rKTs


H258

(e-text produced by ACIP)

see text in transliteration
145a
།།རྒྱ་གར་སྐད་དུ། ཨཱརྱ་སཱུརྱ་གརྦྷ་ནཱ་མ་མ་ཧཱ་བཻ་བུ་ལྱཾ་སཱུ་ཏྲ། བོད་སྐད་དུ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལནྟ་ཀ་གནས་པ་ན་བཞུགས་ཏེ། གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་གྲངས་མེད་དཔག་ཏུ་མེད་པ་དག་ནས་དེར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་སོ། །དེ་བཞིན་དུ་ཕྱོགས་
145b
བཅུའི་སངས་རྒྱས་ཀྱི་ཞིང་གཞན་དང་གཞན་དག་ནས་དེར་འདུས་ཏེ་ལྷགས་པའི་ཉན་ཐོས་ཆེན་པོ་གྲངས་མེད། དཔག་ཏུ་མེད། བརྗོད་དུ་མེད་བདག་གིས་ཀྱང་ཡོངས་སུ་བསྐོར་ཅིང་བདུན་གྱིས་བལྟས་སོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་གཞན་དང་གཞན་དག་ནས་འདིར་ལྷགས་པ་བརྒྱ་བྱིན་དང ། ཚངས་པའི་དབང་པོ་དང ། ལྷའི་དབང་པོ་དང ། ཀླུའི་དབང་པོ་དང ། གནོད་སྦྱིན་གྱི་དབང་པོ་དང ། དྲི་ཟའི་དབང་པོ་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོ་དང ། མིའམ་ཅིའི་དབང་པོ་དང ། ལྟོ་འཕྱེ་ཆེན་པོའི་དབང་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཀྱང་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའ་ལ་འགྲོ་བའི་ལམ་གང་བར་གྱུར་ཏོ། །དེ་བཞིན་དུ་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་གཞན་དང་གཞན་དག་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་གཞན་དང་གཞན་གྲངས་མེད་དཔག་ཏུ་མེད་པ་དག་ཀྱང་ལྷགས་ནས་བཅོམ་ལྡན་འདས་ལ་གྱེན་དུ་ལྟ་ཞིང ། བཅོམ་ལྡན་འདས་རིང་པོ་མི་ཐོགས་པར་མཐར་ཕྱིན་པ། ནམ་མཁའ་
146a
༄#། །ལྟར་སྣང་བ། བྱང་ཆུབ་སེམས་དཔའི་སྤྱོད་པ་རབ་ཏུ་འབྱེད་པ། དབུགས་རྡུབ་པ་དང་འབྱུང་བ་དྲན་པ། འཆི་བ་མེད་པའི་སྒོ། ཚངས་པའི་གནས་པ་ལུང་བསྟན་པ་སྟོན་པ་ན་ཅང་མི་སྨྲ་བར་འཁོད་དེ། ཐམས་ཅད་དང་ལྡན་པའི་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའི་ལམ་གང་བར་གྱུར་ཅིང ། ད་དུང་བཅོམ་ལྡན་འདས་ཀྱི་ཆོས་ཀྱི་ཆར་གྱི་སྟོན་པས་ཚིམ་པར་མ་གྱུར་ནས་ཐལ་མོ་དག་རབ་ཏུ་སྦྱར་ཏེ་བཅོམ་ལྡན་འདས་ཁོ་ན་ལ་བལྟ་ཞིང་འཁོད་པ་ནི། དཔེར་ན། ནད་པ་དག་སྨན་པ་ལ་ལྟ་བར་བྱེད་པ་བཞིན་དང ། མུན་པས་ཁེབས་པ་དག་སྣང་བ་ལྟ་བར་བྱེད་པ་བཞིན་དང ། ཆུ་བོས་ཁྱེར་བ་དག་ཆུ་འགྲམ་དུ་ལྟ་བར་བྱེད་པ་བཞིན་དང ། སྡུག་བསྔལ་བར་གྱུར་པ་དང ། སྐྱབས་ལ་ལྟ་བར་བྱེད་པ་བཞིན་ཏེ། ད་ལྟར་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའི་ལམ་བྱང་ཆུབ་སེམས་དཔའ་སེམས་དཔའ་ཆེན་པོ་དག་དང ། ཉན་ཐོས་དག་དང ། དབང་པོ་བརྒྱ་བྱིན་དག་ནས་ལྟོ་འཕྱེ་ཆེན་པོའི་དབང་པོ་དག་གི་བར་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་གཞན་དང་གཞན་དག་ནས་མི་དང་མ་ཡིན་པ་རྣམས་
146b
གཞན་དང་གཞན་དག་གི་བར་བཅོམ་ལྡན་འདས་ཆོས་དང་ལྡན་པ་ཆོས་ཀྱི་རྒྱལ་པོ་ལ་ལྟ་ཞིང་ཐལ་མོ་རབ་ཏུ་སྦྱར་ཏེ་ཅང་མི་སྨྲ་བར་འཁོད་པར་གྱུར་ཏོ། །དེའི་ཚེ་ཚངས་པ་ཆེན་པོ་པདྨ་འབར་བའི་དཔལ་ཞེས་བྱ་བ་སངས་རྒྱས་མང་པོ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། ཆོས་ལ་དམིགས་པའི་བྱམས་པ་ཤིན་ཏུ་ཡོངས་སུ་སྦྱང་བ་བྱས་པར་གྱུར་ཏོ། །དེ་ནས་ཚངས་པ་ཆེན་པོ་པདྨ་འབར་བའི་དཔལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་བརྗོད་པ་འདིས་ཆོས་བཤད་པར་གསོལ་བ་བཏབ་བོ། །རིང་དུ་གཤེགས་ཤིང་མྱུར་བའི་རྒྱུན་དང་ལྡན། །ཟད་པ་ལྷུར་མཛད་མི་གཡོ་འོད་གསལ་བ། །རྟོགས་པ་ཐམས་ཅད་སྐྱེད་པར་མཛད་པ་པོ། །ཁྱོད་གསུང་རབ་ཞི་རྒྱུ་སྐར་ཚུལ་མཁྱེན་མཁས། །དབུགས་རྡུབ་པ་དང་འབྱུང་བ་དྲན་པ་མཁྱེན། །ཚངས་པའི་གནས་པ་བཞི་པོ་དག་དང་ལྡན། །སྲིད་པ་གསུམ་པོ་ཇི་ལྟར་དག་འགྱུར་བར། །སེམས་ཅན་འགྲོ་བ་སྤོང་བར་མཛད་པ་པོ། །ཚུལ་
147a
༄#། །གཅིག་ལྡན་པ་ཉིད་ཀྱི་མཁྱེན་མངའ་བ། །ལྷ་མི་རྣམ་པ་མང་པོ་ཁྲི་དག་ཀྱང ། །སོ་མ་ཉི་རྒལ་མཛད་དགེ་བརྙེས་ཆུ་བོ་རྒལ། །བདེ་འགྲོའི་མཁྱེན་པ་མྱུར་དང་ལྡན་པ་པོ། །བྱང་ཆུབ་སྤྱོད་དང་སངས་རྒྱས་ཆོས་མངོན་སུམ། །སེམས་གཡོ་སེམས་ཅན་ཁ་ཅིག་འདོད་ཀླུང་ལྷུང ། །མུན་པས་ཁེབས་ཤིང་མིག་དང་མི་ལྡན་པའི། །སྡུག་བསྔལ་ཐམས་ཅད་བཅོམ་པར་གྱུར་ལགས་པ། །མཐོས་དགེ་བྲལ་སློབ་དཔོན་མཁས་ལྡན་པའི། །སྐྱེ་བོ་བྲལ་ལ་མི་དབང་ཐུགས་རྗེ་སྐྱེད། །མཉམ་པའི་ཆོས་ཉན་སྐྱེ་བའི་ཕ་རོལ་མཆི། །སྲིད་པ་གཅོད་པ་བཤད་པར་མཛད་དུ་གསོལ། །སྐྱེ་རླུང་ཕ་རོལ་གཤེགས་ཐུབ་ཐུགས་རྗེས་གསུངས། །བློ་འཆལ་སྐྱེ་མང་སྲེད་པའི་དྲ་བའི་ལམ། །དེ་དག་ཐམས་ཅད་ཉོན་མོངས་རྩ་བ་ཅན། །དེར་ནི་སེམས་ཅན་འཁྱམས་འགྱུར་གཅད་དུ་གསོལ།། གང་དུ་སྡུག་བསྔལ་རབ་ཞི་དབང་དྲུག་དང ། །ཡིད་ཀྱང་ཞི་འགྱུར་སྲེད་སྐྱོན་རྒྱལ་བ་གསུངས། །སྲེད་པ་བྲལ་བ་སྲེད་རྒྱུ་མི་མངའ་བ། །སེམས་ཅན་གདུང་བ་དཔལ་ཀུན་བྲལ་གྱུར་པ། །དེ་སླད་ཐུབ་པ་ཐུགས་བརྩེ་བ་ཡི་རྒྱུས། །སྲེད་པ་ཡི་ནི་ཆུ་ཀླུང་སྐེམ་མཛད་པ། །མྱུར་དུ་བདེ་ཞིང་འཆི་བ་མ་མཆིས་པའི། །ཆོས་ཀྱང་སྲེད་པ་
147b
གཅོད་པ་བཤད་པར་གསོལ། །དེ་ནས་བཅོམ་ལྡན་འདས་ཀྱིས་ཚངས་པ་པདྨ་འབར་བའི་དཔལ་ལ་འདི་སྐད་ཅེས་བཀའ་སྩལ་ཏོ། །གང་དག་སྔོན་ཆད་ཕ་རོལ་ཕྱིན། །སྤྱོད་པ་སྤྱད་ཅིང་སྤྱོད་འགྱུར་བ། །དེ་དག་ཉན་ཐོས་ཆོས་རྣམས་ལ། །ནམ་ཡང་དགའ་བར་མི་བྱ་སྟེ། །སངས་རྒྱས་ཆོས་ལས་ཉམས་འགྱུར་བའི། །ལྟུང་བ་གཉིས་པ་གཞན་མེད་དེ། །དེ་ནི་ཡང་དང་ཡང་དུ་ཡང ། །གཉི་གར་སེམས་ནི་འཇུག་པ་ཡིན། །ཁྲོ་དང་ཉན་ཐོས་ཆོས་རྣམས་དང ། །རྐྱེན་གྱི་བྱང་ཆུབ་འཇུག་པ་ཡིན། ཆོས་གསུམ་རྣམ་པར་སྤངས་པས་ན། །སངས་རྒྱས་ཆོས་རྣམས་རྫོགས་པར་འགྱུར། །སྐྱེ་གནས་བཞི་ལྡན་སེམས་ཅན་འདི། །སངས་རྒྱས་ཞིང་འདིར་ལྷགས་པ་དང ། །ཐམས་ཅད་འདོད་པ་རྟེན་མི་བྱེད། །ཐམས་ཅད་མི་སྡུག་ཐོབ་པ་ཡིན། །འདི་ན་སེམས་ཅན་མཁས་པ་གང ། །བྱང་ཆུབ་མཆོག་གི་ཕྱིར་ཞུགས་ཤིང ། །གང་བློ་གཟུངས་དང་བཟོད་པ་ལ། ། བརྩོན་ཞིང་ལེགས་པར་གོམས་བྱས་ལ། །དབང་པོ་དྲུག་གི་སྒོ་བསྡམས་ཤིང ། །སྐྱིལ་མོ་ཀྲུང་གིས་དྲན་བཞག་ནས། །རང་གི་སྤྱོད་ཡུལ་ས་ནོན་པ། །ཕྱི་མའི་དུས་ཀྱི་དེ་བཞིན་གཤེགས། །ནོར་བདུན་རབ་ཏུ་རྫོགས་པའང་ཡིན། །འདིར་ནི་མི་སྡུག་ཚུལ་བཤད་ན། །ཀུན་གཞི་གང་ཡིན་སེམས་ཅན་གྱི། །འཆིང་བ་བརྟན་པ་འདིར་
148a
༄#། །བཤད་འགྱུར། །ངས་ནི་ཆོས་ཀྱི་སེར་སྣ་སྤངས། །སེམས་ཅན་སྲུང་ཕྱིར་མ་བཤད་དེ། །འདི་ལ་བྱང་ཆུབ་སེམས་དཔའ་ཡིས། །བྱང་ཆུབ་ཕྱིར་སེམས་འདིར་མ་བཏང ། །ཕྱོགས་བཅུའི་སངས་རྒྱས་དེ་དག་གིས། །ཆོས་འདི་ཡུན་རིང་གནས་བྱ་ཞེས། །ས་འདི་ཡོངས་སུ་སྤྱད་མཛད་ཅིང ། །ས་འདི་བྱིན་གྱིས་བརླབས་པ་ཡིན། །དེ་བཞིན་དུ་ནི་ཁྱོད་ཀྱིས་ཀྱང ། །ཞིང་འདི་ལ་ནི་རྩེ་བར་བྱོས། །དེ་བཞིན་བཟོད་པ་དག་གིས་རྩེས། །བསྡམས་ནས་ཡུན་རིང་གནས་པར་བྱོས། །ཉན་ཐོས་ཐེག་པ་ངས་བཤད་དེ། །སེམས་ཅན་ཆགས་ལས་ཐར་བྱ་ཞིང ། །ཕུང་པོ་དག་དང་ཁམས་རྣམས་དང ། །སྐྱེ་མཆེད་སྟོང་པ་ངས་བཤད་དེ། །ཞི་གནས་རྣམ་པ་བཅུ་གསུམ་དང ། །ལྷག་མཐོང་ང་ཡིས་བཤད་བྱ་སྟེ། །འདོད་པའི་འཆིང་བས་དམ་བཅིངས་པའི། །སེམས་ཅན་དེ་ཡིས་རྣམ་དག་འགྱུར། །སེམས་ཅན་རྣམས་ལ་སྙིང་བརྩེ་བས། །ཉན་ཐོས་རྣམས་ཀྱི་བདེན་པ་བཞི། །ཆོས་རྣམས་རྟག་ཏུ་ཡུན་གནས་དང ། །ཟག་པ་མེད་ཕྱིར་ངས་བཤད་དོ། །ཉན་ཐོས་བདེན་པས་འདུལ་བ་ནི། །སྲིད་པའི་མཚོ་ལས་ངས་བསྒྲལ་ལོ། །བྱང་ཆུབ་སྤྱོད་པ་ཐམས་ཅད་ཀྱང ། །ཕྱི་ནས་ཁྱེད་
148b
ལ་བསྟན་པར་བྱའོ། །དེ་ནས་དེའི་ཚེ་ཐམས་ཅད་དང་ལྡན་པའི་མི་མཇེད་ཀྱི་སངས་རྒྱས་ཀྱི་ཞིང་དུ་གཏོགས་པའི་སེམས་ཅན་རྣམས་འདི་སྙམ་དུ་སེམས་ཏེ། ཀྱེ་མ་ད་ལྟར་དེ་བཞིན་གཤེགས་པ་འདི་ནི། ཉན་ཐོས་ཀྱི་གཏམ་ཡང་དག་པར་རབ་ཏུ་སྟོན་པར་མཛད་ཀྱི། ཐེག་པ་ཆེན་པོའི་གཏམ་ནི། མི་མཛད་དོ་སྙམ་མོ། །དེ་ནས་དེའི་ཚེ་བྱང་ཆུབ་སེམས་དཔའ་དེ་དག་ཐམས་ཅད་འདི་སྙམ་དུ་སེམས་ཏེ། ཀྱེ་མ་ད་ལྟར་དེ་བཞིན་གཤེགས་པ་འདི་ནི། སངས་རྒྱས་ཀྱི་ཞིང་འདིར་ས་ཡོངས་སུ་སྤྱད་པའི་ཕྱིར་དང ། མ་འོངས་པའི་དུས་ན་ཆོས་ཀྱི་ཚུལ་རིང་དུ་གནས་པར་བྱ་བའི་ཕྱིར་དང ། ད་ལྟར་སངས་རྒྱས་ཀྱི་ཞིང་འདིར་གང་དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱ་བའི་ཕྱིར་དང ། མ་འོངས་པའི་དུས་ན་ལྷ་དང ། ཀླུ་དང ། གནོད་སྦྱིན་དང ། སྤྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། དད་པ་རྣམས་ཕྱིར་ཞིང་འཕེལ་བར་བྱ་བའི་ཕྱིར་དང ། སེམས་ཅན་ཆོས་ལ་མངོན་པར་བརྩོན་པ་དག་དང ། ཆོས་ལ་གནས་པ་དག་དང ། ཡོན་ཏན་གྱིས་ཕྱུག་པ་དག་དང ། ཚུལ་ཁྲིམས་ཀྱི་དྲི་དང་ཡང་
149a
༄#། །དག་པར་ལྡན་པ་རྣམས་བདེ་བ་ལ་རེག་པ་དང ། རྣམ་པར་མཐོ་འཚམ་པ་མེད་པར་བྱ་བའི་ཕྱིར་དང ། བྱད་གྲོལ་གྱི་བདེ་བ་ཡོངས་སུ་རྫོགས་པར་བྱ་བའི་ཕྱིར་དང ། ཅི་ནས་སངས་རྒྱས་ཀྱི་ཞིང་འདི་ཤིན་ཏུ་ཡོན་ཏན་དག་གིས་བསྒོ་བར་བྱ་བའི་ཕྱིར་དང ། ཕྱོགས་བཅུ་ན་གནས་པའི་སངས་རྒྱས་ཀྱི་ཞིང་གཞན་ཐམས་ཅད་ཀྱང་བསྒོ་བའི་འོས་སུ་གྱུར་པ་དང ། བླ་མ་ལ་གུས་པ་དང ། ཕྱག་བྱ་བའི་འོས་སུ་གྱུར་པར་བྱ་བའི་ཕྱིར་བདག་ཅག་ནང་དུ་ཡང་དག་པར་འཇོག་པར་བཞེད་པས་མ་ལ་བདག་ཅག་གིས་ང་དེ་བཞིན་གཤེགས་པའི་དགོངས་པ་ཡོངས་སུ་རྫོགས་པར་བྱ་སྟེ ། བདག་ཅག་ཐམས་ཅད་ཀྱིས་སའི་སྟེང་དུ་སྐྱིལ་མོ་ཀྲུང་གིས་འཁོད་པར་བྱ་ཞིང ། རང་རང་གི་རྣམ་པ་སྣ་ཚོགས་ཀྱི་མཆོག་ཐམས་ཅད་དང་ལྡན་པའི་བཟོད་པ་དང ། གཟུངས་དང ། ཏིང་ངེ་འཛིན་དང ། རྣལ་འབྱོར་དག་གིས་གནས་པ་དག་ཏུ་བྱ་གོར་མ་ཆག་གོ་སྙམ་མོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསྐལ་པ་བརྒྱས་ངེས་པར་བྱུང་བ་དག་དང ། གང་དག་ས་བཅུ་དག་དང ། གང་དག་མི་སྐྱེ་བའི་ཆོས་ཀྱི་བཟོད་པ་ལ་གནས་པའི་བར་དག་
149b
དང ། གང་དག་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་གཞན་ལ་རག་མ་ལས་པའི་ཡེ་ཤེས་ལ་མཁས་པ་དག་དང ། མི་འཇིགས་པ་ཐོབ་པ་དག་གི་བར་དེ་དག་ཐམས་ཅད་ས་སྟེང་འདིར་སྐྱིལ་མོ་ཀྲུང་གིས་འཁོད་པར་གྱུར་ཏོ། །དེ་བཞིན་དུ་རང་རང་གི་རྣམ་པ་སྣ་ཚོགས་ཀྱི་མཆོག་ཐམས་ཅད་ཀྱི་བཟོད་པ་དང ། གཟུངས་དང ། ཏིང་ངེ་འཛིན་དག་ལ་མཉམ་པར་བཞག་པ་དག་ཏུ་གྱུར་ཏོ། །ཡང་དེའི་ཚེ་བསོད་ནམས་ཀྱི་སྟོབས་ཇི་ལྟ་བ་བཞིན་དུ་རྒྱུ་མཐུན་པའི་རྒྱུའི་སྟོབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཉམ་པར་གཞོག་པ་དེ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་བྱེད་པ་དེ་དག་ལས་ཁ་ཅིག་གི་ལུས་ལས་འོད་འདི་ལྟ་བུ་བྱུང་སྟེ། དཔེར་ན། མར་མེའི་འོད་ལྟ་བུའོ། །ཁ་ཅིག་གི་ནི། སྐར་མདའ་དང་མཉམ་པ་དག་གོ་།ཁ་ཅིག་གི་ནི། བརྒྱ་བྱིན་དང་མཉམ་པ་དག་གོ་།ཁ་ཅིག་གི་ནི། མི་མཇེད་ཀྱི་བདག་པོ་ཚངས་པ་དང་མཉམ་པ་ནས་ཁ་ཅིག་གི་ནི། ཟླ་བ་དང་མཉམ་པའི་བར་དག་གོ་།ཁ་ཅིག་གི་ནི།་ཉི་མ་དང་མཉམ་པ་དག་གོ་།ཁ་ཅིག་གི་ནི། ཉི་མ་གཅིག་དང་མཉམ་པ་དག་གོ་།ཁ་ཅིག་གི་ནི། ཉི་མ་གསུམ་དང་མཉམ་པ་དག་གོ་།ཁ་ཅིག་གི་ནི །
150a
༄#། །ཉི་མ་ལྔ་དང་མཉམ་པ་དག་གོ་།ཁ་ཅིག་གི་ནི། ཉི་མ་སྟོང་དང་མཉམ་པའི་བར་དག་གོ་།ཁ་ཅིག་ནི། ལུས་ལས་ནི།་ཉི་མ་བྱེ་བ་རྒྱ་སྟོང་དང་མཉམ་པའི་འོད་དག་བྱུང་སྟེ། མི་མཇེད་ཀྱི་སངས་རྒྱས་ཀྱི་ཞིང་འདི་ཐམས་ཅད་སྔོན་མ་མཐོང་མ་ཐོས་པའི་སྣང་བ་ཆེན་པོ་རྒྱ་ཆེ་བ་དེ་ལྟ་བུས་འཇིག་རྟེན་ཁྱབ་པར་གྱུར་ཏོ། །དེ་དག་གི་ལུས་ལས་མཆོག་ཏུ་སེམས་ཅན་གཞན་དག་གི་ལུས་དང་སེམས་ཀྱི་བདེ་བ་ལ་རེག་པ་དང ། དགའ་བ་དང ། རབ་ཏུ་ཚིམ་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། ལྟ་བ་ངན་པ་ཐམས་ཅད་རབ་ཏུ་ཞི་བར་བྱེད་པ།་ལུས་ཀྱི་གནས་ངན་ལེན་ཐམས་ཅད་རབ་ཏུ་ཞི་བར་བྱེད་པ། བཀྲེས་པ་དང་སྐོམ་པ་ཐམས་ཅད་རབ་ཏུ་ཞི་བར་བྱེད་པ། འདོད་པ་ཐམས་ཅད་རབ་ཏུ་ཞི་བར་བྱེད་པ། །ཁྲོ་བ་ཐམས་ཅད་དང ། འཇིག་པ་ཐམས་ཅད་དང ། ཉོན་མོངས་པ་དང ། འཆིང་བ་ཐམས་ཅད་རབ་ཏུ་ཞི་བར་བྱེད་པའི་འོད་བྱུང་སྟེ། སངས་རྒྱས་ཀྱི་ཞིང་འདི་སྲིད་པ་གསུམ་གྱི་བཙོན་རའི་སྡུག་བསྔལ་གྱི་འཇིགས་པ་ཐམས་ཅད་ཀྱི་བར་རབ་ཏུ་ཞི་བར་བྱེད་དོ། །དེའི་ཚེ་སངས་རྒྱས་ཀྱི་ཞིང་འདི་སེམས་ཅན་ཐམས་ཅད་
150b
སངས་རྒྱས་ལ་འབབ་པ་དག་དང ། ཆོས་ལ་འབབ་པ་དག་དང ། དགེ་འདུན་གྱི་ཡོན་ཏན་ལ་དགའ་པ་ལ་མཁས་པ་དག་འཁོད་པར་གྱུར་ཏོ། །ཡང་དེའི་ཚེ་སངས་རྒྱས་ཀྱི་ཞིང་འདི་ཕྱོགས་བཅུའི་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་སྟོང་པ་དང ། སྟོང་པ་མ་ཡིན་པ་དག་དང ། ཡོངས་སུ་དག་པ་དང ། ཡོངས་སུ་དག་པ་མ་ཡིན་པ་དག་ན་ཀུན་ནས་ལྷམ་མེ། ལྷན་ནེ། ལྷང་ངེར་ཡང་དག་བར་སྣང་བ་ནི། འདི་ལྟ་སྟེ། མཚན་མོ་མུན་པ་བྱུང་བ་ན་ཟླ་བ་དང ། ཉི་མ་བརྒྱ་སྟོང་ཤར་ནས་ལྷམ་མེ།་ལྷན་ནེ། ལྷང་ངེ་བ་བཞིན་ཏེ། དེ་ལྟར་དེའི་ཚེ་མི་མཇེད་ཀྱི་སངས་རྒྱས་ཀྱི་ཞིང་ཡང་ཕྱོགས་བཅུའི་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་སྟོང་པ་དང ། སྟོང་པ་མ་ཡིན་པ་དག་དང ། ཡོངས་སུ་དག་པ་དང ། ཡོངས་སུ་མ་དག་པ་དག་ན་ཀུན་ནས་མཆོག་ཏུ་ལྷམ་མེ། ལྷན་ནེ། ལྷང་ངར་གྱུར་ཏོ། །དེ་ནས་སངས་རྒྱས་ཀྱི་ཞིང་དེ་དང་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཡོད་པ་དང ། གང་དག་བསྐལ་པ་བརྒྱས་ངེས་པར་བྱུང་བ་དག་དང ། གང་དག་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་གཞན་ལ་རག་མ་ལས་པའི་ཡེ་ཤེས་ལ་མཁས་པ་དག་དང ། མི་འཇིགས་པ་ཐོབ་པའི་བར་དེ་དག་སངས་རྒྱས་
151a
༄#། །ཀྱི་མཐུ་ས་དེ་ནས་ཆས་ཏེ་སེམས་ཀྱི་སྐད་ཅིག་མ་གིག་དང་ལྡན་པས་སངས་རྒྱས་ཀྱི་ཞིང་འདིར་ཞུགས་ནས་གནས་ཇི་ལྟ་བ་བཞིན་ས་སྟེང་དུ་སྐྱིལ་མོ་ཀྲུང་གིས་འཁོད་པར་གྱུར་ཏོ། །དེ་བཞིན་དུ་རང་གི་དགེ་བའི་ཕྱོགས་ལ་ནན་ཏན་དག་ཏུ་བྱེད་ཅིང་ཇི་ལྟར་དགེ་བའི་ཕྱོགས་ཀྱི་སྟོབས་བསྐྱེད་པ་ཐོབ་པ་དེ་དག་དང ། མི་འཇིགས་པའི་རྒྱུ་དང་རྐྱེན་དང་ལྡན་པ་དེ་དག་གི་ལུས་ལས་དེ་འདྲ་བ་ཁོ་ནའི་འོད་བྱུང་བར་གྱུར་ཏོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་གྱིས་ཡོངས་སུ་བསྐོར་ནས་ཉན་ཐོས་ཆེན་པོ་རྣམས་ལ་བཀའ་སྩལ་པ། ཁྱེད་བསམ་གཏན་གྱི་ཡུལ་གྱི་མཐུ་ལ་ལྟོས་ཤིག་།བྱིན་གྱི་རླབས་ཀྱི་རྒྱུས་བདུད་ཐམས་ཅད་ཀྱི་ཡུལ་དང ། ཀླུ་ཐམས་ཅད་ཀྱི་ཡུལ་ཟིལ་གྱིས་མནན་ནས་སྔོན་གྱི་དེ་བཞིན་གཤེགས་པ་ཐམས་ཅད་ཀྱིས་འདིར་ཆོས་ཀྱི་ཚུལ་དང་།དཀོན་མཆོག་གསུམ་གྱི་གདུང་རྒྱུན་མི་འཆད་པའི་ཕྱིར་དང ། གསལ་བར་མཛད་པའི་ཕྱིར་མི་མཇེད་ཀྱི་སངས་རྒྱས་ཀྱི་ཞིང་འདི་ཐམས་ཅད་ཡོངས་སུ་སྤྱད་པ་མཛད་དོ། །དེ་བཞིན་དུ་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད། དཔག་ཏུ་མེད་པ་གངྒཱའི་ཀླུང་གི་བྱེ་མ་སྙེད་བསམ་གཏན་
151b
དང ། མངོན་པར་ཤེས་པའི་ཡུལ་ལ་རྣམ་པར་རྩེ་བ་དང་ལྡན་པ་དག་གིས་མི་མཇེད་ཀྱི་སངས་རྒྱས་ཀྱི་ཞིང་འདི་ན་ཆོས་ཀྱི་ཚུལ་ཡུན་རིང་དུ་གནས་པར་བྱ་བའི་ཕྱིར་དང ། གསལ་བར་བྱ་བའི་ཕྱིར་དང ། ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་མ་དད་པ་རྣམས་དད་པར་བྱ་བའི་ཕྱིར་དང ། དད་པ་རྣམས་ཕྱིར་ཞིང་འཕེལ་བར་བྱ་བའི་ཕྱིར་དང ། སེམས་ཅན་ཆོས་ལ་མངོན་པར་བརྩོན་པ་དག་དང ། ཆོས་ཀྱིས་གནས་པ་དག་དང ། ཡོན་ཏན་གྱིས་ཕྱུག་པ་དག་དང ། སེམས་ལ་དབང་དང་ལྡན་པར་གྱུར་པ་རྣམས་བདེ་བ་ལ་རེག་པ་དང ། རྣམ་པར་མཐོ་འཚམ་པ་མེད་པར་བྱ་བའི་ཕྱིར་དང ། ངའི་བསྟན་པ་རབ་ཏུ་མི་འཇིག་པར་བྱ་བའི་ཕྱིར་དང ། བྱང་གྲོལ་གྱི་བདེ་བ་ཡོངས་སུ་རྫོགས་པར་བྱ་བའི་ཕྱིར་ས་ཆེན་པོ་འདི་ཡོངས་སུ་སྤྱད་པར་བྱས་པ་ཡིན་ནོ། །དོན་དེ་ཉིད་བྱིན་གྱིས་བརླབ་པར་བྱ་བའི་ཕྱིར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་གཏན་གྱི་ཡུལ་དག་གིས་རྣམ་པར་རྩེ་བར་བྱེད་དོ། །ས་ཕྱོགས་གང་དང་གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདི་
152a
༄#། །དག་འཁོད་ཅིང་བསམ་གཏན་གྱི་ཡུལ་དག་གིས་རྣམ་པར་རྩེན་པར་བྱེད་པ་དེ་དང་དེར་ད་ལྟར་དང་མ་འོངས་པའི་དུས་ནའང་ཁ་ཅིག་ཏུ་ལ་ལར་ང་འདས་ནས་སེམས་ཅན་འཁོར་བའི་འཇིགས་པས་སྐྲག་པར་བྱེད་ཅིང་མྱ་ངན་ལས་འདས་པ་འདོད་པ་དག་སྐུ་གདུང་གི་མཆོད་རྟེན་དག་བྱེད་དུ་འཇུག་པར་འགྱུར་ཞིང ། སངས་རྒྱས་ཀྱི་བཞུགས་ཁང་དག་གམ། སངས་རྒྱས་ཀྱི་སྐུ་གཟུགས་དག་གམ། ཆོས་ཀྱི་བཞུགས་ཁང་དག་བྱེད་པར་འགྱུར་རོ། ། ཡང་ན་དེར་གླེགས་བམ་དུ་བྲི་བ་བྱས་ནས་ངའི་ཆོས་ཀྱི་སྐུའང་འཆང་བར་འགྱུར་རོ། །དེར་ཡང་མཆོད་པ་རྣམ་པ་སྣ་ཚོགས་དག་ཀྱང་བྱེད་པར་འགྱུར་ཞིང ། དེར་རིན་པོ་ཆེ་རྣམ་པ་སྣ་ཚོགས་དག་ཀྱང་འབུལ་བར་འགྱུར་ཏེ། འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། མུ་ཏིག་དམར་པོ་དང ། རྡོའི་སྙིང་པོ་དང ། སྡུག་དང ། ནོར་བུ་དང ། མུ་ཏིག་དང ། དབྱིག་དང ། དུང་དང ། མན་ཤེལ་དང ། བྱུ་རུ་ལ་སོགས་པ་དང ། དར་ཡུག་དང ། དྲིལ་བུ་དང ། ཟ་འོག་དང ། གོས་རས་བཟང་པོ་དང ། ཡུལ་ཀ་ཤིའི་རས་བཟང་པོ་དང ། དབུ་རྟེན་ནད་ཚངས་ཅན་དང ། གདིང་བ་དང ། གདུགས་དང ། རྒྱལ་མཚན་
152b
དང།་བདན་དང ། ཆོས་གོས་དང ། མགུར་གྱི་རྒྱན་དང ། སྤོས་དང ། མེ་ཏོག་དང ། བདུག་པ་དང ། རོལ་མོའི་སྒྲ་དང ། ལུས་འདུས་པ་དང ། བླ་མ་དང ། གུས་པ་ཆེན་པོ་དང ། གཅེས་པར་བྱེད་པ་དག་ཏུ་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཕྱག་སོར་བཅུའི་ཐལ་མོ་སྦྱར་ནས་འདི་སྐད་ཅེས་བཀའ་སྩལ་ཏོ། །དེ་དག་གི་མཆོད་པ་ནི། དེ་ནས་ང་ཉིད་ཀྱིས་བཞེས་པར་མཛད་དེ། སེམས་ཅན་དེ་དག་ཐམས་ཅད་ནི། བསམ་པ་ཇི་ལྟ་བ་བཞིན་དུ་ཐེག་པ་གསུམ་གྱིས་ཕྱིར་མི་ལྡོག་པ་དག་ཏུ་འགྱུར་རོ། །ས་ཕྱོགས་ལ་ལར་ནི། གཙུག་ལག་ཁང་དང ། གནས་ཁང་དང ། འཆགས་དང ། དགོན་པའི་གནས་དང ། སྐྱེད་མོས་ཚལ་དང ། ཀུན་དགའི་རེ་བ་དག་རབ་ཏུ་ཤོམ་པར་བྱེད་དོ། །ཡང་ན་ཉན་ཐོས་ཀྱི་ཆོས་ཀྱི་གནས་པ་རྣམས་ལ་མཆོད་པ་དང ། རིམ་གྲོ་རྣམ་པ་སྣ་ཚོགས་འདི་ལྟ་སྟེ།་ཆོས་གོ་ས་དང ། བསོད་སྙོམས་དང ། མལ་ཆ་དང ། སྟན་དང ། ན་བའི་གསོས་སྨན་དང ། ཡོ་བྱད་དག་གིས་བྱེད་པར་འགྱུར་བའམ། བྱེད་དུ་འཇུག་པར་འགྱུར་རོ། །གཙུག་ལག་ཁང་དང ། འཆགས་དང ། དགོན་པའི་གནས་དེ་དག་ཏུའང་བཀུར་སྟིར་བྱས་ཏེ་ཆོས་ཉན་པ་དང ། རྣམ་པར་གཏན་ལ་དབབ་པའི་
153a
༄#། །གཏམ་བྱེད་པ་དག་ཏུ་འགྱུར་བའམ། གླེགས་བམ་དག་ཀློག་པར་འགྱུར་རོ། །གཙུག་ལག་ཁང་དང ། འཆག་ས་ལ་སོགས་པ་དེ་དག་ཏུའང་ཡོངས་སུ་གཏོང་བ་རྣམ་པ་སྣ་ཚོགས་དག་ཡོངས་སུ་གཏོང་བར་འགྱུར་ཏེ། འདི་ལྟ་སྟེ། ཞིང་གི་གཞིའམ། ཁྱིམ་གྱི་གཞིའམ། ཀུན་དགའི་ར་བའི་གཞིའམ། བྲན་དང ། བྲན་མོ་དང ། གླང་པོ་ཆེ་དང ། རྟ་དང ། རྔ་མོ་དང ། བ་ལང་དང ། མ་ཧེ་དང ། བོང་བུ་དང ། ཕྱུགས་གཞན་དག་དང ། སྣོད་སྤྱད་ཀྱི་ཡོ་བྱད་རྣམ་པ་སྣ་ཚོགས་དག་དེར་ཡོངས་སུ་གཏོང་བར་འགྱུར་ཞིང ། ངའི་ཉན་ཐོས་ཀྱིས་ཆོས་ཀྱི་གནས་པ་རྣམས་ལོངས་སྤྱོད་པར་བྱ་བའི་ཕྱིར་མལ་ཆ་དང་སྟན་གྱི་ཡོ་བྱད་རྣམ་པ་སྣ་ཚོགས་དག་སེམས་ཀྱི་རྒྱན་གྱི་དོན་དང ། སེམས་ཀྱི་ཡོ་བྱད་ཀྱི་དོན་དང ། རྣལ་འབྱོར་གྱི་ཚོགས་ཀྱི་དོན་དང ། བྱང་གྲོལ་གྱི་བདེ་བ་དོན་གྱི་མཆོག་ཐོབ་པར་བྱ་བའི་ཕྱིར་བསྔོ་བ་དག་ཏུ་བྱེད་དོ། །ད་ལྟར་དང་མ་འོངས་པའི་དུས་ན་ངའི་བསྟན་པ་ལ་ཕན་གདགས་པའི་ཕྱིར་ཡོངས་སུ་གཏོང་བ་རྣམ་པ་སྣ་ཚོགས་དག་ཡོངས་སུ་གཏོང་བར་བྱེད་དོ། །དེ་བཞིན་དུ་སེམས་ཅན་དེ་དག་གི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དེ་དག་
153b
ཐམས་ཅད་ལ་ཅི་ནས་ཀྱང་སེམས་ཅན་དེ་དག་འབྲས་བུ་ཆེན་པོར་འགྱུར་བར་བྱ་བའི་ཕྱིར་ང་རྗེས་སུ་ཐུགས་རངས་པར་མཛད་དོ། །བཞེས་པར་མཛད་དོ། །སེམས་ཅན་ལོག་པར་ལྟུང་བའི་ཆོས་ཅན་མ་ཡིན་པ་ངན་འགོར་གསུམ་རྣམ་པར་སྤངས་པ་དེ་དག་ཐམས་ཅད་བསམ་པ་ཇི་ལྟ་བ་བཞིན་དུ་ཐེག་པ་གསུམ་གྱིས་ཕྱིར་མི་ལྡོག་པ་དག་ཏུ་འགྱུར་རོ། །སེམས་ཅན་བདག་ཡུན་ཇི་སྲིད་དུ་འཁོར་བར་འཁོར་བར་འགྱུར་བ་དེ་སྲིད་དུའང་ལོངས་སྤྱོད་གཉིས་པོ་ཆོས་ཀྱི་ལོངས་སྤྱོད་དང་ཟང་ཟིང་གི་ལོངས་སྤྱོད་དང་མི་འབྲལ་བར་འགྱུར་རོ། །རི་དང ། ནགས་ཁྲོད་དང ། ཤིང་ལྗོན་པ་ཆེན་པོ་དང ། དགོན་པ་དང ། ནགས་འདབས་གང་དུའང་རུང་སྟེ།་ད་ལྟར་དང་མ་འོངས་པའི་དུས་ན་ཐར་པ་དོན་དུ་གཉེར་བ་ཆོས་ཀྱིས་གནས་པའི་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་སྒྲ་བསྐྱུངས་པ་དག་དང ། བཅོམ་བསྐྱུངས་པ་དག་དང ། ནང་དུ་ཡང་དག་འཇོག་གི་ཚུལ་དང་བཅས་པ་དག་དང ། ཚུལ་བཞིན་དུ་ཡིད་ལ་བྱེད་པ་དང་འཚམ་པ་དག་འབྱུང་བར་འགྱུར་ཞིང ། ལྷ་དང ། ཀླུ་དང ། གནོད་སྦྱིན་དག་ཀྱང་གནས་པར་འགྱུར་རོ། །དགེ་སློང་དག་གདུལ་བའི་དོན་དུ་བསམ་གཏན་གྱི་ཡུལ་གྱི་མཐུ་ལ་
154a
༄#། །ལྟོས་ཤིག་།བདུད་ཐམས་ཅད་ཀྱི་ཡུལ་དང ། ཀླུ་ཐམས་ཅད་ཀྱི་ཡུལ་ཟིལ་གྱིས་མནན་ནས་སྔོན་གྱི་དེ་བཞིན་གཤེགས་པ་བཞུགས་ཏེ་འཚོ་ཞིང་གཞེས་པ་རྣམས་ཀྱིས་ཆོས་ཀྱི་ཚུལ་རིང་དུ་གནས་པར་བྱ་བའི་ཕྱིར་དང ། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་སྔོན་ཡང་མི་མཇེད་ཀྱི་སངས་རྒྱས་ཀྱི་ཞིང་འདི་ཡོངས་སུ་སྤྱོད་པ་མཛད་དེ། ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ་དཔག་ཏུ་མེད་པ་གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་གངྒཱའི་ཀླུང་གི་བྱེ་མ་སྙེད་ནས་ངའི་སངས་རྒྱས་ཀྱི་ཞིང་འདིར་ཞུ་བ་དང ། ཞལ་བལྟ་བ་དང ། ཕྱག་འཚལ་བ་དང ། མཆོད་པ་དང ། བསྙེན་བཀུར་བྱ་བའི་ཕྱིར་དང ། ནམ་མཁའི་མིག་དང་ལྡན་པ། སོ་སོ་ཡང་དག་པར་རིག་པ་བཞི་དང་ལྡན་པ། ཆོས་ཀྱིས་གནས་པ་རྣམས་ཀྱི་བྱང་ཆུབ་སེམས་དཔའི་སྤྱོད་པ་མཉན་པའི་ཕྱིར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་ང་ལ་སྙིང་ཉེ་བའི་ཕྱིར་ཆོས་ཀྱི་ཚུལ་རིང་དུ་གནས་པར་བྱ་བའི་དོན་དང ། དཀོན་མཆོག་གསུམ་གྱི་གདུང་རྒྱུན་མི་གཅད་པའི་དོན་དུ་བསམ་གཏན་གྱི་ཡུལ་གྱིས་ས་སྟེང་དུ་འཁོད་ནས་བདུད་ཐམས་
154b
ཅད་ཀྱི་ཡུལ་ཚར་གཅད་པའི་ཕྱིར་དང ། འཁོར་བས་སྐྲག་པ་སྦྱིན་པ་ལ་མངོན་པར་བརྩོན་པའི་སེམས་ཅན་དེ་དག་ལ་སྙིང་བརྩེ་བའི་ཕྱིར་སངས་རྒྱས་ཀྱི་ཞིང་འདི་ཡོངས་སུ་སྤྱོད་པ་དག་ཏུ་བྱེད་དོ། །ད་ལྟར་དང་མ་འོངས་པའི་དུས་ན་ངའི་བསྟན་པ་འདི་དང ། དམ་པའི་ཆོས་སམ། དམ་པའི་ཆོས་ཀྱི་གཟུགས་བརྙན་ཡུན་ཇི་སྲིད་གནས་པར་ཆོས་ཀྱིས་གནས་པའི་དགེ་སློང་རྣམས་ལ་ཁྱིམ་དང ། ཀུན་དགའི་ར་བ་དང ། ཞིང་དང ། བྲན་དང ། བྲན་མོའི་བར་གང་སུ་དག་གིས་དེ་ལྟར་བསྔོས་པ་དེ་ལ་སྡིག་པ་སྤྱོད་པའི་དགེ་སློང་ཚུལ་ཁྲིམས་འཆལ་བ་གང་དག་ཐ་ན་འདབ་མ་གཅིག་དང ། འབྲས་བུ་གཅིག་དང ། མེ་ཏོག་གཅིག་ཅིག་ཡོངས་སུ་སྤྱོད་པ་དག་ཏུ་བྱེད་ན། དེ་ནི། མི་བླུན་པོ་དེ་ལ་དོན་མ་ཡིན་པ་དང ། ཕན་པ་མ་ཡིན་པར་འགྱུར་ཏེ། དེ་ལ་གནོད་པ་བཞིའང་འབྱུང་བར་འགྱུར་རོ། །བཞི་གང་ཞེ་ན།་ཕྱོགས་ཐམས་ཅད་དུ་མི་སྙན་པ་ཆེན་པོ་འགྲོ་བ་ཡིན། མཛའ་བོ་དང ། ཉེ་དུ་དང ། སྣག་གི་གཉེན་མཚམས་དང ། མཁན་པོ་དང ། སློབ་དཔོན་དང ། རིམ་གྲོ་བ་སྡུག་ཅིང་ཡིད་དུ་འོང་བ་དག་དང་མྱུར་དུ་འབྲལ་བར་འགྱུར་བ་ཡིན། ནད་ཚབས་ཆེན་པོ་ཡུན་རིང་བ་དག་གིས་ཐེབས་པར་འགྱུར་བ་ཡིན། དེའི་ཆོས་གོས་
155a
༄#། །དང་ལྷུང་བཟེད་གང་ཡོད་པའང་འཇིགས་པ་ཆེན་པོ་ལྔས་འཕྲོག་པར་འགྱུར་བ་ཡིན་ནོ། །ལྔ་གང་དག་གིས་ཤེ་ན། འདི་ལྟ་སྟེ། རྒྱལ་པོ་དང ། ཆོམ་རྐུན་དང ། མེ་དང ། ཆུ་དང ། བགོ་སྐལ་ལ་སྤྱོད་པ་མི་མཛའ་བ་དང་ལྔ་པོ་དེ་དག་གིས་སོ། །དེའི་འཇིག་རྟེན་ཕ་རོལ་གྱི་འདོད་པ་མ་ཡིན་པའི་འབྲས་བུ་བཞི་མྱུར་དུ་འགྲུབ་པར་འགྱུར་བ་ཡིན་ཏེ། བཞི་གང་དག་ཡིན་ཞེ་ན། ལུས་ཞིག་ནས་སེམས་ཅན་དམྱལ་བ་ཆེན་པོ་མི་བཟད་པར་སྐྱེ་བར་འགྱུར་བ་ཡིན། དེ་གལ་ཏེ་བརྒྱ་ལ་རེས་འགའ་ཞིག་དུས་རིང་ཞིག་འདས་ནས་སེམས་ཅན་དམྱལ་བ་དེ་ནས་ཤི་འཕོས་ནས་འབྲོག་དགོན་པ་རོ་སྐམ་གྱི་ནང་དུ་དུད་འགོར་དང ། ཡི་དྭགས་ཀྱི་རིས་སུ་ལོང་བ་དང་རྐང་ལག་མེད་པ་དག་ཏུ་སྐྱེ་བར་འགྱུར་ཞིང ། དེ་ལོ་བརྒྱ་སྟོང་མང་པོ་དག་ཏུ་བཀྲེས་པ་དང ། སྐོམ་པས་ཡོངས་སུ་གདུང་བ་ཆེན་པོའི་སྡུག་བསྔལ་ཉམས་སུ་མྱོང་བར་འགྱུར་བ་ཡིན། གལ་ཏེ་བརྒྱ་ལ་རེས་འགའ་ཞིག་དུས་རིང་ཞིག་འདས་ནས་དེ་དག་ཤི་འཕོས་ནས་ལོ་བརྒྱ་སྟོང་མང་པོ་དག་ཏུ་སྤྲུལ་གདུག་པ་ལོང་བ་རྡུལ་ཟ་བ་དག་གི་ནང་དུ་སྐྱེ་བར་འགྱུར་བ་ཡིན། དེ་བརྒྱ་ལ་རེས་འགའ་ཞིག་དེ་ནས་ཤི་འཕོས་ནས་གལ་ཏེ་མི་རྣམས་ཀྱི་ནང་དུ་སྐྱེས་ན། འོན་ཀྱང་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྟོང་པ་དག་ཏུ་མི་ཉིད་ཐོབ་
155b
པ་རྙེད་པར་འགྱུར་ཞིང ། མོངས་རྟུལ་བ་དང ། ཚུལ་དུ་མི་ཤེས་པར་འགྱུར་བ་དང ། མིག་མ་ཚང་བ་དང ། ལག་པ་མ་ཚངས་བ་དང ། རྐང་པ་མ་ཚང་བ་དང ། ཁྱིའི་ལོངས་སྤྱོད་ཀྱི་ཁ་ཟས་ལ་གདུ་ཞིང་སྐྱག་ཁུངས་སའི་ཁ་ཟས་ཟ་བ་དང ། འདམ་རྫབ་དང ། ཕྱག་དར་ཁྲོད་ན་ཉལ་བ་དང ། འབྲོག་དང ། དགོན་པ་དང ། ལམ་པོ་ཆེ་རྣམས་ན་འཚོ་བར་འགྱུར་ལ། དེ་དེ་ནས་ཤི་འཕོས་ནས་ཀྱང་ཡང་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ཅིའི་ཕྱིར་དེའི་འབྲས་བུ་འདོད་པ་མ་ཡིན་པ་དེ་ལྟར་ལྕི་བ་འབྱུང་ཞེ་ན། འདི་ལྟར་སྡིག་པ་སྤྱོད་པའི་དགེ་སློང་དེ་ནི། འདི་ལྟར་ཆོས་ཀྱིས་གནས་པ་རྣམས་ལ་ཁྱིམ་དང ། ཞིང་དང ། ཀུན་དགའི་ར་བ་དང ། བྲན་དང།་བྲན་མོ་དང ། ཕྱུགས་དག་གི་བར་བསྔོས་པ་དག་འཕྲོག་ནས་གང་ཟག་རང་གི་ཡོངས་སུ་ལོངས་སྤྱོད་པས་ལོངས་སྤྱོད་པར་བྱེད་པའི་ཕྱིར་ཏེ། སྡིག་པ་སྤྱོད་པའི་དགེ་སློང་དེ་ལྟ་བུ་དེ་ནི། དེ་ལྟར་ངོ་མཚར་རྨད་དུ་བྱུང་བའི་སངས་རྒྱས་བཅོམ་ལྡན་འདས་འབྱུང་བ་ཐམས་ཅད་ཀྱི་ཆོས་ཀྱི་ཚུལ་མེད་པར་བྱ་བ་དང ། རྣམ་པར་གཞིག་པ་དང ། རྒྱུན་གཅད་པ་དང ། ནུབ་པར་བྱ་བའི་ཕྱིར་བརྩོན་པ་ཡིན་ནོ། །དེ་བཞིན་དུ་དཀོན་མཆོག་གསུམ་གྱི་གདུང་མེད་པར་བྱ་བ་ནས་ནུབ་པར་བྱ་བའི་
156a
༄#། །བར་དུ་བརྩོན་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དགེ་བའི་ཕྱོགས་ནི། ཚོགས་དང་ལྡན་པ་ཡིན་ལ། ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་ཡང་དགེ་བའི་ཕྱོགས་ཀྱིས་རབ་ཏུ་ཕྱེ་བ་ཡིན་ཏེ། དེའི་ཕྱིར་དེ་ཉིད་ཀྱི་མི་འདོད་པའི་འབྲས་བུ་རྣམ་པར་སྨིན་པ་ལྕི་བ་མངོན་པར་འགྲུབ་པ་ཡིན་ནོ། །དེ་ནས་གནས་བརྟན་ག་ཡ་འོད་སྲུང་གིས་མཆི་མ་བླགས་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། མི་ཉིད་རྙེད་པ་ནི། མ་ཐོབ་ཀྱང་མི་བསྔོའི། །རབ་ཏུ་བྱུང་ནས་བཟའ་བ་དང་བཏུང་བའི་སླད་དུ་ལོག་པར་སྒྲུབ་པ་ནི། དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ག་ཡ་འོད་སྲུང་ཆེན་པོ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། གང་དུ་དེའི་སྔོན་གྱི་ལས་རྣམས་ཟད་པ་དག་ཏུ་འགྱུར་བའི་སེམས་ཅན་དམྱལ་བར་གནས་པ་ནི། བླའི། འདི་ན་གང་གཞན་དུ་སྤྱོད་པ་ནི། དེ་ལྟ་མ་ཡིན་ནོ། །འོན་ཀྱང་སྐྱེས་བུ་བླུན་པོ་ཁ་ཅིག་མི་ཉིད་ཐོབ་པ་རྙེད་པར་དཀའ་བ་རྙེད་དེ་ལེགས་པར་གསུངས་པའི་ཆོས་འདུལ་བ་གང་ལ་སྡུག་བསྔལ་ཐམས་ཅད་ཟད་པ་དང ། ཟག་པ་ཐམས་ཅད་མཐར་ཐུག་པར་འགྱུར་བ་ངོ་མཚར་རྨད་དུ་
156b
བྱུང་བའི་རབ་ཏུ་བྱུང་བ་རྙེད་པར་དཀའ་བ་དང ། བསྙེན་པར་རྫོགས་པ་དགེ་སློང་གི་དངོས་པོ་ཐོབ་ནས་འོད་ཀྱང་སྐྱེས་བུ་བླུན་པོ་དེ་དག་གང་གིས་མཆོད་པར་མི་འགྱུར་བ་དང།་བཟའ་བཏུང་དང་བྲལ་བར་འགྱུར་བ་མི་དགེ་བའི་ཕྱོགས་རྣལ་འབྱོར་ཡིད་ལ་བྱེད་པ་ཡོངས་སུ་བསམ་ནས་རྒྱལ་རིགས་དང ། བྲམ་ཟེ་དང ། རྗེའུ་རིགས་དང།་དམངས་རིགས་དད་པ་ཅན་དག་གིས་ཁྱིམ་དང ། ཞིང་དང ། ཀུན་དགའི་ར་བ་དང ། སྐྱེད་མོས་ཚལ་དང ། བྲན་དང ། བྲན་མོ་ནས་རྐང་བཞི་པ་དག་གི་བར་དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལོངས་སྤྱོད་པར་བྱ་བའི་ཕྱིར་དང ། དགེ་བའི་ཕྱོགས་དང་མཐུན་པར་བྱ་བའི་ཕྱིར་ཏེ་ལྟར་བསྔོས་པ་ལ་སྡིག་པ་སྤྱོད་པའི་དགེ་སློང་དེ་མང་དུ་ཐོས་པའི་མཐུའམ། ཁྱིམ་ན་གནས་པའི་མཐུས་དེ་དག་ལ་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་ནས་བདག་ཉིད་ཀྱིས་གང་ཟག་གི་འདུ་ཤེས་ཀྱིས་ཡོངས་སུ་སྤྱོད་པར་བྱེད་དེ། སྐྱེས་བུ་བླུན་པོ་དེའི་ལོག་པར་སྒྲུབ་པ་དེ་ནི། དེ་ལྟ་བུར་འགྱུར་རོ། །དེ་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་
157a
༄#། །དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་པའི་དགེ་སློང་རབ་ཏུ་བྱུང་བའི་མི་འདོད་པའི་འབྲས་བུ་དེ་ལྟ་བུ་འབྱུང་ལགས་ན། དཔེ་ཙམ་དུ་བགྱི་ན་གང་ཡང་ཁྱིམ་ན་གནས་པར་གྱུར་ལ། དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་ན། དེ་བསོད་ནམས་མ་ལགས་པའི་ཕུང་པོ་ཇི་སྙེད་ཅིག་དང་ལྡན་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཐོང ། ཁྱོད་ཀྱིས་སྨྲས་པ་དེས་ཅི་ཞིག་བྱ ། གསོལ་པ། བཙུན་པ་བཅོམ་ལྡན་འདས། དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དེ་ལྟ་བུ་དག་ལ་ལོངས་སྤྱོད་དང ། ཉེ་བར་སྤྱོད་པ་དག་གིས་སྩོལ་བར་ནི། བགྱིད་ཀྱི། འཕྲོག་པར་ནི། མི་བགྱིད་ལགས་སོ། །འོན་ཀྱང་སླད་མའི་དུས་ན་རྒྱལ་རིགས་དང ། བྲམ་ཟེ་དང ། རྗེའུ་རིགས་དང།་དམངས་རིགས་མ་དད་པ་འཇིག་རྟེན་ཕ་རོལ་གྱིས་འཇིགས་པར་མི་ལྟ་བ་དག་འབྱུང་བར་འགྱུར་ཞིང ། དགེ་སློང་ཆོས་ཀྱིས་གནས་པ། ཡོན་ཏན་
157b
གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་པ་གང་དག་ལགས་པ་དེ་དག་གི་རྒུད་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གལ་ཏེ་ངས་ལུང་བོང་ལྟ་བུའི་རྒྱལ་རིགས་དག་ནས་དམངས་རིགས་དག་གི་བར་དག་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་ནས་བདག་ཉིད་ཀྱིས་ལོངས་སྤྱོད་པར་བྱེད་པ་གང་དག་ཡིན་པ་དེ་དག་གི་ལོག་པར་སྒྲུབ་པ་འབྱུང་བ་དེ་བཤད་ན་ནི། དེའི་ཚེ་དེ་དག་ཀྱང་ངའི་བཀའ་བསྟན་པའི་འཕྲིན་ལས་ཀྱི་སྐབས་ཐོབ་ནས་སྤོང་བ་དག་ཏུ་བྱེད་ལ་ཡིད་ཆེས་བ་དག་ཏུ་མི་བྱེད་དོ། །དེ་དག་ནི། ཕུང་བར་འགྱུར་བའི་འཇིགས་པ་ཆེན་པོའི་གནོད་པ་གཉི་ག་དང་ལྡན་པར་འགྱུར་རོ། །བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་ལན་གཉིས་སུའང་འདི་སྐད་ཅེས་གསོལ་ཏོ། །བཅོམ་ལྡན་འདས། བསྟན་དུ་གསོལ། བདེ་བར་གཤེགས་པ། བསྟན་དུ་གསོལ། བཙུན་པ་བཅོམ་ལྡན་འདས། གང་དག་འཇིག་རྟེན་ཕ་རོལ་གྱིས་འཇིགས་པར་ལྟ་ཞིང ། བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་
158a
༄#། །འདུལ་བ་ལེགས་པར་བསྟན་པ་ཡང་དག་པར་འཛིན་པ་དང ། གསལ་བར་བགྱིད་པའི་རྒྱལ་རིགས་ནས་དམངས་རིགས་ཀྱི་བར་དེ་དག་གི་རིགས་རྒྱུད་རིགས་བཙུན་པ་དག་འབྱུང་བར་འགྱུར་ལགས་སོ། །བཅོམ་ལྡན་འདས། དེ་དག་ནི། ཁྱོད་ཀྱི་བཀའི་འཕྲིན་ལས་བསྟན་པ་ཐོས་ནས་སྟོབས་དང་བརྩོན་པ་མཆོག་ཏུ་ཆེན་པོས་རྒྱལ་བའི་བསྟན་པ་ལེགས་པར་བསྟན་པ་གསལ་བར་བགྱིད་པ་དང ། ཡོངས་སུ་སྐྱོང་བ་དག་ཏུ་འགྱུར་ཞིང ། གང་ཟག་དེ་ལྟར་ཡང་དག་པར་ཞུགས་པ་དག་དང ། ཆོས་ཀྱིས་གནས་པ་དག་དང ། ཡོན་ཏན་གྱིས་ཕྱུག་པ་དག་ལའང་མཆོད་པ་བགྱིད་པ་དང ། སྲུང་བ་བགྱིད་པ་དང ། ཡོངས་སུ་སྐྱོང་བར་བགྱིད་པར་འགྱུར་ལགས་སོ། །ཁྱིམ་ན་གནས་པ་དང ། རབ་ཏུ་བྱུང་བ་དེ་དག་ཀྱང་འཕྲོག་པར་མི་བགྱིད་ལགས་སོ། །བཙུན་པ་བཅོམ་ལྡན་འདས།་ཁྱིམ་ན་གནས་པ་གང་གིས་གང་ཟག་ཆོས་ཀྱིས་གནས་པ་དག་གི་ལོངས་སྤྱོད་དང ། ཉེ་བར་སྤྱོད་པ་འཕྲོག་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་པ་དེའི་རྒུད་པར་འགྱུར་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གལ་ཏེ་ངས་མ་འོངས་པའི་དུས་ན་ལུང་བོང་ལྟ་བུའི་
158b
རྒྱལ་རིགས་ནས་དམངས་རིགས་ཀྱི་བར་དག་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་ཅིང་བདག་ཉིད་ཀྱིས་ལོངས་སྤྱོད་པར་བྱེད་པ་གང་དག་ཡིན་པ་དེ་དག་གིས་ལོག་པར་སྒྲུབ་པ་འབྱུང་བ་དེ་བཤད་ན་ནི། དེ་དག་ཀྱང་ངའི་བཀའ་བསྟན་པའི་འཕྲིན་ལས་ཀྱི་སྐབས་ཐོས་ནས་སྤོང་བ་དག་ཏུ་བྱེད་ལ་ཡིད་ཆེས་པ་དག་ཏུ་མི་བྱེད་དེ། དེ་དག་ནི། ཕུང་པར་འགྱུར་བའི་གནོད་པ་ཆེན་པོའི་གནོད་པ་གཉིས་ཀ་དང་ལྡན་པར་འགྱུར་རོ། །བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་ལན་གསུམ་དུའང་འདི་སྐད་ཅེས་གསོལ་ཏོ། །བཅོམ་ལྡན་འདས། བསྟན་དུ་གསོལ། བདེ་བར་གཤེགས་པ། བསྟན་དུ་གསོལ། བཅོམ་ལྡན་འདས། གང་དག་འཇིག་རྟེན་ཕ་རོལ་གྱིས་འཇིགས་པར་ལྟ་ཞིང་བཅོམ་ལྡན་འདས་ཀྱི་ཆོས་འདུལ་བ་ལེགས་པར་བསྟན་པ་ཡང་དག་པར་འཛིན་པ་དང ། གསལ་བར་བགྱིད་པའི་རྒྱལ་རིགས་ནས་དམངས་རིགས་ཀྱི་བར་དག་གི་རིགས་རྒྱུད་རིགས་བཙུན་པ་དག་འབྱུང་བར་འགྱུར་ལགས་སོ། །དེ་དག་གིས་ནི། བཅོམ་ལྡན་འདས་ཀྱི་བཀའི་འཕྲིན་ལས་བསྟན་པ་ཐོས་ནས་སྟོབས་དང ། བརྩོན་པ་མཆོག་ཏུ་ཆེན་པོས་རྒྱལ་བའི་བསྟན་པ་
159a
༄#། །ལེགས་པར་བསྟན་པ་གསལ་བར་བགྱིད་པར་འགྱུར་ཞིང ། གང་ཟག་དེ་ལྟར་ཡང་དག་པར་ཞུགས་པ་དག་དང ། ཆོས་ཀྱིས་གནས་པ་དག་དང ། ཡོན་ཏན་གྱིས་ཕྱུག་པ་དག་ལའང་མཆོད་པ་བགྱིད་པ་དང ། སྲུང་བ་བགྱིད་པ་དང ། ཡོངས་སུ་སྐྱོང་བར་བགྱིད་པར་འགྱུར་ལགས་སོ། ། ཁྱིམ་ན་གནས་པ་དང ། རབ་ཏུ་བྱུང་བ་དེ་དག་ཀྱང་འཕྲོག་པར་མི་བགྱིད་ལགས་སོ། །ཆོས་ཀྱིས་གནས་པ་དེ་དག་གི་ལོངས་སྤྱོད་དང ། ཉེ་བར་སྤྱོད་པ་འཕྲོག་པར་མི་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ལེགས་སོ་ལེགས་སོ། །ཁྱོད་ཀྱི་སྤོབས་པ་ལེགས་སོ། །རྒྱལ་པོ་ཆེན་པོ། མ་འོངས་པའི་དུས་ན་གང་དག་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་དག་གིས་ཆོས་ཀྱིས་གནས་པ་རྣམས་ལ་ཁྱིམ་གྱི་གཞི་དང ། ཞིང་གི་གཞི་དང ། ཀུན་དགའི་ར་བའི་གཞི་དང ། སྐྱེད་མོས་ཚལ་དང ། བྲན་དང ། བྲན་མོ་དང ། མལ་ཆ་དང ། སྟན་དང ། ན་བའི་གསོས་སྨན་དང ། ཡོ་བྱད་དག་དེ་ལྟར་བསྔོས་པ་དང ། རྐང་པ་བཞི་བའི་བར་བསྔོས་པའང་འཕྲོག་པར་བྱེད་པའམ་རྐུ་བར་བྱེད་པ་དག་འབྱུང་བར་འགྱུར་ཏེ།
159b
རྒྱལ་རིགས་ནས་དམངས་རིགས་ཀྱི་བར་དེ་ཐམས་ཅད་ནི། མཐོང་བའི་ཆོས་ལ་འབྱུང་བ་འདོད་པ་མ་ཡིན་པའི་ཆོས་ཉི་ཤུ་དང་མྱུར་དུ་ལྡན་པར་འགྱུར་རོ། །ཉི་ཤུ་གང་དག་ཅེ་ན། ལྷ་རྣམས་ཀྱིས་ཡོངས་སུ་བཏང་བ་ཡིན། ཕྱོགས་དང་ཕྱོགས་མཚམས་དག་ཏུའང་དེའི་མི་སྙན་པ་གྲགས་པར་འགྱུར་བ་ཡིན། མཇའ་བཤེས་དང་སྣག་གི་གཉེན་མཚམས་དག་གིས་ཀྱང་དེའང་ཡོངས་སུ་གཏོང་བར་འགྱུར་བ་ཡིན། དེའི་དགྲ་བོ་དག་ཀྱང་མང་བར་འགྱུར་བ་ཡིན། ནོར་དང་ནོར་གྱི་ཡོ་བྱད་དག་ལས་ཀྱང་ཡོངས་སུ་ཉམས་པར་འགྱུར་བ་ཡིན། རྣམ་པར་གཡེང་བའང་མང་བ་ཡིན། ཡན་ལག་མ་ཚང་བར་འགྱུར་བའང་ཡིན། དེ་གཉིད་མེད་པ་ཡིན།་རྟག་ཏུ་དེས་སྲེད་པས་གནོན་པར་འགྱུར་བའང་ཡིན། དེའི་བཟའ་བ་དང་བཏུང་བའང་དུག་གི་བྱ་བ་བྱེད་པ་ཡིན། སྡུག་པ་དང་ཡིད་དུ་འོང་བ་དག་དང་མྱུར་དུ་འབྲལ་བ་ཐོབ་པ་ཡིན། རྟག་ཏུ་གཞན་དག་དང་འཐབ་མོ་འབྱུང་བ་ཡིན། ཕ་དང ། མ་དང ། སྤུན་དང ། ཆུང་མ་དང ། བུ་མོ་དང ། བྲན་དང ། བྲན་མོ་དག་ཀྱང་བསྒོ་བ་བཞིན་མི་བྱེད་པ་ཡིན། དེའི་གསང་སྔགས་གསང་བ་དག་དང ། ནོར་གསང་བ་དང ། སླས་གསང་བ་དང ། དེའི་དངོས་པོ་གསང་བ་རྣམས་ཀྱང་
160a
༄#། །ཐམས་ཅད་གསང་ཤོར་བ་དག་ཏུ་འགྱུར་བ་ཡིན། བསྒོ་སྐལ་ལ་སྤྱོད་པ་མི་མཛའ་བ་ལ་སོགས་པ་ལྔས་ཀྱང་ལོངས་སྤྱོད་དག་ཆུད་ཟ་བར་འགྱུར་བ་ཡིན། ནད་ཚབས་ཆེན་པོ་དག་གིས་ཀྱང་མྱུར་དུ་ཐེབས་པར་འགྱུར་བ་ཡིན། སྨན་དང་རིམ་གྲོ་བ་དང་བྲལ་ཞིང་ཤ་དང་ཁྲག་བསྐམས་ནས་སྡུག་བསྔལ་ཉམས་སུ་མྱོང་བར་འགྱུར་བ་ཡིན། རང་གི་བཤད་གཅི་དག་གི་ནང་དུ་འཆི་བའི་དུས་བྱེད་པར་འགྱུར་བ་ཡིན་ཏེ། རྒྱལ་པོ་ཆེན་པོ། འདོད་པ་མ་ཡིན་པའི་ལས་ཉི་ཤུ་པོ་དེ་དག་དང་མྱུར་དུ་ལྡན་པར་འགྱུར་རོ། །གང་དགེ་སློང་ཆོས་ཀྱིས་གནས་པ་རྣམས་ལ་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་དང།་ནོར་གྱི་ཡོ་བྱད་འཕྲོག་པར་བྱེད་ཅིང ། བདག་ཉིད་ཀྱིས་ཀྱང་ཡོངས་སུ་སྤྱོད་པར་བྱེད་པ་དེ་འཆི་བའི་དུས་བྱས་ནས་སེམས་ཅན་དམྱལ་བ་ཆེན་པོ་མནར་མེད་པར་སྐྱེས་པར་འགྱུར་རོ། །དེ་དེར་ཡང་ཚེ་བསྐལ་བར་ལྕགས་དང་ཟངས་ཞུན་འཐུང་བར་འགྱུར་ཞིང་ལྕགས་ཀྱི་ཐུ་ལུམ་ཟ་བར་འགྱུར་ལ། མེའི་གོས་དང།་ལོངས་སྤྱོད་དང ། ཉེ་བར་སྤྱོད་པ་སྤྱོད་པར་བྱེད་ཅིང་གནོད་པ་མི་བཟད་པ་ཆེན་པོ་རྣམ་པ་སྣ་ཚོགས་ཉམས་སུ་མྱོང་བར་འགྱུར་བ་ཡིན་ནོ། །ཚེ་བསྐལ་པ་ཟད་
160b
ནས་ཀྱང་དེ་ནས་ཤི་འཕོས་ནས་འབྲོག་དགོན་པ་རོ་གམ་དག་གི་ནང་དུ་ལམ་དུ་སྐྱེས་པའི་ཡི་དྭགས་རྣམས་དང་སྐལ་བ་མཉམ་པར་རྐང་པ་དང ། ལག་པ་དང ། མིག་མ་ཚང་བར་སྐྱེ་བར་འགྱུར་རོ། །དེར་ཡང་ཕྱོགས་བཞི་ནས་ལངས་པའི་རླུང་ཀུན་ཏུ་ཚ་བ་དག་གིས་ཀུན་ཏུ་གདུང་བར་བྱེད་ཅིངས་སྤུ་གྲི་དང་འདྲ་བའི་སྟེང་དུ་དམྱལ་བར་བྱེད། ཡོངས་སུ་དམྱལ་བར་བྱེད་དེ། དེ་དེར་ལོ་བརྒྱ་སྟོང་མང་པོར་སྡུག་བསྔལ་དེ་ལྟ་བུ་ཉམས་སུ་མྱོང་བར་བྱེད་པ་ཡིན་ནོ། །དེ་གལ་ཏེ་བརྒྱ་ལ་རེས་འགའ་ཞིག་དེ་ནས་ཤི་འཕོས་ནས་ཀྱང་རྒྱ་མཚོ་ཆེན་པོའི་ནང་དུ་ལུས་དཔག་ཚད་བརྒྱ་པའི་ཤ་ནར་ནར་པོར་སྐྱེ་བར་འགྱུར་རོ། །སྔོན་གྱི་ལས་ཀྱི་རྒྱུས་དེའི་དཔག་ཚད་ཁོར་ཡུག་གི་ཆུ་ཟངས་ཞུན་མ་ལྟར་དམར་པོ་འབྱུང་བར་འགྱུར་རོ། །དེ་དེར་ཡང་ལོ་བརྒྱ་སྟོང་མང་པོར་ཆུའི་ནང་དུ་སེམས་ཅན་དམྱལ་བའི་གནོད་པ་མྱོང་བར་བྱེད་པ་ཡིན་ནོ། །དེ་དེ་ནས་ཤི་འཕོས་ནས་ཀྱང་འབྲོག་དགོན་པ་ཆེན་པོར་བརྫུས་ཏེ་སྐྱེ་བ་ཤ་ནར་ནར་པོ་ཆེན་པོ་རི་དང་མཉམ་པ་འབྱུང་བར་འགྱུར་རོ། །ཕྱོགས་བཞི་ཀུན་ཏུའང་རླུང་ཀུན་ཏུ་ཚ་བ་དག་གིས་ཀུན་ཏུ་སྲེག་པར་བྱེད་དོ། །དེར་ཡང་ཕྱོགས་བཞི་ནས་རི་དྭགས་དང་བྱ་དག་ལྷགས་ཏེ་ཡོངས་སུ་ཟ་བ་དག་ཏུ་བྱེད་དོ། །དེ་བརྒྱ་ལ་རེས་
161a
༄#། །འགའ་དུས་རིང་ཞིག་འདས་ནས་དེ་ནས་ཤི་འཕོས་ནས་ཡང་སེམས་ཅན་དམྱལ་བ་ཆེན་པོ་དག་གི་ནང་དུ་སྐྱེ་བར་འགྱུར་རོ། །དེ་ནས་ཀྱང་ཤི་འཕོས་ནས་ཡང་དང་ཡང་དུ་ལོག་པར་སྒྲུབ་པ་ཆེན་པོ་དེ་ལྟ་བུ་ཉམས་སུ་མྱོང་བར་འགྱུར་ཏེ། ཡོངས་སུ་བརྟག་པ་ཉེ་བར་བཟུང་ན། དེ་བརྒྱ་ལམ་ན་རེས་འགའ་ཞིག་མི་རྣམས་དང་སྐལ་པ་མཉམ་པར་སྐྱེས་ནའང་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་དག་ཏུ་མིག་མ་ཚང་བ་དང ། ཚུལ་དུ་མི་ཤེས་པར་སྐྱེ་བར་འགྱུར་རོ། ། རྒྱལ་པོ་ཆེན་པོ། གང་ཆོས་ཀྱིས་གནས་པ་དག་ལ་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་དང ། ནོར་གྱི་ཡོ་བྱད་འཕྲོག་པར་བྱེད་པ་དེའི་ལོག་པར་སྒྲུབ་པ་དེ་ནི།་དེ་ལྟ་བུ་ཡིན་ནོ། །དེ་ནས་རྒྱལ་པོ་གཟུགས་ཅན་སྙིང་པོ་མཆི་མ་དག་ཕྱུང་ནས་གསོལ་པ། བཙུན་པ་བཅོམ་ལྡན་འདས། སྐྱེས་བུ་གང་ཟག་དེ་ལྟ་བུ་ནི།་སེམས་ཅན་དམྱལ་བ་ན་གནས་པར་མི་བསྔོ་ལགས་ཀྱི། གང་གིས་མི་ཉིད་རྙེད་པ་ཐོབ་ནས་བསོད་ནམས་མ་ལགས་པ་ཆེན་པོ་དེ་ལྟ་བུ་ཀུན་ཏུ་སྤྱོད་པར་འགྱུར་བའི་མི་ཉིད་རྙེད་པ་ནི། དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ད་ལྟར་དང་མ་འོངས་པའི་དུས་ན་རྒྱལ་རིགས་
161b
ཆོས་ཀྱིས་གནས་པ་ཁྱེད་ཅག་གི་ལག་ཏུ་གང་ཟག་ཡོངས་སུ་གཏད་ཀྱི། སྲུངས་ཤིག་།ཡོངས་སུ་སྲུངས་ཤིག་།རབ་ཏུ་བྱུང་བའམ། ཁྱིམ་ན་གནས་པ་གང་དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་དང ། ནོར་གྱི་ཡོ་བྱད་འཕྲོག་པར་བྱེད་པ་དེ་ལ་ཁྱེད་ཀྱིས་ཅི་ནས་ཀྱང་ཆོས་དང་མཐུན་པས་ཆད་པས་གཅད་པར་བྱའོ། །རྒྱལ་པོས་གསོལ་པ། བཙུན་པ་བཅོམ་ལྡན་འདས། གལ་ཏེ་གང་དག་དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་དང ། ནོར་གྱི་ཡོ་བྱད་འཕྲོག་པར་བྱེད་པའི་ཁྱིམ་ན་གནས་པ་དང་རབ་ཏུ་བྱུང་བ་དེ་དག་ཅི་ནས་ཆོས་དང་མཐུན་པས་ཆད་པས་གཅོད་པར་མི་བགྱིད་ཅིང ། དེ་ལ་རྒྱལ་པོ་བཏང་སྙོམས་པར་གནས་པར་བགྱིད་ལགས་ན། རྒྱལ་རིགས་དེ་བསོད་ནམས་མ་ལགས་པའི་ཕུང་པོ་ཇི་སྙེད་ཅིག་བསྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་གཤེགས་པ་མ་གཏོགས་པར་ཉན་ཐོས་དང ། རང་རྒྱལ་བ་དག་དང་བཅས་པའི་སེམས་ཅན་ཐམས་ཅད་ཀྱི་བསོད་ནམས་ཇི་སྙེད་ཡོད་པའི་བསོད་ནམས་ཀྱི་ཕུང་པོ་དེ་ལྟ་བུ་དང་སེམས་ཅན་གཅིག་ཅིག་ལྡན་པར་གྱུར་ན། སེམས་ཅན་དེ་ཉན་ཐོས་དང ། རང་རྒྱལ་བ་ཐམས་ཅད་ལས་ཆེས་ཁྱད་
162a
༄#། །པར་དུ་འཕགས་པ་དང ། ཆེས་བསོད་ནམས་དང་ལྡན་པར་འགྱུར་བ་ཡིན་ནམ། རྒྱལ་པོས་གསོལ་པ། བཙུན་པ་བཅོམ་ལྡན་འདས། དེ་དེ་ལྟར་ལགས་སོ། །བཙུན་པ་བཅོམ་ལྡན་འདས། སེམས་ཅན་དེ་ཆེས་ཁྱད་པར་དུ་འཕགས་པ་ལགས་ཏེ། དེ་གང་ལ་སེམས་ཅན་འཚོ་བ་ཀུན་གྱི་ནང་ན་ཉན་ཐོས་དང ། རང་རྒྱལ་བ་ཐམས་ཅད་ལས་ཆེས་བསོད་ནམས་དང་ལྡན་པ་ནི། སྐྱེས་བུ་འགའ་ཞིག་འབྱུང་བར་བས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གལ་ཏེ་སེམས་ཅན་སྔ་མ་དེ་བསོད་ནམས་ཀྱི་ཕུང་པོ་ཇི་ལྟ་བུ་དང་ལྡན་པའི་བསོད་ནམས་ཀྱི་ཕུང་པོ་དེ་ལྟ་བུ་དང་སེམས་ཅན་ཐམས་ཅད་ལྡན་པ་དག་ཏུ་གྱུར་ལ། དེ་ལ་གང་སེམས་ཅན་འཚོ་བ་ཐམས་ཅད་ཀྱི་ཡན་ལག་དག་རྣམ་པར་གཅོད་པར་བྱེད་ཅིང ། མིག་འབྱིན་པ་དང ། རྣ་བ་དང ། སྣ་དང ། ལག་པ་དང ། རྐང་པ་དག་རྣམ་པར་གཅོད་པར་བྱེད་པའི་སྐྱེས་བུ་འགའ་ཞིག་བྱུང་བར་གྱུར་ན། རྒྱལ་པོ་ཆེན་པོ། འདི་ཇི་སྙམ་དུ་སེམས། སྐྱེས་བུ་དེ་བསོད་ནམས་མ་ཡིན་པ་སྡིག་པའི་ལས་ཇི་སྙེད་ཅིག་བསྐྱེད་པར་འགྱུར། དེ་ནས་རྒྱལ་པོ་གཟུགས་ཅན་སྙིང་པོ་མཆི་མ་དག་ཕྱུང་ནས་ཅང་མི་སྨྲ་བར་འདུག་གོ་།བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་
162b
པོ།་ལན་ཐོབ་ཅིག་།ལན་ཐོབ་ཅིག་།དེ་ནས་རྒྱལ་པོ་གཟུགས་ཅན་སྙིང་པོ་ཤུམ་ཞེས་ངུ་བཞིན་དུ་གསོལ་པ། བཙུན་པ་བཅོམ་ལྡན་འདས། གང་སེམས་ཅན་བསོད་ནམས་དང་ལྡན་པ་དེ་ལྟ་བུ་གཅིག་གི་ཡན་ལག་དག་རྣམ་པར་གཅོད་པར་བགྱིད་ཅིང་མིག་འབྱིན་པ་དང ། རྣ་བ་དང ། སྣ་དང ། ལག་པ་དང ། རྐང་པ་དག་རྣམ་པར་གཅོད་པར་བགྱིད་པའི་སྐྱེས་བུ་དེའང་བསོད་ནམས་མ་ལགས་པ་སྡིག་པའི་ལས་གྲངས་མ་མཆིས། ཚད་མ་མཆིས། དཔག་ཏུ་མ་མཆིས། དཔེ་མ་མཆིས་པ་བསྐྱེད་པར་འགྱུར་བ་ལགས་ན། གང་དེ་ལྟ་བུའི་བསོད་ནམས་དང་ལྡན་པའི་སེམས་ཅན་ཐམས་ཅད་ཀྱི་ཡན་ལག་དག་རྣམ་པར་གཅོད་པར་བགྱིད་ཅིང ། མིག་འབྱིན་པ་དང ། རྣ་བ་དང ། སྣ་དང ། ལག་པ་དང ། རྐང་པ་དག་རྣམ་པར་གཅོད་པ་ལྟ་ཅི་སྨོས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ད་ལྟར་དང ། མ་འོངས་པའི་དུས་ན་དེ་བཞིན་གཤེགས་པ་འཚོ་བའམ།་ཡོངས་སུ་མྱ་ངན་ལས་འདས་པའང་རུང་སྟེ། ལྔ་བརྒྱ་པ་ཐ་མ་ལ་དམ་པའི་ཆོས་ཟད་པར་འགྱུར་བའི་བར་དུ་ཁྱིམ་ན་གནས་པ་དང ། རབ་ཏུ་བྱུང་བ་གང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་དང ། ནོར་གྱི་ཡོ་བྱད་དང ། ཞིང་གི་གཞི་དང ། ཁྱིམ་གྱི་གཞི་དང །
163a
༄#། །ཀུན་དགའི་ར་བ་དང ། སྐྱེད་མོས་ཚལ་དང ། བྲན་དང ། བྲན་མོ་དང ། རྐང་བཞི་པ་དང ། ཆོས་གོས་དང ། བསོད་སྙོམས་དང ། མལ་ཆ་དང ། སྟན་དང ། ན་བའི་གསོས་སྨན་དང ། ཡོ་བྱད་དག་ཡོད་པ་དེ་ལས་འཕྲོག་གམ་རྐུ་བ་དེ་ལ་རྒྱལ་རིགས་བཏང་སྙོམས་པར་བྱེད་ཅིང ། རབ་ཏུ་བྱུང་བ་དང ། ཁྱིམ་ན་གནས་པ་རྐུན་མ་དེ་དག་ཆད་པ་ཅི་ཡོད་པ་བཞིན་ཆད་པས་གཅོད་དུ་མི་འཇུག་ན། རྒྱལ་རིགས་དེ་བསོད་ནམས་མ་ཡིན་པ་ཆེས་མང་དུ་སྐྱེད་དོ། །རྒྱལ་རིགས་ཇི་ལྟ་བ་བཞིན་གྲོང་གི་བླར་བསྐོས་པ་དང ། གྲོང་ཁྱེར་གྱི་བླ་དང ། གྲོང་རྡལ་གྱི་བླ་དང ། ལྗོངས་ཀྱི་བླར་བསྐོས་པའང་དེ་བཞིན་དུ་བཏང་སྙོམས་པར་བྱེད་ཅིང ། དེ་ལྟར་རྐུ་བའི་སེམས་ཅན་ད་དག་ཟློག་པར་མི་བྱེད་ན། དེ་ལྟ་བུའི་གྲོང་གི་བླ་ནས་ལྗོངས་ཀྱི་བླའི་བར་དེ་བསོད་ནམས་མ་ཡིན་པའི་ཕུང་པོ་ཆེས་མང་དུ་སྐྱེད་དོ། །དེ་ནས་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། རྒྱལ་པོ་ཉིད་ནི། ཤིན་ཏུ་ལྕི་བ་ལགས་སོ། །རྒྱལ་རིགས་ནི། བག་མ་མཆིས་པ་མང་པོ་དང་ལྡན་པར་གནས་པ་ལགས་སོ། །བཙུན་པ་བཅོམ་ལྡན་འདས། གང་ཡང་རྒྱལ་པོ་བག་མ་མཆིས་པར་གནས་ཤིང ། གང་ཟག་ཆོས་ཀྱིས་གནས་པ་དེ་ལྟ་བུ་དག་སྲུང་བར་
163b
བགྱིད་པ་དང ། དེ་བཞིན་དུ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་འཕྲོག་པའི་སེམས་ཅན་རྣམས་སྡིག་པའི་ལས་དེ་ལས་ཟློག་པར་བགྱིད་པ་དང ། གྲོང་གི་བླ་ནས་ལྗོངས་ཀྱི་བླའི་བར་ཡང་དེ་བཞིན་དུ་དེ་ལྟར་བསྔོས་པའི་ལོངས་སྤྱོད་དང ། ཉེ་བར་སྤྱོད་པ་དག་རྐུ་བའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བགྱིད་ན། དེ་བསོད་ནམས་ཀྱི་ཕུང་པོ་ཇི་སྙེད་ཅིག་བསྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གལ་ཏེ་ངས་སྔར་གསུངས་པ་བཞིན་བསོད་ནམས་ཀྱི་ཕུང་པོ་དེ་ལྟ་བུ་དང་སེམས་ཅན་ཐམས་ཅད་ལྡན་པ་དག་ཏུ་གྱུར་ལ། ཐམས་ཅད་ཀྱང་བཙོན་རར་བཅུག་ཅིང་བཀྲེས་པ་དང་སྐོམ་པ་དག་གིས་གཟིར་བར་གྱུར་ལ། དེ་ལ་གང་སེམས་ཅན་ཐམས་ཅད་དེ་ལྟ་བུའི་བསོད་ནམས་དང་ལྡན་པ་དག་བཙོན་ར་དེ་ནས་ཡོངས་སུ་ཐར་པར་བྱེད་ཅིང ། ལོ་བརྒྱ་ཚང་བར་ཡང་སེམས་ཅན་དེ་དག་ཐམས་ཅད་ལ་ཆོས་གོས་དང ། བསོད་སྙོམས་དང ། མལ་ཆ་དང ། སྟན་དང ། ན་པའི་གསོས་སྨན་དང་།ཡོ་བྱད་དག་གིས་རིམ་གྲོ་བྱེད་པའི་སྐྱེས་བུ་འགའ་ཞིག་བྱུང་བར་གྱུར་ན། རྒྱལ་པོ་ཆེན་པོ། འདི་ཇི་སྙམ་དུ་སེམས། ཅི་སྐྱེས་བུ་དེ་གཞི་དེ་ལས་བསོད་ནམས་མང་དུ་སྐྱེད་པར་འགྱུར་
164a
༄#། །རམ།་གསོལ་པ། བཙུན་པ་བཅོམ་ལྡན་འདས། མང་ལགས་སོ། །བཙུན་པ་བདེ་བར་གཤེགས་པ། སྐྱེས་བུ་དེ་ནི། བསོད་ནམས་ཀྱི་ཕུང་པོ་གྲངས་མ་མཆིས། ཚད་མ་མཆིས། དཔག་ཏུ་མ་མཆིས་པ་བསྐྱེད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བས་ཀྱང་གང་ད་ལྟར་ནས་མ་འོངས་པའི་དུས་ལྔ་བརྒྱ་པ་ཐ་མའི་བར་ལ་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པ་འཕྲོག་པའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བྱེད་པའི་རྒྱལ་རིགས་སམ་ལྗོངས་ཀྱི་བླ་དེ་བསོད་ནམས་ཀྱི་ཕུང་པོ་ཆེས་མང་དུ་བསྐྱེད་པར་འགྱུར་རོ། །རྒྱལ་པོས་གསོལ་པ། བཙུན་པ་བཅོམ་ལྡན་འདས། གལ་ཏེ་དགེ་སློང་ཆོས་ཀྱིས་གནས་པ་གཅིག་ཅིག་གི་མ་བསྲུངས་ན། དེ་བསོད་ནམས་མ་ལགས་པ་དེ་སྙེད་ཅིག་བསྐྱེད་པར་འགྱུར་ལགས་ན། གང་ཡང་གཅིག་གི་སྲུང་བར་བགྱིད་པ་དེ་བསོད་ནམས་དེ་སྙེད་ཅིག་བསྐྱེད་པར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་ཟག་གཅིག་གི་ལེན་པ་ངས་མ་གནང་ངོ ། །གཉིས་ལས་མ་ཡིན། གསུམ་གྱི་མ་ཡིན། བཞིའི་མ་ཡིན་གྱི། རྒྱལ་པོ་ཆེན་པོ། ཕྱོགས་བཞིའི་དག་འདུན་གྱི་ཕྱིར་གཙུག་ལག་ཁང་གཅིག་དང ། དགོན་
164b
པའི་གནས་གཅིག་ཏུ་ཡེ་ཉུང་ནའང་དགེ་སློང་ཆོས་ཀྱིས་གནས་པ་ལྔའི་ལེན་པར་གནས་གནང་སྟེ། གཎྜི་བརྡུངས་ནས་ཕྱོགས་བཞིའི་དགེ་སློང་གློ་བུར་དུ་ལྷགས་པ་དག་ལྷན་ཅིག་ཏུ་ལོངས་སྤྱོད་པ་དང ། ཉེ་བར་སྤྱོད་པ་དང ། གནས་ཁང་དང ། མལ་ཆ་དང ། སྟན་དང ། བཟའ་བ་དང ། བཏུང་བ་དང ། ན་བའི་གསོས་སྨན་དང ། ཡོ་བྱད་དག་ལོངས་སྤྱོད་པར་ངས་གནང་ངོ། །གལ་ཏེ་གཙུག་ལྷག་ཁང་གཅིག་དང ། དགོན་པའི་གནས་གཅིག་ཏུ་དགེ་སློང་བརྒྱ་སྟོང་གི་བར་གནས་པར་བྱེད་ན། དེར་ཡང་གཎྜི་བརྡུངས་ནས་ཕྱོགས་བཞིའི་དགེ་སློང་གློ་བུར་དུ་ལྷགས་པ་དག་དང་ལྷན་ཅིག་ཏུ་སྨན་གྱི་ཡོ་བྱད་ཀྱི་བར་དག་ལ་ལོངས་སྤྱོད་པར་ངས་གནང་ངོ ། །མ་ཆགས་པ་དག་དང ། མ་བཅིངས་པ་དག་དང ། མ་ཆུམས་པ་དག་དང ། ནམ་གྱི་ཆ་སྟོད་དང ། ནམ་གྱི་ཆ་སྨད་དག་ལ་མི་ཉལ་བའི་སྦྱོར་བ་ལ་རྗེས་སུ་བརྩོན་པ་དག་དང ། འཁོར་བ་ལ་རྒྱབ་ཀྱིས་ཕྱོགས་པ་དག་དང ། མྱ་ངན་ལས་འདས་པ་ལ་ནང་དུ་ཕྱོགས་པ་དག་དང ། གཞན་ལ་མི་སྨོད་པ་དག་དང ། བདག་ལ་མི་བསྟོད་པ་དག་དང ། ཆོག་ཤེས་པ་དང ། སྦྱངས་པའི་ཡོན་ཏན་སྤྱོད་པ་དང ། རབ་ཏུ་དབེན་པ་དང ། བརྩོན་འགྲུས་བརྩམས་པ་དག་དང ། མཉམ་པར་བཞག་པ་དང ། དྲན་པ་ཉེ་བར་བཞག་པ་དག་གིས་ལོངས་སྤྱོད་པར་ངས་གནང་ངོ ། །རྒྱལ་པོ་ཆེན་པོ། དགེ་སློང་གི་དགེ་འདུན་གྱི་ནང་ན་སེམས་ཅན་དེ་ལྟ་བུ་དག་གནས་ཏེ། རྒྱལ་
165a
༄#། །པོ་ཆེན་པོ། དགེ་སློང་གི་དགེ་འདུན་གྱི་ནང་ན་སེམས་ཅན་དེ་ལྟ་བུ་དག་ལ་སེམས་ཅན་རྣམས་ཀྱིས་ལོངས་སྤྱོད་དང ། ཉེ་བར་སྤྱོད་པ་ཡོངས་སུ་བཏང་བས་བསོད་ནམས་ཚད་མེད་པ་སྐྱེད་དོ། །རྒྱལ་པོ་ཆེན་པོ། གཙུག་ལག་ཁང་ངམ། དགོན་པའི་གནས་གང་ན་དགེ་སློང་ལྔའམ། ལྷག་པར་གནས་ཀྱང་རུང་སྟེ། ཚུལ་ཁྲིམས་དང་ལྡན་པ་དག་དང ། ཚུལ་ཁྲིམས་ཡོངས་སུ་དག་པ་དང ། ཁ་ན་མ་ཐོ་བ་ཕྲ་མོ་དག་ལའང་འཇིགས་པར་ལྟ་བ་དག་གནས་པར་བྱེད་ཅིང ། དེ་བཞིན་གཤེགས་པས་གསུངས་པ་སྟོང་པ་ཉིད་དང་ལྡན་པའི་མདོ་སྡེ་དེ་དག་ཀྱང་སྟོན་པར་བྱེད། ཁ་ཏོན་དུ་བྱེད་ལ། གཞན་ལ་མི་སྨོད་ཅིང་བདག་ལ་མི་བསྟོད་པ། ཕྲག་དོག་དང་སེར་སྣ་རྣམ་པར་སྤངས་པ ། སེམས་ཅན་ཐམས་ཅད་ལ་སྙིང་བརྩེ་བ། ཐར་པ་ལ་མངོན་པར་བརྩོན་པ་དག་གནས་ལ། གཎྜི་བརྡུངས་ནས་ལོངས་སྤྱོད་པར་བྱེད་ན། དགེ་སློང་གི་དགེ་འདུན་དེ་ལྟ་བུ་ལས་སེམས་ཅན་རྣམས་བསོད་ནམས་ཚད་མེད་པ་དེ་ལྟ་བུ་འཛིན་པ་དག་ཏུ་བྱེད་དོ། །རྒྱལ་པོ་ཆེན་པོ། ཡེ་ཉུང་སྟེ་དགེ་སློང་གི་དགེ་འདུན་ལྔའི་ཚོགས་ཤིག་ཡོད་དུ་ཟིན་ཀྱང་གལ་ཏེ་ཡང་ཚུལ་ཁྲིམས་ཡོངས་སུ་དག་ཅིང་ངོ་ཚ་ཤེས་པ་དང ། ཁྲེལ་ཡོད་པ་ཕུན་སུམ་ཚོགས་པ། འཇིག་རྟེན་ཕ་རོལ་གྱི་ཁ་ན་མ་ཐོ་བ་ལ་འཇིགས་པར་ལྟ་ཞིང་སྦྱངས་པའི་
165b
