rKTs


H294

(e-text produced by ACIP)

see text in transliteration
482a
རྒྱ་གར་སྐད་དུ། མ་ཧཱ་ཤཱུ་ནྱ་ཏཱ་ནཱ་མ་མ་ཧཱ་སཱུ་ཏར། བོད་སྐད་དུ། མདོ་ཆེན་པོ་སྟོང་པ་ཉིད་ཆེན་པོ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་སེར་སྐྱའི་གནས་ན་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས་བསོད་སྙོམས་ཀྱི་ཕྱིར་སེར་སྐྱའི་གནས་སུ་ཞུགས་སོ། །སེར་སྐྱའི་གནས་ནས་བསོད་སྙོམས་བཞེས་ཏེ་ཞལ་ཟས་ཀྱི་བྱ་བ་མཛད་ཅིང ། ཟས་ཕྱིས་ལེན་པའི་ཞལ་ཟས་སྤངས་ནས་ལྷུང་བཟེད་དང་ཆོས་གོས་བཞག་སྟེ་ཞབས་བསིལ་ནས་
482b
ཤཱཀྱ་དུས་བདེའི་གཙུག་ལག་ཁང་ག་ལ་བ་དེར་གཤེགས་སོ། །དེའི་ཚེ་ན་དགེ་སློང་རབ་ཏུ་མང་པོ་དག་གིས་ཤཱཀྱ་དུས་བདེའི་གཙུག་ལག་ཁང་དུ་བླ་གབ་མེད་པར་སྟན་རབ་ཏུ་མང་པོ་དག་བཏིང་སྟེ་དོང་ངོ ། །དེ་ནས་བཅོམ་ལྡན་འདས་གཙུག་ལག་ཁང་གི་ཕྱི་རོལ་ཏུ་ཞབས་བསིལ་ནས་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་བཞུགས་སོ། །དེ་ནས་བཅོམ་ལྡན་འདས་ཕྱེ་མ་རེད་ནང་དུ་ཡང་དག་འཇོག་ལས་བཞེངས་ནས་ཤཱཀྱ་ལྟག་པའི་རིའི་གཙུག་ལག་ཁང་ག་ལ་བ་དེར་གཤེགས་སོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་དགེ་སློང་རབ་ཏུ་མང་པོ་དག་དང་ལྷན་ཅིག་ཏུ་ཤཱཀྱ་ལྟག་པའི་རིའི་གཟུག་ལག་ཁང་དུ་འདི་ལྟ་སྟེ། ཆོས་གོས་ཀྱི་ལས་ལ་འདུས་ཏེ་འདུག་པར་གྱུར་ཏོ། །ཚེ་དང་ལྡན་པ་ཀུན་དགའ་བོས་རྒྱད་རིང་པོ་ནས་བཅོམ་ལྡན་འདས་མཐོང་ངོ ། །མཐོང་ནས་ཀྱང་སྟན་ལས་ལངས་ཏེ་བཅོམ་ལྡན་འདས་ཀྱི་གདན་བཤམས་ནས་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། ཚུར་གཤེགས་སུ་གསོལ། བཅོམ་ལྡན་འདས། ལེགས་པར་གཤེགས་ལགས་སོ། །བཅོམ་ལྡན་འདས་གདན་བཤམས་པ་འདི་ལ་བཞུགས་སུ་གསོལ། བཅོམ་ལྡན་འདས་གདན་ལ་བཞུགས་ནས་ཚེ་དང་ལྡན་པ་ཀུན་དགའ་པོ་ལ་བཀའ་སྩལ་པ། ཀུན་དགའ་བོ། དགེ་སློང་རབ་ཏུ་མང་པོ་དག་གིས་ཤཱཀྱ་དུས་བདེའི་གཙུག་ལག་ཁང་དུ་བླ་གབ་མེད་པར་སྟན་རབ་ཏུ་
483a
༄#། །མང་པོ་དག་བཏིང་སྟེ་དོང་ངོ ། །གསོལ་པ། བཅོམ་ལྡན་འདས། ཆོས་གོས་སྩལ་བའི་དུས་ལགས་སོ། །བདེ་བར་གཤེགས་པ། ཆོས་གོས་སྩལ་བའི་དུས་ལགས་སོ། །བཀའ་སྩལ་པ། ཀུན་དགའ་བོ། དགེ་སློང་བྲེ་མོ་གཏམ་ལ་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་དང ། ཚོགས་ལ་དགའ་བ་དང ། ཚོགས་ལ་ཀུན་ཏུ་དགའ་བ་དང ། ཚོགས་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་ལ་གནས་པ་ནི། མི་མཛེས་ཏེ། ཀུན་དགའ་བོ། དགེ་སློང་བྲེ་མོ་གཏམ་ལ་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་དང ། ཚོགས་ལ་དགའ་བ་དང ། ཚོགས་ལ་ཀུན་ཏུ་དགའ་བ་དང ། ཚོགས་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་ལ་གནས་ཤིང ། ཚོགས་ལས་གཅིག་པུ་ལོགས་ཤིག་ན་མི་གནས་པ་དེས་ནི། རེ་ཞིག་འཕགས་པའི་བདེ་བ་དང ། ངེས་པར་འབྱུང་བའི་བདེ་བ་དང ། རབ་ཏུ་དབེན་པའི་བདེ་བ་དང ། ཉེ་བར་ཞི་བའི་བདེ་བ་དང ། རྫོགས་པར་བྱང་ཆུབ་པའི་བདེ་བ་དང ། དེ་ལྟ་བུའི་བདེ་བ་གང་ཡིན་པ་དེ་དག་ཅི་འདོད་པ་བཞིན་འཐོབ་པ་དང ། དཀའ་བ་མེད་པར་འཐོབ་པར་འགྱུར་བ་དེ་ནི། གནས་མེད་དོ། །ཀུན་དགའ་བོ། དགེ་སློང་
483b
བྲེ་མོ་གཏམ་ལ་མི་དགའ་བ་དང ། བྲེ་མོ་གཏམ་ལ་ཀུན་ཏུ་མི་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་མི་སྦྱོར་བ་དང ། ཚོགས་ལ་མི་དགའ་བ་དང ། ཚོགས་ལ་ཀུན་ཏུ་མི་དགའ་བ་དང ། ཚོགས་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་མི་སྦྱོར་བ་ལ་གནས་ཤིང ། ཚོགས་ལས་གཅིག་པུ་ལོགས་ཤིག་ན་གནས་པ་དེས་ནི། རེ་ཞིག་འཕགས་པའི་བདེ་བ་དང ། ངེས་པར་འབྱུང་བའི་བདེ་བ་དང ། རབ་ཏུ་དབེན་པའི་བདེ་བ་དང ། ཉེ་བར་ཞི་བའི་བདེ་བ་དང ། རྫོགས་པར་བྱང་ཆུབ་པའི་བདེ་བ་དང ། དེ་ལྟ་བུའི་བདེ་བ་གང་ཡིན་པ་དེ་དག་ཅི་འདོད་པ་བཞིན་འཐོབ་པ་དང ། དཀའ་བ་མེད་པར་ཐོབ་པར་འགྱུར་བ་དེ་ནི། གནས་ཡོད་དོ། །ཀུན་དགའ་བོ། དགེ་སློང་བྲེ་མོ་གཏམ་ལ་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་དང ། ཚོགས་ལ་དགའ་བ་དང ། ཚོགས་ལ་ཀུན་ཏུ་དགའ་བ་དང ། ཚོགས་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་ལ་གནས་ཤིང ། ཚོགས་ལས་གཅིག་པུ་ལོགས་ཤིག་ན་མི་གནས་པ་དེས་ནི། རེ་ཞིག་དུས་དང་སྦྱོར་ཞིང་སྲུང་བའི་སེམས་རྣམ་པར་གྲོལ་བའམ། དུས་དང་མི་སྦྱོར་ཞིང་མི་ཉམས་པ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་འགྱུར་བ་དེ་ནི། གནས་མེད་དོ། །ཀུན་དགའ་བོ།
