།།རྒྱ་གར་སྐད་དུ། མཻ་ཏྲཱི་སཱུ་ཏྲ། བོད་སྐད་དུ། བྱམས་པའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །སྟོན་པ་དུས་གཅིག་ན་སེར་སྐྱའི་གཞི་དང ། ནྱ་གྲོ་ 409b དྷའི་ཀུན་དགའ་ར་བ་དང ། ཆུ་ཀླུང་རོ་ཧི་ནའི་འགྲམ་ན་བཞུགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་མ་འོངས་པའི་རྒྱལ་བ་དེའི་ཕྱིར་བཅོམ་ལྡན་འདས་ལ་ཞུས་པ། ཁྱེད་ཀྱི་རྗེས་བསྟན་བློ་བརྟན་ནི། །ཅི་འདྲའི་སངས་རྒྱས་སུ་འགྱུར་བར། །སྤྱན་ལྡན་ཡོངས་སུ་རྒྱས་པར་ནི། །བདག་ནི་རབ་ཏུ་ཉན་པར་འདོད། །གནས་བརྟན་ཞུས་པ་གསན་ནས་ནི། །བཅོམ་ལྡན་འདས་ཀྱིས་འདི་སྐད་གསུངས། །བསོད་ནམས་ཕུང་པོ་མི་ཉུང་བའི། །གྲགས་པ་ཆེན་པོ་མི་ཕམ་པའི། །ཡོན་ཏན་ཐམས་ཅད་བརྗོད་མི་ནུས། །མདོར་བསྡུས་ནས་ནི་ལེགས་བཤད་པ། །ཕྱོགས་གཅིག་ཙམ་ནི་བསྟན་པར་བྱ། །ཤཱ་རིའི་བུ་ཉོན་ང་ཡི་ཚིག་།འདི་ནི་བསྐལ་བ་བཟང་པོ་སྟེ། །སྐྱེ་བ་བྱེ་བའི་ལོ་རུ་ནི། །བྱམས་པ་ཞེས་པའི་མིང་ཉིད་ཀྱིས། །རྐང་གཉིས་མཆོག་གི་སངས་རྒྱས་སོ། །ཇི་ལྟར་ང་འདས་ནས་དང་པོར་དུས་ལྔ་འབྱུང་སྟེ། འབྲས་བུའི་བར་གྱི་དུས་དང ། བསྒྲུབ་པའི་བར་གྱི་དུས་དང ། ལུང་གི་བར་གྱི་དུས་དང ། རྟགས་ཙམ་གྱི་བར་གྱི་དུས་དང ། སྐུ་གདུང་གི་བར་གྱི་དུས་སོ། །དེ་ལ་འབྲས་བུའི་བར་གྱི་དུས་ནི། སངས་རྒྱས་ཡོངས་སུ་མྱ་ངན་ལས་འདས་ནས། ལོ་སྟོང་ཕྲག་གཅིག་གི་ནང་དུ་རྟོགས་བ་སྐྱེད་པར་ནུས་སོ། །དེ་སོང་ཞིང་སོང་བའི་དུས་སུ། ཕྱིར་མི་འོང་བ་རྣམས་དང ། ལན་གཅིག་ཕྱིར་འོང་བ་དང ། རྒྱུན་དུ་ཞུགས་པའོ། །དེ་རྣམས་ཡོད་པ་ན་འབྲས་བུའི་བར་གྱི་ 410a ༄#། །དུས་མེད་ཅེས་བརྗོད་བར་མི་བྱའོ། །ལྷག་མ་ནི་རྒྱུན་དུ་ཞུགས་པ་སྟེ། དེ་འདས་ནས་འབྲས་བུའི་བར་གྱི་དུས་ནུབ་པ་ཞེས་བྱའོ། །འདི་ནི་འབྲས་བུའི་བར་གྱི་དུས་ནུབ་པ་ཞེས་བྱ་བ་ཡིན་ནོ། །བསྒྲུབ་པའི་བར་གྱི་དུས་ཞེས་བྱ་བ་ནི། ཞི་གནས་དང ། ལྷག་མཐོང་གི་ལམ་གྱི་འབྲས་བུ་བསླབ་པར་མི་ནུས་པར་ཕམ་པ་བཞི་པོ་བསྲུང་བར་ནུས་པ་ཙམ་མོ། སོང་ཞིང་སོང་བའི་དུས་སུ། ཕམ་པ་བཞི་པོ་དེ་ཉིད་བསྲུང་བ་ཙམ་མོ། །ཕམ་པ་བཞི་པོ་སྲུང་བར་བྱེད་པ་ནི། དགེ་སློང་རྣམས་སྟོང་ཕྲག་གཅིག་གི་ནང་ན་བརྒྱ་ཙམ་ཡོད་ན་ཡང་བསྒྲུབ་པའི་བར་གྱི་དུས་ནུབ་པ་ཞེས་མི་བྱའོ། །བརྒྱའི་ནང་ན་དགེ་སློང་གཅིག་ཙམ་ཡོད་པ་ལས་སྡོམ་པ་ཞིག་པ་དང ། ཤ་བི་ན་བསྒྲུབ་པའི་བར་གྱི་དུས་ནུབ་པ་ཞེས་བྱའོ། །འདི་ནི་བསྒྲུབ་པའི་བར་གྱི་དུས་ནུབ་པ་ཞེས་བྱའོ། །ལུང་གི་བར་གྱི་དུས་ཞེས་བྱ་བ་ནི། སངས་རྒྱས་ཀྱི་གསུང་རབ་སྡེ་སྣོད་གསུམ་པོའི་དོན་མི་གོ་ཞིང་སྒྲ་ཙམ་ཀློག་པ་དང ། པོ་ཏི་ཡོད་པའི་བར་ནི་ལུང་གི་བར་གྱི་དུས་ཡོངས་སུ་རྫོགས་པ་ཞེས་བྱའོ། །སོང་ཞིང་སོང་བའི་དུས་སུ་རྩོད་པའི་དུས་ཀྱི་རྒྱལ་པོ་རྣམས་ཆོས་མ་ཡིན་པ་བྱེད་པར་འགྱུར་རོ། །བློན་པོ་ལ་སོགས་པ་རྣམས་ཀྱང་ཆོས་མ་ཡིན་པ་བྱེད་པར་འགྱུར་ཏེ། དེ་ནས་ཡུལ་འཁོར་རྣམས་དང ། ལྗོངས་རྣམས་ཀྱང་དེ་བཞིན་ནོ། །དེ་རྣམས་ 410b ཀྱིས་ཆོས་མ་ཡིན་པའི་རྒྱུ་ཡིས་ལྷ་རྣམས་ཆར་ལེགས་པར་མི་འབེབས་སོ། །འབྲུ་རྣམས་ལེགས་པར་མི་སྨིན་ནོ། །དེ་རྣམས་ཀྱི་འབྲུ་མ་སྨིན་པས་དགེ་སློང་གི་དགེ་འདུན་ལ་བཟའ་བ་སྟེར་མི་ནུས་སོ། །དགེ་སློང་རྣམས་ཀྱིས་ཁ་ཟས་མ་རྙེད་པས་སློབ་མ་དང ། ཡང་སློབ་རྣམས་འཛིན་པར་མི་ནུས་སོ། །སོང་ཞིང་སོང་བའི་དུས་སུ་ལུང་གི་དུས་དམན་པའོ། ། དང་པོ་ནི་རབ་ཏུ་བྱེད་པ་ཆེན་པོ་ཉམས་པར་འགྱུར་རོ། །དེ་ནུབ་ནས་ཡ་མ་ཀཾ་གི་ཚིགས་སུ་བཅད་པ་དང ། བཞི་དང ། གང་ཟག་དང ། གདགས་པ་དང ། སྐུ་གདུང་གི་གཏམ་དང ། རྣམ་འབྱེད་དང ། ཆོས་བསྡུ་བ་ནུབ་པར་འགྱུར་བའི། ཆོས་མངོན་སྡེ་སྣོད་ནུབ་ནས། མདོ་སྡེའི་སྡེ་སྣོད་ནུབ་པར་འགྱུར་རོ། །དེ་ནས་ཨཾ་ག་ཕྱི་མའི་སྡེ་པ་ནུབ་པར་འགྱུར་རོ། །ཾ་ག་ཕྱི་མའི་སྡེ་པ་ནུབ་ནས། ཡང་དག་པར་ལྡན་པའི་སྡེ་པ་ནུབ་པར་འགྱུར་རོ། །བར་མའི་སྡེ་པ་དང ། རིང་པོའི་སྡེ་པ་ནུབ་པར་འགྱུར་རོ། །རིང་པོའི་སྡེ་པ་ནུབ་ནས་འདུལ་བ་དང་བཅས་པའི་སྐྱེས་རབས་གནས་སོ། །འདུལ་བའི་སྡེ་སྣོད་ལ་ཡང་ངོ་ཚ་དང་ལྡན་པ་ཙམ་འཛིན་ནོ། །སོང་ཞིང་སོང་བའི་དུས་སུ་སྐྱེས་པའི་རབས་ཙམ་ཡང་འཛིན་པར་མི་ནུས་སོ། །དང་པོ་ཐམས་ཅད་སྒྲོལ་གྱི་སྐྱེས་པའི་རབས་ནུབ་པར་འགྱུར་རོ། །ཐ་མར་ལོ་མ་མེད་པའི་སྐྱེས་པའི་རབས་ནུབ་པར་འགྱུར་རོ། །སྐྱེས་རབས་རྣམས་ནུབ་ནས་ 411a ༄#། །འདུལ་བའི་སྡེ་སྣོད་འབའ་ཞིག་འཛིན་ནོ། །སོང་ཞིང་སོང་བའི་དུས་སུ་མི་གང་ཞིག་གིས་སངས་རྒྱས་ཀྱི་གསུང་རབ་ཀྱི་ཚིགས་སུ་བཅད་པ་གཅིག་ཙམ་དར་བར་བྱེད་ན། ལུང་གི་བར་གྱི་དུས་ནུབ་པ་མེད་དོ། །གང་ཞིག་རྒྱལ་པོ་ཆོས་ལ་དད་པའི་དུས་སུ་གླང་པོ་ཆེའི་རྒྱབ་ཏུ་གསེར་གྱི་ཟ་མ་ཏོག་གཅིག་གཞག་སྟེ། ནོར་སྟོང་ཕྲག་གཅིག་དེ་རུ་བཅུག་ནས་སངས་རྒྱས་ཀྱིས་གསུངས་པའི་ཚིགས་སུ་བཅད་པ་གཅིག་གང་གིས་ཤེས་པ་དེས་ནོར་སྟོང་ཕྲག་དེ་ལོང་ཞེས་གྲོང་ཁྱེར་གྱི་དབུས་སུ་རོལ་མོའི་སྒྲ་ལན་གསུམ་བསྒྲགས་ནས་དེ་སྐད་བརྗོད་དེ། དེ་ལེན་པར་མི་ནུས་པ་ན་ནོར་སྟོང་ཕྲག་དེ་རྒྱལ་པོའི་མཛོད་དུ་ཡང་འཇོག་གོ། དེའི་དུས་ནི་ལུང་གི་བར་གྱི་དུས་ནུབ་པའི་དུས་སུ་འགྱུར་རོ། །འདི་ནི་ལུང་གི་བར་གྱི་དུས་ནུབ་པའི་དུས་ཞེས་བྱ་བ་ཡིན་ནོ། །སོང་ཞིང་སོང་བའི་དུས་སུ་ཆོས་གོས་འཛིན་པ་དང ། ལྷུང་བཟེད་འཛིན་པ་དང ། གཅེར་བུ་པའི་དགེ་སྦྱོང་དང་འདྲ་བར་ཆག་ཚང་ཀུ་བའི་སྣོད། སློང་བའི་སྣོད་དང ། ལག་པའི་རྩེ་མོ་ལ་འཕྱང་བའི་ཚུལ་དང་འདྲ་བ་དང་དྲ་བའི་ནང་དུ་ཁྱེར་ནས་འགྲོ་བའོ། །སོང་ཞིང་སོང་བའི་དུས་སུ་གོས་དུར་སྨྲིག་གིས་བདག་ལ་ཅི་བྱེད། ཅུང་ཟད་ཚོས་སུ་བྱས་པའི་དུམ་བུ་ལག་པའམ། མགྲིན་པའམ། རྣ་བ་རྣམས་སུའམ། སྐྲ་རྣམས་ལ་བགེབས་སོ། །བག་མ་ 411b ལེན་པ་དང ། སོ་ནམ་དང ། ཚོང་ལ་སོགས་པ་བྱས་ནས། འཚོ་བའི་ཕྱིར་དུ་སྤྱོད་ཅིང་འགྲོ་བར་བྱེད་དོ། །དེའི་ཚེ་ཡོན་སྟེར་ཅིང་དགེ་འདུན་གྱི་ཆེད་དུ་དེ་ཐམས་ཅད་སྟེར་བར་བྱེད་དེ། དེའི་ཚེངས། ཀུན་དགའ་བོ། དགེ་འདུན་གྱི་ཡོན་གྱི་འབྲས་བུ་ནི་གྲངས་མེད་པར་བཤད་དོ། །སོང་ཞིང་སོང་བའི་དུས་སུ་འདི་ཅི་བདག་གི་དོན་དུ་དུར་སྨྲིག་གི་དུམ་བུ་བཏོགས་ནས་དགོན་པའམ། ནགས་ཚལ་དུ་སྐྱུར་བར་བྱེད་དོ། །དེ་རྣམས་ཀྱི་དུས་སུ་རྟགས་ཙམ་འཛིན་པའི་བར་གྱི་དུས་ནུབ་པར་འགྱུར་རོ། །འདི་ནི་རྟགས་ཙམ་འཛིན་པའི་བར་གྱི་དུས་ནུབ་པའི་དུས་ཞེས་བྱ་བ་ཡིན་ནོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ལོ་སྟོང་ཕྲག་ལྔ་པ་ལ་རྙེད་པ་དང ། བཀུར་སྟི་ལ་སོགས་པའི་རྙེད་པ་ཆུང་ངོ ། །སྐུ་གདུང་རྣམས་བསྙེན་བཀུར་བྱེད་པའི་གནས་སུ་འགྲོ་བར་བྱེད་དོ། །སོང་ཞིང་སོང་བའི་དུས་སུ་གནས་ཐམས་ཅད་དུ་བཀུར་སྟི་དང ། བསྟི་སྟང་མ་ཐོབ་ནས། བསྟན་པ་ཐ་མའི་དུས་སུ་ཀླུའི་ཡུལ་དང ། ལྷའི་འཇིག་རྟེན་དང ། ཚངས་པའི་འཇིག་རྟེན་གྱི་གནས་ཐམས་ཅད་ནས་འོངས་ནས། སྐུ་གདུང་ཐམས་ཅད་བྱང་ཆུབ་ཀྱི་སྙིང་པོ་ཁོ་ནར་བསྡུས་ཏེ་སངས་རྒྱས་ཀྱི་སྐུ་རུ་གྱུར་ནས། གཤིན་རྗེའི་རྫུ་འཕྲུལ་དུ་མ་སྟོན་པ་དང་འདྲ་བར་གཞན་ལ་སྟོན་ནོ། །དེའི་གནས་སུ་སེམས་ཅན་མིར་གྱུར་པའི་མིང་ཡང་མེད་དོ། །སྟོང་ཕྲག་བཅུའི་ལྷའི་འཇིག་རྟེན་གྱི་ཁོར་ཡུག་གི་བར་ཐམས་ཅད་འདུས་ནས། དེ་རིང་སྟོབས་བཅུ་ 412a ༄#། །པ་ཡོངས་སུ་མྱ་ངན་ལས་འདའ་བར་བྱེད་དོ། །དེང་ནས་བཟུང་ནས་མུན་ནག་ཏུ་གྱུར་ཏོ་ཞེས་དུ་བར་བྱེད་དོ། །སྐུ་གདུང་ཐམས་ཅད་ལ་མེའི་ཁམས་ལངས་ནས་དེའི་སྐུ་ལུས་ལྷག་མ་མེད་བར་སྲེག་པར་བྱེད་དོ། །འདི་ནི་སྐུ་གདུང་གི་བར་གྱི་དུས་ནུབ་བ་ཞེས་བྱ་བ་ཡིན་ནོ། །དེ་ནས་ལོ་སྟོང་ཕྲག་ལྔ་པོ་འདིར་བསྟན་པ་ནུབ་པར་གྱུར་ནས་འཇིག་རྟེན་བ་རྣམས་ལ་མི་དགེ་བ་ལྷག་པར་འཕེལ་བར་བྱེད་དོ། །ཞེས་བྱ་བའི་དོན་ནོ། །མི་རྣམས་ལ་ངོ་ཚ་དང ། ཁྲེལ་མེད་པར་འགྱུར་ཞིང ། མ་དང ། བུ་མོ་དང ། སྲིང་མོ་ལ་སོགས་པའི་འདུ་ཤེས་མེད་པར་འགྱུར་རོ། །ཕག་དང ། ཅེ་སྤྱང་ལ་སོགས་པ་དང་འདྲ་བར་ངོ་ཚ་མེད་པར་འགྱུར་རོ། །དེ་ནས་མི་དགེ་བ་ལ་སྦྱོར་ཞིང་ཚེ་བྲི་ནས་ཚེ་ལོ་བཅུ་པར་འགྱུར་རོ། །ལོ་ལྔ་པའི་ཁྱེའུ་ལ་ལོ་ལྔ་པའི་བུ་མོ་བག་མར་ལེན་ནོ། །ཡང་ལོ་ལྔའི་ནང་ཉིད་དུ་བུ་དང ། བུ་མོ་དང ། ཚ་བོ་དང ། ཚ་མོའང་འབྱུང་ངོ ། །དེའི་དུས་སུ་མཚོན་གྱི་བསྐལ་པ་བར་མ་འབྱུང་བར་འགྱུར་རོ། ། བསྐལ་པ་བར་མ་གསུམ་སྟེ། མུ་གེའི་བསྐལ་པ་བར་མ་དང ། ནད་ཀྱི་བསྐལ་པ་བར་མ་དང ། མཚོན་གྱི་བསྐལ་པ་བར་མའོ། །དེ་ལ་གང་གི་ཚེ་འཇིག་རྟེན་གྱི་སེམས་ཅན་རྣམས་ལ་འདོད་པ་ལྷག་པར་སྐྱེས་ནས། མུ་གེའི་བསྐལ་པ་བར་མར་འགྱུར་རོ། །གང་གི་ཚེ་གཏི་མུག་ལྷག་བར་ཆེ་སྟེ། ནད་ཀྱི་བསྐལ་པ་བར་མར་འགྱུར་རོ། །གང་གི་ཚེ་སྐྱོན་དུ་ 412b གྱུར་པ་དེའི་དུས་སུ་མཚོན་གྱི་བསྐལ་བ་བར་མར་འགྱུར་རོ། །མུ་གེའི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་ཡི་དྭགས་སུ་སྐྱེ་བར་འགྱུར་རོ། །ནད་ཀྱི་བསྐལ་བ་བར་མས་སེམས་ཅན་རྣམས་བརླག་པར་བྱས་ནས། དུད་འགྲོར་སྐྱེ་བར་བྱེད་དོ། །མཚོན་གྱི་བསྐལ་བ་བར་མས་སེམས་ཅན་རྣམས་བརླག་པར་བྱས་ནས། དམྱལ་བར་སྐྱེ་བར་འགྱུར་རོ། ། དེའི་ཚེ་མི་རྣམས་ཕན་ཚུན་དུ་རི་དྭགས་ཀྱི་འདུ་ཤེས་དང་བཅས་པ་ཐོབ་པར་གྱུར་ནས། མཚོན་སོ་གཅིག་པ་དང ། མཚོན་སོ་གཉིས་པ་དང ། སྤུ་གླིའི་སོ་དང་འདྲ་བའི་མཚོན་ཆ་རྣམས་བཟུང་ནས་ཕན་ཚུན་གསོད་པར་བྱེད་དོ། །དེ་རྣམས་སུ་མཁས་པ་གང་ཞིག་དེས་འཇོམས་པར་ཐོས་ནས་རིའི་སུལ་ལ་སོགས་པར་ཞག་བདུན་གྱི་ཁ་ཟས་བཟུང་སྟེ་ཡིབ་ནས་སྡོད་དོ། །དེ་རྣམས་སུ་མ་ཡིབ་པའི་སེམས་ཅན་ལྷག་མ་རྣམས་ཕན་ཚུན་དུ་བརྡེག་ཅིང་གསོད་དོ། །ས་གཞི་ཐམས་ཅད་ཤ་དང ། ཁྲག་ཏུ་འགྱུར་རོ། །དེའི་དུས་སུ་སྤྲིན་ཆེན་པོ་འདུས་ནས་ཆར་འབེབས་པར་བྱེད་དོ། །ལྷ་ཡིས་ཆར་ཕབ་པའི་རྗེས་སུ་དྲི་ཞིམ་པའི་ཆར་འབབ་ཅིང་འབབ་པར་བྱེད་དོ། །དེ་རྣམས་ཀྱི་དུས་སུ་གནས་ཐམས་ཅད་ཡིད་དུ་འོང་བར་འགྱུར་རོ། །གནས་ཐམས་ཅད་དག་པར་གྱུར་ནས་འབྲས་ཤུན་པ་ཅན་ཆར་འབབ་ཅིང་འབབ་པར་འགྱུར་རོ། །འབྲས་ཤུན་པ་ཅན་གྱི་ཆར་ཕབ་པའི་རྗེས་སུ་འབྲས་ཤུན་པ་མེད་པའི་ཆར་འབབ་ཅིང་ 413a ༄#། །འབབ་བར་འགྱུར་རོ། །དེའི་རྗེས་སུ་གོས་དང ། རྒྱན་གྱི་ཆར་འབབ་ཅིང་འབབ་པར་བྱེད་དོ། །དེའི་མཐར་བུས་མོ་ནུབ་ཙམ་གྱི་ཚད་དང་མཉམ་པའི་རིན་པོ་ཆེ་སྣ་བདུན་གྱི་ཆར་འབབ་ཅིང་འབབ་པར་བྱེད་དོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དྲི་ཞིམ་པ་ཡི་ཆར་འབབ་ཅིང ། །ཤུན་ཅན་ཤུན་མེད་འབྲས་ཀྱི་ཆར། །གོས་དང་རྒྱན་གྱི་ཆར་འབབ་པ། །དེ་ལྟར་དགའ་ཚལ་མཛེས་པ་བཞིན། །རིན་ཆེན་སྣ་བདུན་མ་ལུས་པའི། །དེ་ཡི་གནས་སུ་ཆར་འབབ་བོ། །གནས་ཀུན་གང་བར་བྱས་ནས་ནི། །དེ་ཚེ་དགའ་ཚལ་མཛེས་པ་བཞིན། །དེ་རྣམས་འདས་ནས་མི་ཡིབ་པ་རྣམས་འཐོན་ཏེ། དེ་རྣམས་འཐོན་ནས་ཕན་ཚུན་དུ་འཁྱུང་པ་དང ། དུ་བ་དང ། ཚུལ་ཁྲིམས་ལྔ་ལ་སོགས་པའི་དགེ་བའི་ཆོས་རྣམས་རྗེས་སུ་དྲན་པར་བྱས་ནས་རྫོགས་པར་རྩོམ་མོ། །དེ་ནས་ཚེ་ལོ་བཅུ་པའི་མི་རྣམས་ལས་སྐྱེས་པའི་བུ་དང ། བུ་མོ་ཚེ་ལོ་ཉི་ཤུ་པར་འཕེལ་ལོ། །དེ་ནས་མི་རྣམས་ལ་ལྷག་པར་ཆོས་འཕེལ་བས་གོ་རིམ་བཞིན་དུ་ཚེ་འཕེལ་ཏེ་ཚེ་ལོ་གྲངས་མེད་པར་འགྱུར་རོ། །དེའི་ཚེ་སེམས་ཅན་རྣམས་ལ་རྒས་པ་དང ། འཆི་བ་མི་མཐོང་བར་འགྱུར་རོ། །དེ་ལྟར་སེམས་ཅན་གཞན་ཡང་བག་ཡོད་པར་འགྱུར་ཏེ། དམྱལ་བའི་སྡུག་བསྔལ་ཞེས་བྱ་བ་ནི་ཅི། ཞེས་སེམས་ཅན་རྣམས་སེམས་པ་མེད་དོ། །དེ་ནས་ཚེ་ 413b གྲངས་མེད་པ་རྣམས་འབྲི་བར་བྱེད་དོ། །སྔར་བཞིན་དུ་བྲི་ནས་ཚེ་ལོ་བརྒྱད་ཁྲི་པར་འགྱུར་རོ། །དེའི་དུས་སུ་འཛམ་བུའི་གླིང་ཐམས་ཅད་དུ་ལྷའི་བུ་མོའི་སྐལ་བ་དང་འདྲ་བར་བུད་མེད་དང།་དེ་ལྟར་སྐྱེས་པ་དང་བཅས་པས་གང་བར་འགྱུར་རོ། །ལྷའི་ཆར་པ་ཟླ་བ་ཕྱེད་དུ་འབབ་པ་དང ། ཞག་བཅུ་དང ། ཞག་ལྔ་དང ། ཉིན་ཞག་ཕྱེད་དུ་སའི་བཅུད་འཕེལ་བར་འགྱུར་རོ། །དེའི་ཚེས་གཞི་ཐམས་ཅད་ཀྱི་ཆ་མཉམ་པ་དང ། ཚེར་མ་དང ། ཤིང་རད་རོད་མེད་ཅིང ། གྲོང་ཁྱེར་ལ་ཕྱོགས་བཞིའི་སྒོ་དང་ལྡན་པ་དང ། གྲོང་ཁྱེར་གྱི་དབུས་སུ་དཔག་བསམ་གྱི་ཤིང་སྐྱེ་བར་འགྱུར་རོ། །དེའི་ཕྱིར་གསུངས་པ། དེ་ནས་དེ་ཡི་གྲོང་ཁྱེར་ནི། །སྣ་ཚོགས་ཚོང་འདུས་སོ་སོ་དང ། །ལེགས་པར་རབ་བྱུང་རྫིང་བུ་དང ། །དགའ་ཞིང་རབ་ཏུ་གནས་པ་དང ། །དྲི་མ་མེད་པའི་ཆུ་ཆེན་པོ། །ཤིན་ཏུ་གྲངས་ཞིང་དྲི་བཟང་ལྡན། །རྙོག་མེད་མཉམ་ཞིང་ཚིམ་པ་དང ། །དེ་ནས་རྙོག་མ་ཡང་དག་གནས། །པདྨ་ཨུཏྤལ་གྱིས་གང་ཞིང ། །རྦ་རླབས་དང་ནི་རྙོག་པ་མེད། །ཏཱ་ལའི་ཕྲེང་བ་བདུན་གནས་ཤིང ། །རིན་ཆེན་རང་བཞིན་གྱིས་ཁེབས་པ། །ལྕགས་རི་བདུན་དང་ལྡན་པ་དང ། །གྲོང་ཁྱེར་ཐམས་ཅད་འབྲེལ་པ་དང ། །རྩཝ་ཅན་རྒྱལ་པོའི་ཕོ་བྲང་སྟེ། །དེ་ཚེ་ཏོག་དང་ལྡན་པར་འགྱུར། །གྲོང་ཁྱེར་ཕྱོགས་ཀྱི་སྒོ་བཞི་བུ ། །དཔག་བསམ་ཤིང་ནི་སྐྱེ་བར་འགྱུར། །སྔོན་པོ་སེར་བོ་དམར་པོ་ 414a ༄#། །དང ། །དཀར་པོ་རབ་ཏུ་གསལ་བའི་འོད། །ལྷ་ཡི་གོས་ནི་སྐྱེ་བར་འགྱུར། །ལྷ་ཡི་དྲིན་གྱིས་རྒྱན་དང་ནི། །ལོངས་སྤྱོད་ཉེ་བར་སྤྱོད་པ་རྣམས། །ཐམས་ཅད་སྟེང་ནས་འཕྱང་བ་ཡིན། །དེ་ནས་གྲོང་ཁྱེར་དབུས་སུ་ནི། །ཁང་དམིགས་བཞི་དང་ལྡན་བ་ཡིན། །བསོད་ནམས་ལས་ཀྱིས་གྲུབ་པ་ནི། །དཔག་བསམ་ཤིང་གི་སྟེང་ནས་འབྱུང ། ། རས་བལ་རས་ནི་བཟང་པོ་དང ། །ཀོ་མ་ཨུ་དུམ་ཝ་རའི་རས། །བསོད་ནམས་ལས་ཀྱི་གྲུབ་པ་ནི། །དཔག་བསམ་ཤིང་གི་སྟེང་ནས་འབྱུང ། །མྲྀ་ཏ་མ་ནི་ལག་པས་རྡུང ། །མུ་ར་རྫ་དང་ཨ་ལམ་བྷ། །བསོད་ནམས་ལས་ལས་བྱུང་བ་ནི། །དཔག་བསམ་ཤིང་གི་སྟེང་ནས་འབྱུང ། །དཔུང་རྒྱན་དག་གི་རྒྱན་དང་ནི། །དཔུང་རྒྱན་དང་ནི་དོ་ཤལ་དང ། །རིན་ཆེན་རང་བཞིན་མགུལ་པའི་རྒྱན། །བསོད་ནམས་ལས་ལས་བྱུང་བ་ནི། །དཔག་བསམ་ཤིང་གི་སྟེང་ནས་འབྱུང ། །དཔལ་བ་ཁ་ཡི་རྒྱན་དང་ནི། །ནོར་བུ་འོག་པག་ལུས་ལ་ལྡན། ། བསོད་ནམས་ལས་ལས་བྱུང་བ་ནི། །དཔག་བསམ་ཤིང་གི་སྟེང་ནས་འབྱུང ། །གཞན་ཡང་རྣམ་པ་སྣ་ཚོགས་པའི། །རྒྱན་རྣམས་ཀུན་གྱིས་རྣམ་པར་བརྒྱན། །བསོད་ནམས་ལས་ལས་གྲུབ་པ་ནི། །དཔག་བསམ་ཤིང་གི་སྟེང་ནས་འགྱུར། །མ་སྨོས་མ་བཏབ་རང་བྱུང་བའི། །བསོད་ནམས་ལས་ཀྱིས་སྐྱེས་པ་ནི། །མ་ཞིག་སྤུན་མེད་དི་མ་མེད། ། 414b འབྲས་ཀྱི་འབྲས་བུ་དྲི་ཞིམ་ལྡན། །འབྲས་རྣམས་བདེ་བར་བཙོས་པ་ན། །མི་རྣམས་ཡོངས་སུ་ལོངས་སྤྱོད་དོ། །དེ་ཡི་འབྲས་ལ་ཟལ་ཟེལ་མེད། །སྟོང་ཕྲག་བརྒྱ་ནི་འབྱུང་བ་ཡིན། ། འབྲས་ཀྱི་མྱུ་གུ་སྐྱེ་བ་ནི། །ཐམས་ཅད་དུ་ནི་ཁྱབ་པར་གནས། །འབྲས་སྙེ་རེ་རེ་སྐྱེ་བ་ལ། །ཕུལ་ནི་རེ་རེ་འབྱུང་བར་འགྱུར། །མི་རྣམས་ཀྱི་ནི་འབྲས་ཀྱི་དྲི། །ཐམས་ཅད་དུ་ནི་ལོངས་སྤྱོད་དོ། །སྟོང་ཕྲག་གཉིས་ཀྱི་ཤིང་རྟའི་ཚད། །ཤིང་རྟ་བརྒྱ་མི་ཚད་ཙམ་དང ། །ཤིང་རྟ་སུམ་ཅུ་རྩ་དགུ་དང ། །བྲེ་ཆེན་བཅུ་དྲུག་པ་ཡི་ཁལ། །དེ་ནས་ཡང་ནི་ཀུ་བ་གཉིས། །དེ་ལྟ་བུ་ཡི་འབྲས་འབྱུང་ངོ ། །ས་བོན་གཅིག་ལ་སྐྱེ་བ་ནི། །སྐྱེ་བོ་རྣམས་ཀྱི་བསོད་ནམས་ལས། །གང་ཞིག་ཏོག་དང་ལྡན་པར་གནས། །དུང་གི་རྒྱལ་པོ་མི་ཡི་བདག། དེ་ཡི་ཚེ་ནི་དེ་ལྟར་འགྱུར། །ཡོན་ཏན་གྱི་ནི་དཔུང་རྒྱན་འཛིན། །བསམ་པ་ཐམས་ཅད་ཡོངས་སུ་རྫོགས། །བཞིན་ལེགས་རྣ་བའི་རྒྱན་དང་ལྡན། །ཧ་རི་ཙནྡན་ན་ལུས་ལ་བྱུགས། །ཀ་ཤིའི་གོས་ནི་མཆོག་ཏུ་གྱོན། །ནོར་ནི་རྒྱ་ཆེར་མང་བ་དང ། །ཏིང་ཤག་པི་ཝང་གིས་སད་བྱེད། །རྟག་ཏུ་ཤིན་ཏུ་སྐྱིད་པ་དང ། །དེ་ཡི་ལུས་དང་སེམས་བདེ་ཞིང ། །དཔག་ཚད་སྟོང་ཕྲག་བཅུ་རུ་ནི། །འཛམ་བུ་གླིང་ནི་གནས་པ་ཡིན། །ཚེར་མ་མེད་ཅིང་ཤིང་མེད་བ། །མཉམ་ཞིང་འཇམ་ལ་སྔོ་བ་སངས་གནས། །དེ་ལ་ནད་ནི་གསུམ་འབྱུང་སྟེ། །འདོད་དང་ཞེན་དང་རྒས་པའོ།། 415a ༄#། །ལྔ་བརྒྱའི་ལོ་ལོན་བུད་མེད་ནི། །རྒན་དང་གཞོན་པ་བག་མར་ལེན། །གཏན་དུ་གཉིས་ཀ་བདེ་བ་ཡིན། །རྩོད་པ་མེད་པར་འགྱུར་བ་ཡིན། །འཕྲས་བུ་ལོ་ཏོག་ཕུན་སུམ་ཚོགས། །འཁྲི་ཤིང་གེལ་བ་ཤིང་གི་ཚལ། །རྩཝ་ནི་སོར་བཞི་པ་རུ་སྐྱེ། །ཤིན་ཏུ་འཇམ་པའི་ཤིང་བལ་འདྲ། །ཧ་ཅང་མི་གྲང་མི་དྲོ་ཞིང ། །ཆར་ནི་མཉམ་པར་འབབ་བ་དང ། །རླུང་ནི་ཤིན་ཏུ་ཆུང་བ་དང ། །དུས་ཚོད་མཉམ་པར་ལྡན་པ་དང ། །ཆུ་ཀླུང་ཏཱ་ལ་མི་དམན་ཞིང ། །དེ་དང་དེ་ཡིས་ཡི་ཆ། །ས་ལ་རྡོ་ནི་ཆུད་ལྡན་ལ། །སྲན་ནག་སྲན་ཆུང་ཚད་ཙམ་མོ། །མུ་ཏིག་འདྲ་བས་ཡོངས་སུ་གང ། །རྒྱན་རྣམས་སྐྱེད་མོས་ཚལ་དང་འདྲ། །དགའ་ཞིང་ཡིད་དུ་འོང་བར་འགྱུར། །གྲོང་དང་གྲོང་རྡལ་མང་པོས་གང ། །དེ་དང་དེ་ནི་ཉེ་བ་རུ། །འོད་མ་མྱུག་ཕྲན་ཚལ་བཞིན་ནོ། །བྱ་གག་འཕུར་བ་ཙམ་ཉིད་དོ། །དགེ་ཞིང་རྒྱས་ལ་རྫུ་འཕྲུལ་ལྡན། །ལུགས་ལ་ཉེ་བར་འཚེ་བ་མེད། །རྟག་ཏུ་རྩེ་ཞིང་དགའ་བ་དང ། །གཅིག་ཏུ་བདེ་བས་ཚིམ་པ་དང ། །རྒྱུ་སྐར་བདེ་བས་བསྐོར་བ་དང ། །དགའ་ཞིང་ཚིམ་ལ་རབ་ཏུ་དགའ། །བཟའ ་དང་བཏུང་བ་མང་པོ་ཟ། །ཤ་ཆང་ཆུ་བཞིན་མང་བ་ནི།། ལྷ་ཡི་ཕོ་བྲང་ལྕང་ལོ་བཞིན། །ཁང་བཟང་རྒྱལ་པོའི་ཕོ་བྲང་ནི། །ཉམས་དགའ་སྒྲ་མི་སྙན་བཞིན་ནོ། །འཛམ་བུ་གླིང་ཡང་དེ་བཞིན་གྱུར། །དེའི་དུས་སུ་བྱང་ཆུབ་སེམས་དཔའ་ 415b བྱམས་པ་འདི་ནི་བསྐལ་པ་གྲངས་མེད་པ་བཅུ་དྲུག་དང ། བསྐལ་པ་འབུམ་ཕྲག་གཅིག་ལྷག་ཙམ་དུ་སྦྱིན་པའི་ཕ་རོལ་ཏུ་ཕྱིན་པ་དང ། ཕ་རོལ་ཏུ་ཕྱིན་པ་སུམ་ཅུ་རྫོགས་པར་བྱས་ནས་ཐམས་ཅད་སྒྲོལ་བཞིན་དུ་སྐྱེ་བ་ལྷག་མའི་ལུས་སྦྱིན་པ་ཆེན་པོ་བྱས་ཤིང ། ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་ཏེ། དེའི་ལུས་ཞིག་ནས་དགའ་ལྡན་དུ་སྐྱེ་བ་རྫོགས་པར་བྱས་ནས། སངས་རྒྱས་བྱོན་པར་འགྱུར་རོ་ཞེས་སྒྲོགས་སོ། །སྟོང་ཕྲག་བཅུ་ཡི་ཁོར་ཡུག་གི་ལྷ་རྣམས་ནི་སངས་རྒྱས་བྱོན་པར་འགྱུར་རོ་ཞེས་དམ་འཆའོ། །ཕྱོགས་ལྔར་གཟིགས་ཏེ་དགའ་ལྡན་གྱི་ལྷའི་ཆགས་རྣམས་ཀྱི་འཁོར་གྱིས་བསྐོར་ལ། དགའ་ལྡན་ནས་བྱོན་ཏེ། ཏོག་ལྡན་ཞེས་བྱ་བའི་རྒྱལ་པོའི་ཕོ་བྲང་དུ་དུང་གི་རྒྱལ་པོའི་ཚངས་བཟང་མདུན་ན་འདོན། བྲམ་ཟེའི་རིགས་ཀྱི་ཚངས་ལྡན་མའི་རུམ་དུ་ཞུགས་ཏེ། འཇིག་རྟེན་གྱི་ཁམས་སྟོང་ཕྲག་བཅུ་གཡོས་སོ། །ཟླ་བ་བཅུ་འདས་ནས། དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་མའི་རུམ་ནས་འཐོན་ཏེ་རིམ་པ་བཞིན་དུ་ཤེས་པ་དང་ལྡན་པར་གྱུར་ཏེ། བདག་ཉིད་ཀྱི་བསོད་ནམས་ཀྱིས་མཐུས་ས་གཞི་བརྟོལ་ནས་སྟེང་དུ་འོངས་ཏེ་རིན་པོ་ཆེ་སྣ་བདུན་གྱི་རང་བཞིན་གྱི་ཁང་བཟང་བཞིར་རང་ཉིད་ཀྱི་ལྷ་བཞིན་དུ་ལྷ་མོ་ཟླ་བའི་གདོང་ཅན་མ་ལ་སོགས་པ་ལྷའི་བུ་མོ་བཞིན་དུ་བུད་མེད་མང་པོ་དེ་རྣམས་དང་འགྲོགས་ནས། ལོ་སྟོང་ཕྲག་ 416a ༄#། །གཅིག་ལྷ་བཞིན་དུ་རྗེས་སུ་ཉམས་སུ་མྱོང་བར་འགྱུར་ཏེ། དེའི་ཉིན་པར་རབ་ཏུ་བྱུང་བའི་གཟུགས་གཅིག་མཐོང་ནས་གསེར་གྱི་གཟེབ་ལ་མི་དགའ་བ་སེང་གེའི་རྒྱལ་པོ་བཞིན་དུ་དཔལ་འབྱོར་མ་ལུས་པ་རྫོགས་པ་རིན་པོ་ཆེའི་ཁང་བཟང་རྣམས་ལ་ཤིན་ཏུ་མི་དགའ་བར་གྱུར་ནས་ངེས་པར་འབྱུང་བའི་འདོད་པ་སྐྱེས་སོ། །ཐམས་ཅད་སྟོང་ཕྲག་བཅུའི་ཁོར་ཡུག་གི་ལྷ་རྣམས་ལྷའི་མེ་ཏོག་ལ་སོགས་པ་ལག་པས་བླངས་ནས། འཇིག་རྟེན་གྱི་འཁོར་ལོ་འདི་གཅིག་ཏུ་འདུས་ཏེ། དུང་གི་རྒྱལ་པོ་ལ་སོགས་པའི་སྐྱེ་བོ་ཆེན་པོས་བཟུང་ནས་དྲི་བཟང་དང ། ཕྲེང་བ་དང ། བདུག་སྤོས་ལ་སོགས་པས་ཁང་བཟང་ལ་བསྐོར་ནས་འདུག་གོ་།ནམ་མཁའི་ལྷ་རྣམས་ཀྱིས་ལྷའི་མེ་ཏོག་ལག་པས་བཟུང་ནས་ལེགས་སོ། །ཞེས་བྱ་བའི་སྒྲ་གཅིག་ཏུ་འབྱིན་པར་བྱེད་དོ། །འོག་མིན་གྱི་བར་དུ་ཐམས་ཅད་སྒྲ་གཅིག་ཏུ་བྱེད་ཅིང་གནས་སོ། །དེའི་དུས་སུ་རིན་པོ་ཆེའི་ཁང་བཟང་རྫ་མཁན་གྱི་འཁོར་ལོ་ལྟར་འཁོར་ཞིང་ནམ་མཁའ་ལ་འགྲོའོ། །ཟླ་བ་ཉ་བ་ལ་རྒྱུ་སྐར་གྱི་ཕྲེང་བས་བསྐོར་བ་བཞིན་ནོ། །བྱང་ཆུབ་སེམས་དཔའི་བཙུན་མོ་ཆེན་མོ་ལ་སོགས་པ་ནམ་མཁའ་ལ་བཞུད་དོ། །གང་ཞིག་སེམས་དཔའ་ཆེན་པོ་དང་འགྲོགས་ནས་འགྲོ་བའི་སེམས་ཀྱིས། དེ་རྣམས་ཀྱིས་རང་རང་གི་ནམ་མཁའ་མཐོང་སྟེ། ཚངས་ 416b པ་ཆེན་པོས་དཔག་ཚད་གསུམ་གྱི་ཚད་དང་མཉམ་པའི་གདུགས་དཀར་པོ་འཛིན་ནོ། །བརྒྱ་བྱིན་ལྷའི་རྒྱལ་པོས་དུང་ལ་སོགས་པ་བཟུང་ནས་འབུད་དོ། །དེ་ལྟར་དཔལ་དང ། སྐལ་བ་བཟང་པོ་དང་ལྡན་པའི་ལྷ་དང ། མིའི་ཚོགས་ཀྱིས་བསྐོར་ནས་ཁང་བཟང་གི་ཀླུ་ཤིང་བྱང་ཆུབ་ཤིང་དྲུང་དུ་གཤེགས་སོ། །དེའི་ཚད་ནི། ཁྲུ་བརྒྱ་ཉི་ཤུ་ཡལ་གའི་བར། །ཡལ་གའི་མཐོ་ཚད་དེ་དང་མཉམ། །འཁྲིལ་ནས་སྟེང་ནས་འོག་ཏུ་འཕྱང ། །རྨ་བྱའི་གདུགས་བཞིན་མཛེས་པའོ། །རྟག་ཏུ་རྩེ་མོར་མེ་ཏོག་གསལ། །ལྷ་ཡི་དྲི་བཟང་བསུང་ལྡང་ཞིང ། །ཀེ་སར་ཕུལ་ལུ་གང་ཙམ་མོ། །མེ་ཏོག་བཟང་པོ་འཁོར་ལོ་ཙམ། །ཕྱོགས་ཕྱོགས་རླུང་གིས་ཁྱེར་བར་བྱེད། །དཔག་ཚད་བཅུ་རུ་ཁྱབ་པ་འོ། །སྟེང་གི་མེ་ཏོག་འོག་ཏུ་ལྷུང ། །བྱང་ཆུབ་སྙིང་པོར་མེ་ཏོག་བརྩེགས། དེའི་དུས་སུ་ནམ་མཁའ་ལ་འགྲོ་བའི་བྱ་རྣམ་པ་སྣ་ཚོགས་པའི་ཚོགས་ཀྱི་སྒྲ་སྙན་པས་མཆོད་དེ། དེ་ལྟར་ཀླུ་ཤིང་གི་བྱང་ཆུབ་ཀྱི་ཤིང་དྲུང་དུ་གཤེགས་ཏེ་ནམ་མཁའ་ལ་འཕང་ཞིང་སའི་ཆུ་ཐམས་ཅད་ཉམས་དགའ་བའི་གནས་སུ་སྡོད་དོ། །དེ་ལ་ཞག་བདུན་དུ་དཔལ་གྱི་སྙིང་པོར་དཀའ་བ་སྤྱོད་དོ། །ཚངས་པ་ཆེན་པོས་བླངས་ནས་དངོས་པོ་རྣམས་བཟུང་ནས་རབ་ཏུ་བྱུང་ངོ་།། ཇི་སྙེད་པའི་འཁོར་ཐམས་ཅད་ཀྱང་རབ་ཏུ་བང་ངོ ། །དེ་ནས་གཞན་ཡང ། སྟོང་ཕྲག་བརྒྱད་ཅུ་རྩ་བཞི་ཡིས། །བྲམ་ཟེའི་རིག་བྱེད་མཆོག་ཤེས་ཤིང ། །བྱམས་པ་རབ་ཏུ་བྱུང་བར་ 417a ༄#། །འགྱུར། །དེ་དང་དེ་ནི་རབ་ཏུ་བྱུང ། །དེ་ལ་རབ་ཏུ་བྱུང་ནས་ཟླ་བའི་གདོང་ཅན་གྱི་ལྷ་མོས་ཤིན་ཏུ་དངར་བའི་འོ་ཐུག་ཕུལ་ལོ། །ཡོངས་སུ་ལོངས་སྤྱད་ནས། སྲོད་ཀྱི་ཐུན་ལ་བྱང་ཆུབ་ཀྱི་ཤིང་དྲུང་དུ་ས་མཉམ་ནས་སྐྱིལ་ཀྲུང་གིས་མ་ཕམ་པ་བཞུགས་སོ། །ཤར་གྱི་འཇིག་རྟེན་གྱི་ཁམས་ཀྱི་ཕྱོགས་སུ་གཟིགས་ཤིང་བཞུགས་སོ། །རིམ་པ་བཞིན་དུ་དུས་ལ་ཐམས་ཅད་མཁྱེན་པའི་ཡེ་ཤེས་སོ་སོར་རྟོགས་སོ། །འདི་སྐད་གསུངས་པ། འཁོར་བའི་སྐྱེ་བོ་མ་ལུས་པ། །དུག་མེད་པ་ནི་བཙལ་བའི་ཕྱིར། །དུག་མེད་ཁྱིམ་ནི་བྱེད་པ་ནི། །ཡང་ཡང་སྐྱེ་བ་སྡུག་བསྔལ་བ། །ཁྱིམ་ནི་བྱེད་པ་མཐོང་བར་འགྱུར། །ཁྱིམ་ནི་གཞན་ནི་བྱེད་པ་མེད། །སྡུག་བསྔལ་ཐམས་ཅད་གཞིག་པ་དང ། །དུག་ལྡན་ཁྱིམ་ནི་གཞིག་པའོ། །སེམས་ཀྱི་དུག་ནི་སྤོང་བ་དང ། །སྲེད་པ་ཟད་ནས་གྲོལ་བར་འགྱུར། །ཆེད་དུ་བརྗོད་པ་གསུངས་པའོ། །བྱང་ཆུབ་ཀྱི་ཤིང་གི་དྲུང་དུ་ཞག་བཞི་བཅུ་རྩ་དགུ་བཞུགས་ནས་ཚངས་པས་གསོལ་བ་འདེབས་པའི་ཕྱིར། ཆོས་ཀྱི་འཁོར་ལོ་བསྐོར་བའི་ཆེད་དུ་དྲང་སྲོང་ལྷུང་བའི་གནས་སུ་གཤེགས་པ་དང ། དེ་ནས་དེར་གཤེགས་པ་ན། ཞབས་ནི་བཏེག་དང་བཞག་པ་ན། །མེ་ཏོག་པདྨ་སྐྱེས་པར་འགྱུར། །འདབ་མཉམ་ཁྲུ་ནི་སུམ་ཅུ་པ། །འདབ་ཆུང་ཁྲུ་ནི་ཉི་ཤུ་ལྔ། །གེ་སར་ཁྲུ་ནི་ཉི་ཤུ་པ། །ལྟེ་བ་ཁྲུ་ནི་བཅུ་དྲུག་པ། །གེ་སར་ 417b རྣམས་ནི་ཁྱབ་པར་གནས། །པདྨའི་མཛོད་སྤུ་ཐམས་ཅད་དུའོ། །སྟོབས་བཅུ་པའི་འོད་ཀྱིས་ཉིན་མོར་བྱེད་པའི་འོད་ཟིལ་གྱིས་གནོན་ནོ། །ཉིན་མོ་དང ། མཚན་མོ་མི་བྱེད་བར་གྱུར་ཏོ། ། དེ་ལ་སྲོད་དང ། ཐོ་རངས་བྱ་རྣམས་སྐད་སྒྲོགས་སོ། །མེ་ཏོག་ཁ་ཟུམ་པ་དང ། བྱེ་བས་མཚན་མོ་དང ། ཉིན་མོར་ཤེས་པར་བྱེད་དོ། །གང་དང ། གང་དུ་ཆོས་སྟོན་པར་བྱེད་པ་དེ་དང ། དེ་རུ་ཆོས་ཀྱི་སྒྲ་སྒྲོགས་སོ། །དེའི་ཕྱིར་གསུངས་པ། འོད་དང་འོད་ཟེར་ཚད་རྣམས་ནི། །དབྱངས་དང་དབྱངས་ཀྱི་ཚད་ཙམ་མོ། །གཟི་བརྗིད་གཟི་ཡི་ཚད་རྣམས་ནི། །བསོད་ནམས་བསོད་ནམས་ཀྱི་ནི་ཚད། །ཤེས་རབ་ཤེས་རབ་ཀྱི་ནི་ཚད། །གྲགས་པ་གྲགས་པ་ཡི་ནི་ཚད། །ཁ་དོག་ཁ་དོག་གི་ནི་ཚད། །ཆོས་ནི་ཆོས་རྣམས་ཀྱི་ནི་ཚད། །དེ་ནས་སྟོང་ཕྲག་བརྒྱད་ཅུ་རྩ་བཞིའི་བྲམ་ཟེ་དང ། བྱེ་བ་ཕྲག་བཅོ་བརྒྱད་ཀྱི་ཚངས་པ་རྣམས་ཀྱིས་བདུད་རྩིའི་བཏུང་བ་འཐུང་ནས། ཇི་ལྟར་བཅོམ་ལྡན་འདས་བསོད་ནམས་ཀྱི་མཐུ་ཡིས་རྣམ་པ་བརྒྱ་ཕྲག་དུ་མའི་འོད་ཟེར་འཕྲོ་ཞིང ། རྣམ་པ་བརྒྱ་ཕྲག་དུ་མའི་མཚན་རྫོགས་པ་མཚན་སུམ་ཅུ་རྩ་གཉིས་མཆོག་དང་ལྡན་པ། དཔེ་བྱད་བཟང་པོ་བརྒྱད་ཅུ་དང་ལྡན་པར་བརྒྱ་ཕྲག་དུ་མའི་སྐུ་མདོག་རྣམ་པ་དུ་མའི་ཡ་མཚན་དང་ལྡན་པར་གྱུར་པ། བརྒྱ་ཕྲག་དུ་མའི་འོད་ཟེར་དེའི་སྐུ་ལས་འཐོན་པར་གྱུར་ཏོ། །དེ་ནི་ཁ་དོག་སྔོན་པོ་དང ། ཁ་དོག་སེར་པོ་དང ། ཁ་དོག་དམར་པོ་དང ། 418a ༄#། །ཁ་དོག་དཀར་པོ་དང ། བཙོད་ཀྱི་མདོག་ལྟ་བུའི་འོད་ཟེར་དང་ལྡན་པའི་སྐུ་མདོག་ཅན་ནོ། །དེའི་སྐུ་ལུས་ལ་འབྱུང་བ་ནི་ཤིང་ཏཱ་ལའི་ཚད་ཙམ་གྱི་འོད་ཟེར་འཕྲོའོ། །དུས་དང ། དུས་མ་ཡིན་པ་དང ། ཟུང་དང ། ཟུང་མ་ཡིན་པ་དང ། ཕུང་པོ་དང ། ཕུང་པོ་མ་ཡིན་པ་ནི། བཅོམ་ལྡན་འདས་ཀྱི་སྐུ་ལུས་ལ་ལན་གསུམ་བསྐོར་བ་བྱས་ནས་རྒྱང་རིང་དུ་འགྲོ་བ་དང ། ཐུང་དུ་འགྲོ་བའོ། །བཅོམ་ལྡན་འདས་དེའི་སྐུ་ལུས་ནི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་པར་འགྱུར་རོ། །ཞབས་ཀྱི་འོག་ནས་པུས་མོའི་བར་དུ་ཁྲུ་ཉི་ཤུ་རྩ་གཉིས་སོ། །པུས་མོ་ནས་ལྟེ་བའི་བར་དུ་ཁྲུ་ཉི་ཤུ་རྩ་གཉིས་སོ། །ལྟེ་བ་ནས་སྒྲོག་རུས་ཀྱི་བར་དུ་ཁྲུ་ཉི་ཤུ་རྩ་གཉིས་སོ། །སྒྲོག་རུས་ནས་སྤྱི་གཙུག་གི་བར་དུ་ཁྲུ་ཉི་ཤུ་རྩ་གཉིས་སོ། །དཔུང་པ་གཉིས་ཀྱི་བར་དུ་ཁྲུ་ཉི་ཤུ་རྩ་ལྔའི་ཚད་དོ། །སྒྲོག་རུས་རེ་རེའི་ཀྱུས་ནི་ཁྲུ་ལྔ་ལྔའོ། །སྙན་གཉིས་ཀྱི་རྩེ་མོ་ནས་རྩ་བའི་བར་ལ་ཁྲུ་བདུན་བདུན་ནོ། །སྤྱན་རེ་རེའི་མཆུ་རུ་ཁྲུ་ལྔ་ལྔའོ། །སྨིན་མ་གཉིས་ཀྱི་དཀྱུས་སུ་ཁྲུ་ལྔ་ལྔའོ། །སྨིན་མ་གཉིས་ཀྱི་དབུས་ཀྱི་བར་ཞེང་ལ་ཁྲུ་ལྔའོ། །ཤངས་ལ་ཁྲུ་བདུན་ནོ། །ཡ་མཆུ་མ་མཆུ་གཉིས་ཀྱི་མཆུ་རུ་ཁྲུ་བཅུ་བཅུའོ། །ལྗགས་ཀྱི་བཟླུམས་སུ་ཁྲུ་ལྔའོ། །གཙུག་ཏོར་ལ་ཁྲུ་ལྔའོ། །གསེར་གྱི་མེ་ལོང་དང་འདྲ་བའི་ཞལ་གྱི་དཀྱིལ་འཁོར་ལ་ཁྲུ་ཉི་ཤུ་རྩ་ལྔའོ། །མགུལ་པ་ལ་ཁྲུ་ལྔའོ། ། 418b ཕྱག་གཉིས་ཀྱི་རིང་དུ་ཁྲུ་བཞི་བཅུ་རྩ་བཞི་པ་ཡིན་ནོ། །དེ་ནི་འདི་བཞིན་དུ་དཔེ་མེད་པའི་སངས་རྒྱས་ཀྱི་དཔལ་མཐའ་ཡས་པའི་སངས་རྒྱས་ཀྱི་རོལ་པའོ། །སྟོང་ཕྲག་བཅུའི་འཇིག་རྟེན་གྱི་ཁོར་ཡུག་ཐམས་ཅད་ཀྱི་ལྷ་རྣམས་དང ། དེའི་རྗེས་སུ་མི་རྣམས་ཀྱི་ནང་དུ་གནས་ནས་ཆོས་ཀྱི་འཁོར་ལོ་བསྐོར་རོ། །ཆོས་སྟོན་པའི་གནས་དང ། བྱེ་བ་འབུམ་ཕྲག་གཅིག་གི་ལྷ་དང ། མིའི་འཆིང་བ་གྲོལ་བ་དང ། ཆོས་ཀྱི་དང་པོ་ཐོབ་པ་དང ། ཆོས་ཀྱི་དང་པོ་མ་ཐོབ་པ་རྣམས་མཐོ་རིས་སུ་སྐྱེ་བར་འགྱུར་རོ། །དེ་ལྟར་མཆོག་དང་ལྡན་པའི་བྱམས་པ་སུ་ཞིག་གིས་མི་མཐོང ། ང་ནི་མ་བསད་པ་དང ། ཕ་བསད་པ་དང ། དགེ་སློང་མ་སུན་ཕྱུང་བ་དང ། དགེ་འདུན་གྱི་དབྱེན་བྱས་པ་དང ། མཚམས་མེད་པ་ལྔའི་ལས་བྱས་པ་དང ། མཆོད་རྟེན་བཤིག་པ་དང ། བྱང་ཆུབ་ཀྱི་ཤིང་བཅད་པ་དང ། བྱང་ཆུབ་སེམས་དཔའ་བསད་པ་དང ། དགེ་འདུན་གྱི་ཁ་ཟས་བརླག་པར་བྱས་པ་དང ། ཤིན་ཏུ་སེར་སྣ་ཆེ་བ་དང ། ལོག་པར་ལྟ་བ་ངེས་པ་དང ། འཕགས་པའི་གང་ཟག་ལ་སྐུར་པ་འདེབས་པ་དང ། གཅེར་བུ་པའི་རིགས་ཏེ། དེ་རྣམས་ཀྱིས་མི་མཐོང་ངོ ། །ཚིགས་བཅད་སྟོང་ཕྲག་གཅིག་གིས་སོ་སོར་བརྒྱན་པ་འདི་ཐམས་ཅད་སྒྲོལ་གྱི་སྐྱེས་རབས་ཆེན་པོ་ཉི་མ་གཅིག་ལ་སྐྱེ་བོ་རྣམས་ཀྱིས་བཤད་པ་དང ། མཉན་པ་དང ། མར་མེ་སྟོང་ཕྲག་གཅིག་གམ། སྟོང་ཕྲག་ 419a ༄#། །གཅིག་གི་མེ་ཏོག་ཕུལ་པའམ། སྟོང་ཕྲག་གཅིག་གི་ཨུཏྤ་ལ་སྔོན་པོའི་མེ་ཏོག་གམ། མཆོད་རྟེན་བྱེད་པའམ། སངས་རྒྱས་ཀྱི་སྐུ་གཟུགས་བྱེད་པའམ། དེ་ལ་མཆོད་པ་བྱེད་པས་ནི་བྱམས་པ་སངས་རྒྱས་པའི་དུས་སུ། དེའི་དྲུང་དུ་དང་པོའི་ཆོས་ཐོབ་ཅེས་སྐྱེ་བར་འགྱུར་རོ། །སེམས་ཅན་ལྷག་མ་རྣམས་ཀྱིས་སྦྱིན་པ་བྱིན་པ་དང ། ཚུལ་ཁྲིམས་བསྲུངས་པ་དང ། གཙུག་ལག་ཁང་སྦྱངས་པ་དང ། བྱང་ཆུབ་ཀྱི་ཤིང་བསྐྲུན་པ་དང ། མཆོད་རྟེན་བྱས་པ་དང ། མཆོད་རྟེན་དང ། བྱང་ཆུབ་ཀྱི་ཤིང་ལ་རིམ་གྲོ་བྱས་པ་དང།་སྐྱེད་མོས་ཚལ་བསྐྲུན་པ་དང ། ཟམ་པ་བཙུགས་པ་དང ། ལམ་བཅོས་པ་དང ། མགྲོན་ཁང་བྱས་པ་དང ། ཁྲོན་པ་བྱས་པ་དང ། བསྟན་པའི་བྱ་བ་བྱས་པ་དང ། ཆོས་ཀྱི་གནས་ལ་བྱི་དོར་བྱས་པ་དང ། དྲི་དང ། ཕྲེང་བ་ལ་སོགས་པས་མཆོད་པར་བྱེད་པ་དང ། གུས་པར་བྱས་ནས་ཆོས་མཉན་པ་དང ། ཁ་ཟས་ཙམ་གྱི་སྦྱིན་པ་དགེ་འདུན་ལ་གཏོང་བ་དང།་ཕ་དང ། མ་ལ་བསྙེན་བཀུར་བྱེད་པ་དང ། རིགས་ཀྱི་གཙོ་བོ་ལ་བསྙེན་བཀུར་བྱེད་པ་དང ། གསོ་སྦྱོང་ལ་གནས་པ་ལ་ཁ་ཟས་སྟེར་བ་དང ། གློ་བུར་བའི་བཙུན་པ་ལ་སྦྱིན་པ་སྟེར་བ་དང ། བསོད་སྙོམས་པ་ལ་སྟེར་བ་དང ། སྟན་འབུལ་བའི་སྐྱེ་བོས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། །ཐ་ན་མེ་ཏོག་སྙིམ་པ་ 419b གང་ཙམ་མམ། མར་མེ་གཅིག་ཙམ་འབུལ་བའམ། གཞན་བསོད་ནམས་བྱེད་པ་རྣམས་ལ་རྗེས་སུ་ཡི་རང་བ་དང ། ལྷའམ། མི་རྣམས་ཀྱི་དགེ་བ་འདི་རྣམས་བྱེད་པ་ནི། དེའི་དུས་སུ་བྱོན་པའི་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། །དེ་ལ་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འདོད་པ་རྣམས་ཀྱིས་སྦྱིན་པ་གཏོང་པ་དང ། ཚུལ་ཁྲིམས་བསྲུང་བ་དང ། གསོ་སྦྱོང་གི་ལས་བྱེད་པ་སྒོམ་པར་བྱེད་པ་དང ། དགེ་བའི་ལས་ཀྱི་བག་ཡོད་པར་གྱུར་ན་གདོན་མི་ཟ་བར་མཐོང་ངོ ། །གང་ཞིག་ཚངས་པར་སྤྱད་པ་སྤྱོད། །ཐུབ་པའི་གསུང་རབ་ཐོས་པ་དང ། །དེ་རྣམས་འཁོར་བ་ལས་གྲོལ་ཞིང ། །བླ་མེད་མཆོག་གྱུར་འཆི་བ་མེད། །ཚངས་པར་སྤྱད་པ་སྤྱོད་བྱེད་ཅིང ། །མཆོད་འོས་རྣམས་ལ་སྟེར་བ་དང ། །གསོ་སྦྱོང་རྣམས་ལ་གནས་པ་དང ། །ལེགས་པར་བྱམས་པ་བསྒོམ་པར་གྱིས། །བག་ཡོད་པར་ནི་འགྱུར་བ་དང ། །རྟག་ཏུ་བསོད་ནམས་བྱ་བ་བྱེད། །དགེ་བ་འདི་རྣམས་བྱས་པ་ཡིས། །སྡུག་བསྔལ་མཐར་ནི་བྱེད་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བྱམས་པའི་མདོ་རྫོགས་སོ།། །།པཎྜི་ཏ་ཆེན་པོ་ཨཱནྣྟ་ཤྲཱིའི་ཞལ་སྔ་ནས། མང་དུ་ཐོས་པའི་ལོ་ཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་ 420a ༄#། །དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ས་སྟེང་དུ་ཉི་མ་དང ། ཟླ་བ་ལྟར་གྱུར་ཅིག།་ |