ཡོན་ཏན་དང་འཕགས་པའི་རིགས་ལ་མངོན་པར་བརྩོན་པ་ཡིན་ན། རྒྱལ་པོ་ཆེན་པོ། དེ་ནི། དགེ་སློང་གི་དགེ་འདུན་རྒྱ་མཚོ་དང་འདྲ་བར་གསུངས་ཤིང ། དེ་ནི། མི་དཔག་ཏུ་མེད་པ་དག་ལ་ཕན་པ་བྱེད་པ་དང ། དོན་བྱེད་པ་དང ། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་ལས་རབ་ཏུ་རྣམ་པར་ཐར་པར་བྱེད་པ་ཡིན་པར་གསུངས་ན། དགེ་སློང་གི་དགེ་འདུན་བཅུའི་ཚོགས་དང་ཞེས་བྱ་བ་ནས་བརྒྱ་སྟོང་གི་ཚོགས་ཞེས་བྱ་བའི་བར་དག་ལྟ་སྨོས་ཀྱང་ཅི་དགོས། རྒྱལ་པོ་ཆེན་པོ། དགེ་སློང་གི་དགེ་འདུན་གང་ལ་བྲམ་ཟེ་དང་ཁྱིམ་བདག་ཆེན་པོ་དད་པ་ཅན་དག་རིམ་གྲོ་བྱ་བའི་ཕྱིར་གཎྜི་རྡུང་བ་དག་ཏུ་བྱེད་ཅིང ། དེར་ཡང་གལ་ཏེ་དགེ་སྦྱོང་ལྟར་བཅོས་པ་སྡིག་པ་སྤྱོད་པའི་དགེ་སློང་ཉུང་མང་རུང ། མང་ཡང་རུང་བ་དག་ཀྱང་འདུ་ལ། དེར་གལ་ཏེ་དགེ་སློང་ཆོས་ཀྱིས་གནས་པ། ཚུལ་ཁྲིམས་ཡོངས་སུ་དག་པ། ངོ་ཚ་ཤེས་པ་དང ། ཁྲེལ་ཡོད་པ་ཕུན་སུམ་ཚོགས་པ་དགེ་སློང་ལྔའང་འདུ་ན། རྒྱལ་པོ་ཆེན་པོ། དགེ་སློང་གི་དགེ་འདུན་དེ་ནི། ཆོས་ཚད་མེད་པ་དང་ལྡན་པ་ཡིན་ཞིང་སྦྱིན་གནས་ཆེན་པོ་དང ། ལྷ་དང་མི་ཐམས་ཅད་ཀྱིས་མཆོད་པར་འོས་པར་འགྱུར་རོ། །རྒྱལ་པོ་ཆེན་པོ། དེ་ལྟ་བས་ན། དགེ་སློང་ཆོས་ཀྱིས་གནས་པ་དག་དང ། ཆོས་ཀྱི་ཀུན་དགའ་ལ་དགའ་བ་དག་ཁྱེད་ཀྱི་ལག་ཏུ་ངས་ཡོངས་སུ་གཏད་དོ། །ཁྱིམ་ན་གནས་པ་དང ། རབ་ཏུ་བྱུང་བ་ལ་ལས་དེ་དག་ལ་རྐྱེན་གང་ཡང་རུང་བ་དག་གིས་གཙེས་\?\་
166a
༄#། །སམ།་གནོད་པར་བྱས་ན་མི་རུང་གི་།ཁྱེད་ཀྱིས་སྲུངས་ཤིག་།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་གཉིས་པ། རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཅི་དགེ་སློང་སྡིག་པ་སྤྱོད་པ་ཚུལ་ཁྲིམས་འཆལ་བ་རྣམས་ཀྱིས་དགེ་འདུན་གྱི་ནང་དུ་ལོངས་སྤྱོད་པར་བགྱི་ལགས་སམ། ཆོས་གོས་དང ། བསོད་སྙོམས་དང ། མལ་ཆ་དང ། སྟན་དང ། ན་བའི་གསོས་སྨན་དང ། ཡོ་བྱད་དམ་པ་དག་ཀྱང་ལོངས་སྤྱོད་དང ། ཉེ་བར་སྤྱོད་པར་བགྱི་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་ཁྱེད་ཀྱི་བློན་པོ་ཆེན་པོ་དང ། སྣ་ཆེན་པོ་ལ་གཏོགས་པ་དང ། རྒྱལ་པོས་བཀྲབས་པ་དང ། ཉུང་རུམ་དང ། རྒྱལ་རིགས་དང ། བྲམ་ཟེ་དང ། ཁྱིམ་བདག་གཞུང་ལུགས་ལས་འགལ་བ་ཉེས་པ་དང་བཅས་པ་ཞིག་ཡོད་ན། གང་ན་རྒྱལ་པོ་ཆེན་པོའི་དགའ་སྟོན་ནམ། དུས་སྟོན་ཉེ་བར་གནས་པར་གྱུར་པའི་འཁོར་གྱི་ནང་དེར་ཉེས་པ་དང་བཅས་པའི་སྐྱེས་བུ་དེ་འཇུག་པ་དང ། ལོངས་སྤྱོད་པ་དང ། དགའ་བ་དང ། རྩེ་བ་ཉམས་སུ་མྱོང་བར་བྱ་བ་དང ། བདེ་བ་དང ། ཡིད་བདེ་བ་མང་ཞིང་གནས་པར་ནུས་སམ། རྒྱལ་པོས་གསོལ་པ། བཙུན་པ་བཅོམ་ལྡན་འདས། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་
166b
དུ་གང་ཚུལ་ཁྲིམས་འཆལ་བ། སྡིག་པའི་ཆོས་ཀུན་ཏུ་སྤྱོད་པ། ཤིང་རུལ་བ་ལྟ་བུར་གྱུར་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བའི་གང་ཟག་དེ་ལྟ་བུ་ནི། འདས་པ་དང ། མ་བྱོན་པ་དང ། ད་ལྟར་གྱི་སངས་རྒྱས་བཅོམ་ལྡན་འདས་ཐམས་ཅད་ལ་གནོད་པ་ཡིན་ཏེ། དེ་ནི། བཅོམ་ལྡན་འདས་ཀྱི་ཉན་ཐོས་མ་ཡིན་ཞིང་བདུད་ཀྱི་སྟོབས་ཀྱི་རིགས་ཀྱིས་ཟིན་པ་ཡིན་ནོ། །གང་ཟག་དེ་ནི། ལམ་ཉམ་ང་བ་ལ་གནས་པ་ཡིན་ཏེ། དེ་ནི། ཕྱིས་ཀྱང་ཉན་ཐོས་ཀྱི་དགེ་འདུན་གྱི་ནང་དུ་བགྲང་བ་མ་ཡིན་ནོ། །དེ་བཞིན་དུ་དེར་འཇུག་པར་བྱ་བ་མ་ཡིན་ཏེ། དགེ་སློང་ཆོས་ཀྱིས་གནས་པ་རྣམས་ལ་བསྔོས་ན་ཐ་ན་ཏིལ་གྱི་ཕུབ་མ་ཙམ་ཡང་ལོངས་སྤྱོད་པར་འོས་པ་མ་ཡིན་ན། དགེ་འདུན་གྱི་ནང་དུ་ཉེ་བར་ལོངས་སྤྱོད་པར་བྱ་བ་ལྟ་སྨོས་ཀྱང་ཅི་དགོས་ཏེ། དེ་ནི། ཆོས་འདུལ་བ་འདིས་བོར་བ་ཡིན་ནོ། །རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སྤྱོད་པའི་མཚན་ཉིད་ཀྱི་མཚན་མ་གང་དག་གིས་དགེ་སློང་ཚུལ་ཁྲིམས་འཆལ་བ། སྡིག་པའི་ཆོས་ཀུན་ཏུ་སྤྱོད་པ། དགེ་སློང་ཆོས་ཀྱིས་གནས་པ་རྣམས་ཀྱི་ནང་དུ་སླན་ཆད་གནས་པ་དང ། ལོངས་སྤྱོད་དང ། ཉེ་བར་སྤྱོད་པར་བགྱིད་པར་མི་འོས་པར་འཚལ་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། རྣམ་པ་
167a
༄#། །འདི་ལྟ་བུས་ཚུལ་ཁྲིམས་འཆལ་བའི་མགོ་འབྱུང་བར་འགྱུར་རོ། །ཞེས་གང་གིས་ཀྱང་མྱུར་དུ་རྣམ་པར་ཤེས་པར་མི་ནུས་ཏེ། རྒྱལ་པོ་ཆེན་པོ། འདི་ནི།་ནང་གི་དང་པོར་སངས་རྒྱས་ལ་མགུས་པ་ཡིན་ནོ། །ཆོས་དང ། དགེ་འདུན་དང ། མཁན་པོ་དང ། སློབ་དཔོན་དང ། བླ་མའི་གནས་ལྟ་བུ་རྣམས་ལ་མ་གུས་པ་ཡིན།་འཕགས་པའི་རིགས་བཏང་བ་ཡིན། རྣལ་འབྱོར་ཡིད་ལ་བྱེད་པ་ལ་ཀུན་དགའ་བ་མ་ཡིན། ངོ་ཚ་ཤེས་པ་དང ། ཁྲེལ་ཡོད་པ་རྣམ་པར་སྤངས་པ་ཡིན ། ཁྱིམ་ན་གནས་པ་དང་འདྲིས་པ་ཡིན། ཚིག་ཀྱལ་པ་སྨྲ་བ་ཡིན། བདག་ལ་བསྟོད་པ་ཡིན། གཞན་ལ་སྨོད་པ་ཡིན། དེ་ལྟ་བུ་དག་ལ་ཀུན་དགའ་བ་ཡིན། སྡིག་པའི་སྙི་ལ་ཆགས་པ་ཡིན། ལམ་ངན་པར་ཞུགས་པ་ཡིན། ཁེངས་པ་ཡིན། ཁ་དྲག་པ་ཡིན། འཕྲལ་གཡར་ཅན་ཡིན། འཕྱར་པོ་ཡིན། ཁ་ཤིང་ཅན་ཡིན། གཡོ་སྒྱུ་ཅན་ཡིན། སྒྱུ་བྱེད་པ་ཡིན། དགེ་སྦྱོང་ཡོན་པོ་ཡིན། དགེ་སྦྱོང་གཡོ་ཅན་ཡིན། དགེ་སློང་སྙེ་ལོང་ལྟ་བུ་ཡིན། དགེ་སློང་གི་དགེ་འདུན་མི་མཐུན་པར་འདོད་པར་སྨྲ་བ་ཡིན ། རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་མངོན་པར་དགའ་བ་ཡིན། འདུ་འཛིའི་ཀུན་དགའ་ལ་དགའ་བ་ཡིན་ཏེ། སྡིག་པ་ཅན་གྱི་དགེ་སློང་ཚུལ་ཁྲིམས་
167b
འཆལ་པ་དེ་ནི། ཇི་སྲིད་དུ་དེའི་ཚུལ་ཁྲིམས་འཆལ་པའི་མགོ་བྱུང་བར་མ་གྱུར་གྱི་བར་དུ་གང་གིས་ཀྱང་མཚན་མ་དེ་དག་གིས་མྱུར་དུ་ཤེས་པར་མི་ནུས་སོ། །སྡིག་པ་ཅན་གྱི་དགེ་སློང་དེ་གང་གི་ཚེ་ཁྱིམ་གྱི་གཞི་དང ། ཞིང་གི་གཞི་དང ། ཀུན་དགའ་ར་བའི་གཞི་དང ། བྲན་དང ། བྲན་མོ་དང ། གླང་པོ་ཆེ་དང ། རྟ་དང ། རྔ་མོང་དང ། བོང་བུ་དང ། ལུག་དག་གང་ཟག་གིར་སྲེལ་བར་བྱེད་ན། དེ་ནི། དེའི་ཚུལ་ཁྲིམས་འཆལ་བའི་མགོ་བྱུང་བ་ཡིན་ཏེ། ཚུལ་ཁྲིམས་འཆལ་པའི་མགོ་དེས་ནི། སྡིག་པ་ཅན་གྱི་དགེ་སློང་དེ་དགེ་སློང་གི་དགེ་འདུན་གྱི་ནང་ནས་དོར་བ་ཡིན། གནས་པར་བྱ་བ་མ་ཡིན། ལོངས་སྤྱོད་པར་བྱ་བ་མ་ཡིན། དགེ་སློང་གི་དངོས་པོ་ལས་ལྷུང་བ་ཡིན། ཕམ་པར་གྱུར་པ་ཡིན་ཏེ། དགེ་སློང་གི་ཚུལ་ལས་ཀྱང་ཕྱིས་བསླད་དུ་མེད་པར་འགྱུར་བ་ཡིན་ནོ། །རྒྱལ་པོ་ཆེན་པོ། མི་གདོལ་བ་གནས་ན་གནས་པར་བྱེད་པ་ནི། བླའི། དགེ་སློང་གདོལ་བ་ཡོངས་སུ་འཛིན་པ་དང་བཅས་པ། རྒྱུད་ཚིག་པ། དོན་ལ་མི་ལྟ་བ། འཇིག་རྟེན་ཕ་རོལ་བཏང་བ། སྙིང་རྗེའི་བསམ་པ་མེད་པ། ཕྱིས་ཁུང་ཆེན་པོ་དང་འདྲ་བ། བདུད་ཀྱི་ལམ་དུ་ཞུགས་པ། ལྷ་དང་མི་རྣམས་ལ་གནོད་པ་བྱེད་པ། དུས་གསུམ་ཐམས་ཅད་ཀྱི་དྲང་སྲོང་ཐུབ་པ་རྣམས་ལ་སླུ་བར་བྱེད་པ། དཀོན་མཆོག་གསུམ་གྱི་གདུང་ཆོས་ཀྱི་མར་མེ་མེད་པར་བྱེད་པ། ཆོས་ཀྱི་རྒྱ་མཚོ་སྐེམ་པར་བྱེད་པ། ཆོས་སྨྲ་བའི་དབྱེན་བྱེད་པ། སྦྱིན་པ་པོ་དང་སྦྱིན་བདག་རྣམས་ལ་འདྲིང་
168a
༄#། །པར་བྱེད་པ། དགེ་སློང་ཆོས་ཀྱིས་གནས་པ་རྣམས་ལ་མཐོ་འཚམ་པར་བྱེད་བ། དགེ་འདུན་མཐུན་བར་བྱེད་པའི་རྒྱུན་གཅོད་པར་བྱེད་པ་ནི། དེ་ལྟ་མ་ཡིན་ནོ། །སྡིག་པ་ཅན་གྱི་དགེ་སློང་དེ་ནི། ཡོངས་སུ་འཛིན་པའི་རྐྱེན་གྱིས་མཐོ་རིས་ཀྱི་ལམ་ལས་རྒྱལ་པོ་ལྡོག་པར་བྱེད་པ་ཡིན་ནོ། །རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་དང ། སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ལྡོག་པར་བྱེད་པ་ཡིན་ནོ། །ངན་སོང་གི་ལམ་གསུམ་ལ་རབ་ཏུ་གཞོག་པར་བྱེད་པ་ཡིན་ནོ། །རྒྱལ་པོ་ཆེན་པོ། སྡིག་པ་ཅན་གྱི་དགེ་སློང་དེ་ཡོངས་སུ་འཛིན་པའི་རྒྱུ་མཚན་གྱིས་ལྷ་དང་མི་ཇི་སྙེད་ཅིག་མི་སྐྱིད་པར་བྱེད་པར་འགྱུར་པ་ལ་ལྟོས། རྒྱལ་པོ་ཆེན་པོ། དེ་ལྟ་བས་ན། ཡོངས་སུ་འཛིན་པ་དང་བཅས་པའི་དགེ་སློང་དང ། དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་དང་ལྷན་ཅིག་ཏུ་ཀུན་དགའ་ར་བ་གཅིག་དང ། གཙུག་ལག་ཁང་གཅིག་ཏུ་གནས་པར་མི་བྱའོ། །གལ་ཏེ་སྡིག་པ་ཅན་གྱི་དགེ་སློང་དེ་ཁ་དྲག་ཅིང་ངོ་ཚ་ཤེས་པ་དང་ཁྲེལ་ཡོད་པ་རྣམ་པར་སྤངས་ཏེ་དགེ་སློང་དེ་དག་དང་ལྷན་ཅིག་གནས་པར་བྱེད་ན། དེའི་ཕྱིར་དགེ་སློང་ཆོས་ཀྱིས་གནས་པ་དེ་དག་གིས་བྱམས་པ་དང་ལྡན་ཞིང་ཆོས་དང་མཐུན་པས་དྲན་པར་བྱ་སྟེ། གལ་ཏེ་སྡིག་པ་ཅན་གྱི་དགེ་སློང་དེ་གནས་དེ་ནས་འགྲོ་བ་ལྟ་ན། དེ་ལྟར་ནི། ལེགས། གལ་ཏེ་
168b
འགྲོ་བར་མི་བྱེད་ན། དེར་དགེ་སློང་ཆོས་ཀྱིས་གནས་པ་དེ་དག་དོང་ལ་གྲོང་ཁྱེར་དང ། གྲོང་རྡལ་དང ། གྲོང་དང ། ལྗོངས་དང ། རི་འོར་དེ་དག་ན་རྒྱལ་རིགས་སམ། བྲམ་ཟེའམ། རྗེའུ་རིགས་སམ།་དམང་རིགས་གང་དབང་བྱེད་དུ་འཇུག་པ་དེ་ལ་སྦྲན་པར་བྱའོ། །གལ་ཏེ་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་དེས་སྡིག་པ་ཅན་གྱི་དགེ་སློང་ཡོངས་སུ་འཛིན་དང་བཅས་པ་གནས་དེ་ནས་ཟློག་པར་བྱེད་ན། དེར་ནི། དགེ་སློང་ཆོས་ཀྱིས་གནས་པ་དེ་དག་གིས་གནས་པར་བྱའོ། །ཅི་སྟེ་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམང་རིགས་དེ་བཟའ་བ་དང ། བཏུང་བ་དང ། རྙེད་པའི་རྒྱུས་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པའི་ཕྱོགས་བྱེད་པ་ལྟ་ན། དེའི་ཕྱིར་དགེ་སློང་ཆོས་ཀྱིས་གནས་པ་དེ་དག་གིས་ཁྲོ་བ་བསྟན་པར་མི་བྱའོ། །ཆགས་པ་མ་ཡིན། ང་རྒྱལ་མ་ཡིན་ཏེ། འོན་ཀྱང་ཅང་མི་སྨྲ་བར་གནས་དེ་ནས་འགྲོ་བར་བྱ་ཞིང་དགོན་པའི་གནས་སམ། ནགས་ཁྲོད་དམ། རིའམ། རི་པོའི་འོར་གཞན་གང་ན་སྒྲ་གཅོམ་ཆུང་བ་དང ། ནང་དུ་ཡང་དག་འཇོག་དང་འཚམ་པའམ། ཚུལ་བཞིན་དུ་ཡིད་ལ་བྱེད་པ་དང་མཐུན་པ་དེར་གནས་པར་བྱའོ། །ཡང་རྒྱལ་པོ་གཟུགས་ཅན་སྙིང་པོས་མཆིམ་ཕྱུང་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་བཟའ་བ་དང ། བཏུང་བ་དང ། རྙེད་པའི་
169a
༄#། །སླད་དུ་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པའི་ཕྱོགས་བགྱིད་ཅིང ། དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པོ་རྣམས་ཀྱང་གནས་ནས་མཆི་བར་འགྱུར་པའི་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་ནི། ཉམས་པ་ལགས་སོ། །བཙུན་པ་བདེ་བར་གཤེགས་པ། མཆོག་ཏུ་ཉམས་པ་ལགས་སོ། །དེའི་མི་ཉིད་རྙེད་པ་ནི། རྙེད་པར་དཀའ་བ་ལགས་ཏེ། འཁོར་བ་ན་འཁོར་བར་བགྱིད་པ་དེའི་མི་ཉིད་རྙེད་པའི་ཐ་མ་ནི། དེ་ལགས་སོ། །སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་གྲངས་མ་མཆིས། དཔག་ཏུ་མ་མཆིས་པ་གངྒཱའི་ཀླུང་གི་བྱེ་མ་སྙེད་འཇིག་རྟེན་དུ་འབྱུང་བར་འགྱུར་བས་ཀྱང་གང་དགེ་སློང་ཆོས་ཀྱིས་གནས་པ་རྣམས་ཀྱི་ཚིག་གུས་པར་མི་ཉན་པའི་སེམས་ཅན་དེ་ནི། ངན་སོང་རྣམས་ལས་ཡོངས་སུ་ཐར་བར་བགྱི་བ་འམ ། མཐོ་རིས་སུ་གཞག་པར་མི་སྤྱོད་དེ། དེ་ནི། སྡིག་པའི་ལས་དེ་ལྟ་བུ་དང་ལྡན་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། མ་འོངས་པའི་དུས་ན་ལ་ལར་གང་དགེ་སློང་ཆོས་ཀྱིས་གནས་པ་རྣམས་ལ་ཤིན་ཏུ་དག་པའི་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་དག་
169b
འབྱུང་བར་འགྱུར་ཏེ། དེ་དག་གི་དོན་དུ་དགོན་པའི་གནས་དག་བྱེད་པར་འགྱུར་རོ། །གཙུག་ལག་ཁང་དང ། དགོན་པའི་གནས་དེར་ཡང་ཁྱིམ་གྱི་གཞི་ནས་ཞིང་གི་གཞི་དང ། བྲན་དང ། བྲན་མོ་དང ། ཀུན་དགའ་ར་བའི་བར་དེ་དག་གི་ལོངས་སྤྱོད་དང ། ཉེ་བར་སྤྱོད་པའི་ཕྱིར་ཡོངས་སུ་གཏོང་བ་བྱེད་པར་འགྱུར་རོ། །དེ་དག་འཆི་བའི་དུས་བྱས་ནས་ཀྱང་རྒྱལ་རིགས་ཤིང་སཱ་ལ་ཆེན་པོ་ལྟ་བུ་དག་ཏུ་སྐྱེ་བར་འགྱུར་བ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ལྷ་རྣམས་ཀྱི་ནང་དུ་སྐྱེ་བའི་བར་དུ་འགྱུར་རོ། །སངས་རྒྱས་ཀྱི་ཞིང་ཡོངས་སུ་དག་པ་དག་ཏུའང་སྐྱེ་བར་འགྱུར་རོ། །སངས་རྒྱས་བཅོམ་ལྡན་འདས་རྣམས་དང་ཡང་ཕྲད་པར་འགྱུར་བ་ནས་རིང་པོར་མི་ཐོགས་པར་སྦྱིན་པ་པོ་དང ། སྤྱིན་བདག་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་ཏེ། དེ་དག་ནི། ངའི་བསྟན་པ་ལ་དགེ་སློང་ཆོས་ཀྱིས་གནས་པ་རྣམས་ཡང་དག་པར་འཛིན་པར་བྱེད་པར་འགྱུར་བ་ཡིན་ནོ། །རྒྱལ་པོ་ཆེན་པོ། འདི་ལྟ་སྟེ། གང་ཁྱོད་ཀྱི་བུའམ། སྤུན་ནམ། བཀྲབས་པའམ། སྣ་ཆེན་པོ་ལ་གཏོགས་པ་གང་ཡང་རུང་བ་ཞིག་ཉེས་པ་དང་བཅས་པ་ཡིན་ན། གང་དང་གང་དུ་རྒྱལ་པོ་ཆེན་པོའི་དུས་སྟོན་ནམ། དགའ་སྟོན་བྱུང་བ་དེར་རྒྱལ་པོ་ཆེན་པོས་དགའ་བ་དང་བདེ་བ་རྣམ་པ་སྣ་ཚོགས་ཉམ་
170a
༄#། །སུ་མྱོང་བར་བྱེད་ན། རྒྱལ་པོ་ཆེན་པོ། འདི་ཇི་སྙམ་དུ་སེམས། སྐྱེས་བུ་དེ་ཁྱོད་ཀྱི་མདུན་དུ་འདུག་ཅིང་སྐྱེད་པ་དང་རྩེ་བ་མྱོང་བར་བྱེད་པའམ། དགའ་བ་དང་བདེ་བ་རྣམ་པ་སྣ་ཚོགས་ཀྱིས་གནས་པར་བྱེད་ནུས་སམ། རྒྱལ་པོས་གསོལ་པ། བཙུན་པ་བཅོམ་ལྡན་འདས། མ་ལགས་ཏེ། སྐྱེས་བུ་དེས་བདག་གི་མདུན་ན་མཆིས་པར་ཡང་རྔོ་མི་ཐོགས་ལགས་ན། སྐྱིད་པ་དང་རྩེ་བ་མྱོང་བར་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་གང་ཟག་གང་ཞིག་གང་ཟག་གིར་བྲན་དང་བྲན་མོ་སྲེལ་བར་བྱེད་ཅིང་ཁྱིམ་གྱི་གཞི་ནས་ཞིང་གི་གཞི་དང ། ལུག་དག་གི་བར་སྲེལ་བར་བྱེད་ན། ངའང་དེའི་སྟོན་པ་མ་ཡིན་ལ། དེའང་ངའི་ཉན་ཐོས་མ་ཡིན་ནོ། །དུས་གསུམ་དུ་གཤེགས་པའི་ཡང་དག་པར་རྫོགས་པའི་སངས་རྒྱས་ཐམས་ཅད་ལའང་གནོད་པར་བྱེད་པ་དང་བཅས་པ་ཡིན་ནོ། །དེ་ནི། ཆོས་ཀྱི་གནས་པ་རྣམས་ཀྱི་གནས་དེ་ལྟར་བསྔོས་པ་དག་ཏུ་ཆོས་དང་མཐུན་པས་གནས་པར་འོས་པ་མ་ཡིན་ནོ། །རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་གང་ཡང་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པ་དེའི་དོན་བྱེད་པ་དང ། དེ་ནས་འགྲོར་མི་སྟེར་བའི་རྒྱལ་རིགས་ནས་དམངས་རིགས་ཀྱི་བར་དེ་ནི། དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ལའང་གནོད་པ་
170b
བྱེད་པ་དང་བཅས་པ་ཆེན་པོ་ཡིན་ནོ། །སྦྱིན་པ་མང་པོ་སྦྱིན་པར་བྱེད་དུ་ཟིན་ཀྱང་འོན་ཀྱང་དེ་འཆི་བའི་དུས་བྱས་ནས་མནར་མེད་པའི་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེ་བར་འགྱུར་རོ། །རྒྱལ་པོ་ཆེན་པོ། དེ་ལྟ་བས་ན། བདག་ལ་ཕན་པར་ཡང་དག་པར་རྗེས་སུ་ལྟ་བས་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པའི་ཕྱོགས་སུ་གནས་པར་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི། ལྷ་དང་མི་ཐམས་ཅད་ལའང་གནོད་པ་དང ། ཕན་པ་མ་ཡིན་པ་དང ། ལོག་པར་ལྟུང་བར་བྱ་བའི་ཕྱིར་ཞུགས་པ་དང ། དཀོན་མཆོག་གསུམ་གྱི་གདུང་མེད་པར་བྱ་བའི་ཕྱིར་ཞུགས་པ་ཡིན་པའི་ཕྱིར་རོ། །རྒྱལ་པོ་ཆེན་པོ། རྒྱལ་རིགས་སམ། བྲམ་ཟེའམ། རྗེའུ་རིགས་སམ། དམངས་རིགས་གང་ཞིག་དགེ་སློང་ཆོས་ཀྱིས་གནས་པ་རྣམས་ཀྱི་ཆོས་ཀྱི་ཕྱོགས་ལ་ཡང་དག་པར་གནས་པར་བྱེད་ཅིང་སྡིག་པ་ཅན་གྱི་དགེ་སློང་རྣམས་ཀྱི་ཕྱོགས་ལ་མ་ཡིན་ན། དེ་སྦྱིན་པ་མི་སྦྱིན་དུ་ཟིན་ཀྱང་འོན་ཀྱང་དེ་ནི། ཆོས་ཀྱི་ཕྱོགས་ཀྱི་རྒྱུའི་ཕྱིར་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་སྦྱིན་བདག་དམ་པ་ཡིན་ནོ། །དེ་ནི། དམ་པའི་ཆོས་རྗེས་སུ་སྲུང་བའི་ཕྱིར་དམ་པའི་ཆོས་འཛིན་པ་དམ་པ་ཡིན་པར་བལྟ་བར་བྱའོ། །འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་བ་ནས་རིང་པོ་མི་ཐོགས་པར་བླ་ན་མེད་
171a
༄#། །པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། །རྒྱལ་པོ་ཆེན་པོ། དེ་ལྟ་བས་ན། རྒྱལ་རིགས་འཚམ་པ་ཁྱོད་ཀྱི་ལག་ཏུ་ཆོས་ཀྱིས་གནས་པ་དང ། བསྟན་པ་ངས་ཡོངས་སུ་གཏད་ཀྱི། ལྔ་བརྒྱ་པ་ཐ་མ་ལ་གནས་པའི་བར་དུ་ཁྱེད་ཀྱིས་ངའི་ཆོས་ཀྱིས་གནས་པ་ཡང་དག་པར་ཟུངས་ཤིག་དང ། དེའི་རྐྱེན་གྱིས་ངའི་ཆོས་ཀྱི་ཚུལ་འདི་དང ། དཀོན་མཆོག་གསུམ་གྱི་གདུང་ཡུན་རིང་དུ་གནས་པར་འགྱུར་ཞིང་ལྷ་དང་མི་རྣམས་ལ་ཕན་པ་དང་བདེ་བར་འགྱུར་རོ། །དེ་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས། ཞལ་ཏ་བ་ཞེས་བགྱི་ལགས་ན། བཅོམ་ལྡན་འདས། ཇི་ཙམ་གྱིས་ན། ཞལ་ཏ་བར་གདགས་པས་གདགས་པར་མཛད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དགེ་སློང་གཉིས་ཞལ་ཏ་བར་ངས་གནང་ངོ ། །གཉིས་གང་ཡིན་ཞེ་ན། གང་ཡང་རྣམ་པར་ཐར་པ་བརྒྱད་ལ་སྒོམ་པའི་དགྲ་བཅོམ་པ་དང ། གང་ཡང་དགེ་སློང་སློབ་པ་རྒྱུན་དུ་ཞུགས་པ་ཡིན་ཏེ། རྒྱལ་པོ་
171b
ཆེན་པོ།་དགེ་སློང་འདི་གཉིས་ཞལ་ཏ་བའི་ལས་བྱེད་པར་ངས་གནང་ངོ ། །འདུས་པ་ཆེན་པོ་ཐེག་པ་ཆེན་པོའི་མདོ་ལས། ལེའུ་བཅུ་གཅིག་པ་སྟེ་ཉི་མའི་སྙིང་པོའི་ལེའུ་ལས་དམ་པའི་ཆོས་སྲུང་བའི་འདུས་པ་དང་པོ་རྫོགས་སོ།། །།གང་གི་ཚེ་བཅོམ་ལྡན་འདས་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཏུ་དགེ་སློང་ཆོས་ཀྱིས་གནས་པ་རྣམས་ཀུན་ཏུ་སྲུང་པའི་གཏམ་ཡང་ཡང་དག་པར་རྩོམ་པ་མཛད་པ་དེའི་ཚེ་དེའི་དུས་ན་ཤར་ཕྱོགས་སུ་སངས་རྒྱས་ཀྱི་ཞིང་ཚད་མེད་པ་གངྒཱའི་ཀླུང་གི་བྱེམ་སྙེད་འདས་པ་དེ་ནི་འཇིག་རྟེན་གྱི་ཁམས་ཡོངས་སུ་གདུང་བ་མེད་པ་ཞེས་བྱ་བ་ཡོད་དོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙམྤ་ཀའི་མདོག་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །སངས་རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་གཤེགས་པ་ཙམྤ་ཀའི་མདོག་དེའི་འཁོར་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ཞེས་བྱ་བ་ཆོས་ཉན་པའི་ཕྱིར་འདུག་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་གྱེན་དུ་རྣམ་པར་བལྟས་པ་དང །
172a
༄#། །བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཤར་ཕྱོགས་ནས་ཆས་ཤིང་ནུབ་ཕྱོགས་སུ་འདོང་བ་དག་མཐོང་བར་གྱུར་ཏོ། །དེ་ནས་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདོང་བ་ནུབ་ཕྱོགས་སུ་བལྟས་ནས་ཀྱང་དེ་ནས་སྣང་བ་ཆེན་པོ་མཐོང་ནས་དེའི་ཚེ་སངས་རྒྱས་ཙམྤ་ཀའི་མདོག་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མ་མཆིས། དཔག་ཏུ་མ་མཆིས་པ་ཤར་ཕྱོགས་ནས་ཆས་ཤིང་ནུབ་ཕྱོགས་སུ་མཆི་བ་དག་བདག་གིས་མཐོང་ལགས་སོ། །ནུབ་ཕྱོགས་སུ་སྣང་བ་ཆེན་པོའང་བདག་གིས་མཐོང་ལགས་ན། འདི་ལ་རྒྱུ་གང་ལགས། དེ་ནས་དེ་བཞིན་གཤེགས་པ་ཙམྤ་ཀའི་མདོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ནུབ་ཕྱོགས་སུ་སངས་རྒྱས་ཀྱི་ཞིང་
172b
ཚད་མེད་པ་གངྒཱའི་ཀླུང་གི་བེ་མ་སྙེད་འདས་ནས་སྙིགས་མ་ལྔ་དང་ལྡན་པར་གནས་པ་ན་སངས་རྒྱས་ཀྱི་ཞིང་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ། ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་ཡུན་རིང་དུ་གནས་པར་མཛད་པའི་ཕྱིར་དང ། ཆོས་ཀྱི་གནས་པ་ཉིད་རྒྱུན་མི་གཅད་པའི་ཕྱིར་འདུས་པ་ཆེན་པོ་ལ་ཐེག་པ་གསུམ་རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་པར་མཛད་དོ། །སངས་རྒྱས་ཀྱི་ཞིང་མི་མཇེད་དེར་བདུད་ཀྱི་ཡུལ་རྣམ་པར་གཞིག་པའི་ཕྱིར་དང ། སྟོབས་དང་མི་ལྡན་པར་མཛད་པའི་ཕྱིར་དང ། ཆོས་ཀྱི་རྒྱལ་མཚན་བསྒྲེད་བར་མཛད་པའི་ཕྱིར་དང ། ཆོས་ཀྱི་ཚུལ་ཡུན་རིང་དུ་གནས་པར་མཛད་པའི་ཕྱིར་འདུ་བ་མཛད་དེ། དེར་ཡང་དེ་བཞིན་གཤེགས་པ་ཐམས་ཅད་ཀྱིས་རིན་པོ་ཆེའི་ཏོག་ཅེས་བྱ་བའི་གཟུངས་སྔགས་བཤད་ཅིང་སངས་རྒྱས་ཀྱི་ཞིང་ཡང་ལོངས་སྤྱད་པར་མཛད་ནས་སླར་གཤེགས་སོ། །ཡང་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང །
173a
༄#། །ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་འདུས་པར་མཛད་དེ། སོ་སོ་ཡང་དག་པར་རིག་པ་བཞི་དང་ལྡན་པའི་སྤྱན་གསུམ་དང ། ཚངས་པའི་གནས་པ་དག་བསྟན་ཀྱང་ད་དུང་འཁོར་སངས་རྒྱས་ཀྱི་ཞིང་མི་མཇེད་ཀྱི་ས་དང་ནམ་མཁའ་མ་འདྲེས་པར་གང་བ་ཞིག་དེ་བཞིན་གཤེགས་པ་ཆོས་དམ་པ་གསུང་བ་ཤཱཀྱ་ཐུབ་པའི་ཆོས་བསྟན་པ་ལ་ངོམས་པ་མེད་དོ། །དེ་ནས་དེ་བཞིན་གཤེགས་པ་མཆོག་ཏུ་སྙན་པར་གསུང་བ་ཤཱཀྱ་ཐུབ་པ་བསྡུ་བའི་དངོས་པོ་བཞི་དང ། ཉི་མའི་སྙིང་པོའི་ཆོས་ཀྱིས་གནས་པ་ཉིད་དང ། བདུད་ཀྱི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང ། སེམས་ཅན་གྱི་ལས་ཟད་པར་འགྱུར་བའི་གཟུངས་སྔགས་བཤད་པར་བཞེད་ནས་དེ་འདི་སྙམ་དུ་དགོངས་ཏེ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་ཕ་རོལ་ཏུ་ཕྱིན་པ་དྲུག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསྐལ་པ་བརྒྱས་ངེས་པར་བྱུང་བ་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་གཞན་གྱི་དྲིང་མི་འཇོག་པའི་ཕྱིར་མི་ལྡོག་པ་སྒྲིབ་པ་མེད་པའི་ཡེ་ཤེས་ལ་མཁས་པའི་བར་འཁོད་པ་དེ་དག་ཐམས་ཅད་
173b
སངས་རྒྱས་ཀྱི་ཞིང་མི་མཇེད་འདིར་ཞུགས་པར་གྱུར་ཅིང ། འདིར་འཁོད་ནས་རང་རང་གི་དགེ་བའི་ཕྱོགས་དང་བསམ་གཏན་དག་གིས་རྣམ་པར་སྤྱོད་པར་གྱུར་ལ། དེས་ན་སངས་རྒྱས་ཀྱི་ཞིང་འདིར་ས་ཆེན་པོ་ཤིན་ཏུ་སྐལ་བ་དང་ལྡན་པ་དང ། བཅུད་དང་ལྡན་པ་དང ། ཡོན་ཏན་དང་ལྡན་པ་དང ། དྲན་པ་དང་ལྡན་པ་དང ། བརྩོན་འགྲུས་དང་ལྡན་པ་དང ། གཏོང་བ་དང་ལྡན་པར་སངས་རྒྱས་ཀྱི་ཞིང་གཞན་བཞིན་གྱུར་ཅིག་སྙམ་དུ་དགོངས་སོ། །དེ་ལྟ་བས་ན། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་སངས་རྒྱས་ཀྱི་ཞིང་མི་མཇེད་དེར་ཞུགས་པ་དེ་དག་དེར་འཁོད་ནས་རང་རང་གི་ཇི་ལྟར་འཚམ་པའི་དགེ་བའི་ཕྱོགས་ཀྱིས་བསམ་གཏན་དག་བྱེད་དེ་སྒོམ་པ་དེ་དག་ལས་ཁ་ཅིག་གིས་ལུས་ལས་ནི། འོད་འདི་ལྟ་བུ་བྱུང་སྟེ། དཔེར་ན། འབྲུ་མར་གྱི་མར་མེ་བཞིན་ནོ། །ཁ་ཅིག་གི་ལུས་ལས་ནི། འོད་འདི་ལྟ་བུའི་བར་དག་བྱུང་སྟེ། དཔེར་ན། ཟླ་བ་དང་ཉི་མ་བྱེ་བ་བརྒྱ་སྟོང་ཕྲག་མང་པོའི་འོད་བཞིན་ནོ། །དེར་བྱང་ཆུབ་སེམས་དཔའ་སེམས་དཔའ་ཆེན་པོ་མང་དུ་འདུས་པ་ད་ལྟར་སྣང་བ་ཆེན་པོས་སངས་རྒྱས་ཀྱི་
174a
༄#། །ཞིང་མི་མཇེད་ཁྱབ་པར་གྱུར་ཏོ། །ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལྷགས་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་སྔོན་དེར་མ་ཕྱིན་པ་ཤ་སྟག་དེའི་ཚེ་ཏིང་ངེ་འཛིན་ལས་ལངས་ནས་སངས་རྒྱས་ཀྱི་ཞིང་མི་མཇེད་དེར་ཆས་ཏེ། དེར་དོང་ནས་ཀྱང་སྐྱིལ་མོ་ཀྲུང་གིས་འཁོད་ཅིང་རང་རང་གི་བསམ་གཏན་རྣམ་པ་སྣ་ཚོགས་དག་གིས་རྩེ་བར་བྱེད་དོ། །དེར་ཡང་དེ་བཞིན་གཤེགས་པ་ཤཱཀྱ་ཐུབ་པ་ལ་དེ་དག་ཕྱག་འཚལ་བར་བྱེད་དོ། །བསྙེན་བཀུར་བྱེད་དོ། །འདུས་པ་ཆེན་པོ་དེ་ལའང་ལྟ་བར་བྱེད་དོ། །དེར་དེ་དག་ཉི་མའི་སྙིང་པོའི་ཆོས་ཀྱིས་གནས་པ་དང ། ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང ། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ཉན་པར་ཡང་བྱེད་དོ། །རིགས་ཀྱི་བུ། ཁྱོད་ཀྱང་ད་ལྟར་ཏིང་ངེ་འཛིན་ལས་ལངས་པས་རིགས་ཀྱི་བུ། ཁྱོད་ད་མི་མཇེད་ཀྱི་འཇིག་རྟེན་གྱི་ཁམས་སུ་འགྲོ་བར་བྱའོ། །རིགས་ཀྱི་བུ།
174b
སངས་རྒྱས་ཀྱི་ཞིང་མི་མཇེད་དེ་ན་ནི། སེམས་ཅན་རྣམས་ཤིན་ཏུ་སྲེད་པའི་ཀུན་ཏུ་སྦྱོར་བ་དང་ལྡན་ཞིང་སྲིད་པའི་ལྟུང་ལ་བཏགས་པ་དག་ཡིན་ཏེ།་སངས་རྒྱས་ཀྱི་ཞིང་དེ་ན་ནང་ནའང་བུད་མེད་གཟུགས་མི་སྡུག་པ་དང ། ཚུལ་དུ་མི་ཤེས་པ་དང ། མཆོག་ཏུ་གཟུགས་ཀྱི་རྒྱགས་པས་དྲེགས་པ་དང ། དྲི་ང་བ་དང ། མི་གཙང་བ་དང ། གཙང་སྦྲར་སྤྱོད་པའི་རྒྱགས་པས་དྲེགས་པ་དང ། ངོ་གཉིས་བྱེད་པ་དང ། བདེན་པ་མ་ཡིན་པའི་ཚིག་སྨྲ་བ་དང ། ཚངས་པར་སྤྱོད་པར་ང་རྒྱལ་བྱེད་པ་དང ། བླུན་པ་དང ། མཁས་པར་ང་རྒྱལ་ཅན་དང ། སེར་སྣ་ཅན་དང ། གཏོང་བར་ང་རྒྱལ་ཅན་དང ། མ་དད་པ་དང ། དད་པར་ང་རྒྱལ་ཅན་དང ། གཡོ་སྒྱུ་ཅན་དང ། སྒྱུ་བྱེད་པ་དང ། དྲང་པོའོ་སྙམ་པའི་ང་རྒྱལ་ཅན་དང ། ཕྲག་དོག་ཅན་དང ། ཕྲག་དོག་མེད་པའོ་སྙམ་པའི་ང་རྒྱལ་ཅན་དང ། གནོད་སེམས་དང་ལྡན་པའི་སེམས་དང ། བྱམས་པར་ང་རྒྱལ་ཅན་དང ། རྣམ་པར་དབྱེན་བྱེད་པ་དང ། མཐུན་པར་ང་རྒྱལ་ཅན་དང ། ལོག་པར་ལྟ་བ་དང ། ཡང་དག་པར་ལྟ་བའི་ང་རྒྱལ་ཅན་ཡིན་ཏེ། སྐྱེས་བུ་དམ་པ་མཁས་པ་
175a
༄#། །ཆེན་པོ་རྫུ་འཕྲུལ་དང་ལྡན་པ་མངོན་པར་ཤེས་པས་རྣམ་པར་རྩེ་བ་དག་བསམ་གཏན་ཡོངས་སུ་སྦྱང་བ་བྱས་སུ་ཟིན་ཀྱང་ཡུད་ཙམ་གྱིས་བུད་མེད་ཀྱི་དབང་དུ་འགྱུར་བ་ཡིན་ནོ། །བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང ། ངན་སོང་བ་དག་དང ། སེམས་ཅན་དམྱལ་བ་པ་དག་ཏུ་འགྱུར་བ་ཡིན་ནོ། །རིགས་ཀྱི་བུ། ཁྱོད་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ངའི་བཀས་ཞུ་བའི་ཕྱིར་ངའི་བཀས་མི་མཇེད་ཀྱི་འཇིག་རྟེན་གྱི་ཁམས་སུ་འགྲོ་བར་སྤྲོ་ན། དེར་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ལ་ང་དད་པ་སྦྱིན་པར་མཛད་དོ། །དེར་བདེན་པ་དང་རྗེས་སུ་མཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་མེད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། ང་རྒྱལ་དང ། ལྷག་པའི་ང་རྒྱལ་དང །
175b
ངའོ་སྙམ་པའི་ང་རྒྱལ་ཐམས་ཅད་ཀུན་ཏུ་ཟད་པར་བྱེད་པ། ཚོལ་བ་ཐམས་ཅད་ཀུན་ཏུ་ཟད་པར་བྱེད་པ། བརྣབ་སེམས་ཐམས་ཅད་དང ། རྒོད་པ་ཐམས་ཅད་དང ། མ་རིག་པ་ཐམས་ཅད་ཀུན་ཏུ་ཟད་པར་བྱེད་པ། འཇིག་ཚོགས་ལ་ལྟ་བ་ཐམས་ཅད་དང ། མཐར་འཛིན་པའི་ལྟ་བ་ཐམས་ཅད་དང ། ཐེ་ཚོམ་ཐམས་ཅད་དང ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཐམས་ཅད་ཀུན་ཏུ་ཟད་པར་བྱེད་པ། རྟག་པར་ལྟ་བ་ཐམས་ཅད་དང ། ཆད་པར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ། སེམས་ཅན་དུ་ལྟ་བ་ཐམས་ཅད་དང ། སྒྲིབ་པར་ལྟ་བ་ཐམས་ཅད་དང ། གསོ་བར་ལྟ་བ་ཐམས་ཅད་དང ། གང་ཟག་ཏུ་ལྟ་བ་ཐམས་ཅད་དང ། བྱེད་པ་པོར་ལྟ་བ་ཐམས་ཅད་དང ། ཚོར་བ་པོར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ། གཟུགས་སུ་ལྟ་བ་ཐམས་ཅད་དང ། སྒྲར་ལྟ་བ་ཐམས་ཅད་དང ། དྲིར་ལྟ་བ་ཐམས་ཅད་དང ། རོར་ལྟ་བ་ཐམས་ཅད་དང ། རེག་བྱར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ། རྨད་དུ་བྱུང་བ་ཆེན་པོར་ལྟ་བ་ཐམས་ཅད་དང ། སྐྱེ་བར་ལྟ་བ་ཐམས་ཅད་དང ། གནས་པར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ་འདི་དང ། བདེན་པ་དང་རྗེས་སུ་མཐུན་
176a
༄#། །པའི་བཟོད་པ། གཟུགས་ཀྱི་ཕུང་པོ་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ་ནས་རྣམ་པར་ཤེས་པའི་ཕུང་པོ་ཐམས་ཅད་ཀྱི་བར་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ། མིག་གི་དབང་པོ་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ་ནས་ཡིད་ཀྱི་དབང་པོ་ཐམས་ཅད་ཀྱི་བར་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ། ཕུང་པོ་དང ། ཁམས་དང ། སྐྱེ་མཆེད་ཐམས་ཅད་ཀྱི་བར་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ། སྤོང་བར་བྱེད་པ། ཆོས་ཐམས་ཅད་འདོད་ཆགས་དང་བྲལ་བར་བྱེད་པ། བྱང་གྲོལ་གྱི་བདེ་བ་ཐམས་ཅད་སྟོན་པར་བྱེད་པ་འདི་བསྐུར་བར་མཛད་དོ། །དེ་ཅིའི་ཕྱིར་ཞེ་ན། དེ་དང་དེ་ན་སེམས་ཅན་རྣམས་འབྱུང་པོ་དམུས་ལོང་འདྲ་བ་དག་དང ། མཆོག་ཏུ་གླེན་པ་དག་དང ། འབྱུང་པོ་ལུག་དང་འདྲ་བ་དག་དང ། འདོད་པའི་འདོད་ཆགས་ཀྱིས་མྱོས་པ་དག་ཡོད་དེ།་བདེན་པ་དང་རྗེས་སུ་མཐུན་པའི་བཟོད་པ་འདི་ནི། སེམས་ཅན་དེ་དག་གི་ལྟ་བ་ཐམས་ཅད་སྤོང་བ་དང ། ལོངས་སྤྱོད་མི་ཟད་པ་ཉིད་བྱེད་
176b
པ་ཡིན། བདེན་པ་དང་རྗེས་སུ་མཐུན་པའི་བཟོད་པ་འདི་ནི། ཆོས་ཐམས་ཅད་ཀྱི་གཏེར་བརྟན་པ་ཡིན། བསམ་གྱིས་མི་ཁྱབ་པའི་ཆོས་ལ་བདུད་དང་ཕས་ཀྱི་རྒོལ་བ་ཐམས་ཅད་ཚར་གཅོད་པར་བྱེད་པ། བདུད་ཐམས་ཅད་ཀྱི་ཡུལ་རྣམ་པར་འཇིག་པར་བྱེད་པ་ཡིན་ནོ། །རིགས་ཀྱི་བུ། གཞན་ཡང་བདེན་པ་དང་རྗེས་སུ་མཐུན་པའི་བཟོད་པ་འདི་ནི། བདུད་རྣམས་ཚར་གཅོད་པར་བྱེད་པ་ཡིན། ཀླུ་རྣམས་ཕམ་པར་བྱེད་པ་ཡིན། ལྷ་རྣམས་དགའ་བར་བྱེད་པ་ཡིན། གནོད་སྦྱིན་རྣམས་སྙིང་དགའ་བར་བྱེད་པ་ཡིན། ལྷ་མ་ཡིན་རྣམས་འབྲོས་པར་བྱེད་པ་ཡིན། ནམ་མཁའ་ལྡིང་རྣམས་དངང་པར་བྱེད་པ་ཡིན། མིའམ་ཅི་རྣམས་དད་པར་བྱེད་པ་ཡིན། ལྟོ་འཕྱེ་ཆེན་པོ་རྣམས་སྐྲག་པར་བྱེད་པ་ཡིན། ཕས་ཀྱི་རྒོལ་བ་རྣམས་འདུལ་བར་བྱེད་པ་ཡིན། རྒྱལ་རིགས་རྣམས་མངོན་པར་དད་པར་བྱེད་པ་ཡིན། བྲམ་ཟེ་རྣམས་འཇུག་པར་བྱེད་པ་ཡིན། རྗེའུ་རིགས་རྣམས་དགའ་བར་བྱེད་པ་ཡིན། དམངས་རིགས་རྣམས་རབ་ཏུ་དགའ་བར་བྱེད་པ་ཡིན། བུད་མེད་འདོད་ཆགས་དང་བྲལ་བར་བྱེད་པ་ཡིན། ཡང་\?\་དུ་ཐོས་པ་རྣམས་སྐྱོ་
177a
༄#། །བར་བྱེད་པ་ཡིན། རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པ་ཡིན། ནད་ཐམས་ཅད་རབ་ཏུ་ཞི་བར་བྱེད་པ་ཡིན།་འཐབ་མོ་དང ། མུ་གེ་དང ། དུས་མ་ཡིན་པར་འཆི་བ་དང ། ཕ་རོལ་གྱི་དམག་ཚོགས་དང ། དུས་མ་ཡིན་པའི་རླུང་དང ། དུས་མ་ཡིན་པའི་ཆར་དང ། ཤཝ་དང ། དུས་མ་ཡིན་པའི་ལྷགས་པ་དང ། དུས་མ་ཡིན་པའི་ཚ་བ་དང ། དངོས་པོ་ཁ་བ་དང ། ཚ་བ་དང ། རྩུབ་པོ་དང ། ཧྲུད་ཧྲུད་པོ་དང ། རེག་པར་དཀའ་བ་རྣམས་རྣམ་པར་ཞི་བར་བྱེད་པ། སྤྲུག་པར་བྱེད་པ། མདངས་སུམ་འགྱུར་དུ་རྣམ་པར་འཕེལ་བར་བྱེད་པ། དམ་པའི་ཆོས་ཀྱི་ཚུལ་གསལ་བར་བྱེད་པ་ཡིན། དཀོན་མཆོག་གསུམ་གྱི་གདུང་རྒྱུན་མི་གཅོད་པར་བྱེད་པ་ཡིན། སངས་རྒྱས་ཀྱི་བསྟན་པ་རྟོན་པར་བྱེད་པ་ཡིན། འཁོར་བས་སྐྲག་པ་རྣམས་དབུགས་འབྱིན་པར་བྱེད་པ་ཡིན་པ་ནས་ཟད་པ་ཤེས་པའི་བར་སྐྱེད་པར་བྱེད་པ་ཡིན། མི་སྐྱེ་བ་ཤེས་པ་རྟོགས་པར་བྱེད་པ་ཡིན། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པ་ཡིན། སྡུག་བསྔལ་གྱི་ཁུར་འདོར་བར་བྱེད་པ་ཡིན་
177b
ནོ། །སྱཱད་ཡ་ཐེ་ད་ན། བ་ཡེ་བ་ཡ་པ་རི་བཱ་རེ། བཱ་ཧེ་བཱ་ཧ་པ་རི་བཱ་རེ། པྲྀ་ཐ་བེ། པྲྀ་ཐ་བཱ་པ་རི་བཱ་རེ། ཨཱ་བེ་ཨ་བ་པ་རི་བཱ་རེ། ཏེ་ཛེ་ཏེ་ཛ་པ་རི་བཱ་རེ། མཱ་ལེ་མཱ་ལ་པ་རི་བཱ་རེ། ཁ་གེ་ཁ་ག་པ་རི་བཱ་རེ། ཨཱ་ལོ་ཀེ་ཨཱ་ལོ་ཀ་པ་རི་བཱ་རེ། སྠཱ་མེ་སྠཱ་མ་པ་རི་བཱ་རེ། རི་ཛེ་རི་ཛ་པ་རི་བཱ་རེ། སི་ལི་སི་ལ་པ་རི་བཱ་རེ། ག་མེ་ག་མ་པ་རི་བཱ་རེ། ཨཱ་བོ་པ་ཨ་བོ་པ་པ་རི་བཱ་རེ། མཱ་ལ་མ་ལ་མ། ལ་མ་ལ་མ། རཱ་ལ་རཱ་ལ་མ། བཱི་ཛྙཱ་ན་བྷུ་ཏ་གྲ་ཧེ། བྷུ་ཏ་གྲ་ཧཱ་པ་རི་བཱ་རེ། ཙཀྵུ་གྲ་ཧ་པ་རི་བཱ་རེ། ཤོ་ཏྲ་གྲ་ཧེ། ཤོ་ཏྲ་གྲ་ཧཱ་པ་རི་བཱ་རེ། གྷྲཱ་ཎ་གྲ་ཧེ། གྷྲཱ་ཎ་གྲ་ཧཱ་པ་རི་བཱ་རེ། ཛི་ཧཝཱ་གྲ་ཧེ། ཛིཧཝཱ་གྲ་ཧཱ་པ་རི་བཱ་རེ། ཀཱ་ཡ་གྲ་ཧེ། ཀཱ་ཡ་གྲ་ཧཱ་པ་རི་བཱ་རེ། མ་ན་གྲ་ཧེ། མ་ན་གྲ་ཧཱ་པ་རི་བཱ་རེ། སྤཪྴ་གྲ་ཧེ། སྤཪྴ་གྲ་ཧཱ་པ་རི་བཱ་རེ། བེ་ད་ནཱ་གྲ་ཧེ། བེ་ད་ནཱ་གྲཧཱ་པ་རི་བཱ་རེ། ཏྲྀཥྞཱ་གྲ་ཧེ། ཏྲྀཥྞཱ་གྲ་ཧཱ་པ་རི་བཱ་རེ། ཨུ་བཱ་དཱ་ན་གྲ་ཧེ། ཨུ་པ་དཱ་ན་གྲ་ཧཱ་པ་རི་བཱ་རེ། བྷཱ་བ་གྲ་ཧེ། བྷཱ་བ་གྲཧཱ་པ་རི་བཱ་རེ། ཛཱ་ཏི་གྲ་ཧེ། ཛཱ་ཏི་གྲ་ཧཱ་བ་རི་བཱ་རེ། ཛ་ར་མ་ར་ཎཱ་གྲ་ཧེ། ཛ་ར་མ་ར་ཎ་གྲ་ཧཱ་པ་རི་བཱ་རེ། དུཿ ་ཁ་སནྟ་པཱ་ན་གྲ་ཧེ། དུཿ ་ཁ་སནྟ་པཱ་ན་གྲཧཱ་པ་རི་པཱ་རེ། ཨཱ་ར་པཱ་ར་དྭི་ཛ་གྲ་ཧེ། ཨཱ་ར་པཱ་རི་དྭི་ཛ་གྲ་ཧཱ་པ་རི་བཱ་རེ། ཨ་བརྟ་བ་བིརྟ་སྱ། ཨ་བ་ར་མུ་བ་མ་ས་སྱ། བེ་ག་བི་ནི།
178a
༄#། །བརྟི་ཨཱརྱ་ར་སྨི་སཾ་བེ་ག་ཤཱནྟ་སཝཱཧཱ། རིགས་ཀྱི་བུ། ཉི་མའི་སྙིང་པོའི་ཆོས་ཀྱིས་གནས་པ་ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང ། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་འདི་ལ་ངས་དད་པ་སྦྱིན་པར་མཛད་ཅིང་བདེན་པ་དང་རྗེས་སུ་མཐུན་པའི་བཟོད་པ་བསྐུར་བར་མཛད་ཀྱི། ལོངས་ལ་སངས་རྒྱས་ཀྱི་ཞིང་མི་མཇེད་དུ་སོང་ཞིག་།ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་ཞུས་ལ། དེ་ལ་འདི་སྐད་དུ། ཤར་ཕྱོགས་སུ་སངས་རྒྱས་ཀྱི་ཞིང་ཚད་མ་མཆིས་པ་གངྒཱའི་ཀླུང་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡོངས་སུ་གདུང་བ་མེད་པ་ཞེས་བགྱི་བ་མཆིས་སོ། །སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་ཙམ་པ་ཀའི་མདོག་ཅེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས་ཀྱང་བདག་དེ་ནས་འདིར་བཅོམ་ལྡན་འདས་ལ་ཡོངས་སུ་ཞུ་བའི་སླད་དུ་བཏང་བ་ལགས་ན། བཙུན་པ་བཅོམ་ལྡན་འདས། ཅི་སྙུང་བ་མི་མངའ་ལགས་སམ། གནོད་པ་ཆུང་ངམ། ཁྱོད་
178b
ཀྱི་འཁོར་བྲོ་འཚལ་བ་མ་མཆིས་ལགས་སམ། གནོད་པ་ཆུང་ངམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཐོས་པ་བཞིན་དུ་ཆོས་དང་ལྡན་པ་ལགས་སམ། ཆོས་དེ་ལ་ནན་ཏན་སྙིང་པོར་བགྱིད་པ་ལགས་སམ། ཆོས་ཀྱིས་གནས་པ་དང་ལྡན་པར་གནས་ལགས་སམ། ཁྱོད་ཀྱིས་སངས་རྒྱས་ཀྱི་ཞིང་འདིར་བདུད་ཀྱི་ཡུལ་དང ། ཀླུའི་ཡུལ་བཅོམ་ལྡན་ལགས་སམ། སངས་རྒྱས་གཅིག་གི་ཡུལ་ལགས་སམ། འདིར་ཁྱོད་ཀྱིས་ཆོས་ཀྱི་འཁོར་ལོ་ཐོགས་པ་མ་མཆིས་པར་བསྐོར་བར་མཛད་ལགས་སམ། གང་ལ་ལ་སངས་རྒྱས་ཀྱི་ཡུལ་འདིར་ཆོས་མ་ལགས་པའི་འཁོར་ལོ་བསྐོར་བ་དེ་ལའང་དེ་བཞིན་གཤེགས་པ་ཙམྤ་ཀའི་མདོག་དེས་ཉི་མའི་སྙིང་པོའི་ཆོས་ཀྱི་གནས་པ་ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང ། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པ་གནང་སྟེ། དེ་ནས་ཀྱང་བདེན་པ་དང་རྗེས་སུ་མཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་མེད་པའི་འདོད་ཆགས་ཀུན་ཏུ་ཟད་པར་བགྱིད་པ་
179a
༄#། །ནས་མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པའི་བར་བགྱིད་པ་དང ། སྡུག་བསྔལ་གྱི་ཕུང་པོའི་ཁུར་འདོར་བར་བགྱིད་པ་འདི་བསྐུར་ལགས་སོ། །ཞེས་གསོལ་ཅིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདེན་པ་དང་རྗེས་སུ་མཐུན་པའི་བཟོད་པ་ཡོན་ཏན་དང་ཕན་ཡོན་དང་བཅས་པ་བདག་གིས་བཟུང་ལགས་ན། བཙུན་པ་བཅོམ་ལྡན་འདས། སངས་རྒྱས་ཀྱི་ཞིང་མི་མཇེད་དུ་མཆི་བ་ལ་འཇིགས་པ་འབའ་ཞིག་མཆིས་ལགས་སོ། །དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་འདོད་ཆགས་ཀྱི་ཤས་ཆེ་བ་དམུས་ལོང་དང་འདྲ་བདག་ལགས་ཏེ། དེ་ན་བུད་མེད་གཟུགས་མི་སྡུག་པ་དང ། ཚུལ་དུ་མི་ཤེས་པ་དང ། མཆོག་ཏུ་གཟུགས་ཀྱི་རྒྱགས་པས་དྲེགས་པ་ནས་སེམས་ཅན་རྣམས་བསམ་གཏན་ལ་རབ་ཏུ་སྤྱད་པ་བགྱིས་པ། མངོན་པར་ཤེས་པས་རྣམ་པར་རྩེ་བ། སྐྱེས་བུ་དམ་པ་མཁས་པ་ཆེན་པོ་དག་ཀྱང་ལྷག་པར་བུད་མེད་ཀྱི་དབང་དུ་
179b
འགྱུར་ལགས་སོ། །བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང ། ངན་སོང་བ་དག་དང ། སེམས་ཅན་དམྱལ་བའི་བར་འབྱུང་ཞིང་འབྱུང་བར་འགྱུར་བའི་སླད་དུའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཙམྤ་ཀའི་མདོག་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཁྱོད་ནི། བདག་གི་དོན་དུ་སྨྲ་བ་མ་ཡིན་ཞིང་བདག་ལ་ཕན་པའི་ཕྱིར་ཞུགས་པ་མ་ཡིན་ནོ། །རིགས་ཀྱི་བུ། ཁྱོད་ནི། སེམས་ཅན་ཐམས་ཅད་ཀྱི་དོན་དུ་སྨྲ་བ་ཡིན་ཞིང ། ཁྱོད་ནི། སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ཡིན་ནོ། །རིགས་ཀྱི་བུ། སངས་རྒྱས་ཀྱི་ཞིང་མི་མཇེད་ན་དེ་བཞིན་གཤེགས་པ་ཤཱཀྱ་ཐུབ་པའི་འཁོར་ན་དགེ་བསྙེན་དྲི་མ་མེད་པར་གྲགས་པ་ཞེས་བྱ་བ་སྣང་བ་གང་ཡིན་པ་དེའང་སུ་ཡིན། དེ་ནི། ཁྱོད་ཉིད་མ་ཡིན་ནམ། དེ་ཅང་མི་སྨྲ་བར་གྱུར་ཏོ། །དེ་བཞིན་གཤེགས་པ་ཙམྤ་ཀའི་མདོག་ངའང་སངས་རྒྱས་ཀྱི་ཞིང་དེ་དང ། སངས་རྒྱས་ཀྱི་ཞིང་བྱེ་བ་ཕྲག་བརྒྱ་སྟོང་གྲངས་མེད་པ་འདིའི་བར་དུ་སེམས་ཅན་ཡོངས་སུ་སྨིན་
180a
༄#། །བར་བྱ་བའི་ཕྱིར་ལ་ལར་ཁ་ཅིག་ཏུ་ནི། ཚངས་པའི་ལུས་བྱེད་དུ་ཀུན་ཏུ་སྣང་ངོ ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་ཁ་ཅིག་ཏུ་ནི། དབང་ཕྱུག་གི་ལུས་བྱད་དུ་ཀུན་ཏུ་སྣང་ངོ ། །ལ་ལར་ནི། དགེ་སྦྱོང་གི་ལུས་བྱད་དང ། ལ་ལར་ནི། བརྒྱ་བྱིན་གྱི་ལུས་བྱད་དང ། ལ་ལར་ནི། ལྷའི་ལུས་བྱད་དང ། ལ་ལར་ནི། ཀླུའི་དབང་པོའི་ལུས་བྱད་དང ། ལ་ལར་ནི། ལྷ་མ་ཡིན་གྱི་དབང་པོའི་ལུས་བྱད་དང ། ལ་ལར་ནི། ནམ་མཁའ་ལྡིང་གི་དབང་པོའི་ལུས་བྱད་དང ། ལ་ལར་ནི། མིའམ་ཅིའི་དབང་པོའི་ལུས་བྱད་དང ། ལ་ལར་ནི། ཤེས་ལས་སྐྱེས་ཀྱི་དབང་པོའི་ལུས་བྱད་དང ། ལ་ལར་ནི། རང་སངས་རྒྱས་ཀྱི་ལུས་བྱད་དང ། ལ་ལར་ནི། ཉན་ཐོས་ཀྱི་ལུས་བྱད་དང ། ལ་ལར་ནི། རྒྱལ་རིགས་ཀྱི་ལུས་བྱད་དང ། ལ་ལར་ནི། བྲམ་ཟེའི་ལུས་བྱད་དང ། ལ་ལར་ནི། ཁྱིམ་བདག་གི་ལུས་བྱད་དང ། ལ་ལར་ནི། བུད་མེད་ཀྱི་ལུས་བྱད་དང ། ལ་ལར་ནི། ཁྱེའུའི་ལུས་བྱད་དང ། ལ་ལར་ནི། བུ་མོའི་ལུས་བྱད་དང ། ལ་ལར་ནི། དུད་འགྲོའི་སྐྱེ་གནས་ཀྱི་ལུས་བྱད་དང ། ལ་ལར་ནི། ཡི་དྭགས་ཀྱི་ལུས་བྱད་དང ། ལ་ལར་ནི། སེམས་ཅན་དམྱལ་བའི་ལུས་བྱད་དུ་ཀུན་ཏུ་སྣང་ངོ ། །དེ་ལྟ་མོད་ཀྱི། འཁོར་འདི་ན་གང་དག་ང་དང་ཐབས་ཅིག་ལྷན་ཅིག་ཏུ་སྙོམས་པར་འཇུག་པ་མཛད་
180b
ཅིང་བཞེངས་པར་ཡང་མཛད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་ཡོད་དོ། །འཁོར་འདི་ན་བྱང་ཆུབ་སེམས་དཔའ་ཁ་ཅིག་བློ་གཡོ་བ་དག་དང ། བློ་རྒྱུད་རྣམ་པར་མི་གནས་པ་དག་ཀྱང་ཡོད་དེ། དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང ། ཕྱག་འཚལ་བ་དང ། བསྙེན་བཀུར་བྱ་བ་དང ། འདུས་པ་ཆེན་པོ་དེ་ལའང་བལྟ་བ་དང ། དེ་བཞིན་གཤེགས་པ་ཤཱཀྱ་ཐུབ་པ་དེ་ལས་ཀྱང་འདུས་པ་ཆེན་པོ་མཉན་པར་མཆོག་ཏུ་འདོད་པར་གྱུར་ཏོ། །བྱང་ཆུབ་སེམས་དཔའ་དེ་དག་ཀྱང་ང་ཁོ་ན་དང་ཐབས་ཅིག་ཏུ་དེ་ཉིད་དུ་འདོང་བར་འདོད་དེ། དེར་དེ་དག་འདོད་པའི་འདོད་ཆགས་ཀྱི་རྒྱུས་བསླུས་པར་གྱུར་ན་མི་རུང་ཞིང་དེར་ངའི་སྐྱེས་བུ་དམ་པ་མ་ཡིན་པའི་བྱེད་པ་འགྲོ་བར་གྱུར་ན་མི་རུང་བས་དེ་དག་གི་དོན་དུ་ངས་བཤད་དོ། །ཡང་དེ་བཞིན་གཤེགས་པ་ཙམྤ་ཀའི་མདོག་གིས་བྱང་ཆུབ་སེམས་དཔའ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅས་བཀའ་སྩལ་ཏོ། །རིགས་ཀྱི་བུ། མ་འཇིགས་ཤིག་།མ་འཇིགས་ཤིག་།སྐྱེས་བུ་དམ་པ་ཁྱེད་ལ་འདི་ལྟ་སྟེ། གཟུངས་སྔགས་གང་གིས་སྲིད་པ་གསུམ་གྱི་བཙོན་རར་ཐམས་ཅད་དུ་མངོན་པར་མི་དགའ་བའི་འདུ་ཤེས་ཅན་དང ། མཚན་མ་མེད་པའི་ཏིང་ངེ་འཛིན་རྣམ་པར་ཐར་པའི་སྒོ་ལ་རེག་ནས་རྫོགས་པར་བྱས་ཏེ་གནས་པ་དང ། མི་གཡོ་བའི་ཏིང་ངེ་འཛིན་ལ་འཇུག་
181a
༄#། །པ་དང ། མགོ་མཉམ་དུ་ཡོངས་སུ་མྱ་ངན་ལས་འདས་པར་འགྱུར་བའི་གཟུངས་སྔགས་ཉི་མ་སྣང་བའི་པདྨ་ཞེས་བྱ་བ་ལུས་ཀྱི་ཚོར་བ་ཐམས་ཅད་སྒྲུབ་པར་བྱེད་པ། ལུས་ཀྱི་འདུ་ཤེས་ཐམས་ཅད་སྒྲུབ་པར་བྱེད་པ། དུལ་བའི་ས་སྒྲུབ་པར་བྱེད་པ། རྣམ་པར་གྲོལ་བ་སྒྲུབ་པར་བྱེད་པ། སྲིད་པའི་རྒྱ་མཚོ་ཡོངས་སུ་གཅོད་པ་སྒྲུབ་པར་བྱེད་པ། དཀོན་མཆོག་གསུམ་གྱི་གདུང་གི་གེགས་ཟློག་པ་སྒྲུབ་པར་བྱེད་པ། བྱམས་པ་ཆེན་པོ་སྒྲུབ་པར་བྱེད་པ། སྙིང་རྗེ་ཆེན་པོ་སྒྲུབ་པར་བྱེད་པ། ཤེས་རབ་རྣམ་པར་གྲོལ་བ་ཐམས་ཅད་སྒྲུབ་པར་བྱེད་པ། བདུད་བཞི་དང་ཕས་ཀྱི་རྒོལ་བ་ཐམས་ཅད་འདུལ་བ་སྒྲུབ་པར་བྱེད་པ། ཟད་པ་ཤེས་པ་དང་མི་སྐྱེ་བ་ཤེས་པ་སྒྲུབ་པར་བྱེད་པ། ལོངས་སྤྱོད་དང ། ཚེའི་འདུ་བྱེད་ཐམས་ཅད་དང ། ཞི་བ་དང ། གཏན་དུ་ཡོངས་སུ་མྱ་ངན་ལས་འདས་པ་སྒྲུབ་པར་བྱེད་པ་ངས་སྦྱིན་པར་མཛད་དོ། །རིགས་ཀྱི་བུ། གང་ལ་ལ་ཉི་མ་སྣང་བའི་གཟུངས་སྔགས་འདི་སེམས་རྩེ་གཅིག་པས་ཉན་པར་བྱེད་ན། འདོད་ཆགས་ལ་སོགས་པའི་ཉོན་མོངས་པ་ཐམས་ཅད་སྲབ་མོར་བྱེད་དོ། །འཆི་བའི་དུས་བྱས་ནས་ཀྱང་ལྷ་རྣམས་ཀྱི་ནང་དུ་ཚེ་རབས་བདུན་འཁོར་བར་བྱེད་ཅིང་ཆེར་བས་དྲན་པར་ཡང་འགྱུར་ལ་དེར་འདོད་པ་རྣམས་ཀྱིས་ཀྱང་གོས་པར་མི་འགྱུར་རོ། །དེ་རྣམས་ཀྱི་ནང་དུ་ལྷའི་དྲང་སྲོང་དུ་འགྱུར་
181b
ཞིང་ལྷ་རྣམས་ཀྱིས་མཆོད་པའི་འོས་སུ་འགྱུར་རོ། །དེ་དེ་ནས་ཤི་འཕོས་ནས་མི་རྣམས་ཀྱི་ནང་དུ་ཚེ་རབས་བདུན་འཁོར་བར་བྱེད་ཅིང་འདིར་འདོད་པ་རྣམས་ཀྱིས་རྗེས་སུ་གོས་པར་ཡང་མི་འགྱུར་རོ། །འདིར་མི་རྣམས་ཀྱི་ནང་དུ་མིའི་དྲང་སྲོང་དུ་འགྱུར་ཞིང་ལྷ་དང་མི་ཐམས་ཅད་ཀྱིས་ཕྱག་བྱ་བའི་འོས་སུ་འགྱུར་པ་དང ། མཆོད་པའི་འོས་སུ་འགྱུར་རོ། །གང་ལ་ལ་འདིར་ཉི་མ་སྣང་བའི་གཟུངས་སྔགས་སེམས་རྩེ་གཅིག་པས་ལན་བདུན་གྱི་བར་དུ་ཉན་པར་བྱེད་ན། དེ་འཆི་བའི་དུས་བྱས་ནས་ལྷ་རྣམས་ཀྱི་ནང་དུ་ལན་བདུན་གྱི་བར་དུ་དྲང་སྲོང་མངོན་པར་ཤེས་པ་ལྔ་དང་ལྡན་པར་འགྱུར་ཞིང་ལྷ་ཐམས་ཅད་ཀྱིས་ཕྱག་བྱ་བའི་འོས་དང ། མཆོད་པའི་འོས་སུ་འགྱུར་རོ། །དེ་འདིར་མི་རྣམས་ཀྱི་ནང་དུ་ལན་བདུན་དུ་དྲང་སྲོང་མངོན་པར་ཤེས་པ་ལྔ་དང་ལྡན་པར་འགྱུར་ཞིང ། ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། མི་དང ། མི་མ་ཡིན་པ་རྣམས་ཀྱིས་ཕྱག་བྱ་བའི་འོས་དང ། མཆོད་པའི་འོས་སུ་འགྱུར་རོ། །རིགས་ཀྱི་བུ། གང་ལ་ལ་ལྷ་རྣམས་ཀྱི་ནང་དུའང་ལྷའི་འདུས་པ་རྣམས་ལ་གཟུངས་སྔགས་ཉི་མ་སྣང་བའི་པདྨ་ཞེས་བྱ་བ་འདི་ལན་བདུན་དུ་རྗོད་པར་བྱེད་ལ། དེ་དག་ཀྱང་སེམས་རྩེ་གཅིག་པས་ཉན་པར་བྱེད་ན། ལྷ་དང ། ལྷ་མོ་དེ་དག་ཐམས་ཅད་ཀྱང་འདོད་པའི་ཡོན་ཏན་ལྔ་པོ་ཐམས་ཅད་ལ་མི་ལྟ་བའི་སེམས་དང་ལྡན་པར་འགྱུར་ཞིང་བསམ་གཏན་ལ་མངོན་པར་
182a
༄#། །དགའ་བར་འགྱུར་རོ། །གལ་ཏེ་ལ་ལ་འདིར་རྒྱལ་པོ་རྣམས་སམ། རྒྱལ་རིགས་རྣམས་སམ། བྲམ་ཟེ་རྣམས་སམ། རྗེའུ་རིགས་རྣམས་སམ། དམངས་རིགས་རྣམས་ཀྱི་རྣ་ཁུང་དུ་ལན་བདུན་དུ་རྗོད་པར་བྱེད་ལ། གལ་ཏེ་དེ་དག་ཀྱང་སེམས་རྩེ་གཅིག་པས་ཉན་པར་བྱེད་ན། དེ་དག་ཐམས་ཅད་འདོད་པའི་ཡོན་ཏན་ལྔ་པོ་ཐམས་ཅད་ལ་མི་ལྟ་བའི་སེམས་དང་ལྡན་པ་དང ། བསམ་གཏན་ལ་མངོན་པར་དགའ་བར་འགྱུར་རོ། །རིགས་ཀྱི་བུ། བུད་མེད་གང་ལ་ལ་གཟུངས་སྔགས་ཉི་མ་སྣང་བའི་པདྨ་ཞེས་བྱ་བ་འདི་ཉན་པར་བྱེད་ཅིང་ཉིན་ཞག་བདུན་དུ་ལས་གཞན་མི་བྱེད་པར་རྣམ་པར་སེམས་པར་བྱེད་དམ། ལྕེས་ཁ་ཏོན་དུ་བྱེད་ན། དེའི་རིས་མཐུན་པ་ལ་འདོད་ཆགས་ལ་སོགས་པའི་ཉོན་མོངས་པ་ཐམས་ཅད་བསྲབས་པར་འགྱུར་རོ། །འདི་ནི། དེའི་བུད་མེད་ཐོབ་པའི་ཐ་མ་ཡིན་ནོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་ཕྱིས་ཀྱང་བླ་ན་མེད་པའི་ཡོངས་སུ་མྱ་ངན་ལས་འདས་ཀྱི་བར་དུ་རང་གི་སྨོན་ལམ་མ་གཏོགས་པར་འཁོར་བ་ན་འཁོར་བའི་ཚེ་བུད་མེད་ཐོབ་པ་རྙེད་པར་མི་འགྱུར་རོ། །རིགས་ཀྱི་བུ། གང་ལ་ལ་གཟུངས་སྔགས་ཉི་མ་སྣང་བའི་པདྨ་ཞེས་བྱ་བ་འདིས་ལན་བདུན་དུ་རྩི་གྲང་མོ་ལས་བྱབས་ནས་རྔ་བོ་ཆེའམ་དུང་ལ་བྱུགས་
182b
ནས་རྔ་བོ་ཆེ་དེ་རྡུང་བར་བྱེད་དམ། དུང་འབུད་པར་བྱེད་ན། གང་དང་གང་དུ་དེ་དག་གི་སྒྲ་འགྲོ་བ་དེ་དང་དེར་མི་རྣམས་ལ་བྱད་སྟེམས་ཐམས་ཅད་ཀྱི་རྒྱུ་མེད་པར་འགྱུར་རོ། །དེར་སྨན་གྱི་སྦྱོར་བ་འགྲོ་བ་དང ། ཕོ་ཉ་དང ། ཡིག་འབྲུ་དང ། ཡིད་ལ་བྱེད་པ་དང ། ལུས་འགྱུར་བ་དང ། ཚུལ་འཆོས་དང ། འཆིང་བ་དང ། ལུས་དང ། སྙིང་གི་ཀུན་ཏུ་གདུང་བ་མཐོང་བར་མི་འགྱུར་རོ། །ལས་སྒྲུབ་པ་མེད་པར་འབྲས་བུ་འགྲུབ་པར་འགྱུར་ཏེ། རིགས་ཀྱི་བུ། གཟུངས་སྔགས་ཉི་མ་སྣང་བའི་པདྨ་ཞེས་བྱ་བ་འདི་ནི། དེ་ལྟར་རྫུ་འཕྲུལ་ཆེ་བ་ཡིན་ནོ། ། ཏདྱ་ཐཱ། སིདྡྷ་མཱ་ཏེ། བི་ལོ་ཀ་མ་ཏེ། ཨེ་ལེ་ཀེ་ཏེ་རེ་ཥེ ། རཱུ་ཙེ་སཱུ་རཱུ་ཙི། བུདྡྷེ་བི་བུདྡྷེ། མཧཱ་བུདྡྷེ། ཨུན་མ་ད་ཨུན་མད་ཏེ། པྲ་ཏི་ཥེ་དྷ་ནེ། ར་ག་དྷུ་ར་ག་དྷུ་པ་པྲ་ཏི་ཥེ་དྷ་ནེ་བིནྡུ ། བིནྡུ་མ་ཏེ། ཙི་ཊ་ཙི་ཊ་པྲ་ཏི་ཥེ་དྷ་ནི། ཨརྐ་ཙནད་ཨ་དྷེ། ཧ་ཏ་ཙིད་ཏི་ཧ་ཏ་ནི་རྨི། ཧ་ཏ་ཀཱ་མ་བེ་གེ་།ཧ་ཏ་པཽ་ན་བྷ་བི་ར་ཛེ། ཧ་ཏ་ཙཀྵུ་ས་མ་ཏེ། ཧ་ཏ་པི་ཏ་མ་བུདྡྷེ། ཧ་ཏ་ཡཱ་གྲེ། ཧ་ཏ་བི་ས་མ་གྲེ། ཧ་ཏ་ས་མུ་དྲ་ཙ་བེ། ཧ་ཏ་བི་ཏ་མཱ་ར་ཛེ། ཧ་ཏ་ཏི་ཏེ། ཧ་ཏ་དྷམྲ་ཙ་ཙ་ཏེ། ཧ་ཏ་དྷརྨ་རཱ་ཛེ། ཧ་ཏ་བ་ཧུ་རཱ་ཛེ། ཧ་ཏ་པ་བརྫ་མ་ཏི། ཧ་ཏ་གྷ་ར་ཤྨི། ཧ་ཏ་དྷརྨ་སིདྡྷི། ཧ་ཏ་སརྦ་ཨུ་བ་དྷ་ན་ཛྙཱ་ཛྙཱ་ཛྙཱ། བི་ཛྙཱ་ཛྙཱ་ཛྙཱ། རི་བི་ཛྙཱ་ཛྙཱ་ཛྙཱ། སརྦ་མཱརྒ་ཛྙཱ་ཛྙཱ། ཨེ་ཥ་ཨནྟ་སཾ་སཱ་ར་དུཿ ་ཁེ་སཝཱཧཱ། རིགས་ཀྱི་བུ། འདོད་པའི་ཆུ་བོ་ཐམས་ཅད་ཀུན་ཏུ་སྐེམ་པར་བྱེད་པ་ངེས་པར་འབྱུང་
183a
༄#། །བའི་ཕ་རོལ་ཏུ་འགྲོ་བའི་གཟུངས་སྔགས་འདི་བཟུང་ནས་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཞིག་།ཁྱོད་ཀྱིས་འདོད་པའི་བདུད་ཀྱི་མཆིལ་བ་ཐམས་ཅད་དང ། ཕ་རོལ་གནོན་པ་དང ། ཡུལ་ལ་བརྩོན་པའི་ཕ་རོལ་གནོན་པས་ཕ་རོལ་གནོན་པ་བྱེད་དུ་ཟིན་ཀྱང་སུས་ཀྱང་ཁྱོད་ཀྱི་ལུས་སམ་སེམས་ལ་འདོད་པའི་ཀུན་ཏུ་སྦྱོར་བ་དག་གིས་གོས་པར་བྱེད་མི་ནུས་ན། གཟུངས་སྔགས་འདི་ལྟར་ཐོས་པ་བཞིན་དུ་སངས་རྒྱས་ཀྱི་ཞིང་མི་མཇེད་དུ་སོང་ནས་ཀྱང་སྦྱོར་བ་བྱོས་ཤིག་།དེར་གལ་ཏེ་བདུད་བྱེ་བ་ཕྲག་བརྒྱ་གསང་སྔགས་ཀྱི་སྦྱོར་བ་ཐམས་ཅད་དང ། སྨན་གྱི་སྦྱོར་བ་ཐམས་ཅད་དང ། ཆོས་ཀྱི་སྦྱོར་བ་ཐམས་ཅད་དང ། ལྷ་དང ། མི་གཞན་དག་གིས་འདོད་པའི་དྲི་ང་བ་དག་གིས་གོས་པར་བྱ་བ་ལྟ་ཅི་སྨོས། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དང ། ལྷ་བྱེ་བ་ཁྲག་ཁྲིག་བརྒྱ་སྟོང་མང་པོ་དང ། ལྷ་དང ། མི་རྣམས་ངོ་མཚར་རྙེད་ཅིང་རྨད་དུ་བྱུང་བ་རྙེད་པར་གྱུར་ནས་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་གཟིགས་པ་དང ། མངའ་བརྙེས་པ་ནི། ངོ་མཚར་ལགས་སོ། །མཆོག་ཏུ་ངོ་མཚར་ལགས་ཏེ།
183b
འདོད་པས་ཀུན་ཏུ་གདུང་བ་རྣམ་པར་འཇིག་པར་བགྱིད་པའི་གཟུངས་སྔགས་འདི་ནི། བདག་ཅག་གིས་སྔོན་མ་ཐོས་ལགས་སོ། །དེ་ནས་འཁོར་དེར་ལྷའི་བུ་མོ་དང ། མིའི་བུ་མོ་བརྒྱད་ཁྲི་བཞི་སྟོང་གིས་བསྙེན་བཀུར་བྱས་ནས་གཟུངས་སྔགས་འདི་ཐོས་པར་གྱུར་ཏོ། །ཐོས་མ་ཐག་ཏུ་དེ་དག་གི་མོ་མཚན་ནུབ་པར་གྱུར་ཅིང ། ཕོ་མཚན་བྱུང་བར་གྱུར་ཏེ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་དེ་བཞིན་གཤེགས་པ་ཙམྤ་ཀའི་མདོག་གིས་མེ་ཏོག་ཙམྤ་ཀའི་ཕྲེང་བ་བཞེས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ཀྱེ་རིགས་ཀྱི་བུ། མེ་ཏོག་ཙམྤ་ཀའི་ཕྲེང་བ་འདི་དང ། གཟུངས་སྔགས་ཉི་མ་སྣང་བའི་པདྨ་ཞེས་བྱ་བ་འདི་དང ། བདེན་པ་དང་རྗེས་སུ་མཐུན་པའི་བཟོད་པ་དེ་ཟུངས་ཤིག་།འདོད་པ་གློག་གི་འོད་ལྟ་བུ་སེལ་བར་བྱེད་པ་འདི་གཉིས་དང ། ཆོས་ཀྱི་སྒོ་མོ་དེར་ཁྱེར་ལ་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་ཞུས་ལ། དེ་ལ་འདི་སྐད་དུ་ཁྱོད་ལ་དེ་བཞིན་གཤེགས་པ་ཙམྤ་ཀའི་མདོག་ཞུ་བར་མཛད་ལགས་ཏེ། བཙུན་པ་བཅོམ་ལྡན་འདས། ཅི་སྙུང་བ་མི་མངའ་ལགས་སམ །
184a
༄#། །གནོད་པ་ཆུང་ངམ། ཁྱོད་ཀྱི་འཁོར་གུས་པར་ཉན་ལགས་སམ། ཆོས་འཚལ་བ་ལགས་སམ། ཆོས་ཀྱིས་གནས་པ་ལགས་སམ། ཆོས་ལ་བརྩོན་པ་ལགས་སམ།་སངས་རྒྱས་ཀྱི་ཡུལ་ཐམས་ཅད་ན་ཉོན་མོངས་པ་སེལ་བར་བགྱིད་པ་དེ་དག་དང ། ཆོས་ཀྱི་སྒོ་ལ་དེ་བཞིན་གཤེགས་པ་དེས་དད་པ་སྩལ་ཏེ། དེ་ནས་འདོད་པ་གློག་གི་འོད་ལྟ་བུ་སེལ་བར་བགྱིད་པ། ཆོས་ཀྱི་སྒོའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཟད་པར་བགྱིད་པ་ནས་མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པའི་བར་བགྱིད་པ། སྡུག་བསྔལ་གྱི་ཁུར་འདོར་བར་བགྱིད་པ་བསྐུར་ལགས་སོ། །ཞེས་གསོལ་ཅིག་།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་གསུམ་པ། དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་བཞིན་འཚལ་ལགས་སོ། །ཡང་དེའི་ཚེ་བྱང་ཆུབ་སེམས་དཔའ་བརྒྱད་ཁྲིས་ཚིག་མཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང ། ཕྱག་བགྱི་བ་དང ། མཆོད་པ་དང ། བསྙེན་བཀུར་བགྱི་བ་དང ། འདུས་པ་ཆེན་པོ་དེ་ལའང་བལྟ་བའི་སླད་དུ་བདག་ཅག་ཀྱང་མཆི་བར་མཚལ་ཏེ། དེ་བཞིན་
184b
གཤེགས་པ་དེ་ལས་འདུས་པ་ཆེན་པོ་སངས་རྒྱས་ཀྱི་ཡུལ་ཐམས་ཅད་ན་ཉོན་མོངས་པ་སེལ་བར་བགྱིད་པའི་ཆོས་ཀྱི་སྒོ་བདག་ཅག་གིས་མཉན་པར་བགྱིད་ལགས་སོ། །དེ་ནས་དེ་བཞིན་གཤེགས་པ་ཙམྤ་ཀའི་མདོག་དེས་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཐམས་ཅད་ལྷན་ཅིག་མཐུན་པར་ཐམས་ཅད་ཚངས་པ་ཆེན་པོའི་ལུས་བྱད་དང ། རྟགས་དང ། མདོག་དང ། དབྱིབས་དང ། སྤྱོད་ལམ་གྱིས་དེངས་ཤིག་།དེ་ནས་དེའི་ཚེ་བྱང་ཆུབ་སེམས་དཔའ་ཉི་མའི་ཤུགས་ཀྱི་སྙིང་པོ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ཐམས་ཅད་ཚངས་པ་ཆེན་པོའི་ལུས་བྱད་དང ། མདོག་དང ། རྟགས་དང ། དབྱིབས་དང ། སྤྱོད་ལམ་དུ་ལུས་དག་མངོན་པར་སྤྲུལ་ནས་དེ་བཞིན་གཤེགས་པ་ཙམྤ་ཀའི་མདོག་གི་ཞབས་གཉིས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་དེ་ནས་ཆས་ཏེ་ཡུད་ཙམ་གྱིས་སངས་རྒྱས་ཀྱི་ཞིང་མི་མཇེད་འདིར་ཕྱིན་ཏོ། །སྐྱེས་བུ་དམ་པ་དེ་དག་ཕྱིན་པ་ཙམ་གྱི་མོད་ལ་སངས་རྒྱས་ཀྱི་ཞིང་མི་མཇེད་འདི་ཐམས་ཅད་དུ་བཅོམ་ལྡན་འདས་ལ་མཆོད་པ་བྱ་བའི་ཕྱིར་མེ་མེ་ཏོག་ཙམྤ་ཀའི་ཆར་མངོན་པར་འབེབས་པར་གྱུར་ཏོ། །དེ་དག་ཡུལ་མ་ག་དྷའི་ཞིང་ག་ལ་བ་དང ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་ཉེ་བར་
185a