484a
༄#། །དགེ་སློང་བྲེ་མོ་གཏམ་ལ་མི་དགའ་བ་དང ། བྲེ་མོ་གཏམ་ལ་ཀུན་ཏུ་མི་དགའ་བ་དང ། བྲེ་མོ་གཏམ་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་མི་སྦྱོར་བ་དང ། ཚོགས་ལ་མི་དགའ་བ་དང ། ཚོགས་ལ་ཀུན་ཏུ་མི་དགའ་བ་དང ། ཚོགས་ལ་ཀུན་ཏུ་དགའ་བ་ཉིད་ལ་བརྩོན་པའི་རྗེས་སུ་མི་སྦྱོར་བ་ལ་གནས་ཤིང ། ཚོགས་ལས་གཅིག་པུ་ལོགས་ཤིག་ན་གནས་པ་དེས་ནི། རེ་ཞིག་དུས་དང་སྦྱོར་ཞིང་སེམས་རྣམ་པར་གྲོལ་བའམ། དུས་དང་མི་སྦྱོར་ཞིང་མི་ཉམས་པ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་འགྱུར་བ་དེ་ནི། གནས་ཡོད་དོ། །ཀུན་དགའ་བོ། ངས་གང་ལ་ཀུན་ཏུ་དགའ་བ་དང ། མངོན་པར་དགའ་བའི་གཟུགས་དེའི་རྣམ་པར་འགྱུར་བ་དང་གཞན་དུ་འགྱུར་བ་ལས་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་འབྱུང་བར་མི་འགྱུར་བའི་གཟུགས་ནི། གཅིག་ཀྱང་ཡང་དག་པར་རྗེས་སུ་མ་མཐོང་ངོ ། །ཀུན་དགའ་བོ། དེ་ལྟ་བས་ན། ངའི་གནས་པ་ནི། འདི་ལྟ་སྟེ། རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ནས་ཕྱི་སྟོང་པ་ཉིད་སྐུས་མངོན་སུམ་དུ་མཛད་ནས་བསྒྲུབས་ཏེ་བཞུགས་པ་འདིའང་རྗེས་སུ་རྟོགས་ཤིང་རབ་ཏུ་རྟོགས་སོ། །ང་གནས་པ་འདིས་གནས་པ་ན་མཆོག་ཏུ་དགའ་བ་སྐྱེས་ཏེ།
484b
ང་མཆོག་ཏུ་དགའ་བ་དེས་ལུས་ཀྱི་ཐམས་ཅད་ཡང་དག་པར་མྱོང་ཞིང་དྲན་པ་དང་ཤེས་བཞིན་གྱིས་ལན་མང་དུ་གནས་སོ། །ང་གནས་པ་འདིས་གནས་པ་ན་དགའ་བ་དང ། ཤིན་ཏུ་སྦྱངས་པ་དང ། བདེ་བ་དང ། ཏིང་ངེ་འཛིན་སྐྱེས་ཏེ། ང་ཏིང་ངེ་འཛིན་དེས་ལུས་ཀྱི་ཐམས་ཅད་ཡང་དག་པར་མྱོང་ཞིང་དྲན་པ་དང་ཤེས་བཞིན་གྱིས་ལན་མང་དུ་གནས་སོ། །ང་གནས་པ་འདིས་གནས་པ་ན་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དག་ཉེ་བར་ལྷག་པར་གྱུར་ནས་ང་དེ་ལ་གཞོལ་བ་དང ། དེ་ལ་འབབ་བ་དང ། དེ་ལ་བབ་པའི་སེམས་ཀྱིས་དེ་དག་ལ་འདི་ལྟ་སྟེ། བརྩོན་འགྲུས་སུ་དག་པར་བྱ་བའི་ཕྱིར་ཕན་ཚུན་ཀུན་དགའ་བར་གཏམ་འདྲེ་བར་སྨྲ། ཕེབས་པར་སྨྲ་ཞིང་ཆོས་ཀྱི་གཏམ་ཡང་ཟེར་རོ། །ཀུན་དགའ་བོ། །དེ་ལྟ་བས་ན། དགེ་སློང་ཡང་ཀྱེ་མ་བདག་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་བོ། དགེ་སློང་དེས་སེམས་ནང་ཁོ་ནར་གཞག་པར་བྱ། ཡང་དག་པར་གཞག་པར་བྱ། བསྡུས་ཏེ་གཞག་པར་བྱ། ཉེ་བར་གཞག་པར་བྱ། དུལ་བར་བྱ། ཞི་བར་བྱ། ཉེ་བར་ཞི་བར་བྱ། རྒྱུད་གཅིག་ཏུ་བྱ་ཞིང་ཏིང་ངེ་འཛིན་དུ་བྱའོ། །ཀུན་དགའ་བོ། དགེ་སློང་གང་དག་འདི་སྐད་བདག་གིས་སེམས་ནང་ཁོ་ནར་མ་བཞག་།ཡང་དག་པར་མ་བཞག་།བསྡུས་ཏེ་མ་བཞག་།ཉེ་བར་མ་བཞག །
485a
༄#། །དུལ་བར་མ་བྱས། ཞི་བར་མ་བྱས། ཉེ་བར་མ་བྱས། ཉེ་བར་ཞི་བར་མ་བྱས། རྒྱུད་གཅིག་ཏུ་མ་བྱས་ཤིང ། ཏིང་ངེ་འཛིན་དུ་མ་བྱས་པར་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་བྱས་སོ། །ཞེས་ཟེར་ན། ཀུན་དགའ་བོ། དེ་ནི། རྣམ་པར་འཁྲུལ་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། དེ་ནི། གནས་མ་ཡིན་ཞིང་སྐབས་མ་ཡིན་ཏེ། གང་སེམས་ནང་ཁོ་ནར་མ་བཞག་།ཡང་དག་པར་མ་བཞག་།བསྡུས་ཏེ་མ་བཞག་།ཉེ་བར་མ་བཞག་།དུལ་བར་མ་བྱས། ཞི་བར་མ་བྱས། ཉེ་བར་ཞི་བར་མ་བྱས། རྒྱུད་གཅིག་ཏུ་མ་བྱས་ཤིང ། ཏིང་ངེ་འཛིན་དུ་མ་བྱས་པར་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་འགྱུར་བ་དེ་ནི། གནས་མེད་པའི་ཕྱིར་རོ། །ཀུན་དགའ་བོ། དགེ་སློང་གང་འདི་སྐད་ཅེས་བདག་གིས་སེམས་ནང་ཁོ་ནར་བཞག་།ཡང་དག་པར་བཞག་།བསྡུས་ཏེ་བཞག་།ཉེ་བར་བཞག་།དུལ་བར་བྱས། ཞི་བར་བྱས། ཉེ་བར་ཞི་བར་བྱས། རྒྱུད་གཅིག་ཏུ་བྱས་ཤིང་ཏིང་ངེ་འཛིན་དུ་བྱས་ཏེ་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་བྱའོ། །ཞེས་ཟེར་ན། ཀུན་དགའ་བོ། དེའི་ཚིག་ནི། ལེགས་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། དེ་ནི། གནས་ཡིན་ཞིང་སྐབས་ཡིན་ཏེ། གང་སེམས་ནང་ཁོ་
485b
