H348

<head>
<link rel="stylesheet" type="text/css" href="../sub/style.css">
<link rel="stylesheet" type="text/css" href="../sub/cssstyles.css" />
<link rel="stylesheet" type="text/css" href="../sub/w3.css" />

<style>
.button {
  display: inline-block;
  border-radius: 4px;
  background-color: #08088a;
  border: none;
  color: #FFFFFF;
  text-align: center;
  font-size: 12px;
  padding: 10px;
  width: 130px;
  transition: all 0.5s;
  cursor: pointer;
  margin: 5px;
  border-radius: 12px;
}

.button span {
  cursor: pointer;
  display: inline-block;
  position: relative;
  transition: 0.5s;
}

.button span:after {
  content: '\00bb';
  position: absolute;
  opacity: 0;
  top: 0;
  right: -20px;
  transition: 0.5s;
}

.button:hover span {
  padding-right: 25px;
}

.button:hover span:after {
  opacity: 1;
  right: 0;
}
</style>
</head>
<div style="position: fixed; top: 0px; left: 0px; width: 150px; height: 60px; background-color: white">
<img src="../sub/logo.png" alt="rKTs" style="width:135px;height:60px;">
</div>

﻿
<table>
<tr height=50>
<tr>
<td width=150 valign=top>

<button  class="button" style="vertical-align:middle"  onclick="window.close();">Close window</button>
<td>


<table><tr><td><h1>H348</h1><td>(<a href="https://asianclassics.org/tibetan/" target="new2">e-text produced by ACIP</a>)<br><br><a href="verif3.php?id=H348&coll=lhasa">see text in transliteration</a></table>476b<br><font size=+2>


།རྒྱ་གར་སྐད་དུ། འདི་རྒ་ན་ཁ་པ་རི་བྲཱ་ཛ་ཀ་པ་རི་པྲཾ་ཙྪ་ནཱ་མ་སཱུ་ཏྲ། བོད་སྐད་དུ། ཀུན་ཏུ་རྒྱུ་བ་སེན་རིང་གིས་ཞུས་པ་ཞེས་བྱ་བའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་འཁོར་བཞི་པོ་དག་ལ་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེའི་ཚེ་ཀུན་ཏུ་རྒྱུ་སེན་རིང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་སྤྱན་སྔར་འཁར་བ་ལ་ཨོཾ་ཚུགས་བཅས་ཏེ་ཅང་མི་སྨྲ་བར་འདུག་ནས་བལྟས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གོའུ་ཏ་མ། འཇིག་རྟེན་ནི། ལས་བདག་གིར་བྱ་བ། ལས་ཀྱི་བགོ་སྐལ་ལ་སྤྱོད་པ། ལས་ཀྱི་འཆིང་བ་ཅན། ལས་བརྟན་པར་བྱའོ། །ཞེས་དེ་སྐད་སྨྲས་པ་ནི། བདེན་ན། དགེ་སྦྱོང་</font><hr>477a<br><font size=+2>


༄#། །གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གོ་ཏ་མ་རྡོ་རྗེའི་ལུས་དང་ལྡན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི། ངས་ཚེ་རབས་སྔ་མའི་སྐྱེ་བར་སྲོག་གཅོད་པ་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གཽ་ཏ་མ་སོར་མོ་རིང་ཞིང་སོར་མོའི་བར་དྲ་བས་འབྲེལ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི་ངས་ཚེ་རབས་སྔ་མའི་སྐྱེ་བར་མ་བྱིན་བར་ལེན་པ་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གཽ་ཏ་མ་དབང་པོ་ཡོངས་སུ་ཚང་ཞིང་ལུས་རབ་ཏུ་རྒྱས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི། ངས་ཚེ་རབས་སྔ་མའི་སྐྱེ་བར་འདོད་པ་ལ་ལོག་པར་གཡེམ་པ་སྤངས་པའི་ལས་དེའི་འབྲས་བུ་ཡིན་ནོ། ། དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། ངས་དགེ་སྦྱོང་གཽ་ཏ་མ་ལྕེས་གདོང་གི་དཀྱིལ་འཁོར་ཐམས་ཅད་ཁེབས། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི་ངས་ཚེ་རབས་སྔ་མའི་སྐྱེ་བར་བརྫུན་དུ་སྨྲ་བ་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། </font><hr>477b<br><font size=+2>