༄#། །དོང་ངོ ། །དོང་ནས་ཀྱང་བཅོམ་ལྡན་འདས་ཀྱི་ཞབས་གཉིས་ལ་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ནི། དེའི་བར་དུའང་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་ཀུན་ཏུ་སྤྱོད་པར་མཛད་དོ། །དེའི་ཚེ་ལྷོ་ཕྱོགས་ན་གྲོང་ཁྱེར་ཆུ་དང་རྒྱར་དཔག་ཚད་གཅིག་ཡོད་པ། བྱེ་མ་དག་གིས་ཡོངས་སུ་གང་བ་དེ་སྙེད་ཀྱི་སངས་རྒྱས་ཀྱི་ཞིང་འདས་པ་དེ་ན་འཇིག་རྟེན་གྱི་ཁམས་སྙིགས་མ་ལྔས་སྙིགས་མའི་རྒྱལ་མཚན་ཞེས་བྱ་བ་ཡོད་དེ། སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་དབང་གི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཁོར་དེར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ཞེས་བྱ་བ་འདུས་ཏེ་འདུག་པར་གྱུར་ཏོ། །དེས་སྟེང་གི་ནམ་མཁའ་ལ་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་ལྷོ་ཕྱོགས་ཀྱི་ཕྱོགས་ཆ་ནས་བྱང་ཕྱོགས་སུ་འགྲོ་བ་དག་མཐོང་ངོ ། །དེ་ནས་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འདོང་བའི་ཕྱོགས་དེ་ལ་བལྟས་ཏེ། དེས་དེར་སྣང་བ་ཆེན་པོ་མཐོང་ནས་དེ་བཞིན་གཤེགས་པ་རི་དབང་རྒྱལ་པོ་ལ་ཡོངས་སུ་ཞུས་སོ། །ཞེས་བྱ་བ་ནས་དེ་བཞིན་གཤེགས་པ་རི་དབང་རྒྱལ་པོ་དེས་བྱང་ཆུབ་སེམས་དཔའ་
185b
སེམས་དཔའ་ཆེན་པོ་སྤོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་སྔ་མ་བཞིན་ནོ། །རིགས་ཀྱི་བུ། འདི་ལྟ་སྟེ། གྲོང་ཁྱེར་ཆུ་དང་རྒྱར་དཔག་ཚད་གཅིག་ཡོད་པ།་བྱེ་མ་དག་གིས་ཡོངས་སུ་གང་བར་གྱུར་པའི་བྱེ་མའི་འབྲུ་དེ་དག་ཇི་སྙེད་ཡོད་པའི་སངས་རྒྱས་ཀྱི་ཞིང་ཇི་སྙེད་འདས་པ་དེ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དོ།། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་ན་ད་ལྟ་འདུས་པ་ཆེན་པོ་ཡོད་དེ། དེ་ན་དེ་བཞིན་གཤེགས་པ་དེ་ཆོས་ཀྱི་ཚུལ་ཡུན་རིང་དུ་གནས་པར་མཛད་པའི་ཕྱིར་དང ། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་དང ། ཆོས་ཀྱིས་གནས་པ་ཉིད་རྒྱུན་མི་གཅད་པའི་ཕྱིར་དང ། བདུད་ཀྱི་ཡུལ་རྣམ་པར་འཇིག་པར་མཛད་པའི་ཕྱིར་དང ། ཆོས་ཀྱི་རྒྱལ་མཚན་བསྒྲེང་བར་མཛད་པའི་ཕྱིར་ཐེག་པ་གསུམ་རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱང་རིན་པོ་ཆེ་ཏོག་ཅེས་བྱ་བའི་གཟུངས་སྔགས་བཤད་ནས་གཤེགས་སོ། །ཞེས་བྱ་བ་ནས་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་འདུས་པར་མཛད་ནས་སོ་སོ་ཡང་
186a
༄#། །དག་པར་རིག་པ་བཞི་དང་ལྡན་པའི་སྤྱན་གསུམ་དང ། ཚངས་པའི་གནས་དག་བསྟན་ཀྱང་ད་དུང་འཁོར་སངས་རྒྱས་ཀྱི་ཞིང་མི་མཇེད་ས་དང་སྟེང་གི་ནམ་མཁའ་མ་འདྲེས་པར་གང་ཞིག་དེ་བཞིན་གཤེགས་པ་མཆོག་ཏུ་སྙན་པ་གསུང་པ་ཤཱཀྱ་ཐུབ་པའི་ཆོས་བསྟན་པ་ལ་ངོམས་པ་མེད་དོ། །ཞེས་བྱ་བའི་བར་ཇི་སྐད་སྔར་གསུངས་པ་བཞིན་ནོ། །རིགས་ཀྱི་བུ། ཁྱོད་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུ་བའི་ཕྱིར་མི་མཇེད་ཀྱི་ཁམས་སུ་འགྲོ་བར་སྤྲོ་ན། དེར་ཉི་མའི་ཤུགས་ཀྱི་སྙིང་པོའི་ཆོས་ཀྱིས་གནས་པ་ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ལ་ངས་དད་པ་སྦྱིན་པར་མཛད་དོ། །དེར་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་མེད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། ང་རྒྱལ་དང ། ལྷག་པའི་ང་རྒྱལ་དང ། ངའོ་སྙམ་པའི་ང་རྒྱལ་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་ཟད་པ་ཤེས་པ་སྐྱེད་པའི་བར་བྱེད་པ། མི་སྐྱེ་བ་ཤེས་པ་རྟོགས་པར་བྱེད་པ། མ་རིག་
186b
པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པ། སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པ་འདི་བསྐུར་བར་མཛད་དོ། །ཏདྱ་ཐཱ། དྷུ་མ་ཏེ། དྷུ་མ་ཏེ། ཨཀྵི་དྷུ་མ་ཏེ། པྲ་བྷཱ་ས་དྷུ་མ་ཏེ། སརྦཱ་ཀཱ་ཤ་དྷུ་མ་ཏེ། ཨ་བ་བཱི་ཀྵ་ཁ་ག་།བི་མཱ་ན་ཁ་ག་། བ་མོ་ཧ་ཁ་ག་། ན་ནྱ་ཁ་ག་།བྱཱ་བ་བྲིད་ཏི་ཁ་ག་། རོ་ཙ་ན་ཁ་ག་། ནི་མཱ་ཁ་ག་།ལོ་ཀ་ཁ་ག་།ཤི་ཁི་ཁ་ག་།བི་ཏི་མི་ར་ཁ་ག་།ན་མོ་ཁ་ག་།ཀྵི་ཁ་ག། ཤྲོ་ཏྲ་ཁ་ག་།གྷྲཱ་ཎ་ཁ་ག་།ཛི་ཧཝཱ་ཁ་ག་།ཀཱ་ཡ་ཁ་ག་།མ་ན་ཁ་ག་།རཱུ་པ་ཁ་ག་།ཤཔྟ་ཁ་ག། གནྡྷ་ཁ་ག་།ར་ས་ཁ་ག་།སྤཪྴ་ཁ་ག་།དྷརྨ་ཁ་ག་།ཙཀྵུརྡྷཱ་ཏུ་ཁ་ག་།རཱུ་པ་དྷཱ་ཏུ་ཁ་ག་།ཙཀྵུརྦི་ཛྙཱ་ན་དྷཱ་ཏུ་ཁ་ག་།ཡཱ་པ་ད་མ་ན་དྷཱ་ཏུ་ཁ་ག་།དྷརྨ་དྷཱ་ཏུ་ཁ་ག་།མ་ན་བི་ཛྙཱ་ན་དྷཱ་ཏུ་ཁ་ག་།པྲྀ་ཐྭཱི་དྷཱ་ཏུ་ཁ་ག་། བ་དྷཱ་ཏུ་ཁ་ག་།ཏེ་ཛོ་དྷཱ་ཏུ་ཁ་ག་།བཱ་ཡུ་དྷཱ་ཏུ་ཁ་ག་།ཙ་ཏུར་ཨ་ནུ་སྨྲྀ་ཏྱུ་པ་སྠཱ་ན་ཁ་ག་།ཡ་བཱ་དྷ་བེ་ཎི་ཀ་ཁ་ག་།ཡཱ་བད་མཱརྒ་ཁ་ག་། བྷི་ཀྵི་པ། ཨ་ན་ནན། བ་ནན། ས་མུ་དྲ་ནན། སརྦ་ཀ་ར་ནན། སརྦ་སཾ་སྐ་ར་བི་ཤེ་ཥ་ནན། ཨ་ཀིན་ཙ་ན་ནན། ཀྵ་ཏ་ཀྵ་ཏ། ཨི་ལི་མི་ལི། ཨི་ཨི་ཨི་ཨི་ལི་མི་ལེ་སཝཱཧཱ། རིགས་ཀྱི་བུ། སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་དེ་ནི། འདི་ཡིན་ཏེ། མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་
187a
༄#། །པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་འདོར་བར་བྱེད་པའི་བར་ཡིན་ནོ། །ལོངས་ལ་སངས་རྒྱས་ཀྱི་ཞིང་མི་མཇེད་དུ་སོང་ཞིག་།ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ཆུང་ངམ་ཞེས་བྱ་བ་ནས་གང་ལ་ལས་ངས་རྒྱས་ཀྱི་ཡུལ་འདིར་ཆོས་མ་ལགས་པའི་འཁོར་ལོ་བསྐོར་བ་དེ་ལའང་དེ་བཞིན་གཤེགས་པ་རི་དབང་རྒྱལ་པོ་དེས་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང ། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པ་སྩོལ་བར་མཛད་ཅིང་ཞེས་བྱ་བའི་བར་དང ། དེ་ནས་ཀྱང་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པ་འདི་བསྐུར་ལགས་སོ། །ཞེས་བྱ་བའི་བར་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེས་འདི་སྐད་ཅེས་གསོལ། །བཙུན་པ་བཅོམ་ལྡན་འདས། སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་ཀྱི་ཡོན་ཏན་གྱི་ཕན་ཡོན་དང ། སྟོང་པ་
187b
ཉིད་ཀྱི་ཕན་ཡོན་བདག་གིས་བཟུང་ལགས་ན། བཙུན་པ་བཅོམ་ལྡན་འདས། སངས་རྒྱས་ཀྱི་ཞིང་མི་མཇེད་དེར་མཆི་བ་ལ་བདག་འཇིགས་ལགས་སོ། །བཙུན་པ་བཅོམ་ལྡན་འདས། དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་མཆོག་ཏུ་འདོད་ཆགས་ཀྱི་ཤས་ཆེ་བ་ཞེས་བགྱི་བ་ནས་བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང ། ངན་སོང་བ་དག་དང ། སེམས་ཅན་དམྱལ་བ་བ་བྱུང་ཞིང་འབྱུང་བར་འགྱུར་བའི་བར་གྱི་སླད་དུའོ། །དེ་ནས་དེ་བཞིན་གཤེགས་པ་རི་དབང་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ། །ནམ་མཁའ་ལ་རྐྱེན་གསུམ་ཡོད་དེ། གསུམ་གྱིས་ཁྱབ་པས་རྣམ་པར་མཛེས་སོ། །གངས་ནི། གདུང་བར་མི་བྱེད་དོ། །ཆུ་ཀླུང་དག་ལ་ཆུ་སྐམ་པར་མི་འགྱུར་རོ། །རྐྱེན་གསུམ་པ་དག་ལ་མཁས་པ་དང ། བཟོད་པ་དང ། བསྡམས་པས་ལུས་ཁྱབ་པ་ནི། ལུང་གིས་མ་རིག་པའི་ཆུ་བོས་ཀྱང་དབང་པོ་དྲུག་གདུང་བར་མི་བྱེད་དེ། བྱིས་པས་སྨྲས་པ། རྐྱེན་གསུམ་གྱིས་ཆུ་བོ་དག་ལས་ཐར་པར་བྱེད་ཅིང་སེམས་ཅན་མེད་པ་དང ། ཕུང་པོའི་ཁུར་འདོར་བའི་ཆོས་སྟོན་པར་བྱེད་
188a
༄#། །དོ། །ཁྱོད་ཀྱིས་མི་སྐྱེ་བའི་ཆོས་ལ་བཟོད་པ་རྣམ་པ་བཅུ་གསུམ་རབ་ཏུ་བསྒོམས་པ་ཡིན་ཞིང་འཇིགས་པ་ཐམས་ཅད་སྤངས་པ་ཡིན་ན། ཅིའི་ཕྱིར་ཁྱོད་འཇིགས་སོ། །ཞེས་སྨྲ་བར་བྱེད། ཁ་ཅིག་ཏུ་ནི། ཁྱོད་ཚངས་པའི་ལུས་བྱད་ཀྱིས་སངས་རྒྱས་ཀྱི་ཞིང་དག་ན་སེམས་ཅན་རྣམས་ཐར་པར་བྱེད་དོ། །ཁ་ཅིག་ཏུ་ནི། དབང་ཕྱུག་ཆེན་པོ་དང ། ཁ་ཅིག་ཏུ་ནི། བརྒྱ་བྱིན་དང ། ཁ་ཅིག་ཏུ་ནི། སྲེད་མེད་ཀྱི་བུ་དང ། ཁ་ཅིག་ཏུ་ནི། ལྷའི་ལུས་བྱད་དང ། ཁ་ཅིག་ཏུ་ནི། གནོད་སྦྱིན་དང ། ཀླུའི་དབང་པོ་དང ། ལྷ་མ་ཡིན་དང ། ཁ་ཅིག་ཏུ་ནི། འཁོར་ལོས་བསྒྱུར་བའི་ལུས་བྱད་དང ། ཁ་ཅིག་ཏུ་ནི། སྨན་པའི་ལུས་བྱད་དང ། རྒྱལ་རིགས་ཀྱི་ལུས་བྱད་དང ། དེ་བཞིན་དུ་ཁ་ཅིག་ཏུ་ནི།་བྲམ་ཟེའི་ལུས་བྱད་དང ། ཁ་ཅིག་ཏུ་ནི། ཉན་ཐོས་ཀྱི་ལུས་བྱད་དང་ཞེས་བྱ་བ་ནས་ཁ་ཅིག་ཏུ་ནི། སངས་རྒྱས་ཀྱི་ཞིང་མང་པོར་བློན་པོའི་བར་གྱི་ལུས་བྱད་དུ་ཀུན་ཏུ་སྣང་བར་བྱེད་དེ། སངས་རྒྱས་ཀྱི་ཞིང་ཉོན་མོངས་པ་ཅན་དག་ཏུ་དུས་རྟག་ཏུ་སངས་རྒྱས་ཀྱི་ཞིང་ཡོངས་སུ་དག་པར་བྱེད་པ་ཡིན་ན། ཅི་སྟེ་སེམས་ཅན་རྣམས་ཡོངས་སུ་སྨིན་པར་བྱེད་པའི་དོན་དུ་འཇིགས་པའི་ཚིག་སྨྲ་བར་བྱེད། རིགས་ཀྱི་བུ། ཁྱོད་ལ་མི་ཟད་པའི་སྦུབས་ལུང་བསྟན་པ་ཞེས་བྱ་བ་སེམས་ཀྱི་ཚོར་བ་སྒྲུབ་པ། ཐམས་ཅད་
188b
མཁྱེན་པའི་ཡེ་ཤེས་ཡང་དག་པར་འདུ་བ། བདུད་བཞི་འདུལ་བར་བྱེད་པ་སྒྲུབ་པ། དཀོན་མཆོག་གསུམ་གྱི་གདུང་གི་གེགས་མེད་པར་སྒྲུབ་པ། ཀླུའི་ཡུལ་ཐམས་ཅད་རྣམ་པར་འཇིག་པར་བྱེད་པའི་འོད་ཟེར་སྒྲུབ་པ། སེམས་ཅན་རྣམས་ཀྱི་ལས་ཐམས་ཅད་ཟད་པར་འགྱུར་བ་སྒྲུབ་པ། བྱམས་པ་ཆེན་པོ་དང ། སེམས་ཅན་ཡོངས་སུ་སྨིན་པར་བྱེད་པ་སྒྲུབ་པ།་སྙིང་རྗེ་ཆེན་པོ་དང ། བསམ་བཞིན་དུ་ངན་འགྲོར་སྐྱེ་བ་དང ། སེམས་ཅན་ཡོངས་སུ་སྐྱོབ་པ་སྒྲུབ་པ། སེམས་ཅན་ཐམས་ཅད་ཀྱི་སེམས་ཡང་དག་པར་དགའ་བར་བྱེད་པ་སྒྲུབ་པ། སེམས་ཅན་ཐམས་ཅད་ཀྱི་ལམ་ངན་པ་དང ། ལྟ་བ་ངན་པ་དང ། འདོད་པ་ངན་པ་དང ། སྨོན་ལམ་ངན་པ་དང ། ཐེག་པ་ངན་པ་ཕྱིར་ལྡོག་པར་བྱེད་པ་སྒྲུབ་པ། སེམས་ཅན་ཐམས་ཅད་ངན་འགྲོ་ལས་ངེ་པར་རྣམ་པར་ཐར་པར་བྱེད་པ་སྒྲུབ་པ། བུད་མེད་ཐམས་ཅད་ཡོངས་སུ་ཐར་པར་བྱེད་ཅིང་སེམས་ཅན་སྐྱེས་བུ་ཐོབ་པ་སྒྲུབ་པ།་ཆོས་ཀྱི་ཕུང་པོ་ཐམས་ཅད་ཟད་མི་ཤེས་པ་སྒྲུབ་པ། སེར་སྣ་ཐམས་ཅད་སེལ་བར་བྱེད་པ་སྒྲུབ་པ། ཏིང་ངེ་འཛིན་གྱི་ཕུང་པོ་དང་མངོན་པར་ཤེས་པ་ཐམས་ཅད་མི་ཟད་པ་སྒྲུབ་པ། སེམས་ཅན་ཐམས་ཅད་དད་པར་བྱེད་པ་དང ། བྱང་ཆུབ་སེམས་དཔའི་ལམ་ལ་གཞོག་པར་བྱེད་པ་སྒྲུབ་པ། ཉན་ཐོས་དང་རྐྱེན་གྱི་ཐེག་པ་སྒྱུར་བ་སྒྲུབ་པ་
189a
༄#། །ཞེས་བྱ་བ་ནས་བླ་ན་མེད་པའི་ཡོངས་སུ་མྱ་ངན་ལས་འདས་པའི་བར་སྒྲུབ་པ་འདི་ནི། མི་ཟད་པའི་སྤུབས་ལུང་བསྟན་པ་ཞེས་བྱ་བ་ཡིན་ཏེ། སེམས་ཅན་རྣམས་ཐོས་པ་ཙམ་གྱི་མོད་ལ་ལས་ཀྱི་སྒྲིབ་པ་དང ། སེམས་ཅན་གྱི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་པ། འཕངས་པ། ཡོངས་སུ་མ་སྤྱད་པ།་མ་ཟད་པ། མ་སྦྱངས་པ་གངྒཱའི་ཀླུང་གི་བྱེ་མའི་ཚད་སྙེད་ཀྱང་མ་ལུས་པར་ཟད་པར་འགྱུར་ཏེ། འབྲས་བུ་འགྲུབ་པར་མི་འགྱུར་རོ། །མཚམས་མེད་པའི་ལས་རྣམས་དང ། དམ་པའི་ཆོས་སྤོང་བའི་ལས་རྣམས་དང ། འཕགས་པ་ལ་སྐུར་བ་འདེབས་པའི་ལས་རྣམས་ནི། མ་གཏོགས་སོ། །རིགས་ཀྱི་བུ། གང་ལ་ལ་མི་ཟད་པའི་སྤུབས་ལུང་བསྟན་པ་ཞེས་བྱ་བ་འདི་ལན་གཅིག་ཙམ་སེམས་རྩེ་གཅིག་པས་ཉན་པར་བྱེད་ན། དེ་ལ་དགའ་བ་དང ། དད་པ་དང ། ཉེ་བར་རྟོག་པ་ཀུན་ཏུ་སྐྱེད་པར་བྱེད་དོ། །དེའི་ལས་ཀྱི་སྒྲིབ་པ་དང ། སེམས་ཀྱི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་པ། འཕགས་པ། ཡོངས་སུ་མ་སྤྱད་པ། མ་ཟད་པ། མ་སྦྱངས་པ་གངྒཱའི་ཀླུང་གི་བྱེ་མ་སྙེད་ཀྱང་མ་ལུས་པར་ཟད་པར་འགྱུར་རོ། །ཞེས་བྱ་བ་ནས་འབྲས་བུ་འགྲུབ་པར་མི་འགྱུར་བའི་བར་དུ་འགྱུར་རོ། །དེ་དགེ་བའི་རྩ་བ་ཇི་ལྟ་བུ་ཀུན་ཏུ་
189b
སྤྱོད་ཀྱང་རུང ། གལ་ཏེ་སྦྱིན་པའི་ཕ་རོལ་ཏུ་ཕྱིན་པ་ཀུན་ཏུ་རྩོམ་པར་བྱེད་ནའང་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །བྱང་ཆུབ་སེམས་དཔའ་དང ། རྐྱེན་གྱི་རྒྱལ་བ་དང ། དགྲ་བཅོམ་པ་ཐམས་ཅད་ཀྱིས་ཀྱང་བྱིན་གྱིས་བརླབས་པར་འགྱུར་རོ། །དེའི་ཁྱིམ་ལོངས་སྤྱོད་ཟད་མི་ཤེས་པར་ཡང་འགྱུར་རོ། །ལུས་དང ། ངག་དང ། ཡིད་སེར་སྣའི་དྲི་མ་དང་བྲལ་བས་སྣོད་ཡིན་ཞིང ། སྣོད་དུ་གྱུར་པའི་སྦྱིན་གནས་ལ་བརྙས་པ་མེད་པའི་སེམས་ཀྱིས་མི་དམིགས་པའི་ཚུལ་གྱིས་སྦྱིན་པ་བྱིན་པར་བྱེད་ན། ཐ་ན་ཡན་ལག་གི་དམ་པ་མགོ་ཡོངས་སུ་གཏོང་བར་བྱེད་ནའང་དེ་ལ་ལྷ་དང་ལྷ་མ་ཡིན་དུ་བཅས་པའི་འཇིག་རྟེན་སུས་ཀྱང་བར་ཆད་བྱ་བར་མི་ནུས་ཏེ། མཚམས་མེད་པ་དང ། འཕགས་པ་ལ་སྐུར་པ་འདེབས་པ་དང ། དམ་པའི་ཆོས་སྤོང་བར་བྱེད་པ་ནི། མ་གཏོགས་སོ། །གལ་ཏེ་ཡང་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱེད་པ་ན་དེ་འདི་ལྟ་བུ་རྩོམ་པར་བྱེད་དོ། ། འཕགས་པ་དགྱེས་པ་དང ། འཕགས་པས་བྱིན་གྱིས་བརླབས་པ་དང ། རྣམ་པར་དག་པའི་ཚུལ་ཁྲིམས་དང ། བཟོད་པ་དང ། དེས་པ་ལ་གནས་པར་བྱེད་ན། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ཐམས་ཅད་ཀྱིས་དད་པར་བྱ་བའི་འོས་སུ་གྱུར་པ་དང ། ཕྱག་བྱ་བའི་འོས་སུ་གྱུར་པ་དང ། རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་
190a
༄#། །རིགས་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་པ་ཡིན། གཞན་ལ་མི་སྨོད་པ་ཡིན། བདག་ལ་མི་བསྟོད་པ་ཡིན་ཞིང་རྙེད་པ་དང་བཀུར་སྟི་ལ་ལྷག་པར་ཆགས་པ་མེད་པས་ཉིན་མཚན་འདས་པར་བྱེད་དོ། །བདེ་བར་གཉིད་ཀྱིས་ལོག་པ་དང ། བདེ་བར་སད་པར་འགྱུར་རོ། །གནོད་པ་ཆུང་བ་དང ། བཟའ་བ་དང ། བཏུང་བ་མོད་ཅིང་མང་བ་དང ། སྙིང་རྗེ་ལ་གནས་པ་དང ། སེམས་ཅན་ཐམས་ཅད་ལ་ཕན་པར་འདོད་པ་དང ། རྩོལ་བ་དོན་ཡོད་པར་འགྱུར་རོ། །ཕྱི་མའི་དུས་ན་འཆི་བའི་ཚེ་ཕྱོགས་བཅུ་ནས་སངས་རྒྱས་བཅོམ་ལྡན་འདས་དག་མཐོང་བར་འགྱུར་ཞིང་དེ་དག་ཀྱང་དེ་ལ་སྐྱེས་བུ་དམ་པ་ལེགས་སོ་ལེགས་སོ། །ཁྱོད་ཚུལ་ཁྲིམས་སྐྱོན་མེད་པ་ཡིན་གྱི།་ངེད་ཀྱི་ཞིང་ཡོངས་སུ་དག་པ་དག་ཚུར་ཤོག་།དེར་ངེད་ཀྱིས་ཁྱོད་ས་བཅུ་ལ་རྣམ་པར་གཞག་པར་བྱའོ། །ཞེས་ལུང་སྟོན་པར་འགྱུར་རོ། །དེ་སངས་རྒྱས་མཐོང་བའི་རྒྱུས་འཕགས་པའི་དགའ་བ་དང ། དད་པ་སྐྱེ་བར་འགྱུར་རོ། །དེ་འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་སྟོང་པ་མ་ཡིན་པ་དག་ཏུ་སྐྱེ་བར་འགྱུར་རོ། །དེ་དེར་ཡང་མྱུར་དུ་ས་བཅུ་འཐོབ་པར་འགྱུར་རོ། །དེ་ས་བཅུ་ལ་གནས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །སྐྱེས་བུ་
190b
དེ་མི་ཟད་པའི་སྤུབས་ལུང་བསྟན་པ་འདི་ཐོས་པ་ཙམ་གྱི་མོད་ལ་དེ་གལ་ཏེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན། དེ་འདི་ལྟ་སྟེ། སྦྱིན་པ་དང ། སྙན་པར་སྨྲ་བ་དང ། དོན་བྱེད་པ་དང ། དོན་མཐུན་པས་བརྩོན་འགྲུས་དང ། སྟོབས་དང ། སྤྲོ་བ་དང ། བློ་དང ། ཕ་རོལ་གནོན་པ་དམ་པ་དེ་ལྟ་བུ་དང་ལྡན་པར་འགྱུར་རོ། །ལྷའི་དབང་པོ་དང ། ཀླུའི་དབང་པོ་དང ། གནོད་སྦྱིན་གྱི་དབང་པོ་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོ་དང ། མིའམ་ཅིའི་དབང་པོ་དང ། ལྟོ་འཕྱེ་ཆེན་པོའི་དབང་པོ་དང ། མིའི་དབང་པོ་ཐམས་ཅད་ཀྱིས་དད་པར་བྱ་བའི་འོས་སུ་གྱུར་པ་ཡིན། མཆོད་པའི་འོས་སུ་གྱུར་པ་དང ། ཕྱག་བྱ་བའི་འོས་སུ་གྱུར་པ་ཡིན། དྲན་པར་བྱ་བའི་འོས་སུ་གྱུར་པ་ཡིན། མངོན་པར་དགའ་བར་བྱ་བའི་འོས་སུ་གྱུར་པ་དང ། རབ་ཏུ་བསྲུང་བའི་འོས་སུ་གྱུར་པ་ཡིན་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། ། སྐྱེས་བུ་དེ་མི་ཟད་པའི་སྤུབས་ལུང་བསྟན་པ་འདི་ཐོས་པ་ཙམ་གྱི་མོད་ལ་གལ་ཏེ་བཟོད་པའི་ཕ་རོལ་ཏུ་ཕྱིན་པ་ལ་གོམས་པར་བྱེད་ན། དེ་སེམས་ཅན་ཐམས་ཅད་དང་བྲལ་བ་དང ། མི་དམིགས་པ་དང་ལྡན་པ་དང ། འཕགས་པས་བྱིན་གྱིས་བརླབས་པ་དང ། ཆོས་ལ་དམིགས་པའི་བཟོད་པ་དེ་ལྟ་བུ་ཐོབ་པར་འགྱུར་ཏེ། དེས་ཀྱང་དེའི་ཡན་ལག་དང་ཉིང་ལག་དག་ཕྱུང་
191a
༄#། །ཞིང་བཅད་ནའང་སེམས་ཀྱི་སྐད་ཅིག་གཅིག་ཀྱང་ཁྲོ་བ་བསྐྱེད་པར་མི་འགྱུར་ཞིང་ཁྲོ་བ་ཐམས་ཅད་སྤངས་པར་འགྱུར། །ལྷའི་དབང་པོ་ཐམས་ཅད་ནས་མིའི་དབང་པོ་ཐམས་ཅད་ཀྱི་བར་གྱིས་དད་པར་བྱ་བའི་འོས་སུ་གྱུར་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། །དེ་བཞིན་དུ་སྐྱེས་བུ་དེ་མི་ཟད་པའི་སྤུབས་ལུང་བསྟན་པ་འདི་ཐོས་པ་ཙམ་གྱི་མོད་ལ་གལ་ཏེ་བསམ་གཏན་གྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན། མྱུར་དུ་འཕགས་པས་བྱིན་གྱིས་བརླབས་པ་དང ། ཆོས་ལ་དམིགས་པའི་བསམ་གཏན་དང ། རྣམ་པར་ཐར་པ་དང ། གཟུགས་མེད་པའི་སྙོམས་པར་འཇུག་པ་དང ། ཏིང་ངེ་འཛིན་གྱི་སྒོ་དང ། གཟུངས་ཀྱི་སྒོ་དང ། བཟོད་པའི་སྒོ་དེ་ལྟ་བུ་བྱེ་བ་ཕྲག་བརྒྱ་སྟོང་ཐོབ་པར་འགྱུར་རོ། །དུས་ཐམས་ཅད་དུ་སངས་རྒྱས་ཐམས་ཅད་ཀྱིས་དགོངས་པར་འགྱུར་རོ། །དེ་ལྷའི་དབང་པོ་ཐམས་ཅད་ནས་མིའི་དབང་པོ་ཐམས་ཅད་ཀྱི་བར་གྱིས་བསམ་པར་འགྱུར་ཞིང་དད་པར་བྱ་བའི་འོས་སུ་གྱུར་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། །རིགས་ཀྱི་བུ། གང་ལ་ལ་མི་ཟད་པའི་སྤུབས་ལུང་བསྟན་པ་ཞེས་བྱ་བ་འདི་
191b
ལན་གཅིག་ཙམ་སེམས་རྩེ་གཅིག་པས་ཉན་པར་བྱེད་ན། དེ་ལ་ལྷག་པར་ཡང་དགའ་བ་དང ། དད་པ་དང ། ཉེ་བར་རྟོག་པ་ཀུན་ཏུ་སྐྱེད་པར་བྱེད་དོ། །དེ་ལས་ཀྱི་སྒྲིབ་པ་དང ། སེམས་ཀྱི་སྒྲིབ་པ་དང ། ཆོས་ཀྱི་སྒྲིབ་པ་དང ། ཉོན་མོངས་པའི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་པ། འཕངས་པ། སོ་སོར་མ་བརྟེན་པ། མ་ཟད་པ། མ་སྦྱངས་པ་གངྒཱའི་ཀླུང་གི་བྱེ་མ་སྙེད་ཀྱང་མ་ལུས་པར་ཟད་པར་འགྱུར་ཏེ། དེ་ལ་འབྲས་བུ་འགྲུབ་པར་མི་འགྱུར་རོ། །མཚམས་མེད་པ་བྱེད་པ་དང ། དམ་པའི་ཆོས་སྤོང་བར་བྱེད་པ་དང ། འཕགས་པ་ལ་སྐུར་བ་འདེབས་པར་བྱེད་པའི་ལས་རྣམས་ནི། མ་གཏོགས་སོ། །དེ་གང་གི་ཚེ་འཕགས་པ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན། དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །བྱང་ཆུབ་སེམས་དཔའ་དང ། རང་རྒྱལ་པ་དང ། དགྲ་བཅོམ་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དབེན་པ་ལ་མངོན་པར་དགའ་བར་འགྱུར་རོ། །གང་དག་གིས་དེ་ལ་འཕགས་པའི་ཤེས་རབ་ཀྱི་དབང་པོ་ལེགས་པར་སྦྱངས་པར་བྱས་པ་དང ། ཤིན་ཏུ་མཐར་ཕྱིན་པར་འགྱུར་བའི་ཆོས་དེ་ལྟ་བུ་དག་དེའི་སེམས་དང་སེམས་ལས་བྱུང་བ་དག་གི་ནང་དུ་སྐྱེ་བར་འགྱུར་རོ། །དེ་ཆོས་ཐམས་ཅད་ལ་ཞུགས་པར་འགྱུར་ཞིང་ཐེ་ཚོམ་མེད་པ་དང ། ཐེ་ཚོམ་ལས་བརྒལ་བར་
192a
༄#། །འགྱུར་རོ། །ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་མི་བརྫི་བར་འགྱུར་རོ། །དེ་ལྷའི་དབང་པོ་ཐམས་ཅད་དང ། གནོད་སྦྱིན་གྱི་དབང་པོ་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོ་དང ། མིའམ་ཅིའི་དབང་པོ་དང ། མིའི་དབང་པོ་ཐམས་ཅད་ཀྱིས་དད་པར་བྱ་བའི་འོས་སུ་གྱུར་པ་དང ། དྲན་པར་བྱ་བའི་འོས་སུ་གྱུར་པ་དང ། མངོན་པར་དགའ་བར་བྱ་བའི་འོས་སུ་གྱུར་པ་དང ། མཆོད་པ་བྱ་བའི་འོས་སུ་གྱུར་པ་དང ། ཕྱག་བྱ་བའི་འོས་སུ་གྱུར་པ་དང ། རབ་ཏུ་བསྲུང་བའི་འོས་སུ་གྱུར་པ་ཡིན་ནོ། །དེ་ཕྱི་མའི་དུས་ན་འཆི་བའི་ཚེ་ཕྱོགས་བཅུ་ཀུན་ཏུ་གོམས་པའི་སངས་རྒྱས་བཅོམ་ལྡན་འདས་དག་མཐོང་བར་འགྱུར་རོ། །སངས་རྒྱས་བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་དེ་ལ་འདི་སྐད་དུ་སྐྱེས་བུ་དམ་པ་ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་ཚུར་ཤོག་།དེར་གནས་པར་བྱོས་ཤིག ། དེར་ངེད་ཀྱིས་རིགས་པས་ས་བཅུ་ལ་གཞག་པར་མཛད་དོ། །ཞེས་ཀྱང་གསུང་བར་འགྱུར་རོ། །དེ་སངས་རྒྱས་མཐོང་བ་དང ། འཕགས་པའི་དགའ་བ་དང ། དད་པ་དེས་འཆི་བའི་དུས་བྱས་ནས་སངས་རྒྱས་ཀྱི་ཞིང་ཡོངས་སུ་དག་པ་སྟོང་པ་མ་ཡིན་པ་དེ་དག་ཏུ་སྐྱེ་བར་འགྱུར་རོ། །དེ་དེར་ཡང་ས་བཅུ་ཐོབ་ཅིང་རིང་པོ་མི་ཐོགས་པར་བླ་ན་མེད་པ་ཡང་དག་
192b
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རིགས་ཀྱི་བུ། མི་ཟད་པའི་སྤུབས་ལུང་བསྟན་པ་ཆེན་པོ་འདི་ནི། དེ་ལྟར་ཕན་ཡོན་ཆེ་བ་ཡིན་ནོ། །སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ནས་སྨད་ཅིང་བོར་བ་མཚམས་མེད་པ་བྱེད་པ་དང ། དམ་པའི་ཆོས་སྤོང་བ་དང ། འཕགས་པ་ལ་སྐུར་བ་འདེབས་པ་དང ། ལྟུང་བའི་རྩ་བ་བྱུང་བའི་སེམས་ཅན་གང་མི་ཟད་པའི་སྤུབས་ལུང་བསྟན་པ་ཆེན་པོ་འདི་ཐོས་ནས་བྱམས་པའི་སེམས་དང་ལྡན་པ་དང ། སེམས་ཅན་ཐམས་ཅད་ལ་སྙིང་བརྩེ་བའི་སེམས་དང་ལྡན་པ་དང ། མཉམ་པའི་སེམས་དང་ལྡན་པ་དང ། ཕྲ་མ་མི་བྱེད་པའི་སེམས་དང་ལྡན་པ་དང ། ཚིག་ཀྱལ་བ་མི་སྨྲ་བའི་སེམས་དང་ལྡན་པས་ལོ་བདུན་དུ་གནས་པར་བྱེད་ཅིང་རྟག་ཏུ་སངས་རྒྱས་རྗེས་སུ་དྲན་པ་སྒོམ་པར་བྱེད་ལ། ཉིན་ལན་གསུམ་མཚན་ལན་གསུམ་དུ་ཆོས་གོས་ཕྲག་པ་གཅིག་ཏུ་བགོས་ནས་པུས་མོའི་ལྷ་ང་གཉི་ག་ས་ལ་བཙུགས་ཏེ་ཐལ་མོ་སྦྱར་ནས་མངོན་དུ་སངས་རྒྱས་ཡིད་ལ་བྱེད་པས་མི་ཟད་པའི་སྤུབས་ལུང་བསྟན་པ་འདི་དྲན་པར་བྱེད་ན། ལོ་བདུན་འདས་ནས་དེའི་ལས་དྲག་པོ་སྠམྶ་ཅད་མ་ལུས་པར་ཟད་པར་འགྱུར་ཞིང་སྦྱངས་པར་འགྱུར་ཏེ། རིགས་ཀྱི་བུ། མི་ཟད་པའི་སྤུབས་ལུང་བསྟན་པ་ཆེན་པོ་འདི་ནི། དེ་ལྟར་རྫུ་འཕྲུལ་ཆེ་བ་ཡིན་ནོ། །འདིར་དབང་ཕྱུག་ལ་མངོན་པར་འདོད་པའི་བུད་མེད་གང་
193a
༄#། །ཞིག་མི་ཟད་པའི་སྦུབས་ལུང་བསྟན་པ་འདི་ཐོས་ནས་ཟླ་བ་བདུན་དུ་ཉིན་ལན་གསུམ་མཚན་ལན་གསུམ་པུས་མོའི་ལྷ་ང་གཉིས་ཀ་ས་ལ་བཙུགས་ཏེ་ཐལ་མོ་སྦྱར་ནས་མདུན་དུ་མངོན་དུ་སངས་རྒྱས་ཡིད་ལ་བྱེད་པས་མི་ཟད་པའི་སྦུབས་ལུང་བསྟན་པ་འདི་དྲན་པར་བྱེད་ན་བུད་མེད་དེ་རིས་མཐུན་པར་དབང་ཕྱུག་ཆེན་པོ་ཐོབ་པར་འགྱུར་རོ། །ཕྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་རང་གི་སྨོན་ལམ་མ་གཏོགས་པར་འཁོར་བར་བུད་མེད་ཀྱི་དངོས་པོ་ཐོབ་པར་མི་འགྱུར་རོ། །ཁྱོ་མངོན་པར་འདོད་པའི་བུད་མེད་གང་ཞེས་བྱ་བ་ནས་རིགས་མངོན་པར་འདོད་པའི་བུད་མེད་གང་ཞེས་བྱ་བའི་བར་དང ། ནོར་མངོན་པར་འདོད་པའི་བུད་མེད་གང་ཞེས་བྱ་བའི་བར་དང ། མངལ་ན་བུ་ཡོད་པའི་ཁུར་གྱིས་སྐྱོ་བའི་བུད་མེད་གང་ཞེས་བྱ་བའི་བར་དང ། བུ་མངོན་པར་འདོད་པའི་བུད་མེད་གང་ཞེས་བྱ་བའི་བར་དེ་ཁྲུས་བྱས་ནས་བྱི་འཆོར་བ་སྲུང་བར་བྱེད་ཅིང་ཉིན་ལན་གསུམ་དབེན་པར། མཚན་ལན་གསུམ་དབེན་པར་པུས་མོའི་ལྷ་ང་གཉིས་ཀ་ས་ལ་བཙུགས་ཏེ་ཐལ་མོ་སྦྱར་བ་རབ་ཏུ་བཏུད་ནས་མདུན་དུ་མངོན་དུ་སངས་རྒྱས་ཡིད་ལ་བྱེད་པས་མི་ཟད་པའི་སྦུབས་ལུང་བསྟན་པ་ཆེན་པོ་འདི་དྲན་པར་བྱེད་ན། བུད་མེད་དེ་བུ་ཇི་ལྟ་བུ་འདོད་པ་དེ་ལྟ་བུ་འབྱུང་བར་
193b
འགྱུར་རོ། །བླ་ན་མེད་པའི་ཡོངས་སུ་མྱ་ངན་ལས་འདས་པའི་བར་དུ་འང་རང་གི་སྨོན་ལམ་མ་གཏོགས་པར་དེའི་བུད་མེད་ཐོབ་པའི་ཐ་མ་ཡིན་ནོ། །མི་ཟད་པའི་སྦུབས་ལུང་བསྟན་པ་ཆེན་པོ་འདི་ནི། དེ་ལྟར་དོན་ཆེ་བ། དེ་ལྟར་ཕན་ཡོན་ཆེ་བ་སྟེ། ཁྱེད་ཀྱིས་སྔོན་མ་ཐོས་པ་ཡིན་ནོ། །ཏདྱ་ཐཱ། ཤ་ར་ཎ་བྱ་ཡ། ཤིཀྵ་བྱ་ཡ། སྨྲྀ་ཏི་བྱ་ཡ། བྲཧྨ་ནི་བྱ་ཡ། རྀདྡྷི་བྱ་ཡ། ཨིནྡྲི་བྱ་ཡ། བ་ལ་བྱ་ཡ། བོ་དྷྱངྒ་བྱ་ཡ། ས་མཱ་དྷི་བྱ་ཡ། དྷཱ་ར་ཎཱི་བྱ་ཡ། ཀྵནྟི་བྱ་ཡ། དྷྱཱ་ན་བྱ་ཡ། ཨ་རཱུ་པ་བྱ་ཡ། ཨ་ནི་ན་ཛ་བྱ་ཡ། མཱ་རྒ་བྱ་ཡ། ཨ་བི་ཛྙཱ་བྱ་ཡ། པྲ་ཏི་ས་མ་བིད་བྱ་ཡ། བྷུ་མི་བྱ་ཡ། བིདྱཱ་བྱ་ཡ། མཧཱ་མཻ་ཏྲི་བྱ་ཡ། མཧཱ་ཀ་རུ་ཎཻ་བྱ་ཡ། པྲྀ་ཐྭི་བྱ་ཡ། སཏྭ་བྱ་ཡ། དྷརྨ་བྱ་ཡ། ཏ་མོ་བྱ་ཡ། ཨཱ་ལོ་ཀ་བྱ་ཡ། པྲ་ཏི་བྷ་ས་བྱ་ཡ། པྲ་ཏི་ཤྲུད་ཀ་བྱ་ཡ། ག་ག་ན་བྱ་ཡ། མ་རུ་ཏ་བྱ་ཡ། ཤཱུ་ནྱ་ཏཱ་བྱ་ཡ། པྲ་ཎི་ཧི་ཏ་བྱ་ཡ། ཨ་ནི་མ་ཏི་བྱ་ཡ། རུ་ཏ་བྱ་ཡ། གྷོ་ཥ་བྱ་ཡ། ཀིན་ཙ་ནཱ་བྱ་ཡ། ཨ་བྷི་ས་མ་ཡ་ཨ་ནུ་ན། ཨ་བ་ཧ། ཙ་ཙ་ཙ་ཙ། ཅཱ་རཱ་ཙ། ཙ་ར་བི་མུ། ཙ་བི་ཙཀྵ་ཙ། ཀུ་ཙ་ཙཱ་ར་བི་མུ། བྱ་ཡ་བི་མུ། ཀྵ་ཡ་བི་མུ། ཨ་ས་མུ་དྲ། ཙ་ར་བི་མུ། ཙྪད་བི་མུ། ཨཱ་ཀཱ་ཤ་བི་མུ། བྱུ་པ་ཤ་མ་བི་མུ། ཨ་ནཱབྷ་ས་བི་མུ། ཨ་ཧ་ཏ་བི་མུ། ཨཱ་ར་པཱ་ར་བི་མུ། ཨ་ར་པ་ར་བི་མུ། ཨུ་པ་ཤ་མ་ས་ལ་ལ་བི་མུ་སཝཱཧཱ། རིགས་ཀྱི་བུ། མི་ཟད་པའི་སྦུབས་ལུང་བསྟན་པ་ཆེན་པོ་དེ་ནི་འདི་ཡིན་ཏེ། ཡོན་ཏན་ཆེ་བ། དོན་
194a
༄#། །ཆེ་བ། ཕན་ཡོན་ཆེ་བ། སེམས་ཅན་ཐམས་ཅད་དབང་དུ་བྱེད་པ། སེམས་ཅན་ཐམས་ཅད་ལ་ཕན་པར་བྱེད་པ། སེམས་ཅན་ཐམས་ཅད་འཁུར་བར་བྱེད་པ། སྣང་བར་བྱེད་པ། ཉེ་བར་ཞི་བར་བྱེད་པ་ཡིན་ནོ། །ལོངས་ལ་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུ་བའི་ཕྱིར་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཞིག་།དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་ཐོབ་ཅིང་ཤིན་ཏུ་དགའ་བ་ཐོབ་ནས་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་རྣམས་ཀྱི་སྒྲིབ་པ་མི་མངའ་བའི་ཡེ་ཤེས་གཟིགས་པ་དང ། ལུང་བསྟན་པ་གང་གིས་སེམས་ཅན་རྣམས་ཀྱི་ལས་ཀྱི་སྒྲིབ་པ་དགེ་བའི་རྩ་བ་ཐམས་ཅད་ལ་བགེགས་བགྱིད་པ་ཆུང་ངུ་དང ། འབྲིང་དང ། ཆེན་པོ་སྲ་བ་དག་མ་ལུས་པར་བས་པར་འགྱུར་ཞིང་མྱུར་དུ་བྱང་གྲོལ་གྱི་བདེ་བའང་རྗེས་སུ་ཐོབ་པར་འགྱུར་བའི་ལུང་བསྟན་པ་ཆེན་པོ་དེ་ལྟ་བུ་དེ་བཞིན་གཤེགས་པས་བསྟན་པ་ནི་ངོ་མཚར་ལགས་སོ། །དེའི་ཚེ་བྱང་ཆུབ་སེམས་དཔའ་སྤོས་ཀྱི་གླང་པོ་ཆེས་ཆེད་དུ་བརྗོད་པ་འདི་ཆེད་དུ་བརྗོད་དོ། །འཇིག་རྟེན་ཐམས་ཅད་སྒྲོལ་བགྱིད་པ། །མི་ཟད་སྤུབས་བཤད་ཇི་ལྟ་བར། །སེམས་ཅན་དག་གི་ལས་རྣམས་ཀུན། །ཟད་བགྱིད་གཉིས་པ་མ་མཆིས་སོ། །འཁོར་བར་རང་གིས་ལས་གང་དག་།བགྱིས་པ་རྣམས་ནི་རིང་དུ་སྤོང ། །སྡུག་བསྔལ་ཀུན་ལས་
194b
གྲོལ་འགྱུར་ཞིང ། །བསོད་ནམས་གཟི་བརྗིད་ལྡན་པར་འགྱུར། །སྲིད་པའི་རྒྱ་མཚོ་སྐེམ་བགྱིད་ཅིང ། །སྡིག་པ་ཐམས་ཅད་འཇོམས་པར་བགྱིད། །གང་ན་\?\་འདྲེན་པ་བཞུགས་འགྱུར་བའི། །ཞིང་དག་ཏུ་ནི་མྱུར་འགྲོ་བགྱིད། །སྡུག་བསྔལ་སྣོད་ཀྱི་འཁོར་བ་ན། །ཉེས་དམིགས་མང་པོ་མཐོང་ནས་ཀྱང ། །ཉོན་མོངས་ཐམས་ཅད་སེལ་བགྱིད་ཅིང ། །བྱང་ཆུབ་དམ་པ་ཐོབ་པར་འགྱུར། །སེམས་ཅན་གང་ཚུལ་འདི་ཉན་ན། །ཐུབ་པར་དཀའ་བར་འགྱུར་བ་ལགས། །དེ་བས་བཀུར་སྟི་བགྱིས་ནས་མཉན། །དཔལ་ཀུན་ཐོབ་པར་བགྱིས་པ་ལགས། བཙུན་པ་བཅོམ་ལྡན་འདས། མི་ཟད་པའི་སྦུབས་ལུང་བསྟན་པ་ཆེན་པོ་འདི་བདག་གིས་བཟུང་ལགས་ཏེ། མི་མཇེད་ཀྱི་འཇིག་རྟེན་གྱི་ཁམས་སུ་བདག་མཆིས་ལགས་སོ། །ཡང་དེའི་ཚེ་འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་དག་ལས་འདས་ནས་རིང་པོ་མ་ལོན་པ་གྲངས་མེད་དཔག་ཏུ་མེད་པ་དག་གིས་ཚིག་མཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང ། ཕྱག་བགྱི་བ་དང ། མཆོད་པ་དང ། བསྙེན་བཀུར་བགྱི་བ་དང ། འདུས་པ་ཆེན་པོ་བལྟ་བ་དང ། ཉི་མའི་སྙིང་པོའི་ཆོས་ཀྱི་རྣམ་གྲངས་སྔོན་ཆད་མཐོས་པ་ཉན་པར་འཚལ་ལགས་ན། བཅོམ་ལྡན་འདས། དེར་བདག་ཅག་མཆི་
195a
༄#། །བར་གནང་བར་མཛད་དུ་གསོལ། དེ་ནས་དེ་བཞིན་གཤེགས་པ་རི་དབང་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཐམས་ཅད་ལྷན་ཅིག་མཐུན་པར་བརྒྱ་བྱིན་གྱི་ཆ་བྱད་དང ། སྤྱོད་ལམ་དང ། རྟགས་དང ། དབྱིབས་དག་དང ། དབང་ཕྱུག་ལ་དབང་བས་དེངས་ཤིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཐམས་ཅད་དང་ལྷན་ཅིག་ཏུ་ཐམས་ཅད་འགྲོགས་ཤིང་མཐུན་པར་བརྒྱ་བྱིན་གྱི་ཆ་བྱད་དང ། སྤྱོད་ལམ་དང ། རྟགས་དང ། དབྱིབས་དག་དང ། དབང་ཕྱུག་ལ་དབང་བར་བདག་ཉིད་མངོན་པར་སྤྲུལ་ནས་བཅོམ་ལྡན་འདས་དེ་བཞིན་གཤེགས་པ་རི་དབང་རྒྱལ་པོའི་ཞབས་གཉིས་ལ་མགོ་པོས་ཕྱག་བཙལ་ཏེ་ལན་གསུམ་བསྐོར་བ་བྱས་ཏེ་དེ་ནས་ཆས་སོ། །དེ་དག་ཡུད་ཙམ་གྱིས་མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་ཏེ། དེ་དག་ཕྱིན་པའི་མདོ་ལ་སངས་རྒྱས་ཀྱི་ཞིང་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པ་དེ་ལ་མཆོད་པའི་ལས་བྱ་བའི་ཕྱིར་སྤོས་ཀྱི་ཆར་ཆེན་པོ་མངོན་པར་རབ་ཏུ་ཕབ་སྟེ། འདི་ལྟ་སྟེ། ཙནྡན་གོ་ཤི་ཪྵ་དང ། ཙནྡན་སྤྲུལ་གྱི་སྙིང་པོ་དང ། ཏ་མ་ལའི་འདབ་མ་དང ། ་ག་རུ་དང ། རྒྱ་སྤོས་དང ། དུས་ཀྱི་རྗེས་སུ་འབྲང་བའི་ཙནྡན་གྱི་ཕྱེ་མའི་
195b
ཆར་མངོན་པར་རབ་ཏུ་ཕབ་བོ། །དེ་དག་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་དོང་སྟེ་ཕྱིན་ནས་ཀྱང་ཐམས་ཅད་བརྒྱ་བྱིན་གྱི་ཆ་བྱད་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ནི། དེའི་བར་དུ་ཡང་རྒྱལ་བོ་གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་ཀུན་ཏུ་སྤྱོད་པར་མཛད་དོ། །ཡང་དེའི་ཚེ་ནུབ་ཕྱོགས་ལོགས་ཀྱི་ཕྱོགས་ཆ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་གནས་པ་སྙིང་པོའི་རྒྱལ་མཚན་ཞེས་བྱ་བ་ཡོད་དོ། །སངས་རྒྱས་ཀྱི་ཞིང་སྙིང་པོའི་རྒྱལ་མཚན་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔལ་བརྩེགས་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་རྣམས་ཀྱི་བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་ཀྱང་སྟོན་ཏོ། །འཁོར་དེ་ནའང་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ཞེས་བྱ་བ་ཆོས་མཉན་པའི་ཕྱིར་འདུས་ཏེ་འདུག་པར་གྱུར་ཏོ། །དེས་ཀྱང་གྱེན་དུ་རྣམ་པར་བལྟས་སོ། །དེས་སྟེང་གི་ནམ་མཁའ་ལ་བྱང་ཆུབ་སེམས་
196a
༄#། །དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ནུབ་ཕྱོགས་ཀྱི་ཕྱོགས་ཆ་ནས་ཤར་ཕྱོགས་སུ་འགྲོ་བ་དག་མཐོང་ངོ ། །དེ་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འདོང་བའི་ཤར་ཕྱོགས་ལ་རྣམ་པར་བལྟས་ཏེ། དེས་དེར་སྣང་བ་ཆེན་པོ་མཐོང་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་ལ་ཡོངས་སུ་ཞུས་སོ། །ཞེས་བྱ་བ་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་དང ། རིགས་ཀྱི་བུ་ཤར་ཕྱོགས་ཀྱི་ཕྱོགས་ཆ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་ནས་སྙིགས་མ་ལྔ་དང་ལྡན་པར་གནས་པ་དེ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་སངས་རྒྱས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །ཞེས་བྱ་བའི་བར་དང ། དེའི་ཚེ་དེ་ན་འདུས་པ་ཆེན་པོ་ཡོད་དེ། དེ་ན་དེ་བཞིན་གཤེགས་པ་དེ་ཆོས་ཀྱི་ཚུལ་དང ། དཀོན་མཆོག་གསུམ་གྱི་གདུང་རིང་དུ་གནས་པར་མཛད་པའི་ཕྱིར་དང ། ཆོས་ཀྱིས་གནས་པ་ཉིད་རྒྱུན་མི་གཅད་པའི་ཕྱིར་དང ། བདུད་
196b
ཀྱི་ཡུལ་རྣམ་པར་འཇིག་པར་མཛད་པའི་ཕྱིར་དང ། ཆོས་ཀྱི་རྒྱལ་མཚན་བསྒྲེང་བར་མཛད་པའི་ཕྱིར་ཐེག་པ་གསུམ་རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་ཏོ། །དེར་དེ་བཞིན་གཤེགས་པ་ཐམས་ཅད་གཤེགས་ནས་རིན་པོ་ཆེ་ཏོག་ཅེས་བྱ་བའི་གཟུངས་སྔགས་བཤད་ནས་ཀྱང་དེ་དག་གཤེགས་པར་མཛད་དོ། །ཡང་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་འདུས་པར་མཛད་དེ།་དེར་སོ་སོ་ཡང་དག་པར་རིག་པ་བཞི་དང་ལྡན་པའི་སྤྱན་གསུམ་དང ། ཚངས་པའི་གནས་པ་དག་བསྟན་ཀྱང་ད་དུང་འཁོར་སངས་རྒྱས་ཀྱི་ཞིང་མི་མཇེད་ས་དང་ནམ་མཁའི་ལམ་ཐམས་ཅད་མ་འདྲེས་པར་གང་བ་ཞིག་དེ་བཞིན་གཤེགས་པ་མཆོག་ཏུ་སྙན་པར་གསུང་བ་ཤཱཀྱ་ཐུབ་པའི་ཆོས་བསྟན་པས་ངོམས་པ་མེད་དོ། །ཞེས་བྱ་བའི་པར་ཇི་ལྟར་སྔར་གསུངས་པ་བཞིན་ཏེ། རིགས་ཀྱི་བུ། ཁྱོད་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུ་བའི་ཕྱིར་མི་མཇེད་ཀྱི་འཇིག་རྟེན་གྱི་ཁམས་སུ་འགྲོ་བར་སྟོན། དེར་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་
197a
༄#། །ལ་ངས་དད་པ་སྦྱིན་པར་མཛད་དོ། །དེར་སྨོན་པ་མེད་པ་དང་རྗེས་སུ་མཐུན་བའི་བཟོད་པ་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་མེད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། ང་རྒྱལ་དང ། ལྷག་པའི་ང་རྒྱལ་དང ། ངའོ་སྙམ་པའི་ང་རྒྱལ་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་ཟད་པ་ཤེས་པ་སྐྱེ་བའི་བར་བྱེད་པ། མི་སྐྱེ་བ་ཤེས་པ་རྟོགས་པར་བྱེད་པ། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པ། སྡུག་བསྔལ་གྱི་ཁུར་འདོར་བར་བྱེད་པ་འདི་བསྐུར་བར་མཛད་དོ། །ཏདྱ་ཐཱ། ཤ་ན་ཤ་བ། མ་ཤ་ན་ཤ་བ། ཨ་བཀྵ་ཤ་པ། ཀྵུ་ཀྵུ་ཏ་ཤ་པ། ཙཀྵུ་ཤ་བ། ཤྲོ་ཏྲ་ཤ་བ། གྷྲཱ་ཎ་ཤ་བ། ཛི་ཧཝ་ཤ་བ། ཀཱ་ཡ་ཤ་བ། མ་ན་ཤ་བ། ཀྵུ་བྷ་བི་དྷ། ཙཀྵུ་པྲ་ཏི་བི་ཤ་བ། ཤྲོ་ཏྲ་ཨ་བྷཀྵ་བྷ།་གྷྲཱ་ཎ་ཏེ་ཛ་ཀྵ་བྷ། ཛི་ཧཝ་བཱ་ཡུ་ཀྵ་བྷ། ཀཱ་ཡ་ཀྲ་མ་ཀཥ་བྷ། མ་ན་ཨོ་ཛ། ཨཱ་ལོ་ཀ་ཛྙཱ་ཡཀྵ་བྷ། བི་ཛ་སཾ་ཀྲ་མ་ཀྵ་བྷ། ཨངྒ་ར་ཁ་གྷ་ཀྵ་བྷ། ས་མཱ་རོ་བ་བྱ་ཡཀྵ་བྷ། ཤ་མ་ཀ་ན་ཀྵ་བྷ། ཀྵ་ཡ་ཀ་ར་ས་ཀྵ་བྷ། ཤཱནྟ་པྱ་ཏྱེ་སྠ་ཀྵ་བྷ། ན་ཏོ་ཏཻ་ཏ་ཏོ་ན། ཨ་ཙ་ནཻ་ན་ན་ཏོ་ན། ན་གྷ་བ་ན་ཡིན་ཏོ་ན། ཨེ་ཤ་ཨེ་བཱནྟོ་དུ་ཁ་སྱ་སཝཱཧཱ། རིགས་ཀྱི་བུ། སྨོན་པ་མེད་པ་དང་
197b
རྗེས་སུ་མཐུན་པའི་གཟུངས་སྔགས་དེ་ནི། འདི་ཡིན་ཏེ། མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པའི་བར་ཡིན་ནོ། །ལོངས་ལ་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཞིག་།བའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང ། བདེ་བར་རེག་པ་ལ་གནས་སམ་ཞེས་ཀྱང་ཞུས་ལ། དེ་ལ་འདི་སྐད་དུ་ནུབ་ཕྱོགས་ཀྱི་ཕྱོགས་ཆ་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་གནས་པ་སྙིང་པོའི་རྒྱལ་མཚན་ཞེས་བྱ་བ་མཆིས་སོ། །སངས་རྒྱས་ཀྱི་ཞིང་སྙིང་པོའི་རྒྱལ་མཚན་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔལ་བརྩེགས་རྒྱལ་པོ་ཞེས་བགྱི་བ་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་རྣམས་ཀྱི་བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་ཀྱང་བདག་དེ་ནས་འདིར་བཅོམ་ལྡན་འདས་ལ་ཡོངས་སུ་ཞུ་བའི་སླད་དུ་བཏང་བ་ལགས་ན། བཙུན་པ་བཅོམ་ལྡན་འདས། ཅི་སྙུང་བ་མི་མངའ་ལགས་
198a
༄#། །སམ།་གནོད་པ་ཆུང་ངམ། ཁྱོད་ཀྱི་འཁོར་བྲོ་འཚལ་བ་མ་མཆིས་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཐོས་པ་བཞིན་དུ་ཆོས་དང་ལྡན་པ་ལགས་སམ། ཆོས་དེ་ལ་ནན་ཏན་སྙིང་པོར་བགྱིད་པ་ལགས་སམ། ཆོས་ཀྱིས་གནས་པ་དང་ལྡན་པར་གནས་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདིར་བདུད་ཀྱི་ཡུལ་དང ། ཀླུའི་ཡུལ་བཅོམ་ལགས་སམ། སངས་རྒྱས་གཅིག་གི་ཡུལ་ལགས་སམ། འདིར་ཁྱོད་ཀྱི་ཆོས་ཀྱི་འཁོར་ལོ་ཐོགས་པ་མ་མཆིས་པར་བསྐོར་བར་མཛད་ལགས་སམ། གང་ལ་ལ་སངས་རྒྱས་ཀྱི་ཡུལ་འདིར་ཆོས་མ་ལགས་པའི་འཁོར་ལོ་བསྐོར་བ་དེའི་སླད་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔལ་བརྩེགས་རྒྱལ་པོ་དེས་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང ། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པར་སྩོལ་བར་མཛད་ཅིང ། དེ་ནས་ཀྱང་སྨོན་པ་མེད་པ་དང་རྗེས་སུ་མཐུན་པའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་
198b
ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པ་འདི་དེས་བསྐུར་ལགས་སོ། །ཞེས་བྱ་བའི་བར་གསོལ་ཅིག་ཅེས་བྱ་བ་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སྨོན་པ་མེད་པ་དང་རྗེས་སུ་མཐུན་པའི་གཟུངས་སྔགས་ཀྱི་ཕན་ཡོན་བདག་གིས་བཟུང་ལགས་ན། བཙུན་པ་བཅོམ་ལྡན་འདས། སངས་རྒྱས་ཀྱི་ཞིང་མི་མཇེད་དེར་མཆི་བ་ལ་འཇིགས་པ་འབའ་ཞིག་མཆིས་ལགས་སོ། །དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལ་བདག་གིས་མངོན་དུ་ཐོས་ཤིང་མངོན་དུ་ཡོངས་སུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་མཆོག་ཏུ་ལྟ་བ་མི་ཟད་པས་སྡུག་བསྔལ་ཐོབ་པར་གྱུར་པ། མཆོག་ཏུ་འདོད་ཆགས་ཀྱི་ཤས་ཆེ་བ། དམུས་ལོང་དང་འདྲ་བ་དག་ལགས་ཏེ་ཞེས་བྱ་བ་ནས་བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང ། ཡུད་ཙམ་ཁོ་ནས་མནར་མེད་པར་མཆི་བར་འགྱུར་བའི་སླད་དུའོ། །ཞེས་བྱ་བའི་བར་སྔ་མ་བཞིན་ནོ། །དེ་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ལ་འདི་སྐད་ཅེས་བཀའ་སྩལ་ཏོ། །
199a
༄#། །རིགས་ཀྱི་བུ། ལན་ཐོབ་ཅིག་།ལན་ཐོབ་ཅིག་།འོ་ན་ཁྱོད་ཀྱིས་ཞག་དགུ་ལ་གླིང་བཞི་པ་བར་མའི་སངས་རྒྱས་ཀྱི་ཞིང་མི་མཇེད་དེར་བྱའི་རྒྱལ་པོ་ན་མ་མཁའ་ལྡིང་གི་ཆ་བྱད་ཀྱིས་རྒྱ་མཚོ་ཆེན་པོར་ཀླུ་བྱེ་བ་ཕྲག་དྲུག་ཅུ་རྩ་བཞི་འཇིགས་པའི་རྐྱེན་ཀུན་ཏུ་བསྟན་པའི་རྐྱེན་གྱིས་སྐྱབས་གསུམ་དུ་འགྲོ་བ་ལ་རྣམ་པར་མ་བཀོད་དམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་མ་བཅུག་གམ། དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་དེ་ལྟ་ལགས་སོ། །ཇི་སྐད་གསུངས་པ་དེ་ལྟ་ལགས་ཏེ། བདག་གིས་ཀླུ་བྱེ་བ་ཕྲག་དྲུག་ཅུ་རྩ་བཞི་པོ་དེ་དག་འཇིགས་པར་ཀུན་ཏུ་བསྟན་པའི་རྐྱེན་གྱིས་བྱང་ཆུབ་ཀྱི་བར་ལ་རབ་ཏུ་བཀོད་ལགས་སོ། །རིགས་ཀྱི་བུ། འོ་ན་ཁྱོད་ཀྱིས་གླིང་བཞི་པ་བར་མ་དེ་ན་གང་ན་ཆར་པ་མེད་པ་དེར་གང་བསྟན་པ་ལས་དེ་ན་གནས་པའི་ཀླུ་ཐམས་ཅད་འཁྲུག་པར་འགྱུར་ཞིང་དེ་དག་འཁྲུགས་ནས་ཀྱང་ཞག་བདུན་དུ་ཆར་པ་མངོན་པར་རབ་ཏུ་འབེབས་པར་བྱེད་པའི་གླང་པོ་ཆེའི་ཀླུ་ཆེན་པོ་དག་དང ། རྟའི་ཀླུ་ཆེན་པོ་དང ། སྤྲུལ་གྱི་ཀླུ་ཆེན་པོ་དག་མ་བསྟན་ཏམ། དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་དེ་ལྟ་ལགས་ཏེ། སྔོན་གྱི་སྨོན་ལམ་གྱི་བྱེ་བྲག་གིས་ལགས་སོ། །བཅོམ་ལྡན་འདས་དེས་བཀའ་སྩལ་པ། ངས་ཁྱོད་དེར་མངགས་ན། དེར་ཇི་ལྟར་ཁྱོད་དངང་བར་བྱེད། བྱང་ཆུབ་
199b
སེམས་དཔའ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འདི་ལྟ་སྟེ། རིན་པོ་ཆེའི་གཏེར་ཆེན་པོ་ཞིག་མཆིས་པར་གྱུར་ལ། དེ་ནས་སྐྱེས་བུ་མཁས་པའི་རང་བཞིན་ཅན་ལ་ལ་དེར་མཆིས་ནས་སེན་མོ་དག་གིས་རྐོ་བར་བགྱིད་ན། དེ་ཇི་ལྟ་ཇི་ལྟར་སེན་མོ་དག་གིས་རྐོ་བར་བགྱིད་པ་དེ་ལྟ་དེ་ལྟར་རིན་པོ་ཆེའི་ཕུང་པོ་ཆེན་པོ་ཆེས་མང་དུ་རྙེད་པར་འགྱུར་རོ། །བཙུན་པ་བཅོམ་ལྡན་འདས། དེ་དེ་བཞིན་དུ་མཁས་པས་དེ་བཞིན་གཤགས་པའི་གཏེར་ཡང་ཆིག་དེ་ལྟ་བུ་དག་གིས་ཇི་ལྟ་ཇི་ལྟར་ཕྱུང་བ་དེ་ལྟ་དེ་ལྟར་དེ་ནས་ཆོས་རིན་པོ་ཆེ་རིན་ཐང་མ་མཆིས་པ་ཆེས་ཕལ་ཆེར་ཐོབ་པར་འགྱུར་ལགས་པས་དེར་སེམས་ཅན་ཡོངས་སུ་སྨིན་པར་བགྱི་བའི་སླད་དུ་ཆོས་ཀྱི་ཕྱག་རྒྱ་གང་གིས་དེ་བཞིན་གཤེགས་པའི་སྟོབས་བསྐྱེད་པས་དེར་བདག་གིས་སེམས་ཅན་ཆེས་མང་པོ་ཡོངས་སུ་སྨིན་པར་བགྱིད་པའི་ཆོས་ཀྱི་ཕྱག་རྒྱ་ཆེས་མང་དུ་དེ་བཞིན་གཤེགས་པ་ལས་བདག་ཡོངས་སུ་ཚོལ་བར་བགྱིད་ལགས་སོ། །དེ་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ངས་ལུང་བསྟན་པ་ཆེན་པོ་རིག་སྔགས་ཀྱི་རྟེན་ཅེས་བྱ་བ་ཁྱོད་ལ་སྦྱིན་པར་མཛད་དོ། །འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་
200a
༄#། །བའི་མདོ། བམ་པོ་བཞི་པ། ཏདྱ་ཐཱ། ས་ཏྲི་ར་ཎ་ཤ་མ། ས་མུ་ད་ཐཱ་ན་ཤ་མ། ཨ་བརྫ་ནཱ་ཤ་མ། སཝ་རཾ་ག་ཤ་ས་མ། སཾ་ཡོ་ག་ཤ་མ། བནྡྷ་ན་ཤ་མ། ས་མ་བི་ས་ར་ཤ་མ། བཱ་ཏཱི་ན་ཤ་མ། ས་མཱ་ཀྲ་མ་ཤ་མ། ཨ་བིདྱཱ་ཤ་མ། སཾ་སྐཱ་ར་ཤ་མ། བི་ཇྙཱ་ན་ཤ་མ། ནཱ་མ་རཱུ་པ་ཤ་མ། ཥ་ཌཱ་ཡ་ཏ་ན་ཤ་མ། སྤཪྴ་ཤ་མ། བེ་ད་ན་ཤ་མ། ཏྲྀཥྞཱ་ཤ་མ།་ཨུ་པཱ་དན་ཤ་མ། བྷ་བ་ཤ་མ། ཛ་ཏི་ཤ་མ། ཛ་རཱ་མ་ར་ཎ་ཤ་མ། ཡཱ་བ་ད་སརྦ་མ་ནུ་ཥྱ་ཤ་མ། ཡཱ་བད་སརྦ་ཏྲཻ་དྷཱ་ཏུ་ཀ་སཾ་སྐྲྀ་ཏ་ཤ་མ། ཨཱ་ར་པཱ་ར་ཤ་མ། འདི་ནི། རིག་སྔགས་ཀྱི་རྟེན་ལུང་སྟོན་པ་ཆེན་པོ་ཡིན་ཏེ། ལུང་བསྟན་པ་དེས་ན་དེར་སེམས་ཅན་རྣམས་ཀྱིས་ཐོས་པ་ཙམ་གྱིས་སྲེད་པ་ཆུང་ངུ་དང ། འབྲིང་དང ། རབ་དང ། སྲིད་པའི་རྒྱུ་ཉོན་མོངས་པ་རྣམས་རབ་ཏུ་ཞི་བར་འགྱུར་ཞིང་གཟུགས་དང ། གཟུགས་མེད་པའི་སྲིད་པའི་རྒྱུ་བྱེད་པའི་ཉོན་མོངས་པ་རྣམས་རབ་ཏུ་ཞི་བར་འགྱུར་བ་ཡིན་ནོ། །ཉོན་མོངས་པ་གངྒཱའི་ཀླུང་གི་བྱེ་མ་སྙེད་ཀྱང་བསྙིལ་བར་འགྱུར་རོ། །འགྲོ་བ་ལྔ་ལུས་དང ། ངག་དང ། ཡིད་ཀྱི་ཉེས་པར་སྤྱོད་པ་སྔོན་ཆད་བྱས་པ་འབྲས་བུ་མཐར་མ་ཕྱིན་པར་མ་སྦྱངས་པ་ཐམས་ཅད་ཀྱང་ལྡོག་པར་འགྱུར་རོ། །རིག་སྔགས་ཀྱི་རྟེན་ལུང་སྟོན་པ་འདི་གང་གིས་རིས་མཐུན་པར་སེམས་རྩེ་གཅིག་པས་མཉན་ནས་ཉིན་ཞག་བདུན་དུ་ལས་གཞན་མི་བྱེད་པར་ཆོས་འདི་རྣམ་པར་
200b
སྒོམ་པར་བྱེད་ན། དགེ་བའི་ཕྱོགས་ཐམས་ཅད་ལས་ཡོངས་སུ་ཉམས་པར་བྱེད་པ་དང ། བགེགས་བྱེད་པ་དང ། ནོར་ཡོངས་སུ་ཉམས་པར་བྱེད་པ་དང ། སྡུག་པའི་དངོས་པོ་དང་བྲལ་བར་བྱེད་པ་དང ། ལུས་ལ་ཀུན་ཏུ་གནོད་པར་བྱེད་པ་དང ། སེམས་ཀུན་ཏུ་འཁྲུག་པར་བྱེད་པ་དང ། དགེ་བ་ཐམས་ཅད་ལ་མངོན་པར་མི་དགའ་བར་བྱེད་པ་དང ། མི་དགེ་བ་ཐམས་ཅད་ལ་མངོན་པར་དགའ་བར་བྱེད་པའི་སྡིག་པའི་ལས་དེ་དག་ཐམས་ཅད་མ་ལུས་པར་འབྲས་བུ་མི་སྒྲུབ་པར་ཟད་པར་འགྱུར་ཏེ། མཚམས་མེད་པ་བྱེད་པ་དང ། དམ་པའི་ཆོས་སྤོང་བ་དང ། འཕགས་པ་ལ་སྐུར་པ་འདེབས་པ་དང ། ལྟུང་བའི་རྩ་བ་བྱུང་བ་ནི། མ་གཏོགས་སོ། །དེ་དགེ་བའི་རྩ་བ་དེ་ལྟ་བུ་ཀུན་ཏུ་སྤྱོད་པར་བྱེད་དེ། གལ་ཏེ་སྦྱིན་པའི་ཕ་རོལ་ཏུ་ཕྱིན་པ་ཀུན་ཏུ་རྩོམ་པར་བྱེད་ན། དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །བྱང་ཆུབ་སེམས་དཔའ་དང ། རྐྱེན་གྱི་རྒྱལ་བ་དང ། དགྲ་བཅོམ་པ་ཐམས་ཅད་ཀྱིས་ཀྱང་བྱིན་གྱིས་བརླབས་པར་འགྱུར་རོ། །དེའི་ཁྱིམ་ལོངས་སྤྱོད་ཟད་མི་ཤེས་པར་ཡང་འགྱུར་རོ། །ཞེས་བྱ་བ་ནས་སྔར་གསུངས་པ་བཞིན་ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན། ལྷ་དང ། ལྷ་མ་ཡིན་དུ་བཅས་པའི་འཇིག་རྟེན་གྱིས་མི་བརྫི་བར་འགྱུར་རོ། །ཞེས་བྱ་བའི་བར་དང ། དེ་
201a
༄#། །ལྷའི་དབང་པོ་ཐམས་ཅད་དང་ཞེས་བྱ་བ་ནས་མིའི་དབང་པོ་ཐམས་ཅད་ཀྱི་བར་གྱིས་དད་པར་བྱ་བའི་འོས་སུ་གྱུར་པ་ཡིན། དྲན་པར་བྱ་བའི་འོས་སུ་གྱུར་པ་དང ། མངོན་པར་དགའ་བར་བྱ་བའི་འོས་སུ་གྱུར་པ་དང ། མཆོད་པའི་འོས་སུ་གྱུར་པ་དང ། ཕྱག་བྱ་བའི་འོས་སུ་གྱུར་པ་དང ། རབ་ཏུ་བསྲུང་བར་བྱ་བའི་འོས་སུ་གྱུར་པ་ཡིན་ནོ། །དེ་ཕྱི་མའི་དུས་ན་འཆི་བའི་ཚེ་ཕྱོགས་བཅུ་ཀུན་ཏུ་སངས་རྒྱས་བཅོམ་ལྡན་འདས་དག་མཐོང་བར་འགྱུར་རོ། །སངས་རྒྱས་བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་དེ་ལ་འདི་སྐད་དུ། སྐྱེས་བུ་དམ་པ་དག་འོངས་པ་ལེགས་སོ། །ཚུར་ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་གནས་པར་བྱོས་ཤིག་།དེར་ངེད་ཀྱིས་ཁྱོད་ས་བཅུ་དག་ལ་གཞག་པར་མཛད་དོ། །ཞེས་ཀྱང་གསུང་བར་འགྱུར་རོ། །དེ་སངས་རྒྱས་མཐོང་བ་དང ། འཕགས་པའི་དགའ་བ་དང ། དད་པ་དེས་འཆི་བའི་དུས་བྱས་ནས་སངས་རྒྱས་ཀྱི་ཞིང་སྟོང་པ་མ་ཡིན་པ་དེ་དག་ཏུ་སྐྱེ་བར་འགྱུར་ཏེ། དེ་དེར་ཡང་ས་བཅུ་ཐོབ་པར་བྱེད་ཅིང་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རིགས་ཀྱི་བུ། རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི། དེ་ལྟར་དོན་ཆེ་བ་ཡིན་ནོ། །རིགས་ཀྱི་བུ། སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་
201b
ནི། ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་བོར་བདག་ཡིན་ཞིང་མཚམས་མེད་པ་བྱེད་པ་དག་དང ། དམ་པའི་ཆོས་སྤོང་བ་དག་དང ། འཕགས་པ་ལ་སྐུར་བ་འདེབས་པ་དག་དང ། ལྟུང་བའི་རྩ་བ་བྱུང་བ་དག་ཡིན་པའི་ཕྱིར་རོ། །དེ་དག་ཐམས་ཅད་ཀྱིས་ངན་སོང་གསུམ་དུ་ཡུན་རིང་པོར་སྡུག་བསྔལ་རྣམ་པ་སྣ་ཚོགས་རབ་ཏུ་དྲག་པོ་རབ་ཏུ་རྩུབ་པོ་ཉམས་སུ་མྱོང་ངོ ། །དེ་དག་ངན་སོང་གསུམ་ལས་ཡོངས་སུ་ཐར་པ་དང ། ཡོངས་སུ་དག་པས་དགེ་བ་བཅུའི་ལས་ཀྱི་ལམ་ཡང་དག་པར་བླངས་པའི་རྒྱུ་དང ། དེ་བཞིན་གཤེགས་པ་ཤཱཀྱ་ཐུབ་པའི་སྔོན་གྱི་སྨོན་ལམ་གྱི་རྒྱུས་དེ་དག་གིས་སངས་རྒྱས་ཀྱི་ཞིང་དེར་མི་ཉིད་རྙེད་པ་ཐོབ་བོ། །གང་དེ་དག་གི་སྔོན་གྱི་དད་པའི་དབང་པོ་ནས་ཤེས་རབ་ཀྱི་དབང་པོའི་བར་དང ། སྦྱིན་པ་དང་ལྡན་པ་ལ་གོམས་པ་ནས་ཤེས་རབ་དང་ལྡན་པ་ལ་གོམས་པའི་བར་དང ། སྨོན་ལམ་ལ་གོམས་པ་དང ། འཁོར་བ་ལ་ཡོངས་སུ་སྐྱོ་བ་ལ་གོམས་པ་དང ། བྱང་གྲོལ་གྱི་བདེ་བ་ལ་གོམས་པ་དང ། ཚངས་པའི་གནས་པ་སྒོམ་པ་ལ་གོམས་པ། སྔོན་ཆད་བྱས་པར་གྱུར་བ་དེ་དག་ཐམས་ཅད་ནི། ངན་སོང་གི་སྡུག་བསྔལ་ཉམས་སུ་མྱོང་བ་ལ་གོམས་པས་མ་ལུས་པར་བརྗེད་དེ། མ་ལུས་པར་བརྗེད་ནས་ཀྱང་སངས་
202a
༄#། །རྒྱས་ཀྱི་ཞིང་དེར་སྐྱེས་ཏེ། ད་དུང་ཡང་ཉེས་པར་སྤྱོད་པ་ཐམས་ཅད་ཀྱི་རྒྱུས་དེ་དག་གཟུགས་མི་སྡུག་པ་དག་དང ། ཆུལ་དུ་མི་ཤེས་པ་དག་དང ། ཡན་ལག་དང་བྲལ་བ་དག་དང ། བཟའ་བ་དང ། བཏུང་བ་དང ། གོས་དང ། མལ་ཆ་དང ། རྒྱན་དང་བྲལ་བ་དག་ཏུ་གྱུར་ཏོ། །དེ་དག་དེར་ཡང་ཚེ་ཐུང་བ་དག་དང ། ཡིད་གཞུངས་པ་ཆུང་བ་དག་དང ། བློ་ཆུང་བ་དག་དང ། ལོངས་སྤྱོད་དང ། ཉེ་བར་སྤྱོད་པ་ཆུང་བ་དག་དང ། དགེ་བའི་རྩ་བ་ཆུང་བ་དག་དང ། བསོད་ནམས་ཆུང་བ་དག་དང ། གྲུབ་པ་ཆུང་བ་དག་དང ། བྱ་བ་ཆུང་བ་དག་དང ། བྱ་བ་ངན་པ་ལ་ཞུགས་པ་དག་དང ། ལྟ་བ་ངན་པས་ཟིན་པ་དག་དང ། བསྟན་བཅོས་ངན་པ་ལ་དད་པ་དག་དང ། སྨོན་ལམ་ངན་པ་དང་ལྡན་པ་དག་དང ། ནད་མང་བ་དག་ཡིན། རྣམ་པར་གཡེང་བ་མང་བ་དག་ཡིན། འཇུག་པ་ལ་སྦྱོར་བ་མང་བ་དག་དང ། ཉེས་པར་སྤྱོད་པ་གསུམ་མང་བ་དག་དང ། ལྟད་མོ་དག་དང ། ལྟས་ངན་པ་དག་དང ། གཟུ་ལུམས་ཅན་དག་དང ། རྩུབ་པ་དག་དང ། ཞེ་སྡང་དང་ལྡན་པ་དག་དང ། མི་དགེ་བ་བཅུའི་ལས་ཀྱི་ལམ་དང་ལྡན་པ་དག་དང ། དཀོན་མཆོག་གསུམ་འགོག་པར་བྱེད་པ་དག་ཡིན་ཏེ། སངས་རྒྱས་ཀྱི་ཞིང་དེ་ན་སེམས་ཅན་ནི། ཕལ་ཆེར་ངན་སོང་གསུམ་དུ་འགྲོ་བ་དག་ཡིན་ནོ། །རིགས་ཀྱི་བུ་དག་།དེར་རིག་སྔགས་ཀྱི་རྟེན་
202b
ལུང་སྟོན་པ་ཆེན་པོ་འདི་དེ་དག་གིས་ཐོས་པ་ཙམ་གྱི་མོད་ལ་དེ་དག་ངེས་པར་འབྱེད་པའི་ཆ་དང་མཐུན་པའི་དགེ་བ་དག་གི་ཀུན་ཏུ་སྦྱོར་བས་ངན་སོང་གི་ལམ་དག་ལས་སྒྲོལ་བར་བྱེད་དོ། །དེ་དག་སྔོན་བྱས་པའི་དད་པའི་དབང་པོ་ལ་གོམས་པས་དགའ་བར་འགྱུར་བ་ནས་ཤེས་རབ་ཀྱི་དབང་པོའི་བར་ལ་གོམས་པས་དགའ་བར་འགྱུར་བའི་པར་དང ། སྨོན་ལམ་དང་འཁོར་བའི་སྐྱོན་དང ། ཚངས་པའི་གནས་པ་སྒོམ་པ་གོམས་པ་ལ་དགའ་བར་འགྱུར་བ་ཡིན་ནོ། །ཐོས་པ་ཙམ་གྱིས་དེ་དག་གི་ཚེ་འཕེལ་བར་འགྱུར་རོ། །ནད་མེད་པ་འཕེལ་བ་དག་ལོངས་སྤྱོད་དང ། ཉེ་བར་སྤྱོད་པ་འཕེལ་བ་དང ། དགེ་བའི་བྱ་བ་འཕེལ་བ་དང ། དགེ་བའི་རྩ་བ་ཡང་དག་པར་སྒྲུབ་པ་འཕེལ་བ་དང ། ཤེས་རབ་འཕེལ་བ་དང ། བྱམས་པ་འཕེལ་བ་དང ། བཏང་སྙོམས་ཀྱི་བར་འཕེལ་བ་དང ། ལེགས་པར་བྱས་པའི་ལས་འཕེལ་བ་མཆོག་ཏུ་འགྱུར་རོ། །ཐོས་པ་ཙམ་གྱིས་དེ་དག་ཐམས་ཅད་ཡང་དག་པའི་ལྟ་བ་དང་ལྡན་པར་འགྱུར་རོ། །གང་དག་རིག་སྔགས་ཀྱི་རྟེན་ལུང་བསྟན་པ་ཆེན་པོ་འདི་བཀུར་སྟི་བྱས་ཏེ་ཉན་པར་བྱེད་ཅིང་ཉིན་ཞག་བདུན་དུ་ལས་གཞན་མི་བྱེད་པར་སེམས་རྩེ་གཅིག་པས་ཆོས་འདི་དག་རྣམ་པར་སྒོམ་པར་བྱེད་པའི་སེམས་ཅན་དེ་དག་ནི། དགེ་བ་བཅུའི་ལས་ཀྱི་ལམ་དང་ལྡན་པ་དག་དང ། ལེགས་པར་སྤྱོད་པ་གསུམ་དང་ལྡན་པ་དག་དང ། དཀོན་མཆོག་
203a
༄#། །གསུམ་ལ་སྐྱབས་དང ། སྨོན་ལམ་གྱི་ཤུགས་ལ་མངོན་པར་དགའ་བ་དག་དང ། ཆོས་ཀྱིས་གནས་པ་དག་དང ། དཀོན་མཆོག་གསུམ་གྱི་གདུང་གསལ་བར་བྱེད་པ་དག་ཏུ་འགྱུར་ཏེ། སེམས་ཅན་གང་དག་དེར་སྔོན་གྱི་སྐྱེ་གནས་མྱོང་བར་འགྱུར་བ་མཚམས་མེད་པ་བྱེད་པ་ནས་ལྟུང་བའི་རྩ་བ་བྱུང་བའི་པར་དག་ནི། མ་གཏོགས་སོ། ། དེ་ནས་ཤི་འཕོས་ནས་ཀྱང་སངས་རྒྱས་ཀྱི་ཞིང་མི་མཇེད་འདིར་སྐྱེས་ཤིང་སྐྱེ་བར་འགྱུར་བ་དག་ཡིན་ཏེ། གང་དག་གི་སྡིག་པའི་ལས་རབ་ཏུ་ཆེན་པོའི་འབྲས་བུ་རྣམ་པར་སྨིན་པར་སྔོན་ཆད་ཡོངས་སུ་མ་སྤྱད་པའི་སེམས་ཅན་དེ་དག་གིས་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ཐོས་ནའང་ཡོན་ཏན་དེ་ལྟ་བུ་དེ་དག་ཐོབ་པར་འགྱུར་རོ། །ཐོས་པ་ཙམ་གྱི་མོད་ལའང་དེ་དག་གི་ལས་ཀྱི་སྒྲིབ་པ་དཔག་ཏུ་མེད་པ་མ་ལུས་པར་ཡོངས་སུ་ཟད་པར་འགྱུར་རོ། །སེམས་ཅན་དེ་དག་གིས་ཀྱང་དེར་ཆོས་ཀྱི་རྣམ་གྲངས་འདི་མཐའ་དག་བྲི་བར་བྱའོ། །ཡང་དག་པར་རྫོགས་པའི་སངས་རྒྱས་བདུན་པོ་དག་གི་སངས་རྒྱས་ཀྱི་སྐུ་གཟུགས་བདུན་ཡང་བྱའོ། །དེ་བཞིན་གཤེགས་པ་ཤཱཀྱ་ཐུབ་པའི་ཉན་ཐོས་ཀྱི་དགེ་འདུན་ཆོས་ཀྱིས་གནས་པ་རྣམས་ཀྱི་ཀུན་དགའི་ར་བའང་བྱའོ། །དེར་སྦྱིན་བ་དག་ཀྱང་རབ་ཏུ་གཞག་པར་བྱའོ། །དུས་དུས་སུ་གསོ་སྦྱོང་གི་སྡོམ་པ་ལའང་མངོན་པར་བརྩོན་པར་བྱའོ། །
203b
ཆོས་མཉན་པར་བྱའོ། །དེར་སེམས་ཅན་གང་དག་དཀོན་མཆོག་གསུམ་ལ་དགའ་བ་དང ། མཆོག་ཏུ་དགའ་བ་ཆེན་པོ་དེ་ལྟ་བུ་ཐོབ་པའི་གནས་དེ་ཡོད་དེ། དེ་དག་གིས་གང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ངན་སོང་གསུམ་དུ་སྡུག་བསྔལ་དྲག་པོ་རྣམ་པ་སྣ་ཚོགས་མྱོང་བར་འགྱུར་བ་དེའང་རིས་མཐུན་པ་འདི་ཉིད་ལ་མི་འདོད་པའི་འབྲས་བུ་མངོན་པར་འགྲུབ་པར་འགྱུར་རོ། །ཁ་ཅིག་ལ་ནི། ཡུན་རིང་དུ་ནད་འབྱུང་སྟེ། དེས་དེའི་སྔོན་གྱི་མི་དགེ་བའི་ལས་འཕངས་པ་དག་ཀྱང་ཡོངས་སུ་ཟད་པར་འགྱུར་རོ། །ཁ་ཅིག་གི་ནི། ཡན་ལག་བཅད་པས་ཡོངས་སུ་ཟད་པར་འགྱུར་རོ། །ཁ་ཅིག་གི་ནི། ནོར་ཟད་པས་ཡོངས་སུ་ཟད་པར་འགྱུར་རོ། །ཁ་ཅིག་གི་ནི། འཁོར་ཞིག་པས་ཡོངས་སུ་ཟད་པར་འགྱུར་རོ། །ཁ་ཅིག་གི་ནི། ལོངས་སྤྱོད་དང ། ཉེ་བར་སྤྱོད་པ་དང་བྲལ་བས་ཡོངས་སུ་ཟད་པར་འགྱུར་རོ། །ཁ་ཅིག་གི་ནི། འཁོར་དང ། བྲན་དང ། ལུས་ལ་གནོད་པ་བྱེད་པ་དང ། བཙོན་རར་བཞག་པས་ཡོངས་སུ་ཟད་པར་འགྱུར་རོ། །ཁ་ཅིག་གི་ནི། མི་སྙན་པ་དང ། ཉེས་པར་སྨྲས་པའི་ཚིག་ཐོས་པས་ཡོངས་སུ་ཟད་པར་འགྱུར་ཏེ། རིས་མཐུན་པ་ལ་དེ་དག་གིས་མི་དགེ་བའི་ལས་སྔོན་བྱས་པ་རྣམས་ཡོངས་སུ་ཟད་པར་འགྱུར་རོ། །རིགས་ཀྱི་བུ། རིག་སྔགས་ཀྱི་གཞི་ལུང་སྟོན་པ་ཆེན་པོ་འདི་ནི། དེ་ལྟར་དོན་ཆེ་བ་ཡིན་ནོ། །ཏ་དྱ་ཐཱ། ཁ་ག་པ་རི་ཙྪེ་ད། གརྦྷ་ཀྵ་སེ། གརྦྷ་རེ་བིདྱཱ། པྲ་བྷ་
204a