ནར་བཞག་།ཡང་དག་པར་བཞག་།བསྡུས་ཏེ་བཞག་།ཉེ་བར་བཞག་།དུལ་བར་བྱས། ཞི་བར་བྱས། ཉེ་བར་ཞི་བར་བྱས། རྒྱུད་གཅིག་ཏུ་བྱས་ཤིང ། ཏིང་ངེ་འཛིན་དུ་བྱས་ཏེ། ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་འགྱུར་བ་དེ་ནི། གནས་ཡོད་པའི་ཕྱིར་རོ། །ཀུན་དགའ་བོ། ཇི་ལྟར་ན་དགེ་སློང་སེམས་ནང་ཁོ་ནར་འཇོག་པར་བྱེད། ཡང་དག་པར་འཇོག་པར་བྱེད། བསྡུས་ཏེ་འཇོག་པར་བྱེད། ཉེ་བར་འཇོག་པར་བྱེད། དུལ་པར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུད་གཅིག་ཏུ་བྱེད་ཅིང ། ཏིང་ངེ་འཛིན་དུ་བྱེད་ཅེ་ན། འདི་ལ་དགེ་སློང་དབེན་པ་ལས་སྐྱེས་པའི་དགའ་བ་དང་བདེ་བས་ལུས་དེ་ཉིད་མངོན་པར་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད་ཅིང ། ཡོངས་སུ་ཁྱབ་པར་བྱེད་དེ།་དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་ཁྱབ་པར་མ་གྱུར་པ་དང ། ཁྱབ་པར་མ་བྱས་པ་ཅུང་ཟད་ཀྱང་མེད་དོ། །འདི་ལྟ་སྟེ། དཔེར་ན་ཁྲུས་མཁན་ནམ། ཁྲུས་མཁན་གྱི་སློབ་མ་མཁས་པ་ཞིག་གིས་ཁྲུས་ཆལ་ཞིབ་མོ་དག་ཁམ་ཕོར་རམ། གཞོང་བུའམ། ཉ་ཕྱིས་སུ་བླུགས་ཏེ་ཆས་བཏབ་ཅིང་མཉེས་ན། དེ་ཁྲུས་ཆལ་གྱི་རིལ་ལུ་རླན་པ་རླན་དང་ལྡན་པ། རླན་གྱིས་ཀུན་ཏུ་གང་བ། ཕྱི་ནང་བཅས་པར་རླན་གྱིས་ཁྱབ་པར་འགྱུར་ཞིང ། ཕྱིར་ཡང་མི་འཇིག་ལ་ཟག་པར་ཡང་མི་འགྱུར་རོ། །དེ་བཞིན་
486a
༄#། །དུ་དགེ་སློང་ཡང་དབེན་པ་ལས་སྐྱེས་པའི་དགའ་བ་དང་བདེ་བས་ལུས་དེ་ཉིད་མངོན་པར་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད་ཅིང ། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་ཁྱབ་པར་མི་གྱུར་པ་དང ། ཁྱབ་པར་མ་བྱས་པ་ཅུང་ཟད་ཀྱང་མེད་དོ། །ཀུན་དགའ་བོ། དེ་ལྟར་ན་དགེ་སློང་སེམས་ནང་ཁོ་ནར་འཇོག་པར་བྱེད། ཡང་དག་པར་འཇོག་པར་བྱེད། བསྡུས་ཏེ་འཇོག་པར་བྱེད། ཉེ་བར་འཇོག་པར་བྱེད། དུལ་བར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུད་གཅིག་ཏུ་བྱེད་ཅིང ། ཏིང་ངེ་འཛིན་དུ་བྱེད་པ་ཡིན་ཏེ། ཀུན་དགའ་བོ། དགེ་སློང་དེས་ནི། སེམས་ནང་ཁོ་ནར་བཞག་།ཡང་དག་པར་བཞག་།བསྡུས་ཏེ་བཞག་།ཉེ་བར་བཞག་།དུལ་བར་བྱས། ཞི་བར་བྱས། ཉེ་བར་ཞི་བར་བྱས། རྒྱུད་གཅིག་ཏུ་བྱས་ཤིང ། ཏིང་ངེ་འཛིན་དུ་བྱས་ཏེ། ཕྱི་སྟོང་པ་ཉིད་ཡིད་ལ་བྱའོ།། ཀུན་དགའ་བོ། དགེ་སློང་དེ་ཕྱི་སྟོང་པ་ཉིད་ཡིད་ལ་བྱེད་པས་སེམས་རྣམ་པར་གཡོ་བར་འགྱུར་ཞིང ། འདི་ལྟ་སྟེ། ཕྱི་སྟོང་པ་ཉིད་ལ་དེའི་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ཕྱི་སྟོང་པ་ཉིད་ཡིད་ལ་བྱེད་པ་ན་སེམས་
486b
རྣམ་པར་གཡོ་བར་འགྱུར་ཞིང ། འདི་ལྟ་སྟེ། ཕྱི་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་གྱུར་ན།་ཀུན་དགའ་བོ། དགེ་སློང་དེས་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ། དགེ་སློང་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང ། འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་ལ། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང ། འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་གྱུར་ན། ཀུན་དགའ་བོ། དགེ་སློང་དེས་ཕྱི་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ། དགེ་སློང་དེ་ཕྱི་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང ། འདི་ལྟ་སྟེ། ཕྱི་ནང་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་ལ། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ཕྱི་ནང་སྟོང་པ་ཉིད་ཡིད་ལ་བྱེད་ན་ཡང་སེམས་རྣམ་པར་གཡོ་བར་འགྱུར་ཞིང ། འདི་ལྟ་
487a
༄#། །སྟེ།་ཕྱི་ནང་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་གྱུར་ན། ཀུན་དགའ་བོ། དགེ་སློང་དེས་མི་གཡོ་བ་ཡིད་ལ་བྱའོ། །ཀུན་དགའ་བོ། དགེ་སློང་དེ་མི་གཡོ་བ་ཡིད་ལ་བྱེད་ན་ཡང་སེམས་རྣམ་པར་གཡོ་བར་འགྱུར་ཞིང ། འདི་ལྟ་སྟེ། མི་གཡོ་བ་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་ལ། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་མི་གཡོ་བ་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང ། འདི་ལྟ་སྟེ། མི་གཡོ་བ་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་གྱུར་ན། ཀུན་དགའ་བོ། དགེ་སློང་དེས་སེམས་དེ་ཏིང་ངེ་འཛིན་དེ་དང་དེ་དག་ལ་གཞོལ་བར་བྱ། དུལ་བར་བྱ། ཞི་བར་བྱ། ལས་སུ་བྱ། བསྲོ་བར་བྱ། ཡང་དག་པར་བསྲོ་བར་བྱ། ཡོངས་སུ་བསྲོ་བར་བྱ། དྲང་པོར་བྱ་ཞིང་ལས་སུ་རུང་བ་དང ། གནམ་པ་དང ། བཅོས་སུ་རུང་བ་དང ། བཏུབ་པར་བྱའོ། །ཀུན་དགའ་བོ།་དགེ་སློང་དེས་སེམས་དེ་ཏིང་ངེ་འཛིན་དེ་དང་དེ་དག་ལ་གཞོལ་བར་བྱས། དུལ་བར་བྱས། ཞི་བར་བྱས། ལས་སུ་བྱས། བསྲོ་བར་བྱས། ཡང་དག་པར་བསྲོ་བར་བྱས།
