ་དང་ཐབས་གཅིག་ཏུ་བཅོམ་ལྡན་འདས་ག་ལ་བ་དེར་ལྷགས་སོ། །ལྷགས་ནས་བཅོམ་ལྡན་འདས་ཀྱི་ཕོ་བྲང་མཆོད་རྟེན་གོ་མ་ས་ལ་གན་ད་ལ་ཡང་ཕྱག་འཚལ་སྐྱབས་སུ་སོང ། སངས་རྒྱས་བཅོམ་ལྡན་འདས་འཁོར་དང་བཅས་པ་ལ་ཡང་ཕྱག་འཚལ་སྐྱབས་སུ་སོང་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་ན་སངས་རྒྱས་བཅོམ་ལྡན་འདས་ཀྱིས་འཁོར་ 351b ཕལ་པོ་ཆེ་འདུས་པར་མཁྱེན་ནས། འཁོར་དེ་དག་ལ་འདི་སྐད་ཅེས་བཀའ་སྩལ་ཏོ། །བསྐལ་པ་བཟང་པོ་འདི་ལ་སྔོན་སངས་རྒྱས་བཅོམ་ལྡན་འདས་བཞི་བྱུང་སྟེ། དེ་དག་གིས་ཀྱང་མཆོད་རྟེན་གོ་མ་ས་གན་ད་ཡུལ་དང་བཅས་པར་བྱིན་གྱིས་བརླབས་སོ། །བསྐལ་པ་བཟང་པོ་འདི་ཉིད་ལ་མ་འོངས་པའི་དུས་ན་ཡང་སངས་རྒྱས་སྟོང་རྩ་གཅིག་འབྱུང་བར་འགྱུར་ཏེ། དེ་དག་ཐམས་ཅད་ཀྱང་འཁོར་དང་བཅས་ཏེ་འདིར་གཤེགས་ནས་མཆོད་རྟེན་གོ་མ་ས་ལ་གན་ད་ཡུལ་དང་བཅས་པར་བྱིན་གྱིས་རློབ་ཅིང ། མཚམས་གཅད་པ་དང ། བཀྲ་ཤིས་པ་དང ། དགེ་བར་མཛད་པར་འགྱུར་རོ། །ང་ཡང་ད་ལྟར་བྱིན་གྱིས་རློབ་པའི་དུས་ལ་བབ་པས་བྱིན་གྱིས་རློབ་པར་མཛད་དོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་ཏིང་ངེ་འཛིན་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བ་དང ། གཞན་ཡང ། དེ་བཞིན་གཤེགས་པའི་ཏིང་ངེ་འཛིན་གྲངས་མེད་པ་ལ་སྙོམས་པར་ཞུགས་སོ། །དེའི་ཚེ་ཏིང་ངེ་འཛིན་ལ་སྙོམས་པར་འཇུག་པ་རྣམས་དང ། བསམ་གཏན་པ་རྣམས་ཡོངས་སུ་སྐྱོང་བར་བྱེད་པ་བྱང་ཆུབ་སེམས་དཔའ་མཐུ་ཆེན་ཐོབ་ཀྱིས་ཀྱང ། སངས་རྒྱས་འོད་སྲུང་གི་མཆོད་རྟེན་གྱི་དྲུང་དུ་བཞུགས་ཏེ། ཡུལ་དེ་བྱུང་བར་གྱུར་པའི་ཚེ་བདག་གི་གཟུགས་བརྙན་བྱེད་པར་འགྱུར་བར་ས་གཞི་དེ་བྱིན་གྱིས་བརླབས་སོ། །དེ་བཞིན་དུ་སྨོན་ལམ་ཆེན་པོས་གནས་པ་བྱང་ཆུབ་ 352a ༄#། །སེམས་དཔའ་འཇམ་དཔལ་གཞོན་ནུར་གྱུར་པས་ཀྱང ། རི་གླང་རུ་ལ་གཙུག་ལག་ཁང་སྤོང་བྱེད་ཅེས་བྱ་བ་འབྱུང་བར་འགྱུར་བའི་ས་གཞི་དེར། བསྙེན་པ་བྱེད་པ་རྣམས་འགྲུབ་པར་འགྱུར་བར་བྱིན་གྱིས་བརླབས་སོ། །དེ་བཞིན་དུ་ནམ་མཁའ་ལྟར་སྟོབས་དཔག་ཏུ་མེད་པ་བྱང་ཆུབ་སེམས་དཔའ་ནམ་མཁའི་སྙིང་པོས་ཀྱང ། གཙུག་ལག་ཁང་འཇིག་ཚོགས་སྤོང་བྱེད་ཅེས་བྱ་བ་འབྱུང་བར་འགྱུར་བའི་ས་གཞི་དེ་མཆོད་གནས་སུ་འགྱུར་བར་བྱིན་གྱིས་བརླབས་སོ། །དེ་བཞིན་དུ་ཐུགས་རྗེ་ཆེན་པོ་དང་ལྡན་པ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཀྱང ། གཙུག་ལག་ཁང་འོད་ཅན་ཞེས་བྱ་བ་འབྱུང་བར་འགྱུར་བའི་ས་གཞི་དེར། དངོས་གྲུབ་འགྲུབ་པར་འགྱུར་བར་བྱིན་གྱིས་བརླབས་སོ། །དེ་བཞིན་དུ་རྟག་ཏུ་བྱམས་པ་དང་ལྡན་པ་བྱང་ཆུབ་སེམས་དཔའ་བྱམས་པས་ཀྱང ། གཙུག་ལག་ཁང་བི་སི་མོ་ཉ་ཞེས་བྱ་བ་འབྱུང་བར་འགྱུར་བའི་ས་གཞི་དེར། བདག་ཉིད་བཞུགས་པར་བྱིན་གྱིས་བརླབས་སོ། །དེ་བཞིན་དུ་སྤྱོད་པ་ཤིན་ཏུ་རྣམ་པར་དག་པ་བྱང་ཆུབ་སེམས་དཔའ་སའི་སྙིང་པོས་ཀྱང ། གཙུག་ལག་ཁང་ཡེ་ཤེས་རི་ཞེས་བྱ་བ་འབྱུང་བར་འགྱུར་བའི་ས་གཞི་དེ་ཕྱག་བྱ་བར་འོས་པར་འབྱུང་བར་འགྱུར་བར་བྱིན་གྱིས་བརླབས་སོ། །དེ་བཞིན་དུ་གདུལ་ 352b བའི་སྐྱེ་བོ་རྣམས་གྲོལ་བར་མཛད་པ་ལ་ཐགས་ཐོགས་མི་མངའ་བ་བྱང་ཆུབ་སེམས་དཔའ་སྨན་གྱི་རྒྱལ་བོས་ཀྱང ། གཙུག་ལག་ཁང་བ་ནོ་ཅོ་ཞེས་བྱ་བ་འབྱུང་བར་འགྱུར་བའི་ས་གཞི་དེར་དངོས་གྲུབ་འགྲུབ་པར་བྱིན་གྱིས་བརླབས་སོ། །དེ་བཞིན་དུ་རྫུ་འཕྲུལ་ཆེན་པོ་དང་ལྡན་པ་བྱང་ཆུབ་སེམས་དཔའ་ཀུན་ཏུ་བཟང་པོས་ཀྱང ། གཙུག་ལག་ཁང་དགེ་འདུན་སྐྱོང་ཞེས་བྱ་བ་འབྱུང་བར་འགྱུར་བའི་ས་གཞི་དེར་དངོས་གྲུབ་འགྲུབ་པར་འགྱུར་བར་བྱིན་གྱིས་བརླབས་སོ། །དེ་བཞིན་དུ་སངས་རྒྱས་བཅོམ་ལྡན་འདས་ལ་སོགས་པ། བྱང་ཆུབ་སེམས་དཔའ་གཞན་དག་དང ། དགྲ་བཅོམ་པ་ཆེན་པོ་རྣམས་ཀྱིས་ཀྱང ། ལི་ཡུལ་གང་དང ། གང་དུ་གཙུག་ལག་ཁང་དང ། སྐྱེད་མོས་ཚལ་དང ། དགོན་པའི་གནས་འབྱུང་བར་འགྱུར་བའི་ས་གཞི་ཐམས་ཅད། དཔེར་ན། ཟླ་བ་ཉ་བ་ལ་སྐར་མའི་ཚོགས་རྣམས་ཀྱིས་ཡོངས་སུ་བསྐོར་ནས། སྟེང་གི་བར་སྣང་དག་པ་ལ་རྒྱུ་བ་བཞིན་དུ་མཛེས་པ་དང ། ཡིད་དུ་འོང་བ་དང ། རྒྱས་པ་དང ། དགའ་དགའ་ལྟར་འདུག་པར་བྱིན་གྱིས་བརླབས་སོ། །ཡང་དེའི་ཚེ་རི་གླང་རུ་ལ་སངས་རྒྱས་བཅོམ་ལྡན་འདས་བཞུགས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། དགྲ་བཅོམ་པ་ཆེན་པོ་རྣམས་ཀྱིས་འོད་ཟེར་རྣམ་པ་སྣ་ཚོགས་དུ་མ་བཀྱེ་བས། ལི་ཡུལ་ཐམས་ཅད་སྣང་བ་ཆེན་པོས་ཁྱབ་པར་བྱས་སོ། །དེ་ནས་སྐད་ 353a ༄#། །ཅིག་དེ་ཉིད་ལ་མཚོ་ཆེན་པོ་དེའི་ནང་ནས་པདྨ་སུམ་བརྒྱ་ལྔ་བཅུ་རྩ་གསུམ་བྱུང་བར་གྱུར་ཏེ། པདྨ་རེ་རེའི་སྟེང་ན་ཡང་སངས་རྒྱས་དང ། བྱང་ཆུབ་སེམས་དཔའི་སྐུ་གཟུགས་འོད་དང་བཅས་པ་བཞུགས་པ་སྣང་བར་གྱུར་ཏོ། །དེ་ནས་དེའི་ཚེ་ལྷ་རྣམས་ཀྱིས་སྔོན་མ་མཐོང་བའི་མཚན་མ་མཐོང་ནས། སངས་རྒྱས་བཅོམ་ལྡན་འདས་ལ་ཞུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། མཚོའི་ནང་ནས་པདྨ་སུམ་བརྒྱ་ལྔ་བཅུ་རྩ་གསུམ་སངས་རྒྱས་དང ། བྱང་ཆུབ་སེམས་དཔའི་སྐུ་གཟུགས་དང་བཅས་ཏེ་བྱུང་བ་འདི་ནི་མ་འོངས་པའི་དུས་ན། ཡུལ་འདི་འབྱུང་བར་འགྱུར་བའི་ཚེ། ཡུལ་འདི་ཉིད་དུ་པདྨ་ཇི་སྙེད་པའི་དགོན་པའི་གནས་དང ། གཙུག་ལག་ཁང་ན་གཎྜི་བརྡུང་བར་འགྱུར་བ་དང ། གནས་གང་དང ། གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་འོད་ཟེར་རྣམ་པ་སྣ་ཚོགས་འགྱེད་ཅིང ། ཡུལ་བྱིན་གྱིས་བརླབས་པའི་ས་གཞི་དེ་དག་དང ། དེ་བཞིན་དུ་ངས་དེ་བཞིན་གཤེགས་པའི་ཕོ་བྲང་མཆོད་རྟེན་གོ་མ་ས་ལ་གན་ད་ཡུལ་དགེ་བ་དང་བཅས་པ་བྱིན་གྱིས་བརླབས་པའི་ས་གཞི་འདིར། དད་པ་ཅན་གྱི་སྦྱིན་བདག་རྣམས་ཀྱིས་སོ་སོ་ནས། སངས་རྒྱས་ལ་སོགས་པའི་གཟུགས་བརྙན་བྱེད་པར་འགྱུར་ཞིང ། གནས་དེ་ 353b དང ། དེ་དག་ཏུ་བསྙེན་པ་བྱས་ན། ཅི་དང ། ཅི་འདོད་པ་འགྲུབ་པར་འགྱུར་བའི་སྔ་ལྟས་ཡིན་ནོ། །ཡང་དེའི་ཚེ་ལྷ་རྣམས་སྟན་ལས་ལངས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཡུལ་འདི་དུས་ཇི་ཙམ་ཞིག་ན་འབྱུང་བར་འགྱུར་བ། སུ་ཞིག་གིས་འབྱིན་པར་བགྱིད་པ་ལགས། བཙུན་པ་བཅོམ་ལྡན་འདས། ད་ལྟར་ནི་དགོན་པ་ཆབ་ཆེན་པོའི་གཏེར་ལགས་ན། སུ་ཞིག་གིས་ཇི་ལྟར་འབྱིན་པ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉོན་ཅིག། ང་མྱ་ངན་ལས་འདས་ནས་ལོ་བརྒྱ་ལོན་པའི་ཚེ། རྒྱའི་ཡུལ་དུ་རྒྱའི་རྒྱལ་པོ་ཆ་ཡང་ཞེས་བྱ་བ་བུ་སྟོང་ཚང་བར་བདོག་པ་ཞིག་འབྱུང་བར་འགྱུར་ཏེ། བུ་རེ་རེ་ཡང་ཡུལ་རེ་རེ་གསར་དུ་ཚོལ་དུ་བཅུག་གོ་།ཕྱིས་ནུབ་ཕྱོགས་ལོགས་ན། རི་གླང་རུ་དང ། བཅོམ་ལྡན་འདས་ཀྱིས་ཕོ་བྲང་མཆོད་རྟེན་གོམས་ལ་གན་ད་ཡོད་པའི་ཡུལ་དེ་བཞིན་གཤེགས་པ་དུ་མས་བྱིན་གྱིས་བརླབས་པ་ཞིག་ཡོད་དེ་ཞེས་ཐོས་ནས། དེ་འདི་སྙམ་དུ། མ་ལ། བདག་ལ་བུ་གཅིག་ཡོད་ན། སངས་རྒྱས་ཕལ་པོ་ཆེས་བྱིན་གྱིས་བརླབས་པའི་གནས་དེར་ཡུལ་འདེབས་སུ་གཞུག་གོ་སྙམ་དུ་བསམས་ནས། དེའི་ཚེ་རྒྱའི་རྒྱལ་པོས་རྣམ་ཐོས་ཀྱི་བུ་ལ་བུ་གཅིག་བསླངས་སོ། །རྣམ་ཐོས་ཀྱི་བུས་ཀྱང་འཛམ་བུའི་གླིང་འདི་ན། 354a ༄#། །རྒྱལ་པོ་མྱ་ངན་མེད་ཅེས་བྱ་བའི་བུ་ཞིག་བཙས་པ་བྱིན་ཏེ། བུ་དེ་ནི་གཟུགས་བཟང་བ། དབྱིབས་མཛེས་པ། བལྟ་ན་སྡུག་པ་ཞིག་ཡིན་ནོ། །བུ་དེའི་དོན་དུ་ས་ལས་ནུ་མ་ཞིག་བྱུང་བ་དང ། བུ་དེ་སྔོན་གྱི་བསོད་ནམས་དང ། དགེ་བའི་རྩ་བའི་མཐུས་ནུ་མ་དེ་ལ་ནུ་བར་བྱེད་པས། དེས་ན་བུ་དེའི་མིང་ས་ལས་ནུ་མ་ནུ་ཞེས་བྱའོ།། བུ་དེ་མྱུར་བར་སྐྱེས་ནས། ཕ་རྒྱའི་རྒྱལ་པོས་རྒྱལ་སྲིད་ཀྱི་དབང་ནི་བསྐུར། ནོར་མང་པོ་ནི་བྱིན། བློན་པོ་ཕལ་པོ་ཆེ་ནི་ལུས་ཀྱི་རིམ་གྲོ་བར་བསྐོས་ནས། རྒྱལ་པོ་ས་ལས་ནུ་མ་ནུ་དེ། བློན་པོ་ཆེན་པོ་ཇང་ཤོ་ཞེས་བྱ་བ་ལ་སོགས་པ་དམག་དུ་མ་དང་ལྷན་ཅིག་ཏུ་རྒྱའི་ཡུལ་ནས་བྱུང་སྟེ། ཡུལ་འདིར་འོང་བར་འགྱུར་རོ། །འོངས་ནས་འདིར་ཡུལ་འདེབས་པར་འགྱུར་ཏེ། རྒྱལ་པོ་ས་ལས་ནུ་མ་ནུ་དེས་ཡུལ་བཏབ་པའི་ཕྱིར། རྒྱུ་དེས་ན་ཡུལ་འདིའི་མིང་ནི་ས་ལས་ནུ་མ་ནུའི་ཡུལ་ཞེས་བྱ་བར་འགྱུར་རོ། །དུས་དེའི་ཚེ་ན་ནུབ་ཕྱོགས་ལོགས་ནས་རྒྱ་གར་གྱི་མི་ཕལ་པོ་ཆེ་འདིར་འོང་བར་འགྱུར་ཏེ། རྒྱལ་པོ་ས་ལས་ནུ་མ་ནུའི་འབངས་སུ་མཆིད་ཀྱི་འཚལ་ཞིང ། ཆུ་སྲིད་གཅིག་པར་དུ་མ་པར་འགྱུར་ནས། རྒྱའི་བློན་པོ་ཆེན་པོ་ཇང་ཤོ་ལ་སོགས་པས་རིམ་གྱིས་རྒྱ་དང ། རྒྱ་གར་གྱི་གྲོང་དང ། གྲོང་ཁྱེར་དང ། གྲོང་རྡལ་འདེབས་པར་འགྱུར་རོ། །དེ་ལྟར་རྒྱལ་པོས་ལས་ནུ་མ་ནུ་དེ། མི་ 354b རབས་དུ་མའི་བར་དུ་ཡུལ་འདིའི་རྒྱལ་པོ་བྱེད་པར་འགྱུར་རོ། །རྒྱལ་པོ་དེ་རྣམས་ཀྱིས་ཀྱང་རིམ་གྱིས་སོ་སོ་ནས། ཡུལ་འདིར་དགོན་པའི་གནས་དང ། གཙུག་ལག་ཁང་བྱས། ཞིང་ཆུ་དང ། འབངས་དང ། ཞལ་ཏ་བྱེད་པ་ཡང་འབུལ་ཞིང ། ལ་ལ་ནི་བདག་ཉིད་ཀྱང་རབ་ཏུ་འབྱུང་བར་བྱེད་དོ། །ལ་ལ་ནི་བུ་དང ། བུ་མོ་རབ་ཏུ་འབྱུང་བར་བྱེད་དོ། །ལ་ལ་ནི་འབངས་ལས་གྲངས་མེད་པ་ཞིག་རབ་ཏུ་འབྱུང་བར་གནང་བར་བྱེད་དོ། །ཡུལ་འདིར་མི་བྱང་ཆུབ་སེམས་དཔའི་རིགས་ཅན་མང་པོ་ཞིག་འབྱུང་སྟེ། རྟག་ཏུ་དཀོན་མཆོག་གསུམ་ལས་དགེ་བའི་རྩ་བ་གསོག་ཅིང ། བསོད་ནམས་བྱ་བའི་དངོས་པོ་བྱེད་པར་འགྱུར་རོ། །དེ་ལྟར་ན་ཡུལ་འདི་ནི་རྒྱལ་པོས་ལས་ནུ་མ་ནུས་ཡུལ་གཏོད་པའི་ཚུལ་དེ་ལྟ་བུས་འབྱུང་བར་འགྱུར་རོ། ། ཡུལ་འདི་ནི་སངས་རྒྱས་འབྱུང་བ་རེ་རེའི་ཚེ་ཡང་འབྱུང་ཞིང་རྒྱས་པར་འགྱུར་རོ། །ཅིའི་ཕྱིར་ཡུལ་གཞན་དང ། གཞན་དག་གི་ནི་ཞིག་ནས། ཡུན་རིང་མོ་ཞིག་ཏུ་སྟོང་ཞིང་དགོན་པར་འདུག་ལ། ཡུལ་དགེ་བ་ནི་སངས་རྒྱས་འབྱུང་བ་རེ་རེའི་ཚེ་མི་རྣམས་ཀྱིས་བརྒྱན་ཅིང་མཛེས་པར་འགྱུར་ཞེ་ན། འདི་ལྟར་ཡུལ་འདི་ནི་ཐུབ་པ་དྲང་སྲོང་ཆེན་པོའི་གནས། དེ་བཞིན་གཤེགས་པའི་སྤྱོད་ཡུལ་མཆོད་རྟེན་གོམས་ལ་གནད་ཞེས་བྱ་བ་རི་གླང་རུ་དང་ཉེ་བ། ཆུ་བོ་གོ་མའི་འགྲམ་ན་ཡོད་པའི་ཕྱིར་རོ། །མཆོད་རྟེན་འདི་མདོ་སྡེའི་ནང་ནས་ནི་མིང་གོམས་ 355a ༄#། །ལ་གན་ད་ཞེས་བྱ་ཡི། འཇིག་རྟེན་ཕལ་གྱི་ཐ་སྙད་དུ་ནི་ཆུ་བོ་གོ་མའི་འགྲམ་ཞེས་བྱ་བར་འདོགས་པར་འགྱུར་ཏེ། འདི་ལྟར་ཇི་སྲིད་དུ་མཆོད་རྟེན་ཆུ་བོ་གོ་མའི་འགྲམ་ཞེས་བྱ་བ་དང ། འོད་སྲུང་གི་མཆོད་རྟེན་འདི་གཉིས་རྒྱས་ཤིང་མཆོད་གནས་སུ་བྱེད་པ་དེ་སྲིད་དུ་ནི། ཡུལ་དགེ་བ་ཡང་རྒྱས་ཤིང་བཟང་པོར་འགྱུར་རོ། །ནམ་མཆོད་རྟེན་འདི་གཉིས་རྒུད་པ་དེའི་ཚེ། ཡུལ་ཡང་རྒུད་ཅིང་སྟོངས་པར་འགྱུར་རོ། །དེ་ནས་དེའི་ཚེ་འཁོར་དེར་འདུས་པའི་ལྷ་རྣམས་ཀྱིས། བཅོམ་ལྡན་འདས་ཀྱིས་བཀའ་སྩལ་པའི་གསུང་དེ་ཐོས་ནས། མཆོད་རྟེན་གོ་མ་ས་ལ་གན་ད་དང ། རི་གླང་རུ་ལ་དད་པ་དང ། གུས་པ་ཆེན་པོ་རྙེད་དེ། སངས་རྒྱས་བཅོམ་ལྡན་འདས་ལ་མགོ་བོས་ཕྱག་བཙལ་སྐྱབས་སུ་སོང་ནས། སྤྱན་སྔར་འདི་སྐད་དུ་བདག་ཅག་ཀྱང་དུས་དེའི་ཚེ་ཡུལ་འདིར་རིགས་མཐོན་པོར་སྐྱེས་ནས། བདེ་བར་གཤེགས་པའི་བསྟན་པ་སྲུང་ཞིང ། ཡུལ་ཆོས་ཀྱི་བཀའ་ཁྲིམས་མི་ཉམས་པར་གྱུར་ཅིག་ཅེས་སྨོན་ལམ་བཏབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷའི་རྒྱལ་པོ་རྣམ་ཐོས་ཀྱི་བུ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འདུ་ཤེས་ཅན་ཞེས་བྱ་བ་དང ། ལྷའི་ལྷ་མི་ཕམ་པ་ཞེས་བྱ་བ་དང ། ཀླུའི་རྒྱལ་པོ་ཁྱིམ་ཚིག་ཅེས་བྱ་བ་དང ། ལྷ་ནམ་མཁའི་དབྱིངས་ཞེས་བྱ་བ་དང ། 355b ལྷ་གསེར་གྱི་ཕྲེང་བ་ཅན་ཞེས་བྱ་བ་དང ། ལྷ་མོ་ལྕགས་ཀྱུ་ཅན་ཞེས་བྱ་བ་དང ། ལྷ་མོ་གནས་ཅན་ཞེས་བྱ་བ་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཁྱེད་རྣམས་ལ་མཆོད་རྟེན་གོ་མ་ས་ལ་གན་ད་དང ། རི་གླང་རུ་ཡུལ་དང་བཅས་པ་དང ། ངའི་བསྟན་པ་དང ། སྲས་རྣམས་ཡོངས་སུ་གཏད་ཀྱི། ཡོངས་སུ་བསྲུང་བ་དང ། བསྐྱབ་པ་དང ། བསྐྱང་བ་དང ། མཆོད་གནས་སུ་འགྱུར་བར་གྱིས་ཤིག་།ཡུལ་འདིའི་རྒྱལ་པོ་དང ། ཡུལ་འཛིན་པའི་བློན་པོ་དང ། སྦྱིན་བདག་ཆོས་དང་མཐུན་པ་རྣམས་ཀྱང་ཡོངས་སུ་གཏད་ཀྱི། དེ་བཞིན་དུ་གྱིས་ཤིག་།རི་གླང་རུ་ལུང་བསྟན་པའི་མདོ་འདི་ཡང་ཡོངས་སུ་གཏད་ཀྱི། འཕེལ་ཞིང་རྒྱས་པར་གྱིས་ཤིག་།གང་གི་ཚེ་ཡུལ་འདི་མེའམ། ཆུའམ། ཕ་རོལ་གྱི་དམག་གིས་ཉེན་ཅིང་ཕོངས་པར་གྱུར་པ་ན། མདོ་འདི་བཀླག་པ་དང ། ཁ་ཏོན་དང ། མཆོད་པ་དང ། བསམ་པ་དང ། བསྒོམ་པ་བྱས་ན། དེས་ན་ཡུལ་དེའི་གནོད་པ་ཞི་བར་འགྱུར་རོ། །མ་འོངས་པའི་དུས་ན་སེམས་ཅན་རྣམས་ཀྱིས་ལས་ཀྱི་རྣམ་པར་སྨིན་པས། ཡུལ་འདིར་སུམ་པ་རྣམས་དང ། བོད་རྣམས་འོང་བར་འགྱུར་གྱི། དེའི་ཚེ་མདོ་འདི་ལྷོགས་ཤིག་དང ། མདོ་འདི་ཐོས་ནས་མདོ་འདིའི་མཐུ་དང ། ལྷ་རྣམས་ཀྱི་བྱིན་གྱི་རླབས་ཀྱིས། དད་པ་མེད་པ་དེ་རྣམས་ཡུལ་འཇིག་པར་མི་བྱེད་ཅིང ། ཡིད་ཀྱང་འགྱོད་པར་ 356a ༄#། །འགྱུར་རོ། །མ་འོངས་པའི་དུས་ན་ཡུལ་འདིར་རྒྱ་རྣམས་ཀྱང་འོང་བར་འགྱུར་གྱི། དེའི་ཚེ་མདོ་འདི་ལྷོགས་ཤིག་དང ། མདོ་འདི་ཐོས་ནས་དེ་དག་དད་པ་སྐྱེ་བར་འགྱུར་རོ། །དད་པའི་སྟོབས་ཀྱིས་ཡུལ་མི་འཇིག་ཅིང ། ཕྱིར་ཞིང་བསྲུང་བ་དང ། བསོད་ནམས་བྱ་བའི་དངོས་པོ་ཡང་བྱེད་པར་འགྱུར་ཏེ། རྒྱུ་དེས་ནི་མདོ་འདི་ནི་ཡུལ་ལ་ཕན་འདོགས་པ་བྱེད་པ་ཡིན་ནོ། །མདོ་འདི་ནི་ཕན་ཡོན་གཞན་ཡང་མང་དུ་ཡོད་དེ། ཡུན་ཐུང་དུས་ནི་བརྗོད་པར་མི་ནུས་སོ། །དེའི་ཕྱིར་མདོ་འདི་ཁྱེད་རྣམས་ལ་ཡོངས་སུ་གཏད་དོ། །དེ་ནས་དེའི་ཚེ་རྣམ་ཐོས་ཀྱི་བུ་ལ་སོགས་པ་ལྷ་རྣམས་དང ། ཀླུ་ཡི་རྒྱལ་པོ་དང ། ལྷ་མོ་དེ་དག་ཐམས་ཅད་འཁོར་དང་བཅས་ཏེ་ལངས་ནས།་བཅོམ་ལྡན་འདས་ཀྱི་སྤྱན་སྔར་པུ་སྨོའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་རྣམས་ཀྱིས་བཅོམ་ལྡན་འདས་ཀྱི་བཀའ་སྤྱི་བོས་ལེན་པར་འཚལ་ལོ། །ཡང་གསོལ་བ། སྟོན་པ་བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་བཞིན་དུ་མཆོད་རྟེན་གོ་མ་ས་ལ་གན་ད་དང ། རི་གླང་རུ་ཡུལ་དང་བཅས་པ་ཐམས་ཅད་ཀྱང་ཡོངས་སུ་བསྲུང་བར་འཚལ། བདེ་བར་གཤེགས་པའི་བསྟན་པ་དང ། ཆོས་དང་མཐུན་པའི་རྒྱལ་ 356b པོ་དང ། རབ་ཏུ་བྱུང་བ་དང ། ཆོས་དང་མཐུན་པར་ཡུལ་འཛིན་པ་དང ། ཆོས་དང་མཐུན་པའི་སྦྱིན་བདག་དང ། གང་ཞིག་བསོད་ནམས་བྱ་བའི་དངོས་པོ་བགྱིད་པར་འགྱུར་བ་དེ་དག་ཐམས་ཅད་ཀྱང་ཡོངས་སུ་བསྲུང་བར་ནི་འཚལ་ན། བཅོམ་ལྡན་འདས། ཇི་སྲིད་དུ་ཡུལ་འདིར་དཀོན་མཆོག་གསུམ་མཆོད་གནས་སུ་བགྱིད་པ་དང ། ཡུལ་འཛིན་བས་ཀྱང་ཆོས་དང་མཐུན་པར་ཡུལ་སྐྱོང་ཞིང ། ཆོས་དང་མི་མཐུན་པའི་སེམས་ཅན་རྣམས་ཀྱི་མགོན་མི་བགྱིད་པ་དེ་སྲིད་དུ་ནི་བདག་ཅག་གིས་ཡོངས་སུ་བསྲུང་བར་རྔོ་ཐོགས་ཏེ། མདོ་འདི་ཡང་ལི་ཡུལ་རིང་དུ་གནས་པར་བགྱི་བའི་སླད་དུ། ལི་ཡུལ་ནས་ཉི་འོག་ཏུ་གྱུར་པའི་རྒྱལ་པོ་དང ། བློན་པོ་རྣམས་ལ་མདོ་སྡེ་འདི་ནི་བཅོམ་ལྡན་འདས་ཀྱིས་ལི་ཡུལ་གྱི་ཆེད་དུ་རི་གླང་རུ་ལ་བཤད་པ་ཡིན་ནོ་ཞེས་རྣར་གྲགས་པར་བགྱི། སུག་པར་ཐོབ་པར་བགྱི། སེམས་བསྒྱུར་བར་བགྱིའོ། །བཅོམ་ལྡན་འདས། ནམ་ཡུལ་འདིར་དཀོན་མཆོག་གསུམ་མཆོད་གནས་སུ་མི་བགྱིད་ཅིང ། ཆོས་དང་མི་མཐུན་པ་རྣམས་ཀྱི་མགོན་ལྷག་པར་བགྱིད་པ་དེའི་ཚེ། བདག་ཅག་རྣམས་ཀྱི་གཟི་བརྗིད་དང ། མཐུ་སྟོབས་ཉམས་པར་འགྱུར་བས་ཡུལ་འདིའི་ཆེད་དང ། བསྲུང་བར་ནི་རྔོ་མི་ཐོགས་སོ། །དེ་ཅིའི་སླད་དུ་ཞེ་ན། བདག་ཅག་རྣམས་ཀྱི་མཐུ་སྟོབས་དང ། གཟི་བརྗིད་ནི་བདེ་བར་གཤེགས་པའི་བསྟན་པ་ 357a ༄#། །དང།་ཆོས་དང་མཐུན་པར་ཡུལ་ཆོས་བཞིན་དུ་སྐྱོང་བ་དང ། བསོད་ནམས་བྱ་བའི་དངོས་པོ་དགེ་བའི་རྩ་བའི་མཐུས་འཕེལ་བར་འགྱུར་བ་ལགས་སོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་གདན་ལས་བཞེངས་ནས། རི་གླང་རུའི་སྟེང་གི་འགྲམ་ནས་མཆོད་རྟེན་གོ་མས་ལ་གན་ད་གང་ན་བ་དེ་ལོགས་སུ་གཟིགས་ནས།་ཡང་ནས་ཡང་དུ་དེ་བཞིན་གཤེགས་པའི་སྤྱོད་ཡུལ་མཆོད་རྟེན་གོ་མ་ས་ལ་གན་ད་དང ། རི་གླང་རུ་དང ། ཡུལ་དང་བཅས་པ་ལན་གཉིས་ལན་གསུམ་གྱི་བར་དུ་བྱིན་གྱིས་བརླབས་ནས། ལི་ཡུལ་ཐམས་ཅད་དང ། མཚོའི་ནང་ན་གནས་པའི་སེམས་ཅན་གྲངས་མེད་བ་རྣམས་ལ་འོད་ཟེར་དང ། ཐུགས་རྗེ་ཆེན་པོས་ཁྱབ་པར་མཛད་དེ། འོད་ཟེར་དེ་དང ། ཐུགས་རྗེ་ཆེན་པོ་དེས་ཆུ་ན་གནས་པའི་སེམས་ཅན་དེ་དག་ཐམས་ཅད་ཀྱི་སྡུག་བསྔལ་ནི་ཞི་བར་གྱུར། ཁོ་བ་དང ། འཁོན་དུ་འཛིན་པ་དང་ནི་བྲལ་ཏེ། བྱམས་པའི་སེམས་དང་ལྡན་པར་གྱུར་ཅིང ། ལྷའི་བདེ་བ་དང་ལྡན་ནས་སྐད་ཅིག་དེ་ཉིད་ལ་སེམས་ཅན་དེ་དག་ལས་གྲངས་མེད་པ་ཞིག་ཚེ་འཕོས་ནས། ལྷ་དང ། མི་རྣམས་ཀྱི་ནང་དུ་སྐྱེས་ཏེ། སངས་རྒྱས་ཉིད་དུ་འགྱུར་བའི་ས་བོན་རྙེད་ཅིང ། བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷ་རྣམས་ལ་ལན་གསུམ་གྱི་བར་དུ་བོས་ནས། འདི་ 357b སྐད་ཅེས་བཀའ་སྩལ་ཏོ། །རིགས་ཀྱི་བུ། ཁྱེད་ཀྱིས་དམ་བཅས་པ་རྣམས་ནི་བརྩོན་འགྲུས་མེད་པར་མི་འགྲུབ་བོ། །རིགས་ཀྱི་བུ། ངས་བསྐལ་པ་གྲངས་མེད་པ་གསུམ་གྱི་བར་དུ་དཀའ་བ་སྤྱད་པའི་བསྟན་པ་འདི་དང ། མཆོད་རྟེན་གོ་མ་ས་ལ་གནད་ཡུལ་དང་བཅས་པ་ཁྱེད་རྣམས་ལ་ཡོངས་སུ་གཏད་ཀྱི་ཡོངས་སུ་སྲུངས་ཤིག་།ཁྱེད་རྣམས་ལས་གང་ཞིག་གིས་ང་རྗེས་སུ་དྲན་ཞིང་གཟུངས་ཡོད་པ་དང ། བསྟན་པ་བསྲུང་བ་དེས་ནི་བསྟན་པ་འདི་ལ་རབ་ཏུ་བྱུང་བ་རྣམས་ཡོངས་སུ་བསྲུང་བར་གྱིས་ཤིག་།དེ་ཅིའི་སླད་དུ་ཞེ་ན། མི་ཁྱིམ་པ་ལ་ལ་ཞིག་ལོ་བརྒྱའི་བར་དུ་ཉིན་རེ་ཞིང་དགེ་བའི་རྩ་བ་བསོད་ནམས་ཆེན་པོ་བྱེད་ལ། འགའ་ཞིག་ཉིན་གཅིག་རབ་ཏུ་བྱུང་ནས་བསྟན་པ་ལ་གནས་ན། སྔ་མས་ཕྱི་མའི་བསོད་ནམས་ཀྱི་བརྒྱའི་ཆར་ཡང་མི་ཆོག་གོ་།དེ་ཅིའི་སླད་དུ་ཞེ་ན། སངས་རྒྱས་གངྒཱའི་ཀླུང་གི་བྱེ་མ་སྙེད་ཐམས་ཅད་ཀྱང་སྔར་ཁྱིམ་གྱི་གནས་སྤངས་ཏེ་རབ་ཏུ་བྱུང་ནས། སྤྱོད་ལམ་དེ་ཉིད་ཀྱིས་བྱང་ཆུབ་ཆེན་པོ་བརྙེས་སོ། །ང་ཡང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ཏེ། ས་བཅུ་བརྙེས་ནས་སྲིད་པ་ཐ་མའི་ཚེ། ནམ་ཕྱེད་ ་རྒྱལ་པོའི་ཁབ་ནས་བྱུང་སྟེ། ནགས་ཚལ་དུ་གཤེགས་སོ། །ནགས་ཚལ་ནས་བཞོན་པ་རྒྱལ་པོ་ཡབ་ཀྱི་ཐོག་ཏུ་དཀྲི་ནས། རང་གི་སྐྲ་རལ་གྲིས་བྲེགས་ཏེ། ངའི་གོས་གྱ་ནོམ་པ་རིན་ཐང་མེད་པ་རྔོན་པ་དེ་དག་ལས་ཆོས་གོས་ངུར་སྨྲིག་ཏུ་ 358a ༄#། །བརྗེས་སོ། །ངས་ཆོས་གོས་དེ་གྱོན་ནས་དུས་གསུམ་གྱི་སངས་རྒྱས་ཐམས་ཅད་ལ་ཕྱག་བཙལ་སྐྱབས་སུ་སོང་ནས། རབ་ཏུ་བྱུང་བའི་སྤྱོད་ལམ་བཟུང་བ་དང ། ལྷ་ཐམས་ཅད་ང་ལ་ཕྱག་འཚལ། སྐྱབས་སུ་སོང་ནས་ཕྱི་བཞིན་དུ་འབྲང་ངོ ། །ང་ཡང་སྤྱོད་ལམ་དེ་ཉིད་ཀྱིས་ཡང་དག་པར་རྫོགས་པའི་སངས་རྒྱས་བརྙེས་སོ། །དེའི་ཕྱིར་བདེ་བར་གཤེགས་པའི་བསྟན་པ་ནི་དམ་པ་ཡིན་པར་ཤེས་པར་བྱའོ། །རབ་ཏུ་བྱུང་བ་ནི་བསོད་ནམས་དང་ལྡན་པར་ཤེས་པར་བྱའོ། །འཇིག་རྟེན་ན་རབ་ཏུ་བྱུང་བས་ཐོབ་པ་མ་གཏོགས་པར་ཁྱིམ་པའི་ཆ་ལུགས་ཀྱིས་དགྲ་བཅོམ་པའམ། རང་སང་རྒྱས་སམ། བླ་ན་མེད་པའི་བྱང་ཆུབ་འཐོབ་པ་ནི་སུས་ཀྱང་མ་ཐོས་མ་མཐོང་ངོ ། །རབ་ཏུ་བྱུང་བའི་སྤྱོད་ལམ་དམ་པ་འདི་ནི་འཇིག་རྟེན་ན་ལྷ་ལ་སོགས་པ་ཐམས་ཅད་ཀྱི་མཆོད་གནས་ཡིན་ནོ། །དེ་ནས་དེའི་ཚེ་ལྷ་དང ། ལྷ་མོ་དེ་དག་ཐམས་ཅད་སྟན་ལས་ལངས་ཏེ། དབྱངས་གཅིག་ཏུ་སངས་རྒྱས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་རྣམས་ཀྱིས་བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་འཚལ་ཞིང ། བསམ་བཞིན་དུ་བཀའ་ལས་འགལ་བར་མི་འཚལ་ལོ། །ཡུལ་འདིར་སངས་རྒྱས་ཀྱི་བསྟན་པ་དང ། དེ་བཞིན་གཤེགས་པའི་སྤྱོད་ཡུལ་མཆོད་རྟེན་དང་བཅས་པ་ཡང་ཀུན་ཏུ་བསྲུང་བ་དང ། 358b བསྐྱང་བ་དང ། རྗེས་སུ་གཟུང་བར་འཚལ་གྱི། བཅོམ་ལྡན་འདས་ཀྱིས་ཀྱང་བདག་ཅག་རྣམས་ལ་མཐུ་བསྟང་དུ་གསོལ། །དེ་ཅིའི་སླད་དུ་ཞེ་ན། མ་འོངས་པ་རྩོད་པའི་དུས་ན་བྱིན་གྱིས་བརླབས་པའི་ཡུལ་འདིར་དགྲ་མང་པོ་དང ། མ་དད་པ་དང ། ཕྱིར་རྒོལ་བ། བདེ་བར་གཤེགས་པའི་བསྟན་པ་ལ་དད་པའི་ཁྱད་པར་མི་རྙེད་ཅིང ། བསྟན་པ་གཞིག་པའི་སླད་དུ་བརྩོན་པ་དག་འབྱུང་བའི་སླད་དུའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷ་དེ་དག་ལ་ལེགས་སོ་ཞེས་བྱ་བ་གནང་སྟེ། སྐྱེས་བུ་དམ་པ་རྣམས་ལེགས་སོ། །ལེགས་སོ། །ངས་ཀྱང་ཡུལ་འདི་བྱིན་གྱིས་བརླབས་ཟིན་ཏེ། བྱིན་གྱིས་བརླབས་པ་དེ་ཉིད་ཀྱིས་མཚམས་བཅད་པ་ཡང་ཡིན་ནོ། །མ་འོངས་པ་རྩོད་པའི་དུས་ན་ཡུལ་འདི་གཞོམ་པའི་ཕྱིར། སུམ་པའི་དམག་ཕལ་པོ་ཆེ་དང ། དྲུག་གུ་རུས་སྣ་ཚོགས་དང ། ཧོར་དང ། གཞན་ཡང ། དད་པ་མེད་པ་དག་འོང་བར་འགྱུར་ཏེ། དེའི་ཚེ་ཡུལ་གཞན་དང ། གཞན་དག་ནས་དེ་བཞིན་གཤེགས་པའི་གཟུགས་བརྙན་བྱིན་གྱིས་བརླབས་པ་དག་ཡུལ་འདིར་གཤེགས་ནས། ཡུལ་གྱི་ས་མཚམས་བསྲུང་བར་མཛད་དེ། བསོད་ནམས་ཀྱི་སྟོབས་དེས་ན་ཡུལ་འདི་གཏན་བརླག་པར་མི་འགྱུར་རོ། །གཟུགས་བརྙན་དེ་དག་གི་ཕྱི་བཞིན་དུ་བྱང་ཆུབ་སེམས་དཔའ་དང ། ལྷ་དང ། ཀླུ་དང ། མཐུ་སྟོབས་དང་ལྡན་པ་མང་པོ་དག་འོང་ཞིང ། ཡུལ་ཡུལ་དུ་གནོད་པ་རྣམས་ 359a ༄#། །ཟློག་པར་བྱེད། དགྲ་རྣམས་ཀྱིས་ཡུལ་མི་ཆོམས་པར་བྱེད་དེ། དགེ་བ་ཅན་ཞེས་བྱ་བའི་མཁར་ནས། དེ་བཞིན་གཤེགས་པ་བདེ་བའི་འབྱུང་གནས་ཞེས་བྱ་བའི་གཟུགས་བརྙན་གཤེགས་ནས། ནུབ་ཕྱོགས་མཁར་ཀོ་ཤེད་དུ་བཞུགས་ཤིང ། ཡུལ་གྱི་ས་མཚམས་བསྲུང་བར་འགྱུར་རོ། །བྱང་ཕྱོགས་ཡུལ་ཤེ་ན་ཞ་ཞེས་བྱ་བའི་དེ་བཞིན་གཤེགས་པའི་གཟུགས་བརྙན་ཤེ་ན་ཞ་ཞེས་བྱ་བ་སའི་འོག་ནས་འབྱུང་བར་འགྱུར་ཞིང ། ཡུལ་གྱི་ས་མཚམས་བསྲུང་བར་འགྱུར་རོ། །དེ་བཞིན་གཤེགས་པའི་གཟུགས་བརྙན་ཀིའུ་ལང་ཞེས་བྱ་བར་གཤེགས་ནས་ཤར་ཕྱོགས་ཡུལ་ཕྱེ་མ་ཞེས་བྱ་བའི་མཁར་དུ་བཞུགས་ཤིང ། ཡུལ་གྱི་ས་མཚམས་བསྲུང་བར་འགྱུར་རོ། །དེ་བཞིན་གཤེགས་པའི་གཟུགས་བརྙན་ཕྱེ་སེ་ཞེས་བྱ་བར་གཤེགས་ནས། བྱང་ཕྱོགས་ཀྱི་རི་གླང་རུ་ལ་འོད་སྲུང་གི་མཆོད་རྟེན་གྱི་དྲུང་དུ་བཞུགས་ཤིང ། དགེ་སློང་དགོན་པ་པ་རྣམས་ཀྱི་དགེ་བའི་རྩ་བ་བསྐྱེད་ཅིང ། དེ་བཞིན་གཤེགས་པའི་བསྟན་པ་དང ། ཡུལ་གྱི་ས་མཚམས་བསྲུང་བར་འགྱུར་རོ། །མཁར་དགེ་བ་ཅན་ཞེས་བྱ་བའི་ནང་ན། ཚོང་འདུས་ཀ་ས་དི་ཟེ་ཞེས་བྱ་བར་དེ་བཞིན་གཤེགས་པའི་གཟུགས་བརྙན་རྒྱལ་པོའི་ཕོ་བྲང་གནས་ཞེས་བྱ་བར་བཞུགས་ཤིང ། མཁར་དགེ་བ་ཡུལ་དང་བཅས་པའི་ས་མཚམས་བསྲུང་ 359b བར་འགྱུར་རོ། །ས་གཞི་ཉོ་མོ་ཉ་ཞེས་བྱ་བ་གང་དུ་རྒྱལ་པོ་ཡོལ་ཞེས་བྱ་བ་མཁར་བརྩིག་པའི་གྲོས་བྱེད་པར་འགྱུར་བ་དེར། དེ་བཞིན་གཤེགས་པའི་གཟུགས་བརྙན་ཅུ་གོན་པ་ན་ཞེས་བྱ་བ་བཞུགས་ཤིང ། མཁར་དགེ་བ་ཅན་ཞེས་བྱ་བ་ཡུལ་དང་བཅས་པའི་ས་མཚམས་བསྲུང་བར་འགྱུར་རོ། །གཙུག་ལག་ཁང་དི་ན་ཛྱ་ཞེས་བྱ་བར་དེ་བཞིན་གཤེགས་པ་མར་མེ་མཛད་ཀྱི་གཟུགས་བརྙན་ཐོར་ཀོང་དུ་བྱས་པ་གཤེགས་པར་འགྱུར་ཏེ། གཟུགས་བརྙན་དེ་ནི་ཛམྦུའི་གླིང་གིས་གཟུགས་བརྙན་ཐོར་ཀོང་དུ་བྱས་པ་ཐམས་ཅད་ཀྱི་ཐོག་མར་འབྱུང་བ་ཡིན་ནོ། ། གཟུགས་བརྙན་དེ་ལ། མི་རྣམས་ཀྱིས་ནི་མཚན་འཁོར་བའི་མར་མེ་མཛད་ཅེས་བྱ་བར་འདོགས་པར་འགྱུར་ཏེ། དེ་ནི། ལི་ཡུལ་གྱི་གཟུགས་བརྙན་ཐོར་ཀོང་དུ་བྱེད་པ་ཐམས་ཅད་ཀྱི་དཔེར་འབྱུང་ཞིང ། བདེ་བར་གཤེགས་པའི་བསྟན་པ་ཡུལ་དང་བཅས་པ་ཡོངས་སུ་བསྲུང་བར་འགྱུར་རོ། །གཞན་ཡང ། དེ་བཞིན་གཤེགས་པ་རིན་ཆེན་མང་གི་གཟུགས་བརྙན་ཡུལ་འདིའི་དབུས་སུ་གཤེགས་ནས། ཕྱོགས་བཅུའི་མཚམས་གཅོད་པར་མཛད་དེ། ཇི་སྲིད་དུ་དེ་བཞིན་གཤེགས་པའི་གཟུགས་བརྙན་ཕྱོགས་ཕྱོགས་ན་བཞུགས་པ་དེ་དག་མཆོད་གནས་སུ་བྱེད་པ་དེ་སྲིད་དུ་ཡུལ་འདི་བརླག་པར་མི་འགྱུར་རོ། །ཡུལ་འདི་ནས་སྐྱེས་པའི་མིའམ། ཡུལ་གཞན་ནས་སྐྱེས་པའི་མི་ལ་ལ་ཞིག་དེ་བཞིན་གཤེགས་པའི་གཟུགས་བརྙན་དེ་དག་ 360a ༄#། །ལ་སྙིང་ཐག་པ་ནས་དད་པ་དང ། གུས་པ་དང ། རབ་ཏུ་དང་བར་བྱེད་ཅིང ། འདི་སྙམ་དུ་བདེ་བར་གཤེགས་པའི་གཟུགས་བརྙན་འདི་དག་ནི། ཡུལ་འདི་བསྲུང་བའི་སླད་དུ་གཤེགས་སོ་སྙམ་དུ་ཡང་སེམས་ན། གཟུགས་བརྙན་དེ་དག་ཀྱང་སངས་རྒྱས་བཞུགས་པ་བཞིན་དུ་དོན་མཛད་པར་འགྱུར་རོ། །དེ་ཅིའི་སླད་དུ་ཞེ་ན། གཟུགས་བརྙན་དེ་དག་ང་དང་འདྲ་བར་དུས་གསུམ་དུ་གཏོགས་པའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་ཕྱིར་རོ། །གཞན་ཡང ། ཡུལ་འདིར་ངའི་གཟུགས་བརྙན་ཆེན་པོ་ཤིང་རྟས་འདྲེན་པ་བྱས་ཏེ། མཁར་དགེ་བ་ཅན་ཞེས་བྱ་བའི་ནང་དུ་བཞག་ནས། མཆོད་གནས་ཆེན་པོར་བྱེད་པར་འགྱུར་རོ། །དེ་ན་ཡུལ་འདིར་ཕྱོགས་དང ། ཕྱོགས་མཚམས་ནས། ཚོང་དཔོན་ཆེན་པོ་རྣམས་འོང་བར་འགྱུར་ཞིང ། གནོད་པ་རྣམས་ཀྱང་ཞི་བར་འགྱུར་རོ། །གཞན་ཡང ། ཡུལ་འདིར་དེ་བཞིན་གཤེགས་པའི་གཟུགས་བརྙན་ཉིས་བརྒྱ་རྩ་བརྒྱད། འོད་སྲུང་གི་མཆོད་རྟེན་དང་བཅས་པར་འབྱུང་བར་འགྱུར་ཏེ། དེ་དག་ཐམས་ཅད་ཀྱང་ཆོ་འཕྲུལ་ཆེན་པོ་སྟོང་ཅིང་སེམས་ཅན་རྣམས་ཀྱི་སྡིག་པ་ཆེན་པོ་ཡོངས་སུ་སྦྱོང་བ་དང ། གནོད་པ་སེལ་བ་མཛད་པར་འགྱུར་རོ། །ཡུལ་འདིར་གནོད་པ་དང ། འཇིགས་པ་དང ། སྐྲག་པ་འགའ་ཞིག་བྱུང་ན། ཡུལ་འདི་ཆེད་དུ་ཕྱོགས་ལྔར་སྦྱོར་བ་བྱས་ཏེ། རྒྱལ་པོ་དང ། 360b བློན་པོ་རྣམས་ཡུལ་འཛིན་པ་གང་ཞིག་འཇིགས་པ་དང་བྲལ་བར་བྱ་བའི་ཕྱིར། བདེ་བར་གཤེགས་པའི་བསྟན་པ་ལས་བསོད་ནམས་སྐྱེད་པར་འདོད་ན། གཙུག་ལག་ཁང་ཚར་མ་ཞེས་བྱ་བར་བསོད་ནམས་བྱའོ། །དེ་ཅིའི་ཕྱིར་ཞེ་ན། ཡུལ་འདིའི་མི་རྣམས་ཀྱི་དད་པ་དང ། ཡང་དག་པའི་ལྟ་བ་ནི་དང་པོའི་གཙུག་ལག་ཁང་དེ་ནས་སྐྱེ་བར་འགྱུར་རོ། །ནམ་ཞིག་ལིའི་རྒྱལ་པོ་དང ། བློན་པོ་དང ། ཡུལ་འཛིན་པ་རྣམས་ལ་གནོད་པ་རྣམ་པ་སྣ་ཚོགས་ཞིག་བྱུང་ན། རི་གླང་རུ་ལ་སྔོན་ཡང་དག་པར་རྫོགས་པའི་སངས་རྒྱས་གང་ན་བཞུགས་བཞུགས་པའི་ས་གཞི་དེ་བསྐོར་བར་བྱའོ། །ཡུལ་འདིའི་སེམས་ཅན་རྣམས་ལས་མི་དགེ་བ་འཆགས་པར་འདོད་ན། མཆོད་རྟེན་གོ་མ་ས་ལ་གན་དའི་དྲུང་དུ་བཤགས་པར་བྱའོ། །དེ་ཅིའི་ཕྱིར་ཞེ་ན། མཆོད་རྟེན་དེ་ནི་སངས་རྒྱས་བཅོམ་ལྡན་འདས་བཞུགས་པ་བཞིན་དུ་གང་དག་གིས་བསྐོར་བའམ། མེ་ཏོག་གམ། བདུག་པའམ། དབྱངས་སམ། རོལ་མོའི་སྒྲས་མཆོད་པ་བྱས་ན།་དེའི་མཚམས་མེད་པ་ལྔ་ཡང་ཉམས་དམས་པར་འགྱུར་ན་གཞན་ལྟ་སྨོས་ཀྱང་ཅི་དགོས། ཡུལ་འདི་རྒྱལ་པོ་དང ། བློན་པོ་དང ། ཡུལ་འཛིན་པ་གང་ཞིག་བརྟུལ་ཞུགས་ཆེན་པོའི་སྡོམ་པ་ལེན་པར་འདོད་པ་དེས། རི་གླང་རུ་ལ་གང་ན་དེ་བཞིན་གཤེགས་པའི་གཟུགས་བརྙན་པི་སེ་ཞེས་བྱ་བ་དང ། འོད་སྲུང་གི་མཆོད་རྟེན་ཡོད་པ་དེའི་དགེ་འདུན་ལས་ 361a ༄#། །མནོད་པར་བྱའོ། །དེ་ཅིའི་ཕྱིར་ཞེ་ན། ཡུལ་འདིར་ཆོས་སྤྱོད་པ་ཡོངས་སུ་རྫོགས་པ་དང ། ཚུལ་ཁྲིམས་ཡོངས་སུ་དག་པ་ནི་དེ་ནས་འབྱུང་བར་འགྱུར་བའི་ཕྱིར་རོ། །ཡུལ་འདིའི་མི་ལ་ལ་ཞིག་ཆད་པ་ཆེན་པོ་ཞིག་ལ་ཐུག་ན། དེས་རི་གླང་རུ་ལ་གནས་པའི་འཕགས་པའི་དགེ་འདུན་ལ་སྐྱབས་སུ་འགྲོ་བ་བྱས་ཏེ། དེས་ན་ཆད་པ་ཆེན་པོ་དེ་ལས་ཐར་བར་འགྱུར་རོ། །དེ་ཅིའི་ཕྱིར་ཞེ་ན། གནས་དེ་ན་ཐར་པ་ཐོབ་པ་སྟོང་ཕྲག་དུ་མ་ཕྱི་མའི་མཐའི་བར་དུ་གནས་ཤིང་མི་སྟོངས་པའི་ཕྱིར་ཏེ། རྒྱུ་དེས་ན་རི་གླང་རུ་དང།་མཆོད་རྟེན་གོ་མ་ས་ལ་གན་ད་ཡུལ་དང་བཅས་པ་དེ་བཞིན་གཤེགས་པ་རྣམས་ཀྱི་ཆང་ཁྱུ་ཡིན་ནོ། །དེ་ནས་དེའི་ཚེ་ཕྱོགས་བཅུའི་སངས་རྒྱས་ཀྱི་ཞིང་དག་ནས། བྱང་ཆུབ་སེམས་དཔའ་ཉི་ཁྲི་ལྷགས་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། དབྱངས་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་རྣམས་ཀྱིས་ཀྱང་ཐབས་སྣ་ཚོགས་ཀྱིས་དེ་བཞིན་གཤེགས་པའི་སྤྱོད་ཡུལ་དང ། ཡུལ་འདི་ཡོངས་སུ་བསྐྱང་བར་བགྱི། བསྲུང་བར་བགྱི་ཞིང ། ཇི་སྲིད་དུ་བདེ་བར་གཤེགས་པའི་བསྟན་པ་དང ། དཀོན་མཆོག་གསུམ་ལ་གནས་ཤིང ། རྒྱལ་པོ་དང ། བློན་པོ་ལ་སོགས་པ་མི་ཚུལ་ཁྲིམས་དང་ལྡན་པ་དད་པ་ཅན་དང ། ཡུལ་ཆོས་དང་ 361b མཐུན་པར་བགྱིད་པ་མཆིས་དེ་སྲིད་དུ་ཡོངས་སུ་མི་གཏང་ཞིང ། ཡུལ་འདིར་དུས་དུས་སྤྱོད་ལམ་དང ། ཆ་ལུགས་ཅི་དང ། ཇི་ལྟ་བུས་སེམས་ཅན་མང་པོའི་བསོད་ནམས་ཆེན་པོ་ཡོངས་སུ་སྨིན་པར་འགྱུར་བ་དང ། སངས་རྒྱས་ཉིད་དུ་སེམས་བསྐྱེད་པར་འགྱུར་བ་དང ། བསམ་གཏན་དང ། ཏིང་ངེ་འཛིན་ལ་སྙོམས་པར་འཇུག་པར་འགྱུར་བ་དང ། སངས་རྒྱས་ཉིད་ལས་ཕྱིར་མི་ལྡོག་པར་འགྱུར་བ་དེ་ལྟ་བུའི་སྐྱེ་བ་བླང་བའི་སླད་དུ། ཁ་ཅིག་གིས་ནི་རྒྱལ་རིགས་ཡོངས་སུ་གཟུང་བར་བགྱི། ཁ་ཅིག་གིས་ནི་རབ་ཏུ་བྱུང་བ་དང ། ཁྱིམ་པ་གཞན་གྱི་ཆ་ལུགས་ཡོངས་སུ་གཟུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ། ཁྱེད་རྣམས་ཀྱིས་འདི་ལྟར་བསྐལ་པ་བཟང་པོའི་སངས་རྒྱས་ཐམས་ཅད་ཀྱི་སྤྱོད་ཡུལ་དང ། ཡུལ་འདི་གང་དུ་སེམས་ཅན་རྣམས་སངས་རྒྱས་ཉིད་ལས་ཕྱིར་མི་ལྡོག་པར་འགྱུར་བར་དེ་ལྟ་བུ་ཆུ་གང་ཐོབ་ཅིག།་ཡང་དེའི་ཚེ་ལྷ་རྣམ་ཐོས་ཀྱི་བུ་ཞེས་བྱ་བ་དང ། མི་ཕམ་པ་ཞེས་བྱ་བ་ལ་སོགས་པ་ལྷ་ཐམས་ཅད་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡུལ་འདི་བསྲུང་བའི་སླད་དུ་མཐུ་བསྟང་བ་དང ། བཅོམ་ལྡན་འདས་ཀྱི་བྱིན་གྱིས་བརླབས་པ་དང ། མཐུས་བདག་ 362a ༄#། །ཅག་རྣམས་ཀྱིས་ཀྱང་དེ་བཞིན་གཤེགས་པའི་སྤྱོད་ཡུལ་དང ། བྱིན་གྱིས་བརླབས་བརླབས་པའི་ཡུལ་འདི། ཀུན་ཏུ་བསྲུང་ཞིང་ཡལ་བར་མི་གཏང་བར་བགྱི་བའི་སླད་དུ་བརྩོན་འགྲུས་ཆེན་པོའི་ཤུགས་ཀྱིས་འབད་པར་འཚལ་ལོ། །གལ་ཏེ་ཡུལ་འདིར་གྲུ་གུ་ལ་སོགས་པ་གཏུམ་པོ་དད་པ་མ་མཆིས་པ་རྣམས་དང ། ཧོར་དང ། སུམ་པའི་དམག་དག་མཆི་བར་འགྱུར་ན། དེ་དག་ཕན་ཚུན་ནང་འཁྲུགས་འབྱུང་བ་དང ། དེ་དག་གི་འཁོར་ནང་མི་མཐུན་པར་འགྱུར་བ་དང ། འགུམ་པར་འགྱུར་བར་བགྱིའོ། །ཡང་ན་དེ་དག་ཅི་ནས་ཀྱང་འདིར་མཆི་ཞིང ། དེ་བཞིན་གཤེགས་པའི་བསྟན་པ་འཇིག་མི་ནུས་པར་བགྱི་བའི་སླད་དུ། གཞན་གྱི་དབང་དུ་འགྱུར་བར་བགྱིའོ། །གལ་ཏེ་རྒྱའི་དམག་དག་མཆིས་པར་གྱུར་ན། དེ་དག་གི་སེམས་དད་པར་བགྱི་ཞིང་སླར་ཡུལ་འདི་ལ་ཕན་འདོགས་པ་དང ། ཕྱིས་ཡུལ་འདིར་བསོད་ནམས་བགྱི་བའི་དངོས་པོ་དགེ་བ་རྒྱ་ཆེན་པོ་བགྱིད་དུ་སྩལ་ཏོ། །ནམ་ཞིག་ཡུལ་འདིའི་སེམས་ཅན་རྣམས་ལ་གནོད་པར་བགྱིད་པ་དེའི་ཚེ་ན་ཡང་ཕྱིར་དད་པར་བགྱི་ཞིང་མདོ་འདི་ཡང་ཁོང་དུ་ཆུད་པར་བགྱིད་དུ་སྩལ་ཏོ། ། གང་གི་ཚེ་དེ་དག་མ་འོངས་པའི་དཀོན་མཆོག་གསུམ་གྱི་ཡོ་བྱད་ལ་དབང་འཚལ་ཞིང་མངའ་འཕྲོག་པ་དང ། སེམས་ཅན་བསོད་ནམས་དང་ལྡན་པ་རྣམས་ལ་འཚེ་བ་དེའི་ཆེ་ 362b ནི།་བདག་ཅག་གི་འཁོར་གནོད་སྦྱིན་དད་པ་ཅན་དང ། དད་པ་མ་མཆིས་པ་དུ་མ་ཞིག་དབང་བསྐུར་ཏེ། བཀྱེ་ནས་ཡུལ་དེར་ཅི་ནས་ཀྱང་ཡུན་རིང་མོ་ཞིག་གི་བར་དུ་རྒུད་པར་བགྱི་ཞིང།་ཡུལ་འདི་འཇིག་མི་ནུས་པར་བགྱི་བའི་སླད་དུ་མུ་གེ་དང ། ནད་དང ། ཕ་རོལ་གྱི་དམག་མཆི་བར་བགྱིད་དུ་སྩལ་ཏོ། །ལི་ཡུལ་གྱི་ནོར་རྫས་དེ་དག་གིས་འཚལ་བ་རྣམས་ཀྱང་བཀྲ་མི་ཤིས་པར་བགྱི་ཞིང ། གང་དང ། གང་དུ་ཕྱིན་པའི་ཡུལ་དེ་ཐམས་ཅད་དུ་ཡང་སྨན་ཡོན་མི་ཐོགས་ཤིང་འཁྲུག་པར་བགྱིའོ། །དེ་དག་གི་ཡུལ་འཛིན་པ་དང ། དམག་དཔོན་ཡང་རྒུད་པར་བགྱིའོ། །བོད་ཀྱི་དམག་རྣམས་ལ་ཡང་དེ་བཞིན་དུ་རིག་པར་བགྱི་སྟེ། དེ་གང་གི་ཚེ་དེ་དག་ཆོས་དང་མཐུན་པར་ཡུལ་འདི་འཛིན་ཅིང་སྲུང་ན་ནི། བདག་ཅག་རྣམས་ཀྱིས་ཀྱང་དེ་དག་ཡོངས་སུ་བསྐྱང་ཞིང་རྒྱལ་བར་འགྱུར་བར་བགྱིའོ། །ནམ་ཞིག་དེ་དག་བདེ་བར་གཤེགས་པའི་བསྟན་པ་འཇིག་པ་དང ། ཡུལ་གྱི་མི་ལ་གནོད་པར་བགྱི་བ་དེའི་ཚེ་ན། དམག་རྣམས་ནང་འཁྲུག་འབྱུང་བ་དང ། དམག་གི་དཔོན་ཡང་ཚེ་ཐུང་དུ་རྒུད་པར་བགྱི་སྟེ། རྒྱས་པར་ནི་སྔ་མ་བཞིན་ནོ། །མ་འོངས་པའི་དུས་ན་ཡུལ་འདིའི་རྒྱལ་པོ་དང ། བློན་པོ་སེམས་གྱ་གྱུ་ཅན། བསོད་ནམས་ཆུང་བ་དང ། དད་པ་མེད་པ། དཀོན་མཆོག་གསུམ་གྱི་དཀོར་ལ་འཇོལ་ཉོག་ཏུ་རློམ་ཞིང ། ཡུལ་གྱི་རྩིས་མགོ་དང་འགལ་བར་བགྱིད་པ། ནོར་རྫས་མ་ 363a ༄#། །བརྟགས་པས་གོ་འཕང་ཚོལ་ལ། སེམས་ཅན་བསོད་ནམས་དང་ལྡན་པ་རྣམས་ལ་སུན་འབྱིན་དུ་རྒོལ་བ། ངོ་ཚ་མེད་པ། མངོན་དུས་ཅན། འདོད་པའི་ཡོན་ཏན་གྱིས་ངོམས་མི་མྱོང་བ། རབ་ཏུ་འབྱུང་བ་དག་གིས་སེམས་སྐྱོ་བ་ལ་ལ་དག་འབྱུང་བར་འགྱུར་ན། དེ་དག་ནི་བདག་ཅག་གིས་ཀྱང་ཡུལ་འདི་ནས་དབྱུང་ཞིང་ཡུལ་ངན་པ་གཞན་དང ། གཞན་དག་ཏུ་སྤྱུགས་པར་བགྱིས་ཏེ། ཚུལ་དེ་ལྟ་བུས་ཡུལ་འདི་ཡོངས་སུ་བསྐྱང་བ་དང ། བསྲུང་བར་བགྱིའོ། །བཅོམ་ལྡན་འདས། སླད་མ་རྩོད་པའི་དུས་ན། ཡུལ་འདི་གཞིག་པར་བརྩོན་པའི་སེམས་ཅན་བདུད་ཀྱི་ཕྱོགས་སྡིག་པ་བགྱིད་པ། མཐུ་སྟོབས་དང་ལྡན་པ། ཡུལ་དག་ཏུ་སེམས་ཅན་རྣམས་ཀྱི་དད་པ་ཟློག་པར་བགྱིད་པ། སེམས་གདུག་ཅིང་བརླང་བའི་ལྷ་དང ། ཀླུ་དང ། གནོད་སྦྱིན་དང ། སྲིན་པོ་དུ་མ་ཞིག་འབྱུང་བར་འགྱུར་ལ། དེ་དག་ཀྱང་བདག་ཅག་གི་དབང་དུ་མི་འགྱུར་ན། དེ་ལ་བདག་ཅག་གིས་ཐབས་ཇི་ལྟར་འཚལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཁྱེད་ཡིད་སྐྱོ་བར་མ་བྱེད་ཅིག་།དེ་ཅིའི་ཕྱིར་ཞེ་ན། གླིང་བཞི་པ་འདི་ན། བྱང་ཆུབ་སེམས་དཔའ་རྣམས་དང ། ལྷ་མཐུ་སྟོབས་ཆེ་བ་དང ། ཀླུ་དང ། གནོད་སྦྱིན་ས་ཐོབ་པ་དུ་མ་ཞིག་གནས་པ་དེ་དག་ལ་སེམས་འཇམ་པོས་མཆོད་པ་ཆེན་པོ་བྱས་ཏེ། མཆོད་རྟེན་གོ་མ་ས་ལ་གན་ད་དང ། གཙུག་ 363b ལག་ཁང་ཚར་མ་ལ་སོགས་པ། ཡུལ་བྱིན་གྱིས་བརླབས་བརླབས་པ་རྣམས་སུ་ཐེག་པ་ཆེན་པོའི་སྡེ་སྣོད་ཤེས་རབ་ཀྱི་ཕ་རོལ་ཏུ་ཕྱིན་པ་དང ། འདུས་པ་ཆེན་པོ་དང ། སངས་རྒྱས་ཕལ་པོ་ཆེ་དང།་དཀོན་མཆོག་བརྩེགས་པ་ལ་སོགས་པ་ཤིན་ཏུ་རྒྱས་པའི་སྡེ་མང་པོ་ལྷོགས་ཤིག་དང ། ཡུལ་སོ་སོ་ནས་བྱང་ཆུབ་སེམས་དཔའ་ས་བཅུ་པ་ལ་སོགས་པ་དང ། མཐུ་སྟོབས་ཆེ་བའི་སེམས་ཅན་དེ་དག་ཡུལ་འདིར་འོངས་ནས་ཆོས་ཀྱི་རོ་མནོས་ཤིང ། དུས་གསུམ་དུ་གཏོགས་པའི་དེ་བཞིན་གཤེགས་པ་རྣམས་ཀྱི་དམ་ཚིག་ལས་མི་འགལ་བར་བྱེད། བསྐལ་པ་བཟང་པོའི་སངས་རྒྱས་རྣམས་ཀྱི་སྤྱོད་ཡུལ་དང ། ཡུལ་ཡང་སྲུང་བར་བྱེད། ཡུལ་འདིའི་མི་དང ། བསྟན་པ་ཡང་སྲུང་བར་བྱེད་པར་འགྱུར་རོ། །གཞན་ཡང ། མ་འོངས་པའི་དུས་ན། ཡུལ་དགེ་བ་འདིའི་རྒྱལ་པོ་མཐུ་ཆུང་བར་འགྱུར་ཏེ། མཐུ་ཆུང་བ་དེས་ན་རང་གི་མཐུ་སྟོབས་ཀྱིས་ཡུལ་མི་ཐུབ་པས། རྒྱལ་པོ་དད་པ་ཅན་གཞན། འདི་ལྟ་སྟེ། བོད་ཀྱི་རྒྱལ་པོ་དང།་རྒྱའི་རྒྱལ་པོ་ལ་སོགས་པ་ལ་སྐྱབས་བཙལ་ནས་ཡུལ་སྲུང་བར་བྱེད་དོ། །དེ་ཅིའི་ཕྱིར་ཞེ་ན། མ་འོངས་པའི་དུས་ན་རྒྱ་དང ། བོད་ཀྱི་ཡུལ་དུ་དཀོན་མཆོག་གསུམ་གནས་ཤིང།་མཆོད་གནས་ཆེན་པོར་བྱེད་པ་དང ། ཡུལ་དེ་དག་ཀྱང་བྱང་ཆུབ་སེམས་དཔའ་ཆེན་པོའི་གནས་སུ་འགྱུར་ཞིང ། སེམས་ཅན་དེ་དག་ཀྱང་བྱང་ཆུབ་ཆེན་པོའི་ལམ་ཚོལ་ 364a ༄#། །པའི་ངང་ཚུལ་ཅན། ཐེག་པ་ཆེན་པོ་ལ་དད་པ། ཏིང་ངེ་འཛིན་ལ་གཞོལ་བར་འགྱུར་ཏེ། དེ་དག་གི་མཐུ་སྟོབས་ཀྱིས་ལི་ཡུལ་གྱི་མི་དང ། དཀོན་མཆོག་གསུམ་བརླགས་པར་མི་འགྱུར་རོ། །སྐྱེས་བུ་དམ་པ་ཁྱེད་རྣམས་ཀྱིས་ཀྱང་བོད་དང ། རྒྱའི་རྒྱལ་པོ་དང ། བློན་པོ་དག་ཅི་ནས་ཀྱང་མཆོད་རྟེན་གོ་མ་ས་ལ་གན་ད་དང ། ཡུལ་དགེ་བ་འདི་ལ་རི་མོ་བྱེད་པར་འགྱུར་བ་དང ། ཡུལ་འདིར་བསོད་ནམས་བྱ་བའི་དངོས་པོ་དགེ་བ་རྒྱ་ཆེན་པོ་བྱེད་པར་འགྱུར་བ་དང ། ཡུལ་འདིའི་མི་ཉི་འོག་དད་པ་མེད་པའི་ཡུལ་གཞན་དུ་འཁྱམས་པ་རྣམས་ཀྱང་སྡུག་བསྔལ་དང་དབྲལ་ཞིང་བདེ་བར་རང་གི་ཡུལ་དུ་བསྐྱལ་ནས། ཕྱིར་ཡང་དག་པའི་ལྟ་བ་ཅན་དང ། བསོད་ནམས་ལ་དགའ་བར་འགྱུར་བར་སེམས་སྒྱུར་ཅིག་དང ། དགེ་བའི་རྩ་བ་དེའི་སྟོབས་ཀྱིས་སྐྱེས་བུ་དམ་པ་ཁྱེད་རྣམས་ཀྱི་དགེ་བའི་རྩ་བ་དང ། མདངས་དང ། གཟི་བརྗིད་དང ། འཁོར་འཕེལ་བར་འགྱུར་ཞིང་སངས་རྒྱས་ཉིད་དུ་ཡང་ཉེ་བར་འགྱུར་གྱི། དུས་གསུམ་དུ་གཏོགས་པའི་དེ་བཞིན་གཤེགས་པ་རྣམས་ཀྱི་གདམས་ངག་ལ་བྱས་པ་གཟོ་བར་གྱིས་ཤིག་།འདི་ལྟར་ཡུལ་འདིའི་སེམས་ཅན་རྣམས་ནི་ཕྱིར་མི་ལྡོག་པ། བྱང་ཆུབ་སེམས་དཔའི་ལས་དང་ལྡན་པ། སྙིང་རྗེ་དང་ལྡན་པ། བདེན་པ་དང་ལྡན་པ། གཏོང་ཕོད་པ། ཕྲག་དོག་དང ། འཁོན་དུ་འཛིན་པ་རྣམ་ 364b པར་སྤངས་པ། བྱས་པ་གཟོ་བ། ཆོས་ལ་དགའ་བ། ཡང་དག་པའི་ལྟ་བ་ཅན། ལོག་པར་ལྟ་བ་ཐམས་ཅད་རྣམ་པར་སྤངས་པ། སེམས་འཇམ་པར་འགྱུར་ཏེ། རྒྱུ་དེས་ན་དགེ་བ་རྣམས་ཞེས་བྱའོ། །ཡུལ་འདི་མཁར་ཡང་མི་བྱམས་པ་དང ། འཇམ་པ་སེམས་དང་ལྡན་པ་རྣམས་དང ། མཆོད་རྟེན་དང ། གཙུག་ལག་ཁང་དུ་མས་བརྒྱན་པར་འགྱུར་ཏེ།་དེའི་ཕྱིར་མཁར་དགེ་བ་ཅན་ཞེས་བྱའོ། །གཞན་ཡང ། ཡུལ་གཞན་དག་ནས་སེམས་ཅན་དད་པ་མེད་པ་སྡང་བ་འཁོན་དུ་འཛིན་པ་དག་ཡུལ་འདིར་འོངས་པ་ཀུན། ཡུལ་འདིའི་རྡུལ་གྱིས་རེག་ཅིང ། ཡུལ་འདི་ནས་འཁྲུངས་པའི་འཚོ་བ་ལ་ལོངས་སྤྱོད་ན། དེ་དག་ཐམས་ཅད་ཀྱིས་སེམས་བསྒྱུར་ནས། སེམས་འཇམ་པ་དང ། མཉེན་པ་དང ། བྱམས་པའི་བསམ་པ་དང ། ཁྲོབ་དང ། འཁོན་དུ་འཛིན་པ་སྤངས་པ་དང ། དད་པ་དང ། ཡང་ཡུལ་འདིར་སྡིག་པ་མི་བྱེད་པར་འགྱུར་སྟེ། ཡུལ་འདི་ནི་ཡོན་ཏན་མང་པོ་འདི་དག་དང་ལྡན་པ་ཡིན་ནོ། །དེ་ནས་དེའི་ཚེ་སྔར་སངས་རྒྱས་བཅོམ་ལྡན་འདས་ཀྱིས་ལན་གསུམ་གྱི་བར་དུ་བྱིན་གྱིས་བརླབས་ནས། འོད་ཟེར་ཐུགས་རྗེ་ཆེན་པོ་དང་བཅས་ཏེ་བཀྱེ་བ་དེས། ཆུ་ན་གནས་པའི་སེམས་ཅན་རྣམས་ཀྱི་ཡོངས་སུ་དག་པ་དང ། བདེ་བ་དང་ལྡན་པར་བྱས་ནས་ཆུའི་ནང་ནས་སླར་འཐོན་ཏེ། ཕྱོགས་བཅུའི་སངས་ 365a ༄#། །རྒྱས་ཀྱི་ཞིང་ཐམས་ཅད་དུ་ཁྱབ་པར་གྱུར་ཏོ། །ཡང་འོད་ཟེར་དེ་དག་སླར་ལོག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡུལ་བྱིན་གྱིས་བརླབས་པ་དང ། ཉན་ཐོས་ཆེན་པོ་རྣམས་ཀྱིས་ཡུལ་བྱིན་གྱིས་བརླབས་པ་དང ། མཚོའི་ནང་ནས་བྱུང་བའི་པད་མོའི་སྟེང་ན། དེ་བཞིན་གཤེགས་པའི་གཟུགས་བརྙན་བཞུགས་པ་དེ་དང ། དེ་དག་གི་འོད་ཟེར་དེ་དང་འདྲེས་ནས་ནམ་མཁའ་ལས་འཕགས་ཏེ། སྟེང་གི་ནམ་མཁའ་ཁེབས་པར་གྱུར་ཅིང ། ལི་ཡུལ་ཐམས་ཅད་དུ་ལྷའི་མེ་ཏོག་གི་ཆར་ཕབ་བོ། །ལྷའི་མེ་ཏོག་དེ་དག་ཕན་ཚུན་དུ་རེག་པ་ལས་ཆོས་ཀྱི་སྒོ་མོ། འདི་ལྟ་སྟེ། སངས་རྒྱས་དང ། ཆོས་དང ། དགེ་འདུན་གྱི་མཚན་དང ། ཡང་དག་པའི་ལྟ་བ་དང ། ཤེས་རབ་དང ། ཚུལ་ཁྲིམས་དང ། དགེ་བའི་རྩ་བ་དང ། དེ་བཞིན་གཤེགས་པ་རྣམས་ཀྱི་དཀའ་བ་སྤྱད་པ་དང ། སྨོན་ལམ་དང ། བྱང་ཆུབ་སེམས་དཔའི་རྫུ་འཕྲུལ་དང ། སེམས་ཅན་ཡོངས་སུ་སྨིན་པར་བྱེད་པ་དང ། དགེ་སྦྱོང་གི་འབྲས་བུ་བཞི་པོ་རྒྱུན་དུ་ཞུགས་པ་དང ། ལན་གཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དང ། ཁམས་གསུམ་གྱི་སྲིད་པ་ལས་ངེས་པར་འབྱིན་པ་དང ། རྣམ་པར་ཐར་པའི་སྒོ་གསུམ་དང ། འདུ་བྱེད་འཇིག་པ་དང ། དྲན་པ་ཉེ་བར་གཞག་པ་དང ། འཕགས་པའི་བདེན་པ་དང ། རྫུ་ 365b འཕྲུལ་གྱི་རྐང་པ་དང ། བསམ་གཏན་དང ། བསྡུ་བའི་དངོས་པོ་དང ། སོ་སོ་ཡང་དག་པར་རིག་པ་དང ། གཟུགས་མེད་པའི་སྙོམས་པར་འཇུག་པ་བཞི་དང ། དབང་པོ་ཡོངས་སུ་དག་པ་དང ། བྱང་ཆུབ་ཀྱི་ཕྱོགས་དང་མཐུན་པའི་ཆོས་མཐའ་དག་གི་སྒྲ་འབྱིན་པར་གྱུར་ཏོ། །གཞན་ཡང ། སེམས་ཡོངས་སུ་དག་པ་དང ། བྱང་ཆུབ་ཀྱི་ཡན་ལག་དང ། འཕགས་པའི་ལམ་དང ། སྙོམས་པར་འཇུག་པ་དང ། ས་དང ། སྟོབས་དང ། ཐུགས་རྗེ་དང ། བྱམས་པ་ཆེན་པོ་དང ། རྟེན་ཅིང་འབྲེལ་བར་འབྱུང་བ་དང ། ཐེ་ཚོམ་སེལ་བ་དང ། སངས་རྒྱས་ཉིད་ལས་མི་ལྡོག་པ་དང ། ཏིང་ངེ་འཛིན་དང ། མངོན་པར་རྟོགས་པ་དང ། མི་སྐྱེ་བའི་ཆོས་ལ་བཟོད་པ་དང ། མ་འདྲེས་པ་དང ། སངས་རྒྱས་ཉིད་དུ་འགྱུར་བ་དང ། མི་རྟག་པ་དང ། སྡུག་བསྔལ་བ་དང ། བདག་མེད་པ་དང ། སྟོང་པ་དང ། མ་བྱས་པ་དང ། མ་སྐྱེས་པ་དང ། ཕྱིན་ཅི་མ་ལོག་པ་དང ། ཡང་དག་པའི་མཐའ་དང ། དེ་བཞིན་གཤེགས་པའི་སྙིང་པོ་ཁོངས་སུ་གཏོགས་པ་རྣམ་པར་མི་རྟོག་པའི་ཡེ་ཤེས་རྟོགས་པ་དང ། རྣལ་འབྱོར་པ་རྣམས་ཀྱིས་སོ་སོ་རང་གིས་རིག་པའི་སྤྱོད་ཡུལ་དང ། སྐྱེ་བ་སྡུག་བསྔལ་བ་དང ། རྒ་བ་དང ། སྡུག་པ་དང་བྲལ་བ་དང ། མི་སྡུག་པ་དང་ཕྲད་པ་དང ། འདོད་པ་བཙལ་ཏེ་མ་རྙེད་པའི་སྡུག་བསྔལ་གྱི་སྒྲ་ཡང་བྱུང་བར་གྱུར་ཏོ། །གཞན་ཡང ། ཕུང་པོ་ལྔ་པོ་དག་ལས་སེམས་ཅན་ 366a ༄#། །མེད་པ་དང ། གསོ་བ་དང ། གང་ཟག་དང ། སྲོག་མེད་པ་དང ། ཆོས་བདེན་པ་སྐྱེ་བ་མེད་པ་དང ། འགག་པ་མེད་པ། རྟག་པ་མེད་པ། ཆད་པ་མེད་པ། འོངས་པ་མེད་པ། འགྲོ་བ་མེད་པ་དང ། དཀོན་མཆོག་གསུམ་གྱི་གདུང་དང ། བྱིན་གྱིས་བརླབས་དང ། འགྲོ་བ་ལྔ་པོ་དག་གི་འཕྲུལ་པ། རྨི་ལམ་ལྟ་བུ་དང ། འཁོར་བའི་འདུ་བྱེད་བཙོན་ར་ལྟ་བུ་དང ། སྒྱུ་མ་དང ། སྨིག་རྒྱུད་དང ། ཆུ་ཟླ་དང ། བྲག་ཆ་ལྟ་བུ་ཞེས་བྱ་བའི་སྒྲ་བྱུང་བར་གྱུར་ཏོ། །གཞན་ཡང ། དད་པ་དང ། མངོན་པར་རྟོགས་པ་དང ། བརྩོན་འགྲུས་དང ། དགེ་བ་བཅུའི་ལས་ཀྱི་ལམ་དང ། འཁོར་བས་སྐྱོ་བར་གྱུར་པ་དང ། དེ་ལྟ་བུ་ལ་སོགས་པ་སྒྲ་བརྒྱ་སྟོང་དུ་མ་བྱུང་བར་གྱུར་ཏོ། །འཁོར་འདུས་པ་མང་པོ་དེ་དག་དང ། བྱང་ཆུབ་སེམས་དཔའ་ཕྱོགས་ཕྱོགས་ནས་ལྷགས་པ་དེ་དག་ཐམས་ཅད་ས་ལ་གནས་པའི་ལྷ་དང ། ཀླུ་དང ། ནམ་མཁའ་ལ་གནས་པའི་ལྷ་དང ། གནོད་སྦྱིན་ཐམས་ཅད་སེམས་ངོ་མཚར་དུ་གྱུར་ནས་རངས་པ་སྐྱེས་ཏེ། ཆོས་ཀྱི་སྒོ་མོའི་སྒྲ་དེ་དག་ལ་ཡིད་མི་ཕྱེད་པར་གྱུར་ཏོ། །དེ་ནས་དེའི་ཚེ་འཁོར་དེ་དག་གིས་ཁོང་དུ་ཆུད་པར་བྱ་བའི་ཕྱིར།་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་ 366b དུ།་ཆོ་འཕྲུལ་ཆེན་པོ་འདི་ལྟ་བུ་བསྟན་པ་ལགས། བཅོམ་ལྡན་འདས་ཀྱིས་ཚངས་པའི་དབྱངས་ཀྱིས་བཀའ་སྩལ་པ། འཇམ་དཔལ། ཆོས་ཀྱི་སྒོ་མོ་འདི་དག་ནི། ཡུལ་དགེ་བ་ནས་སྐྱེས་པའི་སེམས་ཅན་རྣམས་ཀྱི་ཆེད་དང ། འཁོར་བཞི་པོ་རྣམས་ཀྱི་ཆེད་དུ་ཡང་ལྷག་པར་བྱིན་གྱིས་བརླབས་ནས་བསྟན་པ་ཡིན་ཏེ། ཆོས་ཀྱི་སྒོ་མོ་འདིས་ནི། བྱང་ཆུབ་སེམས་དཔའ་རྣམས་ཚེགས་ཆུང་ངུ་དང ། འབད་པ་ཆུང་དུས་དབང་པོ་དང ། ཤེས་པ་ཡོངས་སུ་དག་པར་འགྱུར་ཞིང་ཆོས་ཀྱི་སྒོ་མོ་དེ་དང་དེ་དག་ཀྱང་མངོན་པར་རྟོགས་པར་འགྱུར་རོ། ། མ་འོངས་པའི་སྐྱེ་བོ་དེ་དག་ནི་བྱིས་པ་ཆུང་དུ་ཡན་ཆད་ཆོས་མངོན་པར་རྟོགས་པར་དགའ་ཞིང ། རྩེད་མོར་ཡང་ཆོས་ཀྱི་སྒོ་མོ་འདི་དག་སྨྲ་བར་འགྱུར་རོ། །སེམས་ཅན་དེ་དག་དབང་པོ་ཡོངས་སུ་བརྟས་ནས། ཆོས་ཀྱི་མིག་རྣམ་པར་དག་པས་དེ་བཞིན་གཤེགས་པའི་སྐུ་ཡང་མཐོང་བར་འགྱུར། ཆོས་ཀྱི་རྣ་བ་རྣམ་པར་དག་པས་ཆོས་ཡང་དག་པ་མ་ནོར་བ་ཡང་ཐོས་པར་འགྱུར། དེ་དག་འཁོར་བ་ནས་འདུ་བྱེད་དང ། ཆོས་ཐམས་ཅད་ལས་ཀྱང་སེམས་རྣམ་པར་གྲོལ་བར་འགྱུར་ཏེ། སེམས་དེ་ལྟ་བུ་དེས་ན་ཡུལ་དགོན་པ་བྱིན་གྱིས་བརླབས་པ་འདིར་དགེ་བའི་ཕྱོགས་ལ་བརྩོན་པའམ། ཡང་རི་གླང་རུ་ལ་དེ་དག་ཐམས་ཅད་དངོས་གྲུབ་ཐོབ་པར་གྱུར་ཏེ། བདུད་སྡིག་ཅན་གྱིས་ཀྱང་གླགས་མི་རྙེད་ན། གཞན་དག་གིས་ལྟ་སྨོས་ཀྱང་ 367a ༄#། །ཅི་དགོས། འདི་ལྟ་སྟེ། ལྷ་རྣམས་ཀྱིས་འཁོར་གནོད་སྦྱིན་ནམ། དྲི་ཟའམ། མི་འམ་ཅི་ཆད་པས་བཅད་པར་གྱུར་ན་ཡང་མཆོད་རྟེན་གོ་མ་ས་ལ་གན་ད་དང།་རི་གླང་རུ་ལ་འཁྲས་ན། དེ་དག་གིས་མི་མཐོང་བར་འགྱུར་རོ། །བརྒྱ་ལ་མཐོང་ན་ཡང་སེམས་ཞི་བར་འགྱུར་ཏེ། རྒྱུ་དེས་ན་རི་གླང་རུ་དང ། མཆོད་རྟེན་གོ་མ་ས་ལ་གན་ད་ནི།་མཚམས་གཅད་པ་དང ། གཙང་བྱེད་དང ། སྐྱབས་དང ། འཇིག་རྟེན་གྱི་ཁམས་གཞན་དག་ན་གནས་པའི་སེམས་ཅན་རྣམས་ཀྱིས་ཀྱང་ཕྱག་བྱ་བར་འོས་པ་ཡིན་ནོ།། མཆོད་རྟེན་གོ་མ་ས་ལ་གན་ད་དང ། རི་གླང་རུ་དང ། ཡུལ་དགེ་བ་དང ། མཁར་དགེ་བ་ཅན་དང ། དགོན་པ་བྱིན་གྱིས་བརླབས་པའི་མིང་ཐོས་ནས། དད་པ་སྐྱེས་པ་ཙམ་གྱིས་ཀྱང་སྡིག་པ་ཆེན་པོ་འབྱང་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་དང ། རྣམ་ཐོས་ཀྱི་བུ་ལ་བཀའ་སྩལ་པ། རིགས་ཀྱི་བུ་ཁྱེད་གཉིས་སོང་ལ། མཚོ་ཆེན་པོ་འདིར་ཤའི་རི་དྲོལ་ཏེ། བྱང་ཕྱོགས་ལོགས་སུ་གྱི་ཤོ་གཙང་པོའི་ནང་དུ་ཕོ་ལ། ཆུ་ལ་གནས་པའི་སེམས་ཅན་རྣམས་ལ་མི་གནོད་པར་སྲུང་བ་དང ། ཡུལ་འདི་མཚམས་མངོན་པར་གྱིས་ཤིག་།དེ་ནས་ཉན་ཐོས་ཆེན་པོ་ཤཱ་རིའི་བུ་དང ། རྣམ་ཐོས་ཀྱི་བུས་དེ་བཞིན་འཚལ་ལོ་ཞེས་གསོལ་ནས། རྫུ་འཕྲུལ་གྱིས་ 367b ནམ་མཁའ་ལས་ཤའི་རི་གང་ན་བ་དེ་ལོགས་སུ་ཆས་ཏེ། ཤཱ་རིའི་བུས་ནི་ལག་ན་འཁར་གསིལ་ཐོགས། རྣམ་ཐོས་ཀྱི་བུས་ནི་ལག་ན་མདུང་ཐོགས་ཏེ། ཤའི་རི་ཕྱེད་སྐམ་པས་བླངས་ཏེ། ནུབ་ཕྱོགས་སུ་བཞག་ནས། ཆུ་སྲོལ་ཆེན་པོ་གཏོད་དོ། །མཚོ་སྲོག་ཆགས་དང་བཅས་པར་གྱི་ཤོ་གཙང་པོའི་ནང་དུ་ཕོ་སྟེ། ཚུལ་དེ་ལྟ་བུས་མཆོད་རྟེན་གོ་མ་ས་ལ་གན་ད་དང ། རི་གླང་རུ་དང ། ལི་ཡུལ་དེ་མངོན་པར་བྱས་སོ། །དེ་ནས་བཅོམ་ལྡན་འདས་ཀྱིས་འཕགས་པ་སྤྱན་རས་གཟིགས་དབང་ཕྱུག་དང ། བྱམས་པ་ལ་སོགས་པ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་དང ། བྱང་ཆུབ་སེམས་དཔའ་ཉི་ཁྲི་དྲང་སྲོང་དང་བཅས་པ་དང ། རྣམ་ཐོས་ཀྱི་བུ་དང ། ཁྱིམ་ཚིག་ལ་སོགས་པ་ལྷ་ཆེན་པོ་བརྒྱད་དང ། འཁོར་སུམ་ཁྲི་ལྔ་སྟོང་ལྔ་བརྒྱ་དང་བཅས་པ་ལ། མཆོད་རྟེན་གོ་མ་ས་ལ་གན་ད་ལ་སོགས་པ་ཡོངས་སུ་གཏད་དེ། ལྷ་དེ་དག་གིས་ཀྱང་དེ་བཞིན་དུ་གནས་སོ། །བཅོམ་ལྡན་འདས་ཀྱིས་ཀྱང་དེ་བཞིན་དུ་གནང་ངོ ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། འཁོར་དེ་དག་ཐམས་ཅད་ཀྱིས་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་རི་གླང་རུ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། |