༄#། །ག་ཀྵེ།་ཀྵ་བ་ཡོ་གེ་།པྲ་ཏི་ཧཱ་རེ། ཤ་མ་ན་སི་ཀ་ཐེ། ས་མ་མེ་གྷ་ཛུ་ཥྚེ། ཨ་ཀྵ་ཡ་ཏ་ཏེ། ཀྵ་བྷ་བ་ཛེ། ནི་ན་ད་ན་ཛྷུ་ཥེ། ས་མཱ་གྲ་ཛྷུ་ཥེ། ཨདྡྷྱ་ཤ་ཡ་ཛྷུ་ཥེ། བི་པྲ་བྷ་ཛྷུ་ཥེ། ཤཻ་ཀྵ་ཛྷུ་ཥེ། སཏྱ་ཛ་བ་ཛྷུ་ཥེ། སཻ་ནྱ་ཛ་བ་ཛྷུ་ཥེ། ས་ལི་ལ་གུ་ཧྱ་ཛྷུ་ཥེ། ས་ལ་གུ་ཧྱ་བྱཱ་ཀྵེ། པ་ན་གྷོ་ཥེ། ས་དཱ་ན་ཀོ་ནེ། སརྦ་དྷ་ནན་ཐྱེ། བཱི་ཏ་པྲ་བྲྀ་ད་ཏེ། ཨུ་པ་ཀྲ་མ་ཎ་ཐེ། ཨ་ན་ཙྪ་བྱ་པྲ་ཁྲེ། པྲ་ཏི་ཀྲ་མ་ན། ས་ཀེ་ཐྱེ་ཤེ་།ས་ལོ་ཙ་ན་བ་མེ། ཀྲོ་དྷ་དྷ་རེ་ཀཱ་ཤ་ས་ཤེ། ཨ་ཀ་ཤ་ཁ་གེ་།ན་ཡ་ཀུཉྫེ། བིདྱཱ་བ་ན། ཀླཱ་ན་བ་ནེ། ཨུ་པ་བ་ནེ། ས་མེ་མཀཱ་རེ། ཤཱ་ར་ཡ་བ་ནེ། མེ་གྷ་ཛྷུ་ཥེ། ཧ་རི་ཀོ་ན། བ་ན་ཡ་ན་མུ་གེ་།ས་ར་ཀྵ་ཀོ་ལེ། ན་རཱ་ཡ་ན་ཛྷུ་ཥེ། ཨིནྡྲ་བ་ས་ནེ། ཨོ་ཨ། ཨ་བ་ཨཱ། ཨ་ར་བ་ཧ། ཛོ་རཱ། ཨ་བ་རཱ་བ། ས་མེ་གྷ་དུཿ ་ཁན་སྟི་ར་ཎི་ནིརྦཱ་ཧེ་སཝཱཧཱ། རིགས་ཀྱི་བུ། རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི། ཡོན་ཏན་ཆེ་བ། ཕན་ཡོན་ཆེ་བ། སེམས་ཅན་ཐམས་ཅད་ལ་ཕན་པ་བྱེད་པ་དང ། ཁྲུས་བྱེད་པ། སྣང་བར་བྱེད་པ། དྲན་པར་བྱེད་པ། ཉེ་བར་ཞི་བར་བྱེད་པ་ཡིན་ཏེ། དེ་ལ་གང་དག་སེམས་རྩེ་གཅིག་པས་ཉན་པར་བྱེད་ཅིང་ཇི་ལྟར་བསྟན་པ་བཞིན་དུ་སྒྲུབ་པར་བྱེད་པའི་སེམས་ཅན་དེ་དག་ནི། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་
204b
ཐམས་ཅད་དང ། རྐྱེན་གྱི་རྒྱལ་བ་ཐམས་ཅད་དང ། དགྲ་བཅོམ་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་དག་ཐམས་ཅད་ནི། ལྷའི་དབང་པོ་ནས་མིའི་དབང་པོའི་བར་གྱིས་བསམ་པ་དང ། དད་པར་བྱ་བའི་འོས་སུ་གྱུར་པ་དང ། ཕྱག་བྱ་བའི་འོས་སུ་གྱུར་པ་དང ། མཆོད་པའི་འོས་སུ་གྱུར་པ་ཡིན་ནི། །ཤིན་ཏུ་བསྲུང་བར་བྱ་བའི་འོས་སུ་གྱུར་པ་ཡིན་ནོ། །སེམས་ཅན་དེ་དག་ནི། ཕྱི་མའི་དུས་ན་འཆི་བའི་དུས་ཀྱི་ཚེ་རྣམ་པར་ཤེས་པ་ཐ་མ་ལ་ཕྱོགས་བཅུ་ཀུན་ནས་མདུན་ན་སངས་རྒྱས་བཅོམ་ལྡན་འདས་རྣམས་མཐོང་བར་འགྱུར་ཏེ། སངས་རྒྱས་བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་འདི་སྐད་དུ། ཀྱེ་ཡོན་ཏན་གྱིས་ཕྱུག་པ་དག་ཚུར་ཤོག་།ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་གནས་པར་གྱིས་ཤིག་།དེར་ངེད་ཀྱིས་ཁྱོད་ས་བཅུ་དག་ལ་གཞག་པར་བྱའོ། །ཞེས་ཀྱང་གསུང་བར་མཛད་དོ། །དེ་སངས་རྒྱས་མཐོང་བའི་དགའ་བ་དང ། མཆོག་ཏུ་དགའ་བ་དང ། དང་བ་འཕགས་པ་དེས་འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་སྟོང་པ་མ་ཡིན་པ་དག་ཏུ་སྐྱེ་བར་འགྱུར་ཞིང ། དེ་དེར་ཡང་ས་བཅུ་དག་ཐོབ་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི། སེམས་ཅན་རྣམས་ཀྱི་
205a
༄#། །ལས་ཟད་པར་བྱ་བ་དང ། རྣམ་པར་དག་པ་ཐོབ་པར་བྱ་བ་དང ། བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་དེ་ལྟར་དོན་ཆེ་བ་དང ། ཕན་ཡོན་ཆེ་བ་ཡིན་གྱི།་ལོངས་ལ་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཞིག་།ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུས་ཤིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་ལྟར་འཚལ་ལགས་སོ། །ཡང་དེའི་ཚེ་འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པས་ཀྱང་ཚིག་མཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བ་དང ། འདུས་པ་ཆེན་པོ་དེའང་བལྟ་བ་དང ། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་བགྱིད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་བས་པར་འགྱུར་བའི་གཟུངས་སྔགས་ཐོས་པར་འཚལ་ཏེ། བདག་ཅག་ཀྱང་ཏིང་ངེ་འཛིན་གྱི་རྣལ་འབྱོར་ལས་ལངས་ནས་རིང་པོ་མ་ལགས། སྔ་མའང་ཀུན་ཕྱིན་ལགས་ན། བཙུན་པ་བཅོམ་ལྡན་འདས། འཇིག་རྟེན་གྱི་ཁམས་མི་མཇེད་དེར་བདག་ཅག་ཀྱང་མཆི་བར་གནང་བར་མཛད་པར་
205b
གསོལ། དེ་ནས་དེ་བཞིན་གཤེགས་པ་ཡེ་ཤེས་དཔལ་ཀུན་བརྩེགས་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་།ཁྱེད་དག་ཐམས་ཅད་ལྷན་ཅིག་མཐུན་པར་སྲེད་མེད་ཀྱི་བུའི་མདོག་དང ། རྟགས་དང ། གཟུགས་དང ། དབྱིབས་དང ། སྤྱོད་ལམ་དང ། ཆ་བྱད་ཀྱིས་ཁྱེད་དེངས་ཤིག་།བཙུན་པ་བཅོམ་ལྡན་འདས། དེ་ལྟར་འཚལ་ལགས་སོ། །ཞེས་ཀྱང་གསོལ་ཏེ།་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་དང་ལྷན་ཅིག་ཏུ་སྲེད་མེད་ཀྱི་བུའི་མདོག་དང ། རྟགས་དང ། གཟུགས་དང ། དབྱིབས་དང ། སྤྱོད་ལམ་དང ། ཆ་བྱད་དུ་བདག་ཉིད་མངོན་པར་སྤྲུལ་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོའི་ཞབས་གཉིས་ལ་མགོ་བོས་ཕྱག་བཙལ་ཏེ་ལན་གསུམ་དུ་བསྐོར་བ་བྱས་ནས་ཆས་ཏེ་ཡུད་ཙམ་གཅིག་གིས་སངས་རྒྱས་ཀྱི་ཞིང་མི་མཇེད་འདིར་ཕྱིན་ཏོ། །སངས་རྒྱས་ཀྱི་ཞིང་མི་མཇེད་འདིར་དེ་དག་ཕྱིན་པ་ཙམ་གྱི་མོད་ལ་སངས་རྒྱས་ཀྱི་ཞིང་མི་མཇེད་ཐམས་ཅད་དུ་བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་ཛམྦུའི་ཆུ་བོའི་གསེར་གྱི་ཆར་པ་མངོན་པར་རབ་ཏུ་ཕབ་བོ། །དེ་དག་གླིང་བཞི་པ་བར་མ་འདི་ག་ལ་བ་དང ། ཡུལ་མ་ག་དྷཱའི་ཞིང་ག་ལ་བ་དེ་ལོགས་སུ་དོང་སྟེ། དོང་ནས་ཀྱང་བཅོམ་ལྡན་འདས་ཤཱཀྱ་ཐུབ་པའི་ཞབས་གཉིས་
206a
༄#། །ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ནི། ད་དུང་ཡང་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་རབ་ཏུ་མཛད་དོ། །ཡང་དེའི་ཚེ་བྱང་ཕྱོགས་ན་སངས་རྒྱས་ཀྱི་ཞིང་གངྒཱའི་ཀླུང་བརྒྱད་ཅུའི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྤོས་ཐམས་ཅད་ཡང་དག་པར་འཕགས་པ་ཞེས་བྱ་བ་ཡོད་དེ། སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་གནས་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཞེས་བྱ་བ་ཆོས་མཉན་པའི་ཕྱིར་འདུས་པར་གྱུར་ཏེ་འདུག་གོ་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ས་སྟེང་གི་ནམ་མཁའ་ལ་བལྟས་སོ། །དེས་ཀྱང་དེར་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་བྱང་ཕྱོགས་ཀྱི་ཕྱོགས་ཆ་ནས་ལྷོ་ཕྱོགས་སུ་འདོང་བ་དག་མཐོང་བར་གྱུར་ཏོ། །དེས་ལྷོ་ཕྱོགས་སུ་རྣམ་པར་བལྟས་ཏེ་སྣང་བ་ཆེན་པོ་མཐོང་ནས་དེས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་
206b
བཏུད་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཏིང་ངེ་འཛིན་གྱི་རྣལ་འབྱོར་ལས་ལངས་ནས་རིང་པོ་མ་ལགས་ཏེ། བདག་གིས་ནི། སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མ་མཆིས། དཔག་ཏུ་མ་མཆིས་པ་བྱང་ཕྱོགས་ཀྱི་ཕྱོགས་ཆ་ནས་ལྷོ་ཕྱོགས་སུ་མཆི་བ་དག་མཐོང་ལགས་སོ། །བཙུན་པ་བཅོམ་ལྡན་འདས། ལྷོ་ཕྱོགས་སུ་རྣམ་པར་བལྟས་ཏེ་སྣང་བ་ཆེན་པོ་མཐོང་ནས་བདག་འདི་སྙམ་དུ་སེམས་ཏེ། འདི་ལ་རྒྱུ་ནི། གང་ལགས་སྙམ་ལགས་སོ། །དེ་ནས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སངས་རྒྱས་ཀྱི་ཞིང་འདི་ནས་ལྷོ་ཕྱོགས་ཀྱི་ཕྱོགས་ཆ་ན་སངས་རྒྱས་ཀྱི་ཞིང་གངྒཱའི་ཀླུང་བརྒྱད་ཅུའི་བྱེ་མ་སྙེད་འདས་ནས་སངས་རྒྱས་ཀྱི་ཞིང་མི་མཇེད་ཅེས་བྱ་བ་ཡོད་དོ། །འདི་ལྟར་སྙིགས་མ་ལྔ་དང་ལྡན་པར་གནས་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདུས་པ་ཆེན་པོ་ལ་ཆོས་ཀྱི་ཚུལ་ཡུན་རིང་དུ་གནས་པར་བྱ་བའི་ཕྱིར་དང ། དཀོན་མཆོག་གསུམ་གྱི་གདུང་གི་ཆོས་ཀྱིས་གནས་པ་རྒྱུན་མི་གཅད་པར་བྱ་བའི་ཕྱིར་ད་ལྟར་ཐེག་པ་གསུམ་གྱི་རྣམ་པར་གཏན་ལ་
207a
༄#། །དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་ཏོ། །སངས་རྒྱས་ཀྱི་ཞིང་མི་མཇེད་དེར་བདུད་ཀྱི་ཡུལ་རྣམ་པར་གཞིག་པ་དང ། དྲི་མ་མེད་པར་མཛད་པའི་ཕྱིར་དང ། ཆོས་ཀྱི་རྒྱལ་མཚན་བསྒྲེང་བར་མཛད་པའི་ཕྱིར་དང ། ཆོས་ཀྱི་ཚུལ་ཡུན་རིང་དུ་གཞག་པའི་ཕྱིར་སངས་རྒྱས་ཀྱི་འདུས་པ་ཆེན་པོ་བྱུང་བར་གྱུར་ཏོ། ། དེར་ཡང་དེ་བཞིན་གཤེགས་པ་ཐམས་ཅད་ཀྱིས་རིན་པོ་ཆེའི་ཏོག་གི་གཟུངས་སྔགས་གསུངས་ཏེ། སངས་རྒྱས་ཀྱི་ཞིང་ཡངས་ཡོངས་སུ་སྤྱད་ནས་གཤེགས་སོ། །དེ་བཞིན་གཤེགས་པ་ཤཱཀྱ་ཐུབ་པ་དེའང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་སྒྲུབ་པར་མཛད་དེ།་སོ་སོ་ཡང་དག་པར་རིག་པ་བཞི་དང་ཡང་དག་པར་ལྡན་པ་མིག་གསུམ་པའི་ཚངས་པའི་གནས་པ་བསྟན་ཀྱང་དེ་ན་ད་དུང་སངས་རྒྱས་ཀྱི་ཞིང་མི་མཇེད་ས་དང་ནམ་མཁའ་གང་བ་ཞིག་དེ་བཞིན་གཤེགས་པ་ཤཱཀྱ་ཐུབ་པ་མཆོག་ཏུ་སྙན་པར་གསུང་བའི་ཆོས་བསྟན་པས་ཚིམ་པར་མ་གྱུར་ཏོ། །མཆོག་ཏུ་སྙན་པ་གསུང་བ་ཤཱཀྱ་ཐུབ་པ་དེའང་བསྡུ་བའི་དངོས་པོ་བཞི་དང ། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་
207b
བྱེད་པའི་གཟུངས་སྔགས་བཤད་པར་བཞེད་དོ། །དེ་བཞིན་གཤེགས་པ་དེ་འདི་སྙམ་དུ་དགོངས་ཏེ། ཕྱོགས་བཅུ་དང ། སངས་རྒྱས་ཀྱི་ཞིང་ཐམས་ཅད་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་བསྐལ་པ་བརྒྱས་ངེས་པར་འབྱུང་བ་ཞེས་བྱ་བ་ནས་གང་དག་སྲིད་པ་ཐ་མ་པ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་གཞན་གྱི་དྲིང་མི་འཇོག་པ། སྒྲིབ་པ་མེད་པའི་ཡེ་ཤེས་ལ་མཁས་པ་དག་དེའི་ཚེ་སངས་རྒྱས་ཀྱི་ཞིང་མི་མཇེད་དུ་འཇུག་པར་གྱུར་ཅིག་།འདིར་འཁོད་ནས་ཀྱང་རང་རང་གི་དགེ་བའི་ཕྱོགས་ཀྱི་བསམ་གཏན་དག་གིས་གནས་པར་གྱུར་ཅིག་།འདི་ལྟར་སངས་རྒྱས་ཀྱི་ཞིང་འདིར་ས་ཆེན་པོ་ལྷག་པར་མཐུ་དང་ལྡན་པ་དང ། བཅུད་དང་ལྡན་པ་དང ། ཡོན་ཏན་དང་ལྡན་པ་དག་ཏུ་གྱུར་ཅིག་།འདི་ལྟར་འདིར་སངས་རྒྱས་ཀྱི་ཞིང་གཞན་བཞིན་དུ་ཐམས་ཅད་དྲན་པ་དང་ལྡན་པ་དག་དང ། བརྩོན་འགྲུས་དང་ལྡན་པ་དག་དང ། གཏོང་བ་དང་ལྡན་པ་དག་དང ། ཤེས་རབ་དང་ལྡན་པ་དག་ཏུ་གྱུར་ཅིག ། དེའི་ཆེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ངག་ཕྱོགས་བཅུའི་སངས་རྒྱས་ཀྱི་ཞིང་དག་ནས་ཡང་དག་པར་ཞུགས་པ་དེ་དག་ཀྱང་སངས་རྒྱས་ཀྱི་ཞིང་མི་མཇེད་འདིའི་ནང་དུ་ཆུད་པར་གྱུར་ཅིག་།དེ་ཉིད་དུ་འཁོད་ནས་ཀྱང་རང་རང་གི་དགེ་བའི་ཕྱོགས་ལ་སྟོབས་ཇི་ལྟ་བ་དང ། ཇི་ལྟར་འཚམ་པ་བཞིན་དུ་འཁོད་ནས་བསམ་གཏན་བྱེད་པར་གྱུར་ཅིག་སྙམ་དགོངས་
208a
༄#། །སོ། །བསམ་གཏན་བྱེད་པ་དེ་དག་ཁ་ཅིག་གི་ལུས་ལས་འོད་འདི་ལྟ་བུ། དཔེར་ན། འབྲུ་མར་གྱི་མར་མེ་ལྟ་བུ་བྱུང་ངོ ། །ཞེས་བྱ་བ་ནས་ཁ་ཅིག་གི་ལུས་ལས་འོད་འདི་ལྟ་བུ། དཔེར་ན། ཟླ་བ་དང་ཉི་མ་བྱེ་བ་ཕྲག་བརྒྱ་སྟོང་མང་པོའི་འོད་ལྟ་བུ་བྱུང་ངོ ། །ཞེས་བྱ་བའི་བར་དུ་སྦྱར་རོ། །དེ་ན་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པས་སངས་རྒྱས་ཀྱི་ཞིང་མི་མཇེད་དེ་སྣང་བ་ཆེན་པོས་ཁྱབ་པར་གྱུར་ཏོ། །ད་ལྟར་གང་དག་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་སྙོམས་པར་ཞུགས་པར་གྱུར་ལ། སྔོན་ཆད་དེར་ཕྱིན་པ་ནི་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། དེ་ལྟར་ཏིང་ངེ་འཛིན་ལས་ལངས་ནས་སངས་རྒྱས་ཀྱི་ཞིང་མི་མཇེད་དེར་ཆས་སོ། །དེར་ཕྱིན་ནས་ཀྱང་དེ་བཞིན་གཤེགས་པ་དེ་མཐོང་བར་འགྱུར་རོ། །འདུས་པ་ཆེན་པོ་དེའང་མཐོང་བར་འགྱུར་རོ། །གཟུངས་སྔགས་ཆེན་པོ་དེའང་ཐོས་པར་འགྱུར་རོ། །སྐྱིལ་མོ་ཀྲུང་དུ་འདུག་ནས་རང་རང་གི་དགེ་བའི་ཕྱོགས་ཀྱི་བསམ་གཏན་རྣམ་པ་སྣ་ཚོགས་ཀྱིས་རྩེ་བར་འགྱུར་རོ། །རིགས་ཀྱི་བུ། ཁྱོད་ཀྱང་ད་ལྟར་ཏིང་ངེ་འཛིན་ལས་ལངས་ཀྱི། རིགས་ཀྱི་བུ། ཁྱོད་ཀྱིས་ཀྱང་སངས་རྒྱས་ཀྱི་ཞིང་མི་མཇེད་དེར་འགྲོ་བར་བྱའོ། །རིགས་ཀྱི་བུ། སངས་རྒྱས་ཀྱི་ཞིང་མི་མཇེད་དེ་ནའང་སེམས་ཅན་དག་མཆོག་ཏུ་ཚེ་ཐུང་བ་
208b
དག་ཡིན། ནད་མང་བ་ཡིན། བློ་ཆུང་བ་དག་ཡིན། དགེ་བའི་རྩ་བ་ཀུན་ཏུ་སྤྱོད་པ་ཆུང་བ་ཡིན། བསོད་ནམས་ཆུང་བ་དག་ཡིན། དགེ་བའི་རྩ་བའི་བྱ་བ་ཚོལ་བ་ཆུང་བ་དག་ཡིན། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་ཡིན། ལོངས་སྤྱོད་དང་ཉེ་བར་སྤྱོད་པ་ཆུང་བ་དག་ཡིན། འདོད་པ་ལ་ཆུམས་པ་དག་ཡིན། མི་དགེ་བ་སྤྱོད་པ་དག་ཡིན། ཕྲག་དོག་དང་ལྡན་པ་དག་ཡིན། ངོ་ཚ་ཤེས་པ་དང་ཁྲེལ་ཡོད་པ་དག་སྤངས་པ་ཡིན་ཏེ། དེ་དག་ཕལ་ཆེར་མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པས་ངན་སོང་དུ་འགྲོ་བ་དག་ཡིན་ནོ། །དེ་ཅིའི་ཕྱིར་ཞེ་ན། དེ་ན་གང་དག་འདྲེན་མར་སྤྱོད་པའི་སེམས་ཅན་དེ་དག་འཆི་བའི་དུས་བྱས་ནས་དེ་ཉིད་དུ་སྡིག་པ་བྱེད་པའི་གནོད་སྦྱིན་ཞེས་བྱ་བ་ནས་སྡིག་པ་བྱེད་པའི་ལུས་སྲུལ་པོ་ཞེས་བྱ་བའི་བར་དག་ཏུ་སྐྱེ་བར་འགྱུར་ཏེ། སྡིག་པ་བྱེད་པའི་གནོད་སྦྱིན་ཞེས་བྱ་བ་ནས་ལུས་སྲུལ་པོ་ཞེས་བྱ་བའི་བར་དེ་དག་ཀྱང་དེར་སའི་བཅུད་ཀྱི་མདངས་འཕྲོག་ནས་ཡོངས་སུ་སྤྱོད་པར་བྱེད་དོ། །འབྲུ་དང ། སྨན་དང ། མེ་ཏོག་དང ། འབྲས་བུ་དང ། འདབ་མ་དང ། རོ་རྣམས་ཀྱི་མདངས་འཕྲོག་ནས་ཀྱང་ཡོངས་སུ་སྤྱོད་པར་བྱེད་དོ། །དེས་ན་སྟོབས་དང་ལྡན་པ་དག་ཡིན་ནོ། །དེར་དེ་དག་མངལ་ན་གནས་པའི་མི་རྣམས་ཀྱི་མདངས་དག་འཕྲོག་པར་བྱེད་དོ། །མི་རྣམས་སྐྱེས་པ་ཙམ་གྱི་
209a
༄#། །མོད་དག་ལ་མྱུར་དུ་མདངས་འཕྲོག་པར་བྱེད་དོ། །འོ་མའི་མདངས་དག་ཀྱང་འཕྲོག་པར་བྱེད་དོ། །བཟའ་བ་དང་བཏུར་བའི་མདངས་དག་ཀྱང་འཕྲོག་པར་བྱེད་དོ། །དེར་དེ་དག་གིས་མི་མངལ་དུ་ཞུགས་པའི་མདངས་འཕྲོག་ཅིང་སྐྱེས་པ་ཙམ་གྱི་མོད་ལ་མདངས་འཕྲོག་པས་དེ་དག་ཀྱང་མདངས་ལ་མི་རེག་ཅིང་བཟའ་བ་དང ། བཏུང་བ་ཉམས་པ་ཡོངས་སུ་སྤྱད་ཟིན་པ་ལ་ཡོངས་སུ་སྤྱོད་པར་བྱེད་དེ། རྒྱུ་དེས་དེ་ན་མི་རྣམས་མཆོག་ཏུ་ན་བདག་དང ། ཚེ་ཐུང་བ་དག་དང ། དྲན་པ་ཉམས་པ་དག་དང ། དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང ། བསོད་ནམས་དང་བྲལ་བ་དག་དང ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་དང ། ལོངས་སྤྱོད་དང་ཉེ་བར་སྤྱོད་པ་དང་བྲལ་བ་དག་དང ། འདོད་པ་ལ་ཆུམས་པ་དག་དང ། ཀུན་ཏུ་སྤྱོད་པ་མི་གཙང་བ་དག་ཡིན་ཞེས་བྱ་བ་ནས་མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པས་ངན་སོང་དུ་འགྲོ་བ་དག་ཡིན་ནོ། །ཞེས་བྱ་བའི་བར་ཡིན་ནོ། །རིགས་ཀྱི་བུ། སྔོན་ང་བྱང་ཆུབ་སེམས་དཔར་གྱུར་པའི་སྨོན་ལམ་འདི་ལྟ་བུར་གྱུར་ཏེ། འདི་ལྟར་ང་བྱ་བ་ལ་བརྩོན་པ་དང ། སྤྲོ་བ་དང ། བརྟུལ་བ་བརྟན་པར་གྱུར་ཏོ། །སྔོན་གྱི་ཡང་དག་པར་རྫོགས་པའི་སངས་རྒྱས་གང་དག་བཞུགས་པར་ངས་བསྙེན་བསྐུར་བྱས་སོ། །ངས་ཐབས་གང་གིས་བུད་མེད་སྦྲུམ་པ་སྲུང་བར་ནུས་པའང་ཡོངས་སུ་
209b
ཞུས་སོ། །ངའི་བརྩོན་འགྲུས་གང་གིས་མ་བདེ་ལེགས་སུ་འགྱུར་པ་དང ། མངལ་ན་ཡོད་པ་བདེ་ལེགས་སུ་འགྱུར་བ་ཡོངས་སུ་ཞུས་སོ། །ལྷའམ། ཀླུའམ། གནོད་སྦྱིན་ནམ། སྲིན་པོའམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། གྲུལ་བུམ་མམ། ཡི་དྭགས་སམ། ཤ་ཟའམ། སྲུལ་པོའམ། ལུས་སྲུལ་པོའམ། མདངས་འཕྲོག་པའམ། རྗེད་བྱེད་དམ། རིམས་ཉིན་གཅིག་པའམ། ཉིན་གཉིས་པའམ། ཉིན་གསུམ་པའམ། ཉིན་བཞི་པའམ། རོ་ལངས་གང་ཡང་དུག་གམ། སྔགས་ཀྱི་སྦྱོར་བའམ། སྨན་གྱི་སྦྱོར་བས་ལུས་དང་སེམས་ལ་གནོད་པར་བྱ་བར་མི་ནུས་པ་ཡོངས་སུ་ཞུས་སོ། །གང་གིས་ཀྱང་མའམ། མངལ་ན་ཡོད་པ་དང ། སྐྱེས་མ་ཐག་པ་དང ། འོ་མ་འཐུང་བ་དང ། བཟའ་བ་དང ། བཏུང་བ་ཡོངས་སུ་སྤྱོད་པ་ལ་གནོད་པར་བྱ་བར་མི་ནུས་པར་ཡོངས་སུ་ཞུས་སོ། །གང་གིས་ཀྱང་མདངས་འཕྲོག་པའམ། ལུས་དཀྲུག་པའམ། ཁམས་དཀྲུག་པའམ། སེམས་དཀྲུག་པར་བྱ་བར་མི་ནུས་པར་ཡོངས་སུ་ཞུས་སོ། །གང་གི་ཕྱིར་སེམས་ཅན་དེ་དག་ཐ་མལ་པར་མངལ་ན་གནས་པར་ཡོངས་སུ་ཞུས་སོ། །ལུས་དང་སེམས་ལ་རྣམ་པར་མཐོ་མ་བརྩམས་པས་བདེ་བར་མའི་མངལ་ནས་གནོད་པ་མེད་པར་འབྱུང་བ་ཡོངས་སུ་ཞུས་སོ། །བདེ་བར་འོ་མ་འཐུང་བ་ཡོངས་སུ་ཞུས་སོ། །བདེ་བར་བཟའ་བ་དང་བཏུང་
210a
༄#། །བ་ཡོངས་སུ་སྤྱད་པ་ཡོངས་སུ་ཞུས་སོ། །གནོད་པ་ཆུང་བ་དང ། ཚེ་རིང་བ་དང ། བློ་དང་ལྡན་པ་ཞེས་བྱ་བ་ནས་དགེ་བ་བཅུའི་ལས་ཀྱི་ལམ་ཡང་དག་པར་བླངས་པའི་བར་དང ། སྦྱིན་པ་དང ། དུལ་བ་དང ། ཡང་དག་པར་སྡོམ་པ་ལ་མངོན་པར་དགའ་བ་དང ། འཇིག་རྟེན་ཕ་རོལ་ལ་འཇིགས་པར་ལྟ་བ་ཡིན་པ་དག་ཀྱང་ཡོངས་སུ་ཞུས་སོ། །ངས་གསང་སྔགས་གང་དག་དང ། སྨན་གང་དག་གིས་སེམས་ཅན་དེ་ལྟ་བུ་དག་ཡོངས་སུ་སྨིན་པར་མཛད་པར་སྤྱོད་པའི་གསང་སྔགས་དེ་དག་ནི། གང་ཡིན། སྨན་དེ་དག་ནི། གང་ཡིན་ཞེ་ན། གཟུངས་སྔགས་གང་གིས་ངས་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ཡོངས་སུ་སྨིན་པར་མཛད་པ་དང ། ཕ་རོལ་ཏུ་ཕྱིན་པ་དྲུག་ལ་བཀོད་པ། རིག་པ་ཡོད་པའི་སྦུབས་ཞི་བ། གསང་སྔགས་ཀྱི་གཞིའི་གཟུངས་སྔགས་ལུང་བསྟན་པ་ཆེན་པོ་འདི་སྔོན་གྱི་ཡང་དག་པར་རྫོགས་པའི་སངས་རྒྱས་དེ་དག་གིས་ཀྱང་ང་ལ་བསྟན་པར་གྱུར་ཏོ། །རྟག་ཏུ་བརྩོན་འགྲུས་དང ། བརྟུལ་བ་བརྟན་པ་ངས་རྟག་པར་རྒྱུན་དུ་ཚེ་རབས་དེ་དང་དེ་དག་ཏུ་མངལ་ན་བུ་ཡོད་པའི་བུད་མེད་ལ་རིག་པ་ཡོད་པའི་སྦུབས་ཞི་བ་གཟུངས་སྔགས་གསང་སྔགས་ཀྱི་གཞི་རིག་སྔགས་འདིས་བསྲུང་བ་བྱས་སོ། །བུད་མེད་དེ་མངལ་ན་བུ་ཡོད་པ་དང་བཅས་ཏེ་སྐྱབས་གསུམ་
210b
ལ་རྣམ་པར་བཞག་གོ་།ཕྱིན་ཆད་ཀྱང་ལྷའམ་ཞེས་བྱ་བ་ནས་བདུད་དམ། རྗེད་བྱེད་དམ། མི་དང ། མི་མ་ཡིན་པ་ཞེས་བྱ་བའི་བར་གྱིས་མའི་མངལ་ན་བུ་ཡོད་པ་བཙས་ཏེ། རྣམ་པར་མཐོ་བརྩམས་པའམ། རྣམ་པར་གཙེ་བའམ། ལུས་དཀྲུག་པའམ། ཁམས་དཀྲུག་པའམ། སེམས་དཀྲུག་པར་བྱ་བར་མི་ནུས་སོ། །ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱི་བར་གྱིས་ཀྱང་མདངས་འཕྲོག་པའམ། སྨན་དང་སྔགས་ཀྱི་སྦྱོར་བ་བྱ་བར་མི་ནུས་སོ། །དེ་དག་གིས་མངལ་ན་བུ་ཡོད་པའི་མ་རྣམ་པར་མཐོ་མ་བརྩམས་པ་དང ། མངལ་ན་བུག་ནས་པའང་སྔོན་གྱི་ཚེ་རབས་དྲན་པར་འགྱུར་རོ། །ཉིང་མཚམས་སྦྱོར་བའི་ལུས་ཀྱི་དབང་པོ་ཐམས་ཅད་ཡོངས་སུ་རྫོགས་པ་དང ། གཟུགས་བཟང་བ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་དག་དང ། ཤིན་ཏུ་བློ་དང་ལྡན་པ་དག་བདེ་ལེགས་སུ་མའི་ལྟོ་ནས་བྱུང་ཞིང་བརྗེད་ངས་པ་མེད་པའི་སེམས་དང་ལྡན་པ་དག་ཏུ་འགྱུར་རོ། །དེ་དག་སྐྱེས་པ་ཙམ་གྱི་མོད་ལའང་ལྟ་སྟོབས་དང་ལྡན་པ། དབང་ཆེ་བར་གྲགས་པ་རེ་རེ་ལའང་འཁོར་བརྒྱ་སྟོང་ཡོད་པ་དག་བསྲུང་བ་དང ། རྗེས་སུ་སྦ་བར་བྱེད་པར་ཀུན་ཏུ་གནས་སོ། །དེ་དག་མི་དང་མི་མ་ཡིན་པ་ཞེས་བྱ་བའི་བར་གང་གིས་ཀྱང་རྣམ་པར་མཐོ་བརྩམ་པའམ། རྣམ་པར་གཅེ་བའམ། ལུས་དཀྲུག་པའམ། ཁམས་དཀྲུག་པའམ། སེམས་དཀྲུག་པར་བྱ་བར་མི་ནུས་སོ།།
211a
༄#། །མདངས་བླང་བར་ཡང་མི་ནུས་སོ། །གསང་སྔགས་དང ། སྨན་གྱིས་ཀྱང་རྣམ་པར་མཐོ་བརྩམ་པར་མི་ནུས་སོ། །གང་གི་ཕྱིར་སེམས་ཅན་དེ་དག་མཆོག་ཏུ་གཟུགས་དང་ལྡན་པ་དང ། ཚེ་རབས་དྲན་པ་དང ། འཇིག་རྟེན་ཕ་རོལ་ལ་འཇིགས་པར་ལྟ་བ་དང ། བྱམས་པའི་སེམས་དང་ལྡན་པ་དང ། སྙིང་རྗེ་ཆེན་པོ་དང་ལྡན་པ་དང ། གཏོང་བ་དང་ལྡན་པ་དང ། ཚུལ་ཁྲིམས་ལ་རྗེས་སུ་དགའ་བ་དང ། བཟོད་པ་དང ། ཡོན་ཏན་དང་ལྡན་པ་དང ། བརྩོན་འགྲུས་དང་ལྡན་པ་དང ། དབེན་པ་ལ་དགའ་ཞིང་བསམ་གཏན་ལ་མངོན་པར་བརྩོན་པ་དང ། དགེ་བའི་བཤེས་གཉེན་ལ་མངོན་པར་དགའ་བ་དག་དང ། དེ་ཐོབ་པ་བྱེད་པའི་སྡིག་བསྔལ་ཡང་དག་པར་ཟད་པར་འགྲོ་བ་འཕགས་པའི་ངེས་པར་འབྱིན་པའི་ཤེས་པ་དང་ལྡན་པ་དག་ཏུ་འགྱུར་རོ། །སེམས་ཅན་ཉེ་བར་ཞི་བ་ལ་གནས་པ་ཉོན་མོངས་པ་ཆུང་བ་དེ་ལྟ་བུ་ད་དག་ལ་ལྷ་དང ། ཀླུ་དང ། གནོད་སྦྱིན་རྣམས་ཀྱིས་རིམ་གྲོ་བྱ་བར་བརྩོན་པ་དག་ཡིན་ཏེ། མི་དེ་དག་ཀྱང་མཆོག་ཏུ་འཁོར་བ་ལ་སྐྱོན་དུ་བལྟ་བ་དང ། བྱང་གྲོལ་གྱི་བདེ་བ་འདོད་པ་དག་ཏུ་འགྱུར་རོ། །དེ་དག་གིས་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། དེ་དག་རིས་མཐུན་པ་དེ་ཉིད་ཀྱིས་མྱུར་དུ་བྱང་ཆུབ་ཀྱི་སེམས་མ་བརྗེད་པར་བྱང་ཆུབ་སེམས་
211b
དཔའི་ཏིང་ངེ་འཛིན་ཐོབ་པར་འགྱུར་རོ། །ཅི་སྟེ་རང་སངས་རྒྱས་ཀྱི་ཐེག་པ་ལ་སེམས་བསྐྱེད་ན། དེ་དག་མྱུར་དུ་སྐྱེ་བ་དང ། འཇིག་པ་དང་རྗེས་སུ་མཐུན་པའི་བཟོད་པ་ཐོབ་པར་འགྱུར་རོ། །ཅི་སྟེ་སེམས་ཅན་དེ་དག་ཀྱང་ཉན་ཐོས་ཀྱི་ཐེག་པ་ལ་སེམས་སྐྱེད་པར་བྱེད་ན། སེམས་ཅན་དེ་དག་རིས་མཐུན་པ་ཉིད་ཀྱིས་བདེན་པ་དང་རྗེས་སུ་མཐུན་པའི་བཟོད་པ་ཐོབ་པར་བྱེད་དོ། །སེམས་ཅན་དེ་དག་ཐམས་ཅད་ཀྱང་ངན་སོང་གསུམ་དང་བྲལ་བ་དང ། མཐོ་རིས་སུ་འགྲོ་བ་དག་ཏུ་འགྱུར་རོ། །རིགས་ཀྱི་བུ། ངས་ཐབས་ལ་འཇུག་པའི་སྦྱོར་བ་ལ་བརྟུལ་བ་དེས་སེམས་ཅན་དག་ཡོངས་སུ་སྨིན་པར་བྱས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡང་དག་པར་བསྒྲུབས་སོ། །རིགས་ཀྱི་བུ། རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི། དེ་ལྟར་དོན་ཆེ་བ་ཡིན་ནོ། །རིགས་ཀྱི་བུ། ངས་སེམས་ཅན་ནད་པ་གང་དག་མཐོང་བ་དེ་དག་ལ་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདིས་སྨན་སིདྷ་ཀྵིར་ལ་བྲབས་ནས་ནད་པ་ལ་བྱིན་ན། ནད་ཐམས་ཅད་རབ་ཏུ་ཞི་བར་འགྱུར་རོ། །གང་ན་སྨན་སིདྷ་ཀྵིར་མེད་པར་ཡང་ངས་དེའི་མདུན་དུ་བཟའ་བ་དང ། བཏུང་བ་གང་ཡིན་པ་ལ་རིག་པ་ཡོད་པའི་སྦུབས་ཞི་བ་ལུང་བསྟན་པས་བྲབས་ནས་ནད་པ་ལ་བྱིན་ན། ནད་ཐམས་ཅད་རབ་ཏུ་ཞི་བར་འགྱུར་རོ། །གལ་ཏེ་མེད་པར་གྱུར་ན། ངས་སྨན་བཀྲུས་ཏེ་
212a
༄#། །པོར་བ་ལ་རིག་པ་ཡོད་པའི་སྦུབས་ཞི་བའི་གསང་སྔགས་ཀྱི་གཞི་དག་གིས་བྲབས་ནས་ནད་པ་ལ་བྱིན་ན། ནད་ཐམས་ཅད་རབ་ཏུ་ཞི་བར་འགྱུར་རོ། །རིགས་ཀྱི་བུ།་ངས་ཐབས་ལ་འཇུག་པའི་སྦྱོར་བ་ལ་བརྟུལ་བ་དེས་སེམས་ཅན་རྣམས་ཡོངས་སུ་སྨིན་པར་བྱས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡང་དག་པར་བསྒྲུབས་སོ། །གང་ན་ཤིང་ལྗོན་པ་དག་མེ་ཏོག་དང་འབྲས་བུ་མི་སྐྱེ་བ་དེར་ཡང་ངས་རིག་པ་ཡོང་བའི་སྦུབས་ཞི་བ་གསང་སྔགས་ཀྱི་གཞི་ཆེན་པོ་དག་གིས་ཆར་པའི་ཚུལ་བླབས་ནས་ཤིང་དག་ལ་བཏབ་ན། ཤིང་དེ་དག་ལོ་མང་པོར་ཆུ་མེད་ཀྱང་མེ་ཏོག་དང་འབྲས་བུ་དག་དང་ལྡན་པར་འགྱུར་རོ། །དེ་བཞིན་དུ་བུ་རམ་ཤིང་དང ། རྒུན་འབྲུ་དག་དང ། འབྲུ་དང ། སྨན་དག་གི་བར་ལའང་བྱས་སོ། །གང་ན་ཆར་མི་འབབ་ཅིང་ཆུ་མེད་པ་དེར་ཡང་ངས་རུས་སྦལ་གྱི་སྙིང་ལ་རིག་པ་ཡོད་པའི་སྦུབས་ཞི་བ་གསང་སྔགས་ཀྱི་གཞི་འདིས་བྲངས་ནས་ཤིང་ཙམྤ་ཀའི་འདམ་མས་དཀྲིས་ཏེ་ཀླུ་མཚོའི་འགྲམ་དུ་བཞག་ན། ཆར་ཆེན་པོ་དང ། ཆུ་ཆེན་པོའི་ཚོགས་བྱུང་བར་འགྱུར་རོ། །དེར་ཆུ་ཆེན་པོ་བྱུང་བས་སེམས་ཅན་རྣམས་ཀྱི་ཁྱིམ་དང ། ཞིང་དང ། ཀུན་དགའི་ར་བའི་བར་ཆུད་ཟ་བར་གྱུར་ན་དེར་ཡང་ངས་སྦྲུལ་གྱི་རྒྱལ་པོའི་ནོར་བུ་ལ་རིག་པ་ཡོད་པའི་སྦུབས་ཞི་བའི་གསང་སྔགས་ཀྱི་གཞི་འདིས་
212b
བྲབས་ནས་ཀླུའི་གནས་སུ་བཞག་ན། ཆར་ཆུར་རབ་ཏུ་ཞི་བར་འགྱུར་རོ། །གང་ན་དུས་མ་ཡིན་པར་རླུང་དང ། ཉི་མ་དང ། དུས་མ་ཡིན་པའི་སྤྲིན་དང ། མུན་པ་དང ། རྡུལ་གྱི་ཆར་པ་དང ། གྲང་བ་དང ། དྲོ་བ་དང ། དུས་ཕྱིན་ཅི་ལོག་ཏུ་བྱུང་བའི་བར་དང ། དམག་ཚོགས་དང ། ཟླ་བ་དང ། ཉི་མ་དང ། གཟའ་དང ། རྒྱུ་སྐར་དང ། ཟླ་བ་དང ། ཟླ་བ་ཕྱེད་དང ། དུས་ཚིགས་དང ། ལོ་རྣམས་ཡང་དག་པར་འབྱུང་བ་མ་ཡིན་པའི་བར་ལ་ངས་སྙིང་རྗེས་སེམས་ཅན་རྣམས་ཀྱི་ཆེད་དུ་ཞག་བདུན་པ་གཅིག་གི་ཉིན་མཚན་དུ་ཁྲུས་བྱས་ནས་འོ་མ་དང་འབྲས་ཆན་གྱི་ཁ་ཟས་ཟ་ཞིང་ཚངས་པའི་གནས་པ་སྒོམ་པ་ལ་མངོན་པར་དགའ་བས་རིག་པ་ཡོང་བའི་སྦུབས་ཞི་བ་ལུང་བསྟན་པ་འདི་ལས་གཞན་མི་བྱེད་པར་བརྗོད་དེ། ཉིན་བདུན་པ་ལ་གལ་ཏེ་ཡུལ་ཡོངས་སུ་མ་བསྐྱངས་ན། དེར་ངའི་མདུན་དུ་རང་གི་དམ་བཅས་པས་མི་གནས་པ་ཡིན་ནོ། །དེར་ཡང་ངས་རྩི་ལྕམ་པ་སྦྲུལ་གྱི་སྙིང་དང་བཅས་པ་ལ་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདིས་བྲབས་ཤིང་སྐྱུག་སྨན་མ་ད་ནའི་འབྲས་བུ་དག་དང་བསྲེས་ཏེ་ལྷ་རྟེན་སར་བཞག་པས་དེས་དུས་མ་ཡིན་པའི་རླུང་དང ། ཉི་མ་དང ། སྤྲིན་དང ། མུན་པ་དང ། རྡུལ་གྱི་ཆར་པ་དག་དང ། གྲང་བ་དང ། དྲོ་བ་ཐམས་ཅད་ཞི་བར་གྱུར་ཏོ། །ཡང་དག་པའི་དུས་ཚིགས་དང ། ཟླ་བ་དང ། ཉི་མ་དང ། གཟའ་དང ། རྒྱུ་སྐར་དང ། ཟླ་བ་དང ། ཟླ་བ་ཕྱེད་དང ། ལོ་ཡང་དག་པར་བྱུང་བར་གྱུར་ཏོ། །རིགས་ཀྱི་བུ། དེས་ན་གང་
213a
༄#། །ན་སེམས་ཅན་དགེ་མཚན་དང ། བཀྲ་ཤིས་དང ། སོ་སོར་ལྡན་པ་དག་དང ། ལྟ་བ་ཕྱིན་ཅི་ལོག་ཏུ་གྱུར་པའི་བར་གྱི་སེམས་ཅན་དེ་དག་ལ་ངས་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདིའི་ཆོས་བསྟན་ཏོ། །གང་དང་གང་དུ་སེམས་ཅན་རྣམས་ཀྱིས་ཐོས་པ་དེ་དང་དེར་ཡང་ཉོན་མོངས་པ་ཆུང་ངུ་དག་ཏུ་གྱུར་ཏོ། །དགེ་མཚན་དང ། བཀྲ་ཤིས་དང ། ལྟ་བ་ངན་པ་ཐམས་ཅད་སྤངས་ཏེ། དེ་ཕྱིན་ཆད་དགེ་བའི་ལས་དང་ཡང་དག་པར་ལྡན་པ་ལེགས་པར་བྱས་པའི་ལས་ཀྱི་མཐའ་དང ། སྨོན་ལམ་དག་མང་བ་ངེས་པའི་ཕུང་པོ་དག་ཏུ་གྱུར་ཏོ། །རིགས་ཀྱི་བུ། དེ་བཞིན་དུ་ངས་ཐབས་ལ་འཇུག་པའི་སྦྱོར་བ་ལ་བརྟུལ་བ་དེས་སེམས་ཅན་རྣམས་ཡོངས་སུ་སྨིན་པར་བྱས་ཤིང་ཕ་རོལ་ཏུ་ཕྱིན་པ་དྲུག་གི་བར་ཡོངས་སུ་རྫོགས་པར་བྱས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་སངས་རྒྱས་སོ། །རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི། དེ་ལྟར་སེམས་ཅན་རྣམས་ལ་གཅེས་སྤྲས་བྱེད་པ་ཡིན་ནོ། །དེ་ལྟར་ཕན་ཡོན་མང་པོ་ཡིན་ཏེ། སེམས་ཅན་ཐམས་ཅད་ལ་ཕན་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། བུད་མེད་སྦྲུམ་མ་ཐམས་ཅད་སྲུང་བར་བྱེད་པ། རབ་ཏུ་ཐར་བར་བྱེད་པ། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པ། ཕུང་པོ་དང ། ཁམས་ཐམས་ཅད་
213b
ཡོངས་སུ་ཤེས་པར་བྱེད་པ། ཆོས་ཐམས་ཅད་རྣམ་པར་འབྱེད་པར་བྱེད་པ། ཐབས་ཐམས་ཅད་ཡང་དག་པར་སྟོན་པར་བྱེད་པ། བྱང་གྲོལ་གྱི་བདེ་བ་ཐམས་ཅད་ཡོངས་སུ་རྟོགས་པར་བྱེད་པ།་སེམས་ཅན་ཐམས་ཅད་རབ་ཏུ་དད་པར་བྱེད་པ། ཆོས་ཐམས་ཅད་ཀྱི་བདེ་བ་ལ་འཇུག་པར་བྱེད་པ། བདུད་དང་ཕས་ཀྱི་རྒོལ་བ་ཐམས་ཅད་ཆོས་དང་མཐུན་པས་ཚར་གཅོད་པར་བྱེད་པ། བདུད་ཀྱི་ཡུལ་ཐམས་ཅད་ངེས་པར་འདུལ་བར་བྱེད་པ་ཡིན་ནོ། །རིགས་ཀྱི་བུ། རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི། བདུད་རྣམས་ཚར་གཅོད་པར་བྱེད་ཅིང་ཉོན་མོངས་པ་རྣམས་ཕམ་པར་བྱེད་པ་ཡིན་ཏེ། ལྷ་རྣམས་དགའ་བར་བྱེད་པ། གནོད་སྦྱིན་རྣམས་ཡང་དག་པར་མགུ་བར་བྱེད་པ། ལྷ་མ་ཡིན་རྣམ་པར་འཇོམས་པར་བྱེད་པ། ནམ་མཁའ་ལྡིང་རྣམས་དངང་བར་བྱེད་པ།་མིའམ་ཅི་རྣམས་དད་པར་བྱེད་པ། ལྟོ་འཕྱེ་ཆེན་པོ་རྣམས་རྒྱབ་ཀྱིས་ཕྱོགས་པར་བྱེད་པ། འཐབ་པ་དང ། འཐབ་མོ་དང ། མུ་གེ་དང ། འཆི་བ་དང ། ནད་དང ། ཕ་རོལ་གྱི་དམག་ཚོགས་དང ། དུས་མ་ཡིན་པའི་རླུང་དང ། ཆར་པ་དང ། ནད་ཐམས་ཅད་རྣམ་པར་ཞི་བར་བྱེད་པ། གྲང་བ་དང ། དྲོ་བ་དང ། ཁ་བ་དང ། ཚ་བ་དང ། རྩུབ་པ་དང ། ཧྲུད་ཧྲུད་པོ་དང ། རེག་པར་དཀའ་བའི་དངོས་པོ་རྣམས་རབ་ཏུ་ཞི་བར་བྱེད་པ། ཆོས་ཐམས་ཅད་ཀྱི་ཆོས་ཀྱི་ཚུལ་འབར་བར་བྱེད་པ། སངས་རྒྱས་ཀྱི་བསྟན་པ་སྟོན་པར་བྱེད་པ། དཀོན་མཆོག་གསུམ་གྱི་གདུང་རྒྱུན་
214a
༄#། །མི་འཆད་པར་བྱེད་པ། འཁོར་བས་སྐྲག་པ་རྣམས་དབུགས་འབྱིན་པར་བྱེད་པ། ཟད་པ་ཤེས་པ་སྐྱེད་པར་བྱེད་པ། མི་སྐྱེ་བ་ཤེས་པ་རང་གི་མངོན་སུམ་དུ་བྱེད་པ།་མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇིག་པར་བྱེད་པ། སྡུག་བསྔལ་གྱི་ཁུར་འདོར་བར་བྱེད་པ་ཡིན་ནོ། །རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ཡིན་ཏེ། ཏདྱ་ཐཱ། མ་ནཱཀྵ། ཨ་བུ་ཀྵ། གྷ་ས་ཀྵ། ཛ་ནེ་ཀྵ། མརྨ་ན་ཀྵ། ཀྵ་བཀྵ། མཎྜ་ཀྵ། ན་ཊ་ཀྵ། ན་ད་ར་ཧུ། བི་ས་ནཱ་ད། ཁ་ག་ནཱ་ད། ཨ་ཏ་ན་ཊ། ཀུ་ན་ཊ། བ་རི་ཀུ་ན་ཊ། ནཱ་ཊ་ནཱ་ཊ།་བ་རི་ཀ་ནཱ་ཊ། ཨུད་ཏ་ར་ནཱ་ཊ། བི་ནཱ་ཊ། ཀུཉྫ་ནཱ་ཊ། ཙ་བ་བ་ར་ནཱ་ཊ། ཁ་གྷ་མ་བྷ་ནཱ་ཊ། པུ་ཀྵ་ར་ནཱ་ཊ། སིདྷ་རུ་པྲ་ནཱ་ཊ། ས་མ་ནཱ་ཊ། ཤི་རི་ཀུ་ས་ཀླཽ་ནཱ་ཊ། ཏ་ལ་མ་རུ་ཏ་ཁ་བ། ཏེ་ཧུ་ཀྵ་བ་ཏི་རཀྵ་དཱ་མ་ར་ཛུ་བ་ཧ། ན་བུ་ཏི་ས་ན་ཏི་ར་ན་ཛ་ག་ཨ་མོ་ཧོ་ར་ག་ཛ་ལ། ཨ་ཏྲི་ནཱ། ཨ་ཏྲི་ནཱ། ར་བ། ཨ་ཏྲི་ནཱཀྵ། ཨ་བ་ཧཱ། མཱརྒ་ཏྲི་ནཱཀྵ། ཨེ་ཥ་ཨེ་བནྟོ་དུཿ ་ཁ་སྱ་སཝཱཧཱ། བཅོམ་ལྡན་འདས་ཀྱིས་བསྟན་པ་འདི་བསྟན་པ་ན་འཁོར་དེར་སྲོག་ཆགས་བྱེ་བ་ཕྲག་དྲུག་ཅུ་ནི། རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །དཀྲིགས་པ་ཕྲག་དྲུག་ཅུ་དག་ཀྱང་སྐྱོན་མེད་པ་ལ་ཞུགས་པར་གྱུར་ཏོ། །རིགས་ཀྱི་བུ། རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་དེ་བཞིན་གཤེགས་པ་ཤཱཀྱ་ཐུབ་པ་ལ་ངས་ཁྱོད་ཀྱི་ལག་ནས་བསྐུར་ཏོ། །དེར་
214b
ཡང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ལ་ང་དད་པ་སྦྱིན་པར་མཛད་དོ། །རིག་པ་ཡོད་པའི་སྦུབས་ཞི་བ་འདི་ལོངས་ལ་སངས་རྒྱས་ཀྱི་ཞིང་མི་མཇེད་དེར་སོང་ཞིག་།ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་གནོད་པ་ཆུང་ངམ། བསྐྱོད་པ་ཡང་ངམ། བདེ་བ་ལ་རེག་པར་གནས་སམ་ཞེས་ཀྱང་ཞུས་ཤིག་།འདི་སྐད་དུ་བྱང་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་བརྒྱད་ཅུའི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྒྲ་ཐམས་ཅད་ཡང་དག་པར་འཕགས་པ་ཞེས་བྱ་བ་ཡོད་དེ། སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས་སངས་རྒྱས་ཀྱི་ཞིང་དེ་ནས་བཅོམ་ལྡན་འདས་ལ་ཡོངས་སུ་ཞུ་བའི་སླད་དུ་བདག་མངགས་པ་ལགས་ན། བཙུན་པ་བཅོམ་ལྡན་འདས། ཅི་སྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་དག་མ་མཆིས་ལགས་སམ། གནོད་པ་དག་ཆུང་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཆོས་ཐོས་པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་
215a
༄#། །སམ།་ཆོས་ཀྱི་གནས་པ་དག་གིས་གནས་པར་བགྱིད་པ་ལགས་སམ། ཁྱེད་ཀྱིས་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང ། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་བུ་ལགས་སམ། འདི་ན་ཐོགས་པ་མ་མཆིས་པ་ཆོས་ཀྱི་འཁོར་ལོ་རབ་ཏུ་བསྐོར་ལགས་སམ། གང་སུ་དག་སངས་རྒྱས་ཀྱི་ཞིང་འདིར་འཁོར་ལོ་བསྐོར་བར་མཛད་པ་དེ་དག་གི་ཆེད་དུ་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་འདིར་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་ལ་དད་པ་སྩོལ་བར་མཛད་ཅིང་དེ་ནས་རིག་པ་ཆེན་པོ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་མཐུ་ཆེ་བ། ཕན་ཡོན་ཆེ་བ་འདི་བསྐུར་ལགས་ཏེ། སེམས་ཅན་ཐམས་ཅད་ལ་ཕན་པར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། ཉོན་མོངས་པ་ཐམས་ཅད་རབ་ཏུ་ཞི་བར་བགྱིད་པ་ཞེས་བྱ་བ་ནས་སྡུག་བསྔལ་གྱི་ཁུར་འདོར་བར་བགྱིད་པ་ཞེས་བྱ་བའི་བར་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་\?\་བསྐུར་ལགས་སོ། །ཞེས་ཀྱང་གསོལ་ཅིག་།དེ་ན་ཐམས་ཅད་དང་ལྡན་པའི་འཁོར་དེ་ངོ་མཚར་ཐོབ་ཅིང་རྨད་དུ་བྱུང་བ་ཐོབ་ནས་འདི་སྐད་ཅེས་གསོལ་ཏོ། །སངས་རྒྱས་
215b
བཅོམ་ལྡན་འདས་རྣམས་ཀྱི་ཆོས་ཐམས་ཅད་ལ་མ་ཐོགས་པའི་ཡེ་ཤེས་དང ། གཟིགས་པ་ནི། ངོ་མཚར་ཏོ། །མཆོག་ཏུ་ངོ་མཚར་ཏོ། །དེ་ལྟ་ལགས་པས་ད་ལྟར་དེ་བཞིན་གཤེགས་པས་བདག་ཅག་ལ་སྔོན་མ་ཐོས་པ་འདི་ལྟར་ཟབ་པའི་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་སེམས་ཅན་ཐམས་ཅད་ལ་ཕན་པར་བྱེད་པ་འདི་ཁོ་ན་བསྟན་ཏོ། །གང་ལ་ཡོན་ཏན་འདི་ལྟ་བུ་གྲངས་མེད་དཔག་ཏུ་མེད་པ་དེ་དག་མཆིས་པ་འདི་ལ་མཁས་པ་བྱང་ཆུབ་ཚོལ་བར་བྱེད་པ་སུ་ཞིག་མངོན་པར་བརྩོན་པར་མི་བགྱིད། དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །སེམས་ཅན་གང་སུ་དག་འཁོར་བས་སྐྲག་ཅིང་བྱད་གྲོལ་གྱི་བདེ་བ་མངོན་པར་འཚལ་བ་ནི། བཅོམ་ལྡན་འདས་ཀྱི་མཚན་ཡོངས་སུ་བསྒྲགས་པ་དང ། རིག་པ་མཆིས་པའི་སྦུབས་ཞི་བའི་གཟུངས་སྔགས་ཀྱི་མིང་བསྒྲགས་པ་ན་དགའ་བ་དང ། མཆོག་ཏུ་དགའ་བ་དང ། གུས་པར་སེམས་ཅན་རྣམས་ཀྱི་རྙེད་པ་ཆེན་པོ་དང ། དགེ་བའི་ཕྱོགས་རྣམ་པར་འཕེལ་བར་འགྱུར་ལགས་སོ། །དེ་ནས་དེ་བཞིན་གཤེགས་པ་དཔལ་མེ་ཏོག་གི་སྙིང་པོས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་དེ་བཞིན་ནོ། །ཁྱོད་ཀྱིས་ཇི་སྐད་སྨྲས་པ་དེ་བཞིན་ཏེ། རིགས་ཀྱི་བུ། ང་བྱང་ཆུབ་སེམས་དཔར་གྱུར་ཏེ་བརྩོན་པ་འདིས་སྤྱད་པ་སྤྱོད་པ་ན་སྨོན་ལམ་འདི་ལྟ་བུ་བཏབ་བོ། །བདག་བྱང་ཆུབ་ཐོབ་ནས་སེམས་ཅན་གང་སུ་དག་ཕྱོགས་བཅུའི་སངས་རྒྱས་ཀྱི་
216a
༄#། །ཞིང་ཐམས་ཅད་ན་སྦྱིན་པ་ལ་བརྩོན་པའི་བསམ་པ་ཅན་ཞེས་བྱ་བ་ནས་ཤེས་རབ་ལ་བརྩོན་པའི་བསམ་པ་ཅན་ཞེས་བྱ་བའི་བར་དག་གིས་བདག་གི་མིང་སྒྲོག་པར་བྱེད་ཅིང་སེམས་ཅན་ཐམས་ཅད་ཀྱིས་སེམས་པར་བྱེད་ན། གལ་ཏེ་དེ་དག་ལ་ལྷ་དང་ལྷ་མ་ཡིན་དུ་བཅས་པའི་འཇིག་རྟེན་ན་སེམས་ཅན་ལ་ལ་ཕ་རོལ་ཏུ་ཕྱིན་པ་དེ་དང་དེ་དག་གི་བར་ཆད་བྱེད་པར་ནུས་པ་ཞིག་ཡོད་ན་སེམས་ཅན་དེ་དག་གི་དགེ་བའི་ཕྱོགས་འཕེལ་བ་བརྒྱ་སྟོང་དུ་མར་གྱུར་ཅིག་།སྔོན་གྱི་ལས་ཀྱི་འབྲས་བུའི་རྒྱུ་ནི། མ་གཏོགས་སོ། །བདག་ཀྱང་རེ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།གང་ཡང་བུད་མེད་བུ་ལ་མངོན་པར་དགའ་བ་ཞེས་བྱ་བ་ནས་བུའི་ཁུར་གྱིས་སྐྱོ་བ་ཞེས་བྱ་བའི་བར་དང ། གང་བུད་མེད་སྦྲུམ་པ་ཞེས་བྱ་བའི་བར་བདག་ལ་ཕྱག་འཚལ་བར་བྱེད་ཅིང་སེམས་ཅན་ཐམས་ཅད་ཀྱིས་དགའ་བ་དང ། གུས་པ་དང ། དད་པས་བདག་གིས་མིང་ཡོངས་སུ་སྒྲོག་པར་བྱེད་ལ། གལ་ཏ་མའམ་མངལ་ན་ཡོད་པ་དེ་ལ་མིའམ་མི་མ་ཡིན་པ་སྡང་བའི་སེམས་ཀྱིས་རྣམ་པར་མཐོ་འཚམ་པར་བྱེད་དམ། སྨན་དང་གསང་སྔགས་ཀྱི་སྦྱོར་བས་ཀྱང་རུང་སྟེ། ལུས་ཀུན་ཏུ་འཁྲུག་པར་བྱེད་དམ། སེམས་ཀུན་ཏུ་འཁྲུག་པར་བྱེད་དམ་ཞེས་བྱ་བ་ནས་བཙས་པ་ཙམ་གྱི་བར་ལའང་ཐ་ན་ཡུད་ཙམ་གཅིག་ཙམ་ཡང་
216b
རྣམ་པར་མཐོ་འཚམ་པར་བྱེད་ན། བདག་རེ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚན་རྒྱ་བར་མ་གྱུར་ཅིག་།ཅེས་སྔོན་ང་བྱང་ཆུབ་སེམས་དཔར་གྱུར་པའི་སྨོན་ལམ་དེ་ལྟ་བུ་བཏབ་བོ། །དེ་བཞིན་དུ་ད་ལྟར་ཡང་སེམས་ཅན་གང་དག་སངས་རྒྱས་ཀྱི་ཞིང་ཐམས་ཅད་ན་སྡུག་བསྔལ་དེ་ལྟ་བུས་གཟིར་བ་དག་ཀྱང་ཞེས་བྱ་བ་ནས་ཇི་ལྟར་སྔར་བསྟན་པ་བཞིན་སེམས་ཅན་ཐམས་ཅད་ཀྱིས་དགའ་བ་དང ། གུས་པ་དང ། དང་པས་བདག་གིས་མིང་ཡོངས་སུ་སྒྲོག་པར་བྱེད་པ་ཐམས་ཅད་སྡུག་བསྔལ་དེ་དག་ལས་ཡོངས་སུ་གྲོལ་བར་འགྱུར་ཏེ་གཞན་དུ་མ་ཡིན་ནོ། །སྦྱངས་པ་མ་ཡིན་ན། སྔོན་གྱི་ལས་ཀྱི་འབྲས་བུའི་རྒྱུ་ནི། མ་གཏོགས་སོ། །འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ།་བམ་པོ་ལྔ་པ། དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སངས་རྒྱས་ཀྱི་ཞིང་མི་མཇེད་ནི། ངོ་མཚར་ལགས་ཏེ། དེ་ན་སེམས་ཅན་རྣམས་མཆོག་ཏུ་སྡང་བ། གཟུ་ལུམས་ཅན། རྩུབ་པ། ཕྲག་དོག་དང་ལྡན་པ། སྙིང་བརྩེབ་མ་མཆིས་པ། བགྱིས་པ་མི་གཟོ་བ། ཚིག་རྩུབ་པར་སྨྲ་བ། ལོག་པར་ལྟ་བ་དག་ལགས་པས་དེར་ཁ་ཅིག་གིས་བདག་ལ་རྣམ་པར་མཐོ་བརྩམས་ན་མི་རུང་སྟེ། བདག་མཆིས་པས་ཅི་ལའང་མི་སྨན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། འདི་ནི། གནས་མ་ཡིན་ཞིང་གོ་སྐབས་
217a
༄#། །མེད་དེ།་སུས་དམིགས་པ་མེད་པའི་ཚངས་པའི་གནས་པ་ལེགས་པར་བསྒོམས་ཤིང་ལེགས་པར་ཡིད་ལ་བྱས་པར་གྱུར་པ་དེ་ལ་ནི། བདུད་བྱེ་བས་ཀྱང་རྣམ་པར་མཐོ་འཚམ་པའམ། བར་ཆད་བྱེད་པར་ནུས་པ་འདི་ནི། གནས་མེད་དོ། །རིགས་ཀྱི་བུ། ཁྱོད་ཀྱིས་ཡུན་རིང་པོ་ནས་དམིགས་པ་མེད་པའི་ཚངས་པའི་གནས་པ་ཤིན་ཏུ་བསྒོམས་ཤིང་ལེགས་པར་ཡིད་ལ་བྱས་ཟིན་གྱི། མ་འཇིགས་ཤིག་།རིགས་ཀྱི་བུ། ཁྱོད་ལ་གསང་སྔགས་གང་དག་གིས་སྡང་བ་ཐམས་ཅད་དད་པར་འགྱུར། རྨོངས་པར་འགྱུར་བ་དང ། གང་གིས་བཟོད་པ་དང ། དྲན་པ་དང ། རབ་ཏུ་དང་བ་ཐོབ་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་མཐུན་པར་བྱམས་པ་ཆེན་པོ་སྦྱིན་པར་མཛད་དོ། །ཏདྱ་ཐཱ། བོ་བྲི་ཧ། བུ་བུ་ལ། ཨི་ལ་བར། ཨི་ལ་ས་ཧ། ཧ་ཊྱ་ཊྱ་ག་ག་ནཱཀྵ། ཤ་མ་ཤ་མ། མི་ཏྲ་མི་ཏྲ། ཙཀྲ་བརྟི་ཏི་ལེ། སཱ་ག་ར་ཏི་ལེ། དུརྦྷ་ལི། ཧི་ཧི་ལེ། ཧ་བ་ཧེ་ན་རཱ་ཛ་ནེ། ཡ་པ་ན་མི་ཏྲེ། ཀྵཱནྟི་མི་ཏྲེ།་མི་ཏྲ་རླ་མེ། མི་ཏྲ་ཁ་གྷ། སརྦ་སཏྭ་ཛ་མི་ཏྲེ། སརྦ་ཀྲ་མ་མི་ཏྲེ། མ་ན་བརྟ་མི་ཏྲེ། དྷི་ཏི་ཤ་ར་མི་ཏྲེ་སཝཱཧཱ། རིགས་ཀྱི་བུ། སྡང་བ་ཞི་བར་བྱེད་པ་དང ། རྨོངས་པར་བྱེད་པའི་གསང་སྔགས་ཀྱི་གཟུངས་སྔགས་འདིས་ཙམྤ་ཀའི་འབྲུ་མར་ལ་ལན་བདུན་བཟླས་བརྗོད་བྱས་པས་ལག་པ་གཉིས་བསྐུས་ན། སྡང་བ་ཐམས་ཅད་དད་པར་བྱེད་པ། རྨོངས་པར་བྱེད་ཅིང་སྡང་བའི་
217b
སྤྲུལ་དག་དང ། སྡང་བའི་གནོད་སྦྱིན་དང ། གྲུལ་བུམ་དང ། སྲུལ་པོ་དང ། བདུད་བྱེ་བ་བརྒྱ་སྟོང་ཡང་རུང་སྟེ། སྡང་བའི་སེམས་དང་ལྡན་པའི་སེམས་ཅན་དེ་དག་གིས་ཅིའང་བྱེད་པར་མི་ནུས་སོ། །གལ་ཏེ་སྡང་བའི་སེམས་དང་ལྡན་པ་ཐམས་ཅད་ཀྱིས་གླིང་བཞི་པ་གང་བར་གྱུར་ཀྱང་སྐྱོར་ཆུ་གཅིག་གིས་ཐམས་ཅད་དེའི་མདོ་ཁོ་ན་ལ་མེད་པར་འགྱུར་རོ། །གལ་ཏེ་ཆུ་རྙོག་པ་ཅན་གྱིས་རྒྱ་མཚོ་བཞི་ཡོངས་སུ་གང་བར་གྱུར་ཀྱང་རུང ། སྐྱོར་ཆུ་གཅིག་ཁོ་ནས་རབ་ཏུ་དང་བར་བྱེད་དེ། འདི་ལ་ཐེ་ཚོམ་མེད་ཀྱི། ལོངས་ལ་འཇིག་རྟེན་གྱི་ཁམས་མི་མཇེད་དུ་སོང་ཞིག་།ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པས་ཚིག་མཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང ། ཕྱག་བགྱི་པ་དང ། བསྙེན་བཀུར་བགྱི་བ་དང ། འདུས་པ་ཆེན་པོ་བལྟ་བ་དང ། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་པའི་གཟུངས་སྔགས་དེའང་མཉན་པར་འཚལ་ལགས་ན། བཙུན་པ་བཅོམ་ལྡན་འདས། གལ་ཏེ་དེར་བདག་ཀྱང་མཆིར་གནང་བ་ལྟ་ན། སངས་རྒྱས་ཀྱི་ཞིང་མི་མཇེད་དུ་བདག་ཅག་མཆི་ལགས་སོ། ། དེ་ནས་དེ་དག་ལ་བཅོམ་ལྡན་འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་།ཁྱེད་ཐམས་ཅད་སོ་སོ་ནས་གླིང་བཞི་པའི་འཁོར་ལོས་བསྒྱུར་
218a
༄#། །བའི་ཆ་བྱད་དང ། རྟགས་དང ། དབྱིབས་དང ། ཡོ་བྱད་དང ། སྤྱོད་ལམ་གྱིས་ལྷན་ཅིག་མཐུན་པར་དེངས་ཤིག་།དེ་ནས་བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུ་དེ་དག་ཐམས་ཅད་གླིང་བཞི་པའི་འཁོར་ལོས་བསྒྱུར་བའི་ཆ་བྱང་དང ། རྟགས་དང ། དབྱིབས་དང ། ཡོ་བྱད་དང ། སྤྱོད་ལམ་མངོན་པར་སྤྲུལ་ནས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་སོགས་པ་ཐམས་ཅད་དེ་བཞིན་གཤེགས་པ་དཔལ་མེ་ཏོག་གི་སྙིང་པོའི་ཞབས་གཉིས་ལ་མགོ་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ནམ་མཁའ་ལ་འཁོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རེ་རེས་ཀྱང་རིན་པོ་ཆེ་ལས་བྱས་པའི་པདྨ་འདབ་མ་སྟོང་པ་བདུན་བདུན་དང ། དཔུང་གི་ཚོགས་ཡན་ལག་བཞི་པའང་མངོན་པར་སྤྲུལ་ཏོ། །སྤྱོད་ལམ་དེ་ལྟ་བུས་དེ་ནས་ཆས་ཏེ། དེ་དག་ཐམས་ཅད་སྐད་ཅིག་ཐང་གཅིག་གཅིག་གིས་སངས་རྒྱས་ཀྱི་ཞིང་མི་མཇེད་འདིར་འཁོད་དེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང ། བྱང་ཆུབ་སེམས་དཔའ་རྣམས་ལ་མཆོད་པའི་ལས་བྱ་བའི་ཕྱིར་སངས་རྒྱས་ཀྱི་ཞིང་མི་མཇེད་ཐམས་ཅད་དུ་ཁ་ཅིག་གིས་ནི། གསེར་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང ། བྱང་ཆུབ་སེམས་དཔའ་རྣམས་ལ་མཆོད་པའི་ལས་བྱ་བའི་ཕྱིར་ཁ་ཅིག་གིས་ནི། དངུལ་གྱི་ཕྱེ་མའི་ཆར་མངོན་པར་རབ་
218b
ཏུ་ཕབ་བོ། །ཁ་ཅིག་གིས་ནི། སྤོས་ཀྱི་ཕྱེ་མའི་ཆར་མངོན་པར་རབ་ཏུ་ཕབ་བོ། །ཁ་ཅིག་གིས་ནི། མུ་ཏིག་གི་ཆར་མངོན་པར་རབ་ཏུ་ཕབ་བོ། །ཁ་ཅིག་གིས་ནི། གསེར་སྐུ་དག་མངོན་པར་རབ་ཏུ་ཕབ་བོ། །ཁ་ཅིག་གིས་ནི། མུ་ཏིག་གི་དོ་ཤལ་དག་མངོན་པར་རབ་ཏུ་ཕབ་བོ། །ཁ་ཅིག་གིས་ནི། དཔུང་རྒྱན་གྱི་རྒྱན་དག་མངོན་པར་རབ་ཏུ་ཕབ་བོ། །ཁ་ཅིག་གིས་ནི། རས་དང ། རས་བཅོས་བུ་དང ། གདུགས་དང ། རྒྱལ་མཚན་དང ། བ་དན་གྱི་ཆར་མངོན་པར་རབ་ཏུ་ཕབ་སྟེ། དེ་དག་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདི་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་པར་གྱུར་ཏོ། །ཐེག་པ་ཆེན་པོ་འདུས་པ་ཆེན་པོའི་མདོ་ཉི་མའི་སྙིང་པོའི་ལེའུ་ལས། ཕོ་ཉའི་ལེའུ་སྟེ་གཉིས་པ་རྫོགས་སོ།། །།རྒྱལ་པོ་གཟུགས་ཅན་སྙིང་པོས་སྔོན་མ་མཐོང་བ་ཚངས་པ་ཆེན་པོ་དང ། བརྒྱ་བྱིན་དང ། སྲེད་མེད་ཀྱི་བུ་དང ། གླིང་བཞི་པའི་འཁོར་ལོས་བསྒྱུར་བ་གྲངས་མེད་དཔག་ཏུ་མེད་པ་མཐོང་ནས་མཆོག་ཏུ་ངོ་མཚར་དུ་གྱུར་ཏེ་སྟན་ལས་ལངས་ནས་ཧ་ཅང་ཡང་ཐག་མི་རིང་བར་འདུག་གོ་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཕོ་ཉ་བཞི་པོ་དེ་དག་འཁོར་དང་བཅས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་
219a
༄#། །ཀྱི་སྙིང་པོས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་མེ་ཏོག་ཙམྤ་ཀའི་ཕྲེང་བ་དག་གཏོར་ཏེ། དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ། །རྐང་གཉིས་དམ་པ་འགྲོ་བའི་སྣང་བ་འཛིན། །ལྟ་བ་ཉམས་པའི་འགྲོ་བའི་ལམ་སྩལ་པ། །མཉམ་ཉིད་ལྡན་པ་འགྲོ་ལ་ཕན་མཛད་ཁྱོད། །བདུད་དང་ཀླུ་རྣམས་མྱུར་དུ་འདུལ་མཛད་ཁྱོད། །གདུལ་དཀའ་འགྲོ་བ་ཉོན་མོངས་ཐར་མཛད་ཁྱོད། །ཆོས་འདིར་སྣང་བ་ཡུན་རིང་འབར་མཛད་ཁྱོད། །བསམ་གཏན་སྒོ་འདི་དག་གིས་སྐྱེས་མཆོག་ལྡན། །ཞིང་མང་ཐམས་ཅད་ཤིན་ཏུ་མཛེས་པར་མཛད། །རྒྱལ་བ་སྐྱེས་མཆོག་སྐྱེ་བོ་མཁས་རྒུ་ལ། །རྒྱང་རིང་ནས་ནི་ཞིང་འདི་བརྗོད་པ་མཛད། །འགྲོ་བའི་ཆོས་ཀྱི་དུས་འདི་དཀའ་བ་སྟེ། །དེ་མཐོང་བདག་འདིར་ཆོས་ཆེད་ཚོགས་སུ་མཆིས། །འགྲོ་བ་མིར་སྐྱེ་བ་ནི་རྙེད་པར་དཀའ། །ཤིན་ཏུ་རིང་ནས་མིར་སྐྱེ་རྙེད་ནས་ཀྱང ། །ཉོན་མོངས་ཆེན་པོས་ཟིན་གྱུར་ཐུབ་ཁྱོད་ནི། །རབ་མྱུར་ཉོན་མོངས་དྲ་བ་གཅོད་མཛད་ལགས། །སྡུག་བསྔལ་མཚོ་དང་ཉོན་མོངས་ཀླུང་ལྷུང་བ། །ཁྱོད་ཀྱིས་གླང་ཆེན་ལྟ་བུར་འགྲོ་བ་བསྒྲལ། །རྒྱལ་བས་ཕན་ཚུན་བདག་ཅག་ཕོ་ཉར་མངགས། །ཁྱོད་ཀྱིས་ཆོས་ཀྱི་གཏེར་ལ་ཡི་རང་མཛད། །བཙུན་པ་བཅོམ་ལྡན་འདས། ཤར་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་དཔག་ཏུ་མ་མཆིས་པའི་བྱེ་མ་སྙེད་འདས་པ་དེ་ན་
219b
འཇིག་རྟེན་གྱི་ཁམས་མ་དྲོས་པ་ཞེས་བགྱི་བ་མཆིས་སོ། །སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙམ་པ་ཀའི་མདོག་ཅེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེ་བདག་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་རམ། སྟོབས་དང་བདེ་བ་ལ་རེག་པ་ལ་གནས་སམ་ཞེས་ཀྱང་ཞུ་བར་མཛད་ལགས་ན། བཅོམ་ལྡན་འདས། ཅི་སྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་མ་མཆིས་ལགས་སམ། གནོད་པ་ཆུང་ལགས་སམ། ཆོས་ཉན་པར་འཚལ་བ་དག་ལགས་སམ། ཇི་ལྟར་ཆོས་ཐོས་པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་སམ། ཆོས་ཀྱིས་གནས་པས་གནས་པར་བགྱིད་པ་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང་ཀླུའི་ཡུལ་བཅོམ་ལགས་སམ།་ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་འཁོར་ལོ་བསྐོར་ལགས་སམ། སངས་རྒྱས་ཀྱི་ཡུལ་འདི་ན་གང་སུ་དག་འཁོར་ལོ་
220a
༄#། །བསྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་ཙམྤ་ཀའི་མདོག་དེ་ཁྱོད་དང་ཉི་མའི་སྙིང་པོ་ཆོས་ཀྱིས་གནས་པ་ཀླུའི་ཡུལ་འཇིག་པའི་འོད་ཟེར་གྱི་ལེའུ་གཟུངས་སྔགས་འདི་ལ་དད་པ་སྦྱིན་པར་མཛད་ལགས་སོ། །དེ་ནས་བདེན་པ་དང་རྗེས་སུ་མཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཟད་པར་བགྱིད་པ། གཟུགས་མེད་པའི་འདོད་ཆགས་ཐམས་ཅད་ཟད་པར་བགྱིད་པ། ང་རྒྱལ་དང ། ལྷག་པའི་ང་རྒྱལ་དང ། ངའོ་སྙམ་པའི་ང་རྒྱལ་ཐམས་ཅད་ཟད་པར་བགྱིད་པ་འདིའང་བསྐུར་ལགས་སོ། །ཞེས་བྱ་བ་ཇི་ལྟར་སྔར་བཤད་པ་བཞིན་ཏེ། བདེན་པ་དང་རྗེས་སུ་མཐུན་པའི་བཟོད་པ་འདི་ནི། བདུད་རྣམས་ཚར་གཅོད་པ། ཀླུ་རྣམས་ཕམ་པར་བགྱིད་པ། ལྷ་རྣམས་དགའ་བར་བགྱིད་པ། གནོད་སྦྱིན་རྣམས་ཚིམ་པར་བགྱིད་པ། ལྷ་མ་ཡིན་རྣམས་རྣམ་པར་འཇོམས་པར་བགྱིད་པ། རྗེའུ་རིགས་རྣམས་དགའ་བར་བགྱིད་པ། དམངས་རིགས་རྣམས་མཆོག་ཏུ་དགའ་བར་བགྱིད་པ། བུད་མེད་འདོད་ཆགས་དང་བྲལ་བར་བགྱིད་པ།་མང་དུ་ཐོས་པ་རྣམས་སྐྱོ་བར་བགྱིད་པ། རྣལ་འབྱོར་སྤྱོད་པ་རྣམས་མངོན་པར་དགའ་བར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། འཐབ་པ་དང ། འཐབ་མོ་དང ། མུ་
220b
གེ་དང ། དུས་མ་ཡིན་པའི་ནད་དང ། ཕ་རོལ་གྱི་དམག་ཚོགས་དང ། རླུང་དང ། ཆར་བ་དང ། ཆུ་བོ་དང ། གྲང་བ་དང ། དྲོ་བ་ཐམས་ཅད་རྣམ་པར་ཞི་བར་བགྱིད་པ། ཁ་བ་དང ། ཚ་བ་དང ། རོ་མི་བྲོ་བ་དང ། རྩུབ་པ་དང ། ཧྲུད་ཧྲུད་པོ་དང ། རེག་པར་དཀའ་བའི་དངོས་པོ་རྣམས་རབ་ཏུ་ཞི་བར་བགྱིད་པ། ཆོས་ཀྱི་ཚུལ་འབར་བར་བགྱིད་པ། ཆོས་ཀྱི་ཚུལ་རྒྱུན་མི་འཆད་པར་བགྱིད་པ། སངས་རྒྱས་ཀྱི་བསྟན་པ་སྟོན་པར་བགྱིད་པ། འཁོར་བས་སྐྲག་པ་རྣམས་དབུགས་འབྱིན་པར་བགྱིད་པ། ཟད་པ་ཤེས་པ་སྐྱེད་པར་བགྱིད་པ། མི་སྐྱེ་བ་ཤེས་པ་རྟོགས་པར་བགྱིད་པ། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བགྱིད་པ། སྡུག་བསྔལ་གྱི་ཁུར་འདོར་བར་བགྱིད་པ། སྲེད་པའི་ཀླུང་སྐེམ་པར་བགྱིད་པ་འདི་ཡང་བསྐུར་ལགས་ཏེ། ཏདྱ་ཐཱ། བཱ་ཡེ་བ་ཡ་པ་རི་བཱ་རེ། བ་ཧེ་བ་ཧ་པ་རི་བཱ་རེ། པྲྀ་ཐ་བི་པ་རི་བཱ་རེ། ཨ་བེ་ཨ་བ་པ་རི་བཱ་རེ། ཏེ་ཛེ་ཏེ་ཛ་པ་རི་བཱ་རེ། མ་ལེ་མ་ལ་པ་རི་བཱ་རེ། ཁ་གྷེ་ཁ་གྷ་པ་རི་བཱ་རེ། ཨཱ་ལོ་ཀེ་ཨཱ་ལོ་ཀ་པ་རི་བཱ་རེ། སྠ་མེ་སྠ་མ་པ་རི་བཱ་རེ། རཱ་ཛེ་རཱ་ཛ་པ་རི་བཱ་རེ། སི་ལི་སིལ་པ་རི་བཱ་རེ། ག་མེ་ག་མ་པ་རི་བཱ་རེ། ཨཱ་བོ་ཙ་ཨཱ་བོ་ཙ་པ་རི་བཱ་རེ། མ་ལ་མ་ལ་མ་ལ་ལ་མེ་ལ་མ། རཱ་ལ་རཱ་ལ་ལ་མ། བིདྱཱ་ཛྙཱ་ན་མ་བྷུ་ཏཾ་ག་མེ།་བྷུ་ཏངྒ་མ་པ་རི་བཱ་རེ། ཙཀྵུ་གྲ་ཧེ། ཙཀྵུ་གྲ་ཧ་པ་རི་བཱ་རེ། ཤོ་ཏྲ་གྲ་ཧེ། ཤོ་ཏྲ་གྲ་ཧ་པ་རི་བཱ་རེ། གྷྲཱ་ཎ་གྲ་ཧེ། གྷྲཱ་ཎ་གྲ་ཧ་པ་རི་བཱ་རེ། ཛི་ཧཝ་གྲ་ཧེ། ཛི་ཧཝ་གྲ་ཧཱ་\?\་པ་རི་བཱ་རེ། ཀཱ་ཡ་གྲ་ཧེ། ཀཱ་
221a
༄#། །ཡ་གྲ་ཧ་པ་རི་བཱ་རེ། མ་ན་གྲ་ཧེ། མ་ན་གྲ་ཧ་པ་རི་བཱ་རེ། སྤ་ཪྴ་གྲ་ཧེ། སྤཪྴ་གྲ་ཧ་པ་རི་བཱ་རེ། བེ་ད་ན་གྲ་ཧེ། བེ་ད་ན་གྲ་ཧ་པཱ་རི་བཱ་རེ། ཏྲིཥྞཱ་གྲ་ཧེ། ཏི་ཥྞཱ་གྲ་ཧ་པ་རི་བཱ་རེ།་ཨུ་བཱ་དཱ་ན་གྲ་ཧེ། ཨུ་པཱ་དཱ་ན་གྲ་ཧ་པ་རི་བཱ་རེ། བྷཱ་བ་གྲ་ཧེ། བྷཱ་བ་གྲ་ཧཱ་པ་རི་བཱ་རེ། ཛཱ་ཏི་གྲ་ཧེ། ཛ་ཏི་གྲ་ཧ་པ་རི་བཱ་རེ། ཛ་ར་མ་ར་ཎ་གྲ་ཧེ། ཛ་ར་མ་ར་ཎ་གྲ་ཧཱ་པ་རི་བཱ་རེ། དུཿ ་ཁ་སནྟ་པཱ་གྲ་ཧེ། དུཿ ་ཁསནྟ་པཱ་གྲ་ཧ་པ་རི་བཱ་རེ། ཨཱ་རཱ་པཱ་རཱ་དྷྭ་ཛེ་གྲ་ཧེ། ཨཱ་རཱ་པཱ་རཱ་དྷྭ་ཛ་གྲ་ཧ་པ་རི་བཱ་རེ། ཨཱ་རཱ་པཱ་རཱ་དྭི་ཛ་གྲ་ཧེ། ཨཱ་རཱ་པཱ་རཱ་དྭི་ཛ་གྲ་ཧཱ་པ་རི་བཱ་རེ། ཨ་བརྟ་བི་བརྟ་སྱ་ཨ་བ་ར་མུ་པ་མཱ་སཝ་སྱ། བ་ག་པི་ནི་བརྟ། ཨཱརྱ་རསྨི་ས་མ་བེ་ག་ཤཱནྟི་སཝཱཧཱ། བཙུན་པ་བཅོམ་ལྡན་འདས། དེ་བཞིན་གཤེགས་པ་ཙམྤ་ཀའི་མདོག་དེས་བདེན་པ་དང་རྗེས་སུ་མཐུན་པའི་བཟོད་པ་བསྐུར་བ་ནི། འདི་ལགས་སོ། །བཅོམ་ལྡན་འདས་ཀྱིས་ཀྱང་ལེགས་སོ། །ཞེས་བྱ་བ་གནང་ངོ ། །སངས་རྒྱས་ཀྱི་ཞིང་མི་མཇེད་དུ་ཐམས་ཅད་དང་ལྡན་པའི་འཁོར་ལྷགས་པས་ཀྱང་ལེགས་སོ། །ཞེས་བྱ་བ་བྱིན་ཏེ། བསམ་གཏན་ལ་སྙོམས་པར་ཞུགས་པ་དག་ནི། མ་གཏོགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། འདིར་ང་སྟན་འདི་ཉིད་ལ་བཞུགས་བཞིན་སེམས་ཅན་རྣམས་ལ་དོན་དང་བཅས་པ། ཚིག་འབྲུ་དང་བཅས་པ། ལྷག་ཆད་མེད་པའི་བདེན་པ་དང་རྗེས་སུ་
221b
མཐུན་པའི་བཟོད་པ་རྒྱ་ཆེར་སྟོན་པར་མཛད་དོ། །རིགས་ཀྱི་བུ། དེ་བཞིན་གཤེགས་པ་ཙམྤ་ཀའི་མདོག་གིས་གང་ཁྱོད་འདིར་འོང་བའི་ཚེ་བསྲུང་བའི་ཕྱིར་བྱིན་པ་ལུས་ཀྱི་ཁྱད་པར་ཐམས་ཅད་སྒྲུབ་པ་ཞེས་བྱ་བ་ནས་ཤིན་ཏུ་ཡོངས་སུ་མྱ་ངན་ལས་འདས་པ་སྒྲུབ་པ་ཞེས་བྱ་བའི་བར་ཉི་མའི་སྤྱན་པདྨའི་སྦུ་གུའི་གཟུངས་སྔགས་དེ་ཁྱོད་ཀྱིས་ཀྱང་སྟོན་ཅིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་འདི་སྐད་ཅེས་གསོལ་ཏོ། །སྱཱད་ཡ་ཐེ་ད་ན། སིདྡྷ་མ་ཏེ། བི་ལོ་ཀ་མ་ཏེ། ཨ་ལེ་གེ་ཏ་རི་ཤེ་།རུ་ཙེ་སུ་རུ་ཙེ། བུདྡྷེ། བི་བུདྡྷེ། མཧཱ་བུདྡྷེ། ཨུན་མ་ཏེ། ཨུན་མད་ཏ་པྲ་ཏི་ཥེ་དྷ་ནེ། ར་ག་དྷུ་པ་པྲ་ཏི་ཥེ་དྷ་ནེ། བིནྡུ་བིནྡུ་མ་ཏེ། ཙི་ཏ་ཙི་ཏ་བ་ཏི་ཥེ་དྷ་ནེ། ཨརྐེ་ཙནྡྲ་ཨརྡྷེ། ཧ་ཏ་ཙི་ཏི། ཧ་ཏ་ནིརྨི། ཧ་ཏ་ཀྵ་མ་བེ་གེ་།ཧ་ཏ་པཽ་ན་བྷ་བི་ར་ཛེ། ཧ་ཏ་ཙཀྵུ་ས་མ་ཏེ། ཧ་ཏ་བི་མ་ཏ་མུ་དྲེ། ཧ་ཏ་ཡཱ་གྷེ། ཧ་ཏ་ཡཱ་གྷེ། ཧ་ཏ་ས་མུ་དྲ་ཛ་བེ། ཧ་ཏ་བི་མ་ན་རཱ་ཛེ། ཧ་ཏ་ཧི་ཏེ། ཧ་ཏ་ཙི་ཏ་ཊེ། ཧ་ཏ་དྷརྨ་རཱ་ཛོ། ཧ་ཏ་བ་ཧུ་རཱ་ཛེ། ཧ་ཏ་བརྫ་མ་ཏི། ཧ་ཏ་ཨུ་པ་ག་མ་ཏེ། ཧ་ཏ་རོ་པ་རསྨི། ཧ་ཏ་དྷརྨ་སིདྡྷི། ཧ་ཏ་སརྦོ་ན་མ་ད། ཛྙཱ་ཛྙཱ་ཛྙཱ། བི་ཛྙཱ་ཛྙཱ་ཛྙཱ། སརྦ་མཱརྒ་ཛྙཱ་ཛྙཱ། ཨེ་ཥོ་ན་ད་སཾ་ས་ར་དུཿ ་ཁེ་སཝཱཧཱ། བཙུན་པ་བཅོམ་ལྡན་འདས། དེ་བཞིན་གཤེགས་པ་ཙམྤ་ཀའི་མདོག་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་ཉི་མའི་སྤྱན་པདྨའི་གཟུངས་སྔགས་སྩལ་པ་ནི། འདི་ལགས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཚེ་དང་ལྡན་པ་སྙན་པ་ལ་བཀའ་སྩལ་པ། སྙན་པ། ཁྱོད་ཀྱི་
222a