487b
ཡོངས་སུ་བསྲོ་བར་བྱས། དྲང་པོར་བྱས་ཤིང ། ལས་སུ་རུང་བ་དང ། གནམ་པ་དང ། བཅོས་སུ་རུང་བ་དང ། བཏུབ་པར་བྱས་ཏེ། ཕྱི་སྟོང་པ་ཉིད་ཡིད་ལ་བྱའོ། ཀུན་དགའ་བོ། །དགེ་སློང་དེ་ཕྱི་སྟོང་པ་ཉིད་ཡིད་ལ་བྱེད་པ་ན་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། ཕྱི་སྟོང་པ་ཉིད་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་ལ།་ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ཕྱི་སྟོང་པ་ཉིད་ཡིད་ལ་བྱེད་པ་ན་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། ཕྱི་སྟོང་པ་ཉིད་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་པར་ཤེས་ན། ཀུན་དགའ་བོ། དགེ་སློང་དེས་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ། དགེ་སློང་དེ་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་ལ། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ན། འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་པར་ཤེས་ན། ཀུན་དགའ་བོ། དགེ་སློང་དེས་ཕྱི་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ། དགེ་སློང་དེ་ཕྱི་
488a
༄#། །ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། ཕྱི་ནང་སྟོང་པ་ཉིད་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་ལ། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ཕྱི་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། ཕྱི་ནང་སྟོང་པ་ཉིད་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་པར་ཤེས་ན། ཀུན་དགའ་བོ། དགེ་སློང་དེས་མི་གཡོ་བ་ཡིད་ལ་བྱའོ། །ཀུན་དགའ་བོ། དགེ་སློང་དེ་མི་གཡོ་བ་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། མི་གཡོ་བ་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་ལ། ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་མི་གཡོ་བ་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང ། འདི་ལྟ་སྟེ། མི་གཡོ་བ་ལ་སེམས་འཇུག་པ་དང ། དང་བ་དང ། གནས་པ་དང ། མོས་པར་གྱུར་པར་ཤེས་ན། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ།། ཀུན་དགའ་བོ། དགེ་སློང་དེ་གནས་པ་འདིས་གནས་པ་ན། གལ་ཏེ་འཆག་པ་ལ་སེམས་འཇུག་པར་གྱུར་ན། ཀུན་དགའ་བོ། དགེ་སློང་དེས་གཙུག་ལག་ཁང་གི་ཕྱི་རོལ་བླ་
488b
གབ་མེད་པའི་འཆག་སར་དབང་པོ་རྣམས་ནང་དུ་བསྡུས་ཤིང་ཡིད་ཕྱི་རོལ་ཏུ་མ་སོང་བར་སྔ་ཕྱིའི་འདུ་ཤེས་ཀྱིས་བཅག་པར་བྱའོ། །དེ་དེ་ལྟར་འཆག་པ་ན་འཇིག་རྟེན་ལ་བརྣབ་སེམས་དང ། ཡིད་མི་བདེ་བ་དང ། སྡིག་པ་མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང ། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ། དགེ་སློང་དེ་གནས་པ་འདིས་གནས་པ་ན། གལ་ཏེ་འདུས་པ་ལ་སེམས་འཇུག་པར་གྱུར་ན། ཀུན་དགའ་བོ། དགེ་སློང་དེས་གཙུག་ལག་ཁང་གི་ཕྱི་རོལ་ཏུ་རྐང་པ་བཀྲུས་ཏེ་གཙུག་ལག་ཁང་གི་ནང་དུ་ཞུགས་ལ་སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲང་ལ་དྲན་པ་མངོན་དུ་བཞག་སྟེ་འདུག་པར་བྱའོ། །དེ་དེ་ལྟར་འདུག་པ་ན་འཇིག་རྟེན་ལ་བརྣབ་སེམས་དང ། ཡིད་མི་བདེ་བ་དང ། སྡིག་པ་མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང ། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ། དགེ་སློང་དེ་གནས་པ་འདིས་གནས་པ་ན། གལ་ཏེ་རྣམ་པར་རྟོག་པ་དག་ལ་སེམས་འཇུག་པར་གྱུར་ན། ཀུན་དགའ་བོ། དགེ་སློང་དེས་མི་དགེ་བ། སྡུག་བསྔལ་བ། འཕགས་པ་མ་ཡིན་པ། གནོད་པ་དང་ལྡན་པའི་རྣམ་པར་རྟོག་པ་འདི་ལྟ་སྟེ། འདོད་པའི་རྣམ་པར་རྟོག་པ་དང ། གནོད་སེམས་ཀྱི་རྣམ་པར་རྟོག་པ་དང ། རྣམ་པར་འཚེ་བའི་རྣམ་པར་རྟོག་པ་དང ། དེ་ལྟ་བུའི་རྣམ་པར་རྟོག་པ་གང་དག་
