རྒྱ་གར་སྐད་དུ། ཨཱརྱ་ནཱཀྵ་ར་ཀ་རཎྜ་ཀ་བཻ་རོ་ཙ་ན་གརྦྷ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཡི་གེ་མེད་པའི་ཟ་མ་ཏོག་རྣམ་པར་སྣང་མཛད་ཀྱི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རིལ་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མ་ཐམས་ཅད་ཀྱང་རྒྱ་ཆེན་པོ་ཤེས་པ། ཐབས་ལ་མཁས་པ། གསལ་བ། ལེ་ལོ་མེད་པ། ཡི་གེ་སྒྲུབ་པ་ལ་མཁས་པ། གནས་དང་གནས་མ་ཡིན་པ་ཁོང་དུ་ཆུད་པར་བྱེད་པ། རྣམ་པར་གྲོལ་བ་ཕུན་སུམ་ཚོགས་པ། འདུལ་བའི་མྱུ་གུ་དང་ལྡན་པ། ངོ་ཚ་ཤེས་པའི་ཡན་ལག་དང་ལྡན་པ། སྙིང་རྗེའི་བདག་ཉིད་ཅན། སེམས་ཅན་ལ་མཉེས་གཤིན་པ། ཏིང་ངེ་འཛིན་མང་པོ་དང་ལྡན་པ། ཤེས་རབ་ཀྱི་ལག་པ་དང་ལྡན་པ། བླ་མ་ལ་ 24b སུ་ཞུ་ཆེ་བ། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་གླིང་དང་མཚུངས་པ། དགེ་བ་དང་མི་དགེ་བ་ཤེས་པ། གཡོ་ཁོང་དུ་ཆུད་པར་བྱེད་པ། ངེས་པའི་ཚིག་དང་སྤོབས་པ་ཟད་མི་ཤེས་པ་ཟུང་ཁོང་དུ་ཆུད་པར་བྱེད་པ། རྣམ་པར་རྒྱལ་བ་ཐོབ་པ། སེམས་ཅན་ཐམས་ཅད་ལ་ཁོང་དུ་ཆུད་པར་བྱེད་པ། ཡང་དག་པའི་མཐའ་ལས་བྱུང་ཞིང་བརྟེན་པ།་ཤིན་ཏུ་དཔའ་བ། གནས་པ་མེད་པ། ཆོས་བླ་མའི་རང་བཞིན་ལ་ངེས་པ། རང་བཞིན་མེད་པའི་ཁྱད་པར་སེམས་པ། སྙིང་པོ་ལ་དཔའ་བ། སྐྱེ་བ་ལ་སྨོད་པའི་སྐྱེས་བུ། ཆོས་ཁོང་དུ་ཆུད་པར་བྱེད་པ། མཚན་གྱི་གཞི་ཤེས་པ། ཡུལ་འཁོར་སྲུང་བ། ཡུལ་འཁོར་སྐྱོང་བ། སྒྲ་གྲགས་པ། རྒྱལ་བའི་སྒྲ་དང་ལྡན་པ། རྣམ་པར་རྒྱལ་བའི་མཛོད་དང་ལྡན་པ། ཡི་གེ་མེད་པའི་སྙིང་པོ་དང་ལྡན་པ། ཤིན་ཏུ་གཉིད་ཀྱིས་མ་ལོག་པ། ཡེ་ཤེས་ཀྱི་ཕུང་པོ་ལ་གཞོལ་བ། རང་གི་ལས་ལ་མངོན་པར་དགའ་བ། རང་གི་རིག་པ་སྟེན་པ། ཀུན་ཏུ་བཟང་བ།་མཉམ་པ་ཉིད་ལ་དགའ་བ། རྣམ་པར་དག་བ། རང་གི་རྒྱུད་དང ། ཕ་རོལ་གྱི་རྒྱུད་རྣམ་པར་སྦྱོང་བར་བྱེད་པ། རྣམ་པར་རྒྱལ་བ་ཐོབ་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྒྱལ་བའི་དབྱངས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྒྲོག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ 25a ༄#། །རྒྱལ་བའི་གནས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྤྲུལ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་གི་འབྱུང་གནས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྨོན་ལམ་བརྩེགས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱད་པར་སེམས་དང ། བྱང་ཆུབ་སེམས་དཔའ་སེམས་དཔའ་ཆེན་པོས་འཛིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འགྲོ་བ་འཛིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྒྲ་དབྱངས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཕུན་སུམ་ཚོགས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཤིན་ཏུ་བརྩེགས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་འདབ་མའི་མིག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་གདོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་ནོར་བུ་དང་ཐབས་ཅིག་གོ་།བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་པའི་དབྱངས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་འདས་པ་ཐམས་ཅད་ཀྱང་གཞོན་ནུར་གྱུར་པ་ཤ་སྟག་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ 25b ཀྱང་རྒྱལ་ཚབ་ཏུ་གྱུར་པ་གངྒཱའི་ཀླུང་གི་བྱེ་མ་སྙེད་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱད་པར་སེམས་ནི། བརྒྱ་བྱིན་དུ་མ་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང ། རྒྱལ་པོ་ཆེན་པོ་བཞི་ནི། འཁོར་ལོས་བསྒྱུར་བ་དུ་མ་དག་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ན་།ཚངས་པ་དུ་མ་དག་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བདོན་ཡོད་ནི། འཁོར་རྣམ་ཐོས་ཀྱི་བུ་དུ་མ་དག་དང་ལྷན་གཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་ནི། འཇིག་རྟེན་སྐྱོང་བ་ལྷག་མ་རྣམས་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་གཉིས་འགྲོམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ནི། དེ་བཞིན་གཤེགས་པ་བྱང་ཆུབ་སེམས་དཔའི་ཆ་བྱད་འཛིན་པ་དུ་མ་དང་ལྷན་ཅིག། ཤཱ་ར་དྭ་རིའི་བུ་དང ། མཽངྒལ་གྱི་བུ་དང ། འོད་སྲུང་ཆེན་པོ་ལ་སོགས་པ་དགྲ་བཅོམ་པ་ཐམས་ཅད་དང་ལྷན་ཅིག། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་མང་དང ། བྱང་ཆུབ་སེམས་དཔའ་ 26a ༄#། །སེམས་དཔའ་ཆེན་པོ་ཁྱད་པར་སེམས་ནི། ལྷའི་བུ་མོ་སྟོང་ཕྲག་དུ་མ་དག་དང་ལྷན་ཅིག་ཅིང ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་ཡང་དག་བྱུང་དང ། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་ཟླ་བ་དང་ཉི་མ་རང་གི་གཟི་བརྗིད་སྙེམས་པ་ཇི་སྙེད་པ་དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ་གང་གི་ཚེ་བཅོམ་ལྡན་འདས་ཀྱི་སྤྱན་སྔར་འཁོད་པ་དེའི་ཚེ་ཛམྦུའི་ཆུ་པོའི་གསེར་གྱི་མདུན་དུ་སྣག་ཚའི་ཡུག་བཞག་པ་དེ་བཞིན་དུ་ཟླ་བ་དང་ཉི་མ་དེ་དག་བཅོམ་ལྡན་འདས་ཀྱི་སྤྱན་སྔར་ཕྱིར་ཞིང་མི་མཛེས། ཕྱིར་ཞིང་མི་འབར། ཕྱིར་ཞིང་ལམ་མེ་མ་ཡིན། ཕྱིར་ཞིང་ལྷན་ནེ་མ་ཡིན། ཕྱིར་ཞིང་ལྷང་དེ་མ་ཡིན་ནོ། །སྲེད་མེད་ཀྱི་བུ་ལ་སོགས་པ་ལྷའི་ཚོགས་ཇི་སྙེད་པ་དང ། ཀླུའི་རྒྱལ་པོ་ཆུ་ལྷ་དང ། འཇོག་པོ་དང ། མ་དྲོས་པ་ལ་སོགས་པ་ཀླུའི་རྒྱལ་པོ་འཁོར་དང་བཅས་པ་ཐམས་ཅད་དང ། དྲི་ཟའི་བདག་པོ་ཤིན་ཏུ་ཡིད་དུ་འོང་བ་ནི། དྲི་ཟ་བྱེ་བ་ཕྲག་དུ་མ་དང་ལྷན་ཅིག། ནམ་མཁའ་ལྡིང་གི་རྒྱལ་པོ་དྲི་མ་མེད་པ་ཆེན་པོ་ནི། ནམ་མཁའི་ལྡིང་བྱེ་བ་ཕྲག་བདུན་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་ངོ ། །ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་ 26b སྙེད་ན་བྱང་ཆུབ་སེམས་དཔའ་ཇི་སྙེད་འཁོད་པ་དེ་དག་རང་རང་གི་དེ་བཞིན་གཤེགས་པ་ལས་གནང་བ་མནོས་ཏེ་འཁོར་བཞི་དག་དང་ལྷན་ཅིག་དོང་ནས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་དག་ལའང་འཇིག་རྟེན་ལས་འདས་པའི་མཆོད་པ་བྱས་ནས་རང་རང་གི་པདྨའི་སྟན་ལ་འཁོད་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །གལ་ཏེ་བདག་ལ་བཅོམ་ལྡན་འདས་ཀྱིས་གནང་ན་བཅོམ་ལྡན་འདས་ལ་ཡི་གེ་གཉིས་ཤིག་ཞུ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