༄#། །ཉི་མའི་སྙིང་པོའི་སྤྱན་པདྨའི་གཟུངས་སྔགས་འདི་ཟུངས་ཤིག་།སྙན་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། །དེ་བས་ཀྱང་ཉི་མའི་སྤྱན་པདྨའི་གཟུངས་སྔགས་འདི་ཆེས་རྙེད་པར་དཀའོ། །རིགས་ཀྱི་བུ། དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་ཀྱིས་ཀྱང་རུང ། གང་གིས་ཀྱང་རིའི་རྒྱལ་པོ་རི་རབ་བམ། རྒྱ་མཚོ་ཆེན་པོའི་ཡོན་ཏན་དང ། ཕན་ཡོན་ནི། བརྗོད་པར་ནུས་སོ། །ཉི་མའི་སྤྱན་པདྨའི་གཟུངས་སྔགས་འདིའི་ཡོན་ཏན་དང ། ཕན་ཡོན་ནི། བསྐལ་པའམ། བསྐལ་པ་ལས་ལྷག་པར་ཡང་རུང་སྟེ། བརྗོད་པར་མི་ནུས་སོ། །ཉི་མའི་སྤྱན་པདྨའི་གཟུངས་སྔགས་འདི་ནི། དེ་ལྟར་ཟབ་པ་ཡིན་ནོ། །རིགས་ཀྱི་བུ། ཁྱོད་ཀྱིས་ཉི་མའི་སྤྱན་པདྨའི་གཟུངས་སྔགས་འདི་ཟུངས་ཤིག་།ཀུན་ཆུབ་པར་གྱིས་ཤིག་།འཁོར་བཞི་པོ་དེ་དག་ལའང་རྒྱས་པར་ཡང་དག་པར་རབ་ཏུ་སྟོན་ཅིག་དང ། དེར་སེམས་ཅན་རྣམས་འདོད་པའི་འདོད་ཆགས་ཐམས་ཅད་སྤོང་བར་འགྱུར་རོ། །ཞེས་བྱ་བ་ནས་ཟག་པ་ཐམས་ཅད་ཟད་པ་དང ། བྱང་གྲོལ་གྱི་བདེ་བ་དང་ལྡན་པའི་བར་དུའང་འགྱུར་རོ། །དེ་ནས་དེའི་ཚེ་བྱང་ཆུབ་སེམས་དཔའ་སྤོས་ཀྱི་གླང་པོ་ཆེས་འདི་སྐད་ཅེས་གསོལ་ཏོ། །ཤིང་གི་རྒྱལ་པོའི་དྲུང་དུ་བདུད་ནི་གཅིག་པུ་ཁྱོད་ཀྱིས་བཅོམ། །བྱང་ཆུབ་རབ་མཆོག་དམ་པ་ཡང་ནི་གཅིག་པུས་
222b
བརྙེས་པ་ལགས། །ལྷ་དང་མི་དང་གནོད་སྦྱིན་གཅིག་པུ་ཁྱོད་ཀྱིས་དབང་དུ་མཛད། །རྒྱལ་བ་ཉི་མ་རབ་གྲོལ་ཡེ་ཤེས་མཆོག་གི་འོད་ཟེར་ལགས། །འདི་ན་མུ་སྟེགས་གཞན་ནི་གཅིག་པུས་འོད་དང་བྲལ་མཛད་པ། །འཇིག་རྟེན་ཀུན་ན་སྲིན་བུ་མེ་ཁྱེར་དག་ལ་ཉི་ལྟར་མཛེས། །ཐུབ་པ་འདུས་ན་སེམས་ཅན་བསྒྲལ་བའི་དོན་ཀྱང་མཛད་ལགས་ཏེ། །དཀོན་མཆོག་གསུམ་གྱི་གདུང་དང་ཆོས་ཚུལ་ཡུན་རིང་གནས་པར་མཛད། །ཁྱོད་གཅིག་བུ་ལ་མཆོད་ཕྱིར་བྱང་ཆུབ་སེམས་དཔའ་རྣམས་ལྷགས་པ། །དགེ་དང་བྱང་ཆུབ་ཡོངས་སུ་བཙལ་ཕྱིར་ཆོས་དོན་གཉེར་བ་ལགས། །རྒྱལ་བ་ཁྱོད་ནི་སྡུག་བསྔལ་ཐམས་ཅད་གཅོད་པའི་ཆོས་སྟོན་པ། །ཁྱོད་ནི་ཡེ་ཤེས་བྱང་ཆུབ་སྤྱོད་པ་རབ་མཆོག་སྟོན་པར་མཛད། །གཅིག་པུས་ཞི་འགྱུར་བདུད་རྩིས་སེམས་ཅན་རྣམས་ཀྱང་ཞི་མཛད་པ། །ཡང་སྲིད་མ་མཆིས་མཛད་སླད་སྲོག་ཆགས་ཁྲག་ཁྲིག་སྒྲོལ་བ་ཁྱོད། །ཟག་པ་ཟད་ཅིང་ལྟ་དང་བྲལ་བ་ཉོན་མོངས་སྤུངས་གྱུར་པ། །གང་ན་མྱ་ངན་བྱེད་མེད་ཞི་བའི་གྲོང་ཁྱེར་གཤེགས་པ་ཁྱོད། །འདི་ནི་འཇིག་རྟེན་ཀུན་ཏུ་ཁྱོད་གཅིག་སྨན་དང་མཚུངས་ལགས་ཏེ། །རྒྱལ་བ་རྣམས་ཀྱི་ཁྱོད་ལ་ཞུ་བའི་སླད་དུ་ཕོ་ཉར་མངགས། །རིག་པའི་རྒྱ་མཚོ་ཐུགས་རྗེ་མཉམ་པས་གནས་པར་མཛད་པ་པོ། ། ཐུབ་པ་ཟླ་བའི་ཆོས་དང་གསན་ནས་གཟུངས་ཀྱང་བསྐུར་བ་ལགས། །བཙུན་པ་བཅོམ་ལྡན་འདས། ལྷོ་ཕྱོགས་ན་སངས་རྒྱས་ཀྱི་ཞིང་འདི་ནས་དཔེར་བགྱི་ན། གྲོང་ཁྱེར་རྒྱར་དཔག་ཚད་ཙམ་མཆིས་
223a
༄#། །པ་བྱེ་མས་གཏམས་པ་དེ་སྙེད་ཀྱི་སངས་རྒྱས་ཀྱི་ཞིང་དག་འདས་ནས་སྙིགས་མ་ལྡ་དང་ལྡན་པ་དེ་ན་འཇིག་རྟེན་གྱི་ཁམས་སྙིགས་མའི་རྒྱལ་མཚན་ཞེས་བགྱི་བ་མཆིས་ཏེ། །དེ་ན་དེ་བཞིན་གཤེགས་པ་རི་དབང་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་བ་དེས་བདག་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བ་ལ་རེག་པར་གནས་སམ་ཞེས་ཀྱང་ཞུགས་པར་མཛད་ལགས་ན། བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ལགས་སམ།་ཁྱོད་ཀྱི་འཁོར་བྲོ་འཚལ་བ་མ་མཆིས་ལགས་སམ། གནོད་པ་ཆུང་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཆོས་ཐོས་པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་སམ། ཆོས་ཀྱི་གནས་པས་གནས་པར་བགྱིད་པ་དག་ལགས་སམ། ཁྱོད་ཀྱིས་སངས་རྒྱས་
223b
ཀྱི་ཞིང་འདི་ན་བདུད་ཀྱི་ཡུལ་དང ། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་ཆོས་ཀྱི་འཁོར་ལོ་བསྐོར་ལགས་སམ། སངས་རྒྱས་ཀྱི་ཡུལ་འདི་ན་གང་སུ་དག་འཁོར་ལོ་བསྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་རི་དབང་རྒྱལ་པོ་དེ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་ལ་དད་པ་སྦྱིན་པར་མཛད་ལགས་སོ། །དེ་ནས་སྟོང་བ་ཉིད་དང་རྗེས་སུ་མཐུན་པའི་གཟུངས་སྔགས་མཐུ་ཆ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཟད་པར་བགྱིད་པ།་གཟུགས་ཀྱི་འདོད་ཆགས་ཐམས་ཅད་དང ། གཟུགས་མེད་པའི་འདོད་ཆགས་ཐམས་ཅད་ཟད་པར་བགྱིད་པ། ང་རྒྱལ་དང ། ལྷག་པའི་ང་རྒྱལ་དང ། ངའོ་སྙམ་པའི་ང་རྒྱལ་ཐམས་ཅད་ཟད་པར་བགྱིད་པ་ཞེས་བགྱི་བ་ནས་ཇི་ལྟར་སྔར་བཤད་པའི་བར་དང ། སྡུག་བསྔལ་གྱི་ཁུར་འདོར་བར་བགྱིད་པའི་བར་འདིའང་བསྐུར་ལགས་ཏེ། ཏདྱ་ཐཱ། དྷུ་མ་ཏེ། དྷུ་མ་ཏེ། ཨཀྵི་དྷུ་མ་ཏེ། པྲ་བྷཱ་ས་དྷུ་མ་ཏེ། སརྦཱ་ཀཱ་ཤ་དྷུ་མ་ཏེ། ཨ་བཻ་ཁ་གྷ། པཻ་མེ་ཏ་ཁ་གྷ། ཨ་ཨ་བཻ་ཀྵ་ཁ་གྷ་། མོ་ཧ་ཁ་གྷ། ཨ་ན་ནྱ་ཁ་གྷ། བྱ་
224a
༄#། །བྲྀ་ཏྟི་ཁ་གྷ་།སཾ་རུ་ཙ་ཁགྷ། ཨ་ནཻ་མ་ཁ་གྷ་།ལོ་ཙ་ན་ཁ་གྷ། ཤཱི་ཁི་ཁ་གྷ། བི་ཏི་མི་ད་ཁ་གྷ། ཨུ་ཀྵོ་མ་ཁ་གྷ་།སུ་རོ་ཁ་གྷ་། ཀྵི་ཁ་གྷ་།ཡཱ་དང་མ་ནོ་ཁ་གྷ། རཱུ་བ་ཁ་གྷ་།ཡཱ་བ་ད་བི་ཛྙཱ་ན་ཁ་གྷ ། ཙཀྵུ་དྷཱ་ཏུ་ཁ་གྷ་།ཡཱ་བད་མ་ནོ་པི་དྣྯྱཱ་ན་དྷཱུ་ཏུ་ཁ་གྷ་།བྲི་ཐ་བཱི་དྷཱ་ཏུ་ཁ་གྷ་།ཡཱ་བ་ད་བིཛྙཱ་དྷཱུ་ཏུ་ཁ་གྷ། ཙ་ཏུ་སྨྲྀ་ཏྱུ་པ་སྠ་ན་ཁ་གྷ་ཡཱ་བ་ད་ཡཱ་བོ་ན་ཀ་ཁ་གྷ་།དུཿ ་ཁ་ཁ་གྷ་།ཡཱ་བ་ད་བརྒ་ཁ་གྷ་།བི་པ་བ་ན། བི་ཀྵ་པ། ཨ་ན་ན་ས་མུ་དྲ་ན་ན། སརྦ་ཀཱ་ར་ནན། སརྦ་སད་སྠ་ན་ན། བི་ཤཱུ་པ་ན་ན། ཨ་ཀ་ནི་ཙན་ན་ན།་ཀྵ་བྷ་ཀྵ། ཨི་ལེ་ཨི་ཨི་ལེ། ཨི་ཨི་ལེ་མི་ལེ་སཝཱཧཱ། བཅོམ་ལྡན་འདས་དེ་བཞིན་གཤེགས་པ་རི་དབང་རྒྱལ་པོས་ཁྱོད་ལ་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་བསྐུར་བ་ནི། འདི་ལགས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ལེགས་སོ། །ཞེས་བྱ་བ་གནང་ངོ ། །སངས་རྒྱས་ཀྱི་ཞིང་མི་མཇེད་དུ་ཐམས་ཅད་དང་ལྡན་པའི་འཁོར་ལྷགས་པས་ཀྱང་ལེགས་སོ། །ཞེས་བྱ་བ་བྱིན་ཏེ། བསམ་གཏན་དང་ལྡན་པ་དག་ནི། མ་གཏོགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྦོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། འདིར་ང་སྟན་འདི་ཉིད་ལ་བཞུགས་བཞིན་དུ་སེམས་ཅན་རྣམས་ལ་
224b
དོན་དང་བཅས་པ། ཚིག་འབྲུ་དང་བཅས་པ། ལྷག་ཆད་མེད་པའི་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་རྒྱ་ཆེར་སྟོན་པར་མཛད་དོ། །རིགས་ཀྱི་བུ། དེ་བཞིན་གཤེགས་པ་རི་དབང་རྒྱལ་པོས་གང་ཁྱོད་འདིར་འོང་བའི་ཚེ་བསྲུང་བའི་ཕྱིར་བྱིན་པ་མི་ཟད་པའི་སྦུབས་ཀྱི་ལུང་བསྟན་པ་སེམས་ཅན་རྣམས་ཀྱི་སེམས་དང ། ཚོར་བ་སྒྲུབ་པ་ཡང་དག་པར་འདུ་བ། ཐམས་ཅད་མཁྱེན་པའི་ཡེ་ཤེས་ཐོབ་པ་དང ། བདུད་བཞི་འདུལ་བ། སྒྲུབ་པའི་གནས་དང ། ཆོས་ཀྱི་ཚུལ་དང ། དཀོན་མཆོག་གསུམ་གྱི་གདུང་སྒྲུབ་པ།་མི་ཟད་པའི་སྦུབས་ཀྱི་ལུང་བསྟན་པའི་པར་དེ་ཁྱོད་ཀྱིས་ཀྱང་སྟོན་ཅིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེས་འདི་སྐད་ཅེས་གསོལ་ཏོ། །ཏདྱ་ཐཱ། ཤ་ར་ཎ་བྱཱ་ཡ། ཤིཀྵ་བྱཱ་ཡ། སྨྲྀ་ཏི་བྱཱ་ཡ། པྲ་ཧ་ཎ་བྱཱ་ཡ། རྀ་དྡྷི་བྱཱ་ཡ། ཨིནྡྲི་ཡ་བྱཱ་ཡ། བ་ལ་བྱ་ཡ། བོདྷྱ་དག་བྱཱ་ཡ། ས་མཱ་དྷི་བྱ་ཡ། དྷ་ར་ཎཱི་བྱ་ཡ། ཀྵཱནྟི་བྱཱ་ཡ།་དྷྱ་ན་བྱཱ་ཡ། ཨ་རཱུ་པ་བྱཱ་ཡ། ཨཾ་ནི་ན་ཛ་བྱཱ་ཡ། མཱརྒ་བྱཱ་ཡ། ཨ་དྷི་ཛྙཱ་བྱཱ་ཡ། པྲ་ཏི་སཾ་བིད་བྱཱ་ཡ། བྷཱུ་མི་བྱཱ་ཡ། བི་དྷྱ་བྱཱ་ཡ། མ་ཧཱ་མཻ་ཏྲི་བྱཱ་ཡ། མ་ཧཱ་ཀ་རུ་ཎ་བྱཱ་ཡ། བྲི་ཐི་བཱི་བྱཱ་ཡ། སཏྭ་བྱཱ་ཡ། དྷརྨ་བྱཱ་ཡ། ཏ་མ་བྱཱ་ཡ། ཨཱ་ལོ་ཀ་བྱཱ་ཡ། པྲ་ཏི་བྷཱ་ས་བྱཱ་ཡ། པྲ་ཏི་ཤུ་རུ་ཏྐ་བྱཱ་ཡ། ག་ག་ན་བྱཱ་ཡ། མཱ་ར་བྱཱ་ཡ། ཤཱུ་ནྱ་བྱཱ་ཡ། པྲ་ཏཱི་དྱ་བྱཱ་ཡ་
225a
༄#། ། པྲ་ཎི་ཧི་ཧི་ཏ་བྱཱ་ཡ། ཨ་ནི་མིད་ཏ་བྱཱ་ཡ། རུ་ཏེ་བྱཱ་ཡ། གྷོ་ཥ་བྱཱ་ཡ། ཨ་ཀིན་ཙ་ན་བྱཱ་ཡ། ཨ་བྷི་ས་མ་ཡ་ཨ་ནུ་ནུ། ཨ་ནོ་ན། ཨ་བ་ཏ། ཙ་ཙཱ་ར། ཙ་ཙ་ཙ་ར་བི་མུ། ཙ་ཙ་ཙཀྵ། ཙ་ཙ་ཙ་ར་བི་མུ་བྱཱ་ཡ། བི་མུ་ཨཱ་བ་བྱཱ་ཡ། བི་མུ་ཀྵ་ཡ། བི་མུ་ཨཱ་པ་བྱཱ་ཡ། བི་མུ་ཨ་ས་མུ་དྲ་ཙ་ར་བི་མུ། ཙྪེ་ད་བི་མུ། ཨཱ་ཀཱ་ཤ་བི་མུ། བྱུ་བ་ཤ་མ་བི་མུ། ཨ་ནཱ་བྷ་ས་བི་མུ། ཨ་ཧ་ཧ་བི་མུ། ཨ་བཱ་ར་བི་མུ། ཨུ་བ་ཤ་མ། ས་ལི་ལ་བི་མུ་སཝཱཧཱ། བཙུན་པ་བཅོམ་ལྡན་འདས། དེ་བཞིན་གཤེགས་པ་རི་དབང་རྒྱལ་པོ་དེས་བདག་ཆས་པའི་དུས་ཀྱི་ཚེ་བདག་བསྲུང་བའི་སླད་དུ་མི་ཟད་པའི་སྤུབས་ཀྱི་གཟུངས་སྔགས་སྩལ་བ་ནི། འདི་ལགས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཚེ་དང་ལྡན་པ་ཀུན་ཤེས་ཀཽ་ཌནྱི་ལ་བཀའ་སྩལ་པ། ཀཽ་ཌི་ནྱ། ཁྱོད་ཀྱིས་མི་ཟད་པའི་སྦུབས་ཀྱི་གཟུངས་སྣགས་འདི་གཟུངས་ཤིག་།ཀཽ་ཌི་ནྱ། དེ་བཞིན་གཤེགས་པ་དགྲ་བཅོམ་པ་རྣམས་འཇིག་རྟེན་དུ་འབྱུང་བརྙེད་པར་དཀའོ། །དེ་བས་ཀྱང་མི་ཟད་པའི་སྦུབས་ཀྱི་ལུང་བསྟན་པ་འདི་ཆེས་རྙེད་པར་དཀའོ། །རིགས་ཀྱི་བུ། དེ་བཞིན་གཤེགས་པའམ་དེ་བཞིན་གཤེགས་པའི་ཉན་ཐོས་ཀྱིས་ཀྱང་རུང་བསྐལ་པ་བརྒྱ་སྟོང་གིས་སེམས་ཅན་ཐམས་ཅད་ཀྱི་སེམས་ཀྱི་སྐད་ཅིག་བགྲང་བར་ནུས་སོ། །གང་དག་མི་ཟད་པའི་
225b
སྒྲུབས་ཀྱི་གཟུངས་སྔགས་འདིར་མུན་པ་མེད་པར་འཇུག་པས་ཞུགས་པའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་པོ་དེ་དག་ནི། གང་གིས་ཀྱང་བགྲང་བར་མི་ནུས་སོ། །ཀཽ་ཌི་\?\་ནྱ། དེ་ལྟ་བས་ན། མི་ཟད་པའི་སྦུབས་ཀྱི་ལུང་བསྟན་པའི་ཆོས་འདི་ཇི་ལྟར་ཐོས་པ་འཁོར་བཞི་པོ་དག་ལའང་རྒྱས་པར་ཡང་དག་པར་རབ་ཏུ་སྟོན་ཅིག་དང ། དེ་དག་ཆོས་དེ་ཐོས་པས་ལས་ཐམས་ཅད་ཟད་པ་ཐོབ་པར་འགྱུར་པ་ནས་སྦོབས་པ་ཐོགས་པ་མེད་པ་དག་དང ། སྦོབས་པ་གཅད་དུ་མེད་པ་དག་དང ། སྤོབས་པ་རྒྱུན་མི་འཆད་པའི་བར་དག་ཐོབ་པར་འགྱུར་ཞིང་ཁམས་གསུམ་ལས་ཁྱད་པར་དུ་འཕགས་པའི་དེ་བཞིན་གཤེགས་པ་དག་ཏུའང་འགྱུར་རོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོའི་དཔལ་ད་བཞིན་གཤེགས་པ་ཤཱཀྱ་ཐུབ་པ་ག་ལ་བདེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །འགྲོ་དྲུག་སྡུག་བསྔལ་གྱིས་ཁྲིད་ཅིང ། །ཉོན་མོངས་ནད་ཀྱིས་ཀུན་ཏུ་གཡེངས། །ཁྱོད་ནི་མཁས་པ་མགོན་གྱུར་ཁྱོད། །རྒལ་ནས་འགྲོ་བ་སྒྲོལ་མཛད་ཁྱོད། །དབང་པོ་དྲུག་ལ་རྨོངས་གྱུར་ཅིང ། །བདུད་ཀྱི་ཞགས་པས་ཉེར་ཟིན་ལ། །ཡང་དག་ལམ་ནི་སྟོན་པ་ཁྱོད། །འཇིག་རྟེན་ན་ནི་རབ་རྙེད་དཀའ། །ཡན་ལག་དྲུག་ལྡན་ཁྱིམ་གྱི་གཞི། །མཁས་པའི་མི་
226a
༄#། །རྣམས་ཀྱིས་སྤངས་ལ། །ཁྱོད་ནི་འཇིག་རྟེན་ཀུན་གྱི་གཉེན། །ཆོས་ཀྱི་མུ་གེ་འཇིག་མཛད་པ། །མངོན་ཤེས་དྲུག་ལྡན་སྒོམ་བྱེད་ལ། །བདེན་པ་གསུང་བ་དྲང་སྲོང་ཆེ། །སེམས་ཅན་འཁོར་བར་ཞུགས་པ་རྣམས། །འཆིང་བ་དམ་ལས་གྲོལ་མཛད་ཁྱོད། །ཁྱོད་ཀྱི་སྔགས་ལ་དད་ནས་སུ། །ཞིང་འདིར་ཡང་ནི་ལྷགས་པ་ལགས། །འདིར་ནི་འཇིག་རྟེན་མགོན་པོ་ཡིས། །བདག་ཅག་པོ་ཉར་མངགས་ཀྱིས་གསོན། །བཙུན་པ་བཅོམ་ལྡན་འདས། ནུབ་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངའའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་ནས་དེ་ན་འཇིག་རྟེན་གྱི་ཁམས་སྙིང་པོའི་རྒྱལ་མཚན་ཞེས་བགྱི་བ་མཆིས་སོ། །སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་ཞེས་བགྱི་བ་བཞུགས་ཏེ་འཚོ་ཞིང་གཞས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས་བདག་སངས་རྒྱས་ཀྱི་ཞིང་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བ་
226b
ལ་རག་པར་གནས་སམ་ཞེས་ཀྱང་འདྲི་བར་མཛད་ལགས་ན། བཙུན་པ་བཅོམ་ལྡན་འདས་ཅི་སྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་མ་མཆིས་ལགས་སམ། གནོད་པ་ཆུང་ལགས་སམ། དམ་པའི་ཆོས་ཉན་པར་འཚལ་ལགས་སམ། ཇི་ལྟར་ཆོས་རྗེས་སུ་ཐོས་པ་བཞིན་དུའང་ཆོས་དེ་ལའང་ནན་ཏན་སྙིང་པོར་བགྱིད་པ་དག་ལགས་སམ། ཆོས་ཀྱི་གནས་ཕས་གནས་པར་བགྱིད་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང ། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་འཁོར་ལོ་བསྐོར་ལགས་སམ། སངས་རྒྱས་ཀྱི་ཞིང་འདི་ན་གང་སུ་དག་འཁོར་ལོ་བསྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འདོ་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་ལ་དད་པ་སྦྱིན་པར་མཛད་ལགས་སོ། །དེ་ནས་སྨོན་པ་མེད་པའི་རྗེས་སུ་མཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཡང་དག་པར་ཟད་པར་བགྱིད་པ། གཟུགས་ཀྱི་འདོད་
227a
༄#། །ཆགས་ཐམས་ཅད་དང ། གཟུགས་མེད་པའི་འདོད་ཆགས་ཡང་དག་པར་ཟད་པར་བགྱིད་པ། ང་རྒྱལ་དང ། ལྷག་པའི་ང་རྒྱལ་དང ། །ངའོ་སྙམ་པའི་ང་རྒྱལ་ཐམས་ཅད་ཡང་དག་པར་ཛད་པར་བགྱིད་པ་འདིའང་བསྐུར་ལགས་ཏེ་ཞེས་བགྱི་བ་ནས་མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བགྱིད་པ། སྡུག་བསྔལ་གྱི་ཁུར་འདོར་བར་བགྱིད་པ་ཞེས་བགྱི་བའི་བར་དུ་ཇི་ལྟར་སྔར་བཤད་པ་བཞིན་ནོ། །ཏདྱ་ཐཱ། ཤ་ན་ཤ་ར། ཤ་མ་ན་ཤ་བ། ཨ་བ་ཀྵ་བ་ཤཱ་།ཙུཀྵ་བྷ་བ་ཤ་བ། ཤོ་ཏྲ་ཤ་བ། གྷཱ་ཎ་ཤ་བ། ཛི་ཧཝཱ་ཤ་བ། ཀཱ་ཡ་ཤ་བ། མ་ནཱ་ཤ་བ། ཀྵ་ཏི་བི་དྱ་ཙཀྵུ་པྲྀ་ཐ་བཱི་ཀྶྵ་བྷ། ཤྲོ་ཏྲ་ཨ་བ་ཀྵ་བྷ། ཛི་ཧཝཱ་བཱ་ཡུ་ཀྵ་བྷ། མ་ན་ཨོ་ཛ་ཀྵ་བྷ།་ཨཱ་ལོ་ཀ་ཛྙཱ་ན་ཀྵ་བྷ། བཱི་ཛ་སང་གྲ་མ་ཀྵ་བྷ། ཨང་ཀུ་རུ་ཁ་གྷ་ཀྵ་བྷ། ཤམ་ཀ་རུ་ཀྵ་བྷ། ཀྵ་ཡཱ་རཱས་ཀྵ་བྷ། ཤཱནྟི་བྱ་ ་བྷ། ནཏོ་ནཏན་ཏོ་ན་ཨ་བ་ཉེ་ར་ཏོ་ན། ན་ཡཱ་བ་ན་ཡི་ན་ཏོ་ན་ཨེ་ཥ་ཨནྟ་དུཿ ་ཁ་སྱ་སཝཱཧཱ། བཙུན་པ་བཅོམ་ལྡན་འདས། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་སྨོན་པ་མེད་པའི་རྗེས་སུ་མཐུན་པའི་གཟུངས་སྔགས་བསྐུར་བ་ནི། འདི་ལགས་སོ། །བཅོམ་ལྡན་འདས་ཀྱིས་ཀྱང་ལགས་སོ། །ཞེས་བྱ་བ་གནང་ངོ ། །བསམ་གཏན་དང་ལྡན་པ་རྣམས་མ་
227b
གཏོགས་པ་སངས་རྒྱས་ཀྱི་ཞིང་མི་མཇེད་ཀྱི་ནང་དུ་གཏོགས་པའི་སེམས་ཅན་ཐམས་ཅད་དང་ལྡན་པ་རྣམས་ཀྱིས་ཀྱང་ལེགས་སོ། །ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོའི་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ང་སྟན་འདི་ཉིད་ལ་བཞུགས་བཞིན་སེམས་ཅན་རྣམས་ལ་དོན་བཟང་པོ། ཚིག་འབྲུ་བཟང་པོ་ལྷག་ཆད་མེད་པ་སྨོན་པ་མེད་པ་དང་རྗེས་སུ་མཐུན་པའི་གཟུངས་སྔགས་འདི་རྒྱ་ཆེར་སྟོན་པར་མཛད་དོ། །རིགས་ཀྱི་བུ། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོས་གང་ཁྱོད་ལ་འདིར་འོང་བའི་ཚེ་བྱིན་པ་རིག་སྔགས་ཀྱི་རྟེན་གྱི་ལུང་བསྟན་པ་དེ་ཁྱོད་ཀྱིས་ཀྱང་སྟོན་ཅིག་།ལུང་བསྟན་པ་དེས་ནི། འདིར་སེམས་ཅན་རྣམས་ཀྱི་སྲེད་པ་ཆུང་དུ་དང ། འབྲིང་དང ། ཆེན་པོ་ཉོན་མོངས་པ་སྲིད་པའི་རྒྱུ་རྣམས་རབ་ཏུ་ཞི་བར་འགྱུར་རོ། །དེ་བཞིན་དུ་གཟུགས་དང་གཟུགས་མེད་པའི་ཉོན་མོངས་པ་སྲིད་པའི་རྒྱུ་རྣམས་ཞི་བར་འགྱུར་རོ། །བསྐལ་བ་གངའའི་ཀླུང་གི་བྱེ་མ་སྙེད་ཀྱང་བསྙིལ་བར་འགྱུར་རོ། །ལས་འབྱུང་བ་དང ། དགེ་བའི་ཕྱོགས་ཐམས་ཅད་ཡོངས་སུ་རྫོགས་པའི་བར་དུའང་འགྱུར་རོ། །བཙུན་པ་བཅོམ་ལྡན་འདས། དེ་བཞིན་ཏེ། བསྟན་པར་བགྱི་ལགས་སོ། །ཏཏྱ་ཐཱ། བེ་ག་བ་རི་ཙྪེ་ད། གརྦྷ་ས་ཀྵ་སེ། གརྦྷ་རི་བིདྱ་བྲ་བྷ་ག་
228a
༄#། །ཀྵེ་ཀྵ་ཡ། ཡི་གེ་པྲ་ཏི་ཧ་རེ་ཤ་མནན་སི་ཀ་ཐ། ས་མ་མི་གྷ་ཛ་ཥེ། ཨཀྵ་ཡ། ན་ཏེ་ཀྵ་བྷ་བ་ཛེ། ན་ད་དྷ་ཌྷ་ཥེ། ས་མ་ན་ཛྷ་ཥེ། ཨ་དྷྱ་ཤ་ཡ་ཛྷ་ཥ་བི་པྲ་བྷ་ཛྷ་ཥེ། ཤཻ་ཀྵ་ཛྷ་ཥེ། ས་ལི་ལ་གུ་ཧྱ་ཛྷ་ཥེ། སི་ལ་གུ་ཧ་བཻ་ཀྵི་པ་ན་ཀོ་ཤེ་།སཱ་དྷ་ན་ཀོ་ནོ་སི་བ་དྷ་ན་ན་ཐྱེ། བི་ཏ་པྲ་བི་ད་ཏེ། ཨུ་པ་ཀྲ་མ་པ་ཐེ། ཨ་ན་ཙྪ་ད་པྲ་ཁཱེ། པྲ་ཏི་ཀྲ་མེ་ན།་ས་ཀ་ང་ཐྱ་ཤེ་ས་ལོ་ཙ་ན་བ་མེ། ཀྲོ་དྷ་དྷ་རེ། ཀཱ་མ་ས་ཤེ་།ཱ་ཀཱ་ཤ་ཁ་གེ་ནཱ་ག་ཀུན་ཛེ། བི་དྱ་བ་ནེ། ཀླ་ན་བ་ནེ། ཨུ་ཙ་བ་ནེ། ས་མ་མ་ཀེ་རེ། ཤ་རི་ཡ་བ་ནེ། མེ་གྷ་ཛ་བེ་ཧི་ར་ཀོ་ནོ་བ། ན་ཡ་ན་མུ་ཁེ། སཱ་རཀྵ་ཀོ་ལེ། ན་རཱ་ཡ་ཎ་ཙ་རེ། ཨིནྡྲ་བཱ་ས་ནེ། ཨོ་ཨ། ཨ་བ་ཨ། ཨ་རཱ་བ་ཨཱ། བ་ར་ཨ་བྷ་ར། སཱ་ར་མེ་གྷ་།དུཿ ་ཁ་ན་སྟི་ར་ནི་ནིརྦཱ་ཏེ་སཝཱཧཱ། བཙུན་པ་བཅོམ་ལྡན་འདས། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་རིག་སྔགས་ཀྱི་རྟེན་གྱི་ལུང་བསྟན་པ་སྩལ་བ་ནི། འདི་ལགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཝཻ་རདྭ་ཏིའི་བུ། ཁྱོད་ཀྱིས་རིག་སྔགས་ཀྱི་རྟེན་གྱི་གཟུངས་སྔགས་འདི་ཟུངས་ཤིག་།ཤཱ་རདྭ་ཏིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
228b
སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། །དེ་བས་ཀྱང་རིག་སྔགས་ཀྱི་རྟེན་གྱི་གཟུངས་སྔགས་འདི་ཆེས་རྙེད་པར་དཀའོ། །ཤཱ་རདྭ་ཏིའི་བུ། དེ་བཞིན་གཤེགས་པའམ་དེ་བཞིན་གཤེགས་པའི་ཉན་ཐོས་ཀྱིས་ཀྱང་རུང་བསྐལ་པ་བརྒྱས་གླིང་བཞི་བའི་འཇིག་རྟེན་གྱི་ཁམས་ཀྱི་སའི་ཁམས་ཐམས་ཅད་ཀྱི་རྡུལ་ཕྲ་རབ་རྣམས་བགྲང་བའམ་མཐའ་རྟོགས་པར་ནུས་སོ། །རིག་སྔགས་ཀྱི་རྟེན་གྱི་གཟུངས་སྔགས་འདིའི་མཐའ་ནི། བསྐལ་པ་བརྒྱ་སྟོང་གིས་ཀྱང་བརྗོད་པར་མི་ནུས་སོ། །རིག་སྔགས་ཀྱི་རྟེན་གྱི་ལུང་བསྟན་པ་འདི་ནི། དེ་ལྟར་ཟབ་པ་ཡིན་ནོ། །ཤཱ་རདྭ་ཏིའི་བུ། ཁྱོད་ཀྱིས་རིག་སྔགས་ཀྱི་རྟེན་གྱི་གཟུངས་སྔགས་འདི་ཡང་ཟུངས་ཤིག་།ཀུན་ཆུབ་པར་བྱོས་ཤིག་།འཁོར་བཞི་པོ་དག་ལའང་རྒྱས་པར་སྟོན་ཅིག་།ཡང་དག་པར་རབ་ཏུ་སྟོན་ཅིག་དང ། དེ་ཐོས་པས་ཀྱང་སེམས་ཅན་དེ་དག་གི་སྲད་པ་ཆུང་དུ་དང ། འབྲིང་དང ། ཆེན་པོ་སྲེད་པའི་རྒྱུ་རྣམས་དང ། གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་སྲིད་པའི་རྒྱུ་རྣམས་རབ་ཏུ་ཞི་བར་འགྱུར་རོ། །བསྐལ་པ་གངྒཱའི་ཀླུང་གི་བྱེ་མ་སྙེད་ཀྱང་རྒྱབ་ཀྱིས་ཕྱོགས་པར་འགྱུར་རོ། །བུད་མེད་མཚམས་མེད་པ་བྱེད་པའི་ལས་ཀྱི་སྒྲིབ་པ་སྲིད་པའི་རྒྱུ་རྣམས་ཟད་པར་འགྱུར་ཞིང་ལྷག་མ་མེད་པའི་བར་དུའང་འགྱུར་རོ། །ཟག་པ་ཐམས་
229a
༄#། །ཅད་ཟད་པ་དང ། བྱང་གྲོལ་གྱི་བདེ་བ་དང་ལྡན་པའི་བར་དུའང་འགྱུར་རོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཁྱོད་ནི་དེད་དཔོན་གཅིག་པུ་ལགས། ཆོས་རྣམས་ཀུན་ལ་དེས་པ་སྟེ། །མཐོང་བའི་གུས་པ་སྐྱེས་པ་ཡིས། །བཤེས་གཉེན་དཔལ་ཡང་ཉེ་བར་འཛིན། །མེ་ཏོག་གཅིག་དང་བདུག་པ་ཡིས། །དེ་བཞིན་གཤེགས་ལ་མཆོད་བགྱིས་ན། །ཡན་ལག་ཀུན་གྱི་མཆོག་ལྡན་པའི། །བཤེས་གཉེན་སྡུག་པ་ཉེ་བར་འཛིན། །ཚོགས་ནི་ཆེན་པོ་བསྡུས་པ་ཡང ། །དུས་གཅིག་ཏུ་ནི་འདིར་མཛད་པས། །ལྷ་རྣམས་ཐམས་ཅད་བསྔགས་བགྱིད་ཅིང ། །བཤེས་གཉེན་དཔལ་ཡང་ཉེ་བར་འཛིན། །དེར་ནི་འཇིག་རྟེན་མགོན་པོ་ཡིས། །འདི་ནི་ལན་གཅིག་ཁོ་ན་བསྟན།། རྟག་ཏུ་ལྷ་མིན་ཤེས་རབ་ལྡན། །བཤེས་གཉེན་དཔལ་ཡང་ཉེ་བར་འཛིན། །དཔལ་གྱི་མེ་ཏོག་སྙིང་པོ་ནི། །དཔལ་རྣམས་ཀུན་གྱིས་ཀུན་ཏུ་བརྒྱན། །དེ་ཡིས་ཤཱཀྱའི་དཔལ་ཞུ་བར། །བདག་ཅག་ཕོ་ཉར་མངགས་པ་ལགས། །བཙུན་པ་བཅོམ་ལྡན་འདས། བྱང་ཕྱོགས་ཀྱི་ཕྱོགས་ཆ་ནས་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་
229b
གངྒཱའི་ཀླུང་བརྒྱད་ཅུའི་བྱེ་མ་སྙེད་འདས་ནས་སྙིགས་མ་ལྔ་དང་ལྡན་པ་དེ་ན་འཇིག་རྟེན་གྱི་ཁམས་སྤོས་ཐམས་ཅད་ཡང་དག་པར་འཕགས་པ་ཞེས་བགྱི་བ་མཆིས་སོ། །སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས་བདག་འདིར་མངགས་ལག་སྟེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དང་བ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་ལྡན་ནམ། བདེ་བ་ལ་རེག་པར་གནས་སམ་ཞེས་ཀྱང་ཞུ་བར་མཛད་ལགས་ན། བཙུན་པ་བཅོམ་ལྡན་འདས་ཅི་སྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་མ་མཆིས་སམ། གནོད་པ་ཆུང་ལགས་སམ། དམ་པའི་ཆོས་ཉན་པར་འཚལ་པ་དག་ལགས་སམ། ཇི་ལྟར་ཆོས་རྗེས་སུ་ཐོས་པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་སམ། ཆོས་ཀྱི་གནས་པས་གནས་པས་བགྱིད་པ་དག་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་
230a
༄#། །ཀྱི་ཡུལ་དང ། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་ཆོས་ཀྱི་འཁོར་ལོ་བསྐོར་ལགས་སམ། སངས་རྒྱས་ཀྱི་ཞིང་འདི་ན་གང་དུ་དག་འཁོར་ལོ་བསྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་ལ་དད་པ་སྦྱིན་པར་མཛད་ལགས་སོ། །དེ་ནས་ཞི་བ་རིག་པ་མཆིས་པའི་སྤུབས་ཞི་བའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། སེམས་ཅན་ཐམས་ཅད་ལ་ཕན་པར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། ཉོན་མོངས་པ་ཐམས་ཅད་འདུལ་བར་བགྱིད་པ། ཕུང་པོ་དང་སྐྱེ་མཆེད་ཐམས་ཅད་ཡོངས་སུ་ཤེས་པར་བགྱིད་པ། ཆོས་ཐམས་ཅད་རྣམ་པར་འབྱེད་པར་བགྱིད་པ། ཐབས་ཐམས་ཅད་ཡང་དག་པར་སྟོན་པར་བགྱིད་པ། བྱང་གྲོལ་གྱི་བདེ་བ་ཐམས་ཅད་ཡོངས་སུ་མྱོང་བར་བགྱིད་པ། སེམས་ཅན་ཐམས་ཅད་རབ་ཏུ་དད་པར་བགྱིད་པ། ཆོས་ཐམས་ཅད་ཀྱི་བདེ་བ་ལ་འཇུག་པར་བགྱིད་པ། བདུད་དང་ཕས་ཀྱི་རྒོལ་བ་
230b
ཐམས་ཅད་ཆོས་དང་མཐུན་པས་ཚར་གཅོད་པ། བདུད་ཀྱི་ཡུལ་ཐམས་ཅད་རྣམ་པར་འཇིག་པར་བགྱིད་པ་འདིའང་བསྐུར་ལགས་ཏེ། རིག་པ་མཆིས་པའི་སྤུབས་ཞི་བ་ལུང་བསྟན་པ་ཆེན་པོ་འདི་ནི། བདུད་རྣམས་ཚར་གཅོད་པར་བགྱིད་པ། ཕས་ཀྱི་རྒོལ་བ་རྣམས་ཕམ་པར་བགྱིད་པ། ལྷ་རྣམས་དགའ་བར་བགྱིད་པ། གནོད་སྦྱིན་རྣམས་ཡང་དག་པར་མགུ་བར་བགྱིད་པ། ལྷ་མ་ཡིན་རྣམས་རྣམ་པར་འཇོམས་པར་བགྱིད་པ། ནམ་མཁའ་ལྡིང་རྣམས་ཡང་དག་པར་མགུ་བར་བགྱིད་པ། མིའམ་ཅི་རྣམས་དད་པར་བགྱིད་པ། ལྟོ་འཕྱེ་ཆེན་པོ་རྣམས་རྒྱབ་ཀྱིས་ཕྱོགས་པར་བགྱིད་པ། ཕས་ཀྱི་རྒོལ་བ་རྣམས་འདུལ་བར་བགྱིད་པ། རྒྱལ་རིགས་རྣམས་མངོན་པར་དགའ་བར་བགྱིད་པ། བྲམ་ཟེ་རྣམས་འཇུག་པར་བགྱིད་པ། རྗེའུ་རིགས་རྣམས་རབ་ཏུ་འཇོམས་པར་བགྱིད་པ། དམངས་རིགས་རྣམས་མཆོག་ཏུ་དགའ་བར་བགྱིད་པ། བུད་མེད་འདོད་ཆགས་དང་བྲལ་བར་བགྱིད་པ། བུད་མེད་སྦྲུ་མ་པ་བདེ་ལེགས་སུ་ཡོངས་སུ་ཐར་བར་བགྱིད་པ། མང་དུ་ཐོས་པ་རྣམས་དྲན་པར་བགྱིད་པ། རྣལ་འབྱོར་སྤྱོད་པ་རྣམས་མངོན་པར་དགའ་བར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། འཐབ་པ་དང ། ཐབ་མོ་དང ། མུ་གེ་དང ། མི་ངས་དང ། ནད་དང ། ཕ་རོལ་གྱི་དམག་ཚོགས་དང ། དུས་མ་ཡིན་པའི་རླུང་དང ། ཆར་
231a
༄#། །པ་དང ། ཆུ་བོ་དང ། གྲང་བ་དང ། དྲོ་བ་དང ། ཁ་བ་དང ། ཚ་བ་དང ། རྩུབ་པ་དང ། ཧྲུད་ཧྲུད་པོ་དང ། འདུས་ཏེ་རེག་པར་དགའ་བ་རྣམས་རྣམ་པར་ཞི་བར་བགྱིད་པ། ཆོས་ཀྱི་ཚུལ་འབར་བར་བགྱིད་པ། སངས་རྒྱས་ཀྱི་བསྟན་པ་སྟོན་པར་བགྱིད་པ། དཀོན་མཆོག་གསུམ་གྱི་གདུང་རྒྱུན་མི་འཆད་པར་བགྱིད་པ། འཁོར་བས་སྐྲག་པ་རྣམས་དབུགས་འབྱིན་པར་བགྱིད་པ། ཟད་པ་ཤེས་པ་བསྐྱེད་པར་བགྱིད་པ། མི་སྐྱེ་བ་ཤེས་པ་རང་གི་མངོན་སུམ་དུ་བགྱིད་པ། མུན་པའི་ཕུང་པོ་རྣམ་པར་འཇིག་པར་བགྱིད་པ། སྡུག་བསྔལ་གྱི་ཁུར་འདོར་བར་བགྱིད་པ། མཐུ་ཆེ་བ་ལགས་སོ། །ཏདྱ་ཐཱ། མ་ནཱ་ཀྵ་ཨ་ནཱ་ཀྵ། གྷ་སཱ་ཀྵ། ཛཱ་ལ་ཀྵ། མཱ་ནཱ་ཀྵ། ཀྵ་བཀྵ ། མནྡྷཱ་ཀྵ། ན་ཌ་ཀྵ། ན་ཌ་ར་ར་ཧུ་བི་ས་ནཱ་ཏ། ཁ་གྷ་ནཱ་ཊ། ཨཱ་ཊ་ནཱ་ཊ་ཀུ་ནཱ་ཊ། པ་རི་ཀུ་ས་ནཱ་ཊ། ནཱ་ཊ་ནཱ་ཊ། པུ་རི་ཀྵ་ནཱ་ཊ། ཨུ་ཊ་ར་ནཱ་ཊ། ཀ་པི་ནཱ་ཊ། ཀུ་ན་ཛ་ནཱ་ཊ། ཨ་མ་ཁ་ནཱ་ཊ། ཙ་བ་མ་བྷ་ནཱ་ཊ། ཁ་ག་མ་བྷ་ནཱ་ཊ། པུཀྵ་ར་ནཱ་ཊ། ཧི་ས་དུ་དྲཱ་ནཱ་ཊ། ས་མ་ལ་ཡ་ནཱ་ཊ། ཤི་ར་ཀུ་མ་ར་ཀཽ་ཏ་ཊ་མ་ཏུ་གུ་ར་བ། ཏྭེ་ཧུ་ཀྵ། བ་ནི་ར་ཛཱུ། དྷྭ་ན་མ་ར་ཛཱུ། བདྷ་ན་ཕུ་ཏེ། སནྟི་ར་བ་ཛ་བ། མ་ཧོ་ར་ག་ཛ་ལ། ཨི་ཏྲ་ནཱ། ཨ་ཏྲ་ནཱ། ཨ་ཏྲི་ནཱ་ན་བ།་ཨ་ཏྲི་ནཱ་ཀྵ། ཨ་བ་ཧ་མཱ་རྒ་ཏྲ་ནཱ་ཀྵ། ཨེ་ཥོ་ན་ཏཽ་དུཿ ་ཁ་བྷ་ར་སྱ་སཝཱ་ཧཱ། བཙུན་
231b
པ་བཅོམ་ལྡན་འདས། དེ་བཞིན་གཤེགས་པ་དཔལ་མེ་ཏོག་གི་སྙིང་པོས་རིག་པ་མཆིས་པ་སྤུབས་ཞི་བ་ལུང་བསྟན་པ་ཆེན་པོ་མཐུ་ཆེ་བ་ཕན་ཡོན་ཆེ་བ་འདི་འདིར་བསྐུར་བ་ལགས་སོ། ། དེ་ནས་བཅོམ་ལྡན་འདས་ཤཱཀྱ་ཐུབ་པས་ལེགས་སོ། །ཞེས་བྱ་བ་གནང་ངོ ། །བསམ་གཏན་ལ་བརྩོན་པ་རྣམས་མ་གཏོགས་པ་སངས་རྒྱས་ཀྱི་ཞིང་མི་མཇེད་དུ་ལྷགས་པའི་སེམས་ཅན་ཐམས་ཅད་དང་ལྡན་པ་རྣམས་ཀྱིས་ཀྱང་ལེགས་སོ། །ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ང་སྟན་འདི་ཉིད་ལ་བཞུགས་བཞིན་དུ་སེམས་ཅན་རྣམས་ལ་རིག་པ་ཡོད་པའི་སྤུབས་ཞི་བའི་གཟུངས་སྔགས་དོན་དང་བཅས་པ། ཚིག་འབྲུ་དང་བཅས་པ། ལྷག་ཆད་མེད་པ་འདི་རྒྱ་ཆེར་སྟོན་པར་མཛད་དོ། །རིགས་ཀྱི་བུ། དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་གང་ཁྱོད་ཆས་པའི་དུས་ཀྱི་ཚེ་གསང་སྔགས་གང་དག་གིས་སྡང་བ་ཐམས་ཅད་དད་པར་འགྱུར་བའི་གཟུངས་སྔགས་སྡང་བཞི་བར་བྱེད་པ་དང ། གཉིད་ཀྱིས་ལོག་པར་བྱེད་པ་དང ། དམིགས་པ་མེད་པའི་ཚངས་པའི་གནས་པའི་རྒྱུ་མཐུན་པ་བྱིན་པ་དེ་ཁྱོད་ཀྱིས་ཀྱང་སྟོན་ཅིག་།བཙུན་པ་བཅོམ་ལྡན་འདས། དེ་བཞིན་དུ་བསྟན་པར་བགྱི་ལགས་སོ། །ཏདྱ་ཐཱ། བོ་པྲྀ་ཧེ་བུ་བུ་ར་ཏ་ལ་ར་
232a
༄#། །ར་བ་ཨི་ལ་ས་ཧ། ཧ་ཌུ་ཧ་ཌུ། ག་ག་ནཱ་ཀྵ་ཤ་མ་མི་ཏྲ། ཙཀྲ་བརྟི་ཏི་ལི་སཱ་ག་ར། ཏི་ལེ་དཱུ་ན་ཧི་ལེ། ཧི་ལེ་ཧ་བ་ཧེ། ན་ར་ཛ་ཊེ། ཡ་བ་ན་མི་ཏྲེ། ཀྵི་ཏི་མི་ཏྲེ། བ་ར་མི་ཏྲེ། ཤི་ཁི་མི་ཏྲེ། མུ་རུ་ཏྲ་མི་ཏྲེ། ཁ་ག་མི་ཏྲེ། སརྦ་ཨུ་ཛ་མི་ཏྲེ། སརྦ་ཀྵ་མ་མི་ཏྲེ། མ་ན་བ་རུ་མི་ཏྲེ། དྷ་ནས་ཤཝ་ར་མི་ཏྲེ་སཝཱཧཱ། ཀྱེ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པའི་བསྟན་པ་འདི་བཤད་པ་ན་སྡང་བའི་སྤྲུལ་ཐམས་ཅད་རང་གི་གནས་སུ་དོང་ནས་གཉིད་ཀྱིས་ལོག་པར་གྱུར་ཏེ། གང་དག་བཟོད་པ་ཐོབ་པ་རྣམས་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་རྣམས་ནི། མ་གཏོགས་སོ།། སྲིད་པ་ན་གང་དག་སྡང་བའི་གནོད་སྦྱིན་རྣམས་དང ། གང་དག་སྡང་བའི་ལྷ་མ་ཡིན་རྣམས་དང་ཞེས་བྱ་བ་ནས་སྡང་བའི་ནམ་མཁའ་ལྡིང་རྣམས་ཞེས་བྱ་བའི་བར་དང ། སྡང་བའི་མི་འམ་ཅི་རྣམས་ཞེས་བྱ་བའི་བར་དང ། ཡི་དྭགས་རྣམས་ཞེས་བྱ་བའི་བར་དང ། ཤ་ཟ་རྣམས་ཞེས་བྱ་བའི་བར་དང ། སྲུལ་པོ་རྣམས་ཞེས་བྱ་བའི་བར་དང ། གང་དག་སྡང་བའི་ལུས་སྲུལ་པོ་རྣམས་ཞེས་བྱ་བའི་བར་དེ་དག་རང་རང་གི་གནས་སུ་དོང་ནས་གཉིད་ཀྱིས་ལོག་པར་གྱུར་ཏེ་བྱང་ཆུབ་སེམས་དཔའ་བཟོད་པ་ཐོབ་པ་རྣམས་དང ། ཕྱིར་
232b
མི་ལྡོག་པ་རྣམས་ནི། མ་གཏོགས་སོ། །གང་དག་སྡང་བའི་མི་གཟུ་ལུམས་ཅན་དང ། རྩུབ་པ་དང ། སྙིང་བ་རྩེ་བ་མེད་པ་དང ། ཕན་ཚུན་མི་མཐུན་པ་དང ། རྟག་ཏུ་ཁྲོ་བ་སྤྱོད་པ་དང ། འཇིག་རྟེན་ཕ་རོལ་གྱིས་འཇིགས་པར་མི་ལྟ་བ་དང ། མཚམས་མེད་པ་བྱེད་པ་དང ། དམ་པའི་ཆོས་སྤོང་བར་བྱེད་པ་དང ། འཕགས་པ་ལ་སྐུར་བ་འདེབས་པ་དང ། མི་དགེ་བའི་རྩ་བ་དང་ལྡན་པ་དེ་དག་ཀྱང་སྡང་བཞི་བར་བྱེད་པ། གཉིད་ཀྱིས་ལོག་པར་བྱེད་པའི་བསྟན་པ་འདི་ཐོས་པས་ཐམས་ཅད་མཆོག་ཏུ་བྱམས་པའི་སེམས་དང་ལྡན་པ་དག་དང ། སྙིང་རྗེའི་སེམས་དང་ལྡན་པ་དག་དང ། སྙིང་བརྩེ་བའི་སེམས་དང་ལྡན་པ་དག་དང ། འཁོ་ན་མེད་པའི་སེམས་དང་ལྡན་པ་དག་དང ། མི་འཁྲུགས་པའི་སེམས་དང་ལྡན་པ་དག་དང ། ཆོས་ལ་དམིགས་པའི་སེམས་དང་ལྡན་པ་དག་དང ། འཇིག་རྟེན་ཕ་རོལ་གྱིས་འཇིགས་པའི་སེམས་དང་ལྡན་པ་དག་དང ། དཀོན་མཆོག་གསུམ་ལ་ལྷག་པར་གུས་པའི་སེམས་དང་ལྡན་པ་དག་དང ། ཆོས་ལ་དམིགས་པའི་སེམས་དང་ལྡན་པ་དག་དང ། ཞི་བའི་སེམས་དང་ལྡན་པ་དག་ཏུ་གནས་པར་གྱུར་ཏོ། །གསོལ་པ། བཙུན་པ་བཅོམ་ལྡན་འདས། དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་གང་སྡང་བ་ཞི་བར་བགྱིད་པའི་གཟུངས་སྔགས་
233a
༄#། །སྩལ་བ་ནི། འདི་ལགས་སོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པས་ཚེ་དང་ལྡན་པ་མཽངྒལ་གྱི་བུ་ལ་བཀའ་སྩལ་པ། མཽངྒལ་གྱི་བུ། ཁྱོད་ཀྱིས་སྡང་བ་ཞི་བར་བྱེད་པ་གཉིད་ཀྱིས་ལོག་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་མཐུན་པ་འདི་ཟུངས་ཤིག་།མཽངྒལ་གྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། །དེ་བས་ཀྱང་སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་མཐུན་པ་འདི་ཆེས་རྙེད་པར་དཀའོ། །མཽངྒལ་གྱི་བུ། སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པ་འདི་ནི། བསྐལ་པ་བརྒྱ་སྟོང་དུ་ལས་གཞན་མི་བྱེད་པར་བསྟན་ཀྱང་ལྷ་དང་བཅས་པའི་འཇིག་རྟེན་དང ། ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་ལ་གནས་པ་རྣམས་ཀྱིས་ཀྱང་རུང་གང་གིས་ཀྱང་དོན་གཟུང་བར་མི་ནུས་སོ། །དེ་བཞིན་གཤེགས་པ་ཉིད་ནི། མ་གཏོགས་ཏེ། དེ་ལྟར་ཟབ་ཅིང་དེ་ལྟར་དོན་ཆེ་བ་ཡིན་ལ་དེ་ལྟར་ཕན་ཡོན་ཆེ་བ་ཡིན་ནོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་དང ། བསམ་པ་ཡོངས་སུ་རྫོགས་པར་བྱེད་པ་ཡིན་ཞིང་སེམས་ཅན་ཡོངས་སུ་
233b
སྨིན་པར་བྱེད་པའི་སྙིང་རྗེ་ཆེན་པོའང་ཐོབ་པར་བྱེད་པའོ། །མཽངྒལ་གྱི་བུ། དེ་ལྟ་བས་ན། སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པའི་གཟུངས་སྔགས་འདི་ཟུངས་ཤིག ། དུས་དུས་སུ་སེམས་ཅན་རྣམས་ལ་རྒྱ་ཆེར་ཡང་དག་པར་སྟོན་ཅིག་།སེམས་ཅན་གང་དག་ཉན་པར་བྱེད་པ་དེ་དག་ཀྱང་ཐོས་པ་ཙམ་གྱིས་ཡོན་ཏན་དང ། ཕན་ཡོན་མང་པོ་ཐོབ་པར་འགྱུར་རོ། །ཁྲོ་བ་མང་པོ་མི་འདོད་པ་མྱོང་བར་འགྱུར་བ་ལས་ཀྱི་རྣམ་པར་སྨིན་པའི་འབྲས་བུ་རྣམས་མེད་པར་འགྱུར་རོ། །མི་སྣང་བར་འགྱུར་རོ། །འཁོར་བའི་སྐྱོན་མང་པོ་རྣམ་པར་ཤེས་པར་འགྱུར་རོ། །དགེ་བའི་རྩ་བ་མང་པོ་སྐྱེད་པར་འགྱུར་རོ། །བསོད་ནམས་མང་པོ་སོ་སོར་འཛིན་པར་བྱེད་དོ། །དགེ་བའི་བཤེས་གཉེན་མང་པོ་ལ་སྟེན་པར་བྱེད་དོ། ། སྙེན་པར་བྱེད་དོ། །བསྙེན་བཀུར་བྱེད་དོ། །དེས་ན། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །མཽངྒལ་གྱི་བུ། གཟུངས་སྔགས་འདི་ནི། ཆོས་ཀྱི་མར་མེ་འབར་བར་བྱེད་པ། དཀོན་མཆོག་གསུམ་གྱི་གདུང་མི་འཆད་པར་བྱེད་པ་ཡིན་ནོ། །འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་ལས། གཟུངས་སྔགས་ཀྱི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་ཀྱིས་ཕོ་ཉ་བཞི་པོ་དེ་དག་དང ། བྱང་ཆུབ་སེམས་དཔའ་སེམས་དཔའ་ཆེན་
234a
༄#། །པོ་གཞན་དག་ལའང་བཀའ་སྩལ་པ། རིགས་ཀྱི་བུ་དག་།སངས་རྒྱས་ཀྱི་ཞིང་འདིར་རང་རང་གི་དགེ་བའི་ཕྱོགས་ཀྱིས་གནས་པར་བྱོས་ཤིག་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འཁོར་དང་བཅས་ཏེ་གནས་ཇི་ལྟ་བ་བཞིན་དུ་སྐྱིལ་མོ་ཀྲུང་གིས་འཁོད་ནས་ཇི་ལྟར་འཚམ་པ་བཞིན་དུ་བཟོད་པའི་གཟུངས་ལ་སྙོམས་པར་འཇུག་པ་ཤིན་ཏུ་བསྒོམས་པ་དག་གིས་སྙོམས་པར་ཞུགས་སོ། །སྙོམས་པར་ཞུགས་པ་དེ་དག་ཁ་ཅིག་གི་ལུས་ལས་འོད་འདི་ལྟ་བུ་བྱུང་སྟེ། དཔེར་ན། འབྲུ་མར་གྱི་མར་མེ་བཞིན་ནོ། །ཁ་ཅིག་ནི། དཔེར་ན། ཟླ་བ་དང་ཉི་མ་བྱེ་བ་བརྒྱ་སྟོང་གི་འོད་བཞིན་པའི་བར་དུའོ། །དེའང་དེའི་ཚེ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་འདི་སྙམ་དུ་སེམས་ཏེ། སངས་རྒྱས་ཀྱི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་གིས་ཞུ་བ་ཇི་ལྟ་བུས་དེ་བཞིན་གཤེགས་པ་གཟུངས་སྔགས་བཞི་པོ་ཐམས་ཅད་རྒྱ་ཆེར་ཡང་དག་པར་རབ་ཏུ་སྟོན་པར་མཛད་པ་དང ། སངས་རྒྱས་ཀྱི་ཞིང་མི་མཇེད་དུ་ཇི་ལྟར་ལྷགས་པའི་སེམས་ཅན་ཉན་པར་བྱེད་པ་དང ། ཐེ་ཚོམ་ཐམས་ཅད་སྤོང་བར་འགྱུར་བ་དང ། ཆོས་ཐམས་ཅད་ལ་སྣང་བ་ཐོབ་པ་དང ། ལྟད་མོ་དང་བྲལ་བ་དང ། སོམ་
234b
ཉིད་ལས་རྒལ་ཅིང་ཐེ་ཚོམ་ལས་རྒལ་བར་འགྱུར་བ་དང ། མྱུར་དུ་སྐྱོན་མེད་པར་འཇུག་པ་དང ། ལོག་པར་མི་ལྟུང་བའི་ཆོས་དང ། མཐོ་རིས་ལ་གཞོལ་བར་འགྱུར་བ་དེ་ལྟ་བུར་ཞུ་པར་བྱའོ་སྙམ་མོ། །དེ་ནས་ཚེ་དང་ལྡན་པ་ཀུན་ཤེས་ཀཽ་ཌི་ནྱས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་ཅད་མི་སྨྲ་བར་འདུག་གོ་།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ། ཅི་དེ་བཞིན་གཤེགས་པ་ལ་ཁྱོད་ཞུ་བ་ཞུ་བར་འདོད་དམ། གསོལ་པ། བཙུན་པ་བཅོམ་ལྡན་འདས། དེ་བཞིན་ནོ། །བཙུན་པ་བདེ་བར་གཤེགས་པ། དེ་བཞིན་ཏེ། བཙུན་པ་བཅོམ་ལྡན་འདས། གལ་ཏེ་ཞུ་བ་ཞུས་པ་ལུང་བསྟན་པའི་སླད་དུ་བདག་ལ་སྐབས་ཕྱེ་ན། བཅུན་པ་དེ་བཞིན་གཤེགས་པ་ལ་བདག་ཞུ་བ་འགའ་ཞིག་ཞུ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་གང་དང་གང་འདོད་པ་ཞུས་ཤིག་དང ། ངས་ཞུ་བ་ཞུས་པ་དེ་དང་དེ་ལུང་བསྟན་པས་ཇི་ལྟར་ལྷ་དང་བཅས་པའི་འཇིག་རྟེན་གྱིས་མངོན་སུམ་དུ་འགྱུར་བ་ལྟར་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གང་ཟག་
235a
༄#། །གི་ཟླ་ནི། སྲེད་པའོ། །ཟླ་ནི། སྲེད་པའོ། །ཞེས་གསུངས་ལགས་ན། ཇི་ཙམ་གྱིས་དེ་བཞིན་གཤེགས་པ་གང་ཟག་གི་ཟླ་སྲེད་པ་ལགས་པར་འདོགས་པས་འདོགས་པར་མཛད་ལགས། ཇི་སྐད་དུ་དེ་བཞིན་གཤེགས་པས་སྐྱེས་བུའི་ཟླ་སྲེད་པ་ནི། ཡུན་རིང་པོར་ཡང་དང་ཡང་འཁོར་ཞིང་ཡང་དང་ཡང་མངལ་ལེན་པར་བྱེད་དོ། །ཞེས་གསུངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། གང་ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བའི་ཕྱིར་ཞུགས་ཤིང་དུས་དང་འཚམ་པར་ཞུ་བ་ཞུས་པ་ལེགས་སོ་ལེགས་སོ། །ཀཽ་ཌི་ནྱ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །བཙུན་པ་བཅོམ་ལྡན་འདས། དེ་བཞིན་ནོ། །ཞེས་གསོལ་ནས་ཚེ་དང་ལྡན་པ་ཀུན་ཤེས་ཀཽ་ཌི་ནྱས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀཽ་ཌི་ནྱ། སྲེད་པ་ཞེས་བྱ་བ་ནི། སྲེད་པ་གསུམ་མོ། །གསུམ་གང་ཞེ་ན། འདོད་པའི་སྲེད་པ་དང ། གཟུགས་ཀྱི་སྲེད་པ་དང ། གཟུགས་མེད་པའི་སྲེད་པའོ།། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དྲུག་པ། གཞན་ཡང་སྲེད་པ་ནི། གསུམ་
235b
སྟེ།་འབྱུང་བའི་སྲེད་པ་དང ། འཇིག་པའི་སྲེད་པ་དང ། ཆོས་ཀྱི་སྲེད་པའོ། །ཀཽ་ཌི་ནྱ། དེ་ལ་འདོད་པའི་སྲེད་པ་རྣམས་གང་ཞེ་ན། འདོད་པ་རྣམས་ཞེས་བྱ་བ་ནི། འཁྲིག་པ་དང་ལྡན་པའི་སྤྲོད་པ་སྟེ། གང་ལ་བག་མེད་པ་རྣམས་འདོད་པའི་བདེ་བའི་སྦྱོར་བ་ལ་བརྩོན་ཞིང་དམན་པའི་རང་བཞིན་ཅན་གྱི་མི་དག་དགའ་བར་བྱེད་ཅིང ། སེམས་ཅན་རྣམས་འདོད་ཆགས་ཀྱི་ཡོངས་སུ་གདུང་བས་གདུངས་ནས་འདོད་ཆགས་ཀུན་འབྱུང་བས་མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཏེ་གནས་པར་བྱེད་པའོ། །རྒྱུ་དེ་དང་རྐྱེན་དེས་སེམས་ཅན་དམྱལ་བ་རྣམས་སྣང་ངོ ། །དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། གནོད་སྦྱིན་དབུལ་པོ་ཉིད་སྣང་ངོ ། །འདོད་ཆགས་ཀྱི་རྒྱུས་སེམས་ཅན་རྣམས་འགྲོ་བ་ལྔ་དང་ལྡན་པའི་འཁོར་བར་སྡུག་བསྔལ་གྱི་ཚོར་བ་མི་བཟད་པ་རྩུབ་པ་རྣམ་པ་སྣ་ཚོགས་ཉམས་སུ་མྱོང་བར་འགྱུར་རོ། །སྐྲག་པར་མི་འགྱུར་རོ། །དེ་དག་ངོ་ཚ་ཤེས་པ་དང ། ཁྲེལ་ཡོད་པ་སྤངས་ཤིང་དགེ་བའི་རྩ་བ་དང་བྲལ་བས་བརྒྱ་ལམ་ན་རེས་འགའ་མི་ཉིད་རྙེད་པར་འགྱུར་རོ། །དེ་དག་འདོད་ཆགས་ཀྱི་རྒྱུས་ཡང་དང་ཡང་དུ་ལུས་དང ། ངག་དང ། ཡིད་ཀྱི་ཉེས་པར་སྤྱོད་པའི་ལས་རྣམ་པ་སྣ་ཚོགས་ཞེས་བྱ་བ་ནས་མཚམས་མེད་པའི་ལས་རྣམས་ཞེས་བྱ་བའི་བར་ཀུན་ནས་སློང་བར་བྱེད་དོ། །དེ་དག་ཡང་དང་ཡང་དུ་དུས་ཡུན་རིང་
236a
༄#། །བོར་ངན་སོང་རྣམས་སུ་ཚོར་བ་རྩུབ་པ་མི་བཟད་པ་ཉམས་སུ་མྱོང་བར་འགྱུར་རོ། །ཐམས་ཅད་ཀྱང་འདོད་ཆགས་ཀྱི་རྒྱུ་དང ། འདོད་ཆགས་ཀྱི་གཞིས་འདོད་ཆགས་ཀྱི་བག་ལ་ཉལ་གྱི་ལྟུང་བ་བརྟགས་པ་དག་ཡིན་ཏེ། དེའི་ཕྱིར་དེ་བཞིན་གཤེགས་པ་འདོད་ཆགས་སྤངས་པའི་ཕྱིར་ཆོས་སྟོན་ཏོ། འདོད་པ་རྣམས་ཀྱི་ཉེས་དམིགས་ཡང་དག་པ་ཇི་ལྟ་བ་བཞིན་དུ་མཐོང་བར་མཛད་དོ། །སེམས་ཅན་དེ་དག་འདོད་པ་རྣམས་ཀྱི་ཉེས་དམིགས་ཤེས་ནས་ཡང་དག་པ་ཇི་ལྟ་བ་བཞིན་དུ་སོ་སོར་རྟོགས་པར་བྱེད་དེ། དཔེར་ན། འདོད་པ་རྣམས་ནི། མི་སྡུག་པ་དག་གོ་།ཀིམ་པ་ཀའི་འབྲས་བུ་ལྟ་བུ་དག་གོ་།འདོད་པ་རྣམས་ནི། མེ་མདག་གི་ཕུང་པོ་ལྟ་བུ་དག་གོ་།དུག་གི་བུམ་པ་ལྟ་བུ་དག་གོ་།འདོད་པ་རྣམས་ནི། མནམ་ཕྱི་ས་དང་འདྲ་བ་དག་གོ་།འདོད་པ་རྣམས་ནི། སྤུ་གྲིའི་སོ་ལྟ་བུ་དག་གོ་།ཆོམ་རྐུན་ལྟ་བུ་དག་གོ་།གདོལ་བའི་ཁྱིམ་ལྟ་བུ་དག་གོ་།ལྕགས་ཀྱི་ཐུ་ལུམ་འབར་བ་ལྟ་བུ་དག་གོ་།སེར་བ་འབབ་པ་ལྟ་བུ་དག་གོ་།སྦྲུལ་གདུག་པ་ལྟ་བུ་དག་གོ་།དགྲ་དང་འདྲ་བ་དག་གོ་།དགོན་པའི་ལམ་ལྟ་བུ་དག་གོ ། སྲིན་མོའི་གླིང་ལྟ་བུ་དག་གོ་།གཤེད་མ་ལྟ་བུ་དག་གོ་།ཕྱག་དར་ལྟ་བུ་དག་གོ་།འདོད་པ་རྣམས་ནི། དུར་ཁྲོད་ལྟ་བུ་དག་ཏུ་ཤེས་ཤིང་འདོད་པ་ལ་ཆགས་པ་དང ། འདོད་
236b
པ་ལ་ཞེན་པ་དང ། འདོད་པའི་ཡོངས་སུ་གདུང་བ་དང ། འདོད་པའི་ཀུན་འབྱུང་བ་དང ། འདོད་པ་རྣམས་ཀྱི་ཉེས་དམིགས་ཏེ། དེ་ལ་འདོད་པ་རྣམས་ལ་ཉེས་དམིགས་སུ་ཤེས་པས་སྐྱོ་ཞིང་ཆོས་ཀྱི་བསམ་པ་སྒོམ་པ་དང ། བསླབ་པ་འཛིན་པ་ལ་མངོན་པར་དགའ་བས་གནས་པར་བྱེད་དོ། །ཆོས་ཡོངས་སུ་ཚོལ་བ་དང ། ཆོས་ཀྱི་ཀུན་དགའ་ལ་དགའ་བས་དགའ་བ་དང ། ཆོས་ཀྱི་ནོར་བསགས་པ་དང ། ཆོས་ཀྱི་སེམས་རྣམ་པར་དག་པ་དང ། ཆོས་ཀྱི་ལམ་དང་ཡང་དག་པར་ལྡན་པ་དང ། ཆོས་ལ་གཞོལ་བ་དག་ཏུ་འགྱུར་རོ། །དེ་དག་འཆི་བའི་དུས་ཀྱི་ཚེ་ཆོས་རྗེས་སུ་དྲན་ཞིང་ཆོས་ཀྱི་རོའི་རྣམ་པར་སྨིན་པ་ཆོས་ཀྱིས་བརླན་པའི་སེམས་ཀྱིས་གནས་པ་དེ་དག་གང་དང་གང་དུ་རྣམ་པར་ལྟ་བར་བྱེད་པ་དེ་དང་དེར་ཕྱོགས་ཐམས་ཅད་ན་སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་ཚོགས་ཆེན་པོའི་འཁོར་དང་བཅས་པ་མཐོང་བར་འགྱུར་རོ། ། ཆོས་ཐོས་པར་འགྱུར་རོ། །དེ་དག་ཆོས་དེ་ཐོས་པས་ཀྱང་ཡིད་མཆོག་ཏུ་རངས་ཏེ། དེ་བཞིན་གཤེགས་པ་ལ་ལྟ་བར་བྱེད་དོ། །དེ་དག་འཆི་བའི་དུས་བྱས་ནས་ངན་སོང་སྤངས་ཤིང་སངས་རྒྱས་ཀྱི་ཞིང་སྟོང་པ་མ་ཡིན་པ་རྣམས་སུ་སྐྱེ་བ་དག་ཏུ་འགྱུར་རོ། །དེར་དེ་དག་ཡོན་ཏན་གྱིས་ཕྱུག་པ་དང ། དུལ་བ་དང ། ཡང་དག་པར་སྡོམ་པ་ལ་མངོན་པར་དགའ་
237a
༄#། །ཞིང་བསམ་གཏན་དང་མངོན་པར་ཤེས་པས་རྣམ་པར་རོལ་པ་བྱང་གྲོལ་གྱི་བདེ་བ་ཕུན་སུམ་ཚོགས་པ། བྱམས་པ་ཆེན་པོ་དང ། སྙིང་རྗེ་ཆེན་པོས་བརྒྱན་པ།་སེམས་ཅན་ཐམས་ཅད་ཡོངས་སུ་སྨིན་པར་མཛད་པ། སངས་རྒྱས་ཀྱི་ཡོན་ཏན་གྱིས་རྣམ་པར་བརྒྱན་པ་རྣམས་དང་ལྷན་ཅིག་འཕྲད་པར་འགྱུར་རོ། །དེར་དེ་དག་དང་ལྷན་ཅིག་ཕྲད་པས་དེ་དག་གི་བག་ཆགས་ཀྱི་ཉིང་མཚམས་སྦྱོར་བའི་ཉོན་མོངས་པ་རྣམས་ཡོངས་སུ་ཟད་པར་འགྱུར་རོ། །དེར་དེ་དག་ཡོན་ཏན་དེ་ལྟ་བུ་དག་གིས་ཀྱང་ཤིན་ཏུ་བརྒྱན་པར་འགྱུར་ཏེ། དཔེར་ན། ཟ་མ་ཏོག་ལ་ལར་སྤོས་ཀྱི་རྣམ་པ་སྣ་ཚོགས་དག་བཅུག་པར་གྱུར་ཅིང ། ཟ་མ་ཏོག་དེར་ཡང་རྒྱན་རྣམ་པ་སྣ་ཚོགས་དག་བཞག་པར་གྱུར་ན། རིང་པོ་མ་ཐོགས་པར་དེ་དག་གི་དྲི་ཅི་འདྲ་བར་གོས་དང་རྒྱན་དེ་དག་ཀྱང་དེ་འདྲ་བའི་དྲི་རབ་ཏུ་འབྱིན་པར་བྱེད་དོ། །རིང་པོ་མི་ཐོགས་པར་སྤོས་ཀྱི་རྣམ་པ་དེ་དག་གིས་གོས་པར་ཡང་འགྱུར་ལ་ཁ་དོག་ཏུ་ཉེ་བར་འགྲོ་བར་ཡང་མི་འགྱུར་རོ། །ཀཽ་ཌི་ནྱ། དེ་བཞིན་དུ་སེམས་ཅན་གང་དག་འདོད་པ་རྣམས་ལ་ཉེས་དམིགས་སུ་ཤེས་པས་ཞེས་བྱ་བ་ནས་དེ་དག་འཆི་བའི་དུས་ཀྱི་ཚེ་ཞེས་བྱ་བའི་བར་དང ། སངས་རྒྱས་བཅོམ་ལྡན་འདས་མཐོང་ཞིང་དེ་དག་འཆི་བའི་དུས་བྱས་ནས་ངན་སོང་གསུམ་སྤངས་ཤིང་སངས་རྒྱས་ཀྱི་ཞིང་སྟོང་པ་མ་ཡིན་པ་རྣམས་སུ་སྐྱེ་བ་དག་ཏུ་
237b
འགྱུར་རོ། །ཞེས་བྱ་བའི་བར་དང ། དེར་དེ་དག་ཡོན་ཏན་དེ་ལྟ་བུ་དག་གིས་ཀྱང་ཡང་དག་པར་བརྒྱན་པར་འགྱུར་ཏེ་ཞེས་བྱ་བའི་བར་དང ། དེ་དག་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཀཽ་ཌི་ནྱ། དེ་ལྟ་བས་ན། བདག་གི་དོན་དང ། གཞན་གྱི་དོན་དང ། གཉི་གའི་དོན་ཡང་དག་པར་མཐོང་བའི་རིགས་ཀྱི་བུའམ་རིགས་ཀྱི་བུ་མོས་སྐྱེས་བུ་དམ་པ་དག་ལ་བསྟེན་པར་བྱའོ། །བསྙེན་པར་བྱའོ། །དེ་དག་ལའང་གང་འདོད་པ་རྣམས་ཀྱི་རོ་མྱང་བ་དང ། ཉེས་དམིགས་དང ། ངེས་པར་འབྱུང་བ་ཡོངས་སུ་དྲི་བར་བྱའོ། །དེར་དེ་དག་ཆོས་ཐོས་ནས་གང་གི་ཕྱིར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། །སྐྱེས་བུ་དམ་པ་རྣམས་ཞེས་བྱ་བ་ནི། སངས་རྒྱས་དང ། བྱང་ཆུབ་སེམས་དཔའ་རྣམས་དང ། རྐྱེན་གྱི་རྒྱལ་བ་རྣམས་དང ། དགྲ་བཅོམ་པ་རྣམས་དང ། དེ་ལྟར་འཇིག་རྟེན་དུ་སྟོན་པ་བྱུང་ངོ ། །ཞེས་བྱ་བ་ནས་སངས་རྒྱས་བཅོམ་ལྡན་འདས་སོ། །ཞེས་བྱ་བའི་བར་ཡིན་ཏེ། ང་ནི། སེམས་ཅན་ཐམས་ཅད་ལ་ཕན་པར་བཞེད་པ། སྡུག་བསྔལ་ཐམས་ཅད་ལས་རབ་ཏུ་ཐར་པར་བཞེད་པ། འདོད་པའི་སྐྱོན་ཐམས་ཅད་རབ་ཏུ་སྟོན་པར་བཞེད་པ་ཡིན་ནོ། །དེ་བས་ན། འདིར་ཁྱེད་ཇི་
238a
༄#། །སྙེད་ལྷགས་པ་ཐམས་ཅད་ང་གཞན་མ་ཡིན་པར་གསུང་བ། མི་མཉམ་པ་མེད་པར་གསུང་བ། བྱམས་པར་གསུང་བ། སྙིང་རྗེ་བར་གསུང་བ། སེམས་ཅན་ཐམས་ཅད་ལ་ཕན་པར་མཛད་པ་ལས་འདོད་པ་རྣམས་ཀྱི་ཉེས་དམིགས་ཡང་དག་པར་ཇི་ལྟ་བ་བཞིན་ཉོན་ཅིག་།མཉན་ནས་ཀྱང་ཚུལ་བཞིན་དུ་ཡིད་ལ་བྱོས་ཤིག་དང ། ཕྱིས་ངན་སོང་གསུམ་པོ་ཐམས་ཅད་ལས་ཡོངས་སུ་ཐར་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཡང་དེའི་ཚེ་སངས་རྒྱས་ཀྱི་ཞིང་མི་མཇེད་ཐམས་ཅད་དུ་གཏོགས་པའི་སེམས་ཅན་དེ་དག་ཐམས་ཅད་ཀྱིས་མགྲིན་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམས་ཀྱིས་འདོད་པ་རྣམས་ཀྱི་ཉེས་དམིགས་གང་བདག་ཅག་གིས་སེམས་རྩེ་གཅིག་པས་ཐོས་པར་འགྱུར་བ་བཤད་དུ་གསོལ། ཐོས་ནས་ཀྱང་སྟོབས་ཇི་ལྟ་བ་བཞིན་དུ་བསྒྲུབ་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྐྱེན་བཞིས་སེམས་ཅན་དག་གི་འདོད་པ་རྣམས་འབྱུང་སྟེ། བཞི་གང་ཞེ་ན། གཟུགས་ཀྱི་འདོད་ཆགས་དང ། དབྱིབས་ཀྱི་འདོད་ཆགས་དང ། རེག་པའི་འདོད་ཆགས་དང ། རྣམ་པར་གྲོལ་བ་མ་ཡིན་པའི་རྩེ་བའི་འདོད་ཆགས་ཀྱིས་སོ། །དེ་ལ་གཟུགས་ཀྱི་
238b
འདོད་ཆགས་གང་ཞེ་ན། གཟུགས་ཀྱི་འདོད་ཆགས་ཞེས་བྱ་བ་ནི། མཁས་པ་དུས་སུ་འབྱུང་བ་ཆེན་པོ་བཞི་དག་ལ་མཁས་པ་ནི། ཟད་པའི་ཚུལ་དང ། བདག་མེད་པའི་ཚུལ་དང ། སེམས་ཅན་མེད་པའི་ཚུལ་གྱིས་སོ་སོར་རྟོགས་པར་བྱེད་ན། འོན་ཀྱང་བྱིས་པ་ཕྱིན་ཅི་ལོག་ལ་ཡང་དག་པར་རྟེན་པ་རྣམས་ནི། རྣམ་པར་བརྟག་པ་དག་ཡ་འདི་ནི། བུད་མེད་ཀྱི་གཟུགས་སོ། །འདི་ནི། སྐྱེས་པའི་གཟུགས་སོ། །འདི་ནི། ངན་པའོ། །འདི་ནི། བཟང་པོའོ། །འདི་ནི། དགའ་བར་བྱེད་པའོ། །འདི་ནི། མི་འདོད་པའོ། །ཞེས་ཉེ་བར་རྟོག་པར་བྱེད་དོ། ། དེ་ལ་འདོད་པའི་སྐྱེས་བུ་སྨྱོན་པ་རྣམས་ནི། བུད་མེད་ཀྱི་གཟུགས་དག་མཐོང་ནས་དེ་ལ་མཚན་མར་འཛིན་པ་དག་ཡིན། མངོན་རྟོགས་སུ་འཛིན་པ་དག་ཡིན་ནོ། །དེ་ལ་དེ་དག་འདོད་པའི་གཞི་དང ། འདོད་པ་ལ་འདུན་པ་དང ། འདོད་པ་ལ་ལྷག་པར་ཆགས་པ་མ་བྱུང་བ་སྐྱེད་པར་བྱེད་པས་ད་དག་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པར་འགྱུར་རོ། །མཁས་པ་ཐམས་ཅད་ཀྱིས་རྣམ་པར་སྤོང་བར་བྱེད་པར་འགྱུར་རོ། །ལུས་དང ། ངག་དང ། ཡིད་མ་བསྲུངས་པས་ཉེས་པར་སྤྱོད་པ་ཐམས་ཅད་དང་ཕྲད་པར་འགྱུར་རོ། །དེ་དག་འདོད་པ་རྣམས་ལས་ངེས་པར་འབྱུང་བར་མི་ལྟ་ཞིང་ངན་སོང་གསུམ་དང་ཡང་དག་པར་ལྡན་པ་ཡིན་ཏེ། འཆི་བའི་དུས་བྱས་ནས་སེམས་ཅན་དམྱལ་བ་རྣམས་སམ། དུད་འགྲོ།
239a
༄#། །རྣམས་སམ། ཡི་དྭགས་རྣམས་སུ་སྐྱེ་བར་འགྱུར་རོ། །དེར་འདོད་པའི་རྒྱུ་དང ། འདོད་པའི་རྐྱེན་དང ། འདོད་པའི་གཞིས་དུས་ཡུན་རིང་པོར་སྡུག་བསྔལ་གྱི་ཚོར་བ་རྩུབ་པ་ཚ་བ་མི་ཟད་པ་མྱོང་བར་འགྱུར་རོ། །དེར་མཁས་པ་རྣམས་ནི། བུད་མེད་དང་སྐྱེས་པར་ཤེས་ནས་མི་སྡུག་པའི་འདུ་ཤེས་སྐྱེད་པར་བྱེད་དོ། །སྐྲ་མེད་པ་དང ། པགས་ཤུན་དང ། རྒྱུས་པ་དང ། ཤ་དང ། ཁྲག་མེད་པ་དང ། རུས་པ་དང ། མིའི་ཐོད་པ་དཀར་པོ་ཡིད་ལ་བྱེད། ཀུན་ཏུ་སྟེན་པར་བྱེད་ཅིང་དེ་སྒོམ་པར་བྱེད། ལན་མང་དུ་བྱེད་དོ། །བུད་མེད་ཀྱི་གཟུགས་ལ་ཇི་ལྟ་བར་སྐྱེས་པའི་གཟུགས་ལའང་དེ་བཞིན་ནོ། །མདུན་དུ་ཇི་ལྟ་བར་ཐག་རིང་དུའང་དེ་བཞིན་ནོ། །ཐག་རིང་དུ་ཇི་ལྟ་བར་མདུན་དུའང་དེ་བཞིན་ནོ། །གཞན་ཇི་ལྟ་བར་བདག་གིའང་དེ་བཞིན་དུ་རུས་པའི་ཕུང་པོ་དཀར་པོ་དང ། སྐྲ་མེད་པ་དང ། པགས་ཤུན་དང ། རྒྱུས་པ་དང ། ཤ་དང ། ཁྲག་མེད་པར་ཡིད་ལ་བྱས་ཤིང་རིག་པར་བྱས་ལ་ལན་མང་དུ་བྱས་པས་དེར་སེམས་ཤིན་ཏུ་གནས་པ་ཡིན། ཤིན་ཏུ་བསྒོམས་པ་དང ། ཤིན་ཏུ་ཡིད་ལ་བྱས་པ་ཡིན་ཏེ། འདི་ནི། སེམས་ཀྱི་ཉོན་མོངས་པའི་ཀློང་ཡང་དག་པར་གཅོད་པ་དང་པོའོ། །ཡང་རུས་གོང་གི་ཕུང་པོ་དེ་ཉིད་ལ་སེམས་ཡང་དག་པར་གཏོད་པར་བྱེད་དེ། སྨིན་མཚམས་སུ་རྒྱ་ཤུག་
239b
ཙམ་དེ་ལ་དྲན་པ་གཞོག་པར་བྱེད་ཅིང་སེམས་སྒོམ་པར་བྱེད། ལན་མང་དུ་བྱེད་དོ། །ཞེས་བྱ་བ་ནས་དེའི་སེམས་ཤིན་ཏུ་གནས་པ་ཡིན་ཏེ། ཤིན་ཏུ་བསྒོམས་པ་དང ། ཤིན་ཏུ་ཡིད་ལ་བྱས་པའི་བར་ཡིན་ནོ། །དེ་ལ་དེའི་སེམས་ཤིན་ཏུ་སྦྱངས་པ་ཡིན། ལུས་ཤིན་ཏུ་སྦྱངས་པ་ཡིན་ཏེ། ཇི་ལྟར་སེམས་ཤིན་ཏུ་སྦྱངས་པ་ཡིན་ཞེ་ན། ཐམས་ཅད་ཀྱི་ཐམས་ཅད་དུ་རྣམ་པར་ཞི་བར་བྱེད་དོ། །དེ་ཅུང་ཟད་ཡིད་ལ་བྱེད་པ་ཡིན། དེ་ཅུང་ཟད་ཡང་དག་པར་ཤེས་པ་ཡིན། དེ་ཅུང་ཟད་དམིགས་པར་བྱེད་པ་ཡིན་ཏེ། འདི་ནི། ཞི་གནས་དང་རྗེས་སུ་མཐུན་པ་ཉོན་མོངས་པའི་ཀློང་རྣམ་པར་གཅོད་པ་དང ། འདོད་ཆགས་རྣམ་པར་གཅོད་པའི་ཆོས་ཀྱི་སྒོ་གཉིས་པའོ། །ཇི་ལྟར་ལུས་ཤིན་ཏུ་སྦྱངས་པ་ཡིན་ཞེ་ན། དེ་བཞིན་དུ་སྒོམ་པའི་དབུགས་རྡུབ་པ་དང་དབུགས་ཕྱུང་བ་རྣམ་པར་ཞི་བར་བྱེད་ཅིང་འཇུག་པར་ཡང་མི་བྱེད། འབྱུང་བར་མི་བྱེད་དོ། །དེ་ལུས་དང་སེམས་ཤིན་ཏུ་སྦྱངས་ཤིང་ཞི་གནས་ལ་རྗེས་སུ་བརྩོན་པ་འགོག་པ་ལ་དམིགས་པ་ཡིན་ཏེ། འདི་ནི། འགོག་པ་ལ་དམིགས་པའི་ཉོན་མོངས་པའི་ཀློང་རྣམ་པར་གཅོད་པའི་ཆོས་ཀྱི་སྒོ་གསུམ་པ་ཡིན་ནོ། །ཡང་གང་གི་སེམས་རྒོད་པ་མྱུར་དུ་ཞི་གནས་དང་མཐུན་པར་བྱུང་བ་དེ་མགོ་ཐོད་ཀྱི་མཚོག་མར་རྒྱ་ཤུག་གི་འབྲས་བུ་ཙམ་ལ་གནས་གཅིག་ཏུ་སེམས་ཉེ་བར་གཏོད་པར་བྱེད་ཅིང་སྒོམ་པར་བྱེད། ལན་མང་
240a
༄#། །དུ་བྱེད་དོ། །དེར་བུ་གའི་བར་དུ་མཐོང་བར་བྱེད་ཅིང་སྒོམ་པར་བྱེད། ལན་མང་དུ་བྱེད་དོ། །དེར་ཡང་བྱེ་མའི་འབྲུ་ཙམ་གྱི་རུས་གོང་གི་ཕྱེ་མར་བྱེད། མཐོང་བར་བྱེད་ཅིང་རིམ་པ་དེ་གཉིས་པ་དང ། གསུམ་པ་ཞེས་བྱ་བ་ནས་མགོའི་ཐོད་པ་ཐམས་ཅད་རུས་གོང་གི་ཕྱི་མའི་བར་དུ་ཡང་དག་པར་རྗེས་སུ་མཐོང་བར་བྱེད། དེ་དག་ཀྱང་རླུང་གིས་ཁྱེར་བར་ཡང་དག་པར་རྗེས་སུ་མཐོང་བར་བྱེད་པ་ནས་ཐམས་ཅད་ནམ་མཁའ་སྟོང་པ་ཉིད་དུ་མཐོང་བའི་བར་དུ་བྱེད་དོ། །དེ་ལ་ལུས་ཤིན་ཏུ་སྦྱངས་པ་དང ། སེམས་ཤིན་ཏུ་སྦྱངས་པ་འདི་ནི། ཞི་གནས་ལ་རབ་ཏུ་བརྩོན་པ་དང ། འགོག་པ་ལ་དམིགས་པ་དང ། ཉོན་མོངས་པའི་ཀློང་རྣམ་པར་གཅོད་པའི་ཆོས་ཀྱི་སྒོ་བཞི་པའོ། །དེ་ནས་ཚེ་དང་ལྡན་པ་ཀཽ་ཌི་ནྱས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཅི་ལགས། འདུས་བྱས་ཀྱི་དབྱིངས་ཀྱི་ཡེ་ཤེས་མ་ཚངས་བ་མ་མཆིས་པ་རྣམ་པར་དབེན་པའི་རྟེན་ནམ་མཁའི་དབྱིངས་ཀྱི་ཡང་དག་པའི་མཐའ་ཅན་ལགས་སམ། རིགས་ཀྱི་བུ། དེ་བཞིན་ནོ། །འདུས་བྱས་ཀྱི་དབྱིངས་ཀྱི་ཡང་དག་པའི་མཐའ་ནི། ནམ་མཁའ་དང་འདྲ་སྟེ།་འདི་ནི། ཡང་དག་པར་རང་གིས་མཐོང་བར་བྱ་བ་ལ་འཇུག་པའོ། །ཀུན་ཤེས་ཀཽ་ཌི་ནྱས་ཞུས་པ། བཙུན་པ་བཅོམ་ལྡན་འདས། ཅི་ལགས། ནམ་མཁའ་རང་གི་
240b
ཤེས་པ་ལགས་སམ། འོན་ཏེ་གཞན་གྱི་ཤེས་པ་ལ་མངོན་པར་འཇུག་པ་མཁས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ཀྱི་དབྱིངས་ལ་འཇུག་པས་འདུས་བྱས་ཀྱི་དབྱིངས་ཐམས་ཅད་རང་གི་ཤེས་པ་ལ་འཇུག་པར་བརྗོད་པར་བྱའོ། །ཇི་ལྟ་ཞེ་ན། གང་གཟུགས་ཤིན་ཏུ་རྣམ་པར་དག་པ་ལ་རྣམ་པར་སྒོམ་པར་བྱེད་པ་དེ་དེ་བཞིན་གཤེགས་པ་མཐོང་བར་འགྱུར་རོ། །གང་མགོའི་ཐོད་པའི་རུས་པའི་ཕྱི་མ་མཐོང་ནས་ཐམས་ཅད་རླུང་གིས་ཁྱེར་བར་མཐོང་བ་དེས་གཟུགས་ཐམས་ཅད་རྣམ་པར་བཤིག་པ་ཡིན་ཏེ།་མིག་གི་རྣམ་པར་ཤེས་པ་ལ་གཟུགས་སུ་སྣང་བ་ཅིའང་སྣང་བར་མི་འགྱུར་རོ། །དེ་ནམ་མཁའ་སྟོང་པ་ཡིད་ལ་བྱེད་ཅིང་སྒོམ་པར་བྱེད། ལན་མང་དུ་བྱེད་དེ། ཕྱོགས་དང་ཕྱོགས་མཚམས་ཐམས་ཅད་དུ་ནམ་མཁའ་བཻ་ཌཱུརྱའི་མདོག་ལྟར་དག་པ་ཡང་དག་པར་རྗེས་སུ་མཐོང་ངོ ། །དེའི་ཡིད་ལ་དེ་བཞིན་གཤེགས་པའི་གཟུགས་འབྱུང་སྟེ། དེས་ནམ་མཁའ་དེ་ལ་དེ་བཞིན་གཤེགས་པའི་གཟུགས་མཐོང་ངོ ། །དེ་གང་གི་ཚེ་ཕྱོགས་གང་དང་གང་དུ་ལྟ་བར་བྱེད་པའི་ཕྱོགས་དང་ཕྱོགས་མཚམས་ཐམས་ཅད་དུ་དེ་བཞིན་གཤེགས་པའི་གཟུགས་མཐོང་ངོ ། །ཡང་དེ་བཞིན་གཤེགས་པའི་མཚན་གྱིས་བརྒྱན་པར་མིག་གི་རྣམ་པར་ཤེས་པ་འབྱུང་ངོ ། །དེ་ཕྱོགས་དང་ཕྱོགས་མཚམས་ཐམས་ཅད་དུ་གང་དང་གང་དུ་ལྟ་བར་
241a
༄#། །བྱེད་པ་དེ་དང་དེ་ཉིད་དུ་སངས་རྒྱས་ཀྱི་སྐུ་རིལ་གྱིས་མཚན་སུམ་ཅུ་རྩ་གཉིས་ཀྱིས་བརྒྱན་པ། འོད་འདོམ་གང་བ། ཤིང་ནྱ་གྲོ་དྷ་ལྟར་ཆུ་ཞེང་གབ་པ་འབའ་ཞིག་མཐོང་ངོ ། །གལ་ཏེ་རིས་མཐུན་པར་ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་བསགས་པར་གྱུར་པ་ཞིག་ན་དེ་འདི་སྙམ་དུ་སེམས་ཏེ། གང་དེ་བཞིན་གཤེགས་པ་ལ་སུས་ནམ་མཁའ་ཀུན་ཏུ་སྐྱེད། གང་དུ་དེ་ཡོངས་སུ་ཟད་པར་འགྱུར་བ་བདག་གིས་ཞུ་གོར་མ་ཆག་སྙམ་མོ། །དེ་འདི་སྙམ་དུ་དེ་བཞིན་གཤེགས་པ་ལ་བདག་གིས་ཞུས་ཟིན་ཏོ་སྙམ་ཡང་སེམས་སོ། །དེ་བཞིན་གཤེགས་པའང་དེ་ལ་འདི་སྐད་ཅེས་བཀའ་སྩལ་ཏོ། །ནམ་མཁའ་རྟོག་པར་གསུངས་པ་སྟེ། །རྟོག་པ་དེ་ནི་ཡོད་མ་ཡིན། །ནམ་མཁའི་མིང་དང་རྟོག་པ་དག་།དེ་དག་ཐམས་ཅད་དངོས་པོ་མེད། །ཆོས་རྣམས་ཐམས་ཅད་ཅི་ཡང་མེད། །འགྱུར་བ་མེད་ཅིང་མཚན་ཉིད་མེད། མཚན་ཉིད་མེད་པར་བརྟགས་པ་ཡིས། །མཚན་གཞི་ཀུན་ལས་རབ་ཏུ་གྲོལ། །བསྟན་པ་དེ་ཐོས་ནས་མྱུར་དུ་ཕྱིར་མི་འོང་བའི་འབྲས་བུ་འཐོབ་བོ། །དེའི་གཟུགས་ཀྱི་འདོད་ཆགས་འདོད་པ་རྣམས་ནི། ལྷག་མ་མ་ལུས་པར་འགྱུར་རོ། །དེ་བཞིན་དུ་གཟུགས་མེད་པའི་འདོད་ཆགས་དང ། མ་རིག་པ་དང ། ང་རྒྱལ་དང ། རྒོད་པ་ལྷག་མ་མ་ལུས་པར་འགྱུར་རོ། །
241b
\?\་སུ་ལ་རིས་མཐུན་པར་ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་རྣམས་མེད་པ་དེ། གལ་ཏེ་སངས་རྒྱས་ཀྱི་སྐུ་མཐོང་ན་དེ་འདི་སྙམ་དུ་སེམས་ཏེ། གལ་ཏེ་དེ་བཞིན་གཤེགས་པའི་ཚད་བདག་གིས་བཟུང་བ་གོར་མ་ཆག་སྙམ་མོ། །དེ་གལ་ཏེ་ཕྱོགས་ཐམས་ཅད་དུ་ལྟ་བར་བྱེད་ན་ཐམས་ཅད་དུ་ནམ་མཁའ་ཐམས་ཅད་ལ་དེ་བཞིན་གཤེགས་པ་མཐོང་བར་འགྱུར་ཏེ། ཆུང་ངུར་ལྟ་བར་བྱེད་ན་དེ་བཞིན་གཤེགས་པ་ཆུང་དུ་ཉིད་དུ་མཐོང་ངོ ། །ཚད་མེད་པར་ལྟ་བར་བྱེད་ན་དེ་བཞིན་གཤེགས་པ་ཚད་མེད་པར་མཐོང་ངོ ། །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་འདི་ག་ལས་གཤེགས་སྙམ་མོ། །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་འདི་ག་ལས་ཀྱང་མ་གཤེགས་སོ། །གང་དུའང་མ་བཞུད་དོ། །དེ་གང་དུའང་དེ་བཞིན་གཤེགས་པ་བཞུད་པ་མི་དམིགས། བྱོན་པ་མི་དམིགས་སོ། །ཡང་དེ་འདི་སྙམ་དུ་སེམས་ཏེ། ལུས་ཀྱི་རྒྱུ་ཁམས་གསུམ་པ་འདི་ནི། སེམས་ཙམ་པས།་སུས་ཇི་ལྟར་རྣམ་པར་བརྟགས་པ་དེ་བཞིན་དུ་མཐོང་ངོ ། །བདག་གིས་རང་གི་སེམས་ཀྱིས་སངས་རྒྱས་སུ་བྱེད་དོ། །བདག་གིས་སེམས་ཀྱིས་སངས་རྒྱས་མཐོང་ངོ ། །བདག་གི་སེམས་ཉིད་སངས་རྒྱས་སོ། །བདག་གི་སེམས་ཉིད་ལུས་སོ། །སེམས་ཉིད་ཀྱང་ནམ་མཁའོ། །བདག་གིས་སེམས་ཀྱི་རྣམ་པར་རྟོག་པས་སངས་རྒྱས་མཐོང་ངོ ། །སེམས་ཀྱིས་སེམས་
242a
༄#། །མི་ཤེས་སོ། །སེམས་ཀྱིས་སེམས་མི་མཐོང་ངོ ། །སེམས་སུ་འདུ་ཤེས་པ་རྣམས་ནི། ཤེས་པ་མེད་པའོ། །སེམས་སུ་འདུ་ཤེས་པ་རྣམས་ནི། ལྡོག་པའོ། །ལྡོག་པ་ནི། སྙིང་པོ་མེད་པའོ། །ཆོས་དེ་དག་ནི། ཤེས་པ་མེད་པའི་ཕྱིར་ཡང་དག་པར་བྱུང་ངོ ། །སུས་སྔོན་བྱང་ཆུབ་ཏུ་སེམས་བསྐྱེད་ཅིང་ཤེས་རབ་གང་གིས་སྟོང་པར་རྟོགས་པ་དེའང་རང་བཞིན་གྱིས་སྟོང་པའོ་སྙམ་ནས་དམིགས་པ་ཡིད་ལ་བྱེད་པ་དེས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འཐོབ་བོ། །འོན་ཀྱང་ཡང་ཉན་ཐོས་ཀྱི་ཐེག་པ་ཡིན་ཏེ། དེ་ལྟར་མཚན་མ་མེད་པའི་གཟུགས་ཐམས་ཅད་རྣམ་པར་བསྒོམས་པས་ངེས་པར་འབྱེད་པ་ཡོངས་སུ་དག་པ་ཡིན། འདོད་ཆགས་དང་བྲལ་བ་ཡོངས་སུ་དག་པ་ཡིན། མ་རིག་པ་ཡོངས་སུ་དག་པ་ཡིན་ནོ། །དེ་ལ་སྟོང་པ་ཉིད་ཀྱི་བསམ་པས་ནི། སྟོང་པ་ཉིད་དང་རྗེས་སུ་མཐུན་པའི་བཟོད་པ་རྣོན་པོ་འཐོབ་སྟེ། ཕྱིས་ཀྱང་དེའི་འབྲས་བུ་འཐོབ་པར་དགའ་བ་མེད་དོ། །གལ་ཏེའང་ནམ་མཁའ་སྟོང་པ་ལ་རྣམ་པར་སྒོམ་པར་བྱེད་ན་ལུས་ཤིན་ཏུ་སྦྱངས་པ་ཡིན། སེམས་ཤིན་ཏུ་སྦྱངས་པ་ཡིན་ཏེ། དེར་སྟོང་པ་ཉིད་ཀྱི་རྣམ་པར་ཐར་པའི་སྒོ་འཐོབ་བོ། །དེའི་འབྲས་བུ་རྗེས་སུ་འཐོབ་པར་དགའ་བའང་མེད་དེ། འདི་ནི། སྟོང་པ་ཉིད་ལ་རབ་ཏུ་བརྩོན་པ། འགོག་པ་ལ་དམིགས་པའི་
242b
ཉོན་མོངས་པའི་རྦ་རླབས་རྣམ་པར་གཅོད་པའི་ཆོས་ཀྱི་སྒོ་ལྔ་པའོ། །བཅོམ་ལྡན་འདས་ཀྱིས་བསྟན་པ་འདི་བཤད་པ་ན་འཁོར་དེ་ལས་ལྷ་དང་མི་བྱེ་བ་བརྒྱ་སྟོང་ཕྲག་དགུ་བཅུ་རྩ་དགུ་ནི། དེ་བཞིན་དུ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །སྟོང་ཕྲག་བརྒྱད་ཅུ་རྩ་བཞི་ནི། དེར་སྟོང་པ་ཉིད་དང་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །དེ་བཞིན་དུ་སྲོག་ཆགས་སྟོང་ཕྲག་དྲུག་ཅུ་ནི། དེར་སྟོང་པ་ཉིད་ཀྱི་ཏིང་ངེ་འཛིན་གྱི་རྣམ་པར་ཐར་པའི་སྒོ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་ཉི་ཤུ་ནི། དེར་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཐོབ་པར་གྱུར་ཏོ། །སེམས་ཅན་དཔག་ཏུ་མེད་པས་ཀྱང་རྒྱུན་དུ་ཞུགས་པའི་འབྲས་བུ་ཐོབ་བོ། །དགེ་སློང་སྟོང་ཕྲག་བརྒྱད་ཅུ་རྩ་བཞིའང་ལན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། གཞན་ཡང་སུ་མགོའི་ཐོད་པ་དེ་ལ་སེམས་ཡང་དག་པར་གནས་པར་མི་བྱེད་ཅིང་རབ་ཏུ་དད་པར་མི་བྱེད། མོས་པར་མི་བྱེད་པ་དེས་ཀྱང་དུར་ཁྲོད་དུ་འགྲོ་བར་བྱའོ། །དེས་དེར་མེ་རོ་རྣམ་པ་སྣ་ཚོགས་པ་འཐོར་ཞིང ། ཁ་ཅིག་ནི། རྣམ་པར་སྔོས་པ། ཁ་ཅིག་ནི། རྣམ་པར་རྣགས་པ། ཁ་ཅིག་ནི། རྣམ་པར་དམར་བ། ཁ་ཅིག་ནི། རྣམ་པར་ཟོས་པ་དང ། བམ་པ་དང ། ཤ་ཁྲག་མེད་པ་དང ། དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུའི་
243a
༄#། །རུས་གོང་དུ་མཐོང་བར་འགྱུར་རོ། །དེ་ཐམས་ཅད་ལ་ཡང་དང་ཡང་དུ་སོ་སོར་བརྟག་པར་བྱ་སྟེ། གང་དང་གང་དུ་དེའི་སེམས་ཤིན་ཏུ་ཡང་དག་པར་གནས་ཤིང་མི་གཡོ་ལ། རྣམ་པར་གཡེང་བར་མི་འགྱུར་བ་དེ་ཡིད་ཀྱིས་བཟུང་ནས་ཡིད་ལ་བྱ་ཞིང་སྒོམ་པ་བྱས་ན་ཟག་པ་ཐམས་ཅད་ཟད་པར་འགྱུར་བའི་བར་དུ་ཐམས་ཅད་འགྱུར་རོ། ། སེམས་ཅན་སུ་ལྷག་པའི་ང་རྒྱལ་ཅན་ཡིན་པ་དེས་ནི། ཤི་ནས་རིང་པོ་མ་ལོན་པའི་མི་རོ་རྣམ་པར་སྔོས་པ་དག་ཚུལ་བཞིན་དུ་བཟུང་ནས་ཡིད་ལ་བྱ། བྱིན་གྱིས་བརླབ་པར་བྱ། བསྒོམ་པར་བྱའོ། །ཇི་ལྟར་ཡིད་ལ་བྱས་པ་དེ་ལྟར་བདག་གི་ལུས་ལ་ཡང་དག་པར་མཐོང་བར་འགྱུར་རོ། །འདི་ལ་བྱེ་བྲག་ཅི་ཡོད་དེ། ཇི་ལྟར་རྣམ་པར་སྔོས་པའམ། རྣམ་པར་རྣགས་པ་དེ་བཞིན་དུ་བྱེ་བྲག་མེད་པར་བདག་གིས་ལུས་ཀྱང་གཞན་གྱི་ལུས་ཀྱི་རོ་དང་མཚུངས་པར་ཡང་དག་པར་རྗེས་སུ་མཐོང་ཞིང་དེ་བདག་གི་ལུས་དེ་ལ་སྒོམ་པའི་སྦྱོར་བ་ལ་རྗེས་སུ་བརྩོན་པས་གནས་སོ། །ཞེས་བྱ་བ་ནས་ལུས་འདི་ཐམས་ཅད་རྣགས་པའི་བར་དུ་ཡང་དག་པར་རྗེས་སུ་མཐོང་ངོ ། །རྣམ་པར་དམར་བར་ཡང་དག་པར་རྗེས་སུ་མཐོང་ངོ ། །སྲིན་བུའི་རིགས་རྣམས་ཀྱིས་ལྟོ་གང་བར་ཡང་དག་པར་རྗེས་སུ་མཐོང་ངོ ། །རང་གི་ལུས་རྣམ་པ་ཐམས་ཅད་དང་ལྡན་པའི་སྲིན་བུའི་རིགས་རྣམས་ཀྱིས་གང་ཞིང་ཟ་བར་
243b
ཡང་དག་པར་རྗེས་སུ་མཐོང་ངོ ། །ཞེས་བྱ་བ་ནས་ཤ་ཁྲག་མེད་པ་དང ། དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུའི་རུས་གོང་དང ། རུས་པའི་ཕུང་པོ་རྒྱུས་པ་དང་འབྲེལ་པའི་བར་དུ་ཡང་དག་པར་རྗེས་སུ་མཐོང་སྟེ། །དེ་ཡིད་ལ་བྱེད་ཅིང་དེ་ལ་བྱིན་གྱིས་རློབ་པར་བྱེད། དེ་ལ་སྒོམ་པར་བྱེད་དོ། །ཉིན་པར་ཇི་ལྟ་བར་མཚན་མོའང་དེ་བཞིན་ནོ། །མཚན་མོ་ཇི་ལྟ་བར་ཉིན་པར་ཡང་དེ་བཞིན་ཏེ། འགྲོ་བ་དང ། འགྲེང་བ་དང ། འདུག་པ་དང ། ཉལ་བ་ན་རང་གི་ལུས་དེའང་རུས་གོང་གི་ཕུང་པོ་དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུ་དང ། རྒྱུས་པ་དང ། པགས་ཤུན་དང་འབྲེལ་པར་ཡིད་ལ་བྱེད་ཅིང་བྱིན་གྱིས་རློབ་པར་བྱེད་ཅིང་སྒོམ་པར་བྱེད་དེ། དཔེར་ན། མིག་བཙུམས་པས་ཡང་དག་པར་རྗེས་སུ་མཐོང་བ་བཞིན་ནོ། །ཇི་ལྟར་བདག་གི་ལུས་ལ་ཡང་དག་པར་རྗེས་སུ་མཐོང་བ་དེ་བཞིན་དུ་གང་དང་གང་དུ་ལྟ་བར་བྱེད་པ་སའི་རྣམ་པ་དང ། ཤིང་དང ། མི་དང ། དུད་འགྲོའི་སྐྱེ་གནས་པ་གང་ཅི་མཐོང་བ་ཐམས་ཅད་དུ་རུས་པའི་ཕུང་པོ་དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུ་དང ། རྒྱུས་པ་དང་འབྲེལ་བ་དེ་ལྟ་བུར་ཡང་ཡང་དག་པར་རྗེས་སུ་མཐོང་ངོ ། །གང་དུ་ཆགས་པར་བྱེད་ཅིང་འགྲོ་བར་བྱེད་པ་ཐམས་ཅད་དེ་རུས་པའི་ཕུང་པོ་ལ་རྐང་པ་གཉིས་ཀྱིས་འགྲོ་ཞིང་ལྡོག་པས་རུས་པའི་ཕུང་པོ་ལ་གནོན་པར་བྱེད་ཅིང་འདུག་པར་བྱེད། ཉལ་བར་བྱེད་དེ། དཔེར་ན། དེའི་མི་སྡུག་
244a
༄#། །པའི་འདུ་ཤེས་ཤིན་ཏུ་བསྒོམས་ཤིང་ཡིད་ལ་བྱས་ལ། ཤིན་ཏུ་ནན་ཏན་བྱས་པ་བཞིན་ནོ། །དེའི་རིས་མཐུན་པས་འདོད་པའི་འདོད་ཆགས་ཐམས་ཅད་སྤངས་པར་འགྱུར་ཏེ། རིས་མཐུན་པ་གཞན་ལ་མ་ཡིན་ནོ། །འདི་ནི། སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་ཡིན་ཏེ། དེ་ནི། ཡང་ཕྱོགས་བཞིའི་རླུང་འདུས་ནས་རུས་པའི་ཕུང་པོ་མ་ལུས་པར་རྣམ་པར་ཕྱེ་མར་བྱེད་དོ། །རྣམ་པར་འཇིག་པར་བྱེད་དོ། །ཇི་ལྟར་རང་གི་ལུས་ཀྱི་རུས་པའི་ཕུང་པོ་ལ་རླུང་འདུས་ནས་མ་ལུས་པར་རྣམ་པར་ཕྱེ་མར་བྱེད་ཅིང་རྣམ་པར་འཇིག་པར་བྱེད་པ་དེ་བཞིན་དུ་རླུང་འདུས་ནས་གཟུགས་ཀྱི་ལུས་ཐམས་ཅད་དང ། ས་ཐམས་ཅད་མ་ལུས་པར་ཕྱེ་མར་བྱེད་ཅིང་རྣམ་པར་འཇིག་པར་བྱེད་དོ། །ཞེས་བྱ་བ་ནས་བདག་གམ་གཞན་ཡང་རུང་དེའི་མིག་སྔར་གཟུགས་སུ་སྣང་བ་ཅིའང་མི་འབྱུང་སྟེ། ནམ་མཁའ་བཻ་ཌཱུརྱ་ལྟ་བུར་སྟོང་པར་བརྗོད་པར་བྱ་བ་ལ་མོས་པར་བྱེད་ཅིང་ནམ་མཁའ་བྱིན་གྱིས་རློབ་པར་བྱེད། སྒོམ་པར་བྱེད། ལན་མང་དུ་བྱེད་དོ། །ཇི་ལྟར་དེ་འདི་སྙམ་དུ་སེམས་ཏེ། ཡང་དཔྱོད་པར་བྱ་བའི་ཕྱིར་ནམ་མཁའི་ཁ་དོག་སེར་པོར་ཡིད་ལ་བྱེད་ཅིང་ཁ་དོག་སེར་བོར་རབ་ཏུ་སྦྱོར་བར་བྱེད། བྱིན་གྱིས་རློབ་པར་བྱེད། སྒོམ་པར་བྱེད་པ་དེ་བཞིན་དུ་ནམ་མཁའ་ཐམས་ཅད་སེར་པོར་མོས་པར་བྱེད་དོ། །ཁ་དོག་སེར་པོ་ལ་ཇི་ལྟ་
244b
བ་དེ་བཞིན་དུ་ཁ་དོག་དམར་པོ་དང ། དེ་བཞིན་དུ་ཁ་དོག་དཀར་པོ་དང ། བཙོད་ཀ་ཞེས་བྱ་བ་ནས་ཤེལ་གྱི་ཁ་དོག་གི་བར་ལ་མོས་པར་བྱེད་དོ། །དེ་བཞིན་དུའང་གཟུགས་སུ་སྣང་བ་དང ། ས་ཐམས་ཅད་ལ་ཆུ་ཁ་དོག་སྔོན་པོར་བྱིན་གྱིས་རློབ་པར་བྱེད་ལ་ཞེས་བྱ་བ་ནས་ཁ་དོག་སྔོན་པོར་མོས་པར་བྱེད་དོ། །ཞེས་བྱ་བའི་བར་དང ། དེ་བཞིན་དུ་ཁ་དོག་སེར་པོ་ལ་ཞེས་བྱ་བ་ནས་ཁ་དོག་དམར་པོ་དང ། དེ་བཞིན་དུ་ཁ་དོག་དཀར་པོ་དང ། དེ་བཞིན་དུ་ཁ་དོག་ལེ་བརྒན་དང ། དེ་བཞིན་དུ་ཤེལ་གྱི་ཁ་དོག་གི་བར་དུ་ས་ཐམས་ཅད་ལ་ཆུར་ཡིད་ལ་བྱེད་དོ། །ཡང་དག་པར་རབ་ཏུ་ཤེས་སོ། །རབ་ཏུ་སྦྱོར་བར་བྱེད་དོ། །སའི་ཁམས་ཐམས་ཅད་ལ་ཆུ་ཤེལ་གྱི་ཁ་དོག་ལྟ་བུར་བྱིན་གྱིས་རློབ་པར་བྱེད་ཅིང་ཕྱིས་ཀྱང་ས་སོར་བཞི་ཙམ་དུ་བྱིན་གྱིས་རློབ་པར་བྱེད་དོ། །དེས་རྐང་པའི་མཐེ་བོས་རེག་པར་བྱེད་ཅིང་གང་འདོད་པ་གཡོ་བར་བྱེད། འགུལ་བར་བྱེད། ཀུན་ཏུ་རབ་ཏུ་འགུལ་བར་བྱེད་པ་ནས་གང་འདོད་པ་དང ། ཇི་ཙམ་དུ་འདོང་པ་དེ་ཙམ་དུ་རབ་ཏུ་གཡོ་བར་བྱེད་དོ། །ཞེས་བྱ་བའི་བར་དུའོ། །དེ་འགུལ་བར་བྱེད་པ་ནའང་ས་ཆེན་པོ་རི་དང་བཅས་པ་འགུལ། གཡོ། འཁྲུག་།རབ་ཏུ་ལྡེག་གོ་།གཞན་ཡང་ཆུ་དེ་ལ་ཁ་དོག་སྣ་ཚོགས་པའི་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ཏ་དང ། པདྨ་དཀར་པོ་རྣམས་ཡིད་ལ་བྱེད་དོ། །ཡང་དག་པར་ཤེས་སོ། །རབ་ཏུ་སྦྱོར་བར་བྱེད་དོ། །བྱིན་གྱིས་རློབ་པར་བྱེད་དོ། །ཕྱོགས་བཞིར་སེར་བུ་བསིལ་
245a
༄#། །བ་རབ་ཏུ་དང་བདག་ཏུ་མོས་པར་བྱེད་དོ། །དེ་དེར་འཆག་པར་བྱེད། འདུག་པར་བྱེད། ཉལ་བར་ཡང་བྱེད་དོ། །ཡང་ཕྱོགས་བཞིར་ཁ་དོག་སྣ་ཚོགས་པའི་རི་ཆེན་པོ་རྣམས་སུ་བྱིན་གྱིས་རློབ་པར་བྱེད་ཅིང ། དེའི་སྟེང་དུ་འཆག་པར་བྱེད། གནས་པར་བྱེད། འདུག་པར་བྱེད། ཉལ་བར་ཡང་བྱེད་དོ། །གཞན་ཡང་དེ་སྤོང་བར་བྱེད་ཅིང ། ནམ་མཁའ་དག་པ་དེ་ཉིད་ཡིད་ལ་བྱེད་དོ། །ཡང་དག་པར་ཡིད་ལ་བྱེད་དོ། །ཡང་དག་པར་ཤེས་སོ། །རབ་ཏུ་སྦྱོར་བར་བྱེད་དོ། །ནམ་མཁའ་དག་པར་བྱིན་གྱིས་རློབ་པར་བྱེད་དོ། །རང་གི་ལུས་ཡང་བར་ཡིད་ལ་བྱེད་དོ། །ཡང་བར་རབ་ཏུ་སྦྱོར་བར་བྱེད་དོ། །ཡང་བར་བྱིན་གྱིས་རློབ་པར་བྱེད་དེ། དཔེར་ན། ཤིང་བལ་གྱི་འདབ་མའམ། རས་བལ་གྱི་འདབ་མ་རླུང་ཆུང་ངུས་འདེགས་པར་བྱེད། འཇོག་པར་བྱེད། འཁྱེར་བར་བྱེད་པ་དེ་བཞིན་དུ་དེ་ལུས་འདི་ཉིད་ལ་ཡང་བར་ཡིད་ལ་བྱེད་དོ། །ཞེས་བྱ་བ་ནས་ཡང་བར་བྱིན་གྱིས་རློབ་པར་བྱེད་དོ། །ཞེས་བྱ་བའི་བར་དང ། རླུང་དང་ཕྲད་ནས་ནམ་མཁའ་ལ་གནས་པའི་བར་དུ་ཡིན་ཏེ། དེ་ནམ་མཁའ་ལ་འཆགས་པར་བྱེད། འདུག་པར་བྱེད། གནས་པར་བྱེད།་ཉལ་བར་ཡང་བྱེད་དོ། །མེའི་ཁམས་ལ་སྙོམས་པར་འཇུག་པར་བྱེད་དེ། དེའི་ལུས་ལས་འོད་འཕྲོ་བ་ཁ་དོག་སྔོན་པོ་དང ། སེར་པོ་དང ། དམར་པོ་དང ། ལེ་བརྒན་དང །
245b
ཤེལ་གྱི་ཁ་དོག་ལྟ་བུ་རྣམས་སྣ་ཚོགས་རབ་ཏུ་འབྱུང་བར་བྱེད་དོ། །དེའི་ལུས་ཀྱི་སྟོད་ནས་མེ་འབར་བར་བྱེད་ཅིང ། ལུས་ཀྱི་སྨད་ནས་ཆུ་གྲང་མོའི་རྒྱུན་དག་འབབ་པར་བྱེད། རབ་ཏུ་འབབ་པར་བྱེད་དོ། །ལུས་ཀྱི་སྨད་ནས་མེ་འབར་བར་བྱེད་ཅིང ། ལུས་ཀྱི་སྟོད་ནས་ཆུ་གྲང་མོའི་རྒྱུན་དག་འབབ་པར་བྱེད། རབ་ཏུ་འབབ་པར་བྱེད་དོ། །དེ་བཞིན་དུ་སའི་སྟེང་དུ་འབྱུང་བར་ཡང་བྱེད་པ་ནས་ཉི་མ་དང་ཟླ་བ་དག་ལའང་ལག་པས་ཉུག་བར་བྱེད་དོ། །ཞེས་བྱ་བའི་བར་དང ། ཚངས་པའི་འཇིག་རྟེན་གྱི་བར་དུ་ལུས་ཀྱི་དབང་སྒྱུར་བར་བྱེད་དོ། །ཞེས་བྱ་བའི་བར་དུའོ། ། དེ་ཉིད་སྤངས་ཏེ་ཡང་གཟུགས་ཅི་འདྲ་བ་དང་ཇི་སྙེད་པ་ཡང་ན་ནི། སྔོན་པོ་དང ། ཡང་ན་ནི། སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། ཡང་ན་ནི།་ཤེལ་གྱི་ཁ་དོག་ལྟ་བུར་ཡིད་ལ་བྱེད་ཅིང་དེ་འདྲ་བ་དང ། དེ་སྙེད་ཁོ་ན་མཐོང་བར་བྱེད་དོ། །དེ་འདི་སྙམ་དུ་སེམས་སྟེ། དེ་བཞིན་གཤེགས་པ་ཉིད་ལ་བལྟའོ་སྙམ་ན། དེས་དེ་བཞིན་གཤེགས་པ་ཉིད་མཐོང་ངོ ། །དེས་ཕྱོགས་གང་དང་གང་ཁོ་ནར་ལྟ་བར་བྱེད་པའི་ཕྱོགས་ཐམས་ཅད་དུ་དེ་བཞིན་གཤེགས་པ་མཐོང་ངོ ། །གལ་ཏེ་ད་བཞིན་གཤེགས་པའི་གཟུགས་ཆུང་དུ་ཡིད་ལ་བྱས་ན་ཆུང་ངུ་ཉིད་མཐོང་ངོ ། །གལ་ཏེ་ཚད་མེད་པ་ཡིད་ལ་བྱས་ན་ཞེས་བྱ་བ་ནས་ནམ་མཁའ་ཐམས་ཅད་དུ་དེ་བཞིན་གཤེགས་པ་འབའ་ཞིག་མཐོང་ངོ ། །
246a
༄#། །ཞེས་བྱ་བའི་བར་དང ། དེ་འདི་སྙམ་དུ་སེམས་ཏེ། གང་དུའང་དེ་བཞིན་གཤེགས་པ་བྱོན་པའམ་བཞུད་པ་མེད་དོ། །ཞེས་བྱ་བའི་བར་དང ། ཁམས་གསུམ་ཐམས་ཅད་ཀྱི་ལུས་ཀྱི་རྒྱུ་ནི། སེམས་འབའ་ཞིག་གོ་།ཞེས་བྱ་བ་དང ། ཇི་ལྟར་རྣམ་པར་བརྟགས་པ་དེ་བཞིན་དུ་མཐོང་སྟེ། བདག་གིས་རང་གི་སེམས་ཀྱི་ཁ་དོག་ཐ་དད་པ་དང ། གཟུགས་ཐ་དད་པ་དང ། རྫུ་འཕྲུལ་ཐ་དད་པ་རྣམ་པ་སྣ་ཚོགས་པ་མཐོང་ངོ ། །བདག་གི་སེམས་ནི། གཟུགས་ཐ་དད་པ་དང ། རྫུ་འཕྲུལ་ཐ་དད་པ་དང ། ཁ་དོག་ཐ་དད་པ་དང ། འཇུག་པ་ཐ་དད་པ་དང ། རྣམ་པར་རྟོག་པ་ཐ་དད་པའོ། །སེམས་ནི། སྣ་ཚོགས་སུ་གྲུབ་པའོ། །སེམས་ནི། ནམ་མཁར་འདྲེས་པའོ། །སེམས་ནི། རླུང་དུ་ཡང་དག་པར་བརྗོད་པའོ། །རླུང་ཐམས་ཅད་ཀྱང་དངོས་པོ་མེད་པའོ་སྙམ་སྟེ། འདི་ནི། སོ་སོའི་སྐྱེ་བོ་དང་ཐུན་མོང་བའི་བདེན་པ་དང་རྗེས་སུ་མཐུན་པའི་གཟུངས་སྔགས་ཀྱི་དོན་ཏེ།་གང་དེ་བཞིན་གཤེགས་པ་ཙམ་པ་ཀའི་མདོག་གིས་ང་ལ་ཉི་མའི་ཤུགས་ཀྱི་སྙིང་པོའི་ལག་ནས་བསྐུར་བ་ཡིན་ནོ། །དེ་ལ་སོ་སོའི་སྐྱེ་བོ་དང་ཐུན་མོང་མ་ཡིན་པའི་བདེན་པ་དང་རྗེས་སུ་མཐུན་པའི་གཟུགས་སྔགས་ཀྱི་དོན་གང་ཞེ་ན། དེ་ནི། གཟུགས་ཀྱི་འདོད་ཆགས་དང ། དབྱིབས་ཀྱི་འདོད་ཆགས་སྤངས་པའོ། །དེ་འདི་སྙམ་དུ་སེམས་ཏེ། ནམ་
246b
མཁའ་འདི་ནི། གཟུང་དུ་མེད་ཅིང་བརྗོད་དུ་མེད་པའོ། །དེ་བཞིན་དུ་སེམས་ཀྱང་བརྗོད་དུ་མེད་པ་སྟེ། གཉི་ཀའང་བརྗོད་དུ་མེད་པའོ། །ཕུང་པོ་འདི་དག་ནི། ཡོངས་སུ་གདུང་བ་དང་བཅས།་འཁྲུག་པ་དང་བཅས། འདྲིད་པ་དང་བཅས། སླུ་བ་དང་བཅས་པ་ཡིན་པས་མ་ལ་བདག་གིས་རྣམ་པ་ཐམས་ཅད་དུ་ཀུན་ཏུ་རྟོག་པའི་སེམས་སྤངས་ན། གང་ནམ་མཁའ་ཡང་སྤངས་པར་འགྱུར་ཞིང ། རྟོག་པ་ཐམས་ཅད་ལས་ཡང་དག་པར་བྱུང་བའི་དཔྱོད་པའང་སྤངས་པར་འགྱུར་གོར་མ་ཆག་སྙམ་མོ། །འོན་ཀྱང་དེ་སེམས་དང་པོས་ནམ་མཁའ་ལ་དམིགས་ནས་དེ་ཡང་མངོན་པར་རིག་པར་བྱ་སྟེ། རྣམ་པར་རིག་པ་ཐམས་ཅད་སྤང་ཞིང་སྐྱེད་པར་ཡང་མི་བྱེད་དོ། །སེམས་སྐྱེད་པ་འགག་ལ་དེའི་མི་སྐྱེས་པའང་སྐྱེད་པར་མི་བྱེད་དོ། །དེ་ལྟར་ན།་རྒྱུ་དེ་འགགས་ན་སེམས་ཀྱང་འགག་པས་ལུས་དང ། ངག་དང ། ཡིད་ཀྱི་འདུ་བྱེད་ཤིན་ཏུ་སྦྱངས་པའི་འགོག་པའི་སྙོམས་པར་འཇུག་པ་ལ་འཇུག་པར་བྱེད་དེ། དེ་འགོག་པས་ཉིན་ཞག་གཅིག་འདའ་བར་བྱེད་དོ། །ཇི་ལྟར་བསམ་པ་བཞིན་འགོག་པ་ལ་སྙོམས་པར་འཇུག་པས་མཚུངས་པ་དེ་མ་ཐག་པའི་སེམས་དང་པོ་ལྡང་བའི་བར་དུ་བསྐལ་པ་བརྒྱ་སྟོང་མང་པོའི་བར་ཡང་འདའ་བར་བྱེད་དོ། །སེམས་གཉིས་པས་ནི། དེའི་ཟག་པ་ཐམས་ཅད་ཡོངས་སུ་ཟད་པ་དང ། ཚེ་འདི་ཡོངས་སུ་ཟད་པར་འགྱུར་བས་མགོ་མཉམ་དུ་ཡོངས་སུ་མྱ་ངན་ལས་
247a
༄#། །འདས་པར་བྱེད་དེ། འདི་ནི། སོ་སོའི་སྐྱེ་བོ་དང་ཐུན་མོང་མ་ཡིན་པ་ཟག་པ་མེད་པའི་བདེན་པ་དང་རྗེས་སུ་མཐུན་པའི་གཟུངས་སྔགས་ཀྱི་དོན་ཡིན་ནོ། །དེ་ལ་སོ་སོའི་སྐྱེ་བོ་དང་ཐུན་མོང་པ་དང ། སོ་སོའི་སྐྱེ་བོ་དང་ཐུན་མོང་མ་ཡིན་པའི་བདེན་པ་དང་རྗེས་སུ་མཐུན་པའི་གཟུངས་སྔགས་ཀྱི་དོན་གང་ཞེ་ན། འདི་ལྟར་དེ་འདི་སྙམ་དུ་སེམས་ཏེ། གཟུགས་ཇི་ལྟ་བུར་རྣམ་པར་བརྟགས་པ་དེ་ལྟ་བུ་ཁོ་ནར་མཐོང་ངོ ། །སེམས་ནི། སེམས་ཉིད་དང ། གཟུགས་ཉིད་ཡིན་ཏེ། དེའི་ཕྱིར་བདག་གིས་ནམ་མཁའ་དག་པ་ཉིད་ལ་བརྟག་པར་མི་བྱའོ་སྙམ་མོ། །དེ་གཟུགས་ཐམས་ཅད་སྤངས་བར་འདོད་དེ། དེ་ལྟར་དེའི་གཟུགས་ཀྱི་འདུ་ཤེས་ཐམས་ཅད་སྤངས་ནས་དེ་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་དུ་རྫོགས་པར་བྱས་ཏེ་གནས་པ་འདི་ནི། སོ་སོའི་སྐྱེ་བོ་དང་ཐུན་མོང་བའི་ཏིང་ངེ་འཛིན་ཏོ། །གང་ཡང་དེ་འདི་སྙམ་དུ་སེམས་ཏེ། བདག་གི་གཟུགས་ནི། ནམ་མཁའ་སྟེ།་བདག་གིས་ནམ་མཁའ་གཟུགས་སུ་མཐོང་ངོ ། །ནམ་མཁའི་མཚན་ཉིད་ཅི་ཞེ་ན། ནམ་མཁའ་ནི། གོ་འབྱེད་པའི་མཚན་ཉིད་དོ། །འོན་ཀྱང་ནམ་མཁའ་ནི། རླུང་གིས་ཁྱབ་པའོ། །རླུང་དེའང་འབྱུང་བ་ཆེན་པོ་བཞི་ལས་གྱུར་པའོ། །བདག་གི་གཟུགས་ཀྱང་འབྱུང་བ་ཆེན་པོ་བཞི་ལས་གྱུར་པ་ཡིན་ཏེ། གཉིས་ཀ་མཚན་ཉིད་མཚུངས་སོ་སྙམ་མོ། །དེ་འདི་སྙམ་
247b
དུ་སེམས་ཏེ། ཅི་འབྱུང་བ་རྣམས་འབྱུང་བ་ཆེན་པོའི་ངོ་བོ་དག་ཡིན་ནམ་སྙམ་ཞིང ། དེ་འདི་སྙམ་དུ་སེམས་ཏེ། གཉིས་ཀ་སྤྱིའི་མཚན་ཉིད་དུ་འབྱུང་བ་དག་མ་ཡིན་ནོ་སྙམ་མོ། །དེ་ཅིའི་ཕྱིར་ཞེ་ན། ཆོས་ཐམས་ཅད་རང་བཞིན་གྱི་ངོ་བོ་ཉིད་ཀྱིས་སྟོང་པ་ཡིན་པའི་ཕྱིར་རོ། །དེ་བཞིན་དུ་རང་གི་ངོ་བོའང་གཞན་གྱི་དངོས་པོས་སྟོང་པ་དང ། སྐྱེ་བ་མེད་པ་དང ། འགག་པ་མེད་པ་དང ། འབྱུང་བ་མེད་པ་དང ། གཞི་མེད་པ་ཡིན་ནོ། །དེ་དེ་ལྟར་སོ་སོར་རྟོག་པ་ན་དེ་བཞིན་གཤེགས་པ་ཡིད་ལ་འབྱུང་ངོ ། །དེས་ནམ་མཁའ་ཐམས་ཅད་དུ་དེ་བཞིན་གཤེགས་པ་གཅིག་མཐོང་ངོ ། །དེས་དེ་ལྟར་མཐོང་བས་ཕྱིར་མི་འོང་བའི་འབྲས་བུ་འཐོབ་བོ། །འདི་ནི། སོ་སོའི་སྐྱེ་བོ་དང་ཐུན་མོང་པ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་དང་པོའོ། །གཞན་ཡང་དེ་འདི་སྙམ་དུ་སེམས་ཏེ། གང་ནམ་མཁའ་མཐའ་ཡས་སྐྱེ་མཆེད་འདིས་གནས་པ་དེ་ཅི་རང་གི་ངོ་བོའི་མཚན་ཉིད་ཡིན་ནམ། འོན་ཏེ་དེ་ཉིད་ནམ་མཁའ་ཡིན་སྙམ་ཞིང ། དེ་འདི་སྙམ་དུ་སེམས་ཏེ། ནམ་མཁའི་མཚན་ཉིད་དག་པ་ནི། བདག་གི་བདག་ཡིན་གྱི། བདག་གི་ངོ་བོ་ཉིད་ནི། མ་ཡིན་ནོ་སྙམ་ནས་དེ་ནམ་མཁའ་མཐའ་ཡས་མུ་མེད་པ་ཇི་སྙེད་ཡིད་ལ་བྱེད་པ་དེ་སྙེད་ཀྱིས་བདག་ཡང་དག་པར་ཤེས་ཏེ། འདི་ནི། དེའི་སོ་སོའི་སྐྱེ་བོ་དང་ཐུན་མོང་པའི་ཏིང་ངེ་འཛིན་ཏེ། །དེ་འདི་སྙམ་དུ་སེམས་ཏེ། ནམ་
248a
༄#། །མཁའ་ཐམས་ཅད་ནི། བདག་གི་བདག་ཡིན་ན། འོན་ཅི་ནམ་མཁའ་ལ་ངོ་བོ་གཞན་ཡོད་དམ། གང་གི་ཚེ་དེ་བཞིན་གཤེགས་པ་ཡིད་ལ་བྱེད་པ་ན་དེ་བཞིན་གཤེགས་པ་རྣམས་ཀྱིས་ཇི་ལྟར་བསྟན་སྙམ་མོ། །དེ་ལྟར་དེ་བཞིན་གཤེགས་པ་ཇི་སྙེད་ཡིད་ལ་བྱེད་པ་དེ་སྙེད་ཡང་དག་པར་རྗེས་སུ་མཐོང་ཞིང ། མཐོང་བ་ཙམ་གྱི་མོད་ལ་ཁ་ཅིག་འབྲས་བུ་དང་པོ་དེ་ལ་གནས་པར་བྱེད་ཅེས་བྱ་བ་ནས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་ཀྱི་བར་དུ་མངོན་དུ་བྱེད། འདི་ནི། སོ་སོའི་སྐྱེ་བོ་དང་ཐུན་མོང་པ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་གཉིས་པའོ། །ཡང་དེ་འདི་སྙམ་དུ་སེམས་ཏེ། ནམ་མཁའ་དག་པ། རབ་ཏུ་དང་བ།་རྙོག་པ་མེད་པ། བདག་གི་བདག་ཇི་སྙེད་པ། ཅི་བདག་གི་དགེ་བའི་སེམས་ཉོན་མོངས་པ་ཐམས་ཅད་སྤངས་པ་གཞི་མེད་པ་ཡིན་ནམ་སྙམ་མོ། །དེ་འདི་སྙམ་དུ་སེམས་ཏེ། སྣང་བ་ཆེན་པོ་བྱེད་པ་འཕགས་པའི་ལམ་ཡན་ལག་བརྒྱད་པ་དེ་ནི། ཉོན་མོངས་པ་ཐམས་ཅད་ལས་རྣམ་པར་གྲོལ་བའོ་སྙམ་མོ། །དེ་ཇི་ལྟར་ཉོན་མོངས་པ་ཐམས་ཅད་ལས་རྣམ་པར་གྲོལ་བ་འཕགས་པའི་ལམ་ཡན་ལག་བརྒྱད་པ་ཡིད་ལ་བྱེད་པ་བཞིན་སྐད་ཅིག་དེ་ཉིད་ལ་ཁ་ཅིག་རྒྱུན་དུ་ཞུགས་པའི་འབྲས་བུ་ལ་གནས་པར་བྱེད་ཅེས་བྱ་བ་ནས་ཁ་ཅིག་དགྲ་
248b
བཅོམ་པ་ཉིད་ཀྱི་བར་མངོན་དུ་བྱེད། འདི་ནི། སོ་སོའི་སྐྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་གསུམ་པའོ། ། གཞན་ཡང་དེ་འདི་སྙམ་དུ་སེམས་ཏེ། དེ་ལྟར་བདག་གི་རྟོག་པ་རྣམས་ནི། དོན་མེད་བསྒྲུབ་པ་ཡིན་ཏེ། གང་བདག་གིས་གཟུགས་ལ་རྣམ་པར་བརྟག་པས་གནས་པར་མི་བྱའོ། ། གང་ན་གཟུགས་ཡོད་པ་དེ་ན་འདུ་ཤེས་ཐ་དད་པ་ཡོད་དོ། །དེ་ན་ཐོགས་པའི་འདུ་ཤེས་ཡོད་དོ། །དེ་ན་རྒ་ཤི་ཡོད་པས་བདག་གིས་རྒ་ཤི་རྣམ་པར་གཅད་པའི་ཕྱིར་སེམས་སྒོམ་མོ། །ནམ་མཁའི་འདུ་ཤེས་སུའང་མོས་སོ་སྙམ་མོ། །ཡང་དེ་ནམ་མཁའི་འདུ་ཤེས་ཡིད་ལ་བྱེད་ཅིང་དེ་ཡང་དག་པར་ཤེས་པར་བྱེད་ལ། དེ་ལ་རབ་ཏུ་སྦྱོར་པར་བྱེད། དེ་ལ་མོས་པར་བྱེད་དེ།་དེ་ནམ་མཁའ་ཤིན་ཏུ་ཡོངས་སུ་དག་པ་ཇི་སྙེད་པ་ཐམས་ཅད་ལ་བདག་ཉིད་ཀྱིས་མངོན་པར་བརྗོད་པ་དང་མོས་པར་བྱེད་ཅིང་རྫོགས་པར་བྱས་ཏེ་གནས་པ་འདི་ནི། སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་མཐུན་པའི་གཟུངས་སྔགས་ཡིན་ཏེ། འདི་ནི། སོ་སོའི་སྐྱེ་བོ་དང་ཐུན་མོང་པའོ། །ཡང་དེ་འདི་སྙམ་དུ་སེམས་ཏེ། འདི་ནི། བདག་གི་བདག་ཤིན་ཏུ་ཡོངས་སུ་དག་པ་ཡིན་ཏེ། དེ་ནམ་མཁའ་ཐམས་ཅད་ལ་ད་དུང་བདག་གི་རྟོག་པ་རྣམས་ཀུན་ཏུ་སྤྱོད་པར་བྱེད་དོ། །གང་བདག་གི་བདག་གིས་ནམ་མཁའ་ལ་བརྟག་པར་བྱའོ། །བདག་
249a
༄#། །གི་འདུ་ཤེས་ནི། ནམ་མཁའ་ཡིན་ནོ་སྙམ་མོ། །འོན་ཀྱང་འདུ་ཤེས་ཐམས་ཅད་ནི། སྡུག་བསྔལ་གྱི་སྒྲར་གསུངས་ཏེ། འདི་ནི། ཀུན་འབྱུང་བ་དང ། སྡུག་བསྔལ་ཐམས་ཅད་ཀྱི་འགོག་པ་དང་ཞི་བ་ཡིན་ཏེ། སུས་དེ་ལ་སྡུག་བསྔལ་བ་དང་ཀུན་འབྱུང་བ་འགོག་པར་ཡང་དག་པར་རྗེས་སུ་མཐོང་བ་དེའི་དུས་ན་ཁ་ཅིག་རྒྱུན་དུ་ཞུགས་པའི་འབྲས་བུ་ལ་གནས་པ་ནས་ཁ་ཅིག་དགྲ་བཅོམ་པ་ཉིད་ཀྱི་བར་ལ་གནས་པ་འདི་ནི། སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་བཞི་པའོ། །ཡང་དེ་འདི་སྙམ་དུ་སེམས་ཏེ། འོ་ན་ནམ་མཁའ་བསྒོམ་པར་བྱ་བའི་ཕྱིར་ལན་མང་དུ་གནས་པར་བྱའོ། །གང་ནམ་མཁའ་ཐམས་ཅད་ནི། བདག་གི་བདག་ཡིན་ཏེ། ནམ་མཁའ་ལ་མོས་པར་བྱའོ། །རྣམ་པར་ཤེས་པ་ཡོངས་སུ་བཙལ་བར་བྱའོ་སྙམ་ནས་ནམ་མཁའ་ཇི་ཙམ་པར་དེའི་རྣམ་པར་ཤེས་པ་མཉམ་པར་སྣང་ངོ ། ། དེའི་ནམ་མཁའི་འདུ་ཤེས་ཀྱང་སྤངས་ཤིང་ནམ་མཁའ་མཐའ་ཡས་མུ་མེད་པ་ཇི་སྙེད་པ་དེ་སྙེད་ཀྱི་རྣམ་པར་ཤེས་པ་ཐམས་ཅད་ཀུན་ཏུ་སྣང་སྟེ། འདི་ནི། སོ་སོའི་སྐྱེ་བོ་དང་ཐུན་མོང་པ་བདེན་པ་དང་རྗེས་སུ་མཐུན་པའི་གཟུངས་སྔགས་སོ། །དེ་ལ་གནས་པ་འདི་སྙམ་དུ་སེམས་ཏེ། བདག་གི་རྣམ་པར་ཤེས་པའི་འདུ་ཤེས་འདི་ནི། རྟོག་པ་དང ། སྡུག་བསྔལ་བ་
249b
དང ། ཀུན་འབྱུང་བ་ཞེས་བྱ་བ་ནས་དེ་ཉིད་རྣམ་པར་ཤེས་པ་ཕྱིན་ཅི་ལོག་གི་བར་ཡིན་ནོ་སྙམ་མོ། །འོན་ཀྱང་བདག་གི་ཕྱིན་ཅི་ལོག་འདི་ནི། དགག་པར་བྱའོ། །གནས་སྐབས་གང་དུ་སྡུག་བསྔལ་ཞེས་བྱ་བ་ནས་འགོག་པའི་བར་དུ་ཡིད་ལ་བྱེད་པའི་གནས་སྐབས་དེ་ན་ཁ་ཅིག་འབྲས་བུ་དང་པོ་ལ་གནས་སོ། །ཞེས་བྱ་བ་ནས་ཁ་ཅིག་དགྲ་བཅོམ་པ་ཉིད་ཀྱི་བར་ལ་གནས་པ་འདི་ནི།་སོ་སོའི་སྐྱེ་བོ་དང་ཐུན་མོང་པ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་ལྔ་པའོ། །དེ་འདི་སྙམ་དུ་སེམས་ཏེ། བདག་གི་རྣམ་པར་ཤེས་པའི་འདུ་ཤེས་འདི་ནི། རྟོག་པ་དང ། ཟུག་རྡུ་དང ། འབྲས་དང ། ནད་ཉིད་ཡིན་ཏེ། གང་བདག་གིས་རྣམ་པར་ཤེས་པའི་འདུ་ཤེས་དེའང་སྤང་བར་བྱ་གོར་མ་ཆག་གོ་སྙམ་ནས་ནམ་མཁའི་འདུ་ཤེས་དེའང་སྤངས་ཤིང་རྣམ་པར་ཤེས་པའི་འདུ་ཤེས་ཀྱང་སྤོང་བར་བྱེད་དོ། །དེ་ཅི་ལའང་དམིགས་པར་མི་བྱེད་དོ། །དེའི་ཚེ་འདུ་ཤེས་མེད་པ་ལ་སྙོམས་པར་ཞུགས་པ་ཡིན་ཏེ། སུ་ལ་སྔར་འདི་བྱུང་བ་ནི། སོ་སོའི་སྐྱེ་བོ་དང་ཐུན་མོང་པའི་ཏིང་ངེ་འཛིན་ཏོ། །དེ་བཞིན་དུ་རྣམ་པར་ཤེས་པ་ནི། ཟུག་རྡུ་དང ། འབྲས་དང ། ནད་རྣམས་ཡིན་ཏེ། གང་བདག་གིས་མེད་པ་ཉིད་ཡིད་ལ་བྱ་བ་གོར་མ་ཆག་སྙམ་མོ། །ཅི་ཞིག་མེད་ཅེན། འདུ་ཤེས་ཐམས་ཅད་བདག་གམ་བདག་གི་མེད་དོ། །བདག་དེས་བདག་དང་འདུ་ཤེས་ཀྱང་སྤང་བར་བྱ་སྟེ། དེ་ནི། མྱ་ངན་ལས་
250a
༄#། །འདས་པ་ཡིན་ནོ། །གནས་སྐབས་གང་དུ་མྱ་ངན་ལས་འདས་པ་ཡིད་ལ་བྱས་པའི་གནས་སྐབས་དེར་ཁ་ཅིག་རྒྱུན་དུ་ཞུགས་པའི་འབྲས་བུ་ལ་གནས་པ་ནས་ཁ་ཅིག་དགྲ་བཅོམ་པ་ཉིད་ཀྱི་བར་ལ་གནས་པ་འདི་ནི། སོ་སོའི་སྐྱེ་བོ་དང་ཐུན་མོང་པ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་དྲུག་པའོ། །ཡང་སུ་ཞིག་འདི་སྙམ་དུ་སེམས་ཏེ། རྣམ་པར་ཤེས་པའི་ཏིང་ངེ་འཛིན་གྱི་རིམ་པ་ཤིན་ཏུ་ཡོངས་སུ་དག་པ་ཉོན་མོངས་པ་ཅིའང་མེད་པའི་སེམས་ཀྱིས་གནས་པར་བྱའོ་སྙམ་ནས་དེ་མི་རྟག་པའི་ཚུལ་གྱིས་ཅིའང་མེད་པའི་སེམས་ཀྱིས་གནས་པར་བྱེད་དེ། གནས་སྐབས་གང་དུ་མི་རྟག་པའི་འདུ་ཤེས་ཡིད་ལ་བྱེད་པའི་གནས་སྐབས་དེར་དེ་རྒྱུན་དུ་ཞུགས་པའི་འབྲས་བུ་མངོན་དུ་བྱེད་པ་ནས་དགྲ་བཅོམ་པ་ཉིད་ཀྱི་བར་མངོན་དུ་བྱེད་པ་འདི་ནི། སོ་སོའི་ཀྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་མཐུན་པའི་བཟོད་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་བདུན་པའོ། །སུ་ཞིག་འདི་སྙམ་དུ་སེམས་ཏེ། བདག་གི་རྣམ་པ་ཐམས་ཅད་དུ་ཅིའང་མེད་པའི་ཤེས་པ་ཡང་དག་པར་སྤངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱ་ཏེ་གནས་པར་བྱའོ་སྙམ་ནས་དེ་ཅིའང་མེད་པའི་སྐྱེ་མཆེད་ཐམས་ཅད་སྤངས་ཏེ། འདུ་ཤེས་མེད་འདུ་ཤེས་མེད་
250b
མིན་སྐྱེ་མཆེད་ཡིད་ལ་བྱེད་ཅིང་ཡང་དག་པར་མི་ཤེས། རབ་ཏུ་སྦྱོར་བར་མི་བྱེད། བྱི་གྱིས་རློབ་པར་མི་བྱེད། སྒོམ་པར་མི་བྱེད། སྒྲུབ་པར་མི་བྱེད་པ་འདི་ནི། སོ་སོའི་སྐྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་མཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་བརྒྱད་པའོ། །དེས་ཡིན། འདོད་པའི་འདོད་ཆགས་དང ། གཟུགས་ཀྱི་འདོད་ཆགས་ཐམས་ཅད་དང ། དབྱིབས་ཀྱི་འདོད་ཆགས་དང ། རེག་པའི་འདོད་ཆགས་དང ། རྣམ་པར་གྲོལ་བ་མ་ཡིན་པའི་རྩེ་བའི་འདོད་ཆགས་ཐམས་ཅད་སྤོང་བར་འགྱུར་རོ། ། འཕགས་པའི་གང་ཟག་རྣམས་ནི། ལྷག་མ་མེད་པར་འགྱུར་རོ། །སོ་སོའི་སྐྱེ་བོ་རྣམས་ཀྱི་ཉམས་སྨད་པར་འགྱུར་ཏེ། རྐྱེན་གྱི་དབངས་གིས་ཕྱིས་སྐྱེ་བར་འགྱུར་ཞིང་ངན་སོང་གི་རྒྱུར་འགྱུར་རོ། །འདི་ནི། བདེན་པ་དང་རྗེས་སུ་མཐུན་པའི་གཟུངས་སྔགས་ཀྱི་དོན་གླེང་གཞི་དང་བཅས་པ་རྒྱས་པ་དང་བཅས་པ་ཡིན་ཏེ། གང་དེ་བཞིན་གཤེགས་པ་ཙམ་པ་ཀའི་མདོག་གིས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོའི་ལག་ནས་བསྐུར་བ། མཐུ་ཆེ་བ། ཕན་ཡོན་ཆེ་བ་ཡིན་ནོ། །འདུས་པ་ཆེན་པོ་འདི་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། །འདོད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་དང ། གཟུགས་མེད་པའི་འདོད་ཆགས་ཐམས་ཅད་དང །
251a
༄#། །ང་རྒྱལ་དང ། ལྷག་པའི་ང་རྒྱལ་དང ། ང་རྒྱལ་ལས་ཀྱང་ང་རྒྱལ་ཐམས་ཅད་དང ། ཕྲག་དོག་ཐམས་ཅད་ཡང་དག་པར་ཟད་པར་བྱེད་པ། ཡོངས་སུ་ཚོལ་བ་ཐམས་ཅད་དང ། བརྣབ་སེམས་ཐམས་ཅད་དང ། རྒོད་པ་ཐམས་ཅད་དང ། མ་རིག་པ་ཐམས་ཅད་དང ། འཇིག་ཚོགས་ལ་ལྟ་བ་དང ། ཐེ་ཚོམ་དང ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཐམས་ཅད་དང ། རྟག་པར་ལྟ་བ་དང ། ཆད་པར་ལྟ་བ་དང ། སེམས་ཅན་དུ་ལྟ་བ་དང ། སྲོག་དུ་ལྟ་བ་དང ། གསོ་བར་ལྟ་བ་དང ། གང་ཟག་ཏུ་ལྟ་བ་ཐམས་ཅད་དང ། བྱེད་པ་པོ་དང ། ཚོར་བ་པོར་ལྟ་བ་ཐམས་ཅད་དང ། གཟུགས་སུ་ལྟ་བ་ཐམས་ཅད་ཅེས་བྱ་བ་ནས་རེག་པར་ལྟ་བ་ཐམས་ཅད་ཅེས་བྱ་བའི་བར་དང ། སྐྱེ་བར་ལྟ་བ་ཐམས་ཅད་དང ། འབྱུང་བ་ཆེན་པོར་ལྟ་བ་ཐམས་ཅད་ཡོངས་སུ་ཤེས་པར་བྱེད་པ་ཞེས་བྱ་བ་ནས་ཕུང་པོ་དང ། ཁམས་དང ། སྐྱེ་མཆེད་ཐམས་ཅད་རྡུལ་མེད་པར་བྱེད་པའི་བར་དང ། བྱང་གྲོལ་གྱི་བདེ་བ་ཐམས་ཅད་སྟོན་པར་བྱེད་པ་ཡིན། རིམ་པ་དེས་ནི། བདུད་རྣམས་ཚར་གཅོད་པར་བྱེད་པ། ཀླུ་རྣམས་ཕམ་པར་བྱེད་པ། ལྷ་རྣམས་དགའ་བར་བྱེད་པ། གནོད་སྦྱིན་རྣམས་མགུ་བར་བྱེད་པ། ལྷ་མ་ཡིན་རྣམས་རྣམ་པར་འཇོམས་པར་བྱེད་པ། ནམ་མཁའ་ལྡིང་རྣམས་དངང་བར་བྱེད་པ། མི་འདམ་ཅི་རྣམས་
251b
དད་པར་བྱེད་པ། ལྟོ་འཕྱེ་ཆེན་པོ་རྣམས་སྒྲག་པར་བྱེད་པ། པས་ཀྱི་རྒོལ་བ་རྣམས་འདུལ་བར་བྱེད་པ། རྒྱལ་རིགས་རྣམས་མངོན་པར་དགའ་བར་བྱེད་པ། བྲམ་ཟེ་རྣམས་འཇུག་པར་བྱེད་པ།་རྗེའུ་རིགས་རྣམས་དགའ་བར་བྱེད་པ། དམངས་རིགས་རྣམས་མཆོག་ཏུ་དགའ་བར་བྱེད་པ། བུད་མེད་འདོད་ཆགས་དང་བྲལ་བར་བྱེད་པ། མང་དུ་ཐོས་པ་རྣམས་སྐྱོ་བར་བྱེད་པ།་རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། འཐབ་པ་དང ། འཐབ་མོ་དང ། མུ་གེ་དང ། ནད་དང ། དུས་མ་ཡིན་པའི་ཕ་རོལ་གྱི་དམག་ཚོགས་དང ། དུས་མ་ཡིན་པའི་རླུང་དང ། ཆར་པ་དང ། ཆུ་བོ་དང ། གྲང་བ་དང ། དྲོ་བ་དང ། ཁ་བ་དང ། ཚ་བ་དང ། རྩུབ་པ་དང ། རོ་མེད་པ་དང ། རིག་པར་དཀའ་བའི་དངོས་པོ་རྣམས་རྣམ་པར་ཞི་བར་བྱེད་པ། ཆོས་ཀྱི་ཚུལ་འབར་བར་བྱེད་པ། དཀོན་མཆོག་གསུམ་གྱི་གདུང་རྒྱུན་མི་ཆད་པར་བྱེད་པ། སངས་རྒྱས་ཀྱི་བསྟན་པ་སྟོན་པར་བྱེད་པ། འཁོར་བར་སྐྲག་པ་རྣམས་དབུགས་འབྱིན་པར་བྱེད་པ། ཟད་པ་ཤེས་པ་སྐྱེད་པར་བྱེད་པ། མི་སྐྱེ་བ་ཤེས་པ་རྟོགས་པར་བྱེད་པ། མ་རིག་པའི་ཕུང་པོ་རབ་ཏུ་འཇོམས་པར་བྱེད་པ། སྡུག་བསྔལ་ཕ་མས་ཅད་འདོར་བར་བྱེད་པ་ཡིན་ཏེ། འདི་ནི། བདེན་པ་དང་རྗེས་སུ་མཐུན་པའི་བཟོད་པ་ཡིན་ནོ། །བསྟན་པ་འདི་བཤད་པ་ན་དེར་ལྷ་དང་མི་གྲངས་མེད་དཔག་ཏུ་མེད་པ་ནི། ཆོས་རྣམས་ལ་ཆོས་
252a
༄#། །ཀྱི་མི་གྲྡུལ་མེད་ཅིང་དྲི་མ་དང་བྲལ་བ་ཉེ་བའི་ཉོན་མོངས་པ་དང་བྲལ་བ་ཐོབ་བོ། །དེའི་ཚེ་ཁྲག་ཁྲིག་ཕྲག་དགུ་བཅུ་རྩ་དྲུག་ནི། ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ཏོ། །དེའི་ཚེ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ནི། བདེན་པ་དང་རྗེས་སུ་མཐུན་པའི་གཟུངས་སྔགས་འདི་ཐོབ་པར་གྱུར་ཏོ། །དེའི་ཚེ་སེམས་ཅན་གྲངས་མེད་དཔག་ཏུ་མེད་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་ཕྱིར་མི་ལྡོག་པར་ཡང་གྱུར་ཏོ། །སྟོང་ཕྲག་སུམ་ཅུ་རྩ་གཉིས་ནི། མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། །ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། ཡི་དྭགས་དང ། གྲུལ་བུམ་དང ། ཤ་ཟ་དང ། མི་དང ། མི་མ་ཡིན་པ་ཐམས་ཅད་ཀྱིས་ལེགས་སོ། །ཞེས་བྱ་བ་གསོལ་ཏེ། བཙུན་པ་བཅོམ་ལྡན་འདས། ཁྱོད་ཀྱིས་དགེ་བར་གསུངས་པ་ལེགས་སོ། །སངས་རྒྱས་བཅོམ་ལྡན་འདས་རྣམས་ཀྱི་ཐོགས་པ་མ་མཆིས་པའི་ཡེ་ཤེས་མཐོང་པ་ནི། ངོ་མཚར་ལགས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་སུ་ཞིག་འདུན་པ་སྐྱེད་པར་མི་བགྱིད་ལགས། འདི་ལྟར་དེ་བཞིན་གཤེགས་པ་ནི། སེམས་ཅན་ཐམས་ཅད་ཀྱི་མིག་ཏུ་གྱུར་པ། ཡེ་ཤེས་སུ་གྱུར་པ། སྡུག་བསྔལ་
252b
ཐམས་ཅད་ཉེ་བར་ཞི་བར་བགྱིད་པར་གྱུར་པ། བདེ་བ་ཐམས་ཅད་སྦྱིན་པར་མཛད་པ། འཁོར་བའི་གཟིངས་སུ་གྱུར་པ་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་གཟུངས་སྔགས་ཉི་མའི་མིག་བསྟན་པ་སྲུང་བ་ཆེན་པོ་མ་འདྲེས་པ་ཐམས་ཅད་སྒྲུབ་པ་ཞེས་བགྱི་བ་ནས་ཤིན་ཏུ་ཡོངས་སུ་མྱ་ངན་ལས་འདས་པ་སྒྲུབ་པ་ཞེས་བགྱི་བའི་བར་དང ། གཟུངས་སྔགས་གང་གིས་སྐྱེས་བུ་དམ་པ་རྣམས་སྲིད་པ་གསུམ་གྱི་བརྩོན་ར་ཐམས་ཅད་དུ་མངོན་པར་མི་དགའ་བའི་འདུ་ཤེས་དང ། མཚན་མ་མེད་པའི་ཏིང་ངེ་འཛིན་གྱི་རྣམ་པར་ཐར་པའི་བདེ་བ་ལ་རེག་པར་བགྱིས་ནས་མི་གཡོ་བའི་ཏིང་ངེ་འཛིན་ལ་འཇུག་ཅིང་མོག་མཉམ་པ་ཉིད་དུ་འགྱུར་བ་དང ། སུས་ཐོས་པ་དེའི་ཉོན་མོངས་པ་འདོད་ཆགས་ལ་སོགས་པ་སྲབ་པར་འགྱུར་ཞིང ། དེ་ལྷ་རྣམས་ཀྱི་ནང་དུ་ཚེ་རབས་བདུན་འཁོར་བར་འགྱུར་བ་དང ། ལྷའི་དྲང་སྲོང་དུ་འགྱུར་བ་དང ། དེའི་སེམས་འདོད་པ་རྣམས་ཀྱིས་གོས་པར་མི་འགྱུར་བ་དང ། ལྷ་ཐམས་ཅད་ཀྱིས་མཆོད་པའི་འོས་སུ་འགྱུར་བ་དང ། དེ་དེ་ནས་ཤི་འཕོས་ནས་འདིར་མི་རྣམས་ཀྱི་ནང་དུ་ཚེ་རབས་བདུན་འཁོར་བར་འགྱུར་བ་དང ། དེའི་སེམས་འདོད་པ་རྣམས་ཀྱིས་གོས་
253a
༄#། །པར་མི་འགྱུར་བ་དང ། མིའི་དྲང་སྲོང་དུ་འགྱུར་བ་དང ། ལྷ་དང་མི་ཐམས་ཅད་ཀྱིས་མཆོད་པའི་འོས་སུ་གྱུར་པ་དང ། ཕྱག་བགྱི་བའི་འོས་སུ་གྱུར་པར་འགྱུར་བ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། མི་དགའ་བར་མ་བྱེད་ཅིག་།ཆོག་གོ་།ཀཽ་ཌི་ནྱ། ཉི་མ་དང་ལྡན་པའི་གཟུངས་སྔགས་འདི་ཉན་ཐོས་དང་རང་རྒྱལ་བ་རྣམས་ཀྱིས་མ་ཡིན་ནོ། །ཉི་མའི་མིག་པདྨའི་གཟུངས་སྔགས་འདི་ནི། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་རྒྱུ་མཐུན་པ་དག་ཡིན་ནོ། ཀཽ་ཌི་ནྱ།་གལ་ཏེ་ངས་བསྐལ་པ་བརྒྱ་སྟོང་དུ་ཉི་མའི་མིག་གི་གཟུངས་སྔགས་འདིའི་དོན་བསྟན་ཀྱང་བསྐལ་པ་བརྒྱ་སྟོང་ནི། ཟད་པར་འགྱུར་གྱི། རྒྱ་ཆེར་དོན་ཐམས་ཅད་བརྗོད་པར་མི་ནུས་སོ། །འདི་ལ་ལྷ་དང་བཅས་པའི་འཇིག་རྟེན་རྨོངས་པར་ཡང་འགྱུར་རོ། །འདི་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཉིད་མ་གཏོགས་པར་མངོན་སུམ་པ་གཞན་གང་ཡང་མེད་དོ། །ཉི་མའི་མིག་གི་གཟུངས་སྔགས་འདི་ནི། དོན་དཔག་ཏུ་མེད་པ། མཐོང་བར་དཀའ་བ། རྟོགས་པར་དཀའ་བ་ཡིན་ནོ། །དེ་བཞིན་དུ་མི་ཟད་པའི་སྤུ་བུ་དང ། དེ་བཞིན་དུ་རིག་སྔགས་ཀྱི་རྟེན་དང ། དེ་བཞིན་དུ་སྡང་བ་ཞི་བར་བྱེད་པ། གཉིད་ཀྱིས་ལོགས་པའི་གཟུངས་སྔགས་ནི། དོན་
253b
དཔག་ཏུ་མེད་པ། མཐོང་བར་དཀའ་བ། ཁོང་དུ་ཆུད་པར་དཀའ་བ་ཡིན་ཏེ། འདི་ལ་དེ་བཞིན་གཤེགས་པ་རྣམས་ཉིད་མ་གཏོགས་པར་མངོན་སུམ་པ་གཞན་གང་ཡང་མེད་དོ། །ཀཽ་ཌི་ནྱས་གསོལ་པ། བཙུན་པ་བཅོམ་ལྡན་འདས། གང་དེ་བཞིན་གཤེགས་པ་རི་དབང་རྒྱལ་པོ་དེས་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེའི་ལག་ནས་བསྐུར་བ་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། དེ་བཞིན་ཏེ། གང་དེ་བཞིན་གཤེགས་པ་རི་དབང་རྒྱལ་པོས་འདིར་ང་ལ་བསྐུར་བ་འདུས་པ་འདིར་ངས་བཤད་པ་ལ་དད་པ་སྦྱིན་པར་མཛད་པ་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་ལྷ་དང་བཅས་པའི་འཇིག་རྟེན་གྱི་མདུན་དུ་ངས་བཤད་པར་བྱའོ། །འདི་ལྟར་འདི་ནི། འདིར་ངས་བཤད་ན་སེམས་ཅན་གྲངས་མེད་དཔག་ཏུ་མེད་པའི་དོན་བྱེད་པ་ཡིན་ཞིང་འདིར་སེམས་ཅན་རྣམས་ཀྱིས་མངོན་སུམ་དུ་གྱུར་ཏོ། ཀཽ་ཌི་ནྱ།་དེའི་ཕྱིར་ཁྱོད་ཅེས་བྱ་བ་ནས་བཅོམ་ལྡན་འདས་དེས་དེ་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་རོ། །ཀཽ་ཌི་ནྱ། འདི་ལ་སེམས་ཅན་གང་དག་འདོད་ཆགས་ཀྱི་རྒྱགས་པས་མྱོས་ཤིང་ངེས་པར་འབྱུང་བར་མི་ལྟ་བས་གནས་པ་དེ་དག་ཡུན་རིང་པོར་འཁོར་བར་བྱེད་པར་འགྱུར་རོ། །ཡུན་རིང་པོར་ངན་སོང་གསུམ་དུ་སྡུག་བསྔལ་གྱི་ཚོར་བ་རྩུབ་པ་མི་ཟད་པ་མྱོང་
254a
༄#། །བར་འགྱུར་རོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྙིང་རྗེ་ཆེན་པོ་སྐྱེས་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེའི་སྟོབས་ཆེན་པོ་དང ། བརྩོན་འགྲུས་དང ། བརྩོན་པ་དང ། རྟུལ་བ་ཆེན་པོས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་ཚོལ་བར་བྱེད་དོ། །དེ་དག་མྱུར་དུ་མངོན་པར་རྫོགས་པར་འཚང་རྒྱའོ། །སེམས་ཅན་རྣམས་ངན་སོང་གསུམ་ལས་བསྒྲལ་བའི་ཕྱིར་ངེས་པར་འབྱེད་པ་དང ། ངེས་པར་འབྱིན་པ་དང ། གཅེས་སྤྲས་བྱེད་པས་ཡང་དག་པར་སྡུག་བསྔལ་ཟད་པར་འགྲོ་བར་བྱ་བའི་ཕྱིར་ཆོས་སྟོན་ཏོ། །སེམས་ཅན་གང་དག་ཆོས་བསྟན་པ་དེ་ཉན་པར་བྱེད་ཅིང་སྡུག་བསྔལ་ལས་ངེས་པར་འབྱུང་བར་ལྟ་བ་དེ་དག་འབྲས་བུ་དང་པོ་ཐོབ་པར་བྱེད་དོ། །ཞེས་བྱ་བ་ནས་འབྲས་བུ་བཞི་པའི་བར་དུ་ཐོབ་པར་བྱེད་དོ། །ཡང་ན་གལ་ཏེ་གང་དག་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་ཡེ་ཤེས་ཡོངས་སུ་བཙལ་བར་བྱ་བའི་ཕྱིར་འཁོར་བའི་སྡུག་བསྔལ་འཇིགས་སུ་རུང་བ་རྣམས་ལ་སྤྲོ་བར་བྱེད་པ་དེ་དག་བླ་ན་མེད་པའི་ཡེ་ཤེས་རྗེས་སུ་ཐོབ་ནས་སེམས་ཅན་རྣམས་འདོད་པ་དག་ལ་ངེས་པར་འབྱུང་བར་བྱ་བའི་ཕྱིར་ཆོས་སྟོན་པར་མཛད་དེ། དཔེར་ན། དེ་ལྟར་ང་བཞིན་ནོ། །ཀཽ་ཌི་ནྱ། དེ་ལ་རེག་པའི་འདོད་ཆགས་གང་ཞེ་ན། སེམས་ཅན་གང་དག་གཅིག་
254b
ལ་གཅིག་ལུས་ཀྱིས་རེག་པས་རེག་པར་གྱུར་པ་དེ་དག་བདེ་བའི་ཚོར་བ་མྱོང་བས་སྡུག་བསྔལ་སྐྱེ་བར་བྱེད་དོ། །སྡུག་བསྔལ་སོ་སོ་ཡང་དག་པར་མྱོང་བར་བྱེད་དོ། །དཔེར་ན། སྤྲུལ་གདུག་པ་གཏུམ་པོ་ཁ་ཅིག་བལྟ་བས་སེམས་ཅན་རྣམས་གསོད་པར་བྱེད། ཁ་ཅིག་དབུགས་ཙམ་གྱིས་སེམས་ཅན་རྣམས་གསོད་པར་བྱེད་དོ། །ཁ་ཅིག་རེག་པ་ཙམ་གྱིས་སེམས་ཅན་རྣམས་གསོད་པར་བྱེད། ཁ་ཅིག་སྦྱོར་བ་ཙམ་གྱིས་སེམས་ཅན་རྣམས་གསོད་པར་བྱེད་པ་དེ་བཞིན་དུ་སེམས་ཅན་ཁ་ཅིག་ནི། མཐོང་བ་ཙམ་གྱིས་དགེ་བའི་རྩ་བ་ཐམས་ཅད་ཆུད་གསོན་པར་བྱེད་ཅིང་རབ་ཏུ་སྲེག་པར་བྱེད་དོ། །ཁ་ཅིག་ནི། གཅིག་ལ་གཅིག་ལུས་ཀྱི་རེག་པས་དགེ་བའི་རྩ་བ་ཐམས་ཅད་ཆུད་གསོན་ཅིང་རབ་ཏུ་སྲེག་པར་བྱེད་དོ། །ཁ་ཅིག་ནི། འཇུག་པ་ཙམ་གྱིས་དགེ་བའི་རྩ་བ་ཐམས་ཅད་ཆུད་གསོན་ཅིང་རབ་ཏུ་སྲེག་པར་བྱེད་དོ། །ཁ་ཅིག་ནི། འཁྲིག་པ་དང་ལྡན་པའི་ཀུན་ཏུ་སྦྱོར་བའི་རེག་པ་ཙམ་གྱིས་སྡུག་བསྔལ་སྐྱེད་པར་བྱེད་ཅིང་དེ་དག་སྡུག་བསྔལ་སོ་སོ་ཡང་དག་པར་མྱོང་བར་བྱེད་དོ། །ཀཽ་ཌི་ནྱ། དེ་ལ་རེག་པའི་འདོད་ཆགས་ལས་ངེས་པར་འབྱུང་བ་གང་ཞེ་ན། ཀཽ་ཌི་ནྱ། འདི་ན་རུས་པའི་ཕུང་པོ་གཟུགས་གསལ་བ་ལ་སོ་སོར་པ་རྟག་པར་བྱའོ། །ཇི་ལྟར་ཞེ་ན། གང་དུ་གཟུགས་འདོད་པ། སྡུག་པ། ཕངས་པ། ཡིད་དུ་འོང་བ། འདོད་པ་དང་ལྡན་པ། ཆགས་པར་འགྱུར་བ་རྣམས་མཐོང་ནས་དེ་ལ་
255a
༄#། །བྱང་གྲོལ་གྱི་བདེ་བ་འདོད་པ་དེ་འདི་ལྟར་སོ་སོ་ཡང་དག་པར་སློབ་པར་བྱེད་དོ། །གཟུགས་འདི་ནི། འབྱུང་བ་ཆེན་པོ་བཞི་ལས་གྱུར་པ། འཇིག་ཅིང་རྣམ་པར་འཇིག་ལ་རྣམ་པར་ཕྱེ་མར་འགྱུར་བའི་ངོ་བོ་ཉིད་དོ། །ཇི་ལྟར་ཞེ་ན། དེ་ན་རུས་པའི་ཕུང་པོ་སྐྲ་མེད་པ་དང ། ཤ་དང ། སེན་མོ་དང ། ཁྲག་མེད་པ་དང ། སྟོང་པ་དང ། ཤིན་ཏུ་དཀར་ཞིང་དུང་གི་མདོག་ལྟ་བུ་དང ། རྒྱུས་པས་འབྲེལ་པར་ཡིད་ལ་བྱེད། ཡང་དག་པར་ཤེས་པར་བྱེད། རབ་ཏུ་སྦྱོར་བར་བྱེད། བྱིན་གྱིས་རློབ་པར་བྱེད་དེ། དེས་དེ་ཁོ་ན་བཞིན་དུ་ཡང་དག་པ་ཇི་ལྟ་བ་བཞིན་མཐོང་ངོ ། །དེ་དེ་ལ་སྐྱེད་ཅིང་སྒོམ་ལ་ལན་མང་དུ་བྱེད་པ་མཚན་མོ་ཇི་ལྟ་བར་ཉིན་པར་ཡང་དེ་བཞིན་དུ་ཡང་དག་པར་རྗེས་སུ་མཐོང་ཞིང ། དེ་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་སྐྱེད་དོ། །དེ་འདི་སྙམ་དུ་སེམས་ཏེ། བདག་ནི། རྒ་ཤིའི་འཇིགས་པའི་གནོད་པར་གྱུར་བ་ཡིན་པས་གང་བདག་གིས་རྒ་ཤིའི་རྔ་བོ་ཆེ་འདི་མ་ལུས་པར་གཅོད་གོར་མ་ཆག་སྙམ་མོ། །ཇི་ལྟར་བདག་གིས་རྒ་ཤིའི་རྔ་བོ་ཆེ་མ་ལུས་པར་གཞིག་པར་ནུས་ཤེ་ན། གང་བདག་གིས་རུས་པའི་ཕུང་པོ་འདི་ལ་ཤིན་ཏུ་སོ་སོར་བརྟག་པ་བྱས་པས་མ་ལུས་པར་གཞིག་པར་བྱ་གོར་མ་ཆག་སྙམ་ནས་དེ་ཐམས་ཅད་དང་ལྡན་པའི་རུས་པའི་ཕུང་པོ་འདི་ལ་སོ་སོར་རྟོག་པར་བྱེད་དེ། གང་དེ་ཐམས་
255b
ཅད་ལ་དཀར་བའི་འདུ་ཤེས་ཡིད་ལ་བྱེད་པ་འདི་ནི། དེའི་ཞི་གནས་སུ་འགྱུར་རོ། །དེ་འདི་ནི། བདག་གི་མགོའི་རུས་པའོ། །ཞེས་བྱ་བ་ནས་དེ་བཞིན་དུ་འདི་ན་བདག་གི་རྐང་པའི་མཐེ་བོའི་རུས་པའོ། །ཞེས་བྱ་བའི་བར་དུ་དེ་ལྟར་སོ་སོར་རྟོག་པར་བྱེད་ཅིང་རྒ་ཤིའི་རྔ་བོ་ཆེ་འདི་གཞིག་པར་བྱ་བའི་ཕྱིར་བདག་གིས་གནས་གང་དུ་ལྷག་མཐོང་གིས་བརྩམ་པར་བྱ་སྙམ་མོ། །དེ་འདི་སྙམ་དུ་སེམས་ཏེ། ཁ་དང་སྣ་གཉིས་ཀྱི་རླུང་འདུས་པས་རྒ་ཤིའི་རྔ་བོ་ཆེ་རང་གི་རུས་པའི་ཕུང་པོ་འདི་མ་ལུས་པར་གཞིག་པར་བྱའོ་སྙམ་ནས་དེ་སྣའི་རྩེ་མོར་རླུང་འདུས་པས་ཡང་དག་པར་རྩོམ་པར་བྱེད་དེ། རྡུལ་ཕྲ་རབ་ཙམ་དུ་རུས་པ་འཇིག་པར་བྱེད་དོ། །རླུང་གིས་འཕྱར་བར་བྱེད་དོ། །སྦྱོར་བ་དེས་རང་གི་རུས་པའི་ཕུང་པོ་ཐམས་ཅད་འཇིག་པར་འགྱུར་རོ། །ཇི་ལྟར་རང་གི་རུས་པའི་ཕུང་པོ་ཐམས་ཅད་ལྷག་མ་མེད་པར་རླུང་གིས་ཁྱེར་བར་གྱུར་པ་བཞིན་དེའི་རང་གི་ལུས་དེ་ལ་གང་རུས་པའི་འདུ་ཤེས་བྱུང་བ་དེ་སྤངས་ཤིང་དེང་དེ་ལ་སྟོང་པར་སྣང་སྟེ། འདི་སྟོང་པ་ཉིད་ཀྱི་ཡན་ལག་དང་པོའོ། །འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བདུན་པ། གཞན་ཡང་དེ་ལ་བདག་ནང་སྟོང་པ་ཉིད་དུ་སྣང་ངོ ། །དེ་ལ་ཕྱི་རོལ་ནི། གཟུགས་ཀྱི་འདུ་ཤེས་སུ་འགྱུར་རོ། །དེ་འདི་སྙམ་དུ་སེམས་ཏེ། བདག་གིས་རླུང་འདུས་པ་དེས་གཟུགས་སྣང་བ་ཐམས་ཅད་རྣམ་པར་གཞིག་པར་བྱའོ་སྙམ་
256a
༄#། །ནས་དེ་དེ་ལྟར་རླུང་འདུས་པས་ཕྱི་རོལ་གྱི་གཟུགས་སྣང་བ་གང་ཅིའང་རུང་བ་ཐམས་ཅད་རླུང་གིས་རྣམ་པར་འཇིག་པར་བྱེད་དོ། །དེ་རྣམ་པ་ཐམས་ཅད་དུ་ནང་ངམ་ཕྱི་རོལ་གྱི་གཟུགས་སྣང་བ་ཐམས་ཅད་སྤངས་ནས་བྱེ་བྲག་ཏུ་ཡིད་ལ་བྱེད་པ་འདི་ནི། སྟོང་པ་ཉིད་ཀྱི་ཡན་ལག་གཉིས་པའོ། །ཡང་དེ་འདི་སྙམ་དུ་སེམས་ཏེ། བདག་གིས་གཟུགས་སྣང་བ་གང་སྤངས་པ་ཐམས་ཅད་ནི། བདག་ལ་སྟོང་པར་སྣང་གི་།གཞན་ནི། མ་ཡིན་ནོ། །དེས་ན་བདག་གི་རླུང་དུ་ཀུན་ཏུ་རྟོག་པའི་སེམས་འདིའང་ཤིན་ཏུ་རྣམ་པར་གྲོལ་བ་མ་ཡིན་པས་དེ་བདག་གིས་སྤང་བར་བྱའོ། །ཆོས་ནི། གང་དུའང་འོང་བ་མེད། གང་དུའང་འགྲོ་བ་མེད་དེ། དེ་དེ་ལྟར་འགྲོ་བ་མེད་པའི་ཚུལ་ལམ། བདག་ཉིད་འགྲོ་བའི་ཚུལ་གྱིས་རྟོག་པ་སྤོང་བར་བྱེད་དེ། འདི་ནི། སྟོང་པ་ཉིད་ཀྱི་ཡན་ལག་གསུམ་པའོ། །ཡང་དེ་འདི་སྙམ་དུ་སེམས་ཏེ། ཅི་འདུས་བྱས་ཐམས་ཅད་ལ་དེ་ཁོ་ན་ཡང་དག་པ་ཅིའང་ཡོད་དམ་སྙམ་ནས་དེ་ཡང་དག་པ་མངོན་སུམ་དུ་གྱུར་པ་དེ་ཤེས་པར་བྱས་ཏེ། ཀུན་འབྱུང་བའི་ཆོས་གང་ཅིའང་རུང་བ་ཐམས་ཅད་འགོག་པའི་ཆོས་སུ་རིག་པར་བྱས་ནས་དེས་ཁམས་གསུམ་པ་ཐམས་ཅད་མེད་ཅིང་ཡང་དག་པ་མ་ཡིན་པར་ཤེས་ཏེ། དེའི་འདུ་བྱེད་ཤིན་ཏུ་སྦྱངས་ཤིང་ཞི་བར་འགྱུར་བ་འདི་ནི། སྟོང་པ་ཉིད་ཀྱི་ཡན་ལག་བཞི་པའོ། །ཁ་ཅིག་
256b
ནི།་འདིར་འབྲས་བུ་དང་པོ་ལ་གནས་པར་བྱེད་དོ། །ཁ་ཅིག་ནི། རྗེས་སུ་མཐུན་པའི་བཟོད་པ་སྒོམ་པར་བྱེད་དོ། །ཁ་ཅིག་ནི། དུས་དང་རྐྱེན་ཇི་ལྟ་བ་བཞིན་དུ་བྱང་ཆུབ་ལ་རེག་པར་བྱེད་དོ། །གང་རྟོག་པ་དང་དཔྱོད་པ་འབའ་ཞིག་རྣམ་པར་ཞི་བར་བྱ་བའི་ཕྱིར་བརྩོན་པ་ནི། རྣམ་པར་ཞི་བར་འགྱུར་རོ། །དེ་འགོག་པའི་སྙོམས་པར་འཇུག་པ་ལ་འཇུག་པར་བྱེད་དོ། དེ་བསམ་པ་ཇི་ལྟ་བ་བཞིན་དུ་འགོག་པས་ཉིན་ཞག་གཅིག་འདའ་བར་བྱེད་དོ། །ཞེས་བྱ་བ་ནས་བསྐལ་པ་དཔག་ཏུ་མེད་པའི་བར་དུ་འདའ་བར་བྱེད་དོ། །དང་པོ་དེ་ལངས་མ་ཐག་ཏུ་སྐད་ཅིག་མ་གཉིས་པ་ལ་ཉོན་མོངས་པ་ཟད་པ་ན་ཚེའང་ཟད་པར་གྱུར་ནས་དེ་མགོ་མཉམ་པར་ཡོངས་སུ་མྱ་ངན་ལས་འདས་པར་བྱེད་དོ། །འདི་ནི། སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་བརྒྱད་པ་ཡིན་ཏེ། སོ་སོའི་སྐྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་མཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པ། གཟུགས་དང་གཟུགས་མེད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་འདོར་བར་བྱེད་པ་ཞེས་བྱ་བའི་བར་ཡིན་ནོ། །དེ་ནི། དེ་བཞིན་གཤེགས་པ་རི་དབང་རྒྱལ་པོས་ང་ལ་སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་བྱང་ཆུབ་སེམས་དཔའ་སེམས་དཔའ་ཆེན་
257a
༄#། །པོ་སྤོས་ཀྱི་གླང་པོ་ཆེའི་ལག་ནས་བསྐུར་བ་དང་འདུས་པ་འདི་ལ་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། །བསྟན་པ་འདི་བཤད་པ་ན་དེར་སེམས་ཅན་བྱེ་བ་འབུམ་ཕྲག་དགུ་བཅུ་རྩ་གཉིས་འབྲས་བུ་དང་པོ་ལ་གནས་པར་གྱུར་ཏོ། །འདུམ་ཕྲག་དྲུག་ཅུ་ནི། ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྔོན་ལས་བྱས་པའི་སེམས་ཅན་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་ནི། སྟོང་པ་ཉིད་དང་རྗེས་སུ་མཐུན་པའི་གཟུངས་སྔགས་ཐོབ་པར་གྱུར་ཏོ། །སྲོག་ཆགས་བརྒྱད་ཁྲི་ནི། རང་བྱུང་ཅན་གྱི་གཟུངས་སྔགས་ཐོབ་པར་གྱུར་ཏོ། །དེར་སེམས་ཅན་དཀྲིགས་ཕྲག་དྲུག་ཅུས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་ཐམས་ཅད་དང་ལྡན་པའི་འཁོར་དེས་ལེགས་སོ། །ཞེས་བྱ་བ་གསོལ་ཏོ། །ལྷ་རྫས་ཀྱི་མེ་ཏོག་དང་སྤོས་ཀྱི་ཆར་མངོན་པར་རབ་ཏུ་བབ་པར་གྱུར་ཏོ། །དེ་ནས་ཡང་བཅོམ་ལྡན་འདས་ལ་ཚེ་དང་ལྡན་པ་ཀཽ་ཌི་ནྱས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་སྨོན་པ་མེད་པ་དང་རྗེས་སུ་མཐུན་པའི་གཟུངས་སྔགས་གང་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་དཔལ་སྙིང་པོའི་ལག་ནས་བསྐུར་
257b
བ་དང ། འདུས་པ་ཆེན་པོ་ལུང་བསྟན་པ་ཆེན་པོ་འདི་ལ་དད་པ་སྦྱིན་པར་མཛད་པ་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། དེ་དེ་བཞིན་ནོ། །ཀཽ་ཌི་ནྱ། དེ་དེ་བཞིན་ཏེ། ཀཽ་ཌི་ནྱ། འཁོར་འདི་ལ་སྨོན་པ་མེད་པ་དང་རྗེས་སུ་མཐུན་པའི་གཟུངས་སྔགས་ངས་བཤད་པར་བྱའོ། །ཀཽ་ཌི་ནྱ། འཁོར་འདི་ན་སེམས་ཅན་གང་དག་སྔོན་ཡོངས་སུ་སྤྱོད་པ་བྱས་པ་དང ། ཆོས་འདི་ཀུན་ཏུ་ཤེས་པར་ནུས་པ་དག་ཡོད་དོ། །ཀཽ་ཌི་ནྱ། དེའི་ཕྱིར་ཉོན་ལ་ཞེས་བྱ་བ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་དུའོ། །ཀཽ་ཌི་ནྱ། འདི་ན་སེམས་ཅན་གང་དག་མ་མོས་ཤིང་འདོད་ཆགས་དང་ཡང་དག་པར་རྗེས་སུ་འབྲེལ་པ་དག་ཡོད་དེ། དེ་དག་ངེས་པར་འབྱུང་བ་རབ་ཏུ་མི་ཤེས་ཤིང ། དེ་དག་ངེས་པར་འབྱུང་བར་མི་ལྟ་བས་ཡུན་རིང་པོར་འཁོར་པར་འཁོར་བར་འགྱུར་རོ། །ཞེས་བྱ་བ་ནས་ཡིད་ཀྱི་ཀུན་ཏུ་རྟོགས་པའི་འདོད་ཆགས་ལས་ངེས་པར་འབྱུང་བ་གང་ཞེ་ན་ཞེས་བྱ་བ་དང ། འདི་ལ་ཇི་ལྟར་ཡང་དག་པར་བསླབ་པར་བྱ་ཞེ་ན་ཞེས་བྱ་བའི་བར་དུའོ། །འདོད་པའི་འདོད་ཆགས་དང ། གཟུགས་ཀྱི་འདོད་ཆགས་དང ། གཟུགས་མེད་པའི་འདོད་ཆགས་དང ། དབྱིབས་ཀྱི་འདོད་ཆགས་དང ། རེག་པའི་འདོད་ཆགས་དང ། མོས་པའི་འདོད་ཆགས་དང ། ཡིད་ཀྱི་ཀུན་ཏུ་རྟོག་པའི་འདོད་ཆགས་གང་ཅིའང་རུང་བ་དེ་ཐམས་ཅད་ནི། འདུ་བྱེད་
258a
༄#། །ཀྱི་འབྱོར་འབྲེལ་གྱི་རྐྱེན་ལས་འབྱུང་ན། སུས་འདུ་བྱེད་དེ་དག་མངོན་པར་འདུས་བྱས་ཤིང་སུ་ཞིག་ནི། མངོན་པར་འདུ་བྱེད་ཅེ་ན། རླུང་གིས་མངོན་པར་འདུས་བྱས་པའོ། །བདག་གི་ལུས་དང ། ངག་དང ། ཡིད་ཀྱི་འདུ་བྱེད་དེ་དག་དང ། རླུང་ཡང་རྣམ་པར་གཞིག་པར་བྱའོ། །རླུང་དེ་དག་ནི། ཁ་དང་སྣ་དག་ནས་འཇུག་ཅིང་འབྱུང་སྟེ། རླུང་དེ་དག་གིས་མངོན་པར་འདུས་བྱས་སོ། །རླུང་དེ་དག་ཉིད་ཀྱིས་ལུས་འདི་རྣམ་པར་གཏོར་ཞིང་རྣམ་པར་གཞིག་པར་བྱའོ་སྙམ་ནས་དེ་དེ་ལྟར་སེམས་ལ་དབུགས་རྡུབ་པར་བྱེད་དེ། དབུགས་གང་དག་འཇུག་པར་བྱེད་པ་དེ་དག་ནི། ཤ་དང་ཁྲག་སྐེམ་པར་བྱེད་དོ། །མེད་པར་བྱེད་དོ། །གང་དག་འབྱུང་བར་བྱེད་པ་དེ་དག་ནི། ཤ་དང་ཁྲག་དེ་ལུས་ཀྱི་ཕྱི་རོལ་ཏུ་འདོར་བར་བྱེད་དོ། །ཞེས་བྱ་བ་ནས་ལུས་ཐམས་ཅད་བུ་གར་གྱུར་པར་མཐོང་བའི་བར་དང ། རྨའི་སྒོ་ཐམས་ཅད་ནས་དབུགས་འཇུག་ཅིང་འབྱུང་ལ་སྐྲ་དང ། སེན་མོ་དང ། ཤ་དང ། ཁྲག་གཞི་ནས་འབྱིན་ཅིང་ལུས་ཀྱི་ཕྱི་རོལ་ཏུ་འདོར་བར་བྱིན་གྱིས་རློབ་པར་བྱེད་པའི་བར་དང ། ཤ་དང་ཁྲག་ཐམས་ཅད་མ་ལུས་པར་ལུས་ཐམས་ཅད་ལ་མི་ཐོད་པར་བྱེད་པའི་བར་དང ། རུས་གོང་གི་ཕུང་པོ་སྟོང་ཞིང་དཀར་ལ་དུང་གི་མདོག་ལྟ་བུ་དང ། རྒྱུས་བས་འབྲེལ་བར་ཡང་དག་པར་རྗེས་སུ་མཐོང་བར་བྱེད་ཅིང་ཡིད་ལ་བྱེད། སྒོམ་པར་བྱེད་ལ་
258b
ད་ཉིད་བྱིན་གྱིས་རླབ་པར་བྱེད་པའི་བར་དང ། གང་དེ་ལ་སྔར་འདོད་པའི་འདོད་ཆགས་ཀྱི་སེམས་དང་རྗེས་སུ་འབྲེལ་བར་བྱུང་བ་དེ་སེམས་མཉམ་པར་གཞག་པ་ལ་ཉམས་དམས་པར་འགྱུར།་སྲབ་པར་འགྱུར་ཞིང་དེ་བཞིན་དུ་གཟུགས་ཀྱི་འདོད་ཆགས་དང ། གཟུགས་མེད་པའི་འདོད་ཆགས་དང ། དེ་བཞིན་དུ་དབྱིབས་ཀྱི་འདོད་ཆགས་དང ། དེ་བཞིན་དུ་རེག་པའི་འདོད་ཆགས་དང ། དེ་བཞིན་དུ་མོས་པའི་འདོད་ཆགས་དང ། ཀུན་ཏུ་རྟོག་པའི་འདོད་ཆགས་འགོང་བར་འགྱུར་ཞིང་སྲབ་པར་འགྱུར་རོ། །ཞེས་བྱ་བའི་བར་དུའོ། །གང་གི་ཚེ་ཡང་དེའི་སེམས་མཉམ་པར་མ་བཞག་པ་ན་ཡང་དང་ཡང་དུ་རྐྱེན་ཇི་ལྟ་བུ་རྙེད་པ་དེ་ལྟ་བུ་དེ་ཆུ་ཚོད་གཅིག་ཙམ་དུ་གཟུགས་ཁ་ཅིག་ལ་ཞེས་བྱ་བའི་བར་ལ་རྣམ་པར་ཉམས་པར་འགྱུར་རོ། ། དེ་འདི་སྙམ་དུ་སེམས་ཏེ། བདག་གི་རིས་མཐུན་པས་འདོད་ཆགས་གཞི་དང་བཅས་པ་གང་ཡིན་པ་དེ་བཅད་པ་མ་ལུས་པར་བྱ་བ་ཡིན་ནོ། །དཔེར་ན། དྲུངས་ནས་ཕྱུང་བ་མ་ཡིན་པའི་ཤིང་བཅད་པ་ནི། ཕྱིས་ཀྱང་སྐྱེ་བར་འགྱུར་བ་དེ་བཞིན་དུ་སྲེད་པའི་བག་ལ་ཉལ་མ་བཏོན་པ་སྡུག་བསྔལ་རྣམ་པ་སྣ་ཚོགས་ཕྱི་ཕྱིར་སྐྱེད། དེ་དེ་ཉིད་ལ་སྒོམ་པར་བྱེད་དེ། ཇི་ལྟར་རང་གི་ལུས་ལ་ཀང་རུས་དཀར་ཞིང་དུང་གི་མདོག་ལྟ་བུ་རྒྱུས་བས་འབྲེལ་པ་ཡང་དག་པར་རྗེས་སུ་མཐོང་བར་བྱེད་པའི་བར་དུའོ། །དེ་བཞིན་དུ་གཟུགས་སྣང་བ་གང་ཅིའང་རུང་བ་
259a
༄#། །སེམས་ཅན་ནམ། སེམས་ཅན་མ་ཡིན་པའང་རུང་སྟེ་མིག་སྔར་སྣང་བར་གྱུར་ན། དེས་ཐམས་ཅད་དེ་ལྟ་བུར་ཐམས་ཅད་ཀེང་རུས་མདོག་དཀར་པོ་རྒྱུས་པས་འབྲེལ་པར་ལྷག་ཆད་མེད་པར་ཡང་དག་པར་རྗེས་སུ་མཐོང་ངོ ། །དེ་ལས་དེའི་སེམས་རྣམ་པར་གཡེང་བར་ཡང་མི་བྱེད་དེ། འདི་ནི། དེའི་ཞི་གནས་ཡིན་ནོ། །དེའི་ཚེའང་འདི་ལྟར་སོ་སོར་ཡང་དག་པར་སློབ་པར་བྱེད་དེ། འདི་ནི། མགོའི་ཐོད་པའི་རུས་པའོ། །འདི་དག་ནི། སོ་རྣམས་སོ། །འདི་ནི། མགྲིན་པའོ། །ཞེས་བྱ་བ་ནས་འདི་དག་ནི།་རྐང་པའི་མཐེ་བོས་རུས་པ་རྣམས་སོ། །ཞེས་བྱ་བར་དེའི་ལྷག་མཐོང་དང་མཚུངས་པར་ལྡན་པའི་སེམས་ཀྱིས་བསམ་གཏན་སྒྲུབ་པར་བྱེད་དོ། །དེ་ཅིའི་ཕྱིར་ཞེ་ན། བསམ་བཞིན་དུ་བསམ་གཏན་སྒྲུབ་པར་བྱེད་པའི་ཕྱིར་རོ། །གང་དུ་དེའི་སེམས་ཤིན་ཏུ་ཡང་དག་པར་གནས་ཤིང་རབ་ཏུ་དང་བར་གྱུར་ན་དེས་དེ་བསྒོམ་པར་བྱ་སྟེ། ལྷག་མཐོང་གཅིག་པུ་ལ་སེམས་ཤིན་ཏུ་ཡང་དག་པར་གནས་ཤིང་རབ་ཏུ་དང་པར་གྱུར་ནའང་དེས་དེ་བསྒོམ་པར་བྱའོ། །ལྷག་མཐོང་གཅིག་པུ་ལ་སེམས་ཤིན་ཏུ་ཡང་དག་པར་གནས་ཤིང་རབ་ཏུ་དང་བར་གྱུར་ན་དེས་འདི་ལྟར་བསྒོམ་པར་བྱ་སྟེ། རུས་པའི་ཕུང་པོ་སོ་སོ་ཐ་དད་པར་རུས་པ་རྣམས་ལ་སོ་སོར་བརྟགས་ཤིང་བཤིག་ལ་སོ་སོར་བརྟགས་ནས་རྣམ་པར་ཕྱེ་མར་བྱས་ཏེ་སོ་སོར་བརྟག་གོ་།དེར་རབ་
