།།རྒྱ་གར་སྐད་དུ། ཀ་ན་ཀ་བརྞ་པཱུ་རྦ་ཡོ་ག་ནཱ་མ། བོད་སྐད་དུ། གསེར་མདོག་གི་སྔོན་གྱི་སྦྱོར་བ་ཞེས་བྱ་བ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གི་ཐོས་པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་རབ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་སོ། །བཅོམ་ལྡན་འདས་ལ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། རྒྱལ་པོ་དང ། བློན་པོ་ཆེན་པོ་དང ། མུ་སྟེགས་ཅན་སྣ་ཚོགས་དང ། དགེ་སྦྱོང་དང ། བྲམ་ཟེ་ 79b དང།་སྤྱོད་པ་བ་དང ། ཀུན་ཏུ་རྒྱུ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་ཀྱིས་བཀུར་སྟིར་བྱས། བླ་མར་བྱས། རི་མོར་བྱས་ཤིང་མཆོད་དོ། །བཅོམ་ལྡན་འདས་ཀྱིས་ཆོས་གོས་དང ། ཞལ་ཟས་དང ། གཟིམས་ཆ་དང ། སྙུན་གྱི་རྐྱེན་སྨན་དང ། ལྷ་དང ། མི་རྣམས་ཀྱི་ཡོ་བྱད་དམ་པ་རབ་ཏུ་མང་པོ་ཡང་བརྙེས་ཏེ། དེ་དག་ལ་བཅོམ་ལྡན་འདས་རྗེས་སུ་ཆགས་པའང་མི་མངའ་སྟེ། པདྨ་ལ་ཆུ་མི་ཆགས་པ་དེ་བཞིན་ནོ། །བཅོམ་ལྡན་འདས་ཀྱི་རང་བཞིན་ནི།་འདི་ལྟ་སྟེ། རྒྱ་ཆེ་ཞིང་དགེ་ལ། གྲགས་པ་དང ། སྒྲ་དང ། ཚིགས་སུ་བཅད་པར་མངོན་པར་འཕགས་པ་སྟེ། འདི་ལྟར་བཅོམ་ལྡན་འདས་དེ། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དེ། ལྷ་དང་བཅས་པའི་འཇིག་རྟེན་དང ། བདུད་དང་བཅས་པ་དང ། ཚངས་པ་དང་བཅས། དགེ་སྦྱོང་དང།་བྲམ་ཟེར་བཅས་པ་དང ། ལྷ་དང ། མིར་བཅས་པ་འདི་རྣམས་རང་གི་མངོན་པར་མཁྱེན་པས་མངོན་སུམ་དུ་མཁྱེན་པར་མཛད་ནས། དམ་པའི་ཆོས་སྟོན་ཏོ། །ཐོག་མར་དགེ་བ ། 80a ༄#། །བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། རྣམ་པར་བྱང་བ། ཚངས་པར་སྤྱོད་པ། ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག། ཇི་ལྟར་ངས་སྦྱིན་པའི་འབྲས་བུ་དང ། སྦྱིན་པ་ལ་འགེད་པའི་རྣམ་པར་སྨིན་པ་ཤེས་པ་ལྟར། སེམས་ཅན་རྣམས་ཀྱིས་ཀྱང་སྦྱིན་པའི་འབྲས་བུ་དང ། སྦྱིན་པ་ལ་འགེད་པའི་རྣམ་པར་སྨིན་པ་ཤེས་པར་གྱིས་ཤིག། གང་འདི་ཁམ་ཕྱི་མའི་ཁམ་ཕྱི་མ་གཅིག་པོ་དེ་ཡང་གཞན་དག་ལ་མ་བྱིན་མ་བགོས་པར་བདག་གིས་མི་བཟའ་བར་གྱིས་ཤིག་།སེར་སྣའི་སེམས་ཀྱི་དྲི་མ་སྐྱེས་པས་ཀུན་ནས་དཀྲིས་ཏེ་མ་འདུག་ཅིག། དགེ་སློང་དག། གང་གི་ཕྱིར་ཇི་ལྟར་ངས་སྦྱིན་པའི་འབྲས་བུ་དང ། སྦྱིན་པ་ལ་འགེད་པའི་རྣམ་པར་སྨིན་པ་ཤེས་པ་ལྟར། སེམས་ཅན་རྣམས་ནི་སྦྱིན་པའི་འབྲས་བུ་དང ། སྦྱིན་པ་ལ་འགོད་པའི་རྣམ་པར་སྨིན་པ་མི་ཤེས་ཏེ། དེ་ལྟ་བས་ན་སེམས་ཅན་རྣམས་གང་འདི། ཁམ་ཕྱི་མའི་ཁམ་ཕྱི་མ་གཅིག་པོ་དེ་ཡང་གཞན་དག་ལ་མ་བྱིན་མ་བགོས་པར་བདག་ཉིད་ཟ་བར་བྱེད། སེར་སྣའི་སེམས་ཀྱི་དྲི་མ་སྐྱེས་པས་ཀུན་ནས་དཀྲིས་ཏེ་འདུག་གོ་།དེ་ཅིའི་ཕྱིར་ཞེ་ན། དགེ་སློང་དག། སྔོན་བྱུང་བ་འདས་ 80b པའི་དུས་ན། རྒྱལ་པོ་གསེར་མདོག་ཅེས་བྱ་བ། གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བྱུང་ངོ ། །རྒྱལ་པོ་གསེར་མདོག་དེ་ཕྱུག་སྟེ་ནོར་མང་ལ། ལོངས་སྤྱོད་ཆེ་ཞིང ། བདག་དབང་བ་མང་བ་དང ། དབྱིག་དང ། ཡོ་བྱད་མང་པ་དང ། ནོར་དང ། འབྲུ་དང ། ནོར་བུ་དང ། མུ་ཏིག་དང ། མན་ཤེལ་དང ། བྱུ་རུ་མང་བ་དང ། གསེར་དང ། དངུལ་མང་བ་དང ། གླང་པོ་ཆེ་དང་།རྟ་དང ། བ་ལང་དང ། རྟ་རྒོད་མ་མང་བ་དང ། མཛོད་དང ། བང་བ་ཡོངས་སུ་གང་བ་ཞིག་བྱུང་ངོ ། །རྒྱལ་པོ་གསེར་མ་དོག་གི་ཕོ་བྲང་གྲོང་ཁྱེར་གསེར་ཅན་ཞེས་བྱ་བར་བཏགས་ཏེ། ཆུར་ནི་ཤར་ནས་ནུབ་ཏུ་དཔག་ཚད་བཅུ་གཉིས་ཡོད་དོ། །ཞེང་ནི་ལྷོ་ནས་བྱང་དུ་དཔག་ཚད་བདུན་ཡོད་དེ། འབྱོར་བ་དང།་རྒྱས་པ་དང ། བདེ་བ་དང ། ལོ་ལེགས་པ་དང ། ཉམས་དགའ་ཞིང་སྐྱེ་བོ་དང ། མི་མང་པོ་རྣམས་ཀྱིས་གང་ངོ ། །རྒྱལ་པོ་གསེར་མདོག་ལ་གྲོང་ཁྱེར་བརྒྱད་ཁྲི་ཡོད་དེ། འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། ཉམས་དགའ་ཞིང་སྐྱེ་བོ་དང ། མི་མང་པོ་རྣམས་ཀྱིས་གང་ངོ ། །གྲོང་ས་ཡ་ཕྲག་ལྔ་བདུན་འབུམ་ཡོད་དེ། འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། ཉམས་དགའ་ཞིང་སྐྱེ་བོ་དང ། མི་མང་པོ་རྣམས་ཀྱིས་གང་ངོ ། །རི་འོ་རབ་དྲུག་ཁྲི་ཡོད་དོ། །འབྱོར་བ་དང ། རྒྱས་པ་དང ། 81a ༄#། །བདེ་བ་དང ། ལོ་ལེགས་པ་དང ། ཉམས་དགའ་ཞིང་སྐྱེ་བོ་དང ། མི་མང་པོ་རྣམས་ཀྱིས་གང་ངོ ། །རྒྱལ་པོ་གསེར་མདོག་གི་བློན་པོ་ཁྲི་བརྒྱད་སྟོང་ཡོད་དོ། །བུད་མེད་སླས་ཉི་ཁྲི་ཡོད་པར་གྱུར་ཏོ། །དེ་ནས་རྒྱལ་པོ་གསེར་མདོག་ཆོས་དང་ལྡན་པའི་ཆོས་ཀྱི་རྒྱལ་པོའི་ཆོས་ཀྱིས་རྒྱལ་སྲིད་བྱེད་པར་གྱུར་ཏོ། །རྒྱལ་པོ་གསེར་མདོག་ཐམས་ཅད་སྦྱིན་པར་བྱེད་དེ། དེས་ཐ་ན་རང་གི་ལུས་ཀྱི་ཤ་མན་ཆད་ཡོངས་སུ་མི་གཏོང་བ་ཅིའང་མེད་དོ། །དེའི་དུས་ན་མི་རྣམས་ཀྱི་ཚེའི་ཚད་ལོ་བརྒྱད་ཁྲི་བཞི་སྟོང་ཐུབ་པར་གྱུར་ཏོ། །དེའི་ཚེ་དུས་གཞན་ཞིག་ན། རྒྱལ་པོ་གསེར་མདོག་གཅིག་པུ་དབེན་པར་ནང་དུ་ཡང་དག་འཇོག་ལ་ཞུགས་ནས། སེམས་ཀྱིས་སེམས་ཀྱི་ཡོངས་སུ་རྟོག་པ་འདི་སྙམ་དུ་སྐྱེས་ཏེ། གང་བདག་གིས་ངེས་པར་ཚོང་པ་ཐམས་ཅད་ལ་ནི་ལ་གཅན་དང ། ཤོ་གམ་རྣམས་མི་དབབ་པར་བྱའོ། །འཛམ་བུའི་གླིང་གི་མི་ཐམས་ཅད་ལ་ནི་དཔྱ་དང ། སྒྱུ་རྣམས་མི་དབབ་པར་བྱའོ་སྙམ་མོ། །དེ་ནས་རྒྱལ་པོ་གསེར་མདོག་གིས་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་བོས་ཏེ་འདི་སྐད་ཅེས་སྨྲས་སོ། །དེང་ཕྱིན་ཆད་གྲོང་མི་དང ། ཚོང་བ་ཐམས་ཅད་ལ་ལ་གཅན་དང ། ཤོ་ག་མ་རྣམས་མི་དབབ་པར་བྱའོ། །འཛམ་བུའི་གླིང་གི་མི་ཐམས་ཅད་ལ་དཔྱད་དང ། སྒྱུ་རྣམས་ 81b མི་དབབ་པར་བྱའོ་ཞེས་བསྒོའོ། །དེའི་ཐབས་འདིས་ལོ་མང་པོ་ཞིག་ཏུ་རྒྱལ་སྲིད་བྱེད་པ་ན་དུས་གཞན་ཞིག་གི་ཚེ། ལོ་བཅུ་གཉིས་ཀྱི་བར་དུ་ཆར་མི་འབབ་པའི་རྒྱུ་སྐར་ངན་པ་ཞིག་བྱུང་བར་གྱུར་ཏོ། །དེའི་ཚེ་བྲམ་ཟེ་མཚན་ཉིད་འདོན་པ་དང ། ལྟས་པ་དང ། མོ་པ་རྣམས་ས་དང ། བར་སྣང་གི་རྒྱུ་སྐར་དང ། གཟའ་དང ། བ་བསང་རྒྱུ་བ་དག། དེ་ཐམས་ཅད་ཀྱི་མཚན་ཉིད་ཤེས་པར་བྱས་ནས། རྒྱལ་པོ་གསེར་མདོག་ག་ལ་བདེར་སོང་སྟེ་ཕྱིན་ནས། རྒྱལ་པོ་གསེར་མདོག་ལ་འདི་སྐད་སྨྲས་སོ། །ལྷ།་མཁྱེན་པར་མཛོད་ཅིག་།དགུང་ལོ་བཅུ་གཉིས་ཀྱི་བར་དུ་ཆར་མི་འབབ་པའི་རྒྱུ་སྐར་ངན་པ་དེ་བྱུང་བར་གྱུར་ཏོ། །དེ་ནས་རྒྱལ་པོ་གསེར་མདོག་དངོས་པོ་བསྒྲགས་པ་དེ་ཐོས་ནས། རབ་ཏུ་དུས་ཏེ་མཆི་མ་ཕྱུང་ནས། ཨེ་མའོ། །ངའི་འཛམ་བུའི་གླིང་གི་མི་རྣམས་ཨེ་མའོ། །ེ་མའོ། །ངའི་འཛམ་བུའི་གླིང་གི་མི་རྣམས་ཨེ་མའོ། །ེ་མའོ། །ངའི་འཛམ་བུའི་གླིང་འབྱོར་བ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། ཉམས་དགའ་ཞིང་སྐྱེ་བོ་དང ། མི་མང་པོས་གང་བ་རྣམས་རིང་པོར་མི་ཐོགས་པ་ཉིད་དུ་སྟོང་ཞིང་མི་དང་བྲལ་བར་འགྱུར་རོ། །དེ་ནས་རྒྱལ་པོ་གསེར་མདོག་ཡུད་ཙམ་ཞིག་མྱ་ངན་དང ། སྨྲེ་སྔགས་འདོན་པ་སངས་ནས། འདི་སྙམ་དུ་གྱུར་ཏེ། གང་འདི་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་དེ་དག་ནི་འཚོ་བར་ནུས་ཀྱི། གང་དག་དབུལ་ཞིང་ནོར་ཉུང་ལ་བཟའ་བཏུང་དང ། ལོངས་ 82a ༄#། །སྦྱོད་ཆུང་བ་དེ་དག་ནི་ཇི་ལྟར་བྱེད་ཅིག་གུ། དེ་འདི་སྙམ་དུ་གྱུར་ཏེ། བདག་གིས་ངེས་བར་འཛམ་བུའི་གླིང་གིས་ཟས་ལ་སོགས་པ་ཐམས་ཅད་བསྡུ་བར་བྱའོ། །ཟས་ལ་སོགས་པ་བསྡུས་ཏེ། གྲོང་དང ། གྲོང་ཁྱེར་དང ། གྲོང་རྡལ་དང ། རྒྱལ་པོའི་ཕོ་བྲང་འཁོར་ཐམས་ཅད་དུ་བང་བ་གཅིག་བརྩིག་པར་བྱའོ། །བང་བ་གཅིག་བརྩིགས་ཏེ། འཛམ་བུའི་གླིང་གི་མི་ཐམས་ཅད་བཟའ་བ་མཉམ་པར་བགོ་བར་བྱའོ་སྙམ་མོ། །དེ་ནས་རྒྱལ་པོ་གསེར་མདོག་གིས་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་བོས་ཏེ་འདི་སྐད་ཅེས་སྨྲས་སོ། །གྲོང་གི་གཙོ་བོ་དག་།ཁྱེད་རྣམས་དེངས་ལ་འཛམ་བུའི་གླིང་གིས་ཟས་ལ་སོགས་པ་ཐམས་ཅད་སྡུས་ཤིག།་ཟས་ལ་སོགས་པ་བསྡུས་ཏེ་བཅོལ་ལ་གྲོངས་ཤིག་།གཅེལ་ཏེ་བགྲངས་ནས་ཀྱང ། གྲོང་དང ། གྲོང་ཁྱེར་དང ། གྲོང་རྔལ་དང ། རྒྱལ་པོའི་ཕོ་བྲང་འཁོར་ཐམས་ཅད་དུ་བང་བ་བཟང་པོ་གཅིག་རྩིགས་ཤིག་ཅེས་བསྒོའོ། །དེ་ནས་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་ཀྱིས་རྒྱལ་པོ་གསེར་མདོག་གི་ལྟར་མཉན་ནས། འཛམ་བུ་གླིང་གི་ཟས་ལ་སོགས་པ་ཐམས་ཅད་བསྡུས་སོ། །ཟས་ལ་སོགས་པ་བསྡུས་ནས། གཅལ་བགྲངས་ཏེ། གྲོང་དང ། གྲོང་ཁྱེར་དང ། གྲོང་ 82b རྡལ་དང ། རྒྱལ་པོའི་ཕོ་བྲང་འཁོར་རྣམས་སུ་བང་བ་གཅིག་བྱས་ནས་བླུགས་སོ། །བང་བ་གཅིག་བྱས་ནས་བླུག་སྟེ། རྒྱལ་པོ་གསེར་མདོག་ག་ལ་བ་དེར་སོང་སྟེ་ཕྱིན་ནས། རྒྱལ་པོ་གསེར་མདོག་ལ་འདི་སྐད་ཅེས་སྨྲས་སོ། །ལྷ།་མཁྱེན་པར་མཛོད་ཅིག། གྲོང་དང ། གྲོང་ཁྱེར་དང ། གྲོང་རྡལ་དང ། རྒྱལ་པོའི་ཕོ་བྲང་འཁོར་ཐམས་ཅད་ཀྱི་ཟས་ལ་སོགས་པ་བསྡུས་སོ། །བསྡུས་ནས་ཀྱང་གཅལ་ཞིང་བགྲངས་ལགས་སོ། །གཅལ་ཞིང་བགྲངས་ནས་གྲོང་དང ། གྲོང་ཁྱེར་དང ། གྲོང་རྡལ་དང ། རྒྱལ་པོའི་ཕོ་བྲང་འཁོར་ཐམས་ཅད་དུ་བང་བ་བགྱིས་ནས་སྩལ་ཀྱང་ལགས་ཀྱི། ཁྱོད་གང་གི་དུས་ཉིད་དགོངས་སམ། དེ་ནས་རྒྱལ་པོ་གསེར་མདོག་གིས་གྲངས་པ་དང ། རྩིས་པ་དང ། ཡི་གེ་པའི་མི་རྣམས་བོས་ནས་འདི་སྐད་ཅེས་སྨྲས་སོ། །བགྲོང་གི་གཙོ་བོ་དག། ཁྱེད་རྣམས་དེངས་ལ། འཛམ་བུའི་གླིང་གི་མི་ཐམས་ཅད་གྲོངས་ཤིག། ང་མན་ཆད་ལེགས་པར་གྲོངས་ལ། འཛམ་བུའི་གླིང་གི་མི་ཐམས་ཅད་ཀྱི་བཟའ་བ་ལེགས་པར་མཉམ་པར་བགོ་བར་གྱིས་ཤིག། གྲངས་པ་དང ། རྩིས་པ་དང ། ཡི་གེ་བའི་མི་རྣམས་ཀྱིས་རྒྱལ་པོ་གསེར་མདོག་གི་ལྟར་མཉན་ནས། འཛམ་བུའི་གླིང་གི་མི་ཐམས་ཅད་ལེགས་པར་བགྲངས་སོ། །རྒྱལ་པོ་གསེར་མདོག་མན་ཆད་ལེགས་པར་བགྲངས་ནས། འཛམ་བུའི་གླིང་གི་མི་ཐམས་ཅད་ལ་བཟའ་བ་མཉམ་པར་འགེད་དོ། །ལོ་བཅུ་གཅིག་གི་བར་དུ་ 83a ༄#། །ནི་ཤི་བ་མེད་དོ། །ལོ་བཅུ་གཉིས་པ་བྱུང་བའི་ཚེ་ཟླ་བ་གཅིག་ལ་དེར་མི་མང་དུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་བཀྲེས་པ་དང ། སྐོམ་པས་ཤིའོ།། ལོ་བཅུ་གཉིས་པ་བྱུང་བའི་ཚེ་ཟླ་བ་ལྷག་མ་གཉིས་དང ། གསུམ་དང ། བཞི་དང ། ལྔ་དང ། བཅུ་གཅིག་གི་བར་དུ་དེར་མང་དུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་རྣམས་ཤི་བར་གྱུར་ཏོ། །དེའི་ཚེ་ན་འཛམ་བུའི་གླིང་གི་ཟས་ལ་སོགས་པ་ཐམས་ཅད་ཡོངས་སུ་ཟད་དེ། གཞན་དུ་ན་རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་དོ། །དེའི་ཚེ་དུས་གཞན་ཞིག་ན། བསྐལ་པ་བཞི་བཅུར་སྤྱོད་པའི་བྱང་ཆུབ་སེམས་དཔའ་ཞིག་།མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་པར་གྱུར་ཏོ། །བྱང་ཆུབ་སེམས་དཔའ་དེས་གཞན་ཞིག་ཏུ། ནགས་ཁྲོད་ཞིག་ན་བུ་དང ། མ་གཉིས་ཉལ་པོ་བྱེད་པ་ཞིག་མཐོང་ངོ ། །མཐོང་ནས་ཀྱང་འདི་སྙམ་དུ་གྱུར་ཏེ། ཨེ་མའོ། །ཉོན་མོངས་སོ། །སེམས་ཅན་འདི་དག་ནི་ཉོན་མོངས་སོ། །གང་གི་ཚེ་ཟླ་བ་དགུ་རུ་མ་དེ་ཉིད་དུ་གནས་ལ། དེ་ཉིད་ཀྱི་ནུ་མ་ལ་འཐུངས་ནས་དེ་ཉིད་དུ་དེ་ལྟར་བྱེད། འདི་འདྲ་བའི་སེམས་ཅན་ཆོས་མ་ཡིན་པའི་འདོད་ཆགས་ཀྱིས་ཞེན་པ། ལོག་པར་ལྟ་བ་འདོད་པ་མི་བཟད་པས་ཟིལ་གྱིས་ནོན་པ། ཕར་མི་འཛིན་པ། མར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་རྒན་ 83b རབས་ལ་བཀུར་སྟི་མི་བྱེད་པ་རྣམས་ཀྱི་བདག་ཆོག་སྟེ། འདི་འདྲ་བའི་སེམས་ཅན་རྣམས་ཀྱི་དོན་དུ། བྱང་ཆུབ་ཀྱི་སྤྱོད་པ་སྤྱད་པར་སུ་ཞིག་སྤྲོ། བདག་ནི་ངེས་པར་བདག་གཅིག་པུའི་དོན་བསྒྲུབ་བོ་སྙམ་མོ། །དེ་ནས་བྱང་ཆུབ་སེམས་དཔའ་དེ་གཞན་དུ་ཤིང་ལྗོན་པའི་དྲུང་ག་ལ་བ་དེར་སོང་སྟེ་ཕྱིན་ནས། ཤིང་ལྗོན་པའི་དྲུང་དེར་སྐྱིལ་མོ་ཀྲུང་བཅས་ནས་ལུས་བསྲང་སྟེ། དགའ་བ་དང ། བདེ་བ་དང ། དྲན་པ་མངོན་དུ་བཞག་ནས་འདུག་གོ་།དེ་ནས་བྱང་ཆུབ་སེམས་དཔའ་དེ་ཉེ་བར་ལེན་པའི་ཕུང་པོ་ལྔ་རྣམས་ལ་སྐྱེ་བ་དང ། འཇིག་པར་རྗེས་སུ་ལྟ་ཞིང་གནས་ཏེ། འདི་ནི་གཟུགས་ཏེ། གཟུགས་འདི་ནི་སྐྱེ་བའོ། །གཟུགས་འདི་ནི་འཇིག་པའོ། །འདི་ནི་ཚོར་བ། འདི་དག་ནི་འདུ་ཤེས། འདི་དག་ནི་འདུ་བྱེད། འདི་དག་ནི་རྣམ་པར་ཤེས་པ་སྟེ། རྣམ་པར་ཤེས་པ་འདི་ནི་སྐྱེ་བའོ། །རྣམ་པར་ཤེས་པ་འདི་ནི་འཇིག་པའོ་ཞེས་དེ་ཉེ་བར་ལེན་པའི་ཕུང་པོ་ལྔ་པོ་འདི་རྣམས་ལ་སྐྱེ་བ་དང ། འཇིག་པར་རྗེས་སུ་ལྟ་ཞིང་གནས་སོ། །གང་ཅུང་ཟད་སྐྱེ་བའི་ཆོས་དེ་ཐམས་ཅད་ནི། ཡུན་མི་རིང་བ་ཉིད་དུ་འགག་པའི་ཆོས་ཡིན་ནོ་ཞེས་བྱ་བར་རིག་ནས། དེ་ཉིད་དུ་རང་བྱང་ཆུབ་རྗེས་སུ་ཐོབ་བོ། །དེ་ནས་བཅོམ་ལྡན་འདས་རང་སངས་རྒྱས་དེའི་རྐྱེན་ཇི་ལྟ་བ་བཞིན་གྱིས་ཆོས་ཐོབ་པ་མཐོང་ནས། དེའི་ཚེ་ཚིགས་སུ་བཅད་པ་འདི་དག་སྨྲས་པ། ཡང་དག་བསྙེན་ནས་ཆགས་གྱུར་ལ།། 84a ༄#། །ཆགས་ལས་སྡུག་བསྔལ་འདི་བྱུང་སྟེ། །ཆགས་ལས་སྡུག་བསྔལ་འདི་འཇུག་པས། །དེ་ཕྱིར་མཁས་པས་ཆགས་སུན་ཕྱུང ། །བསེ་རུ་ལྟ་བུར་གཅིག་པུ་སྤྱད།། དེ་ནས་བཅོམ་ལྡན་འདས་རང་སངས་རྒྱས་དེ་འདི་སྙམ་དུ་གྱུར་ཏེ། བདག་གི་སེམས་ཅན་རྣམས་ཀྱི་ཕྱིར། དཀའ་བ་མང་ཞིག་སྤྱད་པས་ནི་སུ་ལ་ཡང་ཕན་པ་བྱས་པ་མ་ཡིན་ཏེ། བདག་གིས་དེང་སུ་ཞིག་ལ་སྙིང་བརྩེ་བར་བྱ་ཞིང་བདག་གིས་དེང་སུ་ཞིག་ལ་བསོད་སྙོམས་བླངས་ཏེ། ཡོངས་སུ་བཟའ་བར་བྱ་སྙམ་མོ། །དེ་ནས་བཅོམ་ལྡན་འདས་རང་སངས་རྒྱས་དེ་མི་ལས་ཤིན་ཏུ་འདས་པའི་ལྷའི་སྤྱན་གྱིས་འཛམ་བུའི་གླིང་འདི་ཀུན་ཏུ་བལྟས་པ་དང ། བཅོམ་ལྡན་འདས་རང་སངས་རྒྱས་དེས་འཛམ་བུའི་གླིང་གི་ཟས་ལ་སོགས་པ་ཡོངས་སུ་ཟད་པར་མཐོང་སྟེ། གཞན་དུ་ན་རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་དོ། །དེ་འདི་སྙམ་དུ་གྱུར་ཏེ། བདག་གིས་ངེས་པར་རྒྱལ་པོ་གསེར་མདོག་ལ་སྙིང་བརྩེ་བར་བྱ་ཞིང ། བདག་གིས་ངེས་པར་རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་པ་ལས་བླངས་ཏེ། ཡོངས་སུ་བཟའ་བར་བྱའོ་སྙམ་མོ། །དེ་ནས་བཅོམ་ལྡན་འདས་རང་སངས་རྒྱས་དེ་དེའི་རྫུ་འཕྲུལ་འདི་ལྟ་བུས་ནམ་མཁའ་ལ་མངོན་དུ་སོང་སྟེ། ལུས་སྣང་བར་བྱ་བཞིན་དུ་རྫུ་འཕྲུལ་གྱིས། རྒྱལ་པོའི་ཕོ་བྲང་གསེར་ཅན་ 84b གང་ན་བ་དེར་སོང་ངོ ། །དེའི་ཚེ་རྒྱལ་པོ་གསེར་མདོག་བློན་པོ་ལྔ་སྟོང་ཙམ་དང ། ཁང་བཟང་གི་སྟེང་ན་འཁོད་བར་གྱུར་ཏོ། །བཅོམ་ལྡན་འདས་རང་སངས་རྒྱས་དེ་རྒྱང་རིང་པོ་ནས་འདི་ལྟར་འོང་བ་ན། སྣ་ཆེན་པོ་ལ་གཏོགས་པ་གཅིག་གིས་མཐོང་ངོ ། །མཐོང་ནས་སྣ་ཆེན་པོ་ལ་གཏོགས་པ་དག་བོས་ནས། གྲོང་གི་གཙོ་བོ་དག། ལྟོས་ཤིག། འདི་ལྟར་རྒྱང་རིང་པོ་ནས་བྱ་དམར་པོ་འཕུར་བ་ཞིག་འོང་ངོ ། །སྣ་ཆེན་པོ་ལ་གཏོགས་པ་གཉིས་པས་སྨྲས་པ། གྲོང་གི་གཙོ་བོ་དག། འདི་ནི་བྱ་དམར་པོ་འཕུར་བ་མ་ཡིན་གྱི། འདི་ནི་སྲིན་པོ་མདངས་འཕྲོག་ཞིག་འོང་སྟེ། འདིས་ནི་དེད་བདག་ཅག་ཟོས་པར་འགྱུར་རོ། །དེ་ནས་རྒྱལ་པོ་གསེར་མདོག་ལག་པ་གཉིས་ཀས་བཞིན་ལེགས་པར་ཕྱིས་ཏེ། སྣ་ཆེན་པོ་རྣམས་ལ་སྨྲས་པ། གྲོང་གི་གཙོ་བོ་དག། འདི་ནི།་བྱ་དམར་པོ་འཕུར་བ་མ་ཡིན་ལ། སྲིན་པོ་མདངས་འཕྲོག་པ་ཡང་མ་ཡིན་ནོ། །འདི་ནི་དྲང་སྲོང་སྟེ་བདག་ཅག་ལ་སྙིང་བརྩེ་བའི་ཕྱིར་འོང་ངོ ། །དེ་ནས་བཅོམ་ལྡན་འདས་རང་སངས་རྒྱས་དེ་རྒྱལ་པོ་གསེར་མདོག་གི་ཁང་བཟང་གྱི་སྟེང་དུ་བབས་སོ། །དེ་ནས་རྒྱལ་པོ་གསེར་མདོག་ལངས་ནས། བཅོམ་ལྡན་འདས་རང་སངས་རྒྱས་དེ་བསུས་ནས། བཅོམ་ལྡན་འདས་རང་སངས་རྒྱས་དེའི་ཞབས་ལ་མགོ་བོས་ཕྱག་བཙལ་ཏེ། སྟན་བཤམས་པ་ལ་བཞུགས་པར་གསོལ་ཏོ། །དེ་ནས་རྒྱལ་པོ་གསེར་མདོག་གིས། བཅོམ་ལྡན་འདས་རང་ 85a ༄#། །སངས་རྒྱས་དེ་ལ་འདི་སྐད་ཅེས་སྨྲས་སོ། །དྲང་སྲོང ། ཅིའི་ཕྱིར་འདིར་བྱོན། །དྲང་སྲོང་གིས་སྨྲས་པ། རྒྱལ་པོ་ཆེན་པོ། ཟས་ཀྱི་ཕྱིར་རོ། །དེ་ནས་རྒྱལ་པོ་གསེར་མདོག་རབ་ཏུ་དུས་ཏེ། མཆི་མ་ཕྱུང་ནས། ཨེ་མའོ། །བདག་དབུལ་ཏེ་འདི་ལྟར་འཛམ་བུའི་གླིང་གི་དབང་ཕྱུག་དམ་པ་བྱས་ཀྱིས་ཀྱང ། དྲང་སྲོང་གཅིག་ལ་བསོད་སྙོམས་དབུལ་བར་མ་ནུས་སོ། །དེ་ནས་རྒྱལ་པོའི་ཕོ་བྲང་གསེར་ཅན་ན་གནས་པའི་ལྷ་དེས་རྒྱལ་པོ་གསེར་མདོག་ལ་ཚིགས་སུ་བཅད་དེ་སྨྲས་པ། ཅི་ཞིག་སྡུག་བསྔལ་ཡིན་ཞེས་ན་ནི་དབུལ་བའོ། །ཤིན་ཏུ་སྡུག་བསྔལ་གང་ཡིན་དབུལ་བ་དེ་ཉིད་དེ། །དབུལ་བ་དག་ནི་ནང་ན་ཤི་དང་མཚུངས་པར་གྱུར་པ་སྟེ། །བདག་ནི་ཤི་ཡང་བླ་ཡི་དབུལ་བར་མི་འདོད་དོ། །དེ་ནས་རྒྱལ་པོ་གསེར་མདོག་གིས་མཛོད་པ་པོས་ནས། འདི་སྐད་ཅེས་སྨྲས་སོ། །གྲོང་གི་གཙོ་བོ། ཁྱིམ་ན་བཟའ་བ་ཅུང་ཟད་ཡོད་ན། དྲང་སྲོང་འདི་ལ་དབུལ་བར་བྱའོ། །དེས་སྨྲས་པ། གང་ལྷ་ཉིད་མཁྱེན་པ་ལགས་ཏེ།་འཛམ་བུའི་གླིང་གི་ཟས་ལ་སོགས་པ་ཐམས་ཅད་ཡོངས་སུ་བས་སོ། །གཞན་དུ་ན་ལྷ་ཉག་གཅིག་ཤོས་ཀྱི་ལྷག་མ་བྲེའུ་ཆུང་གང་ཞིག་མཆིས་སོ། །དེ་ནས་རྒྱལ་པོ་གསེར་མདོག་འདི་སྙམ་དུ་གྱུར་ཏེ། གལ་ཏེ་ཟོས་ན་ནི་འཚོ། ཅི་སྟེ་མ་ཟོས་ན་ནི་འཆིའོ་སྙམ་མོ། །དེ་ཡང་འདི་སྙམ་དུ་གྱུར་ཏེ། གལ་ཏེ་ཟོས་ཀྱང་ངེས་པར་བདག་འཆི་བར་འགྱུར་ཏེ། འཚོ་བས་ཆོག་གི། 85b ཇི་ལྟར་ན། འདི་འདྲ་བའི་དྲང་སྲོང་ཚུལ་ཁྲིམས་དང་ལྡན་པ། དགེ་བའི་ཆོས་ཅན་དེ། དེ་ནས་རྒྱལ་པོ་གསེར་མདོག་གིས། རྩིས་པ་དང ། སྣ་ཆེན་པོ་ལ་གཏོགས་པ་དང ། སྒོ་བ་དང ། འཁོར་རྣམས་བསྡུས་ནས་འདི་སྐད་ཅེས་སྨྲས་སོ། །གྲོང་གི་གཙོ་བོ་དག། ཀྱི་ཧུད། འདི་ནི་གསེར་མདོག་གི་སྦྱིན་པ་གཏོང་བ་མཐའ་མ་ཡིན་ཏེ། རྗེས་སུ་ཡི་རང་བར་གྱིས་ཤིག་།དགེ་བའི་རྩ་བ་འདིས།་འཛམ་བུའི་གླིང་གི་མི་ཐམས་ཅད་ཀྱི་དབུལ་བ་ཡང་དག་པར་གཅོད་པར་གྱུར་ཅིག་།དེ་ནས་རྒྱལ་པོ་གསེར་མདོག་གིས་ཟས་བྲེའུ་ཆུང་གང་ཡོད་པ་དེ། བཅོམ་ལྡན་འདས་རང་སངས་རྒྱས་དེའི་ལྷུང་བཟེད་དུ་བླུགས་ནས། བཅོམ་ལྡན་འདས་རང་སངས་རྒྱས་དེའི་ལག་པ་གཡས་པར་ལྷུང་བཟེད་བྱིན་ནོ། །གང་རང་སངས་རྒྱས་ཀྱི་ལུས་ཀྱིས་ཆོས་སྟོན་པ་ནི་ཆོས་ཉིད་དེ།་ཚིག་གིས་ནི་མ་ཡིན་ནོ། །དེ་ནས་བཅོམ་ལྡན་འདས་རང་སངས་རྒྱས་དེ་རྒྱལ་པོ་གསེར་མདོག་གི་བསོད་སྙོམས་བླངས་ནས། འདི་ལྟར་རྫུ་འཕྲུལ་གྱིས་ནམ་མཁའ་ལ་སོང་ངོ ། །དེ་ནས་རྒྱལ་པོ་གསེར་མདོག་ཐལ་མོ་སྦྱར་ནས། མིག་རྒྱང་གིས་སོང་དག་གི་བར་དུ་མིག་མི་འཛུམ་པར་བལྟས་སོ། །དེ་ནས་རྒྱལ་པོ་གསེར་མདོག་གིས་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་བོས་ནས་འདི་སྐད་ཅེས་སྨྲས་སོ། །གྲོང་གི་གཙོ་བོ་དག་།རང་རང་གི་གནས་ཇི་ལྟ་བ་བཞིན་དེངས་ཤིག་།ཁང་བཟང་འདིར་བཀྲེས་པ་ 86a ༄#། །དང ། སྐོམ་པས་འཆི་བའི་དུས་མ་བྱེད་ཅིག་།དེ་དག་གིས་སྨྲས་པ། གང་གི་ཚེ་ལྷའི་དཔལ་དང ། སྐུ་དཔལ་དང་ལྡན་པར་གྱུར་པའི་དེའི་ཚེ། བདག་ཅག་ལྷའི་ཞབས་འབྲིང་ན་རྩེ་ཞིང་དགའ་ལ་ལོངས་སྤྱོད་པ་ལགས་ན། འདི་ལྟ་སྟེ། བདག་ཅག་ལྷའི་དུས་ཕྱི་མ་དང ། དུས་ཚོད་ཕྱི་མ་ཡོངས་སུ་བཏང་བ་ག་ལ་ཞིག་བཟོད། དེ་ནས་རྒྱལ་པོ་གསེར་མདོག་རབ་ཏུ་དུས་ཏེ་མཆི་མ་ཕྱུང་ངོ ། །མཆི་མ་དེ་ལེགས་པར་ཕྱིས་ནས་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་ལ་འདི་སྐད་ཅེས་སྨྲས་སོ། །གྲོང་གི་གཙོ་བོ་དག་།རང་གི་གནས་ཇི་ལྟ་བ་བཞིན་དེངས་ཤིག་།ཐམས་ཅད་ཀྱིས་ཁང་བཟང་འདིར་བཀྲེས་པ་དང ། སྐོམ་པ་དག་གིས་འཆི་བའི་དུས་མ་བྱེད་ཅིག།་དེ་ནས་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་རབ་ཏུ་དུས་ཏེ། མཆི་མ་ཕྱུང་ངོ ། །མཆི་མ་ལེགས་པར་ཕྱིས་ནས། རྒྱལ་པོ་གསེར་མདོག་ག་ལ་བ་དེར་སོང་སྟེ་ཕྱིན་ནས། རྒྱལ་པོ་གསེར་མདོག་གི་རྐང་པ་གཉིས་ལ་ཕྱག་བཙལ་ཏེ། ཐལ་མོ་སྦྱར་ནས། རྒྱལ་པོ་གསེར་མདོག་ལ་འདི་སྐད་ཅེས་སྨྲས་སོ། །བདག་ཅག་གིས་ལྷའི་ཞལ་ལྟ་བའི་ཕྱི་མ་དེང་ལགས་ཏེ་བདག་ཅག་གིས་གང་ཅུང་ཟད་ལྷའི་བཀའ་ལས་འགལ་བ་ཅི་བགྱིས་པ་བཟོད་པར་གསོལ་ལོ། །འདི་ལྟ་སྟེ། 86b བཅོམ་ལྡན་འདས་རང་སངས་རྒྱས་དེས་བསོད་སྙོམས་དེ་ཡོངས་སུ་ཟོས་སོ། །དེ་ནས་སྐད་ཅིག་དེ་ཉིད་ལ་ཕྱོགས་བཞི་ནས་སྤྲིན་སྟུག་པོ་བཞི་ལངས་སོ། །རླུང་གྲང་པ་ཡང་ལངས་ཏེ། དེའི་ཚེ་འཛམ་བུ་གླིང་ཕྱགས་སོ། །དེ་ནས་དེའི་དུས་ཀྱི་བྱེ་བྲག་ལ་བཅའ་བར་བྱ་བ་དང ། བཟའ་བར་བྱ་བ་རྣམ་པ་སྣ་ཚོགས་ཀྱི་ཆར་བབ་སྟེ། བཟའ་བར་བྱ་བའི་དངོས་པོ་འདི་ལྟ་བུ་འབྲས་ཆན་དང ། ཕྱེ་དང ། ཟན་དྲོན་དང ། ཤ་དང ། ཉ་ཤ་དང ། བཅའ་བར་བྱ་བའི་དངོས་པོ་འདི་ལྟ་བུ་བཅའ་བར་བྱ་བ་ལ་ཕུག་དང ། བཟའ་བར་བྱ་བ་ལོ་མ་དང ། བཟའ་བར་བྱ་བ་མེ་ཏོག་དང ། བཟའ་བར་བྱ་བ་འབྲས་བུ་དང ། བཟའ་བར་བྱ་བ་ཏིལ་དང ། བཟའ་བར་བྱ་བ་ཏིལ་མར་དང ། བཟའ་བར་བྱ་བ་བུ་རམ་དང ། བཟའ་བར་བྱ་བ་ཀ་ར་དང ། གཞན་ཡང ། བཟའ་བར་བྱ་བ་དང ། བཅའ་བར་བྱ་བ་དང ། མྱང་བར་བྱ་བ་རྣམ་པ་མང་པོའི་བཟའ་བ་དག་གི་ཆར་བབ་བོ། །དེ་ནས་རྒྱལ་པོ་གསེར་མདོག་མགུལ་ལ་དགའ་ཞིང་ཡིད་རངས་ཏེ། རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ་རྩིས་པ་དང ། སྣ་ཆེན་པོ་ལ་གཏོགས་པ་དང ། བློན་པོ་དང ། སྒོ་བ་དང ། འཁོར་རྣམས་བོས་ནས་འདི་སྐད་ཅེས་སྨྲས་སོ། །གྲོང་གི་གཙོ་བོ་དག། ལྟོས་ཤིག་།ཀྱེ་མ། དེང་བསོད་སྙོམས་གཅིག་ཕུལ་བའི་མྱུ་གུ་བྱུང་བར་གྱུར་ཏེ། འབྲས་སྟན་དང ། ལོ་མ་དང ། མེ་ཏོག་ནི་ཕྱིས་འབྱུང་བར་འགྱུར་རོ། །དེ་ནས་ཉི་མ་ 87a ༄#། །གཉིས་པ་ལ་ཉིན་བདུན་དུ་ནོར་དང ། འབྲུའི་ཆར་རབ་ཏུ་ཕབ་བོ། །འདི་ལྟ་སྟེ། ཏིལ་དང ། འབྲས་ཐུག་པོ་ཆེ་དང ། མོན་སྲན་གྲེའུ་དང ། མོན་སྲན་དཀར་དུ་དང ། ནས་དང ། གྲོ་དང ། སྤན་ཆུང་དང ། འབྲས་སཱ་ལུ་དང ། འབྲུའི་རིགས་ཐམས་ཅད་དང ། ཞག་བདུན་དུ་མར་སར་གྱི་ཆར་བབ་བོ། །ཞག་བདུན་དུ་ཏིལ་མར་གྱི་ཆར་བབ་བོ། ། ཞག་བདུན་དུ་བེའུ་རས་ཀྱི་ཆར་བབ་བོ། །ཞག་བདུན་དུ་རྫས་རྣམ་པ་སྣ་ཚོགས་ཀྱི་ཆར་བབ་བོ། །ཞག་བདུན་དུ་རིན་པོ་ཆེ་སྣ་བདུན་ལ་གསེར་དང ། དངུལ་དང ། ཤེལ་དང ། བཻ་ཌཱུརྱ་དང ། མུ་ཏིག་དམར་པོ་དང ། རྡོའི་སྙིང་པོ་དང ། སྤུག་རྣམས་ཏེ། རིན་པོ་ཆེ་སྣ་བདུན་པོ་འདི་དག་གི་ཆར་བབ་བོ། །རྒྱལ་པོ་གསེར་མདོག་གི་མཐུས། འཛམ་བུའི་གླིང་གི་མི་ཐམས་ཅད་ཀྱི་དབུལ་བ་ཡང་དག་པར་བཅད་པར་གྱུར་ཏོ། །དགེ་སློང་དག་དེའི་ཚེ་དེའི་དུས་ན། རྒྱལ་པོར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་ཀྱིས་སོམ་ཉི་དང ། ཡིད་གཉིས་སུ་མི་བྱའོ། །དགེ་སློང་དག་དེའི་ཚེ་དེའི་དུས་ན། རྒྱལ་པོ་གསེར་མདོག་ཅེས་བྱ་བ་འབྱུང་བ་དེ་ནི། ང་ཉིད་ཡིན་པར་བལྟ་བར་བྱའོ། །དགེ་སློང་དག། རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། ཇི་ལྟར་ངས་སྦྱིན་པའི་འབྲས་བུ་དང ། སྦྱིན་པ་ལ་འགེད་པའི་རྣམ་པར་སྨིན་པ་ཤེས་པ་ལྟར། སེམས་ཅན་རྣམས་ཀྱིས་ཀྱང་སྦྱིན་པའི་འབྲས་བུ་དང ། སྦྱིན་པ་ 87b ལ་འགེད་པའི་རྣམ་པར་སྨིན་པ་ཤེས་པར་གྱིས་ཤིག། གང་ཁམ་ཕྱི་མའི་ཁམ་ཕྱི་མ་གཅིག་པུ་དེ་ཡང་གཞན་དག་ལ་མ་བྱིན་མ་བགོས་པར་བདག་གི་བར་མི་བྱའོ། །སེར་སྣའི་སེམས་ཀྱི་དྲི་མ་སྐྱེས་པས་ཀུན་ནས་དཀྲིས་ཏེ་འདུག་པར་མི་བྱའོ། །ཇི་ལྟར་ངས་ཤེས་པ་དེ་བཞིན་དུ། འདི་ལྟར་སེམས་ཅན་དག་གི་སྦྱིན་པ་དང ། སྦྱིན་པ་ལ་འགེད་པའི་རྣམ་པར་སྨིན་པ་མི་ཤེས་ཏེ། དེ་ལྟ་བས་ན་སེམས་ཅན་དག་གང་ཁམ་ཕྱི་མ་ཕྱི་མའི་ཁམ་གཅིག་པུ་དེ་ཡང་གཞན་དག་ལ་མ་བྱིན་མ་བགོས་པར་བདག་ཉིད་ཀྱིས་བཟའ་བར་མི་བྱའོ། །སེར་སྣའི་སེམས་ཀྱི་དྲི་མ་སྐྱེས་པས་ཀུན་ནས་དཀྲིས་ཏེ་འདུག་པར་མི་བྱའོ། །སྔོན་གྱི་དགེ་དང་མི་དགེ་བྱས་པ་ཆུད་མི་ཟ། །མཁས་པ་དག་ལ་བརྟེན་པ་ཆུད་ནི་མི་ཟ་སྟེ། །འཕགས་པའི་སྐྱེ་བོས་ལེགས་པར་བཤད་པ་ཆུད་མི་ཟ། །བྱས་པ་གཟོ་ལ་བྱས་པ་རྣམས་ཀྱང་ཆུད་མི་ཟ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་དེ་དག་དང ། དགེ་སློང་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།གསེར་མདོག་གི་སྔོན་གྱི་སྦྱོར་བ་ཞེས་བྱ་བ་རྫོགས་སོ།། |