༄##། །རྒྱ་གར་སྐད་དུ། བུ་ཎྱ་བ་ལ་ཨ་བ་དཱ་ན། བོད་སྐད་དུ། བསོད་ནམས་སྟོབས་ཀྱི་རྟོགས་པ་བརྗོད་པ། བམ་པོ་དང་པོ། སངས་རྒྱས་ལ་ཕྱག་འཚལ་ལོ། ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན།་རྒྱལ་བུ་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་ 2a ༄##། །བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།འདི་ན་མི་བླུན་པོ་ལ་ལ་དམ་པའི་ཆོས་མ་ཡིན་པ་གསུམ་དང་ལྡན་ན། སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་ལ། ཚུལ་ཁྲིམས་ཡང་དག་པར་བླངས་ནས་གནས་པར་མི་བྱེད་དེ། གསུམ་གང་ཞེ་ན། འདི་ལྟར་ཆགས་པ་དང ། སེར་སྣ་དང ། བག་མེད་པ་རྣམས་ཏེ། དགེ་སློང་དག་།འདི་ན་མི་བླུན་པོ་ལ་ལ་དམ་པའི་ཆོས་མ་ཡིན་པ་གསུམ་པོ་འདི་དག་དང་ལྡན་པས་སྦྱིན་པ་ 2b དག་མ་བྱིན་ཞིང་བསོད་ནམས་དག་མ་བྱས་ལ། ཚུལ་ཁྲིམས་ཡང་དག་པར་བླངས་ཏེ་གནས་པར་མ་བྱས་པས་ལུས་ཞིག་སྟེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དགེ་སློང་དག། སྐྱེས་བུ་དམ་པ་ཆོས་གསུམ་དང་ལྡན་པ་ནི་སྦྱིན་པ་དག་བྱིན་ཞིང ། བསོད་ནམས་དག་བྱེད་ལ། ཚུལ་ཁྲིམས་ཡང་དག་པར་བླངས་ཏེ་གནས་སོ། །གསུམ་གང་ཞེ་ན། འདི་ལྟར་མ་ཆགས་པ་དང ། སེར་སྣའི་དྲི་མ་དང་བྲལ་བ་དང ། བག་ཡོད་པ་རྣམས་སོ། །དགེ་སློང་དག། ཆོས་གསུམ་པོ་འདི་དག་དང་ལྡན་ན། སྐྱེས་བུ་དམ་པ་སྦྱིན་པ་དག་ནི་སྦྱིན་ཞིང་བསོད་ནམས་དག་བྱས་ལ། ཚུལ་ཁྲིམས་ཡང་དག་པར་བླངས་ཏེ་གནས་པས་ལུས་ཞིག་སྟེ། ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །བཅོམ་ 3a ༄#། །ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་ཅེས་གསུངས་ནས། དེའི་འོག་ཏུ་གཞན་ཡང་སྟོན་པས་འདི་སྐད་ཅེས་གསུངས་སོ། །གང་ཕྱིར་སེར་སྣ་བག་མེད་པས། །སྦྱིན་པ་སྦྱིན་པར་མི་བྱེད་དེ། །དེ་ཕྱིར་བསོད་ནམས་འདོད་པ་ཡི། །ཤེས་པས་སྦྱིན་པ་སྦྱིན་པར་བྱ། །སེར་སྣ་ཅན་གྱི་འཇིགས་པ་ནི། །བཀྲེས་དང་སྐོམ་པ་འདི་ཡིན་ན། །གང་གིས་འཇིགས་པས་འདིར་མ་བྱིན། །དེ་ཉིད་མ་བྱིན་འཇིགས་པ་སྟེ། །འཇིག་རྟེན་འདི་དང་ཕ་རོལ་ཏུ། །དེ་ཡིས་བྱིས་པ་གོས་པར་འགྱུར། །གང་དག་སེར་སྣ་སྤངས་ནས་ཀྱང ། །དུས་སུ་སྦྱིན་པ་སྦྱིན་བྱེད་ན། །ཤི་ཡང་དེ་ནི་ཤི་མ་ཡིན། །རྒྱགས་བཟང་བ་ཡི་འདྲོན་པོ་བཞིན། །གང་དག་ཤིན་ཏུ་གཏང་དཀའ་བ། །ཉུང་དུའམ་མང་པོ་གཏོང་བྱེད་ན། །གཏང་དཀའ་གཏོང་བ་དེ་དག་ནི། །དཀའ་བའི་ལས་དག་བྱེད་པ་ཡིན། །དམ་པ་ 3b མིན་པས་མི་རྟོགས་ཏེ། །དམ་པ་ཆོས་ལས་འདའ་མི་བྱེད། །དེ་ཕྱིར་དམ་པ་དམ་པ་མིན། །འདི་ནས་ཤི་བར་གྱུར་པ་ན། །དམ་པ་མ་ཡིན་དམྱལ་བར་འགྲོ་།དམ་པ་དག་ནི་མཐོ་རིས་འགྲོ་རྒ་བས་གཙེས་པ་ལ་ནི་སྐྱབས་མེད་དེ། །ཚེ་ཐུང་བས་ན་སྲོག་ཁྱེར་དུས་ཀྱང་ཉེ། །འཆི་བའི་འཇིགས་པ་འདི་མཐོང་རྣམས་ཀྱིས་ནི། །བསོད་ནམས་དེར་སྦྱོར་དག་ནི་བྱ་བའི་རིགས། །བུད་མེད་སྤངས་འདིར་བོར་བས་འཚོ་བ་གང ། །དགའ་བས་སྦྱིན་པ་ཉུང་དུ་བྱིན་ན་ཡང ། །སྟོང་གི་མཆོད་སྦྱིན་བརྒྱ་སྟོང་བྱེད་པས་ནི། །དེ་ཡི་བཅུ་དྲུག་ཆར་ཡང་མི་ཕོད་དོ། །ཅིའི་ཕྱིར་མཆོད་སྦྱིན་ཡངས་ཤིང་རྒྱ་ཆེ་བ། །མཆོད་སྦྱིན་མཐུན་པ་དེ་ཡི་ལམ་མི་འགྲོ་།ཇི་ལྟར་སྟོང་གི་མཆོད་སྦྱིན་སྟོང་རྣམས་ཀྱང ། །དེ་ཡི་བཅུ་དྲུག་ཆར་མི་འགྱུར་ཞེ་ན། །བྱིས་པ་ལ་ལ་གསོད་ཅིང་འཆིང་བྱེད་འདིར། །གཞན་ནོར་སྦྱིན་བྱེད་ཡ་ངར་བརླག་པར་འགྱུར། །མཆི་མའི་གདོང་བཅས་ཆད་པར་བཅས་པ་ཡི། །ཡོན་དེའི་མཆོད་སྦྱིན་མཐུན་པའི་ལམ་མི་འགྲོ་།དེ་ལྟར་མཆོད་སྦྱིན་ཡངས་ཤིང་རྒྱ་ཆེ་བ། །མཆོད་སྦྱིན་མཐུན་པའི་ལམ་དུ་མི་འགྲོ་ལ། །དེ་ལྟར་སྟོང་གི་མཆོད་སྦྱིན་སྟོང་རྣམས་ཀྱང ། །དེ་ཡི་བཅུ་དྲུག་ཆར་ཡང་མི་ཕོད་དོ། །ལ་ལ་གང་དག་གཟུ་ལུམས་མ་ཡིན་པ། །ཆོས་བཞིན་ནོར་རྣམས་ཐོབ་པ་གཏོང་བྱེད་ཅིང ། །དེ་དག་གཏང་དཀའ་དེ་རྣམས་བཏང་བས་ན། །རང་གི་བསོད་ནམས་ཀྱིས་ནི་ལྷ་གནས་འགྲོ། བཅོམ་ 4a ༄#། །ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་གདན་ལས་བཞེངས་ཏེ་ནགས་སྟུག་པོ་ག་ལ་བ་དེར་ལོགས་སུ་གཤེགས་སོ། །གཤེགས་ནས་ནགས་སྟུག་པོའི་ནང་དུ་བཞུགས་ཏེ། ཉིན་པར་གནས་པའི་ཤིང་གི་དྲུང་ན་གནས་ཤིང་བཞུགས་སོ། །དེའི་ཚེ་དགེ་སློང་མང་པོ་དག་འདུན་ཁང་ན་འདུས་ཤིང་འཁོད་པའི་སྐབས་སུ་ཚུལ་འདི་ལྟ་བུར། ཚེ་དང་ལྡན་པ་དག་།མི་རྣམས་ཀྱི་ཉམས་སུ་དབེན་པ་གང་ཡིན་ཞེས་གཏམ་དུ་གླེངས་སོ། །དེའི་ཚེ་བཅོམ་ལྡན་འདས་ཀྱི་གཅུང་སྲུའི་བུ་ཚེ་དང་ལྡན་པ་དགའ་བོ་དང ། ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་དང ། ཚེ་དང་ལྡན་པ་མ་འགགས་པ་དང ། ཚེ་དང་ལྡན་པ་ཤཱ་རིའི་བུ་རྣམས་ཀྱང་འཁོར་དེ་ཉིད་དུ་འདུས་པར་གྱུར་ཏེ་འཁོད་དོ། །དེ་ནས་ཚེ་དང་ལྡན་པ་དགའ་བོས་སྨྲས་པ། ཚེ་དང་ལྡན་པ་དག། བྱད་གཟུགས་ནི་མི་རྣམས་ཀྱི་ཉམས་སུ་དབེན་པ་ཡིན་ནོ། །ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་སྨྲས་པ། ཚེ་དང་ལྡན་པ་དག། བརྩོན་འགྲུས་ནི་མི་རྣམས་ཀྱི་ཉམས་སུ་དབེན་པ་ཡིན་ནོ། །ཚེ་དང་ལྡན་པ་མ་འགགས་པས་སྨྲས་པ། ཚེ་དང་ལྡན་པ་དག། བཟོ་ནི་མི་རྣམས་ཀྱི་ཉམས་སུ་དབེན་པ་ཡིན་ནོ། །ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་དག། ཤེས་རབ་འབའ་ཞིག་མི་རྣམས་ཀྱི་ཉམས་སུ་དབེན་པ་ཡིན་ནོ། །ཞེས་གླེངས་ནས་དེ་དག་འདི་ 4b སྐད་དུ། ཚེ་དང་ལྡན་པ་དག། བདག་ཅག་ཀུན་མི་མཐུན་པར་གྱུར་ཏེ། འདི་ལྟར་ཐ་དད་པར་བརྟགས་ཀྱི་བདག་ཅག་བཅོམ་ལྡན་འདས་ཀྱི་ཐད་དུ་སོང་སྟེ། དོན་འདི་ཉིད་ཞུ་ལ། བཅོམ་ལྡན་འདས་བདག་ཅག་ལ་ཇི་སྐད་དུ་ལུང་སྟོན་པ་དེ་བཞིན་དུ་གཟུང་བར་བྱའོ་ཞེས་ཟེར་ནས། ཚེ་དང་ལྡན་པ་དག། བཅོམ་ལྡན་འདས་ནི། སྟོན་པ་ཐུགས་རྗེ་ཆེན་པོ་སྟེ། །ཐམས་ཅད་མཁྱེན་པ་ཐེ་ཚོམ་བསལ། །དེ་ནས་སོམ་ཉི་གཅོད་པ་སྟེ། །ཉི་མས་མུན་པ་བསལ་བ་བཞིན། །སྡུག་བསྔལ་དྲ་བས་གླགས་པ་དང ། །ལོག་པའི་ལམ་ལ་གནས་པ་ཡི། །སྲོག་ཆགས་རྣམས་ཀྱི་སྐྱབས་གཅིག་སྟེ། །བུ་རྣམས་ཀྱིས་ནི་ཕ་མཆོག་བཞིན། །དེ་ཕྱིར་ཆོས་ཀུན་དབང་ཕྱུག་གིས། །སེམས་ཅན་ཀུན་གྱི་དོན་བརྩོན་པ། །ཐུབ་པ་ཐེ་ཚོམ་གཅོད་དེ་ལ། །བདག་ཅག་ཀུན་གྱིས་ཞུ་བར་བྱ། །སོམ་ཉི་མདུད་པ་ཆེན་པོ་ནི། །གང་ཕྱིར་རྒྱལ་བ་གཅོད་པར་འགྱུར། །དེ་ཕྱིར་ཐམས་ཅད་དོང་ནས་ནི། །དེ་བཞིན་གཤེགས་ལ་ཞུ་བར་བྱ། །ཞེས་བྱས་ནས། དགེ་སློང་མང་པོ་དེ་དག་བཅོམ་ལྡན་འདས་བལྟ་བའི་ཕྱིར་འགྲོ་བར་ཆད་པ་ལས། བཅོམ་ལྡན་འདས་ཉིན་པར་གནས་པའི་ཕྱིར་ནགས་སྟུག་པོའི་ནང་ན་ཞུགས་པའི་བར་སྐབས་སུ། དགེ་སློང་མང་པོ་དག་འདུན་ཁང་དུ་འདུས་ཤིང་འཁོད་དེ། སྐབས་སུ་ཚུལ་དེ་ལྟ་བུའི་གཏམ་གླེངས་པ། ལྷའི་སྙན་རྣམ་པར་དག་པ་མི་ལས་འདས་པས་གསན་ཏོ། །གསན་ནས་ཏིང་ངེ་འཛིན་དེ་ 5a ༄#། །ལས་བཞེངས་ཏེ། འདུན་ཁང་གང་ལ་འདུག་པར་གཤེགས་སོ། །གཤེགས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་དེ་ཉིད་ལ་བཞུགས་སོ། ། བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག། དགེ་སློང་མང་པོ་འདུན་ཁང་དུ་འདུས་ཤིང་འཁོད་པ་རྣམས་ཀྱིས་སྐབས་ཀྱི་གཏམ་ཅི་ཞིག་གླེངས། ད་ལྟར་ཁྱེད་གཏམ་ཇི་ལྟ་བུ་ཞིག་གི་ཕྱིར་འདུས་ཤིང་འཁོད། གསོལ་པ། བཙུན་པ། བདག་ཅག་དགེ་སློང་མང་པོ་འདུན་ཁང་འདིར་འདུས་ཤིང་མཆིས་པ་རྣམས་ཀྱིས་སྐབས་སུ་ཚུལ་འདི་ལྟ་བུར། ཚེ་དང་ལྡན་པ་དག། མི་རྣམས་ཀྱི་ཉམས་སུ་དབེན་པ་གང་ལགས་ཞེས་བཀའ་མཆིད་བགྱིས་སོ། །དེ་ལ་ཚེ་དང་ལྡན་པ་དགའ་བོའི་མཆིད་ནས་ནི།་ཚེ་དང་ལྡན་པ་དག། བྱད་གཟུགས་མི་རྣམས་ཀྱི་ཉམས་སུ་དབེན་པ་ལགས་སོ་ཞེས་མཆི། ཚེ་དང་ལྡན་པ་གྲོ་ཞུན་སྐྱེས་བྱེ་བ་ཉི་ཤུ་པའི་མཆིད་ནས་ནི། ཚེ་དང་ལྡན་པ་དག།་བརྩོན་འགྲུས་མི་རྣམས་ཀྱི་ཉམས་སུ་དབེན་པ་ལགས་སོ་ཞེས་མཆི། ཚེ་དང་ལྡན་པ་མ་འགགས་པའི་མཆིད་ནས་ནི། ཚེ་དང་ལྡན་པ་དག། བཟོ་མི་རྣམས་ཀྱི་ཉམས་སུ་དབེན་པ་ལེགས་སོ་ཞེས་མཆི། ཚེ་དང་ལྡན་པ་ཤཱ་རིའི་བུའི་མཆིད་ནས་ནི། ཚེ་དང་ལྡན་པ་དག། ཤེས་རབ་འབའ་ཞིག་མི་རྣམས་ཀྱིས་ཉམས་སུ་དབེན་པ་ལགས་སོ་ 5b ཞེས་མཆི་སྟེ། བཙུན་པ། བདག་ཅག་རྣམས་འདི་སྙམ་བགྱིད་དོ། །ཚེ་དང་ལྡན་པ་དག། བདག་ཅག་ཀུན་མི་མཐུན་པར་གྱུར་ཏེ། འདི་ལྟར་ཐ་དད་པར་བརྟགས་ཀྱི། བདག་ཅག་བཅོམ་ལྡན་འདས་ཀྱི་ཐད་དུ་མཆིས་ཏེ། དོན་འདི་ཉིད་ཞུས་ལ། བཅོམ་ལྡན་འདས་བདག་ཅག་ལ་ཇི་སྐད་དུ་ལུང་སྟོན་པ་དེ་བཞིན་དུ་གཟུང་བར་བགྱིའོ་སྙམ་བགྱིད་དོ། །བཙུན་པ། བདག་ཅག་དགེ་སློང་མང་པོ་འདུན་ཁང་ན་འདུས་ཤིང་མཆིས་པ་རྣམས་ཀྱིས་སྐབས་ཀྱི་བཀའ་མཆིད་འདི་གླེངས་ཏེ། ད་ལྟར་བདག་ཅག་བཀའ་མཆིད་འདིའི་སླད་དུ་འདུས་ཤིང་མཆིས་ལགས་སོ། །དེ་ནས་བཅོམ་ལྡན་འདས་ཀྱིས་དེའི་གཞི་ལས་ཚིགས་སུ་བཅད་དེ་གསུངས་པ། སེམས་ཅན་རྣམས་ཀྱི་གཟུགས་དང་བཟོ། །བརྩོན་འགྲུས་དང་ནི་ཤེས་རབ་གཞན། །བསོད་ནམས་དག་ལས་བྱུང་བས་ན། །དེ་ཕྱིར་བསོད་ནམས་དམ་པ་ཡིན། །ཞེས་གསུངས་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག། ཅི་ཡང་རུང་སྟེ། ལན་འགའ་ཙམ་དུ་ཟད་ཀྱི་དུས་ཐམས་ཅད་དུ་ཀུན་ཉམས་སུ་དབེན་པ་མ་ཡིན་ནོ། །བསོད་ནམས་ནི་དུས་ཐམས་ཅད་དུ་སྲོག་ཆགས་ཐམས་ཅད་ཀྱི་ཉམས་སུ་དབེན་པ་ཡིན་ཏེ། དགེ་སློང་དག། འདི་ལྟར་བསོད་ནམས་བཞིན་དུ་སེམས་ཅན་རྣམས་ཀྱི་ཉམས་སུ་དབེན་པའི་ཆོས་གཅིག་ཀྱང་ངས་ཡང་དག་པར་རྗེས་སུ་མ་མཐོང་ངོ ། །དགེ་སློང་དག། ཅིའི་ཕྱིར་ཞེ་ན། སྔོན་བྱུང་བ་འདས་པའི་དུས་ན་རྒྱལ་ 6a ༄#། །པོའི་ཕོ་བྲང་འཁོར་ཞིག་ན། རྒྱལ་པོ་གསལ་སྟོབས་ཞེས་བྱ་བ་ཞིག་རྒྱལ་པོ་བྱེད་དེ། དེའི་རིང་ལ་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་པོས་གང་ངོ ། །རྒྱལ་པོ་དེའི་བཙུན་མོ་རྣམ་པར་སྤ་བ་ཞེས་བྱ་བ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་ཡོད་དེ། ཕྱི་ཞིག་ན་བཙུན་མོ་རྣམ་པར་སྤ་པ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད། རྩེ་ཞིང་དགའ་ལ་དགའ་མགུར་སྤྱོད་པ་དེ་ལས་བུ་གཟུགས་བཟང་ཞིང་བལྟ་ན་སྡུག་པ་མཛེས་པ་མིའི་ཁ་དོག་ལས་ནི་འདས། ལྷའི་ཁ་དོག་ནི་མ་ཐོབ་པ་ཞིག་བཙས་ཏེ། དེ་བཙས་པ་ན་བཙས་སྟོན་བྱས་སོ། །བཙས་སྟོན་བྱས་ནས་གཟུགས་སྟོབས་ཞེས་བྱ་བར་མིང་བཏགས་སོ། །དེ་བཞིན་དུ་རིམ་གྱིས་དེའི་འོག་ཏུ་དེའི་བུ་གསུམ་བཙས་ཏེ། དེ་དག་གི་ནང་ན་གཅིག་ནི་བརྩོན་འགྲུས་ལྡན་ཞེས་བྱ། གཉིས་པ་ནི་བཟོ་ལྡན་ཞེས་བྱ། གསུམ་པ་ནི་ཤེས་རབ་ལྡན་ཞེས་བྱའོ།། ཕྱིས་རེ་ཞིག་ན་ཡང་བཙུན་མོ་རྣམ་པར་སྤ་བ་ལ་བུ་ཆགས་ཏེ། གང་གི་ཉིན་པར་དེའི་བུ་ཆགས་པ་དེ་ཉིད་ཀྱི་ཉིན་པར་གློ་བུར་དུ་ཕོ་བྲང་འཁོར་དུ་གསེར་རྣམ་པ་སྣ་ཚོགས་ཀྱི་ཆར་བབ་བོ། །བཙུན་མོ་དེའི་སྟེང་དུ་ལྷའི་བླ་རེ་ཆེན་པོ་རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་བྱུང་ངོ ། །དེ་ནས་རྒྱལ་པོ་གསལ་སྟོབས་ཀྱིས་ཡ་མཚན་དེ་མཐོང་ནས། ཤིན་ཏུ་ངོ་ 6b