rKTs


H347

(e-text produced by ACIP)

see text in transliteration
207b
> །།༄#། །རྒྱ་གར་སྐད་དུ། དམ་མཱུ་ཀོ་ནཱ་མ་སཱུ་ཏྲ། བོད་སྐད་དུ། མཛངས་བླུན་ཞེས་བྱ་བའི་མདོ། །བམ་པོ་དང་པོ། དཀོན་མཆོག་གསུམ་ལ་ཕྱག་འཚལ་ལོ། །དཔེ་སྣ་ཚོགས་བསྟན་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷའི་དཀྱིལ་འཁོར་རྣམ་པར་རྒྱལ་བ་ན་བཞུགས་ཏེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ་ཞིག་ན་འདི་སྙམ་དུ་དགོངས་པར་གྱུར་ཏོ། །སེམས་ཅན་འདི་དག་ནི། ཡུན་རིང་པོ་ནས་ཕྱིན་ཅི་ལོག་གིས་ཡོངས་སུ་བསླད་དེ། བསྟན་ཅིང་བཅོས་སུ་ཡང་ཤིན་ཏུ་དཀའ་བས་ཇི་སྲིད་དུ་འཇིག་རྟེན་ན་བཞུགས་ཀྱང་ཕན་པའི་
208a
> ༄#། །དོན་མེད་ཀྱི། དེས་ན་ལྷག་མ་མ་ལུས་པའི་མྱ་ངན་ལས་འདའ་བས་ཡོངས་སུ་མྱ་ངན་ལས་འདའོ་སྙམ་དུ་དགོངས་མ་ཐག་ཏུ་དེའི་ཚེ་ན་ཚངས་རིས་ཀྱི་ལྷ་རྣམས་ཀྱིས་བཅོམ་ལྡན་འདས་ཀྱི་དགོངས་པ་ཤེས་ཤིང་རྟོགས་ནས་ནམ་མཁའ་ལས་བབས་ཏེ་བཅོམ་ལྡན་འདས་གང་ན་བ་དེར་ལྷགས་ནས་ཕྱིན་པ་དང་ཞབས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་བཅོམ་ལྡན་འདས་ལ་ཆོས་ཀྱི་འཁོར་ལོ་བསྐོར་བར་གསོལ་ཞིང་བསྐུལ་བ་དང ། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀྱེ་ལྷ་དག་།སེམས་ཅན་འདི་དག་ནི། ཉེས་པའི་དྲི་མས་ཡོངས་སུ་གླགས་ཏེ་འཇིག་རྟེན་གྱི་བདེ་བ་ལ་ཆགས་ནས་ཤེས་རབ་དང་ལྡན་པའི་སེམས་མེད་པས། ཇི་སྲིད་དུ་འཇིག་རྟེན་ན་བཞུགས་ཀྱང་བྱ་བ་དོན་མེད་པར་འགྱུར་ཏེ། མྱ་ངན་ལས་འདས་ན་བདེའོ་སྙམ་དུ་དགོངས་སོ། །དེ་ནས་ཚངས་རིས་ཀྱི་ལྷ་རྣམས་ཀྱིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ཆོས་ཀྱི་རྒྱ་མཚོ་ཡོངས་སུ་གང་བ། ཆོས་ཀྱི་རྒྱལ་མཚན་བཙུགས་པ། བསྟན་ཅིང་གདུལ་བའི་དུས་ལ་ཡང་བབ། སེམས་ཅན་འདི་དག་ལས་གྲོལ་བར་འགྱུར་བ་ཡང་ཤིན་ཏུ་མང་ན། ཅིའི་སླད་དུ་བཅོམ་ལྡན་འདས་མྱ་ངན་ལས་འདའ་བར་དགོངས་ཏེ་ཤིན་ཏུ་མདོངས་པར་གྱུར་པ་འདི་དག་གི་མགོན་དང་སྐྱབས་མི་མཛད། བཅོམ་ལྡན་འདས་
208b
> ནི།་སྔོན་བསྐལ་པ་གྲངས་མ་མཆིས་པ་འདས་པའི་ཕ་རོལ་ན་སེམས་ཅན་གྱི་དོན་དུ་ཐོས་པ་ཚོལ་ཞིང་ཚོལ་བ་ན་ཆུང་དུ་ན་ཚིགས་སུ་བཅད་པ་གཅིག་ཙམ་གྱི་སླད་དུ་ཡང་བདག་གི་ལུས་དང ། ཆུང་མ་དང ། བུ་དང ། བུ་མོ་དང ། ནོར་དང ། ཕངས་པར་བྱ་བའི་དངོས་པོ་ཐམས་ཅད་བཏང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་ན་དེ་ཅིའི་སླད་དུ་མགོན་མ་མཆིས་པ་འདི་དག་ཡོངས་སུ་གཏང་བར་དགོངས། སྔོན་འདས་པའི་དུས་ཡུན་རིང་པོ་ན་འཛམ་བུའི་གླིང་འདིར་རྒྱལ་པོ་ཆེན་པོ་ཁ་དོག་དམ་པ་ཞེས་བགྱི་བ། འཇིག་རྟེན་འདི་ལ་དབང་སྒྱུར་བ་ཞིག་བྱུང་སྟེ། རྒྱལ་པོ་དེ་ལ་རྒྱལ་ཕྲན་ནི། བརྒྱད་ཁྲི་བཞི་སྟོང་མངའ། ལྗོངས་ཆེན་པོ་སྟོང་ཕྲག་དྲུག་ཅུའི་ནང་ན་གྲོང་ཁྱེར་ཡང་ཁྲི་ཕྲག་བརྒྱད་ཅུ་མངའ་སྟེ། རྒྱལ་པོ་དེ་ལ་བཙུན་མོ་ནི། སྟོང་ཕྲག་ཉི་ཤུ། བློན་པོ་ཆེན་པོ་ནི། སྟོང་ཕྲག་བཅུ་སྙེད་མངའོ། །རྒྱལ་པོ། བདོག་དམ་པ་དེའི་གཟི་བརྗིད་དང ། མཐུ་དཔེ་མ་མཆིས་པར་ཆེ་སྟེ། འབྱོར་པ་དང ། བདེ་བ་དང ། ལོ་ལེགས་པ་དང ། མི་ལ་སོགས་པ་སྐྱེ་བོ་མང་ཞིང་རབ་ཏུ་མང་བ་དང་ལྡན་པ་དེས་འདི་སྙམ་དུ་བསམ་སྟེ། བདག་གིས་ནི། རིན་པོ་ཆེ་དང ། ལོངས་སྤྱོད་ཀྱིས་འགྲོ་བ་ཐམས་ཅད་ལ་ཕན་བཏགས་ཀྱི། དམ་པའི་ཆོས་ཀྱིས་ཕྲན་འདོགས་པར་མ་གྱུར་ཏེ། འདི་དག་ནི། བདག་གི་སྐྱོན་དུ་འགྱུར་གྱི། དམ་པའི་ཆོས་གང་ན་མཆིས་པ་བཙལ་ཏེ་ཐམས་ཅད་དགྲོལ་བར་བྱའོ་སྙམ་དུ་བསམ་ནས་འདི་
209a
> ༄#། །སྐད་ཅེས་བཀར་བཏགས་སོ། །འཛམ་བུའི་གླིང་འདི་ན་སུ་ལ་དམ་པའི་ཆོས་ཡོད་པ་དེ་བདག་ལ་སྟོན་པར་གྱུར་ན། དེ་ཡིད་དང་མི་འགལ་བར་ཅི་དང་ཅི་འདོད་པ་སྦྱིན་ནོ། །ཞེས་བསྒྲགས་ཀྱང་སྟོན་ནུས་པ་མ་བྱུང་ངོ ། །དེའི་ཚེ་ན་རྒྱལ་པོ་དེ་མྱ་ངན་གྱིས་ཡིད་གདུངས་ཏེ་མི་དགའ་བར་གྱུར་པ་ངལ་བསོ་པོས་ཐོས་ནས་སད་པའི་སླད་དུ་བདག་གི་ལུས་གནོད་སྦྱིན་ཞིག་ཏུ་སྤྲུལ་ནས་དེའི་མདོག་ཤིན་ཏུ་སྔོ་བ། ནག་པ། མིག་ཁྲག་ལྟར་དམར་བ། མཆེ་བ་གྱེན་དུ་བྱུང་བ། སྐྲ་གྱེན་དུ་བསྒྲེང་པ། ཁ་ནས་མེ་འབར་བ་ཕོ་བྲང་གི་སྒོར་མཆིས་ནས་སུ་ཞིག་ཆོས་ཐོས་པར་འདོད་པ་ང་ལས་ཉོན་ཅིག་ཅེས་སྨྲས་སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་ཤིན་ཏུ་དགའ་མགུ་སྟེ་གནོད་སྦྱིན་དེ་བསུ་ནས་མགོ་བོས་ཕྱག་བྱས་ཏེ་སྟན་མཐོན་པོ་ལ་བཞག་ནས་བློན་པོ་དང ། འཁོར་མང་པོ་དག་བསྡུས་ཏེ་ཆོས་ཉན་དུ་གཞུག་པའི་སླད་དུ་འཁོར་བར་བསྐོར་ཏོ། །དེའི་ཚེ་ན་གནོད་སྦྱིན་གྱིས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ། ཆོས་ཐོས་པར་བྱ་བ་ནི། ཤིན་ཏུ་དཀའ་བས་ཆོས་ཉན་པར་འདོད་ན། འདི་ཙམ་གྱིས་ཆོག་པ་མ་ཡིན་ནོ། །ཞེས་སྨྲས་པ་དང ། རྒྱལ་པོས་དེ་ལ་ཐལ་མོ་སྦྱར་ཏེ་ཁྱོད་ཅི་དང་ཅི་འདོད་པ་དེ་མི་འགལ་བར་ཐམས་ཅད་སྦྱིན་ནོ། །ཞེས་སྨྲས་སོ། །
209b
> དེ་ནས་གནོད་སྦྱིན་དེས་རྒྱལ་པོ་ལ་སྨྲས་པ། རྒྱལ་པོ། ཁྱོད་ཀྱི་བཙུན་མོ་དང་སྲས་གང་ཕངས་པ་ཁོ་བོ་ཟར་བཅུག་ན། དམ་པའི་ཆོས་སྦྱིན་ནོ། །ཞེས་སྨྲས་པ་དང ། དེའི་ཚེ་ན་རྒྱལ་པོ་ཆེན་པོ་དེས་བཙུན་མོའི་ནང་ན་གང་ཕངས་པ་དང ། སྲས་ཀྱི་མཆོག་གནོད་སྦྱིན་ལ་ཕུལ་ཏེ། གནོད་སྦྱིན་གྱིས་འཁོར་མང་པོའི་ནང་དུ་ཀུན་གྱིས་མཐོང་བཞིན་དུ་ཟོས་སོ། །དེའི་ཚེ་ན་རྒྱལ་པོ་དེའི་བློན་པོ་རྣམས་དེ་ལྟར་གྱུར་པ་མཐོང་ནས་ཆོ་ངེས་བཏབ་སྟེ་ས་ལ་འགྲེ་བཞིན་དུ་རྒྱལ་པོ་ཆེན་པོ་མི་རིགས་པའི་ལས་འདི་ལྟ་བུ་དག་ཐོང་ཞིག་ཅེས་གསོལ་བ་བཏབ་ཀྱང་རྒྱལ་པོ་དེ་དམ་པའི་ཆོས་ཚོལ་བའི་ཕྱིར་ཤིན་ཏུ་བརྟན་པས་བཟློག་མ་ནུས་སོ། །དེའི་ཚེ་ན་གནོད་སྦྱིན་དེས་རྒྱལ་པོའི་བཙུན་མོ་དང ། སྲས་ཟོས་ནས་ཚིགས་སུ་བཅད་པ་འདི་སྐད་ཅེས་སྨྲས་སོ། །འདུ་བྱེད་ཐམས་ཅད་མི་རྟག་སྟེ། །ཇི་ཙམ་སྐྱེ་བ་སྡུག་བསྔལ་བཅས། །ལྔ་ཕུང་མཚན་མ་མེད་པས་སྟོང ། །བདག་དང་བདག་གི་བ་ཡང་མེད། །ཚིགས་སུ་བཅད་པ་འདི་སྨྲས་པ་དང ། རྒྱལ་པོ་དགའ་མགུ་རངས་ཏེ་བ་སྤུའི་ཉག་མ་ཙམ་གྱི་འགྱོད་པའི་སེམས་མ་སྐྱེས་སོ། །དེ་ནས་ཡི་གེར་བྲིས་ནས་འཛམ་བུའི་གླིང་ཀུན་ཏུ་བསྒྲགས་ཏེ་ཐམས་ཅད་སློབ་དུ་བཅུག་གོ་།དེ་ནས་ངལ་བསོ་པོས་བདག་ཉིད་ཀྱི་ལུས་སུ་སླར་བསྒྱུར་ནས། ཤིན་ཏུ་
210a
> ༄#། །ལེགས་སོ། །ངོ་མཚར་རྨད་དོ། །ཞེས་བསྟོད་ཅིང་བསྔགས་ཏེ། རྒྱལ་པོའི་བཙུན་མོ་དང ། སྲས་ཀྱང་སྔོན་བཞིན་དུ་ཅང་མ་ནོངས་སོ། །དེའི་དུས་ན་རྒྱལ་པོ་དེ་ནི། སངས་རྒྱས་ལགས་ཏེ། བཅོམ་ལྡན་འདས་སྔོན་ཡང་ཆོས་ཀྱི་སླད་དུ་དེ་ལྟ་བུའི་དཀའ་བ་མཛད་ན། ད་ཇི་སྲིད་དུ་སེམས་ཅན་མང་པོ་ཡོངས་སུ་བཏང་སྟེ། མྱ་ངན་ལས་འདའོ། །ཞེས་གསུང ། བཅོམ་ལྡན་འདས། གཞན་ཡང་སྔོན་བསྐལ་པ་གྲངས་མ་མཆིས་པའི་ཕ་རོལ་ན་འཛམ་བུའི་གླིང་འདིར་རྒྱལ་པོ་ཆེན་པོ་ག་ན་ཤ་ནི་བ་ལི་ཞེས་བགྱི་བ་ནི། རྒྱལ་ཕྲན་མང་པོ་ལ་དབང་བསྒྱུར་ཏེ། གྲོང་ཁྱེར་ནི། བརྒྱད་ཁྲི་བཞི་སྟོང་སྙེད་ལ་མངའ་མཛད། བཙུན་མོ་དང་ཕོ་བྲང་གི་སླས་ནི། སྟོང་ཕྲག་ཉི་ཤུ་མངའ་སྟེ། བློན་པོ་ཆེན་པོ་ཡང་སྟོང་ཕྲག་བཅུ་སྙེད་དོ། །རྒྱལ་པོ་དེ་ཤིན་ཏུ་སྙིང་རྗེ་དང་ལྡན་པས་མི་ལ་སོགས་པ་སྐྱེ་བོ་མང་པོ་བདེ་སྐྱིད་ཅིང་འབྱོར་པ་དང ། བདེ་བ་དང ། ལོ་ལེགས་པར་ལྡན་ཏེ། རྒྱལ་པོ་དེ་སྐྱེ་བོ་མང་པོའི་ཕ་མ་ལྟ་བུར་གྱུར་ཏོ། ། དེའི་ཚེ་རྒྱལ་པོ་དེས་འདི་སྙམ་དུ་བསམ་མོ། །བདག་ཀྱང་སྐྱེ་བོ་མང་པོ་ཀུན་གྱི་གཙོ་བོར་གྱུར་ལ། སྐྱེ་བོ་མང་པོ་འདི་དག་ཀྱང་བདག་ལ་མོས་ཤིང་དགའ་བས་བདག་གིས་
210b
> དམ་པའི་ཆོས་ཀྱི་ནོར་རིན་པོ་ཆེས་ཐམས་ཅད་ལ་ཕན་གདགས་སོ་སྙམ་དུ་བསམ་ནས་བློན་པོ་གཅིག་གིས་ཐམས་ཅད་དུ་བཀར་བཏགས་ཏེ་སུ་ལ་དམ་པའི་ཆོས་མཆིས་པ་བདག་ལ་སྟོན་པར་གྱུར་ན། ཅི་དང་ཅི་འདོད་པ་ཡིད་བཞིན་དུ་སྦྱིན་ནོ། །ཞེས་བསྒོ་བ་དང ། དེའི་ཚེ་ན་བྲམ་ཟེ་ལེའུ་དུ་ཅི་ཞེས་བགྱི་བ་ཞིག་ཕོ་བྲང་གི་སྒོར་མཆིས་ཏེ་བདག་གི་དམ་པའི་ཆོས་ཡོད་དེ། །ཞེས་སྨྲས་པ་དང ། རྒྱལ་པོ་དེས་དེ་སྐད་ཅེས་སྨྲས་པ་ཐོས་ནས་ཕྱི་རོལ་ཏུ་བསུས་ཏེ་ཕྱག་བྱས་ནས་སྟན་བཏིང་བ་ལ་བཞག་གོ་།བྲམ་ཟེ་དེ་སྟན་བཏིང་བ་ལ་འདུག་ནས་རྒྱལ་པོ་འཁོར་དང་བཅས་ཏེ་ཐལ་མོ་སྦྱར་ནས་སྟོན་པ་ཆེན་པོ། གཏི་མུག་གིས་མདོངས་པར་གྱུར་པ་ལ་དམ་པའི་ཆོས་དབྱེ་ཞིང་བསྟན་པའི་དུས་ལ་བབ་བོ། ། ཞེས་བསྐུལ་པ་དང ། བྲམ་ཟེ་དེས་རྒྱལ་པོ་ལ་འདི་སྐད་ཅེས་སྨྲས་སོ། །བདག་གིས་ཤེས་པ་འདི་ཉིད་གྱི་ནས་ལོབས་པ་མ་ཡིན་པས་ཐོས་པར་འདོད་ན། འདི་ཙམ་གྱིས་ཆོག་པ་མ་ཡིན་ནོ། །རྒྱལ་པོས་སྨྲས་པ། ཅི་དང་ཅི་འདོད་པ་སྨྲོས་ཤིག་དང ། ཐམས་ཅད་ཡིད་བཞིན་དུ་སྦྱིན་ནོ། །ཞེས་སྨྲས་པ་དང ། བྲམ་ཟེ་དེས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། ཁྱོད་ཀྱི་ལུས་ལ་མར་མེ་སྟོང་བཙུགས་ཏེ་མཆོད་པ་བྱེད་ནུས་ན་ཆོས་བསྟན་པར་བྱའོ། །ཞེས་སྨྲས་པ་དང ། རྒྱལ་པོ་ལྷག་པར་དགའ་མགུ་རངས་ནས་
211a
> ༄#། །དེའི་ཚེ་ཕོ་ཉ་ཞིག་པ་ན་གླང་ཉིན་གཅིག་ལ་རྒྱང་གྲགས་བརྒྱ་སྟོང་དུ་འགྲོ་བ་ཞིག་ལ་བསྐྱོན་ཏེ། འཛམ་བུའི་གླིང་ཐམས་ཅད་དུ་འདི་སྐད་ཅེས་བསྒོའོ། །རྒྱལ་པོ་ག་ན་ཤ་ནི་པ་ལི་ད་སྟེ་ཞག་བདུན་ན་ཆོས་ཀྱི་ཕྱིར་ལུས་ཀྱི་ཤ་ཕུག་ནས་མར་མེ་སྟོང་འཛུགས་སོ། །ཞེས་རྒྱལ་ཕྲན་དང ། མི་ཐམས་ཅད་ལ་བསྒོའོ། །དེ་དག་གིས་དེ་སྐད་བསྒོ་བ་ཐོས་པ་དང་སོ་སོ་ནས་མྱ་ངན་གྱིས་ཡིད་གདུངས་ཏེ་རྒྱལ་པོ་གང་ན་བར་ལྷགས་ནས་ཕྱག་བྱས་ཏེ་ཐམས་ཅད་ཀྱིས་འདི་སྐད་ཅེས་སྨྲས་སོ། །འཇིག་རྟེན་འདི་ནི། ཇི་ཙམ་འཚོ་བའི་སྲོག་དང་བཅས་པ་ཐམས་ཅད་ཁྱོད་ལ་བརྟེན་པ་ནི། ལོང་བ་དམིགས་བུ་ལ་བརྟེན་པའམ། བུ་ཆུང་མ་ལ་བརྟེན་པ་དང་འདྲ་ན། རྒྱལ་པོ་མི་བཞུགས་པའི་སླད་ན་གང་ལ་འཚོ་བའི་སྐྱབས་སུ་མཆི་བར་བགྱི། གལ་ཏེ་སྐུ་ལ་མར་མེ་སྟོང་བཙུགས་ན་གདོན་མི་ཟ་བར་འཚོ་བ་དང་འབྲལ་ན། ཅིའི་སླད་དུ་བྲམ་ཟེ་གཅིག་ཙམ་གྱི་སླད་དུ་འཇིག་རྟེན་འདིའི་སེམས་ཅན་ཡོངས་སུ་གཏང་བར་དགོངས། དེའི་ཚེ་ན་བཙུན་མོ་དང ། སྲས་དང ། རྒྱལ་ཚབ་དང ། སླས་ལྔ་བརྒྱ་དང ། བློན་པོ་སྟོང་ཕྲག་བཅུ་སྙེད་ཀྱིས་ཐལ་མོ་སྦྱར་ཏེ་གསོལ་བ་བཏབ་ཀྱང་རྒྱལ་པོ་ཡི་དམ་ལ་བརྟན་པས་མ་བཟློག་སྟེ། ནམ་མངོན་པར་རྫོགས་པར་སངས་རྒྱས་ནས་ཁྱེད་རྣམས་གནོན་མི་ཟ་བར་བསྒྲལ་ལོ།།
211b
> ཞེས་སྨྲས་པ་དང ། དེའི་ཚེ་ན་སྐྱེ་བོ་མང་པོས་རྒྱལ་པོ་དེ་ཡི་དམ་ལ་བརྟན་པར་རྟོགས་ནས་རབ་ཏུ་མི་དགའ་སྟེ་ཆོ་ངེས་བཏབ་ནས་ས་ལ་འགྱེལ་ཏོ། །རྒྱལ་པོ་དེའི་བསམ་པ་མ་གྱུར་ཏེ་བྲམ་ཟེ་ལ་འདི་སྐད་ཅེས་སྨྲས་སོ། །ད་ལུས་ལ་མར་མེ་སྟོང་གཟུགས་པའི་དུས་ལ་བབ་ཀྱི། ཕུག་ཅིག་ཅེས་བསྒོ་བ་དང ། དེས་རྒྱལ་པོའི་ལུས་ཕུག་ནས་མེ་མར་གྱི་སྙིང་པོ་སྣུམ་གྱིས་སྐུས་པ་དང ། འཁོར་མང་པོས་དེ་ལྟར་གྱུར་པ་མཐོང་ནས་རི་འགྱེལ་པ་བཞིན་དུ་ལུས་ས་ལ་བརྡབས་སོ། །དེ་ནས་རྒྱལ་པོས་བྲམ་ཟེ་ལ་སྟོན་པ་ཆེན་པོ། ཐུགས་བརྩེ་བར་དགོངས་ཏེ། སྔར་བདག་ལ་ཆོས་བསྟན་ནས། དེའི་འོག་ཏུ་མེ་མར་ཚུགས་ཤིག་།གལ་ཏེ་ཚེའི་དུས་བྱས་ན་ཆོས་ཐོས་པར་མི་འགྱུར་རོ། །ཞེས་སྨྲས་པ་དང ། བྲམ་ཟེས་ཚིགས་སུ་བཅད་པ་འདི་སྨྲས་སོ། རྟག་པ་ཐམས་ཅད་ཟད་པར་འགྱུར། །མཐོ་བ་དེ་ཡང་མཐར་ལྟུང་ངོ ། །འདུ་བ་ཡོད་ན་འབྲལ་བར་འོང ། ། སྐྱེ་བ་ཡོད་ན་འཆི་བར་འགྱུར། །ཚིགས་སུ་བཅད་པ་འདི་སྨྲས་མ་ཐག་ཏུ་རྒྱལ་པོ་དེ་རབ་ཏུ་དགའ་མགུ་རངས་ཏེ་འགྱོད་པའི་སེམས་མེད་བཞིན་དུ་འདི་སྐད་ཅེས་དམ་བཅས་སོ། ། བདག་ཆོས་ཚོལ་བ་འདི་ཡང་སངས་རྒྱས་སུ་བསྒྲུབ་པའི་ཕྱིར་ཏེ། ཕྱིས་མངོན་པར་སངས་རྒྱས་པ་ན་ཡེ་ཤེས་ཀྱི་འོད་ཀྱིས་སེམས་ཅན་གཏི་མུག་གིས་མདོངས་པ་རྣམས་ཤིན་ཏུ་སྣང་
212a
> ༄#། །པར་གྱུར་ཅིག་ཅེས་ཡི་དམ་བཅས་མ་ཐག་ཏུ་གནམ་ས་ཡང་རབ་ཏུ་གཡོས་པས་གནས་གཙང་མའི་རིས་ཀྱི་ལྷའི་ཕོ་བྲང་གི་བར་དུ་གཡོས་པས།་ལྷ་དེ་དག་ནམ་མཁའ་ལས་བབས་ཏེ་ལུས་ཀྱིས་མཆོད་པའི་གནས་སུ་ལྷགས་སོ། །བྱང་ཆུབ་སེམས་དཔའ་དེའི་ལུས་དེ་ལྟར་ཞིག་པ་ལྷ་དེ་དག་གིས་མཐོང་ནས་སྟེང་གི་ནམ་མཁའ་ཡོངས་སུ་གང་བ་དེ་དག་དུས་ཏེ། དུས་པའི་མཆི་མཆར་བཞིན་དུ་བབ་ནས་ལྷ་རྫས་ཀྱི་མེ་ཏོག་ཀྱང་ཆར་བཞིན་དུ་བབ་སྟེ་མཆོད་པ་བྱས་སོ། །དེའི་ཚེ་ན་བརྒྱ་བྱིན་ལྷའི་དབང་པོས་ཀྱང་རྒྱལ་པོ་གང་ན་བ་དེར་འོངས་ནས་རྣམ་པ་སྣ་ཚོགས་ཀྱིས་བསྟོད་ཅིང་བསྔགས་ཏེ་འདི་སྐད་ཅེས་སྨྲས་སོ། །རྒྱལ་པོ་ཆེ་ཆེན་པོ།་འདི་ལྟར་ཤིན་ཏུ་སྡུག་བསྔལ་གྱིས་གདུངས་པ་འདི་ལ་སེམས་འགྱོད་པར་མ་གྱུར་ཏམ། རྒྱལ་པོས་སྨྲས་པ། འགྱོད་པ་མེད་དོ། །བརྒྱ་བྱིན་གྱིས་སྨྲས་པ།་རྒྱལ་པོ་ཆེན་པོ། འདི་ལྟར་ལུས་འདར་ཞིང་ཉམས་མི་བདེ་བཞིན་དུ་འགྱོད་པ་མེད་ཅེས་སྨྲས་པ་འདི་ཅིས་ཡིད་ཆེས་པར་འགྱུར། རྒྱལ་པོས་སྨྲས་པ། གལ་ཏེ་བདག་ཐོག་མ་ནས་ཐ་མའི་བར་དུ་འགྱོད་པའི་སེམས་མེད་པ་ཡིན་ན། ལུས་ཀྱི་རྨ་འདི་སྔ་མཁོ་བཞིན་དུ་སོས་པར་གྱུར་ཅིག་ཅེས་སྨྲས་མ་ཐག་ཏུ་ལུས་སྔ་མཁོ་
212b
> བཞིན་དུ་རྨ་མེད་པར་གྱུར་ཏོ། །དེའི་ཚེ་དེའི་དུས་ན་རྒྱལ་པོ་དེ་ནི། སངས་རྒྱས་ལགས་ཏེ། བཅོམ་ལྡན་འདས་སྔོན་ཡང་སེམས་ཅན་གྱི་སླད་དུ་མི་བཟད་པའི་སྡུག་བསྔལ་དང་བསྡོས་ཏེ་ཆོས་བརྙེས་ན། དེ་ཅིའི་སླད་དུ་འགྲོ་བ་ཐམས་ཅད་ཆོས་ཀྱི་སྣང་བ་དང་བྲལ་བ་ཡོངས་སུ་བཏང་སྟེ་མྱ་ངན་ལས་འདའ་བར་དགོངས། གཞན་ཡང་བཅོམ་ལྡན་འདས་སྔོན་འདས་པའི་དུས་ན་ཛམྦུའི་གླིང་འདིར་རྒྱལ་པོ་ཆེན་པོ་བྱིང་ལིང་གར་ལི་ཞེས་བགྱི་བར་གྱུར་པ་ན་རྒྱལ་ཕྲན་རྣམས་ལ་དབང་བགྱིད་དེ། གྲོང་ཁྱེར་ནི། བརྒྱད་ཁྲི་བཞི་སྟོང་དང་ལྡན། བཙུན་མོ་དང་ཕོ་བྲང་གི་སླས་ནི། སྟོང་ཕྲག་ཉི་ཤུ་མངའ་སྟེ། རྒྱལ་ཚབ་དང་རྒྱལ་བུ་ནི། ལྔ་བརྒྱ་སྟེ། བློན་པོ་ཆེན་པོ་ནི།་སྟོང་ཕྲག་བཅུ་མངའོ། །རྒྱལ་པོ་དེ་སྙིང་རྗེ་དང་ལྡན་པས་འབངས་ཐམས་ཅད་ལ་བུ་གཅིག་པ་དང་འདྲ་བར་དགོངས་སོ། །དེའི་ཚེ་རྒྱལ་པོ་ཆེན་པོ་དེ་དམ་པའི་ཆོས་ལ་མོས་ཤིང་དགའ་བས་བློན་པོ་གཅིག་ལ་བསྒོ་ནས་འདི་སྐད་ཅེས་བཀར་བཏགས་སོ། །གང་སུ་ཡང་རུང་བ་ལ་མདོ་སྡེའམ་དམ་པའི་ཆོས་ཡོད་པ་བདག་ལ་བསྟན་པར་གྱུར་ན། ཅི་དང་ཅི་འདོད་པ་ཡིད་བཞིན་དུ་སྦྱིན་ནོ། །ཞེས་བསྒོའོ། །དེ་ནས་བྲམ་ཟེ་ལེའུ་དུ་ཅི་ཞེས་བགྱི་བ་ཕོ་བྲང་གི་སྒོར་འོངས་ནས་འདི་སྐད་ཅེས་སྨྲས་སོ།
213a
> ༄#། །བདག་ལ་དམ་པའི་ཆོས་ཡོད་དེ། གང་ཐོས་པར་འདོད་པ་ལ་བསྟན་པར་བྱའོ། །ཞེས་སྨྲས་པ་རྒྱལ་པོས་ཐོས་ནས་རབ་ཏུ་དགའ་མགུ་རངས་ཏེ་ཕྱི་རོལ་དུ་བསུས་ནས་རྐང་པ་ལ་མགོ་བོས་ཕྱག་འཚལ་ཏེ་ཚིག་སྙན་པར་སྨྲས་ནས་ཕོ་བྲང་གི་ནང་དུ་ཁྲིད་དེ་སྟན་བཤམས་པ་ལ་བཞག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །སྟོན་པ་ཆེན་པོ། བདག་ལ་དམ་པའི་ཆོས་བསྟན་དུ་གསོལ། བྲམ་ཟེས་སྨྲས་པ། བདག་གིས་ལུས་ཀུན་ཏུ་སྡུག་བསྔལ་སྣ་ཚོགས་མྱོང་ནས་ཡུན་རིང་མོ་ཞིག་ལོན་ཏེ་གདོད་ལོབས་པས། རྒྱལ་པོ་ཆེན་པོ། ཐོས་པར་འདོད་ན་འདི་ཙམ་གྱིས་ཆོག་པ་མ་ཡིན་ནོ། །རྒྱལ་པོས་ཐལ་མོ་སྦྱར་ཏེ་ཅི་དང་ཅི་འདོད་པ་སྨྲོས་ཤིག་དང ། སྟོན་པ་ཁྱོད་ལ་མི་ཕངས་པར་ཐམས་ཅད་དབུལ་ལོ། །བྲམ་ཟེས་སྨྲས་པ། གལ་ཏེ་ཁྱོད་ཀྱི་ལུས་ལ་ལྕགས་གཟེར་སྟོང་གིས་བཏབ་ན་ཁྱོད་ལ་ཆོས་སྦྱིན་ནོ། །ཞེས་སྨྲས་པ་དང ། རྒྱལ་པོས་དེ་བཞིན་དུ་བགྱིའོ། །ད་སྟེ་ཞག་བདུན་ན་དངོས་པོ་འདི་དག་བསྒྲུབ་བོ། །ཞེས་སྨྲས་སོ། །དེའི་ཚེ་ན་རྒྱལ་པོ་ཆེན་པོ་དེས་ཕོ་ཉ་ཞིག་གླང་པོ་ཆེ་ཉིན་གཅིག་ལ་རྒྱང་གྲགས་བརྒྱད་ཁྲི་བཞི་སྟོང་སྙེད་དུ་འགྲོ་བ་ཞིག་ལ་བསྐྱོན་ཏེ་ཛམྦུའི་གླིང་ཀུན་ཏུ་འདི་སྐད་ཅེས་བསྒོའོ། །རྒྱལ་
213b
> པ་ཆེན་པོ་བྱིང་ལིང་གར་ལིས་ད་སྟེ་ཞག་བདུན་ན་ལུས་ལ་ལྕགས་གཟེར་སྟོང་འདེབས་སོ། །ཞེས་བསྒོ་བ་བློན་པོ་དང ། འགྲོ་བ་མང་པོས་ཐོས་ནས་ཐམས་ཅད་རྒྱལ་པོའི་དྲུང་དུ་ལྷགས་ཏེ་འདི་སྐད་ཅེས་གསོལ་ཏོ། །བདག་ཅག་ཕྱོགས་བཞིན་འཁོད་པའི་འགྲོ་བ་ཐམས་ཅད་རྒྱལ་པོའི་ཡོན་ཏན་དང་བཀའ་དྲིན་གྱིས་སོ་སོ་ནས་བདེ་སྐྱིད་པ་ལ་ལོངས་སྤྱོད་དེ། རྒྱལ་པོ་ཆེན་པོ། བདག་ཅག་གི་སླད་དུ་སྐུ་ལ་ལྕགས་གཟེར་སྟོང་མི་གདབ་ཏུ་གསོལ་ཞེས་གསོལ་པ་དང ། དེའི་ཚེ་ན་བཙུན་མོ་དང ། ཕོ་བྲང་གི་སླས་དང ། རྒྱལ་ཚབ་དང ། རྒྱལ་བུ་དང ། བློན་པོ་ཐམས་ཅད་ཀྱིས་ཀྱང་གསོལ་བ་བཏབ་སྟེ། རྒྱལ་པོ་ཆེན་པོ། བདག་ཅག་ལ་ཐུགས་བརྩེ་བར་དགོངས་ཏེ་མི་གཅིག་གི་སླད་དུ་སྐུ་ཚེའི་དུས་མཛད་ཅིང་འབངས་ཐམས་ཅད་སྤང་བ་མི་རིགས་སོ། །དེ་ལ་རྒྱལ་པོས་འདི་སྐད་ཅེས་སྨྲས་སོ། །བདག་ནི། ཡུན་རིང་པོ་ནས་འཁོར་བ་ན་ལུས་གྲངས་མེད་པ་ཆུད་གསན་ཏེ་བར་འགའ་ནི། འདོད་ཆགས་དང ། ཞེ་སྡང་དང ། གཏི་མུག་གིས་ལུས་འདི་བསད་པའི་རུས་པ་དཀར་པོ་སྤུངས་པ་ནི།་རི་རབ་པས་ཀྱང་མཐོ། །མགོ་བཅད་པའི་ཁྲག་ཟགས་པ་ནི། ཆུ་ཀླུང་ལྔ་བས་ཀྱང་ཆེ། དུས་པའི་མཆི་མ་ནི། རྒྱ་མཚོ་བཞི་བས་ཀྱང་ལྷག་སྟེ། དེ་ལྟར་རྣམ་པ་སྣ་
214a
> ༄#། །ཚོགས་ཀྱི་སྒོ་ནས་ལུས་སྲོག་ཆུད་གསན་ཀྱང་ལན་འགའ་ཡང་ཆོས་ཀྱི་ཕྱིར་མ་ཡིན་ཏེ། དེ་བདག་གིས་གཟེར་བུ་བཏབ་ལ་སངས་རྒྱས་སུ་བསྒྲུབ་བོ། །ཕྱིས་མངོན་པར་སངས་རྒྱས་ནས་ཤེས་རབ་ཀྱི་རལ་གྲིས་ཁྱེད་ཀྱི་ཀུན་ནས་ཉོན་མོངས་པའི་ནད་གཅོད་པར་བྱེད་ན། ཅིའི་ཕྱིར་ངའི་བྱང་ཆུབ་ཀྱི་བར་དུ་གཅོད་པར་བྱེད་ཅེས་སྨྲས་པ་དང ། དེ་ནས་འཁོར་མང་པོ་རྣམས་ཀྱང་ཅང་མི་སྨྲ་བར་གྱུར་ཏོ། །དེ་ནས་རྒྱལ་པོས་བྲམ་ཟེ་ལ་སྨྲས་པ། སྟོན་པ་ཆེན་པོ། ཐུགས་བརྩེ་བར་དགོངས་ཏེ་སྔར་ཆོས་བསྟན་ནས་དེའི་འོག་ཏུ་ལྕགས་གཟེར་གྱིས་ཐོབ་ཅིག་།གལ་ཏེ་ཚེའི་དུས་བྱས་ན་ཆོས་ཐོས་པར་མི་འགྱུར་རོ། །ཞེས་སྨྲས་པ་དང ། བྲམ་ཟེས་ཚིགས་སུ་བཅད་དེ་སྨྲས་པ། འདུ་བྱེད་ཐམས་ཅད་མི་རྟག་སྟེ། །སྐྱེ་བ་ཐམས་ཅད་སྡུག་བསྔལ་བཅས། །ཆོས་ཀུན་སྟོང་བས་བདག་པོ་མེད། །བདག་གི་བ་ཡང་ཡོད་མ་ཡིན། །ཚིགས་སུ་བཅད་པ་འདི་སྨྲས་ནས་ལུས་ལ་ལྕགས་གཟེར་སྟོང་གིས་བཏབ་བོ། །དེའི་ཚེ་ན་རྒྱལ་ཕྲན་དང ། བློན་པོ་དང ། འཁོར་མང་པོ་རྣམས་ཀྱིས་དེ་ལྟ་བུར་གྱུར་པ་མཐོང་ནས་རི་ཆེན་པོ་འགྱེལ་བ་ལྟར་ལུས་ས་ལ་བརྡབས་ཏེ་དུས་ནས་ཅི་ཡང་མི་དྲན་པར་ས་ལ་འགྲེའོ། །དེའི་ཚེ་ན་གནམས་རྣམ་པ་དྲུག་ཏུ་
214b
> གཡོས་ནས་འདོད་པའི་ཁམས་དང ། གཟུགས་ཀྱི་ཁམས་ཀྱི་ལྷ་རྣམས་ངོ་མཚར་དུ་གྱུར་ཏེ་ཐམས་ཅད་ནམ་མཁའ་ལས་བབས་ནས་བྱང་ཆུབ་སེམས་དཔའི་དྲུང་དུ་ལྷགས་ཏེ། དེ་ལྟར་ཆོས་ཀྱི་ཕྱིར་སྡུག་བསྔལ་ཆེན་པོ་ལུས་ཀྱིས་མྱོང་བར་མཐོང་ནས་ཐམས་ཅད་དུས་ནས་མཆི་མ་ཆར་བཞིན་དུ་ཕབ་ནས་ལྷ་རྫས་ཀྱི་མེ་ཏོག་གིས་མཆོད་པ་བྱས་སོ། །དེའི་ཚེ་ན་བརྒྱ་བྱིན་ལྷའི་དབང་པོས་རྒྱལ་པོ་གང་ན་བ་དེར་འོངས་ནས་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། ཤིན་ཏུ་བརྩོན་འགྲུས་བརྩམས་ཏེ་སྡུག་བསྔལ་ལ་ཅི་མི་སྙམ་པ་འདི་ཆོས་ཀྱི་ཕྱིར་རམ། འོན་ཏེ་བརྒྱ་བྱིན་ནམ། འཁོར་ལོ་བསྒྱུར་བའི་རྒྱལ་པོ་འདོད་དམ། འོན་ཏེ་བདུད་ཀྱི་རྒྱལ་པོའམ། ཚངས་པའི་རྒྱལ་པོའམ། དབང་ཕྱུག་ཆེན་པོ་འདོད་ཅེས་སྨྲས་པ་དང ། རྒྱལ་པོས་སྨྲས་པ། བདག་གིས་བྱས་པ་འདི་ནི། ཁམས་གསུམ་གྱི་བདེ་བ་མྱོང་བར་འདོད་པ་མ་ཡིན་གྱི།་བསོད་ནམས་ཇི་སྙེད་ཡོད་པ་འདིས་སངས་རྒྱས་འདོད་པའི་ཕྱིར་རོ། །བརྒྱ་བྱིན་གྱིས་སྨྲས་པ། བདག་གིས་བལྟས་ན་རྒྱལ་པོའི་ལུས་འདར་ཞིང་མི་བཟོད་པ་ལ་བལྟས་ན། འདི་སྐད་ཟེར་ཞིང་འགྱོད་པ་མེད་ཅེས་སྨྲས་པ་འདི་ཅིས་ཡིད་ཆེས་པར་འགྱུར། རྒྱལ་པོས་སྨྲས་པ། གལ་ཏེ་བདག་གིས་སྨྲས་པ་བདེན་ཏེ་འགྱེད་
215a
> ༄#། །པའི་སེམས་མེད་ན། བདག་གི་ལུས་སྔ་མཁོ་བཞིན་དུ་རྨ་མེད་པར་གྱུར་ཅིག་ཅེས་སྨྲས་མ་ཐག་ཏུ་སྔ་མཁོ་བཞིན་དུ་གྱུར་ནས་ལྷ་དང་མི་རྣམས་དགའ་མགུ་རངས་པར་གྱུར་ཏོ། །དེའི་ཚེ་ཡང་འགྲོ་བ་མང་པོ་བསྐྱབ་པའི་སླད་དུ་ཆོས་བཙལ་ན། བཅོམ་ལྡན་འདས་ནི། ཆོས་ཀྱི་རྒྱ་མཚོ་ཡོངས་སུ་རྫོགས་ཤིང་ཡོན་ཏན་ཚད་མ་མཆིས་པ་དང་ལྡན་ན། ཅིའི་སླད་དུ་འགྲོ་བ་མང་པོ་ཡོངས་སུ་བཏང་སྟེ་ཆོས་ཀྱང་མི་བཤད་པར་མྱ་ངན་ལས་འདའ་བར་དགོངས། བཅོམ་ལྡན་འདས། གཞན་ཡང་སྔོན་འདས་པའི་དུས་བསྐལ་པ་ཚད་མེད་གྲངས་མེད་པའི་ཕྱིར་རོལ་ན་ཛམྦུའི་གླིང་འདིར་རྒྱལ་པོ་ཚངས་ལྷ་ཞེས་བགྱི་བ་ལ་རྒྱལ་ཚབ་ད་མ་གམ་ཞེས་བགྱི་བ་ཞིག་མཆིས་ཏེ། རྒྱལ་བུ་དེ་དམ་པའི་ཆོས་ལ་དགའ་ཞིང་མོས་པས་དམ་པའི་ཆོས་ཕྱོགས་ཀུན་ཏུ་བཙལ་ན་ཡང་མ་རྙེད་ནས་མྱ་ངན་གྱིས་གདུངས་ཏེ་ཡི་མུག་པར་གྱུར་པ་ལས། དེའི་ཚེ་ན་བརྒྱ་བྱིན་ལྷའི་དབང་པོས་དེའི་བསམ་པ་ཤིན་ཏུ་རྟོགས་ཤིང་ཤེས་པས་བྲམ་ཟེ་ཞིག་ཏུ་སྤྲུལ་ཏེ་རྒྱལ་བུའི་ཕོ་བྲང་གི་སྒོར་འོངས་ནས་དམ་པའི་ཆོས་བདག་ལ་ཡོད་དེ། བསྟན་པར་བྱའོ། །ཞེས་སྨྲས་པ་རྒྱལ་བུས་ཐོས་ནས་ཕྱི་རོལ་ནས་བསུས་ཏེ་རྐང་པ་ལ་ཕྱག་བྱས་
215b
> ནས་ཕོ་བྲང་གི་ནང་དུ་ཁྲིད་དེ་སྟན་བཏིང་བ་ལ་བཞག་གོ་།རྒྱལ་བུས་ཐལ་མོ་སྦྱར་ཏེ་སྟོན་པ་ཆེན་པོ། །ཐུགས་བརྩེ་བའི་སླད་དུ་དམ་པའི་ཆོས་བསྟན་དུ་གསོལ་ཞེས་སྨྲས་པ་དང ། བྲམ་ཟེས་སྨྲས་པ། བསླབ་ཅིང་ལོབས་པ་ཡང་ཤིན་ཏུ་དཀའ་ལ། སློབ་དཔོན་གཉེར་ཞིང་ཤེས་པར་འགྱུར་བ་ཡང་སླ་བ་མ་ཡིན་པས་འདི་ཙམ་གྱིས་ཆོག་པར་འཛིན་ཏེ་ཆོས་ཐོས་པར་འདོད་པ་ནི། རིགས་པ་མ་ཡིན་ནོ། །རྒྱལ་བུས་སྨྲས་པ། སྟོན་པ་ཆེན་པོ། ཅི་དང་ཅི་འདོད་པ་གསུངས་ཤིག་དང ། བདག་གི་ལུས་དང ། ཆུང་མ་དང ། བུ་ཕོའི་བར་དུ་བཞེད་ན་ཡང་ཐམས་ཅད་ལ་མི་ཕངས་ཏེ་བཀའ་བཞིན་དུ་བགྱིའོ། །བྲམ་ཟེས་སྨྲས་པ། གལ་ཏེ་མེའི་དོང་ཟབས་སུ་ཁྲུ་བཅུ་པའི་ནང་མེ་མུར་གྱིས་བཀང་ལ། དེའི་ནང་དུ་མཆོངས་ཏེ་མཆོད་པ་བྱས་ན་དམ་པའི་ཆོས་བསྟན་ཏོ། །ཞེས་སྨྲས་པ་དང ། དེའི་ཚེ་ན་རྒྱལ་བུས་སློབ་དཔོན་གྱི་ལུང་བཞིན་དུ་མེ་དོང་ཆེན་པོ་བྱས་སོ། །དེ་ནས་རྒྱལ་པོ་དང ། བཙུན་མོ་དང ། བློན་པོ་དང ། ཕོ་བྲང་གི་སླས་ཀྱིས་དེ་ལྟ་བུར་གྱུར་པ་དག་ཐོས་ནས་ལུས་དང་སེམས་མི་བདེ་བར་གྱུར་ཏེ་ཐམས་ཅད་རྒྱལ་པོའི་ཕོ་བྲང་དུ་ལྷགས་ནས་རྒྱལ་བུ་ལ་ཡང་གསོལ་བ་བཏབ། བྲམ་ཟེ་དེ་ལ་ཡང་ཀུན་གྱིས་ནན་གྱིས་བསྐོར་ནས་བཙུན་པ། ཐུགས་རྗེ་བར་དགོངས་
216a
> ༄#། །ཏེ་བདག་ཅག་གི་སླད་དུ་རྒྱལ་བུ་འདི་མེ་དོང་དུ་མཆོང་བ་མི་མཛད་དུ་གསོལ། །འཁོར་རམ། ཡུལ་ལམ། ཆུང་མའམ། བུ་ཕོའམ། བདག་ཅག་གི་ལུས་བཞེད་ན་ཡང་འབུལ་ལོ། །ཞེས་གསོལ་བ་དང ། བྲམ་ཟེས་སྨྲས་པ། བདག་གིས་ནན་གྱིས་མི་བྱར་རུང་བ་ནི། མེད་ཀྱི། རྒྱལ་བུས་ཅིར་བསམ་པར་ཟད་དེ། གལ་ཏེ་དེ་ལྟར་ནུས་ན་ནི། ཆོས་བསྟན་པར་ཡང་བྱ། མི་ནུས་ན་ནི། ཆོས་ཀྱང་མི་བསྟན་ཏོ། །ཞེས་སྨྲས་སོ། །འཁོར་རྣམས་ཀྱིས་ཀྱང་དེའི་དམ་བཅའ་བ་བརྟན་པར་ཤེས་ཤིང་རྟོགས་ནས་ཅང་མི་སྨྲའོ། །དེའི་ཚེ་རྒྱལ་པོས་ཀྱང་ཕོ་ཉ་གཅིག་གླང་པོ་ཆེ་ཉིན་གཅིག་ལ་རྒྱང་གྲགས་བརྒྱད་སྟོང་དུ་འགྲོ་བ་ཞིག་ལ་བསྐྱོན་ཏེ་ཛམྦུའི་གླིང་ཀུན་ཏུ་བཏང་ནས་རྒྱལ་ཚབ་ད་མ་གམ་ད་སྟེ་ཞག་བདུན་ན་ཆོས་འདོད་པའི་ཕྱིར་མེ་དོང་དུ་མཆོང་གི་།ཁྱེད་མཐོང་བར་འདོད་ན་མྱུར་དུ་ཤོག་ཅིག་ཅེས་བསྒོའོ། །དེའི་ཚེ་ན་རྒྱལ་ཕྲན་དང་མི་མང་པོ་རྒས་ཤིང་ཉམ་ཆུང་བ་དག་ཀྱང་གཅིག་གིས་གཅིག་ཁྲད་དེ་རྒྱལ་བུའི་ཐད་དུ་ལྷགས་ནས་པུས་མོ་ས་ལ་བཙུགས་ཏེ་ཐལ་མོ་སྦྱར་ནས་ཐམས་ཅད་ཀྱིས་ཚིག་མཐུན་པར་འདི་སྐད་ཅེས་སྨྲས་སོ། །བདག་ཅག་ནི། རྒྱལ་བུ་ཁྱོད་ལ་བརྟེན་ཏེ། བདག་ཅག་གི་ཕ་མ་དང་འདྲ་བ་ཁྱོད་མེ་དོང་དུ་
216b
> མཆོང་ན། འབངས་འདི་དག་ཐམས་ཅད་ལ་མགོན་སྐྱབས་དང ། གནས་མེད་པར་འགྱུར་གྱི། མི་འགའ་ཙམ་གྱི་ཕྱིར་འབངས་ཐམས་ཅད་ཀྱི་དཔུང་གཉེན་མེད་པར་མ་མཛད་ཅིག་།དེ་ནས་རྒྱལ་བུས་མི་མང་པོ་དེ་དག་ལ་འདི་སྐད་ཅེས་བསྒོའོ། །ང་ནི། ཡུན་རིང་པོ་ནས་འཁོར་བར་འཁོར་བ་ན་ལུས་གྲངས་མེད་པ་ཞིག་འཕོས་པར་གྱུར་ཏེ།་མིའི་ནང་དུ་སྐྱེས་པ་ན་འདོད་པས་ཆོག་མི་ཤེས་པས་གཅིག་ལ་གཅིག་འཚེ་ཞིང་གསོད་པར་གྱུར་ཏོ། །མཐོ་རིས་ཀྱི་ལྷར་སྐྱེས་པ་ན་ལྷའི་ཚེ་ཟད་པས་འདོད་པ་དང་བྲལ་བའི་སྡུག་བསྔལ་མྱོང་ངོ ། །སེམས་ཅན་དམྱལ་བར་སྐྱེས་པ་ན་མེར་ཚིག་པ་དང ། ཟངས་སུ་བསྐོལ་བ་དང ། རལ་གྲི་དང ། མཚོན་ཆས་དམྱལ་ཞིང་གཏུབས་པ་དང ། གདུག་པའི་ཆུ་ལ་འབོག་པ་དང ། རལ་གྲིའི་སོ་ལ་འཛེག་ཅིང་ཉིན་གཅིག་ལ་ཡང་ཚེ་འཕོས་པ་གྲངས་མེད་པ་ཞིག་མྱོང་སྟེ། ན་བ་དང་འཆི་བའི་སྡུག་བསྔལ་རུས་པ་ལ་ཐུག་པ་བརྗོད་ཀྱིས་མི་ལང་བ་ཞིག་མྱོང་ངོ ། །ཡི་དྭགས་སུ་སྐྱེས་པ་ན་ཡང་ལུས་ཀྱིས་མི་བཟོད་པའི་སྡུག་བསྔལ་རྣམ་པ་སྣ་ཚོགས་མྱོང་ངོ ། ། དུད་འགྲོའི་སྐྱེ་གནས་སུ་ནི། ལུས་ཉིད་ཆུད་གཟན་དུ་གྱུར་ཏེ་ཁལ་ལྕི་བ་བཀལ་ནས་རྩཝ་ལས་མི་ཟ་བའི་སྡུག་བསྔལ་བཟོད་དཀའ་བ་མྱོང་ནས་ལུས་དང་སྲོག་ཆུད་གསན་
217a
> ༄#། །ཀྱང་དམ་པའི་ཆོས་ཀྱི་ཕྱིར་དགེ་བའི་སེམས་ཅུང་ཟད་ཙམ་ཡང་བསྐྱེད་མ་མྱོང་བས། ད་ནི། ལུས་བཅོག་པ་དམན་པ་འདིས་ཆོས་ཀྱི་ཕྱིར་མཆོད་པ་བྱེད་ཀྱི། བདག་གི་བླ་ན་མེད་པའི་བྱང་ཆུབ་ཏུ་སེམས་བསྐྱེད་པའི་བར་དུ་གཅོད་པའི་ལས་མ་བྱེད་ཅིག་།བདག་ནི། སངས་རྒྱས་སུ་བསྒྲུབ་པའི་ཕྱིར་ལུས་འདི་ཡོངས་སུ་གཏོང་སྟེ། ནམ་མངོན་པར་སངས་རྒྱས་ནས་ཁྱེད་ལ་ཆོས་ཀྱི་སྐུས་སྦྱིན་པ་བྱའོ། །ཞེས་སྨྲས་པ་དང་འཁོར་མང་པོ་ཡང་ཅང་མི་སྨྲ་བར་གྱུར་ཏོ། །དེའི་ཚེ་ན་རྒྱལ་བུ་མེ་དོང་གི་ཁར་འགྲེང་ནས་བྲམ་ཟེ་ལ་འདི་སྐད་ཅེས་གསོལ་ཏོ། །སྟོན་པ་ཆེན་པོ། བདག་ལ་སྔར་དམ་པའི་ཆོས་སྟོན་ཅིག་།གལ་ཏེ་ཚེའི་བར་ཆད་དུ་གྱུར་ན་ཆོས་མི་ཐོས་སོ། །ཞེས་གསོལ་པ་དང ། བྲམ་ཟེ་དེས་ཚིགས་སུ་བཅད་པ་འདི་དག་སྨྲས་སོ། །བྱམས་པའི་སེམས་ནི་གོམས་པར་བྱ། །ཞེ་སྡང་ཁྲོ་བའི་འདུ་ཤེས་སྤང ། ། སྙིང་རྗེ་ཆེན་པོས་སེམས་ཅན་སྐྱོབ། །ཀུན་ལ་སྙིང་བརྩེ་མཆི་མ་ཟག་།དགའ་བ་ཆེན་པོ་གོམས་པར་བྱ། །གཞན་ལའང་བདག་དང་མཐུན་པའི་ཆོས། །བྱང་ཆུབ་སེམས་ཀྱིས་བསྐྱབ་པ་ནི། །བྱང་ཆུབ་སེམས་དཔའི་སྤྱོད་པར་ལྡན། །ཚིགས་སུ་བཅད་པ་འདི་དག་སྨྲས་མ་ཐག་ཏུ་མེ་དོང་དུ་མཆོངས་པ་ལས། བརྒྱ་བྱིན་དང ། ཚངས་པའི་
217b
> རྒྱལ་པོས་ལག་པ་ཡ་རེ་ནས་ཟིན་ཏེ་འདི་སྐད་ཅེས་སྨྲས་སོ། །ཛམྦུའི་གླིང་གི་འགྲོ་བ་ཐམས་ཅད་ནི། རྒྱལ་པོ་ཁྱོད་ཀྱི་བཀའ་དྲིན་གྱིས་མི་བདེ་བའི་བག་མེད་ན། ད་མེ་དོང་དུ་མཆོངས་ན་འབངས་ཐམས་ཅད་ཀྱི་ཕ་མ་ཚེ་འཕོས་པ་དང་འདྲ་བས། ཅིའི་ཕྱིར་འགྲོ་བ་ཐམས་ཅད་ཡོངས་སུ་བཏང་སྟེ་མེ་དོང་དུ་མཆོང་ཞེས་སྨྲས་པ་དང ། རྒྱལ་བུ་དེས་ལྷའི་རྒྱལ་པོ་དང ། འཁོར་མང་པོ་ལ་བལྟས་ཏེ། ཁྱེད་ཀྱིས་བདག་བླ་ན་མེད་པའི་བྱང་ཆུབ་ཏུ་སེམས་བསྐྱེད་པའི་བར་དུ་གཅོད་པའི་ལས་མ་བྱེད་ཅིག་ཅེས་སྨྲས་པ་དང ། ཐམས་ཅད་ཅང་མི་སྨྲ་བ་དང ། དེ་མ་ཐག་ཏུ་མེ་དོང་དུ་མཆོངས་སོ། །དེའི་ཚེ་ན་གནམ་ས་རབ་ཏུ་གཡོས་ཏེ་བར་སྣང་གི་ལྷ་དག་ཀྱང་དུས་ནས་མཆི་མཆར་བཞིན་དུ་བབ་བོ། །མེ་དོང་དེ་ཡང་མེ་ཏོག་གི་རྫིང་བུར་གྱུར་ཏེ། རྒྱལ་བུ་དེ་ཡང་པདྨའི་སྟེང་ན་འདུག་པར་གྱུར་ནས་ལྷ་རྣམས་ཀྱིས་མེ་ཏོག་གི་ཆར་པུས་མོ་ནུབ་པ་ཙམ་དུ་ཕབ་བོ། །དེའི་ཚེ་དེའི་དུས་ན་རྒྱལ་པོ་ཚངས་ལྷ་ནི། རྒྱལ་པོ་ཡབ་ཟས་གཙང་མ་ལགས་སོ། །དེའི་དུས་ན་དེའི་མ་ནི། ཡུམ་ལྷ་མཛེས་ལགས་སོ། །དེའི་ཚེ་དེའི་དུས་ན་རྒྱལ་བུ་རྒྱལ་ཚབ་དེ་ནི། བཅོམ་ལྡན་འདས་ལགས་ཏེ། བཅོམ་ལྡན་འདས་ཀྱིས་དེའི་ཚེ་དེའི་དུས་ན་ཡང་འགྲོ་བ་མང་པོ་བསྐྱབ་པའི་སླད་དུ་ཆོས་བཙལ་ན། ད་ཡོངས་སུ་རྫོགས་
218a
> ༄#། །པར་གྱུར་ན་ཅིའི་སླད་དུ་ཤིན་ཏུ་གདུངས་པར་གྱུར་པའི་སེམས་ཅན་མང་པོ་ལ་ཆོས་ཀྱི་ཆར་མི་དབབ་པར་མྱ་ངན་ལས་འདའ་བར་དགོངས། བཅོམ་ལྡན་འདས། གཞན་ཡང་བསྐལ་པ་གྲངས་མེད་ཚད་མེད་པ་འདས་པའི་ཕ་རོལ་ན་དེའི་ཚེ་དེའི་དུས་ན་ཡུལ་ཝཱ་ར་ཎ་སི་འདིར་དྲང་སྲོང་ལྔ་བརྒྱ་ཞིག་གནས་ཏེ། དྲང་སྲོང་དེ་དག་གི་སྟོན་པ་ཨུཏྤ་ལ་ཞེས་བྱ་བ་དེ། དམ་པའི་ཆོས་སློབ་ཅིང་སྒོམ་པ་ལ་དགའ་བས་ཀུན་ཏུ་རྒྱུ་ཞིང་སུ་ལ་དམ་པའི་ཆོས་ཡོད་པ་དེ་བདག་ལ་སྨྲས་ན། ཅི་དང་ཅི་འདོད་པ་ཡིད་བཞིན་དུ་སྦྱིན་ཞིང་གཡོག་བྱའོ། །ཞེས་བསྒྲགས་པ་དང ། བྲམ་ཟེ་ཞིག་དེར་འོངས་ཏེ་དེ་ལ་འདི་སྐད་ཅེས་སྨྲས་སོ། །བདག་ལ་དམ་པའི་ཆོས་ཡོད་དེ། ཐོས་པར་འདོད་ན་བསྟན་པར་བྱའོ། །ཞེས་སྨྲས་པ་དང ། དྲང་སྲོང་དེས་ཐོས་ནས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བདག་ལ་ཐུགས་བརྩེ་བའི་སླད་དུ་དམ་པའི་ཆོས་བསྟན་དུ་གསོལ་ཞེས་སྨྲས་པ་དང ། བྲམ་ཟེས་སྨྲས་པ། ཆོས་ལོབས་པ་ཡང་ཤིན་ཏུ་དཀའ་སྟེ། སྡུག་བསྔལ་མང་པོ་མྱོང་བས་ཆོས་ལོབས་པ་ཡིན་གྱི།་འདི་ཙམ་གྱིས་ཆོས་ཐོས་པར་འདོད་པ་རིགས་པ་མ་ཡིན་ནོ། །ཁྱོད་སྙིང་ནས་ཐོས་པར་འདོད་ན། ཁོ་བོས་བསྒོ་བ་བཞིན་དུ་བྱོས་ཤིག་།དྲང་སྲོང་གིས་སྨྲས་པ།
218b
> སྟོན་པ་ཆེན་པོའི་བཀའ་བཞིན་དུ་མི་འགལ་བར་བགྱིའོ། །ཞེས་སྨྲས་པ་དང ། དེ་ལ་འདི་སྐད་ཅེས་བསྒོའོ། །གལ་ཏེ་ཁྱོད་ཀྱིས་པགས་པ་བཤུས་ཏེ་ཤོག་ཤོག་ཏུ་བྱས་ལ། རུས་པ་ནི། སྨྱུ་གུར་བྱས། ཁྲག་ནི། སྣག་ཚར་བྱས་ཏེ་ངས་བསྟན་པའི་ཆོས་ཡི་གེར་བྲིས་ན། ཁྱོད་ལ་ཆོས་བསྟན་ཏོ། །ཞེས་སྨྲས་སོ། །དེ་ནས་དྲང་སྲོང་དེས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་མགུ་རངས་ཏེ་དེ་བཞིན་གཤེགས་པའི་བསྟན་པ་ལ་བཀུར་སྟི་བྱ་བའི་ཕྱིར་པགས་པ་བཤུས་ནས་རུས་པ་ལ་སྨྱུ་གུར་བྱས་ཏེ་ཁྲག་སྣག་ཚར་སྦྱར་ནས་དུས་ལ་བབ་ཀྱི། མྱུར་དུ་གསུངས་ཤིག་ཅེས་སྨྲས་པ་དང ། བྲམ་ཟེ་དེས་ཚིགས་སུ་བཅད་པ་འདི་དག་སྨྲས་སོ། །ལུས་ཀྱི་སྤྱོད་པ་རབ་བསྡམས་ཤིང ། ། སྲོག་གཅོད་རྐུ་དང་གཡེམ་མི་བྱ། །ཕྲ་མ་རྫུན་དང་ཚིག་རྩུབ་དང ། །ཀྱལ་པ་སྨྲ་བར་མི་བྱའོ། །འདོད་པ་རྣམས་ལ་མི་ཆགས་ཤིང ། །ཞེ་སྡང་སེམས་ཀྱང་མེད་པར་བྱ། །ངན་པར་ལྟ་བ་ཀུན་སྤངས་ན། །བྱང་ཆུབ་སེམས་དཔའི་སྤྱོད་པའོ། །ཚིགས་སུ་བཅད་པ་འདི་དག་སྨྲས་མ་ཐག་ཏུ་ཡི་གེར་བྲིས་ནས་ཛམྦུའི་གླིང་ཀུན་ཏུ་བསྒྲགས་ཏེ་མི་མང་པོ་ཐམས་ཅད་ཀྱིས་དེ་ལ་སློབ་ཅིང་ཇི་ལྟར་བསྟན་པ་བཞིན་དུ་ནན་ཏན་བྱེད་དུ་བཅུག་གོ་།བཅོམ་ལྡན་འདས་དེའི་ཚེ་དེའི་དུས་ན་ཡང་སེམས་ཅན་མང་པོའི་སླད་དུ་ཆོས་
219a
> ༄#། །ཚོལ་བ་ལ་འགྱོད་པའི་ཐུགས་མི་མངའ་ན། དེ་ཅིའི་སླད་དུ་ཆོས་ཀྱང་མ་བསྟན་པར་ཐམས་ཅད་ཡོངས་སུ་བཏང་སྟེ་མྱ་ངན་ལས་འདའ་བར་དགོངས།་བཅོམ་ལྡན་འདས། གཞན་ཡང་སྔོན་འདས་པའི་བསྐལ་པ་ཚད་མ་མཆིས། གྲངས་མ་མཆིས་པའི་ཕ་རོལ་ན་ཛམྦུའི་གླིང་དུ་རྒྱལ་པོ་ཤི་བི་ཞེས་བགྱི་བ་ཞིག་བྱུང་སྟེ། རྒྱལ་པོ་དེ་བཞུགས་པའི་ཕོ་བྲང་ནི། དེ་བ་བརྩ་ཞེས་བགྱི་སྟེ། འབྱོར་པ། བདེ་བ། ལོ་ལེགས་པ། ལོངས་སྤྱོད་དཔག་ཏུ་མ་མཆིས་པ་དང་ལྡན་ནོ། ། དེའི་ཚེ་ན་རྒྱལ་པོ་དེ་ཛམྦུའི་གླིང་འདི་ལ་དབང་མཛད་དེ། རྒྱལ་ཕྲན་བརྒྱད་ཁྲི་བཞི་སྟོང ། ལྗོངས་ནི། སྟོང་ཕྲག་དྲུག་ཅུའི་ནང་ན་གྲོང་ཁྱེར་ཁྲི་ཕྲག་བརྒྱད་ཅུ་དང ། བཙུན་མོ་དང ། ཕོ་བྲང་གི་སླས་སྟོང་ཕྲག་ཉི་ཤུ་དང ། རྒྱལ་བུ་ལྔ་བརྒྱ་ཙམ་དང ། བྲོན་པོ་ཆེན་པོ་སྟོང་ཕྲག་བཅུ་མངའ་བ་ལ་དབང་མཛད་དེ་ཐམས་ཅད་ལ་བྱམས་པ་དང ། སྙིང་རྗེས་མ་ཁྱབ་པ་མེད་དོ། །དེའི་ཚེ་ན་བརྒྱ་བྱིན་ལྷའི་དབང་པོ་ལུས་ཀྱི་ཡོན་ཏན་ལྔ་དང་བྲལ་ཏེ། ཚེའི་དུས་བྱེད་དུ་ཉེ་བས་ཤིན་ཏུ་མི་དགའ་སྟེ་མྱ་ངན་བྱེད་པ་བི་ཤཝ་ཀརྨ་ས་མཐོང་ནས་བརྒྱ་བྱིན་ལ་ཅིའི་སླད་དུ་མྱ་ངན་མཛད་ཅིང་མི་དགྱེས་ཞེས་གསོལ་པ་དང ། བརྒྱ་བྱིན་གྱིས་སྨྲས་པ། ང་ནི། ཚེའི་དུས་བྱེད་
219b
> དུ་ཉེ་སྟེ།་ཚེ་འཕོ་བའི་ལྟས་སྔོན་དུ་བྱུང་ན་འཇིག་རྟེན་འདིར་སངས་རྒྱས་ཀྱི་ཆོས་ནི། ནུབ་པར་གྱུར་ཏེ། བྱང་ཆུབ་སེམས་དཔའ་ཡང་འཇིག་རྟེན་ན་མི་བཞུགས་ན། ཁོ་བོ་གང་ལ་སྐྱབས་སུ་འགྲོ་བ་མི་ཤེས་པས་མྱ་ངན་བྱེད་དོ། །བི་ཤ་ཀརྨས་སྨྲས་པ། ལྷའི་དབང་པོ། །ཛམྦུའི་གླིང་ན་རྒྱལ་པོ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་པ་ཤི་བི་ཞེས་བགྱི་བ་ཞིག་བཞུགས་ཏེ། ཤིན་ཏུ་ཡི་དམ་ལ་བརྟན་ཞིང་བརྩོན་འགྲུས་རྩོམ་པས་གདེན་མ་ཟེ་བར་མངོན་པར་འཚང་རྒྱ་སྟེ། དེ་ལ་སྐྱབས་སུ་སོང་ན་གདོན་མི་ཟ་བར་དཔུང་གཉེན་དུ་གྱུར་ཏེ་བགེགས་ལས་རྣམ་པར་ཐར་པར་འགྱུར་རོ། །བརྒྱ་བྱིན་གྱིས་སྨྲས་པ། གལ་ཏེ་བྱང་ཆུབ་སེམས་དཔའ་ཡིན་ན། སྔར་བགམ་དགོས་ཀྱི་སད་དུ་འདོང་ངོ ། །ཁྱོད་ཀྱིས་ནི། ཕུག་རོན་ཞིག་ཏུ་སྤྲུལ་ཅིག་།ང་ནི། ཁྲ་ཞིག་ཏུ་སྤྲུལ་ཏེ་མགྱོགས་པར་ཁྱོད་ཀྱིས་ཕྱི་བཞིན་དུ་འོང་གི་།རྒྱལ་པོ་དེ་གང་ན་བཞུགས་པར་སོང་ལ་སྐྱབས་བཙལ་ནས་བགམ་སྟེ། དེས་སྒྱུ་ཡོད་དམ། བདེན་པ་རྟོགས་པར་འགྱུར་རོ། །བི་ཤཝ་ཀརྨས་སྨྲས་པ། ལྷའི་དབང་པོ། །སྐྱེས་བུ་ཆེན་པོ་བྱང་ཆུབ་སེམས་དཔའ་ལ་འཚེ་བ་ནི། མི་ཤའི། མཆོད་པའི་རིགས་ཀྱི། ཤིན་ཏུ་དཀའ་བའི་དངོས་པོ་འདི་ལྟ་བུས་གཙེ་བའི་མི་རིགས་སོ། །ཞེས་སྨྲས་པ་དང ། བརྒྱ་བྱིན་ལྷའི་དབང་པོས་ཚིགས་
220a
> ༄#། །སུ་བཅད་པ་འདི་སྨྲས་སོ། །བདག་ནི་ང་ལ་ངན་སེམས་མིན། །གསེར་ལྟར་སད་ན་མངོན་པར་འགྱུར། །བདེན་པ་རྟོགས་པར་འདོད་པ་ན། །བྱང་ཆུབ་སེམས་དཔའ་སད་པར་བྱ། །ཚིགས་སུ་བཅད་པ་དེ་སྐད་ཅེས་སྨྲས་ནས་བི་ཤཝ་ཀརྨ་ནི། ཕུག་རོན་དུ་སྤྲུལ། བརྒྱ་བྱིན་ནི། ཁྲ་རུ་སྤྲུལ་ནས་ཕུག་རོན་གྱི་ཕྱི་བཞིན་དུ་བདས་ཏེ་བཟུང་ལ་ཐུག་པ་ལྟར་བྱས་པ་དང ། ཕུག་རོན་སྐྲག་དངངས་ནས་རྒྱལ་པོའི་མཚན་ཁུང་དུ་ཞུགས་ཏེ་རྒྱལ་པོ་ལ་སྲོག་གི་སྐྱབས་གསོལ་ཏོ། །ཁྲ་ཡང་མོད་ལ་ཕྱིན་ཏེ་ཕོ་བྲང་གི་དྲུང་གང་ན་བ་དེར་འདུག་ནས་རྒྱལ་པོ་ལ་འདི་སྐད་ཅེས་སྨྲས་སོ། །ཕུག་རོན་འདི་ནི། བདག་གི་ཟས་ལགས་ཏེ། འདིར་རྒྱལ་པོ་ལ་བབས་ཀྱི།་མྱུར་དུ་བདག་ལ་སྩོལ་ཅིག་།བདག་ནི། བཀྲེས་པས་རབ་ཏུ་ཉེན་ཏོ། །ཞེས་སྨྲས་པ་དང ། རྒྱལ་པོས་སྨྲས་པ། ཁོ་བོས་ནི། གང་བདག་ལ་སྐྱབས་སུ་འོངས་སོ་ཅོག་ལ་ཕྱིར་མི་གཏང་བར་དམ་བཅས་པས་འདི་ཡང་མི་སྦྱིན་ནོ། །ཞེས་སྨྲས་པ་དང ། ཡང་ཁྲས་སྨྲས་པ། རྒྱལ་པོས་གསུངས་པ་ལྟར་ཐམས་ཅད་ཀྱི་སྐྱབས་མཛད་དོ། །ཞེ་ན། གལ་ཏེ་བདག་གི་ཟས་མི་སྩལ་ན་བདག་ཀྱང་འཚོ་བ་དང་འབྲལ་ན། ཅི་བདག་ཀྱང་ཐམས་ཅད་ཀྱི་ནང་དུ་མ་གཏོགས་སམ། རྒྱལ་པོས་
220b
> སྨྲས་པ། ཁྱོད་ལ་ཤ་གཞན་ཞིག་སྦྱིན་ན་ཟའམ། ཁྲས་སྨྲས་པ། བདག་ནི། གསར་དུ་བཀུམ་པའི་ཤ་རློན་པ་མཆིས་ན་འཚལ་ལོ། །ཞེས་སྨྲས་པ་དང ། རྒྱལ་པོ་དེས་འདི་སྙམ་དུ་སེམས་སོ། །དེ་བདག་གིས་གསར་དུ་བསད་པའི་ཤ་རློན་པ་ཞིག་སྦྱར་ན་ནི། གཅིག་བསད་ད་གཅིག་གསོ་བ་རིགས་པ་མ་ཡིན་ཏེ། དོན་མེད་དོ་སྙམ་བསམས་ནས་ཡང་འདི་སྙམ་དུ་སེམས་སོ། །བདག་འབའ་ཞིག་གི་ལུས་མ་གཏོགས་པར་གཞན་ཇི་ཙམ་སྲོག་དང་བཅས་པ་ཐམས་ཅད་ནི། སྲོག་ཕངས་སོ་སྙམ་བསམས་ནས་གྲི་རྣོན་པོ་ཐོགས་ཏེ་བརླའི་ཤ་བཅད་ནས་ཁྲ་ལ་བྱིན་ཏེ་ཕུག་རོན་གྱི་སྲོག་བླུས་སོ། །ཁྲས་སྨྲས་པ། རྒྱལ་པོ་ཁྱོད་སྦྱིན་བདག་ཏུ་གྱུར་ཏེ་ཐམས་ཅད་ལ་སྙོམས་ན། བདག་བྱ་ཆུང་ངུ་ཞིག་ལགས་ཀྱང་སྙོམས་པར་མཛད་འཚལ་བས། གལ་ཏེ་ཕུག་རོན་གྱི་སྲོག་བླུ་ན། སྲང་གིས་བཅལ་ཏེ་མཉམ་པ་མཛད་དུ་གསོལ་ཞེས་སྨྲས་པ་དང ། རྒྱལ་པོས་སྲང་ལོངས་ཤིག་ཅེས་བཀའ་སྩལ་ཏེ། སྲང་གི་ཁུ་ལེར་ཕུག་རོན་བཞག་།སྲང་གི་གཞིར་ནི་ཤ་བཅད་པ་སྤུངས་ན། བརླའི་ཤ་ཟད་ཀྱང་ཕུག་རོན་པས་ཡང་ངོ། །ཕྲག་པ་གཉིས་དང ། རྩིབ་ལོགས་གཡས་གཡོན་དང ། ལུས་ཀྱི་ཤ་ཟད་པར་བཅད་ཀྱང་ཕུག་རོན་དང་མཉམ་པར་མ་གྱུར་ནས་རྒྱལ་པོ་དེ་ཉིད་བཞེངས་ཏེ་སྲང་
221a
> ༄#། །གི་ནང་དུ་འགྲོ་བར་གཟས་པ་ལས། ཉམས་ཀྱིས་མ་ནུས་ཏེ་ས་ལ་འགྱེལ་ནས་བརྒྱལ་ལོ། །དེ་ནས་རིང་ཞིག་ལོན་པ་དང་དྲན་པར་གྱུར་ནས་བདག་གི་སེམས་ལ་འདི་སྐད་ཅེས་སྨད་དོ། །ཐོག་མ་མེད་པའི་དུས་ནས་ཁྱོད་ཀྱིས་མ་ནུས་པས་ཁམས་གསུམ་དུ་འཁོར་ཞིང་སྡུག་བསྔལ་སྣ་ཚོགས་མྱོང་བར་གྱུར་ཀྱང་བསོད་ནམས་ཀྱི་ཚོགས་སུ་མ་གྱུར་ཏོ། །བརྩོན་འགྲུས་བརྩམས་པའི་དུས་ལ་བབ་སྟེ། ལེ་ལོ་བྱ་བའི་དུས་མ་ཡིན་ནོ། །ཞེས་རྣམ་པ་སྣ་ཚོགས་ཀྱི་སྒོ་ནས་བརྒྱད་དཀག་སྟེ། དེ་ནས་འབད་ནས་དེ་ནས་སྲང་གི་གཞིའི་ནང་དུ་ཕྱིན་པ་དང ། ད་ནི། ལེགས་སོ་ཞེས་རབ་ཏུ་དགའ་བའི་སེམས་སྐྱེས་སོ། །དེའི་ཚེ་གནམས་རྣམ་པ་དྲུག་ཏུ་གཡོས་པས་ལྷ་རྣམས་ཀྱི་ཕོ་བྲང་ཡང་འགུལ་ཞིང་ལྡེག་པར་གྱུར་ཏེ། གཟུགས་ཀྱི་ཁམས་ཀྱི་ལྷ་མན་ཆད་ཐམས་ཅད་ལྷགས་ནས་སྟེང་གི་བར་སྣང་ལ་འཁོད་དོ། །བྱང་ཆུབ་སེམས་དཔས་ཤིན་ཏུ་དཀའ་བ་སྤྱད་ཅིང་ལུས་ཀྱང་གཏན་མ་རུངས་པར་བྱས་ཏེ་ཆོས་ཀྱི་ཕྱིར་ལུས་དང་སྲོག་ལ་མི་ལྟ་བར་གྱུར་པའི་དངོས་པོ་དེ་དག་མཐོང་ནས་མཆི་མ་ཆར་བཞིན་དུ་ཟག་ཅིང་ངུས་ཏེ་ལྷ་རྫས་ཀྱི་མེ་ཏོག་ཆར་བཞིན་དུ་ཕབ་ནས་མཆོད་པ་བྱས་སོ། །དེའི་ཚེ་ན་བརྒྱ་བྱིན་གྱིས་སྔོན་གྱི་ལུས་སུ་
221b
> བ་སྒྱུར་ཏེ་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོས་འདི་ལྟ་བུའི་ཤིན་ཏུ་དཀའ་བ་མཛད་པ་འདིས་ཅི་ཞིག་བཞེད། འཁོར་ལོས་བསྒྱུར་བའི་རྒྱལ་པོ་བཞེད་དམ། བརྒྱ་བྱིན་ནམ། བདུད་ཀྱི་རྒྱལ་པོའམ། ཁམས་གསུམ་གྱི་དབང་པོ་བཞེད་དམ། ཅི་བཞེད་ཅེས་སྨྲས་པ་དང ། བྱང་ཆུབ་སེམས་དཔས་སྨྲས་པ། བདག་འདོད་པ་ནི།་ཁམས་གསུམ་གྱི་ཆེ་བཙན་གྱི་ལོངས་སྤྱོད་འདོད་པ་མ་ཡིན་གྱི། བསོད་ནམས་ཅི་བྱེད་ཀྱང་བླ་ན་མེད་པའི་བྱང་ཆུབ་འདོད་དོ། །བརྒྱ་བྱིན་གྱིས་སྨྲས་པ། འདི་ལྟར་ལུས་ཞིག་ཅིང་མ་རུངས་པར་བྱས་ཏེ་རུས་པ་ལ་ཐུག་པའི་སྡུག་བསྔལ་མྱོང་བར་གྱུར་པ་འདི་ལ་མི་འགྱོད་དམ་ཞེས་སྨྲས་པ་དང ། རྒྱལ་པོས་འགྱོད་པ་མེད་དོ། ། ཞེས་སྨྲས་སོ། །བརྒྱ་བྱིན་གྱིས་སྨྲས་པ། འགྱོད་པ་མེད་ཅེས་སྨྲས་མོད་ཀྱི། ད་ལྟར་ལུས་འདར་ཞིང་རྡེག་ལ་དབུགས་ཆད་པ་ཙམ་དུ་སྨྲ་ཡང་མ་ནུས་པ་ལ་བལྟས་ན། འགྱོད་པ་མེད་པར་ཅིས་ཡིད་ཆེས་པར་འགྱུར། རྒྱལ་པོས་སྨྲས་པ། བདག་ཐོག་མ་ནས་ཐ་མའི་བར་དུ་བ་སྤུའི་ཉག་མ་ཙམ་གྱི་འགྱོད་པའི་སེམས་མེད་ལ། བདག་ཅི་དང་ཅི་འདོད་པ་གདོན་མི་ཟ་བར་འགྲུབ་སྟེ། སྨྲས་པའི་ཚིག་འདི་བདེན་ན། བདེན་པའི་ཚིག་སྨྲས་པས་བདག་གི་ལུས་འདི་སྔ་མཁོ་བཞིན་དུ་རྨ་མེད་པར་གྱུར་ཅིག་ཅེས་
222a
> ༄#། །སྨྲས་མ་ཐག་ཏུ་རྒྱལ་པོའི་ལུས་སྔོན་པས་ཀྱང་ལྷག་པར་བཟང་པོར་གྱུར་ཏེ། ལྷ་དང་མིའི་འཇིག་རྟེན་དུ་བཅས་པ་ཐམས་ཅད་དགའ་མགུ་རངས་ནས་ངོ་མཚར་སྨད་དུ་གྱུར་ཏོ། །དེའི་ཚེ་དེའི་དུས་ན་རྒྱལ་པོ་ཤི་བི་ནི། ད་ལྟར་སངས་རྒྱས་ལགས་ཏེ། བཅོམ་ལྡན་འདས་སྔོན་འདས་པའི་དུས་ན་ཡང་སེམས་ཅན་མང་པོའི་སླད་དུ་སྐུ་ཚེ་ལ་མ་གཟིགས་ན། ད་བཅོམ་ལྡན་འདས་ཆོས་ཀྱི་རྒྱ་མཚོ་ནི། ཡོངས་སུ་རྫོགས། ཆོས་ཀྱི་རྒྱལ་མཚན་ནི། བསྒྲེང ། ཆོས་ཀྱི་རྔ་ཡང་རབ་ཏུ་བརྡུངས། ཆོས་ཀྱི་སྒྲོན་མེ་ཡང་གསལ་བར་མཛད་དེ། ཕན་པ་དང་བདེ་བའི་དོན་མཛད་པའི་དུས་ལ་བབ་ན། ཅིའི་སླད་དུ་ཆོས་ཀྱང་མ་བསྟན་པར་སེམས་ཅན་ཐམས་ཅད་ཡོངས་སུ་བཏང་སྟེ་མྱ་ངན་ལས་འདའ་བར་དགོངས། དེའི་ཚེ་ན་ཚངས་པའི་རྒྱལ་པོས་དེ་བཞིན་གཤེགས་པའི་སྤྱན་སྔར་ཐལ་མོ་སྦྱར་ཏེ།་དེ་བཞིན་གཤེགས་པས་སྔོན་གྱི་སྐུ་ཚེ་ལ་ཆོས་ཇི་ལྟར་བཙལ་བ་དང ། སེམས་ཅན་གྱི་སླད་དུ་དབུ་སྟོང་ཙམ་ཡང་བཏང་བར་གྱུར་ཏོ། །ཞེས་བསྔགས་ཤིང་བསྟོད་པ་བྱས་སོ། །དེའི་ཚེ་ན་བཅོམ་ལྡན་འདས་ཀྱིས་ཚངས་པའི་རྒྱལ་པོས་གསོལ་པ་བཞིན་དུ་གནང་བ་མཛད་ནས་ཡུལ་ཝཱ་ར་ཎཱ་སིའི་རི་དྭགས་ལ་མི་འཇིགས་
222b
> པ་བྱིན་པའི་གནས་སུ་གཤེགས་ནས་ཆོས་ཀྱི་འཁོར་ལོ་བསྐོར་ཏེ། །དེ་ལྟར་ཆོས་ཀྱི་འཁོར་ལོ་བསྐོར་བས་དཀོན་མཆོག་གསུམ་ཡང་འཇིག་རྟེན་ན་མངོན་སུམ་དུ་གྱུར་ཏོ། །དེའི་ཚེ་དེ་སྐད་ཅེས་གསུངས་ནས་ལྷ་དང ། མི་དང ། ཀླུ་དང ། གནོད་སྦྱིན་དང ། ལྷ་མ་ཡིན་སྡེ་བརྒྱད་ལ་སོགས་པ་ཐམས་ཅད་མངོན་པར་དགའ་ནས་རྗེས་སུ་སྤྱོད་དོ། །དཔེ་སྣ་ཚོགས་བསྟན་པའི་ལེའུ་སྟེ་དང་པོའོ།། །།སེམས་ཅན་ཆེན་པོས་སྟག་མོ་ལ་ལུས་བྱིན་པའི་ལེའུ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་བཅོམ་ལྡན་འདས་བསོད་སྙོམས་ཀྱི་དུས་ལ་བབ་ནས་ཤམ་ཐབས་དང་ཆོས་གོས་གསོལ་ཏེ་ལྷུང་བཟེད་བསྣམས་ནས་ཀུན་དགའ་བོ་དང་བསོད་སྙོམས་ལ་གཤེགས་སོ། །དེའི་ཚེ་གྲོང་ཁྱེར་དེ་ན་རྒན་མོ་ཞིག་ལ་བུ་རྟག་ཏུ་རྐུ་བ་གཉིས་ཤིག་ཡོད་དེ། ནོར་བདག་གིས་ཟིན་ནས་ཞལ་ཆེ་བའི་མདུན་དུ་ཁྲིད་དེ་ཁྲིམས་དང་སྦྱར་ནས་གསད་པ་ལ་ཐུག་ནས་རིགས་ངན་གྱིས་བཀྲི་སྟེ་གསོད་པའི་གནས་སུ་ཁྲིད་པ་ལས། བཅོམ་ལྡན་འདས་རྒྱང་མ་ནས་གཤེགས་པ་རྒན་མོ་མ་སྨད་གསུམ་གྱིས་མཐོང་ནས་སངས་རྒྱས་
223a
> ༄#། །གཤེགས་པའི་ཕྱོགས་སུ་ཕྱག་འཚལ་ཏེ། ལྷའི་ནང་ན་གཙོ་བོ་ཐུགས་བརྩེ་བར་དགོངས་ཏེ་བདག་གི་བུ་དགུམ་པ་ལ་ཐུག་པ་འདིའི་སྐྱབས་མཛད་དུ་གསོལ་ཞེས་སྨྲས་པ་བཅོམ་ལྡན་འདས་ཀྱིས་གསན་ནས་དེ་བཞིན་གཤེགས་པ་ཐུགས་རྗེ་ཆེན་པོས་དེ་དག་ལ་ཐུགས་བརྩེ་བར་དགོངས་ཏེ། དེ་དག་གི་བུ་སྲོག་བསྐྱབ་པའི་སླད་དུ་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་ཏེ་རྒྱལ་པོ་ལ་གསོལ་བ་འདེབས་སུ་བཏང་བ་དང ། རྒྱལ་པོས་ཀྱང་བཅོམ་ལྡན་འདས་ཀྱི་བཀའ་བཞིན་དེ་དག་བཏང་ངོ ། །དེ་དག་བཅོམ་ལྡན་འདས་ཀྱི་བཀའ་དྲིན་ཞིང་རབ་ཏུ་དགའ་བ་སྐྱེས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། ཞབས་ལ་སྤྱི་བོས་ཕྱག་འཚལ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་བཀའ་དྲིན་ཆེན་པོས་བདག་ཅག་གི་ཚེ་སྲོག་ལྷག་མ་ཙམ་ཞིག་ལུས་པར་གྱུར་ན། ལྷའི་གཙོ་བོ་ཐུགས་བརྩེ་བར་དགོངས་ཏེ་བདག་ཅག་ཆོས་ལ་རབ་ཏུ་འབྱུང་བར་ཅི་གནང་ཞེས་གསོལ་པ་དང ། བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་པས། སྐྲ་དང་ཁ་སྤུ་རང་བྱི་སྟེ་གོས་ཀྱང་དུར་སྨྲིག་ཏུ་གྱུར་ཏོ། །དེ་དག་
223b
> ཤིན་ཏུ་དད་པའི་སེམས་བརྟན་པར་གྱུར་ནས་བཅོམ་ལྡན་འདས་ཀྱིས་ཅི་རིགས་པའི་ཆོས་བསྟན་ནས་རྡུལ་དང་དྲི་མ་ཟད་དེ་དགྲ་བཅོམ་པར་གྱུར་ཏོ། །དེའི་མ་རྒན་མོ་དེ་ཡང་ཆོས་ཐོས་པས་ལན་གཅིག་ཕྱིར་མི་ལྡོག་པ་ཐོབ་པར་གྱུར་ཏོ། །དེའི་ཚེ་ཀུན་དགའ་བོས་དེ་ལྟ་བུའི་དངོས་པོ་ངོ་མཚར་ཆེ་བ་དག་མཐོང་ནས་དེ་བཞིན་གཤེགས་པ་ནི། ཡོན་ཏན་དེ་སྙེད་ཅིག་མངའོ། །ཞེས་བསྒྲགས་ཏེ། ཡང་འདི་སྙམ་དུ་རྒན་མོ་མ་སྨད་གསུམ་པོ་འདིས་སྔོན་ལེགས་པ་ཅི་ཞིག་བགྱིས་ན། ད་ལྟར་བཅོམ་ལྡན་འདས་དང་ཕྲད་དེ་ཉེས་པ་ཆེན་པོ་ལས་ཀྱང་ཐར་ལ། མྱ་ངན་ལས་འདས་པའི་བདེ་བ་ཐོབ་ནས་ལུས་གཅིག་གིས་ཕན་པ་དང ། བདེ་བའི་དོན་ཐོབ་པ་ལེགས་སོ་སྙམ་དུ་བསམ་པ་དང ། བཅོམ་ལྡན་འདས་ཀྱིས་མཁྱེན་ནས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །མ་སྨད་གསུམ་པོ་འདི་ནི། ངས་ད་ལྟར་འདི་འབའ་ཞིག་གི་དུས་སུ་གསོས་པར་མ་ཟད་ཀྱི། སྔོན་འདས་པའི་དུས་ན་ཡང་ངའི་བཀའ་དྲིན་གྱིས་གསོས་སོ། །ཀུན་དགའ་བོས་གསོལ་པ། བཅོམ་ལྡན་འདས། སྔོན་འདས་པའི་དུས་ན་ཡང་མ་སྨད་གསུམ་པོ་འདི་དག་ཇི་ལྟར་གསོས་པ་བཅོམ་ལྡན་འདས་ཀྱིས་བསྟན་ཏུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་
224a
> ༄#། །བཀའ་སྩལ་པ། སྔོན་འདས་པའི་དུས་བསྐལ་པ་གྲངས་མེད་པའི་སྔ་རོལ་ན་ཛམྦུ་གླིང་འདི་ན་རྒྱལ་པོ་ཤིང་རྟ་ཆེན་པོ་ཞེས་བྱ་བ་ཞིག་ཡོད་དོ།་རྒྱལ་ཕྲན་ལྔ་སྟོང་སྙེད་ལ་དབང་བྱེད་དོ། །རྒྱལ་པོ་དེ་ཡང་སྲས་གསུམ་མངའ་སྟེ། རབ་ནི། སྒྲ་ཆེན་པོ་ཞེས་བྱའོ། །འབྲིང་ནི། ལྷ་ཆེན་པོ་ཞེས་བྱའོ། །ཐ་ཆུང་ནི།་སེམས་ཅན་ཆེན་པོ་ཞེས་བྱ་སྟེ། སྲས་ཐ་ཆུང་དེ་ཆུང་དུ་ནས་བྱམས་པ་དང་སྙིང་རྗེར་ལྡན་ཏེ། ཐམས་ཅད་ལ་བུ་གཅིག་པ་དང་འདྲའོ། །དེའི་ཚེ་རྒྱལ་པོ་དེ་བློན་པོ་དང་བཅས། བཙུན་མོ་དང་སྲས་སུ་བཅས་ཏེ་ཕྱི་རོལ་ཏུ་འཆག་ཅིང་དོང་བ་ལས། ཅུང་ཟད་ཅིག་ངལ་བསོ་བའི་བར་དུ་སྲས་གསུམ་པོ་ཚལ་གྱི་ནང་དུ་དོང་དོང་བ་ལས་སྟག་མོ་གཅིག་བུ་བྱུང་ནས་ཞག་དུ་མ་ལོན་པ་བཀྲེས་སྐོམ་པས་ཉེན་ཏེ། ཕྱིར་ཡང་བུ་ཟ་ལ་ཐུག་པ་ཞིག་མཐོང་ནས་རྒྱལ་བུ་ཐ་ཆུང་དེས་ཕུ་བོ་གཉིས་ལ་སྨྲས་པ། སྟག་མོ་འདི་ནི། ཤིན་ཏུ་སྡུག་བསྔལ་གྱིས་གཟིར་ཏེ་ཉམ་ཆུང་ལ་རིད་པས་ཤི་ལ་ཐུག་པ་འདི་ལྟ་བུ་བུ་བྱུང་མ་ཐག་པ་ཡང་ཟ་རུ་འདོད་དོ། །ཞེས་སྨྲས་པ་དང ། ཕུ་བོ་གཉིས་ཀྱིས་ཁྱོད་ཟེར་བ་བདེན་ནོ། །ཞེས་སྨྲས་སོ། །ནུ་བོས་ཡང་ཕུ་བོ་གཉིས་ལ་སྨྲས་པ། སྟག་མོ་འདི་ཟས་སུ་ཅི་ཟ་ཞེས་དྲིས་
224b
> ན།་ཕུ་བོ་གཉིས་ཀྱིས་བསད་མ་ཐག་པའི་ཤ་རློན་དང ། ཁྲག་དྲོན་གྱིས་དེའི་ཡིད་ཚིམ་པར་འགྱུར་རོ། །ཞེས་སྨྲས་སོ། །ཡང་སྨྲས་པ། གང་སུ་ཡང་རུང་སྟེ་དེ་ལྟ་བུའི་དངོས་པོས་འདིའི་སྲོག་བསྐྱབས་ཏེ་མི་ཉམས་པར་བྱེད་ནུས་པ་ཡོད་དམ། ཕུ་བོ་གཉིས་ཀྱིས་སྨྲས་པ། དེ་ནི། ཤིན་ཏུ་ཡང་དཀའ་བས་མེད་དོ། །དེ་ནས་རྒྱལ་བུ་ཐ་ཆུང་དེས་ཡིད་ལ་འདི་སྙམ་དུ་བསམ་མོ། །བདག་ཡུན་རིང་པོ་ནས་འཁོར་བ་ན་འཁོར་ཞིང་ལུས་དང་སྲོག་གྲངས་མེད་པ་ཞིག་ཆུད་གསན་ཏེ། བར་འགའ་ནི། འདོད་ཆགས་ཀྱི་ཕྱིར།་བར་འགའ་ནི། ཞེ་སྡང་གི་ཕྱིར། བར་འགའ་ནི། གཏི་མུག་གི་ཕྱིར་ལུས་བཏང་སྟེ། ཆོས་ཀྱི་ཕྱིར་བསོད་ནམས་ཀྱི་ཞིང་དང་ལན་འགའ་ཡང་མ་ཕྲད་པའི་ལུས་འདི་ཅི་རུང་སྙམ་བསམ་པ་ཐག་བཅད་ནས་གསུམ་ཆར་འགྲོགས་ཏེ་སོང་བ་ལས་རིང་པོར་མ་ཕྱིན་པར་ཕུ་བོ་གཉིས་ལ་འདི་སྐད་ཅེས་སྨྲས་སོ། །མཆེད་གཉིས་སླར་གཤེགས་ཤིག་དང ། བདག་དོན་ཞིག་གཉེར་ཏེ་སླད་བཞིན་དུ་སླེབ་པར་མཆིའོ། །ཞེས་སྨྲས་ནས་ལམ་དེ་ཉིད་དུ་ཞུགས་ཏེ་སྟག་མོའི་ཚང་གང་ན་འདུག་པར་མྱུར་དུ་སོང་ནས་སྟག་མོའི་དྲུང་དུ་ཉལ་བ་དང ། སྟག་མོ་ཁ་ཐམས་ནས་ཟ་མ་ནུས་སོ། །དེའི་ཚེ་རྒྱལ་བུས་ཤིང་གི་ཚལ་པ་རྣོན་པོས་ལུས་ལ་ཁྲག་ཕྱུང་ནས་སྟག་མོ་ལ་ལྡག་
225a
> ༄#། །ཏུ་བཅུག་པ་དང ། ཁ་ཡང་ཕྱེ་ནས་ལུས་ཀྱི་ཤ་མ་ལུས་པར་ཟོས་སོ། །ཕུ་བོ་གཉིས་ཀྱིས་བསྡད་ནས་རིང་ཞིག་ཏུ་མ་འོངས་པས་ཕྱིར་རྗེས་བཞིན་དུ་ཚོལ་དུ་དོང་བ་ལས་སྔར་སྨྲས་པའི་ཚུལ་ལ་བརྟགས་ནས་གདོན་མི་ཟ་བར་སྟག་མོ་ལྟོགས་པ་སྙོད་དུ་སོང་ངོ་སྙམ་བསམ་ནས་དེར་ཕྱིན་ཏེ་བལྟས་པ་ན། ནུ་བོ་ཐ་ཆུང་སྟག་གིས་ཟོས་ཏེ་ཤ་དང་ཁྲག་གིས་ཀུན་ཏུ་བསྒོས་ནས་རྩོག་རྩོག་པ་ལྟར་འདུག་པ་མཐོང་ནས་ལུས་ས་ལ་བརྡབས་ཏེ་བརྒྱལ་ལོ། །རིང་ཞིག་ལོན་པ་དང་དབུགས་ཕྱིར་ཕྱུང་ནས་ཆོ་ངེས་བཏབ་སྟེ་ས་ལ་འགྲེ་ཞིང་འཁམས་པར་གྱུར་ཏོ། །དེའི་ཚེ་ན་བཙུན་མོ་ཡུམ་མནལ་པའི་རྨི་ལམ་ན་ཕུག་རོན་གསུམ་ཞིག་ཀུན་ཏུ་འཕུར་ཞིང་རྩེ་བ་ལས། ནང་གི་ཆུང་བ་གཅིག་ཁྲས་ཁྱེར་བ་སྙམ་རྨིས་མ་ཐག་ཏུ་སད་ནས་སྔངས་སྐྲག་སྟེ་རྒྱལ་པོ་ལ་བསྙད་དོ། །བདག་གིས་གཏམ་དུ་ཐོས་ན། ཕུག་རོན་ནི། བུའི་བླ་སྟེ། ཕུག་རོན་ནང་གི་ཆུང་དུ་ཁྲས་ཁྱེར་བ་ལས། བདག་གི་བུ་ནང་གི་སྡུག་པ་བཀྲ་མི་ཤིས་སུ་ངེས་ཀྱི་ཞེས་དེ་མ་ཐག་ཏུ་ཀུན་ཏུ་ཚོལ་བ་བཏང་བ་ལས།་རིང་པོར་མ་ལོན་པར་རྒྱལ་བུ་གཉིས་ནི། འོངས་ཀྱི། བུ་ནང་གི་སྡུག་པ་ཅང་མ་ཉེས་སམ། ག་རེ་ཞེས་དྲིས་ན་ཕུ་བོ་གཉིས་སྐད་ཀྱིས་བྲངས་ཏེ་རིང་
225b
> ཞིག་ཏུ་དབུགས་ཀྱང་མ་ཕྱིན། སྨྲ་ཡང་མ་ནུས་ནས་དེའི་འོག་ཏུ་དབུགས་ཕྱིན་པ་དང ། སྟག་གིས་ཟོས་སོ། །ཞེས་སྨྲས་སོ། །ལྷ་མོས་དེ་སྐད་ཅེས་སྨྲས་པ་ཐོས་ནས་འཁམས་ཏེ་ས་ལ་འགྱེལ་ནས་རིང་ཞིག་ལོན་པ་དང་དབུགས་ཕྱིན་ཏེ། པུ་གཉིས་དང ། བཙུན་མོ་དང ། ཕོ་བྲང་སླས་སུ་བཅས་ཏེ་མྱུར་བར་རྒྱལ་བུ་གང་དུ་ཚེ་འཕོས་པའི་གནས་སུ་སོང་ངོ ། །དེའི་ཚེ་སྟག་མོས་རྒྱལ་བུའི་ཤ་ནི་ཟད་པར་ཟོས་ནས་རུས་པ་དང ། ཁྲག་འབའ་ཞིག་ས་ལ་རྩོག་རྩོག་པ་ལྟར་འདུག་པ་མཐོང་ནས་བཙུན་མོས་ནི། མགོ་ནས་བཟུང ། རྒྱལ་པོས་ནི། ལག་པ་ནས་བཟུང་སྟེ་ཆོ་ངེས་བཏབ་ནས་དུས་པ་དང ། དེར་ཡང་འཁམས་ནས་རིང་ཞིག་ལོན་ཏེ་ཕྱིར་སངས་སོ། །རྒྱལ་བུ་སེམས་ཅན་ཆེན་པོ་དེ་དེར་ཚེ་འཕོས་ནས་དགའ་ལྡན་ལྷའི་གནས་སུ་སྐྱེས་སོ། །བདག་ཅི་སྤྱད་པས་འདིར་སྐྱེས་སྙམ་བསམ་སྟེ། ལྷའི་མིག་གིས་རྒྱུད་ལྔ་ཀུན་ཏུ་བརྟགས་ན་བདག་ཚེ་འཕོས་པའི་རུས་བུ་ཚལ་ན་འདུག་པ་ལ་ཕ་མས་བསྐོར་ཏེ་ཤིན་ཏུ་ཡིད་ལ་གཅགས་པས་མྱ་ངན་གྱི་ཟུག་རྡུས་སྡུག་བསྔལ་ཞིང་ཆོ་ངེས་འདེབས་པ་མཐོང་ནས་ལྷས་བསམ་པ། བདག་གི་ཕ་མ་འདི་ལྟར་མི་དགའ་བའི་རྐྱེན་གྱིས་གལ་ཏེ་ན་ལུས་དང་སྲོག་གི་བར་ཆད་དུ་འགྱུར་གྱི། དེ་ལ་སྤྲོ་བ་བསྐྱེད་ཅིང་གཏམ་བྱར་འགྲོ་སྙམ་བསམ་ནས་ནམ་མཁའ་ལས་བབས་ཏེ་སྟེང་
226a
> ༄#། །གི་ནམ་མཁའ་ལས་ཚིག་སྙན་པ་རྣམ་པ་སྣ་ཚོགས་ཀྱིས་ཕ་མ་གཉིས་སྤྲོ་བ་བསྐྱེད་དོ། །ཕ་མ་གཉིས་ཀྱིས་ནམ་མཁར་བལྟས་ནས་ལྷ་ཁྱོད་སུ་ཞིག་ལགས་པ་བདག་ལ་སྨྲོས་ཤིག་ཅེས་སྨྲས་པ་དང ། ལྷས་སྨྲས་པ། བདག་ནི། རྒྱལ་བུ་སེམས་ཅན་ཆེན་པོ་ཞེས་བྱ་བ་ཡིན་ཏེ། བདག་གིས་ལུས་སྟག་མོ་ལྟོགས་པ་ལ་བྱིན་ནས་དགའ་ལྡན་གྱི་ལྷའི་གནས་སུ་སྐྱེས་སོ། །རྒྱལ་པོ་ཆེན་པོ། འདི་ལྟར་མཁྱེན་པར་མཛོད་ཅིག་།ཇི་ཙམ་དུ་སྲིད་པ་དང་བཅས་པའི་ཆོས་ནི། མཐར་འཇིག་པ་འོང ། སྐྱེ་བ་ཡོད་ན་ངེས་པར་འཇིག་གོ་།སྡིག་པ་བྱས་ན་སེམས་ཅན་དམྱལ་བར་ལྟུང་གི་།དགེ་བ་བྱས་ན་མཐོ་རིས་སུ་སྐྱེ་སྟེ། སྐྱེ་བ་དང་འཇིག་པ་ནི། ཀུན་ལ་སྲིད་ན། ཅིའི་སླད་དུ་བདག་འབའ་ཞིག་གི་ཕྱིར་མྱ་ངན་གྱི་རྒྱ་མཚོར་ལྷུང་བ་མི་ཚོར་རམ། དགེ་བའི་ཕྱོགས་ལ་བརྩོན་འགྲུས་མཛོད་ཅིག་།དེའི་ཕ་མས་སྨྲས་པ།་ཁྱོད་ནི། སྙིང་རྗེ་ཆེན་པོས་སྟག་མོ་སྙོད་དེ་ཐམས་ཅད་ལ་སྙིང་བརྩེ་བ་ཡིན་ན། བདག་ཅག་བཏང་སྟེ་ཚེའི་དུས་བྱས་པས་ངེད་ནི། ཁྱོད་དྲན་པའི་ཕྱིར་ཤ་ཡང་དུམ་བུ་དུམ་བུར་བཅད་པ་ཙམ་དུ་སྡུག་བསྔལ་གྱིས་གདུངས་ན། སྙིང་རྗེ་ཆེན་པོ་སྤྱོད་པ་ཁྱོད་འདི་ལྟ་བུ་བྱ་བར་རིགས་སམ། དེ་ནས་ཡང་ལྷ་དེས་ཚིག་སྙན་
226b
> པ་རྣམ་པ་སྣ་ཚོགས་ཀྱི་སྒོ་ནས་བཞམས་ཏེ་སྤྲོ་བ་བསྐྱེད་པས་དེའི་ཕ་མ་ཡང་སྤྲོ་བ་ཅུང་ཟད་སྐྱེས་ནས་རིན་པོ་ཆེ་སྣ་བདུན་གྱི་སྒྲོམ་བྱས་ཏེ་རུས་བུ་དེའི་ནང་དུ་བཅུག་ནས་སྤས་པའི་སྟེང་དུ་མཆོད་རྟེན་བྱས་སོ། །ལྷ་ཡང་ཕྱིར་གནས་སུ་སོང་ངོ ། །རྒྱལ་པོ་དང་འཁོར་མང་པོ་རྣམས་ཀྱང་ཕྱིར་ཕོ་བྲང་དུ་འོངས་སོ། །བཅོམ་ལྡན་འདས་ཀྱིས་ཀུན་དགའ་པོ་ལ་བཀའ་སྩལ་པ། ཁྱོད་ཀྱི་ཡིད་ལ་ཇི་སྙམ། དེའི་ཚེ་དེའི་དུས་ན་རྒྱལ་པོ་ཤིང་རྟ་ཆེན་པོ་དེ་སུ་ཡིན་སྙམ་དུ་སེམས་ན། དེ་ནི། ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་རྒྱལ་པོ་དེའི་བཙུན་མོ་དེ་ནི། ད་ལྟར་ངའི་ཡུམ་ལྷ་མཛེས་ཡིན་ནོ། །དེའི་དུས་ན་སྲས་རབ་སྒྲ་ཆེན་པོ་ནི། བྱམས་པ་ཡིན་ནོ། །སྲས་འབྲིང་པོ་ལྷ་ཆེན་པོ་ནི། བ་སུ་མི་ཏྲ་ཡིན་ནོ། །དེའི་ཚེ་དེའི་དུས་ན་རྒྱལ་བུ་ཐ་ཆུང་སེམས་ཅན་ཆེན་པོ་ནི། གཞན་དུ་མ་སེམས་ཤིག་།ད་ལྟར་ང་ཡིན་ནོ། །དེའི་དུས་ན་སྟག་ཕྲུག་ནི། མི་འདི་གཉིས་ཡིན་ཏེ། ངས་སྔོན་ཡང་ཡུན་རིང་པོ་ནས་བགེགས་ལས་ཐར་པར་བྱས་ཏེ་སྲོག་བསྐྱབས་ནས་བདེ་བར་བྱས་སོ། །ང་སྔོན་པར་སངས་རྒྱས་ནས་ཀྱང་བགེགས་ལས་ཐར་པར་མཛད་ནས་འཁོར་བའི་སྡུག་བསྔལ་ཆེན་པོ་ལས་ཡོངས་སུ་གྲོལ་ལོ། །དེའི་ཚེ་ན་ཀུན་དགའ་བོ་དང ། འཁོར་མང་པོ་ཐམས་ཅད་བཅོམ་ལྡན་འདས་ཀྱིས་
227a
> ༄#། །གསུངས་པ་ལ་ཡི་རང་སྟེ་མངོན་པར་བསྟོད་དོ། །སེམས་ཅན་ཆེན་པོས་སྟག་མོ་ལ་ལུས་བྱིན་པའི་ལེའུ་སྟེ་གཉིས་པའོ།། །། ཀུན་ཏུ་རྒྱུས་ཚུལ་ཁྲིམས་བསྲུངས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ནམ་གྱི་ཆ་སྟོད་ན་ལྷ་གཉིས་ཤིག་སངས་རྒྱས་གང་ན་བ་དེར་འོངས་སོ། །ལྷ་དེའི་ལུས་ཀྱི་འོད་ཀྱིས་རྒྱལ་བུ་རྒྱལ་བྱེད་ཀྱི་ཚལ་གསེར་གྱི་མདོག་ལྟར་གཅིག་ཏུ་སྣང་བར་བྱས་སོ། །དེ་ལ་བཅོམ་ལྡན་འདས་ཀྱིས་ཅི་རིགས་སུ་དམ་པའི་ཆོས་བསྟན་པས་སེམས་རྣམ་པར་གྲོལ་ཏེ་གཉི་གས་བྱང་ཆུབ་ཀྱི་འབྲས་བུ་ཐོབ་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱིར་ཡང་ལྷའི་གནས་སུ་དོང་ངོ ། །ཕྱི་དེ་ཉིན་ནམ་ལངས་མ་ཐག་ཏུ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །མདང་ལྷ་གཉིས་ཤིག་མཆིས་ཏེ་བཅོམ་ལྡན་འདས་ལ་བསྙེན་བཀུར་བགྱིས་ནས་དེའི་ལུས་ཀྱི་འོད་ཀྱིས་ཀུན་ཏུ་སྣང་ཞིང་མཛེས་པར་བགྱིས་པ་འདི་སྔོན་ལས་ཅི་ཞིག་བགྱིས་པས། དེ་ལྟ་བུའི་འབྲས་བུ་ཐོབ་པར་གྱུར་ཅེས་གསོལ་པ་དང ། བཅོམ་ལྡན་
227b
> འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །སྔོན་སངས་རྒྱས་འོད་སྲུང་མྱ་ངན་ལས་འདས་ནས་དམ་པའི་ཆོས་འཇིག་ཏུ་ཉེ་བ་ན་བྲམ་ཟེ་གཉིས་ཤིག་ཉིན་ཞག་གཅིག་པའི་ཚུལ་ཁྲིམས་བརྒྱད་མནོས་ཏེ། དེ་ལ་གཅིག་གིས་ནི། ལྷར་སྐྱེ་བར་ཤོག་ཅིག་ཅེས་སྨོན་ལམ་བཏབ་བོ། །གཅིག་གིས་ནི། རྒྱལ་པོར་གྱུར་ཅིག་ཅེས་སྨོན་ལམ་བཏབ་ནས་ཕྱིར་ཁྱིམ་དུ་འོང་ངོ ། །དེ་ལ་གཅིག་ཁྱིམ་དུ་འོངས་ནས་ཆུང་མས་ཟན་ལ་བོས་ན། ཁྱོད་འདི་སྐད་ཅེས་སྨྲས་སོ། །བདག་སངས་རྒྱས་ཀྱི་ཆོས་ལས་ཕྱི་དྲོ་ཁ་ཟས་མི་ཟ་བའི་ཁྲིམས་མནོས་ཀྱི། མི་འདོད་དོ། །ཞེས་སྨྲས་པ་དང ། ཆུང་མས་སྨྲས་པ། ཁྱོད་ནི། ཀུན་ཏུ་རྒྱུ་ཡིན་ཏེ། བདག་ཅག་གི་ཆོས་ཀྱི་ཚུལ་ཁྲིམས་ཡོད་ན།་ཅིའི་ཕྱིར་སྟོན་པ་གཞན་གྱི་ཚུལ་ཁྲིམས་ནོད། གལ་ཏེ་བདག་དང་ལྷན་ཅིག་ཟན་མི་ཟ་ན། ཁྱོད་ཇི་སྐད་སྨྲས་པ་བཞིན་དུ་ཀུན་ཏུ་རྒྱུ་གཞན་དག་ལ་བསྙད་དེ། ཁྱོད་དང་ལྷན་ཅིག་ཏུ་འདུ་ཞིང་གཏམ་ཟེར་དུ་མི་གནང་བར་སྐྲོད་དུ་གཞུག་གོ་།དེ་སྐད་ཅེས་སྨྲས་པ་དང ། ཁྱོས་མ་བཟོད་དེ་སྔངས་སྐྲག་ནས་ཆུང་མ་དང་ལྷན་ཅིག་ཏུ་དུས་མ་ཡིན་པར་ཟན་ཟོས་སོ། །མི་དེ་གཉིས་ཚེའི་དབང་ཐང་ཇི་ཙམ་ཐུབ་པ་བཞིན་དུ་སོ་སོ་ནས་ཚེའི་དུས་བྱས་ནས་རྒྱལ་པོར་སྨོན་པ་དེ་ནི། ཚུལ་ཁྲིམས་བསྲུངས་པས་
228a
> ༄#། །རྒྱལ་པོའི་རིགས་སུ་སྐྱེས་སོ། །ལྷར་སྐྱེ་བར་སྨོན་པ་དེ་ནི། ཚུལ་ཁྲིམས་ཉམས་པས་ཀླུ་ཞིག་ཏུ་སྐྱེས་སོ། །དེའི་ཚེ་ན་རྒྱལ་པོའི་བཟའ་ཤིང་ག་ར་བ་སྲུང་བ་ཞིག་ཉིན་གཅིག་བཞིན་དུ་ཤིང་ཏོག་རྣམ་པ་སྣ་ཚོགས་སྐྱེལ་བ་ལས། ཕྱིས་དུས་གཞན་ཞིག་ན་ཆུ་མིག་ཅིག་གི་ནང་ནས་ཀུ་ཤུ་ཁ་དོག་དད་དྲི་བསུང་དང་ལྡན་པ་ཞིག་རྙེད་ནས་འདི་སྙམ་དུ་བསམས་སོ། །བདག་ཤིང་ཏོག་སྐྱེལ་ཞིང་ཕན་ཚུན་འགྲོ་བའི་ཚེ་རྟག་ཏུ་སྒོ་བས་བཀག་སྟེ་ལེགས་པར་འགྲོར་མི་སྟེར་གྱི།་ཀུ་ཤུ་འདི་སྒོ་བ་དེ་ལ་སྦྱིན་ནོ་སྙམ་དུ་བསམས་ནས་རྒྱལ་པོའི་ཆབ་སྒོ་བ་ལ་བྱིན་ནོ། །ཆབ་སྒོ་བ་དེས་ཀྱང་ཤིང་ཏོག་བླངས་ནས་འདི་སྙམ་དུ་བསམས་སོ། །ཞུ་ཞིང་གསོལ་བ་ལ་འགྲོ་བའི་ཚེ་རྟག་ཏུ་ཉུག་རུམ་གྱིས་བཀག་ནས་ཉམ་བག་ཏུ་འགྲོར་མེད་ཀྱི། ཀུ་ཤུ་འདི་ནི། ཉུག་རུམ་དེ་ལ་སྦྱིན་ནོ་སྙམ་དུ་བསམས་ནས་ཉུག་རུམ་ལ་བྱིན་ནོ། །ཉུག་རུམ་གྱིས་ཀྱང་བླངས་ནས་བཙུན་མོ་ལ་ཕུལ་ལོ། །བཙུན་མོས་ཐོབ་ནས་རྒྱལ་པོ་ལ་ཕུལ་ལོ། །རྒྱལ་པོས་ཀུ་ཤུ་དེ་ཟོས་ན་རབ་ཏུ་མངར་ཞིང་ལྷག་པར་དྲི་བསུང་དང་ལྡན་པ་ཞིག་ནས་བཙུན་མོ་ལ་ཀུ་ཤུ་འདི་ག་ལས་རྙེད་ཅེས་དྲིས་ན། བཙུན་མོས་ཀྱང་ཇི་ལྟར་རྙེད་པའི་གཏམ་ཞིབ་ཏུ་བྱས་ནས་
228b
> གཅིག་ནས་གཅིག་ཏུ་ཐུག་སྟེ་ཐ་མ་ར་བ་སྲུང་བ་ལ་ཐུག་ནས་རྒྱལ་པོས་ར་བ་སྲུང་བ་བཀུག་སྟེ་དེ་ལ་འདི་སྐད་ཅེས་བཀའ་སྩལ་ཏོ། །ངའི་བཟའ་ཤིང་གི་ར་བ་ན་ཤིང་ཏོག་འདི་ལྟ་བུ་ཡོད་ན། ཅིའི་ཕྱིར་ང་ལ་མི་འབུལ་བར་གཞན་དག་ལ་སྦྱིན་ཞེས་བཀའ་སྩལ་པ་དང ། ར་བ་སྲུང་བ་དེས་ཐོག་མ་ཇི་ལྟར་རྙེད་པ་ཞིབ་ཏུ་གསོལ་ཏོ། །དེ་ནས་རྒྱལ་པོས་ར་བ་སྲུང་བ་དེ་ལ་ད་ཕྱིན་ཆད་ཀུ་ཤུ་འདི་ལྟ་བུ་རྟག་ཏུ་ཕུལ་ཅིག་ཅེས་བཀའ་སྩལ་པ་དང ། ར་བ་སྲུང་བ་དེས་འདི་སྐད་ཅེས་གསོལ་ཏོ། །ཀུ་ཤུ་འདི་ནི། འབྲས་བུ་ལས་སྐྱེས་པ་མ་ལགས་ཏེ། ཆབ་མིག་ཅིག་གི་ནང་ནས་རྙེད་པས་སླན་ཆད་ནི། བདག་གིས་མི་རྙེད་དེ། མི་འབྱོར་ཏོ། །ཞེས་གསོལ་བ་དང ། དེ་ལ་རྒྱལ་པོས་ཡང་ཁྱོད་ཀྱིས་ཕྱིན་ཆད་མི་རྙེད་ན། ཁྱོད་ཀྱིས་ལུས་དུམ་བུར་གཅད་དོ། །ཞེས་བཀའ་སྩལ་པ་དང ། ར་བ་སྲུང་བ་དེ་ཕྱིར་གནས་སུ་སོང་ནས་མྱ་ངན་བྱེད་ཅིང་དུས་པ་དང ། དུས་པའི་སྒྲ་ཆེན་པོ་ཀླུ་ཞིག་གིས་ཐོས་ནས་ཀླུ་དེ་མི་ཞིག་ཏུ་སྤྲུལ་ནས་དེ་ལ་འདི་སྐད་དུ་ཁྱོད་ཅི་ཕྱིར་མི་དགའ་ཞིང་དུ་ཞེས་དྲིས་སོ། །ར་བ་སྲུང་བ་དེས་ཇི་ལྟར་གྱུར་པའི་གཏམ་ཀླུ་ལ་ཞིབ་ཏུ་སྨྲས་པ་དང ། ཀླུ་དེ་མི་སྣང་བར་གྱུར་ནས་རིང་པོ་མ་ལོན་པར་གསེར་གྱི་གཞོང་པ་ཞིག་གི་ནང་ཤིང་ཏོག་བཟང་པོས་བཀང་སྟེ་མི་དེ་ལ་བྱིན་
229a
> ༄#། །ནས་ཁྱོད་ཀྱིས་ཤིང་ཏོག་འདི་ཁྱེར་ལ་རྒྱལ་པོ་ལ་ཕུལ་ལ་འཕྲིན་དུ་ཡང་འདི་སྐད་ཅེས་གྱིས་ཤིག་།རྒྱལ་པོ་དང་བདག་ཏུ་བཤེས་ཏེ། སྔོན་ཚེ་སྔ་མ་ལ་གཉི་ག་ཀུན་ཏུ་རྒྱུ་ཡིན་པ་ལས། ཉིན་ཞག་གཅིག་པའི་ཁྲིམས་བརྒྱད་མནོས་ཏེ་སོ་སོར་སྨོན་ལམ་བཏབ་པ་ལས། རྒྱལ་པོ་ནི། ཚུལ་ཁྲིམས་བསྲུངས་པས་རྒྱལ་པོར་གྱུར་ཏོ། །བདག་ནི། ཚུལ་ཁྲིམས་ཉམས་པས་ཀླུར་སྐྱེས་ཀྱི། ད་ཡང་ཚུལ་ཁྲིམས་སྲུང་ཞིང་ལུས་འདི་ལས་ཐར་བར་དགའོ། །ཉིན་ཞག་གཅིག་པའི་ཁྲིམས་བརྒྱད་ཀྱི་ཆོ་ག་བདག་ལ་སྩལ་དུ་གསོལ། ཅི་སྟེ་མ་གནང་ན་རྒྱལ་པོའི་ཡུལ་ཡང་རྒྱ་མཚོར་བསྒྱུར་རོ། །ཞེས་འཕྲིན་སྤྲིང་ངོ ། །ར་བ་སྲུང་བ་དེས་ཤིང་ཏོག་ཁྱེར་ཏེ་རྒྱལ་པོ་ལ་ཕུལ་ནས་ཀླུས་སྤྲིངས་པའི་འཕྲིན་ཡང་རྫོགས་པར་བསྙད་པ་དང ། རྒྱལ་པོ་དེ་མི་དགའ་བར་གྱུར་ཏོ། །དེ་ཅིའི་ཕྱིར་ཞེ་ན། དེའི་ཚེ་འཇིག་རྟེན་ན་སངས་རྒྱས་ཀྱང་མི་བཞུགས། དམ་ཆོས་ཀྱང་ནུབ་ནས་ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་ཡང་མི་རྙེད་དོ། །དོན་དེ་མ་བསྒྲུབས་ན་ནི། གནོད་པ་མངོན་དུ་བྱེད་ཀྱིས་དོགས་པས་རྟོག་པ་ལ་ཞུགས་ཏེ་མི་དགའ་བར་སེམས་ཤིང་འདུག་འདུག་པ་ལས་རྒྱལ་པོ་དེས་བློན་པོ་མཆོག་ཅིག་ཡོད་པ་ལ་འདི་སྐད་ཅེས་བཀའ་
229b
> སྩལ་ཏོ། །ཀླུ་ཞིག་ང་ལ་ཁྲིམས་བརྒྱད་ཀྱི་དཔེ་ཞིག་སློང་གི་།མི་རྙེད་དུ་མི་གནང་ངོ ། །ཞེས་བཀའ་སྩལ་ན། བློན་པོས་གསོལ་པ། འཇིག་རྟེན་ན་ཆོས་མ་མཆིས་པར་བདག་གིས་ག་ལས་རྙེད་ཅེས་གསོལ་པ་དང ། རྒྱལ་པོས་བློན་པོ་དེ་ལ་ཁྱོད་ཀྱིས་མ་རྙེད་ན། གསད་དོ། །ཞེས་བཀའ་སྩལ་ཏོ། །བློན་པོ་དེ་ཤིན་ཏུ་མི་དགའ་བཞིན་དུ་སོང་ནས་ཁྱིམ་དུ་ཕྱིན་པ་དང ། བློན་པོ་དེ་ལ་ཕ་རྒན་པོ་རྒས་ཤིང་འཁོགས་པ་ཞིག་ཡོད་དེ། ཕས་བལྟས་ན་བདག་གི་བུ་འདི་སྔོན་ཆད་ནི། འཛུམ་མུལ་ཏེ་མདངས་དང་བཅས་པས་གཏམ་ཟེར་ན། དེང་ཅིའི་ཕྱིར་བདག་གི་བུ་འདི་སྔོན་ཆད་དང་མི་འདྲ་བར་ངོ་འཛུམ་གནག་སྟེ་གཏམ་ཟེར་ཞེས་བྱས་པ་དང ། དེས་ཇི་ལྟར་གྱུར་པ་ཕ་ལ་ཞིབ་ཏུ་གཏམ་བྱས་པ་དང ། དེའི་ཕས་སྨྲས་པ། བདག་ཅག་གི་ཁྱིམ་ན་ཀ་བ་ཞིག་ལ་རྟག་ཏུ་འོད་འབྱུང་སྟེ། དེའི་ནང་ན་ཅི་ཡོད་ལྟོས་ཤིག་ཅེས་བསྒོ་བ་དང ། ཀ་བ་བྱུང་སྟེ་གཤགས་ན། དེའི་ནང་ནས་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་མདོ་དང ། ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་བྱུང་ནས་བློན་པོ་དེས་རྒྱལ་པོ་ལ་ཕུལ་ལོ། །རྒྱལ་པོས་ཐོབ་ནས་རབ་ཏུ་དགའ་མགུ་རངས་ཏེ་ཁྲིམས་བརྒྱད་ཀྱི་དཔེ་གསེར་གྱི་སྒྲོམ་བུར་བཅུག་སྟེ་ཀླུ་ལ་བསྐུར་ཏོ། །ཀླུ་དེས་
230a
> ༄#། །ཐོས་ནས་ཤིན་ཏུ་དགའ་བས་རྒྱལ་པོ་ཆེན་པོ་དེ་ལ་རིན་པོ་ཆེ་ཡང་མང་དུ་ཕུལ་ལོ། །ཉིན་ཞག་གཅིག་པའི་ཁྲིམས་བརྒྱད་བསྲུངས་ནས་གཞན་དག་ཀྱང་སྲུང་བར་བསྐུལ་ཏེ། དེ་ནས་ཚེ་འཕོས་ནས་ལྷར་སྐྱེས་སོ། །རྒྱལ་པོ་དེ་ཡང་ཆོས་བཞིན་དུ་ཚུལ་ཁྲིམས་བསྲུངས་པས་ཚེའི་དུས་བྱས་ནས་གནས་ལྷན་ཅིག་ཏུ་ལྷར་སྐྱེས་ཏེ། མདང་ནམ་གྱི་ཆ་སྟོད་ལ་ངའི་སྤྱན་སྔར་འོངས་ཏེ་ཅི་རིགས་པར་ཆོས་བསྟན་པས་རྒྱུན་དུ་ཞུགས་པའི་འབྲས་བུ་ཐོབ་ནས་ངན་སོང་གསུམ་དང་ཡོངས་སུ་བྲལ་ཏེ་ལྷ་དང་མིའི་ལོངས་སྤྱོད་མྱོང་ཞིང་མཐར་མྱ་ངན་ལས་འདའ་བའི་བར་དུ་ཐོབ་པར་གྱུར་ཏེ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་མང་པོ་ཐམས་ཅད་ཡི་རང་ནས་མངོན་པར་དགའོ། །ཀུན་ཏུ་རྒྱུས་ཚུལ་ཁྲིམས་བསྲུངས་པའི་ལེའུ་སྟེ་གསུམ་པའོ།། །།ལུས་བཙོངས་ཏེ་མཆོད་པ་བྱས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཡུལ་དེ་ན་ཁྱིམ་བདག་ཅིག་ལ་ཁྱེའུ་ཞིག་བཙས་ནས་ཁྱེའུ་དེ་དབྱིབས་ལེགས་ཤིང་བལྟ་ན་སྡུག་པ་བཟང་བ་ཞིག་སྟེ། བཙས་ནས་རིང་
230b
> པོར་མ་ལོན་པར་སྨྲ་ཡང་ཤེས་སོ། །ཁྱེའུ་དེས་ཕ་མ་ལ་བཅོམ་ལྡན་འདས་ད་ལྟར་བཞུགས་སམ་ཞེས་དྲིས་པ་དང ། ད་ལྟར་བཞུགས་སོ། །ཞེས་སྨྲས་སོ། །འོ་ན་བཙུན་པ་ཤཱ་རིའི་བུ་དང ། ཀུན་དགའ་བོ་ལ་སོགས་པ་བཞུགས་སམ་ཞེས་དྲིས་པ་དང ། དེ་ཡང་བཞུགས་སོ། །ཞེས་སྨྲས་སོ། །ཁྱེའུ་དེའི་ཕ་མས་བུ་བཙས་མ་ཐག་ཏུ་སྨྲ་ཤེས་པ་འདི་ནི། མི་མ་ཡིན་ནོ་སྙམ་ནས་ངོ་མཚར་བ་དང་ཡ་མཚན་དུ་གྱུར་པས་བཅོམ་ལྡན་འདས་ལ་ཞུས་སོ། །བཅོམ་ལྡན་འདས་ཀྱིས་ཁྱོད་ཀྱི་བུ་ནི། མཚན་དང་ལྡན་ཏེ། ཐེ་ཚེམ་མ་བྱེད་ཅིག་ཅེས་བཀའ་སྩལ་པ་དང ། ཁྱེའུ་དེའི་ཕ་མ་རབ་ཏུ་དགའ་མགུ་རངས་ཏེ་ཕྱིར་ཁྱིམ་དུ་འོངས་སོ། །དེ་ནས་ཁྱེའུ་དེས་ཕ་མ་ལ་སངས་རྒྱས་དང ། དགེ་སློང་གི་དགེ་འདུན་རྣམས་སྤྱན་དྲོངས་ཤིག་ཅེས་གསོལ་པ་དང ། དེའི་ཕ་མས་སངས་རྒྱས་དང ། དགེ་འདུན་སྤྱན་དྲངས་ན་ཡོ་བྱད་སྦྱར་དགོས་ཏེ། འཕྲལ་དུ་འབྱོར་པ་ཡང་མ་ཡིན་ནོ། །ཞེས་བསྒོའོ། །བུས་སྨྲས་པ། ཁང་པའི་ནང་ན་ཕྱག་དར་དང ། ཆག་ཆག་བྱས་ཏེ་གདན་ཐིངས་ལ། གདན་མཐོན་པོ་གསུམ་ཞིག་བསྒྲིགས་ཏེ་ཐིངས་ཤིག་དང ། ཞལ་ཟས་རོ་བརྒྱ་དང་ལྡན་པ་རང་འོང་ངོ ། །བདག་གི་ཚེ་སྔ་མའི་མ་ཡང་ད་ལྟར་ཡུལ་ཝཱ་ར་ཎི་སི་ན་མཆིས་ཀྱི། དེ་ཡང་བོས་ཤིག་ཅེས་སྨྲས་སོ། །དེའི་ཕ་མས་བུས་སྨྲས་པ་
231a
> ༄#། །བཞིན་དུ་མི་ཞིག་གླང་པོ་ཆེ་ལ་བསྐྱོན་ཏེ་དེའི་མ་ཡང་བོས་ནས་འོངས་སོ། །གདན་མཐོན་པོ་གསུམ་བཤམས་པ་དེ་གཅིག་ལ་ནི། སངས་རྒྱས་བཞུགས་སུ་གསོལ་ཅིག་།གཅིག་ལ་ནི། ཆེ་སྔ་མའི་མ་བཞུགས་ཞིག་།གཅིག་ལ་ནི། ད་ལྟར་ལུས་སྐྱད་པའི་མ་བཞུགས་ཤིག་།དེ་ནས་སངས་རྒྱས་ཀྱང་དགེ་འདུན་གྱི་འཁོར་དང་བཅས་ཏེ་གཤེགས་ནས་གདན་བཏིང་བ་ལ་རིམ་པ་བཞིན་དུ་བཞུགས་ནས་ཞལ་ཟས་བཟང་པོས་ཀྱང་ཐམས་ཅད་ཁྱེད་ཅིང་ཆོག་པར་གྱུར་ཏེ། དེ་ལ་བཅོམ་ལྡན་འདས་ཀྱིས་ཆོས་བསྟན་ནས་ཁྱེའུ་དེའི་ཕ་མ་གཉིས་དང ། ཁྱིམ་གང་གི་མི་ཆེན་པོ་དང ། ཆུང་ངུ་ཐམས་ཅད་ཀྱིས་ཆོས་ཐོས་ནས་རབ་ཏུ་དགའ་སྟེ། ཀུན་གྱིས་འབྲས་བུ་དང་པོ་ཐོབ་པར་གྱུར་ཏོ། །ཁྱེའུ་དེ་ཡང་ཕྱི་ཕྱིར་ཆེར་སྐྱེས་ནས་རབ་ཏུ་བྱུང་སྟེ་བརྩོན་འགྲུས་བརྩམས་པས་དགྲ་བཅོམ་པ་ཐོབ་པར་གྱུར་ཏོ། །བཅོམ་ལྡན་འདས་ལ་ཀུན་དགའ་བོས་གསོལ་པ། དགེ་སློང་འདི་སྔོན་ལེགས་པ་ཅི་ཞིག་བགྱིས་ན། ཆེ་ཞིང་མཐོ་བའི་རིགས་སུ་སྐྱེས་ཏེ། ཆུང་དུ་ནས་སྨྲ་ཡང་འཚལ་ལ། རབ་ཏུ་བྱུང་ནས་ཀྱང་མངོན་པར་ཤེས་པ་མྱུར་དུ་ཐོབ་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། མི་འདི་ཚེ་སྔ་མ་ལ་ཡུལ་ཝཱ་ར་ཎཱ་སིའི་
231b
> ཁྱིམ་བདག་གི་བུ་ལས་ཁྱིམ་བདག་ཚེ་འཕོས་ནས་སོ་ཚིས་ཞིག་སྟེ་དབུལ་ཕོངས་པར་གྱུར་ཏོ། །སངས་རྒྱས་བཅོམ་ལྡན་འདས་འཇིག་རྟེན་ན་བཞུགས་པ་དང་ཕྲད་ཀྱང་མཆོད་པ་བྱ་བའི་ལོངས་སྤྱོད་མེད་པས་དེ་མི་དགའ་ནས་རིགས་ཆེ་ཞིང་མཐོ་བ་བཅབས་ཏེ་གླ་ཟ་བར་ཁས་བླངས་ནས་ལོ་གཅིག་ལོན་པ་དང ། གསེར་སྲང་སྟོང་ཙམ་རྙེད་དོ། །དེ་ལ་རིགས་ཆེ་ཞིང་མཐོ་བ་ཞིག་གིས་ཁྱོད་ཆུང་མ་མི་ལེན་ནམ་ཞེས་དྲིས་ན། མི་འདོད་དོ། །ཞེས་སྨྲས་སོ། །ངེས་ཡང་དྲིས་པ། གསེར་འདིས་ཅི་ཞིག་བྱ་ཞེས་དྲིས་ན། སངས་རྒྱས་དང ། འཕགས་པའི་དགེ་འདུན་ལ་བསོད་སྙོམས་ཤིག་གསོལ་བར་དགོས་སོ། །ཞེས་སྨྲས་སོ། །རིགས་ཆེ་ཞིང་མཐོ་བ་དེས་སྨྲས་པ། ཁྱོད་སངས་རྒྱས་དང ། འཕགས་པའི་དགེ་འདུན་སྤྱན་དྲང་འདོད་ན། ཁོ་བོས་གསེར་སྦྱར་ཏེ་ཞལ་ཟས་ལ་སོགས་པའི་གཡོས་ཀྱང་བཤམ་གྱི། ཁོ་བོའི་ཁྱིམ་དུ་སྤྱན་དྲོངས་ཤིག་ཅེས་སྨྲས་པ་དང ། དབུལ་པོ་དེས་ཀྱང་དེ་བཞིན་དུ་བགྱིའོ། །ཞེས་སྨྲས་ནས་ཞལ་ཟས་བཤམས་ཏེ་སངས་རྒྱས་དང ། འཕགས་པའི་དགེ་འདུན་སྤྱན་དྲངས་སོ། །དེའི་རྒྱུ་དེའི་རྐྱེན་གྱིས་ཚེའི་དུས་བྱས་ནས་ཀྱང་ཁྱིམ་བདག་དེའི་ཁྱིམ་དུ་སྐྱེས་ཏེ་ད་ཡང་སངས་རྒྱས་སྤྱན་དྲངས་ནས་ཆོས་ཐོས་མ་ཐག་ཏུ་བྱང་ཆུབ་ཐོབ་པར་གྱུར་ཏོ། །བཅོམ་ལྡན་འདས་ཀྱིས་
232a
> ༄#། །ཀུན་དགའ་བོ་ལ་བཀའ་སྩལ་པ། སྔོན་གྱི་མི་དབུལ་པོ་དེ་ནི། ཁྱིམ་བདག་གི་ཁྱེའུ་དགེ་སློང་འདི་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་མང་པོ་ཐམས་ཅད་ཡིད་རངས་ཏེ་མངོན་པར་དགའོ། །ལུས་བཙོངས་ཏེ་མཆོད་པ་བྱས་པའི་ལེའུ་སྟེ་བཞི་པའོ།། །། རྒྱ་མཚོའི་ལྷས་དྲིས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་པོ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ཉིད་ན་ཚོང་པ་ལྔ་བརྒྱ་ཙམ་ཞིག་རྒྱ་མཚོར་རིན་པོ་ཆེ་ལེན་དུ་འགྲོ་བ་དག་འདི་ལྟར་བགྲོས་སོ། །བདག་ཅག་གིས་མིའི་ནང་ན་མཁས་ཤིང་ཤེས་པ་ཞིག་དེད་དཔོན་དུ་བཀྲིའོ། །ཞེས་བགྲོས་ནས་དགེ་བསྙེན་ཁྲིམས་ལྔ་པ་ཞིག་ཁྲིད་དེ་རྒྱ་མཚོར་ཞུགས་སོ། །རྒྱ་མཚོའི་དབུས་སུ་ཕྱིན་པ་དང ། རྒྱ་མཚོའི་ལྷ་དེ་སྲིན་པོ་ཞིག་ཏུ་སྤྲུལ་ནས་ལུས་གཟུགས་ཤིན་ཏུ་མི་སྡུག་ལ་སྔོ་ཞིང་ནག་པ། མཆེ་བ་གྱེན་དུ་བྱུང་བ། མགོ་ལ་མེ་འབར་བ་ཞིག་དྲུང་དུ་འོངས་ནས་གྲུ་འདི་ང་ལ་བྱིན་ཅིག་ཅེས་སྨྲས་ཏེ། ཚོང་པ་ལ་འདི་སྐད་ཅེས་འདྲིའོ། །འཇིག་རྟེན་ན་གང་དག་འཇིགས་སུ་རུང་བ་ང་ལས་འདའ་བ་ཡོད་དམ། ཞེས་དྲིས་པ་དང །
232b
> དགེ་བསྙེན་གྱིས་སྨྲས་པ། ཁྱོད་པས་ཤིན་ཏུ་ལྷག་པར་འཇིགས་པ་ཡང་ཡོད་དོ། །རྒྱ་མཚོའི་ལྷས་སྨྲས་པ། དེ་ལྟ་བུ་སུ་ཞིག་།དགེ་བསྙེན་གྱིས་སྨྲས་པ། འཇིག་རྟེན་ན་གླེན་པ་གཏི་མུག་ཅན། མི་དགེ་བའི་ལས་རྣམས་བག་མེད་པར་བྱེད་པ། སྲོག་གཅོད་པ་དང ། མ་བྱིན་པར་ལེན་པ་དང ། འདོད་པས་ལོག་པར་གཡེམ་པ་དང ། རྫུན་དུ་སྨྲ་བ་དང ། ཚིག་ཀྱལ་པ་སྨྲ་བ་དང ། ཕྲ་མ་དང་ཞེ་གཅོད་པའི་ཚིག་སྨྲ་བ་དང ། འདོད་ཆགས་དང་ཞེ་སྡང་ཆེ་བ། ངན་པར་ལྟ་བ་དང ། ཚེ་འཕོས་ནས་སེམས་ཅན་དམྱལ་བར་སྐྱེ་སྟེ། སྡུག་བསྔལ་རྣམ་པ་སྣ་ཚོགས་མྱོང་བ་རྣམས་སེམས་ཅན་དམྱལ་བའི་སྲུང་མས་ཁྲིད་ནས་ལ་ལ་ནི། མཚོན་གྱིས་དམྱལ་ཞིང་གཏུབས། ལ་ལ་ནི། ཤིང་རྟས་ཕན་ཚུན་དུ་དྲངས་ནས་ཁམ་ཚད་ཙམ་དུ་བཅད། ལ་ལ་ནི། གཏུན་གྱིས་བརྡུངས། ལ་ལ་ནི། རང་འཐག་གིས་བཏགས། ལ་ལ་ནི།་རལ་གྲིའི་རི་ལ་འཛེག་\?\་།ལ་ལ་ནི། མེའི་ཤིང་རྟ་དང ། ཟངས་ཁོལ་མ་དང ། ཆབ་རོམ་དང ། ངན་སྐྱུག་གི་ནང་དུ་བསྐོལ་བ་ལ་སོགས་ཏེ་སྡུག་བསྔལ་ཤིན་ཏུ་མི་བཟད་པ་རྣམ་པ་སྣ་ཚོགས་དེ་ལྟ་བུ་དག་ལོ་བརྒྱ་སྟོང་གི་པར་དུ་མྱོང་བ་དེ་ནི། ཁྱོད་པས་ཤིན་ཏུ་ཡང་ལྷག་པར་འཇིགས་སུ་རུང་ངོ ། །ཞེས་སྨྲས་པ་རྒྱ་མཚོའི་ལྷས་
233a
> ༄#། །ཐོས་ནས་དེ་མ་ཐག་ཏུ་མི་སྣང་བར་གྱུར་ཏོ། །ཡང་རྒྱ་མཚོའི་ནང་དུ་སོང་སོང་བ་ལས་རྒྱ་མཚོའི་ལྷ་དེ་མིའི་ནང་ན་ཤིན་ཏུ་རིད་ཅིང་ཉམ་ཐག་པ།་རྩ་དང་རུས་པ་ཙམ་འབྲེལ་པ་ཞིག་ཏུ་སྤྲུལ་ནས་གྲུ་འདི་ང་ལ་བྱིན་ཅིག་ཅེས་སྨྲས་ཏེ། དེ་ལ་འདི་སྐད་ཅེས་འདྲིའོ། །འཇིག་རྟེན་ན་རིང་ཅིང་ཉམ་ཐག་པ་ད་ལས་ལྷག་པ་ཡོད་དམ། དགེ་བསྙེན་གྱིས་སྨྲས་པ། ཁྱོད་པས་ཤིན་ཏུ་ལྷག་པར་ཉམ་ཐག་ཅིང་རིད་པ་ཡོད་དོ། །རྒྱ་མཚོའི་ལྷས་སྨྲས་པ། དེ་ལྟ་བུ་སུ་ཞིག ། དགེ་བསྙེན་གྱིས་སྨྲས་པ། གང་གླེན་པ་གཏི་མུག་ཅན། རང་བཞིན་གྱིས་འཇུངས་ཤིང་སེར་སྣ་བྱེད་ལ། འདོད་པས་ཕྲག་དོག་བྱེད་པ། སྦྱིན་པ་མི་ཤེས་པ་དག་ཚེ་འཕོས་ནས་ཡི་དྭགས་སུ་སྐྱེས་ཏེ། ལུས་ནི། རི་ཆེན་པོ་ཙམ་ལ། མགྲིན་པ་ནི། མོ་ཁབ་ཙམ་དུ་གྱུར་ཏེ། སྐྲ་འཛིངས་པ། གནག་ཅིང་རིད་པ། ལོ་བརྒྱ་སྟོང་གི་བར་དུ་ཆུའི་མིང་ཡང་མི་ཐོས་པ་དེ་ནི། ཁྱོད་པས་ཀྱང་ཤིན་ཏུ་ལྷག་པར་རིད་དོ། །ཞེས་སྨྲས་མ་ཐག་ཏུ་མི་སྣང་བར་གྱུར་ཏོ། །དེ་ནས་ཡང་སོང་སོང་བ་ལས་རྒྱ་མཚོའི་ལྷ་དེ་མིའི་ནང་ན་གཟུགས་བྱད་ཤིན་ཏུ་བཟང་པོ་ཞིག་ཏུ་སྤྲུལ་ནས་གྲུ་འདི་ང་ལ་བྱིན་ཅིག་ཅེས་སྨྲས་ཏེ་ཚོང་པ་དག་ལ་འཇིག་རྟེན་མིའི་ནང་ན་ད་ཙམ་དུ་གཟུགས་
233b
> བྱད་བཟང་ལ་མཛེས་པ་ཡོད་དམ། དགེ་བསྙེན་གྱིས་སྨྲས་པ། ཁྱོད་པས་བརྒྱ་འགྱུར་སྟོང་འགྱུར་གྱིས་ལྷག་པར་བཟང་བ་ཡོད་དོ། །རྒྱ་མཚོའི་ལྷས་སྨྲས་པ། བདག་པས་ལྷག་པར་བཟང་བ་དེ་སུ་ཞིག་།དགེ་བསྙེན་གྱིས་སྨྲས་པ། འཇིག་རྟེན་ན་མཁས་པ་བློ་དང་ལྡན་པ། དགེ་བ་ཕུན་སུམ་ཚོགས་པར་སྤྱོད་པ། ལུས་དང་ངག་དང་ཡིད་ཀྱི་ལས་ཡོངས་སུ་དག་པ། དཀོན་མཆོག་གསུམ་ལ་ཤིན་ཏུ་དད་པ། ཅི་འབྱོར་པ་དེས་མཆོད་པ་བྱེད་པའི་བློན་ཅན་དེ་ནི། ཚེ་འཕོས་ནས་མཐོ་རིས་ཀྱི་ལྷར་སྐྱེས་ཏེ་གཟུགས་བྱང་ལེགས་པ། སྡུག་པ། ཤིན་ཏུ་མཛེས་པ་དེ་ནི། ཁྱོད་པས་བརྒྱ་འགྱུར་སྟོང་འགྱུར་གྱིས་ལྷག་སྟེ། ཁྱོད་དང་དེ་གཉིས་བསྒྲུན་ན་སྤྲེའུ་ཞར་མ་བཀྲ་ཤིས་མར་བསྒྲུན་མ་དང་འདྲའོ། །དེ་ནས་རྒྱ་མཚོའི་ལྷས་ཆུ་སྙིམ་པ་གང་བཅུས་ནས་དགེ་བསྙེན་དེ་ལ་སྙིམ་པ་གང་གི་ཆུ་མང་ངམ། རྒྱ་མཚོའི་ཆུ་མང་ཞེས་དྲིས་པ་དང ། དགེ་བསྙེན་གྱིས་སྙིམ་པ་གང་གི་ཆུ་མང་གི་།རྒྱ་མཚོའི་ཆུ་མང་བ་མ་ཡིན་ནོ། །ཞེས་སྨྲས་སོ། །རྒྱ་མཚོའི་ལྷས་སྨྲས་པ། ཁྱོད་འདི་སྐད་དུ་སྨྲས་པའི་ཚིག་དེ་བདེན་པ་ཡིན་ནམ། དགེ་བསྙེན་གྱིས་སྨྲས་པ། ཚིག་འདི་ནི། བདེན་པ་ཡིན་ཏེ། རྫུན་པ་མ་ཡིན་ནོ། །བདེན་པར་ཅིས་མངོན། སྨྲས་པ། རྒྱ་མཚོའི་ཆུ་ཡང་མང་མོད་ཀྱི། གདོན་མི་ཟ་བར་སྐམ་པའི་
234a
> ༄#། །དུས་ཡོད་དོ། །བསྐལ་པ་མེས་འཇིག་ཏུ་ཉེ་བ་ན་ཉི་མ་གཉིས་འཆར་ཏེ། ཆུ་མིག་དང་ལྟེང་ཀ་ཀུན་སྐམ་མོ། །ཉི་མ་གསུམ་འཆར་བ་ན་ཆུ་བྲན་ཐམས་ཅད་སྐམ་མོ། །ཉི་མ་བཞི་འཆར་བ་ན་ཆུ་བོ་ཐམས་ཅད་སྐམ་མོ། །ཉི་མ་ལྔ་འཆར་བ་ན་རྒྱ་མཚོ་ཆེན་པོ་ཡང་སྔ་མ་ལས་བྲིའོ། །ཉི་མ་དྲུག་ཤར་བ་ན་སུམ་ཉིས་བྲིའོ། །ཉི་མ་བདུན་ཤར་བ་ན་རྒྱ་མཚོ་ཡང་སྐམ་སྟེ། རི་རབ་ལྷུན་པོ་ཡང་སྙིལ། རྡོ་རྗེའི་མཐའ་ལ་ཐུག་གི་བར་དུ་ཚིག་ཅིང་འབར་བར་འགྱུར་རོ། །གང་ཞིག་ཤིན་ཏུ་དད་པའི་སེམས་ཀྱིས་ཆུ་སྙིམ་པ་གང་ཙམ་སངས་རྒྱས་ལ་མཆོད་དམ། དགེ་འདུན་ལ་ཕུལ་ལམ། ཕ་མ་ལ་ཕུལ་ལམ། དབུལ་ཕོངས་ལ་བྱིན་ནམ། གཅན་གཟན་ལ་བྱིན་ན། བསོད་ནམས་འདི་ནི། བསྐལ་པ་དུ་མར་ཡང་མི་ཟད་དེ། དེ་བས་ན་རྒྱ་མཚོའི་ཆུ་ནི། ཉུང་གི་།སྙིམ་པའི་ཆུ་ནི། མང་བར་རིག་པར་བྱའོ། །དེ་ནས་རྒྱ་མཚོའི་ལྷ་རབ་ཏུ་དགའ་སྟེ། དེས་དགེ་བསྙེན་དེ་ལ་རིན་པོ་ཆེ་མང་དུ་ཕུལ་ནས་རིན་པོ་ཆེ་དམ་པ་དག་སངས་རྒྱས་དང ། དགེ་འདུན་ལ་ཡང་བསྐུར་རོ། །དགེ་བསྙེན་དང ། ཚོང་པ་རྣམས་རིན་པོ་ཆེས་ཆོག་པར་གྱུར་ནས་ཕྱིར་ཡང་བདེ་བར་ཡུལ་དུ་ཕྱིན་ཏོ། །དེའི་ཚེ་དགེ་བསྙེན་དེ་དང ། ཚོང་པ་ལྔ་
234b
> བརྒྱ་ཙམ་སངས་རྒྱས་གང་ན་བ་དེར་འོངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། སོ་སོ་ནས་རིན་པོ་ཆེ་ཐོགས་པ་དང ། རྒྱ་མཚོའི་ལྷས་བསྐུར་བ་ཡང་སངས་རྒྱས་དང ། དགེ་འདུན་ལ་ཕུལ་ཏེ། དེ་དག་པུས་མོ་ས་ལ་བཙུགས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་ཀྱང་སྟོན་པའི་བསྟན་པ་ལ་རབ་ཏུ་འབྱུང་ངོ ། །ཞེས་སྨྲས་པ་དང་བཅོམ་ལྡན་འདས་ཀྱིས་དགེ་སློང་ལེགས་པར་འོངས་སོ། །ཞེས་བཀའ་སྩལ་པས་སྐྲ་དང་ཁ་སྤུ་རང་བྱི་སྟེ་ཆོས་གོས་གྱོན་པའི་དགེ་སློང་དུ་གྱུར་ཏོ། །དེ་ནས་བཅོམ་ལྡན་འདས་ཀྱིས་ཅི་རིགས་སུ་ཆོས་བསྟན་ཅིང་ཕྱེ་བས་འདོད་པ་ཀུན་ཟད་དེ་དགྲ་བཅོམ་པར་གྱུར་ཏོ། ། འཁོར་མང་པོ་དེ་དག་བཅོམ་ལྡན་འདས་ཀྱིས་གསུངས་པ་ལ་ཡིད་རངས་ནས་མངོན་པར་དགའོ། །རྒྱ་མཚོའི་ལྷས་དྲིས་པའི་ལེའུ་སྟེ་ལྔ་པའོ།། །།བམ་པོ་གཉིས་པ། ལྷའི་བུ་གངྒཱ་ད་ར་ཞེས་བྱ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བྱ་ཀ་ལནད་ཀ་གནས་པ་འོད་མའི་ཚལ་ན་བཞུགས་སོ། །དེའི་ཚེ་ཡུལ་དེ་ན་བློན་པོ་ཤིན་ཏུ་ཕྱུག་པོ་ཞིག་ལ་བུ་ཚ་མེད་དོ། །དེའི་ཚེ་ན་ཆུ་ཀླུང་གངྒཱའི་འགྲམ་ན་མ་ཎི་བྷ་དྲ་ཞེས་བྱ་བའི་ལྷ་རྟེན་ཞིག་ཡོད་དེ། ཐམས་ཅད་དེ་ལ་ཕྱག་
235a
> ༄#། །འཚལ་ཞིང་མཆོད་པ་བྱེད་དོ། །བློན་པོ་ཆེན་པོ་དེ་ཡང་ལྷའི་རྟེན་གྱི་དྲུང་དུ་སོང་ནས་འདི་སྐད་ཅེས་གསོལ་ཏོ། །བདག་ལ་བུ་ཚ་མེད་དེ། ལྷ་ཁྱོད་ཡོན་ཏན་ཚད་མེད་པ་དང་ལྡན་ཞེས་ཐོས་ཀྱི། འགྲོ་བ་ཀུན་ལ་སྐྱོབ་པ་ཁྱོད་གཞན་གྱི་སྨོན་ལམ་བསྐང་བར་ནུས་ན། བདག་ཀྱང་བསྐྱབ་ཏུ་གསོལ་ལོ། །གལ་ཏེ་ཁྱོད་ཀྱིས་བདག་ལ་བུ་ཞིག་སྩལ་ན། གསེར་དང་དངུལ་གྱིས་ལྷ་ཁྱོད་ཀྱི་སྐུ་ཡང་གཡོགས་ཤིང་བཞུགས་པའི་རྟེན་ཡང་སྤོས་དང་བྱུག་པས་བྱུག་གོ་།ཅི་སྟེ་མངོན་རྟགས་མེད་ན།་ལྷ་ཁྱོད་ཀྱི་རྟེན་ཡང་བཤིག་ལ་ཁྱོད་ཀྱི་ལུས་ལ་མི་གཙང་བ་བཤང་གཅིས་ཀྱང་བསྐུའོ། །ཞེས་སྨྲས་པ་ལྷ་དེས་ཐོས་ནས་འདི་སྙམ་དུ་བསམ་མོ། ། བློན་པོ་འདི་ནི། ཕྱུག་ཅིང་བཙན་ལ་མཐུ་ཆེ་བས་སྨད་རིགས་ཙམ་གྱིས་འདིའི་བུར་མི་འགྱུར་ཏེ། བདག་མཐུ་ཆུང་བས་འདིའི་སྨོན་ལམ་བསྐང་མི་ནུས་སོ། །གལ་ཏེ་སྨོན་པ་བཞིན་དུ་མ་བྱས་ན་གདོན་མི་ཟ་བར་མི་སྡུག་པར་མཐོ་བཙམ་མོ་སྙམ་བུ་བསམ་ནས་རྟེན་སྲུང་བའི་ལྷ་དེས་མ་ཎི་བྷ་དྲ་ལ་གསོལ་ཏོ། །དེ་ལ་ཡང་དེ་ལྟ་བུའི་མཐུ་མེད་པས་རྣམ་ཐོས་ཀྱི་བུ་གང་ན་བ་དེར་སོང་སྟེ་རྣམ་ཐོས་ཀྱི་བུ་ལ་གསོལ་ཏོ། །རྣམ་ཐོས་ཀྱི་བུས་ཀྱང་བདག་གི་མཐུ་ཙམ་གྱིས་བུ་ཡོད་པར་མི་ནུས་སོ་སྙམ་བསམ་
235b
> ནས་རྣམ་ཐོས་ཀྱི་བུ་དེ་བརྒྱ་བྱིན་གང་ན་བ་དེར་སོང་སྟེ་འདི་སྐད་ཅེས་གསོལ་ཏོ། །བདག་གི་བློན་པོ་མ་ཎི་བྷ་དྲ་ཞེས་བགྱི་བ་དེ་བདག་ལ་འདི་སྐད་ཅེས་མཆིའོ། །རྒྱལ་པོའི་ཁབ་ན་བློན་པོ་ཆེན་པོ་ཞིག་བདག་ལ་བུ་སློང་སྟེ་སྨོན་པ་བཞིན་དུ་བྱས་ན་ནི། མཆོད་པ་དང་རིམ་གྲོ་ཡང་སྐྱེད་དོ། །སྨོན་པ་བཞིན་དུ་མ་བྱས་ན་རྟེན་ཡང་བཤིག་སྟེ་མི་སྡུག་བར་བྱའོ། །ཞེས་དམ་བཅས་པས་དེས་ནི། དམ་བཅས་པ་བཞིན་དུ་གདོན་མི་འཚལ་བར་བགྱིད་ན། བརྒྱ་བྱིན་ལྷའི་དབང་པོ། །ཁྱོད་ཀྱིས་དེ་ལ་བུ་ཞིག་མཆིས་པར་མཛད་དུ་གསོལ། །བརྒྱ་བྱིན་གྱིས་སྨྲས་པ། འདི་ནི། ཤིན་ཏུ་ཡང་དཀའ་མོད་ཀྱི། ད་ལྟར་རྒྱུ་ཞིག་སྣང་ངོ ། །དེའི་ཚེ་ན་ལྷའི་སྲས་པོ་ཞིག་ཡོན་ཏན་ལྔ་དང་བྲལ་ནས་ཚེའི་དུས་བྱེད་དུ་ཉེ་བ་ཞིག་ཡོད་དེ། དེ་ལ་འདི་སྐད་ཅེས་སྨྲས་སོ། །ཁྱོད་ནི། ཚེའི་དུས་བྱེད་པར་ངེས་པས། དུས་བྱས་ན་བློན་པོ་དེའི་བུར་སྐྱེས་ཤིག་ཅེས་སྨྲས་སོ། །ལྷའི་སྲས་པོས་སྨྲས་པ། བདག་ནི། རབ་ཏུ་བྱུང་ཞིང་དམ་པའི་ཆོས་སྤྱོད་པར་དད་དེ། གལ་ཏེ་རིགས་མཐོ་ཞིང་ཆེ་བར་སྐྱེས་ན་རབ་ཏུ་འབྱུང་བར་བཀའི། རིགས་ཐ་མལ་བར་སྐྱེས་ན་སླའོ། །ཞེས་གསོལ་པ་དང ། བརྒྱ་བྱིན་གྱིས་ཡང་སྨྲས་པ། ལྷ། ཁྱོད་དེར་སྐྱེས་ཤིག་དང ། རབ་ཏུ་འབྱུང་བར་དད་ན་ངས་གྲོགས་བྱའོ། །ཞེས་སྨྲས་སོ། །ལྷའི་
236a
> ༄#། །སྲས་པོ་དེ་དེར་ཚེ་འཕོས་ནས་བློན་པོ་དེའི་རིགས་སུ་དེའི་བཙུན་མོའི་རུམ་དུ་སྐྱེས་ཏེ། ཕྱིས་བཙས་པ་ན་དབྱིབས་ལེགས་ཤིང་བལྟ་ན་སྡུག་པ་བཟང་བ་ཞིག་བཙས་ཏེ་མཚན་མཁན་ལ་བསྟན་ནས་མཚན་མཁན་གྱིས་ཀྱང་བལྟས་ཏེ། བུ་འདི་ཐོག་མ་གང་ནས་རྙེད་ཅེས་དྲིས་ན། ཀླུང་གངྒཱའི་ལྷ་ལས་བསླངས་སོ། །ཞེས་བྱས་ནས་བུ་དེའི་མིང་ཡང་གངྒཱ་ང་ར་ཞེས་བཏགས་སོ། །ཕྱིས་ཚད་དུ་ཕྱིན་པར་སྐྱེས་པ་དང ། དེས་ཕ་མ་ལ་བདག་ནི། རབ་ཏུ་འབྱུང་བར་གསོལ་ལོ། །ཞེས་སྨྲས་སོ། །དེའི་ཕ་མས་སྨྲས་པ། ཁོ་བོ་ནི། འདི་ལྟ་བུར་ཕྱུག་ཅིང་བཙན་ཏེ་ལོངས་སྤྱོད་ཆེན་པོ་དང་ལྡན་ལ། བུ་ནི། ཁྱོད་གཅིག་པུར་ཟར་དེ། ངའི་རིགས་བསབ་ཅིང་ཕ་མ་གསོ་དགོས་ཀྱི། མི་གནང་ངོ ། །ཞེས་བསྒོ་བ་དང ། ཁྱེའུ་དེས་བསམ་པ་བཞིན་དུ་མ་གྱུར་པས་ཤིན་ཏུ་མི་དགའ་སྟེ། འདི་སྙམ་དུ་ལུས་འདི་མེད་པར་བྱས་ལ་རིགས་ཐ་མལ་པ་ཞིག་ཏུ་སྐྱེས་ཏེ་རབ་ཏུ་འབྱུང་བར་གསོལ་ན། འདི་བས་སླ་ཡང་སྲིད་སྙམ་བསམ་ནས་གསང་སྟེ་ཕྱི་རོལ་དུ་བྱུང་ནས་བྲག་མཐོན་པོ་ཞིག་ལ་མཆོངས་སོ། །བྲག་ལས་མཆོངས་ནས་ས་ལ་ལྷུང་ན་ཡང་སྣད་པའམ་ཉམས་པ་མེད་དོ། །དེ་ནས་ཆུ་ཆེན་པོའི་འགྲམ་དུ་སོང་སྟེ་ཆུར་མཆོངས་ན་ཡང་
236b
> ཆུས་གཡེངས་ཏེ་མ་ཉེས་པར་ཕྱིར་བྱུང་ངོ ། །བཙན་དུག་ཟོས་ན་ཡང་དུག་གི་མཐུས་གནོད་པར་མ་གྱུར་ནས་ཡང་འདི་སྙམ་དུ་བསམ་མོ། །བདག་གིས་རྒྱལ་པོའི་ཁྲིམས་དང་འགལ་བ་ཞིག་བྱས་ན། རྒྱལ་པོས་བསད་ཀྱང་སྲིད་སྙམ་བསམ་ནས་རྒྱལ་པོའི་བཙུན་མོ་དང་སྲས་རྣམས་ཕོ་བྲང་གི་ཕྱི་རོལ་དུ་བྱུང་སྟེ་སྐྱེད་མོས་ཚལ་གྱི་རྫིང་དུ་ཁྲུས་བྱེད་དུ་དོང་ནས་དེ་དག་གིས་གོས་དང་རྒྱན་བཀྲོལ་ཏེ་ཤིང་ལ་བཞག་གོ་།དེ་ལྟར་གོས་དང་རྒྱན་ཤིང་ལ་བཞག་པ་གངྒཱ་ད་ར་དེས་མཐོང་ནས་སྐྱེད་མོས་ཚལ་དུ་ཞུགས་ཏེ། བཙུན་མོ་དེ་དག་གི་གོས་དང་རྒྱན་པང་པས་བཏབ་ནས་སྒོར་བྱུང་བ་དང ། སྒོ་སྲུང་གིས་བཟུང་སྟེ་རྒྱལ་པོ་མ་སྐྱེས་དགྲ་ལ་ཕུལ་ལོ། །རྒྱལ་པོས་དེ་སྐད་ཅེས་ཐོས་ནས་རབ་ཏུ་ཁྲོས་ཏེ་མདའ་གཞུ་བླངས་ནས་རྒྱལ་པོ་ཉིད་ལག་དར་ཏེ་ཁྱེའུ་ལ་འཕངས་ན། མདའ་འཕངས་པ་ཁྱེའུ་ལ་མ་སོང་གི་།ཕྱིར་ཡང་རྒྱལ་པོའི་དྲུང་དུ་ལྷུང་ངོ ། ། ལན་གསུམ་གྱི་བར་དུ་དེ་ལྟར་གྱུར་ནས་རྒྱལ་པོ་དངངས་ཏེ་གཞུ་ཡང་བོར་ནས་ཁྱེའུ་ལ། ཁྱོད་ལྷའམ། ཀླུའམ། ཡི་དགས་སམ། གནོད་སྦྱིན་ནམ། ཅི་ཞིག་ཅེས་སྨྲས་སོ། ། ཁྱེའུས་གསོལ་པ། བདག་ལ་གསོལ་བ་སྣ་གཅིག་མཆིའི། དེ་གནང་ན་ལེགས་པར་སྨྲའོ། །ཞེས་གསོལ་བ་དང ། རྒྱལ་པོས་ཀྱང་དེ་བཞིན་དུ་བྱའོ། །ཞེས་སྨྲས་སོ། །
237a
> ༄#། །ཁྱེའུས་གསོལ་པ། བདག་ནི། ལྷ་ཡང་མ་ལགས། ཀླུ་ཡང་མ་ལགས་ཏེ། རྒྱལ་པོའི་ཁབ་ཀྱི་བློན་པོ་ཆེན་པོའི་བུ་ལགས་སོ། །བདག་རབ་ཏུ་བྱུང་བར་དད་ན། བདག་གི་ཕ་མས་མ་གནང་བས། བདག་གི་ལུས་འདི་གཞན་དུ་སྐྱེ་བར་བགྱི་བའི་སླད་དུ་རང་འཆིའོ་སྙམ་སྟེ་བྲག་མཐོན་པོ་ལ་མཆོངས། ཆུར་ཡང་མཆོངས། བཙན་དུག་ཀྱང་འཚལ་ན། འགུམ་དུ་མ་བཏུབ་ནས་རྒྱལ་པོའི་ཁྲིམས་ལས་འགལ་བ་ཞིག་བྱས་ན། འགུམ་པར་འགྱུར་སྙམ་བསམ་སྟེ་རྒྱལ་པོས་དགུམ་པར་བགྱིས་པ་ལས་ཀྱང་འདི་ལྟར་མ་གུམ་སྟེ། ད་འདི་ལྟར་གྱུར་ན་རྒྱལ་པོས་ཐུགས་བརྩེ་བར་དགོངས་ཏེ་བདག་རབ་ཏུ་འབྱུང་བར་གནོང་ཞིག་ཅེས་གསོལ་པ་དང ། རྒྱལ་པོས་ཀྱང་ཁྱོད་རབ་ཏུ་བྱུང་བར་གནང་ངོ ། །ཞེས་བཀའ་སྩལ་ནས་ཁྱེའུ་དེ་ཁྲིད་དེ་བཅོམ་ལྡན་འདས་ཀྱི་སྤྱན་སྔར་ལྷགས་ནས་ཇི་ལྟར་གྱུར་པ་བཅོམ་ལྡན་འདས་ལ་ཞིབ་ཏུ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཀྱང་རབ་ཏུ་འབྱུང་བར་གནང་ནས་ལུས་ལ་ཆོས་གོས་གྱོན་ཅིག་ཅེས་པ་དང་དགེ་སློང་དུ་གྱུར་ཏོ། །བཅོམ་ལྡན་འདས་ཀྱིས་ཅི་རིགས་པར་ཆོས་བསྟན་པས་སེམས་རྣམ་པར་གྲོལ་ཏེ་དགྲ་བཅོམ་པར་གྱུར་ནས་རིག་
237b
> པ་གསུམ་དང ། མངོན་པར་ཤེས་པ་དྲུག་དང ། རྣམ་པར་ཐར་པ་བརྒྱད་དང་ལྡན་པར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཁྱེའུ་གཞོན་ནུ་འདིས་སྔོན་དགེ་བའི་རྩ་བ་ཅི་ཞིག་བསྐྲུན་ན། བྲག་ལ་མཆོངས་ཀྱང་མ་གུམ། ཆབ་ཏུ་མཆོངས་ཀྱང་གནོད་པར་མ་གྱུར། བཙན་དུག་འཚལ་ཀྱང་མ་གུམ། མདའ་འཕངས་ཀྱང་སྨས་པར་མ་གྱུར་ཏེ་བཅོམ་ལྡན་འདས་དང་མཐའ་ནས་འཁོར་བའི་མཐའ་ལས་གྲོལ་བར་གྱུར་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྔོན་འདས་པའི་དུས་བསྐལ་པ་གྲངས་མེད་པ་འདས་པ་ན་ཡུལ་ཝཱ་ར་ཎཱ་སི་ཞེས་བྱ་བ་ན་རྒྱལ་པོ་ཚངས་པས་བྱིན་ཞེས་བྱ་བ་ཞིག་ཡོད་དེ། རྒྱལ་པོ་དེའི་བཙུན་མོ་དང ། ཕོ་བྲང་གི་སླས་སུ་བཅས་ནས་སྐྱེད་མོས་ཚལ་དུ་རོལ་དུ་གཤེགས་སོ། །སྐྱེད་མོས་ཚལ་དེ་ན་ཕོ་བྲང་གི་སླས་དག་གིས་གླུ་བླངས་པ་དང ། ར་བའི་ཕྱི་རོལ་ནས་མི་ཞིག་གིས་སྐད་ཆེན་པོས་རམ་བུ་བཏེགས་པ་རྒྱལ་པོས་ཐོས་སོ། །རྒྱལ་པོས་དེ་ཐོས་ནས་ཁྲོས་ཏེ་མི་དེ་ཟུངས་ལ་སོད་ཅིག་ཅེས་བཀའ་སྩལ་ཏོ། །དེའི་ཚེ་ན་བློན་པོ་ཞིག་ཕྱི་རོལ་ནས་ནང་དུ་འོང་བ་ལས་མི་དེ་བཙོན་དུ་བཟུང་བ་མཐོང་ནས་གཡོག་འཁོར་རྣམས་
238a
> ༄#། །ལ་ཅི་ཉེས་ཏེ་བཟུང་ཞེས་དྲིས་སོ། །དེ་དག་གིས་ཅིའི་ཕྱིར་བཟུང་བའི་གཏམ་ཞིབ་ཏུ་སྨྲས་པ་དང ། བློན་པོ་དེས་དེ་དག་ལ་རེ་ཞིག་མ་བསད་པར་སྡོད་ཅིག་།ཁོ་བོས་རྒྱལ་པོ་ལ་གསོལ་ལོ། །ཞེས་སྨྲས་ནས་ཕོ་བྲང་གི་ནང་དུ་སོང་སྟེ་རྒྱལ་པོ་ལ་འདི་སྐད་ཅེས་གསོལ་ཏོ། །འགུམ་དུ་ཁྲིད་པའི་མི་དེས་དགུམ་པ་ལ་ཐུག་པའི་ནོངས་པ་མ་བགྱིས་སོ། །གླུ་བླངས་པའི་རམ་བུ་བཏེགས་པ་ནི། གཟུགས་སུ་མི་སྣང་བས་མི་རིགས་པའི་གློ་བ་རིངས་པ་དང ། བཙུན་མོ་ལ་ངན་དུ་བགྱིས་པ་མ་ལགས་ཀྱི། དེའི་སྲོག་ལ་ཐུགས་བརྩེ་བར་དོངས་ཏེ་གཏང་བའི་རིགས་སོ། །ཞེས་གསོལ་ནས་རྒྱལ་པོས་ཀྱང་མ་བསད་པར་ཐོང་ཞིག་ཅེས་བཀའ་སྩལ་ཏོ། །མི་དེ་བློན་པོ་དེའི་གཡོག་བྱེད་པ་ལ་ཞུགས་ཏེ་ཕྱིས་ལོ་མང་ཞིག་ལོན་པ་དང་འདི་སྙམ་དུ་བསམ་མོ། །འདོད་ཆགས་ཀྱིས་སྨྲས་པ་ནི། རལ་གྲི་བས་རྣོ་སྟེ། བདག་འདི་ལྟར་ཉམ་ཐག་པ་ཡང་འདོད་ཆགས་ཀྱི་ཕྱིར་རོ་སྙམ་བསམ་ནས་བློན་པོ་ད་ལ་བདག་རབ་ཏུ་འབྱུང་ཞིང་ཐར་པའི་ལམ་སྒོམ་དུ་ཅི་གནང་ཞེས་གསོལ་ནས་བློན་པོ་དེས་ཀྱང་ཁྱོད་ཐར་པའི་ལམ་སྒོམ་ན། བདག་ཀྱང་གེགས་མི་བྱེད་ཀྱི། ཁྱོད་ཐར་པར་གྱུར་ན་ཡང་ཕྱིར་བདག་དང་ཕྲད་དུ་ཤོག་
238b
> ཅིག་ཅེས་བསྒོའོ། །མི་དེ་དབེན་པར་སོང་ནས་དོན་དམ་པ་ཡིད་ལ་བྱས་ཏེ་བརྩོན་འགུས་བརྩམས་པས། རང་སངས་རྒྱས་སུ་གྱུར་ནས་ཕྱིར་ཡང་གྲོང་ཁྱེར་དུ་སོང་སྟེ་བློན་པོ་ཆེན་པོ་ག་ལ་བ་དེར་འོངས་སོ། །བློན་པོ་ཆེན་པོ་དེ་རབ་ཏུ་དགའ་ནས་བསོད་སྙོམས་དང་འཚོ་བའི་ཡོ་བྱད་རྣམ་པ་བཞི་མི་བྲེལ་བར་ཕུལ་ལོ། །དེ་ནས་རང་སངས་རྒྱས་དེ་སྟེང་གི་ནམ་མཁའ་ལ་འཕགས་ནས་སྐུ་ལས་ཆུ་འབབ་པ་དང ། མེ་འབྱུང་བ་དང ། འོད་ཟེར་ཆེན་པོ་གཏོད་པ་ལ་སོགས་ཏེ། ཆོ་འཕྲུལ་རྣམ་པ་བཅོ་བརྒྱད་བསྟན་ཏོ། །བློན་པོ་ཆེན་པོ་དེས་དེ་ལྟ་བུ་དག་མཐོང་ནས་ཚད་མེད་པའི་སྤྲོ་བསྐྱེས་ཏེ་འདི་སྐད་དུ་དམ་བཅས་སོ། །མི་འདི་བདག་གི་དྲིན་གྱིས་འཚོ་བར་གྱུར་ཀྱི།་བདག་གར་སྐྱེས་ཀྱང་བཙན་ཞིང་ཕྱུག་པ་དང ། ཚེ་རིང་བ་དང ། གཞན་པས་བརྒྱ་འགྱུར་སྟོང་འགྱུར་དུ་ཤིན་ཏུ་འཕགས་ཤིང་ཡེ་ཤེས་དང་བསོད་ནམས་ཀྱང་འདི་དང་མཉམ་པར་གྱུར་ཅིག་ཅེས་སྨོན་ལམ་བཏབ་བོ། །བཅོམ་ལྡན་འདས་ཀྱིས་རྒྱལ་པོ་ལ་བཀའ་སྩལ་པ། དེའི་ཚེ་དེའི་དུས་ན་བློན་པོ་དེས་མི་གཅིག་གི་སྲོག་བསྐྱབས་ཏེ་འབྲས་བུ་ཐོབ་པར་བྱས་པ་དེ་ནི། འདི་ཡིན་ནོ། །དེའི་རྒྱུ་དེའི་རྐྱེན་གྱིས་གང་ནས་གང་དུ་སྐྱེས་ཀྱང་སྲོག་གི་བར་ཆད་དུ་མ་གྱུར་ཏེ། ད་ང་དང་ཕྲད་ནས་འབྲས་བུ་མཆོག་
239a
> ༄#། །ཐོབ་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་མང་པོ་ཐམས་ཅད་ཡི་རང་ནས་མངོན་པར་དགའོ། ། ལྷའི་བུ་གངྒ་དར་ཞེས་བྱ་བའི་ལེའུ་སྟེ་དྲུག་པའོ།། །།རྒྱལ་པོ་གསལ་རྒྱལ་གྱི་བུ་མོ་རྡོ་རྗེའི་ལེའུ། འདི་སྐད་བདག་གིས་ཐོས་བ་དུས་གཅིག་ན་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་རྒྱལ་པོ་གསལ་རྒྱལ་གྱི་བཙུན་མོ་ཆེན་པོ་འབར་ལི་ཞེས་བྱ་བ་ལ་བུ་མོ་གཅིག་བཙས་ནས་བུ་མོ་དེའི་མིང་རྡོ་རྗེ་ཞེས་བཏགས་ཏེ། བཞིན་རབ་ཏུ་མི་སྡུག་པ། ལུས་ཀྱི་ཤ་ཤིན་ཏུ་རྩུབ་པ། སྟག་ལྤགས་ལྟར་སྲ་བ། སྐྲ་ཡང་རྟ་རྔོ་ལྟར་ཤོག་རྦ་ཞིག་སྟེ། རྒྱལ་པོས་ཀྱང་བུ་མོ་དེ་མི་སྡུག་པས་མི་དགའ་ནས་ཕོ་བྲང་གི་ནང་དུ་སུས་ཀྱང་མི་མཐོང་བའི་གནས་ཤིག་ཏུ་བསྐྱེད་དོ། །བུ་མོ་དེ་དེ་ལྟར་མི་སྡུག་ཀྱང་བཙུན་མོ་ཆེན་པོ་ལ་བཙས་པས། མི་སྡུག་བཞིན་དུ་སུས་ཀྱང་མི་མཐོང་བར་བསྐྱེད་དེ། ཕྱིས་ཆེར་སྐྱེས་ནས་བག་མར་གཏང་རན་པ་དང ། རྒྱལ་པོ་རབ་ཏུ་མི་དགའ་ནས་བློན་པོ་ལ་འདི་སྐད་ཅེས་བཀའ་སྩལ་ཏོ། །ཐོག་མ་ཆོ་རིགས་མཐོ་བའི་རྗེའུའི་རིགས་སུ་གཏོགས་པ་ལས། ད་
239b
> འཁྱམས་ཏེ་ནོར་དང་ལོངས་སྤྱོད་མི་བདོག་པ་ཞིག་ཚོལ་ལ་ཁྲིད་དེ་ཤོག་ཅིག་ཅེས་བསྒོའོ། །དེ་ནས་བློན་པོ་དེས་ཀྱང་སྔོན་ཆོ་རིགས་མཐོ་ཞིང་རྗེའུའི་རིག་ཀྱི་\?\་བུ་ལས་འཁྱམས་ནས་དབུལ་ཕོངས་པ་ཞིག་རྙེད་དེ་རྒྱལ་པོ་ལ་ཕུལ་ལོ། །རྒྱལ་པོས་ཀྱང་དེ་དང་མི་མེད་པའི་གནས་དབེན་པ་ཞིག་ཏུ་གསང་སྟེང་ལ་བུ་མོ་བཞིན་མི་སྡུག་པ་ཞིག་ཡོད་དེ། བག་མར་གཏང་རན་ན། གཉེན་ཟླ་མ་རྙེད་ཀྱི། ཆོ་རིགས་ཆེ་ཞིང་མཐོབ་ཁྱོད་དབུལ་ཞིང་ཅི་ཡང་མེད་མོད་ཀྱི། ཁྱོད་ཀྱི་ཆུང་མར་སྦྱིན་གྱིས་ལོངས་ཤིག་།ཅེས་བཀའ་སྩལ་བ་དང ། དེ་ནས་ཁྱེའུ་དེས་བུས་མོ་ས་ལ་བཙུགས་ནས་རྒྱལ་པོའི་བཀའ་བཞིན་དུ་བགྱིའོ། །རྒྱལ་པོ་ཆེན་པོས་བདག་ལ་ཁྱི་མོ་ཞིག་སྩལ་ན་ཡང་བླང་བར་འཚལ་ན།་རྒྱལ་པོའི་སྐུ་གདུང་ལ་གཏོགས་པའི་སྲས་མོ་སྩལ་པ་ལྟ་ཅི་སྨོས་ཏེ། བཀའ་བཞིན་དུ་བླང་བར་འཚལ་ཏོ། །ཞེས་གསོལ་ཏོ། །རྒྱལ་པོས་ཀྱང་སྲས་མོ་དབུལ་པོའི་ཆུང་མར་བྱིན་ནས་དེའི་གནས་ཁང་ལ་སོགས་པ་བྱས་ཏེ་སྒོ་བདུན་རིམ་དུ་བྱས་ནས་མག་པ་ལ་འདི་སྐད་ཅེས་བསྒོའོ། །ཁྱོད་གུང་དུ་འགྲོ་བའི་ཚེ་ཁྱོད་ཉིད་ཀྱིས་སྒོ་ཚོང་ལ་ལྡེ་མིག་ཀྱང་ཁྱེར་ཅིག་།ངའི་བུ་མོ་རབ་ཏུ་མི་སྡུག་པ་འདི་ཅི་ནས་ཀྱང་ཕྱི་མི་གཞན་གྱིས་མི་མཐོང་བར་སྒོ་རབ་ཏུ་སྡོམས་ཤིག་ཅེས་བསྒོས་ནས་ནོར་དང་
240a
> ༄#། །ལོངས་སྤྱོད་ལ་སོགས་པ་ཡོ་བྱད་ཅི་དགོས་པ་ཐམས་ཅད་ཆོག་པར་བྱིན་ཏེ་བློན་པོར་བཅུག་གོ་།དེ་ནོར་བུ་རིན་པོ་ཆེ་དང་ལོངས་སྤྱོད་མང་པོ་དང་ལྡན་པར་གྱུར་པས། དབུས་ཕྱི་ཞིག་ན་རིགས་ཆེ་ཞིང་མཐོ་བ་གཞན་དང་སྟོན་མོ་བྱ་བར་འཐམས་ཏེ་སྟོན་མོ་ལ་ཁྱོ་ཤུག་དང ། བུ་ཚ་ཡང་འདུས་ཏེ་རྩེ་བར་བྱས་པ་ལས།་གཞན་ཀུན་ནི། ཆུང་མ་དང་འགྲོགས་ཏེ་འོངས་ན། བློན་པོ་དེ་འབའ་ཞིག་གི་ཆུང་མ་མ་འོངས་པས་གྲོགས་པོ་དག་ཐེ་ཚོམ་དུ་གྱུར་ཏེ། ཡང་ན་ནི། མི་འདིའི་ཆུང་མ་མངའ་བྱད་ཤིན་ཏུ་མཛེས་ཤིང་བཟང་མོ་ཞིག་གོ་།ཡང་ན་ནི། ཤིན་ཏུ་མི་སྡུག་ཅིང་གཞན་གྱིས་མཐོང་དུ་མི་རུང་བ་ཞིག་ཡིན་པས་ཁྲིད་དེ་མ་འོངས་སོ་སྙམ་ཐེ་ཚོམ་ཟ་བས། དེ་དག་དེའི་ཆུང་མ་བལྟ་བར་བགྲོས་ནས་ཡིད་མཐུན་པར་གསང་སྟེ་མི་འདི་ཆང་གིས་ར་རོ་བར་བྱས་ལ་མི་དྲན་པའི་འོག་ཏུ་ལྡེ་མིག་བརྐུས་ཏེ་མི་ལྔ་ཙམ་ཞིག་དེའི་ཆུང་མ་བལྟར་གཏང་ངོ ། །ཞེས་བགྲོས་སོ། །དེའི་ཚེ་ན་མི་དེའི་ཆུང་མས་སྔོན་བདག་གིས་སྡིག་པ་ཅི་ཞིག་བྱས་ན། ཁྱིམ་ཐབ་སྡང་སྟེ་འདི་འདྲ་བར་མུན་ཁང་དུ་བཅུག་ནས་ཉི་མ་དང་ཟླ་བ་ཙམ་ཡང་བལྟར་མེད་དོ། །མི་གཞན་ཡང་མི་མཐོང་སྙམ་སྟེ་ཤིན་ཏུ་མི་དགའ་ནས་ཡང་འདི་སྙམ་དུ་བསམ་མོ། །སངས་
240b
> རྒྱས་བཅོམ་ལྡན་འདས་འཇིག་རྟེན་ན་བཞུགས་ཏེ། སེམས་ཅན་གང་སྡུག་བསྔལ་གྱིས་གདུངས་བདག་གི་མགོན་དང་སྐྱབས་མཛད་དེ་ཐར་པར་མཛད་དོ་ཞེ་ན། བཅོམ་ལྡན་འདས་ལ་བདག་རྒྱང་མ་ནས་ཕྱག་འཚལ་ལོ། །ཐུགས་བརྩེ་བར་དགོངས་ཏེ་བདག་གི་མདུན་དུ་མངོན་སུམ་དུ་གཤེགས་ཤིང་བདག་ལ་ཅུང་ཟད་ཅིག་ཞལ་སྟོན་པར་གྱུར་ཀྱང་ཅི་མ་རུང་སྙམ་བསམ་མོ། །བུ་མོ་དེའི་བསམ་པ་ཤིན་ཏུ་དག་ཅིང་མོས་པར་མཁྱེན་ནས་བཅོམ་ལྡན་འདས་དེའི་ཁྱིམ་དུ་གཤེགས་ཏེ། བུ་མོ་དེའི་མདུན་གྱིས་ལས་དབུ་མཐོན་མཐིང་གིས་མཚན་པ་མངོན་པར་བསྟན་པ་བུ་མོ་དེས་མཐོང་བར་མཛད་དོ། །བུ་མོ་དེས་བཅོམ་ལྡན་འདས་ཀྱི་དབུ་མཐོན་མཐིང་མཐོང་ནས་ལྷག་པར་ཡང་དགའ་ཞིང་མགུ་རངས་ཏེ་བསམ་པ་ཤིན་ཏུ་དག་པར་གྱུར་ཏོ། །བསམ་པ་ཤིན་ཏུ་དག་པས་བུ་མོ་དེའི་སྐྲ་ཡང་ཤིན་ཏུ་འཇམ་ཞིང་མཐོན་མཐིང་གི་ཁ་དོག་ཏུ་གྱུར་ཏོ། །བཅོམ་ལྡན་འདས་ཀྱི་ཞལ་ཡང་མངོན་སུམ་དུ་བསྟན་པ་བུ་མོ་དེས་མཐོང་མ་ཐག་ཏུ་རབ་ཏུ་དགའ་མགུ་རངས་པས་བུ་མོ་དེའི་བཞིན་ཡང་བཟང་ཞིང་མཛེས་པར་གྱུར་ཏོ། །མི་སྡུག་པ་དང ། རྩུབ་པ་ཡང་རང་མེད་པར་གྱུར་ཏོ། །བཅོམ་ལྡན་འདས་ཀྱི་སྐུ་སྟ་ཟུར་ཡན་ཆད་མངོན་པར་བསྟན་ཏེ་གསེར་གྱི་མདོག་ལྟ་བུའི་
241a
> ༄#། །འོད་ལྷམ་མེར་སྣང་བར་མཛད་པ་བུ་མོ་དེས་མཐོང་ནས་སངས་རྒྱས་ལ་ལྷག་པར་དགའ་ཞིང་རབ་ཏུ་མགུ་རངས་པར་གྱུར་ཏོ། །དེ་ལྟར་དགའ་མགུ་རངས་པས་མི་སྡུག་པ་ཐམས་ཅད་མེད་པར་གྱུར་ཏེ་ཤིན་ཏུ་མཛེས་ཤིང་སྡུག་པ་ནི། ལྷའི་བུ་མོ་ལྟར་འཇིག་རྟེན་ན་དཔེ་ཟླ་མེད་པར་གྱུར་ཏོ། །བཅོམ་ལྡན་འདས་ཀྱིས་བུ་མོ་དེ་ལ་ཐུགས་བརྩེ་བའི་ཕྱིར་སྐུ་རྫོགས་པར་བསྟན་ནས་བུ་མོ་མིག་མི་འཛུམ་པར་ལྟ་ཞིང ། སྔར་བས་ཀྱང་ལྷག་པར་རབ་ཏུ་དགའ་མགུ་རངས་ནས་ལུས་ཀྱི་མཚན་ཐམས་ཅད་འཇིག་རྟེན་ན་དཔེ་ཟླ་མེད་པར་ཤིན་ཏུ་བཟང་ཞིང་མི་སྡུག་པའི་བག་ལྷག་མ་ཅུང་ཟད་ཙམ་ཡང་མ་ལུས་སོ། །བཅོམ་ལྡན་འདས་ཀྱིས་ཅི་རིགས་སུ་ཆོས་ཀྱང་བསྟན་པས་སྡིག་པ་ཀུན་ཟད་དེ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ནས་བཅོམ་ལྡན་འདས་ཀྱང་སླར་གཤེགས་སོ། །དེ་ནས་དེ་མ་ཐག་ཏུ་མི་ལྔ་པོས་ཀྱང་སྒོ་ཕྱེ་སྟེ་ནང་དུ་ལྷགས་ནས་དེའི་ཆུང་མ་རབ་ཏུ་མཛེས་ཅིང་བཟང་ལ་ཟླ་མེད་པ་མཐོང་ནས་གཅིག་ལ་གཅིག་འདི་སྐད་དུ། འདིའི་ཆུང་མ་འདི་ཤིན་ཏུ་བཟང་ཞིང་མཛེས་པས་མཁྲིད་དོ། །ཞེས་སྨྲས་ཏེ། དེ་དག་དེའི་ཆུང་མ་མཐོང་ནས་ཕྱིར་ཡང་སྒོ་བཅད་དེ། དེ་དག་གང་ན་འདུག་པར་འོངས་
241b
> ནས་མི་དེས་མ་ཚོར་བར་ལྡེ་མིག་ཀྱང་ཕྱིར་ལུས་ལ་བཏགས་སོ། །མི་དེ་ར་རོ་བ་ལས་སངས་ནས་ཀུན་གྱེས་ཏེ་ཕྱིར་ཁྱིམ་དུ་འོངས་པ་དང ། བདག་གི་ཆུང་མ་མངའ་བྱད་ཤིན་ཏུ་བཟང་ཞིང་མཛེས་ཏེ། མིའི་ནང་ན་ཤིན་ཏུ་དཀོན་པར་གྱུར་པ་མཐོང་ནས་རབ་ཏུ་དགའ་སྟེ་ཆུང་མ། ཁྱོད་སུ་ཡིན་ཞེས་སྨྲས་པ་དང ། ཆུང་མས་ཀྱང་བདག་ནི། ཁྱོད་ཀྱི་ཆུང་མའོ། །ཞེས་སྨྲས་སོ། །ཁྱོས་སྨྲས་པ། ཁྱོད་ནི། རབ་ཏུ་ཡང་མི་སྡུག་པ་ཞིག་ནི། ཅིའི་ཕྱིར་འདི་ལྟར་བཟང་ཞིང་མཛེས་པར་གྱུར་ཅེས་དྲིས་བ་དང ། ཆུང་མས་སྨྲས་པ། བདག་གིས་སངས་རྒྱས་མཐོང་བས་དུ་མ་འདི་ལྟ་བུར་གྱུར་ཏོ། །ཞེས་གཏམ་ཞིབ་ཏུ་སྨྲས་སོ། །ཆུང་མས་ཡང་སྨྲས་པ། བདག་གི་ཡིད་ལ་ད་ནི། བདག་ཡབ་རྒྱལ་པོ་དང་འཕྲད་འདོད་ཀྱི། རྒྱལ་པོ་ལ་བདག་འདི་སྐད་མཆིའོ། །ཞེས་གསོལ་ཅིག་།ཁྱོས་ཀྱང་རྒྱལ་པོ་ལ་དེ་བཞིན་གསོལ་ནས་རྒྱལ་པོས་མག་པ་ལ་འདི་སྐད་ཅེས་མ་ཟེར་བར་མྱུར་དུ་སོང་ལ་ཕྱིར་འབྱུང་དུ་མི་གནང་བར་སྣོམས་ཤིག་ཅེས་བཀའ་སྩལ་ཏོ། །མག་པས་ཡང་གསོལ་པ། རྒྱལ་པོ་ཆེན་པོ། སྲས་མོ་ནི། བཅོམ་ལྡན་འདས་ཀྱི་ཐུགས་རྗེའི་བྱིན་གྱིས་ལྷ་མོ་དང་འདྲ་བར་བཟང་ཞིང་མཛེས་པར་གྱུར་ཏོ། །རྒྱལ་པོས་མག་པ་ལ་བཀའ་སྩལ་པ།
242a
> ༄#། །ཁྱོད་སྨྲས་པ་བདེན་ཏེ། དེ་ལྟར་གྱུར་ན་མྱུར་དུ་ཁྲིད་དེ་ཤོག་ཅིག་ཅེས་བསྒོས་ནས་ཤིང་རྟ་བརྒྱན་ཏེ་སྲས་མོ་ཕོ་བྲང་གི་ནང་དུ་བསུའོ། ། རྒྱལ་པོས་བུ་མོ་དེ་དེ་ལྟར་བཟང་ཞིང་མཛེས་པར་གྱུར་པ་མཐོང་ནས་རབ་ཏུ་དགའ་མགུ་རངས་ཏེ་རྒྱལ་པོ་དང ། བཙུན་མོ་དང ། མག་པ་དང ། བུ་མོར་བཅས་པ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། སངས་རྒྱས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་རྒྱལ་པོ་གསལ་རྒྱལ་གྱིས་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བུ་མོ་འདིས་སྔོན་བསོད་ནམས་ཅི་ཞིག་བགྱིས་ན། རིགས་ཆེ་ཞིང་མཐོ་ལ་ལོངས་སྤྱོད་མང་པོ་ནོར་དབྱིག་དང་ལྡོན་པའི་རིགས་སུ་སྐྱེས་ལ། སྡིག་པའི་ལས་ཅི་ཞིག་བགྱིས་ན། བྱད་གཟུགས་ཤིན་ཏུ་མི་སྡུག་ཅིང་པགས་པ་དང་སྐྲ་མང་དུད་འགྲོ་ལྟ་བུར་གྱུར་ཅེས་གསོལ་པ་དང ། དེ་ལ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། སྲས་མོ་མངའ་བྱད་མཛེས་ཤིང་བཟང་བ་དང ། མི་སྡུག་པ་ཡང་ཚེ་རབས་སྔ་མ་ལ་བསོད་ནམས་དང་སྡིག་པའི་ལས་བྱས་པ་ལས་གྱུར་ཏོ། །སྔོན་འདས་པའི་དུས་ཡུན་རིང་པོ་ན་ཡུལ་ཝཱ་ར་ཎཱ་
242b
> སི་ཞེས་བྱ་བ་དེའི་ཡུལ་མི་ཁྱིམ་བདག་རབ་ཏུ་ཕྱུག་པ། ནོར་དབྱིག་ཚད་མེད་པ་དང་ལྡན་པ་ཞིག་བྱུང་སྟེ། ཁྱིམ་བདག་དེ་ཁྱིམ་ན་ཅི་བདོག་པ་ཐམས་ཅད་རང་སངས་རྒྱས་གཅིག་ལ་མཆོད་ཅིང་འབུལ་ལོ། །རང་སངས་རྒྱས་དེའི་སྐུ་ཤིན་ཏུ་རྩུབ་པ་ལ་ངན་པ། མི་སྡུག་པ། སྐེམ་པ་ཞིག་སྟེ། ཁྱིམ་བདག་དེ་ལ་བུ་མོ་ཆུང་ངུ་ཞིག་ཡོད་པ་དེས་ཉིན་གཅིག་བཞིན་དུ་རང་སངས་རྒྱས་དེ་གཤེགས་པ་མཐོང་བའང་བུ་མོ་དེས་ཁ་ན་མ་ཐོ་བའི་སེམས་བསྐྱེད་དོ། །བརྙས་སྨོད་ཅིང་འདི་སྐད་དུ་བྱད་བཞིན་མི་སྡུག་ལ་ལུས་ཀྱི་པགས་པ་རྩུབ་པ་འདིར་མི་སྡུག་ཅེས་ཁ་བྱས་སོ། །རང་སངས་རྒྱས་བརྟག་ཏུ་དེའི་ཁྱིམ་དུ་གཤེགས་ཤིང་མཆོད་པ་བཞེས་ནས་ཡུན་རིང་མོ་ཞིག་ལོན་པ་དང ། མྱ་ངན་ལས་འདས་པར་བསམ་སྟེ། ཡོན་བདག་དེའི་ཕྱིར་སྟེང་གི་ནམ་མཁའ་ལ་འཕགས་ནས་སྐུ་ལ་མེ་འབར་བ་དང ། ཆུ་འབབ་པ་དང ། ཤར་ཕྱོགས་ནས་མི་སྣང་བར་གྱུར་ནས་ནུབ་ཕྱོགས་སུ་བྱུང་བ་དང ། ནུབ་ཕྱོགས་ནས་མི་སྣང་ནས་ཤར་ཕྱོགས་སུ་བྱུང་བ་དང ། ལྷོ་ཕྱོགས་ནས་མི་སྣང་ནས་བྱང་ཕྱོགས་སུ་བྱུང་བ་དང ། བྱང་ཕྱོགས་ནས་མི་སྣང་ནས་ལྷོ་ཕྱོགས་སུ་བྱུང་བ་དང ། ནམ་མཁའ་སྟོང་པ་ལ་ཉལ་བ་དང ། འདུག་པ་ལ་སོགས་པའི་ཆོ་འཕྲུལ་རྣམ་པ་སྣ་ཚོགས་
243a