259b
གོང་གི་ཕྱེ་མ་རྣམས་ལ་སེམས་ཀྱི་འདུ་འཕྲོད་གང་ཡིན་པ་དེ་རྒྱུ་མེད་པ་མ་ཡིན་པ་དང ། ཟད་པ་དང་འཇིག་པས་མཚན་ཉིད་དུ་སོ་སོར་བརྟག་པར་བྱའོ། །དེ་ལྟར་ལྷག་མཐོང་དང་རྗེས་སུ་མཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། །གཟུགས་སྣང་བ་ཐམས་ཅད་ལ་ཆགས་པ་མེད་པའི་རུས་གོང་གི་ཕྱེ་མ་ཤིན་ཏུ་དཀར་པོ་ལ་འདུ་འཕྲོད་ཀྱི་རྒྱུ་དང ། སེམས་མགྱོགས་པ་ཀུན་ཏུ་མགྱོགས་པ་ལ་སོ་སོར་རྟོག་པ་འབྱུང་བ་འདི་ནི། སྐྱེ་བ་དང་རྗེས་སུ་མཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། །གཟུགས་ཐམས་ཅད་ལ་ཆགས་པ་མེད་པའི་རུས་གོང་གི་ཕྱེ་མ་ཤིན་ཏུ་དཀར་པོ་ངོ་བོ་ཉིད་མེད་པ་ལ་འདུ་འཕྲོད་ཀྱི་རྒྱུ་དང ། སེམས་མགྱོགས་པ་དང་ཀུན་ཏུ་མགྱོགས་པ་ལ་སོ་སོར་རྟོག་པ་བདག་མེད་པ་དེ་ནི། འཇིག་པ་དང་རྗེས་སུ་མཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། །གཟུགས་སྣང་བ་ཐམས་ཅད་ལ་ཆགས་པ་མེད་པའི་རུས་གོང་གི་ཕྱེ་མ་ཤིན་ཏུ་དཀར་པོ་དག་ལ་བརྗོད་དུ་མེད་པ་དང ། སྣུམ་པ་མེད་པ་དང ། གཟུང་བ་མེད་པ་དང ། མཉམ་པར་གནས་པ་མ་ཡིན་པ་དང ། ཅིའང་མེད་པ་འདི་ནི། ཞི་བའི་ཞི་གནས་དང་རྗེས་སུ་མཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། །དེས་བཟོད་པ་ཐོབ་པར་བྱ་བའི་ཕྱིར་དུས་གསུམ་གྱི་འདོད་ཆགས་དག་འདོད་ཆགས་ལས་ཡང་དག་པར་སྒྲོལ་བ་དང ། ཡང་དག་པར་ལྡང་བར་བྱེད་པ་དང ། རྣམ་པར་རྟོག་
260a
༄#། །པ་མཉམ་པ་དང ། རྟེན་མཉམ་པ་དང ། དུས་གསུམ་གྱི་མཐའ་སྤོང་བར་འགྱུར་ཞིང་སྲིད་པ་གསུམ་ཐམས་ཅད་ཀྱི་མཐའ་སྤོང་བ་དང ། ཁམས་གསུམ་པའི་སྲིད་པ་ལྡོག་ཅིང་ཉེ་བར་ཞི་བ་དང ། དྲི་མ་གསུམ་སྤོང་བ་དང ། རྣམ་པར་ཐར་པའི་སྒོ་གསུམ་ཐོབ་པར་འགྱུར་ཞིང་ཀུན་ཏུ་སྦྱོར་བ་གསུམ་སྤངས་ནས་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །གཞན་ཡང་ཡང་དག་པར་མཚན་གྱི་གཞི་མེད་པའི་ཆོས་རྣམས་སྒོམ་པ་ལ་བརྩོན་པ་ནི། དགྲ་བཅོམ་པའི་འབྲས་བུ་ལ་གནས་པར་འགྱུར་རོ། །གཞན་ཡང་སུས་གཟུགས་སྣང་བ་ཐམས་ཅད་དག་ཅིང་དཀར་ལ་དུང་གི་མདོག་ལྟ་བུ་ཆགས་པ་མེད་པ། རྒྱུས་པ་དང་འབྲེལ་བའི་རུས་གོང་གི་ཕུང་པོ་ཡང་དག་པར་རྗེས་སུ་མཐོང་ན་ནི། དེར་དེའི་སེམས་ཤིན་ཏུ་ཡང་དག་པར་གནས་པར་གྱུར་ཏེ། འགྲོ་བ་དང ། གནས་པ་དང ། འདུག་པ་དང ། ཉལ་བ་ན་དེ་ཉིད་ཡིད་ལ་བྱའོ། །དེས་དེ་ཉིད་ཡིད་ལ་བྱས་ཤིང་དེ་ཉིད་བསྒོམས་ལ་དེ་ཉིད་བྱིན་གྱིས་བརླབས་ན། དེ་ལྟར་དེའི་ཞི་གནས་ཤིན་ཏུ་བསྒོམས་ཤིང་ཤིན་ཏུ་སྦྱང་བ་བྱས་པའི་བར་དུ་འགྱུར་རོ། །དེའི་ཚེ་རྣལ་འབྱོར་པ་ཕྱི་ནང་བདག་མེད་པ་སྟོང་པ་ཉིད་ལ་འཇུག་སྟེ། གཟུགས་ཐམས་ཅད་ཀྱི་རུས་གོང་གི་ཕུང་པོ་ལ་གལ་ཏེ་མངོན་པའི་འདུ་ཤེས་བྱུང་ན་དེར་རུས་གོང་གི་ཕུང་པོ་སྔོན་པོ་ཡང་དག་པར་རྗེས་སུ་མཐོང་ངོ ། །ཞེས་བྱ་བ་ནས་
260b
གལ་ཏེ་ཤེལ་གྱི་མདོག་ལྟ་བུ་ཡིད་ལ་བྱེད་ན་དེས་གཟུགས་སྣང་བ་ཐམས་ཅད་རུས་གོང་གི་ཕུང་བོ་ཤེལ་གྱི་མདོག་ལྟ་བུའི་བར་དུ་ཡང་དག་པར་རྗེས་སུ་མཐོང་ངོ ། །དེར་དེའི་རྣམ་པར་རྟོག་པ་འབྱུང་སྟེ། ཅིའི་ཕྱིར་འདི་གཟུགས་སྣང་བ་ཐམས་ཅད་རུས་གོང་གི་ཕུང་པོ་དཀར་པོར་ཡང་དག་པར་སྣང ། ཅིའི་ཕྱིར་ཤེལ་གྱི་མདོག་ལྟ་བུའི་བར་དུ་ཡང་དག་པར་སྣང་སྙམ་མོ།། དེ་འདི་སྙམ་དུ་སེམས་ཏེ། འདི་དག་ཐམས་ཅད་སེམས་ཀྱི་བྲག་ཅ་ཡིན་པའི་ཕྱིར་གསོབ་ལ་བརྫུན་པ་སྟེ། ཐམས་ཅད་སེམས་སྣང་བ་ཡིན་ནོ། །སུས་དེ་ལྟར་ཤེས་པ་དེ་འཇིག་རྟེན་ཐམས་ཅད་ཀྱི་སྦྱིན་གནས་ཡིན་ཞིང་མཆོད་པར་འོས་པ་ཡིན་ནོ། །ཀཽ་ཌི་ནྱ། འདི་ནི། མངོན་པར་མི་དགའ་བའི་འདུ་ཤེས་དང་ཟས་ལ་མི་མཐུན་པའི་འདུ་ཤེས་མ་གཏོགས་པར་སྨོན་པ་མེད་པ་དང་རྗེས་སུ་མཐུན་པའི་བཟོད་པའི་དོན་ཡིན་ནོ། །དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོས་གང་ང་ལ་བསྐུར་བ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་ཀྱི་བློ་གྲོས་བཟང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཉན་ཐོས་ཀྱི་ཞི་གནས་ཀྱི་བསམ་པ་ཅན་སུས་དེ་ལྟར་བསྒོམས་ན། མི་སྡུག་པ་སྒོམ་པར་བགྱིད་པ་ལགས ། དེར་མཚན་མ་གང་དག་འབྱུང་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། སུ་འདོད་ཆགས་ཟད་པར་བྱ་བའི་ཕྱིར་གང་མི་སྡུག་པ་སྒོམ་པར་བྱེད་པ་དེའི་འཕྲལ་བར་སེམས་གཏད་
261a
༄#། །པར་བྱའོ། །དེའི་མཚན་མ་འདི་དག་འབྱུང་སྟེ། ཇི་སྲིད་དུ་མི་སྡུག་པའི་སེམས་ཀྱིས་སོ་སོར་རྟོག་པར་འགྱུར་བ་དེ་སྲིད་དུ་དེའི་ལུས་ཐམས་ཅད་གཡོ་ཞིང་ཀུན་ཏུ་གདུང་བར་འགྱུར་རོ། །འདི་ནི། དེའི་མཚན་མ་ནང་གི་དང་པོ་ཡིན་ནོ། །ཇི་སྲིད་དུ་ཡང་དང་ཡང་དུ་སྒོམ་པར་བྱེད་པའི་རང་གི་ལུས་ཀྱི་གནས་སོ་ཅོག་ཏུ་འདི་སྙམ་བྱེད་དོ། །ཕྱར་བརྩུབ་པོས་རེག་པ་བཞིན་ནོ་སྙམ་པ་འདི་ནི། དེའི་མཚན་མ་གཉིས་པའོ། །ཡང་ཕྱི་ཕྱིར་སེམས་རྣམ་པར་གཡེང་བ་མེད་པར་སྒོམ་པར་བྱེད་པ་དེའི་ལུས་ཐམས་ཅད་རབ་ཏུ་སིམ་པར་འགྱུར་ཏེ།་ལུས་ཐམས་ཅད་ལ་འོ་མས་བཏབ་པ་བཞིན་ནོ་སྙམ་པ་འདི་ནི། དེའི་སེམས་རྩེ་གཅིག་པ་ཉིད་ཀྱི་ཞི་གནས་ཀྱི་མཚན་མ་ཡིན་ཏེ། དེ་དགའ་བ་དང་བདེ་བ་འདིའང་མཚན་མ་མེད་པའི་ཚུལ་གྱིས་སྤོང་བར་བྱེད་དོ། །དེའང་དེའི་ངེས་པར་འབྱེད་པ་ཡོངས་སུ་དག་པར་བྱ་བའི་ཕྱིར་སེམས་འདོད་ཆགས་ཀྱིས་ཉེ་བར་ཉོན་མོངས་པ་ཡོངས་སུ་གཏུགས་ཤིང་མ་རིག་པས་ཉེ་བར་ཉོན་མོངས་པའི་ཤེས་རབ་རྣམ་པར་དག་ན། དེ་ལུས་ཐམས་ཅད་རུས་གོང་གི་ཕུང་པོ་ལ་སྡུག་བསྔལ་གྱི་རྣམ་པ་ཤེས་པ་ཞེས་བྱ་བ་ནས་ཞི་བའི་རྣམ་པ་ཞེས་བྱ་བའི་བར་དུ་སོ་སོར་རྟོག་པར་བྱེད་དོ། །དེ་བཞིན་དུ་དེའི་ལུས་ཐམས་ཅད་ལས་དྲོ་བ་འབྱུང་བར་འགྱུར་ཏེ། འདི་ནི། དེའི་ཞི་གནས་ཡོངས་སུ་རྫོགས་པ་ཡིན་ནོ། །དྲོ་བར་
261b
གྱུར་པའི་དགེ་བའི་རྩ་བ་དང ། སྔ་ཕྱི་མེད་པའི་བདེ་བ་འཇུག་པས་སེམས་ཡོངས་སུ་དག་པར་འགྱུར་རོ། །བདག་ཉིད་ལྷར་གྱུར་པ་བཞིན་དུ་ཡང་དག་པར་ཤེས་སོ། །ཡང་རུས་གོང་དེ་ཕུང་པོ་དེ་ཉིད་ལ་རྣམ་པ་བཞིར་སོ་སོར་རྟོག་པས་རང་གི་འཕྲལ་བ་མར་མེའི་མེ་ལྕེ་མཐོང་ངོ ། །དེ་མ་རིག་པ་ལས་ཡང་དག་པར་འདས་པར་བྱ་བའི་ཕྱིར་ཆེས་ལན་མང་དུ་རང་གི་རུས་གོང་གི་ཕུང་པོ་ལ་ཡང་དང་ཡང་དུ་རྣམ་པ་བཞིར་རྟག་ཏུ་སྣང་བ་དེ་ལྟ་བུར་ཡོངས་སུ་རྟོག་པས་སེམས་དང་སེམས་ལས་བྱུང་བའི་ཆོས་རྣམས་ཀྱི་འཇིག་པ་མི་མཐོང་ངོ ། །དེ་ལྟར་འཁོར་ཞིང་མི་གནས་པ་ཉིད་ནི། དཔེར་ན། ཉི་ཟེར་གྱི་རྡུལ་བཞིན་དུ་འཁོར་བར་བྱེད་དོ། །ཇི་ལྟར་འདུས་བྱས་ཀྱི་དངོས་པོ་ཐམས་ཅད་ལ་འདུ་ཤེས་མཆོག་གིས་མཐོང་བ་དེ་བཞིན་དུ་འདུས་བྱས་ཀྱི་ཆོས་ཐམས་ཅད་ལ་བདག་མེད་པ་ཞེས་བྱ་བ་ནས་འགོག་པའི་ཆོས་ཀྱི་བར་ཡང་དག་པ་ཇི་ལྟ་བ་བཞིན་དུ་ཤེས་ཏེ། དེ་ནི། དེའི་རྩེ་མོའི་དགེ་པའི་རྩ་བ་ཐོབ་པའོ། །ཡང་རང་གི་ལུས་ལ་མེ་ཤི་བ་དང་ཀུན་ཏུ་རབ་ཏུ་འབར་བར་ཡང་དག་པར་རྗེས་སུ་མཐོང་ངོ ། །ཕྱོགས་ཐམས་ཅད་དུ་སྣང་བ་ཆེན་པོ་ཡང་དག་པར་རྗེས་སུ་མཐོང་ངོ ། །དེ་ནི། དེའི་བསམ་གཏན་དང་པོའི་སའི་ལམ་ཡིན་ཏེ། དེ་བཞིན་དུ་གཟུགས་ན་སྤྱོད་པའི་དགེ་བའི་རྩ་བ་རྣམས་དང ། གཟུགས་ན་སྤྱོད་པའི་འབྱུང་བ་ཆེན་པོ་རྣམས་ཐོབ་བར་འགྱུར་རོ། །དེ་བཞིན་དུ་གཟུགས་ན་སྤྱོད་པའི་བདེ་བ་ཆེན་པོས་ལུས་ཐམས་ཅད་
262a
༄#། །ཁྱབ་པར་འགྱུར་རོ། །དེ་བཞིན་དུ་དེའི་སྙིང་གནས་ཀྱང་ཉི་མའི་འོད་ཟེར་དག་འབྱུང་ངོ ། །ཕྱོགས་གང་དང་གང་མཐོང་བ་དང་ཡིད་ཀྱིས་བརྟགས་པ་ཐམས་ཅད་དུ་ཉི་མའི་དཀྱིལ་འཁོར་གྱི་འོད་ཟེར་རྣམས་ཀྱིས་ཁྱབ་པར་མཐོང་ངོ ། །འོད་ཟེར་དེ་རྣམས་ལའང་སྨོན་པ་མེད་པའི་ཚུལ་གྱིས་སྒོམ་པར་བྱེད་དེ། དེ་དེའི་ཚེ་སྲིད་པ་གསུམ་པོ་ཐམས་ཅད་ལ་སྨོན་པ་མེད་པའི་སེམས་ཡིན་ནོ། །དེ་དེའི་ཚེ་ཚུལ་གཅིག་པའི་འཕགས་པའི་བདེན་པ་བཞི་ལ་མི་དམིགས་པའི་ཚུལ་གྱིས་སྟོང་པ་ཉིད་ལ་བརྩོན་པར་གནས་སོ། །དེའི་ལུས་ཐམས་ཅད་ལས་ཀྱང་དྲོ་བ་འབྱུང་ངོ ། །སྤྱི་བོ་ནས་ཀྱང་དྲོ་བ་ཁ་དོག་སྣ་ཚོགས་འབྱུང་ངོ ། །སྤྱི་བོའི་སྟེང་དུ་གདུགས་གནས་པར་འགྱུར་བ་འདི་ནི། རྩེ་མོའི་དགེ་བའི་རྩ་བ་ཡིན་ནོ། །ཡང་མི་དམིགས་པའི་ཚུལ་གྱིས་བདེན་པ་དང་རྗེས་སུ་མཐུན་པའི་བཟོད་པ་ལ་ཡོངས་སུ་རྟོག་པར་བྱེད་དེ། དེའི་ཚེ་འཕགས་པའི་བདེན་པ་བཞི་མངོན་པར་རྟོགས་པར་འགྱུར་རོ། །རིགས་ཀྱི་བུ། འདི་ནི། ཉན་ཐོས་ཀྱི་མི་སྡུག་པ་སྒོམ་པ་ཡིན་ཏེ། མི་སྡུག་པ་ཤིན་ཏུ་བསྒོམས་པ་དེས་ཞི་གནས་ཐོབ་པར་འགྱུར་རོ། །དེའི་མཚན་མ་འདི་དག་འབྱུང་སྟེ། མཚན་མ་དེ་དག་དང ། དད་པ་དེ་ལྟ་བུ་དག་གིས་འཕགས་པའི་ལམ་ཡན་ལག་བརྒྱད་པའི་བར་གནས་ཤིང་ཉོན་མོངས་པ་ཐམས་ཅད་སྤོང་བ་དང་དགྲ་བཅོམ་པ་ཉིད་ལ་རེག་པར་འགྱུར་རོ། །རིགས་ཀྱི་བུ། དེ་ལྟ་བས་ན།
262b
ཁྱོད་ཀྱིས་སངས་རྒྱས་ཀྱི་ཞིང་འོད་ཟེར་གྱིས་རྒྱལ་བར་ཉན་ཐོས་ཀྱི་ཐེག་པ་པའི་གང་ཟག་རྣམས་ལ་ཡིད་ལ་བྱེད་པ་དེ་ལྟ་བུ་སྟོན་ཅིག་།མི་སྡུག་པ་བསྟན་པ་འདི་བཤད་པ་ན་དེར་སེམས་ཅན་དཔག་ཏུ་མེད་པ་བདེན་པ་དང་རྗེས་སུ་མཐུན་པའི་བཟོད་པ་ཐོབ་པ་ནས་དེར་སེམས་ཅན་དཔག་ཏུ་མེད་པ་བདེན་པ་མཐོང་བའི་བར་དུ་གྱུར་ཏོ། །དེ་ནས་བཅོམ་ལྡན་འདས་ཀྱིས་གཞན་ཡང་ཀུན་ཤེས་ཀཽ་ཌི་ནྱ་ལ་འདི་སྐད་ཅེས་བཀའ་སྩལ་ཏོ། །ཀཽ་ཌི་ནྱ། གལ་ཏེ་ཐམས་ཅད་ཚུལ་གཅིག་ཅིང་བསམ་པ་གཅིག་པར་གྱུར་ན་གང་གིས་ཟག་པ་རྣམས་ལས་སེམས་རྣམ་པར་གྲོལ་བར་འགྱུར་བའི་ཆོས་གཅིག་ཁོ་ན་སེམས་ཅན་རྣམས་ལ་བསྟན་པར་བྱའོ། །ཇི་སྲིད་དུ་སེམས་རྣམ་པར་མ་ཞི་བ་དེ་སྲིད་དུ་སྲིད་པའི་འབྲས་དང ། ནད་དང ། ཟུག་རྔུ་དང ། ཡང་སྲིད་པ་སྣ་ཚོགས་ཀུན་ནས་སློང་ཞིང་འགྲོ་བ་སྣ་ཚོགས་བྱེད་པས་གང་བདག་གིས་རང་གི་སེམས་བསྡུ་བར་བྱ་ཞིང་སེམས་ཀྱི་མཚན་མ་གཟུང་བར་བྱ་གོར་མ་ཆག་སྙམ་ཞིང་རུས་གོང་གི་ཕུང་པོ་འདི་ཇི་ལྟར་སེམས་ཀྱི་འདུ་འཕྲོད་སྐྱེད་པར་བྱེད་པའི་རྒྱུ་དེ་ལ་རྣམ་པར་རྟོག་པར་བྱེད་པ་འདི་ནི། ལྷག་པའི་སེམས་ཀྱི་སྐྱོན་མེད་པ་ཐོབ་པ་དང་པོ་ཡིན་ཏེ། ངན་དོན་མ་ཡིན་པར་ཐོབ་པ་ཡིན། མཐོང་བའི་ཆོས་ལ་བདེ་བར་གནས་པར་འགྱུར་ཞིང་ཕྱིར་མི་ལྡོག་པར་འགྱུར་བ་ཡིན་ནོ། །གཞན་ཡང་དེ་འདི་སྙམ་དུ་སེམས་ཏེ། རྐྱེན་གང་དག་གིས་སེམས་ཀྱི་འདུ་འཕྲོད་ཀྱི་རྒྱུ་འབྱུང་བ་ནི། རྐྱེན་དེ་དག་
263a
༄#། །བསྡུས་ནས་འཇིག་པའི་ཚུལ་གྱིས་སྡུད་པར་བྱེད་པ་འདི་ནི། ལྷག་པའི་སེམས་ཀྱིས་མཐོང་བའི་ཆོས་ལ་བདེ་བར་གནས་པ་སྐྱོན་མེད་པ་ཐོབ་པ་གཉིས་པ་ཡིན་ཏེ།་ངན་ངོན་མ་ཡིན་པར་ཐོབ་པ་དང ། དཀའ་བ་མེད་པར་ཐོབ་པ་ཡིན་ནོ། །ཡང་དེ་འདི་སྙམ་དུ་སེམས་ཏེ། བདག་གི་སེམས་འདི་ཇི་སྲིད་དུ་རྐྱེན་གྱི་འདུ་འཕྲོད་ཀྱི་རྒྱུ་ལ་རྒྱུག་པར་བྱེད་པ་དེ་སྲིད་དུ་ལུས་དང ། སེམས་ཀྱི་བདེ་བས་མྱོས་པས་གནས་པར་འགྱུར་བས་གང་བདག་གིས་ལུས་དང་སེམས་ཀྱི་བདེ་བ་ནུབ་པར་བྱ་གོར་མ་ཆག་གོ་སྙམ་ནས་དེ་འདི་ལྟར་སོ་སོ་ཡང་དག་པར་སློབ་པར་བྱེད་དོ། །བདག་གི་སྐྱོན་གྱི་འདུ་འཕྲོད་ཀྱི་རྒྱུ་འདི་ནི། རུས་གོང་གི་ཕུང་པོ་དྲན་པས་ལུས་དང་སེམས་ཀྱི་བདེ་བ་ཡང་དག་པར་འབྱུང་བའོ། །གང་བདག་གིས་དེ་མངོན་པར་དོར་བར་བྱ་གོར་མ་ཆག་སྙམ་ནས་དེ་མིག་གི་རྣམ་པར་ཤེས་པ་བྱུང་བ་ཞེས་བྱ་བ་ནས་ཡིད་ཀྱི་རྣམ་པར་ཤེས་པའི་བར་བྱུང་བ་སྐྱེ་བ་དང་འཇིག་པའི་ཚུལ་གྱིས་ནུབ་པར་བྱེད་པ་ཉིད་ནི། ལྷག་པའི་སེམས་ཀྱི་མཐོང་བའི་ཆོས་ལ་བདེ་བར་གནས་པར་འགྱུར་བ་གསུམ་པ་ཡིན་ཏེ། སྐྱོན་མེད་པར་ཐོབ་པ་དང ། དཀའ་བ་མེད་པར་ཐོབ་པ་དང ། ངན་ངོན་མ་ཡིན་པར་ཐོབ་པ་ཡིན་ནོ། །གཞན་ཡང་དེ་འདི་སྙམ་དུ་སེམས་ཏེ། བདག་ཆོས་ཀྱི་དབྱིངས་ཐམས་ཅད་ངེས་པར་འབྱུང་བ་དང ། ཟད་པ་དང ། རང་བཞིན་དག་པ་དང ། ངོ་བོ་ཉིད་
263b
མེད་པ་དང ། ཞི་བའི་ཚུལ་གྱིས་གནས་པར་བྱའོ། །ཇི་ལྟར་ཞེ་ན། སེམས་ཀྱི་མཚན་ཉིད་ཐམས་ཅད་རྣམ་པར་ཞི་བའི་ཚུལ་གྱིས་གནས་པར་བྱའོ། །སྙམ་ནས་དེ་སེམས་ཀྱི་མཚན་ཉིད་ཐམས་ཅད་པའི་རྒྱུ་བ་རྣམ་པར་ཞི་བ་དང ། སེམས་ཞི་བར་གནས་པ་འདི་ནི། ལྷག་པའི་སེམས་ཀྱི་མཐོང་བའི་ཆོས་ལ་བདེ་བར་གནས་པ་དང ། སྐྱོན་མེད་པ་ཐོབ་པ་བཞི་པ་ཡིན་ཏེ། དཀའ་བ་མེད་པར་ཐོབ་པ་དང ། ཚེགས་མེད་པར་ཐོབ་པ་ཡིན་ནོ། །ལྷག་པའི་སེམས་ཀྱི་ཆོས་བཞི་པོ་དེ་དག་དང་ལྡན་པ་ནི། ཏིང་ངེ་འཛིན་གྱི་སྒོར་འཇུག་པ་འབུམ་ཕྲག་བརྒྱད་ཅུ་རྩ་བཞི་མཐོང་ངོ ། །དེ་ཕྱིར་མི་འོང་བའི་འབྲས་བུ་ལ་གནས་པར་འགྱུར་བ་ནས་དགྲ་བཅོམ་པ་ཉིད་ཀྱི་བར་ལ་གནས་པར་འགྱུར་རོ། །དགེ་སློང་དེ་གཉིས་ཀའི་ཆ་ལས་རྣམ་པར་གྲོལ་བ་ཡིན་ཞིང་མཐུ་ཆེ་བ་ནུས་པ་ཆེ་བ་ཡིན། ཀཽ་ཌི་ནྱ། གལ་ཏེའང་སེམས་ཅན་ཐམས་ཅད་ཚུལ་གཅིག་ཅིང་དད་པ་གཅིག་ལ་བསམ་པ་གཅིག་པར་འགྱུར་དུ་ནི། འདི་ལྟར་སེམས་ཅན་རྣམས་བསམ་པ་ཐ་དད་པའི་ཕྱིར་ཏེ།་དེ་ལྟ་བས་ན། དེ་བཞིན་གཤེགས་པ་ཚིག་ཐ་དད་པའི་ཆོས་ཀྱི་སྒོ་བསྟན་པ་དང ། བརྗོད་པ་རྣམས་ཀྱིས་ཆོས་སྟོན་ཏོ། །བཅོམ་ལྡན་འདས་ཀྱིས་སེམས་ཅན་འདུ་ཤེས་ཐ་དད་པ་ཕྱིན་ཅི་ལོག་པ་རྣམས་ལ་བཀའ་སྩལ་པ། ཁྱེད་ཀྱི་མི་རྟག་པའི་འདུ་ཤེས་ཀྱང་རུང ། སྡུག་བསྔལ་གྱི་འདུ་ཤེས་ཀྱང་རུང ། བདག་མེད་པའི་འདུ་ཤེས་ཀྱང་རུང ། རྣམ་པར་བམ་པའི་
264a
༄#། །འདུ་ཤེས་ཀྱང་རུང ། རྣམ་པར་རྣགས་པའི་འདུ་ཤེས་ཀྱང་རུང ། རྣམ་པར་སྔོས་པའི་འདུ་ཤེས་ཀྱང་རུང ། རྣམ་པར་ཟོས་པའི་འདུ་ཤེས་ཀྱང་རུང ། རྣམ་པར་འཐོར་བའི་འདུ་ཤེས་ཀྱང་རུང་སྟེ། དེ་ཐམས་ཅད་དོན་ནི། འདིར་གསུངས་པ་ཡིན་ནོ། །ཀུན་ཤེས་ཀཽ་ཌི་ནྱས་གསོལ་པ། བཅོམ་ལྡན་འདས། ཇི་ལྟར་མངོན་པར་མི་དགའ་བའི་འདུ་ཤེས་བསྒོམ་པར་བགྱི་བ་དང ། ཇི་ལྟར་ཟས་ལ་མི་མཐུན་པའི་འདུ་ཤེས་བསྒོམ་པར་བགྱི་བ་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། ཆོག་གོ་།ཞིང་འདི་ན་བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་ཆོས་ཀྱི་རྗེས་སུ་མཐུན་པའི་ཆོས་སྒྲུབ་པའང་གཞན་དུ་ཡིན་ལ། འཇིག་རྟེན་གྱི་ཁམས་དེ་དག་ན་སེམས་ཅན་རྣམས་བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་ཆོས་ཀྱི་རྗེས་སུ་མཐུན་པའི་ཆོས་སྒྲུབ་པའི་སེམས་ཅན་གྱི་བསམ་པ་དག་ཀྱང་གཞན་དུ་ཞུགས་པ་ཡིན་ཞིང་སྤྱོད་པ་གཞན་དང ། སྦྱོར་བ་གཞན་གྱི་མངོན་པར་རྟོགས་པ་ཡིན་ནོ། །ཀཽ་ཌི་ནྱ། གལ་ཏེ་ངས་བཤད་ན་ཚུལ་དེ་ལྟ་བུ་དེ་རབ་ཏུ་ཤེས་པར་འགྱུར་བའི་སྐྱོན་མེད་པ་དག་ལ་ཞུགས་པ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་སེམས་ཅན་གཞན་གང་དག་ཡོད་པ་དེ་དག་འདི་ལ་ཀུན་ཏུ་རྨོངས་པར་འགྱུར་རོ། །ཀཽ་ཌི་ནྱས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
264b
འདས།་འཇིག་རྟེན་ཐམས་ཅད་ལ་མངོན་པར་མི་དགའ་པའི་འདུ་ཤེས་དང ། ཟས་ལ་མི་མཐུན་པའི་འདུ་ཤེས་བཤད་པར་གསོལ། བཙུན་པ་བདེ་བར་གཤེགས་པས་བཤད་པར་གསོལ། དེ་ཐོས་པས་སེམས་ཅན་རྣམས་དགེ་བའི་རྩ་བ་རྣམ་པ་སྣ་ཚོགས་སྐྱེད་པར་འགྱུར་ལགས་སོ། །སེམས་ཅན་མ་རིག་པས་བསྒྲིབས་པ་རྣམས་དང ། སྲེད་པའི་ཀུན་ཏུ་སྦྱོར་བ་ཅན་རྣམས་དང ། སྲེད་པའི་ལྟུང་བ་ཐོགས་པ་རྣམས་དང ། འཁོར་བར་ཀུན་ཏུ་རྒྱུག་ཅིང་འཁོར་བ་རྣམས་ཀྱི་སྔོན་གྱི་མཐའ་མི་མངོན་ལགས་ཏེ། དེར་དེ་དག་མངོན་པར་དགའ་ལགས་སོ། །དེ་ཅིའི་སླད་དུ་ཞེ་ན།་ཟས་ཀྱི་ཀུན་ཏུ་སྦྱོར་བའི་རྒྱུ་དང ། འཁྲིག་པ་དང་ལྡན་པའི་ཀུན་ཏུ་སྦྱོར་བའི་སླད་དུ་སྟེ་ཆོས་ཀྱི་ཚུལ་དེ་ལྟ་བུ་དེ་མ་ཐོས་པས་འགྲོ་བ་ལྔའི་འཁོར་བར་བྱིང་ཞིང་རྟག་ཏུ་སྡུག་བསྔལ་གྱིས་ཉེན་པར་གནས་ལགས་སོ། །བཅོམ་ལྡན་འདས་ནི། སེམས་ཅན་ཐམས་ཅད་ལ་བདེ་བར་བཞེད་པ། སེམས་ཅན་ཐམས་ཅད་ལ་ཐུགས་བརྩེ་བ་ཐུགས་རྗེ་ཆེན་པོ་བརྙེས་པ་ལགས་ན། བཙུན་པ་བཅོམ་ལྡན་འདས། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་གང་སྐྱེ་བོ་མང་པོ་ལ་སྨན་པ་དང ། ལྷ་དང་མི་རྣམས་ཀྱི་བར་ལ་སྨན་པའི་སླད་དུ་བསྐུར་བ་སྨོན་པ་མ་མཆིས་པ་དང་རྗེས་སུ་མཐུན་པའི་གཟུངས་སྔགས་ཀྱི་དོན་ཐམས་ཅད་ཡོངས་སུ་རྫོགས་པར་བཤད་པར་གསོལ། །བཙུན་པ་བཅོམ་ལྡན་འདས། འཇིག་རྟེན་ཐམས་ཅད་ལ་མངོན་པར་མི་དགའ་བའི་
265a
༄#། །འདུ་ཤེས་བཤད་པར་གསོལ། སེམས་ཅན་རྣམས་ཀྱིས་དེ་ཐོས་པས་འདོད་པ་རྣམས་ལས་ལྡོག་པར་འགྱུར་ལགས་སོ། །བཙུན་པ་བཅོམ་ལྡན་འདས། ཟས་ལ་མི་མཐུན་པའི་འདུ་ཤེས་བཤད་པར་གསོལ། དེ་ཐོས་པས་སེམས་ཅན་གང་དག་རོ་ལ་ཆུམས་པ་རྣམས་ལྡོག་པར་འགྱུར་ལགས་སོ། །སེམས་ཅན་གང་དག་གིས་འདོད་པ་རྣམས་ཉེས་དམིགས་སུ་འཚལ་བ་དང ། རོ་རྣམས་ལ་ཉེས་དམིགས་སུ་འཚལ་བའི་སེམས་ཅན་དེ་དག་འཁོར་བའི་ཕ་རོལ་ཏུ་དགའ་བ་དག་པ་དང ། སྲིད་པའི་འཆིང་བ་ལས་གྲོལ་བར་བལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ། དེ་བཞིན་ནོ། །ཇི་སྐད་ཁྱོད་ཀྱིས་སྨྲས་པ་དེ་བཞིན་ཏེ། ཇི་ལྟར་བྱང་ཆུབ་སེམས་དཔའ་སྣང་བ་དཔལ་གྱི་སྙིང་པོས་ང་ལ་ཡིད་ཆེས་པ་བརྗོད་པ་བཞིན་ལྷ་དང་བཅས་པའི་འཇིག་རྟེན་གྱི་མདུན་དུ་འཇིག་རྟེན་ཐམས་ཅད་མངོན་པར་མི་དགའ་བའི་འདུ་ཤེས་ངས་བཤད་པར་བྱའོ། །ཟས་ལ་མི་མཐུན་པའི་འདུ་ཤེས་ཀྱང་ངས་བཤད་པར་བྱའོ། །ཀཽ་ཌི་ནྱ། དེའི་ཕྱིར་ཁྱོད་ཀྱིས་ཉོན་ལ་ཞེས་བྱ་བ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་དུའོ།། ཀཽ་ཌི་ནྱ།་གང་དུ་མངོན་པར་མི་དགའ་བ་དེ་བསྐྱེད་པར་བྱ་བའི་འཇིག་རྟེན་གང་ཞེ་ན། འཇིག་རྟེན་ནི། གཉིས་ཏེ། སེམས་ཅན་གྱི་འཇིག་རྟེན་དང ། འདུ་བྱེད་ཀྱི་འཇིག་རྟེན་ནོ། །
265b
དེ་ལ་སེམས་ཅན་གྱི་འཇིག་རྟེན་གང་ཞེ་ན། སེམས་ཅན་རྣམས་ཞེས་བྱ་བ་ནི། གང་དག་འགྲོ་བ་ལྔ་པོ་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་དང ། ལྷ་དང ། མི་རྣམས་ཀྱི་ནང་དུ་སྐྱེས་པ་རྣམས་སོ། །འདོད་པའི་ཁམས་ན་ནི། སྲིད་པ་མངོན་པར་གྲུབ་པ་ཉི་ཤུའོ། །གཟུགས་ཀྱི་ཁམས་ན་ནི། བཅུ་དྲུག་གོ་།གཟུགས་མེད་པའི་ཁམས་ན་ནི། སྲིད་པ་མངོན་པར་གྲུབ་པ་བཞི་སྟེ།་སེམས་ཅན་གྱི་འཇིག་རྟེན་ནི། དེ་ཙམ་མོ། །དེ་ལ་འདོད་པའི་ཁམས་ཀྱི་སྲིད་པ་མངོན་པར་གྲུབ་པ་ཉི་ཤུ་གང་ཞེ་ན། སེམས་ཅན་དམྱལ་བ་ཆེན་པོ་བརྒྱད་དེ། རེ་རེ་ལའང་འཁོར་བཅུ་དྲུག་གོ་།བརྒྱད་གང་ཞེ་ན། དུས་གསུམ་པའི་ཡང་སོས་ཞེས་བྱ་བ་འཁོར་བཅུ་དྲུག་པ་དང ། ཐིག་ནག་དང ། བསྡུས་གཞོམ་དང ། དུ་འབོད་དང ། དུ་འབོད་ཆེན་པོ་དང ། ཚ་བ་དང ། རབ་ཏུ་ཚ་བ་དང ། སེམས་ཅན་དམྱལ་བ་མནར་མེད་པ་ཞེས་བྱ་བ་འཁོར་བཅུ་དྲུག་པའོ། །སེམས་ཅན་གང་དག་ལུས་དང ། ངག་དང ། ཡིད་ཀྱིས་ཉེས་པར་སྤྱད་པའི་རྒྱུས་དེ་དག་ཏུ་སྐྱེས་ཤིང་སྐྱེ་བར་འགྱུར་བ་དེ་དག་དེར་སྡུག་བསྔལ་གྱི་ཚོར་བ་རྩུབ་པ། མི་བཟད་པ། ཚ་བ། ཆེན་པོ་མྱོང་བར་འགྱུར་རོ། །དེ་དག་གིས་དེར་མིག་གིས་གཟུགས་གང་ཅི་མཐོང་ཡང་རུང ། ཐམས་ཅད་ཡིད་དུ་མི་འོང་བར་མཐོང་གི་ཡིད་དུ་འོང་བར་མ་ཡིན། ཡིད་དུ་མི་འཐད་པར་མཐོང་གི་ཡིད་དུ་འཐད་པར་མ་ཡིན། གཟུགས་མི་སྡུག་པར་མཐོང་གི་གཟུགས་སྡུག་པར་མ་ཡིན། གཟུགས་
266a
༄#། །མི་ལེགས་པར་མཐོང་གི་གཟུགས་ལེགས་པར་མི་མཐོང་སྟེ། དེ་ལྟ་བས་ན། གཞི་དེས་དེ་དག་དེར་སྡུག་བསྔལ་གྱི་ཚོར་བ་རྩུབ་པ། མི་བཟད་པ། ཚ་བ་ཆེན་པོ་མྱོང་བར་འགྱུར་རོ། །དེ་དག་གིས་དེར་སྣ་བས་སྒྲ་གང་ཅི་ཐོས་ཀྱང་རུང་ཞེས་བྱ་བ་ནས་སྣས་དྲི་གང་ཅི་མནམས་ཀྱང་རུང་ཞེས་བྱ་བ་དང ། ལྕེས་རོ་གང་ཅི་མྱངས་ཀྱང་རུང་ཞེས་བྱ་བ་དང ། ལུས་ཀྱིས་རེག་བྱ་གང་ཅི་རེག་ཀྱང་རུང་ཞེས་བྱ་བ་དང ། ཡིད་ཀྱིས་ཆོས་རྣམས་གང་ཅི་རྣམ་པར་ཤེས་ཀྱང་རུང་ཞེས་བྱ་བའི་བར་ཐམས་ཅད་ཡིད་དུ་མི་འོང་བར་ཡིན་གྱི་ཡིད་དུ་འོང་བར་མ་ཡིན། ཡིད་དུ་མི་འཐད་པར་ཡིན་གྱི་ཡིད་དུ་འཐད་པ་མ་ཡིན། གཟུགས་མི་སྡུག་པར་ཡིན་གྱི་གཟུགས་སྡུག་པར་མ་ཡིན། གཟུགས་མི་ལེགས་པར་ཡིན་གྱི་གཟུགས་ལེགས་པར་མ་ཡིན་ནོ། །ལུས་རབ་ཏུ་འབར་བ་དང ། ལྕགས་ཀྱི་ཐུ་ལུམ་ཟ་བ་དང ། ལྕགས་དང་ཟངས་འཐུང་བ་དག་ཡིན་ཏེ། གཞི་དེས་དེ་དག་དེར་སྡུག་བསྔལ་གྱི་ཚོར་བ་རྩུབ་པ། མི་བཟད་པ། ཚ་བ། ཆེན་པོ་མྱོང་བར་འགྱུར་རོ། །ཇི་སྲིད་དུ་གང་འདིར་སྔོན་ཆད་མི་རྣམས་ཀྱི་ནང་དུ་མིར་གྱུར་པ་དང་མཐུན་པའི་ལུས་ཀྱིས་ཉེས་པར་སྤྱོད་པ་སྤྱད་པ་དང ། ཕོག་\?\་དང ། ཡིད་ཀྱིས་ཉེས་པར་སྤྱོད་པ་སྤྱད་པ་དག་གི་སྡིག་པའི་ལས་དེ་ཟད་པར་མ་གྱུར་ཅིང་སྦྱངས་པར་མ་གྱུར་པ་དེ་སྲིད་དུ་དེ་དག་དེ་ནས་ཤི་འཕོ་བར་མི་འགྱུར་རོ། །ཀཽ་ཌི་ནྱ་ལྟོས །
266b
སེམས་ཅན་བདེ་བ་འདོད་པར་གྱུར་ལ་སྡུག་བསྔལ་དང་མི་མཐུན་པར་བྱེད་པ་སུ་ཞིག་སེམས་ཅན་དམྱལ་བ་དེ་ལ་དགའ་བར་སེམས་ཤིང་འདོད་པ་སྐྱེད་པར་བྱེད། འདི་ནི། ཉེས་པར་སྤྱད་པ་སྤྱོད་པའི་འགྲོ་བ་དང་པོ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། དེ་ལ་མཁས་པས་ཇི་ལྟར་དུད་འགྲོའི་སྐྱེ་གནས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། ཀཽ་ཌི་ནྱ། དུད་འགྲོ་རྣམས་ཀྱི་ལུས་འདི་ལྟར་མཆོག་ཏུ་ཕྲ་མོ་ཐོབ་པ་དག་ཡོད་དེ། འདི་ལྟ་སྟེ། སྐྲའི་རྩེ་མོའི་མཐའ་ལྔ་བཅུའི་ཆར་ཕྱེ་བ་ཙམ་མོ། ཁ་ཅིག་ནི། ཉི་ཟེར་གྱི་རྡུལ་ཙམ་མོ། །ཞེས་བྱ་བ་ནས་ཁ་ཅིག་ནི། རྒྱ་ཤུག་གི་ཚད་དོ། །ཞེས་བྱ་བའི་བར་དུའོ། ཁ་ཅིག་ནི། ལུས་དཔག་ཚད་ཁྲིའི་བར་དུ་ཐོབ་པ་དང ། ཐོབ་པར་འགྱུར་བ་དག་གོ་།ཁ་ཅིག་གི་སྲོག་ནི། ཡུད་ཙམ་གཅིག་ཐུབ་བོ། །ཞེས་བྱ་བ་ནས་ཁ་ཅིག་གི་ཚེ་བསྐལ་པ་གཅིག་ཐུབ་བོ། །ཞེས་བྱ་བའི་བར་དུའོ། དེར་དེ་དག་ལ་ཆོས་བྱེད་པ་མེད་དོ། །དགེ་བ་བྱེད་པ་མེད་དོ། །དེར་དེ་དག་ངོ་ཚ་ཤེས་པ་དང ། ཁྲེལ་ཡོད་པ་སྤངས་པ་དག་དང ། སྙིང་རྗེ་མེད་པར་ཞུགས་པ་དག་དང ། སྙིང་བརྩེ་བ་མེད་པ་དག་དང ། རྟག་པར་སྡུག་བསྔལ་གྱིས་གཟིར་བ་དག་དང ། རྟག་ཏུ་སྐྲག་པ་དག་དང ། གཅིག་ལ་གཅིག་ཟ་བ་དག་དང ། མི་དགེ་བའི་ལས་ཀྱི་ལམ་ཐམས་ཅད་དང་ཡང་དག་པར་ལྡན་པ་དག་དང ། གཏི་མུག་གི་མུན་ཁྲོད་དུ་ཞུགས་པར་གྱུར་པས་ངན་
267a
༄#། །འགྲོར་འགྲོ་བ་དག་དང ། བདེ་འགྲོར་འགྲོ་བ་དག་ཀྱང་སྤྱོད་ཡུལ་མ་ཡིན་པ་ལ་དགེ་བའི་ལས་བྱེད་པར་སེམས་ཕྱིན་ཅི་ལོག་ཏུ་གྱུར་པ་དག་ཡིན་ནོ། །མཁས་པ་སུ་ཞིག་དེ་ལྟ་བུའི་གཏི་མུག་གི་མུན་ཁྲོད་དུ་རྟག་པར་སྡུག་བསྔལ་གྱིས་གཟིར་བའི་དུད་འགྲོའི་སྐྱེ་གནས་དེ་ལ་དགའ་བར་སེམས་ཤིང་འདོད་པ་སྐྱེད་པར་བྱེད། འདི་ནི། ཉེས་པར་སྤྱད་པ་སྤྱོད་པའི་འགྲོ་བ་གཉིས་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། དེ་ལ་མཁས་པས་ཇི་ལྟར་ཡི་དྭགས་ཀྱི་འགྲོ་བའི་སྐྱེ་གནས་ལའང་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། ཀཽ་ཌི་ནྱ། གང་དག་གི་ལུས་མཐོ་གང་ཙམ་ཡོད་པའི་ཡི་དྭགས་དག་ཡོད་དེ། ཁ་ཅིག་ནི། མི་གང་ཙམ་མོ། ཁ་ཅིག་ནི།་དཔག་ཚད་སྟོང་ཡོད་པའི་བར་གྱི་ལུས་ཐོབ་ལ་དེ་དག་ཀྱང་གཅེར་བུ་དང ། རྩུབ་པ་དག་དང ། ནག་པོ་དག་དང ། ལུས་མཆོག་ཏུ་སྐེམ་ཞིང་ཤ་ཁྲག་དང་བྲལ་བ་དག་དང ། རྟག་པར་བཀྲེས་ཤིང་སྐོམ་པས་གཟིར་བ་དག་དང ། བཟའ་བཏུང་དང་བྲལ་བ་དག་དང ། མེའི་དབུགས་རྡུབ་པ་དང་དབུགས་འབྱུང་བ་དག་དང ། གཅིག་ལ་གཅིག་རབ་ཏུ་སྡང་བའི་སེམས་དང་ལྡན་པ་དག་དང ། སྙིང་རྗེ་མེད་པར་ཞུགས་པ་དག་དང ། རྟག་པར་ལུས་དུབ་པ་དང ། སྤྲིན་བསིལ་བ་དང་བྲལ་བ་དག་ཡིན་ནོ། །ཁ་ཅིག་གི་ཟས་ནི། ལྕགས་དང ། ཟངས་ཡིན་
267b
ནོ། །ཁ་ཅིག་གི་ནི། ལྕགས་ཀྱི་ཐུ་ལུམ་རྣམས་སོ། །ཁ་ཅིག་གི་ནི། རྣག་ཁྲག་ཚ་བའོ། །ཁ་ཅིག་གི་ནི། རྡུལ་ཀུན་ཏུ་ཚ་བའོ། །ཁ་ཅིག་གི་ནི། ཕྱིས་ཀུན་ཏུ་ཚ་བའོ། །ཁ་ཅིག་གི་ནི། གཅིན་བསྐོལ་བའོ། །ཁ་ཅིག་གི་ནི། རླུང་ཀུན་ཏུ་ཚ་བའོ། །ཁ་ཅིག་གི་ནི། རྩ་བ་དང ། འདབ་མ་དང ། མེ་ཏོག་དང ། འབྲས་བུ་དང ། ཤིང་ལས་བྱས་པའི་ཁ་ཟས་རབ་ཏུ་འབར་བའོ། །དེའང་དཀའ་བས་རེས་འགའ་ནན་གྱིས་རྙེད་པར་འགྱུར་རོ། །ཡི་དྭགས་ཁ་ཅིག་གི་ཚེའི་ཚད་ནི། ལོ་སྟོང་ཐུབ་བོ། ཁ་ཅིག་གི་ཚེའི་ཚད་ནི། ལོ་སྟོང་ཕྲག་བརྒྱའི་བར་དུ་ཐུབ་སྟེ། རྟག་པར་བདེ་བ་དང་བྲལ་བ་དག་དང ། སྡུག་བསྔལ་གྱིས་གཟིར་བ་དག་དང ། མ་རིག་པའི་མུན་པར་ཞུགས་པ་དག་ཡིན་ན། མཁས་པ་སུ་ཞིག་ཡི་དྭགས་རྣམས་ལ་དགའ་བ་སྐྱེད་པར་བྱེད། འདི་ནི།་ཉེས་པར་སྤྱོད་པ་སྤྱད་པའི་འགྲོ་བ་གསུམ་པ་སྟེ། ད་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། དེ་ལ་མཁས་པས་ཇི་ལྟར་མིའི་འཇིག་རྟེན་འདི་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། མིའི་འཇིག་རྟེན་འདི་ནི། སེམས་ཅན་རྣམས་སྡུག་བསྔལ་གྱིས་གཟིར་བ་དག་ཡིན་ཏེ། རྒ་བའི་སྡུག་བསྔལ་དང ། ན་བའི་སྡུག་བསྔལ་དང ། འཆི་བའི་སྡུག་བསྔལ་དང ། མི་སྡུག་པ་དང་བྲད་པའི་སྡུག་བསྔལ་དང ། སྡུག་པ་དང་བྲལ་བའི་སྡུག་བསྔལ་དང ། རྣམ་པ་སྣ་ཚོགས་ཡོངས་སུ་ཚོལ་བའི་སྡུག་
268a
༄#། །བསྔལ་དང ། འཁྲུག་པ་དང ། ཁྲོ་བ་དང ། ཕྲག་དོག་དང ། སེར་སྣ་དང ། ཕྲ་མ་སྨྲ་བ་དང ། ཚིག་རྩུབ་པོ་སྨྲ་བ་དང ། བརྣབ་སེམས་དང ། གྲང་བ་དང ། དྲོ་བ་དང ། གཅིག་ལ་གཅིག་ཀུན་ཏུ་གནོད་པར་བྱེད་པའི་སྡུག་བསྔལ་གྱིས་གཟིར་བ་དག་ཡིན། དུས་རྟག་ཏུ་མིའི་འཇིག་རྟེན་འདི་ན་སེམས་ཅན་རྣམས་འཆི་བ་རྗེས་སུ་དྲན་པས་སྡུག་བསྔལ་དང ། ཚེ་ཐུང་བ་ཉིད་ཀྱི་སྡུག་བསྔལ་དང ། འཇིག་རྟེན་ཕ་རོལ་ཏུ་འགྲོ་བ་རྗེས་སུ་དྲན་པའི་སྡུག་བསྔལ་གྱིས་གཟིར་བ་དག་ཡིན་ན། མཁས་པ་སུ་ཞིག་མིའི་འཇིག་རྟེན་ལ་འདོད་པ་སྐྱེད་པར་བྱེད་ཅིང་དགའ་བར་སེམས། འདི་ནི། སྤེལ་མའི་འགྲོ་བ་བཞི་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། དེ་ལ་མཁས་པས་ཇི་ལྟར་ལྷའི་འཇིག་རྟེན་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། འདོད་པ་ན་སྤྱོད་པའི་ལྷ་དྲུག་པོ་དེ་དག་ནའང་སེམས་ཅན་རྣམས་འདོད་པ་ལ་སྲེད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། འགེད་པ་དང ། ལོངས་སྤྱོད་དང ། ཉེ་བར་སྤྱོད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན།་སྔོན་ཆད་དགེ་བའི་རྩ་བ་བསགས་པ་མཐར་གྱིས་ཡོངས་སུ་ཟད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། ཡོངས་སུ་ཚོལ་བའི་སྡུག་བསྔལ་རྣམས་ཀྱིས་གཟིར་བ་
268b
དག་མིན། སྡུག་པ་དང་བྲལ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། བསོད་ནམས་ཡོངས་སུ་ཟད་པས་འཆི་འཕོ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། ཡང་དང་ཡང་དུ་ངན་སོང་གི་སྡུག་བསྔལ་རྣམས་ཀྱིས་གཟིར་བ་དག་ཡིན་ཏེ། འདི་ནི། འདོད་པ་ན་སྤྱོད་པའི་ལྷ་རྣམས་ལ་མངོན་པར་མི་དགའ་བའི་འདུ་ཤེས་ལྔ་པ་ཡིན་ནོ། །འདི་ནི། རྣམ་པ་ལྔ་པ་ཡིན་ཏེ། མཁས་པས་འདོད་པའི་ཁམས་འདི་ཐམས་ཅད་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། དེ་ལ་མཁས་པས་ཇི་ལྟར་གཟུགས་ན་སྤྱོད་པའི་ལྷ་རྣམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། སེམས་ཅན་གང་དག་གཟུགས་ན་སྤྱོད་པ་བཅུ་དྲུག་ཡོད་པ་དེ་དག་ཀྱང་ལྷའི་རིས་རྣམས་ཀྱི་ནང་ན་འཇིག་རྟེན་པའི་བསམ་གཏན་དག་སྒོམ་པར་བྱེད་དེ། དེ་དག་ཐམས་ཅད་ཟག་པ་དང་བཅས་པའི་སྡུག་བསྔལ་རྣམས་ཀྱིས་ཡོངས་སུ་མ་གྲོལ་བ་ཡིན། སྡུག་བསྔལ་མང་པོས་གཟིར་བ་ཡིན། ལྷག་མ་དང་བཅས་པའི་འགྲོ་བ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན། ཕ་རོལ་ལ་མི་ལྟ་བ་རྣམས་ཡིན། ངེས་པར་འབྱུང་བར་མི་ལྟ་བ་རྣམས་ཡིན། ངན་སོང་གི་སྡུག་བསྔལ་རྣམས་ལས་ཡོངས་སུ་མ་གྲོལ་བ་ཡིན་ཏེ། སྡུག་བསྔལ་དེ་དག་གིས་གཟིར་བ་ཡིན་ན། མཁས་པ་སུ་ཞིག་དེ་དག་ལ་དགའ་བར་སེམས་ཤིང་འདོད་པ་སྐྱེད་པར་བྱེད། མཁས་པས་དེ་ལྟར་གཟུགས་
269a
༄#། །ཀྱི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །གཞན་ཡང་གཟུགས་ཀྱི་ཁམས་དེ་ན་སེམས་ཅན་གང་དག་ཟག་པ་མེད་པའི་བསམ་གཏན་དང་ཡང་དག་པར་ལྡན་ཞིང་ཡོངས་སུ་གྲོལ་བ་མ་ཡིན་པར་གནས་པ་ལ་འཕགས་པའི་ལམ་གྱི་ཚེ་སྡུག་བསྔལ་རྣམས་ཀྱིས་གཟིར་བ་ཡིན་ཞིང ། དེ་ཡོངས་སུ་རྫོགས་པ་ཀུན་ཏུ་ཚོལ་བའི་སྡུག་བསྔལ་རྣམས་ཀྱིས་གཟིར་བ་ཡིན། ས་མ་ལུས་པ་ཐམས་ཅད་ཀྱི་ཏིང་ངེ་འཛིན་ལ་དབང་མི་བྱེད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན་ཏེ། དེ་དག་རང་རྒྱལ་བ་དང་ཐུན་མོང་པའི་ཏིང་ངེ་འཛིན་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན་ནོ། །དེ་དག་དེ་བཞིན་གཤེགས་པའི་སྤྱོད་ཡུལ་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན་ནོ། །དེ་ན་གང་དག་མགོ་མཉམ་དུ་ཡོངས་སུ་མྱ་ངན་ལས་འདས་པར་བྱེད་པ་དེ་དག་ཐམས་ཅད་སྡུག་བསྔལ་དེ་རྣམས་ཀྱིས་གཟིར་བ་ཡིན་ནོ། །མཁས་པས་དེ་ལྟར་གཟུགས་ཀྱི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། དེ་ལ་མཁས་པས་ཇི་ལྟར་གཟུགས་མེད་པའི་ཁམས་ལ་མངོན་པར་མི་དགའ་བའི་འདུ་ཤེས་པ་སྐྱེད་པར་བྱ་ཞེ་ན། གཟུགས་མེད་པའི་རིས་ཀྱི་ལྷའི་གནས་བཞི་པོ་དེ་དག་ནའང་སེམས་ཅན་རྣམས་ཟག་པ་དང་བཅས་པའི་ཏིང་ངེ་
269b
འཛིན་རྣམས་དང་ལྡན་པ་ཡིན་ཏེ། དེ་དག་ཐམས་ཅད་ཟག་པ་དང་བཅས་པའི་སྡུག་བསྔལ་རྣམས་ལས་ཡོངས་སུ་མ་གྲོལ་བ་དག་ཡིན། སྡུག་བསྔལ་དེ་རྣམས་ཀྱིས་གཟིར་བ་དག་ཡིན། དེ་དག་སློབ་པ་དང་མི་སློབ་པའི་ས་ཐམས་ཅད་ལ་དབང་སྒྱུར་བ་མེད་པ་དག་ཡིན། སྡུག་བསྔལ་དེ་རྣམས་ཀྱིས་གཟིར་བ་དག་ཡིན། ཆོས་མི་ཐོས་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྲེད་པ་ཐམས་ཅད་གཏན་དུ་བཅད་པ་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་དག་ཡིན། དེ་ནས་འཆི་འཕོ་བའི་ཆོས་ཀྱི་རྣམ་པ་དང ། ལྷག་མ་དང་བཅས་པར་འགྲོ་བ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་དག་ཡིན། ངན་སོང་ཐམས་ཅད་ཀྱི་སྡུག་བསྔལ་རྣམས་ལས་ཡོངས་སུ་མ་གྲོལ་བ་དག་ཡིན་ནོ། །སྡུག་བསྔལ་དེ་རྣམས་ཀྱིས་གཟིར་བ་དག་ཡིན་ཏེ། མཁས་པས་དེ་ལྟར་གཟུགས་མེད་པའི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །རྣམ་པ་བརྒྱད་པོ་དེ་དག་གིས་སྲིད་པ་གསུམ་གྱི་བཙོན་ར་ཐམས་ཅད་དུ་སྲིད་པ་མངོན་པར་གྲུབ་པ་ཡིན་ནོ། །མཁས་པས་དེ་ལྟ་བུ་དང་ཡང་དག་པར་ལྡན་པའི་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞིང་འདུན་པ་དྲག་པོས་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱ་སྟེ། ཀཽ་ཌི་ནྱ། འདི་ནི། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་སོ། །འདུ་བྱེད་ཀྱི་འཇིག་རྟེན་ལ་མངོན་པར་མི་དགའ་བའི་
270a
༄#། །འདུ་ཤེས་གང་ཞེ་ན། འདུ་བྱེད་གསུམ་ཞེས་བྱ་སྟེ། འདི་ལྟ་སྟེ། ལུས་ཀྱི་འདུ་བྱེད་དང ། ངག་གི་འདུ་བྱེད་དང ། ཡིད་ཀྱི་འདུ་བྱེད་དོ། །དེ་ལ་ལུས་ཀྱི་འདུ་བྱེད་གང་ཞེ་ན། དབུགས་རྡུབ་པ་དང ། དབུགས་འབྱུང་བ་རྣམས་ནི། ལུས་ཀྱི་འདུ་བྱེད་རྣམས་ཞེས་བྱའོ། །དེ་ལ་ངག་གི་འདུ་བྱེད་གང་ཞེ་ན། རྟོག་པ་དང ། དཔྱོད་པ་རྣམས་ནི་ངག་གི་འདུ་བྱེད་རྣམས་ཞེས་བྱའོ། །དེ་ལ་ཡིད་ཀྱི་འདུ་བྱེད་རྣམས་གང་ཞེ་ན། རྣམ་པར་ཤེས་པ་དང ། སེམས་པའོ། །འདི་དག་ནི། ཡིད་ཀྱི་འདུ་བྱེད་རྣམས་ཞེས་བྱའོ། །འདུ་བྱེད་གསུམ་པོ་འདི་དག་ནི། སེམས་ཅན་རྣམས་ཀྱི་མཚན་ཉིད་མཉམ་པ་རྣམས་སོ། །མཁས་པས་ཇི་ལྟར་འདུ་བྱེད་རྣམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། མཁས་པས་གང་དབུགས་རྡུབ་པ་དང ། དབུགས་འབྱུང་བ་རྣམས་ཀྱི་མཚན་མ་ལ་གསར་པ་དང ། རྙིང་པའི་ཚུལ་དང ། བསིལ་བའི་རྣམ་པ་དང ། དྲོ་བའི་རྣམ་པ་དང་མི་མཐུན་པའི་ཚུལ་གྱིས་ཉེ་བར་རྟོག་པར་བྱའོ། །ལུས་འབྱུང་བ་ཐམས་ཅད་ཀྱི་དབུགས་རྡུབ་པ་དང ། ལུས་ཐམས་ཅད་ཀྱི་དབུགས་འབྱུང་བ་དང ། རྨའི་སྒོ་རྣམས་ཀྱི་མཚན་མ་ལའང་ཉེ་བར་བརྟགས་ནས་འདུ་བྱེད་འདི་རྣམས་ནི། མ་བྱུང་བ་ལས་ཡང་དག་པར་བྱུང་བ་དག་གོ་།བྱུང་ནས་མེད་པར་གྱུར་པ་དག་གོ་།ཐམས་ཅད་གློག་ལྟ་བུ་དག་གོ་སྙམ་ཞིང་ཐམས་ཅད་དུ་ཟད་
270b
པར་འདུ་ཤེས་པར་ཡིད་ལ་བྱེད་ཅིང་དངོས་པོ་མེད་པར་འདུ་ཤེས་པར་ཡིད་ལ་བྱེད་དོ། །གང་དུ་ཐ་དད་པར་རྟོག་པར་བྱེད་ན་རྣམ་པར་རྟོག་པ་ཐམས་ཅད་འབྱུང་སྟེ། རྟོག་པ་རྣམས་ལ་ཟད་པའི་འདུ་ཤེས་དང ། དངོས་པོ་མེད་པའི་འདུ་ཤེས་འབྱུང་ངོ ། །ཆོས་དེ་ཉིད་ལ་གང་བསིལ་བའི་འདུ་ཤེས་དང ། དྲོ་བའི་འདུ་ཤེས་དང ། མི་མཐུན་པའི་འདུ་ཤེས་དང ། དེ་བཞིན་དུ་གསར་པ་དང ། རྙིང་པའི་འདུ་ཤེས་ཀྱང་རུང་འདུ་ཤེས་དང ། སེམས་པ་དེ་དག་ལས་འབྱུང་སྟེ། ཐམས་ཅད་དུ་ཟད་པར་འདུ་ཤེས་པ་དང ། དངོས་པོར་འདུ་ཤེས་པར་འགྱུར་རོ། ། དེ་འདུ་བྱེད་ཐམས་ཅད་ལ་ཟད་པར་འདུ་ཤེས་པ་དང ། འཇིག་པར་འདུ་ཤེས་པ་དང ། འདོད་ཆགས་དང་བྲལ་བར་འདུ་ཤེས་པ་དང ། འགོག་པ་ལ་དམིགས་པར་འདུ་ཤེས་པར་འགྱུར་རོ། །དེ་འདུ་བྱེད་ཐམས་ཅད་ཀྱི་སྔོན་གྱི་མཐའ་དང ། ཕྱི་མའི་མཐའ་མཐོང་བས་ཐམས་ཅད་དུ་ཟད་པར་འདུ་ཤེས་པ་ཞེས་བྱ་བ་ནས་འགོག་པ་ལ་དམིགས་པར་འདུ་ཤེས་པའི་བར་དུ་འགྱུར་རོ། ། སུས་དེ་ལྟར་འདུ་བྱེད་རྣམས་ལ་དམིགས་པ་ཤིན་ཏུ་ཡོངས་སུ་སྦྱང་བ་བྱས་པར་གྱུར་པ་དེ་འདུ་བྱེད་ཐམས་ཅད་ལ་མི་བརྟན་པར་འདུ་ཤེས་པ་དང ། རབ་ཏུ་འཇིག་པར་འདུ་ཤེས་པ་དང ། ཡིད་མི་བརྟན་པར་འདུ་ཤེས་པ་དང ། མི་རྟག་པར་འདུ་ཤེས་པ་དང ། དངོས་པོ་མེད་པར་འདུ་ཤེས་པ་དང ། བདག་མེད་པར་འདུ་ཤེས་པར་འགྱུར་རོ། །དེ་ལྟ་བུར་ཡང་དག་པར་བརྩོན་པའི་སེམས་
271a
༄#། །དང་ལྡན་པ་དེ་ཡང་དག་པ་ཇི་ལྟ་བ་བཞིན་ཤེས་ནས་འདུ་བྱེད་ཐམས་ཅད་ལ་མངོན་པར་མི་དགའ་བའི་འདུ་ཤེས་པར་འགྱུར་རོ། །དེ་བཞིན་དུའང་སོ་སོར་བརྟགས་པའི་འགོག་པ་ལ་དམིགས་པའམ་སོ་སོར་བརྟགས་པ་མ་ཡིན་པའི་འགོག་པ་ལ་དམིགས་པས་དུས་གསུམ་ལ་རྗེས་སུ་སེམས་པར་བྱེད། ཀུན་ཏུ་སྤྱོར་བ་ཐམས་ཅད་སྤོང་བར་བྱེད། མཐོང་བ་རྣམ་པར་དག་པར་བྱེད། འཁོར་བའི་རྒྱུན་སྤོང་བར་བྱེད་ཅིང་ཡང་དག་པ་ཉིད་སྐྱོན་མེད་པར་ཞུགས་ནས་རྒྱུན་དུ་ཞུགས་པའི་འབྲས་བུ་ཐོབ་པར་བྱེད་དོ། །ཀཽ་ཌི་ནྱ། མཁས་པ་ནི། དེ་ལྟར་རྣམ་པ་ཐམས་ཅད་དུ་འདུ་བྱེད་ཀྱི་འཇིག་རྟེན་ལ་མངོན་པར་མི་དགའ་བའི་འདུ་ཤེས་སྐྱེད་པར་བྱེད་དོ། །ཀཽ་ཌི་ནྱ། འདི་ནི། མངོན་པར་མི་དགའ་བའི་འདུ་ཤེས་ཀྱི་སྦྱོར་བའི་དམིགས་པའོ། །དེ་ལ་ཆོས་གོས་ལ་མི་མཐུན་པའི་འདུ་ཤེས་གང་ཞེ་ན། ཀཽ་ཌི་ནྱ། མཁས་པས་གང་གི་ཚེ་ཆོས་གོས་མཐོང་ངམ། རེག་གམ། ཤམ་ཐབས་སུ་བྱེད་དམ། གྱོན་པར་བྱེད་དམ།་བཞག་གམ། སྦས་ཀྱང་རུང་སྟེ། དེ་ཐམས་ཅད་དུ་འདི་ནི། མིའི་པགས་པའོ། །དེ་ལ་ཁྲག་གིས་བསྐུས་པའོ། །ཁྲག་འཛག་པའོ། །མཆོག་ཏུ་དྲི་མི་ཞིམ་པའོ། །ཐམས་ཅད་ཀྱིས་སྐྱོང་\?\་དུ་བགྲང་བར་བྱའོ། །སྲིན་བུ་དང་སྒྲང་བུས་གང་བའོ། མཛངས་པ་རྣམས་ཀྱིས་མངོན་པར་དགའ་བར་བྱ་བ་མ་ཡིན་པའོ། །ཞེས་དེ་ལྟ་བུར་འདུ་ཤེས་པར་འགྱུར་རོ། །མཁས་པ་
271b
དེ་ལྟར་ཆོས་གོས་ལ་མངོན་པར་མི་དགའ་བའི་འདུ་ཤེས་བསྐྱེད་དོ། །ཀཽ་ཌི་ནྱ། མཁས་པས་ཇི་ལྟར་ཟས་ལ་མི་མཐུན་པའི་འདུ་ཤེས་བསྐྱེད་པར་བྱ་ཞེ་ན། མཁས་པས་གང་ཟས་བླངས་པར་གྱུར་ན་དེ་ཟས་འདིའང་ནང་གྲོལ་ལོ། །སྐྲ་དང་པགས་པ་མེད་ཅིང་རྣག་དང་ཁྲག་གིས་བསྐུས་པ་སྲིན་བུ་དང ། སྦྲང་བུས་ཡོངས་སུ་བསྐོར་བའོ། །སྣོད་འདི་ནི། མི་མགོའི་ཐོད་པ་མཆོག་ཏུ་དྲི་ད་བ་སྐྱོན་དུ་བགྲང་བར་བྱའོ། །ཞེས་དེ་ལྟ་བུར་འདུ་ཤེས་བསྐྱེད་དེ། གལ་ཏེ་འབྲས་ཆན་ཞིག་ལེན་ན། མི་རོ་སྲིན་བུས་གང་བའོ། །ཞེས་དེ་ལྟ་བུར་འདུ་ཤེས་པར་འགྱུར་རོ། །གལ་ཏེ་ཆུ་ཞིག་ལེན་ན། དེ་འདི་ནི། མིའི་ཁྲག་མཆོག་ཏུ་སྐྱོན་དུ་བགྲང་བར་བྱའོ། །ཞེས་བྱ་བ་དང ། དེ་བཞིན་དུ་ཕྱེ་མ་ལ་འདི་ནི། མིའི་རུས་པའི་ཕྱེ་མའོ། །ཞེས་བྱ་བ་དང ། དེ་བཞིན་དུ་ཁུར་སྐྱལ་འདི་ནི། མིའི་པགས་པའོ། །ཞེས་དེ་ལྟར་འདུ་ཤེས་པར་འགྱུར་རོ། །དེ་བཞིན་དུ་ཤ་ཁུ་དང ། ཐུག་པ་དང ། ཚོད་མ་དང ། སྲན་ཚོད་ཀྱང་རུང་སྟེ། དེ་ལ་འདི་ནི། མིའི་ཁྲག་གོ་།འདི་ནི། མིའི་ཀླད་པའོ། ། ཞེས་བྱ་བ་དང ། དེ་བཞིན་དུ་སྔ་སྔོ་ལ་འདི་ནི། མིའི་སྐྲའོ། །འདི་ནི། མིའི་སོའོ། །ཞེས་བྱ་བ་དང ། དེ་བཞིན་དུ་ཤ་ལ་འདི་ནི། མིའི་ཤའོ། །ཞེས་བྱ་བ་དང ། དེ་བཞིན་དུ་ལི་ཁ་ར་དང ། བུ་རམ་དང ། རྒུན་ཆང་དང ། བལ་པོ་སེའུའི་ཁུ་བ་ལ་འདི་ནི། མིའི་ཁྲག་གོ་།མིའི་ཀླད་པའོ། །མིའི་བད་ཀན་ནོ། །མིའི་རུས་པའི་རྐང་ངོ ། །ཞེས་བྱ་བ་དེ་ལྟ་བུར་འདུ་ཤེས་སྐྱེད་དེ། ཀཽ་ཌི་ནྱ།
272a
༄#། །མཁས་པས་དེ་ལྟར་ཟས་ལ་མི་མཐུན་པའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ། མཁས་པས་ཇི་ལྟར་ཁྱིམ་མམ། གནས་ཁང་ངམ། ཁང་པ་བརྩེགས་མར་འཇུག་པའི་ཚེ་འཇིགས་པའི་འདུ་ཤེས་བསྐྱེད་པར་བྱ་ཞེ་ན། གྲོང་ཁྱེར་ཆེན་པོ་སྒོ་བཞི་པ་འདིར་ཞུགས་པས་བདག་སྐྲག་གོ་།འཇུག་པ་ན་ཤིང་ལ་མིར་འདུ་ཤེས་པ་དང ། འཇིམ་པ་ལ་མིའི་ཤར་འདུ་ཤེས་པ་དང ། རི་མོ་ལ་མིའི་ཁྲག་ཏུ་འདུ་ཤེས་པ་དང ། མལ་ཆ་ལ་མིའི་པགས་པ་ཉིད་དུ་འདུ་ཤེས་པ་དང ། སྟན་ལ་མིའི་རུས་གོང་གི་ཕུང་པོའམ། མི་རོར་བྱིན་གྱིས་རློབ་པར་བྱེད་པ་དེ་ལྟ་བུར་འདུ་ཤེས་པ་འཇུག་པར་བྱའོ། །རྩིའི་རྣམ་པ་དེ་ལྟ་བུ་ལ་སོ་སོར་སྟེན་པར་བྱེད་ནའང་ཆོས་དེ་དག་ཡིད་ལ་བྱའོ། །ཀཽ་ཌི་ནྱ། མཁས་པ་དེ་ལྟ་བུར་འདུ་ཤེས་པ་ནི།་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་ཐོབ་པར་འགྱུར་རོ། །སུ་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་པར་འགྱུར་བ་དེ་ཡོན་ཏན་དང ། ཕན་ཡོན་ཅི་ཐོབ་ཅེ་ན། དེ་རྗེས་སུ་མཐུན་པའི་བཟོད་པ་གསུམ་ཐོབ་པར་འགྱུར་རོ། །གསུམ་གང་ཞེ་ན། སྨོན་པ་མེད་པ་དང་རྗེས་སུ་མཐུན་པའི་བཟོད་པ་དང ། སྟོང་པ་ཉིད་དང་རྗེས་སུ་མཐུན་པའི་བཟོད་པ་དང ། མཚན་མ་མེད་པ་དང་རྗེས་སུ་མཐུན་པའི་བཟོད་པའོ། །འཇིག་རྟེན་གྱི་བཟོད་པ་གསུམ་པོ་དེ་དག་ཐོབ་པས་ཕན་ཡོན་ཐོབ་པར་བྱེད་དེ། དེའི་
272b
སེམས་སྟོང་པ་ཉིད་ཀྱི་ལྟ་བ་ལ་འཇུག་པར་བྱེད་དོ། །དེ་སྐྱེ་བ་དང་འཇིག་པའི་ཚུལ་གྱིས་མངོན་པར་འདུ་བྱེད་པ་མེད་པ་ལ་ཡིད་འཇུག་པར་བྱེད་དོ། །དེ་ཕུང་པོའི་རང་བཞིན་ལ་མི་རྟགས་དང ། སྡུག་བསྔལ་བ་དང ། སྟོང་པ་ཉིད་དང ། བདག་མེད་པའི་སྟོང་པ་ཉིད་ཡང་དག་པར་རྗེས་སུ་མཐོང་ངོ ། །ཁམས་རྣམས་ཞེས་བྱ་བ་ནས་སྐྱེ་མཆེད་རྣམས་ཞེས་བྱ་བའི་བར་ཡང་དག་པར་རྗེས་སུ་མཐོང་ངོ ། །བདེན་པ་རྣམས་ཞེས་བྱ་བའི་བར་དང ། རྟེན་ཅིང་འབྲེལ་པར་འབྱུང་བ་ཞེས་བྱ་བའི་བར་ལ་ཆོས་ཐམས་ཅད་ཀྱི་རང་བཞིན་དང ། མི་རྟག་པ་ཉིད་ཡང་དག་པར་རྗེས་སུ་མཐོང་ངོ ། །སྡུག་བསྔལ་བ་ཉིད་དང་བདག་མེད་པ་ཉིད་ཀྱི་སྟོང་པ་ཉིད་ཡང་དག་པར་རྗེས་སུ་མཐོང་ངོ ། །དེ་རྒྱུན་དུ་ཞུགས་པའི་འབྲས་བུ་འཐོབ་བོ། །ཞེས་བྱ་བ་ནས་དགྲ་བཅོམ་པ་ཉིད་ཀྱི་བར་འཐོབ་སྟེ། ཀཽ་ཌི་ནྱ། འདི་ནི། མི་སློབ་པའི་རྣམ་པར་གྲོལ་བ་མཉམ་པར་བཞག་པའོ། །ཀཽ་ཌི་ནྱ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་འདི་ནི། སེམས་ཅན་རྣམས་ཀྱི་གཅེས་སྤྲས་བྱེད་པའོ། །འདོད་པའི་འདོད་ཆགས་ཐམས་ཅད་ཡང་དག་པར་སྤོང་བར་བྱེད་པའོ། །གཟུགས་ཀྱི་འདོད་ཆགས་ཐམས་ཅད་དང ། གཟུགས་མེད་པའི་འདོད་ཆགས་ཐམས་ཅད་ཡང་དག་པར་སྡོང་བར་བྱེད་པའོ། །ང་རྒྱལ་དང ། རྒོད་པ་དང ། ཐེ་ཚོམ་དང ། མ་རིག་པའི་མུན་པ་ཐམས་ཅད་སྤོང་བར་བྱེད་པའོ། །ལྷག་མ་མེད་པའི་སའི་བར་ལ་
273a
༄#། །འཇོག་པར་བྱེད་པའོ། །དོན་ཐམས་ཅད་ཡོངས་སུ་རྫོགས་པ་སྨོན་པ་མེད་པ་དང་རྗེས་སུ་མཐུན་པའི་གཟུགས་སྔགས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོས་གང་ང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བ་དཔལ་གྱི་སྙིང་པོའི་ལག་ནས་བསྐུར་ཞིང ། འདུས་པ་ཆེན་པོ་འདི་ལ་ངས་བཤད་པ་ལ་དད་པ་སྦྱིན་པར་མཇད་པ་འདི་ནི། མཐུ་ཆེ་བ། ཕན་ཡོན་ཆེ་བའོ། །འདོད་པའི་འདོད་ཆགས་ཐམས་ཅད་དང ། གཟུགས་ཀྱི་འདོད་ཆགས་ཐམས་ཅད་དང ། གཟུགས་མེད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པའོ། །ང་རྒྱལ་ཐམས་ཅད་ཡང་དག་པར་ཟད་པར་བྱེད་པའོ། །ཟད་པ་ཤེས་པ་དང ། མི་སྐྱེ་བ་ཤེས་པའི་བར་དུ་བྱེད་པའོ། །མི་སྐྱེ་བའི་ཡེ་ཤེས་མཐོང་བར་བྱེད་པའོ། །མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པའོ། །རྣམ་པར་འཇིག་པར་བྱེད་པའོ། །སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པའོ། །བདུད་རྣམས་ཚར་གཅོད་པར་བྱེད་པའོ། །ཕས་ཀྱི་རྒོལ་བ་རྣམས་ཕམ་པར་བྱེད་པའོ། །ལྷ་ཐམས་ཅད་དགའ་བར་བྱེད་པའོ། །གནོད་སྦྱིན་ཐམས་ཅད་མགུ་བར་བྱེད་པའོ། །ལྷ་མ་ཡིན་རྣམས་རྣམ་པར་འཇོམས་པར་བྱེད་པའོ། །རྣམ་མཁའ་ལྡིང་རྣམས་དབང་བར་བྱེད་པའོ། །མི་འམ་ཅི་རྣམས་དད་པར་བྱེད་པའོ། །ལྟོ་འཕྱེ་ཆེན་པོ་རྣམས་
273b
དངང་བར་བྱེད་པའོ། །ཕས་ཀྱི་རྒོལ་བ་རྣམས་ངེས་པར་ཐུལ་བར་བྱེད་པའོ། །རྒྱལ་རིགས་རྣམས་མངོན་པར་དད་པར་བྱེད་པའོ། །བྲམ་ཟེ་རྣམས་འཇུག་པར་བྱེད་པའོ། །རྗེའི་རིགས་རྣམས་དགའ་བར་བྱེད་པའོ། །དམངས་རིགས་རྣམས་མཆོག་ཏུ་དགའ་བར་བྱེད་པའོ། །བུད་མེད་རྣམས་འདོད་ཆགས་དང་བྲལ་བར་བྱེད་པའོ། །མང་དུ་ཐོས་པ་རྣམས་སྐྱོ་བར་བྱེད་པའོ། ། རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པའོ། །འཇིག་རྟེན་ཐམས་ཅད་རབ་ཏུ་ཞི་བར་བྱེད་པའོ། །འཐབ་པ་དང ། འཐབ་མོ་དང ། མུ་གེ་དང ། ནད་དང ། དུས་མ་ཡིན་པའི་ཕ་རོལ་གྱི་དམག་ཚོགས་དང ། དུས་མ་ཡིན་པའི་རླུང་དང ། ཆར་པ་དང ། ཆུ་བོ་དང ། གྲང་བ་དང ། དྲོ་བ་དང ། ཁ་བ་དང ། ཚ་བ་དང ། རྩུབ་པ་དང ། རོ་མི་ཟོ་བ་དང ། རེག་པར་དཀའ་པའི་དངོས་པོ་ཐམས་ཅད་རྣམ་པར་ཞི་བར་བྱེད་པའོ། །ཆོས་ཀྱི་ཚུལ་འབར་བར་བྱེད་པའོ། །དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པའོ། །སངས་རྒྱས་ཀྱི་བསྟན་པ་སྟོན་པར་བྱེད་པའོ། །འཁོར་བས་སྐྲག་པ་རྣམས་དབུགས་འབྱིན་པར་བྱེད་པ་སྟེ། འདི་ནི། སྨོན་པ་མེད་པ་དང་རྗེས་སུ་མཐུན་པའི་གཟུངས་སྔགས་ཡིན་ནོ། །བསྟན་པ་འདི་བཤད་པ་ན་སེམས་ཅན་ལྷ་དང་མི་གྲངས་མེད་དཔག་ཏུ་མེད་པ་ནི། ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་པར་གྱུར་ཏོ། །དཀྲིགས་ཕྲག་དགུ་བཅུ་རྩ་བརྒྱད་ནི། ལེན་པ་མེད་པར་ཟག་པ་རྣམས་
274a
༄#། །ལས་སེམས་རྣམ་པར་གྲོལ་ལོ། །དེའི་ཚེ་ཁྲི་ཕྲག་བརྒྱད་ནི། སྨོན་པ་མེད་པ་དང་རྗེས་སུ་མཐུན་པའི་གཟུང་སྔགས་འདི་ཐོབ་པར་གྱུར་ཏོ། །དེའི་ཚེ་སེམས་ཅན་གྲངས་མེད་དཔག་ཏུ་མེད་པས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་ཕྱིར་མི་ལྡོག་པར་གྱུར་ཏོ། །དེའི་ཚེ་འབུམ་ཕྲག་ལྔ་བཅུ་རྩ་བརྒྱད་ནི། མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། །ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། ཡི་དྭགས་དང ། ཤ་ཟ་དང ། གྲུལ་བུམ་དང ། མི་དང ། མི་མ་ཡིན་པ་ཐམས་ཅད་ཀྱིས་ལེགས་སོ། །ཞེས་བྱ་བ་གསོལ་ཏེ། བཙུན་པ་བཅོམ་ལྡན་འདས། ལེགས་སོ་ལེགས་སོ། །སངས་རྒྱས་བཅོམ་ལྡན་འདས་རྣམས་ཀྱི་ཐོག་པ་མ་མཆིས་པའི་ཡེ་ཤེས་གཟིགས་པ་ནི། ངོ་མཚར་ལགས་སོ། །མཆོག་ཏུ་ངོ་མཚར་ལགས་སོ། །བཙུན་པ་བཅོམ་ལྡན་འདས། འདི་ལྟར་དེ་བཞིན་གཤེགས་པ་རྣམས་སེམས་ཅན་ཐམས་ཅད་ཀྱི་བསམ་པ་མཁྱེན་པ་ལགས་སོ། །དབང་པོ་ལ་མཁས་པའི་ཕ་རོལ་ཏུ་ཕྱིན་པ་ལགས། སེམས་ཅན་ཐམས་ཅད་ལ་ཆོས་ཀྱི་རོས་ཚིམ་པར་མཛད་པ་ལགས། འཕགས་པའི་ལམ་ཡན་ལག་བརྒྱད་པ་སྟོན་པར་མཛད་པ་ལགས། སྡུག་བསྔལ་ཐམས་ཅད་ཉེ་བར་ཞི་བར་
274b
མཛད་པ་ལགས་པས་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་དད་པ་མི་སྐྱེད་པ་ལགས། ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའི་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཀྱིས་ཐལ་མོ་རབ་ཏུ་སྦྱར་ནས་མགྲིན་པ་གཅིག་ཏུ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་དང་གང་དུ་བདེན་པ་དང་རྗེས་སུ་མཐུན་པའི་གཟུངས་སྔགས་འདི་བསྟན་པ་ཐ་ན་གླེགས་བམ་དུ་ཆུད་པ་ལའང་རུང་སྟེ། དེ་དང་དེར་བདག་ཅག་གིས་བརྩོན་པ་ལྷུར་བླང་བའི་ཐབས་ཐམས་ཅད་ཀྱིས་བཀུར་སྟིར་བགྱིའོ། །རི་མོར་བགྱིའོ། །མཆོད་པར་བགྱིའོ། །ཆོས་སྨྲ་བ་དང་ཆོས་ཉན་པ་དེ་དག་དང་གནས་དེ་དག་ལ་སླར་རྒོལ་བ་ཐམས་ཅད་ཀྱིས་མི་རྫི་བར་ཡོངས་སུ་བསྐྱང་བར་བགྱིའོ།། བསྲུང་བར་བགྱིའོ། །སྦ་བར་བགྱིའོ། །ནོར་གྱི་ཕུང་པོ་ཐམས་ཅད་ཀྱིས་མི་ཕོངས་པར་བགྱིའོ། །རྟག་པར་སྣོད་དུ་གྱུར་ཅིང་སྦྱིན་གནས་སུ་གྱུར་ལ་ཚོགས་པ་རྣམས་ནད་མ་མཆིས་པ་དང ། ལོངས་སྤྱོད་དང་ཉེ་བར་སྤྱོད་པས་དགའ་ཞིང་རྩེ་སྟེ། མཆོག་ཏུ་དགའ་བ་མང་ལ་ཆོས་འཚལ་ཞིང་ཆོས་ཀྱིས་གནས་པ་དག་དང ། ཆོས་རྗེས་སུ་བསྲུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེད་གང་དག་ཆོས་ཀྱི་ཚུལ་དང ། དཀོན་མཆོག་གསུམ་གྱི་གདུང་རྒྱུན་མི་གཅད་པར་བྱ་བའི་ཕྱིར་ཞུགས་པ་ནི། སངས་རྒྱས་ཀྱི་བསྟན་པ་ལ་སྦྱིན་བདག་ཁྱེད་ལེགས་སོ་
275a
༄#། །ལེགས་སོ། །འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བརྒྱད་པ། ཡང་དེའི་ཚེ་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་གང་བྱང་ཆུབ་སེམས་དཔའ་ནམ་མཁའི་སྙིང་པོའི་ལག་ནས་འདིར་ཡིད་ལ་བྱེད་པ་བསྐུར་ཞིང ། ལུང་བསྟན་པ་ཆེན་པོ་ཉི་མའི་སྙིང་པོ་ལ་དད་པ་སྦྱིན་པར་མཛད་པ། རིག་པ་མཆིས་པའི་སྦུབས་ཞི་བ། སྡང་བ་གཉིད་ཀྱིས་ལོག་པར་བགྱིད་པའི་གཟུངས་སྔགས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ།་ཤཱ་རིའི་བུ། ལྷ་དང་བཅས་པའི་འཇིག་རྟེན་གྱི་མདུན་དུ་བཤད་པར་བྱའོ། །ཤཱ་རིའི་བུ། དེའི་ཕྱིར་ཁྱོད་ཉོན་ལ་ཞེས་བྱ་བ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་དུའོ། །ཤཱ་རིའི་བུ། འདི་ལྟར་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་དེ་ལྟ་བུའི་ཐག་རིང་པོ་ནས་འདིར་ཁྱེད་ཀྱི་བསམ་པ་དང་བག་ལ་ཉལ་པ་མཁྱེན་ནས་འདིར་སངས་རྒྱས་ཀྱི་ཞིང་འདི་ན་ཁྱེད་བདག་ཏུ་འདུ་ཤེས་པ་དང ། སེམས་ཕྱིན་ཅི་ལོག་པ་དང ། འཁོར་བའི་འདམ་ལ་ཀུན་ཏུ་རྨོངས་པ་དང ། ལམ་ཡན་ལག་
275b
བརྒྱད་པ་ལ་རྣམ་པར་རྨོངས་པས་གཟུངས་སྔགས་དེ་ལྟ་བུ་འདིར་བསྐུལ་བ་ཡིན་ནོ། །ཇི་ལྟར་བདག་མེད་པ་ཡིན་ཡང་འོན་ཀྱང་འདི་ན་སེམས་ཅན་བྱིས་པ་རྣམས་བདག་ཡོངས་སུ་བཙལ་བར་སེམས་ཕྱིན་ཅི་ལོག་པ་དག་ཡིན་ནོ། །ཤཱ་རིའི་བུ། མཁས་པ་ཇི་ལྟར་བདག་ཡོངས་སུ་ཚོལ་བར་བྱེད་ཅེ་ན། ཇི་ལྟར་བདག་མེད་པ་བཞིན་དུ་བདག་ཉིད་ཀྱིས་མངོན་སུམ་དུ་འགྱུར་རོ། ། ཤཱ་རིའི་བུ། མཁས་པས་འདི་ལ་འདི་ལྟར་བདག་ཡོངས་སུ་བཙལ་བར་བྱ་སྟེ། སེམས་ཅན་འདི་རྣམས་ནི། རང་གི་ལུས་ལ་བདག་ཏུ་འདུ་ཤེས་པ་དག་ཡིན་པས་ལུས་འདི་ཉིད་ལ་ཚུལ་བཞིན་དུ་སོ་སོར་བརྟག་པར་བྱའོ། །ཇི་ལྟར་ཞེ་ན། དབང་པོ་ཁོ་ནར་མིག་ལ་སོ་སོར་བརྟག་པར་བྱའོ། །འདི་ལྟར་ཡང་དག་པར་བརྟག་པར་བྱ་སྟེ། འདི་ལྟར་གནས་མལ་སྣ་ཚོགས་ལ་སྐྱིལ་མོ་ཀྲུང་དུ་འདུག་ནས་དབང་པོ་ཐམས་ཅད་བསྡམས་པའི་རང་གི་སེམས་ཀྱིས་འདི་ལྟར་བརྟག་པར་བྱའོ། །བདག་གི་མིག་གཡས་པ་འདི་ནི། འབྱུང་བ་ཆེན་པོ་བཞི་ལས་གྱུར་པ། རྒྱུས་པས་འབྲེལ་བ། ཆུས་གང་བ་ཡིན་ཏེ། སྒྱུར་བར་བྱེད་པ་གཞན་གང་ཡང་མེད་ཀྱི་རླུང་རྣམས་ཡིན་ནོ། །གང་དག་མིག་གི་དབང་པོར་ཞུགས་ནས་བསྐོར་བར་བྱེད་ཅིང་སྒྱུར་བར་བྱེད་པ་དེ་དག་ཀྱང་རླུང་རྣམས་སོ། །ཡོངས་སུ་སྦྱོར་བར་བྱེད་ཅིང་འབྱུང་བར་བྱེད་པ་དེ་དག་ནི། ནམ་མཁའ་ལ་བརྟེན་པ་དག་གོ་།ནམ་མཁའ་དེའང་གཟུང་བ་མེད་པ། བརྗོད་དུ་མེད་པ། བདག་
276a
༄#། །མེད་པའོ། །ཇི་ལྟར་ནམ་མཁའ་བདག་མེད་པ་དེ་བཞིན་དུ་རླུང་དེ་དག་ཀྱང་བདག་མེད་པའོ། །གང་དག་མིག་གི་དབང་པོ་ལ་འཇུག་ཅིང་བསྐོར་བར་བྱེད། སྒྱུར་བར་བྱེད། ཡོངས་སུ་སྦྱོང་བར་བྱེད། འབྱུང་བར་བྱེད་པ་དེ་དག་ཀྱང་གཟུང་བ་མེད་པ། བརྗོད་དུ་མེད་པ། བདག་མེད་པ། དམིགས་པ་དང་བྲལ་བ་དག་གོ་།དེ་བཞིན་དུ་གང་མིག་གི་དབང་པོ་ལ་སའི་ཁམས་སྲ་བ་ཉིད་ཤིང་ནྱ་གྲོ་དྷའི་ས་བོན་ཙམ་ཡོད་པའང་མིག་ཐམས་ཅད་ལ་ཚུལ་བཞིན་དུ་ཡིད་ལ་བྱེད་པ་སྐྱེ་བས་སོ་སོར་བརྟགས་ནས་དེ་དག་ཏུ་མི་དམིགས་སོ། །དེ་ལ་བདག་ཉིད་ཀྱིས་ནེམ་ནུར་མེད་པར་འགྱུར་རོ། །དེ་ལ་སའི་ཁམས་ལ་བདག་མེད་དེ། ཁམས་དེའང་གཟུང་བ་མེད་པ། བདག་མེད་པར་དམིགས་སོ། །དེ་བཞིན་དུ་དེ་ལ་ཆུའི་ཁམས་ལ་སོ་སོར་རྟོག་པར་བྱེད་དོ། །ཞེས་བྱ་བ་ནས་དེ་བཞིན་དུ་མེའི་ཁམས་ཀྱི་བར་ལ་སོ་སོར་རྟོག་པར་བྱེད་དོ། །དེ་ལྟར་མིག་གི་བར་ལ་སོ་སོར་བརྟགས་པས་མིག་གི་འབྱུང་བ་ཆེན་པོ་རྣམས་ལ་བདག་མེད་པར་བདག་ཉིད་ཁོ་ནས་ནེམ་ནུར་མེད་པར་འགྱུར་རོ། །དེ་འདི་སྙམ་དུའང་སེམས་ཏེ། མིག་དང་གཟུགས་ལ་བརྟེན་ནས་རེག་པའི་བདག་ཏུ་གྱུར་ན་མི་རུང་ངོ་སྙམ་ནས་དེ་རླུང་དེའང་ནམ་མཁའི་ངོ་བོར་ཡང་ཚུལ་བཞིན་དུ་སོ་སོར་བརྟགས་ཏེ། དེ་ཐམས་ཅད་དུ་གང་དུའང་བདག་མི་དམིགས་སོ། །བརྟེན་ནས་རྣམ་པར་ཤེས་པ་འབྱུང་བའང་
276b
རྐྱེན་རྣམས་མེད་ན་མི་འབྱུང་སྟེ། མིག་དང་གཟུགས་ལ་བརྟེན་ཅིང་མིག་གི་རྣམ་པར་ཤེས་པ་འབའ་ཞིག་འབྱུང་ཞིང་གཟུགས་རྣམས་ཀྱི་རྐྱེན་གྱིས་འབྱུང་ངོ ། །གྲོགས་རྣམ་པར་ཤེས་པས་མིང་དང་གཟུགས་སོ། །དེ་ལས་བྱུང་བའི་སྐྱེ་མཆེད་དྲུག་ལས་རེག་པ་དང ། ཚོར་བ་མྱོང་བ་དང ། སྲེད་པ་ལྷག་པར་ཆགས་པ་དང ། ལེན་པ་དང ། སྲིད་པ་དང ། སྐྱེ་བ་དང ། རྒ་ཤིའོ། ། དེ་ཆོས་འདི་དག་ཐམས་ཅད་ནི། མིག་གི་རྣམ་པར་ཤེས་པ་ལ་ཡང་དག་པར་བརྟེན་པའོ། །མིག་གི་རྣམ་པར་ཤེས་པ་དེའང་ཤར་ཕྱོགས་ནས་འོངས་པ་མ་ཡིན། ལྷོ་ཕྱོགས་ནས་མ་ཡིན།་ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན། སྟེང་ནས་མ་ཡིན། འོག་ནས་མ་ཡིན་ཏེ། སྐད་ཅིག་མ་གང་ལ་མིག་གི་རྣམ་པར་ཤེས་པ་བྱུང་བའི་སྐད་ཅིག་དེའང་འགགས་སོ། །སྐད་ཅིག་མ་གཉིས་ལ་ཉེ་བར་མི་གནས་ཏེ། འགག་པས་གང་དུའང་འགྲོ་བ་མེད་དོ། །བསགས་པ་མེད་དོ། །ཆོས་དེ་དག་དང ། འདི་དག་ཐམས་ཅད་ནི། རྐྱེན་ལས་འབྱུང་བར་སྐྱེའོ། །རྐྱེན་མཚང་བས་འགག་གོ་།གང་རྐྱེན་ལ་རག་ལས་པ་དེ་བདག་མེད་དོ། །རྐྱེན་དེ་དག་ཀྱང་བྱེད་པ་པོ་མེད་པ། ཚོར་བ་པོ་མེད་པ། སློང་བ་པོ་མེད་པ། ཀུན་ནས་སློང་བ་པོ་མེད་པའོ། །དེ་བདག་མེད་པ་ཡིན་ཏེ། གང་བདག་མེད་པ་དེ་བདག་དང་བདག་གིས་སྟོང་པའོ། །དེ་ཅིའི་ཕྱིར་ཞེ་ན། མིག་གི་རང་བཞིན་དེ་ཡིན་པའི་ཕྱིར་ཏེ། ཐེར་ཟུག་ཏུ་གནས་