མཚར་དུ་གྱུར་ཏེ། ལྟས་པ་རྣམས་ལ་སྨྲས་པ། ཀྱེ།་སྔོན་མ་བྱུང་བའི་ཡ་མཚན་བྱུང་བ་འདི་ཅི་ཞིག། ལྟས་པ་རྣམས་ཀྱིས་གསོལ་པ། ལྷ། བཙུན་མོའི་ལྷུམས་སུ་སྲས་ཞུགས་པ་གང་ལགས་པ་འདི་ནི་བསོད་ནམས་ཀྱི་ཆེ་བར་གྲགས་པ་ཞིག་སྟེ། སེམས་ཅན་དེའི་མཐུ་ལགས་སོ། །དེ་ནས་རྒྱལ་པོས་དེ་ཐོས་ནས་ཤིན་ཏུ་ངོ་མཚར་དུ་གྱུར་ཏོ། །དེ་ནས་རེ་ཞིག་ན་བཙུན་མོ་དེ་འདི་ལྟ་བུར་ཡིད་ལ་འདོད་པ་སྐྱེས་ཏེ། ཀྱེ་མ། བདག་སེངྒེའི་ཁྲི་ལ་འདུག་ཅིང ། སྟེང་གདུགས་དཀར་པོ་ཐོགས་ལ། རྔ་ཡབ་ནོར་བུའི་ཡུ་བ་ཅན་ཡང་ཐོགས་ན་ཅི་མ་རུང་སྙམ་སྟེ། དེས་རྒྱལ་པོ་ལ་གསོལ་ཏོ། །དེ་ནས་རྒྱལ་པོ་སེམས་རབ་ཏུ་དགའ་བར་གྱུར་ནས། གྲོང་ཁྱེར་རྒྱ་ཆེར་མཛེས་པར་བྱེད་དུ་བཅུག་ནས། དེ་བཞིན་དུ་ཐམས་ཅད་བྱེད་དུ་བཅུག་སྟེ། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ། ཀྱེ་མ། བདག་དངུལ་གྱི་ཕུང་པོའི་སྟེང་དུ་འདུག་ལ་རང་གི་ལག་གིས་སྦྱིན་པ་རྣམས་ཞིང་བསོད་ནམས་དག་བྱེད། ནོར་མེད་པ་རྣམས་ནོར་དང་ལྡན་པར་བྱེད་ན་ཅི་མ་རུང་སྙམ་དུ་འདོད་པ་སྐྱེས་ཏེ། དེས་རྒྱལ་པོ་ལ་གསོལ་ཏོ། །དེ་ནས་རྒྱལ་པོས། དེ་བཞིན་དུ་བྱེད་དུ་བཅུག་ནས། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ། ཀྱེ་མ། བཙོན་ཐམས་ཅད་བཏང་ན་ཅི་མ་རུང་སྙམ་དུ་འདོད་པ་སྐྱེས་སོ། །དེ་ནས་རྒྱལ་པོས་དེའི་ཡིད་ 7a ༄#། །ལ་འདོད་པ་སྐྱེས་པ་བསལ་བའི་ཕྱིར། བཙོན་ཐམས་ཅད་གཏོང་དུ་བཅུག་སྟེ། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ།་ཀྱེ་མ། བདག་སྐྱེད་མོས་ཚལ་དག་མཐོང་ན་ཅི་མ་རུང་སྙམ་དུ་འདོད་པ་སྐྱེས་སོ། །དེ་ནས་དེ་རྒྱལ་པོས་སྐྱེད་མོས་ཚལ་མཛེས་པ་དག་ལྟར་བཅུག་སྟེ། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ། ཀྱེ་མ། བདག་གིས་སྐྱེ་བོ་མང་པོའི་མདུན་དུ་ཚུལ་འདི་ལྟ་བུར་བདེན་པའི་ཚིག་བརྗོད་དེ། ཇི་སྟེ་བསོད་ནམས་དག་གིས་རྣམ་པར་སྨིན་པ་ཡོད་ཅེ་ན། དེ་ལས་ལྷའི་སེངྒེའི་ཁྲི་གང་ལ་འདུག་ན། སྐྱེ་བོ་མང་པོ་ལ་ཆོས་སྟོན་ཅིང ། བདག་གི་གཏམ་གྱི་རྗེས་ལའང ། ཡ་མཚན་འགའ་འབྱུང་བར་འགྱུར་བ་དེ་ལྟ་བུ་ལྷ་རྣམས་ཀྱིས་མྱུར་དུ་བདག་ལ་ཕུལ་ན་ཅི་མ་རུང་སྙམ་དུ་འདོད་པ་སྐྱེས་ཏེ། དེས་རྒྱལ་པོ་ལ་གསོལ་ཏོ། །དེ་ནས་རྒྱལ་པོས་བཙུན་མོ་འཁོར་དང ། གྲོང་ཁྱེར་རྒྱ་ཆེར་མཛེས་པར་བྱེད་དུ་བཅུག་གོ་།གྲོང་ཁྱེར་ན་གནས་པའི་སྐྱེ་བོ་མང་པོ་ཐམས་ཅད་ཀྱང་གོས་གཙང་མ་དང ། རྒྱན་བགོས་ནས། སྤོས་དང ། ཕྲེང་བ་དང ། བྱུག་པ་ལག་ན་ཐོགས་ཏེ་འདུས་པར་གྱུར་ཏོ། །དེ་ནས་བཙུན་མོ་རྣམ་པར་སྤ་བརྒྱན་ཐམས་ཅད་ཀྱིས་ཀླུབས་ཏེ། བུད་མེད་ཀྱི་འཁོར་གྱིས་བསྐོར་ནས། ལྷའི་བུ་མོ་བཞིན་དུ་སྐྱེ་བོ་དག་གི་མིག་དང ། ཡིད་འཕྲོག་ཅིང ། སྐྱེ་བོ་མང་པོ་དེ་ 7b དག་གི་ནང་དུ་སོང་སྟེ། སེམས་ཅན་ཐམས་ཅད་ཀྱི་རྗེས་སུ་འགྲོ་བའི་བྱམས་པའི་སེམས་ཉེ་བར་བཞག་ནས། ནམ་མཁའ་ལ་ལྟ་ཞིང་བདེན་པའི་བྱིན་གྱི་རླབས་བྱེད་དེ། ཚིགས་སུ་བཅད་པ་སྨྲས་པ། མི་དབང་ལྷ་ཡི་རྣམ་པར་གྲུབ་པ་ཡི། །བསོད་ནམས་སྟོབས་འཕགས་ཅི་སྟེ་བདག་ལ་ཡོད། །བདེན་པ་དེས་ན་དེང་དུ་ལྷ་རྣམས་ཀྱིས། །མྱུར་དུ་འདིར་ནི་སེངྒེའི་ཁྲི་ཤོམས་ཤིག ། དེ་ནས་ཚིག་དེ་སྐད་སྨྲས་མ་ཐག་ཏུ། བསོད་ནམས་དག་གི་མཐུ་སྟོན་པའི་ལྷ་རྣམས་ཀྱིས་གློ་བུར་དུ་སེངྒེའི་ཁྲི་ཕུལ་ཏེ། ལྷའི་མེ་ཏོག་གི་ཆར་ཡང་ཕབ་བོ། །དེ་ནས་སྐྱེ་བོ་ཕལ་པོ་ཆེ་དེ་དག་གིས།་ལྷ་དང ། མི་མངོན་པར་དགའ་བར་བྱེད་པའི་ཆོ་འཕྲུལ་ངོ་མཚར་རྨད་དུ་གྱུར་པ་མཐོང་ནས་ཤིན་ཏུ་ཡ་མཚན་དུ་གྱུར་ཏེ། ཀྱེ་མ། བསོད་ནམས་དག་གི་མཐུ་ཆེ་སྟེ། འདི་ལྟར་འཇིག་རྟེན་ཐམས་ཅད་ཀྱི་མཆོད་པའི་གནས་ལྷ་རྣམས་ཀྱང་བསོད་ནམས་ཀྱི་སྟོབས་ཀྱིས་བཀུག་སྟེ། མི་རྣམས་ཀྱི་ངག་ཉན་པ་ནི་ངོ་མཚར་ཏོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བཙུན་མོ་རྣམ་པར་སྤ་བ་ཡིད་རབ་ཏུ་དགའ་སྟེ། ཚམ་ཚོམ་མེད་པར་སེངྒེའི་ཁྲི་ལ་འཛེགས་ནས་འདུག་གོ། བཙུན་མོ་དེ་འདུག་མ་ཐག་ཏུ་ས་རྣམ་པ་དྲུག་ཏུ་གཡོས་ཏེ། སེངྒེའི་ཁྲིའང་ས་ལས་མི་བདུན་གྱི་སྲིད་ཙམ་དུ་ནམ་མཁའ་ལ་འཕགས་ཏེ་འདུག་གོ། དེ་ནས་སེངྒེའི་ཁྲི་དེའི་སྟེང་དུ་ལྷའི་བླ་རེ་རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་བཀྲམ་མོ། །དེ་ནས་སྐྱེ་བོ་ཕལ་པོ་ 8a ༄#། །ཆེ་དེ་དག་བསོད་ནམས་ཀྱི་མཐུ་མཐོང་བས་སེམས་དགའ་བར་གྱུར་ཏེ། སྤོས་དང ། ཕྲེང་བ་དང ། བྱུག་པ་རྣམས་ཀྱིས་བཙུན་མོ་ལའང་ལེགས་པར་མཆོད་ནས།་ཐལ་མོ་སྦྱར་ཏེ་དེའི་ངག་ཉན་ཅིང་སེམས་བཏུད་ནས་མདུན་དུ་འཁོད་དོ། །རྒྱལ་པོ་གསལ་སྟོབས་ཀྱང ། བསོད་ནམས་ཀྱི་རླབས་ཤིན་ཏུ་རྨད་དུ་བྱུང་བ་དེ་མཐོང་ནས་སེམས་གྱི་རྒྱུད་ཡང་དག་པར་དགའ་བར་གྱུར་ཏེ། འཁོར་དང་བཅས་པར་ཐལ་མོ་སྦྱར་ནས་འཁོད་དོ། །དེ་ནས་བཙུན་མོ་རྣམ་པར་སྤ་བས་དེའི་ཚེ། སྔོན་མ་བྱུང་བའི་ཚིགས་སུ་བཅད་པ་འདི་སྐད་ཅེས་སྨྲས་སོ། །བསོད་ནམས་བསགས་ན་བདེ་བར་གྱུར། །དེ་ཕྱིར་མིས་ནི་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཚིགས་སུ་བཅད་པ་འདི་སྨྲས་མ་ཐག་ཏུ་བར་སྣང་ལས་ལེགས་པར་སྨྲས་སོ། །མཆོག་ཏུ་ལེགས་པར་སྨྲས་སོ་ཞེས་སྒྲ་བྱུང་ངོ ། །ལྷའི་རོལ་མོའི་སྒྲ་དག་ཀྱང་སྒྲོགས་སོ། །ལྷའི་གོས་ཤིན་ཏུ་སྤ་བའི་ཆར་ཆེན་པོའང་བབ་བོ། །དེ་ནས་ཚིགས་སུ་བཅད་པ་འདི་ཐོས་མ་ཐག་ཏུ་རྒྱལ་པོ་གསལ་སྟོབས་དང ། སྐྱེ་བོ་ཕལ་པོ་ཆེ་དེ་དག་དགའ་བར་གྱུར་ཏོ། །ནམ་མཁའ་ལ་འཁོད་པའི་ལྷ་རྣམས་ཀྱིས་ཀྱང་ཚམ་ཚོམ་མེད་པར་རང་གི་ལུས་ལས་བླ་གོས་དང ། རྒྱན་རྣམས་ཕུད་ནས་བཙུན་མོ་རྣམ་པར་སྤ་བ་དང ། སེངྒེའི་ཁྲི་ལ་བཀབ་སྟེ། ཚིག་མཐུན་པར་ལེགས་ 8b པར་སྨྲས་སོ། །ལེགས་པར་སྨྲས་སོ་ཞེས་སྒྲ་ཕྱུང་ངོ ། །དེ་ནས་བཙུན་མོ་དེ་སེངྒེའི་ཁྲི་དེ་ལས་དལ་གྱིས་བབས་ཏེ། ས་ལ་འདུག་ནས། ལྷའི་རོལ་མོའི་སྒྲ་རྣམས་ནི་ཞི་བར་གྱུར། མི་རྣམས་ཀྱི་རོལ་མོའི་སྒྲ་ནི་སྒྲོགས་སོ། །དེ་ནས་རྒྱལ་པོ་དེ་དང ། སྐྱེ་བོ་ཕལ་པོ་ཆེ་དགའ་བར་གྱུར་ནས། བཀུར་སྟི་ཆེན་པོས་མཆོད་ཅིང་བཙུན་མོའི་འཁོར་དུ་བསྐྱལ་ཏེ། བཙུན་མོའི་ནང་དུ་སོང་ནས་སེངྒེའི་ཁྲི་དེ་མི་སྣང་བར་གྱུར་ཏོ། །དེ་ནས་སྐྱེ་བོ་ཕལ་པོ་ཆེ་དེ་དག་གིས་བསོད་ནམས་ཀྱི་རྣམ་པར་གཡོ་བ་དེ་མཐོང་སྟེ། སེམས་ཡང་དག་པར་དགའ་བར་གྱུར་ནས། ཀྱེ་མ། བསོད་ནམས་དག་གི་ཆེ་བ་ཉིད། ཀྱེ་མ། བསོད་ནམས་དག་གི་འབྲས་བུ་མངར་བ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བཙུན་མོ་དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ནས། ཕྱིས་རེ་ཞིན་ན་ཟླ་བ་དགུ་ཚང་ནས། བཙུན་མོ་རྣམ་པར་སྤ་བ་ཉི་མ་ཤར་བའི་དུས་ཀྱི་སྐབས་སུ་བུ་བཙས་ཏེ། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་སོ། །དེའི་སྐབས་སུ་ཡངས་རྣམ་པ་དྲུག་ཏུ་གཡོས་ཏེ། ནམ་མཁའ་ལས་ཀྱང་རིན་པོ་ཆེ་སྣ་བདུན་གྱི་ཆར་ཆེན་པོ་བཙུན་མོའི་འཁོར་དུ་བབ་པོ། །རྒྱལ་པོའི་ཕོ་བྲང་འཁོར་དེ་དག་ཐམས་ཅད་དུའང་གོས་རྣམ་པ་སྣ་ཚོགས་ཀྱི་ཆར་བབ་བོ། །རྒྱལ་པོ་དེའི་ཡུལ་ཐམས་ཅད་དུའང་ལྷའི་མེ་ཏོག་མཆོག་ཏུ་ཡིད་དུ་འོང་བའི་ཆར་བབ་བོ། །མེ་ཏོག་དང ། འབྲས་བུའི་ཤིང་ལྗོན་པ་ཐམས་ཅད་ལས་ 9a ༄#། །ཀྱང་མེ་ཏོག་དང་།འབྲས་བུ་རྣམས་འཐོན་ཏོ། །ཆར་ཟིམ་བུའང་ཐམས་ཅད་དུ་བབ་བོ། །ཕྱོགས་བཞི་ནས་ཀྱང་སེར་བུ་བསིལ་བ་ལངས་སོ། །དེ་ནས་གཞོན་ནུ་བཅས་མ་ཐག་པ་ཕྱོགས་གང་ན་འདུག་པ་དེར་རྒྱལ་པོ་ཆེན་པོ་བཞིས་ལྷའི་སེངྒེའི་ཁྲི་ཆེན་པོ་རིན་པོ་ཆེ་སྣ་ཚོགས་ཀྱིས་སྤྲས་པ། ས་བརྟོལ་ཏེ་གློ་བུར་དུ་ཕུལ་ལོ། །ལྷའི་རྒྱལ་པོ་བརྒྱ་བྱིན་ཡང་བདག་ཉིད་ལག་དར་ཏེ། གཞོན་ནུའི་སྟེང་དུ་ལྷའི་གདུགས་རྩིབས་བརྒྱ་པ་དང ། རྔ་ཡབ་ནོར་བུའི་ཡུ་བ་ཅན་འཛིན་ཏོ། །དེའི་སྟེང་ན་སུམ་ཅུ་རྩ་གསུམ་གྱི་ལྷ་རྣམས། ལྷའི་གོས་ཀྱི་བླ་རེ་འགྲེམས་སོ། །ལ་ལ་ནི་རིན་པོ་ཆེ་འཐོར་རོ། །ལ་ལ་ནི་རྒྱན་འཐོར་རོ། །ལ་ལ་ནི་གོས་འཐོར་རོ། །ལ་ལ་ནི་མེ་ཏོག་འཐོར་རོ། །ལ་ལ་ནི་ཕྱེ་མ་འཐོར་རོ། །ལ་ལ་ནི་སྤོས་དང ། ཕྲེང་བ་དང ། བྱུག་པ་རྣམས་འཐོར་རོ། །ལ་ལ་ནི་ལྷའི་རོལ་མོའི་སྒྲ་རྣམས་ལེགས་པར་སྒྲོགས་སོ། །ལྷའི་བུ་ལས་སྣ་ཚོགས་ཅན་གྱིས་ནི་གྲོང་ཁྱེར་དེ་ཐམས་ཅད་རྡོ་དང ། གསེག་མ་དང།་གྱོ་མོ་རྣམས་མེད་པར་བྱས་ཏེ་བཞག་ནས། དར་གྱི་ལྡ་ལྡི་མང་པོ་ནི་བཏགས། རྒྱལ་མཚན་དང ། བ་དན་ནི་བསྒྲེང ། ཙན་དན་གྱི་ཆུས་ནི་ཆག་ཆག་བཏབ། བདུག་པའི་དྲི་ཞིམ་པོའི་སྣོད་ནི་བཏགས། མེ་ཏོག་སྣ་ཚོགས་ནི་གཏོར་ཏེ། ལྷ་རྣམས་ཀྱི་སྐྱེད་མོས་ཚལ་དགའ་བའི་ཚལ་ཞེས་བྱ་བ་དང་འདྲ་བར་ཡིད་དུ་འོང་བར་བྱས་སོ། །གླང་པོ་ཆེའི་མཆོག་ 9b བརྒྱ་ནི་ནགས་ཁུང་ཆེན་པོ་ནས་རང་འོངས་ཏེ་གླང་པོ་ཆེའི་བྲེས་ན་གནས་པར་གྱུར་ཏོ། །རྒོད་མ་བརྒྱའང་རྟེའུ་འབྲངས། འབྲུ་ཐམས་ཅད་ཀྱང་མ་རྨོས་མ་བཏབ་པ་མཐུ་དང་ལྡན་པར་ནི་སྨིན་ཏོ། ། སེངྒེའི་ཁྲི་དེའི་འོག་ནས་ཀྱང ། གཏེར་ཆེན་པོ་ལྡ་ནི་རིན་པོ་ཆེ་སྣ་ཚོགས་ཀྱིས་ལེགས་པར་ཡོངས་སུ་གང་བ་རྣམས་ཀྱི་ཁ་བསྟན་ཏེ། གོད་པར་བྱས་ཀྱང་ཡོངས་སུ་ཟད་པར་མི་འགྱུར་རོ། །སེམས་ཅན་ཕན་ཚུན་འཁོད་པ་རྣམས་ཀྱང་དེའི་ཡུད་ཙམ་ལ་བྱམས་པའི་སེམས་སུ་གྱུར་ཏོ། །གཞོན་ནུ་རྫུ་འཕྲུལ་ཆེ་ཞིང་མཐུ་ཆེ་བ་དེ་བཙས་མ་ཐག་ཏུ་ཚེ་རབས་དྲན་ཏེ། ཕྱོགས་བཞིར་བལྟས་ནས་ཚིགས་སུ་བཅད་དེ་སྨྲས་པ། བསོད་ནམས་བསགས་ན་བདེ་བར་འགྱུར། །དེ་ཕྱིར་མིས་ནི་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཞེས་སྨྲས་སོ། །དེ་ནས་ནམ་མཁའ་ལ་གནས་པའི་ལྷ་རྫུ་འཕྲུལ་ཆེ་ཞིང་མཐུ་ཆེ་བ་ཞིག་བསོད་ནམས་དག་གི་ཤིན་ཏུ་རྨད་དུ་བྱུང་བ། ཤིན་ཏུ་ཡིད་དུ་འོང་བ་རྣམ་པར་གཡོ་བ་དེ་མཐོང་ནས། སེམས་ཡང་དག་པར་དགའ་བར་འགྱུར་ཏེ། བསོད་ནམས་དག་གི་ཆེ་བ་ཉིད་བསྟན་པའི་ཕྱིར། དེའི་ཚེ་ཚིགས་སུ་བཅད་དེ་སྨྲས་པ། བསོད་ནམས་དག་གི་གཡོ་བ་ལྟོས། །རྒྱལ་པོ་ཆེན་པོ་བཞི་རྣམས་དང ། །སུམ་ཅུ་རྩ་གསུམ་དབང་པོར་བཅས། །བསོད་ནམས་ཀྱིས་ནི་དེ་དབང་བྱས། །ཞེས་སྨྲས་སོ། །དེ་ནས་རྒྱལ་པོ་དེ་བཙུན་མོའི་འཁོར་དང ། སྲས་དང ། བློན་པོ་དང ། ཕོ་བྲང་འཁོར་གྱི་མི་དང ། 10a ༄#། །ཡུལ་གྱི་མི་དང་བཅས་པས་ཕུན་སུམ་ཚོགས་པ་དེ་དག་མཐོང་ནས། ཡ་མཚན་གྱིས་མིག་རྒྱས་པར་གྱུར་ཏེ། མཆོག་ཏུ་ཡ་མཚན་དུ་གྱུར་ནས། ཀྱེ་མ། གཞོན་ནུའི་བསོད་ནམས་ཀྱི་སྟོབས། ཀྱེ་མ། གཞོན་ནུའི་བསོད་ནམས་ཀྱིས་ཆེར་གྲགས་པ་འདི་ལྟར་འདི་མིར་གྱུར་དུ་ཟིན་ཀྱང ། འདི་ལྟ་བུར་ལྷའི་འབྱོར་པ་རྒྱས་པ་བྱུང་བར་གྱུར་པ་འདི་ནི་ཡ་མཚན་ཆེའོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་རྒྱལ་པོ་སེམས་རབ་ཏུ་དགའ་ཞིང་བུ་སྙིང་དུ་སྡུག་ནས། དཀོར་པ་རྣམས་ལ་བསྒོ་སྟེ། བཀའ་སྙན་གསོལ་བ་རྣམས་ཀྱི་ཕྱིར་རྒྱལ་པོའི་ར་བར་གསེར་དངུལ་གྱི་ཕུང་པོ་སྤུངས་ནས་སྦྱིན་པ་དག་བྱིན་ཏེ། བསོད་ནམས་དག་བྱས་སོ། །ནོར་མེད་པ་དུ་མ་ནི་ནོར་དང་ལྡན་པ་ལ་བཀོད་དོ། །དེ་ནས་རེ་ཞིག་ན་འབྱོར་པ་ཆེན་པོ་རྒྱས་པས་དེ་བཙས་པའི་བཙས་སྟོན་ཆེན་པོ་བྱས་ནས་མིང་འདོགས་པར་བྱེད་དེ། གཞོན་ནུའི་མིང་ཅིར་གདགས་ཞེས་ཟེར་རོ། །དེ་ནས་བློན་པོ་དག་གིས་གསོལ་པ། ལྷ།་གང་གི་སླད་དུ་སྲས་འདི་བསོད་ནམས་ཀྱི་སྟོབས་རྒྱས་ཤིང་དེ་བཙས་པ་ན་འདི་ལྟ་བུར་ལྷའི་འབྱོར་པ་བྱུང་བར་གྱུར་པས་ན། དེའི་ཕྱིར་སྲས་འདིའི་མཚན་བསོད་ནམས་སྟོབས་ཞེས་གདགས་པའི་རིགས་སོ་ཞེས་ཟེར་རོ། །དེ་ནས་དེའི་མིང་བསོད་ནམས་ཀྱི་སྟོབས་ཞེས་བཏགས་སོ། །དེ་ནས་ཁྱེའུ་བསོད་ནམས་སྟོབས་པང་ན་འཚོ་བའི་མ་མ་གཉིས་དང ། ནུ་མ་སྣུན་པའི་མ་མ་ 10b གཉིས་དང ། དྲི་མ་འཁྲུ་བའི་མ་མ་གཉིས་དང ། རྩེ་བའི་མ་མ་གཉིས་ཏེ། མ་མ་བརྒྱད་ལ་གཏད་ནས། དེ་མ་མ་བརྒྱད་པོ་དེ་དག་གི་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་ཉིང་ཁུ་དང ། གཞན་ཡང ། ཡོ་བྱད་ཀྱི་ཁྱད་པར་བཟང་ངོ་ཅོག་གིས་བསྐྱེད་བསྲིངས་ཏེ། རྫིང་བུའི་པདྨ་བཞིན་དུ་སྐྱེ་དྲག་པར་གྱུར་ཏོ། །གང་གི་ཚེ་དེ་ཆེར་སྐྱེས་པའི་ཚེ། ཡི་གེ་སློབ་ཏུ་བཅུག་སྟེ།་དེས་ཡི་གེ་མཐར་ཕྱིན་ནས། དེ་རྒྱལ་པོ་རྒྱལ་རིགས་དག་གི་གནས་ལྔ་རྣམས་ཀྱི་བར་གང་ཡིན་པ་དེ་དག་ལ་བྱང་བར་གྱུར་ཏོ། །གཞོན་ནུ་བསོད་ནམས་སྟོབས་དེའང་དད་པ་དང་ལྡན་ལ། དགེ་ཞིང་བསམ་པ་བཟང་བ། བདག་ལ་ཕན་པ་དང ། གཞན་ལ་ཕན་པ་ལ་ཞུགས་པ། སྙིང་རྗེ་ཅན། བདག་ཉིད་ཆེ་བ། ཆོས་འདོད་པ། སྐྱེ་དགུ་ལ་བྱམས་པ། གཏོང་བ་ལ་སྲེད་པ། སྦྱིན་པ་ལ་དགའ་བ། རབ་ཏུ་སྦྱིན་པ་ལ་མངོན་པར་དགའ་བ། ཐམས་ཅད་སྦྱིན་པ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། གཏོང་བ་ཆེན་པོ་ལ་གནས་པ་ཞིག་སྟེ། འདི་ལྟར་དགེ་སྦྱོང་དང ། བྲམ་ཟེ་དང ། བཀྲེན་པ་དང ། སྡུག་ཅིང་ཕོངས་པ་རྣམས་ལ། ཐ་ན་རང་གི་ཤའི་བར་དུ་དེས་མ་བྱིན་པ་དང ། ཡོངས་སུ་མ་བཏང་བ་ཅི་ཡང་མེད་དོ། །དེ་ལ་སློང་བ་དག་འོངས་ཏེ་སློང་ན། དེའི་ཚེ་དེ་དག་ལ་བྱམས་པའི་སེམས་ཉེ་བར་གནས་ཏེ་ནམ་མཁའ་ལ་བལྟས་ནས། ཀྱེ་མ། འདི་ལྟར་གསེར་རམ། དངུལ་ 11a ༄#། །ལམ།་གོས་སམ། བཟའ་བའམ། བཅའ་བའམ། བཏུང་བའམ། མལ་སྟན་ནམ། གཞན་ཡང་གང་ཅི་ཡང་རུང་སྟེ། ཅི་འདོད་པ་དེ་དང་དེ་དག་ནམ་མཁའ་ལས་བདག་ལ་འོངས་ཀྱང་ཅི་མ་རུང་སྙམ་དུ་སེམས་བསྐྱེད་དེ། དེས་སེམས་བསྐྱེད་ན། དེ་ལ་འོང་བར་འགྱུར་ལ། སུའང་དོན་དེ་མི་ཤེས་སོ། །དེས་ཡོ་བྱད་དེ་དག་གིས་སློང་བ་དེ་དག་གི་བསམ་པ་ཡོངས་སུ་རྫོགས་པར་བྱས་ནས་ཕྱིར་གཏོང་ངོ ། །དེའི་གྲགས་པས་ཛམྦུའི་གླིང་ཐམས་ཅད་ཀུན་ཏུ་གང་བར་གྱུར་ཏེ། འོག་ཏུ་ཀླུའི་འཇིག་རྟེན་ཐམས་ཅད་ནས། སྟེང་དུ་ཚངས་པའི་འཇིག་རྟེན་གྱི་བར་དུ་སྒྲ་གྲགས་སོ། །དེ་ནས་ཕྱིས་རེ་ཞིག་ན་གཞོན་ནུ་བསོད་ནམས་སྟོབས་ཕུ་བོ་བཞི་དང་ལྷན་ཅིག་ཏུ་འབྱོར་པ་མཆོག་གི་སྐྱེད་མོས་ཚལ་དུ་འཁྱམ་དུ་དོང་ངོ ། །དེའི་བར་གྱི་ལམ་དུ་ཡི་དྭགས་མཆུ་ཁབ་ཙམ་ལ་ལྟོ་རི་རབ་ཙམ་སྟེ། ཀེང་རུས་བསྒྲེང་བ་འདྲ་ཞིང་ལུས་ཤིན་ཏུ་འབར་བ་ཐལ་མོ་སྦྱར་བ་སྟོང་ཕྲག་དུ་མ་དག་གིས་ཡོངས་སུ་བསྐོར་ཏེ། གཞོན་ནུ་བསོད་ནམས་སྟོབས་མ་གཏོགས་པ། སུས་ཀྱང་ཡི་དྭགས་དེ་དག་མི་མཐོང་ངོ ། །དེ་ནས་ཡི་དྭགས་དེ་དག་གིས་གཞོན་ནུ་བསོད་ནམས་སྟོབས་ལ་སྨྲས་པ། གཞོན་ནུ། ཁྱོད་བསོད་ནམས་ཀྱིས་ཆེ་བར་གྲགས་པ་སྙིང་རྗེ་ཆེན་པོ་ཡིན་ན། བདག་ཅག་བཀྲེས་ཤིང་སྐོམ་པས་ཉམ་ཐག་པ་རྣམས་ལ་ཟས་དང་།སྐོམ་བྱིན་ཅིག་།བདག་ཅག་ 11b ནི་སེར་སྣའི་དབང་དུ་གྱུར་ཏེ། ཡི་དྭགས་ཀྱི་འཇིག་རྟེན་དུ་སྐྱེས་པས་ལོ་བརྒྱ་ཕྲག་དུ་མར་ཆུ་ཡང་མི་རྙེད་ན། ཁ་ཟས་ལྟ་ག་ལ་མཐོང ། དེ་སྐད་ཅེས་སྨྲས་ནས། གཞོན་ནུ་བསོད་ནམས་སྟོབས་ཀྱི་སེམས་སྙིང་རྗེས་ཀུན་ཏུ་བསྐྱོད་ནས། སྐྱེན་པར་ནམ་མཁའ་ལ་ལྟས་ཏེ། ཀྱེ་མ། ལྷའི་བཟའ་བ་དང ། བཏུང་བ་བདག་ལ་འོངས་ཀྱང་ཅི་མ་རུང་སྙམ་དུ་སེམས་བསྐྱེད་དོ། །དེ་ནས་གློ་བུར་དུ་ལྷའི་བཟའ་བ་དང ། བཏུང་བ་ནམ་མཁའ་ལས་འོངས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་ཡི་དྭགས་རྣམས་ལྷའི་བཟའ་བ་དང ། བཏུང་བས་ཡང་དག་པར་ཚིམ་པར་བྱ་བ་ལ་ཞུགས་སོ། །དེ་ནས་རེ་ཞིག་ན་ཡི་དྭགས་དེ་དག་གིས་སྔོན་གྱི་ལས་ཀྱི་ཉེས་པས་བཟའ་བ་དང ། བཏུང་བ་དེ་དག་མ་མཐོང་ནས་འདི་སྐད་ཅེས་སྨྲས་ཏེ། གཞོན་ནུ།་ཁྱོད་སྙིང་རྗེ་ཅན་ཞིག་ཅེས་གྲགས་ན། ཅིའི་ཕྱིར་བདག་ཅག་ཚིམ་པར་མི་བྱེད། གཞོན་ནུས་སྨྲས་པ། ལྷའི་བཟའ་བ་དང ། བཏུང་བ་འདི་དག་བྱིན་པ་མ་ཡིན་ནམ། ཁ་ཟས་འདི་དག་ལས་ཅི་ཉེས་ཏེ་མི་ཟ། ཡི་དྭགས་རྣམས་ཀྱིས་སྨྲས་པ། གཞོན་ནུ། བདག་ཅག་ནི་སྔོན་གྱི་ལས་ཀྱི་ཉེས་པས་ལྷའི་བཟའ་བ་དང ། བཏུང་བ་དེ་དག་མི་མཐོང་ངོ ། །དེ་ནས་གཞོན་ནུ་བསོད་ནམས་སྟོབས་མི་དགའ་ནས། ཀྱེ་མ། སེར་སྣའི་རྣམ་པར་གཡོ་བ་སྙམ་དུ་ཡིད་ལ་བསམས་ཏེ། ཡི་དྭགས་དེ་དག་ལ་བྱམས་པས་ཁྱད་པར་བྱས་ནས། 12a ༄#། །སེམས་བསྐྱེད་དེ་ཚིག་ཏུ་སྨྲས་པ། ཇི་སྟེ་བསོད་ནམས་དག་གི་མཐུ་ཡོད་ན། བདེན་པ་དེ་དང ། བདེན་པའི་ཚིག་དེས། ཡི་དྭགས་འདི་དག་གིས་ལྷའི་བཟའ་བ་དང ། བཏུང་བ་འདི་དག་ཡང་དག་པ་ཇི་ལྟ་བ་བཞིན་དུ་མཐོང་ཞིང་ཟ་བའི་མཐུ་ཡོད་པར་གྱུར་ཅིག་ཅེས་གཞོན་ནུས་ཚིག་ཏུ་བརྗོད་མ་ཐག་ཏུ་ཡི་དྭགས་རྣམས་ཀྱིས་ལྷའི་བཟའ་བ་དང ། བཏུང་བ་དེ་དག་ལོག་པར་མི་མཐོང་ཞིང་ཁ་ཡང་ཐ་མལ་པར་གྱུར་ཏོ། །དེ་ནས་གཞོན་ནུ་བསོད་ནམས་སྟོབས་ཡིད་རབ་ཏུ་དགའ་བས་ཡི་དྭགས་དེ་དག་ལྷའི་བཟའ་བ་དང ། བཏུང་བས་ཚིམ་པར་བྱས་ཏེ། དེ་དག་གི་བཟའ་བ་དང ། བཏུང་བ་སྔོན་མ་མྱོང་བ་ཐོབ་ནས། བཀྲེས་པ་དང ། སྐོམ་པ་ཤིན་ཏུ་མི་བཟད་པ་ཆེན་པོའི་དབང་དུ་གྱུར་པས་ཕ་ཅང་མང་དུ་ཟོས་ཏེ་གསུས་པ་རྡོལ་ནས། དེ་དག་གཞོན་ནུ་བསོད་ནམས་སྟོབས་ལ་སེམས་མངོན་པར་དགའ་བཞིན་དུ་ཤི་སྟེ། དགའ་ལྡན་གྱི་ལྷའི་རིས་སུ་སྐྱེས་ནས། གཞོན་ནུ་བསོད་ནམས་སྟོབས་ལ། གཞོན་ནུ། ཁྱོད་ཀྱིས་བདག་ཅག་དགའ་ལྡན་གྱི་ལྷའི་རིས་སུ་བཀོད་ཀྱི། མཆོག་ཏུ་དགའ་བ་གྱིས་ཤིག་།ད་ནི་ཁྱོད་ཉིད་ལས་བརྟེན་ཏེ་སྤྱིན་པ་དག་སྦྱིན་ཞིང་བསོད་ནམས་དག་བྱའོ་ཞེས་སྨྲས་སོ། །དེ་ནས་གཞོན་ནུ་བསོད་ནམས་སྟོབས་མཆོག་ཏུ་དགའ་བ་སྐྱེས་ནས་ལེགས་སོ་ཞེས་སྨྲས་ཏེ། སྐྱེད་མོས་ཚལ་ཉིད་དུ་སོང་ངོ ། །དེ་དག་སྐྱེད་ 12b མོས་ཚལ་དེར་འདུག་ནས། མི་རྣམས་ཀྱི་ཉམས་སུ་དབེན་པ་གང་ཡིན་ཞེས་ཡང་དག་པའི་གཏམ་འདི་ལྟ་བུ་གློད་ཅིང་ངེས་པར་བྱེད་དོ། །དེ་ནས་གཞོན་ནུ་གཟུགས་དང་ལྡན་པ་ན་རེ། འདི་ལ་གདོད་བརྟག་ཏུ་ཅི་ཡོད། འདི་ནི་འཇིག་རྟེན་གྱིས་རྟོགས་པ་ཁོ་ན་ཏེ། འདི་ལྟར་བྱད་གཟུགས་ནི་མི་རྣམས་ཀྱི་ཉམས་སུ་དབེན་པ་ཡིན་ནོ། །དེ་ཅིའི་ཕྱིར་ཞེ་ན། བྱད་གཟུགས་ལྡན་པ་མཐོང་ན་སྔོན་མ་མཐོང་བའི་སྐྱེ་བོའང་མཆོག་ཏུ་དགའ་བར་གྱུར་ལ། མངོན་པར་དགའ་བ་མ་ཡིན་པ་རྣམས་ཀྱང་དགའ་བར་འགྱུར་བའི་ཕྱིར་རོ། །སྔོན་གྱི་དྲང་སྲོང་དག་གིས་ཀྱང་བྱད་གཟུགས་བཟང་བ་འདི་ནི་རྙེད་པ་རྣམས་ཀྱི་ཕྱེད་དོ་ཞེས་སྨྲས་པ་ཡིན་ནོ། །གཞན་ཡང ། ཁྱོད་ཀྱིས་ལྟོས་དང ། ཡིད་དུ་འོང་བའི་གཟུགས་དང་ལྡན་པ་ནི་མཐོང་བ་ཙམ་གྱིས་མི་རྣམས་དགའ་བར་འགྱུར་ཏེ། དམ་པ་རྣམས་ཀྱིས་ཆོས་ཀྱི་མཆོག་ལ་བྱ་བ་བཞིན་དུ་སྙིང་ནས་བཀུར་བར་བྱེད་དོ། །དེ་ནས་གཟུགས་དང་ལྡན་པའི་ཚིག་འདི་ཐོས་ནས། བརྩོན་འགྲུས་ཅན་གྱིས་སྨྲས་པ། གཟུགས་དག་གིས་བྱར་ཅི་ཡོད་དེ། བརྩོན་འགྲུས་འབའ་ཞིག་མི་རྣམས་ཀྱི་ཉམས་སུ་དབེན་པ་ཡིན་ནོ། །དེ་ཅིའི་ཕྱིར་ཞེ་ན། བྱད་གཟུགས་དང་ལྡན་ལ། བརྩོན་འགྲུས་མེད་པ་ནི་ཚེ་འདིའམ། ཚེ་ཕྱི་མའི་འདོད་པའི་འབྲས་བུ་ཅིའང་མི་སྣང་མི་གྲག་སྟེ། བྱད་གཟུགས་ཉམས་སུ་དབེན་ཞེས་བྱ་བར་འདི་ནི་བྱིས་པ་སྐྱེ་བོས་ 13a ༄#། །རྨོངས་པར་བྱེད་པར་ཟད་པའི་ཕྱིར་རོ། །བརྩོན་འགྲུས་ནི་ཚེ་འདི་ཉིད་ལའང་འདོད་པའི་འབྲས་བུ་འགྲུབ་པར་བྱེད་དོ། །འདི་ལྟ་སྟེ། ཞིང་རྨོད་པ་རྣམས་ཀྱི་འབྲུ་དང།་ཚོང་པ་རྣམས་ཀྱི་ཁེ་དང ། ཞམ་རིང་བྱེད་པ་རྣམས་ཀྱི་འཚོ་བ་དང ། མི་སྟོད་རིམ་རྣམས་ཀྱི་བསྟན་བཅོས་རྟོགས་པར་བྱ་བ་དང ། བསམ་གཏན་པ་རྣམས་ཀྱིས་བསམ་གཏན་གྱི་འབྲས་བུ་ཐོབ་པར་བྱ་བ་དང ། དེ་ལ་སོགས་པ་བརྩོན་འགྲུས་ཀྱི་ཚེ་འདིའི་འདོད་པའི་འབྲས་བུ་སྣང་ངོ ། །ཚེ་ཕྱི་མའི་འབྲས་བུ་ནི། འདི་ལྟ་སྟེ། བདེ་འགྲོ་དང ། མཐོ་རིས་ཀྱི་འཇིག་རྟེན་དང།་ལོངས་སྤྱོད་ཆེན་པོ་དང ། ཐར་པ་ཐོབ་པ་དང ། དེ་ལ་སོགས་པ་བརྩོན་འགྲུས་ཀྱི་ཚེ་ཕྱི་མའི་འབྲས་བུ་འང་སྣང་ངོ ། །གཞན་ཡང ། བརྩོན་འགྲུས་ནི་ཡོན་ཏན་ཐམས་ཅད་ཀྱི་གཞིར་གྱུར་པ་དང ། གནོད་པ་རྣམས་ཟློག་པ་ཡིན་ཏེ། བརྩོན་འགྲུས་ལ་ནི་བསྒྲུབ་དཀའ་བ་ཅི་ཡང་མེད་དོ་ཞེས་བརྩོན་འགྲུས་ཅན་གྱིས་དེ་སྐད་ཅེས་སྨྲས་པ་ལ། བཟོ་དང་ལྡན་པས་བགང་དེ་སྨྲས་པ། ཁྱོད་ཀྱིས་བདེན་ཞིང་མང་ལ་རྣམ་པ་སྣ་ཚོགས་ནི་སྨྲ་མོད་ཀྱི། ངའི་སེམས་ནི་མ་མགུའོ། །དེ་ཅིའི་ཕྱིར་ཞེ་ན། བཟོ་དང་བྲལ་བའི་བརྩོན་འགྲུས་ཀྱིས་ནི་འབྲས་བུ་ཅི་ཡང་འགྲུབ་པ་མ་མཐོང་གི། བཟོ་དང་ལྡན་ན་འབྲས་བུ་ཡོད་པར་མཐོང་བའི་ཕྱིར་རོ། །དེ་བས་ན་བཟོ་འབའ་ཞིག་མི་རྣམས་ཀྱི་ཉམས་སུ་དབེན་པ་ཡིན་ནོ། །གཞན་ཡང ། བཟོ་བོ་ནི་ 13b རིགས་དམའ་བར་སྐྱེས་སུ་ཟིན་ཀྱང ། རྒྱལ་པོ་རྣམས་དང ། བློན་པོ་རྣམས་དང ། བྲམ་ཟེ་དང ། ཁྱིམ་བདག་རྣམས་ཀྱིས་གདོན་མི་ཟ་བར་བཀུར་རོ། །སྣ་ཚོགས་ལས་ཅན་ལྷ་རྣམས་དང ། མི་རྣམས་ཀྱིས་ཀྱང་ལེགས་པར་བཀུར། །དེ་བཞིན་མ་རབས་བཟོ་བོའི་ཕྱིར། །མི་དང་ལྷ་རྣམས་ཀྱིས་ཀྱང་བཀུར། །ཞེས་བཟོ་དང་ལྡན་པས་སྨྲས་པ་ལ། ཤེས་རབ་ཅན་གྱིས་ཡིད་ཙམ་གྱི་བག་ད་དེ་སྨྲས་པ། ཤེས་རབ་བཞིན་དུ་མི་རྣམས་ཀྱི་ཉམས་སུ་བྱད་གཟུགས་ཀྱང་དབེན་པ་མ་ཡིན། བརྩོན་འགྲུས་ཀྱང་དབེན་པ་མ་ཡིན། བཟོའང་དབེན་པ་མ་ཡིན་ནོ། །དེ་ཅིའི་ཕྱིར་ཞེ་ན། ཤེས་རབ་འཆལ་པ་ནི་གཟུགས་བཟང་བ་མཐོང་ནའང་རྐྱེན་དུ་འབབ་པར་མཛེས་པ་མ་ཡིན་ལ། བརྩོན་འགྲུས་ཀྱིས་ཀྱང་དོན་དུ་སྐྱེ་བར་མི་འགྱུར། བཟོའང་ཤེས་རབ་མེད་ན་ཤེས་པར་མི་ནུས་པའི་ཕྱིར་རོ། །དེ་བས་ན་ཤེས་རབ་འབའ་ཞིག་དོན་ཐམས་ཅད་བསྒྲུབ་པ་ལ་མི་རྣམས་ཀྱི་ཉམས་སུ་དབེན་པ་ཡིན་ནོ། །གཞན་ཡང ། ཤེས་རབ་ཀྱིས་ནི་གཟུགས་དང་བཟོ། །བརྩོན་འགྲུས་ནོར་ཡང་ཐོབ་པར་འགྱུར། །མི་རྣམས་ལེགས་དང་བདེ་བ་ཆེ། །ཤེས་རབ་ཀྱིས་ནི་ཐམས་ཅད་འཐོབ། །ཅེས་ཤེས་རབ་ཅན་གྱིས་དེ་སྐད་སྨྲས་པ་ལ།་གཞོན་ནུ་བསོད་ནམས་སྟོབས་ཀྱིས་བཞིན་འཛུམ་མུལ་ནས། བསོད་ནམས་དག་གི་སྟོབས་དངོས་སུ་ཁ་ནས་བྱུང་བ་བཞིན་དུ་སྨྲས་པ། ཤེས་རབ་དང་བྲལ་བའི་གཟུགས་ 14a ༄#། །དང ། བཟོ་དང ། བརྩོན་འགྲུས་ཐམས་ཅད་ནི་ཉམས་སུ་དབེན་པ་མ་ཡིན་ལ། ཤེས་རབ་ཀྱིས་ཡོངས་སུ་ཟིན་པ་ནི་འབྲས་བུ་དང་བཅས་ཤིང་ཉམས་སུ་དབེན་པ་ཡིན་ཏེ། དེ་ནི་བདེན་པ་ཁོ་ན་མོད་ཀྱི་འོན་ཀྱང་ཤེས་རབ་དེ་འང་བསོད་ནམས་མེད་པར་འཐོབ་པར་མི་འགྱུར་ཏེ། དེ་བས་ན་བསོད་ནམས་འབའ་ཞིག་མི་རྣམས་ཀྱི་ཉམས་སུ་དབེན་པ་ཡིན་ནོ། །བསོད་ནམས་ཞེས་བྱ་བ་ནི་གཅིག་ཏུ་སྡུག་པའི་འབྲས་བུ་རྣམས་དང ། ཕངས་པའི་འབྲས་བུ་རྣམས་དང ། དགའ་བའི་འབྲས་བུ་རྣམས་དང ། ཡིད་དུ་འོང་བའི་འབྲས་བུ་རྣམས་དང ། ཡིད་དང་འཐད་པའི་འབྲས་བུ་རྣམས་ཀྱི་གཙོ་བོ་ཡིན་ཏེ། ཡོན་ཏན་མ་ལུས་བར་ངས་བརྗོད་མི་ནུས་མོད་ཀྱི་ཁྱེད་ཀྱིས་ཁོང་དུ་ཆུད་པར་བྱ་བའི་ཕྱིར་བསོད་ནམས་དག་གི་ཡོན་ཏན་ཕྱོགས་གཅིག་ཙམ་བཤད་པར་བྱ་ཡི་ཉོན་ཅིག། བསོད་ནམས་དག་གིས་བྱད་གཟུགས་འཐོབ། །བསོད་ནམས་ཀྱིས་ནི་ཚུལ་ཁྲིམས་ལྡན། །བསོད་ནམས་དག་གིས་དཔལ་འཐོབ་ཅིང ། །དེ་བཞིན་ལོངས་སྤྱོད་ཅན་དུ་འགྱུར། །བསོད་ནམས་དག་གིས་ཤེས་རབ་འཐོབ། །སྙན་དང་གས་སྦྱོར་མཆོག་བསོད་ནམས་ཀྱིས། །བསོད་ནམས་དག་གི་ཡིད་གཞུངས་འཐོབ། །བསོད་ནམས་དག་གིས་བཟང་འགྲོ་འཐོབ། །བསོད་ནམས་དག་གིས་རིགས་མཐོར་སྐྱེ། །བསོད་ནམས་ཀྱིས་ 14b ནི་སྐྱེ་བ་དྲན། །བསོད་ནམས་དག་གིས་གྲགས་པ་འཐོབ། །བསོད་ནམས་དག་གིས་ངང་ཚུལ་ཅན། །བསོད་ནམས་དག་གིས་གཏོང་ལྡན་འགྱུར། །བསོད་ནམས་དག་གིས་དབང་པོ་ཚང། །བསོད་ནམས་དག་གིས་བདེ་བ་འཐོབ། །བསོད་ནམས་དག་གིས་མཁས་པས་མཆོད། །བསོད་ནམས་དག་གིས་སྟོབས་ཐོབ་ཅིང ། །དམ་པ་འཕྲད་པ་བསོད་ནམས་ཀྱིས། ། བསོད་ནམས་དག་གིས་དོན་ཀུན་འཐོབ། །འདིར་ནི་ཡོན་གནས་སུ་ཡང་རུང ། །ཇི་སྟེ་ཞིང་ལས་ཚོང་ཡང་རུང ། །མི་ནི་སྐྱེ་འདོད་ཕྱིར་བྱེད་ན། །ཅུང་ཟད་བྱས་པས་བསོད་ནམས་ཀྱིས། ། ལོངས་སྤྱོད་རྒྱ་ཆེན་ཚོགས་ཀྱང་འཐོབ། །བསོད་ནམས་བྱེད་རྣམས་བསོད་ནམས་ཀྱིས། །བསམས་པ་ཙམ་གྱིས་ནམ་མཁའ་ལས། །གོས་དང་ཟས་སྐོམ་རིན་ཆེན་རྣམས། །ཐམས་ཅད་བདེ་བ་འཐོབ་པར་འགྱུར། །ཡིད་འོང་ཁྱིམ་རྣམས་བསོད་ནམས་ཀྱིས། །བསོད་ནམས་དག་གིས་བུད་མེད་མཆོག་།བསོད་ནམས་ཆེན་པོར་ནོར་དང་འབྲུ། །དེ་ཡི་འདོད་རྒུ་འབྱུང་བར་འགྱུར། །བསོད་ནམས་དག་གིས་འགྲོ་བ་ན། །ས་ནི་སྡོང་དུམ་ཚེར་མ་མེད། །བསོད་ནམས་ཇི་ལྟར་ལྡན་པ་བཞིན། །མཉམ་གནས་ཡང་ན་གོས་ཀྱང་བཏིང ། །ཇི་ལྟར་རེག་པ་ཙམ་གྱིས་ནི། །ནད་པ་དག་ནི་སོས་འགྱུར་བཞིན། །བསོད་ནམས་དག་གིས་རེག་གྱུར་ན། །ཟས་སྐོམ་དེ་བཞིན་གཉི་ག་དང ། །གོས་དང་རིན་ཆེན་འབྲུ་དག་ཀྱང ། །རྟག་ཏུ་ཟད་པར་མི་ 15a ༄#། །འགྱུར་རོ། །ལྷ་ཀླུ་ལྷ་མིན་གནོད་སྦྱིན་དང ། །ཡི་དྭགས་ལྟོ་འཕྱེ་མི་རྣམས་ཀྱང ། །བསོད་ནམས་བདག་ཉིད་ཆེ་བའི་ཕྱིར། །དུག་དང་གནོད་པ་རྣམས་ལས་བསྲུང ། །བསོད་ནམས་དག་གིས་བསྙེན་བཀུར་འཐོབ། །སྐྱེ་བོ་མང་དགའ་བསོད་ནམས་ཀྱིས། །བསོད་ནམས་དག་གིས་གྲགས་ལྡན་འགྱུར། །བསོད་ནམས་དག་གིས་སྐལ་བཟང་ཐོབ། །བསོད་ནམས་དག་གིས་ཚིག་ཀྱང་བཙན། །བསོད་ནམས་དག་གིས་སྡུག་གུར་འགྱུར། །ཚངས་པའི་དབྱངས་འཐོབ་བསོད་ནམས་ཀྱིས། །བསོད་ནམས་ཀྱིས་ནི་ལུས་མདོག་སྡུག་།བསོད་ནམས་དག་གིས་ཚིག་བཟང་བ། །དྲན་ལྡན་མཛའ་ལྡན་གཙོ་བོར་འགྱུར། །དེ་དང་དེར་ནི་མཁས་པར་འོང ། །མི་ཕྱེད་པ་ཡི་འཁོར་དང་ལྡན། །བསོད་ནམས་ཅན་ནི་ནད་མེད་ཅིང ། །སྨོན་པའི་གནས་འགྱུར་བསོད་ནམས་ཀྱིས། །བསོད་ནམས་རྙེད་ལྡན་གཟི་བྱིན་ཡོད། །བསོད་ནམས་དག་གིས་རྒྱལ་སྲིད་འཐོབ། །འགྲན་ཟླ་མེད་ཅིང་གནོད་པ་མེད། །ལོངས་སྤྱོད་མི་ཉམས་བསོད་ནམས་ཀྱིས། །བསོད་ནམས་དག་གིས་གཏེར་ཡང་རྙེད། །འཁོར་ལོས་བསྒྱུར་འགྱུར་བསོད་ནམས་ཀྱིས། །རིན་ཆེན་བདུན་ནི་མདུན་དུ་འགྲོ་།ནམ་མཁའི་བར་ནས་ཀུན་ཏུ་རྒྱུ། །ཉི་ཟླ་དང་ཡང་གཟི་བྱིན་མཉམ། །ཟླ་བ་ཉིད་འཐོབ་བསོད་ནམས་ཀྱིས། །བསོད་ 15b རྣམས་ཀྱིས་འཐོབ་ཉི་མ་ཉིད། །ཚངས་པ་ཉིད་འཐོབ་བསོད་ནམས་ཀྱིས། །བསོད་ནམས་ཀྱིས་འཐོབ་བརྒྱ་བྱིན་ཉིད། །གཞལ་མེད་ཁང་ན་རྒྱུ་བ་ཡི། །བསོད་ནམས་ཀྱིས་ནི་ལྷར་ཡང་འགྱུར། །བསོད་ནམས་དེ་བཞིན་ལྷ་ཡི་བུ། །ལྷ་མིན་དབང་པོ་སྟོབས་པོ་ཆེ། །བསོད་ནམས་དག་གིས་ངན་འགྲོ་སྤོང ། །བསོད་ནམས་ཀྱིས་ནི་བདེ་འགྲོར་འགྲོ། །ཤིན་ཏུ་ཡིད་འོང་རབ་དཀོན་པའི། །མེ་ཏོག་བསོད་ནམས་དག་གིས་རྙེད། །བསོད་ནམས་དག་གིས་གྲུབ་པ་འཐོབ། །འགྲོ་བ་སྣང་བྱེད་བསོད་ནམས་ཀྱིས། །ལྷ་དང་ལྷ་མིན་རྣམས་ཀྱིས་ནི། །ཡང་དག་མཆོག་འགྱུར་བསོད་ནམས་ཀྱིས། །ཞེས་གཞོན་ནུ་བསོད་ནམས་སྟོབས་ཀྱིས་དེ་སྐད་ཅེས་སྨྲས་ནས། འོན་ཀྱང་རང་རང་གི་ཕྱོགས་འཛིན་པས་ཁས་མི་ལེན་ཏོ། །དེ་ནས་བསོད་ནམས་སྟོབས་ཀྱིས། དེ་དག་ལའང་སྨྲས་པ། ཀྱེ་ཚུར་ཤོག། བདག་ཅག་ཤིན་ཏུ་རིང་བ་གཞན་གྱི་ཡུལ་ཞིག་ཏུ་དོང་སྟེ། ཆ་ལུགས་མི་མངོན་པར་འཁོད་ན། འདི་ལྟར། ཅི་གཟུགས་མི་རྣམས་ཀྱི་ཉམས་སུ་དབེན་པ་ཡིན་ནམ། འོན་ཏེ་བརྩོན་འགྲུས་སམ། བཟོའམ། ཤེས་རབ་བམ། བསོད་ནམས་ཉམས་སུ་དབེན་པ་ཤེས་པར་འགྱུར་རོ། ། དེ་ནས་གཞོན་ནུ་དེ་དག་གིས་དེ་ལྟར་བྱའོ། །ཞེས་བྱས་ནས། གཞོན་ནུ་བསོད་ནམས་སྟོབས་ཀྱིས་ལྟར་མཉན་ཏེ། ཡབ་ལ་མ་གསོལ་བར་ཚམ་ཚོམ་མེད་པར་ཤིན་ཏུ་རིང་ 16a ༄#། །བ་རྒྱལ་ཁམས་གཞན་དང ། ཡུལ་གཞན་དུ་དོང་ནས། རྒྱལ་པོའི་ཕོ་བྲང་འཁོར་གཞན་ཞིག་ཏུ་ཞུགས་ཏེ་ཆ་ལུགས་མི་མངོན་པར་འཁོད་དོ། །དེ་ནས་གཟུགས་དང་ལྡན་པ་ནི་མཐོང་ན་ཡིད་དུ་འོང་བས་བསྡུས་པའི་སྐྱེ་བོ་དག་གིས་བཤུགས་པའི་ལོངས་སྤྱོད་ཙམ་གྱིས་འཚོའོ། །བརྩོན་འགྲུས་ཅན་གྱིས་ནི་ཆུ་ཀླུང་ཤུགས་དྲག་ཅིང་མགྱོགས་ལ་ཤིན་ཏུ་ཟབ་ཅིང་མཐོང་ནས་འཇིགས་པ་ཙནྡན་གྱི་ཤིང་ཆེན་པོ་ཁྱེར་བ་ན་གཞན་དག་གིས་བླང་བར་མི་ནུས་པ། བརྩོན་འགྲུས་ཀྱི་སྟོབས་ཆེན་པོས་དྲངས་ནས་འཚོ་ཞིང་དེ་ལས་བྱུང་བའི་ལོངས་སྤྱོད་ཙམ་གྱིས་འཚོའོ། །བཟོ་དང་ལྡན་པའང་བཟོ་སྟོན་པ་ལས་བྱུང་བའི་ལོངས་སྤྱོད་ཙམ་གྱིས་འཚོའོ། །ཤེས་རབ་ཅན་གྱིས་ཀྱང་ཚོང་དཔོན་གཉིས་ཁོན་བྱུང་ནས་ཡུན་རིང་དུ་ལོན་པ་ཤེས་རབ་ཀྱིས་མཁས་པས་མཛའ་བར་བྱས་ཏེ། དེ་ནས་དེ་གཉིས་ཡོངས་སུ་མགུ་བས་ནོར་བྱིན་པ་ཙམ་གྱིས་བདེ་བར་འཚོའོ། །གཞོན་ནུ་བསོད་ནམས་སྟོབས་ཀྱང ། བདག་གིས་བསོད་ནམས་བྱས་པ་རྣམས་ཀྱིས་ཆེ་བ་ཉིད་བསྒྲགས་པའི་ཕྱིར་མི་ཤིན་ཏུ་དབུལ་པོ་ཞིག་གིས་ཁྱིམ་དུ་ཞུགས་ནས། དེ་གང་གི་ཉིན་པར་ཁྱིམ་དེར་ཞུགས་པ་དེའི་ཉིན་པར་ཉིད་དུ། གཞོན་ནུ་བསོད་ནམས་སྟོབས་ཀྱི་བསོད་ནམས་ཀྱི་མཐུས་ཁྱིམ་དེ་ཉིད་ཀྱི་ནང་དུ་འབྱོར་པ་ཆེན་པོ་བྱུང་ 16b སྟེ།་ཁྱིམ་དེ་ནོར་དང ། འབྲུ་དང ། གསེར་དངུལ་མང་པོས་ཡོངས་སུ་གང་བར་གྱུར་ཏོ། །དེ་ནས་མི་དབུལ་པོ་དེ་འདི་ཅི་ཞིག་སྙམ་དུ་ཡ་མཚན་དང ། མཆོག་ཏུ་དགའ་བ་སྐྱེས་ཏེ། སྔོན་མ་བྱུང་བའི་འབྱོར་པ་འདི་ག་ལས་འོང་སྙམ་སེམས་སོ། །དེ་ཡང་འདི་སྙམ་དུ་ཁྱིམ་འདིར་ལོངས་སྤྱོད་འབྱོར་བ་བྱུང་བ་འདི་ནི་སྔོན་མ་མཐོང་བའི་སེམས་ཅན་འདི་བདག་གི་ཁྱིམ་དུ་འོངས་པ་དེའི་མཐུ་ཡིན་ནོ་སྙམ་དུ་སེམས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་ལོངས་སྤྱོད་འབྱོར་པ་དེ་དག་མི་དབུལ་པོ་ལ་ཅི་བདེར་སྤྱོད་དུ་བཅུག་སྟེ། དེའི་ཚེ་མི་དབུལ་པོ་དེ་ཕྱུག་ཅིང་ནོར་མང་ལ་ལོངས་སྤྱོད་ཆེ་བར་གྱུར་ཏོ། །དེ་ནས་འདི་སྙམ་དུ་རྟོགས་ཏེ། བདག་སྔོན་ཤིན་ཏུ་དབུལ་ཞིང་འདུག་འདུག་པ་ལས། ད་བདག་གི་དཔལ་དང ། སྐལ་བ་བཟང་པོ་འབྱོར་པར་གྱུར་པ་དེ་དག་ཐམས་ཅད་ནི་གཞོན་ནུ་འདི་ལ་བརྟེན་ཏོ། །གང་གི་ཕྱིར་གང་གི་ཉིན་མོ་གཞོན་ནུ་འདི་ནི་བདག་གི་ཁྱིམ་དུ་འོངས་པ་དེའི་ཉིན་པར་ཉིད་དུ་བདག་གི་ཁྱིམ་དུ་དཔལ་བྱུང་བར་གྱུར་པ་ལས་ན། སེམས་ཅན་འདི་ནི་བསོད་ནམས་ཀྱིས་ཆེ་བར་གྲགས་པ་ཞིག་གི། བཀུར་སྟི་བྱ་བའི་རིགས་སོ་སྙམ་སྟེ། དེ་ནས་དེས་དེ་ལ་རྒྱུན་མི་འཆད་པར་བཀུར་སྟི་ཤིན་ཏུ་ཆེན་པོས་བཀུར་སྟི་བྱས་ནས། མི་དབུལ་པོ་ཆེ་གེ་མོ་ཞིག་གེ་ཁྱིམ་དུ་གཞོན་ནུ་སྔོན་མ་བྱུང་བ་ཞིག་འོངས་ཏེ། དེའི་མཐུས་ཁྱིམ་དེར་དཔལ་བྱུང་བར་གྱུར་ཏེ་ཞེས་ 17a ༄#། །ཀུན་ཏུ་སྒྲ་གྲགས་སོ། །སྐྱེ་བོ་མང་པོ་དག་གིས་དེ་ཐོས་ནས་བསོད་ནམས་སྟོབས་ལ་མངོན་པར་དགའ་བར་གྱུར་ཏོ། །ཀྱེ་མ། བསོད་ནམས་དག་གི་མཐུ་ཆེ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེའི་ཚེ་ལྗོངས་དེར་ཡང་གཞོན་ནུ་བསོད་ནམས་སྟོབས་ཀྱི་མཐུས་མེ་ཏོག་དང ། འབྲས་བུའི་ཤིང་རྣམས་རྟག་ཏུ་རྒྱས་པར་གྱུར་ཏོ། །ལྷའང་དུས་དུས་སུ་ལེགས་པར་མཐུན་པར་ཆར་གྱི་རྒྱུན་འབེབས་ཏེ། འབྲུ་ཤིན་ཏུ་ཕུན་སུམ་ཚོགས་པར་བྱུང་བར་གྱུར་ཏོ། །དེ་ནས་སྐྱེ་བོ་མང་པོ་བསོད་ནམས་དག་གིས་སེམས་དགའ་བར་བྱས་ཏེ། ལྟད་མོ་ལྟ་འདོད་པར་གྱུར་ནས། དེ་ལྟ་བའི་ཕྱིར་དོང་ངོ ། །དེ་ནས་གཞོན་ནུ་བསོད་ནམས་སྟོབས་ཀྱིས་སྐྱེ་བོ་ལྷགས་པ་དེ་དག་བསྡུ་བར་འདོད་དེ། ཀྱེ་མ།་བདག་ལ་ཁྱིམ་རིན་པོ་ཆེ་ཐམས་ཅད་ཀྱིས་གང་ཞིང ། འཚོག་ཆས་རྣམ་པ་སྣ་ཚོགས་དང་ལྡན་ལ། བྲན་དང ། བྲན་མོ་དང ། ལས་བྱེད་པས་གང་བ་རྣམ་པ་སྣ་ཚོགས་བལྟ་ན་ཡིད་དུ་འོང་བ་ཞིག་བྱུང་ཡང་ཅི་མ་རུང་སྙམ་དུ་སེམས་བསྐྱེད་དོ། །དགེ་སློང་དག། སེམས་བསྐྱེད་མ་ཐག་ཏུ་གཞོན་ནུ་བསོད་ནམས་སྟོབས་ཀྱི་ཁྱིམ་ཆེན་པོ་རིན་པོ་ཆེ་ཐམས་ཅད་ཀྱིས་གང་ཞིང་འཚོག་ཆས་རྣམ་པ་སྣ་ཚོགས་དང་ལྡན་ལ། བྲན་དང ། བྲན་མོ་དང ། ལས་བྱེད་པས་གང་བ་རྣམ་པ་སྣ་ཚོགས་བལྟ་ན་ཡིད་དུ་འོང་བ་གློ་བུར་དུ་བྱུང་ངོ ། །དེ་མཐོང་ནས་ 17b ཀྱང་སྐྱེ་བོ་མང་པོ་དག་མཆོག་ཏུ་ངོ་མཚར་དུ་གྱུར་ཏེ། བསོད་ནམས་དག་ལ་གཅེས་སུ་འཛིན་པ་ཡང་དག་པར་སྐྱེས་ནས། ཀྱེ་མ། བསོད་ནམས་དག་གི་འབྲས་བུ་ནི་མངར་རོ་ཞེས་རྟོགས་ནས་གཞོན་ནུ་བསོད་ནམས་སྟོབས་ལ་བཀུར་སྟི་ཆེན་པོས་བཀུར་སྟི་བྱས་སོ། །གཞོན་ནུ་བསོད་ནམས་སྟོབས་ཀྱིས་ཀྱང་སྐྱེ་བོ་མང་པོ་དེ་དག་སེམས་དགའ་བར་གྱུར་པར་ཤེས་ནས། བསྡུ་བའི་དངོས་པོ་བཞི་དག་གིས་ཅི་རིགས་པར་ཁ་ཅིག་ནི་སྦྱིན་པས་བསྡུས། ཁ་ཅིག་ནི་ཚིག་སྙན་པས་བསྡུས། ཁ་ཅིག་ནི་དོན་སྤྱོད་པས་བསྡུས། ཁ་ཅིག་ནི་དོན་མཐུན་པས་བསྡུས་ཏེ། དེའི་གྲགས་པས་རྒྱལ་པོའི་ཕོ་བྲང་འཁོར་དེ་ཐམས་ཅད་ཀུན་ཏུ་གང་བར་གྱུར་ཏོ། །དེ་ནས་ཕྱིས་རེ་ཞིག་ན། རྒྱལ་པོ་གཞན་ཞིག་ལ་སྨན་ཆོས་གསོལ་པའི་མི་ཞིག་གཤེད་མ་དག་གིས་ཡན་ལག་བཅད་དེ་གཞག་ནས། དེའི་ལུས་ལས་ཁྲག་ཤིན་ཏུ་མང་པོ་ཟག་སྟེ། དེས་ན་དེའི་ཁ་བསྐམས་པར་གྱུར་ཏེ། །དེ་ནས་གཞོན་ནུ་བསོད་ནམས་སྟོབས་ཀྱང་ས་ཕྱོགས་དེར་ཕྱིན་ཏེ། དེ་ནས་མི་དེས་དེ་མཐོང་ནས། ཉམ་ཐག་པའི་ང་རོས་ངུ་ཞིང ། ཇོ་བོ་གཞོན་ནུ། བདག་ལ་ཡོངས་སུ་བསྐྱབ་ཏུ་གསོལ་ཞེས་སྨྲས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་དེ་མཐོང་ནས་སྙིང་རྗེའི་སེམས་བསྐྱེད་དེ། བདག་གིས་ཐབས་ཇི་ལྟ་བུ་ཞིག་གིས་འདི་ཡོངས་སུ་བསྐྱབ་པར་བྱ་སྙམ་དུ་བསམས་ནས་དེང་བདག་གི་བསོད་ནམས་དག་གི་མཐུ་ 18a ༄#། །འཇིག་རྟེན་གྱི་མངོན་སུམ་དུ་བསྟན་ཏོ་སྙམ་དུ་དེའི་བློ་སྐྱེས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་དེའི་ལུས་ཀྱི་ཉམ་དྲོད་རྟོགས་ནས། སྙིང་རྗེས་སེམས་བརླན་ཏེ། རང་གི་ལུས་ལས་རྩ་གཏར་ནས་ཁྲག་ཟགས་ཏེ་མི་དེ་ལ་བླུད་ནས། དེས་མི་དེའི་ཁ་བསྐམས་པ་ཐམས་ཅད་ཞི་བར་གྱུར་ཏོ། །དེ་ནས་གཞན་ནུ་བསོད་ནམས་སྟོངས་ཀྱིས་དེའི་རྐང་ལག་བཅད་པས་ཤིན་ཏུ་མི་བཟད་པར་ན་བ་མཐོང་ནས་སྡུག་བསྔལ་དེ་བདག་གི་ཉམས་སུ་བབ་པར་སེམས་ཤིང ། བདག་ཉིད་ཀྱི་རྐང་ལག་བཅད་དེ། མི་དེའི་རྐང་ལག་གི་གནས་སུ་སྦྱར་ནས་ནམ་མཁའ་ལ་བལྟས་ཏེ། སེམས་ཅན་ཐམས་ཅད་ཀྱི་རྗེས་སུ་འགྲོ་བའི་བྱམས་པའི་སེམས་བསྐྱེད་ནས་བདེན་པའི་ཚིག་གང་གིས་བདག་གི་ལུས་འདི་སྐྱེས་ཚུན་ཆད་མི་དགེ་བའི་ལས་ཅི་ཡང་བྱས་པ་མི་དྲན་པའི་བདེན་པ་དང ། བདེན་པའི་ཚིག་འདིས་མི་འདི་ལ་བདག་གི་རྐང་ལག་འདི་དག་གནས་གནས་སུ་འབྱོར་པར་གྱུར་ཅིག།་སྔོན་གྱི་ལུས་ཇི་ལྟ་བ་བཞིན་དུ་ཡང་གྱུར་ཅིག་ཅེས་བདེན་པའི་བྱིན་གྱི་རླབས་བྱས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་དེ་སྐད་སྨྲས་མ་ཐག་ཏུ་མི་དེ་ལ་རྐང་ལག་བཅད་པ་དེ་དག་གནས་གནས་སུ་འབྱོར་པར་གྱུར་ཏེ། མི་དེ་སྔོན་གྱི་ལུས་ཇི་ལྟ་བ་བཞིན་དུ་གྱུར་ནས། རྨ་སོས་ཤིང་སྒྲོས་མི་མངོན་པར་གྱུར་ཏོ། །དེ་ནས་གཞོན་ནུ་བསོད་ 