> ༄#། །བསྟན་ཏེ། ཁྱིམ་དེའི་མི་ཐམས་ཅད་ཀྱིས་ཆོ་འཕྲུལ་དེ་མཐོང་བར་བྱས་ནས་ནམ་མཁའ་ལས་བབས་ཏེ་དེའི་ཁྱིམ་དུ་གཤེགས་སོ། །ཁྱིམ་བདག་དེ་ཡང་ལྷག་པར་རབ་ཏུ་དགའ་མགུ་རངས་པར་གྱུར་ཏོ། །བུ་མོ་དེ་ཡང་ཤིན་ཏུ་འགྱོད་པ་སྐྱེས་ནས་རང་སངས་རྒྱས་དེ་ལ་འདི་སྐད་དུ་བདག་གིས་སྔར་ཁ་ན་མ་ཐོ་བའི་ནོངས་པ་ཡང་དང་ཡང་བགྱིས་པ་དེ་དག་གི་དངོས་སྡིག་ཏུ་མི་འགྱུར་བར་འགྱོད་ཚངས་གསོལ་ནས་རང་སངས་རྒྱས་དེས་ཀྱང་འགྱོད་ཚངས་བྱ་བར་གནང་ངོ ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེའི་ཚེ་དེའི་དུས་ན་བུ་མོ་དེ་ནི། ད་ལྟར་གྱི་རྒྱལ་པོའི་བུ་མོ་འདི་ཡིན་ཏེ། དེའི་ཚེ་མི་དགེ་བའི་སེམས་ཀྱིས་འཕགས་པ་རང་སངས་རྒྱས་ལ་སྨད་པའི་ངག་གི་ཉེས་པས། དེ་ཕྱིན་ཆད་རྟག་ཏུ་མི་སྡུག་པའི་ལུས་མྱོང་བར་གྱུར་ཏོ། །ཕྱིས་ཆོ་འཕྲུལ་མཐོང་ནས་འགྱོད་པས་ནི།་ཕྱིར་ཡང་མངའ་བྱེད་མཛེས་ཤིང་བཟང་བ་དང ། བློ་དང་ལྡན་པར་གྱུར་ཏེ། རང་སངས་རྒྱས་ལ་མཆོད་པ་བྱས་པས་གང་ནས་གང་དུ་སྐྱེས་ཀྱང་རིགས་ཆེ་ཞིང་ལོངས་སྤྱོད་འབྱོར་བ་དང ། མཐར་ཡང་རྣམ་པར་གྲོལ་བར་གྱུར་ཏོ། །དེ་བས་ན་རྒྱལ་པོ་ཆེན་པོ། ཇི་ཙམ་དུ་སེམས་ཅན་གྱི་རིགས་སུ་གཏོགས་པ་ཐམས་
243b
> ཅད་ནི།་ལུས་དང་ངག་གི་ཉེས་པ་ཤིན་ཏུ་བསྲུང་ཞིང་གཞན་ལ་བརྙེས་པ་དང་སྨད་པར་མི་བྱའོ། །དེའི་ཚེ་ན་རྒྱལ་པོ་གསལ་རྒྱལ་འཁོར་དང་བཅས་པ་དང ། འཁོར་མང་པོ་ཐམས་ཅད་བཅོམ་ལྡན་འདས་ཀྱིས་རྣམ་པར་སྨིན་པའི་འབྲས་བུ་བསྟན་པ་ཐོས་ནས་བསམ་པ་ཤིན་ཏུ་རྣམ་པར་དག་པའི་དད་པ་དང་ལྡན་པར་གྱུར་ཏ། དེ་ལྟར་བསམ་པ་ཤིན་ཏུ་རྣམ་པར་དག་པས། ལ་ལ་ནི། འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་པར་གྱུར་ཏོ། །ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི། ཕྱིར་མི་ལྡོག་པའི་ས་ལ་གནས་པར་གྱུར་ཏེ། འཁོར་དེ་དག་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། ། རྒྱལ་པོ་གསལ་རྒྱལ་གྱི་བུ་མོ་རྡོ་རྗེའི་ལེའུ་སྟེ་བདུན་པའོ།། །།གསེར་དབྱིག་གི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་རབ་ན་དགེ་སློང་ཆེན་པོའི་དགེ་འདུན་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་སོ། །དེའི་ཚེ་གྲོང་ཁྱེར་དེ་ན་ཁྱིམ་བདག་ཅིག་གི་ཆུང་མ་ལ་བུ་ཞིག་བཙས་ཏེ། མིང་ཡང་གསེར་དབྱིག་ཅེས་བཏེགས་ནས་བྱད་གཟུགས་ལེགས་པ། བཟང་
244a
> ༄#། །བ།་ཤིན་ཏུ་མཛེས་པ། འཇིག་རྟེན་ན་ཟླ་མེད་པ། ཁྱེའུ་དེ་སྔོན་གྱི་ལས་ཀྱིས་ལག་པ་གཉིས་ཁུ་ཚུར་བཅངས་ནས་བྱུང་ངོ ། །ཁྱེའུ་དེའི་ཕ་མ་ཡ་མཚན་དུ་གྱུར་ཏེ་བཀྲ་མི་ཤིས་སོ་སྙམ་ནས་ཁྱེའུ་དེའི་ཁུ་ཚུར་གཉིས་ཕྱེ་སྟེ་བལྟས་ན། ཁྱེའུའི་ལག་མཐིལ་ན་གསེར་གྱི་དོང་ཚེ་རེ་རེ་ཡོད་དོ། །ཕ་མ་གཉིས་རབ་ཏུ་དགའ་སྟེ་གསེར་གྱི་དོང་ཚེ་གཉི་ག་བླངས་ཏེ། བླངས་པའི་ཤུལ་ན་ད་དུང་ཡང་ཡོད་པར་གྱུར་ནས་ཡང་བླངས་སོ། །དེ་བཞིན་དུ་ཕ་མ་གཉིས་ཀྱིས་གསེར་གྱི་དོང་ཚེ་ལག་མཐིལ་ནས་བླངས་པས་བང་མཛོད་གང་ཡང་བུའི་ལག་ནས་དོང་ཚེ་ཟད་པར་མ་གྱུར་ཏོ། །ཁྱེའུ་དེ་ཕྱིས་ཆེར་སྐྱེས་ནས་ཕ་མ་ལ་བདག་རབ་ཏུ་འབྱུང་ངོ ། །ཞེས་གསོལ་པ་དང ། ཕ་མས་ཀྱང་ཡིད་བཞིན་དུ་གནང་ངོ ། །ཞེས་སྨྲས་སོ། །དེ་ནས་ཁྱེའུ་གསེར་དབྱིག་བཅོམ་ལྡན་འདས་ག་ལ་བ་དེར་སོང་ནས་ཞབས་ལ་སྤྱི་བོས་ཕྱག་འཚལ་ཏེ་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་ཐུགས་བརྩེ་བའི་སླད་དུ་སྟོན་པས་བདག་ལ་རབ་ཏུ་འབྱུང་བར་ཅི་གནང་ཞེས་གསོལ་བ་དང ། བཅོམ་ལྡན་འདས་ཀྱིས་ཁྱེའུ་གསེར་དབྱིག་།ཁྱོད་རབ་ཏུ་འབྱུང་བར་གནང་ངོ ། །ཞེས་བཀའ་སྩལ་
244b
> ཏོ། །དེ་ལྟར་སངས་རྒྱས་ཀྱིས་གནང་ནས་ཁྱེའུ་གསེར་དབྱིག་སྐྲ་དང་ཁ་སྤུ་བྲེགས་ཏེ་ཆོས་གོས་གྱོན་ནས་དགེ་སྦྱོང་དུ་གྱུར་ཏོ། །ཕྱིས་ལོ་གྲངས་ཚང་སྟེ་བསྙེན་པར་རྫོགས་རན་ནས་དགེ་འདུན་ལ་དད་པ་གསོལ་ཏེ་བསྙེན་པར་རྫོགས་པར་གསོལ་ཏོ། །བསྙེན་པར་རྫོགས་པའི་དགེ་འདུན་ལ་རིམ་གྱིས་ཕྱག་འཚལ་ཏེ། མཐར་གྱིས་ཕྱག་འཚལ་བ་ན་ལག་པ་གཉིས་ས་ལ་གར་རེག་པར་གསེར་གྱི་དོང་ཚེ་རེ་རེ་ཡོད་དེ། དེ་བཞིན་དུ་མཐར་གྱིས་ཕྱག་འཚལ་བ་ཐམས་ཅད་དུ་གསེར་གྱི་དོང་ཚེ་ཡོད་པར་གྱུར་ཏོ། །བསྙེན་པར་རྫོགས་ནས་བརྩོན་འགྲུས་བསྒོམས་པས་དགྲ་བཅོམ་པ་ཐོབ་པར་གྱུར་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས།་དགེ་སློང་གསེར་དབྱིག་འདིས་སྔོན་བསོད་ནམས་ཅི་ཞིག་བགྱིས་ན། ཐོག་མ་བཙས་ནས་དེ་ཙམ་གྱི་བར་དུ་གསེར་གྱི་དོང་ཚེ་ཐོགས་པ་བཅོམ་ལྡན་འདས་ཀྱིས་བསྟན་དུ་གསོལ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། རྟག་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང ། ཁྱོད་ལ་བསྟན་པར་བྱའོ། ། ཞེས་བཀའ་སྩལ་པ་དང ། ཀུན་དགའ་བོས་དེ་བཞིན་དུ་ཐོས་པར་འཚལ་ལོ། །ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་
245a
> ༄#། །བསྐལ་པ་དགུ་བཅུ་རྩ་གཅིག་གི་ཕ་རོལ་ན་སངས་རྒྱས་གསེར་ཐུབ་ཅེས་བྱ་བ་འཇིག་རྟེན་དུ་གཤེགས་ཏེ་དམ་པའི་ཆོས་ཀྱིས་སེམས་ཅན་གྱི་དོན་མཛད་པ་ནི། བརྗོད་ཅིང་དཔག་ཏུ་མེད་དོ། །སངས་རྒྱས་དེ་དགེ་འདུན་དང་བཅས་ནས་ཡུལ་རྒྱུ་ཞིང་གཤེགས་པ་ལས་ཁྱིམ་བདག་རིགས་ཆེ་ཞིང་མཐོ་བ། འབྱོར་པ་དང་ལོངས་སྤྱོད་དུ་ལྡན་པ་རྣམས་ཞལ་ཟས་རྣམ་པ་སྣ་ཚོགས་བཤམས་ཏེ་སངས་རྒྱས་དང ། ཉེ་གནས་འཕགས་པའི་དགེ་འདུན་ལ་མཆོད་པ་བྱས་སོ། །དེའི་ཚེ་ན་མི་དབུལ་པོ་ལོངས་སྤྱོད་ཅི་ཡང་མི་བདོག་པ་ཞིག་རྟག་ཏུ་རི་ལ་ཤིང་འཐུ་ཞིང་འཚོང་ངོ ། །ཕྱིས་ཤིང་བཙོངས་པའི་རིན་དུ་དོང་ཚེ་གཉིས་ཤིག་རྙེད་ནས་མི་དབུལ་པོ་དེས་སངས་རྒྱས་དགེ་འདུན་དང་བཅས་པ་རྒྱལ་པོའི་ཕོ་བྲང་དུ་སྤྱན་དྲངས་ཏེ་གཤེགས་པ་མཐོང་ནས་རབ་ཏུ་དགའ་མགུ་རངས་ཏེ་དོང་ཚེ་གཉིས་བདོག་པ་སངས་རྒྱས་དང་དགེ་འདུན་ལ་ཕུལ་བ་དང ། བཅོམ་ལྡན་འདས་ཀྱིས་དེ་ལ་ཐུགས་བརྩེ་བར་དགོངས་ཏེ་དོང་ཚེ་གཉིས་བཞེས་ཏེ་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་ན་མི་དབུལ་པོ་དེས་དོང་ཚེ་གཉིས་ཤིག་སངས་རྒྱས་དང་དགེ་འདུན་ལ་བུལ་བས། བསྐལ་
245b
> པ་དགུ་བཅུ་རྩ་གཅིག་གི་བར་དུ་ལག་ན་གསེར་གྱི་དོང་ཚེ་རྟག་ཏུ་ཐོགས་པར་གྱུར་ཏོ། །ནོར་དང ། རིན་པོ་ཆེ་དང ། འཚོ་བའི་ལོངས་སྤྱོད་ཟད་མི་ཤེས་པར་གྱུར་ཏོ།། དེའི་ཚེ་དེའི་དུས་ན་མི་དབུལ་པོ་དེ་ནི། དགེ་སློང་གསེར་དབྱིག་འདི་ཡིན་ཏེ། མི་འདིས་ཅི་སྟེ་དགྲ་བཅོམ་པའི་འབྲས་བུ་ཐོབ་ན་ཡང་མ་འོངས་པའི་འབྲས་བུ་རྣམ་པར་སྨིན་པ་ཡང་ཚད་དཔག་ཏུ་མེད་དོ། །དེ་བས་ན་ཀུན་དགའ་བོ། སེམས་ཅན་ཐམས་ཅད་ཀྱིས་སྦྱིན་པ་སྦྱིན་པའི་ལས་ལ་བརྩོན་པར་བྱའོ། །དེའི་ཚེ་ན་ཀུན་དགའ་བོ་དང ། འཁོར་མང་པོ་རྣམས་སངས་རྒྱས་ཀྱིས་གསུངས་པ་འདི་ཐོས་ནས་དད་ཅིང་མོས་པར་གྱུར་ཏེ། ལ་ལ་ནི། རྒྱུན་དུ་ཞུགས་པའི་འབྲས་བུ་ཐོབ། ལ་ལ་ནི། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་བོ། །ལ་ལ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི། ཕྱིར་མི་ལྡོག་པའི་ས་ལ་གནས་པར་གྱུར་ཏོ། །འཁོར་ཐམས་ཅད་སངས་རྒྱས་ཀྱིས་གསུངས་པ་ལ་མངོན་པར་དགའོ། །གསེར་དབྱིག་གི་ལེའུ་སྟེ།་བརྒྱད་པའོ།། །།ལྷའི་མེ་ཏོག་གི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་
246a
> ༄#། །བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་ཆེན་པོའི་དགེ་འདུན་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་སོ། །དེའི་ཚེ་ཡུལ་དེ་ན་ཁྱིམ་བདག་རིགས་ཆེ་ཞིང་མཐོ་བའི་ཆུང་མ་ལ་བུ་ཞིག་བཙས་ནས་བྱད་གཟུགས་ལེགས་པ། བལྟ་ན་སྡུག་པ། བཟང་བ།་ཤིན་ཏུ་མཛེས་པ་ཞིག་བཙས་སོ། །བཙས་མ་ཐག་ཏུ་ནམ་མཁའ་ལས་ལྷ་རྫས་ཀྱི་མེ་ཏོག་ཆར་བཞིན་དུ་བབ་སྟེ་ཁང་པ་ཀུན་གང་བས་བུའི་མིང་ཡང་ལྷའི་མེ་ཏོག་ཅེས་བཏགས་སོ། །ཁྱེའུ་དེ་ཕྱིས་ཆེར་སྐྱེས་ནས་སངས་རྒྱས་གང་ན་བ་དེར་སོང་སྟེ་ཕྱིན་པ་དང ། སངས་རྒྱས་ཀྱི་སྐུ་མདོག་དང་མཚན་དང་དཔེ་བྱད་བཟང་པོ་དཔེ་མེད་པ་མཐོང་ནས་རབ་ཏུ་དགའ་བ་སྐྱེས་ཏེ་འདི་སྙམ་དུ་བསམ་མོ། །བདག་འཇིག་རྟེན་འདིར་སྐྱེས་ཀྱང་འཕགས་པའི་གཙོ་བོ་དང་ཕྲད་ཀྱི། སངས་རྒྱས་དང་འཕགས་པའི་དགེ་སློང་གི་དགེ་འདུན་སྤྱན་དྲང་ངོ་སྙམ་བསམས་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཕགས་པའི་དགེ་འདུན་དང་བཅས་ཏེ་སང་གི་གདུགས་ལ་བདག་གི་མཆིས་བྲང་དུ་བསོད་སྙོམས་ངན་པ་ཞིག་སྦྱར་གྱི། བསོད་ནམས་བསྐྱེད་པའི་སླད་དུ་གཤེགས་པར་
246b
> ཅི་གནང་ཞེས་གསོལ་པ་དང ། དེའི་བསམ་པ་དག་པར་མཁྱེན་ནས་གཤེགས་སུ་གནང་ངོ ། །དེ་ནས་ལྷའི་མེ་ཏོག་ཕྱིར་ཁྱིམ་དུ་འོངས་པ་དང ། ཕྱི་ཉིན་སངས་རྒྱས་དང་དགེ་འདུན་རྣམས་ཀྱང་དེའི་ཁྱིམ་དུ་གཤེགས་སོ། །ལྷའི་མེ་ཏོག་གིས་ཀྱང་ཁང་བཟང་གི་ནང་དུ་རིན་པོ་ཆེའི་གདན་མང་པོ་སྤྲུལ་ཏེ་རྒྱན་གྱིས་བརྒྱན་པ་ལས་སངས་རྒྱས་དང་དགེ་འདུན་གྱི་རྣམས་གདན་དེ་ལ་རིམ་གྱིས་བཞུགས་སུ་གསོལ་ནས་ལྷའི་མེ་ཏོག་གིས་ཞལ་ཟས་རྣམ་པ་སྣ་སོགས་དགོས་པར་བསམ་པ་དང ། དེའི་བསོད་ནམས་ཀྱིས་བསམ་པ་བཞིན་དུ་འབྱོར་ཏེ་སངས་རྒྱས་དང ། དགེ་འདུན་རྣམས་ལ་བསོད་སྙོམས་ཀྱི་བྱ་བ་བྱས་སོ། །ལྷུང་བཟེད་བླངས་ཏེ་ལྷའི་མེ་ཏོག་ལ་ཆོས་མང་པོ་རྒྱས་པར་བསྟན་ནས་ལྷའི་མེ་ཏོག་གི་ཁྱིམ་གང་གི་མི་ཀུན་གྱིས་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །དེ་ནས་ལྷའི་མེ་ཏོག་གིས་ཕ་མ་ལ་རབ་ཏུ་འབྱུང་ཞིང་སངས་རྒྱས་ཀྱི་ཉེ་གནས་སུ་མཆི་བར་གསོལ་པ་དང ། ཕ་མས་ཀྱང་དེ་བཞིན་དུ་གནང་ནས་ཁྱེའུ་དེ་སངས་རྒྱས་གང་ན་བ་དེར་སོང་སྟེ་ཕྱིན་པ་དང ། སངས་རྒྱས་ཀྱི་ཞབས་ལ་མགོ་བོས་ཕྱག་འཚལ་ནས་སངས་རྒྱས་ཀྱི་བསྟན་པ་ལ་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་ཀྱང་དགེ་སློང་ལེགས་
247a
> ༄#། །པར་འོངས་སོ། །ཞེས་བཀའ་སྩལ་ནས་སྐྲ་དང་ཁ་སྤུ་རང་བྱི་སྟེ་ངུར་སྨྲིག་གྱོན་པར་གྱུར་ནས་སྣགས་རྒྱས་ཀྱི་བཀའ་བཞིན་དུ་ནན་ཏན་བྱས་པས་དགྲ་བཅོམ་པར་གྱུར་ཏོ། །དེ་ནས་ཀུན་དགའ་བོས་དེ་ལྟར་གྱུར་པ་མཐོང་ནས་སངས་རྒྱས་གང་ན། བ་དེར་སོང་སྟེ་བུས་མོས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་ལྷའི་མེ་ཏོག་འདིས་སྔོན་བསོད་ནམས་ཅི་ཞིག་བགྱིས་ན། ལྷའི་མེ་ཏོག་རང་འབབ་ཅིང་རིན་པོ་ཆེའི་གདན་དང་ཞལ་ཟས་སྣ་ཚོགས་ཡིད་བཞིན་དུ་སྤྲུལ་པ་བཅོམ་ལྡན་འདས་ཀྱིས་བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ།་ཐོས་པར་འདོད་ན་ལེགས་པར་ཉོན་ཅིག་།སྔོན་འདས་པའི་དུས་ན་སངས་རྒྱས་གསེར་ཐུབ་ཅེས་བྱ་བ་འཇིག་རྟེན་དུ་གཤེགས་ཏེ་སེམས་ཅན་གྱི་དོན་རྒྱས་པར་མཛད་དོ། །དེའི་ཚེ་ན་དགེ་འདུན་མང་པོ་གྲོང་རྒྱུ་ཞིང་གཤེགས་པ་ལས། ཁྱིམ་བདག་རིགས་ཆེ་ཞིང་མཐོ་བ་དག་གིས་མཆོད་པ་བྱས་སོ། །དེའི་ཚེ་ན་མི་དབུལ་པོ་ཞིག་ལོངས་སྤྱོད་ཅི་ཡང་མི་བདོག་པས། དགེ་འདུན་དེ་དག་ལ་རབ་ཏུ་དགའ་བའི་སེམས་སྐྱེས་ཏེ། བདག་གིས་ནི། ཅིས་ཀྱང་མཆོད་དུ་མེད་དོ་
247b
> སྙམ་ནས་སྤང་དང ། ནེའུ་ལས་མེ་ཏོག་རྣམ་པ་སྣ་ཚོགས་བ་ཏུས་ཏེ་དགེ་འདུན་ལ་གཏོར་ནས་བསམ་པ་དག་པས་ཕྱག་དར་བྱས་ཏེ་སོང་ངོ ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་མི་དབུལ་པོ་མེ་ཏོག་གིས་གཏོར་བ་དེ་ནི། དགེ་སློང་ལྷའི་མེ་ཏོག་འདི་ཡིན་ནོ། །དེ་ལྟར་འདས་པའི་དུས་ན་བསམ་པ་དག་པའི་དད་པས་མེ་ཏོག་བསྡུས་ཏེ་དགེ་འདུན་ལ་གཏོར་ནས་སྨོན་ལམ་བཏབ་པས་བསྐལ་པ་དགུ་བཅུ་རྩ་གཅིག་གི་བར་དུ་གང་ནས་གང་དུ་སྐྱེས་ཀྱང་བྱད་གཟུགས་ལེགས་ཤིང་བཟང་བ་དང ། བལྟ་ན་སྡུག་པ་དང ། ཇི་ལྟར་བསམ་པ་བཞིན་དུ་བཟའ་བའམ། བཏུང་བའམ། ཁྲི་སྟན་ལ་སོགས་པ་ཡིད་བཞིན་དུ་འབྱོར་ཅིང་ལྡན་ཏེ། བསོད་ནམས་དེས་འབྲས་བུའི་བར་དུ་ཐོབ་པར་གྱུར་ཏོ། །དེ་བས་ན་ཀུན་དགའ་བོ། སེམས་ཅན་ཐམས་ཅད་ཀྱིས་ཀྱང་སྦྱིན་པ་ཆུང་ངུ་ལ་བསོད་ནམས་མེད་དོ་སྙམ་དུ་མ་བཅས་ཤིག་།ལྷའི་མེ་ཏོག་ལྟར་ཅི་ཡང་འབྱོར་ཅིང་འགྲུབ་པར་འགྱུར་རོ། །དེ་ནས་ཀུན་དགའ་བོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་ཡི་རང་ནས་མངོན་པར་དགའོ། །ལྷའི་མེ་ཏོག་གི་ལེའུ་སྟེ་དགུ་པའོ།། །།ལྷའི་རིན་ཆེན་གྱི་ལེའུ། འདི་སྐད་བདག་གིས་ཐོས་པ་
248a
> ༄#། །དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་ཕྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཁྱིམ་བདག་ཅིག་གི་ཆུང་མ་ཞིག་ལ་བུ་ཞིག་བཙས་ནས་ཁྱེའུ་དེ་བཙས་པའི་ཚེ་ནམ་མཁའ་ལས་རིན་པོ་ཆེ་སྣ་བདུན་ཆར་བཞིན་དུ་བབ་སྟེ། དེའི་ཁྱིམ་ཡོངས་སུ་གང་ངོ ། །དེ་ནས་མཚན་མཁན་པོས་ཏེ་བུའི་མཚན་བལྟས་ན། བུའི་མཚན་རབ་ཏུ་བཟང་ངོ ། །ཞེས་ཁྱིམ་བདག་ལ་སྨྲས་ནས་ཁྱིམ་བདག་དེ་རབ་ཏུ་དགའ་སྟེ་མཚན་མཁན་དེ་ལ་བུའི་མིང་གདགས་པར་གསོལ་པ་དང ། ཁྱེའུ་འདི་བཙས་པའི་ཚེ་ལྟས་ཅི་བྱུང་ཞེས་དྲིས་སོ། །ཁྱིམ་བདག་གིས་ཀྱང་ཁྱེའུ་འདི་བཅས་པའི་ཆེ་ནམ་མཁའ་ལས་རིན་པོ་ཆེ་སྣ་བདུན་ཆར་བཞིན་དུ་བབས་ནས་ཁྱིམ་ཡོངས་སུ་གང་བར་བྱས་སོ། །ཞེས་སྨྲས་པ་དང ། མཚན་མཁན་གྱིས་བསོད་ནམས་ལས་མིང་བཏགས་ཏེ། ཁྱེའུ་དེའི་མིང་ལྷའི་རིན་ཆེན་ཞེས་བཏགས་སོ། །ཕྱིས་ཆེན་པོར་སྐྱེས་ནས་མང་དུ་ཐོས་ཤིང་ཤེས་པ་མང་བ་དང ། སྒྱུ་རྩལ་ཡང་ཟླ་མེད་པར་གྱུར་ཏེ། རབ་ཏུ་འབྱུང་བར་དད་པས་ཕ་མ་ལ་ཕྱི་ཕྱག་འཚལ་ནས་སངས་རྒྱས་གང་ན་བ་དེར་སོང་སྟེ་ཕྱིན་པ་དང ། སངས་རྒྱས་
248b
> ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་རབ་ཏུ་འབྱུང་ངོ ། །ཞེས་གསོལ་པ་དང ། བཅོམ་ལྡན་འདས་ཀྱིས་དགེ་སློང་ལེགས་པར་འོངས་སོ། །ཞེས་བྱ་བ་གནང་ནས་སྐྲ་དང་ཁ་སྤུ་རང་བྱི་སྟེ་ལུས་ལ་ཆོས་གོས་གྱོན་པར་གྱུར་ནས་བཅོམ་ལྡན་འདས་ཀྱིས་ཆོས་བསྟན་པས་དགྲ་བཅོམ་པར་གྱུར་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས། དགེ་སློང་ལྷའི་རིན་ཆེན་གྱིས་སྔོན་བསོད་ནམས་ཅི་ཞིག་བགྱིས་ན། ཐོག་མ་བཙས་པའི་ཚེ་ནམ་མཁའ་ལས་རིན་པོ་ཆེ་ཆར་བཞིན་དུ་བབ་ཅིང་བགོ་བ་དང་བཟའ་བ་ལྡན་གྱིས་གྲུབ་ནས་ཅིས་ཀྱང་མི་བྲེལ་བར་གྱུར། སངས་རྒྱས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་སངས་རྒྱས་གསེར་ཐུབ་ཅེས་བྱ་བ་འཇིག་རྟེན་དུ་གཤེགས་ཏེ། འཇིག་རྟེན་ན་སེམས་ཅན་གྱི་དོན་མཛད་པ་ནི། བརྗོད་ཀྱིས་མི་ལང་ངོ ། །དེའི་ཚེ་ན་དགེ་སློང་མང་པོ་གྲོང་རྒྱུ་ཞིང་གཤེགས་པ་ལས་དེའི་ཚེ་གྲོང་ཁྱེར་ན་གནས་པའི་ཁྱིམ་བདག་མང་པོས་དགེ་འདུན་སྤྱན་དྲངས་ཏེ་མཆོད་པ་རྣམ་པ་སྣ་ཚོགས་བྱས་སོ། །དེའི་ཚེ་ན་མི་དབུལ་པོ་ཞིག་དད་པས་རྗེས་སུ་ཡི་རང་བའི་སེམས་སྐྱེས་ཀྱང་ལོངས་
249a
> ༄#། །སྤྱོད་དང་མཆོད་པའི་ཡོ་བྱད་ཅི་ཡང་མེད་པས། རྡེའུ་དཀར་རུ་ལས་བྱས་པའི་ནོར་བུ་སྤར་གང་གིས་དགེ་འདུན་ལ་གཏོར་ནས་སྨོན་ལམ་ཆེན་པོ་བཏབ་བོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་མི་དབུལ་པོ་ནོར་བུ་སྤར་གང་གིས་དགེ་འདུན་ལ་གཏོར་བ་དེ་ནི།་དགེ་སློང་ལྷའི་རིན་ཆེན་འདི་ཡིན་ནོ། །འདས་པའི་དུས་ན་བསམ་པ་དག་པའི་དད་པས་རྡེའུ་དཀར་རུའི་ནོར་བུ་སྤར་གང་གིས་དགེ་འདུན་ལ་གཏོར་བ་ཙམ་གྱིས་བསྐལ་པ་དགུ་བཅུ་རྩ་གཅིག་གི་པར་དུ་བསོད་ནམས་ཚད་མེད་པས་ནོར་བུ་རིན་པོ་ཆེ་མང་བ་དང ། བགོ་བ་དང ། བཟའ་བ་ལྷུན་གྱིས་གྲུབ་ཅིང་ལོངས་སྤྱོད་ཅིས་ཀྱང་མི་བྲེལ་བར་གྱུར་ཏོ། །དེའི་ཚེ་ན་བསམ་པ་དག་པའི་དད་པ་ཙམ་གྱིས་ང་འཇིག་རྟེན་དུ་གཤེགས་པ་དང་ཕྲད་ནས་འབྲས་བུའི་བར་དུ་ཐོབ་པར་གྱུར་ཏོ། །དེའི་ཚེ་ན་འཁོར་མང་པོ་རྣམས་སངས་རྒྱས་ཀྱིས་གསུངས་པ་ཐོས་ནས་བསམ་པ་དག་པའི་དད་པ་སྐྱེས་ཏེ། ལ་ལ་ནི། འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་པར་གྱུར། ལ་ལ་ནི། ཕྱིར་མི་ལྡོག་པའི་ས་ལ་གནས་པའི་སེམས་བསྐྱེད་པར་གྱུར་ཏོ། །འཁོར་མང་པོ་དེ་དག་ཐམས་ཅད་བཅོམ་ལྡན་འདས་ཀྱིས་
249b
> གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །ལྷའི་རིན་ཆེན་གྱི་ལེའུ་སྟེ་བཅུ་པའོ།། །།བཟོད་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལནད་ཀ་གནས་པ་ན་བཞུགས་སོ། །དེའི་ཚེ་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ་ཞིག་ན་ཐོག་མར་ཀཽཎྜི་ནྱ་ལ་སོགས་ཏེ་དགེ་སློང་ལྔ་རབ་ཏུ་བྱུང་ངོ ། །དེའི་འོག་ཏུ་ཆུ་བོ་འོད་སྲུང་སྤུན་ལ་སོགས་པ་དགེ་སློང་སྟོང་རབ་ཏུ་བྱུང་ངོ ། །དེ་ནས་དེ་མ་ཡིན་པ་རབ་ཏུ་བྱུང་ཞིང་ཆོས་ལ་གནས་པ་ཡང་མང་བར་གྱུར་ནས་རྒྱལ་པོའི་ཁབ་ཀྱི་མི་རྣམས་ཚད་མེད་པའི་དགའ་བ་སྐྱེས་ཏེ། དེ་བཞིན་གཤེགས་པ་འཇིག་རྟེན་དུ་གཤེགས་པ་ནི། ངོ་མཚར་སྨད་དེ། སོ་སོའི་སྐྱེ་བོ་མང་པོའི་དོན་མཛད་དོ། །ཞེས་བསྟོད་ཅིང་བསྔགས་སོ། །གཞན་ཡང་འདི་སྐད་དུ་ཀཽཎྜི་ནྱ་དང ། ཆུ་པོ་འོད་སྲུང་གི་འཁོར་ལ་སོགས་པ་ཐོག་མར་རབ་ཏུ་བྱུང་བ་དེ་དག་སྔོན་དེ་བཞིན་གཤེགས་པ་དང་འཕྲིན་ལས་གང་མཐུན་ན། ནང་གི་ཐོག་མར་ཆོས་ཀྱི་བདུད་རྩི་མྱོང་བར་གྱུར་ཅེས་སྨྲས་སོ། །དགེ་སློང་དེ་དག་དེ་སྐད་ཅེས་སྨྲས་པ་ཐོས་ནས་དེ་བཞིན་དུ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་དེ་ལ་
250a
> ༄#། །འདི་སྐད་ཅེས་བཀའ་སྩལ་ཏོ། །སྔོན་འདས་པའི་དུས་ན་འདི་དག་གི་ཕྱིར་ངས་ཡི་དམ་ཆེན་པོ་བཅས་ཏེ་ནམ་མངོན་པར་རྫོགས་པར་སངས་རྒྱས་ནས་སྔར་འདི་དག་གི་དོན་བྱ་བར་ཤོག་ཅིག་ཅེས་དམ་བཅས་སོ། །དགེ་སློང་རྣམས་ཀྱིས་དེ་སྐད་ཅེས་ཐོས་ནས་བཅོམ་ལྡན་འདས་ཀྱིས་སྔོན་ཐུགས་དམ་ཇི་ལྟར་བཅས་པ་ཐུགས་བརྩེ་བར་དགོངས་ཏེ་རྒྱས་པར་བསྟན་དུ་གསོལ། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཁྱེད་རྟག་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང ། ཁྱེད་ལ་བསྟན་པར་བྱའོ། །སྔོན་འདས་པའི་བསྐལ་པ་ཚད་མེད་གྲངས་མེད་དཔག་ཏུ་མེད་བསམ་གྱིས་མི་ཁྱབ་བརྗོད་ཀྱིས་མི་ལང་བ་འདས་པའི་སྔ་རོལ་ན་ཡུལ་ཝཱ་ར་ཎཱ་སི་ཞེས་བྱ་བར་རྒྱལ་པོ་རྩོད་བྱུང་ཞེས་བྱ་བ་ཞིག་བྱུང་སྟེ། དེའི་ཚེ་ཡུལ་དེ་ན་དྲང་སྲོང་བཟོད་པ་ཅན་ཞེས་བྱ་བ། འཁོར་སློབ་མ་ལྔ་བརྒྱ་དང་རིའི་ནགས་ན་གནས་ཤིང་བཟོད་པ་སྒོམ་མོ། །དེའི་ཚེ་ན་རྒྱལ་པོ་དེ་བཙུན་མོ་དང ། ཕོ་བྲང་གི་སླས་དང ། བློན་པོར་བཅས་ཏེ་རིལ་རོལ་དུ་གཤེགས་པ་ལས་གནས་ཤིག་ཏུ་མཉེས་ཏེ་གཟིམས་པ་དང ། ཕོ་བྲང་སླས་རྣམས་སྔོན་དུ་དོང་ནས་གནས་དང ། མེ་ཏོག་རྣམས་བལྟ་ཞིང་སོང་སོང་བ་ལས།
250b
> དྲང་སྲོང་བཟོད་པ་ཅན་ལུས་དྲང་པོར་བཞག་སྟེ་ཤིན་ཏུ་སེམས་ཤིང་འདུག་པར་མཐོང་ནས་དེ་ལ་དད་པའི་སེམས་སྐྱེས་ཏེ་མེ་ཏོག་སྣ་ཚོགས་ཀྱིས་གཏོར་ཏོ། །བཙུན་མོ་དེ་དག་དེའི་མདུན་དུ་འཁོད་དེ་ཆོས་ཀྱང་ཉན་ཏོ། །རྒྱལ་པོ་གཟིམས་པ་ལས་སད་ནས་བཙུན་མོ་རྣམས་མི་སྣང་བ་དང ། བློན་པོ་བཞི་དང་བཙུན་མོ་བཙལ་བ་ལས་བཙུན་མོ་རྣམས་དྲང་སྲོང་གི་མདུན་ན་འཁོད་པ་མཐོང་ནས་དྲང་སྲོང་དེ་ལ་འདི་སྐད་ཅེས་སྨྲས་སོ། །ཁྱོད་སྐྱེ་མཆེད་མཐའ་ཡས་ཀྱི་ཏིང་ངེ་འཛིན་བཞི་ཐོབ་བམ། སྨྲས་པ།་མ་ཐོབ་བོ། །སྨྲས་པ། འོ་ན་ཁྱོད་ཚད་མེད་པ་བཞི་ཐོབ་བམ། མ་ཐོབ་བོ། །སྨྲས་པ། འོ་ན་ཁྱོད་བསམ་གཏན་བཞི་ཐོབ་བམ། དེ་ཡང་མ་ཐོབ་བོ། །ཞེས་སྨྲས་པ་དང ། རྒྱལ་པོ་དེ་ཁྲོས་ཏེ་ཡོན་ཏན་འདི་དག་ཁྱོད་ཀྱིས་གང་ཡང་མ་ཐོབ་ན། ཁྱོད་ནི། མ་རབས་ཐ་མལ་པ་ཡིན་ཏེ། བུད་མེད་རྣམས་དང་དབེན་པ་སྐྱབས་ཡོད་པའི་གནས་ན་འདུག་པ་ཇི་ལྟར་ཡིད་ཆེས་སུ་རུང ། རྟག་ཏུ་འདི་ན་གནས་པ་འདི་ཁྱོད་སུ་ཞིག་།ལས་ཅི་ཞིག་བྱེད་ཅེས་སྨྲས་པ་དང ། དྲང་སྲོང་གིས་རྒྱལ་པོ་དེ་ལ་བདག་ནི། འདི་ན་བཟོད་པ་སྒོམ་མོ། །ཞེས་སྨྲས་སོ། །དེ་ནས་རྒྱལ་པོས་རལ་གྲི་ཕྱུང་སྟེ་ཁྱོད་བཟོད་པ་སྒོམ་ཞེ་ན། བཟོད་དམ་མི་བཟོད་སད་དོ། །ཞེས་དྲང་སྲོང་གི་
251a
> ༄#། །ལག་པ་གཉིས་བཅད་དེ། ཁྱོད་སུ་ཡིན་ཞེས་དྲིས་ན། བདག་ནི། བཟོད་པ་ཅན་ནོ། །ཞེས་སྨྲས་སོ། །དེ་ནས་རྐང་བ་བཅད་ན། འོན་ཀྱང་བཟོད་པ་ཅན་ནོ། །ཞེས་སྨྲས་སོ། །དེའི་ཚེ་ན་གནམ་ས་རྣམ་པ་དྲུག་ཏུ་གཡོས་ནས་ཉེ་གནས་ལྔ་བརྒྱ་ཙམ་ཡང་ནམ་མཁའ་ལ་འཕུར་ཏེ་དེར་ལྷགས་ནས་སློབ་དཔོན་དེ་ལ་དེ་ལྟ་བུའི་སྡུག་བསྔལ་ཉམས་སུ་མྱོང་ན། བཟོད་པའི་སེམས་ཉམས་པར་མ་གྱུར་ཏམ་ཞེས་སྨྲས་སོ། །དྲང་སྲོང་གིས་སྨྲས་པ། བདག་གི་སེམས་མ་གྱུར་མ་ཉམས་སོ། །ཞེས་སྨྲས་པ་དང ། རྒྱལ་པོ་ཡང་སྡངས་སྐྲག་ནས་དྲང་སྲོང་ལ་སྨྲས་པ། ཁྱོད་བཟོད་པ་ཅན་ཡིན་པར་ཅིས་ཡིད་ཆེས་པར་འགྱུར། དྲང་སྲོང་གིས་སྨྲས་པ། བདག་གིས་སྨྲས་པའི་ཚིག་རྫུན་པ་མ་ཡིན་ཏེ་བདེན་ན། བདེན་པ་དེས་ཁྲག་འོ་མར་གྱུར་ཅིང་ཡན་ལག་བཅད་པ་ཡང་སོས་ཏེ་སྔ་མ་ཁོ་ན་བཞིན་དུ་གྱུར་ཅིག་ཅེས་སྨྲས་མ་ཐག་ཏུ་ཁྲག་འོ་མར་གྱུར་ནས་ཡན་ལག་ཀྱང་སོས་ཏེ་སྔ་མ་ཁོ་ན་བཞིན་དུ་གྱུར་ཏོ། །རྒྱལ་པོས་དེ་ལྟར་བཟོད་པ་དང་ལྡན་པར་མཐོང་ནས་ལྷག་པར་འཇིགས་སྐྲག་སྟེ། བདག་ཅིའི་སླད་དུ་དྲང་སྲོང་ཆེན་པོ་ལ་གནོད་པ་བགྱིས། བདག་ལ་ཐུགས་བརྩེ་བར་དགོངས་ཏེ་འགྱོད་ཚངས་བྱ་བར་
251b
> གནོད་ཞིག་ཅེས་གསོལ་ཏོ། །དྲང་སྲོང་གིས་སྨྲས་པ། ཁྱོད་ནི། བུད་མེད་ཀྱི་ཕྱིར་མཚོན་ཐོགས་ནས་བདག་གི་ཡན་ལག་བཅད་མོད་ཀྱི། བདག་གི་བཟོད་པ་ནི། ས་དང་འདྲ་བས་ཕྱིས་མངོན་པར་སངས་རྒྱས་པ་ན་ཤེས་རབ་ཀྱི་རལ་གྲིས་ཁྱོད་ཀྱི་དུག་གསུམ་ཆོད་པར་ཤོག་ཅིག་ཅེས་སྨྲས་སོ། །དེའི་ཚེ་ན་རི་དེའི་ལྷ་དང་ཀླུ་རྣམས་ཀྱིས་དྲང་སྲོང་དེ་ལ་རྒྱལ་པོ་དེ་འཚེ་ཞིང་གནོད་པ་བྱས་པ་མཐོང་ནས་སོ་སོ་ནས་ཁྲོས་ཏེ་སྤྲིན་བསྡུས་ནས་འབྲུག་དང ། སེར་བ་དང ། གནམ་ལྕགས་ཕབ་སྟེ་རྒྱལ་པོ་འཁོར་དང་བཅས་པ་གསད་པར་བྱས་པ་ལས། དྲང་སྲོང་གིས་ཁྱེད་ངའི་ཕྱིར་འདི་ལྟ་བུའི་གནོད་པ་དང་འཚེ་བ་མ་བྱེད་ཅིག་ཅེས་བསྒོའོ། །རྒྱལ་པོ་དེས་དེར་འགྱོད་ཚངས་བྱས་ནས་དྲང་སྲོང་དེ་རྟག་ཏུ་ཕོ་བྲང་དུ་སྤྱན་དྲངས་ཏེ་མཆོད་པ་བྱས་སོ། །དེའི་ཚེ་ན་སློབ་དཔོན་གཞན་ལ་ཞུགས་པ་ཀུན་ཏུ་རྒྱུ་སྟོང་ཙམ་ཞིག་དྲང་སྲོང་བཟོད་པ་ཅན་ལ་རྒྱལ་པོ་དེ་དད་ཅིང་མོས་པ་མཐོང་ནས་ཕྲག་དོག་སྐྱེས་ཏེ་བདེན་པ་མི་སྣང་བའི་གནས་ནས་ས་རྡུལ་དང ། རྩོག་ཅིང་སྨེ་བའི་བག་གིས་དྲང་སྲོང་དེ་ལ་གཏོར་ཏོ། །དེའི་ཚེ་ན་ཀུན་ཏུ་རྒྱུ་ང་ལ་སས་གཏོར་བ་བརྒྱ་ཕྲག་བཅུ་པོ་དེ་ནི། ད་ལྟར་གྱི་ཆུ་བོ་འོད་སྲུང་ལ་སོགས་པའི་དགེ་སློང་བརྒྱ་ཕྲག་བཅུ་ཡིན་ཏེ། དེའི་ཚེ་
252a
> ༄#། །ན་ཡི་དམ་བཅས་ནས་བདག་བཟོད་པ་བསྒོམས་པ་རྒྱུན་མི་འཆད་པ་འདིས་ནམ་མངོན་པར་སངས་རྒྱས་པ་ན་བདུད་རྩིའི་ཆུས་ཁྱོད་ཀྱི་རྡུལ་དང་དྲི་མ་བཀྲུས་ཏེ་འདོད་པའི་རྩོག་པ་ཡོངས་སུ་དག་པར་ཤོག་ཅིག་ཅེས་དམ་བཅས་སོ། །དགེ་སློང་དག་།དེའི་ཚེ་ན་དྲང་སྲོང་བཟོད་པ་ཅན་དེ་ཤེས་པར་འདོད་ན་གཞན་དུ་མ་སེམས་ཤིག་།དེ་ནི། ད་ལྟར་ང་ཡིན་ནོ། །རྒྱལ་པོ་རྩོད་བྱུང་དང ། བློན་པོ་བཞི་ནི། ཀཽཎྜི་ནྱ་ལ་སོགས་དགེ་སློང་ལྔ་སྡེ་ཡིན་ནོ། །དེའི་ཚེ་བཟོད་པ་བསྒོམས་པ་ན་འདི་དག་གི་དོན་སྔར་བྱའོ། །ཞེས་དམ་བཅས་པས་མངོན་པར་སངས་རྒྱས་ནས་སྔར་འདི་དག་སྡུག་བསྔལ་ལས་ཡོངས་སུ་གྲོལ་བར་མཛད་དོ། །དགེ་སློང་རྣམས་སངས་རྒྱས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །བཟོད་པའི་ལེའུ་སྟེ་བཅུ་གཅིག་པའོ།། །། བམ་པོ་གསུམ་པ། རྒྱལ་པོ་བྱམས་པའི་སྟོབས་ཀྱིས་སྦྱིན་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཀུན་དགའ་བོ་བསོད་སྙོམས་ཀྱི་བྱ་བ་བྱས་ནས་ཚལ་ཞིག་གི་ནང་ན་
252b
> བསམ་གཏན་དུ་འདུག་སྟེ་འདི་སྙམ་དུ་རྟོག་པ་སྐྱེས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་པ་ངོ་མཚར་ཆེ་སྟེ། སེམས་ཅན་མང་པོ་ཡང་རབ་ཏུ་བདེ་བ་ལ་བཀོད། ཀཽཎྜི་ནྱ་ལ་སོགས་པའི་དགེ་སློང་ལྔ་སྡེས་དགེ་བའི་རྩ་བ་ཅི་བསགས་ན། ཆོས་ཀྱི་སྒོ་རྣམ་པར་ཕྱེ་མ་ཐག་ཏུ་འཇུག་པར་གྱུར། ཆོས་ཀྱི་རྔ་བརྡུངས་མ་ཐག་ཏུ་ཐོག་མར་ཐོས་པར་གྱུར། ཆོས་ཀྱི་བདུད་རྩིས་ཐོག་མར་ངོམས་པར་གྱུར་སྙམ་དུ་རྟོག་པ་སྐྱེས་ནས་འདུག་པ་ལས་ལངས་ཏེ་སངས་རྒྱས་གང་ན་བ་དེར་སོང་ནས་ཕྱིན་པ་དང ། ཇི་ལྟར་བསམ་པ་བཞིན་དུ་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཀཽཎྜི་ནྱ་ལ་སོགས་པ་ནི། སྔོན་འདས་པའི་དུས་ན་ཡང་ངས་ཤ་དང་ཁྲག་གིས་བཀྲེས་སྐོམ་པ་ལས་ཆོག་པར་བྱིན་ཏེ་བདེ་བར་བྱས་པས་དེ་བས་ན། མངོན་པར་སངས་རྒྱས་ནས་ཀྱང་སྔར་རྣམ་པར་གྲོལ་བ་ལ་བཀོད་དེ། རྒྱུ་དང་རྐྱེན་མེད་པ་མ་ཡིན་ནོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། སྔོན་འདས་པའི་དུས་ན་ཇི་ལྟ་བུར་བཀྲེས་སྐོམ་པ་ལས་བདེ་བར་མཛད་པ་བསྟན་དུ་གསོལ། འཁོར་མང་པོ་འདི་དག་གིས་ཐོས་ནས་རྟོགས་པར་འགྱུར་རོ། །བཅོམ་ལྡན་འདས་ཀྱིས་བཀའ་
253a
> ༄#། །སྩལ་པ། སྔོན་འདས་པའི་དུས་ན་བསྐལ་པ་གྲངས་མེད་པའི་ཕ་རོལ་ན་ཛམྦུའི་གླིང་འདིར་རྒྱལ་པོ་བྱམས་པའི་སྟོབས་ཞེས་བྱ་བ་ཛམྦུའི་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་རྙེད་ལ་དབང་བྱེད་པ་ཞིག་བྱུང་ངོ ། །རྒྱལ་པོ་དེ་ལ་བཙུན་མོ་ནི། སྟོང་ཕྲག་ཉི་ཤུ་ཡོད་དོ། །བློན་པོ་ནི། སྟོང་ཕྲག་བཅུ་ཡོད་དོ། །རྒྱལ་པོ་དེ་བྱམས་པ་དང་སྙིང་རྗེར་ལྡན་ཏེ་ཚད་མེད་པ་བཞི་སྤྱོད་ཅིང་འགྲོ་བ་ཐམས་ཅད་ལ་སྙིང་བརྩེ་བས་དགེ་བ་བཅུས་སྲིད་འཛིན་ཏེ། ཐམས་ཅད་ཀྱིས་བཀུར་བ། ཡུལ་ན་དགྲ་མེད་ཅིང་ལོ་ལེགས་པ། འབྱོར་པ། བདེ་བ། སྐྱིད་པ་དང་ལྡན་པ་སྟེ། རིམས་གཏོང་བའི་ཡི་དྭགས་དག་མིའི་ཁྲག་དང་མདངས་འཕྲོག་ཅིང་ཟབ་ལས། དེའི་ཚེ་ན་ཡུལ་མི་ཐམས་ཅད་ལུས་དང་ངག་དང་ཡིད་སྲུང་སྟེ་དགེ་བ་བཅུ་ལ་གནས་པས་ཡི་དྭགས་མ་རུངས་པ་དག་བཟའ་བ་མ་རྙེད་ནས་ཀུན་ལྟོགས་ཏེ་མཐུ་མེད་པར་གྱུར་ཏོ། །དེའི་ཚེ་གནོད་སྦྱིན་ལྔ་ཞིག་རྒྱལ་པོའི་དྲུང་དུ་འོངས་ནས་འདི་སྐད་ཅེས་སྨྲས་སོ། །བདག་ཅག་གི་ཟས་ནི། མིའི་མདངས་དང་ཁྲག་ལ་ལྟོས་ཏེ་ལུས་དང་སྲོག་འཚོ་བ་ལས། རྒྱལ་པོས་བཀར་བཏགས་ཏེ་ཐམས་ཅད་དགེ་བ་བཅུ་ལ་གནས་པས་བདག་ཅག་ཟས་དང་སྐོམ་མ་རྙེད་དེ། ཉམ་
253b
> ཐག་ནས་སྲོག་ལ་བབ་བོ། །རྒྱལ་པོ་ཆེན་པོ། བདག་ཅག་ལ་ཡང་ཐུགས་མི་བརྩེའམ་ཞེས་གསོལ་ནས་རྒྱལ་པོས་ཀྱང་དེ་དག་ལ་སྙིང་བརྩེ་བའི་ཕྱིར་ལུས་ཀྱི་ཡན་ལག་ལྔ་ལས་རྩ་ལྔ་བཅད་ནས་གནོད་སྦྱིན་རྣམས་སོ་སོ་ནས་སྣོད་བཟེད་དེ་ཁྲག་ལས་ངོམས་པར་འཐུང་དུ་བཅུག་གོ་།དེ་དག་ཁྲག་གིས་ངོམས་ནས་ཤིན་ཏུ་དགའ་བར་གྱུར་ཏོ། །དེ་དག་ཁྲག་གིས་ངོམས་ནས་དགེ་བ་བཅུ་ལ་ཅི་ནུས་སུ་སྤྱོད་ཅིག་ཅེས་བསྐུལ་ཏོ། །ད་ལྟར་ངའི་ལུས་ལས་ཁྲག་ཕྱུང་སྟེ་ཁྱོད་ངོམས་ཤིང་བདེ་བར་བྱས་པ་ལྟར་ཕྱིས་མངོན་པར་སངས་རྒྱས་པ་ན་ཆོས་ཀྱི་སྐུའི་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་ཀྱིས་ཁྱེད་ཀྱི་དུག་གསུམ་བསལ་ཏེ་འདོད་པས་གདུངས་པ་ལས་ཤིན་ཏུ་བདེ་བའི་མྱ་ངན་ལས་འདས་པ་ལ་འགོད་པར་ཤོག་ཅིག་ཅེས་སྨྲས་སོ། །ཀུན་དགའ་བོ། དེའི་ཚེ་དེའི་དུས་ན་རྒྱལ་པོ་བྱམས་པའི་སྟོབས་དེ་ནི། དེ་ལྟར་ང་ཡིན་ནོ། །གནོད་སྦྱིན་ལྔ་པོ་དེ་ནི། ཀཽཎྜི་ནྱ་ལ་སོགས་པ་དགེ་སློང་ལྔ་ཡིན་ནོ། །ངས་གང་ནས་གང་དུ་སྐྱེས་པར་དེ་དག་ཐོག་མར་བསྒལ་བར་སྨོན་ལམ་བཏབ་བོ། །དེ་བས་ན་ངས་ཐོག་མར་ཆོས་བསྟན་མ་ཐག་ཏུ་རྣམ་པར་གྲོལ་བར་གྱུར་ཏོ། །ཚེ་དང་ལྡན་པ་ཀུན་དགའ་བོ་དང ། འཁོར་མང་པོ་རྣམས་སངས་རྒྱས་ཀྱིས་གསུངས་པ་ལ་ཡི་རང་
254a
> ༄#། །ནས་མངོན་པར་དགའོ། །རྒྱལ་པོ་བྱམས་པོའི་སྟོབས་ཀྱིས་སྦྱིན་པའི་ལེའུ་སྟེ་བཅུ་གཉིས་པའོ།། །།སྟོན་པ་དྲུག་བཏུལ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་ཀནད་ཀ་གནས་པ་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་སོ། །དེའི་ཚེ་ན་རྒྱལ་པོ་གཟུགས་ཅན་སྙིང་པོ་འབྲས་བུ་དང་པོ་ཐོབ་པས་དད་པ་དང ། བསྙེན་བཀུར་བྱ་བའི་སེམས་སྔོན་པས་ཀྱང་ལྷག་པར་གྱུར་ནས་བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་པའི་ཡོ་བྱད་རྣམ་པ་བཞི་རྟག་ཏུ་འབུལ་ཏེ། སྐྱེ་བོ་མང་པ་དག་ཀྱང་མཐུན་པར་དགེ་བ་ལ་སྤྲོའོ། །ཡུལ་དེ་ན་རྫོགས་བྱེད་ལ་སོགས་པ་སྟོན་པ་དྲུག་སྔར་བྱུང་བས་ངན་པར་ལྟ་བ་ལོག་པར་སྟོན་ཏེ། འགྲོ་བ་མང་པོ་བསླུས་པས་དེ་ལ་གང་བསླད་པར་མཐོང་བ་དག་ནི། ངན་པར་ལྟ་བ་དག་ལ་ཡིད་ཆེས་པས་སྡིག་པ་ཅན་གྱི་ཕྱོགས་མང་ཞིང་རྒྱས་པར་གྱུར་ཏོ། །རྒྱལ་པོ་དེའི་གཅུང་ཞིག་ཀྱང་སྟོན་པ་དྲུག་ལ་ཡིད་ཆེས་པས་ངན་པར་ལྟ་བ་ལོ་ཞེན་ཏེ་ཐར་བའི་ལམ་ཡིན་པར་བཟུང་ནས་ལོངས་སྤྱོད་ཅི་བདོག་པ་གཏུགས་ནས་དེ་ལ་འབུལ་ཏེ། སངས་
254b
> རྒྱས་བཅོམ་ལྡན་འདས་ཉི་མ་ཤར་བ་ལྟ་བུ། ཤེས་རབ་ཀྱིས་ཀུན་ཏུ་ལྷམ་མེར་མཛད་ཀྱང་ངན་པར་ལྟ་བས་གླགས་པས་དེ་ལ་མོས་པའི་སེམས་མེད་དོ། །རྒྱལ་པོ་གཟུགས་ཅན་སྙིང་པོ་དེ། དེ་ལ་ལྷག་པར་སྡུག་པར་འཛིན་པས་ཐབས་ཀྱིས་སངས་རྒྱས་ལ་བསྙེན་བཀུར་བྱ་བར་བསྐུལ་ན་ཡང་ངན་པར་ལྟ་བ་ལ་ཞེན་པས་བསྒོ་བ་བཞིན་དུ་མ་བྱས་སོ། །སངས་རྒྱས་ལ་མཆོད་པ་གྱིས་ཤིག་ཅེས་ཡང་དང་ཡང་བསྐུལ་ན། བདག་ལ་ཡང་སྟོན་པ་ཡོད་དེ། གོའུ་ཏ་མ་ལ་བསྙེན་བཀུར་མི་བྱེད་དོ། ། འོན་ཀྱང་རྒྱལ་པོའི་བཀའ་ཚུལ་གྱིས་བཅག་པར་རིགས་པ་མ་ཡིན་པས་མཆོད་སྟོན་ཆེན་པོ་བཤམས་ནས་མ་བོས་པར་གང་རང་འོངས་པ་ལ་བསོད་སྙོམས་སྦྱིན་ནོ། ། ཞེས་བྱས་ནས་མཆོད་པའི་ཡོ་བྱད་བཤམས་ཏེ་སྟན་བཏིང་ནས་སྟོན་པ་དྲུག་ནི། འབོད་པ་བཏང་སྟེ། དེ་མ་ཐག་ཏུ་ལྷགས་ནས་གྲལ་གྱི་ཐོག་མ་ལ་འདུག་གོ་།སངས་རྒྱས་དང་དགེ་འདུན་རྣམས་རང་མ་བྱོན་པས་རྒྱལ་པོ་གང་ན་བ་དེར་སོང་ནས་འདི་སྐད་ཅེས་གསོལ་ཏོ། །དགེ་སྦྱོང་གོའུ་ཏ་མ་སྤྱན་དྲོངས་ཤིག་ཅེས་ཡང་དང་ཡང་དུ་བཀའ་སྩལ་ཏེ། བདག་གིས་མཆོད་པ་བཤམས་ཏེ་གདུགས་ཚོད་ལ་བབ་ན། ཅིའི་སླད་དུ་མི་གཤེགས། རྒྱལ་པོས་བཀའ་སྩལ་པ། ཁྱོད་ཉིད་སྤྱན་འདྲེན་དུ་
255a
> ༄#། །འགྲོ་མི་ནུས་ན་ཡང་མི་ཞིག་གདུགས་ཚོད་ལ་བབ་བོ། །ཞེས་སྤྱན་འདྲེན་པར་ཐོང་ཞིག་།རྒྱལ་པོའི་གཅུང་གིས་ཀྱང་སྤྱན་འདྲེན་དུ་བཏང་བ་ལས་བཅོམ་ལྡན་འདས་འཕགས་པའི་དགེ་འདུན་དང་བཅས་ཏེ་གཤེགས་ནས་གྲལ་རིམ་བཞིན་དུ་བཞུགས་སོ། །བཅོམ་ལྡན་འདས་ཀྱི་བྱིན་གྱིས་སྟོན་པ་དྲུག་གྲལ་གྱི་ལྟག་ན་འདུག་པ་ཡང་གྲལ་གྱི་ཐ་མར་སོང་ངོ ། །སྟོན་པ་དྲུག་ངོ་ཚ་ཞིང་སྐྱེངས་ནས་ལངས་ཏེ་གྲལ་གྱི་ལྟག་ཏུ་འདུག་ན་ཡང་མ་ཚོར་བར་གྲལ་གྱི་མཇུག་ཏུ་སོང་སྟེ། དེ་བཞིན་དུ་ལན་གསུམ་གྱི་བར་དུ་གྲལ་གྱི་གོང་དུ་སོང་ཡང་ད་དུང་གྲལ་གྱི་འོག་ན་འདུག་པར་གྱུར་ནས་མཐུ་མེད་པར་གྱུར་ཏེ་སྐྱེངས་བཞིན་དུ་གྲལ་གྱི་ཐ་མར་འདུག་གོ་།ཡོན་བདག་གིས་གནས་བརྟན་ལ་ཆུ་བྲིམས་ནས་བཅོམ་ལྡན་འདས་ཀྱིས་སྔར་ཁྱོད་ཀྱི་སྟོན་པ་ལ་བྲིམས་ཤིག་ཅེས་བཀའ་སྩལ་པ་དང ། ཡོན་བདག་གིས་ཆུ་སྣོད་ཐོགས་ཏེ་སྟོན་པ་དྲུག་ལ་ཆུ་བྲིམས་ན། ཆུ་སྣོད་ཀྱི་ཁ་འགགས་ཏེ་ཆུ་འབྱུང་དུ་མ་བཏུབ་པས། ཕྱིར་ཡང་སངས་རྒྱས་ནས་མཐར་གྱིས་གསོལ་ན། ཆུ་ཡང་བྱུང་སྟེ་ལག་པ་བཀྲུས་སོ། །ལག་པ་བཀྲུས་ནས་སྦྱིན་བདག་གིས་བསོད་སྙོམས་ཐོགས་ཏེ་སྨོན་ལམ་གདབ་པར་གསོལ་ན། བཅོམ་
255b
> ལྡན་འདས་ཀྱིས་སྦྱིན་བདག་ལ་འདི་སྐད་ཅེས་བཀའ་སྩལ་པ། ཐོག་མ་ཡང་ངེད་ཀྱི་ཕྱིར་མ་ཡིན་པས། ད་ཡང་ཁྱོད་ཉིད་ཀྱི་སྟོན་པ་ལ་སྨོན་ལམ་གདབ་པར་གསོལ་ཅིག་ཅེས་བཀའ་སྩལ་ནས་སྦྱིན་བདག་དེ་སྟོན་པ་དྲུག་གི་མདུན་དུ་སོང་སྟེ་སྨོན་ལམ་གདབ་པར་གསོལ་ན། སྟོན་པ་དྲུག་ཁ་འཐམས་ནས་སྨྲ་མ་ནུས་ཏེ། སངས་རྒྱས་ལ་གསོལ་ཅིག་ཅེས་ལག་བརྡ་བྱས་སོ། །དེ་ནས་བཅོམ་ལྡན་འདས་ཀྱིས་ཀྱང་ཚངས་པའི་དབྱངས་ལྟ་བུའི་གསུང་གིས་སྨོན་ལམ་བཏབ་བོ། །སྨོན་ལམ་བཏབ་ནས་སྦྱིན་བདག་གིས་བསོད་སྙོམས་གནས་བརྟན་ལ་བྲིམས་པ་ལས། བཅོམ་ལྡན་འདས་ཀྱིས་སྔར་ཁྱོད་ཉིད་ཀྱི་སྟོན་པ་ནས་བྲིམས་ཤིག་ཅེས་བཀའ་སྩལ་པ་དང ། འབྲིམ་པ་རྣམས་ཀྱིས་སྟོན་པ་དྲུག་ལ་བྲིམས་ཞེས་བྱས་ན། ཞལ་ཟས་རྣམས་སྟེང་གི་ནམ་མཁའ་ལ་འཕགས་ཏེ་བྲིམས་སུ་མེད་པར་གྱུར་ཏོ། །དེ་ནས་སངས་རྒྱས་ལོགས་སུ་འབྲིམ་དུ་ཆས་པ་དང་ཞལ་ཟས་ཀྱང་སོ་སོའི་ལག་ཏུ་འོངས་སོ། །མཐར་གྱིས་བྲིམས་ཏེ་སངས་རྒྱས་དད་དགེ་འདུན་བསོད་སྙོམས་ཀྱི་བྱ་བ་བྱས་ནས་ཁ་ལག་བཀྲུས་ཏེ་ཕྱིར་ཡང་གདན་ལ་བཞུགས་ནས་ཆོས་བསྟན་པར་གསོལ་ཏོ། །དེ་ལ་ཡང་བཅོམ་ལྡན་འདས་ཀྱིས་ཁྱོད་ཉིད་ཀྱི་སྟོན་པ་དྲུག་ལ་སྟོན་པར་གསོལ་ཅིག་ཅེས་བཀའ་
256a
> ༄#། །སྩལ་ཏོ། །སྟོན་པ་དྲུག་ཀྱང་ཁ་འཐམས་ནས་སངས་རྒྱས་ལ་གསོལ་ཅིག་ཅེས་ལག་བརྡ་བྱས་སོ། །དེ་ནས་བཅོམ་ལྡན་འདས་ཀྱིས་ཤིན་ཏུ་གཉེན་ཞིང་འཇམ་པའི་གསུང་ཕྱུང་སྟེ་འཁོར་མང་པོ་ལ་ཆོས་ཀྱི་མཚན་ཉིད་རྣམ་པར་ཕྱེ་སྟེ་བསྟན་པས། འཁོར་མང་པོའི་ཡིད་ཚིམ་པར་གྱུར་ཏེ་སངས་རྒྱས་ཀྱིས་གསུངས་པ་ཐོས་ནས་ཐམས་ཅད་ཀྱིས་རྟོགས་ཤིང་ཁོང་དུ་ཆུད་དེ། གཟུགས་ཅན་སྙིང་པོའི་གཅུང་ནི། ཆོས་ལ་ཆོས་ཀྱི་མིག་རྣམ་པར་དག་པར་གྱུར་ཏོ། །འཁོར་གཞན་དག་ནི། འབྲས་བུ་དང་པོ་ནས་འབྲས་བུ་གསུམ་པའི་བར་དུ་ཐོབ་ནས་རབ་ཏུ་བྱུང་སྟེ་ཟག་པ་ཟད་དོ། །ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ། ཕྱིར་མི་ལྡོག་པའི་ས་ལ་གནས་པར་གྱུར་ནས་ཇི་ལྟར་སྨོན་པ་བཞིན་དུ་ཡོངས་སུ་རྫོགས་པས། སོ་སོ་ནས་ཡང་དག་པར་གང་ཡིན་པ་ཤེས་ཤིང་རྟོགས་ཏེ།་དཀོན་མཆོག་གསུམ་ལ་དད་ཅིང་མོས་ཀྱི། སྟོན་པ་དྲུག་མི་འདོད་དེ། དེ་ལ་བསྙེན་བཀུར་མི་བྱེད་པར་གྱུར་ཏོ། །དེ་ནས་སྟོན་པ་དྲུག་པོ་ཤིན་ཏུ་སེམས་འཁྲུགས་ནས་ཁྲོས་ཏེ་དབེན་པའི་ས་ཕྱོགས་སུ་དོང་ནས་རྟོག་པ་ལ་ཞུགས་སོ། །དེ་ནས་བདུད་སྡིག་ཏོ་ཅན་འདི་སྙམ་དུ་སེམས་པར་གྱུར་ཏེ། བདག་གིས་ཡུན་རིང་
256b
> ཞིག་ན་དགེ་སློང་གོའུ་ཏ་མ་ལ་བགེགས་བྱས་ན་སྐབས་མ་རྙེད་ཀྱི། ད་ནི། བདག་གིས་ཅི་ནས་ཀྱང་བགེགས་བྱའོ་སྙམ་དུ་བསམ་ནས་བདུད་སྡིག་ཅན་གྱིས་རྫོགས་བྱེད་ལྟ་བུར་བདག་མངོན་པར་སྤྲུལ་ནས་ཕྱུགས་ལྷས་ཀྱི་བུ་མོ་སྐ་རི་དང ། རྣམ་པར་སྨྲ་བའི་བུ་ཀུན་ནས་རྒྱལ་བ་དང ། སྐྲའི་ལཝ་བ་ཅན་མི་ཕམ་པ་དང ། ཀ་ཏྱཱ་ཡ་ན་ནོག་ཅན་དང ། གཉེན་གྱི་བུ་གཅེར་བུ་པ་གང་ན་བ་དེར་སོང་སྟེ་ཕྱིན་པ་དང ། དེ་དག་གི་མདུན་དུ་མེ་འབར་བ་དང ། ཆུ་འབབ་པ་དང ། གློག་འབྱུང་བར་ཆོ་འཕྲུལ་སྟོན་པ་ལ་ཞུགས་པ་དང ། དེ་དག་གིས་རྫོགས་བྱེད་ཀྱི་ཡོན་ཏན་རྣམ་པ་མང་པོ་འདི་ལྟ་བུ་ཐོབ་བམ། སྨྲས་པ། ཐོབ་བོ། །དེ་རྣམས་ཀྱིས་སོ་སོ་ནས་འདི་སྙམ་དུ་བསམ་མོ། །བདག་གཅིག་བུ་མ་གཏོགས་པར་འདི་དག་ཐམས་ཅད་ནི། རྫུ་འཕྲུལ་ཆེ་བ་མཐུ་ཆེ་བར་སོ་སོར་སྟོན་ཏོ་སྙམ་བསམ་མོ། །དེ་ནས་དུས་ཕྱི་ཞིག་ན་རྫོགས་བྱེད་ལ་སོགས་པ་སྟོན་པ་དྲུག་འདུན་ཁང་དུ་འདུས་ཤིང་ལྷགས་ནས་གཏམ་འདི་ལྟ་བུ་དག་སྐབས་སུ་སྨྲ་སྟེ། བདག་ཅག་རྣམས་ལ་སྔོན་ནི། རྒྱལ་པོ་དང ། བློན་པོ་དང ། བྲམ་ཟེ་དང ། ཁྱིམ་བདག་ཕྱུག་པོ་དང ། ཚོང་དཔོན་དང ། དེད་དཔོན་དག་གིས་རིམ་གྲོར་བྱས། བཀུར་སྟིར་བྱས། མཆོད་པར་བྱས་ཤིང་བདག་ཅག་གིས་གོས་དང ། ཟས་དང ། མལ་སྟན་དང །
257a
> ༄#། །ནང་ཀྱི་རྐྱེན་རྩི་དང ། ཡོ་བྱད་རྣམས་རྙེད་པར་གྱུར་ན། ད་ནི། དགེ་སྤྱོང་ཤཱཀྱའི་བུ་འདི་ལ་རིམ་གྲོ་དང ། བཀུར་སྟི་བྱེད་དེ། གོས་དང ། ཟས་དང་མལ་སྟན་དང ། ནད་ཀྱི་རྐྱེན་རྩེ་དང ། ཡོ་བྱད་རྣམས་ཀྱང་རྙེད་པར་མ་གྱུར་གྱི། ད་ནི། བདག་ཅག་རྣམས་ཀྱིས་དགེ་སྦྱོང་གོའུ་ཏ་མ་མིའི་བླ་མའི་ཆོས་ཀྱི་ཆོ་འཕྲུལ་ལ་འཇུག་གོ་།དེ་སྟེ་དགེ་སྦྱོང་གོའུ་ཏ་མས་མིའི་བླ་མའི་ཆོས་ཀྱི་ཆོ་འཕྲུལ་གཅིག་སྟོན་པ་ལ་ཞུགས་ན། བདག་ཅག་གིས་གཉིས་བསྟན་ནོ། །དགེ་སྦྱོང་གོའུ་ཏ་མས་གཉིས་ན། བདག་ཅག་གིས་བཞིའོ། །དགེ་སྦྱོང་གོའུ་ཏ་མས་བཞི་ན། བདག་ཅག་གིས་བརྒྱད་དོ། །དགེ་སྦྱོང་གོའུ་ཏ་མས་བརྒྱད་ན། བདག་ཅག་གིས་བཅུ་དྲུག་གོ་།དགེ་སྦྱོང་གོའུ་ཏ་མས་བཅུ་དྲུག་ན། བདག་ཅག་གིས་སུམ་ཅུ་རྩ་གཉིས་སུའོ། །དགེ་སྦྱོང་གོའུ་ཏ་མས་ཇི་སྙེད་དུ་མིའི་བླ་མའི་ཆོས་ཀྱི་ཆོ་འཕྲུལ་བསྟན་པ་ལ་བདག་ཅག་གིས་ཉིས་འགྱུར་སུམ་འགྱུར་ལྟ་བུར་མིའི་བླ་མའི་ཆོས་ཀྱི་ཆོ་འཕྲུལ་བསྟན་པར་བྱའོ། །དེ་ནས་རྫོགས་བྱེད་ལ་སོགས་པ་སྟོན་པ་དྲུག་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་དྲུང་དུ་ཕྱིན་པ་དང ། རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང ། ཚེ་རིང་བར་ཤོག་ཅིག་ཅེས་བརྗོད་ནས་
257b
> འདི་སྐད་ཅེས་སྨྲས་སོ། །ལྷ། བདག་ཅག་རྣམས་ནི། ཆོ་འཕྲུལ་དང་ལྡན་ཞིང་ཤེས་པར་སྨྲ་བ་ལགས་ན། དགེ་སྦྱོང་གོའུ་ཏ་མ་ཡང་བདག་ཉིད་ཆོ་འཕྲུལ་དང་ལྡན་པར་ཤེས་པར་སྨྲའོ། །ཞེས་མཆི་ན། ཤེས་པར་སྨྲ་བ་ནི། ཤེས་པར་སྨྲ་བ་དང་ལྷན་ཅིག་མིའི་བླ་མའི་ཆོས་ཀྱི་ཆོ་འཕྲུལ་འགྲན་དུ་གཞུག་པའི་རིགས་ཀྱི། བདག་ཅག་སྤྲོད་ཅིག་ཅེས་སྨྲས་པ་དང ། རྒྱལ་པོ་གཟུགས་ཅན་སྙིང་པོས་བགད་དེ་འདི་སྐད་ཅེས་སྨྲས་སོ། །ཁྱེད་རྣམས་རེ་གླེན། སངས་རྒྱས་ནི། ཡོན་ཏན་ཆེ་བ། རྫུ་འཕྲུལ་ཆེ་བ། ཆོ་འཕྲུལ་ཐོགས་པ་མེད་པ་ཡིན་ན། ཁྱེད་འདྲ་བ་ནི། སྲིན་བུ་མེ་ཁྱེར་ཉི་མ་ལ་འགྲན་པའམ། བ་རྨིག་གི་ཆུ་རྒྱ་མཚོ་དང་བསྒྲུན་པའམ། ཝ་སྔར་མ་སེངྒེ་དང་འགྲན་པའམ། བྱི་བྲུན་རི་རབ་ལྷུན་པོ་ལ་འཕང་མཐོ་བ་འགྲན་པ་དང་འདྲ་སྟེ། ཆེ་ཆུང་ཁྱད་ཞུགས་པར་མངོན་པས་ངན་པར་ལྟ་བ་ཁྱེད་ཧ་ཅང་ཡང་གླེན་ཆེས་སོ། །སྟོན་པ་དྲུག་གིས་ཡང་སྨྲས་པ། སྔོན་རྟགས་ཕྱིས་འབྱུང་བ་རྒྱལ་པོས་མ་གཟིགས་ཏེ། བདག་ཅག་གིས་ཆོ་འཕྲུལ་ཆེན་པོ་འགྲན་ན་མངོན་ཏེ། བསྒྲུན་པའི་འོག་ཏུ་གང་རྒྱལ་བ་མངོན་ནོ། །རྒྱལ་པོས་སྨྲས་པ། འགྲན་འདོད་ན་ལྟ་འགྲན་ལ་རག་སྟེ། ཁྱེད་སྐྱེངས་ཀྱིས་དོགས་སོ། །ཁྱེད་ཆོ་འཕྲུལ་འགྲན་པར་གྱུར་ན། དེད་ཀྱིས་ཀྱང་ཁྱེད་ཀྱི་ཆོ་འཕྲུལ་
258a
> ༄#། །མཐོང་བར་གྱིས་ཤིག་།སྟོན་པ་དྲུག་གིས་སྨྲས་པ། ད་སྟེ་ཞག་བདུན་ན་ཆོས་འཕྲུལ་འགྲན་གྱི། གར་འགྲན་པའི་ས་ཕྱོགས་བྱི་དོར་མཛོད་ཅིག་ཅེས་སྨྲས་སོ། །སྟོན་པ་དྲུག་གིས་དེ་སྐད་ཅེས་སྨྲས་ནས་ཕྱིར་དོང་བའི་འོག་ཏུ་རྒྱལ་པོ་གཟུགས་ཅན་སྙིང་པོ་སངས་རྒྱས་གང་ན་བ་དེར་སོང་ནས་ཕྱིན་པ་དང་འདི་སྐད་ཅེས་གསོལ་ཏོ། །སྟོན་པ་དྲུག་གིས་ནི། བཅོམ་ལྡན་འདས་ལ་ཆོ་འཕྲུལ་འགྲན་ནོ། །ཞེས་མཆི་སྟེ། བདག་གིས་བཀག་ན་ཡང་མ་བཏུབ་ཀྱི། བཅོམ་ལྡན་འདས་ཀྱིས་ཆོ་འཕྲུལ་གྱི་མཐུ་བསྟན་ཏེ་ངན་པར་ལྟ་བ་ལས་བཟློག་ནས་དགེ་བ་ལ་དགོད་དུ་གསོལ། ཆོ་འཕྲུལ་བསྟོན་པ་ཡང་བདག་ཅག་གིས་མཐོང་བར་མཛད་དུ་གསོལ། བཅོམ་ལྡན་འདས་ཀྱིས་རྒྱལ་པོ་གཟུགས་ཅན་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ང་བདག་དུས་མཁྱེན་གྱི། གང་དུ། འགྲན་པའི་གནས་ཡངས་པ་ཞིག་ཏུ་བྱི་དོར་གྱིས་ཤིག་ཅེས་བཀའ་སྩལ་ནས་རྒྱལ་པོ་གཟུགས་ཅན་སྙིང་པོས་བློན་པོ་ལ་བཀའ་སྩལ་ཏེ་གནས་ཡངས་པ་བདེ་བ་ཞིག་ཏུ་ཕྱག་དར་བྱས་ནས་སེངྒེའི་ཁྲི་བཤམས། རྒྱལ་མཚན་དང་བ་དང་བཙུགས་ཏེ་ཤིན་ཏུ་མཛེས་པར་བརྒྱན་ཏོ། །དེ་ལྟར་ཆོ་འཕྲུལ་འགྲན་པར་བྱས་པའི་
258b
> དུས་སུ་དེའི་ཉིན་པར་ཐམས་ཅད་མཐོང་དུ་རེའོ། །དེའི་ཚེ་ན་དེ་བཞིན་གཤེགས་པ་དགེ་འདུན་དང་བཅས་པ་རྒྱལ་པོའི་ཁབ་ནས་གཤེགས་ཏེ། ཡངས་པ་ཅན་དུ་བཞུད་དོ། །ཡངས་པ་ཅན་ན་ལི་ཙ་བཱི་དང ། མི་མང་པོས་དེ་བཞིན་གཤེགས་པ་བསུའོ། །རྒྱལ་པོའི་ཁབ་ཀྱི་མི་རྣམས་ཀྱིས་བཅོམ་ལྡན་འདས་ཡངས་པ་ཅན་དུ་གཤེགས་པ་ཡང་གདོད་ཤེས་ཤིང་རྟོགས་ནས་སྟོན་པ་དྲུག་ཀྱང་འདི་སྐད་དུ། དགེ་སྦྱོང་གོའུ་ཏ་མའི་ཆོ་འཕྲུལ་གྱིས་བདག་ཅག་ལ་ནི། མི་ཐུབ་བོ། །ཞེས་བྱས་ན། ཁྱོད་ཡིད་མི་ཆེས་ཏེ།་ཆོ་འཕྲུལ་འགྲན་པའི་དུས་བྱས་པ་ལས་བྱོལ་ནས་ཡངས་པ་ཅན་དུ་བྲོས་སོ། །ཞེས་བསྒྲགས་ཏེ། སྟོན་པ་དྲུག་ང་རྒྱལ་ལྷག་པར་སྐྱེས་ནས་སོ་སོ་ནས་སྤྲོ་བ་བསྐྱེད་དེ་དེ་སྙེགས་སུ་དོང་ངོ ། །དེའི་ཚེ་ན་རྒྱལ་པོ་གཟུགས་ཅན་སྙིང་པོ་ཡང་ཐེག་པ་ལྔ་བརྒྱ་བཤམས་ཏེ་རྒྱལ་པོ་དང་རྒྱལ་པོའི་འཁོར་ཁྲི་ཕྲག་བཅུ་བཞི་སྙེད་ཀྱང་འཚོ་བའི་རྒྱགས་ཀྱང་ཁྱེར་ནས་བཅོམ་ལྡན་འདས་ཀྱི་རྗེས་སུ་ཡུལ་ཡངས་པ་ཅན་དུ་དོང་ངོ ། །སྟོན་པ་དྲུག་ཀྱང་ཡུལ་ཡངས་པ་ཅན་དུ་ཕྱིན་ནས་ལི་ཙ་བཱི་རྣམས་ལ་འདི་སྐད་ཅེས་སྨྲས་སོ། །བདག་ཅག་དགེ་སྦྱོང་གོའུ་ཏ་མ་དང་ཆོ་འཕྲུལ་འགྲན་པར་གནང་ན། ད་སྟེ་ཞག་བདུན་ན་ཆོ་འཕྲུལ་འགྲན་པར་བགྱིའོ། །དེ་ནས་ལི་ཙ་བཱི་རྣམས་བཅོམ་ལྡན་འདས་
259a
> ༄#། །གང་ན་བ་དེར་དོང་སྟེ་འདི་སྐད་ཅེས་གསོལ་ཏོ། །གླེན་པ་ཆེན་པོ་སྟོན་པ་དྲུག་ནི། ཡོན་ཏན་དང་ལྡན་སྙམ་སྟེ་དེ་བཞིན་གཤེགས་པ་དང་ཆོ་འཕྲུལ་འགྲན་ནོ། །ཞེས་མཆི་ན། བཅོམ་ལྡན་འདས་ཀྱིས་ཚར་གཅད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ང་ཉིད་དུས་མཁྱེན་ཏོ། །དེ་ནས་ལི་ཙ་བཱི་རྣམས་ཡུལ་མི་རྣམས་ངང་ཡོ་བྱད་རྒྱལ་པོ་གཟུགས་ཅན་སྙིང་པོ་བཞིན་དུ་སྦྱར་ཏེ། སང་ལྟ་བུར་འགྲན་པ་ལས་དེ་རིང་ལྟ་བུར་བཅོམ་ལྡན་འདས་དགེ་འདུན་དང་བཅས་ཏེ་ཡུལ་ཀོའུ་ཤམྦྷིར་གཤེགས་སོ། །ཀོའུ་ཤམྦྷིའི་རྒྱལ་པོ་ཨུ་ཏྲ་ཡ་ན་ཞེས་བྱ་བས་ཀྱང་བློན་པོ་དང་བཅས་ཏེ་དེ་བཞིན་གཤེགས་པ་བསུའོ། ། ཡངས་པ་ཅན་གྱི་མི་རྣམས་སང་ལྟ་བུར་དེ་བཞིན་གཤེགས་པ་ཕྱག་འཚལ་དུ་འདོང་བ་ལས་ཀོའུ་ཤམྦྷིར་གཤེགས་སོ། །ཞེས་ཐོས་པ་དང ། སྟོན་པ་དྲུག་པོས་ཀྱང་བཅོམ་ལྡན་འདས་གཤེགས་སོ། །ཞེས་ཐོས་ནས་སྔར་བས་ཀྱང་ལྷག་པར་ང་རྒྱལ་སྐྱེས་ཏེ། ཡང་བཅོམ་ལྡན་འདས་གར་གཤེགས་པར་དོང་ངོ ། །དེའི་ཚེ་ལི་ཙ་བཱི་རྣམས་ཀྱང་ཐེག་པ་ལྔ་བརྒྱ་བཤམས་ནས་འཁོར་ཁྲི་ཕྲག་བདུན་དང ། གཟུགས་ཅན་སྙིང་པོའི་འཁོར་དང་བཅས་ཏེ་ཀོའུ་ཤམྦྷིར་སངས་རྒྱས་དང ། སྟོན་པ་
259b
> དྲུག་ཆོ་འཕྲུལ་འགྲན་པ་ལ་བལྟར་དོང་ངོ ། །སྟོན་པ་དྲུག་པོ་ཀོའུ་ཤམྦྷིར་ཕྱིན་ནས་རྒྱལ་པོ་ཨུ་ཏྲ་ཡ་ན་ལ་གཏམ་སྔ་མ་བྱས་ཏེ་དགེ་སྦྱོང་གོའུ་ཏ་མ་འདྲི་སྡོད་དུ་མ་བཏུབ་ནས་བདག་ཅག་ལ་བྱོལ་གྱི། རྒྱལ་པོས་བདག་ཅག་དང་ཆོ་འཕྲུལ་འགྲན་པའི་དུས་ཐོབ་ཅིག་ཅེས་གསོལ་པ་དང ། ུ་ཏྲ་ཡ་ནས་སངས་རྒྱས་ལ་འདི་སྐད་ཅེས་གསོལ་ཏོ། །སྟོན་པ་དྲུག་ནི། བཅོམ་ལྡན་འདས་དང་ཆོ་འཕྲུལ་འགྲན་ནོ། །ཞེས་མཆི་ན། མཁྱེན་ཏམ། བཅོམ་ལྡན་འདས་ཀྱིས་བཀའ་སྩལ་པ། ང་ཉིད་དུས་མཁྱེན་ཏོ། །དེ་ནས་ཨུ་ཏྲ་ཡ་ནས་ཀྱང་རྒྱལ་པོ་གཟུགས་ཅན་སྙིང་པོ་བཞིན་དུ་སྦྱར་ཏེ་བཤམས་པ་དང ། བཅོམ་ལྡན་འདས་ཡང་དགེ་སློང་གི་དགེ་འདུན་དང་བཅས་ཏེ་ཡུལ་ཝ་ར་གྱིར་གཤེགས་སོ། །ཝ་ར་གྱིའི་རྒྱལ་པོ་ཤུན་ཙི་ད་ལས་ཀྱང་མི་མང་པོ་དང་དེ་བཞིན་གཤེགས་པ་བསུའོ། །ཀོའུ་ཤམྦྷིའི་མི་རྣམས་ཀྱིས་ཀྱང་དེ་བཞིན་གཤེགས་པ་ཡུལ་ཝ་ར་གྱིར་གཤེགས་པ་གཟོད་ཐོས་ཏེ། སྟོན་པ་དྲུག་ཀྱང་ཕྱི་བཞིན་སོང་ངོ ། །དེའི་ཚེ་རྒྱལ་པོ་ཨུ་ཏྲ་ཡ་ན་འཁོར་སྟོང་ཕྲག་བརྒྱང་ཁྲི་དང ། རྒྱལ་པོ་གཟུགས་ཅན་སྙིང་པོ་ལ་སོགས་པ་ཐམས་ཅད་འགྲོགས་ཏེ་ཡུལ་ཝར་གྱིར་གཤེགས་སོ། །དེ་བས་སྟོན་པ་དྲུག་པོས་རྒྱལ་པོ་ཤུན་ཙི་ད་ལ་ལ་བདག་ཅག་དགེ་སྦྱོང་གོའུ་ཏ་མ་ལ་ཆོ་འཕྲུལ་
260a
> ༄#། །འགྲན་པར་གྱིས་ཤིག་ཅེས་གསོལ་བ་དང ། རྒྱལ་པོ་དེས་ཀྱང་དེ་བཞིན་དུ་གསོལ་ནས་བཅོམ་ལྡན་འདས་ཀྱིས་ང་ཉིད་དུས་མཁྱེན་ཏོ།། ཞེས་བཀའ་སྩལ་ཏོ། །རྒྱལ་པོ་དེས་ཀྱང་ཡོ་བྱད་སྦྱར་ཏེ་བཤམས་པ་དང ། བཅོམ་ལྡན་འདས་དགེ་སློང་གི་དགེ་འདུན་དང་བཅས་ཏེ་ཡུལ་ཏི་ཀི་ཙ་ཤི་རིར་གཤེགས་ནས་ཡུལ་ཏི་ཀི་ཙ་ཤི་རིའི་རྒྱལ་པོ་ཨིནྡྲ་བ་མི་ཞེས་བྱ་བས་འཁོར་མང་པོ་དད་དེ་བཞིན་གཤེགས་པ་བསུའོ། །དེའི་ཚེ་རྒྱལ་པོ་ཤུན་ཙི་ད་ལ་འཁོར་ཁྲི་ཕྲག་ལྔ་དང ། རྒྱལ་པོ་གཟུགས་ཅན་སྙིང་པོ་ལ་སོགས་པ་ཐམས་ཅད་དང་འགྲོགས་ཏེ་ཡུལ་ཏི་ཀི་ཙ་ཤི་རིར་དོང་ངོ ། །སྟོན་པ་དྲུག་པོ་ཡང་ཡུལ་དེར་ཕྱིན་ནས་རྒྱལ་པོ་ཨིནྡྲ་བ་མི་ལ་སྐད་ཆེན་པོར་དགེ་སྦྱོང་གོའུ་ཏ་མ་དང་བདག་ཅག་ཆོ་འཕྲུལ་འགྲན་པར་གྱིས་ཤིག་ཅེས་ཟློག་མ་ཐུབ་བོ། །དེའི་ཚེ་ཨིནྡྲ་བ་མིས་བཅོམ་ལྡན་འདས་གང་ན་བ་དེར་སོང་ནས་དེ་བཞིན་དུ་གསོལ་པ་དང ། བཅོམ་ལྡན་འདས་ཀྱིས་ང་ཉིད་དུས་མཁྱེན་ནོ། །ཞེས་བཀའ་སྩལ་ཏོ། །དེ་ནས་རྒྱལ་པོ་དེས་ཡོ་བྱད་བཤམས་ཏེ་དུས་ལ་བབ་པ་དང ། བཅོམ་ལྡན་འདས་དགེ་སློང་གི་དགེ་འདུན་དང་བཅས་ཏེ་ཡུལ་ཝཱ་ར་ཎཱ་སིར་གཤེགས་སོ། །ཡུལ་དེའི་རྒྱལ་པོ་ཚངས་སྦྱིན་ཞེས་བྱ་བས་
260b
> ཀྱང་འཁོར་མང་པོ་དང་བཅས་ཏེ་དེ་བཞིན་གཤེགས་པ་བསུའོ། །ཏི་ཀི་ཙ་ཤི་རིའི་མི་དག་དེ་བཞིན་གཤེགས་པ་བཞུད་པར་གདོད་ཤེས་ནས་སྟོན་པ་དྲུག་ཀྱང་དེའི་རྗེས་སུ་དོང་ངོ ། །རྒྱལ་པོ་ཨིནྡྲ་བ་མིས་ཀྱང་འཁོར་ཁྲི་ཕྲག་དྲུག་དང་བཅས་ཏེ། རྒྱལ་པོ་གཟུགས་ཅན་སྙིང་པོ་ལ་སོགས་པ་རྒྱལ་པོ་ཐམས་ཅད་དང་འགྲོགས་ཏེ་གནས་དེར་སོང་ངོ ། སྟོན་པ་དྲུག་ཀྱང་དེར་ཕྱིན་ཏེ་དེ་བཞིན་དུ་རྒྱལ་པོ་དེ་ལ་གསོལ་ནས་རྒྱལ་པོ་དེས་ཀྱང་དེ་བཞིན་དུ་གསོལ་པ་དང ། ང་ཉིད་དུས་མཁྱེན་ཏོ། །ཞེས་བཀའ་སྩལ་ཏོ། །དེ་ནས་རྒྱལ་པོ་དེས་ཀྱང་ཡོ་བྱད་སྦྱར་ཏེ་བཤམས་པ་ལས། བཅོམ་ལྡན་འདས་དགེ་སློང་གི་དགེ་འདུན་དང་བཅས་ཏེ་ཡུལ་སེར་སྐྱར་གཤེགས་སོ། །ཡུལ་སེར་སྐྱའི་ཤཱ་ཀྱའི་རིགས་རྣམས་གཅིག་གིས་གཅིག་སྦྲན་ནས་ཐམས་ཅད་འདུས་ཏེ་དེ་བཞིན་གཤེགས་པ་བསུའོ། །ཡུལ་ཝཱ་ར་ཎཱ་སིའི་མི་རྣམས་ཀྱིས་ཀྱང་དེ་བཞིན་གཤེགས་པ་བཞུད་པར་གཟོད་རྟོགས་ནས་སྟོན་པ་དྲུག་པོ་ཡང་དེའི་རྗེས་སུ་དོང་ངོ ། །རྒྱལ་པོ་ཚངས་སྦྱིན་འཁོར་ཁྲི་ཕྲག་བརྒྱད་ཅུ་དང ། གཟུགས་ཅན་སྙིང་པོ་ལ་སོགས་ཏེ། རྒྱལ་པོ་དྲུག་ཅར་ཡང་འཁོར་དང་བཅས་ཏེ་བཅོམ་ལྡན་འདས་གང་དུ་གཤེགས་པའི་རྗེས་སུ་དོང་ངོ ། །སྟོན་པ་དྲུག་ཀྱང་དེར་ཕྱིན་པ་དང ། ཤཱ་ཀྱའི་རིགས་རྣམས་ལ་
261a
> ༄#། །དགེ་སྦྱོང་གོའུ་ཏ་མ་དང་ཆོ་འཕྲུལ་འགྲན་པར་བྱས་པ་ལས། ངེད་ཀྱི་མཐུ་ཆེ་བས་བྱོལ་ལོ། །ཞེས་ཡེངས་མ་གཏམ་བྱས་སོ། །དེ་ནས་ཤཱཀྱའི་རིགས་རྣམས་ཀྱིས་དེ་བཞིན་དུ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་ང་ཉིད་དུས་མཁྱེན་ཏོ། །ཞེས་བཀའ་སྩལ་ཏོ། །དེ་ནས་ཤཱཀྱའི་རིགས་རྣམས་ཀྱིས་ཀྱང་ཡོ་བྱད་སྦྱར་ཅིང་བཤམས་པ་དང ། བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་མཉན་དུ་ཡོད་པར་གཤེགས་སོ། །དེའི་ཚེ་མཉན་དུ་ཡོད་པའི་རྒྱལ་པོ་གསལ་རྒྱལ་འཁོར་དང་བཅས་ཏེ་དེ་བཞིན་གཤེགས་པ་བསུའོ། །ཤཱ་ཀྱའི་རིགས་རྣམས་ཀྱང་དེ་བཞིན་གཤེགས་པ་བཞུད་པར་གཟོད་རྟོགས་ཏེ། སྟོན་པ་དྲུག་པོས་ཀྱང་རྗེས་སུ་སྙེགས་སོ། །ཤཱཀྱའི་རིགས་རྣམས་ཀྱང་འཁོར་ཁྲི་ཕྲག་དགུ་དང ། རྒྱལ་པོ་གཟུགས་ཅན་སྙིང་པོ་ལ་སོགས་ཏེ།་རྒྱལ་པོ་རྣམས་དང ། འཁོར་རྣམས་ཀྱིས་མཉན་དུ་ཡོད་པའི་ལྗོངས་ཡོངས་སུ་གང་ངོ ། །སྟོན་པ་དྲུག་པོ་ཡང་དེར་ཕྱིན་ནས་རྒྱལ་པོ་གསལ་རྒྱལ་ལ་འདི་སྐད་དུ། དགེ་སྦྱོང་གོའུ་ཏ་མ་དང ། བདག་ཅག་ཆོ་འཕྲུལ་འགྲན་པར་དུས་བྱས་པ་ལས། དུས་ལ་བབ་པ་དང་བྱོལ་ཞིང་བྲོས་ཏེ། ད་ནི། འཁོར་མང་པོ་
261b
> ཡང་རྒྱལ་པོའི་ཡུལ་དུ་ཚོགས་ཀྱི། རྒྱལ་པོ་ཆེན་པོས་བདག་ཅག་འགྲན་དུ་ཆུག་ཅིག་ཅེས་གསོལ་པ་དང ། རྒྱལ་པོ་གསལ་རྒྱལ་གྱིས་བགང་དེ་འདི་སྐད་དུ ། བཅོམ་ལྡན་འདས་ཀྱི་ཡོན་ཏན་ངོ་མཚར་ཆེ་བ་ནི། བསམ་གྱིས་མི་ཁྱབ་ན། ཅིའི་ཕྱིར་ཁྱོད་ལྟ་བུ་མ་རབས་ཅི་ཡང་མི་ཤེས་པ། ཆོས་ཀྱི་རྒྱལ་པོ་ཆེན་པོ་དང་ཆོ་འཕྲུལ་འགྲན་པར་བྱེད་ཅེས་བསྒོའོ། །འོན་ཀྱང་སྟོན་པ་དྲུག་པོ་དག་དྲོད་མི་ཐུབ་སྟེ་ང་རྒྱལ་སྙེམས་པས་རྒྱལ་པོ་གསལ་རྒྱལ་བཅོམ་ལྡན་འདས་གང་ན་བ་དེར་སོང་ནས་འདི་སྐད་ཅེས་གསོལ་ཏོ། །སྟོན་པ་དྲུག་པོ་དག་ཆོ་འཕྲུལ་འགྲན་པར་ཡང་དང་ཡང་དུ་བསྐུལ་གྱི། བཅོམ་ལྡན་འདས་ཀྱིས་ཚར་བཅད་དེ་ཆོ་འཕྲུལ་གྱི་བྱེ་བྲག་དབྱེ་བར་གསོལ། བཅོམ་ལྡན་འདས་ཀྱིས་ང་ཉིད་དུས་མཁྱེན་ཏོ། །ཞེས་བཀའ་སྩལ་པ་དང ། རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བཀའ་སྩལ་ཏེ་ཆོ་འཕྲུལ་འགྲན་པའི་གནས་བསྙམས་ཤིང་ཕྱག་དར་བྱས། མེ་ཏོག་དང་སྤོས་མང་དུ་བཤམས་ཏེ་སེངྒེའི་ཁྲི་བཙུགས་ནས་བ་དན་དང ། རྒྱལ་མཚན་ལ་སོགས་པས་བརྒྱན་ཏེ་འཁོར་མང་པོ་བསྡུས་སོ། །དེའི་ཚེ་དཔྱིད་ཟླ་ར་བ་ཚེས་གཅིག་གི་ཉིན་པར་བཅོམ་ལྡན་འདས་ཆོ་འཕྲུལ་འགྲན་པའི་གནས་སུ་གཤེགས་པ་དང ། རྒྱལ་པོ་གསལ་རྒྱལ་གྱིས་མཆོད་པའི་
262a
> ༄#། །ཡོ་བྱད་དང་ཞལ་ཟས་བཤམས་ཏེ་བཅོམ་ལྡན་འདས་ལ་ཕྱག་དར་ཏེ་ཕུལ་ལོ། །བཅོམ་ལྡན་འདས་ཀྱིས་ཚེམས་ཤིང་གསོལ་ནས་ཚེམས་ཤིང་ས་ལ་བཙུགས་སོ། །ས་ལ་བཙུགས་མ་ཐག་ཏུ་སྐྱེས་ནས་ཡལ་ག་དང་ལོ་མ་རྒྱས་པ། མཐོ་ཁྱད་དཔག་ཚད་ལྔ་བརྒྱ་པར་གྱུར་ཏེ་ཡལ་ག་དང་ལོ་མ་ཁོ་ར་ཁོར་ཡུག་ཏུ་དཔག་ཚད་ལྔ་བརྒྱ་ཁེབས་སོ། །དེ་མ་ཐག་ཏུ་མེ་ཏོག་ཤིང་རྟའི་འཕང་ལོ་ཙམ་སྐྱེས་ནས་འབྲས་བུ་བྲེ་ལྔ་ཤོང་བའི་བུམ་པ་ཙམ་དུ་གྱུར་ཏེ་རྩ་བ་དང ། ཡལ་ག་དང ། འདབ་མ་ལ་སོགས་པ་ཐམས་ཅད་རིན་པོ་ཆེ་སྣ་བདུན་དུ་གྱུར་ནས་ཁ་དོག་རྣམ་པ་སྣ་ཚོགས་སུ་འཚེར་ཞིང་འབར་ཏེ། ཉི་ཟླའི་འོད་ཀྱང་ཟིལ་ཀྱིས་གནོན་ཏོ། ། གང་གིས་འབྲས་བུ་དེ་ཟོས་ན་བདུད་རྩིའི་རོ་བས་ཀྱང་ལྷག་སྟེ། དྲི་བསུང་གིས་ཀུན་ཏུ་ངད་པས་དྲིས་ཕོག་པ་ཐམས་ཅད་ཀྱང་བདེ་ཞིང་ཚིམ་པར་གྱུར་ཏོ། །རླུང་བསུང་ཅན་གྱིས་ཡལ་ག་དང་ལོ་མ་ལ་རེག་ན། ཤིན་ཏུ་ཡིད་དུ་འོང་བའི་ཆོས་ཀྱི་སྒྲ་བྱུང་ངོ ། །མི་ཐམས་ཅད་ཀྱིས་ཤིང་དེ་ལ་ཤིན་ཏུ་དད་པའི་སེམས་སྐྱེས་ཏེ། དེ་ནས་བཅོམ་ལྡན་འདས་ཀྱིས་ཆོས་བསྟན་པས་ཐམས་ཅད་ཀྱི་ཡིད་དང་མཐུན་ཏེ་འབྲས་བུ་ཐོབ་པ་དང ། ལྷར་སྐྱེས་པ་ཡང་རབ་ཏུ་མང་ངོ ། །དེའི་ཕྱི་ཉིན་རྒྱལ་པོ་ཨུ་ཏྲ་
262b
> ཡ་ནས་སྤྱན་དྲངས་ནས་མཆོད་པ་སྦྱར་རོ། །དེའི་ཚེ་དེ་བཞིན་གཤེགས་པས་སྐུའི་གཡས་གཡོན་དུ་རིན་པོ་ཆེའི་རི་གཉིས་ཤིག་སྤྲུལ་ཏེ། ཤིན་ཏུ་མཐོ་བ། མཛེས་པ། རིན་པོ་ཆེ་རྣམ་པ་སྣ་ཚོགས་ཀྱི་ཁ་དོག་ལྟར་འཚེར་བ། ཤིང་རྣམ་པ་སྣ་ཚོགས་རི་དེ་ལ་སྐྱེས་པ། མེ་ཏོག་དང་འབྲས་བུ་རབ་ཏུ་རྒྱས་པ། སྒྲ་སྐད་ཤིན་ཏུ་སྙན་པ་འབྱུང་བ། རི་གཅིག་གི་རྩེ་མོ་ལ་འབྲས་བུ་རོ་བརྒྱ་དང་ལྡན་པ་འཇམ་ཞིང་མང་རབ་བྱུང་སྟེ། མི་མང་པོ་དག་ཡིད་བཞིན་དུ་དེ་ལ་ཚིམ་པར་ཟའོ། །རི་གཅིག་གི་རྩེ་མོ་ལ་རྩཝ་ཤིན་ཏུ་འཇམ་པ་དང་མངར་བ་སྐྱེས་ཏེ། དུད་འགྲོའི་སྐྱེ་གནས་རྣམས་དེ་ལ་ཡིད་བཞིན་དུ་ཟ་ཞིང་ཚིམ་པ་སྤྲུལ་ཏེ། བཅོམ་ལྡན་འདས་ཀྱིས་དེ་དག་ལ་ཅི་རིགས་སུ་ཆོས་བསྟན་པས་སེམས་རྣམ་པར་གྲོལ་ཏེ་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་དང ། མཐོ་རིས་ཀྱི་ལྷར་སྐྱེས་པའི་གྲངས་ཀྱང་རབ་ཏུ་མང་ངོ ། །དེའི་ཕྱི་ཉིན་རྒྱལ་པོ་ཤུན་ཙི་ད་ལས་སྤྱན་དྲངས་ཏེ་མཆོད་པ་སྦྱར་རོ། །བཅོམ་ལྡན་འདས་ཀྱིས་ཞལ་བསིལ་ནས་ཞལ་བསིལ་བའི་ཆུ་སླར་ས་ལ་དོར་བ་རིན་པོ་ཆེའི་རྫིང་དུ་གྱུར་ནས་ཁོ་ར་ཁོར་ཡུག་དཔག་ཚད་ཉིས་བརྒྱ་ཡོད་པ། རིན་པོ་ཆེ་སྣ་བདུན་གྱིས་རྣམ་པར་སྤྲས་པ། ཁ་དོག་རྣམ་པ་སྣ་ཚོགས་སུ་འཚེར་བ། རྫིང་བུ་དེའི་ཆུ་ཡོན་ཏན་བརྒྱད་དང་ལྡན་པ། རྫིང་གི་ཞབས་
263a
> ༄#། །ཀྱང་རིན་པོ་ཆེ་སྣ་བདུན་གྱི་བྱེ་མས་བདལ་བ། པདྨ་ཆེ་ཁྱད་ཤིང་རྟའི་འཁོར་ལོ་ཙམ་རྣམ་པ་སྣ་ཚོགས་ཀྱིས་གང་བ་འདི་ལྟ་སྟེ། པདྨ་སྔོན་པོ་དང།་སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། མྲྒད་ལ་སོགས་པའོ། །པདྨ་དེའི་དྲི་ཡང་ཀུན་ཏུ་ངད་ཅིང་བྲོ་ལ། པདྨའི་ཁ་དོག་ཇི་ལྟ་བ་བཞིན་དུ་འོད་ཟེར་འཚེར་ཏེ་དེའི་འོད་ཟེར་གྱིས་གནམ་ས་ཀུན་སྣང་བར་བྱས་ཏེ། འཁོར་མང་པོ་ཐམས་ཅད་ཀྱང་རིན་པོ་ཆེའི་རྫིང་དེ་ལ་ལྟ་ཞིང་རབ་ཏུ་དགའ་ནས་བསྟོད་དོ། །དེ་ནས་བཅོམ་ལྡན་འདས་ཀྱིས་འཁོར་མང་པོའི་ཡོ་བྱད་སྦྱར་ནས་ཆོས་རྣམ་པ་སྣ་ཚོགས་བསྟན་ཏེ་གོ་ཞིང་རྟོགས་པར་མཛད་ནས་ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི། འབྲས་བུ་ཐོབ་ནས་མཐོ་རིས་ཀྱི་ལྷར་སྐྱེས་པ་དང ། བསོད་ནམས་ཀྱི་ལས་བསྐྱེད་པ་ཡང་དཔག་ཏུ་མེད་དོ། །དེའི་ཕྱི་ཉིན་རྒྱལ་པོ་ཨིནྡྲ་བ་མིས་མཆོད་པའི་ཡོ་བྱད་བཤམས་ཏེ་སངས་རྒྱས་སྤྱན་དྲངས་སོ། །བཅོམ་ལྡན་འདས་ཀྱིས་དེའི་ཉིན་པར་རིན་པོ་ཆེའི་རྫིང་བུ་དེའི་ངོས་བཞིན་ཡུར་བ་ཆེན་པོ་བརྒྱད་བརྒྱད་ཡོད་པ་ལ་ཕྱིར་ཡང་འཁོར་ཞིང་རྫིང་དེ་ཉིད་དུ་འབབ་པ་དང ། ཆུ་འབབ་པའི་སྒྲ་ལས་དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་
263b
> པའི་ལམ་ཡན་ལག་བརྒྱད་དང ། རྣམ་པར་ཐར་པ་གསུམ་དང ། མངོན་པར་ཤེས་པ་དྲུག་དང ། ཕ་རོལ་ཏུ་ཕྱིན་པ་དྲུག་དང ། སྙིང་རྗེ་ཆེན་པོ་དང ། བྱམས་པ་ཆེན་པོ་དང ། ཚད་མེད་པ་བཞི་ལ་སོགས་ཏེ་ཆོས་རྣམ་པ་སྣ་ཚོགས་ཀྱི་སྒྲ་འབྱུང་ཞིང་ཆོས་ཀྱི་སྒྲ་དེ་ལས་ཆུད་ཅིང་རྟོགས་ནས་སངས་རྒྱས་སུ་འགྱུར་བའི་འབྲས་བུ་དང ། མཐོ་རིས་ཀྱི་ལྷར་སྐྱེ་བ་དང ། བསོད་ནམས་ཀྱི་ལས་བསྐྱེད་པ་ཡང་རབ་ཏུ་མང་ངོ ། །དེའི་ཕྱི་ཉིན་རྒྱལ་པོ་ཚངས་སྦྱིན་གྱིས་སྦྱན་དྲངས་ཏེ་མཆོད་པའི་ཡོ་བྱད་བཤམས་སོ། །དེའི་ཉིན་པར་བཅོམ་ལྡན་འདས་ཀྱི་ཞལ་གྱི་སྒོ་ནས་གསེར་གྱི་མདོག་ལྟ་བུའི་འོད་ཟེར་བཀྱེ་ནས་སྟོང་ཆེན་པོའི་འཇིག་རྟེན་གྱི་ཁམས་ཀུན་ཏུ་སྣང་བར་བྱས་ཏེ། འོད་དེས་རེག་པའི་སེམས་ཅན་ཐམས་ཅད་གདུག་པ་གསུམ་དང ། སྒྲིབ་པ་ལྔ་དང་བྲལ་ཏེ་ལུས་དང་སེམས་རབ་ཏུ་བདེ་བ་ནི། ཇི་ལྟར་དགེ་སློང་དག་བསམ་གཏན་གསུམ་པ་ཐོབ་པ་དང་འདྲའོ། །འཁོར་མང་པོ་རྣམས་སངས་རྒྱས་ཀྱི་ཡོན་ཏན་ལ་མོས་པས་བཅོམ་ལྡན་འདས་ཀྱིས་ཆོས་བསྟན་ཏེ་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་དང ། མཐོ་རིས་ཀྱི་ལྷར་སྐྱེས་པ་དང ། བསོད་ནམས་ཀྱི་ལས་བསྐྱེད་པ་ཡང་གྲངས་མེད་དོ། །དེའི་ཕྱི་ཉིན་ལི་ཙ་བཱི་རྣམས་ཀྱིས་སྤྱན་དྲངས་ནས་མཆོད་པའི་ཡོ་བྱད་སྦྱར་རོ། །དེའི་ཉིན་པར་བཅོམ་ལྡན་འདས་ཀྱིས་འཁོར་མང་
264a
> ༄#། །པོ་དེ་དག་ཐམས་ཅད་གཅིག་གི་བསམ་པ་གཅིག་གིས་ཤེས་པར་བྱས་ཏེ། སོ་སོའི་དགེ་བ་དང ། མི་དགེ་བའི་ལས་ཀྱང་རྟོགས་པར་བྱས་ནས་སོ་སོ་ནས་དགའ་སྟེ་སངས་རྒྱས་ཀྱི་ཡོན་ཏན་བསྔགས་སོ། །དེ་དག་ལ་བཅོམ་ལྡན་འདས་ཀྱིས་དམ་པའི་ཆོས་བསྟན་པས་ཁོང་དུ་ཆུད་ཅིང་རྟོགས་ནས་སངས་རྒྱས་སུ་སྨོན་ལམ་འདེབས་པ་དང ། འབྲས་བུ་ཐོབ་པ་དང ། མཐོ་རིས་ཀྱི་ལྷར་སྐྱེ་བར་སྨོན་པ་ཡང་གྲངས་མེད་དོ། །དེའི་ཕྱི་ཉིན་ཤཱཀྱའི་རིགས་རྣམས་ཀྱིས་སངས་རྒྱས་སྤྱན་དྲངས་ཏེ་མཆོད་པའི་ཡོ་བྱད་སྦྱར་རོ། །བཅོམ་ལྡན་འདས་ཀྱིས་དེའི་ཉིན་པར་འཁོར་དེ་དག་ཐམས་ཅད་སོ་སོ་ནས་འཁོར་ལོས་བསྒྱུར་བའི་རྒྱལ་པོར་བསྒྱུར་ཏེ་རིན་པོ་ཆེ་སྣ་བདུན་དང ། བུ་སྟོང་དང་ལྡན་པར་སྤྲུལ་ནས་རྒྱལ་ཕྲན་དང ། བློན་པོ་རྣམས་ཀྱིས་བསྟི་སྟང་བྱས་པར་མཐོང་སྟེ་སོ་སོ་ནས་ངོ་མཚར་རྨད་དུ་བྱུང་བའི་སྤྲོ་བ་སྐྱེས་ནས་སྤྲོ་བ་དེ་ལ་བཅོམ་ལྡན་འདས་ཀྱིས་ཆོས་རྣམ་པར་ཕྱེ་ཞིང་བསྟན་པས་སོ་སོའི་ཡིད་ཚིམ་པར་གྱུར་ཏེ་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་དང ། འབྲས་བུ་ཐོབ་པ་དང ། ལྷ་དང་མིར་སྐྱེས་པ་གྲངས་མེད་པར་གྱུར་ཏོ། །དེའི་ཕྱི་ཉིན་བརྒྱ་བྱིན་གྱིས་སངས་རྒྱས་སྤྱན་དྲངས་ཏེ་སེངྒེའི་ཁྲི་བཤམས་ནས་བཅོམ་ལྡན་འདས་དེ་ལ་བཞུགས་པ་དང ། བརྒྱ་བྱིན་ནི། གཡོན་ནས་མཆོད་པ་
264b
> བྱེད།་ཚངས་པའི་རྒྱལ་པོ་ནི། གཡས་ནས་མཆོད་པ་བྱེད་དོ། །འཁོར་མང་པོ་རྣམས་ཀྱང་ཅང་མི་སྨྲ་བར་འཁོད་པ་ལས། བཅོམ་ལྡན་འདས་ཀྱི་ཕྱག་གིས་སེངྒེའི་ཁྲི་ལ་མནན་པ་དང ། སེངྒེའི་ཁྲི་ལས་གླང་པོ་ཆེའི་སྐད་ལྟ་བུའི་སྒྲ་ཆེན་པོ་ཞིག་བྱུང་བ་དང ། དེ་མ་ཐག་ཏུ་སྲིན་པོ་ཆེན་པོ་ལྔ་ཞིག་བྱུང་ནས་སྟོན་པ་དྲུག་གི་ཁྲི་དྲངས་ནས་བཤིག་གོ་།ཕྱག་ན་རྡོ་རྗེས་ནི། རྡོ་རྗེའི་རྩེ་མོ་ལ་མེ་འབར་བ་ཐོགས་ཏེ་སྟོན་པ་དྲུག་གི་མགོར་གཟས་སོ། །སྟོན་པ་དྲུག་པོ་འཇིགས་སྐྲག་ནས་བྱེར་ཞིང་བྲོས་ཏེ་སྐྱེངས་ནས་ཁ་ཅིག་ནི། ཆུར་མཆོངས་ཏེ་ཚེ་འཕོས་སོ། །སྟོན་པ་དྲུག་གི་འཁོར་ལས་སྟོང་ཕྲག་དགུ་བཅུ་ནི། སངས་རྒྱས་ལ་སྐྱབས་སུ་གསོལ་ནས་རབ་ཏུ་འབྱུང་བར་གསོལ་པ་དང ། བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་པས།་སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ཏོ། །བཅོམ་ལྡན་འདས་ཀྱིས་དེ་དག་ལ་ཅི་རིགས་པར་ཆོས་བསྟན་པས་ཟག་པ་ཀུན་ཟད་དེ་ཉོན་མོངས་པ་ལས་རྣམ་པར་གྲོལ་ནས་དགྲ་བཅོམ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྐུའི་བ་སྤུའི་བུ་ག་བརྒྱད་ཁྲི་ནས་འོད་ཟེར་བཀྱེ་ནས་ནམ་མཁའ་ཡོངས་སུ་གང་བར་མཛད་དེ། འོད་ཟེར་དེ་དག་རེ་རེའི་ཐོག་མ་ལ་པདྨ་ཆེན་པོ་རེ་རེ་སྤྲུལ་ནས་པདྨ་དེ་དག་རེ་རེའི་སྟེང་ན་སྤྲུལ་པའི་སངས་རྒྱས་འཁོར་དང་བཅས་པ་དམ་པའི་ཆོས་སྟོན་པ་རེ་རེ་སྤྲུལ་ཏེ། འཁོར་མང་པོ་ཀུན་གྱིས་སྤྲུལ་པ་དེ་ལྟ་བུ་མཐོང་བར་བྱས་པས་ལྷག་པར་
265a
> ༄#། །དད་པའི་སེམས་སྐྱེས་ཏེ། དེ་ལ་བཅོམ་ལྡན་འདས་ཀྱིས་ཅི་རིགས་པར་ཆོས་བསྟན་པས་དེ་དག་ལས་ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད། ཁ་ཅིག་ནི།་འབྲས་བུ་ཐོབ་ནས་ལྷ་དང་མིར་སྐྱེ་བའི་བསོད་ནམས་ཀྱི་ཚོགས་བསྐྱེད་པ་ཡང་གྲངས་མེད་དོ། །དེའི་ཕྱི་ཉིན་ཚངས་པའི་རྒྱལ་པོས་སངས་རྒྱས་སྤྱན་དྲངས་ཏེ་བཅོམ་ལྡན་འདས་ཀྱི་སྐུ་ཚངས་ལྷ་ལ་ཐུག་གི་བར་དུ་ཤིན་ཏུ་མཐོ་བ། ལྷང་ངེ་ལྷམ་མེར་བཞུགས་པ་སྤྲུལ་ནས་འོད་ཟེར་ཆེན་པོས་གནམ་ས་ཀུན་ཏུ་སྣང་ཞིང་གསལ་བར་མཛད་དོ། །དེ་ཐམས་ཅད་ཀྱིས་མཐོང་བ་དང ། གསུང་ཡང་ཐོས་པར་གྱུར་ནས་དེ་ལ་བཅོམ་ལྡན་འདས་ཀྱིས་ཅི་རིགས་སུ་ཆོས་རྣམ་པ་སྣ་ཚོགས་ཕྱེ་ཞིང་བསྟན་པས་འཁོར་མང་པོ་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ནས་འབྲས་བུ་ཐོབ་པ་དང ། ལྷ་དང་མིར་སྐྱེ་བའི་དགེ་བའི་རྩ་བ་བསྐྱེད་པ་ཡང་གྲངས་མེད་དོ། །དེའི་ཕྱི་ཉིན་རྒྱལ་ཆེན་བཞིའི་རྒྱལ་པོས་སྤྱན་དྲངས་ཏེ། དེའི་ཚེ་ན་བཅོམ་ལྡན་འདས་ཀྱིས་འཁོར་མང་པོ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་སྐུ་རྒྱལ་ཆེན་བཞིའི་རིས་ནས་སྲིད་པའི་རྩེ་མོ་ལ་ཐུག་གི་བར་དུ་སྐུས་ཡོངས་སུ་གང་བར་མཐོང་བར་མཛད་ནས་སྐུ་དེ་དག་ལས་འོད་ཟེར་ཆེན་པོ་འབྱུང་ཞིང་འཁོར་རྣམས་ལ་ཅི་རིགས་སུ་དམ་པའི་ཆོས་སྟོན་པ་ཡང་གསལ་བར་ཐོས་ཤིང་མཐོང་བར་མཛད་ནས་འཁོར་དེ་དག་
265b
> ལྷག་པར་དགའ་བ་སྐྱེས་ཏེ་ཅི་རིགས་སུ་ཆོས་བསྟན་པས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ནས་འབྲས་བུ་ཐོབ་པ་དང ། ལྷ་དང་མིར་སྐྱེ་བའི་དགེ་བའི་རྩ་བ་བསྐྱེད་པ་ཡང་གྲངས་མེད་དོ།། དེའི་ཕྱི་ཉིན་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་སྤྱན་དྲངས་ཏེ། བཅོམ་ལྡན་འདས་དེའི་ཉིན་པར་བྱམས་པའི་ཏིང་ངེ་འཛིན་ལ་ཞུགས་ནས་གསེར་གྱི་མདོག་ལྟར་སེངྒེའི་ཁྲི་ལ་བཞུགས་བཞིན་དུ་སྐུ་མི་སྣང་བར་མཛད་ནས་འོད་ཟེར་ཆེན་པོ་བཀྱེ་སྟེ་ཤིན་ཏུ་འཇམ་པའི་གསུང་གིས་དམ་པའི་ཆོས་རྣམ་པར་ཕྱེ་ཞིང་བསྟན་ཏེ་འཁོར་མང་པོ་དེ་དག་གིས་ཐོས་པར་བྱས་ནས་ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པའི་ས་ལ་གནས། ལ་ལ་ནི། འབྲས་བུ་ཐོབ། ལ་ལ་ནི། ལྷ་དང་མིར་སྐྱེ་བའི་བསོད་ནམས་བསྐྱེད་པ་ཡང་གྲངས་མེད་དོ། །དེའི་ཕྱི་ཉིན་ཁྱིམ་བདག་ཙིནྡས་\?\་སངས་རྒྱས་སྤྱན་དྲངས་ཏེ། བཅོམ་ལྡན་འདས་དེའི་ཉིན་པར་བྱམས་པའི་ཏིང་ངེ་འཛིན་ལ་ཞུགས་ནས་གསེར་གྱི་ཁ་དོག་ལྟ་བུའི་འོད་ཟེར་བཀྱེ་སྟེ་སྟོང་ཆེན་པོའི་འཇིག་རྟེན་གྱི་ཁམས་དེ་ཀུན་འོད་ཟེར་གྱིས་སྣང་བར་བྱས་ནས་འོད་ཀྱིས་རེག་པའི་སེམས་ཅན་དེ་དག་ཐམས་ཅད་གདུག་པ་གསུམ་གྱི་སེམས་ཀུན་ཞི་ནས་སྙིང་རྗེའི་སེམས་སྐྱེས་ཏེ།་སེམས་ཅན་ཐམས་ཅད་གཅིག་ལ་གཅིག་ཕ་ལྟ་བུའམ། མ་ལྟ་བུའམ། བུ་ཕོ་ལྟ་བུའམ། ནུ་བོ་ལྟ་བུར་མཛའ་ཞིང་སྡུག་པར་གྱུར་ཏེ། དེའི་འོག་ཏུ་ཆོས་རྣམ་པ་སྣ་ཚོགས་བསྟན་
266a
> ༄#། །པས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པའི་ས་ལ་གནས་པ་དང ། འབྲས་བུ་ཐོབ་པ་དང ། ལྷ་དང་མིར་སྐྱེ་བའི་དགེ་བའི་རྩ་བ་བསྐྱེད་པ་ཡང་གྲངས་མེད་དོ། །དེའི་ཕྱི་ཉིན་རྒྱལ་པོ་ཤུན་ཙི་ད་ལས་སངས་རྒྱས་ཡང་སྤྱན་དྲངས་ཏེ་བཅོམ་ལྡན་འདས་དེའི་ཉིན་པར་སེངྒེའི་ཁྲི་ལ་བཞུགས་ནས་སྐུའི་ལྟེ་བ་ནས་འོད་ཟེར་གཉིས་ཤིག་ཕྱུང་སྟེ་སྐུ་ལས་འདོམ་བདུན་ཙམ་དུ་འཕགས་ནས་དེའི་སྟེང་ན་པདྨ་རེ་རེ་ཡོད་དེ། པདྨ་ལ་སྤྲུལ་པའི་སངས་རྒྱས་སྤྲུལ་ཏེ། སྤྲུལ་པའི་སངས་རྒྱས་དེ་དག་གི་ལྟེ་བ་ནས་ཀྱང་འོད་ཟེར་བྱུང་སྟེ་རྣམ་པ་གཉིས་སུ་གྱེས་ནས་འདོམ་བདུན་ཙམ་དུ་འཕགས་ཏེ་པདྨ་ཡང་ཡོད་ལ། པདྨའི་སྟེང་ན་སྤྲུལ་པའི་སངས་རྒྱས་ཀྱང་བཞུགས་ཏེ། དེ་བཞིན་དུ་མཐར་གྱིས་སྟོང་ཆེན་བོའི་འཇིག་རྟེན་གྱི་པར་དུ་དེ་དང་འདྲ་བ་ཤ་སྟག་སྤྲུལ་ཏེ་འཁོར་མང་པོ་ཐམས་ཅད་དེ་ལྟ་བུ་དག་མཐོང་ནས་ངོ་མཚར་དུ་གྱུར་ཏེ། བཅོམ་ལྡན་འདས་ཀྱིས་དེ་ལ་ཅི་རིགས་པར་ཆོས་བསྟན་པས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་དང ། ཕྱིར་མི་ལྡོག་པའི་ས་ལ་གནས་པ་དང ། འབྲས་བུ་ཐོབ་པ་དང ། ལྷ་དང་མིར་སྐྱེ་བ་ཡང་གྲངས་མེད་དོ། །དེའི་ཕྱི་ཉིན་རྒྱལ་པོ་ཨུ་ཏྲ་ཡ་ནས་སངས་རྒྱས་སྤྱན་དྲངས་ཏེ་བཅོམ་ལྡན་འདས་ལ་རྒྱལ་པོ་ཨུ་ཏྲ་ཡ་ནས་མེ་ཏོག་གིས་གཏོར་བ་དང ། གཏོར་བའི་མེ་ཏོག་རྣམས་དེ་མ་ཐག་ཏུ་རིན་པོ་ཆེའི་ཤིང་རྟ་སྟོང་ཉིས་བརྒྱ་ལྔ་བཅུས་སྟོང་གསུམ་གྱི་
266b
> སྟོང་ཆེན་པོའི་འཇིག་རྟེན་གྱི་ཁམས་ཀུན་ཏུ་སྣང་ཞིང་ཐམས་ཅད་ཀྱིས་མཐོང་བར་བྱས་སོ། །དེ་ལ་བཅོམ་ལྡན་འདས་ཀྱིས་ཅི་རིགས་པར་ནད་པ་ལ་སྨན་བཏང་བ་བཞིན་དུ་དམ་པའི་ཆོས་བསྟན་པས། ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པའི་ས་ལ་གནས་པ་དང ། ལྷ་དང་མིར་སྐྱེ་བ་ཡང་གྲངས་མེད་དོ། །དེའི་ཕྱི་ཉིན་རྒྱལ་པོ་གཟུགས་ཅན་སྙིང་པོས་སངས་རྒྱས་སྤྱན་དྲངས་ཏེ། བཅོམ་ལྡན་འདས་ཀྱིས་རྒྱལ་པོ་དེ་ལ་སྔར་འདི་སྐད་ཅེས་བཀའ་སྩལ་ཏོ། །རྒྱལ་པོས་ཞལ་ཟས་ཀྱི་སྣོད་སྦྱོར་ཅིག་།གདུགས་ཚོད་ཀྱི་དུས་ལ་བབ་པ་ན་སྣོད་ཀུན་ཞལ་ཟས་རོ་བརྒྱ་དང་ལྡན་པ། རྣམ་པ་སྣ་ཚོགས་རང་གང་སྟེ་འཁོར་མང་པོ་ཐམས་ཅད་ལ་ཆོག་པར་གྱུར་ཏེ། དེ་དག་ཟོས་ནས་ལུས་དང་སེམས་རབ་ཏུ་བདེ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཕྱག་ས་ལ་བརྡབས་པ་དང ། སེམས་ཅན་དམྱལ་བ་བཅོ་བརྒྱད་དག་ན་སེམས་ཅན་ཚད་མེད་པ་སྙེད་སྡུག་བསྔལ་མྱོང་བ་དང ། དེ་དག་སོ་སོ་ནས་འདི་སྐད་ཅེས་སྨྲས་སོ། །བདག་ཅག་གིས་སྔོན་སྡིག་པ་འདི་ལྟ་བུ་ཞིག་བྱས་པས་སྡུག་བསྔལ་འདི་ལྟ་བུ་མྱོང་བར་གྱུར་ཏོ། ཞེས་སྨྲས་ཏེ། འཁོར་མང་པོ་ཐམས་ཅད་ཀྱིས་ཐོས་ཤིང་མཐོང་བར་བྱས་ནས་ཐམས་ཅད་སྙིང་བརྩེ་བའི་སེམས་སྐྱེས་ཏེ་སྡངས་ནས་བ་སྤུ་ལངས་པ་ཙམ་དུ་སྐྲག་པར་གྱུར་ཏེ། དེ་ལ་བཅོམ་ལྡན་འདས་ཀྱིས་ཅི་རིགས་
267a
> ༄#། །སུ་ཆོས་བསྟན་ཏེ་དེ་དག་གི་སེམས་ཚིམ་པར་གྱུར་ནས་ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི། ཕྱིར་མི་ལྡོག་པའི་ས་ལ་གནས་ཏེ། ལྷ་དང་མིར་སྐྱེ་བའི་དགེ་བའི་རྩ་བ་བསྐྱེད་པ་ཡང་གྲངས་མེད་དོ། །སེམས་ཅན་དམྱལ་བ་པ་དག་གིས་སངས་རྒྱས་མཐོང་ཞིང་ཆོས་ཐོས་པའི་རྐྱེན་གྱིས་ཤིན་ཏུ་དད་པའི་སེམས་སྐྱེས་ཏེ། དེ་དག་ཚེའི་དུས་བྱས་ནས་ཐམས་ཅད་ལྷ་དང་མིར་སྐྱེས་སོ། །དེ་ནས་རྒྱལ་པོ་གཟུགས་ཅན་སྙིང་པོས་པུས་མོ་གཉིས་ས་ལ་བཙུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ངོ་མཚར་ཆེ་བའི་མཚན་སུམ་ཅུ་རྩ་གཉིས་མངའ་བ། སྐུའི་མཚན་གཞན་ནི། བལྟར་སྣང་ན། དེ་བཞིན་གཤེགས་པའི་ཞབས་ཀྱི་མཐིལ་ན་འཁོར་ལོའི་མཚན་མངའ་པ་འཁོར་རྣམས་ལ་བསྟན་དུ་གསོལ་ཞེས་གསོལ་པ་དང ། བཅོམ་ལྡན་འདས་ཀྱིས་ཞབས་བརྐྱངས་ཏེ་འཁོར་མང་པོ་ཐམས་ཅད་ལ་ཞབས་ཀྱི་མཐིལ་ན་འཁོར་ལོའི་མཚན་མངའ་བ་ཐམས་ཅད་ལ་བསྟན་ཏོ། །འཁོར་ཐམས་ཅད་ཀྱིས་ཞབས་ཀྱི་འོག་གི་འཁོར་ལོའི་མཚན་རི་མོ་བྲིས་པ་ལྟ་བུར་ཤིན་ཏུ་གསལ་བ་མཐོང་ནས་སྐྱོ་མི་ཤེས་པར་ལྟ་འདོད་དེ་ལྷག་པར་དགའ་བའི་སེམས་སྐྱེས་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སྔོན་བཅོམ་ལྡན་
267b
> འདས་ཀྱིས་བསོད་ནམས་ཅི་ཞིག་མཛད་ན། འདི་ལྟ་བུའི་འཁོར་ལོའི་མཚན་དང་ལྡན་པར་གྱུར། བཅོམ་ལྡན་འདས་ཀྱིས་རྒྱལ་པོ་ལ་བཀའ་སྩལ་པ། ངས་སྔོན་འདས་པའི་དུས་ན་དགེ་བ་བཅུའི་ལས་བདག་གིས་ཀྱང་བྱས། གཞན་ཡང་བྱེད་པར་བསྐུལ་བས་འདི་ལྟ་བུའི་མཚན་ཤིན་ཏུ་གསལ་བ་དང་ལྡན་པར་གྱུར་ཏོ། །དེ་ནས་རྒྱལ་པོས་ཡང་བཅོམ་ལྡན་འདས་ལ་གསོལ་པ།་བཅོམ་ལྡན་འདས་ཀྱིས་དགེ་བ་བཅུའི་ལས་ཇི་ལྟར་མཛད་པ་དང ། གཞན་དག་དགེ་བ་བཅུ་བྱེད་པར་ཇི་ལྟར་བསྐུལ་བ་ཐུགས་བརྩེ་བར་དགོངས་ཏེ་བསྟན་དུ་གསོལ།་བཅོམ་ལྡན་འདས་ཀྱིས་རྒྱལ་པོ་ལ་བཀའ་སྩལ་པ། ཤིན་ཏུ་རྟག་པར་ཉོན་ལ་ཡིད་ལ་ཟུངས་ཤིག་དང་བསྟན་པར་བྱའོ། །སྔོན་འདས་པའི་བསྐལ་པ་གྲངས་མེད་ཚད་མེད་པའི་ཕ་རོལ་ན་འཛམ་བུའི་གླིང་འདིར་རྒྱལ་པོ་ཆེན་པོ་ཤ་ཏ་ནི་མི་ཞེས་བྱ་བ་རྒྱལ་ཕྲན་བརྒྱད་ཁྲི་བཞི་སྟོང་ལ་དཔང་བྱེད་དེ། གྲོང་ཁྱེར་ནི། ཁྲི་ཕྲག་བཅུ་ཡོད་པ། བློན་པོ་ཆེན་པོ་ནི།་སྟོང་ཕྲག་བཅུ་ཡོད་དེ། རྒྱལ་པོ་དེ་ལ་བཙུན་མོ་སྟོང་ཕྲག་ཉི་ཤུ་ཡོད་ཀྱང་སྲས་གཅིག་ཀྱང་མེད་པས་རྒྱལ་པོ་རབ་ཏུ་མི་དགའ་སྟེ་གདུང་འཚོ་བ་པ་ཡང་མེད་སྙམ་ནས་ཤིན་ཏུ་མྱ་ངན་གྱིས་ནོན་ཏེ།་ལྷ་མཚུན་ཀུན་ལ་མཆོད་ནས་ཕྱིས་དུས་གཞན་ཞིག་ན་བཙུན་མོ་ཆེན་མོ་སུ་ལི་པ་ལ་ཞེས་བྱ་བ་སེམས་ཅན་དང་ལྡན་པར་གྱུར་ཏེ། དེ་ཚུན་ཆད་བཙུན་
268a
> ༄#། །མོ་ཡང་ཡོད་གཞུངས་ཤིང་མཁས་པ་དང་མཉེན་ཞིང་དེས་བས། འགྲོ་བ་མང་པོ་ཡང་དགེ་བ་ལ་དགོད་པར་མོས་པ་དང ། ཕྱིས་ཟླ་བ་ཚང་པ་དང་བུ་ཁྱེའུ་ཞིག་བཙས་ཏེ་བྱད་གཟུགས་ལེགས་པ། བལྟ་ན་སྡུག་པ། ཕལ་ལས་འཕགས་པར་བཟང་བ། བ་སྦུའི་བུ་ག་ཀུན་ནས་འོད་འབྱུང་བ་ཞིག་བཙས་ཏེ། རྒྱལ་པོ་ཡང་བུ་དེ་ལ་ཤིན་ཏུ་སྡུག་པར་སེམས་པས་སྐྱོ་མི་ཤེས་པ་ཙམ་དུ་རྟོག་སྟེ། མཚན་མཁན་ལ་བསྟན་ནས་མཚན་མཁན་གྱིས་ཀྱང་མཚན་བཟང་ངན་བརྟགས་ན། ཁྱེའུ་འདི་ནི། ཤིན་ཏུ་ངོ་མཚར་ཆེའོ། །ཞེས་དགའ་བ་སྐྱེས་ནས་ཁྱེའུ་འདིའི་མཚན་དང་སྦྱར་ན། གླིང་བཞི་ལ་དབང་བར་འགྱུར་རོ། །ཞེས་རྒྱལ་པོ་ལ་སྨྲས་པས། རྒྱལ་པོ་ཡང་རབ་ཏུ་དགའ་ནས་མཚན་མཁན་ལ་ཁྱེའུ་འདི་ལ་མིང་ཐོགས་ཤིག་ཅེས་སྨྲས་པ་དང ། མཚན་མཁན་གྱིས་རྒྱལ་པོ་ལ་ཁྱེའུ་འདི་མའི་རུམ་དུ་ཞུགས་ནས་ངོ་མཚར་ཆེ་བའི་ལྟས་ཅི་བྱུང་ཞེས་དྲིས་ན།་ཁྱེའུའི་མ་ལྷག་པར་ཡིད་གཞུངས་ཤིང་དེས་པ་དང ། དགེ་བར་དགོད་པ་ལ་དགའ་བར་གྱུར་ཏོ། །ཞེས་སྨྲས་ནས་མཚན་མཁན་གྱིས་ཁྱེའུའི་མིང་ཤེས་རབ་འོད་ཅེས་བཏགས་ཏེ། རྒྱལ་ཚབ་ཏུ་དབང་བསྐུར་ནས་མཁས་པའི་བློ་དང་ལྡན་ཏེ་གཞན་པས་འཕགས་པར་གྱུར་ཏོ། །དེ་ནས་དུས་ཕྱི་ཞིག་ན་རྒྱལ་པོ་ཆེན་པོ་ཚེ་འཕོས་ནས་བློན་པོ་
268b
> རྣམས་ཀྱིས་རྒྱལ་བུ་དེ་རྒྱལ་པོར་དབང་བསྐུར་བར་གསོལ་པ་དང ། རྒྱལ་བུས་བློན་པོ་རྣམས་ལངས་ནི། རྒྱལ་པོ་མི་ནུས་སོ། །ཞེས་བསྒོའོ། །བློན་པོ་རྣམས་ཀྱིས་གསོལ་པ། ད་རྒྱལ་པོ་ཆེན་པོ་ནོངས་ཏེ་རྒྱལ་བུ་མ་ལགས་པ་རྒྱལ་བུ་གཞན་འགའ་ཡང་མེད་དོ། །ད་རྒྱལ་བུས་རྒྱལ་པོ་མི་མཛད་ན། སུ་ཞིག་རྒྱལ་པོར་གཞུག་ཅེས་གསོལ་པ་དང ། རྒྱལ་བུས་སྨྲས་པ།་འཇིག་རྟེན་འདི་དག་ནི། མི་རིགས་པའི་སྡིག་པའི་ཆོས་བྱེད་དེ། བསད་པ་དང ། ཆད་པས་བཅད་པའི་ལས་བྱས་ན། ཁོ་བོ་ལ་ཁ་ན་མ་ཐོ་བའི་ལས་མི་ཆུང་སྟེ། གལ་ཏེ་ཁྱེད་ཡུལ་མི་ཐམས་ཅད་ཀྱིས་དགེ་བ་བཅུའི་ལས་བྱེད་ནུས་ནི། ཁོ་བོ་ཡང་རྒྱལ་པོ་བྱེད་ནུས་སོ། །ཞེས་བསྒོའོ། །བློན་པོ་རྣམས་ཀྱིས་གསོལ་པ། འདི་ནི། ལེགས་ཏེ། རྒྱལ་སར་གཤེགས་ཏེ་དབང་མཛོད་ཅིག་དང ། དགེ་བ་བཅུའི་ལས་ཀྱི་ལམ་ཐམས་ཅད་བགྱིད་པར་བཀར་གདགས་སོ། །ཞེས་གསོལ་ནས་མོད་ལ་རྒྱལ་བུ་ཡང་རྒྱལ་སར་གཤེགས་ནས་མི་ཐམས་ཅད་དགེ་བ་བཅུའི་ལས་ཀྱི་ལམ་སྤྱོད་པར་ཡིད་མཐུན་ཏེ་བཀའ་བཞིན་དུ་བྱས་སོ། །དེའི་ཚེ་བདུད་ཀྱི་རྒྱལ་པོས་ཕྲག་དོག་བྱས་ཏེ་རྒྱལ་པོའི་སྲིད་མི་རུང་བར་བྱ་བའི་ཕྱིར་རྐུ་ཡིག་བྲིས་ནས་རྒྱལ་ཕྲན་ཀུན་ལ་སྦྲིངས་ཏེ་སྔར་དགེ་བ་བྱོས་ཤིག་ཅེས་བཀར་བཏགས་པ་ནི། དགེ་བ་བྱས་ཀྱང་མངོན་རྟགས་མེད་དེ། བདག་ཉོན་མོངས་པ་ལས་ཕན་པའི་དོན་མེད་ཀྱི།
269a
> ༄#། །ད་ཕྱིན་ཆད་ཡིད་བཞིན་དུ་མི་དགེ་བ་ལ་བག་མེད་པར་སྤྱོད་ཅིག་ཅེས་སྤྲིང་བའི་རྐུ་ཡིག་རྒྱལ་ཕྲན་རྣམས་ཀྱི་ལག་ཏུ་འོངས་ནས་རྒྱལ་ཕྲན་རྣམས་ངོ་མཚར་གྱུར་ཏེ་རྒྱལ་པོ་ཆེན་པོ་ཅིའི་ཕྱིར་སྡིག་པའི་ལས་བྱེད་པར་བསྐུལ་སྙམ་ནས་འདི་ནི། རིགས་པ་མ་ཡིན་ཏེ། ཡིད་མ་ཆེས་པར་རྒྱལ་པོ་ལ་ཞུས་པ་དང ། རྒྱལ་པོས་དེ་སྐད་ཅེས་ཐོས་ནས་སྔངས་ཤིང་ངོ་མཚར་དུ་གྱུར་ཏེ། ངས་ནི། འདི་སྐད་དུ་བསྒོ་བ་མེད་ན། ཅིའི་ཕྱིར་འདི་འདྲ་བར་གྱུར་ཅེས་སྡངས་ནས་རྒྱལ་པོ་ཉིད་ཡུལ་ཀུན་ཏུ་གཤེགས་ཏེ།་མི་མང་པོ་སྔོན་ལས་གྱུར་ཏམ་མ་གྱུར་པ་རྟོག་ཏུ་གཤེགས་གཤེགས་པ་ལས། བདུད་ཀྱི་རྒྱལ་པོས་ལམ་ག་ན་མི་ཞིག་མེ་དོང་ཆེན་པོ་རབ་ཏུ་འབར་བའི་ནང་ན་སྡུག་བསྔལ་གྱིས་སྙིང་རྗེ་བ་སྐད་དུ་འདོན་པའི་སྐད་རྒྱལ་པོས་ཐོས་པར་སྤྲུལ་ནས་རྒྱལ་པོ་ཡང་དེའི་ཐད་དུ་གཤེགས་ཏེ། ཁྱོད་སུ་ཞིག་།ཅི་ཉེས་ཞེས་དྲིས་ནས་མི་དེས་སྨྲས་པ། བདག་གིས་སྔོན་མི་འདི་དག་དགེ་བ་བཅུ་ལ་བཀོད་པས་ད་ཤིན་ཏུ་མི་བཟད་པའི་སྡུག་བསྔལ་འདི་ལྟ་བུ་མྱོང་བར་གྱུར་ཏོ། །རྒྱལ་པོས་སྨྲས་པ། དགེ་བ་བྱེད་པར་བསྐུལ་པས་སྡུག་བསྔལ་མྱོང་བ་ནི། ཆོས་མེད་དེ། དགེ་བ་བྱེད་པར་བསྐུལ་བས་ཁྱོད་འདི་ལྟ་བུའི་སྡུག་བསྔལ་མྱོང་བར་གྱུར་ན། དགེ་བ་བྱེད་པར་བསྐུལ་ནས་དགེ་བ་བྱས་པ་དེ་དག་
269b
> དགེ་བའི་འབྲས་བུ་ཐོབ་བམ། སྨྲས་པ། དེ་ནི། དགེ་བའི་འབྲས་བུ་ཐོབ་སྟེ། དགེ་བ་བྱེད་པར་བསྐུལ་པ་འབའ་ཞིག་སྡུག་བསྔལ་འདི་ལྟ་བུ་མྱོང་ངོ ། །རྒྱལ་པོས་དེ་སྐད་ཅེས་ཐོས་ནས་ཤིན་ཏུ་དགའ་སྟེ་འདི་སྐད་ཅེས་སྨྲས་སོ། །མི་ཕ་རོལ་པོས་དགེ་བའི་འབྲས་བུ་ཐོབ་པར་གྱུར་ན་ལྟ་སྡུག་བསྔལ་མྱོང་ཡང་བླའི། འགྱོད་པ་མེད་དོ། །ཞེས་སྨྲས་པ་དང ། བདུད་ཀྱི་རྒྱལ་པོས་ཐོས་ནས་དེ་དག་དེ་མ་ཐག་ཏུ་མི་སྣང་བར་བྱས་སོ། །དེ་ནས་རྒྱལ་པོ་ཡུལ་ཀུན་ཏུ་གཤེགས་ཏེ། དགེ་བ་བཅུའི་ལས་ཀྱི་ལམ་ཀུན་ཏུ་བསྒྲགས་ཏེ་འབངས་ཐམས་ཅད་ལུས་དང་ངག་དང་ཡིད་ཀྱི་སྒོ་ནས་དགེ་བ་ལ་འདུན་ཏེ་ཐམས་ཅད་ཀྱིས་རྒྱལ་པོའི་ཡོན་ཏན་བསྔགས་པས་དེའི་ཚེ་གསེར་གྱི་འཁོར་ལོ་དང ། རིན་པོ་ཆེ་སྣ་བདུན་དང་ལྡན་ནས་གླིང་བཞི་ཀུན་ཏུ་གཤེགས་ཏེ་དགེ་བ་ལ་འགོད་པ་ལྷུར་བྱས་སོ། །དེའི་ཚེ་དེའི་དུས་ན་རྒྱལ་པོ་ཆེན་པོ་དེ་ནི། ད་ལྟར་ངའི་ཡབ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་རྒྱལ་བུ་དེའི་མ་ནི། ད་ལྟར་ངའི་ཡུམ་ལྷ་མཛེས་མ་ཡིན་ནོ། །རྒྱལ་པོ་ཤེས་རབ་འོད་མི་མང་པོ་དགེ་བ་བཅུ་ལ་བཀོད་པ་ནི། ང་ཡིན་ཏེ། དེའི་ཚེ་དེའི་དུས་ན་ཡང་ང་ཉིད་དགེ་བ་བཅུ་ཉམས་སུ་བླངས་ཏེ་གཞན་དག་ཀྱང་དགེ་བ་བཏུལ་བཀོད་པས། དེའི་ཕྱིར་ཞབས་ཀྱི་འོག་ན་འཁོར་ལོ་རྩིབས་སྟོང་དང་ལྡན་པའི་མཚན་དང་ལྡན་པར་གྱུར་ཏོ། །དེ་ནས་རྒྱལ་པོ་གཟུགས་ཅན་སྙིང་པོས་ཡང་བཅོམ་ལྡན་འདས་
270a
> ༄#། །ལ་འདི་སྐད་ཅེས་གསོལ་ཏོ། །སྟོན་པ་དྲུག་པོ་མྱོས་ཤིང་བསླད་པའི་འཁོར་དུ་བཅས་པ་རང་གི་ཚོད་མི་འཛིན་ཏེ། རྙེད་པ་དང་གྲགས་པ་ལ་ཆགས་ནས་ཕྲག་དོག་གི་སེམས་སྐྱེས་ཏེ་བཅོམ་ལྡན་འདས་དང་ཆོ་འཕྲུལ་འགྲན་པར་གསོལ་པ། བཅོམ་ལྡན་འདས་ཀྱིས་གཅིག་མཛད་ན། བདག་ཅག་གིས་གཉིས་བགྱིའོ། །ཞེས་མཆི་བ་ལས་བཅོམ་ལྡན་འདས་ཀྱིས་ཆོ་འཕྲུལ་བསམ་གྱིས་མི་ཁྱབ་པ་བསྟན་ཀྱང་སྟོན་པ་དྲུག་གིས་ཆོ་འཕྲུལ་གཅིག་ཙམ་ཡང་སྟོན་མ་ནུས་ཏེ། ངོ་ཚ་ཞིང་སྐྱེངས་ནས་ཆུར་མཆོངས་ཏེ་གུམ་པ་འདི་དག་ནི། ཧ་ཅང་ཡང་མྱོངས་ཤིང་འཁྲུལ་ཏོ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། སྟོན་པ་དྲུག་པོ་འདི་དག་རྙེད་པ་དང་གྲགས་པའི་ཕྱིར་ང་དང་འགྲན་པར་འདོད་ནས་སྲོག་དང་བྲལ་བ་འདི་འབའ་ཞིག་ཏུ་མ་ཟད་དེ། སྔོན་འདས་པའི་དུས་ན་ཡང་ང་དང་འགྲན་པར་འདོད་པ་ལས་ལུས་དང་སྲོག་གི་བར་དུ་ཡང་བྲལ་ལོ། །དེ་ནས་རྒྱལ་པོ་གཟུགས་ཅན་སྙིང་པོས་པུས་མོ་གཉིས་ས་ལ་བཙུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སྔོན་འདས་པའི་དུས་ན་བཅོམ་ལྡན་འདས་ཀྱིས་སྟོན་པ་དྲུག་དང་འགྲན་པ་བདག་ཅག་ལ་བསྟན་དུ་གསོལ། བཅོམ་ལྡན་འདས་ཀྱིས་རྒྱལ་པོ་ལ་བཀའ་སྩལ་པ། རྒྱལ་པོ་ཆེན་པོ། རྟག་པར་ཉོན་ལ་ཡིད་ལ་ཟུངས་
270b
> ཤིག་དང ། སྔོན་འདས་པའི་དུས་ན་བསྐལ་པ་ཚད་མེད་གྲངས་མེད་པའི་ཕ་རོལ་ན་འཛམ་བུ་གླིང་འདིར་རྒྱལ་པོ་མ་ཧ་ཤ་ཀུ་ལི་ཞེས་བྱ་བ་རྒྱལ་ཕྲན་ལྔ་བརྒྱ་ལ་དབང་བྱེད་པ་ཞིག་བྱུང་སྟེ།་རྒྱལ་པོ་དེ་ལ་བཙུན་མོ་ལྔ་བརྒྱ་ཡོད་ཀྱང་ཁྱེའུ་རིགས་འཚོབ་པ་གཅིག་ཀྱང་མེད་པས་རྒྱལ་པོ་དེས་འདི་སྙམ་དུ་བསམ་མོ། །ང་ནི། རྒས་འཁོགས་ཏེ་བུ་གཅིག་ཙམ་ཡང་རིགས་འཚོབ་པ་མེད་ན། གལ་ཏེ་ང་འདས་པའི་འོག་ཏུ་རྒྱལ་ཕྲན་རྣམས་གཅིག་ལ་གཅིག་མི་ཉན་ཅིང་དམག་འདྲེན་ཏེ། སེམས་ཅན་རྣམས་ཀྱང་མ་ཉེས་པར་འཆི་ལ། སྲིད་ཀྱང་འཁྲུགས་པར་འགྱུར་རོ་སྙམ་བསམ་ནས་མྱ་ངན་གྱིས་ཡིད་གདུངས་ཏེ་སེམས་ཁོང་དུ་ཆུད་དོ། །དེའི་ཚེ་ན་བརྒྱ་བྱིན་ལྷའི་དབང་པོས་རྒྱང་མ་ནས་རྒྱལ་པོ་དེ་མི་དགའ་ཞིང་སེམས་ཁོང་དུ་ཆུང་པ་མཐོང་ནས་ནམ་མཁའ་ལས་བབས་ཏེ་སྨན་པ་ཞིག་ཏུ་སྤྲུལ་ནས་རྒྱལ་པོ་དེའི་གན་དུ་སོང་སྟེ། རྒྱལ་པོ་ཁྱོད་ནི། ཅིའི་ཕྱིར་འདི་ལྟར་ཡི་མུག་ཅིང་མི་དགའ་ཞེས་དྲིས་པ་དང ། རྒྱལ་པོས་ཀྱང་སྔ་མ་བཞིན་དུ་གཏམ་བྱས་སོ། །སྤྲུལ་པའི་སྨན་པས་རྒྱལ་པོ་ལ་སྨྲས་པ། རྒྱལ་པོ་ཁྱོད་མྱ་ངན་མ་བྱེད་ཅིག་།བདག་ནི། ཁྱོད་ཀྱི་ཕྱིར་གངས་ཀྱི་རི་ལ་སོང་ནས་གངས་ཀྱི་རི་ལས་སྨན་རྣམ་པ་མང་པོ་བཏུས་ཏེ་བཙུན་མོ་དག་ཟར་བཅུག་ན། ཟོས་མ་ཐག་ཏུ་བཙུན་མོ་ཀུན་སེམས་ཅན་དང་ལྡན་པར་འགྱུར་བར་བགྱིའོ། །རྒྱལ་པོས་དེ་སྐད་ཅེས་སྨྲས་པ་ཐོས་
271a
> ༄#། །ནས་ཚིག་འདི་ནི། བདག་གི་མྱ་ངན་སངས་པར་བྱེད་དོ་སྙམ་བསམ་ནས་སྨན་པ་ལ་ཁྱོད་ཀྱིས་འདི་ལྟར་ནུས་ན་ཤིན་ཏུ་ལེགས་སོ། །ཞེས་སྨྲས་སོ། །དེའི་ཚེ་ན་སྤྲུལ་པའི་སྨན་པ་དེ་གངས་ཀྱི་རི་ལ་སོང་ནས་སྨན་རྣམ་པ་མང་པོ་བཏུས་ཏེ་ཁུར་དུ་ཁྱེར་ནས་ཕྱིར་རྒྱལ་པོའི་ཕོ་བྲང་དུ་འོངས་སོ། །དེ་ནས་སྨན་རྣམས་འོ་མ་ལ་བསྐོལ་ཏེ་བཙུན་མོ་ཆེན་མོ་ལ་བྱིན་པ་དང ། བཙུན་མོ་ཆེན་མོས་སྨན་དེ་མནམ་ཞིང་ཡིད་མ་ཆེས་པས་འཐུང་དུ་མ་བཏུབ་པ་དང ། སྤྲུལ་པའི་སྨན་པ་ཡང་ཕྱིར་ལྷའི་གནས་སུ་སོང་ངོ ། །སྨན་དེ་ལ་བཙུན་མོ་ཆུང་ངུ་གཞན་དག་གིས་འཐུངས་ཏེ་བཙུན་མོས་དེ་དག་འཐུངས་ནས་རིང་པོར་མ་ལོན་པར་སོ་སོ་ནས་སེམས་ཅན་དང་ལྡན་པར་གྱུར་ཏེ། དེ་དག་གིས་དེ་བཞིན་དུ་བཙུན་མོ་ཆེན་མོ་ལ་སྨྲས་པ་དང ། བཙུན་མོ་ཆེན་པོ་འགྱོད་དེ་མི་དགའ་ནས་སྨན་དེའི་ལྷག་མ་ཅི་ཡོད་ཅེས་དྲིས་ན་ཟད་དོ། །ཞེས་སྨྲས་སོ། །འོ་ན་སྨན་གྱི་ཚིགས་མ་ཙམ་ཡོད་དམ་ཞེས་དྲིས་ན་སྨན་གྱི་ཚིགས་མ་ནི། ཡོད་དོ། །ཞེས་སྨྲས་སོ། །དེ་ནས་བཙུན་མོ་ཆེན་མོས་སྨན་གྱི་ཚིགས་མ་འོ་མའི་ནང་དུ་བསྐོལ་ཏེ་འཐུངས་པ་དང ། རིང་པོར་མ་ལོན་པར་སེམས་ཅན་དང་ལྡན་པར་གྱུར་ཏེ། བཙུན་མོ་གཞན་དག་སྨན་སྔར་འཐུངས་པ་ནི། ཟླ་བ་ཚང་བས་སོ་སོ་ནས་ཁྱེའུ་ཤ་སྟག་བཙས་ཏེ་བཟང་བ་བལྟ་ན་སྡུག་པའོ། །རྒྱལ་
271b
> པོ་རབ་ཏུ་དགའ་ནས་བཙུན་མོ་ཆེན་མོ་སྲས་ནམ་བཙའ་པ་འབའ་ཞིག་སེམས་སོ། །བཙུན་མོ་ཆེན་མོ་ཡང་ཟླ་བ་ཚང་ནས་ཁྱེའུ་ཞིག་བཙས་ཏེ་བྱད་བཞིན་མི་སྡུག་པ་ཤིང་དུ་མ་ལྟ་བུ་ཞིག་བཙས་པས་རྒྱལ་པོ་དང་བཙུན་མོ་མི་དགའ་སྟེ། བུའི་མིང་ཡང་སྡོང་དུམ་ཞེས་བཏགས་སོ། །དེ་ནས་གསོས་བསྐྱེད་དེ་ཆེར་སྐྱེས་ནས་ཕུ་བོ་རྣམས་ནི། ཐམས་ཅད་ཆུང་མ་ལེན་ཏེ། རྒྱལ་བུ་སྡོང་དུ་མ་འབའ་ཞིག་ཆུང་མ་མ་བླངས་སོ། །དུས་གཞན་ཞིག་ན་ཕ་རོལ་པོའི་རྒྱལ་པོས་དམག་དྲངས་ནས་ཉེ་བར་འོངས་པ་དང ། རྒྱལ་བུ་ལྔ་བརྒྱས་ཀྱང་དམག་གི་ཚོགས་བཤམས་ཏེ་ཕ་རོལ་པོའི་དམག་ལ་རྒོལ་དུ་སོང་སོང་བ་ལས། གཡུལ་ཕམ་ནས་ཕྱིར་ཕོ་བྲང་དུ་བྲོས་ཏེ་འོངས་སོ། །རྒྱལ་བུ་སྡོང་དུམ་གྱིས་ཕུ་བོ་རྣམས་ལ་སྨྲས་པ།་ཁྱེད་ཅིའི་ཕྱིར་འདི་ལྟར་འཇིགས་སྐྲག་སྟེ་བྲོས་ཞེས་དྲིས་ན་ཕུ་བོ་རྣམས་ཀྱིས་སྨྲས་པ། ངེད་དམག་དང་བཅས་ཏེ་ཕ་རོལ་པོའི་དམག་ལ་རྒོལ་དུ་སོང་བ་ལས་གཡུལ་ཕམ་ནས་ཕ་རོལ་པོའི་དམག་གིས་བདས་ནས་བྲོས་པ་ཡིན་ནོ། །རྒྱལ་བུ་སྡོང་དུམ་གྱིས་སྨྲས་པ། དགྲ་དེ་ཙམ་གྱིས་བདག་ཅག་ལ་བདོ་བར་མི་ནུས་ཀྱི། བདག་ཅག་གིས་མེས་པོའི་གཞུ་དང ། དུང་ད་ལྟར་ལྷའི་རྟེན་གྱི་ནང་ན་ཡོད་པ་འོན་ཅིག་དང ། བདག་དེ་དག་ལ་རྒོལ་དུ་འགྲོའོ། །ཞེས་སྨྲས་སོ། །རྒྱལ་བུ་དེའི་མེས་པོ་ནི། འཁོར་ལོས་བསྒྱུར་
272a
> ༄#། །བའི་རྒྱལ་པོ་ཡིན་ཏེ། མི་མང་པོ་བཟློག་ནས་འཁོར་ལོས་བསྒྱུར་བའི་རྒྱལ་པོའི་གཞུ་གཡེར་པོར་བཏེགས་ཏེ་རྒྱལ་བུ་ལ་ཕུལ་ལོ། །རྒྱལ་བུས་གཞུ་བླངས་ཏེ་བརྡུངས་ནས་གཞུ་རྒྱུད་སྦྲེངས་པའི་སྒྲ་འབྲུག་སྐད་ཟེར་ཏེ་དཔག་ཚད་བཞི་བཅུའི་བར་དུ་ཐོས་པར་གྱུར་ཏོ། །དེ་ནས་རྒྱལ་བུས་གཞུ་དང ། དུང་ཐོགས་ཏེ་གཅིག་བུ་དགྲ་ལ་རྒོལ་དུ་སོང་ནས་སྔར་དུང་བུས་ཏེ་དུང་གི་སྒྲ་གནམ་ལྕགས་འབབ་པ་སྐད་དྲག་པོས་ཕ་རོལ་པོའི་དམག་གིས་ཐོས་པ་ཙམ་གྱིས་འཇིགས་སྐྲག་སྟེ་ཐམས་ཅད་བྱེར་རོ། །དེ་ནས་རྒྱལ་བུ་ཡང་ཕྱིར་ལོག་ནས་རྒྱལ་པོ་དང ། བཙུན་མོས་གདོད་སྡུག་པར་བསམ་སྟེ་རྒྱལ་བུའི་ཆུང་མ་བླང་བར་བྱས་སོ། །དེའི་ཚེ་ན་རྒྱལ་པོ་ལི་ཤི་བ་ཙ་ཞེས་བྱ་བ་ལ་བུ་མོ་ཞིག་ཡོད་དེ། འཇིག་རྟེན་ན་དཀོན་པར་བཟང་ངོ ། །ཞེས་ཐོས་ནས་རྒྱལ་པོས་ཕོ་ཉ་བཏང་སྟེ་བུ་མོ་མནའ་མར་བླངས་ནས་རྒྱལ་བུའི་ནང་ན་བྱང་གཟུགས་བཟང་བ་གཅིག་མག་པ་ཡིན་ནོ། །ཞེས་བསྟན་ཏེ། རྒྱལ་པོ་དེས་ཀྱང་བུ་མོ་སྦྱིན་པར་བྱས་སོ། །དེ་ནས་རྒྱལ་པོ་རབ་ཏུ་དགའ་ནས་མནའ་མ་བསུ་བའི་ཡོད་བྱད་བཤམས་ཏེ་རྒྱལ་བུ་སྡོང་དུམ་ཉིད་ཀྱང་ཆུང་མ་བསུར་བཏང་ནས་ཉིན་པར་ཆུང་མ་དང་མ་ཕྲང་བར་གྱིས་ལ། མཚན་མོ་ཕྲད་པར་གྱིས་ཤིག་ཅེས་བསྒོས་ནས་བཏང་ངོ ། །དེ་ནས་
272b
> དུས་གཞན་ཞིག་ན་བུ་མོ་དེ་ཕུ་ནུ་མོ་གཞན་དག་དང་ཕྲད་ནས་སོ་སོ་ནས་ཁྱོའི་ཡོན་ཏན་ཅི་ཡོད་པ་སྨྲས་པ་དང ། རྒྱལ་བུ་སྡོང་དུམ་གྱི་ཆུང་མས་ཀྱང་ཁྱོ་ལ་བསྟོད་དེ། །ཁོ་མོའི་ཁྱོ་ནི། དཔའ་ལ་སྟོབས་ཀྱང་གྱད་དང་མཉམ་སྟེ། ལུས་ཀྱི་ཤ་ཡང་ཤིན་ཏུ་འཇམ་མོ། །ཞེས་སྨྲས་པ་དང ། ཕུ་ནུ་མོས་སྨྲས་པ། ཁྱོད་ནི། མ་སྨྲ་ཞིག་།ཁྱོད་ཀྱི་ཁྱོ་ནི། ཤིན་ཏུ་ཡང་མི་སྡུག་སྟེ།་སྡོང་དུ་མ་དང་འདྲ་བས་ཅི་སྟེ་ཁྱོད་ཉིན་པར་མཐོང་ན་སྔངས་པར་འགྱུར་རོ། །ཞེས་སྨྲས་སོ། །སྡོང་དུམ་གྱི་ཆུང་མས་ཕུ་ནུ་མོ་དག་གིས་དེ་སྐད་སྨྲས་པ་ཐོས་ནས་ཡིད་ལ་བཟུང་སྟེ་མཚན་མོ་མེ་མར་སྦས་ནས་ཁྱོ་གཉིད་ཀྱིས་ལོག་པའི་འོག་ཏུ་མེ་མར་ཕྱུང་སྟེ་བལྟས་ན། ཤིན་ཏུ་མི་སྡུག་པར་མཐོང་ནས་དངངས་སྐྲག་སྟེ་མོད་ལ་ཕྱིར་པ་མའི་ཡུལ་དུ་བྲོས་སོ། །རྒྱལ་བུ་སྡོང་དུ་མ་གྱིས་ནམ་ལངས་ནས་གདོད་ཚོར་ཏེ་མི་དགའ་ནས་གཞུ་དང་དུང་ཐོགས་ཏེ་ཆུང་མའི་ཡུལ་དུ་ཆུང་མ་སྙེགས་སུ་སོང་ངོ ། །ཡུལ་དེར་ཕྱིན་ན་བློན་པོ་ཞིག་ལ་གནས་ཤིང་འདུག་པ་ལས། དུས་གཞན་ཞིག་ན་རྒྱལ་ཕྲན་དྲུག་གི་རྒྱལ་པོས་ཀྱང་རྒྱལ་པོ་ལི་ཤི་པ་ཙ་ལ་བུ་མོ་བཟང་མོ་ཞིག་ཡོད་དོ། །ཞེས་ཐོས་ནས་སོ་སོ་ནས་དམག་དང་བཅས་ཏེ་བུ་མོ་སློང་དུ་འོངས་སོ། །དེའི་ཚེ་རྒྱལ་པོ་ལི་ཤི་པ་ཙ་མི་དགའ་ནས་བློན་པོ་རྣམས་བསྡུས་ཏེ་བགྲོས་ནས་གལ་ཏེ་བུ་མོ་འདི་རྒྱལ་པོ་གཅིག་ལ་བྱིན་ན། གཅིག་མི་དགའ་ཞིང་འཁོན་
273a
> ༄#། །དུ་འཛིན་པས། ཇི་ལྟར་བྱས་ན་དགྲ་འདི་དག་མེད་པར་འགྱུར་ཞེས་བགྲོས་པ་དང ། བློན་པོ་གཅིག་གིས་བུ་མོ་འདི་དུམ་བུ་དུམ་བུར་བྱས་ལ་དུམ་བུ་རེ་རེ་བྱིན་ན། དེ་དག་གི་ཡིད་ཚིམ་པར་འགྱུར་ཞེས་སྨྲས་སོ། །བློན་པོ་ཁ་ཅིག་གིས་ནི། འདི་སྐད་དུ། ལ་ལ་ཞིག་གིས་དམག་འདི་དག་ཟློག་ནུས་ན་བུ་མོ་ཡང་ཆུང་མར་སྦྱིན་ལ།་ཡུལ་ཕྱེད་ཀྱང་བྱ་དགར་སྦྱིན་ནོ། །ཞེས་བཀར་བཏགས་ན་རུང་ངོ ། །ཞེས་སྨྲས་སོ། །རྒྱལ་པོས་ཀྱང་གྲོས་དེ་ཉན་ཏེ་བཀར་བཏགས་པ་དང ། དེའི་ཚེ་ན་རྒྱལ་བུ་སྡོང་དུམ་གཞུ་དང་དུང་ཐོགས་ཏེ་གྲོང་ཁྱེར་གྱི་ཕྱི་རོལ་ཏུ་ཕ་རོལ་གྱི་དགྲ་གང་ན་འདུག་པར་སོང་ནས་དུང་བུས་ཏེ་གཞུ་རྒྱུད་སྦྲེངས་པ་ཙམ་གྱིས་ཕ་རོལ་གྱི་དམག་ཐམས་ཅད་སྐྲག་ནས་འགུལ་ཡང་མ་ནུས་སོ། །དེ་ནས་དེ་དག་གི་དམག་གི་ནང་དུ་སོང་ནས་རྒྱལ་པོ་དྲུག་ཆར་གྱི་མགོ་བཅད་དེ་ཅོད་པན་བླངས་ནས་དམག་དེ་རྣམས་ཀྱང་འཁོར་དུ་བསྡུས་སོ། །རྒྱལ་པོ་ལུ་ཤི་པ་ཙ་རབ་ཏུ་དགའ་སྟེ་བུ་མོ་ཡང་ཆུང་མར་བྱིན་ནས་རྒྱལ་པོ་ཆེན་པོར་བཅུག་སྟེ་རྒྱལ་པོ་དྲུག་གི་སྲིད་གཅིག་ཏུ་བསྡུས་ནས་དམག་གི་ཚོགས་དང་བཅས་ཏེ་ཆུང་མ་དང་འགྲོགས་ནས་ཕྱིར་བདག་གི་ཡུལ་དུ་འོངས་སོ། །རྒྱལ་པོས་ཀྱང་སྲས་ཀྱིས་ཕྱིར་འོངས་སོ། །ཞེས་ཐོས་ནས་ཕྱི་རོལ་ནས་བསུས་ཏེ་རྒྱལ་སྲིད་ཀྱང་རྒྱལ་བུ་
273b
> ལ་བྱིན་པ་ལས། བྱེད་དུ་མ་བཏུབ་ནས་ཕྱིར་ཡབ་ལ་གཏད་དེ་སྔོན་བཞིན་དུ་ཆུང་མ་དང་ལྷན་ཅིག་ཏུ་འདུག་ནས་ཆུང་མ་ལ་ཁྱོད་ཅིའི་ཕྱིར་མཚན་མོ་ཁོ་བོ་བོར་ཏེ་བྲོས་ཞེས་དྲིས་ན།་ཁྱོད་མི་སྡུག་ཆེས་ནས་མི་མ་ཡིན་སྙམ་སྟེ་སྐྲག་ནས་བྲོས་སོ། །དེ་ནས་རྒྱལ་བུས་མེ་ལོང་བླངས་ཏེ་མེ་ལོང་གི་ནང་དུ་བལྟས་ན། བདག་གི་བཞིན་ཤིན་ཏུ་མི་སྡུག་པར་མཐོང་སྟེ།་ལུས་དེ་ལ་ལྟ་མི་འདོད་པ་ཙམ་དུ་སྐྱོ་ནས་ཚལ་ཞིག་གི་ནང་དུ་སོང་སྟེ་འཆི་བར་བྱས་པ་ལས། བརྒྱ་བྱིན་ལྷའི་དབང་པོས་རྒྱང་མ་ནས་མཐོང་སྟེ་དེའི་དྲུང་དུ་འོངས་ཏེ་ཅིའི་ཕྱིར་ཁྱོད་འཆི་ཞེས་དྲིས་ན། རྒྱལ་བུས་དེ་བཞིན་དུ་སྨྲས་པ་དང ། བརྒྱ་བྱིན་གྱིས་སྤྲོ་བ་བསྐྱེད་དེ། རིན་པོ་ཆེའི་ནོར་བུ་གཅིག་བྱིན་ནས་འདི་སྐད་ཅེས་སྨྲས་སོ། །ཁྱོད་རྟག་ཏུ་ནོར་བུ་འདི་སྤྱི་བོ་ལ་ཐོགས་ཤིག་དང ། ང་དང་འདྲ་བར་བཟང་ཞིང་མཛེས་པར་འགྱུར་རོ། །ཞེས་བསྒོས་ནས་རྒྱལ་བུས་ནོར་བུ་སྤྱི་བོ་ལ་བཏགས་མ་ཐག་ཏུ་བདག་གི་ལུས་སྔོན་པས་ལྷག་པར་གྱུར་པ་ཚོར་ནས་ཕྱིར་ཕོ་བྲང་གི་ནང་དུ་འོངས་ནས་གཞུ་དང ། དུང་བླངས་ཏེ་ཕྱི་རོལ་དུ་རྩེར་འགྲོ་བ་ལས་ཆུང་མས་ངོ་མ་ཤེས་ཏེ་འདི་སྐད་ཅེས་སྨྲས་སོ། །ཁྱོད་སུ་ཞིག་།འདི་ལ་མ་རེག་ཅིག་།ཁོ་མོའི་ཁྱོ་འོངས་ན་གནོད་པར་གྱུར་ཏ་རེ། ཆུང་མ་ལ་སྨྲས་པ། ང་ནི། ཁྱོད་ཀྱི་ཁྱོ་ཡིན་ནོ། །ཞེས་སྨྲས་ན། ཆུང་མ་ཡིད་མ་ཆེས་ཏེ། འདི་སྐད་ཅེས་སྨྲས་སོ། །ཁོ་མོའི་ཁྱོ་
274a
> ༄#། །ནི།་ཤིན་ཏུ་ཡང་མི་སྡུག་སྟེ། ཁྱོད་ནི། ཤིན་ཏུ་ཡང་བཟང་བ་ཞིག་ན། ཇི་ལྟར་ཁོ་མོའི་ཁྱོ་ཞེས་སྨྲས་པ་དང ། རྒྱལ་བུས་སྤྱི་བོའི་ནོར་བུ་བཀྲོལ་མ་ཐག་ཏུ་ཕྱིར་མི་སྡུག་པར་མཐོང་ནས་རབ་ཏུ་དགའ་སྟེ། ཅིའི་ཕྱིར་འདི་ལྟར་གྱུར་ཅེས་དྲིས་ན། རྒྱལ་བུས་ཅིའི་ཕྱིར་དེ་ལྟར་གྱུར་བ་རྒྱས་པར་གཏམ་བྱས་ནས་དེ་ཕྱིན་ཆད་ཁྱོ་ཤུག་གཉིས་མཛའ་སྟེ་རྒྱལ་བུའི་མིང་སྡོང་དུམ་ཞེས་བྱ་བ་ཡང་བརྗེས་ནས་རྒྱལ་བུ་སུ་ལ་ཤན་ཞེས་བཏགས་སོ། །དེ་ནས་དུས་གཞན་ཞིག་ན་རྒྱལ་བུ་དེས་འདི་སྙམ་དུ་བསམ་མོ། །ད་ནི། དམག་དང་བཅས་ཏེ་ཕོ་བྲང་ཞིག་བྱའོ་སྙམ་དུ་བསམ་ནས་གང་ནས་གཞི་ཡངས་ཤིང་མཉམ་པ་ཞིག་ཏུ་སོང་སྟེ། འདིར་ཕོ་བྲང་གྱིས་ཤིག་ཅེས་བསྒོ་བ་དང ། ཀླུའི་རྒྱལ་པོ་བཞི་ཞིག་མིར་སྤྲུལ་ནས་འདིར་ཕོ་བྲང་མཛད་ན་ཅི་ལས་མཛད་ཅེས་དྲིས་ན། རྒྱལ་བུ་སུ་ལ་ཤན་གྱིས་སྨྲས་པ། ས་ལས་བྱའོ། །ཞེས་བསྒོ་བ་དང ། ཀླུའི་རྒྱལ་པོ་བཞིས་ཅིའི་ཕྱིར་རིན་པོ་ཆེ་ལས་མི་མཛད་ཅེས་སྨྲས་སོ། །སྨྲས་པ། ཕོ་བྲང་ཆེན་པོ་ཞིག་བྱ་དགོས་ན། རིན་པོ་ཆེ་དེ་སྙེད་ཅིག་ག་ལས་རྙེད་ཅེས་སྨྲས་པ་དང ། ཀླུའི་རྒྱལ་པོ་ས་བདག་ཅག་གིས་དབུལ་ལོ། །ཞེས་སྨྲས་ནས་དེའི་ངོས་བཞིར་ཆུ་མིག་རེ་རེ་སྤྲུལ་ཏེ་འདི་སྐད་ཅེས་སྨྲས་སོ། །ཤར་ཕྱོགས་ལོགས་ཀྱི་ཆུ་མིག་ལས་བཅུས་ཏེ་བྱས་ན། བཻ་
274b
> ཌཱུརྱར་འགྱུར་རོ། །ལྷོ་ཕྱོགས་ཀྱི་ཆུ་མིག་ལས་བཅུས་ཏེ་བྱས་ན། ཐམས་ཅད་གསེར་དུ་འགྱུར་རོ། །ནུབ་ཕྱོགས་ངོས་ཀྱི་ཆུ་མིག་ལས་བཅུས་ཏེ་བྱས་ན། ཐམས་ཅད་དངུལ་དུ་འགྱུར་རོ། །བྱང་ཕྱོགས་ངོས་ཀྱི་ཆུ་མིག་ལས་བཅུས་ཏེ་བྱས་ན། ཐམས་ཅད་ཤེལ་དུ་འགྱུར་རོ། །ཞེས་སྨྲས་སོ། །རྒྱལ་བུས་ཀྱང་དེ་དག་གིས་སྨྲས་པ་བཞིན་དུ་ཆུ་མིག་ལས་བཅུས་ནས་དེ་བཞིན་དུ་གྱུར་ཏེ། དེ་ནས་ཕོ་བྲང་གི་ར་བ་ཁོར་ཁོར་ཡུག་དཔག་ཚད་བཞི་བརྒྱ་པ་ཞིག་བྱས་ནས་དེའི་ནང་དུ་ཕོ་བྲང་དཔག་ཚད་བཞི་བཅུ་པ་ཞིག་བྱས་ཏེ། ལམ་གྱི་སྲང་ན་ཁང་བུ་བརྩེགས་པ་དང ། སྐྱེད་ཤིང་དང ། ཁྲུས་ཀྱི་ཁང་བུ་ཡང་རིན་པོ་ཆེ་སྣ་བཞི་ལས་བྱས་སོ། །བཟང་བྱད་ལྷའི་ཕོ་བྲང་དང་འདྲ་བར་བྱས་ནས་ཟིན་མ་ཐག་ཏུ་རིན་པོ་ཆེ་སྣ་བདུན་ཡང་ཡོད་པར་གྱུར་ཏེ། གླིང་བཞི་ལ་དབང་བྱེད་ཅིང་དགེ་བ་རྒྱས་པར་བྱས་སོ། །རྒྱལ་པོ་ཆེན་པོ། དེའི་ཚེ་དེའི་དུས་ན་རྒྱལ་པོ་མ་ཧ་ཤ་ཀུ་ལ་ནི། ད་ལྟར་ངའི་ཡབ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་རྒྱལ་པོའི་བཙུན་མོ་ནི་ད་ལྟར་ངའི་ཡུམ་ལྷ་མཛེས་མ་ཡིན་ནོ། །རྒྱལ་བུ་མི་སྡུག་པ་སྡོང་དུ་མ་ནི། ད་ལྟར་ང་ཡིན་ནོ། །དེའི་ཆུང་མ་དེ་ནི་སྐྱེ་རྒུའི་བདག་མོ་ཡིན་ནོ། །ཆུང་མ་དེའི་ཕ་དེ་ནི། འོད་སྲུང་ཡིན་ནོ། །རྒྱལ་པོ་དྲུག་གིས་དམག་དྲངས་ཏེ་བུ་མོ་འདོད་པ་དེ་དག་ནི། སྟོན་པ་དྲུག་པོ་འདི་དག་ཡིན་ཏེ། དེའི་ཚེ་དེའི་དུས་ན་ཡང་ང་དང་གཟུགས་ལ་རྩོད་པས་ངས་དེ་དག་ཀུན་བསད་
275a
> ༄#། །དེ་དམག་གི་ཚོགས་ཀྱང་འཁོར་དུ་བསྡུས་པས་ད་ལྟར་གྱི་བར་དུ་རྙེད་པ་དང ། གྲགས་པ་ལ་ཕྲག་དོག་བྱེད་པའི་ཕྱིར་ང་དང་འགྲན་པར་འདོད་ཀྱང་ཆོ་འཕྲུལ་མེད་དེ་བསམ་པ་ལྟར་མ་གྱུར་པས་ཆུར་ཤི་བ་ཡིན་ནོ། །དེ་ལྟར་དེ་དག་གི་འཁོར་ཁྲི་ཕྲག་དགུ་བཅུ་ཡང་ངའི་འཁོར་དུ་བསྡུས་ནས་ངའི་ཉེ་གནས་སུ་གྱུར་ཏོ། །དེ་ནས་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རྒྱལ་པོ་སྡོང་དུམ་དེ་སྔོན་བསོད་ནམས་ཅི་ཞིག་བགྱིས་པས། འདི་ལྟར་མཐུ་སྟོབས་ཆེ་ལ་ཤིན་ཏུ་མི་སྡུག་པར་གྱུར། བཅོམ་ལྡན་འདས་ཀྱིས་རྒྱལ་པོ་ལ་བཀའ་སྩལ་པ། རྒྱུ་ཡོད་རྐྱེན་ཡོད་དེ། བསྟན་པར་བྱའོ། །སྔོན་འདས་པའི་དུས་བསྐལ་པ་གྲངས་མེད་དཔག་ཏུ་མེད་པའི་ཕ་རོལ་ན་འཛམ་བུའི་གླིང་འདིར་ཡུལ་ཝཱ་ར་ཎཱ་སི་ཞེས་བྱ་བ་ན་དྲང་སྲོང་རི་ཞེས་བྱ་བ་ལ་རང་སངས་རྒྱས་གཅིག་ཅིག་གནས་ཏེ། རང་སངས་རྒྱས་དེ་ལ་རླུང་ནད་ཡོད་པས། རླུང་ནད་ཀྱི་སྨན་འབྲུ་མར་འཐུང་དགོས་པ་ལས་འབྲུ་མར་འཚག་པའི་ཁྱིམ་དུ་སོང་ནས་འབྲུ་མར་བསླངས་པ་དང ། འབྲུ་མར་འཚག་པ་དེས་དེ་ལ་ཁྲོས་ཏེ། མགོ་དང་ཤིང་དུམ་བུ་འདྲ་བ། རྐང་ལག་དང་ཤིང་ཚལ་འདྲ་བ་འདི་ལས་བྱེད་དུ་ནི། མི་བཏུབ་ཀྱི། ཞོ་གཅིག་ནམ་གཅིག་ཀྱང་འབྱིན་དུ་མི་བཏུབ་པར་སློང་མོ་འབའ་ཞིག་ལ་འཚོ་བ་ལྟོས་པ་འདི་ཞེས་སྤྱོས་ཤིང་བརྒྱད་ནས་འོན་
275b
> ཀྱང་མར་གྱི་ཚིགས་མ་ཕུལ་ལོ། །རང་སངས་རྒྱས་དེས་མར་གྱི་ཚིགས་མ་ཐོབ་ནས་སྒོར་བྱུང་སྟེ་ཕྱིར་འགྲོ་བ་ལས། སྒོ་ཁར་མར་འཚག་པ་དེའི་ཆུང་མ་དང་ཕྲད་ནས་རང་སངས་རྒྱས་དེ་ལ་དད་པའི་སེམས་སྐྱེས་ཏེ། སྐྱེས་བུ་ཁྱེད་གར་གཤེགས། མར་གྱི་ཚིགས་མ་འདིས་ཅི་ཞིག་མཛད་ཅེས་དྲིས་པ་དང ། རང་སངས་རྒྱས་དེས་ཀྱང་དེ་བཞིན་དུ་དྲང་པོར་གཏམ་བྱས་ནས་ཆུང་མ་དེས་རང་སངས་རྒྱས་དེ་ཕྱིར་བོས་ཏེ་ཁྱིམ་དུ་ཁྲིད་ནས་ལྷུང་བཟེད་བླངས་ཏེ་འབྲུ་མར་ལྷུང་བཟེད་བཀང་སྟེ་ཕུལ་ནས་ཁྱོལ་འདི་སྐད་ཅེས་སྨྲས་སོ། །ཁྱོད་ཀྱིས་སྐྱེས་བུ་འདི་ལ་མར་གྱི་ཚིགས་མ་ཕུལ་བ་ཤིན་ཏུ་ཉེས་ཀྱི། ཁའི་ཉེས་པ་འགྱོད་ཚངས་གྱིས་ཤིག་ཅེས་བསྒོ་ནས་མི་དེས་ཀྱང་འགྱོད་པའི་སེམས་སྐྱེས་ཏེ། འགྱོད་ཚངས་བྱས་ནས་ཁྱོ་ཤུག་ཡིད་མཐུན་པར་རང་སངས་རྒྱས་དེ་ལ་འདི་སྐད་ཅེས་གསོལ་ཏོ། །བཙུན་པ། ད་སླན་ཆད་མར་དགོས་ན་ཡང་རྟག་ཏུ་ལོངས་ཤིག་ཅེས་སྨྲས་ནས་རང་སངས་རྒྱས་དེས་ཀྱང་རྟག་ཏུ་དེའི་ཁྱིམ་ནས་མར་བླངས་ཏེ་དེ་དག་གིས་བྱས་པ་གཟོ་བའི་ཕྱིར་དེ་དག་གི་དྲུང་དུ་ཆོ་འཕྲུལ་བསྟན་ཏེ་སྟེང་གི་ནམ་མཁའ་ལ་འཕགས་ནས་ཆུ་འབབ་པ་དང ། མེ་འབྱུང་བ་དང ། ཆོ་འཕྲུལ་རྣམ་པ་སྣ་ཚོགས་བསྟན་ཏོ། །མར་འབུལ་བའི་ཁྱོ་ཤུག་གཉིས་ཀྱིས་དེ་ལྟ་བུའི་ཆོ་འཕྲུལ་མཐོང་ནས་ལྷག་པར་དགའ་ཞིང་དད་པའི་སེམས་སྐྱེས་ཏེ་མི་དེས་ཆུང་མ་ལ་སྨྲས་པ། ཁྱོད་ཀྱིས་མར་ཕུལ་བའི་
276a
> ༄#། །བསོད་ནམས་ཅི་ཡོད་པ་ཁོ་བོ་དང་ཐུན་མོང་དུ་གྱུར་ཏེ་བདག་ཅག་ཁྱོ་ཤུག་ཏུ་ཤོག་ཅིག་།ཅེས་སྨྲས་པ་དང ། ཆུང་མས་སྨྲས་པ། ཁྱོད་ཀྱིས་སྐྱེས་བུ་ཆེན་པོ་ལ་ཚིག་ངན་པ་སྨྲས་ཏེ་མར་གྱི་ཚིགས་མ་ཕུལ་ནས་དད་པའི་སེམས་མེད་པས་གང་དུ་སྐྱེས་ཀྱང་ཤིན་ཏུ་མི་སྡུག་པར་འོང་ན། ཁྱོད་དང་ཇི་ལྟར་ཁྱོ་ཤུག་ཏུ་བྱ་ཞེས་སྨྲས་པ་དང ། ཁྱོས་སྨྲས་པ། ཁོ་བོས་རྟག་ཏུ་ཉོན་མོངས་ཏེ་མར་འཚག་པའི་ལས་བྱས་ན། ཅིའི་ཕྱིར་ཁྱོད་ཀྱི་སྦྱིན་པའི་འབྲས་བུ་ང་དང་ཐུན་མོང་དུ་མི་བསྔོ། ང་མི་ཉན་གྱི་ཁྱོད་དང་ཁྱོ་ཤུག་ཏུ་བྱ་དགོས་སོ། །ཆུང་མས་སྨྲས་པ། ཅི་སྟེ་ཁྱོད་དང་ཁྱོ་ཤུག་ཏུ་གྱུར་ན། ཁྱོད་མི་སྡུག་ཆེས་ནས་ཁོ་མོའི་ཁྱོད་དོར་ཏེ་མཚན་མོ་བྲོས་སུ་འོང་ངོ ། །ཁྱོས་སྨྲས་པ། ཅི་སྟེ་ཁྱོད་བྲོས་ན་ཡང་ངས་ཕྱི་བཞིན་བསྙགས་ལ་ཁྱོད་ཐོབ་པར་བྱས་ནས་ཕྱིར་འོང་ངོ ། །ཞེས་ཁྱོ་ཤུག་གཉིས་གཅིག་ལ་གཅིག་སྨྲས་ནས་རང་སངས་རྒྱས་དེ་ལ་ལུས་དང་སྲོག་ཕྱོགས་ཏེ་འགྱོད་ཚངས་བྱས་སོ། དེའི་ཚེ་ན་རང་སངས་རྒྱས་དེས་ཁྱོ་ཤུག་དེ་གཉིས་ལ་འདི་སྐད་ཅེས་བསྒོའོ། །ཁྱེད་ཁྱོ་ཤུག་གཉིས་ཀྱིས་ང་ལ་མར་བྱིན་པས་ན། ངའི་ནད་སོས་ཀྱི་ཁྱོ་ཤུག་གཉིས་ཅིར་སྨོན་པ་སྨྲོས་ཤིག་།དེ་བཞིན་དུ་འགྲུབ་པར་འགྱུར་རོ། །ཞེས་བསྒོ་བ་དང ། མི་ཁྱོ་ཤུག་དེ་གཉིས་རབ་ཏུ་དགའ་ནས་བུས་མོ་ས་ལ་བཙུགས་ཏེ་འདི་སྐད་
276b
> ཅེས་སྨོན་ལམ་བཏབ་བོ། །བདག་ཅག་ཁྱོད་ཤུག་གཉིས་ལྷའམ། མི་གང་དུ་སྐྱེས་ཀྱང་ཡིད་བཞིན་དུ་གྲུབ་པར་གྱུར་ཅིག་ཅེས་སྨོན་ལམ་བཏབ་བོ། །རྒྱལ་པོ་ཆེན་པོ། དེའི་ཚེ་དེའི་དུས་ན་མར་འཚག་པའི་མི་དེ་ནི། རྒྱལ་བུ་སྡོང་དུམ་ཡིན་ནོ། །དེའི་ཆུང་མ་ནི། སྡོང་དུམ་གྱི་ཆུང་མ་ཉིད་ཡིན་ནོ། །དེའི་ཚེ་ན་རང་སངས་རྒྱས་ལ་སྡོང་དུམ་དང་འདྲ་ཞེས་ཚིག་ངན་པ་སྨྲས་ཏེ་ཁྲོས་བཞིན་དུ་མར་གྱི་ཚིགས་མ་བྱིན་པས། སྐྱེ་བ་ཐམས་ཅད་དུ་ཤིན་ཏུ་མི་སྡུག་པར་གྱུར་ཏོ། །ཕྱིས་འགྱོད་ཚངས་བྱས་ཏེ་མར་བཟང་པོ་ཕུལ་བས་སྐྱེ་བ་ཐམས་ཅད་དུ་ཕྱིས་བཟང་ཞིང་སྡུག་པར་གྱུར་ཏོ། །མར་ཕུལ་བས་ན་སྐྱེ་བ་ཐམས་ཅད་དུ་མཐུ་སྟོབས་དང་ལྡན་ཏེ། ཐམས་ཅད་ཐུབ་པར་གྱུར་ཏོ། །དེའི་བསོད་ནམས་ཀྱིས་ནི། འཁོར་ལོས་བསྒྱུར་བའི་རྒྱལ་པོར་གྱུར་ཏེ། གླིང་བཞི་ལ་དབང་ཞིང་འདོད་པ་ལྔ་ལ་ཡིད་བཞིན་དུ་སྤྱོད་པར་གྱུར་ཏོ། །དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པ་ནི། ནམ་ཡང་མེད་པར་མི་འགྱུར་ཏེ། དེ་བས་ན་ལུས་དང ། ངག་དང ། ཡིད་ཀྱི་ལས་སྲུང་པ་ལ་ནན་ཏན་བྱའོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་རྒྱལ་པོ་གཟུགས་ཅན་སྙིང་པོ་ལ་སོགས་ཏེ་རྒྱལ་པོ་དང ། བློན་པོ་དང ། འཁོར་རྣམ་བཞི་དང ། ལྷ་དང ། ཀླུ་ལ་སོགས་པས་ཐོས་ནས། ལ་ལ་ནི། རྒྱུན་དུ་ཞུགས་པའི་འབྲས་བུ་ཐོབ། ལ་ལ་ནི། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་
277a
> ༄#། །པ་དང ། དགྲ་བཅོམ་པའི་འབྲས་བུ་ཐོབ། ལ་ལ་ནི། རང་སངས་རྒྱས་ཀྱི་དགེ་བའི་རྩ་བ་བསྐྱེད། ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ། ཕྱིར་མི་ལྡོག་པའི་ས་ལ་གནས་པར་གྱུར་ནས་འཁོར་དེ་དག་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་ཡི་རང་ནས་མངོན་པར་དགའོ། །སྟོན་པ་དྲུག་བཏུལ་བའི་ལེའུ་སྟེ་བཅུ་གསུམ་པའོ།། །།བམ་པོ་བཞི་པ། གཅན་གཟན་ཀུན་ཏས་ལུས་ཀྱི་སྦྱིན་པ་བྱས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་སྤུངས་པའི་རི་ལ་བཞུགས་སོ། །དེའི་ཚེ་བཅོམ་ལྡན་འདས་ཀྱི་སྐུ་ལ་བསེར་མའི་སྙུན་གྱིས་བཟུང་ནས་སྨན་པ་འཚོ་བྱེད་ཀྱིས་སྨན་རྣམ་པ་སུམ་ཅུ་རྩ་གཉིས་དང་མར་དུ་སྦྱར་ཏེ་ཉིན་རེ་བཞིན་སྦྱར་སྨན་སྲང་སུམ་ཅུ་རྩ་གཉིས་གཉིས་གསོལ་ལོ། །ལྷ་སྦྱིན་མ་རུངས་པ་ཕྲག་དོག་གི་སེམས་སྐྱེས་ནས་སངས་རྒྱས་དང་མཉམ་མོ། །ཞེས་བསྒྲགས་ཏེ། བཅོམ་ལྡན་འདས་སྨན་གསོལ་ཞེས་ཐོས་ནས་སྨན་འདོད་ཅིང་སངས་རྒྱས་དང་འདྲ་བར་བྱ་བའི་ཕྱིར་སྨན་པ་འཚོ་བྱེད་ལ་བཅོམ་ལྡན་འདས་ལ་གསོལ་བའི་སྨན་ང་ལ་སྦྱར་ཏེ་བྱིན་ཅིག་ཅེས་བསྒོའོ། །དེ་ནས་འཚོ་བྱེད་ཀྱིས་སྨན་སྦྱར་ཏེ་ལྷ་སྦྱིན་ལ་བྱིན་ནས་ཉིན་རེ་ལ་སྲང་བཞི་བཞི་ཐོང་ཞིག་ཅེས་བསྒོ་བ་དང ། ལྷ་སྦྱིན་
277b
