rKTs


H304

(e-text produced by ACIP)

see text in transliteration
1b
༄##། །རྒྱ་གར་སྐད་དུ། ཨ་བྷི་ནི་ཥྐྲ་མ་ཎ་སཱུ་ཏྲ། བོད་སྐད་དུ། མངོན་པར་འབྱུང་བའི་མདོ། དཀོན་མཆོག་གསུམ་ལ་ཕྱག་འཚལ་ལོ། །གང་ཞིག་ཉིད་ཀྱི་དབུ་ནི་རིན་ཆེན་འོད་ལྡན་དང ། །བཙུན་མོ་པདྨ་ཁ་བྱེ་མ་རྙིས་མདངས་ལྡན་པས། །སློང་བ་དགའ་མཛད་སངས་རྒྱས་གོ་འཕང་བརྙེས་གྱུར་ཅིང ། །ཆོས་རྣམས་སྟོན་མཛད་ཞི་
2a
༄##། །བ་དེ་ལ་ཕྱག་འཚལ་ལོ། །གང་ཞིག་རྙེད་པས་ངན་འགྲོའི་འཇིགས་ལས་འདས་གྱུར་ཅིང། །སྲིད་པའི་འཆིང་བ་ཐམས་ཅད་ཟད་བྱེད་ཞིར་གྱུར་ལ། །སྡུག་བསྔལ་མཐའ་མེད་འཁོར་བའི་རྒྱ་མཚོ་ལས་བརྒལ་བའི། །ཟམ་པ་གཅིག་པུ་བདེ་གཤེགས་ཆོས་ལ་ཕྱག་འཚལ་ལོ། །གང་ལ་ཡོན་ཏན་ཕུལ་བྱུང་ལ་གནས་སྦྱིན་པའི་གནས། །མཆོད་པ་ཅུང་ཟད་བྱས་ཀྱང་རྒྱ་ཆེ་ཉིད་འགྱུར་བ། །བདེ་བར་གཤེགས་པས་རབ་བསྔགས་གང་ཟག་མཆོག་བརྒྱད་ཀྱིས། །རབ་བརྒྱན་འཕགས་པའི་དགེ་འདུན་དེ་ལ་ཕྱག་འཚལ་
2b
ལོ། །ཐུབ་གསུང་རྣམ་པར་བརྟགས་ན་དད་པ་མི་སྐྱེད་པའམ། །ཕན་པ་མི་འབྱུང་གང་དེ་ཅི་ཡང་ཡོད་མིན་ལ། །ཚིག་བཏུ་བ་དང་འཛིན་པའི་ནུས་དང་རྣམ་བྲལ་བ། །རྣམ་པར་གཡེངས་ཕྱིར་འབྲས་སྩོལ་འདི་བདག་ཉུང་ཟད་ཅིག་།ཇི་ལྟར་པདྨ་ཁ་བྱེའི་དབུས་གནས་བུང་བ་ནི། །འཁོར་ཞིང་པདྨ་ལ་ནི་ཅུང་ཟད་གསོག་པར་བྱེད། །དེ་བཞིན་ཐུབ་པའི་ཞལ་གྱི་པདྨའི་ཚལ་ནང་ནས། ། རང་ཡིད་རབ་ཏུ་དགའ་བྱེད་ཅུང་ཟད་བསྡུ་བར་བྱ། །ཐུབ་པའི་གསུང་ནི་མ་ལུས་ཤིན་ཏུ་རྟོགས་དཀའ་བ། །དད་ལྡན་མི་ལ་ཉིན་རེའང་རྒྱས་པར་ཉེར་འགྲོ་སྟེ། །རྣམ་པར་དཔྱད་ན་ཚིགས་བཅད་ཕྱེད་མཐའང་མི་དཔོགས་ན། །རིན་ཆེན་མདོ་བརྒྱ་བསྡུ་བ་འདི་ནི་སྨོས་ཅི་དགོས། །ཕྱོགས་སྒོ་རྣམས་སུ་སྙན་དང་གྲགས་པའི་སྣང་བས་ཁྱབ། །རབ་གསལ་ཞེས་བྱས་ཡི་བདག་པོར་གྱུར་པ་ན། །
3a
༄##། །བསོད་ནམས་སྟོབས་ཀྱིས་དགྲ་ལས་རྒྱལ་བས་རྒྱལ་ཕྲན་གྱིས། །བཏུད་པས་ནོར་བུའི་ཅོད་པན་འོད་ཀྱིས་ཞལ་གཙང་བྱས། །གླང་པོའི་དབང་པོ་རྒྱགས་འཁྲིག་འདོད་ཆགས་ཀྱིས་ཆགས་པ། །འཕྲལ་དུ་བཅོས་པའི་ཐབས་མེད་ཉོན་མོངས་སྐབས་གྱུར་ལ། །གཟིགས་ནས་འགྲོ་བའི་ཆགས་སོགས་ཉེས་པ་ཞི་བཞེད་པས། །ཐུགས་བརྟན་ཐུབ་དབང་གྱུར་པར་དེས་ནི་སྨོན་ལམ་བཏབ། །དེ་ནས་བརྩམས་ཏེ་སྦྱིན་དང་ཚུལ་ཁྲིམས་བཟོད་པ་དང ། །བརྩོན་འགྲུས་བསམ་གཏན་མི་གཡོ་བློ་གྲོས་རྣོན་པོ་རྣམས། །ཉིད་བདེའི་ལྟོས་མེད་ཤིན་ཏུ་ཡུན་རིང་ཡང་དག་སྤེལ། །འགྲོ་ལ་ཕན་ཕྱིར་ཤིན་ཏུ་དཀའ་བ་བརྒྱ་ཕྲག་མཛད། །ཐུགས་རྗེ་ཆེར་ལྡན་དྲང་སྲོང་མཆོག་འདི་ཚེ་གཞན་དུ། །ཉིད་ཀྱིས་འགྲོ་ཕན་དོན་མཛད་མི་སྐྱོ་ཇི་སྙེད་དེ། །བརྗོད་པ་འདི་ན་ཤཱ་རིའི་བུས་ཀྱང་མི་ནུས་ནའང ། །གང་དག་ཕྱིར་ནི་ཅུང་ཟད་ཡོངས་སུ་བརྗོད་པར་བྱ། །སྟག་མོ་
3b
ཤི་བིའི་གླང་པོ་སྤྲེའུ་དཀའ་ཐུབ་དབང ། །ཚངས་སོགས་སྐུ་ཚེ་བརྒྱ་ཕྲག་དུ་མར་དགེ་མཛད་ནས། །དོན་ཀུན་སྒྲུབ་བརྩོན་བདག་ཉིད་ཆེན་པོ་ཚེ་གཅིག་ཐོགས། །བྱང་ཆུབ་སེམས་དཔའ་དགའ་ལྡན་གནས་སུ་སྐྱེ་བ་བཞེས། །དེར་བཞུགས་ནས་ནི་འགྲོ་བ་ཀུན་ལ་ལེགས་གཟིགས་ནས། །སྐྱབས་མེད་གཡོ་ཞིང་ཕོངས་པ་དུ་མས་ཡོངས་ཁྱབ་ལ། །ཐུགས་རྗེ་ཆེན་པོས་ཐུགས་ནི་སྤྲོ་བ་བསྐྱེད་གྱུར་ཏེ། །གཞན་གྱི་དོན་མཛད་ཐུགས་དམ་ཉིད་ཀྱི་རྒྱུད་དགོངས་གྱུར། །དེ་བས་འདི་ནི་ཇི་ལྟར་མི་ཡུལ་ཉེར་གཤེགས་ཏེ། །སྐྱེ་དང་རྒ་ཤི་ན་བའི་འཇིགས་པ་གཟིགས་ནས་ནི། །རབ་བྱུང་བློ་གྲོས་ངེས་མཛད་བྱང་ཆུབ་ཡང་དག་བརྙེས། །དེ་བཞིན་ཆོས་སྟོན་མཛད་པ་བཤད་ཀྱི་མཉན་པར་གྱིས། །དེ་ནས་དགའ་ལྡན་གྱི་གནས་ན་བཞུགས་པའི་བྱང་ཆུབ་སེམས་དཔའ་བསྐལ་པ་མང་པོར་བསོད་ནམས་དང ། ཡེ་ཤེས་ཀྱི་ཚོགས་དཔག་ཏུ་མེད་པ་རྣམ་པ་དུ་མར་ཉེ་བར་བསགས་པས་བྱང་ཆུབ་ཀྱི་ཚོགས་ཡོངས་སུ་རྫོགས་པར་མཛད་པ། ཉོན་མོངས་པའི་ཆུ་བོ་སྟོབས་དང་ལྡན་པས་ཤིན་ཏུ་ཆོད་པ་རྣམས་ལ་ཐུགས་རྗེས་ཡོངས་སུ་བསྐུལ་བ། གཞན་གྱི་དོན་མཛད་པའི་ཕྱིར་རྟག་ཏུ་བརྩོན་པར་མཛད་པ་དེ་ཐུགས་ལ་དགོངས་པ་འདི་ལྟ་བུ་མངོན་སུམ་དུ་མཛད་དེ། གང་ངས་སྐྱེ་བ་མང་པོར་ཡོངས་སུ་འཁོར་བ་ན་རང་གི་ཤ་དང ། ཁྲག་དང ། མགོ་དང ། མིག་དང ། བུ་དང ། ཆུང་མ་རྣམས་གཏོང་བ་
4a
༄#། །དང།་ཤིན་ཏུ་གཏོང་བས་ཡོངས་སུ་བཏང་བ་དང ། དཀའ་བའི་ཚུལ་ཁྲིམས་ལ་གནས་པ་དང ། གཞན་གྱིས་སྦྱར་བའི་བསྙེན་བཀུར་མ་ཡིན་པ་སྣ་ཚོགས་པ་བཟོད་པར་བྱས་པ་དང ། རྟག་ཏུ་ལྷོད་པ་མེད་པའི་སྤྲོ་བ་དང ། འབྲས་བུ་དང་བཅས་པའི་ཏིང་ངེ་འཛིན་གྱི་བདེ་བ་ལ་མ་ཆགས་པ་དང ། ཡོད་པ་དང ། མེད་པའི་དོན་ལ་རྣམ་པར་དཔྱོད་པ་དང་ལྡན་པས་གཞན་གྱི་དོན་ལ་བརྩོན་པའི་བློ་གྲོས་ཀྱིས་ཤིན་ཏུ་མི་བཟད་པའི་སྡུག་བསྔལ་གྱི་ཚོར་བ་རྣམ་པ་མང་པོས་སེམས་ལ་གདུངས་པའི་སྡུག་ཕོངས་པའི་སྲོག་ཆགས་རྣམས་ལ་མཆོག་ཏུ་སྙིང་རྗེ་བསྐྱེད་ནས་བྱམས་པའི་སྟོབས་དང ། ཟླ་འོད་དང ། ཤི་བི་དང ། གླང་པོ་དང ། ཐམས་ཅད་སྒྲོལ་དང ། བཟོད་པར་སྨྲ་བ་དང ། སྤྲེའུའི་བདག་པོ་དང ། མིག་བཟང་དང།་སྨན་ཆེན་པོ་ལ་སོགས་པ་སྐྱེས་པའི་རབས་སྟོང་ཕྲག་སྙེད་དུ་སྨོན་ལམ་བྱས་ཤིང་བསགས་པ། ཨེ་མའོ། །ཀྱེ་མ་བདག་གིས་འཇིག་རྟེན་ལོང་བ་འདྲེན་པ་མེད་པ། ཡོངས་སུ་འདྲེན་པ་མེད་པ། ཆོས་མ་ཡིན་པ་འདོད་ཆགས་ཀྱིས་དབང་དུ་འགྲོ་བ། ལོག་པའི་ཆོས་ཀྱིས་ཡོངས་སུ་ཁྱབ་པ། སེམས་ལ་མི་བཟད་པའི་ཆགས་པས་ཟིལ་གྱིས་ནོན་པ། ཁྲོ་བ་མང་བ། ལྟ་བ་ངན་པའི་ཚང་ཚིང་གིས་རྣམ་པར་བརླག་པ། ཕྲག་དོག་དང ། སེར་སྣས་ཀུན་ཏུ་བཅིངས་པ། ལེགས་པར་སྤྱོད་པ་ལ་འཇུག་པ་ལ་རྒྱབ་ཀྱིས་ཕྱོགས་ཤིང་ཉེས་
4b
པར་སྤྱོད་པ་ལ་ཀུན་ཏུ་གཞོལ་བར་གྱུར་པ་རྣམས་ལ་བདག་སངས་རྒྱས་སུ་གྱུར་ནས་སེམས་ཅན་མ་བརྒལ་བ་རྣམས་ནི་བསྒྲལ་བར་བྱའོ། །མ་གྲོལ་བ་རྣམས་ནི་དགྲོལ་བར་བྱའོ། ། དབུགས་མ་ཕྱིན་པ་རྣམས་ནི་དབུགས་དབྱུང་བར་བྱའོ། །ཡོངས་སུ་མྱ་ངན་ལས་མ་འདས་པ་རྣམས་ནི་ཡོངས་སུ་མྱ་ངན་ལས་བཟླ་བར་བྱའོ་ཞེས་ངས་ཡུན་རིང་དུ་མངོན་པར་འདོད་པ་ཡིན་ན། དེ་ནི་དོན་དེ་བྱ་བའི་དུས་ལ་བབ་པ་ཡིན་གྱི། མ་ལ། བདག་གིས་འཇིག་རྟེན་གྱི་གནས་སྐབས་ཅི་ཞིག་ཡིན་པ་བལྟས་ན་གདུལ་བར་ནུས་སོ། །གདུལ་བར་ནུས་སོ། །ཞེས་དེ་ལྟར་རྣམ་པར་དགོངས་ནས་འཇིག་རྟེན་འདི་དག་ཐམས་ཅད་ལ་གཟིགས་པ་འཇུག་སྟེ། སུ་ནི་འགྲིབ། སུ་ནི་དགེ་བའི་ཆོས་རྣམས་ཀྱིས་འཕེལ། སུ་ནི་གནོད་པར་གྱུར། སུ་ནི་ཉམ་ཐག་པར་གྱུར།་སུ་ནི་སྡུག་བསྔལ་བར་གྱུར། གང་ལ་ནི་ངས་མ་འཇིགས་ཤིག་།མ་འཇིགས་ཤིག་།ཅེས་མི་འཇིགས་པ་སྦྱིན་པས་དབུགས་བཅུང་\?\་བར་བྱ། སུ་ནི་ངན་སོང་ལ་གཞོལ། སུ་ནི་ངན་སོང་ལ་འབབ། སུ་ནི་ངན་སོང་ལ་བབ། སུ་ནི་ངས་ངན་སོང་ལས་བཏོན་ཏེ། མཐོ་རིས་དང ། ཐར་བའི་འབྲས་བུ་ལ་གཞག་པར་བྱ། སུ་ནི་འདོད་པའི་འདམ་དུ་བྱིང་བ་ལ་ལག་ནས་དྲང་བར་བྱ། སུ་ནི་འཕགས་པའི་ནོར་དང་བྲལ་བ་རྣམས་ལ་འཕགས་པའི་ནོར་གྱི་དབང་ཕྱུག་གི་བདག་པོ་ལ་གཞག་པར་བྱ། གང་གི་དགེ་བའི་རྩ་བ་མ་བསྐྱེད་པ་དག་ནི་བསྐྱེད་
5a
༄#། །པར་བྱ། གང་གི་དགེ་བའི་རྩ་བ་བསྐྱེད་པ་དག་ནི་ཡོངས་སུ་སྨིན་པར་བྱ། གང་གི་ཡོངས་སུ་སྨིན་པ་རྣམས་ནི་རྣམ་པར་གྲོལ་བར་བྱ་ཞེས་ཡེ་ཤེས་ཀྱི་གཟིགས་པ་འཇུག་པར་མཛད་པ་ན་སྲོག་ཆགས་བརྒྱ་སྟོང་དཔག་ཏུ་མེད་པ་ལ་ལ་ནི་དགེ་བའི་རྩ་བ་མ་བསྐྱེད་པ་བསྐྱེད་པར་འོས་པ་དང ། ལ་ལ་དགེ་བའི་རྩ་བ་མ་སྨིན་པ་ཡོངས་སུ་སྨིན་པར་ནུས་པ་དང།་ལ་ལ་དགེ་བའི་རྩ་བ་ཡོངས་སུ་སྨིན་པ་བདེ་འགྲོར་འགྲོ་བར་གཞོལ་བ་དང ། ལ་ལ་འབྲས་བུ་དང་པོ་ཐོབ་པར་གཞོལ་བ་དང ། ལ་ལ་ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བ་དང ། དགྲ་བཅོམ་པ་ཉིད་དང ། རང་བྱང་ཆུབ་འཐོབ་པར་གཞོལ་བ་དང ། ལ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པའི་སྐལ་བ་དང་ལྡན་པ་དང ། ལ་ལ་ནི་སྔོན་གྱི་སྨོན་ལམ་རྣམས་ཉེ་བར་བསགས་པས་རྐྱེན་ལ་རགས་ལས་པ་གང་ཞིག་མ་ཐོས་པས་དམ་པའི་ཆོས་ལས་ཡོངས་སུ་ཉམས་པར་གྱུར་པར་གཟིགས་སོ། །གཟིགས་ནས་ཀྱང་འདི་སྙམ་དུ་དགོངས་ཏེ། ཀྱེ་མའོ། །བདག་གིས་ཡུན་རིང་པོ་ནས་ཡང་དག་པར་རྟོགས་པ་རྫོགས་པར་གྱུར་ཅིང་ངའི་ངལ་བ་འབྲས་བུ་དང་བཅས་པར་གྱུར་ཏོ་ཞེས་དགྱེས་ཤིང་ངས་བྱ་བ་ནི་བྱས་སོ། །ངས་ཁུར་བསྐུར་བར་དཀའ་བ་ནི་མཐར་ཕྱིན་ཏེ། གང་ངའི་ཡོངས་སུ་དག་པའི་རྒྱུད་དང་ལྡན་པའི་ཞིང་དུ་གྱུར་ཅིང་གདུལ་བྱའི་སྐྱེ་བོ་རྣམས་ཡུན་རིང་པོར་
5b
མི་ཐོགས་པར་པདྨའི་ཚལ་ཡོངས་སུ་སྨིན་ཅིང་ཁ་བྱེ་ལ་མ་རེག་པའི་ཉི་མ་ཤར་བས་རྒྱས་པར་འགྱུར་བ་ལྟ་བུར་གྱུར་གྱི་ཕྱི་བཤོལ་མི་བྱའོ། །འདིར་གནས་བཞིན་དུའང་དངོས་པོ་ཐམས་ཅད་རྫོགས་པར་བྱ་བར་ནུས་པ་མ་ཡིན་པས་ན་གཞེས་པའི་དུས་ནི་མ་ཡིན་གྱི། མ་ལ། བདག་མིའི་འཇིག་རྟེན་དུ་སོང་ལ། དེར་ཕྱིན་ནས་བརྩོན་འགྲུས་ཀྱི་གྲོགས་དང ། དེ་བཞིན་གཤེགས་པའི་བླ་ན་མེད་པའི་ཡེ་ཤེས་རྟོགས་པར་བྱས་ཏེ། འདི་རྣམས་སྐལ་བ་ཇི་ལྟ་བ་བཞིན་དུ་འདི་རྣམས་ཀྱི་དགེ་བའི་རྩ་བ་བསྐྱེད་ཅིང་ཡོངས་སུ་སྨིན་ལ་རྣམ་པར་གྲོལ་བར་བྱ་ཞིང ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བའི་སྡུག་བསྔལ་གྱི་རྒྱ་མཚོར་ལྟུང་བ། སྐྱབས་མེད་པ། ཡོངས་སུ་སྐྱོབ་པ་མེད་པའི་སྲོག་ཆགས་རྣམས་དམ་པའི་ཆོས་བསྟན་པའི་ལག་པ་བརྐྱང་བས་གདོན་པར་བྱའོ། །ཐོག་མ་མེད་པའི་དུས་ནས་རྗེས་སུ་འབྲེལ་བའི་འདོད་ཆགས་དང ། ཞེ་སྡང་དང ། གཏི་མུག་གི་མེས་ཀུན་ཏུ་གདུངས་པ་རྣམས་ལ་འཕགས་པའི་ལམ་ཡན་ལག་བརྒྱད་པའི་ཆུའི་རྒྱུན་བླུགས་པས་སྡུག་བསྔལ་མ་ལུས་པ་བསལ་བར་བྱའོ་ཞེས་དེ་ལྟ་བུའི་ཐུགས་ལ་དགོངས་པ་ངེས་པར་བསྐྱེད་ནས། ཛམྦུའི་གླིང་དུ་འཇུག་པར་མཛད་པ་ན་རིགས་དང ། ཡུལ་དང ། དུས་དང ། རྒྱུད་དང ། བུད་མེད་དེ། གཟིགས་པ་རྣམ་པ་ལྔས་གཟིགས་པར་མཛད་དོ། །བྱང་ཆུབ་སེམས་དཔའ་རྣམས་རྒྱུ་
6a
༄#། །གང་གིས་རིགས་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་རིགས་ཇི་ལྟ་བུ་ཞིག་ཏུ་ཉིང་མཚམས་སྦྱོར་བ་ལེན་སྙམ་ན། བྲམ་ཟེའི་རིགས་སམ། རྒྱལ་རིགས་སུ་ཡིན་ལ། དེ་ལ་རེས་འགའ་ནི་བྲམ་ཟེའི་རིགས་བཙུན་པར་བཀུར། རེས་འགའ་ནི་རྒྱལ་རིགས་ཏེ། ད་ལྟ་ན་ནི་རྒྱལ་རིགས་བཙུན་པར་བཀུར་བར་གཟིགས་ནས། མ་ལ། བདག་ལ་གཞན་དག་བྱང་ཆུབ་སེམས་དཔས་རིགས་ངན་པར་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་བར་བདག་གིས་རྒྱལ་རིགས་སུ་ཉིང་མཚམས་སྦྱོར་བ་བླང་བར་བྱའོ་སྙམ་མོ། །འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང ། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་རིགས་ལ་གཟིགས་པར་མཛད་དོ། །བྱང་ཆུབ་སེམས་དཔའ་རྣམས་རྒྱུ་གང་གིས་ཡུལ་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ནི་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་ཡུལ་ཇི་ལྟ་བ་ཞིག་ཏུ་ཉིང་མཚམས་སྦྱོར་བ་ལེན་སྙམ་ན། འབྲས་དང ། བུ་རམ་ཤིང་དང ། བ་ལང་དང ། མ་
6b
ཧེ་ཕུན་སུམ་ཚོགས་པ། སློང་མོ་བ་བརྒྱ་འདུ་བ། མཐའ་འཁོབ་ཀྱི་སྐྱེ་བོ་མེད་པ། དབུས་པའི་སྐྱེ་བོ་གནས་པ། གང་དུ་སྐྱེ་བོ་གཅིག་བཏུལ་བས་སྐྱེ་བོའི་ཚོགས་ཆེན་པོ་འདུལ་བར་འགྱུར་བའི་ཡུལ་གང་ཡིན་པ་གཟིགས་སོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། དབུས་ཀྱི་ཡུལ་འདི་ནི་བུ་རམ་ཤིང་གི་ཕྲེང་བ་དང ། འབྲས་དང ། བ་ལང་དང ། མ་ཧེ་ཕུན་སུམ་ཚོགས་པ། སློང་མོ་བ་བརྒྱ་འདུ་བ། མཐའ་འཁོབ་ཀྱི་སྐྱེ་བོ་མེད་པ། དབུས་པའི་སྐྱེ་བོ་གནས་པ། གང་དུ་སྐྱེ་བོ་གཅིག་བཏུལ་བས་སྐྱེ་བོའི་ཚོགས་ཆེན་པོ་བཏུལ་བར་འགྱུར་བ་ཡིན་གྱི། མ་ལ། བདག་ལ་གཞན་དག་བྱང་ཆུབ་སེམས་དཔས་ཡུལ་མཐའ་འཁོབ་རྣམས་སུ་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་བར་བདག་གིས་ཡུལ་དབུས་སུ་ཉིང་མཚམས་སྦྱོར་བ་བླང་བར་བྱའོ་སྙམ་མོ། །འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང ། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་ཡུལ་ལ་གཟིགས་པར་མཛད་དོ། །བྱང་ཆུབ་སེམས་དཔའ་རྣམས་རྒྱུ་གང་གིས་ན་དུས་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ནི་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་དུས་ཇི་ལྟ་བུ་ཞིག་ཏུ་ཛམྦུའི་གླིང་དུ་ཉིང་
7a
༄#། །མཚམས་སྦྱོར་བ་ལེན་སྙམ་ན། སྐྱེ་དགུའི་ཚེ་ལོ་ཡར་སྐྱེ་བ་ན་བརྒྱད་ཁྲི་ཐུབ་པ་ཡན་ཆད་ཉིང་མཚམས་སྦྱོར་བ་མི་ལེན་ལ། མི་རྣམས་ཀྱི་ཚེ་ལོ་མར་འགྲིབ་པ་ན་བརྒྱ་ཐུབ་པ་མན་ཆད་ཉིང་མཚམས་སྦྱོར་བ་མི་ལེན་ནོ། །བྱང་ཆུབ་སེམས་དཔའ་རྒྱུ་གང་གིས་མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ཡན་ཆད་ཉིང་མཚམས་སྦྱོར་བ་ལེན་པར་མི་མཛད་ཅེ་ན། མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་ཡིད་འབྱུང་བར་དཀའ་ཞིང་སྐྱོ་བར་བྱ་བར་དཀའ་ལ་བླུན་ཞིང་དབང་པོ་རྟུལ་བ་དང ། བག་མེད་ཅིང ། བདེ་བ་མང་བས་བདེན་པ་རྣམས་ཀྱི་སྣོད་དུ་མི་འགྱུར་བའི་ཕྱིར་རོ། །མར་འགྲིབ་པ་ལོ་བརྒྱ་མན་ཆད་དུའང་སྙིགས་མ་ལྔ་པོ་འདི་ལྟ་སྟེ། ཚེའི་སྙིགས་མ་དང ། ཉོན་མོངས་པའི་སྙིགས་མ་དང ། སེམས་ཅན་གྱི་སྙིགས་མ་དང ། ལྟ་བའི་སྙིགས་མ་དང ། དུས་ཀྱི་སྙིགས་མ་ཤས་ཆེ་བ་ཡིན་པས་བདག་ལ་གཞན་དག་བྱང་ཆུབ་སེམས་དཔས་སྙིགས་མ་ལྔ་ཤས་ཆེ་བའི་དུས་སུ་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་རོ་སྙམ་མོ། །འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང ། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་དུས་ལ་གཟིགས་
7b
པ་ཡིན་ནོ། །བྱང་ཆུབ་སེམས་དཔའ་རྣམས་རྒྱུ་གང་གིས་རྒྱུད་མ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་རྒྱུད་ཅི་འདྲ་བ་ཞིག་ཏུ་ཉིང་མཚམས་སྦྱོར་བ་ལེན་སྙམ་ན། རིགས་གང་ཞིག་བཙུན་པར་བཀུར་ཞིང་མ་མེས་དང ། ཕ་མེས་ཟུང་བདུན་གྱི་བར་དུ་སྤྱོད་པ་ལ་སྐྱོན་མེད་པར་གཟིགས་ནས། དེ་འདི་སྙམ་དུ་དགོངས་ཏེ་ཤཱཀྱའི་རིགས་རྒྱུད་འདི་ནི་བཙུན་པར་བཀུར་བ་ཡིན་ཞིང་མང་པོས་བཀུར་བ་ནས་བཟུང་སྟེ་སྤྱོད་པ་སྐྱོན་མེད་པ་ཡིན་གྱི། མ་ལ། བདག་ལ་གཞན་དག་བྱང་ཆུབ་སེམས་དཔས་རྒྱུད་ངན་པ་ལས་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་བར་བདག་གིས་རྒྱལ་པོ་ཟས་གཙང་མའི་རྒྱུད་དུ་ཉིང་མཚམས་སྦྱོར་བ་བླང་ངོ་སྙམ་མོ། །འདི་ལྟར་བྱང་ཆུབ་སེམས་དཔའ་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང ། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྒྱུད་ལ་གཟིགས་པར་མཛད་དོ། །བྱང་ཆུབ་སེམས་དཔའ་རྣམས་རྒྱུ་གང་གིས་བུད་མེད་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་བུད་མེད་ཅི་འདྲ་བ་ཞིག་གི་རུམ་དུ་ཉིང་མཚམས་
8a
༄#། །སྦྱོར་བ་ལེན་སྙམ་ན་དེ་འདི་སྙམ་དུ་དགོངས་ཏེ། བུད་མེད་གང་ཞིག་གཟུགས་བཟང་མོ་དང་ལྡན་པ། རིགས་དང་ལྡན་པ། རིགས་འཕེལ་བར་འགྱུར་བ། ཁྲོ་བག་ཅན་མ་ཡིན་པ། ཕྲ་མ་ཅན་མ་ཡིན་པ། ངག་རྩུབ་པ་མ་ཡིན་པ། དད་པ་དང་ལྡན་པ། རང་བཞིན་བཟང་བ། བསམ་པ་དགེ་བ། རྒྱུད་ཕུན་སུམ་ཚོགས་པ། རིགས་མཐོ་བ། ཉེ་དུའི་རིགས་དང་ལྡན་པ། ཤེས་རབ་ཕུན་སུམ་ཚོགས་པ། གཏོང་བ་ཕུན་སུམ་ཚོགས་པ། མཚན་ཉིད་མི་གཡོ་བ། རང་བཞིན་བརྟན་ལ་རྒོད་བག་ཅན་མ་ཡིན་པ། ཁེངས་པ་མེད་པ། བྱམས་པའི་སེམས་དང་ལྡན་པ། སྡུག་ཅིང་ཡིད་དུ་འོང་བ། འཇིག་རྟེན་ཐམས་ཅད་ལ་ཆོས་དང་ལྡན་པ། བུད་མེད་ཐམས་ཅད་ཀྱི་མཆོག་ཏུ་གྱུར་པ། སྔོན་གྱི་སངས་རྒྱས་རྣམས་ལ་ཨེ་མའོ་བདག་སངས་རྒྱས་ཀྱི་ཡུམ་དུ་གྱུར་ཅིག་ཅེས་སྨོན་ལམ་བཏབ་པ་དང ། བྱང་ཆུབ་སེམས་དཔའ་ཟླ་བ་བཅུ་རུམ་དུ་འཛིན་ནུས་པ་དང ། རང་གི་དོན་ཡང་ཉམས་པར་མི་བྱེད་པ་ཡིན་པར་གཟིགས་སོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། སྒྱུ་འཕྲུལ་ཆེན་མོ་འདི་ནི་མ་མེས་དང ། ཕ་མེས་ཟུང་བདུན་གྱི་བར་དུ་སྤྱོད་པ་ལ་སྐྱོན་མེད་ཅིང་གཟུགས་དང་ལྡན་པ་དང ། རིགས་དང་ལྡན་པ་དང ། ཚུལ་དང་ལྡན་ཞེས་བྱ་བ་ནས་བུད་མེད་ཐམས་ཅད་ཀྱི་མཆོག་ཏུ་གྱུར་ཅེས་བྱ་བའི་བར་གོང་མ་བཞིན་ཏེ། ཁྲོ་བག་ཅན་མ་ཡིན་པ་དང ། རིགས་འཕེལ་
8b
བར་འགྱུར་བ་དང ། བྱང་ཆུབ་སེམས་དཔའ་རུམ་དུ་ཟླ་བ་བཅུར་འཛིན་ནུས་པ་དང ། རང་གི་དོན་ཡང་མི་ཉམས་པ་ཡིན་ལ། འདི་ལྟར་སྒྱུ་འཕྲུལ་ཆེན་མོས་སྔོན་སངས་རྒྱས་རྣམས་ལ། ཀྱེ་མ།་བདག་སངས་རྒྱས་ཀྱི་ཡུམ་དུ་གྱུར་ཅིག་ཅེས་སྨོན་ལམ་བཏབ་པའང་ཡིན་པས་བདག་ལ་གཞན་དག་བྱང་ཆུབ་སེམས་དཔའ་མཚན་ངན་པ་དང་ལྡན་པའི་བུད་མེད་ཀྱི་རུམ་དུ་ཉིང་མཚམས་སྦྱོར་བ་བླངས་སོ་ཞེས་ཁ་ཟེར་བར་མི་འགྱུར་རོ་སྙམ་མོ། །འདི་ལྟར་བྱང་ཆུབ་སེམས་དཔས་སྨད་པར་མི་འགྱུར་བའི་ལས་བྱས་ཤིང་བསགས་པ་དང ། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་བུད་མེད་རྣམས་ལ་གཟིགས་པར་མཛད་དོ། །དེ་ནས་བྱང་ཆུབ་སེམས་དཔའ་གཟིགས་པ་ལྔས་གཟིགས་ནས་དགའ་ལྡན་ན་སྤྱོད་པའི་ལྷའི་རིས་རྣམས་ལ་གསུངས་པ། གྲོགས་པོ་དག་།ཤེས་པར་གྱིས་ཤིག་།ང་ཛམྦུའི་གླིང་དུ་བབས་ནས་ཡུལ་དབུས་སུ་ཉིང་མཚམས་སྦྱོར་བ་ལེན་གྱི། ཁྱེད་ཅག་ལས་གང་དག་བདུད་རྩི་དོན་དུ་ཉེ་བར་ཕལ་ཆེར་ཡུལ་དབུས་ཀྱི་གྲོང་ཁྱེར་ཆེན་པོ་དྲུག་པོ། འདི་ལྟ་སྟེ། མཉན་ཡོད་དང ། སཱ་ཀེ་ཏ་དང ། ཡངས་པ་ཅན་དང ། ཙམ་པ་དང ། རྒྱལ་པོའི་ཁབ་དང ། ཝཱ་ར་ཎཱ་སིར་ཉིང་མཚམས་སྦྱོར་བ་ལོང་ཞིག་།དེ་སྐད་ཅེས་བཀའ་སྩལ་པ་དང ། དགའ་ལྡན་ ་རིས་ཀྱི་ལྷ་རྣམས་ཀྱིས་བྱང་ཆུབ་སེམས་དཔའ་ལ་
9a
༄#། །འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ། མཁྱེན་པར་མཛོད་ཅིག་།དེ་ལྟར་འཇིག་རྟེན་ནི་སྡིག་པས་གོས་པ། སྐྱེ་དགུ་ནི་མ་རུངས་པའི་བསམ་པ་ཅན། ཛམྦུའི་གླིང་ན་རྟོག་གེ་བ་དྲུག་དང ། རྗེས་སུ་སྒྲོགས་པ་དྲུག་དང ། སྙོམས་པར་འཇུག་པ་དྲུག་གིས་དཀྲུག་པ་ལགས་སོ། །དེ་ལ་རྟོག་གེ་བ་དྲུག་གང་ཞེ་ན། འདི་ལྟ་སྟེ། འོད་སྲུང་རྫོགས་བྱེད་དང ། ཀུན་ཏུ་རྒྱུ་གནག་ལྷས་ཀྱི་བུ་དང ། སྨྲ་འདོན་གྱི་བུ་མོའི་བུ་ཡང་དག་རྒྱལ་བ་ཅན་དང ། མི་ཕམ་སྐྲའི་ལབ་ཅན་དང ། ཀཱ་ཏྱཱའི་བུ་ནོག་ཅན་དང ། གཅེར་བུ་པ་གཉེན་གྱི་བུའོ། ། རྗེས་སུ་སྒྲོགས་པ་དྲུག་གང་ཞེ་ན། འདི་ལྟ་སྟེ། བྲམ་ཟེ་སྒྱུས་རྒལ་དང ། བྲམ་ཟེ་རྣས་རྡེག་དང ། བྲམ་ཟེ་བཟང་ལྡན་དང ། བྲམ་ཟེ་ཚངས་པའི་ཚེ་དང ། བྲམ་ཟེ་པདྨའི་སྙིང་པོ་དང ། བྲམ་ཟེ་དམར་པོའོ། །སྙོམས་པར་འཇུག་པ་དྲུག་གང་ཞེ་ན། འདི་ལྟ་སྟེ། རངས་བྱེད་ཀྱི་བུ་ལྷག་སྤྱོད་དང ། སྒྱུ་རྩལ་ཤེས་ཀྱི་བུ་རིང་འཕུར་དང ། ཀུན་ཏུ་རྒྱུ་རབ་བཟང་དང ། བྲམ་ཟེའི་ཁྱེའུ་ཀུན་རྒྱལ་དང ། དྲང་སྲོང་ཉོན་མོངས་མེད་པ་དང ། ལྟེང་རྒྱས་འོད་སྲུང་རལ་བ་ཅན་ནོ། །འདིར་ནི་ཆོས་མཉན་པའི་སླད་དུ་བྱང་ཆུབ་སེམས་དཔའ་ཁྱེད་ཀྱི་གདན་དཔག་ཚད་བཅུ་གཉིས་པ་བཤམ་པ་བགྱི་ཞིང་བདག་ཅག་འདི་སྙམ་དུ་བདག་ཅག་ལ་དགའ་ལྡན་གྱི་གནས་ན་བྱང་ཆུབ་སེམས་དཔའ་བཞུགས་པས་ཆོས་བཤད་དེ། ཆོས་དེ་བདག་ཅག་གིས་ཐོས་ནས་ཅི་ནས་
9b
ཀྱང་བདག་ཅག་ཡུན་རིང་པོའི་དོན་དང ། སྨན་པ་དང ། བདེ་བར་འགྱུར་བ་དེ་ལྟ་དེར་ལྟར་བསྒྲུབ་པར་བགྱིད་པར་སེམས་ལགས་སོ། །དེ་སྐད་ཅེས་གསོལ་པ་དང ། བྱང་ཆུབ་སེམས་དཔའ་དགའ་ལྡན་གྱི་ལྷ་རྣམས་ལ་འདི་སྐད་ཅེས་གསུངས་སོ། །གྲོགས་པོ་དག། དེའི་ཕྱིར་རོལ་མོའི་ཆ་སྤྱད་ཐམས་ཅད་བརྡུངས་ཤིག། དགའ་ལྡན་གྱི་རིས་ཀྱི་ལྷ་རྣམས་ཀྱིས་རོལ་མོའི་ཆ་སྤྱད་ཐམས་ཅད་བརྡུངས་པ་དང ། བྱང་ཆུབ་སེམས་དཔས་ཀྱང་དུང་བུས་ཏེ་གསུངས་པ། གྲོགས་པོ་དག་།འདི་ལ་ལྷག་པར་སྒྲ་གང་ཆེ། བཅོམ་ལྡན་འདས། དུང་གི་སྒྲ་ལགས་སོ། །གྲོགས་པོ་དག། ཇི་ལྟར་དུང་གི་སྒྲས་རོལ་མོའི་ཆ་སྤྱད་ཐམས་ཅད་ཟིལ་གྱིས་མནན་ཏེ་གནས་པ་དེ་བཞིན་དུ་ངས་ཀྱང་ཛམྦུའི་གླིང་དུ་སོང་ལ་རྟོག་གེ་པ་དྲུག་དང ། རྗེས་སུ་སྒྲོགས་པ་དྲུག་དང ། སྙོམས་པར་འཇུག་པ་དྲུག་ཟིལ་གྱིས་མནན་ནས་བདུད་རྩི་རྟོགས་པར་བྱ་སྟེ། བདུད་རྩིས་འགྲོ་བ་ཚིམ་པར་བྱའོ། །མི་རྟག་པའི་དུང་བུད་པར་བྱའོ། །སྟོང་པ་ཉིད་ཀྱི་རྔ་བརྡུང་བར་བྱའོ། །བདག་མེད་པའི་སེང་གེའི་སྒྲ་བསྒྲག་པར་བྱའོ། །ཞེས་གསུངས་ནས་ཚིགས་སུ་བཅད་དེ་ཡང་གསུངས་པ། སེང་གེ་གཅིག་གིས་གཅན་ཟན་ཚོགས་ནི་དུ་མ་འཇོམས། །རྡོ་རྗེ་གཅིག་གིས་བྲག་གི་རྩེ་མོ་དུ་མ་འཇིག་།བརྒྱ་བྱིན་གཅིག་གིས་ལྷ་མ་ཡིན་དབང་དུ་མ་འཇོམས། །ཉི་མ་གཅིག་གིས་མུན་པ་དུ་མ་རྣམ་པར་སེལ། །གྲོགས་པོ་དག་།ཁྱེད་ཅག་ལས་གང་བདུད་རྩི་དོན་དུ་གཉེར་བ་དེ་ཡུལ་
10a
༄#། །དབུས་ཀྱི་གྲོང་ཁྱེར་ཆེན་པོ་དྲུག་ཏུ་ཉིང་མཚམས་སྦྱོར་བ་ལོང་ཞིག། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་འདི་ནི་བཙུན་མོ་སྒྱུ་འཕྲུལ་ཆེན་མོའི་ལྷུམས་སུ་ཉིང་མཚམས་སྦྱོར་བ་ལེན་པར་བཞེད་ཀྱི། མ་ལ། དེ་ལ་བདག་གིས་གཟི་བརྗིད་བསྒྲུབ་པར་བྱ། ལྷུམས་ཀྱང་སྦྱང་བར་བྱའོ་སྙམ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཙུན་མོ་སྒྱུ་འཕྲུལ་ཆེན་མོ་ལ་གཟི་བརྗིད་བསྒྲུབས་ཤིང ། ལྷུམས་ཀྱང་གཙང་མར་བྱས་སོ། །དེ་ནས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་རིགས་དང ། ཡུལ་དང ། དུས་དང ། རྒྱུད་དང ། བུད་མེད་ལ་གཟིགས་པ་སྟེ། གཟིགས་པ་ལྔས་གཟིགས་ནས་ནམ་གྱི་གུང་ལ་གླང་པོ་ཆེར་བསྟན་ཏེ་དགའ་ལྡན་གྱི་ལྷའི་རིས་ནས་འཕོས་ནས་ཡུམ་གྱི་ལྷུམས་སུ་ཞུགས་སོ། །གང་གི་ཚེ་བྱང་ཆུབ་སེམས་དཔའ་དགའ་ལྡན་གྱི་ལྷའི་རིས་ནས་ཤི་འཕོས་ཏེ་ཡུམ་གྱི་ལྷུམས་སུ་ཞུགས་པ་དེའི་ཚེ་ས་ཆེན་པོ་འདི་ཤིན་ཏུ་གཡོས་པར་གྱུར། འཇིག་རྟེན་འདི་ཐམས་ཅད་སྣང་བ་རྒྱ་ཆེན་པོས་གསལ་བར་གྱུར་ཅིང་འཇིག་རྟེན་ན་འཇིག་རྟེན་གྱི་བར་གྱི་མུན་པ་མུན་གནག་སྨག་ཏུ་གྱུར་པ། གང་དུ་ཉི་མ་དང ། ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་དག་གིས་ཀྱང་འོད་ཀྱིས་སྣང་བར་མི་ནུས་པ་དེ་དག་ཀྱང་དེའི་ཚེ་སྣང་བ་ཆེན་པོས་གསལ་བར་གྱུར་ཏོ། །དེར་སེམས་
10b
ཅན་གང་དག་སྐྱེས་པ་དེ་དག་རང་གི་ལག་པ་བརྐྱང་བ་མི་མཐོང་བ་ལས། དེ་རྣམས་སྣང་བ་དེས་གཅིག་གིས་གཅིག་མཐོང་ནས། ཤེས་ལྡན་དག་།སེམས་ཅན་གཞན་ཡང་འདིར་སྐྱེས་སོ། ། ཤེས་ལྡན་དག། སེམས་ཅན་གཞན་ཡང་འདིར་སྐྱེས་སོ་ཞེས་བྱ་བར་ཤེས་སོ། །ཇི་ལྟར་སྤྲིན་ནི་རྒྱ་ཆེན་ལེགས་འདུས་པ། །ཆུ་མང་བསགས་པ་རླུང་གིས་བསྐྱོད་པ་ལྟར། །དེ་བཞིན་བློ་ལྡན་དེ་ནི་ལྷུམས་འཇུག་པ། །སྟོན་ཀའི་སྤྲིན་རུམ་ཟླ་རྒྱས་ཇི་བཞིན་ནོ། །གང་ཚེ་རྩལ་ལྡན་མཉམ་མེད་ཉེར་གཤེགས་ལ། །དེ་ཚེ་འཇིག་རྟེན་སོ་སོའི་གླིང་བར་ན། །མུན་གྱིས་ཁེབས་བསལ་ཕྱོགས་ཀུན་ཤིན་ཏུ་ནི། །གསལ་སྣང་བྱུང་གྱུར་འདི་འདིར་ཆོས་ཉིད་དོ། །གང་གི་ཚེ་བྱང་ཆུབ་སེམས་དཔའ་དགའ་ལྡན་གྱི་ལྷའི་རིས་ནས་འཕོས་ཏེ་ཡུམ་གྱི་ལྷུམས་སུ་ཞུགས་པར་མཛད་པ་དེ་ཉིད་ཀྱི་མཚན་མོ་བཙུན་མོ་སྒྱུ་འཕྲུལ་ཆེན་མོས་རྨི་ལམ་བཞི་མཐོང་སྟེ། གླང་པོ་ཆེའི་ཕྲུ་གུ་དཀར་པོ་ཞིག་བདག་གི་རུམ་གཡས་པ་དྲལ་ནས་ཞུགས་པ་དང ། སྟེང་གི་ནམ་མཁའ་ལ་སྐྱིལ་མོ་ཀྲུང་གིས་འཆག་པ་དང ། སེང་གེའི་གདན་ལ་འདུག་ནས་སྐྱེ་བོའི་ཚོགས་ཆེན་པོ་ལ་ཆོས་སྟོན་པ་དང ། ལྷ་དང ། ལྷ་མ་ཡིན་དུ་བཅས་པའི་འཇིག་རྟེན་བདག་ལ་ཕྱག་བྱེད་པའོ། །རྒྱལ་པོ་ཟས་གཙང་མས་བཙུན་མོ་ལས་དེ་ཐོས་པ་དང ། མཚན་མཁན་རྣམས་ལ་རྨི་ལམ་འདི་ཇི་ལྟར་སྟོན་པ་ཡིན་དྲིས་པ་དང ། དེ་རྣམས་ཀྱིས་སྨྲས་པ། ལྷ། མཁྱེན་པར་མཛོད་ཅིག་།གང་བཙུན་
11a
༄#། །མོས་རྨི་ལམ་དུ་མཐོང་བ་གླང་པོ་ཆེའི་ཕྲུ་གུ་དཀར་པོ་ཞིག་བདག་གི་རུམ་གཡས་པ་དྲལ་ནས་ཞུགས་པ་ཞེས་བྱ་བའི་འཁོར་ལོས་བསྒྱུར་བའི་སྲས་བལྟམ་པར་འགྱུར་རོ། །སྟེང་གི་ནམ་མཁའ་ལ་འཆག་གོ་ཞེས་བྱ་བ་ནི་རྫུ་འཕྲུལ་ཆེ་བ་དང ། མཐུ་ཆེ་བར་འགྱུར་རོ། །སེང་གེའི་གདན་ལ་འདུག་སྟེ་ཆོས་སྟོན་ཏོ་ཞེས་བྱ་བ་ནི་དེའང་སེང་གེའི་གདན་ལ་བཞུགས་ཏེ་འཁོར་བཞི་ལ་ཆོས་སྟོན་པར་འགྱུར་རོ། །ལྷ་དང ། ལྷ་མ་ཡིན་དུ་བཅས་པའི་འཇིག་རྟེན་བདག་ལ་ཕྱག་བྱེད་དོ་ཞེས་བྱ་བ་ནས། གལ་ཏེ་དེ་རབ་ཏུ་བྱུང་བར་གྱུར་ན་ལྷ་དང།་ལྷ་མ་ཡིན་དུ་བཅས་པའི་འཇིག་རྟེན་གྱིས་མཆོད་ཅིང་རྗེད་ལ་མངོན་པར་བསྟོད་པར་འགྱུར་རོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་དགའ་ལྡན་གྱི་ལྷའི་རིས་ནས་འཕོས་ཏེ་ཡུམ་གྱི་ལྷུམས་ན་ཞུགས་པ་དེའི་ཚེ། ལྷ་རྣམས་ཀྱི་དབང་པོ་བརྒྱ་བྱིན་གྱིས་དེ་ལ་མིའམ། མི་མ་ཡིན་པ་སུས་ཀྱང་འཚེ་བར་མི་འགྱུར་བར་ལྷའི་བུ་བཞི་ཡུམ་གྱི་སྲུང་མར་འཇོག་པ་ནི། ལག་ན་རལ་གྲི་དང ། ལག་ན་མདུང་དང ། ལག་ན་མདུང་ཐུང་དང ། ལག་ན་མདའ་བོ་ཆེའོ། །དེ་ལ་འདི་སྐད་ཅེས་བྱ་སྟེ། ལྷ་མཆོག་བཞི་ལ་བརྒྱ་བྱིན་གྱིས་སྨྲས་པ།། ཁྱེད་རྣམས་སོང་ལ་ལྷ་མི་རྣམས་ཀྱི་ནི། །ཤིན་ཏུ་མཆོག་གྱུར་ཡུམ་དེ་ཇི་ལྟར་སུའང ། །གནོད་མི་བྱེད་པར་གུས་པས་ཡོངས་སུ་སྲུངས། །དེ་རྣམས་ཤིན་ཏུ་འབད་བྱས་དགའ་
11b
པ་དང ། །བརྒྱ་བྱིན་ལུང་ནི་སྤྱི་བོས་མནོས་ནས་སུ། །རྣམ་ཀུན་མདའ་མདུང་རལ་གྲི་ལག་ན་ཐོགས། །བྱང་ཆུབ་སེམས་དཔའི་ཡུམ་ནི་སྲུང་བར་བྱེད། །གཡུལ་དུ་རྒྱལ་གྱུར་ལྷ་བཞིས་སྤས་པ་དང ། །དེ་ནི་ཉིན་མཚན་སྣ་ཚོགས་རྒྱན་འཆང་ཞིང ། །ལྷ་མོ་རང་ཁྱིམ་ནང་ནས་རྣམ་རོལ་པ། །དགའ་བའི་ཚལ་ན་སྤྱོད་པ་ལྟ་བུར་སྤྱོད། །དེ་ནས་དུས་གཞན་ཞིག་ན་བཙུན་མོ་སྒྱུ་འཕྲུལ་ཆེན་མོ་འདི་ལྟ་བུའི་འདོད་པ་སྐྱེས་ཏེ། ཀྱེ་མའོ། །ལྷ། བཙོན་ཐམས་ཅད་ཐར་བར་བགྱིའོ། །རྒྱལ་པོ་ཟས་གཙང་མས་ཀྱང་བཙུན་མོའི་ཚིག་མཉན་ནས་བཙོན་ཐམས་ཅད་ཐར་བར་བྱས་སོ། །དེ་ནས་དུས་གཞན་ཞིག་ན་བཙུན་མོ་འདོད་པ་སྐྱེས་པ། ཀྱེ་མའོ། །ལྷས་གྲོང་ཁྱེར་གྱི་ཤར་ཕྱོགས་ཀྱི་དབུས་སུ་དམན་པ་དང ། ལོང་པ་དང ། བཀྲེན་པ་དང ། སྡུག་ཕོངས་པ་དང།་སློང་མོ་བ་རྣམས་ལ་སྦྱིན་པ་བྱིན་ལ་བསོད་ནམས་དག་བྱས་པ་དང ། ལྷོ་དང ། ནུབ་དང ། བྱང་དང ། སུམ་མདོའི་དབུས་སུ་དམན་པ་དང ། ལོང་བ་དང ། བཀྲེན་པ་དང ། སྡུག་ཕོངས་པ་དང ། སློང་མོ་པ་རྣམས་ལ་སྦྱིན་པ་བྱིན། བསོད་ནམས་ནི་བགྱིའོ། །དེ་ནས་རྒྱལ་པོ་ཟས་གཙང་གིས་བཙུན་མོའི་ཚིག་མཉན་ནས་གྲོང་ཁྱེར་གྱི་ཤར་ཕྱོགས་སུ་དམན་པ་དང ། ལོང་བ་དང ། བཀྲེན་པ་དང ། སྡུག་ཕོངས་པ་དང ། སློང་མོ་པ་རྣམས་ལ་ཇི་ལྟར་མངོན་པར་འདོད་པ་དང ། ཇི་ལྟར་བསླངས་པ་བཞིན་དུ་སྦྱིན་པ་ནི་བྱིན། བསོད་ནམས་ནི་བྱས་པ་དང །
12a
༄#། །དེ་བཞིན་དུ་ལྷོ་དང ། ནུབ་དང ། བྱང་དང ། སུམ་མདོའི་དབུས་སུ་དམན་པ་དང ། ལོང་བ་དང ། བཀྲེན་པ་དང ། སྡུག་ཕོངས་པ་དང ། སློང་མོ་པ་རྣམས་གང་མངོན་པར་འདོད་པ་དང ། ཇི་ལྟར་བསླངས་པ་བཞིན་དུ་སྦྱིན་པ་ནི་བྱིན། བསོད་ནམས་ནི་བྱས་སོ། །གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་དགའ་ལྡན་གྱི་ལྷའི་རིས་ནས་འཕོས་ཏེ་ཡུམ་གྱི་ལྷུམས་ན་བཞུགས་པ་ན་མཛོད་ཀྱི་ནང་དུ་རྫས་བཞག་པ་བཞིན་དུ་མངལ་གྱི་དྲི་མ་དང ། ཤ་མའི་དྲི་མ་དང ། ཁྲག་གི་དྲི་མ་དང ། མི་གཙང་བ་གང་ཡང་རུང་བ་སྣ་ཚོགས་ཀྱིས་མ་སྦགས་སོ། །དཔེར་ན། ནོར་བུ་རིན་པོ་ཆེ་ཀ་ཤིའི་རས་ཀྱིས་མི་གོས་པ་དང ། ཀ་ཤིའི་རས་ཀྱང་ནོར་བུ་རིན་པོ་ཆེས་མི་གོས་པ་དེ་བཞིན་དུ་གང་གིས་ཚེ་བྱང་ཆུབ་སེམས་དཔའ་ཡུམ་གྱི་ལྷུམས་ན་བཞུགས་པ་ན་མཛོད་ཀྱི་ནང་དུ་རྫས་བཞག་པ་བཞིན་དུ་མངལ་གྱི་དྲི་མ་དང ། ཤ་མའི་དྲི་མ་དང ། ཁྲག་གི་དྲི་མ་དང ། མི་གཙང་བ་གང་ཡང་རུང་བ་སྣ་ཚོགས་ཀྱིས་མ་སྦགས་སོ། །ཇི་ལྟར་ནོར་བུ་ཚོན་ཤེལ་འོད་གསལ་དང ། །རབ་གཙང་ཀ་ཤིའི་རས་ཀྱང་གོས་པ་མེད། །དེ་བཞིན་ཐུབ་ཆེན་ལྷུམས་ན་བཞུགས་པ་ན།། མངལ་གྱི་དྲི་མ་ཅིས་ཀྱང་གོས་པ་མེད། །གང་གི་ཚེ་བྱང་ཆུབ་སེམས་དཔའ་དགའ་ལྡན་གྱི་ལྷའི་རིས་ནས་འཕོས་ནས་ཡུམ་གྱི་ལྷུམས་ན་བཞུགས་པ་དེའི་ཚེ་ཡུམ་གྱི་ལྷུམས་ན་
12b
དེ་ཐམས་ཅད་ཡོངས་སུ་རྫོགས་པས་བཞུགས་པ་མཐོང་ངོ ། །དཔེར་ན། ནོར་བུ་བཻ་ཌཱུརྱ་ཟུར་བརྒྱད་པ་བཟང་པོ། རིགས་དང་ལྡན་པ། དང་བ། གསལ་བ། དྲི་མ་མེད་པ། ཚོན་སྐུད་སྣ་ལྔ་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་ལ་བརྒྱུས་ལ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་སྐུད་པའོ། །འདི་ནི་ནོར་བུའོ། །སྐུད་པ་འདི་ལ་ནོར་བུ་བརྒྱུས་པ་ཡིན་ནོ་ཞེས་ཤེས་པ་དེ་བཞིན་དུ། གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་དགའ་ལྡན་གྱི་གནས་ནས་འཕོས་ཏེ་ཡུམ་གྱི་ལྷུམས་ན་བཞུགས་པ་དེའི་ཚེ། དེའི་ཡུམ་གྱི་ལྷུམས་ན་རྣམ་པ་ཐམས་ཅད་ཡོངས་སུ་རྫོགས་པར་ལྷུམས་ཀྱི་ནང་ན་བཞུགས་པ་མཐོང་ངོ ། །ཇི་ལྟར་དྲི་མེད་ནོར་བུ་བཻ་ཌཱུརྱ། །འོད་གསལ་ལག་པར་བཞག་པ་སྣང་བལྟར།། དེ་བཞིན་ཐུབ་ཆེན་ཡུམ་གྱི་ལྷུམས་བཞུགས་པ། །ཤེས་ཤིང་སེམས་དཔས་ཡུམ་ནི་ཡང་དག་ལྟ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་དགའ་ལྡན་ནས་འཕོས་ནས་ཡུམ་གྱི་ལྷུམས་ན་བཞུགས་པ་དེའི་ཚེ། དེའི་ཡུམ་འདི་ལྟ་སྟེ། བྱང་ཆུབ་སེམས་དཔའ་འཛིན་པས་ལུས་ངལ་བའམ། ལུས་དུབ་པར་འགྱུར་བ་མེད་དོ། །ལས་ཀྱི་རྣམ་སྨིན་ཟད་པས་མཐོ་རིས་འཕོས། །གང་ཚེ་འདི་ནི་ལྷུམས་ཞུགས་བཞུགས་པ་ན། །དེའི་ཡུམ་ངལ་བས་འཛིན་པར་མི་བྱེད་པར། །དེ་ཚེ་གྱུར་པ་འདིར་དེ་ཆོས་ཉིད་དོ། །ཆོས་ཉིད་ཀྱིས་
13a
༄#། །གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་དགའ་ལྡན་གྱི་གནས་ན་འཕོས་ནས་ཡུམ་གྱི་ལྷུམས་ན་བཞུགས་པ་དེའི་ཚེ་ཡུམ་ད་ཕན་ཆད་ཇི་སྲིད་འཚོའི་བར་དུ་བརྟུལ་ཞུགས་ལྔའི་གཞི་བླངས་པར་གྱུར་ཏེ། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་གོ་།མ་བྱིན་པར་ལེན་པ་དང ། མི་ཚངས་པ་སྤྱོད་པ་དང།་བརྫུན་དུ་སྨྲ་བ་དང ། འབྲུའི་ཆང་དང ། སྦྱར་བའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང ། སྦྱར་བའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བྱེད་དོ། །སྲོག་མི་གཅོད་དང་མ་བྱིན་མི་ལེན་དང ། །རྫུན་མི་སྨྲ་དང་ཆང་ལ་མི་བརྐམ་དང ། །འཁྲིག་པའི་མི་ཚངས་སྤྱོད་པ་སྤོང་བ་འདི། །འདི་ནི་དོན་གྲུབ་ཡུམ་གྱི་ཆོས་ཉིད་ཡིན། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་དགའ་ལྡན་གྱི་གནས་ནས་འཕོས་ནས་ཡུམ་གྱི་ལྷུམས་ན་བཞུགས་པ་དེའི་ཚེ་ཡུམ་འདི་ལྟ་སྟེ།་སྐྱེས་པ་རྣམས་ལ་འདོད་པ་དང་ལྡན་པའི་ཡིད་གཏོད་པ་མེད་དོ། །ཉོན་མོངས་རྣམས་ལ་ཆགས་པར་མི་འགྱུར་ཞིང ། །དེ་ནི་འདོད་རྒྱུས་སེམས་གདུངས་མི་འགྱུར་ལ། །དེ་ཡུམ་འདོད་པའི་ཡོན་ཏན་ལྡན་པ་ཡི། །སྐྱེས་པ་རྣམས་ལ་སེམས་ནི་གཏོང་པ་མེད། །དེ་ནས་དུས་གཞན་ཞིག་ན་བཙུན་མོ་སྒྱུ་འཕྲུལ་ཆེན་མོ་འདོད་པ་སྐྱེས་པ། ཀྱེ་མ། བདག་གིས་
13b
རྒྱ་མཚོ་ཆེན་པོ་བཞིའི་ཆུ་བཏུང་ངོ་སྙམ་ནས་དེས་རྒྱལ་པོ་ཟས་གཙང་ལ་སྨྲས་པ་དང ། རྒྱལ་པོ་ཟས་གཙང་གིས་མཚན་མཁན་རྣམས་ལ་སྨྲས་པ། ཅིའི་ཕྱིར་བཙུན་མོ་འདི་ལྟ་བུའི་འདོད་པ་སྐྱེས། མཚན་མཁན་རྣམས་ཀྱིས། ལྷ། བཙུན་མོ་ལ་སྲས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་སྐུ་བརྒྱན་པ་ཞིག་བལྟམ་པར་འགྱུར་ཏེ། དེ་རབ་ཏུ་བྱུང་ནས་ཤེས་བྱའི་རྒྱ་མཚོ་མཐའ་དག་འཐུང་བར་འགྱུར་རོ་ཞེས་ལུང་བསྟན་ཏོ། །རྒྱལ་པོ་ཟས་གཙང་གིས་སྨྲས་པ། གལ་ཏེ་འདི་ལ་མཚོ་ཆེན་པོའི་ཆུ་མ་བླུད་ན་ཅིར་འགྱུར། དེ་རྣམས་ཀྱིས་སྨྲས་པ། སྲས་ཡན་ལག་མ་ཚང་བ་ཞིག་བཙས་པར་འགྱུར་རོ། །རྒྱལ་པོས་སྨྲས་པ། ངའི་མིང་ཟས་གཙང་ཞེས་བྱ་བའི་བུ་ཡན་ལག་མ་ཚང་བར་བྱའམ། དེའི་ཚེ་གྲོང་ཁྱེར་སེར་སྐྱའི་གཞི་ན་ཀུན་ཏུ་རྒྱུ་མིག་དམར་ཞེས་བྱ་བ་མིག་འཕྲུལ་ལ་བྱང་བ་ཞིག་འདུག་པ་དེ་རྒྱལ་པོས་བཀུག་ནས་རྒྱ་མཚོ་ཆེན་པོ་ལས་ཆུ་མྱུར་བར་ཁུག་ཅིག་ཅེས་བསྒོ་བ་དང ། དེས་དེ་ཉིད་ན་འདུག་བཞིན་དུ་རྒྱ་མཚོ་ཆེན་པོ་བཞིའི་ཆུ་དྲངས་ཏེ་དེ་རྣམས་ལ་བཙུན་མོ་འཐུང་དུ་བཅུག་པ་དང ། དེའི་འདོད་པ་སྐྱེས་པ་གང་ཡིན་པ་དེ་དང་བྲལ་བར་གྱུར་ཏོ། །དེ་ནས་དུས་གཞན་ཞིག་ན་བཙུན་མོ་སྒྱུ་འཕྲུལ་ཆེན་མོ་ཚུལ་འདི་ལྟ་བུའི་འདོད་པ་སྐྱེས་ཏེ། ཀྱེ་མའོ། །བདག་ལུས་ལུམ་བི་ནཱིའི་ཚལ་དུ་ཞུགས་ལ་ཤིང་གི་རྩར་ཡལ་གའི་མཐར་འདུག་པར་བྱའོ་སྙམ་མོ། །དེ་ནས་
14a
༄#། །རྒྱལ་པོ་ཟས་གཙང་མས་བཙུན་མོ་སྒྱུ་འཕྲུལ་ཆེན་མོ་ཚུལ་དེ་ལྟ་བུའི་འདོད་པ་སྐྱེས་པར་རིག་ནས། རིན་པོ་ཆེ་སྣ་བཞི་ལས་བྱས་པའི་ཁྱོགས་བཤམས་ཏེ་གླང་པོའི་ཚོགས་དང ། རྟའི་ཚོགས་དང ། ཤིང་རྟའི་ཚོགས་དང ། དཔུང་བུ་ཆུང་གི་ཚོགས་ཏེ་དཔུང་གི་ཚོགས་ཡན་ལག་བཞི་པ་གོ་བསྐོན་ནས་སྐྱེ་བོའི་ཚོགས་ཆེན་པོས་ཡོངས་སུ་བསྐོར་ཏེ།་བཙུན་མོ་སྒྱུ་འཕྲུལ་ཆེན་མོ་དང་ལྷན་ཅིག་ཏུ་ཆས་ནས་ལུམ་བི་ནཱིའི་ཚལ་དུ་ཕྱིན་ཏོ། །དེ་ནས་བཙུན་མོ་སྒྱུ་འཕྲུལ་ཆེན་མོས་ལུམ་བི་ནཱིའི་ཚལ་མཐོང་བ་ན་སེམས་རྩེ་གཅིག་པར་གྱུར་པ་དང ། དེ་ཁྱོགས་ལས་བབས་ཏེ། ཤིང་མྱ་ངན་འཚང་མེ་ཏོག་ཡང་དག་པར་རྒྱས་པ་མཐོང་བས་དགའ་བ་དང ། ཡིད་བདེ་བ་སྐྱེས་ཏེ། དེ་དེར་སོང་ནས་མེ་ཏོག་དང ། འདབ་མའི་གཡུར་གྱིས་དུད་པའི་ཡན་ལག་ལ་འཇུས་ཏེ། བུད་མེད་རྒན་པས་བསྐོར་ནས་གནས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བཙུན་མོ་སྒྱུ་འཕྲུལ་ཆེན་མོ་སྲས་བལྟམ་པར་ཉེ་བར་གནས་ཀྱི། མ་ལ། བདག་གིས་བྱང་ཆུབ་སེམས་དཔའ་དེ་དང་པོ་བལྟམ་པ་ན་བླང་བར་བྱའོ། །དེ་ནས་ཡང་བསམས་པ། བཙུན་མོ་སྒྱུ་འཕྲུལ་ཆེན་མོ་ནི་ངོ་ཚ་ཤེས་པ་དང་ལྡན་པ་ཡིན་པས་བདག་གི་མདུན་དུ་བལྟམ་མི་ཕོད་ཀྱི་ཐབས་ཤིག་བཤམ་པར་བྱའོ་སྙམ་ནས་ལྷའི་དབང་པོ་བརྒྱ་བྱིན་བུད་མེད་རྒན་མོ་
14b
ཞིག་གི་ཆ་བྱད་དུ་སྤྲུལ་ཏེ། དེས་གང་གིས་བུད་མེད་རྒན་མོ་དེ་རྣམས་ཕྱོགས་བཅུར་འབྲོས་པར་འགྱུར་བ་དེ་ལྟ་བུའི་རླུང་དང་ཆར་དྲག་པོ་ཞིག་སྤྲུལ་ནས་དེ་རྣམས་བྲོས་པ་དང ། བདག་ཉིད་མ་མ་རྒན་མོའི་ཆ་བྱད་དུ་མངོན་པར་སྤྲུལ་ནས་བཙུན་མོ་སྒྱུ་འཕྲུལ་ཆེན་མོའི་མདུན་དུ་འཇུག་གོ་།ཆོས་ཉིད་ཀྱིས་བྱང་ཆུབ་སེམས་དཔའ་ནི་མཁྱེན་བཞིན་དུ་ཡུམ་གྱི་ལྷུམས་སུ་འཇུག་པ་དང ། མཁྱེན་བཞིན་དུ་གནས་པ་དང ། མཁྱེན་བཞིན་དུ་འབྱུང་བ་ཡིན་ནོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། གང་བདག་སྐྱེས་བུ་ཐ་མལ་པ་བཞིན་དུ་མངལ་གྱི་སྒོ་ནས་འབྱུང་བ་ནི་ཚུལ་དང་མཐུན་པ་མ་ཡིན་གྱི། མ་ལ། བདག་གིས་ཡུམ་གྱི་དཀུ་གཡས་པ་བརྟོལ་ལ་འབྱུང་བར་བྱའོ་ཞེས་དེ་ནས་བྱང་ཆུབ་སེམས་དཔའ་ཡུམ་གྱི་དཀུ་གཡས་པ་བརྟོལ་ཏེ་བྱུང་བ་དང ། ལྷའི་དབང་པོ་བརྒྱ་བྱིན་གྱིས་ལག་པ་གཉིས་ཀྱིས་བླངས་པ་དང ། བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བརྒྱ་བྱིན་འདི་བདག་གིས་བྱང་ཆུབ་སེམས་དཔའ་འདི་བླངས་སོ་ཞེས་དྲེགས་པ་སྐྱེ་བར་འགྱུར་བར་མཁྱེན་ནས་ངོ་བོ་ཉིད་ཀྱི་རྡོ་རྗེའི་སྙིང་པོ་ཅན་གྱི་སྐུར་བྱིན་གྱིས་བརླབས་ཏེ་ལྷུམས་སུ་ནི་ཡུམ་འཛིན་པས་ཉོན་མོངས་པར་མ་གྱུར་ཅིག་སྙམ་དུ་དགོངས་ནས་ཡང་བར་མཛད་དེ་བཞུགས་པ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་གྱིས་འཛིན་པར་མ་ནུས་པ་དང་འདར་བར་གྱུར་ཏོ། །བྱང་
15a
༄#། །ཆུབ་སེམས་དཔས་བཀའ་སྩལ་པ། ཀོའུ་ཤི་ཀ་ཐོང ། ཐོང ། དེ་སྐད་ཅེས་བཀའ་སྩལ་པ་དང ། ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ས་ལ་བཞག་གོ་།བཞག་པ་ཙམ་གྱི་མོད་ལ་སུས་ཀྱང་མ་བཟུང་བར་ཕྱོགས་བཞིར་གཟིགས་ནས་གོམ་པ་བདུན་བདུན་པོར་ཞིང་ཚིག་ཏུ་ཡང་གསུང་པ། ཀཽ་ཤི་ཀ་།ཕྱོགས་འདི་གང་ཡིན་བྱང་ཆུབ་སེམས་དཔའ། ཤར་ཕྱོགས་ལགས་སོ། །བྱང་ཆུབ་སེམས་དཔས་བཀའ་སྩལ་པ། ཀཽ་ཤི་ཀ་།སེམས་ཅན་ཐམས་ཅད་ཀྱི་སྔོན་དུ་འགྲོ་བར་བྱའོ། །ཕྱོགས་འདི་གང་ཡིན། ལྷོ་ཕྱོགས་ལགས་སོ། །འགྲོ་བ་ཐམས་ཅད་ཀྱི་ཡོན་གནས་སུ་གྱུར་པར་བྱའོ། །ཕྱོགས་འདི་གང་ཡིན། བྱང་ཕྱོགས་ལགས་སོ། །སྲིད་པའི་རྒྱ་མཚོ་ལས་བརྒལ་བར་བྱའོ། །ཕྱོགས་འདི་གང་ཡིན།་ནུབ་ཕྱོགས་ལགས་སོ། །ངའི་སྐྱེ་བ་ཐ་མ་ནི་འདི་ཡིན་པར་འགྱུར་རོ། །སྐྱེ་འཆི་མཐར་བྱེད་དེ་ནི་བལྟམས་པ་ན། །ས་ལ་གོམ་པ་བདུན་ནི་བཞུད་ནས་སུ། །འདི་ངའི་སྐྱེ་བ་ཐ་མར་གྱུར་ཡིན་ཞེས། །འཇིག་རྟེན་གསུམ་གྱི་བླ་མ་གཅིག་པུས་གསུངས། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་ཡུམ་གྱི་ལྷུམས་ནས་བྱུང་བའི་དེའི་ཚེ་ས་ཆེན་པོ་འདི་ཤིན་ཏུ་གཡོས་པར་གྱུར། འཇིག་རྟེན་འདི་ཐམས་ཅད་སྣང་བ་རྒྱ་ཆེན་པོས་གསལ་བར་གྱུར་ཅིང ། འཇིག་རྟེན་ན་འཇིག་རྟེན་གྱི་བར་གྱི་མུན་པ་མུན་གནག་སྨག་ཏུ་གྱུར་པ་གང་དུ་ཉི་མ་དང །
15b
སླར་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་དག་གིས་ཀྱང་འོད་ཀྱིས་སྣང་བར་མི་ནུས་པ་དེ་དག་ཀྱང་དེའི་ཚེ་སྣང་བ་ཆེན་པོས་གསལ་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་རང་གི་ལག་པ་བརྐྱང་པའང་མི་མཐོང་བ་ལས་དེ་རྣམས་སྣང་བ་དེས་སེམས་ཅན་གཅིག་གིས་གཅིག་མཐོང་ནས། ཤེས་ལྡན་དག་།སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་།སེམས་ཅན་གཞན་ཡང་འདིར་སྐྱེས་སོ་ཞེས་བྱ་བར་ཤེས་སོ། །གང་ཆེ་རྣམ་འདྲེན་བལྟམས་པར་གྱུར་པ་ན། །དེ་ཚེ་ས་ནི་རིར་བཅས་ཤིན་ཏུ་གཡོས། །གང་གིས་འཇིག་རྟེན་པར་ཡང་སྐད་ཅིག་གིས། །སྣང་བྱེད་འོད་གསལ་དེ་ཡང་བྱུང་བར་གྱུར། །དེ་ནས་རྒྱལ་པོ་ཟས་གཙང་མས་ས་གཡོས་པ་ཆེན་པོ་དང ། སྣང་བ་རྒྱ་ཆེན་པོ་མཐོང་བ་དང ། བྱང་ཆུབ་སེམས་དཔའ་ལ་བསྐོར་བ་བྱས་ཏེ་ཞབས་གཉིས་ལ་ཕྱག་བྱས་ནས་འདི་སྐད་ཅེས་སྨྲས་སོ། །འདི་ལྟ་བུའི་རྫུ་འཕྲུལ་ཆེ་བ་དང ། མཐུ་ཆེ་བའི་བུ་སྐྱེས་པ་ནི་བདག་གིས་རྙེད་པ་ལེགས་པར་རྙེད་དོ། །ཆོས་ཉིད་ཀྱིས་གང་གིས་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་ཡུམ་གྱི་ལྷུམས་ན་བལྟམས་པ་ན་རལ་གྲི་ཤུགས་ནས་ཕྱུང་བ་བཞིན་དུ་མངལ་གྱི་དྲི་མ་དང ། ཤ་མའི་དྲི་མ་དང ། ཁྲག་གི་དྲི་མ་དང ། མི་གཙང་བ་གཞན་དང་གཞན་སྣ་ཚོགས་ཀྱིས་མ་གོས་སོ། །ཇི་ལྟར་འོད་གསལ་ཚོན་ཤེལ་བཟང་པོ་དང ། །ཀ་ཤི་རས་གཙང་ཕན་ཚུན་གོས་མི་འགྱུར། །དེ་བཞིན་ཐུབ་དེ་
16a
༄#། །ལྷུམས་ནས་བྱུང་བ་ན། །གསེར་སྦྱངས་མེ་ཆེན་ནང་ནས་བཏོན་པ་འདྲ། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་ཡུམ་གྱི་ལྷུམས་ནས་བལྟམས་པ་དེའི་ཚེ་དེའི་ཡུམ་མི་འདུག་།མི་ཉལ་ཏེ། འགྲེང་བཞིན་དུ་རྒྱལ་རིགས་མ་དེས་རྒྱལ་རིགས་བལྟམ་པར་བྱེད་དོ། །དེ་ནི་མི་འདུག་ཉལ་བའང་མ་ཡིན་ཏེ། ཡན་ལག་ལྔ་ལྡན་ཚུལ་ཁྲིམས་ཀྱིས་བརྒྱན་པས། །དེ་ནི་འགྲེང་བཞིན་ཤིན་ཏུ་དགེ་བ་ཡི། །གཞོན་ནུ་དེ་འདིར་བརྒྱ་བྱིན་དག་གིས་བླངས། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་ཡུམ་གྱི་ལྷུམས་ནས་བལྟམས་པ་དེའི་ཚེ་དེའི་དབུའི་སྟེང་ནས་ལྷ་རྣམས་གདུགས་དཀར་པོ་ནོར་བུའི་ཡུ་བ་ཅན་དག་འཛིན་ཏོ། །དྲི་མེད་ཟླ་བའི་དཀྱིལ་འཁོར་འོད་འདྲའི་གདུགས། །ལྷ་ཡི་གཙོ་བོས་དབུ་ཡི་སྟེང་ནས་འཛིན། །གདུབ་འཁྲོལ་འོད་ཟེར་གྱིས་འབར་ལག་པ་དང ། །རྔ་ཡབ་བཟང་གིས་འདི་ལ་གཡོབ་པར་བྱེད། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་བལྟམས་པའི་མོད་ལ་བར་སྣང་ལས་ཆུ་བསིལ་བ་གཅིག་དང ། ཆུ་དྲོན་མོ་གཅིག་སྟེ། ཆུ་གཉིས་ཀྱི་རྒྱུན་སྤྱི་གཙུག་གི་སྟེང་དུ་འབབ་ཅིང་དེས་བྱང་ཆུབ་སེམས་དཔའ་ཁྲུས་མཛད་དོ། །དྲི་མེད་རབ་དག་བསིལ་དང་དེ་བཞིན་དྲོའི། །ཆུ་ཡིས་རྐང་གཉིས་གཙོ་བོ་ཁྲུས་མཛད་དེ། །རིགས་རྒྱུད་གང་དུ་བྱང་ཆུབ་སེམས་དཔའ་འཁྲུངས། །ཀླུ་རྣམས་དེ་ལའང་མཆོད་
16b
པ་བྱེད་པར་གྱུར། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམས་པའི་མོད་ལ་བསྐྲུན་པའི་ཡུམ་གྱི་མདུན་དུ་ཆུ་མིག་ཆེན་པོ་བྱུང་ནས་འབབས་པར་གྱུར་ཏེ་དེ་ལ་དེའི་ཡུམ་ཁྲུས་ཆུའི་བྱ་བ་བྱེད་དོ། །རྐང་གཉིས་གཙོ་བོ་གཞོན་ནུ་བལྟམས་པ་ན། །ལྷ་དེ་རྣམས་ནི་ཤིན་ཏུ་ཡིད་དགའ་བས། །དེར་ནི་ཆུ་བཟང་ཕྱུང་བར་གྱུར་པ་ལ། །དེ་ཡུམ་དེར་ནི་ཆུ་ཡིས་བྱ་བ་བྱེད། །ལྷ་ཡི་རོལ་མོ་ཤིན་ཏུ་སྒྲ་སྙན་རྣམས། །ཤིན་ཏུ་དགའ་བ་མཆོག་ཏུ་རྡུང་བར་བྱེད། །དེ་རྣམས་གོས་དང་ཕྲེང་བ་འཐོར་བྱེད་ཅིང ། །གཞན་ངག་རབ་ཏུ་འདུད་ཅིང་དེ་བཞིན་བསྟོད། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམས་པའི་མོད་ལ་ལྷས་པར་སྣང་ལས་ལྷའི་ཨུཏྤལ་དང ། པདྨ་དང ། ཀུ་མུ་ད་དང ། པདྨ་དཀར་པོ་དང ། ་ག་རུའི་ཕྱེ་མ་དང ། རྒྱ་སྤོས་ཀྱི་ཕྱེ་མ་དང ། ཙནྡན་གྱི་ཕྱེ་མ་དང ། ཏ་མ་ལའི་འདབ་མས་འཐོར་རོ། །ལྷའི་མེ་ཏོག་མནྡཱ་ར་བས་ཀྱང་འཐོར་རོ། །ལྷའི་སིལ་སྙན་རྣམས་ཀྱང་སྒྲ་འབྱིན་ཏོ། །གོས་དག་ཀྱང་འཐོར་བར་བྱེད་དོ། །མཁས་པས་བཏུད་པའི་སངས་རྒྱས་བལྟམས་པ་ན། །དྲི་ཞིམ་དྲི་མཆོག་ཆར་ནི་ཕབ་པ་དང ། །དེ་དང་དེས་ན་རང་སྤོབས་ཚུལ་མཐུན་པའི། །རབ་དགའི་སེམས་ཀྱིས་བསྟོད་པ་རྗོད་པར་བྱེད། ། འདིས་ནི་བྱང་ཆུབ་མཆོག་དག་ཐོབ་འགྱུར་ཞིང ། །སྡུག་བསྔལ་ཟད་པའི་འགྲོ་ཕན་མཛད་གྱུར་ལ། །འགྲོ་བ་མི་ཤེས་རབ་རིབ་མིག་ལྡོངས་ལ། །སྨན་པ་མཆོག་འདི་མིག་ནི་རབ་སྩོལ་
17a
༄#། །འགྱུར། །འདི་ནི་རྨོངས་པས་མིག་ཁེབས་ལོང་བ་ཡི། །འགྲོ་བའི་སྒྲོན་མ་ཆེན་པོ་ཉིད་དུ་འགྱུར། །ལྟ་ངན་གྱིས་བརླགས་ལོག་པའི་ལམ་ཞུགས་ལ། །མ་འཚོལ་དྲང་བའི་ལམ་ནི་སྟོན་པར་འགྱུར། །ངན་འགྲོའི་ལམ་ནི་མ་ལུས་འགོག་འགྱུར་ཞིང ། །ལྷ་ཡི་གནས་ཀྱི་ས་ནི་འབྱེད་འགྱུར་ཞེས། །འོག་མིན་པར་ན་གནས་པའི་ལྷ་རྣམས་ནི། །ལྷ་ཡི་གནས་སུ་ཡང་ཡང་སྒྲོག་པར་བྱེད། །གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་བལྟམས་པ་དེ་ཉིད་ཀྱི་ཚེ་མཉན་ཡོད་དུ་རྩིབས་ཀྱིས་འཕུར་ཚངས་བྱིན་བུ་བཙས་པ་ན་ཚངས་བྱིན་འདི་སྙམ་དུ་སེམས་ཏེ། བདག་གི་བུ་བཙས་པ་ན་ཡུལ་གསལ་བ་གསལ་བ་བཞིན་དུ་སྣང་བས་དེ་བས་ན་འདིའི་མིང་གསལ་རྒྱལ་ཞེས་བྱ་བར་གདགས་སོ་ཞེས་བཏགས་སོ། །རྒྱལ་པོའི་ཁབ་ཀྱི་གྲོང་ཁྱེར་ན་རྒྱལ་པོ་པདྨ་ཆེན་པོ་བུ་བཙས་པ་ན་པདྨ་ཆེན་པོ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་ཉི་མའི་གཟུགས་ཤར་བ་ལྟར་སྣང་ཞིང་གཟུགས་ཅན་མའི་བུ་ཡིན་པས་འདིའི་མིང་གཟུགས་ཅན་སྙིང་པོ་ཞེས་བྱ་བར་གདགས་སོ་ཞེས་བཏགས་སོ། །ཀོའུ་ཤམ་བི་ན་རྒྱལ་པོ་དམག་བརྒྱ་བ་བུ་བཙས་པ་ན་དམག་བརྒྱ་བ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་ཉི་མ་ཤར་བ་ལྟར་སྣང་བར་གྱུར་པས་འདིའི་མིང་ཤར་བ་ཞེས་བྱ་བར་གདགས་སོ་ཞེས་བཏགས་སོ། །
17b
གྲོང་ཁྱེར་འཕགས་རྒྱལ་དུ་རྒྱལ་པོ་མུ་ཁྱུད་མཐའ་ཡས་བུ་བཙས་པ་ན་དེ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འཇིག་རྟེན་སྒྲོན་མས་སྣང་བ་ལྟ་བུར་གྱུར་པས་འདིའི་མིང་རབ་སྣང་ཞེས་བྱ་བར་གདགས་སོ་ཞེས་བཏགས་ཏེ། དེ་ནི་དེ་ལྟ་མ་ཡིན་ནོ། །འོན་ཀྱང་དེ་ཐམས་ཅད་ནི་བྱང་ཆུབ་སེམས་དཔའི་མཐུ་ཡིན་ནོ། །གང་གི་ཚེ་བྱང་ཆུབ་སེམས་དཔའ་ཤཱཀྱ་ཐུབ་པ་བལྟམས་པ་དེ་ཉིད་ཀྱི་ཚེ་དགའ་བོ་ལ་སོགས་པ་ཤཱཀྱའི་གཞོན་ནུ་ལྔ་བརྒྱ་བཙས་པ་དང ། གྲགས་འཛིན་མ་ལ་སོགས་པ་ཤཱཀྱའི་གཞོན་ནུ་མ་ལྔ་བརྒྱ་བཙས་པ་དང ། འདུན་པ་ལ་སོགས་པ་རིམ་གྲོ་བ་ལྔ་བརྒྱ་བཙས་པ་དང ། བསྔགས་ལྡན་ལ་སོགས་པ་རྟ་ལྔ་བརྒྱ་འབྲངས་སོ། །ལྷ་རྣམས་ཀྱིས་གཏེར་ལྔའི་ཁའང་ཉེ་བར་བསྟན་ཏོ། །ཁམས་ཀྱི་རྒྱལ་ཕྲན་རྣམས་དང།་མཁར་གྱི་རྒྱལ་པོ་རྣམས་ཀྱིས་རབ་ཏུ་བཏུད་ཅིང་ཐམས་ཅད་ཀྱིས་ཀྱང་དཔྱ་ཕུལ་ལོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། བདག་གི་བུ་བཙས་པ་ན་འདོད་པ་ཐམས་ཅད་གྲུབ་པས་ན་གཞོན་ནུ་འདིའི་མིང་དོན་ཐམས་ཅད་གྲུབ་པ་ཞེས་བྱའོ་ཞེས་བྱང་ཆུབ་སེམས་དཔའ་ལ་ཐོག་མར་མཚན་བཏགས་སོ། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་བལྟམས་པའི་མོད་ལ་ཡབ་ཡུམ་གྱིས་མཚན་མཁན་དང ། ལྟས་མཁན་གྱི་བྲམ་ཟེ་རྣམས་ལ་ཉེ་བར་སྟོན་པ་ཡིན་པས། ཤེས་ལྡན་དག་།ཅི་ག་གཞོན་ནུ་གང་དག་
18a
༄#། །དང་ལྡན་ན་འགྲོ་བ་གཉིས་སུ་འགྱུར་གྱི་གཞན་དུ་ནི་མ་ཡིན་ཏེ། གལ་ཏེ་ཁྱིམ་པ་ཁྱིམ་ན་གནས་པར་གྱུར་ན་འཁོར་ལོས་བསྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་འབྱུང་སྟེ། འདི་ལྟ་སྟེ། འཁོར་ལོ་རིན་པོ་ཆེ་དང།་གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བདུན་པ་ནི་བློན་པོ་རིན་པོ་ཆེའོ། །བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་འབྱུང་བ་དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་འདེབས་པ་མེད་པ། ཆོས་དང་མཐུན་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང ། ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བར་འཇིག་རྟེན་དུ་སྒྲ་རྣམ་པར་གྲགས་པར་འགྱུར་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ནས། ལྷ། མང་ལགས་ཏེ། གཞོན་ནུ་སྐྱེས་བུ་ཆེན་པོའི་མཚན་སུམ་
18b
ཅུ་རྩ་གཉིས་དང་ལྡན་པ་ནི་འགྲོ་བ་གཉིས་སུ་འགྱུར་གྱི་གཞན་དུ་ནི་མ་ཡིན་ཏེ། ཞེས་བྱ་བ་ནས་ཡང་དག་པར་རྫོགས་པའི་སངས་རྒྱས་ཞེས་བྱ་བར་འཇིག་རྟེན་དུ་གདགས་པར་འགྱུར་ཞེས་བྱ་བའི་བར་དུ་སྟེ། སྔ་མ་བཞིན་དུ་འདི་ནི་འདིར་ཆོས་ཉིད་ཡིན་ནོ། །དེ་ལ་འདི་སྐད་ཅེས་བྱ་སྟེ། རྒྱལ་པོས་གཞོན་ནུ་བལྟམས་ནས་སྐྱེས་བུ་ཡི། །མཚན་ཤེས་བྲམ་ཟེ་ལ་དྲིས་དེ་ཚེ་སྨྲས། །རྒྱལ་བུ་གལ་ཏེ་ཁྱིམ་ན་གནས་གྱུར་ན། །ངེས་པར་འདི་ནི་མི་དབང་དག་ཏུ་འགྱུར། །བརྟུལ་བར་ལྡན་ཞིང་རྒྱལ་པོ་གཞན་རྣམས་ཀྱིས། །སྤྱི་ལ་དབང་བའི་འཁོར་ལོས་བསྒྱུར་བར་འགྱུར། །འདི་ནི་གླིང་རྣམས་ཀུན་ཏུ་མངོན་རྒྱལ་བའི། །ཆོས་ཀྱི་རྒྱལ་སྲིད་དག་ནི་བྱེད་པར་འགྱུར། །རིན་ཆེན་གྱུར་པ་འདི་ནི་རིན་ཆེན་བདུན། །མི་མཆོག་བསོད་ནམས་ལས་ཀྱིས་འཐོབ་པར་འགྱུར། །གང་གི་མཐུ་ཡིས་ས་ནི་མ་ལུས་པ། །འདི་ནི་ལུང་མི་གཅོག་པར་སྤྱོད་པར་འགྱུར། །གསེར་ལས་ལེགས་བྱས་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཞིང་མྱུ་ཁྱུད་མ་ཉམས་བཟང ། །དང་པོར་ས་ལ་རྣམ་པར་རྒྱལ་འགྱུར་གང ། །འཁོར་ལོ་དེ་འདིས་དང་པོར་ཐོབ་པར་འགྱུར། །ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཅན་རྩེ་འདྲའི་གླང་པོའི་མཆོག་།རྒྱལ་པོ་ལ་འོས་མཁའ་ལ་འགྲོ་བ་ཡི། །རིན་ཆེན་མཆོག་ནི་གཉིས་པ་འདིས་འཐོབ་འགྱུར། །ཐོ་རངས་དུས་སུ་ཕྱོགས་ཀུན་མ་ལུས་
19a
༄#། །པའི། །ས་རྣམས་བསྐོར་ནས་སླར་ནི་ལྡོག་གྱུར་གང ། །རྨ་བྱའི་མགྲིན་འདྲ་སྤུ་ནི་ཡིད་འོང་བའི། །རིན་ཆེན་རྟ་ནི་འདི་ཡིས་ཐོབ་པར་འགྱུར། །རིན་ཆེན་དྲི་མེད་བཻ་ཌཱུརྱ་རང་བཞིན། །ཀུན་ཏུ་དཔག་ཚད་ཙམ་དུ་སྣང་བྱེད་པ། །དྲི་མེད་མཚན་མོ་ཅི་འདྲ་ཉིན་དེ་བཞིན། །རིན་ཆེན་མཆོག་ནི་བཞི་པ་འཐོབ་པར་འགྱུར། །གང་ཞིག་རེག་དྲི་གཟུགས་དང་མདངས་ལྡན་པའི། །བུད་མེད་དམ་པ་དྲེགས་ལྡན་རྣམས་ཀྱི་མཆོག་།ལྷ་མོ་བཞིན་དུ་ཡོན་ཏན་ཀུན་ལྡན་པ། །བུད་མེད་རིན་ཆེན་དེ་འདིར་འཐོབ་པར་འགྱུར། །གང་ཡང་འདི་ནི་རྒྱལ་ལ་མུ་ཏིག་དང ། །གསེར་སོགས་ཤིན་ཏུ་མང་པོ་འབུལ་བ་ཡི། །ནོར་ལྡན་མཚུངས་པར་ནོར་མང་ཁྱིམ་བདག་ནི། །རིན་ཆེན་ཐོབ་ནས་རྣམ་པར་སྤྱོད་པར་འགྱུར། །འགྲོར་དང་ཀུན་ཏུ་གནས་དང་རྣམ་ལྡོག་དང ། །མ་ལུས་དཔུང་ལ་མཁས་པར་བྱེད་པ་ཡི། །དཔལ་ལྡན་བདུན་པ་འབྱུང་བར་འགྱུར་བ་ནི། །མི་ཡི་རིན་ཆེན་བློན་པོ་ཞེས་བྱ་ཡིན། །དཔལ་ཞིང་བརྟུལ་ཕོད་ཡན་ལག་མཆོག་གཟུགས་ལྡན། །བུ་སྟོང་དག་ནི་འདི་ལ་འབྱུང་འགྱུར་ཞིང ། །གང་གི་གཟི་བརྗིད་ཤིན་ཏུ་སྟོབས་ཆེ་ཞིང ། །ས་བདག་གཞན་དག་འདུད་པར་བྱེད་པ་འབྱུང ། །གལ་ཏེ་ཁྱིམ་ནི་ཉེས་མང་གིས་དཀྲུགས་པ། །རབ་འབར་ཤིང་ནི་བྱ་ཡིས་སྡོང་བ་ལྟར། །ཉེ་བར་ཞི་ཕྱིར་ནགས་སུ་དེས་སོང་ན། །དེ་འདིར་རིང་པོར་མི་ཐོགས་
19b
སངས་རྒྱས་འགྱུར། །ཁྱོད་ཀྱི་སྲས་འདི་དེང་ནི་འདི་འདྲ་བ། །གཞོན་ནུ་འགྲོ་བའི་རིན་ཆེན་གཅིག་བལྟམས་པ། །འགྲོ་བ་གཉིས་ལས་གཞན་དུ་མི་འགྲོ་བ། །དེ་ལྟར་སྔགས་ཀྱི་ཚིག་ལས་མཐོང་བ་ལགས། །ཤེས་ལྡན་དག་།གང་དག་དང་ལྡན་པའི་སྐྱེས་བུ་ཆེན་པོ་འགྲོ་བ་གཉིས་སུ་འགྱུར་གྱི་གཞན་དུ་མ་ཡིན་ཞེས་བྱ་བ་ནས་སྔ་མ་བཞིན་དུ་འཇིག་རྟེན་གྱི་སྒྲ་རྣམ་པར་གྲགས་པར་འགྱུར་ཞེས་བྱ་བའི་བར་གྱི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་ནི་གང་དག་ཡིན། །ལྷ།་གཞོན་ནུའི་ཞབས་ཤིན་ཏུ་གནས་པ་ལགས་སོ། །ཞབས་གཉིས་ཤིན་ཏུ་གནས་པ་ཉིད་ཀྱིས་ས་ལ་མཉམ་པར་འབབ་སྟེ། ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །དེའི་ཞབས་ཀྱི་མཐིལ་གྱི་ངོས་གཉིས་ལ་འཁོར་ལོ་རྩིབས་སྟོང་པ་ལྟེ་བ་དང་མུ་ཁྱུད་དུ་བཅས་པ་རྣམ་པ་ཐམས་ཅད་ཡོངས་སུ་རྫོགས་པ་མཆིས་ཏེ། ལྷ། འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུའི་སོར་མོ་རིང་བ་དང ། ཞབས་ཀྱི་རྟིང་པ་ཡངས་པ་དང ། དེའི་ཕྱག་དང ། ཞབས་འཇམ་ཞིང་གཞོན་ཤ་ཆགས་པ་ལགས་ཏེ། ཕྱག་དང ། ཞབས་འཇམ་ཞིང་གཞོན་ཤ་ཆགས་པ་ནི།་དཔེར་ན། ཤིང་བལ་གྱི་འདའ་བའམ། རས་བལ་གྱི་འདའ་བ་བཞིན་ནོ། །ལྷ། འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུའི་
20a
༄#། །ཕྱག་དང ། ཞབས་དྲ་བར་འབྲེལ་བ་ལགས་ཏེ། དེའི་ཕྱག་དང ། ཞབས་དྲ་བར་འབྲེལ་བ་ནི། དཔེར་ན། ངང་པའི་རྒྱལ་པོ་གཞོན་ནུ་བཞིན་ནོ། །ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ། གཞོན་ནུའི་ཞབས་ལོང་མོའི་ཚིགས་མི་མངོན་པ་དང ། བྱིན་པ་རི་དྭགས་ཨེ་ན་ཡའི་ལྟ་བུ་དང ། སྐུ་མདུད་པ་དང ། སྐུ་བཞེངས་བཞིན་དུ་མ་བཏུད་པར་ཕྱག་པུས་མོའི་ལྷ་ང་གཉིས་སླེབས་ཤིང་རེག་པ་སྟེ། ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུ་ནི་འདོམས་ཀྱི་སྤ་བ་སྦུབས་སུ་ནུབ་པ་ལགས་ཏེ། དེའི་འདོམས་ཀྱི་སྦ་བ་སྦུབས་སུ་ནུབ་པ་ནི། དཔེར་ན། གླང་པོ་ཆེ་ཅང་ཤེས་ཀྱིའམ། རྟ་ཅང་ཤེས་བྱུང་མ་ཐག་གི་བཞིན་ནོ། ། ལྷ།་འདི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ་གཞོན་ནུའི་སྐུ་ཅི་སྲིད་པར་འདོམ་ཡང་དེ་སྲིད་ལ། འདོམ་ཅི་སྲིད་པར་སྐུའང་དེ་སྲིད་པས་ཤིང་ནྱ་གྲོ་དྷ་ལྟར་ཆུ་ཞེང་གབ་པ་ལགས་ཏེ། ལྷ། འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ། གཞོན་ནུའི་རོ་སྟོད་ཀྱིས་སྤུ་རེ་རེ་ནས་སྐྱེ་ཞིང་དེའི་སྐུ་ལ་སྤུ་རེ་རེ་ནས་སྐྱེ་བའང་མཐིང་ག་ལ་གཡས་ཕྱོགས་སུ་འཁྱིལ་བར་སྐྱེ་ལགས་ཏེ། ལྷ། འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ། གཞོན་ནུ་ནི་
20b
མདོག་གསེར་འདྲ་བ་དང ། འོད་འདོམ་གང་བ་དང ། པགས་པ་སྲབ་ཅིང་མདོག་གསེར་གྱི་འདྲ་བ་ལགས་ཏེ། པགས་པ་སྲབ་པ་ཉིད་ཀྱིས་རྡུལ་དང ། དྲི་མས་སྐུ་ལ་མི་གོས་པ་སྟེ། ལྷ། འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུའི་སྐུ་ནི་བདུན་མཐོ་བ་སྟེ། སྐུ་བདུན་མཐོ་བར་འཁྲུངས་པ་ནི་ཕྱག་གཉིས་དང ། ཞབས་གཉིས་དང ། དཔུང་མགོ་གཉིས་དང ། ལྟག་པ་ལགས་ཏེ། ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུ་ནི་ཐལ་གོང་རྒྱས་པ་དང ། སྐུ་རོ་སྟོད་སེང་གེའི་འདྲ་བ་དང།་སྐུ་དྲང་ཞིང་ཁོ་ལག་ཆེ་བ་དང ། དཔུང་མགོ་ཤིན་ཏུ་ཟླུམ་པ་དང ། ཚེམས་བཞི་བཅུ་མངའ་བ་དང ། ཚེམས་མཉམ་པ་དང ། ཚེམས་ཐགས་བཟང་བ་དང ། མཆེ་བ་ཤིན་ཏུ་དཀར་བ་དང།་འགྲམ་པ་སེང་གེའི་འདྲ་བ་དང ། རོ་བྲོ་བའི་མཆོག་དང་ལྡན་\?\་པ་ལགས་ཏེ། ལྷ། འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུ་ནི་ལྗགས་ཤིན་ཏུ་རིང་ཞིང་སྲབ་པ་ལགས་ཏེ། ལྗགས་ཤིན་ཏུ་རིང་བ་ཉིད་དང ། སྲབ་པ་ཉིད་ཀྱི་ཕྱིར་ལྗགས་ཞལ་ནས་ཕྱུང་བས་སྐྲ་མཚམས་ནས་བཟུང་སྟེ། ཞལ་གྱི་དཀྱིལ་འཁོར་ཐམས་ཅད་ཀྱི་བར་དུ་ཡོག་པར་མཛད་པ་སྟེ། ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུ་ནི་ཚངས་པའི་དབྱངས་དང ། ཀ་ལ་པིངྐའི་
21a
༄#། །སྐད་ལྟར་ཡིད་དུ་འོང་བ་དང ། ངའི་\?\་དབྱངས་ཅན་ལགས་ཏེ། ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་གཞོན་ནུའི་སྤྱན་མཐོན་མཐིང་ལ་བའི་རྫི་མ་ལྟ་བུ་དང ། གཙུག་ཏོར་དང་ལྡན་པ་དང ། སྨིན་མཚམས་ཀྱི་མཛོད་སྤུ་དུང་ལྟར་དཀར་ཞིང་གཡས་སུ་འཁྱིལ་བ་ལགས་ཏེ། ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་སྐྱེས་བུ་ཆེན་པོའི་མཚན་ལགས་སོ། །ལྷ།་འདི་དག་ནི་གང་དང་ལྡན་པའི་འགྲོ་བ་གཉིས་སུ་འགྱུར་གྱི་གཞན་དུ་ནི་མ་ལགས་པ་ཞེས་བྱ་བ་ནས་སྔ་མ་བཞིན་དུ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་བྱ་བའི་བར་གྱི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ལགས་སོ། །བདག་ཉིད་ལེགས་བསྒོམས་སྐུ་ལ་ནི། །སྐུ་ཡི་ཐ་མ་འཛིན་མཛད་པའི། ། ཐུབ་པ་ཆེན་པོའི་མཚན་རྣམས་ནི། །དེ་ནི་བདག་གིས་བརྗོད་པར་བགྱི། །འདི་ཞབས་ཤིན་ཏུ་གནས་པ་སྟེ། །ས་ལ་མཉམ་པར་འབབ་པ་ཡིན། །འདི་ཞབས་ཕྱག་གི་མཐིལ་ལ་ནི། འཁོར་ལོ་ཤིན་ཏུ་དབྱིབས་ལེགས་སྐྱེས། །འདི་ཞབས་རྟིང་པ་ཡངས་པ་དང ། །དེ་ནི་སོར་མོ་རིང་ཞིང་མཛེས། །ཕྱག་ཞབས་དྲ་བར་འབྲེལ་པ་དང ། །ཤིང་བ་ལ་ལྟ་བུར་འཇམ་པ་དང། །འདིའི་ཞབས་ལོང་བུའི་ཚིགས་མི་མངོན། །བྱིན་པ་ཨེ་ནེ་ཡ་དང་མཚུངས། །མི་མཆོག་སྐུ་ཡང་མ་བཏུད་པར། །ཕྱག་གིས་པུས་མོའི་ལྷ་ང་སླེབས། །འདོམས་ཀྱི་སྦ་བ་
21b
སྦུབས་སུ་ནུབ། །ནྱ་གྲོ་དྷ་ལྟར་ཆུ་ཞེང་གབ། །རོ་སྟོད་སྤུ་ནི་རེ་རེ་ནས། །སྐྱེ་ཞིང་དེ་སྤུ་གཡས་སུ་འཁྱིལ། །མདོག་ནི་གསེར་སྦྱངས་འདྲ་བ་དང ། །ཀུན་ནས་འདོམ་གང་འོད་དང་ལྡན། །བཅོམ་ལྡན་དེ་ནི་པགས་སྲབ་ཅིང ། །འདི་སྐུ་བདུན་ནི་མཐོ་བ་སྟེ། །བཅོམ་ལྡན་ཐལ་གོང་རྒྱས་པ་དང ། །སྐུ་སྟོད་སེང་གེ་འདྲ་བ་དང ། །སྐུ་དྲང་ཁོ་ལག་ཆེ་བ་དང ། །དཔུང་མགོ་ཤིན་ཏུ་ཟླུམ་པ་དང་།། བཅུ་ཕྲག་བཞི་ཡི་ཚེམས་རྣམས་ནི། །ཡོངས་སུ་རྫོགས་ཤིང་མ་ཚང་མེད། །མཉམ་དང་ཐགས་བཟང་ཉིད་དུ་ནི། །དེ་ཡི་ཚེམས་ནི་ལེགས་པར་གནས། །རབ་དཀར་འགྲམ་པ་སེང་གེ་འདྲ།། རོ་བྲོ་མཆོག་དང་ལྡན་པ་དང ། །ལྗགས་ནི་ཤིན་ཏུ་སྲབ་པ་དང ། །བཅོམ་ལྡན་ཚངས་པའི་དབྱངས་དང་ལྡན། །རྫི་མ་བ་འདྲ་སྤྱན་མཐོན་མཐིང ། །སྨིན་མའི་མཚམས་ཀྱི་མཛོད་སྤུ་ནི། །དུང་ལྟར་དཀར་ཞིང་གཡས་སུ་འཁྱིལ། །མཚན་བཟང་སུམ་ཅུ་རྩ་གཉིས་འདི། །གང་ཞིག་ལ་ནི་འབྱུང་འགྱུར་བ། །དེ་ནི་འགྲོ་བ་གཉིས་འགྱུར་གྱི། །གསུམ་པར་འགྱུར་བ་མ་ལགས་སོ། །འདི་ནི་གལ་ཏེ་ཁྱིམ་གནས་ན། །འཁོར་ལོས་བསྒྱུར་རྒྱལ་ཉིད་འགྱུར་ཏེ། །དྲན་ལྡན་བུ་ནི་མང་བ་དང ། །གནོད་པ་ཆུང་ཞིང་མཁས་པར་འགྱུར། །གལ་ཏེ་རབ་བྱུང་རྫོགས་སངས་རྒྱས། །གང་ཟག་མཉམ་པ་མེད་པར་འགྱུར། །བཤོས་དང་བཏུང་དང་ན་བཟའ་དང ། །གཟིམས་ཆ་རྣམས་ཀྱང་སྙེད་འགྱུར་ལ། །འདི་ཡི་འཁོར་ནི་མི་ཕྱེད་ཅིང ། །ལུས་ཅན་ཀུན་གྱི་ཡིད་དུ་འོང ། །ལྷ་
22a
༄#། །རྣམས་རྗེས་སུ་འབྲང་བ་དང ། །མི་རྣམས་ཀྱང་ནི་དེ་བཞིན་ཏེ། །ཆོས་ཀྱི་བདག་པོ་མཆོག་འགྱུར་ཞིང ། །མི་ཡུལ་དག་ཏུའང་དེ་བཞིན་འགྱུར། །མཉམ་པ་མེད་ཅིང་འདྲ་བ་མེད། །རྣམ་འདྲེན་མཚུངས་པ་མེད་པར་འགྱུར། །ལྷ།་འདི་ནི་གཞོན་ནུའི་སྐྱེས་བུ་ཆེན་པོའི་མཚན་ལགས་ཏེ། གང་དང་ལྡན་ན་འགྲོ་བ་གཉིས་སུ་འགྱུར་གྱི་གཞན་ནི་མ་ལགས་ཞེས་བྱ་བ་ནི་སྔ་མ་བཞིན་ནོ། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་བལྟམས་ནས་ཞག་བདུན་ལོན་པ་དང ། དེ་བསྐྲུན་པའི་ཡུམ་ནོངས་པར་གྱུར་ཏེ། ནོངས་མ་ཐག་ཏུ་སུམ་ཅུ་རྩ་གསུམ་གྱི་ལྷའི་རིས་གྱ་ནོམ་པར་སྐྱེས་སོ། །དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་མ་མ་རྣམས་ལ་གཏད་ནས། མ་མ། ཁྱེད་ཀྱིས་གཞོན་ནུ་འདི་དུས་དུས་སུ་སྐུ་མཉེ་བྱོས་ཤིག་།དུས་དུས་སུ་ཁྲུས་བྱོས་ཤིག་།དུས་དུས་སུ་ཟས་བྱིན་ཅིག་།དུས་དུས་སུ་ཡང་དག་པའི་བདེ་བས་བསྙེན་བཀུར་བྱོས་ཤིག་།མ་མ། དགའ་བའི་ལག་པ་གཉིས་ཀྱིས་དེ་བླངས་ནས་དུས་དུས་སུ་སྐུ་མཉེ་བྱེད། དུས་དུས་སུ་ཁྲུས་བྱེད། དུས་དུས་སུ་ཟས་བྱིན། དུས་དུས་སུ་ཡང་དག་པའི་བདེ་བས་བསྙེན་བཀུར་བྱེད་དོ། །ཡང་དེའི་ཚེ་དྲི་ཤིན་ཏུ་ཡིད་འོང་བའི་ངོ་བོ་གང་ཡིན་པ་དེ་རྣམས་བྱུགས་ཤིང་རྒྱན་ཐམས་ཅད་ཀྱིས་བརྒྱན་ནས་ཡབ་ཟས་གཙང་ལ་ཕུལ་བ་དང ། རྒྱལ་པོ་ཟས་གཙང་གིས་དེ་བླངས་ཏེ་དགའ་
22b
བས་པང་དུ་བཞག་ནས་ཡང་དང་ཡང་དུ་རྟོག་ཅིང་དགའ་བ་སྐྱེད་དོ། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་ནི་གཟུགས་བཟང་བ། མཛེས་པ། བལྟ་ན་སྡུག་པ། མིའི་ཁ་དོག་ལས་ཡང་དག་པར་འདས་ལ་ལྷའི་ཁ་དོག་མ་ཐོབ་པ། སྐྱེས་པ་དང ། བུད་མེད་རྣམས་ཀྱིས་བལྟས་པ་ན་ངོམས་མི་ཤེས་ཤིང་དགའ་བ་འཐོབ་སྟེ། དཔེར་ན། ཛམྦུའི་ཆུ་བོའི་གསེར་ལ་མགར་བ་མཁས་པས་རྒྱུན་བརྡུངས་པ། ལ་བ་དཀར་པོ་སར་པའི་སྟེང་དུ་བཞག་ན་ཤིན་ཏུ་གསལ་ཞིང་འབར་ལ་རྣམ་པར་འཚེར་བ་དེ་བཞིན་དུ་བྱང་ཆུབ་སེམས་དཔའ་ཤཱཀྱ་ཐུབ་པ་གཟུགས་བཟང་བ། མཛེས་པ། བལྟ་ན་སྡུག་པ། མིའི་ཁ་དོག་ལས་འདས་ཤིང་ལྷའི་ཁ་དོག་ནི་མ་ཐོབ་པ་ཡིན་ནོ། །ཆོས་ཉིད་ཀྱི་བྱང་ཆུབ་སེམས་དཔའ་ཤཱཀྱ་ཐུབ་པ་སྐྱེ་བོའི་ཚོགས་ཆེན་པོའི་སྙིང་དུ་སྡུག་པ་དང ། ཡིད་དུ་འོང་བར་འགྱུར་ཏེ། ཡང་འདི་སྐྱེ་བོའི་ཚོགས་ཆེན་པོས་ད་ཕྲག་པ་ནས་ཕྲག་པར་སྤོ་བར་བྱེད་པ་ནི། དཔེར་ན། སྟོན་ཀའི་པདྨ་སྐྱེ་བོའི་ཚོགས་ཆེན་པོའི་སྙིང་དུ་སྡུག་ཅིང་ཡིད་དུ་འོང་བས་སྐྱེ་བོའི་ཚོགས་ཆེན་པོས་དེ་ལག་པ་ནས་ལག་པར་བརྒྱུད་པར་བྱེད་པ་བཞིན་ཏེ་སྔ་མ་བཞིན་ནོ། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམས་པའི་མོད་ནས་སྤྱན་མི་འཛུམ་པར་གཟུགས་རྣམས་ལ་ལྟ་སྟེ། དེ་སྤྱན་མི་འཛུམ་པ་ནི། དཔེར་ན། སུམ་ཅུ་རྩ་གསུམ་གྱི་ལྷ་རྣམས་བཞིན་ནོ། །ཆོས་ཉིད་ཀྱིས་བྱང་ཆུབ་སེམས་
23a
༄#། །དཔའ་བལྟམས་པའི་མོད་ནས་སྔོན་གྱི་ལས་ཀྱི་རྣམ་པར་སྨིན་པ་ལས་སྐྱེས་པའི་ལྷའི་སྤྱན་དེས་དེ་ཉིན་དང ། མཚན་དུ་དཔག་ཚད་གཅིག་ཁོ་ར་ཁོར་ཡུག་ཏུ་གཟིགས་སོ། །ལས་བཅས་ལས་བྱུང་དྲི་མེད་སྤྱན་གྱིས་ནི། །གཟུགས་ཆེན་པོ་དང་དེ་བཞིན་ཕྲ་རབ་རྣམས། །ཉིན་དང་མཚན་དུ་ཁོར་ཡུག་དཔག་ཚད་གཅིག་།མདུན་ན་གནས་པ་བཞིན་དུའང་གཟིགས་པར་འགྱུར། །ཆོས་ཉིད་ཀྱི་བྱང་ཆུབ་སེམས་དཔའ་བལྟམས་པའི་མོད་ནས་གསུང་སྙན་ཅིང་འཇེབས་པ་དང ། གསུང་སྙན་པ་དང ། གསུང་ཡིད་དུ་འོང་བ་ཡིན་ཏེ། དཔེར་ན། གངས་ཅན་གྱི་བྱ་སྐད་སྙན་ཅིང་འཇེབས་པ་དང ། སྐད་སྙན་པ་དང ། ཡིད་དུ་འོང་བ་དེ་བཞིན་དུ་བྱང་ཆུབ་སེམས་དཔའ་བལྟམས་པའི་མོད་ནས་གསུང་སྙན་ཅིང་འཇེབས་པ་དང ། གསུང་སྙན་པ་དང ། གསུང་ཡིད་དུ་འོང་བ་ཡིན་ནོ། །རི་བོ་ཀུན་འཛིན་ལ་དྲང་སྲོང་ཉོན་མོངས་མེད་ཅེས་བྱ་བ་མངོན་པར་ཤེས་པ་ལྔ་དང་ལྡན་པ། བྱམས་པའི་བདག་ཉིད་ཅན་སྙིང་རྗེ་དང་ལྡན་པ། སྐྱེ་དགུ་ལ་མཉེས་གཤིན་པ་ཞིག་གནས་ཏེ། དེ་ལ་ཚ་བོ་མིས་བྱིན་ཞེས་བྱ་བ་ཡོད་པ་དང ། དེ་དེའི་ཚེ་ཕུག་ཏུ་ཞུགས་ཏེ་བསམ་གཏན་བྱེད་པ་ན་བྱང་ཆུབ་སེམས་དཔའ་བལྟམས་ཏེ། འཇིག་རྟེན་ཐམས་ཅད་སྣང་བ་རྒྱ་ཆེན་པོ་གསལ་བར་གྱུར་པའི་སྣང་བ་དེ་མཐོང་བ་དང ། ཉོན་མོངས་མེད་ལ་སྨྲས་པ། མཁན་པོ་འདིར་
23b
ནི་ཉི་མ་ཐམས་ཅད་དག་།གཅིག་ཅར་བྱུང་བར་གྱུར་ཏམ་ཅི། །འདི་ལྟར་རི་ནི་ཕུག་བཅས་པ། །འདི་ནི་འོད་ཀྱིས་གསལ་བར་གྱུར། །ཉོན་མོངས་མེད་ཀྱིས་དེ་ལ་སྨྲས་པ། ཉི་མའི་འོད་ནི་རྒྱུན་དུ་རྣོ། །བུ་གཅིག་སྣང་བ་འདི་དག་ནི། །ཡན་ལག་རེག་ན་འོད་གསལ་བས། །ངེས་པར་ཐུབ་པ་དེ་ཡི་འོད། །བྱང་ཆུབ་སེམས་དཔའ་འོད་ཅན་ནི། །ངེས་པར་ལྷུམས་ནས་བལྟམས་གྱུར་ལ། །བལྟམས་ནས་སེམས་དཔའ་ཆེན་པོ་དེའི། །འོད་ཟེར་གསེར་དང་འདྲ་བ་ནི། །དྲི་མ་མེད་པ་འདི་དག་གིས། །འཇིག་རྟེན་གསུམ་ནི་སྣང་བྱས་ཡིན། །མིས་བྱིན་གྱིས་སྨྲས་པ། མཁན་པོ་བཞུད། ཅི་རེ་ཞིག་འཁོར་ལོས་བསྒྱུར་བའི་རྒྱལ་པོར་འགྱུར་རམ། འོན་ཏེ་བླ་ན་མེད་པའི་ཡེ་ཤེས་རྟོགས་པར་འགྱུར་བ་རང་ཉིད་ཀྱིས་བལྟ་བར་མཛོད་ཅིག་།དྲང་སྲོང་ཉོན་མོངས་མེད་ཀྱིས་སྨྲས་པ། དེ་ལྟར་ན་ནི་རྒྱལ་པོ་ཟས་གཙང་མའི་ཁྱིམ་ཉི་འོག་གི་རྒྱལ་པོ་དང ། མཁར་གྱི་རྒྱལ་པོ་དང ། ཚོང་བ་དང ། ཚོང་དཔོན་དང ། དེད་དཔོན་རྣམས་དང ། བྲམ་ཟེ་དང ། ཁྱིམ་བདག་བརྒྱ་སྟོང་དཔག་ཏུ་མེད་པས་ཀུན་ཏུ་ཁྱབ་ནས་འདུག་གི། གང་གི་ཚེ་དེ་དབེན་པར་གྱུར་པ་དེའི་ཚེ་རྒྱལ་པོ་ཟས་གཙང་མའི་གན་དུ་འགྲོ་བར་བྱའོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ། ཀྱེ་མའོ། །དྲང་སྲོང་ཉོན་མོངས་མེད་རྐང་གིས་སེར་སྐྱའི་གཞིར་འོངས་ན་ཅི་མ་རུང་སྙམ་དུ་སེམས་སོ། །དེ་ནས་དྲང་སྲོང་ཉོན་མོངས་མེད་སྟེང་གི་ནམ་མཁའ་ལ་མངོན་པར་
24a
༄#། །འཕགས་ནས་རྒྱལ་པོ་ཟས་གཙང་མའི་ཕོ་བྲང་སྒོར་ཕྱིན་པ་དང ། ཇི་ཙམ་ན་སྒོ་སྲུང་གིས་རྒྱལ་པོ་ཟས་གཙང་མ་ལ། ལྷ། དགྱེས་པ་བསྐྱེད་དུ་གསོལ། དྲང་སྲོང་ཉོན་མོངས་མེད་འདིར་མཆིས་སོ་ཞེས་རིག་པར་བྱས་པ་དང ། རྒྱལ་པོ་ཟས་གཙང་མས་ཐོས་ཏེ་དགའ་བ་དང ། མགུ་བ་དང ། རབ་ཏུ་དགའ་བ་དང ། མཆོག་ཏུ་རངས་པ་བྱུང་ནས་མཆོག་ཏུ་གུས་པས་མཆོད་དེ་འདི་སྐད་ཅེས་སྨྲས་སོ། །དྲང་སྲོང་ཆེན་པོ། ལེགས་པར་འོངས་སོ། །དགོས་པ་ཅི་ཞིག་ལ་འོངས། ཉོན་མོངས་མེད་ཀྱིས་སྨྲས་པ། རྒྱལ་པོ་ཆེན་པོ་བདག་ནི་འདིར། །ཁྱེད་སྲས་བལྟ་བའི་ཕྱིར་མཆིས་ཏེ། །འཇིག་རྟེན་གཙོ་བོ་རྣམ་འདྲེན་པ། །ཐུབ་པ་དེ་ནི་མཐོང་བར་འཚལ། །རྒྱལ་པོས་སྨྲས་པ། གལ་ཏེ་དེ་ལྟ་ན་ནི་གཞོན་ནུ་གཉིད་ལོག་གི་སང་ཀྱི་བར་དུ་རེ་ཞིག་སྡོད་ཅིག་།ཉོན་མོངས་མེད་ཀྱིས་སྨྲས་པ། རིགས་དང་ལྡན་པའི་རྟ་རྣམས་ནི། །མཚན་མོའི་བཞི་ཆ་ཉལ་བ་ལྟར། །དགོས་པ་དོན་གཉེར་རྣམས་ཀྱི་གཉིད། །མིག་ལ་ཡུན་རིང་མི་གནས་སོ། །དེ་ནས་གཞོན་ནུ་ཤཱཀྱ་ཐུབ་པ་མ་མའི་པར་ན་འདུག་པ་དྲང་སྲོང་ཉོན་མོངས་མེད་ལ་བྱིན་པ་དང ། དྲང་སྲོང་ཉོན་མོངས་མེད་ཀྱིས་ལག་པ་གཉིས་ཀྱིས་བླངས་ནས་ཡུད་ཙམ་བརྟགས་ཏེ་སྨྲས་པ། ལྷ། གཞོན་ནུ་འདི་མཚན་མཁན་རྣམས་ཀྱིས་ཇི་སྐད་ལུང་བསྟན། རྒྱལ་པོ་ཟས་གཙང་མས་སྨྲས་པ། རིན་
24b
པོ་ཆེ་སྣ་བདུན་དང་ལྡན་པའི་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ཟེར་རོ། །དེ་ནས་དྲང་སྲོང་ཉོན་མོངས་མེད་ཀྱིས་བྱང་ཆུབ་སེམས་དཔའ་མཐོང་ནས་ཚིགས་སུ་བཅད་དེ་སྨྲས་པ། ས་བདག་རྟོག་པ་པོ་རྣམས་བློ་འཁྲུལ་ཏེ། །རྩོད་པའི་དུས་ན་འཁོར་ལོས་བསྒྱུར་མི་འབྱུང ། །བསོད་ནམས་མཆོག་གིས་ཆོས་ཀྱི་མཛོད་འདི་ནི། །ཉེས་ལས་རྣམ་པར་རྒྱལ་ནས་སངས་རྒྱས་འགྱུར། །མཚན་མི་གསལ་དང་ལྡན་ན་མི་དབང་པོ། །གླིང་བཞི་རྣམས་ཀྱི་བདག་པོ་དབང་ཕྱུག་འགྱུར། །ཐུབ་དབང་མཚན་ནི་ཤིན་ཏུ་གསལ་བས་ན། །མི་མཆོག་སངས་རྒྱས་ཆོས་ཀྱི་འཁོར་ལོས་བསྒྱུར། །དེ་ནས་དྲང་སྲོང་ཉོན་མོངས་མེད་ཀྱིས་བདག་ཉིད་ཀྱི་ཚེའི་མཐའི་ངེས་པ་དང ། བྱང་ཆུབ་སེམས་དཔའི་མངོན་པར་བྱང་ཆུབ་པ་བརྟག་པ་ལ་ཞུགས་པ་དང ། བྱང་ཆུབ་སེམས་དཔའ་ལོ་ཉི་ཤུ་རྩ་དགུ་བཞེས་ནས། ཁབ་ནས་བྱུང་ནས་ལོ་དྲུག་ཏུ་དཀའ་བ་སྤྱོད་པར་འགྱུར་ཏེ་དེ་ནས་བདུད་རྩི་རྟོགས་པར་འགྱུར་བར་མཐོང་ངོ ། །བདག་ནི་བར་སྐབས་དེར་འཆི་བའི་དུས་བྱེད་པར་མཐོང་ནས་དེ་མིག་མཆི་མས་གང་སྟེ་འདུག་པ་རྒྱལ་པོ་ཟས་གཙང་གིས་མཐོང་ནས་དངངས་ནས་ཚིགས་སུ་བཅད་དེ་སྨྲས་པ། སྐྱེས་བུ་བུད་མེད་རྣམས་ཀྱིས་མཐོང་བ་ན། །ངོམས་པར་མི་འགྱུར་དགའ་བ་ཐོབ་འགྱུར་བ། །ལུས་བཟང་དགེ་བྱེད་ད་ནི་འདིར་མཐོང་ནས། །དྲང་སྲོང་ཆེན་པོ་ཅི་སླད་དུ་བཞིན་གྱུར། །གང་ལས་བདག་གི་གཞོན་ནུ་
25a
༄#། །འཇིགས་པའམ། །ཚེ་ཟད་འགྱུར་བ་ཉེ་བར་མི་གནས་གྲང ། །དེ་ནི་མྱུར་དུ་ལེགས་པར་བདག་ལ་སྨོས། །ཁྱོད་ཀྱི་མཆི་མས་བདག་ནི་འདར་བར་གྱུར། །དྲང་སྲོང་ཉོན་མོངས་མེད་ཀྱིས་ཀྱང་ཚིགས་སུ་བཅད་དེ་སྨྲས་པ། གལ་ཏེ་འདི་ཡི་སྟེང་དུ་ནམ་མཁའ་ལས། །རྡོ་རྗེ་སེར་དྲག་འཕངས་པ་བབ་གྱུར་ཀྱང ། །ཐུབ་པ་ཆེན་པོའི་སྐུ་ལ་བ་སྤུ་ནི། ། ཉག་མ་གཅིག་ཀྱང་གཡོས་པར་མི་ནུས་སོ། །མེ་ཆེན་རླུང་གི་ཤུགས་ཀྱིས་བདས་པ་དང ། །མཚོན་ཆ་རྣོན་པོ་ཤིན་ཏུ་མི་བཟད་དང ། །དྲག་པོའི་དུག་དང་སྦྲུལ་གྱི་དུག་ནོན་ཡང ། ། གཞོན་ནུ་ལ་བབ་སྐད་ཅིག་འཇིགས་མི་འགྱུར། །ཐུགས་རྗེ་ཉིད་ལ་གནས་གྱུར་གང་ལགས་པ། །འཇིགས་པས་ཉེན་པ་རྣམས་ལ་མི་འཇིགས་སྩོལ། །དེ་ནི་འཇིག་རྟེན་ཀུན་གྱི་འཇིགས་འཇོམས་ན། །མི་དབང་འདི་ལ་འཇིགས་པ་ག་ལ་འབྱུང ། །འཇིག་རྟེན་ན་ནི་བདག་ཉིད་ཆེ་རྣམས་ཀྱི། །གཙོར་གྱུར་བདག་ཉིད་ཆེན་པོ་གང་ཞིག་ལ། །ཚངས་བཅས་ལྷ་ཡང་རྟག་ཏུ་སྲུང་བྱེད་པ། །མི་དབང་དེ་ལ་འཇིགས་པ་ག་ལ་འབྱུང ། །མི་དབང་བདག་གི་རྒུད་པ་མཐོང་ནས་ནི། །གང་ཕྱིར་ཞི་བ་མི་འཐོབ་པར་དུ་མོད། །ཆོས་ཀྱི་མཆོག་མཛོད་འདི་དང་ཕྲད་ནས་ནི། །དོན་མ་ཐོབ་པར་བདག་ནི་འཆི་བར་འགྱུར། །གང་དག་སྨྲ་བ་དམ་པ་མཚུངས་མེད་པ། །འདི་ཡི་ཆོས་ཐོས་འགྱུར་ཞིང་ཐོས་ནས་ཀྱང ། །རབ་ཏུ་ཞི་བའི་ཕ་རོལ་
25b