489a
༄#། །ཡིན་པ་དེ་དག་མངོན་པར་སྤངས་ལ། དགེ་བ་བདེ་བ་འཕགས་པ་གནོད་པ་མེད་པ་དང་ལྡན་པའི་རྣམ་པར་རྟོག་པ་འདི་ལྟ་སྟེ། ངེས་པར་འབྱུང་བའི་རྣམ་པར་རྟོག་པ་དང ། གནོད་སེམས་མེད་པའི་རྣམ་པར་རྟོག་པ་དང ། རྣམ་པར་མི་འཚེ་བའི་རྣམ་པར་རྟོག་པ་དང ། དེ་ལྟ་བུའི་རྣམ་པར་རྟོག་པ་གང་དག་ཡིན་པ་དེ་དག་ལ་རྣམ་པར་བརྟག་པར་བྱའོ། །དེ་དེ་ལྟར་རྣམ་པར་རྟོག་པ་ན་འཇིག་རྟེན་ལ་བརྣབ་སེམས་དང ། ཡིད་མི་བདེ་བ་དང ། སྡིག་པ་མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང ། དེ་ད་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ། དགེ་སློང་དེ་གནས་པ་འདིས་གནས་པ་ན་གལ་ཏེ་གཏམ་ལ་སེམས་འཇུག་པར་གྱུར་ན། ཀུན་དགའ་བོ། དགེ་སློང་དེས་མི་དགེ་བ་འཕགས་པ་མ་ཡིན་པ་གནོད་པ་དང་ལྡན་པའི་གཏམ་འདི་ལྟ་སྟེ། རྒྱལ་པོའི་གཏམ་དང ། རྐུན་པོའི་གཏམ་དང ། འཐབ་མོའི་གཏམ་དང ། ཟས་ཀྱི་གཏམ་དང ། སྐོམ་གྱི་གཏམ་དང ། གོས་ཀྱི་གཏམ་དང ། ལམ་སྲང་གི་གཏམ་དང ། སྨད་ཚོང་མའི་གཏམ་དང ། འཇིག་རྟེན་གྱི་གཏམ་རྒྱུད་ཀྱི་གཏམ་དང ། ལས་ངན་པའི་གཏམ་རྒྱུད་ཀྱི་གཏམ་དང ། རྒྱ་མཚོའི་གཏམ་རྒྱུད་ཀྱི་གཏམ་དང ། ཡུལ་གྱི་མི་དང ། སྣ་ཆེན་པོ་ལ་གཏོགས་པའི་གཏམ་རྒྱུད་ཀྱི་གཏམ་དང ། དེ་ལྟ་བུའི་གཏམ་གང་དག་ཡིན་པ་དེ་དག་མངོན་པར་
489b
སྤངས་ལ། འཕགས་པའི་ཡོ་བྱད་བསྙུངས་པ་སེམས་ཀྱི་སྒྲིབ་པ་མེད་པ་དང་མཐུན་པར་འགྱུར་བའི་གཏམ་འདི་ལྟ་སྟེ། ཚུལ་ཁྲིམས་ཀྱི་གཏམ་དང ། ཏིང་ངེ་འཛིན་གྱི་གཏམ་དང ། ཤེས་རབ་ཀྱི་གཏམ་དང ། རྣམ་པར་གྲོལ་བའི་གཏམ་དང ། རྣམ་པར་གྲོལ་བའི་ཡེ་ཤེས་མཐོང་པའི་གཏམ་དང ། འདོད་པ་ཆུང་བའི་གཏམ་དང ། ཆོག་ཤེས་པའི་གཏམ་དང ། མི་གསོག་པའི་གཏམ་དང ། ཡོ་བྱད་བསྙུངས་པའི་གཏམ་དང ། འདུ་འཛི་མེད་པའི་གཏམ་དང ། སྤོང་བའི་གཏམ་དང ། འདོད་ཆགས་དང་བྲལ་བའི་གཏམ་དང ། འགོག་པའི་གཏམ་དང ། སྟོང་པ་ཉིད་ཀྱི་གཏམ་དང ། རྐྱེན་འདི་ཉིད་ཀྱི་རྟེན་ཅིང་འབྲེལ་པར་འབྱུང་བའི་གཏམ་དང ། དེ་ལྟ་བུའི་གཏམ་གང་དག་ཡིན་པ་དེ་དག་གི་གཏམ་བྱའོ། །དེ་དེ་ལྟར་གཏམ་ཟེར་བ་ནས་འཇིག་རྟེན་ལ་བརྣབ་སེམས་དང ། ཡིད་མི་བདེ་བ་དང ། སྡིག་པ་མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང་དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ། འཕགས་པ་ཉན་ཐོས་ཀྱིས་མ་ལ་བདག་གིས་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་ཏུ་འབྱུང་བ་ཡོད་དམ། འོན་ཏེ་བདག་གི་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་ཏུ་འབྱུང་བ་མེད་ཅེས་ཡང་དང་ཡང་དུ་འདོད་པའི་ཡོན་ཏན་ལྔ་པོ་
490a
༄#། །འདི་དག་ལ་རང་གི་སེམས་སོ་སོར་བརྟག་པར་བྱ་སྟེ། ཀུན་དགའ་བོ། ང་ནི། འདོད་པའི་ཡོན་ཏན་ལྔ་པོ་དག་ལས་གཞན་པ་ལ་སེམས་ཀུན་ཏུ་འབྱུང་བར་མི་སྨྲའོ། །ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གི་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་ཏུ་འབྱུང་བ་ཡོད་པར་ཤེས་པར་གྱུར་ན། ཀུན་དགའ་བོ། དགེ་སློང་དེས་འདོད་པའི་ཡོན་ཏན་དེ་དང་དེ་དག་ལ་མི་རྟག་པར་རྗེས་སུ་བལྟ་ཞིང་གནས་པར་བྱ། ཟད་པར་རྗེས་སུ་བལྟ་བ་དང ། འདོད་ཆགས་དང་བྲལ་བར་རྗེས་སུ་བལྟ་བ་དང ། འགོག་པར་རྗེས་སུ་བལྟ་བ་དང ། ངེས་པར་འབྱུང་བར་རྗེས་སུ་བལྟ་ཞིང་གནས་པར་བྱའོ། །ཀུན་དགའ་བོ། དགེ་སློང་དེ་འདོད་པའི་ཡོན་ཏན་དེ་དང་དེ་དག་ལ་མི་གནས་པར་རྗེས་སུ་བལྟ་ཞིང་གནས་པ་དང ། ཟད་པར་རྗེས་སུ་བལྟ་བ་དང ། འདོད་ཆགས་དང་བྲལ་བར་རྗེས་སུ་བལྟ་པ་དང ། འགོག་པར་རྗེས་སུ་བལྟ་བ་དང ། ངེས་པར་འབྱུང་བར་རྗེས་སུ་ལྟ་ཞིང་གནས་པ་ན། དེའི་སེམས་འདོད་པའི་ཡོན་ཏན་ལྔ་པོ་འདི་དག་ལས་ཡོན་ཏན་གང་ཡང་རུང་བ་ལ་བརྟེན་ནས་ཀུན་ཏུ་འབྱུང་བར་འགྱུར་བ་གང་ཡིན་པ་དེ་ཀུན་ཏུ་འབྱུང་བར་མི་འགྱུར་རོ། །ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གི་སེམས་འདོད་པའི་
490b
ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་ཏུ་འབྱུང་བར་གྱུར་པ་གང་ཡིན་པ་དེ་སྤང་བར་ཤེས་པར་གྱུར་ན། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ། འཕགས་པ་ཉན་ཐོས་ཀྱིས་མ་ལ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང ། ངའོ་སྙམ་པའི་འདུན་པ་དང ། ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་བཀག་མ་བསལ་བ་ཡོད་དམ། འོན་ཏེ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང ། ངའོ་སྙམ་པའི་འདུན་པ་དང ། ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་བཀག་མ་བསལ་བ་མེད་ཅེས་དེ་ཡང་དང་ཡང་དུ་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་རང་གི་སེམས་སོ་སོར་བརྟག་པར་བྱའོ། །ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང ། ངའོ་སྙམ་པའི་འདུན་པ་དང ། ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་བཀག་མ་བསལ་བ་ཡོད་པར་ཤེས་པར་གྱུར་ན། ཀུན་དགའ་བོ། དགེ་སློང་དེས་ཉེ་བར་ལེན་པའི་ཕུང་པོ་ལྔ་པོ་འདི་དག་ཡང་དང་ཡང་དུ་འདི་ལྟ་སྟེ། འདི་ནི། གཟུགས་སོ། འདི་ནི། གཟུགས་ཀྱི་ཀུན་འབྱུང་བའོ།།
491a
༄#། །འདི་ནི།་གཟུགས་ཀྱི་ཟད་པའོ། །འདི་ལྟ་སྟེ། འདི་ནི། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པའོ། །འདི་ནི། རྣམ་པར་ཤེས་པའི་ཀུན་འབྱུང་བའོ། །འདི་ནི། རྣམ་པར་ཤེས་པའི་ཟད་པའོ། །ཞེས་ཀུན་འབྱུང་བ་དང་ཟད་པར་རྗེས་སུ་བལྟ་ཞིང་གནས་པར་བྱའོ། །དེ་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ཡང་དང་ཡང་དུ་ཀུན་འབྱུང་བ་དང་ཟད་པར་རྗེས་སུ་བལྟ་ཞིང་གནས་པ་ན། དེ་ལ་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང ། ངའོ་སྙམ་པའི་འདུན་པ་དང ། ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལམ་བཀག་མ་བསལ་བར་གྱུར་པ་གང་ཡིན་པ་དེ་མེད་པར་འགྱུར་རོ། །ཀུན་དགའ་བོ། གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང ། ངའོ་སྙམ་པའི་འདུན་པ་དང ། ངའོ་སྙམ་པའི་བག་ལ་ཉལ་འབྱུང་བར་གྱུར་པ་གང་ཡིན་པ་དེ་སྤངས་པར་ཤེས་པར་གྱུར་ན། དེ་དེ་ལ་དྲན་པ་དང་ཤེས་བཞིན་ཅམ་དུ་འགྱུར་ཏེ། ཀུན་དགའ་བོ། ཆོས་དེ་དག་ནི། གཅིག་ཏུ་དཀར་བ། གཅིག་ཏུ་དགེ་བ། གཅིག་ཏུ་ཁ་ན་མ་ཐོ་བ་མེད་པ་སྟེ། བདུད་སྡིག་ཅན་གྱིས་འདའ་བར་བྱ་བ་མ་ཡིན་ཞིང ། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ་དང །
491b
ཡང་སྲིད་པར་འགྱུར་བ་གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང ། རྒ་བ་དང ། འཆི་བར་འགྱུར་བ་རྣམས་ཀྱིས་མི་འཕྲོག་པ་ཡིན་ནོ། །ཀུན་དགའ་བོ།་ཇི་སྙམ་དུ་སེམས་ཉན་ཐོས་དད་པ་ཅན་དག་ཇི་སྲིད་འཚོའི་བར་དུ་ཕྱིར་བཀག་ཀྱང་སྟོན་པའི་ཕྱི་བཞིན་རྗེས་སུ་འབྲང་བར་འོས་པ་ཅིའི་ཕྱིར་སྙམ། གསོལ་པ། བཙུན་པ་བཅོམ་ལྡན་འདས་ནི། ཆོས་རྣམས་ཀྱི་གཞི་པོ་ལགས་ཏེ། བཅོམ་ལྡན་འདས་ཀྱིས་མཚོན་པ་དང ། བཅོམ་ལྡན་འདས་ལ་རྟེན་པ་ལགས་པས་བཅོམ་ལྡན་འདས་ཀྱིས་དོན་དེ་དགེ་སློང་རྣམས་ལ་ལེགས་པར་བཀའ་སྩལ་དུ་གསོལ། བཅོམ་ལྡན་འདས་ལས་ཐོས་ནས་དགེ་སློང་རྣམས་ཀྱང་འཛིན་པར་འགྱུར་ལགས་སོ། །བཀའ་སྩལ་པ། ཀུན་དགའ་བོ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་བཤད་པར་བྱའོ། །ཀུན་དགའ་བོ། ཉན་ཐོས་དད་པ་ཅན་གང་དག་འདི་ལྟ་སྟེ། མདོའི་སྡེ་དང ། དབྱངས་ཀྱིས་བསྙད་པའི་སྡེ་དང ། ལུང་བསྟན་པའི་སྡེ་དང ། ཚིགས་སུ་བཅད་པའི་སྡེ་དང ། ཆེད་དུ་བརྗོད་པའི་སྡེ་དང ། གླེང་གཞིའི་སྡེ་དང ། རྟོགས་པ་བརྗོད་པའི་སྡེ་དང ། དེ་ལྟ་བུ་བྱུང་བའི་སྡེ་དང ། སྐྱེས་པ་རབས་ཀྱི་སྡེ་དང ། ཤིན་ཏུ་རྒྱས་པའི་སྡེ་དང ། རྨང་དུ་བྱུང་བའི་ཆོས་ཀྱི་སྡེ་དང ། གཏན་ལ་བབ་པར་བསྟན་པའི་སྡེའི་ཆོས་དེ་དག་དང ། དེ་ལྟ་བུའི་ཆོས་རྣམས་མཉན་པའི་ཕྱིར་ཇི་སྲིད་འཚོའི་བར་དུ་ཕྱིར་
492a