> གྱིས་ད་ལྟར་བཅོམ་ལྡན་འདས་ཉིན་རེ་ཞིང་སྲང་དུ་དུ་གསོལ་ཞེས་དྲིས་པ་དང ། འཚོ་བྱེད་ཀྱིས་བཅོམ་ལྡན་འདས་ནི། ད་ལྟར་ཉིན་རེ་ཞིང་སྲང་སུམ་ཅུ་རྩ་གཉིས་གཉིས་གསོལ་ལོ། །ཞེས་སྨྲས་པ་དང ། ལྷ་སྦྱིན་གྱིས་ཁོ་བོ་ལ་ཡང་ཉིན་རེ་ཞིང་སྲང་སུམ་ཅུ་རྩ་གཉིས་གཉིས་བྱིན་ཅིག་ཅེས་བསྒོ་བ་དང ། འཚོ་བྱེད་ཀྱིས་སྨྲས་པ། དེ་བཞིན་གཤེགས་པའི་སྐུ་དང ། ཁྱོད་ནི། མི་འདྲ་སྟེ། ཁྱོད་ཀྱིས་མང་དུ་ཟོས་ན་མི་ཞུ་བས་གདོན་མི་ཟ་བར་ཕྱིར་ནད་དུ་འགྱུར་རོ། །ཞེས་སྨྲས་པ་དང ། ལྷ་སྦྱིན་གྱིས་སྨྲས་པ། ཇི་ཙམ་ཟོས་ན་ཞུ་བའི་དྲོད་ཁོ་བོ་ལ་ཡོད་དེ། ཁོ་བོ་དང ། སངས་རྒྱས་སུ་བྱེ་བྲག་ཅི་ཡོད་ཅེས་སྨྲས་ནས་སངས་རྒྱས་དང་འདྲ་བར་ཉིན་གཅིག་ལ་སྨན་སྲང་སུམ་ཅུ་རྩ་གཉིས་གཉིས་བཏང་ནས་སྨན་མ་ཞུ་སྟེ་རྩ་ཀུན་ཏུ་ཟུག་ནས་ཉམ་ཐག་སྟེ་ཤིན་ཏུ་སྡུག་བསྔལ་བའི་སྐད་ཕྱུང་ནས་འབོད་འགྲོགས་སོ། །དེ་ལ་བཅོམ་ལྡན་འདས་ཐུགས་བརྩེ་བར་དགོངས་ཏེ་རྒྱང་མ་ནས་ཕྱག་བརྐྱངས་ནས་ལྷ་སྦྱིན་གྱི་མགོ་ལ་བྱུགས་པས་མོད་ལ་སྨན་ཀུན་ཞུ་ནས་ཚ་བའི་སྡུག་བསྔལ་དང་བྲལ་བར་གྱུར་ཏེ། ལྷ་སྦྱིན་གྱིས་བཅོམ་ལྡན་འདས་ཀྱི་ཕྱག་ཡིན་པར་ཤེས་ནས་འདི་སྐད་ཅེས་སྨྲས་སོ། །རྒྱལ་བུ་དོན་གྲུབ་ཀྱིས་ཤེས་པའི་རྩལ་དུ་སྨན་ཡང་བསླབས་ཏེ། སྨན་པ་ཡང་མཁས་པ་ལྟ་སྟེ་མི་འདོད་དོ་ཞེས་སྨྲས་སོ། །དེའི་ཚེ་ན་ཀུན་དགའ་བོས་དེ་སྐད་ཅེས་སྨྲས་
278a
> ༄#། །བ་ཐོས་ནས་ཤིན་ཏུ་མི་དགའ་སྟེ་བུས་མོ་ས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་འདི་ནི། བཀའ་དྲིན་མི་འཚལ་ཏེ།་བཅོམ་ལྡན་འདས་ཀྱིས་ད་ལ་ཐུགས་བརྩེ་བར་དགོངས་ནས་དེའི་ནད་ཡོངས་སུ་བསལ་ཀྱང་སླར་མི་དགེ་བའི་སེམས་ཀྱིས་ཚིག་མི་དགོས་པ་སྨྲས་ཏེ། རྟག་ཏུ་བཅོམ་ལྡན་འདས་ལ་བསྔོའོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལྷ་སྦྱིན་གྱིས་ད་ལྟར་འདི་འབའ་ཞིག་ཏུ་ང་ལ་མི་དགེ་བའི་སེམས་བསྐྱེད་ནས་ང་ལ་གནོད་པར་བྱེད་པར་མ་ཟད་ཀྱི། སྔོན་འདས་པའི་དུས་ན་ཡང་ང་ལ་སྡིག་པའི་སེམས་བསྐྱེད་དེ་ང་བསད་པར་གྱུར་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ། འདས་པའི་དུས་ན་ལྷ་སྦྱིན་གྱིས་ཇི་ལྟར་བགྱིས་པ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་བསྐལ་པ་གྲངས་མེད་དཔག་ཏུ་མེད་པའི་ཕ་རོལ་ན་འཛམ་བུའི་གླིང་འདིར་ཡུལ་ཝཱ་ར་ཎཱ་སི་ཞེས་བྱ་བ་ན་རྒྱལ་པོ་ཚངས་སྦྱིན་ཞེས་བྱ་བ་ཁྲོ་ཞིང་གཏུམ་ལ་སྙིང་རྗེ་མེད། འདོད་ཆགས་དང་ཞེ་སྡང་ཆེ་བ། སྡིག་པའི་ལས་ཀྱིས་གཙེས་ཤིང་གསོང་པ་ལ་དགའ་བ་ཞིག་བྱུང་ངོ ། །དེའི་ཚེ་ན་རྒྱལ་པོ་དེའི་རྨི་ལམ་དུ་གཅན་གཟན་ལུས་ཀྱིས་གསེར་གྱི་མདོག་ལྟར་འདུག་ལ། སྤུའི་ཐོག་མ་ལ་གསེར་ལྟ་བུའི་
278b
> འོད་བྱུང་ཞིང ། གཡས་གཡོན་ཐམས་ཅད་ཀྱང་གསེར་གྱི་མདོག་ཏུ་སྣང་བར་བྱེད་པའི་གཅན་གཟན་གཅིག་ཅིག་རྨིས་ནས་དེ་མ་ཐག་ཏུ་སད་དེ་འདི་སྙམ་དུ་བདག་གིས་རྨི་ལམ་ན་མཐོང་བ་འདི་ནི། གདོན་མི་ཟ་བར་ཡོད་ཀྱི། རྔོན་བདག་དེའི་པགས་པ་ཚོལ་དུ་གཞུག་གོ་སྙམ་བསམ་ནས་རྔོན་པ་རྣམས་བསྡུས་ཏེ་འདི་སྐད་ཅེས་བསྒོའོ། །ཁོ་བོའི་རྨི་ལམ་དུ་གཅན་གཟན་གསེར་གྱི་མདོག་ཅན་སྤུའི་ཐོག་མ་ལ་གསེར་གྱི་འོད་ལྟ་བུ་འབྱུང་བ་ཞིག་རྨིས་ཏེ། འདི་ལྟ་བུ་ཞིག་ཡུལ་འདི་ན་ཡོད་དུ་ངེས་ཀྱི། ཁྱེད་རྣམས་ཀྱིས་ཀུན་ཏུ་ཚོལ་ལ་དེའི་པགས་པ་བཤུས་ཏེ་ང་ལ་ཕུལ་ཅིག་དང ། ཁྱོད་ཀྱི་བུ་ཚེ་རབས་བདུན་ཚུན་ཆད་སྐྱེད་ཅིང་བདེ་བར་བྱའོ། །གལ་ཏེ་སྙིང་ནས་མ་བཙལ་ལམ། ལེ་ལོ་ཞིག་བྱས་ཏེ་མ་རྙེད་ན། ཁྱེད་རྣམས་རྩ་རྒྱུད་ཚུན་ཆད་མེད་པར་བྱའོ། །ཞེས་བསྒོའོ། །དེ་ནས་རྔོན་པ་དེ་དག་ཤིན་ཏུ་མི་དགའ་སྟེ་དབེན་པའི་ཕྱོགས་ཤིན་ཏུ་ཐམས་ཅད་འདུས་ནས་འདི་སྐད་ཅེས་བགྲོས་སོ། །རྒྱལ་པོས་རྨིས་པའི་གཅན་གཟན་དེ་ནི། གནའ་ནས་མ་མཐོང་སྟེ། གལ་ཏེ་བདག་ཅག་གིས་མ་རྙེད་ན། རྒྱལ་པོའི་བཀའ་ཁྲིམས་གཉན་པས་བདག་ཅག་གསོན་པར་མི་འགྱུར་རོ། །ཞེས་བགྲོས་ནས་ལྷག་པར་མི་དགའ་བའི་སེམས་བསྐྱེད་ཏེ། ཡང་འདི་སྐད་ཅེས་སྨྲས་སོ། །ཤིང་ཁུང་འདི་ན་སྤྲུལ་གདུག་པ་དང ། གཅན་གཟན་མ་རུངས་པ་མང་བས། ལམ་རིང་པོར་འགྲོ་ཞིང་སྲོག་མི་
279a
> ༄#། །ཕངས་པར་དོན་སྒྲུབ་ཏུ་ནི། སྲོག་དང་བསྔོས་སུ་ཡང་མི་ནུས་པས་བདག་ཅག་གི་ནང་ན་མི་གང་གིས་ནུས་པ་གཅིག་ཅིག་ཚོལ་དུ་བཏང་ངོ ། །གལ་ཏེ་མི་དེས་མཐོང་བར་གྱུར་ན། གདོད་བདག་ཅག་སྤྲན་པར་བྱས་ན་ལེགས་སོ། །ཞེས་སྨྲས་ནས་མི་ཞིག་ལ་འདི་སྐད་ཅེས་སྨྲས་སོ། །ཁྱོད་སྲོག་དང་བསྔོས་ཏེ་ཀུན་ཏུ་ཚོལ་དུས་སོང་ཞིག ། གལ་ཏེ་རྙེད་ན་ངེད་སྤྱི་ལས་ནཽར་བཀྲལ་ཏེ་མང་དུ་སྦྱིན་ནོ། །ཅི་སྟེ་ཁྱེད་ཕྱིར་མ་འཁོར་ན་ཡང་ཁྱོད་ཀྱི་བུ་དང་ཆུང་མ་ལ་སྦྱིན་ནོ། །ཞེས་སྨྲས་ཏེ་མི་དེས་ཀྱང་འདི་སྙམ་དུ་བདག་ནི། མི་མང་པོ་འདི་དག་གི་ཕྱིར་ལུས་དང་སྲོག་ཡལ་ཡང་བླའོ་སྙམ་བསམ་ནས་འགྲོ་བའི་ཡོ་བྱད་བཤམས་ཏེ་དྲི་དང་ནགས་ཚལ་ཉམ་ང་བ་ཀུན་ཏུ་ཚོལ་དུ་སོང་སོང་བ་ལས། ཡུན་རིང་ཞིག་ལོན་པས་ཤིན་ཏུ་ཉམ་ཐག་ནས་དབྱར་ཚ་བའི་དུས་སུ་བྱེ་མ་ཚ་བ་པུས་མོ་ནུབ་ཙམ་ཞིག་ཏུ་ཕྱིན་པ་དང་ངལ་ཆད་དེ་སྐོམ་གྱིས་གདུངས་པས་སྲོག་ཆགས་ལ་ཐུག་ནས་འདི་སྐད་ཅེས་སྨྲས་སོ། །སྙིང་རྗེ་དང་ལྡན་པ་སུ་ཞིག་བདག་འདི་ལྟར་སྡུག་བསྔལ་བའི་ལུས་དང་སྲོག་གི་སྐྱབས་སུ་འགྱུར་བ་ཡོད་དམ་ཞེས་སྨྲས་པ་དང ། དེའི་ཚེ་ན་རི་དེ་ལ་གཅན་གཟན་ཀུན་ཏ་ཞེས་བྱ་བ་ལུས་ཀྱི་སྤུ་མདོག་གསེར་གྱི་ཁ་དོག་ལྟར་འདུག་ལ། སྤུའི་ཐོག་མ་ལ་གསེར་གྱི་འོད་འབྱུང་བ་ཞིག་ཡོད་པ་དེས་རྒྱང་མ་ནས་མི་དེས་སྨྲས་པའི་
279b
> ཚིག་ཐོས་ནས་ཤིན་ཏུ་སྙིང་བརྩེ་བའི་སེམས་བསྐྱེད་ཏེ། གང་ན་ཆུ་མིག་གྲང་མོ་ཡོད་པའི་ནང་དུ་ལུས་བཅུག་ནས་མི་དེའི་དྲུང་དུ་འོངས་ཏེ་མི་དེ་ལ་ཕང་པས་འཁྱུད་ནས་ཅུང་ཟད་ཅིག་ཉམས་བརྟས་པ་དང་ཆུ་འགྲམ་དུ་ཁྲིད་དེ་བཀྲུས་ནས་ཤིན་ཏོག་བཏུས་ཏེ་ཟར་བཅུག་གོ་།དེ་ནས་མི་དེ་སོར་ཆུད་ནས་འདི་སྙམ་དུ་སེམས་སོ། །གཅན་གཟན་འདི་ནི། རྒྱལ་པོ་འདོད་པ་ཁོ་ན་ཡིན་ན། བདག་སྲོག་དང་བྲལ་བ་ལས་སྲོག་གི་སྐྱབས་བྱས་ཏེ་དྲིན་དུ་གཟོ་བ་ཅུང་ཟད་ཀྱང་མ་བྱས་པར་འདི་ལ་གསོད་པའི་སེམས་ཇི་ལྟར་ཡང་སྐྱེད། གལ་ཏེ་མ་རྙེད་ན་ནི། རྔོན་པ་དེ་དག་གཉེན་དང་བཅས་པ་ཐམས་ཅད་གྱོད་ལ་ཐོགས་པར་འགྱུར་རོ་སྙམ་བསམས་ནས་མི་དགའ་ཞིང་འདུག་པ་ལས། གཅན་གཟན་གྱིས་ཁྱོད་ཅིའི་ཕྱིར་འདི་ལྟར་མི་དགའ་ཞེས་དྲིས་ན།་མཆི་མ་ལྷགས་ནས་རྒྱས་པར་སྨྲས་པ་དང ། ཀུན་ཏས་འདི་སྐད་ཅེས་སྨྲས་སོ། །འདི་ལ་ཁྱོད་མི་དགའ་བར་མ་བྱེད་ཅིག་།ངའི་པགས་པ་འདི་ཐོབ་སླ་བ་ཡིན་ཏེ། ཁོ་བོས་བསམ་ན།་ཚེ་སྔ་མ་ལ་ལུས་གྲངས་མེད་པ་ཞིག་བཏང་ཡང་ལུས་ཀྱིས་བསོད་ནམས་སུ་འགྱུར་བའི་ལས་མ་བྱས་ཏེ། ལུས་ཀྱི་པགས་པ་འདིས་དེ་དག་གི་སྲོག་བསྐྱབ་བོ། །ཞེས་སྨྲས་ནས་རབ་ཏུ་དགའ་བའི་སེམས་སྐྱེས་ཏེ་ཁྱོད་ཀྱིས་ཁོ་བོའི་སྲོག་མ་བཅད་པར་པགས་པ་བཤུས་ཏེ་ཁྱེར་ཅིག་།འགྱོད་པའི་སེམས་མེད་པར་ཁྱོད་ལ་སྦྱིན་ནོ། །དེའི་ཚེ་ན་རྔོན་པ་དེས་པགས་
280a
> ༄#། །པ་དལ་གྱིས་བཤུས་ནས་ཀུན་ཏས་འདི་སྐད་ཅེས་སྨོན་ལམ་བཏབ་བོ། །བདག་གིས་པགས་པ་འདི་ཁྱོད་ལ་བྱིན་ཏེ་མི་མང་པོ་ཕངས་པའི་སྲོག་བསྐྱབས་པའི་བསོད་ནམས་འདི་སེམས་ཅན་ཐམས་ཅད་ལ་བསྔོས་ཏེ། བདག་བླ་ན་མེད་པའི་བྱང་ཆུབ་ཏུ་མངོན་པར་འཚང་རྒྱ་ཞིང ། སེམས་ཅན་ཐམས་ཅད་འཁོར་བའི་སྡུག་བསྔལ་ལས་བསྒྲལ་ནས་མྱ་ངན་ལས་འདས་པའི་བདེ་བ་ལ་འགོད་པར་ཤོག་ཅིག་ཅེས་སྨོན་ལམ་བཏབ་བོ། །དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་ཏེ། ལྷའི་ཕོ་བྲང་ཀུན་ལྡེ་གཅིང་གཡོས་ནས་ལྷ་རྣམས་སྡངས་ཏེ་བལྟས་ན། བྱང་ཆུབ་སེམས་དཔས་ལུས་ཀྱི་པགས་པ་སྦྱིན་པར་བྱས་པ་མཐོང་ནས་ནམ་མཁའ་ལས་བབས་ཏེ་ཀུན་ཏ་གང་ན་བར་ལྷག་ནས་ལྷ་རྫས་ཀྱི་མེ་ཏོག་གིས་གཏོར་ཏེ་མཆོད་པར་བྱས་ནས་མཆི་མ་ཆར་བཞིན་དུ་ཕབ་བོ། །པགས་པ་བཤུས་ནས་སོང་བའི་འོག་ཏུ་ཤ་རློན་པ་དེ་ལ་ཁྲག་ཀུན་ནས་གཟག་ཅིང་སྦྲང་མ་དང ། གྲོག་མ་ལ་སོགས་པ་སྟོང་ཕྲག་བརྒྱད་ཅུ་སྙེད་དེའི་ལུས་ལ་འདུས་ན་ཐམས་དད་དེའི་ལུས་ལ་ཟ་ཞིང་དེ་དག་བྲོས་སུ་དོགས་པས་ལུས་ཀྱང་མི་འགུལ་ཏེ་ལུས་ཀྱི་སྦྱིན་པ་བྱས་ནས་དེ་ཉིད་དུ་ཚེའི་དུས་བྱས་སོ། །སྦྲང་མ་དེང་སྲིན་བུ་བྱང་ཆུབ་སེམས་དཔའི་ཤ་ལ་ཟོས་པ་རྣམས་ཀྱང་ཚེ་འཕོས་ནས་ཐམས་
280b
> ཅད་མཐོ་རིས་ཀྱི་ལྷར་སྐྱེས་སོ། །དེའི་ཚེ་ན་རྔོན་པ་དེས་པགས་པ་དེ་ཁྱེར་ཏེ་རྒྱལ་པོ་ལ་ཕུལ་ནས་རྒྱལ་པོ་རབ་ཏུ་དགའ་སྟེ། འདི་ལྟ་བུ་ཤིན་ཏུ་འཇམ་པ་ནི། ཟླ་མེད་དོ། །ཞེས་རྟག་ཏུ་ཉལ་བའི་སྟན་དུ་བཏིང་ནས་དེ་ལ་ཉལ་ལོ། །ཀུན་དགའ་བོ། དེ་ལྟར་རིག་པར་གྱིས་ཤིག་།དེའི་ཚེ་དེའི་དུས་ན་གཅན་གཟན་ཀུན་ཏ་དེ་ནི། ད་ལ་རང་ཡིན་ནོ། །རྒྱལ་པོ་ཚངས་སྦྱིན་དེ་ནི། ལྷས་སྦྱིན་ཡིན་ནོ། །སྲིན་བུ་སྟོང་ཕྲག་བརྒྱད་ཅུ་ནི། ང་ཐོག་མར་མངོན་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བ་ན་འབྲས་བུ་ཐོབ་པའི་ལྷའི་སྲས་པོ་བརྒྱད་ཁྲི་པོ་ཡིན་ནོ། །ལྷ་སྦྱིན་གྱིས་དེའི་ཚེ་ན་ཡང་ང་བསད་དེ། ད་ལྟར་གྱི་བར་དུ་ཡང་ང་ལ་སྡིག་པའི་སེམས་ཀྱིས་གསོང་པར་སེམས་སོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་ཚེ་དང་ལྡན་པ་ཀུན་དགའ་བོ་དང ། འཁོར་མང་པོ་རྣམས་དགེ་བའི་ཆོས་ལ་འདུན་ཏེ། ལ་ལ་ནི། རྒྱུན་དུ་ཞུགས་པའི་འབྲས་བུ་དང ། ལ་ལ་ནི། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པའི་འབྲས་བུ་ཐོབ་བོ། །ལ་ལ་ནི། རང་སངས་རྒྱས་ཀྱི་དགེ་བའི་རྩ་བ་བསྐྱེད། ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །གཅན་གཟན་ཀུན་ཏས་ལུས་ཀྱི་སྦྱིན་པ་བྱས་པའི་ལེའུ་
281a
> ༄#། །སྟེ་བཅུ་བཞི་པའོ།། །།རབ་ཏུ་བྱུང་བའི་ཡོན་ཏན་བསྔགས་པའི་ལེའུ། གང་ཞིག་རབ་ཏུ་བྱུང་ན། དེའི་བསོད་ནམས་ནི། རབ་ཏུ་མང་སྟེ།་བདག་གི་བུའམ། བུ་མོའམ། བྲན་ཁོ་ལ་ལས་གང་ཡང་རུང་བ་རབ་ཏུ་འབྱུང་བར་གནང་ངམ། བདག་ཉིད་རབ་ཏུ་བྱུང་ན། ངེའི་བསོད་ནམས་ནི། དཔག་ཏུ་མེད་དོ། །གང་ཞིག་སྦྱིན་པ་བྱས་པའི་བསོད་ནམས་དེ་ནི། སྐྱེ་བ་བཅུའི་བར་དུ་ལོངས་སྤྱོད་མྱོང་བར་འགྱུར་ཏེ། གནམ་རིམ་པ་དྲུག་གི་ལྷར་ཡང་དང་ཡང་དུ་ལ་ན་སྟོང་སྐྱེས་བ་བས། མི་གཅིག་རབ་ཏུ་བྱུང་ངམ། བདག་ཉིད་རབ་ཏུ་བྱུང་ན། བསོད་ནམས་འདི་ནི། སྔ་མ་བས་མཆོག་ཏུ་ཆེའོ། །དེ་ཅིའི་ཕྱིར་ཞེ་ན། སྦྱིན་པ་བྱས་པའི་བསོད་ནམས་ནི། ཟད་པའི་མཐའ་ཡོད་ཀྱི། རབ་ཏུ་བྱུང་བའི་བསོད་ནམས་ནི། དཔག་ཏུ་མེད། མཐའ་མེད་དོ། །གཞན་ཡང་ཚུལ་ཁྲིམས་བསྲུངས་པའི་བསོད་ནམས་ཀྱིས་མངོན་པར་ཤེས་པ་ལྔ་དང་ལྡན་པའི་དྲང་སྲོང་དང ། མཐོ་རིས་ཀྱི་ལོངས་སྤྱོད་ཚངས་པའི་འཇིག་རྟེན་གྱི་བར་དུ་མྱོང་བར་འགྱུར་གྱི། སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་བསོད་ནམས་ནི།་བསམ་གྱིས་མི་ཁྱབ་སྟེ། མྱ་ངན་ལས་འདས་པའི་བར་དུ་བསོད་ནམས་ཟད་མི་ཤེས་སོ། །གལ་ཏེ་ཁ་ཅིག་གིས་རིན་པོ་ཆེ་སྣ་བདུན་ལས་བྱས་པའི་མཆོད་རྟེན་
281b
> མཐོ་ཁྱད་སུམ་ཅུ་རྩ་གསུམ་ལ་ཐུག་པར་བྱས་པའི་བསོད་ནམས་ཀྱིས་ཀྱང་རབ་ཏུ་བྱུང་བའི་བསོད་ནམས་ཙམ་ལ་མི་ཕོད་དོ། །དེ་ཅིའི་ཕྱིར་ཞེ་ན། རིན་པོ་ཆེ་སྣ་བདུན་གྱི་མཆོད་རྟེན་ནི།་གླེན་པ་མ་རུངས་པ་དག་གིས་བཤིག་པར་འགྱུར་གྱི། རབ་ཏུ་བྱུང་བའི་བསོད་ནམས་ནི། གཞིག་ནུས་པ་མེད་དོ། །དགེ་བའི་ཆོས་འདོད་ན། སངས་རྒྱས་ཀྱི་ཆོས་མ་གཏོགས་པ་འདི་ལྷག་པའི་ཆོས་གཞན་མེད་དོ། །དཔེར་ན། ལོངས་བ་བརྒྱའི་མིག་སྨན་པ་མཁས་པ་ཞིག་གིས་ཕྱེ་སྟེ། གཅིག་ཅར་མཐོང་བར་བྱས་པ་དང ། གཞན་ཡང་མི་བརྒྱ་ཞིག་མིག་འབྱུང་བ་ལ་ཐུག་པ་ལས། མཐུ་དང་ལྡན་པ་ཞིག་གིས་མིག་དབྱུང་བ་དེ་དག་གི་ལས་ཐར་པར་བྱས་པ་དང ། མི་འདི་གཉིས་ཀྱི་བསོད་ནམས་ནི། དེ་པག་ཏུ་མེད་མོད་ཀྱི། འོན་ཏེ་གཞན་རབ་ཏུ་ཕྱུང་ངམ། བདག་རབ་ཏུ་བྱུང་བའི་བསོད་ནམས་ཙམ་མི་ཕོད་དོ། །དེ་ཅིའི་ཕྱིར་ཞེ་ན། འདི་གཉིས་ཀྱིས་དེ་དག་གི་མིག་ཕྱིན་པ་ནི།་འཇིག་རྟེན་གྱི་ཕན་པ་དང་བདེ་བ་ཙམ་ཐོབ་པར་ཟད་ལ། ཤའི་མིག་གི་རང་བཞིན་ནི། འཇིག་པའི་རང་བཞིན་ནོ། །གཞན་རབ་ཏུ་ཕྱུང་ངམ། བདག་རབ་ཏུ་བྱུང་ན་གཅིག་གིས་གཅིག་བསྟན་ཅིང་དྲངས་པས། སེམས་ཅན་གྱི་ཁམས་བསྐལ་པའི་མཐར་བླ་ན་མེད་པའི་ཤེས་རབ་ཀྱི་མིག་ཏུ་འགྱུར་ཏེ། ཤེས་རབ་ཀྱི་མིག་གི་
282a
> ༄#། །རང་བཞིན་ནི། བསྐལ་པའི་བར་དུ་འཇིག་པར་མི་འགྱུར་རོ། །དེའི་བསོད་ནམས་ཀྱིས་ལྷ་དང་མིའི་ནང་ན་བདེ་བའི་ལོངས་སྤྱོད་ཟད་མི་ཤེས་པ་མཐར་ཐུག་པ་མེད་པ་ཡིད་བཞིན་དུ་མྱོང་ཞིང་མཐར་ཡང་མངོན་པར་འཚང་རྒྱའོ། །དེ་ཅིའི་ཕྱིར་ཞེ་ན། རབ་ཏུ་བྱུང་བའི་ཆོས་ནི། བདུད་ཀྱི་འཁོར་མེད་པར་བྱེད་ཅིང་སངས་རྒྱས་ཀྱི་གདུང་འཚོང་པར་བྱེད་དོ། །སྡིག་པ་མི་དགེ་བའི་ཆོས་མེད་པར་བྱེད་ཅིང་དགེ་བའི་ཆོས་སྐྱེས་པར་བྱེད་དོ། །ཁ་ན་མ་ཐོབ་པའི་དྲི་མ་མེད་པར་བྱེད་ཅིང་བླ་ན་མེད་པའི་བསོད་ནམས་ཀྱི་ལས་སྐྱེད་པར་བྱེད་དོ། །དེ་བས་ན་བཅོམ་ལྡན་འདས་ཀྱིས་རབ་ཏུ་བྱུང་བའི་བསོད་ནམས་ནི། རི་རབ་ལྷུན་པོ་བས་འཕང་མཐོའོ། །རྒྱ་མཚོ་བས་གཏིང་ཟབ་བོ། ། ནམ་མཁའ་བས་རྒྱ་ཆེའོ། །ཞེས་གསུངས་སོ། །གལ་ཏེ་སུ་ཞིག་རབ་ཏུ་བྱུང་བའི་བགེགས་དང་བར་ཆད་བྱས་ཏེ་བསམ་པ་ལྟར་མ་གྲུབ་ན། དེའི་ཁ་ན་མ་ཐོ་བའི་ལས་ཤིན་ཏུ་ལྕི་བ་ནི། དཔེར་ན། མི་ཞིག་མུན་ཁྲོད་དུ་སོང་ན་ཅི་ཡང་མི་མཐོང་བ་དང་འདྲ་བར་དེའི་སྡིག་པའི་རྣམས་པར་སྨིན་པ་ཡང་དེ་དང་འདྲ་སྟེ། ཤིན་ཏུ་མི་སྣང་བའི་མུན་པ་ནག་པོའི་སེམས་ཅན་དམྱལ་བར་ལྟུང་ངོ ། །དཔེར་ན། རྒྱ་མཚོའི་ནང་དུ་ཆུ་བོ་དང ། ཆུ་བྲན་ཐམས་ཅད་འབབ་པ་ལྟར། མི་དེའི་སྡིག་པའི་རྣམ་པར་སྨིན་པ་ཡང་དེ་དང་འདྲ་སྟེ། ཉེས་པ་ཐམས་ཅད་དེའི་ལུས་ལ་པ་ཡང་དེ་དང་འདྲ་སྟེ། ཉེས་པ་ཐམས་ཅད་དེའི་ལུས་ལ་
282b
> འདུའོ། །དཔེར་ན། རི་རབ་ལྷུན་པོ་ནི། བསྐལ་པའི་མེ་བྱུང་ན། ལྷག་མ་མ་ལུས་པར་ཚིག་པ་དང་འདྲ་བར་དེ་ཡང་སེམས་ཅན་དམྱལ་བའི་སེམས་ཚིགས་ནས་ལྷག་མ་མི་ལུས་ལ་ཡང་དེ་དང་འདྲའོ། །གཞན་རབ་ཏུ་བྱུང་བར་གནང་ངམ། གལ་ཏེ་བདག་རབ་ཏུ་བྱུང་ན། དེའི་བསོད་ནམས་ནི། རབ་ཏུ་བྱུང་བ་ནི། མདོ་སྡེའི་ཆུ་ཡོངས་སུ་དག་པས་ཀུན་ནས་ཉོན་མོངས་པའི་དྲི་མ་ཐམས་ཅད་བཀྲུས་ཏེ་འཁོར་བའི་སྡུག་བསྔལ་ཡོངས་སུ་བསལ་ནས་མྱ་ངན་ལས་འདས་པའི་རྒྱུར་འགྱུར་རོ། །འདུལ་བའི་རྐང་པས་ཚུལ་ཁྲིམས་ཡོངས་སུ་དག་པའི་ས་ལ་འཆག་ཅིང་ཆོས་མངོན་པའི་མིག་གིས་འཇིག་རྟེན་གྱི་དགེ་བ་དང ། སྡིག་པ་ལ་ལྟ་ཞིང་ཡིད་བཞིན་དུ་འཕགས་པའི་ལམ་ཡན་ལག་བརྒྱད་ལ་འགྲོ་སྟེ་།མྱ་ངན་ལས་འདས་པའི་གྲོང་ཁྱེར་དུ་ཕྱིན་པ་བྱེད་དོ། །དེ་བས་ན་རྒན་པོའམ། གཞོན་ནུ་རབ་ཏུ་བྱུང་ངམ། རབ་ཏུ་བྱུང་བར་གནང་ངམ། བདག་རབ་ཏུ་བྱུང་ན། དེའི་བསོད་ནམས་མཆོག་ཏུ་ཆེའོ། །དེའི་ཚེ་བཅོམ་ལྡན་འདས་རྒྱལ་པོའི་ཁབ་བྱ་ཀ་ལནྟ་ཀ་གནས་པ་འོད་མའི་ཚལ་ན་བཞུགས་སོ། །དེའི་ཚེ་རྒྱལ་པོའི་ཁབ་ན་ཁྱིམ་བདག་དཔལ་སྐྱེས་ཞེས་བྱ་བ་ལ་བརྒྱ་ལོན་པ་ཞིག་གིས་རབ་ཏུ་འབྱུང་བའི་ཡོན་ཏན་འདི་ལྟར་ཚད་མེད་དོ། །ཞེས་ཐོས་ནས་འདི་སྙམ་དུ་བདག་ཅིའི་ཕྱིར་སངས་རྒྱས་ཀྱི་བསྟན་པ་ལ་རབ་ཏུ་མ་བྱུང་སྙམ་བསམ་ནས་ཆུང་མ་དང ། བུ་དང ། བྲན་ཁོལ་ལ་ང་ནི། རབ་
283a
> ༄#། །ཏུ་འབྱུང་ངོ ། །ཞེས་བྱས་སོ། །མི་དེ་རྒས་འཁོགས་པས་ཁྱིམ་གང་གིས་མི་ཐམས་ཅད་སྐྱོ་སྟེ་དགོས་པ་མེད་དོ་སྙམ་ནས་རབ་ཏུ་འབྱུང་ངོ ། །ཞེས་ཐོས་པ་དང ། དེ་དག་དགའ་སྟེ་མྱུར་དུ་འགྲོ་བའི་རིགས་ཀྱི། དུས་ལ་བབ་བོ། །ཞེས་སྨྲས་སོ། །དེ་ནས་ཁྱིམ་བདག་དེ་ཁྱིམ་ནས་བྱུང་སྟེ་འོད་མའི་ཚལ་དུ་བཅོམ་ལྡན་འདས་ལ་རབ་ཏུ་འབྱུང་བར་གསོལ་དུ་སོང་ནས་འོད་མའི་ཚལ་དུ་ཕྱིན་པ་དང ། དགེ་སློང་རྣམས་ལ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ལྷ་དང་མི་ལ་ཕན་པའི་དོན་རྒྱས་པར་མཛད་པ་ག་ལ་བཞུགས་ཞེས་དྲིས་སོ། །དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་རྣམས་ནི། འགྲོ་བ་མང་པོ་ལ་ཕན་པའི་དོན་དུ་རྒྱུ་ཞིང་གཞན་དུ་གཤེགས་སོ། །ཞེས་སྨྲས་སོ། །ཁྱིམ་བདག་དེས་ཡང་དགེ་སློང་རྣམས་ལ་སངས་རྒྱས་སྟོན་པ་ཆེན་པོའི་མཁས་པ་དང ། ཤེས་རབ་ཏུ་ལྡན་པའི་མཆོག་སུ་ཡིན་ཞེས་དྲིས་པ་དང ། དགེ་སློང་རྣམས་ཀྱིས་བཙུན་པ་ཤཱ་རིའི་བུ་ཡིན་ནོ། །ཞེས་བསྟན་ཏོ། །རྒན་པོ་དེ་འཁར་པ་ལ་བརྟེན་ཏེ་ཤཱ་རིའི་བུ་གང་ན་བ་དེར་སོང་སྟེ་ཕྱིན་པ་དང ། འཁར་བ་བོར་ནས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཙུན་པ་བདག་རབ་ཏུ་བྱུང་བར་གནོད་ཞིག་།བཙུན་པ་ཤཱ་རིའི་བུས་བརྟགས་ན། ཁྱིམ་བདག་འདི་རྒས་པས། སློབ་པ་དང ། བསམ་
283b
> གཏན་དང ། དགེ་འདུན་གྱི་ལས་བྱ་བ་རྣམ་པ་གསུམ་ལས་ཉམས་ཏེ་མི་ནུས་སོ་སྙམ་བསམ་ནས་འདི་སྐད་ཅེས་སྨྲས་སོ། །ཁྱོད་ཕྱིར་སོང་ཞིག་།ཁྱོད་ནི། རྒས་འཁོགས་ཏེ་དུས་ལས་ཡོལ་གྱི། རབ་ཏུ་འབྱུང་བར་མི་རུང་ངོ ། །ཞེས་བསྒོའོ། །དེ་ནས་མཐར་གྱིས་འོད་སྲུང་ཆེན་པོ་དང ། ུ་པ་ལི་དང ། མ་འགགས་པ་ལ་སོགས་ཏེ། དགྲ་བཅོམ་པ་ཆེན་པོ་དེ་དག་ཀུན་གྱི་དྲུང་དུ་སོང་ནས་གསོལ་བ་བཏབ་པ་ལས། དེ་དག་ཀུན་གྱིས་ཁྱོད་སྔར་སུ་ལ་ཡང་གསོལ་བ་མ་བཏབ་པ་མ་ཞེས་དྲིས་ན། བདག་གིས་སྔར་བཙུན་པ་ཤཱ་རིའི་བུ་ལ་གསོལ་བ་བཏབ་བོ། །འོ་ན་ཇི་སྐད་ཟེར། དེ་ན་རེ། ཁྱོད་རྒས་འཁོགས་ཏེ་དུས་ལས་ཡོལ་བས་འབྱུང་དུ་མི་རུང་ངོ ། །ཞེས་མཆིའོ། །དགེ་སློང་དེ་དག་གིས་སྨྲས་པ། ཤཱ་རིའི་བུ་ལྟ་བུ་མཁས་པ་དང ། ཤེས་རབ་ཀྱི་མཆོག་དེས་ཀྱང་མ་གནང་ན། བདག་ཅག་ཀྱང་དེ་དང་འདྲ་སྟེ་གནང་བ་མེད་དོ། །དཔེར་ན། སྨན་པ་མཁས་པ་སྨན་དཔྱད་ལ་མཁས་པས་ནད་པ་བརྟགས་ཏེ་སྨན་དཔྱད་མི་བྱེད་པར་སྤོང་ན། སྨན་པ་ཆུང་དུ་གཞན་དག་ཀྱང་གསོ་བར་མི་བྱེད་དེ། དེ་ལ་ངེས་པར་འཆི་བའི་མཚན་མ་ཡོད་པར་རྟོགས་པའི་ཕྱིར་རོ། །ཤཱ་རིའི་བུ་བློ་དང་ལྡན་པས་ཀྱང་མ་གནང་ན། དགེ་སློང་གཞན་ཡང་དེ་དང་འདྲ་སྟེ། གནང་བ་མེད་དོ། །ཞེས་བསྒོའོ། །ཁྱིམ་བདག་དེ་དགེ་སློང་རྣམས་ཀྱིས་རབ་ཏུ་འབྱུང་བར་
284a
> ༄#། །མ་གནང་བས། འོད་མའི་ཚལ་ནས་ཕྱིར་བྱུང་སྟེ་སྒོའི་ཐེམ་པ་ལ་འདུག་ནས་སྐད་ཆེན་པོ་ཕྱུང་སྟེ་སྨྲེ་སྔགས་འདོན་ཅིང་དུས་སོ། །བདག་ཐོག་མ་སྐྱེས་ནས་ཉེས་པ་ཆེན་པོ་ནི་མ་བྱས་ན། ཅིའི་ཕྱིར་བདག་རབ་ཏུ་འབྱུང་བར་མི་གནང ། ུ་པ་ལི་ལྟ་བུ་འབྲེག་མཁན་ལས་བྱུང་བ་དང ། མི་དེ་ལྟ་བུ་ཕྱག་དར་བ་ངན་སྐྱུག་འདོར་བ་དང ། སོར་ཕྲེང་ཅན་ལྟ་བུ་མི་གྲངས་མེད་པ་བསད་པ་དང ། ་སི་ཀ་ལྟ་བུ་མི་རྒོད་མ་རུངས་པ་དེ་དག་ལ་སོགས་པ་ཡང་རབ་ཏུ་བྱུང་ན། བདག་ལ་ཉེས་པ་ཅི་ཞིག་ཡོད་དེ་རབ་ཏུ་འབྱུང་དུ་མ་གནང་ཞེས་སྨྲས་པ་དང ། བཅོམ་ལྡན་འདས་དེའི་དྲུང་དུ་གཤེགས་ཏེ་སྐུ་མངོན་པར་བསྟན་ནས་འོད་ཟེར་གྱིས་ལྷང་ངེ་ལྷམ་མེར་གསལ་ཏེ་མཚན་དང་དཔེ་བྱད་ཀྱིས་བརྒྱན་ནས་བརྒྱ་བྱིན་ལྷའི་དབང་པོ་རིན་པོ་ཆེ་སྣ་བདུན་གྱི་རྒྱལ་མཚན་ལྟར་མངོན་དུ་གཤེགས་ཏེ། ཁྱིམ་བདག་དཔལ་སྐྱེས་ལ་ཁྱོད་ཅིའི་ཕྱིར་དུ་ཞེས་བཀའ་སྩལ་ཏོ། །དེའི་ཚེ་ཁྱིམ་བདག་དེས་སངས་རྒྱས་ཀྱི་གསུང་ཚངས་པའི་དབྱངས་ལྟ་བུར་ཐོས་ནས་རབ་ཏུ་དགའ་མགུ་རངས་པ་ནི། བྱིས་པ་ཕ་མ་མཐོང་བ་ཙམ་དུ་དགའ་སྟེ་ལུས་སྨད་ལྔས་ལ་གཏུགས་ནས་སངས་རྒྱས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །སེམས་ཅན་གྱི་ནང་ན་མི་འགུམ་པ་དང ། མི་རྒོད་བགྱིད་པ་
284b
> དང ། བརྫུན་དུ་སྨྲ་བ་དང ། སྐུར་གླང་འདེབས་པའི་མ་རབས་དག་ཀྱང་རབ་ཏུ་བྱུང་ན། བདག་འབའ་ཞིག་དངོས་སྡིག་ཅི་མཆིས་ན། སངས་རྒྱས་ཀྱི་བསྟན་པ་ལ་རབ་ཏུ་འབྱུང་བར་མ་གནང ། བདག་གི་ཁྱིམ་གང་གི་མི་ཡང་བདག་རྒས་འཁོགས་པས་སྐྱོ་བར་གྱུར་ཏེ་དགོས་པ་མེད་དེ། །ཞེས་མཆི་བས། གལ་ཏེ་སངས་རྒྱས་ཀྱི་བསྟན་པ་ལ་རབ་ཏུ་འབྱུང་བར་མ་གནང་ན། སླར་ཁྱིམ་དུ་མཆིས་ཀྱང་གདོན་མི་འཚལ་བར་བདག་ཁྱིམ་དུ་འཇུག་ཏུ་མི་སྟེར་བས་གང་དུ་ཡང་མཆི་བའི་གནས་མ་མཆིས་ཏེ། འདི་ཉིད་དུ་ངེས་པར་སྲོག་དང་འབྲལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དཔལ་སྐྱེས་ལ་བཀའ་སྩལ་པ། ནམ་མཁའ་ལ་ལག་པ་བཏེག་པ་ལ་འདི་ནི། རབ་ཏུ་འབྱུང་ངོ ། །འདི་ནི། རབ་ཏུ་མི་འབྱུང་ངོ ། །ཞེས་ངེས་བར་སུ་ཞིག་སྨྲ། ཁྱིམ་བདག་གིས་གསོལ་པ། བཅོམ་ལྡན་འདས་ཀྱི་འཁོར་ལོས་བསྒྱུར་བའི་རྒྱལ་པོའི་འཁོར་མཁས་པའི་མཆོག་།སངས་རྒྱས་ཀྱི་འོག་ཏུ་ཆེ་བ། འཇིག་རྟེན་གྱི་དེད་དཔོན་ཤཱ་རིའི་བུས་བདག་བསྟན་པ་ལ་རབ་ཏུ་འབྱུང་བར་མ་གནང་ངོ ། །དེ་ནས་བཅོམ་ལྡན་འདས་ཀྱི་ཐུགས་ཆེན་པོས་ཇི་ལྟར་བུ་སྲི་ཞུ་ཆེ་བ་ལ་ཕ་མས་ཚིག་སྙན་པར་སྨྲ་བ་བཞིན་དུ་ཁྱིམ་བདག་དཔལ་སྐྱེས་དེ་ལ་སྤྲོ་བ་བསྐྱེད་ནས་འདི་སྐད་ཅེས་བཀའ་སྩལ་ཏོ། །ཁྱོད་མྱ་ངན་
285a
> ༄#། །མ་བྱེད་ཅིག་།ངས་ཁྱོད་རབ་ཏུ་དབྱུང་ངོ ། །ཤཱ་རིའི་བུས་ནི། བསྐལ་པ་གྲངས་མེད་པ་གསུམ་གྱི་བར་དུ་བརྩོན་འགྲུས་དཀའ་བ་སྤྱོད་ཅིང་བསྐལ་པ་བརྒྱར་བསོད་ནམས་བྱས་པ་མ་ཡིན། ཤཱ་རིའི་བུས་སྐྱེ་བ་ཐམས་ཅད་དུ་ཤིན་ཏུ་སྤྱོད་དཀའ་བ་མགོ་བཅད་པ་དང ། མིག་ཕྱུང་བ་དང ། རུས་པ་དང ། རྐང་དང་ཤ་དང ། ཁྲག་དང ། པགས་པ་དང ། རྐང་པ་དང ། ལག་པ་དང ། རྣ་བ་དང ། སྣ་བཅད་དེ་སྦྱིན་པ་བྱིན་པ་མ་ཡིན། ཤཱ་རིའི་བུས་ནི། སྟག་མོ་ལ་ལུས་སྦྱིན་པ་དང ། མེ་དོང་དུ་མཆོང་པ་དང ། ལྕགས་གཟེར་སྟོང་ལུས་ལ་བཏབ་པ་དང ། ལུས་ལ་མར་མེ་སྟོང་བཙུགས་པ་མ་ཡིན། ཤཱ་རིའི་བུས་ནི། ཡུལ་དང ། གྲོང་ཁྱེར་དང ། ཆུང་མ་དང ། བུ་དང ། བྲན་ཕོ་དང ། བྲན་མོ་དང ། གླང་པོ་ཆེ་དང ། རྟ་དང ། རིན་པོ་ཆེ་སྣ་བདུན་གྱི་སྦྱིན་པ་བྱིན་པ་མ་ཡིན། ཤཱ་རིའི་བུས་ནི། བསྐལ་པ་གྲངས་མེད་པ་ཐོག་མ་ལ་སངས་རྒྱས་བརྒྱད་ཁྲི་བརྒྱད་སྟོང་ལ་བསྙེན་བཀུར་བྱས་པ་དང ། བསྐལ་པ་བར་མ་གྲངས་མེད་པ་ལ་སངས་རྒྱས་དགུ་ཁྲི་དགུ་སྟོང་ལ་བསྙེན་བཀུར་བྱས་པ་དང ། བསྐལ་པ་ཐ་མ་གྲངས་མེད་པ་ལ་སངས་རྒྱས་ཁྲི་ཕྲག་བཅུ་ལ་བསྙེན་བཀུར་བྱས་ཤིང་རབ་ཏུ་བྱུང་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་
285b
> ཡོངས་སུ་རྫོགས་པར་བྱས་པ་མ་ཡིན། ཤཱ་རིའི་བུ་ནི། ཆོས་ལ་དབང་དུ་གྱུར་པ་མ་ཡིན་ན། ཅིའི་ཕྱིར་འདི་ནི། རབ་ཏུ་དབྱུང་གི་།འདི་ནི། རབ་ཏུ་དབྱུང་བའི་མི་རིགས་སོ། །ཞེས་སྨྲ། ང་འབའ་ཞིག་ནི། ཆོས་ལ་དབང་མཛད་དེ། ཕ་རོལ་ཏུ་ཕྱིན་པ་དྲུག་གིས་བཏེག་ཅིང་བཟོད་པའི་གོ་ཆ་བགོས་ཏེ་བྱང་ཆུབ་ཀྱི་ཤིང་དྲུང་དུ་རྡོ་རྗེའི་གདན་ལ་བཞུགས་ནས་བདུད་ཀྱི་སྡེ་རྣམས་བཏུལ་ཏེ་མངོན་པར་སངས་རྒྱས་པས་ང་དང་མཉམ་པ་མེད་དོ། །དེ་བས་ན་ཁྱོད་ངའི་ཕྱི་བཞིན་དུ་ཤོག་ཅིག་།རབ་ཏུ་དབྱུང་ངོ ། །ཞེས་དེ་ལྟར་བཅོམ་ལྡན་འདས་ཀྱིས་ཐབས་རྣམ་པ་སྣ་ཚོགས་ཀྱིས་སྤྲོ་བ་བསྐྱེད་པས་མྱ་ངན་ཀུན་ཞི་ནས་རབ་ཏུ་དགའ་བའི་སེམས་བསྐྱེད་དེ་སངས་རྒྱས་ཀྱི་ཕྱི་བཞིན་དུ་གཙུག་ལག་ཁང་གི་ནང་དུ་སོང་ངོ ། །དེ་ནས་བཅོམ་ལྡན་འདས་ཀྱིས་མཽ་གལ་ཡ་ན་ཆེན་པོ་ལ་ཁྱིམ་བདག་འདི་རབ་ཏུ་ཕྱུང་ཞིག་ཅེས་བཀའ་སྩལ་ཏོ། །དེ་ཅིའི་ཕྱིར་ཞེ་ན། སེམས་ཅན་ནི། ལས་གང་དང་མཐུན་པ་དེས་འདུལ་བར་འགྱུར་ཏེ། གང་སངས་རྒྱས་དང་ལས་མཐུན་པ་ལ་ནི། གཞན་གྱིས་འདུལ་བར་མི་འགྱུར་རོ། །གང་གཞན་དང་ལས་མཐུན་པ་དེ་ལ་ཡང་སངས་རྒྱས་ཀྱིས་འདུལ་བར་མི་འགྱུར་ཏེ། གང་ཞིག་ཤཱ་རིའི་བུ་དང་ལས་མཐུན་པ་ནི། མཽ་གལ་དང ། འོད་སྲུང་དང ། མ་འགགས་པ་དང ། ན་བུན་ལ་སོགས་པ་ཉེ་
286a
> ༄#། །གནས་གཞན་ཐམས་ཅད་ཀྱིས་འདུལ་བར་མི་འགྱུར་རོ། །དེ་བཞིན་དུ་གང་དང་གང་ལས་མཐུན་པ་དེ་ལ་གཞན་གྱིས་འདུལ་བར་མི་འགྱུར་རོ། །དེའི་ཚེ་མཽ་ག་ལ་ཡ་ནས་ཀྱང་ཁྱིམ་བདག་འདི་རྒས་འཁོགས་ཏེ་ཁ་ཏོན་སློབ་པ་དང ། བསམ་གཏན་དང ། དགེ་འདུན་གྱི་ལས་བྱེད་མི་ནུས་ཏེ་ལས་བྱ་བ་གསུམ་ལས་ཉམས་སོ་སྙམ་བསམས་ཀྱང་ཆོས་ཀྱི་རྒྱལ་པོ་བཅོམ་ལྡན་འདས་ཀྱིས་རབ་ཏུ་ཕྱུང་ཞིག་ཅེས་བཀའ་སྩལ་པས། ཚུལ་གྱིས་བཟློག་ཏུ་མི་རུང་ངོ་སྙམ་བསམས་ནས་རབ་ཏུ་ཕྱུང་སྟེ་བསྙེན་པར་རྫོགས་སོ། །མི་འདིས་ཚེ་རབས་སྔ་མ་ལ་ཐར་པར་འགྱུར་བའི་རྒྱུ་ཡང་བསྐྱེད། ཆོས་ཀྱི་ལྕགས་ཀྱུས་ཟིན་པ་ནི། ཇི་ལྟར་ཉ་མཆིལ་པ་ལ་ཐོགས་ན་གདོན་མི་ཟ་བར་ཕྱིར་འབྱུང་བ་ལྟར་ཐར་པའི་རྒྱུ་ཡང་བསྐྱེད། དགེ་བའི་ཚོགས་ཀྱང་བསགས་པས་ཉིན་མཚན་དུ་བརྩོན་འགྲུས་བསྐྱེད་དེ་ཀློག་པ་དང་འདོན་པ་ལ་གོམས་ཤིང ། མདོ་སྡེ་དང ། འདུལ་བ་དང ། ཆོས་མངོན་པ་རྒྱས་པར་ཁོང་དུ་ཆུད་ཅིང་རྟོགས་པར་གྱུར་ན། རྒས་འཁོགས་པས་ཚུལ་བཞིན་དུ་རིམ་གྲོ་དང ། བསྟི་སྟང་དང ། བསུ་སྐྱེལ་དང ། བླ་མ་ལ་གསོང་བོར་སྨྲ་བ་དང ། ཕྱག་འཚལ་བ་ནི། མི་ནུས་སོ། །དེ་ལ་དགེ་སློང་གཞོན་ནུ་སྔར་རབ་ཏུ་བྱུང་བ་གྲལ་
286b
> མཐོ་བ་དག་འདི་སྐད་དུ། དགེ་སློང་རྒན་པོ་འདི་འདོན་པ་དང ། ཀློག་པ་དང ། སློབ་པ་ལ་སྙེམས་ཏེ་བདག་ཅག་ལ་བཀུར་སྟི་ཡང་མི་བྱེད་དོ་སྙམ་ནས་རྟག་ཏུ་འཚོ་བར་གྱུར་ཏོ། ། དེ་ནས་དགེ་སློང་རྒན་པོ་དེས་འདི་སྙམ་དུ་བསམས་སོ། །བདག་ཁྱིམ་ན་འདུག་པའི་ཚེ་ན་ཆུང་མ་དང་བུས་གཙེས། ད་རབ་ཏུ་བྱུང་ནས་འདི་ལྟ་བུའི་བག་མེད་པར་འགྱུར་སྙམ་ན། ད་ཡང་དགེ་སློང་གཞོན་ནུ་འདི་དག་གིས་གཙེ་ན། སྔོན་ཉེས་པ་ཅི་ཞིག་བྱས་ན་འདི་འདྲ་བའི་སྡུག་བསྔལ་གྱིས་གདུངས་པས་བདག་ད་ཤི་ཡང་རུང་སྙམ་བསམས་ནས་ཚལ་དེའི་འགྲམ་ན་ཆུ་ཆེན་པོ་ཞིག་འབབ་པའི་འགྲམ་དུ་སོང་ནས་ཆོས་གོས་ཕུད་དེ་ཤིང་གི་ཡལ་ག་ལ་བཀལ་ནས་པུས་མོ་ས་ལ་བཙུགས་ཏེ་མཆི་མ་བླགས་ནས་འདི་སྙམ་དུ་ཡི་དམ་བཅས་སོ། །བདག་ནི། སངས་རྒྱས་དང ། ཆོས་དང ། དགེ་འདུན་ཡོངས་སུ་སྤོང་བ་མ་ཡིན་གྱི། ལུས་འདི་འབའ་ཞིག་གཏོང་ངོ ། །བདག་གིས་སྦྱིན་པ་བགྱིས་པ་དང ། ཚུལ་ཁྲིམས་བསྲུངས་པ་དང ། བརྩོན་འགྲུས་བརྩམས་པ་དང ། མདོ་སྡེ་ཁ་ཏོན་བྱས་པའི་བསོད་ནམས་ཀྱིས་བདག་གི་ལུས་འདི་དང་བྲལ་ནས་བཙན་ཞིང་ཕྱུག་ལ་ལོངས་སྤྱོད་དང་ལྡན་པ་འཁོར་འདུམ་པའི་རིགས་སུ་སྐྱེས་ཏེ་བདག་དགེ་བའི་ཆོས་ལ་འཇུག་པའི་བགེགས་མི་བྱེད་པ་དང ། རྟག་ཏུ་དཀོན་མཆོག་གསུམ་དང་ཕྲད་པ་དང ། རབ་
287a
> ༄#། །ཏུ་འབྱུང་ཞིང་ཆོས་ལ་ནན་ཏན་བྱེད་པ་དང ། སློབ་དཔོན་མཁས་པ་དང་ཕྲད་དེ་མྱ་ངན་ལས་འདའ་བ་ཡང་སྟོན་པར་ཤོག་ཅིག་།ཅེས་དམ་བཅས་ནས་གང་ན་ཆུ་དྲག་པོ་འབབ་ཅིང་ཟབ་པ། ཀློང་འཁྱིལ་བ་དང་དཔའ་རྒོད་པར་མཆོད་པར་གཟས་སོ། །དེའི་ཚེ་མཽ་གལ་གྱི་བུས་ལྷའི་མིག་གིས་བདག་གི་ཉེ་གནས་རྒན་པོ་དེ་ད་ལྟར་ཅི་ཞིག་བྱེད་སྙམ་བལྟས་ན། བདག་གི་ཉེ་གནས་དེ་ཆུ་ལ་མཆོང་བར་མཐོང་ནས་ཆུར་མ་ཕྱིན་པར་རྫུ་འཕྲུལ་གྱི་མཐུས་བླངས་ནས་ཆུའི་འགྲམ་དུ་བཞག་སྟེ་ཆོས་ཀྱི་སྲས་ཁྱོད་ཅི་ཞིག་བྱེད་ཅེས་དྲིས་པ་དང ། རྒན་པོ་དེ་ངོ་ཚ་ཞིང་སྐྱེངས་ནས་ཇི་སྐད་དུ་ལན་གདབ་བསམས་ནས་གལ་ཏེ་བདག་གིས་བརྫུན་བྱས་ཏེ་སློབ་དཔོན་བསླུས་ན། སློབ་དཔོན་བསླུས་པས་སྐྱེ་བ་ཐམས་ཅད་དུ་ལྕེའི་དབང་པོ་མེད་པའི་ཁ་ན་མ་ཐོ་བ་དང་བཅས་པར་འགྱུར་རོ། །ཅི་སྟེ་བདག་གིས་བརྫུན་དུ་སྨྲས་ན་ཡང་སློབ་དཔོན་ལ་མངོན་པར་ཤེས་པ་མངའ་བས་རྟོགས་པར་འགྱུར་རོ། །གང་འཇིག་རྟེན་མཁས་པའི་ཤེས་རབ་དང་ལྡན་ལ་རང་བཞིན་གྱི་དྲང་ཞིང་གཡོ་སྒྱུ་མེད་ན། ལྷ་རྣམས་ཀྱིས་བཀུར་བར་འགྱུར་རོ། །མཁས་པའི་ཤེས་རབ་དང་ལྡན་པ་གཡོ་སྒྱུ་ཞིག་ཡོད་ན་ཡང་གཞན་གྱི་སློབ་དཔོན་དུ་མི་རུང་སྟེ། མི་བཀུར་བར་འགྱུར་རོ། །གལ་ཏེ་ཤེས་པ་མེད་ཀྱང་གཡོ་སྒྱུ་ཡང་མེད་དེ་དྲང་
287b
> ན།་གཞན་གྱི་དོན་བྱེད་མི་ནུས་ཀྱང་བདག་གི་དོན་བྱེད་པར་འགྱུར་རོ། །གལ་ཏེ་གླེན་པ་གཏི་མུག་ཅན་ཡང་ཡིན་ལ་གཡོ་སྒྱུ་ཡོད་ན། ཐམས་ཅད་ཀྱི་དགྲ་མ་རུང་བ་ཡིན་ཏེ། ཅི་སྨྲས་ཀྱང་འདི་ནི། བརྫུན་དུ་སྨྲ་བ་སྟེ། སླུ་བ་ཡིན་ནོ། །ཞེས་ཟེར་རོ། །གལ་ཏེ་ཚིག་བདེན་པ་ཞིག་སྨྲས་ན་ཡང་ཀུན་གྱིས་ཡིད་མི་ཆེས་ཏེ། དེ་བས་ན་བདག་གིས་སློབ་དཔོན་ལ་བརྫུན་དུ་སྨྲས་ཏེ་བསླུས་ན། མི་རིགས་མི་བཤའི། གང་བདེན་པ་སྨྲའོ་སྙམ་བསམས་ནས་སློབ་དཔོན་ལ་འདི་སྐད་ཅེས་སྨྲས་སོ། །བདག་ཁྱིམ་གྱིས་སྐྱོ་སྟེ་ཁྱིམ་མ་ཡིན་པར་རབ་ཏུ་བྱུང་ནས་དབེན་པ་ཞི་བར་འཚལ་ན། ད་ཡང་མི་བདེ་བར་གྱུར་ནས་བདག་འགུམ་སྙམ་མོ། །མཽ་གལ་གྱི་བུས་དེ་སྐད་ཅེས་སྨྲས་པ་ཐོས་ནས་འདི་ལ་ནི། སྐྱེ་བ་དང ། འཆི་བའི་འཇིག་པ་ཞིག་གིས་མ་བསྡིགས་ན། རབ་ཏུ་བྱུང་བའི་དོན་མེད་པར་འགྱུར་རོ་སྙམ་བསམས་ནས་དེ་ལ་ངའི་ཆོས་གོས་ཀྱི་མཐའ་མ་འདི་ལ་དམ་དུ་ཟུངས་ལ་མ་བཏང་ཞིག་ཅེས་སྨྲས་ནས་སྟེང་གི་ནམ་མཁའ་ལ་འཕགས་པ་ནི། རླུང་གིས་སྦུར་མ་བུས་པ་ལྟར་རྫུ་འཕྲུལ་གྱིས་ལག་ན་སྤུ་ཉག་མ་གཅིག་ཙམ་ཁྱེར་བ་དང་འདྲ་བར་ཡིད་བཞིན་དུ་ཕྱིན་ཏོ། །གཞན་ཡང་བྱ་ཁྲས་བྱེའུ་ཕྲུག་ཁྱེར་བ་ལྟར་མཽ་གལ་གྱི་བུ་རྫུ་འཕྲུལ་གྱིས་ནམ་མཁའ་ལ་འཕགས་ནས་སྐྱེས་བུས་ལག་ངར་བསྐུམ་པ་ལས་བརྐྱང་བ་ཙམ་གྱི་རྒྱ་མཚོའི་འགྲམ་
288a
> ༄#། །དུ་ཕྱིན་ཏེ། །རྒྱ་མཚོའི་འགྲམ་དེ་ན་བུད་མེད་ཚེ་འཕོས་མ་ཐག་པའི་རོ་ཤིན་ཏུ་མཛེས་པ། བཟང་བ། མངའ་བྱད་ལེགས་པ། མཚན་དང་ལྡན་པ་ལ་སྦྲུལ་ཞིག་ཁའི་ནང་དུ་ཞུགས་ནས་སྣའི་ནང་ནས་བྱུང ། མིག་གི་ནང་ནས་ཞུགས་ནས་རྣ་བའི་ནང་དུ་བྱུར་བ་མཽ་གལ་གྱི་བུས་རབ་ཏུ་བརྟགས་སོ། །དེ་ནས་དགེ་སློང་དཔལ་སྐྱེས་ཀྱིས་བུད་མེད་འདི་ལྟ་བུ་མཚན་དང་ལྡན་པ་སུ་ཡིན་ཞེས་ཞུས་ན། ནམ་དུས་ལ་བབ་ན་བསྟན་ཏོ། །ཞེས་སྨྲས་ཏེ་ཡང་སོང་བ་དང ། བུད་མེད་ཅིག་ཟངས་པོ་ཆེ་ཞིག་བཙུགས་ཏེ་ཟངས་ཀྱི་ནང་དུ་ཆུ་བླུགས་ནས་འོག་ཏུ་མེ་པོ་ཆེ་བུས་ཏེ་ཆུ་ཁོལ་བ་དང་གོས་ཕུད་ནས་ནང་དུ་ཞུགས་ཏེ་དེ་མ་ཐག་ཏུ་སྐྲ་དང་སྤུ་ཀུན་བྱི་ནས་ཤ་ཡང་ཚོས་ཏེ་རུས་པ་ཡང་བྱེ་ནས་ཆུ་ལུས་པས་རུས་པ་རྣམས་ཕྱིར་བྱུང་ངོ ། །རུས་པ་དེ་དག་རླུང་གིས་བུས་པས་དེ་མ་ཐག་ཏུ་མི་ཞིག་ཏུ་གྱུར་ནས་ཟངས་ཀྱི་ནང་ནས་ཤ་ཕྱུང་སྟེ་ཟ་བ་ཞིག་མཐོང་ངོ ། །དགེ་སློང་དཔལ་སྐྱེས་སྐྲག་སྟེ་བ་སྤུ་ཡང་ལངས་ནས་སློབ་དཔོན་ལ་ཤ་ཟ་བ་འདི་སུ་ཡིན་ཞེས་ཞུས་ན། མཽ་གལ་གྱི་བུས་དུས་ལ་བབ་ན་བསྟན་ཏོ། །ཞེས་སྨྲས་པ་དང ། ཡང་སོང་སོང་བ་ལས་ཤིང་ཆེན་པོ་ཞིག་ལོ་མ་དང་ཡལ་གའི་བར་དུ་ཁབ་ཀྱི་རྩེ་མོ་ཙམ་གཟུགས་པའི་ས་སྟོང་ཙམ་ཡང་མེད་པར་སྲིན་བུ་མང་པོས་ཟ་བ་ལ་སྐད་ཆེན་པོར་དུ་ཞིང་འབོད་པའི་སྒྲ་ཀུན་ཏུ་
288b
> གྲགས་པ་སེམས་ཅན་དམྱལ་བའི་སྒྲ་འདྲ་བ་ཞིག་ཐོས་ནས་འདི་ལྟ་བུའི་སྒྲ་མི་སྙན་པ་སུའི་ལགས་ཞེས་ཞུས་ན། མཽ་གལ་གྱི་བུས་དུས་ལ་བབ་ན་བསྟན་ཏོ། །ཞེས་སྨྲས་སོ། །དེ་ནས་ཡང་མིའི་ལུས་ལ་གཅན་གཟན་གྱི་མགོ་ཅན་དུ་འདུག་པའི་ཡི་དྭགས་མང་པོས་མི་ཞིག་ལ་འཁོར་བར་བསྐོར་ཏེ་ལག་ན་མདའ་གཞུ་ཐོགས་ཤིང་མདའ་ལ་མེ་འབར་བཞིན་དུ་ཀུན་གྱིས་མི་དེ་ལ་མདའ་འཕངས་ནས་གཅིག་ཏུ་འབར་བར་མཐོང་སྟེ། འདི་ལྟ་བུའི་སྡུག་བསྔལ་མི་བཟད་པ་མྱོང་བ་ཡང་འབྲོས་པའི་གནས་མེད་པ་འདི་སུ་ལགས་ཞེས་ཞུས་ན།་སློབ་དཔོན་གྱིས་རེ་ཞིག་སྡོད་ཅིག་།དུས་ལ་བབ་ན་བསྟན་ཏོ། །ཞེས་བསྒོའོ། དེ་ནས་ཡང་སོང་སོང་བ་ལས་རིང་ཞིག་ལོན་པ་དང ། རི་ཆེན་པོ་ཞིག་གི་དྲུང་ན་རལ་གྲི་དང་མཚོན་རྣོན་པོ་སོ་གྱེན་དུ་གཏམས་ཏེ་བཙུགས་པ་ལ་མི་ཞིག་རིའི་རྩེ་མོ་ནས་ཐུར་དུ་རྒྱུགས་ཏེ་རལ་གྲི་དང ། མཚོན་གྱིས་ཟུག་ཅིང་རལ་ནས་ཕྱིར་ཡང་རལ་གྲི་དང་མཚོན་ས་ལ་བཙུགས་ཏེ། དེ་བཞིན་དུ་མི་དལ་བར་རྒྱུག་པ་མཐོང་ནས་འདི་ལྟ་བུ་སུ་ལགས་ཞེས་ཞུས་ན། སློབ་དཔོན་གྱིས་དུས་ལ་བབ་ན་བསྟན་ཏོ། །ཞེས་བསྒོའོ། །དེ་ནས་ཡང་སོང་སོང་བ་ལས་རུས་པའི་རི་ཆེན་པོ་མཐོ་ཁྱད་དཔག་ཚད་བདུན་བརྒྱ་པ། ཉི་མ་ཡང་སྒྲིབ་ཅིང་རྒྱ་མཚོ་ཡང་གྲིབ་མས་མུན་པར་གྱུར་པ་དེ་ལ་མཽ་གལ་འཛེགས་ཏེ་རྩིབ་རུས་
289a
> ༄#། །གཅིག་གི་སྟེང་ནས་ཕན་ཚུན་དུ་འགྲོ་བའི་ཕྱི་བཞིན་དུ་བདག་ཀྱང་སོང་བ་མཐོང་ནས་འདི་སྙམ་དུ་བསམས་སོ། །བདག་ནི། སློབ་དཔོན་དང་དེའུ་རེ་བྲལ་གྱི།་སྔར་མཐོང་བའི་དངོས་པོ་དེ་དག་ཞུའོ་སྙམ་བསམས་ནས་སློབ་དཔོན་ལ་བདག་གིས་སྔར་མཐོང་བའི་དངོས་པོ་དེ་དག་བསྟན་དུ་གསོལ་ཞེས་ཞུས་པ་དང ། མཽ་གལ་གྱིས་ཀྱང་ད་དུས་ལ་བབ་ཀྱི། ཁྱོད་ལ་བསྟན་པར་བྱའོ། །སྔར་མཐོང་བའི་བུད་མེད་དེ་ཤེས་པར་འདོད་ན། དེ་ནི། རྒྱལ་པོའི་ཁབ་ན་སར་ཕག་ཆེན་པོ་ཞེས་བྱ་བའི་ཆུང་མ་ཡིན་ཏེ། བྱད་བཞིན་བཟང་བས་ཁྱིམ་ཐབ་ཀྱང་ལྷག་པར་བྱམས་སོ། །དེའི་ཚེ་ན་སར་ཕག་དེ་རྒྱ་མཚོར་འཇུག་པ་ལས་ཆུང་མ་གཏོང་མ་ཕོད་ནས་ཆུང་མ་ཡང་ཁྲིད་དེ་ཚོང་པ་ལྔ་བརྒྱ་ཙམ་དང་རྒྱ་མཚོར་ཞུགས་ནས་དེའི་ཆུང་མ་རྟག་ཏུ་ཤིང་གསུམ་མགོ་བསྡུས་ཏེ་མདུང་ཁྱིམ་ལྟར་བྱས་ནས་དེ་ལ་མེ་ལོང་བཞག་སྟེ་མེ་ལོང་ལས་བལྟས་ན། བདག་གི་བྱད་བཞིན་བཟང་བར་མཐོང་ནས་ཤིན་ཏུ་ཆགས་པ་སྐྱེས་སོ། །དེའི་ཚེ་ན་རྒྱ་མཚོའི་ནང་ནས་རུས་སྦལ་ཆེན་པོ་ཞིག་གིས་གྲུ་བརྫིས་ནས་གྲུ་ཞིག་སྟེ་ཚོང་པ་ལྔ་བརྒྱ་ཙམ་ཐམས་ཅད་ཚེའི་དུས་བྱས་སོ། །རྒྱ་མཚོའི་ཆོས་ཉིད་ཀྱིས་རོ་ཞག་ཏུ་ལོན་པར་མི་གནས་པས་ཆུས་ཕུལ་ཏེ་རྒྱ་མཚོའི་འགྲམ་དུ་ཕྱིན་ཏོ། །སེམས་ཅན་
289b
> དག་ནི།་ཚེའི་དུས་བྱེད་པ་ན་ཅི་ལ་ཆགས་པ་དེར་སྐྱེ་བར་འགྱུར་རོ། །འོ་ན་སུ་ཞིག་སེམས་ཅན་དམྱལ་བར་སྐྱེ་བར་དགའ་ན། སེམས་ཅན་དམྱལ་བར་མང་དུ་སྐྱེས་པར་འགྱུར། སྨྲས་པ།་སེམས་ཅན་གང་དཀོན་མཆོག་གསུམ་གྱི་ནོར་བརྐུས་སམ། ཕ་མའི་ལོངས་སྤྱོད་བརྐུས་སམ། མིའི་སྲོག་བཅོད་པའི་ཁ་ན་མ་ཐོ་བ་ཆེན་པོ་བྱས་ན། ཤིན་ཏུ་འབར་བའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་ཏེ། མི་དེ་རླུང་ངམ་གྲང་ནད་ཀྱིས་གཟིར་བས་ཡིད་ལ་མེ་འདོད་པར་བསམ་མོ། །མེའི་ནང་དུ་འགྲོ་བར་བསམ་མ་ཐག་ཏུ་ཚེའི་དུས་བྱས་ནས་ཤིན་ཏུ་འབར་བའི་སེམས་ཅན་དམྱལ་བར་འགྲོའོ། །དེ་ལ་གང་སངས་རྒྱས་ལ་ཕུལ་བའི་མར་མེའམ། རིན་པོ་ཆེ་བརྐུས་སམ། དགེ་འདུན་གྱི་\?\་མའམ། ཤིང་བརྐུས་སམ། དགེ་འདུན་གྱི་གནས་ཁང་བཤིག་གམ། ཆོས་འཆད་པའི་འདུན་ཁང་བཤིག་གམ། དགུན་གྲང་བའི་དུས་སུ་ཕ་རོལ་པོའི་གོས་འཕྲག་\?\་མ། མཐུ་ཡོད་པས་ལྷགས་པའི་ནང་དུ་བྲན་མོའམ། བྲན་མོའམ། མི་གཞན་གྱི་གོས་འཕྲོག་སྟེ་ཆུ་བླུགས་སམ། གཞན་གྱི་གོས་བཤུས་ཤིང་འཕྲོག་ན། ཁ་ན་མ་ཐོ་བའི་ལས་ཀྱི་སྡིག་པ་འདིས་ཆབ་དྲོན་གྱི་སེམས་ཅན་དམྱལ་བར་ལྟུང་སྟེ། མི་དེ་ཚ་བའི་ནད་ཀྱིས་གཟིར་བས་རྟག་ཏུ་བསིལ་ཞིང་གྲང་
290a
> ༄#། །བའི་གནས་སེམས་ཏེ་གྲང་བར་འདོད་པས་དུས་བྱས་མ་ཐག་ཏུ་སེམས་ཅན་དམྱལ་བ་དེར་སྐྱེས་ཏེ། ཨུཏྤ་ལ་དང ། པདྨོ་དང ། ཀུ་མུ་ཏ་དང།་པུཎྜ་རཱི་གའི་སེམས་ཅན་དམྱལ་བ་ཡང་དེ་དང་འདྲའོ། །གྲང་བའི་སེམས་ཅན་དམྱལ་བ་ན་སྡུག་བསྔལ་མྱོང་བ་ན་ལུས་ཀྱི་ཤ་ཀུན་ཁམ་ཚད་ཁམ་ཚད་དུ་ཡོས་རྔོ་བ་ལྟར་ཆད་ཅིང་གས་ནས་མགོ་དང་རུས་པ་ཡང་དུམ་བུ་བརྒྱ་སྟོང་དུ་ཆད་ཅིང་གས་པར་འགྱུར་རོ། །སེམས་ཅན་གང་སེར་སྣ་བྱེད་ཅིང་གཞན་གྱི་འཚོ་བ་བཅད་དེ་ལྟོགས་སུ་བོར་བ་དང ། ཁ་ཟས་དུས་བཞིན་དུ་མི་སྟེར་ན། ཡི་དྭགས་ཀྱི་ཁམས་སུ་ལྟུང་སྟེ། མི་དེ་ཁ་ཟས་མི་ཆུད་ཅིང་སྐྱུག་དྲོ་བའི་ནད་ཀྱིས་བཏབ་ན། ནང་གཡོག་གམ་བཤེས་གཉེན་གྱི་ཁ་ཟས་རྣམ་པ་མང་པོ་དང་སྦྱར་ཏེ་འདི་ནི། མངར་རོ། །འདི་ནི། སྐྱུར་རོ། །འདི་ནི། བསོད་པའོ། །འདི་ནི། འཇུ་སླ་བའོ། །ཞེས་ནན་ཏན་གྱིས་བསྟབས་ན།་ནད་པ་དེ་ཁྲོས་ཏེ་བདག་ཁ་ཟས་འདི་མིག་གིས་མི་མཐོང་བའི་དུས་ཡོད་དམ་སྙམ་བསམ་ནས་དེ་ཚེའི་དུས་བྱས་མ་ཐག་ཏུ་ཡི་དྭགས་ཀྱི་ཁམས་སུ་ལྟུང་ངོ ། །སེམས་ཅན་གང་གླེན་པ་གཏི་མུག་ཅན། དཀོན་མཆོག་གསུམ་ལ་མ་དད་པ། འཕགས་པ་ལ་སྐུར་པ་འདེབས་པ་ནི། དུད་འགྲོའི་སྐྱེ་གནས་སུ་སྐྱེ་སྟེ། དེ་ཡང་ནད་ཀྱིས་
290b
> གཟིར་པ་ན་སྒུར་ཏེ་ཉལ་ནི། ཤེས་ཀྱི། འཕྲེས་ཏེ་ཉལ་མི་ཤེས་ལ། དགེ་བའི་ཕྱོགས་གཏམ་སྙན་པ་ཐོས་མི་འདོད་ན། ནད་གཡོག་གིས་ཀྱང་གདོན་མི་ཟ་བར་ཚེ་འཕོ་བར་ཤེས་པས་ན། ནད་གཡོག་གིས་ཀྱང་ཁྱོད་ཆོས་ཉོན་ཅིག་།ཚུལ་ཁྲིམས་ཀྱང་ནོས་ཤིག་།སྐུ་གཟུགས་དང་དགེ་སློང་དག་ཀྱང་མཐོང་བར་བྱོས་ལ། དེ་ལ་སྦྱིན་པ་ཡང་བྱོས་ཤིག་ཅེས་བསྐུལ་ན། དེ་ལ་མི་དད་མི་དགའ་སྟེ། ནན་གྱིས་བསྐུལ་མ་བཏབ་པ་དང ། དེ་ཁྲོས་ནས་བདག་དཀོན་མཆོག་གསུམ་དང ། དགེ་བའི་མིང་ཡང་མི་ཐོས་པ་ཞིག་ཏུ་སོང་ན་ཅི་མ་རུང་ཞེས་སྨྲས་ནས་ཚེའི་དུས་བྱས་མ་ཐག་ཏུ་དུད་འགྲོའི་སྐྱེ་གནས་སུ་སྐྱེའོ། །དེ་ལ་གད་ལྷ་དང་མིའི་རྒྱུར་གྱུར་པའི་དགེ་བའི་ཕྱོགས་ལ་བརྩོན་པ་དེ་ནི། ནད་ཀྱིས་ཀྱང་ཤིན་ཏུ་གདུངས་པར་མི་འགྱུར་ཏེ། ཚེའི་དུས་བྱེད་པ་ན་སེམས་ཀྱང་མི་འཁྲུག་གི་།ནད་གཡོག་དང་བཤེས་གཉེན་དག་གིས་འཆི་བར་རྟོགས་ནས་ཁྱོད་དམ་པའི་ཆོས་ཐོས་པར་འདོད་དམ། སྐུ་གཟུགས་མཐོང་བར་འདོད་དམ། དགེ་སློང་དག་ལས་མདོ་སྡེ་དང་ཚིགས་སུ་བཅད་པ་དག་ཉན་པར་འདོད་དམ། ཁྱོད་ཚུལ་ཁྲིམས་མནོད་པར་དགའམ། སངས་རྒྱས་དང་དགེ་འདུན་ལ་ལོངས་སྤྱོད་འབུལ་པར་དད་དམ་ཞེས་བསྐུལ་ན། དེ་དག་ཀུན་ལ་དད་དོ། །ཞེས་ཟེར་རོ། །གཞན་ཡང་སངས་རྒྱས་ཀྱི་སྐུ་གཟུགས་ལ་ཡོན་ཕུལ་ན་
291a
> ༄#། །ཚངས་རྒྱ་བར་འགྱུར་རོ། །ཆོས་ལ་མཆོད་ཅིང་ལོངས་སྤྱོད་ཕུལ་ན། གང་ནས་གང་དུ་སྐྱེ་བའི་གནས་ཐམས་ཅད་དུ་ཤེས་པ་དང་ལྡན་ཏེ། ཆོས་ཀྱི་མཚན་ཉིད་ཁོང་དུ་ཆུད་ཅིང་རྟོགས་པར་འགྱུར་རོ། །དགེ་འདུན་ལ་ལོངས་སྤྱོད་ཀྱི་སྦྱིན་པ་བྱས་ན། གང་ནས་གང་དུ་སྐྱེས་ཀྱང་རིན་པོ་ཆེ་དང ། ལོངས་སྤྱོད་ཆེན་པོ་དང་ཡིད་བཞིན་དུ་ལྡན་པར་འགྱུར་རོ། །ཞེས་ནད་པ་ལ་གཏམ་བྱས་ན། ནད་པ་རབ་ཏུ་དགའ་མགུ་རངས་ཏེ་བདག་སྐྱེ་བ་ཐམས་ཅད་དུ་དཀོན་མཆོག་གསུམ་དང་ཕྲད་ཅིང་ཆོས་ཐོས་པ་དང ། ཆོས་ཐོས་ནས་ཁྱད་ཁོང་དུ་ཆུད་ཅིང་རྟོགས་པར་གྱུར་ཅིག་ཅེས་སྨོན་ལམ་བཏབ་ན་ཚེའི་དུས་བྱེད་དེ་མིའི་ནང་དུ་སྐྱེའོ། །གང་ཞིག་ལྷར་སྐྱེ་བའི་རྒྱུར་གྱུར་པའི་དགེ་བའི་ཕྱོགས་རྒྱ་ཆེར་བསྐྱེད་པ། སྦྱིན་པ་དང་ཚུལ་ཁྲིམས་རྣམ་པར་དག་པ། ཆོས་ཉན་པར་དགའ་བ། དགེ་བ་བཅུ་ལ་སྤྱོད་པའི་གང་ཟག་དེ་ནི། དུས་བྱེད་པ་ན་བདེ་བར་ཉལ་བཞིན་དུ་སངས་རྒྱས་ཀྱི་སྐུ་གཟུགས་དང ། ལྷའི་ཕོ་བྲང་དང ། ལྷའི་བུ་མོ་དག་མཐོང་ཞིང་ལྷའི་རོལ་མོ་དག་ཐོས་ཏེ་མདངས་ཀྱང་ཤིན་ཏུ་བཟང་བ་དང ། ལག་པ་གྱེན་དུ་འདེགས་པ་ནི།་ཚེའི་དུས་བྱས་ནས་མཐོ་རིས་ལྷའི་ནང་དུ་སྐྱེའོ། །ཁྱིམ་བདག་སར་ཕག་གིས་ཆུང་མ་དེ་བདག་གི་ལུས་ལ་ཆགས་པས། ཚེའི་དུས་བྱས་མ་ཐག་ཏུ་ཕྱིར་ཡང་བུད་མེད་
291b
> གྱི་ལུས་དེ་ལ་སྦྲུལ་དུ་སྐྱེས་ཏེ། སྦྲུལ་དེ་ལས་ཚེའི་དུས་བྱས་ནས་སེམས་ཅན་དམྱལ་བ་ཆེན་པོའི་སྡུག་བསྔལ་དཔག་ཏུ་མེད་པ་མྱོང་བར་འགྱུར་རོ། །དགེ་སློང་དེས་ཡང་སློབ་དཔོན་ལ་གསོལ་པ། བདག་གི་ཤ་ལ་ཟ་བའི་བུད་མེད་དེ་སུ་ལགས། མཽ་གལ་གྱི་བུས་སྨྲས་པ། མཉན་དུ་ཡོད་པ་ན་དགེ་བསྙེན་མ་ཞིག་ལ་བྲན་མོ་ཞིག་ཡོད་དོ། །དགེ་བསྙེན་མ་དེས་ཚུལ་ཁྲིམས་རྣམ་པར་དག་པའི་དགེ་སློང་ཞིག་དབྱར་ཟླ་བ་གསུམ་མཆོད་པ་འབུལ་བར་སྤྱན་དྲངས་ཏེ་ཕྱོགས་གཅིག་ཏུ་གནས་ཁང་བྱས་ཏེ་བཞག་ནས་ཉིན་གཅིག་བཞིན་དུ་ཁ་ཟས་རོ་བརྒྱ་དང་དྲི་བསུང་དུ་ལྡན་པ་སྣ་ཚོགས་སྦྱར་ཏེ་དྲོ་ཁར་དུས་སུ་བྲན་མོ་དེ་སྐྱེལ་དུ་བཏང་ངོ ། །བྲན་མོ་དེ་དབེན་པར་ཕྱིན་པ་དང་ཞིམ་པོ་རྣམས་ཟོས་ནས་ལྷག་མ་དགེ་སློང་དེ་ལ་ཕུལ་ལོ། །ཕྱིས་དགེ་བསྙེན་མས་བྲན་མོ་དེ་མདོག་བཟང་ཞིང་ཤ་སྐྱེས་པར་མཐོང་ནས་བྲན་མོ་ལ་ཁྱོད་དགེ་སློང་ལ་འབུལ་བའི་ཁ་ཟས་ལྷག་མར་མ་བྱས་སམ་ཞེས་དྲིས་ན།་ཇོ་མོ། །བདག་ལ་ཡང་དད་པའི་ཤས་ཅུང་ཟད་ཅིག་མཆིས་ཏེ། ངན་པར་ལྟ་བ་ནི། མ་ལགས་ན། ཅིའི་སླད་དུ་དགེ་སློང་ལ་འབུལ་བའི་ཁ་ཟས་ལྷག་མར་བགྱིད། དགེ་སློང་གིས་མ་ཡོག་པའི་ལྷག་མ་བདག་ལ་སྩལ་པ་འཚལ་ཏོ། །ཅི་སྟེ་བདག་གིས་འཚལ་བར་གྱུར་ན། བདག་གར་སྐྱེས་ཀྱང་བདག་གི་ཤ་ལ་བདག་ཟ་བར་ཤོག་ཅིག་
292a
> ༄#། །ཅེས་སྨྲས་པས། དེའི་རྒྱུ་དེའི་རྐྱེན་གྱིས་སྔར་རྣམ་པར་སྨིན་པ་མི་བཟད་པ་འདི་མྱོང་ནས་སེམས་ཅན་དམྱལ་བ་ཆེན་པོར་དཔག་ཏུ་མེད་པའི་སྡུག་བསྔལ་གདོད་མྱོང་པར་འགྱུར་རོ། །དགེ་སློང་དེས་གསོལ་པ། ཤིང་ཆེན་པོ་ལ་སྲིན་བུ་མང་པོ་ཟ་ཞིང་མི་སྙན་པའི་སྒྲ་ཆེན་པོ་གྲགས་པ་དེ་སུ་ཞིག་ལགས་སྨྲས་པ།་ལི་ཏ་ཞེས་བྱ་བ་དགེ་འདུན་གྱི་ལས་བྱེད་པའི་དགེ་སློང་དེ་ཡིན་ཏེ། དགེ་འདུན་གྱི་དཀོར་ལ་སྤྱོད་ཅིང ། མེ་ཏོག་དང ། འབྲས་བུ་དང ། བཟའ་བ་དང ། བཏུང་བ་དག་ཁྱིམ་པའི་ཕྱོགས་ལ་སྦྱིན་པའི་རྣམ་པར་སྨིན་པ་མི་བཟད་པ་འདི་མྱོང་ནས་ཚེའི་དུས་བྱས་མ་ཐག་ཏུ་སེམས་ཅན་དམྱལ་བ་ཆེན་པོར་སྐྱེས་ཏེ་ཤིང་ལ་ཟ་བའི་སྲིན་བུ་དེ་དག་ནི། དགེ་སློང་གིས་བྱིན་པ་ཐོབ་པའི་མི་རྣམས་ཡིན་ནོ། །དགེ་སློང་དེས་ཡང་གསོལ་པ། མི་ཞིག་ལ་མི་མང་པོས་བསྐོར་ཏེ་མདས་བཙུགས་ནས་ལུས་གཅིག་ཏུ་འབར་བ་དེ་སུ་ལགས། མཽ་གལ་གྱིས་སྨྲས་པ། མི་ཞིག་གིས་སྔོན་རྔོན་པ་བྱེད་བྱེད་དེ་རི་དྭགས་མང་དུ་བསད་པས། སྡུག་བསྔལ་འདི་ལྟ་བུ་མྱོང་བར་གྱུར་ཏེ། དེ་ནས་ཚེ་འཕོས་ནས་སེམས་ཅན་དམྱལ་བ་ཆེན་པོར་སྐྱེས་ཏེ། དེ་ལས་ཐར་པའི་དུས་ཤིན་ཏུ་དཀའོ། །དགེ་སློང་གིས་ཡང་གསོལ་པ། རི་བོ་ཆེ་ལ་རལ་གྲི་དང །
292b
> མཚོན་ཁར་རྒྱུག་སྟེ་འཆི་བ་དེ་སུ་ལགས། མཽ་གལ་གྱིས་སྨྲས་པ། རྒྱལ་པོའི་བློན་པོ་ཤིན་ཏུ་དཔའ་བ་ཡིན་ཏེ། རེ་ཞིག་མཚོན་རྣོན་པོ་དང ། རལ་གྲི་དང ། མདུང་དང ། ཤག་ཏིའི་ཁར་རྒྱུགས་ཏེ། དེ་ནས་ཚེ་འཕོས་ནས་སེམས་ཅན་དམྱལ་བ་ཆེན་པོར་སྡུག་བསྔལ་ཡུན་རིང་པོར་མྱོང་བར་འགྱུར་རོ། །དགེ་སློང་གིས་ཡང་གསོལ་པ། རུས་པའི་རི་ཆེན་པོ་དེ་སུའི་ལགས། མཽ་གལ་གྱིས་སྨྲས་པ། ཁྱོད་ཤེས་པར་འདོད་ན། དེ་ནི། ཁྱེད་ཀྱི་ལུས་སྔ་མའི་རུས་པ་ཡིན་ནོ། །དགེ་སློང་གིས་དེ་སྐད་ཅེས་ཐོས་ནས་ཤིན་ཏུ་སྐྲག་སྟེ་བ་སྤུ་ཀུན་ལངས་ནས་རྡུལ་ཡང་བྱུང་སྟེ་སློབ་དཔོན་ལ་སྨྲས་པ། བདག་གི་སྙིང་མ་གས་པར་སྔོན་གྱི་ལས་ཀྱི་རྒྱུ་དང་རྐྱེན་བསྟན་དུ་གསོལ། མཽ་གལ་གྱིས་སྨྲས་པ། སྐྱེ་ཤི་འཁོར་བའི་མཐའ་དང་མུ་མེད། དགེ་སྡིག་གི་ལས་ཀྱང་ཞིག་ཅིང་མེད་པར་མི་འགྱུར་བས་ལས་ཅི་དང་ཅི་བྱས་པ་རྣམ་པར་སྨིན་པ་ཡང་དེ་དང་དེ་དག་གདོན་མི་ཟ་བར་མྱོང་བར་འགྱུར་རོ། །སྔོན་འདས་པའི་དུས་ན་འཛམ་བུའི་གླིང་འདིར་རྒྱལ་པོ་ཆོས་ཀྱིས་འཕགས་ཞེས་བྱ་བ་ཞིག་ཡོད་དེ། སྦྱིན་པ་དང་ཚུལ་ཁྲིམས་ལ་དགའ་བ། ཆོས་ཉན་པར་མོས་པ། ཤིན་ཏུ་སྙིང་རྗེའི་སེམས་དང་ལྡན་པ། རང་བཞིན་གྱིས་མི་གཏུམ་པ། སེམས་ཅན་གྱི་སྲོག་མི་གཅོད་པ། རྒྱལ་པོའི་མཚན་དང་
293a
> ༄#། །ལྡན་པ།་དམ་པའི་ཆོས་ཀྱི་སྲིད་ཀྱིས་འཚོ་བ། ལོ་ཉི་ཤུ་ཙམ་ལོན་པ་དང་དལ་བ་ཞིག་གི་སྐབས་སུ་མི་དང་མིག་མང་ཞིག་རྩེ་བ་ལས་མི་ཞིག་ལ་ཉེས་པ་ཆེན་པོ་བྱང་ནས་བློན་པོ་རྣམས་ཀྱིས་མི་ཞིག་ཁྲིམས་ལས་འགལ་བའི་ཉེས་པ་ཆེན་པོ་བགྱིད་ན། ཇི་ལྟར་བགྱི་ཞེས་གསོལ་པ། རྒྱལ་པོ་མིག་མང་ལ་ཡེངས་པས། རྒྱལ་པོའི་ཁྲིམས་བཞིན་དུ་གྱིས་ཤིག་ཅེས་བསྒོ་ནས། བློན་པོ་རྣམས་ཀྱིས་ཁྲིམས་དང་སྦྱར་ན་གསད་པ་ལ་ཐུག་བས་བསད་དོ། །རྒྱལ་པོ་མིག་མང་རྩེ་བ་ཟིན་ནས་བློན་པོ་ལ་ཉེས་པ་བྱེད་པའི་མི་དེ་ག་རེ། ཞལ་ཆེ་གཅད་དོ། །ཞེས་བྱས་ན། བློན་པོ་རྣམས་ཀྱིས་བདག་ཅག་གིས་ཁྲིམས་དང་སྦྱར་ཏེ་བཀུམ་ལགས་སོ། །ཞེས་སྨྲས་སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་འཁམས་ཏེ་ས་ལ་འགྱེལ་པ་དང ། བློན་པོ་རྣམས་ཀྱིས་ཆུས་བཏབ་ནས་ཕྱིར་ལངས་ནས། མཆི་མ་བླགས་ཏེ་འདི་སྐད་ཅེས་སྨྲས་སོ། །ཕོ་བྲང་གི་སླས་དང ། གླང་པོ་ཆེ་དང ། རྟ་དང ། རིན་པོ་ཆེ་སྣ་བདུན་ལ་སོགས་པ་ཐམས་ཅད་ནི། འདིར་ལུས་ཀྱི། ང་འབའ་ཞིག་སེམས་ཅན་དམྱལ་བར་སྡུག་བསྔལ་མྱོང་བར་འོང་བ་ལྟ། བདག་རྒྱལ་པོ་མ་བྱས་པའི་ཚེ་ན་ཡང་ཕོ་བྲང་འདི་ན་རྒྱལ་པོའི་སྲིད་འཚོ་ཞིང་བཞུགས་
293b
> བཞུགས། བདག་རིང་པོར་མི་ཐོགས་པར་ཤི་ན་ཡང་དེ་བཞིན་དུ་རྒྱལ་པོའི་སྲིད་འཚོ་བར་འགྱུར་ཏེ། བདག་ནི། མི་བསད་བས་ན་རིགས་ངན་གྱི་རྒྱལ་པོ་ཡིན་ཏེ། སྐྱེ་བ་ཐམས་ཅད་དུ་བདག་གར་འགྲོ་བར་འགྱུར། ད་ནི། རྒྱལ་པོ་ཡང་མི་འདོད་དོ་ཞེས་སྨྲས་ནས། རྒྱལ་པོའི་ཐབས་བཏང་སྟེ་རིལ་པ་བདག་སྲང་ཞིང་འདུག་པ་ལས་རྒྱལ་པོ་དེ་ཚེའི་དུས་བྱས་ནས། རྒྱ་མཚོ་ཆེན་པོར་ཆུ་སྲིན་ཞིག་ཏུ་སྐྱེས་ཏེ།ལུས་ཆེ་ཁྱད་དཔག་ཚད་བདུན་བརྒྱ་ཡོད་དོ། །རྒྱལ་པོའམ། བློན་པོ་ཡང་རུང ། མཐུ་རྩལ་བསྙེམས་ཏེ་སེམས་ཅན་གྱི་སྲོག་གཅོད་དམ། འདོད་པ་དང་བྲེལ་བྲལ་བའི་ལས་བྱས་སམ། སེམས་ཅན་ལ་འཚེ་བའི་ལས་བྱས་ན། ཤི་མ་ཐག་ཏུ་ཕལ་ཆེར་ཆུ་སྲིན་དུ་སྐྱེད་ཏེ། དེའི་ལུས་ལ་སྲིན་བུ་མང་པོ་གནས་སོ། །དེའི་ལུས་གཡས་པས་ཤེལ་གྱི་རི་ལ་སྙོགས་ཤིང་དྲུད་བས་སྲིན་བུ་མང་པོ་ཤི་བའི་ཁྲག་གིས་རྒྱ་མཚོའི་ནང་རྒྱད་གྲགས་བརྒྱ་ཙམ་དམར་པོར་བྱས་སོ། །སྡིག་པའི་ལས་དས་དེ་དག་ཏུ་ཚེ་འཕོས་ནས་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །ཆུ་སྲིན་དེ་ལན་གཅིག་གཉིད་ཀྱིས་ལོག་ན་ལོ་བརྒྱས་ལན་གཅིག་སངས་ཏེ། བཀྲེས་པ་དང་སྐོམ་པས་ཉེན་ནས་ཁ་གདངས་པ་དང ། རྒྱ་མཚོའི་ཆུ་བར་འགྲོ་བ་ནི། ཆུ་ཆེན་པོ་རྒྱ་མཚོར་འབབ་པ་དང་
294a
> ༄#། །འདྲའོ། །དེའི་ཚེ་ན་ཚོང་པ་ལྔ་བརྒྱ་ཙམ་ཞིག་རྒྱ་མཚོར་ཞུགས་ཏེ་རིན་པོ་ཆེ་ལེན་དུ་སོང་བ་ལས། ཆུ་སྲིན་ཁ་གདངས་པ་དང་ཕྲད་ནས་གྲུ་ཡང་ཤིན་ཏུ་མགྱོགས་པར་ཆུ་སྲིན་གྱིས་ཟ་འདོད་པའི་ཁར་སོང་ངོ ། །ཚོང་པ་རྣམས་སྐད་ཆེན་པོ་ཕྱུང་སྟེ་དུས་ནས་གཅིག་ལ་གཅིག་འདི་སྐད་ཅེས་སྨྲས་སོ། ། བདག་ཅག་ནི། གདོན་མི་ཟ་བར་འཆི་བར་འགྱུར་གྱི། སོ་སོ་ནས་ཅི་ལ་བརྟེན་པ་དྲན་པར་གྱིས་ཤིག་ཅེས་སྨྲས་པ་དང ། དེ་དག་ལ་ལ་ནི། སངས་རྒྱས་དང ། ཆོས་དང ། དགེ་འདུན་གྱི་མཚན་ནས་བརྗོད། ཁ་ཅིག་ནི། འཇིག་རྟེན་གྱི་ལྷ་དང ། རི་དང ། གཙང་པོ་དང ། ལྷ་མ་སྲིན་དང ། ཕ་མ་དང ། ཆུང་མ་དང ། བུ་དང ། ཕུ་ནུ་དང ། གཉེན་པའི་མིང་ནས་བོས་ཏེ། བདག་ཅག་གིས་ནི། དེང་མཐོང་བ་ཐ་མ་འདི་ལས་འཛམ་བུའི་གླིང་གཏན་མི་མཐོང་ངོ ། །ཞེས་སྨྲས་སོ། །དེའི་ཚེ་དེ་དག་ཆུ་སྲིན་གྱི་ཁར་སོང་ལ་ཁད་པ་དང ། ཐམས་ཅད་ཀྱི་དུས་གཅིག་ཏུ་སངས་རྒྱས་ལ་ཕྱག་འཚལ་ལོ། །ཞེས་བརྗོད་པ་དང ། ཆུ་སྲིན་གྱིས་སངས་རྒྱས་ལ་ཕྱག་འཚལ་ལོ། །ཞེས་བརྗོད་པའི་སྒྲ་ཐོས་མ་ཐག་ཏུ་ཁ་བཙུམས་ཏེ་ཆུ་འབབ་པ་ཡང་ཆད་པར་གྱུར་ནས་ཚོང་པ་དེ་དག་འཆི་བ་ལས་སོས་པར་གྱུར་ཏོ། །
294b
> ཆུ་སྲིན་དེ་ལྟོགས་ནས་དེ་ཉིད་དུ་ཚེ་འཕོས་ཏེ་རྒྱལ་པོའི་ཁབ་ཏུ་སྲིན་བུ་ཞིག་ཏུ་སྐྱེས་སོ། །ཆུ་སྲིན་གྱི་རོ་རྒྱ་མཚོའི་ངོས་སུ་ཕྱུང་ནས་ཉི་མས་གདུངས་ཆར་བས་བརླན་ཏེ་ཤ་ཟད་པར་གྱུར་པའི་རུས་པ་དེ་ནི། རི་འདི་ཡིན་ནོ། །དཔལ་སྐྱེས། འདི་ལྟར་རིག་པར་གྱིས་ཤིག་།དེའི་ཚེ་དེའི་དུས་ན་རྒྱལ་པོ་ཆོས་ཀྱིས་འཕགས་པ་ནི། ཁྱོད་ཡིན་ནོ། །མི་བསད་པའི་རྐྱེན་གྱིས་རྒྱ་མཚོ་ཆེན་པོར་ཆུ་སྲིན་དུ་སྐྱེས་སོ། །ཁྱོད་ཀྱིས་དེ་ཡང་ཕྱིར་མིའི་ལུས་ཐོབ་པ་འདིས་འཁོར་བ་ལ་རྒྱབ་ཀྱིས་མ་ཕྱོགས་ན་འདི་ནས་ཚེ་འཕོས་མ་ཐག་ཏུ་སེམས་ཅན་དམྱལ་བར་ལྟུང་སྟེ། ཐར་པར་ཤིན་ཏུ་དཀའོ། །དགེ་སློང་དཔལ་སྐྱེས་བདག་གི་ལུས་རྙིད་པ་ཡང་མཐོང ། དེ་སྐད་ཅེས་བསྟན་པ་ཡང་ཐོས་ནས་འཁོར་བས་ཤིན་ཏུ་སྐྲག་སྟེ། གང་ལ་ནན་ཏན་བྱེད་པའི་ཆོས་དེ་ལ་མཐར་གྱིས་ཡིད་ལ་བྱས་ནས་སེམས་རྩེ་གཅིག་པ་ལ་གནས་ཏེ་ལུས་རྙིང་པ་མཐོང་བས་མི་རྟག་པའི་ཆོས་ཁོང་དུ་ཆུད་དེ། འཁོར་བ་ལ་རྒྱབ་ཀྱིས་ཕྱོགས་པར་རྟོགས་ནས་ཀུན་ནས་ཉོན་མོངས་པའི་ཟག་པ་ཐམས་ཅད་དེ་དགྲ་བཅོམ་པར་གྱུར་ཏོ། །མཽ་གལ་ཡང་ཤིན་ཏུ་དགའ་ནས་སྨྲས་པ། ཆོས་ཀྱི་སྲས་ཁྱོད་ཀྱིས་ནི། བྱ་པ་ཐམས་ཅད་ཡིད་ལ་བྱས་ཀྱི། སྔར་འདིར་འོངས་པ་ནི། ངའི་མཐུས་འོངས་སོ། །ད་ནི། ཕྱིར་ཁྱོད་བདག་གི་མཐུས་འདོང་ངོ ། །ཞེས་སྨྲས་ནས་
295a
> ༄#། །དེའི་ཚེ་མཽ་གལ་སྟེང་གི་ནམ་མཁའ་ལ་འཕགས་པ་དང ། དགེ་སློང་དཔལ་སྐྱེས་ཀྱང་སློབ་དཔོན་གྱི་ཕྱི་བཞིན་དུ་འོངས་པ་ནི། བྱའི་ཕྱི་བཞིན་དུ་ཕྲུག་གུ་འབྲང་བ་འདྲ་བར་འོད་མའི་ཚལ་གང་ན་བ་དེར་འོངས་སོ། །དེའི་ཚེ་ན་དགེ་སློང་གཞོན་ནུ་དག་དགྲ་བཅོམ་པར་མི་ཤེས་པས་སྔོན་བཞིན་དུ་དཔལ་སྐྱེས་ལ་མཐོ་བརྩམས་ཀྱང་སྤྱོད་ལམ་མ་ཉམས་ཏེ་ཅང་མི་སྨྲའོ། །བཅོམ་ལྡན་འདས་ཀྱིས་དེ་ལྟར་གྱུར་པ་མཁྱེན་ནས་དགེ་སློང་གཞོན་ནུ་རྣམས་ཀྱིས་འདིའི་ལས་མི་འབྱུང་བ་དང ། དགེ་སློང་རྒན་པའི་ཡོན་ཏན་གྲགས་པར་བྱ་བའི་ཕྱིར་འཁོར་མང་པོའི་ནང་དུ་དགེ་སློང་དཔལ་སྐྱེས་ལ་ཚུར་ཤོག་ཅིག་ཅེས་བཀའ་སྩལ་ནས་ཁྱོད་རྒྱ་མཚོའི་ངོགས་སུ་ཕྱིན་ཏམ་ཞེས་བཀའ་སྩལ་ཏོ། །དཔལ་སྐྱེས་ཀྱིས་གསོལ་པ། བདག་རྒྱ་མཚོའི་ངོགས་སུ་མཆིས་སོ། །རྒྱ་མཚོའི་ངོགས་སུ་ཅི་དང་ཅི་མཐོང་བ་སྨྲོས་ཤིག་ཅེས་བཀའ་སྩལ་ནས་དགེ་སློང་གིས་ཅི་དང་ཅི་མཐོང་བ་རྒྱས་པར་གསོལ་བ་དང ། བཅོམ་ལྡན་འདས་ཀྱིས་ལེགས་སོ་ལེགས་སོ། །ཞེས་བྱ་བ་གནང་ནས་དཔལ་སྐྱེས།་ཁྱོད་ཀྱིས་མཐོང་བ་དེ་དག་ནི། བདེན་ནོ། །ཁྱོད་ཀྱིས་ད་ནི། འཁོར་བའི་སྡུག་བསྔལ་ཡོངས་སུ་སྤངས་ཏེ་ཡོངས་སུ་མྱ་ངན་ལས་འདས་པའི་བདེ་བ་ཐོབ་
295b
> པས་ལྷ་དང་མིར་བཅས་པའི་འཇིག་རྟེན་གྱི་མཆོད་པའི་གནས་སུ་གྱུར་ཏོ། །དགེ་སློང་ཁྱོད་ཀྱི་བྱ་བ་ཐམས་ཅད་ཡོངས་སུ་རྫོགས་སོ། །ཞེས་བཀའ་སྩལ་ནས་དགེ་སློང་གཞོན་ནུ་དེ་དག་གིས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་ནས་ཤིན་ཏུ་འགྱོད་ཅིང་མི་དགའ་བ་སྐྱེས་ཏེ་འདི་ལྟ་བུ་མཁས་པ་ཤེས་རབ་ཅན་འཕགས་པ་ལ་བདག་ཅག་ཤེས་རབ་མེད་པས་འཚེ་བ་དང་མཐོ་བརྩམས་པ་བགྱིས་སོ། །བདག་ཅག་ཁ་ན་མ་ཐོ་བའི་རྣམ་པར་སྨིན་པ་མྱོང་བར་འགྱུར་རོ། །ཞེས་སྨྲས་ནས། དགེ་སློང་གཞོན་ནུ་དག་།དགེ་སློང་དཔལ་སྐྱེས་གང་ན་བ་དེར་སོང་ནས་ཕྱིན་པ་དང་ལུས་སྨད་ལྔ་ས་ལ་གཏུགས་ཏེ་ཕྱག་བྱས་ནས་འདི་སྐད་ཅེས་སྨྲས་སོ། །སྐྱེས་བུ་དམ་པ་དག་ནི། སྙིང་རྗེ་དང་ལྷན་ཅིག་སྐྱེས་ཏེ། བཙུན་པ་ཁྱོད་སྐྱེས་པ་ཡང་སྙིང་རྗེ་ཆེན་པོ་དང་ལྷན་ཅིག་སྐྱེས་ལགས་ན། བདག་ཅག་ལ་ཐུག་བརྩེ་བའི་སླད་དུ་བདག་ཅག་ཁྱོད་ལ་མཐོལ་ཚངས་བགྱིའོ། །ཞེས་སྨྲས་པ་དང ། དགེ་སློང་དེས་ཀྱང་བདག་གི་ལུས་ལ་ཡང་མི་དགའ་བའི་བསམ་པ་མེད་ཀྱི། ཚངས་པར་གྱུར་ཅིག་ཅེས་སྨྲས་སོ། །དེ་ནས་དགེ་སློང་དཔལ་སྐྱེས་ཀྱིས་དགེ་སློང་གཞོན་ནུ་དེ་རྣམས་ཤིན་ཏུ་འགྱོད་ཅིང་གནོང་བཀུར་བའི་སེམས་དང་ལྡན་པར་རྟོགས་ནས་དགེ་སློང་དེ་དག་ལ་དམ་པའི་ཆོས་བསྟན་
296a
> ༄#། །ཏོ། །དེ་དག་གིས་འཁོར་བ་ལ་རྒྱབ་ཀྱིས་ཕྱོགས་པའི་ཆོས་ཐོས་ནས་བརྩོན་པ་དང ། འབད་པས་ནན་ཏན་བྱས་ཏེ་ཀུན་ནས་ཉོན་མོངས་པའི་ཟག་པ་ཀུན་ཟད་ནས་དགྲ་བཅོམ་པར་གྱུར་ཏོ། །དེ་ནས་ཁྱིམ་བདག་དཔལ་སྐྱེས་རྒྱལ་པོའི་ཁབ་ཏུ་ཤིན་ཏུ་གྲགས་པར་གྱུར་ཏེ། ཀུན་གྱིས་ངོ་མཚར་ཡ་མཚན་དུ་ཁྱིམ་བདག་རྒན་པོ་ཅི་ཡང་མི་ནུས་པ་ཡང་སངས་རྒྱས་ཀྱི་བསྟན་པ་ལ་རབ་ཏུ་བྱུང་ནས་དགྲ་བཅོམ་པར་གྱུར་ཏེ། འདི་ལྟ་བུའི་དམ་པའི་ཆོས་ཀྱང་སྟན་ཏོ། །ཞེས་བརྗོད་དོ། །དེའི་ཚེ་རྒྱལ་པོའི་ཁབ་ན་གནས་པའི་མི་དག་ཕལ་ཆེར་བསམ་པ་དག་པའི་སེམས་སྐྱེས་ནས་ཁ་ཅིག་ནི། བུ་དང ། བུ་མོ་དང ། བྲན་ཕོ་དང ། བྲན་མོ་ལ་སོགས་པ་རབ་ཏུ་འབྱུང་བར་གནང་ངོ ། །ཁ་ཅིག་ནི། བདག་ཉིད་རབ་ཏུ་འབྱུང་བར་གསོལ་ནས་ཐམས་ཅད་རབ་ཏུ་དགའ་སྟེ་རྗེས་སུ་ཡི་རང་བར་གྱུར་ཏོ། །དེ་བས་ན་རབ་ཏུ་བྱུང་བའི་ཡོན་ཏན་ནི། ཚད་མེད་མཐའ་མེད་དེ། དཔལ་སྐྱེས་ལྟ་བུ་ལོ་བརྒྱ་ལོན་ཏེ་རབ་ཏུ་བྱུང་ནས་དེ་ལྟ་བུའི་ཡོན་ཏན་ཆེན་པོ་དང་ལྡན་པར་གྱུར་ན། གཞོན་ནུ་དར་ལ་བབ་པ་རབ་ཏུ་བྱུང་ན་འབྲས་བུ་ཆེན་པོ་མཆོག་དམ་པ་རྙེད་པ་ལྟ་ཅི་སྨོས་ཏེ། ཆོས་ལ་བརྩོན་པ་དག་ནི། རབ་ཏུ་འབྱུང་བར་བྱའོ། །རབ་ཏུ་བྱུང་བའི་ཡོན་
296b
> ཏན་བསྔགས་པའི་ལེའུ་སྟེ་བཅོ་ལྔ་པའོ།། །།བམ་པོ་ལྔ་པ། དགེ་ཚུལ་གྱིས་ཚུལ་ཁྲིམས་བསྲུངས་པའི་ལེའུ། ཚུལ་ཁྲིམས་སྲུང་བ་དག་ནི།་ལུས་དང་སྲོག་སྟོར་ཀྱང་བླའི། ནམ་དུ་ཡང་ཚུལ་ཁྲིམས་ཉམས་པར་མི་བྱེད་དོ། །དེ་ཅིའི་ཕྱིར་ཞེ་ན། ཚུལ་ཁྲིམས་ནི། བྱང་ཆུབ་ཏུ་འཇུག་པའི་རྩ་བ། ཟག་པ་མེད་པའི་མཆོག་།མྱ་ངན་ལས་འདས་པའི་བདེ་བར་འགྲོ་བའི་ལམ་མོ། །ཚུལ་ཁྲིམས་དག་པར་བསྲུངས་པའི་བསོད་ནམས་ནི། ཚད་མེད་དཔག་ཏུ་མེད་དོ། །དཔེར་ན།་རྒྱ་མཚོ་ཆེན་པོ་ནི། ཚད་མེད་མཐའ་མེད་དོ། །ཚུལ་ཁྲིམས་བསྲུངས་པའི་བསོད་ནམས་ཀྱང་ཚད་མེད་མཐའ་མེད་དོ། །དཔེར་ན། རྒྱ་མཚོ་ནི། ལྷ་མ་ཡིན་དང ། རུས་སྦལ་དང ། ཆུ་སྲིན་དང ། ཆུའི་རིས་སུ་གཏོགས་པའི་སེམས་ཅན་ཆེན་པོའི་གནས་སུ་གྱུར་པ་ལྟར་ཚུལ་ཁྲིམས་ཀྱང་དེ་དང་འདྲ་སྟེ། ཐེག་པ་གསུམ་ལ་གནས་པའི་སྐྱེ་བོ་ཆེན་པོ་མང་དུ་གནས་སོ། །དཔེར་ན། རྒྱ་མཚོའི་ནང་ན་གསེར་དང ། དངུལ་དང ། བཻཌཱུརྱ་ལ་སོགས་ཏེ། རིན་པོ་ཆེ་མང་པོ་ཡོད་པ་བཞིན་དུ་ཚུལ་ཁྲིམས་ཀྱི་རྒྱ་མཚོ་ཡང་དེ་དང་འདྲ་སྟེ། མི་རྟག་པའི་གཞི་དང ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང ། བསམ་གཏན་དང ། ཏིང་ངེ་འཛིན་
297a
> ༄#། །ལ་སོགས་པའི་རིན་པོ་ཆེ་མང་པོ་ཡོད་དོ། །དཔེར་ན། རྒྱ་མཚོ་ཆེན་པོའི་གཏིང་ཡང་རྡོ་རྗེ་ཡིན་ལ། མཐའ་མ་ཡང་རྡོ་རྗེའི་རིས་བསྐོར་ཏེ་ཆུ་བོ་བཞི་འབབ་ཀྱང་མི་འགྲིབ་མི་ལྡུད་པ་ལྟར་ཚུལ་ཁྲིམས་ཀྱི་རྒྱ་མཚོ་ཡང་དེ་དང་འདྲ་སྟེ། འདུལ་བ་རྡོ་རྗེ་ལྟ་བུས་ནི། གཏིང་བྱས། ཆོས་མངོན་པའི་རིས་ནི།་མཐའ་བསྐོར། མདོ་སྡེ་བཞི་ཆུ་བོ་ལྟ་བུར་འབབ་ཀྱང་འཕེལ་བ་ཡང་མེད། འགྲིབ་པ་ཡང་མེད་དོ། །རྒྱ་མཚོ་ཅིའི་ཕྱིར་མི་ལྡུད་ཆེ་ན། མཚམས་མེད་པའི་སེམས་ཅན་དམྱལ་བའི་མེས་རྒྱ་མཚོ་བསྐམས་པས་ན། དེའི་ཕྱིར་རྒྱ་མཚོ་མི་ལྡོད་དོ། །ཆུ་བོ་རྟག་ཏུ་འབབ་པས་ནི། མི་འགྲིབ་བོ། །ཚུལ་ཁྲིམས་ཀྱི་རྒྱ་མཚོ་ཡང་བག་མེད་པས་མི་སྐྱེ། ཡོན་ཏན་དང་ལྡན་པས་མི་འགྲིབ་བོ། །དེ་བས་ན་གང་ཚུལ་ཁྲིམས་བསྲུངས་པ་དེའི་ཡོན་ཏན་ནི། རབ་ཏུ་མང་བར་རིག་པར་བྱའོ། །བཅོམ་ལྡན་འདས་མྱ་ངན་ལས་འདས་ནས་ཡུལ་ཨནྟ་ཞེས་བྱ་བ་ན་དགེ་སློང་བསོད་སྙོམས་པ། དགོན་པ་ལ་གནས་ནས་དགའ་བ། སྤྱོད་ལམ་དང་ལྡན་པ་ཞིག་ཡོད་དོ། །དགེ་སློང་བསོད་སྙོམས་པ་ནི། སངས་རྒྱས་ཀུན་གྱིས་བསྔགས་ཀྱི། ཕལ་གྱི་ནང་ན་གནས་པ་མ་ཡིན་ནོ། །དེ་ཅིའི་ཕྱིར་ཞེ་ན། དགེ་སློང་བསོད་སྙོམས་
297b
> པ་ནི།་འདོད་པ་ཆུང་ཞིང་ཆོག་ཤེས་པ་སྟེ། ཅི་ཡང་མི་གསོག་ཅིང་ཟས་གཅིག་པ། བླ་གབ་མེད་པ། ཆོས་གོས་གསུམ་ལ་སོགས་པ་སྤྱོད་དེ། བཙུན་པའོ། ། གཙོ་བོའོ། །དགེ་འདུན་གྱི་ནང་ན་གནས་པའི་དགེ་སློང་ནི། འདོད་པ་མང་བ། ཆོག་མི་ཤེས་པ། སེར་སྣ་བྱེད་པ། ཅི་ལ་ཡང་ཆགས་པས་གྲགས་པ་ཆེན་པོ་ཐོབ་པར་མི་འགྱུར་རོ། །དགེ་སློང་བསོད་སྙོམས་པ་དེ་ཡོན་ཏན་སྤྱོད་པ་དང་ལྡན་ཏེ།་དགེ་སློང་གི་འབྲས་བུ་ཐོབ་ནས་མངོན་པར་ཤེས་པ་དྲུག་དང ། རིག་པ་གསུམ་དང ། རྣམ་པར་ཐར་པ་བརྒྱད་ལ་གནས་ཏེ་སྤྱོད་ལམ་ཤིན་ཏུ་མཛེས་པས་ཀུན་ཏུ་གྲགས་པར་གྱུར་ཏོ། །དེའི་ཚེ་ཡུལ་ཨནྟ་ཞེས་བྱ་བ་ན་དགེ་བསྙེན་དཀོན་མཆོག་གསུམ་ལ་ཤིན་ཏུ་དད་པ། སྲོག་མི་གཅོད་པ། མ་བྱིན་པར་མི་ལེན་པ། འདོད་པས་ལོག་པར་མི་གཡེམ་པ། བརྫུན་དུ་མི་སྨྲ་བ། སྨྱོ་བའི་ཁུ་བ་ཆང་མི་འཐུང་བའི་ཚུལ་ཁྲིམས་ལྔ་སྲུང་བ། ཡོན་ཏན་དང་ལྡན་པ་ཞིག་ཡུལ་དེ་ན་འདུག་པ་ལས། དགེ་བསྙེན་དེས་དགེ་སློང་བསོད་སྙོམས་པ་དེ་ཚེ་གཅིག་གི་བར་དུ་འཚོ་བ་སྦྱར་ན་འཚོ་བ་སྦྱར་བའི་བསོད་ནམས་ནི། མྱོང་བར་འགྱུར་རོ་སྙམ་ནས་གལ་ཏེ་བདག་གི་ཁྱིམ་དུ་སྤྱན་དྲངས་ན་ལམ་དུ་གྲང་བ་དང ། ཚ་བས་ཉོན་མོངས་ཏེ་སྒོམ་པའི་བར་ཆད་དུ་ཡང་འགྱུར་ལ། ཕྱིས་
298a
> ༄#། །རྣམ་པར་སྨིན་པ་མྱོང་བ་ན་ཡང་བདག་གིས་བསམས་ཤིང་དོན་དུ་གཉེར་དགོས་པ་ཐོབ་པར་འགྱུར་རོ། །གལ་ཏེ་འཚོ་བ་གནས་སུ་བསྐྱལ་ན། ཕྱིས་རྣམ་པར་སྨིན་པ་ཡང་དོན་དུ་གཉེར་མི་དགོས་པར་ཐོབ་པར་འགྱུར་རོ་སྙམ་བསམས་ནས་དགེ་བསྙེན་དེ་དད་པའི་སེམས་ཀྱིས་ཞལ་ཟས་རོ་བརྒྱ་དང་ལྡན་པ། དྲི་བསུང་དང་ཁ་དོག་དང་ལྡན་པ་སྣ་ཚོགས་བཤམས་ཏེ་ཉིན་གཅིག་བཞིན་དུ་སྐྱེལ་ཏོ། །དགེ་སློང་ལ་བཟང་ངན་རྣམ་པ་བཞིས་བརྟག་དཀའ་བ་ནི། ཇི་ལྟར་ཨ་མྲའི་འབྲས་བུ་སྨིན་ནམ་མ་སྨིན་པ་བརྟག་དཀའ་བ་བཞིན་ནོ། །དགེ་སློང་ཁ་ཅིག་སྤྱོད་ལམ་ཤིན་ཏུ་མཛེས་ཤིང་གོམ་པ་དལ་གྱིས་འགྲོ་ལ་གཉའ་ཤིང་གང་ལས་མི་ལྟ་ཡང་ནང་འདོད་ཆགས་དང ། ཞེ་སྡང་དང ། གཏི་མུག་དང་བཅས་ལ། ཆོས་མ་ཡིན་པ་སྤྱོད་ཅིང་ཚུལ་ཁྲིམས་ཉམས་པ་ཡང་ཡོད་དེ། དེ་ནི། ཨ་མྲའི་འབྲས་བུ་ཕྱི་རོལ་སྨིན་ལ་ནང་མ་སྨིན་པ་དང་འདྲའོ། །དགེ་སློང་ཁ་ཅིག་ནི། ཕྱི་རོལ་གྱི་སྤྱོད་པ་རྩིང་ལ་སྤྱོད་ལམ་དང་མི་ལྡན་ན་ཡང་ནང་དགེ་སློང་གི་སྤྱོད་པ་དང་ཡོན་ཏན་དུ་ལྡན་ཏེ་བསམ་གཏན་དང ། ཏིང་ངེ་འཛིན་དང ། ཤེས་རབ་དུ་ལྡན་པ་ཡོད་དེ། དེ་ནི། ཨ་མྲའི་འབྲས་
298b
> བུ་ནང་སྨིན་ལ་ཕྱི་རོལ་མ་སྨིན་པ་དང་འདྲའོ། །\?\་ཁ་ཅིག་ནི། སྤྱོད་ལམ་རྩིང་ལ་ཉེས་པ་བྱེད་ཅིང་ཚུལ་ཁྲིམས་ཀྱང་ཉམས་ལ། ནང་ཡང་འདོད་ཆགས་དང ། ཞེ་སྡང་དང ། གཏི་མུག་དང ། སེར་སྣ་དང ། ཕྲག་དོག་ཏུ་བཅས་པ་ཡང་ཡོད་དེ། དེ་ནི། ཨ་མྲའི་འབྲས་བུ་ཕྱི་རོལ་ཀྱང་མ་སྨིན་ལ་ནང་ཡང་མ་སྨིན་པ་དང་འདྲའོ། ། དགེ་སློང་ཁ་ཅིག་ནི། སྤྱོད་ལམ་མཛེས་ཤིང་ཚུལ་ཁྲིམས་དང་ལྡན་ལ། ནང་ཡང་དགེ་སྦྱོང་གི་ཡོན་ཏན་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་ཏུ་ལྡན་པ་ཡང་ཡོད་དེ། དེ་ནི། ཨ་མྲའི་འབྲས་བུ་ཕྱི་ནང་གཉིས་ཀ་སྨིན་པ་དང་འདྲའོ། །བསོད་སྙོམས་པའི་དགེ་སློང་དེ་ཕྱི་ནང་གཉིས་ཀ་དང་ལྡན་པ་ཡང་དེ་དང་འདྲ་སྟེ། ཡོན་ཏན་དང་སྤྱོད་པ་ཡོངས་སུ་རྫོགས་པས་ཐམས་ཅད་རིམ་གྲོ་དང ། བཀུར་སྟི་བྱེད་དོ། །དེའི་ཚེ་ན་ཡུལ་དེ་ན་ཁྱིམ་བདག་དཀོན་མཆོག་གསུམ་ལ་ཤིན་ཏུ་དད་པ་ཞིག་ལ་བུ་ཁྱེའུ་ཞིག་ཡོད་དེ། དེས་འདི་སྙམ་དུ་བསམས་སོ། །བདག་གི་བུ་འདི་རབ་ཏུ་དབྱུང་གི་།སྟོན་པ་མཁས་པ་ཞིག་ལ་བཅོལ་ཏོ། །དེ་ཅིའི་ཕྱིར་ཞེ་ན། དགེ་བའི་བཤེས་གཉེན་ལ་བསྟེན་པ་ནི། དགེ་བ་འཕེལ་བར་འགྱུར། སྡིག་པའི་གྲོགས་པོ་ལ་བསྟེན་པ་ནི། སྡིག་པའི་ཆོས་སྐྱེ་བར་འགྱུར་ཏེ། དཔེར་ན། རླུང་གི་རང་
299a
> ༄#། །བཞིན་ནི། མི་ལྡོག་མོད་ཀྱི། ཙནྡན་གྱི་ཚལ་ལམ། ཙམ་པ་གའི་ཚལ་ལས་འོངས་ན། རླུང་དེ་ལས་དྲི་བསུང་ཞིམ་པ་བྲོའོ། ། གལ་ཏེ་མནམ་ཞིང་རྩོག་པའམ། རོ་སུངས་པའི་ཕྱོགས་ནས་འོངས་ན། རླུང་དེ་ཡང་མནམ་མོ། །དཔེར་ན། གོས་གསར་པ་ཡང་སྤོས་ཀྱི་སྣོད་དུ་བཅུག་ན། གོས་དེ་ལ་ཡང་སྤོས་བྲོའོ། །གལ་ཏེ་མནམ་པ་སུངས་པའི་གནས་སུ་བཞག་ན། གོས་དེ་ཡང་མནམ་མོ། །དགེ་བའི་བཤེས་གཉེན་ལ་བསྟེན་ན་དགེ་བ་ཕྱིར་ཞིང་བཞིན་འཕེལ་ལ། སྡིག་པའི་གྲོགས་པོ་ལ་བསྟེན་ན། སྡིག་པ་སྐྱེ་ཞིང་འཕེལ་བར་འགྱུར་གྱི། དེ་བས་ན་བདག་གི་བུ་འདི་ཡང་དགེ་སློང་བཙུན་པ་འདི་ལ་ཕུལ་ཏེ་རབ་ཏུ་དབྱུང་ངོ་སྙམ་བསམས་ནས་དགེ་སློང་དེ་གང་ན་བ་དེར་སོང་སྟེ་འདི་སྐད་ཅེས་སྨྲས་སོ། །བདག་གི་བུ་འདི་རབ་ཏུ་འབྱུང་བར་དད་ཀྱི། བཙུན་པས་ཐུགས་བརྩེ་བར་དགོངས་ཏེ་རབ་ཏུ་དབྱུང་བར་གསོལ་ཏོ། །གལ་ཏེ་མི་གནང་ན། སླར་ཡང་ཁྱིམ་དུ་ཁྲིད་དེ་མཆིའོ། །དེ་ནས་དགེ་སློང་གིས་རྫུ་འཕྲུལ་གྱི་མིག་གིས་བརྟགས་ན། ཁྱེའུ་འདི་རབ་ཏུ་བྱུང་ན་ཚུལ་ཁྲིམས་དག་པར་སྲུང་ཞིང་སངས་རྒྱས་ཀྱི་ཆོས་འཕེལ་བར་རྟོགས་
299b
> ནས་རབ་ཏུ་ཕྱུང་སྟེ་དགེ་ཚུལ་དུ་བྱས་སོ། །དེའི་ཚེ་ན་འཚོ་བ་སྦྱོར་བའི་དགེ་བསྙེན་དེ་ལ་ཁྱིམ་བདག་མཛའ་བོ་ཞིག་ཡོད་དེ། ཁྱིམ་བདག་དེས་དུས་ཀྱི་སྟོན་མོ་ཞིག་སྦྱར་ནས་དགེ་བསྙེན་དེ་དང ། ཆུང་མ་དང ། བུ་དང ། བྲན་མོ་དང ། ཁྱིམ་གང་གི་མི་ཀུན་བོས་སོ། །ཕྱི་ཉིན་མགྲོན་དུ་འགྲོ་བ་ལས་དགེ་བསྙེན་དེས་འདི་སྙམ་དུ་བསམས་སོ། །བདག་ཅག་ཀུན་མགྲོན་དུ་འགྲོ་ན། ཁྱིམ་འདི་སུས་བསྲུངས། གལ་ཏེ་ནན་གྱིས་འགའ་ཞིག་བཞག་ན། དེའི་སྒོར་ཕབ་སྟེ་སྐལ་བ་ཆད་པར་འགྱུར་གྱི། དེ་ལ་སུ་ཞིག་འདུག་པར་དགའ་ན། མགྲོན་ལས་ཕྱིར་འཁོར་མ་ཐག་ཏུ་དྲིན་གཟོ་ཞིང་ལན་བྱའོ། །ཞེས་སྨྲས་པ་དང ། དགེ་བསྙེན་དེའི་བུ་མོ་ཞིག་ཡོད་པས། དེས་ཕ་ལ་འདི་སྐད་ཅེས་སྨྲས་སོ། །ཁྱིམ་མི་འདི་དག་ཐམས་ཅད་མགྲོན་དུ་མཆི་བར་བགྱིས་ཏེ། བདག་གིས་ཁྱིམ་བསྲུང་ངོ ། །ཞེས་སྨྲས་ནས་ཕས་ཀྱང་ཤིན་ཏུ་ལེགས་སོ་ལེགས་སོ། །ཁྱོད་ཀྱིས་ཁྱིམ་བསྲུངས་ན། ཁྱོད་ཀྱི་མ་དང་མི་འདྲ་བ་མེད་དེ། སྟོར་བའམ། ཉེས་ལ་འབྱུང་གིས་མི་དགོས་སོ། །ཞེས་སྨྲས་ནས་ཁྱིམ་གང་གི་མི་ཀུན་མགྲོན་དུ་དོང་ངོ ། །བུ་མོས་ཀྱང་སྒོ་རྣམས་དམ་དུ་བཅད་དེ་གཅིག་པུ་ཁྱིམ་ན་འདུག་གོ་།དེའི་ཉིན་
300a
> ༄#། །བར་དགེ་བསྙེན་དེ་བྲེལ་བས། བསོད་སྙོམས་བསྐྱལ་བ་བརྗེད་ནས་དེའི་ཚེ་ན་དགེ་སློང་དེ་འདི་སྙམ་དུ་ཉི་མ་ཡང་ཡོལ་ལ་ཁད་ན། ། ཁྱིམ་པ་ལ་དོན་མང་བྱས་བརྗེད་པ་སྲིད་དམ། ཟན་མི་ཟ་བའི་མི་རིགས་ཀྱི། ལེན་དུ་གཏང་ངོ་སྙམ་བསམས་ནས་དགེ་ཚུལ་དེ་ལ་བསྒོ་བ། ཁྱོད་སྤྱོད་ལམ་ཤིན་ཏུ་བསྡམས་ཏེ་བཅོམ་ལྡན་འདས་ཀྱིས་གསུངས་པ་ལྟར་གྲོང་ནས་བསོད་སྙོམས་ལོངས་ཤིག་།ཇི་ལྟར་བུང་བ་རྣམས་མེ་ཏོག་གི་ཁ་ཏོག་དང ། བསུང་ལ་མི་གནོད་པ་བཞིན་ཆགས་པར་མ་བྱེད་པར་ཁྱིམ་ནས་བསོད་སྙོམས་ལོངས་ཤིག་།གཟུགས་དང ། སྒྲ་དང ། དྲི་དང ། རོ་དང ། རེག་བྱ་ལ་མ་ཆགས་པར་དབང་པོ་རྣམས་སྲུང་ཤིག་།གལ་ཏེ་ཚུལ་ཁྲིམས་བསྲུངས་ན། གདོན་མི་ཟ་བར་འབྲས་བུ་ཐོབ་པར་འགྱུར་གྱི། ལྷ་སྦྱིན་ལྟ་བུ་མདོ་སྡེ་མང་དུ་ཁ་ཏོན་ཤེས་ཀྱང་ཉེས་པ་བྱས་ཏེ་ཚུལ་ཁྲིམས་ཉམས་པས། མཚམས་མེད་པའི་སེམས་ཅན་དམྱལ་བར་སྐྱེས་སོ། །ཀོ་ཀ་ལི་ཀ་ལྟ་བུ་སྐུར་པ་འདེབས་ཤིང་ཚུལ་ཁྲིམས་ཉམས་པས། དེ་ཡང་སེམས་ཅན་དམྱལ་བར་སྐྱེས་སོ། །ཙུའུ་པནྟ་ལྟ་བུ་ཚིགས་སུ་བཅད་པ་གཅིག་ལས་མི་ཤེས་མོད་ཀྱི། ཚུལ་ཁྲིམས་བསྲུངས་པས་དགྲ་
300b
> བཅོམ་པར་གྱུར་ཏོ། །ཚུལ་ཁྲིམས་ནི། མྱ་ངན་ལས་འདའ་བའི་སྒོར་འཇུག་ཅིང ། ཤིན་ཏུ་བདེ་བའི་རྒྱུར་འགྱུར་ཏེ། དཔེར་ན། བྲམ་ཟེའི་ཆོས་ཀྱིས་ཟླ་བ་གསུམ་མམ།་ཟླ་བ་བཞིའི་བར་དུ་མཆོད་སྟོན་བྱེད་དེ། དེ་ཡང་བྲམ་ཟེ་མཁས་པ་རིག་པ་དང་ལྡན་པ། ཚུལ་ཁྲིམས་སྲུང་བ། ཚངས་པར་སྤྱོད་པ་དག་འབོད་ཀྱི། ཐམས་ཅད་ནི།་མ་ཡིན་ནོ། །གང་སྟོན་མོ་ལ་འོངས་པ་ལག་པའི་མཁྲིག་མ་ལ་ཀེའུ་ལེའི་རྒྱས་འདེབས་སོ། །བྲམ་ཟེ་གཅིག་ཅིག་ཡོན་ཏན་དང་ལྡན་ཡང་རང་བཞིན་གྱིས་སྲེད་པ་ཅན་ཞིག་ཡིན་པས། སྦྲང་རྩི་དང་མངར་བ་ལ་ཆགས་པས་མཁྲིག་མ་ལ་རྒྱས་བཏབ་པ་བལྡགས་ཏེ་མི་སྣང་བར་བྱས་སོ། །ཕྱི་ཉིན་སྟོན་མོ་ལ་འདུས་ནས་སྒོ་བས་རྒྱ་བལྟས་ན།་ཀུན་ཏུ་རྒྱུ་དེ་ལ་རྒྱ་མེད་པར་གྱུར་ནས་སྒོ་བས་ཀྱང་ནང་དུ་མ་བཏང་ནས་ཁྱོད་ཀྱི་རྒྱ་ག་རེ་ཞེས་དྲིས་ན། མངར་བས་བལྡགས་ཏེ་མེད་པར་བྱས་སོ། །ཞེས་སྨྲས་སོ། །ཀུན་ཏུ་རྒྱུ་དེ་མངར་བ་ཅུང་ཟད་ཙམ་ལ་ཆགས་པས། ཟླ་བ་བཞིའི་སྟོན་མོ་ཁ་ཟས་ཁ་དོག་དྲང་དྲི་བསུང་དུ་ལྡན་ཞིང ། རོ་ཞིམ་པོ་རྣམ་པ་སྣ་ཚོགས་དང ། ཡོན་རིན་པོ་ཆེ་མང་པོ་ཡང་ཤོར་གྱི། ཁྱོད་ཀྱང་དེ་ལྟ་བུར་ཅུང་ཟད་ཙམ་ལ་ཆགས་པའི་ཕྱིར་ཚུལ་ཁྲིམས་ཀྱི་རྒྱ་ཉམས་པར་མ་བྱེད་ཅིག་།ལྷ་དང་མིའི་འདོད་པ་ལྔའི་རོ་ཞིམ་པོ་དང ། ཟག་པ་
301a
> ༄#། །མེད་པ་དང ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང ། མྱ་ངན་ལས་འདས་པའི་བདེ་བ་དང ། ཆོས་རིན་པོ་ཆེ་ཚད་མེད་པ་དག་སྟོར་བར་གྱུར་ཏ་རེ། དུས་གསུམ་གྱི་སངས་རྒྱས་ཀྱི་ཚུལ་ཁྲིམས་ཉམས་ཤིང ། དཀོན་མཆོག་གསུམ་དང ། སློབ་དཔོན་དང ། དགེ་འདུན་གྱི་རིགས་སུན་པར་མ་བྱེད་ཅིག་།ཅེས་བསྒོ་ནས་སློབ་དཔོན་གྱི་རྐང་པ་ལ་མགོ་བོས་ཕྱག་འཚལ་ཏེ་དེའི་ཁྱིམ་དུ་སོང་ངོ ། །དེར་ཕྱིན་པ་དང་སྒོ་བརྡུངས་ནས་བུ་མོས་སུ་ཡིན་ཞེས་བོས་སོ། །དགེ་ཚུལ་གྱིས་བདག་སློབ་དཔོན་གྱི་བསོད་སྙོམས་ལེན་དུ་འོངས་སོ། །ཞེས་སྨྲས་པ་དང ། བུ་མོ་དེ་རབ་ཏུ་དགའ་ནས་ད་ནི། རེ་བ་རྙེད་དོ་སྙམ་ནས་སྒོ་ཕྱེའོ། །དགེ་ཚུལ་ནང་དུ་འོངས་པ་དང ། བུ་མོ་དེ་ཡང་ལོ་བཅུ་དྲུག་ལས་མ་ལོན་ཏེ། མངའ་བྱད་ལེགས་པ། བལྟ་ན་སྡུག་པ། མཛེས་པ་བཟང་བ་ཞིག་སྟེ། འདོད་ཆགས་ཀྱིས་བསླུའོ། །སྙམ་སྟེ་དགེ་ཚུལ་དེའི་མདུན་དུ་བསླུ་བ་རྣམ་པ་མང་པོ་བྱས་ཏེ་ཤིན་ཏུ་འདོད་པས་དགེ་ཚུལ་དེ་ལ་བརྟགས་སོ། །དགེ་ཚུལ་དེ་འདི་སྙམ་དུ། བུ་མོ་འདི་རླུང་ནད་ལངས་སམ། སྨྱོས་སམ། འོན་ཏེ་བུ་མོ་འདི་འདོད་ཆགས་ཀྱིས་གདུངས་ཏེ། འདོད་ཆགས་ཀྱི་མེས་ངའི་ཚུལ་ཁྲིམས་ཚིག་པར་
301b
> བྱེད་དམ་སྙམ་བསམས་ནས་སྤྱོད་ལམ་ཤིན་ཏུ་བསྡམས་ཏེ་མདངས་ཀྱང་མ་གྱུར་པར་འདུག་གོ་།བུ་མོ་དེས་སྨད་ལྔས་ལ་གཏུགས་ཏེ་ཕྱག་བྱས་ནས་དགེ་ཚུལ་ལ་འདི་སྐད་ཅེས་སྨྲས་སོ། །བདག་རྟག་ཏུ་རེ་བ་ཡང་དེང་གི་དུས་སུ་གྲུབ་བོ། །བདག་ཁྱོད་ལ་སྨྲ་བ་ཞིག་ཡོད་དེ། རྟག་ཏུ་དྲན་ན་སྐབས་མ་རྙེད་དོ། །ཁྱོད་ཀྱང་རྟག་ཏུ་བདག་ལ་དགོངས་པ་དྲན་ན། བདག་གི་རེ་བ་བསྐང་དུ་གསོལ། ཁྱིམ་འདིའི་ནང་ན་རིན་པོ་ཆེ་དང ། གསེར་དང ། དངུལ་དང ། བང་མཛོད་མང་བ་ནི། རྣམ་ཐོས་ཀྱི་བུའི་གཏེར་དང་འདྲ་བར་ཡོད་ཀྱང་བདག་པོ་མེད་ཀྱི། ཁྱོད་ཁྱིམ་དང་བཅས་པའི་བདག་པོ་མཛད་དུ་གསོལ། བདག་ཁྱོད་ཀྱི་ཁོལ་མོ་བགྱིས་ཏེ་བཀུར་སྟི་དང ། རིམ་གྲོ་བགྱིའོ། འདི་ལས་མི་འགལ་ཞིང་བདག་གི་རེ་བ་བསྐང་དུ་གསོལ། དགེ་ཚུལ་གྱིས་བསམ་པ། བདག་གིས་སྡིག་པའི་ལས་ཅི་ཞིག་བྱས་ན། འདི་ལྟ་བུའི་རྐྱེན་དང་ཕྲད་པར་གྱུར། བདག་ལུས་དང་སྲོག་ཡལ་ཡང་བླའི། དུས་གསུམ་གྱི་སངས་རྒྱས་ཀྱིས་བཅས་པའི་ཚུལ་ཁྲིམས་ཉམས་པར་མི་བྱའོ། །སྔོན་དགེ་སློང་དག་སྨད་ཚོང་མའི་ནང་དུ་ཕྱིན་ཀྱང་མེའི་དོང་དུ་མཆོངས་ཀྱང་བླའི། ཚུལ་ཁྲིམས་ཉམས་པར་མི་བྱེད་དོ། །གཞན་ཡང་དགེ་སློང་དག་ནི། མི་རྒོད་ཀྱིས་བཅོམ་ནས་རྩཝ་ལ་བཏགས་ཏེ་རླུང་གིས་བཤུད་ཅིང་ཉི་མས་
302a
> ༄#། །བསྲེགས་པ་དང ། སྲིན་བུ་མང་པོ་ཟ་ཡང་ཚུལ་ཁྲིམས་བསྲུང་བའི་ཕྱིར་རྩཝ་གཅོད་ཅིང་མི་འགྲོའོ། །བྱ་གག་གིས་ནོར་བུ་མེད་པ་དགེ་སློང་གིས་མཐོང་ཡང་ཚུལ་ཁྲིམས་བསྲུང་བའི་ཕྱིར་སྡུག་བསྔལ་མྱོང་བར་བྱེད་ཀྱི་གཏམ་མི་ཟེར་རོ། །གྲུ་ཞིག་པ་ལས་དགེ་སློང་གིས་ཤིང་ལེབ་ལ་འཇུ་བ་ཡང་ཚུལ་ཁྲིམས་བསྲུང་བའི་ཕྱིར་ཤིང་ལེབ་དེ་དགེ་སློང་གྲོགས་པོ་གྲལ་མཐོ་བ་ལ་ཕུལ་ནས་རྒྱ་མཚོར་ཤི་བ་ལ་སོགས་པ་དེ་དག་འབའ་ཞིག་སངས་རྒྱས་ཀྱི་ཉེ་གནས་ཚུལ་ཁྲིམས་སྲུང་བ་ཡིན་གྱི། བདག་ཅག་གིས་བསྲུང་བ་མ་ཡིན་ནམ། དེ་བཞིན་གཤེགས་པ་ཡང་དེ་འབའ་ཞིག་གི་སྟོན་པ་ཡིན་གྱི། བདག་ཅག་གི་སྟོན་པ་མ་ཡིན་ནམ། དཔེར་ན། ཙམ་པ་ཀའི་མེ་ཏོག་ཟར་མ་དང་ལྷན་ཅིག་ཏུ་བཙིར་ན། ཙམ་པ་ཀའི་དྲི་ཞིམ་པོ་ཡང་ཟར་མའི་མར་ལ་བྲོ་བར་འགྱུར་ཏེ། བདག་ཀྱང་དེ་ལྟ་མ་ཡིན་ནམ། དགེ་བའི་བཤེས་གཉེན་གྱིས་ཡོངས་སུ་ཟིན་ན། ཅིའི་ཕྱིར་དེང་འདིར་སྡིག་པ་མི་དགེ་བའི་ཆོས་བྱེད་པར་འགྱུར། ལུས་དང་སྲོག་ཡལ་ཡང་བླའི། ནམ་དུ་ཡང་ཚུལ་ཁྲིམས་ཉམས་ཤིང་སངས་རྒྱས་དང ། ཆོས་དང ། དགེ་འདུན་དང ། ཕ་མ་དང ། སློབ་དཔོན་དང ། བ་མའི་རིགས་
302b
> སུན་འབྱིན་པར་མི་བྱའོ། །ཡང་བསམ་པ། གལ་ཏེ་བདག་བྲོས་ན་ནི། བུ་མོ་དེ་འདོད་ཆགས་ཀྱིས་གདུངས་པས་ཁྲེལ་བ་དང ། ངོ་ཚ་བ་ཡང་མེད་དེ། ཕྱི་རོལ་ཏུ་བདག་ཟིན་ནས་བདག་ལ་སྐུར་པ་འདེབས་པར་འགྱུར་ཏེ། གྲོང་མི་དག་གིས་མཐོང་ན་རིགས་སུན་འབྱིན་པར་འགྱུར་གྱི། བདག་ནི། ངེས་པར་ཁང་པ་འདི་ཉིད་དུ་ཚེ་འཕོ་བར་བྱའོ་སྙམ་དུ་བསམས་ནས་བུ་མོ་དེ་ལ་འདི་སྐད་ཅེས་སྨྲས་སོ། །སྒོ་དག་དམ་དུ་ཆོད་ཅིག་།བདག་ཁང་པ་གཅིག་གི་ནང་དུ་བྱ་བ་ཅུང་ཟད་ཅིག་ཡོད་པ་དེ་བྱས་ནས་ཁྱོད་དང་ཕྲད་པར་བྱའོ། །ཞེས་བསྒོ་ནས་བུ་མོ་ཕྱི་ཞིག་ཏུ་སོང་བའི་འོག་ཏུ་དགེ་ཚུལ་ཁང་པ་གཅིག་གི་ནང་དུ་ཞུགས་ནས་སྒོ་གཏན་དམ་དུ་བཅུག་སྟེ་ནང་ནས་སྤུ་གྲི་རྙེད་པས་རབ་ཏུ་དགའ་སྟེ་ལུས་ལ་གྱོན་པའི་གོས་རྣམས་ཀྱང་ཕུད་ནས་གདང་བུ་ལ་གཟར་ཏེ་ཐལ་མོ་སྦྱར་ནས་གྲོང་ཁྱེར་ཀུ་ཤེ་གང་ན་བར་སངས་རྒྱས་མྱ་ངན་ལས་འདས་པའི་གནས་ལོགས་སུ་པུས་མོ་ས་ལ་བཙུགས་ནས་འདི་སྐད་ཅེས་ཡི་དམ་བཅས་སོ། །བདག་ནི། སངས་རྒྱས་དང ། ཆོས་དང ། དགེ་འདུན་སྤོང་བ་མ་ལགས། མཁན་པོ་དང་སློབ་དཔོན་སྤོང་བ་མ་ལགས། ཚུལ་ཁྲིམས་སྤོང་བ་མ་ལགས་ཀྱི། ཚུལ་ཁྲིམས་བསྲུང་བའི་སླད་དུ་ལུས་འདི་སྤོང་ངོ ། །བདག་གར་སྐྱེས་ཀྱང་སངས་རྒྱས་ཀྱི་བསྟན་པ་ལ་རབ་ཏུ་འབྱུང་བ་དང །
303a
> ༄#། །ཚངས་པར་སྤྱོད་པ་རྣམ་པར་དག་པ་དང ། ཟག་པ་ཟད་པ་དང ། འབྲས་བུ་གྲུབ་པར་གྱུར་ཅིག་ཅེས་སྨོན་ལམ་བཏབ་ནས་རང་གི་མགུལ་བ་བཅད་དེ་ཚེ་འཕོས་སོ། །ཁྲག་གིས་ས་ཡོག་ནས་ལུས་ཀྱང་ཁྲག་གིས་དམར་པོར་གྱུར་ཏོ། །དེའི་ཚེ་ན་བུ་མོས་བསམ་པ། རིང་པོར་ཐོགས་སྙམ་ནས་སྒོ་དྲུང་དུ་སོང་སྟེ་བོས་ན་ཅང་མི་ཟེར་རོ། །བུ་མོས་སྒོ་ཕྱེ་སྟེ་བལྟས་ན། ཚེ་འཕོས་ཟིན་པ་མཐོང་ནས་བསམ་པ་བཞིན་དུ་མ་གྱུར་པས་འདོད་པའི་སེམས་ཀྱང་ཞི་སྟེ། བུ་མོ་དེ་ཤིན་ཏུ་མི་དགའ་བས་གདུངས་བས་སྐྲ་ཡང་བཤིག ། གདོང་ཡང་སེན་མོས་བྲད་དེ་ས་ལ་འགྲེ་ཞིང་དུའོ། །བུ་མོའི་ཕ་མ་སྟོན་མོ་ལས་ཕྱིར་ལོག་ནས་སྒོ་བརྡུངས་ཏེ་བོས་ན་བུ་མོས་ཅང་མི་སྨྲ་བས། མི་ཞིག་ནང་དུ་བཏང་སྟེ་སྒོ་འབྱེད་དུ་བཅུག་ན། བུ་མོ་དེ་ལྟ་བུར་གྱུར་པ་མཐོང་བ་དང ། བུ་མོ་ལ་སྨྲས་པ། ཁྱོད་ཅི་ཉེས། གཅིག་གིས་ཀྱལ་ཀ་བྱས་ཏེ་ཁྱོད་ཀྱི་རིགས་སུན་འབྱིན་པར་བྱས་སམ་ཞེས་དྲིས་ན། བུ་མོ་ཅང་མི་སྨྲ་བར་འདི་སྙམ་དུ་བསམས་སོ། །བདག་གིས་དྲང་པོར་སྨྲས་ན་ནི། རབ་ཏུ་ཡང་ངོ་ཚ་བ་ཞིག་ན། གལ་ཏེ་དགེ་ཚུལ་གྱིས་ཀྱལ་ཀ་བྱས་ཞེས་སྨྲས་ན་ནི། འཕགས་པ་ལ་སྐུར་པས་སེམས་ཅན་དམྱལ་བར་ལྟུང་སྟེ་སྡུག་བསྔལ་མང་པོ་མྱོང་བར་འགྱུར་གྱི། མི་སླུ་བར་དྲང་པོར་སྨྲའོ་སྙམ་དུ་བསམས་ནས་བདག་གཅིག་པུ་ཁང་པ་སྲུང་ཞིང་
303b
> མཆིས་པ་ལས། དགེ་ཚུལ་དེ་སློབ་དཔོན་གྱི་བསོད་སྙོམས་ལེན་དུ་འོངས་ནས་བདག་གི་འདོད་ཆགས་ཀྱི་མེ་མཆེད་པས་དགེ་ཚུལ་ལ་སྟེགས་ན། ཚུལ་ཁྲིམས་སྲུང་བ་ཞིག་པས། སེམས་འགྱུར་དུ་མ་བཏུབ་སྟེ་དགེ་ཚུལ་དེ་ཐབས་བྱས་ནས་ཁང་པའི་ནང་དུ་ཞུགས་ཏེ་ཚེ་འཕོས་པར་གྱུར་ཏོ། །བདག་གི་ལུས་རྩོག་པ་འདིས་སྣོད་ཡོངས་སུ་དག་པ་མ་རུང་བར་བྱས་པའི་སྟེང་དུ་ཁ་ན་མཐོ་བའི་ཉེས་པ་བགྱིས་པས་བདག་མི་དགའོ། །དེ་སྐད་ཅེས་སྨྲས་པ་དང ། བུ་མོའི་ཕས་ཐོས་ནས་ངོ་མཚར་དུ་གྱུར་ཏེ། དེ་ཅིའི་ཕྱིར་ཞེ་ན། ཀུན་ནས་ཉོན་མོངས་པ་ནི། ཆོས་ཉིད་ཀྱིས་དེ་དང་འདྲ་བར་རྟོགས་པའི་ཕྱིར་རོ། །བུ་མོ་ལ་སྨྲས་པ། ཆོས་ཐམས་ཅད་མི་རྟག་པ་ཡིན་གྱི། མྱ་ངན་མ་བྱེད་ཅིག་ཅེས་བསྒོ་ནས་ཁང་པར་ཞུགས་ཏེ་བལྟས་ན། དགེ་ཚུལ་གྱི་རུས་བུ་ཙནྡན་དམར་པོ་ལྟར་ཁྲག་གིས་བསྒོས་པ་མཐོང་ནས་ཕྱག་བྱས་ཏེ་སངས་རྒྱས་ཀྱི་ཚུལ་ཁྲིམས་བསྲུང་བའི་ཕྱིར་ལུས་དང་སྲོག་ལ་ཡང་མི་ལྟ་བ་ལེགས་སོ། །ཞེས་བསྔགས་སོ། །དེའི་ཚེ་ན་རྒྱལ་པོ་དེའི་ཡུལ་ཁྲིམས་ཀྱིས་དགེ་སློང་དག་ཁྱིམ་པའི་ཁྱིམ་དུ་ཆོ་འཕོས་ན། གསེར་གྱི་དོང་ཚེ་སྟོང་བླར་འབུལ་ལོ། །དེའི་ཚེ་དགེ་བསྙེན་དེ་ཡང་གསེར་གྱི་དོང་ཚེ་སྟོང་ཁྱེར་ནས་ཕོ་བྲང་དུ་སོང་སྟེ། རྒྱལ་པོ་ཆེན་པོ། བདག་ལ་ནོངས་པ་བྱུང་གི་།དོང་ཚེ་འདི་དག་བཞེས་ཤིག་ཅེས་གསོལ་པ་དང ། རྒྱལ་
304a
> ༄#། །པོས་དེ་ལ་བཀའ་སྩལ་པ། ཁྱོད་ནི། ཡུལ་ཕྱོགས་ན་དཀོན་མཆོག་གསུམ་ལ་དད་ཅིང་དམ་པའི་ཆོས་ལ་མོས་པས་རང་བཞིན་གྱིས་དྲང་ལ་སྤྱོད་པ་ཉམས་འོག་ཏུ་ཆུད་པ་ནི། ཁྱོད་གཅིག་པུར་ཟད་ན། ཁྱོད་ལ་ཉེས་པ་ཅི་ཞིག་བྱུང ། དགེ་བསྙེན་གྱིས་བདག་གི་བུ་མོ་སྨད་དེ། དགེ་ཚུལ་གྱིས་ཇི་ལྟར་ཚུལ་ཁྲིམས་བསྲུངས་པའི་ཡོན་ཏན་བསྔགས་ནས་ཇི་ལྟར་གྱུར་པ་རྒྱས་པར་གསོལ་ཏོ། །རྒྱལ་པོས་བཀའ་སྩལ་པ། དགེ་ཚུལ་ཚུལ་ཁྲིམས་བསྲུང་བའི་ཕྱིར་ལུས་དང་སྲོག་ལ་ཡང་མ་བལྟས་པར་ཟད་ཀྱི། ཁྱོད་ལ་ཉེས་པ་མེད་ཀྱི། དོང་ཚེ་ཁྱེར་ལ་ཕྱིར་ཁྱིམ་དུ་སོང་ཞིག་།ང་ཡང་ཁྱོད་ཀྱི་ཁྱིམ་དུ་དགེ་ཚུལ་དེ་ལ་མཆོད་པ་ཞིག་བྱེད་དུ་འོང་ངོ ། །ཞེས་བཀའ་སྩལ་ནས་གསེར་གྱི་རྔ་བརྡུངས་ཏེ་འཁོར་ཐམས་ཅད་འདུས་ལ་ཞམ་འབྲིང་དུ་ཆོས་ཤིག་།དགེ་བསྙེན་དེའི་ཁྱིམ་དུ་འདོང་ངོ ། །ཞེས་བཀར་བཏགས་སོ། །དེ་ནས་རྒྱལ་པོ་དེའི་ཁྱིམ་དུ་གཤེགས་ཏེ་དགེ་ཚུལ་གྱི་རུས་བུ་ཙནྡན་དམར་པོ་ལྟར་ཁྲག་གིས་བསྒོས་པ་གཟིགས་ནས་ཕྱག་འཚལ་ཏེ་ཡོན་ཏན་བསྔགས་ནས་རིན་པོ་ཆེ་སྣ་ཚོགས་ཀྱིས་བརྒྱན་པའི་ཤིང་རྟ་ལ་རུས་བུ་བཞག་ནས་གང་ན་ཐང་བདེ་བ་ཀུན་གྱིས་མཐོང་བའི་གནས་སུ་སོང་སྟེ་སྤོས་ཀྱི་ཤིང་གིས་བསྲེགས་ནས་མཆོད་པ་བྱས་སོ། །བུ་མོ་དེ་ཡང་འཇིག་རྟེན་ན་དཀོན་པར་ཤིན་ཏུ་
304b
> བཟང་མོ་ཞིག་སྟེ། བུ་མོ་དེ་ཡང་གནས་མཐོ་བ་ཀུན་གྱིས་མཐོང་བ་ཞིག་ཏུ་བཞག་སྟེ་འཁོར་མང་པོ་ཐམས་ཅད་ཀྱིས་ལེགས་པར་མ་མཐོང་བར་བྱས་ཏེ་མི་མང་པོ་ལ་འདི་སྐད་ཅེས་བཀའ་སྩལ་ཏོ། །བུ་མོ་འདི་ལྟར་གཟུགས་བྱད་ལེགས་ཤིང་ཤིན་ཏུ་བཟང་བ། མཛེས་པ་འདི་ལ་འདོད་ཆགས་དང་མ་བྲལ་བ་སུ་ཞིག་ཆགས་པར་མི་འགྱུར་ན། དགེ་ཚུལ་འདི་འབྲས་བུ་ཡང་མ་ཐོབ་སྟེ། སྐྱེ་བ་དང་འཇིག་པར་བཅས་པའི་ལུས་ཅན་འདིས་ཀྱང་ཚུལ་ཁྲིམས་ཀྱི་ཕྱིར་ལུས་དང་སྲོག་གཏོང་ཕོད་པ་ནི། ངོ་མཚར་ཡ་མཚན་ཆེའོ། །ཞེས་བསྒྲགས་ནས་དེའི་སློབ་དཔོན་ཡང་སྤྱན་དྲངས་ཏེ་འཁོར་མང་པོ་ལ་དམ་པའི་ཆོས་སྟོན་དུ་བཅུག་ནས་འཁོར་དེའི་ནང་དུ་འདུས་པ་ཐམས་ཅད་ཀྱིས་ཆོས་བསྟན་པ་ཐོས་ནས་ཁ་ཅིག་ནི། རབ་ཏུ་བྱུང་ཞིང་ཚུལ་ཁྲིམས་སྲུང་བར་གསོལ་ཏོ། ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ། ཐམས་ཅད་རྗེས་སུ་ཡི་རང་ནས་མངོན་པར་དགའོ། །དགེ་ཚུལ་གྱིས་ཚུལ་ཁྲིམས་བསྲུངས་པའི་ལེའུ་སྟེ་བཅུ་དྲུག་པའོ།། །།ཁྱིམ་བདག་དབང་པོ་མེད་པའི་ལེའུ། དེའི་ཚེ་བཅོམ་ལྡན་འདས་མཉན་ཡོད་ན་རྒྱལ་པུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་ཆེན་པོའི་དགེ་འདུན་དང་ཐབས་ཅིག་ཏུ་བཞུགས་ཏེ་ཆོས་སྟོན་ཏོ། །དེའི་ཚེ་ཡུལ་དེ་ན་ཁྱིམ་བདག་ཆེན་པོ། ཕྱུག་
305a
> ༄#། །པ།་ནོར་མང་བ། གསེར་དང ། དངུལ་དང ། རིན་པོ་ཆེ་སྣ་བདུན་དང ། གླང་པོ་ཆེ་དང ། རྟ་དང ། བ་ལང་དང ། ལུག་དང ། བྲན་ཕོ་དང ། བྲན་མོ་དང ། ལས་བྱེད་པའི་མི་རབ་ཏུ་མང་བ། བང་མཛོད་རབ་ཏུ་མང་བ། བང་མཛོད་རབ་ཏུ་གང་བ་ཞིག་ལ་བུ་ཁྱེའུ་ནི། མེད་མོད་ཀྱི། བུ་མོ་ནི། ལྔ་ཡོད་དེ། དེ་ཡང་མངའ་བྱད་མཛེས་པ། ཤེས་པའི་བློ་དང་ལྡན་པ་ཤ་སྟག་གོ་།དེའི་ཚེ་ཁྱིམ་བདག་དེའི་ཆུང་མ་སྦྲུམ་པ་ལས་ཁྱིམ་བདག་དེ་ཚེ་འཕོས་པར་གྱུར་ཏོ། །དེའི་ཚེ་ན་རྒྱལ་པོའི་ཡུལ་ཆོས་ཀྱིས་བུ་ཕོ་མེད་ན། ལོངས་སྤྱོད་ཅི་བདོག་པ་ཐམས་ཅད་རྒྱལ་པོས་བཞེས་ཏེ། རྒྱལ་པོས་ཀྱང་བློན་པོ་ཆེན་པོ་གཅིག་དེའི་ནོར་ཕྱུགས་དང་ལོངས་སྤྱོད་ཅི་ཡོད་པ་ཐམས་ཅད་བརྩིས་ཏེ་བླར་བཞེས་པར་བཀའ་སྩལ་པ་དང ། བུ་མོ་དེ་དག་གིས་བསམ་པ། བདག་ཅག་གི་མའི་རུམ་མི་བདེ་བ་ཕོའམ། མོ་ཡང་གཏོལ་མེད་དེ། བུ་མོ་ཞིག་བཙས་ན་ནི། ནོར་ཕྱུགས་ཀྱང་རྒྱལ་པོས་བཞེས་པར་ཟད་ན། གལ་ཏེ་ཁྱེའུ་ཞིག་བྱུང་ན་ཁོ་ནོར་བདག་དངོས་ཡིན་ནོ་སྙམ་བསམ་ནས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ཅག་གི་ཕ་གུམ་པས་བུ་ཕོ་མ་མཆིས་པའི་སླད་དུ་ནོར་ཕྱུགས་རྒྱལ་པོས་བཞེས་པ་འདི་ད་ལྟར་བདག་ཅག་གི་མའི་རུམ་མི་བདེ་བ་བྱེ་བྲག་མ་ཕྱེའི་བར་དུ་བཞག་ཅིང ། གལ་ཏེ་བུ་མོ་ཞིག་ལགས་
305b
> ན། བཞེས་པས་ཀྱང་སླེབ་སྟེ། གལ་ཏེ་ཁྱེའུ་ཞིག་ལགས་པར་གྱུར་ན། ནོར་བདག་དངོས་ལགས་སོ། །རྒྱལ་པོ་རབ་གསལ་རྒྱལ་དེ་ཡང་དྲང་ཞིང་ཆོས་ཀྱིས་སྲིད་འཚོ་བས། བུ་མོ་དེ་དང ། གིས་གསོལ་པ་བཞིན་དུ་བྱས་སོ། །དེ་ནས་རིང་པོ་མ་ལོན་པར་ཟླ་བ་དགུ་ཚང་ནས་བུ་ཕོ་ཞིག་བྱུང་སྟེ། དེ་ལ་རྣ་བ་ཡང་མེད། མིག་ཀྱང་མེད། སྣ་ཡང་མེད། ལྕེ་ཡང་མེད། རྐང་ལག་ཀྱང་མེད་དེ། ཕོ་མཚན་འབའ་ཞིག་ཡོད་པའི་གོང་གོང་པོ་ཞིག་བྱུང་བས། དེའི་མིང་ཡང་མན་ཛི་བྱི་ལ་ཞེས་བྱ་བར་བཏགས་སོ། །དེ་ནས་བུ་མོ་དེ་དག་གིས་ཁྱེའུ་ཞིག་བྱུང་ངོ ། ། ཞེས་གསོལ་པ་དང ། རྒྱལ་པོས་བསམ་པ། མིག་དང ། རྣ་བ་དང ། སྣ་དང ། ལྕེ་དང ། རྐང་ལག་ལ་སོགས་པ་ཡོད་པས་ནི། ནོར་བདག་ཏུ་མི་འགྱུར་གྱི། གང་ཕོ་མཚན་དང་ལྡན་པ་དེ་ནོར་བདག་ཏུ་འགྱུར་ཏེ། བུ་འདི་ཡང་ཕོ་མཚན་ཡོད་པས་ཕའི་ནོར་བདག་ཏུ་འགྱུར་རོ་སྙམ་བསམས་ནས་བུ་མོ་དེ་དག་ལ་ནོར་ཕྱུགས་དང ། ལོངས་སྤྱོད་ཅི་བདོག་པ་ཁྱོད་ཀྱི་མིང་པོ་དབང་སྟེ། མི་བཞེས་སོ། །ཞེས་བཀའ་སྩལ་ཏོ། །དེའི་ཚེ་བུ་མོ་ཆེན་མོ་རིགས་མཐུན་པ་ལ་བག་མར་བཏང་ནས་བུ་མོ་དེས་ཁྱིམ་ཐབ་དེ་ལ་བཀུར་སྟི་བསྐྱེད་ནས་སྟན་གདིང་བ་དང ། མལ་བྱེད་པ་དང ། ཕྱག་དར་དོར་བ་དང ། ཁ་ཟས་སྦྱོར་བ་དང ། བསུ་བ་དང ། སྐྱེལ་བ་དང ། ཕྱག་འཚལ་བ་དང ། གསོང་ཕོར་སྨྲ་བ་ལ་སོགས་ཏེ། ལས་བྱེད་
306a
> ༄#། །པ་ཐམས་ཅད་ལ་ཇི་ལྟར་བྲན་མོ་དག་རྗེ་བོའི་ལས་བྱེད་པ་བཞིན་དུ་བུ་མོ་དེ་ཡང་ཁྱིམ་ཐབ་དེའི་བཀུར་སྟི་བྱེད་པས། ཁྱིམ་ཐབ་ཀྱིས་ཆུང་མ་ལ་འདི་སྐད་ཅེས་སྨྲས་སོ། །ཁྱོ་ཤུག་ཅེས་བྱ་བ་བདག་ཅག་ཏུ་མ་ཟད་དེ། ཀུན་ལ་ཡང་སྲིད་ན་ཁྱོད་འབའ་ཞིག་ཅིའི་ཕྱིར་འདི་ལྟར་བྱེད་ཅེས་སྨྲས་སོ། །ཆུང་མས་སྨྲས་པ། བདག་གི་ཕ་ལ་ནོར་ཕྱུགས་གྲངས་མེད་པ་ཞིག་ཡོད་དེ། གུམ་པའི་འོག་ཏུ་བུ་མོ་ལྔ་ཡོད་ཀྱང་ནོར་ཐམས་ཅད་རྒྱལ་པོས་བཞེས་བར་ཆད་པ་ལས་མའི་རུམ་མི་བདེ་བ་ཟླ་བ་ཚད་ནས་མིང་པོ་བཙས་ན། མིག་ཀྱང་མེད། རྣ་བ་དང ། སྣ་དང ། ལྕེ་དང ། རྐང་པ་དང ། ལག་པའང་མེད་དེ། སྐྱེས་པའི་མཚན་མ་འབའ་ཞིག་ཡོད་པས་ནོར་བདག་ཏུ་གྱུར་ཏོ། །དེ་བས་ན་དབང་པོ་ཅི་ཡོད་ཀྱང་སྐྱེས་པའི་མཚན་གཅིག་ཙམ་ལ་ཡང་མི་ཕོད་དེ། བདག་ཁྱེད་ལ་བཀུར་སྟི་བྱེད་པ་ཡིན་ནོ། །ཁྱིམ་བདག་དེས་ཆུང་མས་སྨྲས་པ་ཐོས་ནས་ངོ་མཚར་ཏུ་གྱུར་ཏེ་ཆུང་མ་དང་འགྲོགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་དུ་ཁྱིམ་བདག་གི་བུ་དེ་ལ་མིག་དང ། རྣ་བ་དང ། སྣ་དང ། ལྕེ་དང ། རྐང་པའང་མ་མཆིས་ཏེ། བཙས་མ་ཐག་ཏུ་ཤིན་ཏུ་ཕྱུག་པོའི་ཁྱིམ་དུ་ནོར་གྱི་བདག་པོར་གྱུར། བཅོམ་
306b
> ལྡན་འདས་ཀྱིས་ཁྱིམ་བདག་ལ་བཀའ་སྩལ་པ། ཁྱོད་ཀྱིས་འདི་དག་ཞུས་པ་ལེགས་ཀྱི། ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང ། ཁྱོད་ལ་བསྟན་ཏོ། །ཞེས་བཀའ་སྩལ་ནས་ཁྱིམ་བདག་གིས་དེ་བཞིན་དུ་ཐོས་པར་འཚལ་ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་ན་ཁྱིམ་བདག་ཅིག་ལ་བུ་ཁྱེའུ་སྤུན་གཉིས་ཤིག་ཡོད་དེ། གཅིག་ནི། སྦྱིན་པ་ཞེས་བྱ། གཅིག་ནི། ཚུལ་ཁྲིམས་ཞེས་བྱ་སྟེ། ཁྱེའུ་སྤུན་གཉིས་ཆུང་དུ་ནས་ཆུ་གང་དང་ཁྲེལ་ལྟས་ཆེ་ལ་ཚིག་བདེན་པར་སྨྲ་བ། རྟག་ཏུ་སྦྱིན་པ་ལ་དགའ་བ། དབུལ་ཕོངས་པ་ལ་མགོན་བྱེད་དོ། །དེ་ལྟར་དད་པ་ཆེ་ཞིང་དགེ་བས་ཡུལ་མིས་ཀྱང་བསྔགས་ཏེ། རྒྱལ་པས་ཀྱང་ཞལ་ཆེ་བར་བཅུག་ནས་ཉེས་པ་དང ། མཉེས་པ་དཔྱོད་དོ། །དེའི་ཚེ་ན་རྒྱལ་པོའི་ཡུལ་ཁྲིམས་ཀྱིས་ཡུལ་མི་དག་གཅིག་ལ་གཅིག་ཅི་བསྐྱིས་ཀྱང་ཞལ་ཆེ་བའི་དྲུང་དུ་ལྷགས་ནས་དཔང་འཛུགས་ཀྱི། གཏན་ཚིགས་གཞན་མི་བྱེད་དོ། །དེའི་ཚེ་ཚོང་ཕ་ཞིག་རྒྱ་མཚོར་འགྲོ་བ་ལས་དེའི་ནུ་བོ་ཚུལ་ཁྲིམས་ཞེས་བྱ་བ་ལ་ནོར་དབྱིག་མང་པོ་ཞིག་བསྐྱིས་ཏེ། ཅི་དགོས་པར་སྤྱོད་དོ། །དེའི་ཚེ་ན་ཚུལ་ཁྲིམས་དེ་ལ་བུ་གཅིག་བུ་ཞིག་ཡོད་པའང་གཞོན་ལ་ཆུང་བས་ཚུལ་ཁྲིམས་ཀྱིས་བུ་དེ་ཡང་ཁྲིད་ཅིང ། སྦྱིན་པར་བྱས་པའི་ནོར་རྫས་ཀྱང་ཁྱེར་ནས་ཕུ་བོའི་གན་དུ་སོང་སྟེ་འདི་
307a
> ༄#། །སྐད་དུ་ཚོང་པ་འདིས་བདག་ལ་ནོར་འདི་སྙེད་ཅིག་སྔ་སྐྱིན་དུ་འཚལ་ཏེ། རྒྱ་མཚོ་ནས་ནམ་སླར་འཁོར་བ་ན་སྩལ་བར་བགྱིས་པས། གལ་ཏེ་བདག་གུམ་ནའང་བུ་ལ་སྩལ་བར་བགྱིས་ཀྱི། གཅེན་མཁྱེན་པར་མཛོད་ཅིག་།ཕུ་བོས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དེ་ནས་རིང་པོར་མ་ལོན་པར་ཁྱིམ་བདག་ཚུལ་ཁྲིམས་ནི། ཚེའི་དུས་བྱས་སོ། །ཚོང་དཔོན་དེའང་རྒྱ་མཚོའི་ནང་དུ་རླུང་གིས་གྲུ་ཞིག་སྟེ་ཚོང་པ་འབའ་ཞིག་ཤིང་ལེབ་ཅིག་ལ་འཇུས་ནས་ཕྱིར་ཡུལ་དུ་ཕྱིན་ཏོ། །དེའི་ཚེ་ན་ཁྱིམ་བདག་གིས་ཀྱང་ཚོང་པ་དེ་གྲུ་ཞིག་ནས་ནོར་ནི། འཁྱམས་ཏེ་གཅིག་པུ་ཕྱིར་འཁོར་ཏེ་བདག་གི་ནོར་རྫས་འདི་སྙེད་ཅིག་ཆགས་མོད་ཀྱི། བདར་མེད་དོ་སྙམ་བསམས་སོ། ། དེ་ནས་ཡང་ཚོང་པ་དེས་གཞན་ལ་བསྐྱི་བརྙ་བྱས་ནས་ཕྱིར་རྒྱ་མཚོར་ཞུགས་པ་དང ། ནོར་བུ་རིན་པོ་ཆེ་མང་དུ་རྙེད་དེ་བདེ་བར་ཕྱིར་འཁོར་ནས་འདི་སྙམ་དུ་བསམས་སོ། ། ཁྱིམ་བདག་གི་བུ་འདི་སྔར་ཡང་བདག་ལ་བུ་ལོན་མི་འདོད་པ་ལས་ན། མི་འདི་ཆུང་ཆེས་བས་གལ་ཏེ་ན་བརྗེད་དེ་མི་དྲན་ནམ། འོན་ཏེ་བདག་ལ་ཅི་ཡང་མི་བདོག་པས་བུ་ལོན་མི་འདེད་པ་བག་མ་མོ་སྙམ་བསམས་ནས་རྟ་བཟང་པོ་ཞིག་ལ་ཞོན་ཏེ་གོས་རིན་པོ་ཆེ་གྱོན་ནས་ཚོང་དུས་སུ་སོང་ངོ ། །ཁྱིམ་བདག་གི་བུ་དེས་ཀྱང་ཚོང་པ་དེ་གོས་
307b
> བཟང་པོ་གྱོན་ཅིང་རྟ་བཟང་པོ་ཞོན་པ་མཐོང་ནས་བསམ་པ། འདི་ནི། ལོངས་སྤྱོད་དང་ལྡན་པར་གྱུར་པ་ལྟ། བུ་ལོན་བདའོ་སྙམ་བསམས་ནས་མི་ཞིག་ལ་བུ་ལོན་ཆགས་པ་རྣམས་དེ་ཕྱིར་མི་སྦྱིན་ནམ་ཞེས་སྤྲིངས་ནས་དེས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དེ་ནས་ཚོང་པ་དེས་བསམ་པ། ཁྱིམ་བདག་འདི་ལ་ནོར་དབྱིག་མང་དུ་བསྐྱིས་པས། བདག་ལ་ལོངས་སྤྱོད་ཅི་བདོག་པ་ཐམས་ཅད་གཏུགས་ཀྱང་མི་འཁོར་ཏེ། བདག་གིས་ཐབས་ཤིག་བྱའོ་སྙམ་བསམས་ནས་ཚོང་པ་དེ་ནོར་བུ་རིན་པོ་ཆེ་གཅིག་ཐོགས་ཏེ་ཞལ་ཆེ་བ་དེའི་ཆུང་མའི་གན་དུ་སོང་ནས་འདི་སྐད་ཅེས་གསོལ་ཏོ། །བཙུན་མོ་མཁྱེན་པར་མཛོད་ཅིག་།བདག་གི་སྔོན་ཁྱིམ་བདག་ཚུལ་ཁྲིམས་ལས་ནོར་རྫས་ཅུང་ཟད་ཅིག་བསྐྱིས་ཏེ། དེ་ཁྱིམ་བདག་གི་བུ་བདག་ལ་བུ་ལོན་དེ་ད་ན། ནོར་བུ་རིན་པོ་ཆེ་སྲང་ཁྲི་རི་པ་འདི་བཞེས་ཏེ། ཞལ་ཆེ་བ་ལ་བདག་ཅག་གཉིས་འདྲིར་འོངས་ན། མ་མཐོང་ངོ ། །ཞེས་བྱ་བར་གསོལ་བར་གྱིས་ཤིག་ཅེས་གསོལ་ཏོ། །ཆུང་མས་སྨྲས་པ། བདག་གི་ཁྱིམ་ཐབ་འདི་ནི། ཤིན་ཏུ་དྲང་སྟེ། རྫུན་མི་ཟེར་བས་མི་བཏུབ་ཏུ་ངེས་ན། འོན་ཀྱང་གསོལ་བར་བྱའོ། །ཞེས་ནོར་བླངས་ཏེ་ཁྱིམ་ཐབ་ནུབ་མོ་སླར་འཁོར་བ་དང ། ཚོང་པས་གསོལ་པ་བཞིན་དུ་རྒྱས་པར་སྨྲས་སོ། །ཁྱིམ་ཐབ་ཀྱིས་སྨྲས་པ། བདག་ནི། ཆུ་
308a
> ༄#། །གང་དང་ཁྲིལ་ལྟས་ཀྱིས་འཚོ་སྟེ། རྫུན་མི་ཟེར་བས་རྒྱལ་པོས་ཀྱང་ཞལ་ཆེ་བར་བཅུག་གོ་།གལ་ཏེ་བདག་གིས་རྫུན་སྨྲས་ན་ནི། རིགས་པ་དང་གཤའ་བ་མ་ཡིན་ནོ། །ཞེས་སྨྲས་སོ། །ཕྱི་དེ་ཉིན་ཡང་ཚོང་པ་འོངས་ནས་ཆུང་མས་ཀྱང་དེ་བཞིན་དུ་གཏམ་རྒྱས་པར་སྨྲས་ཏེ། ནོར་བུ་ཕྱིར་བྱིན་པ་ལས་ཚོང་པ་དེས་ནོར་བུ་ཡིན་པོ་ཆེ་སྲང་སྟོང་ཕྲག་ཉི་ཤུ་རི་བ་ཞིག་ཀྱང་ཕུལ་ཏེ། འདི་སྙམ་དུ་དོན་ཅུང་ཟད་ཀྱི་ཕྱིར་ཆིག་གཅིག་ཙམ་སྨྲས་པས། སྲང་སྟོང་ཕྲག་སུམ་ཅུ་རྙེད་པར་འགྱུར་རོ། །ཕ་རོལ་པོ་ནི། ཚ་བོ་ཡིན་ཏེ། རྒྱལ་བར་གྱུར་ན་ཡང་དོང་ཚེ་གཅིག་ཙམ་ཡང་ཐོབ་པར་མི་འགྱུར་རོ། །ཞེས་སྨྲས་ནས་འདི་ནི། རིགས་པ་ཡིན་ནོ་སྙམ་སྟེ་ནོར་བུ་རིན་པོ་ཆེ་ལ་ཆགས་པས་ཚོང་པས་བཅོལ་བ་སྒྲུབ་པར་ཁས་བླངས་སོ། །དགོང་དུ་ཁྱིམ་ཐབ་ཕྱིར་འཁོར་བ་དང ། ཁར་སྩང་བདག་གིས་གསོལ་པ་དེ་རུང་བ་འདྲ་ན། དེ་བཞིན་མཛད་དུ་གསོལ། ཁྱིམ་བདག་གིས་སྨྲས་པ། འདི་ནི། རིགས་པ་མ་ཡིན་ཏེ། བདག་རྫུན་མི་ཟེར་བས་ཞལ་ཆེ་བར་བཅུག་གོ་།གལ་ཏེ་རྫུན་ཞིག་སྨྲས་ན་ཡང་ཚེ་འདི་ལ་འཇིག་རྟེན་པ་ཀུན་གྱིས་ཡིད་ཆེས་པར་མི་འགྱུར། ཚེ་ཕྱི་མ་ལ་ཡང་བསྐལ་པ་གྲངས་མེད་པའི་བར་དུ་སྡུག་བསྔལ་མྱོང་བར་འགྱུར་རོ། །ཞེས་བསྒོའོ། །དེའི་ཚེ་ན་ཁྱིམ་བདག་དེ་ལ་བུ་ཁྱེའུ་
308b
> འགྲོ་མི་ནུས་པ་གོག་བ་ཙམ་ཞིག་ཡོད་དེ། ཁྱིམ་བདག་གི་ཆུང་མས་ཁྱིམ་བདག་ལ་འདི་སྐད་ཅེས་སྨྲས་སོ། །བདག་ནི། ཁྱོད་དང་ཁྱོ་ཤུག་ཏུ་གྱུར་པས་སྲོག་ལ་བབ་པ་ཞིག་སྨྲས་ན་ཡང་ཕྱིར་མི་ཟློག་ཏུ་རེ་ན། འདི་ལྟ་བུའི་དོན་ཆུང་དུ་གཅིག་ལ་ཡང་ཚིག་བརྟུལ་ཏེ་མི་ཟློག་ན། བདག་གསོན་ཏེ་ཡང་ཅི་རུང ། བདག་གིས་གསོལ་པ་བཞིན་དུ་མ་གྱུར་ན། བུ་ཡང་བསད་ལ་དེའི་འོག་ཏུ་བདག་ཀྱང་འཆིའོ། །ཁྱིམ་བདག་གིས་དེ་སྐད་ཅེས་སྨྲས་པ་ཐོས་ནས་དཔེར་ན། མི་བརྣངས་པ་སྐྱུག་ཏུ་མེད་ལ། མིད་དུ་ཡང་མེད་པ་ལྟར་བདག་ལ་བུ་འདི་གཅིག་བུར་ཟད་དེ། གལ་ཏེ་ཤི་བར་གྱུར་ན་ནོར་གྱི་བདག་པོ་ཡང་མེད་པར་འགྱུར། གལ་ཏེ་བུད་མེད་ཀྱིས་སྨྲས་པ་བཞིན་དུ་བྱས་ན་ཡང་འཇིག་རྟེན་བ་ཀུན་གྱིས་སྨྲས་པ་ཡིད་མི་ཆེས་ཏེ། མ་འོངས་པའི་དུས་སུ་ཡང་སྡུག་བསྔལ་མང་པོ་མྱོང་བར་འགྱུར་རོ་སྙམ་བསམས་ནས་མ་རངས་བཞིན་དུ་ཆུང་མས་སྨྲས་པ་བཞིན་བྱས་པས། ཆུང་མ་ཡང་རབ་ཏུ་དགའ་ནས་ཚོང་པ་ལ་སྨྲས་པ། ཁོ་མོའི་ཁྱོ་ཡང་གནང་གི་།དེ་བཞིན་དུ་གྱིས་ཤིག་ཅེས་བསྒོའོ། །ཚོང་པ་ཡང་རབ་ཏུ་དགའ་ནས་ཕྱིར་ཁྱིམ་དུ་སོང་སྟེ་གླང་པོ་ཆེ་ཆེན་པོ་གཅིག་རིན་པོ་ཆེ་སྣ་ཚོགས་ཀྱིས་བརྒྱན་ནས་གོས་རིན་པོ་ཆེ་གྱོན་ཏེ་གླང་པོ་ཆེ་དེ་ལ་ཞོན་ནས་ཚོང་དུས་སུ་འོངས། ཁྱིམ་བདག་གི་བུ་དེས་དེ་ལྟ་བུ་མཐོང་ནས་དགའ་སྟེ། ཡིད་ལ་ད་ནི། མི་འདི་ལོངས་སྤྱོད་
309a
> ༄#། །མང་པོ་དང་ལྡན་གྱི། བདག་གི་བུ་ལོན་བདའོ་སྙམ་བསམས་ནས་དྲུང་དུ་སོང་སྟེ་སར་འཕགས་པ་ལ་འདི་སྐད་ཅེས་སྨྲས་སོ། །ཁྱིམ་བདག་མཁྱེན་ཏམ། བདག་གིས་བུ་ལོན་ཆགས་པ་རྣམས་ད་སླར་སྩོལ་ཅིག་ཅེས་སྨྲས་ན། ཁྱིམ་བདག་དེ་སྡངས་པ་ལྟར་བྱེད་དེ། ཁྱོད་ཀྱི་བུ་ལོན་ཆགས་སུ་མི་དྲན་ནོ། །བུ་ལོན་ཅི་ཞིག་ཆགས་སུ་མཐོང་ཞེས་སྨྲས་སོ། །ཁྱིམ་བདག་གི་བུས་སྨྲས་པ། ལོ་དང་ཟླ་བའི་ངོ་ཆེ་གེ་མོ་ཞིག་ལ་བདག་གི་ཕ་ལས་ནོར་བསྐྱིས་ཏེ་བདག་གི་ལག་ནས་ནོར་ཁྱེར་བར་ཞལ་ཆེ་བ་ཡང་ཤེས་ན།་ཅིའི་ཕྱིར་བསྙོན་ཞེས་སྨྲས་སོ། །ཚོང་པས་སྨྲས་པ། བདག་གིས་ནི། ཁྱོད་ཀྱི་ནོར་བསྐྱིས་པར་མི་དྲན་ནོ། །མཐོང་བ་ཞིག་ཡོད་ན་མཐོང་བའི་ཐད་དུ་གཏུགས་སུ་འདོང་ངོ ། ། ཞེས་སྨྲས་ནས་ཞལ་ཆེ་བའི་ཐད་དུ་ཕྱིན་ནས་མི་འདིས་སྔོན་བདག་གི་ཕ་ལས་ནོར་འདི་སྙེད་ཅིག་བསྐྱིས་ཏེ་ཁུ་བོས་ཀྱང་མཐོང་ན། མི་འདིས་བདག་གི་ཕ་ལས་ནོར་མ་འཚལ་ཏམ་ཞེས་དྲིས་ན། ཁུ་བོས་ཀྱང་བདག་ལ་གཏོལ་མེད་ཅེས་སྨྲས་སོ། །ཚ་བོ་དངངས་ནས་དེའི་ཚེ་བདག་གི་ནོར་ཅི་བསྐྱིས་པ་ཁུ་བོས་ལག་བས་བསྡོས་ཏེ་མི་འདི་བྱིན་པར་མི་དྲན་ནམ།་སྨྲས་པ། དེ་ལྟ་བུ་མེད་དོ། །ཞེས་སྨྲས་སོ། །དེ་ནས་ཁྱེའུ་དེ་ཁུ་བོ་ལ་ཁྲོས་ནས་ཁྱོད་དྲང་པའི་ཕྱིར་ཀུན་གྱི་ཞལ་ཆེ་བར་རྒྱལ་པོས་བཅུག་སྟེ་ཡུལ་མི་ཐམས་ཅད་ཀྱིས་དྲང་
309b
> པོ་ཞེས་བྱས་ན། བདག་ཚ་བོ་ལ་ཡང་འདི་ལྟར་བྱེད་ན། གཞན་དག་ལ་ཐོག་ཏུ་བབ་ཅིང་གཏམ་ལས་བཅད་པ་ལྟ་ཅི་སྨོས་ཏེ། འདི་བདེན་ནམ་རྫུན་པ་དེའུ་རེ་མངོན་ནོ། །ཞེས་སྨྲས་སོ། ། བཅོམ་ལྡན་འདས་ཀྱིས་ཁྱིམ་བདག་ལ་བཀའ་སྩལ་པ། དེའི་ཚེ་ཞལ་ཆེ་བ་དེ་ཤེས་པར་འདོད་ན། གཞན་ཡིན་ནོ་སྙམ་དུ་མ་སེམས་ཤིག་།དེ་ནི། མཛི་བྱི་ལ་དབང་པོ་རྣམས་མེད་བ་འདི་ཡིན་ནོ། །དེའི་ཚེ་ན་རྫུན་གཅིག་བྱས་པས་སེམས་ཅན་དམྱལ་བ་ཆེན་པོར་སྐྱེས་ནས་སྡུག་བསྔལ་སྣ་ཚོགས་མྱོང་སྟེ། དམྱལ་བ་ལས་ཐར་ནས་སྐྱེ་བ་ལྔ་བརྒྱའི་བར་དུ་དབང་པོ་ཅི་ཡང་མེད་པའི་ཤ་གོང་གོང་པོར་སྐྱེས་སོ། །དེའི་ཚེ་སྦྱིན་པ་ལ་དགའ་བའི་དབང་གིས་རྟག་ཏུ་ཕྱུག་པོའི་ཁྱིམ་དུ་སྐྱེས་ནས་ནོར་གྱི་དབང་པོར་གྱུར་ཏོ། །དགེ་བའི་ལས་དང ། སྡིག་པའི་ལས་ནི། ཡུན་རིང་པོར་ལོན་ཀྱང་མེད་ཅིང་ཞིག་པར་མི་འགྱུར་རོ། །དེ་བས་ན་ཁྱེད་རྣམས་བརྩོན་འགྲུས་སུ་ལུས་དང་ངག་དང་ཡིད་བསྡམས་ཏེ་སྡིག་པ་ནི། མི་བྱའོ། །དེའི་ཚེ་འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ཐོས་ནས། ལ་ལ་ནི། འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་པར་གྱུར། ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་རྗེས་སུ་ཡི་རང་ནས་མངོན་པར་དགའོ། །ཁྱིམ་བདག་དབང་པོ་མེད་པའི་ལེའུ་སྟེ་བཅུ་བདུན་པའོ།། །།དབུལ་མོས་རས་ཕུལ་བའི་ལེའུ། དེའི་
310a
> ༄#། །ཚེ་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ལ་ཆོས་སྟོན་ཅིང་བཞུགས་སོ། །དེའི་ཚེ་ན་ཡུལ་དེ་ན་ཁྱིམ་བདག་ཅིག་གི་ཆུང་མ་ཞི་གལ་བུ་མོ་ཞིག་བཅས་ནས་བུ་མོ་གཞན་པས་འཕགས་པར་བཞིན་བཟང་བ། བལྟ་ན་སྡུག་པ། མཛེས་པ་ཞིག་སྟེ།་ཐོག་མ་བཙས་ནས་རས་དཀར་པོ་འཇམ་པོས་དཀྲིས་ཏེ་བྱུང་ངོ ། །དེ་ལ་ཕ་མ་ཡ་མཚན་དུ་གྱུར་ཏེ་མཚན་མཁན་ལ་བསྟན་ནས་མཚན་མཁན་གྱིས་བལྟས་ཏེ་བསོད་ནམས་ཆེན་པོ་དང་ལྡན་པར་རྟོགས་ནས་མིང་ཡང་དཀར་མོ་ཞེས་བཏགས་སོ། །བུ་མོ་དཀར་མོ་ཇི་ཙམ་དུ་སྐྱེས་པ་བཞིན་རས་ཀྱང་ལུས་ཀྱི་ཚད་དུ་སྐྱེས་སོ། །བུ་མོ་དེ་ཕྱིས་ཆེར་སྐྱེས་ནས་ཡུལ་མི་ལས་མང་དུ་ཆུང་མར་སློང་བ་དང ། ཕ་མས་ཀྱང་བུ་མོ་བག་མར་གཏང་བའི་རྒྱན་རྣམས་བརྡུང་སྙམ་ནས་མགར་བ་གཉེར་ཏེ་གསེར་དངུལ་བཅལ་ཏོ། །བུ་མོས་གསེར་དངུལ་བཅལ་བ་མཐོང་ནས་འདི་ཅི་ཞིག་བྱ་ཞེས་ཕ་མ་ལ་དྲིས་པ་དང ། འདི་ནི། ཁྱོད་བདག་མར་གཏང་བའི་རྒྱན་རྣམས་བརྡུང་ངོ ། །ཞེས་སྨྲས་སོ། །བུ་མོས་སྨྲས་པ། བདག་ནི། རབ་ཏུ་འབྱུང་བར་དད་ཀྱི། བག་མར་མཆི་བར་མི་དགའོ། །ཕ་མས་ཀྱང་བུ་མོའི་ཡིད་དང་སྦྱར་ནས་དེ་མ་ཐག་ཏུ་རས་ཕྱུང་སྟེ་ཆོས་གོས་དྲུབ་པར་བཤམས་པ་ལས།
310b
> བུ་མོས་རས་འདིས་ཅི་ཞིག་བྱ་ཞེས་དྲིས་པ་དང ། ཁྱོད་ཀྱི་གོས་འདྲུབ་བོ་ཞེས་སྨྲས་སོ། །བུ་མོས་སྨྲས་པ། བདག་གོས་གྱོན་པ་ཡོད་ཀྱི། དྲུབ་མི་དགོས་སོ། །བདག་བཅོམ་ལྡན་འདས་གང་ན་བཞུགས་པར་ཁྲིད་དེ་འདོང་ངོ ། །ཞེས་སྨྲས་ནས་བཅོམ་ལྡན་འདས་ཀྱི་སྤྱན་སྔར་ཁྲིད་དོ། །སངས་རྒྱས་གང་ན་བདེར་ཕྱིན་པ་དང ། བཅོམ་ལྡན་འདས་ལ་མགོ་བོས་ཕྱག་འཚལ་ཏེ་རབ་ཏུ་འབྱུང་བར་གསོལ་ཏེ། བཅོམ་ལྡན་འདས་ཀྱིས་ཀྱང་ལེགས་པར་འོངས་སོ། །ཞེས་བཀའ་སྩལ་པས། སྐྲ་རང་བྱི་སྟེ་ལུས་ལ་གྱོན་པའི་གོས་དཀར་པོ་ཡང་ཆོས་གོས་སྨད་ལྔར་གྱུར་ནས་དགེ་སློང་མ་སྐྱེ་རྒུའི་བདག་མོ་ལ་གཏད་དོ། །དགེ་སློང་མ་དེས་བརྩོན་འགྲུས་བརྩམས་པས། རིང་པོ་མ་ལོན་པར་དགྲ་བཅོམ་པར་གྱུར་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ། དགེ་སློང་མ་དཀར་མོས་སྔོན་བསོད་ནམས་ཅི་ཞིག་བགྱིས་ན། ཁྱིམ་བདག་གི་ཁྱིམ་དུ་སྐྱེས་ཏེ་ལུས་ལ་རས་ཀྱང་མཆིས་ལ། རབ་ཏུ་བྱུང་ནས་རིང་པོ་མ་ལགས་པར་དགྲ་བཅོམ་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་སངས་རྒྱས་བསོད་སྐྱབས་འཇིག་རྟེན་དུ་གཤེགས་ཏེ། ཉེ་གནས་དང་བཅས་ནས་སེམས་ཅན་གྱི་དོན་ལ་གཤེགས་པ་ལས། ཡུལ་མི་ཐམས་ཅད་ཀྱིས་མཆོད་པ་རྒྱས་པར་བྱས་སོ། །དེའི་ཚེ་དགེ་སློང་གཅིག་ཅིག་འགྲོ་བ་མང་པོའི་དོན་
311a
> ༄#། །དུ་ཡུལ་མི་ཐམས་ཅད་སངས་རྒྱས་ལ་ཆོས་ཉན་པ་དང ། སྦྱིན་པ་བྱེད་པར་སྐུལ་ལོ། །དེའི་ཚེ་བུད་མེད་དཱ་ནི་ཀེ་ཞེས་བྱ་བ་རབ་ཏུ་དབུལ་ཕོངས་པ་ཞིག་སྟེ།་ཁྱོ་ཤུག་གཉིས་ལ་གོས་སུ་རས་ཡུག་གཅིག་ལས་མི་བདོག་སྟེ་ཁྱོ་དོན་གཉེར་དུ་འགྲོ་ན། རས་ཁྱོས་གྱོན་ཏེ་ཆུང་མ་སྒྲེན་མོར་རྩཝའི་སྟེང་ན་འདུག་གོ་།ཆུང་མདོན་གཉེར་ན། རས་ཆུང་མས་གྱོན་ཏེ་ཁྱོ་རྩཝ་ཕུང་གི་ནང་ན་སྒྲེན་མོར་འདུག་གོ་།ཕྱིས་ཀུན་གྱི་དོན་བྱེད་པའི་དགེ་སློང་དེ། དེའི་སྒོར་འོངས་ནས་བུད་མེད་དེ་དང་ཕྲད་དེ། བུད་མེད་དེ་ལ་ཁྱོད་སངས་རྒྱས་ལ་ཕྱག་འཚལ་དུ་སོང་ཞིག་།ཡོན་ཕུལ་ཅིག་ཅེས་སྦྱིན་པའི་ཡོན་ཏན་བསྔགས་ཏེ་སེར་སྣ་བྱེད་པའི་རྣམ་པར་སྨིན་པ་བསྟན་ནས་སངས་རྒྱས་འཇིག་རྟེན་དུ་འབྱུང་བར་དཀའ་བ་དང ། ཆོས་ཐོས་པར་དཀའ་བ་དང ། མི་ལུས་ཐོབ་པར་དཀའ་བའི་གཏམ་རྒྱས་པར་བྱས་ནས་ཆོས་ཉན་དུ་སོང་ཞིག་ཅེས་བསྐུལ་བ་དང ། བུད་མེད་དེས་སྨྲས་པ། བཙུན་པ། ཅུང་ཟད་བཞུགས་ཤིག་།བདག་སླར་མཆིའོ། །ཞེས་སྨྲས་ནས་ཁང་པའི་ནང་དུ་སོང་སྟེ། ཁྱོ་ལ་འདི་སྐད་ཅེས་སྨྲས་སོ། །སྒོ་ན་དགེ་སློང་ཞིག་ཁྱོད་སངས་རྒྱས་ལ་ཕྱག་འཚལ་དུ་སོང་ཞིག་།ཆོས་ཉོན་ཅིག་།སྦྱིན་པ་གྱིས་ཤིག་ཅེས་མཆིའོ། །བདག་ཅག་ཚེ་སྔ་མ་ལ་སྦྱིན་པ་མ་བྱས་པས་འདི་ལྟར་དབུལ་ཕོངས་པར་གྱུར་ཏེ་
311b
> ད་ཡང་ཅི་ཞིག་གིས་ཚེ་ཕྱི་མའི་ཚོགས་སུ་འགྱུར་བར་བྱ། ཁྱོས་སྨྲས་པ། འདི་ལ་ནི། སྦྱིན་པར་འོས་ན་བདག་ཅག་དབུལ་ཕོངས་ཏེ་ཅི་ཡང་མེད་ན། ཅི་ཞིག་སྦྱིན་པར་བྱ། ཆུང་མས་སྨྲས་པ། ཚེ་སྔ་མ་ལ་ཡང་སྦྱིན་པ་མ་བྱས་པས། འདི་ལྟར་དབུལ་བར་གྱུར་ན་ད་ཡང་སྦྱིན་པ་མ་བྱས་ན། ཚེ་ཕྱི་མ་ལ་གར་འགྲོ་སྟེ། བདག་ནི། སྦྱིན་པ་ཞིག་བྱེད་ཀྱི། ཁྱོད་ཀྱིས་གནོང་ཞིག་།ཁྱོས་བསམ་པ། འདི་ལ་ནི། ནོར་ཁུད་པ་ཞིག་ཡོད་པ་གདའ་སྟེ། སྦྱིན་པ་གྱིས་ཤིག་ཅེས་སྨྲས་པ་དང ། ཆུང་མས་བདག་གིས་རས་འདི་སྦྱིན་པར་དགའོ། །ཞེས་སྨྲས་སོ། །ཁྱོས་སྨྲས་པ། བདག་ཅག་ཁྱོ་ཤུག་གཉིས་ལ་རས་འདི་ལས་མེད་དེ། འདིས་དོན་གཉེར་ཞིང་འཚོ་བར་ཟད་ན། ད་སྤྱིན་པར་བྱས་ན་གཉི་ག་སྡོད་དམ་ཅི། ཆུང་མས་སྨྲས་པ།་མི་ཞིག་སྐྱེས་པ་ལ་ཚེ་འཕོ་བ་ཡོད་པས། འདི་མ་བྱིན་ཡང་ཚེ་འཕོ་ལ། བྱིན་ཡང་འཆི་འཕོ་བས་ཉིས་ན་སྦྱིན་པ་བྱས་ཏེ་ཚེ་འཕོས་ན། ཚེ་ཕྱི་མ་ལ་རེ་བ་ཡོད་པས་སྦྱིན་པ་བྱས་ན་ཚེ་འཕོས་ཀྱང་བླའོ། །ཁྱོ་ཡང་དགའ་བཞིན་དུ་སྦྱིན་པ་གྱིས་ཤིག་ཅེས་བསྒོ་ནས་ཆུང་མ་ཕྱི་རོལ་ཏུ་སོང་སྟེ། དགེ་སློང་ལ་འདི་སྐད་ཅེས་སྨྲས་སོ། །བཙུན་པ། ཅུང་ཟད་མ་གཟིགས་ཤིག་།བདག་སྦྱིན་པ་བགྱིའོ། །ཞེས་སྨྲས་པ་དང ། དགེ་སློང་གིས་ཁྱོད་སྦྱིན་པ་བྱེད་ན། མངོན་སུམ་དུ་ལག་གིས་བྱིན་ཅིག་།སྦྱིན་པའི་ཚིགས་བཅད་བྱའོ། །ཞེས་བསྒོའོ།།
312a