འགྲོ་དེ་དག་།སྐྱེད་ཅིང་བསོད་ནམས་ལྡན་ལ་རིམས་ནད་བྲལ། །དེ་ནས་དྲང་སྲོང་ཉོན་མོངས་མེད་བྱང་ཆུབ་སེམས་དཔའ་ལ་རེག་པའི་མཐུས་དེའི་རྫུ་འཕྲུལ་ཉམས་སོ། །ཉམས་པ་དང་ཉོན་མོངས་མེད་ཀྱིས་སྨྲས་པ། རྐང་ཁོ་ནས་གྲོང་ཁྱེར་ནས་ཕྱིར་འབྱུང་བར་བྱའོ། །དེ་ནས་རྒྱལ་པོ་ཟས་གཙང་མས་ཐོས་པ་དང ། གྲོང་ཁྱེར་ཐམས་ཅད་རྡོ་བ་དང ། གསེག་མ་དང ། གྱོ་མོ་རྣམས་བསལ་ནས་སྤོས་དང ། ཕྱེ་མས་ཁྱབ་པར་བྱེད་དུ་བཅུག་གོ་།དེ་ནས་དྲང་སྲོང་ཉོན་མོངས་མེད་འབྱོར་པ་ཆེན་པོས་གྲོང་ཁྱེར་ནས་བྱུང་སྟེ། རིམ་གྱིས་རི་བོ་ཀུན་འཛིན་དུ་ཕྱིན་པ་དང ། མི་སྦྱིན་ལ་སྨྲས་པ། ངས་གཞོན་ནུ་མཐོང་སྟེ། བླ་ན་མེད་པའི་ཡེ་ཤེས་རྟོགས་པར་འགྱུར་ན་ངས་ནི་དེ་སློབ་པར་མི་འགྱུར་ཏེ། ང་ནི་བར་སྐབས་སུ་དུས་བྱེད་པར་འགྱུར་གྱི་ཁྱོད་ནི་དེའི་ཐད་དུ་རབ་ཏུ་བྱུང་ལ། ང་རྒྱལ་དང ། དྲེགས་པ་ངེས་པར་བཅོམ་པར་གྱུར་པ་དང ། ཚངས་པར་སྤྱོད་པ་ལ་སྤྱད་པར་བྱ་སྟེ། རིགས་ཀྱིས་དྲེགས་པར་མི་བྱ། རུས་ཀྱིས་དྲེགས་པར་མི་བྱ། རིགས་རྒྱུད་ཀྱིས་དྲེགས་པར་མི་བྱ་སྟེ། ཁྱོད་ཀྱིས་ཀྱང་ཡུན་རིང་པོ་མི་ཐོགས་པར་བདུད་རྩི་འཐོབ་པར་འགྱུར་གྱི་ཞེས་སྨྲས་ནས་ཡང་ཚིགས་སུ་བཅད་དེ་སྨྲས་པ། དེ་བཞིན་གཤེགས་པ་ཚོལ་འདོད་ན། །ཤར་ཕྱོགས་སུ་ནི་ཁྱོད་འདུག་དང ། །རྫོགས་པའི་སངས་རྒྱས་གྲགས་ལྡན་པ། །རྙེད་པར་དཀའ་བ་མཐོང་བར་འགྱུར། །དེ་ནས་དུས་གཞན་ཞིག་ན་རྒྱལ་པོ་
26a
༄#། །ཟས་གཙང་མས་གཞོན་ནུ་མ་མའི་པང་ན་འདུག་པ་ལ་ཡང་དང ། ཡང་དུ་ལྟ་ཞིང་ངའི་བུ་ཅི་འདྲ་བ་དེ་ལྟ་བུ་ནི་སའི་སྟེང་ན་སུ་ལའང་མེད་དོ་སྙམ་དུ་སེམས་ཤིང་ཤིན་ཏུ་དགའ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འཁྲུངས་ནས་རིང་པོར་མ་ལོན་པར་མ་མའི་པང་དུ་བཞུགས་ནས། གསེར་གྱི་གཞོང་བར་འབྲས་དང ། ཤར་བསྲེས་པའི་ཆན་གསོལ་བ་ན་དེ་མ་མས་བཀག་ཀྱང་མ་ཐུབ་པར་མང་པོར་གསོལ་ནས་དབྲོག་པར་བརྩམས་པ་དང ། དབྲོག་མ་ནུས་ནས་དེས་རྒྱལ་པོ་ཟས་གཙང་ལ་སྦྲན་པ་དང ། རྒྱལ་པོ་བཙུན་མོ་དང་ལྷན་ཅིག་གིས་དབྲོག་པར་བརྩམས་པ་དང་དེས་ཀྱང་མ་ནུས་སོ། །དེ་ནས་རྒྱལ་པོ་བློན་པོ་རྣམས་དང་སེར་སྐྱ་ན་གནས་པའི་སྐྱེ་བོའི་ཚོགས་རྣམས་ལ་བསྒོ་ན་དེ་རྣམས་ཀྱིས་ཀྱང་དབྲོག་པར་མ་ནུས་སོ། །དེ་ནས་གླང་པོ་ཆེ་ལྔ་བརྒྱ་ལ་བཏགས་པ་དང ། བྱང་ཆུབ་སེམས་དཔས་བསམས་པ། འདི་རྣམས་ཀྱིས་བདག་གི་སྟོབས་ཉམས་ན་མི་རུང་གི་།མ་ལ་བདག་གིས་མཛུབ་མོ་བཀུག་པས་གསེར་གྱི་གཞོང་པ་ནས་བཟུང་ངོ་སྙམ་ནས་དེས་མཛུབ་མོ་བཀུག་པས་གསེར་གྱི་གཞོང་པ་བཟུང་ནས་དྲངས་པ་དང ། གླང་པོ་ཆེ་ལྔ་བརྒྱ་པོ་དེ་དག་ཁ་ཕྱིར་བསྒྱུར་ཏེ་དྲངས་ནས་དེ་དག་གིས་ཀྱང་གསེར་གྱི་གཞོང་པ་དབྲོག་པར་མ་ནུས་སོ། །རྒྱལ་པོ་ཟས་གཙང་གིས་བསམས་པ། ཇི་ལྟར་བྱང་ཆུབ་སེམས་དཔའི་ལག་པ་
26b
གཡོན་པས་གླང་པོ་ཆེ་ལྔ་བརྒྱ་དྲངས་པ་དང་སྦྱར་ན་གདོན་མི་ཟ་བར་ལག་པ་གཉིས་ཀྱིས་ནི་གླང་པོ་ཆེ་སྟོང་ཐུབ་ཀྱི། དེ་བས་ན་གཞོན་ནུའི་མིང་གླང་པོ་ཆེ་སྟོང་གི་སྟོབས་ཅན་ཞེས་གདགས་སོ་ཞེས་བཏགས་སོ། །གྲོང་ཁྱེར་སེར་སྐྱའི་གཞི་ན་གནོད་སྦྱིན་ཤཱཀྱ་འཕེལ་ཞེས་བྱ་བ་ཞིག་གཉུག་མར་གནས་སོ། །ཤཱཀྱ་རྣམས་ཀྱིས་ཀུན་ཏུ་སྤྱོད་པ་ནི་ཤཱཀྱ་སུའང་རུང་བ་ལ་ཁྱེའུ་འམ་བུ་མོ་བཙས་པ་གང་ཡིན་པ་དེ་གནོད་སྦྱིན་ཤཱཀྱ་འཕེལ་གྱི་རྐང་པ་ལ་ཕྱག་འཚལ་དུ་གཞུག་པའི་ཕྱིར་འཁྲིད་པ་ཡིན་པས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག། དེངས་ལ་གཞོན་ནུ་གནོད་སྦྱིན་ཤཱཀྱ་འཕེལ་གྱི་རྐང་པ་ལ་ཕྱག་འཚལ་དུ་ཆུག་ཅིག་།དེ་ནས་བྱང་ཆུབ་སེམས་དཔའ་གླང་པོ་ཆེ་ལ་བསྐྱོན་ཏེ་དཔུང་གི་ཚོགས་དཔག་ཏུ་མེད་པས་ཡོངས་སུ་བསྐོར་ཏེ་གྲོང་ཁྱེར་སེར་སྐྱའི་གཞིར་འཇུག་པར་བརྩམས་པ་དང ། གྲོང་ཁྱེར་སེར་སྐྱའི་གཞི་སྒྲ་བཅུ་གཉིས་དང་བྲལ་བར་གྱུར་ཅིང་བྱང་ཆུབ་སེམས་དཔའ་དེ་ནང་དུ་ཞུགས་པ་ན་ཐུབ་པ་བཞིན་དུ་གནས་པར་གྱུར་ཏོ། །དེ་ནས་རྒྱལ་པོ་ཟས་གཙང་མས་བསམས་པ། གྲོང་ཁྱེར་འདི་འདི་ལྟ་སྟེ། གླང་པོ་ཆེའི་སྒྲ་དང ། རྟའི་སྒྲ་དང ། ཤིང་རྟའི་སྒྲ་དང ། དཔུང་བུ་ཆུང་གི་སྒྲ་དང ། དུང་གི་སྒྲ་དང ། རྔ་བོ་ཆེའི་སྒྲ་དང ། བེ་དེའི་སྒྲ་དང ། རཝ་དུང་གི་སྒྲ་དང ། གར་གྱི་སྒྲ་དང ། གླུའི་སྒྲ་དང ། རོལ་མོའི་སྒྲ་དང ། སྦྱིན་པ་ནི་བྱིན། བསོད་ནམས་ནི་གྱིས། བསྙེན་གནས་ལ་ནི་
27a
༄#། །ཉེ་བར་གནས། ཚུལ་ཁྲིམས་ཡང་དག་པར་བླངས་ཏེ་མནོས་ཤིག་ཅེས་བྱ་བའི་སྒྲ་སྟེ་སྒྲ་བཅུ་གཉིས་དང་བྲལ་ཞིང་གཞོན་ནུ་དེ་ནང་དུ་ཞུགས་པ་ནི་ཐུབ་པ་བཞིན་དུ་ཞི་བར་གནས་པས་གཞོན་ནུའི་མིང་ཤཱཀྱ་ཐུབ་པ་ཞེས་གདགས་སོ་ཞེས་བྱང་ཆུབ་སེམས་དཔའི་མིང་ཤཱཀྱ་ཐུབ་པ་ཞེས་བྱ་བར་བཏགས་སོ། །དེ་ནས་བྱང་ཆུབ་སེམས་དཔའ་གནོད་སྦྱིན་ཤཱཀྱ་འཕེལ་གྱི་གན་དུ་ཁྱེར་བ་དང ། གནོད་སྦྱིན་ཤཱཀྱ་འཕེལ་གྱིས་བྱང་ཆུབ་སེམས་དཔའ་གནས་དང་ཉེ་བར་ཕྱིན་པ་མཐོང་ངོ ། །མཐོང་ནས་ཀྱང་ཕྱིར་བྱུང་ནས་ལུས་ཐམས་ཅད་ཀྱིས་བྱང་ཆུབ་སེམས་དཔའི་རྐང་པ་གཉིས་ལ་གཏུགས་ཏེ་ཕྱག་བྱས་སོ། །དེ་མཐོང་བ་དང ། རྒྱལ་པོ་ཟས་གཙང་མས་སྨྲས་པ། ལྷས་ཀྱང་རྐང་པ་གཉིས་ལ་གཏུགས་པས་འདི་ནི་ལྷའི་ཡང་ལྷ་ཡིན་པས་གཞོན་ནུའི་མིང་ལྷའི་ཡང་ལྷ་ཞེས་བྱའོ་ཞེས་བྱང་ཆུབ་སེམས་དཔའི་མིང་ལྷའི་ཡང་ལྷ་ཞེས་བྱ་བར་བཏགས་སོ། །དེ་ནས་དེའི་ཚེ་རྒྱལ་པོ་ཟས་གཙང་གིས་དགོས་པའི་ཆེད་ལ་འདུག་ནས་དོན་ཟབ་མོའི་ཚིག་དང ། ཡི་གེ་དག་ཤེས་རབ་ཀྱིས་སོ་སོར་འབྱེད་པར་བྱེད་དོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་འཁོར་ལྔ་བརྒྱ་དང ། ཡི་གེའི་སློབ་དཔོན་སྲིན་བུ་གོ་ཆ་ལ་ཡི་གེ་སློབ་པར་བཏང་ནས་ཡི་གེའི་སློབ་དཔོན་སྲིན་བུ་གོ་ཆས་བྱང་ཆུབ་སེམས་དཔའ་ལ་ཡི་གེར་བྲིས་ནས་ཕོག་པ་དང ། བྱང་ཆུབ་སེམས་དཔས་
27b
སྨྲས་པ། འདི་ནི་ངས་ཤེས་སོ། །དེ་ནས་དེས་ཡི་གེ་གཉིས་དང ། གསུམ་ནས་དེ་བཞིན་དུ་ལྔ་བརྒྱའི་བར་བྲིས་ནས་ཕོག་པ་དང ། བྱང་ཆུབ་སེམས་དཔས་སྨྲས་པ། འདི་དག་ཐམས་ཅད་ཀྱང་ངས་ཤེས་ཀྱི་གཞན་དག་སྨྲོས་ཤིག་།སྲིན་བུ་གོ་ཆས་སྨྲས་པ། འཇིག་རྟེན་ན་ནི་ཡི་གེ་འདི་ཙམ་སྤྱོད་ཀྱི་གཞན་ནི་བདག་གིས་མ་འཚལ་ཏོ། །དེ་ནས་བྱང་ཆུབ་སེམས་དཔའ་ཉིད་ཀྱིས་ཡི་གེ་བྲིས་ཏེ་སྲིན་བུ་གོ་ཆ་ལ་བྱིན་ནས་གསུངས་པ། ཡི་གེ་འདི་མིང་ཅི་ཡིན་སྨྲོས་ཤིག་།དེས་སྨྲས་པ། མ་འཚལ་ཏོ། །བྱང་ཆུབ་སེམས་དཔས་གསུངས་པ། འཇིག་རྟེན་དུ་གཉིས་ཤིག་བྱུང་ནས་མངོན་པར་འགྱུར་ཏེ། བྱང་ཆུབ་སེམས་དཔའ་དང ། འཁོར་ལོས་བསྒྱུར་བའོ། །ནམ་མཁའི་ངོས་ལ་གནས་པའི་ཚངས་པས་སྨྲས་པ། སྲིན་བུ་གོ་ཆ། བྱང་ཆུབ་སེམས་དཔས་ཇི་སྐད་གསུངས་པ་དེ་དེ་བཞིན་ཏེ། ཡི་གེ་འདི་ནི་འཇིག་རྟེན་དུ་གཉིས་ཤིག་བྱུང་ན་མངོན་པར་འགྱུར་ཏེ་བྱང་ཆུབ་སེམས་དཔའ་འམ། འཁོར་ལོས་བསྒྱུར་བའི་རྒྱལ་པོའོ། ། བྱང་ཆུབ་སེམས་དཔས་ཡི་གེ་དེ་ཚངས་པའི་དབྱངས་ཀྱིས་བཀླགས་ལ། ནམ་མཁའི་ངོས་ལ་གནས་པའི་ཚངས་པས་དབང་བྱས་པས་ཚངས་པའི་ཡི་གེ་ཞེས་བྱ་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཡི་གེའི་མཐར་ཕྱིན་པ་དང་འཁོར་ལྔ་བརྒྱ་དང་བཅས་པར་བཟང་ལེན་དང ། ལྷར་བཅས་ཞེས་བྱ་བ་འཕོང་གི་སློབ་དཔོན་གྱི་གན་དུ་འཕོང་གི་གནས་སུ་
28a
༄#། །གཏད་དོ། །དེ་ནས་བྱང་ཆུབ་སེམས་དཔའ་གནས་ལྔ་པོ་རྒྱང་ནས་ཕོག་པ་དང ། སྒྲ་གྲག་པར་ཕོག་པ་དང ། གནད་དུ་ཕོག་པ་དང ། མི་འཆོར་བར་ཕོག་པ་དང།་ཚབས་ཆེ་བ་ལ་བྱང་བར་གྱུར་ཏོ། །དེ་ནས་བཟང་ལེན་དང ། ལྷར་བཅས་འདི་སྙམ་དུ་སེམས་ཏེ་བྱང་ཆུབ་སེམས་དཔའ་འདི་ནི་སྙིང་རྗེ་ཅན་ཡིན་པས་བསླབ་པར་བྱ་བ་ཐམས་ཅད་བསླབ་ཀྱི། ལྷ་སྦྱིན་འདི་ནི་གདུག་པ་ཡིན་པས་འཇིག་རྟེན་ཐམས་ཅད་དུ་གནོད་པར་འགྱུར་ན་མི་རུང་གི་འདི་ལ་གནད་དུ་བསྣུན་པར་བསླབ་པར་མི་བྱའོ་སྙམ་མོ། །དེ་ནས་དུས་གཞན་ཞིག་ན་ལྷ་སྦྱིན་གྱིས་ངང་པ་ལྕགས་མདས་བསྣུན་པ་དང ། བྱང་ཆུབ་སེམས་དཔའ་སྟེང་གི་ཁང་བཟང་གི་གཞི་ལ་བཞུགས་པ་དེའི་པང་བར་དེ་ལྷུང་ངོ ། །དེ་ནས་བྱང་ཆུབ་སེམས་དཔས་བཟུང་ནས་མདའ་ཕྱུང་སྟེ་སྨན་གྱིས་བྱུགས་པས་སོས་སོ། །ལྷ་སྦྱིན་གྱིས་སྨྲས་པ། བྱང་ཆུབ་སེམས་དཔའ་ངང་པ་འདི་ནི་ངས་ཡོངས་སུ་བཟུང་བ་ཡིན་གྱི་བསྐུར་ཅིག། བྱང་ཆུབ་སེམས་དཔས་སྨྲས་པ། ངས་ཆེས་སྔར་ཡོངས་སུ་བཟུང་སྟེ། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ཁོ་ནའི་ཚེ་ཡོངས་སུ་བཟུང་ངོ ། །དེར་བྱང་ཆུབ་སེམས་དཔའ་ལ་ལྷ་སྦྱིན་གནོད་སེམས་དང ། བཟོད་པ་མ་ཡིན་པ་དང ། ཕེབས་པ་མ་ཡིན་པ་བྱུང་བར་གྱུར་ཏོ། །དེ་ནས་ལྷ་སྦྱིན་ལ་སོགས་པ་
28b
ཤཱཀྱའི་གཞོན་ནུ་ལྔ་བརྒྱ་བྱུང་བ་དང ། ལྷ་སྦྱིན་གྱིས་རས་ཀྱིས་བཅིངས་ནས་ཤཱཀྱའི་གཞོན་ནུ་ལྔ་བརྒྱ་བསྒྱེལ་ཏོ། །ཅི་ཙམ་ན་བྱང་ཆུབ་སེམས་དཔའ་ཕྱོགས་དེར་བཞུད་པ་དང ། ལྷ་སྦྱིན་གྱིས་སྨྲས་པ། བྱང་ཆུབ་སེམས་དཔའ་ཅི་ལ་སྡོད། བྱང་ཆུབ་སེམས་དཔས་ཀྱང་རས་བཅིངས་ཏེ་ཤཱཀྱའི་གཞོན་ནུ་ལྔ་བརྒྱ་བསྒྱེལ་ཏོ། །དེ་ནས་ལྷ་སྦྱིན་རས་ཀྱིས་བཅིངས་པ་དང་བྱང་ཆུབ་སེམས་དཔས་ཀྱང་བཟུང་སྟེ་རྐང་བ་གྱེན་དུ་བསྟན་ནས་གན་རྒྱལ་དུ་བསྒྱེལ་བ་དང ། དེར་ཡང་བྱང་ཆུབ་སེམས་དཔའ་ལ་ལྷ་སྦྱིན་གནོད་སེམས་དང ། མི་བཟོད་པ་དང ། བག་མི་ཕེབས་པའི་སེམས་གཉིས་པ་བསྐྱེད་པར་གྱུར་ཏོ། །དེ་ནས་ཤཱཀྱ་གཞོན་ནུ་ལྔ་བརྒྱ་མདའ་གཞུ་ཐོགས་ཏེ་ཕྱི་རོལ་ཏུ་བྱུང་ནས་ཏ་ལ་ལ་ཚབས་བྱེད་པ་ལ་ཞུགས་པ་དང ། ལ་ལས་ནི་ཏ་ལ་གཅིག་ཕིགས་སོ། །ལ་ལས་ནི་གཉིས་སོ། །ལྷ་སྦྱིན་གྱིས་ནི་གསུམ་མོ། །བྱང་ཆུབ་སེམས་དཔས་ལྕགས་མདའ་འཕངས་པ་དང ། ཤིང་ཏ་ལ་བདུན་ཕིགས་པ་ལས་ཇི་སྲིད་རླུང་གིས་བསྐྱོད་དེ་ཐམས་ཅད་འགྱེལ་བའི་བར་དུ་རྒྱ་ཆེར་སྦྱར་རོ། །དེ་ནས་གཙང་མའི་ལྷ་རྣམས་ཀྱིས་འབབ་ཆུ་རོ་ཧི་ཏ་ཀའི་འགྲམ་ན་ཤིང་དགེ་བའི་སྙིང་པོ་ཞེས་བྱ་བ་ཉི་མ་གཅིག་ཅིང་ཁྲུ་བརྒྱར་སྐྱེ་བ་མཚན་མོ་ནི་སེན་མོས་ཀྱང་གཅད་དུ་རུང་ལ་ཉིན་པར་ནི་མཚོན་གྱིས་ཀྱང་གཅད་པར་མི་ནུས་བ་ཞིག་ཡོད་པ་དང ། གནས་གཙང་མ་པའི་ལྷ་རྣམས་ཀྱིས་གང་གིས་ཤིང་དགེ་བའི་
29a
༄#། །སྙིང་པོ་རྩ་བ་སྟེང་དུ་བཏོན་ནས་རོ་ཧི་ཏ་ཀའི་ནང་དུ་བཅུག་པ་དེ་ལྟ་བུའི་རླུང་དང་ཆར་དྲག་ཅིག་སྤྲུལ་ཏོ། །དེ་རྒྱལ་པོ་ཟས་གཙང་མ་དང ། ལེགས་པར་རབ་སང་ཀྱིས་ཐོས་ནས་ཤིང་འདིར་གྲོང་ཁྱེར་བརླག་པར་མ་གྱུར་ཏམ་སྙམ་ནས་སྲོག་ཆགས་བརྒྱ་སྟོང་དཔག་ཏུ་མེད་པ་དང ། ཤིང་དགེ་བའི་སྙིང་པོ་གང་ན་བ་དེར་སོང་སྟེ་ཕྱིན་པ་དང ། འཁོར་བརྒྱ་སྟོང་དཔག་ཏུ་མེད་པས་དྲངས་སུ་ཟིན་ཀྱང་ཅི་ཙམ་དུ་བསྐྱོད་པར་ཡང་མ་ནུས་སོ། །འཆར་ཀས་སྨྲས་པ། ལྷ།་བྱང་ཆུབ་སེམས་དཔའ་སྦྲོན་ཅིག་།རྒྱལ་པོས་སྨྲས་པ། ཁོ་བོས་གཞོན་ནུ་ལ་བཀའ་སྩོལ་བར་མི་ནུས་སོ། །འཆར་ཀས་སྨྲས་པ། ཁྱེད་རྣམས་ཀྱིས་ཅ་ཅོའི་སྒྲ་གསང་མཐོན་པོ་སྒྲོགས་ཤིག་།ཅི་ནས་ཀྱང་ངས་བྱང་ཆུབ་སེམས་དཔའ་གཤེགས་པར་བྱའོ། །དེ་ནས་སྐྱེ་བོའི་ཚོགས་དེ་རྣམས་ཀྱིས་སྒྲ་གསང་མཐོན་པོ་དང་ཆེན་པོས་ཅ་ཅོའི་སྒྲ་བསྒྲགས་སོ། །འཆར་ཀ་བྱང་ཆུབ་སེམས་དཔའི་ཐད་དུ་སོང་བ་དང།་བྱང་ཆུབ་སེམས་དཔས་སྨྲས་པ། འཆར་ཀ་།ཅ་ཅོའི་སྒྲ་འདི་ཅི་ཞིག་ཡིན། འཆར་ཀས་རྣམ་པ་དེ་དག་རྒྱ་ཆེར་གསོལ་ཏོ། །དེ་ནས་བྱང་ཆུབ་སེམས་དཔས་གསུངས་པ།་གལ་ཏེ་དེ་ལྟར་ན་འབྱིན་དུ་འདོང ། དེ་ནས་འཆར་ཀ་དང ། བྱང་ཆུབ་སེམས་དཔའ་ཆས་པ་དང ། ཅི་ཙམ་ན་ཁུང་ནས་སྤྲུལ་གདུག་པ་ཞིག་བྱུང་ངོ ། །འཆར་ཀས་བྱང་ཆུབ་
29b
སེམས་དཔའ་ཟིན་པར་གྱུར་དུ་འོང་ངོ་ཞེས་རལ་གྲི་རྣོན་པོས་རྐེད་པ་བཅད་པ་དང ། སྦྲུལ་གྱི་དུག་གི་དབུགས་ཀྱིས་འཆར་ཀ་ལ་ཕོག་སྟེ་དེ་ནག་པོར་གྱུར་ནས་དེའི་མིང་ཡང་འཆར་ཀ་ནག་པོ་ཞེས་བྱ་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཤིང་དགེ་བའི་སྙིང་པོ་གང་ན་བ་དེར་བཞུད་དེ་ཕྱིན་པ་དང ། ལྷ་སྦྱིན་ལ་གསུངས་པ། ཁྱོད་ཀྱི་སྟོབས་ཅི་ཙམ་པ་བལྟ་ཡིས་བསྐྱོད་ཅིག་།ལྷ་སྦྱིན་གྱིས་འབད་དེ་ཅུང་ཟད་ཅིག་བསྐུལ་ཏོ། །དགའ་བོས་ནི་ཅུང་ཟད་དྲངས་སོ། །ཇི་ཙམ་ན་བྱང་ཆུབ་སེམས་དཔའ་སྟོབས་ཀྱི་ཉམས་སད་པར་མཛད་ཅིང་ཤིང་དགེ་བའི་སྙིང་པོ་ཕྱག་གིས་བླངས་ཏེ་འབབ་ཆུ་རོ་ཧི་ཏ་ཀའི་འགྲམ་ནས་འཕངས་ཏེ་བྱང་ཆུབ་སེམས་དཔས་གསུངས་པ། ཤེས་ལྡན་དག་།ཤིང་དགེ་བའི་སྙིང་པོ་འདི་ནི་བསིལ་བའི་རང་བཞིན་ཡིན་པས་མཁྲིས་པའི་ནད་དང ། ཤུ་བ་དང ། ཕོལ་མིག་བྱུང་བ་ལ་ཕྱུགས་ན་ཞི་བར་འགྱུར་གྱི་དུམ་བུར་བྱོས་ལ་ཁྱེར་ཏེ་རང་རང་གི་ཁྱིམ་དུ་ཞོག་ཅིག་།ཡང་ཡངས་པ་ཅན་དུ་གླང་པོ་ཆེ་རིན་པོ་ཆེ་ཞིག་སྐྱེས་པ་དང ། དེ་ནས་ཡངས་པ་ཅན་གྱི་ལི་ཙ་བཱི་རྣམས་ཀྱིས་གླང་པོ་ཆེ་མཚན་དང་ལྡན་པ་ཞིག་རྙེད་ནས་དེ་རྣམས་ཀྱིས་བསམས་པ། རྒྱལ་པོ་ཟས་གཙང་གི་སྲས་མཚན་མཁན་རྣམས་ཀྱིས་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་པ་དེའི་མཐུས་གླང་པོ་ཆེ་རིན་པོ་ཆེ་འདི་བྱུང་གི་།དོང་ལ་དེ་ཁོ་ན་ལ་དབུལ་
30a
༄#། །ལོ་སྙམ་མོ། །དེ་རྣམས་ཀྱིས་གླང་པོ་ཆེ་དེ་རྒྱན་ཐམས་ཅད་ཀྱིས་བརྒྱན་ནས་ཁྲིད་དེ་དོང་བ་ལས་རིམ་གྱིས་སེར་སྐྱའི་གཞིར་རྒྱལ་པོའི་ཕོ་བྲང་གི་སྒོར་གླང་པོ་ཆེའི་དམ་པ་བཞག་ནས་སྡོད་པ་དང ། མ་སྟེས་ཏེ་གདུག་པའི་ལས་ཅན་ལྷ་སྦྱིན་ཕྱིར་བྱུང་བ་དེས་གླང་པོ་ཆེའི་དམ་པ་དེ་དེ་ལྟར་རྒྱན་གྱིས་བརྒྱན་པར་མཐོང་ནས་དེ་དེས་ཕྲག་དོག་ཆེན་པོ་སྐྱེས་ཏེ།་དེ་ཕྲག་དོག་དང་མི་བཟོད་པ་སྐྱེས་པས་དྲིས་པ། གླང་པོ་ཆེའི་དམ་པ་འདི་སུའི་ཡིན། དེ་རྣམས་ཀྱིས་སྨྲས་པ། གཞོན་ནུ་ཤཱཀྱ་ཐུབ་པ་མཚན་མཁན་རྣམས་ཀྱིས་འཁོར་ལོས་བསྒྱུར་བའི་རྒྱལ་པོར་ལུང་བསྟན་པ་དེ་ལ་ཡངས་པ་ཅན་གྱི་ཚོགས་རྣམས་ཀྱིས་གླང་པོ་རིན་པོ་ཆེ་འདི་སྐྱེས་སུ་ཕུལ་ལོ། །ལྷ་སྦྱིན་ལྷག་པར་མི་བཟོད་པ་སྐྱེས་ནས་སྨྲས་པ། རེ་ཞིག་དེ་འཁོར་ལོས་བསྒྱུར་བར་མ་གྱུར་པར་ཇེ་ཁྱེད་ཅག་གླང་པོ་རིན་པོ་ཆེ་འབུལ་ལམ་ཞེས་སྨྲས་ནས་ཐལ་ལྕག་གིས་གླང་པོ་ཆེ་བསད་དོ། །ཇི་ཙམ་ན་ཕྱོགས་དེར་དགའ་བོ་འོངས་པ་དེས་དེ་མཐོང་ནས་དྲིས་པ། ཤེས་ལྡན་དག་།གླང་པོ་ཆེ་བཟང་པོ་འདི་སུས་བསད། དེ་རྣམས་ཀྱིས་སྨྲས་པ། ལྷ་སྦྱིན་གྱིས་སོ། །དེས་བསམས་པ། གདོན་མི་ཟ་བར་འདི་ལ་ལྷ་སྦྱིན་གྱི་མཐུ་སད་ཀྱི། མ་ལ། བདག་གིས་ཀྱང་འདི་ལ་མཐུ་སད་པར་བྱའོ་སྙམ་ནས་མཇུག་མ་ནས་བཟུང་སྟེ་གོམས་པ་བདུན་དུ་བོར་རོ། །ཇི་ཙམ་ན་བྱང་ཆུབ་སེམས་དཔའ་ཤཱཀྱ་
30b
ཐུབ་པ་ཕྱིར་བྱུང་བ་དེས་དེ་གཟིགས་ནས་དྲིས་པ། གླང་པོ་ཆེ་འདི་གང་ནས་འོངས། དེ་རྣམས་ཀྱིས་ཇི་ལྟར་གྱུར་པ་སྨྲས་སོ། །སུས་བསད། ལྷ་སྦྱིན་གྱིས་སོ། །མགྲོན་རྣམས་ལ་མགྲོན་གྱི་མཆོད་པ་བྱ་བ་ཡིན་ན་མ་ལེགས་པ་ཞིག་བྱས་སོ། །ཕྱོགས་གང་དུ་བསད། ཕ་གིར་རོ། །འདིར་སུས་དྲུད། དགའ་བོས་སོ། །དེས་དགོངས་པ། འདིར་གདོན་མི་ཟ་བར་དེ་གཉིས་ཀྱིས་འདི་ལ་མཐུ་སད་ཀྱི། མ་ལ། ངས་ཀྱང་འདི་ལ་མཐུ་སད་པར་བྱའོ་སྙམ་དུ་དགོངས་ནས་མཇུག་མ་ནས་བཟུང་སྟེ་ར་བའི་ཁར་འཕངས་པ་ལས་ར་བ་རིམ་པ་བདུན་དང ། འོབས་རིམ་པ་བདུན་ལས་འདས་ཏེ་བོར་རོ། །དེ་ལྷུང་བས་གཤོང་བཏོད་པ་གླང་པོ་ཆེའི་བཤོང ། གླང་པོ་ཆེའི་གཤོང་ཞེས་བྱ་བར་གྱུར་ཏོ། །འདིར་སྨྲས་པ། ལྷ་སྦྱིན་གྱིས་ནི་གླང་ཆེན་དབང་པོ་བསད། ། དགའ་བོས་དེ་ནི་གོམ་པ་བདུན་དུ་དྲུད། །བྱང་ཆུབ་སེམས་དཔས་ཕྱག་གིས་བར་སྣང་ལ། །རྡོ་བ་བཞིན་དུ་ཕྱི་རོལ་རྒྱང་རིང་འཕངས། །མཚན་མཁན་རྣམས་ཀྱིས་ལུང་བསྟན་པ། གལ་ཏེ་གཞོན་ནུ་ལོ་བཅུ་གཉིས་ཀྱི་བར་དུ་རབ་ཏུ་མ་བྱུང་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། མ་ལ། བདག་གིས་འདི་ལ་འདོད་པའི་ཡོན་ཏན་ལྔ་ཕལ་པོ་ཆེ་བྱིན་ན་དེ་ལྟར་ན་ནི་དེ་རྣམས་ལ་དགའ་བས་རབ་ཏུ་འབྱུང་བར་མི་འགྱུར་རོ་སྙམ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའི་མདུན་དུ་གོས་
31a
༄#། །དང།་རྒྱན་གྱི་ཕུང་པོ་བཞག་ནས་སྨྲས་པ། དེང་ཁྱེད་ཀྱིས་ཤཱཀྱའི་བུ་མོ་རྣམས་ལ་རྒྱན་དང ། གོས་རྣམས་བྱིན་ཅིག་།དེ་ནས་རྒྱལ་པོ་ཟས་གཙང་གིས་སེར་སྐྱའི་གྲོང་ཁྱེར་དུ་དེང་གཞོན་ནུ་གོས་དང ། རྒྱན་རྣམས་སྟེར་བར་འགྱུར་གྱི། ཤཱཀྱའི་བུ་མོ་ཐམས་ཅད་ཤོག་ཅིག་ཅེས་དྲིལ་སྒྲོག་ཏུ་བཅུག་གོ་།དེ་ནས་ཤཱཀྱའི་གཞོན་ནུ་མ་ལྔ་བརྒྱ་འོངས་པ་དང ། ཐམས་ཅད་ལ་བྱང་ཆུབ་སེམས་དཔས་གོས་དང ། རྒྱན་རྣམས་བྱིན་ནོ། །དེ་ནས་ཤཱཀྱ་དབྱིག་པ་ཅན་ལ་གྲགས་འཛིན་མ་ཞེས་བྱ་བའི་བུ་མོ་ཡོད་པ་དག་།དེས་དེ་ལ་སྨྲས་པ། ཁྱེད་ལ་ཡང་གཞོན་ནུ་གོས་དང ། རྒྱན་རྣམས་སྟེར་བར་འགྱུར་གྱི་སོང ། དེ་ནས་གྲགས་འཛིན་མ། ཅི། བདག་ལ་བྱང་ཆུབ་སེམས་དཔའ་ལས་གཞན་སུ་ཞིག་ཁྱོར་འགྱུར་སྙམ་དུ་བསམས་ནས་བྱང་ཆུབ་སེམས་དཔའི་ཐད་དུ་སོང་བ་དང ། ཅི་ཙམ་ན་གོས་དང ། རྒྱན་ཐམས་ཅད་བྱིན་ཟིན་ནས་ཅིའང་མ་ལུས་པ་དང ། དེས་བྱང་ཆུབ་སེམས་དཔའི་མགུལ་ན་ཤིན་ཏུ་མཛེས་ཤིང་རིན་ཆེ་བའི་མུ་ཏིག་ཕྲེང་གཅིག་ལུས་པ་མཐོང་ནས་དེ་དེ་ལ་དགའ་བས་བག་འཁུམ་པ་མེད་པར་རང་ཉིད་ཀྱིས་བཀྲོལ་ཏེ་རང་གི་མགུལ་དུ་བཏགས་ནས་བྱང་ཆུབ་སེམས་དཔའི་ཐད་ནས་སོང་ངོ ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ་བུ་མོ་འདི་ཕེབས་ཤིང་བརྟན་པ་ལས་ན་འདིས་གཞོན་ནུའི་ཐུགས་དང་བསྟུན་པར་ནུས་ཀྱི་འདི་བླང་བར་བྱའོ་
31b
སྙམ་དུ་བསམས་ནས། གྲགས་འཛིན་མ་བུད་མེད་ཀྱི་འཁོར་ཉི་ཁྲི་དང་བྱང་ཆུབ་སེམས་དཔའི་བཙུན་མོར་བླངས་སོ། །རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་སྨྲས་པ། སོང་ལས་ཀྱི་མཐའ་ཅི་ཙམ་པ་ལ་ལྟོས་ཤིག་།དེ་ནས་བྱང་ཆུབ་སེམས་དཔའ་རྒྱལ་པོ་ཟས་གཙང་མས་བསྒོ་བ་གསན་ཏེ་ཤིང་རྟ་བཟང་པོ་ལ་ཞུགས་ནས་ཕྱི་རོལ་ཏུ་གཤེགས་ཏེ། ཡབ་རྒྱལ་པོ་ཟས་གཙང་མའི་ལས་ཀྱི་མཐའ་གཟིགས་ཤིང་བྱང་ཆུབ་སེམས་དཔའ་ལས་ཀྱི་མཐའ་ལ་ཞུགས་པ་རྣམས་ཀྱི་གན་དུ་བྱོན་པ་དང ། བཤོལ་ལྔ་བརྒྱ་དང ། ཞིང་རྨེད་ཅིང་ཞིང་པའི་མི་དེ་རྣམས་ཀྱིས་ཀྱང་གཤོལ་གནོན་ཅིང་འདྲེན་པས་སྟོབས་ཉེ་བར་ཉམས་པ་མགོ་ལུས་རྡུལ་གྱིས་ཡོག་པ་དང ། རླུང་དང ། ཐན་པས་ལུས་ལ་གདུངས་པས་ལུས་རྩུབ་ཅིང་མདོག་ངན་པ། རྐང་པ་དང ། ལག་པ་གས་པ་དང ། དེངས་ཤིང་དྲི་མ་ཅན་གྱི་གོས་གྱོན་པ། རྐང་པ་དྲི་མ་ཅན། ལྟོགས་པ་དང ། སྐོམ་པས་མདོག་ངན་ཞིང ། ལྐོག་མ་དང ། མཁུར་བ་དང ། མིག་གི་ལོགས་སྐམས་བ་དང ། གླང་དེ་རྣམས་ཀྱང་རྨོན་པ་ལྕགས་གཟེར་རྣོན་པོ་ཅན་གྱིས་ལུས་བྲལ་བས་རྒྱབ་དང ། མཇུག་ངོའི་ཕྱོགས་ཁྲག་གིས་ཡོག་པ། ལྟོགས་པ་དང ། སྐོམ་པས་དབུགས་བརྩེགས་ཤིང་སྙིང་གའི་ཕྱོགས་ནས་དབུགས་བརྩེགས་པ་རིང་དུ་འདྲེན་ལ། གཉའ་ཤིང་གིས་མནན་པའི་རྨ་ལས་རྣག་ཁྲག་འཛག་པ་ལ་སྦྲང་བུ་དང ། འབུའི་ཚོགས་ཀྱིས་ཟ་བ། ཐོང་ལྕགས་
32a
༄#། །ཀྱིས་རྐང་པ་ལ་རྨ་བྱུང་ཞིང ། ཁ་དང ། སྣ་ནས་ཁ་ཆུ་དང ། སྣ་ཆུ་འཛག་པ་ལ་སྦྲང་མ་དང ། ཤ་སྦྲང་དང ། སྦྲང་བུ་མཆུ་རིང་གིས་ཡོག་པ་རྣམས་གཟིགས་སོ། ། གཟིགས་ནས་ཀྱང་ཐོག་མ་མེད་པའི་དུས་ནས་བསོད་ནམས་བསྐྱེད་ཅིང་བསགས་པའི་ཐུགས་རྗེས་ཀུན་ནས་བསྐྱོད་པའི་ཐུགས་ཀྱིས་ཞིང་པ་རྣམས་ལ་འདི་སྐད་ཅེས་གསུངས་སོ། ། ཤེས་ལྡན་དག་།ཁྱེད་སུའི་ཡིན། དེ་རྣམས་ཀྱིས་གསོལ་པ། བྱང་ཆུབ་སེམས་དཔའི་ལགས་སོ། །དེས་གསུངས་པ། ཤེས་ལྡན་དག། ཁྱེད་དེང་ཕན་ཆད་བྲན་དུ་མི་བྱ། མངག་གཞུག་པར་མི་བྱ། རང་དབང་ཅན་གར་དགའ་བར་འགྲོ་བར་བྱས། བདེ་བ་ལ་རེག་པར་གནས་ཤིག་།རྨོན་པ་རྣམས་ཀྱང་བཀྲོལ་ནས་གསུངས་པ། ཁྱེད་ཅག་ཀྱང་དེང་ཕན་ཆད་རྩཝ་མཆོག་མ་ཉམས་པ་ཟ་ཞིང་ཆུ་མ་རྡུལ་མ་བརྙོགས་ཤིང་དང་བ་དག་ལ་འཐུངས་ཤིག་།ཁྱེད་ལ་ཕྱོགས་བཞི་ནས་ཀྱང་རླུང་བསིལ་བ་ལྡང་བར་གྱུར་ཅིག་།དེ་ནས་བྱང་ཆུབ་སེམས་དཔའ་ཡིད་བྱུང་བ་དེ་ཉིད་ཀྱིས་ཡབ་ཤཱཀྱ་ཟས་གཙང་གི་ཞིང་སླས་ཀྱི་མཐའ་ལ་གཟིགས་ནས་སྣུམ་ཞིང་སྔོ་ལ་འདབ་མ་མཐུག་ཅིང་གྲིབ་མ་བཟང་པོ་དང་ལྡན་པའི་ཛམྦུའི་ཤིང་གི་གྲིབ་མ་གང་ན་བ་དེར་གཤེགས་ཏེ་བྱོན་ནས་ཤིང་ཛམྦུའི་གྲིབ་མ་ལ་བཞུགས་ཏེ། འདོད་པ་ལས་དཔེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་
32b
དཔྱོད་པ་དང་བཅས་ཤིང་དབེན་པ་ལས་སྐྱེས་པའི་དགའ་བ་དང ། བདེ་བ་ཟག་པ་མེད་པ་དང་འདྲ་བའི་བསམ་གཏན་དང་པོ་ལ་སྙོམས་པར་ཞུགས་སོ། །སྐྱེ་བོའི་ཚོགས་ཆེན་པོ་འང་བྱང་ཆུབ་སེམས་དཔའ་སྤངས་ཏེ་མི་འགྲོ་བར་ཤིང་གཞན་རྣམས་ཀྱི་དྲུང་ན་སྡོད་དོ། །རྒྱལ་པོ་ཟས་གཙང་གིས་བསམས་པ། བྱང་ཆུབ་སེམས་དཔའ་རིང་ཞིག་ཐོགས་ཏེ་འདི་ལྟར་དྲོའི་དུས་ལས་ཡོལ་གྱི་བལྟར་འགྲོའོ་ཞེས་དེ་ཤིང་རྟར་ཞུགས་ནས་ཞིང་པའི་གྲོང་དུ་སོང་སྟེ་ཕན་ཚུན་དུ་བྱང་ཆུབ་སེམས་དཔའ་ཚོལ་ཞིང་ཤིང་ཛམྦུའི་དྲུང་དུ་ཕྱིན་ཏོ། །དེའི་ཚེ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ཏོ། །བྱང་ཆུབ་སེམས་དཔའི་མཐུས་ཤིང་ཛམྦུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་ངོ ། །རྒྱལ་པོ་ཟས་གཙང་གིས་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ནི་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ན། ཤིང་ཛམྦུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། གཞོན་ནུ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། འདི་ལྟར་དུ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ནི་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ན། ཤིང་ཛམྦུའི་གྲིབ་མ་ནི་
33a
༄#། །བྱང་ཆུབ་སེམས་དཔའི་སྐུ་མི་གཏོང་བ་ངོ་མཚར་ཆེའོ་སྙམ་མོ། །དེ་ནས་དགའ་བའི་བསྟི་སྟང་བྱས་ཏེ་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་ཚིགས་སུ་བཅད་དེ་སྨྲས་པ། ཇི་ལྟར་བལྟམས་ཚེ་ས་ནི་གཡོས་པ་ལྟར། །ཛམྦུའི་གྲིབ་མ་ཁྱོད་སྐུ་མི་གཏོང་བ། །བློ་ཆེན་ཁྱོད་ཀྱི་ཡ་མཚན་གཉིས་འདི་སྟེ། །ཀུན་གཟིགས་ཁྱོད་ཀྱི་ཞབས་ལ་ཕྱག་འཚལ་ལོ། །དེ་ནས་བྱང་ཆུབ་སེམས་དཔའ་ཏིང་ངེ་འཛིན་དེ་ལས་བཞེངས་ནས་ཤིང་རྟར་ཞུགས་པ་དང ། ཇི་ཙམ་ན་གཏེར་སྐྱོང་བ་སྐྲ་དང ། ཁ་སྤུ་དང ། སེན་མོ་རིང་བ་གཏེར་ཐོགས་ཏེ་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ། །ལྷ། གཏེར་འདི་རྣམས་བཞེས་ཤིག། བྱང་ཆུབ་སེམས་དཔས་གསུངས་པ། འདི་གང་གི། ལྷ། སྐྱེས་བུ་གང་ཞིག་དུས་ལས་འདས་པ་དེ་རྣམས་ཀྱི་ལགས་སོ། །བྱང་ཆུབ་སེམས་དཔས་གསུངས་པ། འདི་རྣམས་ཀྱིས་ཆོག་གི།་རེ་ཞིག་དེ་རྣམས་ཀྱི་བླུན་པོ་ཡོངས་སུ་གཟུང་བ་བྱས་ནས་ཅི་ཞིག་བྱས། ཁྱེད་ང་ལ་དགོས་པ་མེད་ཀྱིས་སོང་ཞིག། ཚིགས་སུ་བཅད་པས་ཀྱང་གསུངས་པ། གང་གིས་ང་ལ་འཆི་བའི་གཏམ་སྨྲས་པ། །དེ་དག་ཀྱང་ཤི་གཏམ་དུ་གྱུར་པ་ཡིན། །བདག་ཀྱང་ཤི་ནས་རིང་པོར་མི་ཐོགས་པར། །གཞན་དག་གི་ཡང་གཏམ་དུ་འགྱུར་བར་འོང ། །དེ་རྣམས་ཀྱིས་
33b
ཡང་སྒྲ་ཕྱུང་བ། གཞོན་ནུ། གལ་ཏེ་མི་བཞེས་ན་བདག་ཅག་རྒྱ་མཚོ་ཆེན་པོར་འཇུག་གོ་།བྱང་ཆུབ་སེམས་དཔས་ཅི་བདེ་བར་ཞུགས་ཤིག་ཅེས་གསུངས་པ་དང ། དེ་རྣམས་རྒྱ་མཚོ་ཆེན་པོའི་ནང་དུ་ཞུགས་སོ། །དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་བསྒྲུབ་པར་བྱ་དགོས་ཏེ། འདི་ལྟར་རྒྱུའི་སྟོབས་ཆེན་པོའང་རྐྱེན་གྱི་སྟོབས་ལ་ལྟོས་སོ། །སྙམ་ནས་བྱང་ཆུབ་སེམས་དཔའ་དུར་ཁྲོད་ཀྱི་ནང་ནས་གཤེགས་པ་ན། ལྷ་རྣམས་ཀྱིས་མི་རོ་རྣམ་པར་སྔོས་པ་དང ། རྣམ་པར་རྣགས་པ་དང ། རྣམ་པར་འབུས་གཞིགས་པ་དང ། རྣམ་པར་བམ་པ་དང ། རྣམ་པར་ཟོས་པ་ཞིག་བསྟན་པ་དང ། བྱང་ཆུབ་སེམས་དཔས་གཟིགས་ནས་སྐྱོ་བ་འཁྲུངས་སོ། །དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལམ་གཞན་ནས་གྲོང་ཁྱེར་སེར་སྐྱའི་གཞིར་འཇུག་པར་བྱས་སོ། །དེ་ནས་གྲོང་ཁྱེར་སེར་སྐྱའི་གཞིའི་བུད་མེད་ཀྱི་ཚོགས་སྐར་ཁུང་དང ། སྐར་ཁུང་དྲ་བ་ཅན་དང ། བ་གམ་དག་ན་བྱང་ཆུབ་སེམས་དཔའ་ལ་ལྟ་ཞིང་འདུག་པ་དང ། ཤཱཀྱ་དུས་ལེགས་ཀྱི་བུ་མོ་ས་འཚོ་མ་ཞེས་བྱ་བ་སྟེང་གི་ཁང་བཟང་གཞི་ལ་འདུག་པ་བྱང་ཆུབ་སེམས་དཔའ་ལ་རྟོག་པ་ན་རྐང་པའི་མཐེ་བོས་ས་ལ་བརྐོས་ཏེ་ཁྲག་བྱུང་ཡང་མཚོར་རོ། །བྱང་ཆུབ་སེམས་དཔའ་ཡང་ས་འཚོ་མ་ལ་གཟིགས་པ་ན་ཕྱག་
34a
༄#། །གཡས་ཀྱིས་མདའ་ཕྱེ་མར་བརླགས་སོ། །ཁ་ལོ་པས་ལྕགས་མདའ་ཕུལ་བ་དང་དེ་ཡང་ཕྱེ་མར་བརླགས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། འདིས་ནི་གཞོན་ནུའི་ཐུགས་དང་བསྟུན་པར་ནུས་སོ་སྙམ་མོ། །དེ་ནས་ཁ་ལོ་བསྒྱུར་བས་ཤིང་རྟ་དྲངས་པ་དང ། ཤཱཀྱ་དྲིལ་བུ་སྒྲའི་བུ་མོའི་རི་དྭགས་སྐྱེས་ཞེས་བྱ་བས་བྱང་ཆུབ་སེམས་དཔའ་ཤིང་རྟར་ཞུགས་ཏེ་བྱོན་པ་མཐོང་བ་དང ། ཡང་སྟེང་གི་ཁང་བཟང་གི་གཞི་ལ་འདུག་ནས་ཚིགས་སུ་བཅད་དེ་སྨྲས་པ། ཀྱེ་མ་འདི་ཡི་ཡུམ་བདེ་ཞིང ། ། ཡབ་ཀྱང་ཤིན་ཏུ་བདེ་བ་ཡིན། །ཀྱེ་མ་གང་གི་ཁྱིམ་ཐབ་གྱུར། །བུད་མེད་དེ་ཡང་མྱ་ངན་འདས། །སྐྱེས་མཆོག་བསམ་གཏན་པ་དེ་ཡིས། །མྱ་ངན་འདས་པའི་སྒྲ་གསན་ནས། །མྱ་ངན་འདས་པ་ཞི་ཉིད་དུ། །མཁྱེན་ནས་དེ་ལ་ཐུགས་དགྱེས་གྱུར། །དེ་ནས་བྱང་ཆུབ་སེམས་དཔས་མྱ་ངན་ལས་འདས་པའི་སྒྲ་གསན་པས་རི་དྭགས་སྐྱེས་ལ་དགྱེས་ཏེ་མགུལ་ནས་མུ་ཏིག་ཕྲེང་ཅིག་ཕོག་སྟེ། འཕངས་ནས་ཤིང་རྟ་དེ་ལ་བསམ་གཏན་ལ་སྙོམས་པར་ཞུགས་པར་མཛད་དོ། །ཕྲེང་བ་དེའང་དེའི་མགུལ་དུ་འཁྲིས་པར་གྱུར་ཏོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། འདིས་ནི་བྱང་ཆུབ་སེམས་དཔའི་ཐུགས་དང་བསྟུན་པར་ནུས་སོ་སྙམ་ནས་ས་འཚོ་མ་བུད་མེད་ཉི་ཁྲིས་སྐོར་བ་དང ། རི་དྭགས་སྐྱེས་ཀྱང་
34b
བུད་མེད་ཉི་ཁྲིས་སྐོར་བ་བྱང་ཆུབ་སེམས་དཔའི་བཙུན་མོར་བླངས་སོ། །དེ་ལྟར་ན་གྲགས་འཛིན་མ་དང ། ས་འཚོ་མ་དང ། རི་དྭགས་སྐྱེས་ལ་སོགས་པ་བཙུན་མོ་སྟོང་ཕྲག་དྲུག་ཅུ་བྱུང་བར་གྱུར་ཏོ། །མཚན་མཁན་རྣམས་ཀྱིས་གལ་ཏེ་བྱང་ཆུབ་སེམས་དཔའ་ལོ་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། མ་ལ། བདག་གིས་བྱང་ཆུབ་སེམས་དཔའ་ལ་འདོད་པའི་ཡོན་ཏན་ལྔ་ལས་ཕལ་པོ་ཆེ་ཞིག་སྦྱིན་པར་བྱའོ་སྙམ་ནས་ཕལ་པོ་ཆེ་བྱིན་ནོ། །མཚན་མཁན་གྱིས་གལ་ཏེ་བྱང་ཆུབ་སེམས་དཔའ་ཟླ་བ་བདུན་གྱི་བར་དུ་རབ་ཏུ་མ་བྱུང་ན་གདོན་མི་ཟ་བར་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་འདོད་པའི་ཡོན་ཏན་ལྔ་ཤིན་ཏུ་འང་མང་དུ་བྱིན་ཏེ། འདི་ལྟར་ཡང་འདི་ལ་མངོན་པར་དགའ་བས་རབ་ཏུ་འབྱུང་བར་མི་འགྱུར་རོ་སྙམ་མོ། །ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་བཞེད་པར་གྱུར་པ་དེའི་ཚེ་ཁ་ལོ་སྒྱུར་བ་ལ། ཀྱེ།་ཁ་ལོ་སྒྱུར་བ། རེ་ཞིག་བཞོན་པ་བཟང་པོ་མྱུར་བར་ཤོམས་ཤིག་དང ། དེར་ཞུགས་ནས་སྐྱེད་མོས་ཚལ་གྱི་གཞིར་འགྲོའོ་ཞེས་གསུང་པར་འགྱུར་བས། དེ་ནས་བྱང་ཆུབ་སེམས་དཔས་ཁ་
35a
༄#། །ལོ་སྒྱུར་བ་ལ་བསྒོ་བ། ཀྱེ། ཁ་ལོ་སྒྱུར་བ། རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང ། དེར་ཞུགས་ནས་སྐྱེད་མོས་ཚལ་གྱི་གཞིར་འགྲོའོ། །ལྷ། བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་མྱུར་དུ་བཤམས་ཏེ་བྱང་ཆུབ་སེམས་དཔའ་ཤཱཀྱ་ཐུབ་པ་ག་ན་བ་དེར་སོང་ནས་ཕྱིན་པ་དང ། བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་སྨྲས་སོ། །ལྷ། བཅིབས་པ་བཟང་པོ་བཤམས་ལགས་ཀྱི། ལྷ། ད་དེའི་དུས་ལ་བབ་པར་དགོངས་སུ་གསོལ། དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ནས་སྐྱེད་མོས་ཚལ་གྱི་གཞིར་བྱུང་བ་དང ། བྱང་ཆུབ་སེམས་དཔའ་ཤཱཀྱ་ཐུབ་པས་མི་རྒས་འཁོགས་གཏུགས་པ། སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་བརྟེན་ཅིང་ལུས་འདར་ཞིང་འགྲོ་བ་དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ། མི་རྒས་འཁོགས་གཏུགས་པ། སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་བརྟེན་ཅིང་ལུས་འདར་ཞིང་འགྲོ་བ་དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་འདི་ཅི་ཡིན། ལྷ། མི་འདི་ནི་རྒས་པ་ཞེས་བགྱིའོ། །ཁ་ལོ་སྒྱུར་
35b
བ།་རྒས་པ་ཞེས་བྱ་བ་འདི་ཅི་ཡིན། ལྷ། མི་འདི་རིང་པོར་མི་ཐོགས་པ་ཁོ་ནར་འགུམ་པར་འགྱུར་བས་དེ་རྒས་པ་ཞེས་བགྱིའོ། །ཁ་ལོ་སྒྱུར་བ། ངའང་རྒ་བའི་ཆོས་དང ། རྒ་བའི་ཆོས་ཉིད་ལས་མ་འདས་སམ། ལྷའང་རྒ་བའི་ཆོས་དང ། རྒ་བའི་ཆོས་ཉིད་ལས་མ་འདས་སོ། །ཁ་ལོ་སྒྱུར་བ། དེའི་ཕྱིར་ཤིང་རྟ་ཕྱིར་སྒྱུར་ཅིག། ཕོ་བྲང་ཉིད་དུ་འདོང་ངོ ། །འདི་ལྟར་ང་ཕོ་བྲང་དུ་ཕྱིན་ནས་ང་རྒ་བ་ལས་མ་འདས་སོ་ཞེས་གྲགས་པའི་དོན་དེ་ཉིད་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ་དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་བྱོན་ནས་དེའང་རྒས་པ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། དར་ཡོལ་རྒས་ཤིང་སྒུར་ལ་མགོ་སྐྱ་བ། །ལག་ན་འཁར་བ་ཐོགས་པའི་མི་གཟིགས་ནས། །འདི་བདག་རྒས་ལས་མ་འདས་ཞེས་གྲག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ། ཅི་གཞོན་ནུ་ཡིད་དགའ་བ་དང ། མགུ་བས་སྐྱེད་མོས་ཚལ་གྱི་གཞིར་བྱུང་ངམ། སྐྱེད་མོས་ཚལ་ལ་མངོན་པར་དགའ་བའམ། ལྷ། མ་ལགས་སོ། ། དེ་ཅིའི་སླད་དུ་ཞེ་ན། ལྷ། གཞོན་ནུ་སྐྱེད་མོས་ཚལ་གྱི་གཞིར་གཤགས་པ་ནི། མི་རྒས་འཁོགས་གཏུགས་པ་སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་བརྟེན་
36a
༄#། །ཅིང་ལུས་འདར་ཞིང་མཆི་ལ། དེས་སྐྲ་སེ་བ་ཇི་ལྟར་ཡང་མི་གཞན་དག་དང་མི་འདྲ་བ་ཞིག་གཟིགས་སོ། །གཟིགས་ནས་ཀྱང་བདག་ལ་འདི་སྐད་ཅེས་བཀའ་སྩལ་ཏོ། །ཁ་ལོ་སྒྱུར་བ། མི་རྒས་འཁོགས་གཏུགས་པ་སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་བརྟེན་ཅིང་ལུས་འདར་ཞིང་འགྲོ་ལ། དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ། འདི་ནི་རྒས་པ་ཞེས་བགྱིའོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ། རྒས་པ་ཞེས་བྱ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ། མི་འདི་རིང་པོ་མི་ཐོགས་པ་ཁོ་ནར་འགུམ་པར་འགྱུར་བས། ལྷ། དེ་ནི་རྒས་པ་ཞེས་བགྱིའོ། ངེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ། ང་ཡང་རྒ་བའི་ཆོས་དང ། རྒ་བའི་ཆོས་ཉིད་ལས་མ་འདས་སམ། དེ་ལ་བདག་གིས་འདི་སྐད་ཅེས་གསོལ་ཏོ། །ལྷའང་རྒ་བའི་ཆོས་དང ། རྒ་བའི་ཆོས་ཉིད་ལས་མ་འདས་སོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ། དེའི་ཕྱིར་ཤིང་རྟ་ཕྱིར་སྒྱུར་ཅིག་།ཕོ་བྲང་ཉིད་དུ་འདོང་ངོ ། །འདི་ལྟར་ཕོ་བྲང་དུ་ཕྱིན་ནས་ང་རྒ་བ་ལས་མ་འདས་སོ་ཞེས་གྲགས་པའི་དོན་དེ་ཉིད་བསམ་པར་བྱའོ། །ལྷ། གཞོན་ནུ་དེ་ཕོ་བྲང་གི་ནང་དུ་གཤེགས་ཏེ། དེ་ནས་རྒ་བ་ལས་མ་འདས་པ་ལྟ་
36b
ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་དག་པར་བདེན་པར་མི་འགྱུར་གྲང ། གཞོན་ནུ་སྐྲ་དང་ཁ་སྤུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་འགྱུར་དུ་འོང་གི། མ་ལ། བདག་གིས་གཞོན་ནུ་ལ་འདོད་པའི་ཡོན་ཏན་ལྔ་ལས་ཕལ་པོ་ཆེ་ཞིག་བྱིན་ལ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱའོ་སྙམ་མོ། །དེ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདོད་པའི་ཡོན་ཏན་ལྔ་ལས་ཕལ་པོ་ཆེ་བྱིན་ཏེ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱས་སོ། །འདིར་སྨྲས་པ། ཁ་ལོ་སྒྱུར་བའི་ཚིག་དེ་ཐོས་པ་དང ། །གཞོན་ནུ་ལ་ནི་ཡབ་དེ་དོགས་བཞིན་དུ། །དེ་ཚེ་སླར་དགའ་ནགས་སུ་མི་འགྲོའི་ཕྱིར། །འདོད་པའི་ཡོན་ཏན་ལྔར་བཅས་མང་དུ་བྱིན། །དེ་ནས་ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་པར་བཞེད་པ་གྱུར་པ་དེའི་ཚེ་ཁ་ལོ་སྒྱུར་བ་ལ། ཀྱེ། ཁ་ལོ་སྒྱུར་བ། རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང ། དེ་ལ་ང་གཞོན་ནས་སྐྱེད་མོས་ཚལ་གྱི་གཞིར་འགྲོའོ་ཞེས་གསུངས་པར་འགྱུར་བས། དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་གསུངས་པ། ཀྱེ། ཁ་ལོ་སྒྱུར་བ།
37a
༄#། །རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་།དེ་ལ་ང་བཞོན་ནས་སྐྱེད་མོས་ཚལ་གྱི་གཞིར་གཤེགས་སོ། །ལྷ། བཀའ་བཞིན་འཚལ་ལོ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་བཤམས་ཏེ། བྱང་ཆུབ་སེམས་དཔའ་ཤཱཀྱ་ཐུབ་པ་གང་ན་བདེར་སོང་སྟེ་ཕྱིན་ནས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །ལྷ། བཅིབས་པ་བཟང་པོ་བཤམས་ལགས་ན། ལྷ། །དེའི་དུས་ལ་བབ་པར་དགོངས་སུ་གསོལ། དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ནས་སྐྱེད་མོས་ཚལ་གྱི་གཞིར་བྱུང་བ་དང ། བྱང་ཆུབ་སེམས་དཔའ་ཤཱཀྱ་ཐུབ་པས་མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ། མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་འདི་ཅི་ཡིན། ལྷ། འདི་ནི་བྲོ་ནད་ཀྱིས་ཐེབས་པ་ཞེས་བགྱིའོ། །ཁ་ལོ་སྒྱུར་བ། ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན། ལྷ། མི་འདི་གང་གིས་འགུམ་པར་འགྱུར་བའི་གནས་དེ་མཆིས་ཏེ། ལྷ། འདི་ནི་བྲོས་ཐེབས་བ་ཞེས་བགྱིའོ། །ཁ་ལོ་སྒྱུར་བ། ངའང་ནད་ཀྱི་ཆོས་
37b
དང།་ནད་ཀྱི་ཆོས་ཉིད་ལས་མ་འདས་སམ། ལྷའང་སྙུན་གྱི་ཆོས་དང ། སྙུན་གྱི་ཆོས་ཉིད་ལས་མ་འདས་སོ། ཁ་ལོ་སྒྱུར་བ། དེའི་ཕྱིར་ཤིང་རྟ་ཕྱིར་སྒྱུར་ཅིག་།ཕོ་བྲང་ཉིད་དུ་འདོང་ངོ ། འདི་ལྟར་ཕོ་བྲང་དུ་ཕྱིན་ནས་ང་ནད་ལས་མ་འདས་པ་ཞེས་བྱ་བའི་དོན་དེ་ཉིད་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ། དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་ནད་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། མི་ནི་ལུས་རིད་སྐྱ་བོ་རྦབ་རྦབ་པོ། །རང་དབང་མེད་པའི་ནད་ཐེབས་འདིར་གཟིགས་ནས། །ནད་ལས་བདག་མ་འདས་པ་ལྟ་ཞིག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ། ཅི་གཞོན་ནུ་ཡིད་དགའ་བ་དང ། མཐུ་བས་སྐྱེད་མོས་ཚལ་གྱི་གཞིར་བྱུང་ངམ་སྐྱེད་མོས་ཚལ་ལ་མངོན་པར་དགའ་བར་གྱུར་ཏམ། ལྷ།་མ་ལགས་སོ། །དེ་ཅིའི་སླད་དུ་ཞེ་ན། ལྷ།་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན། མི་སྐྱ་བོ་རྦབ་རྦབ་པོ་རིང་པ་ཉམ་ཆུང་བ་དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་ཞིག་གཟིགས་སོ། །གཟིགས་ནས་ཀྱང་བདག་ལ་བཀའ་སྩལ་པ། ཁ་ལོ་སྒྱུར་བ། མི་སྐྱ་བོ་རྦབ་རྦབ་པ་རིད་པ་ཉམ་ཆུང་བ་དབང་པོ་ཉམས་པ། སྐྱེ་བོ་
38a
༄#། །མང་པོའི་མིག་གིས་ལྟ་མི་ཕོད་པ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ། འདི་ནི་བྲོ་ནད་ཀྱིས་ཐེབས་པ་ཞེས་བགྱིའོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ། ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །མི་འདི་གང་གནོད་པ་འདིས་འགུམ་པའི་གནས་མཆིས་ཏེ།་ལྷ།་དེ་ནི་བྲོས་ཐེབས་པ་ཞེས་བགྱིའོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ། ང་ཡང་ནད་ཀྱི་ཆོས་དང ། ནད་ཀྱི་ཆོས་ཉིད་ལས་མ་འདས་སམ། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་ཡང་སྙུན་གྱི་ཆོས་དང ། སྙུན་གྱི་ཆོས་ཉིད་ལས་མ་འདས་སོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ། དེའི་ཕྱིར་ཤིང་རྟ་ཕྱིར་བསྒྱུར་ཅིག།་ཕོ་བྲང་ཉིད་དུ་འདོང་ངོ ། །འདི་ལྟར་ང་ཕོ་བྲང་ཉིད་དུ་ཕྱིན་ནས་ང་ནད་ལས་མ་འདས་ཞེས་གྲགས་པའི་དོན་དེ་ཉིད་བསམ་པར་བྱའོ། །གཞོན་ནུ་དེ་ཕོ་བྲང་གི་ནང་དུ་གཤེགས་ནས་ངའང་ནད་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། མཚན་མཁན་དང ། ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་དག་པར་བདེན་པར་མི་འགྱུར་གྲང་ཞེས་བྱ་བ་ལ་སོགས་པ་སྔ་མ་བཞིན་ནོ། །འདིར་སྨྲས་པ། དེ་ཚེ་དགའ་ནས་བདག་ངོར་མི་
38b
གཞུག་ཕྱིར། །གཟུགས་དང་སྒྲ་དང་དྲི་དང་རོ་རྣམས་དང ། །རེག་བྱ་ཡིད་དུ་འོང་བ་གཙོ་རྣམས་ཀྱི། །འདོད་པའི་ཡོན་ཏན་ལྔ་པོ་ཡང་བྱིན་ནོ། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་སྐྱེད་མོས་ཚལ་གྱིས་གཞིར་གཤེགས་པར་བཞེད་པར་གྱུར་པ་དེའི་ཚེ། ཁ་ལོ་སྒྱུར་བ་ལ་བཀའ་སྩལ་པ་ལ་སོགས་པ་སྔ་མ་བཞིན་ཏེ། བྱང་ཆུབ་སེམས་དཔའ་ཤཱཀྱ་ཐུབ་པས་རས་ཁ་དོག་སྣ་ཚོགས་ལས་བྱས་པའི་བླ་བྲེ་བྲེས་པ་དང ། ཁྱོགས་ཁྱེར་བ་དང ། མདུན་ནས་མེ་སྒྲོན་ཐོགས་པ་དང ། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང ། བུད་མེད་སྐྲ་བཤིག་པ་རྣམས་དུ་ཞིང་རྗེས་བཞིན་དུ་འབྲང་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ། རས་ཁ་དོག་སྣ་ཚོགས་ལས་བྱས་པའི་བླ་བྲེ་བྲེས་པ་དང ། ཁྱོགས་ཁྱེར་བ་དང ། མདུན་ནས་མེ་སྒྲོན་ཐོགས་པ་དང ། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང ། བུད་མེད་སྐྲ་བཤིག་པ་རྣམས་དུ་ཞིང་རྗེས་བཞིན་དུ་འབྲང་བ་འདི་ཅི་ཡིན། ལྷ། འདི་ནི་གུམ་པ་ཞེས་བགྱིའོ། །ཁ་ལོ་སྒྱུར་བ། ཤི་བ་ཞེས་བྱ་བ་འདི་ཅི་ཡིན། ལྷ། མི་འདིས་སླན་ཆད་སྡུག་པའི་ཕ་མ་མི་མཐོང་ཞིང ། བུ་ཕོ་དང ། བུ་མོ་དང ། བྲན་མོ་དང ། ལས་བགྱིད་པ་དང ། ཞོ་ཤས་འཚོ་བའི་མི་རྣམས་ཀྱང་མ་ལགས་ལ་དེ་དག་གིས་ཀྱང་སླན་ཆད་འདི་མི་མཐོང་བས། ལྷ། འདི་ནི་གུམ་པ་ཞེས་བགྱིའོ། །ཁ་
39a
༄#། །ལོ་སྒྱུར་བ། ངའང་འཆི་བའི་ཆོས་དང ། འཆི་བའི་ཆོས་ཉིད་ལས་མ་འདས་སམ། ལྷའང་འཆི་བའི་ཆོས་དང ། འཆི་བའི་ཆོས་ཉིད་ལས་མ་འདས་སོ། །ཁ་ལོ་སྒྱུར་པ། དེའི་ཕྱིར་ཤིང་རྟ་ཕྱིར་སྒྱུར་ཅིག་།ཕོ་བྲང་ཉིད་དུ་འདོང་ངོ ། །འདི་ལྟར་ང་ཕོ་བྲང་དུ་ཕྱིན་ནས་ང་འཆི་བ་ལས་མ་འདས་ཞེས་གྲག་པའི་དོན་དེ་ཉིད་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ་དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་འཆི་བ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། ཚེ་ཟད་པ་ཡིས་འདུ་ཤེས་བྲལ་གྱུར་ཅིང ། །སེམས་མེད་མི་ཡི་རོ་ཞིག་གཟིགས་ནས་ནི། །འཆི་ལས་བདག་མ་འདས་པ་ལྟ་ཞིག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །འདིར་སྨྲས་པ། གྲོང་ཁྱེར་དམ་པ་ལ་དཔལ་ལྡན་ཡིད་འོང་དེར། །ལྷ་ཡི་ལྷར་གྱུར་སྒྲོན་མ་དང་མཚུངས་པ། །འདོད་པའི་ཡོན་ཏན་ལྔ་པོས་ཀུན་དགྱེས་པ། །མིག་སྟོང་དགའ་བའི་ཚལ་ན་གནས་པ་བཞིན། །དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་ནི་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་བསྒྲུབ་པར་
39b
བྱ་དགོས་ཏེ། འདི་ལྟར་རྒྱུའི་སྟོབས་ཆེན་པོའང་རྐྱེན་གྱི་སྟོབས་ལ་ལྟོས་སོ་སྙམ་ནས། དེ་རྣམས་ཀྱིས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ། ལག་པ་ན་ལྷུང་བཟེད་ཐོགས་པ་ཞིག་བྱིམ་ནས་ཁྱིམ་དང ། ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་སྤྲུལ་ཏོ། །ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱིས་གཞིར་གཤེགས་པར་བཞེད་པར་གྱུར་པ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྐྱེད་མོས་ཚལ་གྱི་གཞིར་བྱུང་བ་དང ། བྱང་ཆུབ་སེམས་དཔའ་ཤཱཀྱ་ཐུབ་པས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ་ལག་པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང ། ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ། མི་སྐྲ་བྲེགས་ཤིང་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང ། ཁང་པ་ནས་ཁང་པར་རྒྱུ་ཞིང་འགྲོ་བ་འདིའི་གོས་ཀྱང་ཁ་དོག་མི་མཚུངས་ཏེ། ཇི་ལྟར་ཡང་མི་གཞན་དག་གི་དང་མི་འདྲ་བ་ཅི་ཡིན། ལྷ། དེ་ནི་རབ་ཏུ་བྱུང་བ་ཞེས་བགྱིའོ། །ཁ་ལོ་སྒྱུར་བ། རབ་ཏུ་བྱུང་བ་ཞེས་བྱ་བ་འདི་ཅི་ཡིན། ལྷ། རབ་ཏུ་བྱུང་བ་དེ་ནི་དུལ་བ་ལེགས་པ་དང ། ཡང་དག་པར་སྡོམ་པ་ལེགས་པ་དང ། དོན་སྤྱོད་པ་ལེགས་པ་དང ། ཆོས་སྤྱོད་པ་ལེགས་པ་དང ། དགེ་བ་སྤྱོད་པ་ལེགས་པ་དང ། དགེ་ལེགས་སྤྱོད་པ་ལེགས་པར་རིག་ནས་སྐྲ་དང ། ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་
40a
༄#། །པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་སྟེ། ལྷ།་འདི་ནི་རབ་ཏུ་བྱུང་བ་ཞེས་བགྱིའོ། །ཁ་ལོ་སྒྱུར་བ། དེའི་ཕྱིར་ཤིང་རྟ་འདི་རབ་ཏུ་བྱུང་བ་གང་ན་བདེ་ལོགས་སུ་སྒྱུར་ཅིག། ལྷ།་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་ཤིང་རྟ་དེ་རབ་ཏུ་བྱུང་བ་གང་ང་བ་དེར་བསྒྱུར་ཏོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་རབ་ཏུ་བྱུང་བ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ།་མི་ཁྱོད་ཅིའི་ཕྱིར་སྐྲ་བྲེགས་ཤིང་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང ། ཁང་པ་ནས་ཁང་པར་རྒྱུ་ཞིང་འགྲོ་ལ་ཁྱོད་ཀྱི་གོས་ཀྱང་ཁ་དོག་མི་མཚུངས་ཏེ། ཇི་ལྟར་ཡང་མི་གཞན་དག་གི་དང་མི་འདྲ་བ་ཡིན། དེས་འདི་སྐད་ཅེས་སྨྲས་སོ། །གཞོན་ནུ། བདག་ནི་རབ་ཏུ་བྱུང་བ་ཞེས་བགྱིའོ། །ཀྱེ།་མི་ཁྱོད་ཇི་ལྟར་ན་རབ་ཏུ་བྱུང་བ་ཞེས་བྱ། གཞོན་ནུ། བདག་གིས་དུལ་བ་ལེགས་པ་དང ། ཡང་དག་པར་སྡོམ་པ་ལེགས་པ་དང ། དོན་སྤྱོད་པ་ལེགས་པ་དང ། ཆོས་སྤྱོད་པ་ལེགས་པ་དང ། དགེ་བ་སྤྱོད་པ་ལེགས་པ་དང ། དགེ་ལེགས་སྤྱོད་པ་ལེགས་པར་རིག་ནས་སྐྲ་དང ། ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པར་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ལྟར་ན་བདག་རབ་ཏུ་བྱུང་བ་ཞེས་བྱའོ། །ཀྱེ།་མི་ཁྱོད་ཀྱིས་དུལ་
40b
བ་ལེགས་པ་དང ། ཡང་དག་པར་སྡོམ་པ་ལེགས་པ་དང ། དོན་སྤྱོད་པ་ལེགས་པ་དང ། ཆོས་སྤྱོད་པ་ལེགས་པ་དང ། དགེ་བ་སྤྱོད་པ་ལེགས་པ་དང ། དགེ་ལེགས་སྤྱོད་པ་ལེགས་པར་རིག་ནས་སྐྲ་དང ། ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱི་མ་མེད་པར་རབ་ཏུ་བྱུང་བ་ལེགས་སོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ། དེའི་ཕྱིར་ཤིང་རྟ་ཕྱིར་སྒྱུར་ཅིག། ཕོ་བྲང་ཉིད་དུ་འདོང་ངོ ། །འདི་ལྟར་ང་ཕོ་བྲང་ཉིད་དུ་ཕྱིན་ནས་དོན་འདི་ཁོ་ན་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ། དེར་ཕོ་བྲང་དུ་གཤེགས་པ་དང ། བྱང་ཆུབ་སེམས་དཔའ་ཤཱཀྱ་ཐུབ་པ་ཀྱེ་མའོ་བདག་ནི་སྐྲ་དང ། ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པར་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱའོ་སྙམ་པའི་དོན་དེ་ཉིད་དགོངས་སོ། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ་ལ་སོགས་པ་ནི་སྔ་མ་བཞིན་ནོ། །དེ་ནས་སྐྱེ་དགུའི་བདག་མོ་ཆེན་མོས་རྨི་ལམ་རྨིས་བ། དབང་པོའི་རྟོག་ལྷུང་བ་དང ། ཤཱཀྱ་རྣམས་ཕྱག་དར་གྱིས་ཁེངས་པ་དང ། ས་ལྡོག་པ་དང ། དཔལ་ཁྱིམ་ནས་བྱུང་བ་དང ། ཕྱི་རོལ་ན་སྐད་ཅིག་ཅིང་དུ་ཞིང་དགོད་པ་ལ་བདག་ཉིད་ལྟ་བ་དང ། ཉི་མ་གང་ནས་ཤར་བ་དེ་ཉིད་ནས་ནུབ་པའོ། །བྱང་ཆུབ་
41a
༄#། །སེམས་དཔས་དེ་གསན་པ་དང ། དགོངས་པ། ང་ནི་ཤཱཀྱ་རྣམས་ཀྱི་དབང་པོའི་ཏོག་གི་གནས་ཡིན་པ་དང ། ང་གྲོང་ཁྱེར་ནས་འབྱུང་མ་དཔལ་བྱུང་བར་འགྱུར་རོ། ། རྒྱལ་པོ་ཟས་གཙང་མས་ཀྱང་རྨི་ལམ་རྨིས་པ། དཔལ་གྱི་མལ་ཁྲི་ཆག་པ་དང ། ཕའི་རྒྱུད་ཆད་པའོ། །བྱང་ཆུབ་སེམས་དཔས་དེ་གསན་པ་དང ། དེ་དེ་བཞིན་ཏེ། ད་ནི་གྲགས་འཛིན་མའི་དཔལ་གྱི་གནས་སུ་གྱུར་པ་དང ། ཟས་གཙང་མའི་ཕའི་རིགས་རྒྱུད་ཀྱི་གནས་སུ་གྱུར་པས་ང་རབ་ཏུ་བྱུང་ན་ཤཱཀྱ་རྣམས་ཀྱི་རིགས་རྒྱུད་ཆད་པར་འགྱུར་རོ། །མཚན་མ་མཁན་རྣམས་ཀྱིས་རྒྱལ་པོ་ཟས་གཙང་མའི་མདུན་དུ་གལ་ཏེ་གཞོན་ནུ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །འདི་སྐད་ཅེས་ཀྱང་སྨྲས་སོ། །གལ་ཏེ་དེ་ཡི་བཟང་པོ་གཟིགས་བཞེད་ན། །དེ་སླད་དགུང་བདུན་བར་དུ་སྲུངས་ཤིག་དང ། །མི་དབང་གདུགས་ནི་བདལ་བར་གྱུར་པ་ལྟའི། །རིན་ཆེན་སྣ་བདུན་འབྱུང་བར་ཐེ་ཚོམ་མེད། །ཁྱོད་སྲས་རིན་ཆེན་བདུན་པོ་ཡིས། །དབང་ཕྱུག་གི་ནི་རྒྱལ་པོར་འགྱུར། །རྒྱ་མཚོ་ལ་ནི་ཐུག་པའི་ས། །ཆད་པ་མེད་པས་སྐྱོང་བར་འགྱུར། །འོན་ཏེ་ས་ནི་སྤངས་ནས་སུ། །བསྙེངས་མེད་ནགས་སུ་བཞུད་ན་ནི། །ཐམས་ཅད་མཁྱེན་པ་ཐོབ་གྱུར་ནས། །འགྲོ་བ་སྒྲོལ་བ་མཛད་པར་འགྱུར། །ཞེས་ཐོས་སོ། །ཐོས་ནས་ཀྱང་ཟས་གཙང་དང །
41b
ཟས་དཀར་དང ། བྲེ་བོ་ཟས་དང ། བདུད་རྩི་ཟས་བཞི་ལྷན་ཅིག་གཅིག་ཏུ་ཚོགས་ནས་གྲོས་བྱ་བར་བརྩམས་པ། ཤེས་ལྡན་དག་།མཚན་མཁན་དང ། བལྟས་མཁན་གྱི་བྲམ་ཟེ་རྣམས་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་གལ་ཏེ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་གྱི། དེ་ལྟ་བས་ན་བདག་ཅག་གིས་བྱང་ཆུབ་སེམས་དཔའ་ཞག་བདུན་གྱི་བར་དུ་བསྒྲིམས་ཏེ་བསྲུང་བར་བྱ་ཞིང་གྲོང་ཁྱེར་ཡང་ལེགས་པར་བསྲུང་བར་བྱའོ། །དེ་ནས་དེ་རྣམས་ཀྱིས་སེར་སྐྱའི་གཞིའི་གྲོང་ཁྱེར་རབ་རིམ་པ་བདུན་དང ། འོབས་རིམ་པ་བདུན་གྱིས་བསྐོར་ནས་གྲོང་ཁྱེར་གྱི་སྒོ་འཕར་ལྕགས་ལས་བྱས་ཤིང་སྒོ་འཕར་རྣམས་ལ་དྲིལ་བུ་ཤིན་ཏུ་སྐྲགས་གསལ་བ་བཏགས་ཏེ། སྒོ་ཕྱེ་ན་དེའི་སྒྲས་དཔག་ཚད་གཅིག་ཁོར་ཡུག་ཏུ་གྲག་པར་འགྱུར་རོ། །བྱང་ཆུབ་སེམས་དཔའ་ཁང་བཟང་གི་གཞི་ན་བུད་མེད་ཡིད་འཕྲོག་པ། གཟུགས་བཟང་བ་རྣམས་དང ། གར་དང ། གླུ་དང ། རོལ་མོ་རྣམས་ཀྱི་སྤྱོད་པས་བསྙེན་བཀུར་བྱེད་དུ་བཅུག་གོ་།སྐས་ཤིན་ཏུ་ཆེ་བ་སྤོར་རུང་བ་མི་ལྔ་བརྒྱས་བཏེག་པ་བྱས་སོ། །ཆིབས་བསྔགས་ལྡན་གྱིས་ཕྱོགས་ནི་ཟངས་མའི་གླེགས་བུས་གཡོགས་ཤིང་གསེར་གྱི་སིལ་དཀྲོལ་གྱི་དྲ་བ་བཏགས་པས་བསྐོར་ཏོ། །བྱང་ཆུབ་སེམས་དཔའ་ནི་སྟེང་གི་ཁང་བཟང་གི་གཞི་བསྐྱེས་པ་མེད་པར་ཞུགས་ནས། པི་ཝང་དང ། གླིང་བུ་དང ། འཁར་རྔ་དང །
42a
༄#། །སྒྲ་སྙན་ལ་སོགས་པ་རོལ་མོའི་ཆ་བྱད་དག་ཉེ་བར་ལེན་ཅིང་འབྱོར་པ་ཆེན་པོས་བཞུགས་སོ། །མཚན་མོ་ནི་རྒྱལ་པོ་ཟས་གཙང་ཡང་དཔུང་གི་ཚོགས་ཡན་ལག་བཞི་དང ། ཤར་སྒོའི་ཕྱི་རོལ་ན་འདུག་གོ། ལྷོ་ཕྱོགས་ན་ནི་བྲེ་བོ་ཟས་སོ། །ནུབ་ཕྱོགས་ན་ནི་ཟས་དཀར་རོ། བྱང་ཕྱོགས་ན་ནི་བདུད་རྩི་ཟས་སོ། །གྲོང་ཁྱེར་གྱི་དབུས་ཀྱི་འདྲམ་པོ་བྱེད་པ་ནི་ཤཱཀྱ་མིང་ཆེན་དཔུང་གི་ཚོགས་ཡན་ལག་བཞི་དང་ལྡན་པའོ། །དེ་ཤར་སྒོར་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད། རྒྱལ་པོ་ཟས་གཙང་གིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ།་མེལ་ཚེ་མཛོད་ཅིག། མེལ་ཚེ་མཛོད་དང ། ཁྱོད་ལ་ལེགས་པར་འགྱུར་ཞེས་སྨྲས་ཏེ་ཚིགས་སུ་བཅད་དེ་སྨྲས་པ། འཇིག་རྟེན་གཉིད་ལོག་རོ་དང་མཚུངས། །གཉིད་ལོག་བདུད་ཀྱི་དབང་དུ་སོང ། །འདི་ནི་མི་ཉལ་རྟག་ཏུ་མཁས། །དེ་བས་མ་ཉལ་མེལ་ཚེ་བྱོས། །ལྷོ་སྒོར་སོང་ནས་སྨྲས་པ། སུ་ཞིག་མལ་ཚེ་བྱེད། །སུ་ཞིག་མེལ་ཚེ་བྱེད། བྲེ་བོ་ཟས་ཀྱིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ།་མེལ་ཚེ་མཛོད་ཅིག། མེལ་ཚེ་མཛོད་དང ། ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། འཇིག་རྟེན་གཉིད་ལོག་རོ་དང་མཚུངས། །གཉིད་ལོག་བདུད་ཀྱི་དབང་དུ་སོང ། །གཉིད་ལོག་འཆི་བདག་དབང་དུ་སོང ། །དེ་བས་མ་
42b
ཉལ་མེལ་ཚེ་བྱོས། །ནུབ་སྒོར་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད། ཟས་དཀར་གྱིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ།་མེལ་ཚེ་མཛོད་ཅིག། མེལ་ཚེ་མཛོད་དང ། ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། གཉིད་ལོག་པ་ནི་རྟག་ཏུ་མྱོས། །མྱོས་འགྱུར་བྲེ་བོས་འཐུངས་བ་ཉལ། །དགོན་པ་ནགས་སུ་ཉལ་བ་འདྲས། །དེ་བས་མཉལ་མེལ་ཚེ་བྱོས། །བྱང་སྒོར་སོང་ནས་སྨྲས་པ། སུ་ཞིག་མེལ་ཚེ་བྱེད། །སུ་ཞིག་མེལ་ཚེ་བྱེད། བདུད་རྩི་ཟས་ཀྱིས་སྨྲས་པ། ཁོ་བོ་མེལ་ཚེ་བྱེད་དོ། ། ལྷ།་མེལ་ཚེ་མཛོད་ཅིག་།མེལ་ཚེ་མཛོད་དང ། ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། རི་ཉལ་རི་སུལ་ཉལ་བ་བཞིན། །རྒྱ་མཚོའི་ཆུར་ནི་ཉལ་བ་དང ། །ལྗོན་ཤིང་རྩེ་ལ་ཉལ་བ་བཞིན། །དེ་བས་མཉལ་མེལ་ཚེ་བྱོས། །དབུས་ཀྱི་བཞི་མདོ་དང ། སུམ་མདོ་དག་ཏུ་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད།་སྲུང་མ་རྣམས་ཀྱིས་སྨྲས་པ། བདག་ཅག་མེལ་ཚེ་བགྱིད་དོ། །མེལ་ཚེ་བྱོས་ཤིག་།མེལ་ཚེ་བྱས་དང ། ལེགས་པར་འགྱུར་རོ། ཞེས་སྨྲས་ནས་ཚིགས་སུ་བཅད་དེ་སྨྲས་པ། ཆོས་སྤྱོད་ཆོས་མ་ཡིན་མ་སྤྱོད། །བདེན་པར་སྤྲོས་ཤིག་རྫུན་མ་སྨྲ། །མུན་པ་ཆེན་པོར་འཇུག་པར་འགྱུར། །དེ་བས་མ་ཉལ་མེལ་ཚེ་བྱོས། །དེ་ནས་ནམ་ནངས་ནས་ཤཱཀྱ་མིང་
43a
༄#། །ཆེན་གྱིས་རྒྱལ་པོ་ཟས་གཙང་ལ་སྨྲས་པ། ལྷ།་དགུང་སངས་ལགས་ཏེ། དགུང་བདུན་ལ་དགུང་གཅིག་ནི་ཐལ། དགུང་དྲུག་ནི་ལུས་སོ། །རྒྱལ་པོ་ཟས་གཙང་གིས་སྨྲས་པ། ལགས་ཀྱི་ཞག་དྲུག་འདས་ནས་གཞོན་ནུ་འཁོར་ལོས་བསྒྱུར་བར་གྱུར་ན་བདག་ཅག་ནམ་མཁའི་ངོས་ལ་རྒྱུ་ཞིང་གླིང་བཞིར་ཕྱི་བཞིན་འདོང་ངོ ། །དེང་ཤིན་ཏུ་དགུང་གཅིག་ལུས་སོ་ཞེས་བྱ་བའི་བར་དུའོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། མི་དབང་ཤཱཀྱའི་སྲས་པོ་ཐུབ་པ་འདི། །བདག་ཉིད་ཆེན་པོ་ཕ་རོལ་ཕྱིན་དྲུག་རྫོགས།། ཐུགས་རྣམས་དགྱེས་པར་མཛད་པ་དཀའ་ཐུབ་ཚལ། །འཕགས་པ་དགྱེས་པའི་ནགས་སུ་གཤེགས་པར་བཞེད། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བདག་ལ་གཞན་དག་གཞོན་ནུ་ཤཱཀྱ་ཐུབ་པ་ནི་སྐྱེས་པ་མ་ཡིན་ཏེ། གང་གི་ཕྱིར་གྲགས་འཛིན་མ་དང ། ས་འཚོ་མ་དང ། རི་དྭགས་སྐྱེས་དང ། བུད་མེད་དྲུག་ཁྲི་སྤངས་ནས་རབ་ཏུ་འབྱུང་ངོ་ཞེས་གཞི་དེ་ལས་ཁ་ཟེར་བར་འགྱུར་དུ་འོང་གི། མ་ལ། བདག་གིས་གྲགས་འཛིན་མ་དང་ལྷན་ཅིག་དགའ་མགུར་སྤྱད་པར་བྱའོ་སྙམ་ནས་དེས་གྲགས་འཛིན་མ་དང་ལྷན་ཅིག་དགའ་མགུར་སྤྱད་པ་དང་གྲགས་འཛིན་མ་སེམས་ཅན་དང་ལྡན་པར་གྱུར་ནས། དེ་འདི་སྙམ་དུ་སེམས་ཏེ། ནམ་ནངས་ནས་བྱང་ཆུབ་སེམས་དཔའི་སྙན་དུ་གསོལ་ལོ་སྙམ་
43b
མོ། །དེ་ནས་བྱང་ཆུབ་སེམས་དཔའ་དེའི་ཚེ་རྟེན་ཅིང་འབྲེལ་པར་འབྱུང་བ་དང་ལྡན་པས་ཚིགས་སུ་བཅད་དེ་གསུངས་པ། བུད་མེད་དང་བདག་ཁྱིམ་ཉལ་བའི། །ཐ་མ་དེང་གི་འདི་ཡིན་ཏེ། ། ཕྱིན་ཆད་ཁྱིམ་དུ་བུད་མེད་དང ། །ང་ནི་ལྷན་ཅིག་མི་གནས་སོ། །དེ་ནས་བུད་མེད་དེ་རྣམས་གར་དང ། གླུ་དང ། རོལ་མོས་ངལ་ཞིང་ལྕི་ལ་དུབ་ནས་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང ། ལག་པ་དག་ལྷུག་པར་བཏང་ནས། བླ་བའི་ཚིག་བྱུང་རྒྱལ་དུ་རྡོལ་ཞིང་གཉིད་ལོག་གོ་།བྱང་ཆུབ་སེམས་དཔས་བུད་མེད་དེ་དག་ཐམས་ཅད་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང ། ལག་པ་དག་ལྷུག་པར་བཏང་ནས། བླ་བའི་ཚིག་བྱུང་རྒྱལ་དུ་རྡོལ་ཞིང་གཉིད་ལོག་པ་གཟིགས་སོ། །གཟིགས་ནས་ཀྱང་བཙུན་མོའི་འཁོར་ལ་དུར་ཁྲོད་ཀྱི་འདུ་ཤེས་སྐྱེས་སོ། ། དེ་ནས་བྱང་ཆུབ་སེམས་དཔའི་སྐྱོ་བ་འཁྲུངས་པ་དང་ཚིགས་སུ་བཅད་དེ་གསུངས་པ། རླུང་གི་ཤུགས་ཀྱིས་པདྨའི་ཚལ་ལྟར་ས་གཞི་འདིར། །ལག་པ་དག་དང་རྐང་པ་བརྐྱང་ནས་འགྱེལ་འགྱུར་ཏེ། །སྐྲ་རྣམས་ཞིག་ཅིང་མདོམས་དང་རྐུབ་ཀྱི་ཕྱོགས་སྣང་བ། ཤཱཀྱའི་སྲས་ཀྱིས་གཟིགས་ནས་རང་བཞིན་སྐྱོ་བར་འགྱུར། །ཚུལ་དང་འདྲ་བའི་བུད་མེད་ན་ཆུང་ཚོགས་འདི་དག་།དུར་ཁྲོད་འཇིགས་སུ་རུང་བའི་རང་བཞིན་འདྲར་མཐོང་ནས། །སེམས་ཅན་བྱིས་པའི་སྤྱོད་ཡུལ་ལ་ནི་དེང་དགའ་ན། །སེམས་དང་བློ་གྲོས་དྲན་དང་བྲལ་བ་ཡིན་
44a
༄#། །ནམ་ཅི། །འདོད་པ་ཐ་ཆད་འདམ་དང་མདའ་མདུང་དུག་མེ་འདྲ། །རྨི་ལམ་ལྟ་བུ་ཡིན་ཏེ་ཚཝ་ཆུའི་རོ་དང་མཚུངས། །འདོད་པ་ཕུང་བྱེད་རྩོད་དང་སྡིག་པའི་རྒྱུར་གྱུར་པ། ། མཐའ་ངན་སྤྲུལ་གྱི་ཁ་འདྲ་བདག་གིས་སྤང་བར་བྱ། །དེ་ནས་བྱང་ཆུབ་སེམས་དཔའ་གཟིམས་མལ་ཆེན་པོ་ལ་གཟིམས་པ་ན། མཚན་མོ་དེ་ཉིད་ལ་རྨི་ལམ་ལྔ་རྨིས་པ། ས་ཆེན་པོ་ཉིད་གཟིམས་མལ་དུ་བྱས་ཤིང་རི་རབ་རིའི་རྒྱལ་པོ་དབུ་རྟེན་དུ་བཅུག། ཕྱག་གཡོན་པ་ཤར་ཕྱོགས་ཀྱི་རྒྱ་མཚོ་ཆེན་པོར་འཇུག། ཕྱག་གཡས་པ་ནུབ་ཕྱོགས་ཀྱི་རྒྱ་མཚོ་ཆེན་པོར་འཇུག། ཞབས་གཉིས་རྒྱ་མཚོ་ཆེན་པོར་འཇུག་པ་དང ། འགྲེང་པ་ཞེས་བྱ་བའི་རྩའི་རིགས་ལྟེ་བ་ནས་བྱུང་ནས་ནམ་མཁའི་བར་དུ་འཕགས་ཏེ་འདུག་པ་དང ། བྱ་ཀུན་ནས་དཀར་ལ་མགོ་ནག་པ་རྣམས་ཀྱིས་ཞབས་གཉིས་ལ་གཏུགས་ནས་པུས་མོའི་ལྷ་ང་ལ་ཐུག་པའི་བར་དུ་ལྟ་བ་དང ། བྱ་སྣ་ཚོགས་ཕྱོགས་བཞི་ནས་འོངས་ནས་མདུན་དུ་ཁ་དོག་གཅིག་ཏུ་འདུག་པ་དང ། མི་གཙང་བའི་རོའི་སྟེང་ནས་བདག་ཉིད་མི་གཙང་བས་མ་གོས་པར་འཆག་པའོ། །དེ་ལྟ་བུ་རྨིས་ནས་ཀྱང་ཐུགས་དགྱེས་ཏེ་དགོངས་པ། ངའི་རྨི་ལམ་འདི་འདྲ་བ་རྨིས་པས་རིང་པོ་མི་ཐོགས་པ་ཁོ་ནར་བླ་ན་མེད་པའི་ཡེ་ཤེས་ཐོབ་པར་འགྱུར་རོ་སྙམ་མོ། །གྲགས་འཛིན་མས་ཀྱང་རྨི་ལམ་དུ་མཐོང་བ། བདག་གིས་སོ་ཀུན་ལྷགས་པ་དང ། དུང་གི་དཔུང་པ་
44b
ཆག་པ་དང ། ཟླ་བས་ལ་ལྷུང་བ་དང ། སྐར་མ་རྣམས་ནི་དུ་བའོ། །གྲགས་འཛིན་མས་ཀྱང་རྨི་ལམ་རྨིས་པ་དེ་བྱང་ཆུབ་སེམས་དཔའ་ལ་གསོལ་བ་དང ། བྱང་ཆུབ་སེམས་དཔས་གསུངས་པ།་ཁྱོད་ཀྱི་སོ་ནི་ཁ་ནང་གནས། །ཟླ་བ་འདི་ནི་མཁར་གནས་ཀྱིས། །ཡིད་ཀྱི་གདུང་བ་བསལ་ནས་ནི། །དོགས་མེད་བདེ་བར་གཉིད་ལོག་ཅིག། དེ་ནས་གྲགས་འཛིན་མ་འདི་སྙམ་དུ་སེམས་ཏེ།་རྨི་ལམ་འཇིགས་པ་རྨིས་པ་ན། །བདག་ཡིད་དོགས་དང་བཅས་པར་འགྱུར། །དེང་གི་མཚན་མོ་སྡུག་པ་དང ། །འདྲ་ལ་དག་ཏུ་མི་འགྱུར་གྲང ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་ཇི་ལྟར་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་གྱིས་བསྒྲུབ་པར་བྱ་དགོས་ཏེ། འདི་ལྟར་རྒྱུའི་སྟོབས་ཆེན་པོའང་རྐྱེན་གྱི་སྟོབས་ལ་ལྟོས་སོ་སྙམ་ནས། བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང ། ཁང་བཟང་གི་གཞི་ལ་འདུག་སྟེ། བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ། །ནགས་ཀྱི་སྤྲེའུ་ནི་སྤྱོད་ཡུལ་རྒྱུ་འདྲ་ཞིང ། །ཡན་པར་འདུག་པའི་རྟེའུ་དང་འདྲ་བའི་ཐུགས། །གལ་ཏེ་འདོད་པའི་ཡོན་ཏན་ལས་བཟློག་ན། །དེ་ལས་ཤིན་ཏུ་གསལ་བའི་སྣང་བ་གཟིགས། །བློ་གྲོས་བཟང་པོ་བཞེངས་ཤིག་བཞེངས། །ས་ནི་སྤངས་ཏེ་བཞུད་མཛོད་ལ། །ཐམས་ཅད་མཁྱེན་ཉིད་བརྙེས་ནས་ནི། །འགྲོ་བ་དག་ནི་བསྒྲལ་བར་མཛོད། །བྱང་ཆུབ་སེམས་དཔས་གསུངས་པ་ནི། །ཀཽ་
45a
༄#། །ཤི་ཀ་མ་མཐོང་ངམ། །ང་ནི་རི་དྭགས་བདག་པོ་རྒྱས་བསྐོར་ལྟར། །མི་ནི་མཐུ་ལྡན་གཞུ་མཚོན་རལ་གྲི་ཐོགས། །རྟ་གླང་ཤིང་རྟ་དཔུང་ཚོགས་མང་པོ་ཡིས།། གྲོང་ཁྱེར་སེར་སྐྱ་ཀུན་ནས་ཡོངས་སུ་བསྐོར། །ཟས་གཙང་ལ་སོགས་ཤཱཀྱའི་ཚོགས་འདི་དག་།གླང་ཆེན་རྟ་ཞོན་ལེགས་པར་གོ་བགོས་ལུས། །མི་སྡུག་སྣ་ཚོགས་ལག་ན་མཚོན་ཐོགས་ཏེ། །ཁྱམས་དང་རྟ་བབས་ཁང་བཟང་གཞི་ནང་གནས། །ཕོ་བྲང་དང་ནི་ཁྱིམ་སྒོ་དང ། །དེ་བཞིན་གྲོང་ཁྱེར་སྒོ་དག་ཀྱང ། །བཅད་ནས་གཏན་པ་དམ་བཅུག་སྟེ། །དེ་བཞིན་ཀུན་ནས་བསྲུངས་པར་གྱུར། །རུ་དུང་པ་ཊ་ཧ་སྒྲ་རྔ་སྒྲ་ཡིས། །ཁྱམས་དང་རྟ་བབས་ཁང་བཟང་ནང་གནས་ཤིང ། །གླང་ཆེན་རྟ་དམག་འབད་པའི་སྐྱེ་བོའི་ཚོགས། །རྒྱུན་དུ་ང་མི་གཏང་ཕྱིར་སྲུང་བར་བྱེད། །བརྒྱ་བྱིན་གྱིས་གསོལ་པ། ངེས་པ་མར་མེ་མཛད་ཀྱི་ལུང་བསྟན་དང ། །སྡུག་བསྔལ་གྱིས་གདུངས་འཇིག་རྟེན་འདི་དང་ཡབ། །ཁྱོད་ཀྱི་སྔོན་གྱི་དམ་བཅས་དགོངས་མཛོད་ལ། །ཁབ་དག་སྤངས་ཏེ་ངེས་པར་འབྱུང་བར་མཛོད། །ཇི་ལྟར་ཁྱོད་ནི་བགེགས་མེད་པར། །དེང་ཉིད་ནགས་སུ་གཤེགས་འགྱུར་བ། །བདག་ཅག་ཚངས་སོགས་བཅས་པ་ཡི། །ལྷ་རྣམས་ཀྱིས་ནི་དེ་བཞིན་བགྱི། །བྱང་ཆུབ་སེམས་དཔས་ལེགས་སོ་ཞེས་གསུངས་ནས་ཐུགས་དགྱེས་པར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་
45b
གཉིད་ཀྱིས་མྱོས་པར་བྱས་ནས་གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་ལ་བསྒོ་བ། གྲོགས་པོ། བྱང་ཆུབ་སེམས་དཔའ་སྟེང་གི་ཁང་བཟང་ནས་བབས་ཀྱི་སྐས་ལོང་ཞིག་།དེས་སྐབས་བླངས་པ་ལ་བྱང་ཆུབ་སེམས་དཔའ་བབས་པ་དང ། དེ་ནས་བརྒྱ་བྱིན་གྱིས་བརྔ་བྱས་མ་ཐག་ཏུ་ཞབས་འབྲིང་བ་འདུན་པ་གང་ན་པ་དེར་གཤེགས་ན་ཇི་ཙམ་ན་འདུན་པ་གཉིད་སྟུག་པོས་ནོན་པར་གཟིགས་ནས་ནི་བྱང་ཆུབ་སེམས་དཔས་བསྒྲིམས་ཏེ་བསླངས་ནས་ཚིགས་སུ་བཅད་པའི་དབྱངས་ཀྱིས་གསུངས་པ། འདུན་པ་ལོངས་ཀྱི་ཁྱིམ་ནས་མྱུར་བར་ནི། །ང་ཡི་རྟ་པོ་རིན་ཆེན་བསྔགས་ལྡན་ལོང ། །སྔོན་གྱི་རྒྱལ་བས་ལོངས་སྤྱོད་དཀའ་ཐུབ་ཚལ། །ཐུབ་རྣམས་དགྱེས་པ་མཛད་པར་ང་གཤེགས་སོ། །འདུན་པ་གཉིད་ལོག་པའི་མིག་ཕྱེ་ནས་སྨྲས་པ། ལྷ་ཁྱོད་སྐྱེད་མོས་ཚལ་གྱི་དུས་མ་བབ། །དོས་པ་ཁྱོད་དང་འགའ་ཡང་འཁོན་མ་མཆིས། །ཁྱོད་ལ་དགྲ་བོ་སུ་ཡང་མ་མཆིས་ན། །དགུང་ཕྱེད་ཁྱོད་ལ་བཅིབས་པ་ཅི་ཞིག་བགྱི། །བྱང་ཆུབ་སེམས་དཔས་བཀའ་སྩལ་པ། འདུན་པ་ཁྱོད་ཀྱིས་ལན་འགའ་ཡང ། །ང་ཡི་ཚིག་ནི་མ་བཅག་ན། །ང་ཡི་དེང་དུས་ཐ་མ་ལ། །ང་ཡི་ཚིག་འདི་མ་གཅག་ཅིག་།འདུན་པས་གསོལ་པ། གཞོན་ནུ། མཚན་མོ་འདི་ནི་འཇིགས་པ་དང ། འཇིགས་སུ་རུང་པ་མཆིས་པས་བདག་བཅིབས་པ་མི་ལེན་ནོ། །བྱང་ཆུབ་སེམས་དཔས་དགོངས་པ། ལན་དང ། ཡང་ལན་གྱིས་གདོན་མི་ཟ་བར་སྐྱེ་བོ་
46a
༄#། །སད་པར་འགྱུར་གྱི། བདག་ཉིད་སོང་ལ་རྟའི་རྒྱལ་པོ་བསྔགས་ལྡན་སྟ་གོན་བྱའོ་སྙམ་ནས། དེ་ནས་ཉིད་ཀྱི་ཕོ་བྲང་གི་སྒོ་ཕྱེ་ནས་རྟའི་རྒྱལ་པོར་བསྔགས་ལྡན་བཟུང་བར་བརྩམས་པ་ན་མཇིང་ཀྱོག་བྱེད་ལ་ཕར་བྲོས་ཚུར་བྲོས་ཤིང་འདུག་ཏུ་མི་བཏུབ་བོ། །དེ་ནས་བྱང་ཆུབ་སེམས་དཔའི་ཕྱག་བསོད་ནམས་བརྒྱ་ཕྲག་དུ་མས་བསྐྱེད་པ་འཁོར་ལོ་དང ། བཀྲ་ཤིས་དང ། གཡུང་དྲུང་འཁྱིལ་བ་མངའ་བ། སྐྲག་པ་རྣམས་དབུགས་འབྱིན་པར་མཛད་པས་མགོ་ལ་བྱུགས་ནས་གསུངས་པ། བསྔགས་ལྡན་ཐ་མ་ཡི་ནི་ཁུར་ལོང་སྟེ། ། དཀའ་ཐུབ་ནགས་སུ་མ་ཐོགས་ང་སྐྱོལ་ཅིག། བྱང་ཆུབ་ཐོབ་ནས་མྱུར་དུ་འགྲོ་བ་ཀུན། །བསམ་གཏན་རྣམ་ཐར་ཆར་གྱིས་ཚིམ་པར་བྱ། །ཆོས་ཉིད་ཀྱིས་དུད་འགྲོའང་གདམས་ན་ཕྱི་ལང་མི་བྱེད་པས་རྟའི་རྒྱལ་པོ་བསྔགས་ལྡན་མི་གཡོ་བར་འདུག་གོ་།དེ་ནས་བྱང་ཆུབ་སེམས་དཔའ་ཐུགས་དགྱེས་པ་སྐྱེས་ཏེ། རྟའི་རྒྱལ་པོ་བསྔགས་ལྡན་བསྟད་དོ། །ཇི་ཙམ་ན་ཤཱཀྱ་མིང་ཆེན་འདྲམ་པོ་བྱེད་པ་སྐྱེ་བོ་ཉུལ་ཞིང་ཕྱོགས་དེར་ཕྱིན་པ་དང ། བྱང་ཆུབ་སེམས་དཔའ་གཤེགས་པར་ཆས་པ་མཐོང་ངོ ། །དེ་ནས་སྐད་འཛེར་ཅིང་མིག་མཆི་མས་གང་བས་སྨྲས་པ། གཞོན་ནུ་འདི་ཅི་མཛད། མིང་ཆེན། འགྲོའོ། །གཞོན་ནུ། འདི་ནི་རིགས་པ་མ་ལགས་སོ། །བྱང་ཆུབ་སེམས་དཔས་གསུངས་པ། མིང་ཆེན། འདི་ཉིད་རིགས་པ་ཡིན་ཏེ།
46b
གང་གི་ཕྱིར་ངས་བསྐལ་པ་གྲངས་མེད་པ་གསུམ་དུ་དཀའ་བ་བརྒྱ་སྟོང་དུ་མས་སེམས་ཅན་རྣམས་ཀྱི་དོན་དུ་བྱང་ཆུབ་ཡང་དག་པར་བསྒྲུབས་པ་དེས་ན་དང་ཅི་ཁྱིམ་ན་འདུག་ཕོད་དམ།་འདི་ནི་ངེས་ཏེ་དཀའ་ཐུབ་ཀྱི་ཚལ་དུ་འགྲོའོ། །གང་ཞིག་འབར་བའི་ཁྱིམ་ཆེན་ལས། །མཁས་རྣམས་མྱུར་དུ་འབྱུང་བ་ལ། །ལེགས་མིན་སྨྲ་བར་མི་འོས་ཀྱི། །དེ་ནི་བསྔགས་པར་འོས་ཉིད་ཡིན། །དེ་བཞིན་རྒ་ནད་འཆི་བ་ཡིས། །རབ་འབར་སྲིད་པའི་གཟེབ་ལས་ནི། །འབྱུང་བར་འདོད་གྱུར་གང་ཡིན་ལ། །འདིར་ནི་མི་རིགས་ཅི་ཞིག་མཐོང ། །དེ་ལྟར་གསུང་དྲག་པོས་སྤྱོས་པ་དང ། མིང་ཆེན་གདོང་ལས་མཆི་མ་ཆར་བཞིན་དུ་འབབ་ཅིང་ཆོང་འདེབས་པ་ལ་ཞུགས་ཏེ། ཀྱེ་ཧུད། དེང་དུ་རྒྱལ་པོ་ཟས་གཙང་དང ། །ཤཱཀྱ་དག་ནི་ཐམས་ཅད་ཀྱིས། །ཡང་དང་ཡང་དུ་བསམས་པ་ཡི། །རེ་བ་འབྲས་བུ་མེད་པར་གྱུར། དེང་དུ་རྒྱལ་པོ་ཟས་གཙང་ནི། །སྲས་ཀྱི་མྱ་ངན་གྱིས་གདུངས་པ། །ལག་བསྒྲེང་བཞིན་དུ་སྡུག་བསྔལ་ཞིང་།། མི་བཟང་སྒྲ་ནི་འབྱིན་པར་འགྱུར། །ས་མཚོ་གྲགས་འཛིན་རི་དྭགས་སྐྱེས། །དེ་བཞིན་བཙུན་མོའི་འཁོར་རྒྱས་པའང ། །དོན་གྲུབ་དང་ནི་བྲལ་བ་ཡིས། །ཤིན་ཏུ་སྡུག་བསྔལ་མྱོང་བར་འགྱུར། །ཞེས་སྨྲས་ནས། དེ་དངངས་པས་གྲགས་འཛིན་མ་བསླང་སྟེ་སྨྲས་པ། དོན་གྲུབ་འདི་ནི་ཤེས་གྱུར་གྱི། །ཁྱིམ་ཐབ་སྡུག་བསྔལ་གྱིས་གདུངས་ནས། །སྡུག་བསྔལ་
47a
༄#། །ཉམས་ཐག་དུ་མ་འོང ། །ཁྱིམ་ཐབ་སྡུག་པ་དེ་ཟློག་ཅིག་།ཁྱེད་ཀྱི་ཁྱིམ་ཐབ་གཤེགས་གྱུར་འདི་ནི་མཐོང་དཀའ་སྟེ། །ཁྱོད་ཀྱིས་འདི་ལྟོས་ཁྱིམ་ཐབ་མཐོང་བའི་ཐ་མ་ཡིན། །ཀྱི་ཧུད་ཕོངས་པ་བདག་གིས་མཚན་མོ་ཁུས་བཏབ་ཀྱང ། །སུས་ཀྱང་ལན་མ་སྟེར་བས་བདག་གིས་མ་ཉེས་སོ། །དེས་ནི་དེ་ལྟར་ཁུས་བཏབ་ཀྱང ། །འདི་ལྟར་ལྷ་རྣམས་བྱིན་བརླབས་ཀྱིས། །དགོན་པར་འོ་དོད་བོས་པ་བཞིན། །འགའ་ཡང་སད་པར་མ་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། གང་བདག་གིས་ཡབ་ལ་མ་བལྟས་པར་འགྲོ་བ་ནི་ངའི་ཚུལ་དང་མཐུན་པ་མ་ཡིན་ནོ། །སྙམ་ནས་རྒྱལ་པོ་ཟས་གཙང་མ་གང་ན་བ་དེར་གཤེགས་ཏེ་བྱོན་པ་དང ། རྒྱལ་པོ་ཟས་གཙང་མ་གཉིད་ཀྱིས་ནོན་པར་གྱུར་ཏོ། །དེ་ནས་འདི་སྙམ་དུ་དགོངས་ཏེ་ཇི་ལྟར་ང་འཇིག་རྟེན་ཐམས་ཅད་ཀྱི་ཕར་གྱུར་ཅིང་འཇིག་རྟེན་གྱི་བླ་མ་དང ། འཇིག་རྟེན་གྱི་ཐུ་བོ་ཡིན་མོད་ཀྱི། དེ་ལྟར་ནའང་ཕ་དང།་མ་ནི་སྐྱེས་བུའི་སློབ་དཔོན་དུ་གྱུར་པ་དང ། ལྷར་གྱུར་པ་དང ། ཚངས་པར་གྱུར་པ་ཡིན་ཞིང་ཤིན་ཏུ་ཕན་པ་བྱེད་པ་ཡིན་ནོ་སྙམ་དུ་དགོངས་ནས་ཡང་ཕྱི་ཞབས་གཉིས་ལ་བཏུད་དེ་བསྐོར་བ་ལན་གསུམ་མཛད་ནས་འདི་སྐད་ཅེས་གསུངས་སོ། །བདག་ཀྱང་ཡིད་ལ་བརྩེར་ལྡན་ཞིང ། །བདག་ཀྱང་ཉེ་དུ་རྣམས་ལ་དགའ། །འོན་ཀྱང་འཁོར་བ་རང་
47b
བཞིན་ངན། །འདི་མཐོང་ནས་ནི་མཆི་བ་ལགས། །གལ་ཏེ་རྒ་ནད་འཆི་བ་དང ། །སྡུག་པའི་གཉེན་བྲལ་ལས་བྱུང་བའི། །གནོད་བྱེད་སྡུག་བསྔལ་མ་མཆིས་ན། །ཁྱོད་ནི་སྤོང་བར་སུ་ཞིག་བྱེད། །གང་ཕྱིར་མི་འདོད་བཞིན་དུ་ནི། །རབ་ཆེ་གཉེན་གྱི་དཀྱིལ་འཁོར་དང ། །མཛའ་བཤེས་ཆུང་མ་དབང་ཕྱུག་རྣམས། །ཡུན་མི་རིང་བར་འཁོར་བར་འགྱུར། །དེ་བས་མ་ཆགས་ཡིད་ཀྱིས་ནི། །འཁོར་བ་ལས་ནི་རྣམ་གྲོལ་ཕྱིར། །བརྩེར་ལྡན་ཉེ་དུ་སྤངས་ནས་ནི། །སྐྱེ་བོ་མེད་ནགས་བསྟེན་པ་ལགས། །ལུས་ཅན་འདུ་བ་ངེས་པར་ནི། །མཐར་ནི་འབྲལ་འགྱུར་ཉིད་ལགས་པས། །བདག་ནི་རྗེས་སུ་དགོངས་ནས་ནི། །རྨོངས་པས་ཐུགས་ངན་མ་མཛད་ཅིག། ཅེས་གསུངས་ནས་ཆས་སོ། །དེ་ནས་མིང་ཆེན་གྱིས་རྒྱལ་པོ་ཟས་གཙང་མ་བསླང་སྟེ་སྨྲས་པ། དོན་གྲུབ་འདི་ནི་བཞུད་ལགས་ཀྱི། །ས་བདག་དེ་ནི་ཟློག་པར་མཛོད། །སྲས་ཀྱི་མྱ་ངན་གྱིས་ཐེབས་ནས། །སྡུག་བསྔལ་གྱིས་གདུངས་བཤུམས་འགྱུར་མཆི། །མ་སྟེས་ཏེ་དེའང་གཉིད་མ་སད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་མྱུ་གུ་དང ། མང་ཀུ་ར་དང ། འོད་ཟེར་ཅན་དང ། ལོ་མ་གྱོན་པ་སྟེ་བཞི་ལ་སྨྲས་པ། གྲོགས་པོ་དག་།ཁྱེད་རྣམས་ཀྱིས་བྱང་ཆུབ་སེམས་དཔའ་གདེག་པར་ནུས་སམ། དེ་རྣམས་ཀྱིས་སྨྲས་པ། ཤིན་ཏུའང་ནུས་ལགས་སོ། །ཁྱེད་རྣམས་ལ་སྟོབས་ཅི་ཙམ་ཡོད། མྱུ་གུས་སྨྲས་པ། བདག་
48a
༄#། །གིས་ནི་ས་ལ་རི་ཇི་སྙེད་ཡོད་པ་ཕྲག་པ་གཅིག་ཏུ་ཐོགས་ཏེ་ཉམ་ང་བ་ཆུང་ངུས་འགྲོ་ནུས་པ་དེ་ཙམ་གྱི་སྟོབས་ཡོད་དོ། །མང་ཀུ་རས་སྨྲས་པ། བདག་གིས་ཀྱང་ས་ལ་ཆུ་ཇི་སྙེད་ཡོད་པ་དེ་ཐམས་ཅད་ཕྲག་པ་གཅིག་ཏུ་ཐོགས་ནས་འགྲོ་ནུས་སོ། །འོད་ཟེར་ཅན་གྱིས་སྨྲས་པ། བདག་གིས་ཀྱང་ས་ལ་རྡུལ་ཇི་སྙེད་ཡོད་པ་དེ་ཐམས་ཅད་ཕྲག་པར་ཐོགས་ཏེ་ཉམ་ང་བ་ཆུང་དུས་འགྲོ་ནུས་སོ། །ལོ་མ་གྱོན་པས་སྨྲས་པ། བདག་གིས་ཀྱང་ས་ལ་རྩཝ་དང ། ཤིང་དང ། ཡལ་ག་དང ། ལོ་མ་ཇི་སྙེད་པ་དེ་ཐམས་ཅད་ཕྲག་པ་གཅིག་ཏུ་ཐོགས་ཏེ་ཉམ་ང་བ་ཆུང་ངུས་འགྲོ་ནུས་སོ། །བརྒྱ་བྱིན་གྱིས་སྨྲས་པ། གྲོགས་པོ་དག། སྟོབས་འདི་དང་ལྡན་ན་བྱང་ཆུབ་སེམས་དཔའ་གདེག་པར་ནུས་ཀྱི། དེ་ནས་མྱུ་གུ་དང ། མང་ཀུ་ར་དང ། འོད་ཟེར་ཅན་དང ། ལོ་མ་གྱོན་པ་སྟེ་བཞིས་ཆིབས་རིན་པོ་ཆེ་བསྔགས་ལྡན་ཁྱེར་ཏེ། བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་སྨྲས་པ། བྱང་ཆུབ་སེམས་དཔའ་ཅི་ལ་བཞུགས། དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ་འདི་རྣམས་ནི་བདག་ཅག་གིས་བྱང་ཆུབ་སེམས་དཔའ་བཏེག་སྟེ། བར་སྣང་ལ་ཁྱེར་རོ་ཞེས་དྲེགས་པ་སྐྱེ་བར་འགྱུར་རོ་སྙམ་ནས་བྱང་ཆུབ་སེམས་དཔའ་རྡོ་རྗེའི་སྐུར་བྱིན་གྱིས་བརླབས་པ་དང ། དེ་རྣམས་ཀྱིས་བསྒུལ་བར་ཡང་མ་ནུས་ནས་ངོ་
48b
མཚར་སྐྱེས་ཏེ་གསོལ་པ། གཞོན་ནུ། བདག་ཅག་གིས་ནི་བྱང་ཆུབ་སེམས་དཔའ་རྣམས་ལ་སྟོབས་འདི་འདྲ་བ་མངའ་བར་མ་འཚལ་ཏོ། །དེ་ནས་བྱང་ཆུབ་སེམས་དཔའ་འཆི་བས་རིན་པོ་ཆེ་བསྔགས་ལྡན་ལ་བཅིབས་ཏེ་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་མཐུ་དང ། ལྷ་རྣམས་ཀྱི་ལྷའི་མཐུས་ཆིབས་རིན་པོ་ཆེ་བསྔགས་ལྡན་དང ། འདུན་པ་སྟེང་གི་ནམ་མཁའ་ལ་འཕགས་སོ། །དེ་ནས་བརྒྱ་བྱིན་དང ། ཚངས་པ་ལ་སོགས་པ་ལྷ་རྣམས་ཀྱང་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང ། བྱང་ཆུབ་སེམས་དཔའ་བསྐོར་ཅིང་དོང་སྟེ། གཡས་ཕྱོགས་ནས་གཟུགས་ན་སྤྱོད་པའི་ལྷ་རྣམས་ཀྱང་སྤྱོད་ལམ་ཞི་བ་དང ། གཡོན་ཕྱོགས་ནས་འདོད་པ་ན་སྤྱོད་པ་རྣམས་ཀྱིས་རྒྱལ་མཚན་དང ། བདན་བསྒྲེངས་ནས་ལྷའི་རོལ་མོའི་ཁྱད་པར་སྣ་ཚོགས་དང ། མདུན་ནས་བརྒྱ་བྱིན་དང ། ཚངས་པ་ལ་སོགས་པ་རང་རང་གི་སྤྱོད་ལམ་གྱིས་དོང་ངོ ། །ནམ་མཁའི་ངོས་ལ་གནས་པའི་ལྷ་བརྒྱ་སྟོང་དུ་མས་ནི་བྱང་ཆུབ་སེམས་དཔའི་སྟེང་ནས་ལྷའི་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོ་རྣམས་ཀྱིས་གཏོར་རོ། ། ག་རུའི་ཕྱེ་མ་དང ། ཙནྡན་གྱི་ཕྱེ་མ་དང ། ཏམ་ལའི་འདབ་མའི་ཕྱེ་མ་དང ། ལྷའི་མེ་ཏོག་མནྡཱ་ར་བས་ཀྱང་གཏོར་ཏོ། །ལྷའི་རོལ་མོའི་ཆ་སྤྱད་སྣ་ཚོགས་ཀྱང་བརྡུངས་སོ། །གོས་རྣམས་ཀྱང་གཏོར་