༄#། །བཀག་ཀྱང་སྟོན་པའི་ཕྱི་བཞིན་རྗེས་སུ་འབྲང་བ་ནི། འོས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། ཆོས་དེ་དག་ནི། ཡུན་རིང་པོ་ནས་ཐོས་ཤིང་བཟུང་ལ་བརྟན་པར་བྱས་ཤིང་ཁ་ཏོན་བྱེད་པ་དང ། ཡིད་ཀྱིས་བརྟགས་པ་དང ། མཐོང་བས་ཤིན་ཏུ་རྟོགས་པར་བྱས་ཟིན་པའི་ཕྱིར་རོ། །ཀུན་དགའ་བོ། །ཉན་ཐོས་དད་པ་ཅན་གང་དག་འཕགས་པ་ཡོ་བྱད་བསྙུངས་པ་སེམས་ཀྱིས་སྒྲིབ་པ་མེད་པ་དང་མཐུན་པར་འགྱུར་བའི་གཏམ་འདི་ལྟ་སྟེ། ཚུལ་ཁྲིམས་ཀྱི་གཏམ་དང ། ཏིང་ངེ་འཛིན་གྱི་གཏམ་དང ། ཤེས་རབ་ཀྱི་གཏམ་དང ། རྣམ་པར་གྲོལ་བའི་གཏམ་དང ། རྣམ་པར་གྲོལ་བའི་ཡེ་ཤེས་མཐོང་བའི་གཏམ་དང ། འདོད་པ་ཆུང་བའི་གཏམ་དང ། ཆོག་ཤེས་པའི་གཏམ་དང ། མི་གསོག་པའི་གཏམ་དང ། ཡོ་བྱད་བསྙུངས་པའི་གཏམ་དང ། འདུ་འཛི་མེད་པའི་གཏམ་དང ། སྤོང་བའི་གཏམ་དང ། འདོད་ཆགས་དང་བྲལ་བའི་གཏམ་དང ། འགོག་པའི་གཏམ་དང ། སྟོང་པ་ཉིད་ཀྱི་གཏམ་དང ། རྐྱེན་འདི་པ་ཉིད་ཀྱི་རྟེན་ཅིང་འབྲེལ་པར་འབྱུང་བའི་གཏམ་དང ། དེ་ལྟ་བུའི་གཏམ་གང་ཡིན་པ་དག་མཉན་པའི་ཕྱིར་ཇི་སྲིད་འཚོའི་བར་དུ་ཕྱིར་བཀག་ཀྱང་སྟོན་པའི་ཕྱི་བཞིན་རྗེས་སུ་འབྲང་བ་ནི། རིགས་པ་ཡིན་ནོ། །ཀུན་དགའ་བོ། གསུམ་པོ་འདི་དག་ནི། གནོད་པ་ཡིན་ཏེ། གསུམ་གང་ཞེ་ན། སློབ་དཔོན་
492b
གྱི་གནོད་པ་དང ། སློབ་མའི་གནོད་པ་ཡིན་ཏེ། ཚངས་པར་སྤྱོད་པའི་གནོད་པའོ། །ཀུན་དགའ་བོ། སློབ་དཔོན་གྱི་གནོད་པ་གང་ཞེ་ན། ཀུན་དགའ་བོ། འདི་ལྟ་སྟོན་པ་རྟོག་གེ་པ་དཔྱོད་པ་ཅན་རྟོག་གེར་གཏོགས་པའི་ས་རང་གི་སྤོབས་པ་ལས་བྱུང་བ། སོ་སོའི་སྐྱེ་བོ་པ་དཔྱོད་པའི་རྗེས་སུ་སྤྱོད་པ་ལ་གནས་པ་དེ་འཇིག་རྟེན་དུ་བྱུང་ན། དེ་གནས་མལ་དགོན་པའམ། ནགས་འདབ་བམ། བས་མཐའ་དག་ཏུ་གནས་པར་བྱེད་དོ། །དེ་གནས་མལ་དགོན་པའམ། ནགས་འདབ་བམ། བས་མཐའ་དག་ན་གནས་པའི་ཚེ་ཉན་པ་པོ་ཁྱིམ་པ་དང ། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་བ་པོ་ཁྱིམ་པ་དང ། རབ་ཏུ་བྱུང་བ་རྗེས་སུ་ལྷགས་པ་དག་ལ་ཆུམས་པར་བྱེད་ཅིང་བརྒྱལ་བ་སྐྱེད་པར་བྱེད་ལ། མང་པོ་བསྡུ་བའི་ཕྱིར་རྗེས་སུ་འཇུག་པར་བྱེད་དོ། །ཀུན་དགའ་བོ། དེ་ན་སློབ་དཔོན་གྱི་གནོད་པ་ཞེས་བྱའོ། །ཀུན་དགའ་བོ། སློབ་དཔོན་གྱི་གནོད་པས་གནོད་པར་གྱུར་པའི་སློབ་དཔོན་དེ་ནི། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ། ཡང་སྲིད་པར་འགྱུར་བ། གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང ། རྒ་བ་དང ། འཆི་བར་འགྱུར་བ་རྣམས་ཀྱིས་གནོད་པར་འགྱུར་རོ། །ཀུན་དགའ་བོ། སློབ་མའི་གནོད་པ་གང་ཞེ་ན། ཀུན་དགའ་བོ། འདི་ལ་ཉན་པ་པོ་དད་པ་དང་ལྡན་པ་སྟོན་པ་དེ་ཉིད་ཀྱི་ཚིག་ལ་མངོན་པར་དང་པར་
493a
༄#། །གྱུར་པ་དེ་སྟོན་པ་དེ་ཉིད་ཀྱི་དབེན་པའི་རྗེས་སུ་སློབ་པའི་ཚེ་གནས་མལ་དགོན་པའམ། ནགས་འདབ་བམ། བས་མཐའ་དག་ཏུ་གནས་པར་བྱེད་དོ། །དེ་གནས་མལ་དགོན་པའམ། ནགས་འདབ་བམ། བས་མཐའ་དག་ན་གནས་པའི་ཚེ་ཉན་པ་པོ་ཁྱིམ་པ་དང ། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་པ་པོ་ཁྱིམ་པ་དང ། རབ་ཏུ་བྱུང་བ་རྗེས་སུ་ལྷགས་པ་དག་ལ་ཆུམས་པར་བྱེད་ཅིང་ང་རྒྱལ་བསྐྱེད་པར་བྱེད་ལ། མང་པོ་བསྡུ་བའི་ཕྱིར་རྗེས་སུ་འཇུག་པར་བྱེད་དེ། ཀུན་དགའ་བོ། དེ་ནི་སློབ་མའི་གནོད་པ་ཞེས་བྱའོ། །ཀུན་དགའ་བོ། སློབ་མའི་གནོད་པས་གནོད་པར་གྱུར་པའི་སློབ་མ་དེ་ནི། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ། ཡང་སྲིད་པར་འགྱུར་བ། གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང ། རྒ་བ་དང ། འཆི་བར་འགྱུར་བ་རྣམས་ཀྱིས་གནོད་པར་འགྱུར་རོ། །ཀུན་དགའ་བོ། ཚངས་བར་སྤྱོད་པའི་གནོད་པ་གང་ཞེ་ན། ཀུན་དགའ་བོ། འདི་ལ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་
493b
བྱུང་ན། དེ་གནས་མལ་དགོན་པའམ། ནགས་འདབ་བམ། བས་མཐའ་དག་ཏུ་གནས་པར་མཛད་དོ། །དེ་གནས་མལ་དགོན་པའམ། ནགས་འདབ་བམ། བས་མཐའ་དག་ན་བཞུགས་པའི་ཚེ་ཉན་པ་པོ་ཁྱིམ་པ་དང ། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་པ་པོ་ཁྱིམ་པ་དང ། རབ་ཏུ་བྱུང་བ་རྗེས་སུ་ལྷགས་པ་དག་ལ་ཆུ་མས་བར་མི་མཛད་ཅིང་ང་རྒྱལ་བསྐྱེད་པར་མི་མཛད་ལ། མང་པོ་བསྡུ་བའི་ཕྱིར་རྗེས་སུ་འཇུག་པར་མི་མཛད་ཀྱང ། དེ་ཉན་པ་པོས་ཀུན་ཏུ་གང་ཞིང་གནས་ན་ལྷག་པའི་སེམས་ལས་བྱུང་བ་བཞི་པོ་དེ་དག་གིས་ཚེ་འདི་ལ་བདེ་བར་གནས་པ་ཐོབ་པ་གང་དག་ཡིན་པ་དེ་དག་ལས་གང་ཡང་རུང་བ་ལས་ཡོངས་སུ་ཉམས་པར་སྨྲ་ལ། གཅིག་པུ་མ་འདྲེས་པ་དང ། བག་ཡོད་པ་དང ། རྟུན་པ་དང ། སེམས་བསྡུས་པའི་བདག་ཉིད་དེ། དེ་དག་གིས་ཉམས་པ་མེད་པའི་སེམས་རྣམ་པར་གྲོལ་བ་སྐུས་མངོན་སུམ་དུ་མཛད་ཅིང་གནང་བ་གང་ཡིན་པ་དེ་ལ་ནི་རྣམ་གྲངས་གང་གིས་ཀྱང་ཡོངས་སུ་ཉམས་པ་མེད་པར་ང་སྨྲ་མོད་ཀྱི། འོན་ཀྱང་ཉམ་པ་པོ་དང་ལྡན་པ་སྟོན་པ་དེ་ཉིད་ཀྱི་བཀའ་ལ་མངོན་པར་དད་པར་གྱུར་པ་དེ་སྟོན་པ་དེ་ཉིད་ཀྱི་དབེན་པའི་རྗེས་སུ་སློབ་པའི་ཚེ་གནས་མལ་དགོན་པའམ། ནགས་འདབ་བམ། བས་མཐའ་དག་ཏུ་གནས་པར་བྱེད་དོ། །དེ་གནས་མལ་དགོན་པའམ། ནགས་འདབ་བམ། བས་མཐའ་དག་ན་གནས་པའི་ཚེ་ཉན་པ་པོ་ཁྱིམ་པ་དང ། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་