> ༄#། །བུད་མེད་དེས་སྨྲས་པ། ལུས་ལ་རས་འདི་ལས་མེད་དེ། འོག་ན་གོས་གཞན་མེད་པས། བུད་མེད་ཀྱི་ལུས་རྩོག་པ་དྲི་མ་མནམ་པོ་འདི་གཟིགས་པར་མ་འོས་ཀྱི། ནང་ནས་དབུལ་ལོ། །ཞེས་སྨྲས་པ་དང ། ནང་རོལ་ནས་རས་ཕུད་དེ་དགེ་སློང་དེ་ལ་ཕུལ་ལོ། །དགེ་སློང་དེས་སྦྱིན་པའི་ཚིགས་བཅད་པས་ནས་རས་དེ་ཐོགས་ཏེ་སངས་རྒྱས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱིས་དགེ་སློང་དེ་ལ་བུད་མེད་ཀྱིས་ཕུལ་བའི་རས་དེ་འོན་ཅིག་ཅེས་བཀའ་སྩལ་ཏོ། །དགེ་སློང་དེས་ཀྱང་རས་དེ་སངས་རྒྱས་ལ་ཕུལ་ནས་བཅོམ་ལྡན་འདས་ཀྱིས་ཕྱག་གིས་བཞེས་སོ། །རས་རྙིང་ཞིང་དྲི་མས་གོས་པས་རྒྱལ་པོའི་འཁོར་རྣམས་རས་དྲི་མ་ཅན་ཕྱག་ཏུ་བཞེས་པ་ལ་འཕྱའོ། ། བཅོམ་ལྡན་འདས་ཀྱིས་འཁོར་མང་པོའི་བསམ་པ་མཁྱེན་ནས་འདི་སྐད་ཅེས་བཀའ་སྩལ་ཏོ། །ངས་བལྟས་ན་འཁོར་འདིའི་ནང་ན་སྦྱིན་པ་རྣམ་པར་དག་པ་ནི། འདི་ལས་འདའ་བ་མེད་དོ། །ཞེས་བཀའ་སྩལ་ཏོ། །འཁོར་མང་པོ་ངོ་མཚར་དུ་གྱུར་ཏོ། །དེ་ནས་རྒྱལ་པོའི་བཙུན་མོ་རབ་ཏུ་དགའ་སྟེ་ལུས་ལ་གྱོན་པའི་གོས་དང་རྒྱན་རྣམས་ཕུད་ནས་བུད་མེད་ལ་བསྐྱལ་ཏོ། །རྒྱལ་པོས་ཀྱང་གོས་དང་རྒྱན་ཕུད་ནས་དེའི་ཁྱིམ་ཐབ་ལ་བསྐྱལ་ཏེ་ཁྱོ་ཤུག་གཉིས་འཁོར་གྱི་ནང་དུ་ཤོག་ཅིག་།ཅེས་བསྒོའོ། །སངས་རྒྱས་བསོད་སྐྱབས་
312b
> ཀྱིས་འཁོར་མང་པོ་ལ་ཆོས་བསྟན་པས་ཕལ་ཆེར་རྣམ་པར་གྲོལ་བར་གྱུར་ཏོ། །བཅོས་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་བུད་མེད་དབུལ་མོ་དེ་ནི། དགེ་སློང་མ་དཀར་མོ་འདི་ཡིན་ནོ། །དེའི་ཚེ་བསམ་པ་དག་པས་རས་བྱིན་པའི་དབང་གིས་བསྐལ་པ་དགུ་བཅུ་རྩ་གཅིག་གི་བར་དུ་གང་ནས་གང་དུ་སྐྱེས་ཀྱང་རྟག་ཏུ་རས་དང་བཅས་སུ་སྐྱེས་ཏེ། བྲེལ་ཕོངས་པ་མེད་ཅིང་ཡིད་བཞིན་དུ་འབྱོར་པར་གྱུར་ཏོ། །སངས་རྒྱས་དེ་ལས་དམ་པའི་ཆོས་ཐོས་ནས་རྣམ་པར་གྲོལ་བར་སྨོན་ལམ་བཏབ་པས་འདིར་ང་དང་ཕྲད་དེ་དགྲ་བཅོམ་པར་གྱུར་ཏོ། །དེ་བས་ན་ཁྱོད་ཀྱང་ཆོས་མཉན་པ་དང ། སྦྱིན་པ་བྱེད་པ་ལ་བརྩོན་འགྲུས་གྱིས་ཤིག་ཅེས་བཀའ་སྩལ་ནས་འཁོར་མང་པོ་བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་ཡི་རང་ནས་མངོན་པར་དགའོ། །དབུལ་མོས་རས་ཕུལ་བའི་ལེའུ་སྟེ་བཅོ་བརྒྱད་པའོ།། །།བྲན་མོ་དབུལ་མོས་ཀཱ་ཏྱཱ་ཡ་ན་ལ་དབུལ་བཙོངས་པའི་ལེའུ། དེའི་ཚེ་ན་བཙུན་པ་ཀཱ་ཏྱཱ་ཡ་ན་ཆེན་པོ་ཡུལ་ཨ་པ་དེ་ན་འདུག་པ་ལས་ཡུལ་དེ་ན་ཁྱིམ་བདག་ལོངས་སྤྱོད་དང་ལྡན་པ་སེར་སྣ་ཅན། སྙིང་རྗེ་མེད་པ་ཞིག་ལ་བྲན་མོ་རྒན་མོ་ཞིག་ཡོད་དེ། བྲན་མོ་དེ་ངན་ལས་ཐམས་ཅད་བྱེད་ཀྱང་གོས་ནི། ལུས་ལ་མི་ཡོག་།ཟས་ནི། ཁར་མི་མྱོང་སྟེ། རྟག་ཏུ་བརྡེག་འཚོག་པས་རྒན་མོ་མ་བཟོད་
313a
> ༄#། །དེ་སྲོག་འདོར་དུ་འགྲོ་སྙམ་ནས་བུམ་པ་ཐོགས་ཏེ་ཆུ་འཆུར་སོང་བ་ལས། ཆུ་འགྲམ་དུ་སྐད་ཆེན་པོ་ཕྱུང་སྟེ་ངུས་སོ། །ཀཱ་ཏྱཱ་ཡ་ན་དེར་འོངས་ཏེ་རྒན་མོ། །ཅིའི་ཕྱིར་འདི་ལྟར་མི་དགའ་ཞེས་དྲིས་པ་དང ། འཕགས་པ། བདག་རྒས་པའི་སྟེང་དུ་ལས་ནི། ཆེ། བགོ་བ་དང་བཟའ་བ་ནི། མེད། དབུལ་ཕོངས་པས་ཅིའི་ཕྱིར་མི་འགུམ་སྙམ་མི་དགའ་སྟེ་ངུའོ། །ཀཱ་ཏྱཱ་ཡ་ནས་སྨྲས་པ། རྒན་མོ། ཁྱོད་དབུལ་བཙོངས་ནས་ཅི་ཉེས། རྒན་མོས་སྨྲས་པ། དབུལ་ཅི་ལྟར་བཙོང ། སུ་ཞིག་དབུལ་ཉོ་ཞེས་སྨྲས་པ་དང ། ཀཱ་ཏྱཱ་ཡ་ནས་དབུལ་བཙོང་དུ་རུང་ངོ ། །ཞེས་ལན་གསུམ་གྱི་བར་དུ་བསྒོ་བ་དང ། དབུལ་འདི་ཇི་ལྟར་བཙོང་དྲིའོ་སྙམ་ནས་དབུལ་ཇི་ལྟར་བཙོང་དུ་རུང་ཞེས་དྲིས་སོ། །ཀཱ་ཏྱཱ་ཡ་ནས་སྨྲས་པ། ཅི་སྟེ་དབུལ་བཙོང་ཡང་དག་ན། ངས་བསྟན་པ་བཞིན་དུ་གྱིས་ཤིག་ཅེས་བསྒོ་བ་དང ། འཕགས་པ། དེ་བཞིན་དུ་བགྱིའོ། །ཞེས་གསོལ་ཏོ། ། ཀཱ་ཏྱཱ་ཡ་ནས་སྨྲས་པ། ཁྱོད་སྔར་ཁྲུས་གྱིས་ཤིག་།བཀྲུས་པའི་འོག་ཏུ་སྦྱིན་པ་གྱིས་ཤིག་།རྒན་མོས་སྨྲས་པ། བདག་ལ་ལྷན་པ་ཙམ་གྱི་རྒྱུ་ཡང་མེད་ན། ཅི་ཞིག་སྦྱིན་པར་བྱ།་བུམ་པ་འདི་ནི། ཇོ་མོའི་ཡིན་ཏེ། དབང་མ་མཆིས་སོ། །ཀཱ་ཏྱཱ་ཡ་ནས་སྨྲས་པ། ཁྱོད་ལྷུང་བཟེད་ཀྱི་ནང་ཆུ་གཙང་མས་ཁོངས་ལ་ང་ལ་ཕུལ་ཅིག་།ངས་སྦྱིན་པའི་
313b
> ཚིགས་སུ་བཅད་པ་བྱའོ། །ཀཱ་ཏྱཱ་ཡ་ནས་ཆུ་བླངས་ནས་སྦྱིན་པའི་ཚིགས་བཅད་ཀྱང་བྱས། བསླབ་ཚིགས་ཀྱང་བྱིན། སངས་རྒྱས་ཀྱི་མཚན་ནས་ཀྱང་བརྗོད་དུ་བཅུག་སྟེ་ཡོན་ཏན་རྣམ་པ་སྣ་ཚོགས་སུ་བསྔགས་ནས་རྒན་མོ་ཁྱོད་ལ་འདུག་པའི་གནས་ཡོད་དམ། རྒན་མོས་སྨྲས་པ། བདག་ལ་གནས་མ་མཆིས་ཏེ། འཐག་པ་དང ། གཏུན་བརྡུང་བ་དང ། ལས་བྱེད་པའི་གནས་ཉིད་ན་ཉལ་ལོ། །བར་འགའ་ནི།་ལུང་ཕུང་གི་སྟེང་ནའང་ཉལ་ལོ། །ཀཱ་ཏྱཱ་ཡ་ནས་སྨྲས་པ། ཁྱོད་ངན་ལས་བྱེད་པ་ལ་འགྱོད་པ་དང ། མི་དགའ་བ་མ་བྱེད་པར་བརྩོན་འགྲུས་སུ་ལས་བྱོས་ལ། ཇོ་མོ་བསྙལ་བའི་འོག་ཏུ་དལ་གྱིས་ཇོ་མོའི་སྒོ་ཕྱེ་སྟེ་སྒོ་ཕག་གམ། གྲ་གཙང་ཞིག་ཏུ་རྩཝ་གཙང་མ་བཏིང་བ་ལ་འདུག་ནས་གཞན་མ་སེམས་པར་སངས་རྒྱས་ཡིད་ལ་བྱོས་ལ་དྲན་པར་གྱིས་ཤིག་།དེ་ནས་རྒན་མོས་བསྟན་པ་བཞིན་དུ་བྱས་ནས་རིང་པོ་མ་ལོན་པར་མཚན་མོ་འདུག་བཞིན་ཚེ་འཕོས་ནས་སུམ་ཅུ་རྩ་གསུམ་གྱི་ལྷར་སྐྱེས་སོ། །དེའི་ཇོ་མོ་ནང་པར་སྔར་ལངས་ནས་ཁྱིམ་གྱི་ནང་ན་བྲན་མོ་ཚེ་འཕོས་པར་མཐོང་ནས་ཁྲོས་ཏེ། རྒན་མོ་འདི་ཁྱིམ་ནང་དུ་མ་བཏང་ན་ཅིའི་ཕྱིར་འདི་ཚེ་འཕོས་ཞེས་གཤེ་ནས་རྐང་པ་ལ་རྩ་ཐག་གིས་བཏགས་ཏེ་བཤལ་ནས་དུར་ཁྲོད་དུ་བསྐྱལ་ཏོ། །དེའི་ཚེ་ན་ལྷའི་སྲས་པོ་ཞིག་ལ་ལྷའི་བུ་མོ་ལྔ་བརྒྱས་བསྐོར་ཏེ་རྩེ་དགའ་བ་
314a
> ༄#། །ལས་ཚེ་འདས་ནས་རྒན་མོ་དེ་ལྷའི་སྲས་མོ་དེའི་ནང་དུ་སྐྱེས་སོ། །ལྷར་སྐྱེས་བདག་དབང་པོ་རྣོན་པོས་ནི། བདག་ཅིའི་རྐྱེན་གྱིས་ལྷར་སྐྱེས་པར་ཤེས་སོ། ། དབང་པོ་རྟུལ་པོས་ནི། མི་ཤེས་ཏེ། རྒན་མོ་དེ་ཡང་ཅིའི་ཕྱིར་ལྷར་སྐྱེས་པ་ནི། མི་སེམས་ཀྱི། བདེ་བ་འབའ་ཞིག་ལ་ཆགས་སོ། །དེའི་ཚེ་ན་ཤཱ་རིའི་བུ་སུམ་ཅུ་རྩ་གསུམ་ན་འདུག་པ་དེས་ཁྱོད་ཅིའི་རྐྱེན་གྱིས་ལྷར་སྐྱེས་པ་ཤེས་སམ་ཞེས་དྲིས་པ་དང ། བདག་གིས་མི་ཤེས་སོ། །ཞེས་སྨྲས་ནས་ཤཱ་རིའི་བུས་ལྷའི་མིག་གིས་བལྟས་ཏེ་ཇི་ལྟར་ལྷར་སྐྱེས་པ་མཐོང་བར་བྱས་སོ། །དེ་ནས་ལྷའི་སྲས་མོ་ལྔ་བརྒྱ་ཙམ་དང་དུར་ཁྲོད་དུ་ལྷགས་ཏེ་རུས་བུ་ལ་ལྷའི་མེ་ཏོག་གིས་གཏོར། སྤོས་ཀྱིས་མཆོད་པ་བྱས་སོ། །ལྷའི་འོད་ཀྱིས་གྲོང་ཁྱེར་དེ་དག་སྣང་བ་ཆེན་པོས་སྣང་བར་གྱུར་ནས་དེའི་ཇོ་མོ་ལ་སོགས་པ་ཡ་མཚན་དུ་གྱུར་ཏེ། མི་མང་པོ་དང་བ་ལྟར་དོང་བ་ལས་ལྷ་མང་པོ་རྒན་མོའི་རུས་བུ་ལ་མཆོད་པ་བྱེད་པ་མཐོང་ནས་ལྷ་རྣམས་ལ་ཁྱེད་ཅིའི་ཕྱིར་རུས་བུ་འདི་ལ་མཆོད་བ་བྱེད། འདི་ནི། གསོན་པོའི་ཚེ་ཡང་རྩོག་པས་ཀུན་གྱིས་མི་འདོད་ན། ད་ཚེ་འཕོས་པའི་རུས་བུ་ལ་ལྟ་ཅི་སྨོས་ཞེས་སྨྲས་སོ། །དེའི་ཚེ་ན་ལྷའི་སྲས་མོ་རྣམས་ཀྱིས་ཇི་ལྟར་ལྷར་སྐྱེས་པའི་གཏམ་རྒྱས་པར་བྱས་ནས་ཀཱ་ཏྱཱ་ཡ་ན་གང་ན་བ་དེར་སོང་ངོ ། །དེར་ཕྱིན་པ་དང་ཀཱ་ཏྱཱ་ཡ་ནས་ལྷའི་
314b
> སྲས་མོ་དེ་དག་ལ་སྦྱིན་པ་དང ། ཚུལ་ཁྲིམས་དང ། མཐོ་རིས་སུ་སྐྱེ་བ་ལ་སོགས་ཏེ། དམ་པའི་ཆོས་ཀྱི་གཏམ་རྒྱས་པར་བྱས་ནས་མི་གཙང་བའི་ཆོས་དང ། འབྱུང་བའི་ཆོས་བསྟན་པས།་ལྷའི་སྲས་མོ་དེ་དག་རྡུལ་དང་བྲལ། དྲི་མ་དང་བྲལ་ཏེ་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ནས་ཕྱིར་ལྷའི་གནས་སུ་དོང་ངོ ། །འཁོར་མང་པོ་རྣམས་ཀྱང་ཆོས་བསྟན་པ་ཐོས་ནས་སོ་སོ་ནས་འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་པར་གྱུར་ཏེ་རྗེས་སུ་ཡི་རང་ནས་མངོན་པར་དགའོ། །བྲན་མོ་དབུལ་མོས་ཀཱ་ཏྱཱ་ཡ་ན་ལ་དབུལ་བཙོངས་པའི་ལེའུ་སྟེ་བཅུ་དགུ་པའོ།། །།གསེར་ལྷའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ན་ཁྱིམ་བདག་རབ་ཏུ་ཕྱུག་པ། ལོངས་སྤྱོད་ཆེ་བ། ནོར་བུ་རིན་པོ་ཆེས་བང་མཛོད་གང་བ་ཞིག་ཡོད་དེ། རིགས་མཉམ་པ་ལས་ཆུང་མ་བླངས་ནས་དེའི་ཆུང་མ་ལ་བུ་ཁྱེའུ་གསེར་གྱི་མདོག་ལྟ་བུ་ཞིག་བཙས་ཏེ་མཚན་མཁན་གྱིས་བལྟས་ནས་དེའི་མིང་གསེར་ལྷ་ཞེས་བཏགས་སོ། །ཁྱེའུ་དེ་བཙས་པ་ན་ཁྱེའུ་དེའི་ཁྱིམ་དུ་ཁྲོན་པ་ཆུ་ཞེང་གབ་པ། ཆུ་ཞེང་ཁྲུ་བརྒྱད་པ། གཏིང་ཟབ་ཁྱད་ཀྱང་ཁྲུ་བརྒྱད་པ་ཞིག་རང་བྱུང་སྟེ། ཁྲོན་པ་དེའི་ཆུ་བཅུས་ན་
315a
> ༄#། །མིའི་ཡིད་བཞིན་དུ་འབྱུང་སྟེ། གང་གོས་འདོད་པ་ལ་གོས་འབྱུང ། བཟའ་བ་དང་བཏུང་བ་འདོད་པ་ལ་བཟའ་བ་དང་བཏུང་བ་འབྱུང ། གསེར་དངུལ་དང་ནོར་བུ་རིན་པོ་ཆེ་འདོད་པ་ལ་གསེར་དངུལ་དང་ནོར་བུ་རིན་པོ་ཆེ་འབྱུང་སྟེ། ཅི་དང་ཅི་འདོད་པ་དེ་དག་ཐམས་ཅད་ཡིད་བཞིན་དུ་འབྱུང་ངོ ། །ཁྱེའུ་དེ་གསོས་བསྐྱེད་དེ་ཆེར་གྱུར་པ་དང ། རིག་པའི་གནས་ཀྱང་ལོབས་ནས་ཁྱིམ་བདག་དེ་རབ་ཏུ་དགའ་སྟེ། ཁྱེའུ་དེའི་ཆུང་མ་བཙལ་ལོ་སྙམ་བསམས་ནས་ཁྱེའུ་དེའི་ཆུང་མ་ཡང་ཁྱེའུ་དེ་དང་འདྲ་བར་གསེར་གྱི་མདོག་ཅན། བཟང་བ། མཛེས་པ། ཕལ་བས་ལྷག་པ་ཞིག་བཙལ་བར་བསམས་ཏེ་ཡུལ་ཀུན་ཏུ་མནའ་མ་ཚོལ་ལོ། །དེའི་ཚེ་ཡུལ་ཙམ་པ་ན་ཁྱིམ་བདག་རབ་ཏུ་ཕྱུག་པ་ཞིག་ལ་བུ་མོ་གསེར་གྱི་འོད་ཅེས་བྱ་བ་ཞིག་ཡོད་དེ། བུ་མོ་དེ་ཡང་གསེར་གྱི་མདོག་ཅན། ཤིན་ཏུ་འཚེར་བ། པགས་པ་ཤིན་ཏུ་སྲབ་པ། རུས་པ་ཕྲ་བ་ཞིག་སྟེ། ཐོག་མ་བཙས་པའི་ཚེ་ཡང་ཁྱིམ་ནས་ཁྲོན་པ་ཆུ་ཞེང་དང་གཏིང་འདྲ་བར་ཁྲུ་བརྒྱད་པ་ཞིག་རང་བྱུང་སྟེ། ཁྲོན་པ་དེ་ལས་ཀྱང་རིན་པོ་ཆེ་སྣ་ཚོགས་དང ། གོས་དང ། བཟའ་བ་དང ། བཏུང་བ་ལ་སོགས་པ་ཅི་དང་ཅི་འདོད་པ་དེ་དག་ཡིད་བཞིན་དུ་རང་བྱུང་ངོ ། །ཁྱིམ་བདག་དེས་ཀྱང་འདི་སྙམ་དུ་བདག་གི་བུ་མོ་བཟང་མོ་འདི་ནི། བུ་ཕོ་འདི་དང་འདྲ་བར་ལུས་
315b
> གསེར་གྱི་མདག་ཅན། ཤིན་ཏུ་འཚེར་བ། བཟང་བ། མཛེས་པ་ཞིག་ལ་གཏང་ངོ་སྙམ་བསམ་པ་ཞིག་དང་ཕྲད་དེ་བུ་མོའི་གཏམ་ཡང་ཁྱེའུས་ཐོས། ཁྱེའུའི་གཏམ་ཡང་བུ་མོས་ཐོས་ནས་ཁྱིམ་བདག་གཉིས་གཉན་བྱ་བར་འཐམས་ཏེ། སྟོན་མོ་བྱ་བར་འཐམས་ནས་བུ་མོ་མཉན་ཡོད་དུ་ཁྲིད་དེ་མཉན་ཡོད་དུ་གསེར་ལྷའི་ཁྱིམ་དུ་ཕྱིན་ནས་གསེར་ལྷས་སངས་རྒྱས་དང ། དགེ་འདུན་རྣམས་བཤོས་ལ་སྤྱན་དྲངས་ཏེ། བཅོམ་ལྡན་འདས་ཀྱང་དགེ་འདུན་དང་བཅས་ཏེ་བཤོས་ལ་གཤེགས་ནས་གསེར་ལྷ་ཁྱོ་ཤུག་གཉིས་ལ་དམ་པའི་ཆོས་རྒྱས་པར་བསྟན་ཏེ། གསེར་ལྷ་ཁྱོ་ཤུག་དང ། ཁྱིམ་བདག་ཁྱོ་ཤུག་གཉིས་ཀྱིས་བཅོམ་ལྡན་འདས་ལས་ཆོས་ཐོས་ནས་བསྐལ་པ་ཁྲི་ཕྲག་གཉིས་ཤུའི་སྡིག་པ་མི་དགེ་བ་ཤིན་ཏུ་འབར་བ་ཀུན་ཞི་ནས་སེམས་རྣམ་པར་དག་པས་ཆོས་རྟོགས་ཏེ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་སླར་གཙུག་ལག་ཁང་དུ་གཤེགས་པ་དང ། གསེར་ལྷ་དང ། གསེར་འོད་ཁྱོ་ཤུག་གཉིས་ཀྱང་ཕ་མ་ལ་རབ་ཏུ་འབྱུང་བར་གསོལ་ནས་ཕ་མས་ཀྱང་གནང་སྟེ་གཉི་ག་སངས་རྒྱས་གང་ན་བ་དེར་དོང་སྟེ་དེར་ཕྱིན་པ་དང ། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་བདག་ཅག་གཉིས་རབ་ཏུ་འབྱུང་ངོ ། །ཞེས་གསོལ་པ་དང ། བཅོམ་ལྡན་འདས་ཀྱིས་ལེགས་པར་འོངས་
316a
> ༄#། །སོ། །ཞེས་བཀའ་སྩལ་པས་སྐྲ་དང་ཁ་སྤུ་རང་བྱི་སྟེ་དུར་སྨྲིག་གྱོན་པའི་དགེ་སློང་དུ་གྱུར་ནས་གསེར་ལྷ་ནི། དགེ་སློང་གི་དགེ་འདུན་གྱི་ནང་དུ་སོང་ངོ ། ། གསེར་འོད་ནི། སྐྱེ་རྒུའི་བདག་མོ་ལ་གཏད་དོ། །གཉི་ག་རིང་པོ་མ་ལོན་པར་དགྲ་བཅོམ་པར་གྱུར་ནས་རིག་པ་གསུམ་དང ། མངོན་པར་ཤེས་པ་དྲུག་དང ། རྣམ་པར་ཐར་པ་བརྒྱད་ལ་སོགས་ཏེ། ཡོན་ཏན་ཐམས་ཅད་དང་ལྡན་པར་གྱུར་ཏོ། །དགེ་སློང་དག་ཐེ་ཚོམ་དུ་གྱུར་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས། དགེ་སློང་གསེར་ལྷ་དང ། གསེར་འོད་གཉིས་སྔོན་ལས་ཅི་བགྱིས་ན། ཐོག་མ་བཙས་པ་ན་འདི་ལྟར་ནོར་བུ་རིན་པོ་ཆེ་དང ། ལོངས་སྤྱོད་ཐམས་ཅད་དང་ལྡན་ཏེ།་ཁྲོན་པ་ལས་ཀྱང་ཐམས་ཅད་ཀྱི་རེ་བ་ཡོངས་སུ་སྐོང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་བསྐལ་པ་དགུ་བཅུ་རྩ་གཅིག་གི་ཕ་རོལ་ན་སངས་རྒྱས་རྣམ་པར་གཟིགས་ཞེས་བྱ་བ་འཇིག་རྟེན་དུ་གཤེགས་ནས་དེ་མྱ་ངན་ལས་འདས་པའི་འོག་ཏུ་དེའི་བསྟན་པ་ལ་ཞུགས་པའི་དགེ་སློང་དག་གྲོང་ཁྱེར་དང ། ལྗོངས་རྒྱུ་ཞིང་སེམས་ཅན་གྱི་དོན་བྱེད་དེ། དེ་དག་ལ་ཁྱིམ་བདག་རིགས་ཆེ་ཞིང་མཐོ་བ་ཀུན་གྱིས་ཆོས་གོས་དང་བསོད་སྙོམས་མི་བྲེལ་བར་བྱིན་ནོ། །དེའི་ཚེ་ཁྱིམ་བདག་དབུལ་
316b
> པོ་ཁྱོ་ཤུག་གཉིས་ཤིག་གིས་འདི་སྙམ་དུ་བསམས་སོ། །བདག་ཅག་གཉིས་ཕ་མ་ཡོད་པའི་ཚེ་ནོར་བུ་རིན་པོ་ཆེ་དང ། ལོངས་སྤྱོད་དུ་ལྡན་ཏེ་བང་མཛོད་ཡོངས་སུ་གང་ཡང་འཕགས་པའི་དགེ་འདུན་དང་མ་ཕྲད། ད་འདི་ལྟར་ཕོངས་བྲེལ་ཏེ་ཅི་ཡང་མི་བདོག་ནས་རྩཝ་ཕུང་གི་སྟེང་ན་ཉལ་ཞིང ། བྲེ་གང་ཕུལ་གང་ཡང་མི་བདོག་པའི་ཚེ་འཕགས་པའི་དགེ་འདུན་གཤེགས་ནས་ཁྱིམ་བདག་ཕྱུག་པོ་དེ་ཀུན་ཆོས་གོས་དང ། བསོད་སྙོམས་འབུལ་ན། བདག་ཅག་ནི། ཅི་ཡང་དབུལ་དུ་མེད་དོ་སྙམ་དུ་བསམས་ཏེ་རབ་ཏུ་མི་དགའ་ནས་དུས་སོ། །ཁྱིམ་ཐབ་དུས་པའི་མཆི་མ་ཆུང་མའི་ལག་པར་ལྷུང་ནས་ཆུང་མས་ཁྱིམ་ཐབ་ལ་ཁྱོད་ཅིའི་ཕྱིར་དུ་ཞེས་སྨྲས་པ་དང ། ཁྱོད་མི་ཤེས་སམ། གྲོང་ཁྱེར་འདིར་འཕགས་པའི་དགེ་འདུན་དག་གཤེགས་ཏེ་ཁྱིམ་བདག་ཕྱུག་པོ་དེ་ཀུན་མཆོད་པ་བྱེད་ན། བདག་ཅག་འབའ་ཞིག་ཅི་ཡང་དབུལ་དུ་མེད་དེ། ད་འདིར་མ་ཕུལ་ན་སྐྱེ་བ་ཕྱི་མ་ལ་གར་འགྲོ་སྙམ་སྟེ་མི་དགའོ། །ཆུང་མས་སྨྲས་པ། ཁྱོད་སོང་ལ་བདག་ཅག་གི་མཛོད་ཁང་རྙིང་དུ་ཚོལ་ཅིག་དང ། ལུས་བ་ཅུང་ཟད་ཡོད་ཀྱང་སྲིད་ཀྱི། གལ་ཏེ་སྣ་འགའ་ཞིག་རྙེད་ན་དབུལ་ལོ།་ཞེས་སྨྲས་ནས་མཛོད་ཁང་རྙིང་དུ་བཙལ་ན། གསེར་གྱི་དོང་ཚེ་ལུས་པ་གཅིག་རྙེད་དོ། །ཆུང་མ་ལའང་མེ་ལོང་གཅིག་ཅིག་ཡོད་དེ། ཁྱོ་ཤུག་གཉིས་ཀྱིས་བུམ་པ་གསར་
317a
> ༄#། །པ་གཅིག་ཅིག་ཀྱང་ཉོས་ནས་བུམ་པའི་ནང་ཆུ་གཙང་མས་བཀང་སྟེ་གསེར་གྱི་དོང་ཚེ་གཅིག་ནང་དུ་བཅུག་ནས་མེ་ལོང་གིས་ཁ་བཅད་དེ་ཆུའི་བུམ་པ་ཐོགས་པ་དགེ་འདུན་ལ་ཕུལ་ལོ། །དགེ་འདུན་གྱིས་ཀྱང་བཞེས་ནས་ཆུ་དེ་ལ་ཁ་ཅིག་གིས་ནི། འཐུངས། ཁ་ཅིག་གིས་ནི། ཁ་ལག་དང་ལྷུང་བཟེད་བཀྲུས་ཏེ། ཁྱིམ་བདག་ཁྱོ་ཤུག་གཉིས་ཀྱིས་དེ་ལྟར་དགེ་འདུན་གྱིས་སྤྱད་པ་མཐོང་ནས་རབ་ཏུ་དགའ་མགུ་རངས་ཏེ་ཕྱིར་ཁྱིམ་དུ་སོང་ངོ ། །དེ་ནས་རིང་པོ་མ་ལོན་པར་ནད་ཀྱིས་བཏབ་ནས་ཁྱོ་ཤུག་གཉིས་ཚེ་འཕོས་ཏེ་སུམ་ཅུ་རྩ་གསུམ་གྱི་ལྷར་སྐྱེས་སོ། །ཀུན་དགའ་བོ། དེའི་ཚེ་དེའི་དུས་ན་དབུལ་པོ་ཁྱོ་ཤུག་གཉིས་ཆུའི་བུམ་པ་ཕུལ་བ་དེ་ནི། གསེར་ལྷ་ཁྱོ་ཤུག་གཉིས་ཡིན་ནོ། །སྔོན་ཆུ་བུམ་པ་གང་དང ། གསེར་གྱི་དོང་ཚེ་དང ། མེ་ལོང་གཅིག་ཕུལ་བས་སྐྱེ་བ་ཐམས་ཅད་དུ་བཟང་ཞིང་མཛེས་པ་དང ། མདོག་གསེར་གྱི་ཁ་དོག་ཅན་དུ་རྟག་ཏུ་འཚེར་བར་གྱུར་ཏོ། །འདི་ལྟར་བསྐལ་པ་དགུ་བཅུ་རྩ་གཅིག་གི་བར་དུ་དེ་འདྲ་བར་གྱུར་ཏོ། །དེའི་ཚེ་ན་ཤིན་ཏུ་དང་བའི་སེམས་ཀྱིས་ཕུལ་བས། ད་འདིར་འཁོར་བའི་མཐར་ཕྱིན་ཏེ་དགྲ་བཅོམ་པར་གྱུར་ཏོ། །ཀུན་དགའ་བོ། དེ་བས་ན་བསོད་ནམས་ཀྱི་ཕྱོགས་སུ་འགྱུར་བའི་ལས་ནི། གང་ཡང་མི་བྱར་མི་རུང་ངོ ། །དབུལ་
317b
> པོ་དེས་སྦྱིན་པ་ཅུང་ཟད་བྱས་པས། བསོད་ནམས་ཀྱི་ཕུང་པོ་ཚད་མེད་པ་འདི་ལྟ་བུ་དག་ཐོས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཀུན་དགའ་བོ་དང ། འཁོར་མང་པོ་རྣམས་སྦྱིན་པའི་བསོད་ནམས་ཀྱི་ཚོགས་བསག་པའི་སེམས་སྐྱེས་ཏེ་རྗེས་སུ་ཡི་རང་ནས་མངོན་པར་དགའོ། །གསེར་ལྷའི་ལེའུ་སྟེ་ཉི་ཤུ་པའོ།། །། རིགས་གཉིས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ནི། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ན་ཁྱིམ་བདག་ཕྱུག་པོ་ཞིག་རིགས་མཉམ་པ་ལས་ཆུང་མ་བླངས་ནས་བུ་མེད་པས་ཤིན་ཏུ་མི་དགའ་སྟེ་ལྷ་ཀུན་ལ་གསོལ་བ་བཏབ་པ་ལས། ཕྱི་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏེ། ཟླ་བ་ཚང་ནས་ཁྱེའུ་ཞིག་བཙས་སོ། །ཁྱེའུ་དེ་ཡང་མཛེས་ཤིང་སྡུག་པ་ཞིག་སྟེ། ཕ་མ་དང་གཉེན་བཤེས་ཀུན་དགཱ་ནས་བཙས་སྟོན་བྱས་ནས་ཆུ་བོ་ཞིག་གི་འགྲམ་དུ་འདུས་ཏེ་བཙས་སྟོན་ཟ་བའི་ཚེ་ཀུན་གྱིས་ཁྱེའུ་བལྟ་བའི་ཕྱིར་གཅིག་གི་པང་པར་ཁྱེའུ་བླངས་ནས་ཡང་གཅིག་གི་པང་པར་བྱིན་ཏོ། །དེ་བཞིན་དུ་གཅིག་ནས་གཅིག་ཏུ་བརྒྱུད་པའི་ཚེ་གཅིག་གིས་ལེ་ལོ་བྱས་ནས་བུ་ཤོར་ཏེ་ཆུར་ལྷུང་ནས་ཆུས་ཁྱེར་རོ། །ཁྱེའུ་བསོད་ནམས་ཀྱི་མཐུས་ལས་མ་ཟད་པས་ཚེམ་
318a
> ༄#། །འཕོས་པར་ཉ་ཞིག་གིས་མིད་ནས་ཉའི་ལྟོ་ན་གསོན་པོར་འདུག་གོ་།ཆུ་བོ་དེའི་མཇུག་ན་ཡང་གྲོང་ཞིག་ཡོད་དེ། གྲོང་དེ་ན་ཡང་ཁྱིམ་བདག་ཕྱུག་པོ་བུ་མེད་པ་ཞིག་འདུག་གོ་།ཁྱིམ་བདག་དེའི་བྲན་ཞིག་ཆུ་བོའི་འགྲམ་ན་ཉ་བ་ཤོར་བ་ལས། ཉས་བུ་མིད་པ་ཟིན་ནས་ལྟོ་བཀས་པ་དང ། ལྟོ་ནས་བུ་ཁྱེའུ་ཞིག་བྱུང་ནས་བྲན་དེས་ཁྱེར་ཏེ་ཇོ་མོ་ལ་ཕུལ་ལོ། །ཁྱིམ་བདག་གི་ཆུང་མས་ཁྱེའུ་དེ་བླངས་ཏེ་བལྟས་ན། ཁྱེའུ་མཚན་དང་ལྡན་པ་བཟང་པོ་ཞིག་སྟེ་རབ་ཏུ་དགའ་ནས་བདག་ཅག་གིས་ལྷ་ཀུན་ལ་གསོལ་བ་བཏབ་པའི་རྟགས་ནི། འདི་ཡིན་ནོ་སྙམ་ནས་མ་མ་ལ་གཏད་དེ་གསོས་སོ། །དེའི་གྲོང་ལྟག་མའི་ཁྱིམ་བདག་གིས་གྲོང་འོག་མའི་ཁྱིམ་བདག་གིས་ཉའི་ལྟོ་ནས་བུ་ཞིག་རྙེད་དོ། །ཞེས་ཐོས་ནས་དེ་ནི། གདོན་མི་ཟ་བར་བདག་གི་བུ་ཆུར་ལྷུང་པ་ཡིན་ནོ་སྙམ་སྟེ་དེའི་ཐད་དུ་སོང་ནས་འདི་ནི། ངའི་བུ་ཡིན་གྱི། ཕྱིར་བྱིན་ཅིག་ཅེས་སྨྲས་སོ། །དེས་སྨྲས་པ། འདི་ནི། ཁྱོད་ཀྱི་བུ་མ་ཡིན་ཏེ། བདག་ལ་བུ་མེད་པས་ལྷ་ཀུན་ལ་གསོལ་བ་བཏབ་ནས་ལྷས་བྱིན་པའི་བུ་ཡིན་ཏེ། ཉའི་ལྟོ་ནས་རྙེད་དོ། །ཞེས་སྨྲས་སོ། །ཁྱིམ་བདག་དེ་གཉིས་རྩོད་ནས་རྒྱལ་པོ་ཞལ་ཆེ་བར་གསོལ་ཏོ། །དེ་ལ་ཁྱེའུའི་ཕ་མས་ནི། འདི་བདག་གི་བུ་ཡིན་ཏེ། ཆུའི་འགྲམ་ནས་ཆུར་ལྷུང་བ་འདི་ཡིན་ནོ། །ཞེས་སྨྲས་སོ། །ཁྱིམ་བདག་གཅིག་གིས་ཁྱེའུ་
318b
> འདི་བདག་གིས་ཉ་ཟིན་པའི་ལྟོ་ནས་རྙེད་དེ། ཁྱོད་ཀྱི་བུ་མ་ཡིན་ནོ། །ཞེས་སྨྲས་ནས་རྒྱལ་པོས་དེ་གཉིས་ཀའི་ཚུལ་དང་སྦྱར་ཏེ་ཁྱེའུ་འདི་ཁྱེད་གཉིས་གས་ཐུན་མོང་དུ་གསོས་ལ། ཆེར་སྐྱེས་ནས་ཁྱེད་གཉིས་ཀྱིས་བུའི་ཆུང་མ་རེ་རེ་ལོངས་ཤིག་།ཆུང་མ་གཉིས་ལས་བུ་གང་ལས་བྱུང་བ་སོ་སོར་ཁྱེར་ཅིག་ཅས་བཅད་དོ། །དེ་ནས་ཁྱིམ་བདག་གཉིས་ཀྱིས་ཀྱང་རྒྱལ་པོས་ཞལ་ཆེ་བཅད་པ་བཞིན་དུ་ཁྱེའུ་ཐུན་མོང་དུ་གསོས་ནས་ཅིས་ཀྱང་མི་བྲེལ་བར་བྱས་སོ། །དེ་ནས་ཁྱེའུ་དེ་ཆེར་སྐྱེས་ནས་ཕ་མ་གཉིས་ལ་འདི་སྐད་ཅེས་གསོལ་ཏོ། །བདག་བཙས་མ་ཐག་ཏུ་ཆུར་ལྷུང་བ་དང ། ཉས་མིད་པ་ལ་སོགས་ཏེ། སྡུག་བསྔལ་རྣམ་པ་སྣ་ཚོགས་མྱོང་ཡང་བདག་མ་གུམ་པས་བདག་ནི། རབ་ཏུ་འབྱུང་བར་དད་ཀྱི། གནོད་ཞིག་ཅེས་སྨྲས་སོ།། ཁྱེའུ་དེའི་ཕ་མ་གཉིས་ཀ་ཡང་བུ་སྡུག་ཆེས་པས་ངོ་མཆོག་ནས་རབ་ཏུ་འབྱུང་བར་གནང་བ་དང ། ཁྱེའུ་དེས་སངས་རྒྱས་གང་ན་བ་དེར་སོང་ནས་དེར་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བདག་སངས་རྒྱས་ཀྱི་བསྟན་པ་ལ་རབ་ཏུ་འབྱུང་ངོ ། །ཞེས་གསོལ་ཏོ། །དེ་ལ་བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་པས། སྒྲ་དང་ཁ་སྦུ་རང་བྱི་ནས་དགེ་སློང་དུ་གྱུར་ཏེ་མིང་ཡང་རིགས་གཉིས་པ་ཞེས་བཏགས་སོ། །དགེ་སློང་རིགས་གཉིས་པ་ལ་བཅོམ་ལྡན་འདས་ཀྱིས་དམ་པའི་ཆོས་བསྟན་
319a
> ༄#། །ནས་སྡུག་བསྔལ་གྱི་མཐར་ཕྱིན་ཏེ། དེ་ཉིད་དུ་དགྲ་བཅོམ་པར་གྱུར་ཏོ། །དེ་ལ་དགེ་སློང་དག་ཐེ་ཚོམ་སྐྱེས་ཏེ་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་རིགས་གཉིས་པ་འདི། སྔོན་དགེ་བའི་རྩ་བ་ཅི་བསྐྲུན་ན། ཆབ་ཏུ་ལྷུང་སྟེ་ཉའི་ལྟོར་མཆིས་ཀྱང་གུམ་པར་མ་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཁྱོད་རྟག་པར་ཉོན་ཅིག་།སྔོན་སངས་རྒྱས་རྣམ་པར་གཟིགས་ཞེས་བྱ་བ་འཇིག་རྟེན་དུ་གཤེགས་ཏེ་སྐྱེ་བོ་མང་པོ་ལ་ཆོས་སྟོན་ཏོ། །དེའི་ཚེ་ཁྱིམ་བདག་ཁ་ཅིག་ཀྱང་འཁོར་དེར་འོངས་ཏེ་བཅོམ་ལྡན་འདས་ཀྱིས་སྦྱིན་པ་བྱིན་པའི་བསོད་ནམས་དང ། ཚུལ་ཁྲིམས་བསྲུངས་པའི་ཡོན་ཏན་ལ་སོགས་བ་རྒྱ་ཚར་བསྟན་པ་ཐོས་ནས་ཤིན་ཏུ་དགའ་མགུ་རངས་ཏེ་བསམ་པ་དག་པའི་དད་པ་སྐྱེས་ནས་སངས་རྒྱས་དེ་ལས་སྲོག་མི་གཅོད་པ་ལ་སོགས་པའི་བསླབ་ཚིགས་གསུམ་མནོས་ནས་དོང་ཚེ་གཅིག་ཕུལ་ལོ། །དེའི་དབང་གིས་གང་ནས་གང་དུ་སྐྱེས་ཀྱང་ལོངས་སྤྱོད་དང་རིན་པོ་ཆེར་ལྡན་ཏེ་ཕོངས་པ་མེད་པར་གྱུར་ཏོ། །ཀུན་དགའ་བོ། དེའི་ཚེ་དེའི་དུས་ན་ཁྱིམ་བདག་དེ་ནི། དགེ་སློང་རིགས་གཉིས་པ་འདི་ཡིན་ཏེ། སངས་རྒྱས་ལ་དོང་ཚེ་གཅིག་ཕུལ་བས། བསྐལ་པ་དགུ་བཅུ་རྩ་གཅིག་གི་བར་དུ་ལོངས་སྤྱོད་ཆེན་
319b
> པོ་དང་ལྡན་པར་གྱུར། ད་ལྟར་གྱི་ཚེ་འདི་ལ་ཡང་ཕ་མ་གཉིས་ཀྱི་ཁྱིམ་ན་ལོངས་སྤྱོད་བདོག་པ་དབང་བར་གྱུར་ཏེ། སྲོག་མི་གཅོད་པའི་བསླབ་ཚིགས་མནོས་པས་ཆུར་ལྟུང་ཏེ་ཉའི་ལྟོར་སོང་ཡང་མ་ཤིའོ། །དཀོན་མཆོག་གསུམ་ལ་སྐྱབས་སུ་སོང་བས་ང་དང་ཕྲད་ནས་དགྲ་བཅོམ་པར་གྱུར་ཏོ། །དེའི་ཚེ་ཀུན་དགའ་བོ་དང ། འཁོར་མང་པོ་རྣམས་ཀྱིས་བསྟན་པ་ལ་རྗེས་སུ་ཡི་རང་ནས་མངོན་པར་དགའོ། །རིགས་གཉིས་པའི་ལེའུ་སྟེ་ཉི་ཤུ་རྩ་གཅིག་པའོ།། །།བམ་པོ་དྲུག་པ། རྒྱལ་པོ་ཟླ་འོད་ཀྱིས་མགོ་བྱིན་པའི་ལེའུ།་འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཡངས་པ་ཅན་གྱི་ཨ་མྲའི་ཚལ་ན་བཞུགས་སོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །རྫུ་འཕྲུལ་གྱི་རྐང་པ་བཞི་ཐོབ་ན། བསྐལ་པ་གཅིག་གི་བར་དུ་འཇིག་རྟེན་ན་གནས་པར་འགྱུར་ཏེ། ངས་ཀྱང་རྫུ་འཕྲུལ་གྱི་རྐང་པ་བཞི་ཤིན་ཏུ་བསྒོམས་པས། ད་དེ་བཞིན་གཤེགས་པ་འཇིག་རྟེན་ན། སྐུ་ཚེ་ཇི་སྲིད་ཀྱི་བར་དུ་བཞུགས་པའི་རིགས་ཞེས་ལན་གསུམ་གྱི་བར་དུ་སྨྲས་ན། དེའི་ཚེ་ན་ཀུན་དགའ་བོ་བདུད་ཀྱིས་བསླུས་པས། བཅོམ་ལྡན་འདས་ཀྱིས་བཀའ་ཐོས་བཞིན་དུ་ཙང་མི་སྨྲ་བར་འདུག་གོ་།ཡང་བཅོམ་ལྡན་འདས་ཀྱིས་ཀུན་དགའ་བོ་ལ་
320a
> ༄#། །ཁྱོད་ལོངས་ལ་དབེན་པར་སོང་སྟེ་ཤིན་ཏུ་སོམས་ཤིག་།ཅེས་བཀའ་སྩལ་ནས་ཀུན་དགའ་བོ་འདུག་པ་ལས་ལངས་ཏེ་ཚལ་ཞིག་ཏུ་སོང་ངོ ། །ཀུན་དགའ་བོ་སོང་བའི་འོག་ཏུ་བདུད་ཀྱི་རྒྱལ་པོ་སྡིག་ཏོ་ཅན་འོངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཡུན་རིང་དུ་འཇིག་རྟེན་ན་བཞུགས་ཏེ། གདུལ་བའི་རིགས་པ་ཡང་གངྒཱའི་ཀླུང་བྱེ་མ་སྙེད་བཏུལ་ནས་འཁོར་བ་ལས་ཡོངས་སུ་བཟླས་པའི་དོན་ཡང་མཛད་ལགས་ལ། ད་སྐུ་ན་ཡང་བགྲེས་ཀྱི། མྱ་ངན་ལས་འདའ་བར་གཤེགས་པའི་རིགས་སོ། །ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ས་ཉུང་ཟད་ཅིག་བླངས་ཏེ་ཕྱག་གི་སེན་མོའི་སྟེང་དུ་བཞག་ནས་བདུད་སྡིག་ཏོ་ཅན་ལ་ས་ཆེན་པོའི་ས་མང་ངམ། སེན་མོའི་སྟེང་གི་ས་མང་ཞེས་བཀའ་སྩལ་ནས་བདུད་སྡིག་ཅན་གྱིས་གསོལ་པ། ས་ཆེན་པོའི་ས་རབ་ཏུ་མང་གི་།སེན་མོའི་སྟེང་གི་ས་མང་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ངས་བཏུལ་བའི་སེམས་ཅན་ནི། སེན་མོའི་སྟེང་གིས་དང་འདྲའོ། །གང་མ་བཏུལ་བ་ནི། ས་ཆེན་པོ་དང་འདྲའོ། ། བཅོམ་ལྡན་འདས་ཀྱིས་བདུད་སྡིག་ཏོ་ཅན་ལ་བཀའ་སྩལ་པ། ད་སྟེ་ཟླ་བ་གསུམ་ནང་ཡོངས་སུ་མྱ་ངན་ལས་འདའ་འོ། །ཞེས་བཀའ་སྩལ་པ་བདུད་སྡིག་ཏོ་ཅན་གྱིས་ཐོས་
320b
> ནས་རབ་ཏུ་དགའ་མགུ་རངས་ཏེ་ཕྱིར་དོང་ངོ ། །དེའི་ཚེ་ཀུན་དགའ་བོ་ཚལ་གྱི་ནང་ན་གཉིད་ལོག་ནས་རྨི་ལམ་དུ་ཤིང་ཆེན་པོ་ནམ་མཁའི་ཁམས་ཀུན་ཏུ་ཡོག་པ་ལ་ཡལ་ག་དང ། ལོ་མ་དང ། མེ་ཏོག་དང ། འབྲས་བུ་ཤིན་ཏུ་རྒྱས་པ། འགྲོ་བ་ཐམས་ཅད་ལ་ཕན་པའི་དོན་དུ་འགྱུར་བ། ཤིང་དེ་ལ་ཡོན་ཏན་བརྗོད་ཀྱིས་མི་ལང་བ་རྣམ་པ་སྣ་ཚོགས་དང་ལྡན་པ་ཞིག་རྨིས་ཏེ། རིང་པོ་མ་ལོན་པར་རླུང་ཆེན་པོ་ལངས་ནས་ཡལ་ག་དང་ལོ་མ་ཀུན་གྲུགས་ཏེ་རྡུལ་བཞིན་དུ་འཐོར་ནས་ཀྱང་སྟོབས་པོ་ཆེའི་གནས་སུ་མེད་པར་གྱུར་ཏེ་འགྲོ་བ་ཐམས་ཅད་ཤིན་ཏུ་མྱ་ངན་བྱེད་པ་སྙམ་རྨིས་ནས་སད་པ་དང་མི་བདེ་ཞིང་སྐྲག་པར་གྱུར་ཏེ་འདི་སྙམ་དུ་བསམས་སོ། །བདག་གིས་ལྷ་དང་མི་ཐམས་ཅད་ལ་ཕན་པའི་དོན་དུ་འགྱུར་བའི་ཤིང་ཆེན་པོ་ཡོན་ཏན་ཐམས་ཅད་དང་ལྡན་པ་ཞིག་རྨིས་ནས་རིང་པོ་མ་ལོན་པར་རླུང་ཆེན་པོས་གཏོར་ཏེ་མེད་པར་བྱས་པ་འདི། བཅོམ་ལྡན་འདས་ནི། ཤིང་ཆེན་པོ་དང་འདྲ་བར་ཐམས་ཅད་ཀྱི་སྐྱབས་སུ་གྱུར་ན། ཅི་བཅོམ་ལྡན་འདས་མྱ་ངན་ལས་འདའ་བར་མི་དགོངས་སམ་སྙམ་བསམས་ནས་ཤིན་ཏུ་སྐྲག་སྟེ་བཅོམ་ལྡན་འདས་གང་ན་བར་འོངས་ནས་ཞབས་ལ་སྤྱི་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཚལ་ན་མཆིས་པ་ལས་རྨི་ལམ་འདི་ལྟ་བུ་ཞིག་རྨིས་ན། ཅི་བཅོམ་ལྡན་འདས་མྱ་
321a
> ༄#། །ངན་ལས་འདའ་བར་མི་དགོངས་སམ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེ་དེ་བཞིན་ནོ། །ཁྱོད་ཀྱིས་སྨྲས་པ་བཞིན་ཏེ། ང་ད་སྟེ་ཟླ་བ་གསུམ་ན་མྱ་ངན་ལས་འདའོ། །གང་རྫུ་འཕྲུལ་གྱི་རྐང་པ་བཞི་ཐོབ་པ་ནི། བསྐལ་པ་གཅིག་གི་བར་དུ་གནས་ཏེ། ང་ཡང་རྫུ་འཕྲུལ་གྱི་རྐང་པ་བཞི་ཤིན་ཏུ་བསྒོམས་ན།་དེ་དེ་བཞིན་གཤེགས་པ་སྐུ་ཚེ་ཇི་སྲིད་ཀྱི་བར་བཞུགས་པའི་རིགས་ཞེས་ཁྱོད་ལ་དྲིས་ན། ལན་གསུམ་གྱི་བར་དུ་དྲིས་ཀྱང་ཁྱོད་སྨྲར་མ་བཏུབ་སྟེ། ཁྱོད་སོང་བའི་འོག་ཏུ་བདུད་ཀྱི་རྒྱལ་པོ་སྡིག་ཏོ་ཅན་འོངས་ཏེ་མྱ་ངན་ལས་འདའ་བར་གསོལ་ནས་ངས་ཀྱང་དེ་བཞིན་དུ་གནང་ངོ ། །ཀུན་དགའ་བོས་དེ་སྐད་ཅེས་བཀའ་སྩལ་པ་ཐོས་ནས་རབ་ཏུ་མི་དགའ་ཞིང་མྱ་ངན་གྱིས་གདུངས་ཏེ་ལུས་མི་བཟོད་པར་གྱུར་ཏེ། ཉེ་གནས་རྣམས་ཀྱིས་གཅིག་ལ་གཅིག་སྤྲན་ནས་ཐམས་ཅད་ཀྱང་མྱ་ངན་གྱིས་གདུགས་ཏེ་བཅོམ་ལྡན་འདས་གང་ན་བ་དེར་ལྷགས་སོ། །དེ་ལ་བཅོམ་ལྡན་འདས་ཀྱིས་ཀུན་དགའ་བོ་དང་ཉེ་གནས་རྣམས་ལ་བཀའ་སྩལ་པ། རྟག་ཅེས་བྱ་བ་སུ་ཡིན། ཐམས་ཅད་ལ་རྟག་པ་མེད་དེ། ཁྱོད་ཀྱི་ཕྱིར་བྱ་བ་ཀུན་མཛད་དེ། བསྟན་པ་ཡང་བསྟན་ཟིན་པས་ཁྱེད་རྣམས་མྱ་ངན་མ་བྱེད་པར་བརྩོན་འགྲུས་སུ་ནན་ཏན་གྱིས་ཤིག་ཅེས་བཀའ་སྩལ་ནས་དེའི་ཚེ་ན་ཚེ་དང་ལྡན་པ་ཤཱ་རིའི་
321b
> ལུས་དེ་སྐད་དུ་བཅོམ་ལྡན་འདས་མྱ་ངན་ལས་འདའོ། །ཞེས་ཐོས་པ་དང་མྱ་ངན་དུ་གྱུར་ཏེ། དེ་བཞིན་གཤེགས་པ་མྱ་ངན་ལས་འདའ་བ་ནི་ཧ་ཅང་ཡང་མྱུར་ཆེས་སོ། །ལྷ་དང་བཅས་པའི་འཇིག་རྟེན་ཐམས་ཅད་མདོངས་ཤིང་མགོན་མེད་པར་གྱུར་ཏོ། །ཞེས་སྨྲས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི། བཅོམ་ལྡན་འདས་མྱ་ངན་ལས་འདའ་བ་མཐོང་བར་མི་བཟོད་དེ། ཅི་ནས་ཀྱང་བདག་སྔར་མྱ་ངན་ལས་འདའོ། །ཞེས་ལན་གསུམ་གྱི་བར་དུ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ད་སྟེ་ཁྱོད་དུས་ལ་བབ་པར་ཤེས་པ་ན། འཕགས་པ་ཐམས་ཅད་ནི། ཞི་བས་མྱ་ངན་ལས་འདའོ། །ཞེས་བཀའ་སྩལ་ཏོ། །ཤཱ་རིའི་བུས་ཀྱང་བཅོམ་ལྡན་འདས་ལས་གནང་བའི་ལུང་ཐོབ་ནས་གོས་ཚགས་བཅོས་ནས་བཅོམ་ལྡན་འདས་ལ་ལན་བརྒྱ་ཙམ་བསྐོར་ཏེ་ཚིགས་སུ་བཅད་པ་རྣམ་པ་མང་པོས་བསྟོད་ནས་སངས་རྒྱས་ཀྱི་ཞབས་དང་ཕྱག་ནས་བཟུང་སྟེ་ལན་གསུམ་གྱི་བར་དུ་སྤྱི་བོ་ས་ལ་གཏུགས་ནས་ཐལ་མོ་སྦྱར་ཏེ་འདི་སྐད་དུ་བདག་གིས་ནང་གི་ཐ་མར་ཡང་བཅོམ་ལྡན་འདས་མཐོང་ངོ ། །ཞེས་སྨྲས་ནས་སྟི་སྟང་དང་བཅས་ནས་མཆི་ཕྱག་འཚལ་ཏེ་ཉེ་གནས་དགེ་ཚུལ་ཀྱུན་ཏེ་དང་རྒྱལ་བའི་ཁབ་སྔོན་སྐྱེ་བའི་གནས་གང་ན་བར་སོང་ངོ ། །དེར་ཕྱིན་པ་དང་དགེ་ཚུལ་ཀྱུན་ཏེ་ལ་བསྒོ་བ། ཁྱོད་སོང་ལ་གྲོང་ཁྱེར་དང ། གྲོང་
322a
> ༄#། །རྡལ་དང ། རྒྱལ་པོའི་ཕོ་བྲང་དང ། བློན་པོའི་གནས་དང ། ཡོན་བདག་བཤེས་པའི་གནས་ཀུན་ཏུ་སོང་ལ་དེ་དག་ལ་ང་ཕྱི་ཕྱག་འཚལ་ལོ། །ཞེས་བསྒོ་ཞིག་།དེ་ནས་དགེ་ཚུལ་ཀྱུན་ཏེ་སློབ་དཔོན་གྱིས་བསྒོ་བ་བཞིན་དུ་ཀུན་ཏུ་སོང་ནས་འདི་སྐད་དུ་བདག་གི་མཁན་པོ་ཤཱ་རིའི་བུ་འདིར་གཤེགས་ཏེ། མྱ་ངན་ལས་འདའ་བར་གཤེགས་ཀྱི། ཁྱེད་ཀྱིས་མཐོང་བར་འདོད་ན་ཀུན་ཤོག་ཅིག་ཅེས་བསྒོའོ། །དེའི་ཚེ་ན་རྒྱལ་པོ་མ་སྐྱེས་དགྲ་དང ། ཁྱིམ་བདག་རིགས་ཆེ་ཞིང་མཐོ་བ་དང ། ཡོན་བདག་གི་རིགས་རྣམས་དགེ་ཚུལ་གྱིས་བསྒོ་བ་ཐོས་ནས་ཐམས་ཅད་མི་དགའ་ཞིང་མྱ་ངན་གྱིས་གདུངས་པར་གྱུར་ཏེ་ཐམས་ཅད་ཚིག་མཐུན་པར་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཆོས་ཀྱི་གཙོ་བོ་ཆེན་པོ། འགྲོ་བ་མང་པོའི་བཤེས་གཉེན་དུ་གྱུར་པ་ད་མྱ་ངན་ལས་འདའ་བ་ནི། ཧ་ཅང་ཡང་སྔ་ཆེས་སོ། །ཞེས་སྨྲས་ནས་དེ་དག་མྱུར་བར་ཤཱ་རིའི་བུ་གང་ན་བ་དེར་ལྷགས་ཏེ་ཕྱག་བྱས་ནས་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཆོས་ཀྱི་གཙོ་བོ་ཆེན་པོ། འགྲོ་བ་མང་པོའི་བཤེས་གཉེན་སྐུ་ཚེ་ཡོངས་སུ་གཏོང་སྟེ་མྱ་ངན་ལས་འདའོ། །ཞེས་བདག་ཅག་ལ་སོགས་པ་འགྲོ་བ་མང་པོའི་མགོན་དང་དཔུང་གཉེན་མེད་པར་འགྱུར་རོ། །དེ་ནས་ཤཱ་རིའི་བུས་འཁོར་མང་པོ་ལ་སྨྲས་པ། ཐམས་
322b
> ཅད་མི་རྟག་པ་སྟེ། སྐྱེ་བ་ཡང་མཐར་འཆི་ལ་འདུས་པ་ཡང་མཐར་འབྲལ་བས། ཁམས་གསུམ་ནི། སྡུག་བསྔལ་བ་དང་བཅས་པས་ན་གང་ཞིག་བདེ་བར་འགྱུར། ཁྱེད་ནི། སྔོན་གྱི་དགེ་བའི་རྩ་བ་ལས་སངས་རྒྱས་འཇིག་རྟེན་དུ་གཤེགས་པ་དང་ཡང་ཕྲད་མོད་ཀྱི། མདོ་སྡེ་དང་ཆོས་ཐོས་པ་ཡང་ཤིན་ཏུ་དཀའ། མི་ལུས་ཐོབ་པ་ཡང་ཤིན་ཏུ་དཀའ་བ་ཡིན་གྱི། བསོད་ནམས་ཀྱི་ཚོགས་སུ་འགྱུར་ཞིང་འཁོར་བ་ལས་གྲོལ་བའི་ལས་ལ་བརྩོན་པར་གྱིས་ཤིག་ཅེས་ཐབས་མཁས་པ་རྣམ་པ་སྣ་ཚོགས་ཀྱིས་འཁོར་མང་པོ་ལ་ཇི་ལྟར་ན་བ་ལ་སྨན་གཏོང་བ་བཞིན་དུ་རྒྱ་ཆེར་བསྟན་ཏེ། འཁོར་མང་པོས་ཆོས་བསྟན་པ་ཐོས་ནས་ཁ་ཅིག་ནི། འབྲས་བུ་དང་པོ་ནས་འབྲས་བུ་གསུམ་པའི་བར་དུ་ཐོབ་པར་གྱུར། ཁ་ཅིག་ནི། རབ་ཏུ་བྱུང་ནས་དགྲ་བཅོམ་པར་གྱུར། ཁ་ཅིག་ནི། རང་སངས་རྒྱས་སུ་གྲུབ་པར་ཡི་དམ་བཅས་ཏེ་ཆོས་བསྟན་པ་ཐོས་ནས་ཕྱག་འཚལ་ནས་སོ་སོར་དོང་ངོ ། །དེ་ནས་ཤཱ་རིའི་བུ་དེའི་ནུབ་མོ་ནམ་གྱི་ཆ་སྨད་ལ་ལུས་དང་སེམས་དྲང་པོར་བཞག་སྟེ་སེམས་རྩེ་གཅིག་ཏུ་བསམ་གཏན་དང་པོ་ལ་ཞུགས་སོ། །བསམ་གཏན་དང་པོ་ལས་བྱུང་ནས་བསམ་གཏན་གཉིས་ལ་ཞུགས།་བསམ་གཏན་གཉིས་པ་ལས་བྱུང་ནས་བསམ་གཏན་གསུམ་པ་ལ་ཞུགས། བསམ་གཏན་གསུམ་པ་ལས་བྱུང་ནས་བསམ་གཏན་བཞི་པ་ལ་ ཞུགས། བསམ་
323a
> ༄#། །གཏན་བཞི་པ་ལས་བྱུང་ནས་ནམ་མཁའ་མཐའ་ཡས་སྐྱེ་མཆེད་ཀྱི་ཏིང་ངེ་འཛིན་ལ་ཞུགས། ནམ་མཁའ་མཐའ་ཡས་སྐྱེ་མཆེད་ཀྱི་ཏིང་ངེ་འཛིན་ལས་བྱུང་ནས་རྣམ་ཤེས་མཐའ་ཡས་སྐྱེ་མཆེད་ཀྱི་ཏིང་ངེ་འཛིན་ལ་ཞུགས། རྣམ་ཤེས་མཐའ་ཡས་སྐྱེ་མཆེད་ཀྱི་ཏིང་ངེ་འཛིན་ལས་བྱུང་ནས་ཅུང་ཟད་མེད་པའི་སྐྱེ་མཆེད་ཀྱི་ཏིང་ངེ་འཛིན་ལ་ཞུགས། ཅུང་ཟད་མེད་པའི་སྐྱེ་མཆེད་ཀྱི་ཏིང་ངེ་འཛིན་ལས་བྱུང་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ཏིང་ངེ་འཛིན་ལ་ཞུགས། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ཏིང་ངེ་འཛིན་ལས་བྱུང་ནས་འགོག་པའི་ཏིང་ངེ་འཛིན་ལ་ཞུགས། འགོག་པའི་ཏིང་ངེ་འཛིན་ལས་བྱུང་ནས་མྱ་ངན་ལས་འདའ་བར་བཞུགས་སོ། །དེའི་ཚེན་བརྒྱ་བྱིན་ལྷའི་དབང་པོས་ཤཱ་རིའི་བུ་མྱ་ངན་ལས་འདའ་བར་ཤེས་ནས་ལྷའི་འཁོར་བརྒྱ་སྟོང་མང་པོ་དང་སོ་སོ་ནས་མེ་ཏོག་དང་སྤོས་ལ་སོགས་པ་མཆོད་པའི་ཡོ་བྱད་ཐོགས་ཏེ་ཕྱོགས་དེར་ལྷགས་ནས་སྟེང་གི་ནམ་མཁའ་ལ་བར་མཚམས་མེད་པར་འཁོད་དེ་མཆི་མ་ཆར་བཞིན་དུ་བླགས་ནས་མེ་ཏོག་གིས་པུས་མོ་ནུབ་ཙམ་དུ་གཏོར་ནས་འདི་སྐད་དུ་བཙུན་པ་ཤཱ་རིའི་བུའི་ཤེས་རབ་ནི། ཟབ་ཁྱད་ཀྱང་རྒྱ་མཚོ་ཙམ་སྟེ། ཇི་ལྟར་རིགས་པའི་བློ་དང་ལྡན། གསུང་གི་སྤོབས་པ་ནི། ཆུ་མིག་དང་འདྲ་སྟེ། ཚུལ་ཁྲིམས་དང ། ཏིང་ངེ་
323b
> འཛིན་དང ། ཤེས་རབ་ཏུ་ལྡན། ཆོས་ཀྱི་གཙོ་བོ་ཆེན་པོ་དེ་བཞིན་གཤེགས་པའི་རྗེས་སུ་ཆོས་ཀྱི་འཁོར་ལོ་རྒྱས་པར་བསྐོར་བ་དང་མྱ་ངན་ལས་འདའ་བ་ནི། ཧ་ཅང་ཡང་སྔ་ཆེས་སོ། །གྲོང་ཁྱེར་དེའི་ནང་དང་ཕྱི་རོལ་ན་འདུག་པའི་མི་ཐམས་ཅད་ཀྱིས་ཤཱ་རིའི་བུ་མྱ་ངན་ལས་འདས་སོ། །ཞེས་ཐོས་ནས་ཐམས་ཅད་ཀྱིས་མར་དང་འབྲུ་མར་བསུང་ཅན་དང ། སྤོས་དང ། མེ་ཏོག་དང ། མཆོད་པའི་ཡོ་བྱད་ཐོགས་ཏེ་ཐམས་ཅད་ལྷགས་ནས་ལུས་ཀྱིས་མི་བཟོད་པར་མྱ་ངན་གྱིས་གདུངས་ཏེ་སོ་སོ་ནས་ཐོགས་པའི་ཡོ་བྱད་ཀྱིས་མཆོད་པ་བྱས་སོ། །དེ་ནས་བརྒྱ་བྱིན་ལྷའི་དབང་པོས་བི་ཤཝ་ཀརྨ་ལ་བསྒོ་བ། ཁྱོད་ཀྱིས་རིན་པོ་ཆེ་མང་པོས་བརྒྱན་པའི་ཤིང་རྟ་སྦྱོར་ཅིག། ཤཱ་རིའི་བུའི་བུར་གཞག་པར་བྱའོ། །ཞེས་བསྒོའོ། །དེ་ནས་ལྷ་དང ། ཀླུ་དང ། གནོད་སྦྱིན་དང ། རྒྱལ་པོ་དང ། བློན་པོ་དང ། ཡུལ་གྱི་མི་ཐམས་ཅད་ཀྱིས་ཆོ་ངེས་བཏབ་སྟེ་གང་ན་ཐང་བདེ་བར་བསྐྱལ་ཏོ། །བརྒྱ་བྱིན་ལྷའི་དབང་པོས་གནོད་སྦྱིན་རྣམས་ལ་ཁྱེད་ཀྱིས་རྒྱ་མཚོའི་ངོགས་ནས་གླང་མགོའི་ཙནྡན་ལོངས་ཤིག་ཅེས་བསྒོས་ནས་གནོད་སྦྱིན་རྣམས་ཀྱིས་རྒྱ་མཚོའི་ངོགས་ནས་ཙནྡན་བླངས་ཏེ་སྤུངས་ནས་དེའི་སྟེང་དུ་བུར་བཞག་སྟེ་མར་དང་འབྲུ་མར་གྱིས་གཏོར་ནས་མེ་བཏང་ངོ ། །འཁོར་དེ་དག་ཀུན་གྱིས་ཕྱག་འཚལ་ཏེ་ཕྱིར་དོང་ངོ ། །མེ་ཤི་བའི་འོག་ཏུ་དགེ་ཚུལ་ཀུན་ཏེས་སློབ་དཔོན་གྱི་རིང་བསྲེལ་དང ། ལྷུང་བཟེད་དང །
324a
> ༄#། །ཆོས་གོས་གསུམ་ཐོགས་ཏེ་སངས་རྒྱས་གང་ན་བདེར་སོང་ནས་ཞབས་ལ་མགོ་བོས་ཕྱག་འཚལ་ཏེ་པུས་མོའི་ལྷ་ངས་ལ་བཙུགས་ནས་བདག་གི་སློབ་དཔོན་ནི།་མྱ་ངན་ལས་འདས་ཏེ། དེའི་རིང་བསྲེལ་དང ། ཆོས་གོས་དང ། ལྷུང་བཟེད་ནི། འདི་དག་ལགས་སོ། །ཞེས་གསོལ་ཏོ། །དེའི་ཚེ་ན་ཀུན་དགའ་བོས་དགེ་ཚུལ་གྱིས་སྨྲས་པ་ཐོས་ནས་མྱ་ངན་གྱིས་ཤིན་ཏུ་གདུངས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤཱ་རིའི་བུ་ཚོགས་ཀྱི་གཙོ་བོ་ཆེན་པོ་ཡང་མྱ་ངན་ལས་འདས་ན། བདག་ཅག་གིས་སུ་ལ་གནས་བཅའ་ཞིང་སྐྱབས་སུ་མཆི་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་མྱ་ངན་ལས་འདས་ཀྱང་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་གཟིགས་པ་དང ། ཆོས་ཀྱི་སྐུ་ནི། མྱ་ངན་ལས་མ་འདས་སོ། །ཤཱ་རིའི་བུ་ནི། ད་ལྟར་འབའ་ཞིག་ང་མྱ་ངན་ལས་འདའ་བ་ལ་མཐོང་བར་མི་བཟོད་དེ། སྔར་མྱ་ངན་ལས་འདས་པ་འདིར་མ་ཟད་ཀྱི། སྔོན་འདས་པའི་དུས་ན་ཡང་ང་ཚེ་འཕོབ་ལ་མ་བཟོད་ནས་སྔར་ཆེ་འཕོས་སོ། །ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་གསོལ་པ། སྔོན་བཅོམ་ལྡན་འདས་སྐུ་ཚེ་སྔ་མ་ལ་ཡང་སྔར་གུམ་ནས་ཕྱིས་གཤེགས་པའི་དངོས་པོ་རྒྱས་པར་བསྟན་དུ་གསོལ། །བཅོམ་
324b
> ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་བསྐལ་པ་ལ་ཚད་མེད། གྲངས་མེད། བསམ་གྱིས་མི་ཁྱབ་པ་འདས་པའི་སྔ་རོལ་ན་འཛམ་བུའི་གླིང་འདིར་ཡུལ་ཆེ་གེ་མོ་ཞིག་ན་རྒྱལ་པོ་ཟླ་འོད་ཅེས་བྱ་བ། འཛམ་བུའི་གླིང་ལ་དབང་བ། རྒྱལ་ཕྲན་བརྒྱད་ཁྲི་བཞི་སྟོང་དང ། ལྗོངས་སྟོང་ཕྲག་དྲུག་ཅུའི་ནང་ན་གྲོང་ཁྱེར་ཁྲི་ཕྲག་བརྒྱད་ཅུ་ལ་དབང་བྱེད་པ་ཞིག་བྱུང་ངོ ། །རྒྱལ་པོ་དེ་ལ་བཙུན་མོ་སྟོང་ཕྲག་ཉི་ཤུ་ཡོད་དོ། བཙུན་མོ་ཆེན་མོ་ནི། མེ་ཏོག་སྦྱིན་ཞེས་བྱ། བཙུན་མོ་རབ་འོག་ནི། སྤྱན་ཆེན་མོ་ཞེས་བྱ་སྟེ། རྒྱལ་པོ་དེ་ལ་རྒྱལ་བུ་ལྔ་བརྒྱ་སྙེད་ཡོད་དོ། །རྒྱལ་བུ་ཐུ་བོ་རྒྱལ་ཚབ་ནི། ཚུལ་ཁྲིམས་བཟང་པོ་ཞེས་བྱ། རྒྱལ་པོ་བཞུགས་པའི་ཕོ་བྲང་ནི། འཚོ་བ་བཟང་པོ་ཞེས་བྱ་སྟེ། ཕོ་བྲང་དེ་ཆུ་ཞེང་གབ་པར་དཔག་ཚད་བཞི་བརྒྱ་ཡོད་དེ། གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་སོ། །སྐྱེད་མོས་ཚལ་གྱི་ནང་ན་གསེར་དང ། དངུལ་དང ། བཻ་ཌཱུརྱ་དང ། ཤེལ་གྱི་ཤིང་ཚར་བཞི་ཡོད་དེ།་ཁ་ཅིག་གི་ཡལ་ག་ནི། གསེར། ལོ་མ་ནི། དངུལ། ཁ་ཅིག་གི་ཡལ་ག་ནི། དངུལ། ལོ་མ་ནི། གསེར། ཁ་ཅིག་གི་ཡལ་ག་ནི། བཻ་ཌཱུརྱ། ལོ་མ་ནི། ཤེལ། ཁ་ཅིག་གི་ཡལ་ག་ནི། ཤེལ། ལོ་མ་ནི། བཻ་ཌཱུརྱ་སྟེ། རིན་པོ་ཆེའི་རྫིང་རྣམས་ཀྱང་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པ། རྫིང་གི་ཞབས་ཀྱང་རིན་པོ་ཆེ་སྣ་བཞིའི་བྱེ་མ་བདལ་སྟེ་རྒྱལ་པོའི་
325a
> ༄#། །ཕོ་བྲང་དང་ཉེ་བའི་ཚེ་ཁོ་ར་ཁོར་ཡུག་དཔག་ཚད་བཞི་བཅུའི་བར་དུ་གསེར་དང ། དངུལ་དང ། བཻ་ཌཱུརྱ་དང ། ཤེལ་གྱིས་ཆལ་པར་བཀང་ངོ ། །ཡུལ་དེ་ན་གནས་པའི་མི་རྣམས་བདེ་ཞིང་སྐྱིད་པ། ལོ་ལེགས་པ། ལོངས་སྤྱོད་འབྱོར་པ། རིན་པོ་ཆེ་དམ་པ་གྲངས་མེད་པ་བདོག་པར་གྱུར་ཏོ། །དེའི་ཚེ་རྒྱལ་པོ་ཕོ་བྲང་ན་འདུག་པ་ལས་རྟག་ཏུ་འདི་སྙམ་དུ་བསམ་བསྐྱེས་སོ། །འཇིག་རྟེན་ན་གནས་པ་དག་བཙན་ཞིང་ཆེ་བ་ལ་ཐམས་ཅད་ཀྱིས་བཀུར་སྟི་བྱེད་པར་འགྱུར་སྙམ་དུ་བསམས་མ་ཐག་ཏུ་འདོད་པ་ལྔའི་ལོངས་སྤྱོད་དམ་པ་ཡིད་བཞིན་དུ་གྲུབ་སྟེ། འདི་ལྟར་འབྲས་བུ་མཆོག་ཐོབ་པ་ཡང་སྔོན་བསོད་ནམས་ཀྱི་ཚོགས་བསྐྱེད་པ་ལས་གྱུར་ཏེ། དཔེར་ན། ཞིང་པ་དག་ཀྱང་དཔྱིད་ས་བོན་མང་དུ་བཏབ་ན། སྟོན་མང་དུ་བསྡུར་ཡོད་དོ་སྙམ་དུ་རེ་བ་ཡོད་དོ། །བདག་ཀྱང་དེ་དང་འདྲ་སྟེ། སྔོན་བསོད་ནམས་ཀྱི་ཚོགས་བསྐྱེད་པས་ད་ལྟར་འདི་ལྟ་བུ་གྲུབ་པར་གྱུར་ཏོ། །ད་ལྟའི་དུས་སུ་ས་བོན་མ་བསྐྱེད་ན། ཕྱིས་རེ་བ་མེད་དོ་སྙམ་བསམས་ནས་བློན་པོ་རྣམས་ལ་ད་ནི། བདག་གིས་རིན་པོ་ཆེ་དང ། ལོངས་སྤྱོད་ཀྱིས་ཀུན་ལ་སྦྱིན་པའི་ཕྱིར་གྲོང་ཁྱེར་གྱི་སྒོ་དང ། ཚོང་དུས་ཀྱི་མདོར་སྤུངས་ཏེ་སེམས་ཅན་ལ་ཡིད་བཞིན་དུ་ཅི་བདོག་པ་སྦྱིན་པར་བྱའོ། །གཞན་ཡང་རྒྱལ་ཕྲན་བརྒྱད་ཁྲི་བཞི་སྟོང་སྙེད་ཡོད་པ་ལ་ཡང་བང་མཛོད་ཅི་
325b
> ཡོད་པ་ཐམས་ཅད་འགྲོ་བ་མང་པོ་ལ་སྦྱིན་པར་བཀར་བཏགས་སོ། །ཞེས་བསྒོ་ནས་གསེར་གྱི་རྒྱལ་མཚན་བསྒྲེངས་ཏེ་གསེར་གྱི་རྔ་བརྡུངས་ནས་ཕྱོགས་སུ་རྒྱས་པར་ཀུན་གྱིས་ཐོས་ཤིང་ཤེས་པར་ཤིན་ཏུ་བསྒྲགས་སོ། །དེའི་ཚེ་ན་ཡུལ་དེ་ན་འཁོད་པའི་དགེ་སྦྱོང་དང ། བྲམ་ཟེ་དང ། དབུལ་ཕོངས་པ་དང ། མགོན་མེད་པ་དང ། རྒན་པོ་ལོངས་སྤྱོད་ཀྱིས་བྲེལ་བ་ཐམས་ཅད་སྤྲིན་བཞིན་དུ་འདུས་ཏེ། གང་གོས་འདོད་པ་ལ་གོས། ཟས་འདོད་པ་ལ་ཟས། གསེར་དངུལ་དང་ནོར་རིན་པོ་ཆེ་འདོད་པ་ལ་གསེར་དངུལ་དང་ནོར་བུ་རིན་པོ་ཆེ། ནད་པ་རྣམས་ལ་ནི་ནད་ཀྱི་རྐྱེན་སྨན་ལ་སོགས་ཏེ། ཅི་བདོག་པ་ཡིད་བཞིན་དུ་བྱིན་ནོ། །དེའི་ཚེ་ན་འཛམ་བུ་གླིང་ན་འཁོད་པའི་འགྲོ་བ་ཐམས་ཅད་རྒྱལ་པོའི་དྲིན་གྱིས་ཐམས་ཅད་བདེ་ཞིང་སྐྱིད་པས། གླུ་ལེན་བྲོ་བརྡུང་ཚིགས་སུ་བཅད་པས་བསྟོད་དོ། །རྒྱལ་པོ་དེའི་མིང་སྙན་པ་མཐའ་འོག་ཀུན་ཏུ་གྲགས་ནས་བཀའ་མི་ཉན་པ་མེད་དོ། །དེའི་ཚེ་ན་ཡུལ་གྱི་མཐའ་འཁོབ་ན་རྒྱལ་པོ་ཆུང་དུ་བྱི་མ་སེ་ན་ཞེས་བྱ་བ་ཞིག་རྒྱལ་པོ་ཟླ་འོད་ལ་ཕྲག་དོག་སྐྱེས་ནས་བདེ་བར་ཉལ་དུ་མེད་དེ་གཉིད་ཀྱང་མི་བྲོ་ནས་འདི་སྙམ་དུ་བསམས་སོ། །རྒྱལ་པོ་ཟླ་འོད་མེད་པར་མ་བྱས་ཀྱི་བར་དུ་བདག་གི་མིང་གྲགས་པར་མི་འགྱུར་གྱི། བདག་གི་ཡུལ་ཕྱོགས་ན་འཁོད་པའི་ཀུན་ཏུ་རྒྱུ་དག་བོས་ལ་ཀུན་ཏུ་སྒྲུབ་ཏུ་གཞུག་པའི་ཐབས་བྱའོ་སྙམ་བསམས་ནས་བདག་གི་ཡུལ་ན་འཁོད་པའི་ཀུན་ཏུ་རྒྱུ་བོས་ནས་ཁ་ཟས་
326a
> ༄#། །རོ་བརྒྱ་དང་ལྡན་པ་རྣམ་པ་སྣ་ཚོགས་སྦྱར་ཏེ་བསྟི་སྟང་དང་བཅས་པས་ཟླ་བ་གསུམ་གྱི་བར་དུ་མཆོད་པ་བྱས་ནས་ཀུན་ཏུ་རྒྱུ་རྣམས་ལ་འདི་སྐད་ཅེས་སྨྲས་སོ། །ང་ནི། མྱ་ངན་གྱིས་ནོན་ཏེ་ཉིན་མཚན་དུ་མི་བདེ་ན། ཁྱེད་ནི། ཆོས་སྤྱོད་པ་ཡིན་ཏེ། མཆོད་པའི་གནས་ཡིན་ན། ངའི་མྱ་ངན་མེད་པར་བྱ་བའི་ཐབས་སོམས་ཤིག་།བྲམ་ཟེ་རྣམས་ཀྱིས་སྨྲས་པ། རྒྱལ་པོ་ཅིའི་སླད་དུ་ཐུགས་ངན་མཛད་པ་བདག་ཅག་ལ་གསུངས་ཤིག་།ཅི་ནུས་ཀྱིས་རྒྱལ་པོའི་ཐུགས་ངན་མ་མཆིས་པར་བགྱིའོ། །རྒྱལ་པོས་སྨྲས་པ། རྒྱལ་པོ་ཟླ་འོད་དེ་ཡོན་ཏན་ཀུན་ཏུ་གྲགས་པས་ཐམས་ཅད་ཀྱིས་བསྙེན་བཀུར་བྱེད་ན། ང་འབའ་ཞིག་ཡོན་ཏན་མ་གྲགས་ཏེ། རྒྱལ་པོ་དེ་མེད་པར་བྱ་བར་དགའ་ན། ཁྱེད་ལ་ཐབས་ཅི་ཡོད་པ་སྨྲོས་ཤིག་།བྲམ་ཟེ་རྣམས་ཀྱིས་དེ་སྐད་ཅེས་བསྒོ་བ་ཐོས་ནས་སོ་སོ་ནས་གཅིག་ལ་གཅིག་འདི་སྐད་ཅེས་སྨྲས་སོ། །རྒྱལ་པོ་ཟླ་འོད་དེ་ནི། སྙིང་རྗེ་དང་ལྡན་ཏེ། འགྲོ་བ་ཐམས་ཅད་ལ་དྲིན་གྱིས་ཁྱབ་ཅིང་དབུལ་ཕོངས་པ་ལ་ཡང་ཕ་མ་ལྟ་བུར་གྱུར་པས། བདག་ཅག་ནི། ཚེ་འཕོ་བར་ཐུག་ཀྱང་དེ་ལ་འཁུ་ཞིང་གནོད་པ་བྱེད་མི་ནུས་སོ། །ཞེས་སྨྲས་ནས་འཚོ་བ་ལ་ཡང་མ་བལྟས་ཏེ་སོ་སོར་གྱེས་སོ། །རྒྱལ་པོ་བྱི་མ་སེ་ན་དེ་སྐད་ཅེས་སྨྲས་པ་ཐོས་ནས་ལྷག་པར་མི་དགའ་སྟེ་འདི་སྐད་ཅེས་བཀར་བཏགས་སོ། །གང་སུ་ཡང་རུང་བའི་
326b
> ཕྱིར་རྒྱལ་པོ་ཟླ་འོད་ཀྱི་མགོ་བཅད་དེ་འོངས་ན། རྒྱལ་སྲིད་ཕྱེད་ཀྱང་སྦྱིན་ཞིང་བུ་མོ་ཡང་ཆུང་མར་སྦྱིན་ནོ། །ཞེས་བཀར་བཏགས་པ་དང ། དེའི་ཚེ་རི་བྲགས་ཀྱི་གྲོང་ན་བྲམ་ཟེ་ལེའུ་དེ་ཙ་ཞེས་བྱ་བས་ཐོས་ཏེ་རྒྱལ་པོ་དེ་གང་ན་བ་དེར་འོངས་ནས་རབ་ཏུ་དགའ་སྟེ་འདི་སྐད་དུ་བདག་གིས་ནི། རྒྱལ་པོས་དགོངས་པ་བཞིན་དུ་སྒྲུབ་ནུས་སོ། །ཞེས་གསོལ་ཏོ། །རྒྱལ་པོས་སྨྲས་པ། དེ་ལྟར་སྒྲུབ་ནུས་ན་ཉི་མ་གང་ལ་འགྲོ་བར་བྱ། བྲམ་ཟེས་སྨྲས་པ། བདག་གི་ལམ་རྒྱགས་སྩོལ་ཅིག་དང ། ད་སླད་ཆད་ཞག་བདུན་ན་མཆི་བར་བགྱིའོ། །ཞེས་གསོལ་པ་དང ། བྲམ་ཟེ་དེ་ཞག་བདུན་གྱི་བར་དུ་བདག་གི་ལུས་སྲུང་བའི་སྔགས་བྱས་ནས་རྒྱལ་པོ་ལ་ཕྱི་ཕྱག་འཚལ་ཏེ་ལམ་དུ་ཞུགས་ནས་སོང་ངོ ། །དེའི་ཚེ་རྒྱལ་པོ་ཟླ་འོད་ཀྱི་ཡུལ་དུ་ལྟས་ངན་རྣམ་པ་སྣ་ཚོགས་བྱུང་སྟེ། ས་ཀུན་གསལ་པ་དང ། གློག་འགྱུ་བ་དང ། སྐར་མ་ལྟུང་བ་དང ། ཉིན་མཚན་དུ་ཡུལ་རྨུས་པ་དང ། འབྲུག་དྲག་པོ་དང་སེར་བ་དང་གནམ་ལྕགས་དང ། བྱ་མང་པོས་ནམ་མཁའ་ལ་སྙིང་རྗེ་བའི་སྐད་ཟེར་ཞིང ། ནམ་མཁའ་ལས་རང་ལྟུང་བ་དང ། སྟག་དང ། གཟིག་དང ། སྤྱང་ཀི་དང ། གཅན་གཟན་དང ། རི་དྭགས་ལ་སོགས་པ་རྒྱུག་མ་ཆོང་ཞིང་སྐད་ཟེར་བ་དང ། རྒྱལ་ཕྲན་བརྒྱད་ཁྲི་བཞི་སྟོང་གི་རྨི་ལམ་དུ་རྒྱལ་པོ་ཆེན་པོའི་གསེར་གྱི་རྒྱལ་མཚན་ཆག་པ་དང ། གསེར་གྱི་རྔ་རལ་བར་རྨིས་སོ། །བློན་པོ་ཟླ་བ་ཆེན་པོ་ཞེས་བྱ་
327a
> ༄#། །བའི་རྨི་ལམ་དུ་ཡི་དྭགས་ཤིག་གིས་རྒྱལ་པོའི་གསེར་གྱི་ཅོད་པན་འཕྲོག་པ་སྙམ་རྨིས་ཏེ། ཐམས་ཅད་ཀྱང་ལུས་ཀྱིས་མི་བཟོད་པ་ཙམ་དུ་མྱ་ངན་གྱིས་ནོན་པར་གྱུར་ཏོ། །དེའི་ཚེ་ན་གྲོང་ཁྱེར་གྱི་སྒོ་སྲུང་པའི་ལྷས་བྲམ་ཟེ་དེ་རྒྱལ་པོའི་མགོ་སློང་བ་ལ་འོངས་པར་རྟོགས་ནས་དེ་མྱོས་ཤིང་བསླད་པར་བྱས་ཏེ་གྲོང་ཁྱེར་གྱི་སྒོ་ནས་མ་བཏང་བས། བྲམ་ཟེ་དེས་གྲོང་ཁྱེར་ལ་ལན་མང་དུ་བསྐོར་ཀྱང་ནང་དུ་མ་ཆུད་དོ། །དེ་ནས་གནས་གཙང་མའི་རིས་ཀྱི་ལྷས་ཀྱང་རྒྱལ་པོ་ཟླ་འོད་མགོ་བོ་སྦྱིན་པ་བྱས་ནས། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་བ་ཤེས་ནས་རྨི་ལམ་དུ་རྒྱལ་པོ་ལ་སྦྲན་ཏོ། །རྒྱལ་པོ་ཆེན་པོ་ཐམས་ཅད་ཀྱི་ཡིད་དང་མི་འགལ་བར་སྦྱིན་པ་སྦྱིན་ནོ། །ཞེས་ཡི་དམ་བཅས་ན། ད་ལྟར་སློང་བ་གྲོང་ཁྱེར་གྱི་སྒོར་འོངས་ཏེ་ནང་དུ་འོང་བའི་དབང་མེད་དོ། །ཞེས་སྦྲན་ཏོ། །སད་ནས་ངོ་མཚར་དུ་གྱུར་ཏེ་བློན་པོ་ཟླ་བ་ཆེན་པོ་ལ་ཁྱོད་སོང་ལ་གྲོང་ཁྱེར་གྱི་སྒོ་ནས་སུ་འོང་ཡང་རུང ། མ་དགག་པར་ནང་དུ་ཐོང་ཞིག་ཅེས་བསྒོ་ཞིག་།ཟླ་བ་ཆེན་པོ་གྲོང་ཁྱེར་གྱི་སྒོར་འོངས་པ་དང ། གྲོང་ཁྱེར་གྱི་སྒོ་སྲུང་བའི་ལྷས་ལུས་མངོན་པར་བསྟན་ཏེ་ཟླ་བ་ཆེན་པོ་ལ་འདི་སྐད་ཅེས་སྨྲས་སོ། །བྲམ་ཟེ་ཞིག་ཡུལ་གཞན་ནས་འོངས་ཏེ་སྡིག་པའི་སེམས་ཀྱིས་རྒྱལ་པོའི་མགོ་བོ་སློང་དུ་འོངས་པས་ནང་དུ་མ་བཏང་བ་ཡིན་ནོ། །བློན་པོས་
327b
> སྨྲས་པ།་གལ་ཏེ་དེ་ལྟར་བདེན་ན་གནོད་པའི་ལྟས་ཆེན་པོ་ཡིན་ཏེ། འོན་ཀྱང་རྒྱལ་པོའི་བཀའ་བཅག་ཏུ་མི་རུང་ངོ ། །ཞེས་བསྒོའོ། །དེ་ནས་གྲོང་ཁྱེར་སྲུང་བའི་ལྷས་ཀྱང་བྲམ་ཟེད་ནང་དུ་བཏང་ངོ ། །བློན་པོ་ཟླ་བ་ཆེན་པོས་འདི་སྙམ་དུ་བསམས་སོ། །བྲམ་ཟེ་འདི་ནི། གདོན་མི་ཟ་བར་རྒྱལ་པོའི་མགོ་སློང་བར་འགྱུར་གྱི། རིན་པོ་ཆེ་སྣ་བདུན་ལས་སྣ་གཅིག་ཀྱང་མགོ་ལྔ་བརྒྱ་ལྔ་བརྒྱ་བྱས་ཏེ། མགོ་བོ་འདི་དག་གི་རྒྱལ་པོའི་མགོ་བླུའོ་སྙམ་བསམས་ནས་སྦྱོར་དུ་བཅུག་གོ་།དེ་ནས་བྲམ་ཟེ་དེ་རྒྱལ་པོའི་ཕོ་བྲང་དུ་འོངས་ཏེ་སྐད་ཆེན་པོས་འདི་སྐད་ཅེས་སྨྲས་སོ། །བདག་ནི། ཡུལ་གྱི་མཐའ་འཁོབ་ནས་མཆིས་ཏེ། རྒྱང་མ་ནས་རྒྱལ་པོས་ནི། ཐམས་ཅད་ཡོངས་སུ་གཏོང་ལ། ཕ་རོལ་པོའི་ཡིད་དང་མི་འགལ་བར་མཛད་དོ། །ཞེས་ཡོན་ཏན་ཆེན་པོ་ཐོས་ནས་ལམ་རིང་པོ་ནས་དགོས་པ་འདོད་པའི་སླད་དུ་འདིར་མཆིས་སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་མགུ་རངས་ཏེ་ཕྱག་འཚལ་ནས་ངལ་བར་མ་གྱུར་ཏམ་ཞེས་དྲིས་ཏེ་ནོར་ཅི་འདོད་པ་དང ། ཡུལ་ལམ། རྒྱལ་སྲིད་དམ། གྲོང་ཁྱེར་རམ། ཆུང་མའམ། བུ་ཕོའམ། བུ་མོའམ། རིན་པོ་ཆེའམ། ཐེག་པའམ།་གླང་པོ་ཆེའམ། རྟའམ། རིན་པོ་ཆེ་སྣ་བདུན་ནམ། ཕོ་བྲང་ངམ། བྲན་ཕོའམ། བྲམ་མོའམ། ལས་བྱེད་པའི་མིའམ། ཅི་འདོད་པ་ཐམས་ཅད་སྦྱིན་ནོ། །ཞེས་སྨྲས་སོ། །
328a
> ༄#། །བྲམ་ཟེས་སྨྲས་པ། ཕྱི་རོལ་གྱི་ལོངས་སྤྱོད་ཀྱི་སྦྱིན་པ་ནི། སྦྱིན་པའི་བསོད་རྣམས་སུ་འགྱུར་མོད་ཀྱི། སྦྱིན་པ་རྒྱ་ཆེན་པོར་མི་འགྱུར་ཏེ། གང་ལུས་ཀྱི་ཤ་སྦྱིན་པ་བསོད་ནམས་ཀྱི་མཆོག་ཡིན་པས། བདག་ནི། རྒྱལ་པོའི་དབུ་འཚལ་བའི་སླད་དུ་ལ་མ་རིང་པོ་ནས་འདིར་མཆིས་ཀྱི། ཡིད་དང་མི་འགལ་བར་མཛད་ན། སྦྱིན་པར་མཛོད་ཅིག་ཅེས་གསོལ་པ་དང ། རྒྱལ་པོས་དེ་སྐད་ཅེས་སྨྲས་པ་ཐོས་ནས་དཔེ་མེད་པར་དགའ་བར་གྱུར་ཏོ། །བྲམ་ཟེས་སྨྲས་པ། བདག་ལ་དབུ་སྩལ་ནི། ནམ་སྩལ་བ་བཀའ་སྩལ་དུ་གསོལ་རྒྱལ་པོས་སྨྲས་པ། ད་སྟེ་ཞག་བདུན་ན་ཁྱོད་ལ་མགོ་སྦྱིན་ནོ། །ཞེས་བསྒོའོ། དེ་ནས་བློན་པོ་ཟླ་བ་ཆེན་པོས་རིན་པོ་ཆེ་སྣ་བདུན་ལས་བྱས་པའི་མགོ་རྣམས་ཁྱེར་ཏེ་འོངས་ནས་བྲམ་ཟེའི་མདུན་དུ་ལྟོ་བ་ས་ལ་ཕབ་སྟེ་འདི་སྐད་ཅེས་སྨྲས་སོ། །རྒྱལ་པོའི་དབུ་ནི། ཤ་དང ། ཁྲག་དང ། རུས་པ་སྟེ། མི་གཙང་བ་ཡིན་ན་ཅི་ཞིག་ཏུ་རུང ། རིན་པོ་ཆེ་སྣ་བདུན་གྱི་མགོ་འདི་དག་གིས་བརྗེའོ། །རིན་པོ་ཆེ་སྣ་བདུན་གྱི་མགོ་འདི་དག་གིས་ཁྱོད་ཚེ་གཅིག་ཏུ་ཕྱུག་པར་འགྱུར་རོ། །བྲམ་ཟེས་སྨྲས་པ། བདག་ལ་འདི་དག་མི་དགོས་ཀྱི། རྒྱལ་པོའི་དབུ་དགོས་ཀྱི། བདག་གི་རེ་བ་སྐོངས་ཤིག་།ཟླ་བ་ཆེན་པོས་ཐབས་རྣམ་བ་སྣ་ཚོགས་ཀྱིས་གསོལ་བ་བཏབ་ཀྱང་མ་བཏུབ་པས་མྱ་ངན་གྱིས་ནོན་ཏེ་འཁྱམས་ནས་སྙིང་བདུན་དུ་གས་
328b
> ཏེ་ཚེ་འབོས་སོ། །དེའི་ཚེ་ན་རྒྱལ་པོ་དེས་བློན་པོ་ཞིག་གླང་པོ་ཆེ་དཔག་ཚད་བརྒྱད་སྟོང་དུ་འགྲོ་བ་ལ་བསྐྱོན་ནས་རྒྱལ་ཕྲན་ཐམས་ཅད་ལ་སྦྲན་ཏེ། ད་སྟེ་ཞག་བདུན་ན་རྒྱལ་པོ་ཟླ་འོད་བྲམ་ཟེ་ལ་དབུའི་སྦྱིན་པ་མཛད་ཀྱི། མཐོང་བར་འདོད་པ་ཐམས་ཅད་མྱུར་དུ་ཤོག་ཅིག་།དེའི་ཚེ་ན་རྒྱལ་ཕྲན་བརྒྱད་ཁྲི་སྙེད་པོ་དེ་ཐམས་ཅད་དེ་མ་ཐག་ཏུ་ལྷགས་ཏེ་རྒྱལ་པོའི་སྤྱན་སྔར་འོངས་ནས་ལྟོ་བ་ས་ལ་ཕབ་སྟེ་འདི་སྐད་ཅེས་གསོལ་ཏོ། །འཛམ་བུའི་གླིང་གི་སེམས་ཅན་ཐམས་ཅད་ནི། རྒྱལ་པོའི་བཀའ་དྲིན་གྱིས་ཐམས་ཅད་བདེ་སྐྱིད་དེ་གནོད་པ་མ་མཆིས་ནི། མི་གཅིག་གི་སླད་དུ་འགྲོ་བ་ཐམས་ཅད་ཡོངས་སུ་སྤང་པར་མི་རིགས་ཀྱི། བདག་ཅག་ལ་ཐུགས་བརྩེ་བའི་སླད་དུ་དབུའི་སྦྱིན་པ་མི་མཛད་པར་གསོལ། བློན་པོ་ཆེན་པོ་སྟོང་ཕྲག་བཅུས་ཀྱང་ལྟོ་བས་ལ་ཕབ་སྟེ་བདག་ཅག་ལ་ཐུགས་བརྩེ་བའི་སླད་དུ་དབུའི་སྦྱིན་པ་མི་མཛད་པར་གསོལ། བཙུན་མོ་སྟོང་ཕྲག་ཉི་ཤུས་ཀྱང་ལུས་ས་ལ་ཕབ་ནས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ཅག་ལ་ཡང་ཐུགས་བརྩེ་བར་དགོངས་ཏེ་དབུའི་སྦྱིན་པ་མི་མཛད་པར་གསོལ་ཞེས་སྨྲས་སོ། །རྒྱལ་བུ་ལྔ་བརྒྱ་རྣམས་ཀྱང་དུས་ནས་བདག་ཅག་ལ་མགོན་དང་སྐྱབས་མ་མཆིས་ན། ཐུགས་བརྩེ་བར་དགོངས་ཏེ་དབུའི་སྦྱིན་པ་མི་མཛད་ཅིང་བདག་ཀྱང་མི་རྗེས་སླེབས་པར་བསྐྱེད་པར་གསོལ་ཞེས་སྨྲས་སོ། །དེ་ནས་རྒྱལ་པོ་ཆེན་པོས་བློན་པོ་དང ། བཙུན་མོ་དང ། སྲས་རྣམས་ལ་འདི་
329a
> ༄#། །སྐད་ཅེས་བཀའ་སྩལ་ཏོ། །ཐོག་མ་མེད་པ་ནས་ལུས་འདི་འཁོར་བ་ན་འཁོར་ཞིང་ཡུན་རིང་པོར་སེམས་ཅན་དམྱལ་བ་ན་འདུག་པའི་ཚེ་ཉི་མ་གཅིག་ལ་ཡང་ལན་དུ་མ་ཞིག་ཚེ་འཕོས་ནས་ལུས་འདི་ཆུད་ཟོས་ཏེ་ཐལ་ཆུ་དང ། ལྕགས་ཀྱི་ཁྲི་དང ། ཆུ་ཚན་ཁོལ་མ་དང ། ངན་སྐྱུག་དང ། མེའི་ཤིང་རྟ་དང ། མེ་དོང་ལ་སོགས་པའི་སེམས་ཅན་དམྱལ་བར་ཡུན་རིང་པོར་སྡུག་བསྔལ་མྱོང་སྟེ་བཙོ་བ་དང ། བསྲེག་པ་ལ་སོགས་པས་ལུས་འདི་གྲངས་མེད་པར་ཆུད་ཟོས་ཀྱང་བསོད་ནམས་འགའ་ཙམ་ཡང་མེད་དོ། །གལ་ཏེ་དུད་འགྲོའི་སྐྱེ་གནས་སུ་སྐྱེས་པ་ན་གཅིག་ལ་གཅིག་འཆའ་ཞིང་ཟ་བ་དང ། གཞན་གྱིས་བསད་དེ་ཀུན་གྱིས་ཟོས་པ་དང ། ཚེ་འཕོས་ནས་རུལ་ཞིང་མྱགས་པ་ཡང་གྲགས་མེད་དེ། དེ་ལྟར་ལུས་འདི་ཆུད་ཟོས་ཀྱང་བསོད་ནམས་སུ་གྱུར་པ་མེད་དོ། །ཡི་དྭགས་ཀྱི་ཁམས་སུ་སྐྱེས་པ་ན་ལུས་ལ་མེ་འབར་ཏེ་འཁོར་ལོས་མགོ་བཅད་མ་ཐག་ཏུ་ཕྱིར་ཡང་སོས་པ་གྲངས་མེད་པ་ཞིག་མྱོང་སྟེ།་དེ་ལྟར་ལུས་ཆུད་ཟོས་ཀྱང་བསོད་ནམས་སུ་གྱུར་པ་མེད་དོ། །གལ་ཏེ་མིར་སྐྱེས་པ་ན་ཡང་ནོར་དང ། བུད་མེད་ཀྱི་ཕྱིར་ཁྲོས་རྔམས་པས་མིག་བགྲད་དེ་གཅིག་ལ་གཅིག་འཚེ་ཞིང་གསོད་པ་དང ། གཡུལ་ངོར་ལྷགས་ནས་གཅིག་ལ་གཅིག་གསོད་དེ། དེ་ལྟར་ལུས་ཆུད་ཟོས་པ་དང ། འདོད་ཆགས་དང ། ཞེ་སྡང་དང ། གཏི་མུག་གི་ལུས་གྲངས་མེད་པ་
329b
> ཞིག་བོར་ཡང་བསོད་ནམས་སུ་མ་གྱུར་ཏེ། བདག་གི་ལུས་འདི་ཡོངས་སུ་གཏང་བར་བྱའོ། །བདག་གི་ལུས་འདི་ནི། མི་གཙང་བ་རྣམ་པ་སྣ་ཚོགས་ཀྱི་ཕུང་པོ་སྟེ། རིང་པོ་མི་ཐོགས་པར་འཇིག་ཅིང་འབྲལ་བར་འགྱུར་བར། མི་བརྟན་ཞིང་བཙོག་པའི་མགོ་འདིས་ཕན་པའི་དོན་ཆེན་པོར་འགྱུར་ན། ཅིའི་ཕྱིར་སྦྱིན་པར་མི་བྱ། ངའི་མགོ་བོ་འདི་བྲམ་ཟེ་དེ་ལ་བྱིན་ཏེ། བསོད་ནམས་དེས་བླ་ན་མེད་པའི་བྱང་ཆུབ་སྒྲུབ་བོ། །ནམ་མངོན་པར་སངས་རྒྱས་ན་ཡོན་ཏན་ཕུན་སུམ་ཚོགས་པར་འགྱུར་ཏེ། ཐབས་ལ་མཁས་པས་ཁྱེད་ཀྱང་སྡུག་བསྔལ་ལས་བཟླའོ། །ངས་སྦྱིན་པ་བྱས་པ་འདིས་མངོན་པར་འཚང་རྒྱ་ཡི། བླ་ན་མེད་པའི་བྱང་ཆུབ་ཀྱི་སེམས་ལ་ཁྱེད་བར་ཆད་དང་བགེགས་མ་བྱེད་ཅིག་།རྒྱལ་ཕྲན་དང ། བློན་པོ་དང ། བཙུན་མོ་དང ། སྲས་རྣམས་དེ་སྐད་ཅེས་བཀའ་སྩལ་པ་ཐོས་ནས་ཅང་མི་སྨྲ་བར་འཁོད་དོ། །དེ་ནས་རྒྱལ་པོ་ཆེན་པོས་བྲམ་ཟེ་དེ་ལ་སྨྲས་པ། ད་མགོ་བོ་བསླང་བའི་དུས་ལ་བབ་ཀྱི། ལོངས་ཤིག་ཅེས་སྨྲས་སོ། །བྲམ་ཟེས་གསོལ་པ།་ད་ལྟར་རྒྱལ་པོས་བློན་པོ་ལ་སོགས་པ་འཁོར་མང་པོས་བསྐོར་ཏེ་བདག་གཅིག་པུས་རྒྱལ་པོའི་དབུ་གཅད་པའི་མཐུ་མ་མཆིས་ཏེ། ཐུགས་མི་ཐུབ་བོ། །བདག་ལ་སྩལ་བར་ཆད་ན། རྒྱབ་ཀྱི་སྐྱེད་མོས་ཚལ་དུ་གཤེགས་སོ། །ཞེས་གསོལ་ཏོ། །དེ་ནས་རྒྱལ་པོ་ཆེན་པོས་རྒྱལ་ཕྲན་དང ། རྒྱལ་བུ་རྣམས་ལ་བསྒོ་བ། ཁྱེད་ང་ལ་བསྙེན་བཀུར་བྱེད་ན། བྲམ་ཟེ་འདི་ལ་གནོད་
330a
> ༄#། །པའི་ཀྱལ་ཀ་མ་བྱེད་ཅིག་ཅེས་བསྒོས་ནས་བྲམ་ཟེ་དང་འགྲོགས་ཏེ་རྒྱལ་པོ་སྐྱེད་མོས་ཚལ་དུ་སོང་ངོ ། །དེ་ནས་བྲམ་ཟེ་དེས་རྒྱལ་པོ་ལ་གསོལ་པ། རྒྱལ་པོ་ནི། སྐུ་གཞོན་ཏེ། རིང་ཡང་གྱད་དང་མཉམ་པས་ན། ཚ་བ་མི་བཟོད་དེ་ཕྱིར་ཡང་འགྱོད་ཀྱང་སྲིད་ཀྱི། རྒྱལ་པོའི་དབུ་ཤིང་ཞིག་ལ་བཏགས་ཏེ་གདོད་དགུམ་པར་འཚལ་ལོ། །དེ་ནས་རྒྱལ་པོ་ཤིང་ཡལ་ག་བརྟན་ཅིང་ལོ་མས་ཀུན་ཏུ་ཁེབས་པ་ཞིག་ལ་མགོ་བཏགས་ནས་པུས་མོ་ས་ལ་བཙུགས་ཏེ་བྲམ་ཟེ་ལ་འདི་སྐད་ཅེས་སྨྲས་སོ། །ཁྱོད་ཀྱིས་ངའི་མགོ་ཆོད་ལ་ཕྱིར་ཡང་ངའི་ལག་ཏུ་བཞག་ནས་ངའི་ལག་ནས་ལོངས་ཤིག་།ངས་ཁྱོད་ལ་མགོ་སྦྱིན་པའི་བསོད་ནམས་འདི་ནི། བདུད་དམ་ཚངས་པ་འདོད་པ་མ་ཡིན། བརྒྱ་བྱིན་ནམ། འཁོར་ལོས་བསྒྱུར་བའི་རྒྱལ་པོའམ།་ཁམས་གསུམ་གྱི་བདེ་བའི་ལོངས་སྤྱོད་འདོད་པའི་ཕྱིར་མ་ཡིན་གྱི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དེ། འགྲོ་བ་མང་པོ་སྐྱོང་ཞིང་མྱ་ངན་ལས་འདས་པའི་བདེ་བ་ལ་དགོད་པའི་ཕྱིར་རོ། །དེའི་ཚེ་ན་བྲམ་ཟེ་དེས་རལ་གྲི་ཕྱར་ཏེ་གདབ་ཅེས་བྱས་པ་དང ། ཤིང་གི་ལྷ་དེ་རབ་ཏུ་མི་དགའ་བར་གྱུར་ནས་ཅིའི་ཕྱིར་མི་འདི་གསོད་པའི་ལས་བྱེད་སྙམ་ནས་བྲམ་ཟེ་དེའི་རྣ་དྲུང་དུ་ཐལ་མོ་གཅིག་བསྣུན་པས་རྐང་ལག་མ་ཚུགས་ཏེ་ས་ལ་འགྱེལ་ཏོ། །དེ་ནས་རྒྱལ་པོ་དེས་ཡར་ཤིང་གི་ལྷ་ལ་བལྟས་ཏེ་སྨྲས་པ། སྔོན་
330b
> འདས་པའི་དུས་ན་ཤིང་འདི་ལ་མགོ་བོ་དགུ་བརྒྱ་དགུ་བཅུ་རྩ་དགུ་སྙེད་ཀྱི་སྦྱིན་པ་བྱས་ཏེ། ད་མགོ་བོ་འདི་ས་སྦྱིན་བ་སྟོང་དུ་ཚང་སྟེ་སྦྱིན་པའི་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་ཀྱི། ངའི་བླ་ན་མེད་པའི་བྱང་ཆུབ་ཀྱི་སེམས་ཀྱི་བར་ཆད་མ་བྱེད་ཅིག་།དེའི་ཚེ་ན་ཤིང་གི་ལྷ་དེས་རྒྱལ་པོས་སྨྲས་པ་ཐོས་ནས་བྲམ་ཟེ་དེ་ཕྱིར་སོར་ཆུད་པར་བྱས་ཏེ། བྲམ་ཟེ་དེ་ས་ལས་ལངས་ནས་རལ་གྲི་ཐོགས་ཏེ་རྒྱལ་པོའི་མགོ་བཅད་དོ། །མགོ་ལག་ཏུ་ལྷུང་བ་ན་ས་ཆེན་པོ་ཡང་རྣམ་པ་དྲུག་ཏུ་གཡོས། ལྷའི་ཕོ་བྲང་ཡང་འགུལ་ཞིང་ལྡེག་སྟེ་མི་བདེ་བར་གྱུར་ནས་ངོ་མཚར་ཡ་མཚན་དུ་གྱུར་ཏེ་ཀུན་གྱིས་བྱང་ཆུབ་སེམས་དཔས་འགྲོ་བ་ཐམས་ཅད་ཀྱི་ཕྱིར་མགོའི་སྦྱིན་པ་བྱས་པར་མཐོང་ནས་ཐམས་ཅད་འདུས་ཤིང་ཚོགས་ཏེ་ངོ་མཚར་ཏོ། །ཞེས་མཆི་མཆར་བཞིན་དུ་ཕབ་སྟེ་དུས་ནས་འདི་སྐད་ཅེས་སྨྲས་སོ། རྒྱལ་པོ་ཟླ་འོད་ཀྱིས་མགོའི་སྦྱིན་པ་བྱས་པས། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཏོ། །ཞེས་ཀུན་ཏུ་གྲགས་པར་གྱུར་ནས་རྒྱལ་པོ་བྱི་མ་སེ་ནས་ཐོས་ནས་མི་དགའ་ཆེས་ཏེ་འཁམས་ནས་སྙིང་གས་ཏེ་ཆེ་འཕོས་སོ། །དེའི་ཚེ་ན་བྲམ་ཟེས་རྒྱལ་པོའི་མགོ་ཁྱེར་ཏེ་སོང་བའི་ཚེ་རྒྱལ་ཕྲན་དང ། བློན་པོ་དང ། བཙུན་མོ་དང ། རྒྱལ་བུ་རྣམས་ལུས་ས་ལ་བརྡབས་ཏེ་ཆོ་ངེས་བཏབ་ནས་ལ་ལ་ནི། ཁྲག་ཏུ་སྐྱུགས་ཏེ་ཚེ་འཕོས་སོ། །ཁ་ཅིག་ནི། ཅི་ཡང་མི་དྲན་པར་མྱོས་སོ། །ཁ་
331a
> ༄#། །ཅིག་ནི།་རང་གི་སྐྲ་ཀུན་འབལ་ཏོ། །ལ་ལ་ནི། རང་གི་གོས་ཀུན་དྲལ། ཁ་ཅིག་ནི། ལག་པ་གཉིས་ཀྱིས་རང་གི་གདོང་ཀུན་དྲད་ནས་ཆོ་ངེས་འདེབས་ཤིང་ས་ལ་འགྲེའོ། །དེའི་ཚེ་ན་བྲམ་ཟེ་དེས་རྒྱལ་པོའི་དབུ་མི་སྡུག་ཅིང་མནམ་མོ། །ཞེས་མི་འདོད་ནས་ས་ལ་བོར་ཏེ་སོང་བ་དང ། དེ་ལ་བྲམ་ཟེ་ཁ་ཅིག་གིས་ཁྱོད་ནི། ཤིན་ཏུ་གདུག་པ་ཅན་ཡིན་པ་ལྟ། ཐོག་མ་ནས་དགོས་པ་མེད་ན་བསླངས་ཏེ་ཅི་བྱ་ཞེས་སྤྱོས་སོ། །བྲམ་ཟེ་དེ་ལམ་དུ་ཞུགས་ཏེ་སོང་བ་ལས་ཕྲད་པ་ཐམས་ཅད་ཀྱིས་སྤྱོས་ནས་ཁ་ཟས་མི་སྟེར་ཏེ་ཤིན་ཏུ་ཉམ་ཐག་པར་གྱུར་ལ། ལམ་ནས་རྒྱལ་པོ་བྱི་མ་སེ་ན་ཡང་ཚེ་འཕོས་པའི་གཏམ་ཐོས་པས་ཐོག་མར་རེ་བའི་སེམས་ལྟར་མ་གྱུར་པས་མྱ་ངན་གྱིས་ཡི་མུག་སྟེ་སྙིང་བདུན་དུ་གས་ནས་ཁྲག་ཏུ་སྐྱུགས་ཏེ་ཚེ་འཕོས་སོ། །རྒྱལ་པོ་བྱི་མ་སེ་ན་དང ། བྲམ་ཟེ་གཉི་ག་ཚེ་འཕོས་ནས་མཚམས་མེད་པའི་སེམས་ཅན་དམྱལ་བར་སྐྱེས་སོ། །རྒྱལ་པོ་ཟླ་འོད་ཀྱི་མྱ་ངན་གྱིས་གདུངས་ཏེ་ཚེ་འཕོས་པ་རྣམས་ནི། མཐོ་རིས་ཀྱི་ལྷར་སྐྱེས་སོ། །ཀུན་དགའ་བོ། དེའི་ཚེ་དེའི་དུས་ན་རྒྱལ་པོ་ཟླ་འོད་དེ་ནི། ད་ལྟར་ང་ཡིན་ནོ། །རྒྱལ་པོ་བྱི་མ་སེ་ན་དེ་ནི།་བདུད་སྡིག་ཏོ་ཅན་ཡིན་ནོ། །དེའི་དུས་ན་བྲམ་ཟེ་དེ་ནི་ལྷས་སྦྱིན་མིན་ནོ། །དེའི་ཚེ་ན་ཤིང་གི་ལྷ་མོ་དེ་ནི། མོངྒལ་གྱི་བུ་ཡིན་ནོ། །དེའི་ཚེ་ན་བློན་པོ་ཟླ་བ་ཆེན་པོ་དེ་
331b
> ནི།་ཤཱ་རིའི་བུ་ཡིན་ཏེ། དེའི་ཚེ་ཡང་ང་ཚེ་འཕོ་བ་མཐོང་བར་མི་བཟོད་ནས་སྔར་ཚོ་འཕོས་སོ། །དེང་གི་དུས་འདིར་ཡང་ང་མྱ་ངན་ལས་འདའ་བ་མཐོང་བར་མི་བཟོད་ནས་སྔར་མྱ་ངན་ལས་འདས་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་ཚེ་དང་ལྡན་པ་ཀུན་དགའ་བོ་དང ། འཁོར་གཞན་དག་སྐད་མཐུན་པར་དེ་བཞིན་གཤེགས་པའི་ཡོན་ཏན་ནི། ངོ་མཚར་རྨད་དོ། །ཞེས་བསྔགས་ནས་སྒོམ་པ་ལ་ནན་ཏན་བྱས་པས། ཁ་ཅིག་དགེ་སྦྱོང་གི་འབྲས་བུ་བཞི་ཐོབ་པར་གྱུར་ཏོ། །ཁ་ཅིག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཏོ། གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །རྒྱལ་པོ་ཟླ་འོད་ཀྱིས་མགོ་བྱིན་པའི་ལེའུ་སྟེ་ཉི་ཤུ་གཉིས་པའོ།། །།བློན་པོ་རི་དྭགས་ཀྱི་བུ་བདུན་གྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རྒྱལ་པོ་གསལ་རྒྱལ་ལ་བློན་པོ་རི་དྭགས་ཞེས་བྱ་བ་ཡོད་དེ། རབ་ཏུ་ཕྱུག་པ། ལོངས་སྤྱོད་ཆེ་བ་དེ་ལ་བུ་ཕོ་བདུན་ཡོད་དོ། །བུ་ཕོ་དྲུག་ནི། ཆུང་མ་ལོན་གྱི། ནང་གི་བུ་ཐ་ཆུང་གཅིག་ཆུང་མ་མ་ལོན་ནས་ཕས་འདི་སྙམ་དུ་བསམས་སོ། །བདག་ནི། རྒས་འཁོགས་ཏེ། བུ་གཅིག་བུ་ཆུང་མ་མ་ལོན་པོ་འདི་ལ་བཟང་མོ་མཆོག་ཅིག་བཙལ་ལོ་སྙམ་བསམས་
332a
> ༄#། །ནས་དེའི་ཚེ་ན་ཁྱིམ་བདག་དེ་ལ་བྲམ་ཟེ་མཛའ་ཞིང་བཤེས་པ་ཞིག་ཡོད་དེ། དེ་དང་ཕྲད་ནས་གཏམ་དུ་གླེང་པ། བདག་གི་བུའི་ནང་གི་ཐ་ཆུང་འདི་ད་དུང་ཆུང་མ་མ་ལོན་ཏེ་སུ་ལ་བསླང་ཡང་མི་ཤེས་ན། ཁྱོད་ནི། ཡུལ་ཀུན་ཏུ་ཕྱིན་ན། བུ་མོ་བཟང་ཞིང་མཛེས་པ། བློ་དང་ལྡན་པ། ཚེ་དང་དབང་ཐང་ཡོད་པ་ལྟ་ཅི་མཐོང ། བདག་གི་བུ་འདིའི་ཡིད་དུ་འོང་བ་ཞིག་ཁྱོད་ཀྱིས་བཙལ་དགོས་སོ། །ཞེས་སྨྲས་པ་དང ། བྲམ་ཟེ་དེས་ཀྱང་དེ་བཞིན་དུ་བྱའོ། །ཞེས་སྨྲས་ནས་ཀུན་ཏུ་རྒྱུ་ཞིང་ཚོལ་བ་ལས། ཡུལ་ཤི་རི་ཏི་ཏ་ཞེས་བྱ་བ་ན་བུ་མོ་ལྔ་བརྒྱ་ཞིག་འགྲོགས་ཏེ་རྩེ་བ་ལས། མེ་ཏོག་བཟང་པོ་བཏུས་ནས་སངས་རྒྱས་ལ་མཆོད་པའི་ཕྲེང་བ་བྱེད་པ་མཐོང་ངོ ། །བྲམ་ཟེ་དེས་ཀྱང་བུ་མོ་དེ་དག་གར་སོང་བའི་ཕྱི་བཞིན་བལྟས་ན། བུ་མོ་དེ་དག་ཆུ་ཆུང་དུ་ཞིག་འབོག་པ་ལས་གཞན་ཐམས་ཅད་ནི། ལྷམ་ཕུད་ཀྱི། བུ་མོ་གཅིག་ཅིག་ལྷ་མ་མ་ཕུད་པར་ཆུ་རྒལ་ཏོ། །དེ་ནས་ཡང་སོང་སོང་བ་ལས་ཆུ་ཆེན་པོ་ཞིག་རྒལ་ནས་བུ་མོ་གཞན་ནི། གོས་ཕུད་ནས་ཆུར་ཞུགས། བུ་མོ་དེ་འབའ་ཞིག་གོས་ཀྱང་མ་ཕུད་པར་ཆུ་རྒལ་ཏོ། །དེ་ནས་ཚལ་ཞིག་གི་ནང་དུ་ཕྱིན་ནས་བུ་མོ་གཞན་ནི། ཤིང་ཁར་འཛེག་ཅིང་མེ་ཏོག་འཐོག་ན། བུ་མོ་དེ་འབའ་ཞིག་ས་ལ་བཏུས་ཀྱང་གཞན་པས་མང་དུ་རྙེད་དོ། །དེ་ནས་བྲམ་ཟེ་དེ་བུ་མོའི་དྲུང་དུ་སོང་སྟེ་ཁྱོད་
332b
> ལ་ཐེ་ཚོམ་འདྲི་ན། ཁྱོད་ཀྱིས་ལན་ལེགས་པར་ཐོབ་ཅིག་ཅེས་སྨྲས་སོ། །བུ་མོས་ཀྱང་ཐེ་ཚོམ་མ་ཡོད་ན་དྲིས་ཤིག་ཅེས་སྨྲས་པ་དང ། བྲམ་ཟེས་དྲིས་པ། བུ་མོ། ཆུ་རྒལ་བ་ན་བུ་མོ་གཞན་གྱིས་ནི། ལྷ་མ་ཕུད་ནས་ཆུ་རྒལ། བུ་མོ་ཁྱོད་འབའ་ཞིག་ལྷ་མ་ཡང་མ་ཕུད་པར་ཆུ་རྒལ་ན། ཁྱོད་ལ་བསམ་པ་གཞན་ཅི་ཡོད། བུ་མོས་སྨྲས་པ། ཁྱོད་ཀྱི་ཐེ་ཚོམ་ནི། ངོ་མཚར་ཆེ་བ་ཡང་མ་ཡིན་ནོ། །བདག་ས་སྐམ་པོ་ལ་འགྲོ་བའི་ཚེ་རྐང་པའི་འོག་ཏུ་ཅི་འགྲོ་བ་མིག་གིས་བལྟར་ཡོད་པས། ཚེར་མའམ། རྡོའམ། གྱོ་མོའམ། མི་བདེ་བའི་བག་ཡོད་ན་བྱོལ་ཏེ་འགྲོའོ། །ཆུའི་གཏིང་ན་ཅི་ཡོད་པ་མིག་གིས་བལྟར་མེད་དེ། གལ་ཏེ་ཚེར་མའམ། སྤྲུལ་ལམ། སྲིན་བུ་གདུག་པ་དག་བརྫིས་ན། རྐང་པ་ལ་གནོད་པར་འགྱུར་གྱིས་དོགས་པས་ལྷམ་མ་ཕུད་པ་ཡིན་ནོ། །བྲམ་ཟེས་སྨྲས་པ། འོན་ཅིའི་ཕྱིར་གོས་དང་བཅས་སུ་ཆུལ་འབོག་།བུ་མོས་སྨྲས་པ། བུད་མེད་ཀྱི་ལུས་ལ་མཚན་མ་བཟང་པོ་དང ། ངན་པ་ཡོད་པས་གོས་བརྫེས་ཏེ་ཆུར་ཞུགས་ན་གཞན་གྱིས་མཐོང་སྟེ། མཚན་མ་བཟང་ན་ནི། ཅང་མི་ཟེར་གྱི། མཚན་མ་ངན་ན་འཕྱ་བར་འགྱུར་བས། བདག་གིས་གོས་མ་བརྫེས་པ་ཡིན་ནོ། །བྲམ་ཟེས་སྨྲས་པ། འོ་ན་ཅིའི་ཕྱིར་ཁྱོད་གཅིག་པུ་ཤིང་ཁར་མི་འཛེག་།བུ་མོས་སྨྲས་པ། གལ་ཏེ་ཤིང་ཁར་འཛེགས་ན། ཤིང་གི་ཡལ་ག་ཆག་གམ་ལྷུང་ན། ལུས་ལ་གནོད་པར་འགྱུར་བས་ཤིང་
333a
> ༄#། །ཁར་མ་འཛེགས་པ་ཡིན་ནོ། །བུ་མོ་དེ་ནི། རྒྱལ་པོ་རབ་གསལ་གྱི་གཅུང་\?\་སྟོབས་ཀྱི་གྲོགས་པོ་ཞེས་བྱ་བའི་བུ་མོ་ཡིན་ཏེ། རྒྱལ་པོའི་གཅུང་\?\་དེ་སྔོན་ཉེས་པ་ཞིག་བྱུང་བས་ཡུལ་དེ་ནས་བསྐྲད་དེ་ཡུལ་འདིར་འོངས་ནས་ལྷ་མཚམས་མ་ཆུང་མར་བླངས་པ་ལས་བཙས་པའི་བུ་མོ་ཡིན་ནོ། །བྲམ་ཟེས་སྨྲས་པ། བུ་མོ། ཁྱོད་ནི། ཤིན་ཏུ་ཡང་མཁས་ཤིང་མཛངས་མ་ཞིག་ན། ཁྱོད་ལ་ཕ་མ་ཡོད་དམ། བུ་མོས་སྨྲས་པ། ཡོད་དོ། །འོ་ན་འགྲོགས་ཏེ་ཁྱོད་ཀྱི་ཁྱིམ་དུ་འདོང་ངོ ། །ཞེས་སྨྲས་ནས་དེའི་སྒོར་ཕྱིན་པ་དང ། བུ་མོ་ནང་དུ་སོང་སྟེ་ཕ་མ་ལ་སྨྲས་པ། སྒོ་ན་བྲམ་ཟེ་ཞིག་ཡབ་དང་མཇལ་འཚལ་ལོ། །ཞེས་མཆིའོ། །བུ་མོའི་ཕ་སྒོར་བྱུང་ནས་གཅིག་ལ་གཅིག་བདེའམ་ཞེས་ནད་དྲིས་ཏེ།་ད་གཟོད་ཀྱི་བུ་མོ་དེ་ཁྱོད་ཀྱི་བུ་མོ་ཡིན་ནམ་ཞེས་སྨྲས་སོ། །སྨྲས་པ། བདག་གི་བུ་མོ་ཡིན་ནོ། །འོ་ན་བདག་པོ་ཡོད་དམ། སྨྲས་པ། བདག་པོ་མེད་དོ། །བྲམ་ཟེས་སྨྲས་པ།་མཉན་དུ་ཡོད་པ་ན་བློན་པོ་ཆེན་པོ་རི་དྭགས་ཞེས་བྱ་བ་ཁྱོད་ཀྱིས་ཤེས་སམ། སྨྲས་པ། བདག་དང་བཤེས་སོ། །བྲམ་ཟེ་དེས་སྨྲས་པ། བློན་པོ་དེའི་བུའི་ནང་གི་ཆུང་དུ་བྱད་གཟུགས་ལེགས་ཤིང་ཡིད་གཞུངས་པ་ཞིག་ཡོད་དེ། ཁྱོད་ཀྱི་བུ་མོ་ཆུང་མར་སློང་ངོ ། །དེས་སྨྲས་པ། དེ་ནི། རིགས་ཆེ་ཞིང་མཐོ་བ་ཡིན་ཏེ། །གལ་ཏེ་བུ་མོ་དེ་
333b
> འདོད་ན་ལྟ་ཁྱོད་ཀྱི་བསམ་པ་ལྟར་བྱའོ། །ཞེས་སྨྲས་ནས། །བྲམ་ཟེ་དེས་ཀྱང་གྲོགས་པོ་ཕྱིར་འགྲོ་བ་ལ་མཉན་དུ་ཡོད་པར་བྲམ་ཟེའི་ཐོག་ཏུ་ཡི་གེ་སྦྲིང་ངོ ། །བྲམ་ཟེའི་ཐོག་ཏུ་ཡི་གེ་འོངས་ནས་བག་མ་བསུ་བའི་རྟ་དང ། ཤིང་རྟ་ལ་སོགས་པ་བཤམས་ནས་ཡུལ་ཤི་རི་ཏི་ཏར་ཆས་སོ། །དེར་ཕྱིན་ཏུ་ཉེ་བ་དང་སྔར་མི་གཅིག་སྦྲོན་དུ་བཏང་ནས་དེས་ཀྱང་བུ་མོ་བག་མར་གཏང་བའི་སྟོན་མོ་བཤམས་ཏེ་བུ་མོ་བག་མར་བཏང་ངོ ། །དེ་དག་གིས་བུ་མོ་ཐོབ་ནས་མཉན་ཡོད་དུ་འགྲོ་བ་ན་བུ་མོ་དེའི་མས་མི་མང་པོའི་ནང་དུ་བུ་མོ་དེ་ལ་འདི་སྐད་ཅེས། ཁྱོད་དེང་ཕྱིན་ཆད་རྟག་ཏུ་གོས་བཟང་པོ་གྱོན་ཞིང་ཁ་ཟས་ཞིམ་པོ་ཟོ་ཞིག་།ཉིན་གཅིག་བཞིན་དུ་རྒྱུན་མ་ཆད་པར་མེ་ལོང་ལ་ལྟོས་ཤིག་ཅེས་བསྒོས་ནས་བུ་མོས་ཀྱང་དེ་བཞིན་དུ་བགྱིའོ། །ཞེས་སྨྲས་པ་དང ། གྱོས་པོ་དེ་མ་རངས་ཏེ་འདི་སྙམ་དུ་བསམས་སོ། །མི་གཅིག་སྐྱེས་པ་ལ་སྐྱིད་སྡུག་ཀྱང་མི་རྟག་ན། གོས་བཟང་པོ་དང ། ཁ་ཟས་ཞིམ་པོ་རྟག་ཏུ་ག་ལ་རྙེད།་རྒྱུན་དུ་མེ་ལོང་ལ་ལྟོས་ཤིག་པ་ཡང་རིགས་པ་མ་ཡིན་ནོ་སྙམ་བསམས་ནས་སོ་སོར་ཕྱི་ཕྱག་འཚལ་ཏེ་གྱེས་སོ། །དེ་དག་ཐམས་ཅད་འགྲོགས་ཏེ་ལམ་དུ་ཞུགས་ནས་ཕྱིར་ཡུལ་དུ་དོང་བ་ལས། བར་ན་ཁང་པ་བཟང་པོ་བསིལ་བ་ཞིག་ཡོད་དེ། དེ་དག་ལས་སྔར་དོང་བ་དག་ཁང་བ་དེ་ན་བསྟི་ཞིང་འཁོད་དོ། །བག་མ་གསར་པ་ཡང་ཕྱིས་དེར་འོངས་ནས་
334a
> ༄#། །གྱོས་པོ་ལ་འདིའི་འོག་ཏུ་བཞུགས་སུ་མི་རུང་གི་།མྱུར་དུ་ཐང་ལ་བཞུད་དོ། །ཞེས་གསོལ་བ་དང་མནའ་མས་སྨྲས་པ་བཞིན་དུ་ཐང་ལ་བྱུང་ངོ ། །གཡོག་ཁ་ཅིག་འགྲོར་མ་བཏུབ་སྟེ་ཁང་པའི་འོག་ན་འདུག་པ་ལས། རིང་པོ་མ་ལོན་པར་བ་ལང་དང ། རྟ་དག་ཅིག་དེར་འོངས་ནས་ཀ་བ་ལ་བསྙོགས་པ་དང་ཁང་པ་རྡིབ་ནས་ཁང་པའི་འོག་ན་འདུག་པ་དག་ཁ་དག་གོ་།གྱོས་པོས་བསམ་པ། བདག་སྲོག་དང་བྲལ་བ་ལས་ཐར་པར་བྱས་པ་ནི། མནའ་མ་འདི་ཡིན་ནོ་སྙམ་ནས་མནའ་མ་ལ་ལྷག་པར་བྱམས་པའི་སེམས་སྐྱེས་སོ། །དེ་ནས་ཡང་སོང་སོང་བ་ལས་ཆུ་ཤོད་ཅིག་ཏུ་རྩཝ་དང་ཆུར་ལྡན་པ་ཞིག་ཏུ་འདུག་པ་ལས། མནའ་མ་ཕྱིས་འོངས་ནས་ཆུ་ཤོད་འདིར་བཞུགས་སུ་མི་རུང་གི་།མྱུར་དུ་སྤོས་ཤིག་ཅེས་གསོལ་པ་དང་ལོགས་ཤིག་ཏུ་སྤོས་མ་ཐག་ཏུ་གྲུ་ཆར་དྲག་པོ་བབ་ནས་སྔར་བཏབ་པའི་ཆུ་ཤོད་དུ་ཤཝ་ཆེན་པོ་བྱུང་ངོ ། །གྱོས་པོས་བསམ་པ། བདག་སྲོག་དང་བྲལ་བ་ལས་མནའ་མ་འདིས་ལན་གཉིས་ཀྱི་བར་དུ་ཐར་པར་བྱས་སོ་སྙམ་བསམས་ནས་ཆོས་ཏེ་སོང་བ་ལས་ཡུལ་དུ་ཕྱིན་ཏོ། །དེ་ནས་གཉེན་རྣམས་ལྷགས་ཏེ་དགའ་བའི་གཏམ་བྱས་ནས་སྟོན་མོ་ཆེན་པོ་བྱས་ཏེ་ཉི་མ་གཅིག་གི་བར་དུ་དགའ་བའི་རྩེད་མོ་བྱས་སོ། །མགྲོན་ཀུན་གྱེས་པའི་འོག་ཏུ་མནའ་མ་རྣམས་བཀུག་སྟེ་འདི་སྐད་ཅེས་
334b
> བསྒོའོ། །ཁོ་བོ་ནི། ན་སོ་རྒས་ཏེ་ལས་རྣམས་ཀྱིས་སྐྱོན་མནའ་མ་ཁྱེད་རྣམས་ལ་ཁྱིམ་གྱི་ལས་དང ། ནོར་རྫས་ཀྱི་མཛོད་རྣམས་གཏད་དགོས་ན། ཁྱེད་གང་གིས་བང་མཛོད་ཀྱི་ལྡེ་མིག་བཅང་པར་བྱ་ཞེས་དྲིས་ན། མནའ་མ་ཆེན་མོ་དྲུག་ཆར་གྱིས་མི་ནུས་སོ། །ཞེས་གསོལ་ལ། ནང་གི་ཆུང་དུས་ནི། བདག་གིས་ནུས་སོ། །ཞེས་གསོལ་ཏོ། །དེ་ནས་ཁྱིམ་བདག་གིས་ཀྱང་བང་མཛོད་ཐམས་ཅད་ཀྱི་ལྡེ་མིག་གཏད་དེ་མནའ་མས་ཀྱང་དེ་བཞིན་དུ་ཉམས་སུ་བླངས་ནས་ནང་བར་ནི། སྔར་ལངས་ཤིང་ཁང་པའི་ནང་ཀུན་ཕྱག་དར་བྱས་ནས་ཆག་ཆག་གིས་བཏབ་བོ། །དེ་ནས་ཁ་ཟས་ཀྱི་གཡོས་བྱས་ནས་སྔར་གྱོས་རྒྱུག་ལ་སོགས་ཏེ་ཆེ་རིམ་གྱིས་ཟན་བྱིན་ནོ། །དེའི་འོག་ཏུ་བྲན་ཁོལ་དང ། ལས་བྱེད་རྣམས་ལ་ཟན་བྱིན་ནས་སོ་སོར་ལས་ལ་བཅུད་དེ་གཟོད་བདག་ཟན་ཟའོ། །རྟག་ཏུ་དེ་འདྲ་བར་བྱེད་པས་གྱོས་པོས་ཀྱང་བདག་གི་མནའ་མ་འདི་ནི། གཞན་དང་མི་འདྲ་སྟེ་ཐ་མལ་པ་ནི། མ་ཡིན་ན། ཅིའི་ཕྱིར་བུ་མོ་བདག་གི་མས་བསྒོ་བ་ལྟར་མི་བྱེད་སྙམ་བསམས་ནས་འདི་སྐད་ཅེས་སྨྲས་སོ། །ཁྱོད་ཁྱིམ་ནས་ཆས་པའི་ཚེ་ཁྱོད་ཀྱི་མས་རྟག་ཏུ་གོས་བཟང་པོ་གྱོན་ལ་ཁ་ཟས་ཞིམ་པོ་ཟོ་ཞིག་།རྟག་ཏུ་མེ་ལོང་ལ་ལྟོས་ཤིག་ཅེས་བྱ་བ་ཅིའི་ཐ་ཚིག་ཅེས་དྲིས་ན། མནའ་མས་བུས་མོས་ལ་བཙུགས་ཏེ་འདི་སྐད་ཅེས་གསོལ་ཏོ། །བདག་གི་མས་གོས་བཟང་པོ་གྱོན་ཅིག་ཅེས་བསྒོ་བ་ནི། སྟེང་དུ་གྱོན་བའི་
335a
> ༄#། །བཞག་གོས་ལྟ་བུ་ལ་རྟག་ཏུ་བག་བྱ་ཞིང་མ་རྙིང་པར་གྱིས་ཤིག་།མགྲོན་ནམ་ཕྱི་མི་དག་འོངས་ན་གོས་མ་ངན་ཞིག་ཅེས་མཆིའོ། །རྟག་ཏུ་ཁ་ཟས་ཞིམ་པོ་ཟོ་ཞིག་པ་ནི། ཁ་ཟས་ཞིམ་པོ་དང ། བསོད་པ་ལ་བགྱི་བ་མ་ལགས་ཀྱི། སུ་བས་ཀྱང་ཕྱིས་ཟོས་ན་བཀྲེས་པས་ཁ་ཟས་ཀུན་ཏུ་ཞིམ་མོ། །ཞེས་མཆིའོ། །རྟག་ཏུ་མེ་ལོང་ལ་ལྟོས་ཤིག་ཅེས་བསྒོ་བ་ནི། འཁར་བའམ། ལྕགས་ཀྱི་མེ་ལོང་ལ་ལྟ་བ་མ་ལགས་ཀྱི། སྔར་ལོངས་ལ་ཕྱི་ནང་གི་ཕྱག་དར་བྱ་བ་དང ། ཆག་ཆག་གདབ་པ་དང ། ཁྲི་སྟན་གདིང་བ་ལ་སོགས་པ་ལས་སུ་བྱ་བ་རྣམས་ལེགས་པར་གྱིས་ཤིག་ཅེས་མཆི་སྟེ། བདག་གི་མས་བསྒོ་བ་ནི། འདི་ལྟ་བུ་ལགས་སོ། །ཞེས་གསོལ་པ་དང ། མནའ་མ་དེ་ལ་ལྷག་པར་བྱམས་ཏེ་ཁྱིམ་གྱི་ལས་ཐམས་ཅད་གཏད་ནས་ཐམས་ཅད་བདེ་ཞིང་སྐྱིད་པར་གྱུར་ཏོ། །དེའི་ཚེ་ན་བྱ་དག་ཅིག་རྒྱ་མཚོའི་གླིང་ནས་འབྲས་ཟ་བ་ལས་འབྲས་ཀྱི་སྙེ་མ་ཁྱེར་ཏེ་འཕུར་བ་ལས་རྒྱལ་པོའི་ཕོ་བྲང་གི་ཐད་ཀར་ཕྱིན་ནས་འབྲས་ཀྱི་སྙེ་མ་དག་ཅིག་ཤོར་ཏེ་ཕོ་བྲང་གི་ཐད་ཀར་ལྷུང་ངོ ། །འབྲས་ཀྱི་སྙེ་མ་དེ་གཅིག་གིས་རྒྱལ་པོ་ལ་ཕུལ་ནས་རྒྱལ་པོས་ཀྱང་འབྲས་བཟང་པོ་འདི་ལྟ་བུ་ནི། སྨན་དུ་རུང་དུ་ངེས་ཀྱི། ས་བོན་དུ་བྱའོ་སྙམ་ནས་བློན་པོ་ཀུན་ལ་ཤས་ཤས་སུ་བགོས་ཏེ་རྨོས་ཤིག་ཅེས་བསྒོའོ། །དེའི་ཚེ་ཁྱིམ་བདག་དེས་ཀྱང་ཉུང་དུ་ཞིག་ཐོབ་ནས་
335b
> ཕྱིར་ཁྱིམ་དུ་འོངས་ཏེ་མནའ་མ་ལ་འབྲས་འདི་རྨོས་ཤིག་ཅེས་བསྒོའོ། །མནའ་མ་དེས་ཀྱང་བསྒོ་བ་དེ་བཞིན་དུ་བྲན་ཁོལ་ལ་གཞེན་བཏབ་ནས་ཞིང་གཤིན་པར་རྨོས་ན། དེ་བཞིན་དུ་ལེགས་པར་སྐྱེས་ཏེ་འབྲས་མང་ཞིག་བྱུང་ངོ ། །གཞན་གྱིས་རྨོས་པ་ནི། ལས་སུ་ལེགས་པར་མ་བྱས་པས་གཅིག་ཀྱང་མ་སྐྱེས་སོ། །དེའི་ཚེ་ན་རྒྱལ་པོའི་བཙུན་མོ་ནད་ཀྱིས་བཏབ་པ་ལས་སྨན་པས་དཔྱད་བྱས་ནས་ན་བ་འདི་ལ་རྒྱ་མཚོའི་གླིང་གི་འབྲས་བྱིན་ན་འཚོའོ། །ཞེས་དཔྱད་བྱས་སོ། །རྒྱལ་པོས་ཀྱང་རྒྱ་མཚོའི་གླིང་གི་འབྲས་ཤིག་སོ་སོ་ནས་རྨེད་དུ་བཅུག་པ་དྲན་ནས་རྒྱ་མཚོའི་གླིང་གི་འབྲས་ཤིག་རྨེད་དུ་བཅུག་པ་ཡོད་དམ་མེད་ཅེས་དྲིས་ན། བློན་པོ་ཁ་ཅིག་གིས་ནི། འབྲས་རྨོས་པ་མ་སྐྱེས་སོ། །ཞེས་མཆིའོ། །ཁ་ཅིག་གིས་ནི། འབྲས་ཀུན་བྱི་བས་འཚལ་ཏེ་མ་མཆིས་སོ། །ཞེས་མཆིའོ། །དེའི་ཚེ་ན་ཁྱིམ་བདག་དེ་ཡང་ཕྱིར་ཁྱིམ་དུ་སོང་ནས་མནའ་མ་དེ་ལ་སྔོན་འབྲས་ཤིག་རྨོར་བཅུག་པ་སྐྱེས་སམ་མ་སྐྱེས། རྒྱལ་པོའི་བཙུན་མོ་ནད་ཀྱིས་བཏབ་སྟེ་སྨན་དུ་དགོས་སོ། །མནའ་མས་གསོལ་པ། འབྲས་རྨོས་པ་རབ་ཏུ་ལེགས་ཏེ་མི་གཅིག་གི་སྨན་དུ་མ་བས་ཀྱི། ཡུལ་གཅིག་གི་མི་ཡང་སོས་པ་ཙམ་མཆིས་སོ། །ཁྱིམ་བདག་དེས་འབྲས་དེ་ལས་ཤས་ཤིག་རྒྱལ་པོ་ལ་ཕུལ་ནས་རྒྱལ་པོས་ཀྱང་འབྲས་དེས་བཙུན་མོའི་སྨན་བྱས་ཏེ་བཙུན་མོ་ཡང་སོས་ཏེ་རྒྱལ་པོ་རབ་ཏུ་དགའ་ནས་བྱ་དགའ་མང་
336a
> ༄#། །དུ་བྱིན་ནོ། །དེའི་ཚེ་ཤི་རི་ཏི་ཏའི་རྒྱལ་པོ་དང ། ཡུལ་མཉན་ཡོད་ཀྱི་རྒྱལ་པོ་གཉིས་གཅིག་ལ་གཅིག་མི་དགའ་བས་རྟག་ཏུ་མི་འདུམ་མོ། །དེའི་ཚེ་ན་ཤི་རི་ཏི་ཏའི་རྒྱལ་པོས་མཉན་ཡོད་ཀྱི་རྒྱལ་པོ་དེ་ལ་བློན་པོ་མཁས་པ་མཛངས་ཤིང་བློ་དང་ལྡན་པ་ཡོད་དམ་མེད་བག་མ་མོ་སྙམ་ནས་ཕོ་ཉ་ཞིག་ཡུལ་མཉན་ཡྡོ་དུ་བཏང་སེ་ཕོ་ཉ་དེ་ལ་རྒོད་མ་མ་སྨད་མ་དང་བུ་འདྲ་བ། སྤུ་མདོག་གཅིག་པ། བྱེ་བྲག་མི་ཕྱེད་པ་གཉིས་བསྒྲིགས་ཏེ་མ་ནི། གང ། བུ་ནི། གང་ཡིན་བྱེ་བྲག་ཕྱེ་ཞིག་ཅེས་སྤྲིང་ངོ ། རྒྱལ་པོ་དང་བློན་པོ་རྣམས་ཀྱིས་བལྟས་ན། གཅིག་གིས་ཀྱང་བྱེ་བྲག་མ་བྱེད་ངོ ། །དེ་ནས་ཁྱིམ་བདག་དེ་ཁྱིམ་དུ་འོངས་པ་དང ། མནའ་མས་གཏམ་ཅི་གསན་ཞེས་ཞུས་པ་དང ། གཏམ་འདི་ལྟ་བུ་དག་གྲག་གོ་།ཞེས་མནའ་མ་ལ་རྒྱས་པར་གཏམ་བྱས་སོ། །མནའ་མས་གསོལ་པ། འདི་ནི། ཤིན་ཏུ་ཡང་རིག་པར་སླའོ། །རྒོད་མ་མ་སྨད་གཉིས་ཐོགས་ལ་ལྷན་ཅིག་ཏུ་རྩཝ་བཟང་པོ་ཞིག་བྱིན་ཅིག་དང ། མ་གང་ཡིན་པ་དེ་ནི། རྩཝ་མཆུས་ཕུལ་ཏེ་བུ་ལ་སྟོབས་སོ། །ཁྱིམ་བདག་གིས་མནའ་མས་སྨྲས་པ་བཞིན་དུ་རྒྱལ་པོ་ལ་གསོལ་ནས་རྒྱལ་པོས་ཀྱང་རྩཝ་བྱིན་ཏེ་བལྟས་ན། དེ་བཞིན་དུ་གྱུར་ཏེ་མ་དང་བུ་ཡང་རྟོགས་ནས་ཕོ་ཉ་དེ་ལ་མ་ནི། འདིའོ། །བུ་ནི། འདིའོ། །ཞེས་སྨྲས་པས་དེ་བཞིན་དུ་སྨྲས་པ་བདེན་ཏེ། མ་ནོར་རོ། །ཞེས་མཆིའོ།།
336b
> དེ་ནས་ཕོ་ཉ་དེ་རང་ཡུལ་དུ་སོང་ནས་རྒྱལ་པོ་ལ་དེ་བཞིན་དུ་རྒྱས་པར་གསོལ་ཏོ། །དེ་ནས་ཡང་ཕོ་ཉ་གཅིག་བཏང་སྟེ། སྦྲུལ་སྦོམ་ཕྲ་དང་རིང་ཐུང་མཉམ་ལ་འདྲ་བ་གཉིས་ཤིག་བསྐུར་ནས་སྦྲུལ་འདི་གཉིས་ལས་ཕོ་གང་ཡིན་པ་དང ། མོ་གང་ཡིན་པ་བྱེ་བྲག་ཕྱེ་ཞིག་ཅེས་བསྒོའོ། །རྒྱལ་པོ་རབ་གསལ་རྒྱལ་དང ། བློན་པོ་རྣམས་འདུས་ཏེ་དཔྱད་ན། གཅིག་གིས་ཀྱང་མ་རྟོགས་སོ། །དེ་ནས་ཁྱིམ་བདག་དེས་ཁྱིམ་དུ་མནའ་མ་ལ་དྲིས་ནས་མནའ་མས་བསྟན་པ། རས་འཇམ་པོ་ཞིག་ཐིང་ལ་སྦྲུལ་དེའི་སྟེང་དུ་ཞོག་ཅིག་དང ། གང་མོ་ཡིན་པ་དེ་ནི། ཅང་མི་འགུལ་བར་ཉལ་ལོ། །གང་ཕོ་ཡིན་བ་དེ་ནི། མི་བཟོད་དེ་འདུག་ཏུ་མི་བཏུབ་པའི་རིགས་སོ། །ཅི་མངོན་ཞེ་ན། གང་མོར་གྱུར་པ་ནི། འཇམ་ཞིང་ཡང་བ་ལ་ཆགས་སོ། །གང་ཕོར་གྱུར་པ་ནི། རང་བཞིན་གྱིས་ཁྲོ་བས་འཇམ་པོ་ལ་མི་བཟོད་དེ། ཉལ་དུ་མི་བཏུབ་པས་དེས་རྟོགས་པར་འགྱུར་རོ། །ཁྱིམ་བདག་དེས་ཀྱང་རྒྱལ་པོ་ལ་དེ་བཞིན་དུ་གསོལ་ཏེ་མནའ་མས་སྨྲས་པ་བཞིན་དུ་བྱས་ནས་ཕོ་གང་ཡིན་པ་དང་མོ་གང་ཡིན་པ་བྱེ་བྲག་ལེགས་པར་ཕྱེད་དོ་ཕོ་ཉ་བ་དེ་ལ་འདི་ནི། ཕོ་ཡིན་ནོ། །འདི་ནི། མོ་ཡིན་ནོ། །ཞེས་བསྒོ་ནས་དེ་བཞིན་ཏེ། མ་ནོར་ཏོ། །ཞེས་མཆིའོ།། དེ་ནས་རྒྱལ་པོ་དེ་ཤིན་ཏུ་དགའ་ནས་དེ་ལ་ནོར་བུ་རིན་པོ་ཆེ་མང་དུ་བྱ་དགར་བྱིན་ནོ། །དེ་ནས་ཡང་ཤིང་འདོམ་དོ་པ་སྦྲོམ་ཕྲ་མཉམ་པ། ཁྱད་པར་མེད་པ། འཛེར་པ་དང ། སྟ་རེ་དང །
337a
> ༄#། །སྟེའུའི་རྗེས་མེད་པ་ཞིག་བསྐུར་ཏེ་ཤིང་འདིའི་མགོ་མཇུག་གང་ཡིན་པ་བྱེ་ཕྲག་ཕྱེ་ཞིག་ཅེས་བསྒོའོ། །རྒྱལ་པོ་དང ། བློན་པོ་རྣམས་འདུས་ཏེ་དཔྱད་ན། གཅིག་གིས་ཀྱང་མ་ཤེས་ཏེ། ཁྱིམ་བདག་དེས་ཡང་མནའ་མ་ལ་དྲིས་ན། འདི་ནི། ཤིན་ཏུའང་སླ་སྟེ། ཤིང་འདིའི་མགོ་མཇུག་རྟོགས་པར་འདོད་ན། ཆུའི་ནང་དུ་ཞོག་ཅིག་དང ། རྩ་བ་ནི། ཐུར་དུ་ནུབ་ཀྱི། མགོ་ནི། ཕྱིར་འབྱུང་བའི་རིགས་སོ། །ཁྱིམ་བདག་དེས་ཀྱང་རྒྱལ་པོ་ལ་དེ་བཞིན་དུ་གསོལ་ཏེ་མནའ་མས་སྨྲས་པ་དེ་བཞིན་དུ་བྱས་ན། མགོ་མཇུག་རྟོགས་པར་གྱུར་ཏེ། འདི་ནི། མགོའོ། །འདི་ནི། རྩཝ་བའོ། །ཞེས་བསྒོའོ། །ཕོ་ཉས་ཀྱང་དེ་བཞིན་ཏེ། བདེན་ནོ། །ཞེས་སྨྲས་སོ། །དེ་ནས་རྒྱལ་པོ་རབ་ཏུ་དགའ་ནས་དེ་ལ་བྱ་དགའ་མང་དུ་བྱིན་ནོ། །ཕོ་ཉ་དེ་ཕྱིར་ཡུལ་དུ་ཕྱིན་ནས་རྒྱལ་པོ་དེ་ལ་རྒྱས་པར་གསོལ་པ་དང ། རྒྱལ་པོ་དེས་ཕོ་ཉ་ལ་རིན་པོ་ཆེ་མང་དུ་བསྐུར་ཏེ་རྒྱལ་པོ་ཆེན་པོ་དེ་ལ་བློན་པོ་མཛངས་པ་བློ་དང་ལྡན་པ་ཡོད་ཀྱི། འདི་དག་ཕུལ་ལ་ཕྱིན་ཆད་འདུམ་པར་བྱའོ། །ཞེས་བསྒོས་ནས་རྒྱལ་པོ་རབ་གསལ་རྒྱལ་གྱིས་དེ་ལྟ་བུར་གྱུར་པ་ལ་རབ་ཏུ་དགའ་སྟེ་ཁྱིམ་བདག་དེ་ལ་ཁྱོད་ཀྱིས་དེ་དག་ཇི་ལྟར་རྟོགས་ཤིང་ཤེས་ཞེས་བཀའ་སྩལ་ཏོ། །ཁྱིམ་བདག་གིས་གསོལ་པ། འདི་ནི། བདག་གིས་རྟོགས་པ་མ་ལགས་ཀྱི། བདག་གི་མནའ་མ་
337b
> བློ་དང་ལྡན་པ་ཞིག་མཆིས་པ་དེས་རྟོགས་སོ། །རྒྱལ་པོས་དེས་སྐད་ཅེས་གསོལ་པ་གསན་ནས་རབ་ཏུ་དགའ་སྟེ་ཁྱིམ་བདག་གི་མནའ་མ་དེ་ད་ཕྱིན་ཆད་ང་དང་མིང་སྲིང་དུ་བྱའོ། །ཞེས་བཀའ་སྩལ་ཏོ། །ཁྱིམ་བདག་གི་མནའ་མ་དེ་ཕྱིས་སེམས་ཅན་དང་ལྡན་པར་གྱུར་ཏེ་ཟླ་བ་དགུ་ཚང་ནས་སྒོ་ང་སུམ་ཅུ་རྩ་གཉིས་བྱུང་སྟེ། སྒོ་ང་རེ་རེའི་ནང་ནས་བུ་ཁྱེའུ་མངའ་བྱད་ལེགས་བ།་བལྟ་ན་སྡུག་པ། བཟང་བ་རེ་རེ་བྱུང་ངོ ། །བུ་དེ་དག་ཆེར་སྐྱེས་ནས་དཔའ་ཁྱད་ཟླ་མེད་དེ། མི་གཅིག་གིས་ཀྱང་མི་སྟོང་ཐུབ་པར་གྱུར་ཏོ། །དེའི་ཕ་མ་ཡང་བུ་དེ་དག་ལ་རབ་ཏུ་སྡུག་པར་སེམས་ཏེ། ཡུལ་མི་ཐམས་ཅད་ཀྱང་དེ་དག་ལ་བག་བྱེད་དོ། །ཕྱིས་ཡུལ་དེ་ན་རིགས་ཆེ་ཞིང་མཐོ་བ་ལས་ཆུང་མ་ཡང་བླངས་སོ། །དེའི་ཚེ་ན་ལྷ་མཚམས་མ་དད་པའི་སེམས་དང་ལྡན་པས་སངས་རྒྱས་དང་དགེ་འདུན་སྤྱན་དྲངས་ཏེ་བཅོམ་ལྡན་འདས་ཀྱིས་ཆོས་བསྟན་པས། ཁྱིམ་གང་གི་མི་ཐམས་ཅད་ཀྱིས་རྒྱུན་དུ་ཟུགས་པའི་འབྲས་བུ་ཐོབ་པར་གྱུར་ན།་ཁྱེའུ་ནང་གི་ཐ་ཆུང་འབའ་ཞིག་གིས་འབྲས་བུ་མཐོབ་སྟེ། ཁྱེའུ་དེ་གླང་པོ་ཆེ་ལ་ཞིན་ནས་གྲོང་ཁྱེར་གྱི་ཕྱི་རོལ་དུ་རྩེར་སོང་བ་ལས་གྲོང་ཁྱེར་དེའི་ཕྱི་རོལ་ན་ཆུ་ཆེན་པོ་ཞིག་འབབ་པ་ལ་ཟམ་པ་ཆེན་པོ་ཞིག་ཡོད་དེ། ཁྱེའུ་དེ་ཟམ་པའི་སྟེང་དུ་ཕྱིན་པ་དང ། བློན་པོ་ཆེན་པོའི་བུ་ཞིག་ཀྱང་ཤིང་རྟའི་ནང་ན་འདུག་སྟེ་ཕྱི་རོལ་ནས་ནང་དུ་འོང་བ་དང་ཟམ་པའི་སྟེང་དུ་
338a
> ༄#། །ཕྲད་པ་ལས་གཉི་ག་ཚོ་རིགས་ཀྱིས་བསྙེམས་ནས་གཅིག་གིས་གཅིག་ལ་མ་བྱོལ་ལོ། །ལྷ་མཚམས་མའི་བུ་ཁྲོས་ནས་གླང་པོ་ཆེ་ལ་ཞོན་བཞིན་དུ་བློ་ན་པོ་ཆེན་པོའི་བུ་ཤིང་རྟ་དང་བཅས་པ་ཟམ་པའི་འོག་ཏུ་བོར་རོ། །བློན་པོའི་བུ་དེ་ལུས་དང་རྐང་ལག་སྣད་ནས་དུས་ཏེ་ཕྱིར་ཁྱིམ་དུ་འོངས་ནས་ཕ་མ་ལ་འདི་སྐད་དུ་ལྷ་མཚམས་མའི་བུས་བདག་མ་ནོངས་པར་འདི་ལྟར་གནོད་པ་བགྱིས་ནས་ལུས་ཀུན་སྣད་དོ། །ཞེས་གསོལ་ཏོ། །བློན་པོ་ཆེན་པོ་དེ་ཤིན་ཏུ་མི་དགའ་བར་གྱུར་ནས་བུ། དེ་དག་ནི། ཤིན་ཏུ་ཡང་སྟོབས་ཆེ་བའི་སྟེང་དུ་རྒྱལ་པོ་དང་ཉེ་བས་རྩོད་པར་དཀའ་ན། འོན་ཀྱང་དེ་ལ་ནི། རྐུ་ལྟོ་ཞིག་བྱའོ་སྙམ་ནས་རིན་པོ་ཆེ་སྣ་བདུན་ལས་བྱས་པའི་འཁར་བ་སུམ་ཅུ་རྩ་གཉིས་ཤིག་བྱས་ཏེ།་འཁར་པའི་ནང་དུ་རལ་གྲི་སོ་རྣོན་པོ་རེ་རེ་བཅུག་ནས་ཁྱེའུ་སུམ་ཅུ་རྩ་གཉིས་པོ་དེ་ལ་རེ་རེ་བྱིན་ནས་འདི་སྐད་ཅེས་བསྒོའོ། །ཁྱེད་ནི། གཞོན་ཞིང་དར་ལ་བབ་པས་རྩེ་བའི་དུས་ལ་བབ་སྟེ།་ཁྱེད་ཀྱི་ཕྱིར་རྩེ་བའི་རྐྱེན་དུ་འཁར་བ་འདི་དག་བྱས་ཀྱི། ཁྱེད་རྣམས་ཐོགས་ལ་རྩེས་ཤིག་ཅེས་བསྒོའོ། །ཁྱེའུ་དེ་དག་ཀྱང་ཤིན་ཏུ་དགའ་ནས་འཁར་བ་དེ་དག་བླངས་ནས་རེ་རེ་ཐོགས་སོ། །རྒྱལ་པོའི་ཁྲིམས་ཀྱིས་རྒྱལ་པོ་དང་ཕྲད་པ་ན་མཚོན་ཐོགས་སུ་མི་གནང་ངོ ། །དེ་དག་འཁར་བ་ཐོགས་ཏེ་རྒྱལ་པོའི་ཞམ་འབྲིང་ནས་འཁོད་པ་ལས། བློན་པོ་དེས་
338b
> རྒྱལ་པོ་ལ་འདི་སྐད་དུ་ཕྲ་མ་གསོལ་ཏོ། །ལྷ་མཚམས་མའི་བུ་སུམ་ཅུ་རྩ་གཉིས་པོ་དེ་ནི། གཞོན་ཞིང་དར་ལ་བབ་སྟེ། སྟོབས་ཀྱིས་མི་གཅིག་གིས་ཀྱང་སྟོང་ཐུབ་པ་དེ་དག་ནི། རྒྱལ་པོ་ལ་གནོད་པ་ཞིག་བགྱི་བར་སེམས་སོ། །ཞེས་གསོལ་ཏོ། །འོན་ཀྱང་རྒྱལ་པོ་དེ་དག་ལ་ཐུགས་མ་ཆེས་པ་མེད་པ་ལས། བློན་པོས་ཡང་གསོལ་པ། བདག་གིས་སྔར་གསོལ་པ་འདི་བདེན་ཏེ། རྫུན་མ་ལགས་པས་རྟག་ཏུ་གདའོ། །ཁྱེའུ་འདི་དག་གི་ལག་ན་ཐོགས་པའི་འཁར་བའི་ནང་ན་རལ་གྲི་རེ་རེ་མཆིས་པས་གནོད་པ་བགྱིད་དུ་མངོན་ནོ། །བློན་པོས་གསོལ་པ་བཞིན་དུ་ཁྱེའུ་དེ་དག་གི་མཁར་བ་བལྟས་ན། མཚོན་ཡོད་པར་གྱུར་ནས་གཅིག་ནས་ཀྱང་གཅིག་པོས་ཏེ་གྱད་ཀྱིས་བཟུང་ནས་ཀུན་བསད་དོ། །ཁྱེའུ་དེ་དག་གི་མགོ་བཅད་དེ་ཁྱེའུའི་མགོ་སུམ་ཅུ་རྩ་གཉིས་སྒྲོམ་གཅིག་གི་ནང་དུ་བཅུག་ནས་ཁ་ལེགས་པར་བཅད་དེ་སྲིང་མོའི་སྟེང་དུ་བསྐུར་རོ། །དེའི་ཚེ་ན་ཁྱེའུ་དེ་དག་གི་མས་སངས་རྒྱས་དང་དགེ་འདུན་སྤྱན་དྲངས་ཏེ་རྒྱལ་པོས་སྒྲོ་མ་བསྐུར་ཏེ་འོངས་པ་ལ། འདིའི་ནང་ན་མཆོད་པ་བྱེད་པའི་མཐུད་མ་ཞིག་ཡོད་ཡང་དག་སྙམ་ནས་སྒྲོམ་ཁ་ཕྱེ་བ་ལས། བཅོམ་ལྡན་འདས་ཀྱིས་སྒྲོམ་རེ་ཞིག་ཁ་མ་ཕྱེ་བར་ཞལ་ཟས་གསོལ་ལགས་ནས་གཟོད་ཕྱེ་ཞིག་ཅེས་བཀའ་སྩལ་ཏོ། །དེ་ནས་ཞལ་ཟས་གསོལ་ནས་བཅོམ་ལྡན་འདས་ཀྱིས་ཁྱེའུའི་མ་ལ་ཆོས་བསྟན་པ། ལུས་འདི་ནི། མི་
339a
> ༄#། །རྟག་པ་སྟེ། སྡུག་བསྔལ་པ། སྟོང་པ། བདག་མེད་པ། སྙིང་པོ་མེད་པ། རིང་པོ་མི་ཐོགས་པ། ཀུན་ནས་ཉོན་མོངས་པས་ཅིངས་ཤིང་གླགས་པ་དང ། སྡུག་བསྔལ་གྱིས་གཟིར་པ་སྟེ། འདོད་པ་དང་བྱེ་བྲལ་བའི་མྱ་ངན་གྱིས་ལུས་འདི་ཆུད་ཟོས་ཀྱང་ཕན་པ་མེད་དེ། གང་མཁས་པ་ཤེས་རབ་ཅན་གྱིས་ནི། དོན་འདི་རྟོགས་པར་འགྱུར་རོ། །ཞེས་བཀའ་སྩལ་པ་དང ། ལྷ་མཚམས་མས་ཀྱང་དོན་རྟོགས་ནས་ལན་གཅིག་ཕྱིར་མི་ལྡོག་པའི་འབྲས་བུ་ཐོབ་པར་གྱུར་ཏེ། རབ་ཏུ་དགའ་དགུ་རངས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་བདག་ཅག་གིས་གསོལ་པ་འདི་བཞི་ཞིག་གནང་བར་མཛད་དུ་གསོལ། བདག་ཅག་གིས་གསོལ་པ་བཞི་ལ། གཅིག་ནི། དགེ་སློང་ནད་པ་རྣམས་ལ་ནད་ཀྱི་རྐྱེན་སྨན་དང ། བཟའ་བ་དང ། བཏུང་བ་ཡིད་བཞིན་དུ་སྩལ་པ་དང ། གཉིས་པ་ནི། དགེ་སློང་ནད་པའི་གཡོག་བགྱི་བའི་བཟའ་བ་དང ། བཏུང་བ་ཡིད་བཞིན་དུ་སྦྱར་བ་དང ། གསུམ་པ་ནི། དགེ་སློང་མགྲོན་པོའི་ཡི་བྱད་སྦྱར་བ་དང ། བཞི་པ་ནི། དགེ་སློང་མགྲོན་དུ་འགྲོ་བའི་རྒྱགས་དང ། ཡོ་བྱད་སྦྱར་བར་འཚལ་ལོ། །དེ་ཅིའི་ཕྱིར་ཞེ་ན། དགེ་སློང་ནད་པ་དག་ནི། ནད་ཀྱི་རྐྱེན་སྨན་དང ། བཟའ་བ་དང ། བཏུང་བ་མི་ལྡན་ན། ནད་འཚོ་
339b
> དཀའ་སྟེ། གལ་ཏེ་ན་ཚེའི་བར་ཆད་དུ་ཡང་འགྱུར་རོ། །དགེ་སློང་ནད་གཡོག་ཀྱང་ཁ་ཟས་མེད་པའི་རྐྱེན་གྱིས་བསོད་སྙོམས་བགྱིད་དོ། །བསོད་སྙོམས་ལ་དུས་མ་མཆིས་ཏེ། གལ་ཏེ་འཕྱིས་སམ། འདོད་པ་མ་རྙེད་ན། ནད་པ་ཞེ་སྡང་སྐྱེས་ཏེ་ནད་འཚོ་བར་དཀའ་བས། དེ་ལ་ཡང་ཁ་ཟས་དབུལ་བར་འཚལ་ལོ། །ཤུལ་རིང་པོ་ནས་མཆིས་པའི་དགེ་སློང་ཡུལ་མ་འདྲིས་ཏེ་བཤེས་མ་མཆིས་པས་བསོད་སྙོམས་བགྱིད་དོ། །བསོད་སྙོམས་བགྱིད་པ་ན་ཁྱིའམ་མ་རུངས་པས་གཙེས་ཏེ་ཞེ་སྡང་སྐྱེས་ན། བཟོད་པ་ཉམས་པར་འགྱུར་བས། དེ་ལ་ཡང་ཁ་ཟས་དབུལ་བར་འཚལ་ལོ། དགེ་སློང་མགྲོན་དུ་མཆི་བ་གྲོགས་དང་ལྡན་པ་ཡང་ལམ་རྒྱགས་མ་མཆིས་པས་གྲོགས་དང་བྲལ་བན། ཤུལ་དུ་གཅན་གཟན་མང་པོའམ། མི་རྒོད་མ་རུངས་པ་མཆིས་ཏེ།་གཅིག་པུ་སོང་ན་དེ་ཡང་ལུས་ཀྱི་བར་ཆད་དུ་འགྱུར་བས། དེས་དགོས་པ་ཡང་སྦྱར་པར་འཚལ་ལོ། །དེའི་ཚེ་བཅོམ་ལྡན་འདས་ཀྱིས་ལྷ་མཚམས་མས་གསོལ་བ་བཞི་པོ་གསན་ནས་ཤིན་ཏུ་ལེགས་སོ། །ཞེས་བསྔགས་ཏེ། ཁྱོད་ཀྱིས་གསོལ་བ་བཞི་པོ་འདིའི་བསོད་ནམས་རྒྱ་ཆེན་པོ་ནི། སངས་རྒྱས་ལ་མཆོད་པ་བྱས་པ་དང་ཐ་མི་དད་དོ། །ཞེས་བཀའ་སྩལ་ནས་དགེ་འདུན་དང་བཅས་ཏེ་སླར་རྒྱལ་བུ་རྒྱལ་བྱེད་ཀྱི་ཚལ་དུ་གཤེགས་སོ། །བཅོམ་ལྡན་འདས་སླར་གཤེགས་པའི་འོག་ཏུ་སྒྲོམ་ཕྱེ་བ་བལྟས་ན། བུའི་མགོ་སུམ་ཅུ་རྩ་གཉིས་ཡོད་པ་
340a
> ༄#། །མཐོང་ནས་འདོད་པ་དང་བྲལ་བའི་ཕྱིར་མི་དགའ་བས་གདུངས་པར་ནི། མ་གྱུར་གྱི། འདི་སྐད་དུ་ཀྱེ་མ་མི་གཅིག་སྐྱེས་པ་ལ་ཚེ་ཟད་པ་ཡོད་དེ། དེ་རིང་པོར་མ་ཐོགས་སོ། །ད་ཡང་རྒྱུད་ལྔ་གང་ན་སྡུག་བསྔལ་མྱོང་བར་གྱུར་ཅེས་སྨྲས་སོ། །ཁྱེའུ་སུམ་ཅུ་རྩ་གཉིས་ཀྱི་མའི་རིགས་སུ་ཉེ་བ་རྣམས་དེ་ལྟར་གྱུར་པ་ཐོས་ནས་ཤིན་ཏུ་མི་དགའ་སྟེ་ཞེ་སྡང་སྐྱེས་ནས་འདི་སྐད་དུ་རྒྱལ་པོ་ཆེན་པོ་ནི། འདི་ལྟར་མི་མཉེས་པ་ཀུན་བསད་ཀྱི། དམག་བསགས་ལ་དགྲ་བྱ་བར་འདོང་ངོ ། །ཞེས་སྨྲས་ནས་དམག་གི་དཔུང་བསགས་ཏེ་རྒྱལ་པོའི་ཕོ་བྲང་བསྐོར་ཏོ། །དེའི་ཚེ་ན་རྒྱལ་པོ་དེ་སྒྲག་ནས་སངས་རྒྱས་གང་ན་བ་དེར་བྲོས་སོ། །དེ་དག་གིས་དེ་སྐད་ཅེས་ཐོས་ནས་དམག་གི་དཔུང་གིས་རྒྱལ་བུ་རྒྱལ་བྱེད་ཀྱི་ཚལ་ཡང་བསྐོར་ཏོ། །དེའི་ཚེ་ཀུན་དགའ་བོས་རྒྱལ་པོ་རབ་གསལ་རྒྱལ་གྱིས་ལྷ་མཚམས་མའི་བུ་སུམ་ཅུ་རྩ་གཉིས་བསད་དེ་མའི་རིགས་སུ་གཏོགས་པ་རྣམས་ཀྱིས་ཤ་གཉེར་དུ་འོངས་སོ། །ཞེས་ཐོས་ནས་པུས་མོ་ས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་རྒྱུ་ཅིའི་རྐྱེན་གྱིས་མི་སུམ་ཅུ་རྩ་གཉིས་རྒྱལ་པོས་གཅིག་ཅར་དུ་བཀུམ་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལྷ་མཚམས་མའི་བུ་སུམ་ཅུ་རྩ་གཉིས་པོ་འདི་དང་འབའ་ཞིག་ཏུ་རྒྱལ་པོས་གཅིག་ཅར་དུ་བསད་
340b
> པར་མ་ཟད་དོ། །མི་སུམ་ཅུ་རྩ་གཉིས་པོ་ཅིའི་ཕྱིར་གཅིག་ཅར་ཚེ་འཕོས་པ་ཁྱོད་ལ་རྒྱས་པར་བསྟན་གྱི། ལེགས་པར་ཉོན་ལ་ཡིད་ལ་ཟུངས་ཤིག་ཅེས་བཀའ་སྩལ་ནས་ཀུན་དགའ་བོས་ཀྱང་དེ་བཞིན་དུ་བགྱིའོ། །ཐོས་པར་འཚལ་ལོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་མི་སུམ་ཅུ་རྩ་གཉིས་པོ་འདི་གཅིག་པ་གཅིག་དགའ་ཞིང་བཤེས་པ་དང ། །ཡིད་གཅུགས་པར་གྱུར་ནས་དེ་དག་གྲོས་མཐུན་པར་ཕ་རོལ་གཞན་གྱི་བ་ལང་ཞིག་བརྐུས་སོ། །དེའི་ཚེ་ཡུལ་དེ་ན་རྒན་མོ་དབུལ་མོ་བུ་ཚ་ཡང་མེད་པ་ཞིག་ཡོད་དོ། །བ་གླང་རྐུ་བའི་མི་རྣམས་རྒན་མོ་དེའི་ཁྱིམ་དུ་ཁྲིད་དེ་འོངས་ནས་གསད་པར་བྱས་པ་དང ། རྒན་མོ་ཡང་དགའ་རངས་ནས་ཤིང་ལ་སོགས་ཏེ་ཤ་འཚེད་པའི་ཡོ་བྱད་སྦྱར་ཏོ།། མི་དེ་དག་གིས་དེར་བ་ལང་གསོད་པ་ན་བ་ལང་དེ་ཡང་གསོད་པར་ཤེས་ནས་མདུད་པར་བཟུང་སྟེ་ཁྱེད་ཀྱིས་ང་ལྟ་ང་བསམ་པས་ན། མ་འོངས་པའི་དུས་སུ་ཡང་ཅི་སྟེ་འབྲས་བུ་ཐོབ་ན་ཡང་མི་གཏང་སྟེ། གསོད་པར་ཤོག་ཅིག་ཅེས་དམ་བཅས་མ་ཐག་ཏུ་བ་ལང་དེ་མི་རྣམས་ཀྱིས་བསད་ནས་ཁ་ཅིག་ནི། བཙོས། ཁ་ཅིག་ནི། བསྲེགས་ཏེ་ཟོས། རྒན་མོ་ཡང་བ་ལང་གི་ཤས་འགྲངས་ནས་རབ་ཏུ་དགའ་སྟེ་སྔོན་ཆད་ཀྱང་དེ་ལྟ་བུའི་མགྲོན་ཞིག་འོངས་ན། དེང་ལས་ཕན་ཐོགས་པ་ནི། མེད་དོ། །ཞེས་སྨྲས་སོ། །དེའི་ཚེ་དེའི་དུས་ན་བ་ལང་དེ་ནི། རྒྱལ་པོ་
341a
> ༄#། །རབ་གསལ་རྒྱལ་ཡིན་ནོ། །དེའི་དུས་ན་བ་ལང་རྐུ་བ་རྣམས་ནི། ལྷ་མཚམས་མའི་བུ་སུམ་ཅུ་རྩ་གཉིས་པོ་འདི་དག་ཡིན་ནོ། །དེའི་ཚེ་ན་རྒན་མོ་ཁྱིམ་བདག་མོ་དེ་ནི།་དེ་དག་གི་མ་ཡིན་ཏེ། རྣམ་པར་སྨིན་པའི་འབྲས་བུ་ཚེ་རབས་ལྔ་བརྒྱའི་བར་དུ་རྟག་ཏུ་བསད་པར་གྱུར་ཏེ། དེའི་དུས་ན་རྒན་མོ་དེ་རྗེས་སུ་ཡི་རང་ཞིང་དགའ་བ་ཙམ་གྱིས་རྟག་ཏེ་དེ་དག་གི་མ་བྱས་ནས་མྱ་ངན་གྱིས་རབ་ཏུ་གདུངས་པར་གྱུར་ཏེ། དེ་འདི་རང་དང་ཕྲད་ནས་འབྲས་བུ་ཐོབ་པར་གྱུར་ཏོ། །ཀུན་དགའ་བོས་ཡང་ཐལ་མོ་སྦྱར་ཏེ་བཅོམ་ལྡན་འདས་ལ་གསོལ་པ། དེ་དག་གིས་ནི། བསོད་ནམས་ཅི་ཞིག་བགྱིས་ན། རིགས་ཆེ་ཞིང་མཐོ་བ་དང ། ལོངས་སྤྱོད་དང་ལྡན་པ་དང ། དཔའ་ཞིང་ཉམས་རྩལ་དང་ལྡན་པར་གྱུར།་བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་པའི་ཚེ་རྒན་མོ་དཀོན་མཆོག་གསུམ་ལ་ཤིན་ཏུ་དད་བ་ཞིག་ཡོད་དེ།་སྤོས་མང་དུ་ཉོས་ནས་མར་དང་སྦྱར་ཏེ་རྟག་ཏུ་མཆོད་རྟེན་ལ་སྐུད་དོ། །ལམ་གཞིག་ན་མཆོད་རྟེན་ལ་སྐུད་པ་ལས། མི་སུམ་ཅུ་རྩ་གཉིས་ཤིག་དེར་ལྷགས་ནས་རྒན་མོ་མཆོད་རྟེན་ལ་སྐུད་པའི་གྲོགས་བྱས་ཏེ་རྒན་མོ་དེས་ཀྱང་མི་སུམ་ཅུ་རྩ་གཉིས་པོ་དེ་ལ་ཁྱོད་ཀྱིས་ཁོ་མོ་མཆོད་རྟེན་སྐུད་པ་ལ་བསྟངས་པའི་བསོད་ནམས་ཀྱིས་གང་ནས་གང་དུ་སྐྱེས་
341b
> ཀྱང་མངའ་བྱ་ད་ལེགས་པ་དང ། མཐུ་རྩལ་དང་ལྡན་པར་གྱུར་ཅིག་ཅེས་སྨྲས་ནས་དེ་དག་ཀྱང་རབ་ཏུ་དགའ་བཞིན་དུ་མཆོད་རྟེན་སྐུད་པའི་ལས་བྱས་ནས་འདི་སྐད་ཅེས་སྨྲས་སོ། །བདག་ཅག་ནི།་རྒན་མོ་འདིའི་དབང་གིས་བསོད་ནམས་ཀྱི་ལས་བསྐྱེད་པར་གྱུར་ཏོ། །གང་ནས་གང་དུ་སྐྱེས་ཀྱང་ཆོ་རིགས་མཐོ་ཞིང་བཙན་ཕྱུག་པ་དང ། ལོངས་སྤྱོད་དང་ལྡན་པ་དང ། རྒན་མོ་འདི་ཡང་རྟག་ཏུ་བདག་ཅག་གི་མར་གྱུར་ཏེ། བདག་ཅག་ཀྱང་འདིའི་བུར་གྱུར་པ་དང ། རྟག་ཏུ་སངས་རྒྱས་དང ། ཆོས་ཐོས་པ་དང་མ་འབྲེལ་ཏེ། འབྲས་བུ་ཡང་མྱུར་དུ་ཐོབ་པར་ཤོག་ཅིག་ཅེས་སྨོན་ལམ་བཏབ་བོ། །རྒན་མོས་ཀྱང་དེ་བཞིན་དུ་གྱུར་ཅིག་ཅེས་སྨྲས་པས། ཚེ་རབས་ལྔ་བརྒྱའི་བར་དུ་ཆོ་རིགས་མཐོ་ཞིང་བཙུན་པར་གྱུར་ཏོ། །དེའི་ཚེ་དེའི་དུས་ན་རྒན་མོ་དེ་ནི། ད་ལྟར་ཁྱེའུ་དེ་དག་གི་མ་ཡིན་ནོ། །དེའི་དུས་ན་མི་སུམ་ཅུ་རྩ་གཉིས་པ་ནི། ཁྱེའུ་སུམ་ཅུ་རྩ་གཉིས་པོ་ཡིན་ནོ། དེའི་ཚེ་དམག་གི་དཔུང་རྣམས་སངས་རྒྱས་ཀྱིས་གསུངས་པ་ཐོས་ནས་ཞེ་སྡང་གི་སེམས་ཞི་སྟེ་འདི་སྐད་དུ་རྒྱལ་པོ་ཆེན་པོས་ཀྱང་མ་ཉེས་ཏེ། མི་འདི་དག་གི་སྔོན་གྱི་འབྲས་བུ་རྣམ་པར་སྨིན་པ་སྟེ། བ་ལང་གཅིག་བསད་པ་ཙམ་གྱིས་འདི་ལྟ་བུར་གྱུར་ཏོ། །རྒྱལ་པོ་རབ་གསལ་རྒྱལ་འདི་ནི། བདག་ཅག་གི་ཇོ་བོ་ཡིན་ནོ། །ཅིའི་ཕྱིར་འདི་ལ་འཁུ་ཞིང་གནོད་པར་སེམས་ཞེས་སྨྲས་ནས་མཚོན་ཆ་བོར་ཏེ་རྒྱལ་པོ་ལ་བབས་
342a
> ༄#། །ནས་ཉེས་པ་བཤགས་པས་རྒྱལ་པོས་ཀྱང་གྱོད་མ་རྨས་པས་བཏང་ངོ ། །དེའི་ཚེ་བཅོམ་ལྡན་འདས་ཀྱིས་སྔོན་བྱུང་བ་འདི་དང ། གླེང་གཞི་འདིས་འཁོར་བཞི་པོ་ལ་དམ་པའི་ཆོས་རྒྱས་པར་བསྟན་ཏོ། །དགེ་བའི་ལས་ནི། བརྩོན་འགྲུས་སུ་བྱ་བའི་རིགས་པ་དང ། མི་དགེ་བའི་སྡིག་པའི་ཆོས་ནི། མི་བྱ་བའི་རིགས་པ་ཡང་བསྟན། འཕགས་པའི་བདེན་པ་བཞི་ཡང་རྒྱས་པར་བསྟན་པས་འཁོར་མང་པོ་རྣམས་ཀྱིས་ཐོས་ནས་ཐམས་ཅད་ཀྱིས་འབྲས་བུ་ཐོབ་པར་གྱུར་ཏོ། །བཅོམ་ལྡན་འདས་ཀྱིས་གསུངས་པ་ལ་ཡི་རང་ནས་མངོན་པར་དགའོ། །བློན་པོ་རི་དྭགས་ཀྱི་བུ་བདུན་གྱི་ལེའུ་སྟེ་ཉི་ཤུ་གསུམ་པའོ།། །།བམ་པོ་བདུན་པ། ཀ་པི་ན་ཆེན་པོའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཡུལ་དེའི་རྒྱལ་པོ་གསལ་རྒྱལ་ཞེས་བྱའོ། །དེའི་ལྷོ་ཕྱོགས་ན་ཡུལ་གསེར་གྱིས་ཞེས་བྱ་བ་ཞིག་ཡོད་དེ། རྒྱལ་པོ་ནི། ཀ་པི་ན་ཞེས་བྱའོ། །རྒྱལ་པོ་དེའི་སྲས་རྒྱལ་ཚབ་ནི། ཀ་པི་ན་ཆེན་པོ་ཞེས་བྱའོ། །རྒྱལ་པོ་ཡབ་ནོངས་ནས་སྲས་རྒྱལ་ཚབ་རྒྱལ་སར་གཤེགས་ཏེ། དེ་ཡང་རང་བཞིན་གྱིས་ཡིད་གཞུང་ལ་བློ་གསལ་ཏེ། དཔའ་ཞིང་མཐུ་རྩལ་ཆེན་པོ་དང་ལྡན་ནོ། །
342b
> དེ་ལ་དམག་གི་ཚོགས་སྟོང་ཕྲག་སུམ་ཅུ་རྩ་དྲུག་ཡོད་དེ། དམག་དེ་དག་གར་བབ་ཀྱང་རླུང་ཆེན་པོ་དང་འདྲ་བར་ཕས་རྒོལ་མི་ཐུབ་པ་མེད་དེ། ཡུལ་གྱི་དབུས་ཀྱི་རྒྱལ་པོ་དང་ནི་མ་འགྲུལ་ཏོ། །ཕྱིས་ཚོང་པ་དག་ཅིག་ཡུལ་གསེར་སར་ཕྱིན་ནས་རས་འཇམ་པོ་བཟང་པོ་ཡུག་བཞི་ཞིག་རྒྱལ་པོ་དེ་ལ་ཕུལ་ལོ། །རྒྱལ་པོས་ཀྱང་བཞེས་ནས་ཚོང་པ་དེ་ལ་འདི་ལྟ་བུ་ནོར་བཟང་པོ་ག་ལས་འོངས་ཞེས་དྲིས་པ་དང ། ཚོང་པས་ཀྱང་འདི་ཡུལ་དབུས་ནས་མཆིས་སོ། །ཞེས་གསོལ་ཏོ། །རྒྱལ་པོ་དེས་སྨྲས་པ། ཡུལ་གྱི་དབུས་ཞེས་བྱ་བ་ནི། གང ། ཡུལ་གྱི་དབུས་ཀྱི་མིང་ནི།་ཅི་ཞེས་བྱ། ཚོང་པས་གསོལ་པ། ཡུལ་གྱི་དབུས་ཀྱི་མིང་ནི། རྒྱལ་པོའི་ཁབ་ཅེས་ཀྱང་བྱ། མཉན་ཡོད་ཅེས་ཀྱང་བྱ་སྟེ། དེ་ལ་སོགས་པ་ཡུལ་གྱི་མིང་གཞན་ཡང་མང་དུ་མཆིས་སོ། །རྒྱལ་པོས་སྨྲས་པ། རྒྱལ་པོ་དེ་དག་ཅིའི་ཕྱིར་ང་ལ་ཕྱག་འཚལ་ཞིང་དཔྱ་འབུལ་དུ་མི་འོང ། ཚོང་པས་གསོལ་པ། རྒྱལ་པོ་དེ་དག་ཀྱང་སོ་སོའི་རྒྱལ་སྲིད་འཛིན་ཅིང་ཡུལ་གྱི་ཚིས་བགྱིད་པས། འདིར་མི་མཆིའོ། །རྒྱལ་པོ་དེས་བསམ་པ། ངའི་མཐུ་དང་བྱིན་གྱིས་ནི། གནམ་མཐའ་འོག་ཐམས་ཅད་ཀྱང་ཐུལ་ན། ཅིའི་ཕྱིར་རྒྱལ་པོ་འདི་དག་ང་ལ་ཕྱག་འཚལ་ཞིང་དཔྱ་འབུལ་དུ་མི་འོང ། ད་ནི། ངའི་མཐུ་དང་བྱིན་གྱིས་དེ་དག་ཀྱང་དབབ་བོ་སྙམ་ནས་ཚོང་པ་དེ་ལ་སྨྲས་པ། ཡུལ་དབུས་ཀྱི་རྒྱལ་པོའི་ནང་ན་རྒྱལ་པོ་གང་ཆེ། ཚོང་པས་སྨྲ་
343a
> ༄#། །པ།་མཉན་ཡོད་ཀྱི་རྒྱལ་པོ་ཆེའོ། །དེ་ནས་རྒྱལ་པོ་དེས་མཉན་ཡོད་དུ་ཕོ་ཉ་བཏང་སྟེ་རྒྱལ་པོ་གསལ་རྒྱལ་ལ་འདི་སྐད་ཅེས་སྤྲིང་ངོ ། །ངའི་མཐུ་དང་བྱིན་གྱིས་འཛམ་བུའི་གླིང་དུ་གཏོགས་པ་ཀུན་ལ་དབང་ན། ཁྱོད་ཅིའི་ཕྱིར་ཕོ་ཉ་ཡང་འདྲུལ་བར་མི་བྱེད། ད་ཡང་ཁྱོད་ཀྱི་སྟེང་དུ་ཕོ་ཉ་བཏང་བ་ཡིན་གྱི། ཁྱེད་ཉལ་བའི་ཚེ་ངའི་མིང་ཐོས་ན་འདུག་པའི་རིགས་སོ། །འདུག་པའི་ཚེ་ཐོས་ན་ལྡང་བའི་རིགས་སོ། །ཟས་ཟ་བའི་ཚེ་ཐོས་ན་མིད་མི་ཁོམ་པར་ཕྱིར་འདོར་བའི་རིགས་སོ། །ཁྲུས་བྱེད་པའི་འཕྲོ་ལ་ཐོས་ན་སྐྲ་ཡང་ཕྱིར་སྡུད་པའི་རིགས་སོ། །སྡོད་པའི་ཚེ་ཐོས་ན་རྒྱུག་པར་རིགས་ཀྱི། ད་སྟེ་ཞག་བདུན་ན་འདིར་ང་དང་ཕྲད་དུ་ཤོག་ཅིག་།དེ་ལྟར་མ་བྱས་ན་དམག་དྲངས་ཏེ་ཁྱོད་ཀྱི་ཡུལ་མེད་པར་བྱའོ། །ཞེས་སྤྲིང་ངོ ། །རྒྱལ་པོ་གསལ་རྒྱལ་གྱིས་དེ་སྐད་ཅེས་སྤྲིང་བ་ཐོས་ནས་མི་དགའ་ཞིང་སྡངས་ཏེ་བཅོམ་ལྡན་འདས་གང་ན་བར་སོང་ནས་དེ་བཞིན་དུ་རྒྱས་པར་གསོལ་ཏོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོས་ཀྱང་ཕྱིར་ཕོ་ཉ་དེ་ལ་རྒྱལ་པོའི་ནང་ན་ང་མི་ཆེ་སྟེ། ང་བས་ཀྱང་རྒྱལ་པོ་ཆེ་བ་ཞིག་ཡོད་དོ། །ཞེས་གྱིས་ཤིག་།གསལ་རྒྱལ་གྱིས་ཀྱང་བཅོམ་ལྡན་འདས་ཀྱི་བཀའ་བཞིན་དུ་འཇིག་རྟེན་ན་འཕྲུལ་གྱི་རྒྱལ་པོ་ཞིག་འདི་ནས་མི་རིང་བ་ཞིག་ན་བཞུགས་ཀྱི། ཁྱོད་ཉིད་དེར་སོང་ལ་ཁྱོད་ཀྱི་རྒྱལ་པོས་སྤྲིང་པ་བཞིན་
343b
> དུ་གྱིས་ཤིག་ཅེས་བསྒོས་ནས་ཕོ་ཉ་དེ་རྒྱལ་བུ་རྒྱལ་བྱེད་ཀྱི་ཚལ་དུ་སོང་ངོ ། །དེའི་ཚེ་ན་བཅོམ་ལྡན་འདས་འཁོར་ལོས་བསྒྱུར་བའི་རྒྱལ་པོར་སྤྲུལ་ཏེ་བློན་པོ་ཆེན་པོར་མཽ་གལ་སྤྲུལ་ནས་རིན་པོ་ཆེ་སྣ་བདུན་དང་ལྡན་པར་བཞུགས་སོ། །ཀུན་དགའི་ར་བ་ཡང་རིན་པོ་ཆེར་བསྒྱུར་ནས་ར་བའི་ཕྱི་རོལ་ན་རིན་པོ་ཆེའི་འོབས་རིམ་པ་བདུན་དང ། འོབས་ཀྱི་བར་ན་རིན་པོ་ཆེ་སྣ་བདུན་གྱི་ཤིང་དཀྲིགས་ཏེ། ཁ་དོག་རྣམ་པ་སྣ་ཚོགས་ཀྱི་པདྨ་གྲངས་མེད་ལྷམ་མེ་ལྷང་ངེ་ལྷན་ནེར་འཚེར་བ་དང ། ར་བའི་ནང་ན་རིན་པོ་ཆེ་སྣ་ཚོགས་ལས་བྱས་པའི་ཕོ་བྲང་ན་རྒྱལ་པོ་ཤིན་ཏུ་བྱིན་ཆེ་བར་བཞུགས་པར་སྤྲུལ་ཏོ། །ཕོ་ཉ་དེ་སྤྲུལ་པའི་ཕོ་བྲང་དུ་འོངས་ནས་རྒྱལ་པོ་ཆེན་པོ་མཐོང་བ་ཙམ་གྱིས་འཇིགས་སྐྲག་པར་གྱུར་ཏེ་འདི་སྐད་དུ་བདག་གི་རྒྱལ་པོའི་བྱིན་དང་བསོད་ནམས་ཀྱིས་ནི། འདི་ལ་མི་ཐུབ་ན། འོན་ཀྱང་སྤྲིང་པའི་ཡི་གེ་དབུལ་ལོ་སྙམ་ནས་ཡི་གེ་ཕུལ་ལོ། །འཕྲུལ་གྱི་རྒྱལ་པོས་ཡི་གེ་བླངས་ནས་རྡོག་པའི་འོག་ཏུ་བཅུག་སྟེ་ཕོ་ཉ་ལ་འདི་སྐད་ཅེས་བཀའ་སྩལ་ཏོ། །ང་ནི། རྒྱལ་པོ་ཆེན་པོ་སྟེ། གླིང་བཞི་ལ་དབང་བ་ཡིན་ན། ཁྱོད་ཀྱི་རྒྱལ་པོ་གླེན་པ་དེ་ཅིའི་ཕྱིར་བཀའ་མི་ཉན། ཁྱོད་མྱུར་དུ་ཕྱིར་སོང་ལ་ངས་འདི་སྐད་ཅེས་བཀའ་སྩལ་ཏོ། །ཞེས་གྱིས་ཤིག་།ཁྱོད་ཀྱི་ཕོ་ཉ་ཕྱིར་འོངས་ནས་ངའི་བཀའ་ཐོས་པ་ཙམ་གྱིས་གལ་ཏེ་ཉལ་བ་ལས་ཐོས་ན་ལྡང་བའི་རིགས། འདུག་པ་ལས་ཐོས་ན་འགྲེང་
344a
> ༄#། །བའི་རིགས། འགྲོ་བ་ལས་ཐོས་ན་རྒྱུག་པའི་རིགས་ཀྱི། ད་སྟེ་ཞག་བདུན་ན་འདིར་ཕྱག་འཚལ་དུ་མ་འོངས་ཏེ་བཀའ་བཅག་པར་གྱུར་ན། ཁྲིམས་དང་སྦྱར་རོ། །ཞེས་གྱིས་ཤིག་།ཕོ་ཉ་དེས་བཀའ་སྩལ་པ་བཞིན་དུ་ཕྱིར་སོང་ནས་བདག་གི་ཡུལ་དུ་ཕྱིན་པ་དང ། གསེར་སའི་རྒྱལ་པོ་ལ་ཅི་མཐོང་བ་དང ། ཅི་སྤྲིང་པར་རྒྱས་པར་གསོལ་ཏོ། །རྒྱལ་པོས་དེ་སྐད་ཅེས་སྤྲིང་པ་ཐོས་ནས་འགྱོད་པར་གྱུར་ཏེ། ཅི་དབང་བའི་རྒྱལ་ཕྲན་རྣམས་དང་ཆས་ཏེ་རྒྱལ་པོའི་ཐད་དུ་འདོང་ངོ་སྙམ་སྟེ་འོན་ཀྱང་ཐལ་བྱུང་དུ་འགྲོ་བར་མི་རིགས་ཀྱི། ད་དུང་ཡང་ལན་གཅིག་བགམ་མོ་སྙམ་ནས་སྔར་ཕོ་ཉ་གཅིག་བཏང་སྟེ། རྒྱལ་པོ་ཆེན་པོ་ལ་བདག་ཕྱག་འཚལ་དུ་མཆི་ན། བདག་དབང་བའི་རྒྱལ་ཕྲན་ཁྲི་ཕྲག་སུམ་ཅུ་རྩ་དྲུག་མཆིས་ན། དེ་དག་དང་རིལ་གྱིས་མཆིའམ། ཕྱེད་དང་མཆི་བ་བཀའ་སྩོལ་ཅིག་ཅེས་མཆིའོ། །རྒྱལ་པོ་ཆེན་པོས་ཀྱང་ཕྱིར་དེ་ལ་རྒྱལ་ཕྲན་ཕྱེད་དང་ཆས་ཏེ་ཤོག་ཅེས་བསྒོ་བ་དང ། གསེར་སའི་རྒྱལ་པོ་རྒྱལ་ཕྲན་ཁྲི་བརྒྱད་སྟོང་དང་བཅས་ཏེ་མཉན་ཡོད་དུ་རྒྱལ་པོ་སྤྲུལ་པའི་སྤྱན་སྔར་ལྷགས་ནས་ཕྱག་འཚལ་ཏེ་འདི་སྙམ་བསམས་སོ། །རྒྱལ་པོ་ཆེན་པོ་འདིའི་བྱད་གཟུགས་ནི། བདག་པས་ལྷག་ཀྱང་མཐུ་སྟོབས་ནི། བདག་ཙམ་མི་ཕོད་དོ་སྙམ་བསམས་པ་དང ། འཕྲུལ་གྱི་རྒྱལ་པོས་བློན་པོ་རིན་པོ་ཆེ་ལ་ཁྱོད་ཀྱིས་གཞུག་སེར་
344b