49a
༄#། །རོ། །འདིར་སྨྲས་པ། མཁའ་ལ་ལྷ་རྣམས་གཞའི་སྒྲ་ཆེན་འབྱིན་བྱེད་ལ། །དགའ་བའི་ཡིད་ཀྱིས་གོས་ཀྱི་གཡབ་མོ་འདེབས་བྱེད་ཅིང ། །ཁ་ཅིག་བྱང་ཆུབ་སེམས་དཔའ་ལ་ནི་བསྟོད་བྱེད་དེ། །ནམ་མཁའ་ལ་ནི་རོལ་མོ་བརྒྱ་ཕྲག་སྒྱུར་བར་བྱེད། །ཁ་ཅིག་དག་ནི་སྒོ་རྣམས་འབྱེད་བྱེད་ཅིང ། །མེ་ཏོག་མནྡཱ་ར་བས་འཐོར་བར་བྱེད། །ཁ་ཅིག་དག་ནི་བཅིབས་པའི་རྐང་འཛིན་ཅིང ། །བདེ་བར་གཤེགས་ལ་རྟོག་ཅིང་རྗེས་བཞིན་འབྲང ། །ཁ་ཅིག་དག་ཀྱང་གཡས་ནས་རྗེས་བཞིན་འབྲང ། །གཡོན་ནས་འགྲོ་བ་དག་ཀྱང་རྗེས་བཞིན་འབྲང ། །བརྒྱ་བྱིན་དེ་བཞིན་ཚངས་པར་བཅས་པ་དང ། །ལུས་ངན་བདག་ཉིད་ཤུལ་ནི་མཚོན་པར་བྱེད། །ཟླ་བ་ཉ་བ་རྒྱུ་སྐར་ཚོགས་ཀྱིས་ལྟར། །བདག་ཉིད་ཆེན་པོ་ལྷ་ཚོགས་མདུན་བདར་ནས། །དཀའ་ཐུབ་ནགས་ནི་ཐུབ་རྣམས་དགྱེས་བྱེད་པ། །འཕགས་པ་དགྱེས་པའི་ནགས་སུ་ཐུགས་དགྱེས་གཤེགས། །དེ་ནས་བྱང་ཆུབ་སེམས་དཔས་བསྔགས་ལྡན་ལ་དབུགས་དབྱུང་བའི་ཕྱིར་གསུངས་པ། མ་སྐྱོ་མ་སྐྱོ་སྟོབས་ནི་གཟུང་བར་བགྱིས། །འགྲོ་དོན་ངལ་བ་གཅིག་ནི་དེ་རིང་ལོང ། །མི་རིང་བྱང་ཆུབ་ཐོབ་ནས་འགྲོ་བ་རྣམས། །བསམ་གཏན་རྣམ་ཐར་གྱིས་ཚིམ་བྱེད་པོར་བྱ། །བྱང་ཆུབ་སེམས་དཔའ་དཔག་ཚད་བཅུ་གཉིས་སུ་ཞུགས་ནས་ནང་བར་གྲོང་ཁྱེར་དཔེ་མེད་དུ་བྱོན་ཏོ། །དེ་ནས་ལྷ་རྣམས་ཀྱང་བྱང་ཆུབ་སེམས་དཔའ་
49b
བྱུང་ནས་འདི་སླར་ཡང་རང་གི་གྲོང་ཁྱེར་དུ་འཇུག་པར་མི་འགྱུར་རམ་སྙམ་པ་ལ་སྐུ་ཐམས་ཅད་ཀྱི་གཡས་ཕྱོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་ནས། སངས་རྒྱས་རྣམས་ཀྱིས་བསྟན་པ་ཡི། །ལམ་གྱི་མཆོག་ནི་མ་ཐོབ་པར། །གྲོང་ཁྱེར་སེར་སྐྱའི་གཞིར་ནི་སླར། །ང་ནི་འཇུག་པར་མི་བྱའོ། །ཞེས་གསུངས་སོ། །དེ་ནས་བྱང་ཆུབ་སེམས་དཔའི་ཞབས་ལ་བསྐོར་བ་ལན་གསུམ་བྱས་ནས་རང་གི་གནས་སུ་སོང་ངོ ། །བྱང་ཆུབ་སེམས་དཔས་ཆིབས་ལས་བབས་ཏེ་རྒྱན་བཀྲོལ་ནས་འདུན་པ་ལ་བཀའ་སྩལ་པ། འདུན་པ། རྒྱན་དང ། རྟ་ཁྱེར་ལ་སླར་སོང་ཞིག། འདིར་སྨྲས་པ། ཁ་ལོ་སྒྱུར་ཁྱོད་ང་ཡི་རྟ་འདི་དང ། །རྒྱན་འདི་རྣམས་ཀྱང་གཉེན་པ་དག་ལ་བྱིན། །ང་ནི་འདོད་པ་རྒྱ་ཆེན་སྤངས་ནས་སུ། །ད་ལྟར་འདི་ཉིད་དུ་ནི་རབ་འབྱུང་བྱ། །འདོད་པ་འདི་ནི་སྤུ་གྲིའི་སོ་འདྲ་ཞིང ། །མེ་འོབས་འབར་དང་མཚུངས་ཤིང་མཐའ་ངན་པ། །འཇིག་རྟེན་ཕན་ཕྱིར་སྙིང་རྗེས་ང་སྤངས་ཏེ། །དགོན་པར་སོང་ནས་ཁྱིམ་དུ་ཕྱིར་མི་ལྡོག་།དེ་ནས་མདུན་པ་གདོང་པ་མཆི་མཆར་བཞིན་འབབ་པས་བྱང་ཆུབ་སེམས་དཔའ་ལ་གསོལ་པ། སེང་གེ་སྟག་གིས་གཏམས་པ་དང ། །ཕྱུགས་རྫིས་གཏམས་པའི་ནགས་ཚལ་དུ། །འབའ་ཞིག་སྐུ་གཉེན་དང་བྲལ་བས། །འཕགས་པ་ཇི་ལྟར་སྤྱོད་པར་འགྱུར། །བྱང་ཆུབ་སེམས་དཔས་གསུངས་པ། སྐྱེ་དགུ་འདི་ནི་སྐྱེ་ན་གཅིག་པུ་སྐྱེ། །དེ་བཞིན་འཆི་ནའང་གཅིག་པུ་འཆི་བར་འགྱུར། །འདི་ནི་གཅིག་
50a
༄#། །པུས་སྡུག་བསྔལ་མྱོང་འགྱུར་གྱི། །འཁོར་བ་ལ་ནི་གྲོགས་ཡོད་མ་ཡིན་ནོ། །འདུན་པས་གསོལ་པ། ཀྱི་ཧུད་གཞོན་ནུས་སྡུག་བསྔལ་མ་གཟིགས་ཏེ། །ཞབས་འཇམ་གླང་ཆེན་རྟ་ལ་ཆིབས་གོམས་པ། །ས་གཞི་རྩཝ་དང་རྡོ་བས་གཏམས་རྩུབ་པར། །ཇི་ལྟར་ཞབས་ཀྱིས་གཤེགས་ཤིང་ནགས་སུ་རྒྱུ། །བྱང་ཆུབ་སེམས་དཔས་གསུངས་པ། འཆི་བདག་འཇིགས་པ་དེ་ནི་ལན་འགའ་ཡང ། །སྐྱེད་ལ་མེད་མིན་བདེ་བར་གོམས་ལ་མིན། །མགོན་བཅས་ལ་མིན་རིགས་བཙུན་ལ་མ་ཡིན། །དཔའ་དང་བཙུན་མིན་སྐྱེ་བོ་དགའ་ལ་མིན། །རྒ་བས་འཆི་བདག་འཇིགས་པ་དག་།བསྐྱེད་ནས་འོང་བར་འགྱུར་ཞེས་གྲག་།དོན་མ་བྱས་ཤིང་མ་བརྩམས་པར། །འཆི་བར་ཡང་ནི་འགྲོ་བར་འགྱུར། །འདུན་པས་གསོལ་པ། རྒྱལ་པོ་བགྲེས་པོ་ནི་སྲས་ཀྱི་མྱ་ངན་གྱིས་འགྲོངས་པར་འགྱུར་རོ། །འོན་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་ཚོགས་བསགས་པའི་ཕྱིར་འདུན་པའི་ཚིག་ཐུགས་ལ་མ་བབ་བོ། །དེ་ནས་བྱང་ཆུབ་སེམས་དཔས་ཨུཏྤ་ལ་སྔོན་པོ་འདྲ་བའི་རལ་གྲི་ཤུབས་ནས་བྱུང་ནས་གཙུག་ཕུད་བྲེགས་ཏེ། སྟེང་གི་ནམ་མཁའ་ལ་བོར་བ་དང ། ལྷ་རྣམས་ཀྱི་དབང་པོ་བརྒྱ་བྱིན་གྱིས་བླངས་ནས་བཀུར་སྟི་ཆེན་པོ་བྱས་ཏེ་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཁྱེར་ནས་གཙུག་ཕུད་ཀྱི་མཆོད་པ་ཆེན་པོ་བཙུགས་སོ། །དེ་ནས་ལྷའི་དབང་པོ་
50b
བརྒྱ་བྱིན་འདི་སྙམ་དུ་སེམས་ཏེ་གཞོན་ནུ་ནི་རྒྱལ་རིགས་ཀྱི་མངོན་པའི་ང་རྒྱལ་གྱིས་འདི་བཟློག་པར་མི་ནུས་སོ་སྙམ་ནས་དགའ་བར་གྱུར་ཏོ། །དེ་ནས་བྱང་ཆུབ་སེམས་དཔས་འདུན་པ་ལ་གསུངས་པ།་ཁྱོད་ཀྱིས་བསྔགས་ལྡན་ཕོ་བྲང་གི་ནང་དུ་མ་བཀྲི་ཞིག་།དེ་སྐད་ཅེས་གསུངས་པ་དང ། འདུན་པ་སྐད་འཛེར་ཅིང་མིག་མཆི་མས་གང་ནས་རྟའི་རྒྱལ་པོ་བསྔགས་ལྡན་ཁྲིད་དེ་ཡང་དང ། ཡང་དུ་བྱང་ཆུབ་སེམས་དཔའ་ལ་ལྟ་ཞིང་སོང་སྟེ། སེར་སྐྱའི་གཞིར་ཕྱིན་པ་དང་དེར་ཅ་ཅོ་སྐྱེས་ཏེ་ཇི་ཙམ་ན་རྒྱལ་པོ་ཟས་གཙང་མ་ལ་སྨྲས་པ། ལྷ། གཞོན་ནུ་བྱོན་གྱི་དགྱེས་པ་བསྐྱེད་དུ་གསོལ། གྲོང་ཁྱེར་སེར་སྐྱའི་གཞིར་ཡང་སྒྲ་གསང་ཆེན་པོ་བསྒྲགས་སོ། །རྟའི་རྒྱལ་པོ་བསྔགས་ལྡན་ཕོ་བྲང་གི་ནང་དུ་ཞུགས་པ་དང ། བཙུན་མོའི་ཚོགས་ཐམས་ཅད་ཀྱིས་བསྔགས་ལྡན་གྱི་མགུལ་དུ་འཇུས་ཏེ་ངུ་བར་བརྩམས་སོ། །བསྔགས་ལྡན་ཡང་དབུགས་ཁོང་དུ་སོང་སྟེ་དེ་ཉིད་དུ་དུས་བྱས་སོ། །ཤི་ནས་དེ་སྒྲ་གཅན་གྱི་བྲམ་ཟེ་ལས་དྲུག་ལ་བརྩོན་པ་ཞིག་གི་རིགས་སུ་ཉིང་མཚམས་སྦྱོར་བ་བླངས་སོ། །དེ་ནས་བྱང་ཆུབ་སེམས་དཔའ་རིམ་གྱིས་དྲང་སྲོང་ངན་སྤོང་གི་བསྟི་གནས་སུ་གཤེགས་པ་དང ། དེའི་ཚེ་དྲང་སྲོང་ངན་སྤོང་གི་བུ་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་པ་དེ་ལྟ་བུ་དེ་བྱང་ཆུབ་སེམས་དཔས་གཟིགས་ནས་གསུངས་པ། དྲང་སྲོང་ཆེན་པོ། ཅིའི་ཕྱིར་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག།
51a
༄#། །དེས་གསོལ་པ། བདག་གི་བསྟི་གནས་འདི་ན་ཤིང་ཏ་ལ་རྣམས་གསེར་གྱི་ལོ་མ་དང ། མེ་ཏོག་དང ། འབྲས་བུ་ཆགས་པ་ལས་དེ་རྣམས་སྔ་མཁོ་བཞིན་དུ་མ་གྱུར་ཏོ། །བྱང་ཆུབ་སེམས་དཔས་གསུངས་པ། དྲང་སྲོང་ཆེན་པོ། གང་གི་མཐུས་བསྟི་གནས་འདི་ན་ཤིང་ཏ་ལ་རྣམས་གསེར་གྱི་ལོ་མ་དང ། མེ་ཏོག་དང ། འབྲས་བུར་ལྡན་པ་དེ་རྒ་བ་དང།་ན་བ་དང ། འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པས་སོ། །གལ་ཏེ་དེས་རྒ་བ་དང ། ན་བ་དང ། འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པར་མ་གྱུར་ན་སྐྱེད་མོས་ཚལ་འདི་དེའི་ཡིན་པ་ཞིག་།དེ་སྐད་ཅེས་གསུངས་པ་དང ། དྲང་སྲོང་ངན་སྤོང་གི་བུས་བྱང་ཆུབ་སེམས་དཔའ་ལ་བརྟག་པར་བརྩམས་སོ། །དེ་ནས་གཟུགས་བཟང་ཞིང་ཞི་བའི་ཆ་བྱད་དུ་མཐོང་ནས་ཡུན་རིང་དུ་བརྟགས་ཏེ་ངོ་མཚར་སྐྱེས་ནས་གསོལ་པ། ཀྱེ། རབ་ཏུ་བྱུང་བ་དེ་ཁྱོད་ཁོ་ན་མ་ལགས་གྲང།་བྱང་ཆུབ་སེམས་དཔས་གསུངས་པ། དྲང་སྲོང་ཆེན་པོ། དེ་ལྟར་ངེས་སོ། །དེ་ནས་ངན་སྤོང་གི་བུ་ཡ་མཚན་སྐྱེས་པའི་མིག་བགྲད་དེ་བལྟས་ནས་བྱང་ཆུབ་སེམས་དཔའ་ཐོག་མར་གདན་ལ་སྤྱན་དྲངས་ཏེ། མེ་ཏོག་དང ། འབྲས་བུ་བསྟབས་སོ། །གྲོང་ཁྱེར་དཔེ་མེད་ན་ཁྱིམ་བདག་ཕྱུག་པ་དང ། ནོར་མང་ལ་ལོངས་སྤྱོད་ཆེ་བ་ཞེས་བྱ་བ་ནས་དེ་ལ་ཁྱེའུ་བཅུ་
51b
བཙས་སོ་ཞེས་བྱ་བའི་བར་དུ་སྟེ། དེ་དག་ཐམས་ཅད་ཀྱང་རབ་ཏུ་བྱུང་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཇི་ཙམ་ན་བདག་ཉིད་ཆེན་པོ་དེ་རྣམས་ལ་མ་རྒན་མོས་ཤ་ནའི་གོས་དག་ཅིག་བྱིན་པ་དང ། དེ་རྣམས་ཀྱིས་སྨྲས་པ། ཡུམ།་མཁྱེན་པར་མཛོད་ཅིག་།རྒྱལ་པོ་ཟས་གཙང་གི་སྲས་གཞོན་ནུ་དོན་ཐམས་ཅད་གྲུབ་པ་ཞེས་བྱ་བ་རྒ་བ་དང ། ན་བ་དང ། ཤི་བ་མཐོང་ནས་ཀུན་ཏུ་སྐྱོ་བའི་ཡིད་ཀྱིས་ནགས་སུ་སོང་ནས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བས་ན་བདག་ཅག་རྣམས་སངས་རྒྱས་ཀྱི་ཞིང་དུ་གནས་པར་མི་ནུས་པས་ན་བདག་ཅག་ཡོངས་སུ་མྱ་ངན་ལས་འདའོ། །ཤ་ནའི་གོས་འདི་ཟས་གཙང་མའི་སྲས་ལ་ཁྱོད་ཀྱིས་ཕུལ་ཅིག་།བདག་ཉིད་ཆེན་པོ་དེ་ནི་བླ་ན་མེད་པའི་ཡེ་ཤེས་ཐུགས་སུ་ཆུད་པར་འགྱུར་ལ་ཁྱེད་ཀྱིས་ཀྱང་འབྲས་བུ་ཆེན་པོ་འཐོབ་པར་འགྱུར་རོ་ཞེས་སྨྲས་ནས་འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྒན་མོ་དེས་ཀྱང་འཆི་ཀར་གོས་དེ་དག་བུ་མོ་ལ་གཏད་ནས་ཇི་ལྟར་གྱུར་པ་རྣམས་སྨྲས་སོ། །དེའི་བུ་མོ་ཡང་ནད་ཀྱིས་ཐེབས་ཏེ་འཆི་བར་ཤེས་ནས་དེས་ཀྱང་ཤིང་དྲུང་ཞིག་ཏུ་བཞག་ནས་ཤིང་དེ་ལ་གནས་པའི་ལྷ་གང་ཡིན་པ་དེ་ལ་ཁྱོད་ཀྱིས་
52a
༄#། །འདི་དག་རྒྱལ་པོ་ཟས་གཙང་གིས་སྲས་ལ་ཕུལ་ཅིག་ཅེས་གསོལ་བ་བཏབ་བོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དས་དེ་དག་ཤེས་ནས་བླངས་ཏེ། དེ་ནས་རྔོན་པ་རྒས་ཁོགས་པ་ལྟ་བུ་ཞིག་ཏུ་བདག་ཉིད་མངོན་པར་སྤྲུལ་ནས་དེ་དག་བགོས་ཏེ། ལག་པ་ལ་མདའ་གཞུ་ཐོགས་ནས་བྱང་ཆུབ་སེམས་དཔའ་གཤེགས་པའི་ལམ་ཀར་བསྡད་པ་དང ། བྱང་ཆུབ་སེམས་དཔའ་ཡང་རིམ་གྱིས་ལམ་དེར་བྱོན་ནས་རྔོན་པ་ལག་ན་མདའ་གཞུ་ཐོགས་ཤིང་གོས་དུར་སྨྲིག་གྱོན་པ་ཞིག་གཟིགས་སོ། །གཟིགས་ནས་ཀྱང་མི་དེ་ལ་གསུངས་པ། ཀྱེ་ནང་རྗེ། ཤ་ནའི་གོས་འོ་ནི་དག་ནི་རབ་ཏུ་བྱུང་བ་ལ་འཚམ་པ་ཡིན་གྱི། ཀ་ཤི་ཀའི་རས་ཕྲན་འདི་དག་ཁྱེར་ལ་འོ་ནི་དག་ང་ལ་བྱིན་ཅིག།་དེས་གསོལ་པ། གཞོན་ནུ། བདག་ལ་གཞན་དག་ཁྱོད་ཀྱིས་རྒྱལ་བུ་གཞོན་ནུ་བཀྲོངས་ནས་ཀ་ཤི་ཀའི་རས་ཕྲན་གྱི་གོས་འདི་དག་བླངས་སོ་ཞེས་གཞི་དེས། གཡར་འཆི་བར་འགྱུར་ལགས་པས་བདག་འདི་དག་མི་འབུལ་ལོ། །བྱང་ཆུབ་སེམས་དཔས་གསུངས་པ། ཀྱེ་ནང་རྗེ། ང་ནི་མཐུ་ཇི་ལྟ་བུ་དང་ལྡན་པ་འཇིག་རྟེན་ཐམས་ཅད་ཀྱིས་ཤེས་ཏེ། སུ་ཞིག་གིས་ང་བཀྲོངས་པར་ནུས། ཁྱོད་ཀྱིས་ང་བཀྲོངས་པར་སུ་ཞིག་ཡིད་ཆེས་ཀྱི་བག་ཚ་བ་མེད་པར་བྱིན་ཅིག་།དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་
52b
དཔའི་ཞབས་གཉིས་ལ་གཏུགས་ནས་ཤ་ནའི་གོས་དག་ཕུལ་ཏེ་ཀ་ཤི་ཀའི་རས་ཕྲན་རྣམས་བླངས་སོ། །བྱང་ཆུབ་སེམས་དཔའི་སྐུ་དང ། ཤ་ནའི་གོས་དག་འཚམ་པར་མ་གྱུར་པ་དང ། དེ་འདི་སྙམ་དུ་དགོངས་ཏེ། ཀྱེ་མའོ། །ཤ་ནའི་གོས་རྣམས་བདག་གི་སྐུ་དང་འཚམ་པར་གྱུར་ཅིག་སྙམ་ནས་ཚིག་སྨྲས་མ་ཐག་ཏུ་ཤ་ནའི་གོས་དེ་དག་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་མཐུ་དང ། ལྷ་རྣམས་ཀྱི་ལྷའི་མཐུས་བྱང་ཆུབ་སེམས་དཔའི་སྐུ་དང་འཚམ་པར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ད་ནི་བདག་རབ་ཏུ་བྱུང་ཟིན་གྱིས་འགྲོ་བ་རྣམས་རྗེས་སུ་གཟུང་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་མཐར་གྱིས་རྒྱུ་ཞིང་གཤེགས་པ་དང་རྒྱལ་པོའི་ཁབ་ཏུ་བྱོན་ཏོ། ། བྱང་ཆུབ་སེམས་དཔའ་བཟོའི་གནས་དང ། ལས་ཀྱི་གནས་དེ་དང ། དེ་རྣམས་ལ་མཁས་པ་ཡིན་པས་དེས་ཤིང་ཀ་ར་ཝའི་རའི་ལོ་མ་ལས་ལྷུང་བཟེད་བྱས་ནས་སྤྱོད་ལམ་ཞི་བས་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་སོ། །དེའི་ཚེ་རྒྱལ་པོ་གཟུགས་ཅན་སྙིང་པོ་སྟེང་གི་ཁང་བཟང་གི་གཞི་ན་འདུག་པ་དེས་འགྲོ་བ་དང ། ལྡོག་པ་དང ། ལྟ་བ་དང ། རྣམ་པར་ལྟ་བ་དང ། བསྐུམ་པ་དང ། བརྐྱང་བ་དང ། ཆོས་གོས་སྣམ་སྦྱར་དང ། ལྷུང་བཟེད་ཐོགས་པ་མཛེས་པས་བསོད་སྙོམས་སྤྱོད་པ་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། རྒྱལ་པོའི་
53a
༄#། །ཁབ་ན་རབ་ཏུ་བྱུང་བ་ཇི་སྙེད་ཅིག་གནས་པ་ལ་རབ་ཏུ་བྱུང་བ་འདིའི་སྤྱོད་ལམ་དེ་ལྟ་བུ་ནི་འགའ་ཡང་མེད་དོ་སྙམ་མོ། །འདིར་སྨྲས་པ། ཇི་ལྟར་མིག་ཅན་འགྲོ་བ་ལྟར། །རབ་ཏུ་བྱུང་བ་བསྒྲགས་པར་བྱས། །འདིས་ནི་བརྟག་པར་མཛད་ནས་སུ། །རབ་ཏུ་བྱུང་བ་ཡང་དག་བཞེད། །ཁྱིམ་གནས་འདི་ནི་སྡུག་བསྔལ་ཏེ། །འདི་ནི་རྡུལ་གྱི་གནས་ཡིན་ཞིང ། །རབ་ཏུ་བྱུང་བ་བར་སྣང་ལྟར། །མཁྱེན་ནས་དེ་ཚེ་རབ་ཏུ་བྱུང ། །རབ་ཏུ་བྱུང་ནས་སྐུ་ཡིས་ནི། །སྡིག་པའི་ལས་ནི་སྤངས་པ་དང ། །གསུང་གི་སྡིག་པ་སྤངས་ནས་ནི། །འཚོ་བ་ཀུན་ནས་དག་པར་མཛད། །དེ་ནས་མ་ག་དྷ་ཡི་ནི། །གྲོང་མཆོག་རྒྱལ་པོའི་ཁབ་གཤེགས་ནས། །མགོན་པོ་ཤེས་བཞིན་དྲན་ལྡན་པ། །བསོད་སྙོམས་ཕྱིར་ནི་གཤེགས་པ་དེར། །བཟོ་སྦྱངས་མ་ག་དྷ་ཡི་བ་དག་།ཁང་བཟང་འདི་ན་འདུག་པས་མཐོང ། །མཐོང་ནས་སེམས་དང་དེ་ནས་ནི། །བློན་པོ་རྣམས་ལ་འདི་སྐད་སྨྲས། །མཚན་མཆོག་གིས་ནི་རྒྱས་གྱུར་ཅིང ། །ཁོ་ལག་ཕུན་སུམ་ཚོགས་པ་དང ། །གཉའ་ཤིང་གང་དུ་ལྟ་བ་ཡི། །འདི་ལ་ཤེ་ལྡན་དག་ལྟོས་ཤིག་།སྤྱན་མི་འདེག་ལ་ཡིད་གཞུངས་ཤིང ། །དམན་པའི་རིགས་ལས་མ་འཁྲུངས་འདི། །གང་དུ་གནས་པར་གཤེགས་འགྱུར་བ། །རྒྱལ་པོས་ཕོ་ཉ་རྗེས་བཞིན་བཏང ། །དེ་ནས་ཕོ་ཉ་ལ་བསྒོ་བ། །དགེ་སློང་
53b
དེ་ནི་གར་འགྲོ་ཞིང ། །གང་དུ་གནས་ནི་བཏབ་པ་ཡི། །རྗེས་བཞིན་དུ་ནི་འབྲང་བར་བགྱི། །དེ་ནི་བསོད་སྙོམས་གཤེགས་པ་ན། །སྒོ་དྲུག་ལེགས་པར་བསྡམས་ནས་ནི། །ཤེས་བཞིན་དྲན་དང་ལྡན་པ་ཡིས། །ལྷུང་བཟེད་མྱུར་དེ་གང་བར་མཛད། །བསོད་སྙོམས་སྤྱད་པ་བྱས་ནས་ཀྱང ། །ཐུབ་པ་གྲོང་ཁྱེར་ཕྱིར་བྱུང་ནས། །སྐྱ་བསེང་ལ་ནི་མངོན་གཤེགས་ཏེ། །དེ་ལ་གནས་ནི་བཏབ་པར་འགྱུར། །གནས་བཏབ་པ་ནི་ཤེས་ནས་ཀྱང ། །ཕོ་ཉ་གཅིག་གིས་བསྡད་བྱས་ནས། །གཞན་ནི་མྱུར་དུ་སླར་ལོག་སྟེ། །རྒྱལ་པོ་ལ་ནི་ཚིག་སྨྲས་པ། །རྒྱལ་པོ་ཆེན་པོ་དགེ་སློང་དེ། །སེང་གེའམ་སྟག་གི་ཕྲུ་གུ་དག། རིས་སུལ་དག་ན་གནས་པ་ལྟར། །སྐྱ་བསེང་གི་ནི་སྟེང་ན་གནས། །ཕོ་ཉ་རྣམས་ཀྱི་ཚིག་ཐོས་ནས། །ས་བདག་ཤིང་རྟར་ཞུགས་ནས་ནི། །དེ་ནི་བློན་པོས་ཡོངས་བསྐོར་ནས། །མྱུར་བ་ཁོ་ནར་དོང་བར་གྱུར། །བཞོན་པས་བགྲོད་པའི་སར་ཞོན་ཏེ། །དེ་ནི་བཞོན་པ་ལ་བབས་ནས། །རྐང་གིས་ཉེ་བར་སོང་ནས་ནི། ། དེ་ནས་དེ་བཞིན་གཤེགས་པ་མཐོང ། །རྒྱལ་པོ་འདུག་ནས་དགྱེས་པ་དང ། །མགུ་བར་འགྱུར་བའི་གཏམ་གསོལ་ནས། །དེ་ནི་མ་ཁེངས་མི་བརླང་བར། །དོན་འདི་དག་ནི་རབ་སྨྲས་སོ། ། དགེ་སློང་ལང་ཚོ་དང་པོ་ལ། །བབ་པར་ཡང་དག་གནས་གྱུར་ཅིང ། །འདི་འདྲ་གཟི་བརྗིད་ལྡན་པ་ལ། །བསོད་སྙོམས་སྤྱོད་པར་མཛེས་མ་ལགས། །ཁང་པ་ཉམས་དགའ་དག་དང་ནི། །
54a
༄#། །བུད་མེད་རྒྱན་གྱིས་བརྒྱན་པ་དང ། །ལོངས་སྤྱོད་མཆོག་ནི་ཁྱོད་གསོལ་ན། །ཉིད་ཀྱི་གདུང་ནི་ཞུ་ཡི་གསུངས། །རྒྱལ་པོ་གངས་རི་ཉེ་བ་ན། །ཡུལ་གྱི་ལྗོངས་ནི་ནོར་དག་དང ། །འབྲུ་དག་གིས་ནི་གང་གྱུར་པ། །ཀོ་ས་ལ་ཞེས་གྲགས་པ་ཡོད། །བུར་མ་ཤིང་པ་ཉི་མའི་རུས། །ཤཱཀྱ་དག་ནི་དེ་ན་གནས། །རྒྱལ་པོ་ང་ནི་རྒྱལ་རིགས་ཏེ། །ང་ནི་འདོད་པའི་དོན་མི་གཉེར། །ས་འདི་རི་དང་བཅས་ཤིང་རྒྱ་མཚོར་བཅས། །རིན་ཆེན་ཀུན་དང་ལྡན་པ་འབྱོར་གྱུར་ཀྱང ། །མི་ནི་ནམ་ཡང་ངོམས་པར་མི་འགྱུར་ཏེ། །སོ་ག་ཚ་དུས་ཤིང་གི་མེ་བཞིན་ནོ། །འདོད་པ་རྣམས་ནི་ཤ་ཁོ་ན་འབྲེལ་ཅེས་གསུངས། །མི་དབང་རྒལ་བར་དཀའ་ཞིང་འདམ་རྫ་བ་འདྲ། །སྡུག་བསྔལ་དང་ནི་མྱ་ངན་འཇིགས་པ་ཡི། །རྩཝ་བའི་གཙོ་སྟེ་བློ་ངན་རྣམས་ཀྱིས་བསྟེན། །རྒྱལ་པོ་ངས་ནི་བྱུང་མ་ཐག་ཏུ་ཡང ། །འདོད་པ་རྣམས་ལ་མི་དགའི་བློ་བསྐྱེད་ན། །འཇིགས་བྱེད་ཆོས་ཀྱི་དགྲ་བོར་གྱུར་པ་དག་།བོར་བ་དེ་ཀོ་སླར་ཡང་ཅི་ལྟར་བླང ། །རྩེད་མོ་སྣ་ཚོགས་ཡངས་པར་གྱུར་པ་ཡི། །ལྷུན་པོ་གངས་ཅན་རླུང་གིས་བསྐྱོད་སྲིད་ཀྱི། །ང་ཡི་བློ་ནི་ཐར་པ་ལ་རྟེན་པ། །འདོད་པའི་ཤུགས་ཀྱིས་བསྐྱོད་པར་མི་ནུས་སོ། །འཇིག་རྟེན་འདི་ནི་འདོད་པར་བྱིང་གྱུར་ནས། །འཁོར་བའི་འཁོར་ལོས་ཡོངས་སུ་འཁྱམ་པ་ལ། །མི་དབང་ང་སྐྱབས་ཡིན་ཏེ་གཞན་མེད་པས། །འཇིགས་པ་ཆེ་
54b
ལས་དེ་ནི་ཐར་བར་བྱ། །འདོད་པ་རྣམས་ཀྱི་ཉེས་དམིགས་མཁྱེན། །མྱ་ངན་འདས་པ་ཞི་བ་གཟིགས། །སྤང་ཕྱིར་གང་དུ་ང་ཡི་ཡིད། །དགའ་བ་དག་ཏུ་འགྲོ་བར་བྱ། །རྒྱལ་པོ་གཟུགས་ཅན་སྙིང་པོས་གསོལ་བ། ཀྱེ་རབ་ཏུ་བྱུང་བ་བརྟུལ་ཞུགས་འདིས་ཅི་ཞིག་དོན་དུ་གཉེར། །དེས་གསུངས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །རྒྱལ་པོས་གསོལ་པ།་ཀྱེ་རབ་ཏུ་བྱུང་བ་གང་གི་ཚེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་པ་དེའི་ཚེ་བདག་ལའང་དགོངས་ཤིག། བྱང་ཆུབ་སེམས་དཔས་གསུངས་པ། དེ་བཞིན་དུ་བསམ་པར་བྱའོ་ཞེས་གསུངས་ནས་རྒྱལ་པོའི་ཁབ་ནས་བྱུང་སྟེ་བྱ་རྒོད་ཀྱི་ཕུང་པོའི་རི་དང་ཧ་ཅང་ཡང་མི་རིང་བར་དྲང་སྲོང་རྣམས་ཀྱི་བསྟི་གནས་དེར་གཤེགས་སོ། །དེ་ནས་སྤྱོད་པ་དང་གནས་པས་བསམ་གཏན་ལ་བརྩོན་པར་གནས་ཏེ། དེ་རྣམས་གང་གི་ཚེ་རྐང་པ་གཅིག་གིས་ཉིན་ཐུན་གཅིག་འགྲེང་བ་དེའི་ཚེ་བྱང་ཆུབ་སེམས་དཔའ་ཐུན་གཉིས་སུ་བཞུགས་སོ། །གལ་ཏེ་དེ་རྣམས་གདུང་བ་ལྔའི་སྦྱོར་བས་ཉིན་ཐུན་གཅིག་འདུག་པ་དེའི་ཚེ། བྱང་ཆུབ་སེམས་དཔས་ཀྱང་སྦྱོར་བ་དེས་ཐུན་གཉིས་སུ་བཞུགས་སོ། །དེ་ནས་དེ་རྣམས་ཡ་མཚན་སྐྱེས་ནས་དགེ་སྦྱོང་འདི་ནི་ཆེན་པོ་ཞིག་གོ་།ཞེས་སྨྲས་པ། དགེ་སྦྱོང་ཆེན་པོ། དགེ་སྦྱོང་ཆེན་པོ་ཞེས་བྱ་བར་གྱུར་ཏོ། །བྱང་ཆུབ་སེམས་དཔས་
55a
༄#། །དེ་རྣམས་ལ་སྨྲས་པ། ཤེས་ལྡན་དག་།ཁྱེད་བཞུགས་པ་འདིས་ཅི་ཞིག་དོན་དུ་གཉེར། དེ་ན་ཁ་ཅིག་གིས་གསོལ་པ། བརྒྱ་བྱིན་ཉིད་དོ། །ཁ་ཅིག་གིས་གསོལ་པ། བདག་ཅག་ནི་ཚངས་པ་ཉིད་དོ། །ཁ་ཅིག་གིས་གསོལ་པ། བདག་ཅག་ནི་བདུད་ཉིད་དོ། །བྱང་ཆུབ་སེམས་དཔས་དགོངས་པ། དྲང་སྲོང་འདི་དག་ནི་སླར་ཡང་ལྟུང་བ་ལམ་ལོག་པར་ཞུགས་པའོ། །ལམ་འདི་ནི་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་ནུས་པ་མ་ཡིན་ནོ། །དེ་ནས་བྱང་ཆུབ་སེམས་དཔས་ལམ་དེ་ཉིད་ནུས་པ་མེད་པར་མཁྱེན་ནས། སྒྱུ་རྩལ་ཤེས་ཀྱི་བུ་རིང་འཕུར་གང་ན་བ་དེར་གཤེགས་ཏེ་བྱོན་པ་དང ། སྒྱུ་རྩལ་ཤེས་ཀྱི་བུ་རིང་འཕུར་ལ་འདི་སྐད་ཅེས་གསུངས་སོ། །རིང་འཕུར། གལ་ཏེ་ཁྱོད་ལ་མི་བདེ་བ་མེད་ན་ཁྱོད་ཀྱི་དྲུང་དུ་ཁོ་བོ་ཚངས་པར་སྤྱོད་པ་སྤྱད་དོ། །དེས་སྨྲས་པ། ཚེ་དང་ལྡན་པ་གཽ་ཏ་མ། བདག་ལ་མི་བདེ་བ་མེད་ཀྱི་ཅི་བདེ་བ་ཁོ་ནར་བཞུགས་ཤིག་།བྱང་ཆུབ་སེམས་དཔས་གསུངས་པ། རིང་འཕུར་ཁྱོད་ཀྱིས་ཆོས་ཇི་སྙེད་ཅིག་རང་གི་མངོན་པར་ཤེས་པས་རྟོགས་པར་གྱུར་།དེས་གསོལ་པ།་ཚེ་དང་ལྡན་པ་གོའུ་ཏ་མ། ཅིའང་མེད་པའི་སྐྱེ་མཆེད་ཀྱི་བར་དུའོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། སྒྱུ་རྩལ་ཤེས་ཀྱི་བུ་རིང་འཕུར་དད་པ་དེ་ལ་ནི་ང་ཡང་
55b
དད་ལ། སྒྱུ་རྩལ་ཤེས་ཀྱི་བུ་རིང་འཕུར་ལ་བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ཡོད་པ་ལྟར་བདག་ལའང་བརྩོན་འགྲུས་དང ། དྲན་པ་དང ། ཏིང་ངེ་འཛིན་དང།་ཤེས་རབ་ཡོད་པས་སྒྱུ་རྩལ་ཤེས་ཀྱི་བུ་རིང་འཕུར་གྱིས་ཅིའང་མེད་པའི་སྐྱེ་མཆེད་ཀྱི་བར་གྱི་ཆོས་དེ་སྙེད་མངོན་སུམ་དུ་བྱས་ཏེ། ཅིའི་ཕྱིར་བདག་གིས་ཀྱང་ཆོས་འདི་དག་མངོན་སུམ་དུ་མི་བྱ་སྙམ་ནས། དེ་ནས་བྱང་ཆུབ་སེམས་དཔས་ཆོས་དེ་རྣམས་ཁོ་ན་མ་ཐོབ་པ་ཐོབ་པར་བྱ་བའི་ཕྱིར་དང ། མ་རྟོགས་པ་རྟོགས་པར་བྱ་བའི་ཕྱིར་དང ། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་དང ། གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་ཏེ། གཅིག་པུ་བདེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་པ་ན་རིང་པོ་མི་ཐོགས་པ་ཁོ་ནར་ཆོས་དེ་དག་མངོན་སུམ་དུ་མཛད་པར་གྱུར་ཏོ། །ཆོས་དེ་མངོན་སུམ་དུ་མཛད་ནས་ཡང་སྒྱུ་རྩལ་ཤེས་ཀྱི་བུ་རིང་འཕུར་གང་ན་བ་དེར་གཤེགས་ཏེ་བྱོན་ནས་སྒྱུ་རྩལ་ཤེས་ཀྱི་བུ་རིང་འཕུར་ལ་འདི་སྐད་ཅེས་གསུངས་སོ། །རིང་འཕུར་ཁྱོད་ཀྱིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་འདི་དག་རང་གི་མངོན་པར་ཤེས་པས་མངོན་སུམ་དུ་བྱས་སམ། དེས་འདི་སྐད་ཅེས་སྨྲས་སོ། །ཚེ་དང་ལྡན་པ་གཽ་ཏ་མ། མད་དེ། བདག་གིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་
56a
༄#། །མངོན་སུམ་དུ་བྱས་སོ། །བྱང་ཆུབ་སེམས་དཔས་གསུངས་པ། ཚེ་དང་ལྡན་པ་རིང་འཕུར། བདག་གིས་ཀྱང་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་རང་གི་མངོན་པར་ཤེས་པས་མངོན་སུམ་དུ་བྱས་སོ། །ཚེ་དང་ལྡན་པ་གཽ་ཏ་མ། དེ་ལྟར་ན་ཁྱོད་ཀྱི་ཇི་ཙམ་པ་བདག་གིའང་དེ་ཙམ་ལ། བདག་གི་ཇི་ཙམ་པ་ཁྱོད་ཀྱི་ཡང་དེ་ཙམ་པས་དོན་འདི་ལའོ་སྐོལ་མཚུངས་ཤིང་མཉམ་སྟེ་འདྲ་བར་ཐོས་ཀྱི་ཚུར་སྤྱོན། འོ་སྐོལ་གཉིས་ཀས་འཁོར་འདི་ཡོངས་སུ་དྲང་པར་བགྱིའོ། །དེ་ནས་སྒྱུ་རྩལ་ཤེས་ཀྱི་བུ་རིང་འཕུར་བྱང་ཆུབ་སེམས་དཔའི་ཐོག་མའི་སློབ་དཔོན་ཉིད་ཀྱིས་བྱང་ཆུབ་སེམས་དཔའ་ལ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་དོ། །དེའི་རྟོགས་པ་དག་ལའང་དགའ་བ་དང ། མགུ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ནི་ཤེས་པར་ནུས་པ་མ་ཡིན། མཐོང་པར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་དཔས་ལམ་དེ་ནུས་པ་མེད་པར་རིག་ནས། རང་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་ནས་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ། །ལྷག་སྤྱོད། གལ་ཏེ་ཁྱོད་ལ་མི་བདེ་བ་མེད་ན་ཁྱོད་ཀྱི་དྲུང་དུ་ཚངས་པར་སྤྱོད་པ་སྤྱད་དོ། །དེས་གསོལ་པ། ཚེ་དང་ལྡན་པ་གཽ་
56b
ཏ་མ།་བདག་ལ་མི་བདེ་བ་མེད་ཀྱི་ཁྱོད་ཅི་བདེ་བ་ཁོ་ནར་བཞུགས་ཤིག་།ཁྱོད་ཀྱིས་ཆོས་ཇི་སྙེད་ཅིག་མངོན་སུམ་དུ་བྱས། ཚེ་དང་ལྡན་པ་གཽ་ཏ་མ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དུའོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། རངས་བྱེད་ཀྱི་བུ་ལྷག་སྤྱོད་དད་པ་ལ་ནི་བདག་ཀྱང་དད་ལ། རངས་བྱེད་ཀྱི་བུ་ལྷག་སྤྱོད་བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ཡོད་པ་ལྟ་བུའི་བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ནི་བདག་ལ་ཡོད་ན་རངས་བྱེད་ཀྱི་བུ་ལྷག་སྤྱོད་ཀྱིས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་གྱི་ཆོས་འདི་སྙེད་ཅིག་མངོན་སུམ་དུ་བྱས་ནས་བདག་གིས་ཀྱང་ཆོས་འདི་དག་ཅིའི་ཕྱིར་མངོན་སུམ་དུ་མི་བྱ་སྙམ་མོ། །དེ་ནས་བྱང་ཆུབ་སེམས་དཔས་ཆོས་དེ་རྣམས་ཁོ་ན་མ་ཐོབ་པ་ཐོབ་པར་བྱ་བའི་ཕྱིར་དང ། མ་རྟོགས་པ་རྟོགས་པར་བྱ་བའི་ཕྱིར་དང ། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་གཅིག་པུ་དབེན་པ། བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་ཏེ། གཅིག་པུ་དབེན་པར་བག་ཡོད་པར་བདག་ཉིད་གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་མངོན་སུམ་དུ་མཛད་པར་གྱུར་ཏོ། །ཆོས་དེ་མངོན་སུམ་དུ་མཛད་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་པ་དང ། ཏྲངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་
57a
༄#། །སོ། །ལྷག་སྤྱོད། ཁྱོད་ཀྱིས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དུ་ཆོས་འདི་དག་རང་གིས་མངོན་སུམ་དུ་བྱས་སམ། ཚེ་དང་ལྡན་པ་གཽ་ཏ་མ། མད་ལགས་ཏེ། བདག་གིས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་གྱི་ཆོས་འདི་དག་མངོན་སུམ་དུ་བགྱིས་སོ། །བྱང་ཆུབ་སེམས་དཔས་གསུངས་པ། ཚེ་དང་ལྡན་པ་ལྷག་སྤྱོད། བདག་གིས་ཀྱང་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་གྱི་ཆོས་འདི་དག་རང་གི་མངོན་སུམ་དུ་བྱས་སོ། །ཚེ་དང་ལྡན་པ་གཽ་ཏ་མ། དེ་ལྟར་ན་ཁྱོད་ཀྱི་ཇི་ཙམ་པ་བདག་གིའང་དེ་ཙམ་ལ། བདག་གི་ཅི་ཙམ་པ་ཁྱོད་ཀྱི་ཡང་དེ་ཙམ་པས་དོན་འདི་ལ་འོ་སྐོལ་མཚུངས་ཤིང་མཉམ་སྟེ་འདྲ་བར་ཐོས་ཀྱི་ཚུར་སྤྱོན། འོ་སྐོལ་གཉིས་ཀས་ཚོགས་འདི་ཡོངས་སུ་དྲང་བར་བགྱིའོ། །དེ་ནས་རངས་བྱེད་ཀྱི་བུ་ལྷག་སྤྱོད་བྱང་ཆུབ་སེམས་དཔའི་ཐོག་མའི་སློབ་དཔོན་གྱིས་བྱང་ཆུབ་སེམས་དཔའ་ལ་རྗེད་པ་དམ་པས་རྗེད་ཅིང་མཆོད་པའི་དམ་པས་མཆོད་དོ། །དེའི་ཤེས་པ་རྣམས་ལ་ཡང་དགའ་བ་དང ། མགུ་བར་གྱུར་ཏོ། །དེ་ནས་བྱང་ཆུབ་སེམས་དཔས་འདི་སྙམ་དུ་དགོངས་ཏེ། ལམ་འདི་ནི་ཤེས་པར་ནུས་པ་མ་ཡིན། མཐོང་པར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་
57b
དཔས་ལམ་དེ་ཡང་ནུས་པ་མེད་པར་རིག་ནས་གཤེགས་སོ། །དེ་ནས་རྒྱུ་རྩལ་ཤེས་ཀྱི་བུ་རིང་འཕུར་གྱི་འཁོར་གསུམ་དང ། རངས་བྱེད་ཀྱི་བུ་ལྷག་སྤྱོད་ཀྱི་འཁོར་གཉིས་ཏེ་དྲང་སྲོང་ལྔ་བྱང་ཆུབ་སེམས་དཔའི་རྗེས་སུ་འབྲངས་སོ། །དེ་ནས་བྱང་ཆུབ་སེམས་དཔའ་ལྔ་པོ་དང་ལྷན་ཅིག་གངྒཱའི་ལྷོ་ཕྱོགས་ན་ལྟེང་རྒྱས་འོད་སྲུང་གི་སྡེའི་གྲོང་རྡལ་ག་ན་བ་དེར་རྒྱུ་ཞིང་གཤེགས་ཏེ་བྱོན་ནས་དེ་ཕན་ཚུན་འཆག་པ་ན་ཕྱོགས་དགའ་དགའ་ལྟར་འདུག་པ། ནགས་ཚང་ཚིང་མཛེས་པ། ཆུ་ཀླུང་ནཻ་རཉྫ་ནཱ་བསིལ་བར་འབབ་པ། གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་སྔོན་པོ་དང ། ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་གཟིགས་སོ། །གཟིགས་ནས་ཀྱང་འདི་སྙམ་དུ་དགོངས་ཏེ། ཀྱེ་མའོ། །ས་ཕྱོགས་འདི་ནི་དགའ་དགའ་ལྟར་འདུག་པ་ནགས་ཚང་ཚིང་མཛེས་པ། ཆུ་ཀླུང་ནཻ་རཉྫ་ནཱ་བསིལ་བར་འབབ་པ། གསེ་གུ་ཅན་འཇུག་དོགས་བདེ་ཞིང་མཐའ་རྒྱ་ཆེ་ལ་གསིང་མ་སྔོན་པོ་དང ། ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་སྟེ། ཀྱེ་མ་སྤོང་བ་དོན་དུ་གཉེར་བའི་རིགས་ཀྱི་བུས་ནགས་ཁྲོད་འདིར་བརྟེན་ན་སྤོང་བ་བྱ་བར་ནུས་སོ། །བདག་སྤོང་བ་དོན་དུ་གཉེར་བ་ཡིན་པས། མ་ལ་བདག་གིས་ཀྱང་ནགས་ཁྲོད་འདིར་རྟེན་ལ་སྤང་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་ནགས་ཁྲོད་དུ་ཞུགས་ཏེ་ཤིང་
58a
༄#། །གི་དྲུང་དུ་བཞུགས་ནས། ཚེམས་ལ་ཚེམས་གཏད། ལྗགས་རྐན་ལ་བཅར་ནས། ཐུགས་ཀྱིས་ཐུགས་མངོན་དུ་བཟུང ། མངོན་དུ་བསྔམས། ཤིན་ཏུ་མངོན་དུ་བསྔམས་སོ། །དེ་ཐུགས་ཀྱིས་ཐུགས་མངོན་དུ་བཟུང ། མངོན་དུ་བསྔམས། ཤིན་ཏུ་མངོན་དུ་བསྡམས་པས། བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཏེ། དཔེར་ན། མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བ་ཞིག་ཕྱི་ནག་ལོག་ཏུ་བཅིངས། མངོན་དུ་བསྔམས། ཤིན་ཏུ་མངོན་དུ་བསྔམས་ན་དེའི་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཚེམས་ལ་ཚེམས་གཏད། ལྗགས་རྐན་ལ་བཅར་ཏེ། ཐུགས་ཀྱིས་ཐུགས་མངོན་དུ་བཟུང ། མངོན་དུ་བསྔམས། ཤིན་ཏུ་མངོན་དུ་བསྔམས་པ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་སོ། །དེའི་ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་འགགས་པ་
58b
དང།་རླུང་ཐམས་ཅད་སྤྱི་བོའི་ནང་དུ་སོང་ནས་དེའི་དབུ་ལ་དབུའི་ཚེར་བ་ཤིན་ཏུ་མི་བཟད་པ་སྐྱེས་སོ། །དཔེར་ན། མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་པའི་སྤྱི་བོར་ལྕགས་ཀྱི་ཕུར་པ་རྣོན་པོ་བཏབ་ན། དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ། བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན།་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་བཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔའ་སྡུག་བསྔལ་དྲག་པོ་མི་བཟད་པ་རྩུབ་པ་བ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་བའང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་བར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་སོ། །དེའི་ཞལ་དང ། ཤངས་ནས་དབུགས་རྡུབ་པ་
59a
༄#། །དང།་འབྱུང་བ་འགགས་པས་རླུང་ཐམས་ཅད་སྙན་གཉིས་ཀྱི་བུ་ག་ནས་རྒྱུས་པར་གྱུར་ཏོ། །དཔེར་ན། མགར་བས་སྦུད་པ་བུས་ན་རླུང་ཐམས་ཅད་ཀྱི་རྒྱུན་གྲ་གཉིས་ཀྱི་བུ་ག་ནས་རྒྱུ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། རླུང་ཐམས་ཅད་ཀྱི་རྒྱུན་སྙན་གཉིས་ཀྱི་བུ་ག་ནས་རྒྱུས་པར་གྱུར་ཀྱང་དེ་ཞུམ་པ་མ་ཡིན་གྱི། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ།་མ་ལ་བདག་གིས་ལྷག་པར་ཡང་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། ཞལ་དང་ཤངས་ནས་དབུགས་རྡུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྡུབ་པ་དང་འབྱུང་བ་བགགས་པས་ཕྱལ་གྱི་ནང་ཐམས་ཅད་རྒྱས་པར་གྱུར། ཤིན་ཏུ་རྒྱས་པར་གྱུར་ཏེ། དཔེར་ན། མགར་བ་མཁས་པའི་སྤུད་པ་བུས་ན་གང་བར་གྱུར། ཤིན་ཏུ་གང་བར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་
59b
ན་ཕྱལ་གྱི་ནང་ཐམས་ཅད་རྒྱས་པར་གྱུར། ཤིན་ཏུ་རྒྱས་པར་གྱུར་ཀྱང་དེ་ཞུམ་པ་མ་ཡིན་གྱི། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་སོ། །དེའི་ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་པ་དང ། དེའི་ཚེ་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ། །དཔེར་ན། མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་མགོ་ཕྲེང་བས་ཡང་ནས་ཡང་དུ་བཅིངས་ན། དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་
60a
༄#། །འཇུག་པར་བྱའོ་སྙམ་མོ། །དེ་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་སོ། །དེའི་ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་པ་དང།་དེའི་ཚེ་ཁོང་དུ་ཁོང་གི་ཚོར་བ་མི་བཟད་པ་སྐྱེས་སོ། །དཔེར་ན། བ་ལང་གི་བཤན་པ་མཁས་པའམ། བ་ལང་གི་བཤན་པའི་སློབ་མ་མཁས་པས་བ་ལང་བསད་པའི་གྲི་རྣོན་པོས་བ་ལང་གི་ལྟོ་དྲལ་ན་དེའི་ཁོང་གི་ཚོར་བ་ཤིན་ཏུ་མི་ཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། ། དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བསམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེ་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེས་རྣམ་པར་བསམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང །
60b
ཤངས་ནས་དབུགས་རྡུབ་པ་དང ། འབྱུང་བ་བ་གགས་སོ། །དེའི་ཞལ་དང ། ཤངས་ནས་དབུགས་རྡུབ་པ་དང ། འབྱུང་བ་བགགས་པ་དེའི་ཚེ་སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་སོ། །དཔེར་ན། མི་ཤིན་ཏུ་སྟོབས་དང་ལྡན་པ་གཉིས་ཀྱིས་མི་སྟོབས་ཤིན་ཏུ་ཆུང་བ་ཞིག་ཕྱིན་ལོག་དུ་བཟུང་སྟེ་མེ་དོང་གི་ནང་དུ་དཔྱངས་ན། དེའི་ལུས་ལ་ལུས་ཀྱི་གདུང་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། མ་ལ་བདག་གིས་ཐམས་ཅད་ཀྱི་ཐམས་ཅད་དུ་ཟས་མི་བཟའ་བ་བསྒྲུབ་པར་བྱའོ་སྙམ་མོ། །དེ་ནས་ལྷ་རབ་ཏུ་མང་པོའི་སེམས་ཀྱིས་བྱང་ཆུབ་སེམས་དཔའི་ཐུགས་ཤེས་ནས་བྱང་ཆུབ་སེམས་དཔའ་གང་ན་བདེར་དོང་སྟེ་ཕྱིན་ནས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གྲོགས་པོ། གལ་ཏེ་ཁྱོད་མིའི་ཁ་ཟས་ཀྱིས་འཛེམ་པར་མཛད། ངོ་ཚ་བར་མཛད། སྨོན་པར་མཛད་ན། བདག་ཅག་གིས་ཁྱོད་ཀྱི་བ་སྤུའི་ཁུང་བུ་ཐམས་ཅད་ནས་ལྷའི་མདངས་བསྒྲུབ་པར་བགྱིའི་ཁྱོད་ཀྱིས་བདག་གིར་མཛོད་ཅིག་།དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།
61a
༄#། །གལ་ཏེ་བདག་གིས་མིའི་ཁ་ཟས་མི་བཟའ་བར་དམ་བཅས་ལ་བདག་གི་བ་སྤུའི་ཁུང་བུ་ཐམས་ཅད་དུ་ལྷ་རྣམས་ཀྱིས་ལྷའི་མདངས་བསྒྲུབས་ནས་ད་བདག་གིར་བྱེད་པ་ནི་བདག་གི་རྫུན་ཡིན་ལ། བདག་གི་རྫུན་གང་ཡིན་པ་དེ་ནི་བདག་གི་ལོག་པ་ཡིན་ནོ། །བདག་གི་ལོག་པ་གང་ཡིན་པ་དེའི་རྐྱེན་གྱིས་ན་འདི་ན་སེམས་ཅན་ཁ་ཅིག་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེས་པར་འགྱུར་གྱི། མལ་བདག་གིས་ལྷ་རྣམས་ཀྱི་ཚིག་ནི་ཐམས་ཅད་ཀྱི་ཐམས་ཅད་དུ་སྤངས་ལ། ཁ་ཟས་ཉུང་བ་དང ། ཅུང་ཟད་ཆང་ཆུང་བཟའ་བའམ། ཡང་ན་མོན་སྲན་སྡེའུ་ཡི་ཁུ་བའམ། འོན་ཏེ་རྒྱ་སྲན་གྱི་ཁུ་བའམ། ཡང་ན་ཧ་རེ་ནུ་ཀའི་འབྲས་བུའི་ཁུ་བ་བཏུང་ངོ་སྙམ་མོ། །དེ་ནས་བྱང་ཆུབ་སེམས་དཔས་དེའི་ཚེ་ལྷ་རྣམས་ཀྱི་ཚིག་ཐམས་ཅད་ཀྱི་ཐམས་ཅད་དུ་སྤངས་ནས་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བའམ། ཡང་ན་མོན་སྲན་སྡེའུ་ཡི་ཁུ་བའམ། འོན་ཏེ་རྒྱ་སྲན་གྱི་ཁུ་བའམ། ཡང་ན་ཧ་རེ་ནུ་ཀའི་འབྲས་བུའི་ཁུ་བ་གསོལ་ལོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། ཡན་ལག་དང ། ཉིང་ལག་ཐམས་ཅད་ཀུན་ཏུ་ཞུམ་སྟེ། སྐམ་ཞིང་
61b
སྐུ་དབལ་ཆུང་བར་གྱུར་ཏོ། །དཔེར་ན། ལྡུམ་བུ་ཨི་སི་ཏའི་སྡོང་བུ་དང ། ཀ་ལི་ཀའི་སྡོང་བུ་འཇུམ། ཀུན་ཏུ་འཇུམ་པས་ཤ་ཆུང་ཞིང་བསྐམས་པར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། ཡན་ལག་དང ། ཉིང་ལག་ཐམས་ཅད་ཞུམ། ཀུན་ཏུ་ཞུམ་སྟེ། སྐེམ་ཞིང་སྐུ་དབལ་ཆུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་དེའི་ཚེ་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དག་ཆང་ཆུང་གསོལ་བ་ན། དབུ་ལ་དབུའི་པགས་པ་རྙིངས། ཀུན་ཏུ་རྙིངས་ཏེ། འཁུམས་ཤིང་འབར་འབུར་དུ་གྱུར་ཏོ། །དཔེར་ན། ཀུ་བ་རྩ་བ་ནས་བཅད་ན་རྙིས། ཀུན་ཏུ་རྙིས་པས་འཁུམས་ལ་འབར་འབུར་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང།་ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། དབུ་ལ་དབུའི་པགས་པ་རྙིས། ཀུན་ཏུ་རྙེས་ཏེ། འཁུམས་ཤིང་འབར་འབུར་དུ་གྱུར་ཀྱང་དེ་ཞུམ་པ་མ་ཡིན་ཏེ། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཞིང་ཤིན་ཏུ་ཕུག་ཏུ་སོང་སྟེ་ཟབ་པ་ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ངོ ། །དཔེར་ན། ཁྲོན་
62a
༄#། །པ་ཟབ་མོའི་ཆུར་སྐར་མའི་གཟུགས་བརྙན་ཕུག་ཏུ་སོང་ཞིང་ཤིན་ཏུ་ཕུག་ཏུ་སོང་སྟེ། ཟབ་པ་ཤིན་ཏུ་ཟབ་པར་རིང་དུ་སོང་བར་གཏམ་དུ་བྱ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང ། ཤིན་ཏུ་ཕུག་ཏུ་སོང་སྟེ། ཟབ་པ་ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ཡང་དེ་ཞུམ་པ་མ་ཡིན་གྱི། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། དེའི་ཚེ་རྩིབ་མའི་བར་མཐོ་དམན་ཅན་དུ་གྱུར་ཏེ། དཔེར་ན། རྩཝ་ཁང་ལོ་གཉིས་སམ། གསུམ་ལོན་པའི་ཕྱམ་དགུ་པོ་མཐོ་དམན་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང ། ཆུང་བ་དང ། ཅུང་ཟད་དང ། ཆང་ཆུང་གསོལ་བ་ན། རྩིབ་མའི་བར་མཐོ་དམན་ཅན་དུ་གྱུར་ཀྱང་དེ་ཞུམ་པ་མ་ཡིན་གྱི། བརྩོན་འགྲུས་བརྩམས་པ་ཡིན་ཞེས་བྱ་བ་ལ་སོགས་པ་རྣམས་ནི་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང ། ཆུང་བ་དང།་ཅུང་ཟད་དང ། ཆང་ཆུང་གསོལ་བ་ན། སྒལ་པའི་ཚིགས་འདི་ལྟ་སྟེ། སྐྲའི་ལན་བུ་ལྟ་བུར་གྱུར་ཏོ། །མཇུག་དོ་ནི། འདི་ལྟ་སྟེ། རྔ་མོའི་རྐང་པ་ལྟ་བུར་
62b
གྱུར་ཏོ། །དེ་ལན་འགའ་ལྡང་བར་འདོད་ན་ཁ་སྦུབ་ཏུ་འགྱེལ་ལ། ལན་འགའ་འདུག་པར་འདོད་ན་གན་རྐྱལ་དུ་འགྱེལ་ལོ། །དེ་རོ་སྟོད་ལ་བརྟེན་ནས་རོ་སྨད་འཇོག་པར་བྱེད། རོ་སྨད་ལ་བརྟེན་ནས་རོ་སྟོད་འཇོག་པར་བྱེད་དོ། །དེ་ཕྱག་གཉིས་ཀྱིས་སྐུ་ལ་བྱུགས་ཏེ། དེའི་ཕྱག་གཉིས་ཀྱིས་སྐུ་ལ་བྱུགས། ཡོངས་སུ་བྱུགས་པ་དེའི་ཚེ་བ་སྤུ་རྣམས་དྲུང་རུལ་བས་ས་ལ་ལྷགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། མ་ལ། བདག་གིས་ཏིལ་འབྲུ་གཅིག་གིས་ཟས་བཟའ་བར་བྱའོ་ཞེས་ཏེ་དེས་ཏིལ་འབྲུ་གཅིག་གི་ཟས་གསོལ་ཏོ། །དེ་ཏིལ་འབྲུ་གཅིག་གི་ཟས་གསོལ་བ་ན་ཡན་ལག་དང ། ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ་སྐེམ་ཞིང་སྐུ་དབལ་ཆུང་བར་གྱུར་ཏོ། །ཏིལ་འབྲུ་གཅིག་གིས་ཇི་ལྟ་བར་འབྲས་བུ་གཅིག་དང ། སྲན་གོ་ལ་འབྲུ་གཅིག་དང ། རྒྱ་སྲན་འབྲུ་གཅིག་དང ། མོན་སྲན་གྲེའུ་འབྲུ་གཅིག་དང ། མོན་སྲན་སྡེའུ་འབྲུ་གཅིག་དང ། རྩའི་གདིང་བ་ལ་མནལ་བར་མཛད་དོ། །རྒྱལ་པོ་ཟས་གཙང་གིས་དཀའ་བ་ལ་སྤྱོད་པའི་གནས་སྐབས་དེ་ཐོས་ནས་ཉི་མ་རེ་རེ་ཞིང་རྟོག་པ་ཉིས་བརྒྱ་ལྔ་བཅུ་གཏོང་བར་བྱེད་དོ། །རྒྱལ་པོ་ལེགས་པར་རབ་སད་ཀྱིས་
63a
༄#། །ཀྱང་ཉིས་བརྒྱ་ལྔ་བཅུའོ། །དེ་དག་ཉི་མ་རེ་རེ་ཞིང་དེ་གཉིས་ལ་མྱུར་བ་མྱུར་བར་གཏམ་སྐྱེལ་བར་བྱེད་དོ། །བྱང་ཆུབ་སེམས་དཔའ་ནི་འདི་འདྲ་བའི་དཀའ་བ་སྤྱོད་དེ། །ཏིལ་འབྲུ་གཅིག་དང ། འབྲས་འབྲུ་གཅིག་དང ། སྲན་གོལ་འབྲུ་གཅིག་དང ། རྒྱ་སྲན་འབྲུ་གཅིག་དང ། མོན་སྲེན་གྲེའུ་འབྲུ་གཅིག་དང ། མོན་སྲན་སྡེའུ་འབྲུ་གཅིག་གི་ཟས་གསོལ་ཞིང་རྩཝའི་གདིང་བ་ལ་མནལ་ཏོ་ཞེས་སྨྲའོ། །དེ་རྒྱལ་པོ་ཟས་གཙང་གིས་ཐོས་ནས་བུའི་མྱ་ངན་གྱིས་ནོན་པས་ལྷག་པར་དང་ཀན་ཞིང་མིག་མཆིམས་པ་རྣམས་ཏེ་གདུངས་ནས་བཙུན་མོའི་འཁོར་དང་བཅས་པར་རྩཝའི་གདིང་བ་ལ་ཉལ་བར་བྱེད་དོ། །གྲགས་འཛིན་མས་ཀྱང་དེ་ཐོས་པ་དང ། ཁྱིམ་ཐབ་ཀྱི་མྱ་ངན་གྱིས་མནོན་ཏོ། །ཏིལ་འབྲུ་གཅིག་ཟ་བ་དང།་དེའི་རུམ་མི་བདེ་བ་དེ་ཉིད་དུ་ཞུ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདིའང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། མ་ལ་བདག་གིས་ཁ་ཟས་ཤིན་ཏུ་ངན་པ་བཟའ་བར་བྱའོ་སྙམ་སྟེ་དེས་ཁ་ཟས་ཤིན་ཏུ་ངན་པ་གསོལ་བར་མཛད་དོ། །དེ་ལ་ཟས་ཕལ་པ་ནི་འདི་ཡིན་ཏེ། བེའུ་བྱུང་ནས་རིང་པོ་མ་ལོན་པའི་འོ་མ་འཐུང་བ་གང་ཡིན་པ་དེ་
63b
རྣམས་ཀྱི་གཅིན་དང ། ལྕི་བ་ཡིན་ནོ། །དེ་ཇི་སྲིད་དེའི་སྐུ་ལས་མདངས་དེ་ཡལ་བར་མ་གྱུར་པ་དེ་སྲིད་དུ་ཟས་གཉིས་པ་མི་གསོལ་ཏོ། །ཡལ་ནས་ཁ་ཟས་ཕྱི་མ་གསོལ་བར་མཛད་དོ། །དུར་ཁྲོད་ཆེན་པོར་གཤེགས་ནས་ཀྱང་མི་རོ་དབུ་རྟེན་དུ་བཅུག། ཞབས་ལ་ཞབས་བཞག་སྟེ། སྣང་བའི་འདུ་ཤེས་དང ། དྲན་པ་དང ། ཤེས་བཞིན་དང་ལྡན་པའི་འདུ་ཤེས་ཡིད་ལ་མཛད་པས་གློ་གཡས་བས་མནལ་བར་མཛད་དོ། །དེའི་ཚེ་གྲོང་ཁྱེར་གྱི་གཞོན་ནུ་རྣམས་དང ། གྲོང་ཁྱེར་གྱི་གཞོན་ནུ་མ་རྣམས་ལྷགས་ནས་ཤིང་བུས་དེའི་སྙན་གཉིས་ཀྱི་བུ་གར་འཛུགས་པར་བྱེད། རྣ་བ་གཉིས་ཀ་ནས་འདྲེན་པར་བྱེད་ཅིང་འདི་སྐད་ཅེས། ཀྱེ་ཕྱག་དར་ཁྲོད་ཀྱི་ཤ་ཟ་བ་ལ་ལྟོས། ཀྱེ་ཕྱག་དར་ཁྲོད་ཀྱི་ཤ་ཟ་བ་ལ་ལྟོས་ཞེས་སྨྲ་བར་ཡང་བྱེད་དོ། །དེའི་ཚེ་ཕྱག་དར་དང ། བོང་རྡོག་དང ། གསེག་མས་ཀྱང་འཐོར་བར་བྱེད་དོ། །འོན་ཀྱང་བྱང་ཆུབ་སེམས་དཔའ་ནི་གྲོང་ཁྱེར་གྱི་གཞོན་ནུ་རྣམས་སམ། གྲོང་ཁྱེར་གྱི་གཞོན་ནུ་མ་དེ་རྣམས་ལ་ངན་སེམས་སྐྱེད་པའམ། སྡིག་པའི་ཚིག་དབྱུང་བར་མི་དགོངས་སོ། །བྱང་ཆུབ་སེམས་དཔའ་དཀའ་ཐུབ་ཆེན་པོ་ལ་དཀའ་བ་སྤྱོད་པས་ན། དགེ་སྦྱོང་ཆེན་པོ། དགེ་སྦྱོང་ཆེན་པོ་ཞེས་མཚན་དུ་གྱུར་ཏེ། དེ་ལྟར་ལ་དྲུག་གི་བར་དུ་དཀའ་ཐུབ་སྤྱད་པར་མཛད་དོ། །དེ་ནས་ལྷ་གསུམ་ཞིག་བྱང་ཆུབ་སེམས་དཔའ་གང་ན་བ་དེར་ལྷགས་ཏེ། དེ་ནས་ལྷ་གཅིག་གིས་འདི་སྐད་ཅེས་སྨྲས་སོ། དགེ་སྦྱོང་གཽ་ཏ་
64a
༄#། །མ་ནི་ནག་པོ་ཞིག་གོ་།གཉིས་པས་འདི་སྐད་ཅེས་སྨྲས་སོ། །འདི་ནི་ནག་པོ་མ་ཡིན་གྱི། འོན་ཀྱང་སྔོ་བསངས་ཞིག་གོ་།གསུམ་པས་འདི་སྐད་ཅེས་སྨྲས་སོ། །འདི་ནི་ནག་པོའང་མ་ཡིན། །སྔོ་བསངས་ཀྱང་མ་ཡིན་གྱི་དམར་སྨུག་ཞིག་གོ་།བྱང་ཆུབ་སེམས་དཔའི་སྐུ་མདོག་བཟང་པོར་སྣང་བ་ནི་ཐམས་ཅད་ཀྱི་ཐམས་ཅད་དུ་ནུབ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་གསུམ་ཞིག་གནས་པ་འདི་ལྟ་སྟེ། ཤིང་རློན་པ་ཆུ་ཅན་ཞིག་ཆུ་ནས་ཕྱུང་སྟེ། ཉེ་བར་སྐམ་ལ་བཞག་པ་དང ། དེ་ནས་མི་མེ་དོན་དུ་གཉེར་བ། མེ་ཚོལ་བ་ཞིག་འདིར་འོངས་ནས་དེས་དེ་ལ་གཙུབ་སྟན་བྱས་ཏེ། གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་རློན་པ་ཆུ་ཅན་ཡིན་པའི་ཕྱིར་མེ་འབྱུང་བ་དང ། འབར་དུ་མི་བཏུབ་པ་དེ་བཞིན་དུ་དགེ་སྦྱོང་ངམ། བྲམ་ཟེ་ཁ་ཅིག་འདོད་པ་རྣམས་ལ་ལུས་དང ། སེམས་ཀྱིས་ཐག་སྲིད་བར་མི་གནས་ཀྱི་དེ་རྣམས་ཀྱི་འདོད་པ་ལ་འདུན་པ་དང ། འདོད་པ་ལ་ཆགས་པ་དང ། འདོད་པ་ལ་དགའ་བ་དང ། འདོད་པ་ལ་ཞེན་པ་དང ། འདོད་པ་ལ་འཆུམས་པ་དང ། འདོད་པ་ལ་ལྷག་པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ། གནས་པ་མ་ཡིན་པས་ལུས་དང ། སེམས་ཀྱི་ཐག་སྲིང་བར་མི་གནས་པ་རྣམས་ཀྱི་ནི་དེ་དང་འདྲའོ། །དེ་རྣམས་བདག་ཉིད་
64b
གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་མོད་ཀྱི་འོན་ཀྱང་དེ་རྣམས་ཀྱིས་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་དང་པོ་ཡིན་ནོ། །དཔེར་ན། ཤིང་རློན་པ་ཆུ་ཅན་ཞིག་ཆུ་ནས་ཕྱུང་སྟེ་ཉེ་བར་སྐམ་ལ་བཞག་པ་དང ། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་འོངས་ནས་དེ་ལ་དེས་གཙུབ་སྟན་བྱས་ཏེ་གཙུབ་ཤིང་གཞག་ནས་གཙུབས་ནས་འདི་ལྟར་ཤིང་དེ་རློན་པ་ཆུ་ཅན་ཡིན་པའི་ཕྱིར་མེ་འབྱུང་བ་དང ། འབར་དུ་མི་བཏུབ་པ་དེ་བཞིན་དུ་དགེ་སྦྱོང་ངམ། བྲམ་ཟེ་ཁ་ཅིག་འདོད་པ་རྣམས་ལ་ལུས་ཀྱིས་སྤོང་བར་གནས་ཀྱི་སེམས་ཀྱིས་མ་ཡིན་པ་དེ་རྣམས་ཀྱིས་འདོད་པ་ལ་འདུན་པ་དང ། འདོད་པ་ལ་ཆགས་པ་དང ། འདོད་པ་ལ་དགའ་བ་དང ། འདོད་པ་ལ་ཞེན་པ་དང ། འདོད་པ་ལ་འཆུམས་པ་དང ། འདོད་པ་ལ་ལྷག་པར་ཞེན་པ་གང་ཡིན་པ་དེ་རྣམས་ཀྱི་སེམས་ཡོངས་སུ་གཏུགས་ཏེ་གནས་པ་ཡིན་ནོ། །དེ་རྣམས་བདག་ཉིད་ལ་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་མོད་ཀྱི། འོན་ཀྱང་དེ་རྣམས་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། །བླ་ན་མེད་པ་ཡང་དག་པར་རྫོགས་པར་བྱང་ཆུབ་
65a
༄#། །པར་ནུས་པ་མ་ཡིན་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་གཉིས་པ་ཡིན་ནོ། །འདི་ལྟ་སྟེ། ཤིང་སྐམ་ཁོང་སྟོང་ཆུ་མེད་པ་ཞིག་ཆུ་དང ། ཐག་རིང་པོར་སྐམ་ལ་བཞག་པ་དང ། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་འོངས་ནས་དེ་དེ་གཙུབ་སྟན་བྱས་ཏེ། གཙུབ་ཤིང་བཞག་ནས་གཙུབས་ན་ཡང་འདི་ལྟར་ཤིང་དེ་སྐམ་ཞིང་ཁོང་སྟོང་ཡིན་པའི་ཕྱིར་མེ་འབྱུང་བ་དང ། འབར་དུ་བཏུབ་པ་དེ་བཞིན་དུ་དགེ་སྦྱོང་ངམ། བྲམ་ཟེ་ཁ་ཅིག་འདོད་པ་རྣམས་ལ་ལུས་དང ། སེམས་ཀྱིས་ཐག་སྲིང་བར་གནས་པ་དེ་རྣམས་ཀྱི་འདོད་པ་རྣམས་ལ་འདོད་པ་ལ་འདུན་པ་དང ། འདོད་པ་ལ་ཆགས་པ་དང ། འདོད་པ་ལ་དགའ་བ་དང ། འདོད་པ་ལ་ཞེན་པ་དང ། འདོད་པ་ལ་འཆུམས་པ་དང ། འདོད་པ་ལ་ལྷག་པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ་དེ་མི་གནས་པ་ཡིན་ནོ། །དེ་རྣམས་བདག་ཉིད་ལ་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་མྱོང་མོད་ཀྱི་འོན་ཀྱང་དེ་རྣམས་ཀྱིས་ཤེས་པར་ནུས། མཐོང་བར་ནུས། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་གསུམ་པ་ཡིན་ནོ། །དེ་ནས་བྱང་ཆུབ་སེམས་དཔའ་འདི་སྙམ་
65b
དུ་དགོངས་ཏེ། གང་སུ་དག་སྡུག་བསྔལ་སྤོང་བར་བརྩོན་པར་གནས་པ་དེ་ཐམས་ཅད་ནི་འདི་ཙམ་དུ་ཟད་དེ། དེ་ལས་ལྷག་པའང་མེད། དེའི་གོང་ན་ལམ་འདིའང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ་ཤེས་པར་ནུས་པ་དང ། མཐོང་བར་ནུས་པ་དང ། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པའི་ལམ་དེ་གང་ཡིན་སྙམ་ན། དེ་འདི་སྙམ་དུ་དགོངས་ཏེ། བདག་ཡབ་ཤཱཀྱ་ཟས་གཙང་གི་ཁྱིམ་ན་གནས་པའི་ཚེ་ཞིང་ལས་ཀྱི་མཐའི་དྲུང་དུ་སོང་ནས་ཤིང་ཛམྦུའི་གྲིབ་མ་ལ་འདུག་སྟེ་འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་དབེན་པ། རྟོག་པ་དང་བཅས། དཔྱོད་པ་དང་བཅས་ཤིང་དབེན་པ་ལ་སྐྱེས་པའི་དགའ་བ་དང ། བདེ་བ་བསམ་གཏན་དང་པོ་ལ་ཉེ་བར་བསྒྲུབ་སྟེ་གནས་པ་དེ་མངོན་པར་དྲན་ཏེ། དེ་ནི་ལམ་ཡིན། དེ་ནི་བསྒྲུབ་པ་ཡིན། ཤེས་པར་ནུས་པ་ཡིན།་མཐོང་བར་ནུས་པ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་ཡིན་ན། དེ་ལ་བདག་གིས་བསྐྱེད་དུ་ཡང་འདི་ལྟར་རིད་ཅིང་ཉམས་ཆུང་ལ་ཞན་པས་སླ་བ་མ་ཡིན་ཏེ། མ་ལ་བདག་གིས་ཅི་བདེར་དབུགས་རྡུབ་པ་དང ། ཅི་བདེར་དབུགས་དབྱུང་བ་དང ། ཅི་བདེར་འབྲས་ཆན་དང ། ཟན་དྲོན་གྱི་ཁ་ཟས་རགས་པ་བཟའ་ཞིང་ལུས་
66a
༄#། །མར་སར་དང ། ཏིལ་མར་གྱིས་བྱུགས་ལ་ཆུ་འཇམ་པོས་ལུས་བཀྲུ་བར་བྱའོ་སྙམ་སྟེ། དེ་ཅི་བདེར་དབུགས་རྡུབ་པ་དང ། ཅི་བདེར་དབུགས་འབྱུང་བ་དང ། ཅི་བདེར་འབྲས་ཆན་དང ། ཟན་དྲོན་གྱི་ཞལ་ཟས་རགས་པ་གསོལ་ཞིང་སྐུ་ཏིལ་མར་དང ། མར་སར་གྱིས་བྱུགས་ནས་ཆུ་འཇམ་པོས་སྐུ་འཁྲུ་བར་མཛད་དོ། །དེ་ནས་རིམ་གྲོ་པ་དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་།དགེ་སྦྱོང་གཽ་ཏ་མ་འདི་ནི་སྡོམ་པ་ལྷོད་པ། བྱ་བ་མང་བ། མང་པོས་འཚོ་བ། སྤོང་བ་ཉམས་པར་གྱུར་པ་ཡིན་ཏེ། འདི་ད་ལྟར་འབྲས་ཆན་དང ། ཟན་དྲོན་གྱི་ཁ་ཟས་མང་དུ་ཟ་ལ་ལུས་ཞུན་མར་དང ། ཏིལ་མར་གྱི་བྱུགས་ནས་ཆུ་འཇམ་པོས་ལུས་ཁྲུས་བྱེད་དེ། འདིས་ད་ནི་ཅུང་ཟད་ཀྱང་ཐོབ་པར་མི་ནུས་སོ་སྙམ་དུ་བསམས་ནས་བྱང་ཆུབ་སེམས་དཔའ་བོར་ཏེ་དོང་བ་ལས། རིམ་གྱིས་ཝཱ་ར་ཎཱ་སིར་ཕྱིན་ནས་དྲང་སྲོང་སྨྲ་བ་རི་དྭགས་ཀྱི་ནགས་ན་གནས་སོ། །དེ་ནས་བྱང་ཆུབ་སེམས་དཔའི་རིམ་གྱིས་ལུས་ཀྱི་སྟོབས་དང ། མཐུ་དང ། བརྩོན་འགྲུས་ཡང་དག་པར་བསྐྱེད་ནས་རིམ་གྱིས་སྡེ་ཅན་གྱི་གྲོང་ཁྱེར་དུ་གཤེགས་སོ། །དེ་ནི་གྲོང་ཁྱེར་སྡེ་ཅན་ཞེས་བྱ་བ་ན་ནཻ་རཉྫ་ནཱའི་ཆུ་བོའི་འགྲམ་ན་བཞུགས་པ་དང ། བྲམ་ཟེ་ལྷ་ཞེས་བྱ་བ་བྱང་ཆུབ་སེམས་དཔའི་སྔོན་གྱི་གྲོགས་བཤེས་སུ་གྱུར་པ་དེ་སྡེ་ཅན་གྱི་གྲོང་ཁྱེར་ན་གནས་པ་དང །
66b
དེས་བྱང་ཆུབ་སེམས་དཔའ་དཀའ་བ་སྤྱོད་པ་མཛད་པ་མཐོང་ནས། གྲོང་པའི་བུ་མོ་དགའ་མོ་དང ། དགའ་སྟོབས་མ་གཉིས་ལ་སྨྲས་པ། ཁྱེད་གཉིས་ཀྱིས་རྒྱལ་པོ་ཟས་གཙང་མའི་སྲས་མཚན་མཁན་གྱིས་གལ་ཏེ་རབ་ཏུ་བྱུང་བར་མ་གྱུར་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་པ་དེ་ཐོས་སམ། དེ་གཉིས་ཀྱིས་སྨྲས་པ། བདག་ཅག་རྣམས་ཀྱིས་ཀྱང་གལ་ཏེ་དེ་འཁོར་ལོས་བསྒྱུར་བའི་རྒྱལ་པོར་གྱུར་ན་བདག་ཅག་དེའི་བཙུན་མོར་གྱུར་ཅིག་ཅེས་སྨོན་ལམ་བཏབ་ལགས་སོ། །བྲམ་ཟེ་ལྷས་སྨྲས་པ། བདག་ཉིད་ཆེན་པོ་དེ་ནི་དཀའ་ཐུབ་ཀྱིས་ལུས་གདུངས་པས་སྤོང་བ་ལས་བཞེངས་ན་ཁྱེད་གཉིས་ཀྱིས་དེ་ལ་ཐོག་མ་ཁོ་ནར་བསོད་སྙོམས་ཕུལ་ཅིག་དང ། དེ་ཁྱེད་ཅག་གཉིས་ཀྱི་ཡུན་རིང་པོའི་ཕན་པ་དང་བདེ་བའི་དོན་དུ་འགྱུར་རོ། །དེ་ནས་བུ་མོ་དགའ་མོ་དང ། དགའ་སྟོབས་མས་ཐོས་པ་དང ། བ་སྟོང་པ་ཞེས་སོ། །བཞོས་ནས་ཀྱང་བ་ལྔ་བརྒྱ་ལ་བླུད་དོ། །བ་ལྔ་བརྒྱ་བཞོས་ནས་ཉིས་བརྒྱ་ལྔ་བཅུ་ལ་བླུད་དོ། །ཉིས་བརྒྱ་ལྔ་བཅུ་བཞོས་ནས་ཀྱང་བརྒྱ་ལ་བླུད་དོ། །བརྒྱ་བཞོས་ནས་ལྔ་བཅུ་ལ་བླུད་དོ། །ལྔ་བཅུ་བཞོས་ནས་ཉི་ཤུ་ལ་བླུད་དོ། ། ཉི་ཤུ་བཞོས་ཏེ་མ་སྤར་ནས་ཤེལ་ལས་བྱས་པའི་སྣོད་ཀྱི་ནང་དུ་བླུགས་ནས་འོ་ཐུག་བསྐོལ་བར་བརྩམས་པ་ན། བྲམ་ཟེ་རྣམས་ཀྱིས་བསམས་པ། འདིར་ངེས་པར་བག་མ་ལེན་
67a
༄#། །ཏམ།་བག་མ་གཏོང་བར་འགྱུར་རོ། །སྙམ་ནས་བྲམ་ཟེ་མང་པོ་འདུས་པར་གྱུར་པ་དང ། འོ་ཐུག་སྟོང་དུ་བསྒྲེས་པ་བསྐོལ་བ་ན་བུམ་པ་བཟང་པོ་དང ། དཔལ་བེའུ་དང ། གཡུང་དྲུང་འཁྱིལ་བའི་མཚན་མ་དག་བྱུང་བ་སྣང་བ་དང ། ཀུན་ཏུ་རྒྱུ་ཉེ་འགྲོ་ཞེས་བྱ་བས་མཐོང་ནས་བསམས་པ། འོ་མའི་ཐུག་པ་འདི་སུས་འཐུངས་པ་དེས་ནི་བླ་ན་མེད་པའི་ཡེ་ཤེས་འཐོབ་པར་འགྱུར་གྱི། མ་ལ་བདག་གིས་བསླང་ངོ་སྙམ་མོ། །དེ་ནས་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་དེ་ནི་དཀའ་ཐུབ་ཀྱིས་སྐུ་ལུས་ཉམ་ཆུང་ཞིང་སྐུ་ལ་སྦྲེབས་པ་དང ། སྐྱེམས་པས་ཉེན་པ་ཡིན་ལ་བྱང་ཆུབ་སེམས་དཔའ་འོ་ཐུག་གསོལ་ན་བླ་ན་མེད་པའི་ཡེ་ཤེས་ཐུགས་སུ་ཆུད་པར་འགྱུར་ན།་བྲམ་ཟེ་འདི་དག་ནི་རང་བཞིན་གྱིས་བརྐམ་པ་དག་འདིར་འདུས་པར་གྱུར་པས་གལ་ཏེ་བྱང་ཆུབ་སེམས་དཔའ་ལ་གནོད་པ་བྱེད་པར་འགྱུར་རོ་སྙམ་ནས། རི་སྤོས་ཀྱི་ངད་ལྡང་ནས་ལྷའི་སྨན་བླངས་ཏེ། དེ་ཤིན་ཏུ་གཟུགས་བཟང་བའི་བྲམ་ཟེ་ཞིག་ཏུ་མངོན་པར་སྤྲུལ་ནས་འོ་ཐུག་དེ་སྐོལ་བའི་སྟེང་དུ་འདུག་སྟེ། ལྷའི་དབང་པོ་བརྒྱ་བྱིན་གྱིས་དེར་སྨན་མཐུ་བ་སྐྱེད་པ་ཞེས་བྱ་བ་བླུགས་སོ། །དེ་ནས་དགའ་མོ་དང ། དགའ་སྟོབས་མས་འོ་ཐུག་སྦྲང་རྩི་ལྟར་མངར་བ་སྟོང་དུ་བསྒྲེས་པ་བསྐོལ་ནས་ལྷའི་དབང་པོ་བརྒྱ་བྱིན་ལ་འདི་
67b
སྐད་ཅེས་སྨྲས་སོ། །ཁྱོད་ཉིད་རྒྱལ་པོ་ཟས་གཙང་མའི་སྲས་དེ་ཡིན་ནམ། བརྒྱ་བྱིན་གྱིས་སྨྲས་པ། དེ་ནི་ངའི་མཁན་པོ་ཡིན་ཏེ། ང་ནི་དེའི་སློབ་མ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་གྱིས་འོ་ཐུག་སྦྲང་རྩི་ལྟར་མངར་བ་སྟོང་དུ་བསྒྲེས་པ་བླངས་སོ། །བླངས་ནས་ཀྱང་དགའ་མོ་དང ། དགའ་སྟོབས་མ་གཉིས་ལ་སྨྲས་པ། སྦྱིན་པ་འདིས་ཁྱེད་གཉིས་ཅི་ཞིག་དོན་དུ་གཉེར། གང་གི་དོན་དུ་ཡོན་བསྔོ་བར་བྱ། དེ་གཉིས་ཀྱིས་སྨྲས་པ། གསོལ་བ་ཕུལ་བའི་བསོད་ནམས་ཅི་མཆིས་པས། །གྲགས་དང་ལྡན་པ་དོན་རྣམས་ཀུན་གྲུབ་པ། །མི་ཡི་མཆོག་གྱུར་བློ་མཆོག་ལྡན་པ་དེའི། །དོན་ཀུན་མྱུར་དུ་ཤིན་ཏུ་གྲུབ་གྱུར་ཅིག། དེ་ནས་བྱང་ཆུབ་སེམས་དཔའ་ཆུ་ཀླུང་ནཻ་རཉྫ་ནཱ་ར་ཞུགས་ནས་སྐུ་ཁྲུས་མཛད་དེ། རྒལ་བར་བཞེད་པ་དང ། སྐུ་ཉམ་ཆུང་བ་ཉིད་ཀྱིས་རྒལ་བར་མ་སྤྱོད་པ་ན་ལྷ་རྣམས་ཀྱིས་ཨ་རྫུ་ནའི་ཡལ་ག་བཏུད་པ་དང ། དེ་ལ་འཇུས་ནས་བྱང་ཆུབ་སེམས་དཔའ་རྒལ་བར་མཛད་དེ་ཆོས་གོས་མནབས་ནས་ཆུ་ཀླུང་ནཻ་རཉྫ་ནཱའི་འགྲམ་ན་བཞུགས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་བདེ་བར་བཞུགས་པར་རིག་ནས་འོ་ཐུག་སྦྲང་རྩི་ལྟར་མངར་བ་སྟོང་དུ་བསྒྲེས་བ་ཡོལ་གོར་བླུགས་ཏེ། བྱང་ཆུབ་སེམས་དཔའ་ལ་བསྟབས་སོ། །བྱང་ཆུབ་སེམས་དཔས་ཀྱང་གསོལ་ནས་ཡོན་བསྔོ་བར་མཛད་དོ། །དེ་ནས་བྱང་ཆུབ་སེམས་དཔའ་ཆུ་ཀླུང་ནཻ་རཉྫ་
68a
༄#། །ནའི་འགྲམ་ན་ཕན་ཚུན་དུ་བཞུགས་པའི་ས་བཙལ་བ་དང ། ཅི་ཙམ་ན་རི་བྲག་ཆེན་པོ་མེ་ཏོག་དང ། འབྲས་བུ་སྣ་ཚོགས་དང་ལྡན་པ་ཞིག་གཟིགས་ནས་དེ་དེ་ལ་འཛེགས་ཏེ་ཕྱོགས་དབེན་ཞིང་གསལ་བའི་ཕྱོགས་སུ་སྐྱིལ་མོ་ཀྲུང་བཅས་ཏེ་བཞུགས་སོ། །བཞུགས་མ་ཐག་ཏུ་རི་དེ་ཉིད་དུ་རྙིལ་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།་འདིར་རྒྱུ་ཅི་ཞིག་ཡོད་ན་རི་རྙིལ་བར་གྱུར། ཅི་ང་འོད་བ་ལ་ལྷ་རྣམས་མངོན་པར་མི་དགའམ། འོན་ཏེ་བགེགས་འགའ་ཞིག་འབྱུང་བར་འགྱུར་སྙམ་མོ། །ལྷ་རྣམས་ཀྱིས་བྱང་ཆུབ་སེམས་དཔའི་ཐུགས་ཤེས་ནས་གསོལ་པ། བྱང་ཆུབ་སེམས་དཔའ་ས་ཐམས་ཅད་ཀྱིས་གཟུང་བར་རྔོ་མི་ཐོག་པ་ནི་གཉིས་ཏེ། དགེ་བའི་རྩེ་བ་ཆད་པ་གང་ལགས་པ་དང ། དགེ་བའི་རྩ་བ་སྦྱངས་པ་གང་ལགས་པ་སྟེ། ཁྱོད་ནི་དགེ་བའི་རྩ་བ་སྦྱངས་པ་ལགས་སོ། །འདི་ནི་བྱང་ཆུབ་སེམས་དཔའ་རྣམས་ཀྱི་གནས་མ་ལགས་ཏེ། འོན་ཀྱང་མདུན་དུ་བཞུད་ཅིག་དང།་དེ་ན་རྡོ་རྗེའི་གདན་མཆིས་ཏེ། དེར་ནི་འདས་པ་དང ། མ་བྱོན་པ་དང ། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་བཞུགས་ནས་བླ་ན་མེད་པའི་ཡེ་ཤེས་ཐོབ་པར་གྱུར་ཅིང་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྟས་ལམ་བསྟན་པ་བཞིན་གཤེགས་པ་ན་དེའི་ཞབས་བཞག་སར་པདྨ་དག་བྱུང་བར་གྱུར་ཏོ། །རྒྱ་མཚོ་ཆེན་པོ་བཞི་
68b
ལས་ཀྱང་ཆུ་བབ་ནས་པདྨའི་རྫིང་དག་བྱུང་བར་གྱུར་ཏོ། །གོམ་པ་བོར་ནས་མནན་པ་ནས་ཆེན་པོ་འདི་འཁར་བའི་སྣོད་བཞིན་དུ་སྒྲ་འབྱིན་པར་བརྩམས་སོ། །བྱ་ཙ་ཤ་དང ། རི་དྭགས་དག་གིས་ཀྱང་བྱང་ཆུབ་སེམས་དཔའ་ལ་སྐོར་བ་བྱེད་དོ། །རླུང་གཏོང་བའི་ལྷའི་བུ་རྣམས་ཀྱིས་ཀྱང་དལ་བུ་དལ་བུས་རླུང་གཏོང་བར་བྱེད་དོ། །ཆར་པ་འབེབས་པའི་ལྷའི་བུ་རྣམས་ཀྱིས་ཀྱང་ཆར་པ་ཅུང་ཟད་འབབས་པར་བྱེད་དོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ང་ལ་འདི་འདྲ་བའི་མཚན་མ་བཟང་པོ་བྱུང་བར་གྱུར་པས་དེང་ཉིད་བདག་གིས་བླ་ན་མེད་པའི་ཡེ་ཤེས་ཐོབ་པར་འགྱུར་རོ་སྙམ་མོ། །ཆུ་ཀླུང་ནཻ་རཉྫ་ནཱའི་འགྲམ་ན་ཀླུའི་རྒྱལ་པོ་དུས་ཅན་ཞེས་བྱ་བ་ལོང་བ་ཞིག་གནས་ཏེ། དེར་དེའི་ལས་ཀྱི་རྣམ་པར་སྨིན་པ་ལས་སྐྱེས་པའི་གནས་ཞིག་བྱུང་བར་གྱུར་ཏེ། སངས་རྒྱས་བྱུང་བ་ན་མིག་ཐོབ་པར་འགྱུར་ལ། ཡོངས་སུ་མྱ་ངན་ལས་འདས་པ་ན་སླར་ལོང་པར་འགྱུར་རོ། །དེ་སའི་སྒྲ་གྲགས་པས་གནས་ནས་བྱུང་བ་དང ། རྒྱང་རིང་པོ་ཁོ་ན་ནས་བྱང་ཆུབ་སེམས་དཔའ་སྐུ་སྐྱེས་བུའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་ལ། དཔེ་བྱད་བཟང་པོ་བརྒྱད་ཅུས་སྤྲས་པ། འོད་འདོམ་གང་གིས་བརྒྱན་པ། ཉི་མ་སྟོང་བས་ལྷག་པའི་འོད་ཟེར་དང ། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ་མཐོང་ངོ ། །མཐོང་མ་ཐག་ཏུ་བྱང་ཆུབ་སེམས་དཔའ་ལ་ཚིགས་སུ་བཅད་
69a
༄#། །པའི་དབྱངས་ཀྱིས་བསྟོད་པར་བརྩམས་པ། དགའ་བའི་དབྱངས་ཀྱིས་ཀུན་གང་བའི། །ས་ཡི་སྒྲ་ནི་ཐོས་ནས་ཀྱང ། །ཀླུ་ཡི་གནས་ནས་བྱུང་ནས་སུ། །ཕྱོགས་ཀུན་ཏུ་ཡང་ལྟ་བར་བྱེད། །བྲང་གིས་འགྲོ་བའི་གཙོ་བོ་སྟེ། །ཀླུ་ཡི་རྒྱལ་པོ་མཐུ་ཆེན་གྱིས། །ནཻ་རཉྫ་ནཱའི་ངོགས་སུ་ནི། །འཇིག་རྟེན་འདྲེན་པ་གཤེགས་པ་མཐོང ། །སངས་རྒྱས་འབྱུང་བའི་མཐུ་ཡིས་ནི། །ཀླུ་ཡིས་མིག་ནི་ཐོབ་གྱུར་ཏེ། །སེམས་ནི་དགའ་ཞིང་ཡིད་མགུ་ནས། །དེས་ནི་འདི་སྐད་ཅེས་གསོལ་ཏོ། །བདག་གིས་སྔོན་ནི་མཐོང་བ་ཡིན། །སངས་རྒྱས་མཐུ་ཆེན་དེ་རྣམས་དང ། །ཐུབ་པ་ཁྱོད་ནི་མཐོང་གྱུར་ན། །དེ་དང་ཐ་དད་དབྱེར་མ་མཆིས། །ཐུབ་པ་ཇི་ལྟར་ཐོག་མར་ནི། །གཡས་པའི་ཞབས་ནི་འདེགས་པ་ལགས། །ཁྱོད་ནི་སངས་རྒྱས་དེང་གྱུར་ནས། །འཇིག་རྟེན་གྱི་ནི་ཡོན་གནས་འགྱུར། །ཇི་ལྟར་ཆོས་གོས་མནབས་པ་དང ། །ནཻ་རཉྫ་ནཱའི་ཆུ་བསིལ་ལ། །ཇི་ལྟ་བུར་ནི་འཇུག་པ་ལས། །དེ་རིང་ཁྱོད་ནི་སངས་རྒྱས་འགྱུར། །ཇི་ལྟར་རབ་བརྟན་འགྲོས་སུ་གཤེགས་པ་དང ། །བ་ལང་ཁྱུ་མཆོག་འགྱིང་བ་ལྟར་གཤེགས་པས། །སྐྱེས་བུ་ཁྱུ་མཆོག་ཆོས་འཛིན་རྣམས་ཀྱི་མཆོག་།དེང་འདིར་ཁྱོད་ནི་སངས་རྒྱས་མཆོག་འགྱུར་རོ། །ཇི་ལྟར་མཁའ་ལ་ཙ་ཤ་བརྒྱ་ཕྲག་གིས། །ཁྱོད་སྐུ་རྒྱ་ཆེན་རྒྱ་ཆེན་མཛད་དེ་ལ། །ལྡིང་ཞིང་སྐོར་བར་བགྱིད་པར་གྱུར་པ་ལས། །མི་
69b
མཆོག་དེང་ནི་སངས་རྒྱས་མཆོག་འགྱུར་རོ། །ཇི་ལྟར་དྲི་ཞིམ་རླུང་ནི་ལྡང་བ་དང ། །རི་དྭགས་བྱ་ཡི་ཚོགས་ཀྱང་མི་སྐྲག་ལ། །ལྗོན་ཤིང་རླུང་གིས་གཡོས་པར་མ་གྱུར་པས། །མི་མཆོག་དེང་ནི་སངས་རྒྱས་མཆོག་འགྱུར་རོ། །ཇི་ལྟར་བཙུན་པ་ཁྱོད་ཀྱི་ཞལ་གྱི་འོད། །དྲི་མེད་གསེར་འོད་འབར་བ་འདྲ་བ་དེ། །རྣམ་པར་མཛེས་ཤིང་ཁ་དོག་ལྡན་པས་ན། །མི་མཆོག་དེང་ནི་སངས་རྒྱས་མཆོག་འགྱུར་རོ། །དེ་ནས་བྱང་ཆུབ་སེམས་དཔའ་ཀླུའི་རྒྱལ་པོ་དུས་ཅན་གྱིས་ཡང་དག་པར་བསྟོད་ནས་རྡོ་རྗེའི་གདན་ལོགས་སུ་གཤེགས་སོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ་རྩཝའི་གདིང་བ་ལ་འདུག་པར་བྱའོ་སྙམ་པ་དང ། དེ་ལ་རྩཝའི་དགོས་པ་བྱུང་བར་ལྷའི་དབང་པོ་བརྒྱ་བྱིན་གྱིས་སེམས་ཀྱིས་བྱང་ཆུབ་སེམས་དཔའི་དགོངས་པ་ཤེས་ནས་རི་སྦོས་ཀྱི་ངད་ལྡང་ལས་ཤིང་བལ་གྱི་འདབ་མ་ལྟར་རེག་ན་བདེ་བའི་རྩཝ་ཁུར་ཅིག་བླངས་ནས་རྩཝ་འཚོང་བཀྲ་ཤིས་ཀྱི་ཆ་བྱད་དུ་བདག་ཉིད་མངོན་པར་སྤྲུལ་ཏེ་བྱང་ཆུབ་སེམས་དཔའི་སྤྱན་སྔ་ན་སྡོད་དོ། །བྱང་ཆུབ་སེམས་དཔས་གསུངས་པ། བཞིན་བཟང ། རྩཝ་འོ་ནི་དག་ང་ལ་ཕུལ་ཅིག་།ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་གུས་པ་དང་བཅས་པས་ཕུལ་ལོ། །བྱང་ཆུབ་སེམས་དཔའ་རྩཝ་འཚོང་བཀྲ་ཤིས་ལས་རྩཝ་བཞེས་ཏེ་ལྷ་དང ། མི་རྣམས་ཀྱི་ཡིད་སྡུད་པར་བྱེད་པའི་སྤྱོད་
70a
༄#། །ལམ་གྱིས་འགྲོ་བ་རྣམས་དད་པར་མཛད་ཅིང་ལྷ་རྣམས་ཀྱིས་བསྟན་པའི་ལམ་ནས་བྱང་ཆུབ་ཀྱི་སྙིང་པོ་གང་ན་བ་དེར་གཤེགས་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་འཁོར་ལོའི་ལྟེ་བ་ལྟ་བུའི་རྡོ་རྗེའི་གདན་ལ་བརྟན་ཞིང་ངེས་པས་ཉིད་ཀྱིས་རྩཝ་རྣམས་མ་འཁྲུགས་པ་དང ། སྟུག་སྲབ་མེད་པར་བཀྲམ་ནས་ཐུགས་བསྐྱེད་ཅིང་ཚིག་ཏུ་ཡང་གསུང་པ། ཇི་སྲིད་སྡུག་བསྔལ་ཀུན་གྱི་མཐའི། །ཟག་ཟད་ཡང་དག་མ་ཐོབ་པ། །དེ་སྲིད་སྲོག་ནི་མཐར་གྱུར་ཀྱང ། །སྐྱིལ་ཀྲུང་འདི་ནི་གཞིག་མི་བྱ། །ཞེས་གསུངས་ནས་བྱང་ཆུབ་སེམས་དཔའ་རྡོ་རྗེའི་གདན་ལ་འཛེགས་ཏེ་བྲང་གིས་འགྲོའི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟ་བུའི་སྐྱིལ་མོ་ཀྲུང་བཅས་ནས་སྐུ་དྲངས་པོར་བ་སྲང ། དྲན་པ་མངོན་དུ་བཞག་ནས་བཞུགས་སོ། །བཞུགས་པའི་མོད་ཁོ་ན་ལ་བདུད་སྡིག་ཅན་གྱི་གནས་གཡོས་པར་གྱུར་ཏོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། ཅིའི་ཕྱིར་ངའི་གནས་གཡོས་སྙམ་པ་དང ། ཅི་ཙམ་ན་བྱང་ཆུབ་སེམས་དཔའ་རྡོ་རྗེའི་གདན་ལ་བཞུགས་པ་མཐོང་ངོ ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། ཤཱཀྱ་ཟས་གཙང་གི་བུ་རྡོ་རྗེའི་གདན་ལ་འདུག་གི་ཇི་ཙམ་བདག་གི་ཡུལ་ལས་མ་འདས་ཀྱི་བར་དུ་དེ་ལ་བགེགས་བྱའོ་སྙམ་དུ་བསམས་ནས་ཕྲིན་ཡིག་སྐྱེལ་པ་སྐྲ་གྱེན་དུ་འགྲེང་ལ་ཤ་ནའི་སྨད་གཡོག་
70b
བཀོས་པ་ཞིག་གི་ཁ་དོག་ཏུ་མངོན་པར་སྤྲུལ་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་རྟབས་པར་སྨྲས་པ། གྲོང་ཁྱེར་སེར་སྐྱའི་གཞི་ནི་ལྷ་སྦྱིན་གྱིས་མནན། ཕོ་བྲང་ནི་བཅོམ། ཤཱཀྱ་རྣམས་ནི་ཁ་བཏག་ན། ཁྱོད་ཅིའི་ཕྱིར་གནས་བཏབ་སྟེ་འདུག། དེ་ནས་བྱང་ཆུབ་སེམས་དཔའ་ལ་སྡིག་པ་མི་དགེ་བའི་རྣམ་པར་རྟོག་པ་གསུམ་སྐྱེས་པ། འདི་ལྟ་སྟེ། འདོད་པའི་རྣམ་པར་རྟོག་པ་དང ། གནོད་སེམས་ཀྱི་རྣམ་པར་རྟོག་པ་དང ། རྣམ་པར་འཚེ་བའི་རྣམ་པར་རྟོག་པའོ། །དེ་ལ་འདོད་པའི་རྣམ་པར་རྟོག་པ་ནི། གྲགས་འཛིན་མ་དང ། རི་དྭགས་སྐྱེས་དང ། ས་འཚོ་མ་ལའོ། །གནོད་སེམས་རྣམ་པར་རྟོག་པ་ནི། ལྷ་སྦྱིན་ལའོ། །རྣམ་པར་འཚེ་བའི་རྣམ་པར་རྟོག་པ་ནི། དེའི་རྗེས་སུ་འཚོ་བའི་ཤཱཀྱ་རྣམས་ལའོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ཅིའི་ཕྱིར་བདག་ལ་སྡིག་པ་མི་དགེ་བའི་རྣམ་པར་རྟོག་པ་གསུམ་སྐྱེས་སྙམ་ན། ཇི་ཙམ་ན་བདུད་སྡིག་ཅན། འདི་ལྟ་སྟེ། དཀྲུག་པའི་ལས་ཀྱི་ཕྱིར་ཉེ་བར་འོངས་པ་གཟིགས་སོ། །དེ་ནས་བྱང་ཆུབ་སེམས་དཔའ་དགེ་བའི་རྣམ་པར་རྟོག་པ་གསུམ་སྐྱེས་ཏེ། འདི་ལྟ་སྟེ། ངེས་པར་འབྱུང་བའི་རྣམ་པར་རྟོག་པ་དང ། གནོད་སེམས་མེད་པའི་རྣམ་པར་རྟོག་པ་དང ། རྣམ་པར་མི་འཚེ་བའི་རྣམ་པར་རྟོག་པའོ། །ཡང་བདུད་ཀྱིས་སྨྲས་པ། ཁྱོད་ཅིའི་ཕྱིར་བྱང་ཆུབ་ཀྱི་སྙིང་པོ་ལ་འདུག། བྱང་ཆུབ་སེམས་དཔས་བཀའ་སྩལ་
71a
༄#། །པ།་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་རོ། །བདུད་ཀྱིས་སྨྲས་པ། ཁྱོད་ཀྱིས་བླ་ན་མེད་པའི་ཡེ་ཤེས་ག་ལ་ཐོབ། བྱང་ཆུབ་སེམས་དཔས་བཀའ་སྩལ་པ།་སྡིག་ཅན་ཁྱོད་ཀྱིས་རེ་ཞིག་མཆོད་སྦྱིན་གཅིག་བྱས་པས་ཀྱང་འདོད་པའི་ཁམས་ཀྱི་དབང་ཕྱུག་ཕུན་སུམ་ཚོགས་པར་གྱུར་ན་ངེས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང ། ལག་པ་དང ། རྐང་པ་དང ། མིག་དང ། ཤ་དང ། ཁྲག་དང ། བུ་དང ། ཆུང་མ་དང ། དབྱིག་དང ། གསེར་ལ་སོགས་པ་ཡོངས་སུ་བཏང་ནས་བླ་ན་མེད་པའི་ཡེ་ཤེས་ཐོབ་པར་འགྱུར་བ་ལྟ་སྨོས་ཀྱང་ཅི་དགོས་ཏེ། ངས་བླ་ན་མེད་པའི་ཡེ་ཤེས་ཐོབ་པར་མི་འགྱུར་བ་དེ་སྲིད་རེ་སྐན། དེ་སྐད་ཅེས་བཀའ་སྩལ་པ་དང ། བདུད་ཀྱིས་སྨྲས་པ། རེ་ཞིག་ཇི་ལྟར་བདག་གིས་མཆོད་སྦྱིན་གཅིག་གིས་འདོད་པའི་ཁམས་ཀྱི་དབང་ཕྱུག་ཐོབ་པར་གྱུར་པའི་བདག་གི་དབང་ནི་ཁྱོད་ཡིན་ན། ཇི་ལྟར་ཁྱོད་ཀྱིས་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང ། ལག་པ་དང ། རྐང་པ་དང ། མིག་དང ། ཤ་དང ། ཁྲག་དང ། བུ་དང ། ཆུང་མ་དང ། དབྱིག་དང ། གསེར་ལ་སོགས་པ་ཡོངས་སུ་བཏང་བར་
71b
ཁྱོད་ལ་དཔང་སུ་ཡོད། དེ་ནས་བྱང་ཆུབ་སེམས་དཔའ་བཅོམ་ལྡན་འདས་ཀྱི་ཕྱག་འཁོར་ལོ་དང ། བཀྲ་ཤིས་དང ། གཡུང་དྲུང་འཁྱིལ་པ་དང ། དྲ་བས་འབྲེལ་བ་དང ། བསོད་ནམས་བརྒྱ་ཕྲག་དུ་མས་བསྐྱེད་པ། སྐྲག་པ་རྣམས་ལ་དབུགས་འབྱིན་པར་མཛད་པས་ས་ལ་རེག་པར་མཛད་ནས། ངས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང ། ལག་པ་དང ། རྐང་པ་དང ། མིག་དང ། ཤ་དང ། ཁྲག་དང ། བུ་དང ། ཆུང་མ་དང ། དབྱིག་དང ། གསེར་ལ་སོགས་པ་ཡོངས་སུ་བཏང་བའི་ངའི་དབང་ནི་ས་འདི་ཡིན་ནོ། །དེ་ནས་སའི་ལྷས་ས་བརྟོལ་ནས་ཐལ་མོ་སྦྱར་ཏེ་སྐད་ཕྱུང་བ། སྡིག་ཅན། བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་ཡིན་ནོ་ཞེས་དེ་སྐད་ཅེས་སྨྲས་པ་དང ། བདུད་སྡིག་ཅན་ཅང་མི་སྨྲ་བར་གྱུར་ཏེ་ཞུམ་ཞུམ་པོར་གྱུར། བག་འཁུམས་པར་གྱུར། སྤྱི་བོ་སྨད་ནས་སྤོབས་པ་མེད་ལ་སེམས་ཁོང་དུ་ཆུད་ཅིང་འདུག་པར་གྱུར་ཏོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། བདག་གིས་ཟས་གཙང་གི་བུ་ལ་དེ་ལྟར་བྱས་ཀྱང་གླགས་མ་རྙེད་ཀྱི། མལ་འདི་ལ་བདག་གིས་ཡང་བགེགས་ཤིག་བྱའོ་སྙམ་ནས། དཔུང་མཆོག་དང་ལྡན་པ་བྱེ་བ་ཕྲག་སུམ་ཅུ་རྩ་དྲུག་པོ་གླང་པོ་ཆེ་དང ། རྟ་དང ། རྔ་མོ་དང ། ར་དང ། རི་དྭགས་དང ། མ་ཧེ་དང ། ཕག་དང ། ཁྱི་དང ། འུག་
72a
༄#། །པ་དང ། ནེའུ་ལེ་དང ། སྤྲེའུ་དང ། ཝ་ལ་སོགས་པ་འདྲ་བ། རལ་གྲི་དང ། མདའ་བོ་ཆེ་དང ། མཚོན་རྩེ་གཅིག་པ་དང ། འཁོར་ལོ་དང ། མདུང་ཐུང་དང ། གཞུ་དང ། ཞགས་པ་དང ། དགྲ་སྟ་དང ། ལྕགས་ཀྱི་དབྱུག་པ་ལ་སོགས་ཏེ་མཚོན་ཆ་རྣམས་འཕྱར་བ་འཇིགས་སུ་རུང་བ་རྣམས་དང་ལྷན་ཅིག་བྱང་ཆུབ་སེམས་དཔའ་ཀུན་ནས་ཡོངས་སུ་བསྐོར་ནས་གནས་ཤིང་བདུད་སྡིག་ཅན་རང་ཉིད་གཞུ་རྣ་དྲུང་དུ་བཀང་ནས་འདུག་གོ་།དེ་ནས་བྱང་ཆུབ་སེམས་དཔའ་གཟུགས་རྣམ་པ་དུ་མ་ཅན། མཚོན་ཆ་རྣམ་པ་སྣ་ཚོགས་མང་པོ་དང་ཆས་པ་དེ་རྣམས་གཟིགས་ནས་དགོངས་པ་རེ་ཞིག་སྐྱེས་པ། ཕལ་པ་ཞིག་དང་ལྷན་ཅིག་འཐབ་པར་རྩོམ་ནའང ། དེའི་གཉེན་པོའི་ཕྱོགས་ལ་སྦྱོར་བར་བྱེད་ན་འདོད་པའི་ཁམས་ཀྱི་དབང་ཕྱུག་འདི་ལ་ལྟ་སྨོས་ཀྱང་ཅི་དགོས་ཀྱི། མ་ལ་བདག་གིས་གཉེན་པོའི་ཕྱོགས་ལ་སྦྱར་བར་བྱའོ་སྙམ་དུ་དགོངས་ནས་དེ་ཞི་བར་འགྱུར་བའི་ཐབས་ལ་དགོངས་པར་བརྩམས་སོ། །བདུད་ཀྱང་འབྱུང་པོ་བྱེ་བ་ཕྲག་སུམ་ཅུ་རྩ་དྲུག་དང་ལྷན་ཅིག་ཏུ་བྱང་ཆུབ་སེམས་དཔའི་སྟེང་ནས་འཁོར་ལོ་དང ། མདུང་ཐུང་དང ། མདའ་པོ་ཆེ་དང ། མཚོན་རྩེ་གཅིག་པ་དང ། མདའ་ལ་སོགས་ཏེ་མཚོན་ཆ་རྣམས་དབབ་པར་བརྩམས་སོ། །དེ་ནས་བྱང་ཆུབ་སེམས་དཔའ་ཤེལ་ལས་བྱས་པའི་གཞལ་ཡས་ཁང་
72b
མངོན་པར་སྤྲུལ་པ་དང ། མཚོན་ཆ་ཐམས་ཅད་གཞལ་ཡས་ཁང་དེའི་སྟེང་དུ་འབབ་པ་དང ། གཞལ་ཡས་ཁང་གི་སྒྲས་བདུད་ཀྱི་སྡེ་ཐམས་ཅད་སྐྲག་ནས་ཀུན་ཏུ་འབྱེར་བར་གྱུར་ཏོ། །དེ་ནས་བྱང་ཆུབ་སེམས་དཔའ་ནམ་གྱི་ཐུན་དང་པོ་ལ་རྟག་ཏུ་བྱ་བ་དང ། འགྲུས་སྐྱོང་དང་ལྡན་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་བསྒོམ་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་སོ། །དེ་ནམ་གྱི་ཐུན་དང་པོ་ལ་རྫུ་འཕྲུལ་གྱི་ཡུལ་ཤེས་པ་མངོན་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན་དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་མཛད་དེ། གཅིག་ཏུ་གྱུར་ཅིང་མང་པོར་གྱུར་ལ། མང་པོར་གྱུར་ཅིང་གཅིག་ཏུ་འགྱུར་བ་དང ། སྣང་བར་གྱུར་ཅིང་མི་སྣང་བར་གྱུར་པ་ཡེ་ཤེས་གཟིགས་པས་ཉམས་སུ་མྱོང་བར་མཛད་དོ། །སྐུས་རྩིག་པ་དང ། རི་དང ། ར་བ་ལའང་ཐད་ཀར་གཤེགས་པར་མཛད་དེ། དཔེར་ན། ནམ་མཁའ་ལ་བྱ་བ་བཞིན་ནོ། །ས་ལའང་སྟེང་དུ་འབྱུང་བ་དང ། བྱིའུ་ཟུལ་མཛད་དེ། དཔེར་ན། ཆུ་ལ་བྱ་བ་བཞིན་ནོ། །ཆུའི་རྒྱུན་ལའང་མི་ཉམས་པར་གཤེགས་ཏེ། དཔེར་ན། ས་ལ་བྱ་བ་བཞིན་ནོ། །ནམ་མཁའ་ལ་སྐྱིལ་མོ་ཀྲུང་གིས་གཤེགས་པར་མཛད་དེ། དཔེར་ན། འདབ་ཆགས་བྱ་བཞིན་ནོ། །ཉི་མ་དང ། ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་གཟི་བརྗིད་ཆེ་བ་ལའང་
73a