18b ནམས་སྟོབས་ཀྱིས་མི་དེ་སྔོན་གྱི་ལུས་ཇི་ལྟ་བ་བཞིན་དུ་གྱུར་པར་མཐོང་ནས་ཡིད་རབ་ཏུ་དགའ་སྟེ། བསམ་པ་ཡོངས་སུ་རྫོགས་ནས། བདག་ཉོན་མོངས་པ་འབྲས་བུ་ཡོད་པར་གྱུར་ཏེ། བསམ་པ་ཡོངས་སུ་རྫོགས་སོ་སྙམ་དུ་བསམས་སོ། །གཞན་ཡང ། ཇི་ལྟར་མི་འདི་བདག་གིས་རང་གི་ཁྲག་གིས་ཚིམ་པར་བྱས་ནས། རང་གི་རྐང་ལག་གིས་བསྟུད་དེ། བདེན་པས་བསྐུལ་ནས་སྔོན་གྱི་ལུས་ཇི་ལྟ་བ་བཞིན་དུ་གྱུར་ཅིང་སྲོག་ཕངས་པ་དང་ལྡན་པར་བྱས་པ་དེ་བཞིན་དུ། དགེ་བའི་རྩ་བ་འདིས་བདག་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་མི་འདི་དམ་པའི་ཆོས་ཀྱི་བཅུད་ཀྱིས་ཡང་དག་པར་ཚིམ་པར་བྱས་ཏེ། གཡུང་དྲུང་གི་མཐར་ཐུག་པ་གྲུབ་པ་དང ། བདེ་བའི་མྱ་ངན་ལས་འདས་པ་ལ་གཞོག་པར་གྱུར་ཅིག་ཅེས་བྱས་ནས། དེའི་སྐབས་སུ་ཡང་ས་རྣམ་པ་དྲུག་ཏུ་གཡོས་ཏེ། གཡོ་བ་དེས་དབང་པོ་ཆེན་པོའི་ཕོ་བྲང་ཀུན་ཏུ་གཡོས་ནས། ལྷའི་དབང་པོ་བརྒྱ་བྱིན་གྱིས་བསམ་པ། ས་གཡོས་འདི་སུས་བྱས་སྙམ་མོ། ། རེ་ཞིག་ན་གཞོན་ནུ་བསོད་ནམས་སྟོབས་ཀྱིས་ཤིན་ཏུ་དཀའ་བའི་ལས་བྱས་པ་དེ་མཐོང་ངོ ། །དེ་མཐོང་ནས་ཀྱང་ཡ་མཚན་གྱིས་སེམས་དད་པར་གྱུར་ནས། འདི་སྙམ་དུ་བདག་ཉིད་ཆེན་པོ་འདི་ཅིའི་ཕྱིར་འདི་ལྟར་ཤིན་ཏུ་དཀའ་བའི་ལས་བྱེད་པ་དེ་བདག་གིས་བརྟག་པར་བྱའོ་སྙམ་དུ་བསམས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་བདག་ཉིད་བྲམ་ཟེའི་ཆ་ལུགས་ 19a ༄#། །སུ་སྤྲུལ་ནས། སུམ་ཅུ་རྩ་གསུམ་པའི་གནས་ནས་འབབས་ཏེ། གཞོན་ནུ་བསོད་ནམས་སྟོབས་ཀྱི་ཐད་དུ་སོད་ནས་བསོད་ནམས་སྟོབས་ཁྱོད་ཀྱིས་བདག་ཉིད་ཀྱི་རྐང་ལག་མེད་པར་བྱས་ཏེ་བཞག་པ་འདི་ཅིའི་ཕྱིར་བྱས་ཞེས་སྨྲས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་ངོ་མ་ཤེས་ཏེ། སྐབས་འདི་རྒྱས་པར་བསྙད་ནས་ཡང་སྨྲས་པ། གྲོགས་པོ། བདག་ནི་གཞན་དག་གི་སྡུག་བསྔལ་གྱིས་སྡུག་བསྔལ་ལོ། །བདག་ནི་གཞན་དག་གི་བདེ་བས་མཆོག་ཏུ་བདེ་སྟེ། དེ་བས་ན་བདག་གིས་མི་འདི་སྡུག་བསྔལ་མི་བཟད་པས་ཉམ་ཐག་པ་དེ་མཐོང་ནས། སྡུག་བསྔལ་དེ་བདག་གི་ཉམས་ལ་བབ་པར་བསམས་ཏེ། རང་གི་ཡན་ལག་དང ། ཉིད་ལག་རྣམས་ཡོངས་སུ་བཏང་ནས་མི་འདི་བདེན་པས་བསྐུལ་བས་སྔོན་གྱི་ལུས་ཇི་ལྟ་བ་བཞིན་དུ་བཞག་གོ། །།བསོད་ནམས་སྟོབས་ཀྱི་རྟོགས་པ་བརྗོད་པ། བམ་པོ་གཉིས་པ་སྟེ་ཐ་མ། དེ་ནས་ལྷའི་དབང་པོ་བརྒྱ་བྱིན་མཆོག་ཏུ་ཡ་མཚན་དུ་གྱུར་ནས། བྲམ་ཟེའི་ཆ་ལུགས་མི་སྣང་བར་བྱས་ཏེ་རང་བཞིན་དུ་གནས་པར་གྱུར་ནས། གཞོན་ནུ་བསོད་ནམས་སྟོབས་ལ་སྨྲས་པ། གཞོན་ནུ། ཁྱོད་རང་གི་ཡན་ལག་དང ། ཉིང་ལག་རྣམས་ཡོངས་སུ་གཏོང་བར་བྱས་པའམ། ཡོངས་སུ་གཏོང་བ་ན་སེམས་གཞན་དུ་གྱུར་པའམ། འགྱོད་པར་མ་ 19b གྱུར་གྲང ། གཞོན་ནུ་བསོད་ནམས་སྟོབས་ཀྱིས་སྨྲས་པ། ཀོའུ་ཤི་ཀ། བདག་ནི་རང་གི་ཡན་ལག་དང ། ཉིང་ལག་རྣམས་ཡོངས་སུ་གཏོང་བར་བྱས་པའམ། ཡོངས་སུ་གཏོང་བ་ན་སེམས་གཞན་དུ་གྱུར་པའམ། འགྱོད་པར་གྱུར་པའང་མེད་དོ། །བརྒྱ་བྱིན་གྱིས་སྨྲས་པ། དེ་ཅིས་མངོན། བསོད་ནམས་སྟོབས་ཀྱིས་སྨྲས་པ། ཀོའུ་ཤི་ཀ། འོ་ན་བདེན་པའི་ཚིག་བྱ་ཡི་ཉོན་ཅིག། དེ་ནས་གཞོན་ནུ་བསོད་ནམས་སྟོབས་ཀྱིས་སེམས་ཅན་ཐམས་ཅད་ཀྱི་རྗེས་སུ་འགྲོ་བའི་བྱམས་པའི་སེམས་ཉེ་བར་བཞག་སྟེ། ཕྱོགས་བཞིར་བལྟས་ནས་བདེན་པས་བསྐུལ་བའི་ཚིགས་སུ་བཅད་པ་སྨྲས་པ། རང་གི་ཡན་ལག་མཁྲིག་མ་གཅོད་པ་ན། །ཇི་སྟེ་དེ་རིང་འགྱོད་པར་མ་གྱུར་ན། །བདག་གི་བདེན་པའི་ཚིག་ནི་གང་ཡིན་པས། །བདག་གི་ལུས་ནི་སྔ་མཁོ་བཞིན་གྱུར་ཅིག་།ཅེས་ཚིགས་སུ་བཅད་པ་སྨྲས་མ་ཐག་པའི་རྗེས་ལ། བདག་ཉིད་ཆེན་པོ་དེའི་ལུས་འཕྲལ་དུ་སྔོན་བཞིན་དུ་གྱུར་ཏེ། ནམ་མཁའ་ལས་ཀྱང་ལྷའི་མེ་ཏོག་གི་ཆར་བབ་བོ། ། ལྷའི་རོལ་མོའི་སྒྲ་རྣམས་ཀྱང་སྒྲོགས་སོ། །བསེར་བུ་འཇམ་པོའང་ལངས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷ་དང ། མི་དད་པར་བྱེད་པའི་བསོད་ནམས་དག་གི་ཤིན་ཏུ་རྨད་དུ་བྱུང་བ་དེའི་ཚེ་འདི་ཉིད་ལ་རྣམ་པར་སྨིན་པའི་འབྲས་བུ་རྒྱ་ཆེན་པོ་མཐོང་ནས་མཆོག་ཏུ་ངོ་མཚར་ཆེ་བས་སེམས་ཀྱི་རྒྱུད་དང་བར་གྱུར་ཏེ། གཞོན་ནུ་བསོད་ནམས་སྟོབས་ལ་སྨྲས་པ། གཞོན་ 20a ༄#། །ནུ། ཁྱོད་འབད་པ་འདིས་ཅི་ཞིག་སྒྲུབ། བསོད་ནམས་སྟོབས་ཀྱིས་སྨྲས་པ། ཀོའུ་ཤི་ཀ། བདག་ནི་འབད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་ནས་སེམས་ཅན་ཐམས་ཅད་འཁོར་བའི་རྒྱ་མཚོ་ལས་བཏོན་ཏེ། གཡུང་དྲུང་གི་མཐར་ཐུག་པ་གྲུབ་པ་དང ། བདེ་བའི་མྱ་ངན་ལས་འདས་པ་ལ་འགོད་པར་འདོད་དོ། ། དེ་ནས་ལྷའི་དབང་པོ་བརྒྱ་བྱིན་གྱིས་གཞོན་ནུ་བསོད་ནམས་སྟོབས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རི་རབ་བཞིན་དུ་མི་གཡོ་བར་རིག་ནས་མགུ་བར་གྱུར་ཏེ་སྨྲས་པ། སེམས་ཅན་ཆེན་པོ། ལེགས་སོ། །ལེགས་སོ། །ཁྱོད་ཀྱི་སྨོན་ལམ་ནི་རྒྱ་ཆེའོ། །ཁྱོད་ཀྱི་འབད་པ་ནི་བསྐྱོད་པར་མི་ནུས་སོ། །འབད་པ་འདིས་ཁྱོད་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་སྨྲས་ཏེ། ལྷའི་དབང་པོ་བརྒྱ་བྱིན་གྱིས་གཞོན་ནུ་བསོད་ནམས་སྟོབས་ལ་མངོན་པར་བསྟོད་ནས། དེ་ཉིད་དུ་མི་སྣང་བར་གྱུར་ཏོ། །གཞོན་ནུ་བསོད་ནམས་སྟོབས་ཀྱང་བསམ་པ་ཡོངས་སུ་རྫོགས་པར་གྱུར་ནས། རང་གི་གནས་སུ་སོང་ངོ ། །ཕྱིས་རེ་ཞིག་ན་རྒྱལ་པོའི་ཕོ་བྲང་འཁོར་དེའི་རྒྱལ་པོ་བུ་མེད་པར་དུས་ལས་འདས་སོ། །དེ་ནས་བཙུན་མོའི་འཁོར་དང ། གཞོན་ནུ་རྣམས་དང ། བློན་པོ་རྣམས་དང ། གྲོང་ཁྱེར་གྱི་མི་དང ། ཡུལ་མི་ 20b རྣམས་འདུས་ནས། ཀྱེ།་བདག་ཅག་གི་རྒྱལ་པོར་གང་ཞིག་དབང་བསྐུར་བར་བྱ་ཞེས་གྲོས་བྱེད་པ་ལ་ཞུགས་སོ། །དེ་ནས་ཁ་ཅིག་ན་རེ། སུ་བསོད་ནམས་ཀྱིས་ཆེ་བར་གྲགས་པའི་སེམས་ཅན་དེ་རྒྱལ་པོར་དབང་བསྐུར་བར་བྱའོ་ཞེས་ཟེར་རོ། །དེ་ནས་དེ་ལྟར་བྱའོ་ཞེས་སྨྲས་ནས། དེ་དག་ཐམས་ཅད་ཀྱིས་བློ་གཅིག། བརྡ་སྐད་གཅིག་ཏུ་བྱས་ནས། བསོད་ནམས་ཀྱིས་ཆེ་བར་གྲགས་པ་རྒྱལ་པོར་འོས་པའི་སེམས་ཅན་ཚོལ་བ་ལ་ཞུགས་ཏེ། ཚོལ་བའི་མི་ཀུན་ཏུ་བཀྱེའོ། །གཞོན་ནུ་བསོད་ནམས་སྟོབས་ཀྱང་རྒྱལ་པོར་འགྱུར་བའི་སྔོན་གྱི་དགེ་བའི་རྩ་བ་རྣམས་ཀྱིས་བསྐུལ་ནས་དེའི་ཚེ་སྟེན་གྲོགས་དག་དང་ལྷན་ཅིག་ཏུ་ཕྱི་རོལ་གྱི་སྐྱེད་མོས་ཚལ་དུ་སོང་ངོ ། །སོང་ནས་དེ་ལ་བཀྲ་ཤིས་པའི་ལྟས་རྣམས་བྱུང་སྟེ། ནམ་མཁའ་ལས་ཆུའི་རྒྱུན་མགོ་བོར་འབབ་ཅིང ། བྱ་ཁ་དོག་སྣ་ཚོགས་པ་དག་གཡས་ཕྱོགས་ནས་བསྐོར་བར་བྱེད་ལ། ཁྱེའུ་དང ། བུ་མོ་དག་ཀྱང་རྒྱལ་བའི་སྒྲ་སྒྲོགས་པར་བྱེད་དེ། སེམས་སྤྲོ་བ་དང་བཅས་ཤིང་ཡིད་བདེ་བར་གྱུར་པར་གནས་སོ། །གཞོན་ནུ་དེའང་བ་སྤུའི་ཁུང་བུ་ཐམས་ཅད་ཟིང་ཞེས་བྱེད་དོ། །ས་གཞིའང་རྡོ་དང ། གསེག་མ་དང ། གྱོ་མོ་མེད་པར་གྱུར་ཏོ། །དེའི་ལུས་ཀྱང་ཤིན་ཏུ་ཡང་བར་གྱུར་ཏོ། །དགའ་ཞིང་ཡིད་དང་འཐད་པའི་སྒྲའང་ཐོས་སོ། །དེ་ལྟས་ཀྱི་དཔྱད་ལ་མཁས་པ་ཡིན་ཏེ། དེ་འདི་སྙམ་དུ་འདི་ལྟར་བདག་ལ་ལྟས་རྣམས་བྱུང་བས་ 21a ༄#། །དེང་ནི་གདོན་མི་ཟ་བར་བདག་རྒྱལ་པོ་ཆེན་པོར་དབང་བསྐུར་བར་འགྱུར་རོ་སྙམ་དུ་བསམས་སོ། །དེ་ནས་དེ་མཐར་གྱིས་སྐྱེད་མོས་ཚལ་གྱི་ནང་དུ་སོང་སྟེ། སྐྱེད་མོས་ཚལ་གྱི་དགའ་བ་ཉམས་སུ་མྱོང་ནས་ཤིང་མྱ་ངན་འཚང་མེ་ཏོག་ཤིན་ཏུ་རྒྱས་པ་ཞིག་གི་དྲུང་དུ་ཉལ་ཏེ་གཉིད་ཀྱིས་ལོག་གོ། དེའི་གྲོགས་པོ་དེ་དག་ཀྱང་མེ་ཏོག་དང ། འབྲས་བུ་ལ་སེམས་གཡེངས་ནས། སྐྱེད་མོས་ཚལ་དེ་ཕན་ཚུན་ཀུན་ཏུ་འཁྱམ་པ་ལ་ཞུགས་སོ། །དེའི་བར་སྐབས་སུ་གཞོན་ནུ་བསོད་ནམས་སྟོབས་ཀྱི་བསོད་ནམས་ཀྱི་མཐུས་ཀླུ་རྣམས་ཀྱིས་ལྷའི་པདྨ་ཆེན་པོ་ཤིན་ཏུ་མཆོག་ཏུ་ཡིད་དུ་འོང་ལ། ཁ་དོག་དང ། དྲི་དང་ལྡན་པ། འདབ་མ་སྟོང་པ། ཤིན་ཏུ་དགའ་བར་བྱེད་པ་ཞིག་ས་ལ་བརྟོལ་ཏེ་མཐོན་པར་བྱས་ནས། པདྨ་ཆེན་པོ་དེ་ལ་གཞོན་ནུ་བསོད་ནམས་སྟོབས་མཐར་གྱིས་དལ་ནས་བཏེག་སྟེ་བཞག་ནས། དེ་ཅི་ནས་ཀྱང་སད་པར་མི་འགྱུར་བ་དེ་ལྟ་བུར་ཡང་བྱིན་གྱིས་བརླབས་སོ། །དེ་ནས་ཉི་མ་གུང་ལས་ཡོལ་ཏེ་ཟན་ཟ་བའི་དུས་ལས་འདས་ནས། ཤིང་གཞན་དག་གི་གྲིབ་མ་ནི་ཤར་ཕྱོགས་སུ་ཡོལ་ཞིང་ཤར་ཕྱོགས་སུ་འབབ་ལ། ཤར་ཕྱོགས་སུ་བབ་སྟེ། ཤིང་མྱ་ངན་འཚང་དེའི་གྲིབ་མ་ནི་གཞོན་ནུ་བསོད་ནམས་སྟོབས་ཀྱི་ལུས་མི་གཏོང་ངོ ། །སྐྱེད་མོས་ཚལ་དེའི་མེ་ཏོག་དང ། འབྲས་བུའི་ཤིང་གང་ཡིན་པ་དེ་དག་ཐམས་ཅད་ཀྱང ། ཤིང་མྱ་ངན་ཚང་ 21b དེ་གང་ན་འདུག་པ་དེ་ལོགས་སུ་མངོན་པར་འདུད་པར་གྱུར་ཏོ། །རི་དྭགས་དང ། བྱ་མཐོང་ན་ཡིད་དུ་འོང་ཞིང་བཀྲ་ཤིས་པར་བྱ་བ་རྣམས་ཀྱང་སྤྱོད་ལམ་ཞི་བའི་ཚུལ་གྱིས་ཀུན་ནས་བསྐོར་ཏེ་འཁོད་དོ། །གཞོན་ནུ་བསོད་ནམས་སྟོབས་གཉིད་ལོག་པའི་རྨི་ལམ་དུ་འང་བདག་ཉིད་མི་གཙང་བའི་ཕུང་པོ་ཆེན་པོའི་སྟེང་ན་འདུག་པ་རྨིས་སོ། །བདག་ཉིད་མི་གཙང་བས་ཡོགས་པར་ཡང་རྨིས་སོ། །བདག་ཉིད་ནམ་མཁའ་ལ་ལྕེས་ལྡག་པའང་རྨིས་སོ། །བདག་ཉིད་པདྨོའི་སྟེང་ན་འདུག་པའང་རྨིས་སོ། །བདག་ཉིད་རིའི་རྩེ་མོར་འཛེགས་པར་ཡང་རྨིས་སོ། །སྐྱེ་བོ་ཕལ་པོ་ཆེ་བདག་ལ་ཕྱག་འཚལ་བའང་རྨིས་སོ། །དེ་ནས་དེའི་སྐབས་སུ་གྲོང་ཁྱེར་གྱི་མི་དང ། བློན་པོ་དང ། ཡུལ་གྱི་མི་དེ་དག་གིས་ཚོལ་བའི་མི་བཀྱེ་བ་རྣམས་ཀྱང་གཞན་དང ། གཞན་དག་ཏུ་ཀུན་ཏུ་འཁོར་འཁོར་ཏེ། ཕྱོགས་དེར་ཕྱིན་ཏོ། །དེ་ནས་གཞོན་ནུ་བསོད་ནམས་སྟོབས་ཀྱིས་ལྷའི་འབྱོར་པ་དེ་ལྟ་བུ་མཐོང་ནས། ཡང་མཆོག་ཏུ་ཡ་མཚན་དུ་གྱུར་ཏེ་སེམས་ཅན་འདི་ནི་བསོད་ནམས་ཀྱི་ཆེ་བར་གྲགས་པ་ཞིག་གོ་སྙམ་དུ་རིག་ནས། ཤིན་ཏུ་རིངས་པར་གྲོང་ཁྱེར་གྱི་མི་དང ། བློན་པོ་དང ། ཡུལ་མི་རྣམས་ཀྱི་ཐད་དུ་དོང་ནས་སྐབས་དེ་རྒྱས་པར་བསྙད་དོ། །དེའི་སྐབས་སུ་གཞོན་ནུ་བསོད་ནམས་སྟོབས་སད་ནས། དེ་རྨི་ལྟས་ཀྱི་དཔྱད་ལ་མཁས་པ། རྨི་ལམ་དེ་དག་གི་དཔྱད་སེམས་པ་ལ་ཞུགས་ཏེ། བདག་གིས་མི་གཙང་བའི་ 22a ༄#། །ཕུང་པོ་ཆེན་པོའི་སྟེང་ན་བདག་ཉིད་འདུག་པ་རྨིས་པ་དེ་ནི་བདག་རྒྱལ་སྲིད་ཆེན་པོའི་དབང་ཕྱུག་གི་བདག་པོ་ལ་གནས་པར་འགྱུར་བ་དེའི་སྔ་ལྟས་ཡིན་ནོ། །བདག་གིས་མི་གཙང་བས་བདག་ཉིད་ཡོག་པ་རྨིས་པ་དེ་ནི་སེངྒེའི་ཁྲི་ཆེན་པོ་ལ་འདུག་པར་འགྱུར་བ་དེའི་སྔ་ལྟས་ཡིན་ནོ། །བདག་ཉིད་རིའི་རྩེ་མོར་འཛེགས་པ་རྨིས་པ་དེ་ནི་ཐམས་ཅད་ཀྱི་སྟེང་ན་འདུག་པར་འགྱུར་བ་དེའི་སྔ་ལྟས་ཡིན་ནོ། །སྐྱེ་བོ་ཕལ་པོ་ཆེ་ཕྱག་འཚལ་པ་རྨིས་པ་དེ་ནི། སྐྱེ་བོ་ཕལ་པོ་ཆེ་བདག་ལ་བཀུར་སྟི་བྱེད་པར་འགྱུར་བ་དེའི་སྔ་ལྟས་ཡིན་ནོ། །འདི་ལྟར་བདག་གིས་འདི་ལྟ་བུའི་རྨི་ལམ་རྨིས་པ་དང ། འདི་ལྟ་བུའི་ལྟས་མཐོང་བ་དག་ལས་ན་གདོན་མི་ཟ་བར་དེང་ཉིད་དུ་བདག་རྒྱལ་པོར་འགྱུར་སྙམ་མོ། །ཡང་དེའི་སྐབས་སུ་གྲོང་ཁྱེར་གྱི་མི་དང ། བློན་པོ་དང ། ཡུལ་གྱི་མི་རྣམས་ཀྱིས་ཚོལ་བའི་མི་རྣམས་ལ་ཐོས་ནས། མགུ་བར་གྱུར་ཏེ། ཐམས་ཅད་འདུས་ནས་རྒྱལ་སྲིད་ཀྱི་དབང་བསྐུར་བའི་ཡོ་བྱད་ཁྱེར་ཏེ་སྐྱེད་མོས་ཚལ་དེར་དོང་ངོ ། །དེ་ནས་རེ་ཞིག་ན་ལྷའི་འབྱོར་པ་དེ་དག་མཐོང་སྟེ། མཐོང་ནས་ཀྱང་མཆོག་ཏུ་ཡ་མཚན་དུ་གྱུར་ཏོ། །གཞོན་ནུ་བསོད་ནམས་སྟོབས་ཀྱང་དེ་དག་མཐོང་ནས་ལྷའི་པདྨ་ཆེན་པོ་དེ་ཉིད་ལ་སྐྱིལ་མོ་ཀྲུང་བཅས་ཏེ་འདུག་གོ་།དེ་ནས་གཞོན་ནུ་བསོད་ནམས་སྟོབས་ཀྱི་བསོད་ནམས་དག་གིས་བསྐུལ་ནས། རྒྱལ་པོ་ཆེན་པོ་བཞིས་ 22b ཆེ་བ་ལ་འོས་པའི་ལྷའི་སེངྒེའི་ཁྲི་ཕུལ་ལོ། །ལྷའི་དབང་པོ་བརྒྱ་བྱིན་གྱིས་ནི་གདུགས་དཀར་པོ་དང ། རྔ་ཡབ་ནོར་བུའི་ཡུ་བ་ཅན་ཕུལ་ལོ། །སུམ་ཅུ་རྩ་གསུམ་གྱི་ལྷ་རྣམས་ཀྱིས་ལྷའི་བླ་རེ་རིན་པོ་ཆེ་སྣ་ཚོགས་ཀྱིས་སྤྲས་པས་འགྲེམས་སོ། །རླུང་གཏོང་བ་དང ། བར་སྣང་ལ་གནས་པའི་ལྷ་རྣམས་ནི་ལྷའི་མེ་ཏོག་རྣམ་པ་སྣ་ཚོགས་ཀྱི་ཆར་འབེབས་སོ། །རྒྱལ་ཆེན་བཞིའི་རིས་ཀྱི་ལྷ་རྣམས་ནི་ལྷའི་རིན་པོ་ཆེའི་ཆར་འབེབས་ཤིང་ལྷའི་རོལ་མོའི་སྒྲ་རྣམས་ཀྱང་སྒྲོགས་སོ། །གོས་ཀྱང་འཐོར་རོ། །རྒྱལ་པོའི་ཕོ་བྲང་འཁོར་དང ། སྐྱེད་མོས་ཚལ་དང ། ནགས་ཚལ་དུ་བཅས་པ་དེ་དག་ཐམས་ཅད་ཀྱང་རྡོ་དང ། གསེག་མ་དང ། གྱོ་མོ་མེད་པར་བྱས་ཏེ་བཞག་གོ་།རྒྱལ་མཚན་དང ། བ་དན་ནི་སྒྲེང ། དར་གྱི་ལྡ་ལྡི་ཆུན་པོ་ནི་ཀུན་ཏུ་བྲེས། དྲི་ཞིམ་པོའི་བདུག་པའི་སྣོད་ནི་བཏགས། མེ་ཏོག་སྣ་ཚོགས་མི་གཏོར་ཏེ། ལྷའི་གནས་འདྲ་ཞིང ། ལྷའི་བུ་ལས་སྣ་ཚོགས་ཅན་གྱི་ནི་གཞོན་ནུ་བསོད་ནམས་སྟོབས་ཡོངས་སུ་ལོངས་སྤྱོད་པའི་ཕྱིར། བརྒྱ་བྱིན་གྱི་བཀས་སྐྱེད་མོས་ཚལ་དེར་ལྷའི་ཁང་པ་བརྩེགས་པ་ཆེན་པོ་རིན་པོ་ཆེ་སྣ་བཞི་ལས་བྱས་པ་རྣམ་པ་སྣ་ཚོགས་དང་ལྡན་པ་ཞིག་སྤྲུལ་ཏོ། །དེ་ནས་གྲོང་ཁྱེར་གྱི་མི་དང ། བློན་པོ་དང ། ཡུལ་གྱི་མི་དེ་དག་གིས་ལྷའི་འབྱོར་པ་དེ་དག་མཐོང་ནས་ངོ་མཚར་དུ་གྱུར། རྨད་དུ་གྱུར་ཏེ། གུས་པར་བསྒྲིམས་པས་ཚམ་ཚོམ་མེད་པར་ 23a ༄#། །གཞོན་ནུ་བསོད་ནམས་སྟོབས་ལྷའི་སེངྒེའི་ཁྲི་ལ་བཞུགས་སུ་གསོལ་ནས། བཀུར་སྟི་ཆེན་པོས་རྒྱལ་སྲིད་ཀྱི་དབང་བསྐུར་བས་དབང་བསྐུར་རོ། །དགེ་སློང་དག།་དབང་བསྐུར་མ་ཐག་ཏུ་གཞོན་ནུ་བསོད་ནམས་སྟོབས་ཀྱི་ལུས་ལས་སྣང་བ་གང་གིས་ཉི་མའི་དཀྱིལ་འཁོར་གྱི་འོད་མེད་པར་བྱས་ཏེ། ཐད་ཀར་དཔག་ཚད་གཅིག་ཁོར་ཁོར་ཡུག་ཁྱབ་པ་དེ་ལྟ་བུའི་ལྷའི་འོད་བྱུང་བར་གྱུར་ཏོ། །དེ་ནས་དེའི་མིང་གཞོན་ནུ་བསོད་ནམས་སྟོབས་ཞེས་བྱ་བ་དེ་མེད་པར་གྱུར་ནས། མིང་རྒྱལ་པོ་སྣང་བྱེད་ཅེས་བྱ་བར་གྱུར་ཏོ།། དེ་ནས་ལ་ལས་ནི་རྒྱལ་པོ་བསོད་ནམས་སྟོབས་ཞེས་བྱ་བར་ཤེས་སོ། །ལ་ལས་ནི་རྒྱལ་པོ་སྣང་བྱེད་ཅེས་བྱ་བར་ཤེས་སོ། །དེ་ནས་རྒྱལ་པོ་བསོད་ནམས་སྟོབས་ལྷ་དང ། མིའི་འབྱོར་པ་དེ་དག་དང་བཅས་པར་རྒྱལ་པོའི་ཕོ་བྲང་འཁོར་དེར་སོང་ངོ ། །དེ་ནས་བརྒྱ་བྱིན་ལ་སོགས་པ་ལྷ་རྣམས་ཀྱིས་རྒྱལ་པོ་བསོད་ནམས་སྟོབས་ལ་ཚུལ་བཞིན་དུ་ཡང་དག་པར་རིམ་གྲོ་བྱས་ནས་དོང་ངོ ། །རྒྱལ་པོ་བསོད་ནམས་སྟོབས་ཀྱང་རྒྱལ་པོའི་ཕོ་བྲང་དེ་ན་རྒྱལ་པོ་བྱེད་དེ། འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་པོས་གང་བ་དང ། རྩོད་པ་དང ། འཐབ་པ་ཞི་བ་དང ། འཁྲུག་པ་དང ། ནང་འཁྲུག་དང ། ཆོམ་རྐུན་དང ། ནད་དང ། མུ་གེ་མེད་པ་དང ། འབྲས་སཱ་ལུ་དང ། བུ་རམ་ཤིང་ 23b དང།་བ་ལང་དང ། མ་ཧེ་དང་ལྡན་པར་འདུག་སྟེ། བུ་གཅིག་པ་སྡུག་པ་ལ་བྱ་བ་བཞིན་དུ་ཆོས་བཞིན་དུ་རྒྱལ་སྲིད་བསྐྱངས་སོ། །དེའི་མེ་ཏོག་དང ། འབྲས་བུའི་ཤིང་རྣམས་ནི་རྟག་ཏུ་རྒྱས་སོ། །ལྷའང་དུས་དུས་སུ་ཆར་པའི་རྒྱུན་ལེགས་པར་འབེབས་ཏེ། འབྲུ་ཤིན་ཏུ་ལེགས་པར་གྱུར་ཏོ། །དེ་ནས་རེ་ཞིག་ན་གཏམ་དེ་དེའི་ཕུ་བོ་དེ་དག་གིས་ཐོས་སོ། །ཐོས་ནས་ཀྱང་དེ་དག་མཆོག་ཏུ་ཡ་མཚན་དུ་གྱུར་ཏེ། གཅིག་ལ་གཅིག་སྨྲས་པ། བསོད་ནམས་སྟོབས་ཀྱིས་ནི་འདི་ལྟར་དམ་བཅས་པ་དང ། དབང་ཕྱུག་དང ། རྒྱུ་རྣམ་པ་གཉིས་ཀྱིས་བདག་ཅག་ཕམ་པར་བྱས་ཏེ། གང་གི་ཕྱིར་དེ་བསོད་ནམས་དག་གིས་དེ་རྒྱལ་སྲིད་ཀྱི་དབང་ཕྱུག་ཆེན་པོའི་བདག་པོར་གྲུབ་པར་བྱས་པའི་ཕྱིར་རོ། །ཚུར་ཤོག་།བདག་ཅག་ལ་དེ་མ་རྨས་པའི་སྔ་རོལ་དུ་བདག་ཅག་ཟད་པར་དོང་སྟེ། རྒྱལ་པོ་བསོད་ནམས་སྟོབས་ཡང་དག་པར་མཉེས་པར་བྱའོ། །ཞེས་བྱས་སོ། །དེ་ནས་རྒྱལ་པོ་བསོད་ནམས་སྟོབས་ག་ལ་འདུག་པ་དེ་ལོགས་སུ་དོང་ངོ ། །དོང་ནས་རྒྱལ་པོ་བསོད་ནམས་སྟོབས་ལ་རྒྱལ་བར་གྱུར་ཅིག་།སྐུ་ཚེ་རིང་བར་ཤོག་ཅིག་ཅེས་བྱས་ནས། ཕྱོགས་གཅིག་ཏུ་འཁོད་དོ། ། ཕྱོགས་གཅིག་ཏུ་འཁོད་ནས་རྒྱལ་པོ་བསོད་ནམས་སྟོབས་ལ་སྨྲས་པ། ལྷ།་ལེགས་སོ། །ལེགས་སོ། །ཁྱོད་ཀྱིས་དམ་བཅས་པ་ནི་བརྟན་པ་ལགས་སོ། །འདི་ལྟར་ཁྱོད་ཀྱིས་ 24a ༄#། །བདག་ཅག་དམ་བཅས་པ་དང ། དབང་ཕྱུག་གིས་ཕམ་པར་བྱས་ཏེ། གང་གི་ཕྱིར་བསོད་ནམས་དག་གིས་ཁྱོད་ཀྱིས་དོན་བྱས་པ་བཞིན་དུ་རྒྱལ་སྲིད་ཆེན་པོའི་དབང་ཕྱུག་གི་བདག་པོར་བཅུག་པའི་ཕྱིར་རོ། །དེ་ནས་རྒྱལ་པོ་བསོད་ནམས་སྟོབས་གུས་པ་དང་བཅས་པས་ལ་གོར་དུ་སེངྒེའི་ཁྲི་ལས་ལངས་ནས་ཕུ་བོ་དེ་དག་ལ་ལེགས་པར་བསྟི་སྟང་བྱས་ཏེ། ཆེ་བ་ལ་འོས་པའི་ཁྲི་དག་ལ་འདུག་ཏུ་བཅུག་ནས། དེ་དག་གིས་དད་པ་ཕུལ་ཏེ་ཕྱིར་སེངྒེའི་ཁྲི་ལ་འདུག་གོ་།འདུག་ནས་ཕུ་པོ་དེ་དག་ལ་སྔོན་བྱུང་བའི་གཏམ་གྱིས་ཡང་དག་པར་གློད་པ་ངེས་པར་བྱེད་པས་ཕྱིར་མགུ་བར་བྱས། བཀུར་སྟི་ཆེན་པོས་བཀུར་སྟི་བྱས་ནས་ལོངས་སྤྱོད་ཆེན་པོ་དག་གི་བགོ་སྐལ་བྱིན་ནོ། །དེ་ནས་ཕྱི་ཞིག་ན་ཕུ་བོ་དེ་དག་དང ། སྐྱེ་བོ་མང་པོ་དེ་དག་བསོད་ནམས་དག་ལ་གཟུད་པར་འདོད་ནས་འཁོར་ཆེན་པོ་འདུས་པ་རྣམས་ལ་འདི་སྐད་ཅེས་སྨྲས་སོ། །བསོད་ནམས་མིན་པས་མི་བཟད་པའི། །སྡུག་བསྔལ་ཀུན་རྒྱས་དམྱལ་བར་འགྲོ། བསོད་ནམས་མིན་པས་བརླག་པ་ཡི། །དུད་འགྲོའི་སྐྱེ་གནས་མི་བཟད་འགྲོ། བསོད་ནམས་མིན་པས་བཀྲེས་སྐོམ་གྱིས། །ཤིན་ཏུ་གཟིར་བའི་ཡི་དྭགས་འགྲོ། །བསོད་ནམས་མིན་པས་རྟག་ཏུ་ནི། །ཤིན་ཏུ་སྡུག་བསྔལ་བྲན་དུ་འགྱུར། །བསོད་ནམས་མིན་པས་ལྐུགས་པར་འགྱུར། །བསོད་ 24b ནམས་མིན་པས་འོན་པར་འགྱུར། །བསོད་ནམས་མིན་པས་གླེན་པར་འགྱུར། །ཤེས་རབ་འཆལ་ཅིང་ཡིད་མི་བདེ། །བསོད་ནམས་མིན་པས་ལོག་པར་ཤེས། །བྱད་ངན་པོར་ཡང་དེ་བཞིན་འགྱུར། །བསོད་ནམས་མིན་པས་འཇིག་རྟེན་པ། །ཀུན་གྱིས་བརྙེས་པའི་རིགས་དམར་འགྱུར། །བསོད་ནམས་མིན་པས་སེམས་འཁྲུལ་དང ། །དེ་བཞིན་འཇིག་རྟེན་སྡང་བར་འགྱུར།། བསོད་ནམས་མིན་པས་དེ་བཞིན་སྨྱོ། །བསོད་ནམས་མིན་པས་དགྲ་རྣམས་འབྱུང ། །བསོད་ནམས་མིན་པས་དོན་རྣམས་ཀུན། །འབད་དེ་བརྩམས་པ་ཆུད་ཟར་འགྱུར། །དེ་བཞིན་བསོད་ནམས་མ་ཡིན་པས། །ལུས་ནི་རྩུབ་ཅིང་གོས་པར་འགྱུར། །བསོད་ནམས་མིན་པས་རྟག་ཏུ་ཡང ། །གཟི་བྱིན་མེད་ཅིང་མདངས་མེད་འགྱུར། །སེམས་མེད་པ་ཡི་དངོས་པོ་ཡང ། །བསོད་ནམས་མིན་པས་དགྲ་རུ་འགྱུར། །ཡི་དྭགས་ལྟོ་འཕྱེ་སྲིན་རྣམས་ཀྱང ། །བསོད་ནམས་མིན་པས་མྱུར་དུ་གསོད། །བསོད་ནམས་མིན་པས་ཕན་པའི་སྨན། །ཤིན་ཏུ་གནོད་པ་དག་ཏུ་འགྱུར། །བསོད་ནམས་མིན་པས་དབུལ་བར་འགྱུར། །བསོད་ནམས་མིན་པས་བརྙས་པར་འགྱུར། །བསོད་ནམས་མིན་པས་སྐྱེ་བོ་དག་།སྐུར་པ་རབ་འཇིགས་བཏབ་པར་འགྱུར། ། བསོད་ནམས་མིན་པས་རྟག་ཏུ་ནི། །འཁོར་དག་དང་ཡང་འབྱེ་བར་འགྱུར། །བསོད་ནམས་མིན་པས་མིག་མེད་འགྱུར། །བསོད་ནམས་མིན་པས་སྡུག་བསྔལ་འགྲོགས། །བསོད་ནམས་ 25a ༄#། །མིན་པས་ནད་མང་ཞིང ། །བསོད་ནམས་མིན་པས་གསོ་དཀར་འགྱུར། །བསོད་ནམས་མིན་པས་གཟུགས་མི་སྡུག་།བསོད་ནམས་མིན་པས་གདངས་མི་སྙན། །བསོད་ནམས་མིན་པས་ལག་སོར་རྡུམ། །ཐེང་པོ་དེ་བཞིན་ཚིག་མི་བཙན། །བསོད་ནམས་མིན་པས་རྒྱལ་པོ་དང ། །ཆོམ་རྐུན་མེ་ཡིས་ལོངས་སྤྱོད་བཤིག། །བསོད་ནམས་མིན་པས་མི་སྙན་ཐོས། །བསོད་ནམས་མིན་པས་རྟག་ཏུ་འཇིགས། །བསོད་ནམས་མིན་པས་འགྲོ་བ་ན། །ས་ནི་སྡོང་དུམ་ཚེར་མས་གང ། །ཇི་སྟེ་ལོངས་སྤྱོད་འདོད་པའི་མི། །མི་གླས་ཡང་ན་ཚོང་བྱེད་ཀྱང ། །བསོད་ནམས་མིན་པས་རྟག་ཏུ་ནི། །ཆུད་ཟ་དེ་ཡི་ནོར་མི་འགྱུར། །གང་དག་ཅི་ཡང་འཇིག་རྟེན་ན། །མི་དགའ་མི་སྡུག་མི་ཕན་གང་དེ་བཞིན་ལོག་པ་ལྟུང་བ་ཀུན། །འདི་དག་བསོད་ནམས་མིན་ལས་འགྱུར། །བསོད་ནམས་ཀྱིས་ནི་བསྲུང་བར་འགྱུར། །བསོད་ནམས་དག་གིས་བརྩོན་པར་འགྱུར། །བསོད་ནམས་ཀྱིས་ནི་ཚ་གྲང་སྐྱོབ། །ལོག་འབབ་ཆར་ཟློག་བསོད་ནམས་ཀྱིས། །བསོད་ནམས་འདོད་འཇོ་བ་བཞོན་ཡིན། །ཡིད་བཞིན་ནོར་བཟང་བསོད་ནམས་ཀྱིས། །བསོད་ནམས་དག་གིས་དཔག་བསམ་ཤིང ། །ཡིད་འོང་འདོད་ཀུན་འབྲས་བུ་སྨིན། །བསོད་ནམས་དག་གིས་བཟོད་པ་འཐོབ། །བསོད་ནམས་ཀྱིས་ནི་ཡིད་འོང་དཔལ། །བསོད་ནམས་དག་གིས་ཡིད་ 25b བརྟན་འགྱུར། །བསོད་ནམས་ཅན་ནི་མཐོ་རིས་སྐྱེ། །བསོད་ནམས་དག་གིས་གྲགས་པ་འཐོབ། །བསོད་ནམས་ཀྱིས་ནི་མང་ཐོས་འགྱུར། །རྒྱ་ཆེ་ཡིད་འོང་བསོད་ནམས་ཀྱིས། །བསོད་ནམས་དག་གིས་ཐོས་པ་འཛིན། །ནད་མེད་འཆི་བ་བསོད་ནམས་ཀྱིས། །བསོད་ནམས་ཀྱིས་ནི་འཆི་བདག་བཅོམ་།འཆི་བ་དག་མཆོག་ཏུ་འཇིགས་པ་ཡིས། །བསོད་ནམས་དག་གིས་འཇིགས་མི་འབྱུང ། །གཞལ་མེད་ཁང་གནས་ལྷ་རྣམས་ཀྱང ། །ལྷ་ཡི་བདེན་སྟོན་བསོད་ནམས་ལས། །སུམ་ཅུ་གསུམ་པ་བསོད་ནམས་ཀྱིས། །དེ་བཞིན་བསོད་ནམས་འཐབ་བྲལ་ལྷ། །དགའ་ལྡན་ལྷ་རབ་བསོད་ནམས་ཀྱིས། །འཕྲུལ་དགའ་དག་ཀྱང་དེ་བཞིན་ཏེ། །འདོད་པའི་དབང་ཕྱུག་བསོད་ནམས་ཀྱིས། །དབང་བྱེད་ལྷར་ཡང་དེ་བཞིན་འགྱུར། །བསོད་ནམས་དེ་བཞིན་ཚངས་པ་ཆེ། །ལྷ་རྣམས་བྱེ་བ་དག་གིས་རྗེད། །ཚངས་པའི་འཇིག་རྟེན་སྟོང་དག་གི། དབང་བྱེད་པ་ཡི་མངའ་བདག་འགྱུར། །བསོད་ནམས་དག་གིས་འདོད་དགུ་ཡི། །ཕུན་སུམ་ཚོགས་དགུ་རྟག་ཏུ་གནས། །སེམས་མེད་པ་ཡི་དངོས་པོ་ཡང ། །བསོད་ནམས་དག་གི་དབང་དུ་འགྱུར། །རྒྱལ་པོ་བསོད་ནམས་སྟོབས་ཀྱིས། ཚེ་འདི་དང་ཚེ་ཕྱི་མ་ཡང་དག་པར་སྟོན་པ་ཡིད་འཕྲོག་པའི་ཚིག་དེ་སྐད་ཅེས་བརྗོད་པ་ན། སྐྱེ་བོ་ཕལ་པོ་ཆེ་དེ་དག་བསོད་ནམས་ལ་བརྟེན་པར་གྱུར་ཏོ། །དེ་ནས་རྒྱལ་པོ་བསོད་ནམས་སྟོབས་ཀྱིས་སྐྱེ་བོ་ཕལ་པོ་ཆེ་དེ་དག་ལ་ཡང་ཤས་ 26a ༄#། །ཆེར་བསོད་ནམས་དག་ལ་གཅེས་སུ་འཛིན་པ་བསྐྱེད་པའི་ཕྱིར་ནམ་མཁའ་ལ་བལྟས་ཏེ། སེམས་བསྐྱེད་ནས་ཚིག་ཏུ་སྨྲས་པ། ཀྱེ་མ། བདག་ལ་རྒྱལ་པོའི་ཕོ་བྲང་འཁོར་འདིའི་ཕྱི་ནང་དུ་བཅས་པར་ལྷའི་རིན་པོ་ཆེ་སྣ་ཚོགས་ཀྱི་ཆར་དང ། གོས་ཀྱི་ཆར་རབ་ཏུ་འབབ་ཀྱང་ཅི་མ་རུང་ཞེས་བྱས་སོ། །དགེ་སློང་དག་།རྒྱལ་པོ་བསོད་ནམས་སྟོབས་ཀྱིས་སེམས་བསྐྱེད་མ་ཐག་ཏུ་ནམ་མཁའ་ལས་ལྷའི་གོས་ཆེ་བ་ལ་འོས་པ་རྣམ་པ་སྣ་ཚོགས་ཀྱི་ཆར་བབ་བོ། །དེའི་རྗེས་ལ་ལྷའི་མེ་ཏོག་ཡིད་དུ་འོང་བའི་ཆར་ཡང་བབ་བོ། །དེའི་རྗེས་ལ་ལྷའི་རིན་པོ་ཆེའི་ཆར་པ་བབ་སྟེ། རྒྱལ་པོའི་ཕོ་བྲང་འཁོར་དེ་དག་ཐམས་ཅད་རིན་པོ་ཆེ་སྣ་ཚོགས་ཀྱིས་ཁེབས་པར་གྱུར་ནས་ཙེར་ལྷང་ཞིང་འདུག་གོ། དེ་ནས་ལྷ་དང ། མི་རྣམས་དགའ་བར་བྱེད་པའི་བསོད་ནམས་དག་གི་རྣམ་པར་གཡོ་བའི་སྨད་དུ་བྱུང་བ་དེ་མཐོང་ནས། སྐྱེ་བོ་མང་པོ་དེ་དག་ཐམས་ཅད་མཆོག་ཏུ་ཡ་མཚན་དུ་གྱུར་ནས། བསོད་ནམས་དག་ལ་གཅེས་སུ་འཛིན་པ་ཡང་དག་པར་བསྐྱེད་དེ། དགའ་བར་གྱུར་ནས། ཀྱེ་མ།་ལྷ་བསོད་ནམས་སྟོབས་ཀྱི་བསོད་ནམས་དག་གི་ཆེ་བ་ཉིད་ཅེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་རེ་ཞིག་ན་སྐབས་ཀྱི་གཏམ་དེ་ཉི་འོག་གི་རྒྱལ་པོ་དག་གིས་ཐོས་སོ། །ཐོས་ནས་ཀྱང་དེ་དག་མཆོག་ཏུ་ཡ་མཚན་དུ་གྱུར་ 26b ནས།་བདག་ཉིད་ཆེན་པོ་དེ་ནི་བསོད་ནམས་ཀྱི་ཆེ་བར་གྲགས་པ་ཞིག་སྟེ། བསྙེན་བཀུར་བར་བྱ་བའི་འོས་སོ་ཞེས་ཟེར་ནས། ཐམས་ཅད་འདུས་ཏེ། དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚེགས་དང ། རྟ་པའི་ཚོགས་དང ། ཤིང་རྟའི་ཚོགས་དང ། དཔུང་བུ་ཆུང་གི་ཚོགས་རྣམས་གོ་བསྐོན་ནས་རྒྱལ་པོ་བསོད་ནམས་སྟོབས་ལ་ཕུ་དུད་བྱ་བའི་ཕྱིར་སོང་སྟེ། བཞོན་པ་དག་ལས་བབས་ནས་རྒྱལ་པོ་བསོད་ནམས་སྟོབས་ཀྱི་ཞབས་གཉིས་ལ་བཏུགས་ཏེ། ཐལ་མོ་སྦྱར་ནས་སྨྲས། ལྷ། ཁྱོད་ནི་བསོད་ནམས་ཀྱིས་ཆེ་བར་གྲགས་པ་ལགས་ཏེ། ཁྱོད་ཀྱིས་ནི་རྒྱལ་པོ་མཛོད་ཅིག་བདག་ཅག་ནི་ཞམ་འབྲིང་འཚལ་ལོ་ཞེས་བྱས་སོ། །དེ་ནས་རྒྱལ་པོ་བསོད་ནམས་སྟོབས་ཀྱིས་ཆེ་བ་ལ་འོས་པའི་རིན་པོ་ཆེ་དག་གིས་ཅི་འདོད་པར་ཡང་དག་པར་འཚེངས་པར་བྱས་ནས། འཁོར་དང་བཅས་པར་དགེ་བ་བཅུའི་ལས་ཀྱི་ལམ་ལ་བཀོད་དེ། རང་རང་གི་ཡུལ་དུ་བཀྱེའོ། །དེ་ནས་རིམ་གྱིས་གཏམ་དེ་རྒྱལ་པོ་གསལ་སྟོབས་ཀྱིས་ཐོས་སོ། །ཐོས་ནས་ཀྱང་ཐོག་མ་ཁོ་ནར་ཕོ་ཉ་བཏང་ནས་ཤིན་ཏུ་རིངས་པར་དཔུང་ཆེན་པོ་ཐམས་ཅད་དང་ཆས་ཏེ། བར་ཞིག་གིས་རྒྱལ་པོ་བསོད་ནམས་སྟོབས་ལ་ཕུ་དུད་བྱ་བའི་ཕྱིར་སོང་ནས་སྙིང་བུ་ལ་གདུང་པས་བརྒྱལ་ཏེ། མཆི་མས་བརྣངས་ཞིང་དུ་ཀ་ཕྱུང་ལ། མིག་མཆི་མས་ཀུན་ཏུ་གང་སྟེ། གླང་པོ་ཆེའི་རྒྱབ་ནས་བབས་ནས་ཚམ་ཚོམ་མེད་པར་རྒྱལ་པོ་བསོད་ནམས་སྟོབས་ 27a ༄#། །ཀྱི་མགུལ་ནས་འཁྱུད་དེ། མགོ་བོར་ཡང་བསྣམས་ནས་ཡུན་རིང་རབ་ཏུ་བརྟགས་ཏེ། སྨྲས་པ། བུ་གཞོན་ནུ། ང་ཅི་ཟེར་བ་ཤེས་པར་གྱིས་ཤིག། ང་ནི་ད་རྒས་ཤིང་འཁོགས་ལ་གཏུགས་ཏེ། རྒྱལ་སྲིད་ཀྱི་ཁུར་ཁྱེར་མི་ནུས་ཀྱི། རྒྱལ་སྲིད་ཀྱི་ཁུར་ལོང་ཞིག་ཅེས་སྨྲས་ནས། རྒྱལ་པོ་གསལ་སྟོབས་ཀྱིས་རང་གི་མགོ་ལས་དར་ཐོད་དང།་ཅོད་པན་དང ། དབུ་རྒྱན་ཕུད་དོ། །དེ་ནས་རིམ་གྱིས་རྒྱལ་པོ་བསོད་ནམས་སྟོབས་འྫམྦུའི་གླིང་ཐམས་ཅད་དུ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །དེས་འཛམ་བུའི་གླིང་ན་གནས་པའི་སྐྱེ་བོ་མང་པོ་ཐམས་ཅད་ཅི་འདོད་པར་གསེར་དང ། དངུལ་གྱིས་འཚེངས་པར་བྱས་ནས། དགེ་བ་བཅུའི་ལས་ཀྱི་ལམ་ལ་བཀོད་དོ། །དེའི་ཚེ་འཛམ་བུ་གླིང་འདི་ན་སུའང་དབུལ་པོའམ། ནད་པ་མེད་དོ། །འཛམ་བུ་གླིང་གི་མི་ཐམས་ཅད་བདེ་བར་གྱུར་ཏེ། དེ་ནད་མེད་ཅིང་སྟོབས་དང་ལྡན་པ་དང ། དབང་པོ་རྣམས་རྒྱས་པ་དང ། ཕྱུག་ཅིང་ནོར་མང་ལ་ལོངས་སྤྱོད་ཆེ་བ་དང ། ནོར་དང ། འཚོག་ཆས་མང་བ་དང ། བདོག་པ་མང་བ་དང ། ནོར་དང་འབྲུ་དང ། གསེར་དངུལ་དང ། མཛོད་དང ། བང་བ་རྣམས་ཀྱི་ཚོགས་མང་བར་གྱུར་ཏོ། །འཛམ་བུའི་གླིང་འདི་ཐམས་ཅད་ཀྱང་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་པོས་གང་བ་དང ། 27b རྩོད་པ་དང ། འཐབ་པ་ཞི་བ་དང ། འཁྲུག་པ་དང ། ནང་འཁྲུག་དང ། ཆོམ་རྐུན་དང ། ནད་དང ། མུ་གེ་མེད་པ་དང ། འབྲས་སཱ་ལུ་དང ། བུ་རམ་ཤིང་དང ། བ་ལང་དང ། མ་ཧེ་དང་ལྡན་པར་འདུག་སྟེ། ཚེར་མ་དང ། རྡོ་དང ། གསེག་མ་དང ། གྱོ་མོ་རྣམས་ནི་མེད་པར་གྱུར། མེ་ཏོག་དང ། འབྲས་བུའི་ཤིང་རྣམས་ནི་རྟག་ཏུ་རྒྱས་ཏེ། ལྷ་འང་དུས་དུས་སུ་ཆར་གྱི་རྒྱུན་ལེགས་པར་འབེབས་ཤིང ། འབྲུ་ཤིན་ཏུ་རྒྱས་པར་གྱུར་ཏོ། །དེ་ནས་སྐྱེ་བོ་མང་པོ་ཐམས་ཅད་ཀྱང་དགའ་བ་སྐྱེས་ནས། བསོད་ནམས་ལ་བརྟེན་པར་གྱུར་ཏེ། རྟག་ཏུ་སྦྱིན་པ་དག་བྱིན་ཞིང་བསོད་ནམས་དག་བྱེད་དོ། །བསྙེན་གནས་ལ་གནས་ཤིང་ཚུལ་ཁྲིམས་ཡང་དག་པར་བླངས་ཏེ་གནས་སོ། །དེ་ཚེ་འཛམ་བུའི་གླིང་དུ་མིར་གྱུར་པ་ལས་འཆི་བ་གང་ཡང་རུང་བ་དེ་གདག་ཐམས་ཅད་ལུས་དང་བྲལ་ནས། ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ཕལ་ཆེར་ནི་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེའོ། །རྒྱལ་པོ་བསོད་ནམས་སྟོབས་ཀྱང་སེམས་ཅན་དཔག་ཏུ་མེད་པ་རྣམས་ཚེ་འདི་དང ། ཕྱི་མའི་དོན་རྣམས་ལ་བཀོད་ནས། འཁོར་སེམས་ཅན་སྟོང་ཕྲག་དུ་མ་དག་དང་ཤ་འཕོས་ཏེ། ལྷའི་རིས་དགའ་ལྡན་དུ་སྐྱེས་སོ། །དགེ་སློང་དག། ཁྱེད་དེའི་ཚེ་དེའི་དུས་ན་རྒྱལ་པོ་བསོད་ནམས་སྟོབས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན། དེ་ལྟར་མི་བལྟ་ཡི། ང་ཉིད་དེའི་ཚེ་དེའི་དུས་ན་བྱང་ཆུབ་ 28a ༄#། །སེམས་དཔར་གྱུར་ཏོ། །རྒྱལ་པོ་བསོད་ནམས་སྟོབས་ཀྱི་ཡབ་རྒྱལ་པོ་གསལ་སྟོབས་ཞེས་བྱ་བ་གང་ཡིན་པ་དེ་ནི་རྒྱལ་པོ་ཟས་གཙང་མ་འདི་ཉིད་དེའི་ཚེ་དེའི་དུས་ན་རྒྱལ་པོ་གསལ་སྟོབས་ཞེས་བྱ་བར་གྱུར་ཏོ། །བཙུན་མོ་རྣམ་པར་སྤ་བ་ཞེས་བྱ་བར་གྱུར་པ་གང་ཡིན་པ་དེ་ནི། ལྷ་མོ་སྒྱུ་འཕྲུལ་ཆེན་མོ་འདི་ཉིད་ཡིན་ནོ། །གཞོན་ནུ་གཟུགས་དང་ལྡན་པ་གང་ཡིན་པ་དེ་ནི་སྲུའི་བུ་དགེ་སློང་དགའ་བོ་འདི་ཉིད་ཡིན་ནོ། །བརྩོན་འགྲུས་དང་ལྡན་པ་གང་ཡིན་པ་དེ་ནི། དགེ་སློང་གྲོ་བཞིན་སྐྱེས་བྱེ་བ་ཉི་ཤུ་པ་འདི་ཉིད་ཡིན་ནོ། །བཟོ་དང་ལྡན་པ་གང་ཡིན་པ་དེ་ནི་དགེ་སློང་མ་འགགས་པ་འདི་ཉིད་ཡིན་ནོ། །ཤེས་རབ་ཅན་གང་ཡིན་པ་དེ་ནི། དགེ་སློང་ཤཱ་རིའི་བུ་འདི་ཉིད་ཡིན་ནོ། །ལྷའི་དབང་པོ་བརྒྱ་བྱིན་གང་ཡིན་པ་དེ་ནི་དགེ་སློང་མོའུ་དགལ་གྱི་བུ་འདི་ཉིད་ཡིན་ནོ། །རྒྱལ་པོ་ཤི་འཕོས་ནས་བསོད་ནམས་སྟོབས་རྒྱལ་སར་ཞུགས་པ་གང་ཡིན་པ་དེ་ནི་བདུད་སྡིག་ཅན་འདི་ཉིད་ཡིན་ནོ། །སྔོན་གྱི་མི་དབུལ་པོ་གང་གི་ཁྱིམ་དུ་གཞོན་ནུ་བསོད་ནམས་སྟོབས་ཞུགས་པ་གང་ཡིན་པ་དེ་ནི། དགེ་སློང་སྒྲ་གཅན་འཛིན་འདི་ཉིད་ཡིན་ནོ། །རྒྱལ་པོས་མི་རྐང་ལག་མེད་པར་བྱས་ནས། གཞོན་ནུ་བསོད་ནམས་སྟོབས་ཀྱིས་རང་གི་ཁྲག་གིས་ཚིམ་པར་བྱས་ཤིང ། རང་གི་རྐང་ལག་གིས་བསྟུད་དེ། བདེན་པས་བསྐུལ་བས་སྔོན་གྱི་ཆ་ལུགས་ཇི་ལྟ་བ་བཞིན་དུ་བཞག་པ་ 28b གང་ཡིན་པ་དེ་ནི། །དགེ་སློང་ཀོཎྜི་ནྱ་འདི་ཉིད་དེའི་ཚེ་དེའི་དུས་ན་རྒྱལ་པོ་ལ་སྨན་ཆོས་གསོལ་བའི་མིར་གྱུར་ཏོ། །དགེ་སློང་དག། དེ་བས་ན་བསོད་ནམས་གང་ཡིན་པ་དེ་ནི་རྣམ་གྲངས་འདི་ཉིད་ཀྱིས་དུས་ཐམས་ཅད་དང ། རྣམ་པ་ཐམས་ཅད་དུ་སེམས་ཅན་ཐམས་ཅད་ཀྱི་ཉམས་སུ་དབེན་པ་ཡིན་པར་རིག་པར་བྱའོ། །དགེ་སློང་དག། དེ་བས་ན་འདི་སྐད་དུ་བསོད་ནམས་ལྟར་སེམས་ཅན་ཐམས་ཅད་ཀྱི་ཉམས་སུ་དབེན་པ་གཞན་ཅི་ཡང་ངས་ཡང་དག་པར་རྗེས་སུ་མ་མཐོང་ངོ་ཞེས་ང་སྨྲའོ་ཞེས་བཀའ་སྩལ་ནས། དགེ་སློང་དག་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་བསོད་ནམས་སྟོབས་ཀྱིས་ལས་ཅི་བགྱིས་ན། ལས་དེའི་རྣམ་པར་སྨིན་པས་འདི་ལྟར་རྒྱལ་པོ་དབང་ཆེ་བར་གྲགས་པར་གྱུར་ལ། ལྷ་དང ། མི་རྣམས་ཀྱི་རྒྱལ་པོར་སྩོལ་ཅིང ། ཅི་བསམ་པ་དང ། ཅི་འཚལ་བ་དེ་དག་ཐམས་ཅད་བསམས་པ་ཙམ་གྱིས་ནམ་མཁའ་ལས་འབབ་ཅིང་དེ་བཙས་བའི་ཚེའང་ས་གཡོས་པར་གྱུར་ཏེ། ལྷའི་རིན་པོ་ཆེའི་ཆར་པུས་མོ་ནུབ་པ་ཙམ་བབ་ལ། ལྷའི་སེངྒེའི་ཁྲི་ལ་བཞག་ཅིང ། ལྷའི་དབང་པོ་བརྒྱ་བྱིན་གྱིས་རང་ཉིད་ལག་དར་ཏེ། ལྷའི་གདུགས་བཟུང་ཞིང ། གཏེར་མི་ཟད་པའང་བྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག། རྒྱལ་པོ་བསོད་ནམས་སྟོབས་ཉིད་ཀྱིས་ཚོགས་རྙེད་ 29a ༄#། །ཅིང་རྐྱེན་གྲུབ་པ་དང་ལྡན་ཏེ། དབའ་རྒལ་བཞིན་དུ་འབྱུང་ལ། གདོན་མི་ཟ་བར་འོང་བའི་ལས་དེ་དག་བྱས་ཤིང་བསགས་པས་ན། དགེ་སློང་དག། བསོད་ནམས་སྟོབས་ཉིད་ཀྱིས་ལས་བྱས་ཤིང་བསགས་པ་དེ་དག་གཞན་སུ་ཞིག་གིས་ཉམས་སུ་མྱོང་བར་འགྱུར་ཏེ། དགེ་སློང་དག། ལས་བྱས་ཤིང་བསགས་པ་རྣམས་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་དང ། མེའི་ཁམས་དང ། རླུང་གི་ཁམས་ལ་རྣམ་པར་སྨིན་པར་མི་འགྱུར་ཏེ། ལས་དགེ་བ་དང ། མི་དགེ་བ་བྱས་ཤིང་བསགས་པ་རྣམས་ནི། ཟིན་པའི་ཕུང་པོ་དང ། ཁམས་དང ། སྐྱེ་མཆེད་རྣམས་འབའ་ཞིག་ལ་རྣམ་པར་སྨིན་པར་འགྱུར་རོ། །ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །དགེ་སློང་དག། སྔོན་བྱུང་བ་འདས་པའི་དུས་ན། སྟོན་པ་དེ་བཞིན་གཤེགས་པ།་དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གཞན་གྱིས་མི་ཐུབ་པ་ཞེས་བྱ་བ་འཇིག་རྟེན་དུ་བྱུང་སྟེ། ཕྱི་ཞིག་ན་ཡང་དག་པར་རྫོགས་པའི་སངས་ 29b རྒྱས་གཞན་གྱིས་མི་ཐུབ་པ། སངས་རྒྱས་ཀྱི་འཕྲིན་ལས་ཐམས་ཅད་མཛད་ནས། རྒྱལ་པོའི་ཕོ་བྲང་འཁོར་ཞིག་ཏུ། བུད་ཤིང་ཟད་པའི་མེ་བཞིན་དུ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་ཏེ། དེའི་སྐུ་གདུང་གི་མཆོད་རྟེན་རྒྱལ་པོ་ཞིག་གིས་བརྩིགས་ནས། དུས་སྟོན་གྱི་ལུགས་བཅས་སོ། །ཕྱིས་རེ་ཞིག་ན་མཆོད་རྟེན་གྱི་དུས་སྟོན་བྱེད་པའི་ཚེ། གཎྜི་འང་བརྡུངས། རྔའང་བརྡུང ། དུང་སྒྲིལ་མ་བུས་ནས་དགེ་སློང་ཞིག་འཁོར་ཕལ་པོ་ཆེའི་ནང་ན་འདུག་ཅིང ། ཕྱེད་ཡོལ་ཙམ་ན་སྲོག་ཆགས་འབུམ་ཕྲག་དུ་མ་འདུས་པ་དག་ལ་ཉིན་མོ་ཆོས་བསྟན་ཏོ། །དེའི་ཚེ་རྒྱལ་པོའི་ཕོ་བྲང་འཁོར་དེ་ན། རྒྱན་པོ་པ་རྒྱལ་བ་བོ་ཞེས་བྱ་བ་རྒྱན་པོ་ལ་ཤིན་ཏུ་ཞེན་པ་ཞིག་གནས་ཏེ། དེའི་ཆུང་མ་ནི་རྣམ་པར་རྒྱལ་མ་ཞེས་བྱའོ། །བུ་ནི་རྣམ་པར་རྒྱལ་བ་ཞེས་བྱའོ། །དེ་ནས་རེ་ཞིག་ན་རྒྱན་པོ་པ་རྒྱལ་བ་པོ་དེ་རས་ཟུང་གཅིག་གྱོན་པ་དང ། གདུགས་དང ། མཆིལ་ལྷམ་ཟུང་གཅིག་དང ། པ་ཎ་ལྔའི་འགྲོན་བུ་རྣམས་མ་གཏོགས་པར་ཅི་བདོག་པ་ཁྱིམ་ན་འདུག་པ་དང ། ཕྱི་རོལ་ན་འདུག་པ་ཐམས་ཅད་རྒྱན་སྐུགས་སུ་ཡལ་ནས་སྡུག་བསྔལ་དང ། ཡིད་མི་བདེ་བ་མི་བཟད་པས་གདུངས་ཏེ།་ཀྱི་ཧུད། བསོད་ནམས་མ་བྱས་པ་དང ། དབུལ་བ་ནི་ཐ་ཆད་མི་བཟད་པ་ཡིན་ནོ་ཞེས་སྨྲས་ནས། དབུགས་ཚ་བ་རྒྱུན་རིང་པོའི་ཤུགས་ཀྱང་ཕྱུང་སྟེ། མཆིལ་ལྷམ་གཉིས་ནི་བགོས། 30a ༄#། །པ་ཎ་ལྔ་དང ། གདུགས་ཀྱང་ཁྱེར་ནས། རྒྱན་པོའི་ས་ནས་སོང་སྟེ། མཐར་གྱི་ཆོས་ཉན་པ་གང་ན་འདུག་པའི་ཕྱོགས་དེར་ཕྱིན་ནས། དེ་འབྱོར་བ་དེ་ལྟ་བུ་དང།་སྐྱེ་བོ་ཕལ་པོ་ཆེ་ཐལ་མོ་སྦྱར་ཏེ། ཆོས་ཉན་པ་དེ་དག་མཐོང་ནས་དགའ་བ་ཆེན་པོ་སྐྱེས་ཏེ། རེ་ཞིག་ཆོས་ཇི་ལྟ་བུ་ཞིག་འཆད་པ་བལྟའོ་སྙམ་དུ་བསམས་ནས། དེ་ཉིད་ཀྱི་ཕྱོགས་གཅིག་ཏུ་གདུགས་བཞག་སྟེ། མཆིལ་ལྷམ་གཉིས་ཕུད་ནས། རྣ་བླགས་ཤིང་ཐལ་མོ་སྦྱར་ཏེ་ཆོས་ཉན་པའི་ཕྱིར་འདུག་གོ་།དེ་ནས་རེ་ཞིག་ན་ཆོས་སྨྲ་བས་ཚིགས་སུ་བཅད་པ་འདི་བརྗོད་དེ། བསོད་ནམས་བསགས་ན་བདེ་བར་འགྱུར། །དེ་ཕྱིར་མིས་ནི་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཞེས་སྨྲས་སོ། །དེ་ནས་ཚིགས་སུ་བཅད་པ་འདི་ཐོས་ནས། བསོད་ནམས་བསགས་པས་བདེ་བར་འགྱུར་བ་དེ་ནི་དེ་བཞིན་ཏེ། གང་གི་ཕྱིར་བདག་འདི་ཁོ་ན་ལྟར་མཆོག་ཏུ་མི་བཟད་པར་ཀོས་ཐག་ཅིང་འདུག་པ་ལས་ན། བདག་གི་ཚེ་སྔ་མ་ལ་གོར་མ་ཆག་པར་བསོད་ནམས་དག་མ་བྱས་ཀྱི་བདག་གིས་བསོད་ནམས་ཅུང་ཟད་ཅིག་བྱའོ་སྙམ་དུ་བསམས་སོ། །དེ་ནས་དེ་ལྟར་བསམས་ནས། བདག་ལ་ཅི་བདོག་པ་རྟོག་པ་ལ་ཞུགས་སོ། །རེ་ཞིག་ན་རས་ཟུང་གཅིག་གྱོན་པ་དང ། གདུགས་དང ། མཆིལ་ལྷམ་གཉིས་དང ། པ་ཎ་ལྔའི་འགྲོན་བུ་ 30b ལུས་པ་རྣམས་མཐོང་སྟེ། གཞན་ཐམས་ཅད་རྒྱན་སྐུགས་སུ་ཡལ་ནས། དེ་སེམས་པ་ལ་ཞུགས་ཏེ། ཅི་སྟེ། པ་ན་ལྔ་དང ། བླ་གོས་སྦྱིན་ན་ནི་ལྟོགས་ཏེ་འཆི་བར་ཡང་འགྱུར་ལ། འོན་ཏེ་མ་སྦྱིན་ན་བསོད་ནམས་མེད་པར་འཇིག་རྟེན་ཕ་རོལ་ཏུ་འགྲོ་དགོས་ཏེ། དེར་ཡང་དང་ཡང་དབུལ་བའི་སྡུག་བསྔལ་ཐམས་ཅད་དུ་གྱུར་ན། གང་གིས་ལྟོགས་ཏེ་འཆི་བར་ཡང་མི་འགྱུར་ལ།་བསོད་ནམས་ཀྱིས་བགོད་པར་ཡང་མི་འགྱུར་བའི་ཐབས་ཅི་ཡོད་སྙམ་སྟེ། ཡང་བསམས་པ། བསོད་ནམས་མེད་པར་འཇིག་རྟེན་ཕ་རོལ་ཏུ་འགྲོ་བ་བས་ནི་ལྟོགས་ཏེ་ཤི་ཡང་བླ་ཡི། པ་ཎ་ལྔ་དང ། བློ་གོས་འདི་དག་ནི་ངེས་པར་སྦྱིན་པ་སྦྱིན་པར་བྱའོ་སྙམ་སྟེ། དེ་དེ་སྙམ་དུ་སེམས་པའི་སྐབས་སུ་ཡང་ཆོས་སྨྲ་བས་ཚིགས་སུ་བཅད་པ་ཐ་དད་པར་འདི་བརྗོད་དེ། བསོད་ནམས་དལ་ནས་བྱེད་ན་ནི། །སྡིག་ལ་མངོན་པར་དགའ་བར་འགྱུར། །དེའི་ཕྱིར་དགེ་བ་སྨྱུར་ཏེ་བྱ། །སྡིག་པ་ལས་ནི་སེམས་ཀྱང་བཟློག། ཅེས་སྨྲས་སོ། །དེ་ནས་དེས་ཚིགས་སུ་བཅད་པ་འདི་ཐོས་ནས་བསམས་པ། བསོད་ནམས་སྨྱུར་ཏེ་བྱའོ་ཞེས་བཤད་པས་ན། ལ་གོར་དུ་སྦྱིན་པ་སྦྱིན་པར་བྱའོ་སྙམ་མོ། །དེ་ནས་རྒྱན་པོ་པ་དབུལ་བའི་སྡུག་བསྔལ་གྱིས་ཉམ་ཐག་པ་དེ་དད་པའི་ཤུགས་དྲག་པོས་སེངྒེའི་ཁྲི་ལ་ཆོས་སྨྲ་བ་འདུག་པའི་སྤྱི་བོའི་སྟེང་དུ་གདུགས་བཟུང་ནས། མཆིལ་ལྷམ་གཉིས་རྐང་པའི་དྲུང་དུ་བཞག་སྟེ། པ་ཎ་ལྔའི་འགྲོན་བུ་དེ་ 31a ༄#། །དག་གིས་ཆོས་སྨྲ་བའི་རྐང་པ་ལ་གཏོར་ནས། རང་གི་ལུས་ལ་བླ་གོས་ཕུད་དེ་ཆོས་སྨྲ་བའི་རྐང་པ་ལ་བཀབ་ནས། བ་སྤུ་ཐམས་ཅད་ཟིང་ཞེས་བྱས་ནས་དད་པར་གྱུར་ཏེ། རྐང་པ་གཉིས་ལ་གཏུགས་ནས། དད་པའི་ཤུགས་དྲག་པོས་སྨོན་ལམ་འདེབས་པ་ལ་ཞུགས་ཏེ། དགེ་བའི་རྩ་བ་དང ། སེམས་བསྐྱེད་པ་དང ། ཆོས་ཀྱི་ཕྱིར་སྦྱིན་པ་ཡོངས་སུ་བཏང་བ་འདིས་ན་བདག་ཚེ་འདི་ཉིད་ཕན་ཆད་དབུལ་པོར་མ་གྱུར་ཅིག་།སྐྱེ་བ་ཐམས་ཅད་དུ་ཡང་བསོད་ནམས་ཀྱིས་ཆེ་བར་གྲགས་པར་གྱུར་ཅིག། ལྷ་དང ། མི་རྣམས་ཀྱིས་ཀྱང་བདག་རྒྱལ་པོར་བཅུག་པར་གྱུར་ཅིག། ཅི་བསམས་པ་དང ། ཅི་འདོད་པ་དེ་དག་ཐམས་ཅད་ནམ་མཁའ་ལས་འགྲུབ་པར་གྱུར་ཅིག། བདག་བཙའ་བ་ནའང་ངོ་མཚར་དང ། རྨད་དུ་བྱུང་བ་མང་པོ་དག་འབྱུང་བར་གྱུར་ཅིག་།གཏེར་མི་ཟད་པའི་རིན་པོ་ཆེ་མང་པོ་དང ། རིན་པོ་ཆེ་སྣ་ཚོགས་ཀྱིས་ལེགས་པར་ཡོངས་སུ་གང་བ་དག་ཀྱང་འབྱུང་བར་གྱུར་ཅིག་ཅེས་དེས་དེ་ལྟར་སྨོན་ལམ་བཏབ་པའི་སྐབས་སུ། ཆོས་སྨྲ་བས་ཀྱང ། ཁ་སྟོན་དུ་ཡོངས་སུ་བསྔོ་བ་བྱས་ཏེ། འཁོར་ཐམས་ཅད་དོང་ངོ ། །རྒྱན་པོ་པ་རྒྱལ་བ་པོའང་ཆོས་ཀྱི་ཕྱིར་སྦྱིན་པ་དེ་ཉིད་ཡིད་ལ་སེམས་ཤིང་རས་གཅིག་པུ་གྱོན་བཞིན་དུ་བདག་གི་ཁྱིམ་དུ་སོང་ནས། ཆུང་མ་དང ། བུས་མཐོང་ངོ ། །དེ་ནས་ཆུང་མ་དང ། བུས་བསམས་པ། འདིས་ག་ཤེད་དུ་ 31b བླ་གོས་ཀྱང་རྒྱན་སྐུགས་སུ་ཡལ་བར་བྱས་ཞིག་གུ་སྙམ་སྟེ། མི་དགའ་བར་གྱུར་ནས་དེ་ནི་བདག་ཅག་གཉིས་ལུས་སུ་ཟད་དོ། །བདག་ཅག་གཉིས་ཀྱང་ཡལ་བར་བྱེད་དུ་འོང་གི་འདོང་ངོ་ཞེས་སྨྲས་སོ། །དེ་ཡང་ངོ་ཚ་ནས་བདག་ནི་དབུལ་བའི་ཉེས་པས་འདི་ལྟར་སྨ་བབ་བོ་སྙམ་བསམས་ནས། ཚིགས་སུ་བཅད་དེ་སྨྲས་པ། ཅི་ཞིག་སྡུག་བསྔལ་དབུལ་བ་སྡུག་བསྔལ་ཡིན།། ཅི་ཞིག་ཤིན་ཏུ་སྡུག་བསྔལ་དབུལ་དེ་ཉིད། །དབུལ་བ་དག་ནི་ཤི་བ་དང་ཡང་མཚུངས། །བདག་ནི་ཤི་བ་འདམ་གྱི་དབུལ་བ་མིན། །ཞེས་སྨྲས་ནས། དབུགས་ཚ་བ་རྒྱུན་རིང་པོའི་ཤུགས་ཕྱུང་སྟེ། ཅང་མི་ཟེར་བར་འདུག་གོ། དེ་ནས་དེའི་ཁྱིམ་གྱི་ར་བ་ན་ཁྲོན་པ་ཞིག་ཡོད་དེ། དེའི་ཆུང་མས་ཆུ་བཅུ་བའི་ཕྱིར་བུ་མ་པ་ཐག་པས་བཏགས་ནས་དེའི་ནང་དུ་བཏང་སྟེ། ཆུ་ཡར་དབྱུང་སྙམ་པ་དང ། རེ་ཞིག་ན་ཡང་དབྱུང་བར་མ་ནུས་ནས། དེས་རྒྱལ་བ་པོ་ལ། ཇོ་བོ། བུམ་པ་འདི་ཡར་དབྱུང་བར་མི་ནུས་ན་ཚུར་སྤྱོན་ཏེ། གཟིགས་ཞེས་བོས་སོ། །དེ་ནས་དེས་ཀྱང་ཡར་དབྱུང་བར་བརྩམས་སོ། །རེ་ཞིག་ན་དེས་ཀྱང་ཡར་དབྱུང་བར་མ་ནུས་ནས། དེ་གཉིས་ཀྱིས་བུ་ལ་བོས་སོ། །དེ་ནས་མི་གསུམ་ཆར་གྱིས་ཤ་ཐང་པགས་རལ་ཏེ་འབད་པ་ཆེན་པོས་དེའུ་མ་ཕྱིན་ཏེ་ཕྱིན་ཏོ། །རེ་ཞིག་ན་བལྟས་ན་བུམ་པ་དེའི་འོག་ན་ཟངས་ཟུང་ལྔ་གསེར་དངུལ་གྱིས་ཡོངས་སུ་གང་བ་ཐོགས་ཤིང་འདུག་པ་མཐོང་སྟེ། དེ་ནས་རྒྱན་པོ་པ་རྒྱལ་བ་པོས་ཚེ་ 32a ༄#། །འདིའི་སྦྱིན་པའི་འབྲས་བུ་ཤིན་ཏུ་རྨད་དུ་བྱུང་བ་དེ་མཐོང་ནས་ཡ་མཚན་གྱིས་མིག་རྒྱས་ཏེ། སྙིང་རབ་ཏུ་དགའ་ནས་ཚིགས་སུ་བཅད་དེ་སྨྲས་པ། ཀྱེ་མ་ཉེས་པ་ཀུན་སྤངས་པ། །ཡོན་ཏན་ངོ་བོ་ཉིད་ཀྱི་ཞིང ། །ད་ལྟར་བདག་གིས་ས་བོན་བཏབ། །ད་ལྟར་ཉིད་དུ་འབྲས་བུར་སྨིན། །ཅེས་སྨྲས་སོ། །དེའི་ཆུང་མ་དེའང་ཡ་མཚན་གྱིས་མིག་རྒྱས་ཏེ་སྨྲས་པ། ཇོ་བོ། འདི་ཅི་ཞིག་ལ་དགོངས་ཏེ་གསུངས། དེས་སྐབས་འདི་རྒྱས་པར་བསྙད་དོ། །དེ་ནས་དེས་ཚེ་འདི་ཉིད་ལ་བསོད་ནམས་དག་གིས་འབྲས་བུ་མཆོག་ཏུ་ཡིད་དུ་འོང་བ་སྨིན་པའི་རྨད་དུ་བྱུང་བ་དེ་མཐོང་ནས་ཡ་མཚན་དུ་གྱུར་ཏོ། །གཏམ་དེའང་གཅིག་ནས་གཅིག་ཏུ་ཐོས་པས། རྒྱལ་པོའི་ཕོ་བྲང་འཁོར་དེ་དག་ཀུན་ཏུ་གྲགས་སོ། །དེ་ཐོས་པས་སྐྱེ་བོ་ཕལ་པོ་ཆེ་ངོ་མཚར་དུ་གྱུར་ཅིང་རྨད་དུ་གྱུར་ནས། ཕན་ཚུན་དུ། ཀྱེ་མ། ངོ་མཚར་ཏོ། །ཀྱེ་མ། བསོད་ནམས་དག་གིས་ཆེ་བ་ཉིད་ཅེས་འཛེར་ཏོ། །དེ་ནས་གློ་བུར་དུ་ཕྱུག་ཅིང་ནོར་མང་ལ་ལོངས་སྤྱོད་ཆེ་བར་གྱུར་ཏེ། བསོད་ནམས་ཀྱི་འབྲས་བུ་མངོན་སུམ་དུ་མཐོང་ནས་དེས་སངས་རྒྱས་དང ། ཆོས་དང ། དགེ་འདུན་རྣམས་ལ་དད་པ་དྲག་པོས་ཤས་ཆེར་བཀུར་སྟི་བྱས་སོ། །དེ་ནས་དེ་ཉིན་གཅིག་བཞིན་དུ་དེ་བཞིན་གཤེགས་པའི་མཆོད་རྟེན་ལ་མཆོད་པ་རྒྱ་ཆེར་བྱེད་དོ། །ཆོས་ཀྱང་ཉན་ཏོ། །དགེ་འདུན་གྱིས་བསྐོས་པའི་དགེ་སློང་དག་ཀྱང་ཉིན་ 32b གཅིག་བཞིན་དུ་ཁ་ཟས་བཟང་པོས་ཡང་དག་པར་ཚིམ་པར་བྱེད་དོ། །དགེ་སྦྱོང་དང ། བྲམ་ཟེ་དང ། བཀྲེན་པ་དང ། ནད་པ་དང ། སློང་བ་གཞན་དག་ཀྱང་ནོར་གྱིས་ཅི་འདོད་པར་ཡང་དག་པར་འཚེངས་པར་བྱེད་དོ། །གཙུག་ལག་ཁང་ཆེན་པོ་ཡོ་བྱད་ཐམས་ཅད་ཀྱི་ཡོངས་སུ་གང་བའང་བྱེད་དུ་བཅུག་སྟེ། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་ནས། དེའི་གྲགས་པས་རྒྱལ་པོའི་ཕོ་བྲང་འཁོར་དེ་ཀུན་ཏུ་རྒྱས་པར་གྱུར་ཏོ། །ཕྱིས་རེ་ཞིག་ན་རྒྱལ་པོའི་ཕོ་བྲང་འཁོར་དེའི་རྒྱལ་པོ་བུ་མེད་པར་དུས་ལས་འདས་སོ། །དེ་ནས་གྲོང་ཁྱེར་གྱི་མི་དང ། བློན་པོ་རྣམས་ཀྱིས་རྒྱན་པོ་བ་རྒྱལ་བ་པོ་བསོད་ནམས་ཀྱིས་ཆེ་བར་གྲགས་པར་ཤེས་ནས་རྒྱལ་པོར་བཅུག་གོ་།དེ་ནས་དེའི་མིང་རྒྱན་པོ་བ་རྒྱལ་བ་པོ་ཞེས་བྱ་བ་གང་ཡིན་པ་དེ་ནི་མེད་པར་གྱུར་ཏེ། རྒྱལ་པོ་རྒྱལ་བ་པོ།་རྒྱལ་པོ་རྒྱལ་བ་པོ་ཞེས་བྱ་བར་གྱུར་ཏོ། །དེ་ནས་རྒྱལ་པོ་རྒྱལ་བ་པོས་ཚེ་དེ་ཉིད་ལ་བསོད་ནམས་དག་གི་རྣམ་པར་སྨིན་པའི་འབྲས་བུ་མཆོག་ཏུ་ཡིད་དུ་འོང་བ་མཐོང་ནས་དད་པ་སྐྱེས་ཏེ།་ཤས་ཆེར་བསོད་ནམས་ལ་བརྟེན་པར་གྱུར་ཏོ། །དེ་རྒྱུན་མི་འཆད་པར་སྦྱིན་པ་དག་བྱིན་ཞིང ། བསོད་ནམས་དག་བྱེད་དེ། ཚུལ་ཁྲིམས་ཡང་དག་པར་བླངས་ནས་གནས་སོ། ། བཙུན་མོའི་འཁོར་དང ། བློན་པོ་དང ། གྲོང་ཁྱེར་གྱི་མི་དང ། ཡུལ་གྱི་མི་དང ། སྐྱེ་བོའི་ཚེགས་གཞན་དག་ཀྱང་བསོད་ནམས་དག་ལ་ཡང་དག་པར་བཙུད་དོ། །ཕྱི་ཞིག་ན་རྒྱལ་པོ་ 33a ༄#། །རྒྱལ་བ་པོ་འཆི་བའི་ཆོས་དང་ལྡན་པར་གྱུར་ནས། གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེས་ཏེ། ལྷའི་རྒྱལ་པོ་དབང་བྱེད་ཀྱི་བུར་སྐྱེས་སོ། །དེ་སྐྱེས་པ་ན་ནམ་མཁའ་ལས་ལྷའི་རིན་པོ་ཆེའི་ཆར་དང ། གོས་ཀྱི་ཆར་རྣམ་པར་མཛེས་པ་བབ་བོ། །དེའི་ལུས་ལས་ཀྱང་གང་གིས་དབང་བྱེད་ཀྱི་ཕོ་བྲང་དེ་དག་ཐམས་ཅད་སྣང་བར་འགྱུར་བ་དང ། དབང་བྱེད་ཀྱི་ལྷ་གཞན་དག་གི་འོད་ཀྱང་འོད་མེད་པར་འགྱུར་བ་དེ་ལྟ་བུའི་འོད་བྱུང་བར་གྱུར་ཏོ། །དེའི་བསོད་ནམས་དག་གི་འབྲས་བུ་རྣམ་པར་སྨིན་པ་ངོ་མཚར་རྨད་དུ་བྱུང་བ་དེ་མཐོང་ནས། གཞན་འཕྲུལ་དབང་བྱེད་ཀྱི་ལྷ་རྣམས་མཆོག་ཏུ་ཡ་མཚན་དུ་གྱུར་ཏོ། །དགེ་སློང་དག་།ཁྱེད་དེའི་ཚེ་དེའི་དུས་ན་རྒྱན་པོ་པ་རྒྱལ་བ་པོར་གྱུར་བ་དེ་གཞན་ཞིག་ཡིན་སྙམ་དུ་འཛིན་ན་དེ་དེ་ལྟར་མི་བལྟ་ཡི། རྒྱལ་པོ་བསོད་ནམས་སྟོབས་དེ་ཉིད་དེའི་ཚེ་དེའི་དུས་ན། རྒྱན་པོ་པ་རྒྱལ་བ་པོར་གྱུར་ཏོ། །དམ་པའི་ཆོས་ཐོས་ནས་སེམས་དད་པར་གྱུར་པ་དེས་ཆོས་སྨྲ་བ་ལ་གདུགས་དང ། མཆིལ་ལྷམ་གཉིས་དང ། བླ་གོས་དང ། པ་ཎ་ལྔའི་འགྲོན་བུ་རྣམས་ཕུལ་བ་གང་ཡིན་པའི་ལས་དེའི་རྣམ་པར་སྨིན་པས་ཚེ་དེ་ཉིད་ལ་གཏེར་ལྔའང་བྱུང་ངོ ། །རྒྱལ་སྲིད་ཀྱི་དབང་ཕྱུག་གི་བདག་པོར་ཡང་བཅུག་གོ། ལས་དེ་ཉིད་ཀྱི་རྣམ་པར་སྨིན་པས་ལན་སུམ་ཅུ་རྩ་དྲུག་ 33b གི་བར་དུ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་ཅུ་རྩ་དྲུག་གི་བར་དུ་འཕྲུལ་དགའ་བ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་ཅུ་རྩ་དྲུག་གི་བར་དུ་དགའ་ལྡན་པ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་ཅུ་རྩ་དྲུག་གི་བར་དུ་འཐབ་བྲལ་བ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་ཅུ་རྩ་དྲུག་གི་བར་དུ་སུམ་ཅུ་རྩ་གསུམ་པ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་ཅུ་རྩ་དྲུག་གི་བར་དུ་རྒྱལ་ཆེན་བཞི་པ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་བརྒྱ་ཕྲག་དུ་མར་འཁོར་ལོས་བསྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་གྱུར་ཏོ། །དེའི་རིན་པོ་ཆེ་སྣ་བདུན་ནི་རྣམ་པ་འདི་ལྟ་བུ་དག་ཡིན་ཏེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང།་རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བདུན་པ་སྟེ་བློན་པོ་རིན་པོ་ཆེ་རྣམས་སོ། །དེའི་བུ་སྟོང་ཐམ་པ་ཡོད་དེ། དཔའ་བ་དང།་རྟུལ་ཕོད་པ་དང ། ཡན་ལག་མཆོག་གི་གཟུགས་དང་ལྡན་པ་དང ། ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་གོ་།དེ་ནས་ས་ཆེན་པོ་རྒྱ་མཚོའི་མཐས་གཏུགས་པ་འདི་ 34a ༄#། །ཉིད་མ་ལུས་པར་གནོད་པར་སྔོ་བ་མེད་ཅིང་འཚེ་བ་མེད་དེ། ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། གང་གིས་བདག་ཉིད་ཆེན་པོ་ཡི། །བདག་པོར་འགྱུར་བའི་རྒྱུ་འདི་ཡིན། །སངས་རྒྱས་ཕན་འདོགས་དེ་དག་གིས། །འཇིག་རྟེན་དུ་ནི་འདི་གསུངས་སོ། །རྫུ་འཕྲུལ་རྒྱ་ཆེན་འདི་དག་དང ། །ངོ་མཚར་འདི་དག་ཐོས་གྱུར་ན། །མཁས་དང་ནག་པོའི་རིགས་སྐྱེས་པའང ། །སུ་ཞིག་དད་པར་བྱེད་མི་འགྱུར། །དེ་ཕྱིར་བདག་ལ་ལེགས་འདོད་ཅིང ། །བདག་ཉིད་ཆེན་པོ་འདོད་པས་འདིར། །སངས་རྒྱས་བསྟན་པ་དྲན་བྱས་ལ། །དམ་པའི་ཆོས་ནི་བླ་མར་བྱ། །དགེ་སློང་དག། དེ་བས་ན་དམ་པའི་ཆོས་ལ་བཀུར་སྟིར་བྱའོ། །བླ་མར་བྱའོ། །རི་མོར་བྱའོ། །མཆོད་པ་བྱའོ། །ཞེས་དེ་ལྟར་བསླབ་པར་བྱའོ། །དགེ་སློང་དག། དམ་པའི་ཆོས་ལ་བཀུར་སྟིར་བྱེད། བླ་མར་བྱེད། རིམ་གྲོ་བྱེད། མཆོད་པ་བྱེད་ཅིང་རྟེན་ཏེ་གནས་པར་བྱའོ། །ཞེས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བསོད་ནམས་སྟོབས་ཀྱི་རྟོགས་པ་བརྗོད་པ་རྫོགས་སོ།། །། 34b རྒྱ་གར་གྱི་མཁན་པོ་ཛི་ན་མི་ཏྲ་དང ། ཞུས་ཆེན་གྱི་ལོ་ཙཱ་བ་བནྡེ་དེ་བ་ཙནྡྲས་བསྒྱུར་ཏེ་གཏན་ལ་ཕབ་པའོ།། |