> སའི་རྒྱལ་པོ་ལ་བྱིན་ཅིག་ཅེས་བཀའ་སྩལ་ཏོ། །རྒྱལ་པོ་དེས་ཀྱང་བླང་ཞེས་བྱས་ན་མ་ཐེག་གོ་།དེ་ནས་འཕྲུལ་གྱི་རྒྱལ་པོས་བླངས་ཏེ་མཐེའུ་ཆུང་གིས་གཞུ་བརྡུངས་ཏེ་གསེར་སའི་རྒྱལ་པོ་ལ་གཞུ་འདི་ཁོང་ཞིག་ཅེས་བཀའ་སྩལ་ནས་གསེར་སའི་རྒྱལ་པོས་བླངས་ན། གཞུ་རྒྱུད་ཀྱང་མ་བསྐུལ་ཏོ། །དེ་ནས་འཕྲུལ་གྱི་རྒྱལ་པོས་བླངས་ཏེ་དྲངས་ན། གཞུ་རྒྱུད་སྦྲེངས་པ་ཙམ་གྱིས་སྟོང་ཆེན་པོའི་འཇིག་རྟེན་གྱི་ཁམས་ཀྱང་འགུལ་ཞིང་གཡོས་སོ། །དེ་ནས་མདའ་བླངས་ཏེ་མདའ་གཅིག་འཕངས་ན། འཕངས་མ་ཐག་ཏུ་མདའ་ལྔར་གྱུར་ཏེ། མདའ་དེ་དག་གི་རྩེ་མོ་ལས་འོད་ཟེར་གྲངས་མེད་པ་བྱུང་ནས་པདྨ་ཤིང་རྟའི་འཕང་ལོ་ཙམ་རེ་རེ་ཡང་ཡོད་པར་གྱུར་ཏེ། པདྨ་རེ་རེ་ལ་ཡང་འཁོར་ལོས་བསྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་རེ་རེ་ཡོད་པར་གྱུར་ཏོ། །འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་སྣང་བར་བྱས་ནས་ལམ་རྒྱུད་ལྔའི་སེམས་ཅན་ཐམས་ཅད་ལ་ཕན་པའི་དོན་དུ་མ་གྱུར་པ་མེད་དོ། །ལྷ་རྣམས་ཀྱི་གནས་སུ་འོད་ཟེར་དེ་མཐོང་སྟེ་ཆོས་སྟོན་པའི་གསུང་ཡང་གྲགས་པར་གྱུར་ནས་དེ་དག་གི་ལུས་དང་སེམས་ཡོངས་སུ་དག་སྟེ། ཁ་ཅིག་ནི།་རྒྱུན་དུ་ཞུགས་པ་ནས་དགྲ་བཅོམ་པའི་བར་དུ་ཐོབ་པར་གྱུར་ཏོ། །ཁ་ཅིག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། ཁ་ཅིག་ནི། ཕྱིར་མི་ལྡོག་
345a
> ༄#། །པའི་ས་ལ་གནས་པར་གྱུར་ཏོ། །མིའི་རྒྱུད་དུ་གཏོགས་པའི་སེམས་ཅན་སངས་རྒྱས་ཀྱི་འོད་ཟེར་མཐོང་ཞིང་ཆོས་བསྟན་པ་ཐོས་པ་རྣམས་རབ་ཏུ་དགའ་མགུ་རངས་ཏེ། ཁ་ཅིག་ནི། རྒྱུན་དུ་ཞུགས་པ་ནས་ལན་གཅིག་ཕྱིར་ལྡོག་པ་དང ། རབ་ཏུ་བྱུང་ཞིང་དགྲ་བཅོམ་པའི་བར་དུ་ཐོབ་པར་གྱུར་ཏོ། །སེམས་ཅན་གྲངས་མེད་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཕྱིར་མི་ལྡོག་པའི་ས་ལ་གནས་པར་གྱུར་ཏོ། །ཡི་དྭགས་ཀྱི་རྒྱུད་དུ་གཏོགས་པ་དག་ནི། སངས་རྒྱས་ཀྱི་འོད་ཟེར་གྱིས་རེག་ཅིང་ཆོས་ཐོས་པས་ཐམས་ཅད་ཁ་ཟས་ཀྱིས་འགྲངས་བར་གྱུར་ཏེ། ལུས་དང་སེམས་ལ་གདུང་བ་མེད་ཅིང་སིམ་པར་གྱུར་ནས་ཐམས་ཅད་སྙིང་རྗེའི་སེམས་སྐྱེས་ཏེ། སངས་རྒྱས་ལ་བསྙེན་བཀུར་བྱས་པས་ཡི་དྭགས་ལས་རྣམ་པར་གྲོལ་ནས་ལྷ་དང་མིར་སྐྱེས་སོ། །དུད་འགྲོའི་སྐྱེ་གནས་སུ་གཏོགས་པའི་སེམས་ཅན་རྣམས་ནི། སངས་རྒྱས་ཀྱི་འོད་ཟེར་མཐོང་བས་འདོད་ཆགས་དང་ཞེ་སྡང་གི་སེམས་ཞི་སྟེ་གཏི་མུག་གིས་ལྡོངས་པ་ཡང་སད་པར་གྱུར་ནས་ཐམས་ཅད་སངས་རྒྱས་ལ་དགའ་ཞིང་དད་པས་དུད་འགྲོ་ལས་རྣམ་པར་གྲོལ་ཏེ་ལྷ་དང་མིར་སྐྱེས་སོ། །སེམས་ཅན་དམྱལ་བའི་སེམས་ཅན་ལ་སངས་རྒྱས་ཀྱི་འོད་ཟེར་གྱིས་རེག་པས་གྲང་བ་ནི། དྲོ་བར་གྱུར། ཚ་བ་ནི། གྲང་བར་གྱུར། སྡུག་བསྔལ་
345b
> གྱིས་གདུངས་པ་ཡང་རྒྱུན་ཆད་པར་གྱུར་ཏེ། ལུས་དང་སེམས་རབ་ཏུ་དགའ་བས་སངས་རྒྱས་ལ་དད་པར་གྱུར་ཏེ་སེམས་ཅན་དམྱལ་བ་ལས་ཐར་ནས་ལྷ་དང་མིར་སྐྱེས་སོ། །དེའི་ཚེ་ན་རྒྱལ་པོ་ཀ་པི་ན་ཆེན་པོ་དང ། གསེར་སའི་རྒྱལ་ཕྲན་རྣམས་ཀྱིས་རྫུ་འཕྲུལ་འདི་ལྟ་བུ་དག་མཐོང་བས། ཤིན་ཏུ་དད་པའི་སེམས་ཀྱིས་བབས་ཤིང་དད་པས་རྡུལ་དང་བྲལ། དྲི་མ་དང་བྲལ་ཏེ་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ཏོ། །རྒྱལ་ཕྲན་ཁྲི་བརྒྱད་སྟོང་རྣམས་ཀྱང་སེམས་ཚིམ་པར་གྱུར་ཏོ། །དེ་མ་ཐག་ཏུ་སངས་རྒྱས་ཀྱི་རྫུ་འཕྲུལ་བསྡུས་ཏེ་ཕྱིར་ཡང་སངས་རྒྱས་ཀྱི་སྐུར་དགེ་སློང་གི་དགེ་འདུན་གྱིས་མདུན་དང་རྒྱབ་ཏུ་བསྐོར་ཏེ་བཞུགས་པར་བསྟན་ཏོ། །དེ་ནས་གསེར་སའི་རྒྱལ་པོ་དེ་ཡང་བཅོམ་ལྡན་འདས་ལ་རབ་ཏུ་འབྱུང་བར་གསོལ་པ་དང ། བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་པས། སྐྲ་དང་ཁ་སྤུ་རང་བྱི་སྟེ་ངུར་སྨྲིག་གྱོན་པའི་དགེ་སློང་དུ་གྱུར་ནས་ཆོས་ཡིད་ལ་བྱས་པས་ཟག་བཟད་དེ་དགྲ་བཅོམ་པར་གྱུར་ཏོ། །དེ་ནས་ཀུན་དགའ་བོས་བཅོམ་ལྡན་འདས་ལ་གསོལ་པ། གསེར་སའི་རྒྱལ་པོ་འདིས་སྔོན་བསོད་ནམས་ཅི་ཞིག་བགྱིས་ན། འདི་ལྟར་རིགས་ཆེ་ཞིང་མཐོ་ལ་ཡོན་ཏན་འཕགས་པར་ཆེ་ཞིང་སངས་རྒྱས་བཅོམ་ལྡན་འདས་དང་ཕྲད་ནས་དེ་མ་ཐག་ཏུ་ཟག་པ་ཟད་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་
346a
> ༄#། །པ།་སེམས་ཅན་དག་ནི། སྤྱོད་པ་བཞིན་དུ་ལས་ཀྱི་འབྲས་བུ་རྣམ་པར་སྨིན་པར་འགྱུར་རོ། །སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་ཏེ། སངས་རྒྱས་དེ་མྱ་ངན་ལས་འདས་ནས་ཁྱིམ་བདག་ཅིག་གིས་མཆོད་རྟེན་བརྩིགས་ཏེ་དགེ་འདུན་གྱི་གནས་ཁང་བྱས་ནས་འཚོ་བའི་ཡོ་བྱད་རྣམས་པ་བཞི་ཡང་སྦྱར་ཏེ་ཡུན་རིང་པོ་ཞིག་ལོན་པ་དང ། མཆོད་རྟེན་དེ་ཡང་ཞིག་།འཆོ་བའི་ཡོ་བྱད་ཁྲི་སྟན་དང ། གོས་དང ། ཁ་ཟས་ཀྱང་རྒྱུན་ཆད་པར་གྱུར་ཏོ། །དེ་ནས་ཁྱིམ་བདག་དེ་ལ་བུ་དགེ་སློང་ཞིག་ཡོད་པ་དེས་མི་མང་པོ་ལ་ཆོས་བཤད་དེ། ཕྱིར་ཡང་མཆོད་རྟེན་གསོས་ནས་གོས་དང ། མལ་ཆ་དང ། བཟའ་བ་དང ། བཏུང་བ་དང ། ཁྲི་སྟན་ལ་སོགས་པ་འཚོ་བའི་ཡོ་བྱད་སྦྱར་ཏོ། །མི་དེ་དག་ཀྱང་སེམས་ཡིད་མཐུན་པར་འཚོ་བའི་ཡོ་བྱད་སྦྱར་ཏེ་འདི་སྐད་དུ་སྨོན་ལམ་བཏབ་བོ། །བདག་ཅག་ཀྱང་མ་འོངས་པའི་དུས་སུ་བཙན་ཞིང་ཕྱུག་པ་དང ། ཚེ་རིང་བ་དང ། །སངས་རྒྱས་འཇིག་རྟེན་དུ་གཤེགས་པ་དང་ཕྲད་དེ་ཆོས་ཐོས་ནས་འབྲས་བུ་ཡང་མ་ལུས་པར་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །ཀུན་དགའ་བོ། དེའི་ཚེ་དེའི་དུས་ན་ཁྱིམ་བདག་གི་བུ་དགེ་སློང་དེ་ནི། ཡུལ་གསེར་སའི་རྒྱལ་པོ་ཀ་བི་ན་ཆེན་པོ་ཡིན་ནོ། །དེས་ཆོས་བསྟན་ཏེ་མཆོད་རྟེན་གསོས་པ་དང ། འཚོ་བའི་ཡོ་བྱད་བསྟབས་
346b
> པ་ནི།་རྒྱལ་ཕྲན་ཁྲི་བརྒྱད་སྟོང་སྙེད་པོ་འདི་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཁོར་མང་པོ་རྣམས་ཕྱིར་མི་ལྡོག་པའི་སེམས་བསྐྱེད་དེ་ཡི་རང་ནས་མངོན་པར་དགའོ། །ཀ་པི་ན་ཆེན་པོའི་ལེའུ་སྟེ་ཉི་ཤུ་བཞི་པའོ།། །།དགེ་སློང་མ་ཨུཏྤ་ལའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རྒྱལ་པོ་གསལ་རྒྱལ་ནི། ནོངས། རྒྱལ་ཚབ་བཻ་ཌཱུརྱ་རྒྱལ་སར་གཤེགས་ཏེ་རྒྱལ་པོའི་ནང་ན་ཆོས་བཞིན་དུ་རྒྱལ་པོ་བྱེད་པ་མ་ཡིན་པས། གླང་པོ་ཆེའི་རྨིག་པས་མི་བརྫིས་ཏེ་བསད་པ་ཡང་གྲངས་མེད་དོ། །དེའི་ཚེ་ན་རིགས་ཆེ་ཞིང་བཙུན་པའི་བུད་མེད་དག་ཅིག་དེ་ལྟ་བུ་དག་མཐོང་ནས་ཁྱིམ་ལ་མི་དགའ་བར་གྱུར་ཏེ་ཐམས་ཅད་རབ་ཏུ་བྱུང་ནས་དགེ་སློང་མར་གྱུར་ཏོ། །རབ་ཏུ་བྱུང་བ་དེ་དག་ལ་ལ་ནི། ཤཱཀྱའི་རིགས། ལ་ལ་ནི། རྒྱལ་རིགས་ཡིན་ཏེ།་དཔེ་མེད་པར་མངའ་བྱད་ལེགས་པ། བལྟ་ན་སྡུག་པ། རིགས་ཆེ་བ་ལྔ་བརྒྱ་སྙེད་འདོད་པ་ཡོངས་སུ་སྤངས་ཏེ་རབ་ཏུ་བྱུང་བས་ཡུལ་མི་ཐམས་ཅད་ཀྱང་དེ་ལ་དགའ་སྟེ་འཚོ་བ་སྦྱར་ཏོ། །དགེ་སློང་མ་དེ་དག་གཅིག་ལ་གཅིག་འདི་སྐད་དུ། བདག་ཅག་ནི། རབ་ཏུ་བྱུང་ཡང་ཆོས་ཀྱི་བདུད་རྩིའི་རོ་མ་མྱོང་སྟེ། འདོད་ཆགས་དང ། ཞེ་སྡང་དང ། གཏི་མུག་ཞི་
347a
> ༄#། །བར་མ་བྱས་ན་མི་རུང་གི་།དྲུག་སྡེ་མ་བསྙེན་དགའ་མོའི་ཐད་དུ་ཆོས་ཉན་དུ་འདོང་ངོ ། །ཞེས་སྨྲས་ནས་དེ་གང་ན་བར་སོང་སྟེ་ཕྱིན་པ་དང་ཕྱག་འཚལ་ནས་འདི་སྐད་དུ་བདག་ཅག་ནི། རབ་ཏུ་བྱུང་ཡང་ཆོས་ཀྱི་བདུད་རྩིའི་རོ་མ་མྱོང་ན། བདག་ཅག་ལ་དམ་པའི་ཆོས་བསྟན་དུ་གསོལ་ཞེས་སྨྲས་པ་དང ། དྲུག་སྡེ་མས་བསམ་པ། བདག་གིས་འདི་དག་ཆོས་དང ། ཚུལ་ཁྲིམས་ལས་ཕྱིར་བཟློག་སྟེ་འདི་དག་གི་ཆོས་གོས་དང ། ལྷུང་བཟེད་ཐོབ་པར་གྱུར་ན་རེ་ལེགས་སྙམ་ནས་འདི་སྐད་ཅེས་སྨྲས་སོ། །ཁྱེད་རྣམས་ནི། རིགས་ཆེ་ཞིང་མཐོ་བ་སྟེ། རིན་པོ་ཆེ་སྣ་བདུན་དང ། གླང་པོ་ཆེ་དང ། རྟ་དང ། བྲན་ཕོ་དང ། བྲན་མོ་དང ། ལས་བྱེད་པའི་མི་དང ། ཞིང་དང ། འཚོ་བའི་ཡོ་བྱད་ཀྱིས་མི་བྲེལ་ན། ཅིའི་ཕྱིར་དེ་དག་ཡོངས་སུ་སྤངས་ཏེ་དགེ་སློང་མར་བཞུགས་ནས་འདི་ལྟར་ཉོན་མོངས་ཤིང་སྡུག་བསྔལ་དང་བསྔོས་ཏེ་སངས་རྒྱས་ཀྱི་བསླབ་པ་ལ་འཇུག་པར་བྱེད། ཉིས་ན་ཕྱིར་ཁྱིམ་དུ་སོང་སྟེ་ཁྱིམ་ཐབ་དང ། བུ་དང ། བུ་མོར་ལྡན་པར་ལྷན་ཅིག་ཏུ་ཡིད་བཞིན་དུ་རྩེ་དགའ་ཞིང་ཚེ་འདི་ལ་ཡང་སྐྱིད་པ་མྱོང་བར་བྱས་ལ། སྦྱིན་པ་ཡང་ཡིད་བཞིན་དུ་བྱས་ན་ལེགས་སོ། །ཞེས་བསྒོའོ། །དགེ་སློང་མ་རྣམས་དེ་སྐད་ཅེས་སྨྲས་པ་ཐོས་ནས་མི་དགའ་སྟེ་དུས་ནས་ཕྱིར་དོང་ངོ ། །དེ་ནས་
347b
> དགེ་སློང་མ་དེ་དག་དགེ་སློང་མ་ཨུཏྤ་ལའི་མདོག་གང་ན་འདུག་པར་སོང་ནས་དེར་ཕྱིན་པ་དང་ཨུཏྤ་ལའི་མདོག་ལ་ཕྱག་འཚལ་ཏེ་ཆོས་བཞིན་དུ་སྙུན་གསོལ་ནས་འདི་སྐད་ཅེས་སྨྲས་སོ། །བདག་ཅག་ཁྱིམ་ན་མཆིས་པ་ན་ཁྱིམ་གྱི་ལས་ཀྱིས་བསླུས། ད་རབ་ཏུ་བྱུང་ན་ཡང་འདོད་པའི་དབང་དུ་གྱུར་ནས་ཉོན་མོངས་པ་ལས་ཐར་པར་མི་ནུས་ན། བདག་ཅག་ལ་ཐུགས་བརྩེ་བའི་སླད་དུ་དམ་པའི་ཆོས་བསྟན་དུ་གསོལ། ཨུཏྤ་ལས་སྨྲས་པ། ཁྱོད་ཅི་དང་ཅི་འདོད་པ་འདས་པའམ། མ་འོངས་པའམ། ད་ལྟར་གྱི་དངོས་པོ་གང་ཡང་རུང་བ་དྲིས་ཤིག་དང་ངས་བསྟན་པར་བྱའོ། །དགེ་སློང་མ་རྣམས་ཀྱིས་འདས་པ་དང ། མ་འོངས་པ་རེ་ཞིག་ཞོག་ལ་ད་ལྟར་གྱི་བསྟན་ཏེ་བདག་ཅག་གི་ཐེ་ཚོམ་དགྲོལ་དུ་གསོལ། ཨུཏྤ་ལས་སྨྲས་པ། འདོད་ཆགས་ནི། མེ་དང་འདྲ་སྟེ། རི་ལུང་ཚིག་པར་བྱེད་དོ། རྩ་འཁྲི་དང་འདྲ་སྟེ། མཆེད་པར་འགྱུར་རོ། །འདོད་ཆགས་ཀྱི་དབང་གིས་གཅིག་ལ་གཅིག་འཚེ་ཞིང་གནོད་པར་བྱེད་དོ། །དེ་ལ་ཡུན་རིང་ན་ངན་སོང་གསུམ་དུ་ལྷུང་སྟེ་ཐར་པའི་དུས་མེད་དོ། །ཁྱིམ་ན་གནས་པ་ནི། སྡུག་པ་ལ་ཆགས་ཏེ་འདོད་པ་དང ། བྱེ་བྲལ་བ་དང ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། རྒྱལ་པོའི་ཁྲིམས་ཀྱིས་གཙེ་བའི་སྡུག་བསྔལ་རྒྱུན་མི་ཆད་པར་མྱོང་སྟེ། ཚེ་འཕོས་ནས་ཕྱིར་ཡང་སོས་
348a
> ༄#། །པ་ཙམ་དུ་ལུས་དང་སེམས་གདུངས་ཏེ་ཁྱིམ་གྱིས་གླགས་ཤིང་བཅིངས་པ་ནི། བཙོན་རབས་ཀྱང་དམ་མོ། །བདག་ཀྱང་ཀུན་ཏུ་རྒྱུ་བའི་རིགས་སུ་སྐྱེས་ཏེ། ཁོ་མོའི་ཕ་མ་ཡང་རིགས་ཆེ་ཞིང་བཙུན་པས་ཁོ་མོ་ཡང་ཀུན་ཏུ་རྒྱུ་རིགས་ཆེ་བ། མང་དུ་ཐོས་པ། རིག་བྱེད་དང་ལྡན་པ་ཞིག་ལ་བག་མར་བཏང་ནས་དེའི་ཆུང་མ་བྱེད་དེ།་དེའི་བུ་ཡང་ཡོད་པར་གྱུར་ཏོ། །ཕྱིས་གྱོས་རྒྱུག་ཚེ་འཕོས་པའི་འོག་ཏུ་ཁོ་མོ་ལ་སེམས་ཅན་ཡོད་པར་གྱུར་ནས་ཁྱིམ་ཐབ་ལ་འདི་སྐད་ཅེས་བྱས་སོ། །ཁོ་མོ་ལ་སེམས་ཅན་ཡོད་དེ།་ཟླ་བ་ཡང་ཚད་དུ་ཉེ་བས་གལ་ཏེ་འདིར་བུ་བཙས་ན། བཙོག་ཅིང་མི་བཏུབ་ཀྱི། ཁོ་མོའི་ཕ་མའི་ཁྱིམ་དུ་བཙར་འགྲོའོ། །ཞེས་བྱས་ན། ཁོ་མོ་ལ་ལེགས་སོ། །ཞེས་ཟེར་ཏེ།་ཁྱོ་ཤུག་གཉིས་འགྲོགས་ནས་བུ་ཞིག་ཀྱང་ཁྲིད་དེ་ཕ་མ་འདོད་པར་སོང་བ་ལས། ལམ་ཕྱེད་ཙམ་དུ་ཕྱིན་པ་དང་མངལ་མི་བདེ་བར་གྱུར་ནས་ཤིང་ཞིག་གི་དྲུང་དུ་ནམ་ཕྱེད་ཙམ་ན་བུ་བཙས་སོ། ཁོ་མོའི་ཁྱིམ་ཐབ་ཀྱང་ལོགས་ཤིག་ན་ཉལ་བ་ལས་མཚན་མོ་སྦྲུལ་གྱིས་ཟིན་ཏོ། །མཚན་མོ་བོས་ན་ཅང་མི་གྲག་ནས་ནམ་ལངས་ཏེ་བལྟས་ན། ཁྱིམ་ཐབ་ཀྱང་སྦྲུལ་གདུག་པས་ཟིན་པས་ཚེ་འཕོས་ཏེ་ལུས་ཀྱང་ཞིག་པར་གྱུར་ཏོ། །དེའི་ཚེ་ན་ཁོ་མོ་འཁམས་ཏེ་ས་ལ་འགྱེལ་བ་དང ། བུ་ཆེ་བ་ཡང་ཕ་སྦྲུལ་གྱིས་བསད་པ་མཐོང་
348b
> ནས་སྐད་ཕྱུང་སྟེ་དུས་པས། བུ་དུས་པའི་སྐད་གྱིས་ཁོ་མོ་ཡང་ཕྱིར་སངས་ནས་བུ་ཆེ་བ་ནི། ཁུར་དུ་ཐོགས། བུ་ཆུད་བ་ནི། ཕང་བར་ཁྱེར་ཏེ་དུ་ཞིང་སོང་སོང་བ་ལས་ལམ་ཡང་དབེན་པ་ཞིག་སྟེ། མི་འགའ་མང་མི་འདྲུལ་པས་གྲོགས་ཀྱང་མ་རྙེད་དོ། །བར་ན་ཆུ་ཆེན་པོ་ཞིག་ཡོད་དེ། ཆུའི་ཁ་ཚོ་ན་ཡང་ཆེ་ལ་ཟབ་པས་བུ་གཉི་ག་མ་ཐེག་ནས་བུ་ཆེ་བ་ནི། ཆུའི་ཆུ་རོལ་དུ་བཞག་།བུ་ཆུང་དུ་ཁྱེར་ཏེ་ཕ་རོལ་ཏུ་བསྐྱལ་ནས་ཕྱིར་ཆེ་བ་བསུར་འོངས་པ་དང ། བུ་ཡང་མ་འོང་བ་མཐོང་ནས་ཆུའི་ནང་དུ་ཞུགས་ཏེ་ཆུས་ཁྱེར་བ་ལས་ཁོ་མོས་བསྙགས་ན། སྟོབས་ཆུང་བསམ་ཟིན་ཏེ་ཆུས་ཁྱེར་རོ། །དེ་ནས་ཕྱིར་ཕ་རོལ་ཏུ་ཕྱིན་ཙམ་ན་བུ་ཆུང་དུ་ཡང་སྤྱང་ཀིས་ཟོས་ཏེ་ཁྲག་ཅུང་ཟད་ཙམ་ས་ལ་སྣང་ངོ ། །དེར་ཡང་འཁམས་ནས་རིང་ཞིག་ལོན་ཏེ་ཕྱིར་སངས་པ་དང་ལམ་དུ་ཞུགས་ཏེ་སོང་སོང་བ་ལས། ཀུན་ཏུ་རྒྱུ་ཁོ་མོའི་ཕ་མ་དང་ཉེ་ཞིང་བཤེས་པ་ཞིག་དང་ཕྲད་ནས་ཀུན་ཏུ་རྒྱུ་དེས་ཁྱོད་ཅི་ཉེས་ན་འདི་ལྟར་ཉོན་མོངས་པར་གྱུར་ཅེས་དྲིས་ན།་ཁོ་མོས་ཀྱང་ཇི་ལྟར་གྱུར་པ་རྒྱས་པར་གཏམ་བྱས་པ་དང ། ཀུན་ཏུ་རྒྱུ་དེ་ཡང་དུས་ནས་ཁོ་མོས་ཕ་མའི་གཏམ་དྲིས་ན། ཁྱོད་ཀྱི་ཕ་མའི་ཁྱིམ་དུ་དེ་བར་མེ་ཤོར་ནས་ཕ་མ་དང་ཁྱིམ་གང་གི་མི་ཐམས་ཅད་མེས་ཚིག་གོ་།ཞེས་ཟེར་རོ། །དེ་སྐད་ཅེས་སྨྲས་པ་ཐོས་ནས་ཁོ་མོ་འཁམས་ཏེ་ས་ལ་འགྱེལ་ཏོ། །དེ་ནས་ཀུན་ཏུ་རྒྱུ་དེས་བསླད་སྟེ་ཁྱིམ་དུ་ཁྲིད་ནས་ཁོ་མོ་ལ་
349a
> ༄#། །བུ་བཞིན་དུ་བྱམས་ཤིང་འདུག་པ་ལས། ཡང་ཀུན་ཏུ་རྒྱུ་གཅིག་གིས་ཆུང་མར་བླངས་ཏེ་དེ་དང་ལྷན་ཅིག་རྩེ་དགའ་ཡོངས་སུ་སྤྱོད་པ་ལས་སེམས་ཅན་དང་ལྡན་པར་གྱུར་ཏེ། ཟླ་བ་ཚང་ནས་བུ་འབྱུང་དུ་ཉེ་བ་ན་ཁྱིམ་ཐབ་གཞན་གྱི་ཁྱིམ་དུ་ཚང་ལ་བོས་ནས་དེའི་འོག་ཏུ་བདག་བུ་བཙས་ཏེ་སྒོ་དམ་དུ་བཅད་ནས་ཕུ་འཚིར་བ་ལས་ཁྱིམ་ཐབ་ཆང་གིས་མྱོས་ཏེ་སྒོ་བརྡུངས་པ་དང ། སྒོ་འབྱེད་པ་མེད་པས་ཁྲོས་ཏེ་སྒོ་བཅག་ནས་ནང་དུ་འོངས་པ་དང་ཁོ་མོ་ཡང་བརྡེགས་སོ། །བདག་གིས་བུ་བཙས་སོ། །ཞེས་བྱས་ན། བུ་ཡང་བསད་དེ་མར་གྱི་ནང་དུ་བརྡོས་ནས་ཁོ་མོ་ཡང་ཟར་བཅུག་གོ་།བུའི་ཤ་ཟ་མ་ཕོད་དེ་མ་ཟོས་པས་ཡང་བརྡེགས་ནས་ནན་གྱིས་ཟར་བཅུག་གོ་།ཟོས་པའི་འོག་ཏུ་ཁྱིམ་ཐབ་ཀྱང་སངས་ནས་བདག་གིས་བསམ་པ། བདག་བསོད་ནམས་མེད་ཅིང་ལས་ངན་ནོ་སྙམ་བསམས་ནས་ཁྱིམ་ཐབ་བོར་ཏེ་ཡུལ་ཝ་ར་ཎཱ་སིར་བྲོས་སོ། །ཡུལ་ཝ་ར་ཎཱ་སའི་ཕྱི་རོལ་ན་ཤིང་ཞིག་གི་དྲུང་ན་འདུག་པ་ལས། གྲོང་དེའི་ཁྱིམ་ཐབ་གཞོན་ནུ་ཞིག་གསར་དུ་ཆུང་མ་ཚེ་འཕོས་ནས་གྲོང་ཁྱེར་དེའི་ཕྱི་རོལ་དུ་ཆུང་མའི་རུས་བུ་སྦས་ནས་ཁྱིམ་བདག་དེ་ཆུང་མ་དེ་ལ་ཆགས་པས། རུས་པུའི་དུང་ན་དུ་ཞིང་འདུག་པ་ལས་བདག་གི་དྲུང་དུ་འོངས་ཏེ་ཁོ་མོ་ལ་ཁྱོད་གཅིག་པུ་འདི་ན་ཅི་བྱེད་ཅེས་དྲིས་སོ། །ཁོ་མོས་ཀྱང་དེ་བཞིན་དུ་གཏམ་བྱས་པ་
349b
> ལས་ཁྱིམ་བདག་དེས་སྐྱེད་མོས་ཚལ་དུ་ཁྲིད་དེ་ཁོ་མོ་ལ་ཆུང་མ་བྱའོ། །ཞེས་སྨྲས་ནས་ཁོ་མོས་ཀྱང་དེ་བཞིན་དུ་རུང་ངོ ། ཞེས་སྨྲས་སོ། །ཁྱོ་ཤུག་ཏུ་འདུས་ནས་རིང་པོ་མ་ལོན་པར་ཁྱིམ་བདག་ནད་ཀྱིས་བཏབ་སྟེ་ཚེ་འཕོས་ནས་དེའི་ཚེ་ན་ཡུལ་ཆོས་ཀྱིས་གསོན་པའི་ཚེ་ཁྱོ་ཤུག་མཛའ་བ་རྣམས་ཁྱོ་ཚེ་འཕོས་ན། ཆུང་མ་ཡང་གསོན་པོར་ཁྱོ་དང་ལྷན་ཅིག་ཏུ་དུར་དུ་འཇུག་གོ། ཁོ་མོ་ཡང་དེ་ལྟར་དུར་དུ་བཅུག་ནས་ནུབ་མོ་དུར་རྐུན་འོངས་ཏེ་དུར་བྲུས་པ་དང ། དུར་རྐུན་གྱི་དཔོན་པོས་ཁོ་མོ་བཟང་བར་མཐོང་བས། དེས་ཀྱང་ཆུང་མར་བྱས་སོ། ། རིང་པོ་མ་ལོན་པར་བརྐུར་སོང་བ་ལས་རྒྱལ་པོས་བསད་ནས་རྐུན་ཟླ་རྣམས་ཀྱིས་རུས་བུ་བཀུར་ཏེ་ཁོ་མོ་དང་ལྷན་ཅིག་ཡང་དུར་དུ་བཅུག་གོ་།དུར་ན་ཞག་གསུམ་འདུག་འདུག་པ་ལས་སྤྱང་ཀིས་དུར་བྲུས་ནས་ཁོ་མོ་ཡང་དུར་ནས་བྱུང་སྟེ་འདི་སྙམ་དུ་བསམས་སོ། ཁོ་མོས་སྔོན་སྡིག་པ་ཅིག་གི་བྱས་ན། འདི་འདྲ་བར་ལན་དུ་མ་ཤི་བ་ལས་ཕྱིར་སོས་པར་གྱུར། སྔོན་ཐོས་ན་ཤཱཀྱའི་རིགས་ཀྱི་སྲས་ཤིག་མངོན་པར་བྱང་ཆུབ་ནས་མཚན་ཡང་སངས་རྒྱས་ཞེས་བྱ་སྟེ། འདས་པ་དང ། མ་འོངས་པ་ཀུན་མཁྱེན་ནོ། །ཞེས་གྲག་ན། ད་ནི། དེ་ལ་སྐྱབས་སུ་འགྲོའོ་སྙམ་བསམས་ནས་རྒྱལ་བུ་རྒྱལ་བྱེད་ཀྱི་ཚལ་གང་ན་བ་དེ་ལོགས་སུ་སོང་བ་དང ། རྒྱང་མ་ནས་དེ་བཞིན་གཤེགས་པ་མེ་ཏོག་གི་སྡོང་པོ་རྒྱས་པ་ལྟ་
350a
> ༄#། །བུའམ།་སྐར་མའི་ནང་ན་ཟླ་བ་ལྟ་བུར་མཐོང་ངོ ། །དེའི་ཚེ་བཅོམ་ལྡན་འདས་ཀྱིས་ཀྱང་ཐོགས་པ་མེད་པའི་ཡེ་ཤེས་ཀྱིས་བདག་གདུལ་བའི་དུས་ལ་བབ་པར་མཁྱེན་ནས་བཞེངས་ཏེ་ཁོ་མོ་བསུའོ། ཁོ་མོ་སྒྲེན་མོར་འདུག་པས་ངོ་ཚ་སྟེ་ལག་པས་ནུ་མ་བཀབ་ནས་སལ་འདུག་གོ་།དེ་ནས་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བུད་མེད་འདི་ལ་གོས་སྐོན་ཅིག་ཅེས་བཀའ་སྩལ་པ་དང ། ཁོ་མོས་གོས་གྱོན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བདག་ལ་ཐུགས་བརྩེ་བར་དགོངས་ནས་བདག་རབ་ཏུ་འབྱུང་བར་གནོད་ཞིག་ཅེས་གསོལ་པ་དང ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་ཏེ། བུད་མེད་འདི་སྐྱེ་རྒུའི་བདག་མོ་ལ་གཏད་དེ་རབ་ཏུ་ཕྱུང་ཞིག་ཅེས་བཀའ་སྩལ་ཏོ། །དེ་ནས་སྐྱེ་རྒུའི་བདག་མོས་ཁོ་མོ་རབ་ཏུ་ཕྱུང་ནས་ཁོ་མོ་ལ་བདེན་པ་བཞིའི་ཆོས་བསྟན་ནས་ཁོ་མོས་ཐོས་མ་ཐག་ཏུ་བརྩོན་འགྲུས་སུ་ནན་ཏན་བྱས་པས་དགྲ་བཅོམ་པ་ཐོབ་སྟེ་འདས་པ་དང ། མ་འོངས་པ་དང ། ད་ལྟར་གྱི་བྱ་བ་ཀུན་རྟོགས་པར་གྱུར་ཏོ། །དགེ་སློང་མ་དེ་རྣམས་ཀྱིས་སྨྲས་པ། སྔོན་ལས་ཅི་བགྱིས་ན། དེ་ལྟ་བུའི་རྣམ་པར་སྨིན་པ་མྱོང་བ་སྟོན་ཅིག་ཅེས་སྨྲས་པ་དང ། དགེ་སློང་མ་ཨུཏྤ་ལས་ཁྱེད་རྟག་པར་ཉོན་ཅིག་།ཁྱེད་ལ་བསྟན་པར་བྱའོ། །ཞེས་སྨྲས་
350b
> སོ། །སྔོན་འདས་པའི་དུས་ཡུན་རིང་པོ་ཞིག་ན་ཁྱིམ་བདག་ཤིན་ཏུ་ཕྱུག་པ་ཞིག་ལ་བུ་མེད་པ་ལས་ཆུན་མ་ཞིག་བླངས་ཏེ། ཆུན་མ་དེ་ལ་ཤིན་ཏུ་བྱམས་པས། རིང་པོ་མ་ལོན་པར་ཆུན་མ་དེ་སེམས་ཅན་དང་ལྡན་པར་གྱུར་ཏོ། །ཟླ་བ་ཚང་ནས་བུ་ཁྱེའུ་ཞིག་བཙས་ཏེ། ཁྱོ་ཤུག་གཉིས་དེ་ལ་བྱམས་ཤིང་སྡུག་པར་འཛིན་ཏོ། །དེ་ནས་ཆེན་མས་འདི་སྙམ་དུ་བསམས་སོ། །ཁོ་མོ་ནི། རིགས་ཆེ་ཞིང་བཙུན་མོད་ཀྱི། བུ་མེད་པས་རིགས་འཚོབ་པ་མེད་དོ། །གལ་ཏེ་ཁྱེའུ་འདི་ཆེར་སྐྱེས་ན་རིགས་འཚོ་བཅིང་ནོར་དང་ལོངས་སྤྱོད་ཀྱི་བདག་པོར་འགྱུར་ཏེ།་བདག་ལ་མི་སྟེར་ཅིང་བདག་སྡུག་པར་འགྱུར་རོ་སྙམ་དུ་ཕྲག་དོག་སྐྱེས་ཏེ་བསད་པར་བསམས་ནས་བུ་ཁྱེའུའི་འཚོག་མར་ཁབ་ཀྱིས་བཙུགས་ཏེ་རྨ་ཡང་མི་སྣང་བར་བྱས་སོ། །ཁྱེའུ་ཡང་རིང་པོར་མ་ལོན་པར་ཚེ་འདས་པ་དང ། ཆུན་མ་འཁམས་ནས་ཆེན་མ་ལ་ཁྱོད་ཀྱིས་ངའི་བུ་བསད་དོ། །ཞེས་བརྒལ་ཏོ། །ཆེན་མས་བསྙོན་ནས་འདི་སྐད་ཅེས་མནའ་བོར་རོ། །ཁོ་མོས་ཁྱོད་ཀྱི་བུ་བསད་པར་གྱུར་ན། ཁོ་མོ་སྐྱེ་བ་ཐམས་ཅད་དུ་ཁོ་མོའི་ཁྱོ་སྦྲུལ་གདུག་པས་བསད་པར་ཤོག་ཅིག་།བུ་ཞིག་ཡོད་ན་ཡང་ཆུས་ཁྱེར་བ་དང ། སྦྱང་ཀིས་ཟ་བར་ཤོག་ཅིག་།ཁོ་མོའི་ལུས་ཀྱང་གསོན་པོར་དུར་དུ་བཅུག་ཅིང་བུའི་ཤ་ཟ་བར་ཤོག་ཅིག་།ཕ་མའི་ཁྱིམ་དུ་མེ་ཤོར་ཏེ་ཐམས་ཅད་ཚིག་པར་ཤོག་ཅིག་ཅེས་སྨྲས་སོ། །དེའི་ཚེ་ན་དེ་སྐད་ཅེས་
351a
> ༄#། །མནའ་བོར་བའི་ཆེན་མ་དེ་ནི། ཁོ་མོ་ཡིན་ཏེ། དེ་དག་ཐམས་ཅད་ལུས་ཀྱིས་མྱོང་བར་གྱུར་ཏོ། །དགེ་སློང་མ་དེ་དག་གིས་སྨྲས་པ། བསོད་ནམས་ཅི་ཞིག་བྱས་ན། སངས་རྒྱས་མཐོང་ཞིང་སངས་རྒྱས་ཀྱིས་བསུ་ནས་རབ་ཏུ་བྱུང་སྟེ་འཁོར་བའི་མཐར་ཕྱིན་པར་གྱུར། ཨུཏྤ་ལས་སྨྲས་པ། སྔོན་ཝཱ་ར་ཎཱ་སི་འདིར་རི་དྲང་སྲོང་ལྷགས་ཞེས་བྱ་བ་ན་རང་སངས་རྒྱས་དང ། ཉན་ཐོས་དང ། མུ་སྟེགས་ཅན་མངོན་པར་ཤེས་པ་ལྔ་དང་ལྡན་པ་མང་དུ་གནས་སོ། །དེའི་ཚེ་ན་རང་སངས་རྒྱས་དག་ཅིག་བསོད་སྙོམས་ལ་གྲོང་དུ་གཤེགས་པ་དང ། ཁྱིམ་བདག་གི་ཆུང་མ་ཞིག་གིས་མཐོང་ནས་རབ་ཏུ་དགའ་སྟེ་བསོད་སྙོམས་ཕུལ་ནས་མཆོད་པ་བྱས་སོ། །དེ་ནས་རང་སངས་རྒྱས་དེ་ནམ་མཁའ་ལ་འཕགས་ཏེ་ལུས་ལ་མེ་འབར་བ་དང ། ཆུ་འབབ་པ་དང ། འགྲོ་བ་དང ། ཉལ་བ་དང ། འདུག་པའི་རྫུ་འཕྲུལ་བསྟན་ནས་ཁྱིམ་བདག་གི་ཆུང་མ་དེས་ཁོ་མོ་ཡང་མ་འོངས་པའི་དུས་སུ་འདི་འདྲ་བ་ཐོབ་བར་གྱུར་ཅིག་ཅེས་སྨོན་ལམ་བཏབ་བོ། །དེའི་ཚེ་ན་སྨོན་ལམ་བཏབ་པའི་ཁྱིམ་བདག་གི་ཆུང་མ་དེ་ནི། ཁོ་མོ་ཡིན་ནོ། །དེའི་ཕྱིར་དེ་བཞིན་གཤེགས་པ་དང་ཕྲད་ནས་སེམས་རྣམ་པར་གྲོལ་ཏེ་དགྲ་བཅོམ་པ་ཐོབ་བོ། །འདི་ལྟར་དགྲ་བཅོམ་པ་ཐོབ་མོད་ཀྱི། ལྕགས་ཚ་བའི་ཐུར་མ་སྤྱི་བོ་ནས་ཟུག་ནས་རྐང་མཐིལ་དུ་བྱུང་སྟེ་རྟག་
351b
> ཏུ་འདི་ལྟ་བུའི་གནོད་པ་མྱོང་ངོ ། །དེའི་ཚེ་རིགས་ཆེ་ཞིང་མཐོ་བའི་དགེ་སློང་མ་ལྔ་བརྒྱ་སྙེད་ཀྱིས་དེ་སྐད་ཅེས་སྨྲས་པ་ཐོས་ནས་ལུས་དང་སེམས་སྐྱི་གཡའ་སྟེ་འདོང་བ་ལ་མེ་མ་མུར་གྱི་ཕུང་པོ་ལྟར་རྟོགས་ནས་འདོད་ཆགས་ཀྱི་སེམས་ཡོངས་སུ་ཟད་དེ། ཁྱིམ་གྱི་སྡུག་བསྔལ་ལ་བཙོན་ར་བས་ཀྱང་ལྷག་པར་རྟོགས་ཏེ། དྲི་མ་ཀུན་ཟད་ནས་དུས་གཅིག་ཏུ་ཏིང་ངེ་འཛིན་དུ་ཞུགས་ཏེ་དགྲ་བཅོམ་པར་གྱུར་ཏོ། །དགེ་སློང་མ་དེ་དག་གིས་ཚིག་མཐུན་པར་དགེ་སློང་མ་ཨུཏྤལ་ལ་བདག་ཅག་ནི། འདོད་ཆགས་ཀྱིས་ཀུན་ནས་བཅིངས་ཤིང་གླགས་པ་ལས་ཁྱོད་ཀྱིས་ཆོས་བསྟན་པས་འཁོར་བའི་མཐར་ཕྱིན་པར་གྱུར་ཏོ། །ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་དགེ་སློང་མ་ཨུཏྤ་ལས་ནི། ལེགས་པར་བསྟན་ཏོ། །གང་ཆོས་སྟོན་པ་ནི། གཅིག་གིས་གཅིག་བསྟན་ཏེ་འབྲས་བུ་ཐོབ་ན། སངས་རྒྱས་ཀྱི་སྲས་ཡང་དག་པའོ། །ཞེས་བསྔགས་སོ། །དེ་སྐད་ཅེས་གསུངས་པ་ལ་འཁོར་མང་པོ་རྗེས་སུ་ཡི་རང་ནས་མངོན་པར་དགའོ། །དགེ་སློང་མ་ཨུཏྤ་ལའི་ལེའུ་སྟེ་ཉི་ཤུ་ལྔ་པའོ།། །།ཤུ་དོ་ལ་གར་ནེའི་ལེའུ། འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་རྒྱལ་པོའི་ཁབ་བྱ་ཀ་ལནྟ་ཀ་གནས་པ་འོད་མའི་ཚལ་ན་བཞུགས་སོ། །དེའི་ཚེ་ཚེ་དང་ལྡན་པ་ཀུན་དགའ་བོ་འདུག་པ་ལས་ལངས་ནས་གོས་ཚགས་བཅོས་
352a
> ༄#། །ཏེ་པུས་མོ་ས་ལ་བཙུགས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀཽཎྜི་ནྱ་ལ་སོགས་པ་དགེ་སློང་ལྔ་པོ་འདི་ཅིའི་རྒྱུ་ཅིའི་རྐྱེན་གྱིས་བཅོམ་ལྡན་འདས་ཀྱིས་འཇིག་རྟེན་དུ་ཆོས་ཀྱི་འཁོར་ལོ་བསྐོར་མ་ཐག་ཏུ་ཆོས་ཀྱི་བདུད་རྩི་སྔར་མྱོང་བ་བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དགེ་སློང་ལྔ་པོ་འདི་དག་སྔོན་ཡང་ངའི་ཤ་སྔར་ཟོས་ཏེ་བདེ་བར་གྱུར་པས་འདིར་ཡང་ཆོས་ཀྱི་རོ་ཐོག་མར་མྱོང་སྟེ་རྣམ་པར་གྲོལ་བར་གྱུར་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ། དགེ་སློང་འདི་ལྔས་སྔོན་ཅི་བགྱིས་པ་བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་བསྐལ་པ་ཚད་མེད་གྲངས་མེད་བསམ་གྱིས་མི་ཁྱབ་པ་འདས་པའི་སྔ་རོལ་དུ་འཛམ་བུའི་གླིང་འདིར་རྒྱལ་པོ་ཤུ་དོ་ལ་གར་ནེ་ཞེས་བྱ་བ་བྱུང་སྟེ། འཛམ་བུའི་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་སྙེད་ལ་དབང་བྱེད་དོ། །དེའི་ཚེ་ན་ཡུལ་དེར་ལོ་བཅུ་གཉིས་ཀྱི་བར་དུ་ཆར་མི་འབབ་བོ། །ཞེས་ལྟས་མཁན་གྱིས་ལུང་བསྟན་ནས་རྒྱལ་པོས་དེ་སྐད་ཅེས་ཐོས་པ་དང ། རབ་ཏུ་མྱ་ངན་གྱིས་ཡི་མུག་པར་གྱུར་ཏེ། འདི་ལྟར་མུ་གེ་ཆེན་པོ་བྱུང་ན་མི་མང་པོ་འདི་དག་ལ་ལོ་དེ་སྙེད་ཀྱི་ཁ་ཟས་ཇི་ལྟར་རྙེད་སྙམ་ནས་རྒྱལ་ཕྲན་དང་བློན་པོ་ཀུན་
352b
> བསྡུས་ཏེ་བགྲོས་ན། བང་བ་ན་འབྲུ་ཇི་སྙེད་ཡོད་པ་དང ། ད་ལྟར་མི་ཇི་སྙེད་ཡོད་པ་རྩིས་སུ་སྦྱར་ན། ལོ་བཅུ་གཉིས་ཀྱི་བར་དུ་མི་རེ་ལ་ཕུལ་རེའི་ཐད་དུ་བརྩིས་ན་ཡང་ལོ་བཅུ་གཉིས་སུ་མི་ཐུབ་བོ། །ཞེས་དྲིལ་བསྒྲགས་སོ། །དེ་ནས་ཕྱི་ཕྱིར་ཡང་མུ་གེ་ཆེ་བར་གྱུར་ཏེ་ཚེ་འཕོས་པ་ཡང་མང་ནས་རྒྱལ་པོ་དེས་ཇི་ལྟར་བྱས་ན་མི་མང་པོ་འཚོ་བར་འགྱུར་སྙམ་བསམས་ཏེ་བཙུན་མོ་དང་ཕོ་བྲང་སླས་སུ་བཅས་ཏེ་སྐྱེད་མོས་ཚལ་དུ་འཆག་ཏུ་སོང་བ་ལས་བསྟི་བའི་གནས་ཤིག་ཏུ་ཕྱིན་ནས་བཙུན་མོ་དང ། མི་མང་པོ་ཀུན་གཉིད་ཀྱིས་ལོག་པའི་འོག་ཏུ་ཉལ་བ་ལས་ལངས་ནས་ཕྱོགས་བཞིར་ཕྱག་འཚལ་ཏེ་འདི་ལྟ་བུའི་ཡི་དམ་བཅས་སོ། །ཡུལ་འདིར་མུ་གེ་བྱུང་བས་ཐམས་ཅད་བཟའ་བ་མེད་པར་གྱུར་ཏེ་ལྟོགས་ཀྱི། བདག་གི་ལུས་འདི་བཏང་སྟེ་ཚེ་འཕོས་པའི་འོག་ཏུ་ཉ་ཆེན་པོ་ཞིག་ཏུ་སྐྱེས་ནས་ཐམས་ཅད་བདག་གི་ཤ་ལ་ཟ་ཞིང་ཀུན་འགྲངས་པར་ཤོག་ཅིག་ཅེས་སྨོན་ལམ་བཏབ་ནས་ཤིང་ཞིག་ལ་འཛེགས་ཏེ་ཤིང་ཁ་ནས་ལུས་གཡང་དུ་བཏང་ངོ ། །དེར་ཚེ་འཕོས་ནས་ཆུ་ཆེན་པོར་བརྫུས་ཏེ་སྐྱེས་བའི་ཉ་ཆེན་པོ་དཔག་ཚད་ལྔ་བརྒྱ་པ་ཞིག་ཏུ་གྱུར་ཏོ། །དེའི་ཚེ་ཡུལ་དེ་ན་ཤིང་མཁན་མི་ལྔ་ཞིག་ཆུ་འགྲམ་དུ་ཤིང་འབྱོར་དོང་པ་ལས། ཉ་ཆེན་པོ་དེ་མཐོང་ནས་ཉ་དེས་མིའི་སྐད་དུ་འདི་སྐད་ཅེས་སྨྲས་སོ། །ཁྱེད་བཀྲེས་ན་ངའི་ཤ་ལ་བཅད་དེ་ཅི་འདོད་པ་ཟོ་ཞིག་།འགྲངས་ནས་ཀྱང་ཅི་ཐེག་པ་ཁྱིམ་དུ་ཁྱེར་
353a
> ༄#། །ཅིག་།ཁྱེད་ཀྱིས་སྔར་ངའི་ཤ་ཟོས་ཏེ་འགྲངས་པས་ན། ཕྱིས་མངོན་པར་སངས་རྒྱས་ནས་ཀྱང་ཐོག་མར་ཁྱོད་ཆོས་ཀྱི་ཟས་མྱོང་བར་སྐྱའོ། །ཡུལ་མི་དག་ལ་གང་བཀྲེས་པ་ཐམས་ཅད་ཀྱིས་ཀྱང་ཅི་དགའ་བར་ངའི་ཤ་ལ་ལོངས་ཤིག་ཅེས་སྒོས་ཤིག་།དེའི་ཚེ་མི་ལྔ་པོས་ཤ་བཅད་དེ་ཟོས་ནས་ཡུལ་མི་ལ་སྦྲན་ཏེ། དེ་ནས་གཅིག་གིས་གཅིག་ལ་སྦྲན་པས་འཛམ་བུའི་གླིང་གི་མི་ཐམས་ཅད་འདུས་ཏེ་དེའི་ཤ་ལ་བཅད་ཅིང་ཟོས་སོ། །རྩིབ་ལོགས་ངོས་གཅིག་ཟད་ཙམ་ན། རྩིབ་ལོགས་ངོས་གཅིག་རང་བསྒྱུར་ཏེ།་སྟེང་མ་ཟད་ན་འོག་མ་ཡང་དེ་བཞིན་དུ་སྐྱེའོ། །དེ་བཞིན་དུ་ལྟག་འོག་བསྒྱུར་ཞིང་ལོ་བཅུ་གཉིས་ཀྱི་བར་དུ་ཐམས་ཅད་ཀྱིས་ཤ་བཅད་ཅིང་ཟོས་ནས་ཐམས་ཅད་དེ་ལ་སྙིང་རྗེ་བའི་སེམས་སྐྱེས་པས། དེའི་ཤ་ཟོས་པ་དེ་དག་ཐམས་ཅད་ཚེའི་དུས་བྱས་པ་ཡང་མཐོ་རིས་ཀྱི་ལྷར་སྐྱེས་སོ། །ཀུན་དགའ་བོ། དེའི་ཚེ་དེའི་དུས་ན་རྒྱལ་པོ་ཉར་གྱུར་པ་དེ་ནི། ད་ལྟར་ང་ཡིན་ནོ། །ཤིང་མཁན་ལྔ་པོ་ཐོག་མར་ངའི་ཤ་བཅད་དེ་ཟོས་པ་ནི། དགེ་སློང་ཀཽཎྜི་ནྱ་ལ་སོགས་པ་ལྔ་པོ་ཡིན་ནོ། །སྐྱེ་བོ་མང་པོ་ཕྱིས་ངའི་ཤ་ཟོས་པ་ནི། ལྷའི་སྲས་པོ་བརྒྱད་ཁྲི་དང ། ངའི་ཉེ་གནས་རྣམ་པར་གྲོལ་བ་རྣམས་ཡིན་ནོ། །དེའི་ཚེ་ན་སྔར་མི་ལྔ་པོ་དེ་ལ་བྱིན་ཏེ་འཚོ་བས་སྲོག་བསྐྱབས་པས་འདིར་ཡང་སྔར་ཆོས་བསྟན་ཏེ་ཆོས་ཀྱི་སྐུའི་
353b
> ཡན་ལག་གིས་དུག་གསུམ་གྱི་མེ་ཞི་བར་བྱས་སོ། །ཀུན་དགའ་བོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །ཤུ་དོ་ལ་གར་ནེའུ་ལེའུ་སྟེ་ཉི་ཤུ་དྲུག་པའོ།། །།རྒྱལ་པོ་ཨ་ཤོ་ཀའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་པ་ན་བཞུགས་སོ། །དེའི་ཚེ་བཅོམ་ལྡན་འདས་ཀུན་དགའ་བོ་དང ། བསོད་སྙོམས་ལ་གཤེགས་པ་ལས། ལམ་ག་ན་བྱིས་པ་དག་ཅིག་ས་ལ་ཁང་བུ་དང ། བང་མཛོད་དང ། རིན་པོ་ཆེར་བསྔོས་ནས་རྩེ་ཞིང་འཁོད་དོ། །དེ་ལ་ཁྱེའུ་གཅིག་ཅིག་གིས་སངས་རྒྱས་རྒྱང་མ་ནས་གཤེགས་པ་མཐོང་ནས་རབ་ཏུ་དགའ་སྟེ་སྦྱིན་པ་བྱ་བར་བསམས་ནས་བང་བ་ཞེས་བསྔོས་པའི་ས་ལས་སྙིམ་པ་གང་བླངས་ཏེ་སངས་རྒྱས་ལ་དཔུལ་བར་གཟས་པ་ལས་ཁྱེའུ་ཆུང་ཆེས་པས་མ་སླེབ་ནས་གྲོགས་ཁྱེའུ་གཅིག་ལ་ཁྱོད་ས་ལ་སྒུ་ཞིག་།ཁོ་བོ་ཁྱོད་ཀྱི་སྟེང་དུ་འགྲེང་སྟེ་ལྷུང་བཟེད་དུ་བླུག་གོ་།ཞེས་སྨྲས་ནས་གྲོགས་པོས་ཀྱང་དེ་བཞིན་དུ་བྱའོ། །ཞེས་སྨྲས་ཏེ། ཁྱེའུ་དེས་གྲོགས་པོའི་ཕྲག་པ་ལ་འཛེགས་ཏེ་ས་སྙིམ་པ་གང་སངས་རྒྱས་ལ་ཕུལ་ལོ། །སངས་རྒྱས་ཀྱིས་ཀྱང་ལྷུང་བཟེད་སྨྲད་ནས་ས་ཕུལ་བ་བཞེས་སོ། །བཞེས་ནས་ཀུན་དགའ་བོ་ལ་གཏད་དེ་ས་འདི་འཇིམ་པར་གྱིས་ལ་གཙུག་
354a
> ༄#། །ལག་ཁང་ལ་བྱུགས་ཤིག་ཅེས་བཀའ་སྩལ་ཏོ། །ཀུན་དགའ་བོ། ཆུང་དུས་དགའ་བའི་སེམས་ཀྱིས་ང་ལས་ཕུལ་བ་བཞེས་ནས་གཙུག་ལག་ཁང་ལ་བསྐུས་པས། དེའི་བསོད་ནམས་ཀྱིས་ང་མྱ་ངན་ལས་འདས་ནས་ལོ་བརྒྱ་ལོན་པའི་འོག་ཏུ་རྒྱལ་པོ་ཨ་ཤོ་ཀ་ཞེས་བྱ་བར་འགྱུར་རོ། །ཁྱེའུ་གཅིག་ཤོས་ནི། དེའི་བློན་པོར་འགྱུར་ཏེ། འཛམ་བུའི་གླིང་ལ་དབང་བྱེད་ཅིང་དཀོན་མཆོག་གསུམ་གྱི་ཡོན་ཏན་ཀྱང་ཡུལ་ཐམས་ཅད་དུ་བསྒྲགས་ནས་རིང་བསྲེལ་ལ་ཡང་རྒྱས་པར་མཆོད་པར་བྱེད་དེ། འཛམ་བུའི་གླིང་དུ་མཆོད་རྟེན་བརྒྱད་ཁྲི་བཞི་སྟོང་གཅིག་ཅར་བྱེད་པར་འགྱུར་རོ། །ཀུན་དགའ་བོ་དགའ་མགུ་རངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་སྔོན་བསོད་ནམས་ཅི་ཞིག་མཛད་པས། རིང་བསྲེལ་ལ་ཡང་མཆོད་རྟེན་དེ་སྙེད་ཅིག་བགྱིད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རྟག་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང ། ཁྱོད་ལ་བསྟན་པར་བྱའོ། །སྔོན་བསྐལ་པ་གྲངས་མེད་པ་འདས་པ་ན་འཛམ་བུའི་གླིང་འདིར་རྒྱལ་པོ་གསལ་ཐུབ་ཞེས་བྱ་བ། རྒྱལ་ཕྲན་བརྒྱད་ཁྲི་བཞི་སྟོང་སྙེད་ལ་དབང་བྱེད་པ་ཞིག་བྱུང་ངོ ། །དེའི་ཚེ་སངས་རྒྱས་བུར་ཤ་ཞེས་བྱ་བ་འཇིག་རྟེན་དུ་བྱུང་སྟེ། རྒྱལ་པོ་དེས་བློན་པོ་དང་བཅས་སུ་ཡོ་བྱད་རྣམ་པ་བཞི་
354b
> སྦྱར་ཏེ་སངས་རྒྱས་དང ། དགེ་སློང་གི་དགེ་འདུན་ལ་ཕུལ་ལོ། །དེའི་ཚེ་རྒྱལ་པོ་དེ་དང ། ཡུལ་མི་རྣམས་ནི། རྟག་ཏུ་སངས་རྒྱས་དང་ཕྲད་དེ་ཕྱག་འཚལ་བ་དང ། བསྙེན་བཀུར་བྱེད་ཀྱི། རྒྱལ་ཕྲན་གཞན་དག་ནི། བསོད་ནམས་ཀྱང་མི་བྱེད་པས་མཐའ་འཁོབ་ཀྱི་རྒྱལ་ཕྲན་དང ། ཡུལ་མི་དག་བསོད་ནམས་བྱེད་དུ་གཞུག་པའི་ཕྱིར་སངས་རྒྱས་ཀྱི་སྐུ་གཟུགས་བྲིས་ལ་རྒྱལ་ཕྲན་རྣམས་ལ་སྦྱིན་ནོ་སྙམ་བསམས་ནས་རི་མོ་མཁན་མང་པོ་བསྡུས་ཏེ་སངས་རྒྱས་ཀྱི་སྐུ་གཟུགས་རི་མོ་ལ་བྲིས་ཤིག་ཅེས་བསྒོ་བ་དང ། རི་མོ་མཁན་དག་སངས་རྒྱས་ཀྱི་སྤྱན་སྔར་སོང་སྟེ་སངས་རྒྱས་ཀྱི་མཚན་བལྟས་ནས་རི་མོ་བྲིས་པ་ལས་མཚན་གཅིག་བྲིས་ན་གཅིག་མི་འདྲ་བར་གྱུར་ཏེ། རི་མོ་མཁན་གྱིས་རི་མོ་བྲི་བར་མ་ནུས་སོ། །སངས་རྒྱས་ཉིད་ཀྱིས་ཚོན་རྩི་སྦྱར་ཏེ་སྐུ་གཟུགས་གཅིག་བྲིས་ནས་རི་མོ་མཁན་རྣམས་དེ་ལ་བལྟས་ཏེ་སྐུ་གཟུགས་མཚན་དང་ལྡན་པ་བརྒྱད་ཁྲི་བཞི་སྟོང་བྲིས་ནས་རྒྱལ་ཕྲན་རེ་རེ་ལ་སྐུ་གཟུགས་རེ་རེ་བསྐུར་ཏེ། སྐུ་གཟུགས་དེ་ལ་རྒྱལ་པོ་དང ། ཡུལ་མི་ཐམས་ཅད་ཀྱིས་མེ་ཏོག་དང ། སྤོས་དང ། ཡོ་བྱད་ཐམས་ཅད་ཀྱིས་མཆོད་དེ་ཕྱག་འཚོལ་ཅིག་ཅེས་བསྒོའོ། །རྒྱལ་ཕྲན་དེ་དག་དང ། ཡུལ་མི་དེ་དག་གིས་དེ་བཞིན་གཤེགས་པའི་སྐུ་གཟུགས་མཐོང་ནས་རབ་ཏུ་དགའ་མགུ་རངས་ཏེ་བསྙེན་བཀུར་བྱས་སོ། །དེའི་ཚེ་ན་རྒྱལ་པོ་གསལ་ཐུབ་དེ་ནི། དེ་ལྟར་ང་ཡིན་ཏེ། དེ་ལྟར་དེ་བཞིན་གཤེགས་
355a
> ༄#། །པའི་སྐུ་གཟུགས་བརྒྱད་ཁྲི་བཞི་སྟོང་བྲིས་ཏེ་རྒྱལ་ཕྲན་ཀུན་ལ་སྤེལ་བའི་བསོད་ནམས་ཀྱིས་གང་ནས་གང་དུ་སྐྱེས་ཀྱང་མཐོ་རིས་སུ་བརྒྱ་བྱིན་ལྷའི་དབང་པོར་སྐྱེས་ཏེ་བྱད་གཟུགས་བཟང་བ་དང ། མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུ་ཐོབ་སྟེ་མངོན་པར་སངས་རྒྱས་སོ། །མྱ་ངན་ལས་འདས་ནས་ཀྱང་རིང་བསྲེལ་ལ་མཆོད་རྟེན་བརྒྱད་ཁྲི་བཞི་སྟོང་སྙེད་བྱེད་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་ཀུན་དགའ་བོ་དང ། འཁོར་མང་པོ་མངོན་པར་དགའ་ནས་རྗེས་སུ་ཡི་རང་ངོ ། །རྒྱལ་པོ་ཨ་ཤོ་ཀའི་ལེའུ་སྟེ་ཉི་ཤུ་བདུན་པའོ།། །།གསེར་གྱི་བུམ་པའི་ལེའུ། འདི་སྐད་བདག་གིས་ཐོགས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་དག་དབྱར་སོ་སོར་ཚུལ་དུ་ཞུགས་ནས་ཚུལ་ནས་བྱུང་བ་དང ། བཅོམ་ལྡན་འདས་གང་ན་བ་དེར་ལྷགས་སོ། །བཅོམ་ལྡན་འདས་དགེ་སློང་དག་དང་ཡུན་རིང་དུ་མ་ཕྲད་པས་དེ་དག་ལ་ཐུགས་རྩེ་བར་དགོངས་ཏེ། འཁོར་ལོ་རྩིབས་སྟོང་དང་ལྡན་པའི་ཕྱག་བཏེག་སྟེ་དགེ་སློང་དེ་དག་ལ་བསྟི་སྟང་དང་བཅས་པས་ཁྱེད་ན་བར་མ་གྱུར་ཏམ། བསོད་སྙོམས་ཀྱིས་བྲེལ་ཏམ་ཞེས་བཀའ་སྩལ་པ་དང ། དེ་བཞིན་གཤེགས་
355b
> པ་ཡོན་ཏན་ཆེན་པོ་དང་ལྡན་པ་དེ། དགེ་སློང་རྣམས་ལ་བསྟི་སྟང་མཛད་པར་དགེ་སློང་ཀུན་དགའ་བོས་མཐོང་ནས་ངོ་མཚར་དུ་གྱུར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ནི། འཇིག་རྟེན་གྱི་གཙོ་བོ། །ཡོན་ཏན་དཔག་ཏུ་མ་མཆིས་པ། ཡེ་ཤེས་བསམ་གྱིས་མི་ཁྱབ་པ་ལགས་ན། ཅིའི་སླད་དུ་ཐུགས་སྨད་དེ་དགེ་སློང་རྣམས་ལ་བསྟི་སྟང་མཛད་ཅེས་གསོལ་པ་དང ། བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །སྔོན་བསྐལ་པ་གྲངས་མེད་ཚད་མེད་བསམ་གྱིས་མི་ཁྱབ་པ་འདས་པ་ན་འཛམ་བུའི་གླིང་འདིར་ཡུལ་ཝཱ་ར་ཎཱ་སི་ན་ཁྱིམ་བདག་སོ་ཚིས་ལ་མཁས་པ་ཞིག་ཡོད་དེ། ནོར་ཅི་རྙེད་ཀྱང་གསེར་དུ་བསྒྱུར་ནས་གསེར་གྱི་བུམ་པ་གཅིག་བྱས་ཏེ་ས་འོག་ཏུ་སྦས་སོ། །དེ་བཞིན་དུ་ནོར་རྫས་ཅི་རྙེད་ཀྱང་ལུས་ལ་མི་སྤྱོད་དེ། གསེར་དུ་བསྒྱུར་ནས་ཕྱིས་རིང་ཞིག་ལོན་པ་དང ། གསེར་གྱི་བུམ་པ་སྔ་ཕྱིར་བསགས་པ་བདུན་དུ་གྱུར་ནས་ཐམས་ཅད་ས་འོག་ཏུ་སྦས་སོ། ། ཁྱིམ་བདག་དེ་ཕྱིས་ནད་ཀྱིས་བཏབ་ནས་ཚེ་དུས་བྱས་པ་དང ། གསེར་གྱི་བུམ་པ་ལ་ཆགས་པས་སྦྲུལ་གདུག་པ་ཞིག་ཏུ་སྐྱེས་ཏེ་གསེར་དེ་ལ་སྲུང་ངོ ། །ཕྱིས་ཡུན་རིང་ཞིག་ལོན་པ་དང ། གྲོང་ཁྱེར་དེ་ཡང་ཞིག་ནས་སུ་ཡང་མི་གནས་ཏེ། ས་སྟོང་དུ་གྱུར་ཏོ། །སྦྲུལ་དེ་ཡང་ལོ་གྲངས་མང་དུ་ལོན་པས་ཚེའི་དུས་བྱས་ནས་ཕྱིར་ཡང་དེ་ཉིད་ཀྱི་ལུས་སུ་སྐྱེས་ཏེ་གསེར་གྱི་བུམ་པ་ལ་འཁྲི་
356a
> ༄#། །ཞིང་ཉལ་ལོ། །དེ་བཞིན་དུ་ལོ་ཁྲི་ཕྲག་དུ་མ་ལོན་པ་དང ། ནང་གི་སྐྱེ་བ་ཐ་མ་ལ་ལུས་དེས་སྐྱོ་སྟེ་འདི་སྙམ་དུ་བསམས་སོ། །བདག་ནི། གསེར་འདི་ལ་ཆགས་པས་འདི་འདྲ་བའི་ལུས་ལ་མི་སྡུག་པ་མྱོང་བར་གྱུར་གྱི། ད་ནི། བསོད་ནམས་ཀྱི་ཞིང་ལ་ཕུལ་ནས་ལམ་དང་ཉེ་བར་སོང་སྟེ་རྩཝ་ཁྲོད་དུ་ལུས་སྤས་ལ་མི་དག་འོངས་ནས་འབོད་དོ་སྙམ་སྟེ། དེའི་ཚེ་སྦྲུལ་གདུག་པ་དེས་མི་གཅིག་ལམ་ནས་འོང་བ་མཐོང་ནས་སྦྲུལ་གྱིས་མི་དེ་ལ་བོས་པ་དང ། མི་དེས་བོས་པའི་དགྲ་ཐོས་ནས་ཕན་ཚུན་བལྟས་ན་ཅང་མི་སྣང་བས་ལམ་དུ་ཞུགས་ཏེ་སོང་སོང་བ་ལས། སྦྲུལ་གྱིས་ཡང་བོས་ཏེ། ཀྱེ་ཁོ་བོའི་དྲུང་དུ་སྙེན་ཅིག་ཅེས་སྨྲས་སོ། །མི་དེས་སྨྲས་པ། ཁྱོད་ཀྱིས་ཁོ་བོ་བོས་ཏེ་ཅི་ཞིག་བྱ། ཁྱོད་ནི། ཤིན་ཏུ་གདུག་པ་ཅན་ཡིན་པས།་ཁོ་བོ་གསད་དུ་འོང་ངོ ། །སྦྲུལ་གྱིས་སྨྲས་པ། ཁོ་བོས་གནོད་པ་བྱ་ན། ཁྱོད་དྲུང་དུ་མ་འོངས་ཀྱང་གནོད་པ་བྱ་ནུས་སོ། །ཞེས་སྨྲས་པ་དང ། མི་དེ་སྐྲག་ནས་སྤྲུལ་གྱི་དྲུང་དུ་བསྙེན་ཏོ། །སྦྲུལ་གྱིས་སྨྲས་པ། ཁོ་བོ་ལ་འདི་ན་གསེར་གྱི་བུམ་པ་ཞིག་ཡོད་ཀྱི། ཁྱོད་ལ་བསོད་ནམས་ཤིག་བྱ་བར་བཅོལ་ན་ནུས་སམ། ཅི་སྟེ་མ་བྱས་ན་ཁྱོད་ལ་གནོད་པ་བྱའོ། ། མི་དེས་ཁོ་བོས་ནུས་སོ། །ཞེས་སྨྲས་པ་དང ། སྦྲུལ་གྱིས་མི་དེ་གསེར་གྱི་བུམ་པའི་དྲུང་དུ་ཁྲིད་དེ། གསེར་གྱི་བུམ་པ་གཅིག་བསྐུར་ཏེ་འདི་སྐད་ཅེས་སྨྲས་སོ། །ཁྱོད་གསེར་འདི་
356b
> ཁྱེར་ལ་དགེ་འདུན་རྣམས་ལ་མཆོད་སྟོན་ཞིག་གསོལ་ཅིག་།མཆོད་སྟོན་གསོལ་བའི་ཉིན་པར་ཁོ་བོས་ཀྱང་འོང་གི་།བསུས་ཤིག་ཅེས་བསྒོའོ། །དེ་ནས་མི་དེ་གསེར་ཁུར་དུ་ཁྱེར་ཏེ་དགེ་འདུན་གྱི་གནས་སུ་སོང་ནས་དགེ་སློང་གི་གཙང་སྦྱོར་ལ་གསེར་ཕུལ་ཏེ། འདི་ནི། སྦྲུལ་གདུག་པ་ཞིག་གི་གསེར་ལགས་ཀྱི། གསེར་འདིས་དགེ་འདུན་ལ་མཆོད་སྟོན་གསོལ་ཅིག་ཅེས་མཆིའོ། །གསེར་འདིས་མཆོད་སྟོན་སྦྱར་ཏེ་མཆོད་སྟོན་ནམ་གསོལ་བཞག་དུས་བརྩིས་ནས་དེའི་ཉིན་པར་མི་དེ་གཟེབ་ཅིག་ཐོགས་ཏེ་སྦྲུལ་གདུག་པ་དེ་གང་ན་འདུག་པ་དེར་སོང་ངོ ། ། སྦྲུལ་གདུག་པ་དེས་ཀྱང་མི་དེ་འོང་བ་མཐོང་ནས་རབ་ཏུ་དགའ་བར་གྱུར་ཏེ་མི་དེས་སྦྲུལ་གཟེབ་ཀྱི་ནང་དུ་བཅུག་ནས་ཁྱེར་ཏེ་སོང་བ་ལས། ལམ་དུ་མི་ཞིག་དང་ཕྲད་དེ། མི་དེས་ཁྱོད་གང་ནས་འོངས་ཞེས་ལན་གསུམ་གྱི་བར་དུ་དྲིས་ཀྱང་སྦྲུལ་ཐོགས་པ་དེས་ཅང་མ་སྨྲས་པས། སྦྲུལ་དེ་ཁྲོས་ནས་གདུག་པ་བྱུང་བ་ལས་ཡང་འདི་སྙམ་དུ་བསམས་སོ། །མི་འདི་ཅི་ཞིག་ཉེས་ན་ཕ་རོལ་པོས་ལན་གསུམ་གྱི་བར་དུ་དྲིས་ན། གཏམ་གྱི་ལན་ཡང་མི་སྟེར་སྙམ་སྟེ་ཕྱིར་ཡང་ཁྲོས་ནས་གདུག་པ་ཕྱུང་བ་ལས་ཕྱིར་བཀག་སྟེ་ཡང་འདི་སྙམ་དུ་བསམས་སོ། །མི་འདི་བདག་གི་ཕྱིར་བསོད་ནམས་བྱེད་ན། བྱས་པ་གཟོ་བའི་དྲིན་ཡང་དྲན་པར་བྱས་པས་གདུག་པ་མི་དབྱུང་ངོ་སྙམ་བསམས་ཏེ་མི་འདི་བདག་ལ་ཕན་ཕའི་དོན་བྱེད་ཀྱི། ཉེས་པ་ཞིག་བྱས་
357a
> ༄#། །ན་ཡང་བཟོད་པར་བྱའོ། །ཞེས་དབེན་པར་ཕྱིན་པ་དང ། རེ་ཞིག་ས་ལ་ཞོག་ཅིག་ཅེས་སྨྲས་ནས་མི་དེས་སྦྲུལ་དེ་ལ་སེམས་སྨད་དེ་བདག་གི་ཉེས་པ་འགྱོད་ཅིང་བཤགས་སོ། །ཞེས་སྨྲས་ནས་ཕྱིར་ཡང་ཁུར་དུ་ཁྱེར་ཏེ་དགེ་འདུན་གྱི་གནས་སུ་ཕྱིན་པ་དང ། དགེ་འདུན་དག་ཀྱང་གདུགས་ཚོད་ཀྱི་དུས་ལ་བབ་པས། མི་དེས་དགེ་འདུན་ལ་མེ་ཏོག་བྲིམས་ཏེ་སྦྲུལ་དེ་དད་པའི་སེམས་ཀྱིས་མེ་ཏོག་འབྲིམ་པ་ལ་བལྟའོ། །དེ་ནས་དགེ་འདུན་དག་ཟས་ཀྱི་བྱ་བ་བྱས་ནས་ཁ་ལག་བཀྲུས་ཏེ་སྦྲུལ་དེ་ལ་ཆོས་བཤད་དོ། །སྦྲུལ་དེ་རབ་ཏུ་དགའ་ནས་གསེར་གྱི་བུམ་པ་དྲུག་ཀྱང་དགེ་འདུན་ལ་ཕུལ་ཏེ་བསོད་ནམས་ཀྱི་ལས་བྱས་ནས་དེ་ནས་ཚེ་འཕོས་སོ། །ཚེའི་དུས་བྱས་ནས་དེའི་བསོད་ནམས་ཀྱིས་སུམ་ཅུ་རྩ་གསུམ་གྱི་ལྷར་སྐྱེས་སོ། །ཀུན་དགའ་བོ། དེའི་ཚེ་ན་སྦྲུལ་གདུག་པ་ཁུར་དུ་ཁྱེར་བའི་མི་དེ་ནི། ད་ལྟར་ང་ཡིན་ནོ། །སྦྲུལ་གདུག་པ་དེ་ནི། ཤཱ་རིའི་བུ་ཡིན་ནོ། །འདས་པའི་དུས་ན་ཡང་ཁུར་དུ་སྦྲུལ་ཁྱེར་བ་ལས་སྦྲུལ་གྱིས་སྤྱོས་ཏེ། དེ་ལ་ཡང་སེམས་སྨད་པས་ད་ཡང་དགེ་སློང་རྣམས་ལ་སེམས་སྨད་པ་ཡིན་ནོ། །ཀུན་དགའ་བོ་ལ་སོགས་པ་སངས་རྒྱས་ཀྱིས་གསུངས་པ་ལ་ཡི་རང་ནས་མངོན་པར་དགའོ། །གསེར་གྱི་བུམ་པའི་ལེའུ་སྟེ་ཉི་ཤུ་བརྒྱད་པའོ།། །།བྲམ་ཟེ་མོ་བདེ་བའི་ལེའུ། འདི་སྐད་བདག་གི་
357b
> གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་ཀ་ལནད་ཀ་གནས་པ་འོད་མའི་ཚལ་ན་དགེ་སློང་གྲངས་མེད་པ་དང་ཐབས་ཅིག་ཏུ་བཞུགས་སོ། །དེའི་ཚེ་ཡུལ་དེ་ན་བྲམ་ཟེ་ཤིན་ཏུ་དབུལ་ཞིང་ཕོངས་པ། ཅི་ཡང་མི་བདོག་པ་ཞིག་ཡོད་དེ།བྲམ་ཟེ་དེ་ཕོངས་ཆེས་ནས་ཀུན་ལ་ཇི་ལྟར་བྱས་ན། ཚེ་འདི་ཉིད་ལ་ལོངས་སྤྱོད་དང་ལྡན་པར་འགྱུར་རོ། །ཞེས་དྲིས་སོ། །དེ་ལ་མི་ཞིག་གིས་སྨྲས་པ། ཅི་ཁྱོད་མི་ཤེས་སམ། སངས་རྒྱས་བཅོམ་ལྡན་འདས་ཞེས་བྱ་བ་ད་ལྟར་འཇིག་རྟེན་དུ་གཤེགས་ཏེ་སེམས་ཅན་ཐམས་ཅད་ལ་ཕན་པའི་དོན་མཛད་དོ། །དེའི་ཉེ་གནས་འོད་སྲུང་ཆེན་པོ་དང ། མཽ་གལ་ཡ་ན་དང ། ཤཱ་རིའི་བུ་དང ། མ་འགགས་པ་ལ་སོགས་པ་འཕགས་པ་བཞི་ཡང་རྟག་ཏུ་དབུལ་ཕོངས་པ་ལ་ཕན་པའི་དོན་བྱེད་ཀྱི། གལ་ཏེ་ཁྱོད་དད་པའི་སེམས་ཀྱིས་འཕགས་པ་དེ་དག་ལ་ཞལ་ཟས་ཀྱིས་མཆོད་ན། འཕགས་པ་དེ་དག་གིས། ཚེ་འདི་ཉིད་ལ་ཁྱོད་ཅི་དང་ཅི་འདོད་པ་དེ་དང་དེ་དག་དང་ལྡན་པར་མཛད་དོ།། ཞེས་སྨྲས་སོ། །དེའི་ཚེ་ན་བྲམ་ཟེ་དེས་མི་དེས་སྨྲས་པ་ཐོས་ནས་རབ་ཏུ་དགའ་སྟེ་ཀུན་ཏུ་རྒྱུ་ཞིང་སློང་མོ་དང་གླ་ཟོས་ནས་ནོར་ཅུང་ཟད་ཅིག་རྙེད་དེ། ཕྱིར་ཁྱིམ་དུ་འོངས་ནས་ཞལ་ཟས་སྦྱར་ཏེ་འཕགས་པ་རྣམས་སྤྱན་དྲངས་ནས་བཤོས་གསོལ་ཏེ། འཇིག་རྟེན་འདི་ཉིད་ལ་ཕན་པར་རེའོ། །དེའི་ཚེ་བྲམ་ཟེ་དེའི་ཆུང་མ་བདེ་བ་ཞེས་བྱ་བ་དེས་དགེ་འདུན་ལ་
358a
> ༄#། །བཤོས་གསོལ་ནས་ཉིན་ཞག་གཅིག་པའི་བསླབ་ཚིགས་མནོས་སོ། །དེའི་ཚེ་རྒྱལ་པོ་གསལ་རྒྱལ་འཆག་ཏུ་སོང་བ་ལས་ཕྱིར་འོངས་པའི་ལམ་དུ་ཉེས་པ་བྱས་པའི་བཙོན་ཞིག་ལམ་ག་ན་ཤིང་ལ་བཅིངས་ཤིང་འདུག་པ་མཐོང་ངོ ། །བཙོན་དེས་རྒྱལ་པོ་གཤེགས་པ་མཐོང་ནས་དུས་ཏེ་ཁ་ཟས་ཤིག་བསླངས་པ་དང ། རྒྱལ་པོས་ཀྱང་སྦྱིན་ནོ། །ཞེས་བྱས་ནས་ཕྱིར་ཕོ་བྲང་དུ་གཤེགས་པ་དང་བརྗེད་པ་ལས་དེའི་ནུབ་མོ་ནམ་ཕྱེད་ཙམ་ན་བཙོན་ལ་ཁ་ཟས་སྦྱིན་པར་བྱས་པ་དྲན་ཏེ་ཁ་ཟས་བསྐྱལ་བར་བྱས་ནས་ཕོ་བྲང་ནང་གི་མི་ནི། གཅིག་ཀྱང་འགྲོ་ཕོད་པ་མེད་དེ། ནམ་ཕྱེད་ན་ཁ་ཟས་བསྐུར་དུ་ལམ་ན་འདྲེ་གདོན་དང ། སྲིན་པོས་འཇིགས་པས་སྲོག་དང་བསྡོས་ཏེ་འགྲོ་ནུས་པ་མེད་དོ། །དེའི་ཚེ་རྒྱལ་པོ་མི་དེའི་སྡུག་བསྔལ་བ་དང ། བཀྲེས་པས་ཉེན་པ་དྲན་ནས་དེ་ལ་ཤིན་ཏུ་སྙིང་བརྩེ་སྟེ་ངའི་ཡུལ་འདི་ནས་སུ་ཞིག་བཙོན་དེ་ལ་ཁ་ཟས་སྐྱེལ་ནུས་ན།་གསེར་སྲང་སྟོང་སྦྱིན་ནོ། །ཞེས་བསྒྲགས་ཀྱང་འགྲོ་ནུས་པ་མ་བྱུང་ངོ ། །དེའི་ཚེ་བྲམ་ཟེའི་ཆུང་མ་བདེ་བ་དེས་གཏམ་དུ་ཐོས་ན་འཇིག་རྟེན་པ་སུ་ཡང་རུང་སྟ་ཉིན་ཞག་གཅིག་པའི་བསླབ་ཚིགས་བརྒྱད་མནོས་ན། འདྲེ་གདོན་ལ་སོགས་པས་མི་བརྫི་སྟེ། གདོན་ཐམས་ཅད་ཀྱིས་གནོད་པ་བྱེད་མི་ནུས་སོ། །ཞེས་ཐོས་ཀྱི། བདག་ནི། རྒྱལ་
358b
> པོས་གར་བཏང་བར་འགྲོའོ་སྙམ་བསམས་ནས་ཆས་སོ། །དེ་ནས་རྒྱལ་པོས་བདེ་བ་ལ་ཁྱོད་ཁ་ཟས་འདི་དག་ཁྱེར་ལ་ཆེ་གེ་མོ་ཞིག་ན་བཙོན་འདུག་པ་དེ་ལ་བྱིན་ཅིག་དང ། གསེར་སྲང་སྟོང་སྦྱིན་ནོ། །ཞེས་དམ་བཅས་སོ། །དེ་ནས་བདེ་བ་རྒྱལ་པོའི་བཀའ་བཞིན་དུ་ཁ་ཟས་ཐོགས་ཏེ་ཚུལ་ཁྲིམས་དྲན་པར་བྱས་ནས་ལམ་དུ་ཞུགས་ཏེ་སོང་སོང་བ་ལས། གྲོང་ཁྱེར་གྱི་ཕྱི་རོལ་ཏུ་སྲིན་མོ་ལམ་པ་དང་ཕྲད་དོ། །དེའི་ཚེ་སྲིན་མོ་དེ་བུ་ལྔ་བརྒྱ་གསར་དུ་བཙས་པས་བཀྲེས་སྐོམ་གྱིས་ཉེན་ཏེ་བདེ་བ་འོངས་པར་མཐོང་ནས་བཟའ་བར་གཟས་སོ། །དེའི་ཚེ་བསྙེན་གནས་མ་ཚུལ་ཁྲིམས་མ་ཉམས་པས་སྲིན་མོས་མཐོང་ནས་ཕྱིར་སྐྲག་སྟེ། བསྙེན་གནས་མ་ཁྱོད་ཁྱེར་བའི་ཁ་ཟས་ལས་ཅུང་ཟད་ཅིག་བསླང་ངོ ། །ཞེས་སྨྲས་པ་དང ། བསྙེན་གནས་མས་ཀྱང་ཉུང་དུ་ཞིག་བྱིན་ཏེ་བྱིན་པ་ཉུང་མོད་ཀྱི། སྲིན་མོའི་མཐུས་མང་དུ་སྤྲུལ་པས་སྲིན་མོ་མ་སྨད་ཤིན་ཏུ་འགྲངས་པར་གྱུར་ཏོ། །དེ་ནས་སྲིན་མོས་བསྙེན་གནས་མ་ལ་ཁྱོད་ཀྱི་མིང་ཅི་ཞེས་དྲིས་པ་དང ། ཁོ་མོ་ནི། བདེ་བའོ། །ཞེས་སྨྲས་སོ། །འོ་ན་ཁོ་མོ་མ་སྨད་ཀྱང་ལྟོགས་པ་ལས་ཁྱོད་ཀྱིས་གསོས་ཀྱི། ཁོ་མོ་འདུག་པ་འདི་ན་གསེར་བུམ་པ་གང་ཡོད་ཀྱི་ཕྱིར་ལོག་པའི་ལམ་དུ་ཁྱེར་ཅིག་།ཁྱོད་ཕར་འགྲོ་ན་ཁོ་མོའི་ནུ་མོ་ཨ་ལམ་པ་ཡང་ལམ་ག་ན་འདུག་སྟེ་ཁྱོད་དང་ཕྲད་ཀྱི། ཁོ་མོའི་འཕྲིན་དུ་ཁྱོད་བདེའམ། ཁོ་མོ་ཡང་བུ་ལྔ་བརྒྱ་བདེ་བར་
359a
> ༄#། །བཙས་སོ། །ཞེས་གྱིས་ཤིག་།དེ་ནས་བསྙེན་གནས་མ་ལམ་དུ་ཞུགས་ཏེ་སོང་སོང་བ་ལས་རིང་པོ་མ་ལོན་པར་ཨལྨྤ་དང་ཕྲད་དོ། ། ལམྤལ་བུ་མོའི་འཕྲིན་སྤྲིང་པ་དང ། བུ་ལྔ་བརྒྱ་བདེ་བར་བཙས་སོ། །ཞེས་གཏམ་བྱས་པས་ཨ་ལམྤ་དགའ་སྟེ། བསྙེན་གནས་མ་ལ་ཁྱོད་ཀྱིས་ཁོ་མོའི་ཕུ་མོའི་འཕྲིན་དང་གཏམ་སྙན་བྱས་པ་ལེགས་ཀྱི། ཁོ་མོ་འདུག་པའི་གནས་འདི་ན་གསེར་བུམ་པ་གང་ཡོད་ཀྱི་ཕྱིར་ལོག་པའི་ལས་དུ་ཁྱེར་ཅིག་།ཁོ་མོ་ཅག་གི་མིང་པོ་གཅིག་ཀྱང་ལམ་ག་ན་འདུག་གི་།དེ་དང་ཕྲད་ན་ཁོ་མོ་ཅག་སྤུན་གཉིས་ཀྱི་འཕྲིན་དང ། བུ་ལྔ་བརྒྱ་བཙས་པའི་གཏམ་ཡང་གྱིས་ཤིག་ཅེས་བསྒོ་ནས་སོང་ངོ ། །དེ་ནས་ཡང་རིང་པོར་མ་ཕྱིན་པར་སྲིན་མོ་གཉིས་ཀྱི་མིང་པོ་དང་ཕྲད་དེ།་དེ་ལ་སྲིན་མོ་གཉིས་ཀྱི་འཕྲིན་དང་བུ་ལྔ་བརྒྱ་ཡང་བདེ་བར་བཙས་པའི་གཏམ་བྱས་ནས་དེ་ཡང་རབ་ཏུ་དགའ་སྟེ། ཁྱོད་ཀྱིས་ཁོ་བོའི་སྲིང་མོ་གཉིས་ཀྱི་འཕྲིན་བྱས་པ་ལེགས་ཀྱི།་ཁོ་བོ་འདུག་པའི་གནས་འདི་ན་གསེར་བུམ་པ་གང་ཡོད་ཀྱི། ཕྱིར་ལྡོག་པའི་ལམ་དུ་ཁྱེར་ཅིག་ཅེས་བསྒོའོ། །དེ་ནས་བསྙེན་གནས་མ་ཆས་ཏེ་སོང་སོང་བ་ལས་བཙོན་དེའི་དྲུང་དུ་ཕྱིན་ཏེ་ཁ་ཟས་བསྙོད་ནས་ཕྱིར་ལྡོག་པའི་ལམ་དུ་གསེར་བུམ་པ་གསུམ་ཡང་རྙེད་དོ། །རྒྱལ་པོས་ཀྱང་གསེར་སྲང་སྟོང་བྱ་དགར་བྱིན་པས། བྲམ་ཟེ་དབུལ་པོ་
359b
> ཁྱོ་ཤུག་གཉིས་ཡུལ་དེ་ན་ཤིན་ཏུ་ཕྱུག་ཅིང་ནོར་མང་བར་གྱུར་པས་ལྷག་པར་བསོད་ནམས་བྱེད་ཅིང་རིན་པོ་ཆེ་མང་བར་གྱུར་ཏོ། །རྒྱལ་པོས་ཀྱང་དེ་བསོད་ནམས་ལས་གྱུར་པར་ཤེས་ནས་བློན་པོར་བཅུག་སྟེ་ཤིན་ཏུ་ཕྱུག་པར་གྱུར་པས། ལྷག་པར་བསོད་ནམས་བྱེད་པ་ལ་དད་པའི་སེམས་སྐྱེས་ཏེ་སངས་རྒྱས་དང ། དགེ་འདུན་སྤྱན་དྲངས་ནས་མཆོད་པ་ཆེན་པོ་བྱས་སོ། །དེ་ལ་བཅོམ་ལྡན་འདས་ཀྱིས་ཆོས་བསྟན་པས་སེམས་རྣམ་པར་གྲོལ་ཏེ་རྒྱུན་དུ་ཞུགས་པའི་འབྲས་བུ་ཐོབ་བོ། །འཁོར་མང་པོ་དང ། ཀུན་དགའ་བོ་ལ་སོགས་པ་སངས་རྒྱས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །བྲམ་ཟེ་མོ་བདེ་བའི་ལེའུ་སྟེ་ཉི་ཤུ་དགུ་པའོ།། །།བམ་པོ་བརྒྱད་པ། སྦྱིན་པ་ཆེན་པོ་རྒྱ་མཚོར་ཞུགས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་དགེ་སློང་ཆེན་པོའི་དགེ་འདུན་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་སོ། །དེའི་ཚེ་ན་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་སོགས་པ་ལ་བསྙེན་བཀུར་བྱེད་པའི་གཡོག་ཅིག་དགོས་སོ། །ཞེས་བཀའ་སྩལ་པ་དང ། དེ་ནས་ཀུན་ཤེས་ཀཽཎྜི་ནྱ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་བདེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་བདག་
360a
> ༄#། །གིས་བསྙེན་བཀུར་ཡིད་བཞིན་དུ་བགྱི་ཞིང་ཆོས་གོས་དང་ལྷུང་བཟེད་གཟུང་ངོ ། །ཞེས་གསོལ་བ་དང ། བཅོམ་ལྡན་འདས་ཀྱིས་ཀཽཎྜི་ནྱ་ལ་ཁྱོད་ཀྱང་རྒས་འཁོགས་ཏེ་ཁྱོད་ཉིད་ལ་ཡང་བསྙེན་བཀུར་བྱེད་པ་དགོས་ཀྱི། ཀཽཎྜི་ནྱ་ཁྱོད་སྟན་ལ་འདུག་ཅིག་ཅེས་བཀའ་སྩལ་ཏོ། །དེ་བཞིན་དུ་འོད་སྲུང་དང ། ཤཱ་རིའི་བུ་དང ། མཽ་གལ་ཡན་ལ་སོགས་པ་ཉེ་གནས་ལྔ་བརྒྱ་སྙེད་ཀུན་གྱིས་བཅོམ་ལྡན་འདས་ལ་བསྙེན་བཀུར་བགྱིའོ། །ཞེས་གསོལ་ན་ཡང་གཅིག་ཀྱང་མ་གནང་ངོ ། །དེ་ནས་ཚེ་དང་ལྡན་པ་མ་འགགས་པས། བཅོམ་ལྡན་འདས་བསྙེན་བཀུར་བྱེད་པའི་དགེ་སློང་གང་ལ་དགྱེས་སྙམ་དུ་བརྟགས་ན། བཅོམ་ལྡན་འདས་ཀྱི་ཐུགས་ཀུན་དགའ་བོ་ལ་དགྱེས་པ་ནི། འདི་ལྟ་སྟེ། ཁང་བུ་བརྩེགས་པའི་ཤར་ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་བྱུང་བ་ན་ནུབ་ཕྱོགས་ཀྱི་ངོས་ལ་ཤར་ཅིང་ལྷན་པ་བཞིན་དུ། བཅོམ་ལྡན་འདས་ཀྱི་ཐུགས་ཀུན་དགའ་བོ་ལ་དགོངས་ཤིང་དགྱེས་པར་ཉེ་གནས་ཀུན་གྱིས་རྟོགས་ནས་ཚེ་དང་ལྡན་པ་ཤཱ་རིའི་བུ་དང ། མཽ་གལ་གྱི་བུ་ཆེན་པོ་གཉིས་ཀུན་དགའ་བོ་གང་ན་བ་དེར་སོང་སྟེ་དྲུང་དུ་ཕྱིན་པ་དང་ཀུན་དགའ་བོ་དང་ལྷན་ཅིག་ཏུ་ཡིད་མགུ་ཞིང་དགའ་བའི་གཏམ་རྣམ་བ་དུམ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཤཱ་རིའི་བུ་དང ། མཽ་གལ་ཡ་ནས་ཚེ་དང་ལྡན་པ་
360b
> ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ། བཅོམ་ལྡན་འདས་ལ་བསྙེན་བཀུར་བྱ་བར་དད་དམ། བཅོམ་ལྡན་འདས་ཀྱང་ཁྱོད་ཀྱིས་བསྙེན་བཀུར་བྱ་བར་དགྱེས་ཏེ། དེ་བཞིན་གཤེགས་པ་ལ་བསྙེན་བཀུར་བྱས་ན། ཁྱོད་ལ་ཕན་པའི་དོན་ཆེར་འགྱུར་རོ། །བཙུན་པ་ཤཱ་རིའི་བུ། བདག་ནི། བཅོམ་ལྡན་འདས་ལ་བསྙེན་བཀུར་བྱ་བར་མི་དད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི། སྒྲུབ་པར་དཀའ། བཟོད་པར་དཀའོ། །འདི་ལྟ་སྟེ། མེ་འབར་བ་ནི། སྒྲུབ་པར་དཀའ། བཟོད་པར་ཡང་དཀའ་བ་ཡིན་ཏེ། དེ་ལྟར་དེ་བཞིན་དུ་སངས་རྒྱས་བཅོམ་ལྡན་འདས་ཀྱང་སྒྲུབ་པར་དཀའ། བཟོད་པར་དཀའ་བས་ན། བདག་སངས་རྒྱས་བཅོམ་ལྡན་འདས་ལ་བསྙེན་བཀུར་བགྱིད་པར་མི་དད་དོ། །དེ་ནས་ཚེ་དང་ལྡན་པ་མཽ་གལ་ཡ་ནའི་བུ་ཆེན་པོས་ཀུན་དགའ་བོ་ལ་འདི་སྐད་ཅེས་སྨྲས་སོ། །ཀུན་དགའ་བོ། ཁྱོད་ལ་བཅོམ་ལྡན་འདས་དགོངས་ཤིང་དགྱེས་པ་ནི། འདི་ལྟ་སྟེ།་ཁང་བུ་བརྩེགས་པའི་ཤར་ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་བྱུང་བ་ན་ནུབ་ཕྱོགས་ཀྱི་རྩིག་ངོས་ལ་ཤར་ཅིང་ལྷན་པ་བཞིན་དུ། བཅོམ་ལྡན་འདས་ཀྱི་ཐུགས་ཀྱང་ཀུན་དགའ་བོ་ཁྱོད་ཀྱིས་བསྙེན་བཀུར་བྱ་བར་དགྱེས་ཀྱི། དད་པར་གྱིས་ཤིག་།དེ་བཞིན་གཤེགས་པ་ལ་བསྙེན་བཀུར་བྱས་ན། ཁྱོད་ལ་ཕན་པའི་དོན་ཆེར་འགྱུར་རོ། །ཞེས་སྨྲས་
361a
> ༄#། །སོ། །བཙུན་པ་མཽ་གལ་ཡན་ཆེན་པོ། །ཅི་སྟེ་བདག་ལ་བཅོམ་ལྡན་འདས་ཀྱིས་འདོད་པ་འདི་གསུམ་གནང་ན། བཅོམ་ལྡན་འདས་ལ་བསྙེན་བཀུར་བགྱིད་པར་དད་དོ། །འདི་ལྟ་སྟེ། བཅོམ་ལྡན་འདས་མི་གསོལ་བའི་ན་བཟའ་བདག་ལ་འཚལ་དུ་མི་སྩལ་བ་དང ། བཅོམ་ལྡན་འདས་མི་གསོལ་བའི་བཤོས་ཀྱི་ལྷག་མ་བདག་མི་འཚལ་བ་དང ། བདག་དུས་མ་མཆིས་པར་བཅོམ་ལྡན་འདས་ཀྱི་སྤྱན་སྔར་མཆིར་གནང་བར་བགྱི་ན་ནི། བཅོམ་ལྡན་འདས་ལ་བསྙེན་བཀུར་བགྱི་བར་དད་དོ། །དེ་ནས་ཚེ་དང་ལྡན་པ་ཤཱ་རིའི་བུ་དང ། མཽ་གལ་ཡན་ཆེན་པོས་ཚེ་དང་ལྡན་པ་ཀུན་དགའ་བོ་བསྙེན་བཀུར་བྱེད་དུ་དད་པར་བྱས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་གིས་བཅོམ་ལྡན་འདས་ལ་བསྙེན་བཀུར་བགྱིད་པར་ཚེ་དང་ལྡན་པ་ཀུན་དགའ་བོ་དད་པར་བགྱིས་ན། བཅོམ་ལྡན་འདས་ཀྱིས་བདག་ལ་འདོད་པ་འདི་གསུམ་གནང་ན། གདོད་བདག་གིས་བཅོམ་ལྡན་འདས་ལ་བསྙེན་བཀུར་བགྱི་བར་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ། །མཽ་གལ་ཡ་ནའི་བུ། དགེ་སློང་ཀུན་དགའ་བོ་དེ་ནི། མཁས་པ་ཤེས་རབ་ཅན་ཏེ། ཚངས་པ་མཚུངས་པར་སྤྱོད་པ་རྣམས་སྨད་པའི་ཚིག་དང་།རྗེས་
361b
> སུ་སྨད་པའི་ཚིག་གི་ཆོས་ཕྱིས་འབྱུང་བར་མཐོང་བས་ན། བདག་ལ་ཚངས་པ་མཚུངས་པར་སྤྱོད་པ་རྣམས་འདི་སྐད་དུ་དགེ་སློང་ཀུན་དགའ་བོ་ནི། གོས་དང་ཟས་ཀྱི་ཕྱིར་སྟོན་པ་ལ་བསྙེན་བཀུར་བྱེད་དོ། །ཞེས་སྨྲ་བར་མི་འགྱུར་བའི་ཕྱིར་མཽ་གལ་གྱི་བུ་དེ་ནི། དགེ་སློང་ཀུན་དགའ་བོའི་ངོ་མཚར་རྨད་དུ་བྱུང་བའི་ཆོས་སོ། །དགེ་སློང་ཀུན་དགའ་བོ་ནི། མཁས་པ་ཤེས་རབ་ཅན་ཏེ། དུས་ཤེས་ཤིང་དུས་རིག་པ་ལགས་ཤིང ། དུས་ཤེས་པར་འགྱུར་བ་ནི། བཅོམ་ལྡན་འདས་ལ་འཁོར་རྣམ་བཞི་བལྟ་བར་འགྲོ་བའི་དུས་ལ་བབ་པ་དང ། དུས་ལ་མ་བབ་པ་དང ། གཞན་ཡང་མུ་སྟེགས་ཅན་ཀུན་ཏུ་རྒྱུ་རྣམས་བཅོམ་ལྡན་འདས་ཀྱི་སྤྱན་སྔར་འགྲོ་བའི་དུས་ལ་བབ་པ་དང ། དུས་ལ་མ་བབ་པ་དང ། གཞན་ཡང་མུ་སྟེགས་ཅན་ཀུན་ཏུ་རྒྱུ་འདི་དག་ནི། བཅོམ་ལྡན་འདས་ཀྱིས་གསུངས་པ་ལ་ལན་ལྡོན་པར་སྤོབས་སོ། །འདི་དག་ནི། ལན་ལྡོན་པར་མི་སྤོབས་སོ། །བཅའ་བ་དང་བཟའ་བ་འདི་ནི་བཅོམ་ལྡན་འདས་ལ་བདེ་ཞིང་བསོད་པར་འགྱུར་ལ། འདི་ནི། བདེ་ཞིང་བསོད་པར་མི་འགྱུར་བར་ཤེས་པའི་ཕྱིར་ཏེ། མཽ་གལ་གྱི་བུ། འདི་ནི། དགེ་སློང་ཀུན་དགའ་བོའི་ངོ་མཚར་རྨད་དུ་བྱུང་བའི་ཆོས་སོ། །དེ་ནས་ཤཱ་རིའི་བུ་དང ། མཽ་གལ་གྱི་བུ་གཉིས་ཀྱིས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ལ་བསྙེན་བཀུར་བྱེད་པར་དད་པར་བྱས་པ་དང ། བཅོམ་
362a
> ༄#། །ལྡན་འདས་ཀྱིས་ཀྱང་ཀུན་དགའ་བོ་ནི། མཁས་པ་ཤེས་རབ་ཅན་ཏེ། དུས་ཤེས་ཤིང་དུས་རིག་གོ་།ཞེས་བསྔགས་པས། དགེ་སློང་རྣམས་ཐེ་ཚོམ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་ཀུན་དགའ་བོ་འདི་ཅིའི་རྒྱུ་ཅིའི་རྐྱེན་གྱིས་དུས་དང་ཚོད་ལ་མཁས་པར་གྱུར། བཅོམ་ལྡན་འདས་ཀྱིས་ཤཱ་རིའི་བུ་ལ་བཀའ་སྩལ་པ། སྔོན་འདས་པའི་བསྐལ་པ་ཚད་མེད་གྲངས་མེད་པའི་ཕ་རོལ་ཏུ་རྒྱལ་པོ་ཆེན་པོ་འཛམ་བུའི་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བྱེད་པ་ཞིག་བྱུང་ངོ ། ། དེའི་ཚེ་གྲོང་ཁྱེར་པ་རུ་ད་ཞེས་བྱ་བ་ན་བྲམ་ཟེ་ནྱ་གྲོ་དྷ་ཞེས་བྱ་བ་ཞིག་ཡོད་དེ། མཁས་པ། རིག་པ་དང་ལྡན་པ། སྨན་དང ། གཙུག་ལག་དང ། སྐར་མ་ལ་མཁས་པ་ཞིག་པས་རྒྱལ་པོ་དེའི་སྟོན་པ་བྱེད་དེ། རྒྱལ་ཕྲན་བརྒྱད་ཁྲི་བཞི་སྟོང་སྙེད་ཀྱང་དེ་ལ་རྒྱལ་པོ་ཆེན་པོ་དང་འདྲ་བར་བསྙེན་བཀུར་བྱེད་དེ་བསྒོ་བའི་ཚིག་ཀྱང་ཉོན་ཏོ། །བྲམ་ཟེ་དེ་ཕྱུག་ཁྱད་རྣམ་ཐོས་ཀྱི་བུ་དང་འགྲན་ཏེ། དེ་ལ་བུ་མེད་བས་རྟག་ཏུ་མི་དགའ་སྟེ་སེམས་ཁོང་དུ་ཆུད་ཅིང་འདུག་པ་ལས་ཇི་ལྟར་བྱས་ན་བུ་ཡོད་པར་འགྱུར་ཞེས་ཚངས་པ་དང ། བརྒྱ་བྱིན་དང ། དབང་ཕྱུག་དང ། ཉི་ཟླ་དང ། སྐར་མ་དང ། རི་དང ། ཆུ་དང ། ནགས་ཀྱི་ལྷ་ཀུན་ལ་མཆོད་ཅིང་རྗེད་དེ་ལོ་བཅུ་གཉིས་ལོན་ནས་ཆུང་མ་ཆེན་སེམས་ཅན་དང་ལྡན་པར་གྱུར་
362b
> ཏོ། །བུད་མེད་མཁས་པ་དག་ནི། སེམས་ཅན་དང་ལྡན་མ་ཐག་ཏུ་བུ་ཁྱེའུ་འམ། བུ་མོ་ཡིན་པ་ངེས་པར་རྟོགས་པས། དེ་ཡང་ཁྱེའུ་ཡིན་པར་ཤེས་ནས་བྲམ་ཟེ་ལ་གཏམ་སྨྲས་སོ། །བྲམ་ཟེ་དེ་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་མགུ་རངས་ཏེ་ཆུང་མའི་རིམ་གྲོ་ལྷག་པར་ཆེར་སྐྱེད་དོ། །དེ་ནས་ཟླ་བ་དགུ་ཚང་ནས་ཁྱེའུ་ཞིག་བཙས་ཏེ་གསེར་གྱི་མདོག་ཅན། སྐྲ་མཐོན་མཐིང་དུ་འདུག་པ། བཟང་བ། མཛེས་པ། མཚན་དང་ལྡན་པ་ཞིག་གོ་།དེ་ནས་བཙས་སྟོན་བྱས་ནས་མཚན་མཁན་བཀུག་སྟེ་མཚན་བལྟས་ནས་མིང་སྦྱིན་པ་ཆེན་པོ་ཞེས་བཏགས་སོ། །ཁྱེའུ་དེ་རིམ་གྱིས་ཆེར་སྐྱེས་ནས་དབྱར་དགུན་དང ། སྟོན་དཔྱིད་ཀྱི་གནས་ཀྱང་སོ་སོར་བྱས་ཏེ་ལོངས་སྤྱོད་བྱེད་དུ་བཅུག་གོ་།ཁྱེའུ་དེ་ཡང་ཡིད་གཞུངས་ཤིང་མཁས་པའི་བློ་དང་ལྡན་པ་ཞིག་བས་རིག་བྱེད་དང ། གཙུག་ལག་རྣམ་པ་བཅོ་བརྒྱད་ལ་སོགས་ཏེ། སྒྱུ་རྩལ་གང་ཡང་མི་ཤེས་པ་མེད་དོ། །ཕྱིས་སྦྱིན་པ་ཆེན་པོས་ཕ་མ་ལ་གསོལ་པ། བདག་ཕྱི་རོལ་ཏུ་འཆག་ཅིང་ལྟད་མོ་བལྟར་འགྲོའོ། །ཞེས་བྱས་པ་དང ། དེའི་ཕ་མས་ཀྱང་བུ་འཆག་ཏུ་འགྲོའོ། །ཞེས་ལམ་སྲང་ཕྱག་དར་བྱེད་དུ་བཅུག་སྟེ་རྒྱལ་མཚན་དང ། བ་དན་བསྒྲེངས་ནས་མེ་ཏོག་གིས་གཏོར་ཏེ་བདུག་སྤོས་ཀྱི་བདུག་པ་ལ་སོགས་པ་ཡོ་ལང་བཤམས་ནས་སྦྱིན་པ་ཆེན་པོ་གླང་པོ་རིན་པོ་ཆེ་སྣ་བདུན་གྱིས་བརྒྱན་པ་ལ་བསྐྱོན་ཏེ་
363a
> ༄#། །དྲིལ་བསྒྲགས། རྔ་བརྡུངས། རོལ་མོ་དང ། སིལ་སྙན་བཀྲོལ་ཏེ་འཁོར་བརྒྱ་སྟོང་སྙེད་ཀྱིས་བསྐོར་ནས་གྲོང་ཁྱེར་གྱི་ཕྱི་རོལ་ཏུ་སོང་ངོ ། །ཡུལ་མི་ཐམས་ཅད་ལམ་གྱི་གཡས་གཡོན་དུ་ཁང་བུ་བརྩེགས་པའི་སྟེང་ནས་མིག་མི་འཛུམ་པར་ལྟ་ཞིང་འདིའི་བྱིན་དང ། གཟི་བརྗིད་ནི། ཚངས་པ་དང་འདྲའོ། །ཞེས་བསྒྲགས་སོ། །དེ་ནས་སོང་སོང་བ་ལས་མུ་ཏོ་བ་དག་གོས་ཧྲུལ་པོ་གྱོན་ཅིང་སྣོད་ཆག་པ་དག་ཐོགས་ཏེ་ཅུང་ཟད་བསླང་ངོ ། །ཞེས་འབོད་པ་སྦྱིན་པ་ཆེན་པོས་ཐོས་ནས་དེ་དག་ལ་ཁྱེད་ཅིའི་ཕྱིར་འདི་ལྟར་ཉོན་མོངས་ཤིང་སྡུག་ཅེས་དྲིས་སོ། །དེ་ལ་ཁ་ཅིག་ནི། འདི་སྐད་དུ་བདག་ཅག་ལ་ཕ་མ་དང ། ཕུ་ནུ་དང ། བུ་སྨད་དང ། གཉེན་བཤེས་མ་མཆིས་པས་སྡུག་གོ་།ཞེས་ཟེར་རོ། །དེ་ལ་ཁ་ཅིག་ནི། བདག་ཅག་ཡུན་རིང་དུ་ནད་ཀྱིས་བཏབ་པས་མི་སོས་ཏེ་སྡུག་གོ་།ཞེས་ཟེར་རོ། །དེ་ལ་ཁ་ཅིག་ནི། བདག་ཅག་བག་མ་བྱས་པས་ཆོམ་པོས་བཅོམ་སྟེ་ཅི་ཡང་མི་བདོག་པས་སློང་མོ་བྱེད་དོ། །ཞེས་ཟེར་རོ། །སྦྱིན་པ་ཆེན་པོས་དེ་སྐད་སྨྲས་པ་ཐོས་ནས་མཆི་མ་དཀུ་སྟེ་སོང་ངོ ། །དེ་ནས་ཡང་ཕ་ཟད་ཅིག་ན་བཤན་པ་དག་ཅིག་སྲོག་ཆགས་བསད་ནས་པགས་པ་བ་ཤུ་བ་དང ། བསྙལ་གཏུབས་པ་དག་མཐོང་ངོ ། །སྦྱིན་པ་ཆེན་པོས་ཨེ་མ་ཧོ་འདི་དག་ཅི་བྱེད་ཅེས་དྲིས་ན། བདག་ཅག་ནི། ཕ་མེས་རྒྱུད་
363b
> ཀྱིས་འདི་འདྲི་བའི་གསོད་པའི་ལས་བྱེད་དེ། འདི་མ་བྱས་ན་མི་འཚོའོ། །ཞེས་ཟེར་རོ། །དེ་ལ་སྦྱིན་པ་ཆེན་པོ་ངོ་མཚར་དུ་གྱུར་ནས་ལྟ་མི་འདོད་པར་སོང་ངོ ། །དེ་ནས་ཕ་ཟད་དུ་ཕྱིན་པ་དང་ཞིང་པ་དག་ཞིང་རྨོས་ཏེ། ཞིང་རྨོས་པའི་ཤུལ་ན་སྲིན་བུ་མང་དུ་བྱུང་བ་ལ་བྱ་མང་པོ་དང ། སྦྲུལ་དག་འཐུ་ཞིང་ཟ་བ་མཐོང་བ་དང་འདི་དག་ཅི་བྱེད་ཅེས་དྲིས་ན། བདག་ཅག་ནི།་ཞིང་རྨོས་ཏེ་ས་གློངས་པའི་ཤུལ་དུ་ས་བོན་བཏབ་ན་ཕྱིས་མང་དུ་སྐྱེས་ཏེ། དེས་འཚོ་ཞིང་རྒྱལ་པོའི་དཔྱ་ཡང་འབུལ་ལོ། །ཞེས་ཟེར་རོ། །སྦྱིན་པ་ཆེན་པོ་དེ་ལ་ཡང་ངོ་མཚར་དུ་གྱུར་ནས་ཕ་ཟད་སོང་བ་དང ། རྔོན་པ་དག་བྱ་རྒྱ་བྲེས་པ་དང ། རྙི་བཙུགས་ནས་བྱ་རྣམས་བཤོར་བ་དང ། སེམས་ཅན་དག་བྱ་རྒྱ་དང་རྙིས་ཟིན་ནས་ལུས་རྡེབ་ཅིང་འཐེན་ཀྱང་མ་ཤོར་ཏེ་སྙིང་རྗེ་བའི་སྐད་ཕྱུང་ནས་ཤིན་ཏུ་འཇིགས་སྐྲག་པ་དག་མཐོང་ནས་ཁྱེད་ཅི་བྱེད་ཅེས་དྲིས་ན། བདག་ཅག་ཀྱང་རྒྱུད་ཀྱིས་འདི་འདྲ་བའི་གསོད་པའི་ལས་བྱེད་པས་འཚོའོ། །ཞེས་ཟེར་རོ། །སྦྱིན་པ་ཆེན་པོས་དེ་སྐད་སྨྲས་པ་ཐོས་ནས་ཤིན་ཏུ་ཡི་མུག་སྟེ་ཡང་ཕ་ཟད་སོང་བ་དང ། ཉ་ས་དག་ཉ་རྒྱས་ཉ་བཅུས་ནས་མང་དུ་ཟིན་ཏེ་ཐང་ལ་ཕུང་པོར་སྤུངས་ནས་ད་དུང་ཡང་འགུལ་བ་དག་མཐོང་ནས་འདི་དག་ཅི་བྱེད་ཅེས་དྲིས་ན། བདག་ཅག་རྒྱུད་ཀྱིས་ལས་གཞན་མི་བྱེད་ཀྱི། འདི་ལྟར་ཉ་བཤོར་ཞིང་འཚོ་བར་བྱེད་དོ།།
364a
> ༄#། །ཞེས་ཟེར་རོ། །སྦྱིན་པ་ཆེན་པོས་འདི་ལྟ་བུ་དག་མཐོང་ནས་འདི་སྙམ་དུ་བསམས་སོ། །སེམས་ཅན་འདི་དག་ནི། དབུལ་ཕོངས་པས་བགོ་བ་དང་བཟའ་བའི་ཕྱིར་འདི་ལྟ་བུའི་ཁ་ན་མ་ཐོ་བའི་ལས་གསོད་པ་ལ་སོགས་པ་བྱེད་དེ། འདི་དག་ནི། ཚེ་འཕོས་མ་ཐག་ཏུ་ངན་སོང་གསུམ་དུ་ལྷུང་སྟེ་མུན་པ་ནས་མུན་པར་འགྲོ་ཞིང་ཐར་པའི་དུས་མེད་དོ་སྙམ་བསམས་ནས་ཕྱིར་ཁྱིམ་དུ་འོངས་ཏེ་ཉིན་མཚན་དུ་དེ་སེམས་ཤིང་མི་དགའ་ནས་ཕའི་དྲུང་དུ་སོང་སྟེ་ཕ་ལ་བདག་གསོལ་བ་ཞིག་མཆིས་ཀྱི།་གནོང་ཞིག་ཅེས་སྨྲས་སོ། །ཕས་ཀྱང་བུ། ཁྱོད་ཅི་ཟེར། ཁྱོད་སྨྲ་བ་བཞིན་དུ་བྱའོ། །ཞེས་སྨྲས་སོ། །ཡབ། བདག་སྔོན་ཕྱི་རོལ་ཏུ་འཆག་ཏུ་མཆིས་པ་ལས་མི་མང་པོ་གོས་དང ། ཁ་ཟས་ཀྱི་ཕྱིར་ཐམས་ཅད་ཉོན་མོངས་ཏེ། གཅིག་ལ་གཅིག་གསོད་པ་དང ། རྫུན་དང ། དབང་ཟ་བ་དང ། མི་དགེ་བའི་ལས་རྣམ་པ་སྣ་ཚོགས་བགྱིད་པ་མཐོང་ནས་དེ་དག་ལ་སྦྱིན་པ་བགྱིད་པར་བསམས་ཀྱི། ཡབ་ཀྱི་བང་མཛོད་ཆེན་པོ་ལས་ཕོངས་བྲེལ་པ་དག་གི་ཕྱིར་ཡིད་བཞིན་དུ་སྤྱོད་དུ་གནོད་ཞིག་།ཕས་སྨྲས་པ། ངས་བང་མཛོད་དང ། རིན་པོ་ཆེ་མང་དུ་བསགས་པ་ཐམས་ཅད་ཁྱོད་ཀྱི་ཕྱིར་བྱས་པར་ཟད་ན། ཅིའི་ཕྱིར་ཁྱོད་ཟེར་བ་མི་ཉན་ཞེས་སྨྲས་སོ། །དེ་ནས་སྦྱིན་པ་ཆེན་པོས་ཕས་གནང་བའི་ལུང་
364b
> ཐོབ་ནས་ཡུལ་མི་ཐམས་ཅད་ལ་སྦྱིན་པ་ཆེན་པོ་སྦྱིན་གཏོང་ཆེན་པོ་བྱེད་ཀྱི། ཐམས་ཅད་འདུས་ཤིང་ཤོག་ཅིག་ཅེས་བསྒྲགས་སོ། །དེའི་ཚེ་དགེ་སྦྱོང་དང ། བྲམ་ཟེ་དང ། དཔུལ་ཞིང་ཕོངས་པ་མགོན་མེད་པ་དང ། ནད་པ་ལ་སོགས་ཏེ་གྲོང་ཁྱེར་གྱི་ཕྱི་རོལ་ན་ལམ་ཐོག་ཐག་ཏུ་གང་ངོ ། །དེ་དག་ཀྱང་དཔག་ཚད་བརྒྱ་དང ། ཉིས་བརྒྱ་དང ། སུམ་བརྒྱ་དང ། བཞི་བརྒྱ་དང ། ལྔ་བརྒྱ་དང ། དཔག་ཚད་སྟོང་གི་ལམ་ནས་འོངས། ཁ་ཅིག་ནི། དཔག་ཚད་ཉིས་སྟོང་དང ། སུམ་སྟོང་དང ། བཞི་སྟོང་དང ། ལྔ་སྟོང་ནས་དཔག་ཚད་ཁྲིའི་བར་དུ་ལྷགས་ཏེ། དེ་དག་སྤྲིན་བཞིན་དུ་འདུས་ནས་ཐམས་ཅད་ལ་ཡིད་བཞིན་དུ་སྦྱིན་པ་ནི། གོས་འདོད་པ་ལ་གོས། ཟས་འདོད་པ་ལ་ཟས། རིན་པོ་ཆེ་གསེར་དང ། དངུལ་དང ། བཻ་ཌཱུརྱ་དང ། མུ་ས་ར་གལ་པ་དང ། བཞོན་པ་དང ། ཐེག་པ་དང ། ཁྱོགས་དང ། སྐྱེད་མོས་ཚལ་དང ། ཞིང་དང ། རྐང་འགྲོ་ལ་སོགས་ཏེ། ཡིད་བཞིན་དུ་སྦྱིན་པ་བྱས་སོ། །དེ་ལྟར་སྦྱིན་པ་ལ་ཞུགས་ཏེ་ཡུན་རིང་ཞིག་ལོན་པ་དང ། བང་མཛོད་སུམ་ཆ་གཅིག་ཟད་ནས་མཛོད་སྲུང་གིས་བྲམ་ཟེ་ལ་འདི་སྐད་ཅེས་སྨྲས་སོ། །སྲས་ཀྱིས་བང་མཛོད་ནས་སྦྱིན་པ་བྱས་ནས་སུམ་ཆ་གཅིག་ནི། ཟད་དེ་སུམ་གཉིས་ལས་མ་ལུས་ན། ཕན་ཚུན་དུ་འདྲུལ་བའི་སྐྱེས་དང ། ཚོང་ཟོང་ཅི་ལས་བགྱིད་དགོངས་ཤིག་ཅེས་སྨྲས་སོ། །ཁོ་བོ་ནི། བུ་འདི་ལ་བྱམས་པས་ངོ་མི་ལྡོག་གི།
365a
> ༄#། །བང་མཛོད་སྟོངས་ཀྱང་བླའོ། །ཞེས་བསྒོའོ། །དེ་ནས་ཡང་རིང་ཞིག་ལོ་ན་པ་དང་བང་མཛོད་སུམ་གཉིས་ཟད་དེ་སུམ་ཆ་ཙམ་ལུས་པ་དང ། མཛོད་སྲུང་གིས་ཡང་བྲམ་ཟེ་ལ། ད་ནི། བང་མཛོད་སུམ་གཉིས་ཙམ་ཟད་དེ་སུམ་ཆ་ཙམ་ལས་མ་ལུས་ན། ཕན་ཚུན་སྐྱེས་བསྐུར་བ་དང ། ཚོང་ཟོང་ཅི་ལས་བྱ་ཞེས་སྨྲས་སོ། །བྲམ་ཟེ་དེས་བསྒོ་བ། ཁོ་བོའི་བུ་སྡུག་ཆེས་ཏེ་ངོ་མི་ལྡོག་པས་སྨྲ་མི་ཕོད་ཀྱི། ཁྱོད་བདག་གིས་ཐབས་ཅི་ལེགས་སུ་བྱོས་ལ་བྲེལ་ཅིང་མི་ཁོམ་པ་ལྟར་ཐ་སྙད་ཐོགས་ཤིག་།མཛོད་སྲུང་གིས་བྲམ་ཟེ་ལས་ལུང་ཐོབ་ནས་མཛོད་སྒོ་བཅད་དེ་དོན་གཉེར་དུ་སོང་ངོ ། །དེ་ནས་སློང་བ་དག་སྦྱིན་པ་ཆེན་པོའི་ཐད་དུ་ལྷགས་ནས་བར་འགའ་ནི། མཛོད་སྲུང་མི་རྙེད་དེ་མཛོད་སྒོ་མི་ཕྱེད། གལ་ཏེ་མཛོད་སྲུང་འོངས་ན་ཡང་ཡིད་བཞིན་དུ་མི་སྟེར་བས་སྦྱིན་པ་ཆེན་པོས་འདི་སྙམ་དུ་བསམས་སོ། །འདི་ལྟར་གྱུར་པ་འདི་ནི། མཛོད་སྲུང་གིས་ཐུགས་མི་ཐུབ་པས་ཕའི་མན་ངག་འོངས་ཀྱི། ཡོང་ཡང་བུས་ཕའི་བང་མཛོད་སྟོངས་པར་བྱ་བར་མི་རིགས་ཀྱི། བདག་གིས་ད་ཐབས་ཅི་ཞིག་བྱས་ན། རིན་པོ་ཆེ་ཡིད་བཞིན་དུ་རྙེད་དེ་སྐྱེ་བོ་མང་པོ་ལ་ཕན་ཐོགས་པར་འགྱུར་བ་བསམས་ནས་མི་དག་ལ་འདི་སྐད་ཅེས་དྲིས་སོ། །འཇིག་རྟེན་ན་ལས་ཅི་ཞིག་བྱས་ན། རིན་པོ་ཆེ་ཡིད་བཞིན་དུ་རྙེད་
365b
> དེ་ནོར་དབྱིག་མང་དུ་རྙེད་ཅིང་ཟད་མི་ཤེས་པར་འགྱུར་ཞེས་དྲིས་པ་དང ། ཁ་ཅིག་ནི། ཞིང་མང་དུ་རྨོས་ན་ནོར་དབྱིག་མང་པོར་འགྱུར་རོ། །ཞེས་ཟེར་རོ། ཁ་ཅིག་ནི། རྐང་འགྲོ་སྤེལ་ཏེ་སྤོགས་བྱས་ན་ནོར་མང་དུ་རྙེད་དོ། །ཞེས་ཟེར་རོ། ཁ་ཅིག་ནི། ལམ་རིང་པོར་ཚོང་སྤོགས་བྱས་ན་ནོར་མང་དུ་རྙེད་དོ། །ཞེས་ཟེར་རོ། ཁ་ཅིག་ནི། རྒྱ་མཚོར་ཞུགས་ཏེ་ནོར་བུ་རིན་པོ་ཆེ་བླངས་ན་རིན་པོ་ཆེ་མང་དུ་འགྱུར་རོ། །ཞེས་ཟེར་རོ། །སྦྱིན་པ་ཆེན་པོས་དེ་དག་གིས་སྨྲས་པ་ཐོས་ནས་ཞིང་རྨོ་བ་དང ། རྐང་འགྲོ་སྤེལ་བ་དང ། ལམ་རིང་པོར་ཚོང་ལ་འགྲོ་བ་ནི། ངའི་ཆ་མ་ཡིན་གྱི། རྒྱ་མཚོར་འཇུག་པ་འབའ་ཞིག་ངའི་ཆའོ། །ཞེས་སྨྲས་ནས་རྒྱ་མཚོར་འཇུག་གོ་སྙམ་བསམས་ཏེ་ཕ་མ་ལ་འདི་སྐད་ཅེས་སྨྲས་སོ། །བདག་ནི། རྒྱ་མཚོ་ནས་རིན་པོ་ཆེ་མང་པོ་བླངས་ཏེ་དབུལ་ཕོངས་པ་ལ་སྦྱིན་པ་ཡིད་བཞིན་དུ་བགྱིའོ། །བདག་རྒྱ་མཚོར་རིན་པོ་ཆེ་ལེན་དུ་མཆིར་གནོང་ཞིག་ཅེས་སྨྲས་སོ། །དེའི་ཕ་མས་དེ་སྐད་ཅེས་སྨྲས་པ་ཐོས་ནས་འཁམས་ཏེ་བུ་ལ་འདི་སྐད་ཅེས་སྨྲས་སོ། །འཇིག་རྟེན་ན་དབུལ་འཕོངས་པ་དག་ནི། བློ་མེད་དེ། ལུས་དང་སྲོག་དང་བསྔོས་ནས་འགྲོ་བར་བྱེད་དོ། །ཁྱོད་ཅིས་ཕོངས་ནས་དེ་ལྟ་བུར་སེམས། ཁྱོད་སྦྱིན་པ་བྱེད་འདོད་ན། ཁྱིམ་ན་ཡོད་པའི་ནོར་ཐམས་ཅད་སྦྱིན་པར་བྱོས་ཤིག་།རྒྱ་མཚོར་ནི། འགྲོར་མི་རུང་སྟེ། རྒྱ་མཚོའི་ནང་ན་ཆུ་རླབས་
366a
> ༄#། །དང ། དབའ་ཀློང་འཁྱིལ་བ་དང ། ཆུ་སྲིན་དང ། ཀླུ་གདུག་པ་དང ། སྲིན་མོ་དང ། རི་ཆུའི་མདོག་ཅན་ལ་སོགས་ཏེ་ཤིན་ཏུ་ཡང་བའི་བགེགས་མང་དུ་ཡོད་པས་ཐར་པར་དཀའ་ན། ཁྱོད་ཅིས་ཕོངས་ནས་སྲོག་དང་བསྔོ་བར་བྱེད། འདི་ལ་ནི། ཉན་པ་མེད་ཀྱི། མ་སེམས་པར་འདུག་ཅིག་ཅེས་བསྒོའོ། །སྦྱིན་པ་ཆེན་པོས་དེ་སྐད་ཅེས་བསྒོ་བ་ཐོས་ནས་བསམ་པ་བཞིན་དུ་མ་གྲུབ་པས་ཡི་དམ་བཅས་ཏེ། བསམ་པ་འདི་མ་གྲུབ་ཀྱི་བར་དུ་ཕ་མའི་མདུན་དུ་ས་ལ་ཁས་བུབ་ཏུ་ཉལ་ཏེ་མི་ལྡང་ངོ་སྙམ་བསམས་ནས་ཡབ་ཡུམ་གྱིས་མཁྱེན་པར་མཛོད་ཅིག་།བདག་ནི། བསམ་པ་བཞིན་དུ་མ་གྲུབ་ཀྱི་བར་དུ་ཁས་བུབ་ཏུ་ཉལ་བ་འདི་ལས་མི་ལྡང་ངོ ། །ཞེས་སྨྲས་སོ། །དེ་ནས་ཕ་མ་མི་དགའ་སྟེ་གཉེན་བཤེས་དང་བགྲོས་ནས་རྒྱ་མཚོའི་ནང་དུ་བགེགས་ཡང་བ་མང་དུ་ཡོད་པའི་གཏམ་ཡང་བྱས། བདག་ཀྱང་རྨོངས་པ་ལས་ལོ་བཅུ་གཉིས་ཀྱི་བར་དུ་ལྷ་ཀུན་ལ་མཆོད་དེ་ཁྱོད་ལྟ་ཞིག་ངའི་བུར་སྐྱེས་ན། ངེད་མ་དོར་བར་ཟན་ཟོ་ཞིག་ཅེས་ཞག་གཅིག་ཞག་གཉིས་ནས་ཞག་དྲུག་གི་བར་དུ་ཚིག་རྣམ་པ་སྣ་ཚོགས་ཀྱིས་གྲོས་བཏབ་ཀྱང་མ་ཉན་ཏེ། སྔར་ཇི་སྐད་ད་སྨྲས་པ་ལས་མ་ལྡོག་གོ་།ཕ་མ་སྐྲག་ནས་ཡང་འདི་སྐད་ཅེས་སྨྲས་སོ། །བདག་གི་བུ་འདི་ཐོག་མ་ནས་ད་ཙམ་གྱི་བར་དུ་བྱ་བ་བརྩམས་པ་མཐར་མ་གྲུབ་ཀྱི་བར་དུ་མི་
366b
> གཏོང་བས། རྒྱ་མཚོར་བཏང་ན་བརྒྱ་ལ་ཕྱིར་ལྡོག་ཀྱང་སྲིད་ཀྱི། མ་བཏང་ན་ཞག་བདུན་ལོན་ན་འཕྲལ་དུ་བྱེ་བྲག་འབྱེ་སྟེ། ད་ནི། གཏང་དགོས་སོ་སྙམ་བགྲོས་ནས་བུའི་དྲུང་དུ་སོང་སྟེ་ལག་པ་ནས་བཟུང་ནས་བུ་ལོངས་ལ་ཟན་ཟོ་ཞིག་།ཡིད་བཞིན་དུ་འགྲོ་བར་གནང་ངོ ། །ཞེས་སྨྲས་པ་དང ། སྦྱིན་པ་ཆེན་པོ་ཡང་ལངས་ཏེ་བཟའ་བ་ཟོས། བཏང་བ་འཐུངས་སོ། །དེ་ནས་ཕྱི་རོལ་ཏུ་བྱུང་སྟེ་མི་མང་པོ་ལ་ཁོ་བོ་རྒྱ་མཚོར་རིན་པོ་ཆེ་ལེན་དུ་འགྲོའོ། །ཁྱེད་སུ་འགྲོར་དགའ་བ་རྣམས་དང་འགྲོགས་ཏེ་འདོང་གི། དེ་དད་པོན་ཡང་ཁོ་བོས་བྱ་ལ་ཡོ་བྱེད་ཀྱང་ཁོ་བོས་སྦྱར་རོ། །ཞེས་བསྒྲགས་སོ། །དེའི་ཚེ་མི་ལྔ་བརྒྱ་ཙམ་ཡང་འགྲོ་བར་ཁས་བླངས་ནས་སོ་སོ་ནས་ཡོ་བྱད་སྦྱར་ཏེ་ནམ་འགྲོ་བའི་དུས་ཀྱང་བྱས་ནས་དུས་བཞིན་དུ་ལམ་དུ་ཞུགས་ཏེ་ཆོས་སོ། ། ལམ་དུ་འཇུག་པའི་ཚེ་ཁྱེའུའི་ཕ་མ་དང ། རྒྱལ་པོ་དང ། རྒྱལ་བུ་དང ། བློན་པོ་ལ་སོགས་ཏེ་ཡུལ་མི་ཐམས་ཅད་ཀྱིས་ཀྱང་བསྐྱལ་ནས་རྫོངས་བསྟབས་སོ། །ཕ་མས་ཀྱང་ངུས་ཏེ་ཕྱི་ཕྱག་བྱས་ནས་ཞག་དུ་མའི་ལམ་འདས་པ་དང ། འབྲོག་སྟོང་དུ་ཕྱིན་ཏེ་ནུབ་མོ་དགོང་མ་ལ་དུ་མི་རྒོད་ཀྱིས་བཅོམ་ནས་ནོར་རྫས་ཀུན་འཕྲོག་གོ་།དེ་ནས་སོང་སོང་བ་ལ་གྲོང་ཁྱེར་ཤུ་པ་ར་ཞེས་བྱ་བར་ཕྱིན་ནས་གྲོང་ཁྱེར་དེ་ན་བྲམ་ཟེ་ཀ་པི་ལི་ཞེས་བྱ་བ་དང་ཕྲད་དེ། བྲམ་ཟེ་དེའི་ཁྱིམ་དུ་སོང་ནས་བྲམ་ཟེ་དེ་ལས་སྦྱིན་པ་ཆེན་པོས་གསེར་སྲང་སུམ་སྟོང་བསླང་བར་བྱས་སོ། །
367a
> ༄#། །དེའི་ཚེ་ན་བྲམ་ཟེ་དེ་ལ་བུ་མོ་གསེར་གྱི་མདོག་ཅན། སྐྲ་མཐོན་མཐིང་ཁར་འདུག་པ། རྒྱལ་ཕྲན་བརྒྱད་ཁྲི་བཞི་སྟོང་སྙེད་ཀྱི་རྒྱལ་བུ་ཐམས་ཅད་ཀྱིས་བསླངས་ན་ཡང་མ་སྟེར་བ་ཞིག་ཡོད་དེ། དེའི་ཚེ་ན་སྦྱིན་པ་ཆེན་པོ་བྲམ་ཟེ་དེའི་སྒོར་སོང་སྟེ་བྲམ་ཟེ་ཀ་པི་ལི་འདུག་གམ་ཞེས་དྲིས་པའི་ཚེ་བུ་མོས་ཁྱིམ་གྱི་ནང་ནས་སྦྱིན་པ་ཆེན་པོའི་སྐད་ཐོས་པ་ཙམ་གྱིས་སྒོ་ཕྱི་ན་སྐད་གྲག་པ་འདི་ཁོ་མོའི་ཁྱིམ་ཐབ་ཡིན་ནོ། །ཞེས་ཕ་མ་ལ་སྨྲས་སོ། །དེ་ནས་བྲམ་ཟེ་སྒོར་བྱུང་ནས་ཕྲད་པ་དང ། ཁྱེའུ་དེ་ལ་འདི་ནི། ངེས་པར་གཞན་བས་འཕགས་སོ་སྙམ་བསམས་སོ། །ཁྱེའུ་དེས་གསེར་བསླངས་པ་དང ། བྲམ་ཟེས་ཀྱང་སྦྱིན་པར་གནང་ནས་ལག་པ་ཡ་གཅིག་ཏུ་ནི། གསེར་ཐོགས། ལག་པ་ཡ་གཅིག་གིས་བུ་མོ་ཁྲིད་དེ།་བུ་མོ་འདི་ཡང་ཁྱོད་ཀྱི་ཆུང་མར་སྦྱིན་གྱི། ལོངས་ཤིག་ཅེས་སྨྲས་པ་དང ། སྦྱིན་པ་ཆེན་པོས་སྨྲས་པ། བདག་ནི། རྒྱ་མཚོ་ཆེན་པོར་རིན་པོ་ཆེ་ལེན་དུ་འགྲོ་སྟེ། རྒྱ་མཚོའི་ནང་ན་བགེགས་ཤིན་ཏུ་མང་བས་ཁོ་བོ་འཁོར་ཏམ་མི་འཁོར་གྱི་གཏོལ་མེད་དེ། ཁྱོད་ཀྱི་བུ་མོ་ཆུང་མར་ལེན་པའི་ཐུགས་མི་ཐུབ་བོ། །བྲམ་ཟེས་སྨྲས་པ། ཁྱོད་བདེ་བར་འཁོར་ན་བུ་མོ་འདི་ཆུང་མར་ལོངས་ཤིག་ཅེས་སྨྲས་པ་དང ། སྦྱིན་པ་ཆེན་པོས་ཀྱང་ཕྱིར་འཁོར་ན་དེ་བཞིན་དུ་བྱའོ། །ཞེས་སྨྲས་སོ། །དེ་ནས་བྲམ་ཟེས་ཀྱང་གསེར་སྲང་སུམ་
367b
> སྟོང་དང ། གཞན་ཡང་ཡོ་བྱད་ཅི་དགོས་པ་ཀུན་སྦྱར་ཏེ། དེ་ནས་ཆས་པས་རྒྱ་མཚོའི་ངོགས་སུ་ཕྱིན་ཏོ། །དེ་ནས་གྲུ་བཅོས་ཏེ་གྲུའི་ནང་དུ་ཞུགས་ནས་དེ་ནས་ཐག་པ་བདུན་གྱིས་བརྟོད་དེ་གྲུའི་ནང་ནས་འདི་སྐད་ཅེས་སྨྲས་སོ། །རྒྱ་མཚོའི་ནང་ན་བགེགས་འདི་དག་ཡོད་དེ། འདི་ལྟ་སྟེ། རླུང་ནག་པོ་དང ། སྲིན་པོ་དང ། ཆུའི་དབའ་རླབས་འཁྱིལ་པ་དང ། ཀླུ་གདུག་པ་དང ། ཆུའི་མདོག་ལྟ་བུའི་རི་དང ། ཆུ་སྲིན་ལ་སོགས་པའི་བགེགས་ཡང་བ་མང་དུ་ཡོད་ཀྱི། ཁྱེད་ལས་འགྲོར་མི་དད་པ་ཞིག་ཡོད་ན་འདི་ལས་ཕྱིར་ལོག་ཅིག། །ཕྱིས་འགྱོད་པར་གྱུར་ཏ་རེ། གལ་ཏེ་ལུས་དང་སྲོག་ལ་མི་ལྟ་སྟེ། ཕ་མ་དང ། ཕུ་ནུ་དང ། བུ་དང ། ཆུང་མ་དང ། གཉེན་བཤེས་ལ་མི་ཆགས་ན་འདོང་ངོ ། །གལ་ཏེ་བདེ་བར་ཕྱིན་ན། རིན་པོ་ཆེ་སྣ་བདུན་གྱིས་བུ་ཚ་རབས་བདུན་ཚུན་ཆད་ཕྱུག་པར་འགྱུར་ཏེ། ལོངས་སྤྱོད་ཟད་མི་ཤེས་པར་འགྱུར་རོ། །ཞེས་སྨྲས་ནས་ཐག་པ་གཅིག་བཅད་དོ། །དེ་བཞིན་དུ་ཉི་མ་བདུན་གྱི་བར་དུ་ཉིན་རེ་ལན་རེ་དེ་སྐད་སྒྲས་ནས་རྟོད་ཐག་རེ་རེ་བཅད་དེ་རླུང་དང་སྦྱར་ཏེ་གཡོར་ཤིང་བསྒྲེང་བས་མགྱོགས་ཁྱོད་མདའ་བཞིན་སོང་ངོ ། །དེ་ནས་ཚོང་བ་དག་དང་རིན་པོ་ཆེའི་གླིང་དུ་ཕྱིན་ནས་སྦྱིན་པ་ཆེན་པོ་མང་དུ་ཐོས་པས་རིན་པོ་ཆེ་བརྟག་པ་ལ་ཡང་ཤིན་ཏུ་མཁས་ཏེ། རིན་པོ་ཆེ་བཟང་ངན་དང ། ལྕི་ཡང་དང ། ཇི་ཙམ་རི་བའི་རིན་ཐང་
368a
> ༄#། །ཕན་ཚུན་ཚོང་པ་རྣམས་ལ་བསྟན་ནས་རིན་པོ་ཆེ་ཁ་ངོག་འདི་ལྟ་བུ་ནི། ཡང་མོད་ཀྱི། རིན་ཆེའོ། །རིན་པོ་ཆེ་འདི་དག་ནི། ལྕི་ཡང་རིན་ཆུང་གི་།མ་ལེན་ཅིག་།ཧ་ཅང་ཡང་མང་ཆེས་ན་གྲུ་ལྕི་བས་འབྱིང་ངོ ། །ཧ་ཅང་ཉུང་ཆེས་ན་ཡང་ཉོན་མོངས་ཏེ་སོང་སོང་བའི་དོན་མེད་པས། འདི་ཙམ་ཞིག་ནི། རན་ནོ། །ཞེས་བྱ་བ་ལ་སོགས་པའི་ཚོད་ཀྱང་བསྟན་ནས་རིན་པོ་ཆེ་གྲུར་བརྫངས་ཏེ་ཅི་ལ་ཡང་མ་རག་ནས་ད་ཕྱིར་འདོང་ངོ ། །ཞེས་ཆས་པ་དང ། སྦྱིན་པ་ཆེན་པོ་གྲུའི་ནང་དུ་འོང་དུ་མ་བཏུབ་ནས་ཚོང་པ་རྣམས་ལ་ཁོ་བོ་ནི། ཀླུའི་རྒྱལ་པོའི་ཕོ་བྲང་ནས་ཡིད་བཞིན་གྱི་ནོར་བུ་རིན་པོ་ཆེ་མ་ཐོབ་ཀྱི་བར་དུ་མི་ལྡོག་གོ་།ཞེས་སྨྲས་སོ། །དེ་ནས་ཚོང་པ་རྣམས་ཀྱིས་དུས་ཏེ་མྱ་ངན་གྱིས་ཡི་མུག་ནས་འདི་སྐད་ཅེས་སྨྲས་སོ། །བདག་ཅག་ཚོང་པ་འདི་རྣམས་ནི། སྐྱེས་བུ་དེད་དཔོན་ཁྱོད་ཀྱི་གཡོག་ཏུ་འོངས་ཏེ། ད་ཁྱོད་ཀྱིས་འདིར་དོར་ཏོ་མི་འགྲོ་ན་བདག་ཅག་ཀྱང་ཕྱིར་ཁྱིམ་དུ་མི་ཕྱིན་ཏེ། ཐམས་ཅད་འཁྱམས་པར་འགྱུར་རོ། །སྦྱིན་པ་ཆེན་པོས་སྨྲས་པ། ཚོང་པ་ཁྱེད་ཅག་མི་ཉེས་པར་ཡུལ་དུ་ཕྱིན་པར་ཁོ་བོས་ཀྱང་སྨོན་ལམ་གདབ་བོ། །ཞེས་བོག་པོར་ལག་ཏུ་བླངས་ཏེ་ཕྱོགས་བཞིར་མཆོད་ནས་འདི་སྐད་ཅེས་སྨྲས་སོ། །བདག་ནི། རིན་པོ་ཆེ་བླངས་ཏེ་སེམས་ཅན་ཕོངས་པ་ལ་སྤྱིན་པར་མ་ཟད་ཀྱི། དེ་ལྟར་སྦྱིན་པ་བྱེད་
368b
> པའི་བསོད་ནམས་དེས་སངས་རྒྱས་སུ་འགྲུབ་པའི་ཕྱིར་རོ། །བདག་གིས་སྨྲས་པ་འདི་བདེན་ཏེ་སྨོན་ལམ་བཞིན་དུ་འགྲུབ་ན། ཚོང་པ་འདི་དག་རིན་པོ་ཆེ་དང་བཅས་པ་ཉེ་ཞེ་མེད་པར་འཛམ་བུའི་གླིང་དུ་བདེ་བར་ཕྱིན་པར་ཤོག་ཅིག་ཅེས་སྨོན་ལམ་བཏབ་ནས་ཐག་པ་བཅད་དེ་གཡོར་ཤིང་བསྒྲེངས་ནས་ཕྱིར་འཛམ་བུའི་གླིང་དུ་བདེ་བར་དོང་ངོ ། །དེ་དག་སོང་བའི་འོག་ཏུ་སྦྱིན་པ་ཆེན་པོ་ཆུར་ཞུགས་ཏེ་སོང་བ་ལས་ཞག་བདུན་གྱི་བར་དུ་ནི། པུས་མོ་ཙམ་ལས་མ་ནུབ་བོ། །དེ་ནས་ཡང་ཞག་བདུན་གྱི་བར་དུ་ནི། བརླ་དྲུང་ཙམ་ལས་མ་ནུབ་བོ། །དེ་ནས་ཡང་ཞག་བདུན་སོང་བ་ལས་རྐེད་པ་ཙམ་ལས་མ་ནུབ་བོ། །ཞག་བདུན་ལོན་གྱི་བར་དུ་ནི། ཕྲག་པ་ཙམ་དུ་ཕྱིན་ཏོ། །དེ་ནས་ཞག་བདུན་གྱི་བར་དུ་ནི། རྐྱལ་ལོ། །དེ་ནས་རི་ཞིག་གི་དྲུང་དུ་ཕྱིན་པ་དང་ཤིང་ལ་འཇུས་ཏེ་རི་ལ་འཛེགས་ནས་ཞག་བདུན་གྱིས་རྩེ་མོར་ཕྱིན་ཏོ། །རི་རྩེར་ཞག་བདུན་སོང་སོང་ནས་ཡང་ཞག་བདུན་གྱིས་ཤོད་དུ་ཆུ་འགྲམ་དུ་ཕྱིན་ཏོ། །ཆུ་འགྲམ་དུ་ཕྱིན་པ་དང་ཆུའི་ནང་ན་པདྨ་གསེར་གྱི་མདོག་ཅན་ཡོད་པ་ལ་སྦྲུལ་གདུག་པས་པདྨའི་རྩ་བ་ལ་དཀྲིས་ཤིང་འདུག་པ་མཐོང་ངོ ། །དེ་ནས་བྱང་ཆུབ་སེམས་དཔའ་སྐྱིལ་མོ་ཀྲུང་བཅས་ཏེ་འདུག་ནས་སེམས་རྩེ་གཅིག་ཏུ་བྱམས་པའི་ཏིང་ངེ་འཛིན་ལ་ཞུགས་ཏེ། སྦྲུལ་གདུག་པ་འདི་དག་ཀྱང་སྔོན་ཞེ་སྡང་དང ། ཕྲག་དོག་བྱས་པའི་རྐྱེན་གྱིས་འདི་ལྟ་
369a
> ༄#། །བུའི་ལུས་མི་སྡུག་པ་མྱོང་ངོ་སྙམ་ལྷག་པར་དེ་ལ་སྙིང་བརྩེ་བའི་སེམས་སྐྱེས་པས་སྦྲུལ་གདུག་པ་དེའི་གདུག་པ་ཀུན་ཞི་ནས་བྱང་ཆུབ་སེམས་དཔའ་པདྨ་དེའི་སྟེང་ནས་གོམ་པ་དོར་ཏེ་སོང་སོང་བ་ལས་ཞག་བདུན་གྱིས་སྤྲུལ་གདུག་པ་དེ་དག་ལས་བརྟོལ་ཏོ། །དེ་ནས་ཡང་སོང་སོང་བ་ལས་སྲིན་པོ་དང་ཕྲད་ནས་སྲིན་པོ་དེ་དག་མིའི་དྲི་ཚོར་བས་ཀུན་ཏུ་ཚོལ་ལོ། །དེ་ནས་བྱང་ཆུབ་སེམས་དཔའ་སེམས་རྩེ་གཅིག་ཏུ་བྱམས་པའི་སེམས་ཀྱིས་བརྟགས་པས་སྲིན་པོ་དེ་དག་འཇམ་པའི་ཚིག་གིས་སྐྱེས་བུ་ཁྱོད་གང་ནས་འོངས། གང་དུ་འགྲོ་ཞེས་དྲིས་སོ། །དེ་ལ་སྦྱིན་པ་ཆེན་པོས་ཁོ་བོ་ནི། ཡིད་བཞིན་གྱི་ནོར་བུ་རིན་པོ་ཆེ་ཚོལ་དུ་འོངས་སོ། །ཞེས་སྨྲས་སོ། །དེ་ནས་སྲིན་པོ་དེ་དག་རབ་ཏུ་དགའ་སྟེ། འདི་ནི། བསོད་ནམས་ཆེན་པོ་དང་ལྡན་པ་ཞིག་སྙམ་བསམས་ནས་འདི་ནི། ད་དུང་ཀླུའི་ཕོ་བྲང་ལས་ཤིན་ཏུ་རིང་སྟེ་ནམ་ཡང་མི་ཕྱིན་པས་ཉོན་མོངས་པར་འགྱུར་གྱི། མཐུ་ཞིག་བསྟངས་ཏེ་བསྐྱལ་ལོ་སྙམ་ནས་ནམ་མཁའ་ལ་ཁྱེར་ཏེ་དཔག་ཚད་བཞི་བརྒྱའི་ཕ་རོལ་ཏུ་ཕྱིན་ནས་ཕྱིར་ཡང་ས་ལ་བཞག་གོ་།སྦྱིན་པ་ཆེན་པོ་དེ་ནས་ཡང་སོང་སོང་བ་ལས་རིང་པོ་མ་ལོན་པར་དངུལ་གྱི་མཁར་ཞིག་མཐོང་ནས་ཀླུའི་གནས་ཡིན་ནོ་སྙམ་བསམས་ཏེ་ཉེ་བར་སོང་ངོ ། །མཁར་དེའི་ཕྱི་རོལ་འོབས་རིམ་པ་བདུན་གྱིས་བསྐོར་ཏེ་འོབས་ཀྱི་ནང་ན་སྦྲུལ་
369b
> གདུག་པ་འཇིགས་སུ་རུང་བས་གང་ངོ ། །སྦྱིན་པ་ཆེན་པོས་དེ་དག་མཐོང་ནས་སྦྲུལ་གདུག་པ་འདི་དག་ནི། སྔོན་ཞེ་སྡང་ཆེ་བའི་ལན་གྱིས་འདི་ལྟ་བུའི་ལུས་འཇིགས་སུ་རུང་བ་མྱོང་བར་གྱུར་ཏོ་སྙམ་སྟེ། དེ་ལ་བུ་གཅིག་པ་དང་འདྲ་བར་བྱམས་ཤིང་སྙིང་རྗེ་བའི་སེམས་སྐྱེས་ཏེ། དེ་ལྟར་བྱམས་པའི་སེམས་བསྐྱེད་པས་སྤྲུལ་གྱི་གདུག་པ་ཡང་ཞི་བར་གྱུར་ནས་སྤྲུལ་དེ་དག་བརྫིས་ཏེ་ཀླུའི་མཁར་དུ་སོང་ངོ ། །མཁར་དེ་ལ་ཀླུ་གཉིས་ཀྱིས་དཀྲིས་ཏེ་ཀླུའི་མགོ་མཁར་སྒོ་ལ་བསྟན་ཏོ། །ཀླུ་དེ་གཉིས་ཀྱིས་སྦྱིན་པ་ཆེན་པོ་མཐོང་ནས་མགོ་བཏེག་སྟེ་གདུག་པ་འབྱིན་པ་ལས་སྦྱིན་པ་ཆེན་པོ་བྱམས་པའི་སེམས་བསྐྱེད་པས། གདུག་པ་ཡང་ཞི་ནས་མགོ་སྨད་དེ་ཉལ་ལོ། །སྦྱིན་པ་ཆེན་པོས་ཀླུའི་མགོ་ལ་བརྫིས་ནས་མཁར་གྱི་ནང་དུ་སོང་བ་དང ། མཁར་གྱི་ནང་ན་ཀླུ་ཞིག་རིན་པོ་ཆེ་སྣ་བདུན་གྱི་གཞལ་མེད་ཁང་ན་འདུག་པ་མཐོང་ངོ ། །ཀླུའི་རྒྱལ་པོ་དེས་བྱང་ཆུབ་སེམས་དཔའ་མཐོང་བ་དང་སྡངས་ཏེ་འདི་སྙམ་དུ་བསམས་སོ། །ངའི་གནས་འདི་འོབས་རིམ་པ་བདུན་གྱིས་བསྐོར་ཏེ་འོབས་ཀྱི་ནང་ན་སྦྲུལ་གདུག་པས་གང་བས། ཀླུ་དང ། གནོད་སྦྱིན་མ་ཡིན་པ་གཞན་གང་ཡང་འདིར་འོང་བའི་ཐུགས་མི་ཐུབ་ན། འདི་ལྟ་བུ་སུ་ཞིག་ཡིན་སྙམ་སྟེ་འདུག་པ་ལས་ལངས་ནས་བསུ་སྟེ་བསྟི་སྟང་དང་བཅས་པས་ཕྱག་བྱས་ནས་རིན་པོ་ཆེའི་ཁྲི་ལ་བཞག་སྟེ་
370a
> ༄#། །ཁ་ཟས་རྣམ་པ་སྣ་ཚོགས་བྱིན་ནོ། །ཁ་ཟས་ཟོས་ནས་ཁྱོད་འདིར་ཅི་ལ་འོངས། ཇི་ལྟར་ཕྱིན་ཅེས་དྲིས་སོ། །བྱང་ཆུབ་སེམས་དཔས་སྨྲས་པ། འཛམ་བུའི་གླིང་གི་མི་དག་ནི། དབུལ་ཕོངས་པས་ནོར་དང་གོས་དང་ཟས་ཀྱི་ཕྱིར་གཅིག་ལ་གཅིག་རྣམ་པ་སྣ་ཚོགས་ཀྱིས་འཚེ་ཞིང་གནོད་པ་བྱེད་དེ། ཚེ་འཕོས་མ་ཐག་ཏུ་ངན་སོང་གསུམ་དུ་ལྟུང་ངོ ། །བདག་ནི། དེ་དག་ལ་སྙིང་བརྩེ་སྟེ་དེ་དག་གི་མགོན་བྱ་བའི་ཕྱིར་ལམ་རིང་པོ་ནས་ཉོན་མོངས་པ་དང་བསྔོས་ཏེ་རྒྱལ་པོ་ཆེན་པོ་ཁྱོད་ལ་ནོར་བུ་རིན་པོ་ཆེ་སློང་དུ་འོངས་སོ། །ཡིད་བཞིན་གྱི་ནོར་བུ་རིན་པོ་ཆེས་སེམས་ཅན་ལ་ཕན་གདགས་པའི་བསོད་ནམས་ཀྱིས་མངོན་པར་འཚང་རྒྱ་བར་འཚལ་གྱི། བདག་གིས་ཡིད་དང་མི་འགལ་བར་རིན་པོ་ཆེ་སྩལ་བར་གསོལ། །ཀླུའི་རྒྱལ་པོས་སྨྲས་པ། ཡིད་བཞིན་གྱི་ནོར་བུ་རིན་པོ་ཆེ་ནི། ཤིན་ཏུ་ཡང་རྙེད་དཀའ་བ་ཡིན་ཏེ། ཁྱོད་དོན་འདིའི་ཕྱིར་འོངས་ན་འདིར་ཟླ་བ་གཅིག་ཅིག་འདུག་སྟེ། བདག་གིས་མཆོད་པ་ཅུང་ཟད་བཞེས་ལ་བདག་ཅག་ལ་ཆོས་ཀྱང་བསྟན་ན། ཡིད་བཞིན་གྱི་ནོར་བུ་རིན་པོ་ཆེ་ཡང་སྦྱིན་ནོ། །ཞེས་བྱས་པ་དང ། བྱང་ཆུབ་སེམས་དཔས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དེ་ནས་ཀླུའི་རྒྱལ་པོས་ཉིན་གཅིག་བཞིན་དུ་ཁ་ཟས་རོ་བརྒྱ་དང་
370b
> ལྡན་པ་རྣམ་པ་སྣ་ཚོགས་སྦྱར་ཏེ་ཕུལ་ནས་རོལ་མོས་བྱང་ཆུབ་སེམས་དཔའ་ལ་མཆོད་དོ། །བྱང་ཆུབ་སེམས་དཔས་ཀྱང་དེ་ལ་དྲན་པ་ཉེ་བར་གཞག་པའི་ཆོས་ཀྱི་ཡན་ལག་ཟླ་བ་གཅིག་གི་བར་ཏུ་བསྟན་ནས་ཕྱིར་འགྲོའོ། །ཞེས་བྱས་པ་དང ། ཀླུའི་རྒྱལ་པོ་དགའ་ནས་སྤྱི་བོའི་གཙུག་ཕུད་ལས་ཡིད་བཞིན་གྱི་ནོར་བུ་རིན་པོ་ཆེ་བཀྲོལ་ཏེ་ཕུལ་ལོ། །སྐྱེས་བུ་ཆེན་པོ་འགྲོ་བ་ལ་ཕན་པའི་དོན་དུ་ཡི་དམ་ལ་ཤིན་ཏུ་བརྟན་པ་ཁྱོད་གདོན་མི་ཟ་བར་འཚང་རྒྱའོ། །ནམ་མངོན་པར་སངས་རྒྱས་པ་ན་བདག་ཀྱང་ཁྱོད་ཀྱི་ཉེ་གནས་མཆོག་ཏུ་གྱུར་ཅིག་ཅེས་སྨྲས་སོ། །དེ་ནས་ཀླུའི་རྒྱལ་པོ་ལ་ནོར་བུ་རིན་པོ་ཆེ་འདི་ལ་མཐུ་སྟོབས་ཅི་ཡོད་ཅེས་དྲིས་ན། སྨྲས་པ། ནོར་བུ་འདི་ནི། དཔག་ཚད་ཉིས་སྟོང་ཁོར་ཁོར་ཡུག་ཏུ་དགོས་པ་ཐམས་ཅད་ཆར་བཞིན་དུ་འབེབས་ནུས་སོ། །བྱང་ཆུབ་སེམས་དཔས་བསམ་པ། ནོར་བུ་རིན་པོ་ཆེ་འདི་མཐུ་སྟོབས་ཆེ་མོད་ཀྱི། འོན་ཀྱང་བདག་གིས་བསམ་པའི་དོན་ཆེན་པོ་སྒྲུབ་ནུས་པ་མ་ཡིན་ནོ་བསམས་ནས་ཀླུའི་རྒྱལ་པོ་འཁོར་དང་བཅས་པས་བསྐྱལ་ཏེ་སོང་ངོ ། །དེ་ནས་ཡང་སོང་སོང་བ་ལས་རྒྱང་མ་ནས་བཻ་ཌཱུརྱ་སྔོན་པོའི་མཁར་ཞིག་མཐོང་ངོ ། །མཁར་དེ་འདོད་པས་སོང་བ་དང་མཁར་དེའི་དྲུང་དུ་ཕྱིན་པ་དང ། མཁར་དེ་ཡང་འོབས་རིམ་པ་བདུན་གྱིས་བསྐོར་ཏེ་འོབས་ཀྱི་ནང་ན་སྦྲུལ་གདུག་པས་ཡོངས་སུ་
371a
> ༄#། །གང་ངོ ། །བྱང་ཆུབ་སེམས་དཔས་སྦྲུལ་གདུག་པ་དེ་དག་ལ་སྙིང་བརྩེ་ཞིང་བྱམས་པའི་སེམས་བསྐྱེད་པས་སྦྲུལ་གྱི་གདུག་པ་ཞི་ནས་སྦྲུལ་དེ་དག་ལ་བརྫིས་པ་སོང་ངོ ། །མཁར་སྒོར་ཕྱིན་པ་དང་ཀླུ་གཉིས་ཤིག་མཁར་སྒོ་ན་ཉལ་བ་ཡང་བྱང་ཆུབ་སེམས་དཔའ་སྙིང་བརྩེ་ཞིང་བྱམས་པའི་སེམས་ཀྱིས་ཀླུའི་གདུག་པ་ཞི་ནས་མགོ་ལ་བརྫིས་ཏེ་མཁར་གྱི་ནང་དུ་སོང་ངོ ། །དེའི་ཚེ་མཁར་དེ་ན་ཀླུའི་རྒྱལ་པོ་ཞིག་རིན་པོ་ཆེ་སྣ་བདུན་གྱི་གཞལ་མེད་ཁང་ན་འདུག་པས་རྒྱང་མ་ནས་བྱང་ཆུབ་སེམས་དཔའ་མཐོང་ནས་འདི་སྙམ་དུ་བདག་གི་གནས་འདི་ལ་འོབས་རིམ་པ་བདུན་གྱིས་བསྐོར་ཏེ། འོབས་ཀྱི་ནང་ན་སྦྲུལ་གདུག་པས་གང་བས་ཀླུ་དང་གནོད་སྦྱིན་མ་ཡིན་པ་གཞན་སུ་ཡང་འོང་བའི་ཐུགས་མི་ཐུབ་ན། མི་འདི་ལྟ་བུ་སུ་ཡིན། གང་ནས་འོངས་སྙམ་སྟེ་ཡ་མཚན་དུ་གྱུར་ནས་བསུ་སྟེ་བསྟི་སྟང་དང་བཅས་པས་ཕྱག་བྱས་ནས་རིན་པོ་ཆེའི་གདན་ལ་བཞག་གོ་།དེ་ནས་ཁ་ཟས་རོ་བརྒྱ་དང་ལྡན་པ་རྣམ་པ་སྣ་ཚོགས་སྦྱར་ཏེ་ཕུལ་ནས་བྱང་ཆུབ་སེམས་དཔས་ཁ་ཟས་ཟོས་པའི་འོག་ཏུ་ཁྱོད་འདིར་ཅི་ལས་འོངས། དོན་ཅི་ཡོད་ཅེས་དྲིས་སོ། །བྱང་ཆུབ་སེམས་དཔས་སྨྲས་པ། བདག་ནི། རྒྱལ་པོ་ཁྱོད་ལ་ཡིད་བཞིན་གྱི་ནོར་བུ་རིན་པོ་ཆེ་སློང་དུ་འོངས་སོ། །ཀླུས་སྨྲས་པ། རིན་པོ་ཆེ་ནི། ཤིན་ཏུ་ཡང་རྙེད་པར་དཀའ་སྟེ།
371b
> ཁྱོད་འདོད་པ་ཡང་དག་ན། ཁོ་བོས་གསོལ་བ་བཞིན་དུ་ཟླ་བ་གཉིས་ཤིག་འདིར་འདུག་སྟེ། བདག་ཅག་ལ་བྱང་ཆུབ་སེམས་དཔའི་སྤྱོད་པ་བསྟན་པས་བདག་ཅག་གི་མཆོད་པ་བཞེས་ན།་ནོར་བུ་རིན་པོ་ཆེ་ཡང་སྦྱིན་ནོ། །ཞེས་བྱས་པ་དང ། སྦྱིན་པ་ཆེན་པོས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དེ་ནས་ཀླུའི་རྒྱལ་པོས་ཟླ་བ་གཉིས་ཀྱི་བར་དུ་ཁ་ཟས་རོ་བརྒྱ་དང་ལྡན་པ་རྣམ་པ་སྣ་ཚོགས་སྦྱར་ཏེ་ཕུལ་ནས་རོལ་མོ་སྣ་ཚོགས་ཀྱིས་མཆོད་དེ་བྱང་ཆུབ་སེམས་དཔས་ཀྱང་དེ་དག་ལ་རྫུ་འཕྲུལ་གྱི་རྐང་པ་བཞིའི་ཆོས་ཀྱི་རྣམ་གྲངས་ཟླ་བ་གཉིས་ཀྱི་བར་དུ་བསྟན་ཏེ་ཕྱིར་འགྲོ་བར་བསམས་ནས་ཀླུའི་རྒྱལ་པོས་ཀྱང་ཡིད་བཞིན་གྱི་ནོར་བུ་རིན་པོ་ཆེ་བཀྲོལ་ཏེ་ཕུལ་ནས་སྐྱེས་བུ་ཆེན་པོ་ཡི་དམ་ལ་ཤིན་ཏུ་བརྟན་པ་ཁྱོད་གདོན་མི་ཟ་བར་འཚང་རྒྱའོ། །ནམ་མངོན་པར་སངས་རྒྱས་པ་ན་བདག་ཀྱང་ཁྱོད་ཀྱི་ཉེ་གནས་བགྱིའོ། །ཞེས་སྨྲས་པ་དང ། དེ་བཞིན་དུ་གྱུར་ཅིག་ཅེས་སྨྲས་སོ། །ནོར་བུ་རིན་པོ་ཆེ་འདི་ལ་མཐུ་སྟོབས་ཅི་ཡོད་ཅེས་དྲིས་ན། ནོར་བུ་འདི་ནི། དཔག་ཚད་བཞི་སྟོང་ཁོ་ར་ཁོར་ཡུག་ཏུ་ཅི་འདོད་པ་ཐམས་ཅད་ཆར་བཞིན་དུ་འབེབས་སོ། །ཞེས་སྨྲས་སོ། །བྱང་ཆུབ་སེམས་དཔའ་ཡང་འདི་སྙམ་དུ་རིན་པོ་ཆེ་འདི་མཐུ་སྟོབས་ཆེ་མོད་ཀྱི། བདག་གི་བསམ་པ་སྒྲུབ་ནུས་པ་མ་ཡིན་ནོ། །སྙམ་ནས་ཀླུའི་རྒྱལ་པོས་མཁར་གྱི་སྒོའི་ཕྱི་རོལ་ཏུ་བྱང་ཆུབ་སེམས་
372a
> ༄#། །དཔའ་བསྐྱལ་ཏོ། །དེ་ནས་ཡང་སོང་སོང་བ་ལས་རྒྱང་མ་ནས་གསེར་གྱི་མཁར་རབ་ཏུ་འཚེར་བ་ཞིག་མཐོང་ནས་བྱང་ཆུབ་སེམས་དཔའ་དེའི་དྲུང་དུ་སོང་ནས་ཕྱིན་པ་དང ། མཁར་དེ་ཡང་འོབས་རིམ་པ་བདུན་གྱིས་བསྐོར་ཏེ། འོབས་ཀྱི་ནང་ན་སྦྲུལ་གདུག་པས་ཡོངས་སུ་གང་བ་མཐོང་ངོ ། །བྱང་ཆུབ་སེམས་དཔའ་ཡང་བྱམས་པའི་སེམས་བསྐྱེད་པས་སྦྲུལ་གྱི་གདུག་པ་ཞི་ནས་དེ་ལ་བརྫིས་ཏེ་སོང་ངོ ། །མཁར་དེ་ལའང་ཀླུ་གཉིས་ཤིག་འཁྱིལ་ཏེ་མགོ་སྒོའི་ཕྱི་རོལ་ཏུ་བསྟན་ནས་ཉལ་བ། བྱང་ཆུབ་སེམས་དཔའ་མཐོང་ནས་མགོ་བཏེག་སྟེ་གདུག་པ་འབྱིན་པ་ལས་བྱང་ཆུབ་སེམས་དཔས་སྙིང་བརྩེ་ཞིང་བྱམས་པའི་སེམས་བསྐྱེད་པས་གདུག་པ་ཞི་ནས་དེའི་མགོ་ལ་བརྫིས་ཏེ་མཁར་གྱི་ནང་དུ་སོང་ངོ ། །མཁར་དེའི་ནང་ན་ཀླུའི་རྒྱལ་པོས་རིན་པོ་ཆེའི་གཞལ་མེད་ཁང་ནས་བྱང་ཆུབ་སེམས་དཔའ་རྒྱང་མ་ནས་མཐོང་སྟེ་འདི་སྙམ་དུ་བདག་གི་གནས་འདི་ནི།་འོབས་རིམ་པ་བདུན་གྱིས་བསྐོར་ཏེ། འོབས་ཀྱི་ནང་ན་སྦྲུལ་གདུག་པས་གང་བས་ཀླུ་དང་གནོད་སྦྱིན་མ་གཏོགས་པར་གཞན་གང་ཡང་འོང་བའི་ཐུགས་མི་ཐུབ་ན།་མི་འདི་སུ་ཡིན། གང་ནས་འོངས་སྙམ་ངོ་མཚར་དུ་བཟུང་སྟེ་རྒྱང་མ་ནས་བསུ་ནས་བསྟི་སྟང་དང་བཅས་པས་ཕྱག་འཚལ་ཏེ་རིན་པོ་ཆེའི་གདན་ལ་འདུག་ཏུ་བཅུག་
372b
> གོ་།དེ་ནས་ཁ་ཟས་རོ་བརྒྱ་དང་ལྡན་པ་རྣམ་པ་སྣ་ཚོགས་སྦྱར་ཏེ་ཕུལ་ནས་ཁ་ཟས་ཟོས་པའི་འོག་ཏུ་ཁྱོད་སུ་ཞིག་།གང་ནས་འོངས་ཞེས་དྲིས་སོ། །དེ་ལ་བྱང་ཆུབ་སེམས་དཔས་བདག་ནི།་འཛམ་བུའི་གླིང་ནས་མཆིས་ཏེ། འཛམ་བུའི་གླིང་གི་སེམས་ཅན་དག་བསོད་ནམས་ཆུང་བས། ནོར་དང་ཟས་དང་སྐོམ་གྱི་ཕྱིར་གཅིག་ལ་གཅིག་རྣམ་པ་སྣ་ཚོགས་པས་འཚོ་ཞིང་གསོད་དེ། མི་དགེ་བ་བཅུའི་ལས་རྫོགས་པར་བྱེད་པས་ཚེ་འཕོས་མ་ཐག་ཏུ་ངན་སོང་གསུམ་དུ་ལྟུང་ཞིང་སྡུག་བསྔལ་མང་པོ་མྱོང་བར་འགྱུར་བས། བདག་ནི། དེ་དག་ལ་སྙིང་བརྩེ་སྟེ་མགོན་བྱ་བའི་ཕྱིར་རྒྱལ་པོ་ཆེན་པོ་ཁྱོད་ལ་ཡིད་བཞིན་གྱི་ནོར་བུ་རིན་པོ་ཆེ་སློང་དུ་འོངས་སོ། །ཀླུའི་རྒྱལ་པོས་སྨྲས་པ། ཡིད་བཞིན་གྱི་ནོར་བུ་རིན་པོ་ཆེ་ནི། རྙེད་པར་སླ་བ་མ་ཡིན་ཏེ། སྐྱེས་བུ་ཁྱོད་བདག་ལ་རེ་སྟེ་འོངས་ན། བདག་གི་གནས་འདིར་ཟླ་བ་བཞི་ཞིག་འདུག་སྟེ་བདག་ཅག་གི་མཆོད་པ་བཞེས་ན། ནོར་བུ་རིན་པོ་ཆེ་ཡང་དབུལ་ལོ། །ཞེས་བྱས་པ་དང ། བྱང་ཆུབ་སེམས་དཔས་ཀྱང་དེ་བཞིན་དུ་བགྱིའོ། །ཞེས་སྨྲས་ནས། ཀླུའི་རྒྱལ་པོས་ཟླ་བ་བཞིའི་བར་དུ་ཁ་ཟས་རོ་བརྒྱ་དང་ལྡན་པ་རྣམ་པ་སྣ་ཚོགས་སྦྱར་ཏེ་ཕུལ་ནས་རོལ་མོ་མང་པོས་ཀྱང་མཆོད་དོ། །དེ་ལ་བྱང་ཆུབ་སེམས་དཔས་ཆོས་ཀྱི་རྣམ་གྲངས་རྒྱ་ཆེར་ཕྱེ་ཞིང་བསྟན་པས་ཀླུའི་རྒྱལ་པོ་རབ་ཏུ་དགའ་སྟེ་ཀླུ་
373a
> ༄#། །གཞན་དང ། གནོད་སྦྱིན་གཞན་ལ་མི་ལྟོས་པར་ཡོ་བྱད་ཐམས་ཅད་ཀྱང་ཡིད་བཞིན་དུ་སྦྱར་ཏོ། །དེ་ལྟ་བུའི་ཚུལ་དུ་ཟླ་བ་བཞི་བྱས་ནས་བྱང་ཆུབ་སེམས་དཔའ་འགྲོ་བར་ཆས་པ་དང ། ཀླུའི་རྒྱལ་པོས་གཙུག་ཕུད་ནས་ཡིད་བཞིན་གྱི་ནོར་བུ་རིན་པོ་ཆེ་བཀྲོལ་ཏེ་བྱང་ཆུབ་སེམས་དཔའ་ལ་ཕུལ་ནས་སྐྱེས་བུ་ཆེན་པོ་ཡི་དམ་ལ་བརྟན་པ་ཁྱོད་གདོན་མི་ཟ་བར་འཚང་རྒྱའོ། །ནམ་མངོན་པར་སངས་རྒྱས་པ་ན་བདག་ཀྱང་ཉེ་གནས་མཆོག་ཏུ་གྱུར་ཏེ་བསྙེན་བཀུར་བྱེད་པར་ཤོག་ཅིག་ཅེས་སྨོན་ལམ་བཏབ་བོ། ། བྱང་ཆུབ་སེམས་དཔས་ཀྱང་དེ་བཞིན་དུ་གྱུར་ཅིག་ཅེས་སྨྲས་ནས་ནོར་བུ་རིན་པོ་ཆེ་འདི་ལ་མཐུ་སྟོབས་ཇི་ཙམ་ཞིག་ཡོད་ཅེས་དྲིས་སོ། །ཀླུའི་རྒྱལ་པོས་སྨྲས་པ། ནོར་བུ་རིན་པོ་ཆེ་འདི་ནི།་དཔག་ཚད་བརྒྱད་སྟོང་ཁོར་ཁོར་ཡུག་ཏུ་རིན་པོ་ཆེ་ཆར་བཞིན་དུ་འབེབས་ཏེ། ཅི་འདོད་པ་ཐམས་ཅད་འབེབས་སོ། །ཞེས་སྨྲས་པ་དང ། བྱང་ཆུབ་སེམས་དཔའ་གདོད་དགའ་ནས་འདི་སྙམ་དུ་འཛམ་བུ་གླིང་གི་ས་ཁྱོན་ནི། དཔག་ཚད་བདུན་སྟོང་ལས་མེད་དེ། ནོར་བུ་རིན་པོ་ཆེ་འདིས་ནི། བདག་གི་རེ་བ་སྐོང་ངོ་སྙམ་བསམས་ནས་སྔ་ཕྱིར་རྙེད་པའི་རིན་པོ་ཆེ་གསུམ་ཆར་གོས་ཀྱི་མཐའ་མར་ཕུར་ཏེ་མཁར་གྱི་སྒོར་བྱུང་བ་དང ། ཀླུའི་རྒྱལ་པོ་འཁོར་དང་བཅས་པས་བསྐྱལ་ནས་སོ་སོར་དོང་ངོ ། །བྱང་ཆུབ་
373b
> སེམས་དཔས་ཕ་ཟད་ཅིག་ཏུ་ཕྱིན་ནས་ནོར་བུ་རིན་པོ་ཆེ་རྣམས་ལག་ཏུ་ཐོགས་ནས་འདི་སྐད་ཅེས་སྨོན་ལམ་བཏབ་བོ། །ནོར་བུ་འདི་ཡིད་བཞིན་གྱི་ནོར་བུ་རིན་པོ་ཆེ་ཡིན་ཡང་དག་ན།་བདག་ནམ་མཁའ་ལ་འཕུར་བར་གྱུར་ཅིག་ཅེས་སྨྲས་སོ། །དེ་སྐད་ཅེས་སྨྲས་མ་ཐག་ཏུ་ནམ་མཁའ་ལ་འཕུར་ཏེ་རྒྱ་མཚོའི་བགེགས་ལས་ཐར་ནས་རྒྱ་མཚོའི་ངོགས་སུ་ཕྱིན་པར་གྱུར་ཏེ། དེ་ན་ཅུང་ཟད་བསྟི་ཞིང་ངལ་སོས་པའི་མལ་དུ་གཉིད་ཀྱིས་ལོག་པ་དང ། དེའི་ཚེ་རྒྱ་མཚོའི་ཀླུ་བྲན་རྣམས་འདི་སྐད་ཅེས་བགྲོས་སོ། །རྒྱ་མཚོ་འདི་ན་ནོར་བུ་རིན་པོ་ཆེ་འདི་གསུམ་ལས་མེད་དེ། གསུམ་ཆར་མི་འདིས་ཁྱེར་གྱི། ནོར་བུ་འདི་ནི། ཡོན་ཏན་དང་ལྡན་པས་བདག་ཅག་ལ་ཡང་དགོས་ཀྱི་ཕྱིར་བརྐུའོ། །ཞེས་བགྲོས་ནས་བྱང་ཆུབ་སེམས་དཔའ་གཉིད་ཀྱིས་ལོག་པའི་ཚེ་ཡིད་བཞིན་གྱི་ནོར་བུ་རིན་པོ་ཆེ་ཀླུ་རྣམས་ཀྱིས་ཕྱིར་བརྐུས་སོ། །བྱང་ཆུབ་སེམས་དཔའ་སད་ནས་བལྟས་ན། ནོར་བུ་རིན་པོ་ཆེ་མེད་པས་འདི་སྙམ་དུ་བསམས་སོ། །འད་ནི། གདོན་མི་ཟ་བར་རྒྱ་མཚོའི་ཀླུས་བརྐུས་ཀྱི། བདག་གིས་མཐུ་ཅི་ཡོད་པས་རྒྱ་མཚོའི་ཆུ་བཅུས་ཏེ་བསྐམ་པར་བྱའོ་སྙམ་བསམས་ཏེ་ནོར་བུ་ཕྱིར་མ་ཐོབ་ཀྱི་བར་དུ་ལག་པ་སྟོང་པར་ཕྱིར་མི་འགྲོའོ་སྙམ་ཡི་དམ་བཅས་ནས་རྒྱ་མཚོའི་ངོགས་སུ་སོང་སྟེ་རུས་སྦལ་གྱི་ཁོག་པ་ཞིག་བླངས་ནས་ལག་པ་གཉིས་ཀྱིས་རྒྱ་མཚོའི་ཆུ་བཅུས་
374a
> ༄#། །སོ། །དེའི་ཚེ་ན་རྒྱ་མཚོའི་ལྷས་དེའི་བསམ་པ་ཤེས་ནས་དེ་ལ་འདི་སྐད་ཅེས་སྨྲས་སོ། །རྒྱ་མཚོ་འདི་ནི། གཏིང་ཟབ་ཅིང་ཡངས་ཏེ། དཔག་ཚད་སྟོང་ཕྲག་སུམ་བརྒྱ་སུམ་ཅུ་ཡོད་པ། གལ་ཏེ་འཛམ་བུའི་གླིང་གི་མི་ཐམས་ཅད་ལོག་ཀྱང་རྒྱ་མཚོ་སྐམ་པར་བྱེད་མི་ནུས་ན། ཁྱོད་གཅིག་པུས་ནུས་པ་ལྟ་ཅི་སྨོས་ཏེ། དོན་མེད་དོ། ། བྱང་ཆུབ་སེམས་དཔས་སྨྲས་པ། མི་གཅིག་གི་སྙིང་ནས་ལས་བྱས་ན། ཅི་ཡང་མི་འགྲུབ་པ་མེད་དེ། བདག་གི་རིན་པོ་ཆེ་རྙེད་པ་དེས་འགྲོ་བ་ཐམས་ཅད་ལ་ཕན་པ་དང ། བདེ་བ་བྱ་བར་བསམས་ཏེ། དེའི་བསོད་ནམས་ཀྱིས་མངོན་པར་འཚང་རྒྱ་བར་འགྱུར་ཏེ། དེ་ལ་སེམས་མ་ཞུམ་ན། ཅིའི་ཕྱིར་རྒྱ་མཚོ་འདི་སྐམ་པར་མི་ནུས་ཞེས་སྨྲས་སོ། །དེའི་ཚེ་ན་ལྷ་ཁྱབ་འཇུག་ལ་སོགས་པས་རྒྱང་མ་ནས་བྱང་ཆུབ་སེམས་དཔའ་གཅིག་པུ་ལུས་ཡིད་མཐུན་པར་རྒྱ་མཚོའི་ཆུ་བཅུས་ཏེ་འགྲོ་བ་མང་པོས་དོན་དུ་དཀའ་བ་བྱེད་པ་མཐོང་ནས་དེ་དག་ཀྱང་བྱང་ཆུབ་སེམས་དཔའ་ལ་བསྟང་ངོ་སྙམ་བསམས་ཏེ་གཅིག་ནས་གཅིག་ཏུ་སྦྲན་ནས་ཐམས་ཅད་བྱང་ཆུབ་སེམས་དཔའི་དྲུང་དུ་ལྷགས་ཏེ། བྱང་ཆུབ་སེམས་དཔའ་སྣོད་ཀྱིས་ཆུ་འཆུ་བ་མཐོང་ནས་ལྷ་དེ་དག་ཐམས་ཅད་སོ་སོའི་གོས་ཕུད་དེ་ཆུར་སྨྱུགས་ནས་ལན་གཅིག་སྨྱུགས་ཏེ་ཕྱིར་ཕྱུང་བས། རྒྱ་མཚོའི་ཆུ་དཔག་ཚད་བཞི་བཅུ་
374b
> བྲིའོ། །ཡང་ལན་གཉིས་སྨྱུགས་པས་དཔག་ཚད་བརྒྱད་ཅུ་བྲིའོ། །ལན་གསུམ་སྨྱུགས་པས་དཔག་ཚད་བརྒྱ་ཉི་ཤུ་བྲི་ནས་ཀླུ་དེ་དག་འཇིགས་སྐྲག་སྟེ། བྱང་ཆུབ་སེམས་དཔའི་དྲུང་དུ་ལྷགས་ནས་འདི་སྐད་དུ་ཐོང་ཞིག་།རྒྱ་མཚོའི་ཆུ་སྐམ་པར་མ་བྱེད་ཅིག་ཅེས་སྨྲས་པ་དང ། བྱང་ཆུབ་སེམས་དཔས་བཏང་ངོ ། །དེ་ནས་ཀླུ་རྣམས་ཀྱིས་བྱང་ཆུབ་སེམས་དཔའ་ལ་ཁྱོད་ཀྱི་ནོར་བུ་རིན་པོ་ཆེ་འདི་ཅི་ཞིག་ཏུ་དགོས། སྨྲས་པ། སེམས་ཅན་ལ་ཕན་པའི་དོན་དུ་དགོས་སོ། །གླུས་སྨྲས་པ། སེམས་ཅན་ལ་ཕན་པའི་དོན་དུ་དགོས་ན། རྒྱ་མཚོའི་ནང་ན་ཡང་སེམས་ཅན་མང་དུ་ཡོད་ན། ཅིའི་ཕྱིར་བསྐུར་ཞེས་སྨྲས་སོ། །སྨྲས་པ། རྒྱ་མཚོའི་ནང་ན་གནས་པ་ཡང་སེམས་ཅན་ཡིན་མོད་ཀྱི། དེ་ལ་ཕོངས་པའི་སྡུག་བསྔལ་མེད་དོ། །འཛམ་བུ་གླིང་གི་སེམས་ཅན་དག་ནི། ནོར་གྱི་ཕྱིར་གཅིག་གིས་གཅིག་ལ་རྣམ་པར་འཚེ་ཞིང་གནོད་པ་བྱེད་དེ། མི་དགེ་བ་བཅུ་རྫོགས་པར་བྱེད་པས་ཚེ་འཕོས་ནས་ཀུན་སེམས་ཅན་དམྱལ་བར་སྐྱེ་སྟེ། བདག་ནི། དེ་དག་ལ་སྙིང་བརྩེ་བའི་ཕྱིར་རིན་པོ་ཆེ་འདི་དགོས་སོ། །ཞེས་སྨྲས་པ་དང ། ཀླུ་རྣམས་ཀྱིས་ནོར་བུ་རིན་པོ་ཆེ་ཕྱུང་སྟེ་སླར་ཕུལ་ལོ། །རྒྱ་མཚོའི་ལྷས་བྱང་ཆུབ་སེམས་དཔའ་དོ་ལྟར་བརྩོན་འགྲུས་ལ་བརྟན་པ་མཐོང་ནས་འདི་ནི། གདོན་མི་ཟ་བར་འཚང་རྒྱའོ་སྙམ་སེམས་ཏེ། ནམ་མངོན་པར་སངས་རྒྱས་
375a
> ༄#། །པ་ན་བདག་ཀྱང་ཉེ་གནས་ཀྱི་མཆོག་ཏུ་གྱུར་ཅིག་ཅེས་སྨོན་ལམ་བཏབ་བོ། །དེ་ནས་བྱང་ཆུབ་སེམས་དཔས་རིན་པོ་ཆེ་ཕྱིར་ཐོབ་ནས་སྟེང་གི་ནམ་མཁའ་ལ་འཕུར་ཏེ་གནས་སུ་འོངས་ནས་སྔར་གྱི་ཚོང་པ་གྲོགས་པོ་རྣམས་ཡོད་དམ། བདེ་བར་ཕྱིན་ཏམ་ཞེས་དྲིས་སོ། །ཚོང་པ་གྲོགས་པོ་དག་བདེ་བར་ཕྱིན་ནས་དེ་དག་གཅིག་ལ་གཅིག་དགའ་ནས་གྲོགས་པོ་རྣམས་ཀྱིས་ངོ་མཚར་ཡ་མཚན་དུ་བཟུང་ངོ ། །དེ་ནས་བྲམ་ཟེ་ཀ་པི་ལིའི་སྒོར་སོང་ནས་བྱང་ཆུབ་སེམས་དཔའ་རྒྱ་མཚོ་ནས་ཕྱིར་ལོག་གོ་།ཞེས་ཐོས་ནས་ཐམས་ཅད་ཀྱིས་སྒོར་བསུ་སྟེ་རབ་ཏུ་དགའ་ནས་ཚོང་བ་གྲོགས་པོ་རྣམས་དང་བཅས་པ་ལ་དགའ་སྟོན་ཆེན་པོ་བྱས་སོ། །དེའི་ཚེ་བྱང་ཆུབ་སེམས་དཔས་རིན་པོ་ཆེ་ཐོགས་ཏེ་ཁྱིམ་དུ་འོངས་པ་དང ། བྲམ་ཟེ་དེའི་བང་མཛོད་ཐམས་ཅད་ཡོངས་སུ་གང་བར་གྱུར་ཏོ། །དེ་ནས་བྲམ་ཟེ་ཀ་པི་ལིས་རིན་པོ་ཆེ་སྣ་ཚོགས་ཀྱིས་བུ་མོ་བརྒྱན་ནས་རིན་པོ་ཆེའི་ཆུ་སྣོད་བསྐུར་ཏེ་བྱང་ཆུབ་སེམས་དཔའི་ལུས་དང་རྐང་ལག་བཀྲུས་ནས་བུ་མོའི་ལག་པ་ནས་བཟུང་སྟེ་བྱང་ཆུབ་སེམས་དཔའ་ལ་གཏད།་བྱང་ཆུབ་སེམས་དཔས་ཀྱང་བཞེས་ནས་བྲམ་ཟེ་རབ་ཏུ་དགའ་སྟེ་བུ་མོའི་གཡོག་ཏུ་བུ་མོ་ལྔ་བརྒྱ་དང ། གླང་པོ་ཆེ་ལྔ་བརྒྱ་ཡང་རིན་པོ་ཆེས་བརྒྱན་ཏེ་རོལ་མོ་
375b
> བྱས་ནས་བྱང་ཆུབ་སེམས་དཔའ་ལ་བརྫངས་སོ། །དེའི་ཚེ་ན་སྦྱིན་པ་ཆེན་པོའི་ཕ་མ་བུ་དང་དྲལ་བའི་འོག་ཏུ་རྟག་ཏུ་དུས་པས། ཕ་མ་གཉིས་ཀའི་མིག་ལྡོངས་པར་གྱུར་ཏེ། བུ་རྒྱ་མཚོ་ནས་ལོག་པ་དང་ཕ་མ་ཕྲད་ནས་བུས་ཕ་མ་ལ་ཕྱག་འཚལ་ཏེ་ལག་པ་ནས་འཇུས་ཏེ་བུ་ཡིན་པར་རྟོགས་སོ། །སྦྱིན་པ་ཆེན་པོ། ཁྱོད་ཀྱིས་ངེད་པོར་ཏེ་སོང་བའི་འོག་ཏུ་མིག་ཀྱང་ལྡོངས་སོ། །ཁྱོད་རྒྱ་མཚོར་སོང་སོང་ནས་ཅི་རྙེད་ཅེས་དྲིས་པ་དང ། སྦྱིན་པ་ཆེན་པོས་ནོར་བུ་རིན་པོ་ཆེ་པའི་ལག་ཏུ་བྱིན་ཏེ། བདག་གིས་འདི་རྙེད་དོ། ། ཞེས་སྨྲས་ནས་ཕས་ལག་ཏུ་བླངས་ཏེ་བསྣམས་ནས་འདི་ལྟ་བུའི་རྡོ་བ་ནི། ངའི་མཛོད་ན་སྔོན་ཡང་མང་དུ་ཡོད་ན། འདི་ལྟར་ཉོན་མོངས་པ་དང་བསྡོ་ཅི་དགོས་ཞེས་སྨྲས་སོ། །དེ་ནས་བྱང་ཆུབ་སེམས་དཔས་ནོར་བུ་ཕྱིར་བླངས་ཏེ་ཕ་མའི་མིག་ཕྱིས་པ་ཙམ་གྱིས་ཇི་ལྟར་རླུང་དྲག་པོས་སྤྲིན་བུས་པ་བཞིན་དུ་ཕ་མ་གཉིས་ཀྱི་མིག་ཀྱང་སྔར་བས་གསལ་བར་མཐོང་བར་གྱུར་ཏོ། །དེ་ནས་ཕ་མ་གཉིས་དགའ་སྟེ། འདི་ནི། ནོར་བུ་རིན་པོ་ཆེ་ཡིན་ཡང་དག་པ་ལྟ་སྟེ། ཉོན་མོངས་པའི་དོན་ཡོད་པར་གྱུར་ཏོ་ཞེས་སྨྲས་སོ། །དེ་ནས་ཡང་སྦྱིན་པ་ཆེན་པོས་རིན་པོ་ཆེ་ཐོགས་ཏེ། ཁྱོད་ཡིད་བཞིན་གྱི་ནོར་བུ་རིན་པོ་ཆེ་ཡིན་ཡང་དག་ན། ཁོ་བོའི་ཕ་མའི་འོག་ཏུ་རིན་པོ་ཆེ་སྣ་བདུན་གྱི་གདན་འབྱུང་
376a
> ༄#། །ཞིང ། རིན་པོ་ཆེའི་བླ་རེས་སྟེང་ཁེབས་པར་ཤོག་ཅིག་ཅེས་སྨོན་ལམ་བཏབ་མ་ཐག་ཏུ་དེ་བཞིན་དུ་གྲུབ་ནས་རྒྱལ་པོའི་བང་མཛོད་ཐམས་ཅད་ཀྱང་གང་བར་གྱུར་ཏོ། །དེ་ནས་རྒྱལ་པོས་ཕོ་ཉ་ཞིག་གླང་པོ་ཆེ་དཔག་ཚད་བརྒྱ་སྟོང་དུ་འགྲོ་བ་ཞིག་ལ་བསྐྱོན་ཏེ། འཛམ་བུའི་གླིང་གི་མི་ཐམས་ཅད་ལ་སྦྱིན་པ་ཆེན་པོས་རྒྱ་མཚོ་ནས་ཡིད་བཞིན་གྱི་ནོར་བུ་རིན་པོ་ཆེ་རྙེད་དེ། ནོར་བུ་ཡོན་ཏན་ཅན་དེས་ད་སྟེ་ཞག་བདུན་ན་རིན་པོ་ཆེ་ལ་སོགས་པ་གོས་དང ། ཟས་དང ། དགོས་པའི་ཡོན་ཏན་ཐམས་ཅད་ཆར་བཞིན་དུ་འབེབས་ཀྱི། སོ་སོ་ནས་ཅི་བདེར་ལོངས་ཤིག་ཅེས་བསྒྲགས་སོ། །དེ་ལྟར་ཀུན་དུ་བསྒྲགས་ནས་སྦྱིན་པ་ཆེན་པོ་ཁྲུས་བྱས་ཏེ་གོས་གསར་པ་བགོས་ནས་ག་ལའི་ཐུང་བུ་མཉམ་པོར་རྒྱལ་མཚན་བཙུགས་ཏེ་ཡིད་བཞིན་གྱི་ནོར་བུ་རིན་པོ་ཆེ་རྒྱལ་མཚན་གྱི་རྩེ་མོ་ལ་བཏགས་ནས་བོག་ཕོར་ལག་ཏུ་བླངས་ནས་འདི་སྐད་ཅེས་སྨོན་ལམ་བཏབ་བོ། །འཛམ་བུ་གླིང་གི་མི་དག་ནི། དབུལ་ཕོངས་པ་ཤ་སྟག་སྟེ། དེ་དག་ལ་ཕན་གདགས་དགོས་ཀྱི། ཡིད་བཞིན་གྱི་ནོར་བུ་རིན་པོ་ཆེ་ཡིན་ཏེ་མི་རྫུན་ན། སོ་སོ་ནས་ཅི་དང་ཅི་དགོས་པ་དེ་དང་དེ་དག་ཐམས་ཅད་ཡིད་བཞིན་དུ་ཆར་ལྟར་ཕོབ་ཅིག་ཅེས་སྨྲས་མ་ཐག་ཏུ་ཕྱོགས་བཞི་ནས་རླུང་ནག་པོ་གཡོས་ནས་དེ་མ་ཐག་ཏུ་མི་
376b
> གཙང་བའི་ཉལ་ཉིལ་ཐམས་ཅད་ཕྱགས་ཏེ་ཆར་ཟིམ་བུ་མི་དྲག་པ་ཞིག་བབ་ནས་རྡུལ་མི་འཐུལ་བར་བྱས་པའི་འོག་ཏུ་ཐོག་མར་བཟའ་བ་དང ། བཏུང་བ་རོ་བརྒྱ་དང་ལྡན་པ་རྣམ་པ་སྣ་ཚོགས་ཆར་བཞིན་དུ་བབ་བོ། །དེ་ནས་འབྲུ་རྣམས་ཆར་བཞིན་དུ་བབ་བོ། །དེ་ནས་གོས་ཆར་བཞིན་དུ་བབ་བོ། །དེ་ནས་རིན་པོ་ཆེ་ཆར་བཞིན་དུ་བབ་སྟེ། འཛམ་བུའི་གླིང་ནི། རིན་པོ་ཆེའི་ཕུང་པོས་ཡོངས་སུ་གང་ནས་རིན་པོ་ཆེ་དག་སོག་མའམ། གྱོ་མོ་ལྟ་བུར་བྱས་ཏེ་བྱང་ཆུབ་སེམས་དཔས་དེ་ལྟར་ཀུན་ཆོག་པར་བྱས་ནས་འཛམ་བུའི་གླིང་གི་མི་རྣམས་ལ་འདི་སྐད་ཞེས་བསྒོའོ། །འཛམ་བུའི་གླིང་གི་སེམས་ཅན་དག་ནི། གོས་དང ། ཟས་དང ། ནོར་གྱི་ཕྱིར་གཅིག་ལ་གཅིག་གསོད་ཅིང་རྣམ་པ་སྣ་ཚོགས་ཀྱིས་གཙེས་པས་སྡིག་པ་མི་དགེ་བའི་ཆོས་འབའ་ཞིག་བྱེད་དེ། ཚེའི་དུས་བྱས་ནས་ངན་སོང་གསུམ་དུ་ལྷུང་སྟེ་མུན་པ་ནས་མུན་པར་འགྲོ་བས་བདག་ནི། དེ་དག་ལ་སྙིང་བརྩེ་བའི་ཕྱིར་རྒྱ་མཚོའི་བགེགས་དང ། ཉོན་མོངས་པ་མང་དུ་ཁྱེད་དུ་བསད་དེ། ཁྱེད་རྣམས་བདེ་བར་བྱ་བའི་ཕྱིར་རྒྱ་མཚོ་ནས་ནོར་བུ་རིན་པོ་ཆེ་དག་བླངས་ནས་ད་ཁྱེད་ཀུན་ཅིས་ཀྱང་མི་བྲེལ་ཏེ་བདེ་བར་གྱུར་གྱི། ཁྱེད་རྣམས་དགེ་བ་བཅུའི་ལས་ཀྱི་ལམ་ལ་ལུས་དང ། ངག་དང ། ཡིད་བསྡུས་ཏེ་བརྩོན་པར་གྱིས་ཤིག་ཅེས་ཐབས་རྣམ་པ་སྣ་ཚོགས་ཀྱི་སྒོ་ནས་བསྟན་ཅིང་བསྐུལ་ཏོ། །དེ་ལྟར་བསྟན་ཅིང་བསྐུལ་ཏེ་
377a
> ༄#། །དགེ་བ་བཅུའི་ལས་ཀྱི་ལམ་ལ་ནན་ཏན་བྱེད་དུ་བཅུག་པས། འཛམ་བུའི་གླིང་གི་མི་དེ་དག་ཚེ་འཕོས་ནས་མཐོ་རིས་གྱི་ལྷར་སྐྱེས་སོ། །དེའི་ཚེ་དེའི་དུས་ན་དེའི་ཕ་བྲམ་ཟེ་ནྱ་གྲོ་དྷ་ནི། ད་ལྟར་ངའི་ཡབ་ཟས་གཙང་མ་ཡིན་ནོ། །དེའི་མར་གྱུར་པ་ནི། ད་ལྟར་ངའི་ཡུམ་ལྷ་མཛེས་ཡིན་ནོ། །སྦྱིན་པ་ཆེན་པོ་ནི། ང་ཉིད་ཡིན་ནོ། །དངུལ་གྱི་\?\་མཁར་ན་འདུག་པའི་ཀླུ་དེ་ནི། ཤཱ་རིའི་བུ་ཡིན་ནོ། །བཻ་ཌཱུརྱའི་མཁར་ན་འདུག་པའི་ཀླུ་དེ་ནི། མཽ་གལ་ཡན་ཡིན་ནོ། །གསེར་གྱི་མཁར་ན་འདུག་པའི་ཀླུ་དེ་ནི། ཀུན་དགའ་བོ་ཡིན་ནོ། །རྒྱ་མཚོའི་ལྷ་དེ་ནི། མ་འགགས་པ་ཡིན་ནོ། །ཀུན་དགའ་བོ་འདི་ཀླུའི་རྒྱལ་པོ་བྱེད་པ་ན་ཡང་ང་ལ་བསྙེན་བཀུར་བྱས་ཏེ་དུས་ལ་མཁས། ད་ལྟར་གྱི་བར་དུ་ཡང་དུས་ལ་མཁས་ཀྱི། འདོད་པ་གསུམ་ཡང་ཡིད་བཞིན་དུ་གནང་ངོ ། །ཞེས་བཀའ་སྩལ་པ་དང ། ཀུན་དགའ་བོ་དགའ་མགུ་རངས་ནས་པུས་མོའི་ལྷ་ངས་ས་ལ་བཙུགས་ཏེ་བདག་གིས་ནམ་མཚོའི་བར་དུ་དེ་བཞིན་གཤེགས་པ་ལ་བསྙེན་བཀུར་བགྱིའོ། །ཞེས་གསོལ་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཁོར་མང་པོ་རྣམས་ལ་ལ་ནི། རྒྱུན་དུ་ཞུགས་པའི་འབྲས་བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པོ། །ལ་ལ་ནི། རང་སངས་རྒྱས་སུ་གྱུར། ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་