༄#། །ཕྱག་གིས་ནོམ་ཞིང་ཉུག་པར་མཛད་དེ། ཚངས་པའི་འཇིག་རྟེན་གྱི་བར་དུ་སྐུས་དབང་སྒྱུར་བར་མཛད་དོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། བསམ་གཏན་གྱི་ཚེར་མ་ནི་སྒྲ་ཡིན་པས། མ་ལ་བདག་གིས་རྒྱད་རིང་པོ་ཁོ་ནར་འདུག་ལ་སྒྲ་དབྱུང་བར་བྱའོ་སྙམ་ནས་དེས་འབྱུང་པོ་བྱེ་བ་ཕྲག་སུམ་ཅུ་རྩ་དྲུག་དང ། འཇིགས་པ་ཆེན་པོ་འཇིགས་སུ་རུང་བའི་སྒྲ་ཕྱུང་ངོ ། །བྱང་ཆུབ་སེམས་དཔས་ཀྱང་དེ་བསྒྲིབ་པའི་ཕྱིར་དཔག་ཚད་བཅུ་གཉིས་ཀྱི་བར་དུ་ཤིང་ཀ་དམ་པའི་ཚལ་སྤྲུལ་པས་དེས་ན་སྒྲ་དེ་རྡུགས་པས་མི་གྲག་གོ་།དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། མ་ལ་བདག་གིས་ལྷའི་རྣ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་བཞག་ནས་དེས་ན་ལྷ་དང་མི་རྣམས་ཀྱི་སྒྲ་གང་དང ། གང་དག་ཐོས་པར་འདོད་པ་དེ་དག་མཉན་པར་བྱའོ་སྙམ་དུ་དགོངས་ནས། ལྷའི་རྣ་བ་ཤེས་པར་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་བཞག་པ་ན་དེའི་ལྷའི་སྙན་རྣམ་པར་དག་པ་མི་ལས་འདས་པས་སྒྲ་གཉིས་པོ་མི་རྣམས་ཀྱི་དང ། མི་མ་ཡིན་པ་རྣམས་ཀྱི་དང ། གང་དག་རིང་བ་དང ། གང་དག་ཉེ་བའང་གསན་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་ཅུ་རྩ་དྲུག་ལས་བདག་ལ་སུ་དག་ནི་གནོད་པར་སེམས། སུ་དག་
73b
ནི་མ་ཡིན་ཞེས་དེ་དག་ཇི་ལྟར་ཤེས་པར་བྱ་སྙམ་པ་དང ། དེ་ནས་བྱང་ཆུབ་སེམས་དཔའ་དེ་འདི་སྙམ་དུ་དགོངས་ཏེ། སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་ནས་དེ་ནམ་གྱི་གུང་ཐུན་ལ་སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན་དེའི་ཐུགས་ཀྱིས་སེམས་ཅན་གཞན་དང ། གང་ཟག་གཞན་དག་གི་རྣམ་པར་རྟོག་པ་དང ། རྣམ་པར་དཔྱོད་པའི་ཡིད་ཇི་ལྟ་བ་བཞིན་དུ་རབ་ཏུ་མཁྱེན་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཞེ་སྡང་དང་བཅས་པ་དང ། ཞེ་སྡང་དང་བྲལ་བ་དང ། གཏི་མུག་དང་བཅས་པ་དང ། གཏི་མུག་དང་བྲལ་བ་དང ། བསྡུས་པ་དང ། རྣམ་པར་གཡེངས་པ་དང ། ཞུམ་པ་དང ། རབ་ཏུ་འཛིན་པ་དང ། རྒོད་པ་དང ། མི་རྒོད་པ་དང ། ཉེ་བར་མ་ཞི་བ་དང ། ཉེ་བར་ཞི་བ་དང ། མཉམ་པར་མ་བཞག་པ་དང ། མཉམ་པར་བཞག་པ་དང ། མ་བསྒོམས་པ་དང ། བསྒོམས་པ་དང ། སེམས་རྣམ་པར་མ་གྲོལ་བ་དང ། རྣམ་པར་གྲོལ་བ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་ཞེས་ཡང་དག་པ་ཇི་
74a
༄#། །ལྟ་བ་བཞིན་དུ་རབ་ཏུ་མཁྱེན་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བདུད་ཀྱི་མངག་གཞུག་པ་འདི་རྣམས་ལས་སུ་དག་ཚེ་རབས་གཞན་ན་མར་འབྲེལ་བའམ། ཕར་འབྲེལ་བའམ། སུ་དག་གཤེད་མའམ། ཕྱིར་རྒོལ་བའམ། དགྲར་གྱུར་པ་དེ་དག་ཇི་ལྟར་ཤེས་པར་བྱ་སྙམ་མོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱས་པའི་མངོན་པར་ཤེས་པས་ཡིན་ནོ་སྙམ་ནས་དེ་ནམ་གྱི་གུང་ཐུན་ལ་སྔོན་གྱི་གནས་རྗེས་སུ་དྲན་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན་དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་ཏེ། འདི་ལྟ་སྟེ། སྐྱེ་བ་གཅིག་དང ། གཉིས་དང།་གསུམ་དང ། བཞི་དང ། ལྔ་དང ། དྲུག་དང ། བདུན་དང ། བརྒྱད་དང ། དགུ་དང ། བཅུ་དང ། ཉི་ཤུ་དང ། སུམ་ཅུ་དང ། བཞི་བཅུ་དང ། ལྔ་བཅུ་དང ། སྐྱེ་བ་བརྒྱ་དང ། སྐྱེ་བ་སྟོང་དང ། སྐྱེ་བ་བརྒྱ་སྟོང་དང ། སྐྱེ་བ་བརྒྱ་ཕྲག་དུ་མ་དང ། སྐྱེ་བ་སྟོང་ཕྲག་དུ་མ་དང ། སྐྱེ་བ་བརྒྱ་སྟོང་ཕྲག་དུ་མ་དང ། འཇིག་པའི་བསྐལ་པ་དང ། འཆགས་པའི་བསྐལ་པ་དང ། འཇིག་པ་དང ། ཆགས་པའི་བསྐལ་པ་དང ། འཇིགས་པའི་བསྐལ་པ་དུ་ ་དང ། འཆགས་པའི་བསྐལ་པ་དུ་མ་དང ། འཇིག་པ་དང ། འཆགས་པའི་བསྐལ་པ་དུ་མ་རྗེས་
74b
སུ་དགོངས་ཏེ། བདག་སྔོན་སེམས་ཅན་འདི་དག་གི་ནང་ན་གནས་པ་ན་མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཟས་ནི་འདི་ལྟ་བུ་ཞིག་ཟ་ཟ། བདེ་བ་དང ། སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང ། ཚེ་ནི་འདི་སྲིད་ཅིག་ལོན། ཡུན་ནི་འདི་སྲིད་ཅིག་འདུག་འདུག། ཚེ་འདི་སྲིད་ཅིག་ལོན་ཏེ་གནས་དེ་ནས་བདག་ཤི་འཕོས་ཏེ་ཆེ་གེ་མོ་ཞིག་དུ་སྐྱེས་སོ། །དེ་ནས་ཀྱང་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་རྣམ་པར་དང་བཅས་པ། ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དགོངས་སོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བདུད་ཀྱི་མངག་གཞུག་འདི་རྣམས་ལས་སུ་དག་ནི་ངན་སོང་དུ་འགྲོ། སུ་དག་ནི་ངན་སོང་དུ་མི་འགྲོ་བ་དེ་དག་ཇི་ལྟར་ཤེས་པར་བྱ་སྙམ་མོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། འཆི་འཕོ་དང ། སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པས་ཡིན་ནོ་སྙམ་སྟེ། དེ་ནམ་གྱི་ཐུན་ཐ་མལ་འཆི་འཕོ་དང ། སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན་དེའི་ལྷའི་སྤྱན་རྣམ་པར་དག་པ་མི་རྣམས་ཀྱི་ལས་འདས་པས་གཟིགས་ན་སེམས་ཅན་རྣམས་ཀྱི་འཆི་འཕོ་དང ། སྐྱེ་བ་དང ། ཁ་དོག་བཟང་པོ་དང ། ཁ་དོག་ངན་པ་དང ། དམན་པ་དང ། གྱ་ནོམ་པ་དང ། བདེ་འགྲོ་དང ། ང་
75a
༄#། །འགྲོར་འགྲོ་བའི་སེམས་ཅན་རྣམས་ལ་ཇི་ལྟ་བ་བཞིན་གྱི་རྗེས་སུ་འགྲོ་བ། ཇི་ལྟ་བ་བཞིན་དུ་རབ་ཏུ་མཁྱེན་ཏེ། ཤེས་ལྡན་དག་།སེམས་ཅན་འདི་ཞེས་བྱ་བ་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན། ངག་གི་དང ། ཡིད་ཀྱི་ཉེས་པར་སྤྱོད་པ་དང ། ལྡན་ཏེ། འཕགས་པ་རྣམས་ལ་སྐུར་པ་འདེབས་པ་ལོག་པར་ལྟ་བ་སྟེ། ལོག་པར་ལྟ་བའི་ཆོས་དང་ལས་ཡང་དག་པར་བླངས་པའི་རྒྱུས་རྒྱུ་དེ་རྣམས་དང ། རྐྱེན་དེས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །ཤེས་ལྡན་དག། སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་དང་ལྡན་པ། ངག་གི་དང ། ཡིད་ཀྱི་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་པ་མི་འདེབས་ཤིང་ཡང་དག་པར་ལྟ་བ་སྟེ། ཡང་དག་པར་ལྟ་བའི་ཆོས་དང་ལས་ཡང་དག་པར་བླངས་པའི་རྒྱུས་རྒྱུ་དེ་དང ། རྐྱེན་དེས་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་དང་མི་རྣམས་སུ་སྐྱེ་པར་འགྱུར་རོ་ཞེས་རབ་ཏུ་མཁྱེན་ཏོ། །དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་ན་བཞུགས་ཏེ་རྟག་ཏུ་བྱ་བ་དང ། འགྲུས་སྐྱོང་དང་ལྡན་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་སྒོམ་པའི་རྣལ་འབྱོར་གྱི་རྗེས་སུ་མཐུན་པས་བཞུགས་ཏེ། དེ་ནམ་གྱི་ཐུན་ཐ་མ་ལ་ཟག་པ་ཟད་པའི་ཤེས་
75b
པ་མངོན་སུམ་དུ་བྱ་བའི་ཤེས་པ་ལ་དགོངས་པ་མངོན་དུ་བཞག་པ་ན། དེས་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བ་འཕགས་པའི་བདེན་པའོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་དེ་ལྟར་ཤེས་ཤིང་དེ་ལྟར་མཐོང་ན་འདོད་པའི་ཟག་པ་ལས་སེམས་རྣམ་པར་གྲོལ་བར་འགྱུར་ཞིང ། སྲིད་པའི་ཟག་པ་དང ། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ། །རྣམ་པར་གྲོལ་ན་བདག་གིས་སྐྱེ་བ་ནི་ཟད་དོ། །ཚངས་པར་སྤྱོད་པ་ལ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་དེ་ཉིད་དུ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཐུགས་སུ་ཆུད་པར་གྱུར་ཅིང་དེ་ལྟར་བཅོམ་ལྡན་འདས་ནམ་གྱི་ཐུན་ཐ་མ་ལ་བདུད་འབྱུང་པོ་བྱེ་བ་ཕྲག་སུམ་ཅུ་རྩ་དྲུག་དང་བཅས་པ་ལས་བྱམས་པའི་མཚོན་གྱིས་མངོན་པར་རྒྱལ་ཏེ་བླ་ན་མེད་པའི་ཡེ་ཤེས་བརྙེས་སོ། །དེ་ནས་བདུད་སྡིག་ཅན་གྱི་ལག་པ་ནས་གཞུ་ཤོར་བ་དང ། རྒྱལ་མཚན་རྩེ་མོ་ཐུར་དུ་ལྟ་བ་དང ། གནས་གཡོས་པར་གྱུར་ཏོ། །དེ་ནས་བདུད་སྡིག་ཅན་འབྱུང་པོའི་འཁོར་བྱེ་བ་ཕྲག་གསུམ་ཅུ་རྩ་དྲུག་དང་བཅས་པར་སྡུག་བསྔལ་ཞིང་ཡིད་མི་བདེ་ལ་ཡིད་ལ་བཅགས་ཏེ་དེ་ཉིད་དུ་མི་སྣང་
76a
༄#། །བར་གྱུར་ནས་རང་གི་གནས་སུ་སོང་སྟེ། སྡུག་བསྔལ་ཞིང་ཡིད་མི་བདེ་ལ་ཕམ་པར་གྱུར་པས་སེམས་པ་ལ་ཞུགས་ཏེ་མདས་ས་ལ་འདྲེ་ཞིང་གནས་པར་གྱུར་ཏོ། །དེ་ནས་བདུད་ཀྱི་བུ་མོ་སྲེད་མ་དང ། དགའ་བྱེད་མ་དང ། དགའ་སྤྱོད་མ་ཞེས་བྱ་བ་བདུད་གང་ན་བ་དེར་སོང་སྟེ་ཕྱིན་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །ཡབ་ཁྱོད་ཅི་ཕྱིར་ཐུགས་མི་དགྱེས། །ཅི་ཡི་ཕྱིར་ན་འདི་ལྟར་བཞུགས། །གང་གིས་ཁྱོད་ལ་གནོད་བྱེད་པའི། །སྐྱེས་བུ་གང་ལ་རྗེས་སུ་སེམས། །གསུངས་ཤིག་དེ་ནི་འདོད་ཆགས་ཀྱི། །ཞགས་པས་ནགས་ནས་གླང་པོ་བཞིན། །བཅིངས་ནས་བདག་ཅག་འཚལ་ཏེ་མཆི། །དེ་ནི་ཁྱོད་ཀྱི་དབང་དུ་གྱུར། །བདུད་ཀྱིས་སྨྲས་པ། སྐྱེས་བུ་འདོད་ཆགས་རབ་བྲལ་ཏེ། །ཆགས་པས་ལེགས་པར་དགུག་མི་ནུས། །བདུད་ཀྱི་ཡུལ་འདས་དེ་ཡི་ཕྱིར། །ང་ནི་ཤིན་ཏུ་མྱ་ངན་བྱེད། །དེ་ནས་སྲེད་མ་དང ། དགའ་བྱེད་མ་དང ། དགའ་སྤྱོད་མ་སྟེ། བདུད་ཀྱི་བུ་མོ་གསུམ་པོ་སྤྲིན་ལས་བྱུང་བའི་གློག་བཞིན་དུ་གཟི་བརྗིད་རབ་ཏུ་འབར་ཞིང་རང་གི་གནས་ནས་བཅོམ་ལྡན་འདས་གང་ན་བ་དེར་ལོགས་སུ་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བདུད་སྡིག་ཅན་གྱི་བུ་མོ་གསུམ་གྱིས་འདི་སྐད་
76b
ཅེས་གསོལ་ཏོ། །ཀྱེ་དགེ་སྦྱོང་ཁྱོད་ཀྱི་ཞབས་ལ་བསྙེན་བཀུར་བགྱིད་ཅིང་བདེ་བར་གཤེགས་པ་ཁྱོད་ཀྱི་རི་མ་གྲོ་བགྱིད་དོ། །བཅོམ་ལྡན་འདས་ཅི་ནས་ཀྱང་སྲེད་པ་ཡང་དག་པར་ཟད་ཅིང་རྣམ་པར་གྲོལ་ལ་ཐུགས་ཡང་དག་པར་ཤིན་ཏུ་རྣམ་པར་གྲོལ་བ་བླ་ན་མེད་པ་བརྙེས་པས་དེ་ལ་དགོངས་པར་མ་མཛད་དོ། །ལན་གཉིས་ལན་གསུམ་དུའང་བཅོམ་ལྡན་འདས་ལ་བདུད་ཀྱི་བུ་མོ་གསུམ་གྱིས་འདི་སྐད་ཅེས་གསོལ་ཏོ། །ཀྱེ་དགེ་སྦྱོང་ཁྱོད་ཀྱི་ཞབས་ལ་བསྙེན་བཀུར་བགྱིད་ཅིང་བདེ་བར་གཤེགས་པ་ཁྱོད་ཀྱི་རིམ་གྲོ་བགྱིད་དོ། །བཅོམ་ལྡན་འདས་ཀྱིས་ལན་གཉིས་ལན་གསུམ་དུའང་ཅི་ནས་ཀྱང་སྲེད་པ་ཡང་དག་པར་ཟད་ཅིང་རྣམ་པར་གྲོལ་ལ་ཐུགས་ཡང་དག་པར་ཤིན་ཏུ་རྣམ་པར་གྲོལ་བ་བླ་ན་མེད་པ་བརྙེས་པས་དེ་ལ་དགོངས་པར་མ་མཛད་དོ། །དེ་ནས་བདུད་ཀྱི་བུ་མོ་གསུམ་ཕྱོགས་གཅིག་ཏུ་སོང་སྟེ་ཕན་ཚུན་སྨྲ་ཞིང་ཀུན་ཏུ་བགྲོས་པ། ཤེས་ལྡན་སྤུན་ཟླ་དག། སྐྱེས་པ་རྣམས་ཀྱིས་བུད་མེད་ལ་སྲེད་པ་ནི་ཐ་དད་པ་ཡིན་པས། མ་ལ་བདག་ཅག་གིས་གཞོན་ནུ་མ་མདོག་མདངས་བརྒྱ་ཕྲག་དང ། གོས་དང ། ཁ་དོག་བརྒྱ་ཕྲག་དང་བཅས་པར་མངོན་པར་སྤྲུལ་ཞིང་བུ་བཙས་མ་མྱོང་བ་དང ། ལན་གཅིག་བཙས་པ་དང ། ལན་གཉིས་དང ། གསུམ་དང ། ལན་བཞི་བཙས་པར་མངོན་པར་སྤྲུལ་ཞིང་བུད་མེད་པར་མའི་ཚུལ་བརྒྱ་ཕྲག་ཏུ་བདག་ཉིད་མངོན་པར་སྤྲུལ་ལ་
77a
༄#། །དགེ་སྦྱོང་གཽ་ཏ་མ་གང་ན་བ་དེར་ཉེ་བར་འགྲོ་བར་བྱའོ། །ཕྱིན་ནས་ཀྱང་དགེ་སྤྱོང་གཽ་ཏ་མ་ལ་འདི་སྐད་ཅེས་དགེ་སྦྱོང་ཁྱོད་ཀྱི་ཞབས་ལ་བསྙེན་བཀུར་བྱེད་ཅིང་བདེ་བར་གཤེགས་པ་ཁྱོད་ལ་རིམ་གྲོ་པ་བགྱིད་དོ། །ཞེས་སྨྲ་བར་བྱའོ། །དེ་ནས་བདུད་ཀྱི་བུ་མོ་གསུམ་པོ་གཞོན་ནུའི་མདོག་བརྒྱ་སྟོང་དུ་མར་བདག་ཉིད་མངོན་པར་སྤྲུལ་ཅིང་གོས་ཁ་དོག་བརྒྱ་ཕྲག་དང་བཅས་པ་ནས་ཇི་སྲིད་དུ་བུད་མེད་པར་མའི་ཚུལ་བརྒྱ་ཕྲག་ཏུ་བདག་ཉིད་མངོན་པར་སྤྲུལ་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་དགེ་སྦྱོང་ཁྱོད་ཀྱི་ཞབས་ལ་བསྙེན་བཀུར་བགྱིད་ཅིང་བདེ་བར་གཤེགས་པ་ཁྱོད་ཀྱི་རིམ་གྲོ་བ་བགྱིད་དོ། །བཅོམ་ལྡན་འདས་ཅི་ནས་ཀྱང་སྲེད་པ་ཡང་དག་པར་ཟད་ཅིང་རྣམ་པར་གྲོལ་ལ་ཐུགས་ཡང་དག་པར་ཤིན་ཏུ་རྣམ་པར་གྲོལ་བ་བླ་ན་མེད་པ་བརྙེས་པས་དེ་ལ་དགོངས་པར་མ་མཛད་དོ། །ལན་གཉིས་ལན་གསུམ་དུ་བཅོམ་ལྡན་འདས་ལ་བདུད་ཀྱི་བུ་མོ་གསུམ་གྱིས་དེ་སྐད་གསོལ་ཀྱང ། ལན་གཉིས་ལན་གསུམ་དུ་བཅོམ་ལྡན་འདས་ཀྱིས་དེ་ལ་དགོངས་པར་མ་མཛད་དོ། །དེ་ནས་བདུད་ཀྱི་བུ་མོ་གསུམ་ཕྱོགས་གཅིག་ཏུ་
77b
སོང་ནས་ཕན་ཚུན་འདི་སྐད་ཅེས་སྨྲ་སྟེ། སྤུན་ཟླ་དག། འདོད་ཆགས་དང་མ་བྲལ་བའི་སྐྱེས་བུ་དག་འདི་ལྟ་བུའི་ཐབས་མང་པོས་ཉེ་བར་བསྟེན་ཅིང་གནས་ན་དེའི་སེམས་གཡེངས་པར་འགྱུར་བའམ། སྙིང་འགས་པར་འགྱུར་བའམ། ཁ་ནས་ཁྲག་དྲོན་པོ་སྐྱུག་པར་འགྱུར་བའི་གནས་དེ་ནི་ཡོད་ན་དགེ་སྦྱོང་གོའུ་ཏ་མ་འདི་ནི་འུ་བུ་ཅག་ལ། སེམས་གཏོད་པར་མི་བྱེད་ཀྱི། སྐྱེས་པ་རྣམས་ཀྱིས་བུད་མེད་ལ་སྲེད་པ་ནི་ཐ་དད་པ་ཡིན་གྱི། མ་ལ་བདག་ཅག་བུད་མེད་རྒན་མོའི་ཚུལ་བརྒྱ་ཕྲག་ཏུ་མངོན་པར་སྤྲུལ་ལ་དགེ་སྦྱོང་གཽ་ཏ་མའི་གན་དུ་འགྲོ་ན་དེ་ལྟ་ན་ནི་དགེ་སྦྱོང་གཽ་ཏ་མ་བདག་ཅག་རྣམས་ལ་འདུན་པ་སྐྱེད་པའང་སྲིད་པར་འགྱུར་གྱི་ཞེས་སྨྲས་ཏེ་བདུད་ཀྱི་བུ་མོ་གསུམ་པོ་བུད་མེད་རྒན་མོའི་ཚུལ་བརྒྱ་ཕྲག་ཏུ་བདག་ཉིད་མངོན་པར་སྤྲུལ་ནས་བཅོམ་ལྡན་འདས་གང་ན་བ་དེར་སོང་སྟེ། སྔ་མ་བཞིན་དུ་བསྙེན་བཀུར་བགྱིད་པའི་བར་དུ་གསོལ་པ་དང ། བཅོམ་ལྡན་འདས་ཅི་ནས་ཀྱང་སྲེད་པ་ཡང་དག་པར་ཟད་ཅིང་རྣམ་པར་གྲོལ་ལ་ཐུགས་ཡང་དག་པར་ཤིན་ཏུ་རྣམ་པར་གྲོལ་བ་བླ་ན་མེད་པ་བརྙེས་པས་དེ་ལ་དགོངས་པར་མ་མཛད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། འདི་དག་ནི་རང་ཉིད་ཀྱིས་རྒན་མོའི་དངོས་པོར་བྱས་པ་ཡིན་གྱི། མ་ལ་ངས་ཀྱང་འདི་རྣམས་ཉིད་ཀུན་ཏུ་སྐྱོ་བ་བསྐྱེད་པའི་ཕྱིར་རྒན་པ་འདི་ཉིད་དུ་བྱིན་གྱིས་བརླབ་པར་བྱའོ་སྙམ་ནས་བཅོམ་ལྡན་
78a
༄#། །འདས་ཀྱིས་བདུད་ཀྱིས་བུ་མོ་རྒན་མོར་བྱིན་གྱིས་བརླབས་སོ། །དེ་ནས་བདུད་ཀྱི་བུ་མོ་གསུམ་པོ་རྒན་པ་དེ་མི་སྣང་བར་བྱ་བར་འདོད་ཀྱང་མི་སྣང་བར་བྱ་བར་མི་ནུས་སོ། །དེ་ནས་བདུད་ཀྱི་བུ་མོ་གསུམ་པོ་བསམ་པ་ཡོངས་སུ་མ་རྫོགས་ཤིང་གཟུགས་ཀྱིས་ངོ་ཚ་བ་བཞིན་དུ་རྒས་ཤིང་འཁོགས་ལ་གཏུགས་པ། སྒུར་པོ་ཕྱམ་དགུ་པོ་ལྟར་ཀྱང་ཀྱོར་ཅན་མདུན་ནས་འཁར་བ་ལ་རྟེན་ཅིང་ལུས་འདར་བཞིན་དུ་བདུད་སྡིག་ཅན་གང་ན་བ་དེར་སོང་སྟེ་ཕྱིན་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྐྱེས་བུ་འདོད་ཆགས་རབ་བྲལ་ཏེ། །ཆགས་པས་ལེགས་པར་དགུག་མི་ནུས། །བདུད་ཀྱི་ཡུལ་འདས་དེ་ཡི་ཕྱིར། །ང་ནི་ཤིན་ཏུ་མྱ་ངན་བྱེད། །ཅེས་བདག་ཅག་རྣམས་ལ་གསུང་བ་ནི་ཡབ་མེད་དོ། །གང་ཞིག་གཞན་སེམས་རྨོངས་བྱེད་པ། །བདག་ཅག་གིས་ནི་མ་བྱས་པའི། །རྣམ་པ་དེ་ནི་ཡོད་མིན་ན། །དེ་ལྟ་ན་ཡང་དབང་མ་གྱུར། །ཐ་མར་གཟུགས་ནི་འདི་འདྲ་བ། །བྱས་ནས་དེ་གན་ཉེར་སོང་ན། །ཇི་ལྟར་རྒན་པ་ཉིད་གནས་པ། །དེ་ལྟར་དེ་ཡིས་བྱིན་གྱིས་བརླབས། །དེ་བས་ཡབ་ཀྱིས་བདག་ཅག་རྣམས། །རྒས་པ་འདི་ནི་མི་སྣང་མཛོད། །བདུད་ཀྱིས་སྨྲས་པ། ཁྱེད་རྣམས་གཟུགས་ཀྱིས་དྲེགས་ནས་ནི། །སྤྲིན་གྱི་ཚོགས་ལས་གློག་བཞིན་དུ། །གཟི་བརྗིད་རབ་ཏུ་འབར་བ་དང ། །སྤྲོ་བའི་ང་རྒྱལ་གནས་པས་སོང ། །དཔའ་ཆེན་དེ་གན་ཕྱིན་པ་
78b
དང། །རླུང་གིས་ཤིང་བལ་བཞིན་དུ་བརླག། གང་ཞིག་ཆགས་ཀུན་མཐར་འབྱིན་པའི། །སངས་རྒྱས་ལ་འདིར་གནོད་བྱེད་པ། །རི་བོ་སེན་མོས་རྐོ་བ་དང ། །སོ་ཡིས་ལྕགས་ནི་འཆའ་བ་དང། །པདྨ་གཞོན་ནུའི་སྡོང་བུ་ཡིས། །རི་བོ་གཞིག་པར་འདོད་པ་ཡིན། །གང་ཞིག་ཆགས་ཀུན་མཐར་འབྱིན་པའི། །སངས་རྒྱས་ལ་འདིར་གནོད་བྱར་འདོད། །རྒྱ་མཚོ་བརྐོས་པར་གྱུར་ནས་ནི། །ཟབ་པའི་གཏིང་ཚོལ་འདོད་པ་ཡིན། །གང་ཞིག་ཆགས་ཀུན་མཐར་འབྱིན་པའི། །སངས་རྒྱས་ལ་འདིར་གནོད་བྱར་འདོད། །རླུང་ནི་ཞགས་པས་འཆིང་བ་དང ། །ཟླ་བ་མཁའ་ལས་དབབ་པ་དང ། །རྒྱ་མཚོ་ལག་པས་འཆུ་བ་དང ། །གངས་ཅན་ལ་ནི་རྒལ་བ་དང ། །སྣང་ཞིང་སྲེག་བཅས་འབར་བ་ཡི། །མེ་ལ་འཁྱུད་པར་འདོད་པ་ཡིན། །གང་ཞིག་དཀའ་བ་བྱེད་འདོད་པ། །དེ་ནི་འདི་ལྟར་འགྱུར་བ་ཡིན། །ཇི་སྲིད་ཐུབ་པ་དེ་ཉིད་ལ། །སྐྱབས་སུ་འགྲོ་བར་གྱིས་ཤིག་དང ། །དེ་ཉིད་རྒས་པའི་གཟུགས་འདི་ནི། །དོན་གཞན་དུ་བྱེད་པར་འགྱུར། །དེ་ནི་ཐུགས་རྗེ་ཆེར་ལྡན་པས། །ངེས་པར་ཁྱེད་ཀྱི་སལ་བར་འགྱུར། །འཇིག་རྟེན་ལྷ་དང་བཅས་པ་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང ། བྲམ་ཟེར་བཅས་པའི་སྐྱེད་གུ་རྣམས་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ན་ཁྱེད་རྣམས་ཀྱི་རྒ་བའི་དངོས་པོ་མི་སྣང་བར་བྱེད་པ་དེ་ནི་བཅོམ་ལྡན་འདས་དེ་བཞིན་གཤེགས་
79a
༄#། །པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཉིད་ལས་གཞན་དག་གང་ཡང་མ་མཐོང་སྟེ། ཁྱེད་རྣམས་སོང་ལ་བཅོམ་ལྡན་འདས་དེ་ཉིད་མཉེས་པར་གྱིས་ཤིག་།དེ་ནས་བདུད་ཀྱི་བུ་མོ་གསུམ་བཅོམ་ལྡན་འདས་ག་ལ་བ་དེར་ལོགས་སུ་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་བདུད་ཀྱི་བུ་མོ་གསུམ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་གིས་བྱིས་པ་ཇི་ལྟ་བ་དང ། རྨོངས་པ་ཇི་ལྟ་བ་དང ། མི་གསལ་བ་ཇི་ལྟ་བ་དང ། ཐབས་མི་མཁས་པ་ཇི་ལྟ་བར་ཇི་ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཉེས་པར་བགྱི་བ་མཉེས་པར་མ་བགྱིས་པ་ནི་ནོངས་ལགས་ཀྱི། བཅོམ་ལྡན་འདས། ནོངས་པ་གཟུང་དུ་གསོལ། བདེ་བར་གཤེགས་པ། བཟོད་པར་མཛད་དུ་གསོལ།་བཅོམ་ལྡན་འདས། བདག་ཅག་གི་རྒས་པའི་དངོས་པོ་མི་སྣང་བར་མཛད་དུ་གསོལ། བདེ་བར་གཤེགས་པ། བདག་ཅག་གི་རྒས་པའི་དངོས་པོ་མི་སྣང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་དེ་རྣམས་རྒས་པའི་དངོས་པོ་མི་སྣང་བར་མཛད་དོ། །དེ་ནས་བདུད་ཀྱི་བུ་མོ་གསུམ་པོ་རང་གི་གཟུགས་ཉིད་རྙེད་ནས་བཅོམ་
79b
ལྡན་འདས་ཀྱི་ཞབས་ལ་མགོ་པོས་ཕྱག་བྱས་ཏེ། བཅོམ་ལྡན་འདས་ལ་དད་པར་གྱུར་པ་དང ། དེ་ཉིད་དུ་མི་སྣང་བར་གྱུར་ཏོ། །དེ་ནས་རྒྱལ་པོ་ཟས་གཙང་ལ་རང་གི་སྐྱེས་བུ་རྣམས་ཀྱིས།་ལྷ། དགྱེས་པ་བསྐྱེད་དུ་གསོལ། གཞོན་ནུས་བླ་ན་མེད་པའི་ཡེ་ཤེས་བརྙེས་སོ། །དེ་ཐོས་པ་དང་ཉི་མ་དེ་ཉིད་ལ་གྲགས་འཛིན་མ་ལའང་ཁྱེའུ་ཞིག་བཙས་སོ། །བདུད་རྩི་ཟས་ལའང་ཁྱེའུ་ཞིག་བཙས་སོ། །དེ་ཉིད་ཀྱི་ཉིན་མོ་ཟླ་བའང་སྒྲ་གཅན་གྱིས་ཟིན་ཏོ། །དེ་ནས་རྒྱལ་པོ་ཟས་གཙང་གིས་ཕུན་སུམ་ཚོགས་པ་དེ་མཐོང་ནས་དགའ་བ་དང ། མགུ་བ་དང ། རབ་ཏུ་དགའ་བ་དང ། རངས་པ་རྒྱ་ཆེན་པོ་དང ། ཡིད་བདེ་བ་སྐྱེས་པར་གྱུར་ཏོ། །དེ་ནས་གྲོང་ཁྱེར་སེར་སྐྱའི་གཞི་རྡོ་བ་དང ། གསེག་མ་དང ། གྱོ་མོ་རྣམས་བསལ་ནས་ཙནྡན་གྱི་ཆུས་ཆག་ཆག་བཏབ། ཤིན་ཏུ་དྲི་ཞིམ་པའི་པོག་པོར་ཉེ་བར་བཤམས། དར་གྱི་ཆུན་འཕྱང་མང་པོར་དཔྱངས། རྒྱལ་མཚན་དང ། བ་དན་ནི་བསྒྲེང ། མེ་ཏོག་སྣ་ཚོགས་ཀྱིས་དགའ་དགའ་ལྟར་བཀྲམ་ནས་གྲོང་ཁྱེར་གྱི་སྒོ་བཞི་དང ། སུམ་མདོ་རྣམས་སུའང་སྦྱིན་གཏོང་གི་ཁང་པ་བརྩིགས་སོ། །དེ་ནས་གྲོང་ཁྱེར་གྱི་ཤར་སྒོར་དགེ་སྦྱོང་དང་།བྲམ་ཟེ་དང ། སྤྱོད་པ་པ་དང།་ཀུན་ཏུ་རྒྱུ་དང ། ངན་པ་དང ། མགོན་མེད་པ་དང ། བཀྲེན་པ་དང ། ཕོངས་པ་དང ། སློང་མོ་པ་རྣམས་ལའང་སྦྱིན་པ་དག་གཏོང་ངོ ། །ལྷོ་དང ། ནུབ་དང ། བྱང་དང ། དབུས་ཀྱི་
80a
༄#། །སུམ་མདོ་རྣམས་སུའང་སྦྱིན་པ་དག་གཏོང ། བསོད་ནམས་དག་བྱེད་དོ། །གྲགས་འཛིན་མའི་བུའི་མིང་འདོགས་པར་བྱེད་དེ། བཙུན་མོའི་འཁོར་གྱི་སྐྱེ་པོས་སྨྲས་པ། འདི་བཙས་པ་ན་ཟླ་བ་སྒྲ་གཅན་གྱིས་ཟིན་པས་དེ་བས་ན་ཁྱེའུའི་མིང་སྒྲ་གཅན་ཟིན་ཞེས་གདགས་སོ་ཞེས་བཏགས་སོ། །བདུད་རྩི་ཟས་ཀྱི་ཡང་དེ་བཞིན་དུ་སྦྱིན་པ་དག་བཏང ། བསོད་ནམས་དག་བྱས་ནས་ཁྱེའུའི་མིང་ཅིར་གདགས་ཞེས་བུའི་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། གང་གི་ཚེ་འདི་བཙས་པ་ན་གྲོང་ཁྱེར་ཐམས་ཅད་དགའ་བར་གྱུར་པས་དེའི་ཕྱིར་ཁྱེའུའི་མིང་ཀུན་དགའ་བོར་གདགས་སོ་ཞེས་བཏགས་སོ། །རྒྱལ་པོ་ཟས་གཙང་གིས་སྨྲས་པ། གྲགས་འཛིན་མའི་བུ་གང་ཡིན་པ་འདི་ནི་ཤཱཀྱ་ཐུབ་པའི་བུ་མ་ཡིན་ནོ་ཞེས་སྨྲས་པ་གྲགས་འཛིན་མས་ཐོས་ནས་ཡི་ཆད་པར་གྱུར་ཏོ། །དེ་ནས་དེས་བྱང་ཆུབ་སེམས་དཔའི་ཕང་ཚད་ཀྱི་ཕ་པོང་ལ་བསྐྱོན་ནས་རོལ་པའི་རྫིང་འགྲམ་དུ་འདུག་སྟེ་བདེན་པ་གསོལ་བ་བཏབ་པ། གལ་ཏེ་འདི་བྱང་ཆུབ་སེམས་དཔའ་ལས་སྐྱེས་པ་ཡིན་ན་དེ་བཞིན་དུ་རྫིང་འདིར་ཕ་པོང་དང་ལྷན་ཅིག་འཕྱོ་བར་གྱུར་ཅིག། ཇི་སྟེ་མ་ཡིན་ན་བྱིང་བར་གྱུར་ཅིག་ཅེས་སྨྲས་ནས་ཆུར་པོར་བ་དང ། དེ་ཤིང་བལ་གྱི་འདབ་མ་བཞིན་དུ་ཕ་བོང་དང་ལྷན་ཅིག་འཕྱོ་བར་གྱུར་ཏོ། །རྒྱལ་པོ་ཟས་གཙང་གིས་ཡ་མཚན་དུ་
80b
གྱུར་པ་དེ་ཐོས་ནས་སྐྱེ་བོའི་ཚོགས་ཆེན་པོས་ཡོངས་སུ་བསྐོར་ཏེ། བྱང་ཆུབ་སེམས་དཔའ་རོལ་པའི་རྫིང་འགྲམ་དུ་དོང་ན། ཇི་ཙམ་ན་སྒྲ་གཅན་འཛིན་བཟང་པོ་བྱང་ཆུབ་སེམས་དཔའི་ཕང་ཚད་ཀྱི་རི་བོང་ལ་ཞོན་ནས་ཤིང་བལ་གྱི་འདའ་བ་བཞིན་དུ་ཆུ་ན་འཕྱོ་བ་མཐོང་ངོ ། །མཐོང་ནས་ཀྱང་དགའ་བ་དང ། མགུ་བ་དང ། རབ་ཏུ་དགའ་བ་དང ། རངས་པ་རྒྱ་ཆེན་པོ་དང ། ཡིད་བདེ་བ་སྐྱེས་ཏེ། དེ་མ་ཐག་ཏུ་རྫིང་དེར་ཞུགས་ནས་གཞོན་ནུ་སྒྲ་གཅན་ཟིན་བཟང་པོ་པང་དུ་བླངས་ནས་ལངས་སོ། །གང་གི་ཚེ་བཅོམ་ལྡན་འདས་ཀྱིས་བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་ཅུ་རྩ་དྲུག་བྱམས་པའི་མཚོན་གྱིས་མངོན་པར་བཏུལ་ནས་བླ་ན་མེད་པའི་ཡེ་ཤེས་བརྙེས་པ་དེའི་ཚེས་ཆེན་པོ་འདི་ཤིན་ཏུ་གཡོས་པར་གྱུར་ཏོ། །འཇིག་རྟེན་འདི་ཐམས་ཅད་ཀྱང་སྣང་བ་རྒྱ་ཆེན་པོས་གསལ་བར་གྱུར་ཏེ། འདི་ལྟར་འཇིག་རྟེན་དང ། འཇིག་རྟེན་གྱི་བར་གྱི་མུན་པ་མུན་ནག་སྨག་ཏུ་གྱུར་པ་ཉི་མ་དང ། ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་བའི་སྣང་བས་སྣང་བ་ཉམས་སུ་མ་མྱོང་བ་གང་ཡིན་པ་དེ་དག་ཀྱང་དེའི་ཚེ་སྣང་བ་རྒྱ་ཆེན་པོས་གསལ་བར་གྱུར་ནས། དེར་སེམས་ཅན་གང་དག་སྐྱེས་པ་དེ་རྣམས་ཀྱིས་སྣང་བ་དེས་སེམས་ཅན་གཅིག་གིས་གཅིག་མཐོང་ནས། ཞེས་ལྡན་དག། སེམས་ཅན་གཞན་དག་ཀྱང་འདིར་སྐྱེས་པ་ལྟ་ཞིག། ཤེས་ལྡན་དག། སེམས་ཅན་གཞན་དག་ཀྱང་འདིར་སྐྱེས་པ་ལྟ་ཞིག་ཅེས་ངོ་ཤེས་པར་གྱུར་
81a
༄#། །ཏོ། །སངས་རྒྱས་བཅོམ་ལྡན་འདས་མེའི་ཁམས་ལ་སྙོམས་པར་ཞུགས་ནས་སྐྱིལ་མོ་ཀྲུང་གཅིག་གིས་ཞག་བདུན་འདའ་བར་མཛད་དོ། །དེ་ནས་ཚངས་རྲིས་ཀྱི་ལྷ་གཉིས་ཤིག་ཚངས་པའི་འཇིག་རྟེན་ན་འདུག་པ་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་ལྟེང་རྒྱས་ན་ཆུ་ཀླུང་ནཻ་རཉྫ་ནཱའི་འགྲམ་བྱང་ཆུབ་ཀྱི་ཤིང་དྲུང་ན་བཞུགས་ཏེ། མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་མེའི་ཁམས་ལ་སྙོམས་པར་ཞུགས་ཏེ་སྐྱིལ་མོ་ཀྲུང་གཅིག་གིས་ཞག་བདུན་འདའ་བར་མཛད་ན་དེ་ལ་སུས་ཀྱང་བསོད་སྙོམས་མ་ཕུལ་གྱི། མ་ལ་བདག་ཅག་དེར་སོང་ལ་ཚིགས་སུ་བཅད་པ་རེ་རེས་མངོན་པར་བསྟོད་དོ། །དེ་ནས་ཚངས་རིས་ཀྱི་ལྷ་དེ་གཉིས་ཀྱིས། འདི་ལྟ་སྟེ། སྐྱེས་བུ་སྟོབས་དང་ལྡན་པའི་དཔུང་པ་བསྐུམ་སྟེ་བརྐྱང་བའམ། བརྐྱངས་སྟེ་བསྐུམ་པ་ཙམ་གྱིས་ཚངས་རིས་ཀྱི་ལྷ་གཉིས་ཀྱིས་ཚངས་རིས་ཀྱི་འཇིག་རྟེན་ནས་མི་སྣང་བར་གྱུར་ཏེ།་བཅོམ་ལྡན་འདས་ཀྱི་སྤྱན་སྔར་ཕྱིན་ནས་ཕྱོགས་གཅིག་ཏུ་འདུག་སྟེ། ཚངས་རིས་ཀྱི་ལྷ་གཉིས་ལས་གཅིག་གིས་ཚིགས་སུ་བཅད་དེ་གསོལ་པ། དེད་དཔོན་གཡུལ་ལས་རྣམ་པར་རྒྱལ་བ་ཕེ། །སྡིག་པ་མི་མངའ་བཞེངས་ཤིག་འཇིག་རྟེན་གཟིགས། །རིན་ཆེན་ཆོས་ནི་འཚལ་བར་འགྱུར་མཆིས་ཀྱི། །བདེ་གཤེགས་ཆོས་ཀྱི་མཆོག་ནི་བཤད་དུ་
81b
གསོལ། །གཅིག་ཤོས་ཀྱིས་ཀྱང་ཚིགས་སུ་བཅད་དེ་གསོལ། །ང་རྒྱལ་བཅོམ་ཞིང་གཡུལ་ལས་རྣམ་རྒྱལ་བ། །སྡིག་པ་མི་མངའ་བཞེངས་ཤིག་འཇིག་རྟེན་གཟིགས། །བཅོ་ལྔ་ལོན་པའི་དགུང་ཟླ་ཉ་བ་ལྟར། །ཁྱོད་ཀྱི་ཐུགས་ནི་ཤིན་ཏུ་རྣམ་དག་ལགས། །ཞེས་གསོལ་ནས་ཚངས་རིས་ཀྱི་ལྷ་གཉིས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ནས་དེའི་ཚེ་ཚིགས་སུ་བཅད་དེ་བཀའ་སྩལ་པ། འཇིག་རྟེན་འདོད་པའི་བདེ་གང་དང ། །ལྷ་ཡུལ་བྱུང་བ་དེ་གང་ཡིན་པ། །སྲེད་པ་ཟད་པའི་བདེ་དེ་ལ། །བཅུ་དྲུག་ཆར་ཡང་མི་ཕོད་དོ། །ཁུར་ཁྱེར་བ་ནི་སྡུག་བསྔལ་ཏེ། །ཁུར་བོར་བ་ནི་བདེ་བ་ཡིན། །ཁུར་ནི་ལྕི་བ་རྣམ་བོར་ནས། །གཞན་དག་བླང་བར་མི་བྱའོ། །སྲེད་པ་ཐམས་ཅད་རྣམ་སྤངས་ཤིང ། །འདུས་བྱས་ཐམས་ཅད་ཟད་ནས་ནི། །དངོས་པོ་ཐམས་ཅད་ཡོངས་ཤེས་ན། །སླར་ཡང་སྲིད་པར་མི་འོང་ངོ ། །སངས་རྒྱས་བཅོམ་ལྡན་འདས་རྣམས་པར་གྲོལ་བའི་དགའ་བ་དང ། བདེ་བ་སྐུ་ཉམས་སུ་བསྟར་བ་ལས་སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་པ་ན་དེ་ལ་སུས་ཀྱང་བསོད་སྙོམས་མ་ཕུལ་ལོ། །དེའི་ཚེ་ཚོང་པ་ག་གོན་དང ། བཟང་པོ་གཉིས་ཤིང་རྟ་ལྔ་བརྒྱ་ཙམ་དང་ལྷན་ཅིག་དོང་བ་ན་ལམ་དེ་ཉིད་དུ་ཞུགས་པར་གྱུར་ཏོ། །དེ་ནས་ཚོང་པ་ག་གོན་དང ། བཟང་པོའི་སྔོན་གྱི་གྲོགས་པོ་དང ། བློན་པོ་དང ། ཉེ་དུ་དང ། མཛའ་བཤེས་སུ་གྱུར་
82a
༄#། །པའི་ལྷ་ཞིག་ཡོད་པ་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་ལྟེང་རྒྱས་ན་ཆུ་ཀླུང་ནཻ་རཉྫ་ནཱའི་འགྲམ་བྱང་ཆུབ་ཀྱི་ཤིང་དྲུང་དུ་བཞུགས་ཏེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་རྣམ་པར་གྲོལ་བའི་དགའ་བ་དང ། བདེ་བ་སྐུ་ཉམས་སུ་བསྟར་ནས་སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་པ་ན་དེ་ལ་སུས་ཀྱང་བསོད་སྙོམས་མ་ཕུལ་གྱི་དེ་ལ་ཚོང་པ་ག་གོན་དང ། བཟང་པོ་གཉིས་ཀྱིས་དེར་ཐོག་མར་བསོད་སྙོམས་འབུལ་དུ་བཅུག་ན། དེ་ནི་ཚོང་པ་ག་གོན་དང ། བཟང་པོ་དེ་གཉིས་ཀྱི་ཡུན་རིང་པོའི་དོན་དང ། ཕན་པ་དང ། བདེ་བར་འགྱུར་གྱི། མ་ལ་བདག་རང་གིས། འདི་ལྟ་སྟེ། བཅོམ་ལྡན་འདས་ལ་བསོད་སྙོམས་འབུལ་དུ་གཞུག་པའི་ཕྱིར་བརྩོན་པར་བྱའོ་སྙམ་ནས། དེ་ན་ལྷ་དེས་ཤིང་རྟ་དང ། ཚོང་པ་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་ཚོང་པ་ག་གོན་དང ། བཟང་པོ་ལ་འདི་སྐད་ཅེས་སྨྲས་སོ། །ཚོང་པ། ཚོང་པ་དག། སངས་རྒྱས་བཅོམ་ལྡན་འདས་འདི་ལྟེང་རྒྱས་ན་ཆུ་ཀླུང་ནཻ་རཉྫ་ནཱའི་འགྲམ་བྱང་ཆུབ་ཀྱི་ཤིང་དྲུང་ན་བཞུགས་ཏེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་རྣམ་པར་གྲོལ་བའི་དགའ་བ་དང ། བདེ་བ་སྐུ་སྙམས་སུ་བསྟར་བ་ན་སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་དེ། དེ་ལ་སུས་ཀྱང་བསོད་སྙོམས་མ་ཕུལ་གྱི། དེ་
82b
ལ་ཁྱེད་ཀྱིས་དེར་ཐོག་མར་བསོད་སྙོམས་ཕུལ་ན་དེ་ནི་ཁྱེད་ཀྱི་ཡུན་རིང་པོའི་དོན་དང ། ཕན་པ་དང ། བདེ་བར་འགྱུར་རོ་ཞེས་སྨྲས་ནས་ལྷ་དེ་དེ་ཉིད་དུ་མི་སྣང་བར་གྱུར་ཏོ། །དེ་ནས་ཚོང་པ་ག་གོན་དང ། བཟང་པོ་གཉིས་འདི་སྙམ་དུ་སེམས་ཏེ། སངས་རྒྱས་ནི་མཆོག་མ་ཡིན་པ་མ་ཡིན་ལ། ཆོས་བཤད་པའང་མཆོག་མ་ཡིན་པ་མ་ཡིན་ཏེ། གང་གི་ཕྱིར་འདི་ལྟར་ལྷས་ཀྱང་འདི་ལྟ་སྟེ། བཅོམ་ལྡན་འདས་དེ་ལ་བསོད་སྙོམས་དབུལ་བའི་ཕྱིར་བརྩོན་པར་བྱེད་དོ་སྙམ་ནས་ནང་པར་སྔར་ལངས་ཏེ་སྦྲང་རྩི་དང ། འདའ་གུ་མང་དུ་ཁྱེར་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཚོང་པ་ག་གོན་དང ། བཟང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱི་ཆེད་དུ་འདིར་བདག་ཅག་གིས་སྦྲང་རྩི་དང ། འདའ་གུ་མང་དུ་འཚལ་ཏེ་མཆིས་ཀྱི་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་འདི་བཞེས་སུ་གསོལ་ལོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་བདག་གིས་ཕྱག་གིས་བསོད་སྙོམས་བཞེས་ན། དཔེར་ན།་མུ་སྟེགས་ཅན་བཞིན་དུ་འགྱུར་བས་དེ་ནི་བདག་གི་ཆ་མ་ཡིན་གྱི། མ་ལ། བདག་གིས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྲོག་ཆགས་རྣམས་ལ་ཕན་
83a
༄#། །པའི་ཕྱིར་བསོད་སྙོམས་གང་དུ་བཞེས་པ་བསམ་པར་བྱའོ་སྙམ་པ་ན། བཅོམ་ལྡན་འདས་ལ་ལྷ་རྣམ་ཀྱིས་གསོལ་པ། བཙུན་པ། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྲོག་ཆགས་རྣམས་ལ་སྨན་པར་བགྱི་བའི་སླད་དུ་ལྷུང་བཟེད་དུ་བསོད་སྙོམས་བཞེས་ལགས་སོ། །བཅོམ་ལྡན་འདས་ཀྱིས་ཀྱང་དགོངས་ཤིང་ཡེ་ཤེས་གཟིགས་པ་བསྐྱེད་ན། སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱིས་སྲོག་ཆགས་རྣམས་ལ་ཕན་པའི་ཕྱིར་བསོད་སྙོམས་ལྷུང་བཟེད་དུ་བཞེས་པར་གྱུར་ནས། དེ་ན་བཅོམ་ལྡན་འདས་ལ་ལྷུང་བཟེད་ཀྱི་དགོངས་པ་བྱུང་ངོ ། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་ལྷུང་བཟེད་ཀྱི་དགོངས་པ་འབྱུང་བར་རིག་ནས་རི་བྲག་ཅན་ཞིག་ལ་རྡོ་བ་ལས་བྱས་པའི་ལྷུང་བཟེད་མི་མ་ཡིན་པས་བྱས་ཤིང་མི་མ་ཡིན་པས་ཟིན་པར་བྱས་ལ་གསལ་བ་གཙང་བ་དྲི་མི་ཞིམ་པ་མེད་པ་བཞི་ཁྱེར་ཏེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལ་ལྷུང་བཟེད་ཀྱི་མཁོ་བ་བྱུང་བར་བདག་ཅག་གིས་འཚལ་ནས་རི་བྲག་ཅན་ཞིག་ལ་རྡོ་
83b
ལས་རྡོའི་ལྷུང་བཟེད་མི་མ་ལགས་པས་བགྱིས་པ་གསལ་བ་གཙང་བ་དྲི་ང་བ་མ་མཆིས་པ་བཞི་འདིར་འཚལ་ཏེ་མཆིས་ན། བཅོམ་ལྡན་འདས། ཐུགས་བརྩེ་བ་ཉེ་བར་བཟུང་སྟེ་བཞེས་སུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་བདག་གིས་རྒྱལ་པོ་ཆེན་པོ་གཅིག་ལས་ལྷུང་བཟེད་གཅིག་བཞེས་ན་གསུམ་གྱི་སེམས་མི་དགའ་བར་འགྱུར་རོ། ། གལ་ཏེ་གཉིས་ལས་ན་ནི་གཉིས་ཀྱི་སེམས་མི་དགའ་བར་འགྱུར་རོ། །གལ་ཏེ་གསུམ་ལས་ན་ནི་གཅིག་གི་སེམས་མི་དགའ་བར་འགྱུར་གྱི། མ་ལ། བདག་གིས་རྒྱལ་པོ་ཆེན་པོ་བཞི་ལས་ལྷུང་བཟེད་བཞི་བཞེས་ལ་ལྷུང་བཟེད་གཅིག་ཏུ་བྱིན་གྱིས་བརླབ་པར་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལས་ལྷུང་བཟེད་བཞི་བཞེས་ཏེ། ལྷུང་བཟེད་གཅིག་ཏུ་བྱིན་གྱིས་བརླབས་སོ། །དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང ། བཟང་པོ་ལས་སྲོག་ཆགས་རྣམས་ལ་ཕན་པའི་ཕྱིར་བསོད་སྙོམས་བཞེས་སོ། །དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང ། བཟང་པོ་ལ་འདི་སྐད་ཅེས་བཀའ་སྩལ་ཏོ། །ཚོང་པ་དག་།ཁྱེད་ཚུར་སངས་རྒྱས་ལ་སྐྱབས་སུ་དེང་ཞིག། ཆོས་ལ་སྐྱབས་སུ་དེང་ཞིག། །མ་འོངས་པའི་དུས་ན་འབྱུང་བར་འགྱུར་བའི་དགེ་འདུན་ཞེས་བྱ་བ་གང་ཡིན་པ་དེ་ལ་ཡང་སྐྱབས་སུ་དེང་ཞིག་།བཙུན་པ། བདག་ཅག་སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ།།
84a
༄#། །མ་འོངས་པའི་དུས་ན་འབྱུང་བར་འགྱུར་བའི་དགེ་འདུན་གང་ལགས་པ་དེ་ལའང་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང ། བཟང་པོའི་སྦྱིན་པ་དེ་ལ་རྗེས་སུ་ཡི་རང་བ་མཛད་དེ། གང་གི་དོན་དུ་སྦྱིན་པ་བཏང ། །དེ་ཡི་དོན་དུ་འགྱུར་བ་སྟེ། །བདེ་བའི་དོན་དུ་སྦྱིན་བཏང་ན། །དེ་ནི་བདེ་བར་འགྱུར་བ་ཡིན། །བསོད་ནམས་རྣམ་སྨིན་བདེ་བ་དང ། །བསམ་པ་ཡང་ནི་འགྲུབ་པར་འགྱུར། །མྱུར་དུ་ཞི་བ་དམ་པ་ཡི། །མྱ་ངན་འདས་པ་རྟོགས་པར་འགྱུར། །ཕ་རོལ་ལས་བྱུང་གནོད་པ་ནི། །ལྷ་དང་བདུད་ཀྱི་རིས་དག་གིས། །བསོད་ནམས་ཁོ་ན་བྱེད་པ་ན། །བར་ཆད་བྱ་བར་མི་ནུས་སོ། །གལ་ཏེ་འཕགས་པའི་ཤེས་རབ་ཕྱིར། །གཏོང་ལྡན་དེ་ནི་འབད་བྱེད་ན། །སྡུག་བསྔལ་ཐ་མར་བྱེད་པ་དག། རྣམ་པར་མཐོང་ཞེས་རེག་པར་འགྱུར། །དེ་ནས་ཚོང་པ་ག་གོན་དང ། བཟང་པོ་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་སྟེ་རྗེས་སུ་ཡི་རང་ནས་བཅོམ་ལྡན་འདས་ཀྱིས་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང ། བཟང་པོ་ལས་བསོད་སྙོམས་བཞེས་ནས་ཆུ་ཀླུང་ནཻ་རཉྫ་ནཱ་གང་ན་བ་དེར་གཤེགས་ཏེ་བྱོན་ནས་ཆུ་ཀླུང་ནཻ་རཉྫ་ནའི་འགྲམ་དུ་བཞུགས་ཏེ་ཞལ་ཟས་ཀྱི་བྱ་བ་མཛད་དོ། །དེ་ན་སྦྲང་རྩིའང་རླུང་སློང་ལ་འདེ་གུའང་རླུང་
84b
སློང་བ་དེས་ན་བཅོམ་ལྡན་འདས་རླུང་ནད་ཀྱི་སྙུན་གྱིས་ཐེབས་སོ། །དེ་ནས་བདུད་སྡིག་ཅན་གྱིས་བཅོམ་ལྡན་འདས་རླུང་ནད་ཀྱི་སྙུན་གྱིས་ཐེབས་པར་རིག་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཡོངས་སུ་མྱ་ངན་འདའ་བའི་དུས་ལ་བབ་ལགས་སོ། །བདེ་བར་གཤེགས་པ། ཡོངས་སུ་མྱ་ངན་ལས་འདའ་བའི་དུས་ལ་བབ་ལགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། འདི་ལྟ་སྟེ། དཀྲུག་པའི་ལས་ཀྱི་ཕྱིར་བདུད་སྡིག་ཅན་འདི་ཉེ་བར་འོངས་སོ་སྙམ་དུ་དགོངས་ནས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན། ཇི་སྲིད་པའི་ཉན་ཐོས་མཁས་པ། གསལ་བ་ཡིད་གཞུངས་བ། ཕ་རོལ་གྱི་རྩོད་པ་བྱུང་ཞིང་བྱུང་བ་རྣམས་ཆོས་པ་བཞིན་གྱིས་ཚར་གཅོད་ནུས་པ། རང་གི་སྨྲ་བ་གསལ་བར་བྱེད་ནུས་པ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་བྱུང་བར་མ་གྱུར་པ་དང ། ངའི་ཚངས་པར་སྤྱོད་པ་རྒྱ་ཆེན་པོ་སྐྱེ་བོ་མང་པོ་དང ། ལྷ་དང ། མིའི་བར་ལ་རྒྱ་ཆེར་ཡང་དག་པར་ལེགས་པར་རབ་ཏུ་མ་བསྟན་གྱི་བར་དུ་ང་ཡོངས་སུ་མྱ་ངན་ལས་མི་འདའོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། ཀྱེ་མའོ་དགེ་སྦྱོང་གོའུ་ཏ་མ་ནི་ཡོངས་སུ་མྱ་ངན་ལས་མི་འདའོ་སྙམ་དུ་བསམས་ནས་སྡུག་བསྔལ་ཞིང་ཡིད་མི་བདེ་ལ་འགྱོད་པས་དེ་ཉིད་དུ་མི་
85a
༄#། །སྣང་བར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་རླུང་ནད་ཀྱི་སྙུན་གྱིས་ཐེབས་པར་རིག་ནས་ཤིང་ཛམྦུ་ཞེས་བྱ་བས་ཛམྦུའི་གླིང་དུ་གདགས་པ་གང་ཡིན་པ་དེ་དང་ཧ་ཅང་ཡང་མི་རིང་བ་ཞིག་ན་ཨ་རུ་ར་ཆེན་པོའི་ཚལ་ཡོད་དེ། དེ་ནས་ཁ་དོག་དང ། དྲི་དང ། རོ་དང་ལྡན་པའི་ཨ་རུ་ར་བླངས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བསེར་མའི་སྙུན་ནད་ཀྱི་སྙུན་གྱིས་ཐེབས་པར་བདག་གིས་འཚལ་ནས་ཤིང་ཛམྦུ་ཞེས་བྱ་བས་ཛམྦུའི་གླིང་དུ་གདགས་པ་གང་ལགས་པ་དེ་དང་ཧ་ཅང་མི་རིང་བ་ན་ཨ་རུ་ར་ཆེན་པོའི་ཚལ་མཆིས་ཏེ། དེ་ནས་བདག་གིས་ཁ་དོག་དང ། དྲི་དང ། རོ་དང་ལྡན་པའི་ཨ་རུ་ར་འདིར་འཚལ་ཏེ་མཆིས་ཀྱི་དེ་བཅོམ་ལྡན་འདས་གསོལ་ཅིག་།བཅོམ་ལྡན་འདས་ཀྱིས་དེ་གསོལ་པ་དང ། བསེར་མ་དང་མཐུན་པར་འགྱུར་ཞིང་བསེར་མའི་སྙུན་ཉེ་བར་ཞི་བར་འགྱུར་རོ། །བཅོམ་ལྡན་འདས་ཀྱིས་དེ་གསོལ་པ་དང ། རླུང་དང་མཐུན་པར་གྱུར་ནས་རླུང་ནད་ཀྱི་སྙུན་ཉེ་བར་ཞི་བར་གྱུར་ཏོ། །དེ་ན་བཅོམ་ལྡན་འདས་ཤིན་ཏུ་
85b
བཟོད་ཅིང་ལྷག་པར་འཚོ་བར་གྱུར་ཏོ། །དེ་ན་བཅོམ་ལྡན་འདས་ཇི་ཙམ་དགྱེས་ཀྱི་བར་དུ་བྱང་ཆུབ་ཀྱི་ཤིང་དྲུང་དུ་བཞུགས་ནས་ཀླུའི་རྒྱལ་པོ་བཏང་བཟུང་གི་གནས་གང་ན་བ་དེར་གཤེགས་ཏེ་བྱོན་ནས་ཤིང་གི་དྲུང་དུ་བརྟེན་ཏེ་སྐྱིལ་མོ་ཀྲུང་བཅས་ནས། སྐུ་དྲང་པོར་བསྲང་སྟེ། དྲན་པ་མངོན་དུ་ཕྱོགས་པར་བཞག་ནས་བཞུགས་སོ། །དེའི་ཚེ་ཀླུའི་རྒྱལ་པོ་བཏང་བཟུང་གི་གནས་སུ་ཞག་བདུན་དུ་དུས་མ་ཡིན་པའི་སྤྲིན་ཆགས་པར་གྱུར་ཏོ། །དེ་ནས་ཀླུའི་རྒྱལ་པོ་བཏང་བཟུང་གིས་ཞག་བདུན་དུ་དུས་མ་ཡིན་པའི་སྤྲིན་ཆགས་པར་རིག་ནས་གནས་ནས་མངོན་པར་འཕགས་ཏེ། བཅོམ་ལྡན་འདས་ཞག་བདུན་པོ་འདི་ལ་བསེར་བར་འགྱུར་དུ་འོང ། ཚ་བ་དང ། སྦྲང་མ་དང ། ཤ་སྦྲང་དང ། རླུང་དང ། ཉི་མ་དང ། སྡིག་སྤྲུལ་གྱི་རེག་པས་སྐུ་ལ་གནོད་པར་འགྱུར་དུ་འོང་ཞེས་ལུས་ཀྱིས་བཅོམ་ལྡན་འདས་ཀྱི་སྐུ་ལ་ལན་བདུན་དུ་དཀྲིས་ཏེ་སྟེང་དུ་མགོའི་གདེངས་ཀ་ཆེན་པོ་བྱས་ནས་འདུག་གོ་།དེ་ནས་ཀླུའི་རྒྱལ་པོ་བཏང་བཟུང་གིས་ཞག་བདུན་གྱི་དུས་མ་ཡིན་པའི་སྤྲིན་ཆགས་པ་མེད་པར་རིག་ནས་བཅོམ་ལྡན་འདས་ཀྱི་སྐུ་ལས་ལུས་ཕྲལ་ཏེ། དཔུང་རྒྱན་དང ། རྣ་རྒྱན་དང ། ཕྲེང་བ་དང ། རྒྱན་སྣ་ཚོགས་དང ། བྱུག་པས་བྱུགས་ནས་བཅོམ་ལྡན་འདས་ག་ན་བ་དེར་ལོགས་སུ་ཐལ་མོ་སྦྱར་བ་བཏུང་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
86a
༄#། །འདས། དགུང་བདུན་པོ་འདི་ལ་བསེར་བར་མ་གྱུར་ཏམ། ཚ་བ་དང ། སྦྲང་མ་དང ། ཤ་སྦྲང་དང ། བསེར་མ་དང ། གདུགས་དང ། སྡིག་སྦྲུལ་གྱི་གནོད་པས་སྐུ་ལ་རེག་པར་མ་གྱུར་ཏམ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། བདེན་པའི་དགའ་བར་བདེ་བ་ཡིན། །ཆོས་ཐོས་པ་ལ་ལྟ་བ་དང ། །སྲོག་ཆགས་རྣམས་ལ་སྡོམ་པ་ཡིས། །འཇིག་རྟེན་འཚེ་བ་མེད་པ་བདེ། །འཇིག་རྟེན་འདོད་ཆགས་བྲལ་བ་དང ། །འདོད་པ་རྣམས་ལ་རྒལ་བ་དེ། །ངའོ་ང་རྒྱལ་ཐུལ་པ་གང ། །དེ་ཉིད་བདེ་བའི་དམ་པ་ཡིན། །དེ་ནས་བཅོམ་ལྡན་འདས་ཇི་ཙམ་བཞེད་ཀྱི་བར་དུ་ཀླུའི་རྒྱལ་པོ་བཏང་བཟུང་གི་གནས་ན་བཞུགས་ནས། བྱང་ཆུབ་ཀྱི་སྙིང་པོ་ག་ལ་བ་དེར་གཤེགས་ཏེ་བྱོན་པ་དང ། རྩཝའི་གདིངས་བ་བཤམས་པ་ཉིད་ལ་སྐྱིལ་མོ་ཀྲུང་བཅས། སྐུ་དྲང་པོར་བསྲང་ནས། དྲན་པ་མངོན་དུ་ཕྱོགས་པར་བཞག་ནས་བཞུགས་ཏེ། སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་ཅིང་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་པོ་ལུགས་དང་མཐུན་པ་དང ། ལུགས་དང་མི་མཐུན་པ་འདི་ཉིད་ལ་གཟིགས་པར་མཛད་དེ། འདི་ལྟ་སྟེ། འདི་ཡོད་པས་འདི་ཡོད། འདི་སྐྱེས་པས་འདི་སྐྱེ་བ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་
86b
རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང ། གཟུགས། མིང་དང ། གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་བར་འགྱུར་ཏེ་དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ། འདི་མེད་ན་འདི་མེད་ལ། འདི་འགགས་པས་འདི་འགག་པར་འགྱུར་ཏེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་།འདུ་བྱེད་འགགས་པས་རྣམས་པར་ཤེས་པ་འགག་།རྣམ་པར་ཤེས་པ་འགགས་པས་མིང་དང ། གཟུགས་འགག་།མིང་དང ། གཟུགས་འགགས་པས་སྐྱེ་མཆེད་དྲུག་འགག ། སྐྱེ་མཆེད་དྲུག་འགགས་པས་རེག་པ་འགགས། །རེག་པ་འགགས་པས་ཚོར་བ་འགག་།ཚོར་བ་འགགས་པས་སྲེད་པ་འགག་།སྲེད་པ་འགགས་པས་ལེན་པ་འགག་།ལེན་པ་འགགས་པས་སྲིད་པ་འགག་།སྲིད་པ་འགགས་པས་སྐྱེ་བ་འགག་།སྐྱེ་བ་འགགས་པས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་
87a
༄#། །པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཞག་བདུན་པོ་དེ་ཉིད་འདས་པར་མཛད་ནས་ཏིང་ངེ་འཛིན་དེ་ལས་བཞེངས་ཏེ། དེའི་ཚེ་ཚིགས་སུ་བཅད་དེ་བཀའ་སྩལ་པ། གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་ཆོས་རྣམས་རྒྱུ་དང་བཅས་ཤེས་པ། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་སྡུག་བསྔལ་རྒྱུ་དང་བཅས་ཤེས་པ། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་ཚེར་བཟད་པ་ཐོབ་གྱུར་པ། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་སྐྱེན་རྣམས་ཟད་པ་ཐོབ་ནས་ནི། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་ཟག་པ་ཟད་པ་ཐོབ་གྱུར་ནས། ། དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །འཇིག་རྟེན་ཀུན་ཏུ་སྣང་བར་འདུག་པ་
87b
ནི། །ཇི་ལྟར་བར་སྣང་ཉི་མ་ཤར་བ་བཞིན། །གང་ཚེ་ཆོས་དེ་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །བདུད་ཀྱི་སྡེ་རྣམས་རྣམ་པར་བཅོམ་གནས་ཏེ། ། སངས་རྒྱས་ཀུན་ཏུ་སྦྱོར་ལས་རྣམ་པར་གྲོལ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་ཆོས་ཟབ་མོ་ཟབ་པར་སྣང་བ། མཐོང་བར་དཀའ་ཞིང་ཁོང་དུ་ཆུད་པར་དཀའ་བ། རྟོག་གེ་པ་རྣམས་ཀྱི་རྟོག་གེའི་སྤྱོད་ཡུལ་མ་ཡིན་པ། ཞི་བ་མོ། མཛངས་པའི་མཁས་པ་དང ། རིག་པས་རྣམ་པར་ཤེས་པ་བྱ་བ་རྟོགས་ཏེ། དེ་བདག་གི་གཞན་ལ་སྨྲས་ཀྱང་གཞན་གྱིས་དེ་མི་ཤེས་པས་དེས་བདག་དུབ་པར་འགྱུར། ངལ་བར་འགྱུར། སེམས་ལ་སྤྲོ་བ་མེད་པ་ཁོ་ནར་འགྱུར་བར་ཟད་པས། མ་ལ། བདག་གཅིག་པུ་དགོན་པའི་ནགས་སྟུག་པོར་མཐོང་བའི་ཆོས་ལ་བདེ་བར་གནས་པའི་རྣལ་འབྱོར་ལ་རྗེས་སུ་བརྩོན་པར་གནས་པར་བྱའོ་སྙམ་སྟེ། དེ་ན་བཅོམ་ལྡན་འདས་ཐུགས་ལས་ཆུང་དུས་བཞུགས་པ་ལ་ཐུགས་གཞོལ་བར་མཛད་ཅིང་ཆོས་འཆད་པ་ལ་མ་ཡིན་ནོ། །དེ་ནས་ཚངས་པ་མི་མཇེད་ཀྱི་བདག་པོ་འདི་སྙམ་དུ་སེམས་ཏེ། ཀྱེ་མའོ་འཇིག་རྟེན་འདི་མ་རུང་ངོ ། །ཀྱེ་མའི་འཇིག་རྟེན་འདི་མ་རུང་སྟེ། གང་གི་ཕྱིར་དེ་ལྟར་བརྒྱ་ལམ་ན། ལན་འགའ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་བ་ནི། དཔེར་ན། ཨུ་
88a
༄#། །དུམ་ཝ་རའི་མེ་ཏོག་བཞིན་དུ་བཅོམ་ལྡན་འདས་དེ་ད་ལྟར་ཐུགས་ལས་ཆུང་དུས་བཞུགས་པ་ལ་ཐུགས་གཞོལ་བར་མཛད་ཅིང་ཆོས་འཆད་པ་ལམ་ཡན་པས། མ་ལ། བདག་དེར་སོང་ལ་གསོལ་བ་གདབ་བོ་སྙམ་མོ། །དེ་ནས་ཚངས་པ་མི་མཇེད་ཀྱི་བདག་པོས། དཔེར་ན། སྐྱེས་བུ་སྟོབས་དང་ལྡན་པའི་དཔུང་པ་བསྐུམས་ནས་བརྐྱང་པའམ། བརྐྱངས་ནས་བསྐུམ་པ་ཙམ་གྱིས་ཚངས་པ་མི་མཇེད་ཀྱི་བདག་པོ་ཚངས་པའི་འཇིག་རྟེན་ནས་མི་སྣང་བར་བྱས་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ། དེ་ནས་ཚངས་པ་མི་མཇེད་ཀྱི་བདག་པོས་དེའི་ཚེ་ཚིགས་སུ་བཅད་དེ་གསོལ་པ། མ་ག་དྷར་ནི་སྔོན་ཆད་ཆོས་བྱུང་བ། །དག་པ་མ་ལགས་དྲི་མར་བཅས་པར་རྟོགས། །བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། །དྲི་མ་མེད་པས་རྟོགས་པ་བཤད་པར་མཛོད། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། ཚངས་པ་ངས་ནི་ཚེགས་ཆེན་གྱིས། །སྐྱོན་རྣམས་བཅོམ་ནས་རྟོགས་གྱུར་པ། །སྲིད་དང་ཆགས་པས་དཀྲིས་རྣམས་ཀྱིས། །ཆོས་འདི་ལེགས་པར་རྟོགས་མི་འགྱུར། །རྒྱུན་ལས་བཟློག་ཕྱོགས་འགྲོ་བའི་ལམ། །ཟབ་ཅིང་ཤིན་ཏུ་མཐོང་དཀའ་བ། །མུན་པའི་ཕུང་པོས་བསྒྲིབས་པ་ཡི། །འདོད་ཆགས་ཞེན་པས་མཐོང་མི་འགྱུར། །བཙུན་པ། འཇིག་རྟེན་དུ་སྐྱེས་ཤིང་འཇིག་རྟེན་དུ་
88b
རྒས་པའི་སེམས་ཅན་རྣམས་ལ་དབང་པོ་རྣོན་པོ་དང ། དབང་པོ་འབྲིང་པོ་དང ། དབང་པོ་རྟུལ་པོ་དང ། དྲང་སླ་བ་དང ། གདུལ་སླ་བ་དང ། ཉོན་མོངས་པ་ཆུང་བ་དང ། རྡུལ་ཆུང་བའི་རིགས་མཆིས་ཏེ་དེ་དག་གིས་དམ་པའི་ཆོས་མ་ཐོས་ན་ཉམས་པར་འགྱུར་ལགས་སོ། །བཙུན་པ། དཔེར་ན། ཨུཏྤ་ལའམ། པདྨ་འམ། ཀུ་མུ་དའམ། པདྨ་དཀར་པོ་དག་ཆབ་ནས་སྐྱེས་ཤིང་ཆབ་ནས་ཆེན་པོར་གྱུར་ཏེ། ཆབ་ནས་འཕགས་ཏེ་ཁ་ཅིག་ནི་ཆབ་དང་མཉམ། ཁ་ཅིག་ནི་ཆབ་ཀྱི་ནང་དུ་ནུབ་ཅིང་མཆིས་པ་དེ་བཞིན་དུ། བཙུན་པ། འཇིག་རྟེན་དུ་སྐྱེས་ཤིང་འཇིག་རྟེན་དུ་རྒས་པའི་སེམས་ཅན་རྣམས་ལའང་དབང་པོ་རྣོན་པོ་དང ། དབང་པོ་འབྲིང་པོ་དང ། དབང་པོ་རྟུལ་པོ་དང ། དྲང་སླ་བ་དང ། གདུལ་སླ་བ་དང ། ཉོན་མོངས་པ་ཆུང་བ་དང ། རྡུལ་ཆུང་བའི་རིགས་མཆིས་ཏེ། དེ་དག་གིས་དམ་པའི་ཆོས་མ་ཐོས་ན་ཡོངས་སུ་ཉམས་པར་འགྱུར་བས་ཆོས་རིན་པོ་ཆེ་འཚལ་བར་འགྱུར་བ་མཆིས་ཀྱི། བཅོམ་ལྡན་འདས། ཆོས་བཤད་དུ་གསོལ། བདེ་བར་གཤེགས་པ། ཆོས་བཤད་དུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ། ང་ཉིད་ཀྱིས་སངས་རྒྱས་ཀྱི་སྤྱན་གྱིས་འཇིག་རྟེན་ལ་བལྟ་བར་བྱའོ་སྙམ་ནས།་དེ་ནས་བཅོམ་ལྡན་འདས་ཉིད་ཀྱི་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཏེ། བཅོམ་ལྡན་འདས་ཉིད་ཀྱི་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་པ་དང །
89a
༄#། །འཇིག་རྟེན་དུ་སྐྱེས་ཤིང་འཇིག་རྟེན་དུ་རྒས་པའི་སེམས་ཅན་རྣམས་ལ་དབང་པོ་རྣོན་པོ་དང ། དབང་པོ་འབྲིང་པོ་དང ། དབང་པོ་རྟུལ་པོ་དང ། དྲང་སླ་བ་དང ། གདུལ་སླ་བ་དང ། ཉོན་མོངས་པ་ཆུང་བ་དང ། རྡུལ་ཆུང་བའི་རང་བཞིན་ཡོད་དོ། །དེ་དག་དམ་པའི་ཆོས་མ་ཐོས་ན་ཡོངས་སུ་ཉམས་པར་འགྱུར་བར་གཟིགས་སོ། །གཟིགས་ནས་ཀྱང་སེམས་ཅན་རྣམས་ལ་ཐུགས་རྗེ་ཆེན་པོ་གཞོལ་བར་འགྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། བདུད་རྩི་སྒོ་མོ་དག་ནི་དབྱེ་བར་བྱ། ། ཉན་པ་མུ་འདོད་སོ་མ་ཉི་སོལ་ཅིག་དང ། །ཚངས་པ་མི་རྣམས་ལ་ནི་གྱ་ནོམ་ཆོས། །ཀླན་ཀ་མི་བཙལ་མདོ་ཙམ་བཤད་པར་བྱ། །དེ་ནས་ཚངས་པ་མི་མཇེད་ཀྱི་བདག་པོ་འདི་སྙམ་དུ་སེམས་ཏེ། ཀྱེ་བཅོམ་ལྡན་འདས་ཀྱིས་ཆོས་བཤད་པར་འགྱུར་རོ། །ེ་མ་བདེ་བར་གཤེགས་པས་ཆོས་བསྟན་པར་འགྱུར་རོ་སྙམ་དུ་རིག་ནས། དགའ་བ་དང ། མགུ་བ་དང།་མཆོག་ཏུ་དགའ་བ་དང ། དགའ་བ་རྒྱ་ཆེན་པོ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ་ངས་སུ་ལ་ཐོག་མར་ཆོས་བཤད་པར་བྱ་སྙམ་མོ། །དེ་ནས་བཅོམ་ལྡན་
89b
འདས་འདི་སྙམ་དུ་དགོངས་ཏེ། མ་ལ། ངས་སྒྱུ་རྩལ་ཤེས་ཀྱི་བུ་རིང་འཕུར་དེ་ལ་ཐོག་མར་ཆོས་བཤད་པར་བྱ་སྟེ། དེ་ནི་ངའི་ཐོག་མའི་སློབ་དཔོན་ཁོ་ན་ཡིན་བཞིན་དུ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་ལ་རྟོགས་པ་དམ་པ་དག་ལའང་ཡི་རངས་ཤིང་དད་པར་གྱུར་པ་ཡིན་ནོ་སྙམ་མོ། །བཅོམ་ལྡན་འདས་ལ་ལྷ་རྣམས་ཀྱིས་གསོལ་པ། བཙུན་པ། སྒྱུ་རྩལ་ཤེས་ཀྱི་བུ་གུམ་ནས་དགུང་བདུན་ལགས་སོ། །བཅོམ་ལྡན་འདས་ཀྱིས་ཀྱང་དགོངས་པ་ལ་ཞུགས་ཏ་ཡེ་ཤེས་གཟིགས་པ་བསྐྱེད་ན་སྒྱུ་རྩལ་ཤེས་ཀྱི་བུ་རིང་འཕུར་ཤི་ནས་ཞག་བདུན་ལོན་ནོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཨེ་མའོ་སྒྱུ་རྩལ་ཤེས་ཀྱི་བུ་རིང་འཕུར་ཤི་བ་དེ་ནི་ཏེ་བོར་མ་སྟེས་སོ། །ེ་མའོ་སྒྱུ་རྩལ་ཤེས་ཀྱི་བུ་རིང་འཕུར་ཤི་བ་དེ་ནི་ཤིན་ཏུ་ཏེ་བོར་མ་སྟེས་ཏེ། ཆོས་འདུལ་བའི་འདི་མ་ཐོས་སོ། །གལ་ཏེ་འདས་ཆོས་འདུལ་བ་འདི་ཐོས་ན་ཤེས་པར་འགྱུར་བ་ཞིག་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་།ངས་ཐོག་མར་སུ་ཞིག་ལ་ཆོས་བཤད་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ། ངས་རངས་བྱེད་ཀྱི་བུ་ལྷག་སྤྱོད་དེ་ལ་ཐོག་མར་ཆོས་བཤད་པར་བྱ་སྟེ། དེ་ནི་ངའི་ཐོག་མའི་སློབ་དཔོན་ཁོ་ན་ཡིན་བཞིན་དུ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་ལ་རྟོགས་པ་དམ་པ་དག་ལའང་ཡི་རངས་ཤིང་དད་པར་གྱུར་ཏོ་སྙམ་མོ། །བཅོམ་ལྡན་འདས་ལ་ལྷ་རྣམས་ཀྱིས་གསོལ་པ།
90a
༄#། །བཙུན་པ། རངས་བྱེད་ཀྱི་བུ་ལྷག་སྤྱོད་མདང་སུམ་སྲོད་ལ་གུམ་ལགས་སོ། །བཅོམ་ལྡན་འདས་ཀྱིས་དགོངས་པ་ལ་ཞུགས་ཏེ་ཡེ་ཤེས་གཟིགས་པ་བསྐྱེད་ན་རངས་བྱེད་ཀྱི་བུ་ལྷག་སྤྱོད་སྲོད་ལ་ཤི་བར་གྱུར་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཨེ་མའོ་རངས་བྱེད་ཀྱི་བུ་ལྷག་སྤྱོད་ཤི་བ་དེ་ནི་ཏེ་བོར་མ་སྟེས་སོ། །ེ་མའོ་རངས་བྱེད་ཀྱི་བུ་ལྷག་སྤྱོད་ཤི་བ་དེ་ནི་ཤིན་ཏུ་ཏྲེ་བོར་མ་སྟེས་ཏེ། ཆོས་འདུལ་བ་འདི་མ་ཐོས་སོ། །གལ་ཏེ་དེས་ཆོས་འདུལ་བ་འདི་ཐོས་ན་ཤེས་པར་འགྱུར་བ་ཞིག་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ། ངས་ཐོག་མར་སུ་ཞིག་ལ་ཆོས་བཤད་སྙམ་མོ། །དེ་ནས་འདི་སྙམ་དུ་དགོངས་ཏེ། མ་ལ། ངས་ལྔ་སྡེའི་དགེ་སློང་དེ་རྣམས་ལ་ཐོག་མར་ཆོས་བཤད་པར་བྱ་སྟེ། དེ་དག་གིས་ང་སྔོན་སྡུག་བསྔལ་སྤོང་བའི་རྣལ་འབྱོར་གྱི་རྗེས་སུ་བརྩོན་པར་གནས་པ་དང ། བླ་མ་དང ། གུས་པ་དང ། སྡུག་པ་དང་བཅས་པས་གནས་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ལྔ་སྡེའི་དགེ་སློང་རྣམས་ད་ལྟ་གང་ན་འདུག་སྙམ་ནས་བཅོམ་ལྡན་འདས་ཀྱི་ལྷའི་སྤྱན་རྣམ་པར་དག་པ་མི་རྣམས་ཀྱི་ལས་འདས་པས་ལྔ་སྡེའི་དགེ་སློང་རྣམས་ཝཱ་ར་ཎཱ་སི་ན་དྲང་སྲོང་སྨྲ་བ་རི་དྭགས་ཀྱི་གནས་ན་འཁོད་པ་གཟིགས་སོ། །གཟིགས་
90b
ནས་ཀྱང་ཇི་ཙམ་བཞེད་ཀྱི་བར་དུ་བྱང་ཆུབ་ཀྱི་ཤིང་དྲུང་དུ་བཞུགས་ནས་ཝཱ་ར་ཎཱ་སིའི་ཀ་ཤིའི་གྲོང་རྡལ་གང་ན་བ་དེར་རྒྱུ་ཞིང་གཤེགས་སོ། །དེའི་ཚེ་ཀུན་ཏུ་འཚོ་ཉེར་འགྲོ་ལམ་དེ་ཉིད་དུ་ལམ་དུ་ཞུགས་པར་གྱུར་ཏེ། ཀུན་ཏུ་འཚོ་ཉེར་འགྲོས་བཅོམ་ལྡན་འདས་ལམ་ནས་གཤེགས་པ་མཐོང་ངོ ། །མཐོང་ནས་ཀྱང་འདི་སྐད་ཅེས་གསོལ་ཏོ། །དགེ་སྦྱོང་གཽ་ཏ་མ། ཁྱོད་ཀྱི་དབང་པོ་རྣམས་ནི་དང ། བཞིན་གྱི་མདོག་ནི་ཡོངས་སུ་དག་།པགས་པའི་མདོག་ནི་བསལ་ན། ཚེ་དང་ལྡན་པ་གཽ་ཏམ། ཁྱོད་ཀྱི་སྟོན་པ་ནི་གང ། ཁྱོད་སུ་ལས་བརྟེན་ཏེ་རབ་ཏུ་བྱུང ། ཁྱོད་སུའི་ཆོས་ལ་དགའ། བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། ང་དང་འདྲ་བ་ཡོད་མིན་པས། །ང་ལ་སློབ་དཔོན་འགའ་མེད་དེ། །འཇིག་རྟེན་སངས་རྒྱས་ང་གཅིག་པུ། །ཡང་དག་བྱང་ཆུབ་དམ་པ་ཐོབ། །ཐམས་ཅད་ཟིལ་མནན་འཇིག་རྟེན་ཀུན་མཁྱེན་ལ། །འདི་ནི་ཆོས་ཀུན་གྱིས་ནི་ང་མ་གོས། །ཐམས་ཅད་སྤངས་ཤིང་སྲེད་བྲལ་རྣམ་གྲོལ་ཏེ། །རང་གིས་མངོན་པར་ཤེས་ནས་སུ་ལ་རྟེན། །དེ་བཞིན་གཤེགས་པ་ལྷ་མིའི་སྟོན་པ་པོ། །ཐམས་ཅད་མཁྱེན་པའི་སྟོབས་ནི་ཀུན་ལྡན་པས། །ཉིད་ཀྱིས་བྱང་ཆུབ་རྟོགས་ནས་རབ་གསུངས་པ། །མི་ཉམས་མཚུངས་པ་མེད་ན་སུ་ལ་རྟེན། །ང་ནི་འཇིག་རྟེན་དགྲ་བཅོམ་སྟེ། །འཇིག་རྟེན་བླ་མེད་ང་ཡིན་པས། །ལྷ་དང་བཅས་པའི་འཇིག་རྟེན་ན། །ང་ནི་རྒྱལ་
91a
༄#། །བ་བདུད་ཟིལ་གནོན། །ཚེ་དང་ལྡན་པ་གཽ་ཏ་མ། རྒྱལ་བ་ཞེས་གསུང་ངམ། གང་གིས་ཟག་པ་ཟད་ཐོབ་པ། །རྒྱལ་བ་ང་འདྲར་ཤེས་པར་བྱ། །སྡིག་པའི་ཆོས་ནི་ངས་བཅོམ་པས། །དེ་བས་ཉེར་འགྲོ་ང་རྒྱལ་བའོ། །ཚེ་དང་ལྡན་པ་གཽ་ཏམ། གང་དུ་བཞུད། ཝཱ་ར་ཎཱ་སིར་གཤེགས་ནས་ནི། །ངས་ནི་ཆོས་ཀྱི་རྔ་བརྡུང་ཞིང ། ། འཇིག་རྟེན་མ་བསྐོར་གང་ཡིན་པ། །ཆོས་ཀྱི་འཁོར་ལོ་རབ་ཏུ་བསྐོར། །འཇིག་རྟེན་ཆགས་པ་ལས་བརྒལ་བའི། །ཀུན་མཁྱེན་སངས་རྒྱས་ཞི་གྱུར་པ། །འཇིག་རྟེན་བསྒྲལ་བ་མ་བྱས་པར། །སྐྱེས་བུ་དམ་པ་གྲགས་མི་སྲིད། །ཚེ་དང་ལྡན་པ་གཽ་ཏ་མ་རྒྱལ་བ་ལེགས་སོ་ཞེས་གསོལ་ནས། ཀུན་ཏུ་འཚོ་ཉེར་འགྲོ་ལམ་ནས་སོང་ངོ ། །དེ་ནས་བཅོམ་ལྡན་འདས་ཡུལ་ཀ་ཤིའི་ལྗོངས་རྒྱུ་ཞིང་གཤེགས་པ་ན་ཝཱ་ར་ཎཱ་སིར་བྱོན་ཏོ། །དེའི་ཚེ་ལྔ་སྡེའི་དགེ་སློང་རྣམས་ཝཱ་ར་ཎཱ་སི་ན་དྲང་སྲོང་སྨྲ་བ་རི་དྭགས་ཀྱི་ནགས་ན་འཁོད་དོ། །ལྔ་སྡེའི་དགེ་སློང་རྣམས་ཀྱིས་བཅོམ་ལྡན་འདས་རྒྱང་རིང་པོ་ཁོ་ནས་མཐོང་ངོ ། །མཐོང་ནས་ཀྱང་ཕན་ཚུན་ནས་ཆེད་དུ་བསམས་ཏེ་ལེགས་པར་འདུག་ནས་ཁྲིམས་སུ་བཅས་པ། ཤེས་ལྡན་དག ། དགེ་སྦྱོང་གཽ་ཏམ། མི་བརྟན་པ། བྱ་བ་མང་བ། མང་པོས་འཚོ་བ། སྤོང་བ་ཉམས་པ་དེང་འབྲས་ཆན་དང ། ཟན་དྲོན་གྱི་ཁ་ཟས་ལ་མང་དུ་ཟ་ཞིང་ལུས་མར་སར་དང ། ཏིལ་མར་གྱིས་བྱུགས་
91b
ནས་ཆུ་འཇམ་པོས་ལུས་ཁྲུས་བྱེད་ཅིང་འོང་གི་།དེ་བདག་ཅག་གི་དྲུང་དུ་འོངས་པ་དང་དེ་ལ་སྨྲ་བར་མི་བྱ། ཕྱག་མི་བྱ། ལྡང་བར་མི་བྱ། ལངས་ཏེ་སྟན་བསྟབ་པར་མི་བྱའོ། །གཞན་དུ་ན་སྟན་ནར་མ་ཁོ་ནར་བཏིང་བ་ལ་ཚིག་འདི་སྐད་ཅེས་ཚེ་དང་ལྡན་པ་གཽ་ཏ་མ་སྟན་ཡོད་ཀྱི་ཇི་སྟེ་འདོད་ན་འདུག་ཅིང་ཅེས་བརྗོད་པར་བྱའོ་ཞེས་བཅས་སོ། །བཅོམ་ལྡན་འདས་ཇི་ལྟ་ཇི་ལྟར་ལྔ་སྡེའི་དགེ་སློང་རྣམས་ལ་གཟིགས་པའི་ཕྱིར་ཉེ་བར་གཤེགས་པ་དེ་ལྟ་དེ་ལྟར་ལྔ་སྡེའི་དགེ་སློང་རྣམས་བཅོམ་ལྡན་འདས་གཟི་བརྗིད་དང ། དཔལ་དང ། བཀུར་སྟིམ་བཟོད་ནས་སྟན་ལས་ལངས་ཏེ་ཁ་ཅིག་ནི་བཅོམ་ལྡན་འདས་ཀྱི་ཆེད་དུ་གདན་ཤོམ་མོ། །ཁ་ཅིག་ནི་ཞབས་བཀྲུ་བའི་ཆུ་དང ། ཞབས་ཀྱི་རྟེན་དག་མཐའ་གཅིག་ཏུ་འཇོག་པར་བྱེད་དོ། །ཁ་ཅིག་ནི་བསུ་སྟེ། ན་བཟའ་ཆོས་གོས་དག་བླངས་ནས། འདི་སྐད་ཅེས། ཤེས་ལྡན་གཽ་ཏམ། ཚུར་སྤྱོན། ཤེས་ལྡན་གཽ་ཏམ། བྱོན་པ་ལེགས་སོ། །ཤེས་ལྡན་གཽ་ཏམ། གདན་བཤམས་པ་ཉིད་ལ་བཞུགས་ཤིག་ཅེས་ཟེར་རོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མ་སྐྱེས་བུ་བླུན་པོ་འདི་རྣམས་ཀྱིས་ཁྲིམས་བཅས་ནས་རང་གིས་བཤིག་གོ་སྙམ་དུ་མཁྱེན་ནས་གདན་བཤམས་པ་ཉིད་ལ་བཞུགས་སོ། །དེ་ནས་ལྔ་སྡེའི་དགེ་སློང་རྣམས་ལྷག་པར་ཡང་བཅོམ་ལྡན་འདས་ཀྱི་མཚན་ནས་བརྗོད། གདུང་ནས་རྗོད། ཚེ་དང་ལྡན་པས་རྗོད་པས་ཀུན་ཏུ་རྗོད་པར་བྱེད་དོ། །དེ་ནས་
92a
༄#། །བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱེད་ལྷག་པར་ཡང་དེ་བཞིན་གཤེགས་པའི་མཚན་ནས་རྗོད་པ་དང ། གདུང་ནས་རྗོད་པ་དང ། ཚེ་དང་ལྡན་པས་རྗོད་པས་ཀུན་ཏུ་མ་རྗོད་ཅིག་།ཁྱེད་ལ་ཡུན་རིང་པོར་གནོད་པ་དང ། ཕན་པ་མ་ཡིན་པ་དང ། སྡུག་བསྔལ་བར་འགྱུར་རོ། །དེ་ཅིའི་ཕྱིར་ཞེ་ན།་དགེ་སློང་དག་།གང་ལ་ལ་ལྷག་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་མཚན་ནས་རྗོད་པ་དང ། གདུང་ནས་རྗོད་པ་དང ། ཚེ་དང་ལྡན་པས་རྗོད་པའི་ཀུན་ཏུ་རྗོད་པ་དེ་ནི་སྐྱེས་བུ་བླུན་པོ་དེ་ལ་ཡུན་རིང་པོར་གནོད་པ་དང ། ཕན་པ་མ་ཡིན་པ་དང ། སྡུག་བསྔལ་བར་འགྱུར་རོ། །དེ་དག་གིས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏམ། ཁྱོད་ཀྱི་རེ་ཞིག་སྔོན་གྱི་ཚུལ་དང ། སྤྱོད་པ་དང ། དཀའ་བར་སྤྱད་པ་དེས་མིའི་ཆོས་བླ་མ་འཕགས་པའི་ཁྱད་པར་ཐོབ་པར་ནུས་སམ།་ཤེས་པའམ། མཐོང་བ་དང ། རེག་པར་གནས་པ་ཅུང་ཟད་ཀྱང་མ་ཐོབ་ན་ད་ལྟར་ཁྱོད་མི་རྟན་ཞིང་བྱ་བ་མང་ལ་མང་པོས་འཚོ་ཞིང་སྤོང་བ་ཉམས་པས་ད་ཁྱོད་འབྲས་ཆན་དང ། ཟན་དྲོན་གྱི་ཁ་ཟས་ལ་མང་དུ་ཟ་ཞིང་ལུས་མར་སར་དང ། ཏིལ་མར་གྱིས་བྱུགས་ནས་ཆུ་འཇམ་པོས་ལུས་ཁྲུས་བྱེད་པ་ལྟ་སྨོས་ཀྱང་ཅི་དགོས། དགེ་སློང་ཁྱེད་ཀྱིས་དེ་བཞིན་གཤེགས་པའི་ཞལ་མདོག་
92b
དང་དབང་པོ་རྣམས་གསལ་བ་སྔོན་ལས་ཐ་དད་དུ་བྱ་བ་གཞན་ལྟ་མཐོང་ངམ། དེ་རྣམས་ཀྱིས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏམ། དེ་དེ་བཞིན་ནོ། །དེ་ནས་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་།རབ་ཏུ་བྱུང་ནས་ནི་མཐའ་འདི་གཉིས་ལ་བསྟེན་པར་མི་བྱ། བསྙེན་པར་མི་བྱ། བསྙེན་བཀུར་མི་བྱ་སྟེ། གཉིས་གང་ཞེ་ན། འདོད་པ་རྣམས་ལ་འདོད་པའི་ས་བོན་ནམས་ཀྱི་རྗེས་སུ་བརྩོན་པ། དམན་པ་ངན་པ། ཐ་ཆད་མ་རབས་གང་ཡིན་པ་དང ། བདག་ཉིད་དུབ་པ་ལ་རྗེས་སུ་བརྩོན་པ། སྡུག་བསྔལ་བ་འཕགས་པའི་མ་ཡིན་པ་གནོད་པ་དང་ལྡན་པ་གང་ཡིན་པ་པའོ། །ཁྱེད་ཀྱིས་མཐའ་འདི་གཉིས་ལ་མི་རྟེན་པར་དབུ་མའི་ལམ་མིག་བྱེད་པ། ཡེ་ཤེས་བྱེད་པ། ཉེ་བར་ཞི་བར་འགྱུར་བ། མངོན་པར་ཤེས་པ་དང ། རྫོགས་པར་བྱང་ཆུབ་པ་དང ། མྱ་ངན་ལས་འདས་པར་འགྱུར་བ་ཡོད་དེ། དབུ་མའི་ལམ་གང་ཞེ་ན། འཕགས་པའི་ལམ་ཡན་ལག་བརྒྱད་པ་འདི་ལྟ་སྟེ། ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་པ་དང ། ཡང་དག་པའི་ཏིང་ངེ་འཛིན་ཡིན་ནོ། །བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་ཤེས་པར་བྱ་བ་འདིས་ཤེས་པར་མཛད་སྤྱོད་པས་བཅོམ་ལྡན་འདས་ལྔ་སྡེའི་དགེ་
93a
༄#། །སློང་རྣམས་ལས་གཉིས་ལ་སྔ་དྲོ་གདམས་ངག་འབོགས་པ་ན། གསུམ་གྲོང་ཁྱེར་དུ་བསོད་སྙོམས་ལ་འཇུག་སྟེ། གསུམ་གྱིས་བསྒྲུབས་པ་གང་ཡིན་པ་དེས་དྲུག་ཅར་འཚོ་བར་བྱེད་དོ། །བཅོམ་ལྡན་འདས་ལྔ་སྡེའི་རྣམས་ཀྱིས་དགེ་སློང་གསུམ་ལ་ཕྱི་དྲོ་གདམས་ངག་འབོགས་པ་ན། གཉིས་གྲོང་ཁྱེར་དུ་བསོད་སྙོམས་ལ་འཇུག་སྟེ། གཉིས་ཀྱིས་བསྒྲུབས་པ་གང་ཡིན་པ་དེས་ལྔ་སྡེ་འཚོ་བར་བྱེད་དེ། དེ་བཞིན་གཤེགས་པ་ནི་སྔ་དྲོའི་དུས་ཁོ་ནར་གསོལ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེངས་མངོན་པར་ཤེས་པས་ཡོངས་སུ་ཤེས་པར་བྱའོ་ཞེས་ཚུལ་བཞིན་ཡིད་ལ་བྱེད་
93b
པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བའི་འཕགས་པའི་བདེན་པ་དེས་ངས་མངོན་པར་ཤེས་པས་སྤང་བར་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་ངས་མངོན་པར་ཤེས་པས་མངོན་སུམ་དུ་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང།་རིག་པ་དང ། བློ་དང ། རྟོག་པ་སྐྱེས་སོ། །དགེ་སློང་དག། །ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་ངས་མངོན་པར་ཤེས་པས་བསྒོམ་པར་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་ངས་མངོན་པར་ཤེས་པས་ཡོངས་སུ་ཤེས་སོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་ངས་མངོན་པར་ཤེས་པས་སྤངས་སོ་ཞེས་ཚུལ་བཞིན་ཡིད་ལ་བྱེད་
94a
༄#། །པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་བསྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་ངས་མངོན་པར་ཤེས་པས་མངོན་སུམ་དུ་བྱས་སོ་ཞེས་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེས་ངས་མངོན་པར་ཤེས་པས་བསྒོམས་སོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་སོ། །དགེ་སློང་དག་།ང་ཇི་སྲིད་དུ་འཕགས་པའི་བདེན་པ་བཞི་པོ་འདི་རྣམས་དེ་ལྟར་ལན་གསུམ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་མིག་མ་སྐྱེས། ཤེས་པ་མ་ཡིན། རིག་པ་མ་ཡིན། བློ་མ་ཡིན། རྟོགས་པ་མ་སྐྱེས་པ་དེ་སྲིད་དུ་ལྷ་དང་བཅས་པའི་འཇིག་རྟེན་བདུད་དང ། ཚངས་པ་དང་བཅས། དགེ་སྦྱོང་དང ། བྲམ་ཟེར་བཅས་པའི་སྐྱེ་དགུ་དང ། ལྷ་དང ། མིར་བཅས་པ་འདི་ལས་གྲོལ་བ་དང ། ངེས་པར་འབྱུང་བ་དང་མི་ལྡན་པ་དང ། རབ་ཏུ་གྲོལ་བ་དང ། ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་མ་གྱུར་ཅིག་།དགེ་སློང་དག་།ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
94b
པར་རྫོགས་པར་སངས་རྒྱས་སོ་ཞེས་བྱ་བར་མ་ཤེས་སོ། །དགེ་སློང་དག་།ངས་གང་ནས་འཕགས་པའི་བདེན་པ་བཞི་པོ་འདི་རྣམས་ལ་དེ་ལྟར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་མིག་སྐྱེས་ཤིང་ཤེས་པ་དང ། རིག་པ་དང ། བློ་དང ། རྟོགས་པ་སྐྱེས་པ་དེ་ནས་ང་ལྷ་དང་བཅས་པའི་འཇིག་རྟེན་བདུད་དང ། ཚངས་པ་དང་བཅས། དགེ་སྦྱོང་དང ། བྲམ་ཟེར་བཅས་པའི་སྐྱེས་དགུ་དང ། ལྷ་དང ། མིར་བཅས་པ་འདི་ལས་གྲོལ་བ་དང ། ངེས་པར་བྱུང་བ་དང་ལྡན་པ་དང ། རབ་ཏུ་གྲོལ་བ་དང ། ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་གྱུར་ཅིག་།དགེ་སློང་དག་།ངས་དེ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བྱ་བར་ཤེས་སོ། །ཆོས་ཀྱི་རྣམ་གྲངས་དེ་བཀའ་སྩལ་པ་ན། ཚེ་དང་ལྡན་པ་ཀཽཎྜི་ནྱ་དང ། ལྷ་བརྒྱད་ཁྲི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜི་ནྱ་ལ་བཀའ་སྩལ་པ། ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས། ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། ཀུན་ཤེས་སམ ། བདེ་བར་གཤེགས་པ། ཀུན་འཚལ་ལགས་སོ། །ཀུན་འཚལ་ལགས་སོ། །ཚེ་དང་ལྡན་པ་ཀཽཎྜི་ནྱས་ཆོས་ཀུན་ཤེས་པས་དེའི་ཕྱིར་ཚེ་དང་ལྡན་པ་ཀུན་ཤེས་ཀཽཎྜི་ནྱ་ཞེས་བླ་དྭགས་སུ་
95a
༄#། །བཏགས་སོ། །ཚེ་དང་ལྡན་པ་ཀཽཎྜི་ནྱས་ཆོས་ཀུན་ཤེས་སོ་ཞེས་ས་བླའི་གནོད་སྦྱིན་རྣམས་སྒྲ་སྒྲོགས་པར་བྱེད་དེ། གྲོགས་པོ་དག་།བཅོམ་ལྡན་འདས་ཀྱིས་ཝཱ་ར་ཎཱ་སིར་དྲང་སྲོང་སྨྲ་བ་རི་དྭགས་ཀྱི་ནགས་སུ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་ཀྱི་འཁོར་ལོ་ཆོས་དང་ལྡན་པ་དགེ་སྦྱོང་དང ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་འཇིག་རྟེན་དུ་ཆོས་དང་མཐུན་པར་མ་བསྐོར་བ་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང ། མི་རྣམས་ཀྱི་དོན་དང ། ཕན་པ་དང ། བདེ་བའི་ཕྱིར་བསྐོར་བས་ལྷའི་རིགས་མངོན་པར་འཕེལ་ཞིང་ལྷ་མ་ཡིན་གྱི་རིས་ཡོངས་སུ་ཉམས་སོ་ཞེས་དབྱངས་བསྒྲགས་སོ། །ས་བླའི་གནོད་སྦྱིན་རྣམས་ཀྱི་སྒྲ་ཐོས་ནས་ནམ་མཁའ་ལ་རྒྱུ་བའི་གནོད་སྦྱིན་དང ། རྒྱལ་ཆེན་བཞིའི་རིས་དང ། སུམ་ཅུ་རྩ་གསུམ་པའི་ལྷ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང།་གཞན་འཕྲུལ་དབང་བྱེད་ཀྱི་ལྷ་རྣམས་ནས་སྐད་ཅིག་དེ་དང ། ཐང་ཅིག་དེ་དང ། ཡུད་ཙམ་དེ་དང ། སྐད་ཅིག་དང ། ཐང་གཅིག་དང ། ཡུད་ཙམ་དེ་ལ་ཚངས་པའི་འཇིག་རྟེན་གྱི་བར་དུ་སྒྲ་གྲགས་སོ། །ཚངས་རིས་ཀྱི་ལྷ་རྣམས་ཀྱིས་ཀྱང་སྒྲ་སྒྲོགས་པར་བྱེད་དེ། གྲོགས་པོ་དག་།བཅོམ་ལྡན་འདས་ཀྱིས་ཝཱ་ར་ཎཱ་སིར་དྲང་སྲོང་སྨྲ་བའི་རི་དྭགས་ཀྱི་ནགས་སུ་
95b
ལན་གསུམ་དུ་བཟླས་ཏེ་རྣམ་པ་བཅུ་གཉིས་ཀྱི་འཁོར་ལོ་ཆོས་དང་ལྡན་པ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་འཇིག་རྟེན་དུ་ཆོས་དང ། མཐུན་པར་འགའ་ཙམ་ཡང་མ་བསྐོར་བ། སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང ། མི་རྣམས་ཀྱི་དོན་དང ། ཕན་པ་དང ། བདེ་བའི་ཕྱིར་བསྐོར་བས་ལྷའི་རིས་མངོན་པར་འཕེལ་ཞིང་ལྷ་མ་ཡིན་གྱི་རིས་ཡོངས་སུ་ཉམས་སོ་ཞེས་དབྱངས་བསྒྲགས་སོ། །བཅོམ་ལྡན་འདས་ཀྱིས་ཝཱ་ར་ཎཱ་སིར་དྲང་སྲོང་སྨྲ་བ་རི་དྭགས་ཀྱི་ནགས་སུ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་ཀྱི་འཁོར་ལོ་ཆོས་དང་ལྡན་པ་བསྐོར་བས་དེའི་ཕྱིར་ཆོས་ཀྱི་རྣམ་གྲངས་འདི་ལ་ཆོས་ཀྱི་འཁོར་ལོ་བསྐོར་བ་ཞེས་ཚིགས་བླ་དྭགས་སུ་བཏགས་སོ། །དེ་ནས་བཅོམ་ལྡན་འདས་ཀྱིས་ལན་གཉིས་སུ་ཡང་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་།འཕགས་པའི་བདེན་པ་བཞི་ནི་འདི་དག་ཡིན་ཏེ། བཞི་གང་ཞེ་ན།་སྡུག་བསྔལ་འཕགས་པའི་བདེན་པ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། ། སྡུག་བསྔལ་འཕགས་པའི་བདེན་པ་གང་ཞེ་ན། སྐྱེ་བ་སྡུག་བསྔལ་དང ། རྒ་བ་སྡུག་བསྔལ་བ་དང ། ན་བ་སྡུག་བསྔལ་བ་དང ། འཆི་བ་སྡུག་བསྔལ་བ་དང ། སྡུག་པ་དང་བྲལ་བ་སྡུག་བསྔལ་
96a
༄#། །བ་དང ། མི་སྡུག་པ་དང་ཕྲད་པ་སྡུག་བསྔལ་བ་དང ། གང་འདོད་པ་བཙལ་ཏེ་མ་རྙེད་པ་དེའང་སྡུག་བསྔལ་བ་དང ། མདོར་ན་ཉེ་བར་ལེན་པའི་ཕུང་པོ་ལྔ་སྡུག་བསྔལ་བ་སྟེ། དེ་ཡོངས་སུ་ཤེས་པར་བྱ་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱའོ། །སྡུག་བསྔལ་ཀུན་འབྱུང་བ་འཕགས་པའི་བདེན་པ་གང་ཞེ་ན།་ཡང་སྲིད་པའི་སྲེད་པ་དགའ་བའི་འདོད་ཆགས་དང་ལྡན་པ་དེ་དང་དེ་ལ་མངོན་པར་འདོད་པ་སྟེ། དེ་སྤང་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱའོ། །སྡུག་བསྔལ་འགོག་པ་འཕགས་པའི་བ་དེན་པ་གང་ཞེ་ན། ཡང་སྲིད་པའི་སྲེད་པ་དགའ་བའི་འདོད་ཆགས་དང་ལྡན་པ་དེ་དང ། དེ་ལ་མངོན་པར་དགའ་བ་གང་ཡིན་པ་དེ་ཉིད་མ་ལུས་པར་སྤངས་པ་དང ། བོར་བ་དང ། བསལ་བ་དང ། ཟད་པ་དང ། འདོད་ཆགས་དང་བྲལ་བ་དང ། འགགས་པ་དང ། ཉེ་བར་ཞི་བ་དང ། ནུབ་པ་སྟེ་དེ་མངོན་སུམ་དུ་བྱ་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱའོ། །སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་གང་ཞེ་ན། འཕགས་པའི་ལམ་ཡན་ལག་བརྒྱད་པ་སྟེ། འདི་ལྟ་སྟེ། ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་
96b
པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་པ་དང ། ཡང་དག་པའི་ཏིང་ངེ་འཛིན་ཏེ་དེ་ཡང་བསྒོམ་པར་བྱའོ། །ཆོས་ཀྱི་རྣམ་གྲངས་འདི་བཤད་པ་ན་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །ལྔ་སྡེའི་དགེ་སློང་ལྷག་མ་རྣམས་ལ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེའི་ཚེ་འཇིག་རྟེན་ན་དགྲ་བཅོམ་པ་གཅིག་དང ། གཉིས་པ་ནི་བཅོམ་ལྡན་འདས་སོ། །དེ་ནས་བཅོམ་ལྡན་འདས་ཀྱིས་ཡང་དགེ་སློང་ལྔ་སྡེའི་ལྷག་མ་རྣམས་ལ་བཀའ་སྩལ་པ། དགེ་སློང་དག་།གཟུགས་ནི་བདག་མ་ཡིན་ནོ། །དགེ་སློང་དག་།གལ་ཏེ་གཟུགས་བདག་ཡིན་ན་གཟུགས་ལ་གནོད་པ་དང ། སྡུག་བསྔལ་བར་མི་འགྱུར་ཞིང ། གཟུགས་ལ་བདག་གི་གཟུགས་འདི་ལྟ་བུར་གྱུར་ཅིག་།འདི་ལྟ་བུར་མ་གྱུར་ཅིག་སྙམ་ན་ཡང་འཐོབ་པར་འགྱུར་རོ། །དགེ་སློང་དག་།གང་གི་ཕྱིར་གཟུགས་བདག་མ་ཡིན་པ་དེའི་ཕྱིར་གཟུགས་ལ་གནོད་པ་དང ། སྡུག་བསྔལ་བར་འགྱུར་ཞིང་གཟུགས་ལ་བདག་གི་གཟུགས་འདི་ལྟ་བུ་འགྱུར་ཅིག་།འདི་ལྟ་བུར་མ་གྱུར་ཅིག་སྙམ་པ་ཡང་འཐོབ་པར་མི་འགྱུར་རོ། །དགེ་སློང་དག་།ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ནི་བདག་མ་ཡིན་ནོ། །དགེ་སློང་དག་།གལ་ཏེ་རྣམ་པར་ཤེས་པ་བདག་ཡིན་ན་རྣམ་པར་ཤེས་པ་ལ་གནོད་པ་དང ། སྡུག་བསྔལ་བར་མི་འགྱུར་ཞིང་
97a
༄#། །རྣམ་པར་ཤེས་པ་ལ་བདག་གི་རྣམ་པར་ཤེས་པ་འདི་ལྟ་བུར་གྱུར་ཅིག་།འདི་ལྟ་བུར་མ་གྱུར་ཅིག་སྙམ་ན་ཡང་འཐོབ་པར་འགྱུར་རོ། །དགེ་སློང་དག་།གང་གི་ཕྱིར་རྣམ་པར་ཤེས་པ་བདག་མ་ཡིན་པ་དེའི་ཕྱིར་རྣམ་པར་ཤེས་པ་ལ་གནོད་པ་དང ། སྡུག་བསྔལ་བར་འགྱུར་ཞིང་རྣམ་པར་ཤེས་པ་ལ་བདག་གི་རྣམ་པར་ཤེས་པ་འདི་ལྟ་བུར་གྱུར་ཅིག་།འདི་ལྟ་བུར་མ་གྱུར་ཅིག་སྙམ་ན་ཡང་འཐོབ་པར་མི་འགྱུར་རོ། །དགེ་སློང་དག་།ཇི་སྙམ་དུ་སེམས། གཟུགས་རྟག་གམ། མི་རྟག་།བཙུན་པ། མི་རྟག་ལགས་སོ། །མི་རྟག་པ་གང་ཡིན་པ་དེ་སྡུག་བསྔལ་ཡིན་ནམ། སྡུག་བསྔལ་མ་ཡིན། བཙུན་པ། སྡུག་བསྔལ་བ་ལགས་སོ། །མི་རྟག་པ་སྡུག་བསྔལ་བ་རྣམ་པར་འགྱུར་བའི་ཆོས་ཅན་གང་ཡིན་པ་དེ་ལ་ཅིག་འཕགས་པ་ཉན་ཐོས་ཐོས་པ་དང་ལྡན་པ་དེ་ལ་འདི་ནི་བདག་གོ་།བདག་ནི་འདི་ཡིན་ནོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་ཏམ། བཙུན་པ། མ་ལགས་སོ། །དགེ་སློང་དག་།ཇི་སྙམ་དུ་སེམས། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྟག་གམ་མི་རྟག་།བཙུན་པ། མི་རྟག་ལགས་སོ། །མི་རྟག་པ་གང་ཡིན་པ་དེ་སྡུག་བསྔལ་ཡིན་ནམ། སྡུག་བསྔལ་མ་ཡིན། བཙུན་པ། སྡུག་བསྔལ་ལགས་སོ། །མི་རྟག་པ་སྡུག་བསྔལ་བ་རྣམ་པར་འགྱུར་བའི་ཆོས་ཅན་གང་ཡིན་པ་དེ་ལ་གཅིག་འཕགས་པ་
97b
ཉན་ཐོས་ཐོས་པ་དང་ལྡན་པ་འདི་ནི་བདག་གོ་།བདག་ནི་འདི་ཡིན་ནོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་ཏམ། བཙུན་པ། མ་ལགས་སོ། །དགེ་སློང་དག་།དེ་ལྟ་བས་ན་གཟུགས་གང་ཡིན་པ་དེ་ཅི་ཡང་རུང་བ་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ།་ཕྱིའིའམ། རགས་པའམ། ཕྲ་བའམ། ངན་པའམ། གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བ་དེ་དག་ཐམས་ཅད་ནི་བདག་མ་ཡིན། བདག་ནི་དེ་མ་ཡིན། དེ་ནི་བདག་གི་བདག་མ་ཡིན་ནོ་ཞེས་ཇི་ལྟ་བ་བཞིན་དུ་ཡང་དག་བའི་ཤེས་རབ་ཀྱིས་བལྟ་བར་བྱའོ། །དགེ་སློང་དག་།དེ་ལྟ་བས་ན་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ཇི་སྙེད་པ་གང་ཅིའང་རུང་བ་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱིའིའམ། རགས་པའམ། ཕྲ་བའམ། ངན་པའམ། གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བ་དེ་དག་ཐམས་ཅད་ནི་བདག་མ་ཡིན། བདག་ནི་དེ་མ་ཡིན། དེ་ནི་བདག་གི་བདག་མ་ཡིན་ནོ་ཞེས་ཇི་ལྟ་བ་དེ་བཞིན་དུ་ཡང་དག་པའི་ཤེས་རབ་ཀྱིས་བལྟ་བར་བྱའོ། །དགེ་སློང་དག་།འདི་ལྟར་འཕགས་པ་ཉན་ཐོས་ཐོས་པ་དང་ལྡན་པ་ནི་ཉེ་བར་ལེན་པའི་ཕུང་པོ་ལྔ་པོ་འདི་བདག་མ་ཡིན། བདག་གི་མ་ཡིན་པར་ལྟ་སྟེ། དེ་དེ་ལྟར་ལྟ་བ་ན། འཇིག་རྟེན་ཅིའང་ལེན་པ་མེད་
98a
༄#། །དོ། །ལེན་པ་མེད་པ་ན་ཡོངས་སུ་གདུང་བ་མེད་དོ། །ཡོངས་སུ་གདུང་བ་མེད་ན་བདག་ཉིད་ཡོངས་སུ་མྱ་ངན་ལས་འདས་པ་སྟེ་བདག་གི་སྐྱེ་བ་ཟད་དོ། ། ཚངས་པར་སྤྱོད་པ་ལ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་བྱ་བར་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་ལྔ་སྡེའི་དགེ་སློང་ལྷག་མ་རྣམས་ཀྱིས་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དེའི་ཚེ་དགྲ་བཅོམ་པ་ལྔ་དང ། དྲུག་པ་ནི་བཅོམ་ལྡན་འདས་སོ། །དེ་ནས་བཅོམ་ལྡན་འདས་ཝཱ་ར་ཎཱ་སིའི་འབབ་ཆུ་གནོད་པ་ཅན་གྱི་འགྲམ་ན་བཞུགས་སོ། །དེའི་ཚེ་ཝཱ་ར་ཎཱ་སི་ན་རིགས་ཀྱི་གཙོ་བོ་ཞེས་བྱ་བའི་བུ་གྲགས་པ་ཞེས་བྱ་བ་ཞིག་གནས་ཏེ། དེ་ཉི་མ་རེ་རེ་ཞིང་བུད་མེད་ཀྱིས་བྱས་པའི་རོལ་མོས་རྩེ་བར་བྱེད། དགའ་མགུར་སྤྱོད་པར་བྱེད་པས་ལུས་སྙོམས། ལུས་དུབ། ལུས་རྒུད་པས་མྱུར་དུ་གཉིད་ལོག་པར་གྱུར་ཏོ། །བུད་མེད་དེ་རྣམས་ཀྱང་ལུས་སྙོམས། ལུས་དུབ ། ལུས་རྒུད་པས་གཉིད་ལོག་པར་གྱུར་ཏོ། །རིགས་ཀྱི་གཙོ་བོའི་བུ་གྲགས་པ་མཚན་མོ་གཉིད་སད་པ་ན་བུད་མེད་དེ་དག་ཐམས་ཅད་བརྡོལ་ཞིང་སྒྲོན་མོར་བྱུང་ལ་སྐྲ་ཞིག་།ལག་པ་བརྐྱང་སྟེ་བྱུང་རྒྱལ་དུ་བླ་བ་མཐོང་ངོ ། །མཐོང་ནས་ཀྱང་དེ་དག་གི་ཆུང་མ་ལ་དུར་ཁྲོད་ཀྱི་འདུ་ཤེས་སྐྱེས་པར་གྱུར་ཏོ། །དེ་ནས་རིགས་ཀྱི་གཙོ་བོའི་བུ་གྲགས་པ་མལ་ཆེན་པོ་ལ་བབས་ཏེ། རིན་
98b
པོ་ཆེའི་ལྷ་མ་བརྒྱ་སྟོང་རི་བ་ཟུང་གཅིག་གྱོན་ནས་ཉལ་ཁང་གི་སྒོ་ག་ན་བ་དེར་སོང་སྟེ་ཕྱིན་ནས། གྲོགས་པོ། བདག་ནི་གཙེས་སོ། །གྲོགས་པོ། བདག་ནི་ཉམས་སོ་ཞེས་སྐད་ངན་ཕྱུང་བ་དང ། དེའི་སྒོ་མི་མ་ཡིན་པ་རྣམས་ཀྱིས་ཕྱེ་ནས་སྐད་ཀྱང་མི་གྲག་པར་བྱས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་ཁྱིམ་གང་ན་བ་དེར་སོང་སྟེ་ཕྱིན་ནས། གྲོགས་པོ། བདག་ནི་གཙེས་སོ། གྲོགས་པོ། བདག་ནི་ཉམས་སོ་ཞེས་སྐད་ངན་པ་བྱུང་བ་དང ། དེའི་སྒོ་མི་མ་ཡིན་པ་རྣམས་ཀྱིས་ཕྱེ་ནས་སྐད་ཀྱང་མི་གྲག་པར་བྱས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་གྲོང་ཁྱེར་གྱི་སྒོ་གང་ན་བ་དེར་སོང་སྟེ་ཕྱིན་ནས། གྲོགས་པོ། བདག་ནི་གཙེས་སོ། །གྲོགས་པོ། བདག་ནི་ཉམས་སོ་ཞེས་སྐད་ངན་པ་ཕྱུང་བ་དང ། དེའི་སྒོ་མི་མ་ཡིན་པ་རྣམས་ཀྱིས་ཕྱེ་ནས་སྐད་ཀྱང་མི་གྲག་པར་བྱས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་འབབ་ཆུ་གནོད་པ་ཅན་དེ་གང་ན་བ་དེར་སོང་བ་ན། དེའི་ཚེ་བཅོམ་ལྡན་འདས་འབབ་ཆུ་གནོད་པ་ཅན་གྱི་འགྲམ་ན་གཙུག་ལག་ཁང་གི་ཕྱི་རོལ་བླ་གབ་མེད་པ་ན་རིགས་ཀྱི་གཙོ་བོའི་བུ་གྲགས་པ་འོང་བ་ལ་ཡང་དང ། ཡང་དུ་བཞེངས་ཤིང་འཆག་པས་འཆག་གོ་།རིགས་ཀྱི་གཙོ་བོའི་བུ་གྲགས་པས་བཅོམ་ལྡན་འདས་འབབ་ཆུ་གནོད་པ་ཅན་གྱི་འགྲམ་ན་འཆག་པ་རྒྱང་རིང་པོ་ ནས་མཐོང་ངོ ། །མཐོང་ནས་ཀྱང ། དགེ་སྦྱོང ། བདག་ནི་གཙེས་སོ། །དགེ་སྦྱོང ། བདག་ནི་ཉམས་སོ་ཞེས་སྐད་ངན་ཕྱུང་
99a
༄#། །ངོ། །དེ་ནས་བཅོམ་ལྡན་འདས་ཀྱིས་རིགས་ཀྱི་གཙོ་བོའི་བུ་གྲགས་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ། ཚུར་ཤོག་།གནས་འདི་ནི་ཁྱོད་ལ་འཚེ་བ་མེད་པ་ཡིན།་འདི་ནི་ཉམས་པ་མེད་པ་ཡིན་ནོ། །དེ་ནས་རིགས་ཀྱི་གཙོ་བོའི་བུ་གྲགས་པ་རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་པོ་འབབ་ཆུ་གནོད་པ་ཅན་གྱི་འགྲམ་དུ་ཕུད་ནས་འབབ་ཆུ་གནོད་པ་ཅན་བརྒལ་ཏེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།དེ་ནས་བཅོམ་ལྡན་འདས་ཀྱིས་རིགས་ཀྱི་གཙོ་བོའི་བུ་གྲགས་པ་ཁྲིད་དེ་ཉིད་ཀྱི་གཙུག་ལག་ཁང་གང་ན་བ་དེར་གཤེགས་ནས་བྱོན་པ་དང ། གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་རིགས་ཀྱི་གཙོ་བོའི་བུ་གྲགས་པ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་འདི་ལྟ་སྟེ། སྦྱིན་པའི་གཏམ་དང ། ཚུལ་ཁྲིམས་ཀྱི་གཏམ་དང ། མཐོ་རིས་ཀྱི་གཏམ་དང ། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང ། ཀུན་ནས་ཉོན་མོངས་པ་དང ། རྣམ་པར་བྱང་བ་དང ། ངེས་པར་བྱུང་བ་དང ། རབ་
99b
ཏུ་དབེན་པའི་རྗེས་སུ་བསྒྲགས་པ་དང ། རྣམ་པར་བྱང་བའི་ཕྱོགས་ཀྱི་ཆོས་རྣམས་རྒྱ་ཆེར་བཤད་དོ། །གང་གི་ཚེ་དེ་བཅོམ་ལྡན་འདས་ཀྱིས་དགའ་བའི་སེམས་དང ། དགེ་བའི་སེམས་དང ། མགུ་བའི་སེམས་དང ། སྒྲིབ་པ་དང་བྲལ་བའི་སེམས་དང ། སྐལ་བ་དང་ལྡན་པ་དང ། ཡང་དག་ཕུལ་གྱི་ཆོས་བཤད་ན་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་ཡང་དག་ཕུལ་གྱི་ཆོས་བཤད་པ་གང་ཡིན་པ། འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་བ་དང ། ཀུན་འབྱུང་བ་དང ། འགོག་པ་དང ། ལམ་སྟེ་རྒྱ་ཆེར་བཤད་དོ། །དབེར་ན། གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབས་པ་དེ་བཞིན་དུ་རིགས་ཀྱི་གཙོ་བོའི་བུ་གྲགས་པ་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ། འདི་ལྟ་སྟེ། སྡུག་བསྔལ་བ་དང ། ཀུན་འབྱུང་བ་དང ། འགོག་པ་དང ། ལམ་རྟོགས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་རྒལ་བ་དང ། ཐེ་ཚོམ་ལས་རྒལ་བ་དང ། གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་བ་དང ། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་
100a
༄#། །བ་དེར་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། བདག་ནི་འཕགས་སོ། །མངོན་པར་འཕགས་སོ། ། བདག་བཅོམ་ལྡན་འདས་དང ། ཆོས་དང ། དགེ་འདུན་ལ་སྐྱབས་སུ་མཆིས་ལགས་ཀྱི། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །བྲན་མོ་ཞིག་དེ་ཉིད་ཀྱི་མཚན་མོ་གཉིད་ལོག་པ་ལས་སད་ན། གཞོན་ནུ་གྲགས་པ་མལ་ཆེན་པོ་ན་མི་སྣང་བར་མཐོང་ངོ ། ། མཐོང་ནས་ཀྱང་ཁྱིམ་བདག་རིགས་ཀྱི་གཙོ་བོ་གང་ན་བ་དེར་སོང་སྟེ་ཕྱིན་ནས་ཁྱིམ་བདག་རིགས་ཀྱི་གཙོ་བོ་ལ་འདི་སྐད་ཅེས་གསོལ་ཏོ། །ཇོ་བོ། མཁྱེན་པར་མཛོད་ཅིག་།གཞོན་ནུ་གྲགས་པ་ནི་རང་གི་མལ་ཆེན་པོ་ན་མི་གདའ་ལགས་སོ། །དེ་ནས་ཁྱིམ་བདག་རིགས་ཀྱི་གཙོ་བོ་འདི་སྙམ་དུ་སེམས་ཏེ། གཞོན་ནུ་ནོར་གྱི་ཕྱིར་ཆོམ་རྐུན་ནམ། གཡོན་ཅན་རྣམས་ཀྱིས་ཕྱི་རོལ་ཏུ་ཁྲིད་པར་མ་གྱུར་གྲང་སྙམ་དུ་སེམས་ཤིང་ཕྱོགས་བཞིར་ཕོ་ཉ་རྟ་པ་དག་བཀྱེ་ནས་རང་ཉིད་མི་ལག་ན་སྒྲོན་མ་ཐོགས་པ་རྣམས་དང་ལྷན་ཅིག་ཏུ་འབབ་ཆུ་གནོད་པ་ཅན་གང་ན་བ་དེ་ལོགས་སུ་སོང་བ་དང ། ཁྱིམ་བདག་རིགས་ཀྱི་གཙོ་བོས་འབབ་ཆུ་གནོད་པ་ཅན་གྱི་འགྲམ་ན་རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་ཕུད་པ་མཐོང་ངོ ། །མཐོང་
100b
ནས་ཀྱང་དེ་འདི་སྙམ་དུ་སེམས་ཏེ། གཞོན་ནུ་ནི་ནོར་གྱི་ཕྱིར་ཆོམ་རྐུན་ནམ། གཡོན་ཅན་རྣམས་ཀྱིས་ཕྱི་རོལ་ཏུ་ཁྲིད་ཀྱི། འདི་ལྟར་འབབ་ཆུ་གནོད་པ་ཅན་གྱི་འགྲམ་ན་རིན་པོ་ཆེའི་ལྷམ་བརྒྱ་སྟོང་རི་བ་ཟུང་གཅིག་ཕུད་པ་ལས་ན་གཞོན་ནུ་འབབ་ཆུ་གནོད་པ་ཅན་གྱི་ངོགས་འདི་ཉིད་ལས་བརྒལ་བར་མ་གྱུར་གྲང ། འདི་ལྟར་འབབ་ཆུ་གནོད་པ་ཅན་གྱི་འགྲམ་ན་རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་བོར་རོ་སྙམ་དུ་བསམས་ནས་འབབ་ཆུ་གནོད་པ་ཅན་གྱི་ངོགས་དེ་ཉིད་ལས་བརྒལ་ཏེ་བཅོམ་ལྡན་འདས་གང་ན་བ་དེར་སོང་ངོ ། །བཅོམ་ལྡན་འདས་ཀྱིས་ཁྱིམ་བདག་རིགས་ཀྱི་གཙོ་བོ་རྒྱང་རིང་པོ་ནས་གཟིགས་སོ། །གཟིགས་ནས་ཀྱང་འདི་སྙམ་དུ་དགོངས་ཏེ་ཅི་ནས་ཀྱང་ངས་རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་འདུ་བྱས་པས་ཁྱིམ་བདག་རིགས་ཀྱི་གཙོ་བོས་གཞོན་ནུ་གྲགས་པ་སྟན་འདི་ཉིད་ལ་འདུག་བཞིན་དུ་མི་མཐོང་བ་དེ་ལྟ་བུ་ཞིག་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་འདུ་མཛད་པས་ཁྱིམ་བདག་རིགས་ཀྱི་གཙོ་བོས་གཞོན་ནུ་གྲགས་པ་སྟན་དེ་ཉིད་ལ་འདུག་བཞིན་དུ་མི་མཐོང་བ་དེ་ལྟ་བུ་མཛད་དོ། །དེ་ནས་ཁྱིམ་བདག་རིགས་ཀྱི་གཙོ་བོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིག་གཞོན་ནུ་གྲགས་པ་གཟིགས་སམ། ཁྱིམ་བདག་དེའི་ཕྱིར་འདུག་ཅིག་དང ། སྟན་འདི་ཁོ་ན་ལ་
101a
༄#། །གཞོན་ནུ་གྲགས་པ་མཐོང་བར་འགྱུར་བའི་གནས་གང་ཡིན་པ་དེ་ཡོད་དོ། །དེ་ནས་ཁྱིམ་བདག་རིགས་ཀྱི་གཙོ་བོ་འདི་སྙམ་དུ་སེམས་ཏེ། གདོན་མི་ཟ་བར་བཅོམ་ལྡན་འདས་ཀྱིས་གཞོན་ནུ་གྲགས་པ་གཟིགས་པར་གྱུར་ཏེ་འདི་ལྟར་བཅོམ་ལྡན་འདས་འདི་སྐད་ཅེས་ཁྱིམ་བདག་དེའི་ཕྱིར་འདུག་ཅིག་དང ། སྟན་འདི་ཁོ་ན་ལ་གཞོན་ནུ་གྲགས་པ་འདུག་པ་མཐོང་བར་འགྱུར་བའི་གནས་གང་ཡིན་པ་དེ་ཡོད་དོ་ཞེས་བཀའ་སྩལ་ཏོ་སྙམ་དུ་རིག་ནས་དགའ་བ་དང ། མགུ་བ་དང ། མཆོག་ཏུ་དགའ་བ་དང ། དགའ་བ་རྒྱ་ཆེན་པོ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་པ་དང ། ཁྱིམ་བདག་རིགས་ཀྱི་གཙོ་བོ་ལ་བཅོམ་ལྡན་འདས་ཀྱིས་ཆོས་དང་ལྡན་པའི་གཏམ་གྱིས་ཡང་དག་པར་བསྟན་པ་ལ་སོགས་པ་ནི་སྔ་མ་བཞིན་ནོ། །ཆོས་ཀྱི་རྣམ་གྲངས་འདི་བཤད་པ་ན་ཁྱིམ་བདག་རིགས་ཀྱི་གཙོ་བོ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །ཚེ་དང་ལྡན་པ་གྲགས་པ་ཡང་རྒྱན་ཐམས་ཅད་ཀྱིས་བརྒྱན་བཞིན་དུ་ལན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་སླར་བརྟུལ་ནས་དེའི་ཚེ་ཚིགས་སུ་
101b
བཅད་པས་བཀའ་སྩལ་པ། རྒྱན་གྱིས་བརྒྱན་བཞིན་དུ་ནི་ཆོས་སྤྱད་དེ། །དུལ་ཞིང་ཡང་དག་སྡོམ་པ་ཚངས་སྤྱོད་ལ། །འབྱུང་པོ་ཀུན་ལ་ཆད་པ་སྤངས་པ་ནི། །དེ་ནི་བྲམ་ཟེ་དགེ་སྦྱོང་དགེ་སློང་ཡིན། །དེའི་ཚེ་འཇིག་རྟེན་ན་དགྲ་བཅོམ་པ་དྲུག་དང ། བདུན་པ་ནི་བཅོམ་ལྡན་འདས་སོ། །ཁྱིམ་བདག་རིགས་ཀྱི་གཙོ་བོས་གཞོན་ནུ་གྲགས་པ་བསྟན་དེ་ཉིད་ལ་འདུག་པ་མཐོང་ངོ་།། མཐོང་ནས་ཀྱང་གཞོན་ནུ་གྲགས་པ་ལ་འདི་སྐད་ཅེས་སྨྲས་སོ། །གཞོན་ནུ་ཚུར་ཤོག་།ཁྱོད་ཀྱི་མ་ལུས་ངལ་ཞིང་ལུས་དུབ་པས་སྨྲེ་སྔགས་འདོན་གྱི་ཁྱིམ་དུ་འདོང ། དེ་ནས་བཅོམ་ལྡན་འདས་ཀྱིས་ཁྱིམ་བདག་རིགས་ཀྱི་གཙོ་བོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཇི་སྙམ་དུ་སེམས། གང་གིས་མི་སློབ་པའི་ཤེས་པ་དང ། མི་སློབ་པའི་ལྟ་བས་འཕགས་པའི་བདེན་བ་བཞི་པོ།་འདི་ལྟ་སྟེ། སྡུག་བསྔལ་དང ། ཀུན་འབྱུང་དང ། འགོག་པ་དང ། ལམ་མངོན་པར་རྟོགས་པ་དེ་ཇི་ག་ཁྱིམ་པ་ཁྱིམ་ན་གནས་པའམ། གསོག་འཇོག་གི་ལོངས་སྤྱོད་ཀྱིས་འདོད་པ་ལ་ལོངས་སྤྱོད་པར་འགྱུར་རམ། བཙུན་པ། མ་ལགས་སོ། །ཁྱིམ་བདག་།ཇི་ལྟར་ཁྱོད་ཀྱིས་སློབ་པའི་ཤེས་པ་དང ། སློབ་པའི་ལྟ་བས་འཕགས་པའི་བདེན་པ་བཞི་པོ། འདི་ལྟ་སྟེ། སྡུག་བསྔལ་དང ། ཀུན་འབྱུང་དང ། འགོག་པ་དང ། ལམ་མངོན་པར་རྟོགས་པ་དེ་བཞིན་དུ་གཞོན་ནུ་གྲགས་པས་མི་སློབ་པའི་ཡེ་ཤེས་དང ། མི་སློབ་པའི་ལྟ་བས་འཕགས་པའི་བདེན་
102a
༄#། །པ་བཞི་པོ། འདི་ལྟ་སྟེ། སྡུག་བསྔལ་དང ། ཀུན་འབྱུང་དང ། འགོག་པ་དང ། ལམ་མངོན་པར་རྟོགས་སོ། །བཙུན་པ། གཞོན་ནུ་གྲགས་པས་གང་གིས་ན་མི་སློབ་པའི་ཤེས་པ་དང ། མི་སློབ་པའི་ལྟ་བས་འཕགས་པའི་བདེན་པ་བཞི་པོ། འདི་ལྟ་སྟེ། སྡུག་བསྔལ་དང ། ཀུན་འབྱུང་དང ། འགོག་པ་དང ། ལམ་མངོན་པར་རྟོགས་པ་ནི་རྙེད་པ་ལེགས་པར་རྙེད་ལགས་སོ། །བཅོམ་ལྡན་འདས། སླད་བཞིན་དུ་འབྲང་བའི་དགེ་སྦྱོང་གྲགས་པ་དང ། ཐུགས་བརྩེ་བ་ཉེ་བར་བཟུང་སྟེ་རིགས་ཀྱི་གཙོ་བོ་གང་ན་བདེར་གཤེགས་ན་ལེགས་སོ། །བཅོམ་ལྡན་འདས་ཀྱིས་ཁྱིམ་བདག་རིགས་ཀྱི་གཙོ་བོ་ལ་ཅང་མི་གསུངས་པས་གནང་ངོ ། །དེ་ནས་ཁྱིམ་བདག་རིགས་ཀྱི་གཙོ་བོས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་དེ་ཉིད་གྱི་མཚན་འདས་ནས་སྔ་དྲོ་ན་བཟའ་ཤམ་ཐབས་མན་པས། ལྡང་བཟེད་དང ། ཆོས་གོས་བསྣམས་ཏེ་ཕྱི་བཞིན་འབྲང་བའི་དགེ་སྦྱོང་ཚེ་དང་ལྡན་པ་གྲགས་པ་དང ། ཁྱིམ་བདག་རིགས་ཀྱི་གཙོ་བོའི་ཁྱིམ་གང་ན་བ་དེར་གཤེགས་སོ། །དེའི་ཚེ་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་བཅོམ་ལྡན་འདས་ལ་ཡང་དང ། ཡང་དུ་བསུ་བའི་ཕྱིར་བར་སྒོ་ན་སྡོད་དོ། །
102b
ཚེ་དང་ལྡན་པ་གྲགས་པའི་མ་དང ། ཆུད་མ་གཉིས་ཀྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ཀྱི་ཕྱིར་གདན་བཤམས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། ཚུར་སྤྱོན། བཅོམ་ལྡན་འདས། བྱོན་པ་ལེགས་སོ། །བཅོམ་ལྡན་འདས། གདན་བཤམས་པ་ཉིད་ལ་བཞུགས་སུ་གསོལ་ཞེས་གསོལ་ནས་བཅོམ་ལྡན་འདས་གདན་བཤམས་པ་ཉིད་ལ་བཞུགས་སོ། །དེ་ནས་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། བཅོམ་ལྡན་འདས་ཀྱིས་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན་ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དེ། སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ། འདི་ལྟ་སྟེ། སྦྱིན་པའི་གཏམ་དང ། ཚུལ་ཁྲིམས་ཀྱི་གཏམ་དང ། མཐོ་རིས་ཀྱི་གཏམ་དང ། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང ། ཀུན་ནས་ཉོན་མོངས་པ་དང ། རྣམ་པར་བྱང་བ་དང ། ངེས་པར་འབྱུང་བ་དང ། རབ་ཏུ་དབེན་པའི་རྗེས་སུ་བསྔགས་པ་དང ། རྣམ་པར་བྱང་བའི་ཕྱོགས་ཀྱི་ཆོས་རྣམས་རྒྱ་ཆེར་བཤད་དོ། །གང་གི་
103a
༄#། །ཚེ་དེ་གཉིས་བཅོམ་ལྡན་འདས་ཀྱིས་དགའ་བའི་སེམས་དང ། མགུ་བའི་སེམས་དང ། སྒྲིབ་པ་དང་བྲལ་བའི་སེམས་དང ། སྐལ་བ་དང་ལྡན་པ་དང ། ཡང་དག་ཕུལ་གྱི་ཆོས་བཤད་ན་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བཤད་པ་གང་ཡིན་པ། འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་བ་དང ། ཀུན་འབྱུང་དང ། འགོག་པ་དང ། ལམ་རྒྱ་ཆེར་བཤད་དོ། །དཔེར་ན། གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ཀྱིས་སྟན་དེ་ཉིད་ལ་འཁོད་བཞིན་དུ་འཕགས་པའི་བདེན་པ་བཞི་པོ། འདི་ལྟ་སྟེ། སྡུག་བསྔལ་དང ། ཀུན་འབྱུང་དང ། འགོག་པ་དང ། ལམ་མངོན་པར་རྟོགས་སོ། །དེ་ནས་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ཀྱིས་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་རྒལ་བ་དང ། ཐེ་ཚོམ་ལས་རྒལ་བ་དང ། གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་བ་དང ། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ། བཅོམ་ལྡན་འདས་གང་ན་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་
103b
ཅེས་གསོལ་ཏོ། །བཙུན་པ། བདག་ཅག་ནི་འཕགས་སོ། །བདག་ཅག་ནི་མངོན་པར་འཕགས་ལགས་ཏེ། བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱི་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྔོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །བཙུན་པ། དེའི་སླད་དུ་འདིར་ཞལ་ཟས་ཀྱི་མཛད་པ་མཛད་དུ་གསོལ། བཅོམ་ལྡན་འདས་ཀྱིས་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ལ་ཅང་མི་གསུང་བས་གནང་ངོ ། །དེ་ནས་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་གདན་ལ་བདེ་བར་བཞུགས་པ་དང ། གཙང་ཞིང་བསོད་པའི་བཟའ་བ་དང ། བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང ། བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་ནས། བཅོམ་ལྡན་འདས་ཀྱིས་གསོལ་ཟིན་ཅིང་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་ཉན་པའི་ཕྱིར་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྲགས་པའི་མ་དང ། ཆུང་མ་གཉིས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་
104a
༄#། །འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །ཝཱ་ར་ཎཱ་སི་ན་ཁྱིམ་བདག་རིགས་ཀྱི་གཙོ་བོའི་བུ་གཉིས་པ་དང ། གསུམ་པ་དང ། བཞི་བ་དང ། ལྔ་པ་གང་པོ་དང ། དྲི་མེད་དང ། བ་ལང་བདག་དང ། ལག་བཟང་སྟེ། རིགས་ཀྱི་གཙོ་བོའི་བུ་དག་གིས་རིགས་ཀྱི་གཙོ་བོའི་བུ་གྲགས་བ་སྐྲ་དང ། ཁ་སྦུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། ཀྱེ་མའོ་སངས་རྒྱས་ནི་མཆོག་མ་ཡིན་པ་མ་ཡིན་ཞིང་ཆོས་བསྟན་པའང་མཆོག་མ་ཡིན་པ་མ་ཡིན་ཏེ། གང་གི་ཕྱིར་ད་ལྟར་གྱི་རིགས་ཀྱི་གཙོ་པོའི་བུ་གྲགས་པ་རེ་ཞིག་ཤིན་ཏུ་གཞོན་པ། ཤིན་ཏུ་བདེ་བ་འདོད་པའང་སྐྲ་དང ། ཁ་སྦུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་གི་།མ་ལ། བདག་ཅག་གིས་ཀྱང་སྐྲ་དང ། ཁ་སྦུ་བྲེགས་ཏེ་གོས་དུར་སྨྲིག་བགོས་ནས། དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱའོ་སྙམ་མོ། །
104b
དེ་ནས་རིགས་ཀྱི་གཙོ་བོའི་བུ་གཉིས་པ་དང ། གསུམ་པ་དང ། བཞི་པ་དང ། ལྔ་པ་གང་པོ་དང ། དྲི་མེད་དང ། བ་ལང་བདག་དང ། ལག་བཟང་སྟེ། རིགས་ཀྱི་གཙོ་བོའི་བུ་རྣམས་ཝཱ་ར་ཎཱ་སི་ནས་བྱུང་ནས་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་རིགས་ཀྱི་གཙོ་བོའི་བུ་གཉིས་པ་དང ། གསུམ་པ་དང ། བཞི་པ་དང ། ལྔ་པ་གང་པོ་དང ། དྲི་མ་མེད་དང ། བ་ལང་བདག་དང ། ལག་བཟང་སྟེ། རིགས་ཀྱི་གཙོ་བོའི་བུ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། ལེགས་པར་གསུངས་པའི་ཆོས་འདུལ་བ་ལ་བདག་ཅག་རབ་ཏུ་འབྱུང་བ་དང ། བསྙེན་པར་རྫོགས་པར་དགེ་སློང་གི་དངོས་པོ་གནང་ན། བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཚེ་དང་ལྡན་པ་དེ་དག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པར་དགེ་སློང་གི་དངོས་པོ་ཐོབ་སྟེ། དེ་ལྟར་རབ་ཏུ་བྱུང་ནས་ཚེ་དང་ལྡན་པ་དེ་དག་གཅིག་བུ་དབེན་པ་བག་ཡོད་པ། རྟུན་པ་དང་ལྡན་པ་བདག་ཉིད་གཏོད་པར་གནས་སོ། །གཅིག་པུ་དབེན་པ་བག་ཡོད་པ། རྟུན་པ་དང་ལྡན་པ་བདག་ཉིད་གདོད་པར་གནས་པ་ན་གང་གི་ཕྱིར་རིགས་ཀྱི་བུ་དེ་དག་སྐྲ་དང ། ཁ་སྦུ་བྲེགས་ཏེ་གོས་དུར་
105a
༄#། །སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་ཚེ་འདི་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་ཅག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་ཚེ་དང་ལྡན་པ་དེ་དག་སེམས་ཤིན་ཏུ་རྣམ་པར་གྲོལ་བ་ཀུན་ཤེས་པ་དང་ལྡན་པའི་དགྲ་བཅོམ་པར་གྱུར་ཏོ། །དེའི་ཚེ་འཇིག་རྟེན་ན་དགྲ་བཅོམ་པ་བཅུ་དང ། བཅུ་གཅིག་པ་ནི་བཅོམ་ལྡན་འདས་སོ། །ཝཱ་ར་ཎཱ་སི་ན་གྲོང་མི་གཙོ་བོ་གཙོ་བོ་རྣམས་ཀྱི་ཁྱེའུ་ལྔ་བཅུས་རིགས་ཀྱི་གཙོ་བོའི་བུ་དང་བོ་དང ། གཉིས་པ་དང ། གསུམ་པ་དང ། བཞི་པ་དང ། ལྔ་པ་སྟེ་གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟང་སྟེ་རིགས་ཀྱི་གཙོ་བོའི་བུ་རྣམས་སྐྲ་དང ། ཁ་སྦུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པར་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། ཀྱེ་མ་སངས་རྒྱས་ནི་མཆོག་མ་ཡིན་པ་མ་ཡིན་ཞིང ། ཆོས་བསྟན་པའང་མཆོག་མ་ཡིན་པ་མ་ཡིན་ཏེ། གང་གི་ཕྱིར་ད་ལྟར་རིགས་ཀྱི་གཙོ་བོའི་བུ་དང་པོ་དང ། གཉིས་པ་དང ། གསུམ་པ་དང ། བཞི་པ་དང ། ལྔ་པ་སྟེ་གྲགས་པ་དང ། གང་པོ་དང ། དྲི་མེད་དང ། བ་ལང་བདག་
105b
དང།་ལག་བཟང་སྟེ་རིགས་ཀྱི་གཙོ་བོའི་བུ་རྣམས་ནི་རེ་ཞིག་ཤིན་ཏུ་གཞོན་པ། ཤིན་ཏུ་བདེ་བ་འདོད་པའང་སྐྲ་དང ། ཁ་སྦུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་གི་།མ་ལ། བདག་ཅག་ཀྱང་སྐྲ་དང ། ཁ་སྤུ་བྲེགས་ནས་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་སྙམ་མོ། །དེ་ནས་གྲོང་ཁྱེར་གྱི་གཙོ་བོ་རྣམས་ཀྱི་ཁྱེའུ་ལྔ་བཅུ་པོ་དག་ཝཱ་ར་ཎཱ་སི་ནས་བྱུང་ནས་བཅོམ་ལྡན་འདས་གང་ན་བ་དེར་སོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་གྲོང་མིའི་གཙོ་བོའི་ཁྱེའུ་ལྔ་བཅུ་པོ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་གནང་ན་བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཚེ་དང་ལྡན་པ་དེ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་ཐོབ་སྟེ། དེ་ལྟར་རབ་ཏུ་བྱུང་ནས་ཚེ་དང་ལྡན་པ་དེ་དག་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་སོ། །གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་པ་ན་གང་
106a
༄#། །གི་ཕྱིར་རིགས་ཀྱི་བུ་དེ་དག་སྔ་མ་བཞིན་དུ་ཇི་སྲིད་སེམས་ཤིན་ཏུ་རྣམ་པར་གྲོལ་བ་ཀུན་ཤེས་པ་དང་ལྡན་པའི་དགྲ་བཅོམ་པར་གྱུར་ཏོ། །དེའི་ཚེ་འཇིག་རྟེན་ན་དགྲ་བཅོམ་པ་དྲུག་ཅུ་དང ། དྲུག་ཅུ་གཅིག་པ་ནི་བཅོམ་ལྡན་འདས་སོ། །དེ་ནས་བཅོམ་ལྡན་འདས་ཝཱ་ར་ཎཱ་སིའི་དྲང་སྲོང་སྨྲ་བ་རི་དྭགས་ཀྱི་ནགས་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ང་ནི་ལྷ་དང ། མིའི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་ནོ། །དགེ་སློང་དག་།ཁྱེད་ཀྱང་ལྷ་དང ། མི་རྣམས་ཀྱི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་གྱི། དགེ་སློང་དག་།སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང ། མི་རྣམས་ལ་ཕན་པ་དང ། བདེ་བའི་ཆེད་དུ་རྒྱུ་ཞིང་དེང་ལ་ཁྱེད་གཉིས་ཤིག་ནི་གཅིག་ཏུ་མ་འགྲོ་ཞིག་།ང་ཡང་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་རྒྱུ་ཞིང་གཤེགས་སོ། ། དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་འདི་ཝཱ་ར་ཎཱ་སིའི་དྲང་སྲོང་སྨྲ་བའི་རི་དྭགས་ཀྱི་ནགས་སུ་འདུག་ནས་དེ་ཉན་ཐོས་རྣམས་ལ་འདི་སྐད་ཅེས་ཆོས་སྟོན་ཏེ། དགེ་སློང་དག་།ང་ནི་ལྷ་དང ། མིའི་འཆིང་བ་གང་ཡིན་པ་ཐམས་ཅད་གྲོལ་བ་ཡིན་ནོ། །དགེ་སློང་དག་།ཁྱེད་ཀྱང་ལྷ་དང ། མིའི་འཆིང་བ་གང་ཡིན་པ་ཐམས་ཅད་ལས་གྲོལ་བ་
106b
ཡིན་གྱི། དགེ་སློང་དག་།སྐྱེ་བོ་མང་པོ་ལ་ཕན་པ་དང་ཞེས་བྱ་བ་ནས་རྒྱུ་ཞིང་དེང་ཞིག་ཅེས་བྱ་བའི་བར་དུ་སྟེ། ང་ཡང་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་རྒྱུ་ཞིང་འགྲོའོ་ཞེས་ཟེར་གྱི།་མ་ལ་བདག་གིས་དེ་ལ། འདི་ལྟ་སྟེ། དཀྲུག་པའི་ལས་ཤིག་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་བདུད་སྡིག་ཅན་བྲམ་ཟེའི་ཁྱེའུའི་ཆ་བྱད་དུ་བདག་ཉིད་མངོན་པར་སྦྲུལ་ཏེ།་བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ་ཚིགས་སུ་བཅད་པས་གསོལ་པ། མ་གྲོལ་གྲོལ་བར་འདུ་ཤེས་ན། །ཇི་ལྟར་བདག་ཉིད་གྲོལ་བར་སེམས། །བདག་ཉིད་དགེ་སྦྱོང་མ་བཀྲོལ་བས། །འཆིང་བ་ཆེན་པོས་བཅིངས་པ་ཡིན། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཨེ་མའོ་འདི་ནི་བདུད་སྡིག་ཅན་ཡིན་ཏེ། འདི་ལྟ་སྟེ། དཀྲུག་པའི་ལས་ཀྱི་ཕྱིར་ཉེ་བར་འོངས་སོ་སྙམ་དུ་ཐུགས་སུ་ཆུད་ནས་ཚིགས་སུ་བཅད་དེ་བཀའ་སྩལ་པ། ང་ནི་ལྷ་དང་མི་རྣམས་ཀྱི། །འཆིང་བ་གང་ཡིན་ཀུན་ལས་གྲོལ། །བར་ཆད་བྱེད་པ་ཁྱོད་བཅོམ་པར། །སྡིག་ཅན་དེ་ལྟར་ཤེས་པར་གྱིས། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མའི་སེམས་ཀྱིས་བདག་ཤེས་སོ་སྙམ་དུ་རིག་ནས་སྡུག་བསྔལ་ཞིང་ཡིད་མི་བདེ་ལ་ཡིད་ལ་གཅགས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལན་གཉིས་སུའང་དགེ་
107a
༄#། །སློང་རྣམས་ལ་བཀའ་སྩལ་པ། དགེ་སློང་དག་།ང་ནི་ལྷ་དང ། མི་རྣམས་ཀྱི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་ནོ། །དགེ་སློང་དག་།ཁྱེད་ཀྱང་ལྷ་དང ། མི་རྣམས་ཀྱི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་གྱི། དགེ་སློང་དག་།སྐྱེ་བོ་མང་པོ་ལ་ཕན་པ་དང་ཞེས་བྱ་བ་ནས། རྒྱུ་ཞིང་དེང་ཞིག་ཅེས་བྱ་བའི་བར་གོང་མ་བཞིན་དུའོ། །ང་ཡང་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་གཤེགས་སོ། །བཙུན་པ། བཀའ་བཞིན་འཚལ་ལོ་ཞེས་དགེ་སློང་རྣམས་ཀྱིས་བཅོམ་ལྡན་འདས་ལས་ཉིད་མཉན་ནས་ལྗོངས་རྒྱུ་ཞིང་དོང་ངོ ། །དེ་ནས་བཅོམ་ལྡན་འདས་ཀྱིས་ཝཱ་ར་ཎཱ་སིར་ཇི་ཙམ་བཞེད་ཀྱི་བར་དུ་བཞུགས་ནས་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་རྒྱུ་ཞིང་གཤེགས་ཏེ།་རིམ་གྱིས་རྒྱུ་ཞིང་གཤེགས་པ་དང་གྲོང་ཁྱེར་སྡེ་ཅན་དུ་བྱོན་ཏོ། །དེ་ནས་བཅོམ་ལྡན་འདས་རས་བལ་ཅན་གྱི་ནགས་ཚང་ཚིང་གང་ན་བ་དེར་གཤེགས་ཏེ་བྱོན་ནས་ཤིང་ཞིག་གི་དྲུང་དུ་བརྟེན་ཏེ་ཉིན་བར་གྱི་གནས་པས་བཞུགས་སོ། །དེའི་ཚེ་དྲུག་ཅུ་སྡེ་བཟང་པོའི་ཚོགས་གྲོང་ཁྱེར་སྡེ་ཅན་གྱི་ཕྱི་རོལ་ཏུ་ཉི་མ་རེ་རེ་ཞིང་བུད་མེད་ཀྱིས་བྱས་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་དེ་རྣམས་ལས་བུད་མེད་ཅིག་དམ་བཅས་པ་དྲལ་ཏེ་བྲོས་སོ། །དེ་ནས་དྲུག་ཅུ་སྡེ་བཟང་པོའི་ཚོགས་བུད་མེད་དེ་ཚོལ་ཞིང་རས་
107b
བལ་གྱི་ནགས་ཚང་ཚིང་གང་ན་བ་དེར་དོང་བ་དང ། དྲུག་ཅུ་སྡེ་བཟང་པོའི་ཚོགས་ཀྱིས་བཅོམ་ལྡན་འདས་མཛེས་པ། དད་པར་འོས་པ། དབང་པོ་ཞི་བ། ཐུགས་ཞི་བ། ཐུགས་མཆོག་ཏུ་དུལ་བ།་ཞི་བ་དང ། དུལ་བ་དང་ལྡན་པ། གསེར་གྱི་མཆོད་སྡོང་ལྟ་བུར་དཔལ་གྱིས་འབར་ཞིང་ཤིང་ཞིག་དྲུང་ན་བརྟེན་ཏེ་བཞུགས་པ་མཐོང་ངོ ། །མཐོང་ནས་ཀྱང་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ལ་འདི་སྐད་གསོལ་ཏོ། །བཅོམ་ལྡན་འདས། ཇི་ག་བུད་མེད་གཅིག་གཟིགས་སམ། གཞོན་ནུ་དག་།བུད་མེད་དེ་ཁྱེད་ཅག་གི་ཅིར་འོང ། བཙུན་པ། འདི་ན་བདག་ཅག་དྲུག་ཅུ་སྡེ་བཟང་པོའི་ཚོགས་གྲོང་ཁྱེར་སྡེ་ཅན་གྱི་སླད་རོལ་ཏུ་བུད་མེད་ཀྱིས་བགྱིས་པའི་རོལ་མོས་རྩེ་བར་བགྱིས། དགའ་བར་བགྱིད། དགའ་མགུར་སྤྱོད་པར་བགྱིད་དེ། དེ་རྣམས་དང་བདག་ཅག་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་པ་ན། བུད་མེད་གཅིག་དམ་བཅས་པ་དྲལ་ཏེ་བྲོས་ནས་བདག་ཅག་ཚོལ་ལགས་སོ། །གཞོན་ནུ་དག་།ཇི་སྙམ་དུ་སེམས། བུད་མེད་ཚོལ་བ་གང་ཡིན་པ་དང ། བདག་ཉིད་ཚོལ་བ་གང་འདམ། བཙུན་པ། བདག་ཅག་ལ་བུད་མེད་ཀྱིས་ཅི་བགྱིས། བདག་ཅག་ནི་བདག་ཉིད་ཚོལ་བ་གང་ལགས་པ་དེ་འདམ་ལགས་སོ། །གཞོན་ནུ་དག་།དེའི་ཕྱིར་འདུག་ཅིག་དང་ཁྱེད་ལ་ཆོས་བཤད་དོ། །དེ་ནས་དྲུག་ཅུ་སྡེ་བཟང་པོའི་ཚོགས་ཀྱིས་བཅོམ་ལྡན་འདས་
108a
༄#། །ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ཀྱིས་དྲུག་ཅུ་སྡེ་བཟང་པོའི་ཚོགས་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན་པ་ལ་སོགས་པ་སྔ་མ་བཞིན་ནོ། །དེ་ནས་དྲུག་ཅུ་སྡེ་བཟང་པོའི་ཚོགས་ཀྱིས་སྟན་དེ་ཉིད་ལ་འཁོད་བཞིན་དུ་འཕགས་པའི་བདེན་པ་བཞི་པོ།་འདི་ལྟ་སྟེ། སྡུག་བསྔལ་བ་དང ། ཀུན་འབྱུང་བ་དང ། འགོག་པ་དང ། ལམ་མངོན་པར་རྟོགས་སོ། །དེ་ནས་དྲུག་ཅུ་སྡེ་བཟང་པོའི་ཚོགས་ཀྱིས་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་བརྒལ་བ་དང ། ཐེ་ཚོམ་ལས་བརྒལ་བ་དང ། གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་བ་དང ། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ཏེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། བདག་ཅག་འཕགས་སོ། །མངོན་པར་འཕགས་སོ། །བདག་ཅག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱི། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་
108b
སུ་མཆི་བར་མངོན་པར་དད་ལགས་སོ། །དེ་ནས་དྲུག་ཅུ་སྡེ་བཟང་པོའི་ཚོགས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་སྟེ་རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེ་ནས་བཅོམ་ལྡན་འདས་དེའི་ནུབ་མོ་འདས་ནས་སྔ་དྲོ་ན་བཟའ་ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ཏེ་གྲོང་ཁྱེར་སྡེ་ཅན་དུ་བསོད་སྙོམས་ལ་ཞུགས་སོ། །དེ་ནས་བཅོམ་ལྡན་འདས་གྲོང་ཁྱེར་སྡེ་ཅན་དུ་བསོད་སྙོམས་ལ་ཞུགས་པ་ན་འདི་སྙམ་དུ་དགོངས་ཏེ། མ་ལ་ངས་གྲོང་ཁྱེར་སྡེ་ཅན་དེར་ཐོག་མར་སུ་ཞིག་ལ་ཆོས་བཤད་སྙམ་པ་ལས། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངས་གྲོང་པའི་བུ་མོ་དགའ་མོ་དང ། དགའ་སྟོབས་མ་ལ་ཐོག་མར་ཆོས་བཤད་པར་བྱ་སྟེ། དེ་དག་གིས་བ་སྔོན་སྡུག་བསྔལ་སྤོང་བའི་རྣལ་འབྱོར་ལ་རྗེས་སུ་བརྩོན་པས་གནས་པ་ན་འདིར་མར་གསར་དང་འོ་ཐུག་སྦྲང་རྩི་ལྟར་མངར་བས་བསྙེན་བཀུར་བྱས་སོ་སྙམ་མོ། །དེ་ནས་བཅོམ་ལྡན་འདས་གྲོང་བའི་བུ་མོ་དགའ་མོ་དང ། དགའ་སྟོབས་མའི་ཁྱིམ་གང་ན་བ་དེར་གཤེགས་སོ། །གྲོང་བའི་བུ་མོ་དགའ་མོ་དང ། དགའ་སྟོབས་མས་བཅོམ་ལྡན་འདས་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ཀྱི་ཆེད་དུ་གདན་བཤམས་ནས་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། ཚུར་སྤྱོན། བཅོམ་ལྡན་
109a
༄#། །འདས།་བྱོན་པ་ལེགས་སོ། །བཅོམ་ལྡན་འདས། གདན་བཤམས་པ་ཉིད་ལ་བཞུགས་སུ་གསོལ། ཞེས་གསོལ་ནས། བཅོམ་ལྡན་འདས་གདན་བཤམས་པ་དེ་ཉིད་ལ་བཞུགས་སོ། །དེ་ནས་གྲོང་བའི་བུ་མོ་དགའ་མོ་དང ། དགའ་སྟོབས་མས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་གྲོང་པའི་བུ་མོ་དགའ་མོ་དང ། དགའ་སྟོབས་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན་ཅེས་བྱ་བ་ནས། མངོན་པར་དད་ནས་སྐྱབས་སུ་སོང་ངོ་ཞེས་བྱ་བའི་བར་དུ་གོང་མ་བཞིན་ནོ། །དེ་ནས་གྲོང་པའི་བུ་མོ་དགའ་མོ་དང ། དགའ་སྟོབས་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། དེའི་སླད་དུ་འདིར་ཞལ་ཟས་ཀྱི་མཛད་པ་མཛད་དུ་གསོལ། བཅོམ་ལྡན་འདས་ཀྱིས་གྲོང་པའི་བུ་མོ་དགའ་མོ་དང ། དགའ་སྟོབས་མ་ལ་ཅང་མི་གསུང་བས་གནང་ངོ ། །དེ་ནས་གྲོང་པའི་བུ་མོ་དགའ་མོ་དང ། དགའ་སྟོབས་མས་བཅོམ་ལྡན་འདས་ཅང་མི་གསུང་བས་གནང་བར་རིག་ཅིང་བཅོམ་ལྡན་འདས་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང ། བཅའ་བདག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང ། བཅའ་བ་དག་རང་གི་
109b
ལག་ནས་བསྟབས་ཤིང་ཚིམ་པར་བྱས་སོ། །བཅོམ་ལྡན་འདས་ཀྱིས་གསོལ་ཟིན་ཏེ་ཕྱག་བཅབས་ཤིང་ལྷུང་བཟེད་གྱུར་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །དེ་ནས་བཅོམ་ལྡན་འདས་ཀྱིས་གྲོང་པའི་བུ་མོ་དགའ་མོ་དང ། དགའ་སྟོབས་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་བཅོམ་ལྡན་འདས་གྲོང་ཁྱེར་སྡེ་ཅན་ནས་གཤེགས་པ་ན་འདི་སྙམ་དུ་དགོངས་ཏེ། ངས་ཡུལ་མ་ག་དྷ་འདིར་ངང་ཚུལ་བཟང་པོར་བཀུར་བའི་དགེ་སྦྱོང་ངམ། བྲམ་ཟེ་གང་ཞིག་དབང་དུ་བྱས་ན་དེ་དབང་དུ་གྱུར་པས་ཚེགས་ཆུང་དུས་སྐྱེ་བོའི་ཚོགས་ཆེན་པོ་དབང་དུ་འགྱུར་བ་སུ་ཞིག་ཡོད་སྙམ་མོ། །དེའི་ཚེ་ལྟེང་རྒྱས་འོད་སྲུང་རལ་བ་ཅན་བཙས་ནས་ལོ་བརྒྱ་ཉི་ཤུ་ལོན་པ་རྒས་པ་འཁོགས་གཏུགས་པ་ཞིག་ཡོད་པ་དེ་མ་ག་དྷའི་མི་རྣམས་ཀྱིས་བཀུར་སྟིར་བྱ་བ་དང ། བླ་མར་བྱ་བ་དང ། རྗེད་པར་བྱ་བ་དང ། མཆོད་པར་བྱ་བས་དགྲ་བཅོམ་པར་བཀུར་ཅིང་འཁོར་ལྔ་བརྒྱ་དང་ནཻ་རཉྫ་ནཱིའི་ཆུ་ཀླུང་གི་འགྲམ་གྱི་བསྟི་གནས་ན་དཀའ་ཐུབ་སྤྱོད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ལྟེང་རྒྱས་འོད་སྲུང་རལ་པ་ཅན་བཙས་ནས་ལོ་བརྒྱ་ཉི་ཤུ་ལོན་པ་རྒས་འཁོགས་གཏུགས་
110a
༄#། །པ་འདི་མ་ག་དྷའི་མི་རྣམས་ཀྱིས་ཞེས་བྱ་བ་ནས་དཀའ་ཐུབ་སྤྱོད་དོ་ཞེས་བྱ་བའི་བར་གོང་མ་བཞིན་དུ་སྟེ། མ་ལ་ངས་ལྟེང་རྒྱས་འོད་སྲུང་རལ་པ་ཅན་དབང་དུ་བྱ་སྟེ།་འདི་དབང་དུ་གྱུར་ན་ཚེགས་ཆུང་དུས་སྐྱེ་བོའི་ཚོགས་ཆེན་པོ་དབང་དུ་འགྱུར་རོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ག་ན་བ་དེར་གཤེགས་སོ། །ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ཀྱི་ཆེད་དུ་གདན་བཤམས་ནས་འདི་སྐད་ཅེས་ཀྱང་གསོལ་ཏོ། །དགེ་སྦྱོང་ཆེན་པོ། ཚུར་སྤྱོན། དགེ་སྦྱོང་ཆེན་པོ། བྱོན་པ་ལེགས་སོ། །དགེ་སྦྱོང་ཆེན་པོ། ཡུན་རིང་པོ་ཞིག་ལགས་ན་གང་ནས་འཁོར་འདིར་བྱོན། དགེ་སྦྱོང་ཆེན་པོ།་གདན་བཤམས་པ་ཉིད་ལ་བཞུགས་ཤིག་ཅེས་གསོལ་ཏོ། །བཅོམ་ལྡན་འདས་ཀྱིས་གདན་བཤམས་པ་ཉིད་ལ་བཞུགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་དང ། བཅོམ་ལྡན་འདས་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང ། མགུ་བར་འགྱུར་བའི་གཏམ་རྣམ་པ་སྣ་ཚོགས་མཛད་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་བཀའ་སྩལ་ཏོ། །འོད་སྲུང ། གལ་ཏེ་ཁྱོད་ལ་མི་བདེ་བ་མེད་ན་ཁྱོད་ཀྱི་མེ་ཁང་དུ་ང་ཞག་གཅིག་
110b
ཅིག་འདུག་གོ་།དགེ་སྦྱོང་ཆེན་པོ། བདག་ལ་མི་བདེ་བ་མ་མཆིས་ན། འོན་ཀྱང་དེ་ན་ཀླུ་གདུག་པ་ཞིག་གནས་ཏེ་དེས་ཁྱོད་ལ་མཐོ་བ་ཙམས་པར་གྱུར་དུ་མཆིའོ། །འོད་སྲུང ། ཁྱོད་ཀྱིས་རེ་ཞིག་གནང་བར་གྱིས་ཤིག་དང་མཐོ་བཙམས་པར་མི་འགྱུར་རོ། །དགེ་སྦྱོང་ཆེན་པོ། གལ་ཏེ་ཁྱོད་ལ་མཐོ་མི་འཚམ་ན། དགེ་སྦྱོང་ཆེན་པོ། ཅི་བདེ་ཁོ་ནར་བཞུགས་ཤིག་།དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་པ་ཅན་གྱི་མེ་ཁང་གང་ན་བ་དེར་གཤེགས་ཏེ་བྱོན་ནས་མེ་ཁང་གི་ཕྱི་རོལ་ཏུ་ཞབས་བསིལ་ནས་མེ་ཁང་གི་ནང་དུ་ཞུགས་ཏེ། ཉིད་ཀྱིས་རྩཝའི་གདིང་བ་བཤམས་ནས་སྐུ་དྲང་པོར་བསྲང་སྟེ་སྐྱིལ་མོ་ཀྲུང་བཅས་ནས་དྲན་པ་མངོན་དུ་ཕྱོགས་པར་བཞག་སྟེ་བཞུགས་སོ། །ཀླུ་གདུག་པས་བཅོམ་ལྡན་འདས་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་ཁྲོས་པའི་མཐུས་དུད་པ་བྱུང་ངོ ། །བཅོམ་ལྡན་འདས་ཀྱིས་ཀྱང་རྫུ་འཕྲུལ་གྱི་མཐུས་དུད་པ་ཕྱུང་ངོ ། །ཀླུ་གདུག་པས་ཁྲོ་བའི་མཐུས་འབར་བར་བྱས་སོ། །བཅོམ་ལྡན་འདས་ཀྱིས་ཀྱང་མེའི་ཁམས་ལ་སྙོམས་པར་བཞུགས་སོ། །དེ་ནས་ཀླུ་གདུག་པ་ཁྲོས་པའི་མཐུ་དང ། བཅོམ་ལྡན་འདས་ཀྱི་རྫུ་འཕྲུལ་གྱི་མཐུས་མེ་ཁང་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ།་མེ་ལྕེ་གཅིག་ཏུ་གྱུར་པས་སྲེག་པར་བྱེད་དོ། །ལྟེང་རྒྱས་འོད་སྲུང་རལ་པ་ཅན་མཚན་མོ་རྒྱུ་སྐར་ལ་ལྟ་བ་ན་མེ་ཁང་ཐམས་གཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་
111a
༄#། །ཏུ་གྱུར་ནས་སྲེག་པ་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། དགེ་སྦྱོང་ཆེན་པོ་གཽ་ཏ་མ་འདི་ལྟར་མཛེས་པར་ཀླུ་གདུག་པས་ཐལ་བར་བྱས་པར་མ་གྱུར་གྲང ། ཀྱེ་ཧུད་ཉོན་མོངས། བདག་གི་ཚིག་མཉན་ཏོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ང་ལྟེང་རྒྱས་འོད་སྲུང་རལ་པ་ཅན་འཁོར་དང་བཅས་པས་ཕྱས་སྤྱད་ཀྱི། མ་ལ་ངས་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་ལ་སེམས་མཉམ་པར་བཞག་ན་མེས་ཀླུ་གདུག་པའི་མེ་ཟིལ་གྱིས་མནན་ལ། དེས་ཀྱང་དེའི་ལུས་ལ་གནོད་པར་མི་བྱེད་ཅིང་དེ་དུལ་བར་བྱས་ནས་ལྷུང་བཟེད་ཀྱི་ནང་དུ་བཅུག་སྟེ། ལྟེང་རྒྱས་འོད་སྲུང་རལ་པ་ཅན་དེ་ལ་སྦྱིན་པ་དེ་ལྟ་བུ་ཞིག་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་ཇི་ལྟ་བུ་མངོན་པར་འདུ་མཛད་པ་ལ་ཐུགས་མཉམ་པར་བཞག་ན་མེས་ཀླུ་གདུག་པའི་མེ་ཟིལ་གྱིས་མནན་ལ། དེས་ཀྱང་དེའི་ལུས་ལ་གནོད་པ་མི་བྱེད་པ་དེ་ལྟ་བུ་མངོན་པར་འདུ་མཛད་དེ། དེ་དུལ་བར་མཁྱེན་ནས་ལྷུང་བཟེད་དུ་བཅུག་སྟེ། ལྟེང་རྒྱས་འོད་སྲུང་གང་ན་བ་དེར་བསྣམས་ཏེ་གཤེགས་སོ། །ལྟེང་རྒྱས་འོད་སྲུང་རལ་བ་ཅན་གྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། གསོན་པ་ལྟ་ཞིག་།འོད་སྲུང ། གསོན་ནོ། །དགེ་སྦྱོང་ཆེན་པོ། ཁྱོད་ཀྱི་ལྷུང་
111b
བཟེད་ན་བསྣམས་ཏེ་བྱོན་པ་ཅི། འོད་སྲུང ། ཀླུ་གདུག་པ་གང་གི་མཐུས་ཁྱོད་ཀྱི་མེ་ཁང་དུ་མིར་གྱུར་བ་རྫུ་འཕྲུལ་དང་མི་ལྡན་པ་གནས་སུ་མི་སྟེར་བ་དེ། ངས་བཏུལ་ནས་ལྷུང་བཟེད་དུ་བཅུག་ནས་ཁྱེར་ཏེ་འོངས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཅག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་བ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེའི་ཚེ་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ན་བྲམ་ཟེའི་ཁྱེའུ་ལྔ་བརྒྱ་ཙམ་མེ་ལ་ཡོངས་སུ་སྤྱོད་པར་རེ་རེའི་མེ་ཐབ་གསུམ་གསུམ་སྟེ། མེ་ཐབ་སྟོང་ལྔ་བརྒྱ་ཡོད་དེ། །དེ་ནས་བྲམ་ཟེའི་ཁྱེའུ་དེ་རྣམས་མེ་ལ་ཡོངས་སུ་སྤྱོད་པར་འདོད་ན་མེ་སྤར་བར་མ་ནུས་སོ། །དེ་ནས་བྲམ་ཟེའི་ཁྱེའུ་དེ་རྣམས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་སོང་སྟི་ཕྱིན་ནས། ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། ། མཁན་པོ་མཁྱེན་པར་མཛོད་ཅིག་།འདིར་བདག་ཅག་ཞུགས་ལ་ཡོངས་སུ་སྤྱོད་པར་འཚལ་ན་ཞུགས་ཏེ་སྤར་བར་རྔོ་མ་ཐོགས་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་བདག་གི་ཉེ་འཁོར་ན་གནས་ན་དེའི་མཐུ་ཞིག་མ་བྱུང་གྲང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་
112a
༄#། །ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛོད་ཅིག་།འདིར་བདག་གི་བྲམ་ཟེའི་ཁྱེའུ་ལྔ་བརྒྱ་ཙམ་མེ་ལ་ཡོངས་སུ་སྤྱོད་པར་འཚལ་ན། མེ་དེ་སྤར་བར་རྔོ་མ་ཐོགས་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་མ་བྱུང་གྲང་སྙམ་བགྱིད་དོ། །འོད་སྲུང ། མེ་སྤར་བར་འདོད་དམ། དགེ་སྦྱོང་ཆེན་པོ། སྤར་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང ། ལྷ་རྣམས་ཀྱི་ལྷའི་མཐུས་མེ་དེ་རང་ཉིད་འབར་བར་གྱུར་ཏོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བྲམ་ཟེའི་ཁྱེའུ་དེ་རྣམས་མེ་ལ་ཡོངས་སུ་སྤྱད་ནས་མེ་གསད་པར་འདོད་ན་གསད་པར་མ་ནུས་སོ། །དེ་ནས་བྲམ་ཟེའི་ཁྱེའུ་དེ་རྣམས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་དོང་སྟེ་ལྷགས་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག་།འདིར་བདག་ཅག་ཞུགས་ལ་ཡོངས་སུ་སྤྱད་པ་ནས་ཞུགས་དགུམ་པར་འཚལ་ན་དགུམ་པའི་རྔོ་མ་ཐོགས་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སློང་ཆེན་
112b
པོ་བདག་གི་ཉེ་འཁྲོ་ན་གནས་ན་དེའི་མཐུ་ཞིག་མ་བྱུང་གྲང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། མཁྱེན་པར་མཛད་དུ་གསོལ། འདིར་བདག་གི་བྲམ་ཟེའི་ཁྱེའུ་རྣམས་ཞུགས་ལ་ཡོངས་སུ་སྤྱད་ནས་ཞུགས་དགུམ་པར་འཚལ་ན་དགུམ་པའི་རྔོ་མ་ཐོགས་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་མ་བྱུང་གྲང་སྙམ་བགྱིད་དོ། །འོད་སྲུང ། མེ་དེ་བསད་དམ། དགེ་སྦྱོང་ཆེན་པོ། དགུམ་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང ། ལྷ་རྣམས་ཀྱི་ལྷའི་མཐུས་མེ་དེ་རང་ཉིད་ཤིའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་ཡང་དུས་གཞན་ཞིག་ན་ལྟེང་རྒྱས་འོད་སྲུང་རལ་པ་ཅན་རང་ཉིད་མེ་ལ་ཡོངས་སུ་སྤྱོད་པར་འདོད་ན་སྤར་བར་མ་ནུས་སོ་ཞེས་བྱ་བ་ནས། བདག་ཀྱང་དགྲ་བཅོམ་པ་ཡིན་ནོ་ཞེས་བྱ་བའི་བར་དུ་གོང་མ་བཞིན་ནོ། །དེ་བཞིན་དུ་ཡོངས་སུ་སྤྱད་ནས་གསད་པར་འདོད་ན་ཞེས་བྱ་བ་ནས། བདག་ཀྱང་དགྲ་བཅོམ་པ་ཡིན་ནོ་ཞེས་བྱ་བའི་བར་དུ་གོང་མ་བཞིན་ནོ། །དེ་ནས་དུས་གཞན་ཞིག་
113a
༄#། །ན་ལྟེང་རྒྱས་འོད་སྲུང་རལ་པ་ཅན་གྱི་མེ་ཁང་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་དེ་ལ་ལྟེང་རྒྱས་འོད་སྲུང་རལ་པ་ཅན་འཁོར་དང་བཅས་པ་དང ། གཞན་ཡང་སྐྱེ་བོའི་ཚོགས་ཆེན་པོ་རྣམས་ཀྱིས་བསྒྲིབས་ཀྱང་གདབ་པར་མ་ནུས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་གནས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། མཁྱེན་པར་མཛད་དུ་གསོལ། དགེ་སྦྱོང་ཆེན་པོ། འདིར་བདག་གི་མེ་ཁང་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་ནས་སྲེག་པར་བགྱིད་པ་དེ་ལ་བདག་འཁོར་དང་བཅས་པ་དང ། གཞན་ཡང ། སྐྱེ་བོའི་ཚོགས་ཆེན་པོས་བསྒྲིབས་ན་ཞུགས་དགུམ་པའི་རྔོ་མ་ཐོགས་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་བགྱིད་དོ། །འོད་སྲུང ། མེ་དེ་ཞི་བར་བྱའམ། དགེ་སྦྱོང་ཆེན་པོ། ཞི་བར་མཛད་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང ། ལྷ་རྣམས་ཀྱི་ལྷའི་མཐུས་
113b
མེ་ཁང་དེ་རང་ཉིད་ཞི་བར་གྱུར་ཏོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་རྒྱལ་པོ་ཆེན་པོ་བཞི་པོ་དག་ཁ་དོག་འཕགས་བསམ་ཚན་མོ་ལ་བབ་པ་ན་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་དེ་རྣམས། དཔེར་ན། མེའི་ཕུང་པོ་འབར། རབ་ཏུ་འབར་ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་བཞི་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། དགེ་སྦྱོང་ཆེན་པོ་འང་མེ་ལ་ཡོངས་སུ་སྤྱོད་དེ། འདི་ལྟར་དེའི་སྤྱན་སྔ་ན་མེའི་ཕུང་པོ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་བཞི་ཡོད་དོ་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་ནང་བར་སྔར་ལངས་ཏེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། མཁྱེན་པར་མཛད་དུ་གསོལ། འདིར་བདག་མདང་སུམ་རྒྱུ་སྐར་རྣམས་ལ་ལྟ་བ་ན་དགེ་སྦྱོང་ཆེན་པོའི་སྤྱན་སྔ་ན་ཞུགས་ཀྱི་ཕུང་པོ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ཏེ་སྲེག་པར་བྱེད་པ་བཞི་མཐོང་ངོ ། །མཐོང་
114a
༄#། །ནས་ཀྱང་འདི་སྙམ་དུ་སེམས་ཏེ། དགེ་སྦྱོང་ཆེན་པོ་འང་མེ་ལ་ཡོངས་སུ་སྤྱོད་དོ། །འདི་ལྟར་དེའི་སྤྱན་སྔ་ན་མེའི་ཕུང་པོ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་ནས་སྲེག་པར་བགྱིད་པ་བཞི་མཆིས་སོ་སྙམ་མོ། །འོད་སྲུང ། ཅི་ང་མེ་ལ་ཡོངས་སུ་སྤྱོད་དམ། ང་མེ་ལ་ཡོངས་སུ་མི་སྤྱོད་དེ། མཁས་པ་ཀུན་ནས་ཉོན་མོངས་ལས། །སེམས་ནི་ཡོངས་སུ་ཟློག་བྱེད་ཀྱི། །མེའམ་ཡང་ན་ཆུ་དག་ལ། །ཡོངས་བསྟེན་ཡོན་ཏན་ཅི་ཞིག་ཡོད། །དེ་ལྟ་མོད་ཀྱི་འདིར་མདང་སུམ་རྒྱལ་པོ་ཆེན་པོ་བཞི་པོ་དག་ཁ་དོག་འཕགས་པས་མཚན་མོ་ལ་བབ་པ་ན་ང་གང་ན་བ་དེར་འོངས་ཏེ་ལྷག་ནས་ངའི་ཞབས་གཉིས་ལ་མགོ་བོས་ཕྱག་བྱས་ཏེ་དེ་རྣམས། དཔེར་ན། མེའི་ཕུང་པོ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་བཞི་པོ་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་པ་ཡིན་ནོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་ཁ་དོག་འཕགས་པས་མཚན་མོ་ལ་བབ་པ་ན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། དེ་དཔེར་ན།
114b
མེའི་ཕུང་པོ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པ་བཞི་པོ་དེ་དག་པས་ཆེས་ལྷག་ཅིང་ཆེས་འཕག་པ་ཆེས་བཟང་བ་ལྟ་བུའི་ལུས་ཀྱིས་ཕྱོག་གཅིག་ཏུ་འདུག་གོ་།ལྟེང་རྒྱས་འོད་སྲུང་རལ་པ་ཅན་དེ་ཉིད་ཀྱི་མཚན་མོ་རྒྱུ་སྐར་རྣམས་ལ་ལྟ་བ་ན། བཅོམ་ལྡན་འདས་ཀྱི་སྤྱན་སྔ་ན་མེའི་ཕུང་པོ་འབར་ཞེས་བྱ་བ་ནས། དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ་ཞེས་བྱ་བའི་བར་དུ་གོང་མ་བཞིན་ནོ། །དེ་ནས་མི་མཇེད་ཀྱི་བདག་པོ་ཚངས་པ་ཁ་དོག་འཕགས་བས་མཚན་མོ་ལ་བབ་པ་ན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། དེ་དཔེར་ན། མེའི་ཕུང་པོ་བཞི་པོ་དེ་དག་ཉིད་སྔ་མ་བཞིན་དུ་སྲེག་པ་ཞེས་བྱ་བ་ནས། མེའི་ཕུང་པོ་ཆེན་པོ་ལྔ་པོ་དེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་དོ། །ཞེས་བྱ་བའི་བར་དེ་དག་པས་ཀྱང་ཆེས་ལྷག་ཅིང་ཆེས་འཕགས་ལ་ཆེས་བཟང་བ་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་གོ་།ལྟེང་རྒྱས་འོད་སྲུང་རལ་པ་ཅན་དེ་ཉིད་ཀྱི་མཚན་མོ་རྒྱུ་སྐར་རྣམས་ལ་ལྟ་བ་ན་བཅོམ་ལྡན་འདས་ཀྱི་སྤྱན་སྔ་ན་མེའི་ཕུང་པོ་ཆེན་པོ་འབར་ཞེས་བྱ་བ་ནས། དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་ཞེས་བྱ་བའི་བར་དུ་གོང་མ་བཞིན་ནོ། །དེའི་ཚེ་ལྟེང་རྒྱས་
115a
༄#། །འོད་སྲུང་རལ་པ་ཅན་གྱི་འདུག་གནས་ན་མཆོད་སྦྱིན་ཞག་བདུན་པ་བྱེད་པ་ལ་བབ་པོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། གལ་ཏེ་མ་ག་དྷའི་མི་རྣམས་ཀྱིས་དགེ་སྦྱོང་ཆེན་པོ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པར་ཤེས་ན་དེ་ཉིད་ལ་བྱ་བ་བྱེད་པར་སེམས་ཀྱི། བདག་ལ་ནི་དེ་ལྟ་མ་ཡིན་པའི་གནས་ཡོད་ཀྱི། ཀྱེ་མ།་དགེ་སྦྱོང་ཆེན་པོ་ཞག་བདུན་ཞིག་འདི་ནས་གཞན་དུ་སོང་ཡང་ཅི་མ་རུང་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ལྟེང་རྒྱས་འོད་སྲུང་རལ་པ་ཅན་གྱི་སེམས་མཁྱེན་ནས་ཞག་བདུན་གཞན་དུ་བཞུད་དོ། །དེའི་ཚེ་ཞག་བདུན་དུ་ལྟེང་རྒྱས་འོད་སྲུང་རལ་པ་ཅན་ལ་རྙེད་པ་དང ། བཀུར་སྟི་ཆེན་པོ་བྱུང་ནས་བཟའ་བ་དང ། བཅའ་བར་རབ་ཏུ་མང་པོ་དང་ལྡན། སྐྱེ་བོའི་ཚོགས་ཆེན་པོའང་དབང་དུ་གྱུར་ཏོ། །དེ་ནས་ལྟེང་རྒྱས་འོད་སྲུང་རལ་པ་ཅན་གྱི་འདུག་གནས་ན་མཆོད་སྦྱིན་ཞག་བདུན་དུ་བྱས་ཟིན་པ་དང་འདི་སྙམ་དུ་སེམས་ཏེ། ཞག་བདུན་པོ་འདི་ལ་བདག་ལ་རྙེད་པ་དང ། བཀུར་སྟི་ཆེན་པོ་བྱུང་ནས་བཟའ་བ་དང ། བཅའ་བ་རབ་ཏུ་མང་པོ་དང་ལྡན། སྐྱེ་བོའི་ཚོགས་ཆེན་པོའང་དབང་དུ་གྱུར་གྱི། ཀྱེ་མ་ད་ནི་དགེ་སྦྱོང་ཆེན་པོ་འོངས་ཀྱང་ཅི་མ་རུང ། བདག་གིས་དེའང་དེ་ལ་བསོད་སྙོམས་སྤྱོད་དུ་གཞུག་གོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ལྟེང་རྒྱས་འོད་སྲུང་རལ་པ་ཅན་གྱི་སེམས་མཁྱེན་ནས་
115b
ལྟེང་རྒྱས་འོད་སྲུང་རལ་པ་ཅན་གང་ན་བ་དེར་གཤེགས་སོ། །ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བྱོན་ཏམ། འོད་སྲུང ། འོངས་སོ། །དགེ་སྦྱོང་ཆེན་པོ། ཁྱོད་ཅིའི་སླད་དུ་ཞག་བདུན་འདི་ནས་བཞུད་ལགས། འོད་སྲུང་ཁྱོད་ཀྱི་འདུག་གནས་ན་མཆོད་སྦྱིན་ཞག་བདུན་དུ་བྱེད་པ་ལ་བབ་ནས་འདི་སྙམ་དུ་གལ་ཏེ་མ་ག་དྷའི་མི་རྣམས་ཀྱིས་དགེ་སྦྱོང་ཆེན་པོ་ནི་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་བ་ཡིན་ནོ་བར་ཤེས་ན་དེ་ཁོ་ན་ལ་བྱ་བ་བྱེད་པར་སེམས་ཀྱི་བདག་ལ་ནི་དེ་ལྟར་མ་ཡིན་པའི་གནས་འདི་ཡོད་པར་འགྱུར་གྱིས་ཀྱེ་མ་དགེ་སྦྱོང་ཆེན་པོ་ཞག་བདུན་ཞིག་འདི་ནས་གཞན་དུ་སོང་ཡང་ཅི་མ་རུང་སྙམ་སེམས་པ་མ་ཡིན་ནམ། ངའི་ཐུགས་ཀྱིས་ཁྱོད་ཀྱི་སེམས་ཤེས་ནས་ཞག་བདུན་འདི་ནས་གཞན་དུ་སོང་ངོ ། །འོ་ན་ཅིའི་སླད་དུ་འདིར་བྱོན་ལགས། འོད་སྲུང་ཁྱོད་ཀྱི་མཆོད་སྦྱིན་ཞག་བདུན་དུ་བྱས་ཟིན་ནས་འདི་སྙམ་དུ་བདག་ལ་ཞག་བདུན་དུ་རྙེད་པ་དང ། བཀུར་སྟི་ཆེན་པོ་བྱུང་ཞིང་བཟའ་བ་དང ། བཅའ་བ་རབ་ཏུ་མང་པོ་དང་ཡང་ལྡན། སྐྱེ་བོའི་ཚོགས་ཆེན་པོའང་དབང་དུ་གྱུར་གྱི། ཀྱེ་མ་དགེ་སྦྱོང་ཆེན་པོ་འོངས་ཀྱང་ཅི་མ་རུང ། བདག་གིས་དེ་ཡང་དེ་ལ་ཡོངས་སུ་ལོངས་སྤྱོད་དུ་གཞུག་གོ་སྙམ་དུ་སེམས་པ་མ་ཡིན་ནམ། དགེ་
116a
༄#། །སྦྱོང་ཆེན་པོ། དེ་ལྟ་ལགས་སོ། །ངའི་ཐུགས་ཀྱིས་ཁྱོད་ཀྱི་སེམས་ཤེས་ནས་ང་འོངས་པ་ཡིན་ནོ། །དགེ་སྦྱོང་ཆེན་པོ། ཅི་བདེ་བ་ཁོ་ནར་ལོངས་སྤྱད་དུ་གསོལ། དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། དེའི་སླད་དུ་བདག་གི་ཉེ་འཁོར་དུ་བཞུགས་ཤིག་དང ། བདག་གིས་ཁྱོད་ལ་ཆོས་དང་མཐུན་པའི་འཚོ་བ་སྦྱར་རོ། །བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་ལ་ཅང་མི་གསུང་བས་གནང་ངོ ། །དེ་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་ཀྱི་ཆེད་དུ་རང་ཁོ་ནས་གཡོས་བྱས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། གདུགས་ཚོད་ལགས་ཤིང་མཆིས་ན། དགེ་སྦྱོང་ཆེན་པོ། ད་དེའི་དུས་ལ་བབ་པར་དགོངས་སུ་གསོལ། འོད་སྲུང ། དེའི་ཕྱིར་སོང་ཞིག་ངའང་འོང་ངོ ། །དེ་ནས་བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་སོང་ནས་རིང་པོ་མ་ལོན་པར་མཁྱེན་ནས་ཇི་ལྟར་ཐུགས་མཉམ་པར་བཞག་ན་ཤིང་ཛམྦུ་ཞེས་བྱ་བ་གང་
116b
གིས་ཛམྦུའི་གླིང་དུ་གདགས་པ་དེ་ལས་ཁ་དོག་དང ། དྲི་དང ། རོ་དང་ལྡན་པའི་ཛམྦུའི་སྙེ་མ་རྣམས་ཀྱིས་ལྷུང་བཟེད་བཀང་ནས་བསྣམས་ཏེ། ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་གཤེགས་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་དེའི་འོག་ཏུ་ལྟེང་རྒྱས་འོད་སྲུང་རལ་པ་ཅན་འོངས་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་བསྟི་གནས་ཀྱི་གདན་བཤམས་པ་ཉིད་ལ་བཞུགས་པ་མཐོང་ངོ ། །མཐོང་ནས་ཀྱང་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བྱོན་ཏམ ། འོད་སྲུང ། འོངས་སོ། །དགེ་སྦྱོང་ཆེན་པོ། ཁྱོད་ཀྱི་ལྷུང་བཟེད་ན་ཅི་མཆིས། འདིར་ངས་འོད་སྲུང་ཁྱོད་སོང་ན་སྲིང་པོ་མ་ལོན་པར་མཁྱེན་ནས། ཇི་ལྟར་ཐུགས་མཉམ་པར་བཞག་ན་ཤིང་ཛམྦུ་ཞེས་བྱ་བ་གང་གིས་ཛམྦུ་གླིང་དུ་གདགས་པ་དེ་ལས་ཁ་དོག་དང ། དྲི་དང ། རོ་དང་ལྡན་པའི་ཛམྦུའི་སྙེ་མ་རྣམས་ཀྱིས་ལྷུང་བཟེད་བཀང་ནས་འདིར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཀྱི། གལ་ཏེ་འདོད་ན་ལོངས་སྤྱོད་ཅིག་།དགེ་སྦྱོང་ཆེན་པོ། ཅི་བདེ་བ་ཁོ་ནར་འཚལ་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ། རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །ཤིང་ཛམྦུ་ཞེས་བྱ་བ་གང་གིས་ཛམྦུའི་གླིང་དུ་གདགས་པ་དེ་དང ། ཧ་
117a
༄#། །ཅང་མི་རིང་བ་ཞིག་ན་ཨ་རུ་རའི་ནགས་དང ། བིལ་པའི་ནགས་དང ། ཀ་བིད་ཐའི་ནགས་དང ། སྐྱུ་རུ་རའི་ནགས་ཀྱང་དེ་བཞིན་ནོ། །བྱང་གི་སྒྲ་མི་སྙན་གྱི་གླིང་དུ་གཤེགས་ནས་མ་རྨོས་མ་བཏབ་པའི་འབྲས་སཱ་ལུས་ལྷུང་བཟེད་བཀང་སྟེ་བསྣམས་ནས་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་དེའི་འོག་ཏུ་ལྟེང་རྒྱས་འོད་སྲུང་རལ་པ་ཅན་འོངས་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་བསྟི་གནས་ཀྱི་གདན་བཤམས་པ་ཉིད་ལ་བཞུགས་པ་མཐོང་ངོ ། །མཐོང་ནས་ཀྱང་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བྱོན་ཏམ། འོད་སྲུང ། འོངས་སོ། །དགེ་སྦྱོང་ཆེན་པོ། ཁྱོད་ཀྱི་ལྷུང་བཟེད་ན་ཅི་མཆིས། འདིར་ངས་འོད་སྲུང་ཁྱོད་སོང་ནས་རིང་པོ་མ་ལོན་པར་མཁྱེན་ནས་ཇི་ལྟར་ཐུགས་མཉམ་པར་བཞག་ན་བྱང་གི་སྒྲ་མི་སྙན་གྱི་གླིང་དུ་གཤེགས་ནས་མ་རྨོས་མ་བཏབ་པའི་འབྲས་སཱ་ལུའི་འབྲས་ལྷུང་བཟེད་བཀང་ནས་འདིར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཀྱི་གལ་ཏེ་འདོད་ན་ལོངས་སྤྱོད་ཅིག་།དགེ་སྦྱོང་ཆེན་པོ། ཅི་བདེ་བ་ཁོ་ནར་འཚལ་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་
117b
ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་ལས་བསོད་སྙོམས་བཞེས་ནས་ཕྱོགས་གཞན་ཞིག་ཏུ་བཞུགས་ནས་ཞལ་ཟས་ཀྱི་བྱ་བ་མཛད་དོ། །དེ་ནས་བཅོམ་ལྡན་འདས་ལ་ཆུས་ཆུའི་དགོས་པ་ཞིག་བྱུང་ངོ ། །དེ་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ཆུས་ཆུའི་དགོས་པ་བྱུང་བར་ཤེས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་སྤྱན་སྔར་ལག་པས་ས་ལ་བསྣུན་པ་དང ། དེ་ནས་བཀོད་མ་ཆེན་པོ་ཞིག་བྱུང་སྟེ་ཆུ་བབ་པ་དེ་ལ་བཅོམ་ལྡན་འདས་ཀྱིས་ཆུས་ཆུའི་བྱ་བ་མཛད་དོ། །ལྟེང་རྒྱས་འོད་སྲུང་རལ་པ་ཅན་བསྟི་གནས་ན་འཆག་པ་ན་བཀོད་མ་ཆེན་པོ་བྱུང་སྟེ་ཆུ་བབ་པ་མཐོང་ངོ ། །མཐོང་ནས་འདི་སྙམ་དུ་སེམས་ཏེ། ཆུ་འདི་སྔོན་ནི་མེད་ན་ཆུ་འདི་ད་ལྟར་གང་ནས་བྱུང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། དགེ་སྦྱོང་ཆེན་པོ། མཁྱེན་པར་མཛད་དུ་གསོལ། བདག་འདིར་བསྟི་གནས་ན་འཆག་པ་ན་བཀོད་མ་ཆེན་པོའི་ཆབ་ཅིག་མཐོང་ངོ ། །མཐོང་ནས་ཀྱང་བདག་འདི་སྙམ་དུ་སེམས་ཏེ། ཆུ་འདི་སྔོན་མ་མཆིས་ན་ད་ལྟར་ཆུ་འདི་གང་ནས་བབ་སྙམ་བགྱིད་དོ། །འོད་སྲུང ། འདིར་ཁྱོད་ལས་བསོད་སྙོམས་བཞེས་ནས་ཕྱོགས་འདིར་བཞུགས་ཏེ་ཞལ་ཟས་ཀྱི་བྱ་བ་མཛད་པ་ན་ང་
118a
༄#། །ཆུས་ཆུའི་དགོས་པ་ཞིག་བྱུང་ངོ ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ང་ལ་ཆུས་ཆུའི་དགོས་པ་བྱུང་བར་ཤེས་ནས་ང་གང་ན་བ་དེར་འོངས་ཏེ་ཕྱིན་ནས་ངའི་མདུན་དུ་ལག་པས་ས་ལ་བསྣུན་པ་ལས་དེ་ནས་བཀོད་མ་ཆེན་པོ་ཞིག་བྱུང་བ་དེ་ལ་ངས་ཆུས་ཆུའི་བྱ་བ་མཛད་དོ། །འོད་སྲུང ། རྫིང་འདི་ན་ལག་པས་བརྐོས་པ་ཞེས་བྱའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ཕྱེམ་རེད་དུ་ཡང་དག་འཇོག་ལས་བཞེངས་ནས་རྫིང་ལག་པས་བརྐོས་པ་གང་ན་བ་དེར་གཤེགས་ཏེ་བྱོན་ནས་རྫིང་ལག་པས་བརྐོས་པའི་འགྲམ་གྱི་མཐའ་གཅིག་ཏུ་ན་བཟའ་ཆོས་གོས་རྣམས་བཞག་སྟེ་རྫིང་ལག་པས་བརྐོས་པར་ཞུགས་ནས་སྐུ་ཁྲུས་མཛད་ནས། རྫིང་ལག་པས་བརྐོས་པ་ནས་བྱུང་བར་བཞེད་པ་ན་ཤིང་ཨརྫུ་ན་གང་ན་བ་དེ་ལོགས་སུ་ཕྱག་བརྐྱང་ངོ ། །དེ་ནས་ཨརྫུ་ནའི་ཡལ་ག་ཆེན་པོ་དུད་པར་གྱུར་ཏེ། དེ་ལ་བཅོམ་ལྡན་འདས་ཀྱིས་གཟུང་ནས་རྫིང་ལག་པས་བརྐོས་པ་ནས་བྱུང་ངོ ། །ལྟེང་རྒྱས་འོད་སྲུང་རལ་པ་ཅན་བསྟི་གནས་ན་འཆག་པ་ན་རྫིང་ལག་པས་བརྐོས་པའི་འགྲམ་ན་ཨརྫུ་ནའི་ཡལ་ག་ཆེན་པོ་དུད་པ་ཞིག་མཐོང་ངོ ། །
118b
མཐོང་ནས་ཀྱང་འདི་སྙམ་དུ་སེམས་ཏེ། ཨརྫུ་ནའི་ཡལ་ག་འདི་སྔོན་ནི་དུད་པར་མ་གྱུར་ན། ཨརྫུ་ནའི་ཡལ་ག་ཆེན་པོ་འདི་ད་སུ་ཞིག་གིས་བཏུད་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། མཁྱེན་པར་མཛད་དུ་གསོལ། བདག་འདིར་བསྟི་གནས་ན་འཆག་པ་ན་རྫིང་ལག་པས་བརྐོས་པའི་འགྲམ་ན་ཨརྫུ་ནའི་ཡལ་ག་ཆེན་པོ་དུད་པར་མཐོང་ངོ ། །མཐོང་ནས་ཀྱང་བདག་འདི་སྙམ་དུ་སེམས། ཨརྫུ་ནའི་ཡལ་ག་ཆེན་པོ་འདི་སྔོན་ནི་དུད་པར་མ་གྱར་ན་ད་སུ་ཞིག་གིས་བཏུད་སྙམ་བགྱིད་དོ། །འོད་སྲུང ། འདིར་ཕྱེ་མ་རེད་ནང་དུ་ཡང་དག་འཇོག་ལས་བཞེངས་ནས། རྫིང་ལག་པས་བརྐོས་པའི་འགྲམ་གང་ན་བ་དེར་གཤེགས་ཏེ་བྱོན་ནས་རྫིང་ལག་པས་བརྐོས་པའི་འགྲམ་གྱི་མཐའ་གཅིག་ཏུ་ན་བཟའ་ཆོས་གོས་རྣམས་བཞག་སྟེ་རྫིང་ལག་པས་བརྐོས་པར་ཞུགས་ཏེ་ལུས་ཁྲུས་བྱས་ནས་རྫིང་ལག་པས་བརྐོས་པ་ནས་བྱུང་བར་འདོད་པས་ཤིང་ཨརྫུ་ན་འདི་དག་གང་ན་བ་དེ་ལོགས་སུ་ལག་པ་བརྐྱང་བ་དང ། དེ་ནས་ཨརྫུ་ནའི་ཡལ་ག་ཆེན་པོ་འདི་དུད་པར་གྱུར་ཏེ། དེ་ལ་ངས་འཇུས་ནས་རྫིང་ལག་པས་བརྐོས་པ་ནས་བྱུང་ངོ ། །འོད་སྲུང ། འདི་ནི་ཨརྫུ་ན་ལག་པས་བཟུང་བ་ཞེས་བྱའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་
119a
༄#། །འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེའི་ཚེ་བཅོམ་ལྡན་འདས་ཀྱི་ཕྱག་དར་ཁྲོད་པའི་ཤ་ནའི་རས་དག་བརྙེས་ནས། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངའི་ཕྱག་དར་ཁྲོད་པའི་ཤ་ནའི་རས་གང་དུ་བཀྲུ་སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་བཅོམ་ལྡན་འདས་ཀྱི་དགོངས་པ་ཤེས་ནས་རི་བྲག་གཅིག་ལས་རྡོ་ལེབ་ཆེ་ལ་རིང་བ་ཞིག་བླངས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཕྱག་དར་ཁྲོད་པའི་ཤ་ནའི་རས་དག་འདི་ལ་བཀྲུ་བར་གསོལ། དེ་ལ་བཅོམ་ལྡན་འདས་ཀྱིས་ཕྱག་དར་ཁྲོད་པའི་ཤ་ནའི་རས་རྣམས་བཀྲུས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། དེའི་ཕྱག་དར་ཁྲོད་པའི་ཤ་ནའི་རས་རྣམས་གང་དུ་དགྲམ་སྙམ་པ་དང ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་བཅོམ་ལྡན་འདས་ཀྱི་དགོངས་པ་ཤེས་ནས་བྲག་གཅིག་ལས་རྡོ་ལེབ་ཆེ་ལ་རིང་བ་ཞིག་ཁྱེར་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལ་ཕྱག་དར་ཁྲོད་པའི་ཤ་ནའི་རས་རྣམས་དགྲམ་དུ་གསོལ། དེ་ལ་བཅོམ་ལྡན་འདས་ཀྱིས་
119b
ཕྱག་དར་ཁྲོད་པའི་ཤ་ནའི་རས་དག་བཀྲམ་མོ། །ལྟེང་རྒྱས་འོད་སྲུང་རལ་པ་ཅན་བསྟི་གནས་ན་འཆག་པ་ན་རྡོ་ལེབ་ཆེ་ལ་རིང་བ་དག་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། རྡོ་ལེབ་ཆེ་ལ་རིང་བ་འདི་དག་སྔོན་ནི་མེད་ན་རྡོ་ལེབ་ཆེ་ལ་རིང་བ་འདི་དག་སུ་ཞིག་གིས་ཁྱེར་ཏེ་འོངས་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། མཁྱེན་པར་མཛད་དུ་གསོལ། འདིར་བདག་བསྟི་གནས་ན་འཆག་པ་ན་རྡོ་ལེབ་ཆེ་ལ་རིང་བདག་གཅིག་མཐོང་ངོ ། །མཐོང་ནས་ཀྱང་བདག་འདི་སྙམ་དུ་སེམས་ཏེ། རྡོ་ལེབ་ཆེ་ལ་རིང་བ་འདི་དག་སྔོན་ནི་ཡེ་མ་མཆིས་ན། རྡོ་ལེབ་ཆེ་ལ་རིང་བ་འདི་དག་ད་སུ་ཞིག་གིས་འཚལ་ཏེ་མཆིས་སྙམ་བགྱིད་དོ། །འོད་སྲུང ། འདིར་ངས་ཕྱག་དར་ཁྲོད་པའི་ཤ་ནའི་རས་དག་བརྙེས་སོ། །དེ་ནས་ང་འདི་སྙམ་དུ་དགོངས་ཏེ། ཕྱག་དར་ཁྲོད་པའི་ཤ་ནའི་རས་དག་གང་དུ་བཀྲུ་སྙམ་པ་དང ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་ངའི་དགོངས་པ་ཤེས་ནས། བྲག་གཅིག་ལས་རྡོ་ལེབ་ཆེ་ལ་རིང་བ་ཞིག་བླངས་ཏེ་ང་གང་ན་བ་དེར་འོངས་ཏེ་ཕྱིན་ནས་ང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལ་ཕྱག་དར་ཁྲོད་པའི་ཤ་ནའི་རས་རྣམས་བཀྲུ་བར་གསོལ། ངས་དེ་ལ་ཕྱག་དར་ཁྲོད་པའི་ཤ་ནའི་རས་རྣམས་བཀྲུས་སོ། །ང་འདི་སྙམ་
120a
༄#། །དུ་དགོངས་ཏེ། ངས་ཕྱག་དར་ཁྲོད་པའི་ཤ་ནའི་རས་རྣམས་གང་དུ་དགྲམ་སྙམ་པ་དང ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་ངའི་དགོངས་པ་ཤེས་ནས་བྲག་གཅིག་ལས་རྡོ་ལེབ་ཆེ་ལ་རིང་བ་ཞིག་བླངས་ཏེ་ང་གང་ན་དེར་འོངས་ཏེ་ཕྱིན་ནས་ང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་ཕྱག་དར་ཁྲོད་པའི་ཤ་ནའི་རས་དགྲམ་དུ་གསོལ། ངས་དེ་ལ་ཕྱག་དར་ཁྲོད་པའི་ཤ་ནའི་རས་རྣམས་བཀྲམ་མོ། །འོད་སྲུང ། རྡོ་ལེབ་ཆེ་ཞིང་རིང་བ་འདི་དག་ནི་གནོད་སྦྱིན་གྱིས་བླངས་པ་ཞེས་བྱའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེའི་ཚེ་ནཻ་རཉྫ་ནའི་ཆུ་ཆེར་བྲུབ་ནས་བབ་བོ། ། དེ་ནས་བཅོམ་ལྡན་འདས་ཆུ་ཀླུང་མི་གང་བས་ལྷག་པས་ཁེབས་པའི་ལྟེང་ན་རྡུལ་གྱིས་ཡོག་པ་བླ་ག་བ་མེད་པ་ལ་འཆག་པས་འཆག་པར་མཛད་དོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་དེ་ལྟར་མཛེས་པ་ཆུ་ཆེན་པོ་བྲུབ་པས་ཁྱེར་བར་མ་གྱུར་གྲང ། མ་ལ། བདག་གིས་དགེ་སྦྱོང་ཆེན་པོ་བཙལ་སྙམ་དུ་བསམས་
120b
ནས།་ཤིང་གཅིག་པའི་གྲུའི་ནང་དུ་ཞུགས་ཏེ། བཅོམ་ལྡན་འདས་བཙལ་བ་ན་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་ཆུ་ཀླུང་མི་གང་བས་ལྷག་པར་ཁེབས་པའི་སྟེང་ནས་རྡུལ་གྱིས་ཡོག་པ་བླ་གབ་མེད་པ་ན་འཆག་པས་འཆག་པ་མཐོང་ངོ ། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། གསོན་ནམ། འོད་སྲུང་གསོན་ནོ། །དགེ་སྦྱོང་ཆེན་པོ། ཞུགས་ཤིང་གཅིག་པའི་གྲུར་འཇུག་གམ། འོད་སྲུང ། འཇུག་གོ་།དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ། ངས་ཇི་ལྟར་ཐུགས་མཉམ་པར་གཞག་ན་ཤིང་གཅིག་པའི་གྲུ་ཇི་ལྟར་ཆུ་ལ་འཇུག་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་འདུ་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་ཇི་ལྟར་ཐུགས་མཉམ་པར་བཞག་ནས་ཤིང་གཅིག་པའི་གྲུ་ཇི་ལྟ་བར་ཆུ་ལ་འཇུག་པར་དེ་ལྟ་བུའི་རྫུ་འཕྲུལ་མངོན་པར་འདུ་མཛད་དོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ་ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ལྟེང་རྒྱས་འོད་སྲུང་རལ་པ་ཅན་གྱི་སེམས་མཁྱེན་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་བཀའ་སྩལ་ཏོ། །འོད་སྲུང་རལ་པ་ཅན། ཁྱོད་ནི་དགྲ་བཅོམ་པ་མ་ཡིན། དགྲ་བཅོམ་པའི་འབྲས་བུ་མངོན་
121a
༄#། །སུམ་དུ་བྱ་བའི་ཕྱིར་ཞུགས་པ་མ་ཡིན་ཏེ། དགྲ་བཅོམ་པའི་ལམ་གང་ཡིན་པ་དེའང་མི་ཤེས་སོ། །དེ་ནས་ལྟེང་རྒྱས་འོད་སྲུང་རལ་བ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་གཽ་ཏ་མའི་ཐུགས་ཀྱིས་བདག་གི་སེམས་མཁྱེན་ཏོ་སྙམ་དུ་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པ་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན་དགེ་སྦྱོང་ཆེན་པོའི་སྤྱན་སྔར་བདག་ཚངས་པར་སྤྱོད་པ་སྤྱད་པར་བགྱིའོ།། འོད་སྲུང་ཁྱོད་ཀྱི་འཁོར་ལ་ལྟས་སམ། དགེ་སྦྱོང་ཆེན་པོ། མ་ལྟས་ལགས་སོ། །འོད་སྲུང ། དེའི་ཕྱིར་རེ་ཞིག་འཁོར་ལ་ལྟོས་ཤིག་།འདིར་ཁྱོད་ལྟ་བུའི་མི་གྲགས་པ་དང་ལྡན་པ་ཤེས་ཉེན་ཅན་རྣམས་ཀྱིས་ནི་འཁོར་ལ་ལྟ་བ་ལེགས་པ་ཡིན་ནོ། །དེ་ནས་ལྟེང་རྒྱས་འོད་སྲུང་རལ་པ་ཅན་རང་གི་བསྟི་གནས་གང་ན་བ་དེར་སོང་སྟེ་ཕྱིན་ནས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་དག་།ཤེས་པར་གྱིས་ཤིག་།བྲམ་ཟེའི་ཁྱེའུ་དག་།ཁོ་བོ་ནི་དགེ་སྦྱོང་ཆེན་པོའི་སྤྱན་སྔར་ཚངས་པ་སྤྱོད་པ་སྤྱད་ན། ཤེས་ལྡན་དག་།ཅི་བྱེད། མཁན་པོ། བདག་ཅག་གིས་ཅུང་ཟད་ཅི་འཚལ་བ་དེ་ཐམས་ཅད་ནི་མཁན་པོ་ལ་བརྟེན་ནས་ལགས་པས། གལ་ཏེ་མཁན་པོ་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་ན་བདག་ཅག་
121b
ཀྱང་མཁན་པོ་རབ་ཏུ་འབྱུང་བའི་རྗེས་སུ་རབ་ཏུ་འབྱུང་ངོ ། །བྲམ་ཟེའི་ཁྱེའུ་དང ། །ཁྱེད་ཀྱིས་དེའི་ཕྱིར་གཡང་གཞི་དག་ཤིང་ཤུན་དང ། འཁར་བ་དང ། རིལ་བ་སྤྱི་བླུགས་དང ། བླུགས་གཟར་འདི་དག་ཆུ་ཀླུང་ནཻ་རཉྫ་ནཱའི་འགྲམ་དུ་འོར་ཅིག་།མཁན་པོ། བཀའ་བཞིན་འཚལ་ཞེས་བྲམ་ཟེའི་ཁྱེའུ་དེ་རྣམས་ཀྱིས་གཡང་གཞི་དང ། ཤིང་ཤུན་དང ། འཁར་བ་དང ། རིལ་བ་སྤྱི་བླུགས་དང ། བླུགས་གཟར་རྣམས་ཆུ་ཀླུང་ནཻ་རཉྫ་ནཱའི་འགྲམ་དུ་བོར་ནས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་སོང་སྟེ་ཕྱིན་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། ། མཁན་པོ། འདི་ལྟར་བདག་ཅག་གིས་བདག་ཅག་གི་བགྱི་བ་གང་ལགས་པ་དེ་བགྱིས་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འཁོར་ལྔ་བརྒྱ་དན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བདག་གིས་འཁོར་ལ་བལྟས་ལགས་ཏེ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན་བདག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །འོད་སྲུང ། ཚུར་ཤོག ། ཚངས་པར་སྤྱད་པ་སྤྱོད་ཅིག་།དེ་ཉིད་ཀྱིས་ཚེ་དང་ལྡན་པ་དེ་དག་རབ་ཏུ་བྱུང་བ་དང ། དེས་བསྙེན་པར་རྫོགས་པ་དང ། དེས་དགེ་སློང་གི་དངོས་པོར་གྱུར་ཏོ། །དེའི་ཚེ་ལྟེང་རྒྱས་འོད་སྲུང་
122a
༄#། །རལ་པ་ཅན་གྱི་སྤུན་ཆུ་ཀླུང་འོད་སྲུང་དང ། ག་ཡཱ་འོད་སྲུང་གཉིས་འཁོར་ཉིས་བརྒྱ་ལྔ་བཅུ་གཉིས་བརྒྱ་ལྔ་བཅུ་དང ། ཆུ་ཀླུང་ནཻ་རཉྫ་ནཱའི་མཇུག་གི་འགྲམ་གྱི་བསྟི་གནས་ན་དཀའ་ཐུབ་སྤྱོད་དོ། །ཆུ་ཀླུང་འོད་སྲུང་དང ། ག་ཡཱ་འོད་སྲུང་སྤུན་གྱིས་གཡང་གཞི་དང ། ཤིང་ཤུན་དང ། འཁར་བ་དང ། རིལ་པ་སྤྱི་བླུགས་དང ། བླུགས་གཟར་དེ་དག་ཆུ་ཀླུང་ནཻ་རཉྫ་ནས་ཁྱེར་བ་མཐོང་ངོ ། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། བདག་ཅག་གི་ཚངས་པ་མཚུངས་པར་སྤྱོད་པ་རྣམས་རྒྱལ་པོའམ། ཆོམ་རྐུན་ནམ། མེའམ། ཆུས་ཉེས་དམིགས་འགའ་ཞིག་བྱུང་བར་མ་གྱུར་གྲང ། མ་ལ། བདག་གིས་ཚངས་པ་མཚུངས་པར་སྤྱོད་པ་རྣམས་བཙལ་ལོ་སྙམ་མོ། །དེ་ནས་ཆུ་ཀླུང་འོད་སྲུང་དང ། ག་ཡཱ་འོད་སྲུང་སྤུན་དག་ལྟེང་རྒྱས་འོད་སྲུང་རལ་པ་ཅན་ཚོལ་ཞིང་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་དོང་བ་དང་དེའི་ཚེ་ཚེ་དང་ལྡན་པ་ལྟེང་རྒྱས་འོད་སྲུང་རལ་པ་ཅན་སྐྲ་བྱི་སྣམ་སྦྱར་བགོས་ནས་འཁོར་ལྔ་བརྒྱ་དང ། བཅོམ་ལྡན་འདས་ཀྱི་སྤྱན་སྔ་ན་ཆོས་མཉན་པའི་ཕྱིར་འཁོད་དོ། །ཆུ་ཀླུང་འོད་སྲུང་དང ། ག་ཡཱ་འོད་སྲུང་གིས་ལྟེང་རྒྱས་འོད་སྲུང་རལ་པ་ཅན་སྐྲ་བྱི་སྣམ་སྦྱར་བགོས་ནས་བཅོམ་ལྡན་འདས་ཀྱི་སྤྱན་སྔ་ན་ཆོས་མཉན་པའི་ཕྱིར་འདུག་པ་མཐོང་ངོ ། །མཐོང་ནས་ཀྱང་ཚེ་
122b