494a
༄#། །པ་པོ་ཁྱིམ་པ་དང ། རབ་ཏུ་བྱུང་བ་རྗེས་སུ་ལྷགས་པ་དེ་དག་ལ་ཆུམས་པར་བྱེད་ཅིང་བརྒྱལ་བ་སྐྱེད་པར་བྱེད་ལ། མང་པོ་བསྡུ་བའི་ཕྱིར་རྗེས་སུ་འཇུག་པར་བྱེད་དེ། ཀུན་དགའ་བོ། དེ་ནི། ཚངས་པར་སྤྱོད་པའི་གནོད་པ་ཞེས་བྱའོ། །ཀུན་དགའ་བོ། གནོད་པ་རྣམས་ལས་འདི་ལྟ་སྟེ། སློབ་དཔོན་གྱི་གནོད་པ་དང ། སློབ་མའི་གནོད་པ་དེ་དག་ནི། ཅུང་ཟད་ཙམ་དུ་ཟད་ཀྱི། གནོད་པ་རྣམས་ལས་འདི་ལྟ་སྟེ། ཚངས་པར་སྤྱོད་པའི་གནོད་པ་དེ་ནི། ཐ་ཆད་ཡིན་ནོ། །ཀུན་དགའ་བོ། ཚངས་པར་སྤྱོད་པའི་གནོད་པས་གནོད་པར་གྱུར་པའི་ཚངས་པར་སྤྱོད་པ་དེ་ནི། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ། ཡང་སྲིད་པར་འགྱུར་བ། གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང ། རྒ་བ་དང ། འཆི་བར་འགྱུར་བ་རྣམས་ཀྱིས་གནོད་པར་འགྱུར་རོ། །ཀུན་དགའ་བོ། ང་ནི། མཛའ་བཤེས་དང་ལྡན་པས་ཀུན་ཏུ་སྤྱོད་པར་བྱེད་ཀྱི། འགྲན་ཟླ་དང་ལྡན་པས་ནི། མ་ཡིན་ནོ། །ཀུན་དགའ་བོ། ཇི་ལྟར་ན་ཉན་ཐོས་རྣམས་སྟོན་པ་ལ་འགྲན་ཟླ་དང་ལྡན་པས་ཀུན་ཏུ་སྤྱོད་ཅིང་མཛའ་བཤེས་དང་ལྡན་པས་མ་ཡིན་ཞེ་ན། ཀུན་དགའ་བོ། འདི་ལ་སྟོན་པ་རྗེས་སུ་ཐུགས་སུ་བརྩེ་བ་དང་ལྡན་པ། ཐུགས་རྗེ་དང་ལྡན་པ། དོན་དུ་བཞེད་པ། ཕན་པར་བཞེད་པ།
494b
ཐུགས་རྗེ་བར་གྱུར་པ། ཉན་ཐོས་རྣམས་ལ་དགེ་སློང་དག། ཁྱོད་ལ་ཕན་པ་འདི་དང ། བདེ་བ་འདི་དང ། ཕན་པ་དང་བདེ་བ་འདིའི་ཕྱིར་རོ་ཞེས་ཆོས་སྟོན་པར་མཛད་པ་ན་དེའི་ཉན་ཐོས་དེ་དག་གུས་པར་ཉན་པར་མི་བྱེད་ཅིང ། རྣ་ཀློག་པར་མི་བྱེད། ཀུན་ཤེས་པར་བྱེད་པའི་སེམས་ཉེ་བར་འཇོག་པར་མི་བྱེད། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པར་མི་བྱེད་ལ།་སྟོན་པའི་བསྟན་པ་ལས་རྣམ་པར་འདས་ཤིང་གནས་པར་བྱེད་ན། ཀུན་དགའ་བོ། དེ་ནི། ཉན་ཐོས་རྣམས་སྟོན་པ་ལ་འགྲན་ཟླ་དང་ལྡན་པས་ཀུན་ཏུ་སྤྱོད་ཅིང་མཛའ་བཤེས་དང་ལྡན་པས་མ་ཡིན་པ་ཡིན་ནོ། །ཀུན་དགའ་བོ། ཇི་ལྟར་ན་ཉན་ཐོས་རྣམས་སྟོན་པ་ལ་མཛའ་བཤེས་དང་ལྡན་པས་ཀུན་ཏུ་སྤྱོད་ཅིང་འགྲན་ཟླ་དང་ལྡན་པས་མ་ཡིན་ཞེ་ན། ཀུན་དགའ་བོ། འདི་ལ་སྟོན་པ་རྗེས་སུ་ཐུགས་བརྩེ་བ་དང་ལྡན་པ། ཐུགས་རྗེ་དང་ལྡན་པ། དོན་དུ་བཞེད་པ། ཕན་པར་བཞེད་པ། ཐུགས་རྗེ་བར་གྱུར་པ། ཉན་ཐོས་རྣམས་ལ་དགེ་སློང་དག་།ཁྱེད་ལ་ཕན་པ་འདི་དང ། བདེ་བ་འདི་དང ། ཕན་པ་དང་བདེ་བ་འདིའི་ཕྱིར་རོ། །ཞེས་ཆོས་སྟོན་པར་མཛད་པ་ན། དེའི་ཉན་ཐོས་དེ་དག་གུས་པར་ཉན་པར་བྱེད་ཅིང ། རྣ་ཀློག་པར་བྱེད། ཀུན་ཤེས་པར་བྱ་བའི་སེམས་ཉེ་བར་འཇོག་པར་བྱེད། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པར་བྱེད་ལ། སྟོན་པའི་བསྟན་པ་ཡང་དག་པར་བླངས་ཏེ་གནས་པར་བྱེད་ན།
495a
༄#། །ཀུན་དགའ་བོ། དེ་ནི། ཉན་ཐོས་རྣམས་སྟོན་པ་ལ་མཛའ་བ་ཤེས་དང་ལྡན་པས་སྤྱོད་ཅིང་འགྲན་ཟླ་དང་ལྡན་པས་མ་ཡིན་པ་ཡིན་ནོ། །ཀུན་དགའ་བོ། ང་ནི། ཁྱེད་ཅག་ལ་ཚར་བཅད་ཅིང་བཅད་ཅིང ། ཟིལ་གྱིས་མནན་ཅིང་མནན་ཅིང་སྨྲ་སྟེ། རྫ་མཁན་རྫ་མ་མཚོས་པ་དག་ལས་སྲ་བ་གང་ཡིན་པ་དེ་འཇོག་པར་བྱེད་པ་བཞིན་དུ་ཁྱེད་ལ་དབྱིག་ཏུ་མི་འཛིན་གྱི། ངའི་ཚིག་གི་ལམ་རྣམས་ལ་ཡང་བཟོད་པར་གྱིས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ནས་དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བར་སྡོམ་ནི། འཕགས་པའི་བདེ་དང་དུས་སྦྱོར་དང ། །གཟུགས་དང་མཆོག་དགའ་དགེ་སློང་དང ། །ཁྲུས་རིལ་ཕྱི་སྟོང་ཉིད་སོགས་དང ། །ཏིང་ངེ་འཛིན་ལ་སེམས་གཞོལ་དང ། །འཆག་པ་དང་ནི་འདུག་པ་དང ། །རྣམ་རྟོག་གཏམ་དང་འོད་ཡོན་ཏན། །ཕུང་པོ་གཅིག་དཀར་ཉན་ཐོས་དང ། །གནོད་དང་མཛའ་བཤེས་ཚར་གཅོད་པའོ། །མདོ་ཆེན་པོ་སྟོང་པ་ཉིད་ཆེན་པོ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཛི་ནས་མི་ཏྲ་དང ། པྲ་ཛྙཱ་ཝརྨ་དང ། ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།