377b
> དོ། །ལ་ལ་ནི། ཕྱིར་མི་ལྡོག་པའི་ས་ཐོབ་ནས་རྗེས་སུ་ཡི་རང་སྟེ་མངོན་པར་དགའོ། །སྦྱིན་པ་ཆེན་པོ་རྒྱ་མཚོར་ཞུགས་པའི་ལེའུ་སྟེ་སུམ་ཅུ་པའོ།། །།རྒྱལ་པོ་མེ་ལོང་གདོང་གི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ནྱ་གྲོ་དྷའི་ཚལ་ན་བཞུགས་སོ། །དེའི་ཚེ་བཅོམ་ལྡན་འདས་ཚངས་པ་དང ། བརྒྱ་བྱིན་ལ་སོགས་པས་བསྐོར་ཅིང་བཞུགས་པ་ལས། བཅོམ་ལྡན་འདས་ཀྱི་མཚོན་དང ། དཔེ་བྱད་དང ། གསེར་གྱི་མདོག་ལྟ་བུའི་སྐུ་ལ་འཁོར་མང་པོ་ཐམས་ཅད་ངོ་མཚར་དུ་འཛིན་ཏེ་བསྟོད་ཅིང་བསྔགས་སོ། །དེ་ལྟར་བཅོམ་ལྡན་འདས་འཁོར་མང་པོ་ལས་འཕགས་ཏེ་ཐམས་ཅད་ཀྱི་མཆོག་གཙོ་བོར་གྱུར་པས། དགེ་སློང་དག་ཐེ་ཚོམ་དུ་གྱུར་ནས་བཅོམ་ལྡན་འདས་ལ་ཞུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འདི་འབའ་ཞིག་ཏུ་འཁོར་ཀུན་ལས་འཕགས་ཏེ། མཆོག་གཙོ་བོར་གྱུར་པ་མ་ཡིན་གྱི། སྔོན་འདས་པའི་དུས་ན་ཡང་འདི་དག་ཀུན་ལས་འཕགས་ཏེ་གཙོ་བོར་གྱུར་ཏོ། །དེ་ནས་དགེ་སློང་དག་གིས་སྔོན་ཇི་ལྟར་གཙོ་བོར་གྱུར་པ་བསྟན་པར་གསོལ་པ་དང་དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སྔོན་འདས་པའི་དུས་བསྐལ་པ་གྲངས་མེད། དཔག་ཏུ་མེད། བསམ་གྱིས་མི་ཁྱབ་པའི་ཕ་རོལ་ན་འཛམ་བུའི་གླིང་འདིར་རྒྱལ་
378a
> ༄#། །པོ་ཆེན་པོ་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བྱེད་པ་ཞིག་བྱུང་སྟེ། དེ་ལ་བུ་ནི། ལྔ་བརྒྱ་ཡོད་དོ། །དུས་ཕྱི་ཞིག་ན་བཙུན་མོ་ལ་བུ་ཞིག་བཙས་ཏེ། ལུས་གསེར་གྱི་ཁ་དོག་ཅན་སྐྲ་མཐོན་མཐིང་ལྟ་བུ་ལག་མཐིལ་ན་འཁོར་ལོ་རྩིབས་སྟོང་དང་ལྡན་པའི་མཚན་ཡོད་པ། རྐང་པ་གཡོན་གྱི་མཐིལ་ན་རྟའི་རི་མོ་ཡོད་པ། རྐང་པ་གཡས་ཀྱིས་མཐིལ་ན་གླང་པོ་ཆེའི་རི་མོ་ཡོད་པ། བསོད་ནམས་དང་མཚན་དུ་ལྡན་པ་ཞིག་བཙས་ཏེ། མིང་ཡང་མེ་ལོང་གདོང་ཞེས་བྱ་བར་བཏགས་སོ། །རྒྱལ་པོ་ཆེན་པོ་དེ་ནད་ཀྱིས་བཏབ་སྟེ་ཚེའི་དུས་བྱེད་དུ་ཉེ་བ་ན་བློན་པོ་རྣམས་ཀྱིས་སྲས་འདི་རྣམས་ཀྱི་ནང་ན་རྒྱལ་ཚབ་ཏུ་གང་གཞུག་།རྒྱལ་པོའི་དབང་གང་ལ་བསྐུར་ཞེས་ཞུས་པ་དང ། རྒྱལ་པོ་དེས་ཡོན་ཏན་དང་མཚན་རྣམ་པ་འདི་བཅུ་དང་ལྡན་ན། རྒྱལ་པོར་ཆུག་ལ་དབང་སྐུར་ཅིག་ཅེས་བསྒོའོ། །བཅུ་གང་ཞེ་ན། འདི་ལྟ་སྟེ། ལྷས་ཀྱི་མདོག་གསེར་ལྟ་བུ་ལ་སྐྲ་མཐོན་མཐིང་དུ་འདུག་པ་དང ། ལག་པ་གཉིས་ཀྱི་མཐིལ་ན་འཁོར་ལོའི་མཚན་ཡོད་པ་དང ། རྐང་པ་གཡས་ཀྱི་མཐིལ་ན་གླང་པོ་ཆེའི་རི་མོ་ཡོད་པ་དང ། རྐང་པ་གཡོན་པའི་མཐིལ་ན་རྟའི་རི་མོ་ཡོད་པ་དང ། རྒྱལ་པོའི་གོས་གོན་ན་ལུས་དང་འཚམ་ཞིང་མི་ཆེ་མི་ཆུང་བ་དང ། རྒྱལ་པོའི་སྟན་ལ་འདུག་ན་གཟི་བརྗིད་དང་མཐུར་ལྡན་པ་དང ། རྒྱལ་ཕྲན་རྣམས་
378b
> ཀྱིས་བཀུར་སྟི་རིམ་གྲོ་ཆེར་བྱེད་དེ། བཙུན་མོ་དང ། ཕོ་བྲང་སླས་རྣམས་ཀྱང་དེ་ལ་དགའ་ཞིང་ཕྱག་བྱེད་པ་དང ། ལྷ་རྣམས་ཀྱི་རྟེན་དུ་ཁྲིད་ན་ལྷ་རྣམས་ཀྱིས་ཕྱིར་ཕྱག་བྱེད་པ་དང ། ཡོན་ཏན་དང་བསོད་ནམས་ཀྱི་མཐུས་རིན་པོ་ཆེ་སྣ་བདུན་གྱི་ཆར་འབེབས་ཤིང་ཐམས་ཅད་ཀྱི་ཡིད་ཚིམ་པར་བྱེད་པ་དང ། བཙུན་མོ་ཆེན་མོ་ལས་བཙས་པ་དང་བཅུ་སྟེ། ཡོན་ཏན་འདི་དག་དང་ལྡན་ན། རྒྱལ་པོར་དབང་སྐུར་ཅིག་ཅེས་བསྒོས་ནས་མི་རྟག་པ་མངོན་སུམ་དུ་གྱུར་ཏེ་ཚེ་འཕོས་སོ། །དེ་ནས་རྒྱལ་བུ་དང་བློན་པོ་རྣམས་འདུས་ཏེ་རྒྱལ་བུའི་ནོར་གི་ཚེ་བ་ནས་བསྔར་གྱིས་ཡོན་ཏན་བཅུ་གང་ལ་ཡོད་པ་བརྟགས་ན། རྒྱལ་བུ་གཞན་ཐམས་ཅད་ནི། ལུས་གསེར་ལྟ་བུའི་མདོག་ཅན་མ་ཡིན། སྐྲ་མཐོན་མཐིང་དུ་འདུག་པ་མ་ཡིན། ལག་པའི་མཐིལ་ན་འཁོར་ལོའི་མཚན་ཡོད་པ་མ་ཡིན། རྐང་བའི་མཐིལ་ན་གླང་པོ་ཆེ་དང་རྟའི་རི་མོ་ཡོད་པ་མ་ཡིན། རྒྱལ་པོའི་གོས་དང་འཚམ་པ་མ་ཡིན། རྒྱལ་པོའི་གདན་ལ་བཞག་ན་སྡངས་པ་ལྟར་འགྲེང་བར་གྱུར། རྒྱལ་ཕྲན་དང་བློན་པོ་རྣམས་བསྟི་སྟང་དང་ཕྱག་མི་བྱེད་དེ། བཙུན་མོ་དང་ཕོ་བྲང་སླས་རྣམས་དགའ་བ་དང་ཕྱག་བྱ་བ་མ་ཡིན། ལྷའི་རྟེན་དུ་ཁྲིད་ན་ལྷ་རྣམས་ཀྱིས་ཕྱག་བྱ་བ་མ་ཡིན། རིན་པོ་ཆེའི་ཆར་འབེབས་པར་ནུས་པ་མ་ཡིན། བཙུན་མོ་ཆེན་མོའི་སྲས་ཀྱང་མ་ཡིན་ཏེ། རྒྱལ་བུ་ལྔ་བརྒྱ་ལས་མཚན་གཅིག་ཙམ་དང་ལྡན་པ་
379a
> ༄#། །འགའ་ཡང་མ་བྱུང་སྟེ། སྲས་ཀྱི་ནང་གི་ཐ་ཆུང་འབའ་ཞིག་ལུས་གསེར་གྱི་མདོག་ཅན་ལ། སྐྲ་མཐོན་མཐིང་གི་མདོག་ལྟ་བུ། ལག་པ་གཉིས་འཁོར་ལོའི་མཚན་དང་ཡང་ལྡན། རྐང་པའི་མཐིལ་ན་གླང་པོ་ཆེ་དང་རྟའི་རི་མོ་ཡང་ཡོད། གོས་དང་ལུས་སུ་འཚམ། རྒྱལ་པོའི་གདན་ལ་བཞག་ན་གཟི་བརྗིད་དང་བྱིན་ཆེ། རྒྱལ་ཕྲན་ཐམས་ཅད་ཀྱིས་བསྟི་སྟང་དང་བཅས་པས་ཕྱག་བྱེད་ཅིང ། བཙུན་མོ་དང་སླས་རྣམས་ཀྱང་དགའ་བས་ཕྱག་བྱེད། ལྷའི་རྟེན་དུ་འོངས་ན་ལྷ་རྣམས་ཕྱག་བྱེད། རིན་པོ་ཆེ་ཕོབ་ཅིག་ཅེས་སྨྲས་མ་ཐག་ཏུ་ཆར་བཞིན་དུ་འབབ། བཙུན་མོའི་ནང་གི་ཆེན་མོ་ལས་བཙས་ཏེ། མཚན་རྫོགས་པར་ལྡན་པས་རྒྱལ་ཕྲན་དང ། བློན་པོ་རྣམས་ཀྱིས་རྒྱལ་པོར་དབང་བསྐུར་ཏེ། ཚེས་བཅོ་ལྔའི་ནང་བར་ཉི་མ་ཐོག་མར་ཤར་བ་ན་གསེར་གྱི་འཁོར་ལོ་རྩིབས་སྟོང་དང་ལྡན་པ། ཆེ་ཁྱད་དཔག་ཚད་གཅིག་པ། ཤར་ཕྱོགས་ནས་འོངས་ཏེ་དེ་ལ་པུས་མོ་བཙུགས་ནས་གལ་ཏེ་བདག་ཡོན་ཏན་དང་ལྡན་ཏེ་རྒྱལ་པོར་འགྱུར་ན། འཁོར་ལོ་འདི་བདག་གི་དྲུང་དུ་ཉེ་བར་ཤོག་ཅིག་ཅེས་སྨྲས་པ་དང ། ནམ་མཁའི་ཕྱོགས་ནས་ཉེ་བར་འོངས་སོ། །གླང་པོ་རིན་པོ་ཆེ་ནི། རི་སྤོས་ཀྱི་ངད་ཅན་ནས་འོངས་ཏེ་མཇུག་མ་ལ་ནོར་\?\་བུས་བརྒྱན་པ། རྒྱལ་པོ་དེ་ལ་ཞོན་ནས་ནམ་མཁའ་ལ་འཕུར་ཏེ། ཉི་མ་ཕྱེད་ཀྱིས་
379b
> གླིང་བཞི་ནས་འཁོར་ཏོ། །གལ་ཏེ་རྐང་པས་འགྲོ་ན་རྐང་པའི་རྗེས་གར་རེག་པར་གསེར་གྱི་བྱེ་མར་འགྱུར་རོ། །རྟ་རིན་པོ་ཆེ་ནི། ཁ་དོག་མཐིང་ག་ལ་རྔ་རྡོག་དམར་བ། རིན་པོ་ཆེ་སྣ་བདུན་འབབ་པ། རྒྱལ་པོ་དེ་ལ་ཞོན་ན། ཟན་གཅིག་བཟའ་རན་ཙམ་གྱིས་གླིང་བཞི་ནས་འཁོར་ཏེ། མི་ངལ་མི་དུབ་བོ། །ནོར་བུ་རིན་པོ་ཆེ་ནི། འོད་ཟེར་ཉིན་མཚན་དུ་གསལ་ཏེ། རྒྱང་གྲགས་བརྒྱ་ཉི་ཤུ་ཚུན་ཆད་འོད་ཀྱིས་སྣང་བར་བྱེད་ལ། རིན་པོ་ཆེ་སྣ་བདུན་ཆར་བཞིན་དུ་འབབ་ཅིང་ཐམས་ཅད་ལ་སྦྱིན་པར་བྱེད་དོ། །བུད་མེད་རིན་པོ་ཆེ་ནི། བཟང་བ། མཛེས་པ། རྒྱལ་པོའི་ཡིད་ཚིམ་པར་བྱེད་དོ། །ཁྱིམ་བདག་རིན་པོ་ཆེ་ནི། རྒྱལ་པོའི་རིན་པོ་ཆེ་སྣ་བདུན་ཅི་དགོས་པ་ཡིད་བཞིན་དུ་སྤྱར་ཏེ། ཟད་མི་ཤེས་པར་བྱེད་དོ། །བློན་པོ་རིན་པོ་ཆེ་ནི། རྒྱལ་པོ་ལ་དཔུང་རྣམ་བཞི་དགོས་ན། བལྟས་པ་ཙམ་གྱིས་དཔུང་གི་ཚོགས་རྣམས་འདུས་ཏེ། རྩལ་དང་མཐུར་ལྡན་ནོ། །དེ་ལྟར་རིན་པོ་ཆེ་སྣ་བདུན་དང་ལྡན་ནས་དེ་འདི་སྙམ་དུ་སེམས་སོ། ། ཐབས་འདི་ལྟ་བུ་ཐོབ་པ་ཡང་སྔོན་གྱི་བསོད་ནམས་ལས་སྐྱེས་ཀྱི། རྒྱལ་པོའི་གདུང་རྒྱུད་མི་འཆད་པར་བྱའོ་སྙམ་བསམས་ནས་སྤོས་ཆུས་ཁྲུས་བྱས་ཏེ། གོས་གསར་པ་གཙངས་བགོས་ནས་ལག་ན་བོག་ཕོར་ཐོགས་ཏེ་ཤར་ཕྱོགས་ལོགས་སུ་པུས་མོ་ས་ལ་བཙུགས་ནས་འདི་སྐད་ཅེས་སྨྲས་སོ། །ཤར་ཕྱོགས་ན་སྐྱེས་བུ་འཕགས་པ་བཞུགས་པ་རྣམས་བདག་
380a
> ༄#། །གསོལ་བ་བཞིན་དུ་གཤེགས་སུ་གསོལ་ཞེས་སྨྲས་པ་དང ། ཤར་ཕྱོགས་ནས་རང་སངས་རྒྱས་ཉི་ཁྲི་སྙེད་རྒྱལ་པོའི་ཕོ་བྲང་དུ་གཤེགས་སོ། །ལྷོ་དང་ནུབ་དང ། བྱང་ཕྱོགས་སུ་ཡང་དེ་བཞིན་དུ་གསོལ་པ་དང ། དེ་དག་ཀྱང་སོ་སོ་ནས་རང་སངས་རྒྱས་ཉི་ཁྲི་སྙེད་རྒྱལ་པོའི་ཕོ་བྲང་དུ་གཤེགས་སོ། །དེ་ནས་རྒྱལ་པོ་དང ། བློན་པོ་རྣམས་ཀྱིས་ཡོ་བྱད་རྣམ་བཞི་སྦྱར་ཏེ་མཆོད་པ་བྱས་སོ། །དེ་ནས་རྒྱལ་ཕྲན་བརྒྱད་ཁྲི་བཞི་སྟོང་སྙེང་ཕྱིར་ཡུལ་དུ་འགྲོ་བར་གསོལ་ཏེ་ཕྱི་ཕྱག་འཚལ་བ་ན། རྒྱལ་ཕྲན་རྣམས་ཀྱིས་འཕགས་པ་རྣམས་ལ་ཤས་ཀྱིས་བདག་ཅག་ཀྱང་མཆོད་པར་འཚལ་ཏེ། བསོད་ནམས་བགྱིའོ། །ཞེས་གསོལ་པ་དང ། རྒྱལ་པོ་དང ། བློན་པོ་རྣམས་ཀྱིས་ལོ་བརྒྱད་ཁྲི་བཞི་སྟོང་གི་བར་དུ་རང་སངས་རྒྱས་བརྒྱད་ཁྲི་ལ་ཡིད་བཞིན་དུ་མཆོད་ནས་ཚེའི་དུས་བྱས་པ་དང ། མཐོ་རིས་ཀྱི་ལྷར་སྐྱེས་སོ། །དགེ་སློང་དག་།དེའི་ཚེ་རྒྱལ་པོ་མེ་ལོང་གདོང་དེ་ནི། ད་ལྟར་ང་ཡིན་ནོ། །རྒྱལ་པོ་དེའི་ཕ་ནི། ངའི་ཡབ་ཟས་གཙང་མ་ཡིན་ནོ། །བཙུན་མོ་ཆེན་མོ་དེ་ནི། ངའི་ཡུམ་ལྷ་མཛེས་ཡིན་ནོ། །རྒྱལ་བུ་ལྔ་བརྒྱ་ནི། ཤཱཀྱའི་རིགས་ལྔ་བརྒྱ་ཡིན་ནོ། །དེའི་ཚེ་ན་ཡང་ཐམས་ཅད་ཀྱི་མཆོག་གཙོ་བོར་གྱུར་ཏེ་ད་སངས་རྒྱས་ནས་ཀྱང་མཚན་དང་ལྡན་པའི་མཆོག་གཙོ་བོར་གྱུར་ཏོ། །འཁོར་མང་པོ་རྣམས་སངས་
380b
> རྒྱས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །རྒྱལ་པོ་མེ་ལོང་གདོང་གི་ལེའུ་སྟེ་སུམ་ཅུ་གཅིག་པའོ།། །།བམ་པོ་དགུ་པ། ལེགས་ཚོལ་དང་ཉེས་ཚོལ་གྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ལྷ་སྦྱིན་རབ་ཏུ་བྱུང་མོད་ཀྱི། རྙེད་པ་ལ་ཆགས་པས་མཚམས་མེད་པའི་ལས་ཀྱིས་རི་བསྙིལ་ནས་སངས་རྒྱས་མནན་པ་དང ། ཞབས་ལ་ཤིང་གི་ཚལ་པ་འཇུགས་པ་དང ། གླང་པོ་ཆེ་སྨྱོན་པ་བཏང་བ་དང ། མཐུན་པའི་དགེ་འདུན་གྱི་དབྱེན་བྱས་པ་དང ། ཟག་པ་ཟད་པའི་དགེ་སློང་མ་བསད་པ་དང ། མི་དགེ་བའི་ལས་འདི་དག་བྱས་ནས་སྐྱེ་བ་ཕྱི་མའི་རྣམ་པར་སྨིན་པས་འཇིགས་ཏེ་མུ་སྟེགས་ཅན་གྱི་སྟོན་པ་དྲུག་གི་ཐད་དུ་སོང་ནས་དྲིས་སོ། །སྟོན་པ་དྲུག་གིས་ཀྱང་ངན་པར་ལྟ་བའི་ཆོས་སྡིག་པ་བྱས་ཀྱང་སྡིག་པར་མི་འགྱུར་ལ། དགེ་བ་བྱས་ཀྱང་བསོད་ནམས་སུ་མི་འགྱུར་བའི་ཆོས་བསྟན་ནས་དེ་ལ་ཡིད་ཆེས་ཏེ་དགེ་བའི་རྩ་བ་བཅད་དོ། །དེའི་ཚེ་ན་ཀུན་དགའ་བོས་ཕུ་ནུ་བོ་ལ་སྙིང་བརྩེ་བའི་ཕྱིར་རབ་ཏུ་མི་དགའ་སྟེ་དུས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷས་སྦྱིན་གཏི་མུག་ཅན་ནི། མི་དགེ་བའི་ལས་ཁ་ན་མ་ཐོབ་བགྱིས་ཏེ་དགེ་བའི་རྩ་བ་བཅད་ནས་
381a
> ༄#། །ཤཱཀྱའི་རིགས་རྣམས་ཀྱང་སུན་འབྱིན་པར་བགྱིས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལྷ་སྦྱིན་འདི་ནི། ཚེ་འདི་འབའ་ཞིག་ལ་རྙེད་པ་དང་གྲགས་པའི་ཕྱིར་དགེ་བའི་རྩ་བ་བཅད་པར་མ་ཟད་ཀྱི། འདས་པའི་དུས་ན་ཡང་རྙེད་པ་དང ། གྲགས་པའི་ཕྱིར་ལུས་དང་སྲོག་ཀྱང་སྟོར་བའི་ལས་བྱས་སོ། །དགེ་སློང་དག་ཐེ་ཚོམ་དུ་གྱུར་ནས་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་གྱིས་འདས་པའི་དུས་ན་ཡང་རྙེད་པ་དང་གྲགས་པའི་སླད་དུ་ལུས་དང་སྲོག་སྟོར་བའི་ལས་བགྱིས་པ་ཇི་ལྟ་བུ་ལགས་ཞེས་གསོལ་པ་དང ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། སྔོན་འདས་པའི་དུས་ན་བསྐལ་པ་གྲངས་མེད་དཔག་ཏུ་མེད། བསམ་གྱིས་མི་ཁྱབ་པའི་ཕ་རོལ་ན་འཛམ་བུའི་གླིང་འདིར་ཡུལ་ཝ་ར་ཎ་སི་ན་བྲམ་ཟེ་ཧ་ཡི་ཞེས་བྱ་བ་ཞིག་ཡོད་དེ། དེས་རིགས་མཉམ་པ་ལས་ཆུང་མ་བླངས་ནས་རིང་པོ་མ་ལོན་པར་ཆུང་མ་སེམས་ཅན་དང་ལྡན་པར་གྱུར་ཏེ་ཟླ་བ་དགུ་ཚང་བ་ན་བུ་ཁྱེའུ་ཞིག་བཙས་སོ། །དེ་ནས་བཙས་སྟོན་ཆེན་པོ་བྱས་ནས་བུའི་མིང་ཡང་ལེགས་ཚོལ་ཞེས་བྱ་བར་བཏགས་ཏེ་མ་མ་ལ་གཏད་ནས་གསོས་སོ། །དེ་ནས་ཡང་སེམས་ཅན་དང་ལྡན་པར་གྱུར་ཏེ། སྔོན་མ་དེ་མཉེན་ཞིང་དེས་པ་ལས།
381b
> སེམས་ཅན་དང་ལྡན་པའི་འོག་ཏུ་གཏུམ་ཞིང་ཁྲོ་བར་གྱུར་ཏོ། །དེ་ནས་ཟླ་བ་ཚང་བ་དང་ཁྱེའུ་ཞིག་བཙས་ཏེ། དེ་ལྟར་མ་ཡང་སྔོན་ལས་གྱུར་པས། བུའི་མིང་ཡང་ཉེས་ཆོལ་ཞེས་བྱ་བར་བཏགས་ཏེ་མ་མ་ལ་གཏད་ནས་གསོས་སོ། །ཁྱེའུ་སྤུན་གཉིས་ཕྱིས་ཆེར་སྐྱེས་ནས་སྤུན་གཉིས་རྒྱ་མཚོར་རིན་པོ་ཆེ་ལེན་པར་དད་དེ་སོ་སོ་ནས་འཁོར་དང་གྲོགས་ལྔ་བརྒྱ་ལྔ་བརྒྱ་རྙེད་ནས་སྔ་ཕྱིར་ལམ་དུ་ཞུགས་སོ། །ལམ་རིང་བས་ན་ཞག་བདུན་གྱི་གནས་སུ་མ་ཕྱིན་པར་རྒྱགས་ཆད་དེ་སྲོག་དང་བྲལ་དུ་ཉེ་ནས་ལེགས་ཚོལ་དང་གྲོགས་ཚོང་པ་གྲོགས་པོ་རྣམས་ཉམ་ཐག་སྟེ། ཐམས་ཅད་ལྷ་རྗེད་ཅིང་ལྷ་རྣམས་ལ་མཆོད་པ་བྱེད་དོ། །དེ་ནས་འབྲོག་སྟོང་དེ་ན་རྒྱང་མ་ནས་སྐྱེད་ཤིང་བཟང་པོ་ཞིག་མཐོང་ནས་ཐམས་ཅད་སྐྱེད་ཤིང་དྲུང་དུ་ལྷགས་པ་དང ། ཤིང་གི་དྲུང་ན་ཆུ་མིག་བཟང་པོ་ཞིག་ཀྱང་ཡོད་དེ། ཚོང་པ་རྣམས་ཆུ་མིག་དེ་ལ་འཐུངས་ནས་བདག་ཅག་གིས་ལྷ་མཆོད་པའི་རྟགས་འདིའོ། །ཞེས་སྨྲས་པ་དང ། ལྷས་མངོན་སུམ་དུ་སྨྲས་ཏེ་སྐྱེད་ཤིང་གི་ཡལ་ག་ཆོད་ཅིག་དང ། འདོད་པ་ཐམས་ཅད་འབྱུང་ངོ ། །ཞེས་བསྒོའོ། །དེ་ནས་ཡལ་ག་གཅིག་བཅད་པ་དང ། བཏུང་བ་ཞིམ་པོ་བྱུང་ངོ ། །དེ་ནས་ཡལ་ག་གཅིག་བཅད་པ་དང ། ཁ་ཟས་རོ་བརྒྱ་དང་ལྡན་པ་ཐམས་ཅད་བྱུང་ནས་དེ་དག་ཀུན་གྱིས་ཚིམ་པར་ཟོས་སོ། །དེ་ནས་ཡང་ཡལ་ག་གཅིག་བཅད་པ་དང ། གོས་རྣམ་པ་
382a
> ༄#། །སྣ་ཚོགས་བྱུང་ངོ ། །དེ་ནས་ཡལ་ག་གཅིག་བཅད་པ་དང ། ནོར་བུ་རིན་པོ་ཆེ་སྣ་ཚོགས་བྱུང་སྟེ་ཁལ་ཐམས་ཅད་ལོངས་སོ། །དེ་ནས་ཉེས་ཚོལ་ལ་སོགས་པ་ཐམས་ཅད་དེར་ལྷགས་ཏེ་སྔ་མའི་ཡལ་ག་བཅད་པ་ལས་རིན་པོ་ཆེ་སྣ་ཚོགས་ཁལ་ལོངས་པ་མཐོང་ནས་འདི་སྙམ་དུ་བསམས་སོ། །སྔ་མ་འདི་དག་གིས་ཡལ་ག་ལས་ཀྱང་རིན་པོ་ཆེ་ཆོག་པར་རྙེད་ན། ཤིང་འདིའི་རྩ་བ་ཕྱུང་ན་ནི། རིན་པོ་ཆེ་སྣ་ཚོགས་མང་དུ་རྙེད་དོ་སྙམ་བསམས་ནས་ཤིང་གི་རྩ་བ་རྐོ་བར་གཟས་སོ། །དེ་ནས་ལེགས་ཚོལ་མི་དགའ་སྟེ་སྨྲས་པ། བདག་ཅག་ནི། ཕོངས་ཏེ། སྲོག་དང་བྲལ་བ་ལས་ཤིང་འདིས་བདག་ཅག་སྲོག་གསོད་\?\་ཀྱི། ཁྱོད་ཤིང་འདི་མ་གཅོད་ཅིག་ཅེས་སྨྲས་ན། ཉེས་ཚོལ་མ་ཉན་ཏེ་ཤིང་གི་རྩ་བ་བཅད་དོ། །དེ་ནས་ལེགས་ཚོལ་ཡང་མཐོང་མི་འདོད་པར་ཁལ་དང་བཅས་པ་སོང་བའི་འོག་ཏུ་ཤིང་གི་རྩ་བ་ནས་སྲིན་པོ་ལྔ་བརྒྱ་བྱུང་སྟེ་ཉེས་ཚོལ་དང ། ཚོང་པ་ཀུན་ཟོས་སོ། །ཀུན་དགའ་བོ། དེའི་ཚེ་དེའི་དུས་ན་ལེགས་ཚོལ་དེ་ནི། ད་ལྟར་ང་ཡིན་ནོ། །དེའི་ཕ་དེ་ནི། ད་ལྟར་ངའི་ཡབ་ཟས་གཙང་མ་ཡིན་ནོ། །དེའི་མ་དེ་ནི། ད་ལྟར་ངའི་ཡུ་མ་ལྷ་མཛེས་མ་ཡིན་ནོ། །ཉེས་ཚོལ་ནི། ད་ལྟར་གྱི་ལྷ་སྦྱིན་འདི་ཡིན་ཏེ། ཀུན་དགའ་བོ། ལྷ་སྦྱིན་གྱིས་དེ་ལྟར་འབའ་ཞིག་ང་ལ་གནོད་པར་མ་ཟད་དེ། རྙེད་པ་
382b
> དང ། གྲགས་པའི་ཕྱིར་སྐྱེ་བ་ཐམས་ཅད་དུ་ང་ལ་གནོད་པ་བྱས་ན། ངས་ཕན་པའི་ཆོས་བསྟན་ཏེ་ཕན་པར་བྱས་ཀྱང་ལྷ་སྦྱིན་ནི། ང་ལ་དགྲར་འཛིན་ཏོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་རྣམས་རྗེས་སུ་ཡི་རང་སྟེ་མངོན་པར་དགའོ། །ལེགས་ཚོལ་དང་ཉེས་ཚོལ་གྱི་ལེའུ་སྟེ་སུམ་ཅུ་གཉིས་པའོ།། །།རྒྱལ་པོ་དགེ་དོན་གྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་\?\་དགེ་སློང་ཆེན་པོའི་དགེ་འདུན་དང་ཐབས་ཅིག་ཏུ་བཞུགས་སོ།། དེའི་ཚེ་ན་ཚེ་དང་ལྡན་པ་ཀུན་དགའ་བོས་ལྷ་སྦྱིན་གྱིས་ཐབས་རྣམ་པ་སྣ་ཚོགས་ཀྱིས། དེ་བཞིན་གཤེགས་པ་ལ་གནོད་པ་བྱ་བར་བསམས་ཀྱང་དེ་བཞིན་གཤེགས་པ་ནི། ལྷ་སྦྱིན་དང ། སྒྲ་གཅན་འཛིན་གཉིས་ལ་མི་འདྲ་བ་མེད་པར་དགོངས་ཏེ། རྟག་ཏུ་དེ་ལ་ཐུགས་བརྩེ་བར་མཐོང་སྟེ་བཅོམ་ལྡན་འདས་ལ་ཞུས་པ་དང ། བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ལྷ་སྦྱིན་འདིས་དུས་འདི་ཉིད་ན་ང་ལ་གནོད་པ་བྱས་པར་མ་ཟད་དོ། སྐྱེ་བ་གཞན་དུ་ཡང་ང་ལ་གནོད་སེམས་བསྐྱེད་དོ། །དགེ་སློང་དག་ཐེ་ཚོམ་དུ་གྱུར་ནས་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་འདིས་སྐྱེ་བ་གཞན་དག་ན་བཅོམ་ལྡན་འདས་ལ་གནོད་པ་ཇི་ལྟར་བགྱིས་ནས་གསོལ་
383a
> ༄#། །པ་དང ། བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །སྔོན་འདས་པའི་དུས་བསྐལ་པ་གྲངས་མེད། ཚད་མེད། དཔག་ཏུ་མེད།་བསམ་གྱིས་མི་ཁྱབ་པའི་ཕ་རོལ་ན་འཛམ་བུའི་གླིང་འདིར་རྒྱལ་པོ་རིན་ཆེན་གོ་ཆ་ཞེས་བྱ་བ། རྒྱལ་ཕྲན་ལྔ་བརྒྱ་ལ་དབང་བྱེད་པ་ཞིག་བྱུང་ངོ ། །དེ་ལ་བཙུན་མོ་དང ། ཕོ་བྲངས་སླས་ལྔ་བརྒྱ་སྙེད་ཡོད་ཀྱང་བུ་མེད་དེ། ཉི་ཟླའི་ལྷ་ལ་སོགས་ཏེ་ལྷ་ཐམས་ཅད་ལ་གསོལ་བ་བྱས་ནས་ལོ་མང་དུ་ལོན་ཡང་བུ་མེད་པས་མི་དགའ་བར་གྱུར་ཏེ་འདི་སྙམ་དུ་བསམས་སོ། །བདག་ལ་བུ་ནི། གཅིག་ཀྱང་མེད་ཀྱི། དེའུ་རེ་ཚེ་ཟད་པས་རྒྱལ་ཕྲན་ལྔ་བརྒྱ་ཡང་གཅིག་ལ་གཅིག་མི་ཉན་ཏེ་ཐམས་ཅད་འཁྲུགས་ནས་ཡུལ་མ་བདེ་བར་འགྱུར་རོ་སྙམ་ནས་སེམས་ཁོང་དུ་ཆུད་དེ་ལག་པ་འགྲམ་པ་ལ་བརྟེན་ནས་འདུག་པ་ལས། དེའི་ཚེ་ན་ལྷ་ཞིག་རྒྱལ་པོའི་བསམ་པ་ཤེས་ནས་རྨི་ལམ་དུ་རྒྱལ་པོ་ལ་འདི་སྐད་ཅེས་བསྒོའོ། །ཕོ་བྲང་གི་ཕྱི་རོལ་ཚལ་གྱི་ནང་ན་དྲང་སྲོང་གཉིས་ཤིག་ཡོད་དེ། གཅིག་གི་ལུས་གསེར་གྱི་མདོག་ཏུ་འདུག་གི་།དེའི་གན་དུ་སོང་ལ་གསོལ་བ་ཐོབ་ཅིག་དང ། བུར་སྐྱེ་བར་འགྱུར་རོ། །ཞེས་བསྒོ་མ་ཐག་ཏུ་གཉིད་ལོག་པ་ལས་སད་ནས་དྲང་སྲོང་གཉིས་གང་ན་འདུག་པ་ཚོལ་དུ་སོང་སྟེ་དྲང་སྲོང་དེ་དང་ཕྲད་ནས་བདག་ལ་རྒྱལ་པོའི་རིགས་
383b
> འཚོབ་པ་མེད་ཀྱི། ཁྱོད་བདག་གི་རིགས་སུ་སྐྱེས་ཏེ་རིགས་སོབས་ཤིག་ཅེས་གསོལ་བ་བཏབ་ནས་དྲང་སྲོང་དེས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དྲང་སྲོང་གཅིག་གིས་ཀྱང་བདག་ཀྱང་ཁྱོད་ཀྱི་རིགས་སུ་སྐྱེ་བར་བྱའོ། །ཞེས་སྨྲས་པ་དང ། རྒྱལ་པོ་རབ་ཏུ་དགའ་ནས་ཁྱོད་ཀྱང་བདག་གི་རིགས་སུ་སྐྱེ་བར་ཤོག་ཅིག་ཅེས་སྨྲས་སོ། །དེ་ནས་རྒྱལ་པོ་ཕྱིར་ལོགས་ནས་དུས་ཕྱི་ཞིག་ན་དྲང་སྲོང་གསེར་གྱི་མདོག་ཅན་དེ་ཚེའི་དུས་བྱས་ནས་བཙུན་མོ་ཆེན་མོའི་མངལ་དུ་སྐྱེས་ཏེ། བུད་མེད་མཁས་པས་བུ་ཡོད་པར་ཤེས་ནས་བུ་ཕོར་ཤེས་ཏེ་བདག་ལ་ངེས་པར་བུ་ཕོ་ཡོད་དོ། །ཞེས་རྒྱལ་པོ་ལ་སྨྲས་ནས་རྒྱལ་པོས་ཀྱང་བཙུན་མོའི་རིམ་གྲོ་བསྐྱེད་དོ། །ཟླ་བ་དགུ་ཚང་ནས་བུ་ཁྱེའུ་གསེར་གྱི་མདོག་ཅན་སྐྲ་མཐོན་མཐིང་གར་འདུག་པ། མཚན་དང་ལྡན་པ་ཞིག་བཙས་སོ། །རྒྱལ་པོ་རབ་ཏུ་དགའ་ནས་བཙས་སྟོན་བྱས་ཏེ་མཚན་མཁན་གྱིས་མཚན་བལྟས་ནས་བུའི་མིང་ཡང་དགེ་དོན་དུ་བཏགས་སོ། ། དེ་ནས་ཡང་བཙུན་མོ་གཅིག་ཀྱང་སེམས་ཅན་དང་ལྡན་པར་གྱུར་ཏོ། །དྲང་སྲོང་གཅིག་ཤོས་ཀྱང་ཚེའི་དུས་བྱས་ནས་བཙུན་མོ་དེའི་མངལ་དུ་སྐྱེས་སོ། །དེ་ནས་ཡང་བཙས་སྟོན་བྱས་ཏེ་མཚན་མཁན་གྱིས་མཚན་བལྟས་ནས་ཁྱེའུའི་མིང་སྡིག་དོན་དུ་བཏགས་སོ། །རྒྱལ་པོ་བུ་ལ་བྱམས་ཤིང་སྡུག་པས། བུ་འདུག་པའི་གནས་དབྱར་དགུན་དང ། སྟོན་
384a
> ༄#། །དཔྱིད་སོ་སོར་བྱས་ཏེ་བགས་ཀྱིས་ཆེར་སྐྱེས་ནས་རིག་པ་བཅོ་བརྒྱད་ལ་སོགས་ཏེ་གཙུག་ལག་ཐམས་ཅད་ལ་མཁས་པར་གྱུར་ཏོ། །ཕྱིས་དགེ་དོན་གྱིས་རྒྱལ་པོ་ལ་གསོལ་ཏེ། བདག་ཕྱི་རོལ་ཏུ་འཆག་ཅིང་ལྟད་མོ་བལྟར་འགྲོའོ། །ཞེས་བྱ་བ་དང ། དེའི་ཕ་མས་ཀྱང་བུ་འཆག་ཏུ་འགྲོའོ། །ཞེས་ལམ་སྲུང་ཕྱག་དར་བྱེད་དུ་བཅུག་སྟེ་རྒྱལ་མཚན་དང་བ་དན་བསྒྲེངས་ནས་མེ་ཏོག་གིས་གཏོར་ཏེ་བདུག་པ་དང ། སྤོས་ཀྱིས་བདུག་པ་ལ་སོགས་པ་ཡོ་ལང་བཤམས་ནས་དགེ་དོན་གླང་པོ་ཆེ་རིན་པོ་ཆེ་སྣ་བདུན་གྱིས་བརྒྱན་པ་ལ་བསྐྱོན་ཏེ་དྲིལ་བསྒྲགས། རྔ་བརྡུངས། རོལ་མོ་དང་སིལ་སྙན་དཀྲོལ་ཏེ་སྐྱེ་བོ་བརྒྱ་སྟོང་སྙེད་ཀྱིས་བསྐོར་ནས་གྲོང་ཁྱེར་གྱི་ཕྱི་རོལ་དུ་དོང་ངོ ། །ཡུལ་མི་ཐམས་ཅད་ལམ་གྱི་གཡས་གཡོན་ན་ཁང་བུ་བརྩེགས་པའི་སྟེང་ནས་མིག་མི་འཛུམ་པར་ལྟ་ཞིང ། འདིའི་བྱིན་དང་གཟི་བརྗིད་ནི། ཚངས་པ་དང་འདྲའོ། །ཞེས་བསྒྲགས་སོ། དེ་ནས་སོང་སོང་བ་ལས་མུ་ཏོ་བདག་གཅིག་གོས་ཧྲུལ་པོ་གྱོན་ཞིང་སྣོད་ཆག་པ་ཐོགས་ཏེ་ཅུང་ཟད་བསླང་ངོ ། །ཞེས་འབོད་པ་དགེ་དོན་གྱིས་ཐོས་ནས་དེ་དག་ལ་ཁྱེད་ཅིའི་ཕྱིར་འདི་ལྟར་ཉོན་མོངས་ཤིང་སྡུག་ཅེས་དྲིས་སོ། །དེ་དག་ལས་ཁ་ཅིག་ནི། འདི་སྐད་དུ། བདག་ཅག་ལ་ཕ་མ་དང ། ཕུ་ནུ་དང ། བུ་སྨད་དང ། གཉེན་བཤེས་མ་མཆིས་པས་
384b
> སྡུག་གོ་།ཞེས་ཟེར་རོ། །དེ་ལ་ཁ་ཅིག་ནི། བདག་ཅག་ཡུན་རིང་དུ་ནད་ཀྱིས་བཏབ་པས་མི་སོས་ཏེ་དུག་གོ་།ཞེས་ཟེར་རོ། །དེ་ལ་ཁ་ཅིག་ནི། བདག་ཅག་བག་མ་བྱས་པས་ཆོམ་པོས་བཅོམ་སྟེ་ཅི་ཡང་མི་བདོག་པས་སློང་མོ་བྱེད་དོ། །ཞེས་ཟེར་རོ། །དགེ་དོན་གྱིས་དེ་སྐད་ཅེས་སྨྲས་པ་ཐོས་ནས་མཆི་མ་དཀུ་སྟེ་སོང་ངོ ། །དེ་ནས་ཡང་ཡ་ཟད་ཅིག་ན་ཤན་པ་དག་ཅིག་སྲོག་ཆགས་བསད་ནས་བགས་པ་བཤུ་བ་དང ། བསྙལ་གཏུབས་བདག་མཐོང་ངོ ། །དགེ་དོན་གྱིས་ཨེ་མའོ་འདི་དག་ཅི་བྱེད་ཅེས་དྲིས་པ་ན། བདག་ཅག་གི་ཕ་མེས་རྒྱུད་ཀྱིས་འདི་འདྲ་བའི་གསོད་པའི་ལས་བྱེད་དེ། འདི་མ་བྱས་ན་མི་འཚོའོ། །ཞེས་ཟེར་རོ། །དེ་ལ་དགེ་དོན་ངོ་མཚར་དུ་གྱུར་ནས་ལྟ་མི་འདོད་པར་སོང་ངོ ། །དེ་ནས་ཡང་ཕ་ཟད་ཕྱིན་པ་དང་ཞིང་པ་དག་ཅིག་ཞིང་རྨོས་ཏེ། ཞིང་རྨོས་པའི་ཤུལ་ན་སྲིན་བུ་མང་དུ་བྱུང་བ་ལ་བྱ་མང་པོ་དང ། སྤྲུལ་གདུག་པ་དག་འཐུ་ཞིང་ཟ་བ་མཐོང་ནས་འདི་དག་ཅི་བྱེད་ཅེས་དྲིས་པ་ན། བདག་ཅག་ནི།་ཞིང་རྨོས་ཏེ་ས་རློགས་པའི་ཤུལ་དུ་ས་བོན་བཏབ་ན་ཕྱིས་མང་དུ་སྐྱེས་ཏེ། དེས་འཚེ་ཞིང་རྒྱལ་པོའི་དཔྱ་ཡང་འབུལ་ལོ། །ཞེས་ཟེར་རོ། །དགེ་དོན་དེ་ལ་ཡང་ངོ་མཚར་དུ་གྱུར་ནས་ཕ་ཟད་སོང་བ་དང ། རྔོན་པ་བྱ་རྒྱ་བྲེས་པ་དང ། རྙི་བཙུགས་ནས་བྱ་རྣམས་བཤོར་བ་དང ། སེམས་ཅན་དག་བྱ་རྒྱ་དང ། རྙིས་ཟིན་ནས་ལུས་རྡེབ་ཅིང་འཐེན་ཀྱང་མ་
385a
> ༄#། །ཤོར་ཏེ།་སྙིང་རྗེ་བའི་སྐད་ཕྱུང་ནས་ཤིན་ཏུ་འཇིགས་སྐྲག་པ་དག་མཐོང་ནས་ཁྱོད་ཅི་བྱེད་ཅེས་དྲིས་ན། བདག་ཅག་ཀྱང་རྒྱུད་ཀྱིས་འདི་འདྲ་བའི་གསོད་པའི་ལས་བྱེད་པས་འཚོའོ། །ཞེས་ཟེར་རོ། །དགེ་དོན་གྱིས་དེ་སྐད་ཅེས་སྨྲས་པ་ཐོས་ནས་ཤིན་ཏུ་ཡི་མུག་སྟེ་ཡང་ཕ་ཟད་སོང་བ་དང ། ཉ་བ་དག་ཉ་རྒྱས་ཉ་བཅུས་ནས་མང་དུ་ཟིན་ཏེ་ཐང་བུ་ལ་ཕུང་པོར་སྤུངས་ནས་ད་དུང་ཡང་འགུལ་བ་དག་མཐོང་ནས་འདི་དག་ཅི་བྱེད་ཅེས་དྲིས་ན། བདག་ཅག་ཀྱང་རྒྱུད་ཀྱིས་ལས་གཞན་མི་བྱེད་ཀྱི། འདི་ལྟར་ཉ་བཤོར་ཞིང་འཚོ་བར་བྱེད་དོ། །ཞེས་ཟེར་རོ། །དགེ་དོན་གྱིས་འདི་ལྟ་བུ་དག་མཐོང་ནས་འདི་སྙམ་དུ་བསམས་སོ། །སེམས་ཅན་འདི་དག་ནི། དབུལ་ཕོངས་པས་བགོ་བ་དང་བཟའ་བའི་ཕྱིར་འདི་ལྟ་བུའི་ཁ་ན་མ་ཐོ་བའི་ལས་གསོད་པ་ལ་སོགས་པ་བྱེད་དེ། འདི་དག་ནི། ཚེ་འཕོས་མ་ཐག་ཏུ་ངན་སོང་གསུམ་དུ་ལྟུང་སྟེ་མུན་པ་ནས་མུན་པར་འགྲོ་ཞིང་ཐར་པའི་དུས་མེད་དོ་སྙམ་དུ་བསམས་ནས་ཕྱིར་ཁྱིམ་དུ་འོངས་ཏེ་ཉིན་མཚན་དུ་དེ་སེམས་ཤིང་མི་དགའ་ནས་ཕའི་དྲུང་དུ་སོང་སྟེ་ཕ་ལ་ཡབ། བདག་ལ་གསོལ་པ་ཞིག་མཆིས་ཀྱི།་གནོང་ཞིག་ཅེས་སྨྲས་སོ། །ཕས་ཀྱང་བུ། ཁྱོད་ཅི་ཟེར། ཁྱོད་སྨྲས་པ་བཞིན་དུ་བྱའོ། །ཞེས་སྨྲས་སོ། །ཡབ། བདག་སྔོན་ཕྱི་རོལ་ཏུ་འཆག་ཏུ་མཆིས་པ་ལས་མི་མང་པོ་
385b
> གོས་དང་ཟས་ཀྱི་ཕྱིར་ཐམས་ཅད་ཉོན་མོངས་ཏེ། གཅིག་ལ་གཅིག་གསོད་པ་དང ། རྫུན་དང ། དབང་ཟ་བ་དང ། མི་དགེ་བའི་ལས་རྣམ་པ་སྣ་ཚོགས་བགྱིད་པ་མཐོང་ནས་དེ་དག་ལ་སྦྱིན་པ་བགྱི་བར་བསམས་ཀྱི། ཡབ་ཀྱི་བང་མཛོད་ཆེན་པོ་ལས་བྲེལ་ཅིང་ཕོངས་པ་དག་གི་ཕྱིར་ཡིད་བཞིན་དུ་སྤྱོད་དུ་གནོང་ཞིག་།ཕས་སྨྲས་པ། ངས་རིན་པོ་ཆེ་དང ། བང་མཛོད་མང་དུ་བསགས་པ་ཐམས་ཅད་ཁྱོད་ཀྱི་ཕྱིར་བྱས་པར་ཟད་ན། ཅིའི་ཕྱིར་ཁྱོད་ཟེར་བ་བཞིན་དུ་མི་ཉན་ཞེས་སྨྲས་སོ། །དེ་ནས་དགེ་དོན་གྱིས་ཕས་གནང་བའི་ལུང་ཐོབ་ནས་ཡུལ་མི་ཐམས་ཅད་ལ་དགེ་དོན་ནི། སྦྱིན་པ་ཆེན་པོ་བྱེད་ཀྱི། ཐམས་ཅད་འདུས་ཤིང་ཤོག་ཅིག་ཅེས་བསྒྲགས་སོ། །དེའི་ཚེ་ན་དགེ་སྦྱོང་དང ། བྲམ་ཟེ་དང ། དབུལ་ཞིང་ཕོངས་པ་མགོན་མེད་པ་དང ། ནད་པ་ལ་སོགས་ཏེ། གྲོང་ཁྱེར་གྱི་ཕྱི་རོལ་ན་ལམ་ཐོག་ཐག་ཏུ་གང་ངོ ། །དེ་དག་ཀྱང་དཔག་ཚད་བརྒྱ་དང ། ཉིས་བརྒྱ་དང ། སུམ་བརྒྱ་དང ། བཞི་བརྒྱ་དང ། ལྔ་བརྒྱ་དང ། དཔག་ཚད་སྟོང་གི་ལམ་ནས་འོངས་ཁ་ཅིག་ནི། དཔག་ཚད་ཉིས་སྟོང ། སུམ་སྟོང ། བཞི་སྟོང ། ལྔ་སྟོང་དང ། དཔག་ཚད་ཁྲིའི་བར་ནས་ལྷགས་ཏེ་སྤྲིན་བཞིན་དུ་འདུས་ནས་ཐམས་ཅད་ལ་ཡིད་བཞིན་དུ་སྦྱིན་པ་ནི། གོས་འདོད་པ་ལ་གོས། ཟས་འདོད་པ་ལ་ཟས་རིན་པོ་ཆེ་གསེར་དང ། དངུལ་དང ། བཻ་ཌཱུརྱ་དང ། མུ་སར་གལ་བ་དང ། བཞོན་པ་དང ། ཐེག་པ་དང ། ཁྱོགས་
386a
> ༄#། །དང ། སྐྱེད་མོས་ཚལ་དང ། ཞིང་དང་རྐང་འགྲོ་ལ་སོགས་ཏེ་ཡིད་བཞིན་དུ་སྦྱིན་པར་བྱས་སོ། །དེ་ལྟར་སྦྱིན་པ་ལ་ཞུགས་ཏེ་ཡུན་རིང་ཞིག་ལོན་པ་དང ། བང་མཛོད་སུམ་ཆ་གཅིག་ཟད་ནས་མཛོད་སྲུང་གིས་རྒྱལ་པོ་ལ་འདི་སྐད་ཅེས་སྨྲས་སོ། །སྲས་ཀྱིས་བང་མཛོད་ལས་སྦྱིན་པ་བགྱིས་ནས་སུམ་ཆ་ནི་ཟད་པས། སུམ་གཉིས་ཙམ་ལས་མ་ལུས་ན། ཕན་ཚུན་དུ་འདྲུལ་བའི་སྐྱེས་དང ། ཚོང་ཟོང་ཅི་ལས་བགྱི་དགོངས་ཤིག་ཅེས་སྨྲས་སོ། །ང་ནི། སྲས་འདི་ལ་བྱམས་པས་ངོ་མི་ལྡོག་གིས་།བང་མཛོད་སྟོངས་ཀྱང་བླའོ། །ཞེས་སྨྲས་སོ། །དེ་ནས་ཡང་རིང་ཞིག་ལོན་པ་དང་བང་མཛོད་སུམ་གཉིས་ནི། ཟད། སུམ་ཆ་ཙམ་ལུས་པ་དང ། མཛོད་སྲུང་གིས་ཡང་རྒྱལ་པོ་ལ་ད་ནི། བང་མཛོད་སུམ་གཉིས་ཙམ་ནི་ཟད། སུམ་ཆ་ཙམ་ལས་མ་ལུས་ན། ཕན་ཚུན་སྐྱེས་བསྐུར་བ་དང ། ཚོང་ཟོང་ཅི་ལས་བགྱི་ཞེས་སྨྲས་སོ། །རྒྱལ་པོས་དེ་ལ་བསྒོ་བ། ངའི་སྲས་སྡུག་ཆེས་ཏེ་ངོ་མི་ལྡོག་པས་སྨྲ་མི་ཕོད་ཀྱི། ཁྱོད་ཀྱིས་ཐབས་ཅི་ལེགས་སུ་བྱོས་ལ་བྲེལ་ཅིང་མི་ཁོམ་པ་ལྟར་བསྙད་ཐོགས་ཤིག་།མཛོད་སྲུང་གིས་རྒྱལ་པོ་ལས་ལུང་ཐོབ་ནས་མཛོད་སྒོ་བཅད་དེ་དོན་གཉེར་དུ་སོང་ངོ ། །དེ་ནས་སློང་བ་དག་དགེ་དོན་གྱི་ཐད་དུ་ལྷགས་ནས་བར་འགའ་ནི། མཛོད་སྲུང་མི་རྙེད་དེ་མཛོད་སྒོ་མི་ཕྱེད། གལ་ཏེ་མཛོད་སྲུང་འོངས་ན་ཡང་ཡིད་བཞིན་དུ་
386b
> མི་སྟེར་བས། དགེ་དོན་གྱིས་འདི་སྙམ་དུ་བསམས་སོ། །འདི་ལྟར་གྱུར་པ་འདི་ནི། མཛོད་སྲུང་གིས་ཐུགས་མི་ཐུབ་པས་ཡབ་ཀྱི་མན་ངག་འོངས་ཀྱི། ཡོང་ཡང་བུས་ནི། ཕའི་མཛོད་སྟོངས་པར་བྱ་བ་མི་རིགས་ཀྱི། བདག་གིས་ད་ཐབས་ཅི་ཞིག་བྱས་ན་རིན་པོ་ཆེ་ཡིད་བཞིན་དུ་རྙེད་དེ། སྐྱེ་བོ་མང་པོ་ལ་ཕན་འདོགས་པར་འགྱུར་སྙམ་བསམས་ནས་མི་དག་ལ་འདི་སྐད་ཅེས་དྲིས་སོ། །འཇིག་རྟེན་ན་ལས་ཅི་ཞིག་བྱས་ན་ནོར་དབྱིག་མང་དུ་རྙེད་ཅིང་ཟད་མི་ཤེས་པར་འགྱུར་ཞེས་དྲིས་པ་དང ། ཁ་ཅིག་ནི། ཞིང་ཆེར་རྨོས་ན་ནོར་དབྱིག་མང་པོར་འགྱུར་ཞེས་ཟེར་རོ། ཁ་ཅིག་ནི། རྐང་འགྲོ་སྤེལ་ཏེ་སྤོགས་བྱས་ན་ནོར་མང་དུ་རྙེད་དོ། །ཞེས་ཟེར་རོ། །ཁ་ཅིག་ནི། ལམ་རིང་པོར་ཚོང་སྤོགས་བྱས་ན་ནོར་མང་དུ་རྙེད་ཅེས་ཟེར་རོ། ཁ་ཅིག་ནི། རྒྱ་མཚོར་ཞུགས་ཏེ་ནོར་བུ་རིན་པོ་ཆེ་བླངས་ན་རིན་པོ་ཆེ་མང་དུ་འགྱུར་རོ། །ཞེས་ཟེར་རོ། །དགེ་དོན་གྱིས་དེ་དག་གིས་སྨྲས་པ་ཐོས་ནས་ཞིང་རྨོ་བ་དང ། རྐང་འགྲོ་སྤེལ་བ་དང ། ལམ་རིང་པོར་ཚོང་ལ་འགྲོ་བ་ནི། ངའི་ཆ་མ་ཡིན་གྱི། རྒྱ་མཚོར་འཇུག་པ་འབའ་ཞིག་ངའི་ཆ་ཡིན་ནོ། །ཞེས་སྨྲས་ནས་རྒྱ་མཚོར་འཇུག་གོ་སྙམ་དུ་བསམས་ཏེ་ཕ་མ་ལ་འདི་སྐད་ཅེས་སྨྲས་སོ། །བདག་ནི། རྒྱ་མཚོ་ནས་རིན་པོ་ཆེ་མང་དུ་བླངས་ཏེ་དབུལ་ཕོངས་པ་ལ་སྦྱིན་པ་ཡིད་བཞིན་དུ་བགྱིའོ། །བདག་རྒྱ་མཚོར་རིན་པོ་ཆེ་ལེན་དུ་མཆིར་གནོང་
387a
> ༄#། །ཞིག་ཅེས་སྨྲས་སོ། །དེའི་ཕ་མས་དེ་སྐད་ཅེས་སྨྲས་པ་ཐོས་ནས་འཁམས་ཏེ་བུ་ལ་འདི་སྐད་ཅེས་སྨྲས་སོ། །འཇིག་རྟེན་ན་དབུལ་ཕོངས་པ་དག་ནི། བློ་མེད་དེ།་ལུས་སྲོག་དང་བསྔོས་ནས་འགྲོ་བར་བྱེད་དོ། །ཁྱོད་ཅིས་ཕོངས་ན་དེ་ལྟ་བུར་སེམས་ཏེ། ཁྱོད་སྦྱིན་པ་བྱེད་འདོད་ན་ཁྱིམ་ན་ཡོད་པའི་ནོར་ཐམས་ཅད་སྦྱིན་པར་ཁྱོས་ཤིག་།རྒྱ་མཚོར་ནི། འགྲོར་མི་རུང་སྟེ་རྒྱ་མཚོའི་ནང་ན་ཆུ་རླབས་དང ། དཔའ་ཀློང་འཁྱིལ་པ་དང ། ཆུ་སྲིན་དང ། ཀླུ་གདུག་པ་དང ། སྲིན་མོ་དང ། རི་ཆུའི་མདོག་ཅན་ལ་སོགས་པ་ཤིན་ཏུ་ཡང་བའི་བགེགས་མང་དུ་ཡོད་པས་ཐར་པར་དཀའ་ན། ཁྱོད་ཅིས་ཕོངས་ཏེ་སྲོག་དང་བསྔོ་བར་བྱེད། །འདི་ལ་ནི། ཉན་པ་མེད་ཀྱི། མ་སེམས་པར་འདུག་ཅིག་ཅེས་བསྒོའོ། །དགེ་དོན་གྱིས་དེ་སྐད་ཅེས་བསྒོ་བ་ཐོས་ནས་བསམ་པ་བཞིན་དུམ་གྲུབ་པས་ཡི་དམ་བཅས་ཏེ། བསམ་པ་འདི་མ་གྲུབ་ཀྱི་བར་དུ་ཕ་མའི་མདུན་དུ་ས་ལ་ཁས་བུབ་ཏུ་ཉལ་ཏེ་མི་ལྡང་ངོ་སྙམ་བསམས་ནས་ཡབ་ཡུམ་གྱིས་མཁྱེན་པར་མཛོད་ཅིག་།བདག་ནི། བསམ་པ་བཞིན་མ་གྲུབ་ཀྱི་བར་དུ་ཁས་བུབ་ཏུ་ཉལ་བ་འདི་ལས་མི་ལྡང་ངོ ། །ཞེས་སྨྲས་སོ། །དེ་ནས་ཕ་མ་མི་དགའ་སྟེ་གཉེན་བཤེས་དང་བགྲོས་ནས་རྒྱ་མཚོའི་ནང་ན་དགེགས་ཡང་བ་མང་དུ་ཡོད་པའི་གཏམ་ཡང་བྱས། བདག་ཀྱང་
387b
> རྨོངས་པས་ལོ་བཅུ་གཉིས་ཀྱི་བར་དུ་ལྷ་ཀུན་ལ་མཆོད་དེ། ཁྱོད་ལྟ་ཞིག་ངའི་བུར་སྐྱེས་ན་ངེད་མདོར་བར་ཟན་ཟོ་ཞིག་ཅེས་ཞག་གཅིག་ཞག་གཉིས་ནས་ཞག་དྲུག་གི་བར་དུ་ཚིག་རྣམ་པ་སྣ་ཚོགས་ཀྱིས་གྲོས་བཏབ་ཀྱང་མ་ཉན་ཏེ། སྔར་ཇི་སྐད་སྨྲས་པ་ལས་མ་ལྡོག་གོ་།ཕ་མ་སྡངས་ནས་ཡང་འདི་སྐད་ཅེས་བགྲོས་སོ། །བདག་གི་བུ་འདི་ཐོག་མ་ནས་ད་ཙམ་གྱི་བར་དུ་བྱ་བ་བསམ་པ་མཐར་མ་གྲུབ་ཀྱི་བར་དུ་མི་གཏོང་བས། རྒྱ་མཚོར་བཏང་ན་གལ་ཏེ་ན་ཕྱིར་ལྡོག་ཀྱང་སྲིད་ཀྱི། མ་བཏང་ན་ཞག་བདུན་ལོན་ནས་འཕྲལ་དུ་བྱེ་བྲལ་བྱེད་དེ།་ད་ནི། གཏང་དགོས་སོ་སྙམ་བགྲོས་ནས་བུའི་དྲུང་དུ་སོང་སྟེ་ལག་པ་ནས་བཟུང་ནས་བུ་ལོངས་ལ་ཟན་ཟོ་ཞིག་།ཡིད་བཞིན་དུ་འགྲོ་བར་གནང་ངོ ། །ཞེས་སྨྲས་པ་དང་དགེ་དོན་ཡང་ལངས་ཏེ་བཟའ་བ་ཟོས། བཏུང་བ་འཐུངས་སོ། །དེ་ནས་ཕྱི་རོལ་ཏུ་བྱུང་སྟེ་མི་མང་པོ་ལ་ཁོ་བོ་རྒྱ་མཚོར་རིན་པོ་ཆེ་ལེན་དུ་འགྲོའོ། །ཁྱེད་སུ་འགྲོར་དགའ་བ་རྣམས་ཀྱང་འགྲོགས་ཏེ་འདོང་གི་།དེད་དཔོན་ཡང་ཁོ་བོས་བྱ་ལ། ཡོ་བྱད་ཀྱང་ཁོ་བོས་སྦྱར་རོ། །ཞེས་བགྲགས་སོ། །དེའི་ཚེ་ན་ཡུལ་དེ་ན་ཚོང་པ་ལྔ་བརྒྱ་སྙེད་ཀྱིས་བདག་ཅག་ཀྱང་རྒྱ་མཚོར་རིན་པོ་ཆེ་ལེན་དུ་མཆིའོ། །ཞེས་ཐམས་ཅད་འདུས་ནས་ཆས་སོ། །དེའི་ཚེ་ཡུལ་དེ་ན་ཚོང་བ་དེད་དཔོན་རྒན་པོ་ཞིག་སྔོན་ཆད་ཀྱང་རྒྱ་མཚོར་ལན་དུ་མ་ཕྱིན་པ་ཞིག་
388a
> ༄#། །ཡོད་དེ།་རྒྱལ་བུ་ཉིད་དེའི་གན་དུ་སོང་ནས་འདི་སྐད་ཅེས་སྨྲས་སོ། ཁོ་བོ་རྒྱ་མཚོར་འགྲོ་བའི་ས་མཁན་དུ་འགྲོ་དགོས་ཀྱི། ཁྱོད་ཀྱང་ཆས་ཤིག་ཅེས་བསྒོ་བ་དང ། དེད་དཔོན་གྱིས་བདག་ནི། རྒས་འཁོགས་པའི་སྟེང་དུ་མིག་གཉིས་ཀྱིས་ཀྱང་མི་མཐོང་བས་འགྲོ་མི་ནུས་སོ། །ཞེས་སྨྲས་སོ། །དེ་ནས་རྒྱལ་བུ་ཕའི་ཐང་དུ་སོང་སྟེ་རྒྱལ་པོ་ལ་འདི་སྐད་ཅེས་གསོལ་ཏོ། །དེད་དཔོན་རྒན་པོ་ཞིག་མཆིས་པ་སྔོན་ཆད་ཀྱང་རྒྱ་མཚོར་ལན་དུ་མ་ཞིག་ཕྱིན་ཏེ་རྒྱ་མཚོའི་རྒྱུས་མཆིས་ཀྱི། བདག་རྒྱ་མཚོར་མཆིས་པའི་ས་མཁན་དུ་བཀའ་སྩོལ་ཅིག་ཅེས་གསོལ་པ་དང ། རྒྱལ་པོ་ཉིད་དེད་དཔོན་ལོང་བའི་གན་དུ་སོང་ནས་དེད་དཔོན་ལོང་བ་ལ་འདི་སྐད་ཅེས་བསྒོའོ། །རྒྱལ་བུ་རྒྱ་མཚོར་འགྲོ་འདོད་དེ། ངེད་ཀྱིས་འགྲོར་མི་རུང་བའི་གྲོས་རེ་ལྟ་ཞིག་བཏབ་ན་མ་ཉན་གྱི། རྒྱལ་བུ་རྒྱ་མཚོར་འགྲོ་བའི་ས་མཁན་དུ་ཁྱོད་སོང་ཞིག་ཅེས་བཀའ་སྩལ་པ་དང ། དེད་དཔོན་གྱིས་འདི་སྐད་ཅེས་གསོལ་ཏོ། །བདག་རྒས་འཁོགས་པའི་སྟེང་དུ་མིག་གཉིས་ཀྱང་ལོང་མོད་ཀྱི། ད་རྒྱལ་པོས་བཀའ་སྩལ་པ་ན་བཀའ་མི་གཅོག་གོ། ཞེས་གསོལ་ཏོ། །དེ་ནས་རྒྱལ་པོ་ཕོ་བྲང་དུ་འོངས་ནས་ངའི་བུ་དང་རྒྱ་མཚོར་འགྲོ་ཕོད་པ་སུ་ཡོད་ཅེས་དྲིས་པ་དང ། རྒྱལ་བུ་སྡིག་དོན་ཡང་བདག་ཕུ་བོའི་གཡོག་ཏུ་མཆིའོ། །ཞེས་གསོལ་ཏོ། །
388b
> རྒྱལ་པོས་བསམ་པ། གཞན་སོང་བ་བས་ནུ་བོ་སོང་ན་ཕན་སྙམ་ནས་ནུ་བོ་ཡང་འགྲོར་གནང་ངོ ། །དེ་ནས་རྒྱལ་བུས་གསེར་སྲང་སུམ་སྟོང་ཞིག་ཕྱུང་སྟེ་སྲང་སྟོང་ནི། གྲུའི་ཟོང་དུ་བྱས། སྲང་ཉིས་སྟོང་ནི། འཕྲལ་དུ་དགོས་པའི་ཡོ་བྱད་དུ་སྦྱར་ཏེ་ཆས་ནས་རྒྱལ་པོ་དང་བཙུན་མོ་ལ་སོགས་པ་ཐམས་ཅད་ཀྱིས་བསྐྱལ་ཏོ། །དེ་ནས་རྒྱ་མཚོའི་ངོགས་སུ་ཕྱིན་ནས་གྲུར་ཞུགས་ཏེ་ཐག་པ་བདུན་གྱིས་བརྟོད་ནས་རླུང་ཕྱོགས་དང་སྦྱར་ཏེ་འགྲོ་བའི་ཚོང་པ་རྣམས་ལ་འདི་སྐད་ཅེས་སྨྲས་སོ། །རྒྱ་མཚོའི་ནང་ན་བགེགས་རྣམ་པ་སྣ་ཚོགས་ཡོད་དེ། སྔ་ཕྱིར་འདོང་བ་ནི། རབ་ཏུ་ཡང་མང་ན། ཕྱིར་འཁོར་བ་ནི། ཉུང་རབ་བོ། །དེ་ལས་ཐེ་ཚོམ་ཟ་བ་ལ་དེ་ན་ཕྱིར་དེངས་ཤིག་།གལ་ཏེ་ལུས་དང་སྲོག་ལ་མི་ལྟ། ཕ་མ་དང ། བུ་དང ། ཆུང་མ་དང ། གཉེན་བཤེས་དག་ལ་ཡང་མ་ཆགས་ཏེ་རིན་པོ་ཆེའི་གླིང་དུ་ཕྱིན་ནས་ཕྱིར་ཡང་བདེ་བར་འཁོར་ན། བུ་ཚ་རབས་བདུན་ཚུན་ཆད་ནོར་གྱིས་མི་བྲེལ་བར་འགྱུར་རོ། །ཞེས་བསྒྲགས་ནས་ཐག་པ་གཅིག་བཅད་དོ། །དེ་བཞིན་དུ་ཉི་མ་བདུན་གྱི་བར་དུ་ཉིན་རེ་ལན་རེ་དེ་སྐད་ཅེས་བསྒོས་ནས་ཐག་པ་རེ་རེ་བཅད་དེ་རླུང་ཕྱོགས་སུ་བབ་པ་ལ་གཡོར་ཤིང་བསྒྲེངས་ཏེ་མགྱོགས་ཁྱད་མདའ་བཞིན་དུ་སོང་ངོ ། །དེ་ནས་རིན་པོ་ཆེའི་གླིང་དུ་ཕྱིན་ནས་རྒྱལ་བུ་རིན་པོ་ཆེ་བརྟག་པ་ལ་ཤིན་ཏུ་མཁས་པས། རིན་པོ་ཆེ་བཟང་ངན་དང ། མང་ཉུང་གི་ཚད་ཀྱང་བསྟན་ནས་
389a
> ༄#། །སོ་སོ་ནས་རིན་པོ་ཆེ་ཚོལ་ལོ། །དེད་དཔོན་དང་གཉིས་གྲུ་ཆུང་གཅིག་གི་ནང་དུ་ཞུགས་ནས་ཚོང་པ་ཕལ་རྣམས་དེར་བོར་རོ། །དེ་ནས་སོང་སོང་བ་ལས་དེད་དཔོན་གྱིས་ནི། རི་དཀར་པོ་ཞིག་ཡོད་པའི་རིགས་ན་མཐོང་ངམ་ཞེས་དྲིས་སོ། །རྒྱལ་བུས་ཀྱང་དེ་འདྲ་བ་ཞིག་སྣང་ངོ ། །ཞེས་སྨྲས་པ་དང ། དེ་ནི། དངུལ་གྱི་རི་ཡིན་ནོ། །ཞེས་ཟེར་རོ། །དེ་ནས་ཡང་སོང་སོང་བ་ལས། ད་ནི། རི་སྔོན་པོ་ཞིག་སྣང་བའི་རིགས་ན་མཐོང་ངམ་ཞེས་དྲིས་ན། དེ་འདྲ་བ་ཞིག་སྣང་ངོ ། །ཞེས་སྨྲས་པ་དང ། དེ་ནི། བཻ་ཌཱུརྱའི་རི་ཡིན་ནོ། །ཞེས་སྨྲས་སོ། །དེ་ནས་ཡང་སོང་སོང་བ་ལས། ད་ནི། རི་སེར་པོ་ཞིག་སྣང་བའི་རིགས་སོ། །ཞེས་དྲིས་ན། རི་སེར་པོ་འདྲ་བ་ཞིག་སྣང་ངོ ། །ཞེས་སྨྲས་པ་དང ། དེ་ནི། གསེར་གྱི་རི་ཡིན་ནོ། །ཞེས་སྨྲས་སོ། །དེ་ནས་གསེར་གྱི་རིའི་དྲུང་དུ་ཕྱིན་ཏེ་གསེར་གྱི་བྱེ་མའི་སྟེང་དུ་འདུག་ནས་དེད་དཔོན་དེས་འདི་སྐད་ཅེས་སྨྲས་སོ། །བདག་ནི། རྒས་ཞོམ་སྟེ་ད་ནི། འགྲོ་མི་ཕོད་པས། ད་འདི་ཉིད་དུ་ཚེའི་དུས་བྱས་པར་འགྱུར་གྱི། ཁྱོད་འདི་ནས་སོང་ཞིག་དང ། མདུན་ན་རིན་པོ་ཆེ་སྣ་བདུན་གྱི་མཁར་ཞིག་དང་ཕྲད་པའི་རིགས་ཀྱི། གལ་ཏེ་མཁར་སྒོ་བཅད་ཅིང་འདུག་ན། སྒོ་དྲུང་ན་རྡོ་རྗེའི་གཏུན་ཞིག་ཡོད་པའི་རིགས་ཀྱི། རྡོ་རྗེའི་གཏུན་གྱིས་མཁར་
389b
> བསྒོ་རྡུངས་ཤིག་དང ། ནང་ནས་ལྷ་མོ་ལྔ་བརྒྱ་ཞིག་སོ་སོ་ནས་རིན་པོ་ཆེ་ཐོགས་ཏེ་འབུལ་དུ་འོང་ངོ ། །དེ་ལ་ལྷ་མོ་གཅིག་ཅིག་ཀྱང་རིན་པོ་ཆེ་སྔོན་པོ་གཅིག་ཐོགས་ཤིང་འབུལ་དུ་འོང་གི་།དེ་ནི། ཡིད་བཞིན་གྱི་ནོར་བུ་རིན་པོ་ཆེ་ཡིན་ནོ། །ཐོབ་མ་ཐག་ཏུ་མ་ཤོར་བར་དམ་དུ་ཟུངས་ཤིག་།བུ་མོ་གཞན་དག་གི་ནོར་བུ་རིན་པོ་ཆེ་ཡང་ལོངས་ཤིག་།དབང་པོ་རབ་ཏུ་སྡོམས་ལ་དེ་དག་དང་མ་སྨྲ་ཞིག་།བདག་ནི། ཉམ་ཐག་སྟེ་འདིར་ཚེ་འཕོས་ནས་དྲིན་དྲན་པར་གྱིས་ལ་འདི་ཉིད་དུ་རུས་བུ་སྦས་ཏེ་སོང་ཞིག་ཅེས་བསྒོ་མ་ཐག་ཏུ་ཚེའི་དུས་བྱས་སོ། །དེ་ནས་དེད་དཔོན་གྱི་རུས་བུ་གསེར་གྱི་བྱེ་མའི་ནང་དུ་སྦས་ནས་བསྒོ་བ་བཞིན་དུ་སོང་ནས་རིང་པོ་མ་ལོན་པར་རིན་པོ་ཆེ་སྣ་བདུན་གྱི་མཁར་ཞིག་གི་དྲུང་དུ་ཕྱིན་ཏོ། །སྒོ་ཡང་དམ་དུ་བཅད་པ་ལས་དྲུང་ན་རྡོ་རྗེའི་གཏུན་འདུག་པ་བླངས་ཏེ་སྒོ་བརྡུངས་པ་དང ། སྒོ་ཡང་རང་བྱེ་ནས་ལྷ་མོ་ལྔ་བརྒྱ་སོ་སོ་ནས་རིན་པོ་ཆེ་ཐོགས་ཏེ་འབུལ་བར་བྱེད་དོ། །ནང་གི་ལྷ་མོ་སྔ་མ་གཅིག་གི་ལག་ན་ནོར་བུ་སྔོན་པོ་ཞིག་ཐོགས་ཏེ་སྨྲས་པ་བཞིན་བླངས་ནས་གོས་ཀྱི་ཐ་མར་ཕུར་ཏེ་དེ་མ་ཐག་ཏུ་ཕྱིར་ལོག་གོ་།རྒྱལ་བུ་དང་བྲལ་བའི་འོག་ཏུ་རྒྱལ་བུ་སྡིག་དོན་གྱིས་ཚོང་བ་རྣམས་ལ་རིན་པོ་ཆེ་མང་དུ་ལོངས་ཤིག་ཅེས་བྱས་པས། ཚོང་པ་རྣམས་ཀྱིས་མང་དུ་བླངས་ནས་རིན་པོ་ཆེ་མང་བས། གྲུ་ཡང་བར་འགའ་ནི། ནུ་བ། བར་
390a
> ༄#། །འགའ་ནི། བྱུང་ནས་རྒྱལ་བུ་དགེ་དོན་འབའ་ཞིག་ནི། ཡིད་བཞིན་གྱི་ནོར་བུ་རིན་པོ་ཆེ་ཡོད་པས་ཆུར་མ་ནུབ་བོ། །རྒྱལ་བུ་སྡིག་དོན་སྐྲག་ནས་དགེ་དོན་ལ་བདག་ལ་ཡང་སྐྱོབས་ཤིག་ཅེས་སྨྲས་པ་དང ། སྡིག་དོན་ཡང་ཁྲིད་དེ་རྒྱ་མཚོ་བརྒལ་ཏོ། །དེ་ནས་སྐམ་སར་ཕྱིན་པ་དང་སྡིག་དོན་གྱིས་ཕུ་བོ་ལ་འདི་སྐད་ཅེས་སྨྲས་སོ། །བདག་ཅག་སྤུན་གཉིས་ཕ་མ་དང་བྲལ་ཏེ་རྒྱ་མཚོར་རིན་པོ་ཆེ་ལེན་དུ་དོང་བ་ལས་མ་སྟས་ཏེ་རིན་པོ་ཆེ་དང་བྲལ་ནས་ལག་པ་སྟོང་པར་ཁྱིམ་དུ་འགྲོ་བ་ནི། ངོ་ཆེའོ། །རྒྱལ་བུ་དགེ་དོན་རང་བཞིན་གྱིས་དྲང་བས། ནུ་བོ་ལ་བདག་ཅག་གིས་རིན་པོ་ཆེ་ཐོབ་ན་ཅིའི་ཕྱིར་ངོ་ཚ་ཞེས་སྨྲས་སོ། །རིན་པོ་ཆེ་ཇི་ལྟ་བུ་ཞིག་རྙེད་བདག་ལ་སྟོན་ཅིག་ཅེས་སྨྲས་པ་དང ། ཕུ་བོས་རིན་པོ་ཆེ་བཀྲོལ་ཏེ་ནུ་བོ་ལ་བསྟན་ཏོ། །ནུ་བོས་རིན་པོ་ཆེ་མཐོང་ནས་འདི་སྙམ་དུ་བསམས་སོ། །བདག་གི་ཕ་མ་ཡང་བུར་འདྲ་བ་ལས། ཕུ་བོ་ལ་བྱམས་ཏེ་བདག་ལ་མི་བྱམས་པའི་སྟེང་དུ་ང་གཉིས་འགྲོགས་ཏེ་རིན་པོ་ཆེ་ལེན་དུ་སོང་བ་ལས། ཕུ་བོས་ནི། རིན་པོ་ཆེ་རྙེད་ཀྱི་བདག་གིས་ནི།་ཅི་ཡང་མ་རྙེད་པས། ད་ཁྱིམ་དུ་འོངས་ན་བདག་ལ་དེ་བས་ཀྱང་མི་བྱམས་པར་འགྱུར་གྱི། བདག་གིས་ཕུ་བོ་གཉིད་ལོག་པའི་ཚེ་བསད་ལ་ནོར་བུ་རིན་པོ་ཆེ་ཁྱེར་
390b
> ཏེ་འགྲོའོ། །གལ་ཏེ་ཕ་མས་དྲིས་ན། ཕུ་བོ་ནི། རྒྱ་མཚོའི་ནང་དུ་ནུབ་བོ། །ཞེས་བྱའོ་བསམས་ནས་ཕུ་བོ་ལ་འདི་སྐད་ཅེས་སྨྲས་སོ། །བདག་ཅག་སྤུན་གཉིས་རིན་པོ་ཆེ་ཐོགས་ཏེ་གཉིས་ཀ་གཅིག་ཅར་ཉལ་བ་མི་རིགས་ཀྱི། རེས་ཀྱིས་ཉལ་ལ་མེལ་ཚེ་བྱའོ། །ཞེས་སྨྲས་པ་དང ། ཕུ་བོས་ཀྱང་དེ་བཞིན་དུ་བྱའོ། །ཞེས་སྨྲས་ཏེ། སྤུན་གཉིས་རེས་ཀྱིས་མེལ་ཚེ་བྱེད་དོ། །དེ་ནས་ནུབ་གཅིག་ཕུ་བོ་སྔར་མེལ་ཚེ་བྱེད་པ་ལས་མེལ་ཚེ་ཐུན་འཁོར་བས་ཀྱང་རིང་ཞིག་ལངས་སུ་མ་བཏུབ་བོ། །ཕུ་བོས་ཡུན་རིང་དུ་མེལ་ཚེ་བྱས་ནས་ནུ་པོ་གདོད་ལངས་ཏེ་ཕུ་བོ་ཡུན་རིང་དུ་འདུག་པས་གཉིད་བྲོ་ནས་གཉིད་ལོག་པའི་འོག་ཏུ་ཚལ་གྱི་ནང་ནས་ཚེར་མ་རིང་པོ་གཉིས་ཤིག་བླངས་ནས་ཕུ་བོ་གཉིད་ལོག་པའི་མིག་ཏུ་ཚེར་མ་རེ་རེ་བཙུགས་ཏེ་རིན་པོ་ཆེ་ཁྱེར་ནས་བྲོས་སོ། །དགེ་དོན་སྔངས་ནས་ཆོམ་པོ་བྱུང་ངོ ། །ཞེས་བོས་ན་ཅང་མི་ཟེར་ཏེ། དེ་ནས་ཤིང་གི་ལྷ་མོ་ཞིག་གིས་ཁྱོད་ཀྱི་ཆོམ་པོ་ནི། སྡིག་དོན་ཡིན་ནོ། །ཞེས་སྨྲས་སོ། །དེ་ནས་དགེ་དོན་མིག་ན་བ་མ་བཟོད་ནས་འབོད་འགྲོགས་ཏེ་གོག་ཅིང་སོང་སོང་བ་ལས་ཡུལ་ཤི་བ་དེ་དང་ཉེ་བར་ཕྱིན་ནས་བ་ལང་རྫིབ་ལང་ལྔ་བརྒྱ་ཙམ་འཚོ་བ་དང་ཕྲད་དོ། །བ་ལང་དེའི་ནང་ནས་ཁྱུ་མཆོག་ཅིག་གིས་རྒྱལ་བུ་ལྡོངས་པ་མཐོང་ནས་རྒྱལ་བུའི་མིག་ལ་ལྕེས་བལྡགས་སོ། །དེ་ནས་པ་
391a
> ༄#། །ལང་ཀུན་ཀྱང་དེར་འདུས་པས་རྫིའུ་ཡང་དེར་འོངས་ན། མི་ཞིག་ས་ལ་འགྲེ་བ་མཐོང་ནས་དྲུང་དུ་བརྟགས་ན། མིག་ཏུ་ཚེར་མ་ཟུག་པ་མཐོང་ནས་ཚེར་མ་གཉིས་དལ་གྱིས་ཕྱུང་སྟེ་གནས་སུ་ཁྲིད་དོ། །དེ་ནས་འོ་མ་དང་སྣུམ་གྱིས་རྨ་ཁ་བསྐུས་ནས་ཁ་ཟས་ཀྱིས་བསྙོད་དེ་གསོས་སོ། །དེ་ནས་ཕྱི་ཞིག་ན་རྨ་ཡང་བགས་ཀྱིས་སོས་ནས་ད་ནི། འགྲོའོ། །ཞེས་བྱས་པ་དང ། བ་ལང་རྫིས་མ་བཏང་ངོ ། །དེ་ནས་ཡང་ཕྱི་ཞིག་ན་རྨ་ཡང་ལེགས་པར་སོས་ནས་ད་ནི། གྲོང་ཁྱེར་འོ་ནིར་འགྲོའོ། །ཞེས་བྱས་ནས་མཐར་གྱིས་གྲོང་ཁྱེར་དང་ཉེ་བར་བསྐྱལ་ཏེ་བདག་ལ་རོལ་མོའི་ཆ་བྱད་ཀིམ་ཞེས་བྱ་བ་བྱིན་ཅིག་ཅེས་བྱས་པ་དང ། རྫིའུས་རོལ་མོའི་ཆ་བྱད་ཀིམ་ཞིག་བྱིན་ནོ། །དེ་ནས་རྒྱལ་བུས་རོལ་མོ་བྱེད་ཅིང་གླུ་དང་ཚིག་སྙན་པར་སྦྱར་ཏེ་བླངས་པས་ཐམས་ཅད་དེ་ལ་ཉན་ཏེ་ཀུན་གྱིས་ཟས་དང་སྐོམ་བསྐྱལ་བས། དེ་ན་སྦྲང་པོ་ལྔ་བརྒྱ་ཡང་རྒྱལ་པུ་ལ་བརྟེན་ཏེ་གསོས་སོ། ། ཕྱི་ཞིག་ན་རྒྱལ་པོ་དེའི་སྐྱེད་མོས་ཚལ་སྲུང་བ་ཞིག་དེར་འོངས་ནས་རོལ་མོ་སྙན་པ་ཐོས་པ་དང ། དེ་ལ་དགའ་སྟེ་ཁྱོད་ངའི་སྐྱེད་མོས་ཚལ་དུ་རོལ་མོ་བྱེད་ཅིང་སྐྱེད་མོས་ཚལ་ཡང་སྲུང་ན་མི་ནུས་སམ་ཞེས་དྲིས་ན། བདག་མིག་ལོང་བས་མི་ནུས་སོ། །ཞེས་སྨྲས་སོ། །དེས་སྨྲས་པ། ཁྱོད་མིག་མི་མཐོང་ཡང་བླའི། ཤིང་གི་ཁ་ནས་ཐེ་གུ་ལ་དྲིལ་བུ་
391b
> བཏགས་ཏེ་བྱའི་སྐད་བྱུང་ན། ཐེ་གུ་དྲངས་པས་ཆོག་གི་།ངའི་སྐྱེད་མོས་ཚལ་དུ་འདོང་ངོ ། །ཞེས་སྨྲས་ནས་ཁྲིད་དོ། །རྒྱལ་བུ་དེའི་ཚལ་ན་འདུག་ཅིང་རོལ་མོ་བྱེད་དོ། །དེའི་ཚེ་ན་སྡིག་དོན་ཕྱིར་ཡུལ་དུ་འོངས་པ་དང ། རྒྱལ་པོས་ཁྱོད་ཀྱིས་ཕུ་བོ་དང་ཚོང་པ་གཞན་དག་ག་རེ་ཞེས་དྲིས་ན། བདག་གི་ཕུ་བོ་དགེ་དོན་དང ། ཚོང་པ་གཞན་ནི། རིན་པོ་ཆེ་མང་དུ་རྙེད་ནས་གྲུ་དང་བཅས་སུ་ཆུར་ནུབ་བོ། །བདག་ནི། རྐྱལ་འཚལ་བས་བདག་འབའ་ཞིག་ཐར་རོ། །ཞེས་སྨྲས་པ་དང ། རྒྱལ་པོ་ཡབ་དང་བཙུན་མོ་གཉིས་འཁམས་ནས་ས་ལ་འགྱེལ་ཏོ། །ཡུལ་ན་མི་འཁོད་པ་གཞན་དག་ཀྱང་དེ་སྐད་ཅེས་ཐོས་ནས་ངོ་མཚར་དུ་གྱུར་ཏེ་མྱ་ངན་གྱིས་བརྣངས་སོ། །རྒྱལ་པོ་ཡབ་དང་བཙུན་མོ་ཡང་མྱ་ངན་གྱིས་ཡིད་གདུངས་ནས་སྡིག་དོན་ཁྱོད་ཀྱང་ཕུ་བོ་དང་ལྷན་ཅིག་ལོག་ན་ཅི་ཉེས་ཞེས་བསྒོའོ། །རྒྱལ་བུ་དགེ་དོན་འདུག་པའི་ཚེ་བྱ་ངང་པ་གཅིག་གསོས་པ་དེ་ལ་རྒྱལ་པོས་འདི་སྐད་ཅེས་བསྒོའོ། །རྒྱལ་བུ་དགེ་དོན་རྒྱ་མཚོར་རིན་པོ་ཆེ་ལེན་དུ་སོང་བ་ལས་རྒྱ་མཚོར་ནུབ་སྟེ་དགེ་དོན་དག་ཅེས་ཟེར་གྱི། ཁྱོད་རྟོག་ཅིང་ཚོལ་དུ་སོང་ཞིག་ཅེས་བསྒོས་ནས་ཡི་གེ་བྲིས་ཏེ་མགུལ་དུ་བཏགས་ནས་སོང་ངོ་།། དེ་ནས་བྱ་ངང་པ་ཀུན་ཏུ་འཕུར་ཞིང་ཚོལ་ཚོལ་བ་ལས་སྐྱེད་མོས་ཚལ་དེ་ན་རྒྱལ་བུའི་སྐད་གྲག་ནས་དེར་བབས་ཏེ་བལྟས་ན། རྒྱལ་བ་དེ་ན་འདུག་པ་དང་ཕྲད་དོ། །རྒྱལ་བུས་
392a
> ༄#། །ཀྱང་ངང་པའི་སྐད་ཤེས་པས་མགུལ་ནས་ཡི་གེ་བཀྲོལ་ཏེ་ཀློག་ཏུ་བཅུག་གོ་།དེ་ནས་ཡི་གེའི་ལན་བྲིས་ནས་སྡིག་དོན་གྱིས་ཇི་ལྟར་མིག་ཏུ་ཚེར་མས་བཙུགས་ཏེ་བྲོས་པ་ཡང་ཞིབ་ཏུ་སྦྲིང་ངོ ། །དེའི་ཚེ་ན་རྒྱལ་པོ་ལི་ཤི་བར་དེ་ལ་བུ་མོ་བཟང་མོ་འཇིག་རྟེན་ན་དཀོན་པ་ཞིག་ཡོད་དེ། བུ་མོ་དེ་སྐྱེད་མོས་ཚལ་དུ་འཆག་ཏུ་སོང་སོང་བ་ལས་རྒྱལ་བུ་དགེ་དོན་དེ་ན་འདུག་པ་དང་ཕྲད་ནས་རྒྱལ་བུ་དགེ་དོན་སྐྲ་ནི། འཛིངས། གདོང་ལ་ནི། དྲི་མས་གང ། གོས་ངན་པ་གྱོན་ཞིང་ཤིང་དྲུང་ན་འདུག་པ་མཐོང་ནས་བུ་མོ་དེ་ལ་ཆགས་ཏེ་ཕན་ཚུན་གར་ཡང་མ་སོང་བར་དེའི་དྲུང་དུ་འདུག་སྟེ་གཏམ་བྱས་སོ། །དྲོ་ལ་བབ་ནས་རྒྱལ་པོས་བུ་མོ་བོས་ན། བདག་གི་འཚལ་མ་འདིར་སྐྱོལ་ཅིག་ཕར་མི་མཆིའོ་ཞེས་མཆིའོ། །དེ་ནས་རྒྱལ་པོས་ཡང་ཟན་བསྐྱལ་བ་དང ། བུ་མོས་རྒྱལ་བུ་ལ་བདག་ཅག་གཉིས་ལྷན་ཅིག་ཟན་བཟའོ། །ཞེས་བྱས་པ་དང ། རྒྱལ་བུས་བདག་ནི། ལོང་བ་སྤྲང་པོ་ལགས་པས། རྒྱལ་པོའི་སྲས་མོ་དང་ལྷན་ཅིག་འཚལ་མ་འཚལ་དུ་མི་རུང་ངོ ། །གལ་ཏེ་རྒྱལ་པོས་གསན་ན་བདག་ལ་གྱོད་མཆི་བས་མི་རུང་ངོ ། །ཞེས་སྨྲས་སོ། །བུ་མོས་སྨྲས་པ། ཁྱོད་བདག་དང་ཟན་ལྷན་ཅིག་མི་ཟ་ན། བདག་ཀྱང་ཟན་མི་ཟའོ། །ཞེས་ལན་དུ་མའི་བར་དུ་སྨྲས་པ་དང །
392b
> དེ་ནས་ལྷན་ཅིག་ཟན་ཟོས་ཏེ་གཏམ་ཡང་ལེགས་པར་བྱས་ནས་དེ་ལ་བུ་མོ་ཆགས་ཏེ་གཞན་དུ་གོམ་པ་གཅིག་ཀྱང་འགྲོ་མ་བཏུབ་བོ། །དེ་ནས་ཉི་མ་ནུབ་ཏུ་ཉེ་ནས་རྒྱལ་པོས་བུ་མོ་ཕྱིར་ཤོག་ཅིག་ཅེས་སྦྲན་པ་དང ། བུ་མོས་ཕྱིར་འདི་སྐད་ཅེས་གསོལ་ཏོ། །བདག་ནི། སྐྱེད་མོས་ཚལ་སྲུང་བ་འདིའི་ཆུང་མར་དགའ་བས་གཞན་སུ་ཡང་མི་འཚལ་ལོ། །ཡབ་རྒྱལ་པོ་བདག་གི་བསམ་པ་འདི་ལས་མི་བསྒྱུར་དུ་གསོལ་ཞེས་སྤྲིང་བ་དང ། རྒྱལ་པོས་དེ་སྐད་ཅེས་གསོལ་པ་ཐོས་ནས་བུ་མོའི་ངོ་མ་ལྡོག་སྟེ་འདི་ནི། ངོ་མཚར་ཡ་མཚན་དུ་ཆེའོ། ། བུ་མོ་འདི་རྒྱལ་པོ་རིན་ཆེན་གོ་ཆའི་མནའ་མར་བླངས་ཏེ་རྒྱལ་བུ་རྒྱ་མཚོ་ནས་མ་འཁོར་བར་སྤྲང་པོར་འདི་ལྟ་བུ་ཞིག་གི་ཆུང་མར་བསྟེན་པ་འདི་ནི། ངའི་རིགས་སུན་འབྱིན་ཏེ། ངའི་མགོ་ཡང་འདེག་ཏུ་མེད་པར་བྱེད་པ་འདི་ནི། ངོ་མཚར་ཆེ་ཞེས་ཡང་འབོད་དུ་བཏང་བ་ལས། བུ་མོ་ཆིག་སྔ་མ་ལས་མ་གྱུར་ཏེ་འོང་དུ་མ་བཏུབ་བོ། །དེ་ནས་རྒྱལ་པོ་བུ་མོ་ལ་བྱམས་པས་ངོ་མ་ལྡོག་ནས་གཉིས་ཀ་བསུ་སྟེ་ཕོ་བྲང་གི་ནང་དུ་ཁྲིད་ནས་ཁྱོ་ཤུག་ཏུ་བསྡུས་སོ། །དེ་ནས་ཞག་དུ་མ་ཞིག་ལོན་པ་དང ། བུ་མོ་ཉིན་པར་རྟག་ཏུ་སོང་ཞིང་ནུབ་མོ་ཕྱིར་འོང་བས་རྒྱལ་བུ་དོགས་པ་སྐྱེས་ཏེ་ཆུང་མ་ལ་འདི་སྐད་ཅེས་སྨྲས་སོ། །ཁྱོད་བདག་གི་ཆུང་མ་བྱ་ཞེས་ཁྱོ་ཤུག་ཏུ་འདུས་ན། ཉིན་པར་ནི་རྟག་ཏུ་འགྲོའོ། །མཚན་མོ་འབའ་ཞིག་
393a
> ༄#། །ནི་ཕྱིར་འོང་ན། འདིར་མི་རྟག་པ་ལས་ན། ཁྱོད་གཞན་དུ་སེམས་པ་ཡོད་དུ་ངེས་སོ། །ཞེས་སྨྲས་པ་དང ། བུ་མོས་དམ་བཅས་པ། བདག་ནི།་ཁྱོད་འབའ་ཞིག་ལ་སེམས་ཏེ་བསམ་པ་གཞན་པ་སྤུ་ཙམ་ཡང་མེད་དོ། །བདག་གིས་སྨྲས་པའི་ཚིག་བདེན་ན། བདེན་པར་སྨྲས་པ་འདིས་ཁྱོད་ཀྱི་མིག་ཡ་གཅིག་མཐོང་བར་གྱུར་ཅིག་ཅེས་སྨྲས་མ་ཐག་ཏུ་མིག་ཡ་གཅིག་མཐོང་བར་གྱུར་ཏོ། །དེ་ནས་གཏམ་དེ་དག་གླེང་ནས་རྒྱལ་བུ་ལ་ཁྱོད་ཀྱིས་ཕ་མ་དང་ཡུལ་གང་ན་འདུག་ཅེས་དྲིས་པ་དང ། རྒྱལ་བུས་ཆུང་མ་ལ་སྨྲས་པ། ཁྱོད་ཀྱིས་རྒྱལ་པོ་རིན་ཆེན་གོ་ཆ་ཞེས་བྱ་བ་ཞིག་ཐོས་སམ། ཆུང་མས་སྨྲས་པ། བདག་གིས་ཐོས་སོ། །འོ་ན་དེ་ནི། བདག་གི་ཕ་ཡིན་ནོ། །རྒྱལ་བུ་དགེ་དོན་ཞེས་བྱ་བ་ཐོས་སམ། ཆུང་མས་སྨྲས་པ། ཐོས་སོ། །འོ་ན་རྒྱལ་བུ་དགེ་དོན་དེ་ནི། བདག་ཡིན་ནོ། །ཞེས་སྨྲས་པ་དང ། ཆུང་མ་སྔབས་ནས་འོ་ན་ཁྱོད་ཅིའི་ཕྱིར་འདི་ལྟར་ཉོན་མོངས་པར་གྱུར་ཅེས་དྲིས་པ་ལས། རྒྱལ་བུས་ཇི་ལྟར་གྱུར་པ་ཞིབ་ཏུ་གཏམ་བྱས་པ་དང ། བུ་མོས་རྒྱལ་བུ་ལ་འདི་སྐད་ཅེས་སྨྲས་སོ། ། རྒྱལ་བུ་སྡིག་དོན་གྱིས་ཁྱོད་ཀྱི་མིག་ཕྱུང་བ་འདི་ནི། འཇིག་རྟེན་གང་ན་ཡང་མི་སྲིད་ན། ཁྱོད་དེ་དང་ཕྲད་ན་ཇི་ལྟར་བྱ་སྙམ། རྒྱལ་བུས་སྨྲས་པ། སྡིག་དོན་གྱིས་ངའི་
393b
> མིག་ཕྱུང་བ་ཉེས་མོད་ཀྱི། བདག་ནི། དེ་ལ་ཅུང་ཟད་ཀྱང་མི་དགའ་བའམ། འཁོན་དུ་འཛིན་པ་མེད་དོ། །ཆུང་མས་སྨྲས་པ། འདི་ནི། ཤིན་ཏུ་ཡང་ཡིད་ཆེས་པར་དཀའ་སྟེ།་གནོད་པ་འདི་ལྟ་བུ་བྱས་ཀྱང་མི་དགའ་བ་མེད་ཅེས་སྨྲས་པ་ནི། ཚིག་ཏུ་མི་རུང་ངོ ། །རྒྱལ་བུས་སྨྲས་པ། བདག་ནི། རྒྱལ་བུ་སྡིག་དོན་ལ་མི་དགའ་བ་སྤུ་ཉག་མ་ཙམ་ཡང་མེད་དོ། །བདག་གི་ཚིག་འདི་བདེན་ན། བདེན་པའི་ཚིག་གིས་བདག་གི་མིག་ཡ་གཅིག་ཀྱང་མཐོང་བར་གྱུར་ཅིག་ཅེས་སྨྲས་པ་དང ། མིག་ཡ་གཅིག་ཀྱང་གསལ་བར་མཐོང་བར་གྱུར་ཏོ། །དེ་ལྟར་རྒྱལ་བུའི་མིག་གཉིས་ཀྱང་མཐོང་ནས་མཚན་དང་བྱིན་ཡང་གཞན་པས་ལྷག་པར་ཆེ་བས། བུ་མོ་དགའ་ནས་ཡབ་རྒྱལ་པོ་གང་ན་འདུག་པར་སོང་སྟེ་འདི་སྐད་ཅེས་སྨྲས་སོ། །ཡབ་ཀྱིས་རྒྱལ་པོ་རིན་ཆེན་གོ་ཆའི་སྲས་རྒྱལ་བུ་དགེ་དོན་མཁྱེན་ཏམ། རྒྱལ་པོས་སྨྲས་པ། ངས་ཤེས་སོ། །འོ་ན་རྒྱལ་པོ་གཟིགས་བཞེད་དམ། རྒྱལ་བུ་དེ་ད་ལྟར་ག་རེ་བལྟའོ་ཞེས་སྨྲས་པ་དང ། བུ་མོས་སྨྲས་པ། ད་ལྟར་བདག་གི་ཁྱིམ་ཐབ་བགྱིད་པ་ཉིད་ལགས་སོ། །ཞེས་གསོལ་ཏོ། །རྒྱལ་པོས་བུ་མོ་འདི་སྨྱོས་སམ། འོན་ཏེ་མི་དྲན་ནམ།་ཅི་ཉེས། རྒྱལ་བུ་དེ་ནི། རྒྱ་མཚོ་ནས་ཕྱིར་མ་འཁོར་ན། སྤྲང་པོ་ལ་རྒྱལ་བུ་དགེ་དོན་ཡིན་ཞེས་སྨྲ། བུ་མོས་ཡང་གསོལ་པ། ཐུགས་མི་ཆེས་ན་བརྟག་ཏུ་གསོལ་ཞེས་
394a
> ༄#། །སྨྲས་པ་དང ། རྒྱལ་པོས་བལྟར་ཕྱིན་ན་རྒྱལ་བུ་དངོས་ཡིན་ཏེ། ལྟོ་བ་ས་ལ་ཕབ་ནས་བདག་གིས་ངོ་མ་ཤེས་པ་ནོངས་ཀྱི། འགྱོད་དོ། །ཞེས་སྨྲས་སོ། །དེ་ནས་རྒྱལ་པོ་དེས་གསང་སྟེ་རྒྱལ་བུ་དགེ་དོན་ལམ་སྲང་ཞིག་ཏུ་བསྐྱལ་ནས་དགེ་དོན་རྒྱ་མཚོ་ནས་གདོད་འཁོར་བ་སྐད་བསྒྲགས་ཏེ་བློན་པོ་རྣམས་དང་རྒྱལ་བུ་དགེ་དོན་བསུས་ནས་ཕོ་བྲང་དུ་འོངས་པ་དང ། གདོད་བུ་མོ་ཡང་ཆུང་མར་བྱིན་པ་སྐད་དུ་བསྒྲགས་སོ། །དེའི་ཚེ་ན་བྱ་ངང་པ་ཡང་ཡི་གེ་དང་ཕྱིར་ཡུལ་དུ་ཕྱིན་ཏེ་ཡི་གེ་བཀླགས་ནས་རྒྱལ་བུ་དགེ་དོན་ཡང་འདུག་པར་ཤེས་པས། སྡིག་དོན་ཡང་བཙོན་དུ་བཟུང ། རྒྱལ་པོ་ལི་ཤི་བར་གྱི་སྟེང་དུ་ཡང་ཕོ་ཉ་བཏང་ནས་ངའི་བུ་དགེ་དོན་ཁྱོད་ཀྱི་ཡུལ་དུ་འོངས་ཏེ་ཉོན་མོངས་ཤིང་འདུག་ཅེས་ཐོས་ཀྱི། སྔར་མ་སྤྲན་པ་ཡང་ཉེས་སོ། །ད་ཡང་གླང་པོ་ཆེ་དང ། རྟའི་ཚོགས་མང་པོས་སྐྱོལ་ཅིག་།མ་བསྐྱལ་ནང་ཉིད་ཀྱང་འོང་ངོ ། །ཞེས་སྤྲིང་ངོ ། །དེའི་ཚ་རྒྱལ་བུ་དགེ་དོན་གྱིས་ཕྱུགས་རྫིའི་དྲིན་དྲན་པའི་ཕྱིར་རྒྱལ་པོ་ལི་ཤི་བར་ལ་གསོལ་ནས་གླང་པོ་ཆེ་དང ། རྟ་དང ། གོས་དང ། ཁང་ཁྱིམ་དང ། ཞིང་འབྲོག་དང ། གསེར་དངུལ་\?\་དང ། རིན་པོ་ཆེ་དང ། བྲན་ཕོ་དང ། བྲན་མོ་དང ། ལས་བྱེད་པའི་མི་ལ་སོགས་ཏེ་བྱ་དགའ་མང་དུ་བྱིན་ནས་ཚེ་གཅིག་ཏུ་བདེ་ཞིང་སྐྱིད་པར་བྱས་སོ། །དེ་ནས་
394b
> རྒྱལ་པོ་རིན་ཆེན་གོ་ཆའི་ཕོ་ཉ་ཡང་དེར་ཕྱིན་ནས་རྒྱལ་པོ་ལི་ཤི་བར་གྱིས་གླང་པོ་ཆེ་ལྔ་བརྒྱ་ཙམ་རིན་པོ་ཆེས་བརྒྱན་ཏེ་གཡོག་ལྔ་བརྒྱ་དང ། བུ་མོའི་གཡོག་གཞོན་ནུ་ལྔ་བརྒྱ་དང ། ཤིང་རྟ་ལྔ་བརྒྱ་སྙེད་ཀྱང་བརྫངས། རྒྱལ་པོ་ཉིད་ཀྱང་བློན་པོ་དང་བཅས་ཏེ་འཁོར་བརྒྱ་སྟོང་དུ་མས་རོལ་མོ་སྣ་ཚོགས་བྱས་ཏེ་བུ་མོ་བསྐྱལ་ཏོ། །ཕོ་ཉ་སྔར་ཕྱིན་ནས་རྒྱལ་པོ་རིན་ཆེན་གོ་ཆ་ཡང་བཙུན་མོའི་འཁོར་དང་བཅས་ཏེ་རྒྱལ་བུ་བསུའོ། །རྒྱལ་བུ་དང་ཕྲད་པའི་ཚེ་བཞོན་པ་ལས་བབས་ནས་ཕ་མ་ལ་ཕྱག་འཚལ་ཏེ་ལག་པ་ནས་འཇུས་ཏེ་སྙུན་གསོལ་ནས་རོལ་མོ་བྱས་ཏེ་ཕོ་བྲང་དུ་སོང་ངོ ། །དེ་ནས་རྒྱལ་བུ་དགེ་དོན་གྱིས་སྡིག་དོན་ག་རེ་ཞེས་དྲིས་པ་དང ། ད་ལྟར་བཙོན་དུ་བཟུང་ངོ ། །ཞེས་སྨྲས་སོ། །དེ་ནས་རྒྱལ་བུ་སྡིག་དོན་ཐོང་ཞིག་ཅེས་གསོལ་པ་དང ། ཉེས་པ་ཆེན་པོ་བྱས་ཀྱི། གཏང་དུ་མི་རུང་ངོ་ཞེས་བསྒོའོ། །དེ་ལྟར་རྒྱལ་བུ་སྡིག་དོན་མ་བཏང་ན། བདག་ཀྱང་ཕོ་བྲང་དུ་མི་མཆིའོ། །ཞེས་གསོལ་ནས་སྡིག་དོན་ཡང་བཏང་ངོ ། །དེ་ནས་སྡིག་དོན་ཡང་ཕུ་བོ་ལ་ཕྱག་འཚལ་ཞིང་བསུར་འོངས་ནས་སྤུན་གཉིས་གཅིག་ལ་གཅིག་འཇུས་ཏེ་ནུ་བོ་ལ་སྔར་བས་ཀྱང་ལྷག་པར་བྱམས་པར་གྱུར་པས། ཐམས་ཅད་ངོ་མཚར་དུ་འཛིན་ཏོ། །དེ་ནས་ཕོ་བྲང་གི་ནང་དུ་འོངས་ནས་རིན་པོ་ཆེ་ག་རེ་ཞེས་བགས་ཀྱིས་དལ་གྱིས་དྲིས་པ་དང ། འོངས་པའི་
395a
> ༄#། །ལམ་དུ་ས་བརྐོས་པའི་ནང་དུ་སྤས་སོ། །ཞེས་ཟེར་རོ། །དེ་ནས་ལེན་དུ་བཏང་ནས་རྙེད་པ་ལས་དགེ་དོན་དང་འགྲོགས་ཏེ་གནས་སུ་ཕྱིན་མ་ཐག་ཏུ་དགེ་དོན་གྱིས་མཐོང་ནས་རྙེད་དོ། །དེ་ན་རིན་པོ་ཆེ་རྣམས་རྙེད་དེ་ཕོ་བྲང་དུ་འོངས་ནས་རྒྱལ་ཕྲན་ལྔ་བརྒྱ་ཀུན་ལ་ཡང་རེ་རེ་བྱིན་ཏེ་གཅིག་པུ་ཞིག་ཕྱིར་བཞག་པ་ལག་ཏུ་ཐོགས་ཏེ་འདི་སྐད་ཅེས་སྨོན་ལམ་བཏབ་བོ། །རིན་པོ་ཆེ་འདི་ཉིད་ཡིད་བཞིན་གྱི་ནོར་བུ་རིན་པོ་ཆེ་ཡིན་ཡང་དག་ན། བདག་གི་ཕ་མ་འདུག་པའི་ཁྲི་རིན་པོ་ཆེ་སྣ་བདུན་གྱི་ཁྲིར་གྱུར་ཅིང་རིན་པོ་ཆེ་སྣ་བདུན་གྱི་གདུགས་ཀྱང་ཡོད་པར་གྱུར་ཅིག་ཅེས་སྨྲས་མ་ཐག་ཏུ་དེ་བཞིན་དུ་གྱུར་ཏོ། །དེ་ནས་ཡང་འདི་སྐད་དུ། རྒྱལ་པོའི་བང་མཛོད་དང ། བློན་པོའི་བང་མཛོད་ལས་བདག་གིས་སྔོན་སྦྱིན་པ་བགྱིས་ཏེ་གོད་པའི་རྣམ་པ་ཐམས་ཅད་ཕྱིར་གང་བར་ཤོག་ཅིག་ཅེས་སྨྲས་ནས་དེ་ཕྱོགས་སུ་བསྟན་པ་ཙམ་གྱིས་བང་མཛོད་ཐམས་ཅད་རིན་པོ་ཆེས་ཡོངས་སུ་གང་བར་གྱུར་ཏོ། །དེ་ནས་དྲིལ་བསྒྲགས་ཏེ། ད་ཕྱིན་ཆད་ཞག་བདུན་ན་རྒྱལ་བུ་དགེ་དོན་རིན་པོ་ཆེ་སྣ་བདུན་གྱི་ཆར་འབེབས་ཀྱིས་ཐམས་ཅད་འདུས་ཤིག་ཅེས་བསྒོ་ནས་རྒྱལ་བུ་དགེ་དོན་སྤོས་ཆུས་ལུས་བཀྲུས་ཏེ་གོས་གསར་བ་གཙང་མ་གྱོན་ཏེ་རྒྱལ་མཚན་གྱི་རྩེ་མོ་ལ་ཡིད་བཞིན་གྱི་ནོར་བུ་རིན་པོ་ཆེ་བཏགས་ཏེ་
395b
> ལག་ན་པོག་ཕོར་ཐོགས་ཤིང་ཕྱོགས་བཞིར་ཕྱག་བྱས་ནས་འདི་སྐད་ཅེས་སྨྲས་སོ། །ནོར་བུ་འདི་ཡིད་བཞིན་གྱི་ནོར་བུ་རིན་པོ་ཆེ་ཡིན་ཡང་དག་ན། ཐམས་ཅད་ཅི་འདོད་པ་ཐམས་ཅད་ཆར་བཞིན་དུ་ཕོབ་ཅིག་ཅེས་སྨྲས་མ་ཐག་ཏུ་ཕྱོགས་བཞི་ནས་སྤྲིན་ལངས་ནས་རླུང་གིས་མི་གཙང་བ་ཕྱག་དར་བྱས་ཏེ་ཐོག་མར་ཆར་ཟིམ་བུ་བབས་ནས་རྡུལ་མི་ལྡང་བར་བྱས་སོ། ། དེ་ནས་ཁ་ཟས་རོ་བརྒྱ་དང་ལྡན་པ་རྣམ་པ་སྣ་ཚོགས་བབ་བོ། །དེ་ནས་གོས་རྣམས་བབ་བོ། །དེ་ནས་རིན་པོ་ཆེ་སྣ་བདུན་བབས་ནས་ཡུལ་ཐམས་ཅད་དུ་གང་ངོ ། །དེའི་ཚེ་ན་ཐམས་ཅད་ཀྱིས་རིན་པོ་ཆེ་དང ། གསེག་པ་འདྲ་བའི་སེམས་སུ་གྱུར་ནས་དེ་ནས་རྒྱལ་བུས་འདི་སྐད་ཅེས་བསྒོའོ། །ཁྱོད་ཀྱི་དགོས་པ་ཐམས་ཅད་ཡིད་བཞིན་གྱིས་ཐོབ་པས། ད་ནི་བྲེལ་བའམ།་ཕོངས་པ་མེད་པར་གྱུར་གྱི། སོ་སོ་ནས་ལུས་དང་ངག་ཡིད་བསྡམས་ཏེ་དགེ་བ་བཅུའི་ལས་ཀྱི་ལམ་ལ་བརྩོན་པར་གྱིས་ཤིག་ཅེས་བསྒོས་ནས་ཐམས་ཅད་ཀྱིས་བསྒོ་བ་བཞིན་དུ་དགེ་བ་བཅུ་ལ་ནན་ཏན་བྱས་ཏེ་སྡིག་པ་མ་བྱས་པས། ཚེ་འཕོས་ནས་མཐོ་རིས་ཀྱི་ལྷར་སྐྱེས་སོ། །ཀུན་དགའ་བོ། དེའི་ཚེ་དེའི་དུས་ན་རྒྱལ་པོ་རིན་ཆེན་གོ་ཆ་ནི་ད་ལྟར་ངའི་ཡབ་ཟས་གཙང་མ་ཡིན་ནོ། །རྒྱལ་པོའི་བཙུན་མོ་དེ་ནི་ད་ལྟར་ངའི་ཡུམ་ལྷ་མཛེས་ཡིན་ནོ། །རྒྱལ་བུ་དགེ་དོན་ནི་ད་ལྟར་ང་ཡིན་ནོ། །རྒྱལ་པོ་ལི་ཤི་བར་དེ་ནི་ད་ལྟར་འོད་སྲུང་
396a
> ༄#། །ཡིན་ནོ། །དེའི་ཚེ་ན་རྒྱལ་བུའི་ཆུང་མར་གྱུར་པ་དེ་ནི། ད་ལྟར་སྐྱེ་རྒུའི་བདག་མོ་ཡིན་ནོ། །རྒྱལ་བུ་སྡིག་དོན་དེ་ནི། ད་ལྟར་ལྷ་སྦྱིན་ནོ། །འཛམ་བུའི་གླིང་གི་མི་ལ་ངའི་དྲིན་གྱིས་ཁྱབ་པ་ནི། ང་ཐོག་མར་སངས་རྒྱས་པ་ན་ལྷའི་སྲས་པོ་བརྒྱད་ཁྲི་འོངས་པ་དང ། ངའི་ཉེ་གནས་ལུང་བསྟན་པ་རྣམས་ཡིན་ནོ། །ཀུན་དགའ་བོ། དེའི་ཚེ་དེའི་དུས་ན་ད་ལྟར་ང་ལ་གནོད་པ་ཆེན་པོ་བྱས་ཀྱང་དེ་ལ་སྙིང་བརྩེ་བའི་སེམས་སྐྱེས་ན། ད་མངོན་པར་སངས་རྒྱས་ནས་ཉོན་མོངས་པའི་སྒྲིབ་པ་ནི། ཟད། ཐུགས་རྗེ་ཆེན་པོས་རྒྱས་པར་ཁྱབ་པས་ན། གནོད་པ་ཅུང་ཟད་ཅིག་བྱས་པ་ལ་ཐུགས་བརྩེ་བ་ལྟ་ཅི་སྨོས། བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་ལ་ལ་ནི། རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་བོ། ཁ་ཅིག་ནི། རང་སངས་རྒྱས་སུ་གྱུར། ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །དེ་སྐད་ཅེས་གསུངས་པ་ལ་ཐམས་ཅད་རྗེས་སུ་ཡི་རང་ནས་མངོན་པར་དགའོ། །རྒྱལ་བུ་དགེ་དོན་གྱི་ལེའུ་སྟེ་སུམ་ཅུ་སུམ་པའོ།། །།ཁྱིམ་བདག་སྔ་\?\་མས་བྱེད་ཀྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་
396b
> ན་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་སོ། །དེའི་ཚེ་ཡུལ་དེ་ན་སྤྲང་པོ་ལྔ་བརྒྱ་ཞིག་རྟག་ཏུ་སངས་རྒྱས་དང ། དགེ་འདུན་ལ་བརྟེན་ཏེ་འཚོའོ། །ཕྱིས་སྤྲང་པོ་དེ་དག་འདི་སྙམ་དུ་བསམས་སོ། །ད་བདག་ཅག་སངས་རྒྱས་ཀྱི་བསྟན་པ་ལ་རབ་ཏུ་འབྱུང་ངོ་སྙམ་ནས་སངས་རྒྱས་གང་ན་བ་དེར་ལྷགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་ནི། སངས་རྒྱས་དང ། དགེ་འདུན་གྱི་ཐུགས་རྗེས་འཚོ་བར་གྱུར་ཏེ། ད་བདག་ཅག་རབ་ཏུ་འབྱུང་ངོ ། །ཞེས་གསོལ་པ་དང ། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ངས་བསྟན་པའི་ཆོས་ནི། རྣམ་པར་དག་པ་སྟེ། བཙན་ཉན་དང ། ཕྱུག་དབུལ་མེད་དེ། དཔེར་ན། ཆུ་དང་འདྲ་བས་ན། བཙན་ཉན་དང ། ཕྱུག་དབུལ་དང ། བཟང་ངན་ཀུན་འཁྲུ་སྟེ། ཆུས་བཀྲུས་ན་མི་འདག་པ་མེད་དོ། །དཔེར་ན། མེ་དང་འདྲ་སྟེ། རི་དང ། བྲག་དང ། གནམ་སའི་བར་ན་དངོས་པོ་ཆེན་པོ་དང ། ཆུང་དུ་གང་ཡང་མི་འཚིག་པ་མེད་དོ། །གཞན་ཡང་ངའི་ཆོས་ནི། ནམ་མཁའ་དང་འདྲ་སྟེ། སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང ། ཕྱུག་པོ་དང ། དབུལ་པོ་དང ། གང་སུ་ཡང་རུང་མི་ཆད་པ་མེད་དེ། ཡིད་བཞིན་དུ་སྤྱོད་དུ་གནང་ངོ ། །ཞེས་སྦྲེང་པོ་རྣམས་ཀྱིས་ཐོས་ནས་རབ་ཏུ་དགའ་མགུ་རངས་
397a
> ༄#། །ཏེ་ལྷག་པར་སངས་རྒྱས་ལ་རབ་ཏུ་འབྱུང་ངོ་ཞེས་གསོལ་བ་དང ། བཅོམ་ལྡན་འདས་ཀྱིས་བདེ་བར་འོངས་སོ། །ཞེས་བཀའ་སྩལ་པ་ཙམ་གྱིས་སྐྲ་དང་ཁ་སྤུ་རང་བྱི་སྟེ་དུར་སྨྲིག་གྱོན་པའི་དགེ་སློང་དུ་གྱུར་ནས་བསྙེན་པར་རྫོགས་སོ། །བཅོམ་ལྡན་འདས་ཀྱིས་ཆོས་བསྟན་པས་ལུས་དང་སེམས་རྣམ་པར་གྲོལ་ཏེ་ཟག་པ་ཟད་ནས་དགྲ་བཅོམ་པར་གྱུར་ཏོ། །དེའི་ཚེ་ན་ཡུལ་དེ་ན་གནས་པའི་ཁྱིམ་བདག་དང ། ཚོང་དཔོན་རིགས་ཆེ་ཞིང་མཐོ་བ་རྣམས་མུ་ཏོ་བ་དག་སངས་རྒྱས་ཀྱིས་རབ་ཏུ་ཕྱུང་ངོ ། །ཞེས་ཐོས་ནས་བརྙས་ཤིང་དཔྱས་པར་གྱུར་ཏེ་འདི་སྐད་དུ། གལ་ཏེ་བདག་ཅག་བཅོམ་ལྡན་འདས་དང ། འཕགས་པའི་དགེ་འདུན་སྤྱན་འདྲེན་ཅིང་བསོད་ནམས་བྱེད་ན། རིགས་ངན་མུ་ཏོ་བ་ལས་རབ་ཏུ་བྱུང་བ་དེ་དག་ཇི་ལྟ་བུར་བདག་ཅག་གི་སྟན་ལ་གཞག་ཅིང་སྣོད་ལ་འབག་པར་བྱ་ཞེས་སྨྲས་སོ། །དེའི་ཚེ་རྒྱལ་བུ་རྒྱལ་བྱེད་ཀྱིས་སངས་རྒྱས་དང་དགེ་འདུན་རྣམས་བཤོས་ལ་སྤྱན་དྲངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་དང་དགེ་འདུན་རྣམས་སྤྱན་འདྲེན་གྱི། མུ་ཏོ་བ་ལས་གསར་དུ་ཞུགས་པ་རྣམས་ནི། མ་ལགས་སོ། །ཕྱི་ཉིན་གདུགས་ཚོད་ཀྱི་ཐད་ཀར་སངས་རྒྱས་དང ། དགེ་འདུན་སྤྱན་དྲངས་ནས་གཤེགས་པ་
397b
> དང་མུ་ཏོ་བའི་དགེ་སློང་མ་བོས་པ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་ནི། ཡོན་བདག་གིས་མ་བོས་ཀྱི། བྱང་གི་སྒྲ་མི་སྙན་དུ་དེངས་ལ་ས་བོན་མ་བཏབ་མ་རྨོས་པར་རང་སྐྱེས་པའི་འབྲས་ལོངས་ལ། ཡོན་བདག་གི་ཁྱིམ་དུ་ཟར་ཤོག་ཅིག་ཅེས་བཀའ་སྩལ་ཏོ། །དགེ་སློང་དེ་དག་བཀའ་སྩལ་པ་བཞིན་དུ་དགྲ་བཅོམ་པའི་རྫུ་འཕྲུལ་གྱིས་བྱང་གི་སྒྲ་མི་སྙན་དུ་སོ་སོ་ནས་འབྲས་ཀྱིས་ལྷུང་བཟེད་བཀང་སྟེ་སྤྱོད་ལམ་མཛེས་པར་སྟེང་གི་ནམ་མཁའ་ལས་ངང་པའི་རྒྱལ་པོ་ལྟར་རྒྱལ་བུ་རྒྱལ་བྱེད་ཀྱི་ཁྱིམ་དུ་ལྷགས་ནས་རིམ་བཞིན་དུ་འཁོད་དེ་འབྲས་ལ་ཟའོ། །དེའི་ཚེ་ན་རྒྱལ་བུ་རྒྱལ་བྱེད་ཀྱིས་དགེ་སློང་དེ་དག་སྤྱོད་ལམ་མཛེས་པར་རྫུ་འཕྲུལ་གྱི་སྟོབས་ཀྱིས་ནམ་མཁའ་ལས་འོངས་པར་མཐོང་ནས་ལྷག་པར་དགའ་རངས་ཏེ་ངོ་མཚར་རྨད་དུ་གྱུར་ནས་བཅོམ་ལྡན་འདས་ལ་འདི་ལྟ་བུའི་འཕགས་པ་གཟི་བརྗིད་དང་ཡོན་ཏན་དུ་ལྡན་པ། སྤྱོད་ལམ་མཛེས་པར་ལྷག་པ་ཕྱོགས་གང་ནས་མཆིས་ཞེས་གསོལ་བ་དང ། བཅོམ་ལྡན་འདས་ཀྱིས་རྒྱལ་བུ་རྒྱལ་བྱེད་ལ་འདི་སྐད་ཅེས་བཀའ་སྩལ་ཏོ། །འདི་དག་ཤེས་པར་འདོད་ན་ལེགས་པར་ཉོན་ཅིག་དང ། ཁྱོད་ལ་བསྟན་པར་བྱའོ། །དགེ་སློང་འདི་དག་ནི། རྒྱལ་བུས་མ་བོས་པའི་དགེ་སློང་དག་ཡིན་ཏེ། རྒྱལ་བུས་མ་བོས་པས་སོ་སོ་ནས་བྱང་གི་སྒྲ་མི་སྙན་ནས་འབྲས་བླངས་ནས་
398a
> ༄#། །ཟ་བ་ཡིན་ནོ། །དེ་ནས་རྒྱལ་བུ་རྒྱལ་བྱེད་ཀྱིས་དེ་སྐད་ཅེས་གསུངས་པ་ཐོས་ནས་ཤིན་ཏུ་ངོ་ཚ་ཞིང་འགྱོད་དེ། བདག་ནི། གཏི་མུག་གིས་ལྡོངས་པས་འཕགས་པ་ངོ་མ་འཚལ་ཏོ། །ཞེས་སྨྲས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་ཡོན་ཏན་ནི། བསམ་གྱིས་མི་ཁྱབ་སྟེ། སྤྲང་པོ་འདི་དག་ནི།་ཡུལ་འདི་དག་ན་ཤིན་ཏུ་ཡང་རིགས་ཆུང་ཞིང་ངན་པ་ལགས་ན། འདིར་འཇིག་རྟེན་འདིའི་བདེ་བ་ཡང་ཐོབ་ལ། ཡུན་རིང་པོའི་ཡོན་ཡང་རྙེད་པར་གྱུར་ཏེ། བཅོམ་ལྡན་འདས་འཇིག་རྟེན་དུ་གཤེགས་པ་ནི། དོན་འདི་དག་དབང་ཞིག་གི་སླད་དུ་གཤེགས་སོ། །གཞན་ཡང་བཅོམ་ལྡན་འདས། སྤྲང་པོ་འདི་སྔོན་དགེ་བའི་རྩ་བ་ཅི་བསྲུངས་ཤིང ། བསོད་ནམས་ཀྱི་ལས་གང་ལ་ནན་ཏན་བགྱིས་པས། བཅོམ་ལྡན་འདས་དང་ཕྲད་དེ་རྣམ་པར་གྲོལ་བར་གྱུར། སྡིག་པ་ཅི་བགྱིས་ན། ཐོག་མར་བཙས་ནས་སྤྲང་པོར་སྐྱེས་ཏེ་དབུལ་ཕོངས་པར་གྱུར། བཅོམ་ལྡན་འདས་ཀྱིས་རྒྱལ་བུ་རྒྱལ་བྱེད་ལ་བཀའ་སྩལ་པ། སྔོན་འདས་པའི་བསྐལ་པ་ཚད་མེད། གྲངས་མེད། བསམ་གྱིས་མི་ཁྱབ་པ་འདས་པའི་ཕ་རོལ་ན་འཛམ་བུའི་གླིང་འདིར་གྲོང་ཁྱེར་ཝཱ་ར་ཎ་སི་ཞེས་བྱ་བ་ན་རི་དྲང་སྲོང་ལྷ་ལས་ཞེས་བྱ་བ་ལ་སྔོན་ཡང་རང་སངས་རྒྱས་མང་པོ་བཞུགས་བཞུགས་
398b
> ཏེ།་སངས་རྒྱས་འཇིག་རྟེན་དུ་མ་གཤེགས་པ་ན་ཡང་རང་སངས་རྒྱས་དག་དེ་ན་གནས་ཏེ། རི་དེ་ལའང་སངས་རྒྱས་མེད་ན་ཡང་ལྔ་མངོན་པར་ཤེས་པའི་དྲང་སྲོང་དག་གནས་སོ། །དེའི་ཚེ་ན་རི་དེ་ལ་དྲང་སྲོང་ཉིས་སྟོང་ཞིག་གནས་ཏེ། ཕྱི་ཞིག་ན་ལྟས་མཁན་དག་གིས་ལོ་བཅུ་གཉིས་ཀྱི་བར་དུ་ཆར་མི་འབབ་བོ། །ཞེས་ལུང་བསྟན་པ་དང ། དེའི་ཚེ་ན་ཡུལ་དེ་ན་ཁྱིམ་བདག་ཕྱུག་པོ་ལོངས་སྤྱོད་དང་ལྡན་པ་སྡུམས་བྱེད་ཅེས་བྱ་བའི་དྲུང་དུ་སོང་སྟེ་ཁྱིམ་བདག་དེ་ལ་བདག་ཅག་རབ་ཏུ་བྱུང་བ་དྲང་སྲོང་སྟོང་པོ་འདི་དག་གི་ལོ་བཅུ་གཉིས་ཀྱི་ཟས་དང ། སྐོམ་ཡོད་དམ། དེས་སྨྲས་པ། བདག་ཅག་ལ་མཆིས་ཀྱི། འཕགས་པ་རྣམས་གུད་དུ་མི་གཤེགས་པར་བཞུགས་སུ་གསོལ་ལོ། །དེ་ནས་ཡང་དྲང་སྲོང་སྟོང་ཡང་དེར་ལྷགས་ནས་ཁྱིམ་བདག་སྡུམས་བྱེད་ལ་བདག་ཅག་ལ་ལོ་བཅུ་གཉིས་ཀྱི་བར་དུ་ཟས་དང་སྐོམ་དགོས་སོ། །ཞེས་སྨྲས་པ་དང ། ཁྱིམ་བདག་གིས་བང་མཛོད་སྲུང་བ་ལ་འཕགས་པ་འདི་རྣམས་ཀྱི་འཚོ་བ་ལོ་བཅུ་གཉིས་ཀྱི་བར་དུ་འབྱོར་ཏམ་ཞེས་དྲིས་ན། མཛོད་སྲུང་གིས་འབྱོར་ཏོ། །ཞེས་གསོལ་ནས་ཁྱིམ་བདག་དེས་དྲང་སྲོང་ཉིས་སྟོང་གི་འཚོ་བ་སྦྱོར་བའི་ལས་མི་ལྔ་བརྒྱ་བསྐོས་ནས་བསོད་སྙོམས་སྤྱོར་དུ་བཅུག་གོ་།དེའི་ཚེ་ན་ལས་མི་དག་བསོད་སྙོམས་ཀྱི་གཡོས་བྱེད་པ་ལ་ཡུན་རིང་པར་གྱུར་པས་
399a
> ༄#། །སྐྱོ་སྟེ་འདི་སྐད་ཅེས་སྨྲས་སོ། །བདག་ཅག་འདི་ལྟར་རྟག་ཏུ་ཉོན་མོངས་པར་གྱུར་པ་ནི། སྤྲང་པོ་འདི་དག་གི་ཕྱིར་རོ། །ཞེས་སྨྲས་སོ། །དེའི་ཚེ་ན་ཁྱིམ་བདག་དེས་གདུགས་ཚོད་ལ་རྟག་ཏུ་སྤྱན་འདྲེན་པའི་ལས་མི་གཅིག་ཅིག་བསྐོས་སོ། །སྤྱན་འདྲེན་དེ་ལ་ཁྱི་ཞིག་ཡོད་དོ། །ཁྱི་དེ་ཡང་རྟག་ཏུ་སྤྱན་འདྲེན་གྱི་ཕྱི་བཞིན་དུ་འགྲོ་བ་ལས།་ཉིན་གཅིག་སྤྱན་འདྲེན་པ་བརྗེད་པ་དང ། ཁྱི་དེ་གདུགས་ཚོད་ཀྱི་དུས་སུ་དྲང་སྲོང་དེ་དག་གི་དྲུང་དུ་སོང་ནས་སྐད་ཆེན་པོ་ཕྱུང་སྟེ་ཟུག་པ་དང ། དྲང་སྲོང་དེ་དག་ཀྱང་ཁྱི་ཟུག་པ་ཐོས་ནས་གདུགས་ཚོད་ལ་བབ་པར་ཤེས་ཏེ་བསོད་སྙོམས་ལ་གཤེགས་སོ། །ཕྱི་ཞིག་ན་དྲང་སྲོང་དེ་དག་བསོད་སྙོམས་ཀྱི་བྱ་བ་བྱས་ནས་ཁྱིམ་བདག་ལ་འདི་སྐད་ཅེས་སྨྲས་སོ། །ཁྱིམ་བདག་།ད་ནི། ཆར་པ་འོང་གི་།ཞིང་པ་དག་ཞིང་གི་ལས་བྱེད་དུ་ཆུག་ཅིག་ཅེས་བསྒོ་བ་དང ། ཁྱིམ་བདག་གིས་ཀྱང་ཞིང་པ་རྣམས་ཞིང་གི་ལས་བྱེད་དུ་བཅུག་སྟེ་ནས་དང ། གྲོ་དང ། འབྲུ་མང་ཞིག་རྨོས་སོ། །དེ་ནས་ཕྱི་ཞིག་ན་འབྲུ་རྨོས་པའི་རྣམ་པ་ཐམས་ཅད་ཀུ་བར་སྐྱེས་ནས་ཁྱིམ་བདག་ཡ་མཚན་དུ་གྱུར་ཏེ་དྲང་སྲོང་རྣམས་ལ་འདི་དག་དོན་མེད་པར་མི་འགྱུར་རམ་ཞེས་སྨྲས་པ་དང ། དྲང་སྲོང་གིས་སྨྲས་པ། དོན་མེད་པར་མི་འགྱུར་གྱི། དུས་སུ་ཆུ་བཅུ་བ་ལ་སོགས་ཏེ་ལས་བྱོས་ཤིག་
399b
> པས་\?\་སྨྲས་སོ། །ཕྱིས་རིང་པོ་མ་ལོན་པར་ཀུ་བ་ཀུན་ཆེར་སྐྱེས་ནས་བཀས་ཏེ་བལྟས་ནས་ཅི་དང་ཅི་སྨོས་པ་བཞིན་དུ་དེ་དང་དེ་དག་ཀུ་བའི་ནང་ཀུན་གང་བར་སྐྱེས་ཏེ་ཁྱིམ་བདག་རབ་ཏུ་དགའ་མགུ་ནས་བང་བ་ཀུན་ཀྱང་གང་བར་གྱུར་ཏོ། །ལས་བྱེད་པའི་མི་ལྔ་བརྒྱ་པོ་ཡང་དེ་ལྟ་བུ་དག་མཐོང་ནས་འགྱོད་པའི་སེམས་སྐྱེས་ཏེ། བདག་ཅག་གིས་ནི། ཚིག་ངན་པས་འཕགས་པ་ལ་སྨད་དོ། །ཞེས་འགྱོད་ཚངས་བྱས་ཏེ་སོ་སོ་ནས་བདག་ཅག་ཀྱང་མ་འོངས་པའི་དུས་ན་འཕགས་པ་དང་ཕྲད་ཅིང་རྣམ་པར་གྲོལ་བར་གྱུར་ཅིག་ཅེས་སྨོན་ལམ་བཏབ་བོ། །སྤྲང་པོ་ལྔ་བརྒྱ་པོ་འདིས་ཚིག་ངན་པ་སྨྲས་པས། སྐྱེ་བ་ལྔ་བརྒྱའི་བར་དུ་རྟག་ཏུ་སྤྲང་པོར་གྱུར་ཏོ། །འགྱོད་ཚངས་བྱས་ཏེ་སྨོན་ལམ་བཏབ་པས། ང་དང་ཕྲད་དེ་འཁོར་བའི་མཐར་ཕྱིན་ཏོ། །རྒྱལ་བུ། འདི་ལྟར་རིག་པར་བྱའོ། །དེའི་ཚེ་དེའི་དུས་ན་ཁྱིམ་བདག་ཕྱུག་པོ་སྡུམས་བྱེད་དེ་ནི། ང་ཡིན་ནོ། །བང་མཛོད་སྲུང་བ་དེ་ནི། རྒྱལ་བུ་རྒྱལ་བྱེད་ཡིན་ནོ། ། ཉིན་གཅིག་བཞིན་དུ་སྤྱན་འདྲེན་པ་དེ་ནི། རྒྱལ་པོ་ཨུ་ཏྲ་ཡ་ན་ཡིན་ནོ། །དེའི་ཚེ་ཁྱི་དེ་ནི། ཁྱིམ་བདག་སྐད་སྙན་ཡིན་ཏེ། དེའི་དབང་གིས་སྐྱེ་བ་ཐམས་ཅད་དུ་སྐད་སྙན་པར་གྱུར་ཏོ། །དེའི་ཚེ་ན་ལས་བྱེད་པའི་མི་ལྔ་བརྒྱ་པོ་ནི། དགྲ་བཅོམ་པ་ལྔ་བརྒྱ་པོ་འདི་དག་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་རྣམས་ཁ་ཅིག་གིས་
400a
> ༄#། །ནི།་འབྲས་བུ་དང་པོ་ཐོབ་པ་ནས་འབྲས་བུ་བཞི་བའི་བར་དུ་ཐོབ་པར་གྱུར་ཏོ། །ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །ཁྱིམ་བདག་སྡུམས་བྱེད་ཀྱི་ལེའུ་སྟེ་སུམ་ཅུ་བཞི་པའོ།། །།བམ་པོ་བཅུ་པ། རྒྱལ་པོ་མིག་འབྱེད་ཀྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ་སྐྱེ་བོ་མང་པོ་ལ་དམ་པའི་ཆོས་སྟོན་ཏོ། །དེའི་ཚེ་ན་གྲོང་ཁྱེར་གྱི་མི་ཀུན་ཆོས་ཉན་དུ་ཆས་པ་དང ། གྲོང་དེ་ན་བྲམ་ཟེ་ལོང་བ་གཅིག་ཅིག་ལམ་གན་འདུག་པ་ལས་མི་མང་པོ་སོང་བ་ལས།་ཁྱེད་མྱུར་བར་གར་འདོང་ཞེས་དྲིས་སོ། །མི་རྣམས་ཀྱིས་སྨྲས་པ། ཁྱོད་ཅི་མ་ཐོས་སམ། དེ་བཞིན་གཤེགས་པ་འཇིག་རྟེན་དུ་བྱུང་སྟེ་ད་ལྟར་ཡུལ་འདི་ན་བཞུགས་ཤིང་ཆོས་སྟོན་ཏོ། །དེ་བཞིན་གཤེགས་པ་འཇིག་རྟེན་དུ་བྱུང་བ་དང་ཕྲད་པར་ཤིན་ཏུ་དཀའ་བས། བདག་ཅག་ནི། སངས་རྒྱས་ལ་ཆོས་ཉན་དུ་འགྲོའོ། །ཞེས་སྨྲས་སོ། །བྲམ་ཟེ་དེ་སྐད་རྣམ་པ་བརྒྱད་ལ་ཤིན་ཏུ་མཁས་པ་ཞིག་སྟེ། སྐད་ཕྱུང་བ་ཙམ་གྱིས་དབང་ཐང་དང ། ཚེ་ཇི་ཙམ་པ་རྟོགས་སོ། །བརྒྱད་གང་ཞེ་ན། བྱ་བང་ལྟ་བུའི་སྐད་དང ། ཁཝ་ལྟ་བུའི་
400b
> སྐད་དང ། སྐད་འཛེར་འཛེར་པོ་དང ། གླང་པོ་ཆེའི་སྐད་དང ། རྔའི་སྐད་དང ། འབྲུག་གི་སྐད་དང ། དྲིལ་གྱི་སྐད་དང ། ཚངས་པའི་སྐད་དང་བརྒྱད་དོ། །བྱ་པང་ལྟ་བུའི་སྐད་དུ་སྨྲ་བ་ནི།་ཁྲེལ་ལྟས་མེད་དེ། བྱས་པ་དྲིན་དུ་མི་གཟོའོ། །ཁཝ་ལྟ་བུའི་སྐད་དུ་སྨྲ་བ་ནི། ཁྲོ་ཞིང་གཏུམ་ལ་གསོད་པ་ལ་དགའ་ཞིང་སྙིང་རྗེ་མེད་དོ། །སྐད་འཛེར་འཛེར་པོ་ནི། ཕོ་དག་མོའི་སྐད་དུ་སྨྲ་བ་དང་མོ་དག་ཕོའི་སྐད་དུ་སྨྲ་བ་སྟེ། དེ་ནི། དབང་ཐང་མེད་ཅིང་དབུལ་བ་དང ། མ་རབས་སོ། །གླང་པོ་ཆེའི་སྐད་དུ་སྨྲ་བ་ནི། རང་བཞིན་གྱིས་དྲང་ཞིང་གཉེན་བཤེས་ལ་ཕན་འདོགས་པར་སེམས་སོ། །རྔའི་སྐད་དུ་སྨྲ་བ་ནི། སྨྲ་མཁས་ལ་བློ་མྱུར་ཞིང་རིག་པ་འཛིན་ཏེ། རྒྱལ་པོའི་སྟོན་པའོ། །འབྲུག་སྐད་དུ་སྨྲ་བ་ནི། མཁས་པའི་བློ་དང་ལྡན་ཞིང་ཆོས་མཁས་སོ། །དྲིལ་སྐད་དུ་སྨྲ་བ་ནི། ཕྱུག་ཅིང་ལོངས་སྤྱོད་དང་ལྡན་ལ་གསེར་སྲང་བརྒྱ་སྟོང་མང་པོ་བདོག་པའོ། །ཚངས་པའི་སྐད་དུ་སྨྲ་བ་ནི། བསོད་ནམས་དང ། དབང་ཐང་ཆེན་པོ་དང་ལྡན་ཏེ། ཁྱིམ་ན་འདུག་ན་ནི། འཁོར་ལོས་བསྒྱུར་བའི་རྒྱལ་པོར་འགྱུར། །རབ་ཏུ་བྱུང་ན་ནི། གདོན་མི་ཟ་བར་འཚང་རྒྱའོ། །དེའི་ཚ་ན་བྲམ་ཟེ་དེས་མི་དེ་རྣམས་ལ་བདག་ནི། སྐད་ལ་ཤིན་ཏུ་མཁས་ཏེ། ཡང་དག་པར་སངས་རྒྱས་ཡིན་ན། ཚངས་པའི་སྐད་དང་ལྡན་པའི་རིགས་ཀྱི། ཁོ་བོ་ཡང་ཁྲིད་ལ་འགྲོགས་ཏེ་འདོང་ངོ ། །དེ་དག་གིས་
401a
> ༄#། །ཀྱང་བྲམ་ཟེ་ལོང་བ་དེ་ཁྲིད་ནས་སོང་སོང་བ་ལས་ཕྱོགས་དེར་ཉེ་བར་འོངས་པ་དང ། སངས་རྒྱས་ཀྱི་གསུང་ཚངས་པའི་དབྱངས་ཐོས་ནས་ལོང་བ་དགའ་མགུ་རངས་ཏེ་དད་པ་སྐྱེས་པས། མིག་གཉིས་རང་བྱེ་ནས་སངས་རྒྱས་ཀྱི་སྐུ་གསེར་གྱི་མདོག་ཅན། མཚན་སུམ་ཅུ་རྩ་གཉིས་ཀྱིས་བརྒྱན་པ། ཉི་མའི་འོད་ལྟར་ཤིན་ཏུ་གསལ་བ་མཐོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚད་མེད་པའི་དགའ་བ་སྐྱེས་ནས་བཅོམ་ལྡན་འདས་ཀྱིས་ཆོས་བསྟན་ཏེ་སྤྲོ་བ་བསྐྱེད་པས་སྡིག་པ་མི་དགེ་བའི་ལས་ཁྲི་ཕྲག་ཉི་ཤུ་ཟད་དེ་རྒྱུན་དུ་ཞུགས་པའི་འབྲས་བུ་ཐོབ་ནས་ཤེས་རབ་ཀྱི་མིག་དང་ལྡན་པར་གྱུར་པས་བསྟན་པ་ལ་རབ་ཏུ་འབྱུང་བར་གསོལ་ཏོ། །དེ་ནས་བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་ནས་དགེ་སློང་དུ་གྱུར་ཏེ་ཅི་རིགས་པའི་ཆོས་བསྟན་པས་དགྲ་བཅོམ་པར་གྱུར་ཏོ། །འཁོར་མང་པོ་ཐེ་ཚོམ་དུ་གྱུར་ནས་ཚེ་དང་ལྡན་པ་ཀུན་དགའ་བོ་འདུག་པ་སྟན་ལས་ལངས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འགྲོ་བ་མང་པོའི་དོན་མཛད་པ། མདོངས་པ་ཐམས་ཅད་ལ་ཐུགས་རྗེ་བའི་ནང་ན་བྲམ་ཟེ་དམུས་ལོང་འདི་ལ་ལྷག་པར་ཐུགས་རྗེ་ཆེའོ། །བྲམ་ཟེ་མདོངས་པ་ཞིག་ཤའི་མིག་
401b
> ཀྱང་ཐོབ་ལ། ཤེས་རབ་ཀྱི་མིག་ཀྱང་ཐོབ་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བྲམ་ཟེ་ལོང་པ་འདི་ལ་དུས་འདི་འབའ་ཞིག་ཏུ་མིག་བྱིན་པར་མ་ཟད་དེ།་འདས་པའི་དུས་ན་ཡང་མིག་བྱིན་ནོ། །ཀུན་དགའ་བོས་གསོལ་པ། བཅོམ་ལྡན་འདས། འདས་པའི་དུས་ན་ཇི་ལྟ་བུར་མིག་སྩལ་པ་ལེགས་པར་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་བསྐལ་པ་གྲངས་མེད་ཚད་མེད་དཔག་ཏུ་མེད་བསམ་གྱིས་མི་ཁྱབ་པའི་ཕ་རོལ་ན་འཛམ་བུའི་གླིང་འདིར་ཡུལ་པུ་ཀ་ལ་ད་ཞེས་བྱ་བ་ན་རྒྱལ་པོ་མིག་འབྱེད་ཅེས་བྱ་བ་ཞིག་ཡོད་དེ། རྒྱལ་པོ་དེ་བྲག་དང ། རྩིག་པ་ལ་ཡང་ཐོགས་པ་མེད་པར་དཔག་ཚད་བཞི་བཅུ་ཚུན་ཆད་མཐོང་བས། མིག་འབྱེད་ཅེས་བྱ་བར་བཏགས་ཏེ།་འཛམ་བུའི་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་ཀུན་ལ་དབང་བྱེད་དོ། །རྒྱལ་པོ་དེ་ལ་བཙུན་མོ་དང ། ཕོ་བྲང་གི་སླས་ཉི་ཁྲི་ཡོད་དེ། རྒྱལ་བུ་ནི། ལྔ་བརྒྱ་སྙེད་ཡོད་དོ། ། རྒྱལ་ཚབ་ནི། ཚུལ་ཁྲིམས་བཟང་པོ་ཞེས་བྱ་སྟེ། རྒྱལ་པོ་དེ་ཚུལ་བཞིན་དུ་རྒྱལ་པོ་བྱེད་པས། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སེམས་ཏེ་རླུང་དང་ཆར་དུས་ལས་མི་ཡོལ་བས་ལོ་ལེགས་ཏེ་ཐམས་ཅད་བདེ་སྐྱིད་དོ། །དེ་ནས་རྒྱལ་པོ་དེ་དབེན་པ་ཞིག་ན་འདི་སྙམ་དུ་སེམས་པར་གྱུར་ཏོ། །བདག་ཚེ་སྔ་མའི་བསོད་ནམས་ཀྱིས་མིའི་རྒྱལ་པོར་
402a
> ༄#། །གྱུར་ཏེ་ནོར་བུ་རིན་པོ་ཆེ་དང ། ལོངས་སྤྱོད་ཆེན་པོ་དང་ལྡན་ཞིང་ཐམས་ཅད་ཀྱིས་དག་ཉན་པ་ནི། ཇི་ལྟར་རྩཝ་འཇམ་པོ་ལ་རླུང་གིས་བཏབ་ན་ཕྱོགས་གཅིག་ཏུ་ཉལ་བ་བཞིན་ནོ། །ཚེ་འདི་ལ་ཡང་ཕྱི་མའི་འབྲས་བུ་མ་སྐྱེད་ན། སྡུག་བསྔལ་བར་འགྱུར་ཏེ། དཔེར་ན། ཞིང་པ་དག་དཔྱིད་མང་དུ་རྨོས་ན། སྟོན་ཡང་མང་དུ་བསྡུར་ཡོད་པས།་བདག་ཀྱང་ཚེ་འདིར་དཔྱིད་ས་བོན་མ་བཏབ་ན། ཚེ་ཕྱི་མར་སྟོན་པ་སྔར་མེད་པས། ད་ནི། ལེ་ལོ་བྱ་བར་མི་རིགས་ཀྱི། བསོད་ནམས་ཀྱི་ཞིང་ལ་ས་བོན་རྒྱས་པར་གདབ་བོ་སྙམ་བསམས་ནས་བློན་པོ་ལ་འདི་སྐད་ཅེས་བཀའ་སྩལ་ཏོ། །ངའི་དཀོར་མཛོད་ཐམས་ཅད་ཕྱུང་ལ། གྲོང་ཁྱེར་གྱི་སྒོ་དང་ལམ་སྲང་མི་མང་པོ་འདུ་བའི་གནས་སུ་ཐམས་ཅད་སྤུངས་ལ་འགྲོ་བ་མང་པོ་ལ་སྦྱིན་པར་བྱའོ། །རྒྱལ་ཕྲན་བརྒྱད་ཁྲི་བཞི་སྟོང་གི་བང་མཛོད་ཐམས་ཅད་ཀྱང་ཐམས་ཅད་ལ་ཡིད་བཞིན་དུ་བྱིན་ཅིག་ཅེས་བསྒོས་ནས་གསེར་གྱི་རྒྱལ་མཚན་བསྒྲེངས། དྲིལ་ཆེན་པོ་བསྒྲགས་ཏེ་འཛམ་བུའི་གླིང་གི་དགེ་སྦྱོང་དང ། བྲམ་ཟེ་དང ། དབུང་ཕོངས་པ་དང ། རྒས་པ་དང ། ན་བའི་རྣམ་པ་ཐམས་ཅད་འདུས་ཤིག་།ཅི་དང་ཅི་འདོད་པ་དེ་དག་ཐམས་ཅད་ཡིད་བཞིན་དུ་སྦྱིན་ནོ། །ཞེས་བསྒྲགས་སོ། །དེའི་ཚེ་ན་འབངས་ཐམས་ཅད་ཀྱང་རྒྱལ་པོ་ཆོས་བཞིན་བྱེད་པས། དེ་ལ་དགའ་སྟེ་
402b
> བསྟོད་ཅིང་སྙན་པར་སྒྲོག་གོ་།མཐའ་འཁོབ་ཀྱི་རྒྱལ་ཕྲན་པ་ལ་ད་བར་ནི་ཞེས་བྱ་བ་ཞིག་རྒྱལ་པོ་དེའི་བཀའ་མི་ཉན་པར་གྱུར་ཏེ། ཆོས་མ་ཡིན་པས་རྒྱལ་པོ་བྱེད་དོ། །རྒྱལ་ཕྲན་དེ་ལ་བློན་པོ་མཁས་པ། བློ་གྲོས་དང་ལྡན་པ་ལོ་དར་ཞེས་བྱ་བ་ཞིག་ཡོད་དེ། བློན་པོ་དེས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ནི། ཡིད་ཐུང་ལ་གཏུམ་སྟེ་སྔ་བསམ་ཕྱི་མ་ནོ་མེད་པས་ཕྱིས་འགྱོད་པར་འགྱུར་རོ། །རྒྱལ་པོ་མིག་འབྱེད་ནི། ཤིན་ཏུ་སྙིང་རྗེ་ཆེ་བ་དང་ལྡན་པས་འཛམ་བུའི་གླིང་གི་མི་ཐམས་ཅད་ལ་དྲིན་གྱིས་ཁྱབ་སྟེ། རྒྱལ་པོ་ཐམས་ཅད་དེའི་བཀའ་ཉན་ན། རྒྱལ་པོ་འབའ་ཞིག་གིས་དེ་ལ་བསྔོ་བའི་མི་རིགས་ཀྱི། དེའི་བཀའ་ཉན་ན་བུ་ཚ་རྒྱུད་དུ་བདེ་བར་འགྱུར་རོ། །ཞེས་གསོལ་པ་དང ། ཕྱིར་བློན་པོ་དེ་ལ་ཁྲོས་ནས་གྲོས་མཉན་ཏོ། །དེ་ནས་བློན་པོ་དེ་ཡང་མི་དགའ་ནས་འདི་སྙམ་དུ་བསམས་སོ། །རྒྱལ་པོས་ཆོས་མ་ཡིན་པ་དང ། མི་རིགས་པ་བྱས་པས་བདག་གིས་ཕན་པའི་གྲོས་བཏབ་ན་ཁྲོས་ཏེ་མ་ཉན་ཏོ། །རྒྱལ་པོ་འདི་ལ་ནི། འབངས་ཐམས་ཅད་ཀྱང་མི་དགའ་བས་མེད་པར་བྱའོ་སྙམ་བསམས་ནས་གྲོས་བྱས་པ་ལས་གསང་ཤོར་ནས་རྒྱལ་པོས་དམག་བསྡོགས་ཏེ་འཛིན་ཏུ་བཅུག་གོ་།བློན་པོ་དེས་ཀྱང་འཕྲིགས་ནས་རྟ་མགྱོགས་པ་ལ་ཞོན་ཏེ་བྲོས་སོ། །དམག་གི་དཔུང་གིས་ཕྱི་བཞིན་བདས་ནས་སླེབ་པ་དང ། བློན་པོ་དེ་འཕོང་སྐྱེན་པ་
403a
> ༄#། །ཞིག་པས་འཕྲལ་དུ་མི་བཅོ་བརྒྱད་མདའ་འཕངས་ཏེ་བསད་དོ། །དེ་ནས་སྙེགས་མ་ཡང་སྙེགས་མ་ནུས་པས། བློན་པོ་དེ་ཡང་མིག་འབྱེད་ཀྱི་ཡུལ་དུ་ཕྱིན་ཏེ་རྒྱལ་པོ་མིག་འབྱེད་ལ་ཕྱག་འཚལ་ནས་གཏམ་བྱས་ཏེ་རྒྱལ་པོ་དགའ་བས་དེ་ཡང་བློན་པོར་བཅུག་གོ་།དེ་ནས་རྒྱལ་པོ་དེ་བཀའ་མི་ཉན་ནོ། །ཞེས་གསོལ་ནས་བློན་པོ་རྣམས་ལ་རྒྱལ་པོ་དེ་ང་དབང་བ་ལ་མ་གཏོགས་སམ་ཞེས་དྲིས་ན། དེ་ལ་རྒྱལ་པོ་མི་དབང་ངོ ། །ཞེས་གསོལ་ཏོ། །དེ་ནས་བློན་པོ་དེས་དཔུང་གི་ཚོགས་བསྡུས་ཏེ་རྒྱལ་པོ་དེ་ད་བབ་པར་གསོལ་པ་དང ། རྒྱལ་པོས་ཀྱང་དེ་བཞིན་དུ་གནང་ངོ ། །དེ་ནས་དཔུང་གི་ཚོགས་མཆོག་རྣམས་བསྡུས་ཏེ་པ་ལ་ད་བར་ནེའི་ཡུལ་དུ་འདོང་ངོ ། །ཞེས་འགྲོ་བའི་ཞག་དུས་ཕོག་གོ་།དེའི་ཚེ་རྒྱལ་པོ་དེས་ཀྱང་དཔུང་གི་ཚོགས་བདག་གི་ཡུལ་དུ་འོང་ངོ ། །ཞེས་ཐོས་ནས་རབ་ཏུ་མི་དགའ་སྟེ་སེམས་ཁོང་དུ་ཆུད་ནས་ཅི་བྱ་བའི་གཏོལ་མེད་དེ། གོས་དྲི་མ་ཅན་བགོས་ནས་མུན་ཁང་དུ་ཞུགས་སོ། །དེའི་ཚེ་ཡུལ་དེ་ན་བྲམ་ཟེ་མ་རུངས་པ་ཞིག་ཡོད་པ་དེས་རྒྱལ་པོ་ལ་ཁྱོད་ཅི་མི་དགའ་ན། འདི་ལྟར་མྱ་ངན་བྱེད་ཅེས་དྲིས་པ་དང ། རྒྱལ་པོས་སྨྲས་པ། ཁྱོད་མ་ཐོས་སམ། །ཁོ་བོའི་བློན་པོ་ལོ་ད་ར་བྲོས་པ། རྒྱལ་པོ་མིག་འབྱེད་ཀྱི་ཡུལ་དུ་འོངས་ནས་ཕྱིར་
403b
> ཁོ་བོའི་ཡུལ་དུ་དམག་འདྲེན་ནོ། །ཞེས་ཟེར་བས་བདག་མི་དགའོ། །གལ་ཏེ་དམག་དྲངས་ན། བདག་ཅག་ཀྱང་མེད་པར་འགྱུར་རོ། །ཞེས་སྨྲས་པ་དང ། བྲམ་ཟེས་སྨྲས་པ།་བློན་པོ་རྣམས་སྡུས་ཤིག་དང ། གྲོས་བགྱིའོ། །ཞེས་གསོལ་ཏོ། །དེ་ནས་བློན་པོ་དང་བྲམ་ཟེ་འདུས་ཏེ་བྲམ་ཟེས་སྨྲས་པ། རྒྱལ་པོ་མིག་འབྱེད་དེ་བདག་གི་ཕ་མ་མ་གཏོགས་པར་གཞན་ཅི་ལ་ཡང་མ་ཆགས་ཏེ་སྦྱིན་པ་བྱེད་དོ། །ཞེས་ཐོས་ཀྱི། ཡུལ་འདི་ན་བྲམ་ཟེ་ལོང་བ་ཞིག་ཡོད་པ་དེ། རྒྱལ་པོ་དེ་ལ་མིག་ཡ་གཅིག་སློང་དུ་གཏང་ངོ ། །གལ་ཏེ་མིག་བྱིན་ན་དམག་ཀྱང་མི་འདྲེན་པར་འགྱུར་རོ། །ཞེས་བགྲོས་ཏེ་རྒྱལ་པོ་ལ་གསོལ་པ་དང ། རྒྱལ་པོས་ཀྱང་དེ་བཞིན་དུ་བྱའོ། །ཞེས་སྨྲས་ནས་བྲམ་ཟེ་ལོང་བ་འབོད་དུ་བཏང་ངོ ། །བྲམ་ཟེ་ལོང་བ་འོངས་ནས་རྒྱལ་པོས་ལོང་བ་ལ་འདི་སྐད་ཅེས་སྨྲས་སོ། །ཁོ་བོ་ཁྱོད་ལ་སྒྲུབ་ཏུ་གསོལ་བ་ཞིག་ཡོད་ཀྱི། ཁྱོད་ཀྱིས་བྱ་དགོས་སོ། །ཞེས་བསྒོ་བ་དང ། བྲམ་ཟེ་ལོང་བས་སྨྲས་པ། བདག་མིག་གཉིས་ཀ་མདོངས་ན། ཅི་ཞིག་སྒྲུབ་ཏུ་ནུས་ཞེས་གསོལ་ཏོ། །རྒྱལ་པོས་བསྒོ་བ། རྒྱལ་པོ་མིག་འབྱེད་དཔུང་གི་ཚོགས་བཤམས་ཏེ་འདིར་འོངས་པས། ཁོ་བོ་ནི། བཞོན་པས་བྲོས་ཀྱང་ཐར་ན། ཁྱོད་མིག་མེད་པར་གར་འབྲོས། རྒྱལ་པོ་དེ་སྦྱིན་པ་གཏོང་བ་ལ་ཕ་རོལ་གྱི་ཡིད་དང་མི་འགལ་
404a
> ༄#། །བར་གཏོང་ངོ ། །ཞེས་གྲག་གོ་།ཁྱོད་སོང་ལ་དེའི་མིག་སློངས་ཤིག་དང་གལ་ཏེ་སྟེར་ན་དམག་ཀྱང་མི་འོང་བར་འགྱུར་གྱི། ཁྱོད་མིག་སློང་དུ་སོང་ཞིག་ཅེས་བསྒོ་བ་དང ། བྲམ་ཟེས་བདག་མིག་མི་མཐོང་ན། ཇི་ལྟར་མཆི་ཞེས་གསོལ་ཏོ། །རྒྱལ་པོས་བསྒོ་བ་ཁྱོད་སོང་ཞིག་དང ། ལམ་རྒྱགས་དང ། ལམ་འདྲེན་པ་དང ། ཡོ་བྱད་གཞན་ཡང་ཅི་དགོས་པ་སྦྱར་རོ། །གལ་ཏེ་མིག་ཐོབ་ན། བྱ་དགའ་ཡང་ཆེར་སྦྱིན་ནོ། །ཞེས་བསྒོ་ནས་སོང་ངོ ། །དེའི་ཚེ་ན་རྒྱལ་པོ་མིག་འབྱེད་ཀྱི་ཡུལ་དུ་ལྟས་ངན་རྣམ་པ་སྣ་ཚོགས་བྱུང་ངོ ། །འདི་ལྟ་སྟེ་གནམ་གྲུམ་པ་དང ། གནམ་ལྕགས་འབབ་པ་དང ། སྐར་མ་ལྟུང་བ་དང ། ནམ་རྨུགས་པ་དང ། གནམ་ལྕགས་བབ་ནས་ས་ཀུན་གས་པ་དང ། བྱ་རྣམས་ནམ་མཁའ་ལ་དུ་བའི་སྐད་འབྱིན་ཅིང་ས་ལ་ལྟུང་བ་དང ། སེངྒེ་དང ། སྟག་དང ། འཕར་སྦྱང་དག་སྙིང་རྗེ་བའི་སྐད་འབྱེན་ཅིང ། མིའི་ནང་དུ་འོངས་ཏེ་ས་ལ་འགྲེ་བ་ལ་སོགས་པའི་ལྟས་ངན་པ་སྣ་ཚོགས་བྱུང་ངོ ། །དེ་ནས་བྲམ་ཟེ་ལོང་བ་ཡང་མཐར་གྱིས་ཡུལ་དེར་ཕྱིན་ཏེ་ཕོ་བྲང་གི་སྒོར་འོངས་ནས་སྐད་ཆེན་པོས་འདི་སྐད་ཅེས་སྨྲས་སོ། །བདག་ནི། ཡུལ་གཞན་ནས་འདིར་མཆིས་ཏེ་རྒྱལ་པོ་ཁྱོད་ཀྱི་ཡོན་ཏན་ཀུན་ཏུ་གྲགས་པ་ནི། སློད་པ་འོངས་ན་ཅི་ཡང་གཏོང་སྟེ་
404b
> སློང་བའི་ཡིད་དང་མི་འགལ་བར་མཛད་ཅེས་ཐོས་པས་ཉོན་མོངས་པ་དང་བསྡོས་ཏེ་འདིར་སློང་དུ་འོངས་ཀྱི། ཅི་འདོད་པ་བྱིན་ཅིག་ཅེས་སྨྲས་སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་བསུས་ཏེ་ཁྱོད་ལམ་ན་ངལ་བར་མ་གྱུར་ཏམ། ཉོན་མ་མོངས་སམ། བདེ་བར་འོངས་སམ་ཞེས་སྤྲོ་བའི་ཚིག་སྨྲས་ནས་རྒྱལ་སྲིད་དམ། རིན་པོ་ཆེའམ། རྟའམ། ཐེག་པའམ།་གོས་སམ། བཟའ་བའམ། བཏུང་བའམ། ནད་ཀྱི་རྐྱེན་རྩིའམ། ཅི་དང་ཅི་དགོས་པ་སློངས་ཤིག་དང ། དེ་དང་དེ་དག་ཆོག་པར་སྦྱིན་ནོ། །ཞེས་སྨྲས་པ་དང ། བྲམ་ཟེས་སྨྲས་པ། ཕྱི་རོལ་གྱི་ཟང་ཟིང་བྱིན་པས་ནི། བསོད་ནམས་ཀྱི་དམ་པར་མི་འགྱུར་གྱི། ནང་གི་སྦྱིན་པ་བྱས་ན་འབྲས་བུ་ཆེ་སྟེ། བདག་མིག་སྟོར་ནས་ཡུན་རིང་དུ་ལོན་པས་རྟག་ཏུ་མདོངས་ཤིང་འཐོམ་པར་གྱུར་གྱི། བདག་ནི། རྒྱལ་པོའི་སྤྱན་འཚལ་ལོ། །ཞེས་སྨྲས་སོ། །དེ་སྐད་ཅེས་སྨྲས་པ་ལ་རྒྱལ་པོ་རབ་ཏུ་དགའ་ནས་བྲམ་ཟེ་ལ་ཁྱོད་མིག་འདོད་ན་སྦྱིན་ནོ། །ཞེས་བསྒོའོ། །བྲམ་ཟེས་སྨྲས་པ། རྒྱལ་པོས་བདག་ལ་སྩལ་ན་ནམ་སྩལ་ཅེས་སྨྲས་པ་དང ། ད་སྟེ་ཞག་བདུན་ན་མིག་སྦྱིན་ནོ། །ཞེས་བསྒོས་ནས་དྲིལ་བསྒྲགས་ཏེ། རྒྱལ་ཕྲན་བརྒྱད་ཁྲི་བཞི་སྟོང་ཡང་སྦྲན་ཏོ། །རྒྱལ་པོ་མིག་འབྱེད་ད་སྟེ་ཞག་བདུན་ན་བྲམ་ཟེ་ལ་མིག་གི་སྦྱིན་པ་བྱེད་ཀྱི། ལྟ་འདོད་ན་ཐམས་ཅད་ཤོག་ཅིག་ཅེས་
405a
> ༄#། །བསྒོའོ། །དེའི་ཚེ་ན་འཛམ་བུའི་གླིང་གི་མི་དག་དེ་སྐད་བསྒོ་བ་ཐོས་ནས་ཐམས་ཅད་མྱུར་བར་དེར་ལྷགས་སོ། །རྒྱལ་ཕྲན་བརྒྱད་ཁྲི་བཞི་སྟོང་སྙེད་ཀྱང་སོ་སོའི་བློན་པོ་དང་ཆས་ཏེ་རྒྱལ་པོའི་ཐད་དུ་ལྷགས་ནས་ལྟོ་བ་ས་ལ་ཕ་བ་སྟེ་མཆི་མ་བླགས་ནས་འདི་སྐད་ཅེས་གསོལ་ཏོ། །བདག་ཅག་འཛམ་བུའི་གླིང་གི་མི་ཐམས་ཅད་རྒྱལ་པོ་ལ་བརྟེན་ནས་འཚོ་ན། ཅིའི་སླད་དུ་མི་གཅིག་གི་ཕྱིར་བདག་ཅག་ཀུན་སྤངས་ཞེས་གསོལ་ཏོ། །བློན་པོ་རྣམས་དང ། བཙུན་མོ་དང ། ཕོ་བྲང་གི་སླས་རྣམས་ཀྱང་མགོ་བོ་ས་ལ་རྡེབ་ཅིང་ས་ལ་ཁ་བུག་ཏུ་ཉལ་ནས་བྲམ་ཟེ་མི་གཅིག་གི་སླད་དུ་བདག་ཅག་ཀུན་མ་སྤོངས་ཤིག་ཅེས་གསོལ་ནས་ཚེ་ངེས་འདེབས་སོ། །རྒྱལ་བུ་ལྔ་བརྒྱ་རྣམས་ཀྱང་དུས་ནས་བདག་ཅག་ལ་མགོན་མ་མཆིས་སོ། །སྐྱབས་མ་མཆིས་སོ། །ཐུགས་བརྩེ་བའི་སླད་དུ་སྤྱན་གྱི་སྦྱིན་གཏོང་མཛད་པའི་ཐུགས་སླར་ལྡོག་ཏུ་གསོལ། རྒྱལ་ཚབ་ཚུལ་ཁྲིམས་བཟང་པོས་འདི་སྐད་ཅེས་གསོལ་ཏོ། །རྒྱལ་པོ་ཡབ་ཀྱི་སྦྱིན་པར་བདག་གི་མིག་འདི་སྩལ་དུ་གསོལ། བདག་གུམ་པ་ནི། ཚོད་མཆིས་ཀྱི། ཡབ་སྤྱན་མི་མངའ་བར་གྱུར་ན་འཛམ་བུའི་གླིང་གི་མི་ཐམས་ཅད་མགོ་ནམ་མཆིས་ཏེ། དཔུང་གཉེན་མེད་པར་འགྱུར་རོ། །ཞེས་གསོལ་པ་དང ། རྒྱལ་པོས་རྒྱལ་
405b
> ཕྲན་དང ། བློན་པོ་དང ། བཙུན་མོ་དང ། རྒྱལ་བུ་རྣམས་ལ་འདི་སྐད་ཅེས་བསྒོའོ། །ང་ནི། སྐྱེ་བ་ཡུན་རིང་པོར་ལུས་འདིས་སྐྱེ་བ་ཅི་ཡང་མྱོང་སྟེ། རུས་བ་སྤུངས་ན་རི་རབ་བས་མཐོ། །ཁྲག་བསགས་ན་རྒྱ་མཚོ་བཞི་བས་མང ། མའི་ནུ་ཞོ་འཐུངས་པ་ཡང་ཆུ་བོ་བཞི་བས་ཆེ་སྟེ། འདོད་པ་དང་བྱེ་བྲལ་ནས་དུས་པའི་མཆི་མ་ཡང་རྒྱ་མཚོ་དང་མཉམ་མོ། །སེམས་ཅན་དམྱལ་བར་ཡང་བསྲེགས་པ་དང ། བཙོས་པ་དང ། མིག་ཕྱུང་བའི་གྲངས་ཀྱང་ཤིན་ཏུ་མང ། ཡི་དྭགས་ཀྱི་ཁམས་སུ་ལུས་རྣམ་པ་སྣ་ཚོགས་མྱོང་སྟེ།་ལུས་ལ་མེ་འབར་བ་ནས་ལུས་དང་མིག་བཅས་སུ་ཚིག་པ་ཡང་གྲངས་མེད། དུད་འགྲོའི་སྐྱེ་གནས་སུ་གཅིག་ལ་གཅིག་གསོད་ཅིང་འཆི་བས་ཀྱང་ལུས་གྲངས་མེད་པ་ཞིག་ཆུད་ཟོས། མིའི་ནང་དུ་སྐྱེས་པ་ན་ཤི་མ་རན་པར་ཤི་བའི་གྲངས་ནི། མང ། ཚེའི་མཐར་ཐུག་པའི་དུས་ནི། ཉུང་སྟེ། འདོད་པ་ལ་ཆགས་པས་གཅིག་ལ་གཅིག་གསོད་ཅིང་གནོད་པར་བྱེད་དོ། །དེར་ཡང་ལུས་དང་མིག་གྲངས་མེད་པ་ཞིག་ཆུད་གཟན་ན། གལ་ཏེ་ལྷར་སྐྱེས་ན་ཡང་རིང་པོར་མི་ཐུབ་སྟེ། མདོར་ན་ཁམས་གསུམ་གྱི་རྒྱུད་དྲུག་ཏུ་འདོད་ཆགས་དང ། ཞེ་སྡང་དང ། གཏི་མུག་གི་རྡུལ་ཕྲ་མོ་སྙེད་ཀྱི་ལུས་ཆུད་ཟོས་ན། ལན་འགའ་ཡང་སྦྱིན་པ་མ་བྱས་ཏེ་སངས་རྒྱས་ཀྱི་བྱང་ཆུབ་བཙལ་མ་མྱོང་ངོ ། །ཤིན་ཏུ་བཙོག་ཅིང་
406a
> ༄#། །མནམ་པའི་མིག་འདི་དེའུ་རེ་རུལ་ཅིང་འཇིག་པས། ད་སྦྱིན་པ་བྱ་བའི་རིགས་ཀྱི་མི་སྦྱིན་པའི་མི་རིགས་ཏེ། ཤའི་མིག་འདི་བྱིན་ལ་སངས་རྒྱས་རྣམ་པ་ཐམས་ཅད་མཁྱེན་པའི་སྤྱན་ཐོབ་པར་བྱའོ། །ནམ་ངའི་སྨོན་ལམ་གྲུབ་ན། ཁྱེད་ལ་ཡང་རྣམ་པར་དག་པའི་ཆོས་ཀྱི་སྦྱིན་པ་བྱའོ། །ཁྱེད་ངའི་བླ་ན་མེད་པའི་བྱང་ཆུབ་ཀྱི་སེམས་ཀྱི་བར་དུ་མ་གཅོད་ཅིག་ཅེས་བསྒོ་བ་དང ། འཁོར་ཐམས་ཅད་ཅང་མི་ཟེར་བར་འཁོད་དོ། །དེ་ནས་བློན་པོ་རྣམས་ལ་ཁྱེད་ལས་གཅིག་གིས་ངའི་མིག་ཕྱུང་ཞིག་ཅེས་བསྒོ་ན། དེ་དག་གིས་བདག་ཅག་གི་ལུས་རྡུལ་དུ་བགྱིས་ཀྱང་རྒྱལ་པོའི་བ་སྤུ་གཅིག་ཙམ་ཡང་འབྱིན་མི་ཕོད་ན། རྒྱལ་པོའི་སྤྱན་ལ་ལག་དར་བ་ལྟ་ཅི་སྨོས་ཞེས་གསོལ་ཏོ། །རྒྱལ་པོས་ཡང་བསྒོ་བ། ཁྱེད་ཀྱིས་མི་གང་ཤ་མདོག་ནག་ལ། མིག་འོག་ནས་མིག་ཚུགས་སུ་ལྟ་བ་ཞིག་ཚོལ་ཅིག་ཅེས་བསྒོ་བ་དང ། ཤ་ཚུགས་དེ་འདྲ་བ་ཞིག་རྙེད་ནས་རྒྱལ་པོས་དེའི་ལག་ཏུ་གྲི་བྱིན་ཏེ་ངའི་མིག་ཕྱུང་ཞིག་ཅེས་བསྒོ་ནས། དེས་རྒྱལ་པོའི་མིག་ཡ་གཅིག་ཕྱུང་སྟེ་རྒྱལ་པོའི་ལག་ཏུ་བཞག་གོ་།རྒྱལ་པོས་མིག་ལག་ཏུ་བཞག་ནས་འདི་སྐད་ཅེས་སྨོན་ལམ་བཏབ་བོ། །བདག་གི་མིག་སྦྱིན་པ་བྱིན་པ་འདིས་མངོན་པར་འཚང་རྒྱ་བར་ཤོག་ཅིག་།གལ་ཏེ་མངོན་པར་འཚང་རྒྱ་ན། བྲམ་ཟེ་ལོང་བ་འདི་ངའི་
406b
> མིག་ཐོབ་མ་ཐག་ཏུ་མཐོང་བར་གྱུར་ཅིག་ཅེས་སྨོན་ལམ་བཏབ་མ་ཐག་ཏུ་རྒྱལ་པོས་མིག་ཐོགས་པ་བྲམ་ཟེའི་མིག་ཏུ་བཅུག་གོ་།དེ་ནས་མོད་ལ་མཐོང་བར་གྱུར་ཏེ། རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོའི་མིག་འདིས་བདག་མཐོང་བར་གྱུར་ཏེ། མཐོང་བ་འདིས་འཚལ་གྱི། ཡ་གཅིག་ནི། མི་འཚལ་ལོ། །ཞེས་གསོལ་ཏོ། །རྒྱལ་པོས་བསྒོ་པ། ཁོ་པོས་མིག་གཉིས་ཀ་ཁྱོད་ལ་སྦྱིན་པར་བྱས་པས་ཡ་གཅིག་བཞག་ན། སྔར་སྨྲས་པ་དང་འགལ་ལོ། །ཞེས་བསྒོས་ནས་མིག་ཡ་གཅིག་ཀྱང་ཕྱུང་སྟེ་ལག་ཏུ་བླངས་ནས་སྨོན་ལམ་སྔ་མ་བཞིན་དུ་བཏབ་བོ། །བྲམ་ཟེའི་མིག་ཏུ་བཅུག་ནས་བྲམ་ཟེའི་མིག་གཉིས་ཀས་མཐོང་བར་གྱུར་ཏོ། །དེའི་ཚེ་ན་གནམ་ས་ཀུན་ཀྱང་གཡོས། ལྷའི་ཕོ་བྲང་ཀུན་ཀྱང་འགུལ་ཞིང་ལྡེག་སྟེ་ལྷ་རྣམས་ངོ་མཚར་དུ་གྱུར་ནས་ཐམས་ཅད་ཀྱིས་བྱང་ཆུབ་སེམས་དཔས་མིག་གི་སྦྱིན་པ་བྱས་པར་མཐོང་ནས་སྟེང་གི་ཕྱོགས་ཀྱི་ནམ་མཁའ་ལ་ལྷགས་ཏེ་ལྷ་རྫས་ཀྱི་མེ་ཏོག་དང ། སྤོས་ཀྱི་མཆོད་པ་བྱས་ནས་ལེགས་སོ་ལེགས་སོ། །ཞེས་བསྟོད་དོ། །བརྒྱ་བྱིན་ཡང་དེར་འོངས་ཏེ་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །འདི་ལྟར་ཤིན་ཏུ་སྤྱད་དཀའ་བ་བྱ་བ་འདིས་རྣམ་པར་སྨིན་པའི་ལན་ཅི་ཞིག་འདོད། བྱང་ཆུབ་སེམས་དཔས་སྨྲས་པ། བདུད་ཀྱི་རྒྱལ་པོའམ། ཚངས་པའམ། བརྒྱ་བྱིན་ནམ། རྒྱལ་ཆེན་བཞིའམ །
407a
> ༄#། །འཁོར་ལོས་བསྒྱུར་བའི་རྒྱལ་པོ་ལ་སོགས་ཁམས་གསུམ་གྱི་བདེ་བ་འདོད་པ་མ་ཡིན་གྱི། བསོད་ནམས་འདིས་མངོན་པར་བྱང་ཆུབ་ནས་སེམས་ཅན་ཐམས་ཅད་མྱ་ངན་ལས་འདས་པའི་བདེ་བ་ལ་དགོད་པའི་ཕྱིར་རོ། །བརྒྱ་བྱིན་གྱིས་ཡང་སྨྲས་པ། འདི་ལྟར་མིག་ཕྱུང་བ་འདི་རབ་ཏུ་སྡུག་བསྔལ་བར་གྱུར་ན་འགྱོད་པའམ། ཁྲོ་བའི་སེམས་མ་བྱུང་ངམ། རྒྱལ་པོས་སྨྲས་པ། འགྱོད་པ་ཡང་མེད། ཁྲོ་བའི་བག་ཀྱང་མེད་དོ། །བརྒྱ་བྱིན་གྱིས་སྨྲས་པ། བདག་གིས་བལྟས་ན། མིག་གཉིས་ནས་ཁྲག་ཟག་ཅིང་མདོག་ཀྱང་གྱུར་བཞིན་དུ་འགྱོད་པ་མེད་ཅེས་ཟེར་བ་ནི། ཡིད་ཆེས་པར་དཀའོ། །རྒྱལ་པོས་སྨྲས་པ། བདག་གིས་མིག་བྱིན་པ་འདི་ལ་འགྱོད་པ་ཡང་མེད་ལ། བླ་ན་མེད་པའི་བྱང་ཆུབ་ཀྱང་ཐོབ་པར་འགྱུར་ཞེ་ན། བདེན་པར་སྨྲས་པ་འདིས་བདག་གི་མིག་གཉིས་སྔོན་བཞིན་མཐོང་བར་གྱུར་ཅིག་ཅེས་སྨྲས་མ་ཐག་ཏུ་མིག་གཉིས་སྔོན་པས་ཀྱང་གསལ་བར་གྱུར་པས། དེའི་ཚེ་ན་ལྷ་དང་མི་ཐམས་ཅད་རབ་ཏུ་དགའ་ཞིང་མགུ་རངས་པར་གྱུར་ཏོ། །དེ་ནས་རྒྱལ་པོས་བྲམ་ཟེ་ལ་བསྒོ་བ། ངས་མིག་བྱིན་པས་ཁྱོད་ཀྱང་མཐོང་བར་གྱུར་གྱི། ནམ་སངས་རྒྱས་པ་ན་ཡང་ཁྱོད་ལ་ཆོས་ཀྱི་མིག་སྦྱིན་པར་བྱའོ། །རིན་པོ་ཆེ་འདི་དག་ཀྱང་ཁྱེར་ལ་ཕྱིར་སོང་ཞིག་ཅེས་བསྒོའོ། །བྲམ་ཟེ་མིག་དང ། རིན་པོ་ཆེ་ཐོབ་ནས་ཕྱིར་ཆས་ཏེ་ཡུལ་
407b
> དུ་ཕྱིན་པ་དང ། རྒྱལ་པོ་ཉིད་ཀྱིས་ཀྱང་བསུས་ནས་ཕྲད་མ་ཐག་ཏུ་མིག་ཐོབ་བམ་ཞེས་དྲིས་སོ། །བྲམ་ཟེས་སྨྲས་པ། མིག་ཀྱང་ཐོབ་ནས་བདག་ཀྱང་འདི་ལྟར་མཐོང་བར་གྱུར་ཏོ། །རྒྱལ་པོས་སྨྲས་པ།་འོ་ན་ད་ལྟར་ཚེ་འཕོས་སམ་མ་འཕོས། སྨྲས་པ། ལྷ་རྣམས་དེར་ལྷགས་ནས་སྨོན་ལམ་བཏབ་པས། མིག་གཉིས་སྔོན་བས་ཀྱང་གསལ་བར་མཐོང་བར་གྱུར་ཏོ། །རྒྱལ་པོ་བ་ལ་ད་བར་ནས་དེ་སྐད་ཅེས་སྨྲས་པ་ཐོས་ནས་འཁམས་ཏེ་སྙིང་གས་ཏེ་ཚེ་འཕོས་སོ། །ཀུན་དགའ་བོ། །དེའི་ཚེ་དེའི་དུས་ན་རྒྱལ་པོ་སྤྱན་འབྱེད་ཞེས་བྱ་བ་དེ་ནི། ད་ལྟར་ང་ཡིན་ནོ། །བ་ལ་ད་བར་ནི། ལྷས་བྱིན་ཡིན་ནོ། །བྲམ་ཟེ་མིག་སློང་བ་དེ་ནི། ད་ལྟར་གྱི་བྲམ་ཟེ་ལོང་བ་དགྲ་བཅོམ་པ་ཐོབ་པ་ཡིན་ཏེ། སྔོན་ཡང་མིག་བྱིན་པ་ནས་ད་ལྟར་གྱི་པར་དུ་ཡང་ཤེས་རབ་ཀྱི་མིག་བྱིན་ཏེ། ཁྱེད་ཀྱི་ཕྱིར་སྐྱེ་བ་ཐམས་ཅད་དུ་དཀའ་བ་སྤྱད་ནས་མངོན་པར་སངས་རྒྱས་སོ། །ཁྱེད་ཀྱང་འབྱུང་བའི་ལམ་ལ་བརྩོན་འགྲུས་ཀྱིས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཁོར་མང་པོ་རྣམས་ཁ་ཅིག་གིས་རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་པར་གྱུར་ཏོ། །ཁ་ཅིག་གིས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །ཀུན་དགའ་བོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་བར་དགའོ། །རྒྱལ་པོ་མིག་འབྱེད་ཀྱི་ལེའུ་སྟེ་སུམ་
408a
> ༄#། །ཅུ་ལྔ་པའོ།། །།མི་གདུང་བ་སོར་ཕྲེང་ཅན་གྱི་ལེའུ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རྒྱལ་པོ་གསལ་རྒྱལ་ལ་བློན་པོ་ཆེན་པོ་མཁས་པ། རིག་པ་དང་ལྡན་པ། བཙན་ཕྱུག་པ་ཞིག་ཡོད་དོ། ། དེའི་ཆུང་མ་སེམས་ཅན་དང་ལྡན་པར་གྱུར་ནས་བུ་ཁྱེའུ་མཚན་དང་ལྡན་པ། བྱད་གཟུགས་ལེགས་པ། དཔེ་ཟླ་མེད་པ་ཞིག་བཙས་ཏེ་མཚན་མཁན་པོས་ནས་བུ་བསྟན་པ་དང ། མཚན་མཁན་དགའ་བའི་མདངས་ཀྱིས་འདི་སྐད་ཅེས་སྨྲས་སོ། །བུ་འདི་ནི། བསོད་ནམས་ཀྱི་མཚན་དང་ལྡན་ཏེ། ཀུན་ལས་འཕགས་པར་ཡིད་གཞུངས་ལ་མཁས་པའི་བློ་དང་ལྡན་ནོ།། ཁྱེའུའི་ཕས་དེ་སྐད་ཅེས་སྨྲས་པ་ཐོས་ནས་ཁྱེའུའི་མིང་ཇི་སྐད་གདགས་ཞེས་དྲིས་པ་དང ། མཚན་མཁན་གྱིས་ཁྱེའུ་འདི་མངལ་དུ་ཆགས་ནས་ཡ་མཚན་དུ་གྱུར་པ་ཅི་ཡོད་ཅེས་དྲིས་སོ། ། བློན་པོས་སྨྲས་པ། ཁྱེའུ་འདིའི་མ་སྔོན་རང་བཞིན་འཇམ་ཞིང་དེས་པ་ཙམ་མ་ཡིན་པ་ལས། བུ་འདི་མངལ་དུ་ཆགས་ནས་ལྷག་པར་འཇམ་ཞིང་དེས་ཏེ་གཞན་གྱི་ཡོན་ཏན་དང ། ལེགས་པ་བརྗོད་པར་དགའ་ཡི། ཉེས་པ་བརྗོད་པར་མི་དགའ་ལ། ཉོན་མོངས་པ་ཕོངས་པ་ལ་བྱམས་ཤིང་བརྩེ་བར་གྱུར་ཏོ། །མཚན་མཁན་གྱིས་སྨྲས་པ། འདི་བུའི་ཡོན་ཏན་ཡིན་
408b
> ཏེ།་བུའི་མིང་ཡང་མི་གདུང་བ་ཞེས་བཏགས་སོ། །དེ་ནས་གསོས་བསྐྱེད་དེ་ཆེར་སྐྱེས་ནས་སྟོབས་ཀྱང་གྱད་སྟོབས་པོ་ཆེའི་ཚད་དུ་ཕྱིན་ཏེ། གཅིག་པུས་མི་སྟོང་ཡང་ཐུབ་ལ། ནམ་མཁའ་ལ་བྱ་འཕུར་བ་ཡང་མཆོངས་པས་ཟིན་ཏེ་མགྱོགས་ཁྱད་ཀྱང་རྟ་དང་བང་མཉམ་ནས་བུ་དེ་ལ་ལྷག་པར་སྡུག་ཅིང་བྱམས་པར་གྱུར་ཏེ། དེའི་ཚེ་ཡུལ་དེན་བྲམ་ཟེ་མཁས་པའི་རིག་པ་དང་ལྡན་པ། མང་དུ་ཐོས་པ། གཙུག་ལག་ལ་མཁས་པ་ཞིག་ཡོད་དེ། བྲམ་ཟེ་དེ་ལ་སློབ་མ་ལྔ་བརྒྱ་ཙམ་རྟག་ཏུ་རྗེས་སུ་སློབ་བོ། །དེའི་ཚེ་བློན་པོ་དེས་ཀྱང་བུ་ཁྲིད་དེ་བྲམ་ཟེ་ལ་གཏད་ནས་སློབ་ཏུ་བཅུག་གོ་།ཁྱེའུ་མི་གདུང་བ་སློབ་པ་ལ་འགྲུས་པས་ཉི་མ་གཅིག་བསླབས་ན། གཞན་ལོར་བསླབས་པ་བས་མཁས་ཏེ། རིང་པོ་མ་ལོན་པར་ཐམས་ཅད་ཁོང་དུ་ཆུད་ཅིང་རྟོགས་པར་གྱུར་ཏོ། །སློབ་དབོན་བྲམ་ཟེ་དེས་ཀྱང་དེ་ལ་ལྷག་པར་ཡིད་རྟོན་ཏེ། རྟག་ཏུ་འགྲོགས་ཤིང་ལྷན་ཅིག་འདུག་པས་སློབ་མ་གཞན་དག་ཀྱང་དེ་ལ་བསྟི་སྟང་བྱེད་དོ། །དེའི་ཚེ་ན་སློབ་དཔོན་བྲམ་ཟེ་དེའི་ཆུང་མས་ཁྱེའུ་དེའི་བྱད་གཟུགས་བཟང་ཞིང་ལེགས་པ་དང ། བསླབ་པ་ཡང་གཞན་པས་ལྷག་པར་མཁས་པར་མཐོང་ནས་དེ་ལ་ཆགས་ཏེ་ཡིད་ལ་བཟུང་ཡང་སློབ་མ་རྣམས་དང་མི་འབྲལ་ཏེ། ཉིན་མཚན་འགྲོགས་པས་གཏམ་བྱ་བའི་སྐབས་མེད་དེ་བསམ་པ་ལྟར་མ་གྱུར་པས་རྟག་ཏུ་ཡིད་ལ་གཅགས་པར་གྱུར་ཏོ། །དུས་ཕྱི་ཞིག་ན་སྦྱིན་བདག་ཅིག་གིས་སློབ་དཔོན་དེ་དང་སློབ་མར་
409a
> ༄#། །བཅས་སུ་ཟླ་བ་གསུམ་གྱི་བར་དུ་འཚོ་བ་སྦྱར་ནས་མགྲོན་དུ་གཉེར་ཏོ། །དེའི་ཚེ་སློབ་དཔོན་བྲམ་ཟེ་ཆུང་མ་དང་གཉིས་འདི་སྐད་ཅེས་བགྲོས་སོ། །ཁོ་བོ་ནི། སློབ་མ་དང་བཅས་སུ་སྦྱིན་བདག་གིས་ཟླ་བ་གསུམ་གྱི་བར་དུ་འཚོ་བ་སྦྱོར་རོ། །ཞེས་བོས་ཀྱི། ད་སློབ་མ་ལས་གཅིག་ཅིག་ཕྱི་ན་ལས་སུ་བསྐོས་ཏེ་བཞག་པའི་རིགས་སམ་ཞེས་ཆུང་མ་ལ་སྨྲས་པ་དང ། ཆུང་མ་དགའ་ནས་བྲམ་ཟེ་ལ་འདི་སྐད་ཅེས་སྨྲས་སོ། །ཁྱིམ་གྱི་སོ་ཚིས་དང་བྱ་བ་མང་པོ་ལ་ཤེས་པ་མཁས་པ་དང་ལྡན་པ་གཅིག་ཅིག་བྱ་དགོས་པས། ཁྱེའུ་མི་གདུང་བ་ཡིད་བརྟན་ཏེ་ཕྱིར་གཞག་པའི་རིགས་སོ། །ཞེས་སྨྲས་ནས་བྲམ་ཟེས་ཀྱང་ཁྱེའུ་མི་གདུང་བ་ཁྱོད་ཕྱིར་འདུག་ལ་ཁྱིམ་གྱི་སོ་ཚིས་དང་ཞལ་ཏ་བྱོས་ཤིག་།ཁོ་བོ་ནི། སྦྱིན་བདག་གིས་བོས་པས་འགྲོའོ། །ཞེས་བསྒོའོ། །ཁྱེའུ་མི་གདུང་བ་ཡང་སློབ་དཔོན་གྱིས་བསྒོ་བ་བཞིན་དུ་ཕྱིར་འདུག་གོ་།དེའི་ཚེ་ན་སློབ་དཔོན་བྲམ་ཟེ་སློབ་མ་དང་བཅས་ཏེ་སོང་བའི་འོག་ཏུ་བྲམ་ཟེའི་ཆུང་མ་དེ་རབ་ཏུ་དགའ་མགུ་རངས་ནས་ཤིན་ཏུ་བྱི་བདར་བྱས་ཏེ་བསླུ་བའི་རྣམ་པས་ཁྱེའུ་དང་སྨྲས་ཀྱང་མི་གདུང་བ་སྲན་བཙུགས་ཏེ་སེམས་མ་གྱུར་ཏོ། །དེ་ནས་འདོད་ཆགས་ཀྱི་སེམས་སྐྱེས་པས་ཚིག་དྲང་པོར་སྨྲས་ཏེ། ཁོ་བོ་ནི། ཁྱོད་ལ་ཆགས་ཀྱང་སྔོན་ཆད་ནི། སྐབས་མེད་དོ། །ད་ནི། སློབ་དཔོན་ཡང་སོང་ནས་ཆེད་དུ་ཁྱོད་
409b
> ཕྱིར་བཞག་པ་ཡིན་གྱི། ད་ནི། དབེན་ཞིང་སྐབས་ལ་བབ་སྟེ། ཁོ་མོའི་ཡིད་དང་སྦྱོར་ཅིག་ཅེས་བསྒོའོ། །མི་གདུང་བས་སྨྲས་པ། བདག་ནི། བྲམ་ཟེ་ཡིན་པས་བྲམ་ཟེའི་ཆོས་ཀྱིས་སློབ་དཔོན་གྱི་ཆུང་མ་དང་ཉལ་དུ་མི་རུང་སྟེ། གལ་ཏེ་འདི་འདྲ་བ་ཞིག་བྱས་ན། བྲམ་ཟེ་མ་ཡིན་པས་བདག་ཤི་ཡང་བླའི། འདི་ནི། མི་ཕོད་དོ། །ཞེས་སྨྲས་པ་དང ། སློབ་དཔོན་གྱི་ཆུང་མ་རེ་བ་ལྟར་མ་གྱུར་པས་ངོ་ཚ་ཞིང་སྐྱེངས་ནས་འཁོན་དུ་བཟུང་སྟེ་དཀུ་ལྟོ་བྱ་བར་བསམས་ནས་ཕྱིས་སློབ་དཔོན་ཕྱིར་འོང་དུ་ཉེ་བ་ན་གོས་ཀྱང་དྲལ། གདོང་ཡང་སྦར་མོས་དྲད་ནས་ས་རྡུལ་གྱིས་གོས་ཤིང་སྨ་བབ་པ་ལྟར་ཅང་མི་སྨྲ་བར་ས་ལ་ཉལ་ལོ། །དེ་ནས་སློབ་དཔོན་བྲམ་ཟེ་ཕྱིར་སླར་འོངས་ནས་ཁྱིམ་དུ་ཞུགས་པ་དང ། ཆུང་མ་དེ་འདྲ་བར་འདུག་པ་མཐོང་ནས་ཅིའི་ཕྱིར་ཁྱོད་འདི་ལྟར་གྱུར་ཅེས་དྲིས་པ་དང ། ཆུང་མས་མཆི་མ་བླགས་ཏེ་དྲི་ང་བའི་རིན་མི་ཆོག་གོ་།ཞེས་སྨྲས་སོ། །སློབ་དཔོན་བྲམ་ཟེས་ཅི་ཉེས་པ་སྨྲོས་ཤིག་ཅེས་ནན་གྱིས་དྲིས་པ་དང ། ཆུང་མ་དུས་ཏེ་འདི་སྐད་ཅེས་སྨྲས་སོ། །ཁྱོད་ཀྱིས་རྟག་ཏུ་བསྟོད་པའི་མི་གདུང་བ་ནི། ཁྱོད་སོང་བའི་འོག་ཏུ་རྟག་པར་ཁོ་མོ་ལ་ཉལ་བར་བསྒུགས་ཏེ་ཁོ་མོ་མ་བཏུབ་པས།་ཁོ་མོའི་གོས་ཀྱང་དྲལ། གདོང་ལ་ཡང་རྨ་ཕྱུང་བ་ཡིན་ཏེ། ཁྱོད་ལ་འདི་ལྟ་བུའི་སློབ་མ་བདོག་གམ། བྲམ་ཟེས་དེ་སྐད་ཅེས་ཐོས་ནས་ཤིན་ཏུ་ཁྲོས་ཏེ་ཆུང་མ་ལ་འདི་སྐད་
410a
> ༄#། །ཅེས་སྨྲས་སོ། །མི་གདུང་བ་འདི་སྟོབས་ནི། གཅིག་པུས་ཀྱང་མི་སྟོང་ཡང་ཐུབ་ལ་བློན་པོ་ཆེན་པོའི་བུ་ཡིན་ཏེ། ཆོ་རིགས་བཙུན་པས་ཉེས་པ་ཞིག་བྱ་ན་ཡང་བགས་ཀྱིས་བྱ་དགོས་སོ། །ཞེས་སྨྲས་ནས་མི་གདུང་བའི་དྲུང་དུ་སོང་སྟེ་ཅི་རིགས་པར་སྙན་པའི་ཚིག་གིས་སྤྲོ་བ་བསྐྱེད་ནས་ཁོ་བོ་སོང་བའི་ཕྱིན་ལས་ཆེན་པོ་དང ། ཉོན་མ་མོངས་སམ་ཞེས་གཏམ་དྲིས་ནས་འདི་སྐད་ཅེས་བསྒོའོ། །ཁྱོད་ཀྱིས་སྔ་ཕྱིར་ཁོ་བོ་ལ་ཆུ་གང་གི་སྙིང་ཉེ་སྟེ། ཁྱོད་ཀྱི་དྲིན་རྟག་ཏུ་དྲན་པས། ད་ནི། ཁྱོད་ལ་གསང་བའི་ཆོས་གཅིག་པུ་ཞིག་ཡོད་པ་སྔོན་ཆད་མ་བསྟན་པ་ཁྱོད་ལ་བསྟན་གྱི། གལ་ཏེ་ཁྱོད་ཀྱིས་དེ་བཞིན་དུ་བྱས་ན། གདོན་མི་ཟ་བར་ཚངས་པའི་ལྷར་སྐྱེའོ། །ཞེས་སྨྲས་སོ། །ཁྱེའུ་མི་གདུང་བ་པུས་མོ་ས་ལ་བཙུགས་ཏེ་བསྟན་པར་གསོལ་བ་དང ། མི་གདུང་བ་ལ་འདི་སྐད་ཅེས་བསྒོའོ། །ཁྱོད་ཉིན་ཞག་བདུན་གྱིས་དགེ་བ་བསྲུངས་ཏེ་མི་སྟོང་གི་མགོ་བཅད་ནས་སོར་མོ་རེ་རེ་ཞིང་བླངས་ལ་སོར་མོ་སྟོང་གིས་ལུས་ཀྱི་ཕྲེང་བ་བྱས་ན། དེའི་ཚེ་ཚངས་པའི་ལྷ་མངོན་སུམ་དུ་མཐོང་སྟེ། ཚེ་འཕོས་མ་ཐག་ཏུ་ཚངས་པའི་ལྷར་སྐྱེའོ། །ཞེས་བསྟན་ཏོ། །ཁྱེའུ་མི་གདུང་བས་སློབ་དཔོན་གྱིས་དེ་སྐད་ཅེས་བསྟན་པ་ཐོས་ནས་ཐེ་ཚོམ་སྐྱེས་ཏེ་སློབ་དཔོན་ལ་འདི་སྐད་ཅེས་གསོལ་ཏོ། །
410b