དང་ལྡན་པ་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། །འོད་སྲུང ། འདི་མཆོག་ཡིན་ལ། དེ་མཆོག་མ་ཡིན་ནམ། འོད་སྲུང་དག་།འདི་ནི་མཆོག་ཡིན་ཏེ། དེ་ནི་མ་ཡིན་ནོ། ། དེ་ནས་ཆུ་ཀླུང་འོད་སྲུང་དང ། ག་ཡཱ་འོད་སྲུང་སྤུན་དག་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་ནི་མཆོག་མ་ཡིན་པ་མ་ཡིན་ཞིང་ཆོས་བཤད་པའང་མཆོག་མ་ཡིན་པ་མ་ཡིན་ཏེ། གང་གི་ཕྱིར་ད་ལྟར་ལྟེང་རྒྱས་འོད་སྲུང་རལ་པ་ཅན་བཙས་ནས་ལོ་བརྒྱ་ཉི་ཤུ་ལྷག་ལོན་པ་རྒས་འཁོགས་གཏུགས་པ་མ་ག་དྷའི་མི་རྣམས་ཀྱིས་བཀུར་སྟིར་བྱས། བླ་མར་བྱས། བརྗེད་པར་བྱས།་མཆོད་པར་བྱས་ཤིང་དགྲ་བཅོམ་པར་བཀུར་བ་དེ་ཡང་ལན་གཉིས་ཀྱི་བར་དུ་དགེ་སྦྱོང་ཆེན་པོའི་སྤྱན་སྔར་རབ་ཏུ་བྱུང་བར་ཁས་བླངས་ཀྱི། མ་ལ་བདག་ཅག་ཀྱང་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བྱའོ་སྙམ་དུ་བསམས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན། བདག་ཅག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། ། ཁྱོད་ཀྱིས་འཁོར་ལ་བལྟས་སམ། དགེ་སྦྱོང་ཆེན་པོ། མ་བལྟས་ལགས་སོ། །འོད་སྲུང་དག་།དེའི་ཕྱིར་རེ་ཞིག་འཁོར་ལ་ལྟོས་ཤིག་།འདི་ལྟར་ཁྱོད་ལྟ་བུའི་མི་གྲགས་པ་དང་ལྡན་པ།
123a
༄#། །ཤེས་ཉེན་ཅན་དག་གིས་ནི་འཁོར་ལ་བལྟ་བ་ལེགས་པ་ཡིན་ནོ། །དེ་ནས་ཆུ་ཀླུང་འོད་སྲུང་དང ། ག་ཡཱ་འོད་སྲུང་སྤུན་རང་གི་བསྟི་གནས་གང་ན་བ་དེར་དོང་སྟེ་ཕྱིན་ནས་བྲམ་ཟེའི་ཁྱེའུ་རྣམས་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་དག། ཤེས་པར་གྱིས་ཤིག་།ཁོ་བོ་ཅག་ནི་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱད་པ་སྤྱོད་ན། ཤེས་ལྡན་དག་ཅི་བྱེད། མཁན་པོ་དག་།བདག་ཅག་ཅུང་ཟད་ཅི་འཚལ་བ་དེ་ཐམས་ཅད་ནི་མཁན་པོ་དག་ལ་བརྟེན་ནས་ལགས་པས། གལ་ཏེ་མཁན་པོ་དག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱོད་ན། བདག་ཅག་ཀྱང་མཁན་པོ་དག་རབ་ཏུ་བྱུང་བའི་རྗེས་སུ་རབ་ཏུ་འབྱུང་ངོ ། །བྲམ་ཟེའི་ཁྱེའུ་དག་།དེའི་དུས་ད་ཡིན་པར་ཤེས་པར་གྱིས་ཤིག་།དེ་ནས་ཆུ་ཀླུང་འོད་སྲུང་དང ། ག་ཡཱ་འོད་སྲུང་སྤུན་འཁོར་ཉིས་བརྒྱ་ལྔ་བཅུ་ཉིས་བརྒྱ་ལྔ་བཅུ་དང ། བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ། བདག་ཅག་གིས་འཁོར་ལ་བལྟས་ལགས་ཏེ། དགེ་སྦྱོང་ཆེན་པོ། བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན་བདག་ཀྱང་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །འོད་སྲུང་དག་།ཚུར་ཤོག།
123b
ཚངས་པར་སྤྱད་པ་སྤྱོད་ཅིག་།དེ་ཉིད་ཀྱིས་ཚེ་དང་ལྡན་པ་དེ་རྣམས་རབ་ཏུ་བྱུང་བ་དང ། དེས་བསྙེན་པར་རྫོགས་པ་དང ། དེས་དགེ་སློང་གི་དངོས་པོར་གྱུར་ཏོ། །དེ་ནས་བཅོམ་ལྡན་འདས་ཀྱིས་རལ་པ་ཅན་སྟོང་པོ་དེ་རབ་ཏུ་བྱུང ། བསྙེན་པར་རྫོགས་པར་མཛད་ནས་ལྟེང་རྒྱས་སུ་ཇི་ཙམ་བཞེད་ཀྱི་བར་དུ་བཞུགས་ནས། ག་ཡཱ་གང་ན་བ་དེར་རྒྱུ་ཞིང་གཤེགས་ཏེ་རིམ་གྱིས་རྒྱུ་ཞིང་གཤེགས་པ་ན་ག་ཡཱར་བྱོན་ནས། ག་ཡཱའི་མགོའི་མཆོད་རྟེན་ལ་སྔོན་གྱི་རལ་པ་ཅན་ཐམས་ཅད་རབ་ཏུ་བྱུང་བའི་དགེ་སློང་སྟོང་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་སྟོང་པོ་དེ་ལ་ཆོ་འཕྲུལ་རྣམ་པ་གསུམ་གྱིས་འདོམས་པར་མཛད་དེ། རྫུ་འཕྲུལ་གྱི་ཆོ་འཕྲུལ་དང ། ཀུན་རྗོད་པའི་ཆོ་འཕྲུལ་དང ། རྗེས་སུ་བསྟན་པའི་ཆོ་འཕྲུལ་ལོ། །དེ་ལ་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ནི་འདི་ཡིན་ཏེ། དེ་ནས་བཅོམ་ལྡན་འདས་ཀྱིས་ཇི་ལྟར་ཐུགས་མཉམ་པར་བཞག་པ་ཉིད་ཀྱི་གདན་གྱི་ནང་དུ་མི་སྣང་བར་གྱུར་ཅིང་ཤར་ཕྱོགས་གྱི་སྟེང་གི་བར་སྣང་ལ་མངོན་པར་འཕགས་ནས། སྤྱོད་ལམ་རྣམ་པ་བཞི་མཛད་དེ། འདི་ལྟ་སྟེ། འཆག་པ་དང ། བཞེངས་པ་དང ། བཞུགས་པ་དང ། མནལ་བར་མཛད་དོ། །མེའི་ཏིང་ངེ་འཛིན་ལ་སྙོམས་པར་ཞུགས་པར་མཛད་དེ། མེའི་ཏིང་ངེ་འཛིན་ལ་སྙོམས་པར་ཞུགས་པ་ན། སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་
124a
༄#། །རྣམ་པ་སྣ་ཚོགས་དག་འབྱིན་པར་མཛད་དོ། །འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་དང ། ཤེལ་གྱི་ཁ་དོག་གོ་།ཆོ་འཕྲུལ་ཟུང་དུ་སྟོན་པར་མཛད་དེ། སྐུའི་སྨད་ནས་མེ་འབར་བར་མཛད་ལ། སྐུའི་སྟོད་ལས་ཆུ་གྲང་མོའི་རྒྱུན་འབེབས་པར་མཛད་དོ། །སྐུའི་སྟོད་ནས་མེ་འབར་བར་མཛད་ལ། སྐུའི་སྨད་ནས་ཆུ་གྲང་མོའི་རྒྱུན་འབེབས་པར་མཛད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང ། ནུབ་དང།་བྱང་ཕྱོགས་སུའང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་མཛད་པ་རྣམས་བསྡུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ཏེ། དེ་ལ་འདི་ནི་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ཡིན་ནོ། །དེ་ལ་བཅོམ་ལྡན་འདས་ཀྱི་ཀུན་རྗོད་པའི་ཆོ་འཕྲུལ་ནི་འདི་ཡིན་ཏེ། དགེ་སློང་དག་།ཁྱོད་ཀྱི་སེམས་ནི་འདི་ལྟ་བུའོ། །ཁྱོད་ཀྱི་ཡིད་ནི་འདི་ལྟ་བུའོ། །རྣམ་པར་ཤེས་པ་ནི་འདི་ལྟ་བུའོ། །འདི་ནི་རྟོག་ཅིག་།འདི་ནི་མ་རྟོག་ཅིག་།འདི་ནི་ཡིད་ལ་བྱོས་ཤིག་།འདི་ནི་ཡིད་ལ་མ་བྱེད་ཅིག་།འདི་ནི་སྤོངས་ཤིག་།འདི་ནི་མ་སྤངས་ཤིག། འདི་ནི་ལུས་ཀྱིས་མངོན་སུམ་དུ་བྱས་ལ་རྫོགས་པར་གྱིས་ཏེ་མནོས་ཤིག་།འདི་ནི་བཅོམ་ལྡན་
124b
འདས་ཀྱི་ཀུན་རྗོད་པའི་ཆོ་འཕྲུལ་ཡིན་ནོ། །དེ་ལ་བཅོམ་ལྡན་འདས་ཀྱི་རྗེས་སུ་བསྟན་པའི་ཆོ་འཕྲུལ་ནི་འདི་ཡིན་ཏེ། དགེ་སློང་དག་།འདི་ཐམས་ཅད་ནི་ཀུན་ཏུ་འབར་བ་ཡིན་ནོ། །དགེ་སློང་དག་།ཐམས་ཅད་ཀུན་ཏུ་འབར་བ་དེ་ཅི་ཡིན་ཞེ་ན། དགེ་སློང་དག་།མིག་དང ། གཟུགས་དང ། མིག་གི་རྣམ་པར་ཤེས་པ་དང ། མིག་གི་འདུས་ཏེ་རེག་པ་ཀུན་ཏུ་འབར་བ་ཡིན་ཞིང ། མིག་གི་འདུས་ཏེ་རེག་པའི་རྐྱེན་གྱིས་ནང་གི་ཚོར་བ་བདེ་བའམ། སྡུག་བསྔལ་བའམ། བདེ་བའང་མ་ཡིན་སྡུག་བསྔལ་བའང་མ་ཡིན་པ་འབྱུང་བ་གང་ཡིན་པ་དེའང་ཀུན་ཏུ་འབར་བ་ཡིན་ནོ། །དགེ་སློང་དག་།རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་དང ། ཡིད་ཀྱི་རྣམ་པར་ཤེས་པ་དང ། ཡིད་ཀྱི་འདུས་ཏེ་རེག་པ་ནི་ཀུན་ཏུ་འབར་བ་ཡིན་ཞིང ། ། ཡིད་ཀྱི་འདུས་ཏེ་རེག་པའི་རྐྱེན་གྱིས་ནང་གི་ཚོར་བའམ། སྡུག་བསྔལ་བའམ། བདེ་བའང་མ་ཡིན། སྡུག་བསྔལ་བའང་མ་ཡིན་པ་འབྱུང་བ་གང་ཡིན་པ་དེའང་ཀུན་ཏུ་འབར་བ་ཡིན་ནོ། །གང་གིས་ཀུན་ཏུ་འབར་བ་འདོད་ཆགས་ཀྱི་མེ་དང ། ཞེ་སྡང་གི་མེ་དང ། གཏི་མུག་གི་མེས་ཀུན་ཏུ་འབར་བ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲ་སྔགས་འདྲེན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་སྟེ། སྡུག་བསྔལ་གྱིས་ཀུན་ཏུ་འབར་བའོ་ཞེས་སྨྲའོ། །དེ་ལ་འདི་ནི་བཅོམ་ལྡན་འདས་ཀྱིས་རྗེས་སུ་
125a
༄#། །བསྟན་པའི་ཆོ་འཕྲུལ་ཡིན་ནོ། །ཆོས་ཀྱི་རྣམ་གྲངས་འདི་བཤད་པ་ན། སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ག་ཡཱའི་མགོའི་མཆོད་རྟེན་ལ་སྔོན་ཐམས་ཅད་རལ་པ་ཅན་གྱུར་པའི་དགེ་སློང་སྟོང་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་གཅིག་ཏུ་བཞུགས་སོ། །རྒྱལ་པོ་གཟུགས་ཅན་སྙིང་པོའི་ཞོ་ཤས་འཚོ་བའི་མི་རྣམས་ལྗོངས་རྒྱུ་བ་ན། ཤཱཀྱ་རྣམས་ཀྱི་གཞོན་ནུ་གངས་རིའི་ངོས་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བ་ཞིག་ཏུ་བྱུང་བ་དེ་བྲམ་ཟེ་མཚན་མཁན་དང ། ལྟས་མཁན་རྣམས་ཀྱིས་གལ་ཏེ་ཁྱིམ་པར་གྱུར་ཏེ་ཁྱིམ་ན་གནས་ན་ནི་འཁོར་ལོས་བསྒྱུར་བའི་རྒྱལ་པོ་ཆོས་དང་ལྡན་པའི་ཆོས་ཀྱི་རྒྱལ་པོ་མཐའ་བཞིར་རྣམ་པར་རྒྱལ་བ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་ཡིན་པར་འགྱུར་རོ། །འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང །
125b
ཁྱིམ་བདག་རིན་པོ་ཆེ་དང ། བདུན་པ་བློན་པོ་རིན་པོ་ཆེན་ཡིན་ནོ། །དེ་ལ་བུ་སྟོང་ཡང་ཚང་བར་འབྱུང་བར་འགྱུར་ཏེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་བདོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང ། ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་བ་ལུང་བསྟན་ཏོ་ཞེས་ཐོས་སོ། །ཐོས་ནས་ཀྱང་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་གང་ན་བ་དེར་སོང་སྟེ་ཕྱིན་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ།མཁྱེན་པར་མཛད་དུ་གསོལ། བདག་ཅག་འདིར་ལྷའི་ཡུལ་ན་རྒྱུ་བ་ན་ཤཱཀྱ་རྣམས་ཀྱི་གཞོན་ནུ་གངས་རིའི་ངོས་ཞེས་བྱ་བ་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་བར་ལུང་བསྟན་པ་ཞིག་ཐོས་སོ་ཞེས་བྱ་བའི་བར་གོང་མ་བཞིན་དུའོ། །ལྷ།་དེ་ཁུམ་ཞིག་།ལྷ་ཆེས་གཙོ་བོ་བས་
126a
༄#། །ཆེས་གཙོ་བོར་འགྱུར་དུ་མཆིའོ། །གྲོང་བ་དག་།ཤཱཀྱ་རྣམས་ཀྱི་གཞོན་ནུ་གངས་རིའི་ངོས་ཞེས་བྱ་བ་ནས། གྲགས་པར་འགྱུར་རོ་ཞེས་བྱ་བའི་བར་གོང་མ་བཞིན་ཏེ། ལྷ།་དེ་ཁུམ་ཞིག་།ལྷ་ཆེས་གཙོ་བོ་བས་ཆེས་གཙོ་བོར་འགྱུར་དུ་མཆིའོ་ཞེས་ཁྱེད་ཅག་དེ་སྐད་མ་སྨྲ་ཞིག་།དེ་ཅིའི་ཕྱིར་ཞེ་ན། གྲོང་པ་དག་།ཤཱཀྱ་རྣམས་ཀྱི་གཞོན་ནུ་ཞེས་བྱ་བ་ནས་བྱུང་བ་ཞེས་བྱ་བའི་བར་གོང་མ་བཞིན་དུ་ཏེ། གལ་ཏེ་འཁོར་ལོས་བསྒྱུར་བའི་རྒྱལ་པོར་གྱུར་ན་དེའི་གཡོག་བྱའོ། །གལ་ཏེ་སྐྲ་དང ། ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པར་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་སྒྲ་རྣམ་པར་གྲགས་པར་གྱུར་ན་དེའི་ཉན་ཐོས་སུ་ཁས་བླངས་བར་བྱའོ། །དེ་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟང་གི་གཞི་ལ་འདུག་ནས་སྨོན་པའི་གཞི་ལྔ་ལ་སྨོན་པར་བྱེད་དེ། ཀྱེ་མའོ། །བདག་གི་ཡུལ་དུ་འཇིག་རྟེན་གྱི་སྟོན་པ། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། བཅོམ་ལྡན་འདས་བྱུང་བ་དང ། དེ་
126b
ལའང་བལྟ་བའི་ཕྱིར་བདག་ཉེ་བར་འགྲོ་བ་དང ། ཉེ་བར་སོང་བ་ན་དེས་ཀྱང་བདག་ལ་ཆོས་བཤད་པ་དང ། བདག་གིས་ཀྱང་ཆོས་བཤད་པ་དེ་ཤེས་པ་དང ། བདག་གིས་ཆོས་ཤེས་ནས་བསླབ་པ་བཅས་ཤིང་བསླབ་པ་དེ་ཡང་བདག་གིས་བླངས་ཏེ་གནས་ཀྱང་ཅི་མ་རུང་སྙམ་མོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་དེ་སྟེང་གི་ཁང་བཟང་གི་གཞི་ལ་འདུག་ནས། སྨོན་པའི་གཞི་ལྔ་སྨོན་པ་བྱེད་དེ། ཀྱེ་མའོ། བདག་གི་ཡུལ་དུ་འཇིག་རྟེན་གྱི་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནས་ཞེས་བྱ་བའི་བར་གོང་མ་བཞིན་ནོ། །མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་ཞོ་ཤས་འཚོ་བ་དག་ཅིག་ལྗོངས་རྒྱུ་བ་ན། ཤཱཀྱ་རྣམས་ཀྱི་གཞོན་ནུ་གངས་རིའི་ངོས་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་བ་གང་ཡིན་པ་དེ་བྲམ་ཟེ་མཚན་མཁན་དང ། ལྟས་མཁན་ཞེས་བྱ་བ་ནས་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་ལུང་བསྟན་པ་ཞེས་བྱ་བའི་བར་གོང་མ་བཞིན་དུའོ། །དེ་སྐྲ་དང ། ཁ་སྤུ་\?\་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
127a
༄#། །རྒྱས་པས་དེ་ག་ཡཱ་ན། ག་ཡཱའི་མགོའི་མཆོད་རྟེན་ལ་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་སྟོང་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ།་བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་གཅིག་ཏུ་བཞུགས་སོ་ཞེས་ཐོས་སོ། །ཐོས་ནས་ཀྱང་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་གང་ན་བ་དེར་དོང་སྟེ་ལྷགས་ནས། མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ།མཁྱེན་པར་མཛད་དུ་གསོལ། བདག་ཅག་འདི་ན་ལྷའི་ཡུལ་ན་རྒྱུ་བ་ན། ཤཱཀྱ་རྣམས་ཀྱི་གཞོན་ནུ་གང་ལགས་པ་དེ་ཞེས་བྱ་བ་ནས། འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་བྱ་བའི་བར་གོང་མ་བཞིན་དུ་སྟེ། དེ་སྐྲ་དང ། ཁ་སྤུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་ལྦ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། དེ་ག་ཡཱ་ན་ག་ཡའི་མཆོད་རྟེན་ལ་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ་ཞེས་བྱ་བ་ནས། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་
127b
གཅིག་ཏུ་བཞུགས་སོ་ཞེས་བྱ་བའི་བར་དུ་སྟེ། ལྷ།་དེ་དག་ལ་བཀུར་སྟི་མཛོད་ཅིག་དང ། དེ་ལྟ་ན་ལྷ་གཙོ་བོ་བས་ཆེས་གཙོ་བོར་འགྱུར་རོ། །དེ་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་མི་ཞིག་ལ་བསྒོ་བ། ཀཝའེ་ནང་རྗེ། ཚུར། ཁྱོད་བཅོམ་ལྡན་འདས་གང་ན་བ་དེར་སོང་ལ་སོང་ནས། ཁོ་བོའི་ཚིག་འདི་དག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱོས་ལ་གནོད་པ་ཆུང་ངམ། ཉམ་ང་བ་ཆུང་ངམ། འཚོའམ། བསྐྱོད་པ་ཡང་དམ། སྟོབས་དང ། བདེ་བ་དང ། སྐུ་ཉམས་དང་ལྡན་ནམ། རེག་པར་སྤྱོད་དམ་ཞེས་ཞུས་ལ་འདི་སྐད་ཅེས་ཀྱང་གསོལ་ཅིག་།བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ལ་ཇི་སྲིད་འཚོའི་བར་དུ་ན་བཟའ་ཆོས་གོས་དང ། བསོད་སྙོམས་དང ། གཟིམས་ཆ་དང ། སྙུན་དཔྱད་ཀྱི་རྐྱེན་སྨན་དང ། ཡོ་བྱད་རྣམས་ཀྱིས་བསྙེན་བཀུར་བགྱིད་ན། བཅོམ་ལྡན་འདས་རྒྱལ་པོའི་ཁབ་ཏུ་གཤེགས་སུ་གསོལ་ཞེས་གསོལ་ཅིག་།ལྷ།བཀའ་བཞིན་འཚལ་ཞེས་མི་དེས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལས་མཉན་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་ནས། བཅོམ་ལྡན་འདས་ལ་མི་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་ཞབས་གཉིས་ལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་མགོ་བོས་
128a
༄#། །ཕྱག་འཚལ་ནས། གནོད་པ་ཆུང་ངམ། ཉམ་ང་བ་ཆུང་ངམ་ཞེས་བྱ་བ་ནས། རེག་པར་སྤྱོད་དམ་ཞེས་བྱ་བའི་བར་དུ་གོང་མ་བཞིན་དུ་སྟེ་སྙུན་གསོལ་ལགས་སོ།། ཀྱེ།་མི་ཁྱོད་དང ། མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བདེ་བར་གྱུར་ཅིག་།བཙུན་པ། མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་མཆིད་ནས། འདི་སྐད་ཅེས་བདག་།བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ལ་ཇི་སྲིད་འཚོའི་བར་དུ་ན་བཟའ་དང ། ཆོས་གོས་དང ། བསོད་སྙོམས་དང ། གཟིམས་ཆ་དང ། སྙུན་དཔྱད་ཀྱི་རྐྱེན་སྨན་དང ། ཡོ་བྱད་རྣམས་ཀྱིས་བསྙེན་བཀུར་བགྱིད་ན། བཅོམ་ལྡན་འདས་རྒྱལ་པོའི་ཁབ་ཏུ་གཤེགས་སུ་གསོལ་ཞེས་མཆི་ལགས་སོ། །བཅོམ་ལྡན་འདས་ཀྱིས་དེ་ལ་ཅང་མི་གསུངས་པས་གནང་ངོ ། །དེ་ནས་མི་དེས་བཅོམ་ལྡན་འདས་ཅང་མི་གསུངས་པས་གནང་བར་རིག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཞེས་བྱ་བ་ནས། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཞེས་བྱ་བའི་བར་ཤ་སྟག་དང་ཐབས་གཅིག་ཏུ་མ་ག་དྷའི་ལྗོངས་རྒྱུ་ཞིང་གཤེགས་པ་ན། ཡུལ་མ་
128b
ག་དྷ་\?\་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ཡོད་པ་ག་ན་བ་དེར་གཤེགས་སོ། །དེ་ནས་བཅོམ་ལྡན་འདས་ལེགས་པར་རབ་གནས་སུ་བྱོན་ནས། མ་ག་དྷ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ཡོད་པ་ན་བཞུགས་སོ། །མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་སྔོན་ཐམས་ཅད་རལ་པ་ཅན་དུ་གྱུར་བའི་དགེ་སློང་གི་དགེ་འདུན་ཆེན་པོ་སྟོང་གི་དགེ་སློང་གི་དགེ་འདུན་ཆེན་པོ་ཞེས་བྱ་བ་ནས། སེམས་ཤིན་ཏུ་རྣམ་པར་གྲོལ་བ་ཞེས་བྱ་བའི་བར་དུ་སྟེ། མ་ག་དྷའི་ལྗོངས་རྒྱུ་ཞིང་གཤེགས་པ་ན།་མ་ག་དྷ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ཡོད་པ་གང་ན་བ་དེར་གཤེགས་ཏེ། མ་ག་དྷ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ཡོད་པ་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཤིང་རྟ་བཟང་པོའི་ནང་དུ་ཞུགས་ཏེ། རྒྱལ་པོའི་མཐུ་ཆེན་པོ་དང ། རྒྱལ་པོའི་འབྱོར་པ་ཆེན་པོས་རྟ་དང ། ཤིང་རྟ་བརྒྱ་སྟོང་སྙེད་དང་ལྷན་ཅིག་འཁོར་བརྒྱ་ཕྲག་དུ་མ་དང་རྒྱལ་པོའི་ཁབ་ནས་བྱུང་ནས་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་བ་ན། དེའི་ཤིང་རྟའི་འཁོར་ལོ་སའི་ནང་དུ་བྱིང་བར་གྱུར་ཏོ། །དེས་བསམས་པ། བདག་གིས་ལས་སྐྱོན་ཅན་ཅུང་ཟད་ཅིག་བྱས་པར་མ་གྱུར་གྲང་སྙམ་མོ། །ལྷ་རྣམས་ཀྱིས་དེ་ལ་སྨྲས་པ། རྒྱལ་པོ་ཆེན་པོ།
129a
༄#། །ཁྱོད་ཀྱིས་ལས་སྐྱོན་ཅན་མ་བྱས་མོད་ཀྱི་ཁྱོད་དང་ལྷན་ཅིག་ལས་མཚུངས་པར་སྤྱོད་པ་གང་ཡིན་པ་དེ་དག་བཙོན་ར་ན་འདུག་གི་དེ་དག་ཐོན་ཅིག་།རྒྱལ་པོས་སྨྲས་པ། གལ་ཏེ་དེ་ལྟ་ན་གདོན་ནོ་ཞེས་རྒྱལ་པོས་བཙོན་རྣམས་འདོན་དུ་བཅུག་གོ་།ཡང་རྒྱལ་པོ་ཕྱིར་བྱུང་བར་བརྩམས་པ་ན་དེའི་དབུ་རྒྱན་སྒོ་ལ་ཐུག་གོ་།དེ་ནས་ཡང་བསམས་པ། བདག་གིས་ནི་གདོན་མི་ཟ་བར་ལས་སྐྱོན་ཅན་ཞིག་བྱས་ཏེ་དེས་ན་བདག་ལ་ལྟས་ངན་པ་གཞན་སྒོ་ལ་དབུ་རྒྱན་ཐུག་པ་འདི་བྱུང་ངོ་སྙམ་མོ། །ལྷ་དེ་རྣམས་ཀྱིས་ཡང་སྨྲས་པ། རྒྱལ་པོ་ཆེན་པོ་ཁྱོད་ཀྱིས་ལས་སྐྱོན་ཅན་མ་བྱས་མོད་ཀྱི་ཁྱོད་དང་ལྷན་ཅིག་ལས་མཚུངས་པར་སྤྱད་པ་གང་ཡིན་པ་དེ་དག་ཁ་ཅིག་ནི་འདུས་ཀྱང་ཁ་ཅིག་ནི་ཡུལ་ལྗོངས་གཞན་ག་གེ་མོ་ཞེས་བྱ་བ་དག་ན་ལས་ཀྱི་མཐའ་བྱེད་ཅིང་འདུག་པ་དེ་དག་སྦྲོན་ཅིག་།རྒྱལ་པོས་ཡུལ་དེ་ན་གནས་པའི་སྐྱེ་བོའི་ཚོགས་ཐམས་ཅད་ཀྱང་བཀུག་གོ་།དེ་ནས་རྒྱལ་པོ་གཟུགས་ཅན་སྙིང་པོ་ཤིང་རྟ་ཁྲི་ཉིས་སྟོང་དང ། ཞབས་འབྲིང་པ་རྟ་པའི་ཚོགས་ཁྲི་བརྒྱད་སྟོང་དང ། མ་ག་དྷའི་བྲམ་ཟེ་དང ། ཁྱིམ་བདག་བརྒྱ་སྟོང་ཕྲག་དུ་མ་དང་ལྷན་ཅིག་རྒྱལ་པོའི་ཁབ་ནས་བྱུང་སྟེ། བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་ངོ ། །དེ་ཇི་ཙམ་བཞོན་པའི་སའི་བར་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་པ་ཁོ་ནས་
129b
ཀུན་དགའ་ར་བར་ཞུགས་སོ། །མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཐག་ཇི་ཙམ་ནས་བཅོམ་ལྡན་འདས་མཐོང་བའི་བར་དེ་ནས་རྒྱལ་པོའི་མཚན་མ་ལྔ་པོ་ཟེའུ་ཁ་དང ། གདུགས་དང།་རལ་གྲི་དང ། ནོར་བུའི་རྔ་ཡབ་དང ། ལྷམ་ཁྲ་བོ་རྣམས་ཕུད་དོ། །དེ་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་པོའི་མཚན་མ་ལྔ་བཞག་ནས་བཅོམ་ལྡན་འདས་ག་ན་བ་དེར་སོང་སྟེ་ཕྱིན་པ་དང ། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་དེ་རང་གི་མིང་ནས་ཕྱུང་སྟེ་ལན་གསུམ་དུ་གསོལ་པ། བཙུན་པ། བདག་ནི་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །བཙུན་པ། བདག་ནི་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །རྒྱལ་པོ། ལགས་སོ། །རྒྱལ་པོ།་དེ་དེ་བཞིན་ནོ། །དེ་དེ་བཞིན་ཏེ། རྒྱལ་པོ་ཆེན་པོ། ཁྱོད་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། །རྒྱལ་པོ་ཆེན་པོ། ཁྱོད་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། །རྒྱལ་པོ་ཡིན་ནོ། །རྒྱལ་པོ་ཆེན་པོ། ཁྱོད་རང་གི་སྟན་ཇི་ལྟ་བ་ལ་འདུག་ཅིག་།དེ་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།མ་ག་དྷའི་བྲམ་ཟེ་དང ། ཁྱིམ་བདག་ཁ་ཅིག་ནི་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འཁོད་
130a
༄#། །དོ། །ཁ་ཅིག་ནི་བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བ་དང ། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་ནི་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་འཁོད་དོ། །ཁ་ཅིག་གིས་ནི་བཅོམ་ལྡན་འདས་རྒྱང་རིང་པོ་ནས་མཐོང་ནས་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །དེའི་ཚེ་ཚེ་དང་ལྡན་པ་ལྟེང་རྒྱས་འོད་སྲུང་འཁོར་དང་བཅས་ཏེ་དེ་ཉིད་དུ་འདུས་ཤིང་འདུག་པར་གྱུར་ཏོ། །དེ་ནས་མ་ག་དྷའི་བྲམ་ཟེ་དང ། ཁྱིམ་བདག་རྣམས་འདི་སྙམ་དུ་སེམས་ཏེ། ཅི། དགེ་སྦྱོང་ཆེན་པོ། ལྟེང་རྒྱས་འོད་སྲུང་རལ་བ་ཅན་གྱི་ཚངས་པར་སྤྱོད་པ་ལ་སྤྱད་དམ། འོན་ཏེ་ལྟེང་རྒྱས་འོད་སྲུང་རལ་པ་ཅན་དགེ་སྦྱོང་ཆེན་པོའི་ཚངས་པར་སྤྱད་པ་ལ་སྤྱོད་སྙམ་མོ། །དེ་ནས་བཅོམ་ལྡན་འདས་ཀྱི་ཐུག་ཀྱིས་མ་ག་དྷའི་བྲམ་ཟེ་དང ། ཁྱིམ་བདག་རྣམས་ཀྱི་སེམས་མཁྱེན་ནས་ཚེ་དང་ལྡན་པ་ལྟེང་རྒྱས་འོད་སྲུང་རལ་པ་ཅན་ལ་ཚིགས་སུ་བཅད་པའི་དབྱངས་ཀྱིས་དྲི་བ་རྨས་པ། ལྟེང་རྒྱས་གནས་པ་ཁྱོད་འདིར་ཅི་མཐོང་ན། །མེ་སྤངས་ནས་ནི་བརྟུལ་ཤུགས་འདི་དག་སྤྱོད། །ཁྱོད་ཀྱིས་ཇི་ལྟར་མེ་ཡི་མཆོད་སྤངས་པ། །དོན་དེ་འོད་སྲུང་ང་ལ་སྨྲ་བར་གྱིས། །ལྟེང་རྒྱས་འོད་སྲུང་གིས་གསོལ་པ། འདི་ན་ཁ་ཅིག་ཟས་སྐོམ་དེ་བཞིན་ནོ། །འདོད་
130b
པ་དག་དང་བུད་མེད་ཁོ་ན་སྨྲ། །དེ་དག་ཕུང་པོའི་དྲི་མར་རབ་མཐོང་སྟེ། །དེས་བདག་མཆོད་སྦྱིན་མི་དགའ་བསྲེག་བླུགས་མིན། །ཁྱོད་ནི་འདོད་དང་བཟའ་དང་བཏུང་བ་དང ། །དེ་བཞིན་རོ་ལ་ཡིད་ནི་མི་དགའ་ན། །ལྷ་མི་འཇིག་རྟེན་ལ་ཅི་ཁྱོད་ཀྱི་ཡིད། །དགའ་བ་ཡིན་ནམ་འོད་སྲུང་དྲི་ཡི་སྨྲོས། །ཕུང་པོ་མ་མཆིས་ཞི་བ་ཅི་མ་མཆིས། །འདོད་སྲེད་མ་ཆགས་གཞན་དུ་འགྱུར་མ་མཆིས། །གཞན་གྱིས་མི་བཀྲིའི་གོ་འཕང་མཆོག་མཐོང་སྟེ། །དེས་བདག་མཆོད་སྦྱིན་མི་དགའ་བསྲེག་བླུགས་མིན། །གོ་འཕང་མི་ཉམས་མཆོག་ནི་མ་མཐོང་བས། །མཆོད་སྦྱིན་བརྟུལ་ཞུགས་དང་ནི་ཞུགས་དག་གིས། །གྲོལ་སྙམ་བདག་གི་ཡིད་ནི་རྨོངས་གྱུར་ཏེ། །དམུས་ལོང་གྱུར་ནས་སྐྱེ་ཤིའི་རྗེས་བཞིན་མཐོང ། །སྐྱོབ་པ་གཙོ་བོ་མཆོག་གིས་ལེགས་བཤད་པ། །གོ་འཕང་འདུས་མ་བྱས་ཏེ་གཟོད་མཐོང་ན། །ཐུབ་པ་གཽ་ཏམ་རྣམ་པར་འདྲེན་ཁྱོད་ནི། །སྐྱེ་བོའི་ཕལ་ཆེན་དོན་བརྩོན་བདེན་ལ་ཞུགས། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་རྟོགས་པ་ལེགས་རྟོགས་ཏེ། །ཁྱོད་ཀྱིས་ཉེས་པར་བསམས་མ་ཡིན། །རབ་ཏུ་ཕྱེ་བའི་ཆོས་རྣམས་ལས། །གཙོ་བོ་གང་ཡིན་དེ་བླངས་སོ། །འོད་སྲུང ། འཁོར་སྐྱོ་བ་སྐྱེད་ཅིག་།དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་བཅོམ་ལྡན་འདས་ཀྱིས་སྐབས་ཕྱེ་ནས་ཇི་ལྟར་སེམས་མཉམ་པར་བཞག་ན་རང་གི་སྟན་གྱི་ནང་དུ་མི་སྣང་བར་གྱུར་ཏོ། །ཤར་ཕྱོགས་ཀྱི་ལྟེང་གི་བར་སྣང་
131a
༄#། །ལ་མངོན་པར་འཕགས་ནས་སྤྱོད་ལམ་རྣམ་པ་བཞི་བྱེད་དེ། སྔ་མ་བཞིན་དུ་ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དག་བསྡུས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནི་བདག་གི་སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །བཅོམ་ལྡན་འདས་ནི་བདག་གི་སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །འོད་སྲུང ། དེ་དེ་བཞིན་ནོ། །དེ་དེ་བཞིན་ཏེ། འོད་སྲུང ། ང་ནི་ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །འོད་སྲུང ། ང་ནི་ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །འོད་སྲུང ། ཁྱོད་རང་གི་སྟན་ཇི་ལྟ་བ་ལ་འདུག་ཅིག་།དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།དེ་ནས་མ་ག་དྷའི་བྲམ་ཟེ་དང ། ཁྱིམ་བདག་རྣམས་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ནི་ལྟེང་རྒྱས་འོད་སྲུང་རལ་བ་ཅན་གྱི་ཚངས་པར་སྤྱོད་པ་ལ་མི་སྤྱོད་ཀྱི་ལྟེང་རྒྱས་འོད་སྲུང་རལ་པ་ཅན་ཉིད་ནི་དགེ་སྦྱོང་ཆེན་པོའི་ཚངས་པར་སྤྱོད་པ་ལ་སྤྱོད་དོ་སྙམ་མོ། །དེ་ནས་བཅོམ་
131b
ལྡན་འདས་ཀྱིས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་བཀའ་སྩལ་པ། རྒྱལ་པོ་ཆེན་པོ། གཟུགས་ལ་སྐྱེ་བའང་ཡོད། འཇིག་པའང་ཡོད། དེའི་སྐྱེ་བ་དང ། འཇིག་པའང་རིག་པར་བྱའོ། །རྒྱལ་པོ་ཆེན་པོ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ལ་སྐྱེ་བའང་ཡོད། འཇིག་པའང་ཡོད། དེའི་སྐྱེ་བ་དང ། འཇིག་པའང་རིག་པར་བྱའོ།། རྒྱལ་པོ་ཆེན་པོ། ཡང་རིགས་ཀྱི་བུས་གཟུགས་ཀྱི་སྐྱེ་བ་དང ། འཇིག་པའི་ཆོས་ཉིད་རིག་ནས་གཟུགས་དེ་ཡོངས་སུ་ཤེས་སོ། །རྒྱལ་པོ་ཆེན་པོ། རིགས་ཀྱི་བུས་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་སྐྱེ་བ་དང ། འཇིག་པའི་ཆོས་ཉིད་རིག་ནས་རྣམ་པར་ཤེས་པ་ཡོངས་སུ་ཤེས་སོ། །རྒྱལ་པོ་ཆེན་པོ། རིགས་ཀྱི་བུས་གཟུགས་ཡོངས་སུ་ཤེས་ན་གཟུགས་ལ་བདག་གམ། བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ། རིགས་ཀྱི་བུས་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ཡོངས་སུ་ཤེས་ན་བདག་གམ། བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ། རིགས་ཀྱི་བུས་གཟུགས་ལ་བདག་གམ། བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་ན་ཚད་མེད་ཅིང་གྲངས་མེད་པའི་མྱ་ངན་ལས་འདས་པ་ཡིན་
132a
༄#། །ནོ་ཞེས་སྨྲའོ། །རྒྱལ་པོ་ཆེན་པོ། རིགས་ཀྱིས་བུས་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ལ་བདག་གམ། བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་ན་ཚད་མེད་ཅིང་གྲངས་མེད་པའི་མྱ་ངན་ལས་འདས་པ་ཡིན་ནོ་ཞེས་སྨྲའོ། །དེ་ནས་མ་ག་དྷའི་བྲམ་ཟེ་དང ། ཁྱིམ་བདག་རྣམས་འདི་སྙམ་དུ་སེམས་ཏེ། གལ་ཏེ་གཟུགས་བདག་མ་ཡིན། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་བདག་མ་ཡིན་ན། འོ་ན། བདག་གམ། སེམས་ཅན་ནམ། སྲོག་གམ། སྐྱེ་བ་པོའམ། གསོ་བ་པོའམ། གང་ཟག་གམ། ཤེད་ལས་སྐྱེས་སམ། ཤེད་བུའམ། བྱེད་པ་པོའམ། བྱེད་དུ་འཇུག་པ་པོའམ། ཤེས་པ་པོའམ། ཀུན་ནས་ཤེས་པ་པོའམ། སློང་བ་པོའམ། ཀུན་ནས་སློང་བ་པོའམ། སྨྲ་བ་པོའམ། ཀུན་ནས་སྨྲ་བ་པོའམ། ཚོར་བ་པོའམ། ཀུན་ནས་ཚོར་བ་པོ་གང་ཡིན་པ་ནམ་ཡང་མ་བྱུང ། འབྱུང་བར་མི་འགྱུར་ཞིང་ད་ལྟར་ཡང་ཡོད་པ་གང་གིས་དེ་དང ། དེར་བདེ་བ་དང ། སྡིག་པའི་ལས་བྱས་པ་རྣམས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་ཞིང་གང་གིས་ཕུང་པོ་འདི་བོར་ཏེ་ཕུང་པོ་གཞན་དང་ཉིང་མཚམས་སྦྱོར་བ་དེ་སུ་ཞིག་ཡིན་པར་འགྱུར་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་མ་ག་དྷའི་བྲམ་ཟེ་དང ། ཁྱིམ་བདག་རྣམས་ཀྱི་སེམས་
132b
མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།བདག་བདག་ཅེས་བྱ་བ་ནི་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པས་བཏགས་པའི་རྗེས་སུ་ལྟུང་བ་ཡིན་ཏེ། འདི་ལ་བདག་ཅེའམ། བདག་གི་མེད་ཀྱི། དགེ་སློང་དག་།སྐྱེ་བ་ན་སྡུག་བསྔལ་འདི་སྐྱེ་ཞིང་འགག་པ་ནའང་སྡུག་བསྔལ་འདི་འགག་གོ་།སྐྱེ་བ་ན་འདུ་བྱེད་རྣམས་སྐྱེ་ཞིང་འགག་པ་ནའང་འདུ་བྱེད་རྣམས་འགག་པར་འགྱུར་ཏེ། རྒྱུ་དང ། རྐྱེན་དེ་ལ་བརྟེན་ནས་སེམས་ཅན་རྣམས་ཀྱི་འདུ་བྱེད་ཀྱི་རྒྱུད་འཇུག་གོ་།དགེ་སློང་དག་།དེ་བཞིན་གཤེགས་པས་འདུ་བྱེད་ཀྱི་ཉིང་མཚམས་སྦྱོར་བ་ཐུགས་སུ་ཆུད་ནས་སེམས་ཅན་རྣམས་ཀྱི་འཆི་འཕོ་དང ། སྐྱེ་བ་འདོགས་པར་མཛད་དེ། དགེ་སློང་དག་།ངས་ལྷའི་སྤྱན་རྣམ་པར་དག་པའི་མི་ལས་འདས་པའི་སེམས་ཅན་རྣམས་ཀྱི་འཆི་འཕོ་ཞེས་བྱ་བ་ནས། བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་སུ་སྐྱེ་བར་འགྱུར་རོ་ཞེས་བྱ་བར་མཁྱེན་ཏོ་ཞེས་བྱ་བའི་བར་དུ་གོང་མ་བཞིན་ནོ། །དགེ་སློང་དག་།ངས་དེ་ལྟར་མཁྱེན་ཅིང་དེ་ལྟར་གཟིགས་པས་ང་འདི་སྐད་ཅེས་བདག་གམ། སེམས་ཅན་ནམ། ཞེས་བྱ་བ་ནས་ཚོར་བ་པོ་ཞེས་བྱ་བའི་བར་གོང་མ་བཞིན་དུ་སྟེ། གང་ནམ་ཡང་མ་བྱུང ། འབྱུང་བར་མི་འགྱུར་ཞིང་ད་ལྟར་ཡང་ཡོད་པ་མ་ཡིན་པས་གང་གིས་དེ་དང ། དེར་སྡིག་པའི་ལས་བྱས་པ་རྣམས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་ཞིང་གང་གིས་ཕུང་པོ་འདི་བོར་ཏེ་ཕུང་པོ་གཞན་
133a
༄#། །དང ། ཉིང་མཚམས་སྦྱོར་བ་དེ་ཆོས་སུ་བརྡར་བཏགས་པ་མ་གཏོགས་པ་འདི་ཡིན་ནོ་ཞེས་མི་གསུངས་སོ། །དེ་ལ་ཆོས་ཀྱི་བརྡར་བཏགས་པ་ནི་འདི་ཡིན་ཏེ། འདི་ལྟ་སྟེ། འདི་ཡོད་པས་འདི་ཡོད། འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང ། གཟུགས། མིང་དང ། གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ། འདི་མེད་པས་འདི་མེད་ལ་འདི་འགགས་པས་འདི་འགག་པར་འགྱུར་ཏེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་།འདུ་བྱེད་འགགས་པས་རྣམ་པར་ཤེས་པ་འགག་།རྣམ་པར་ཤེས་པ་འགགས་པས་མིང་དང ། གཟུགས་འགག་།མིང་དང ། གཟུགས་འགགས་པས་སྐྱེ་མཆེད་དྲུག་འགག་།སྐྱེ་མཆེད་དྲུག་འགགས་པས་རེག་པ་འགག་།རེག་པ་འགགས་པས་ཚོར་བ་འགགས །
133b
ཚོར་བ་འགགས་པས་སྲེད་པ་འགག་།སྲེད་པ་འགགས་པས་ལེན་པ་འགག་།ལེན་པ་འགགས་པས་སྲིད་པ་འགག་།སྲིད་པ་འགགས་པས་སྐྱེ་བ་འགག་།སྐྱེ་བ་འགགས་པས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་པ་དང ། ཡིད་མི་བདེ་བ་དང ། འཁྲུགས་པ་རྣམས་འགགས་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་།འདུ་བྱེད་རྣམས་ནི་སྡུག་བསྔལ་ལོ། །མྱ་ངན་ལས་འདས་པ་ནི་ཞི་བའོ། །རྒྱུ་ཀུན་འབྱུང་བས་སྡུག་བསྔལ་ཀུན་འབྱུང་ཞིང་རྒྱུ་འགགས་པས་སྡུག་བསྔལ་འགག་སྟེ། རྒྱུན་བཅད་པས་མི་འབྱུང་ཞིང་ཉིང་མཚམས་སྦྱོར་བ་མེད་པས་འགགས་པ་འདི་ཉིད་ནི་སྡུག་བསྔལ་གྱི་མཐའ་ཡིན་ནོ། །དགེ་སློང་དག་།དེ་ལ་ཡོངས་སུ་མྱ་ངན་ལས་འདས་པ་གང་ཞེ་ན། གཞན་མེད་ཀྱི་སྡུག་བསྔལ་འགག་པ་གང་ཡིན་པ་དེ་ནི་ཉེ་བར་ཞི་བ། དེ་ནི་བསིལ་བར་གྱུར་པ། དེ་ནི་ནུབ་པ་སྟེ། དགེ་སློང་དག་།ཞི་བའི་གནས་ནི་འདི་ཡིན་ཏེ།་འདི་ལྟ་སྟེ། ཕུང་པོ་ཐམས་ཅད་སྤངས་པ། སྲེད་པ་ཟད་པ། འདོད་ཆགས་དང་བྲལ་བ་འགགས་པ་མྱ་ངན་ལས་འདས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ལན་གཉིས་སུ་བཀའ་སྩལ་པ། རྒྱལ་པོ་ཆེན་པོ། ཇི་སྙམ་དུ་སེམས། གཟུགས་རྟག་གམ། མི་རྟག་།བཙུན་པ། འདི་མི་རྟག་ལགས་
134a
༄#། །སོ། །མི་རྟག་པ་གང་ཡིན་པ་དེ་སྡུག་བསྔལ་ཡིན་ནམ། སྡུག་བསྔལ་མ་ཡིན། བཙུན་པ། འདི་ནི་སྡུག་བསྔལ་ལགས་སོ། །མི་རྟག་པ་སྡུག་བསྔལ་བ་འགྱུར་བའི་ཆོས་ཅན་གང་ཡིན་པ་དེ་ལ་ཅིག་འཕགས་པའི་ཉན་ཐོས་ཐོས་པ་དང་ལྡན་པ་དེ་དག་འདི་ནི་བདག་ཡིན་ནོ། །བདག་ནི་འདི་ཡིན་ནོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་པར་བྱེད་དམ། བཙུན་པ། མ་ལགས་སོ། །རྒྱལ་པོ་ཆེན་པོ། ཇི་སྙམ་དུ་སེམས། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྟག་གམ། མི་རྟག་བཙུན་པ། འདི་ནི་མི་རྟགས་ལགས་སོ། །མི་རྟག་པ་གང་ཡིན་པ་དེ་སྡུག་བསྔལ་ཡིན་ནམ། སྡུག་བསྔལ་བ་མ་ཡིན། བཙུན་པ། འདི་ནི་སྡུག་བསྔལ་ལགས་སོ། །མི་རྟག་པ་སྡུག་བསྔལ་བར་འགྱུར་བའི་ཆོས་ཅན་གང་ཡིན་པ་དེ་ལ་ཅིག་འཕགས་པའི་ཉན་ཐོས་ཐོས་པ་དང་ལྡན་པ་འདི་ནི་བདག་ཡིན་ནོ། །བདག་ནི་འདི་ཡིན་ནོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་པར་བྱེད་དམ། བཙུན་པ། མ་ལགས་སོ། །རྒྱལ་པོ་ཆེན་པོ། དེ་ལྟ་བས་ན་ཁྱོད་ཀྱི་གཟུགས་གང་ཅིའང་རུང ། འདས་པ་དང ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱིའི་འམ། ངན་པའམ། གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བའང་རུང་སྟེ། དེ་ཐམས་ཅད་ལ་འདི་ནི་བདག་མ་ཡིན་ནོ། །བདག་ནི་འདི་མ་ཡིན་
134b
ནོ། །འདི་ནི་བདག་གི་བདག་མ་ཡིན་ནོ་ཞེས་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །རྒྱལ་པོ་ཆེན་པོ། དེ་ལྟ་བས་ན་ཁྱོད་ཀྱིས་ཚོར་བ་དང ། འདུ་ཤེས་དང།་འདུ་བྱེད་གང་ཅིའང་རུང་བ་དང ། རྣམ་པར་ཤེས་པ་གང་ཅིའང་རུང་བ་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱིའིའམ། རགས་པའམ། ཕྲ་བའམ། ངན་པའམ། གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བའང་རུང་སྟེ། དེ་དག་ཐམས་ཅད་ལ་འདི་ནི་བདག་མ་ཡིན་ནོ། །བདག་ནི་འདི་མ་ཡིན་ནོ། །འདི་ནི་བདག་གི་བདག་མ་ཡིན་ནོ་ཞེས་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །རྒྱལ་པོ་ཆེན་པོ། འཕགས་པ་ཉན་ཐོས་ཐོས་པ་དང་ལྡན་པ་དེ་ལྟར་མཐོང་བ་ནི་གཟུགས་ལའང་ཡིད་འབྱུང་བར་འགྱུར་རོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ལའང་ཡིད་འབྱུང་བར་འགྱུར་རོ། །ཡིད་བྱུང་ན་འདོད་ཆགས་དང་འབྲལ་ལོ། །འདོད་ཆགས་དང་བྲལ་བ་ན་རྣམ་པར་གྲོལ་བར་འགྱུར་རོ། །རྣམ་པར་གྲོལ་ན་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་རྣམ་པར་གྲོལ་བའི་ཡེ་ཤེས་མཐོང་བར་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་དང ། ལྷ་
135a
༄#། །བརྒྱད་ཁྲི་དང ། མ་ག་དྷའི་བྲམ་ཟེ་དང ། ཁྱིམ་བདག་འབུམ་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། ། དེ་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཆོས་མཐོང་བ་དང ། ཆོས་ཐོས་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་བརྒལ་བ་དང ། ཐེ་ཚོམ་ལས་བརྒལ་བ་དང ། གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་བ་དང ། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ནབ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ ། བདག་ནི་འཕགས་སོ། །མངོན་པར་འཕགས་སོ། །བདག་བཙུན་པ་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱི་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྔོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །བཅོམ་ལྡན་འདས། བདག་བཅོམ་ལྡན་འདས་དང ། དགེ་སློང་གི་དགེ་འདུན་དུ་བཅས་པ་ལ་ཇི་སྲིད་འཚོའི་བར་དུ་ན་བཟའ་ཆོས་གོས་དང ། བསོད་སྙོམས་དང ། གཟིམས་ཆ་དང ། བསྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྙེན་
135b
བཀུར་བགྱིད་ལགས་ན། བཅོམ་ལྡན་འདས། རྒྱལ་པོའི་ཁབ་ཏུ་གཤེགས་སུ་གསོལ། བཅོམ་ལྡན་འདས། རྒྱལ་པོའི་ཁབ་ཀྱི་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ ། །དེ་ནས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་མ་ག་དྷ་ནས་ལྗོངས་རྒྱུ་ཞིང་གཤེགས་པ་དང་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་རྒྱལ་པོའི་ཁབ་ན་མུ་སྟེགས་ཡང་དག་རྒྱལ་བ་ཅན་ཞེས་བྱ་བ་སྐྱེས་ནས་རིང་པོ་མ་ལོན་པར་དེ་རྣམས་ཀྱི་སྟོན་པ་དུས་བྱས་པར་གྱུར་པ་དང།་དེ་རྣམས་ཀྱི་ནང་ན་ཉེ་རྒྱལ་དང ། པང་ནས་སྐྱེས་ཞེས་བྱ་བ་གཉིས་ཚོགས་ཡོངས་སུ་བསྡུས་པ་དང ། ཚོགས་ཀྱི་འདྲེན་པར་གྱུར་བ་གང་ཡིན་པ་དེ་ཡོངས་སུ་འདྲེན་པ་ན་དེ་གཉིས་ཀྱིས་འདི་ལྟར་ཡུ་བུ་ཅག་ལས་གཅིག་གིས་འདུད་རྩི་སྔར་རྙེད་ཀྱང་དེ་གཅིག་ལ་གཅིག་སྨྲ་བར་བྱའོ་ཞེས་དམ་བཅའ་བ་བྱས་སོ། །དེ་ནས་ཚེ་དང་ལྡན་པ་རྟ་ཐུལ་སྔ་དྲོ་ཤམ་ཐབས་བགོས ། ལྷུང་བཟེད་དང ། ཆོས་གོས་ཐོགས་ཏེ་འགྲོ་བ་དང ། ལྡོག་པ་དང ། ཅུང་ཟད་ལྟ་བ་དང ། རྣམ་པར་ལྟ་བ་དང ། བསྐུམ་པ་དང ། བརྐྱང་བ་དང ། སྣམ་སྦྱར་དང ། ཆོས་གོས་དང ། ལྷུང་
136a
༄#། །བཟེད་ཐོགས་པ་མཛེས་པས་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །དེའི་ཚེ་ན་ཀུན་ཏུ་རྒྱུ་ཉེ་རྒྱལ་རྒྱལ་པོའི་ཁབ་ཏུ་བྱ་བ་ཞིག་གི་ཕྱིར་སྤྱོད་ཡུལ་དུ་ཞུགས་པས་ཚེ་དང་ལྡན་པ་རྟ་ཐུལ་འགྲོ་བ་དང ། ལྡོག་པ་དང ། ཅུང་ཟད་ལྟ་བ་དང ། རྣམ་པར་ལྟ་བ་དང ། བསྐུམ་པ་དང ། བརྐྱང་བ་དང ། སྣམ་སྦྱར་དང ། ཆོས་གོས་དང ། ལྷུང་བཟེད་ཐོགས་པ་མཛེས་པས་རྒྱལ་པོའི་ཁབ་ན་བསོད་སྙོམས་ལ་རྒྱུ་བ་ཐག་རིང་པོ་ཁོ་ནས་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། རྒྱལ་པོའི་ཁབ་འདིར་རབ་ཏུ་བྱུང་པ་ཇི་སྙེད་ལྷགས་ཤིང་གནས་པ་དག་ལས། འདི་ལྟ་སྟེ། རབ་ཏུ་བྱུང་བ་འདིའི་སྤྱོད་ལམ་འདི་ལྟ་བུ་ནི་བདག་གིས་སྔོན་ཆད་འགའ་ཡང་མ་མཐོང་གི་མ་ལ་བདག་དེའི་གན་དུ་སོང་སྟེ། དགེ་སློང་ཁྱེད་ཀྱི་སྟོན་པ་ནི་གང་ཡིན། གང་གི་ཕྱིར་ནི་རབ་ཏུ་བྱུང ། སུའི་ཆོས་ལ་ནི་དགའ་ཞེས་དྲིའོ་སྙམ་དུ་རིག་ནས་ལམ་པོ་ཆེ་རུབ་བ་ཞིག་ན་འགྲོ་བ་དང ། ལྡོག་པས་ཤས་ཆེར་སྡོད་ཅིང་འདུག་གོ་།དེ་ནས་ཚེ་དང་ལྡན་པ་རྟ་ཐུལ་ཀུན་ཏུ་རྒྱུ་ཉེ་རྒྱལ་ག་ལ་བ་དེར་སོང་ངོ ། །དེ་ནས་ཀུན་ཏུ་རྒྱུ་ཉེ་རྒྱལ་གྱིས་ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་སོ། །དགེ་སློང ། ཁྱོད་ཀྱི་སྟོན་པ་ནི་གང་ཡིན། གང་གི་ཕྱིར་ནི་རབ་ཏུ་བྱུང ། སུའི་ཆོས་ལ་ནི་དགའ། ཚེ་དང་ལྡན་པ་ཤཱཀྱའི་སྲས་ཀྱི་དགེ་སྦྱོང་གཽ་ཏ་མ་ཤཱཀྱའི་རིས་ལས་སྐྲ་དང ། ཁ་སྤུ་བྲེགས་ནས་གོས་དུར་སྨྲིག་དག་བགོས་ཏེ་དད་པ་ཡང་
136b
དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཞིག་ཡོད་དོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཁོ་བོའི་སྟོན་པ་ནི་བཅོམ་ལྡན་འདས་དེ་ཡིན་ནོ། །ཁོ་བོ་དེའི་ཕྱིར་རབ་ཏུ་བྱུང་ངོ ། །ཁོ་བོ་དེའི་ཆོས་ལ་དགའོ། །དགེ་སློང ། དེའི་ཕྱིར་ཆོས་སྟོན་ཅིག་།ཚེ་དང་ལྡན་པ། ཁོ་བོ་ནི་ན་གཞོན་པ་དང ། རབ་ཏུ་བྱུང་བ་གསར་པས་དེའི་ཕྱིར་ཁོ་བོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་བསྟན་པ་རྒྱ་ཆེར་ཡང་དག་པར་རབ་ཏུ་བསྟན་པར་སླ་བ་མ་ཡིན་ཏེ། འོན་ཀྱང་འདི་ལྟར་དེའི་དོན་བསྟན་པར་བྱའོ། །དགེ་སློང ། ཁོ་བོ་ལ་ནི་དོན་དགོས་ཀྱི་ཚིག་ནི་ཤིན་ཏུ་མང་པོས་ཀྱང་ཅི་བྱ་སྟེ། ཁྱོད་ཀྱིས་དོན་མང་ཡང་རུང་ཉུང་ཡང་རུང་སྟོན་ཅིག་།དེ་ནས་ཚེ་དང་ལྡན་པ་རྟ་ཐུལ་གྱིས་དེའི་ཚེ་ཚིགས་སུ་བཅད་པས་སྨྲས་པ། ཆོས་རྣམས་གང་དག་རྒྱུ་ལས་བྱུང་བ་དང ། །དེ་ཡི་རྒྱུ་དང་དེ་འགོག་གང་ཡིན་པའང ། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་བའི་ཚུལ་ཅན་དགེ་སྦྱོང་ཆེ། །ཆོས་ཀྱི་རྣམ་གྲངས་འདི་བཤད་པ་ན། ཀུན་ཏུ་རྒྱུ་ཉེ་རྒྱལ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཀུན་ཏུ་རྒྱུ་ཉེ་རྒྱལ་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་བརྒལ་བ་དང ། ཐེ་ཚོམ་ལས་
137a
༄#། །བརྒལ་བ་དང ། གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་བ་དང ། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་རོ་སྟོད་བསྲང་ནས་ལག་པ་གཡས་པ་བརྐྱང་སྟེ། ཚེ་དང་ལྡན་པ་རྟ་ཐུལ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེའི་ཚེ་ཚིགས་སུ་བཅད་པ་སྨྲས་པ། སྐྱོབ་པ་རྣམས་ཀྱི་ཆོས་འདི་ཡིན། །བསྐལ་པ་བྱེ་བ་ཁྲག་ཁྲིག་ཏུ། །སྔོན་ཆད་མ་མཐོང་མ་ཐོས་པ། །འཆི་མེད་མྱ་ངན་མེད་པ་ཡི། །གོ་འཕང་འདི་ལ་རྗེས་སུ་རྟོགས། །ཚེ་དང་ལྡན་པ། བཅོམ་ལྡན་འདས་དེ་ད་ལྟ་ག་ལ་བཞུགས ། ཚེ་དང་ལྡན་པ། རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་འདི་ཉིད་ནའོ། །དེ་ནས་ཀུན་ཏུ་རྒྱུ་ཉེ་རྒྱལ་ཚེ་དང་ལྡན་པ་རྟ་ཐུལ་གྱིས་སྨྲས་པ་ལ་མངོན་པར་བསྟོད་པ་དང་རྗེས་སུ་ཡི་རང་བ་བྱས་ཏེ། ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ནས། ཚེ་དང་ལྡན་པ་རྟ་ཐུལ་ལ་ལན་གསུམ་བསྐོར་བ་བྱས་ཏེ་སོང་ནས་ཀུན་རྒྱུ་པང་ནས་སྐྱེས་ག་ལ་བ་དེར་སོང་ངོ ། །ཀུན་ཏུ་རྒྱུ་པང་ནས་སྐྱེས་ཀྱིས་ཀུན་ཏུ་རྒྱུ་ཉེ་རྒྱལ་ཐག་རིང་པོ་ཁོ་ནས་མཐོང་ངོ ། །མཐོང་ནས་ཀྱང་ཀུན་ཏུ་རྒྱུ་ཉེ་རྒྱལ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ། ཁྱོད་ཀྱི་དབང་པོ་རྣམས་ནི་རྣམ་པར་དྭངས། བཞིན་གྱི་མདོག་ནི་ཡོངས་སུ་དག་།པགས་པའི་མདོག་ནི་ཡོངས་སུ་དཀར་ན་ཁྱོད་ཀྱིས་བདུད་རྩི་རྙེད་དམ། ཚེ་དང་ལྡན་པ། རྙེད་དོ། །ཚེ་
137b
དང་ལྡན་པ། དེའི་ཕྱིར་ཆོས་སྟོན་ཅིག་།དེ་ནས་ཀུན་ཏུ་རྒྱུ་ཉེ་རྒྱལ་གྱིས་དེའི་ཚེ་ཚིགས་སུ་བཅད་པ་སྨྲས་པ། ཆོས་རྣམས་གང་དག་རྒྱུ་ལས་བྱུང་བ་དང ། །དེ་ཡི་རྒྱུ་དང་དེ་འགོག་གང་ཡིན་པ། ། དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་པའི་ཚུལ་ཅན་དགེ་སྦྱོང་ཆེ། །ཚེ་དང་ལྡན་པ། ད་དུང་ཡང་ལན་གཅིག་བརྗོད་ཅིག་།ཚེ་དང་ལྡན་པ། བརྗོད་པར་བྱའོ། ། ཆོས་རྣམས་གང་དག་རྒྱུ་ལས་བྱུང་བ་དང ། །ཞེས་པ་ལ་སོགས་པ་སྔ་མ་བཞིན་ནོ། །ཆོས་ཀྱི་རྣམ་གྲངས་འདི་བཤད་པ་ན་ཀུན་ཏུ་རྒྱུ་པང་ནས་སྐྱེས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཀུན་ཏུ་རྒྱུ་པང་ནས་སྐྱེས་ཆོས་མཐོང་བ་དང ། ཆོས་ཐོབ་པ་དང ། ཆོས་རིག་པ་དང ། ཆོས་ཀྱི་གཏིང་སླེབས་པ་དང ། སོམ་ཉི་ལས་བརྒལ་བ་དང།་ཐེ་ཚོམ་ལས་བརྒལ་བ་དང ། གཞན་གྱི་དྲིང་མི་འཇོག་པ་དང ། གཞན་གྱིས་མི་བཀྲི་བ་དང ། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས། རོ་སྟོད་བསྲང་ནས་ལག་པ་གཡས་བརྐྱང་སྟེ། ཀུན་ཏུ་རྒྱུ་ཉེ་རྒྱལ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེའི་ཚེ་ཚིགས་སུ་བཅད་པ་སྨྲས་པ། སྐྱོབ་པ་རྣམས་ཀྱི་ཆོས་འདི་ཡིན། །བསྐལ་པ་བྱེ་བ་ཁྲག་ཁྲིག་ཏུ། །སྔོན་ཆད་མ་མཐོང་མ་ཐོས་པ། །འཆི་མེད་མྱ་ངན་མེད་པ་ཡི། །གོ་འཕང་འདི་ལ་རྗེས་སུ་རྟོགས། །ཚེ་དང་ལྡན་པ། བཅོམ་ལྡན་འདས་དེ་ད་ལྟ་ག་ལ་བཞུགས། །ཚེ་དང་ལྡན་པ།
138a
༄#། །རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་འདི་ཉིད་ནའོ། །ཚེ་དང་ལྡན་པ། ཚུར་ཤོག་།བཅོམ་ལྡན་འདས་དེའི་སྤྱན་སྔར་ཚངས་པར་སྤྱོད་པ་སྤྱད་པར་བྱའོ། །ཚེ་དང་ལྡན་པ། དེའི་ཕྱིར་རྗེ་འཁོར་ལ་བལྟ་བར་བྱ་སྟེ། བདག་ཅག་ལྟ་བུ་མི་གྲགས་པ་དང་ལྡན་པ། ཤེས་པར་གྱུར་པ་དག་གིས་འཁོར་ལ་བལྟ་བ་ནི་ལེགས་པ་ཡིན་ནོ། །དེ་ནས་ཀུན་ཏུ་རྒྱུ་ཉེ་རྒྱལ་དང ། པང་ནས་སྐྱེས་གཉིས་ཀྱིས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་རྣམས། ཤེས་པར་གྱིས་ཤིག་།ཁོ་བོ་ཅག་གཉིས་ནི་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་པར་བྱེད་ན་ཁྱེད་ཅག་ཇི་ལྟར་བྱེད། མཁན་པོ་གཉིས་བདག་ཅག་ཅུང་ཟད་ཅི་འཚལ་བ་གང་ལགས་པ་དེ་དག་ཐམས་ཅད་མཁན་པོ་གཉིས་ལས་བརྟེན་ནས་འཚལ་བ་ལགས་ན། གལ་ཏེ་མཁན་པོ་གཉིས་བཅོམ་ལྡན་འདས་ཀྱི་སྤྱན་སྔར་ཚངས་པ་སྤྱད་པ་སྤྱོད་ན། བདག་ཅག་ཀྱང་མཁན་པོ་གཉིས་རབ་ཏུ་བྱུང་བའི་རྗེས་སུ་རབ་ཏུ་འབྱུང་བར་བགྱིའོ། །བྲམ་ཟེའི་ཁྱེའུ་རྣམས། ད་དེའི་དུས་ལ་བབ་པར་ཤེས་པར་གྱིས་ཤིག་།དེ་ནས་ཀུན་ཏུ་རྒྱུ་ཉེ་རྒྱལ་དང ། པང་ནས་སྐྱེས་གཉིས་འཁོར་ཉིས་བརྒྱ་ལྔ་བཅུ་ལྔ་བཅུ་དང ། བཅོམ་ལྡན་འདས་ག་ལ་བ་དེར་དོང་ངོ ། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་གུང་ལ་ཆོས་སྟོན་
138b
ཅིང་བཞུགས་སོ། །བཅོམ་ལྡན་འདས་ཀྱིས་ཀུན་ཏུ་རྒྱུ་ཉེ་རྒྱལ་དང ། པང་ནས་སྐྱེས་གཉིས་ཐག་རིང་པོ་ཁོ་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱོད་ཀྱིས་གྲོགས་པོའི་ཚོགས་ཡོངས་སུ་སྡུད་པ། ཚོགས་ཡོངས་སུ་འདྲེན་པ། ཚོགས་ཀྱི་མདུན་ནས་འོང་བ། འདི་ལྟ་སྟེ། ཉེ་རྒྱལ་དང ། པང་ནས་སྐྱེས་གཉིས་མཐོང་ངམ།་བཙུན་པ། མཐོང་ངོ ། །འདི་གཉིས་ནི་ཉན་ཐོས་ཟུང་དང ། ཟུང་གི་མཆོག་དང ། ཟུང་བཟང་པོར་གྱུར་ཏེ། གཅིག་ནི་རྫུ་འཕྲུལ་དང་ལྡན་པ་རྣམས་ཀྱི་མཆོག་ཏུ་འགྱུར་ལ། གཅིག་ཤོས་ནི་ཤེས་རབ་དང་ལྡན་པ་རྣམས་ཀྱི་མཆོག་ཏུ་འགྱུར་རོ། །དེ་ནས་དགེ་སློང་ཞིག་གིས་དེའི་ཚེ་ཚིགས་སུ་བཅད་པ་སྨྲས་པ། སྟོན་པ་དགོངས་ཡུལ་མཐའ་ཡས་པ། །སྐྱེས་བུའི་དབང་པོ་མཁྱེན་མཐར་བྱོན། །བཅོམ་ལྡན་སྲིད་པ་མཐར་མཛད་པས། །གྲོགས་པོ་ཉེ་རྒྱལ་པང་ནས་སྐྱེས། །འོད་མའི་ཚལ་དུ་མ་ཕྱིན་པར། །དེ་ལྟར་མཆི་བ་གཟིགས་གྱུར་ནས། ། ཚོགས་མཆོག་དབུས་སུ་དེ་གཉིས་ནི། །འདི་གཉིས་ང་ཡི་ཉན་ཐོས་ཀྱི། །ཟུང་མཆོག་འགྱུར་ཞེས་དེས་བསྟན་ཏེ། །གཅིག་ནི་རྫུ་འཕྲུལ་ལྡན་པའི་མཆོག་།གཅིག་ཤོས་ཤེས་རབ་ལྡན་པ་ཡི། །མཆོག་ཏུ་འགྱུར་བར་ལུང་བསྟན་མཛད། །དེ་ནས་ཀུན་ཏུ་རྒྱུ་ཉེ་རྒྱལ་དང ། པང་ནས་སྐྱེས་གཉིས་བཅོམ་ལྡན་འདས་ག་ལ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་
139a
༄#། །ཞབས་གཉིས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོར་གནང་ན་བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། ། བཅོམ་ལྡན་འདས་ཀྱིས་དེ་གཉིས་ལ་དགེ་སློང་ཚུར་ཤོག་ཅེས་བྱ་བས་རབ་ཏུ་བྱུང་ཞིང ། དགེ་སློང་དག་།ཚུར་ཤོག་།ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང ། དེ་དག་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང ། སྣམ་སྦྱར་གྱོན་པར་གྱུར་ཏེ། ལག་ན་ལྷུང་བཟེད་ཐོགས་པ་སྐྲ་དང ། ཁ་སྤུ་ཞག་བདུན་སྐྱེས་པ་ཙམ་དང ། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས། ལྷུང་བཟེད་དང ། ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང ། དེ་ནས་རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་
139b
ཅན་གྱི་གནས་རབ་ཏུ་བྱུང་ཞིང་བསྙེན་པར་རྫོགས་ནས་རིང་པོ་མ་ལོན་པས་ཡིད་མ་རངས་ཤིང་མངོན་པར་མི་དགའ་བ་དེ་དག་གིས་དགེ་སློང་དེ་དང ། དེ་དག་མཐོང་ནས་ཅོ་འདྲི་ཞིང་ཚིགས་སུ་བཅད་པ་སྨྲས་པ། སངས་རྒྱས་མ་ག་དྷ་དག་གི་།གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །དེ་དགེ་སློང་རྣམས་སྤ་གོང་ཞིང་མི་དགའ་བ་དང ། མི་འཇིགས་པ་མེད་པར་གྱུར་ཏོ། །དེ་ནས་དགེ་སློང་རབ་ཏུ་མང་པོ་དག་རྒྱལ་པོའི་ཁབ་ཏུ་བསོད་སྙོམས་རྒྱུས་ནས་ཟས་ཀྱི་བྱ་བ་བྱས་ཏེ། ཕྱི་དྲོ་བསོད་སྙོམས་མི་ལེན་པས་ལྷུང་བཟེད་དང ། ཆོས་གོས་མཁོས་སུ་ཕབ་ནས། རྐང་པ་གཉིས་བཀྲུས་ཏེ། སྡུག་བསྔལ་ཞིང་ཡིད་མི་བདེ་བས་བཅོམ་ལྡན་འདས་གལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་པོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་འདི་སྐད་ཅེས་གསོལ་ཏོ། །བཙུན་པ། འདི་ན་བདག་ཅག་དགེ་སློང་རབ་ཏུ་མང་པོ་སྔ་དྲོ་ཤམ་ཐབས་འཚལ། ལྷུང་བཟེད་དང ། ཆོས་གོས་དག་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང ། དེ་ནས་རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་ནས་རབ་ཏུ་ཕྱུང་ཞིང་བསྙེན་པར་རྫོགས་ནས་རིང་པོ་མ་ལགས་
140a
༄#། །པས།་ཡིད་མ་རངས་ཤིང་མངོན་པར་མི་དགའ་བ་དེ་དག་གིས་དགེ་སློང་དེ་དང ། དེ་དག་མཐོང་ནས་ཅོ་འདྲི་ཞིང་ཚིགས་སུ་བཅད་པ་སྨྲས་པ། སངས་རྒྱས་མ་ག་དྷ་དག་གི་།གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །ཞེས་མཆི་ནས་དེས་བདག་ཅག་རྣམས་སྤ་གོང་ཞིང་མི་དགའ་བ་དང ། མི་འཇིགས་པ་མ་མཆིས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།རྒྱལ་པོའི་ཁབ་ཀྱི་མི་དེ་སྐད་ཟེར་བ་རྣམས་ལ་འདི་སྐད་ཅེས། འདི་ལ་དཔའ་ཆེན་བདེ་གཤེགས་དག་།དམ་པའི་ཆོས་ཀྱིས་ཁྲིད་མཛད་དེ། །དེ་དག་ཆོས་ཀྱིས་ཁྲིད་མཛད་ལ། །མཁས་པ་སུ་ཞིག་མི་བཟོད་བྱེད། །ཅེས་བརྗོད་ན་རྒྱལ་པོའི་ཁབ་ཀྱི་མི་དེ་སྐད་ཟེར་བ་རྣམས་ཀྱི་རློམ་པ་ཙམ་མམ། །སྤོབས་པ་ཙམ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་མེད་པར་འགྱུར་རོ། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས། ལྷུང་བཟེད་དང ། ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང ། དེ་ནས་རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་ནས་རབ་ཏུ་བྱུང་ཞིང་བསྙེན་པར་རྫོགས་ནས་རིང་པོ་མ་ལོན་པས་ཡིད་མ་རངས་ཤིང་མངོན་པར་མི་དགའ་བ་དེ་དག་གིས་དགེ་སློང་དེ་དང་
140b
དེ་དག་མཐོང་ནས་ཅོ་འདྲི་ཞིང་ཚིགས་སུ་བཅད་པ་སྨྲས་པ། སངས་རྒྱས་མ་ག་དྷཱ་དག་གི་།གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །དེ་ནས་དགེ་སློང་ཞིག་གིས་དེའི་ཚེ་ཚིགས་སུ་བཅད་པ་སྨྲས་པ། འདི་ན་དཔའ་ཆེན་བདེ་གཤེགས་དག་།དམ་པའི་ཆོས་ཀྱིས་ཁྲིད་མཛད་དེ། །དེ་དག་ཆོས་ཀྱིས་ཁྲིད་མཛད་ལ། །མཁས་པ་སུ་ཞིག་བཟོད་མི་བྱེད། །དེ་སྐད་ཅེས་སྨྲས་པ་དང ། རྒྱལ་པོའི་ཁབ་ཀྱི་མི་དེ་སྐད་ཅེས་ཟེར་བ་རྣམས་ཀྱི་རློམ་པ་ཙམ་མམ། སྤོབས་པ་ཙམ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་མེད་པར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་རྒྱལ་པོ་ཟས་གཙང་ལ་སྤྲིང་ཡིག་བསྐུར་བ། ལྷ།་དགྱེས་པ་བསྐྱེད་དུ་གསོལ། ཁྱོད་ཀྱི་སྲས་ཀྱིས་བདུད་རྩི་ཐོབ་ནས་བདུད་རྩིས་འགྲོ་བ་ཚིམ་པར་བྱེད་དོ། །ཞེས་སྤྲིང་བ་རྒྱལ་པོ་ཟས་གཙང་གིས་ཐོས་ནས་ཕོ་ཉ་གཏང་བ་ལས་དེ་དེ་ཉིད་དུ་རབ་ཏུ་བྱུང་སྟེ། ཕོ་ཉ་གང་དང ། གང་གཏང་བ་དེ་དང ། དེ་ཉིད་དུ་ལེགས་པར་གསུངས་པའི་ཆོས་འདུལ་བ་ཉིད་ལ་རབ་ཏུ་བྱུང་བར་གྱུར་ཏོ། །རྒྱལ་པོ་ཟས་གཙང་ལག་པ་འགྲམ་པ་ལ་གཏད་ནས་ཕོ་ཉ་གང་དང ། གང་གཏང་བ་དེ་དང ། དེ་དག་དེ་ཉིད་དུ་ལེགས་པར་གསུངས་
141a
༄#། །པའི་ཆོས་འདུལ་བ་ཉིད་ལ་རབ་ཏུ་བྱུང་ངོ་སྙམ་ནས་སེམས་ཁོང་དུ་ཆུད་ཅིང་འདུག་པ་འཆར་ཀས་མཐོང་ནས་སྨྲས་པ། ལྷ།་ཁྱོད་ཅིའི་སླད་དུ་ཕྱག་ལ་ཞལ་གཏད་ནས་ཐུགས་མི་དགྱེས་ཤིང་བཞུགས། དེས་སྨྲས་པ། འཆར་ཀ་།གང་གི་ཚེ། གཞོན་ནུ་དོན་ཐམས་ཅད་གྲུབ་པ་དཀའ་བ་སྤྱོད་པ་དེའི་ཚེ་ཁོ་བོས་སྦྲིང་ཡིག་སྐྱེལ་བའི་མི་བཏང་བ་ལས་དེ་དག་ཁོ་བོའི་གན་དུ་འོངས་ནས་གཞོན་ནུ་དོན་ཐམས་ཅད་གྲུབ་པ་བཞུགས་པ་འདི་དང ། འདིས་བཞུགས་སོ་ཞེས་སྨྲའོ། །ད་ནི་ཁོ་བོས་སྤྲིང་ཡིག་སྐྱེལ་བའི་མི་བཏང་ན་འགའ་ཡང་ཕྲིན་ཡིག་ཁྱེར་ཏེ་མི་འོང་ན་ཇི་ལྟར་སེམས་ཁོང་དུ་ཆུད་པར་མི་འགྱུར། འཆར་ཀས་སྨྲས་པ། ལྷ།་བདག་མཆིས་ཏེ་བཀའ་མཆིད་འཚལ་ལ་སླར་མཆིའོ། །རྒྱལ་པོ་ཟས་གཙང་གིས་སྨྲས་པ། འཆར་ཀ་།གང་དང ། གང་སོང་བ་དེ་དང ། དེའི་བསྟན་པ་ཕུན་སུམ་ཚོགས་པ་མཐོང་ནས་དེ་ཉིད་དུ་འདུག་པས་ཁྱོད་ཀྱང་སོང་ན་དེ་ཉིད་དུ་འདུག་པར་འགྱུར་བའི་གནས་གང་ཡིན་པ་དེ་ཡོད་དོ། །འཆར་ཀས་སྨྲས་པ། ལྷ།་སླར་མཆིས་ལགས་སོ། །དེ་ནས་རྒྱལ་པོ་ཟས་གཙང་རང་ཉིད་ཀྱིས་སྤྲིང་ཡིག་བྲིས་པ།་ལྷུམས་སུ་ཞུགས་པ་བཟུང་ནས་སུ། །ཁྱོད་ནི་བདག་གིས་ཆེར་བསྐྲུན་ཏེ། །ཉོན་མོངས་མེ་རབ་འབར་བཞིན་དུ། །རྒྱལ་བ་ལྗོན་ཤིང་ལ་བསྟེན་ན། །དེ་ཉིད་ཁྱོད་ཀྱི་སློབ་མ་
141b
ཡི། །ཡལ་ག་ལྕུག་མ་འཕེལ་འགྱུར་བས། །གཞན་ནི་བདེ་བས་དགའ་བར་འགྱུར། །བདག་ནི་སྡུག་བསྔལ་སྐལ་བར་ལྡན། །གཞན་ཡང་གང་གིས་ཁྱོད་ནི་ལྗོན་ཤིང་\?\་ལྕུག་ཕྲན་མཚུངས་ཙམ་ན། །བདག་གི་བུ་ནི་འདི་ཡིན་སྙམ་ནས་ཆུང་ནས་བསྐྲུན་བསྐྲུན་ཏེ། །བུ་གཅིག་ཡུལ་མིས་འབྲས་བུ་ཡོངས་སུ་སྤྱད་པ་ཐོབ་གྱུར་ན། །དེ་ལ་ཡོན་ཏན་འབྲས་བུ་མི་སྟེར་ཁྱོད་ལ་སྙིང་རྗེ་མེད། །གང་ཚེ་ཐོག་མ་བལྟམས་པ་ན། །ཉིད་དོན་བསྒྲུབས་ནས་གཉེན་རྣམས་ནི། །ཤིན་ཏུ་ཆེ་དང་ཕན་གདགས་ཞེས། །ཁྱོད་ཀྱིས་དམ་བཅས་མཛད་པས་ན། །ཁྱོད་ཀྱིས་ཞི་གནས་དེ་བརྙེས་ན། །བདག་དང་གཉེན་གྱི་ཚོགས་རྣམས་ལ། །ཐུགས་བརྩེས་རྗེས་སུ་གཟུང་མཛོད་དེ། །གཤེགས་པར་དགོངས་པ་མཛད་དུ་གསོལ། །ཞེས་སྤྲིང་པའི་ཡི་གེ་འཆར་ཀས་ཁྱེར་ནས་ཆས་ཏེ་རིམ་གྱིས་མཉན་ཡོད་དུ་ཕྱིན་པ་དང ། ལམ་གྱིས་དུབ་པ་ངལ་བསོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་རྒྱལ་པོ་ཟས་གཙང་གིས་གསོལ་བའི་ཡི་གེ་ལགས་སོ་ཞེས་བཅོམ་ལྡན་འདས་ལ་ཡི་གེ་ཕུལ་བ་དང ། བཅོམ་ལྡན་འདས་ཉིད་ཀྱིས་བཞེས་ནས་བཀླགས་སོ། །བཀླགས་ནས་ཡི་གེ་མཐའ་གཅིག་ཏུ་བཞག་པ་དང ། འཆར་ཀས་གསོལ་པ། བཅོམ་ལྡན་འདས། ཅི་ལགས། སེར་སྐྱའི་གཞིར་མི་བཞུད་དམ། བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་།འདོང་ངོ ། །
142a
༄#། །འཆར་ཀ་སྔོན་བཅོམ་ལྡན་འདས་དང་ལྷག་པར་འདྲིས་པ་ཡིན་པས་དེ་སྔོན་གྱི་འདྲིས་པ་ཁོ་ནས་གསོལ་པ། བཅོམ་ལྡན་འདས། གལ་ཏེ་མི་བཞུད་དང་བདག་གི་མཐུས་བཀྲི་བར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་དེ་བཀའ་སྩལ་པ། གང་ཞིག་ཡུལ་གྱི་རྒྱལ་མོར་མ་ཆགས་ཤིང ། ། སྲེད་འགས་བཀྲི་བ་ཡོད་པ་མ་ཡིན་པའི། །སངས་རྒྱས་སྤྱོད་ཡུལ་མཐའ་ཡས་མངའ་བ་དེ། །གཞི་མེད་ན་ནི་གང་གི་གཞི་ཡིས་བཀྲི། གང་ཞིག་ཡུལ་གྱི་རྒྱལ་མོར་མ་ཆགས་ཤིང ། །སྲེད་འགས་བཀྲི་བ་ཡོད་པ་མ་ཡིན་པའི། །སངས་རྒྱས་མཐའ་ཡས་པ་ཡི་རྩལ་མངའ་དེ། །གཞི་མེད་ན་ནི་གང་གི་གཞི་ཡིས་བཀྲི། །གང་ཞིག་བཅོམ་ནས་བརྩེགས་པ་མེད་གྱུར་ཅིང ། །འཇིག་རྟེན་མ་བཅོམ་ཅུང་ཟད་ཡོད་མིན་པ། །སངས་རྒྱས་སྤྱོད་ཡུལ་མཐའ་ཡས་མངའ་བ་དེ། །གཞི་མེད་ན་ནི་གང་གི་གཞི་ཡིས་བཀྲི། །ལན་ལ་སྤོབས་པ་མེད་ནས་གསོལ་པ། བཅོམ་ལྡན་འདས། མཆི་སྟེ། རྒྱལ་པོ་ཟས་གཙང་མ་ལ་རིག་པར་བགྱིའོ། །འཆར་ཀ་།སངས་རྒྱས་ཀྱི་ཕོ་ཉ་ནི་འདི་ལྟ་བུ་མ་ཡིན་ནོ། །འཆར་ཀས་གསོལ་པ། བཅོམ་ལྡན་འདས། ཅི་འདྲ་བ་ཞིག་ལགས། རབ་ཏུ་བྱུང་བ་ཡིན་གྱི། ཁྱོད་ཀྱང་རབ་ཏུ་བྱུང་ཞིག་།བཅོམ་ལྡན་འདས། བདག་གིས་རྒྱལ་པོ་ཟས་གཙང་ལ་སླར་
142b
མཆི་བར་དམ་བཅས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་།རབ་ཏུ་བྱུང་ལ་ཇི་ལྟར་དམ་བཅས་པ་བཞིན་དུ་གྱིས་ཤིག་།འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་པ་ན་ཡབ་དང ། ཡུམ་དང ། མཁན་པོ་དང ། སློབ་དཔོན་དང ། བླ་མ་དང ། བླ་མའི་གནས་ལྟ་བུ་རྣམས་ཀྱིས་ཆོས་དང་མཐུན་པའི་ཚིག་ལན་འགའ་ཡང་སླར་མ་བཟློག་པས། འཆར་ཀས་གསོལ་པ། བཅོམ་ལྡན་འདས། གལ་ཏེ་དེ་ལྟར་ན་རབ་ཏུ་འབྱུང་ལགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། འཆར་ཀ་འདི་ནི་ཡུན་རིང་པོའི་དོན་དང ། ཕན་པ་དང ། བདེ་བའི་ཕྱིར་རབ་ཏུ་ཕྱུང་ཞིག་།བཙུན་པ། བཀའ་བཞིན་འཚལ་ཞེས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་མཉན་ནས་འཆར་ཀ་རབ་ཏུ་བྱུང་སྟེ། བསྙེན་པར་རྫོགས་པར་བྱས་ནས་ཀུན་ཏུ་སྤྱོད་པའི་ཆོས་དག་དེ་ལ་རྒྱས་པར་སྨྲས་ནས། འཆར་ཀ། འདི་ནི་ཁྱོད་ཀྱི་བྱ་བ་ཡིན་ཏེ། དེང་ཕན་ཆད་བུད་མེད་དང་ལྷན་ཅིག་ཁང་པ་གཅིག་ཏུ་ཉལ་བར་མི་བྱའོ་ཞེས་བྱ་བ་དག་གོ་།བཙུན་པ། བཀའ་བཞིན་འཚལ་ཞེས་འཆར་ཀས་ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་བྱས་ཏེ་སོང་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་
143a
༄#། །ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སེར་སྐྱའི་གཞིར་མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་།སོང་ལ་ཁྱོད་མོད་ཁོ་ནར་རྒྱལ་པོའི་ཁབ་ཏུ་མ་འཇུག་པར་སྒོར་སྡོད་ལ་ཤཱཀྱའི་དགེ་སློང་འོངས་སོ་ཞེས་བརྗོད་པར་བྱའོ། །གལ་ཏེ་ནང་དུ་སྤྱོད་ཅིག་ཟེར་ན་འཇུག་པར་བྱའོ། །ཞུགས་ནས་གལ་ཏེ་ཤཱཀྱའི་དགེ་སློང་གཞན་ཡང་ཡོད་དམ་ཞེས་ཟེར་ན། ཡོད་དོ་ཞེས་བརྗོད་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པའང་འདི་འདྲ་ཞིང་ཆ་བྱད་འདི་འདྲ་འམ་ཞེས་འདྲི་ན། འདི་འདྲ་ཞིང་ཆ་བྱད་འདི་འདྲའོ་ཞེས་བརྗོད་པར་བྱའོ། །ཁྱོད་ཀྱིས་རྒྱལ་པོའི་ཁབ་ཏུའང་གནས་པར་མི་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པའང་རྒྱལ་པོའི་ཁབ་ཏུ་གནས་པར་མི་བྱེད་དམ་ཞེས་འདྲི་ན། །མི་བཞུགས་སོ་ཞེས་བརྗོད་པར་བྱའོ། །གལ་ཏེ་གང་དུ་གནས་པར་བྱེད་ཅེས་འདྲི་ན། དགོན་པའམ། གཙུག་ལག་ཁང་དུ་འོ་ཞེས་བརྗོད་པར་བྱའོ། །གལ་ཏེ་གཙུག་ལག་ཁང་ཅི་འདྲ་ཞེས་འདྲི་ན། རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་བྲིས་ཏེ་བསྟན་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་བྱོན་ནམ་ཞེས་འདྲི་ན། བྱོན་ནོ་ཞེས་བརྗོད་པར་བྱའོ། །ཇི་སྲིད་ཅིག་ན་བྱོན་ཞེས་འདྲི་ན། ཞག་བདུན་
143b
ལོན་ནའོ་ཞེས་བརྗོད་པར་བྱའོ། །དེས་གསོལ་པ། བཅོམ་ལྡན་འདས། མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སོང་ཞིག་།ས་བདག་རྣམས་ནི་ཚིག་གིས་ཏེ། ། ལྷ་རྣམས་བསམས་པས་འགྲུབ་འགྱུར་ཞིང ། །དེ་བཞིན་བསམ་གཏན་པ་རྣམས་ཀྱི། །སེམས་བསྐྱེད་པས་ནི་ཐམས་ཅད་འགྲུབ། །བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་དེ་ཇི་ལྟར་སྐད་ཅིག་དེ་ཉིད་ལ་གྲོང་ཁྱེར་སེར་སྐྱའི་གཞིར་སོང་བ་དེ་ལྟར་བྱིན་གྱིས་བརླབས་པ་དང ། ཚེ་དང་ལྡན་པ་འཆར་ཀ་བཅོམ་ལྡན་འདས་ལ་དད་པ་དྲག་པོ་སྐྱེས་པ་དེ་རྒྱལ་པོའི་ཁབ་ཀྱི་སྒོར་བསྡད་ནས་སྨྲས་པ། ཤེས་ལྡན་དག་།རྒྱལ་པོ་ལ་ཤཱཀྱའི་དགེ་སློང་མཆིས་སོ་ཞེས་གསོལ་ཅིག་།དེ་རྣམས་ཀྱིས་སྨྲས་པ། ཅི་ཤཱཀྱའི་དགེ་སློང ། གཞན་དག་ཀྱང་ཡོད་དམ། ཤེས་ལྡན་དག་།ཡོད་དོ། །དེ་རྣམས་ཀྱིས་རྒྱལ་པོ་ལ་སྨྲས་པ། ཤཱཀྱའི་དགེ་སློང་མཆིས་སོ། །རྒྱལ་པོས་སྨྲས་པ། ནང་དུ་ཐོང་ཞིག་།དེ་ནང་དུ་ཞུགས་པ་རྒྱལ་པོ་ཟས་གཙང་གིས་མཐོང་ནས་སྨྲས་པ། འཆར་ཀ་།རབ་ཏུ་བྱུང་ངམ། ལྷ།་རབ་ཏུ་བྱུང་ངོ ། །ཁྱོད་སླར་འོང་ངོ་ཞེས་སྨྲས་པ་མ་ཡིན་ནམ། འདི་ཅི་ཡིན། འཆར་ཀས་སྨྲས་པ།་ལྷ།་བཅོམ་ལྡན་འདས་ཀྱིས་སངས་རྒྱས་ཀྱི་ཕོ་ཉ་ནི་འདི་ལྟ་བུ་མ་ཡིན་ནོ་ཞེས་བཀའ་སྩལ་ནས་ཆོས་འདུལ་བ་ལེགས་པར་གསུངས་པའི་ཕྱིར་བདག་རབ་ཏུ་བྱུང་མོད་ཀྱི་
144a
༄#། །བདག་རང་གི་དད་པས་ཀྱང་རབ་ཏུ་བྱུང་ངོ ། །རྒྱལ་པོས་ཡན་ལག་ཐམས་ཅད་ཀྱི་འཁྱུད་ནས་སྟན་བཤམས་པ་ཉིད་ལ་འདུག་ཏུ་བཅུག་སྟེ། དེའི་དོན་དུ་ཆུར་བཙགས་པ་དང ། འབྲས་བུ་བཏགས་པ་གཙང་སྦྲ་བྱས་ཏེ་ཟར་བཅུག་གོ་།ཚེ་དང་ལྡན་པ་འཆར་ཀ་།མཆོག་ཏུ་ཉེ་བར་ཞི་བ་དང ། དུལ་བར་གནས་པ་དང་ལྡན་ཞིང་ཇི་སྐད་རྗེས་སུ་བསྟན་པའི་ཆོ་གས་ཡོངས་སུ་ལོངས་སྤྱོད་དོ། །རྒྱལ་པོས་དེ་ལ་བརྟགས་ནས་ངོ་མཚར་སྐྱེས་ཏེ་སྨྲས་པ། འཆར་ཀ་།ཅི། གཞོན་ནུ་དོན་ཐམས་ཅད་གྲུབ་པའང་འདི་འདྲ་བར་ཉེ་བར་ཞི་བ་ཡིན་ནམ། འཆར་ཀས་སྨྲས་པ། ལྷ།་བདག་གི་དུལ་བ་དང ། ཉེ་བར་ཞི་བ་ནི་ཅུང་ཟད་ཙམ་ལགས་སོ། །དཔེར་ཇི་ལྟ་བུ་རི་རབ་དང ། ཡུངས་འབྲུ་བཞིན་ནོ། ། རྒྱ་མཚོ་དང ། རྨིག་རྗེས་བཞིན་ནོ། །ཉི་མ་དང ། སྲིན་བུ་མེ་ཁྱེར་བཞིན་ནོ། །ནམ་མཁའ་དང ། པདྨའི་རྩ་བའི་བུ་ག་བཞིན་ནོ། །རྒྱལ་པོ་ཟས་གཙང་གིས་སྨྲས་པ། འཆར་ཀ་།གཞོན་ནུ་དོན་ཐམས་ཅད་གྲུབ་པའང་འདི་འདྲ་ཞིང་ཆ་བྱད་འདི་འདྲའམ། ལྷ།་འདི་འདྲ་ཞིང་ཆ་བྱད་ཀྱང་འདི་འདྲའོ། །རྒྱལ་པོ་ཟས་གཙང་བ་རྒྱལ་ནས་ས་ལ་འགྱེལ་བ་དང ། ཆུ་མང་དུ་བཏབ་ནས་དབུགས་སླར་ཕྱུང་སྟེ་སྨྲས་པ། འཆར་ཀ། གཞོན་ནུ་དོན་ཐམས་ཅད་གྲུབ་པ་བྱོན་ནམ། འཆར་ཀས་སྨྲས་པ། ལྷ།་བྱོན་ནོ། །དུས་ཇི་ཙམ་ན་དགུང་བདུན་ལོན་
144b
ནའོ། །རྒྱལ་པོ་ཟས་གཙང་གིས་བློན་པོ་རྣམས་ལ་བསྒོ་བ། ཤེས་ལྡན་དག་།གཞོན་ནུ་དོན་ཐམས་ཅད་གྲུབ་པ་བྱོན་པར་འགྱུར་གྱི། རྒྱལ་པོའི་ཁབ་དང ། ཕོ་བྲང་བྱི་དོར་བྱོས་ཤིག་འཆར་ཀས་སྨྲས་པ། བཅོམ་ལྡན་འདས་ནི་ཕོ་བྲང་དུ་བཞུགས་པར་མི་མཛད་དོ། །རྒྱལ་པོས་སྨྲས་པ། གང་དུ་བཞུགས། འཆར་ཀས་སྨྲས་པ། དགོན་པའམ། གཙུག་ལག་ཁང་དུའོ། །རྒྱལ་པོ་ཟས་གཙང་གིས་སྨྲས་པ། འཆར་ཀ་།གཙུག་ལག་ཁང་ཅི་འདྲ་བ་ཡིན། ཚེ་དང་ལྡན་པ་འཆར་ཀས་རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་རི་མོར་བྲིས་ཏེ་བསྟན་ཏོ། །དེ་ནས་རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་།ནྱ་གྲོ་དྷའི་ཀུན་དགའ་ར་བར་རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་གཙུག་ལག་ཁང་ཆེན་པོ་བཅུ་དྲུག་དང ། ཁང་ཕྲན་དྲུག་ཅུ་བརྩིག་ཏུ་ཆུག་ཅིག་།ལྷ།་བཀའ་བཞིན་འཚལ་ཞེས་བློན་པོ་རྣམས་ཀྱིས་རྒྱལ་པོ་ཟས་གཙང་ལས་མཉན་ནས་ནྱ་གྲོ་དྷའི་ཀུན་དགའ་ར་བར་རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་གཙུག་ལག་ཁང་ཆེན་པོ་བཅུ་དྲུག་དང ། ཁང་ཕྲན་དྲུག་ཅུ་བརྩིག་ཏུ་བཅུག་གོ་།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏེ། མཽངྒལ་གྱི་བུ། སོང་ལ་དགེ་སློང་རྣམས་ལ་བཅོམ་ལྡན་འདས་སེར་སྐྱའི་གཞིར་གཤེགས་ཏེ་ཡབ་སྲས་གདན་འཛོམ་ན། ཁྱོད་ཅག་ལས་སུ་ཞིག་ལྟ་བར་སྤྲོ་བ་
145a
༄#། །དེ་ཆོས་གོས་དག་ལོང་ཞིག་ཅེས་བསྒོ་ཞིག་།བཙུན་པ། བཀའ་བཞིན་འཚལ་ཞེས་ཚེ་དང་ལྡན་པ་མོངྒལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་།བཅོམ་ལྡན་འདས་སེར་སྐྱའི་གཞིར་གཤེགས་ཏེ། ཡབ་སྲས་གདན་འཛོམ་ན། ཁྱེད་ཅག་ལས་སུ་ལྟ་བར་སྤྲོ་བ་དེ་ཆོས་གོས་དག་ལོང་ཞིག་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ། ཞི་བ་འཁོར་ཞི་བ། གྲོལ་བ་འཁོར་གྲོལ་བ། དབུགས་ཕྱིན་པ། འཁོར་དབུགས་ཕྱིན་པ་རྣམ་པར་དུལ་བ་འཁོར་རྣམ་པར་དུལ་བ། དགྲ་བཅོམ་པ་འཁོར་དགྲ་བཅོམ་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ། མཛེས་པ་འཁོར་མཛེས་པ། ཁྱུ་མཆོག་བ་ལང་གི་ཚོགས་ཀྱིས་བསྐོར་བ་ལྟ་བུ། གླང་པོ་ཆེ་གླང་པོའི་ཕྲུ་གུའི་ཚོགས་ཀྱིས་བསྐོར་བ་ལྟ་བུ། སེང་གེ་མཆེ་བ་ཅན་གྱི་ཚོགས་ཀྱིས་བསྐོར་བ་ལྟ་བུ། ངང་པའི་རྒྱལ་པོ་ངང་པའི་ཚོགས་ཀྱིས་བསྐོར་བ་ལྟ་བུ། ནམ་མཁའ་ལྡིང་བྱའི་ཚོགས་ཀྱིས་བསྐོར་བ་ལྟ་བུ། བྲམ་ཟེ་སློབ་མའི་ཚོགས་ཀྱིས་བསྐོར་བ་ལྟ་བུ། སྨན་པ་མཁས་པ་ནད་པའི་ཚོགས་ཀྱིས་བསྐོར་བ་ལྟ་བུ། དཔའ་བོ་རུ་པའི་ཚོགས་ཀྱིས་བསྐོར་བ་ལྟ་བུ། ལམ་མཁན་འགྲོན་པོའི་ཚོགས་ཀྱིས་བསྐོར་བ་ལྟ་བུ། དེད་དཔོན་ཚོང་པའི་ཚོགས་ཀྱིས་བསྐོ་ར་བ་ལྟ་
145b
བུ།་ཁམས་ཀྱི་རྒྱལ་པོ་བློན་པོའི་ཚོགས་ཀྱིས་བསྐོར་བ་ལྟ་བུ། འཁོར་ལོས་བསྒྱུར་བའི་རྒྱལ་པོ་བུ་སྟོང་གིས་བསྐོར་བ་ལྟ་བུ། ཟླ་བ་རྒྱུ་སྐར་གྱི་ཚོགས་ཀྱིས་བསྐོར་བ་ལྟ་བུ། ཉི་མ་འོད་ཟེར་སྟོང་གིས་བསྐོར་བ་ལྟ་བུ། ཡུལ་འཁོར་སྐྱོང་དྲི་ཟའི་ཚོགས་ཀྱིས་བསྐོར་བ་ལྟ་བུ། འཕགས་སྐྱེས་པོ་གྲུལ་བུམ་གྱི་ཚོགས་ཀྱིས་བསྐོར་བ་ལྟ་བུ། མིག་མི་བཟང་ཀླུའི་ཚོགས་ཀྱིས་བསྐོར་བ་ལྟ་བུ།་རྣམ་ཐོས་ཀྱི་བུ་གནོད་སྦྱིན་གྱི་ཚོགས་ཀྱིས་བསྐོར་བ་ལྟ་བུ། ཐགས་བཟང་རིས་ལྷ་མ་ཡིན་གྱི་ཚོགས་ཀྱིས་བསྐོར་བ་ལྟ་བུ། བརྒྱ་བྱིན་སུམ་ཅུ་རྩ་གསུམ་པའི་ཚོགས་ཀྱིས་བསྐོར་བ་ལྟ་བུ། ཚངས་པ་ཚངས་རིས་ཀྱི་ཚོགས་ཀྱིས་བསྐོར་བ་ལྟ་བུ། རྒྱ་མཚོ་གཡོ་བ་མེད་པ་ལྟ་བུ། སྤྲིན་ཆུ་དང་བཅས་པ་ལྟ་བུ། གླང་པོ་དམ་པ་དྲེགས་པ་དང་བྲལ་བ་ལྟར་དབང་པོ་རྣམས་ཤིན་ཏུ་དུལ་བས་སྤྱོད་ལམ་གྱི་ཚུལ་མ་འཁྲུགས་པ་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པར་བྱས་པ། འོད་འདོམ་གང་གིས་བརྒྱན་པའི་སྐུ་ཉི་མའི་འོད་ཟེར་སྟོང་པས་ལྷག་པའི་འོད་ཅན། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པ་དྲན་པ་ཉེ་བར་གཞག་པ་གསུམ་དང ། ཐུགས་རྗེ་ཆེན་པོ་དང་ལྡན་པ། དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་
146a
༄#། །འབབ་ཆུ་རོ་ཧི་ཏ་ཀར་བྱོན་ཏོ། །རྒྱལ་པོ་ཟས་གཙང་གིས་གཞོན་ནུ་དོན་ཐམས་ཅད་གྲུབ་པ་འབབ་ཆུ་རོ་ཧི་ཏ་ཀར་བྱོན་ཏོ་ཞེས་ཐོས་སོ། །ཐོས་ནས་ཀྱང་རྒྱལ་པོ་ཟས་གཙང་གིས་གྲོང་ཁྱེར་སེར་སྐྱའི་གཞི་རྡོ་བ་དང ། གྱོ་མོ་དང ། གསེག་མ་རྣམས་བསལ་ནས་ཙནྡན་གྱི་ཆུས་ཆག་ཆག་བཏབ། དྲི་ཤིན་ཏུ་ཞིམ་པོའི་པོག་པོར་ཉེ་བར་བཤམས། དར་གྱི་ཆུན་འཆང་མང་པོ་དབྱངས་ཏེ། གང་ཡང་འབབ་ཆུ་རོ་ཧི་ཏ་ཀ་ནས་གང་ཡང་ནྱ་གྲོ་དྷའི་ཀུན་དགའ་ར་བ་དེའི་བར་གྱི་ལམ་ཤིན་ཏུ་མཛེས་པར་བྱས་ཏེ། ས་ཕྱོགས་ཡངས་ཤིང་རྒྱ་ཆེ་བར་གདན་རྣམ་པར་བཀྲ་བ་དག་གཤོམ་དུ་བཅུག་གོ་།དེ་ནས་འབབ་ཆུ་རོ་ཧི་ཏ་ཀ་ལ་དགེ་སློང་ཁ་ཅིག་ནི་ལག་པ་འཁྲུ་བར་བྱེད་དོ། །ཁ་ཅི་གི་ནི་སོ་ཤིང་འདོར་བར་བྱེད་དོ། །ཁ་ཅིག་ནི་ཁྲུས་བྱེད་དོ། །སེར་སྐྱའི་གཞི་ན་གནས་པའི་ཤཱཀྱ་རྣམས་ཀྱིས་གཞོན་ནུ་དོན་ཐམས་ཅད་གྲུབ་པ་གཤེགས་སོ་ཞེས་ཐོས་སོ། །ཐོས་ནས་ཀྱང་ཁ་ཅིག་ནི་སྔོན་གྱི་དགེ་བའི་རྩ་བས་བསྐུལ། ཁ་ཅིག་ནི་ཡ་མཚན་སྐྱེས་ནས་ཐམས་ཅད་ནྱ་གྲོ་དྷའི་ཀུན་དགའ་ར་བ་ནས་བྱུང་སྟེ། ཅི་ཡབ་སྲས་ཀྱི་ཞབས་ལ་ཕྱག་བྱེད་དམ། འོན་ཏེ་སྲས་ཡབ་ཀྱི་ཞབས་ལ་ཕྱག་བྱེད་པ་ལྟའོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་ང་ཞབས་ཀྱིས་
146b
སེར་སྐྱའི་གཞིར་གཤེགས་ན་ཤཱཀྱའི་ང་རྒྱལ་ཅན་རྣམས་ཀྱེ་མའོ་གཞོན་ནུ་དོན་ཐམས་ཅད་གྲུབ་པས་དཀའ་ཐུབ་ཀྱི་ནགས་སུ་གཤེགས་ནས་ལྟོག་པོ་ཞིག་གྲུབ་པ་ལྟ་ཞིག་སྟེ། དེས་ལྷ་བརྒྱ་སྟོང་ཕྲག་དུམས་ཞབས་འབྲིང་བྱས་ནས་སྟེང་གི་ནམ་མཁའ་ལས་གཤེགས་ཏེ་དེས་དེ་སྲིད་དུ་དཀའ་བ་བརྒྱ་སྟོང་སྤྱད་པས་བདུད་རྩི་ཐོབ་ནས་ང་ཞབས་ཀྱིས་གཤེགས་པ་ལྟ་ཞེས་མ་དད་པ་སྐྱེས་པར་འགྱུར་རོ་སྙམ་ནས། དེ་ནས་བཅོམ་ལྡན་འདས་ཀྱིས་ཐུགས་མཉམ་པར་བཞག་ན། ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་མཛད་དེ། འདི་ལྟ་སྟེ། འཆག་པ་དང ། བཞེངས་པ་དང ། བཞུགས་པ་དང ། མནལ་བར་མཛད་དོ། །མེའི་ཏིང་ངེ་འཛིན་ལའང་སྙོམས་པར་འཇུག་པར་མཛད་དེ། མེའི་ཏིང་ངེ་འཛིན་ལ་སྙོམས་པར་ཞུགས་པ་ན་སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་རྣམ་པ་སྣ་ཚོགས་དག་འབྱིན་པར་མཛད་དེ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་དང ། ཤེལ་གྱི་ཁ་དོག་དག་གོ་།ཆོ་འཕྲུལ་ཟུང་དུའང་སྟོན་པར་མཛད་དེ། སྐུའི་སྨད་ནས་མེ་འབར་བར་མཛད་ལ། སྐུའི་སྟོད་ནས་ཆུ་གྲང་མོའི་རྒྱུན་འབེབས་པར་མཛད་དེ་སྐུའི་སྟོད་ནས་མེ་འབར་བར་མཛད་ལ་སྐུའི་སྨད་ནས་ཆུ་གྲང་མོའི་རྒྱུན་འབེབས་པ་མཛད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །
147a
༄#། །ཤར་ཕྱོགས་ལ་ཇི་ལྟ་བར་ལྷོ་དང ། ནུབ་དང ། བྱང་ཕྱོགས་སུའང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས། རྫུ་འཕྲུལ་གྱི་མངོན་པར་འདུ་མཛད་པ་དེ་བསྡུས་ཏེ་ཏ་ལ་བདུན་གྱི་སྲིད་ཙམ་ན་བཞུགས་སོ། །དགེ་སློང་རྣམས་ནི་ཏ་ལ་དྲུག་གི་སྲིད་ཙམ་ནའོ། །བཅོམ་ལྡན་འདས་དྲུག་གི་སྲིད་ཙམ་ན་ནི་དགེ་སློང་རྣམས་ལྔའི་སྲིད་ཙམ་ནའོ། །བཅོམ་ལྡན་འདས་ལྔའི་སྲིད་ཙམ་ན་ནི་དགེ་སློང་རྣམས་བཞིའི་སྲིད་ཙམ་ནའོ། །བཅོམ་ལྡན་འདས་བཞིའི་སྲིད་ཙམ་ན་ནི་དགེ་སློང་རྣམས་གསུམ་གྱི་སྲིད་ཙམ་ནའོ། །བཅོམ་ལྡན་འདས་གསུམ་གྱི་སྲིད་ཙམ་ན་ནི་དགེ་སློང་རྣམས་གཉིས་ཀྱི་སྲིད་ཙམ་ནའོ། །བཅོམ་ལྡན་འདས་གཉིས་ཀྱི་སྲིད་ཙམ་ན་ནི་དགེ་སློང་རྣམས་ཏ་ལ་གཅིག་གི་སྲིད་ཙམ་ནའོ། །བཅོམ་ལྡན་འདས་མི་བདུན་གྱི་སྲིད་ཙམ་ན་བཞུགས་ན་ནི་དགེ་སློང་རྣམས་མི་དྲུག་གི་སྲིད་ཙམ་ནའོ། །བཅོམ་ལྡན་འདས་དྲུག་གི་སྲིད་ཙམ་ན་ནི་དགེ་སློང་རྣམས་ལྔའི་སྲིད་ཙམ་ནའོ། །བཅོམ་ལྡན་འདས་ལྔའི་སྲིད་ཙམ་ན་ནི་དགེ་སློང་རྣམས་བཞིའི་སྲིད་ཙམ་ནའོ། །བཅོམ་ལྡན་འདས་བཞིའི་སྲིད་ཙམ་ན་ནི་དགེ་སློང་རྣམས་གསུམ་གྱི་སྲིད་ཙམ་ནའོ། །བཅོམ་ལྡན་འདས་གསུམ་གྱི་སྲིད་ཙམ་ན་ནི་དགེ་སློང་རྣམས་གཉིས་ཀྱི་སྲིད་ཙམ་ནའོ། །བཅོམ་ལྡན་འདས་གཉིས་ཀྱི་སྲིད་ཙམ་ན་ནི་དགེ་སློང་རྣམས་མི་གང་
147b
ལྷག་ཙམ་ནའོ། །བཅོམ་ལྡན་འདས་མི་གང་ལྷག་ཙམ་ན་ནི་དགེ་སློང་རྣམས་ས་ལའོ། །རྒྱལ་པོ་ཟས་གཙང་གིས་ཆོ་འཕྲུལ་དེ་ལྟ་བུ་དེ་དང ། དགེ་སློང་མང་པོ་མཐོང་ནས་དེ་ལ་བཅོམ་ལྡན་འདས་གང་ཡིན་པ་མ་ཤེས་ཏེ་མོངས་པར་གྱུར་ཏོ། །དེ་ནས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་།འདི་ན་ངུར་སྨྲིག་གྱོན་པའི་རབ་ཏུ་བྱུང་བ་མང་པོ་ཞིག་ཡོད་ན་དེ་ལ་གཞོན་ནུ་གང་ཡིན། ཚེ་དང་ལྡན་པ་འཆར་ཀས་བཅོམ་ལྡན་འདས་བསྟན་ནས་སྨྲས་པ། འདི་ནི་བཅོམ་ལྡན་འདས་ལགས་སོ། །སྲིད་པའི་མཐར་བྱེད་སེམས་ཀྱི་དབང་ཕྱུག་འདྲེན་པ་ལགས།། འདི་ནི་ཉོན་མོངས་སེལ་མཛད་ཉིན་བྱེད་དོན་ནི་ཀུན་ཏུ་སྟོན་མཛད་ལགས། །འདི་ནི་དགོངས་པ་བཞིན་བརྙེས་སྟོབས་བཅུ་མངའ་བས་ཀུན་གྱི་ཕ་རོལ་གཤེགས་པ་ལགས། །དྲི་མེད་བཙལ་བ་ཆོས་ཀྱི་དབང་ཕྱུག་ཁྱོད་ཀྱི་སྲས་ལགས་མི་དབང་དེ་གཟིགས་ཤིག་།དེ་ནས་རྒྱལ་པོ་ཟས་གཙང་གིས་ལུས་བཏུད་ནས་ཞབས་ལ་ཕྱག་བྱས་ཏེ་ཚིགས་སུ་བཅད་པས་གསོལ་པ། བློ་གྲོས་ཡངས་པ་ཁྱོད་ལ་འདི་དང་ནི། །ཀུན་སྤྱན་ཞབས་ལ་ལན་གསུམ་ཕྱག་བགྱིས་ཏེ། །བལྟམས་པའི་ཚེ་ནས་ནི་གཡོས་པ་དང ། །ཛམྦུའི་གྲིབ་མས་སྐུ་ལས་མ་འདས་པའོ། །དེ་ནས་ཤཱཀྱ་དང ། ཤཱཀྱ་མོ་རྣམས་ཀྱིས་རྒྱལ་པོ་ཟས་གཙང་བཅོམ་ལྡན་འདས་ཀྱི་ཞབས་ལ་གཏུགས་པ་མཐོང་ནས། དེ་ལྟར་ཡབ་སྲས་ཀྱི་ཞབས་ལ་ཕྱག་བྱེད་པ་ཅིའི་ཐ་\?\་
148a
༄#། །ཚིག་ཅེས་མ་དད་པ་བསྐྱེད་དོ། །རྒྱལ་པོ་ཟས་གཙང་གིས་ཤཱཀྱ་དང ། ཤཱཀྱ་མོ་རྣམས་ལ་གོ་བར་བྱ་བའི་ཕྱིར་འདི་སྐད་ཅེས་སྨྲས་སོ། །ཤེས་ལྡན་དག ། ད་གདོད་ཁོ་བོས་གཞོན་ནུ་དོན་ཐམས་ཅད་གྲུབ་པའི་ཞབས་ལ་ཕྱག་བྱས་པ་མ་ཡིན་ཏེ། གང་གི་ཚེ་ན་གཞོན་ནུ་དོན་ཐམས་ཅད་གྲུབ་པ་བལྟམས་པ་ན་ས་ཆེན་པོ་གཡོས་པར་གྱུར་ཅིང་འཇིག་རྟེན་འདི་ཐམས་ཅད་སྣང་བ་རྒྱ་ཆེན་པོས་གསལ་བར་གྱུར་ཏེ། འཇིག་རྟེན་ན་འཇིག་རྟེན་གྱི་བར་གྱི་མུན་པ་མུན་ནག་སྨག་ཏུ་གྱུར་པ་ཉི་མ་དང ། ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བའི་འོད་ཀྱི་སྣང་བ་ཉམས་སུ་མ་མྱོང་བ་གང་ཡིན་པ་དེའང་དེའི་ཚེ་སྣང་བ་ཆེན་པོས་གསལ་བར་གྱུར་ནས་སེམས་ཅན་གང་དག་སྐྱེས་པ་དེ་དག་སྣང་བ་དེས་སེམས་ཅན་དག་གཅིག་གིས་གཅིག་མཐོང་ནས། ཤེས་ལྡན་དག་།སེམས་ཅན་གཞན་དག་ཀྱང་འདིར་སྐྱེས་པ་ལྟ། ཤེས་ལྡན་དག་།སེམས་ཅན་གཞན་དག་ཀྱང་འདིར་སྐྱེས་པ་ལྟ་ཞེས་ངོ་ཤེས་པར་གྱུར་པ་དེའི་ཚེའང་ཁོ་བོས་བྱང་ཆུབ་སེམས་དཔའི་ཞབས་ལ་མགོ་བོས་ཕྱག་བྱས་སོ། །གང་གི་ཚེ་གཞོན་ནུ་དོན་ཐམས་ཅད་གྲུབ་པ་ཞིང་ལས་ཀྱི་མཐའ་ལ་བཞུགས་པ་ན་ཤིང་ཛམྦུའི་གྲིབ་མ་ལ་བཞུགས་ནས་འདོད་པ་རྣམས་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་
148b
དང་བཅས་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང ། བདེ་བ་ཟག་པ་མེད་པ་དང་མཚུངས་པའི་བསམ་གཏན་དང་པོ་བསྒྲུབས་ཏེ་བཞུགས་པ་ན། ཤིང་གཞན་རྣམས་ཀྱི་གྲིབ་མ་ནི་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་ཀྱང་ཤིང་ཛམྦུའི་འགྲིབ་མ་ནི་བྱང་ཆུབ་སེམས་དཔའི་སྐུ་ལས་མ་འདས་པར་གྱུར་པ་དེའི་ཚེ་ཡང་ངོ་མཚར་རྨད་དུ་བྱུང་བའི་ཆོས་དེས་ཁོ་བོའི་ཡིད་བསྡུས་པས། བཅོམ་ལྡན་འདས་ཀྱི་ཞབས་ལ་ཡང་ཕྱག་བྱས་ཏེ། འདི་དང་བཅོམ་ལྡན་འདས་ཀྱི་ཞབས་ལ་ལན་གསུམ་ཕྱག་བྱས་སོ། །དེ་བས་ན་འདི་སྐད་ཅེས། བློ་གྲོས་ཡངས་པ་ཁྱོད་ལ་འདི་དང་ནི། །ཀུན་སྤྱན་ཞབས་ལ་ལན་གསུམ་ཕྱག་བགྱིས་ཏེ། །བལྟམས་པའི་ཚེ་ན་ས་འདི་གཡོས་པ་དང ། །ཛམྦུའི་གྲིབ་མ་སྐུ་ལས་མ་འདས་པའོ། །ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་བརྟུལ་ནས་འཁོར་བརྒྱ་ཕྲག་དུ་མ་ཟིལ་གྱིས་མནན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཟས་གཙང་སྐད་འཛེར་ཅིང་མིག་མཆི་མས་གང་བས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། གཞལ་མེད་ཁང་གི་གནས་རྣམས་ལས། །ཡབ་ཀྱི་ཁབ་ན་བཞུགས་པ་ལས། །དགོན་པ་འཇིགས་དང་བཅས་
149a
༄#། །རྣམས་སུ། །ཇི་ལྟ་བུར་ནི་འབའ་ཞིག་བཞུགས། །བཅོམ་ལྡན་འདས་ཀྱིས་བཀའ་སྩལ་པ། མི་ཡི་བདག་པོ་གང་དུ་ནི། །ཁྱིམ་གྱི་འཆིང་བ་ལས་གྲོལ་བ། ། འཕགས་པ་ཡི་ནི་གནས་པ་བཅུས། །ཐུབ་པ་རྣམས་ནི་གནས་པར་མཛད། །རྒྱལ་པོས་གསོལ་པ། བ་སོ་གསེར་གྱི་རྩ་བ་ཅན། །ཤིན་ཏུ་བདེ་བ་གཏིང་བ་ཡིས། །ཁྲི་ལ་མནལ་བར་མཛད་པ་ལས། །གདིང་བ་ལ་ནི་ཇི་ལྟར་མནལ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་རྣམ་གྲོལ་གནས་མལ་ནི། །དགའ་བ་བྱང་ཆུབ་ཡན་ལག་གི། མེ་ཏོག་བཀྲམ་པར་ཆགས་མེད་ཅིང ། །ཡོངས་སུ་གདུང་བ་རྣམ་སྤངས་མནལ། །རྒྱལ་པོས་གསོལ་པ། དཔའ་བོ་ཉིད་ཀྱི་ཕོ་བྲང་ན། །གླང་པོ་ཤིང་རྟ་རྟས་བཞུད་པ། །ཚེར་མར་བཅས་པའི་ས་གཞི་ལ། །ཞབས་ཀྱིས་ཇི་ལྟར་གཤེགས་པར་མཛད། །བཅོམ་ལྡན་འདས་ཀྱིས་བཀའ་སྩལ་པ། ང་ཡི་ཤིང་རྟ་རྫུ་འཕྲུལ་རྐང ། །ཡང་དག་རྩོལ་བའི་གཞོལ་བ་ཡིས། །ས་ཀུན་རྣམ་པར་རྒྱུན་ཡང ། །ཉོན་མོངས་ཚེར་མས་གནོད་པ་མེད། །རྒྱལ་པོ་ཟས་གཙང་གིས་གསོལ་པ། དཔའ་བོ་སྔོན་ནི་ཀ་ཤི་ཀའི། །ན་བཟའ་མནབས་ནས་མཛེས་པ་ལས། །ངུར་སྨྲིག་རྩུབ་པོའི་གོས་མནབས་པ། །ཇི་ལྟར་ཁྱོད་ཀྱིས་སྐུ་ཡིས་བཟོད། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ངའི་གོས་ངོ་ཚ་ཤེས། །ང་ཡི་བགོ་བ་སྣམ་སྦྱར་ཏེ། །དེ་
149b
བགོས་ཐུབ་པ་ཞི་བ་རྣམས། །ནགས་ཁྲོད་ན་ནི་མཛེས་པར་འགྱུར། །རྒྱལ་པོ་ཟས་གཙང་གིས་གསོལ་པ། འདི་ལྟར་ཁྱོད་སྔོན་གསེར་གྱི་གཞོང་བ་ནས། །དུ་མའི་རོ་ལྡན་འབྲས་ཆན་གསོལ་བ་ལས། །འདི་ལྟར་གཙོ་བོ་ད་ལྟའི་བསོད་སྙོམས་ནི། །ཕལ་པ་གསོལ་པ་ཇི་ལྟར་མགུལ་དུ་མཆི། །བཅོམ་ལྡན་འདས་ཀྱིས་བཀའ་སྩལ་པ། ཟས་ཀྱི་སྲེད་པ་ཐམས་ཅད་སྤངས་ནས་ནི། །ངེས་པར་བྱུང་དང་མཉམ་པར་བཞག་ལྡན་པའི། །ང་ཡི་ཆོས་ཀྱི་རོ་མཆོག་གསོལ་མོད་ཀྱི། །འཇིག་རྟེན་ལ་སྙིང་བརྩེ་བའི་ཕྱིར་སྤྱོད་དོ། །རྒྱལ་པོ་ཟས་གཙང་གིས་གསོལ་པ། མགུར་དུ་བདེ་བ་མང་བགྱིད་པའི། །རྒུན་སྐྱེམས་ཁ་རའི་ཆབ་གསོལ་ན། །རྙོག་པ་ཅན་ལ་དྲི་ང་བའི། །ཆབ་ནི་ཇི་ལྟ་ཞིག་ཏུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། མི་ཡི་བདག་པོ་གང་འཐུངས་ན། །བདག་ལ་འཐུང་བ་ཐམས་ཅད་ནི། །དུག་དང་འདྲ་བར་སྣང་གྱུར་པ། །ཆབ་ཀྱི་རོ་མཆོག་ང་འཐུང་ངོ ། །རྒྱལ་པོ་ཟས་གཙང་གིས་གསོལ་པ། འདི་ལྟར་ཁྱོད་སྔོན་བསིལ་ཁང་གཞལ་མེད་ཁང ། །ཁང་བཟང་སྟེང་ན་ཇི་ལྟའི་དུས་བཞིན་བཞུགས། །ད་ལྟར་གཅིག་པུ་ནགས་ཁྲོད་ཁྱོད་བཞུགས་པ། །བློ་བཟང་ཇི་ལྟར་བསྙེངས་པ་མེད་པར་བཞུགས། །བཅོམ་ལྡན་འདས་ཀྱིས་བཀའ་སྩལ་པ། །གཽ་ཏམ་འཇིགས་པའི་རྩ་བ་གང་ཡིན་པ། །དྲི་མ་བག་ཆགས་བཅས་པར་ཡང་སྤངས་པས། །ད་
150a
༄#། །ནི་མྱ་ངན་འཇིགས་པ་མེད་གནས་ཏེ། །ང་ལ་འདི་ན་འཇིགས་པ་ཅུང་ཟད་མེད། །རྒྱལ་པོ་ཟས་གཙང་གིས་གསོལ་པ། །ཁྱོད་སྔོན་ཁྲུས་ཁང་ཤིན་ཏུ་ཡིད་འོང་བར། །ཁྲུས་མཆོག་ཁྱད་པར་འཕགས་པས་རྟག་བསིལ་ན། །གཅིག་པུ་ཁྱོད་ནི་ནགས་ཁྲོད་གནས་ལྡན་པར། །ཐུབ་དབང་ད་ལྟར་སུ་ཡི་ཁྲུས་མཛད་འགྱུར། །བཅོམ་ལྡན་འདས་ཀྱིས་བཀའ་སྩལ་པ། གཽ་ཏ་མ་ཆོས་ཀྱི་མཚོ་ཕྲན་དྲི་མེད་པ། །ཚུལ་ཁྲིམས་འཇུག་ངོགས་དམ་པས་བསྔགས་པ་སྟེ། །དེ་ལ་རེག་པའི་ཡོན་ཏན་མི་བཀྲུ་ན། །ལུས་མི་གཤེར་བར་ཕ་རོལ་རབ་ཏུ་བརྒལ། །རྒྱལ་པོ་ཟས་གཙང་གིས་གསོལ། །དཔའ་བོ་ཉིད་ཀྱི་ཁབ་ན་ནི། །གསེར་དངུལ་བུམ་པས་ཁྲུས་མཛད་ན། །རྙོག་པ་ཅན་ལ་དྲི་ང་བ། ། ཆབ་ཀྱིས་ཇི་ལྟར་ཁྲུས་མཛད་ལགས། །བཅོམ་ལྡན་འདས་ཀྱིས་བཀའ་སྩལ་པ། གཽ་ཏམ་དད་པའི་འབབ་ཆུ་རྙོག་པ་མེད། །བསོད་ནམས་འཇུག་ངོགས་དམ་པས་བསྔགས་པ་སྟེ། །དེ་ལ་རིག་པའི་ཡོན་ཏན་མ་བཀྲུས་ན། །ལུས་མི་གཤེར་བར་ཕ་རོལ་རབ་ཏུ་བརྒལ། །རྒྱལ་པོ་ཟས་གཙང་གིས་གསོལ་པ། དཔའ་བོ་ཁྱོད་སྔོན་སེར་སྐྱ་ཡིས། །ཙནྡན་གྱིས་ནི་སྐུ་བཀྲུས་ཤིང ། །ཀ་ཤིའི་མཆོག་གནས་མཛེས་པ་ལས། །དེ་དང་བྲལ་ནས་མཛེས་མ་ལགས། །བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་ང་ཡི་རྒྱན་
150b
ཡིན་ཏེ། །ཚུལ་ཁྲིམས་ཉིད་ནི་བྱུག་པ་ཡིན། །གསེར་དང་ནོར་བུ་རྣ་ཆ་དག་།རྨོངས་སྐྱེས་ང་ལ་ཅི་ཞིག་བྱ། །རྒྱལ་པོ་ཟས་གཙང་གིས་གསོལ་པ། གང་གིས་ཁྱོད་ནི་ཁྱད་དུ་གསོད། ། གང་ལས་འཇིགས་སུ་རུང་བ་སྐྱེ། །ཡིད་འབྱུང་བ་ཡང་གང་ལས་སྐྱེས། །ཞུས་པ་དེ་དག་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། གང་གིས་ང་ནི་ཁྱོད་གསོད་དང། །གང་ཞིག་ལས་ནི་འཇིགས་པ་དང ། །གང་ལས་ཡིད་འབྱུང་སྐྱེས་པ་དག་།ཉོན་ཅིག་ཁྱོད་ལ་བཤད་པར་བྱ། །རྒ་དང་ན་དང་འཆི་བ་སྟེ། །གལ་ཏེ་འདི་གསུམ་ཡོད་མིན་ན། །ང་ཡང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་འགྱུར། །རྒྱལ་པོ་ཟས་གཙང་གིས་གསོལ་པ། ཤཱཀྱ་རྣམས་ཀྱི་རིགས་དགའ་བ། །ལེགས་པར་འཁྲུངས་པའི་དཔའ་བོ་ལེགས། །ཁྱོད་ནི་འཇིག་རྟེན་ཆོས་བརྒྱད་ཀྱིས། །ཇི་ལྟ་བུར་ཡང་མ་གོས་སོ། །དེ་ནས་རབ་དགའ་དང་བ་རྒྱས་བྱས་ནས། །དྲང་སྲོང་དགེ་འདུན་བསྐོར་བ་བྱས་ནས་ཅི། །ཐུབ་པའི་ཞབས་ལ་མགོ་བོས་ཕྱག་བྱས་ཏེ། །བདེ་བར་གཤེགས་ལ་ཀུན་ནས་རྟོག་ཅིང་འདུག་།དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། གང་བདག་གི་བུས་ཡོན་ཏན་གྱི་ཚོགས་འདི་ལྟ་བུ་ཐོབ་པ་ནི་བདག་གི་རྙེད་པ་ལེགས་པར་རྙེད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་ནྱ་གྲོ་དྷའི་ཀུན་དགའ་ར་བར་འཁོར་དེའི་བསམ་པ་དང །
151a
༄#། །བག་ལ་ཉལ་བ་དང ། ཁམས་དང ། རང་བཞིན་མཁྱེན་ནས་དེ་དང་མཐུན་པའི་ཆོས་བཤད་པར་མཛད་དེ། དེ་ཐོས་པས་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ་རྒྱལ་པོ་ཟས་གཙང་ནི་མ་གཏོགས་སོ། །ལྷ་བྱིན་ང་རྒྱལ་ལས་ང་རྒྱལ་ཅན་སྡིག་པ་འདོད་པ་དེས་བདེན་པ་མཐོང་བར་མ་བྱས་པས་ཁྲོ་བས་ཀུན་ནས་བཀྲིས་པ་དང་བཅས་པས་སྨྲས་པ། གལ་ཏེ་བདག་གིས་འདི་འདྲ་བའི་སྒྱུ་མས་དབང་དུ་བྱེད་པ་ཤེས་ན། བདག་གིས་ཀྱང་འཇིག་རྟེན་ཐམས་ཅད་དབང་དུ་བྱ་བ་ཞིག་།དེ་ལ་ཤཱཀྱ་རྣམས་ཀྱིས་གཤེ་བའི་ཚིག་གིས་སྨྲས་པ། ལྷས་བྱིན། བཅོམ་ལྡན་འདས་ནི་རྫུ་འཕྲུལ་ཆེ་བ་ཡིན་གྱི་དེ་སྐད་མ་སྨྲ་ཞིག་ཅེས་བཟློག་ནས་ཅང་མི་སྨྲ་བར་འདུག་གོ་།ཚངས་པས་བསྐོར་བའི་སྐྱེད་མོས་ཚལ་དུ་འདི་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་མ་གཏོགས་པར་བྲེ་བོ་ཟས་ལ་སོགས་པ་ཤཱཀྱ་དྲུག་ཁྲི་དྲུག་སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་ནའང་ལྷས་བྱིན་དེ་ཁོ་ན་བཞིན་དུ་ཟེར་རོ། །རོ་ཧི་ཏ་ཀའི་སྐྱེད་མོས་ཚལ་དུ་འདི་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་མ་གཏོགས་པར་བདུད་རྩི་ཟས་ལ་སོགས་པ་ཤཱཀྱ་བདུན་ཁྲི་ལྔ་སྟོང་གིས་རྒྱུན་
151b
དུ་ཞུགས་པའི་འབྲས་བུ་མངོན་སུམ་དུ་བྱས་པ་ནའང་ལྷས་བྱིན་དེ་ཁོ་ན་བཞིན་དུ་ཟེར་རོ། །འཁོར་ལྷག་མ་རྣམས་ལས་ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པར་འགྱུར། །ཁ་ཅིག་གིས་ནི་སངས་རྒྱས་ལ་སྐྱབས་སུ་སོང ། ཁ་ཅིག་གིས་ནི་ཆོས་ལ། ཁ་ཅིག་གིས་ནི་དགེ་འདུན་ལ་སྟེ། འཁོར་དེ་དག་ཕལ་ཆེར་ཡང་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་པར་བཀོད་དོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། སྔོན་ནི་བཅོམ་ལྡན་འདས་ལྷ་དང ། ལྷ་མ་ཡིན་གྱི་འགྲོ་བར་བཅས་པས་མཆོད་པ་དང།་རྗེད་པ་དང ། མངོན་དུ་སྨྲ་བར་གྱུར་ན། ད་ལྟ་ནི་མིས་མཆོད་ཀྱི། ལྷས་ནི་མ་ཡིན་ནོ་སྙམ་མོ། །དེ་ནས་ཤཱཀྱ་གཞོན་ནུ་ཞིག་གིས་ཚིགས་སུ་བཅད་དེ་གསོལ་པ། དྲང་སྲོང་ཆེན་པོ་སྨྲ་མཆོག་དམ་ཆོས་ཀྱི། །ཆར་པས་འགྲོ་བ་འདི་ནི་ཚིམ་མཛད་དེ། །མི་བཟད་ལམ་དུ་ལྷུང་བའི་འཇིག་རྟེན་འདི། །དྲངས་ཏེ་ཐར་བའི་ལམ་ལ་སྤྱོད་པར་མཛོད། །དེ་ནས་བཅོམ་ལྡན་
152a
༄#། །འདས་འདི་སྙམ་དུ་དགོངས་ཏེ། རྒྱལ་པོ་ཟས་གཙང་ནི་འདི་སྙམ་དུ་བདག་གི་བུ་འབའ་ཞིག་།འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་བ་ཡིན་ནོ་སྙམ་སྟེ་ལྷག་པར་དགའ་བ་ལས་གྱུར་གྱི་མདོར་ན་དེའི་དྲེགས་པ་སྤོང་དུ་གཞུག་གོ་།རྒྱུ་གཉིས་ཀྱིས་བདེན་པ་རྣམས་མཐོང་བར་མི་འགྱུར་ཏེ། ཧ་ཅང་ཞུམ་པ་དང ། ཤིན་ཏུ་དགའ་བའོ། ། དེ་ལ་ཞུམ་པའི་སེམས་དང ། ཤིན་ཏུ་དགའ་བ་ཡོད་ཀྱིས། མ་ལ་ངས་དེའི་ཞུམ་པ་དང ། ཤིན་ཏུ་དགའ་བ་གཉིས་སྤོང་དུ་གཞུག་གོ་སྙམ་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་བཀའ་སྩལ་པ། མཽངྒལ་གྱི་བུ། རྒྱལ་པོ་ཟས་གཙང་མ་ལ་སྒོམས་ཤིག་།བཙུན་པ། བཀའ་བཞིན་འཚལ་ཞེས་ཚེ་དང་ལྡན་པ་མཽངྒལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་རྒྱལ་པོ་ཟས་གཙང་གང་ན་བ་དེར་སོང་བ་དང ། རྒྱལ་པོ་ཟས་གཙང་གིས་ཚེ་དང་ལྡན་པ་མཽངྒལ་གྱི་བུ་ཆེན་པོ་རྒྱང་རིང་པོ་ནས་འོང་བ་མཐོང་ངོ ། །མཐོང་ནས་ཀྱང་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽངྒལ་གྱི་བུ་ཆེན་པོ། །ཚུར་སྤྱོ་ན། མཽངྒལ་གྱི་བུ་ཆེན་པོ་ཁྱོད་བྱོན་པ་ལེགས་སོ། །བཙུན་པ་མཽངྒལ་གྱི་བུ་ཆེན་པོ། གདན་བཤམས་པ་ཉིད་ལ་བཞུགས་ཤིག་།ཚེ་དང་ལྡན་པ་མཽངྒལ་གྱི་བུ་ཆེན་པོས་གདན་བཤམས་པ་ཉིད་ལ་འདུག་
152b
གོ་།དེ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོས་སེམས་ཇི་ལྟར་མཉམ་པར་བཞག་ན། རང་གི་སྟན་ལས་མི་སྣང་བར་གྱུར་ཏེ་ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པར་བཞི་བྱེད་དེ། འདི་ལྟ་སྟེ། འཆག་པ་དང ། འགྲེང་བ་དང ། འདུག་པ་དང ། ཉལ་བར་བྱེད་དོ། །མེའི་ཏིང་ངེ་འཛིན་ལའང་སྙོམས་པར་འཇུག་པར་བྱེད་དོ། །མེའི་ཏིང་ངེ་འཛིན་ལ་སྙོམས་པར་ཞུགས་པ་ན། ཚེ་དང་ལྡན་པ་མཽངྒལ་གྱི་བུ་ཆེན་པོའི་ལུས་ལས་འོད་ཟེར་རྣམ་པ་སྣ་ཚོགས་དག་འབྱིན་པར་བྱེད་དེ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་དང ། ཤེལ་གྱི་ཁ་དོག་དག་གོ་།ཆོ་འཕྲུལ་ཟུང་དུའང་སྟོན་པར་བྱེད་དོ། །ལུས་ཀྱི་སྨད་ནས་མེ་འབར་བར་བྱེད་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབེབས་པར་བྱེད་དོ། །ལུས་ཀྱི་སྟོད་ནས་མེ་འབར་བར་བྱེད་ལ་ལུས་ཀྱི་སྨད་ནས་ཆུ་གྲང་མོའི་རྒྱུན་འབེབས་པར་བྱེད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང ། ནུབ་དང ། བྱང་ཕྱོགས་སུའང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་བསྡུས་ཏེ་སྟན་བཤམས་པ་ཉིད་ལ་འདུག་གོ་།དེ་ནས་རྒྱལ་པོ་ཟས་གཙང་གིས་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་འདི་སྐད་ཅེས་
153a
\ཾཱིཥཥཱིཎG་PཱGཱེ\་
153b
\ཾཱིཥཥཱིཎG་PཱGཱེ\་
154a
༄#། །པའོ། །ནུབ་ཀྱི་ཕྱོགས་ན་ནི་མིག་མི་བཟང་རིན་པོ་ཆེ་སྣ་བདུན་གྱིས་བརྒྱན་པའོ། །བྱང་ཕྱོགས་ན་ནི་ལུས་ངན་པོ་རྒྱན་ཐམས་ཅད་ཀྱིས་བརྒྱན་པའོ། ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ནྱ་གྲོ་དྷའི་ཀུན་དགའ་ར་བ་ཆེ་ཐང་དུ་བརྒྱན་དུ་བཅུག་སྟེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ལ་དོན་དེ་རྒྱས་པར་གསོལ་ཏོ། །དེ་ནས་བརྒྱ་བྱིན་དང ། ཚངས་པ་ལ་སོགས་པ་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་ཁང་པ་བརྩེགས་པར་ཞུགས་ཏེ་ལྷའི་འཁོར་ཕལ་པོ་ཆེའི་གུང་ལ་རིན་པོ་ཆེ་སྣ་ཚོགས་ཀྱིས་བརྒྱན་པའི་སེང་གེའི་ཁྲི་ལ་བཞུགས་སོ། །དེ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོ་རྒྱལ་པོ་ཟས་གཙང་ཁྲིད་དེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། ཚེ་དང་ལྡན་པ་མཽངྒལ་གྱི་བུ་ཆེན་པོ་ནང་དུ་ཞུགས་པ་དང ། རྒྱལ་པོ་ཟས་གཙང་ལ་རྒྱལ་པོ་ཆེན་པོ་ཡུལ་འཁོར་སྐྱོང་གིས། རྒྱལ་པོ་ཆེན་པོ། ནང་དུ་མ་འགྲོ་བར་སྡོད་ཅིག་ཅེས་བཟློག་གོ་།ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ་དེར་མིར་གྱུར་པ་འཇུག་ཏུ་མི་དབང་ངོ ། །བཞིན་བཟང་ཁྱོད་སུ་ཞིག་།རྒྱལ་པོ་ཆེན་པོ། བདག་ནི་ཡུལ་འཁོར་སྐྱོང་ངོ ། །དེ་ནས་རྒྱལ་པོ་ཟས་གཙང་ལྷོ་སྒོར་སོང་བ་དང ། རྒྱལ་པོ་ཆེན་པོ་འཕགས་
154b
སྐྱེས་པོས་མཐོང་ནས་སྨྲས་པ། རྒྱལ་པོ་ཆེན་པོ། ནང་དུ་མ་འཇུག་པར་སྡོད་ཅིག་།རྒྱལ་པོ་ཟས་གཙང་གི་མཐོང་ནས་སྨྲས་པ། བཞིན་བཟང་ཁྱོད་སུ་ཞིག་།འཕགས་སྐྱེས་པོས་སྨྲས་པ། རྒྱལ་པོ་ཆེན་པོ། བདག་ནི་འཕགས་སྐྱེས་པོའོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ ། །དེ་ནས་རྒྱལ་པོ་ཟས་གཙང་ནུབ་སྒོར་སོང་བ་དང ། རྒྱལ་པོ་ཆེན་པོ་མིག་མི་བཟང་གིས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག་།རྒྱལ་པོ་ཟས་གཙང་གིས་མཐོང་ནས་སྨྲས་པ། བཞིན་བཟང་ཁྱོད་སུ་ཞིག་།མིག་མི་བཟང་གིས་སྨྲས་པ། རྒྱལ་པོ་ཆེན་པོ། བདག་ནི་མིག་མི་བཟང་ངོ ། །ཅིའི་ཕྱིར།་བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ ། །དེ་ནས་རྒྱལ་པོ་ཟས་གཙང་བྱང་སྒོར་སོང་བ་དང ། རྒྱལ་པོ་ཆེན་པོ་རྣམ་ཐོས་ཀྱི་བུས་མཐོང་ནས་སྨྲས་པ། རྒྱལ་པོ་ཆེན་པོ། ནང་དུ་མ་འཇུག་པར་སྡོད་ཅིག་།རྒྱལ་པོ་ཟས་གཙང་གིས་སྨྲས་པ། བཞིན་བཟང་ཁྱོད་སུ་ཞིག་།རྣམ་ཐོས་ཀྱིས་བུས་སྨྲས་པ། རྒྱལ་པོ་ཆེན་པོ། བདག་ནི་རྣམ་ཐོས་ཀྱི་བུའོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་
155a
༄#། །ཏུ་མི་དབང་ངོ ། །དེ་ནས་རྒྱལ་པོ་ཟས་གཙང་ཀྱེ་མའོ་བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་པ་དེ་བདག་གིས་བལྟའོ་སྙམ་པའི་འདོད་པ་སྐྱེས་སོ། །དེ་ནས་རྒྱལ་པོ་ཟས་གཙང་གིས་ཞུམ་པའི་རྒྱུད་གང་ཡིན་པ་དེ་དང་བྲལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགོངས་པ་རྒྱལ་པོ་ཟས་གཙང་གིས་གལ་ཏེ་ང་མ་མཐོང་ན་ཁྲག་དྲོན་པོ་སྐྱུགས་ནས་འཆི་བར་འགྱུར་བའི་གནས་སྐབས་གང་ཡིན་པ་དེ་ཡོད་ཀྱི། དེ་ལ་ཐབས་ཤིག་བཤམ་པར་བྱའོ་སྙམ་ནས་བཅོམ་ལྡན་འདས་ཀྱིས་རིན་པོ་ཆེ་སྣ་བཞིའི་ཁང་པ་བརྩེགས་པ་གང་ཡིན་པ་དེ་ཤེལ་ལས་བྱས་པར་སྤྲུལ་པ་དང ། དེ་ནས་རྒྱལ་པོ་ཟས་གཙང་གིས་སངས་རྒྱས་ཀྱི་སྐུ་སྒྲིབ་པ་མེད་པར་མཐོང་ངོ་།། མཐོང་ནས་ཀྱང་དགའ་བ་དང ། མགུ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ་།དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་བསམ་པ་དང ། བག་ལ་ཉལ་བ་དང ། ཁམས་དང ། རང་བཞིན་མཁྱེན་ནས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་གིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་
155b
པའི་འབྲས་བུ་མངོན་སུམ་དུ་བྱས་ཏེ། དེ་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་པ། བཙུན་པ། བདག་ལ་ཕས་མ་བགྱིས། མས་མ་ལགས། རྒྱལ་བས་མ་ལགས། ལྷ་རྣམས་ཀྱིས་མ་ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང ། བྲམ་ཟེ་རྣམས་ཀྱིས་མ་ལགས། སྡུག་པ་དང ། རང་གི་སྐྱེ་བོ་དང ། གཉེན་གྱི་ཚོགས་ཀྱིས་མ་ལགས་པ་གང་ལགས་པ་དེ་ནི་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང ། མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་རྣམས་ནི་བཀུམ ། མཐོ་རིས་དང ། ཐར་པའི་སྒོ་རྣམས་ནི་ཕྱེ། བདག་ལྷ་དང ། མི་རྣམས་སུ་ནི་བཞག་གོ་།ཡང་གསོལ་པ། ཕ་ལ་ལན་དུ་ཕན་གདགས་པ། །དམ་པའི་བུས་ནི་བགྱི་བ་གང ། །ཁྱོད་ཀྱིས་བདག་ལ་མཛད་ལགས་ཏེ། །སེམས་ནི་གྲོལ་བར་གཞོལ་བར་བགྱིས། །ཁྱོད་ཀྱིས་བདག་ནི་ངན་འགྲོ་ལས། །དྲངས་ཏེ་མཐོ་རིས་ཐར་པ་ལས། །བསྒྲིམ་མི་འཚལ་བར་བཞག་ལགས་ཏེ། །ཁྱོད་ཀྱིས་དགའ་བ་མཛད་པ་ལེགས། །མགོན་པོ་བྱམས་པ་ཁྱེད་ཀྱིས་ནི། །བདག་གི་ཚོང་པ་རྙེད་ལྡན་ལྟར། །མཐོ་རིས་རྙེད་པ་སྲིད་པ་ཡི། །ལོངས་སྤྱོད་དག་ནི་རྙེད་པར་མཛད། །དེ་ནས་རྒྱལ་པོ་ཟས་གཙང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེར་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་
156a
༄#། །ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནད་བར་མཛད་དུ་གསོལ། བཅོམ་ལྡན་འདས་ཀྱིས་རྒྱལ་པོ་ཟས་གཙང་ལ་ཅང་མི་གསུང་བས་གནང་ངོ ། །དེ་ནས་རྒྱལ་པོ་ཟས་གཙང་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་ཆས་ཏེ་ཟས་དཀར་གང་ན་བ་དེར་སོང་སྟེ་ཕྱིན་ནས་ཟས་དཀར་ལ་འདི་སྐད་ཅེས་སྨྲས་སོ། །གཞོན་ནུ། རྒྱལ་སྲིད་ཐོབ་ཀྱི། རྒྱལ་སྲིད་ཁྱེར་ཅིག་།ཅིའི་སླད་དུ། ངས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བས་སོ། །གང་གི་གདུགས་ལ་ལགས། དེ་རིང་ཁོ་ནའོ། །བདག་གིས་ཀྱང་བཅོམ་ལྡན་འདས་གང་གི་ཉི་མ་ལ་ནྱ་གྲོ་དྷའི་ཀུན་དགའ་ར་བར་ཆོས་བཤད་པ་དེའི་ཉི་མ་ལ་ཤཱཀྱ་བདུན་ཁྲི་བདུན་སྟོང་དང་ལྷན་ཅིག་བདེན་བ་མཐོང་ལགས་སོ། །དེ་བཞིན་དུ་བྲེ་བོ་ཟས་ལ་རྒྱལ་སྲིད་ཁྱེར་ཅིག་ཅེས་སྨྲས་པ་དང ། དེས་སྨྲས་པ། བདག་གིས་ཀྱང་བཅོམ་ལྡན་འདས་ཀྱིས་གང་གི་ཚེ་ཚངས་པས་བསྐོར་བའི་སྐྱེད་མོས་ཚལ་དུ་ཆོས་བཤད་པ་དེའི་ཚེ་ཤཱཀྱ་བདུན་ཁྲི་དྲུག་སྟོང་དང་བདེན་པ་མཐོང་ལགས་སོ། །དེ་བཞིན་དུ་བདུད་རྩི་ཟས་ལ་རྒྱལ་སྲིད་ཁྱེར་ཅིག་ཅེས་སྨྲས་
156b
པ་དང ། དེས་སྨྲས་པ། བདག་གིས་ཀྱང་གང་གི་ཚེ་བཅོམ་ལྡན་འདས་ཉིད་ཀྱིས་རོ་ཧི་ཏ་ཀའི་སྐྱེད་མོས་ཚལ་དུ་ཆོས་བཤད་པ་དེའི་ཚེ་ཤཱཀྱ་བདུན་ཁྲི་ལྔ་སྟོང་དང་ལྷན་ཅིག་བདེན་པ་མཐོང་ལགས་སོ། །གལ་ཏེ་དེ་ལྟར་གྱུར་ནད་སུ་ཞིག་རྒྱལ་སྲིད་ལ་གཞག་།དེ་རྣམས་ཀྱིས་སྨྲས་པ། ཤཱཀྱའི་རྒྱལ་པོ་བཟང་ལྡན་གྱིས་བགྱིའོ། ཞེས་དེ་རྣམས་འདུས་ནས་ཤཱཀྱའི་རྒྱལ་པོ་བཟང་ལྡན་རྒྱལ་སྲིད་ཀྱི་དབང་ཕྱུག་ལ་དབང་བསྐུར་རོ། །དེ་ནས་རྒྱལ་པོ་ཟས་གཙང་གིས་དེ་ཉིད་ཀྱི་མཚན་མོ་ནས་གཙང་ཞིང་བསོད་པའི་བཟའ་བ་དང ། བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། གདན་བཤམས་ཤིང་ནོར་བུ་ཆུ་སྣོད་བཞག་ནས་བཅོམ་ལྡན་འདས་ལ་སྤྱན་འདྲེན་གྱིས་དུས་ཚོད་གསོལ་པ། བཙུན་པ། བཅོམ་ལྡན་འདས། གདུགས་ཚོད་ལགས་ན། ད་དེའི་དུས་ལ་བབ་པར་དགོངས་སུ་གསོལ། བཅོམ་ལྡན་འདས། སྔ་དྲོ་ན་བཟའ་དང ། ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས། རྒྱལ་པོ་ཟས་གཙང་གི་བཀང་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཟས་གཙང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་
157a
༄#། །བཟའ་བ་དང ། བཅའ་བས་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང ། བཅའ་བས་རང་གི་ལག་ནས་བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་གསེར་གྱི་བྱ་མ་བུམ་བླངས་ཏེ། བཅོམ་ལྡན་འདས་ལ་ནྱ་གྲོ་དྷའི་ཀུན་དགའ་ར་བ་ཕུལ་ལོ། །བཅོམ་ལྡན་འདས་ཀྱིས་ཡན་ལག་ལྔ་དང་ལྡན་པའི་གསུང་དབྱངས་ཀྱིས་ཡོན་བསྔོ་བར་མཛད་པ། སྦྱིན་པའི་བསོད་ནམས་གང་ཡིན་འདིས། ། ཤཱཀྱ་རྣམས་ཀྱིས་བསམས་པ་ཡི། །ཡིད་ལ་རེ་བ་རྫོགས་ནས་ནི། །རྟག་པའི་གནས་ནི་ཐོབ་པར་ཤོག་།དེ་ནས་བཅོམ་ལྡན་འདས་སེར་སྐྱའི་གཞི་ཤིང་ནྱ་གྲོ་དྷའི་ཀུན་དགར་ར་བ་ན་བཞུགས་སོ། །དེ་བཞིན་དུ་བསམ་གཏན་པ་རྣམས་ཀྱིས་ཀྱང་མདོ་སྡེ་ལ་བཅོམ་ལྡན་འདས་སེར་སྐྱའི་གཞི་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ་ཞེས་གདགས་པ་བྱས་སོ། །བཅོམ་ལྡན་འདས་སེར་སྐྱའི་གཞི་དེ་ཉིད་ན་བཞུགས་ནས་ཉི་མ་གཅིག་ནི་རྒྱལ་པོའི་ཕོ་བྲང་དུ་གདུགས་ཚོད་གསོལ། ཉི་མ་གཅིག་ནི་བཙུན་མོའི་ནང་དུ་གསོལ་ལོ། ། རྒྱལ་པོ་ཟས་གཙང་གིས་རལ་པ་ཅན་ལས་རབ་ཏུ་བྱུང་བའི་དགེ་སློང་རྣམས་སྤྱོད་ལམ་ཞི་ཞིང་སེམས་དང་བ་ཡིན་ན། དཀའ་ཐུབ་དྲག་པོའི་བརྟུལ་ཤུགས་ཀྱི་ཁྱད་པར་དག་གིས་
157b
ལུས་གདུངས་པས་ལུས་མི་མཛེས་པར་མཐོང་ངོ ། །མཐོང་ནས་ཀྱང་འདི་སྙམ་དུ་སེམས་ཏེ། འདི་ལྟར་རལ་པ་ཅན་འདི་དག་སྤྱོད་ལམ་ཞི་ཞིང་སེམས་དང་བ་ཡིན་མོད་ཀྱི། ལུས་མཛེས་པ་མ་ཡིན་ན་འཁོར་ཅི་འདྲ་བ་ཞིག་གིས་བཅོམ་ལྡན་འདས་མཛེས་པར་འགྱུར་སྙམ་པ་ལས། དེས་བསམས་པ། ཤཱཀྱའི་འཁོར་གྱིས་ཡིན་ནོ་སྙམ་ནས། དེ་ནས་ཤཱཀྱ་ཐམས་ཅད་བསོགས་ཏེ་སྨྲས་པ། ཤེས་ལྡན་དག་།གལ་ཏེ་གཞོན་ནུ་དོན་ཐམས་ཅད་གྲུབ་པ་རབ་ཏུ་བྱུང་བར་མ་གྱུར་ན་ཇི་ལྟར་འགྱུར། འཁོར་ལོས་བསྒྱུར་བའི་རྒྱལ་པོར་འགྱུར་རོ། །ཁྱེད་ཅག་ཅི་ཞིག་བྱེད་པར་འགྱུར། གཡོག་བགྱིད་པར་འགྱུར་རོ། །ད་ལྟར་གཞོན་ནུ་དོན་ཐམས་ཅད་གྲུབ་པ་བླ་ན་མེད་པ་ཆོས་ཀྱི་རྒྱལ་པོར་འགྱུར་ན། ཁྱེད་ཅག་ཅིའི་ཕྱིར་གཡོག་མི་བྱེད། ལྷ།་ཅི་རབ་ཏུ་འབྱུང་ངམ། རབ་ཏུ་བྱུང་ཞིག་།ཅི་ཐམས་ཅད་དམ། ཁྱིམ་རེ་ནས་རེ་རེའོ། །བཀའ་བཞིན་འཚལ། རྒྱལ་པོ་ཟས་གཙང་གིས་གྲོང་ཁྱེར་སེར་སྐྱའི་གཞིར་དྲིལ་སྒྲོགས་སུ་བཅུག་པ། རྒྱལ་པོའི་ཞལ་ནས་ངའི་ཡུལ་ན་གནས་པའི་ཤཱཀྱ་རྣམས་ཀྱིས་ཁྱིམ་རེ་ནས་རེ་རེ་རབ་ཏུ་བྱུང་ཞིག་ཅེས་དེ་སྐད་བཀའ་སྩལ་ཏོ། །བྲེ་བོ་ཟས་ལ་བུ་གཉིས་ཡོད་པ་མ་འགགས་པ་དང ། མིང་ཆེན་ནོ། ། མིའི་ཆེན་ནི་ཞིང་བླས་ཀྱི་མཐའ་ལ་ལྷག་པར་བརྩོན་ནོ། །མ་འགགས་པ་ནི་སྟེང་གི་ཁང་བཟང་གི་གཞི་ལ་འདུག་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་
158a
༄#། །སྤྱོད་པར་བྱེད་དོ། །མིང་ཆེན་ལ་མས་སྨྲས་པ། བུ།རྒྱལ་པོས་དྲིལ་སྒྲོགས་སུ་བཅུག་པ་ཤཱཀྱ་རྣམས་ལས་ཁྱིམ་རེ་ནས་རེ་རེ་རབ་ཏུ་ཕྱུང་ཞིག་ཅེས་བསྒོ་ཡི། ཁྱོད་རབ་ཏུ་བྱུང་ཞིག་།དེས་སྨྲས་པ། བདག་ནི་རབ་ཏུ་མི་འབྱུང་གི་།ཁྱོད་ཀྱི་བུ་སྡུག་པ་དང ། བདེ་བ་དང་ལྡན་པར་གནས་པ་གང་ཡིན་པ་དེ་རབ་ཏུ་ཕྱུང་ཞིག་།བུ།་བསོད་ནམས་ཀྱི་དབང་ཐང་ཆེན་པོ་ཅན་གྱིས་སེམས་ཅན་དེ་ལ་ཁྱོད་འགྲན་མཚོ་ལ་ཅིག་།ཡུམ་ཁྱོད་གང་ལ་དགྱེས་པ་དེ་བསོད་ནམས་ཀྱི་དབང་ཐང་ཆེན་པོ་ཅན་ལགས་མོད། དེ་རིང་ལ་ཅུང་ཟད་ཀྱང་མ་བསྐུར་དང ། ཅི་བསོད་ནམས་ཀྱི་དབང་ཐང་ཆེན་པོ་ལགས་སམ། མ་ལགས་མངོན་པར་འགྱུར་རོ། །བུ།་དེ་བཞིན་དུ་བྱས་ཏེ་ཡིད་ཆེས་པར་བྱའོ། །དེས་གཟེབ་སྟོང་པ་རྫེའུ་ཡིས་བཀང་ནས་ཁ་རས་དཀར་པོས་བཀྲིས་ཏེ་རྒྱ་སྐེགས་ལ་རྒྱས་བཙབ་ནས། བུ་མོ་མངག་གཞུག་མའི་ལག་ཏུ་བསྐུར་ནས་བསྒོ་བ། གལ་ཏེ་དེ་ན་ཅི་ཡོད་ཅེས་འདྲི་བ་དང ། ཅི་ཡང་མ་མཆིས་སོ་ཞེས་སྨྲོས་ཤིག་།དེས་དེ་ཁྱེར་ནས་སོང་བ་དང ། ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས། དེས་བསམས་པ། རང་སངས་རྒྱས་ཀུན་ཤེས་ལ་བསོད་སྙོམས་ཕུལ་བ་གང་ཡིན་པ་དེ་དེང་ཅིའི་ཕྱིར་ཟས་ཀྱིས་ཕོངས་པར་བྱ། དེའི་ཟན་སྦྱར་བར་བྱའོ་ཞེས་དེས་རྫེའུ་དེ་རྣམས་སྲན་ཚོད་དང ། ཚོད་མ་སྣ་ཚོགས་རོ་དང་ལྡན་པའི་
158b
ཟས་ཀྱིས་བཀང་ངོ ། །ཇི་ཙམ་ན་མངག་གཞུག་མས་དེར་ཁྱེར་ནས་མ་འགགས་པའི་དྲུང་དུ་ཕྱིན་པ་དང ། དེས་སྨྲས་པ། བུ་མོ། འོ་ན་ནི་ཅི་ཡོད། དེས་སྨྲས་པ། གཞོན་ནུ། ཅི་ཡང་མ་མཆིས་སོ། །མ་འགགས་པས་བསམས་པ། བདག་ལ་མ་བྱམས་ན་འདི་སྟོང་པར་ཅི་སྟེ་བསྐུར། གདོན་མི་ཟ་བར་འདི་ཅིའང་མ་ཡིན་པ་ཞེས་བྱ་བའི་ཟས་ཤིག་བསྐུར་གྱི། རེ་ཞིག་བལྟའོ་ཞེས་ཇི་ཙམ་ན་ཁ་ཕྱེ་བ་དང ། སྐྱེད་མོས་ཚལ་དེ་ཐམས་ཅད་ཟས་ཀྱི་དྲི་ཞིམ་པོས་གང་བར་གྱུར་ཏེ། དེ་བསྣམས་ནས་མ་འགགས་པ་མཆོག་ཏུ་ཡ་མཚན་སྐྱེས་སོ། །དེ་མ་ལ་གུས་པ་ཡིན་པས་དེས་མ་ལ་ཟས་ཀྱི་ཕུད་བསྐུར་ནས་སྤྲིང་བ། ཡུམ་གདུགས་རེ་རེ་ཞིང་ཟས་ཅི་ཡང་མ་ཡིན་ཞེས་བགྱི་བ་འདི་ལྟ་བུ་བསྐུར་བའི་རིགས་སོ། །དེས་ཀྱང་མཐོང་ནས་མཆོག་ཏུ་ཡ་མཚན་སྐྱེས་ཏེ། དེས་མིང་ཆེན་ལ་བསྟན་ནས། བུ།མཐོང་ངམ། ཡུམ།་མཐོང་ལགས་སོ། །ཁྱོད་ལ་ཁོ་མོས་སྔར་བསོད་ནམས་ཀྱི་དབང་ཐང་ཆེན་མོའི་སེམས་ཅན་མིའི་སྐལ་བ་བཟང་པོ་དང་ལྡན་པ་ལ་ཁྱོད་འགྲན་མཚོལ་ཅིག་ཅེས་མ་སྨྲས་སམ། དེས་སྨྲས་པ། ཡུམ་དེ་བསོད་ནམས་ཀྱི་དབང་ཐང་ཆེན་པོ་དང་ལྡན་ཡང་རུང ། མི་ལྡན་ཡང་རུང ། བདག་ནི་རབ་ཏུ་མི་འབྱུང་ངོ་ཞེས་ཇི་ལྟར་མིང་ཆེན་གནས་སྐབས་ཐམས་ཅད་ཏུ་རབ་ཏུ་འབྱུང་བར་ཁས་ལེན་དུ་མ་བཏུབ་བོ། །དེ་ནས་དེས་མ་འགགས་པ་ལ་སྨྲས་པ། བུ།་རྒྱལ་པོས་དྲིལ་
159a
༄#། །སྒྲོགས་སུ་བཅུག་པ་ཤཱཀྱ་རྣམས་ལ་ཁྱིམ་རེ་ནས་རེ་རེ་རབ་ཏུ་བྱུང་ཞིག་ཅེས་བསྒོ་ན། ཁྱོད་ཅི་རབ་ཏུ་བྱུང་ངམ། འོན་ཏེ་ཁྱིམ་པར་འདུག་།དེས་སྨྲས་པ། ཡུམ། རབ་ཏུ་བྱུང་བ་ལ་ཕན་ཡོན་ཅི་མཆིས། ཉེས་དམིགས་ཅི་མཆིས། ཁྱིམ་པར་མཆིས་པ་ལ་ཕན་ཡོན་ཅི་མཆིས། ཉེས་དམིགས་ཅི་མཆིས། བུ། རབ་ཏུ་བྱུང་བས་ལེགས་པར་བསྒྲུབས་ན། མྱ་ངན་ལས་འདས་པ་ཐོབ་པར་འགྱུར་རོ། །ལེགས་པར་མ་བསྒྲུབས་ན་ལྷ་དང ། མི་འཐོབ་པར་འགྱུར་རོ། །ཁྱིམ་པར་འདུག་སྟེ་ལེགས་པར་བསྐྱངས་ན་ལྷ་དང ། མི་འཐོབ་བོ། །མ་བསྐྱངས་ན་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་འཐོབ་བོ། །ཡུམ། རབ་ཏུ་བྱུང་བའི་ཉེས་དམིགས་གང་ལགས་པ་དེ་ནི་ཁྱི་མན་གནས་པའི་ཕན་ཡོན་ལགས་པས་དེ་བས་ན་ཁྱིམ་ན་གནས་པ་མི་འཚལ་གྱི་གནང་བར་མཛོད་ཅིག་དང ། རབ་ཏུ་འབྱུང་ངོ ། །དེས་སྨྲས་པ། བུ། ལེགས་ཀྱི་དེ་བཞིན་དུ་གྱིས་ཤིག་།མ་འགགས་པའི་ནེའུ་ཟླ་ཤཱཀྱའི་རྒྱལ་པོ་བཟང་ལྡན་ཡིན་པས་དེ་དེའི་དྲུང་དུ་སོང་ངོ ། །དེའི་ཚེ་ཤཱཀྱའི་རྒྱལ་པོ་བཟང་ལྡན་པི་ཝང་ལེན་ཏེ། པི་ཝང་ལེན་པ་ན་རྒྱུད་ཆད་ནས་སྒྲ་གཞན་དུ་གྱུར་ཏོ། །མ་འགགས་པ་པི་ཝང་ལ་བྱང་བ་ཡིན་པས་དེས་སྒྲ་ཅི་འདྲ་བར་གྱུར་པའི་རྟགས་བཟུང་ནས་དེ་སྒོར་བསྔད་དེ། སྒོ་སྲུངས་ཀྱི་མི་ལ་སྨྲས་པ། ཀྱེ་ནང་རྗེ། སོང་ལ་
159b
རྒྱལ་པོ་བཟང་ལྡན་ལ་མ་འགགས་པ་ལྷའི་ཞལ་མཐོང་བར་འཚལ་ནས་སྒོ་ན་སྡོད་ཅིང་མཆིས་སོ་ཞེས་གསོལ་ཅིག་།སྒོ་སྲུང་སོང་ནས་ཤཱཀྱའི་རྒྱལ་པོ་བཟང་ལྡན་ལ་སྨྲས་པ། ལྷ།་མ་འགགས་པ་ལྷའི་ཞལ་མཐོང་བར་འཚལ་ནས་ཆབ་སྒོ་ན་སྡོད་ཅིང་མཆིས་སོ། །དེས་སྨྲས་པ། ཤེས་ལྡན་མ་འགགས་པ་ལ་སུ་འགོག་།ཤེས་ལྡན་མ་འགགས་པ་ནང་དུ་ཐོང་ཞིག་།དེ་ནང་དུ་ཞུགས་པ་དང ། རྒྱལ་པོས་འཁྱུད་ནས་འདུག་ཏུ་བཅུག་སྟེ་སྨྲས་པ། ཁྱོད་འོངས་ནས་ཅི་སྲིད་ལོན། དེས་སྨྲས་པ། གང་གི་ཚེ་ཁྱོད་པི་ཝང་ལེན་པ་ན་རྒྱུད་ཆད་ནས་སྒྲ་གཞན་དུ་གྱུར་པ་ནས་སོ། །དེ་མཆོག་ཏུ་ཡ་མཚན་སྐྱེས་ནས། དེས་སྨྲས་པ། ཁྱོད་པི་ཝང་ལེན་པ་ལ་བྱང་བ་ཡིན་ནོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། གཞོན་ནུ། དོན་ཅི་ཞིག་ལ་འོངས། མ་འགགས་པས་སྨྲས་པ། ལྷ།་རྒྱལ་པོ་ཟས་གཙང་གིས་དྲིལ་སྒྲོགས་སུ་བཅུག་པ། ཤཱཀྱ་རྣམས་ལས་ཁྱིམ་རེ་ནས་རེ་རེ་རབ་ཏུ་བྱུང་ཞིག་པར་བསྒོ་བས་དེ་ཁྱོད་ཀྱིས་མཁྱེན་པར་མཛོད་ཅིག་།རབ་ཏུ་འབྱུང་ངོ ། །རྒྱལ་པོས་སྨྲས་པ། གལ་ཏེ་དེ་ལྟ་ན་ཁོ་བོའང་རབ་ཏུ་འབྱུང་སྟེ་གྲོས་བྱ་བ་ཡོད་ཀྱི་ཁྱོད་དེ་རིང་འདི་ཉིད་ཏུ་གནས་ཐོབ་ཅིག་།དེ་དེ་ཉིད་དུ་གནས་བཏབ་བོ། །མལ་ཆ་བས་རིམས་བག་གི་དྲི་མ་ཅན་གྱི་གོས་ཀྱིས་བཏིང་ཞིང་མེ་ཏོག་གི་སིལ་མས་བཀྲམ་པའི་མལ་དུ་མ་འགགས་པ་ཉལ་བ་དང ། དེའི་འོག་ན་མེ་ཏོག་གི་རྩ་བ་
160a
༄#། །ཡོད་པའི་རེག་པ་དེའི་ཉམས་སུ་མྱོང་ནས་སྨྲས་པ། ཅི།འདི་འོག་ཏུ་རྡོ་ཕྲེའུ་ཡོད་དམ། དེ་རྣམས་ཀྱིས་བརྟག་པ་བརྩམས་པར་མེ་ཏོག་གི་རྩ་བ་ཞིག་མཐོང་ནས་དེ་རྣམས་མཆོག་ཏུ་ངོ་མཚར་སྐྱེས་སོ། །མ་འགགས་པ་མཚན་མོ་མི་བདེ་ཞིང་ཉལ་ནས་ནམ་ལངས་སོ། །རྒྱལ་པོས་སྨྲས་པ། མ་འགགས་པ། ཅི་ག་བདེ་བར་གཉིད་ལོག་གམ། དེས་སྨྲས་པ། ལྷ།་བདེ་བར་གཉིད་མ་ལོག་གོ་།རྒྱལ་པོས་སྨྲས་པ། ཅིའི་ཕྱིར། མ་འགགས་པས་སྨྲས་པ། ལྷ།་རིམས་བག་གི་དྲི་ཅན་གྱི་གོས་བཏིང་བར་མེ་ཏོག་སིལ་མ་བཀྲམ་པའི་མེ་ཏོག་གི་རྩ་བས་ལུས་སྣད་ལགས་སོ། །རྒྱལ་པོས་མལ་འཆའ་བ་བཀུག་ནས་ཁྱོད་ཀྱིས་རིམས་བག་གི་དྲི་ཅན་གྱི་གོས་བཏིང་སྟེ་ཅི་བྱ། མལ་འཆའ་བས་སྨྲས་པ། ལྷ།་བདག་ལ་དཀོར་བས་གཏད་པ་ལགས་སོ། །རྒྱལ་པོས་དཀོར་བ་བཀུག་ནས་སྨྲས་པ། ཁྱོད་ཀྱིས་རིམས་བག་གི་དྲི་ཅན་གྱི་གོས་ཕོག་སྟེ་ཅི་བྱ། དེས་སྨྲས་པ། ལྷ།་བདག་ལ་ཐ་ག་པས་གཏད་པ་ལགས་སོ། །རྒྱལ་པོས་ཐ་ག་པ་བཀུག་ནས་སྨྲས་པ། ཁྱོད་ཀྱིས་ཅིའི་ཕྱིར་རིམས་བག་གི་དྲི་ཅན་གྱི་གོས་འབུལ། ཐ་ག་པས་སྨྲས་པ། ལྷ།་སྣམ་བུ་འཐག་པའི་འཕྲོ་ཅུང་ཞིག་ལུས་པ་ན། བདག་རིམས་ཀྱིས་ཐེབས་བཞིན་བགྱིས་པ་ལགས་སོ། །རྒྱལ་པོས་སྨྲས་པ། གཞོན་ནུ་ཁྱོད་ཀྱིས་ཇི་ལྟར་ཤེས། དེས་སྨྲས་པ། ཚ་བའི་རེག་
160b
པ་ཉམས་སུ་མྱོང་བས་རིམས་བག་གི་དྲི་ལགས་སོ། །རྒྱལ་པོ་མཆོག་ཏུ་ཡ་མཚན་སྐྱེས་ཏེ་སྨྲས་པ། ཤེས་ལྡན་མ་འགགས་པ་ནི་ཤཱཀྱའི་སྐལ་བ་བཟང་པོ་དང་ལྡན་པ་ཡིན་ནོ། །དེ་ནས་ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། གཞོན་ནུ་གལ་ཏེ་ཁོ་བོ་རབ་ཏུ་བྱུང་ན། ལྷས་བྱིན་ཤཱཀྱ་རྣམས་ཀྱི་རྒྱལ་པོར་གྱུར་ཏེ། ཤཱཀྱ་རྣམས་ལ་གནོད་པ་བྱེད་པར་འགྱུར་གྱི། མ་ལ་བདག་ཅག་ཐམས་ཅད་འདུས་ལ་ལྷས་བྱིན་སྤྲོ་བ་བསྐྱེད་པར་བྱའོ་ཞེས་ཤཱཀྱའི་རྒྱལ་པོ་བཟང་ལྡན་གྱིས་དེ་བཀུག་སྟེ། དེ་ནས་ཐམས་ཅད་འདུས་ནས་སྨྲས་པ། ལྷས་བྱིན་ཁོ་བོ་ཅག་ཐམས་ཅད་རབ་ཏུ་འབྱུང་ན། ཁྱོད་ཅི་བྱེད། ལྷས་བྱིན་གྱིས་བསམས་པ། གལ་ཏེ་རབ་ཏུ་མི་འབྱུང་ངོ་ཞེས་སྨྲས་པ་དང ། ཤཱཀྱའི་རྒྱལ་པོ་བཟང་ལྡན་རབ་ཏུ་བྱུང་བར་མི་འགྱུར་གྱི་དེ་ལ་ཐབས་ཤིག་བཤམ་པར་བྱ་སྟེ་བསླུའོ། །གཞན་ཡང ། བཅོམ་ལྡན་འདས་ཀྱིས་གང་གི་ཉི་མ་ལ་ནྱ་གྲོ་དྷའི་ཀུན་དགའ་ར་བར་སྒྱུ་མའི་ཆོ་འཕྲུལ་བསྟན་པ་དེའི་ཚེ་བདག་བློ་སྐྱེས་པ། ཇི་ལྟར་འདིའི་སྒྱུ་མས་སྐྱེ་བོའི་ཚོགས་ཆེན་པོ་དབང་དུ་བྱེད་པ་དེ་བཞིན་དུ་བདག་གིས་ཀྱང་དབང་དུ་བྱའོ་ཞེས་བསམས་སོ་སྙམ་ནས་སྨྲས་པ། ཁྱེད་ཅག་རབ་ཏུ་འབྱུང་ན་བདག་ཅི་སྟེ་འདུག་།ཤཱཀྱའི་རྒྱལ་པོ་བཟང་ལྡན་གྱིས་བསམས་པ། འདི་ནི་བརྫུན་དུ་སྨྲ་བ་ཡིན་གྱི་དམ་འཆར་བཅུག་ལ་འགྲོ་བ་མང་པོས་སོ་སོར་རིག་པར་བྱའོ་སྙམ་མོ། །དེ་
161a
༄#། །ནས་རྒྱལ་པོས་ཚིག་དེ་གླེགས་བུ་ལ་བྲིས་ནས་གྲོང་ཁྱེར་སེར་སྐྱའི་གཞིར་དྲིལ་སྒྲོགས་སུ་བཅུག་པ། གྲོང་ཁྱེར་སེར་སྐྱའི་གཞིན་གནས་པའི་ཤེས་ལྡན་དག་ཉོན་ཅིག་།བཟང་ལྡན་དང ། ནམ་གྲུ་དང ། མ་འགགས་པ་དང ། ལྷས་བྱིན་ལ་སོགས་ཏེ་ཤཱཀྱ་ལྔ་བ་རྒྱ་རབ་ཏུ་འབྱུང་བར་འགྱུར་གྱི་ཐོས་པར་གྱིས་ལ་རབ་ཏུ་དགའ་བ་སྐྱེད་ཅིག་ཅེས་བསྒོའོ། །ལྷས་བྱིན་གྱིས་དེ་ཐོས་ནས་སྡུག་བསྔལ་ཆེན་པོ་དང ། ཡིད་མི་བདེ་བ་སྐྱེད་ནས། གལ་ཏེ་བདག་གིས་ཤཱཀྱའི་རྒྱལ་པོ་བཟང་ལྡན་ངེས་པར་རབ་ཏུ་འབྱུང་བར་ཤེས་པར་གྱུར་པ་དང ། བདག་ཁས་ལེན་པར་མི་འགྱུར་བ་ཞིག་།ད་ནི་གལ་ཏེ་རབ་ཏུ་མ་བྱུང་ན་བརྫུན་དུ་སྨྲ་བ་ཡིན་ནོ་ཞེས་རྒྱལ་སྲིད་ཀྱང་ཐོབ་པར་མི་འགྱུར་བས་ཐམས་ཅད་ཀྱི་ཐམས་ཅད་དུ་དུས་འདིར་ཟད་དམ། ཅི་རབ་ཏུ་བྱུང་ལ་བདག་རབ་ཏུ་བྱུང་བཞིན་དུ་རྒྱལ་སྲིད་བྱའོ་སྙམ་མོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ།་ཤཱཀྱ་རྣམས་ཀྱི་ཐ་མའི་འབྱོར་པ་ལ་བལྟའོ་སྙམ་ནས། དེས་གྲོང་ཁྱེར་དེ་གསེག་མ་དང ། གྱོ་མོ་བསལ། ཙནྡན་གྱི་ཆུས་ཆག་ཆག་བཏབ། གདུགས་དང ། རྒྱལ་མཚན་བསྒྲེང ། དར་གྱི་ཆུན་འཕྱང་མང་པོ་དབྱངས། ཤིན་ཏུ་དྲི་ཞིམ་པོའི་ཕོག་ཕོར་ཉེ་བར་བཞག་མེ་ཏོག་སྣ་ཚོགས་ཀྱི་སིལ་མས་དགའ་དགའ་ལྟར་བྱེད་དུ་བཅུག་གོ་།དེ་
161b
ནས་ཤཱཀྱ་བརྒྱ་སྟོང་དུ་མས་ཡོངས་སུ་བསྐོར་ནས་གྲོང་ཁྱེར་གྱི་སྒོ་ནས་སེང་གེའི་ཁྲི་ལ་འདུག་གོ་།ཤཱཀྱ་མོ་དང ། ཤཱཀྱ་གཞོན་ནུ་ངོ་མཚར་སྐྱེས་པ་རྣམས་ཀྱང་སྐར་ཁུང་ཁོལ་མ་ཅན་དང ། ། སྐར་ཁུང་དང ། སྟེགས་བུ་དག་ལ་འདུག་གོ་།ཤཱཀྱ་རྣམས་ཀྱི་འབྱོར་པ་ལ་ལྟ་བར་འདོད་པའི་སྐྱེས་པའི་ཚོགས་ཡུལ་སྣ་ཚོགས་ནས་ལྷགས་པ་དག་ཀྱང་ལམ་པོ་ཆེ་དང ། ཚོང་འདུས་དང།་བཞི་མདོ་དང ། སུམ་མདོ་རྣམས་སུ་འདུག་གོ་།ཤཱཀྱ་ལས་སུ་དག་གིས་ནི་མཉེས་པར་འགྱུར། སུ་དག་གིས་ནི་ཐུགས་བྱུང་བར་འགྱུར་བར་བརྟག་པའི་བྲམ་ཟེ་མཚན་མཁན་དང།་ལྟས་མཁན་དག་བཀུག་གོ་།ཤཱཀྱ་རྣམས་དོ་ཤལ་དང ། གདུ་བུ་དང ། དཔུང་རྒྱན་དང ། རྒྱན་གྱིས་བརྒྱན་པ་རྣམས་ཀྱི་ཕ་དང ། མ་དག་ལ་བལྟས་ནས། སོ་སོའི་ཤིང་རྟར་ཞུགས་ཏེ་ཕྱིར་འབྱུང་བར་བརྩམས་པ་ན། ཤཱཀྱའི་རྒྱལ་པོ་བཟང་ལྡན་སྣ་ལ་བྱུང་བ་མཚན་མཁན་རྣམས་ཀྱིས་མཐོང་ནས་དེ་དག་གིས་སྨྲས་པ། རེ་ཞིག་འདིས་ནི་མཉེས་པར་བྱེད་པར་འགྱུར་རོ། །དེ་བཞིན་དུ་ནམ་གྲུ་དང ། མ་འགགས་པ་ལ་སོགས་པ་ཕྱིར་ཕྱུང་བ་ན། དེ་རྣམས་ཀྱང་མཚན་མཁན་རྣམས་ཀྱིས་ལུང་བསྟན་ཏོ། །དེ་ནས་ལྷས་བྱིན་ཕྱིར་བྱུང་སྟེ།་དེ་ཕྱིར་བྱུང་བ་ན་བྱ་ཁྲས་གཙུག་གི་ནོར་བུ་ཕྲོག་པ་མཚན་མཁན་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། འདིའི་རྟགས་དང་སྦྱར་ན་གདོན་མི་ཟ་བར་སྟོན་པ་ལ་
162a
༄#། །འཁུས་ནས་དམྱལ་བར་གཞོལ་བར་འགྱུར་རོ། །ཀོ་ཀ་ལི་ཀ་དང ། ཁན་དྲ་དྲབ་བྱ་དང ། ཀ་ཏ་མོ་ར་ཀ་དང ། རྒྱལ་དང ། རྒྱ་མཚོས་སྦྱིན་རྣམས་ཕྱིར་བྱུང་བ་ན། བོང་བུའི་སྐད་གྲགས་ནས་དེ་དག་ཀྱང་མཚན་མཁན་རྣམས་ཀྱིས་ལུང་བསྟན་པ། འདི་དག་གིས་ཀྱང་ཉན་ཐོས་ཆེན་པོ་རྣམས་ལ་ཚིག་ངན་པ་སྨྲས་ནས་དམྱལ་བར་གཞོལ་བར་འགྱུར་རོ། །ཉེ་དགའ་གླང་པོ་ཆེ་ལ་ཞོན་ནས་ཕན་ཚུན་དུ་ལྟ་བར་བྱེད་པ་ན་མུ་ཏིག་གི་དོ་ཤལ་ལྷུང་བ་དང ། དེ་གླང་པོ་ཆེ་ལས་བབས་ཏེ་བླངས་སོ། །དེའང་དེ་རྣམས་ཀྱིས་ལུང་བསྟན་པ། འདི་ཧ་ཅང་འདོད་ཆེན་ཆེས་པས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དེ་ནས་བཟང་ལྡན་དང ། ནམ་གྲུ་དང ། མ་འགགས་པ། ལྷས་སྦྱིན་ལ་སོགས་པ་ཤཱཀྱ་ལྔ་བརྒྱ་པོ་དེ་རྣམས་སྐྱེད་མོས་ཚལ་དུ་དུས་སྟོན་ལ་འགྲོ་བ་བཞིན་དུ་བཟང་པོས་འགྲན་ཅིང་བཅོམ་ལྡན་འདས་གང་ན་བ་དེར་དོང་ངོ ། །བཅོམ་ལྡན་འདས་ཀྱིས་དགོངས་པ། གལ་ཏེ་ངས་ཤཱཀྱ་རྣམས་ལ་དགེ་སློང་ཚུར་ཤོག་ཅེས་བྱ་བས་རབ་ཏུ་བྱུང་ན་ཁ་ཅིག་གིས་ནི་མཉེས་པར་བྱེད་པར་འགྱུར། ཁ་ཅིག་གིས་ནི་མཉེས་པར་བྱེད་པར་མི་འགྱུར་ཏེ། མཉེས་པར་བྱེད་པར་མི་འགྱུར་བ་གང་དག་ཡིན་པ་དེ་དག་གཞན་དུ་སེམས་ལ། དགེ་སློང་ཚུར་ཤོག་ཅེས་བྱ་བ་ནི་ཐམས་ཅད་སྲིད་པ་ཐ་མ་པ་ཡིན་པས། མ་
162b
ལ།་ངས་ཐམས་ཅད་དགེ་སློང་རྣམས་ཀྱིས་གསོལ་བ་དང ། བཞིའི་ལས་ཀྱིས་རབ་ཏུ་བྱུང་བ་དང ། བསྙེན་པར་རྫོགས་སུ་གཞུག་གོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ།་དགེ་སློང་དག་།སེར་སྐྱའི་གཞིའི་ཤཱཀྱ་རྣམས་གསོལ་བ་དང ། བཞིའི་ལས་ཀྱིས་རབ་ཏུ་བྱུང་བ་དང ། བསྙེན་པར་རྫོགས་པར་གྱིས་ཤིག་།བཙུན་པ། བཀའ་བཞིན་འཚལ་ཞེས་དགེ་སློང་དེ་རྣམས་ཀྱིས་བཅོམ་ལྡན་འདས་ལས་མཉན་ཏོ། །རྒྱལ་པོ་ཟས་གཙང་གིས་ཤཱཀྱ་རྣམས་ཀྱི་འདྲེག་མཁན་ཉེ་བར་འཁོར་ཞེས་བྱ་བ། དེ་རྣམས་རབ་ཏུ་འབྱིན་པ་ན་སྐྲ་འདྲེག་པར་བཏང་ནས་ཤཱཀྱའི་རྒྱལ་པོ་བཟང་ལྡན་གྱི་སྐྲ་འདྲེག་པ་ན། དེ་ངོམ་ཟུང་གནག་ཅིར་མཆི་མ་འཛག་ཅིང་སྐད་འཛེར་ཅིང་དབུགས་བརྩེགས་པས་སྐྲ་འདྲེག་པར་བྱེད་དོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། ཉེ་བར་འཁོར། ཅིའི་ཕྱིར་དུ། དེ་སྙིང་རྗེ་རྗེ་སྐད་དུ་གཅོམ་ཆུང་ངུར་དལ་བུས་ཚིག་རེ་རེ་ནས་སྨྲས་པ། ལྷ།་བདག་ཛམྦུའི་གླིང་གི་སྐྱེས་བུ་གཙོ་བོ་རྣམས་ལ་བསྙེན་བཀུར་བགྱིད་བགྱིད་ཕ་མི་ཕལ་པ་རྣམས་ལའང་བསྙེན་བཀུར་བགྱིད་པར་འགྱུར་བ་ལྟ་ཞིག་།ཁྱེད་ཀྱིས་སྤངས་ཏེ་གསོན་པ་བས་ན་གུམ་མི་བསྔོའོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། ཉེ་བར་འཁོར་ཁྱོད་ཀྱིས་རྗེ་བོ་ལ་སྙིང་ཉེ་བའི་མཉེས་པར་བྱ་བ་བསྟན་ཟིན་ཏེ་ཆོག་གི་།མྱ་ངན་མ་བྱེད་ཅིག་།ངས་ཇི་ལྟར་མི་ཕལ་ཆེ་བ་རྣམས་ལ་
163a
༄#། །བསྙེན་བཀུར་བྱེད་པར་མི་འགྱུར་བ་དེ་ལྟར་བྱའོ་ཞེས་སྨྲས་ནས། དེས་ཕྱོགས་གཅིག་ཏུ་རས་གཅིག་བཏིང་ནས་ཤཱཀྱའི་གཞོན་ནུ་རྣམས་ལ་སྨྲས་པ ། ཤེས་ལྡན་གཞོན་ནུ་དག་ཉོན་ཅིག་།འདྲེག་མཁན་ཉེ་བར་འཁོར་འདིས་བདག་ཅག་ལ་བཀུར་སྟི་བྱས་ལ་བདག་ཅག་ཀྱང་སླར་ཁྱིམ་དུ་མི་གནས་ཀྱི། རྒྱན་རྣམས་དེའི་འཚོ་བའི་རྐྱེན་དུ་རས་ཀྱི་སྟེང་དུ་ཞོག་ཅིག་།དེ་རྣམས་ཀྱི་སེ་མོ་དོ་དང ། དོ་ཤལ་དང ། མགུལ་རྒྱན་དང ། གདུ་བུ་དང ། དཔུང་རྒྱན་དང ། རྣ་རྒྱན་ལ་སོགས་པ་རིན་པོ་ཆེ་སྣ་ཚོགས་ཀྱིས་བརྒྱན་པའི་རྒྱན་ཁྱད་པར་ཅན་རྣམས་ཀྱིས་རས་ཀྱི་སྟེང་དུ་ཕུང་པོ་ཆེན་པོར་སྤུངས་སོ། །ཉེ་བར་འཁོར་གྱིས་དེ་རྣམས་མཐར་གྱིས་སྐྲ་བྲེགས་ཏེ་དེ་རྣམས་ཁྲུས་ལ་དོང་བ་དང ། དེས་བསམས་པ།་རེ་ཞིག་གཞོན་ནུ་འདི་དག་རིགས་དང ། འབྱོར་པ་དང ། ལང་ཚོ་ལ་བབ་ཅིང་ཆུང་མ་དང་ལྡན་ལ། མཛོད་དང ། བང་མཛོད་ཀྱིས་རྒྱས་པའང་སྤངས་ནས་རབ་ཏུ་བྱུང་ན་བདག་རྒྱན་འདི་ཙམ་ལ་ཆགས་པ་ནི་ཚུལ་མ་ཡིན་པས་སྡུག་བསྔལ་བར་འགྱུར་རོ། །གལ་ཏེ་བདག་རིགས་ངན་དུ་མ་སྐྱེས་ན་བདག་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་ཆུ་བོ་ལས་བརྒལ་བ་དང ། སྦྱོར་བ་ལས་ཡང་དག་པར་འདའ་བར་བྱ་བའི་ཕྱིར་བཙལ་བ་དང ། འབད་པ་ལ་བརྩོན་པར་བྱ་བ་ཞིག་སྙམ་མོ། །འདི་ནི་ཆོས་ཉིད་ཡིན་ཏེ།
163b
ཇི་ལྟར་སངས་རྒྱས་བཅོམ་ལྡན་འདས་རྣམས་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་པ་དེ་བཞིན་དུ་ཉན་ཐོས་ཆེན་པོ་རྣམས་ཀྱང་བྱད་པས།་ཚེ་དང་ལྡན་པ་ཤཱ་རདྭ་ཏིའི་བུས་འདྲེག་མཁན་ཉེ་བར་འཁོར་ལྷག་པར་སྐྱོ་བ་སྐྱེས་པ་མཐོང་ངོ ། །མཐོང་ནས་ཀྱང་འདྲེག་མཁན་ཉེ་བ་འཁོར་གང་ན་པ་དེར་སོང་སྟེ་ཕྱིན་ནས་འདྲེག་མཁན་ཉེ་བར་འཁོར་ལ་འདི་སྐད་ཅེས་སྨྲས་སོ། །ཉེ་བར་འཁོར། ཁྱོད་ཅིའི་ཕྱིར་ཤིན་ཏུ་མི་དགའ་བས་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་།ཉེ་བར་འཁོར་གྱིས་སྨྲས་པ། བཙུན་པ་ཤཱ་རདྭ་ཏིའི་བུ། གང་གི་ཕྱིར་ད་ལྟར་གཞོན་ནུ་འདི་དག་རིགས་དང ། འབྱོར་པ་དང ། ལང་ཚོལ་བབ་ཅིང་ཆུང་མ་དང་ལྡན་ལ་བང་མཛོད་དང ། བར་མཛོད་ཀྱིས་རྒྱས་པའང་སྤངས་ནས་རབ་ཏུ་འབྱུང་ན། བདག་རྒྱན་འདི་ཙམ་ལ་ཆགས་པ་ནི་ཚུལ་མ་ཡིན་པས་སྡུག་བསྔལ་བར་འགྱུར་རོ། །གལ་ཏེ་བདག་རིགས་ངན་དུ་མ་སྐྱེས་ན་བདག་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་ཆུ་བོ་ལས་བརྒལ་བ་དང ། སྦྱོར་བ་ལས་ཡང་དག་པར་འདའ་བར་བྱ་བའི་ཕྱིར་བཙལ་བ་དང ། འབད་པ་ལ་བརྩོན་པར་བགྱི་བ་ཞིག་ན་བདག་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། ཚེ་དང་ལྡན་པ་ཤཱ་རདྭ་ཏིའི་བུས་སྨྲས་པ། བཞིན་བཟང ། ཐུབ་པའི་དབང་པོའི་གསུང་རབ་
164a
༄#། །འདི་ལ་ནི་རིགས་སྙིང་པོར་བྱེད་པ་མ་ཡིན། རུས་སྙིང་པོར་བྱེད་པ་མ་ཡིན། རྒྱུད་སྙིང་པོར་བྱེད་པ་མ་ཡིན། ཐོས་པ་སྙིང་པོར་བྱེད་པ་མ་ཡིན་ཏེ། འདི་ལྟར་ཐུབ་པའི་དབང་པོའི་གསུང་རབ་འདི་ལ་ནི་སྒྲུབ་པ་སྙིང་པོར་བྱེད་པ་ཡིན་ནོ། །དེ་བཞིན་གཤེགས་རྣམས་རིགས་དང་ནི། རྒྱུད་དང་རུས་ལ་རྟོག་མི་མཛད། །འདས་ནས་ཡུན་རིང་ལོན་པ་ཡི། ། ལས་རྣམས་ལ་ནི་རྟོག་པར་མཛད། །གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་རྫོགས་པར་འདོད་ན་ཚུར་བཅོམ་ལྡན་འདས་ཀྱི་སྤྱན་སྔར་འདོད་དང ། བཅོམ་ལྡན་འདས་ཀྱིས་རབ་ཏུ་འབྱིན་པར་འགྱུར་རོ། །དེས་ཁས་བླངས་སོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས་འདྲེག་མཁན་ཉེ་པར་འཁོར་ཁྲིད་དེ་བཅོམ་ལྡན་འདས་གང་ན་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། ཉེ་བར་འཁོར་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་འཚལ་ལགས་ན་ཐུགས་བརྩེ་བར་ཉེ་བར་བཟུང་སྟེ། བཅོམ་ལྡན་འདས་ཀྱིས་འདི་རབ་ཏུ་དབྱུང་བ་དང ། བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་དེ་ལ་བཀའ་སྩལ་པ། དགེ་སློང་ཚུར་ཤོག་།ཚངས་
164b
པར་སྤྱོད་པ་སྤྱོད་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པའི་མོད་ཁོ་ནར་སྐྲ་བྱི་བ་དང ། སྣམ་སྦྱར་གྱོན་པ་དང ། ལག་པ་ལྷུང་བཟེད་དང ། བྱ་མ་བུམ་གྱིས་འབྲེལ་བ་དང ། སྐྲ་དང ། ཁ་སྤུ་སྐྱེས་ནས་ཞག་བདུན་ལོན་པ་ཙམ་དང ། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས།་སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཤཱཀྱ་རབ་ཏུ་བྱུང་བ་རྣམས་ནི་རྒན་རིམས་ཇི་ལྟ་བ་བཞིན་དུ་འདུད་པ་བྱེད་པས། ཤཱཀྱའི་རྒྱལ་པོ་བཟང་ལྡན་འདུད་པར་བྱེད་པ་ན་ཉེ་བར་འཁོར་གྱི་རྐང་པ་ཡིན་པར་ཤེས་སོ། །དེ་ནས་དེས་གདོང་བཏེག་སྟེ་གསོལ་པ། བཅོམ་ལྡན་འདས། འདི་ནི་ཉེ་བར་འཁོར་ལགས་ན། ཅི། བདག་གིས་འདིའི་རྐང་པ་གཉིས་ལའང་གདུད་པར་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། བུ།་ང་རྒྱལ་སྤངས་པའི་ཕྱིར་རབ་ཏུ་བྱུང་བ་ཡིན་ཏེ། འདི་རྒན་གྱི། ང་རྒྱལ་གྱི་དྲེགས་པ་ཆོག་ལ་ཐུད་ཅིག་།དེས་དེའི་རྐང་པ་ལ་གཏུགས་པ་ནས་ཆེན་པོ་ལན་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས་རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག་རབ་ཏུ་ལྡེག་།ཀུན་ཏུ་རབ་ཏུ་ལྡེག་སྟེ། ཤར་ཕྱོགས་མཐོན་ནུབ་ཕྱོགས་དམའ། ནུབ་ཕྱོགས་མཐོན་ཤར་ཕྱོགས་དམའ། ལྷོ་ཕྱོགས་མཐོ་
165a
༄#། །བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བར་གྱུར་ཏེ། དེ་ལྟར་ཐམས་ཅད་ཀྱིས་རིམ་བཞིན་དུ་གཏུགས་སོ། །ལྷས་བྱིན་གྱིས་མ་བཏུད་པ་དང ། བཅོམ་ལྡན་འདས་ཀྱིས་བཀའ་སྩལ་པ། བུ། ང་རྒྱལ་སྤང་བའི་ཕྱིར་རབ་ཏུ་བྱུང་བ་ཡིན་གྱིས་ཐུད་ཅིག ། དེས་གསོལ་པ། བདག་གིས་དེའི་རྐང་པ་ལ་མ་གཏུགས་ན་ཁྱོད་ལ་གནོད་པ་ཅི་མཆིས་ཞེས་ཏེ་འདུད་དུ་མ་བཏུབ་སྟེ། དེར་ཐོག་མར་བཅོམ་ལྡན་འདས་ཀྱི་བཀའ་ལྷས་བྱིན་གྱིས་བཅག་གོ་།སངས་རྒྱས་བཅོམ་ལྡན་འདས་ཡུལ་སེར་སྐྱའི་གཞི་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །དེ་ནས་སེར་སྐྱའི་གཞི་ན་གནས་པའི་ཤཱཀྱ་རབ་ཏུ་མང་པོ་འདུན་ཁང་དུ་ཚོགས་ཤིང་འདུས་ནས་བར་སྐབས་ཀྱི་གཏམ་འདི་ལྟ་བུ་དག་གླེང་བར་བྱེད་དེ། ཤེས་ལྡན་དག་།ཤཱཀྱ་རྣམས་ནི་གང་ལས་སྐྱེས། ཐོག་མ་ནི་གང་ཡིན། རྒྱུ་ནི་ཅི་ཞིག་ཡིན། ཤཱཀྱ་རྣམས་ཀྱི་སྔོན་གྱི་རིགས་རྒྱུད་ནི་གང་ཡིན། གལ་ཏེ་བདག་ཅག་གི་དྲུང་དུ་འགའ་ཞིག་འོངས་ནས་འདི་སྐད་འདྲི་སྟེ། ཤེས་ལྡན་དག་།ཤཱཀྱ་རྣམས་ནི་གང་ལས་སྐྱེས། ཐོག་མ་ནི་གང་ཡིན། རྒྱུ་ནི་ཅི་ཞིག་ཡིན། ཤཱཀྱ་རྣམས་ཀྱི་སྔོན་གྱི་རིགས་རྒྱུད་ནི་གང་ཡིན་ཞེས་དེ་སྐད་དུ་འདྲི་ན། བདག་ཅག་གིས་ནི་ཤཱཀྱ་རྣམས་གང་ལས་སྐྱེས་
165b
པ་དང ། ཐོག་མ་གང་ཡིན་པ་དང ། རྒྱུ་ནི་ཅི་ཞིག་ཡིན་པ་དང ། ཤཱཀྱ་རྣམས་ཀྱི་སྔོན་གྱི་རིགས་རྒྱུད་ནི་གང་ཡིན་པའང་མི་ཤེས་ན་ཇི་སྐད་དུ་ལུང་བསྟན། ཚུར་བདག་ཅག་བཅོམ་ལྡན་འདས་གང་ན་བ་དེར་དོང་ལ་ལྷགས་པ་དང ། བཅོམ་ལྡན་འདས་ལ་དོན་དེ་ཉིད་ཞུས་ནས་བཅོམ་ལྡན་འདས་ཀྱིས་བདག་ཅག་ལ་ཇི་སྐད་དུ་ལུང་བསྟན་པ་དེ་བཞིན་དུ་གཟུང་བར་བྱའོ། ། དེ་ནས་སེར་སྐྱའི་གཞི་ན་གནས་པའི་ཤཱཀྱ་རབ་ཏུ་མང་པོ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་སེར་སྐྱའི་གཞིའི་ཤཱཀྱ་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ། འདིར་བདག་སེར་སྐྱའི་གཞིའི་ཤཱཀྱ་རབ་ཏུ་མང་པོ་འདུན་ཁང་དུ་ཚོགས་ཤིང་འདུས་ནས་བར་སྐབས་ཀྱི་བཀའ་མཆིད་འདི་ལྟ་བུ་དག་གླེང་སྟེ། ཤཱཀྱ་རྣམས་ནི་གང་ལས་སྐྱེས། ཐོག་མ་ནི་གང་ཡིན། རྒྱུ་ནི་ཅི་ཞིག་ཡིན། ཤཱཀྱ་རྣམས་ཀྱི་སྔོན་གྱི་རིགས་རྒྱུད་ནི་གང་ཡིན། གལ་ཏེ་བདག་ཅག་གི་དྲུང་དུ་འགའ་ཞིག་འོངས་ནས་འདི་སྐད་འདྲི་སྟེ། ཤེས་ལྡན་དག་།ཤཱཀྱ་རྣམས་ནི་གང་ལས་སྐྱེས། ཐོག་མ་ནི་གང་ཡིན། རྒྱུ་ནི་ཅི་ཞིག་ཡིན། ཤཱཀྱ་རྣམས་ཀྱི་སྔོན་གྱི་རིགས་རྒྱུད་ནི་གང་ཡིན་ཞེས་དེ་སྐད་དུ་འདྲི་ན། བདག་ཅག་གིས་ཤཱཀྱ་རྣམས་ནི་གང་ལས་སྐྱེས། ཐོག་མ་ནི་གང་ཡིན། རྒྱུ་ནི་ཅི་ཞིག་ཡིན།
166a
༄#། །ཤཱཀྱ་རྣམས་ཀྱི་སྔོན་གྱི་རིགས་རྒྱུད་གང་ཡིན་པའང་མི་ཤེས་ན་ཇི་སྐད་དུ་ལུང་བསྟན། ཚུར་བདག་ཅག་བཅོམ་ལྡན་འདས་གང་ན་བ་དེར་དོང་ལ་ལྷག་པ་དང ། བཅོམ་ལྡན་འདས་ལ་དོན་འདི་ཉིད་ཞུས་ཏེ། བཅོམ་ལྡན་འདས་ཀྱིས་བདག་ཅག་ལ་ཇི་སྐད་དུ་ལུང་བསྟན་པ་དེ་བཞིན་དུ་གཟུང་བར་བགྱིའོ་སྙམ་ནས་དེའི་སླད་དུ་བཅོམ་ལྡན་འདས་ལ་བདག་ཅག་དོན་འདི་ཉིད་ཞུ་ལགས་ན། བཅོམ་ལྡན་འདས། ཤཱཀྱ་རྣམས་ནི་གང་ལས་སྐྱེས་ལགས། ཐོག་མ་ནི་གང་ལགས། རྒྱུ་ནི་ཅི་ཞིག་ལགས། ཤཱཀྱ་རྣམས་ཀྱི་སྔོན་གྱི་རིགས་རྒྱུད་ནི་གང་ལགས། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་ངས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ནས་ཆོས་ཀྱི་གཏམ་གླེངས་ན། མུ་སྟེགས་ཅན་དང ། ཀུན་ཏུ་རྒྱུ་གཞན་དག་འདི་སྐད་ཅེས་དགེ་སློང་གཽ་ཏ་མ་ནི་ཅི་འདོད་པ་དེ་ལུང་སྟོན་པས་བདག་ཉིད་བསྟོད་པར་བྱེད་དོ། །ཞེས་སྨྲ་བ་གང་ཡིན་པའི་གནས་འདི་ཡོད་པས་ངའི་ཉན་ཐོས་ལས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ནས་ཆོས་ཀྱི་གཏམ་གླེངས་པར་ནུས་པ་སུ་ཡོད་སྙམ་མོ། །དེའི་ཚེ་ཚེ་དང་ལྡན་པ་མཽངྒལ་གྱི་བུ་ཆེན་པོ་འཁོར་དེ་ཉིད་དུ་འདུས་ཤིང་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་བཀའ་སྩལ་པ། མཽངྒལ་
166b
གྱི་བུ།་ང་རོ་རྒྱབ་བསྙུང་བས་རེ་ཞིག་དེ་བསལ་གྱི། ཁྱོད་ཀྱིས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ནས་དགེ་སློང་རྣམས་ལ་ཆོས་ཀྱི་གཏམ་བྱ་བར་སྤོབས་པར་གྱིས་ཤིག་ཚེ་དང་ལྡན་པ་མཽངྒལ་གྱི་བུ་ཆེན་པོས་བཅོམ་ལྡན་འདས་ལ་ཅང་མི་སྨྲ་བས་ཁས་བླངས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽངྒལ་གྱི་བུ་ཆེན་པོས་ཅང་མི་སྨྲ་བས་ཁས་བླངས་པར་ཐུགས་སུ་ཆུད་ནས་སྣམ་སྦྱར་བཏབ་སྟེ་སྔས་སུ་བཅུག་ནས། གློ་གཡས་པ་ཕབ་སྟེ། ཞབས་ཀྱི་སྟེང་དུ་ཞབས་བཞག་ནས་སྣང་བའི་འདུ་ཤེས་དང ། དྲན་པ་དང ། ཤེས་བཞིན་དང་ལྡན་པའི་འདུ་ཤེས་ཁོ་ན་ཡིད་ལ་མཛད་པས་མནལ་ཏོ། །དེ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོ་འདི་སྙམ་དུ་སེམས་ཏེ། མ་ལ། བདག་གིས་སེམས་ཇི་ལྟར་མཉམ་པར་བཞག་ན་ཤཱཀྱ་རྣམས་གང་ལས་སྐྱེས་པ་དང ། ཐོག་མ་གང་ཡིན་པ་དང ། རྒྱུ་ནི་ཅི་ཡིན་པ་དང ། ཤཱཀྱ་རྣམས་ཀྱི་སྔོན་གྱི་རིགས་རྒྱུད་གང་ཡིན་པ་མཐོང་བར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པར་འཇུག་པར་བྱའོ་སྙམ་ནས། ཚེ་དང་ལྡན་པ་མཽངྒལ་གྱི་བུ་ཆེན་པོས་སེམས་ཇི་ལྟར་མཉམ་པར་བཞག་ན། ཤཱཀྱ་རྣམས་ཀྱི་སྔོན་གྱི་རིགས་རྒྱུད་མཐོང་བར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་དང ། ཚེ་དང་ལྡན་པ་མཽངྒལ་གྱི་བུ་ཆེན་པོས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ཤཱཀྱ་རྣམས་གང་ལས་སྐྱེས་པ་དང ། ཐོག་
167a
༄#། །སྨྲས་སོ། །བཙུན་པ་མཽངྒལ་གྱི་བུ་ཆེན་པོ། བཅོམ་ལྡན་འདས་ཀྱི་ཉན་ཐོས་འདི་ལྟར་རྫུ་འཕྲུལ་ཆེ་བ་འདི་ལྟར་མཐུ་ཆེ་བ་གཞན་ཡང་མཆིས་ལགས་སམ།་རྒྱལ་པོ་ཆེན་པོ། མཆིས་སོ་ཞེས་ཚིགས་སུ་བཅད་དེ་སྨྲས་པ། མཐུ་ཆེ་བ་དག་གསུམ་རིག་དང ། །སེམས་ཀྱི་རྣམ་གྲངས་ཤེས་པ་དང ། །ཟག་ཟད་དགྲ་བཅོམ་གང་ཡིན་པ། །ཐུབ་པའི་ཉན་ཐོས་མང་དུ་མཆིས། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བདག་གི་བུ་འབའ་ཞིག་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བར་མ་ཟད་དེ། འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བའི་རབ་ཏུ་བྱུང་བ་གཞན་ཡང་ཡོད་དོ་སྙམ་ནས་དེ་ཤིན་ཏུ་དགའ་བ་གང་ཡིན་པ་དེ་དང་བྲལ་བར་གྱུར་ཏོ། །སྐབས་དེར་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་དེ། ཀྱེ་མ་བརྒྱ་བྱིན་དང ། ཚངས་པ་ལ་སོགས་པ་ལྷ་རྣམས་འོངས་ན། ལྷའི་འཁོར་དག་པ་ལ་ཆོས་བཤད་དོ་སྙམ་པ་དང ། ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་པ་དེའི་ཚེ། སྲོག་ཆགས་གྲོག་སྦུར་རྣམས་ཀྱི་སེམས་ཀྱིས་ཀྱང་བཅོམ་ལྡན་འདས་ཀྱི་དགོངས་པ་ཤེས་པར་འགྱུར་ན། བརྒྱ་བྱིན་དང ། ཚངས་པ་ལ་སོགས་པ་ལྷ་རྣམས་ཀྱིས་ལྟ་སྨོས་ཀྱང་ཅི་དགོས། གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་
167b
པ་དེའི་ཚེ་ཉན་ཐོས་ཆེན་པོ་རྣམས་ཀྱི་སེམས་ཀྱིས་ཀྱང་བཅོམ་ལྡན་འདས་ཀྱི་དགོངས་པ་མི་ཤེས་ན་བརྒྱ་བྱིན་དང ། ཚངས་པ་ལ་སོགས་ཏེ་ལྷ་རྣམས་ཀྱིས་ལྟ་ཅི་སྨོས། སྲོག་ཆགས་གྲོག་སྦུར་རྣམས་ཀྱིས་ལྟ་ག་ལ་ཤེས། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བཅོམ་ལྡན་འདས་ཅིའི་ཕྱིར་འཇིག་རྟེན་པའི་ཐུགས་བསྐྱེད་པ་མཛད་སྙམ་པ་ལས་དེ་འདི་སྙམ་དུ་སེམས་ཏེ། ལྷའི་འཁོར་དག་པ་རྣམས་ལ་ཆོས་འཆད་པར་བཞེད་དོ་སྙམ་ནས་དེས་ལྷའི་བུ་བཟོ་ཐམས་ཅད་པ་ལ་བསྒོ་བ། བཟོ་ཐམས་ཅད་པ། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་པར་བཞེད་ཀྱི། ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་བརྩེགས་མ་གདན་སྣ་ཚོགས་བཤམས་པ་ཞིག་སྤྲུལ་ཅིག་།ཀཽ་ཤི་ཀ། ཁྱོད་ཀྱི་གསུང་མཆོག་ཏུ་བཟང་པོ་ཞེས་ལྷའི་བུ་བཟོ་ཐམས་ཅད་པས་ལྷའི་དབང་པོ་བརྒྱ་བྱིན་ལས་མཉན་ཏེ་ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་བརྩེགས་མ་གདན་སྣ་ཚོགས་བཤམས་པ་ཞིག་སྤྲུལ་ཏོ། །དེ་ལ་རྒྱལ་པོ་ཆེན་པོ་བཞི་སྒོ་བཞིན་འཁོད་པ་ནི་ཡུལ་འཁོར་སྐྱོང་དང ། འཕགས་སྐྱེས་པོ་དང ། མིག་མི་བཟང་དང ། ལུས་ངན་པོ་སྟེ། ཤར་སྒོ་ན་ནི་ཡུལ་འཁོར་སྐྱོང་དཔུང་རྒྱན་དང ། རྣ་ཆ་གདུབ་ཀོར་དང ། ཕྲེང་བ་དང་རྒྱན་སྣ་ཚོགས་ཀྱིས་བརྒྱན་པའོ། །ལྷོ་ཕྱོགས་ན་ནི་འཕགས་སྐྱེས་པོ། ངའི་\?\་རྒྱན་ཐམས་ཅད་ཀྱིས་བརྒྱན་
168a
༄#། །བའི་གྲངས་སུ་འགྲོའོ། །དེ་ནས་སེམས་ཅན་བརྐམ་ཆགས་ཀྱི་རང་བཞིན་ཅན་ཞིག་གིས་མཛུབ་མོའི་རྩེ་མོས་སའི་བཅུད་མྱོང་བར་བྱེད་དེ། ཇི་ལྟ་ཇི་ལྟར་མྱངས་པ་དེ་ལྟ་དེ་ལྟར་སྲེད་དོ། །ཇི་ལྟ་ཇི་ལྟར་སྲེད་པ་དེ་ལྟ་དེ་ལྟར་ཁམ་གྱི་ཟས་རིམ་གྱིས་ཟའོ། །སེམས་ཅན་གཞན་དག་གིས་ཀྱང་སེམས་ཅན་དེ་མཛུབ་མོའི་རྩེ་མོས་སའི་བཅུད་མྱོང་བར་བྱེད་དེ། ཇི་ལྟ་ཇི་ལྟར་མྱངས་པ་དེ་ལྟ་དེ་ལྟར་སྲེད་ལ། ཇི་ལྟ་ཇི་ལྟར་སྲེད་པ་དེ་ལྟ་དེ་ལྟར་ཁམ་གྱི་ཟས་རིམ་གྱིས་ཟ་བ་མཐོང་ངོ ། །མཐོང་ནས་ཀྱང་དེ་རྣམས་ཀྱིས་ཀྱང་མཛུབ་མོའི་རྩེ་མོས་སའི་བཅུད་མྱང་པར་རྩོམ་སྟེ། ཇི་ལྟ་ཇི་ལྟར་མྱངས་པ་དེ་ལྟ་དེ་ལྟར་སྲེད་དོ། །ཇི་ལྟ་ཇི་ལྟར་སྲེད་པ་དེ་ལྟ་དེ་ལྟར་ཁམ་གྱི་ཟས་རིམ་གྱིས་ཟའོ། །གང་གི་ཚེ་སེམས་ཅན་ད་རྣམས་ཀྱིས་སའི་བཅུད་ལ་ཁམ་གྱི་ཟས་རིམ་གྱིས་ཟོས་པ་དེའི་ཚེ། དེ་རྣམས་ཀྱི་ལུས་ལ་མཁྲང་བ་དང ། ལྕི་བ་ཞུགས་པར་གྱུར་ཏོ། །དེ་རྣམས་ཀྱི་ཁ་དོག་བཟང་པོའི་གསལ་བ་གང་ཡིན་པ་དེའང་ནུབ་པར་གྱུར་པས་འཇིག་རྟེན་དུ་མུན་པ་བྱུང་བར་གྱུར་ཏོ། །གཽ་ཏ་མ་དག་།ཆོས་ཉིད་ཀྱིས་འཇིག་རྟེན་དུ་མུན་པ་བྱུང་བ་ན་ཉི་མ་དང ། ཟླ་བ་གཉིས་འཇིག་རྟེན་དུ་འབྱུང་བར་འགྱུར་རོ། །རྒྱུ་སྐར་དང ། སྐད་ཅིག་དང ། ཐང་ཅིག་དང ། ཡུད་ཙམ་དང ། མཚན་མོ་དང ། ཉིན་མོ་དང ། ཟླ་བ་དང ། ཟླ་བ་ཕྱེད་དང ། དུས་ཚིགས་དང ། ལོ་འཇིག་
168b
རྟེན་དུ་འབྱུང་བར་འགྱུར་རོ། །དེ་རྣམས་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །དེ་རྣམས་ལས་ཟས་ལ་ཆེས་ཉུང་ཟད་དུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་འགྱུར་རོ། །ཁ་ཟས་ལ་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་འགྱུར་ཏེ། ཁ་ཟས་ཀྱི་ཚད་གཉིས་ལ་བརྟེན་ནས་ཁ་དོག་གི་རྣམ་པ་གཉིས་མངོན་ཏེ། ཁ་དོག་རྣམས་པ་གཉིས་ཡོད་པས། ཀྱེ། སེམས་ཅན་ཁོ་བོ་ནི་ཁ་དོག་དང་ལྡན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་དོ། ཁ་དོག་གི་མངོན་པའི་ང་རྒྱལ་ཅན་དེ་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་སའི་བཅུད་དེ་ནུབ་པར་གྱུར་ཏོ། །གཽ་ཏ་མ་དག་།སའི་བཅུད་དེ་ནུབ་པ་ན་སེམས་ཅན་དེ་རྣམས་ཚོགས་ཤིང་འདུས་ནས་འདི་སྐད་ཅེས། ཀྱི་ཧུད་བྲོ་བ། ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང་སྡུག་བསྔལ་བར་གྱུར་ཏོ། །དཔེར་ན། ད་ལྟར་མི་རྣམས་ཀྱིས་ཟས་ཞིམ་པོ་ཅུང་ཟད་ཅིག་ཟོས་ནས་སྔོན་གྱི་ཡི་གེ་དང ། ཚིག་དང ། ཚིག་འབྲུ་དེ་ཉིད་རྗེས་སུ་དྲན་ནས་འདི་སྐད་ཅེས། ཀྱི་ཧུད་བྲོ་བ། ཀྱི་ཧུད་བྲོ་བ་ཞེས་སྨྲ་བ་དེ་བཞིན་དུ་སེམས་ཅན་དེ་རྣམས་སའི་བཅུད་དེ་ནུབ་པ་ན་ཚོགས་ཤིང་འདུས་ནས་འདི་སྐད་ཅེས། ཀྱི་ཧུད་བྲོ་བ། ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང ། སྡུག་བསྔལ་བར་གྱུར་ཀྱང་སྨྲས་པ་འདིའི་དོན་ནི་འདི་ཡིན། སྨྲས་པ།
169a
༄#། །འདིའི་དོན་ནི་འདི་ཡིན་ནོ་ཞེས་དེའི་དོན་ནི་མི་ཤེས་སོ། །གཽ་ཏ་མ་དག་།སེམས་ཅན་དེ་རྣམས་ཀྱི་སའི་བཅུད་དེ་ནུབ་པ་ན། སའི་ཞག་ཁ་དོག་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་འགྱུར་ཏེ། ཁ་དོག་ནི་འདི་ལྟ་བུ་ཡིན་ཏེ། དཔེར་ན། དོང་ཀའི་མེ་ཏོག་ལྟ་བུའོ། །རོ་ནི་འདི་ལྟ་བུ་ཡིན་ཏེ། དཔེར་ན། སྦྲང་མའི་སྦྲང་རྩི་བཙིར་བ་ལྟ་བུའོ། །དེ་རྣམས་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །དེ་རྣམས་ལས་ཁ་ཟས་ལ་ཆེས་ཉུང་དུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར་ཏོ། །ཁ་ཟས་ལ་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏོ། །ཟས་ཀྱི་ཚད་གཉིས་ལ་བརྟེན་ནས་ཁ་དོག་རྣམ་པ་གཉིས་མངོན་ཏེ། ཁ་དོག་རྣམ་པ་གཉིས་ཡོད་པས། ཀྱེ།་སེམས་ཅན་ཁོ་བོ་ནི་ཁ་དོག་དང་ལྡན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །ཁ་དོག་གི་མངོན་པའི་ང་རྒྱལ་ཅན་དེ་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱས་པའི་ཞག་ནུབ་པར་གྱུར་ཏོ། །གཽ་ཏ་མ་དག་།སའི་ཞག་དེ་ནུབ་པར་གྱུར་པ་ན་སེམས་ཅན་དེ་རྣམས་ཚོགས་ཤིང་འདུས་ནས་འདི་སྐད་ཅེས། ཀྱི་ཧུད་བྲོ་བ། ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་གྱིས་སྡུག་བསྔལ་བར་བྱེད་དོ། །དཔེར་ན། ད་ལྟར་མི་རྣམས་སྡུག་བསྔལ་དང ། ཡིད་མི་བདེ་བ་འབའ་ཞིག་གིས་རེག་པ་ན་སྔོན་གྱི་ཡི་གེ་དང ། ཚིག་དང ། ཚིག་འབྲུ་དེ་
169b
ཉིད་རྗེས་སུ་དྲན་ནས་འདི་སྐད་ཅེས་ཨེ་མའོ་ཀྱི་ཧུད། ཨེ་མ་འོ་ཀྱི་ཧུད་ཅེས་སྨྲ་བ་དེ་བཞིན་དུ་སེམས་ཅན་དེ་རྣམས་ས་ཞག་དེ་ནུབ་པ་ན་ཚོགས་ཤིང་འདུས་ནས་འདི་སྐད་ཅེས་ཀྱི་ཧུད་བྲོ་བ། ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང ། སྡུག་བསྔལ་བར་འགྱུར་ཀྱང་སྨྲས་པ་འདིའི་དོན་ནི་འདི་ཡིན་།སྨྲས་པ་འདིའི་དོན་ནི་འདི་ཡིན་ནོ་ཞེས་བྱ་བར་མི་ཤེས་སོ། །གཽ་ཏ་མ་དག་།སེམས་ཅན་དེ་རྣམས་ཀྱིས་ཞག་དེ་ནུབ་པ་ན། མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་འབྱུང་བར་འགྱུར་ཞིང་ཁ་དོག་ནི་འདི་ལྟ་བུ་ཡིན་ཏེ། དཔེར་ན། ཤིང་ཀ་དམ་པ་ཀའི་མེ་ཏོག་ལྟ་བུའོ།། རོ་ནི་འདི་ལྟ་བུ་ཡིན་ཏེ། དཔེར་ན། སྦྲང་མའི་སྦྲང་རྩི་བཙིར་བ་ལྟ་བུའོ། །དེ་རྣམས་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །དེ་རྣམས་ལས་ཁ་ཟས་ལ་ཆེས་ཉུང་བར་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར་ཏོ། །ཁ་ཟས་ལ་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏོ། །ཟས་ཀྱི་ཚད་གཉིས་ལ་བརྟེན་ནས་ཁ་དོག་རྣམ་པ་གཉིས་མངོན་ནོ། །ཁ་དོག་རྣམ་པ་གཉིས་ཡོད་པས། ཀྱེ། སེམས་ཅན་ཁོ་བོ་ནི་ཁ་དོག་དང་ལྡན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །ཁ་དོག་གི་མངོན་པའི་ང་རྒྱལ་ཅན་དེ་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་མྱུ་གུའི་ཚལ་དེ་ནུབ་པར་གྱུར་ཏོ། །གཽ་ཏ་མ་དག་།མྱུ་གུའི་ཚལ་དེ་ནུབ་པར་གྱུར་པ་ན་སེམས་ཅན་དེ་རྣམས་
170a
༄#། །ཚོགས་ཤིང་འདུས་ནས་འདི་སྐད་ཅེས། མདུན་ནས་ཕར་སོང ། མདུན་ནས་ཕར་སོང་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང ། སྡུག་བསྔལ་བར་གྱུར་ཏོ། ། དཔེར་ན། ད་ལྟར་མི་རྣམས་འགའ་ཞིག་ལ་དྲག་པོའི་ཚར་གཅད་པས་ཚར་གཅོད་པར་འདོད་པ་ན་སྔོན་གྱི་ཡི་གེ་དང ། ཚིག་དང ། ཚིག་འབྲུ་དེ་དག་ཉིད་རྗེས་སུ་ཟློས་ཤིང་འདི་སྐད་དུ། མདུན་ནས་ཕར་སོང ། མདུན་ནས་ཕར་སོང་ཞེས་སྨྲ་བ་དེ་བཞིན་དུ་སེམས་ཅན་དེ་རྣམས་མྱུ་གུའི་ཚལ་ནུབ་པ་དང ། ཚོགས་ཤིང་འདུས་ནས་འདི་སྐད་ཅེས་མདུན་ནས་ཕར་སོང ། མདུན་ནས་ཕར་སོང་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང ། སྡུག་བསྔལ་བར་གྱུར་ཀྱང ། སྨྲས་པ་འདིའི་དོན་ནི་འདི་ཡིན། སྨྲས་པ་འདིའི་དོན་ནི་འདི་ཡིན་ནོ་ཞེས་བྱ་བར་དེའི་དོན་ནི་མི་ཤེས་སོ། །གཽ་ཏ་མ་དག ། སེམས་ཅན་དེ་རྣམས་ཀྱི་མྱུ་གུའི་ཚལ་ནུབ་ནས། མ་རྨོས་མ་བཏབ་པའི་འབྲས་སཱ་ལུའི་འབྲས་བུ་ཚོན་བཞི་པ། ཕུབ་མ་མེད་པ། སྤུན་པ་མེད་པ། ཤུན་པ་མེད་པ། དག་པ། གཙང་མ་སྐྱེ་སྟེ།་དེ་ནུབ་བརྔས་ན་ནང་སྐྱེ་ཞིང་སྨིན་པར་འགྱུར། ནང་བརྔས་ན་ནུབ་སྐྱེ་ཞིང་སྨིན་པར་འགྱུར་བས། བརྔས་ཤིང་བརྔས་ཀྱང་སླར་སྐྱེ་བས་བརྔས་པར་ཡང་མི་མངོན་ནོ། །དེ་རྣམས་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །གང་ནས་སེམས་ཅན་དེ་རྣམས་ཀྱི་མ་རྨོས་མ་བཏབ་པའི་འབྲས་སཱ་ལུའི་འབྲས་བུ་ལ་ཁམ་གྱིས་ཟས་སུ་རིམ་གྱིས་ཟོས་པ་དེ་ནས་
170b
དེ་རྣམས་ཀྱི་དབང་པོ་ཐ་དད་འབྱུང་བར་གྱུར་ཏེ། ཁ་ཅིག་ལ་ནི་སྐྱེས་པའི་དབང་པོའོ། །ཁ་ཅིག་ལ་ནི་བུད་མེད་ཀྱི་དབང་པོའོ། །དེ་ན་བུད་མེད་ཀྱི་དབང་པོ་ཅན་གང་ཡིན་པ་རྣམས་དང ། སྐྱེས་པའི་དབང་པོ་ཅན་གང་ཡིན་པ་རྣམས་གཅིག་ལ་གཅིག་མིག་གིས་མིག་ཚུགས་སུ་བལྟའོ། །ཇི་ལྟ་ཇི་ལྟར་གཅིག་ལ་གཅིག་མིས་མིག་ཚུགས་སུ་ལྟ་བ་དེ་ལྟ་དེ་ལྟར་ཀུན་ཏུ་ཆགས་སོ། །ཇི་ལྟ་ཇི་ལྟར་ཀུན་ཏུ་ཆགས་བ་དེ་ལྟ་དེ་ལྟར་ཞེན་ནོ། །ཇི་ལྟ་ཇི་ལྟར་ཞེན་པ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་གྱིས་སེམས་ཅན་ལ་ལོག་པར་ཞུགས་པ་མཐོང་ངོ ། །མཐོང་ནས་ཀྱང་ས་དང ། བོང་བ་དང ། གསེག་མ་དང ། གྱོ་མོས་གཏོར་ནས་འདི་སྐད་ཅེས། སེམས་ཅན་ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་དོ། །སེམས་ཅན་ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་པ་ཡིན་གྱི། ཀཝའེ། སེམས་ཅན་ཁྱོད་ཀྱིས་ད་ཇི་ལྟར་སེམས་ཅན་སུན་དབྱུང་ཞེས་སྨྲའོ། །དཔེར་ན། ད་ལྟར་གྱི་མི་རྣམས་བག་མ་བླངས་པ་ན་ཕྱེ་མ་དང ། དྲི་དང ། ཕྲེང་བ་དང ། གོས་དང ། འབྲས་ཡོས་ཀྱིས་གཏོར་ནས། འདི་སྐད་ཅེས། བག་མ་བདེ་བར་གྱུར་ཅིག་ཅེས་ཟེར་བ་དེ་བཞིན་དུ་སེམས་ཅན་རྣམས་ཀྱིས་སེམས་ཅན་ལ་ལོག་པར་ཞུགས་པ་མཐོང་བ་ནས་ས་གཏོར་ཅིང་བོང་བ་དང ། གསེག་མ་དང ། གྱོ་མོ་རྣམས་ཀྱིས་ཀྱང་གཏོར་ནས་ཀྱང ། འདི་སྐད་ཅེས། སེམས་ཅན་ངན་པ་ཐ་ཆད་རྣམས་ནི་བྱ་བ་
171a
༄#། །མ་ཡིན་པ་བྱེད་དོ། །སེམས་ཅན་ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་ཀྱི། ཀཝའེ། སེམས་ཅན་ཁྱོད་ཀྱིས་ད་ཇི་ལྟར་སེམས་ཅན་སུན་དབྱུང་ཞེས་བྱ་བ་སྨྲ་བའི་དུས་གང་ཡིན་པ་དེ་ཡོད་དོ། །གཽ་ཏ་མ་དག་།དེ་ལྟར་སྔོན་ཆོས་མ་ཡིན་པར་འདོད་པ་གང་ཡིན་པ་དང ། སྔོན་གྱི་འདུལ་བ་མ་ཡིན་པར་འདོད་པ་གང་ཡིན་པ་དེ་ནི་ད་ལྟར་ཆོས་སུ་འདོད་དོ། །འདུལ་བར་འདོད་དོ། །སྔོན་སྨད་པར་བྱ་བར་འདོད་པ་གང་ཡིན་པ་དེ་ནི་ད་ལྟར་བསྔགས་པར་བྱ་བར་འདོད་དོ། །དེ་རྣམས་ཀྱིས་དེ་ཞག་གཅིག་ཅིག་སྤངས་པ་ནས་ཞག་གཉིས་དང ། གསུམ་དང ། བདུན་དུའང་སྤངས་སོ། །གང་ན་སེམས་ཅན་དེ་རྣམས་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ལྷག་པར་སྡིག་པ་ཅན་གྱི་བརྟུལ་ཞུགས་སྤྱོད་པ་དེ་རྣམས་ཁང་པ་བརྩིག་པ་ལ་བརྩོན་པར་བྱེད་དོ། །འདིར་བདག་ཅག་བྱ་བ་མ་ཡིན་པ་སྤྱད་དོ། །འདིར་བདག་ཅག་བྱ་བ་མ་ཡིན་པ་སྤྱད་དོ་ཞེས་ཟེར་བས་ཁྱིམ་ཁྱིམ་ཞེས་བྱ་བར་གྲགས་ཏེ།་གཽ་ཏ་མ་དག་།འདི་ནི་འཇིག་རྟེན་དུ་ཁང་པའི་ལས་ཀྱི་མཐའ་རྣམས་བྱུང་བའི་རྩོམ་པ་དང་པོ་ཡིན་ནོ། །དེའང་ཆོས་ཀྱིས་ཡིན་གྱི། ཆོས་མ་ཡིན་པས་མ་ཡིན་ཏེ། དེ་ལ་རྒྱལ་བའི་དབང་པོའི་ཆོས་ལ་འདི་ནི་གཙོ་བོ་ཡིན་ནོ། །དེ་རྣམས་ནུབ་བཟའ་བ་དོན་དུ་གཉེར་བའང་དགོངས་ཀ་།ནང་བཟའ་བ་དོན་དུ་གཉེར་བའང་ནང་པར་སཱ་ལུའི་ཆེད་དུ་འདོང་བར་