ངས་གནང་གི། ཁྱད་པར་སེམས། ཁྱོད་ཅི་བསམ་པ་དེ་བཞིན་གཤེགས་པ་ལ་དྲིས་ཤིག་།དེ་བཞིན་གཤེགས་པ་ནི། སེམས་ཅན་གཅིག་གི་དོན་གྱི་ཕྱིར་འདིར་བྱུང་བ་མ་ཡིན་གྱི། ང་ནི། ཁྱེད་ཀྱི་དོན་གྱི་ཕྱིར་འདིར་བྱུང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔས་གང་སྤང་བར་བགྱི་བའི་ཆོས་གཅིག་པོ་དེ་གང་ལགས། བཅོམ་ལྡན་འདས། བྱང་ཆུབ་སེམས་དཔས་གང་བསྲུངས་ན། བསླབ་པའི་གཞི་ཐམས་ཅད་ཡོངས་སུ་བཟུང་བར་འགྱུར་བའི་ཆོས་གཅིག་པོ་དེ་གང་ལགས། བཅོམ་ལྡན་འདས། དེ་བཞིན་གཤེགས་པས་ 27a ༄#། །གང་མངོན་པར་རྫོགས་པར་སངས་རྒྱས་བའི་ཆོས་གཅིག་པོ་དེ་གང་ལགས། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཁྱད་པར་སེམས་ལ་ལེགས་སོ། །ཞེས་བྱ་བ་བྱིན་ཏེ། ཚངས་པ། དེ་སྐད་ཅེས་སྨྲས་བ་ནི། ལེགས་སོ། །ལེགས་སོ། །རིགས་ཀྱི་བུ། དེ་བཞིན་གཤེགས་པའི་བྱིན་གྱི་རླབས་ཀྱིས་སྦོབས་པ་འདི་ལྟ་བུ་བྱུང་ངོ ། །རིགས་ཀྱི་བུ། དེ་བཞིན་གཤེགས་པས་བྱིན་གྱིས་བརླབས་པ་མ་མཛད་ན། དེ་བཞིན་གཤེགས་པ་ལ་སུའང་ཞུ་བ་འདི་ལྟ་བུ་ཞུ་བར་མི་འགྱུར་རོ། །ཁྱད་པར་སེམས། དེའི་ཕྱིར་ཁྱོད་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་བྱང་ཆུབ་སེམས་དཔའ་ཁྱད་པར་སེམས་ཀྱིས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བྱང་ཆུབ་སེམས་དཔས་ཆོས་གཅིག་གང་སྤང་བར་བྱ་བའི་ཆོས་གཅིག་ཕོ་གང་ཞེ་ན། འདི་ལྟ་སྟེ། འདོད་ཆགས་ཀྱི་ཆོས་ཏེ། རིགས་ཀྱི་བུ། འདི་ནི། སྤང་བར་བྱ་བའི་ཆོས་གཅིག་གོ། ཡང་སྤང་བར་བྱ་བའི་ཆོས་གཅིག་སྟེ། འདི་ལྟར་ཞེ་སྡང་གི་ཆོས་ཏེ། འདི་ནི། སྤང་བར་བྱ་བའི་ཆོས་གཅིག་གོ། ཡང་སྤང་བར་བྱ་བའི་ཆོས་གཅིག་སྟེ། འདི་ལྟར་ 27b གཏི་མུག་གི་ཆོས་ཏེ། འདི་ནི། སྤང་བར་བྱ་བའི་ཆོས་གཅིག་གོ། ཡང་སྤང་བར་བྱ་བའི་ཆོས་གཅིག་སྟེ། འདི་ལྟར་བདག་ཏུ་འཛིན་པ་སྟེ། འདི་ནི། སྤང་བར་བྱ་བའི་ཆོས་གཅིག་གོ་།ཡང་སྤང་བར་བྱ་བའི་ཆོས་གཅིག་སྟེ། འདི་ལྟར་ལེ་ལོ་སྟེ། འདི་ནི། སྤང་བར་བྱ་བའི་ཆོས་གཅིག་གོ་།ཡང་སྤང་བར་བྱ་བའི་ཆོས་གཅིག་སྟེ། འདི་ལྟར་རྨུགས་པ་དང་གཉིད་དེ།་འདི་ནི། སྤང་བར་བྱ་བའི་ཆོས་གཅིག་གོ་།ཡང་སྤང་བར་བྱ་བའི་ཆོས་གཅིག་སྟེ། འདི་ལྟར་སྲེད་པ་སྟེ། འདི་ནི། སྤང་བར་བྱ་བའི་ཆོས་གཅིག་གོ། རིགས་ཀྱི་བུ། ཡང་བྱང་ཆུབ་སེམས་དཔས་སྤང་བར་བྱ་བའི་ཆོས་གཅིག་སྟེ། འདི་ལྟར་མ་རིག་པ་སྟེ། རིགས་ཀྱི་བུ། འདི་ནི། བྱང་ཆུབ་སེམས་དཔས་སྤང་བར་བྱ་བའི་ཆོས་གཅིག་གོ། རིགས་ཀྱི་བུ། གང་བྱང་ཆུབ་སེམས་དཔས་རྟག་པར་རྒྱུན་དུ་མངོན་པར་བསྲུང་བར་བྱ་བའི་ཆོས་གཅིག་པོ་དེ་གང་ཞེ་ན། རིགས་ཀྱི་བུ། བྱང་ཆུབ་སེམས་དཔས་གང་བདག་མི་འདོད་པ་དེ་གཞན་དག་ལ་མི་བྱའོ། །རིགས་ཀྱི་བུ། བྱང་ཆུབ་སེམས་དཔའི་གང་ལ་ལ་ཞིག་ཆོས་གཅིག་པོ་དེ་བསྲུངས་ན། དེས་དེ་བཞིན་གཤེགས་པའི་བསླབ་པའི་གཞི་ཐམས་ཅད་སྲུང་བར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ། གང་བདག་གི་སྲོག་ཕངས་པར་འཛིན་པ་དེ་སྲོག་མི་གཅོད་དོ། །གང་བདག་གི་ནོར་ཕངས་པར་འཛིན་པ་དེ་མ་བྱིན་ 28a ༄#། །པར་མི་ལེན་ཏོ། །གང་བདག་གི་ཆུང་མ་ཕངས་པར་འཛིན་པ་དེ་གཞན་གྱི་ཆུང་མའི་གན་དུ་མི་འགྲོའོ། །རིགས་ཀྱི་བུ། དེ་ལ་སོགས་ཏེ། གང་ལ་ལ་ཞིག་འདི་སྙམ་དུ་དེ་བཞིན་གཤེགས་པའི་བཀའ་བཞིན་དུ་བྱའོ་སྙམ་དུ་སེམས་པ་དེས་ཆོས་གཅིག་པོ་འདི་བསྲུང་བར་བྱའོ། །ཞེས་བཤད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ། གང་ལ་ལ་བླ་ན་མེད་པ་ཡང་དག་པར་རྫོགས་པར་བྱང་ཆུབ་དོན་དུ་གཉེར་བ་དེ་ཐམས་ཅད་ནི། རང་གི་བདེ་བའི་རྒྱུ་དོན་དུ་གཉེར་གྱི། སུའང་བདག་སྡུག་བསྔལ་བ་མི་འདོད་དོ། །འགྲོ་བ་ནི། བདེ་བ་འདོད་ཅེས་བྱ་བའི་ཐ་ཚིག་གོ་།གང་ཁྱེད་ཅག་མི་འདོད་པ་དེ་གཞན་དག་ལ་མ་བྱེད་ཅིག་ཅེས་ང་སྨྲའོ། །རིགས་ཀྱི་བུ། འདི་ནི། གང་བྱང་ཆུབ་སེམས་དཔས་རྟག་པར་རྒྱུན་དུ་མངོན་པར་བསྲུང་བར་བྱ་བའི་ཆོས་གཅིག་གོ་།རིགས་ཀྱི་བུ། གང་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་པའི་ཆོས་གཅིག་པོ་དེ་གང་ཡིན་ཞེས་དེ་སྐད་ཟེར་བ་ནི། རིགས་ཀྱི་བུ། གང་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་པའི་ཆོས་གཅིག་པོ་དེ་གང་ཡང་མེད་དོ།། རིགས་ཀྱི་བུ། གང་ལ་ཆོས་གང་ཡང་རྟོགས་པ་མེད་པ་དེ། དེ་བཞིན་གཤེགས་པས་མངོན་པར་རྫོགས་པར་སངས་རྒྱས་པའོ། །རིགས་ཀྱི་བུ། ཡང་དེ་བཞིན་གཤེགས་ 