> སྲོག་བཅད་པས་ཚངས་པའི་ལྷར་སྐྱེ་བ་ནི། རིགས་པ་མ་ལགས་སོ། །སློབ་དཔོན་གྱིས་སྨྲས་པ། ཁྱོད་ནི། ཁོ་བོའི་སློབ་མ་ཡིན་ན། ཅི་ཁོ་བོས་བསྟན་པའི་མན་ངག་ལ་ཡིད་མི་ཆེས་སམ། ཅི་སྟེ་ཡིད་མི་ཆེས་ན་ཁྲེལ་ལྟས་ཡོད་པ་མ་ཡིན་ཏེ། འདིར་མ་འདུག་པར་གར་དགའ་བར་སོང་ཞིག་ཅེས་བསྒོས་ནས་གསང་སྔགས་ཀྱིས་བཏབ་སྟེ་རལ་གྲི་ཞིག་ས་ལ་བཙུགས་ཏེ་སྔགས་ཀྱིས་བཏབ་པས། ཁྱེའུ་དེ་ཁྲོས་པའི་སེམས་སྐྱེས་ཏེ་སློབ་དཔོན་གྱིས་ཁྲོས་པར་རིག་ནས་རལ་གྲི་ལག་ཏུ་བྱིན་ནོ། །མི་གདུང་བ་རལ་གྲི་ཐོགས་ནས་སྒོར་བརྒྱུགས་ཏེ་མི་ཕྲད་རྒུ་བསད་ནས་སོར་མོ་བཅད་དེ་ལུས་ཀྱི་ཕྲེང་བར་བཏགས་པས། ཀུན་གྱིས་སོར་ཕྲེང་ཅན་དུ་བཏགས་སོ། །ཀུན་ཏུ་གསོད་ཅིང་ཞག་བདུན་དུ་ཕྱིན་པའི་ཉིན་པར་སོར་མོ་དགུ་བརྒྱ་དགུ་བཅུ་རྩ་དགུ་ནི། རྙེད་ཀྱི། སོར་མོ་གཅིག་གིས་བསྣན་ན་བསད་པའི་གྲངས་ཀྱང་སྟོང་དུ་ཚང་བ་ལས། མི་ཐམས་ཅད་བྲོས་ཤིང་གབ་པས་གཅིག་ཀྱང་མི་རྒྱ་སྟེ། ཀུན་ཏུ་བཙལ་ཀྱང་མ་རྙེད་དོ། ཞག་བདུན་གྱི་བར་དུ་ཁ་ཟས་མ་ཟོས་པས་ཁྱེའུའི་མ་བུལ་སྙིང་བརྩེ་སྟེ་ཁ་ཟས་སྐྱེལ་དུ་བཏང་ན་ཐམས་ཅད་འཇིགས་པས་གཅིག་ཀྱང་མ་སྤོབས་སོ། །དེ་ནས་ཁྱེའུའི་མ་ཉིད་ཁ་ཟས་ཐོགས་ཏེ་བུའི་དྲུང་དུ་སོང་བ་ལས། རྒྱང་མ་ནས་མ་འོངས་པ་མཐོང་བ་དང ། མའི་ཐོག་ཏུ་བརྒྱུགས་ཏེ་གསད་པར་
411a
> ༄#། །གཟས་པ་ལས་དེ་ལ་མས་སྲི་ཞུ་མེད་པར་ཁྱོད་ཅི་ལོག་པས་བསམ་སྟེ། མཚམས་མེད་པའི་ལས་བྱེད་ཅིང་མ་གསོད་དམ་ཞེས་སྨྲས་པ་དང ། ཕྱིར་མ་ལ་འདི་སྐད་ཅེས་སྨྲས་སོ། །བདག་ནི། སློབ་དཔོན་གྱིས་བསྟན་པ་བཞིན་དུ་ཉིན་ཞག་བདུན་གྱིས་སོར་མོ་སྟོང་ཞིག་ཁ་བསྐངས་ཏེ། སོར་མོ་སྟོང་དུ་ཚང་ན་ཚངས་པའི་ལྷར་སྐྱེ་བས་སོར་མོ་གྲངས་མ་ཚང་སྟེ་མི་བྱར་མི་རུང་བས། ད་གསད་དགོས་སོ། །ཞེས་སྨྲས་པ་དང ། དེ་ལ་ཁྱེའུའི་མས་ད་འདི་ལྟར་གྱུར་ན། ཁོ་མོ་མི་གསད་པར་སོར་མོ་གཅད་དུ་མི་རུང་ངམ་ཞེས་བསྒོ་བའི་ཚེ་བཅོམ་ལྡན་འདས་ཀྱིས་རྒྱང་མ་ནས་གདུལ་བའི་དུས་ལ་བབ་པར་གཟིགས་ཤིང་མཁྱེན་ནས་དགེ་སློང་ཞིག་ཏུ་སྦྲུལ་ཏེ། དེའི་ཕྱོགས་སུ་གཤེགས་སོ།། སོར་ཕྲེང་ཅན་གྱིས་དགེ་སློང་མཐོང་བ་དང ། མ་གསོད་པར་བྱས་པ་བཏང་ནས་དགེ་སློང་གི་ཐོག་ཏུ་མཆོངས་ཏེ་གསད་པར་གཟས་སོ། །སངས་རྒྱས་ཀྱིས་དེ་ལྟར་འོངས་པ་གཟིགས་ནས་ཞབས་ཀྱིས་དལ་གྱིས་གཤེགས་ཀྱང་སོར་ཕྲེང་ཅན་མཐུ་སྟོབས་གཏུགས་ཏེ་བརྒྱུགས་ཀྱང་མ་སླེབས་ནས་རྒྱང་མ་ནས་དགེ་སློང་ཁྱོད་ཅུང་ཟད་ཅིག་སྡོད་ཅིག་ཅེས་བོས་སོ། །བཅོམ་ལྡན་འདས་ཀྱིས་ཀྱང་རྒྱང་མ་ནས་ང་ནི། རྟག་ཏུ་སྡོད་ན། ཁྱོད་ཉིད་མི་སྡོད་དོ། །ཞེས་བཀའ་སྩལ་པ་དང ། སོར་ཕྲེང་ཅན་གྱིས་ཇི་ལྟར་ན་ཁྱོད་ནི། སྡོད་ལ།
411b
> ཁོ་བོ་ནི།་མི་སྡོད་ཅེས་སྨྲས་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ངའི་དབང་པོ་རྣམས་ནི། རྟག་ཏུ་ཞི་ཞིང་ཏིང་ངེ་འཛིན་གྱི་དབང་ཐོབ་པས་སྡོད་དོ། ། ཁྱོད་ནི།་སློབ་དཔོན་གྱིས་ལོག་པར་བསྟན་ཏེ། སྡིག་པ་ལ་ཡིད་ཆེས་ནས་ཁྱོད་ཀྱི་སེམས་ཀྱང་བསླུས་ཏེ་མི་སྡོད་པས། ཉིན་མཚན་དུ་གསོད་པའི་ལས་བྱེད་དེ། སྡིག་པ་མཐའ་མེད་པའི་ལས་བྱེད་དོ། །སོར་ཕྲེང་ཅན་གྱིས་ཐོས་པ་ཙམ་གྱིས་སེམས་ཀྱིས་རྟོགས་ཤིང་ཆུད་དེ་རལ་གྲི་ས་ལ་བོར་ནས་རྒྱང་མ་ནས་སྐྱབས་སུ་གསོལ་ལོ། །ཞེས་ཕྱག་འཚལ་ཏོ། །དེ་ནས་བཅོམ་ལྡན་འདས་ཀྱང་དེར་གཞེས་ཏེ་སངས་རྒྱས་ཀྱི་སྐུར་སྤྲུལ་ནས་འོད་ཟེར་ལྷང་ངེ་ལྷམ་མེར་མཚན་སུམ་ཅུ་རྩ་གཉིས་ཀྱིས་གསལ་བར་བརྒྱན་པ་བསྟན་ཏོ། །སོར་ཕྲེང་ཅན་གྱིས་སངས་རྒྱས་ཀྱི་སྐུ་འོད་ཟེར་དང་མཚན་དུ་ལྡན་པ་མཐོང་ནས་ལུས་ས་ལ་བརྡབས་ཏེ་ཉེས་པ་མཐོལ་ཅིང་འགྱོད་ནས་བཅོམ་ལྡན་འདས་ཀྱིས་ཆོས་བསྟན་པས། ཆོས་ལ་ཆོས་ཀྱི་མིག་རྣམ་པར་དག་པར་གྱུར་ཏོ། །དད་པས་རབ་ཏུ་འབྱུང་བར་གསོལ་བ་དང ། བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་བས་སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ཏོ། །དེ་ལ་བཅོམ་ལྡན་འདས་ཀྱིས་ཅི་རིགས་པར་ཆོས་བསྟན་པས། སེམས་ཀྱི་དྲི་མ་ཀུན་ཟད་ནས་དགྲ་བཅོམ་པར་གྱུར་ཏེ། བཅོམ་ལྡན་
412a
> ༄#། །འདས་ཀྱིས་རྒྱལ་བུ་རྒྱལ་བྱེད་ཀྱི་ཚལ་དུ་ཁྲིད་དོ། །དེའི་ཚེ་ཡུལ་དེ་ན་གནས་པའི་མི་ལ་སོགས་པ་སྲོག་ཆགས་ཐམས་ཅད་སོར་ཕྲེང་ཅན་གྱི་མིང་ཐོས་པ་ཙམ་གྱིས་མི་སྐྲག་པ་མེད་དེ། མི་དང་སྲོག་ཆགས་སྦྲུམ་མ་རྣམས་ཀྱང་སྐྲག་པས། བུ་བཙའ་བའི་ཐུགས་མི་ཐུབ་བོ། །དེའི་ཚེ་བལ་གླང་མོ་ཞིག་བུ་མི་ཕྱིན་པ་དང ། བཅོམ་ལྡན་འདས་ཀྱིས་སོར་ཕྲེང་ཅན་ལ་བཀའ་སྩལ་པ། ཁྱོད་བལ་གླང་མོའི་དྲུང་དུ་སོང་ལ་འདི་སྐད་དུ་བདག་ཐོག་མ་སྐྱེས་ནས་ད་ཙམ་གྱི་བར་དུ་མི་གཅིག་ཀྱང་མ་བསད་དོ། །ཞེས་བདེན་པའི་ཚིག་སྨྲོས་ཤིག་ཅེས་བཀའ་སྩལ་པ་དང ། སོར་ཕྲེང་ཅན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གིས་ནི། མི་ཡང་མང་དུ་བཀུམ་ན། ཇི་སྐད་དུ་མ་བཀུམ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ནི། འཕགས་པའི་ཆོས་ལས་སྐྱེས་མ་ཐག་པ་ཞེས་བྱའོ། །དེ་ནས་སོར་ཕྲེང་ཅན་གོས་ཚགས་བཅོས་ཏེ་བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་བལ་གླང་མོའི་དྲུང་དུ་སོང་སྟེ། དེ་སྐད་སྨྲས་པས་བདེ་བར་བཙས་ནས་སོར་ཕྲེང་ཅན་ཡང་ཕྱིར་གནས་སུ་འོངས་སོ། །རྒྱལ་པོ་གསལ་རྒྱལ་དཔུང་གི་ཚོགས་དང་བཅས་ཏེ་སོར་ཕྲེང་ཅན་འཛིན་དུ་ཆས་པ་ལས། དཔུང་གི་ཚོགས་འགྲོ་བའི་ལམ། རྒྱལ་བུ་རྒྱལ་བྱེད་ཀྱི་དྲུང་དུ་བྱུང་བས་རྒྱལ་བུ་རྒྱལ་བྱེད་ཀྱི་
412b
> ཚལ་ན་དགེ་སློང་ལུས་ཐུང་ཞིང་མི་སྡུག་པ་དབྱངས་རབ་ཏུ་སྙན་པ་ཞིག་ཡོད་དེ། གཙུག་ལག་ཁང་ན་དབྱངས་བྱེད་པ་དཔུང་གི་ཚོགས་ཀྱིས་ཐོས་ནས་སྐྱོ་མི་ཞེས་བ་ཙམ་དུ་ཉན་འདོད་དོ། །གླང་པོ་ཆེ་དང ། རྟ་ཡང་རྣ་བ་བཏུད་ནས་འགྲོར་མི་བཏུབ་པར་ཉན་ཏོ། །རྒྱལ་པོ་ཡ་མཚན་དུ་གྱུར་ཏེ། ཅིའི་ཕྱིར་གླང་པོ་ཆེ་དང་རྟ་ལ་སོགས་པ་འགྲོར་མི་བཏུབ་ཅེས་སྨྲས་པ་དང་དབྱངས་སྙན་པ་ཉན་འདོད་པའི་ཕྱིར་འགྲོར་མི་བཏུབ་བོ། །ཞེས་གསོལ་ཏོ། །རྒྱལ་པོས་སྨྲས་པ། དུད་འགྲོའི་སྐྱེ་གནས་སུ་སྐྱེས་པ་ཡང་འདི་ལྟར་ཆོས་ཉན་པར་དགའ་ན། བདག་ཅག་མིའི་ནང་དུ་སྐྱེས་པ་ལྟ་ཅི་སྨོས་ཏེ། སྐད་ཅིག་མཉན་པར་བྱའོ། །ཞེས་རྒྱལ་བུ་རྒྱལ་བྱེད་ཀྱི་ཚལ་དུ་སོང་ནས་གླང་པོ་ཆེ་ལས་བབས་ཏེ་རལ་གྲི་ཡང་དཀྲོལ། གདུགས་ཀྱང་བཞག་ནས་བཅོམ་ལྡན་འདས་གང་ན་བཞུགས་པའི་སྤྱན་སྔར་སོང་སྟེ་ཕྱིན་པ་དང ། སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་དབྱངས་ཤིན་ཏུ་སྙན་པ་འདི་སུ་ལགས་ལྟ་བར་འཚལ་ཏེ། ཀཪྵ་པ་ཎ་སྟོང་ཕྲག་བརྒྱད་ཅུ་ཞིག་ཀྱང་འབུལ་ལོ། །ཞེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྔར་སྦྱིན་པ་བྱིན་པའི་འོག་ཏུ་ཕྲད་པར་བྱའོ། །གལ་ཏེ་སྔར་ཕྲད་ན། ཀཪྵ་པ་ཎ་གཅིག་ཙམ་ཡང་སྦྱིན་མི་འདོད་པར་འགྱུར་རོ། །དེ་ནས་རྒྱལ་པོ་དང་དགེ་སློང་དུ་
413a
> ༄#། །ཕྲད་ནས་ཧ་ཅང་མི་སྡུག་ལ་ཐུང་ཆེས་པས། ཀཪྵ་པ་ཎ་གཅིག་ཙམ་ཡང་སྦྱིན་པའི་སེམས་མ་སྐྱེས་ཏེ། རྒྱལ་པོས་པུས་མོ་ས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དགེ་སློང་འདིའི་ལུས་ཤིན་ཏུ་མི་སྡུག་ཅིང་ཐུང་ལ་དབྱངས་ཤིན་ཏུ་སྙན་པ་འདི་སྔོན་ལས་ཅི་ཞིག་བགྱིས་ན། འདི་ལྟ་བུའི་རྣམ་པར་སྨིན་པ་ཐོབ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཉན་ལ་ཤིན་ཏུ་ཡིད་ལ་ཟུངས་ཤིག་དང་བསྟན་པར་བྱའོ། །སྔོན་འདས་པའི་དུས་ན་སངས་རྒྱས་འོད་སྲུང་ཞེས་བྱ་བ་འཇིག་རྟེན་དུ་གཤེགས་ཏེ་སེམས་ཅན་གྱི་དོན་མཛད་ནས་མྱ་ངན་ལས་འདས་པའི་འོག་ཏུ་རྒྱལ་པོ་ཀྲྀ་ཀཱི་བྱི་ཞེས་བྱ་བས་རིང་བསྲེལ་བསྡུས་ཏེ་མཆོད་རྟེན་བརྩིགས་པར་བྱས་པ་ལས། ཀླུའི་རྒྱལ་པོ་བཞི་ཞིག་མིར་སྤྲུལ་ཏེ་རྒྱལ་པོའི་དྲུང་དུ་ལྷགས་ནས་རིང་བསྲེལ་གྱི་ཕྱིར་མཆོད་རྟེན་རྩིག་པ་འདི་རིན་པོ་ཆེ་ལས་བགྱིའམ། ས་ལས་བགྱི་ཞེས་གསོལ་ཏོ། །རྒྱལ་པོས་སྨྲས་པ། མཆོད་རྟེན་ནི། ཆེན་པོར་རྩིག་དགོས་ན། རིན་པོ་ཆེ་མང་པོ་མད་པས་ས་ལས་བྱ་དགོས་ཏེ། གྲུ་བཞི་ངོས་གཅིག་ཀྱང་དཔག་ཚད་ལྔར་ཕྱིན་པ། འཕང་དུ་མཐོ་ཚད་དཔག་ཚད་ཉི་ཤུ་ཡོད་པ་ཀུན་ཏུ་སྣང་བ་ཞིག་རྩིག་དགོས་སོ། །ཀླུའི་རྒྱལ་པོ་དེ་བཞིས་རྒྱལ་པོ་ལ་འདི་སྐད་ཅེས་སྨྲས་སོ། །
413b
> བདག་ཅག་བཞི་ནི། ཀླུའི་རྒྱལ་པོ་ཡིན་ཏེ། རྒྱལ་པོ་མཆོད་རྟེན་བྱེད་པས་བདག་ཅག་ཀྱང་རིན་པོ་ཆེ་གཏང་སྙམ་མོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་མགུ་རངས་ཏེ། འདི་ལྟར་བསྟབ་པ་ལེགས་སོ། །ཞེས་སྨྲས་པ་དང ། ཀླུ་རྣམས་ཀྱིས་ཡང་འདི་སྐད་ཅེས་གསོལ་ཏོ། །གྲོང་ཁྱེར་གྱི་ངོས་བཞིའི་ཕྱི་རོལ་ན་ཆུ་མིག་ཆེན་པོ་བཞི་ཞིག་ཡོད་དེ།་ཤར་ཕྱོགས་ངོས་ཀྱི་ཆུ་མིག་ལས་བཅུས་ཏེ་ཕ་གུ་བྱས་ན། ཐམས་ཅད་བཻ་ཌཱུརྱ་སྔོན་པོར་འགྱུར་རོ། །ལྷོ་ཕྱོགས་ངོས་ཀྱི་ཆུ་མིག་ལས་བཅུས་ཏེ་ཕ་གུ་བྱས་ན། ཐམས་ཅད་གསེར་དུ་འགྱུར་རོ། །ནུབ་ཕྱོགས་ངོས་ཀྱི་ཆུ་མིག་ལས་བཅུས་ཏེ་ཕ་གུ་བྱས་ན། ཐམས་ཅད་དངུལ་དུ་འགྱུར་རོ། །བྱང་ཕྱོགས་ངོས་ཀྱི་ཆུ་མིག་ལས་བཅུས་ཏེ་ཕ་གུ་བྱས་ན། ཐམས་ཅད་ཤེལ་དཀར་པོར་འགྱུར་རོ། །ཞེས་སྨྲས་ཏེ། རྒྱལ་པོས་དེ་སྐད་ཅེས་སྨྲས་པ་ཐོས་ནས་ལྷག་པར་དགའ་མགུ་རངས་ཏེ་ངོས་བཞིའི་ལག་དཔོན་རེ་རེ་བསྐོས་ནས་ངོས་རེ་རེ་བྱེད་དུ་བཅུག་པ་ལས། ངོས་གསུམ་གྱི་ལག་དཔོན་གྱིས་མཆོད་རྟེན་ཟིན་དུ་ཉེ་བ་ཙམ་ན་ངོས་གཅིག་གི་ལག་དཔོན་གྱིས་ལེ་ལོ་བྱས་པས་ཟིན་དུ་མི་ཉེ་སྟེ། རྒྱལ་པོ་ཉིད་མཆོད་རྟེན་བྱེད་པ་ལ་བལྟར་འོངས་ནས་ལེ་ལོ་བྱས་པ་དེ་ལ་ཁྱོད་ཀྱིས་ལས་ལེགས་པར་མ་བྱས་པས་མ་ཟིན་ཏེ། ཆད་པས་གཅོད་དོ། །ཞེས་བསྒོ་བ་དང ། མི་དེ་རྒྱལ་པོ་ལ་ཁྲོས་ནས་འདི་
414a
> ༄#། །ལྟ་བུའི་མཆོད་རྟེན་ཧ་ཅང་ཐང་ཆེས་པ་འདི་ནམ་ཡང་མི་ཟིན་ནོ། །ཞེས་གསོལ་ཏོ། །དེ་ནས་རྒྱལ་པོས་ནན་ཏུར་བསྐྱེད་པས་ཀུན་གྱིས་ཉིན་མཚན་བརྩོན་འགྲུས་བྱས་ནས་དུས་གཅིག་ཏུ་གཅིག་ཅར་ཟིན་ཏོ། །མཆོད་རྟེན་ངོ་མཚར་དུ་མཐོང་ལ་རིན་པོ་ཆེ་རྣམས་འཚེར་ཞིང་དབྱིབས་ཀྱང་ལྷག་པར་ལེགས་པས། ལག་དཔོན་ཁྲོས་པ་ཡང་ཤིན་ཏུ་དགའ་ནས་སྔར་ཉེས་པ་རྣམས་འགྱོད་ཅིང་བཤགས་ཏེ་གསེར་གྱི་དྲིལ་བུ་གཅིག་མཆོད་རྟེན་གྱི་རྩེ་མོ་ལ་བཏགས་ནས་འདི་སྐད་ཅེས་སྨོན་ལམ་བཏབ་བོ། །བདག་གང་ནས་གང་དུ་སྐྱེས་ཀྱང་སྒྲ་སྐད་ཤིན་ཏུ་སྙན་ཅིང་འགྲོ་བ་ཐམས་ཅད་ཐོས་པ་དང་དགའ་བར་ཤོག་ཅིག་།མ་འོངས་པའི་དུས་སུ་སངས་རྒྱས་ཤཱཀྱ་ཐུབ་པ་དང་ཕྲད་དེ་འཁོར་བ་ལས་རྣམ་པར་གྲོལ་བར་ཤོག་ཅིག་ཅེས་སྨོན་ལམ་བཏབ་བོ། །རྒྱལ་པོ་ཆེན་པོ། དེའི་ཚེ་དེའི་དུས་ན་ངོས་གཅིག་གི་ལག་དཔོན་མཆོད་རྟེན་ཧ་ཅང་ཆེས་སོ། །ཞེས་ཁྲོས་པ་དེ་ནི། དགེ་སློང་འདི་ཡིན་ཏེ། དེའི་ཚེ་ཁྲོས་བཞིན་དུ་མཆོད་རྟེན་ཧ་ཅང་ཆེས་སོ། །ཞེས་སྨྲས་པ་ཙམ་གྱིས་རྟག་ཏུ་ལུས་ཐུང་ལ་མི་སྡུག་པར་གྱུར་ཏོ། །ཕྱིས་དགའ་བའི་སེམས་ཀྱིས་དྲིལ་བུ་ཕུལ་ནས་མཆོད་རྟེན་ལ་བཏགས་ཏེ་སྒྲ་སྐད་སྙན་པ་དང ། ང་དང་ཕྲད་པར་ཤོག་ཅིག་ཅེས་སྨོན་ལམ་བཏབ་
414b
> པས་སྐྱེ་བ་ལྔ་བརྒྱའི་བར་དུ་སྒྲ་སྐད་རབ་ཏུ་སྙན་ཏེ་ད་འདིར་ང་དང་ཕྲད་ནས་རྣམ་པར་གྲོལ་བ་ཐོབ་པར་གྱུར་ཏོ། །རྒྱལ་པོས་དེ་སྐད་ཅེས་གསུངས་པ་ཐོས་ནས་ཕྱིར་འགྲོ་བར་ཆེས་པ་ལས་བཅོམ་ལྡན་འདས་ཀྱིས་རྒྱལ་པོ་ཆེན་པོ། ཁྱོད་གར་འགྲོ་ཞེས་བཀའ་སྩལ་པ་དང ། རྒྱལ་པོས་བཅོམ་ལྡན་འདས་ལ་འདི་སྐད་གསོལ་ཏོ། །ཡུལ་འདི་ན་དགྲ་མ་རུངས་པ་སོར་ཕྲེང་ཅན་ཞེས་བགྱི་བ། མི་ཀུན་བསད་ནས་མ་འོས་པར་གནོད་པར་བགྱིད་པས། བདག་ཅག་དེ་ལ་དམག་རྒོལ་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། སོར་ཕྲེང་ཅན་ནི། ད་ལྟར་གྲོག་སྦུར་ཡང་མི་གསོད་ན། གཞན་གསོད་པ་ལྟ་སྨོས་ཀྱང་ཅི་དགོས། རྒྱལ་པོ་དེས་ད་ཙམ་བཅོམ་ལྡན་འདས་ཀྱིས་མ་བཏུལ་ལམ་སྙམ་བསམས་པ་དང ། བཅོམ་ལྡན་འདས་ཀྱིས་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སོར་ཕྲེང་ཅན་ནི། ད་ལྟར་རབ་ཏུ་བྱུང་ནས་དགྲ་བཅོམ་སྟེ་ཉེས་པའི་སྐྱོན་ཐམས་ཅད་ཟད་ནས་ད་ལྟར་གནས་ཁང་ན་འདུག་གོ་།རྒྱལ་པོ་དེ་དང་ཕྲད་པར་འདོད་ན། དེ་དང་སྦྲད་དོ། །ཞེས་བཀའ་སྩལ་ཏེ། སོར་ཕྲེང་ཅན་གྱི་གནས་ཁང་གི་སྒོར་ཕྱིན་ནས་དགེ་སློང་སོར་ཕྲེང་ཅན་གནས་ཁང་གི་ནང་ན་ལུད་པ་བསལ་བའི་སྒྲ་ཕྱུང་བ་ཐོས་པ་ཙམ་གྱིས་སྔར་མི་མང་པོ་བསད་པ་དྲན་ཏེ་རྒྱལ་པོ་འཇིགས་སྐྲག་ནས་འཁམས་ཏེ་ས་ལ་འགྱེལ་ཏོ། །དེ་ནས་རིང་ཞིག་ལོན་པ་དང ། ཕྱིར་ལངས་
415a
> ༄#། །ཏེ་བཅོམ་ལྡན་འདས་གང་ན་བ་དེར་སོང་ནས་ཇི་ལྟར་འཁམས་པ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ལེགས་པར་ཉོན་ཅིག་དང ། སྔོན་འདས་པའི་དུས་ན་འཛམ་བུའི་གླིང་འདིར་ཡུལ་ཝཱ་ར་ཎཱ་སི་ཞེས་བྱ་བ་ན་བྱ་ཤིན་ཏུ་གདུག་པ་ཞིག་ཡོད་དེ། ཟས་སུ་ཡང་སྲིན་བུ་གདུག་པ་འབའ་ཞིག་ཟའོ། །ལུས་ཀྱང་ཤིན་ཏུ་གདུག་པས་རེག་གམ་ཉེར་ཡང་མི་བཟོད་དེ། གར་འཕུར་ཞིང་འགྲོ་བའི་དུས་ན་སེམས་ཅན་ཡོད་པ་ཀུན་ཡང་དོག་ལ། ཤིང་ཡང་ཀུན་ཏུ་སྐམ་པར་འགྱུར་རོ། །དེའི་ཚེ་བྱ་གདུག་པ་དེ་ཚལ་ཞིག་གི་ནང་དུ་ཕྱིན་ནས་ཤིང་ཁར་འདུག་སྟེ་སྐད་ཕྱུང་བ་ལས་དེའི་ཚེ་ཤིང་དེའི་དྲུང་ན་གླང་པོ་ཆེའི་རྒྱལ་པོ་ཞིག་ཡོད་དེ། བྱ་གདུག་པའི་སྐད་ཐོས་པ་ཙམ་གྱིས་འཁམས་ནས་ས་ལ་འགྱེལ་ཏོ། །རྒྱལ་པོ་ཆེན་པོ། དེའི་ཚེ་དེའི་དུས་ན་བྱ་གདུག་པ་དེ་ནི།་ད་ལྟར་གྱི་སོར་ཕྲེང་ཅན་ཡན་ནོ། །གླང་པོ་ཆེའི་རྒྱལ་པོ་དེ་ནི། རྒྱལ་པོ་ཉིད་ཡིན་ནོ། །བཅོམ་ལྡན་འདས། སོར་ཕྲེང་ཅན་འདི་ནི། ཁྲོ་གཏུམ་པས་སེམས་ཅན་དེ་སྙེད་ཅིག་བསད་དེ། ད་བཅོམ་ལྡན་འདས་ཀྱིས་དགེ་བ་ལ་བཞག་གོ་།བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དགེ་སློང་སོར་ཕྲེང་ཅན་འདི་ད་ལྟར་གྱི་དུས་
415b
> འབའ་ཞིག་ན་མི་མང་པོ་བསད་དེ་ངས་བཏུལ་བར་མ་ཟད་དེ། སྔོན་འདས་པའི་དུས་ན་ཡང་སོར་ཕྲེང་ཅན་གྱིས་མི་འདི་དག་ཀུན་བསད་པ་ལས་ངས་བཏུལ་ཏེ་དགེ་བ་སེམས་པར་གྱུར་ཏོ། །རྒྱལ་པོས་ཡང་གསོལ་པ། བཅོམ་ལྡན་འདས་སྔོན་འདས་པའི་དུས་ན་ཡང་འདི་དག་བསད་པ་དང ། བཅོམ་ལྡན་འདས་ཀྱིས་བཏུལ་བའི་དངོས་པོ་རྣམ་པར་བྱེ་སྟེ་བསྟན་དུ་གསོལ།་བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་བསྐལ་པ་གྲངས་མེད་པའི་ཕ་རོལ་ན་འཛམ་བུའི་གླིང་འདིར་ཡུལ་ཝཱ་ར་ཎཱ་སི་ཞེས་བྱ་བ་ན་རྒྱལ་པོ་བ་ལ་མདར་ཞེས་བྱ་བ་ཞིག་བྱུང་ངོ ། །དེའི་ཚེ་རྒྱལ་པོ་དེ་དཔུང་རྣམ་བཞི་དང་བཅས་ཏེ་ཚལ་གྱི་ནང་དུ་རྩེར་སོང་སོང་བ་ལས། རི་དྭགས་དང་ཕྲད་དེ་རི་དྭགས་ཀྱི་ཕྱི་བཞིན་རྒྱུག་རྒྱུག་པ་ནས་དེའི་ཚེ་རྒྱལ་པོ་དེ་ངལ་ནས་རྟ་ལས་བབས་ཏེ་འདུག་པ་ལས་ནས་དེའི་ཚེ་རྒྱལ་པོ་དེ་ངལ་ནས་རྟ་ལས་བབས་ཏེ་འདུག་པ་ལས་ཚལ་སྟུག་པོ་དེའི་ནང་ན་སེངྒེ་མོ་ཞིག་གནས་པ་འདོད་ཆགས་ཀྱིས་ཉེན་ནས་སོང་སོང་བ་ལས་ཚལ་གྱི་ནང་ན་རྒྱལ་པོ་གཅིག་པུ་འདུག་པ་དང་ཕྲད་ནས་སེངྒེ་མོ་ལྷག་པར་འདོད་ཆགས་སྐྱེས་ཏེ་རྒྱལ་པོ་ལ་བསྙེན་ནས་མཇུག་མ་བཏེག་སྟེ་སྙེགས་སོ། །རྒྱལ་པོས་ཀྱང་འདོད་ཆགས་སྐྱེས་པར་རིག་ནས་འདི་སྙམ་དུ་བསམས་སོ། །འདི་ནི། གཅན་གཟན་ཁྲོ་བ་ཡིན་ཏེ། བདག་བསད་པའི་མཐུ་ཡང་ཡོད་པས་གལ་
416a
> ༄#། །ཏེ་ཡིད་བཞིན་དུ་མ་བྱས་ན། བདག་གི་སྲོག་ལ་འབབ་བོ་སྙམ་ནས་སྐྲག་བཞིན་དུ་སེངྒེ་མོ་ལ་འདོད་པ་སྤྱད་དོ། །དེ་ནས་སེངྒེ་མོ་ཕྱིར་སོང་བའི་འོག་ཏུ་གཡོག་རྣམས་ཀྱང་ལྷགས་ཏེ་རྒྱལ་པོ་བསུས་ཏེ་ཕོ་བྲང་དུ་ཁྲིད་དོ། །དེའི་ཚེ་སེངྒེ་མོ་དེ་སྦྲུམ་པར་གྱུར་ཏེ་ཟླ་བ་ཚང་ནས་བུ་ཞིག་བྱུང་ན། ལུས་གཟུགས་ནི། ཐམས་ཅད་མི་དང་འདྲ་སྟེ།་རྐང་པ་འབའ་ཞིག་ཁྲ་བོར་འདུག་གོ་།སེངྒེ་མོས་ཀྱང་རྒྱལ་པོའི་བུ་ཡིན་པར་དྲན་ནས་རྒྱབ་ཏུ་བཀལ་ཏེ་རྒྱལ་པོའི་ཐད་དུ་བསྐྱལ་ལོ། །རྒྱལ་པོས་ཀྱང་བདག་གི་བུ་ཡིན་པར་\?\་གསོས་བསྐྱེད་ནས་དེའི་རྐང་པ་བཀྲ་བའི་ཕྱིར་མིང་ཡང་རྐང་བཀྲ་ཞེས་བཏགས་སོ། །གསོས་བསྐྱེད་དེ་ཚད་དུ་ཕྱིན་པར་སྐྱེས་པ་དང ། ཤིན་ཏུ་དཔའ་ཞིང་རྟུལ་ཕོད་པར་སྐྱེས་སོ། །ཕ་རྒྱལ་པོ་ཚེ་འཕོས་པའི་འོག་ཏུ་རྒྱལ་པོའི་དབང་ཐོབ་ནས་བཙུན་མོ་གཉིས་བླངས་སོ། །དེ་ལ་བཙུན་མོ་གཅིག་ནི། རྒྱལ་རིགས་སོ། །གཅིག་ནི། བྲམ་ཟེའི་རིགས་སོ། །ཕྱིས་རྐང་བཀྲ་དེ་སྐྱེད་མྶོ་ཚལ་དུ་འཆག་ཏུ་སོང་ནས་བཙུན་མོ་གཉིས་ལ་འདི་སྐད་ཅེས་བསྒོའོ། །བཙུན་མོ་ཁྱོད་གཉིས་ལས་གང་ངའི་ཕྱི་བཞིན་མགྱོགས་པར་འོངས་ཏེ་གང་ང་དང་སྔར་ཕྲད་པ་དེ་ལ་ནི། ཉི་མ་གཅིག་གི་བར་དུ་རྩེ་དགའ་ཞིང་ཡོངས་སུ་སྤྱད་དོ། །གང་ཕྱིས་འོངས་པ་དེ་ནི། ང་དང་ཕྲད་དུ་མི་འདོད་དོ། །ཞེས་བསྒོས་ནས་རྒྱལ་པོ་དེ་
416b
> སོང་བའི་འོག་ཏུ་བཙུན་མོ་གཉིས་ཀྱང་རྒྱན་གྱིས་བརྒྱན་ཏེ་བཞོན་པ་བཤམས་ནས་དུས་གཅིག་ཏུ་ཆས་སོ། །ལམ་བྱི་བར་ན་ལྷའི་རྟེན་ཞིག་ཡོད་པ་ལ་བཙུན་མོ་བྲམ་ཟེའི་རིགས་ཅན་བཞོན་པ་ལས་བབས་ཏེ་ཕྱག་བྱས་ནས་མྱུར་དུ་སོང་བ་ལས་འཕྱིས་པར་གྱུར་ཏོ། །དེ་ནས་རྒྱལ་པོས་ཀྱང་སྔར་སྨྲས་པ་བཞིན་དུ་མ་བསྟེན་ཏོ། །དེ་ནས་བཙུན་མོ་དེ་ཞེ་སྡང་སྐྱེས་ནས་ལྷ་ལ་ཁྲོས་ཏེ་བདག་ནི། ཁྱོད་ལ་ཕྱག་འཚལ་བའི་བར་དུ་འཕྱིས་ནས་རྒྱལ་པོས་མ་འདོད་དོ། །གལ་ཏེ་ལྷ་ཁྱོད་ལ་མཐུ་ཞིག་ཡོད་ཡང་དག་ན། ཅིའི་ཕྱིར་ངའི་མགོན་དང་སྐྱབས་མི་བྱེད་ཅེས་ཤིན་ཏུ་ཁྲོས་རྔམ་ནས་ཡིད་ལ་འདི་སྙམ་དུ་གནོད་པར་བྱ་བར་བསམས་སོ། །རྒྱལ་པོ་དེའི་ཕྱིར་ཕོ་བྲང་དུ་འོངས་ནས་བཙུན་མོས་འདི་སྐད་ཅེས་གསོལ་ཏོ། །བདག་ཉི་མ་གཅིག་ཅིག་ཅི་དགའ་བར་བགྱིད་དུ་གནང་བར་དབང་བསྐུར་ཅིག་ཅེས་གསོལ་པ་དང ། རྒྱལ་པོས་ཀྱང་དེ་བཞིན་དུ་གནང་ངོ ། །ཞེས་བསྒོ་བ་དང ། མི་མང་པོ་བསྡོགས་ཏེ་ལྷའི་རྟེན་བཅོམ་ནས་ས་ཡང་བསྙམས་སོ། །དེ་ནས་ལྷའི་རྟེན་སྲུང་བའི་ལྷ་དེ་ཤིན་ཏུ་མི་དགའ་སྟེ་འཁྲུགས་ནས་རྒྱལ་པོ་ལ་གནོད་པར་བྱ་བར་བསམས་ཏེ་ཕོ་བྲང་གི་ནང་དུ་སོང་བ་ལས་ཕོ་བྲང་སྲུང་བའི་ལྷ་དེས་ནང་དུ་མ་བཏང་ངོ ། །དེའི་ཚེ་ན་དྲང་སྲོང་གཅིག་ཅིག་རི་དྲང་སྲོང་ལྷགས་ཞེས་བྱ་བ་ལ་གནས་ཏེ་རྒྱལ་པོ་རྐང་བཀྲ་དྲང་སྲོང་དེ་ལ་མཆོད་པ་བྱེད་པས་ཉིན་
417a
> ༄#། །གཅིག་བཞིན་དུ་ནམ་མཁའ་ལ་འཕུར་ཞིང་ཕོ་བྲང་དུ་འོངས་ཏེ། ཟས་བཟང་པོ་ནི། མི་འདོད་ཀྱི། ཟས་ཐ་མལ་པ་ཙམ་ཟོས་ནས་ཕྱིར་འགྲོའོ། །ཉི་མ་གཅིག་ཅིག་དྲང་སྲོང་དེ་མི་འོང་བར་ལྷ་དེས་ཤེས་པས། དྲང་སྲོང་གི་ལུས་སུ་སྤྲུལ་ཏེ་ཕོ་བྲང་གི་ནང་དུ་འགྲོ་བར་བསམས་པ་ལས། ཕོ་བྲང་སྲུང་བའི་ལྷས་ཤེས་ནས་ནང་དུ་མ་བཏང་བ་དང ། སྒོ་ནས་བོས་ཏེ་ནང་དུ་མི་སྟེར་རོ། །ཞེས་བྱས་པ་དང ། རྒྱལ་པོས་ཐོས་ནས་དྲང་སྲོང་ཕྱི་རོལ་ནས་འབོད་པ་མྱུར་དུ་ནང་དུ་ཐོང་ཞིག་ཅེས་བཀའ་སྩལ་པ་དང ། ཕོ་བྲང་སྲུང་བའི་ལྷས་ཀྱང་རྒྱལ་པོའི་བཀའ་བཞིན་དུ་མ་བཀག་སྟེ་ནང་དུ་བཏང་ངོ ། །ནང་དུ་འོངས་པ་དང་དྲང་སྲོང་གི་སྟན་ལ་འདུག་ནས་རྒྱལ་པོས་ཀྱང་རྟག་ཏུ་ཁ་ཟས་ཅི་ཟ་བ་ཙམ་སྦྱར་ཏེ་ཕུལ་ལོ། །དེའི་ཚེ་ན་དྲང་སྲོང་སྦྲུལ་པ་དེ་ཁ་ཟས་ཟར་མ་བཏུབ་ནས་རྒྱལ་པོ་ལ་འདི་སྐད་ཅེས་སྨྲས་སོ། །ཁ་ཟས་འདི་ནི། ངན་ཆེས་ཀྱི། ཤ་དང་ཉ་ཤ་མེད་ན་མི་ཟའོ། །ཞེས་སྨྲས་པ་དང ། རྒྱལ་པོས་ཀྱང་འདི་སྐད་ཅེས་སྨྲས་སོ། །དྲང་སྲོང་ཆེན་པོ་སྔོན་ཆད་ནི། ཁ་ཟས་ཐ་མལ་པ་ཟ་བས་ན། ཤ་དང་ཉ་མ་སྦྱར་བ་ཡིན་ནོ། །དྲང་སྲོང་སྦྲུལ་པས་སྨྲས་པ། ད་ཕྱིན་ཆད་ནི། ཁ་ཟས་ངན་པ་འདི་དག་མི་འདོད་ཀྱི། ཤ་དང་ཉ་སྦྱོར་ཅིག་ཅེས་སྨྲས་ནས་སོང་ངོ ། །དེ་ནས་རྒྱལ་པོས་ཀྱང་དྲང་སྲོང་སྤྲུལ་པས་སྨྲས་
417b
> པ་བཞིན་དུ་ཤ་དང་ཉ་སྦྱར་ནས་ཕྱི་ཉིན་དྲང་སྲོང་རྙིང་པ་འོངས་པ་ལ་ཕུལ་ལོ། །དྲང་སྲོང་དེ་ཞེ་སྡང་སྐྱེས་ཏེ་རྒྱལ་པོ་དེ་ལ་ཁྲོས་པ་དང ། རྒྱལ་པོས་ཀྱང་དྲང་སྲོང་ལ་འདི་སྐད་ཅེས་སྨྲས་སོ། །དྲང་སྲོང་ཆེན་པོ་ཁ་སྩང་འོངས་པ་ན་ཁ་ཟས་འདི་ལྟ་བུ་སྦྱོར་ཅིག་ཅེས་མ་བསྒོས་སམ། དྲང་སྲོང་གིས་སྨྲས་པ། ཁར་སྩང་ན་བས་ཉི་མ་གཅིག་ཟན་བཅད་དེ་མ་འོངས་པ་ཡིན་ན། དེ་སྐད་ཅེས་སུས་བསྒོས། ཁྱོད་ཀྱིས་ང་ལ་བརྙེས་པས་འདི་ལྟ་བུར་བྱས་པ་མ་ཡིན་གྱི། རྒྱལ་པོ་ཁྱོད་ལོ་བཅུ་གཉིས་བར་དུ་མི་ཤ་འབའ་ཞིག་ཟ་བར་གྱུར་ཅིག་ཅེས་སྨྲས་ནས་སོང་ངོ ། །དེ་ནས་ཉིན་གཅིག་རྒྱལ་པོའི་གཡོས་མཁན་གྱིས་ཤ་མ་འབྱོར་ནས་འཕྲལ་དུ་ཤ་གཞན་མ་རྙེད་དེ་བྱིས་པའི་རོ་ཞིག་དང་ཕྲད་ནས་ཤ་འདི་ཡང་རུང་ངོ་སྙམ་བསམས་ཏེ་མགོ་དང་རྐང་ལག་བཅད་ནས་གཡོས་སུ་བྱས་ཏེ་སྦོས་སྣ་ཚོགས་ཀྱིས་བཏབ་ནས་རྒྱལ་པོ་ལ་བྱིན་ནོ། །རྒྱལ་པོས་ཀྱང་ཤ་དེ་ཟོས་ནས་སྔོན་གྱི་ཤ་བས་ལྷག་པར་ཞིམ་མོ། །ཞེས་གཡོས་མཁན་ལ་སྔོན་ཆད་ཀྱི་ཤ་འདི་ལྟ་བུའི་རོ་མེད་དོ། །ཤ་འདི་ནི། ལྷག་པར་ཞིམ་ན་ཅིའི་ཤ་ཞེས་དྲིས་པ་དང ། གཡོས་མཁན་སྐྲག་ནས་ལྟོ་བ་ས་ལ་ཕབ་སྟེ་རྒྱལ་པོ་ལ་འདི་སྐད་ཅེས་གསོལ་ཏོ། །གལ་ཏེ་རྒྱལ་པོས་གྱོད་མི་རྨོ་ན། དྲང་པོར་གསོལ་ལོ། །ཞེས་སྨྲས་པ་དང ། རྒྱལ་པོས་ཀྱང་ཁྱོད་ཀྱིས་དྲང་པོར་སྨྲས་ནི། གྱོད་མི་རྨའོ་ཞེས་བསྒོའོ།།
418a
> ༄#། །གཡོས་མཁན་གྱིས་སྨྲས་པ། བདག་ཅག་གིས་འཕྲལ་ལ་ཤ་གཞན་བརྟས་ཕས་མ་རྙེད་དེ། བྱིས་པ་ཆུང་དུ་གུམ་པའི་རོ་ཞིག་རྙེད་དེ། དེ་གཡོས་སུ་བགྱིས་ཏེ་གསོལ་པ་ལས་རྒྱལ་པོས་མཁྱེན་པར་གྱུར་ཏོ། །རྒྱལ་པོས་བསྒོ་བ། ཤ་འདི་ནི། ལྷག་པར་ཞིམ་གྱི། ད་ཕན་ཆད་ཤ་འདི་ལྟ་བུ་རྟག་ཏུ་སྦྱོར་ཅིག་ཅེས་བསྒོ་བ་དང་གཡོས་མཁན་གྱིས་འདི་སྐད་ཅེས་གསོལ་ཏོ། །སྔར་ནི། བྱིས་པ་གུམ་པའི་རོ་ཞིག་རྙེད་དེ་གཡོས་སུ་བྱས་པ་ལགས་ཀྱི། འདི་ལས་ནི། མི་རྙེད་དོ། །ཞེས་གསོལ་པ་དང ། རྒྱལ་པོས་ཡང་བསྒོ་བ། ད་ཕྱིན་ཆད་ཀྱང་ཁྱེད་ཀྱིས་གསང་ཐུབ་ཅིང་གཞན་གྱིས་མཚོར་བར་ལོངས་ཤིག་དང ། ང་ལ་དབང་ཡོད་དོ། །ཞེས་བསྒོའོ། །གཡོས་མཁན་གྱིས་ཀྱང་རྒྱལ་པོས་བསྒོ་བ་བཞིན་དུ་མཚན་མོ་གསང་སྟེ་བརྐུས་ནས་བསད་དེ་ཉིན་གཅིག་བཞིན་དུ་གཡོས་སུ་བྱས་སོ། །དེའི་ཚེ་ན་གྲོང་ཁྱེར་དེའི་མི་དག་ཕལ་ཆེར་ཆོ་ངེས་འདེབས་ཤིང ། བུ་སྟོར་ཏོ། །ཞེས་གཅིག་ནས་གཅིག་ཏུ་བསྒྲགས་ཏེ། ཅིའི་ཕྱིར་འདི་ལྟར་གྱུར་ཅེས་བློན་པོ་རྣམས་འདུས་ཏེ་བསྒོས་ནས་མཚན་མོ་ལམ་སྲང་མདོར་མེལ་ཚེ་བྱས་ཏེ་བལྟས་ན། རྒྱལ་པོའི་གཡོས་མཁན་གྱིས་བུ་ཆུང་དུ་བརྐུས་ཏེ་ཁྱེར་བ་ཟིན་ནས་བཅིངས་ཏེ་རྒྱལ་པོའི་སྤྱན་སྔར་ཁྲིད་ནས་སྔ་ཕྱིར་བུ་ཆུང་འདི་སྙེད་ཅིག་སྟོར་ཏོ། །ཞེས་གསོལ་པ་དང ། རྒྱལ་པོ་
418b
> ཅང་མི་སྨྲ་བར་གྱུར་ཏོ། །དེ་བཞིན་དུ་ལན་གསུམ་གྱི་བར་དུ་གསོལ་ཀྱང་མི་སྨྲ་བ་ལས། ད་བདག་ཅག་གིས་ཉེས་པ་བྱེད་བྱེད་པ་ཟིན་ཏེ་ཉེས་པར་མངོན་ན། ཞལ་ཆེ་གཅད་པའི་རིགས་ཀྱི།་མི་སྨྲ་བའི་མི་རིགས་སོ། །ཞེས་གསོལ་པ་དང ། རྒྱལ་པོས་ངས་བསྒོ་བ་ཡིན་ནོ། །ཞེས་སྨྲས་སོ། །དེ་ནས་བློན་པོ་རྣམས་མི་དགའ་སྟེ་འཁོན་དུ་བཟུང་ནས་སོ་སོར་དོང་ངོ ། །ཕྱི་རོལ་ཏུ་ཕྱིན་པ་དང ། གཅིག་ལ་གཅིག་འདི་སྐད་ཅེས་སྨྲས་སོ། །རྒྱལ་པོས་ནི། བདག་ཅག་ལ་སོགས་པའི་བུ་ཀུན་ཟོས་པས་དགྲ་ཡིན་ཏེ། མི་ཤ་ཟ་བའི་རྒྱལ་པོ་དང་ལྷན་ཅིག་སྲིད་ཅིག་ཏུ་བྱར་མི་རུང་གི་།གནོད་པར་འགྱུར་བའི་དག་འདི་ལྟ་བུ་ནི། མེད་པར་བྱ་བའི་རིགས་སོ། །ཞེས་ཐམས་ཅད་གྲོས་མཐུན་པར་རྒྱལ་པོ་གསོད་པའི་གྲོས་བྱས་སོ། །གྲོང་ཁྱེར་དེའི་ཕྱི་རོལ་ན་སྐྱེད་མོས་ཚལ་ཞིག་ཡོད་དེ། དེ་ན་རྫིང་བུ་ཞིག་ཡོད་པའི་ནང་ན་རྒྱལ་པོ་ཉིན་གཅིག་བཞིན་དུ་ཁྲུས་བྱེད་དུ་འགྲོ་བ་ལས། བློན་པོ་རྣམས་ཀྱིས་སྐྱེད་མོས་ཚལ་གྱི་ནང་དུ་དཔུང་གི་ཚོགས་སྦས་ནས་རྒྱལ་པོ་རྫིང་བུར་ཞུགས་ཏེ་ཁྲུས་བྱེད་པ་ན་དབུང་གི་ཚོགས་མང་པོས་བསྐོར་ནས་བཟུང་སྟེ་གསད་པར་བྱས་པ་ལས། རྒྱལ་པོ་དེ་སྐྲག་ནས་དཔུང་གི་ཚོགས་དེ་ལ་འདི་སྐད་ཅེས་སྨྲས་སོ། །ཅིའི་ཕྱིར་ཁྱེད་ཀྱིས་ང་ལ་བསྐོར་ཏེ་འཛིན་དུ་རྒོལ་ཞེས་བྱས་པ་དང ། བློན་པོ་རྣམས་ཀྱིས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་
419a
> ༄#། །ཞེས་བྱ་བ་ནི། འབངས་མང་པོ་གསོ་བ་ཡིན་ན། རྒྱལ་པོས་འབངས་ཀྱི་བུ་ཀུན་ཟོས་པས། འབངས་ཐམས་ཅད་གནས་མེད་པར་གྱུར་ཏེ་སྡུག་བསྔལ་མི་བཟོད་པས། ད་རྒྱལ་པོ་ཁྱོད་གསད་དོ། །རྒྱལ་པོས་སྨྲས་པ། འདི་ལྟར་བྱས་པ་ངས་ནི། ཉེས་མོད་ཀྱི། ད་ཕྱིན་ཆད་འདི་ལྟར་མི་བྱའི། འདིའི་ཚེ་གཏང་དུ་རུང་ངམ་མི་རུང་ཞེས་བསྒོ་བ་དང ། བློན་པོ་རྣམས་ཀྱིས་འདི་སྐད་ཅེས་སྨྲས་སོ། །གལ་ཏེ་གནམ་ལས་ཁ་བ་ནག་པོ་བབ་བམ། ཁྱོད་ཀྱི་མགོ་ལ་སྦྲུལ་ནག་པོ་སྐྱེས་ཀྱང་གཏང་བ་མེད་ཀྱི། ད་མ་སྨྲ་ཞིག། རྒྱལ་པོ་རྐང་བཀྲས་ཀྱང་བློན་པོས་སྨྲས་པའི་ཚིག་ཐོས་ནས་ད་ནི། གདོན་མི་ཟ་བར་སྲོག་དང་འབྲལ་ལོ་སྙམ་སྟེ་ཡང་བློན་པོ་ལ་འདི་སྐད་ཅེས་སྨྲས་སོ། །ད་ནི། ཁྱེད་ཀྱིས་གསད་པར་ནི་ཆད་ན། སྐད་ཅིག་ཁོ་ན་ཞིག་ཁོ་བོ་བདེ་བར་སེམས་སུ་ཆུག་ལ་གདོད་སོད་ཅིག་ཅེས་བསྒོའོ། །དེ་ནས་བློན་པོས་ཀྱང་ཅུང་ཟད་བསྡད་དེ་སེམས་སུ་བཅུག་པ་དང ། རྒྱལ་པོ་དེས་ཡིད་ལ་འདི་སྙམ་དུ་དམ་བཅས་སོ། །བདག་གིས་སྔོན་ཆད་དགེ་བ་ཅི་བྱས་པ་དང ། རྒྱལ་པོའི་སྲིད་ཆོས་བཞིན་བྱས་པ་དང ། དྲང་སྲོང་ལ་སྦྱིན་པ་བྱས་པའི་བསོད་ནམས་ཅི་ཡོད་པ་ཐམས་ཅད་ཀྱི་མཐུས་ནམ་མཁའ་ལ་འཕུར་བའི་སྲིན་པོར་གྱུར་ཅིག་ཅེས་བསྔོས་ཏེ་དེ་སྐད་ཅེས་སྨྲས་ནས་བསྡོས་མ་ཐག་ཏུ་སྲིན་པོར་
419b
> གྱུར་ཏེ་སྟེང་གི་ནམ་མཁའ་ལ་འཕགས་ནས་བློན་པོ་རྣམས་ལ་འདི་སྐད་ཅེས་སྨྲས་སོ། །ཁྱེད་ཀྱི་མཐུས་བསྡོངས་ཏེ་ང་ལ་གསད་པར་བྱས་ཀྱང་ངའི་བསོད་ནམས་ཀྱིས་རང་སོས་པར་གྱུར་ཏེ་ད་ཕྱིན་ཆད་ནི། ཁྱེད་བཟོད་པར་བྱོས་ཤིག་།ཁྱེད་ཀྱི་ཆུང་མ་དང་བུ་གང་སྡུག་ཅིང་ཕངས་པ་བཟའ་བར་བྱའོ། །ཞེས་སྨྲས་ནས་འཕུར་ཏེ་རི་ལ་བབས་ནས་ཕྱིན་ཆད་མིའི་ནང་དུ་མི་ཟ་བར་གྱུར་ཏོ། །མི་མང་པོ་ཡང་འཇིགས་སྐྲག་ནས་རྟག་ཏུ་འཁྲས་ཤིང་གབ་བོ། །དེ་ནས་སྲིན་པོ་མི་ལ་ཟ་ཞིང་སྲིན་པོ་མང་དུ་བསྡོངས་ནས་འཁོར་དང་གཡོག་ཀྱང་མང་བར་གྱུར་ཏེ། ཕྱིས་སྲིན་པོའི་འཁོར་རྣམས་ཀྱིས་སྲིན་པོ་རྐང་བཀྲ་ལ་འདི་སྐད་ཅེས་གསོལ་ཏོ། །བདག་ཅག་ནི། ཁྱོད་ཀྱི་འཁོར་དང་གཡོག་ཏུ་གྱུར་ན། བདག་ཅག་ལ་སྟོན་མོ་ཆེན་པོ་ཞིག་བྱིན་ཅིག་ཅེས་གསོལ་པ་དང ། སྲིན་པོ་རྐང་བཀྲས་ཀྱང་དེ་བཞིན་གནང་ནས་རྒྱལ་པོ་ལྔ་བརྒྱ་བསད་དེ་སྟོན་མོ་བྱ་བར་བགྲོས་ནས་སོ་སོ་ནས་རྒྱལ་པོ་བླངས་ཏེ་བྲག་ཕུག་ཏུ་བཅུག་གོ་།བཞི་བརྒྱ་དགུ་བཅུ་རྩ་དགུ་ནི། རྙེད་ཀྱི། རྒྱལ་པོ་གཅིག་མ་ཚང་བ་ལས་རྒྱལ་པོ་དེ་དག་བྲག་ཕུག་ན་གཅིག་ལ་གཅིག་འདི་སྐད་ཅེས་སྨྲའོ། །བདག་ཅག་ནི། ད་ཕོངས་ཏེ་སྐྱབས་སུ་འགྱུར་བ་ཡང་མེད་ན། གལ་ཏེ་སུ་ཏ་སོ་མ་ཐབས་དང་ལྡན་པ་དེ་འདིར་འོངས་ན་བདག་ཅག་ཐར་ཀྱང་སྲིད་ཀྱི། སུ་ཏ་སོ་མ་འདིར་འོངས་པར་སྲིན་པོ་ལ་གསོལ་བར་བྱའོ།།
420a
> ༄#། །ཞེས་བགྲོས་ནས་སྲིན་པོའི་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་བོ་ཁྱོད་སྟོན་མོ་མཛད་ན། བདག་ཅག་མིའི་རྒྱལ་པོ་འབའ་ཞིག་བསད་དེ་སྟོན་མོ་བྱས་པས། སྟོན་མོ་བཟང་པོར་མི་འགྱུར་གྱི། སུ་ཏ་སོ་མ་ཞེས་བགྱི་བ་ཡོན་ཏན་ཆེན་པོ་དང་ལྡན་ཏེ། དེ་རྙེད་ན་འདོད་སྟོན་མོ་བཟང་བོར་འགྱུར་རོ། །ཞེས་གསོལ་པ་དང ། སྲིན་པོའི་རྒྱལ་པོས་འདི་ལྟ་བུ་ཞིག་ཅི་དཀའ་ཞེས་སྨྲས་ནས་ནམ་མཁའ་ལ་འཕུར་ཏེ་སུ་ཏ་སོ་མ་ལེན་དུ་སོང་ངོ ། །དེའི་ཚེ་ན་སུ་ཏ་སོ་མ་བུ་མོ་གཞོན་ནུ་དང་གྲོང་ཁྱེར་གྱི་ཕྱི་རོལ་ཏུ་ཁྲུས་བྱེད་དུ་འགྲོ་བ་ལས་ལམ་དུ་བྲམ་ཟེ་སློང་བ་ཞིག་དང་ཕྲད་དེ་སྦྱིན་པར་བྱས་ནས་བྲམ་ཟེ་ལ་འདི་སྐད་ཅེས་སྨྲས་སོ། །བདག་ད་ཁྲུས་ཤིག་བྱེད་དུ་འགྲོ་སྟེ། ཕྱིར་ལོག་ནས་སྦྱིན་པར་བྱའོ། །ཞེས་སྨྲས་ནས་ཁྲུས་བྱེད་དུ་སོང་བ་ལས། ཁྲུས་བྱེད་པ་ན་སྲིན་པོའི་རྒྱལ་པོ་འོངས་ཏེ་བྲག་ཕུག་ཏུ་ཁྱེར་རོ། །དེའི་ཚེ་ན་སུ་ཏ་སོ་མ་མ་དགའ་སྟེ་དུས་པ་དང ། རྐང་བཀྲས་འདི་སྐད་ཅེས་སྨྲས་སོ། །ཁྱོད་ནི། གཞན་པས་ལྷག་པར་ཡོན་ཏན་དང་ལྡན་པའི་མཆོག་གོ་ཞེ་ན། སྐྱེས་བུ་ཆེན་པོ་ནི། ཅིས་ཀྱང་མི་སྐྲག་པ་ཡིན་ན། ཅིའི་ཕྱིར་མི་དགའ་སྟེ་བྱིས་པ་ཆུང་དུ་ལྟར་དུ་ཞེས་སྨྲས་སོ། །སུ་ཏ་སོ་མས་སྲིན་པོ་ལ་སྨྲས་པ། བདག་ལུས་ལ་ཆགས་ཤིང་སྲིན་པོའི་འཇིགས་པས་མི་དགའ་བ་མ་ཡིན་གྱི། བདག་ནི།
420b
> ཐོག་མ་ནས་རྫུན་སྨྲ་མ་མྱོང་ན། ད་ཅི་ཁྲུས་ལ་འགྲོ་བའི་ལམ་དུ་བྲམ་ཟེ་སློང་བ་ཞིག་དང་ཕྲད་དེ། བདག་གིས་ཀྱང་ཁྲུས་བྱས་ནས་ཕྱིར་ལོག་སྟེ་སྦྱིན་པ་སྦྱིན་ནོ། །ཞེས་སྨྲས་ནས་ཁྲུས་བྱེད་དུ་སོང་བ་ལས། རྒྱལ་པོ་ཁྱོད་ཀྱིས་བདག་འདིར་ཁྱེར་ཏེ་འོངས་པས་བདག་གིས་རྫུན་སྨྲས་སོ་སྙམ་སྟེ་མི་དགའི། ལུས་དང་སྲོག་ལ་ཆགས་པ་ནི། མ་ཡིན་ནོ། །རྒྱལ་པོ་ཁྱོད་བདག་ལ་ཐུགས་བརྩེ་བའི་ཕྱིར་ཞག་བདུན་ཞིག་བཤོལ་ཏེ་བྲམ་ཟེ་དེ་ལ་སྦྱིན་པ་བྱས་ནས་ཕྱིར་ཡང་འགུམ་དུ་མཆིའོ། །ཞེས་གསོལ་ཏོ། །སྲིན་པོས་སྨྲས་པ། ཁྱོད་ད་བཏང་ན་ཕྱིར་འོང་དུ་བཏུབ་བམ། སྨྲས་པ།་གལ་ཏེ་མ་འོངས་ན་ཡང་ཁྱོད་ལ་བླང་བའི་མཐུ་བྱེད་དོ། །ཞེས་སྨྲས་ནས་ཕྱིར་བཏང་ངོ ། །སུ་ཏ་སོ་མ་ཕྱིར་ཡུལ་དུ་ཕྱིན་ཙམ་ན་བྲམ་ཟེ་དེ་ཡང་ད་དུང་འདུག་སྟེ་རབ་ཏུ་དགའ་ནས་བྲམ་ཟེ་ལ་སྦྱིན་པ་བྱིན་ནོ། །བྲམ་ཟེ་དེས་ཀྱང་སུ་ཏ་སོ་མ་རིང་པོར་མི་ཐོགས་པར་སྲོག་དང་བྲལ་བར་འགྲོ་བས། ཕྱིར་ཡུལ་ལ་ཆགས་ཏེ་མི་དགའ་བར་ཤེས་ནས་དེ་ལ་ཚིགས་སུ་བཅད་དེ་སྨྲས་པ།་བསྐལ་པའི་མཐའ་ལ་ཐུག་པ་ན། །གནམ་དང་ཀླུང་ཡང་རབ་འབར་ཏེ། །རི་རབ་ལྷུན་པོ་རྒྱ་མཚོ་ཡང ། །ཐམས་ཅད་ཐལ་བ་ཉིད་དུ་འགྱུར། །ལྷ་དང་ཀླུ་དང་ལྷ་མ་ཡིན། ། ཐམས་ཅད་འཇིག་ཅིང་ཉམས་ཡལ་ཏེ། །གནམ་དང་ས་ཡང་མེད་འགྱུར་ན། །རྒྱལ་སྲིད་ལྟ་ཞིག་ག་ལ་རྟག་།སྐྱེ་དང་རྒ་དང་ན་འཆི་ཡི། །འཁོར་བའི་མཐའ་ནི་ཟད་མི་ཤེས། །རེ་
421a
> ༄#། །ཞིང་འདོད་པ་མ་གྲུབ་ན། །མྱ་ངན་གྱིས་ནི་གནོད་པར་འགྱུར། །འདོད་པ་སྐྱོན་དུ་རབ་ཆེ་སྟེ། །ཉེས་པ་གཞན་ནས་འོངས་པ་མིན། །ཁམས་གསུམ་སྡུག་བསྔལ་བཅས་པས་ན། །ཡུལ་སྲིད་ཡིད་བརྟེན་རུང་རེ་སྐན། །ཡོད་པ་ཡེ་ནས་མེད་པ་སྟེ། །རྒྱུ་དང་རྐྱེན་གྱིས་སྒྲུབ་པར་འགྱུར། །དར་བ་ཡོད་ན་རྒུད་པ་ཡོད། །བདེན་པ་ངེས་པར་རྫུན་འགྱུར་རོ། །སོ་སོའི་སྐྱེ་བོ་ཐམ་ཐོམ་དག་།སྒྱུ་མ་ལ་ནི་ཀུན་གནས་ཏེ། །ཁམས་གསུམ་ཇི་ལྟར་སྟོང་བཞིན་དུ། །ཡུལ་གྱི་སྲིད་ཀྱང་དེ་བཞིན་ནོ། །རྣམ་པར་ཤེས་ལ་གཟུགས་མེད་དོ། ། གདུག་པའི་སྤྲུལ་བཞི་ལ་གནས་ཏེ། །མ་རིག་པ་ལས་སྐྱེས་པ་ལ། །བདེ་བའི་གནས་སུ་ཀུན་འཛིན་ཏོ། །གཟུགས་ལ་རྟག་པའི་བདག་མེད་དེ། །སེམས་ལ་རྟག་པའི་ཁྱིམ་ཡོད་མིན། །ལུས་ལ་སེམས་ཀྱང་བྲལ་འགྱུར་ན། །ཡུལ་སྲིད་ལྟ་ཞིག་ཡོད་རེ་སྐན། །དེའི་ཚེ་སུ་ཏ་སོ་མས་ཚིགས་སུ་བཅད་དེ་སྨྲས་པ་ཐོས་ནས་དོན་ཡིད་ལ་བསམས་པས་ཤིན་ཏུ་དགའ་སྟེ་རྒྱལ་ཚབ་རྒྱལ་པོར་བཅུག་ནས་བློན་པོ་རྣམས་ལ་ཕྱི་ཕྱག་བྱས་ཏེ་འཐམས་པ་བཞིན་དུ་ཕྱིར་འགྲོ་བར་བྱས་པ་ལས། བློན་པོ་རྣམས་ཀྱིས་འདི་སྐད་ཅེས་གསོལ་ཏོ། ། རྒྱལ་པོ་རྐང་བཀྲས་མ་བསྙེངས་ཤིག་།བདག་ཅག་གིས་བསམས་ན། རྒྱལ་པོའི་སྐུ་བསྲུང་བའི་སླད་དུ་ལྕགས་ཀྱི་ཁང་པ་བྱས་ལ་རྒྱལ་པོ་དེའི་ནང་དུ་ཞུགས་ན་རྐང་བཀྲ་དཔའ་
421b
> མོད་ཀྱི།་ཅི་བགྱིར་ཡང་མ་མཆིས་སོ། །རྒྱལ་པོས་བློན་པོ་རྣམས་དང་མི་མང་པོ་རྣམས་ལ་བསྒོ་བ། མི་གཅིག་སྐྱེས་པ་ལ་རྫུན་མི་ཟེར་བའི་ཁྲེལ་ལྟས་དགོས་ཏེ། རྫུན་སྨྲས་ན་གསོན་ཡང་དགའ་བ་མ་ཡིན་པས། ཐོག་མ་འཁམས་པ་ནས་ཚེ་འཕོས་ཀྱང་བླའི། རྫུན་སྨྲས་ཏེ་གསོན་པར་མི་འདོད་དོ། །ཞེས་ཁྲེལ་ལྟས་བྱས་པའི་ལེགས་པ་རྣམ་པ་སྣ་ཚོགས་དང ། རྫུན་སྨྲ་བའི་སྐྱོན་མང་པོ་སྨྲས་པ་དང ། བློན་པོ་རྣམས་ཀྱང་མྱ་ངན་གྱིས་བརྣངས་ཏེ་ཚིག་མེད་པར་གྱུར་ཏོ། །དེ་ནས་ཐམས་ཅད་ཀྱིས་རྒྱལ་པོ་བསྐྱལ་ནས་ཐམས་ཅད་ཀྱིས་ཆོ་ངེས་བཏབ་སྟེ་བརྒྱལ་ཞིང་འཁམས་པར་གྱུར་ཏོ། །སུ་ཏ་སོ་མ་ལམ་དུ་ཞུགས་ཏེ་སོང་བའི་ཚེ་སྲིན་པོ་རྐང་བཀྲ་ཡང་སུ་ཏ་སོ་མ་འདིར་འོང་བའི་དུས་ཡིན་ནོ་སྙམ་བསམས་ནས་རིའི་རྩེ་མོར་བྱུང་སྟེ་བལྟས་པ་དང ། སུ་ཏ་སོ་མ་ལམ་ན་རྒྱང་མ་ནས་སྲོག་འདོར་དུ་འོང་བ་མཐོང་ངོ ། །དེ་ནས་ཉེ་བར་འོངས་ཏེ་བལྟས་ན། སྔོན་པས་ཀྱང་ལྷག་པར་དགའ་བའི་མདངས་ཡོད་པས་སྲིན་པོས་རྒྱལ་པོ་ལ་འདི་སྐད་ཅེས་སྨྲས་སོ། །སྲོག་འདོར་དུ་འོང་བ་ལྟ་བདག་ལ་དགའ་བ་ཅི་ཞིག་ཡོད་དེ། ཁྱེད་འཚོ་བ་གཏོང་བ་ལ་སྲོག་ཀྱང་མི་ཕངས་སམ། ཁྱོད་ཡུལ་དུ་ཕྱིན་ནས་ཕན་པའི་དོན་ཅི་ཞིག་རྙེད་ན། འདི་ལྟར་དགའ་ཞེས་དྲིས་སོ། །སུ་ཏ་སོ་མས་སྨྲས་པ། རྒྱལ་པོ་ཆེན་པོ། ཁྱེད་ཀྱིས་ཐུགས་བག་མཛད་དེ་བདག་གི་འཚོ་བ་ཞིག་བདུན་བཤོལ་ནས་བདག་གིས་སྔར་དམ་བཅས་པ་ལས་མ་འགལ་
422a
> ༄#། །ཏེ་སྦྱིན་པ་ཆེན་པོ་ཡང་བྱས། དམ་པའི་ཆོས་ཀྱང་ཐོས་ནས་ཡིད་ལ་གཅགས་ཏེ་བསམ་པ་གྲུབ་པས་ན། འདིར་སྲོག་བཏང་ཡང་གསོན་པ་པས་དགའོ། ། ཞེས་སྨྲས་སོ། །རྒྱལ་པོ་རྐང་བཀྲས་སྨྲས་པ། ཁྱོད་ཀྱིས་ཆོས་ཅི་ཞིག་ཐོས་པ་ཁོ་བོ་ལ་ཡང་སྨྲོས་ཤིག་ཅེས་བསྒོ་བ་དང ། སུ་ཏ་སོ་མས་ཚིགས་སུ་བཅད་པ་ཇི་སྐད་དུ་ཐོས་པ་དེ་ཡང་སྨྲས།་དེ་མ་ཡིན་པས་ཞན་ཡང་གསོད་པའི་ཁ་ན་མ་ཐོ་བའི་སྡིག་པ་དང ། མི་དགེ་བའི་རྣམ་པར་སྨིན་པ་ཡང་ཐབས་མཁས་པས་རྒྱ་ཆེར་སྨྲས། སྲོག་མི་གཅོད་པའི་ཡོན་ཏན་དང་བསོད་ནམས་རྒྱ་ཆེན་པོ་དང ། བྱམས་པའི་སེམས་ཀྱང་རྒྱས་པར་བསྟན་པས། རྒྱལ་པོ་རྐང་བཀྲ་རབ་ཏུ་དགའ་རངས་ཏེ་སྤྱི་བོས་ཕྱག་འཚལ་ནས་བསྟན་པ་བཞིན་དུ་ཕྱིན་ཆད་སྲོག་གཅོད་པ་བཏང ། རྒྱལ་པོ་བྲག་ཕུག་ཏུ་བཅུག་པ་རྣམས་ཀྱང་སོ་སོའི་ཡུལ་དུ་བསྐྱལ་ལོ། །དེ་ནས་སུ་ཏ་སོ་མས་དཔུང་གི་ཚོགས་བཤམས་ནས་རྒྱལ་པོ་རྐང་བཀྲ་བསུས་ཏེ་ཕྱིར་ཡང་རྒྱལ་པོར་བཅུག་གོ་།དེར་ནི། དྲང་སྲོང་གིས་དམོད་པ་བོར་བའི་ལོ་བཅུ་གཉིས་ཀྱང་ཚང་བས། དེ་ཕྱིན་ཆད་མི་ཤ་ཡང་མི་ཟ་སྟེ་སྔོན་བཞིན་དུ་རྒྱལ་པོ་བྱས་སོ། །རྒྱལ་པོ་ཆེན་པོ།་དེའི་ཚེ་དེའི་དུས་ན་སུ་ཏ་སོ་མ་དེ་ནི། ད་ལྟར་ང་ཡིན་ནོ། །རྒྱལ་པོ་རྐང་བཀྲ་དེ་ནི། ད་ལྟར་སོར་ཕྲེང་ཅན་ཡིན་ནོ། །དེའི་ཚེ་ལོ་བཅུ་གཉིས་ཀྱི་བར་དུ་རྐང་བཀྲས་མི་ཟོས་པ་
422b
> རྣམས་ནི། སོར་ཕྲེང་ཅན་གྱིས་བསད་པའི་མི་རྣམས་ཡིན་ནོ། །མི་འདི་དག་ཀྱང་གང་ནས་གང་དུ་སྐྱེས་པར་རྟག་ཏུ་སོར་ཕྲེང་ཅན་གྱིས་བསད་པར་གྱུར་ལ། ངས་ཀྱང་སྐྱེ་བ་ཐམས་ཅད་དུ་དགེ་བ་ལ་བཀོད་པར་གྱུར་ཏོ། །ངས་སྔོན་དུ་དྲན་པ་སྔོན་མ་རབས་བྱེད་པའི་ཚེ་ཡང་གསོད་པ་ལས་བཟློག་ནུས་ན། ད་མངོན་པར་སངས་རྒྱས་ཏེ་ཡོན་ཏན་ཕུན་སུམ་ཚོགས་ལ་སྡིག་པ་ཡོངས་སུ་སྤངས་ན། འདི་དག་འདུལ་བར་གྱུར་པ་ལྟ་ཅི་སྨོས། རྒྱལ་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །མི་འདི་དག་སྔོན་ཅི་ཞིག་བགྱིས་ན། སྐྱེ་བ་ཐམས་ཅད་དུ་སོར་ཕྲེང་ཅན་གྱིས་རྟག་ཏུ་བསད་པར་གྱུར། བཅོམ་ལྡན་འདས་ཀྱིས་རྒྱལ་པོ་ལ་བཀའ་སྩལ་པ། རྒྱལ་པོ་ཆེན་པོ་ལེགས་པར་ཉོན་ཅིག་དང་བསྟན་པར་བྱའོ། །སྔོན་འདས་པའི་བསྐལ་པ་གྲངས་མེད་པའི་ཕ་རོལ་ན་འཛམ་བུའི་གླིང་འདིར་ཡུལ་ཝཱ་ར་ཎཱ་སི་ན་རྒྱལ་པོ་བ་ལ་ད་ར་ཞེས་བྱ་བ་ཞིག་བྱུང་སྟེ། རྒྱལ་པོ་དེ་ལ་སྲས་གཉིས་ཡོད་དེ། བྱད་གཟུགས་ལེགས་པ། བལྟ་ན་སྡུག་པ། རྩལ་དང་ལྡན་པའོ། །དེའི་ཚེ་སྲས་ཆུང་དུ་ཤོས་ཀྱིས་འདི་སྙམ་དུ་བསམས་སོ། །གལ་ཏེ་བདག་གི་ཕ་ཚེ་འཕོས་ན་ཕུ་བོ་རྒྱལ་པོར་འགྱུར་ཏེ།་བདག་གཞོན་པས་རྒྱལ་པོ་ཡང་མི་འཐོབ་ན། མིར་སྐྱེས་ལ་རྒྱལ་པོ་མ་ཐོབ་ན་ཐ་མལ་བར་འདུག་ན་ཡང་ཅི་རུང ། དབེན་པར་སོང་ནས་དྲང་སྲོང་གི་ལམ་བཙལ་ལོ་སྙམ་
423a
> ༄#། །བསམས་ནས་རྒྱལ་པོའི་ཐད་དུ་སོང་སྟེ་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ནི། རི་དབེན་པར་དྲང་སྲོང་གི་ལམ་བཙལ་བར་དགའོ། ། བདག་ལ་སྡུག་པར་འཛིན་ན་བསམ་པ་འདི་ལས་མ་ཟློག་ཅིག་ཅེས་ཡང་དང་ཡང་དུ་གསོལ་པ་དང ། རྒྱལ་པོས་ཀྱང་དེ་བཞིན་དུ་གནང་ནས་རི་དབེན་པར་སོང་ངོ ། །དེ་ནས་ལོ་མང་ཞིག་ལོན་པ་དང ། རྒྱལ་པོ་ཡབ་ཚེ་འཕོས་ནས་ཕུ་བོ་རྒྱལ་སར་གཤེགས་སོ། །ཕུ་བོ་ཡང་རྒྱལ་སར་ཞུགས་ནས་རིང་པོར་མ་ལོན་པར་ནད་ཀྱིས་བཏབ་ནས་ཚེ་འཕོས་ཏེ།་རིགས་འཚོབ་པའི་མི་མེད་དོ། །བློན་པོ་རྣམས་འདུས་ནས་ཇི་ལྟར་བྱ་བ་བགྲོས་པ་དང ། དེ་ལ་བློན་པོ་གཅིག་གིས་འདི་སྐད་ཅེས་སྨྲས་སོ། །རྒྱལ་པོ་ཆེན་པོའི་སྲས་ཆུང་དུ་ཞིག་རྒྱལ་པོ་ལ་གསོལ་ཏེ་དེ་ལྟར་རི་ལ་དྲང་སྲོང་བྱེད་ཅིང་འདུག་གི་།དེ་སྤྱན་དྲངས་ལ་རྒྱལ་བོར་གཞུག་གོ་།ཞེས་སྨྲས་པ་དང ། བློན་པོ་རྣམས་ཀྱིས་དེ་འདྲ་བ་ཞིག་ངེས་པར་ཡོད་དམ། དེ་འདྲ་བ་ཞིག་ཡོད་ན་ལྟ་སྤྱན་དྲངས་ལ་རྒྱལ་པོར་གཞུག་གོ་།ཞེས་བགྲོས་ནས་རི་ལ་རྒྱལ་བུ་ཚོལ་དུ་དོང་ངོ ། །དེ་དག་རྒྱལ་བུ་དང་ཕྲད་ནས་བདག་ཅག་ལ་རྒྱལ་པོ་མེད་དེ། ཁྱོད་ཀྱིས་རྒྱལ་པོ་བྱ་དགོས་ཀྱི། འདོང་ངོ ། །ཞེས་སྨྲས་པ་དང ། དྲང་སྲོང་གིས་ཚིག་འདི་ནི། འཇིགས་སུ་རུང་སྟེ། ཁོ་བོ་ནི། དབེན་པ་འདི་ན་རབ་ཏུ་བདེ་
423b
> སྟེ།་མྱ་ངན་ཅི་ཡང་མེད་དོ། །འཇིག་རྟེན་པ་ནི། རང་བཞིན་གྱིས་མ་དུལ་བ་ཡིན་པས། རྒྱལ་པོ་ཡང་གསོད་དེ། བདག་གིས་མི་ནུས་སོ། །བློན་པོ་རྣམས་ཀྱིས་སྨྲས་པ། རྒྱལ་པོའི་གདུང་ཆད་དེ་གདུང་འཚོབ་པ་མེད་པས། དྲང་སྲོང་ཁྱོད་འབའ་ཞིག་རྒྱལ་པོའི་གདུང་ལ་གཏོགས་པ་ཡིན་ཏེ། ཡུལ་མི་ཐམས་ཅད་ཀྱང་མགོན་མེད་པར་གྱུར་གྱི། འགྲོ་བ་མང་པོ་ལ་ཐུགས་བརྩེ་བའི་ཕྱིར་རྒྱལ་པོར་གཤེགས་སུ་གསོལ། ཞེས་སྨྲས་པ་དང ། དྲང་སྲོང་གིས་ཀྱང་མ་བཟོད་ནས་བློན་པོ་རྣམས་ཀྱིས་གསོལ་པ་བཞིན་དུ་ཕྱིར་ཡུལ་དུ་འོངས་ཏེ་རྒྱལ་པོ་བྱས་སོ། །དྲང་སྲོང་དེ་ཆུང་དུ་ནས་འདོད་ཆགས་དང་མ་འཕགས་པ་ལས། སྲིད་འཚོ་ཞིང་བགས་ཀྱིས་བུད་མེད་དང་འབགས་པས། འདོད་ཆགས་ལྷག་པར་ཆེ་བར་གྱུར་ཏེ། ཉིན་མཚན་དུ་འདོད་ཆགས་ལ་བག་མེད་པས་འདི་སྐད་བཀར་བཏགས་སོ། །ངའི་ཡུལ་མི་ལས་བུ་མོ་ཡོད་པ་རྣམས་བག་མར་གཏོང་བ་ན་སྔར་ང་དང་ཕྲད་པའི་འོག་ཏུ་གདོད་བག་མར་ཐོང་ཞིག་ཅེས་བཀར་བཏགས་སོ། །ཡུལ་ན་བུད་མེད་བཟང་མོ་སྡུག་གུ་ཡིད་དུ་འོང་བ་ཐམས་ཅད་ལ་ཡང་མི་རིགས་པ་སྤྱོད་དོ། །དེའི་ཚེ་བུད་མེད་གཅིག་ཅིག་མི་མང་པོ་ཚོགས་པའི་མདུན་དུ་སྒྲེན་མོར་བྱུང་སྟེ་གཅིན་གཅི་བ་དང ། ཐམས་ཅད་ཀྱིས་བགད་དེ་ངོ་ཚ་མི་ཤེས་པ་འདི་ཅི་བྱེད་ཅེས་སྤྱོས་པ་དང ། བུད་མེད་དེས་འདི་སྐད་ཅེས་སྨྲས་སོ། །བུད་
424a
> ༄#། །མེད་ཀྱིས་བུད་མེད་ཀྱི་ནང་དུ་གཅིན་གཅི་བ་ལ་ངོ་ཚར་ཅི་ཞིག་ཡོད་དེ། ཁྱེད་ཀྱང་གཅིག་གི་མདུན་དུ་གཅིག་གིས་གཅིན་གཅིས་ཀྱང་ངོ་མི་ཚ་ན། ཁོ་མོ་བུད་མེད་དུ་འདྲ་བའི་ནང་དུ་གཅིས་པ་ལ་ངོ་ཚར་ཡང་ཅི་ཞིག་ཡོད། མི་མང་པོས་སྨྲས་པ། ཁྱོད་ཀྱིས་འདི་སྐད་སྨྲས་པ་འདི་ཅིའི་ཐ་ཚིག་ཅེས་སྨྲས་པ་དང ། བུད་མེད་དེས་འདི་སྐད་ཅེས་སྨྲས་སོ། །ཡུལ་འདི་ནི་རྒྱལ་པོ་གཅིག་པུ་ནི། སྐྱེས་པ་ཡིན་གྱི། གཞན་ཡུལ་མི་ཐམས་ཅད་ནི། བུད་མེད་ཡིན་དུ་ངེས་སོ། །ཁྱེད་ཀུན་སྐྱེས་པ་ཡིན་ན་དེ་འདྲ་བའི་མི་རིགས་པ་རྒྱལ་པོ་བྱེད་པའི་མི་རིགས་སོ། །དེ་ནས་མི་མང་པོ་ངོ་ཚ་ཞིང་སྐྱེངས་པར་གྱུར་ཏེ་བུད་མེད་འདིས་སྨྲ་བ་ནི། བདེན་ཏེ། རིགས་པ་མ་ཡིན་པས་རྒྱལ་པོ་འདི་མེད་པར་བྱའོ། །ཞེས་བགྲོས་ནས་ཐམས་ཅད་གྲོས་མཐུན་ཏེ་རྒྱལ་པོ་སྐྱེད་མོས་ཚལ་དུ་ཁྲུས་ལ་འགྲོ་བའི་ཚེ་གསད་པར་བྱའོ། །དེ་ནས་སྐྱེད་མོས་ཚལ་དུ་དཔུང་གི་ཚོགས་སྤས་ནས་རྒྱལ་པོ་རྫིང་བུར་འོངས་པའི་ཚེ་ཐམས་ཅད་ལོག་ནས་བཟུང་སྟེ་བསད་པར་བྱས་སོ། །རྒྱལ་པོ་སྐྲག་ནས་ཁྱེད་རྣམས་ཅི་བྱེད་ཅེས་སྨྲས་པ་དང ། བློན་པོ་རྣམས་ཀྱིས་འདི་སྐད་ཅེས་སྨྲས་སོ། །རྒྱལ་པོ་ཆོས་བཞིན་མི་བྱེད་དེ་འདོད་ཆགས་ཀྱིས་སྦྱོར་ནས་ཡུལ་མི་ཐམས་ཅད་ཀྱང་རིགས་སུན་ཅིང་སྨྲ་ཕ་བ་སྟེ། བདག་ཅག་མ་བཟོད་ཆེས་ནས་
424b
> ཁྱོད་མེད་པར་བྱས་ཏེ་རྒྱལ་པོ་མཛངས་པ་གཟོད་བཙལ་ལོ་སྙམ་མོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་སྐྲག་པར་གྱུར་ཏེ་བློན་པོ་རྣམས་ལ་འདི་སྐད་ཅེས་སྨྲས་སོ། །སྔོན་ཆད་ནི།་བདག་གི་ཉེས་པ་བདེན་གྱི་ཕྱིན་ཆད་དེ་ལྟར་མི་བྱ་ན། གཏང་དུ་རུང་ངམ་མི་རུང་ཞེས་སྨྲས་པ་དང ། བློན་པོ་རྣམས་ཀྱིས་འདི་སྐད་ཅེས་སྨྲས་སོ། །གལ་ཏེ་གནམ་ལས་ཁ་བ་ནག་པོ་བབ་བམ། མགོ་ལ་སྤྲུལ་ནག་པོ་སྐྱེས་ཀྱང་མི་གཏང་གི་།མ་སྨྲ་ཞིག་ཅེས་བསྒོའོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་ད་ནི། གདོན་མི་ཟ་བར་གསོད་དོ་སྙམ་སྟེ་ཁྲོས་ནས་བློན་པོ་རྣམས་ལ་འདི་སྐད་ཅེས་སྨྲས་སོ། །ང་སྔོན་རི་ལ་འདུག་སྟེ་འཇིག་རྟེན་ལ་མི་དགའ་བ་ལས་ནན་གྱིས་རྒྱལ་པོར་བཅུག་སྟེ། ང་ནི། ང་གསོད་དོ། །གར་སྐྱེས་གར་སྐྱེས་ཀྱང་ཁྱོད་ང་དང་ཕྲད་དེ་ཁྱོད་ཀྱང་ངས་གསོད་པར་ཤོག་ཅིག་ཅེས་དམ་བཅས་སོ། །དེ་ལྟར་དམ་བཅས་མོད་ཀྱི། འོན་ཀྱང་མ་གནང་སྟེ་བསད་དོ། །རྒྱལ་པོ་ཆེན་པོ། དེའི་ཚེ་དེའི་དུས་ན་རྒྱལ་པོ་དྲང་སྲོང་དེ་ནི། ད་ལྟར་སོར་ཕྲེང་ཅན་ཡིན་ནོ། །དེའི་ཚེ་མི་མང་པོ་གྲོས་མཐུན་པར་རྒྱལ་པོ་གསོད་པ་ནི། སོར་ཕྲེང་ཅན་གྱིས་བསད་པའི་མི་འདི་དག་ཡིན་ཏེ།་རྟག་ཏུ་སོར་ཕྲེང་ཅན་གྱིས་བསད་པར་གྱུར་ཏོ། །རྒྱལ་པོས་ཡང་པུས་མོས་ལ་བཙུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་སོར་ཕྲེང་ཅན་འདིས་མི་
425a
> ༄#། །མི་འདི་སྙེད་ཅིག་བསད་ན། ད་འབྲས་བུ་ཐོབ་པའི་འོག་ཏུ་རྣམ་པར་སྨིན་པ་མྱོང་བར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ།་སྡིག་པ་བྱས་ན། རྣམ་པར་སྨིན་པ་ངེས་པར་མྱོང་སྟེ། དགེ་སློང་འདི་ཡང་ད་ལྟར་གནས་ཁང་ན་སེམས་ཅན་དམྱལ་བའི་མེ་བ་སྤུའི་ཁུང་ཀུན་ནས་འབར་ཏེ་སྡུག་བསྔལ་མི་བཟད་པ་མྱོང་ཞིང་འདུག་གོ་།དེ་ནས་བཅོམ་ལྡན་འདས་ཀྱིས་འཁོར་མང་པོ་ལ་སྡིག་པའི་ལས་བྱས་ན། ངེས་པར་སྡིག་པའི་རྣམ་པར་སྨིན་པ་རྟོགས་པར་བྱ་བའི་ཕྱིར་དགེ་སློང་ཞིག་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཁྱེད་སོང་ལ་ལྡེ་མིག་ཁྱེར་ཏེ་དགེ་སློང་སོར་ཕྲེང་ཅན་གྱི་སྒོའི་བུ་གུར་ཆུག་ཅིག་ཅེས་བཀའ་སྩལ་ནས་དགེ་སློང་གིས་བཀའ་བཞིན་དུ་ལྡེ་མིག་ཐོགས་ཏེ་སྒོའི་བུ་གུར་བཅུག་ན། དེ་མ་ཐག་ཏུ་ཞུའོ། །དགེ་སློང་དེ་སྡངས་སྐྲག་ནས་ཕྱིར་བཅོམ་ལྡན་འདས་ཀྱི་སྤྱན་སྔར་འོངས་ཏེ་དེ་བཞིན་དུ་གསོལ་པ་དང ། བཅོམ་ལྡན་འདས་ཀྱིས་དགེ་སློང་དག་ལ་འདི་སྐད་ཅེས་བཀའ་སྩལ་ཏོ། །སྡིག་པ་བྱས་པའི་རྣམ་པར་སྨིན་པ་ནི། འདི་ཡིན་ནོ། །ཞེས་བཀའ་སྩལ་ཏེ། རྒྱལ་པོ་དང་འཁོར་མང་པོ་རྣམས་ཡིད་ཆེས་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་སོར་ཕྲེང་ཅན་སྔོན་ལེགས་པ་ཅི་
425b
> ཞིག་བགྱིས་ན། མཐུ་སྟོབས་གྱད་ཆེན་པོའི་སྟོབས་དང་མཉམ་ཞིང་རྩལ་ཆེ་བ། བྱ་ལྟར་མགྱོགས་པར་གྱུར། ལེགས་པ་ཅི་ཞིག་བགྱིས་ན། བཅོམ་ལྡན་འདས་དང་ཕྲད་དེ་འཁོར་བ་ལས་གྲོལ་བར་གྱུར་པ་འཁོར་མང་པོ་ལ་ཐུགས་བརྩེ་བའི་སླད་དུ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཁྱེད་ལེགས་པར་ཉོན་ཅིག་།སྔོན་འདས་པའི་དུས་ན་སངས་རྒྱས་འོད་སྲུང་གི་ཚེ་དགེ་སློང་ཞིག་གང་ཟག་གི་ལས་བྱེད་པ་ལས། འབྲུའི་ཁལ་ཞིག་བཀལ་ཏེ་སོང་སོང་བ་ལས་ལམ་དུ་ཆར་པས་ནོན་ཏེ་བྱོལ་བའི་གནས་མེད་པས། འབྲུ་དང་སྣོད་དུ་བཅས་པ་ཐམས་ཅད་གཤེར་བར་གྱུར་ཏོ། །དེའི་ཚེ་ན་དགེ་སློང་དེ་མགྱོགས་པར་འགྲོ་འདོད་པ་ལས། མཐུ་ཆུང་བས་འགྲོ་བུལ་ཏེ་མགྱོགས་པར་མ་གྱུར་པས་འདི་སྐད་ཅེས་སྨོན་ལམ་བཏབ་པོ། །བདག་མ་འོངས་པའི་དུས་ན་མཐུ་སྟོབས་ནི། མི་སྟོང་དང་མཉམ་ཞིང་ལུས་ཡང་ལ། འགྲོ་མགྱོགས་ཁྱད་བྱ་འཕུར་བ་དང་འདྲ་བར་ཤོག་ཅིག་།མ་འོངས་པའི་དུས་ན་སངས་རྒྱས་ཤཱཀྱ་ཐུབ་པ་འཇིག་རྟེན་དུ་གཤེགས་པ་དང་ཕྲད་དེ་འཁོར་བ་ལས་གྲོལ་བར་གྱུར་ཅིག་ཅེས་སྨོན་ལམ་བཏབ་བོ། །ཀུན་དགའ་བོ། དེ་ལ་གཞན་དུ་མ་སེམས་ཤིག་།དེའི་ཚེ་གང་ཟག་གི་ལས་བྱེད་པའི་དགེ་སློང་དེ་ནི། ད་ལྟར་གྱི་དགེ་སློང་སོར་ཕྲེང་ཅན་ཡིན་ཏེ། དེའི་ཚེ་རབ་ཏུ་བྱུང་ནས་ཚུལ་ཁྲིམས་བསྲུངས་ཏེ་དགེ་འདུན་གྱི་ལས་བྱས་པས །
426a
> ༄#། །སྨོན་ལམ་བཞིན་དུ་གང་ནས་གང་དུ་སྐྱེས་ཀྱང་བྱད་གཟུགས་བཟང་བ་དང ། མཐུ་སྟོབས་དང་རྩལ་ཆེ་བར་གྱུར་ཏེ། ང་དང་ཕྲད་པར་སྨོན་པས་འཁོར་བ་ལས་གྲོལ་བར་གྱུར་ཏོ། །དེའི་ཚེ་ཀུན་དགའ་བོ་དང ། དགེ་སློང་རྣམས་དང ། རྒྱལ་པོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་རྣམ་པར་སྨིན་པའི་འབྲས་བུ་གསུངས་པ་ཐོས་ནས་ཐམས་ཅད་ཀྱིས་བརྩོན་འགྲུས་བསྐྱེད་དེ་བདེན་པ་བཞི་ཡིད་ལ་བྱས་པས་ལ་ལ་རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པར་གྱུར་ཏོ། །ལ་ལ་ནི། རང་སངས་རྒྱས་ཀྱི་དགེ་བའི་རྩ་བ་བསྐྱེད་དོ། །ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །ཐམས་ཅད་ལུས་དང་ངག་དང་ཡིད་དགེ་བ་ལ་འདུན་ཏེ་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །མི་གདུང་བ་སོར་ཕྲེང་ཅན་གྱི་ལེའུ་སྟེ་སུམ་ཅུ་རྩ་དྲུག་པའོ།། །།བམ་པོ་བཅུ་གཅིག་པ། དབུལ་མོ་བསྙེན་དགའ་མོའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ན་བུད་མེད་བསྙེན་དགའ་མོ་ཞེས་བྱ་བ་དབུལ་ཕོངས་པ། འཚོ་
426b
> བ་སློང་མོ་ལ་ལྟོས་པ་ཞིག་ཡོད་དེ། བུད་མེད་དེས་རྒྱལ་པོ་དང ། བློན་པོ་དང ། མི་མང་པོས་སོ་སོ་ནས་སངས་རྒྱས་དང་དགེ་འདུན་ལ་མཆོད་པ་བྱས་པ་མཐོང་ནས་འདི་སྙམ་དུ་བསམས་སོ། ། བདག་གིས་སྔོན་སྡིག་པ་ཅི་ཞིག་བྱས་ན། འདི་ལྟར་དབུལ་ཞིང་རིགས་ངན་པར་སྐྱེས་ཏེ། ད་བསོད་ནམས་ཀྱི་ཞིང་དང་ཕྲད་ཀྱང་ས་བོན་མི་བདོག་སྙམ་ནས་ཤིན་ཏུ་ཡི་ཆད་དེ་འགྱོད་པ་སྐྱེས་ནས་ཉི་མ་གཅིག་གི་བར་དུ་ཐོག་ཐག་བསླངས་ན། དོང་ཚེ་གཅིག་ལས་མ་རྙེད་དེ། དོང་ཚེ་གཅིག་པོ་ཐོགས་ནས་མར་འཚོང་པའི་ཁྱིམ་དུ་སོང་སྟེ་མར་ཞིག་ཉོ་བར་བྱས་སོ། ། མར་འཚོང་པའི་ཁྱིམ་བདག་གིས་སྨྲས་པ། དོང་ཚེ་གཅིག་གིས་མར་ཉོ་བ་འདི་ཧ་ཅང་ཡང་ཉུང་ཆེས་ན། ཁྱོད་ཀྱིས་ཅི་ཞིག་བྱ་ཞེས་དྲིས་པ་དང ། བསྙེན་དགའ་མོས་ཀྱང་དྲང་པོར་གཏམ་བྱས་པས། མར་འཚོང་པའི་བདག་པོ་སྙིང་བརྩེ་སྟེ་མར་ལྷག་པར་བྱིན་ནོ། །བསྙེན་དགའ་མོས་མར་དེ་ཐོབ་ནས་རབ་ཏུ་དགའ་སྟེ་གཙུག་ལག་ཁང་དུ་སོང་ནས་བཅོམ་ལྡན་འདས་ལ་དབུལ་ལོ། །ཞེས་སངས་རྒྱས་ཀྱི་སྤྱན་སྔར་མར་མེ་བཙུགས་ཏེ་སྨོན་ལམ་འདི་སྐད་ཅེས་བཏབ་བོ། །བདག་ད་ལྟར་དབུལ་ཕོངས་ཏེ་མར་མེ་ཆུང་དུ་འདིས་སངས་རྒྱས་ལ་མཆོད་དོ། ། བསོད་ནམས་འདིས་མ་འོངས་པའི་དུས་ན་བདག་ཤེས་རབ་ཀྱི་མར་མེ་དང་ལྡན་ཏེ། སེམས་ཅན་ཐམས་ཅད་ཀྱི་མུན་པའི་དྲི་མ་བསལ་བར་ཤོག་ཅིག་ཅེས་སྨོན་ལམ་བཏབ་ནས་ཕྱིར་
427a
> ༄#། །གནས་སུ་སོང་ངོ ། །དེའི་མཚན་མོ་མར་མེ་གཞན་ནི། ཟད་ཀྱི་བསྙེན་དགའ་མོའི་མར་མེ་གཅིག་པུ་ནི། ནམ་ནངས་ཀྱི་བར་དུ་འབར་རོ། །དེའི་ཚེ་མཽ་ག་ལ་ཡ་ན་དུས་འཛིན་པའི་རས་ལ་བབ་པས་ནམ་ནངས་ནས་མར་མེ་གཅིག་པུ་ཞིག་ལྷག་པར་གསལ་ཏེ། མར་དང་སྙིང་པོ་ཡང་མ་ཉམས། གསར་དུ་བཙུགས་མ་ཐག་པ་འདྲ་ནས་འདི་སྙམ་དུ་སེམས་སོ། །ཉིན་པར་ནི། མར་མེ་བཙུགས་ཀྱང་ཕན་པ་མེད་ཀྱི། གསད་དོ་སྙམ་ནས་གསད་པར་གཟས་ན་མ་སོད་དོ། །དེ་ནས་ལག་དར་ཏེ་གསད་པར་གཟས་ན་ཡང་བསོད་དེ་མ་ཉམས་སོ། །དེ་ནས་གོས་ཀྱིས་གསད་པར་གཟས་ན་ཡང་མ་སོད་པ་བཅོམ་ལྡན་འདས་ཀྱིས་གཟིགས་ནས་མཽ་གལ་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱིས་མར་མེ་འདི་གསད་པར་སེམས་ཀྱང་མར་མེ་འདི་ནི། ཁྱོད་ཀྱིས་མི་སོད་དོ། །ཁྱོད་ཉན་ཐོས་ཀྱིས་བསྒུལ་ཞིང་བསྐྱོད་ནུས་པ་ཡང་མ་ཡིན་ནོ། །གལ་ཏེ་ཁྱོད་ཀྱིས་རྒྱ་མཚོ་ཆེན་པོ་བཞིའི་ཆུ་ཕབ་བམ་རྫི་རླུང་ཡུག་པས་བུས་ཀྱང་སོད་པར་མི་འགྱུར་རོ། །དེ་བས་ན་མར་མེ་འདི་ནི། ཀུན་གྱི་དོན་རྒྱ་ཆེན་པོ་བྱེད་པར་བསམ་པ་ཆེན་པོ་བསྐྱེད་པས་ཕུལ་བ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་བསྙེན་དགའ་མོ་ཡང་བཅོམ་ལྡན་འདས་ཀྱི་སྤྱན་སྔར་འོངས་ཏེ་ཞབས་ལ་སྤྱི་བོས་ཕྱག་འཚལ་བ་དང ། དེའི་ཚེ་བཅོམ་
427b
> ལྡན་འདས་ཀྱིས་ལུང་བསྟན་ཏེ། ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་གཉིས་འདས་ནས་མངོན་པར་སངས་རྒྱས་ཏེ་མཚན་ཡང་མར་མེ་འོད་ཅེས་བྱ་སྟེ། དབང་བཅུ་དང་ལྡན་པར་འགྱུར་རོ། །དེའི་ཚེ་ན་བསྙེན་དགའ་མོས་བཅོམ་ལྡན་འདས་ཀྱིས་ལུང་བསྟན་པ་ཐོབ་ནས་རབ་ཏུ་དགའ་སྟེ་པུས་མོ་གཉིས་ས་ལ་བཙུགས་ནས་རབ་ཏུ་འབྱུང་བར་གསོལ་ཏེ། བཅོམ་ལྡན་འདས་ཀྱིས་ཀྱང་རབ་ཏུ་འབྱུང་བར་གནང་ངོ ། །ཚེ་དང་ལྡན་པ་ཀུན་དགའ་བོ་དང ། མཽ་གལ་གྱི་བུས་བུད་མེད་དབུལ་མོ་ལུང་བསྟན་པ་ཐོབ་སྟེ་རབ་ཏུ་བྱུང་བ་མཐོང་ནས་པུས་མོ་གཉིས་ས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བསྙེན་དགའ་མོ་དབུལ་མོ་འདི་སྔོན་ལས་ཅི་ཞིག་བགྱིས་ན། དེ་སྲིད་ཀྱི་བར་དབུལ་ཕོངས་ཏེ་འཚོ་བ་ཡང་མི་རྙེད་པར་གྱུར། ཅི་ཞིག་བགྱིས་ན་བཅོམ་ལྡན་འདས་དང་ཕྲད་དེ། འཁོར་རྣམ་པ་བཞི་མཆོད་པ་བྱས་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་ཏེ། དེའི་ཚེ་ཁྱིམ་བདག་གི་ཆུང་མ་ཞིག་གིས་སངས་རྒྱས་དང ། དགེ་སློང་གི་དགེ་འདུན་དུ་བཅས་པ་སྤྱན་དྲངས་པ་ལས། སྔར་བུད་མེད་དབུལ་མོ་ཞིག་གིས་སྤྱན་དྲངས་ཏེ་གཤེགས་སུ་གནང་ངོ ། །བུད་མེད་དབུལ་མོ་དེ་ཡང་ལན་གཅིག་ཕྱིར་
428a
> ༄#། །ལྡོག་པ་ཐོབ་པ་ཞིག་སྟེ། དེའི་ཚེ་ན་ཁྱིམ་བདག་གི་ཆུང་མ་དེ་བཙན་ཞིང་ཕྱུག་པ་དང ། ཆོ་རིགས་སྙེམས་པས་དབུལ་མོས་སྔར་སྤྱན་དྲངས་པ་ལ་བརྙས་སྨད་ནས་འདི་སྐད་ཅེས་སྨྲས་སོ། །བཅོམ་ལྡན་འདས་ཅིའི་སླད་དུ་བདག་གིས་སྤྱན་དྲངས་པར་སྔར་མི་གཤེགས་པར་སྦྲང་མོས་སྤྱན་དྲངས་པར་གཤེགས་ཞེས་ཚིག་ངན་པ་སྨྲས་ཏེ་འཕགས་པ་ལ་བརྙས་སྨད་པས། སྐྱེ་བ་ལྔ་བརྒྱའི་བར་དུ་རྟག་ཏུ་དབུལ་ཕོངས་པ། འཚོ་བ་སློང་མོ་ལ་ལྟོས་པའི་རིགས་སུ་སྐྱེས་སོ། །ཕྱི་ཉིན་སངས་རྒྱས་དང ། དགེ་འདུན་ལ་དད་པས་མཆོད་དེད་དགའ་བས་ན། ད་སངས་རྒྱས་དང་ཕྲད་དེ་རབ་ཏུ་བྱུང་ནས་ལུང་དུ་བསྟན་པ་ཡིན་ནོ། །དེའི་ཚེ་འཁོར་མང་པོ་རྣམས་སངས་རྒྱས་ཀྱིས་གསུངས་པ་ལ་རབ་ཏུ་དགའ་བར་གྱུར་ཏེ། །དེའི་ཚེ་རྒྱལ་པོ་དང ། བློན་པོ་དང ། མི་མང་པོ་དག་གིས་བུད་མེད་དབུལ་མོས་སངས་རྒྱས་ལ་མར་མེ་གཅིག་ཕུལ་བས། སངས་རྒྱས་སུ་ལུང་བསྟན་ཏོ། །ཞེས་ཐོས་ནས་ཐམས་ཅད་ཀྱིས་བཀུར་སྟིར་བྱས་ཏེ་འཚོ་བའི་ཡོ་བྱད་མཆོག་དམ་པ་རྣམ་པ་བཞི་ཆོ་ག་པར་སྦྱར་ཏེ་ཕུལ་ལོ། །དེའི་ཚེ་ཡུལ་དེའི་ཁྱེའུ་དང ། བུ་མོ་ཡ་རབས་དང་མ་རབས་ཐམས་ཅད་ཀྱིས་མར་མེ་དྲི་བསུང་ཅན་སྦྱར་ཏེ་རྒྱལ་བུ་རྒྱལ་བྱེད་ཀྱི་ཚལ་དུ་བཅོམ་ལྡན་འདས་ལ་ཕུལ་ལོ། །མར་མེ་འབུལ་བའི་མི་མང་པོས་མར་མེ་
428b
> མེས་རྒྱལ་བུ་རྒྱལ་བྱེད་ཀྱི་ཚལ་ཀུན་ཡོངས་སུ་གང་སྟེ་ཕྱོགས་བཞིན་ས་སྐར་མ་ནམ་མཁའ་ལ་སྣང་བ་དང་འདྲ་བར་ཉིན་གཅིག་བཞིན་དུ་ཕུལ་ཏེ། དེ་ལྟ་བུར་རྒྱུན་མ་ཆད་པར་ཉིན་ཞག་བདུན་གྱི་བར་དུ་ཕུལ་ལོ། །དེའི་ཚེ་ཀུན་དགའ་བོ་ཤིན་ཏུ་དགའ་ནས་ངོ་མཚར་དུ་གྱུར་ཏེ། བཅོམ་ལྡན་འདས་ཀྱི་ཡོན་ཏན་ནི། འདི་སྙེད་ཅིག་མངའ་འོ། །ཞེས་བསྔགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྔོན་འཕྲིན་ལས་ཅི་ཞིག་བགྱིས་ན། འདི་ལྟ་བུའི་མར་མེ་ཚད་མེད་པ་དང་ལྡན་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་འཛམ་བུའི་གླིང་འདིར་རྒྱལ་པོ་ཀ་སི་ཀི་ཞེས་བྱ་བ་ཞིག་བྱུང་སྟེ། རྒྱལ་ཕྲན་བརྒྱད་ཁྲི་བཞི་སྟོང་སྙེད་ལ་དབང་བྱེད་པ་རྒྱལ་པོའི་བཙུན་མོ་ཆེན་མོ་ལ་སྲས་གཅིག་བྱུང་སྟེ། ལུས་ཀྱི་མདོག་གསེར་ལྟ་བུར་འདུག་ལ། མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུར་ལྡན་ཏེ།་སྤྱི་ལ་རིན་པོ་ཆེ་ཁ་དོག་གསལ་པ། བལྟ་ན་མི་སྤྲིད་པ་ཞིག་ཡོད་དེ། མཚན་མཁན་བོས་ནས་བཟང་ངན་བརྟགས་ཏེ་མིང་གདགས་པ་ལས། མཚན་མཁན་གྱིས་བལྟས་ན་མཚན་ངོ་མཚར་དུ་བཟང་བས་ལག་པ་བཏེག་ནས་ཤིན་ཏུ་ལེགས་སོ། །ཞེས་སྨྲས་ཏེ། རྒྱལ་བུ་འདི་ནི། འཇིག་རྟེན་ལྷ་དང ། མིའི་ནང་ན་བསྒྲུན་དུ་མེད་དོ་།གལ་ཏེ་ཁྱིམ་ན་
429a
> ༄#། །གནས་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ། །གལ་ཏེ་རབ་ཏུ་བྱུང་ན་མངོན་པར་འཚང་རྒྱའོ། །ཞེས་སྨྲས་ཏེ། མཚན་མཁན་གྱིས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་བུ་འདི་ཐོག་མ་བཙས་པ་ན་ངོ་མཚར་ཡ་མཚན་གྱི་ལྟས་ཅི་ཞིག་བྱུང་ཞེས་དྲིས་ན། རྒྱལ་བུ་འདི་བཙས་པའི་སྟེ་སྤྱི་བོ་ན་རིན་པོ་ཆེ་ཤིན་ཏུ་གསལ་བ་ཞིག་ཡོད་དོ། །ཞེས་སྨྲས་ནས་རྒྱལ་བུའི་མིང་ཡང་རིན་ཆེན་གཙུག་ཕུད་ཅེས་བཏགས་སོ། །ཕྱིས་ཆེར་སྐྱེས་ནས་རབ་ཏུ་བྱུང་སྟེ་བྱང་ཆུབ་ལ་ནན་ཏན་བྱས་ནས་མངོན་པར་སངས་རྒྱས་ཏེ་སེམས་ཅན་གྲངས་མེད་པའི་དོན་བྱས་སོ། །དེའི་ཚེ་རྒྱལ་པོ་ཡབ་ཀྱིས་སངས་རྒྱས་དང ། དགེ་སློང་གི་དགེ་འདུན་དང་བཅས་པ་ཟླ་བ་གསུམ་དུ་སྤྱན་དྲངས་ནས་མཆོད་སྟོན་གསོལ་ཏོ། །དེའི་ནང་ན་དགེ་སློང་འཕགས་པའི་གཉེན་ཞེས་བྱ་བ་ཞིག་ཟླ་བ་གསུམ་དུ་མར་མེ་སྦྱོར་བའི་ཡོན་བདག་ཏུ་ཁས་བླངས་ནས་ཉིན་གཅིག་བཞིན་དུ་གྲོང་ཁྱེར་དུ་སོང་སྟེ། ཚོང་དཔོན་དང ། ཁྱིམ་བདག་དང ། མི་མང་པོ་ལས་མར་དང ། འབྲུ་མར་དང ། མེ་མར་གྱི་སྙིང་པོ་བསླངས་སོ། །དེའི་ཚེ་ན་རྒྱལ་པོ་དེ་ལ་བུ་མོ་ཐུབ་པ་ཞེས་བྱ་བ་ཞིག་ཡོད་དེ། ཡང་ཐོག་གི་སྟེང་ནས་དགེ་སློང་དེ་ཉིན་གཅིག་བཞིན་དུ་གྲོང་རྒྱུ་ཞིང་ཉོན་མོངས་པ་མཐོང་ནས་དེ་ལ་སྙིང་བརྩེ་སྟེ་མི་ཞིག་
429b
> མངགས་ནས་བཙུན་པ་ཁྱོད་ཅི་ཞིག་སྒྲུབ་ན། རྟག་ཏུ་འདི་ལྟ་བུར་ཉོན་མོངས་ཞེས་དྲིས་ན། དགེ་སློང་དེས་འདི་སྐད་ཅེས་སྨྲས་སོ། །བདག་ནི། ཟླ་བ་གསུམ་གྱི་བར་དུ་སངས་རྒྱས་དང ། དགེ་འདུན་གྱི་མར་མེ་སྦྱོར་བའི་ཡོན་ཏན་བདག་ཏུ་ཁས་བླངས་ཏེ། དེ་བས་ན་གྲོང་རྒྱུ་ཞིང་དགེ་བསྙེན་རྣམས་ལས་མར་དང ། འབྲུ་མར་དང ། མར་གྱི་སྙིང་པོ་དང ། མར་མེ་འཛུགས་པའི་ཡོ་བྱད་རྣམས་སློང་ངོ ། །ཞེས་བུ་མོ་ལ་སྤྲིང་པ་དང ། བུ་མོ་དེ་རབ་ཏུ་དགའ་ནས་དགེ་སློང་འཕགས་པའི་གཉེན་ལ་འདི་སྐད་ཅེས་བསྒོའོ། །ད་ཕྱིན་ཆད་འདི་ལྟར་ཀུན་ཏུ་འགྲོ་མི་དགོས་ཀྱི། མེ་མར་གྱི་ཡོ་བྱད་ཐམས་ཅད་ཁོ་མོས་སྦྱར་གྱི། ལོངས་ཤིག་ཅེས་བསྒོ་བ་དང ། དགེ་སློང་དེ་ཡང་དེ་ལྟར་བྱའོ། །ཞེས་སྨྲས་ནས་དེ་ཕྱིན་ཆད་རྟག་ཏུ་མེ་མར་དང།་འབྲུ་མར་དང ། མར་མེའི་ཡོ་བྱད་ཀུན་སྦྱར་ཏེ་གཙུག་ལག་ཁང་དུ་བསྐྱལ་ཏོ། །དགེ་སློང་འཕགས་པའི་གཉེན་གྱིས་དེ་ལྟར་ཉིན་གཅིག་བཞིན་དུ་མར་མེ་ཕུལ་ཏེ་ཀུན་ལ་ཕན་པའི་དོན་རྒྱ་ཆེན་པོའི་སེམས་བསྐྱེད་པས། བཅོམ་ལྡན་འདས་ཀྱིས་ལུང་བསྟན་ཏེ། མ་འོངས་པའི་དུས་ན་བསྐལ་པ་གྲངས་མེད་པ་འདས་ནས་མངོན་པར་འཚང་རྒྱ་སྟེ། མཚན་ཡང་མར་མེ་མཛད་ཅེས་བྱ་བར་ལུང་བསྟན་ནས་མཚན་སུམ་ཅུ་དང་ལྡན་པར་གྱུར་ཏོ། །རྒྱལ་པོའི་བུ་མོ་ཐུབ་པས། དགེ་སློང་འཕགས་པའི་གཉེན་ལུང་བསྟན་ཏོ། །ཞེས་
430a
> ༄#། །ཐོས་ནས་འདི་སྙམ་དུ་བསམས་སོ། །སངས་རྒྱས་ལ་ཕུལ་བའི་མར་མེ་ནི། བདག་གིས་སྦྱར་ཏེ། དགེ་སློང་དེས་བསྐུལ་མ་ཙམ་བྱས་ཀྱང་ལུང་བསྟན་ན།་བདག་ལ་ནི་ལུང་མ་བསྟན་ཏོ་སྙམ་དུ་བསམས་ནས་བཅོམ་ལྡན་འདས་གང་ན་བ་དེར་སོང་སྟེ། དེ་བཞིན་དུ་དྲང་པོར་གསོལ་ནས་བཅོམ་ལྡན་འདས་ཀྱིས་ལུང་བསྟན་ཏེ།་བུ་མོ་ཐུབ་པ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་དགུ་བཅུ་རྩ་གཅིག་འདས་ནས་མངོན་པར་འཚང་རྒྱ་སྟེ། མཚན་ཡང་ཤཱཀྱ་ཐུབ་པ་ཞེས་བྱ་བར་མཚན་སུམ་ཅུ་དང་ལྡན་པར་ལུང་བསྟན་ཏོ། །དེ་ལྟར་རྒྱལ་པོའི་བུ་མོས་ཀྱང་སངས་རྒྱས་ལས་ལུང་བསྟན་པ་ཐོབ་པས་རབ་ཏུ་དགའ་བ་སྐྱེས་པར་གྱུར་ཏེ་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་ཀྱང་རབ་ཏུ་འབྱུང་བར་གནང་ནས་བར་ཆད་མེད་པར་བརྩོན་འགྲུས་རྩོམ་མོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་དགེ་སློང་འཕགས་པའི་གཉེན་ནི། སྔོན་འདས་པའི་སངས་རྒྱས་མར་མེ་མཛད་ཡིན་ནོ། །རྒྱལ་པོའི་བུ་མོ་ཐུབ་པ་ནི། ད་ལྟར་ང་ཡིན་ཏེ། སྔོན་མར་མེ་ཕུལ་བར་བསྐལ་པ་གྲངས་མེད་པའི་བར་དུ་ལྷ་དང་མིའི་འཇིག་རྟེན་ན་བསོད་ནམས་མྱོང་སྟེ། གཟུགས་ཀྱང་གཞན་པས་འཕགས་པར་བཟང་
430b
> སྟེ།་ད་མངོན་པར་སངས་རྒྱས་ནས་ཀྱང་མར་མེ་མང་པོ་དང་ལྡན་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་རྣམས་ལ་ལ་ནི། འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་བོ། །ལ་ལ་ནི། རང་སངས་རྒྱས་སུ་དགེ་བའི་རྩ་བ་བསྐྱེད་དོ། །ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །ཚེ་དང་ལྡན་པ་ཀུན་དགའ་པོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །དབུལ་མོ་བསྙེན་དགའ་མོའི་ལེའུ་སྟེ་སུམ་ཅུ་རྩ་བདུན་པའོ།། །།བ་ཤི་ཙིར་གྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་སྤུངས་པའི་རི་ལ་བཞུགས་སོ། ། དེའི་ཚེ་ཡུལ་དེ་ན་ཁྱིམ་བདག་ཤི་རི་ཙི་ཞེས་བྱ་བ་ཤིན་ཏུ་ཕྱུག་ཅིང་ལོངས་སྤྱོད་དང་ལྡན་པ། རིན་པོ་ཆེ་སྣབ་དུན་གྱིས་བང་མཛོད་གང་བ་ཞིག་ཡོད་དེ། རིགས་མཉམ་པ་ལས་ཆུང་མ་བླངས་ནས་དུས་ཕྱི་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏེ་ཟླ་བ་ཚང་ནས་བུ་ཁྱེའུ་སྡུག་པ། མཛེས་པ། འཇིག་རྟེན་ན་དཔེ་མེད་པ་ཞིག་བཙས་ཏེ། ཕ་མ་ཤིན་ཏུ་བྱམས་པས་མཚན་མཁན་བོས་ཏེ་མཚན་བལྟས་ན། མཚན་མཁན་གྱིས་ཀྱང་ཁྱེའུ་འདི་ནི། བསོད་ནམས་ཀྱི་མཚན་དང་ལྡན་ཏེ། རིགས་ཀྱང་འཚོབ་པར་འགྱུར་རོ། །ཞེས་སྨྲས་
431a
> ༄#། །པ་དང ། ཁྱེའུའི་ཕ་མ་ལྷག་པར་དགའ་ནས་མཚན་མཁན་དེ་ལ་བུའི་མིང་ཐོགས་ཤིག་ཅེས་སྨྲས་པ་དང་མཚན་མཁན་གྱིས་སྨྲས་པ། བུ་འདི་ཡོད་པར་གྱུར་ནས་ལྟས་སམ། ཡ་མཚན་ཅི་བྱུང་ཞེས་དྲིས་ན། སྨྲས་པ། གཞན་ནི། མེད་ཀྱི། ཁྱེའུའི་མ་སྔོན་སྨྲས་མཁས་པ་ལས་ཁྱེའུ་འདི་ཡོད་ཚུན་ཆད་སྨྲ་མཁས་པར་གྱུར་ཏོ། །ཞེས་བྱས་པ་དང ། བུའི་མིང་བ་ཤེ་ཙིར་ཞེས་བཏགས་སོ། །གསོས་བསྐྱེད་དེ་ཚར་སྐྱེས་ནས་ཡིད་གཞུངས་ཏེ་རྩལ་དང་ལྡན་པར་གྱུར་ཏོ། །དུས་གཞན་ཞིག་ན་བྱིས་པ་གྲོགས་པོ་དག་རྩེ་ཞིང་སོང་སོང་བ་ལས། རིགས་ངན་པ་ཞིག་གི་ཁྱིམ་ན་བུ་མོ་སྡུག་གུ་མ་ཚུལ་དུ་ཤིས་པ་ཞིག་ཡོད་པ་མཐོང་ནས་དེ་ལ་ཆགས་ཏེ་ཆུང་མར་བླང་བར་བསམས་ནས་ཕྱིར་ཁྱིམ་དུ་འོངས་ཏེ། བུ་མོ་དེ་བདག་གི་ཆུང་མར་ལོངས་ཤིག་ཅེས་སྨྲས་སོ། །ཕ་མས་སྨྲས་པ། བདག་ཅག་ནི། ཚོ་རིགས་བཙུན་པ་ཡིན་ཏེ། བུ་མོ་དེ་རིགས་ཆུང་ཞིང་ངན་པ་ཡིན་ན། ཇི་ལྟར་ཆུང་མར་བླང་ཞེས་བྱས་པ་དང ། ཁྱེའུ་རབ་ཏུ་མི་དགའ་ནས་ཕ་མ་ལ་འདི་སྐད་ཅེས་སྨྲས་སོ། །ཆོ་རིགས་ལ་མ་ལྟ་བར་བུ་མོ་ཉིད་ཅི་འདྲ་བ་ལས་བདག་གི་ཆུང་མར་ལོངས་ཤིག་།གལ་ཏེ་ཆུང་མར་མ་བླངས་ན་བདག་ཀྱང་འགུམ་མོ། །ཞེས་སྨྲས་པ་དང ། ཕ་མས་ཀྱང་བུའི་ངོམ་ལྡོག་
431b
> པས་བུ་མོ་སློང་དུ་བཏང་ངོ ། །བུ་མོའི་ཕ་མས་སྨྲས་པ། ཁྱོད་ནི། ཆོ་རིགས་བཙུན་པ་ཡིན་ཏེ། བདག་ཅག་ནི། རིགས་ཆུང་ཞིང་ངན་པ་ཡིན་པས་གཉེན་ཟླ་ཡང་མ་ཡིན་ནམ། ཅིའི་ཕྱིར་བུ་མོ་སློང་ཞེས་བྱས་སོ། །འོན་ཀྱང་ཁྱེའུ་དེ་བུ་མོ་དེ་ལ་ཆགས་སོ། །ཡང་བསྐྱར་ཏེ་བུ་མོ་སློང་དུ་བཏང་བ་དང་བུ་མོའི་ཕ་མས་འདི་སྐད་ཅེས་སྨྲས་སོ། །གལ་ཏེ་བདག་གི་མག་པར་བྱས་རྩལ་སྣ་ཚོགས་ཀྱང་ཡོད་ལ་གླུ་གར་དང ། རྩེད་མོའི་བག་ཅི་ཡང་ཤེས་ཤིང་རྒྱལ་པོ་ཅི་ལ་དགྱེས་པ་ཀུན་ཤེས་ན། གཉེན་བྱའོ་ཞེས་སྨྲས་པ་དང ། ཁྱེའུ་དེར་རོལ་མོ་ལ་སོགས་པ་སློབ་པ་ལས་ངོ་ཚ་བ་དང་བསྡོས་ནས་རིང་པོ་མ་ལོན་པར་ཀུན་བྱང་བར་བསླབས་སོ། །དུས་གཞན་ཞིག་ན་རྒྱལ་པོས་རོལ་མོ་བྱས་ཏེ་རྩལ་ཆེ་བ་ཀུན་བསགས་ནས་ཤིང་འཛེག་པ་དང ། མཆོད་པ་དང ། ཐག་འཛེག་པ་སོགས་པ་རྩེད་མོ་སྣ་ཚོགས་བྱེད་པ་ལས། ཁྱིམ་བདག་གི་བུ་ཡང་དེར་འོངས་ནས་ཐག་པ་ལ་འཛེགས་ཏེ། ཐག་པ་ལ་རྒྱུག་ཅིང་ཐག་འཛེག་བྱས་པ་དང་རྒྱལ་པོ་ཡེངས་ཏེ་མ་མཐོང་བས་གདོད་བྱོས་ཤིག་ཅེས་བསྒོའོ། །ཁྱེའུ་ངལ་བས་ཐག་འཛེག་བྱས་པ་དང ། ཐུག་པའི་དབུས་ཙམ་དུ་ཕྱིན་ནས་ཐག་པ་ལས་ལྷུང་སྟེ་ཤིན་ཏུ་སྐྲག་པས་སྐྱབས་མེད་དོ། །ཞེས་སྨྲས་སོ། །དེའི་ཚེ་མཽ་གལ་གྱི་བུ་དེར་འོངས་ནས་ས་ལ་མ་ལྷུང་བར་བཟུང་སྟེ་འདི་སྐད་ཅེས་སྨྲས་སོ། །
432a
> ༄#། །ཁྱོད་དུ་ལུས་དང་སྲོག་མ་ཡལ་བར་རབ་ཏུ་འབྱུང་ངམ། འོན་ཏེ་ས་ལ་ལྷུང་སྟེ་བུ་མོ་ཆུང་མར་བླང་བར་བྱ། སྨྲས་པ། སྲོག་མ་ཡལ་ན་ཆུང་མ་མི་འདོད་དོ། །ཞེས་སྨྲས་པ་དང ། མཽ་གལ་གྱིས་ནམ་མཁའ་ལས་གཞི་མཉམ་པར་སྤྲུལ་ནས་བདེ་བར་བཞག་པ་དང ། ཁྱེའུ་དེ་འཇིགས་པ་མེད་པར་གྱུར་ཏེ། བདེ་བར་ས་ལ་བཞག་པས་ཁྱེའུ་རབ་ཏུ་དགའ་ནས་མཽ་གལ་གྱི་ཕྱི་བཞིན་བཅོམ་ལྡན་འདས་གང་ན་བ་དེར་སོང་ངོ ། །དེར་ཕྱིན་བ་དང་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་སངས་རྒྱས་ལ་མཆོད་པ་བྱས་སོ། །དེའི་ཚེ་བཅོམ་ལྡན་འདས་ཀྱིས་སྦྱིན་པའི་གཏམ་དང ། ཚུལ་ཁྲིམས་ཀྱི་གཏམ་དང ། མཐོ་རིས་ཀྱི་ལྷར་སྐྱེ་བའི་གཏམ་དང ། འདོད་པ་མི་གཙང་བ་དང ། རབ་ཏུ་བྱུང་བ་ནི། བདེའོ། །ཞེས་རྒྱས་པར་བསྟན་པས་ཡིད་རྣམ་པར་གྲོལ་ཏེ་འབྲས་བུ་དང་པོ་ཐོ་བ་ནས་བཅོམ་ལྡན་འདས་ལ་རབ་ཏུ་འབྱུང་ཞིང་དམ་པའི་ཆོས་སློབ་པར་གསོལ་པ་དང ། བཅོམ་ལྡན་འདས་ཀྱིས་གནང་ནས་སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ནས་དགེ་སློང་གི་ཆོས་ལ་ནན་ཏན་བྱས་པས་ཟག་པ་ཟད་དེ་དགྲ་བཅོམ་པར་གྱུར་ཏེ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་
432b
> སློང་འདི་བུ་མོ་དེ་དང་སྔོན་གྱི་ལས་ཇི་ལྟར་མཐུན་ན། ལུས་སྲོག་ལ་འབབ་ཀྱི་བར་དུ་ཆགས་པར་གྱུར། མཽ་གལ་གྱི་བུ་ལ་དགེ་བའི་རྩ་བ་ཅི་ཞིག་བསྐྱེད་ན། སྲོག་བསྐྱབས་པའི་རྐྱེན་གྱིས་མཐར་དགྲ་བཅོམ་པར་གྱུར་པ་བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་བསྐལ་པ་ཚད་མེད་པ་འདས་པའི་ཕ་རོལ་ན་ཡུལ་ཝཱ་ར་ཎཱ་སི་འདིར་ཁྱིམ་བདག་ཅིག་ལ་བུ་སྡུག་ཅིང་བཟང་བ་དཔེ་མེད་པ་ཞིག་བཙས་སོ། །དེའི་ཚེ་ན་ཁྱིམ་བདག་དེའི་ཁྱིམ་དུ་རྒྱ་མཚོ་ནས་མི་ཞིག་འོངས་ནས་ཁྱིམ་བདག་དེ་ལ་བྱ་སྒོ་ང་གཅིག་ཕུལ་ལོ། །ཁྱིམ་བདག་གིས་ལག་ཏུ་བླངས་པ་དང ། རིང་པོ་མ་ལོན་པར་སྒོ་ང་གསན་བྱ་ཕྲུག་ཚང་མ་ཞིག་བྱུང་ངོ ། །ཁྱིམ་བདག་གིས་བྱ་ཕྲུག་དེ་བུ་ལ་བྱིན་ནས་ཆེར་སྐྱེས་པ་དང ། གཅིག་ལ་གཅིག་ཆགས་ཏེ་ཁྱིམ་བདག་གི་བུ་ཕན་ཚུན་དུ་ལྟད་མོ་ལ་འགྲོ་ན། བྱ་དེའི་རྒྱབ་ལ་འདུག་ནས་བྱས་ཁྱེར་ཞིང་ནམ་མཁའ་ལ་འཕུར་འགྲོའོ། །ནམ་སྐྱོ་ན་ཕྱིར་ཡང་ཁྱིམ་དུ་འོངས་ཏེ། དེ་བཞིན་དུ་ཉིན་གཅིག་བཞིན་དུ་འཕྱན་དུ་འགྲོའོ། །དེ་ནས་རིང་ཞིག་ལོན་པ་དང ། དུས་གཞན་ཞིག་ན་རྒྱལ་པོ་གཞན་ཞིག་གི་ཡུལ་དུ་རོལ་མོ་བྱེད་དོ། །ཞེས་ཐོས་ནས་ཁྱེའུ་དེ་བྱ་ལ་ཞོན་ཏེ་ཡུལ་ཕ་རོལ་པོར་ལྟ་དེ་མོ་བལྟར་སོང་ནས་བྱ་ཤིང་ཁར་བཞག་སྟེ་ཁྱེའུ་ནི། ལྟད་མོ་བལྟར་ཞུགས་སོ།
433a
> ༄#། །ལྟད་མོ་བལྟ་བའི་ལམ་དུ་རྒྱལ་པོའི་བུ་མོ་དང་ཕྲད་ནས་རྒྱལ་པོའི་བུ་མོ་ལ་ཆགས་ཏེ་བུ་མོ་དང་ཉལ་ནས་ཕྱིས་གསང་ཤོར་ཏེ་རྒྱལ་པོས་ཟིན་ནས་གསོད་དུ་བཅུག་པ་ལས། ཁྱིམ་བདག་གི་བུས་འདི་སྐད་ཅེས་གསོལ་ཏོ། །བདག་ལ་མཚོན་གྱིས་དགུམ་ཡང་ཅི་འཚལ། བདག་ཉིད་ཤིང་ཁར་འཛེགས་ཏེ། ཤིང་ཁ་ནས་གཡང་དུ་འགུམ་པར་གསོལ་བ་དང ། རྒྱལ་པོས་ཀྱང་དེ་བཞིན་དུ་གནང་ནས་ཁྱེའུ་ཤིང་ཁར་འཛེགས་ཏེ་བྱ་ལ་ཞོན་ནས་འཕུར་ཏེ་སོང་བ་ལས་བྱ་དེས་སྲོག་ཐར་བར་བྱས་སོ། ། ཀུན་དགའ་བོ། དེའི་ཚེ་དེའི་དུས་ན་ཁྱིམ་བདག་གི་བུ་དེ་ནི། བ་ཤེ་ཙིར་ཡིན་ནོ། །རྒྱལ་པོའི་བུ་མོ་དེ་ནི། བུ་མོ་འདི་ཡིན་ནོ། །བྱ་དེ་ནི། མཽ་གལ་གྱི་བུ་ཡིན་ཏེ། འདས་པའི་དུས་ན་ཡང་འདོད་ཆགས་ཀྱི་རྐྱེན་གྱིས་ཚེ་ཟད་པ་ལས་ཐར་པར་བྱས་སོ། །དེ་ཡང་འདོད་ཆགས་ཀྱི་དབང་གིས་ཚེ་ཟད་པ་ལས་མཽ་གལ་གྱི་བུས་ཐར་པར་བྱས་སོ། །དགེ་སློང་འདི་ཡིད་གཞུངས་ཤིང་ཟག་པ་མེད་པའི་འབྲས་བུ་ཐོབ་པ་ནི། སྔོན་འདས་པའི་དུས་ན་ཝཱ་ར་ཎཱ་སི་འདིར་ཁྱིམ་བདག་ཅིག་ལ་རང་སངས་རྒྱས་ཤིག་གིས་བསོད་སྙོམས་བསླངས་པ་ལས། ཁྱིམ་བདག་དེས་བསོད་སྙོམས་ཕུལ་ཏེ་ཆོས་བསྟན་པར་གསོལ་པ་དང ། དེའི་ཚེ་རང་སངས་རྒྱས་དེས་ཆོས་སྟོན་མི་ནུས་སོ། །ཞེས་སྨྲས་ནས་ལྷུང་བཟེད་
433b
> ནམ་མཁའ་ལ་བསྒྱུར་ནས་འཕུར་ཏེ་སོང་ངོ ། །དེ་ནས་ཁྱིམ་བདག་དེས་འདི་སྙམ་དུ་བསམས་ཏེ། སྐྱེས་བུ་འདི་རྫུ་འཕྲུལ་གྱི་མཐུ་ནི། ཆེ་ན། དམ་པའི་ཆོས་སྟོན་མི་ནུས་པ་ལྟ། བདག་མ་འོངས་པའི་དུས་སུ་འཕགས་པ་དང་ཕྲད་དེ་སྐྱེས་བུ་འདི་ལས་ལྷག་པ་དམ་པའི་ཆོས་སྟོན་པ་ལ་ཟད་མི་ཤེས་པར་ཤོག་ཅིག་ཅེས་སྨོན་ལམ་བཏབ་བོ། །དེའི་རྐྱེན་གྱིས་ཡིད་གཞུངས་ཤིང་དགྲ་བཅོམ་པའི་འབྲས་བུ་ཐོབ་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་མང་པོ་རྣམས་མངོན་པར་དགའ་ནས་ལ་ལ་ནི། རྒྱུན་དུ་ཞུགས་པའི་འབྲས་བུ་དང ། ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པའི་འབྲས་བུ་ཐོབ་བོ། ཁ་ཅིག་ནི། རང་སངས་རྒྱས་ཀྱི་དགེ་བའི་རྩ་བ་བསྐྱེད། ཁ་ཅིག་ནི།་བྱང་ཆུབ་ཏུ་སེམས་བསྐྱེད་དེ་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ངོ ། །བ་ཤེ་ཙིར་གྱི་ལེའུ་སྟེ་སུམ་ཅུ་བརྒྱད་པའོ།། །།ཁྱིམ་བདག་དབྱིག་པ་ཅན་གྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ན་བྲམ་ཟེ་ཕྱིན་ཏེ་ལོ་ཤུ་ཤ་ཞེས་བྱ་བ་ཞིག་ཡོད་དེ། བྲམ་ཟེ་དེའི་ཆུང་མ་དེ་རབ་ཏུ་མི་སྡུག་ཅིང་མིག་གཉིས་ཀྱང་མི་མཐོང་སྟེ། མི་མཐོང་བ་དེ་ལ་
434a
> ༄#། །བུ་ཕོ་ནི།་མེད་ཀྱི། བུ་མོ་བདུན་ཡོད་དེ། རབ་ཏུ་དབུལ་ཕོངས་སོ། །བྲམ་ཟེའི་བུ་མོ་དེ་དག་ཀྱང་སོ་སོར་བག་མར་བཏང་སྟེ་ཕྱིས་མག་པ་དག་འདུས་ནས་བྲམ་ཟེའི་ཆུང་མ་ཡང་ཁྲོ་ཞིང་གཏུམ་མོ་ཞིག་སྟེ། བུ་མོ་དང་མག་པ་དག་འོང་བ་ལ་ཁྲོས་ནས་བུ་མོ་དག་ཀྱང་ཕྱིར་མ་ལ་གཤེའོ། །དེའི་ཚེ་ཞིང་དག་ཀྱང་བརྔ་རན་ནས་ཁྱིམ་མཚེས་ལ་བ་ལང་ཞིག་བརྙེས་ཏེ་ཞིང་ཐོག་ཏུ་སོང་སོང་བ་ལས། ལེགས་པར་མ་བསྲུངས་པས་སྟོར་ཏོ། །དེའི་ཚེ་ཕྱིན་ཏེ་ལོ་ཤུ་ཤས་འདི་སྙམ་དུ་བསམས་སོ། །བདག་གིས་སྔོན་ཉེས་པ་ཅི་ཞིག་བྱས་ན། ཁྱིམ་དུ་འོངས་ན་ནི། ཆུང་མས་རྟག་ཏུ་སྤྱོ་ཞིང་བུ་མོ་བདུན་དང་མག་པ་རྣམས་ཀྱིས་འདུག་ཏུ་མི་སྟེར། ང་ཁྱིམ་མཚེས་ཀྱི་བ་ལང་བརྙས་ན་ནི། སྟོར་བར་གྱུར་ཏེ་བདག་གིས་བཙལ་ཀྱང་མ་རྙེད་ན། ཇི་ལྟར་བྱ་སྙམ་མྱ་ངན་གྱིས་ཡི་མུག་སྟེ་འདུག་འདུག་པ་ལས་རྒྱང་མ་ནས་དེ་བཞིན་གཤེགས་པ་ཤིང་དྲུང་ན་དབང་པོ་ཀུན་ཞི་ཞིང་བདེ་བར་བཞུགས་པ་མཐོང་ངོ ། །བྲམ་ཟེ་དེས་འཁར་བ་ལ་སྐོམ་ཚུགས་བཅས་ཏེ་རྒྱང་ཚད་ཀྱི་བར་དུ་བརྟགས་ནས་ཡང་འདི་སྙམ་བ་བསམས་སོ། །དགེ་སྦྱོང་གཽ་ཏ་མ་ནི། རབ་ཏུ་བདེ་སྐྱིད་དོ། །དེ་ལ་ནི། ཆུང་མས་སྤྱོ་བ་ཡང་མེད། བུ་མོ་ངན་པ་དང ། མག་པས་གཙེ་བ་ཡང་མེད།
434b
> ཞིང་བརྔ་རན་ཏེ་གླང་བརྙ་ཡང་མི་དགོས་ཏེ་མྱ་ངན་མེད་དོ་སྙམ་བསམས་ནས་བཅོམ་ལྡན་འདས་ཀྱིས་དེའི་བསམ་པ་ཐུགས་ཀྱིས་མཁྱེན་ནས་དེ་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱིས་བསམ་པ་བཞིན་ཏེ། ང་ལ་ཡང་དག་པར་ཉེས་པའི་སྐྱོན་གང་ཡང་མེད། ཆུང་མ་ངན་པ་ཡང་མེད་ན། གཤེ་ཞིང་སྤྱོ་བ་ལྟ་ཅི་སྨོས། བུ་མོ་བདུན་གྱི་འཚེ་བ་ཡང་མེད།་མག་པ་ཁྱིམ་དུ་འདུ་བ་ཡང་མེད། ཞིང་བརྔ་རན་པ་དང ། གླང་སྟོར་བའི་མྱ་ངན་བྱེད་པ་ཡང་མེད་དོ། །ཁྱོད་རབ་ཏུ་འབྱུང་བར་དགའ་མ་ཞེས་བཀའ་སྩལ་པ་དང ། བྲམ་ཟེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ད་ལྟར་ཁྱིམ་ལ་དུར་ཙམ་དུ་འཛིན་ཏེ། ཆུང་མ་དང་བུ་མོ་ལ་དགྲ་ཙམ་དུ་སེམས་སོ། །བཅོམ་ལྡན་འདས་ཀྱིས་རབ་ཏུ་འབྱུང་བར་གནང་ན་བདག་རབ་ཏུ་འབྱུང་ངོ ། །ཞེས་གསོལ་པ་དང ། བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་པས། སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ཏོ། །དེ་ནས་བཅོམ་ལྡན་འདས་ཀྱིས་ཅི་རིགས་པར་ཆོས་བསྟན་ནས་དེ་ཉིད་དུ་དྲི་མ་ཀུན་ཟད་དེ་དགྲ་བཅོམ་པར་གྱུར་ཏོ། །དེ་ནས་ཀུན་དགའ་བོས་བཅོམ་ལྡན་འདས་ལ་གསོལ་པ། ལེགས་སོ། །བཅོམ་ལྡན་འདས་སེམས་ཅན་གྱི་དོན་མཛད་པ་བསམ་གྱིས་མི་ཁྱབ་བོ། །བྲམ་ཟེ་འདིས་སྔོན་ལེགས་པ་ཅི་ཞིག་བགྱིས་ན། ཉེས་པའི་
435a
> ༄#། །སྐྱོན་ཀུན་དང་བྲལ་ཏེ་རས་དཀར་པོ་གཙང་མ་ལ་ཚོན་ཞེན་སླ་བ་ལྟར་དགེ་བ་ལ་ཕན་པའི་དོན་བྱེད་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བྲམ་ཟེ་འདི་ད་ལྟར་འབའ་ཞིག་ངས་ཕན་བཏགས་ཏེ་བདེ་བར་བྱས་པ་མ་ཟད་ཀྱི། སྔོན་འདས་པའི་དུས་ན་ཡང་ཉེས་པ་ཀུན་ལས་ཐར་ཅིང་བདེ་བར་བྱས་སོ། །ཀུན་དགའ་བོས་གསོལ་པ། འདས་པའི་དུས་ན་བྲམ་ཟེ་འདི་ཇི་ལྟར་བདེ་བར་མཛད་པ་རྒྱས་པར་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ།་ཁྱོད་ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང ། ཁྱོད་ལ་བསྟན་པར་བྱའོ། །ཀུན་དགའ་བོས་གསོལ་བ། དེ་བཞིན་དུ་ཐོས་པར་འཚལ་ལོ། །ཞེས་གསོལ་པ་དང།་བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །སྔོན་འདས་པའི་བསྐལ་པ་གྲངས་མེད་ཚད་མེད་པའི་ཕ་རོལ་ན་རྒྱལ་པོ་མཛེས་པ་ཞེས་བྱ་བ་ཞིག་བྱུང་སྟེ།་ཆོས་བཞིན་དུ་སྲིད་འཚོའོ། །དེའི་ཚེ་ཡུལ་དེ་ན་བྲམ་ཟེ་དབྱིག་བ་ཅན་ཞེས་བྱ་བ་ཞིག་འདུག་སྟེ། རབ་ཏུ་དབུལ་ཕོངས་པ། བཟའ་བ་དང་བགོ་བ་མེད་པ་ཞིག་གོ ། དེས་ཁྱིམ་བདག་ཅིག་ལ་གླང་ཞིག་བརྙས་ཏེ་ཉིན་པར་སྤྱད་ནས་གླང་དེ་ཁྲིད་དེ་ཁྱིམ་བདག་དེའི་ཁྱིམ་དུ་སོང་བ་དང ། དེ་ན་ཁྱིམ་བདག་ནི། ཟན་ཟ་སྟེ། དབྱིག་པ་ཅན་གྱིས་
435b
> གླང་དེ་ཁྱིམ་གྱི་ནང་དུ་བཏང་བ་དང ། གླང་སྒོ་གཞན་དུ་སོང་ནས་སྟོར་ཏོ། །ཁྱིམ་བདག་དེ་ཟན་ཟོས་ནས་ལངས་པ་དང ། །དེ་ན་གླང་མ་མཐོང་ནས་དེས་དབྱིག་པ་ཅན་ལ་གླང་ག་རེ་ཞེས་བྱས་པ་དང ། དེས་སྨྲས་པ། ཁྱོད་ཀྱི་ཁྱིམ་དུ་བཏང་ངོ ། །ཁྱོད་ཀྱིས་ངའི་གླང་པོར་གྱི། གླང་སླར་བྱིན་ཅིག་ཅེས་སྨྲས་པ་དང ། དེས་སྨྲས་པ། ངས་མ་བོར་རོ། །དེ་ནས་དེ་གཉིས་འགྲོགས་ཏེ་རྒྱལ་པོའི་ཐད་དུ་འདོད་བ་དང ། འུ་བུ་ཅག་གི་རིགས་པ་དང ། མི་རིགས་པ་རྟོགས་སོ། །ཞེས་སྨྲས་ནས་དེ་གཉིས་དོང་བ་དང ། མི་གཞན་ཞིག་གི་རྟ་རྒོད་མ་ཞིག་བྲོས་ནས་དེས་དབྱིག་པ་ཅན་ལ་སྨྲས་པ། རྟ་རྒོད་མ་མ་བཏང་ཞེས་སྨྲས་ནས། དེས་རྡོ་བ་ཞིག་བླངས་ཏེ་འཕངས་པ་དང ། རྟའི་རྐང་པ་ལ་ཕོག་ནས་རྐང་པ་ཆག་གོ་།དེས་སྨྲས་པ། ཁྱོད་ཀྱིས་ངའི་རྟ་བསད་ཀྱི། ངའི་རྟ་བྱིན་ཅིག་།ཅིའི་ཕྱིར་རྟ་སྦྱིན། དེས་སྨྲས་པ། ཚུར་ཤོག་རྒྱལ་པོའི་དྲུང་དུ་འདོད་དང ། འུ་བུ་ཅག་གི་ཞལ་ཆེ་གཅོད་དོ། །ཞེས་སྨྲས་ནས་དེ་དག་དེར་སོང་བ་དང ། དབྱིག་པ་ཅན་དེ་འབྲོས་པར་བརྩམས་ཏེ། དེས་རྩིག་པ་ཞིག་གི་སྟེང་ནས་མཆོངས་པ་དང ། དེའི་དྲུང་ན་ཐ་ག་པ་ཞིག་ཐགས་འཐག་ཅིང་འདུག་པའི་སྟེང་དུ་ལྷུང་ནས་ཐ་ག་པ་དེ་ཚེ་འཕོས་པ་དང ། ཐ་ག་པའི་ཆུང་མས་དབྱིག་པ་ཅན་དེ་བཟུང་ནས་ཁྱོད་ཀྱིས་ངའི་ཁྱོ་བསད་ཀྱི། ངའི་ཁྱོ་བྱིན་ཅིག་ཅེས་སྨྲས་པ་དང ། ངས་ཁྱོད་ཀྱི་ཁྱོ་ཇི་ལྟར་སྦྱིན་ཞེས་སྨྲས་ནས་ཚུར་ཤོག་རྒྱལ་པོའི་དྲུང་དུ་འདོང་དང ། འུ་བུ་ཅག་
436a
> ༄#། །ཅག་གི་ཞལ་ཆེ་གཅོད་དོ། །ཞེས་དེ་དག་དོང་བ་ལས། ལམ་གྱི་བར་དེ་ན་ཆུ་པོ་གཏིང་ཟབ་པ་ཞིག་ཡོད་དོ། ཆུ་དེའི་ནང་ནས་ཚུར་ཤིང་མཁན་ཞིག་སྟེའུ་ཁ་ནས་ཁྱེར་ཏེ་འོང་ངོ ། །དེ་ལ་དབྱིག་པ་ཅན་གྱིས་ཆུའི་གཏིང་ཇི་ཙམ་ཞེས་དྲིས་པ་དང ། ཆུ་གཏིང་ཟབ་བོ། །ཞེས་སྨྲས་པས་སྟེའུ་ཆུར་ལྷུང་སྟེ། སྟེའུ་དེ་མ་རྙེད་པ་དང ། དེས་དབྱིག་པ་ཅན་བཟུང་ནས་ཁྱོད་ཀྱིས་ངའི་སྟེའུ་ཆུར་བསྐུར་རོ། །དེས་སྨྲས་པ། ངས་མ་བསྐུར་རོ། །ཚུར་ཤོག་རྒྱལ་པོའི་དྲུང་དུ་འདོང་དང ། འུ་བུ་ཅག་གི་ཞལ་ཆེ་གཅོད་དོ། །ཞེས་སྨྲས་ནས་དོང་ངོ ། །དེ་ལུས་ངལ་ནས་ཆང་ཚོང་གི་ཁྱིམ་དུ་སོང་སྟེ་ཆང་བསླངས་ནས་ཆང་ཚོང་མ་དེ་ལ་བུ་པོ་ཞིག་བཙས་ཏེ་བུ་གོས་ཀྱིས་གཡོགས་ཏེ་བསྙལ་བ་ལས། དབྱིག་པ་ཅན་དེའི་སྟེང་དུ་འདུག་པ་དང ། ཁྱེའུ་དེ་སྲོག་དང་བྲལ་བར་གྱུར་ཏོ། །དེས་ཀྱང་དགྱིག་པ་ཅན་དེ་བཟུང་སྟེ་ཁྱོད་ཀྱིས་ངའི་བུ་བསད་ཀྱི། ངའི་བུ་བྱིན་ཅིག་།དེས་སྨྲས་པ། ངས་ནི། མ་བསད་ན།་ཁྱོད་ཀྱི་བུ་ངས་ཇི་ལྟར་སྦྱིན། དེས་ཚུར་ཤོག་རྒྱལ་པོའི་དྲུང་དུ་འདོང་དང ། འུ་བུ་ཅག་གི་ཞལ་ཆེ་གཅོད་དོ། །ཞེས་སྨྲས་ནས་དེ་དག་དོང་བ་ལས་གནས་གཞན་ཞིག་ན་ཤིང་ཤ་ཀོ་ཏ་ཀ་ལ་བྱ་རོ་གཅིག་འདུག་པ་དེས་དབྱིག་པ་ཅན་དེ་མཐོང་ནས་གར་འགྲོ་ཞེས་སྨྲས་པ་དང ། ང་ནི། མི་འགྲོ་ན། འདི་དག་གིས་ང་ཁྲིད་དོ། །གང་དུ་ཁྲིད། རྒྱལ་པོའི་དྲུང་དུ་
436b
> དུའོ། །འོ་ན་ཁོ་པོའི་འཕྲིན་ཞིག་ཀྱང་རྒྱལ་པོ་ལ་བྱོས་ཤིག་།གནས་འདི་ཞེས་བགྱི་བ་ན། ཤིང་ཤ་ཀོ་ཏ་ཀ་དེ་ལ་བྱ་རོག་ཅིག་འདུག་པ། བདག་ཤིང་གཞན་གྱི་ཁ་ན་འདུག་པའི་ཚེ་སྐད་མི་སྙན་ལ་ཤིང་འདིའི་ཁར་འོངས་ན་སྐད་དོ་མཚར་དུ་སྙན་ན། དེ་ཅིའི་ཕྱིར་ཞེས་དེ་སྐད་མཆིའོ། །ཞེས་སྨྲོས་ཤིག་།དེ་ནས་ཡང་གནས་གཞན་ཞིག་ཏུ་སྦྲུལ་ཞིག་གིས་མཐོང་ནས་སྔ་མ་བཞིན་དུ་བདག་གི་འཕྲིན་འདི་ཡང་ཞུས་ཤིག་།བདག་ནམ་ཁུང་ནས་ཕྱིར་འབྱུང་བའི་ཚེ་ནི། བདེ། སླར་འཇུག་པའི་ཚེ་སྡུག་བསྔལ་ན། ཅིའི་ཕྱིར་དེ་ལྟར་གྱུར་ཅེས་ཞུས་ཤིག་།དེ་དག་དོང་བ་ལས་གནས་གཞན་ཞིག་ན་ན་ཆུང་མ་གཞོན་ནུ་ཞིག་གིས་མཐོང་ནས་སྔ་མ་བཞིན་དུ་ཁོ་མོའི་འཕྲིན་ཡང་ཞུས་ཤིག་།ནམ་ཁོ་མོ་ཕའི་ཁྱིམ་ན་འདུག་པའི་ཚེ་ན་གྱོས་པོའི་ཁྱིམ་འདོད། གྱོས་པོའི་ཁྱིམ་ན་འདུག་པའི་ཚེ་ཕའི་ཁྱིམ་འདོད་ན། ཅིའི་ཕྱིར་ཞུས་ཤིག་ཅེས་སྨྲས་ནས་དེ་དག་དོང་བ་ལས་རྒྱལ་པོའི་དྲུང་དུ་ཕྱིན་པ་དང ། དེ་དག་རྒྱལ་པོའི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།དེ་ནས་རྒྱལ་པོས་དེ་དག་ལ་ཁྱོད་ཅི་ལ་འོངས་ཞེས་དྲིས་པ་དང ། དེ་དག་གིས་དབྱིག་པ་ཅན་དང་ཁྱིམ་བདག་རྩོད་པ་དེ་དག་ཐམས་ཅད་ལ་སྨྲས་སོ། །རྒྱལ་པོས་དབྱིག་པ་ཅན་ལ་སྨྲས་པ། ཁྱོད་ཀྱིས་གླང་བརྙས་སམ། བརྙས་སོ། །འོ་ན་ཕྱིར་བྱིན་ནམ། གླང་བདག་གིས་མཐོང་བར་བྱིན་ཏེ། ཁས་ནི། མ་གཏད་དོ། །རྒྱལ་
437a
> ༄#། །པོས་སྨྲས་པ། ད་ཕྱིག་པ་ཅན་འདིས་གླང་ཕྱིར་བྱིན་ཏེ་མ་སྨྲས་པས་ན། ལྕེ་ཆོད་ཅིག་།ཁྱིམ་བདག་ཀྱང་གླང་འོངས་པར་མཐོང་ལ་མ་བཏགས་པས་ན།་མིག་ཕྱུང་ཞིག་ཅེས་བཅད་དོ། །ཁྱིམ་བདག་གིས་སྨྲས་པ། དབྱིག་པ་ཅན་འདིས་གཅིག་ཏུ་ན་བདག་གི་གླང་འཕྲོག་།གཉིས་སུ་ན་བདག་གི་མིག་ཕྱུང་བ་བས། དབྱིག་པ་ཅན་རྒྱལ་བར་གྱུར་ཀྱང་བླའོ། །མི་གཅིག་གིས་ལྷ། དབྱིག་པ་ཅན་འདིས་བདག་གི་རྟ་རྒོད་མ་བཀུམ་མོ། །ཞེས་སྨྲས་པ་དང ། རྒྱལ་པོས་དབྱིག་པ་ཅན་ལ་ཁྱོད་ཀྱིས་རྟ་ཇི་ལྟར་བསད་ཅེས་དྲིས་ན། བདག་ལམ་དུ་ཞུགས་ཏེ་མཆི་བ་ལས། མི་འདིས་རྟ་མ་གཏང་ཞིག་ཅེས་མཆིས་ནས་བདག་གིས་རྡོ་བ་ཞིག་བླངས་ཏེ་འཕངས་པ་ལས་རྟ་གུམ་མོ།། རྒྱལ་པོས་སྨྲས་པ། རྟ་བདག་གིས་རྟ་མ་གཏང་ཞིག་ཅེས་སྨྲས་པས། རྟ་བདག་ནི། ལྕེ་ཆོད་ཅིག་།དབྱིག་པ་ཅན་ནི། རྡོ་བ་འཕངས་པས་ལག་པ་ཆོད་ཅིག་།མི་དེས་སྨྲས་པ། གཅིག་ཏུ་ན་བདག་གི་རྟ་བསད། གཉིས་སུ་ན་བདག་གི་ལྕེ་བཅད་པ་བསད་དབྱིག་པ་ཅན་རྒྱལ་བར་གྱུར་ཀྱང་བླའོ། །ཤིང་མཁན་གྱིས་སྨྲས་པ། དབྱིག་པ་ཅན་གྱིས་བདག་ལ་ཆུའི་གཏི་ང་ཇི་ཙམ་དུ་བབས་ཞེས་དྲིས་པས། ཁ་ནས་སྟེའུ་ཐོགས་པ་ཆུར་ལྷུང་ངོ ། །ཞེས་གསོལ་པ་དང ། རྒྱལ་པོས་སྨྲས་པ། རྫས་ཅི་འཁྱེར་ཡང་ཕྲག་པ་ལ་བཀུར་
437b
> བའི་རིགས་ཀྱི་ཁ་ནས་ཁྱེར་བས་ཤིང་མཁན་གྱི་མདུན་སོ་གཉིས་ཆོག་ཅིག་།དབྱིག་པ་ཅན་ནི། ཆུ་གཏིང་ཟབས་སམ་ཞེས་དྲིས་པས་ལྕེ་ཆོད་ཅིག་།ཤིང་མཁན་གྱིས་སྨྲས་པ། གཅིག་ཏུ་ན་བདག་གི་སྟེའུ་སྟོར། གཉིས་སུ་ན་བདག་གི་སོ་བཅག་པ་བས་དབྱིག་པ་ཅན་རྒྱལ་བར་གྱུར་ཀྱང་བླའོ། །ཆང་ཚོང་མས་སྨྲས་པ། དབྱིག་པ་ཅན་གྱིས་བདག་གི་བུ་བསད་དོ། །དབྱིག་པ་ཅན་གྱིས་སྨྲས་པ། བདག་ངལ་བས་ཆང་སློང་དུ་མཆིས་པས་སྟན་ལ་མ་བལྟས་པར་སྟན་ལ་འདུག་པས། འོག་ན་བུ་མཆིས་པ་མ་ཚོར་ཏེ་བུ་གུམ་མོ། །རྒྱལ་པོས་སྨྲས་པ། ཆང་ཚོང་མ་ཁྱོད་བུ་གོར་བསྙལ་ལ་གོས་ཀྱིས་མི་མངོན་པར་གཡོགས་པས་ཉེས་སོ། །དབྱིག་པ་ཅན་ཁྱོད་སྟན་ལ་མི་རྟོག་པར་འདུག་པ་ཡང་ཉེས་ཀྱི། དབྱིག་པ་ཅན་ཁྱོད་ཁྱོར་བྱོས་ལ་བུ་ཡོད་པར་གྱིས་ཤིག་ཅེས་སྨྲས་སོ། །ཆང་ཚོང་མས་སྨྲས་པ། གཅིག་ཏུ་ན་བདག་གི་བུ་བསད། གཉིས་སུ་ན་ཁྱོ་བྱས་པ་བས་དབྱིག་པ་ཅན་རྒྱལ་བར་གྱུར་ཀྱང་བླའོ། །ཐ་ག་པའི་ཆུང་མས་སྨྲས་པ། དབྱིག་པ་ཅན་གྱིས་བདག་གི་ཁྱོ་བཀུམ་མོ། །དབྱིག་པ་ཅན་གྱིས་སྨྲས་པ། བདག་ལ་དགྲ་མང་པས་འཇིགས་ཏེ་རྩིག་པ་རྒལ་ནས་བྲོས་པ་ལས། ཕག་ན་མི་ཡོད་པ་མ་མཐོང་སྟེ་གུམ་མོ། །རྒྱལ་པོས་སྨྲས་པ། སོང་ལ་འདི་ཉིད་ཁྱོད་ཀྱི་ཁྱོར་གྱིས་ཤིག་།དེས་སྨྲས་པ། གཅིག་ཏུ་ན་བདག་གི་ཁྱོ་བསད།
438a
> ༄#། །གཉིས་སུ་ན་བདག་གི་ཁྱོ་བྱས་པ་བས། དབྱིག་པ་ཅན་རྒྱལ་བར་གྱུར་ཀྱང་བླའོ། །དེ་དག་སོ་སོ་ནས་ཞལ་ཆེ་བཅད་དེ་དབྱིག་པ་ཅན་ཡུས་བྱིན་ནས་ཉེས་པ་ཀུན་ལས་ཐར་ཏོ། །རྒྱལ་པོ་དེ་ལ་ཡང་བུད་མེད་གཉིས་ཤིག་བུ་གཅིག་ལ་རྩོད་དེ། རྒྱལ་པོ་བློ་མཁས་པས་བརྟགས་ནས་བུད་མེད་གཉིས་ལ་འདི་སྐད་ཅེས་བསྒོའོ། །ཁྱེད་གཉིས་ཀྱིས་བུའི་ལག་པ་རེ་རེ་ནས་བཟུང་སྟེ་དྲོངས་ལ་གང་གིས་ཐོབ་པ་བུར་ཁྱེར་ཅིག་ཅེས་བསྒོ་བ་དང ། བུའི་མ་མ་ཡིན་པ་དེས་ནི། བུ་ལ་སྙིང་རྗེ་མེད་པས་སྣང་ཀྱིས་མི་དོགས་ཏེ་མཐུ་ཅི་ཡོད་པས་དྲངས་སོ། །བུའི་མ་གང་ཡིན་པ་དེས་ནི། བུ་ལ་བྱམས་པས་སྣད་ཀྱིས་དོགས་ཏེ་སྟོབས་ཀྱིས་ཐུབ་ཀྱང་དྲག་ཏུ་མི་འདྲེན་ནོ། །རྒྱལ་པོས་ཀྱང་རྟོགས་ནས་དྲག་ཏུ་དྲངས་པ་དེ་ལ་འདི་ནི། ཁྱོད་ཀྱི་བུ་མ་ཡིན་ཏེ། བུད་མེད་གཅིག་ཤོས་ཀྱི་བུ་ཡིན་པས་ན། དྲང་པོར་སྨོས་ཤིག་ཅེས་བྱས་པ་དང ། དལ་གྱིས་འདྲེན་པའི་བུ་ཡིན་པར་གྱུར་ཏེ་བུ་ཁྱེར་རོ། །དེ་ནས་ཡང་མི་གཉིས་ཤིག་རས་ཡུག་ཅིག་ལ་རྩོད་དེ། རྒྱལ་པོའི་དྲུང་དུ་འོངས་པ་ལས་རྒྱལ་པོས་བརྟགས་ནས་ཞལ་ཆེ་གོང་མ་བཞིན་དུ་བཅད་དོ། །དེ་ནས་དབྱིག་པ་ཅན་གྱིས་རྒྱལ་པོ་ལ་འདི་སྐད་ཅེས་གསོལ་ཏོ། །འདི་དག་གིས་བདག་བཟུང་སྟེ་ཁྲིད་ཅིང་མཆི་བ་ན་སྤྲུལ་ཞིག་གི་འཕྲིན་དུ་འདི་སྐད་ཅེས་མཆིའོ། །བདག་
438b
> ཁུང་བུ་ནས་ཕྱིར་འབྱུང་བའི་ཚེ་ནི། བདེ། སླར་འཇུག་པའི་ཚེ་ནི། སྡུག་བསྔལ་ན། ཅིའི་ཕྱིར་དེ་ལྟར་གྱུར་པ་ཤེས་ཤིག་ཅེས་མཆིའོ། །རྒྱལ་པོས་སྨྲས་པ། སྤྲུལ་དེ་ལ་ཁྱོད་ཀྱིས་འདི་སྐད་ཅེས་གྱིས་ཤིག་།ཁྱོད་མ་ཁྲོ་ཞིང་བཀྲེས་པས་ཁུང་ནས་བྱུང་བའི་ཚེ་བདེའོ། །ཕྱིར་བྱུང་ནས་ཁ་ཟས་མང་དུ་ཟོས་ལ་བྱ་རྣམས་ཀྱིས་གཙོས་པས་ཁྱོད་ཁྲོས་ཏེ་སྦོམ་པོར་གྱུར་པས་སླར་འཇུག་པའི་ཚེ་ཁུང་བུ་ལ་ཐོགས་ནས་སྡུག་བསྔལ་ལོ། །ཞེས་གྱིས་ཤིག་།ཁྱོད་ཀྱིས་དེ་སྟེ་ཁ་ཟས་ཀྱི་ཚོད་ཤེས་ལ་མི་ཁྲོ་ན། ཇི་ལྟར་ཕྱིར་འབྱུང་བ་དང་འདྲ་བར་བདེ་བར་འདུག་གོ་།ཞེས་སྨོས་ཤིག་།དེ་ནས་ན་ཆུང་མ་གཞོན་ནུའི་འཕྲིན་སྨྲས་པ་དང ། རྒྱལ་པོས་སྨྲས་པ། ན་ཆུང་མ་གཞོན་ནུ་དེ་ལ་ཁྱོད་ཀྱི་ཕའི་ཁྱིམ་ན་མཛའ་བོ་ཞིག་འདུག་སྟེ། ནམ་གྱོས་པོའི་ཁྱིམ་ན་འདུག་པ་དེའི་ཚེ་ནི། མཛའ་བོ་ལ་ཆགས་པས་ཕའི་ཁྱིམ་དུ་འགྲོ་འདོད་དོ། །ནམ་པའི་ཁྱིམ་ན་འདུག་པ་དེའི་ཚེ་ནི། མཛའ་བོར་སྐྱོ་སྟེ་ཁྱོ་ལ་ཆགས་པས་གྱོས་པོའི་ཁྱིམ་དུ་འགྲོ་འདོད་པ་ཡིན་གྱི། གནས་གཅིག་སྤངས་ལ་གཅིག་ལེགས་པར་ཟུངས་ཤིག་དང ། དེ་ལྟ་བུའི་གནོད་པ་མེད་པར་འགྱུར་རོ། །ཞེས་སྨྲོས་ཤིག་།གནས་གཞན་ཞིག་ན་ཤིང་ཤ་ཀོ་ཏ་ཀ་ལ་བྱ་རོ་གཅིག་འདུག་པའི་འཕྲིན་སྨྲས་པ་དང ། རྒྱལ་པོས་སྨྲས་པ། ཤིང་དེའི་འོག་ན་གསེར་ཡོད་པས་ཁྱོད་ཀྱི་སྐད་སྙན་པ་ཡིན་ནོ། །ཤིང་གཞན་གྱི་དྲུང་ན་གསེར་མེད་པས་སྐད་མི་སྙན་ནོ། །ཞེས་གྱིས་ཤིག་།རྒྱལ་པོས་དབྱིག་པ་ཅན་ལ་སྨྲས་པ །
439a
> ༄#། །ཁྱོད་ལ་ཉེས་པ་མང་དུ་བྱུང་ཡང་ངས་བཏང་ངོ ། །ཁྱོད་ནི། དབུལ་ཕོངས་ཀྱི། ཤིང་གི་འོག་ན་གསེར་གྱི་གཏེར་ཡོད་པ་རྐོས་ལ་ཁྱེར་ཅིག་།དབྱིག་པ་ཅན་གྱིས་རྒྱལ་པོས་བསྒོ་བ་བཞིན་དུ་སོ་སོའི་འཕྲིན་ཡང་བསྒོས་ནས་ཤིང་དྲུང་ནས་གསེར་ཡང་བྱུང་སྟེ་ཁྱེར་རོ། །དེ་ཕྱིན་ཆད་སོ་ཆོས་ཚུགས་ནས་ཅིས་ཀྱང་མི་བྲེལ་ཏེ་ཚེ་གཅིག་ཏུ་ཕྱུག་ཅིང་བདེ་སྐྱིད་པར་གྱུར་ཏོ། །ཀུན་དགའ་བོ། དེའི་ཚེ་དེའི་དུས་ན་རྒྱལ་པོ་མཛེས་པ་དེ་ལ་གཞན་དུ་མ་སེམས་ཤིག་།དེ་ནི། ད་ལྟར་ང་ཡིན་ནོ། །དེའི་ཚེ་དེའི་དུས་ན་བྲམ་ཟེ་དབྱིག་པ་ཅན་དེ་ནི། བྲམ་ཟེ་ཕྱིན་ཏེ་ལོ་ཤུ་ཤ་ཡིན་ནོ། །ངས་སྔོན་ཡང་སྡུག་བསྔལ་ཐམས་ཅད་ལས་ཐར་པར་བྱས་ཏེ་རིན་པོ་ཆེ་བྱིན་ནས་བདེ་སྐྱིད་པར་བྱས་སོ། །ང་མངོན་པར་སངས་རྒྱས་ནས་ཀྱང་སྡུག་བསྔལ་ལས་ཐར་པར་བྱས་ཏེ་ཟད་མི་ཤེས་པའི་ཆོས་རིན་པོ་ཆེའི་གཏེར་བྱིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །ཁྱིམ་བདག་དབྱིག་པ་ཅན་ཞེས་བྱ་བའི་སྟེ་ལེའུ་སུམ་ཅུ་དགུ་པའོ།། །།བྲམ་ཟེ་ཤིན་ཙིར་ཞེས་བྱ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །
439b
> དེའི་ཚེ་ཡུལ་དེ་ན་བྲམ་ཟེ་ཤིན་ཙིར་ཞེས་བྱ་བའི་ཚེ་རིགས་བཙུན་ཞིང་ཕྱུག་པ་ཞིག་ཡོད་དེ། བུ་མེད་པས་སྟོན་པ་དྲུག་གི་ཐད་དུ་སོང་སྟེ་དྲིས་པ་དང ། སྟོན་པ་དྲུག་གིས་ཀྱང་ཁྱོད་ལ་བུའི་མཚན་མ་ཡོང་མེད་དོ། །ཞེས་སྨྲས་སོ། །དེ་ནས་བྲམ་ཟེ་ཕྱིར་ཁྱིམ་དུ་འོངས་ནས་གོས་དྲི་མ་ཅན་གྱོན་ཏེ་མྱ་ངན་གྱི་ཁང་བུར་ཞུགས་ནས་མི་དགའ་སྟེ་འདི་སྙམ་དུ་བསམས་སོ། །བདག་ལ་བུ་ནི། མེད་ཀྱི། གལ་ཏེ་ནང་གཅིག་ཚེའི་དུས་བྱས་ན་ཁྱིམ་དང་ནོར་རྫས་བཅས་སུ་རྒྱལ་པོས་བཞེས་སོ་སྙམ་བསམས་ནས་རབ་ཏུ་མི་དགའ་ཞིང་འདུག་གོ་།དེའི་ཚེ་བྲམ་ཟེ་དེའི་ཆུང་མ་དགེ་སློང་མ་དང་བཤེས་སོ། །དགེ་སློང་མ་དེ་བྲམ་ཟེ་དེའི་ཁྱིམ་དུ་འོངས་ནས་བྲམ་ཟེ་དེ་ཤིན་ཏུ་མི་དགའ་ཞིང་མྱ་ངན་གྱིས་ཡི་མུག་པར་མཐོང་ནས་ཆུང་མ་ཁྱོད་ཀྱི་ཁྱོ་ཅིའི་ཕྱིར་མི་དགའ་ཞེས་དྲིས་པ་དང ། བྲམ་ཟེའི་ཆུང་མས་སྨྲས་པ། བདག་ཅག་ལ་བུ་མེད་དེ་སྟོན་པ་དྲུག་ལ་དྲིས་ན། ཁྱོད་ལ་བུའི་མཚན་མ་མེད་དོ། །ཞེས་བསྒོ་བས་མི་དགའ་ཞིང་མྱ་ངན་བྱེད་དོ། །དེ་ནས་དགེ་སློང་མ་དེ་དེས་སྨྲས་པ། སྟོན་པ་དྲུག་ནི། ཐམས་ཅད་ཤེས་པ་མ་ཡིན་ན། དེས་ལས་ཀྱི་རྒྱུ་རྐྱེན་ག་ལ་ཞིག་རིག་།དེ་བཞིན་གཤེགས་པ་འཇིག་རྟེན་ན་བཞུགས་ཏེ། ཐམས་ཅད་རྟོགས་ཤིང་མཁྱེན་པས་འདས་པ་དང ། མ་འོངས་པ་ལ་ཐོགས་པ་མེད་ན། ཅིའི་ཕྱིར་བུ་ཡོད་དམ་མེད་ཅེས་མི་འདྲི་ཞེས་བསྒོའོ། །དགེ་སློང་མ་དེ་ཕྱིར་སོང་ནས་བྲམ་ཟེའི་ཆུང་མས་ཁྱོ་དེ་ལ་དེ་སྐད་ཅེས་
440a
> ༄#། །སྨྲས་པ་དང ། བྲམ་ཟེ་དེ་དགའ་རངས་ནས་རྟོགས་ཤིང་ཁོང་དུ་ཆུད་པར་གྱུར་ཏེ། དེ་མ་ཐག་ཏུ་གོས་གསར་པ་བགོས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ་བཅོམ་ལྡན་འདས། བདག་ལ་མཚན་དང ། དབང་ཐང་གི་བུ་མ་མཆིས་སམ་ཞེས་གསོལ་པ་དང ། བཅོམ་ལྡན་འདས་ཀྱིས་བྲམ་ཟེ། ཁྱོད་ལ་བུ་ཡོད་པར་འགྱུར་ཏེ། བསོད་ནམས་དང་ཡང་ལྡན་ལ། ཆེར་སྐྱེས་ནས་རབ་ཏུ་འབྱུང་བ་ལ་དགའ་བར་འགྱུར་རོ། །ཞེས་བཀའ་སྩལ་ཏོ། །བྲམ་ཟེས་དེ་སྐད་ཅེས་བཀའ་སྩལ་པ་ཐོས་ནས་རབ་ཏུ་དགའ་མགུ་རངས་ཏེ་བུ་ཡོད་པར་གྱུར་ན་ལྟ་རབ་ཏུ་བྱུང་ཡང་བླ་སྟེ། སྡུག་བསྔལ་མེད་དོ། །ཞེས་སྨྲས་ནས་བཅོམ་ལྡན་འདས་དང ། དགེ་སློང་གི་དགེ་འདུན་རྣམས་བཤོས་ལ་གཤེགས་པར་སྤྱན་དྲངས་པ་དང ། བཅོམ་ལྡན་འདས་ཀྱིས་ཅང་མི་གསུང་བས་གཤེགས་སུ་གནང་སྟེ། ཕྱི་ཉིན་གདུགས་ཚོད་ལ་བབ་པ་ནས་སངས་རྒྱས་དང་དགེ་འདུན་རྣམས་དང་བཅས་སུ་བྲམ་ཟེ་དེའི་ཁྱིམ་དུ་གཤེགས་ནས་གདན་བཏིང་བ་ལ་བཞུགས་ཏེ། བྲམ་ཟེ་ཁྱོ་ཤུག་གིས་བསྟི་སྟང་དང་བཅས་པས་བསོད་སྙོམས་གསོལ་ཏོ། །བསོད་སྙོམས་གསོལ་ནས་སངས་རྒྱས་དང་དགེ་འདུན་རྣམས་དང་བཅས་སུ་སླར་གཤེགས་པ་དང ། དེའི་བར་ན་ནེའུ་གསིལ་ཞིག་ཡོད་དེ། ཆུ་མིག་ཤིན་ཏུ་གཙང་
440b
> མ་ཞིག་ཡོད་པ་ལ་བཅོམ་ལྡན་འདས་དང ། དགེ་སློང་གི་དགེ་འདུན་རྣམས་མཉེལ་བ་ཤོལ་ཏེ་སོ་སོ་ནས་ཆུ་མིག་དེ་ལ་བཅུས་ནས་ལྷུང་བཟེད་དང་རྐང་ལག་བཀྲུས་སོ། །དེ་ནས་སྤྲེའུ་ཞིག་དེར་འོངས་ཏེ་ཀུན་དགའ་བོ་ལས་ལྷུང་བཟེད་བླངས་པ་དང་བཅག་གིས་དོགས་པས་ཀུན་དགའ་བོས་ལྷུང་བཟེད་མ་སྟེར་བ་ལས། བཅོམ་ལྡན་འདས་ཀྱིས་ཀུན་དགའ་བོ་ལ་ལྷུང་བཟེད་སྤྲེའུ་ལ་བྱིན་ཅིག་ཅེས་བཀའ་སྩལ་ཏོ། །དེ་ནས་ཀུན་དགའ་བོས་ལྷུང་བཟེད་སྤྲེའུ་ལ་བྱིན་པ་དང ། སྤྲེའུས་ཤིང་ཁ་ནས་སྦྲང་རྩི་བླངས་ཏེ་ལྷུང་བཟེད་བཀང་ནས་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་སྦྲང་རྩིའི་ནང་གི་མི་གཙང་བ་ཕྱུང་ཞིག་ཅེས་བཀའ་སྩལ་པ་དང ། སྤྲེའུས་སྲིན་བུའི་རོ་ལ་སོགས་པ་བསལ་ཏེ་ཕུལ་ལོ། །བཅོམ་ལྡན་འདས་ཀྱིས་སྦྲང་རྩིའི་ལྷུང་བཟེད་བཞེས་ནས་སྦྲང་རྩི་ཆུ་དང་སྦྱོར་ལ་སྩོལ་ཅིག་ཅེས་བཀའ་སྩལ་ནས་ཆུ་དང་སྦྱར་ཏེ་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་བཞེས་ནས་དགེ་སློང་གི་དགེ་འདུན་རྣམས་ལ་ཡང་བགོས་ཏེ་བྱིན་ནས་ཐམས་ཅད་ངོམས་པར་གྱུར་ཏོ། །དེའི་ཚེ་སྤྲེའུ་དེས་འདི་ལྟ་བུ་དག་མཐོང་ནས་རབ་ཏུ་དགའ་སྟེ་མཆོངས་པ་དང ། གར་བྱས་པ་ལས་གཡང་དུ་ལྷུང་སྟེ་ཚེའི་དུས་བྱས་ནས་དེ་མ་ཐག་ཏུ་བྲམ་ཟེའི་བུར་སྐྱེས་ཏེ། བྲམ་ཟེ་དེའི་ཆུང་མ་སེམས་ཅན་དང་ལྡན་པར་གྱུར་ཏེ་ཟླ་བ་ཚང་ནས་བུ་ཁྱེའུ་བཟང་བ། བལྟ་
441a
> ༄#། །ན་སྡུག་པ་ཞིག་བཙས་སོ། །ཐོག་མ་བཙས་པའི་ཚེ་ཁྱིམ་གྱི་ནང་ན་སྣོད་ཅི་ཡོད་པ་དེ་དག་ཐམས་ཅད་ཀྱི་ནང་ན་སྦྲང་རྩིས་གང་བར་གྱུར་ཏོ། །བྲམ་ཟེ་ཁྱོ་ཤུག་རབ་ཏུ་དགའ་ནས་མཚན་མཁན་པོས་ཏེ་མཚན་བལྟས་སོ། །མཚན་མཁན་གྱིས་ཁྱེའུ་འདི་བཅས་པ་ན་ལྟས་སམ། ཡ་མཚན་ཅི་ཞིག་བྱུང་ཞེས་དྲིས་ན། ཐོག་མ་བཙས་པའི་ཚེ་སྦྲང་རྩིས་གང་ངོ ། །ཞེས་སྨྲས་ནས་བུའི་མིང་ཡང་སྦྲང་རྩི་མཆོག་ཅེས་བཏགས་སོ། །དེ་ནས་གསོས་བསྐྱེད་དེ་ཆེར་སྐྱེས་པ་དང ། ཕ་མ་ལ་རབ་ཏུ་འབྱུང་བར་གསོལ་ཏོ། །ཕ་མས་བུ་ལ་ཆགས་པས་མ་བཏང་ངོ ། །ཁྱེའུས་ཡང་དང་ཡང་དུ་གསོལ་ཏེ་ཕ་མས་བདག་གི་བགེགས་བགྱིས་ན། བདག་འགུམ་ཕོད་ཀྱི། འདུ་འཛིའི་ནང་དུ་འཚོ་མི་ཕོད་དོ། །ཞེས་སྨྲས་སོ། །དེ་ནས་ཁྱེའུའི་ཕ་མས་བགྲོས་ཏེ། སྔོན་བཅོམ་ལྡན་འདས་ཀྱིས་ཀྱང་རབ་ཏུ་འབྱུང་ངོ ། །ཞེས་ལུང་བསྟན་ཏེ། ད་བར་ཆད་བྱས་ན་སྲོག་དང་བྲལ་བར་གྱུར་དུ་འོང་གི་།གནང་བར་བྱའོ། །ཞེས་གྲོས་བྱས་ནས་བུ་ལ་ཁྱོད་ཡིད་བཞིན་དུ་རབ་ཏུ་འབྱུང་བར་གནང་ངོ ། །ཞེས་བསྒོའོ། །དེ་ནས་ཁྱེའུ་དགའ་མགུ་རངས་ཏེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། ཞབས་ལ་སྤྱི་བོར་ཕྱག་འཚལ་ཏེ་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་ཀྱང་ལེགས་པར་འོངས་སོ། །ཞེས་བཀའ་སྩལ་པས། སྐྲ་དང་ཁ་སྦུ་རང་བྱི་
441b
> སྟེ་དགེ་སློང་དུ་གྱུར་ཏོ། །དེ་ནས་བདེན་པ་བཞིའི་ཆོས་རྒྱས་པར་བསྟན་པས་སེམས་རྣམ་པར་གྲོལ་ཏེ་ཟག་པ་ཀུན་ཟད་ནས་དགྲ་བཅོམ་པར་གྱུར་ཏོ། །དགེ་སློང་དག་དང་ཕན་ཚུན་སེམས་ཅན་གྱི་དོན་ལ་འགྲོ་བའི་ཚེ་གལ་ཏེ་སྐོམ་མམ་ངལ་ན་ནམ་མཁའ་ལ་ལྷུང་བཟེད་བོར་བས། སྦྲང་རྩིས་རང་གང་སྟེ་ཀུན་དང་ཐུན་མོང་དུ་འཐུང་ངོ ། །དེ་ནས་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་སྦྲང་རྩི་མཆོག་གིས་སྔོན་བསོད་ནམས་ཅི་ཞིག་བགྱིས་ན། རབ་ཏུ་བྱུང་ནས་རིང་བོ་མ་ལོན་པར་དགྲ་ཡང་བཅོམ་ལ་བསམ་པ་ཡིད་བཞིན་དུ་ཐོབ་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་སྔོན་བྲམ་ཟེ་ཤིན་ཙིར་གྱིས་བོས་པ་དྲན་ནམ། གསོལ་པ། དྲན་ནོ། །ཀུན་དགའ་བོ།་ཁྱོད་ཀྱིས་ཟས་ཀྱི་བྱ་བ་བྱས་ནས་ནེའུ་གསིང་ལ་བསྟི་བ་ན་སྤྲེའུ་ཞིག་གིས་ཁྱོད་ལས་ལྷུང་བཟེད་བླངས་ཏེ་སྦྲང་རྩིས་བཀང་ནས་ང་ལ་ཕུལ་བ་དང ། སྤྲེའུ་དགའ་ནས་མཆོངས་པ་དང ། གར་བྱས་པ་ལས་གཡང་དུ་སོང་སྟེ་ཚེ་བརྗེས་པ་དྲན་ནམ། གསོལ་པ། དྲན་ནོ། །ཀུན་དགའ་བོ། དེའི་ཚེ་ན་སྦྲང་རྩི་ཕུལ་བའི་སྤྲེའུ་དེ་ནི། དགེ་སློང་སྦྲང་རྩི་མཆོག་འདི་ཡིན་ནོ། །སངས་རྒྱས་མཐོང་ནས་དགའ་བའི་སེམས་ཀྱིས་སྦྲང་རྩི་ཕུལ་བས་བྲམ་ཟེ་དེའི་ཕུར་སྐྱེས་ཏེ་བྱད་གཟུགས་བཟང་བ་དང ། རབ་ཏུ་བྱུང་ནས་ཀྱང་ཟག་པ་མེད་པར་གྱུར་ཏོ། །དེ་ནས་
442a
> ༄#། །ཀུན་དགའ་བོས་པུས་མོའི་ལྷ་ང་ས་ལ་བཙུགས་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་འདིས་ཉེས་པ་ཅི་ཞིག་བགྱིས་ན། སྤྲེའུའི་ནང་དུ་སྐྱེས་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་པའི་ཚེ་དགེ་སློང་གསར་ཞུགས་གཞོན་ནུ་ཞིག་གིས་དགེ་སློང་ཞིག་ཡུར་བ་ལ་མཆོངས་པ་མཐོང་ནས་འདི་སྐད་དུ་ཁྱོད་ནི། རབ་ཏུ་མྱུར་ཏེ། སྤྲེའུ་དང་འདྲའོ། །ཞེས་སྨྲས་པ་དང ། དགེ་སློང་དེས་ཐོས་ནས་དེ་ལ་འདི་སྐད་ཅེས་སྨྲས་སོ། །ཁྱོད་ཀྱིས་ང་ཤེས་སམ། སྨྲས་པ། ཁྱོད་ནི། སངས་རྒྱས་འོད་སྲུང་གི་དགེ་སྦྱོང་ཡིན་ན། ཅིའི་ཕྱིར་མི་ཤེས། དགེ་སློང་དེས་ཡང་སྨྲས་པ། ཁྱོད་ང་ལ་མ་འཕྱ་ཞིག་།ང་ནི། མིང་ཙམ་གྱི་དགེ་སྦྱོང་མ་ཡིན་ཏེ། དགེ་སྦྱོང་གི་འབྲས་བུ་བཞི་ཡང་ངས་ཐོབ་བོ། །ཞེས་བསྒོ་བ་དང ། དགེ་སློང་གཞོན་ནུ་དེ་སྡངས་ཏེ་བསྡུ་ཡང་ལངས་ནས་ལུས་སྨད་ལྔ་ས་ལ་གཏུགས་ཏེ་འགྱོད་ཚངས་གསོལ་ཏོ། །དེ་ལྟར་འགྱོད་ཚངས་བྱས་པས་ནི། སེམས་ཅན་དམྱལ་བར་མ་སྐྱེས་སོ། །དགྲ་བཅོམ་པ་ལ་འཕྱ་བས་ནི། སྐྱེ་བ་ལྔ་བརྒྱའི་བར་དུ་རྟག་ཏུ་སྤྲེའུར་སྐྱེས་སོ། །སྔོན་ཡང་རབ་ཏུ་བྱུང་སྟེ་ཚུལ་ཁྲིམས་བསྲུངས་པས། ད་ང་དང་ཕྲད་ནས་བཀྲུས་པ་བཞིན་དུ་སྡུག་བསྔལ་ཀུན་ཟད་དོ། །ཀུན་
442b
> དགའ་བོ། དེའི་ཚེ་དེའི་དུས་ན་དགེ་སློང་གཞོན་ནུ་དེ་ད་ལྟར་སྦྲང་རྩི་མཆོག་ཡིན་ནོ། །དེའི་ཚེ་ན་ཀུན་དགའ་བོ་དང ། འཁོར་མང་པོ་རྣམས་སངས་རྒྱས་ཀྱིས་གསུངས་པ་ཐོས་ནས་ཀུན་གྱིས་འདི་སྐད་ཅེས་སྨྲས་སོ། །ལུས་དང་ངག་དང་ཡིད་ཀྱི་ལས་ནི། མི་སྲུང་དུ་མི་རུང་ངོ ། །དགེ་སློང་འདི་ཡང་ངག་གི་ལས་མ་བསྲུངས་པས་ལས་རྣམ་པར་སྨིན་པ་དེ་ལྟ་བུ་མྱོང་ངོ ། ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་སྨྲས་པ་བཞིན་ནོ། །ཞེས་བཀའ་སྩལ་ནས་བདེན་པ་བཞི་རྒྱས་པར་བསྟན་ཏེ། ལུས་དང་ངག་དང་ཡིད་ཀྱི་ལས་རྣམ་པར་དག་ཅིང་སེམས་ཀྱི་དྲི་མ་ཀུན་དང་བྲལ་བས་ཁ་ཅིག་ནི། རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་པར་གྱུར་ཏོ། །ཁ་ཅིག་གིས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི། ཕྱིར་མི་ལྡོག་པའི་ས་ལ་གནས་པར་གྱུར་ཏེ། །བཅོམ་ལྡན་འདས་ཀྱིས་གསུངས་པ་ལ་འཁོར་མང་པོ་དག་རྗེས་སུ་ཡི་རང་ནས་མངོན་པར་དགའོ། །བྲམ་ཟེ་ཤིན་ཙིར་ཞེས་བྱ་བའི་ལེའུ་སྟེ་བཞི་བཅུ་པའོ།། །།ཁྱིམ་བདག་དན་གྱི་ལ་ཞེས་བྱ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་ཀ་ལནད་ཀ་གནས་པ་འོད་མའི་ཚལ་ན་བཞུགས་སོ། །དེའི་ཚེ་ཡུལ་ཀོ་ས་ལ་
443a
> ༄#། །ཁྱིམ་བདག་དམ་ཤིན་ཙིར་ཞེས་བྱ་བ་ཕྱུག་པ། བཙན་པ། རིགས་ཆེ་བ་ཞིག་ཡོད་དེ། དེ་ལ་བུ་མེད་ནས་ལྷ་ཀླུ་ལ་སོགས་ཏེ། ལྷ་ཐམས་ཅད་ཀྱི་རྟེན་ལ་མཆོད་པ་བྱས་ནས་བུ་བསླངས་སོ། །ཁྱིམ་བདག་དེས་ལྷ་ཀླུ་ཀུན་ལ་སྙིང་ནས་མཆོད་དེ་བསླངས་པས། ཕྱིས་དེའི་ཆུང་མ་སེམས་ཅན་དང་ལྡན་པར་གྱུར་ཏེ། ཟླ་བ་ཚང་ནས་བུ་ཁྱེའུ་བཟང་བ་བལྟ་ན་སྡུག་པ། འཇིག་རྟེན་ན་དཀོན་པ་ཞིག་བྱུང་སྟེ། མཚན་མཁན་ལ་བསྟན་ནས་མཚན་བལྟས་སོ། །མཚན་མཁན་གྱིས་ཀྱང་མཚན་དང་སྦྱར་ཏེ། བུའི་མིང་ཡང་དན་བྱི་ལ་ཞེས་བྱ་བར་བཏགས་སོ། །གསོས་བསྐྱེད་དེ་ཆེར་སྐྱེས་པ་དང ། རྒྱལ་པོ་གསལ་རྒྱལ་གྱི་ཕ་ཤི་ནས་ཁྱེའུ་དེ་རྒྱལ་པོས་ཕའི་གོར་རྒྱལ་པོར་བཅུག་གོ་།དེ་ལྟར་ཕའི་གོར་རྒྱལ་པོ་དབང་བསྐུར་བ་ན། ཁང་ཁྱིམ་ཀུན་རིན་པོ་ཆེ་སྣ་བདུན་དུ་གྱུར་ཏེ། བང་མཛེད་མང་པོ་ཡང་ཐམས་ཅད་ཡོངས་སུ་གང་ནས་ཅི་ཡང་ཡོད་པར་གྱུར་ཏོ། །དེའི་ཚེ་རྒྱལ་པོའི་སྲས་བཻ་ཌཱུརྱ་ཞེས་བྱ་བ་ཚ་བའི་ནད་ཀྱིས་བཏབ་སྟེ་སྨན་པས་སྨན་དཔྱད་བྱས་ན། སྨན་དུ་གོ་ཤིཪྵ་ཙནྡན་གྱིས་ལུས་བསྐུས་ན་འཚོའོ། །ཞེས་སྨྲས་ཏེ། རྒྱལ་པོས་ཡུལ་མི་ལ་འདི་སྐད་ཅེས་བཀར་བཏགས་སོ། །ཁྱེད་སུ་ལ་གོ་ཤིཪྵ་ཙནྡན་ཡོད་ན་རྒྱལ་པོ་ལ་ཕུལ་ཅིག་དང ། བྱ་དགར་གསེར་
443b
> སྲང་སྟོང་སྦྱིན་ནོ། །ཞེས་ཀུན་ཏུ་བསྒོ་ན། གཅིག་ཙམ་ལ་ཡང་མ་བྱུང་ངོ ། །དེའི་ཚེ་ན་གཅིག་གིས་རྒྱལ་པོ་ལ་འདི་སྐད་ཅེས་སྨྲས་སོ། །ཡུལ་ཀོ་ས་ལར་ཁྱིམ་བདག་དན་བྱི་ལའི་ཁྱིམ་ན་མང་དུ་ཡོད་དོ། །ཞེས་སྨྲས་པ་དང ། རྒྱལ་པོ་ཉིད་རྟའི་ཐེག་པ་ལ་ཞོན་ཏེ་ཙནྡན་སློང་དུ་ཆས་སོ། །ཁྱིམ་བདག་དེའི་སྒོར་ཕྱིན་པ་དང ། ཁྱིམ་བདག་དེའི་སྒོ་ན་སྒོ་སྲུང་དག་གིས་རྒྱལ་པོ་གསལ་རྒྱལ་འདིར་གཤེགས་ཏེ་ད་ལྟར་ཕྱི་རོལ་ན་བཞུགས་སོ། །ཞེས་སྨྲས་པ་དང ། ཁྱིམ་བདག་དེ་རབ་ཏུ་དགའ་ནས་སྒོར་བྱུང་སྟེ་རྒྱལ་པོ་ནང་དུ་བསུས་སོ། །རྒྱལ་པོ་སྒོར་ཕྱིན་ཏེ་བལྟས་ན། སྒོ་ཉིད་ཀྱང་དངུལ་ལས་བྱས་ཏེ་སྒོའི་ནང་རོལ་ན་བུད་མེད་མཛེས་ཤིང་སྡུག་པ། འཇིག་རྟེན་ན་ཟླ་མེད་པ་ཞིག་དངུལ་གྱི་ཁྲི་ལ་འདུག་སྟེ་དངུལ་གྱི་སྐུད་པ་འཁལ་ལོ། །དྲུང་ན་ན་ཆུང་བཟང་མོ་བཅུ་ཡང་གཡོག་བྱེད་དེ། རྒྱལ་བོས་དེ་མཐོང་ནས་ཁྱིམ་བདག་ལ་འདི་ཁྱོད་ཀྱི་ཆུང་མ་ཡིན་ནམ་ཞེས་དྲིས་ན། མ་ཡིན་ཏེ། སྒོ་སྲུང་བའི་བྲན་མོ་ཡིན་ནོ། །ཞེས་སྨྲས་སོ། །འོ་ན་ན་ཆུང་བཟང་མོ་འདི་དག་ཅི་ལ་དགོས་ཞེས་དྲིས་ན། འདི་ནི། ཕྱི་ནང་དུ་བཟླུགས་པའི་མངག་གཞུག་པ་ཡིན་ནོ། །ཞེས་སྨྲས་སོ། །དེ་ནས་ཡང་སྒོ་རིམ་པ་གཅིག་གི་ནང་དུ་ཕྱིན་ཏེ་བལྟས་ན། སྒོ་ནི། བཻ་ཌཱུརྱ་མཐོན་མཐིང་ལས་བྱས་ཏེ། སྒོའི་ནང་རོལ་ནན་ཆུང་བཟང་མོ་བལྟ་ན་སྡུག་པ་སྔ་མ་བས་ཀྱང་ལྷག་པ། གཡོག་ན་ཆུང་བཟང་མོ་
444a
> ༄#། །སྔ་མ་བས་ཕྱེད་ཀྱིས་མང་བ་ཞིག་འདུག་གོ་།དེ་ནས་ཡང་སྒོ་རིམ་པ་གཅིག་ཏུ་ཕྱིན་ཏེ་བལྟས་ན། སྒོ་ཡང་གསེར་ལས་བྱས་ཏེ། སྒོའི་ནང་རོལ་ན་ན་ཆུང་བཟང་མོ་བལྟ་ན་སྡུག་པ་སྔ་མ་བས་ཀྱང་ཤིན་ཏུ་ལྷག་པ་ཞིག་གསེར་གྱི་ཁྲི་ལ་འདུག་སྟེ། གསེར་གྱི་ཐགས་འཐག་གོ་།གཡས་གཡོན་ན་ན་ཆུང་བཟང་མོ་གཡོག་བྱེད་བ་སྔ་མ་བས་ཀྱང་ཤིན་ཏུ་མང་བས། ཁྱིམ་བདག་དེ་ལ་འདི་ཁྱོད་ཀྱི་ཆུང་མ་ཡིན་ནམ་ཞེས་དྲིས་ན། འདི་ཡང་མ་ཡིན་ནོ། །ཞེས་སྨྲས་སོ། །དེ་ནས་ཁྱིམ་གྱི་ནང་དུ་ཕྱིན་ཏེ་བལྟས་ན། ས་གཞི་ཀུན་བཻ་ཌཱུརྱ་ལས་བྱས་པ་ཤིན་ཏུ་གསལ་བ་ནི། ཆུའི་མདོག་དང་འདྲ་སྟེ། སྟེང་གི་ཁང་པ་ལ་གཅན་གཟན་གྱི་གཟུགས་དང ། ཆུ་སྲིན་དང་ཉ་ལ་སོགས་པའི་གཟུགས་དབྱངས་ཏེ་རླུང་གིས་བསྐྱོད་ནས་འགུལ་བས་གཟུགས་བརྙན་ས་གཞི་ལ་སྣང་ངོ ། །རྒྱལ་པོས་ཡང་དག་པར་ཆུ་ཡིན་སྙམ་བསམས་ཏེ་འདི་སྐད་ཅེས་སྨྲས་སོ། །ཅི་གུད་ནས་མེད་དམ་ཅི་ཉེས་ན། ཁང་པའི་ནང་དུ་རྫིང་བུ་བསྐྱིལ་ཞེས་སྨྲས་སོ། །དན་བྱི་ལས་སྨྲས་པ། འདི་ནི། ཆུ་མ་ལགས་ཏེ། བཻ་ཌཱུརྱ་མཐོན་མཐིང་བ། །ཞེས་སྨྲས་ནས་ལག་གི་གདུ་བུ་ཕུད་དེ་སྟེང་དུ་བོར་རོ། །རྒྱལ་པོས་དེ་ལྟ་བུ་གཟིགས་ནས་ཁང་པའི་ནང་དུ་གཤེགས་ཏེ་རིན་པོ་ཆེ་སྣ་བདུན་གྱི་ཁང་པའི་ནང་དུ་བཻ་ཌཱུརྱ་
444b
> མཐོང་མཐིང་གི་ཁྲི་བཤམས་ནས་རྒྱལ་པོ་ཞུགས་སུ་གསོལ་ཏོ། །ཁྱིམ་བདག་གི་ཆུང་མ་ཡང་དེ་ན་འདུག་པ་ལས་མིག་ནས་མཆི་མ་བྱུང་བ་དང ། རྒྱལ་པོས་ཅིའི་ཕྱིར་མིག་ནས་མཆི་མ་བྱུང ། ང་འོངས་པས་མི་དགའ་མ་ཅི་ཉེས་ཞེས་དྲིས་ན། ཁྱིམ་བདག་གི་ཆུང་མས་གསོལ་པ། རྒྱལ་པོ་འདིར་གཤེགས་པ་ནི། ལེགས་ཏེ་དགའ་ན།་རྒྱལ་པོའི་ན་བཟའ་ལ་དུད་པ་ཅུང་ཟད་ཅིག་བྲོ་བས་མིག་ནས་མཆི་མ་བྱུང་གི་།རྒྱལ་པོ་མཐོང་མི་འཚལ་བ་ནི། མ་ལགས་སོ། །རྒྱལ་པོས་སྨྲས་པ། ཅི་ཁྱོད་ཀྱི་ཁྱིམ་ན་མེ་ཙམ་ཡང་མི་འབུད་དམ། སྨྲས་པ། མེ་མ་མཆིས་སོ། །འོ་ན་ཁ་ཟས་ཅི་ཞིག་གིས་གཡོ། །སྨྲས་པ། ཁ་ཟས་ནི། བསམ་པ་ཙམ་གྱིས་ཁ་ཟས་རོ་བརྒྱ་དང་ལྡན་པ་རང་འབྱུང་ངོ ། །རྒྱལ་པོ་ན་རེ། མཚན་མོ་མུན་པཱ་ནང་དུ་ཅི་ཞིག་གིས་མཐོང་བར་འགྱུར། སྨྲས་པ། ནོར་བུ་རིན་པོ་ཆེས་སྣང་བར་འགྱུར་རོ། །སྒོ་བཅད་ན་ཡང་སྐར་ཁུང་ནས་ནོར་བུ་རིན་པོ་ཆེའི་འོད་ཀྱིས་ཉིན་མོ་དང་འདྲ་བར་སྣང་ངོ ། །དེ་ནས་དན་བྱི་ལས་པུས་མོ་གཉིས་ས་ལ་བཙུགས་ཏེ། རྒྱལ་པོ་ཆེན་པོ། ཅིའི་སླད་དུ་འོ་བརྒྱལ་ཏེ་འདིར་གཤེགས་ཞེས་གསོལ་པ་དང ། རྒྱལ་པོས་འདི་སྐད་ཅེས་སྨྲས་སོ། །ངའི་བུ་བཻ་ཌཱུརྱ་ཚ་བའི་ནད་ཀྱིས་བཏབ་ནས་སྨན་པས་དཔྱད་དེ། སྨན་དུ་གོ་ཤིཪྵ་ཙནྡན་དགོས་སོ། །ཞེས་ཟེར་ནས་
445a
> ༄#། །འདིར་ཁྱོད་ལ་སློང་དུ་འོངས་ཞེས་སྨྲས་པ་དང ། ཁྱིམ་བདག་དེ་རབ་ཏུ་དགའ་ནས་རྒྱལ་པོ་ཉིད་བང་མཛོད་དུ་གཤེགས་སུ་གསོལ་ཏེ། རིན་པོ་ཆེ་སྣ་བདུན་ལ་སོགས་པ་ནོར་དབྱིག་ཐམས་ཅད་ཀྱང་བསྟན། ཙནྡན་གྱི་ཕུང་པོ་ཚད་མེད་པ་དག་ཀྱང་བསྟན་ནས་ཅི་བཞེད་པ་བཞེས་ཤིག་ཅེས་གསོལ་པ་དང ། རྒྱལ་པོས་སྨྲས་པ། ང་ལ་སྲང་གཉིས་ལས་མི་དགོས་ཀྱི། བྱིན་ཅིག་ཅེས་སྨྲས་པ་དང ། ཁྱིམ་བདག་གིས་ཅི་བཞེད་པ་ཕུལ་ལོ། །དེ་ནས་རྒྱལ་པོ་སླར་གཤེགས་པ་དང ། ཁྱིམ་བདག་དེ་ལ་ཁྱོད་སངས་རྒྱས་དང་ཕྲད་དུ་སོང་ཞིག་ཅེས་བསྒོའོ། །ཁྱིམ་བདག་དེས་སྨྲས་པ། སངས་རྒྱས་ཞེས་བྱ་བ་ཇི་ལྟ་བུ། རྒྱལ་པོས་སྨྲས་པ།་ཅི་ཁྱོད་མ་ཐོས་སམ། གྲོང་ཁྱེར་སེར་སྐྱའི་རྒྱལ་པོ་ཟས་གཙང་མའི་སྲས་རྒ་བ་དང ། ན་བ་དང ། ཤི་བ་ལ་སྐྱོ་ནས་རབ་ཏུ་བྱུང་སྟེ་བྱང་ཆུབ་ལ་ནན་ཏན་བྱས་པས་མངོན་པར་སངས་རྒྱས་ཏེ་མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུས་སྐུ་བརྒྱན་པ་ནས་རྫུ་འཕྲུལ་གྱི་རྐང་པ་དང ། ཡེ་ཤེས་ནི། དཔེ་ཟླ་མེད་དེ།་ལྷ་དང་མིའི་གཙོ་བོར་གྱུར་པས་སངས་རྒྱས་ཞེས་བྱའོ། །ཁྱིམ་བདག་གིས་དེ་སྐད་ཅེས་སྨྲས་པ་ཐོས་ནས་ཤིན་ཏུ་དད་པའི་སེམས་སྐྱེས་ཏེ། རྒྱལ་པོ་ལ་
445b
> སངས་རྒྱས་ད་ལྟར་གང་ན་བཞུགས་ཞེས་གསོལ་པ་དང ། རྒྱལ་པོས་སྨྲས་པ། ད་ལྟར་རྒྱལ་པོའི་ཁབ་འོད་མའི་ཚལ་ན་བཞུགས་སོ། །རྒྱལ་པོ་གཤེགས་མ་ཐག་ཏུ་ཁྱིམ་བདག་དེ་ཡང་སངས་རྒྱས་གང་ན་བཞུགས་པ་དེར་སོང་ནས་ཕྱིན་པ་དང ། སངས་རྒྱས་ཀྱི་སྐུ་ལ་བརྟགས་ན་རྒྱལ་པོ་ཀུན་པས་ཀྱང་ཤིན་ཏུ་ལྷག་པར་མཐོང་ནས་དགའ་མགུ་རངས་ཏེ་མགོ་བོས་ཕྱག་འཚལ་ནས་སྙུན་གསོལ་ཏོ། །དེ་ལ་བཅོམ་ལྡན་འདས་ཀྱིས་ཅི་རིགས་པར་ཆོས་བསྟན་པས། ཁྱིམ་བདག་དེ་ཡང་རྒྱུན་དུ་ཞུགས་པ་ཐོབ་པར་གྱུར་ཏེ། དེ་པུས་མོ་གཉིས་ས་ལ་བཙུགས་ནས་བཅོམ་ལྡན་འདས་ལ་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་ཀྱང་ལེགས་པར་འོངས་སོ། །ཞེས་བཀའ་སྩལ་པ་དང ། སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ཏོ། །དེ་ནས་ཡང་བདེན་པ་བཞིའི་ཆོས་ཅི་རིགས་པར་བསྟན་པས་སེམས་ཀྱི་དྲི་མ་ཡོངས་སུ་དག་སྟེ་དགྲ་བཅོམ་པར་གྱུར་ཏོ། །དེ་ནས་ཀུན་དགའ་བོ་དང ། འཁོར་མང་པོ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་དན་བྱི་ལ་འདིས་བསོད་ནམས་ཅི་ཞིག་བགྱིས་ན། མིའི་ནང་དུ་སྐྱེས་ལ་ལྷའི་ལོངས་སྤྱོད་དང་ལྡན་ཡང་ཁྱིམ་ལ་མ་ཆགས་ཏེ་རབ་ཏུ་འབྱུང་བར་དགའ་ནས་དེ་མ་ཐག་ཏུ་འབྲས་བུ་ཐོབ་པར་གྱུར། བཅོམ་
446a
> ༄#། །ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཤིན་ཏུ་ལེགས་པར་ཉོན་ཅིག་།སྔོན་འདས་པའི་བསྐལ་པ་དགུ་བཅུ་རྩ་གཅིག་འདས་པའི་ཕ་རོལ་ན། སངས་རྒྱས་རྣམ་པར་གཟིགས་ཞེས་བྱ་བ་འཇིག་རྟེན་དུ་གཤེགས་ཏེ། སངས་རྒྱས་དེ་མྱ་ངན་ལས་འདས་ནས་གཟུགས་བརྙན་ལ་སྤྱོད་པའི་ཚེ་དགེ་སློང་ལྔ་བརྒྱ་ཙམ་ཞིག་ལྷན་ཅིག་ཏུ་འདི་སྐད་ཅེས་དམ་བཅས་སོ། །བདག་ཅག་གིས་དབེན་པའི་གནས་ཤིག་བཙལ་ལ་བྱང་ཆུབ་ཀྱི་ལམ་བསྒོམ་མོ། །ཞེས་བྱས་ནས་ཚལ་ཞིག་གི་ནང་ན་གསིང་མ་དང་ཆུ་མིག་ཡོད་པ་ཞིག་ཏུ་དབེན་པའི་གནས་བཅས་ཏེ། དགེ་སློང་དེ་དག་ཡིད་མཐུན་པར་དགེ་སློང་ཞིག་ལ་འདི་སྐད་ཅེས་གསོལ་པ་བཏབ་བོ། །བདག་ཅག་གི་གནས་འདི་གྲོང་ཁྱེར་དང་རིང་བས། ཐམས་ཅད་བསོད་སྙོམས་ལ་འགྲོ་ན་ཀུན་ཉོན་མོངས་ཀྱི། ཁྱོད་བསོད་ནམས་བྱ་བའི་ཕྱིར་ཁྱོད་ཀྱིས་ངེད་ཀྱི་བསོད་སྙོམས་སློངས་ལ་བྱིན་ཅིག་ཅེས་སྨྲས་པ་དང ། དགེ་སློང་དེས་ཀྱང་དེ་ལྟར་བྱའོ། །ཞས་ཁས་བླངས་ནས་རྟག་ཏུ་གྲོང་དུ་སོང་སྟེ་སྦྱིན་བདག་མང་པོ་ལ་ཆོས་བསྟན་ནས་བསོད་སྙོམས་བསླངས་སོ། །དེའི་ནང་ན་མི་བཞི་ཞིག་ལུས་ལས་སུ་རུང་བས་བསྒོམས་ནས་ཞག་དགུ་བཅུ་ལེན་པ་དང་འབྲས་བུ་ཐོབ་པར་གྱུར་ཏེ། དེ་
446b
> དག་ཡིད་མཐུན་པར་དགེ་སློང་བསོད་སྙོམས་སློང་བ་ལ་འདི་སྐད་ཅེས་བསྒོའོ། །བདག་ཅག་ནི། ཁྱོད་ཀྱི་ཕྱིར་རབ་ཏུ་བདེ་སྟེ། ཐོབ་པར་རེ་བའི་ཏིང་ངེ་འཛིན་ཡང་ཐོབ་ཀྱི། ཁྱོད་ཅིར་སྨོན་པ་ངེད་ལ་བྱོས་ཤིག་དང ། ཁྱོད་ཀྱིས་རེ་བ་བསྐང་ངོ ། །ཞེས་བསྒོའོ། །དེའི་ཚེ་དགེ་སློང་དེ་ཡང་རབ་ཏུ་དགའ་ནས་འདི་སྐད་ཅེས་སྨྲས་སོ། །བདག་མ་འོངས་པའི་དུས་ན་ལྷའམ་མིར་སྐྱེས་ཀྱང་ཕྱུག་ཅིང་ལོངས་སྤྱོད་དང་ལྡན་ཏེ་ཅི་དགོས་པ་ཐམས་ཅད་ཆེད་དུ་ལས་མ་བྱས་པར་ཐམས་ཅད་རང་སྐྱེས་པར་གྱུར་ཅིག་།སློབ་དཔོན་འཕགས་པ་དང ། ཕྲད་ནས་ཁྱོད་བས་ཀྱང་བརྒྱ་འགྱུར་སྟོང་འགྱུར་དུ་ཆོས་ཐོས་ནས་སེམས་ཡོངས་སུ་དག་ཅིང་འབྲས་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་དགེ་སློང་ངན་བྱི་ལས་དགེ་སློང་གྲོགས་པོ་བཞིའི་བསོད་སྙོམས་སྦྱོར་བས། བསྐལ་པ་དགུ་བཅུ་རྩ་གཅིག་གི་བར་དུ་ལྷ་དང་མིའི་ནང་ན་ཆོ་རིགས་བཙུན་པར་སྐྱེས་ཏེ་དབུལ་ཞིང་ཕོངས་པའི་རིགས་སུ་མ་སྐྱེས་སོ། །ད་ཡང་ང་མཐོང་བ་ཙམ་གྱིས་དད་པ་ཐོབ་པར་གྱུར་ཏོ། །དེའི་ཚེ་ན་ཀུན་དགའ་བོ་དང ། དགེ་སློང་རྣམས་བཅོམ་ལྡན་འདས་ཀྱིས་གསུངས་པ་ཐོས་ནས་སོ་སོ་ནས་བརྩོན་འགྲུས་བརྩམས་པས་འབྲས་བུ་དང་པོ་འབྲས་བུ་བཞི་པའི་བར་དུ་ཐོབ་བོ། །
447a
> ༄#། །ཁ་ཅིག་ནི། རྒྱ་ཆེན་པོའི་སེམས་བསྐྱེད་དེ་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ལ་སོ་སོ་ནས་རྗེས་སུ་ཡི་རང་སྟེ་མངོན་པར་དགའོ། །ཁྱིམ་བདག་དན་བྱི་ལ་ཞེས་བྱ་བའི་ལེའུ་སྟེ་བཞི་བཅུ་རྩ་གཅིག་པའོ།། །།གླང་པོ་སྐྱོང་གི་ལེའུ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། ། དེའི་ཚེ་ཡུལ་མ་ག་དྷ་ན་ཁྱིམ་བདག་ཅིག་ལ་བུ་ཞིག་བཙས་ཏེ། བཟང་བ། བལྟ་ན་སྡུག་པ། མཚན་དང་ལྡན་པ་ཞིག་གོ་།ཁྱེའུ་དེ་ཐོག་མ་བཙས་པ་ན་བང་མཛོད་ཀྱི་ནང་ནས་གསེར་གྱི་གླང་པོའི་ཕྲུ་གུ་ཞིག་རང་བྱུང་ངོ ། །ཁྱེའུའི་ཕ་མས་དེ་ལྟ་བུ་བྱུང་བ་མཐོང་ནས་རབ་ཏུ་དགའ་སྟེ་མཚན་མཁན་ལ་བསྟན་ནས་མཚན་མཁན་གྱིས་ཀྱང་ཁྱེའུ་འདི་བསོད་ནམས་ཀྱི་མཚན་དང་ལྡན་པར་རྟོགས་ཏེ། ཁྱེའུ་འདི་ཐོག་མ་བཙས་པ་ན་ངོ་མཚར་ཆེ་བའི་ལྟས་ཅི་བྱུང་ཞེས་དྲིས་སོ། །ཁྱེའུའི་ཕ་མས་སྨྲས་པ། ཁྱེའུ་འདི་བཙས་པ་ན་མཛོད་ཀྱི་ནང་ནས་གསེར་གྱི་གླང་པོ་ཆེའི་ཕྲུ་གུ་ཞིག་རང་བྱུང་ངོ ། །ཞེས་སྨྲས་པ་དང ། ཁྱེའུའི་མིང་ཡང་གླང་པོ་སྐྱོང་ཞེས་བཏགས་སོ། །ཁྱེའུ་ཇི་ཙམ་
447b
> དུ་ཆེར་སྐྱེས་པ་བཞིན་དུ་གསེར་གྱི་གླང་པོ་ཆེའི་ཕྲུ་གུ་ཡང་སྐྱེས་ཏེ། ཁྱེའུ་འགྲོ་ན་གླང་པོ་ཆེའི་ཕྲུ་གུ་ཡང་འགྲོ་སྟེ། རྟག་ཏུ་འགྲོགས་སོ། །གླང་པོ་ཆེའི་ཕྲུ་གུའི་གཅིན་རྟག་ཀྱང་གསེར་དུ་བྱུང་ངོ ། །གླང་པོ་སྐྱོང་ཆེར་སྐྱེས་ནས་ཁྱིམ་བདག་གི་བུ་ལྔ་བརྒྱ་ཙམ་དང་རྟག་ཏུ་ལྷན་ཅིག་རྩེ་སྟེ་གཅིག་ལ་གཅིག་ཡིད་གཅུགས་པས་ཕྱི་ཞིག་ན་བུས་པ་དེ་དག་སོ་སོ་ནས་ཁྱིམ་ཁྱིམ་ན་ངོ་མཚར་ཆེ་བ་ཅི་ཡོད་པའི་གཏམ་བྱས་པ་དང ། དེ་ལ་ཁ་ཅིག་ནི། ངའི་ཁྱིམ་ན་ཁྲི་སྟན་དང་ཉལ་བའི་མལ་ཆ་ལ་སོགས་པ་ཐམས་ཅད་རིན་པོ་ཆེ་སྣ་བདུན་ལས་བྱས་སོ། །ཞེས་ཟེར་རོ། ། ཁ་ཅིག་ནི། ངའི་ཁྱིམ་དང་སྐྱེད་མོས་ཚལ་ལ་སོགས་པ་ཐམས་ཅད་ཀྱང་རིན་པོ་ཆེ་ཞེས་ཟེར་རོ། །ཁ་ཅིག་ནི། ངའི་བང་མཛོད་རྟག་ཏུ་རིན་པོ་ཆེ་དམ་པས་ཡོངས་སུ་གང་ངོ་ཞེས་ཟེར་ཏེ། ཀུན་གྱིས་སོ་སོ་ནས་ཡ་མཚན་ཅི་ཡོད་པ་རྣམ་པ་སྣ་ཚོགས་ཀུན་སྨྲས་པ་དང ། དེ་ནས་གླང་པོ་སྐྱོང་གིས་ཀྱང་བདག་ཐོག་མ་བཙས་པ་ན་གསེར་གྱི་གླང་པོ་ཆེའི་ཕྲུ་གུ་ཞིག་ཀྱང་རང་བྱུང་སྟེ། ཁོ་བོ་ཇི་ཙམ་དུ་སྐྱེས་པ་བཞིན་དུ་གླང་པོ་ཆེའི་ཕྲུ་གུ་ཡང་དེ་བཞིན་དུ་སྐྱེས་ཏེ། ཁོ་བོས་བསམ་པ་བཞིན་དུ་འགྲོ་ལ། གླང་པོ་ཆེ་དེ་ལ་ཞོན་ནས་ལྟད་མོ་ལྟ་བ་ལ་སོགས་པ་གར་ཡང་ཡིད་བཞིན་དུ་མགྱོགས་པར་འགྲོ་སྟེ། གཅིན་རྟུག་ཀྱང་གསེར་དུ་འབྱུང་ངོ ། །ཞེས་སྨྲས་པ་དང ། དེའི་ཚེ་རྒྱལ་བུ་མ་སྐྱེས་དགྲ་ཡང་དེ་ན་འདུག་སྟེ་གླང་པོ་སྐྱོང་གིས་སྨྲས་པ་ཐོས་ནས་འདི་སྙམ་དུ་བདག་
448a
> ༄#། །ནམ་རྒྱལ་པོར་གྱུར་པ་ན་གླང་པོ་ཆེ་དབྲོག་གོ་།སྙམ་བསམ་མོ། །ཕྱིས་རྒྱལ་པོར་གྱུར་ནས་གླང་པོ་སྐྱོང་བཀུག་སྟེ་ཁྱོད་ཀྱིས་གླང་པོ་ཆེ་འོན་ཅིག་ཅེས་བསྒོའོ། ། དེ་ནས་གླང་པོ་སྐྱོང་གི་ཕ་མས་བུ་ལ་འདི་སྐད་ཅེ་སྨྲས་སོ། །མ་སྐྱེས་དགྲ་ལྟ་བུ་ཁྲོ་ཞིང་གཏུམ་ལ་འདོད་པ་ཆེ་བ་མེད་དེ། བདག་གི་ཕ་ཡང་གསོད་ན། གཞན་ལྟ་ཅི་སྨོས་ཏེ། དེ་ཁྱོད་ཀྱི་གླང་པོ་ཆེ་འཕྲོག་པར་བྱས་ཀྱི། གླང་པོ་ཆེ་སྦྱིན་དགོས་སོ། །བུས་སྨྲས་པ། བདག་གི་གླང་པོ་ཆེ་འདི་ནི། སུས་ཀྱང་དབྲོག་མི་ནུས་སོ། །ཞེས་སྨྲས་ནས་སྤད་གཉིས་གླང་པོ་ཆེ་ལ་ཞོན་ཏེ་རྒྱལ་པོའི་ཕོ་བྲང་གི་སྒོར་འོངས་པ་དང་སྒོ་སྲུང་བ་དག་གིས་རྒྱལ་པོ་ལ་གསོལ་ཏོ། །རྒྱལ་པོས་ཀྱང་གླང་པོ་སྐྱོང་སྤད་གཉིས་གླང་པོ་ཆེ་ལས་མ་བབས་པར་ནང་དུ་ཤོག་ཅིག་ཅེས་བསྒོ་བ་དང ། གླང་པོ་སྐྱོང་སྤད་གཉིས་གླང་པོ་ཆེ་ལ་ཞོན་ཏེ་ཕོ་བྲང་གི་ནང་དུ་འོངས་ནས་གདོད་བབས་སོ། །དེ་ནས་རྒྱལ་པོ་ལ་ཕྱག་བྱས་ཏེ་བདེ་བར་གྱུར་ཅིག་ཅེས་སྨྲས་པ་དང ། རྒྱལ་པོ་རབ་ཏུ་དགའ་ནས་སྟན་བཏིང་བ་ལ་འདུག་ཏུ་བཅུག་སྟེ་བཟའ་བ་དང་བཏུང་བ་བྱིན་ནོ། །དེ་སྐད་ཅེས་སྨྲས་པའི་འོག་ཏུ་ཕྱིར་འགྲོ་ཞེས་བྱས་པ་དང ། གླང་པོ་སྐྱོང་ལ་གསེར་གྱི་གླང་པོ་ཞོག་ལ་ཁྱེད་ཅག་ཕྱིར་དེངས་ཤིག་ཅེས་བསྒོའོ། །དེ་ནས་གླང་པོ་སྐྱོང་ཡང་རྒྱལ་པོའི་བཀའ་བཞིན་དུ་གླང་པོ་ཆེ་ཕྱིར་བཞག་ནས་སྤད་གཉིས་རྐང་བས་སོང་སྟེ་སྒོར་ཕྱིན་བཙམ་ན། རིང་པོར་མ་
448b
> ལོན་པར་གླང་པོ་ཆེ་དེ་ཡང་དེ་ཉིད་དུ་སའི་ནང་དུ་ནུབ་ནས་སྒོའི་ཕྱི་རོལ་ཏུ་གླང་པོ་སྐྱོང་གི་མདུན་དུ་བྱུང་ངོ ། །གླང་པོ་སྐྱོང་སྤད་གཉིས་དེ་ལ་ཕྱིར་ཞོན་ཏེ་ཁྱིམ་དུ་སོང་ནས་དེ་འདི་སྙམ་དུ་བསམས་སོ། ། རྒྱལ་པོ་ཡང་ཆོས་བཞིན་བྱེད་པ་མ་ཡིན་ཏེ། མ་ཉེས་བདག་ཀྱང་ཁྲིམས་དང་སྦྱོར་བས། བདག་གིས་ཀྱང་མ་སྟེས་ན་གླང་པོ་ཆེ་འདིའི་ཕྱིར་སྲོག་ལ་བརྒལ་བར་འོང་གི་།ད་ལྟར་བཅོམ་ལྡན་འདས་འཇིག་རྟེན་ན་འགྲོ་བ་མང་པོ་ལ་བདེ་བའི་དོན་མཛད་པ་དེའི་དྲུང་དུ་སོང་ལ་ཁྱིམ་ནས་བྱུང་ཞིང་ཚངས་པར་སྤྱོད་པ་ལ་དགའ་བར་བྱའོ་སྙམ་བསམས་ནས་ཕ་མ་ལ་རབ་ཏུ་འབྱུང་བར་གསོལ་པ་དང ། ཕ་མས་ཀྱང་རབ་ཏུ་འབྱུང་བར་གནང་ནས་ཕྱི་ཕྱག་འཚལ་ཏེ་གསེར་གྱི་གླང་པོ་ལ་ཞོན་ནས་རྒྱལ་བུ་རྒྱལ་བྱེད་ཀྱི་ཚལ་གང་ན་བར་སོང་ངོ ། །བཅོམ་ལྡན་འདས་ཀྱི་སྤྱན་སྔར་ཕྱིན་པ་དང ། ཞབས་ལ་མགོ་བོས་ཕྱག་འཚལ་ནས་ཇི་ལྟར་གྱུར་བ་རྒྱས་པར་གསོལ་ནས་བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་པས་སྐྲ་དང་ཁ་སྤུ་རང་ཕྱི་སྟེ་དགེ་སློང་དུ་གྱུར་ཏོ། །དེ་ལ་བཅོམ་ལྡན་འདས་ཀྱིས་བདེན་པ་བཞིའི་ཆོས་ཅི་རིགས་པར་བསྟན་པས་དགྲ་བཅོམ་པར་གྱུར་ཏོ། །དགེ་སློང་གླང་པོ་སྐྱོང་ཡང་དགེ་སློང་གྲོགས་གཞན་དང་ལྷན་ཅིག་གང་ན་འདུག་ཀྱང་རུང་སྟེ།་གསེར་གྱི་གླང་པོ་ཆེ་རྟག་ཏུ་དྲུང་ན་འདུག་གོ་།དེའི་ཚེ་མཉན་དུ་ཡོད་པ་ན་འཁོད་པའི་མི་རྣམས་ཀྱིས་གསེར་གྱི་གླང་པོ་ཆེ་བལྟ་བའི་ཕྱིར་ཐམས་ཅད་དེར་འདུ་བར་གྱུར་ནས་རྣལ་འབྱོར་
449a
> ༄#། །སྤྱོད་པ་ལ་འདུ་འཛི་མང་བར་གྱུར་ཏེ། དགེ་སློང་དག་གིས་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་དེའི་ཕྱིར་དགེ་སློང་གླང་པོ་སྐྱོང་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱི་གླང་པོ་ཆེ་ལ་ལྟ་བ་མང་པོ་འདུ་བས་མི་དབེན་པར་གྱུར་གྱི། མྱུར་དུ་སྤོངས་ཤིག་ཅེས་བཀའ་སྩལ་པ་དང ། གླང་པོ་སྐྱོང་གིས་གསོལ་པ ། བདག་གིས་ཀྱང་ཐོག་མ་ནས་སྤང་བར་བསམས་ན་འགྲོར་མ་བཏུབ་བོ། །བཅོམ་ལྡན་འདས་ཀྱིས་ཡང་བཀའ་སྩལ་པ། ཁྱོད་གླང་པོ་ཆེ་ལ་ལན་གསུམ་འདི་སྐད་ཅེས་སྨྲོས་ཤིག ། ང་ནི།་སྐྱེ་བའི་ཕྱོགས་བཟད་དེ་ད་ཕྱིན་ཆད་མི་དགོས་སོ། །ཞེས་སྨྲོས་ཤིག་དང་མེད་པར་འགྱུར་རོ། །གླང་པོ་སྐྱོང་གིས་ཀྱང་བཅོམ་ལྡན་འདས་ཀྱིས་བཀའ་བཞིན་དུ་གླང་པོ་ཆེ་ལ་ད་ནི། མི་དགོས་སོ། །ཞེས་ལན་གསུམ་གྱི་བར་དུ་སྨྲས་པས། གསེར་གྱི་གླང་པོ་ཆེ་ཡང་སའི་ནང་དུ་ནུབ་བོ། །དེ་ལ་དགེ་སློང་དག་ངོ་མཚར་དུ་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་གླང་པོ་སྐྱོང་འདིས་སྔོན་བསོད་ནམས་ཀྱི་ཞིང་ཇི་ལྟ་བུ་ལ་དགེ་བའི་རྩ་བ་ཇི་ལྟ་བུ་ཞིག་བསྐྱེད་ན། འདི་ལྟ་བུའི་འབྲས་བུའི་རྣམ་པར་སྨིན་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་དང ། དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །སོ་སོའི་སྐྱེ་བོ་གང་ཡང་རུང ། དཀོན་མཆོག་གསུམ་གྱི་བསོད་ནམས་ཀྱི་ཞིང་ལ་དགེ་བའི་ས་
449b
> བོན་ཅུང་ཟད་ཅིག་བཏབ་ན་འབྲས་བུ་ཚད་མེད་པ་འཐོབ་པར་འགྱུར་རོ། །སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་པའི་ཚེ་མིའི་ཚེ་ནི། ལོ་སྟོང་ཕྲག་ཉི་ཤུའི་བར་དུ་གནས་སོ། །སངས་རྒྱས་དེ་སེམས་ཅན་གྱི་དོན་བྱས་ནས་མྱ་ངན་ལས་འདས་པའི་འོག་ཏུ་རིང་བསྲེལ་ལ་མཆོད་རྟེན་མང་དུ་བྱས་སོ། །དེའི་ཚེ་མཆོད་རྟེན་གཅིག་གི་ནང་ན་བྱང་ཆུབ་སེམས་དཔའ་ཐོག་མ་དགའ་ལྡན་གྱི་གནས་ནས་བབས་ཏེ་ཡུམ་གྱི་ལྷུམས་སུ་གཤེགས་པའི་ཚེ་བཅི་བས་པ། གླང་པོ་ཆེ་དེའི་མཆོད་རྟེན་ཞིག་ཀྱང་ཡོད་དེ། དེའི་ཚེ་ན་གླང་པོ་ཆེའི་གཟུགས་ཅུང་ཟད་ཅིག་ཞིག་ནས་དེ་ལ་མི་ཞིག་ཕྱག་འཚལ་དུ་འོངས་ཏེ་གླང་པོ་ཆེའི་གཟུགས་ཅུང་ཟད་ཞིག་པ་དེ་མཐོང་ནས་འདི་སྙམ་དུ་བསམས་སོ། །བདེ་ནི། བྱང་ཆུབ་སེམས་དཔའི་བཅིབས་པའི་ཐེག་པ་ཡིན་ཏེ། འདི་ལྟར་ཞིག་པར་གྱུར་གྱི། བདག་གིས་སླར་གསོའོ་སྙམ་བསམས་ནས་འཇིམ་པ་ཞིག་སྦྱར་ཏེ་བསྐུས་པའི་སྟེང་དུ་ལྡོང་རོས་ཀྱིས་བསྐུས་ནས་འདི་སྐད་ཅེས་སྨོན་ལམ་བཏབ་བོ། །བདག་མ་འོངས་པའི་དུས་སུ་རྟག་ཏུ་ཆོ་རིགས་བཙུན་ཞིང་ལོངས་སྤྱོད་ཟད་མི་ཤེས་པ་དང་ལྡན་པར་ཤོག་ཅིག་ཅེས་སྨོན་ལམ་བཏབ་བོ། །མི་དེ་ཚེ་འཕོས་ནས་མཐོ་རིས་ཀྱི་ལྷར་སྐྱེས་ཏེ། ལྷ་ལས་ཚེའི་དུས་བྱས་ནས་མིའི་འཇིག་རྟེན་དུ་སྐྱེས་ཏེ་རྟག་ཏུ་ཆོ་རིགས་བཙུན་པ་དང ། ལོངས་སྤྱོད་དང་ལྡན་ཞིང་བྱད་གཟུགས་བཟང་སྟེ། གསེར་གྱི་གླང་པོ་ཆེས་རྟག་ཏུ་བསྲུངས་པར་གྱུར་ཏོ། །བཅོམ་ལྡན་འདས་ཀྱིས་ཀུན་
450a
> ༄#། །དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་གླང་པོ་ཆེ་གསོས་པའི་མི་དེ་ནི། ད་ལྟར་དགེ་སློང་གླང་པོ་སྐྱོང་ཡིན་ཏེ། དེའི་ཚེ་གླང་པོ་ཆེ་གསོས་པས་དེ་ཚུན་ཆད་ལྷ་དང་མིའི་ནང་ན་ལོངས་སྤྱོད་ཆེན་པོ་དང་ལྡན་པར་གྱུར་ཏོ། །དཀོན་མཆོག་གསུམ་ལ་གུས་ཤིང་བསྟི་སྟང་བྱས་བསད་ལྟར་ང་དང་ཕྲད་དེ་བསྟན་པ་ལ་རབ་ཏུ་བྱུང་ནས་སེམས་ཅན་གྱི་དྲི་མ་ཀུན་ཟད་དེ་དགྲ་བཅོམ་པར་གྱུར་ཏོ། །ཚེ་དང་ལྡན་པ་ཀུན་དགའ་བོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་འདི་ཐོས་ནས་ཐམས་ཅད་ཀྱིས་དོན་རྟོགས་ཤིང་ཁོང་དུ་ཆུད་དེ། ལ་ལ་ནི། རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་པར་གྱུར་ཏོ། །ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པའི་ས་ལ་གནས་སོ། །བཅོམ་ལྡན་འདས་ཀྱིས་གསུངས་པ་ལ་འཁོར་མང་པོ་མངོན་པར་དགའ་ནས་རྗེས་སུ་ཡི་རང་ངོ ། ། གླང་པོ་སྐྱོང་གི་ལེའུ་སྟེ་བཞི་བཅུ་གཉིས་པའོ།། །།བམ་པོ་བཅུ་གཉིས་པ། བྲམ་ཟེས་ལྷན་པ་ཕུལ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན ། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་བཅོམ་ལྡན་འདས་ཀྱིས་ཀུན་དགའ་བོ་ཞབས་
450b
> འབྲིང་དུ་ཁྲིད་དེ་བསོད་སྙོམས་ལ་གཤེགས་པ་ན་བཅོམ་ལྡན་འདས་གསོལ་བའི་ན་བཟའ་ལ་རྡོལ་བཅུང་ཟད་ཅིག་ཡོད་དེ། དེ་ཡང་སེམས་ཅན་འདུལ་བར་རིགས་པའི་དོན་དུ་དགོངས་སོ། །བསོད་སྙོམས་བསླངས་ནས་སླར་གཤེགས་པའི་ཚེ་བྲམ་ཟེ་ཞིག་འོངས་ནས་བཅོམ་ལྡན་འདས་ལ་སྤྱི་བོས་ཕྱག་འཚལ་ཏེ་བཅོམ་ལྡན་འདས་ཀྱི་མཚན་ལྷང་དེ་ལྷན་ནོར་གསལ་བ་ལ་བརྟགས་ནས་བཅོམ་ལྡན་འདས་ཀྱི་ན་བཟའ་ཅུང་ཟད་རྡོལ་བ་དེ་མཐོང་བ་དང ། སྦྱིན་པ་བྱ་བར་བསམས་ཏེ། ཁྱིམ་ན་རས་དཀར་པོ་ཞིག་ཡོད་པ་ལས་དུམ་བུ་ཞིག་བཅད་ནས་བཅོམ་ལྡན་འདས་ལ་ཕུལ་ཏེ། རས་ཀྱི་དུམ་བུ་འདི་ན་བཟའི་ལྷན་པ་མཛོད་ཅིག་ཅེས་གསོལ་ཏོ། །བཅོམ་ལྡན་འདས་ཀྱིས་ཀྱང་དེ་ལ་ཐུགས་བརྩེ་བའི་སླད་དུ་བཞེས་པ་དང ། བྲམ་ཟེ་རབ་ཏུ་དགའ་ནས་མགུ་རངས་པར་གྱུར་ཏོ། །བཅོམ་ལྡན་འདས་ཀྱིས་དེ་ལ་ཐུགས་བརྩེ་བའི་སླད་དུ་ལུང་བསྟན་ཏེ། བྲམ་ཟེ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་བརྒྱ་འདས་ནས་མངོན་པར་འཚང་རྒྱ་སྟེ། མཚན་ཡང་མངོན་པར་ཤེས་པ་བཟང་པོ་ཞེས་བྱ་སྟེ། སྟོབས་བཅུ་རྫོགས་པར་འགྱུར་རོ། །ཞེས་ལུང་བསྟན་པ་དང་རབ་ཏུ་དགའ་ནས་སོང་ངོ ། །དེའི་ཚེ་ཡུལ་དེ་ན་ཆོ་རིགས་བཙུན་པའི་ཚོང་དཔོན་དང ། ཁྱིམ་བདག་ལ་སོགས་པས་འདི་སྙམ་དུ་བསམས་སོ། །ཅིའི་སླད་དུ་བཅོམ་ལྡན་འདས་སྦྱིན་པ་ཅུང་ཟད་ཙམ་གྱི་ལན་རབ་ཏུ་ཆེ་བ་བྱིན་སྙམ་བསམས་ཏེ་
451a
> ༄#། །སོ་སོ་ནས་རས་དཀར་པོ་བཤམས་ཏེ། དེ་བཞིན་གཤེགས་པའི་ན་བཟའ་རྣམ་པ་སྣ་ཚོགས་བྱས་ནས་སངས་རྒྱས་ལ་ཕུལ་ལོ། །ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་སྔོན་དགེ་བའི་རྩ་བ་ཅི་ཞིག་མཛད་ན། ཐམས་ཅད་ཀྱིས་ན་བཟའ་མང་པོ་ཕུལ་ཞེས་གསོལ་བ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཁྱོད་ལེགས་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང་ཁྱོད་ལ་བསྟན་པར་བྱའོ། །སྔོན་འདས་པའི་དུས་བསྐལ་པ་གྲངས་མེད་ཚད་མེད་པའི་ཕ་རོལ་ན་སངས་རྒྱས་རྣམ་པར་གཟིགས་ཞེས་བྱ་བ་འཇིག་རྟེན་དུ་གཤེགས་ཏེ་འཁོར་སྟོང་ཕྲག་དགུ་བཅུ་དང་ལྷན་ཅིག་ཏུ་བཞུགས་སོ། །དེའི་ཚེ་རྒྱལ་པོ་ནི་བན་དུ་ཞེས་བྱ་སྟེ། དེའི་བློན་པོ་ཆེན་པོ་གཅིག་གིས་སངས་རྒྱས་དང་དགེ་འདུན་དུ་བཅས་ཏེ་ཟླ་བ་གསུམ་གྱི་བར་དུ་བཞུགས་པར་སྦྱན་དྲངས་ནས་བཅོམ་ལྡན་འདས་ཀྱིས་ཀྱང་དེ་བཞིན་དུ་གནང་བ་དང ། བློན་པོ་དེ་ཕྱིར་ཁྱིམ་དུ་འོངས་ནས་ཡོ་བྱད་རྣམས་སྦྱོར་ཞིང་གཤོམ་མོ། །དེའི་ཚེ་རྒྱལ་པོས་ཀྱང་སངས་རྒྱས་དང་དགེ་འདུན་སྤྱན་དྲངས་པར་བསམས་ཏེ་སངས་རྒྱས་གང་ན་བར་སོང་སྟེ་ཕྱིན་པ་དང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དང་འཕགས་པའི་དགེ་འདུན་དུ་བཅས་ཏེ་ཟླ་བ་གསུམ་གྱི་བར་དུ་བདག་གི་མཆོད་པ་
451b
> བཞེས་ཤིག་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །ངས་སྔར་བློན་པོ་ཆེན་པོས་སྤྱན་དྲངས་པར་གཤེགས་པར་བྱ་སྟེ། སྐྱེས་བུ་ཆེན་བའི་ཆོས་ཀྱིས་སྔར་གནང་བ་ལས་འགལ་བར་བྱར་མི་རུང་ངོ ། །དེ་ནས་རྒྱལ་པོ་ཕྱིར་ཕོ་བྲང་དུ་འོངས་ཏེ་བློན་པོ་ཆེན་པོ་ལ་འདི་སྐད་ཅེས་བསྒོའོ། །ཡུལ་འདི་ནང་ལས་ཆེ་བ་མེད་དེ། བཅོམ་ལྡན་འདས་ངའི་ཡུལ་ན་བཞུགས་པས། ངས་སྔར་མཆོད་པ་བྱ་བར་བསམས་ཏེ་སྤྱན་དྲངས་ན། སྔར་ཁྱོད་ཀྱིས་སྤྱན་དྲངས་ཞེས་གསུང་གི་།ཁྱོད་རེ་ཞིག་སྡོད་ཅིག་།ངས་སྔར་སྦྱན་དྲངས་པའི་འོག་ཏུ་ཁྱོད་ཀྱིས་སྤྱན་དྲོངས་ཤིག་ཅེས་བསྒོ་བ་དང ། བློན་པོ་ཆེན་པོ་དེས་རྒྱལ་པོ་ལ་འདི་སྐད་ཅེས་གསོལ་ཏོ། །ལྷ། ཁྱོད་ཀྱིས་བདག་གི་ལུས་དང་སྲོག་ཀྱང་མི་ཉེས་པར་གཉའ་སྤྱོད་ལ། དེ་བཞིན་གཤེགས་པ་ཡང་རྟག་ཏུ་བཞུགས་པ་དང ། རྒྱལ་པོའི་ཡུལ་ཡང་རྟག་ཏུ་བདེ་སྐྱིད་ཅིང་ཡེ་འབྲོག་མི་འབྱུང་བར་གཉའ་སྤྱོད་ན་བདག་ཀྱང་རེ་ཞིག་སྡོད་དོ། །ཞེས་གསོལ་པ་དང ། རྒྱལ་པོས་འདི་ནི། མི་རུང་ངོ་སྙམ་བསམས་ནས་བདག་ཅག་གཉིས་ཉིན་རེས་ཀྱིས་སྤྱན་དྲང་ངོ ། །ཞེས་བསྒོས་ནས་ཉི་མ་གཅིག་ནི། རྒྱལ་པོས་སྤྱན་དྲངས། ཉི་མ་གཅིག་ནི། བློན་པོས་སྤྱན་དྲངས་ཏེ་གཉི་གའི་རེ་བ་བསྐང་ངོ ། །དེའི་ཚེ་བློན་པོ་ཆེན་པོ་དེས་དེ་བཞིན་གཤེགས་པ་ལ་ཆོས་གོས་སྨད་གསུམ་ཕུལ་ནས་དགེ་སློང་གི་དགེ་འདུན་སྟོང་ཕྲག་དགུ་
452a
> ༄#། །བཅུ་རྣམས་ལ་ཡང་ཆོས་གོས་བདུན་པ་རེ་རེ་སྦྱར་ཏེ་ཕུལ་ལོ། །དེའི་ཚེ་དེའི་དུས་ན་བློན་པོ་ཆེན་པོས་ཆོས་གོས་སྦྱར་ཏེ་སངས་རྒྱས་དང་དགེ་འདུན་རྣམས་ལ་ཕུལ་བ་དེ། གཞན་དུ་མ་སེམས་ཤིག་།དེ་ནི། ད་ལྟར་ང་ཡིན་ནོ། །ངས་ནི། སྐྱེ་བ་ཐམས་ཅད་དུ་བསོད་ནམས་བྱེད་པ་ལ་སྐྱོ་བ་མེད་པས། དེ་དག་ཐམས་ཅད་ཀྱི་རྣམ་པར་སྨིན་པ་ཡང་མྱོང་ནས་ཆུད་མ་ཟོས་སོ། །ཀུན་དགའ་བོ་ལ་སོགས་པ་འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ཐོས་ནས་བསོད་ནམས་ཀྱི་ལས་བྱེད་པ་ལ་བརྩོན་པར་གྱུར་ཏེ་མངོན་པར་དགའ་ནས་རྗེས་སུ་ཡི་རང་ངོ ། །བྲམ་ཟེས་ལྷན་པ་ཕུལ་བའི་ལེའུ་སྟེ་བཞི་བཅུ་གསུམ་པའོ།། །།སངས་རྒྱས་ཐོག་མ་བྱམས་པའི་ཐུགས་བསྐྱེད་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་དག་དབྱར་ཚུལ་ལས་བྱུང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ལ་ཕྱག་འཚལ་ནས་སྙུན་མི་མངའ་ཞེས་སྙུན་གསོལ་ཏོ། །བཅོམ་ལྡན་འདས་ཀྱིས་ཀྱང་བྱམས་པའི་ཐུགས་ཀྱིས་སྤྲོ་བ་བསྐྱེད་དེ། དགེ་སློང་ཁྱེད་སྡུག་བསྔལ་བར་མ་གྱུར་ཏམ་ཞེས་ཤིན་ཏུ་ཐུགས་བརྩེ་ཞིང་བྱམས་པའི་ཐུགས་ཀྱིས་བཀའ་སྩལ་པ་དང ། ཀུན་
452b
> དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འདི་ལྟར་བཅོམ་ལྡན་འདས་ཀྱིས་དགེ་སློང་དག་ལ་ཐུགས་བརྩེ་ཞིང་བྱམས་པའི་ཐུགས་བསྐྱེད་ནས་ཡུན་ཇི་སྲིད་ཅག་ལགས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཁྱོད་ཤེས་པར་འདོད་ན་ཁྱོད་ལ་བསྟན་པར་བྱའོ། །སྔོན་འདས་པའི་དུས་བསྐལ་པ་གྲངས་མེད་པ་བརྗོད་དུ་མེད་པའི་ཕ་རོལ་ན་སྡིག་པ་བྱས་པའི་མི་གཉིས་ཤིག་སེམས་ཅན་དམྱལ་བར་ལྷུང་སྟེ། དམྱལ་བའི་སྲུང་མ་ལྕགས་ཀྱི་ཤིང་རྟ་འདྲེན་དུ་བཅུག་ནས་ལྕགས་ཐོས་བརྡེགས་ཏེ་ཕན་ཚུན་མི་དལ་བར་རྒྱུག་ཏུ་བཅུག་གོ། དེ་ལ་མི་གཅིག་སྟོབས་ཆུང་སྟེ་འདྲེན་མ་ནུས་ནས་འདུག་པ་དང ། ལྕགས་ཀྱི་ཐོ་བས་བརྡེགས་ཏེ་ཚེ་བརྗེས་ནས་ཕྱིར་སོས་སོ། །གྲོགས་པོ་ཟླ་གཅིག་གིས་དེ་ལྟ་བུའི་སྡུག་བསྔལ་མཐོང་ནས་བྱམས་ཤིང་སྙིང་རྗེ་བའི་སེམས་སྐྱེས་ཏེ་དམྱལ་བའི་སྲུང་མ་ལ་འདི་སྐད་ཅེས་སྨྲས་སོ། །བདག་འབའ་ཞིག་གིས་ཤིང་རྟ་འདི་དྲང་གི། མི་འདི་ཐོང་ཞིག་ཅེས་སྨྲས་པ་དང ། སྲུང་མ་ཁྲོས་ནས་ལྕགས་ཀྱི་ཐོ་བས་བརྡེགས་ཏེ་དེར་ཚེ་འཕོས་པ་དང ། སུམ་ཅུ་རྩ་གསུམ་གྱི་ལྷར་སྐྱེས་སོ། །ཀུན་དགའ་བོ། དེའི་ཚེ་དེའི་དུས་ན་སེམས་ཅན་དམྱལ་བ་ན་འདུག་པ་ལས་བྱམས་ཤིང་སྙིང་བརྩེ་བའི་སེམས་བསྐྱེད་པ་དེ་ནི། ད་ལྟར་ང་ཡིན་ནོ། །ངས་དེའི་ཚེ་སེམས་ཅན་དམྱལ་བ་ན་དེ་ལ་ཐོག་མར་སྙིང་རྗེ་བའི་སེམས་བསྐྱེད་དེ། སེམས་
453a
> ༄#། །ཅན་ཐམས་ཅད་ལ་ཡང་དེ་ཙམ་གྱི་བར་དུ་ཐུགས་བརྩེ་ཞིང་བྱམས་པའི་སེམས་བསྐྱེད་དོ། །ཀུན་དགའ་བོ་དང ། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །སངས་རྒྱས་ཐོག་མ་བྱམས་པའི་ཐུགས་བསྐྱེད་པའི་ལེའུ་སྟེ་བཞི་བཅུ་བཞི་པའོ།། །།རྒྱལ་པོ་སྤྱི་བོ་སྐྱེས་གྱི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་ཆེན་པོའི་དགེ་འདུན་བརྒྱ་ཕྲག་བྱེད་དང་བཅུ་གསུམ་དང་ཐབས་ཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་ཀྱིས་དགེ་སློང་དག་འཇོ་སྒེག་ཅིང ། རྙེད་པ་དང་གྲགས་པ་ལ་ཆགས་ནས་ལྷག་པར་བྱས་པ་མང་དུ་འཆང་ཞིང་ཆོག་མི་ཤེས་པར་གསོག་པར་གྱུར་པ་བཅོམ་ལྡན་འདས་ཀྱིས་གཟིགས་ནས་དགེ་སློང་རྣམས་ལ་རྙེད་པ་ལ་ཆགས་པའི་སྐྱོན་འདི་དག་གསུངས་སོ། །གང་རྙེད་པ་ལ་ཆགས་པ་ནི། ལུས་ཞིག་ནས་ཚེ་འཕོས་མ་ཐག་ཏུ་ངན་སོང་གསུམ་དུ་ལྷུང་སྟེ་སྡུག་བསྔལ་ཚད་མེད་པ་མྱོང་བར་འགྱུར་རོ། །དེ་བས་ན་ངས་མངོན་དུ་དྲན་པ། སྔོན་འདས་པའི་དུས་ན་འདོད་པའི་དབང་གིས་ལྟུང་བར་གྱུར་ཏེ་སྡུག་བསྔལ་མང་པོ་མྱོང་ངོ ། །དེ་ནས་ཀུན་དགའ་བོས་པུས་མོས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་
453b
> འདས་ལ་འདི་སྐད་ཅེས་གསོལ་ཏོ། །སྔོན་བཅོམ་ལྡན་འདས་འདོད་པ་ལ་ཆགས་པའི་དབང་གིས་ལྟུང་བར་གྱུར་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་ཀྱི་བསྐལ་པ་གྲངས་མེད་ཚད་མེད་མཐའ་ཡས་བསམ་གྱིས་མི་ཁྱབ་དཔག་ཏུ་མེད་པའི་ཕ་རོལ་ན་འཛམ་བུའི་གླིང་འདིར་རྒྱལ་པོ་ཆེན་པོ་གུ་ས་ལི་ཞེས་བྱ་བ། འཛམ་བུའི་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བྱེད་དེ། བཙུན་མོ་དང་ཕོ་བྲངས་ལས་ནི། སྟོང་ཕྲག་ཉི་ཤུ་ཡོད་དོ། །བློན་པོ་ཆེན་པོ་ནི། སྟོང་ཕྲག་བཅུ་ཡོད་དོ། །དུས་གཞན་ཞིག་ན་རྒྱལ་པོ་སྤྱི་བོ་ལ་སྒོ་ང་འདྲ་བའི་ཆུ་བུར་ཞིག་བྱུང་སྟེ། གསལ་པ། ཡོངས་སུ་དག་པ། ན་ཚ་མེད་པའོ། །པགས་ཀྱིས་ཇེ་ཆེ་ཇེ་ཆེར་སྐྱེས་ཏེ་ཀུ་བ་ཙམ་དུ་གྱུར་པ་དང ། བཀས་ན་ནང་ནས་ཁྱེའུ་བལྟ་ན་སྡུག་པ། མཚན་དང་ལྡན་པ། སྐྲ་མཐོན་མཐིང་དུ་འདུག་པ། ལུས་ཀྱི་མདོག་གསེར་ལྟ་བུར་སྣང་བ་ཞིག་བྱུང་བར་གྱུར་ཏེ། མཚན་མཁན་གྱིས་བལྟས་ནས་བུ་འདི་ནི། ངོ་མཚར་ཆེ་བའི་ཡོན་ཏན་གྱི་མཚན་དང་ལྡན་ཏེ། གདོན་མི་ཟ་བར་འཁོར་ལོས་བསྒྱུར་བའི་རྒྱལ་པོར་འགྱུར་ཞིང་གླིང་བཞི་ལ་དབང་བར་འོང་ངོ ། །ཞེས་སྨྲས་ནས་ཁྱེའུ་ནི། མིང་ཡང་སྤྱི་བོ་སྐྱེས་ཞེས་བཏགས་སོ། །ཆེར་སྐྱེས་ནས་ཡོན་ཏན་དང་ལྡན་པས་རྒྱལ་པོས་ཀྱང་ཡུལ་གཅིག་གི་རྒྱལ་ཕྲན་དུ་བཅུག་གོ། དུས་གཞན་ཞིག་ན་རྒྱལ་པོ་ཆེན་པོ་ནད་
454a
> ༄#། །ཀྱིས་བཏབ་པ་དང ། རྒྱལ་ཕྲན་ཀུན་འདུས་ནས་ནད་གཡོག་དང ། དཔྱད་བྱས་ཀྱང་མ་ཕན་ཏེ། ཚེའི་དུས་བྱས་སོ། །དེ་ནས་རྒྱལ་ཕྲན་རྣམས་འདུས་ཏེ་སྤྱི་བོ་སྐྱེས་ད་གང་ན་འདུག་བར་སོང་ནས་ཕྱིན་པ་དང་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ནི། སྐུ་ཚེའི་དུས་བྱས་ཀྱི། ཁྱོད་རྒྱལ་པོ་ཆེན་པོར་གཤེགས་སུ་གསོལ་ཞེས་སྨྲས་པ་དང ། སྤྱི་བོ་སྐྱེས་ཀྱིས་འདི་སྐད་ཅེས་སྨྲས་སོ། །གལ་ཏེ་ང་རྒྱལ་པོར་འགྱུར་བའི་བསོད་ནམས་དང ། དབང་ཐང་ཞིག་ཡོད་ན་རྒྱལ་ཆེན་བཞི་དང ། བརྒྱ་བྱིན་ལ་སོགས་པས་ང་ལ་གསོལ་བ་བཏབ་སྟེ་དབང་བསྐུར་བར་ཤོག་ཅིག་ཅེས་སྨྲས་མ་ཐག་ཏུ་རྒྱལ་ཆེན་བཞིའི་རྒྱལ་པོ་ཡང་བབས་ནས་རིན་པོ་ཆེའི་བུམ་པ་སྤོས་ཆུས་བཀང་བ་ཐོགས་ཏེ་སྤྱི་བོར་བླུགས་ནས་དབང་བསྐུར་རོ། ། བརྒྱ་བྱིན་ལྷའི་དབང་པོ་ཡང་བབས་ནས་རིན་པོ་ཆེའི་ཅོད་པན་ཕུལ་ཏེ་མགོ་ལ་བཞག་ནས་ཡོན་ཏན་བསྔགས་སོ། །དེ་ནས་རྒྱལ་ཕྲན་རྣམས་ཀྱིས་དབུས་ཀྱི་ཡུལ་ཆེན་པོར་གཤེགས་པར་གསོལ་པ་དང ། སྤྱི་བོ་སྐྱེས་ཀྱིས་ཡང་འདི་སྐད་ཅེས་སྨྲས་སོ། །བདག་ལ་རྒྱལ་པོར་འགྱུར་བའི་དབང་ཐང་ཞིག་ཡོད་ན། ཡུལ་ས་ངའི་དྲུང་དུ་འོང་བའི་རིགས་ཀྱི། ང་ཡུལ་ས་སྙེགས་སུ་མི་འགྲོའོ། །ཞེས་སྨྲས་པ་དང ། དེ་མ་ཐག་ཏུ་ཡུལ་ཆེན་པོའི་རྒྱལ་པོའི་ཕོ་བྲང་དང ། སྐྱེད་མོས་ཚལ་དང ། ཁྲུས་ཀྱི་རྫིང་བུ་ལ་སོགས་ཏེ་དགོས་པ་ཐམས་ཅད་
454b
> དེར་བྱུང་བར་གྱུར་ནས་གསེར་གྱི་འཁོར་ལོ་དང ། གླང་པོ་ཆེ་དང ། རྟ་རིན་པོ་ཆེ་དང ། བུད་མེད་རིན་པོ་ཆེ་དང ། བློན་པོ་རིན་པོ་ཆེ་དང ། ཁྱིམ་བདག་རིན་པོ་ཆེ་ལ་སོགས་པ་ཐམས་ཅད་འདུས་ནས་གླིང་བཞི་ལ་དབང་བྱེད་པའི་འཁོར་ལོས་བསྒྱུར་བའི་རྒྱལ་པོར་གྱུར་ཏེ་ཆོས་བཞིན་དུ་སྲིད་འཚོའོ། །དེ་ནས་མི་མང་པོ་དགས་རྐོ་ཞིང་ཞིང་རྨོད་པ་མཐོང་ནས་བློན་པོ་རྣམས་ལ་འདི་དག་ཅི་བྱེད་ཅེས་བཀའ་སྩལ་པ་དང ། སྨྲས་པ། ཇི་ཙམ་དུ་སྲོག་དང་བཅས་པ་ཐམས་ཅད་ཟས་ཀྱིས་འཚོ་བས། འདི་དག་ནི། ཞིང་རྨོས་ནས་འཚོ་བར་བྱེད་དོ། །དེ་ནས་རྒྱལ་པོས་འདི་སྐད་ཅེས་སྨྲས་སོ། ། གལ་ཏེ་ང་ལ་རྒྱལ་པོར་འགྱུར་བའི་བསོད་ནམས་ཀྱི་དབང་ཐང་ཞིག་ཡོད་ན། ལས་བྱ་མི་དགོས་པར་རོ་བརྒྱ་དང་ལྡན་པའི་ཟས་རང་ཡོད་པར་གྱུར་ཏེ། ཐམས་ཅད་ཆོག་ཅིང་འགྲངས་ནས་བཀྲེས་པ་དང ། སྐོམ་པ་མེད་པར་གྱུར་ཅིག་ཅེས་སྨྲས་སོ། །དེ་སྐད་ཅེས་སྨྲས་མ་ཐག་ཏུ་བཟའ་བ་དང ། བཏུང་བ་ཡོད་པར་གྱུར་ཏོ། །དེ་ནས་ཡང་འཆག་ཏུ་སོང་སོང་བ་ལས། ཐ་ག་པ་དག་ཅིག་འཁལ་བ་དང ། འཐག་པ་དག་མཐོང་ནས་འདི་དག་ཅི་བྱེད་ཅེས་དྲིས་བ་དང ། སྨྲས་པ། ཁ་ཟས་ནི། རང་ཡོད་པར་གྱུར་ན། ལུས་བརྒྱན་པའི་གོས་མེད་དེ། འདི་དག་ནི། བགོ་བའི་གོས་བྱེད་དོ། །དེ་ནས་རྒྱལ་པོས་ཡང་འདི་སྐད་ཅེས་སྨྲས་སོ། །གལ་ཏེ་བདག་ལ་རྒྱལ་པོར་འགྱུར་བའི་དབང་ཐང་ཞིག་ཡོད་ན། བགོ་བའི་གོས་རང་ཡོད་པར་གྱུར་ཏེ་
455a
> ༄#། །དབུལ་ཕོངས་པ་ཐམས་ཅད་ཀྱང་གོས་ཀྱིས་ཆོག་པར་ཤོག་ཅིག་ཅེས་སྨྲས་སོ། །དེ་སྐད་ཅེས་སྨྲས་མ་ཐག་ཏུ་ཤིང་ཐམས་ཅད་ལས་བགོ་བའི་གོས་ཁ་དོག་རྣམ་པ་སྣ་ཚོགས་དང་ལྡན་པ་རང་སྐྱེས་ཏེ། མི་ཐམས་ཅད་ཀྱི་གོས་ཀྱང་ཟད་མི་ཤེས་པ་བྱུང་ངོ ། །དེ་ནས་ཡང་རྒྱལ་པོ་འཆག་ཅིང་སོང་སོང་བ་ལས། མི་དག་རོལ་མོའི་ཆ་བྱད་ཐོགས་པ་མཐོང་ནས་འདི་དག་ཅི་ཡིན་ཞེས་དྲིས་པ་དང ། སྨྲས་པ། ཁ་ཟས་དང་བགོ་བའི་གོས་ནི། ཆོག་པར་ཡོད་ན། རོལ་མོ་མང་པོ་མེད་དེ། འདི་དག་རང་དགའ་ཞིང་རྩེ་བའི་རོལ་མོ་ཡིན་ནོ། །རྒྱལ་པོས་སྨྲས་པ། གལ་ཏེ་བདག་ལ་རྒྱལ་པོའི་དབང་ཐང་ཞིག་ཡོད་ན། རོལ་མོ་དམ་པའི་ཆ་བྱད་ཐམས་ཅད་རང་ཡོད་པར་གྱུར་ཅིག་ཅེས་སྨྲས་མ་ཐག་ཏུ་ཤིང་ཐམས་ཅད་ཀྱི་ཡལ་ག་ལས་རོལ་མོའི་ཆ་བྱད་མང་པོ་འཕྱང་སྟེ། རོལ་མོ་འདོད་བ་ཞིག་ཡོད་ན། རང་འཁྲོལ་ཞིང་སྙན་པ་དང ། ཐོས་པ་ཙམ་གྱིས་དགའ་རངས་པར་གྱུར་ཏོ། ། རྒྱལ་པོའི་བསོད་ནམས་དང་དབང་ཐང་ཆེན་པོས་ནམ་མཁའ་ལས་རིན་པོ་ཆེ་སྣ་བདུན་ཆར་བཞིན་དུ་བབ་སྟེ་ཡུལ་ཀུན་གང་ནས་རྒྱལ་པོས་བློན་པོ་དག་ལ་འདི་ལྟ་བུར་གྱུར་པ་སུའི་ཡོན་ཏན་ཞེས་དྲིས་པ་དང ། བློན་པོ་རྣམས་ཀྱིས་འདི་སྐད་ཅེས་སྨྲས་སོ། །འདི་ནི། རྒྱལ་པོའི་ཡོན་ཏན་དང ། སེམས་ཅན་གྱི་བསོད་ནམས་ཀྱིས་འདི་ལྟར་གྱུར་ཏོ། །ཞེས་
455b
> སྨྲས་པ་དང ། རྒྱལ་པོས་ཡང་འདི་སྐད་ཅེས་སྨྲས་སོ། །གལ་ཏེ་སེམས་ཅན་གྱི་བསོད་ནམས་ཀྱི་མཐུ་ཡིན་ན་ནི། རིན་པོ་ཆེ་འདི་དག་ཀུན་ཏུ་འབབ་པར་གྱུར་ཅིག། གལ་ཏེ་ང་འབབ་ཞིག་གི་དབང་ཐང་ཡིན་ན། ཕོ་བྲང་གི་ནང་འབའ་ཞིག་ཏུ་བོབས་ཤིག་ཅེས་སྨྲས་པ་དང ། གཞན་ཀུན་ན་བབ་པ་ནི། ཆད་ཀྱི། ཕོ་བྲང་གི་ནང་འབའ་ཞིག་ཏུ་ཉིན་ཞག་བདུན་གྱི་བར་དུ་བབ་བོ། །རྒྱལ་པོ་སྤྱི་བོ་སྐྱེས་ཀྱིས་འཛམ་བུའི་གླིང་དུ་ལོ་བརྒྱད་ཁྲི་བཞི་སྟོང་གི་བར་དུ་འདོད་པ་ལྔ་ལ་ལོངས་སྤྱོད་པ་ལས་དུས་གཞན་ཞིག་ན་ཕོ་བྲང་གི་སྒོར་གནོད་སྦྱིན་ཅིག་བྱུང་སྟེ་སྐད་ཆེན་པོར་འདི་སྐད་ཅེས་སྨྲས་སོ། །ཤར་ཕྱོགས་ན་ཤར་གྱི་ལུས་འཕགས་གླིང་ཞེས་བྱ་བ་ཡོད་དེ། དེ་ན་ཡང་བདེ་སྐྱིད་ལ་དཔེ་མེད་པར་བཟང་གི ། རྒྱལ་པོ་ཆེན་པོ་དེར་ཡང་རོལ་ཅིང་གཤེགས་པའི་རིགས་སོ། །ཞེས་སྨྲས་པ་དང ། རྒྱལ་པོ་ཡང་དེར་འགྲོ་བར་དགའ་ནས་གསེར་གྱི་འཁོར་ལོ་ནམ་མཁའ་ལ་འཕགས་པ་དང ། བློན་པོ་དང ། རིན་པོ་ཆེ་སྣ་བདུན་ལ་སོགས་པ་ཡང་རྗེས་སུ་འཕགས་ཏེ་ཤར་གྱི་ལུས་འཕགས་གླིང་དུ་ཕྱིན་ཏོ། །རྒྱལ་ཕྲན་ཕྱག་མི་འཚལ་བ་རྣམས་ཀྱང་ཐམས་ཅད་ཕྱག་འཚལ་ནས་ལུས་འཕགས་གླིང་དུ་འདོད་པ་ལྔ་ལ་ལོ་སྟོང་ཕྲག་བརྒྱད་ཅུའི་བར་དུ་ལོངས་སྤྱོད་དོ། །དེ་ནས་ཡང་གནོད་སྦྱིན་གྱིས་འདི་སྐད་ཅེས་སྨྲས་སོ། །ནུབ་ཕྱོགས་ན་ནུབ་ཀྱི་བ་ལང་སྤྱོད་
456a
> ༄#། །ཅེས་བྱ་བ་ཡོད་དེ། དེ་ན་ཡང་རབ་ཏུ་བདེ་སྐྱིད་ཀྱི། རྒྱལ་པོ་ཆེན་པོ་ཡང་དེར་གཤེགས་པའི་རིགས་སོ། །ཞེས་སྨྲས་སོ། །རྒྱལ་པོ་དེ་ཡང་དེར་འགྲོ་བར་དགའ་ནས་ནུབ་ཀྱི་བ་ལང་སྤྱོད་དུ་ལོ་སྟོང་ཕྲག་བཅུ་བཞིའི་བར་དུ་བདེ་བ་ལ་ལོངས་སྤྱོད་དོ། །དེ་ནས་ཡང་གནོད་སྦྱིན་གྱིས་འདི་སྐད་ཅེས་སྨྲས་སོ། །བྱང་ཕྱོགས་ན་བྱང་གི་སྒྲ་མི་སྙན་ཞེས་བྱ་བ་ཡོད་དེ། དེ་ན་གནས་པའི་མི་དག་འབྱོར་བ། ལོ་ལེགས་པ། ལོངས་སྤྱོད་དང་ལྡན་གྱི། རྒྱལ་པོ་ཡུལ་དེར་གཤེགས་པའི་རིགས་སོ། །ཞེས་སྨྲས་པ་དང ། རྒྱལ་པོ་འགྲོ་བར་དགའ་ནས་བྱང་གི་སྒྲ་མི་སྙན་དུ་འདོད་པ་ལྔའི་དམ་པ་ལ་ལོ་སྟོང་ཕྲག་བཅོ་བརྒྱད་ཀྱི་བར་དུ་ལོངས་སྤྱོད་པར་གྱུར་ཏོ། །དེ་ནས་དུས་ཕྱི་ཞིག་ན་གནོད་སྦྱིན་གྱིས་འདི་སྐད་ཅེས་སྨྲས་སོ། །རྒྱལ་ཆེན་བཞིའི་རིགས་ཀྱི་རྒྱལ་པོའི་གནས་ཀྱང་རབ་ཏུ་བདེ་བ་ནི། ཚད་བྱ་བར་ཡང་དཀའོ། །རྒྱལ་པོ་དེར་ཡང་གཤེགས་པའི་རིགས་སོ། །ཞེས་སྨྲས་པ་དང ། རྒྱལ་པོ་དང ། བློན་པོ་དང ། དཔུང་གི་ཚོགས་རྣམ་བཞི་དང་བཅས་ཏེ་ནམ་མཁའ་ལ་འཕགས་ཏེ་དོང་ངོ ། །རྒྱལ་ཆེན་བཞིའི་རིགས་ཀྱི་རྒྱལ་པོས་རྒྱང་མ་ནས་མཐོང་བ་དང ། འཇིགས་སྐྲག་ནས་དཔུང་གི་ཚོགས་བཤམས་ཏེ་ཕྱི་རོལ་ཏུ་བྱུང་བ་དང ། ཅི་བྱར་ཡང་མེད་ནས་ཕྱིར་གནས་སུ་དོང་ངོ ། །སྤྱི་བོ་སྐྱེས་དེར་ཡང་ལོ་སྟོང་ཕྲག་བཅུའི་བར་དུ་འདོད་པ་ལ་ལོངས་སྤྱད་ནས་ཡང་
456b
> འདི་སྙམ་དུ་སུམ་ཅུ་རྩ་གསུམ་གྱི་ལྷའི་རིས་སུ་འགྲོ་བར་བསམས་ནས་འཁོར་དང་བཅས་སུ་སྟེང་གི་ནམ་མཁའ་ལ་འཕགས་ཏེ་སུམ་ཅུ་རྩ་གསུམ་གྱི་ལྷའི་རིས་སུ་སོང་ངོ ། །དེའི་ཚེ་དྲང་སྲོང་ལྔ་བརྒྱ་ཙམ་ཞིག་རི་རབ་ལྷུན་པོའི་སུལ་ན་གནས་པ་ལས། རྒྱལ་པོའི་གླང་པོ་ཆེ་དང ། རྟའི་གཅིན་རྟུག་ལྷུང་བས་དྲང་སྲོང་དེ་དག་གི་ལུས་ལ་རེག་པར་གྱུར་ནས་དེ་དག་གཅིག་ལ་གཅིག་འདི་ཅི་ཡིན་ཞེས་དྲིས་པ་དང ། དྲང་སྲོང་མཁས་པ་བློ་དང་ལྡན་པ་ཞིག་གིས་དྲང་སྲོང་གཞན་དག་ལ་འདི་སྐད་ཅེས་སྨྲས་སོ། །རྒྱལ་པོ་སྤྱི་བོ་སྐྱེས་ཡར་སུམ་ཅུ་རྩ་གསུམ་གྱི་ལྷའི་རིས་སུ་སོང་ངོ། །ཞེས་ཟེར་གྱི། འདི་ནི། གདོན་མི་ཟ་བར་དེ་དག་གི་གླང་པོ་ཆེ་དང ། རྟའི་མི་གཙང་བ་ཡིན་ནོ། །ཞེས་སྨྲས་ནས་དྲང་སྲོང་རྣམས་ཁྲོས་ཏེ་གསང་སྔགས་དང ། ཕྱག་རྒྱ་བཅིངས་པས་རྒྱལ་པོ་སྤྱི་བོ་སྐྱེས་དང་འཁོར་མང་པོ་འགྲོར་མེད་པར་བྱས་སོ། །རྒྱལ་པོས་ཀྱང་དེ་ལྟར་ཤེས་ཤིང་རིག་ནས་འདི་སྐད་ཅེས་དམ་བཅས་སོ། །གལ་ཏེ་བདག་ལ་བསོད་ནམས་དང་དབང་ཐང་ཞིག་ཡོད་ན་དྲང་སྲོང་དེ་དག་ངའི་ཐང་དུ་ལྷགས་ཏེ་ང་ལ་མཆོད་པར་ཤོག་ཅིག་ཅེས་སྨྲས་ནས་རྒྱལ་པོའི་ཡོན་ཏན་ཆེན་པོའི་བྱིན་དང་ཤུགས་ཀྱིས་དྲང་སྲོང་ལྔ་བརྒྱ་ཙམ་པོ་རིལ་གྱིས་དེར་ལྷགས་ནས་གཡོག་བྱས་ཏེ་སུམ་ཅུ་རྩ་གསུམ་གྱི་ལྷའི་རིས་སུ་དོང་ངོ ། ཡར་མ་ཕྱིན་པར་རྒྱང་མ་ནས་ལྷའི་ཕོ་བྲང་ཡིད་དུ་འོང་བ་ཤིན་ཏུ་བཀྲ་བར་སྣང་བ། ལྷང་ངེ ། ལྷམ་
457a
> ༄#། །མེར་མཐོང་བར་གྱུར་ཏོ། །ལྷའི་ཕོ་བྲང་ཡིད་དུ་འོང་བ་ལ་སྒོ་ཆེན་པོ་བརྒྱ་ཕྲག་བཅུ་གཉིས་ཡོད་དེ། ལྷ་རྣམས་འཇིགས་སྡངས་ནས་སྒོ་རྣམས་བཅད་དེ་ལྕགས་ཀྱི་གཏན་པ་སུམ་རིམ་བཅུག་གོ་།སྤྱི་བོ་སྐྱེས་དཔུང་གི་ཚོགས་དང་བཅས་སུ་ཐོགས་པ་མེད་པར་དེར་ཕྱིན་པ་དང ། རྒྱལ་པོས་དུང་བུ་སྟེ་གཞུ་བདུངས་ནས་གཞུ་རྒྱུད་སྦྲེངས་པ་དང ། ལྷའི་ཕོ་བྲང་གི་སྒོ་བརྒྱ་ཕྲག་བཅུ་གཉིས་དུས་གཅིག་ཏུ་རང་དབྱེ་བ་དང ། བརྒྱ་བྱིན་གྱིས་ཕྱི་རོལ་ནས་བསུས་ཏེ་ལྷའི་ཕོ་བྲང་དུ་ཁྲིད་ནས་བརྒྱ་བྱིན་གྱི་སྟོན་ཕྱེད་ལ་འདུག་ཏུ་བཅུག་གོ་།ལྷའི་དབང་པོ་དང ། མིའི་དབང་པོ་གཉིས་བྱད་གཟུགས་འདྲ་སྟེ། དབང་པོ་མཐོང་བདག་གིས་བྱེ་བྲག་མི་ཕྱེད་ན། ལྷའི་མགྱོགས་བུལ་གྱིས་རྟོགས་སོ། །རྒྱལ་པོས་ལྷའི་ཕོ་བྲང་དུ་འདོད་པ་ལྔའི་དམ་པ་ལ་ལྷའི་དབང་པོ་བརྒྱ་བྱིན་སུམ་ཅུ་རྩ་དྲུག་བརྗེས་ཀྱི་བར་དུ་ལོངས་སྤྱོད་དོ། །ལྷའི་དབང་པོའི་ནང་གི་ཐ་མ་དེ་བྱང་ཆུབ་སེམས་དཔའ་འོད་སྲུང་ཞེས་བྱ་བ་སྟེ། དེའི་ཚེ་ལྷ་མ་ཡིན་གྱི་རྒྱལ་པོས་ལྷ་རྣམས་ལ་དམག་དྲངས་ནས་བརྒྱ་བྱིན་དང་འཐབ་པ་ལས། བརྒྱ་བྱིན་གྱིས་མ་ཐུབ་ནས་དཔུང་གི་ཚོགས་དང་ཕྱིར་གནས་སུ་བྲོས་སོ། །དེ་ནས་སྤྱི་བོ་སྐྱེས་ཕྱིར་བྱུང་སྟེ་དུང་བུས། གཞུ་རྒྱུད་སྦྲེངས་པས་ལྷ་མ་ཡིན་གྱི་དམག་རྣམས་དེ་མ་ཐག་ཏུ་བྱེར་རོ། །དེའི་ཚེ་སྤྱི་བོ་སྐྱེས་ཀྱིས་འདི་སྙམ་དུ་བསམས་སོ། །བདག་
457b
> གི་མཐུ་སྟོབས་ནི། གང་དང་ཡང་མི་མཉམ་ན། ད་བརྒྱ་བྱིན་དང་ཐུན་མོང་དུ་འདུག་པ་ཅི་རུང ། ཉིས་ན་བསད་ལ་ང་འབའ་ཞིག་གིས་བྱས་ན་ལེགས་སོ་སྙམ་མོ། སྡིག་པའི་སེམས་བསྐྱེད་མ་ཐག་ཏུ་ནམ་མཁའ་ལས་ལྷུང་ནས་སྔོན་གྱི་ཕོ་བྲང་རྙིང་པའི་སྒོ་དྲུང་དུ་ལྷུང་སྟེ་སྲོག་དང་བྲལ་ལ་ཁད་པ་ཙམ་དུ་ཉམ་ཐག་པར་གྱུར་ཏོ། །དེ་ནས་མི་དག་ལྷགས་ཏེ་འདི་སྐད་ཅེས་དྲིས་སོ། །གལ་ཏེ་འཇིག་རྟེན་གྱི་ཁྱིམ་པ་དག། རྒྱལ་པོ་སྤྱི་བོ་སྐྱེས་ཇི་ལྟར་ཚེའི་དུས་བྱས་ཞེས་འདྲི་ན། དེ་ལ་བདག་ཅག་གིས་ཇི་སྐད་ཅེས་བྱ། སྨྲས་པ། གལ་ཏེ་དེ་སྐད་ཅེས་འདྲི་བ་ཡོད་ན།་དེ་ལ་འདི་སྐད་ཅེས་གྱིས་ཤིག་།རྒྱལ་པོ་སྤྱི་བོ་སྐྱེས་ནི། འདོད་པའི་དབང་གིས་ཚེ་འཕོས་སོ། །དེས་གླིང་བཞི་ལ་ལོ་བྱེ་བ་ཕྲག་བཞི་བཅུའི་བར་དུ་དབང་བྱས་ཏེ། ཉིན་ཞག་བདུན་གྱི་བར་དུ་རིན་པོ་ཆེ་ཡང་ཆར་བཞིན་བབ། ལྷའི་རིས་གཉིས་སུ་ཕྱིན་ཀྱང་ཆོག་མ་ཤེས་པས་ནམ་མཁའ་ལས་ལྟུང་སྟེ་ཚེ་འཕོས་སོ། །ཞེས་བྱོས་ཤིག་།དེ་བས་ན་དགེ་སློང་དག་རྙེད་པ་དང ། གྲགས་པ་ནི། ཡང་དག་པར་ཉེས་པའི་སྐྱོན་ཆེན་པོ་སྟེ། ཅི་ནས་ཀྱང་རིང་དུ་སྤང་བར་སོམས་ལ་ཡང་དག་པར་བྱང་ཆུབ་ལ་ནན་ཏན་གྱིས་ཤིག་།དེ་ནས་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རྒྱལ་པོ་སྤྱི་བོ་སྐྱེས་དེ་སྔོན་བསོད་ནམས་ཅི་ཞིག་བགྱིས་ན། འདི་ལྟ་བུའི་འབྲས་བུ་ཆེན་པོ་ཐོབ་པར་གྱུར། བཅོམ་ལྡན་
458a
> ༄#། །འདས་ཀྱིས་བཀའ་སྩལ་པ། སྔོན་འདས་པའི་བསྐལ་པ་གྲངས་མེད་བསམ་གྱིས་མི་ཁྱབ་པ་འདས་པའི་ཕ་རོལ་ན་སངས་རྒྱས་པུར་ཤ་ཞེས་བྱ་བ་འཇིག་རྟེན་དུ་གཤེགས་ཏེ། འཁོར་དང་བཅས་སུ་འཇིག་རྟེན་གྱི་དོན་མཛད་དོ། །དེའི་ཚེ་བྲམ་ཟེའི་བུ་ཞིག་ཆུང་མ་ལེན་སྙམ་སྟེ། འཇིག་རྟེན་པའི་ཆོས་ཀྱིས་ཆུང་མ་ལེན་ན། སྲན་མ་སྤར་གང་བླངས་ཏེ་གཏོར་བའི་རིགས་སོ། །ཁྱེའུ་དེ་ཡང་སྲན་མ་ཐོགས་ཏེ་འཐོར་དུ་སོང་སོང་བ་ལས། ལམ་དུ་བཅོམ་ལྡན་འདས་དང་ཕྲད་ནས་སེམས་ཡིད་དགའ་སྟེ་ལག་ན་སྲན་མ་ཐོགས་པ་དག་བཅོམ་ལྡན་འདས་ལ་གཏོར་བ་དང ། འབྲུམ་བུ་བཞི་ལྷུང་བཟེད་ཀྱི་ནང་དུ་སོང་ངོ ། །འབྲུམ་བུ་གཅིག་ནི། དབུའི་སྤྱི་བོར་ཆགས་སོ། །བསོད་ནམས་ཀྱི་རྒྱུ་དང་རྐྱེན་དེ་ཙམ་གྱིས་བསོད་ནམས་ཆེན་པོ་ཐོབ་སྟེ། སྲན་མ་འབྲུམ་བུ་བཞི་ལྷུང་བ་བཟེད་ཀྱི་ནང་དུ་སོང་བས་གླིང་བཞི་ལ་དབང་བྱེད་པར་གྱུར་ཏོ། །འབྲུམ་བུ་གཅིག་སྤྱི་བོ་ལ་ཆགས་པས་ལྷ་རིམ་པ་གཉིས་ཀྱི་ལོངས་སྤྱོད་མྱོང་བར་གྱུར་ཏོ། །དེའི་ཚེ་ཉེ་གནས་རྣམས་ཀྱིས་སངས་རྒྱས་ཀྱིས་གསུངས་པ་ཐོས་ནས་ལ་ལ་ནི། འབྲས་བུ་དང་པོ་ནས་གཉིས་པ་དང ། གསུམ་པ་དང ། དགྲ་བཅོམ་པའི་བར་དུ་ཐོབ་པར་གྱུར་ཏོ། །འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །
458b
> རྒྱལ་པོ་སྤྱི་བོ་སྐྱེས་ཀྱི་ལེའུ་སྟེ་བཞི་བཅུ་ལྔ་པའོ།། །།བུ་མོ་སུ་མ་ནའི་བུ་བཅུའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཁྱིམ་བདག་མགོན་མེད་ཟས་སྦྱིན་གྱི་བུ་མོ་ཐ་ཆུང་སུ་མན་ཞེས་བྱ་བ་མངའ་བྱད་མཛེས་ཤིང་བལྟ་ན་སྡུག་པ་ཞིག་ཡོད་དེ། བུའི་ནང་ན་བུ་མོ་ཐ་ཆུང་དེ་ལ་བྱམས་པས་གར་འགྲོ་ཡང་ཁྲིད་དོ། །དུས་གཞན་ཞིག་ན་ཁྱིམ་བདག་སངས་རྒྱས་ལ་ཕྱག་འཚལ་དུ་སོང་བ་དང ། བུ་མོ་ཡང་ཕྱི་བཞིན་སོང་ནས་བུ་མོ་དེས་སངས་རྒྱས་མཐོང་བ་དང་ལྷག་པར་དགའ་བའི་སེམས་སྐྱེས་ཏེ། སྤོས་ཀྱིས་སངས་རྒྱས་བཞུགས་པའི་གནས་ཀུན་ཏུ་བྱུག་པར་བསམས་པ་དང ། དེའི་ཚེ་བུ་མོ་དེའི་ལག་ན་ཨ་མྲའི་འབྲས་བུ་ཞིག་ཐོག་པ་ལས། བཅོམ་ལྡན་འདས་ཀྱིས་འོན་ཅིག་ཅེས་བཀའ་སྩལ་པ་དང ། བུ་མོས་ཀྱང་དེ་མ་ཐག་ཏུ་བཅོམ་ལྡན་འདས་ཀྱི་ཕྱག་ཏུ་ཕུལ་ལོ། །བཅོམ་ལྡན་འདས་ཀྱིས་ཨ་མྲའི་འབྲས་བུ་བཞེས་ནས་སྤོས་དམ་པའི་མིང་རྣམ་པ་མང་པོ་བྲིས་ཏེ་བུ་མོའི་ལག་ཏུ་ཕྱིར་བྱིན་ནོ། །དེ་ནས་བུ་མོ་ཕ་དང་བཅས་སུ་ཕྱིར་ཁྱིམ་དུ་འོངས་ནས་ཚོང་དུས་སུ་སོང་སྟེ་བཅོམ་ལྡན་འདས་བཞེད་པའི་སྤོས་རྣམ་པ་སྣ་ཚོགས་ཉོས་ནས་ཕྱིར་ཡང་རྒྱལ་བུ་རྒྱལ་བྱེད་ཀྱི་ཚལ་དུ་སོང་སྟེ་ཉིན་གཅིག་བཞིན་དུ་
459a
> ༄#། །སྤོས་བདར་ནས་གནས་ཀུན་ཉུག་གོ་།དུས་གཞན་ཞིག་ན་ཡུལ་ཏིག་ཅ་ཤི་རིའི་རྒྱལ་པོས་བུ་ཞིག་རྒྱལ་པོའི་ཁབ་ཏུ་མངགས་ནས་འཕྱན་ཅིང་སོང་སོང་བ་ལས། མཐར་གྱིས་རྒྱལ་བུ་རྒྱལ་བྱེད་ཀྱི་ཚལ་དུ་ཕྱིན་པ་དང ། བུ་མོ་སྤོས་བདར་ཞིང་འདུག་པ་མཐོང་ནས་བུ་མོ་དེ་ལ་ཆགས་ཏེ་ཆུང་མར་བླང་བར་བསམས་ནས་རྒྱལ་པོ་གསལ་རྒྱལ་ལ་བུ་མོ་དེ་བསླངས་པ་དང ། རྒྱལ་པོས་དེ་སུའི་བུ་མོ་ཡིན་ཞེས་སྨྲས་ན། དེ་ནི། ཁྱིམ་བདག་མགོན་མེད་ཟས་སྦྱིན་གྱི་བུ་མོའོ། །ཞེས་སྨྲས་སོ། ། འོ་ན་ང་ལ་གསོལ་ཀྱང་མི་ཕན་གྱི། བུ་མོ་ཉིད་ཀྱི་ཕ་མ་ལ་གསོལ་ཅིག་ཅེས་བསྒོའོ། །རྒྱལ་བུ་དེས་རྒྱལ་པོ་ལ་དུས་ཀྱིས་གསོལ་བ་དང ། རྒྱལ་པོས་ཀྱང་དེ་བཞིན་གྱིས་ཤིག་ཅེས་བསྒོ་བ་དང ། རྒྱལ་བུ་དེས་བདག་གི་གཡོག་དང ། འཁོར་ཀུན་ཕྱིར་ཡུལ་དུ་བཏང་ནས་གླང་པོ་ཆེ་གཅིག་པུ་ཞིག་ཕྱིར་བཞག་གོ་།དུས་གཞན་ཞིག་ན་རྒྱལ་བུ་རྒྱལ་བྱེད་ཀྱི་ཚལ་དུ་སོང་ནས་བུ་མོ་སུ་མ་ན་བརྐུས་ཏེ་གླང་པོ་ཆེ་ལ་བསྐྱོན་ནས་བྲོས་པ་དང ། མགོན་མེད་ཟས་སྦྱིན་གྱིས་བསྙགས་ན་ཡང་མ་སླེབ་སྟེ། ཕྱིར་ཡུལ་དུ་ཕྱིན་ནས་ཆུད་མར་བྱས་སོ། །དེ་ནས་ཆུང་མ་དེ་སེམས་ཅན་དང་ལྡན་པར་གྱུར་ཏེ། ཕྱིས་ཟླ་བ་ཚང་ནས་སྒོ་ན་བཅུ་ཞིག་བཙས་སོ། །སྒོ་ང་བཅག་པ་དང ། སྒོ་ང་རེ་རེའི་ནང་ནས་བུ་ཁྱེའུ་བལྟ་
459b
> ན་སྡུག་པ། མཛེས་ཤིང་བཟང་བ། གཞན་ལས་འཕགས་པ་རེ་རེ་བྱུང་ངོ ། །བུ་དེ་དག་ཆེར་སྐྱེས་ནས་དཔའ་ཞིང་རྩལ་ཆེ་བས། རི་དྭགས་གསོད་པ་ལ་དགའ་བར་གྱུར་པ་དང ། ཁྱེའུའི་མས་འདི་ལྟར་རི་དྭགས་གསོད་པར་མ་བྱེད་ཅིག་ཅེས་བསྒོ་བ་དང ། བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །རི་དྭགས་བཤོར་བ་ལས་དགའ་བ་མེད་དེ། བདག་ཅག་གི་མས་གསོད་དུ་མི་གནང་བ་ལས་ན། བདག་ཅག་ལ་སྡང་བ་ལྟ། མས་སྨྲས་པ། ཁོ་མོ་ནི། ཁྱེད་ལ་སྡང་བ་མ་ཡིན་གྱི། ཁྱེད་ལ་བྱམས་པའི་ཕྱིར་རི་དྭགས་གསོད་དུ་མ་བཅུག་པ་ཡིན་ནོ། །འདི་ལྟ་སྟེ། སྲོག་གཅོད་པའི་སྡིག་གིས་སེམས་ཅན་དམྱལ་བར་ལོ་བརྒྱ་སྟོང་དུ་མའི་བར་དུ་སྡུག་བསྔལ་མྱོང་སྟེ། རྟག་ཏུ་ཤ་བའི་མགོ་ཅན་དང ། ལུག་གི་མགོ་ཅན་དང ། རི་བོང་གི་མགོ་ཅན་ལ་སོགས་ཏེ། རི་དྭགས་སྣ་ཚོགས་ཀྱི་མགོ་ཅན་དུ་གྱུར་ནས་དམྱལ་བའི་སྲུང་མས་ལོ་གྲངས་མེད་པའི་བར་དུ་གསོད་པར་འགྱུར་རོ། །གལ་ཏེ་དེ་ལས་ཐར་པར་འདོད་ན་ཡང་སྡིག་པའི་ལས་དེ་ལས་མི་ཐར་རོ། །བུ་རྣམས་ཀྱིས་སྨྲས་པ། ཇི་ལྟར་ཁྱོད་ཀྱིས་བསྒོ་བཞིན་དུ་བྱ་ན། འདི་སྐད་དུ་བསྒོ་བ་འདི་གཞན་ལས་གསན་ཏམ།་ཁྱོད་ཉིད་ཀྱིས་བསམས་ཏེ་སྨྲས། ཚིག་འདི་ནི། ཁོ་མོས་སངས་རྒྱས་ལས་ཐོས་སོ། །ཞེས་སྨྲས་པ་དང ། བུ་རྣམས་ཀྱིས་སངས་རྒྱས་ཞེས་བྱ་བ་ཅི་ཡིན་སྟོན་ཅིག་ཅེས་སྨྲས་
460a
> ༄#། །སོ། །ཅི་ཁྱོད་ཀྱིས་མ་ཐོས་སམ། རྒྱལ་པོ་ཡབ་ཟས་གཙང་མའི་སྲས་སྐུ་མཛེས་ཤིང་བཟང་བ། འཁོར་ལོས་བསྒྱུར་བའི་རྒྱལ་པོར་འགྱུར་བ་ལས། རྒ་བ་དང ། ན་བ་དང ། འཆི་བ་མ་འདོད་དེ། རབ་ཏུ་བྱུང་ནས་ལམ་བསྒོམས་པས་སྨོན་ལམ་བཞིན་དུ་གྲུབ་སྟེ་བླ་ན་མེད་པའི་འབྲས་བུ་ཐོབ་ནས་སྐུ་ཁྲུ་བཅུ་དྲུག་པ། མཚན་དང་དཔེ་བྱད་ཀྱིས་ཡོངས་སུ་བརྒྱན་པ། རིག་པ་གསུམ་དང་མངོན་པར་ཤེས་པ་དྲུག་ཏུ་ལྡན་པ། སྔ་མ་འདས་པ་ཤེས་པ་ཡང་མཐའ་མེད་ལ། ཕྱིས་འབྱུང་བ་ཤེས་པ་ཡང་མཐའ་མེད་དེ། དུས་གསུམ་ནི། ལག་མཐིལ་ན་འབྲས་བུ་བཞག་པ་དང་འདྲའོ། །ཞེས་སྨྲས་པ་བུ་རྣམས་ཀྱིས་ཐོས་ནས་རབ་ཏུ་དགའ་སྟེ། སངས་རྒྱས་དེ་ད་ལྟར་འདི་ནས་ཉེ་རིང་ཇི་ཙམ་ཞིག་ན་བཞུགས་པ་མཐོང་བར་རུང་ངམ་ཞེས་སྨྲས་པ་དང ། མས་སྨྲས་པ། ད་ལྟར་མཉན་ཡོད་ན་བཞུགས་ཏེ། མཐོང་དུ་རུང་ངོ ། །བུ་རྣམས་ཀྱིས་སྨྲས་པ། འོ་ན་བདག་ཅག་སངས་རྒྱས་བལྟར་འགྲོའོ། །ཞེས་གསོལ་པ་དང ། བུའི་མས་ཀྱང་གནང་ནས་བུ་རྣམས་གཅིག་ཅར་མཉན་ཡོད་དུ་དོང་ངོ ། །དེར་ཕྱིན་པ་དང་མེས་པོ་མགོན་མེད་ཟས་སྦྱིན་གྱིས་མཐོང་ནས་རབ་ཏུ་དགའ་མགུ་རངས་ཏེ་ཚ་བོ་རྣམས་ཁྲིད་དེ་རྒྱལ་བུ་རྒྱལ་བྱེད་ཀྱི་ཚལ་དུ་དེ་བཞིན་གཤེགས་པ་བལྟར་དོང་ངོ ། །བྱིས་པ་དེ་དག་གིས་སངས་རྒྱས་ཀྱི་མཚན་
460b
> སྔོན་ཐོས་པ་བས་སྟོང་འགྱུར་གྱིས་ལྷག་པར་བཟང་བ་མཐོང་ནས་ཤིན་ཏུ་དགའ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཅི་རིགས་པར་ཆོས་བསྟན་པས་ཁྱེའུ་བཅུ་ཆར་དུས་གཅིག་ཏུ་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ནས་སངས་རྒྱས་ལ་རབ་ཏུ་འབྱུང་བར་གསོལ་པ་དང ། བཅོམ་ལྡན་འདས་ཀྱིས་བྱིས་པ་རྣམས། ཁྱེད་ཀྱི་ཕ་མས་གནང་ངམ་ཞེས་བཀའ་སྩལ་ན། བདག་ཅག་གིས་ད་དུང་མ་གསོལ་ལོ། །ཞེས་གསོལ་པ་དང ། ཕ་མས་མག་ནང་གི་བར་དུ་རབ་ཏུ་འབྱུང་དུ་མི་གནང་ངོ ། །ཞེས་བཀའ་སྩལ་ཏོ། །དེ་ནས་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི། འདི་དག་གི་མེས་པོ་ལགས་ཏེ། བདག་གི་ཚ་བོ་ལ་བདག་ཀྱང་ད་དུང་བས། བདག་གིས་རབ་ཏུ་འབྱུང་བར་གནང་ངོ ། །ཞེས་གསོལ་པ་དང ། བཅོམ་ལྡན་འདས་ཀྱིས་ཀྱང་དེ་བཞིན་དུ་གནང་ནས་སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ཏོ། །དགེ་སྦྱོང་གི་ལམ་ལ་དེ་དག་གིས་བརྩོན་འགྲུས་བསྐྱེད་པས་ཐམས་ཅད་དགྲ་བཅོམ་པར་གྱུར་ཏོ། །དགེ་སློང་བཅུ་པོ་གཅིག་ལ་གཅིག་ལྷག་པར་དགའ་བས། འགྲོ་ན་ཡང་ལྷན་ཅིག་འགྲོ། །འདུག་ན་ཡང་ལྷན་ཅིག་འདུག་སྟེ། ཡུལ་མི་ཐམས་ཅད་ཀྱང་དགའ་ནས་རྗེས་སུ་ཡི་རང་ངོ ། །དེ་ནས་ཀུན་དགའ་བོས་བཅོམ་ལྡན་འདས་ལ་གསོལ་པ། དགེ་སློང་བཅུ་པོ་འདིས་བསོད་ནམས་ཅི་
461a
> ༄#། །ཞིག་བགྱིས་ན། །ཆོ་རིགས་བཙུན་པར་སྐྱེས་ལ་བྱད་གཟུགས་བཟང་བ་དང ། བཅོམ་ལྡན་འདས་དང་ཕྲད་ནས་སྡུག་བསྔལ་གྱི་མཐར་ཕྱིན་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་བསྐལ་པ་དགུ་བཅུ་རྩ་གཅིག་གི་ཕ་རོལ་ན་སངས་རྒྱས་ཐམས་ཅད་སྐྱོབ་ཅེས་བྱ་བ་འཇིག་རྟེན་དུ་གཤེགས་ཏེ། སེམས་ཅན་གྱི་དོན་མཛད་ནས་མྱ་ངན་ལས་འདས་ཏེ་རིང་བསྲེལ་རྒྱས་པར་སྦེལ་ནས་མཆོད་རྟེན་ཚད་མེད་པ་སྙེད་བྱས་སོ། །དེའི་ཚེ་ན་མཆོད་རྟེན་གཅིག་ཅིག་ཞིག་རལ་དུ་གྱུར་ནས་རྒན་མོ་ཞིག་གིས་གསོ་ཞིང་འདུག་པ་ལས། མི་མགྲོན་པོ་བཅུ་ཞིག་དེར་ལྷགས་ཏེ་མཐོང་བ་དང ། རྒན་མོ་ལ་ཁྱོད་ཅི་བྱེད་ཅེས་སྨྲས་སོ། །རྒན་མོས་སྨྲས་པ། འདི་ནི། མཆོད་གནས་ཀྱི་རྟེན་མཆོད་རྟེན་ཡིན་ཏེ། འདི་བཅོས་ན་བསོད་ནམས་ལྷག་པར་ཆེའོ། །དེ་བས་ན། དགེ་བའི་འབྲས་བུ་འདོད་པའི་ཕྱིར་འདི་འཆོས་སོ། །གཞོན་ནུ་དེ་དག་ཀྱང་རྒན་མོས་སྨྲས་པ་ལ་རབ་ཏུ་དགའ་ནས་བདག་ཅག་གིས་ཀྱང་བསྟང་ངོ ། །ཞེས་སྨྲས་ནས་མཆོད་རྟེན་བཅོས་པའི་འོག་ཏུ་གཞོན་ནུ་བཅུ་ཆར་རྒན་མོ་དེའི་བུར་སྐྱེ་བར་གྱུར་ཅིག་།ཅེས་སྨོན་ལམ་བཏབ་པས། དེ་ཚུན་ཆད་བསྐལ་པ་དགུ་བཅུ་རྩ་གཅིག་གི་བར་དུ་ལྷ་དང་མིའི་ནང་དུ་ལྷན་ཅིག་ཏུ་སྐྱེས་ནས་
461b
> ནས་བདེ་བ་ལ་ལོངས་སྤྱད་དེ་དངོས་པོ་འདི་གསུམ་གྱིས་མི་གཞན་ལས་ཁྱད་དུ་འཕགས་སོ། །གསུམ་གང་ཞེ་ན། བྱད་གཟུགས་བཟང་ཞིང་མཛེས་པ་དང ། ཀུན་གྱིས་བཀུར་བ་དང ། རྟག་ཏུ་ཚེ་རིང་ཞིང་དེ་སྲིད་ཀྱི་བར་དུ་སེམས་ཅན་དམྱལ་བར་མི་ལྟུང་བའོ། །ད་ང་དང་ཕྲད་ནས་རྡུལ་དང་དྲི་མ་ཀུན་བཀྲུས་ཏེ་དགྲ་བཅོམ་པར་གྱུར་ཏོ། །དེའི་ཚེ་དེའི་དུས་ན་རྒན་མོ་དེ་ནི། བུ་མོ་སུ་མ་ན་ཡིན་ནོ། །མི་གཞོན་ནུ་བཅུ་པོ་དེ་ནི། དགྲ་བཅོམ་པ་འདི་བཅུ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་རྣམས་ལ་ལ་ནི། རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་བོ། ཁ་ཅིག་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་ཕྱིར་མི་ལྡོག་པའི་ས་ལ་གནས་པར་གྱུར་ཏེ། སངས་རྒྱས་ཀྱིས་གསུངས་པ་ལ་རྗེས་སུ་ཡི་རང་ནས་མངོན་པར་དགའོ། །བུ་མོ་སུ་མ་ནའི་བུ་བཅུའི་ལེའུ་སྟེ་བཞི་བཅུ་རྩ་དྲུག་པའོ།། །།ུ་པ་གུཔྟའི་ལེའུ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན། །རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ན་ཀུན་ཏུ་རྒྱུ་ཨུ་པ་གུཔྟ་ཞེས་བྱ་བ་ཡིད་གཞུངས་ཤིང་ཤེས་པ་མང་བ་ནི། འདས་པ་དང ། ད་ལྟར་ལ་མཁས་པ་
462a
> ༄#། །ཞིག་སྟེ།་བཅོམ་ལྡན་འདས་གང་ན་བ་དེར་སོང་ནས་རབ་ཏུ་འབྱུང་ངོ ། །ཞེས་གསོལ་ཏོ། །གལ་ཏེ་བདག་རབ་ཏུ་བྱུང་ནས་ཤེས་རབ་དང་སྤོབས་ཤཱ་རིའི་བུ་དང་མཉམ་ན་རབ་ཏུ་འབྱུང་གི། དེ་ཙམ་མི་ཕོད་ན་ཕྱིར་ཁྱིམ་དུ་མཆིའོ། །ཞེས་གསོལ་བ་དང ། བཅོམ་ལྡན་འདས་ཀྱིས་དེ་ཙམ་མི་ཕོད་དོ། །ཞེས་བཀའ་སྩལ་ནས་ཀུན་ཏུ་རྒྱུ་དེ་རབ་ཏུ་འབྱུང་དུ་མ་བཏུབ་ནས་ཕྱིར་ཁྱིམ་དུ་སོང་ངོ ། །བཅོམ་ལྡན་འདས་ཀྱིས་དུས་གཞན་ཞིག་ན་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་ལོ་བརྒྱ་ལོན་པ་དང ། བྲམ་ཟེ་འདི་རབ་ཏུ་བྱུང་ནས་མངོན་པར་ཤེས་པ་དྲུག་དང་ཤེས་རབ་ཏུ་ལྡན་ཏེ། སེམས་ཅན་རྡུལ་སྙེད་ཅིག་གི་དོན་བྱེད་པར་འགྱུར་རོ། །བཅོམ་ལྡན་འདས་མྱ་ངན་ལས་འདས་གང་ཡང་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་མདོ་སྡེའི་སྡེ་སྣོད་ཐམས་ཅད་ཁྱོད་ལ་གཏད་ཀྱི། ཁྱོད་ཀྱིས་གཟུངས་སུ་ཟུངས་ལ་རྒྱས་པར་བྱོས་ཤིག་ཅེས་བཀའ་སྩལ་ནས་བཅོམ་ལྡན་འདས་མྱ་ངན་ལས་འདས་པའི་འོག་ཏུ་ཀུན་དགའ་བོས་ཆོས་ཀྱི་སྡེ་སྣོད་ཀུན་བཟུང་ངོ ། །ཀུན་དགའ་བོས་ལུས་ཡོངས་སུ་གཏོང་བ་ན་ཉེ་གནས་ཡེ་ཤེའི་ཀི་ལ་འདི་སྐད་ཅེས་བསྒོའོ། །ང་འདས་པའི་འོག་
462b
> ཏུ་མདོ་སྡེ་ཀུན་ཁྱོད་ལ་གཏད་ཀྱི། གཟུངས་སུ་ཟུངས་ཤིག་ཅེས་བསྒོས་ནས་ཡང་འདི་སྐད་ཅེས་སྨྲས་སོ། །ཡུལ་ཝཱ་ར་ཎཱ་སིར་ཁྱིམ་བདག་གུཔྟ་ཞེས་བྱ་བ་ལ་བུ་ཨུ་པ་གུཔྟ་ཞེས་བྱ་བ་ཞིག་ཡོད་ཀྱི། ཁྱོད་ཀྱིས་སློངས་ལ་རབ་ཏུ་ཕྱུང་ཞིག་།ཁྱོད་འདས་པའི་འོག་ཏུ་ཆོས་ཀྱང་དེ་ལ་གཏོད་ཅིག་ཅེས་བསྒོའོ། །ཀུན་དགའ་བོ་འདས་པའི་འོག་ཏུ་ཡ་ཤེའི་ཀིས་དམ་པའི་ཆོས་བཟུང་སྟེ་འཇིག་རྟེན་ན་སེམས་ཅན་གྱི་དོན་མང་དུ་བྱས་སོ། །དེ་ནས་ཝཱ་ར་ཎཱ་སིའི་གྲོང་ཁྱེར་དུ་སོང་སྟེ་ཁྱིམ་བདག་དེ་དང་བཤེས་པར་བྱས་ནས་ཡང་དང་ཡང་དེའི་ཁྱིམ་དུ་སོང་སྟེ་ཡིད་གཅུགས་པར་བྱས་སོ། །ཁྱིམ་བདག་དེ་ལ་བུ་ཁྱེའུ་ཞིག་བཙས་ནས་མིང་ཨུ་པ་གུཔྟ་ཞེས་བྱ་བར་བཏགས་ཏེ། ཆུང་དུ་ཤེད་མ་བྱེ་བ་ནས་ཡ་ཤེའི་ཀིས་བསླངས་ཏེ་རབ་ཏུ་དབྱུང་བར་བྱས་པ་ལས་ཁྱིམ་བདག་གིས་འདི་སྐད་ཅེས་སྨྲས་སོ། །བདག་འདོད་པའི་བུ་འདི་འདྲ་བ་ཞིག་ཡོད་དེ། རིགས་འཚོ་བ་སྙམ་སྟེ་མི་རུང་ངོ ། །གལ་ཏེ་ཡང་གཅིག་བཙས་ན་གདོད་སྦྱིན་ནོ། །ཕྱིས་དུས་གཞན་ཞིག་ན་ཡང་བུ་ཞིག་བཙས་ནས་མིང་ནནྟ་ཀུ་པ་ཏ་ཞེས་བཏགས་སོ། །དེ་ནས་ཡ་ཤེའི་ཀི་ཡང་དེར་སོང་སྟེ་བུ་བསླངས་པ་དང ། ཁྱིམ་བདག་གིས་ཡང་འདི་སྐད་ཅེས་སྨྲས་སོ། །བུ་ཆེན་པོ་ནི། ཕྱི་རོལ་གྱི་བྱ་བ་སྒྲུབ་དགོས། བུ་ཆུང་དུ་ནི། ནང་གི་བྱ་བ་སྒྲུབ་ན་གདོད་བདེ་བར་འགྱུར་རོ། །ཞེས་སྦྱིན་
463a
> ༄#། །དུ་མ་བཏུབ་སྟེ། ཕྱིས་ཡང་བུ་ཞིག་བཙས་ན་གདོད་དབུལ་ལོ། །ཞེས་སྨྲས་སོ། །ཡ་ཤེའི་ཀི་ནི། དགྲ་བཅོམ་པའི་ནང་ན་རིག་པ་གསུམ་དང་ལྡན་ཏེ། སེམས་ཅན་གྱི་དབང་པོ་ལ་མཁས་པས་ཁྱེའུ་དེ་གཉིས་ལ་བརྟགས་ན། རབ་ཏུ་འབྱུང་བའི་སྐལ་པ་ཡོད་པ་ནི། འདྲ་ནས་མ་བསྐུལ་བར་བཞག་གོ་།དེ་ནས་ཡང་ཁྱིམ་བདག་དེ་ལ་བུ་ཞིག་བཙས་ནས་བྱད་གཟུགས་ལེགས་པ། བལྟ་ན་སྡུག་པ་ཞིག་སྟེ། ཡང་ཁྱིམ་བདག་གི་ཐད་དུ་སོང་ནས་བུ་བསླངས་པ་དང ། ཡང་འདི་སྐད་ཅེས་སྨྲས་སོ། །བུད་དུང་ཆུང་བས་གཡོག་བྱེད་ཀྱང་མི་ནུས་ལ། བདག་ཅག་ཀྱང་དབུལ་བས་བསྟང་དུ་མེད་དེ། རེ་ཞིག་སྡོད་ཅིག་།ནམ་སྐྱེས་ན་སྦྱིན་ནོ། །ཞེས་སྨྲས་སོ། །དེ་ནས་ཆེར་སྐྱེས་ནས་ཤེས་པ་དང་ལྡན་པར་གྱུར་ཏེ། ཕས་ཀྱང་ནོར་རྫས་ལག་ཏུ་གཏད་ནས་ཚོང་བྱེད་དུ་བཅུག་གོ་།དུས་གཞན་ཞིག་ན་ཡ་ཤེའི་ཀི་ཉིད་དེའི་དྲུང་དུ་སོང་སྟེ་ཆོས་བསྟན་ནས་སེམས་རྩེ་གཅིག་པ་ཡིད་ལ་བྱེད་དུ་བཅུག་སྟེ། དགེ་བའི་རྟོག་པ་བྱུང་ན་རྡེའུ་དཀར་རུ་ཞིག་ཞོག་།མི་དགེ་བའི་རྟོག་པ་བྱུང་ན་རྡེའུ་ན་གུ་ཞིག་ཞོག་ལ་དུས་དུས་སུ་གང་མང་རྩིས་ཤིག་ཅེས་བསྒོའོ། །ུ་པ་གུཔྟས་ཀྱང་བསྒོ་བ་བཞིན་དུ་དགེ་བ་དང ། མི་དགེ་བའི་རྟོག་པ་བྱུང་བ་ལས་རྡེའུ་བཞག་སྟེ་བརྩིས་ན། ཐོག་མ་ནི། རྡེའུ་ན་གུ་མངར་བ་ལ་དཀར་རུ་
463b
> ཉུང་རབ་བོ། །དེ་ནས་ཡང་བགས་ཀྱིས་དཀར་ནག་མཉམ་མོ། །དེ་ནས་ཡིད་ལ་བྱ་བ་མ་བཏང་བས་རྡེའུ་ན་གུ་ནི། མེད་ཀྱི། རྡེའུ་དཀར་རུ་འབའ་ཞིག་ཏུ་གྱུར་ཏེ། དགེ་བའི་རྟོག་པ་གྲུབ་ནས་འབྲས་བུ་དང་པོ་ཐོབ་པར་གྱུར་ཏོ། །དེའི་ཚེ་གྲོང་ཁྱེར་དེ་ནས་སྨད་ཚོང་མ་ཞིག་གིས་བྲན་མོ་ཞིག་མངགས་ཏེ། ཨུ་པ་གུཔྟ་ལ་མེ་ཏོག་ཉོར་བཏང་ངོ ། །ུ་པ་གུཔྟ་རང་བཞིན་གྱིས་དྲང་བས། ཕྲན་མོ་དེ་ལ་མེ་ཏོག་རྒྱལ་བར་བྱིན་ཏེ་མ་རངས་པ་མེད་པར་བྱས་སོ། །བྲན་མོ་དེ་མེ་ཏོག་རྣམས་ཁྱེར་ཏེ་ཇོ་མོ་ལ་ཕུལ་བ་དང ། ངོ་མཚར་ཆེར་བཟུང་སྟེ་བྲན་མོ་ལ་འདི་སྐད་ཅེས་སྨྲས་སོ། །སྔར་མེ་ཏོག་ཉོས་བའི་རིན་དང ། དེང་ཉོས་པའི་རིན་འདྲ་ན། སྔར་ནི། ཅིའི་ཕྱིར་ཉུང་ལ། ད་ནི། ཅི་སྟེ་མང ། སྔ་མའི་ཚེ་ན་ཁྱོད་ཀྱིས་ང་བསླུས་སམ། ཕྲན་མོས་སྨྲས་པ།་དེང་གི་མེ་ཏོག་ཚོང་བའི་བདག་པོ་དེ་ངོ་མཚར་དུ་དྲང་ལ་དེས་ཏེ་གཡོ་སྒྱུ་མེད་པས་མང་དུ་ཁུགས་པ་ཡིན་ནོ། །སྐྱེས་བུ་དེ་གཟུགས་བྱད་བཟང་ཞིང་མཛེས་པས། རྗེ་མོས་གཟིགས་ན་ཡང་དགྱེས་པར་འགྱུར་རོ། །ཞེས་སྨྲས་པ་དང ། སྨད་ཚོང་མས་དེ་འབོད་དུ་བཏང་ངོ ། །ུ་པ་གུཔྟ་དེར་འོང་དུ་མ་བཏུབ་ནས་ཡང་དང་ཡང་བོས་ཀྱང་འགྲོར་མ་བཏུབ་བོ། །དེའི་ཚེ་སྨད་ཚོང་མ་དེ་རྒྱལ་བུ་ཞིག་དང་འདུས་ཏེ། རྒྱལ་བུ་དེའི་གོས་རིན་པོ་ཆེ་ལ་ཆགས་པས་གསང་སྟེ་རྒྱལ་བུ་བསད་ནས་རོ་སྦས་སོ། །དེ་ནས་རྒྱལ་པོས་ཁྱིམ་བཙལ་བ་དང ། སྨད་
464a
> ༄#། །ཚོང་མའི་ཁྱིམ་ནས་རྒྱལ་བུའི་རོ་རྙེད་དེ། སྨད་ཚོང་མ་དེའི་རྐང་ལག་ཀྱང་གཏུངས། རྣ་བ་དང་སྣ་ཡང་བཅད་ནས་ཤིང་ཁར་བཏགས་ཏེ་དུར་ཁྲོད་དུ་བཙུགས་སོ། །དེ་ལྟར་བྱས་ཀྱང་ད་དུང་སྲོག་མ་ཆད་པས། ཨུ་པ་གུཔྟ་དེའི་དྲུང་དུ་སོང་བ་དང ། སྨད་ཚོང་མས་འདི་སྐད་ཅེས་སྨྲས་སོ། །སྔོན་སྡུག་པའི་ཚེ་ནི། འོང་དུ་མ་བཏུབ་ན། ད་མ་རུངས་པར་གྱུར་པའི་འོག་ཏུ་གར་འགྲོ་ཞེས་སྨྲས་པ་དང ། ུ་པ་གུཔྟས་སྨྲས་པ། ཁྱོད་ཀྱི་མདའ་བྱད་འདོད་པའི་ཕྱིར་འདིར་འོངས་པ་མ་ཡིན་གྱི། ཁྱོད་ལ་སྙིང་བརྩེ་བའི་ཕྱིར་འདིར་འོངས་སོ། །ཞེས་སྨྲས་ནས་མི་རྟག་པའི་ཆོས་རྣམ་པ་བཞི་པོ་འདི་དག་བསྟན་ཏོ། །ལུས་འདི་ནི། མི་གཙང་བ། སྡུག་བསྔལ་བ། སྟོང་པ། བདག་མེད་པ་སྟེ། རེ་རེ་ནས་བརྟགས་ཤིང་ཡིད་བརྟན་དུ་མི་རུང་ངོ ། །གང་གླེན་པ་གཏི་མུག་ཅན་ནི། དེ་ལ་ཆགས་སོ། །སྨད་ཚོང་མས་ཆོས་དེ་དག་ཐོས་ནས་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ཏོ། །ུ་པ་གུཔྟ་ནི། ཕྱིར་མི་ལྡོག་པའི་འབྲས་བུ་ཐོབ་པོ། །དེ་ནས་ཡ་ཤེས་ཀྱིས་ཁྱིམ་བདག་དེ་ལས་གཞོན་ནུ་བསླངས་ནས་རབ་ཏུ་དབྱུང་ངོ ། །ཞེས་བྱས་པ་དང ། ཁྱིམ་བདག་གིས་ཀྱང་དེ་བཞིན་དུ་ཕུལ་ནས་བཙུག་ལག་ཁང་དུ་ཁྲིད་དེ་ཁྲིམས་བཅུ་ཕོག་གོ་།དེ་ནས་ལོ་ཉི་ཤུ་ཚོང་བ་དང་བསྙེན་པར་རྫོགས་སོ། །བསྙེན་པར་རྫོགས་པའི་ཚེ་གསོལ་བ་དང་བཞིའི་
464b
> ལས་ཀྱིས་བསྙེན་པར་རྫོགས་ནས་དགྲ་བཅོམ་པར་གྱུར་ཏོ། །རིག་པ་གསུམ་དང་མངོན་པར་ཤེས་པ་དྲུག་དང་ལྡན་ཏེ། སྨྲ་བ་ལ་སྤོབས་པ་ཟད་མི་ཤེས་པར་གྱུར་ནས་མི་མང་པོ་བསྡུས་ཏེ་ཆོས་བསྟན་པར་བྱས་པ་དང ། དེའི་ཚེ་བདུད་སྡིག་ཏོ་ཅན་གྱིས་འཁོར་མང་པོའི་ནང་དུ་གསེར་གྱི་དོང་ཙེ་ཆར་བཞིན་དུ་ཕབ་པས། མི་ཀུན་དོང་རྩེ་ལ་རྟོད་ནས་ཆོས་མཉན་དུ་མེད་པར་བྱས་སོ། །དེའི་ཕྱི་ཉིན་འཁོར་མང་པོ་བསྡུས་ཏེ་ཆོས་བསྟན་པར་བྱས་པ་ལས། བདུད་སྡིག་ཏོ་ཅན་གྱིས་མེ་ཏོག་གི་ཕྲེང་བའི་ཆར་ཕབ་པས། ཀུན་གྱི་སེམས་དཀྲུགས་སོ། ། དེའི་ཚེ་ཕྱི་ཉིན་འཁོར་མང་པོ་བསྡུས་ཏེ་ཆོས་བསྟན་པར་བྱས་པ་ལས། བདུད་ཀྱི་རྒྱལ་པོས་གླང་པོ་ཆེ་མཐོན་མཐིང་ག་ཏ་ཁ་ནས་མཆེ་བ་དྲུག་བྱུང་ལ། མཆེ་བ་རེ་རེ་ལ་ཡང་རྫིང་བུ་རེ་རེ་ཡོད་པ། རྫིང་བུ་རེ་རེའི་ནང་ན་མེ་ཏོག་བདུན་བདུན་ཡོད་པ། མེ་ཏོག་རེ་རེའི་ནང་ན་ཤེལ་གྱི་བུ་མོ་བདུན་བདུན་ཡོད་པ། བུ་མོ་དེ་དག་ཀྱང་སོ་སོ་ནས་རོལ་མོ་བྱེད་དེ། གླང་པོ་ཆེ་དེ་ཡང་གོམ་པ་དལ་གྱིས་འཁོར་གྱི་ནང་དུ་འགྲོ་བ་བསྟན་པ་དང ། མི་ཐམས་ཅད་དེ་ལ་ལྟ་བས་ཆོས་ལ་མི་འདུན་ཏོ། །དེའི་ཕྱི་ཉིན་འཁོར་རྣམས་བསྡུས་ཏེ་ཆོས་བསྟན་པར་བྱས་པ་ལས། བདུད་ཀྱི་རྒྱལ་པོས་ན་ཆུང་བཟང་མོ་ཤིན་ཏུ་མཛེས་ཤིང་བཟང་བ་ཞིག་འཁོར་གྱི་ནང་དུ་འོངས་པ་སྤྲུལ་ནས་མི་ཀུན་དེ་ལ་མིག་མི་འཛུམ་པར་ལྟ་སྟེ། ཆོས་
465a
> ༄#། །ཉན་པ་བརྗེད་དོ། །དེ་མ་ཐག་ཏུ་ཡ་ཤེའི་ཀིས་སྤྲུལ་པའི་བུད་མེད་ཀེང་རུས་དཀར་པོར་སྤྲུལ་ནས་མི་མང་པོས་མཐོང་བ་དང ། མི་ཀུན་གདོད་ཆོས་ཉན་པས་འབྲས་བུ་ཐོབ་པ་ཡང་རབ་ཏུ་མང་ངོ ། །བཙུན་པ་དེ་དག་ལ་ཐོག་མ་ནས་ཁྱི་ཞིག་ཡོད་དེ། ཉིན་གཅིག་བཞིན་དུ་ཆོས་བསྟན་པ་ལ་རྣ་བ་གཏད་དེ་ཉན་པས། ཁྱི་དེ་ཚེ་བརྗེས་ནས་ལྷའི་རིས་དྲུག་པར་སྐྱེས་ཏེ། བདུད་སྡིག་ཏོ་ཅན་དང་སྟན་གཅིག་ལ་འདུག་གོ་།བདུད་ཀྱི་རྒྱལ་པོས་ལྷ་དེ་ལ་འདི་ནི། ཡོན་ཏན་ཆེན་པོ་དང་ལྡན་ཏེ་ང་དང་མཉམ་ན། འདི་གང་ནས་ཚེ་འཕོས་ཏེ་འདིར་སྐྱེས་པ་བརྟག་གོ་སྙམ་སྟེ་བརྟགས་པ་དང ། ཁྱི་ལས་སྐྱེས་པར་མཐོང་ནས་དགེ་སློང་གིས་བསྐྱེངས་ཏེ་སྨ་ཕབ་བོ་སྙམ་ནས་རྒྱད་མ་ནས་བཙུན་པ་ཏིང་ངེ་འཛིན་དུ་ཞུགས་པ་མཐོང་བ་དང ། རིན་པོ་ཆེའི་ཅོད་པན་ཞིག་བཙུན་པའི་མགོ་ལ་བཞག་གོ་།ཏིང་ངེ་འཛིན་ལས་ལངས་པ་དང ། མགོ་ལ་ཅོད་པན་ཡོད་པར་རྟོགས་ནས་སུས་བཞག་སྙམ་བརྟགས་ནས་བདུད་སྡིག་ཏོ་ཅན་གྱིས་བཞག་པར་རྟོགས་ནས་རྫུ་འཕྲུལ་གྱི་མཐུས་བདུད་སྡིག་ཏོ་ཅན་དེར་བཀུག་སྟེ། ཁྱི་རོ་ཞིག་མགོའི་ཕྲེང་བར་སྤྲུལ་ནས་སྡིག་ཏོ་ཅན་ལ་འདི་སྐད་ཅེས་སྨྲས་སོ། །ཁྱོད་གྱིས་ང་ལ་ཅོད་པན་བྱིན་པའི་ལན་དུ་ཁྱོད་ལ་ཕྲེང་བ་ཞིག་སྤྱིན་གྱི། བཞེས་ཤིག་ཅེས་སྨྲས་པ་དང །
465b
> བདུད་སྡིག་ཏོ་ཅན་གྱིས་བླངས་ཏེ་ཕྲེང་བར་བཏགས་ནས་ཕྱིར་གནས་སུ་སོང་ངོ ། །གནས་སུ་ཕྱིན་ཏེ་བརྟགས་ན། མགོ་ལ་ཕྲེང་བ་བཞག་བ་ཁྱི་རོ་ཡིན་པར་མཐོང་ནས་མི་འདོད་དེ་འདོར་བར་བྱས་པ་ལས་མཐུ་སྟོབས་ཅི་ཡོད་པ་གཏུགས་ཀྱང་འདོར་མ་ནུས་སོ། །དེ་ནས་བརྒྱ་བྱིན་གྱི་ཐད་དུ་སོང་སྟེ་མི་གཙང་བ་འདི་དོར་ཅིག་ཅེས་སྨྲས་ན། བརྒྱ་བྱིན་གྱིས་སྨྲས་པ། འདི་ལྟ་བུ་སུས་བྱས་པ་ཉིད་ཀྱིས་འདོར་ནུས་ཀྱི། བདག་ལ་ནི། འདོར་ནུས་པའི་མཐུ་མེད་དོ། །བདུད་སྡིག་ཏོ་ཅན་གྱིས་ལྷ་ཀུན་དང ། ཚངས་པའི་རྒྱལ་པོའི་བར་དུ་བདག་གི་མི་གཙང་བ་འདི་དོར་ཅིག་ཅེས་ན། སྔ་མས་སྨྲས་པ་དང་འདྲ་སྟེ། ངེད་ལ་འདི་འདོར་བའི་མཐུ་མེད་དོ། །ཞེས་སྨྲས་བས། ཅི་བྱར་མི་རུང་ནས་ཕྱིར་བཙུན་པའི་དྲུང་དུ་འོངས་ནས་འདི་སྐད་ཅེས་སྨྲས་སོ། །སངས་རྒྱས་བཅོམ་ལྡན་འདས་ནི། ཡོན་ཏན་ཆེན་པོ་དང་ལྡན་པ་བདེན་ཏེ། བྱམས་པའི་ཐུགས་ཕྱོགས་གཅིག་ཏུ་མ་གྱུར་ཏོ། །ཁྱེད་ཉན་ཐོས་རྣམས་ནི། འཇིགས་སུ་རུང་བ།་མ་རུངས་པའོ། །ཅི་མངོན་ཞེ་ན། ངས་སྔོན་ཡི་དྭགས་ཀྱི་དཔུང་ཁྲི་ཕྲག་བརྒྱད་ཅུ་བསགས་ཏེ་བྱང་ཆུབ་སེམས་དཔའ་ལ་བསྐོར་ནས་བྱང་ཆུབ་ལས་ཉམས་པར་བྱ་བར་བརྒལ་བ་ལས། འོན་ཀྱང་ཐུགས་རྗེ་བསྐྱེད་དེ་བདག་ལ་དགྲར་མི་དགོངས་སོ། །ད་བདག་གིས་ཀྱལ་ཀ་ཅུང་ཟད་ཅིག་བྱས་པས་ལན་དུ་འདི་འདྲ་བར་བྱས་སོ། །ུ་པ་གུཔྟས་སྨྲས་པ། ཁྱོད་
466a
> ༄#། །ཟེར་བ་བདེན་ཏེ། སངས་རྒྱས་དང་ངར་བསྒྲུན་ན་བརྒྱ་འགྱུར། སྟོང་འགྱུར་དུ་ཡང་དཔེ་བྱར་མི་རུང་སྟེ། རི་རབ་ལྷུན་པོ་ཡུངས་ཀར་དང་བསྒྲུན་པའམ། རྒྱ་མཚོ་ཆེན་པོ་དང་བ་རྨིག་གི་ཆུར་བསྒྲུན་པའམ། སེངྒེའི་རྒྱལ་པོ་དང་ཝར་བསྒྲུན་པ་དང་འདྲ་སྟེ། ཆེ་ཆུང་གི་ཁྱད་པར་བསྐྱེད་དུ་མེད་དོ། །ཁོ་བོ་ནི། དུས་ངན་པའི་མཐར་སྐྱེས་ཏེ་དེ་བཞིན་གཤེགས་པ་ཡང་མ་མཐོང་ན། ཁྱོད་ཀྱི་རྫུ་འཕྲུལ་གྱིས་སངས་རྒྱས་ཀྱི་སྐུར་སྤྲུལ་ནུས་སོ། །ཞེས་ཐོས་ཀྱི། ཁྱོད་ཀྱིས་ཁོ་བོས་མཐོང་བར་སྟོན་ཅིག། བལྟ་བར་བྱའོ། །བདུད་ཀྱི་རྒྱལ་པོས་སྨྲས་པ། ངས་དེ་འདྲ་བར་སྤྲུལ་གྱི། ཁྱོད་ཕྱག་མ་བྱེད་ཅིག་།སྨྲས་པ། ཕྱག་མི་བྱེད་དོ། །དེ་ནས་བདུད་ཀྱི་རྒྱལ་པོས་ཀྱང་སངས་རྒྱས་ཀྱི་སྐུ་སྤྲུལ་ཏེ། སྐུ་ཆེན་པོ་ཁྲུ་བཅུ་དྲུག་པ། གསེར་གྱི་མདོག་ཅན། མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། འོད་ཟེར་ལྷམ་མེ། ལྷན་ནེར་གསལ་བ་ཉི་ཟླ་བས་ཀྱང་ལྷག་པར་སྤྲུལ་པ་དང ། ུ་པ་གུཔྟ་རབ་ཏུ་དགའ་ནས་ཕྱག་བྱ་བར་གཟས་པ་དང ། བདུད་ཀྱི་རྒྱལ་པོ་ཕྱིར་ཡང་བདུད་ཀྱི་ལུས་སུ་བསྒྱུར་ནས་ཨུ་པ་གུཔྟ་ལ། བཙུན་པ་ཁྱོད་ཕྱག་མི་བྱ་བར་བྱས་ན། ཅིའི་ཕྱིར་བྱེད་ཅེས་སྨྲས་སོ། །ུ་པ་གུཔྟས་སྨྲས་པ། ཁོ་བོ་སངས་རྒྱས་ལ་ཕྱག་བྱེད་ཀྱི། ཁྱོད་ལ་ཕྱག་མི་བྱེད་དོ། །བདུད་ཀྱི་རྒྱལ་པོས་སྨྲས་པ། བཙུན་པ་བདག་
466b
> ལ་ཐུགས་བརྩེ་བའི་སླད་དུ་ཁྱི་རོ་འདི་མ་མཆིས་པར་མཛོད་ཅིག་།ུ་པ་གུཔྟས་སྨྲས་པ། ཁྱོད་ཉིད་སྙིང་བརྩེ་བའི་སེམས་བསྐྱེད་དེ་སེམས་ཅན་ཀུན་གྱི་སྐྱབས་བྱོས་ཤིག་དང ། ཁྱི་རོ་ལས་རིན་པོ་ཆེའི་ཕྲེང་བར་འགྱུར་རོ། །གལ་ཏེ་མི་དགེ་བའི་སྡིག་པའི་བསམ་པ་སྐྱེས་ན། ཁྱི་རོ་ཉིད་ལས་མི་འགྱུར་རོ། །ཞེས་སྨྲས་པ་དང ། བདུད་ཀྱི་རྒྱལ་པོ་སྐྲག་ནས་རྟག་ཏུ་དགེ་བའི་སེམས་བསྐྱེད་དོ། །དེའི་ཚེ་བཙུན་པ་ཨུ་པ་གུཔྟས་འབྲས་བུ་ཐོབ་པའི་འོག་ཏུ་སེམས་ཅན་བཏུལ་ཏེ་འབྲས་བུ་བཞི་ཐོབ་པར་བྱས་པའི་གྲངས་ནི། འབྲས་བུ་ཐོབ་པའི་མི་རེ་རེས་ཚུལ་ཤིང་སོར་བཞི་པ་རེ་རེ་བྱས་པའི་ཚུལ་ཤིང་དེ་ལྟ་བུས་ཁན་པ་མཐོ་ཁྱད་ཆག་དྲུག་ཅུ་པ། ཆུ་ཞེང་གབ་ཕར་ཆག་དྲུག་ཅུ་པའི་ནང་ཡོངས་སུ་གང་ངོ ། །དེ་ནས་མི་མང་པོ་ཀུན་གྱིས་བསྟོད་ཅིང་བསྔགས་ཏེ། ཁྱོད་ཀྱི་ཡོན་ཏན་ནི། རྒྱ་ཆེ་བས། སེམས་ཅན་བཏུལ་བའི་གྲངས་ཀྱང་དཔག་ཏུ་མེད་དོ། །ཞེས་སྨྲས་སོ། །ུ་པ་གུཔྟས་སྨྲས་པ། ཁོ་བོ་དུད་འགྲོ་བྱེད་པའི་ཚེ་ན་ཡང་སེམས་ཅན་དག་བཏུལ་ཏེ་འཕགས་པའི་འབྲས་བུ་ཐོབ་པར་བྱས་ན། ད་ལྟར་གྱི་དུས་ན་བཏུལ་བ་ལྟ་ཅི་སྨོས། འཁོར་མང་པོས་སྨྲས་པ། སྔོན་ཇི་ལྟ་བུར་སེམས་ཅན་དག་བཏུལ་བ་བདག་ཅག་ལ་བསྟན་དུ་གསོལ། ཨུ་པ་གུཔྟས་སྨྲས་པ། སྔོན་འདས་པའི་དུས་ན་ཝཱ་ར་ཎཱ་སི་འདིར་དྲང་སྲོང་ལྷགས་པའི་རི་ལ་རང་སངས་རྒྱས་ལྔ་བརྒྱ་ཞིག་གནས་སོ།།
467a
> ༄#། །དེའི་ཚེ་སྤྲེའུ་ཞིག་ཉིན་གཅིག་བཞིན་དུ་མཆོད་པ་འབུལ་ཞིང་སྤྱོད་ལམ་ལ་ལྟའོ། །རང་སངས་རྒྱས་དེ་དག་ཕྱིས་གཞན་ཞིག་ཏུ་དོང་བ་ལས། ཀུན་ཏུ་རྒྱུ་ལྔ་བརྒྱ་ཞིག་དེ་ན་གནས་སོ། །ཀུན་ཏུ་རྒྱུ་དེ་དག་ལ་ལ་ནི། ཉི་མ་དང་ཟླ་བ་ལ་མཆོད། ལ་ལ་ནི། མེ་ལྷ་ལ་མཆོད་དོ། །ཉི་མ་དང་ཟླ་བ་ལ་མཆོད་པ་ནི། ཉི་ཟླ་ལོགས་སུ་རྐང་བ་ཡ་གཅིག་གིས་འགྲེང་ངོ ། །མེ་ལྷ་ཅན་ནི། ནང་པར་སྔ་དྲོ་ཞིང་མེ་འབུད་དོ། །དེའི་ཚེ་ན་སྤྲེའུ་དེས་འགྲེང་བ་དེ་དག་གི་རྐང་པ་ནས་ལག་པ་ཡ་གཅིག་གིས་བཟུང་སྟེ་ཐུར་དུ་དྲངས་སོ། །མེ་འབུད་བདག་གི་མེ་བསད་ནས་ལུས་དྲང་པོར་འདུག་སྟེ་བསམ་པ་ཡིད་ལ་བྱེད་དོ། །དེ་ནས་ཀུན་ཏུ་རྒྱུ་དེ་རྣམས་གཅིག་ལ་གཅིག་འདི་སྐད་ཅེས་སྨྲས་སོ། །སྤྲེའུ་འདིས་བདག་ཅག་ཀྱང་\?\་སྤྱོད་ལམ་འདི་ལྟ་བུར་འདུག་ཅིག་ཅེས་བྱ་བའི་ཐ་ཚིག་སྟེ། བདག་ཅག་ཀྱང་སོ་སོ་ནས་ལུས་དྲང་པོར་བསྲངས་ཏེ་དོན་ལ་བརྟག་གོ་།ཞེས་བྱས་ནས་དེ་དག་དེ་ལྟར་བྱས་མ་ཐག་ཏུ་སེམས་ཀྱིས་ཁོང་དུ་ཆུད་ཅིང་རྟོགས་ཏེ་རང་སངས་རྒྱས་སུ་གྱུར་ཏོ། །དེའི་ཚེ་དེའི་དུས་ན་སྤྲེའུ་དེ་ནི། ད་ལྟར་ང་ཡིན་ནོ། །འཁོར་རྣམས་ཀྱིས་སྨྲས་པ། འོ་ན་ཅིའི་ཕྱིར་སྤྲེའུའི་ལུས་སུ་གྱུར། ཨུ་པ་གུཔྟས་སྨྲས་པ། སྔོན་འདས་པའི་བསྐལ་པ་དགུ་བཅུ་རྩ་གཅིག་གི་ཕ་རོལ་ན་སངས་རྒྱས་རྣམ་པར་གཟིགས་འཇིག་རྟེན་དུ་གཤེགས་
467b
> ཏེ།་དགེ་སློང་རྣམས་ནི། ཝཱ་ར་ཎཱ་སི་ན་དྲང་སྲོང་ལྷགས་པའི་རི་ལ་གནས་སོ། །དེའི་ཚེ་འབྲས་བུ་ཐོབ་པའི་དགེ་སློང་ཞིག་རིའི་རྩེ་མོར་མགྱོགས་པར་སོང་བ་དང ། དེ་ལ་དགེ་སློང་གཞོན་ནུ་ཞིག་གིས་དགེ་སློང་དེ་ནི། མགྱོགས་ཁྱད་སྤྲེའུ་དང་འདྲའོ། །ཞེས་སྨྲས་ཏེ། དེའི་རྒྱུ་དེའི་རྐྱེན་གྱིས་སྐྱེ་བ་ལྔ་བརྒྱའི་བར་དུ་སྤྲེའུའི་ལུས་ཐོབ་པར་གྱུར་ཏོ། །དེ་བས་ན་འཁོར་བཞི་པོ་དག་ངག་གི་ལས་ཡོངས་སུ་བསྡམས་ཏེ་མི་དགོས་པ་མི་སྨྲའོ། །ུ་པ་གུཔྟས་ཆོས་འདི་བསྟན་པའི་ཚེ་འཁོར་མང་པོ་རྣམས་ལ་ལ་ནི། རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པའི་འབྲས་བུ་ཐོབ་བོ། ཁ་ཅིག་ནི། རང་སངས་རྒྱས་སུ་དགེ་བའི་རྩ་བ་བསྐྱེད་དོ། ཁ་ཅིག་ནི། བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པར་གྱུར་པ་ཡང་དཔག་ཏུ་མེད་དོ། །དེ་སྐད་ཅེས་སྨྲས་པ་ལ་རྗེས་སུ་ཡི་རང་ནས་མངོན་པར་དགའོ། །ུ་པ་གུཔྟའི་ལེའུ་སྟེ་བཞི་བཅུ་བདུན་པའོ།། །། དང་པ་ལྔ་བརྒྱ་ལྷར་སྐྱེས་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཝཱ་ར་ཎཱ་སི་ན་བཞུགས་སོ། །དེའི་ཚེ་བཅོམ་ལྡན་འདས་ཚལ་ཞིག་གི་ནང་ནེའུ་གསིང་དང་ལྡན་པ་ཞིག་ན་ལྷ་དང ། མི་དང ། འཁོར་རྣམ་བཞི་ལ་དམ་པའི་ཆོས་སྟོན་ཏོ། །དེའི་ཚེ་སྟེང་གི་ནམ་མཁའ་ལ་བྱ་ངང་པ་ལྔ་བརྒྱ་ཙམ་ཞིག་འཕུར་བ་ལས་
468a
> ༄#། །བཅོམ་ལྡན་འདས་ཀྱི་གསུང་ཤིན་ཏུ་སྙན་པ་ཐོས་ནས་དགའ་ཞིང་མོས་ཏེ། ནམ་མཁའ་ལ་ལྡིང་ཞིང་བཅོམ་ལྡན་འདས་ཀྱི་སྤྱན་སྔར་འབབ་པར་འདོད་པ་ལས་དེའི་ཚེ་རྔོན་པ་དག་ཅིག་གིས་ས་ཕྱོགས་དེར་བྱ་རྒྱ་བྲེས་པས་ངང་པ་ལྔ་བརྒྱ་ཙམ་པོ་བྱ་རྒྱས་ཟིན་ནས་རྔོན་པས་བསད་པ་དང ། ཐམས་ཅད་སུམ་ཅུ་རྩ་གསུམ་གྱི་ལྷའི་རིས་སུ་ཕ་མའི་པུས་མོའི་སྟེང་ནས་ཁྱེའུ་ལོ་བརྒྱད་ལོན་པ་ཙམ་དུ་སྐྱེས་ཏེ་བྱད་གཟུགས་བཟང་བ། བལྟ་ན་སྡུག་པ། འོད་ཟེར་གྱིས་ཀུན་ཏུ་སྣང་བ། གསེར་གྱི་རི་ལྟར་གསལ་ཞིང་དག་པར་གྱུར་ནས་དེ་དག་འདི་སྙམ་དུ་བདག་ཅག་ཅིའི་རྐྱེན་གྱིས་ལྷར་སྐྱེས་སྙམ་བསམ་པ་དང ། སྔོན་གྱི་གནས་དྲན་པར་གྱུར་ཏོ། །ཆོས་གསུངས་པའི་སྒྲ་ཐོས་ནས་ལྷར་སྐྱེས་པར་རིག་ནས་དེ་དག་དེའི་ཚེ་ནམ་མཁའ་ལས་བབས་ཏེ་ལྷ་རྫས་ཀྱི་མེ་ཏོག་དང་སྤོས་ལ་སོགས་པ་ཐོགས་ནས་འཛམ་བུའི་གླིང་གི་ཡུལ་ཝཱ་ར་ཎཱ་སི་ན་བཅོམ་ལྡན་འདས་གང་ན་བཞུགས་པར་ལྷགས་སོ། །ལྷའི་འོད་ཀྱིས་བཅོམ་ལྡན་འདས་བཞུགས་པའི་གནས་ཀུན་རིན་པོ་ཆེ་ལྟར་སྣང་བར་བྱས་ནས་དུས་གཅིག་ཏུ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བདག་ཅག་གིས་བཅོམ་ལྡན་འདས་ཆོས་སྟོན་པའི་གསུང་ཐོས་པ་ཙམ་
468b
> གྱིས་གནས་དམ་པར་སྐྱེས་ཀྱི། ད་ཡང་བདག་ཅག་ལ་ཐུགས་བརྩེ་བའི་སླད་དུ་དམ་པའི་ཆོས་སྟོན་ཅིག་ཅེས་གསོལ་པ་དང ། བཅོམ་ལྡན་འདས་ཀྱིས་བདེན་པ་བཞིའི་ཆོས་བསྟན་ཏེ། ལྷ་དེ་དག་གིས་རྟོགས་ནས་རྒྱུན་དུ་ཞུགས་པའི་འབྲས་བུ་ཐོབ་བོ། །དེ་དག་དེ་ཕྱིན་ཆད་ངན་སོང་གསུམ་དུ་མི་ལྟུང་བར་གྱུར་ཏེ་ཕྱིར་ལྷའི་རིས་སུ་དོང་ནས་སྐྱེ་བ་བདུན་གྱིས་ཟག་པ་ཀུན་ཟད་པར་གྱུར་ཏོ། །དེ་ནས་ཀུན་དགའ་བོས་བཅོམ་ལྡན་འདས་ལ་གསོལ་པ། མ་དང་སུམ་ལྷ་དག་གི་འོད་ཟེར་གྱིས་ཀུན་ནས་སྣང་བར་བགྱིས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་ལྷགས་པའི་ལྷ་དེ་དག་གང་ནས་མཆིས་པ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ལེགས་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང་ངས་བསྟན་པར་བྱའོ། །ང་ཁ་སྩང་ཚང་ཞིག་ན་ལྷ་དང་མི་རྣམས་དང་འཁོར་རྣམ་བཞི་ལ་ཆོས་སྟོན་པའི་ཚེ་དང་ལྡན་བརྒྱ་ཙམ་ཞིག་ཆོས་གསུངས་པའི་སྒྲ་ལ་དད་ནས་ང་ལ་དགེ་བའི་སེམས་བསྐྱེད་དེ་ངའི་ཐད་དུ་སོང་བ་ལས་མ་ཕྱིན་པར་རྔོན་པས་ཟིན་ཏེ་ཐམས་ཅད་བསད་དོ། །ཆོས་ཀྱི་སྒྲལ་དད་པའི་དགའ་བའི་སེམས་ཀྱིས་སུམ་ཅུ་རྩ་གསུམ་གྱི་ལྷའི་རིས་སུ་སྐྱེས་ནས་སྔོན་གྱི་གནས་དྲན་པས་ང་ལ་ཕྱག་འཚལ་དུ་འོངས་སོ། །དེ་ནས་ཀུན་དགའ་བོས་བཅོམ་ལྡན་འདས་ཀྱིས་གསུངས་
469a
> ༄#། །པ་ཐོས་ནས་རབ་ཏུ་དགའ་མགུ་རངས་ཏེ་ངོ་མཚར་རྨད་དོ། །ཞེས་བསྔགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་གཤེགས་པ་ནི།་ངོ་མཚར་རྨད་དུ། ཆོས་ཀྱི་ཆར་གྱིས་མ་ངོམས་པ་མ་མཆིས་སོ། །ཆུང་དུ་ན་དུད་འགྲོའི་སྐྱེ་གནས་ལྟ་བུ་ཡང་ཆོས་ཐོས་པས་བསོད་ནམས་ཐོབ་ན་མི་ལྟ་ཞིག་ཅི་སྨོས་ཏེ།་དད་པའི་སེམས་ཀྱིས་གཟུངས་སུ་བཟུང་བའི་བསོད་ནམས་ཀྱི་འབྲས་བུ་བས་བརྒྱ་སྟོང་གིས་ལྷག་སྟེ། དཔེར་བགྱིར་མ་མཆིས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལེགས་སོ་ལེགས་སོ། །ཁྱོད་ཀྱིས་སྨྲས་པ་བཞིན་དུ་བཅོམ་ལྡན་འདས་འཇིག་རྟེན་དུ་གཤེགས་པ་ནི། ཀུན་ལ་ཕན་པ་དང་བདེ་བའི་དོན་དུ་འགྱུར་ཏེ། ཀུན་ཏུ་བདུད་རྩིའི་ཆར་བབ་ནས་འགྲོ་བ་མང་པོ་ངོམ་པར་བྱེད་དོ། །དེ་བས་ན་ཁྱོད་ཀྱིས་སེམས་རྩེ་གཅིག་ཏུ་སངས་རྒྱས་ཀྱི་བསྟན་པ་ལ་ནན་ཏན་གྱིས་ཤིག་།བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་ཀུན་དགའ་བོ་དང ། འཁོར་མང་པོ་རྣམས་རྗེས་སུ་ཡི་རང་སྟེ་མངོན་པར་དགའོ། །ངང་པ་ལྔ་བརྒྱ་ལྷར་སྐྱེས་པའི་ལེའུ་སྟེ་བཞི་བཅུ་བརྒྱད་པའོ།། །།སེངྒེ་ཡི་དམ་བརྟན་ཞེས་བྱ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་
469b
> བྱ་རྒོད་དུ་ཕུང་པོའི་རི་ལ་བཞུགས་སོ། །དེའི་ཚེ་ན་ལྷ་སྦྱིན་གྱིས་བཅོམ་ལྡན་འདས་ལ་རྟག་ཏུ་ངན་སེམས་བསྐྱེད་ནས་དེ་བཞིན་གཤེགས་པ་མེད་པར་བྱས་ལ་ལྷ་སྦྱིན་ཉིད་སངས་རྒྱས་ཡིན་ནོ། །ཞེས་བསྒྲག་པའི་ཕྱིར་རྒྱལ་བུ་མ་སྐྱེས་དགྲ་ཕ་གསོད་དུ་བཅུག་ནས་སངས་རྒྱས་གསར་པ་དང ། རྒྱལ་པོ་གསར་པས་ཡུལ་གྱི་སྲིད་བཅས་ནམ་ལེགས་སམ་ཞེས་སྨྲས་པ། རྒྱལ་པོ་མ་སྐྱེས་དགྲས་ཉན་ཏེ་ཕ་བསད་ནས་བདག་ཉིད་རྒྱལ་པོར་ཞུགས་སོ། །དེའི་ཚེ་ཡུལ་མི་དག་དགེ་སློང་ཀུན་ལ་ངན་སེམས་བསྐྱེད་ནས་མཐོང་ཡང་མི་འདོད་པར་གྱུར་ཏོ། །དེ་ནས་དུས་གཞན་ཞིག་ན་དགེ་སློང་དག་གྲོང་དུ་བསོད་སྙོམས་སློང་དུ་སོང་བ་ལས་ཡུལ་མི་དགྲ་ཁྲོས་ཏེ་གཏམ་ཡང་མི་སྟེར་ནས་ལྷུང་བཟེད་སྟོང་པར་ཕྱིར་ལོག་སྟེ་བྱ་རྒོད་སྤུངས་པའི་རི་ལ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་གྱིས་སྡིག་པ་མི་དགེ་བའི་ལས་བགྱིས་པས། ཡོན་བདག་ཀུན་དགེ་སློང་ལ་ངན་སེམས་སྐྱེས་སོ། །ཞེས་གསོལ་བ་དང ། བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །སེམས་ཅན་གང་ཞིག་དགེ་སྦྱོང་དུར་སྨྲིག་གྱོན་པ་ལང་ནས་སེམས་བསྐྱེད་ན། མི་དེ་ནི། འདས་པའི་སངས་རྒྱས་དང ། རང་སངས་རྒྱས་དང ། དགྲ་བཅོམ་པ་ལ་ངན་སེམས་བསྐྱེད་དོ། །མ་འོངས་པའི་སངས་རྒྱས་དང ། རང་སངས་རྒྱས་དང ། དགྲ་བཅོམ་པ་ལ་ངན་སེམས་བསྐྱེད་པ་ཡིན་ནོ། །ད་ལྟར་བཞུགས་
470a
> ༄#། །པའི་སངས་རྒྱས་དང ། རང་སངས་རྒྱས་དང ། དགྲ་བཅོམ་པ་ལ་ངན་སེམས་བསྐྱེད་པ་ཡིན་པར་རིག་པར་བྱའོ། །དེ་ལྟར་དུས་གསུམ་གྱི་འཕགས་པ་ལ་ངན་སེམས་བསྐྱེད་པས། སྡིག་པའི་ལས་ཁ་ན་མཐོ་བའི་འབྲས་བུ་ཚད་མེད་པ་སྨིན་པར་འགྱུར་རོ། །དེ་ཅིའི་ཕྱིར་ཞེ་ན། ཆོས་གོས་དུར་སྨྲིག་ནི། དུས་གསུམ་གྱི་འཕགས་པ་རྣམས་ཀྱི་རྒྱལ་མཚན་ཡིན་ཏེ། སེམས་ཅན་གང་ཞིག་སྐྲ་དང་ཁ་སྤུ་བྲེགས་ནས་ཁ་དོག་བསྒྱུར་བའི་ཆོས་གོས་གྱོན་ན། དེ་ནི། རིང་པོར་མི་ཐོགས་པར་སྡུག་བསྔལ་ཀུན་ལས་སེམས་རྣམ་པར་གྲོལ་ཏེ་ཟག་པ་མེད་པའི་ཡེ་ཤེས་ཐོབ་ཅིང་འགྲོ་བ་ཐམས་ཅད་ཀྱི་མགོན་སྐྱབས་དང་དཔུང་གཉེན་དུ་འགྱུར་རོ། །སེམས་ཅན་གང་ཞིག་རབ་ཏུ་བྱུང་ཞིང་ཁ་དོག་བསྒྱུར་པའི་ཆོས་གོས་གྱོན་པ་ལ་དད་པའི་སེམས་བསྐྱེད་ན། བསོད་ནམས་དཔག་ཏུ་མེད་པ་ཐོབ་པར་འགྱུར་རོ། །ཀུན་དགའ་བོ། ང་ཡང་སྔོན་རབ་ཏུ་བྱུང་བ་ཆོས་གོས་ཁ་དོག་བསྒྱུར་བ་གྱོན་པ་ལ་དད་པའི་སེམས་སྐྱེས་ཏེ། བསྟི་སྟང་བྱས་པས་མངོན་པར་སངས་རྒྱས་སོ། །ཀུན་དགའ་བོས་གསོལ་པ། བཅོམ་ལྡན་འདས་ཀྱིས་སྔོན་ཁ་དོག་བསྒྱུར་བའི་ཆོས་གོས་བགོས་ཤིང་རབ་ཏུ་བྱུང་བ་ལ་བསྟི་སྟང་ཇི་ལྟར་བགྱིས་པ་བསྟན་དུ་གསོལ། །ཐོས་པར་འཚལ་ལོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཤིན་
470b
> ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང ། ཁྱོད་ལ་བསྟན་པར་བྱའོ། །ཀུན་དགའ་བོ། སྔོན་འདས་པའི་བསྐལ་པ་ཚད་མེད་པ་གྲངས་མེད་པའི་ཕ་རོལ་ན་འཛམ་བུའི་གླིང་འདིར་རྒྱལ་པོ་ཆེན་པོ་དེ་བྱི་ཞེས་བྱ་བ་ཞིག་བྱུང་སྟེ། རྒྱལ་ཕྲན་བརྒྱད་ཁྲི་བཞི་སྟོང་སྙེད་ལ་དབང་བྱེད་དོ། །དེའི་ཚེ་འཇིག་རྟེན་ན་སངས་རྒྱས་ཀྱི་ཆོས་ནི། མེད་དོ། རང་སངས་རྒྱས་དག་ཅིག་རི་དང་ཚལ་ན་གནས་པ། ནམ་མཁའ་ལ་རྒྱུ་ཞིང་སེམས་ཅན་གྱི་དོན་བྱེད་དོ། །དེའི་ཚེ་ན་རི་དྭགས་དག་དེ་ལ་བསྙེན་བཀུར་བྱེད་དེ། སེངྒེ་ཡི་དམ་བརྟན་པ་ཞེས་བྱ་བ་ལུས་ཀྱི་སྤུ་གསེར་གྱི་མདོག་ལྟར་འདུག་ལ་ཤིན་ཏུ་འཚེར་བ་ཞིག་ཀྱང་དེ་ན་འདུག་སྟེ། ཟས་སུ་འབྲས་བུ་དང་རྩཝ་ཟའི། སེམས་ཅན་ནི། མི་གསོད་དོ། །དེའི་ཚེ་རྔོན་པ་ཞིག་གིས་མཐོང་ནས་རབ་ཏུ་དགའ་སྟེ། ད་བདག་གིས་བདེ་བ་ཐོབ་ཀྱི།་སེངྒེ་འདི་བསད་ལ་པགས་པ་རྒྱལ་པོ་ལ་ཕུལ་ན། གདོན་མི་ཟ་བར་དབུལ་བ་བོར་རོ་སྙམ་བསམས་ཏེ། དུས་གཞན་ཞིག་ན་སྐྲ་བྲེགས་ཆོས་གོས་གྱོན་ནས་མདའ་གཞུ་མཆན་དུ་བཅུག་སྟེ་སེངྒེ་གང་ན་འདུག་པར་སོང་ངོ ། །དེའི་ཚེ་ན་སེངྒེ་དེ་གཉིད་ལོག་སྟེ་ཉ་ལ་བ་ལས་རྔོན་པས་དུག་མདའ་འཕངས་སོ། །དེ་ནས་སེངྒེ་སད་ནས་རྔོན་པ་བསྙགས་པ་དང ། ཆོས་གོས་གྱོན་པ་མཐོང་ནས་འདི་སྙམ་དུ་བསམས་སོ། །མི་འདི་ལྟ་བུ་ནི། འཇིག་རྟེན་ན་ཡུན་རིང་དུ་མི་གནས་ཏེ། རིང་པོར་མི་ཐོགས་པར་སྡུག་བསྔལ་ཀུན་ལས་
471a
> ༄#། །རྣམ་པར་གྲོལ་ལོ། །དེ་ཅིའི་ཕྱིར་ཞེ་ན། ཁ་དོག་བསྒྱུར་བའི་ཆོས་གོས་འདི་ནི། འདས་པ་དང ། མ་འོངས་པ་དང ། ད་ལྟར་གྱི་འཕགས་པ་རྣམས་ཀྱི་རྒྱལ་མཚན་ཡིན་ཏེ། བདག་གིས་གནོད་པ་བྱས་ན། དུས་གསུམ་གྱི་འཕགས་པ་རྣམས་ལ་ངན་སེམས་བསྐྱེད་པ་ཡིན་ནོ། །སྙམ་བསམས་ཏེ་གསོད་པའི་སེམས་བཏང་བ་དང ། དུག་མདས་ཞེན་པས་ལུས་དང་སྲོག་ཕྲལ་བ་ལ་ཐུག་ནས་ཚིག་འདི་སྐད་ཅེས་སྨྲས་སོ། །ཡ་ལ་ལ་བ་ཤ་ས་སཝཱཧཱ་ཞེས་སྨྲས་པའི་ཚེ་གནམ་ས་ཀུན་གཡོས་ནས་སྤྲིན་མེད་པར་ཆར་བ་བབ་སྟེ་ལྷ་རྣམས་ཀྱིས་ལྷའི་མིག་གིས་བརྟགས་ན། འཇིག་རྟེན་འདིར་རྔོན་པོས་བྱང་ཆུབ་སེམས་དཔའ་སེངྒེའི་ཚུལ་དུ་བཞུགས་པ་བསད་པ་མཐོང་ནས་སྟེང་གི་ནམ་མཁའ་ལས་ལྷ་རྫས་ཀྱི་མེ་ཏོག་ཆར་བཞིན་དུ་ཕབ་སྟེ་སེནྔེའི་རོ་ལ་མཆོད་པ་བྱས་སོ། །དེ་ནས་རྔོན་པས་སེངྒེའི་པགས་པ་བཤུས་ནས་ཁྱིམ་དུ་འོངས་ཏེ་རྒྱལ་པོ་དེ་བྱི་ལ་ཕུལ་ནས་བྱ་དགའ་གསོལ་པ་དང ། རྒྱལ་པོས་འདི་སྙམ་དུ་བསམས་མོ། །ཡི་གེ་དང ། གཙུག་ལག་ལས་དུད་འགྲོ་གང་གི་སྤུ་མདོག་གསེར་ལྟར་འདུག་ན། ངེས་པར་བྱང་ཆུབ་སེམས་དཔའ་ཡིན་ཏེ། སྐྱེས་བུ་ཆེན་པོ་ཡིན་ནོ། །ཞེས་འབྱུང་ན། ཅིའི་ཕྱིར་རྔོན་པ་འདི་ལ་བྱ་དགའ་སྦྱིན། གལ་ཏེ་བྱིན་ན་བདག་ཀྱང་
471b
> གསོད་པ་དང་ཐ་མི་དད་དོ་སྙམ་བསམས་ནས་དེའི་ཚེ་རྔོན་པས་ཡང་བསྐུལ་བ་དང་རྒྱལ་པོས་ཀྱང་ཉུང་ཞིག་བྱིན་ནས་རྔན་པ་ལ་འདི་སྐད་ཅེས་སྨྲས་སོ། །སེངྒེ་འདི་གསོད་པའི་ཚེ་ངོ་མཚར་ཆ་བའམ། ལྟས་ཅི་ཞིག་བྱུང་ཞེས་དྲས་ན། ཁ་ནས་ཡི་གེ་འབྲུ་བརྒྱད་པོ་འདི་སྨྲས་ཏེ། གནམས་ཡང་གཡས་ནས་སྤྲིན་མེད་པར་ཆར་པ་བབ་ཅིང་ལྷ་རྣམས་ཀྱིས་མེ་ཏོག་བབ་བོ། །དེའི་ཚེ་རྒྱལ་པོས་དེ་སྐད་ཅེས་སྨྲས་པ་ཐོས་ནས་ཤིན་ཏུ་མི་དགའ་སྟེ་དད་པའི་སེམས་སྐྱེས་ནས་བློན་པོ་དང ། སྔ་རབས་ཀྱི་རྒན་པོ་ཤེས་པ། བློ་དང་ལྡན་པ་ཀུན་བསགས་ཏེ་སེངྒེས་སྨྲས་པའི་ཚིག་དཔྱད་ན། གཅིག་གིས་ཀྱང་མ་གོ་མ་ཤེས་སོ། །གནས་དབེན་པ་ཞིག་ན་དྲང་སྲོང་ཤ་མ་ཞེས་བྱ་བ་མཁས་པ། རིག་པ་དང་ལྡན་པ་ཞིག་ཡོད་དེ།་རྒྱལ་པོས་དྲངས་སྲོང་དེ་སྤྱན་དྲངས་ནས་དྲིས་པ་དང ། དྲང་སྲོང་དེས་འདི་སྐད་ཅེས་བཤད་དོ། །ཡ་ལ་ལ་ཞེས་བྱ་བའི་དོན་ནི། སྐྲ་བྲགས་ལ་ཆོས་གོས་ཁ་དོག་བསྒྱུར་བ་གྱོན་པ་འབའ་ཞིག་སྐྱེ་ཤི་ལས་མྱུར་དུ་ཐར་ཏོ། །ཞེས་ཟེར་རོ། །བཤ་ས་ཞེས་ཟེར་བའི་དོན་ནི། སྐྲ་བྲེགས་ཏེ་ཆོས་གོས་ཁ་དོག་བསྒྱུར་བ་གྱོན་པ་ཐམས་ཅད་འཕགས་པའི་རྒྱལ་མཚན་ཡིན་ཏེ།་མྱ་ངན་ལས་འདའ་བ་དང་ཉེ་བའོ། །ཞེས་ཟེར་རོ། །སཝཱཧཱ་ཞེས་བྱ་བའི་དོན་ནི། སྐྲ་བྲེགས་ཏེ་ཆོས་གོས་ཁ་དོག་བསྒྱུར་བ་གྱོན་ན། ལྷ་དང་མི་དང་འཇིག་རྟེན་དུ་བཅས་
472a
> ༄#། །བ་ཐམས་ཅད་ཀྱིས་བཀུར་བསྟི་བྱའོ། །ཞེས་བྱ་བའི་དོན་ཏོ། །དེའི་ཚེ་དྲང་སྲོང་གིས་དེ་སྐད་ཅེས་སྨྲས་པ་དང ། རྒྱལ་པོ་རབ་ཏུ་དགའ་ནས་རྒྱལ་ཕྲན་བརྒྱད་ཁྲི་བཞི་སྟོང་མང་པོ་ཡང་བསྡུས་ཏེ་རིན་པོ་ཆེ་སྣ་བདུན་གྱི་ཤིང་རྟ་མཐོན་པོ་བཅས་ནས་སེངྒེའི་པགས་པ་སྟེང་བཞག་སྟེ་ཐམས་ཅད་ཀྱིས་མཐོང་བར་བྱས་ནས་སྤོས་དང་མེ་ཏོག་གིས་མཆོད་ཅིང་ཕྱག་འཚལ་དུ་བཅུག་གོ་།དེ་ནས་གསེར་གྱི་སྒོམ་བྱས་ནས་སེངྒེའི་པགས་པ་ནང་དུ་བཅུག་སྟེ་མཆོད་རྟེན་བྱས་སོ། །དེའི་ཚེ་མི་མང་པོ་དགེ་བར་སེམས་པ་དེ་དག་ཐམས་ཅད་ཚེ་འཐོས་པའི་འོག་ཏུ་མཐོ་རིས་ཀྱི་ལྷར་སྐྱེས་སོ། །ཀུན་དགའ་བོ། དེའི་ཚེ་སེངྒེ་དེས་ཆོས་གོས་ཁ་དོག་བསྒྱུར་བ་གྱོན་པའི་མི་ལ་དགེ་བའི་སེམས་བསྐྱེད་པས། བསྐལ་པ་ཁྲི་ཕྲག་བཅུའི་བར་དུ་འཁོར་ལོས་བསྒྱུར་བའི་རྒྱལ་པོ་བྱས་ནས་སེམས་ཅན་ཀུན་ལ་བདེ་བ་བྱིན་ཏེ་བསོད་ནམས་ཀྱི་ལས་རྒྱས་པར་བྱས་ནས་མངོན་པར་སངས་རྒྱས་སོ། །དེའི་ཚེ་དེའི་དུས་ན་སེངྒེ་ཡི་དམ་བརྟན་པ་དེ་ལ་གཞན་དུ་མ་སེམས་ཤིག་།དེ་ནི། ད་ལྟར་ང་ཡིན་ནོ། །དེའི་ཚེ་དེའི་དུས་ན་རྒྱལ་པོ་དེ་བྱིས་སེངྒེའི་པགས་པ་ལ་མཆོད་པ་བྱས་པས། བསྐལ་པ་ཁྲི་ཕྲག་བཅུའི་བར་དུ་ལྷ་དང་མིའི་མཆོག་ཏུ་གྱུར་ནས་དགེ་བ་ཀུན་བྱས་པ་དེ་ནི། བྱང་ཆུབ་སེམས་དཔའ་བྱམས་པ་ཡིན་ནོ།།
472b
> དེའི་ཚེ་དེའི་དུས་ན་དྲང་སྲོང་དེ་ནི། ཤཱ་རིའི་བུ་ཡིན་ནོ། །རྔོན་པ་དེ་ནི། ལྷ་སྦྱིན་ཡིན་ནོ། །དེའི་ཚེ་འཁོར་མང་པོ་དག་བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ཐོས་ནས་རབ་ཏུ་དགའ་སྟེ་འདི་སྐད་ཅེས་གསོལ་ཏོ། །བདག་ཅག་གིས་འཕགས་པར་མ་ཤེས་པས་ངན་སེམས་བསྐྱེད་ཀྱི། དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་སྡིག་པར་མི་འགྱུར་བར་འགྱོད་ཚངས་འཚལ་ལོ། །ཞེས་གསོལ་པ་དང ། བཅོམ་ལྡན་འདས་ཀྱིས་ཐུགས་རྗེ་ཆེན་པོས་བདེན་པ་བཞིའི་ཆོས་བསྟན་ཏོ། སྔོན་རྒྱུ་གང་དང་མཐུན་པ་བཞིན་དུ་འབྲས་བུ་ཐོབ་ནས་ལ་ལ་ནི། རྒྱུན་དུ་ཞུགས་པ་དང ། ལན་གཅིག་ཕྱིར་ལྡོག་པ་དང ། ཕྱིར་མི་ལྡོག་པ་དང ། དགྲ་བཅོམ་པ་ཐོབ་བོ། །ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །བཅོམ་ལྡན་འདས་ཀྱིས་གསུངས་པ་ལ་ཀུན་དགའ་བོ་དང ། འཁོར་རྣམ་བཞི་མངོན་པར་དགའ་ནས་རྗེས་སུ་ཡི་རང་ངོ ། །སེངྒེ་ཡི་དམ་བརྟན་པ་ཞེས་བྱ་བའི་ལེའུ་སྟེ་བཞི་བཅུ་དགུ་པའོ།། །།སྲིན་བུའི་རྒྱུ་བསྟན་པའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་སྤུངས་པའི་རི་ལ་བཞུགས་སོ། །དེའི་ཚེ་གྲོང་ཁྱེར་དེ་དང་མི་རིང་པ་ཞིག་ན་ཆུའི་ལྟེང་ཀ་མི་གཙང་བ་ཞིག་ཡོད་དེ། མི་མང་པོ་བཤད་གཅི་དང ། མི་གཙང་བ་ཐམས་ཅད་དེར་འདོར་ཏེ། ལྟེང་ཀའི་ནང་ན་
473a
> ༄#། །སྲིན་བུ་ཆེན་པོ་སྦྲུལ་དང་འདྲ་བ། རྐང་པ་བཞི་ཡོད་པ་ཞིག་ཡོད་དེ། ཆུའི་ནང་ན་ཕན་ཚུན་རྒྱུག་ཅིང་བར་འགའ་ནི། ཕྱིར་འབྱུང ། བར་འགའ་ནི། ཆུའི་གཏིང་དུ་འགྲོ་སྟེ། ལོ་མང་པོ་དེ་ན་གནས་ཤིང་སྡུག་བསྔལ་ཚད་མེད་པ་མྱོང་ངོ ། །དུས་གཞན་ཞིག་ན་བཅོམ་ལྡན་འདས་དགེ་སློང་མང་པོས་བསྐོར་ཏེ་མདུན་དུ་བདར་ནས་ལྟེང་ཀ་དེའི་དོགས་སུ་གཤེགས་ཏེ་སྲིན་བུ་དེ་གཟིགས་པ་དང ། སྲིན་བུ་དེའི་སྔོན་གྱི་རྒྱུ་ཁྱེད་ཅག་སུས་ཤེས་ཞེས་བཀའ་སྩལ་པ་དང ། དགེ་སློང་རྣམས་ཀྱིས་བསམས་ཀྱང་སྲིན་བུ་དེས་སྔོན་ཅི་བྱས་པ་གཅིག་གིས་ཀྱང་མ་རྟོགས་ནས་བདག་ཅག་ལས་གང་ཡང་འཚལ་བ་མ་མཆིས་སོ། །ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ལེགས་པར་ཉོན་ལ་ཡིད་ལ་ཟུངས་ཤིག་དང ། སྲིན་བུ་འདིའི་སྔོན་གྱི་རྒྱུ་བཤད་པར་བྱའོ། །སྔོན་འདས་པའི་དུས་ན་སངས་རྒྱས་རྣམ་པར་གཟིགས་ཞེས་བྱ་བ་འཇིག་རྟེན་དུ་གཤེགས་ཏེ་སེམས་ཅན་གྱི་དོན་མཛད་ནས་མྱ་ངན་ལས་འདས་སོ། །སངས་རྒྱས་དེའི་བསྟན་པ་ལ་དགེ་སློང་སྟོང་ཕྲག་བཅུ་ཞིག་ཚངས་པར་སྤྱོད་པ་ཡོངས་སུ་དག་པར་སྤྱོད་དེ་དགོན་པའི་རི་ཞིག་ལ་གནས་པ་ལས། གཡས་གཡོན་ན་མེ་ཏོག་གི་ཤིང་དང ། འབྲས་བུའི་ཤིང་རབ་ཏུ་རྒྱས་ཤིང ། ཤིང་གི་བར་བར་ན་ཆུ་མིག་དང ། ཁྲུས་ཀྱི་རྫིང་བུ་དང་ལྡན་པ་
473b
> ཤིན་ཏུ་དགའ་བའི་གནས་ཤིག་ཡོད་དོ། །དེའི་ཚེ་ན་དགེ་སློང་དག་སྤྱོད་ལམ་ལ་བརྩོན་ཞིང་ནན་ཏན་བྱེད་པས། ཐམས་ཅད་ཀྱིས་འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་སྟེ། སོ་སོའི་སྐྱེ་བོ་མེད་དོ། །དུས་གཞན་ཞིག་ན་ཚང་པ་ལྔ་བརྒྱ་ཙམ་ཞིག་རྒྱ་མཚོར་རིན་པོ་ཆེ་ལེན་དུ་དོང་བ་ལས་ལམ་དུ་ཞུགས་ཏེ་ལམ་གཡོགས་སུ་རི་དལ་ལྷགས་ནས་དགེ་སློང་དག་སྤྱོད་ལམ་ལ་ཤིན་ཏུ་བརྩོན་པ་མཐོང་ནས་ཚོང་པ་རྣམས་བགྲོས་ཏེ་མཆོད་པ་ཞིག་བྱ་བར་བསམ་པ་ལས། ཡོན་བདག་མང་བས་སྐབས་མ་རྙེད་དེ་བསམ་པ་བཞིན་དུ་མ་གྲུབ་ནས་དགེ་འདུན་ལ་འཕྱི་ཕྱག་འཚལ་ཏེ་རྒྱ་མཚོར་དོང་ནས་འདི་སྐད་ཅེས་སྨྲས་སོ། །གལ་ཏེ་བདག་ཅག་ཉེ་ཞོ་མེད་པར་བདེ་བར་འཁོད་ན་མཆོད་པ་བགྱིའོ། །ཞེས་གསོལ་བ་དང ། དགེ་འདུན་རྣམས་ཀྱང་ཅང་མི་གསུང་སྟེ། ཚོང་པ་རྣམས་རྒྱ་མཚོར་ཞུགས་སོ། །ཚོང་པ་དེ་དག་རྒྱ་མཚོ་ནས་རིན་པོ་ཆེ་མང་དུ་རྙེད་དེ་བདེ་བར་འཁོར་ནས་དགེ་འདུན་དེ་དག་ལ་རིན་པོ་ཆེའི་དམ་པ་རིན་ཆེ་བ་ཞིག་དགེ་འདུན་རྣམས་ལ་བསོད་སྙོམས་ཀྱི་ཟོང་དུ་ཕུལ་ལོ། །དེ་ནས་དགེ་སློང་རྣམས་ཀྱིས་རིན་པོ་ཆེ་དེ་བཞེས་ནས་དགེ་འདུན་གྱི་ལས་བྱེད་པའི་དགེ་སློང་ཞིག་ལ་གཏད་དོ། །ཕྱིས་དགེ་འདུན་དག་བསོད་སྙོམས་ཀྱིས་བྲལ་བར་གྱུར་ནས་རིན་པོ་ཆེ་དེ་བསོད་སྙོམས་སུ་བཙོང་སྙམ་སྟེ། ལས་བྱེད་པའི་དགེ་སློང་དེ་ལ་ཚོང་པས་ཕུལ་བའི་རིན་པོ་ཆེ་འོན་ཅིག་ཅེས་བསྒོ་ནས་
474a
> ༄#། །དགེ་སློང་དེས་སྨྲས་པ། ཚོང་པས་རིན་པོ་ཆེ་དེ་ང་ལ་བྱིན་དུ་ཟད་ཀྱི། ཁྱོད་ཀུན་ལ་མ་བྱིན་ནོ། །དགེ་འདུན་གྱིས་དགེ་སློང་དེ་ལ་རིན་པོ་ཆེ་དེ་ནི། ཚོང་བས་དགེ་འདུན་ལ་ཕུལ་ནས་ཁྱོད་སྦེད་དུ་བཅུག་གི། ཁྱེད་ལ་བྱིན་པ་མ་ཡིན་ནོ། །ཞེས་བསྒོ་བ་དང ། དགེ་སློང་དེ་ཁྲོས་ནས་ཁྱོད་སྐྱག་པ་ལ་ཟ་ཟ་བའམ། རིན་པོ་ཆེ་དེ་ནི། ཁོ་བོའི་ཡིན་གྱི། མ་ཟེར་ཅིག་ཅེས་སྨྲས་སོ། །དེ་ནས་དགེ་འདུན་རྣམས་ཀྱང་དགེ་སློང་དེ་ཁྲོས་ནས་ངན་སེམས་སྐྱེས་པ་མཐོང་ནས་སོ་སོར་གྱེས་སོ། །དེ་ལྟར་དགེ་འདུན་ལ་ངན་སེམས་ཀྱིས་ཚིག་ངན་པ་སྨྲས་པས་ལུས་ཞིག་སྟེ་ཚེ་འཕོས་ནས་མནར་མེད་པའི་སེམས་ཅན་དམྱལ་བ་ཆེན་པོར་ལྷུང་སྟེ་ངན་སྐྱུག་གི་ནང་ན་བསྐལ་པ་དགུ་བཅུ་རྩ་གཅིག་གི་བར་དུ་འགྲེ་འགྲེའོ། །དེ་ལས་ཐར་ནས་ད་འདིར་ངན་སྐྱུག་གི་ཁུང་དུ་སྐྱེས་ཏེ་ལོ་མང་དུ་ལོན་ཡང་ད་དུང་མཐར་ཏེ། འདི་ལྟ་སྟེ། སྔོན་འདས་པའི་སངས་རྒྱས་གཙུག་ཏོར་ཅན་གྱིས་ཀྱང་དགེ་སློང་གི་དགེ་འདུན་དང་བཅས་འདིར་གཤེགས་ནས་ཉེ་གནས་རྣམས་ལ་བསྟན་ཏེ། སྔོན་ཅི་ལས་གྱུར་པ་བསྟན་ཏོ། །དེ་ནས་ཡང་སངས་རྒྱས་ཐམས་ཅད་སྐྱོབ་ཀྱང་དགེ་སློང་གི་དགེ་འདུན་དང་བཅས་འདིར་གཤེགས་ནས་སྟོན་ཅི་ལས་གྱུར་པ་བསྟན་ཏོ། །དེ་ནས་ཚེ་འཕོས་ནས་ཕྱིར་ཡང་སེམས་ཅན་དམྱལ་བར་སྐྱེས་ཏེ། ལོ་ཁྲི་ཕྲག་གྲངས་མེད་པ་ཞིག་ལོན་ནས་ཕྱིར་ཡང་ཁུང་འདིར་སྐྱེས་སོ། །དེའི་འོག་ཏུ་
474b
> སངས་རྒྱས་ལེག་པར་དད་སེལ་ཀྱང་དགེ་སློང་གི་དགེ་འདུན་དང་བཅས་སུ་འདིར་གཤེགས་ནས་སྔོན་གྱི་ལོ་རྒྱུས་བསྟན་ཏོ། །དེའི་འོག་ཏུ་སངས་རྒྱས་གསེར་ཐུབ་ཀྱང་འདིར་གཤེགས་སོ། ། དེའི་འོག་ཏུ་སངས་རྒྱས་འོད་སྲུང་ཡང་ཉེ་གནས་རྣམས་དང་བཅས་པར་འདིར་གཤེགས་ཏེ་སྔོན་གྱི་ལོ་རྒྱུས་བསྟན་ཏོ། །ད་སངས་རྒྱས་བདུན་པོའི་ཐ་མ་སངས་རྒྱས་ཤཱཀྱ་ཐུབ་པ་ང་ཡང་ཁྱེད་ལ་འདིར་སྲིན་བུ་འདི་བསྟན་ཏེ། དེ་བཞིན་དུ་བསྐལ་པ་བཟང་པོའི་སངས་རྒྱས་སྟོང་པ་ཀུན་ཉེ་གནས་དང་བཅས་ཏ་འདིར་གཤེགས་ནས་སྲིན་བུ་འདིས་སྔོན་ཅི་བྱས་པའི་ལོ་རྒྱུས་སྟོན་པར་འགྱུར་རོ། །དགེ་སློང་རྣམས་བཅོམ་ལྡན་འདས་ཀྱིས་གསུངས་པ་ཐོས་ནས་ལུས་ཀྱི་བ་སྤུ་ཀུན་ལངས་ནས་སོ་སོ་ནས་ལུས་དང ། ངག་དང ། ཡིད་ཀྱི་ལས་ཤིན་ཏུ་སྲུང་བ་གྱུར་ཏོ། །བཅོམ་ལྡན་འདས་ཀྱིས་གསུངས་པ་ལ་འཁོར་མང་པོ་རྗེས་སུ་ཡི་རང་ནས་མངོན་པར་དགའོ། །སྲིན་བུའི་རྒྱུ་བསྟན་པའི་ལེའུ་སྟེ་ལྔ་བཅུ་པའོ།། །།དགེ་སྦྱོང་ཀྱུན་ཏེ་ཞེས་བྱ་བའི་ལེའུ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་ཤཱ་རིའི་བུ་ཉིན་མཚན་དུས་གསུམ་དུ་ལྷའི་མིག་གིས་སེམས་ཅན་གང་ལ་འདུལ་བའི་སྐལ་པ་ཡོད་པ་རྟོག་སྟེ། གདུལ་བར་རིགས་པ་ཡོད་ན་དེར་འགྲོའོ། །དུས་གཞན་ཞིག་ན་ཚོང་པ་དག་ཅིག་ཡུལ་གཞན་དུ་ཚོང་
475a
> ༄#། །ལ་འདོང་བ་ལས་ཁྱི་ཞིག་ཁྲིད་དོ། །ལམ་དུ་ཁྱི་དེས་ཚོང་པ་ཞིག་གི་ཤ་བརྐུས་པ་དང ། ཚོང་བ་དེ་ཁྲོས་པས་ཁྱིའི་རྐང་པ་བཅག་ནས་འབྲོག་སྟོང་བར་བོར་ཏེ་སོང་ངོ ། དེ་ནས་ཤཱ་རིའི་བུས་ལྷའི་མིག་གིས་བརྟགས་ན། ཁྱི་དེ་ལྟོགས་པ་མཐོང་ནས་ཆོས་གོས་གྱོན། ལྷུང་བཟེད་ཐོགས་ཏེ་བསོད་སྙོམས་བསླངས་ནས་དེ་མ་ཐག་ཏུ་ནམ་མཁའ་ལ་འཕུར་ཏེ་ཁྱིའི་གན་དུ་སོང་ནས་བྱམས་ཤིང་སྙིང་བརྩེ་བའི་སེམས་བསྐྱེད་དེ་ཁ་ཟས་ཀྱིས་ཁྱི་དེ་སྙོད་དོ། །ཁྱི་དེ་ཁ་ཟས་ཟོས་ནས་ལྷག་པར་དགའ་སྟེ་ཤཱ་རིའི་བུས་ཁྱི་ལ་དམ་པའི་ཆོས་བསྟན་ནས་ཁྱི་དེ་ཡང་དེར་ཚེ་འཕོས་ཏེ་མཉན་དུ་ཡོད་པར་བྲམ་ཟེ་ཞིག་གི་བུར་སྐྱེས་སོ། །དུས་གཞན་ཞིག་ན་ཤཱ་རིའི་བུ་གཅིག་པུ་བསོད་སྙོམས་ལ་སོང་སྟེ་བྲམ་ཟེ་དེའི་སྒོར་ཕྱིན་པ་དང ། བྲམ་ཟེ་དེས་ཤཱ་རིའི་བུ་ལ་ཅིའི་ཕྱིར་གཅིག་པུ་འགྲོ་བར་བྱེད། དགེ་ཚུལ་ཡང་མེད་དམ་ཞེས་སྨྲས་པ་དང ། ཤཱ་རིའི་བུས་སྨྲས་པ། བདག་ལ་དགེ་ཚུལ་མེད་པས་གཅིག་པུ་འགྲོ་བ་ཡིན་ནོ། །ཁྱོད་ལ་བུ་གཅིག་ཡོད་ཟེར་ན། བདག་ལ་སྦྱིན་དུ་རུང་ངམ་ཞེས་སྨྲས་སོ། །བྲམ་ཟེས་སྨྲས་པ། བདག་ལ་ཀྱུན་ཏེ་ཞེས་བྱ་བ་ཞིག་ཡོད་དེ། དེ་དུང་ན་གཞོན་ཏེ་ཆུང་བས་ཅི་ཡང་མི་ནུས་ཀྱི། ནམ་སྐྱེས་པ་ན་སྦྱིན་ནོ། །ཞེས་སྨྲས་སོ། །ཤཱ་རིའི་བུས་དེ་སྐད་ཅེས་སྨྲས་པ་ཐོས་ནས་ཡིད་ལ་བཟུང་སྟེ་ཕྱིར་རྒྱལ་བུ་རྒྱལ་བྱེད་ཀྱི་ཚལ་དུ་འོངས་སོ། །ཕྱིས་དེ་ལོ་
475b
> བདུན་ལོན་པ་དང ། བྲམ་ཟེའི་ཁྱིམ་དུ་སོང་སྟེ་བྲམ་ཟེ་དེ་ལ་བུ་བསླངས་པ་དང ། བྲམ་ཟེ་དེས་ཀྱང་ཤཱ་རིའི་བུ་ལ་ཕུལ་ལོ། །ཤཱ་རིའི་བུས་ཀྱང་བུ་དེ་བཞེས་ནས་རྒྱལ་བུ་རྒྱལ་བྱེད་ཀྱི་ཚིལ་དུ་ཁྲིད་དེ་དག་ཚུལ་དུ་བཅུག་ནས་དམ་པའི་ཆོས་རྣམ་པ་སྣ་ཚོགས་བསྟན་པས་སེམས་རྣམ་པར་གྲོལ་ཏེ་དགྲ་བཅོམ་པར་གྱུར་ནས་མངོན་པར་ཤེས་པ་དྲུག་དང ། ཡོན་ཏན་ཀུན་དང་ལྡན་པར་གྱུར་ཏོ། །དུས་གཞན་ཞིག་ན་དགེ་ཚུལ་ཀྱུན་ཏེ་ཤེས་རབ་ཀྱི་སྟོབས་ཀྱིས་ཚེ་སྔ་མ་ལ་ཅི་ཞིག་བྱས་པས་ལུས་འདི་ཐོབ་ནས་སློབ་དཔོན་དང་ཕྲད་དེ་འབྲས་བུ་ཐོབ་པར་གྱུར་པ་བརྟགས་ན། ཚེ་སྔ་མ་ལ་ཁྱི་ལྟོགས་པ་ཞིག་བྱེད་པ་ལས། བདག་གི་སློབ་དཔོན་ཤཱ་རིའི་བུའི་དྲིན་གྱིས་མིའི་ལུས་དང་འབྲས་བུ་ཐོབ་པར་མཐོང་ཞིང་རྟོགས་ནས་རབ་ཏུ་དགའ་སྟེ་འདི་སྙམ་དུ་བསམས་སོ། བདག་ནི། སློབ་དཔོན་འདིའི་དྲིན་གྱིས་སྡུག་བསྔལ་ལས་ཐར་པར་གྱུར་ཏོ། །ད་བདག་ནམ་འཚོའི་བར་དུ་སློབ་དཔོན་གྱི་བསྙེན་བཀུར་བྱ་བའི་ཕྱིར་དགེ་ཚུལ་བྱའི། བསྙེན་པར་རྫོགས་པར་མི་བྱའོ་སྙམ་བསམས་སོ། །དེའི་ཚེ་ཀུན་དགའ་བོས་བཅོམ་ལྡན་འདས་ལ་གསོལ་པ། དགེ་ཚུལ་འདིས་སྔོན་འདས་པའི་དུས་ན་སྡིག་པའི་ལས་ཅི་བགྱིས་པས་ཁྱིའི་ལུས་སུ་གྱུར། དགེ་བའི་རྩ་བ་ཅི་བགྱིས་ན་རྣམ་པར་གྲོལ་བར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་སངས་རྒྱས་འོད་
476a
> ༄#། །སྲུང་གི་ཚེ་དགེ་སློང་དག་ཅིག་ལྷན་ཅིག་འཁོད་པ་ལས། དགེ་ཚུལ་གཞོན་ནུ་སྐད་སྙན་པ་ཞིག་ཡོད་དེ། བསྟོད་པ་དང་དབྱངས་བྱེད་ན་ཐམས་ཅད་ཐོས་པར་དགའོ། །དེའི་ཚེ་ན་དགེ་སློང་རྒན་པོ་ཞིག་ཡོད་པ་སྐད་མི་སྙན་ཏེ། འོན་ཀྱང་བསྟོད་པ་དང ། ཚིགས་སུ་བཅད་པ་དབྱངས་དང་བཅས་ཏེ་བྱེད་དོ། །དགེ་སློང་རྒན་པོ་དེ་ནི། དགྲ་བཅོམ་པ་ཞིག་སྟེ།་དགེ་སྦྱོང་གི་ཡོན་ཏན་ཐམས་ཅད་དང་ལྡན་ནོ། །དུས་གཞན་ཞིག་ན་དགེ་སློང་གཞོན་ནུ་དབྱངས་སྙན་པ་དེས་དགེ་སློང་རྒན་པོ་དབྱངས་མི་སྙན་པ་དེ་ལ་ཁྱོད་ཀྱི་དབྱངས་ནི། ཁྱི་ཟུགས་པ་དང་འདྲའོ། །ཞེས་སྨད་པའི་ཚིག་སྨྲས་སོ། །དེ་ནས་དགེ་སློང་རྒན་པོ་དེས་དགེ་སློང་གཞོན་ནུ་ལ་ཁྱོད་ཀྱིས་ང་ཤེས་སམ་ཞེས་དྲིས་ན། སྨྲས་པ། ཁོ་བོས་ཏེ་བོར་ཤེས་ཏེ། ཁྱོད་ནི།་སངས་རྒྱས་འོད་སྲུང་གི་དགེ་སློང་གནས་བརྟན་ཡིན་ནོ། །སྨྲས་པ། བདག་ནི། དགྲ་བཅོམ་པ་སྟེ། དགེ་སྤྱོང་གི་ཡོན་ཏན་ཐམས་ཅད་དང་ལྡན་ནོ། །ཞེས་བྱས་པ་དང ། དགེ་སློང་གཞོན་ནུ་དེ་འཇིགས་སྐྲག་སྟེ་འགྱོད་ནས་དེ་ལ་མཐོལ་ཚངས་བྱས་སོ། །དགེ་སློང་རྒན་པོས་ཀྱང་ཚངས་པ་བྱིན་མོད་ཀྱི། ཚིག་ངན་པ་སྨྲས་པའི་རྐྱེན་གྱིས་སྐྱེ་བ་ལྔ་བརྒྱའི་བར་དུ་རྟག་ཏུ་ཁྱིར་སྐྱེས་སོ། །རབ་ཏུ་བྱུང་སྟེ་ཚུལ་ཁྲིམས་བསྲུངས་པས་འདིར་ང་དང་ཕྲད་ནས་རྣམ་པར་གྲོལ་བར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་
476b
> ཀུན་དགའ་བོ་དང ། འཁོར་མང་པོ་རྗེས་སུ་ཡི་རང་སྟེ་མངོན་པར་དགའོ། །དགེ་སྦྱོང་ཀྱུན་ཏེ་ཞེས་བྱ་བའི་ལེའུ་སྟེ་ལྔ་བཅུ་རྩ་གཅིག་པའོ། །མཛངས་བླུན་ཞེས་བྱ་བའི་མདོ་རྫོགས་སོ།། །། རྒྱ་ནག་ལས་འགྱུར་བར་སྣང་ངོ །