171b
བྱེད་དོ། །དེ་ནས་སེམས་ཅན་སྙོམས་ལས་ཀྱི་རང་བཞིན་ཅན་ཞིག་གིས་ནང་པར་གྱི་སཱ་ལུ་ནུབ་བླངས་སོ། །དེ་ནས་སེམས་ཅན་གཞན་ཞིག་གིས་སེམས་ཅན་དེ་ལ་འདི་སྐད་ཅེས་སྨྲས་སོ། ། ཀྱེ།་སེམས་ཅན་ཁྱོད་ཚུར་སཱ་ལུའི་ཕྱིར་འདོང་ངོ ། །དེ་ནས་སེམས་ཅན་དེས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྱེ།་སེམས་ཅན་ཁྱོད་རང་གི་སཱ་ལུ་ལ་སོམས་ཤིག་།ཁོ་བོས་ནི་ནང་པར་གྱི་སཱ་ལུ་ནུབ་བླངས་སོ། །དེ་ནས་སེམས་ཅན་དེ་འདི་སྙམ་དུ་སེམས་ཏེ། ཀྱེ་མ་དེ་ནི་ལེགས་སོ། །ཀྱེ་མ་དེ་ནི་ཤིན་ཏུ་ལེགས་ཀྱི། མ་ལ། བདག་གིས་ཞག་གཉིས་ཀྱི་དང ། ཞག་གསུམ་གྱི་དང ། ཞག་བདུན་གྱི་བར་གྱི་སཱ་ལུ་བླང་ངོ་སྙམ་ནས། དེས་ཞག་པ་གཉིས་ཀྱི་དང ། ཞག་གསུམ་གྱི་དང ། ཞག་བདུན་གྱི་བར་གྱི་སཱ་ལུ་བླངས་སོ། །དེ་ནས་སེམས་ཅན་ཞིག་གིས་སེམས་ཅན་དེ་ལ། འདི་སྐད་ཅེས་སྨྲས་སོ། །ཀྱེ།་སེམས་ཅན་ཁྱོད་ཚུར་སཱ་ལུའི་ཕྱིར་འདོང་ངོ ། །དེ་ནས་སེམས་ཅན་དེས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྱེ།སེམས་ཅན་ཁྱོད་རང་གི་སཱ་ལུ་ལ་སོམས་ཤིག་།ཁོ་བོས་ནི་ཞག་གཉིས་ཀྱི་དང ། གསུམ་གྱི་དང ། ཞག་བདུན་གྱི་བར་གྱི་སཱ་ལུ་བླངས་ཟིན་ནོ། །དེ་ནས་སེམས་ཅན་དེ་འདི་སྙམ་དུ་སེམས་ཏེ། ཀྱེ་མ་དེ་ནི་ལེགས་སོ། །ཀྱེ་མ་དེ་ནི་ཤིན་ཏུ་ལེགས་ཀྱི། མ་ལ། བདག་གིས་ཟླ་བ་ཕྱེད་དང ། ཟླ་བ་གཅིག་གི་སཱ་ལུ་བླང་ངོ་སྙམ་ནས། དེས་ཟླ་བ་ཕྱེད་དང ། ཟླ་བ་གཅིག་གི་སཱ་ལུ་བླངས་སོ། །གང་ནས་སེམས་ཅན་དེ་རྣམས་ཀྱིས་
172a
༄#། །མ་རྨོས་མ་བཏབ་པའི་འབྲས་སཱ་ལུའི་འབྲུ་གསོག་འཇོག་གི་ཡོངས་སུ་ལོངས་སྤྱད་པས་ཟོས་པ་དེ་ནས་སཱ་ལུ་དེའི་འབྲས་བུ་ཕུབ་མ་དང ། སྤུན་པ་དང ། ཤུན་པས་ཡོག་པར་གྱུར་ཏོ། །བརྔས་ཤིང་བརྔས་ནའང་ཕྱིར་མི་སྐྱེ་བས་བརྔས་པར་ཡང་མངོན་ལ། སཱ་ལུའང་སྤུབས་སམ། ཡལ་གའི་སྦུབས་ལ་ཡོད་པར་གྱུར་ཏོ། །དེ་ནས་སེམས་ཅན་དེ་རྣམས་ཚོགས་ཤིང་འདུས་ནས། ཤེས་ལྡན་དག་།བདག་ཅག་སྔོན་ཡིད་ལས་བྱུང་བའི་གཟུགས་ཕུན་སུམ་ཚོགས་པ། དབང་པོ་མཉམས་ཤིང་མ་ཚང་བ་མེད་པ། ཡན་ལག་དང ། ཉིང་ལག་ཐམས་ཅད་དང་ལྡན་པ། ཁ་དོག་བཟང་པོས་གནས་པ། རང་གི་འོད་དང་ལྡན་པ། ནམ་མཁའ་ལ་འགྲོ་ཞིང་དགའ་བ་ཟ་ཟིང་དགའ་བའི་ཟས་ཀྱིས་ཚེ་རིང་ཞིང་ཡུན་རིང་དུ་གནས་ལ། བདག་ཅག་ལ་སའི་བཅུད་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་སའི་བཅུད་ལ་ཁམ་གྱི་ཟས་ཀྱི་རིམ་གྱིས་ཟོས་ཏེ། གང་གི་ཚེ་བདག་ཅག་གིས་སའི་བཅུད་ལ་ཁམ་གྱི་རིམ་གྱིས་ཟོས་པ་དེའི་ཚེ་བདག་ཅག་གིས་ལུས་ལ་རྩུབ་པ་ཉིད་དང ། ལྕི་བ་ཉིད་དུ་ཞུགས་པར་གྱུར་ཏེ། ཁ་དོག་བཟང་པོའི་གསལ་བ་གང་ཡིན་པ་དེ་ནི་ནུབ་པར་གྱུར་པས་འཇིག་རྟེན་དུ་མུན་པ་བྱུང་བར་གྱུར་ཏོ། །བདག་ཅག་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་པར་གྱུར་
172b
ཏོ། །བདག་ཅག་ལས་ཁ་ཟས་ལ་ཆེས་ཉུང་དུ་ཟ་བ་གང་ཡིན་པ་དེ་ནི་ཁ་དོག་བཟང་པོར་གྱུར། ཁ་ཟས་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏེ། ཁ་ཟས་ཀྱི་ཚད་གཉིས་ལ་བརྟེན་ནས་ཁ་དོག་གི་རྣམ་པ་གཉིས་མངོན་ཏེ། ཁ་དོག་རྣམ་པ་གཉིས་ཡོད་པས། ཀཝའེ། སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་སའི་བཅུད་དེ་ནུབ་པར་གྱུར་ཏོ། ། སའི་བཅུད་དེ་ནུབ་པ་ནས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་གནས་སོ། །བདག་ཅག་ལས་ཁ་ཟས་ཆེས་ཉུང་དུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར། ཁ་ཟས་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏེ། ཟས་ཀྱི་ཚད་གཉིས་ལ་བརྟེན་ནས་ཁ་དོག་གི་རྣམ་པ་གཉིས་མངོན་ནོ། །ཁ་དོག་རྣམ་པ་གཉིས་ཡོད་པས། ཀཝའེ། སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་ས་ཞག་དེ་ནུབ་པར་གྱུར་ཏོ་།ས་ཞག་
173a
༄#། །དེ་ནུབ་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །བདག་ཅག་རྣམས་ལས་ཁ་ཟས་ཆེས་ཉུང་དུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར། ཁ་ཟས་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏེ། ཁ་དོག་གི་རྣམ་པ་གཉིས་མངོན་ནོ། །ཁ་དོག་རྣམ་པ་གཉིས་ཡོད་པས། ཀཝའེ། སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་མྱུ་གུའི་ཚལ་དེ་ནུབ་པར་གྱུར་ཏོ། །མྱུ་གུའི་ཚལ་དེ་ནུབ་པ་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཚོན་བཞི་པ། ཕུབ་མ་མེད་པ། སྤུན་པ་མེད་པ། ཤུན་པ་མེད་པ། དག་པ། གཙང་མ་སྐྱེ་སྟེ། དེ་ནུབ་བརྔས་ན་ནང་སྐྱེ་ཞིང་སྨིན་པར་འགྱུར། ནང་བརྔས་ན་ནུབ་སྐྱེ་ཞིང་སྨིན་པར་འགྱུར་བས་བརྔས་ཤིང་བརྔས་ཀྱང་སླར་ཡང་སྐྱེ་བས་བརྔས་པར་ཡང་མི་མངོན་ཏེ། བདག་ཅག་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །གང་ནས་བདག་ཅག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་གོགས་འཇོག་གི་ཡོངས་སུ་ལོངས་སྤྱད་
173b
པས་ཟོས་པ་དེ་ནས་སཱ་ལུ་དེའི་འབྲས་བུ་ཕུབ་མ་དང ། སྤུན་པ་དང ། ཤུན་པས་ཡོག་པར་གྱུར་ཏོ། །བརྔས་ཤིང་བརྔས་ནའང་སླར་མི་སྐྱེ་བས་བརྔས་པར་མངོན་ལ། སཱ་ལུའང་སྤུབས་སམ་ཡལ་གའི་སྦུབས་ལ་ཡོད་པར་གྱུར་པས། མ་ལ། བདག་ཅག་ཚོགས་ཤིང་འདུས་ལ་ཞིང་གཞལ་ཏེ་མཚམས་བཅད་ལ། འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་བྲེ་བར་བྱའོ་ཞེས་དེ་རྣམས་ཚོགས་ཤིང་འདུས་ནས་ཞིང་བགོས་ཏེ་མཚམས་སུ་མུ་ཐུག་བྲེས་སོ། །གཽ་ཏ་མ་དག་།འདི་ནི་འཇིག་རྟེན་དུ་མུ་ཐུག་བྲེ་བའི་ལས་ཀྱི་མཐའ་རྣམས་བྱུང་བའི་རྩོམ་པ་དང་པོ་ཡིན་ནོ། །དེའང་ཆོས་ཀྱིས་ཡིན་གྱི། ཆོས་མ་ཡིན་པས་མ་ཡིན་པས་དེ་ལ་རྒྱལ་བའི་དབང་པོའི་ཆོས་ལ་འདི་ནི་ཆོས་ཀྱི་མཆོག་ཡིན་ནོ། །དེ་ནས་སེམས་ཅན་ཞིག་གིས་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་དག་གིས་སེམས་ཅན་དེས་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་པ་མཐོང་ངོ ། །མཐོང་ནས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀཝའེ། སེམས་ཅན་ཁྱོད་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ཅིའི་ཕྱིར་བླང་ཞེས་དེ་ཕར་དྲངས། ཚུར་དྲངས་ནས་ཅི་ཙམ་ན་འཁོར་གྱི་ནང་དུ་ཁྲིད་དེ། ཤེས་ལྡན་དག་།སེམས་ཅན་འདི་རང་གི་སཱ་ལུ་ཡོད་བཞིན་དུ་ལན་གསུམ་གྱི་བར་དུ་གཞན་གྱི་སཱ་ལུ་མ་བྱིན་པར་ལེན་ཏོ་ཞེས་སྦྱོས་སོ། །དེ་ནས་སེམས་ཅན་
174a
༄#། །དེ་རྣམས་ཀྱིས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀཝའེ། སེམས་ཅན་ཁྱེད་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ཅིའི་ཕྱིར་བླང ། ཀཝའེ། སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།དེ་ནས་སེམས་ཅན་དེས་སེམས་ཅན་དེ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་།སེམས་ཅན་འདིས་བདག་སཱ་ལུའི་ཕྱིར་ཕར་དྲངས། ཚུར་དྲངས་ནས་ཇི་ཙམ་ན་འཁོར་གྱི་ནང་དུ་ཡང་ཕྱུང་ནས་སྤྱོས་སོ། །དེ་ནས་སེམས་ཅན་དེ་རྣམས་ཀྱིས་སེམས་ཅན་དེ་ལ་འདི་སྨྲས་སོ། །ཀཝའེ། སེམས་ཅན་ཁྱོད་ཀྱིས་སེམས་ཅན་ལ་སཱ་ལུའི་ཕྱིར་ཕར་དྲངས། ཚུར་དྲངས་ནས་ཇི་ཙམ་ན་འཁོར་གྱི་ནང་དུ་ཡང་ཕྱུང་ནས་ཅིའི་ཕྱིར་སྤྱོས། ཀཝའེ། སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།དེ་ནས་སེམས་ཅན་དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་།སཱ་ལུའི་ཕྱིར་ཕར་འདྲེན་ཚུར་འདྲེན་ཅིང་ཅི་ཙམ་ན་འཁོར་གྱི་ནང་དུ་སྤྱོ་བའང་སྣང་བས། མ་ལ།་བདག་ཅག་ཚོགས་ཤིང་འདུས་ལ་བདག་ཅག་གི་ནང་ན་སེམས་ཅན་ལྷག་པར་གཟུགས་བཟང་བ། ལྷག་པར་བལྟ་ན་སྡུག་པ། ལྷག་པར་མཛེས་པ། ལྷག་པར་བསོད་ནམས་ཆེ་བར་གྲགས་པ་གང་ཡིན་པ་དེ་ནི་བདག་ཅག་གི་ཞིང་རྣམས་ཀྱི་བདག་པོར་བསྐོས་དང ། དེས་བདག་ཅག་ཆད་པས་གཅད་པར་བྱ་བ་རྣམས་ནི་ཆད་པས་
174b
གཅོད་པར་འགྱུར། ཕན་གདགས་པར་བྱ་བ་རྣམས་ལ་ནི་ཕན་འདོགས་པར་འགྱུར་ཏེ། བདག་ཅག་གི་ཞིང་དག་ལས་འཁྲུངས་པ་གང་ཡིན་པ་དེ་ལས་དེ་ལ་ཆོས་བཞིན་དུ་ཐོག་ཤས་སྦྱིན་པར་བྱའོ་སྙམ་ནས། དེ་རྣམས་ཚོགས་ཤིང་འདུས་ཏེ། དེ་རྣམས་ཀྱི་ནང་ནས་ལྷག་པར་གཟུགས་བཟང་བ། ལྷག་པར་བལྟ་ན་སྡུག་པ། ལྷག་པར་མཛེས་པ། ལྷག་པར་བསོད་ནམས་ཆེ་བར་གྲགས་པ་གང་ཡིན་པ་དེ་ཞིང་རྣམས་ཀྱི་བདག་པོར་བསྐོས་ཏེ། འདི་སྐད་ཅེས། ཀྱེ། སེམས་ཅན་ཁྱོད་ཚུར་ཤོག་།ཁོ་བོ་ཅག་ལས་ཆད་པས་གཅད་པར་བྱ་བ་རྣམས་ལ་ནི་ཆད་པས་ཆོད་ཅིག ། ཕན་གདགས་པར་བྱ་བ་རྣམས་ལ་ནི་ཕན་ཐོགས་ཤིག་།ཁོ་བོ་ཅག་གི་ཞིང་དག་ལས་ཁྲུངས་པ་གང་ཡིན་པ་དེ་ལས་ཁྱོད་ལ་ཁོ་བོ་ཅག་གིས་ཆོས་བཞིན་དུ་ཐོག་ཤས་སྦྱིན་ནོ། །དེ་དེ་རྣམས་ལ་ཆད་པས་གཅད་པར་བྱ་བ་ལ་ནི་ཆད་པས་གཅོད། ཕན་གདགས་པར་བྱ་བ་རྣམས་ལ་ནི་ཕན་འདོགས་པར་བྱེད་ཅིང་དེ་ལ་དེ་རྣམས་ཀྱི་ཞིང་དག་ལས་འཁྲུངས་པ་གང་ཡིན་པ་དེ་ལས་ཆོས་བཞིན་དུ་ཐོག་ཤེས་དབུལ་ཏེ། སྐྱེ་བོའི་ཚོགས་ཆེན་པོས་བཀུར་ཤིང་སྐྱེ་བོའི་ཚོགས་ཆེན་པོས་བཀུར་བས། མང་པོས་བཀུར་བ། མང་པོས་བཀུར་བ་ཞེས་གྲགས་སོ། །ཞིང་དེ་རྣམས་ཀྱི་བདག་པོར་གྱུར་པ་ན་ཉམས་པ་ལས་སྐྱོབ་པར་བྱེད་པས། རྒྱལ་རིགས། རྒྱལ་རིགས་ཞེས་བྱ་བར་གྲགས་སོ། །ཆོས་ཀྱིས་སྐྱེ་དགུ་མགུ་བར་བྱེད་ཅིང་ཚུལ་ཁྲིམས་ཉམས་སུ་བླངས་ཏེ་གནས། ཤེས་རབ་ཉམས་སུ་
175a
༄#། །བླངས་ཏེ་གནས་པས། རྒྱལ་པོ། རྒྱལ་པོ་ཞེས་བྱ་བར་གྲགས་སོ། །གཽ་ཏ་མ་དག་།རྒྱལ་པོ་མང་པོས་བཀུར་གྱི་ཚེ་མི་རྣམས་ཀྱི་མིང་སེམས་ཅན། སེམས་ཅན་ཞེས་བྱ་བར་གྱུར་ཏོ། །གཽ་ཏ་མ་དག་།རྒྱལ་པོ་མང་པོས་བཀུར་བའི་བུ་འོད་མཛེས་ཞེས་བྱ་སྟེ། གཽ་ཏ་མ་དག་།རྒྱལ་པོ་འོད་མཛེས་ཀྱི་ཚེ་མི་རྣམས་ཀྱི་མིང་ཚུར་ཤོག་།ཚུར་ཤོག་ཅེས་བྱ་བར་གྱུར་ཏོ། །འོད་མཛེས་ཀྱི་བུ་དགེ་བ་ཞེས་བྱ་སྟེ། གཽ་ཏ་མ་དག་།རྒྱལ་པོ་དགེ་བའི་ཚེ་མི་རྣམས་ཀྱི་མིང་སྨྲེ་བ་ཅན། སྨེ་བ་ཅན་ཞེས་བྱ་བར་གྱུར་ཏོ། །གཽ་ཏ་མ་དག་།དགེ་བའི་བུ་དགེ་མཆོག་ཅེས་བྱ་སྟེ། གཽ་ཏ་མ་དག་།རྒྱལ་པོ་དག་མཆོག་གི་ཚེ་མི་རྣམས་ཀྱི་མིང་སྤྲིན་མགྲིན། སྤྲིན་མགྲིན་ཞེས་བྱ་བར་གྱུར་ཏོ། །དགེ་མཆོག་གི་བུ་གསོ་སྦྱོང་འཕགས་ཞེས་བྱ་སྟེ། གཽ་ཏ་མ་དག་།རྒྱལ་པོ་གསོ་སྦྱོང་འཕགས་ཀྱི་ཚེ་མི་རྣམས་ཀྱི་མིང་ཏ་ལའི་རྐང ། ཏ་ལའི་རྐང་ཞེས་བྱ་བར་གྱུར་ཏོ། །རྒྱལ་པོ་གསོ་སྦྱོང་འཕགས་ཀྱི་སྤྱི་བོར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན། ཤིང་བལ་གྱི་འདའ་བའམ། རས་བལ་གྱི་འདའ་བ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང ། ཁྱེའུ་གཟུགས་བཟང་བ།་བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། སྤྱི་བོ་ལས་སྐྱེས་པས། སྤྱི་བོ་སྐྱེས་ཞེས་བྱ་བར་གྱུར་ཏོ། །གཞོན་
175b
ནུ་བྱུང་མ་ཐག་ཏུ་རྒྱལ་པོ་གསོ་སྦྱོང་འཕགས་ཀྱི་བཙུན་མོ་དྲུག་ཁྲིའི་ནང་དུ་དཀྲི་བ་དང ། དེ་ཐམས་ཅད་ཀྱི་ནུ་མ་ལ་འོ་མ་ཟག་ནས་རེ་རེས་ང་ལས་ནུ། ང་ལས་ནུ་ཞེས་སྨྲས་པས། ང་ལས་ནུ། ང་ལས་ནུ་ཞེས་བྱ་བར་གྲགས་སོ། །གཽ་ཏ་མ་དག་།རྒྱལ་པོ་ང་ལས་ནུ་གང་གི་ཚེ་རྒྱལ་སྲིད་བྱེད་པ་དེའི་ཚེ་མི་རྣམས་སེམས་པར་བྱེད། འཇལ་བར་བྱེད། ཉེ་བར་རྟོག་པར་བྱེད་དེ། དེ་རྣམས་བསམས། གཞལ། ཉེ་བར་བརྟགས་ནས་བཟོའི་གནས་དང ། ལས་ཀྱི་གནས་ཐ་དད་པ་དག་བྱེད་དུ་འཇུག་པས་དེས་ན། དེ་རྣམས་ཡིད་ལ་སྐྱེས། ཡིད་ལས་སྐྱེས་ཞེས་བྱ་བར་གྲགས་སོ། །གཽ་ཏ་མ་དག ། རྒྱལ་པོ་དྲུག་པོ་འདི་དག་ནི་ཚེ་ཚད་མེད་ཅིང་ཚེ་དཔག་ཏུ་མེད་པ་ཡིན་ནོ། །གཽ་ཏ་མ་དག་།རྒྱལ་པོ་ང་ལས་ནུའི་བྲལ་གཡས་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན། ཤིང་བལ་གྱི་འདའ་བའམ། རས་བལ་གྱི་འདའ་བ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང ། ཁྱེའུ་གཟུགས་བཟང་ཞིང ། བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། བརླ་གཡས་པ་ལས་སྐྱེས་པས་མིང་མཛེས་པ། མཛེས་པ་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་ཡང་གླིང་བཞི་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ་།གཽ་ཏ་མ་དག་།རྒྱལ་པོ་མཛེས་པའི་བརླ་གཡོན་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་
176a
༄#། །མཉེན་ཏེ། དཔེར་ན། ཤིང་བལ་གྱི་འདའ་བའམ། རས་བལ་གྱི་འདའ་བ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང ། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། བརླ་གཡོན་པ་ལས་སྐྱེས་པས་མིང་ཉེ་མཛེས། ཉེ་མཛེས་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་ཡང་གླིང་གསུམ་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ་།གཽ་ཏ་མ་དག་།རྒྱལ་པོ་ཉི་མཛེས་ཀྱི་རྐང་པ་གཡས་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན། ཤིང་བལ་གྱི་འདའ་བའམ། རས་བལ་གྱི་འདའ་བ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། ། དེ་སྨིན་ནས་བརྟོལ་བ་དང ། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། རྐང་པ་གཡས་པ་ལས་སྐྱེས་པས་མིང་མཛེས་ལྡན། མཛེས་ལྡན་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་དུའང་གླིང་གཉིས་ལ་ང་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ་།གཽ་ཏ་མ་དག་།རྒྱལ་པོ་མཛེས་ལྡན་གྱི་རྐང་པ་གཡོན་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན། ཤིང་བལ་གྱི་འདའ་བའམ། རས་
176b
བལ་གྱི་འདའ་བ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང ། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། རྐང་པ་གཡོན་པ་ལས་སྐྱེས་པས་མིང་ཉེ་མཛེས་ལྡན། ཉེ་མཛེས་ལྡན་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་དུའང་གླིང་གཅིག་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ། གཽ་ཏ་མ་དག་།དེ་ལྟར་ན་རྒྱལ་པོ་མང་པོས་བཀུར་གྱིས་བུ་འོད་མཛེས་སོ། །འོད་མཛེས་ཀྱི་བུ་དགེ་བའོ། །དགེ་བའི་བུ་དགེ་མཆོག་།དགེ་མཆོག་གི་བུ་གསོ་སྦྱོང་འཕགས་སོ། །གསོ་སྦྱོང་འཕགས་ཀྱི་བུ་ང་ལས་ནུའོ། །ང་ལས་ནུའི་མཛེས་པའོ། །མཛེས་པའི་ཉི་མཛེས་པའོ། །ཉི་མཛེས་ཀྱི་མཛེས་ལྡན་དང ། ཉེ་མཛེས་ལྡན་དང ། བཟང་པོ་དང ། ལེགས་བཟང་དང ། བཏང་བ་དང ། བཏང་བཟུང་དང ། ཡན་ལག་དང ། ཡན་ལག་ཤིང་རྟ་དང ། ངན་སྤོང་དང ། སྐལ་ལྡན་ཤིང་རྟ་དང ། རྒྱ་མཚོ་དང ། རྒྱ་མཚོའི་བུ་དང ། རྒྱ་མཚོ་ཆེན་པོ་དང ། ཤ་ཀུ་ནི་དང ། ཤ་ཀུ་ནི་ཆེན་པོ་དང ། ཀུ་ཤ་དང ། ཉེ་བའི་ཀུ་ཤ་དང ། ཀུ་ཤ་ཆེན་པོ་དང ། ལེགས་མཐོང་དང ། ལེགས་མཐོང་ཆེན་པོ་དང ། རབ་ཐོབ་དང ། རབ་ཐོབ་ཆེན་པོ་དང ། རབ་ཏུ་སྒྲ་བསྒྲགས་དང ། རབ་ཏུ་སྒྲ་བསྒྲགས་ཆེན་པོ་དང ། འོད་བྱེད་དང ། རྟུལ་ཕོད་པ་དང ། ལྷུན་པོ་ལྡན་དང ། ལྷུན་པོ་ཡོད་དང །
177a
༄#། །འོད་ཟེར་དང ། འོད་ཟེར་ལྡན་དང ། འོད་ཟེར་ཡོད་དང ། ཀུན་ནས་འོད་ཟེར་རོ། །གཽ་ཏ་མ་དག་།ཀུན་ནས་འོད་ཟེར་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བརྒྱ་ཐམ་པ་ཡུལ་གྲུ་འཛིན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་དགྲ་འདུལ་ཞེས་བྱ་བ་བྱུང་སྟེ། དགྲ་འདུལ་བར་བྱེད་པས་དགྲ་འདུལ། དགྲ་འདུལ་ཞེས་བྱ་བར་གྱུར་ཏོ། །གཽ་ཏ་མ་དག་།རྒྱལ་པོ་དགྲ་འདུལ་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ལྔ་ཁྲི་བཞི་སྟོང་ཡུལ་དམག་གིས་མི་ཚུགས་པར་བྱུང་ངོ ། །དེ་རྣམས་ཀྱི་ཐ་མ་ནི་རྒྱལ་པོ་མ་རྒྱལ་བ་ལས་རྒྱལ་བ་ཞེས་བྱ་བ་བྱུང་སྟེ། མ་རྒྱལ་བ་ལས་རྒྱལ་བར་བྱེད་པས་ན། མ་རྒྱལ་བ་ལས་རྒྱལ་བ། མ་རྒྱལ་བ་ལས་རྒྱལ་བ་ཞེས་བྱ་བར་གྲགས་སོ། །གཽ་ཏ་མ་དག་།རྒྱལ་པོ་མ་རྒྱལ་བ་ལས་རྒྱལ་བའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་སུམ་ཁྲི་དྲུག་སྟོང་ཡུལ་ཝཱ་ར་ཎཱ་སིར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་བཟོད་དཀའ་ཞེས་བྱ་བ་བྱུང་ངོ། །གཽ་ཏ་མ་དག་།རྒྱལ་པོ་བཟོད་དཀའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་ཀིམ་བི་ལའི་གྲོང་ཁྱེར་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཚངས་པས་བྱིན་ཅེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་ཚངས་བྱིན་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གླང་པོ་ཆེའི་གྲོང་ཁྱེར་དུ་བྱུང་སྟེ། དེ་
177b
རྣམས་ཀྱི་ཐ་མ་ནི་རྒྱལ་པོ་གླང་པོས་བྱིན་ཅེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་གླང་པོས་བྱིན་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ལྔ་སྟོང་ཡུལ་རྡོ་འཇོག་ཏུ་བྱུང་སྟེ།་དེ་རྣམས་ཀྱི་ཐ་མ་ནི་རྒྱལ་པོ་བལ་བུ་ཅན་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་བལ་བུ་ཅན་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་བྲང་གིས་ཉལ་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཚན་པོ་ཆེ་འདུལ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་ཚན་པོ་ཆེ་འདུལ་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་མ་རྒྱལ་བ་ལས་རྒྱལ་བར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྒྱལ་བྱིན་ཅེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་རྒྱལ་བྱིན་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་ཀནྱ་ཀུབ་ཛར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྒྱལ་སྡེ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་རྒྱལ་སྡེའི་བུ་དང ། ཚ་པོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ཁྲི་བརྒྱད་སྟོང་གྲོང་ཁྱེར་ཙམ་པར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཀླུའི་ལྷ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་ཀླུའི་ལྷའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ཉི་ཁྲི་ལྔ་སྟོང་གྲོང་ཁྱེར་ཏ་ལའི་ཕྲེང་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་མིའི་ལྷ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་མིའི་ལྷའི་
178a
༄#། །བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ཁྲི་ཉིས་སྟོང་གྲོང་ཁྱེར་ཏ་མ་ལར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྒྱ་མཚོའི་ལྷ་ཞེས་བྱ་བ་བྱུང་ངོ ། ། གཽ་ཏ་མ་དག་།རྒྱལ་པོ་རྒྱ་མཚོའི་ལྷའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ཁྲི་བརྒྱད་སྟོང་གྲོང་ཁྱེར་བ་སོའི་གྲོང་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་བློ་གྲོས་བཟང་པོ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་བློ་གྲོས་བཟང་པོའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ཉི་ཁྲི་ལྔ་སྟོང་གྲོང་ཁྱེར་རྒྱལ་པོའི་ཁབ་ཏུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་མུན་སེལ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་མུན་སེལ་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བརྒྱ་ཐམ་པ་ཡང་གྲོང་ཁྱེར་ཝཱ་ར་ཎཱ་སིར་བྱུང་སྟེ།་དེ་རྣམས་ཀྱི་ཐ་མ་ནི་རྒྱལ་པོ་དབང་ཕྱུག་ཆེན་པོའི་སྡེ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་དབང་ཕྱུག་ཆེན་པོའི་སྡེའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་གྲོང་ཁྱེར་རྩཝ་ཅན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྒྱ་མཚོའི་སྡེ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་རྒྱ་མཚོའི་སྡེའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་སྟོང་ཡང་གྲོང་ཁྱེར་གྲུ་འཛིན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་དཀའ་ཐུབ་སྤྱོད་ཅེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་དཀའ་ཐུབ་སྤྱོད་ཀྱི་བུ་དང ། ཚ་བོ་དང ། ཡང་
178b
ཚ་དང ། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་ཡང་གྲོང་ཁྱེར་རྩཝ་ཅན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་སའི་གདོང་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་སའི་གདོང་གི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་འབུམ་ཡང་གྲོང་ཁྱེར་ཝཱ་ར་ཎཱ་སིར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་སའི་བདག་པོ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་སའི་བདག་པོའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་འབུམ་ཡང་གྲོང་ཁྱེར་དམག་གིས་མི་ཚུགས་པར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོས་འཛིན་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་ས་འཛིན་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་གྲོང་ཁྱེར་མི་ཐི་ལར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ལྷ་ཆེན་པོ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་ལྷ་ཆེན་པོའི་བུ་དང ། ཚ་བོ་དང ། ཡང་ཚེ་དང ། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་ཡང་གྲོང་ཁྱེར་མི་ཐི་ལར་དྲང་སྲོང་གི་ཚངས་པར་སྤྱོད་པ་ལ་སྤྱད་དེ། དེ་རྣམས་ཀྱི་ཐ་མ་ནི་རྒྱལ་པོ་མུ་ཁྱུད་ཅེས་བྱ་བ་བྱུང་ངོ ། །མུ་ཁྱུད་ལས་འབྱིང་བ་དང ། སྲ་བའི་མུ་ཁྱུད་དང ། རྐོ་བ་དང ། ཉེ་བར་རྐོ་བ་དང ། རྐོ་བ་ཡོད་དང ། ཀུན་ནས་རྐོ་དང ། གྱ་ནོམ་སྣང་དང ། ཐོས་པའི་སྡེ་དང ། ཆོས་ཀྱི་སྡེ་དང ། རྟོགས་པ་དང ། རྟོགས་པ་ཆེན་པོ་དང ། རྟོགས་པའི་སྡེ་དང ། མྱ་ངན་མེད་དང ། མྱ་ངན་བྲལ་དང ། བརྟན་པའི་སྡེ་དང ། རྒ་བས་
179a
༄#། །སྦྱར་དང ། གླེན་བསད་དང ། སྐྱ་རེངས་དང ། ཕྱོགས་ཀྱི་བདག་པོ་དང ། རྡུལ་ཅན་དང ། བདེ་བྱེད་དང ། ཀུན་དགའ་དང ། མེ་ལོང་གདོང་དང ། སྐྱེད་པ་དང ། ཀུན་ནས་སྐྱེད་པ་དང།་སྐྱེ་བོའི་ཁྱུ་མཆོག་དང ། བཟའ་བཏུང་ཅན་དང ། བཟའ་བཏུང་མང་པོ་ཅན་དང ། མི་ཐུབ་པ་དང ། གཞན་གྱིས་མི་ཐུབ་པ་དང ། གནས་པ་དང ། ཤིན་ཏུ་གནས་པ་དང ། སྟོབས་ཆེན་དང ། སྟོབས་ཆེན་ཞོན་དང ། ལེགས་པའི་བློ་གྲོས་དང ། བརྟན་བཞོན་དང ། གཞུ་བཅུ་པ་དང ། གཞུ་བརྒྱ་པ་དང ། གཞུ་དགུ་བཅུ་དང ། གཞུ་རྒྱལ་དང ། གཞུ་བཀྲ་དང ། གཞུས་དང ། ཤིང་རྟ་བཅུ་པ་དང ། ཤིང་རྟ་བརྒྱ་པ་དང ། ཤིང་རྟ་དགུ་བཅུ་པ་དང ། ཤིང་རྟ་ཁྲ་བོ་དང ། ཤིང་རྟ་རྒྱལ་དང ། ཤིང་རྟ་སྲ་བའོ། །གཽ་ཏ་མ་དག་།རྒྱལ་པོ་ཤིང་རྟ་སྲ་བའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བདུན་ཁྲི་བདུན་སྟོང་གྲོང་ཁྱེར་ཀུན་ཏུ་སྣང་བར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཀྲི་ཀྲི་ཞེས་བྱ་བ་བྱུང་ངོ ། །དེའི་ཚེ་སྟོན་པ་དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེའི་སྤྱན་སྔར་བཅོམ་ལྡན་འདས་བྱང་
179b
ཆུབ་སེམས་དཔའ་མ་འོངས་པ་ན་བྱང་ཆུབ་པར་བྱ་བའི་ཕྱིར་སྨོན་ལམ་བཏབ་ནས་ཚངས་པར་སྤྱོད་པ་སྤྱད་དེ། དགའ་ལྡན་གྱི་ལྷའི་རིས་སུ་སྐྱེས་སོ། །གཽ་ཏ་མ་དག་།རྒྱལ་པོ་ཀྲི་ཀྲིའི་བུ་ལེགས་སྐྱེས་སོ། །གཽ་ཏ་མ་དག་།རྒྱལ་པོ་ལེགས་སྐྱེས་ཀྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བརྒྱ་ཐམ་པའང་གྲོང་ཁྱེར་གྲུ་འཛིན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྣ་བཅན་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་རྣ་བ་ཅན་ལ་བུ་གཉིས་ཏེ། གཽ་ཏ་མ་དང ། བྷ་ར་དྭ་ཛའོ། །དེ་གཉིས་ལས་གཽ་ཏ་མ་ནི་མངོན་པར་འབྱུང་བར་དགའོ། །བྷ་ར་དྭ་ཛ་ནི་རྒྱལ་སྲིད་ལ་མངོན་པར་དགའོ། །དེ་ཕ་ཆོས་དང ། ཆོས་མ་ཡིན་པས་རྒྱལ་སྲིད་བྱེད་པ་མཐོང་ནས་དེས་བསམས་པ། བདག་ཡབ་འདས་ནས་རྒྱལ་པོར་གྱུར་ཏེ། བདག་གིས་ཀྱང་ཆོས་དང ། ཆོས་མ་ཡིན་པས་རྒྱལ་སྲིད་བྱས་ནས་སེམས་ཅན་དམྱལ་བར་གཞོལ་བར་འགྱུར་བས་འདིར་ཅིའི་དུས་ལ་བབ་ཅེ་ན། ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་དུ་བསམས་ནས།་རྒྱལ་པོ་རྣ་བ་ཅན་གང་ན་བ་དེར་སོང་སྟེ་ཕྱིན་པ་དང་རྐང་པ་གཉིས་ལ་གཏུགས་ཏེ་གསོལ་བ་བཏབ་པ། ཡབ།་མཁྱེན་པར་མཛོད་ཅིག་།བདག་ནི་དད་པས་ཁྱིམ་ནས་ཁྱིམ་མ་མཆིས་བར་རབ་ཏུ་འབྱུང་ངོ ། །དེས་སྨྲས་པ། བུ་གང་གི་ཕྱིར་མཆོད་སྦྱིན་མཆོད་པར་བྱེད་པ་དང ། སྦྱིན་སྲེག་སྲེག་པར་བྱེད་པ་དང ། དཀའ་ཐུབ་དཀའ་ཐུབ་སྤྱོད་པ་དེ་དག་ནི་འདིའི་
180a
༄#། །ཆེད་ཡིན་ཏེ། ང་འདས་ན་རྒྱལ་སྲིད་ལག་མཐིལ་དུ་འོངས་ཏེ་རྒྱལ་པོ་བྱེད་པར་འགྱུར་ན་ཅིའི་ཕྱིར་རབ་ཏུ་འབྱུང ། དེས་སྨྲས་པ། ཡབ།་བདག་གིས་ཆོས་དང ། མ་ཡིན་པས་རྒྱལ་སྲིད་བགྱིད་རྡོ་མི་ཐོགས་སོ། །དེ་ལྟ་བས་ན་མཁྱེན་པར་མཛོད་ཅིག་།རབ་ཏུ་འབྱུང་ངོ ། །དེ་ནས་རྒྱལ་པོས་གལ་གྱིས་འཆུ་བར་ཤེས་ནས་གནང་ངོ ། །དེའི་ཚེ་བསྟི་གནས་ཞིག་ན་དྲང་སྲོང་མདོག་གང་ཅེས་བྱ་བ་གནས་སོ། །དེ་ནས་གཞོན་ནུ་གཽ་ཏ་མ་རྒྱལ་པོས་གནང་ནས། དགའ་ཞིང་མགུ་ལ་དགའ་བ་རྒྱ་ཆེན་པོ་དང ། ཡིད་བདེ་བ་སྐྱེས་ནས། དྲང་སྲོང་མདོག་གནག་གང་ན་བ་དེར་སོང་སྟེ་ཕྱིན་པ་དང ། སྤྱོད་ལམ་དུལ་བས་རྐང་པ་གཉིས་ལ་ཕྱག་བྱས་ནས་སྨྲས་པ། དྲང་སྲོང་ཆེན་པོ། བདག་རབ་ཏུ་འབྱུང་བར་འདོད་ཀྱི་བདག་རབ་ཏུ་ཕྱུང་ཞིག་།དེས་དེ་རབ་ཏུ་བྱུང་ངོ ། །དྲང་སྲོང་མདོག་གནག་ནི་འབྲས་བུ་དང ། རྩ་བ་དང ། ཆུ་འཐུང་བས་དེའང་དྲང་སྲོང་གཽ་ཏ་མ། དྲང་སྲོང་གཽ་ཏ་མ་ཞེས་བྱ་བར་གྱུར་ཏོ། །ཇི་ཙམ་ན་དུས་གཞན་ཞིག་ན་རྒྱལ་པོ་རྣ་བ་ཅན་ཤི་ནས་གཞོན་ནུ་བྷ་ར་དྭ་ཛ་པའི་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་གོ་།ཇི་ཙམ་ན་དུས་གཞན་ཞིག་ན་དྲང་སྲོང་གཽ་ཏ་མས་མཁན་པོ་ལ་སྨྲས་པ། མཁན་པོ། དགོན་པའི་གནས་ན་ཟས་ཀྱིས་འཚོ་བར་རྡོ་མི་ཐོགས་ཀྱི་གྲོང་འདབ་ཏུ་གནས་པར་བགྱིའོ། །དེས་སྨྲས་པ། བུ། རུང་གིས་གྲོང་ངམ། དགོན་པ་ན་གནས་པའི་
180b
དྲང་སྲོང་གིས་ནི་མདོར་ན་དབང་པོ་བསྲུང་བ་ཡིན་གྱི། ཁྱོད་སོང་ལ་གྲུ་འཛིན་གྱི་ཉེ་འཁོར་དུ་ལོ་མའི་སྤྱིལ་བུ་བྱོས་ལ་འདུག་ཅིག་།མཁན་པོ། བཀའ་བཞིན་འཚལ་ཞེས་སྨྲས་ནས། དྲང་སྲོང་གཽ་ཏ་མ་གྲུ་འཛིན་གྱི་ཉེ་འཁོར་དུ་ལོ་མའི་སྤྱིལ་བུ་བྱས་ཏེ་གནས་སོ། །དེའི་ཚེ་གྲོང་ཁྱེར་གྲུ་འཛིན་ན་སྨད་འཚོང་མ་བཟང་མོ་ཞེས་བྱ་བ་དང ། སྐྱེས་བུ་གཡོན་ཅན་པདྨའི་རྩ་ལག་ཅེས་བྱ་བ་གནས་ཏེ།་དེས་དེ་ལ་དགའ་མགུར་སྤྱད་པའི་ཕྱིར་གོས་དང ། རྒྱན་དག་བསྐུར་རོ། །དེས་གོས་དང ། རྒྱན་དག་ཐོགས་ནས་ཆས་པ་ལས། ཡང་མི་གཞན་ཞིག་ཀཱཪྵཱ་པ་ཎ་ལྔ་བརྒྱ་ཐོགས་པ་ཞིག་འོངས་ནས།་བཟང་མོ་དགའ་མགུར་སྤྱད་ཀྱི་ཚུར་ཤོག་།དེས་བསམས་པ། གལ་ཏེ་བདག་སོང་ན་ཀཱཪྵཱ་པ་ཎ་ལྔ་བརྒྱའང་མི་འཐོབ་ལ་ཁྱིམ་དུ་འོངས་པ་སྤངས་ཏེ་གཞན་དུ་འགྲོ་བ་འདི་ནི་ལེགས་པ་མ་ཡིན་ནོ་སྙམ་ནས་དེས་བུ་མོ་མངག་གཞུག་མ་ལ་སྨྲས་པ། སོང་ལ་པདྨའི་རྩ་ལག་ལ་ཇོ་མོའི་མཆིད་ནས་རེ་ཞིག་བདག་སྐབས་མ་མཆིས་ཏེ་སླད་ཀྱིས་མཆིའོ་ཞེས་སྨྲོས་ཤིག་།དེས་དེའི་གན་དུ་སོང་ནས་སྨྲས་སོ། །མི་དེའང་བྱ་བ་མང་པོ་ཞིག་ཡིན་པས་དེ་དེ་དང ། དགའ་མགུར་སྤྱད་ནས་ཐུན་དང་པོ་ཉིད་ལ་སོང་ངོ ། །དེས་བསམས་པ། ནམ་ཚོད་རིང་དུ་ཡོད་པས་དེའི་སེམས་ཀྱང་\?\་བསྲུང་བར་ནུས་སོ་སྙམ་ནས། དེས་ཡང་བུ་མོ་དེ་ལ་བསྒོ་བ། པདྨའི་རྩ་ལག་གི་གན་དུ་སོང་ལ་ཇོ་མོའི་མཆིད་ནས་སྟ་གོན་བགྱིས་ལགས་ན་སྐྱེད་མོས་ཚལ་གང་དུ་མཆིས་ཞེས་སྨྲོས་
181a
༄#། །ཤིག་།དེས་དེའི་གན་དུ་སོང་ནས་སྨྲས་པ་དང ། དེས་སྨྲས་པ། ཁྱོད་ཀྱིས་སྐད་ཅིག་ལ་སྐབས་མེད། སྐད་ཅིག་ལ་སྐབས་ཡོད་ཅེའམ། བུ་མོ་དེ་དེ་དང ། རིགས་མི་འཕྲོད་པ་ཞིག་པས། དེས་སྨྲས་པ། རྗེའི་སྲས། སྐབས་མཆིས་པ་ནི་མ་ལགས་མོད་ཀྱི། དེ་ཁྱོད་ཀྱི་གོས་དང ། རྒྱན་དག་གིས་སྐྱེས་པ་གཞན་དང་ལྷན་ཅིག་དགའ་མགུར་སྤྱད་དོ། ། དེའི་འདོད་ཆགས་ཀྱི་ཀུན་ནས་དཀྲིས་པ་གང་ཡིན་པ་དེ་དང་བྲལ་བར་གྱུར་ཅིང་གནོད་སེམས་ཀྱི་ཀུན་ནས་དཀྲིས་པ་སྐྱེས་ཏེ། དེ་མི་བཟོད་པ་སྐྱེས་ནས་སྨྲས་པ། བུ་མོ་སོང་ལ། བཟང་མོ། པདྨའི་རྩ་ལག་ན་རེ། སྐྱེད་མོས་ཚལ་ག་གེ་མོ་ཞིག་ཏུ་ཤོག་ཅིག་ཅེས་བྱོས་ཤིག་།དེས་སོང་ནས་བཟང་མོ་ལ་སྨྲས་ནས། དེ་ནས་དེ་སྐྱེད་མོས་ཚལ་དུ་སོང་བ་དང ། སྐྱེས་བུ་གཡོན་ཅན་པདྨའི་རྩ་ལག་གིས་སྨྲས་པ། ཁྱོད་ཁོ་བོའི་གོས་དང ། རྒྱན་གྱིས་སྐྱེས་པ་གཞན་དང་ལྷན་ཅིག་དགའ་མགུར་སྤྱོད་པ་རིགས་སམ། དེས་སྨྲས་པ། རྗེའི་སྲས། དེ་ནི་བདག་གིས་ནོངས་ཏེ་འོན་ཀྱང་བུད་མེད་ནི་རྟག་ཏུ་སྐྱོན་ཅན་ལགས་པས་བཟོད་པར་མཛོད་ཅིག་།དེ་ནས་དེ་མི་བཟོད་པ་སྐྱེས་ནས་རལ་གྲི་ཤུགས་ནས་ཕྱུང་སྟེ་བསད་དོ། །དེ་ནས་བུ་མོ་མངག་གཞུག་མས་ཇོ་མོ་བསད་དོ། །ཇོ་མོ་བསད་དོ་ཞེས་ཀུ་ཅོའི་སྒྲ་ཆེན་པོ་བཏོན་པ་སྐྱེ་བོའི་ཚོགས་ཆེན་པོ་ཀུན་གྱིས་ཐོས་ནས་བརྒྱུགས་པ་དང ། དེ་ཇི་ཙམ་ན་བསྟི་གནས་དེ་ཉིད་ན་
181b
དྲང་སྲོང་གཽ་ཏ་མ་གནས་སོ། །དེ་ནས་སྐྱེས་བུ་གཡོན་ཅན་པདྨའི་རྩ་ལག་དེ་སྐྲག་ནས་རལ་གྲི་ཁྲག་ཅན་དྲང་སྲོང་གཽ་ཏ་མའི་མདུན་དུ་བོར་ནས་སྐྱེ་བོའི་ཚོགས་དེ་ཉིད་ཀྱི་ནང་དུ་ཞུགས་སོ། ། སྐྱེ་བོའི་ཚོགས་ཆེན་པོ་དེས་རལ་གྲི་ཁྲག་ཅན་མཐོང་ནས་སྨྲས་པ། རབ་ཏུ་བྱུང་བ་འདིས་བཟང་མོ་བསད་དོ་ཞེས་དེ་ནས་དྲང་སྲོང་གཽ་ཏ་མ་དེ་བསྐོར་ཏེ། མི་བཟོད་པ་སྐྱེས་ནས་སྨྲས་པ། ཀཝའི་རབ་ཏུ་བྱུང་བ་དྲང་སྲོང་གི་རྒྱལ་མཚན་ཐོགས་ནས་འདི་འདྲ་བའི་ལས་བྱེད་དམ། དེས་སྨྲས་པ། ཅི་བྱས། དེ་རྣམས་ཀྱིས་སྨྲས་པ། བཟང་མོ་དང་ཁྱོད་ལྷན་ཅིག་དགའ་མགུར་སྤྱད་ནས་དེ་བསད་དོ། །དེས་སྨྲས་པ། ཁོ་བོའི་སྡིག་པ་ཞི་བས་ལས་དེ་མི་བྱེད་དོ་ཞེས་དེ་ཞི་བས་སྨྲས་ཀྱང་སྐྱེ་བོའི་ཚོགས་དེས་ལག་པ་ཕྱིན་ཀ་ལོག་ཏུ་དམ་དུ་བཅིངས་ནས་རྒྱལ་པོ་ལ་ཕུལ་ཏེ། ལྷ།་རབ་ཏུ་བྱུང་བ་འདིས་བཟང་མོ་དང་ལྷན་ཅིག་དགའ་མགུར་སྤྱད་ནས་དེ་བཀུམ་ལགས་སོ། །རྒྱལ་པོ་རྣམས་ནི་མི་རྟོག་པ་ཡིན་པས། དེས་སྨྲས་པ། གལ་ཏེ་དེ་ལྟར་གྱུར་ན་རབ་ཏུ་བྱུང་བ་འདི་ངས་སྤངས་ཀྱིས་གསལ་ཤིང་ལ་གཤོན་ཅིག་།དེ་རབ་ཏུ་བྱུང་བ་དེ་མེ་ཏོག་ཀ་ར་བཱི་རའི་ཕྲེང་བ་མགུལ་དུ་བཏགས་ཤིང་སྐྱེས་པ་གོས་སྔོན་པོ་གྱོན་པ་ལག་ན་མཚོན་ཐོགས་པ་རྣམས་ཀྱིས་ཡོངས་སུ་བསྐོར་ནས་ལམ་པོ་ཆེ་དང ། ཚོང་འདུས་དང ། བཞི་མདོ་དང ། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ཏེ། གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཕྱུང་ནས་གསོན་
182a
༄#། །པོ་ཉིད་དུ་གསལ་ཤིང་ལ་གཤོན་ནོ། །དེའི་མཁན་པོ་མདོག་གང་དེ་དུས་དུས་སུ་དེའི་བསྟི་གནས་སུ་འགྲོ་བ་ཡིན་པས་ཇི་ཙམ་དུས་གཞན་ཞིག་ན་སོང་བ་ལས་མ་མཐོང་ནས་དེས་ཕན་ཚུན་དུ་བཙལ་བར་བརྩམས་པ་དང ། ཇི་ཙམ་ན་དེ་གསལ་ཤིང་ལ་གཤོན་པ་མཐོང་ནས་དེ་སྐད་མི་གསལ་ཞིང་མིག་མཆིམས་གང་ལ་སྙིང་རྗེ་བའི་ཚིག་གིས་དལ་བུ་དལ་བུས་སྨྲས་པ། ཀྱི་ཧུད་བུ། འདི་ཅི་ཞིག་།དེས་ཀྱང་སྐད་མི་གསལ་ཞིང་ཡིད་ཆད་ལ་གནད་དུ་བབ་པའི་གནོད་པའི་ཚོར་བ་སྐྱེས་ཤིང་གདུངས་པས་སྨྲས་པ། མཁན་པོ།་གཞན་ཅི་ལགས། ལས་ལགས་མོད། དེས་སྨྲས་པ། བུ།་རྨ་ཕྱུང་བའམ། གནོད་པ་ཞིག་མ་བྱས་གྲང ། མཁན་པོ། བདག་གིས་ལུས་ཀྱིས་རྨ་བྱུང་གི་སེམས་ཀྱིས་ནི་མ་ཡིན་ནོ། །བུ།་ཇི་ལྟར་ཤེས། མཁན་པོ། བདེན་པ་གསོལ་གྱི་གསོན་ཅིག་།བདེན་པ་དང ། བདེན་པའི་ཚིག་གང་གིས་བདག་གི་ལུས་ཀྱིས་རྨ་ཕྱུང་གི་སེམས་ཀྱི་སམ་ཡིན་ན། བདེན་པ་དང ། བདེན་པའི་ཚིག་དེས་མཁན་པོའི་པགས་པའི་མདོག་ནག་པོ་གང་ཡིན་པ་འདི་གསེར་གྱི་ཁ་དོག་ཏུ་གྱུར་ཅིག་།བདག་ཉིད་ཆེན་པོ་དེ་ལྷག་པའི་བསམ་པ་གོམས་པ་ཡིན་པས་ཚིག་སྨྲས་མ་ཐག་ཏུ་དྲང་སྲོང་མདོག་ནག་གི་པགས་པ་ནག་པོ་མི་སྣང་ཞིང་གསེར་གྱི་ཁ་དོག་ཏུ་གྱུར་ཏོ། །ཀུན་ཏུ་དྲང་སྲོང་མདོག་ནག་གསེར་གྱི་ཁ་དོག་ཏུ་གྱུར་
182b
ཏོ་ཞེས་སྒྲ་གྲགས་པས་དེའི་མིང་གསེར་མདོག་ཅེས་བྱ་བར་གྱུར་ཏོ། །དེ་ངོ་མཚར་མཆོག་ཏུ་གྱུར་ཏོ། །དེ་ནས་དྲང་སྲོང་གཽ་ཏ་མས་སྨྲས་པ། མཁན་པོ། བདག་འདི་ནས་ཤི་འཕོས་ནས་འགྲོ་བ་ནི་གང ། སྐྱེ་བ་ནི་གང ། ཚེ་ཕྱི་མ་ནི་གང་ཞིག་ལགས། དེས་སྨྲས་པ། བུ།་བྲམ་ཟེ་རྣམས་ཁྱེའུ་མེད་པ་ལ་འགྲོ་བ་མེད་དོ་ཞེས་ཟེར་ན། ཁྱོད་ཀྱིས་བུ་འགའ་བསྐྱེད་པ་ལྟ་ཡོད་དམ་མཁན་པོ། ཡབ་ཀྱིས་རྒྱལ་སྲིད་ཀྱི་སླད་དུ་སྤྲོ་བ་བསྐྱེད་པ་ན་བདག་གཞོན་ནུ་ཉིད་དུ་རབ་ཏུ་བྱུང་བས་བུད་མེད་ཀྱི་རྒྱུས་ཀྱང་མ་འཚལ་ན། བདག་གི་བུ་སྐྱེ་བ་ལྟ་ག་ལ་མཆིས། བུ།་གལ་ཏེ་དེ་ལྟ་ན་སྔོན་ཡུལ་ལ་སྤྱད་པ་རྗེས་སུ་དྲན་པར་གྱིས་ཤིག་།མཁན་པོ། ཚོར་བ་དྲག་པོས་ཉེན་ནས་ད་ནི་བདག་གི་གནད་རྣམས་ཆད་ཅིང་ཚིགས་རྣམས་བྱེ་སྟེ། འགུམ་པ་གཅིག་ཏུ་དྲན་པར་བས་ན་ཇི་ལྟར་སྔོན་གྱི་ཡུལ་ལ་སྤྱད་པ་རྗེས་སུ་དྲན་པར་འགྱུར། དེའི་མཁན་པོ་མངོན་པར་ཤེས་པ་ཐོབ་པ་ཡིན་པས་དེ་རྫུ་འཕྲུལ་གྱིས་རྫི་ཆར་ཆེན་པོ་སྤྲུལ་ནས་ཆར་པའི་ཐིགས་པས་དེའི་ལུས་ལ་ཕོག་པ་དང ། དེ་ནས་ཆར་བ་དང ། རླུང་གྲང་མོ་རེག་པས་སྡུག་བསྔལ་རྣམ་པར་མནན་ནས། དེས་སྔོན་གྱི་ཡུལ་ལ་སྤྱད་པ་རྗེས་སུ་དྲན་པར་བྱ་བར་བརྩམས་སོ། །གང་གི་ཚེ་དེས་འཁྲིག་པའི་འདོད་ཆགས་རྗེས་སུ་དྲན་པར་བྱས་པ་ལས་ཁུ་བའི་ཐིགས་པ་གཉིས་ཁྲག་དང་ལྷན་ཅིག་ལྷུང་ངོ ། །བསམ་གྱིས་མི་ཁྱབ་པའི་གནས་ནི་བཞི་སྟེ། བདག་སེམས་པ་དང །
183a
༄#། །འཇིག་རྟེན་སེམས་པ་དང ། སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་སེམས་པ་དང ། སངས་རྒྱས་རྣམས་ཀྱི་སངས་རྒྱས་ཀྱི་ཡུལ་སེམས་པའོ། །ཁུ་བའི་ཐིགས་པ་དེ་གཉིས་སྒོ་ང་གཉིས་སུ་གྱུར་ནས་ཉི་མ་ཤར་བའི་དུས་ཀྱི་ཚེ་ཉི་མའི་འོད་ཟེར་གྱིས་སྨིན་ནས་རྡོ་ལ་བ་དང ། ཁྱེའུ་གཉིས་ཤིག་བྱུང་ནས་དེ་དང་ཧ་ཅང་ཡང་མི་རིང་བའི་བུ་རམ་ཤིང་གི་ཚལ་གསེབ་དེར་དེ་གཉིས་ཞུགས་སོ། །དེ་ནས་ཉི་མའི་འོད་ཟེར་ཤིན་ཏུ་ཚ་བ་བྱུང་སྟེ། ཉི་མའི་འོད་ཟེར་གྱིས་དྲང་སྲོང་གཽ་ཏ་མ་གདུངས་ནས་ཤིའོ། །དེ་ནས་དྲང་སྲོང་གསེར་མདོག་འོངས་ནས་ཤི་བ་མཐོང་ནས་དེས་གསལ་ཤིང་གི་ཉེ་འཁོར་དུ་བལྟས་ན། སྒོ་ང་རྡོལ་བའི་ཁོག་པ་གཉིས་ཤིག་འདུག་ནས། དེ་ཕན་ཚུན་རྗེས་གཅོད་ཅིང་བུ་རམ་ཤིང་གི་ཚལ་གསེབ་ཏུ་ཞུགས་པ་ལས། ཇི་ཙམ་ན་ཁྱེའུ་གཉིས་ཤིག་མཐོང་ངོ ། །དེས་འདི་གཉིས་སུའི་བུ་ཡིན་ཞེས་བསམས་པ་ལས་ཞུགས་པ་དང ། དྲང་སྲོང་གཽ་ཏ་མའི་བུ་ཡིན་པར་གྱུར་ནས། དེ་ནས་དེ་ལྷག་པར་སྡུག་པ་སྐྱེས་ཏེ། དེས་དེ་གཉིས་བསྟི་གནས་སུ་ཁྲིད་ནས་བསྣུན་གསོས་ཏེ། དེ་དེ་གཉིས་ཀྱི་མིང་བཏགས་པ་ཉི་མ་ཤར་བའི་ཚེ་ཉི་མའི་འོད་ཟེར་གྱིས་སྨིན་པར་བྱས་པ་ལས་འདི་གཉིས་སྐྱེས་པར་གྱུར་པས་དེ་བས་ཉི་མའི་རིགས་ཡིན་པས་དེས་ན་ཉི་མའི་རིགས། ཉི་མའི་རིགས་ཞེས་བྱ་བར་གྱུར་ཏོ། །དྲང་སྲོང་གཽ་ཏ་མའི་
183b
བུ་ཡིན་པས་མིང་གཉིས་པ་ལ་ནི། གཽ་ཏ་མ། གཽ་ཏ་མ་ཞེས་བྱ་བར་གྱུར་ཏོ། །རང་གི་ཡན་ལག་ལས་སྐྱེས་པས་མིང་གསུམ་པ་ཡན་ལག་སྐྱེས། །ཡན་ལག་སྐྱེས་ཞེས་བྱ་བར་གྱུར་ཏོ། །བུ་རམ་ཤིང་གི་ཚལ་གསེབ་ནས་རྙེད་པས་མིང་བཞི་པ་བུ་རམ་ཤིང་པ། བུ་རམ་ཤིང་པ་ཞེས་བྱ་བར་གྱུར་ཏོ། །ཇི་ཙམ་ན་དུས་གཞན་ཞིག་ན་རྒྱལ་པོ་བྷ་ར་དྭ་ཛ་བུ་མེད་པར་ཤི་ནས། བློན་པོ་རྣམས་འདུས་ནས་གྲོས་བྱ་བར་བརྩམས་པ། ཤེས་ལྡན་དག་།སུ་ཞིག་རྒྱལ་པོར་དབང་བསྐུར་བར་བྱ། གཞན་དག་གིས་སྨྲས་པ། དེའི་གཅེན་པོ་གཽ་ཏ་མ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་སྟེ་རྒྱལ་སྲིད་འདི་ནི་དེའི་རིགས་རྒྱུད་དུ་འོངས་པ་ཡིན་པས་དེ་དབང་བསྐུར་རོ། །དེ་ནས་དེ་རྣམས་ཀྱིས་གྲོས་བྱས་ནས་དྲང་སྲོང་གསེར་མདོག་གི་དྲུང་དུ་སོང་སྟེ་ཕྱིན་པ་དང ། རྐང་པ་གཉིས་ལ་གཏུགས་ནས་སྨྲས་པ། དྲང་སྲོང་ཆེན་པོ། གཽ་ཏ་མ་གང་དུ་མཆིས། དེས་སྨྲས་པ། ཁྱེད་ཅག་ཁོ་ནས་བསད་དོ། །དེ་རྣམས་ཀྱིས་སྨྲས་པ། དྲང་སྲོང་ཆེན་པོ། བདག་ཅག་གིས་དེ་མཐོང་བར་ཡང་མི་དྲན་ན་ཇི་ལྟར་བསད། ཁོ་བོས་ཁྱེད་ཅག་དྲན་པར་བྱའོ། །མ་ནོངས་སོ། །དེས་དེ་རྣམས་དྲན་པར་བྱས་པ་དང ། སྨྲས་པ། དྲང་སྲོང་ཆེན་པོ། གལ་ཏེ་དེ་ལྟ་ན་སྡིག་པ་སྤྱོད་པ་དེ་མིང་ཙམ་སྨོས་པའང་བསྒྲགས་པ་མ་ཡིན་གྱི་ཞོག་ཅིག་།དེས་སྡིག་པའི་ལས་ཅི་དང ། ཅི་བྱས། འདི་དང ། འདིའོ། །སྐྱོན་མེད་པ་གནོད་པ་མི་བྱེད་པ་དེས་སྡིག་པའི་ལས་མ་བྱས་པར་ཁྱེད་ཅག་གིས་
184a
༄#། །བསད་དོ། །དེ་ལྟར་ཅི་མངོན། དེས་ཇི་ལྟར་གྱུར་པ་རྒྱས་པར་སྨྲས་པ་དང ། དེ་རྣམས་ཡིད་མི་བདེ་བ་སྐྱེས་ནས་སྨྲས་པ། དྲང་སྲོང་ཆེན་པོ། གལ་ཏེ་དེ་ལྟ་ན་དེས་མ་ལེགས་ཀྱི། བདག་ཅག་གིས་སྡིག་པའི་ལས་བགྱིས་སོ་ཞེས་དེ་རྣམས་དེ་སྐད་དུ་སྨྲ་བར་བྱེད་པ་ན། ཁྱེའུ་དེ་གཉིས་ཀྱང་དྲང་སྲོང་གི་དྲུང་དུ་འོངས་སོ། །བློན་པོ་རྣམས་ཀྱིས་སྨྲས་པ།་དྲང་སྲོང་ཆེན་པོ། ཁྱེའུ་འདི་གཉིས་སུའི་ལགས། དེས་སྨྲས་པ། དེ་ཁོ་ནའི་བུའོ། །དེ་རྣམས་ཀྱིས་སྨྲས་པ། འདི་གཉིས་ཇི་ལྟར་སྐྱེས། འདི་གཉིས་ཀྱི་མིང་ཅི་ལགས། དེས་བྱུང་བ་དང་བཅས་པར་རྒྱས་པར་སྨྲས་པ། བློན་པོ་རྣམས་ཀྱིས་དེ་ཐོས་ཏེ་མཆོག་ཏུ་ངོ་མཚར་སྐྱེས་ནས། དེ་རྣམས་ཀྱིས་དྲང་སྲོང་དེ་ལ་གསོལ་བ་བཏབ་ནས་དེ་གཉིས་ལས་གཞོན་ནུ་ཕུ་བོ་ཤོས་རྒྱལ་སྲིད་ཀྱི་དབང་བསྐུར་བས་དབང་བསྐུར་བ་ལས་དེའང་བུ་མེད་པར་ཤིའོ། །དེ་ནས་གཅིག་ཤོས་ནུ་བོ་དབང་བསྐུར་ནས་དེའི་མིང་རྒྱལ་པོ་བུ་རམ་ཤིང་པ་ཞེས་བྱ་བར་གྱུར་ཏོ། །གཽ་ཏ་མ་དག་།རྒྱལ་པོ་བུ་རམ་ཤིང་པའི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་བུ་རམ་ཤིང་པ་བརྒྱའང་གྲོང་ཁྱེར་གྲུ་འཛིན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་བུ་རམ་ཤིང་པ་འཕགས་སྐྱེས་པོ་ཞེས་བྱ་བ་བྱུང་ངོ ། །གཽ་ཏ་མ་དག་།རྒྱལ་པོ་བུ་རམ་ཤིང་པ་འཕགས་སྐྱེས་པོ་ལ་བུ་བཞི་སྟེ། སྐར་མདའ་གཏོང་དང ། ལག་རྣ་དང ། གླང་པོ་
184b
ཆེ་འདུལ་དང ། རྐང་གདུབ་ཅན་ནོ། །དུས་གཞན་ཞིག་ན་དེའི་བཙུན་མོ་དམ་པ་ཤི་ནས་དེ་ལགས་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་གོ་།བློན་པོ་རྣམས་ཀྱིས་སྨྲས་པ། ལྷ།་ཅིའི་སླད་དུ་ཕྱག་ལ་ཞལ་གཏད་ནས་ཐུགས་མི་དགྱེས་ཤིང་བཞུགས། དེས་སྨྲས་པ། ངའི་བཙུན་མོ་དམ་པ་ཤི་ན་ཅིའི་ཕྱིར་སེམས་ཁོང་དུ་ཆུད་ཅིང་མི་འདུག་།ལྷ།་གལ་ཏེ་དེ་ལྟ་ན་ཉི་འོག་གི་རྒྱལ་པོ་རྣམས་ལ་བུ་མོ་མཆིས་ན་ཅིའི་སླད་དུ་ལྷའི་བཙུན་མོ་དམ་པ་མི་བཙལ། རྒྱལ་པོས་སྨྲས་པ། གཞོན་ནུ་འདི་དག་ནི་རྒྱལ་སྲིད་མངོན་པར་འདོད་པས་ཕྱིར་རྒོལ་བ་འདི་དག་ཡོད་ན་ང་ལ་སུ་ཞིག་བུ་མོ་སྟེར་བར་འགྱུར། ལྷ།་དགོངས་ཤིག་དང ། བདག་ཅག་གིས་བཙལ་ལོ། །ཇི་ཙམ་ན་རྒྱལ་པོ་གཞན་ཞིག་གི་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། བཙུན་མོ་དམ་པར་འཚམ་པ་ཡོད་པ་དེ་མི་རྣམས་ཀྱིས་བརྟགས་ཏེ། རྒྱལ་པོ་དེའི་དྲུང་དུ་དོང་ནས། དེ་རྣམས་ཀྱིས་གཅིག་ནས་གཅིག་ཏུ་བརྒྱུད་དེ་རྒྱལ་པོ་དེ་ལ་རིག་པར་བྱས་པ་དང ། རྒྱལ་པོས་བསྒོ་བ། ཁུག་ཅིག་།དེ་ནས་དེ་རྣམས་རྒྱལ་པོའི་སྤྱན་སྔར་དོང་ནས་རྐང་པ་གཉིས་ལ་གཏུགས་ཏེ་ཐོག་མར་གཏམ་བྱས་ནས་འདུག་གོ་།གཏམ་གྱི་སྐབས་རྙེད་ཅིང་རྒྱལ་པོའི་ཞལ་མཐོང་ནས་སྨྲས་པ། ལྷ།་བཀྲ་ཤིས་པར་གྱུར་ཅིག་།བཀྲ་ཤིས་པར་གྱུར་ཅིག་།རྒྱལ་པོས་སྨྲས་པ། ཤེས་ལྡན་དག་།ཁྱེད་ཅི་གསོལ། རྒྱལ་པོ་བུ་རམ་
185a
༄#། །ཤིང་པ་འཕགས་སྐྱེས་པོའི་བཙུན་མོ་དམ་པ་གུམ་ནས་དེའི་ཆེད་ཏུ་སྲས་མོ་བསླང་ངེ ། །རྒྱལ་པོས་སྨྲས་པ། འཐབ་རིར་བབ་པའི་མཆོག་ཡིན་པས་རུང་ན་འོ་ན་ཀྱང་དམ་ཞིག་བཅའ་སྟེ། གལ་ཏེ་ངའི་བུ་མོ་ལ་ཁྱེའུ་ཞིག་ཡོད་པར་གྱུར་ན་དེ་གལ་ཏེ་རྒྱལ་སྲིད་ཀྱི་དབང་ཕྱུག་ལ་གཞག་པ་ལྟ་ན་སྦྱིན་ནོ། །ལྷ།་བཀའ་བཞིན་འཚལ། མཆིས་ལ་ལྷ་ལ་སྙན་དུ་གདས་པར་གསོལ་ལོ་ཞེས་དེ་རྣམས་དོང་ནས། རྒྱལ་པོ་བུ་རམ་ཤིང་པ་འཕགས་སྐྱེས་པོ་ལ་ཇི་ལྟར་གྱུར་པ་སྨྲས་པ། རྒྱལ་པོས་སྨྲས་པ། ཤེས་ལྡན་དག་།གཞོན་ནུ་ཆེས་ཕུ་བོར་གྱུར་པ་རྒྱལ་སྲིད་ལ་མངོན་པར་དགའ་བ་རྣམས་སྤངས་ཏེ། ནུ་བོ་རྒྱལ་སྲིད་ལ་འཇོག་པ་དེ་ནི་འོས་པ་མ་ཡིན་ནོ། །ལྷ།་དོན་འདི་ལ་ངེས་པ་མ་མཆིས་ཏེ། རེ་ཞིག་བཙུན་མོ་བླངས་ལ་ལྷ་དེ་དང་ལྷན་ཅིག་རྩེད་མོ་དང ། དགྱེས་པ་དང ། དགྱེས་དགུར་སྤྱོད་པ་མཛོད་ཅིག་།དེ་ལ་ཁྱེའུ་བཙའ་བར་འགྱུར་རམ། འོན་ཏེ་བུ་མོར་འགྱུར་རམ། སྤྱི་མ་མཆིས་པར་འགྱུར་བ་སུས་འཚལ། རྒྱལ་པོས་སྨྲས་པ། ཤེས་ལྡན་དག་།གལ་ཏེ་དེ་ལྟ་ན་དེང་ལ་ལོངས་ཤིག་།དེ་རྣམས་དོང་ནས་བསུ་སྟེ། ཇི་ཙམ་ན་རྒྱལ་པོའི་དཔལ་གྱི་འབྱོར་པ་ཆེན་པོས་བླངས་ནས་དེའང་རྒྱལ་པོས་མངོན་པར་འདོད་པར་གྱུར་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད།
185b
དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་བཙུན་མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ། དགུ་འདས་པ་དང ། ཁྱེའུ་གཟུགས་བཟང་བ། བལྟ་ན་སྡུག་པ།་མཛེས་པ་ཞིག་བཙས་སོ། །བཙས་ནས་དེའི་བཙས་སྟོན་རྒྱ་ཆེར་བྱས་ཏེ་ཁྱེའུ་འདིའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ།་འདི་ལྟར་མ་སྐྱེས་པ་ཉིད་ནས་རྒྱལ་སྲིད་ལ་མངོན་པར་དགའ་བས་དེའི་སླད་དུ་ཁྱེའུའི་མིང་རྒྱལ་སྲིད་དགའ་ཞེས་བགྱིའོ། །ཁྱེའུ་རྒྱལ་སྲིད་དགའ་མ་མ་བརྒྱད་ལ་རྗེས་སུ་གཏད་དེ་ཞེས་བྱ་བ་ནས་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་དྲག་པར་བྱེད་དོ་ཞེས་བྱ་བའི་བར་གོང་མ་བཞིན་དུའོ། །དེ་རྒྱལ་ཚབ་ཀྱི་རྒྱལ་སྲིད་ལ་མ་བཞག་པ་དེའི་ཞང་པོ་རྒྱལ་པོས་ཐོས་ནས། དེས་དེ་ལ་ཕོ་ཉ་བཏང་སྟེ། ཚིག་རྩུབ་པོ་དང་ཆས་པའི་སྦྲིང་ཡིག་བསྐུར་བ། ཁྱེད་ཀྱིས་སྔོན་ཁས་བླངས་ཤིང་དམ་བཅས་པ་བཞིན་གལ་ཏེ་བྱེད་ན་དེ་ལྟ་ན་ལེགས། གལ་ཏེ་དེ་ལྟར་མ་བྱས་ན་ཁྱོད་ཀྱི་མཐུ་དང ། བརྩོན་འགྲུས་ཀྱི་ཕ་རོལ་གནོན་པ་གང་ཡིན་པ་དེས་སྡོད་ཅིག་།ཁོ་བོའི་ནིར་འོངས་ནས་ཡུལ་འཁོར་ཕུར་མར་བརླག་གོ་།རྒྱལ་པོ་དེ་མཐུ་ཆེན་པོ་དང་ལྡན་པ་དེས་ཐོས་ནས་སྐྲག་སྟེ། བློན་པོ་རྣམས་བསོགས་ནས་སྨྲས་པ། ཤེས་ལྡན་དག་།ང་ལ་རྒྱལ་པོ་དེས་འདི་སྐད་ཅེས་སྤྲིང་ན་དེ་ལ་ཇི་ལྟར་བསྒྲུབ་པར་བྱ། དེ་རྣམས་ཀྱིས་སྨྲས་པ། ལྷ།་རྒྱལ་སྲིད་
186a
༄#། །དགའ་རྒྱལ་ཚབ་ཏུ་དབང་བསྐུར་ལགས་མོད། དེས་སྨྲས་པ། ཤེས་ལྡན་དག་།གཞོན་ནུ་ཆེས་ཕུ་བོར་གྱུར་པ་རྒྱལ་སྲིད་ལ་མངོན་པར་དགའ་བ་རྣམས་སྤངས་ཏེ།་ནུ་བོ་རྒྱལ་སྲིད་ཀྱི་དབང་བསྐུར་བ་འདི་ནི་འོས་པ་མ་ཡིན་ནོ། །དེ་རྣམས་ཀྱིས་སྨྲས་པ། ལྷ།་རྒྱལ་པོ་དེ་ནི་སྟོབས་དང ། བཞོན་པ་རྒྱ་ཆེ་བས་གལ་ཏེ་འདིར་མཆིས་ན་གདོན་མི་འཚལ་བར་ཡུལ་ཕུར་མར་རློག་པ་གང་ལགས་པའི་གནས་དེ་མཆིས་པས་རྒྱལ་སྲིད་དགའ་རྒྱལ་ཚབ་ཀྱི་དབང་ཕྱུག་ལ་དབང་བགྱིད་པར་དབང་བསྐུར་ལ། གཞོན་ནུ་དེ་རྣམས་ནི་སྦྱུག་ཏུ་གསོལ། རྒྱལ་པོས་སྨྲས་པ། ཤེས་ལྡན་དག་།སྐྱོན་མེད་ཅིང་གནོད་པ་མ་བྱས་པའི་གཞོན་ནུ་རྣམས་ཇི་ལྟར་སྤྱུག་།ལྷ།་བདག་ཅག་ནི་བློན་པོ་ལགས་ཏེ། ལྷ་ལ་སྨན་པར་བགྱི་བ་ལྷུར་ལེན་པ་ལགས་པས་སྐྱོན་མ་མཆིས་པ་དང ། ནོངས་པ་མ་མཆིས་པའང་སྤྱུགས་ལ་སྐྱོན་མཆིས་པ་དང ། ནོངས་པ་བགྱིས་པ་ནི་བཞག་གོ་།རྒྱལ་པོས་བཏང་སྙོམས་སུ་བཞག་ནས་ཅང་མི་སྨྲ་བར་འདུག་གོ་།བློན་པོ་རྣམས་ཚོགས་ནས་ཕན་ཚུན་དུ་གྲོས་བྱ་བར་བརྩམས་པ། ཤེས་ལྡན་དག་།ཐབས་ཤིག་བཤམ་པར་བྱ་སྟེ། དེས་ན་རྒྱལ་པོ་གཞོན་ནུ་རྣམས་ལ་ཐུགས་བྱུང་བར་འགྱུར་བ་ཞིག་བྱའོ་ཞེས་དེ་ནས་དེ་རྣམས་ཀྱིས་སྐྱེད་མོས་ཚལ་བྱི་དོར་བྱས་པ། རི་མོ་སྣ་ཚོགས་བྲིས་པར་ཤིན་ཏུ་དྲི་ཞིམ་པའི་པོག་ཕོར་ཉེ་བར་བཞག །
186b
དར་གྱི་ཆུན་འཕྱང་མང་པོ་བཏགས། མེ་ཏོག་སྣ་ཚོགས་ཀྱིས་དགའ་དགའ་ལྟར་བྱས་པ་ཞིག་བྱེད་ཏུ་བཅུག་གོ་།དེ་ནས་དེ་རྣམས་ཀྱིས་བློན་པོ་རྣམས་ཀྱིས་སྐྱེད་མོས་ཚལ་དེའི་བྱི་དོར་བྱེད་པ་རྒྱང་རིང་པོ་ནས་མཐོང་ནས་གཞོན་ནུ་རྒོད་བག་ཅན་དེ་རྣམས་སྐྱེད་མོས་ཚལ་གྱི་ཕྱོགས་སུ་དོང་ངོ ། །བློན་པོ་རྣམས་སྐྱེད་མོས་ཚལ་གྱི་བྱི་དོར་བྱས་ནས་སྒོར་བྱུང་བ་དང ། གཞོན་ནུ་རྣམས་ཀྱིས་དྲིས་པ། འདི་སུའི་སྐྱེད་མོས་ཚལ། དེ་རྣམས་ཀྱིས་སྨྲས་པ། ལྷའི་ལགས་སོ། །དེ་རྣམས་སླར་ལོག་པར་བརྩམས་པ་དང ། བློན་པོ་རྣམས་ཀྱིས་སྨྲས་པ། གཞོན་ནུ་རྣམས་ནང་དུ་ཞུགས་ཤིག་།ཅིའི་ཕྱིར་སླར་ལྡོག་།དེ་རྣམས་ཀྱིས་སྨྲས་པ། ལྷའི་སྐྱེད་མོས་ཚལ་ཡིན་ན་འདིར་འཇུག་ཏུ་ག་ལ་རུང ། བློན་པོ་རྣམས་ཀྱིས་སྨྲས་པ། ལྷའམ། གཞོན་ནུ་རྣམས་རོལ་པ་འདི་ལ་འགལ་བ་ཅི་མཆིས། དེ་རྣམས་ནང་དུ་ཞུགས་ཏེ་རྩེ་བར་བརྩམས་སོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ།སྐྱེད་མོས་ཚལ་ལེགས་པར་བྱི་དོར་བགྱིས་ལགས་ཀྱི།་ལྷ།་གཟིགས་པའི་དུས་ལ་བབ་ལགས་སོ། །རྒྱལ་པོ་ཆས་པ་དང ། སྐྱེད་མོས་ཚལ་ན་ཀུ་ཅོའི་སྒྲ་ཐོས་སོ། །ཐོས་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་།སྐྱེད་མོས་ཚལ་ན་ཀུ་ཅོའི་སྒྲ་གྲག་ན་འདི་ནི་སུ་ཞིག་འདུག་།བློན་པོ་རྣམས་ཀྱིས་སྨྲས་པ། ལྷ། གཞོན་ནུ་རྣམས་སོ། །གལ་ཏེ་དེ་ལྟ་ན་ངས་གཞོན་ནུ་རྣམས་སྤངས་སོ། །བློན་པོ་རྣམས་ཀྱིས་
187a
༄#། །རྐང་པ་གཉིས་ལ་གཏུགས་ཏེ་སྨྲས་པ། ལྷ།་བཟོད་པར་མཛད་ཅིང་གཞོན་ནུ་རྣམས་སྤང་པར་གསོལ། རྒྱལ་པོས་སྨྲས་པ། དེ་བཞིན་དུ་བྱའོ་ཞེས་གཞོན་ནུ་དེ་རྣམས་སྤྱུག་པར་ཆད་པ་དང ། རྒྱལ་པོའི་རྐང་པ་གཉིས་ལ་གཏུགས་ནས་སྨྲས་པ། ལྷ།་གལ་ཏེ་དེ་ལྟ་ན་བདག་ཅག་འཁོར་གྱི་སྐྱེ་བོ་དང་ལྷན་ཅིག་མཆི་ན་དེ་ཅི་ནས་ཀྱང་མི་དགག་པ་དེ་ལྟར་བཀའ་སྩལ་པའི་རིགས་སོ། །རྒྱལ་པོས་བསྒོ་ནས། དེ་རྣམས་ཆས་པ་ན། དེ་རྣམས་ལ་དགའ་བའི་ཕོ་བྲང་འཁོར་གྱི་མི་སྐྱེ་བོའི་ཚོགས་ཆེན་པོ་དང་དེ་རྣམས་ལྷན་ཅིག་ཆས་ཏེ་ཞག་བདུན་དུ་གྲོང་ཁྱེར་གྲུ་འཛིན་གྱི་སྒོ་ཕྱེ་ནས་སྐྱེ་བོའི་ཚོགས་རྒྱུས་སོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ།་གལ་ཏེ་གྲོང་ཁྱེར་གྱི་སྒོ་མ་བཀུ་མ་ན་རིང་པོ་མི་ཐོགས་པར་གྲུ་འཛིན་སྟོབས་པར་འགྱུར་རོ། །གལ་ཏེ་དེ་ལྟ་ན་སྒོ་ཆོད་ཅིག་།དེ་ནས་གཞོན་ནུ་དེ་རྣམས་རང་གི་སྲིང་མོ་ཁྲིད་ནས་མཐར་གྱིས་རི་བོ་གངས་རི་དང་ཉེ་བ་ཆུ་བོ་སྐལ་ལྡན་ཤིང་རྟའི་འགྲམ་ན། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་ཕྱིན་ནས། དེ་རྣམས་ཀྱི་ས་དེར་ལོ་མའི་སྤྱིལ་བུ་དག་བྱས་ཏེ། གནས་བཏབ་ནས་རི་དྭགས་བསད་ཅིང་བསད་ནས་འཚོ་བ་བྱེད་ཅིང་དུས་གསུམ་དུ་དྲང་སྲོང་སེར་སྐྱའི་བསྟི་གནས་སུ་འདོང་བར་བྱེད་དོ། །ལང་ཚོ་དང ། དར་ལ་བབ་པའི་དྲེགས་པས་ཟིན་པས་འདོད་ཆགས་ཀྱིས་ཤིན་
187b
ཏུ་ཉེན་ཏེ། ཤ་དྲི་ངན་པ་སྐྱ་བོ་བསེང་བསེང་པོར་གྱུར་ཏོ། །ཇི་ཙམ་དུས་གཞན་ཞིག་ན་དྲང་སྲོང་སེར་སྐྱས་དེ་ལྟ་བུ་མཐོང་ནས་དྲིས་པ། ཁྱེད་ཅག་ཅིའི་ཕྱིར་སྐྱ་བོ་བསེང་བསེང་པོར་གྱུར། དེ་རྣམས་ཀྱིས་སྨྲས་པ། དྲང་སྲོང་ཆེན་པོ། བདག་ཅག་འདོད་པའི་འདོད་ཆགས་ཀྱིས་ཤིན་ཏུ་ཉེན་པས་སོ། །དེས་སྨྲས་པ། རང་རང་གི་སྲིང་མོ་སྤོངས་ལ་མས་དབྱེན་གྱི་སྲིང་མོ་རྣམས་དང་ལྷན་ཅིག་འདུག་ཅིག་།དྲང་སྲོང་ཆེན་པོ། བདག་ཅག་གིས་དེ་ལྟ་བུ་བགྱིར་རུང་རམ། ཤེས་ལྡན་དག་།རྒྱལ་རིགས་རྒྱལ་སྲིད་སྟོར་བ་རྣམས་ཀྱིས་རུང་ངོ ། །དེ་ནས་དེ་རྣམས་དྲང་སྲོང་གི་ཚིག་ནི་ཚད་མ་ཡིན་ནོ་སྙམ་ནས་འདོད་པའི་འདོད་ཆགས་ཀྱིས་ཉེན་པས་དགའ་བ་དང ། མགུ་བ་སྐྱེས་ཏེ། མས་དབྱེན་གྱི་སྲིང་མོ་རྣམས་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྣམས་དང་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བུ་ཕོ་དང ། བུ་མོ་དག་བཙས་ཏེ་དེ་རྣམས་ཆེན་པོར་གྱུར་པ་དང ། བསམ་གཏན་གྱི་ཚེར་མ་ནི་སྒྲ་ཡིན་པས་དྲང་སྲོང་སེར་སྐྱ་སེམས་རྩེ་གཅིག་པ་ཉིད་དུ་མ་བཏུབ་ནས། ཤེས་ལྡན་དག་།མཐོང་ཟིན་གྱི་ཁོ་བོ་གཞན་དུ་འགྲོའོ། །དྲང་སྲོང་ཆེན་པོ། ཅིའི་ཕྱིར། བསམ་གཏན་གྱི་ཚེར་མ་ནི་སྒྲ་ཡིན་པས་སེམས་རྩེ་གཅིག་པ་ཉིད་དུ་མ་བཏུབ་བས་སོ། །དྲང་སྲོང་ཆེན་པོ། ཁྱོད་འདི་ཉིད་ན་བཞུགས་ཤིག་།བདག་ཅག་གཞན་དུ་མཆི་ན། འོན་ཀྱང་སའི་
188a
༄#། །ཕྱོགས་ཤིག་བདག་ཅག་ལ་ཕོག་ཅིག་།ཤེས་ལྡན་དག་།རུང་ངོ ། །དྲང་སྲོང་བདག་ཉིད་ཆེན་པོ་དེ་རྣམས་ནི་འདོད་པ་བཞིན་ཡིད་ལ་རེ་བ་གྲུབ་པ་ཡིན་པས་དེས་གསེར་གྱི་བྱ་མ་བུ་མ་བླངས་ཏེ། ཆུའི་རྒྱུན་གྱིས་གྲོང་ཁྱེར་གྱི་རྣམ་པ་དག་བྲིས་ནས་དེ་རྣམས་ཀྱིས་གྲོང་ཁྱེར་བརྩིགས་སོ། །དྲང་སྲོང་སེར་སྐྱས་དེ་རྣམས་ཀྱི་ཕྱིར་གཞི་ཡོངས་སུ་བཏང་བས་སེར་སྐྱའི་གཞི། སེར་སྐྱའི་གཞི་ཞེས་བྱ་བར་གྱུར་ཏོ། །དེ་རྣམས་དེར་འཕེལ་བར་གྱུར་བས་སྐྱེ་བོའི་ཚོགས་ཆེན་པོར་གྱུར་ཏེ། དོགས་པས་འཕེལ་ཆེ་བར་མ་གྱུར་ཏོ། །ལྷ་རྣམས་ཀྱི་སེམས་ཀྱིས་དེ་རྣམས་ཀྱི་སེམས་ཤེས་ནས་ཕྱོགས་གཞན་ཞིག་བསྟན་པ་དང ། དེ་རྣམས་དེར་དོང་སྟེ་གྲོང་ཁྱེར་གཅིག་ཤོས་བརྩིགས་ནས་ལྷས་བསྟན། ལྷས་བསྟན་ཅེས་བྱ་བར་གྱུར་ཏོ། །དེ་ནས་དེ་རྣམས་ཚོགས་ཤིང་འདུས་ནས་ཕན་ཚུན་གྲོས་བྱ་བར་བརྩམས་པ། ཤེས་ལྡན་དག་།གང་གི་ཕྱིར་བདག་ཅག་སྤྱུགས་པ་ནི་རིགས་མཉམ་པ་ལས་ཆུང་མ་མ་བླངས་པ་དེ་ལས་གྱུར་གྱི་དེ་བས་ན་བདག་ཅག་ལས་སུས་ཀྱང་རིགས་མཉམ་པ་ལས་ཆུང་མ་བླང་བར་མི་བྱ་སྟེ། གཅིག་ཁོ་ནས་ཆོག་ཤེས་པར་བྱའོ། །དེ་རྣམས་རིགས་མཉམ་པ་གཅིག་ཁོ་ན་ལས་ཆུང་མ་ཡིན་གྱི་ཆུན་མ་ནི་མི་ལེན་ཏོ། །དེ་ནས་དུས་གཞན་ཞིག་ན་རྒྱལ་པོ་འཕགས་སྐྱེས་པོ་བུ་སྡུག་པ་རྣམས་རྗེས་སུ་དྲན་ནས་བློན་པོ་རྣམས་ལ་སྨྲས་པ། ཀྱེ་
188b
གྲོང་པ་དག་།གཞོན་ནུ་དེ་རྣམས་ད་ལྟར་གང་ན་འདུག་།དེ་རྣམས་ཀྱིས་སྨྲས་པ། ལྷས་ནོངས་པ་འགའ་ཞིག་ལ་སྤྱུགས་པ་ལས་དེ་རྣམས་རང་རང་གི་སྲིང་མོ་ཁྲིད་དེ་འདི་ནས་མཆིས་པ་ན་གངས་རི་དང་ཉེ་བ་ཆུ་བོ་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བ་ཞིག་ཏུ་གནས་བཏབ་སྟེ། རང་རང་གི་སྲིང་མོ་སྤངས་ཏེ། མས་དབྱེན་གྱི་སྲིང་མོ་རྣམས་དང་ལྷན་ཅིག་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་དོ། །དེ་རྣམས་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་པ་ན་བུ་ཕོ་དང ། བུ་མོ་དག་བཙས་སོ། །གྲོང་པ་དག་།གཞོན་ནུ་རྣམས་ཀྱིས་དེ་ལྟར་བྱེད་ཕོད་དམ། ལྷ།་རྔོ་ཐོགས་ལགས་སོ། །དེ་ནས་རྒྱལ་པོ་བུ་རམ་ཤིང་པ་འཕགས་སྐྱེས་པོས་རོ་སྟོད་བསྲང་ནས་ལག་པ་གཡས་པ་བརྐྱང་སྟེ། ཆེད་དུ་བརྗོད་པས་ཆེད་དུ་བརྗོད་པ། ཀྱེ་མ་གཞོན་ནུ་རྣམས་ནི་ཕོད་པ་ཡིན་ནོ། །ཀྱེ་མ་གཞོན་ནུ་རྣམས་ནི་ཤིན་ཏུ་ཕོད་པ་ཡིན་ནོ་ཞེས་སེམས་ཅན་དབང་ཆེན་པོས་ཚིག་ཏུ་ཕྱུང་སྟེ། ཀྱེ་མ་གཞོན་ནུ་རྣམས་ནི་ཕོད་པ་ཡིན་ནོ། །ཀྱེ་མ་གཞོན་ནུ་རྣམས་ནི་ཤིན་ཏུ་ཕོད་པ་ཡིན་ནོ་ཞེས་བྱ་བས་དེ་རྣམས་ཤཱཀྱ། ཤཱཀྱ་ཞེས་བྱ་བར་གྱུར་ཏོ། །དེ་རྣམས་དུས་གཞན་ཞིག་ན་རྒྱལ་པོ་བུ་རམ་ཤིང་པ་འཕགས་སྐྱེས་པོ་ཤི་ནས་རྒྱལ་སྲིད་དགའ་རྒྱལ་སྲིད་ལ་དབང་བསྐུར་རོ། །དེའང་བུ་མེད་པར་ཤི་ནས་སྐར་མདའ་གདོང་རྒྱལ་སྲིད་ཀྱི་དབང་ཕྱུག་ལ་དབང་
189a
༄#། །བྱེད་དུ་བཅུག་གོ་།དེའང་བུ་མེད་པར་ཤི་ནས་ལག་ན་རྒྱལ་པོར་གྱུར་ཏོ། །དེའང་བུ་མེད་པར་ཤི་ནས་གླང་པོ་ཆེ་འདུལ་རྒྱལ་པོར་འགྱུར་ཏོ། །དེའང་བུ་མེད་པར་ཤི་ནས་རྐང་གདུབ་ཅན་རྒྱལ་པོར་གྱུར་ཏོ། །དེའི་བུ་གནས་འཇོག་གོ་།གཽ་ཏ་མ་དག་།གནས་འཇོག་གི་བུ་ས་ཁྱིམ་མོ། །གཽ་ཏ་མ་དག་།རྒྱལ་པོ་ས་ཁྱིམ་གྱི་བུ་དང ། ཚ་བོ་དང ། ཡང་ཚ་དང ། སུམ་ཚའི་རྒྱུད་རྒྱལ་པོ་ལྔ་ཁྲི་ལྔ་སྟོང་གྲོང་ཁྱེར་སེར་སྐྱའི་གཞིར་བྱུང་སྟེ། དེ་རྣམས་ཀྱི་ཐ་མ་ནི་ཤིང་རྟ་བཅུ་པ་དང ། ཤིང་རྟ་བརྒྱ་པ་དང ། ཤིང་རྟ་དགུ་བཅུ་དང ། ཤིང་རྟ་ཁྲ་བོ་དང ། ཤིང་རྟ་རྒྱལ་དང ། བརྟན་པའི་ཤིང་རྟ་དང ། གཞུ་བཅུ་པ་དང ། གཞུ་བརྒྱ་པ་དང ། གཞུ་དགུ་བཅུ་དང ། གཞུ་རྒྱལ་དང ། གཞུ་བཀྲ་དང ། གཞུ་བརྟན་ནོ། །གཽ་ཏ་མ་དག་།གཞུ་བརྟན་ལ་བུ་གཉིས་ཏེ། སེང་གེའི་འགྲམ་དང ། སེང་གེའི་སྒྲའོ། །གཽ་ཏ་མ་དག་།ཛམྦུའི་གླིང་གི་གཞུ་ཐོགས་ཇི་སྙེད་ཡོད་པ་དེ་རྣམས་ཀྱི་ནང་ན་སེང་གེའི་འགྲམ་མཆོག་ཏུ་གྲགས་སོ། །གཽ་ཏ་མ་དག་།སེང་གེའི་འགྲམ་ལ་བུ་བཞི་སྟེ། ཟས་གཙང་དང ། ཟས་དཀར་དང ། བྲེ་བོ་ཟས་དང ། བདུད་རྩིའི་ཟས་སོ། །བུ་མོ་གཙང་མ་དང ། དཀར་མོ་དང ། བྲེ་མོ་མ་དང ། བདུད་རྩི་མའོ། །ཟས་གཙང་ལ་བུ་གཉིས་ཏེ། བཅོམ་ལྡན་འདས་དང ། ཚེ་དང་ལྡན་པ་དགའ་བོའོ། །ཟས་དཀར་ལ་བུ་གཉིས་ཏེ། ཚེ་དང་ལྡན་པ་རྒྱལ་དང ། ཤཱཀྱའི་
189b
རྒྱལ་པོ་བཟང་ལྡན་ནོ། །བྲེ་བོ་ཟས་ལ་བུ་གཉིས་ཏེ། མིང་ཆེན་དང ། ཚེ་དང་ལྡན་པ་མ་འགགས་པའོ། །བདུད་རྩི་ཟས་ཀྱི་བུ་གཉིས་ཏེ། ཚེ་དང་ལྡན་པ་ཀུན་དགའ་བོ་དང ། ལྷས་བྱིན་ནོ། ། གཙང་མའི་བུ་ནི་ལེགས་པར་རབ་སད་དོ། །དཀར་མོའི་བུ་ནི་ཕྲེང་བ་ཅན་ནོ། །བྲེ་བོ་མའི་བུ་ནི་བཟང་ལན་ནོ། །བདུད་རྩི་མའི་བུ་ནི་དགེ་འཕེལ་ལོ། །བཅོམ་ལྡན་འདས་ཀྱི་སྲས་ནི་སྒྲ་གཅན་འཛིན་ཡིན་ཏེ། གཽ་ཏ་མ་དག་།མང་པོས་བཀུར་གྱི་རྒྱུད་ཚེ་དང་ལྡན་པ་སྒྲ་གཅན་འཛིན་དུ་རྫོགས། སྲིད་པའི་བྲེང་རྒྱུད་ཆད། འཁོར་བ་ཟད་དེ་ད་ནི་ཡང་སྲིད་པ་མེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽངྒལ་གྱི་བུ་ཆེན་པོའི་གཏམ་རྫོགས་པར་མཁྱེན་ནས་བཞེངས་ཏེ་བཞུགས་སོ། །བཞུགས་ནས་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་བཀའ་སྩལ་པ། མཽངྒལ་གྱི་བུ། ལེགས་སོ། །ལེགས་སོ། །མཽངྒལ་གྱི་བུ། ཁྱོད་ཀྱིས་དགེ་སློང་རྣམས་ཀྱི་མདུན་དུ་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ནས་ཆོས་ཀྱི་གཏམ་སྨྲས་པའང་ཁྱོད་ལེགས་སོ། །མཽངྒལ་གྱི་བུ། ཡང་ཁྱོད་ཀྱིས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ཏེ་ཆོས་ཀྱི་གཏམ་རྟག་ཏུ་སྨྲོས་ཤིག་དང ། དེས་ནི་དེ་རྣམས་ལ་ཡུན་རིང་པོའི་དོན་དང ། ཕན་པ་དང ། བདེ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱེད་ཀྱིས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་པའི་
190a
༄#། །ཆོས་ཀྱི་གཏམ་ཆོངས་ཤིག་།ཟུངས་ཤིག་།ལྷོགས་ཤིག་།དེ་ཅིའི་ཕྱིར་ཞེ་ན། དགེ་སློང་དག་།ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལ་བརྩམས་པའི་ཆོས་ཀྱི་གཏམ་ནི་དོན་དང་ལྡན། ཆོས་དང་ལྡན་པ་ནས། ཚངས་པར་སྤྱོད་པའི་བར་དང་ལྡན་པ་ཡིན་ཏེ། དགེ་སློང་དག་།རིགས་ཀྱི་བུ་དད་པས་རབ་ཏུ་བྱུང་བས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་པའི་ཆོས་ཀྱི་གཏམ་གཟུང་ཞིང་བཀླག་པའི་རིགས་སོ། །དེ་ནས་སེར་སྐྱའི་གཞིའི་ཤཱཀྱ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ། རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་དོང་ངོ ། །དེའི་ཚེ་གྲོང་ཁྱེར་སེར་སྐྱའི་གཞི་ན་རྒྱལ་པོ་སེང་གེ་འགྲམ་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ། འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ། སྐྱེ་བོ་དང ། མི་མང་པོས་གང་བ། འཐབ་པ་དང ། འཐབ་མོ་དང ། རྩོད་པ་དང།་འགྱེད་པ་དང ། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ། འབྲས་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་ན་བུ་གཅིག་པ་ལ་སྡུག་པ་བཞིན་དུ་རྒྱལ་སྲིད་སྐྱོང་བར་བྱེད་དོ། །གྲོང་ཁྱེར་ལྷས་བསྟན་དུ་རྒྱལ་པོ་ལེགས་པར་རབ་སད་ཅེས་བྱ་བ་རྒྱལ་སྲིད་བྱེད་དུ་འཇུག་སྟེ། འབྱོར་པ་དང ། རྒྱས་པ་དང ། བདེ་བ་དང ། ལོ་
190b
ལེགས་པ་དང ། སྐྱེ་བོ་དང ། མི་མང་པོས་གང་བ། འཐབ་པ་དང ། འཐབ་མོ་དང ། རྩོད་པ་དང ། འགྱེད་པ་དང ། ཆོམ་རྐུན་མེད་ཅིང་ནད་རབ་ཏུ་ཞི་བར་བྱ་བར་གྱུར་པ། འབྲས་དང ། བུ་རམ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་ན། བུ་གཅིག་པ་ལག་པ་བཞིན་དུ་རྒྱལ་སྲིད་སྐྱོང་བར་བྱེད་དོ། །རྒྱལ་པོ་ལེགས་པར་རབ་སད་ཀྱི་བཙུན་མོ་དམ་པ་གཟུགས་བཟང་བ།་བལྟ་ན་སྡུག་པ། མཛེས་པ། ཡུལ་གྱི་བཟང་མོ་ལུམ་བི་ནཱི་ཞེས་བྱ་བ་ཡོད་དོ། །ལྷས་བསྟན་ན་ཁྱིམ་བདག་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཡོངས་སུ་བཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་པ་དེའི་ཀུན་དགའ་ར་བ་མེ་ཏོག་ཕུན་སུམ་ཚོགས་པ་དང ། འབྲས་བུ་ཕུན་སུམ་ཚོགས་པ་དང ། ཆུ་ཕུན་སུམ་ཚོགས་པ་དང ། བྱ་སྣ་ཚོགས་སྐད་འབྱིན་པས་དེའི་ཀུན་དགའ་ར་བ་དགའ་དགའ་ལྟར་འདུག་པ་དེར་རྒྱལ་པོ་དུས་དུས་སུ་བཙུན་མོའི་འཁོར་དང་ལྷན་ཅིག་ལྷགས་ནས། དེ་ན་དགའ་བའི་རྩེད་མོ་ཉམས་སུ་མྱོང་བར་བྱེད་དོ། །ལུམ་བི་ནཱི་ས་དེ་མཐོང་ནས་འདོད་པ་སྐྱེས་ཏེ། དེས་སྨྲས་པ། ལྷ།་ཀུན་དགའ་ར་བ་འདི་བདག་ལ་སྩལ་དུ་གསོལ། རྒྱལ་པོས་སྨྲས་པ།་ད་ཀུན་དགའ་ར་བ་འདི་ཁྱིམ་བདག་གི་ཡིན་ན་ཇི་ལྟར་སྦྱིན། གལ་ཏེ་ཁྱོད་ལ་ཀུན་དགའ་ར་བ་དགོས་ན་ཁྱོད་ཀྱི་ཕྱིར་དེ་བས་ལྷག་པར་བཟང་བ་གཞན་ཞིག་བྱའོ། །དེ་ནས་རྒྱལ་བོ་
191a
༄#། །ལེགས་པར་རབ་སད་ཀྱིས་ལུམ་བི་ནཱིའི་ཆེད་དུ་དེ་བས་ཁྱད་པར་དུ་འཕགས་པའི་ཀུན་དགའ་ར་བ་ཞིག་བྱེད་དུ་བཅུག་ནས། དེའི་མིང་ལུམ་བི་ནཱིའི་ཚལ་ཞེས་བྱ་བར་གྱུར་ཏོ། །རྒྱལ་པོ་སེང་གེ་འགྲམ་ལ་ཡུན་རིང་པོ་ནས་ཀྱེ་མའོ་བདག་གི་རྒྱུད་ལ་འཁོར་ལོས་སྒྱུར་བར་སྐྱེ་བར་གྱུར་ཀྱང་ཅི་མ་རུང་སྙམ་པའི་བསམ་པ་འདི་ཡོད་དོ། །རྒྱལ་པོ་ལེགས་པར་རབ་སད་ལ་ཡང་ཡུན་རིང་པོ་ནས། ཀྱེ་མའོ། བདག་ནི་སེང་གེ་འགྲམ་དང་ལྷན་ཅིག་གཉེན་དུ་གྱུར་ཀྱང་ཅི་མ་རུང་སྙམ་པའི་བསམ་པ་འདི་ཡོད་དོ། །ཇི་ཙམ་དུ་དུས་གཞན་ཞིག་ན་དེའི་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་ལས་དུས་གཞན་ཞིག་ན་བཙུན་མོ་སེམས་ཅན་དང་ལྡན་པར་གྱུར་ནས། དེ་ཟླ་བ་བརྒྱད་དམ། དགུ་འདས་པ་ན་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང ། ཉིད་ལག་ཐམས་ཅད་དང་ལྡན་པ་ཞིག་བཙས་སོ། །བཙས་པ་དེའི་གཟུགས་བཟང་པོས་རྒྱལ་པོ་ལེགས་པར་རབ་སད་བཙུན་མོའི་འཁོར་དང་བཅས་པ་དང་ལྷས་བསྟན་ན་གནས་པའི་སྐྱེ་བོའི་ཚོགས་རྣམས་མཆོག་ཏུ་ངོ་མཚར་སྐྱེས་ཏེ། ཐེ་ཚོམ་དུ་གྱུར་ནས་ཅི་འདི་བུ་མོ་ཡིན་ནམ།་འོན་ཏེ་ལས་སྣ་ཚོགས་པས་སྤྲུལ་པའི་སྒྱུ་འཕྲུལ་ཡིན་སྙམ་མོ། །དེའི་བཙས་པའི་བཙས་སྟོན་ཉི་མ་བདུན་གསུམ་ཉི་ཤུ་གཅིག་ཏུ་རྒྱ་ཆེར་བྱས་ནས་བུ་མོ་འདིའི་མིང་
191b
ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷས་བསྟན་ན་གནས་པའི་སྐྱེ་བོའི་ཚོགས་ལམ་པོ་ཆེ་དང ། ཚོང་འདུས་དང ། སུམ་མདོ་དང ། བཞི་མདོ་རྣམས་སུ་གླེང་བ་ཁ་ཅིག་གི་མཆིད་ནས་ནི་འདི་བུ་མོ་ཁོ་ན་ལེགས་ཏེ། སྔོན་གྱི་ལས་ཀྱི་རྣམ་པར་སྨིན་པས་གཟུགས་བཟང་ཞིང་ཁ་དོག་ཕུན་སུམ་ཚོགས་པར་གྱུར་ཏོ་ཞེས་མཆིའོ། །གཞན་དག་གི་མཆིད་ནས་ནི་འདི་བུ་མོ་མ་ལགས་ཀྱི་འོ་ན་ཅི་ཞེ་ན། ལས་སྣ་ཚོགས་པས་སྤྲུལ་པའི་སྒྱུ་འཕྲུལ་ལགས་སོ་ཞེས་མཆི་ལགས་པས། དེ་བས་ན་བུ་མོའི་མིང་སྒྱུ་འཕྲུལ་ཞེས་བགྱི་བར་གདགས་སོ་ཞེས་བཏགས་སོ། །བུ་མོ་སྒྱུ་འཕྲུལ་མ་མ་བརྒྱད་ལ་རྗེས་སུ་གཏད་དེ་ཞེས་བྱ་བ་དེས་ཆེན་མོར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་ལ་མཚན་མཁན་རྣམས་ཀྱིས་ལུང་བསྟན་པ། མཚན་ཕུན་སུམ་ཚོགས་པ་དུ་མ་དང་ལྡན་པ་ཞིག་བཙའ་བར་འགྱུར་ཞིང་སྟོབས་ཀྱིས་འཁོར་ལོས་བསྒྱུར་བར་འགྱུར་རོ་ཞེས་བསྟན་ཏོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བཙས་སོ། །དེ་བཙས་པ་ན་གྲོང་ཁྱེར་དེ་དག་ཐམས་ཅད་སྣང་བ་རྒྱ་ཆེན་པོས་སྣང་བར་བྱས་ཏེ། སྒྱུ་འཕྲུལ་ལ་ཇི་ལྟ་བ་བཞིན་དུ་དེའི་གཟུགས་བཟང་པ་རྣམ་པ་ཐམས་ཅད་དུ་དཔྱད་པར་མི་ནུས་སོ། །དེའི་བཙས་པའི་
192a
༄#། །བཙས་སྟོན་ཡང་རྒྱ་ཆེར་བྱས་ནས། བུ་མོ་འདིའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། སྒྱུ་འཕྲུལ་བས་འདི་ལྷག་པར་གཟུགས་བཟང་བས། སྒྱུ་འཕྲུལ་ཆེན་མོ་ཞེས་བགྱི་བར་གདགས་སོ་ཞེས་བཏགས་སོ། །དེའང་སྐྱེད་བསྲིངས་ནས་ཆེན་མོར་གྱུར་པ་དང ། དེ་ལ་མཚན་མཁན་རྣམས་ཀྱིས་ལུང་བསྟན་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་བཙའ་བར་འགྱུར་ཏེ། དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །རྒྱལ་པོ་ལེགས་པར་རབ་སད་ཀྱིས་རྒྱལ་པོ་སེང་གེ་འགྲམ་ལ་ཕོ་ཉ་བཏང་སྟེ། བདག་ལ་བུ་མོ་གཉིས་ཤིག་བཙས་པ་ནི་སྒྱུ་འཕྲུལ་དང ། སྒྱུ་འཕྲུལ་ཆེན་མོ་ལགས་ཏེ། དེ་ལ་གཅིག་ལ་ནི་མཚན་ཐམས་ཅད་ཕུན་སུམ་ཚོགས་པའི་བུ་ཞིག་བཙའ་བར་འགྱུར་ཏེ། དེ་ནི་སྟོབས་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །གཅིག་ཤོས་ལ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པའི་བུ་ཞིག་བཙའ་བར་འགྱུར་ཞིང ། དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་གྱི། འདི་གཉིས་ལས་གང་བཞེད་པ་གཞོན་ནུ་ཟས་གཙང་གི་ཆུང་མར་སྣོམས་ཤིག་།སེང་གེ་འགྲམ་གྱིས་སླར་སྦྲིང་པ། གཉིས་ཀའང་གཞོན་ནུ་ལ་དགོས་མོད་ཀྱི། འོན་ཀྱང་ཆུང་མ་འདྲ་བ་གཉིས་གཅིག་ལ་
192b
གཞག་པར་མི་བྱ་བས། གང་ལ་སྐྱེས་བུ་ཆེན་པོས་མཚན་སུམ་ཅུ་རྩ་གཉིས་ཀྱིས་བརྒྱན་པའི་བུ་བཙའ་བར་འགྱུར་ཞིང ། དེའང་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་པ་དེ་རེ་ཞིག་འདོད་དོ། །གཅིག་ཤོས་ཀྱང་ཚོགས་ལ་བཏབ་པར་བྱའོ། །དེས་དེ་འཁོར་ལྔ་བརྒྱ་དང་བཀྲིའོ། །དེའི་ཚེ་ཤཱཀྱ་རྣམས་ཀྱི་ཕྱིར་རྒོལ་བ་སྐྱ་བསེང་ཞེས་བྱ་བའི་རི་ཁྲོད་པ་ཞིག་ཡོད་ནས་ཤཱཀྱ་རྣམས་འདུས་ཏེ། རྒྱལ་པོ་སེང་གེ་འགྲམ་གྱི་དྲུང་དུ་སོང་ནས། ལྷ།་སྐྱ་བསེང་རི་ཁྲོད་པ་བདག་ཅག་ལ་གནོད་པ་བགྱིད་ཀྱི་གྲོགས་མཛད་དུ་གསོལ། དེས་སྨྲས་པ། ཤེས་ལྡན་དག་།ཁོ་བོ་རྒས་པས་དེ་རྣམས་དང་ལྷན་ཅིག་གཡུལ་སྤྲད་པར་མི་ནུས་སོ། །ལྷ།་གཞོན་ནུ་ཟས་གཙང་གཏང་དུ་གསོལ། དམ་ཞིག་བཅའ་སྟེ། གལ་ཏེ་གཞོན་ནུ་ཇི་ལྟ་བུ་འདོད་པའི་དམ་པ་གཅིག་བསླངས་པའི་དམ་པ་དེ་སྦྱིན་པ་བལྟ་ན་གཏང་ངོ ། །དེ་རྣམས་ཀྱིས་སྨྲས་པ། ལྷ།་བཀའ་བཞིན་འཚལ། སུལ་བར་བགྱིའོ། །རྒྱལ་པོས་དཔུང་གི་ཚོགས་ཡན་ལག་བཞི་པ་གཞོན་ནུ་ཟས་གཙང་ལ་བསྔོ་ནས་དེས་རི་ཁྲོད་པ་དེ་རྣམས་བཅོམ། རབ་ཏུ་བཅོམ་སྟེ་རྨེག་བཏང་ངོ ། །དེ་ནས་ཤཱཀྱ་རྣམས་མགུ་ནས་རྒྱལ་པོ་སེང་གེ་འགྲམ་གྱི་དྲུང་དུ་དོང་སྟེ། ལྷ། གཞོན་ནུས་རི་ཁྲོད་པ་རྣམས་བཅོམ་རབ་ཏུ་བཅོམ་སྟེ་རྨེག་བཏང་ལགས་པས་བདག་ཅག་གློ་བ་དགའ་ན། གཞོན་ནུ་མཆོག་ཅི་བཞེད་གསུངས་ཤིག་།དབུལ་ལོ། །ཤེས་ལྡན་དག་།ཤཱཀྱ་རྣམས་
193a
༄#། །ཀྱི་ཁྲིམས་སུ་བཅས་པ་སུས་ཀྱང་མཉམ་པ་ལས་ཆུན་མ་གཞག་པར་མི་བྱའོ་ཞེས་བཅས་སོ། །ལྷ།་ཅི་ཁྲིམས་འདྲལ་ལམ། དེས་སྨྲས་པ། ལྷག་པར་ཤིན་ཏུ་བསྡམ་གྱི་དྲལ་བར་མི་བྱ་ན། འོན་ཀྱང་གཞོན་ནུའི་དམ་པ་གཅིག་སློང་བ་ནི་མཉམ་པ་ལས་ཆུན་མ་བླང་བ་ཡིན་ནོ། །ལྷ་རུང་གི་དེ་བཞིན་དུ་མཛོད་ཅིག་།དེ་ནས་སེང་གེ་འགྲམ་གྱིས་ལེགས་པར་རབ་སད་ལ་ཕོ་ཉ་བཏང་ནས། ཁོ་བོས་ཚོགས་བརྟགས་ཟིན་གྱིས་བུ་མོ་གཅིག་ཤོས་ཀྱང་བཀྲི་ཞིག་།དེས་དེའང་འཁོར་ལྔ་བརྒྱ་དང་བཀྲི་སྟེ། གཞོན་ནུ་ཟས་གཙང་གིས་གཉིས་ཀ་བླངས་སོ། །ཇི་ཙམ་དུས་གཞན་ཞིག་ན་རྒྱལ་པོ་སེང་གེ་འགྲམ་ཤི་ནས། སེར་སྐྱའི་གཞི་ན་རྒྱལ་པོ་ཟས་གཙང་རྒྱལ་སྲིད་བྱེད་དུ་བཅུག་སྟེ། འབྱོར་པ་དང ། རྒྱས་པ་དང།་བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་བོས་གང་བ། འཐབ་པ་དང ། འཐབ་མོ་དང ། རྩོད་པ་དང ། འགྱེད་པ་དང ། ཆོམ་རྐུན་མེད་ཅིང ། ནད་རབ་ཏུ་ཞི་བར་གྱུར་པ། འབྲས་དང ། བུར་མ་ཤིང་གི་ཕྲེང་བ་དང ། བ་ལང་དང ། མ་ཧེ་ཕུན་སུམ་ཚོགས་པ་ན། བུ་གཅིག་པ་ལ་སྡུག་པ་བཞིན་དུ་རྒྱལ་སྲིད་སྐྱོང་བར་བྱེད་དོ། །དེ་དུས་གཞན་ཞིག་ན་བཙུན་མོ་སྒྱུ་འཕྲུལ་ཆེན་པོ་དང་ལྷན་ཅིག་སྟེང་གི་ཁང་བཟང་གི་གཞི་སྐྱེས་པ་མེད་པར་དོང་ནས། རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །
193b
འདི་ནི་ཆོས་ཉིད་ཡིན་ཏེ། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུག་པར་ན་འཇིག་རྟེན་ལ་གཟིགས་པ་ལྔས་གཟིགས་པར་མཛད་དོ། །རིགས་ལ་གཟིགས་པ་དང ། ཡུལ་ལ་གཟིགས་པ་དང ། དུས་ལ་གཟིགས་པ་དང ། རྒྱུད་ལ་གཟིགས་པ་དང ། བུད་མེད་ལ་གཟིགས་པ་སྟེ། རྒྱ་ཆེར་མདོ་སྔ་མ་དང་སྦྱར་རོ། །མངོན་པར་འབྱུང་བའི་མདོ་རྫོགས་སོ།། །། རྒྱ་གར་གྱི་མཁན་པོ་ཨཱ་ཙརྱ་དྷརྨ་ཤྲཱི་བྷ་དྲ་དང ། ཞུས་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།