28b པས་ཆོས་ཐམས་ཅད་མ་སྐྱེས་པར་ཐུགས་སུ་ཆུད་དོ། །དེ་བཞིན་གཤེགས་པས་ཆོས་ཐམས་ཅད་འགག་པ་མེད་པར་ཐུགས་སུ་ཆུད་དོ། །རིགས་ཀྱི་བུ། ཡང་དེ་བཞིན་གཤེགས་པས་ཆོས་ཐམས་ཅད་མཐའ་གཉིས་ལས་གྲོལ་བར་ཐུགས་སུ་ཆུད་དོ། །རིགས་ཀྱི་བུ། དེ་བཞིན་གཤེགས་པས་ཆོས་ཐམས་ཅད་མ་བྱུང་བར་ཐུགས་སུ་ཆུད་དོ། །རིགས་ཀྱི་བུ། དེ་བཞིན་གཤེགས་པས་ལས་བདག་གིར་བྱ་བར་ཐུགས་སུ་ཆུད་དོ། །དེ་བཞིན་གཤེགས་པས་ཆོས་ཐམས་ཅད་རྒྱུ་དང་རྐྱེན་ལ་རག་ལས་པར་ཐུགས་སུ་ཆུད་དོ། །རིགས་ཀྱི་བུ། དེ་བཞིན་གཤེགས་པས་རྒྱུ་དང་རྐྱེན་ནི། གློག་དང་འདྲ་བར་ཐུགས་སུ་ཆུད་དོ། །དེ་བཞིན་གཤེགས་པས་རྒྱུ་དང་རྐྱེན་མེད་པ་ལས་སྐྱེ་བ་མེད་པར་ཐུགས་སུ་ཆུད་དོ། །དེ་ལྟར་དེ་བཞིན་གཤེགས་པས་རྣམ་པར་སྣང་མཛད་ཀྱི་སྙིང་པོའི་ཆོས་ཉིད་ཐུགས་སུ་ཆུད་དོ། །ཅིའི་ཕྱིར་ཡོངས་སུ་རྟོག་པ་དག་རྣམ་པར་སྣང་མཛད་ཀྱི་སྙིང་པོ་ཞེས་སྨྲ་ཞེ་ན། རིགས་ཀྱི་བུ།་འཇིག་རྟེན་པ་དང ། འཇིག་རྟེན་ལས་འདས་པའི་ཡེ་ཤེས་ལ་སོགས་པ་གང་དག་ཅི་འབྱུང་བའི་མངལ་དེ་ཡིན་པའི་ཕྱིར་རོ། །གང་གི་ཚེ་ཡེ་ཤེས་དེ་རང་བཞིན་ལ་ཡོངས་སུ་རྟོག་པ་དེའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པའི་ནི་མངལ་དུ་ཆུད་པ་ཡིན་ཏེ། དེའི་ཚེ་རྣམ་པར་སྣང་མཛད་ཀྱི་སྙིང་པོ་ཞེས་བྱ་བའི་མིང་ཐོབ་བོ། །རིགས་ཀྱི་བུ། ཡང་དེ་བཞིན་གཤེགས་ 29a ༄#། །པས་ཆོས་ཐམས་ཅད་སྒྱུ་མ་དང་སྨིག་རྒྱུ་དང་འདྲ་བར་ཐུགས་སུ་ཆུད་དོ། །དེ་བཞིན་གཤེགས་པས་རང་བཞིན་གྱིས་རྣམ་པར་གྲོལ་བའི་རང་གི་ཆོས་ཉིད་ཐུགས་སུ་ཆུད་དོ། །རྣམ་པར་གྲོལ་བ་གང་ཡིན་པ་དེ་རྣམ་པར་སྣང་མཛད་ཀྱི་སྙིང་པོའི་ཆོས་ཉིད་དོ། །རིགས་ཀྱི་བུ། ཡང་དེ་བཞིན་གཤེགས་པས་ཆོས་ཀྱི་སྒོ་གཅིག་ཐུགས་སུ་ཆུད་དོ། ། རིགས་ཀྱི་བུ། གང་ལ་འགྲོ་བ་མེད་པ་དང ། འོང་བ་མེད་པ་དང ། རྒྱུ་མེད་པ་དང ། རྐྱེན་མེད་པ་དང ། འཆི་འཕོ་མེད་པ་དང ། སྐྱེ་བ་མེད་པ་དང ། བླང་ང་མེད་པ་དང ། དོར་བ་མེད་པ་དང ། འགྲིབ་པ་མེད་པ་དང ། འཕེལ་བ་མེད་པ་དང ། རིགས་ཀྱི་བུ། གང་རང་བཞིན་གྱིས་རང་བཞིན་མེད་དེ། གང་ལ་དཔེར་བྱ་བར་མི་ནུས་པ་དང ། གང་ཡི་གེ་དང་ངེས་པའི་ཚིག་གིས་བརྗོད་པར་མི་ནུས་པའི་ཆོས་ཀྱི་སྒོ་གཅིག་པོ་དེ་དེ་བཞིན་གཤེགས་པས་ཐུགས་སུ་ཆུད་དོ། །བཀོད་པའི་རྒྱལ་པོ་བསྟན་པ་ཡི་གེ་མེད་པའི་ཟ་མ་ཏོག་རྣམ་པར་སྣང་མཛད་ཀྱི་སྙིང་པོའི་ཆོས་ཀྱི་རྣམ་གྲངས་འདི་བཤད་པ་ན་ས་བཅུ་ལ་གནས་པའི་བྱང་ཆུབ་སེམས་དཔའི་མིག་ལ་རྡུལ་ཕྲ་རབ་ཇི་སྙེད་སྣང་བར་འགྱུར་བ་དེ་སྙེད་ཀྱི་སེམས་ཅན་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་སྙེད་ཅིག་གིས་དགྲ་བཅོམ་པ་ཉིད་མངོན་དུ་བྱས་སོ། །དེ་བས་ཆེས་མང་བའི་སེམས་ཅན་ 29b དང ། སེམས་ཅན་དམྱལ་བ་ནས་ཤི་འཕོས་ནས་ལྷ་དང་མིར་སྐྱེས་སོ། །བྱང་ཆུབ་སེམས་དཔའ་དུ་མ་ནི། ས་ཐོབ་པར་གྱུར་ཏོ། །བྱང་ཆུབ་སེམས་དཔའ་དུ་མ་ནི། ཏིང་ངེ་འཛིན་བརྒྱ་སྟོང་མངོན་དུ་གྱུར་ཏོ། །མང་དུ་ཅི་དགོས་ཏེ་གཏམ་འདི་ནི། སུ་ལའང་དོན་མེད་པར་མ་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན།་ཁྱོད་ངའི་ཆོས་ཀྱི་ཚུལ་འདི་གཟུང་བར་སྤྲོ་བར་གྱིས་ཤིག ། བཅོམ་ལྡན་འདས་ཀྱིས་བཀའ་སྩལ་མ་ཐག་ཏུ་སངས་རྒྱས་ཀྱི་མཐུས་འཁོར་དེ་ནས་བྱང་ཆུབ་སེམས་དཔའ་བྱེ་བ་ཕྲག་དགུ་སྟན་ལས་ལངས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པའི་ཆོས་ཀྱི་ཚུལ་འདི་བདག་ཅག་གིས་གཟུང་བར་བགྱིའོ། །སླད་མའི་ཚེ་སླད་མའི་དུས་ན་བྱང་ཆུབ་སེམས་དཔའི་སྣོད་དུ་འཚལ་བར་བགྱིས་ལ། འཇིག་རྟེན་གྱི་ཁམས་མི་མཇེད་དུ་ཡང་དག་པར་བཤད་པར་བགྱིའོ། །རྒྱལ་པོ་ཆེན་པོ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་གང་དག་འདི་ལྟ་བུའི་ཆོས་ཀྱི་སྣོད་དུ་གྱུར་པ་འབྱུང་བར་འགྱུར་བའི་བྱང་ཆུབ་སེམས་དཔའ་དེ་དག་གི་བསམ་པ་ཐམས་ཅད་ཡོངས་སུ་རྫོགས་པར་བགྱིའོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེ་ལ་གཟིགས་ནས་བཀའ་སྩལ་པ། གྲོགས་ 30a ༄#། །པོ་དག་།ཤིན་ཏུ་རྒྱས་པ་བསྡུས་པ་ཡི་གེ་མེད་པའི་ཟ་མ་ཏོག་རྣམ་པར་སྣང་མཛད་ཀྱི་སྙིང་པོའི་ཆོས་ཀྱི་རྣམ་གྲངས་འདི་ཉན་པ་དེ་དག་ནི། དགེ་བའི་རྩ་བ་ཆུང་ངུ་དང་ལྡན་པར་མི་འགྱུར་རོ། །དེ་ཅིའི་ཕྱིར་ཞེ་ན། ང་ལ་སྐྱེས་བུ་དམ་པ་དེ་དག་གིས་བཀུར་སྟིར་བྱས། བླ་མར་བྱས། བཙུན་པར་བྱས་པའི་ཕྱིར་རོ། །རིགས་ཀྱི་བུ། དེ་དག་ནི།་ངའི་བྱང་ཆུབ་ཕྲག་པ་ལ་ཐོགས་པར་འགྱུར་རོ། །དེ་དག་གི་སྤོབས་པ་ཕུན་སུམ་ཚོགས་པ་རྒྱུན་མི་འཆད་པར་འགྱུར་རོ། །དེ་དག་གི་སངས་རྒྱས་ཀྱི་ཞིང་ཤིན་ཏུ་ཡོངས་སུ་དག་པར་འགྱུར་རོ། །འཆི་བའི་དུས་ཀྱི་ཚེ་ནའང་དེ་བཞིན་གཤེགས་པ་འོད་དཔག་མེད་ཉན་ཐོས་ཀྱི་དགེ་འདུན་གྱིས་ཡོངས་སུ་བསྐོར་ཅིང་བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟས་ནས་མདུན་ན་བཞུགས་པར་གྱུར་ཏེ་མཐོང་བར་འགྱུར་རོ། །ངའང་བྱང་ཆུབ་སེམས་དཔའ་འདི་དག་ཉིད་དང་ཐབས་ཅིག་ཏུ་རིའི་རྒྱལ་པོ་བྱ་རྒོད་ཀྱི་ཕུང་པོ་ལ་གནས་པར་མཐོང་བར་འགྱུར་རོ། །རིགས་ཀྱི་བུ། དེ་དག་གི་ཆོས་ཀྱི་མཛོད་མི་ཟད་པར་འགྱུར་རོ། །དེ་དག་ཚེ་རབས་དྲན་པར་འགྱུར་རོ། །ངན་སོང་རྣམས་སུ་སྐྱེ་བར་མི་འགྱུར་རོ། །རིགས་ཀྱི་བུ། ང་ནི། འཇིག་རྟེན་ཐམས་ཅད་དང་མི་མཐུན་པའི་ཚིག་འདི་སྨྲ་སྟེ། རིགས་ཀྱི་བུ། གལ་ཏེ་མཚམས་མེད་པ་ལྔ་བྱེད་པར་འགྱུར་ལ། ཆོས་ཀྱི་རྣམ་གྲངས་ 30b འདི་ལུས་ལ་བཏགས་སམ། ཡི་གེར་འབྲིའམ། ཀློག་གམ། ཀུན་ཆུབ་པར་བྱེད་ན། ད་ནི། ངན་སོང་ངན་འགྲོ་ལོག་པར་ལྟུང་བར་འགྲོ་བར་ངས་མ་མཐོང་ངོ ། །བྱང་ཆུབ་སེམས་དཔའ་དེ་སངས་རྒྱས་ཐམས་ཅད་ཀྱིས་དབང་བསྐུར་ཞིང་མིག་ལྔ་ཐོབ་པར་འགྱུར་རོ། །དབང་པོ་ཉམས་པར་མི་འགྱུར་རོ། །སངས་རྒྱས་ཐམས་ཅད་ཀྱིས་ཡོངས་སུ་བཟུང་ངོ ། །བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་བཟུང་ངོ ། །དེའི་ལས་ཚད་མེད་པ་རྣམ་པར་དག་པར་འགྱུར་རོ། །རིགས་ཀྱི་བུ། ཚིག་འདི་ནི། ཐ་མར་སྨྲ་སྟེ། དེ་མངོན་པར་རྫོགས་པར་སངས་རྒྱས་པར་ངས་མཐོང་ངོ ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཁྱད་པར་སེམས་ལ་སོགས་པ་བྱང་ཆུབ་སེམས་དཔའ་རྣམས་དང ། བརྒྱ་བྱིན་ལ་སོགས་པ་ལྷའི་བུ་རྣམས་དང ། རྒྱལ་པོ་ཆེན་པོ་བཞི་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཡི་གེ་མེད་པའི་ཟ་མ་ཏོག་རྣམ་པར་སྣང་མཛད་ཀྱི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། མུ་ནི་ཝརྨ་དང ། ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེས་ཞུས་ནས་གཏན་ལ་ཕབ་པ། |