དེས་དགེ་སྦྱོང་གོ་ཏ་མ་སེངྒེའི་སྟབས་སུ་འགྲོ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི་ངས་ཚེ་རབས་སྔ་མའི་སྐྱེ་བར་འབྲུའི་ཚང་དང ། སྦྱར་བའི་ཆང་མྱོས་པ་བག་མེད་པའི་གནས་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གཽ་ཏ་མ་སོ་བཞི་བཅུ་དང་ལྡན་ཞིང་སོ་མཉམ་ལ་སོ་དཀར་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི། ངས་ཚེ་རབས་སྔ་མའི་སྐྱེ་བར་དུས་མ་ཡིན་པའི་ཟས་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གཽ་ཏ་མ་ཚུལ་ཁྲིམས་ཀྱི་སྤོས་ཀྱིས་ལུས་བྱུགས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི། ངས་ཚེ་རབས་སྔ་མའི་སྐྱེ་བར་ཕྲེང་བ་དང ། སྤོས་དང ། བྱུག་པ་དང ། ཁ་དོག་འཆང་བ་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གཽ་ཏ་མ་ལུས་མཚན་ཐམས་ཅད་ཀྱིས་བརྒྱན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི། ངས་ཚེ་ར་བས་སྔ་མའི་སྐྱེ་བར་གླུ་དང ། གར་དང ། རྒྱན་རྣམས་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་</font><hr>478a<br><font size=+2>


༄#། །ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གཽ་ཏ་མ་སྟན་གསུམ་ལ་ཡོངས་སུ་སྤྱོད། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི།་ངས་ཚེ་རབས་སྔ་མའི་སྐྱེ་བར་ཁྲི་སྟན་མཐོན་པོ་དང ། ཁྲི་སྟན་ཆེན་པོ་སྤངས་པའི་ལས་དེའི་འབྲས་བུ་ཡིན་ནོ། །དགེ་སྦྱོང་གཽ་ཏ་མས་སྔོན་ལས་ཅི་ཞིག་བྱས་ཤིང་བསགས་ན། དེས་དགེ་སྦྱོང་གོའུ་ཏ་མ་མགོའི་གཙུག་ཏོར་འཕགས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། འདི་ནི། ངས་ཚེ་རབས་སྔ་མའི་སྐྱེ་བར་སངས་རྒྱས་དང ། ཆོས་དང ། དགེ་འདུན་དང ། ཕ་མ་དང ། སློབ་དཔོན་དང ། མཁན་པོ་དང ། བླ་མ་དང ། སྦྱིན་གནས་རྣམས་ལ་ཡན་ལག་ལྔ་ས་ལ་གཏུགས་ཏེ་མགོ་བོས་ཕྱག་འཚལ་ཞིང་མཆོད་པའི་ལས་དེའི་འབྲས་བུ་ཡིན་ནོ། །དེ་ནས་ཀུན་ཏུ་རྒྱུ་སེན་རིང་གིས་འཁར་བས་ལ་བོར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ག་ལ་བདེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཇི་སྲིད་འཚོའི་བར་དུ་སངས་རྒྱས་ལ་སྐྱབས་སུ་མཆིའོ། །ཇི་སྲིད་འཚོའི་བར་དུ་ཆོས་ལ་སྐྱབས་སུ་མཆིའོ། །ཇི་སྲིད་འཚོའི་བར་དུ་དགེ་འདུན་ལ་སྐྱབས་སུ་མཆིའོ། །ཇི་</font><hr>478b<br><font size=+2>


སྲིད་འཚོའི་བར་དུ་ཡན་ལག་བརྒྱད་པའི་བསྙེན་གནས་ལ་ཉེ་བར་གནས་པར་བགྱིའོ། །སྲོག་ཆགས་ཐམས་ཅད་གསོད་དང་གཞན་ནོར་རྐུ་དང་མི་ཚངས་སྤྱོད་པ་དང ། །ངག་གི་དབྱེ་བ་རྫུན་དང་མྱོས་སྐྱེས་དུས་མིན་ཟ་བ་དང ། །ཕྲེང་བ་ཁ་དོག་གླུ་དང་གར་དང་རྩེ་འཇོ་མལ་སྟན་མཐོན་པོ་རྣམས། །དེང་ནས་བདག་གིས་སྤངས་ཏེ་ཡོན་ཏན་བརྒྱད་ཀྱིས་དགྲ་བཅོམ་ཚུལ་དུ་བགྱི། །དེ་བཞིན་དུ་ལན་གཉིས་ལན་གསུམ་དུའོ། །བདག་གིས་གསོ་སྦྱོང་གི་ཚུལ་ཁྲིམས་ཀྱིས་སྡོམ་པ་ཡང་དག་པར་འཛིན་པ་འདི་སེམས་ཀྱི་རྒྱན་དང ། སེམས་ཀྱི་ཡོ་བྱད་དང ། བྱང་ཆུབ་ཀྱི་ཚོགས་སུ་འགྱུར་བ་དང ། དོན་གྱི་དམ་པ་ཐམས་ཅད་མཁྱེན་པའི་ཡེ་ཤེས་དང ། མྱ་ངན་ལས་འདས་པའི་བདེ་བ་བླ་ན་མེད་པ་ལ་གནས་པར་གྱུར་ཅིག། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། ཁྱོད་དེ་བྱེད་པ་ལེགས་སོ་ལེགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཀུན་ཏུ་རྒྱུ་སན་\?\རིང་གིས་ཞུས་པའི་མདོ་རྫོགས་སོ།། །། བཀའ་དང་པོར་གཏོགས་སོ། </font><hr>

</table>