277a
༄#། །པ་མ་ཡིན་པ་དང ། འཇིགས་པ་མེད་པའི་ཕྱིར་དེ་ལ་བདག་གམ་བདག་གི་མེད་དོ་སྙམ་མོ། །འདི་ལ་ཇི་ལྟར་ཆོས་ཐམས་ཅད་ལེན་པ་མེད་པ་དང ། འདོར་བ་མེད་པ་དང ། ཉན་ཐོས་རྣམས་ཀྱིས་བྱས་པ་མ་ཡིན་པ་དང ། རང་རྒྱལ་བ་རྣམས་ཀྱིས་མ་ཡིན་པ་དང ། དེ་བཞིན་གཤེགས་པ་རྣམས་ཀྱིས་མཛད་པ་མ་ཡིན་ཏེ། ངོ་བོ་ཉིད་ཐམས་ཅད་ཀྱི་མིག་གི་བདག་མེད་པའོ། །གང་བདག་མེད་པ་དེ་སྟོང་པའོ། །མི་དམིགས་པའི་ཚུལ་གྱིས་ཆོས་ཐམས་ཅད་སྟོང་པའོ། །དེ་བཞིན་དུ་མཚན་མ་མེད་པའི་རྣམ་པར་ཐར་པའི་སྒོའི་བར་དུ་བསྒོམས་པས་ཆགས་པའི་གཞི་སྤོང་བར་འགྱུར་ཞིང་དེའི་རྒྱུ་ལས་བྱུང་བ་ཉོན་མོངས་པ་ཐམས་ཅད་ཀྱང་སྤོང་བར་འགྱུར་རོ། །དེའི་ཚེ་ཁ་ཅིག་ནི། བདེན་པ་དང་པོ་མངོན་པར་རྟོགས་པར་འགྱུར་རོ། །ཁ་ཅིག་ནི། བདེན་པ་བཞི་པའི་བར་མངོན་པར་རྟོགས་པར་འགྱུར་རོ། །རྣ་བ་ཞེས་བྱ་བ་ནས་སྣ་དང་ལྕེའི་བར་ལའང་དེ་བཞིན་ནོ། །ཡང་དེ་ལུས་ཐམས་ཅད་ལ་ཚུལ་བཞིན་དུ་ཡིད་ལ་བྱེད་པས་སོ་སོར་རྟོག་པར་བྱེད་དེ། ཁ་ཅིག་ནི། དང་པོར་སྤུ་གཅིག་ལ་ལྔ་བཅུར་རྣམ་པར་བཅད་དེ་བཅུར་བཤིག་པ་ལའོ། །གང་དག་རྟེན་པའི་སྤུ་ཐམས་ཅད་ལའང་དེ་བཞིན་ཏེ། དེ་ལ་བདག་ཉིད་ཀྱིས་ནེམ་ནུར་མེད་པར་འགྱུར་རོ། །སྤུ་གང་ལའང་བདག་མི་དམིགས་སོ། །བདག་གི་
277b
པགས་པ་དང ། ཤ་དང ། ཁྲག་དང ། བད་ཀན་དང ། རྒྱུས་པ་དང ། རྒྱུ་མ་དང ། ཀླད་པ་དང ། རུས་པ་དང ། རྐང་པ་དང ། དྲོ་བ་ཉིད་ལའང་དེ་བཞིན་ནོ། །རླུང་གྱེ་ན་དུ་རྒྱུ་བ་དག་དང་ཐུར་དུ་རྒྱུ་བདག་དང ། བླང་བ་མེད་པ་དང ། དོར་བ་མེད་པའི་རླུང་རྣམས་ལའང་དེ་བཞིན་དུ་ཇི་ལྟར་སྔར་བཤད་པ་བཞིན་དུ་དམིགས་པ་ཡིད་ལ་བྱེད་པ་སྟེ། ལུས་འདི་ལ་དེ་ལྟར་སོ་སོར་རྟོག་པར་བྱེད་དོ། །སེམས་ཀྱི་བར་ལ་ཚུལ་བཞིན་དུ་ཡིད་ལ་བྱེད་པས་དེ་ལྟར་སོ་སོར་རྟོག་པར་བྱེད་དོ། །ཇི་ལྟ་ཞེ་ན། ཡིད་ལ་རྟེན་ལ་ཆོས་རྣམས་ལའང་རྟེན་ཅིང་ཡིད་འབྱུང་ངོ ། །གྲོགས་རྣམ་པར་ཤེས་པས་མིང་དང་གཟུགས་དང ། སྐྱེ་མཆེད་དང ། འདུས་པའི་རེག་པ་དང ། ཚོར་བ་མྱོང་བ་དང ། སྲེད་པ་ལྷག་པར་ཆགས་པ་ཉིད་དང ། ལེན་པ་དང ། སྲེད་པ་དང ། སྐྱེ་བ་དང ། རྒ་ཤིའོ། །ཆོས་འདི་དག་ཐམས་ཅད་ནི། ཡིད་ཀྱི་རྣམ་པར་ཤེས་པ་ལ་ཡང་དག་པར་བརྟེན་ནས་འབྱུང་ངོ ། །ཡིད་ཀྱི་རྣམ་པར་ཤེས་པ་དེའང་ཤར་ཕྱོགས་ནས་འོངས་པ་མ་ཡིན་ནོ། །ཞེས་བྱ་བ་ནས་འོག་ནས་འོངས་པ་མ་ཡིན་ནོ། །ཞེས་བྱ་བའི་བར་ཡིན་ཏེ། སྐད་ཅིག་མ་གང་ཁོ་ན་ལ་རྐྱེན་གྱི་འདུ་འཕྲོད་ཀྱི་རྒྱུས་ཡིད་ཀྱི་རྣམ་པར་ཤེས་པ་བྱུང་བའི་སྐད་ཅིག་དེའང་འགགས་སོ། །སྐད་ཅིག་མ་གཉིས་པ་ལ་ཉེ་བར་མི་གནས་ཏེ། འགགས་པ་གང་དུའང་འགྲོ་བ་མེད་དོ། །བསགས་པ་མེད་དོ། །ཆོས་འདི་དག་ཐམས་
278a
༄#། །ཅད་ནི།་རྐྱེན་ལས་ཡང་དག་པར་བྱུང་བར་སྐྱེའོ། །རྐྱེན་མཚང་བས་འགག་གོ། ཐམས་ཅད་རྐྱེན་ལ་རག་ལས་པ་ཡིན་ཏེ། དེ་དག་བདག་མེད་དོ། །རྐྱེན་དེའང་བྱེད་པ་ཡོ་དང ། ཚོར་བ་པོ་དང ། སློང་བ་པོ་དང ། ཀུན་ནས་སློང་བ་པོ་མི་དམིགས་པ་ཉིད་པས་དེས་ན། དེ་དག་བདག་མེད་པ་ཡིན་ཏེ། གང་བདག་མེད་བ་དེ་བདག་དང་བདག་གིས་སྟོང་པའོ། །དེ་ཅིའི་ཕྱིར་ཞེ་ན། ཡིད་ཀྱི་རང་བཞིན་དེ་ཡིན་པའི་ཕྱིར་ཏེ། ཐེར་ཟུག་ཏུ་གནས་པ་མ་ཡིན་པ་དང ། འཇིག་པ་མེད་པའི་ཕྱིར་དེ་ལ་བདག་གམ་བདག་གི་མེད་དོ་སྙམ་མོ། །ཆོས་ཐམས་ཅད་སྐྱེ་བ་དང་འཇིག་པའི་ཆོས་ཉིད་ཡིན་ཏེ། འདི་ལ་ལེན་པ་མེད་དོ། །འདོར་བ་མེད་དོ། །དེ་ཉན་ཐོས་རྣམས་ཀྱིས་བྱས་པ་མ་ཡིན་ནོ། །རང་སངས་རྒྱས་རྣམས་ཀྱིས་མ་ཡིན་ནོ། །དེ་བཞིན་གཤེགས་པ་རྣམས་ཀྱིས་མཛད་པ་མ་ཡིན་ཏེ། རང་བཞིན་དང་ངོ་བོ་ཉིད་ཀྱིས་ཡིད་བདག་མེད་པའོ། །གང་བདག་མེད་པ་དེ་སྟོང་པའོ། །མི་དམིགས་པའི་ཚུལ་གྱིས་ཆོས་ཐམས་ཅད་བདག་མེད་པའོ། །གང་བདག་མེད་པ་དེ་སྟོང་པའོ། །དེ་བཞིན་དུ་མཚན་མ་མེད་པའི་རྣམ་པར་ཐར་པའི་སྒོའི་བར་དུ་བསྒོམས་པས་ཆགས་པའི་གཞི་རྣམས་སྤོད་བར་འགྱུར་ཞིང་དེའི་རྒྱུས་ལས་བྱུང་བ་ཉོན་མོངས་པ་རྣམས་སྤོང་བར་འགྱུར་རོ། །དེའི་ཆེ་ཁ་ཅིག་
278b
ནི།་བདེན་པ་དང་པོ་མངོན་པར་རྟོགས་པར་འགྱུར་རོ། །ཁ་ཅིག་ནི། བདེན་པ་བཞི་པའི་བར་མངོན་པར་རྟོགས་པར་འགྱུར་རོ། །མཁས་པས་འདིར་དེ་ལྟར་བདག་ཡོངས་སུ་བཙལ་ནས་མི་དམིགས་པའི་ཕྱིར་ཇི་ལྟར་བདག་མེད་པ་བཞིན་རང་གི་མངོན་སུམ་དུ་འགྱུར་རོ། །ཤཱ་རིའི་བུ། མཁས་པ་སྟོང་པ་ཉིད་ཀྱིས་གནས་པས་གནས་ཤིང་སྨོན་པ་མེད་པ་དང ། མཚན་མ་མེད་པའི་གནས་པས་གནས་ནས་དབང་པོ་བརྒྱ་བྱིན་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་བ་དང ། མཆོད་པའི་འོས་སུ་གྱུར་པ་དང ། མངོན་པར་སྲུང་བའི་འོས་སུ་གྱུར་པ་དང ། རྗེས་སུ་དྲན་པར་བྱ་བའི་འོས་སུ་གྱུར་པ་དང ། དད་པར་བྱ་བའི་འོས་སུ་གྱུར་པ་ཡིན་ནོ། །དབང་པོ་ཚང་བ་ཞེས་བྱ་བ་ནས་ལྷའི་དབང་པོ་ཞེས་བྱ་བའི་པར་དང ། ཀླུའི་དབང་པོ་དང ། གནོད་སྦྱིན་གྱི་དབང་པོ་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོ་དང ། མི་འམ་ཅིའི་དབང་པོ་དང ། ལྟོ་འཕྱེ་ཆེན་པོའི་དབང་པོའི་བར་རྣམས་ཀྱིས་ཕྱག་བྱ་བའི་འོས་སུ་གྱུར་པ་དང ། མཆོད་པའི་འོས་སུ་གྱུར་པ་དང ། མངོན་པར་སྲུང་བའི་འོས་སུ་གྱུར་པ་དང ། རྗེས་སུ་དྲན་པར་བྱ་བའི་སུ་གྱུར་པ་ཡིན་ནོ། །མིའི་དབང་པོ་ཐམས་ཅད་ཀྱིས་ཀྱང་དད་པར་བྱ་བའི་འོས་སུ་གྱུར་པའི་བར་དུ་ཡིན་ནོ། །ཤཱ་རིའི་བུ། རིག་པ་ཡོད་པའི་སྤུབས་ཞི་བའི་གཟུངས་སྔགས་དེ་ནི། དེ་བཞིན་གཤེགས་པ་དཔལ་མེ་ཏོག་གི་སྙིང་
279a
༄#། །པོས་ང་ལ་གང་བྱང་ཆུབ་སེམས་དཔའ་ནམ་མཁའི་སྙིང་པོའི་ལག་ནས་བསྐུར་ཞིང་འདུས་པ་ཆེན་པོ་ཉི་མའི་སྙིང་པོ་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། །རིག་པ་ཡོད་པའི་སྤུབས་ཞི་བའི་གཟུངས་སྔགས་དེ་ནི། མཐུ་ཆེ་བ། ཕུན་ཡོན་ཆེ་བའོ། །སེམས་ཅན་ཐམས་ཅད་ལ་ཕན་པར་བྱེད་པའོ། །ནད་ཐམས་ཅད་རབ་ཏུ་ཞི་བར་བྱེད་པའོ། །ཉོན་མོངས་པ་ཐམས་ཅད་འདུལ་བར་བྱེད་པའོ། །ཕུང་པོ་དང ། ཁམས་དང ། སྐྱེ་མཆེད་ཐམས་ཅད་ཡོངས་སུ་ཤེས་པར་བྱེད་པའོ། །ཆོས་ཐམས་ཅད་རྣམ་པར་འབྱེད་པར་བྱེད་པའོ། །ཐབས་ཐམས་ཅད་ཡང་དག་པར་སྟོན་པར་བྱེད་པའོ། །བྱང་གྲོལ་གྱི་བདེ་བ་ཐམས་ཅད་ཡོངས་སུ་འབྱེད་པར་བྱེད་པའོ། །སེམས་ཅན་ཐམས་ཅད་དད་པར་བྱེད་པའོ། །ཆོས་ཐམས་ཅད་ཀྱི་བདེ་བ་ལ་འཇུག་པར་བྱེད་པའོ། །བདུད་དང་ཕས་ཀྱི་རྒོལ་བ་ཐམས་ཅད་ཆོས་དང་མཐུན་པས་ངེས་པར་ཐུལ་བར་བྱེད་པའོ། །བདུད་ཀྱི་ཡུལ་ཐམས་ཅད་འཇིག་པར་བྱེད་པའོ། །བདུད་རྣམས་ཚར་གཅོད་པར་བྱེད་པའོ། །ཕས་ཀྱི་རྒོལ་བ་རྣམས་ཕམ་པར་བྱེད་པའོ། །ལྷ་རྣམས་དགའ་བར་བྱེད་པའོ། །གནོད་སྦྱིན་རྣམས་ཡང་དག་པར་མགུ་བར་བྱེད་པའོ། །ལྷ་མ་ཡིན་རྣམས་རྣམ་པར་འཇོམས་པར་བྱེད་པའོ། །ནམ་མཁའ་ལྡིང་རྣམས་མགུ་བར་བྱེད་པའོ། །མི་
279b
འམ་ཅི་རྣམས་དད་པར་བྱེད་པའོ། །ལྟོ་འཕྱེ་ཆེན་པོ་རྣམས་རྒྱབ་ཀྱིས་ཕྱོགས་པར་བྱེད་པའོ། །རྒྱལ་རིགས་རྣམས་མངོན་པར་དགའ་བར་བྱེད་པའོ། །བྲམ་ཟེ་རྣམས་འཇུག་པར་བྱེད་པའོ་རྗེའུ་རིགས་རྣམས་རབ་ཏུ་སིམ་པར་བྱེད་པའོ། །དམངས་རིགས་རྣམས་མཆོག་ཏུ་དགའ་བར་བྱེད་པའོ། །བུད་མེད་འདོད་ཆགས་དང་བྲལ་བར་བྱེད་པའོ། །བུད་མེད་སྦྲུམ་མ་བདེ་ལེགས་སུ་ཡོངས་སུ་ཐར་པར་བྱེད་པའོ། །མང་དུ་ཐོས་པ་རྣམས་དྲན་པར་བྱེད་པའོ། །རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པའོ། །ནད་ཐམས་ཅད་རབ་ཏུ་ཞི་བར་བྱེད་པའོ། །འཐབ་པ་དང ། འཐབ་མོ་དང ། མུ་གེ་དང ། མི་དད་དང ། ནད་དང ། ཕ་རོལ་གྱི་དམག་ཚོགས་དང ། དུས་མ་ཡིན་པའི་རླུང་དང ། ཆར་པ་དང ། ཆུ་བོ་དང ། གྲང་བ་དང ། དྲོ་བ་ཐམས་ཅད་དང ། ཁ་བ་དང ། ཚ་བ་དང ། ཕྲུད་ཧྲུད་པོ་དང ། རྩུབ་པ་དང ། རེག་པར་དཀའ་བའི་དངོས་པོ་ཐམས་ཅད་རྣམ་པར་ཞི་བར་བྱེད་པའོ། །ཆོས་ཀྱི་ཚུལ་འབར་བར་བྱེད་པའོ། །སངས་རྒྱས་ཀྱི་བསྟན་པ་སྟོན་པར་བྱེད་པའོ། །དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པའོ། །འཁོར་བས་སྐྲག་པ་རྣམས་དབུགས་འབྱིན་པར་བྱེད་པའོ། །ཟད་པ་ཤེས་པ་སྐྱེད་པར་བྱེད་པའོ། །མི་སྐྱེ་བ་ཤེས་པ་རང་གི་མངོན་སུམ་དུ་བྱེད་པའོ། །མ་རིག་པའི་མུན་པའི་ཕུང་པོ་རྣམས་པར་འདུལ་བར་བྱེད་པའོ། །སྡུག་
280a
༄#། །བསྔལ་གྱི་ཁུར་འདོར་བར་བྱེད་པའོ། །ཞི་པ་རིག་པ་ཡོད་པའི་སྦུབས་ལུང་བསྟན་པ་ཆེན་པོ་འདི་ནི། སེམས་ཅན་རྣམས་ཀྱི་ལས་འབྱང་བ་དང ། བདུད་ཀྱི་ལམ་ལས་ཡང་དག་པར་འདས་པ་དང ། སངས་རྒྱས་ཀྱི་ཡུལ་ལ་འཇུག་པར་བྱེད་པའོ། །ཆོས་ཐམས་ཅད་ལ་དབང་སྒྱུར་བར་བྱེད་པའོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་གྱི་ཕ་རོལ་ཏུ་འགྲོ་བ་དང ། ཆོས་ཀྱི་འཁོར་ལོ་རབ་ཏུ་བསྐོར་བར་བྱེད་པའོ། །ཆོས་ཀྱི་ཆར་རབ་ཏུ་འབེབས་པར་བྱེད་པའོ། །སེམས་ཅན་ཐམས་ཅད་ཡོངས་སུ་སྨིན་པར་བྱེད་པའོ། །བླ་ན་མེད་པའི་ཡོངས་སུ་མྱ་ངན་ལས་འདས་པར་བྱེད་པ་སྟེ། འདི་ནི། རིག་པ་ཡོད་པའི་སྤུགས་ཞི་བ་ལུང་བསྟན་པ་ཆེན་པོ་ཡིན་ནོ། །བཅོམ་ལྡན་འདས་ཀྱིས་བསྟན་པ་འདི་བཤད་པ་ན་གང་དུ་སེམས་ཅན་དེ་ལྟ་བུ་རྣམས་ཀྱི་ལས་ཀྱི་སྒྲིབ་པ་སྔོན་འཕངས་ཤིང་ཡོངས་སུ་མ་ཟད་པའི་ལྷ་དང་མི་གྲངས་མེད་པ་དཔག་ཏུ་མེད་པ་དང་ནི། དེར་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་པར་གྱུར་ཏོ། །སེམས་ཅན་དཀྲིགས་ཕྲག་འབུམ་གྱིས་ནི། ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེའི་ཚེ་ཁྲི་ཕྲག་བདུན་ཅུ་ནི། ཞི་བ་རིག་པ་ཡོད་པའི་སྦུབས་ཀྱི་གཟུངས་སྔགས་འདི་ཐོབ་པར་གྱུར་ཅིང་ཐེག་
280b
པ་གསུམ་ལས་ཕྱིར་མི་ལྡོག་པར་ཡུང་གྱུར་ཏོ། །དེའི་ཚེ་ལྷ་དང་མི་གྲངས་མེད་དང་ཏུ་མེད་པ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡག་པར་ཡང་གྱུར་ཏོ། །དེའི་ཚེ་བརྒྱད་ཁྲི་བཞི་སྟོང་ནི། མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། ། སངས་རྒྱས་ཀྱི་ཞིང་མི་མཇེད་ཐམས་ཅད་ཀྱི་སེམས་ཅན་རྣམས་ཀྱི་གཟུངས་སྔགས་བཞི་པོ་དབེན་པ་དང་རྗེས་སུ་མཐུན་པ་དང ། སྟོང་པ་ཉིད་དང་རྗེས་སུ་མཐུན་པ་དང ། སྨོན་པ་མེད་པ་དང་རྗེས་སུ་མཐུན་པ་དང ། ཞི་བ་རིག་པ་ཡོད་པའི་སྦུབས་ཀྱི་གཟུངས་སྔགས་དེ་དག་གི་དོན་བསྟན་པ་ཐོས་ནས་དེའི་ཚེ་སེམས་ཅན་གྲངས་མེད་པ་དཔག་ཏུ་མེད་པ་དག་གི་འདོད་པའི་འདོད་ཆགས་ཐམས་ཅད་དང ། གཟུགས་ཀྱི་འདོད་ཆགས་ཐམས་ཅད་དང ། འབྱིབས་ཀྱི་འདོད་ཆགས་དང ། རེག་པའི་འདོད་ཆགས་དང ། མོས་པའི་འདོད་ཆགས་དང ། གཟུགས་མེད་པའི་འདོད་ཆགས་ཐམས་ཅད་ཡོངས་སུ་ཟད་དོ། །འདོད་ཆགས་པ་རྣམས་ཀྱི་ཉེས་དམིགས་ཀྱང་རང་གི་མངོན་སུམ་དུ་གྱུར་ཏོ། ། ཁ་ཅིག་གིས་ནི། མི་སྡུག་པའི་དགེ་བའི་རྩ་བ་བསྐྱེད་དོ། །ཁ་ཅིག་གིས་ནི། སྐྱེ་མཆེད་དྲུག་གོ་།ཁ་ཅིག་གིས་ནི། ཟིལ་གྱིས་གནོན་པའི་སྐྱེ་མཆེད་དོ། །ཁ་ཅིག་གིས་ནི། ཟད་
281a
༄#། །པར་གྱི་སྐྱེ་མཆེད་དོ། །ཁ་ཅིག་གིས་ནི། དབུགས་རྡུབ་པ་དང་དབུགས་འབྱུང་བ་དྲན་པའོ། །ཁ་ཅིག་གིས་ནི། ཞི་གནས་སོ། །ཁ་ཅིག་གིས་ནི།་ལྷག་མཐོང་ངོ ། །ཁ་ཅིག་གིས་ནི། བསམ་གཏན་དང་པོའོ། །ཁ་ཅིག་གིས་ནི། བསམ་གཏན་ཁྱད་པར་ཅན་ནོ། །ཁ་ཅིག་གིས་ནི། བསམ་གཏན་བཞི་པའི་བར་རོ། །ཁ་ཅིག་གིས་ནི། གཟུགས་མེད་པའི་སྙོམས་པར་འཇུག་པ་རྣམས་སོ། །ཁ་ཅིག་གིས་ནི། བདེན་པ་དང་རྗེས་སུ་མཐུན་པའི་བཟོད་པའོ། །ཁ་ཅིག་གིས་ནི། རིགས་ཀྱི་སའོ། །ཁ་ཅིག་གིས་ནི། བརྒྱད་པའི་ཆོས་རྣམས་སོ། ཁ་ཅིག་གིས་ནི། ཉན་ཐོས་དང་ཐུན་མོང་པའི་དགེ་བའི་རྩ་བ་རྣམས་བསྐྱེད་དོ། །ཁ་ཅིག་གིས་ནི། རྣག་སངས་རྒྱས་དང་ཐུན་མོང་པའོ། །ཁ་ཅིག་གིས་ནི། ཐམས་ཅད་མཁྱེན་པའི་ཡེ་ཤེས་དང་ཐུན་མོང་པའི་ཏིང་གེ་འཛིན་དང ། བཟོད་པ་དང ། གཟུངས་ཀྱི་དགེ་བའི་རྩ་བ་རྣམས་བསྐྱེད་དོ། །དེའི་ཚེ་བུད་མེད་གང་དག་སེམས་རྩེ་གཅིག་པ་དང ། བུད་མེད་ཀྱི་དངོས་པོ་སྐྱོན་དུ་བགྲང་བའི་སེམས་ཀྱིས་ཚུལ་བསྟན་པ་འདི་ཐོས་པ་དེ་ལས་མིའི་བུད་མེད་དཀྲིགས་ཕྲག་དགུ་བཅུ་རྩ་གཅིག་གི་མོ་མཚན་ནུབ་པར་གྱུར་ཅིང་ཕོ་མཚན་ཡང་བྱུང་བར་གྱུར་ཏོ། །ལྷའི་བུ་མོ་བྱེད་བ་ཕྲག་དགུ་བཅུ་རྩ་དགུ་དང ། ཀླུའི་
281b
བུ་མོ་བརྒྱད་ཁྲི་བཞི་སྟོང་སྙེད་དང ། གནོད་སྦྱིན་གྱི་བུ་མོ་བརྒྱད་ཁྲི་དྲུག་སྟོང་སྙེད་དེ་དང ། ལྷ་མ་ཡིན་གྱི་བུ་མོ་བརྒྱད་ཅུ་རྩ་བཞི་སྙེད་དང ། ནམ་མཁའ་ལྡིང་གི་བུ་མོ་བདུན་ཁྲི་སྙེད་དང ། མི་འམ་ཅིའི་བུ་མོ་དཀྲིགས་ཕྲག་བཅུ་གཉིས་སྙེད་དང ། ལྟོ་འཕྱེ་ཆེན་པོའི་བུ་མོ་སྟོང་སྙེད་དང ། ཡི་དྭགས་མོ་དྲིགས་ཕྲག་དགུ་བཅུ་སྙེད་དང ། ཤ་ཟ་མོ་དཀྲིགས་ཕྲག་བཞི་བཅུ་རྩ་གཉིས་སྙེད་ཀྱི་བུ་མོ་མོ་མཚན་ནུབ་པར་གྱུར་ཅིང་ཕོ་མཚན་བྱུང་བར་གྱུར་ཏོ། །གང་བུད་མེད་བསྲུམ་པ་དེའང་ངས་ལུས་དང་སེམས་ཀྱི་བདེ་བ་མཆོག་ལ་ཡང་དག་པར་གཏད་དེ། ཐ་ན་དུད་འགྲོའི་སྐྱེ་གནས་སུ་གཏོགས་པའང་རུང ། མཐོ་འཚམ་པ་མེད་པའི་ལུས་དང་ལྡན་པ་དང ། འཁྲུག་པ་མེད་པའི་སེམས་དང་ལྡན་པར་ཁྱེའུའམ། བུ་མོ་བཙས་པར་འགྱུར་ཏོ། །བཙས་ནས་ཀྱང་དབང་པོ་ཚང་བ་དང ། གཟུགས་མཆོག་དང་ལྡན་པ་དང ། དྲན་པ་དང་ལྡན་པ་དང ། ཚེ་རབས་དྲན་པ་དང ། དཔའ་བ་དང ། སྲན་ཐུབ་པ་དང ། ཤེས་རབ་དང་ལྡན་པར་གྱུར་ཏོ། །གང་སྦྲུམ་པ་བཙཱ་བར་མི་བྱེད་པ་དེའི་ནད་ཐམས་ཅད་ངས་རབ་ཏུ་ཞི་བར་བྱས་སོ། །མངལ་ན་ཡོད་པ་དེའང་ཚལ་དེ་ལྟ་བུའི་བདེ་བ་དང་ཡང་དག་པར་ལྡན་པར་བྱས་ཏེ། ལུས་དང་སེམས་ཀྱི་བདེ་བ་དང་ཡང་དག་པར་ལྡན་པར་བྱས་ནས་ཀྱང་དེ་ཕྱིས་བདེ་བ་མཆོག་གིས་ཁྱེའུ་དང་བུ་མོ་བཙས་ཏེ།
282a
༄#། །གཟུགས་མཆོག་དང་ལྡན་པ་དང ། དྲན་པ་མཆོག་དང་ལྡན་པ་དང ། ཚེ་རབས་དྲན་པ་དང ། དཔའ་བ་དང ། སྲན་ཐུབ་པ་དང ། ཤེས་རབ་དང་ལྡན་པའི་བར་དུ་གྱུར་ཏོ། །དེ་ནས་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའི་ལྡིང་དང ། མའི་མ་ཅི་དང ། ལྟོ་འཕྱེ་ཆེན་པོ་དང ། ཡི་དྭགས་དང ། ཤ་ཟ་དང ། གྲུལ་བུམ་དང ། སྲུལ་པོ་དང ། མི་དང ། མི་མ་ཡིན་པ་དེ་དག་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་གསོལ་ཏེ། །བཅོམ་ལྡན་འདས། ལེགས་སོ་ལེགས་སོ། །དེ་བཞིན་གཤེགས་པས་ད་ལྟར་སྔོན་མ་ཐོས་པའི་ཆོས་ཀྱི་འཁོར་ལོ་རབ་ཏུ་བསྐོར་བ། སེམས་ཀྱི་ཡོངས་སུ་རྟོག་པའི་ལས་ཀྱི་སྒྲིབ་པ་ཡང་དག་པར་འབྱང་བ། འཁོར་བ་ལས་སྒྲོལ་བ། སྲིད་པར་འགྲོ་བ་ཐམས་ཅད་ཡོངས་སུ་འབྱང་བ། བདུད་རྩིའི་བྱང་གྲོལ་གྱིས་ཡང་དག་པར་ཚིམ་པར་མཛད་པ་ནི། མཆོག་ཏུ་ངོ་མཚར་ལགས་སོ། །སེམས་ཅན་ཡོངས་སུ་སྨིན་པ་ཐམས་ཅད་ཀུན་ཏུ་སྲུང་བ་དང ། རྙོག་པའི་དངོས་པོ་ཐམས་ཅད་ཡོངས་སུ་འབྱང་བ་དང ། ཤེས་རབ་མཆོག་གི་མིག་ཐོབ་པར་བགྱི་བ་དང ། དཀོན་མཆོག་གསུམ་གྱི་གདུང་བ་རྒྱུན་མིག་ཅད་པའི་སླད་དུ་དེ་བཞིན་གཤེགས་པས་ད་ལྟར་སངས་རྒྱས་ཀྱི་ཡུལ་ཐམས་ཅད་སྣང་བར་
282b
མཛད་པའི་ཆོས་ཀྱི་ཆར་རབ་ཏུ་ཕབ་ལགས་ཏེ། དེ་བཞིན་གཤེགས་པ་ལ་བདག་ཅག་གིས་རྔོ་ཅི་ཐོགས་པར་མཆོད་པ་བགྱི་ལགས་སོ། །བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་ཏིང་ངེ་འཛིན་ལ་བརྩོན་པ་རྣམས་མ་གཏོགས་པར་ལྷ་ཐམས་ཅད་ཅེས་བྱ་བ་ནས་ལུས་སྤྲུལ་པོའི་པར་གྱིས་ཀྱང་ལྷ་རྫས་ཀྱི་རོལ་མོའི་སྒྲ་དང ། ཕེག་རྡོབ་པའི་སྒྲ་འབྱུང་བར་བྱེད་དོ། །ལྷ་རྫས་ཀྱི་གསེར་གྱི་ཕྱེ་མའི་ཆར་མངོན་པར་རབ་ཏུ་ཕ་བོ། །ཞེས་བྱ་བ་ནས་ལྷ་རྫས་ཀྱི་མེ་ཏོག་དང ། སྤོབས་དང ། བདུག་པ་དང ། རས་བཅོས་བུ་དང ། ཆོས་གོས་དང ། རྒྱུན་དང ། ལྷ་རྫས་ཀྱི་མེ་ཏོག་ཕྲེང་གི་བར་གྱི་ཆར་མངོན་པར་རབ་ཏུ་ཕབ་བོ། །བཅོམ་ལྡན་འདས། ཇི་ལྟར་ཉི་མ་ཤར་བ་ལའང་མཆོད་པའི་ལས་བྱ་བའི་ཕྱིར་རིན་པོ་ཆེའི་མེ་ཏོག་དང ། སྤོས་དང ། བདུག་པ་དང ། རས་བཅོས་བུ་དང ། ཕྲེང་བ་རྣམས་གཏོར་ཏོ། །འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་བཅུ་གཅིག་པ་ལས། ལས་འབྱང་བའི་ལེའུ་སྟེ་བཞི་པའོ།། །།དེ་ནས་དེ་སྙེད་ཀྱི་ལྷའི་དབང་པོ་འཁོར་དང་བཅས་པ་ཐམས་ཅད་དང ། ཀླུའི་དབང་པོ་འཁོར་དང་བཅས་པ་ཐམས་ཅད་དང ། གནོད་སྦྱིན་གྱི་དབང་པོ་འཁོར་དང་བཅས་པ་ཐམས་ཅད་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོ་
283a
༄#། །དང ། མི་འམ་ཅིའི་དབང་པོ་དང ། ལྟོ་འཕྱེ་ཆེན་པོའི་དབང་པོ་དང ། ཡི་དྭགས་ཀྱི་དབང་པོ་དང ། ཤ་ཟའི་དབང་པོ་འཁོར་དང་བཅས་པ་ཐམས་ཅད་དང ། ལུས་སྲུལ་པོའི་དབང་པོ་འཁོར་དང་བཅས་པ་ཐམས་ཅད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་དང་གང་དུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དད་པ་དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་མི་སྡུག་པ་སྔོན་དུ་གཏོང་བ་ཚུལ་དེ་ལྟ་བུས་ཤེས་བགྱི་བ་ནས་འགོག་པའི་སྙོམས་པར་འཇུག་པའི་བར་གྱི་ཚུལ་གྱིས་གནས་པར་བགྱིད་ལ། ཇི་སྐད་སྔར་བཤད་པའི་དགེ་བའི་ཕྱོགས་ཡིད་ལ་བགྱིད་པས་གནས་པར་བགྱིད་ན། དད་པ་དང་ལྡན་པའི་རིགས་ཀྱི་བུ་མོའི་བར་འཁོར་དང་བཅས་པ་ཐམས་ཅད་ལའང་རང་གི་རིས་ཀྱི་སྟོན་པའི་འདུ་ཤེས་གཟུང་བར་བགྱིའོ། །ལུས་དང ། སེམས་དང ། ཡིད་ཀྱིས་སེམས་ཅན་ཐམས་ཅད་ལ་རིམ་གྲོའི་སྤྱོད་པ་བགྱིའོ།། ཆོས་གོས་དང ། བསོད་སྙོམས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་མི་བྲེལ་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅོ་
283b
ལྔ་ལས་ཡོངས་སུ་ཐར་པར་བགྱིའོ། །བཅོ་ལྔ་གང་ཞེ་ན། ལུས་ཀྱི་ཀུན་ཏུ་འཁྲུག་པའི་འཇིགས་པ་ལས་ཡོངས་སུ་ཐར་པར་བགྱིའོ། །བོང་བ་དང ། དབྱུག་གུ་དང ། མཚོན་ཆ་དང ། དུག་དང ། རྡོ་དང ། སེམས་སྡང་བ་དང ། རྩུབ་པ་དང ། དད་པ་མ་མཆིས་པ་རྣམས་ལས་ཡོངས་སུ་ཐར་པར་བགྱིའོ། །ཁམས་ཀུན་ཏུ་འཁྲུག་པའི་འཇིགས་པ་ལས་བསྲུང་བར་བགྱིའོ། །ཇི་ལྟར་མཐུན་པའི་བཟའ་བ་དང ། བཏུང་བ་དང ། སྨན་དང ། ཡོ་བྱད་ཀྱི་གཞི་ལས་རིམ་གྲོ་བ་དང ། ཉེ་དུ་དང ། སྦྱིན་པ་པོ་དང ། སྦྱིན་བདག་ཡོངས་སུ་མི་ཉམས་པའི་ཆོས་ཅན་རྣམས་ནད་དང་དགྲའི་ཀུན་ཏུ་འཁྲུག་པའི་འཇིགས་པ་དང ། འབྱུང་པོ་ཐམས་ཅད་དང ། དགྲ་ཐམས་ཅད་ཀྱི་ཀུན་ཏུ་འཁྲུག་པའི་འཇིགས་པ་ལས་བསྲུང་བར་བགྱིའོ། །དུག་གི་ཀུན་ཏུ་འཁྲུག་པའི་འཇིགས་པ་དང ། རྒྱལ་པོའི་ཀུན་ཏུ་འཁྲུག་པའི་འཇིགས་པ་དང ། ནང་གི་དམག་ཚོགས་དང ། ཕ་རོལ་གྱི་དམག་ཚོགས་དང ། མུ་གེའི་ཀུན་ཏུ་འཁྲུག་པའི་འཇིགས་པ་ལས་ཡོངས་སུ་བསྲུང་བར་བགྱི་སྟེ། ཀུན་ཏུ་འཁྲུག་པའི་འཇིགས་པ་བཅོ་ལྔ་པོ་དེ་དག་གོ་།གང་དག་ད་ལྟར་དང་མ་འོངས་པའི་དུས་ན་དམ་པའི་ཆོས་ལྟར་བཅོས་པ་ལ་གནས་པའི་བར་གྱི་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། དད་པ་
284a
༄#། །དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་དང ། གང་དག་མི་སྡུག་པ་སྔོན་དུ་གཏོང་བའི་ཚུལ་དེ་ལྟ་བུས་ཞེས་བགྱི་བ་ནས་འགོག་པའི་སྙོམས་པར་འཇུག་པའི་བར་གྱི་ཚུལ་གྱིས་གནས་པར་བགྱིད་ལ། ཇི་སྐད་སྔར་བཤད་པ་བཞིན་ནམ་གྱི་ཆ་སྟོད་དང ། ནམ་གྱི་ཆ་སྨད་ལ་མི་ཉལ་བར་སྦྱོར་བ་ལ་རྗེས་སུ་བརྩོན་པར་གནས་པར་བགྱིད་པ་འཁོར་དང་བཅས་པ་དེ་དག་ཐམས་ཅད་དང ། གང་དུ་གནས་པའི་ཡུལ་འཁོར་དང ། གྲོང་རྡལ་དང ། ལྗོངས་དང།་རི་འོར་དང ། གྲོང་དང ། རྒྱལ་པོའི་ཕོ་བྲང་འཁོར་དེ་དག་དང ། དགོན་པའི་གནས་དེ་དག་རང་གི་རིས་གྱི་ཁྱིམ་ཁོལ་གྱི་ཁྱིམ་གྱི་བར་བཞིན་དུ་གཟུང་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅོ་ལྔ་པོ་དེ་དག་ལས་ཡོངས་སུ་བསྲུང་བར་བགྱིའོ། །སླར་བཟློག་པར་བགྱིའོ། །གང་དུ་དེ་ལྟ་བུའི་དགེ་བ་ལ་བརྩོན་པ་ཐ་ན་གང་ཟག་གཅིག་ཅིག་གནས་པར་བགྱིད་ཀྱང་རུང ། དེར་ཐ་ན་ཉིན་ཞག་གཅིག་ཅིག་གནས་པར་བགྱིད་ཀྱང་རུང་སྟེ། ཡུལ་འཁོར་དེ་དག་རང་གི་རིས་མི་ཁྱིམ་ཁོལ་གྱི་ཁྱིམ་གྱི་བར་བཞིན་དུ་གཟུང་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅོ་ལྔ་ལས་ཡོངས་སུ་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །སྦྱིན་པ་པོ་དང །
284b
སྦྱིན་བདག་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་དང ། སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དེ་དག་ཀྱང་རང་གི་རིས་ལགས་པར་གཟུང་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅོ་ལྔ་པོ་དེ་དག་ལས་རྗེས་སུ་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །གང་དག་དེ་ལྟ་བུའི་དགེ་བའི་ཕྱོགས་ལ་བརྩོན་པའི་གང་ཟག་རྣམས་ལ་གནས་ཁང་དང ། གཙུག་ལག་ཁང་དང ། ཀུན་དགའ་ར་བ་དང ། གནས་དང ། ཆོས་གོས་དང ། བསོད་སྙོམས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་བཀུར་སྟི་དང ། མཆོད་པ་དང ། རིམ་གྲོ་བགྱིད་པ་དག་ཀྱང་ཀུན་ཏུ་འཁྲུག་པའི་འཇིགས་པ་དེ་ལྟ་བུ་དེ་དག་ལས་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །གང་ཡང་བུད་མེད་སྦྲུམ་པ་གང་ཟག་དེ་ལྟ་བུ་དག་ལ་བཀུར་སྟི་བགྱིད་པ་དེ་ལ་དུས་རྟག་ཏུ་རྣམ་པར་མི་འཚེ་བའི་ཆོས་ཅན་དང ། ནད་མ་མཆིས་པ་དང ། མཆོག་ཏུ་དགའ་བ་མང་བར་བདག་ཅག་གིས་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །ཡང་གང་དང་གང་དུ་དེ་ལྟ་བུར་ཚུལ་བཞིན་ཡིད་ལ་བགྱིད་པ་ལ་བརྩོན་པའི་གང་ཟག་ལ་སྙིང་བརྩེ་བར་གསོལ་བ་འདེབས་པར་བགྱིད་པ་དག་དང ། དེའི་མིང་བརྗོད་པར་བགྱིད་པ་
285a
༄#། །དག་དང ། སྐུད་པ་བཏགས་པའམ། ཀུན་ཏུ་སྲུང་བར་བགྱིད་པའམ། མི་དགེ་བ་ལས་སླར་བཟློག་པའམ། དགེ་བ་ལ་སྦྱོར་དུ་སྩལ་པའམ་རུང་སྟེ། སེམས་ཅན་དེ་དག་ཀྱང་ཀུན་ཏུ་འཁྲུག་པའི་འཇིགས་པ་བཅོ་ལྔ་པོ་དེ་དག་ལས་བདག་ཅག་གིས་རྗེས་སུ་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །མི་དང ། མི་མ་ལགས་པའི་སེམས་ཅན་གང་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པའི་གང་ཟག་རྣམས་ཀྱི་ཚིག་མི་ཉན་ཞིང་མི་བགྱི་བར་སེམས་པ་དག་དང ། གང་དག་དེ་དག་ལ་གཤེ་བར་བགྱི་བའམ། ཕན་པ་མ་ལགས་པ་དང ། དོན་མ་ལགས་པ་དང ། བར་དུ་ཉམས་པ་དང ། གནོད་སེམས་སུ་བགྱི་བའི་སླད་དུ་རྟུལ་བར་བགྱིད་པའི་སེམས་ཅན་དེ་དག་གི་ཐད་དུ་བདག་ཅག་གིས་མི་དང ། མི་མ་ཡིན་པ་དག་གཏང་བར་བགྱིའོ། །དེ་ལ་བཟོད་པར་མི་བགྱིའོ། །གང་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པའི་གང་ཟག་རྣམས་ཀྱི་ཚིག་མི་མཉན་ཞིང་མི་བགྱི་བར་སེམས་པ་དག་དང ། གང་དག་དེ་དག་ལ་གཤེ་བར་བགྱིད་པའམ། དོན་མ་ལགས་པ་དང ། ཕན་པ་མ་ལགས་པ་དང ། གནོད་སེམས་དང ། རབ་ཏུ་ཉམས་པར་
285b
བགྱི་བའི་སླད་དུ་རྟུལ་བར་བགྱི་བའི་སེམས་ཅན་དེ་དག་ནི། གནོད་པ་བཅོ་ལྔ་པོ་འདི་དག་དང་ལྡན་པར་འགྱུར་ལགས་སོ། །བཅོ་ལྔ་གང་ཞེ་ན། མྱུར་དུ་ནད་ཀྱི་སྡུག་བསྔལ་དང ། ལོངས་སྤྱོད་ཀྱི་སྡུག་བསྔལ་དང ། ཉེ་བར་སྤྱོད་པ་ལས་ཡོངས་སུ་ཉམས་པའི་སྡུག་བསྔལ་དང ། ཡན་ལག་དང་ཉིང་ལག་གཅོད་པའི་སྡུག་བསྔལ་དང ། འཁོར་སྡུག་པ་དང་བྲལ་བའི་སྡུག་བསྔལ་དང ། དབང་ཕྱུག་ལས་རྒུད་པའི་སྡུག་བསྔལ་དང ། གནས་ཀྱི་སྡུག་བསྔལ་དང ། དགྲས་རྫི་བའི་སྡུག་བསྔལ་དང ། རྟག་ཏུ་སེམས་ཀུན་ཏུ་འཁྲུག་པའི་སྡུག་བསྔལ་དང ། ཡུལ་འཁོར་གྱི་སྡུག་བསྔལ་དང ། རྒྱལ་རིགས་ཀྱི་ཀུན་ཏུ་འཁྲུག་པའི་སྡུག་བསྔལ་དང ། ཆོམ་རྐུན་གྱི་ཀུན་ཏུ་འཁྲུག་པའི་སྡུག་བསྔལ་དང ། བུད་མེད་ཀྱི་ཀུན་ཏུ་འཁྲུག་པའི་སྡུག་བསྔལ་དང ། མྱུར་དུ་ཚེ་ཟད་པ་དང ། འཆི་བའི་སྡུག་བསྔལ་ལགས་སོ། །སེམས་ཅན་དེ་དག་ནི། གནོད་པ་དེ་དག་དང་མྱུར་དུ་ལྡན་པར་འགྱུར་ལགས་སོ། །སེམས་ཅན་གང་དག་དེ་ལྟ་བུའི་ཚུལ་བཞིན་དུ་ཡིད་ལ་བགྱིད་པ་ལ་བརྩོན་པ་རྣམས་ཀྱི་ཚིག་མི་ཉན་ཞིང་མི་བགྱིད་པར་སེམས་པ་དང ། དེ་དག་ལའང་གཤེ་བར་བགྱིད་པའམ། དོན་མ་ལགས་པ་དང ། ཕན་པ་མ་ལགས་པ་དང ། གནོད་སེམས་དང ། རབ་ཏུ་ཉམས་པར་བགྱི་པའི་སླད་
286a
༄#། །དུ་རྟུལ་བར་བགྱིད་པའི་སེམས་ཅན་དེ་དག་སྐྲ་གནས་བདག་ཅག་ལ་སྐྱབས་སུ་མཆིས་ཀྱང་རུང ། གསང་སྔགས་སྣ་ཚོགས་སྒྲུབ་པའི་ཡོ་བྱད་ཀྱིས་རིམ་གྲོ་བགྱི་བར་བརྩོན་པར་བགྱིས་སུ་ལགས་ཀྱང་དེ་དག་གི་དོན་དུ་བདག་ཅག་རིམ་གྲོའི་བསྙེན་བཀུར་བླང་བར་མི་བགྱིའོ། །དེ་དག་གི་སྐྱབས་མི་བགྱིའོ། །དེ་དག་གི་བགྱི་བ་མི་སྒྲུབ་བོ། །དོན་སྒྲུབ་པར་མི་བགྱིད་དོ། །ཕུང་གྲོལ་གྱི་ལྷའམ། ཀླུ་ནས་ལུས་སྲུལ་པོའི་བར་སྡང་བ། སྙིང་བརྩེ་བ་མ་མཆིས་པ། བགྱིས་པ་མི་གཟོ་བ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་གང་དག་འབྱུང་བར་འགྱུར་བ་དེ་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པ་དགོན་པ་དང ། ནགས་དང ། བས་མཐའ་དང ། རི་ཁྲོད་དང ། དུར་ཁྲོད་དང ། ཤིང་དྲུང་དང ། ཀུན་དགའི་ར་བ་དང ། གཙུག་ལག་ཁང་དང ། གནས་ཁང་དང ། འཆག་སའི་གནས་ན་གནས་པའི་གང་ཟག་རྣམས་ཀྱི་ཐ་དད་དུ་སྡང་བའི་སེམས་དང་ལྡན་པ་དང ། རྣམ་པར་མཐོ་འཚམ་པའི་སེམས་དང་ལྡན་པ་དང་ཉེ་བར་མཆི་བར་བགྱིད་ཅིང ། དེ་ལྟ་བུའི་གང་ཟག་རྣམས་ཀྱི་ལུས་ཀུན་ཏུ་འཁྲུག་པའམ་སེམས་ཀུན་ཏུ་འཁྲུག་པར་བགྱིད་ལ། མདངས་འཕྲོག་པར་
286b
བགྱིད་ཅིང ། ཐ་ན་དེ་ལྟ་བུའི་གང་ཟག་རྣམས་ཀྱི་རིམ་གྲོ་བ་དང ། སྦྱིན་བདག་གང་དག་ལགས་པ་དེ་དག་ལའང་ལྷའམ། ཀླུ་ནས་ལུས་སྲུལ་པོའི་བར་སྡང་བ། བགྱིས་པ་མི་གཟོ་བ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་གིས་ལུས་ཀུན་ཏུ་འཁྲུག་པ་དང ། སེམས་ཀུན་ཏུ་འཁྲུག་པར་བགྱིད་ཅིང་མདངས་འཕྲོག་པར་བགྱིད་ལ། སྔོན་གྱི་ལས་ཀྱི་རྐྱེན་མ་གཏོགས་ལགས་ཏེ། གལ་ཏེ་ལྷ་དང ། ཀླུ་ནས་ལུས་སྤྲུལ་པོའི་བར་དེ་དག་བདག་ཅག་གིས་སོ་སོར་མ་ཟློག་གམ། སླར་མ་ཟློག་གམ།་ནོངས་པ་ཅི་མཆིས་པའི་ཆད་པ་ལ་མ་བཀོད་པར་གྱུར་ན། དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་བདག་ཅག་གིས་བསླུས་པར་གྱུར་ཅིག ། བདག་ཅག་འཁོར་བ་ན་འཁོར་བའི་ཚེ་དེ་ལྟ་བུའི་ཉན་ཐོས་ཀྱི་སྤྱོད་ཡུལ་ལམ། རང་རྒྱལ་བའི་སྤྱོད་ཡུལ་ལམ། དེ་བཞིན་གཤེགས་པའི་སྤྱོད་ཡུལ་གྱིའང་རུང་སྟེ། སྣོད་དུ་མ་གྱུར་ཅིག་།བྱང་གྲོལ་གྱི་བདེ་བ་ཐོབ་པར་མ་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་།འདི་ལྟར་ཡང་ཁྱེད་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་འབར་བར་བྱེད་པ་དང ། དཀོན་མཆོག་གསུམ་གྱི་གདུང་མི་གཅད་པར་བྱ་བའི་ཕྱིར་ཞུགས་པ་ལེགས་སོ་ལེགས་
287a
༄#། །སོ། །ཁྱེད་ཀྱིས་དེ་ལྟར་བྱོས་ཤིག་།དེ་ལྟར་བྱས་ན་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ལ་ཁྱེད་ཀྱིས་མཆོད་པ་དང ། རིམ་གྲོ་བྱས་པར་འགྱུར་རོ། །རིགས་ཀྱི་བུ་དག་།གང་ལ་ལ་བརྩོན་པ་དང་བརྟུལ་པ་དེ་ལྟ་བུས་ལེགས་པར་གསུངས་པའི་ཆོས་འདུལ་བ་རྗེས་སུ་སྲུང་བར་བྱེད་པ་དང ། དེ་ལྟར་ཞུགས་ཤིང་ཆོས་ཀྱིས་གནས་པའི་གང་ཟག་རྣམས་ལ་རྗེས་སུ་སྲུང་བར་བྱེད་པའི་རིགས་ཀྱི་བུ་དེ་འཁོར་བར་འཁོར་བ་ན་དཔལ་དམ་པ་ལ་ཉེ་བར་སྤྱོད་པར་འགྱུར་རོ། །དེ་ལ་འཁོར་བའི་སྡུག་བསྔལ་འབྱུང་བར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ།། དེ་ལྟ་བས་ན་སྡུག་བསྔ་དང་མི་མཐུན་པ་བདེ་བ་འདོད་པ་ཁྱེད་ཀྱིས་དེ་ལྟར་བྱོས་ཤིག་།འདི་ལྟར་ཁྱེད་ལེགས་པར་བྱས་པའི་ལས་ཀྱི་མཐའ་ལ་ཞུགས་པ་ནི། ཁྱེད་ཡང་ལེགས་སོ་ལེགས་སོ། །ཡང་དེའི་ཚེ་མི་མ་ཡིན་པའི་འབྱུང་པོ་མདངས་དང་ཁྲག་ཟ་བ་གང་དག་ཡིན་པ་གྲངས་མེད་པ་དཔག་ཏུ་མེད་པ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ནི། མི་མ་ལགས་པ། མདངས་འཚལ་པ། ཤ་ཁྲག་
287b
འཚལ་བ་དག་ལགས་ཏེ། བདག་ཅག་གིས་དེ་བཞིན་གཤེགས་པའི་ཉན་ཐོས་རྣམས་ལ་རྣམ་པར་མཐོ་བ་ཙམ་པར་མི་བགྱིའོ། །བཙུན་པ་བཅོམ་ལྡན་འདས། ད་ལྟར་བཅོམ་ལྡན་འདས་ཀྱིས་ཇི་སྐད་བསྟན་པ་བཞིན་ཉན་ཐོས་གང་དག་དེ་ལྟ་བུའི་མི་སྡུག་པའི་སྦྱོར་བ་རྣལ་འབྱོར་ཡིད་ལ་བགྱིད་པས་གནས་པའི་གང་ཟག་དེ་ལྟ་བུ་དག་གལ་ཏེ་བདག་ཅག་གིས་རྣམ་པར་མཐོ་བཙམས་པར་གྱུར་ན། བདག་ཅག་དད་པ་ཅན་མ་ལགས་པར་གྱུར་ཅིག་།དབང་པོ་ཐམས་ཅད་ཀྱི་སྤྱོད་ཡུལ་རྣམས་སུ་མཆི་བར་མི་ནུས་པར་གྱུར་ ་ཅིག་།གང་ཟག་དེ་ལྟ་བུ་དག་ནི། བདག་ཅག་གིས་ཀྱང་བསྲུང་བར་བགྱིའོ། །དེ་དག་གི་རིམ་གྲོ་བ་དང ། སྦྱིན་བདག་གང་དག་ལགས་པ་དེ་དག་ཀྱང་བསྲུང་བར་བགྱིའོ། ། ཡོངས་སུ་བསྐྱང་བར་བགྱིའོ། །དེ་བཞིན་གཤེགས་པའི་ཉན་ཐོས་ཆོས་ཀྱིས་གནས་པ་མི་སྡུག་པའི་སྦྱོར་བ་ཡིད་ལ་བགྱིད་པས་གནས་པ་དག་ཡང་དག་པར་འཛིན་པར་བགྱིད་པ་གཙུག་ལག་ཁང་དང ། གནས་དང ། ཀུན་དགའི་ར་བ་དང ། ཆོས་གོས་དང ། བསོད་སྙོམས་དང ། མལ་སྟན་དང ། བྲོ་འཚལ་བའི་གསོས་སྨན་གྱི་ཡོ་བྱད་རྣམས་ཀྱིས་ཡང་དག་པར་འཛིན་པར་བགྱིད་པ་གང་དག་ལགས་པ་དེ་དག་བདག་ཅག་གིས་བསྲུང་བ་དང ། བསྐྱབ་པ་དང ། སྦ་བར་བགྱིའོ། །ཡོངས་སུ་བསྐྱང་བར་
288a
༄#། །བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། བཞིན་བཟང་དག་།ལེགས་སོ་ལེགས་སོ། །ཁྱེད་ཀྱིས་དེ་ལྟར་བྱོས་ཤིག་།ཡང་དེའི་ཚེ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བཅོམ་ལྡན་འདས་ཀྱི་ཉན་ཐོས་ཆོས་ཀྱིས་གནས་པ་དེ་ལྟ་བུའི་མི་སྡུག་པའི་སྦྱོར་བས་རྣལ་འབྱོར་ལ་བརྩོན་པར་གནས་པར་བགྱིད་པ་གང་དག་ལགས་པ་དེ་དག་གི་ལུས་ལ་བདག་གིས་རྒྱ་ཆེན་པོའི་སའི་བཅུད་ཀྱི་མདངས་གཏང་བར་བགྱི་སྟེ།་དེའི་ཆོས་ཀྱིས་གནས་པ་དེ་ལྟ་བུའི་ཏིང་ངེ་འཛིན་ལ་མངོན་པར་བརྩོན་པ་དེ་དག་ཤིན་ཏུ་གཟི་བརྗིད་དང་ལྡན་པ་དང ། ཁ་དོག་དང་ལྡན་པ་དང ། དྲན་པ་དང་ལྡན་པ་དང ། བརྩོན་འགྲུས་དང་ལྡན་པ་དང ། ཤེས་རབ་དང་ལྡན་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་ཆེན་པོ་དང་ལྡན་པ་གང་ཁྱོད་ངའི་སྲས། ཐུགས་ཀྱི་སྲས། ཞལ་ནས་སྐྱེས་པ། ཆོས་དང་ལྡན་པ། ཆོས་ཀྱི་སྤྲུལ་པ་དག་དེ་ལྟ་བུའི་བསོད་སྙོམས་ཀྱིས་ཡང་དག་པར་ཚིམ་པར་བྱེད་བ་ལེགས་སོ་ལེགས་སོ། །སྦྱིན་པ་ཆེན་པོ་དང་ཡང་དག་པར་ལྡན་པ་དེས་ཁྱོད་ཐེག་པ་ཆེན་པོ་ཡོངས་སུ་རྫོགས་པར་བྱེད་པར་འགྱུར་རོ། །ཡང་དེའི་ཚེ་དཔལ་
288b
ལྷ་མོ་ཆེན་མོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་གིས་ཀྱང་དེ་ལྟ་བུའི་ཆོས་ཀྱིས་གནས་པ་རྣམས་ཀྱིས་སྦྱིན་པ་པོ་དང ། སྦྱིན་བདག་གང་དག་ལགས་པའི་སྦྱིན་པ་པོ་དང ། སྦྱིན་བདག་དེ་དག་གི་དགའ་སྟོན་དང ། ནོར་དང ། འབྲུ་དང ། ཤིང་རྟ་དང ། ཉེ་བར་སྤྱོད་པ་དང ། ལོངས་སྤྱོད་རྣམས་མ་ཚང་བ་མ་མཆིས་པར་བགྱིའོ། །མི་སྡུག་པའི་སྦྱོར་བས་ཞེས་བགྱི་བ་ནས་འགོག་པའི་སྙོམས་པར་འཇུག་པ་ཡིད་ལ་བགྱིད་པའི་བར་གྱིས་ཉིན་མཚན་འདའ་བར་བགྱིད་པ་གང་དག་ལགས་པ་དེ་དག་གཙུག་ལག་ཁང་དང ། གཞི་དང ། གནས་དང ། ཆོས་གོས་དང ། བསོད་སྙོམས་དང ། མལ་སྟན་དང ། བྲོ་འཚལ་བའི་གསོས་སྨན་གྱི་ཡོ་བྱད་རྣམས་ཀྱིས་འཛིན་པར་བགྱིད་པ་དང ། ཡང་དག་པར་འཛིན་པར་བགྱིད་པ་དང ། ཡོངས་སུ་སྐྱོང་བར་བགྱིད་པ་དེ་དག་གི་ཡོ་བྱེད་ཐམས་ཅད་ཕུན་སུམ་ཚོགས་པ་དང ། ཉེ་བར་སྤྱོད་པ་དང ། ལོངས་སྤྱོད་པ་དང ། ལུས་དང་སེམས་ཀྱི་བདེ་བ་དང ། ཡིད་བདེ་བ་དང ། མཆོག་ཏུ་དགའ་བ་མང་བར་བདག་གིས་ཡང་དག་པར་གཟུང་བར་བགྱིའོ། །སྣོད་དུ་གྱུར་པའི་སྤྱིན་གནས་རྣམས་དང་མ་བྲལ་ཞིང་ལྷན་ཅིག་འགྲོགས་སུ་སྩལ་བར་བགྱིའོ། །ཆོས་ལ་མངོན་པར་དགའ་བའི་སེམས་དང་
289a
༄#། །ལྡན་པ་དང ། སྙིང་བརྩེ་བའི་སེམས་དང་ལྡན་པ་དང ། ལོག་པར་མི་ལྟུང་བའི་སེམས་དང་ལྡན་པ་དང ། བྱམས་པའི་སེམས་དང་ལྡན་པ་དང ། སྙིང་རྗེའི་སེམས་དང་ལྡན་པ་དང ། མི་ཉམས་པའི་ཆོས་ཅན་དུ་ཡང་དག་པར་བསྒྲུབ་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་ཆེན་པོ་ལ་ཡང་དག་པར་བརྟེན་པ་ལེགས་སོ་ལེགས་སོ། །ཁྱོད་བརྩོན་པའི་བརྟུལ་བ་དེས་ཐེག་པ་ཆེན་པོ་རྣམ་པར་འཕེལ་བར་བྱེད་པར་འགྱུར་རོ། །ཡང་དེའི་ཚེ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འདུས་པ་ཆེན་པོའི་ལེའུ་འདི་བཤད་པ་ན་བཅོམ་ལྡན་འདས་ཀྱིས་བསྟན་པ་ཡང་དག་པར་འཛིན་པ་ཡོངས་སུ་སྐྱོང་བ་དང ། ཡོ་བྱད་དང་ཡང་དག་པར་ལྡན་པའི་སྦྱིན་པ་པོ་དང ། སྦྱིན་བདག་མང་པོ་གང་དག་མཆིས་པའི་རྐྱེན་དེས་སངས་རྒྱས་ཀྱི་ཞིང་འདིར་ཆོས་ཀྱི་ཚུལ་ཡུན་རིང་དུ་འབར་ཞིང་མི་ཉམས་པའི་ཆོས་ཅན་དུ་འགྱུར་ལགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྨྲས་པ།་ཀྱེ་གསང་བ་པའི་བདག་པོ། ཅི་ནམ་མཁའ་ཡོངས་སུ་ཉམས་པ་མངོན་ནམ། སྨྲས་པ། གནས་ལ་སྒྲོ་བཏགས་པ་མེད་པའི་ཕྱིར་རོ། །སྨྲས་པ། ཅི་
289b
ཆོས་རྣམས་ཀྱི་ཡང་དག་པར་འདུ་བ་མངོན་ནམ། སྨྲས་པ། ཅི་ཡང་དག་པའི་མཐར་ཐུག་པའི་ཕྱིར་མི་མངོན་ནོ། །སྨྲས་པ། ཅི་ཡང་དག་པའི་མཐའ་དང ། ནམ་མཁའ་མི་འདྲ་བར་མངོན་ནམ། སྨྲས་པ། འདི་ནི། ཐ་མི་དད་པ་ཉིད་དེ། ཐ་མི་དད་པ་ཉིད་ཀྱི་ཕྱིར་མི་འདྲ་བའོ། །སྨྲས་པ། ཅི་ནམ་མཁའ་དང ། ཆོས་རྣམས་མི་འདྲའམ། སྨྲས་པ། ཅི་མི་གཡོ་བ་དང ། མི་སྐྱེ་བའི་ཆོས་ཀྱི་དབྱིངས་སུ་འཇུག་པས་མི་འདྲ་བ་མེད་པ་ཉིད་དོ། །སྨྲས་པ། རིགས་ཀྱི་བུ། ཅི་འདུས་བྱས་དང ། འདུས་མ་བྱས་ཀྱི་ཆོས་རྣམས་ཀྱི་ཐ་དད་པ་ཉིད་མི་མངོན་ནམ། སྨྲས་པ། ཇི་ལྟར་ཡང་དག་པའི་མཐའ་དང ། དེ་བཞིན་ཉིད་ཐ་མི་དད་པ་ཉིད་ཡིན་པ་དེ་བཞིན་དུ་འདུས་བྱས་ཀྱི་ཆོས་རྣམས་ནམ་མཁར་སྒྲོ་བཏགས་པ་ཉིད་ཀྱི་ཕྱིར་ཐ་མི་དད་པ་ཉིད་དོ། །སྨྲས་པ། ཅི་ཡང་དག་པའི་མཐའ་དེ་བཞིན་དུ་འདུས་བྱས་ཀྱི་ཆོས་རྣམས་ཡིན་ནམ། འོན་ཏེ་འདུས་མ་བྱས་ཀྱི་ཆོས་རྣམས་ཡིན།་སྨྲས་པ། སྟོང་པ་ཉིད་སྒྲོ་བཏགས་པ་ཉིད་ཀྱི་ཕྱིར་ཡང་དག་པའི་མཐའ་དང ། དེ་བཞིན་ཉིད་དུ་འདུས་བྱས་དང ། འདུས་མ་བྱས་དང་ཡང་དག་པར་ལྡན་པ་མ་ཡིན་ནོ། །ཡང་སྨྲས་པ། ཅི་སྟོང་པ་ཉིད་དུ་ཡང་དག་པར་འདུ་བ་ཡིན་ནམ། སྨྲས་པ། ཐེར་ཟུག་ཏུ་གནས་པ་མ་ཡིན་པ་དང ། རང་བཞིན་སྟོང་པ་ཉིད་དང ། འཇིག་པ་
290a
༄#། །མེད་པ་ཉིད་ཀྱི་ཕྱིར་ཆོས་ཐམས་ཅད་ཡང་དག་པར་འདུ་བ་སྟོང་པ་ཉིད་དོ། །འདི་ལ་གང་སྟོང་པ་ཉིད་ཅེས་བྱ་བའི་དངོས་པོའང་མི་དམིགས་སོ། །རིགས་ཀྱི་བུ། ཇི་ལྟར་ངོ་བོ་ཉིད་ངོ་བོ་ཉིད་ཀྱི་སྟོང་པ་དང་མཚན་གྱི་གཞི་མཚན་གྱི་གཞིས་སྟོང་པ་དང ། མཚན་གྱི་གཞི་མེད་པ་མཚན་གྱི་གཞིས་སྟོང་པ་ཡིན་པ་དེ་བཞིན་དུ་ཚུལ་དེས་ཆོས་ཐམས་ཅད་ཤེས་པར་བྱའོ། །དེ་ཅིའི་ཕྱིར་ཞེ་ན། དེ་ལྟར་བརྗོད་དུ་མེད་པའི་ཕྱིར་ཆོས་ཐམས་ཅད་སྟོང་པ་ཉིད་ཀྱི་ཕྱིར་རོ། །འདི་ལྟར་ཆོས་ཐམས་ཅད་ཀྱི་དའི་ངོ་བོ་ཉིད་ཉན་ཐོས་རྣམས་ཀྱིས་བྱས་པ་མ་ཡིན་ནོ། །རང་རྒྱལ་བ་རྣམས་ཀྱིས་མ་ཡིན་ནོ། །དེ་བཞིན་གཤེགས་པ་རྣམས་ཀྱིས་མཛད་པ་མ་ཡིན་ཏེ། དེ་ལྟར་ཡང་དག་པའི་མཐའ་དང ། དེ་བཞིན་ཉིད་དང ། འདུས་བྱས་དང ། འདུས་མ་བྱས་ཀྱི་ཆོས་ཉིད་ཐམས་ཅད་ནམ་མཁའ་དང་ཡང་དག་པར་ལྡན་པ་ཉིད་ཀྱི་ཕྱིར་མི་འདྲ་བ་མེད་པ་ཉིད་ནི། ཐ་མི་དད་པ་ཡིན་པར་ཤེས་པར་བྱའོ། །བསྟན་པ་འདི་བཤད་པ་ན་སྔོན་སྟོང་པ་ཉིད་ཀྱི་ཚུལ་ལ་ཡོངས་སུ་སྦྱང་བ་བྱས་པའི་སེམས་ཅན་དཔག་ཏུ་མེད་པ་ནི། སྔོན་གྱི་མི་དགེ་བའི་ལས་ཀྱི་སྒྲིབ་པ་ཟད་ཅིང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་
290b
ཐོབ་པར་གྱུར་ཏོ། །སེམས་ཅན་ཁྲག་ཁྲིག་ཕྲག་དགུ་བཅུ་རྩ་གཉིས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཤིང་ཕྱིར་མི་ལྡོག་པའི་ཆོས་རྣམས་ལ་གནས་པར་གྱུར་ཏོ། །འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་བཅུ་གཅིག་པ་ལས། ཀུན་ཏུ་སྲུང་བའི་ལེའུ་སྟེ་ལྔ་པ་རྫོགས་སོ།། །།ཡང་དེའི་ཚེ་རྒྱལ་པོ་གཟུགས་ཅན་སྙིང་པོ་དགའ་བ་དང ། མཆོག་ཏུ་དགའ་བ་དམ་པ་སྐྱེས་ཏེ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་ལ་མངོན་པར་བརྩོན་པ་རྣམས་ཀྱིས་སངས་རྒྱས་ཀྱི་ཞིང་མི་མཇེད་གཏམས་ཞིང་སྔོན་མ་མཐོང་མ་ཐོས་པའི་སྣང་བ་ཆེན་པོས་ཁྱབ་པ་དེ་ལྟ་བུ་ནི། ངོ་མཚར་ལགས་སོ། །བཙུན་པ་བདེ་བར་གཤེགས་པ། མཆོག་ཏུ་ངོ་མཚར་ལགས་ཏེ། སངས་རྒྱས་ཀྱི་ཞིང་འདི་དང་མཚམས་གཞན་གྱི་ཁོར་ཡུག་ཆེན་པོའི་རིམ་གཏོགས་པར་གཡར་སྔར་གཞན་ཅི་ཡང་གདའ་བར་མི་འགྱུར་ལགས་སོ། །བཙུན་པ་བཅོམ་ལྡན་འདས།་གང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྣང་བས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་མཐོང་ལགས་ན། དེ་བཞིན་གཤེགས་པ་
291a
༄#། །སྙོམས་པར་ཞུགས་པའི་སྣང་བ་ཇི་ལྟ་བུར་འགྱུར་བ་ལགས། ཅི་དེ་བཞིན་གཤེགས་པའི་སྣང་བས་བདག་ཅག་གིས་སངས་རྒྱས་ཀྱི་ཞིང་གཞན་གྱི་ཡོན་ཏན་བཀོད་པ་མཐོང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་དེ་བཞིན་ཏེ། དེ་བཞིན་གཤེགས་པ་རང་གི་སྤྱོད་ཡུལ་ན་བཞུགས་སོ། །དེ་བཞིན་གཤེགས་པ་བསོད་ནམས་ཆེན་པོའི་རྒྱན་གྱིས་མངོན་པར་བརྒྱན་པ། སྔོན་གྱི་ཚོགས་བསགས་པའི་དགེ་བའི་རྩ་བ་དང་སྔོན་གྱི་བྱང་ཆུབ་སེམས་དཔའི་སྤྱོད་པའི་རྒྱུ་མཐུན་པའི་བྱང་ཆུབ་སེམས་དཔར་གྱུར་པའི་རྒྱུ་མཐུན་པའི་རང་གི་གནས་སངས་རྒྱས་ཀྱི་རྣམ་པར་སྨིན་པས་མངོན་པར་གྲུབ་པ་མཐའ་ཡས་པར་བསྟན་པ། དེ་བཞིན་གཤེགས་པའི་རྣམ་པར་འཕྲུལ་པ་མ་ཆགས་པའི་སྤྱོད་ཡུལ་གྱིས་བྱིན་གྱིས་བརླབས་པ། ཡེ་ཤེས་གསལ་བ་བསྐྱེད་པར་འཇུག་པའི་བློ་གྲོས་དང་ཡང་དག་པར་ལྡན་པ། ཡེ་ཤེས་ཀྱི་ཕ་རོལ་ཏུ་གཤེགས་པ་ལས་རབ་ཏུ་སྐྱེས་པ། ཕྱི་མའི་མཐའི་བསྐལ་པར་ཡང་དག་པར་བསྒྲུབས་པ། སངས་རྒྱས་ཀྱི་སྤྱོད་ཡུལ་ཚད་མེད་པ་ལ་གནས་པ། ཆོས་ཀྱི་འཁོར་ལོ་ཤིན་ཏུ་བསྐོར་བ། ཆོས་ཐམས་ཅད་ལ་དབང་སྒྱུར་བ་བརྙེས་པའི་རྒྱུ་
291b
མཐུན་པ། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་མཁྱེན་པ་དང ། ཡོངས་སུ་སྨིན་པར་མཛད་པ་ལ་མཁས་པ། བག་ཆགས་ཡང་དག་པར་བཅོམ་པས་སངས་རྒྱས་ཀྱི་མཛད་པ་ལྷུན་གྱིས་གྲུབ་པ་ཡང་དག་པར་བསྟན་པ་ན་བཞུགས་སོ། །རྒྱལ་པོ་ཆེན་པོ། དེས་ན་ཕྱོགས་བཅུ་ཀུན་ཏུ་འཇིག་རྟེན་གྱི་ཁམས་གྲངས་མེད་པ་དཔག་ཏུ་མེད་པ་ཁྱོད་ཀྱིས་མཐོང་བར་འགྱུར་རོ། །དེ་བཞིན་དུ་དེ་བཞིན་གཤེགས་པ་གྲངས་མེད་པ་དཔག་ཏུ་མེད་པ་བཞུགས་ཤིང་གཞེས་པ་བྱང་ཆུབ་སེམས་དཔའ་རྣམས་དང ། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་བ་དང་བཅས་པ་ཁྱོད་ཀྱིས་མཐོང་བར་འགྱུར་རོ། །དེ་ནས་རྒྱལ་པོ་གཟུགས་ཅན་སྙིང་པོ་དང ། སྲོག་ཆགས་བྱེ་བ་མང་པོ་གཞན་དག་གིས་ཀྱང་ཚིག་མཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ཅག་ལ་སངས་རྒྱས་ཀྱི་ཡུལ་ཉིད་ཀྱི་སྤྱོད་ཡུལ་བསོད་ནམས་ཆེན་པོའི་རྒྱན་གྱི་རྒྱུ་མཐུན་པ་བསྟན་དུ་གསོལ། བདག་ཅག་ལ་སངས་རྒྱས་ཀྱི་མཛད་པ་ལྷུན་གྱིས་གྲུབ་པའི་བར་ཡང་དག་པར་བསྟན་དུ་གསོལ། །བཅོམ་ལྡན་འདས་ཀྱིས་དེ་བཞིན་གཤེགས་པའི་སྤྱོད་ཡུལ་ཡང་དག་པར་བསྟན་པ་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་
292a
༄#། །བཀའ་སྩལ་པ། ཀཽ་ཌི་ནྱ། ཉན་ཐོས་ཆེན་པོ་རྣམས་དང ། ཁྱིམ་ན་གནས་པ་དང ། རབ་ཏུ་བྱུང་བ་གང་དག་ཡིན་པ་ཐམས་ཅད་རང་གི་དགེ་བའི་ཕྱོགས་ཀྱི་ནང་དུ་ཡང་དག་འཇོག་ལ་གནས་པར་བྱོས་ཤིག་།ངའང་རང་གི་སངས་རྒྱས་ཀྱི་སྤྱོད་ཡུལ་གྱི་ནང་དུ་ཡང་དག་འཇོག་ལ་གནས་པར་མཛད་དོ། །ཡང་དེའི་ཚེ་ལྷ་དང ། ཀླུ་དང ། གནོད་སྦྱིན་ནས་མི་དང ། མི་མ་ཡིན་པའི་བར་གང་དག་ཡིན་པ་དང ། བདེན་པ་མཐོང་བ་གང་དག་ཡིན་པ་དང ། རྗེས་སུ་མཐུན་པའི་བཟོད་པ་ཐོབ་པ་གང་དག་ཡིན་པ་དང ། ཐེག་པ་གསུམ་ལས་ཕྱིར་མི་ལྡོག་པ་གང་དག་ཡིན་པ་དང ། དཀོན་མཆོག་གསུམ་ལ་མངོན་པར་དད་པ་གང་དག་ཡིན་པ་དེ་དག་ཐམས་ཅད་སྐྱིལ་མོ་ཀྲུང་དུ་འཁོད་ནས་སྙོམས་པར་ཞུགས་སོ། །དེ་ནས་བཅོམ་ལྡན་འདས་སངས་རྒྱས་ཐམས་ཅད་ཀྱི་ཡུལ་གྱི་སྤྱོད་ཡུལ་ལ་ཤེས་རབ་ཀྱིས་ནམ་མཁའ་ཁྱབ་པར་བྱེད་པ། མཁས་པ་མང་པོ་ཐམས་ཅད་ཡང་དག་པར་ཚིམ་པར་བྱེད་པ་ཉི་མ་དང་ཟླ་བ་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ནི།་ཉན་ཐོས་དང་རང་རྒྱལ་བ་ཐམས་ཅད་ཀྱི་སྤྱོད་ཡུལ་མ་ཡིན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་སྤྱོད་ཡུལ་མ་ཡིན་པ་དང །
292b
སེམས་ཅན་ཐམས་ཅད་ཀྱིས་ཤེས་པའི་སྤྱོད་ཡུལ་མ་ཡིན་ཏེ། དེ་སངས་རྒྱས་བཅོམ་ལྡན་འདས་ཐམས་ཅད་ཀྱི་སྤྱོད་ཡུལ་གྱི་ཡུལ་མཁྱེན་པ་ནི། མ་གཏོགས་སོ། །དེའི་ཚེ་བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་དང ། གླིང་བཞི་བ་བྱེ་བ་ཕྲག་བརྒྱ་དང ། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང ། ཉི་མ་དང་ཟླ་བ་བྱེ་བ་ཕྲག་བརྒྱ་སྙེད་དང ། སྲིད་པའི་རྩེ་མོ་ལྷའི་གནས་བྱེ་བ་ཕྲག་བརྒྱ་སྙེད་ཡོད་པ་དེ་དག་ཐམས་ཅད་དེ་བཞིན་གཤེགས་པའི་སྐུ་ལ་ཆུད་པར་ཡང་དག་པར་སྣང་ངོ ། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཐམས་ཅད་དེ་བཞིན་གཤེགས་པའི་སྐུ་ལ་གནས་པར་ཡང་དག་པར་སྣང་ངོ ། །སངས་རྒྱས་ཀྱི་ཞིང་མི་མཇེད་འདིར་གཏོགས་པའི་སེམས་ཅན་སེམས་ཅན་དམྱལ་བའམ། དུད་འགྲོའི་སྐྱེ་གནས་པའམ། གཤིན་རྗེའི་འཇིག་རྟེན་པའམ། ལྷའམ། མི་གང་དག་ཡིན་པ་དེ་དག་ཐམས་ཅད་ཀྱི་ལུས་དང་སེམས་ཀྱི་སྡུག་བསྔལ་གྱི་ཉོན་མོངས་པའང་ཐམས་ཅད་ཀྱི་ཐམས་ཅད་དུ་རྒྱུན་ཆད་དོ། །དེ་དག་ཐམས་ཅད་ཀྱིས་ལུས་དང་སེམས་ཀྱི་བདེ་བ་འདི་ལྟ་བུ་ཐོབ་པར་གྱུར་ཏེ། དཔེར་ན། བསམ་གཏན་གཉིས་པའི་ཞི་གནས་ཐོབ་པའི་དགེ་སློང་སྙོམས་པར་ཞུགས་པ་བཞིན་
293a
༄#། །བྱང་ཆུབ་སེམས་དཔའ་ཐམས་ཅད་ཀྱིས་ཏིང་ངེ་འཛིན་ལས་ལངས་ཏེ། ལངས་པ་དེ་དག་ཐམས་ཅད་ཀྱི་རང་གི་ལུས་ལ་སྣང་བ་ནུབ་བར་གྱུར་ཏོ། །ཉན་ཐོས་ཐམས་ཅད་དང ། སེམས་ཅན་གང་སུ་དག་སྙོམས་པར་ཞུགས་པ་དེ་དག་ཐམས་ཅད་ཏིང་ངེ་འཛིན་ལས་ལངས་ཏེ། དེ་དག་ཐམས་ཅད་ལུས་དང་སེམས་ཀྱི་བདེ་བ་དེ་ལྟ་བུ་དང་ཡང་དག་པར་ལྡན་པར་གྱུར་ཏོ། །དེ་དག་ཐམས་ཅད་ངོ་མཚར་ཐོབ་ཅིང་རྨད་དུ་བྱུང་བ་ཐོབ་པ་སྟེ། དབང་པོ་ཚིམ་ནས་དེ་དག་དེ་བཞིན་གཤེགས་པའི་སྐུའི་ནང་དུ་གནས་ཤིང་འཁོད་ནས་བཅོམ་ལྡན་འདས་ཀྱི་སྐུའི་བ་སྤུའི་ཁུང་བུ་ལ་བལྟས་ཏེ། དེ་དག་ཐམས་ཅད་ཀྱིས་འདི་ལྟར་བཅོམ་ལྡན་འདས་ཀྱི་སྐུའི་བ་སྤུའི་ཁུང་བུ་གཅིག་ནས་འོད་ཟེར་འདི་ལྟ་བུ་བྱུང་བ་དེ་ལྟ་བུ་མཐོང་བར་གྱུར་ཏེ། དཔེར་ན། ཉི་མ་དང་ཟླ་བ་གངྒཱའི་ཀླུང་གི་བྱེ་མ་སྙེད་དང ། ནོར་བུ་རིན་པོ་ཆེ་ཆན་པོ་གངྒཱའི་ཀླུང་གི་བྱེ་མ་སྙེད་ཀྱི་སྣང་བ་དང ། བྱང་ཆུབ་སེམས་དཔའ་ས་བཅུ་པ་གངྒཱའི་ཀླུང་གི་བྱེ་མ་སྙེད་ཀྱི་འོད་ཟེར་གྱི་སྣང་བ་བཞིན་ནོ། །བཅོམ་ལྡན་འདས་ཀྱི་བ་སྤུའི་ཁུང་བུ་རེ་རེ་ནས་ཀྱང་འོད་དེ་ལྟ་བུ་བྱུང་སྟེ། བཅོམ་ལྡན་འདས་ཀྱི་སྐུ་ལས་འོད་ཟེར་རབ་ཏུ་བྱུང་བ་དེ་དག་གིས་ཕྱོགས་བཅུའི་སངས་རྒྱས་ཀྱི་ཞིང་
293b
ཐམས་ཅད་སྣང་བ་ཆེན་པོས་རྒྱས་པར་གང་བར་གྱུར་ཏོ། །སངས་རྒྱས་ཀྱི་ཞིང་སྟོང་པ་མ་ཡིན་པ་གང་དག་ན་སངས་རྒྱས་བཅོམ་ལྡན་འདས་བཞུགས་ཤིང་གཞེས་པའི་སངས་རྒྱས་བཅོམ་ལྡན་འདས་དེ་དང་དེ་དག་གིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཐམས་ཅད་འདི་ལྟ་བུའི་དབྱངས་བརྗོད་པས་ཀུན་ཏུ་གང་བར་མཛད་དོ། །ཤཱཀྱ་སེངྒེ་མི་ཡི་མཆོག་།བྱམས་དང་ཐུགས་རྗེའི་རྒྱུ་མཐུན་པ། །སེམས་ཅན་ཀུན་ལ་ཕན་མཛད་པ། །བསོད་ནམས་ལས་གྲུབ་པ་ལ་ལྟོས།། སེམས་ཅན་ཀུན་ལ་ཐུགས་བརྩེའི་ཕྱིར། །སངས་རྒྱས་སྤྱོད་ཡུལ་སྟོན་པར་མཛད། །ཐུགས་རྗེས་འོད་ཟེར་བཀྱེ་བས་ནི། །ཞིང་རྣམས་ཐམས་ཅད་གསལ་བར་གྱུར།། རེ་རེས་ཞིང་ནི་རྒྱས་གྱུར་པ། །གནས་ཀུན་གསལ་བ་མཐོང་ནས་སུ། །བྱང་ཆུབ་མཆོག་ནི་ཡོངས་ཚོལ་ཞིང ། །སེམས་ཀྱི་མཆོག་ཀྱང་སྐྱེད་པར་བྱེད། །གང་དག་ལུས་ཅན་རྫུ་འཕྲུལ་འཐོབ། །དེ་དག་ཐམས་ཅད་མྱུར་དུ་ལྷགས། །ཤཱཀྱ་སེངྒེ་མི་མཆོག་ལ། །ཁྱེད་ཀྱིས་བསྐོར་བ་བྱས་ནས་ཀྱང ། །གང་དག་རྫུ་འཕྲུལ་མ་ཐོབ་ཀུན། །རྒྱང་མ་ནས་ནི་ཕྱག་འཚལ་ལ། །བྱང་ཆུབ་ཏུ་ནི་སེམས་བསྐྱེད་དང ། །མི་ཡི་སྐྱེས་མཆོག་རྣམས་སུ་འགྱུར། །སངས་རྒྱས་བཅོམ་ལྡན་འདས་དེ་དག་གི་རང་རང་གི་སངས་
294a
༄#། །རྒྱས་ཀྱི་ཞིང་ནས་དབྱངས་ཀྱིས་གོ་བར་མཛད་ནས་ཐུགས་རྗེའི་དབང་གིས་སེམས་ཅན་རྣམས་ཡོངས་སུ་སྨིན་པར་མཛད་པའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པའི་དགོངས་པ་དང་སྨོན་ལམ་ཡོངས་སུ་བསྐང་བའི་ཕྱིར་དང ། དེའི་ཡོན་ཏན་བརྗོད་པའི་ཕྱིར་དེ་བཞིན་གཤེགས་པ་རེ་རེའང་བྱང་ཆུབ་སེམས་དཔའ་དང ། དེ་བཞིན་དུ་ཉན་ཐོས་ཆེན་པོ་གངྒཱའི་ཀླུང་གི་བྱེ་མ་སྙེད་ཕྲག་དུ་མ་དང ། ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་གངྒཱའི་ཀླུང་གི་བྱེ་མ་སྙེད་ཕྲག་དུ་མས་མདུན་དུ་བདར་ཅིང་ཡོངས་སུ་བསྐོར་ཏེ། དེ་དག་རང་གི་སངས་རྒྱས་ཀྱི་ཞིང་རྣམས་ནས་རྫུ་འཕྲུལ་གྱིས་ཡང་དག་པར་ཞུགས་ནས་སངས་རྒྱས་ཀྱི་ཞིང་མི་མཇེད་འདིར་གཤེགས་ཏེ་བཅོམ་ལྡན་འདས་ཀྱི་སྐུ་ལ་ལན་གསུམ་བསྐོར་བ་མཛད་ནས་སངས་རྒྱས་བཅོམ་ལྡན་འདས་དེ་དག་གི་འཁོར་གྱི་སེམས་ཅན་གང་དག་ཡིན་པ་དེ་དག་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་བསྐོར་བ་བྱེད་ཅིང་དེ་ལྟ་བུའི་མཆོད་པ་བྱེད་པར་གྱུར་ཏོ། །ཡང་རང་རང་གི་སངས་རྒྱས་ཀྱི་ཞིང་དག་ཏུའང་དོང་ངོ ། །དེའི་དུས་ན་སེམས་ཅན་གང་དག་སངས་
294b
རྒྱས་ཀྱི་ཞིང་མི་མཇེད་དུ་བཅོམ་ལྡན་འདས་ཀྱི་སྐུ་ལ་ཆུང་པ་དེ་དག་ཐམས་ཅད་ཀྱིས་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པའི་དེ་བཞིན་གཤེགས་པ་འཁོར་དང་བཅས་པ་རྣམས་མཐོང་ངོ ། །དེ་དག་ཐམས་ཅད་ཀྱིས་དེ་ནས་ཡང་དག་པར་ཞུགས་པ་འཁོར་དང་བཅས་པ་རྣམས་དང ། བཅོམ་ལྡན་འདས་ཤཱཀྱ་ཐུབ་པ་ལ་བསྐོར་བ་མཛད་ཅིང་གཤེགས་པ་དང ། རང་རང་གི་སངས་རྒྱས་ཀྱི་ཞིང་དུ་འཇུག་ཅིང་རྡོ་རྗེའི་གདན་ལ་བཞུགས་ཏེ་ཆོས་སྟོན་པ་མཐོང་ངོ ། ། ཇི་ལྟར་སངས་རྒྱས་བཅོམ་ལྡན་འདས་དེ་དག་རང་རང་གི་སངས་རྒྱས་ཀྱི་ཞིང་དག་ཏུ་རང་རང་གི་གདན་ལ་བཞུགས་ནས་རང་རང་གི་འཁོར་ལས་བརྩམས་ཏེ་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་དང ། ཡོན་ཏན་དང ། གྲགས་པ་དང ། ཤེས་རབ་དང ། བསོད་ནམས་དང ། བརྩོན་འགྲུས་དང ། ཐུགས་རྗེ་དང ། སེམས་ཅན་ཡོངས་སུ་སྨིན་པར་མཛད་པ་བསྟན་པ་བཞིན་དེར་སངས་རྒྱས་ཀྱི་ཞིང་རེ་རེར་ཡང་སེམས་ཅན་གྲངས་མེད་དཔག་ཏུ་མེད་པ་གངྒཱའི་ཀླུང་གི་བྱེ་མ་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རང་རང་གི་ལུང་བསྟན་པ་ཐོབ་པར་གྱུར་ཏོ། །རང་སངས་རྒྱས་ཀྱི་ཐེག་པ་ལའང་དེ་བཞིན་ནོ། །ཉན་
295a
༄#། །ཐོས་ཀྱི་ཐེག་པ་ལའང་དེ་བཞིན་ནོ། །འདིར་བཅོམ་ལྡན་འདས་ཀྱི་སྐུ་ལ་ཆུད་པ་གང་དག་ཡིན་པ་ཐམས་ཅད་ཀྱིས་ཀྱང་མཐོང་ངོ ། ། ལུང་བསྟན་པའང་ཐམས་ཅད་ཀྱིས་ཐོས་སོ། །སྙིགས་མ་ལྔའི་སངས་རྒྱས་ཀྱི་ཞིང་སྟོང་པ་དག་ན་སེམས་ཅན་གང་དག་ཡོད་པའི་བདེ་བ་དང་སྡུག་བསྔལ་གྱི་ཚོར་བ་ཅི་འདྲ་བ་མྱོང་བ་དག་ཀྱང་འདིར་བཅོམ་ལྡན་འདས་ཀྱི་སྐུ་ལ་ཆུད་ཅིང་འཁོད་པ་རྣམས་ཀྱིས་མཐོང་ངོ ། །དེའི་ཚེ་སྙིགས་མ་ལྔའི་འཇིག་རྟེན་གྱི་ཁམས་སྟོང་པ་དག་ན་སེམས་ཅན་གང་དག་ཡོད་པ་དེ་དག་ཐམས་ཅད་ཀྱིས་ཀྱང་སྣང་བ་དེ་མཐོང་ནས་དེ་བཞིན་གཤེགས་པ་ཤཱཀྱ་ཐུབ་པའང་མཐོང་སྟེ། སངས་རྒྱས་བཅོམ་ལྡན་འདས་བགྲང་བ་ལས་འདས་པ་དང ། དེ་བཞིན་གཤེགས་པ་རེ་རེའང་སེམས་ཅན་བགྲང་བ་ལས་འདས་པ་དག་དང་ཐབས་ཅིག་ཏུ་འདིར་དེ་བཞིན་གཤེགས་པ་ཤཱཀྱ་ཐུབ་པ་ལ་བསྐོར་བ་མཛད་པ་མཐོང་ངོ ། །དེའི་ཚེ་སེམས་ཅན་དེ་དག་ཐམས་ཅད་མཆོག་ཏུ་དགའ་བའི་དམ་པ་སྐྱེས་ཏེ་ཐམས་ཅད་སྡུག་བསྔལ་གྱི་ཚོར་བ་རྒྱུན་ཆད་དོ། །སྙིགས་མ་ལྔའི་སངས་རྒྱས་ཀྱི་ཞིང་སྟོང་པ་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་པ་གང་དག་སེམས་ཅན་ཡོངས་སུ་སྨིན་པར་བྱ་བའི་
295b
ཕྱིར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སངས་རྒྱས་ཀྱི་ཞིང་གང་ན་སངས་རྒྱས་ཀྱིས་འདུལ་བའི་སེམས་ཅན་དག་ཡོད་པ་དེར་སངས་རྒྱས་ཀྱི་སྐུ་བྱད་ཀྱིས་སངས་རྒྱས་ཀྱི་ཞིང་མི་མཇེད་ཐམས་ཅད་དབྱངས་དང ། ངག་དང ། སྒྲ་བརྗོད་པ་གཅིག་གིས་གོ་བར་མཛད་དོ། །དགེ་བའི་དོན་དུ་ཞིང་གཅིག་ཏུ། ། ངེད་ཅག་ཐམས་ཅད་གཤེགས་པ་ཡིན། །སངས་རྒྱས་རྣམས་ནི་མི་བཞུགས་ན། །སུས་ཀྱང་དཔལ་ཆེན་མི་ཐོབ་བོ། །ཁྱེད་ཅག་གིས་ནི་བྱང་ཆུབ་ཏུ། །གཅིག་ཏུ་སེམས་ནི་གཞོལ་བྱས་ན། །ཁྱེད་ཅག་ཕྱིན་ཆད་འཁོར་བར་ནི། །སྡུག་བསྔལ་སྐྱེ་བར་མི་འགྱུར་རོ། །ཤཱཀྱ་ཁྱུ་མཆོག་མཆོད་པ་དང ། །དེ་ལ་བསྐོར་བ་བྱ་བའི་ཕྱིར། །འདི་ལྟར་ཁྱེད་ཅག་ཐམས་ཅད་ནི། །ང་དང་ཐབས་ཅིག་མྱུར་དུ་འདེང ། །འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དགུ་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སངས་རྒྱས་ཀྱི་སྐུ་བྱད་ཀྱིས་རེ་རེ་ཞིང་སེམས་ཅན་རྫུ་འཕྲུལ་དང་ལྡན་པ་གངྒཱའི་ཀླུང་གཅིག་གི་བྱེ་མ་སྙེད་དང་ལྷན་ཅིག་ཏུ་དེ་ནས་ཆས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཤཱཀྱ་ཐུབ་པ་ལ་སེམས་ཅན་དེ་དག་གིས་རིན་པོ་ཆེ་
296a
༄#། །སྣ་ཚོགས་ནས་རོལ་མོའི་སྒྲ་དང ། གར་དང ། གླུ་སྣ་ཚོགས་བའི་བར་གྱིས་མཆོད་བ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ། ཁ་ཅིག་གིས་ནི་ཉན་ཐོས་ཀྱི་ཐེག་པར་སྨོན་ལམ་བཏབ་སྟེ། ཐམས་ཅད་ཀྱང་བསམ་པ་ཇི་ལྟ་བ་བཞིན་དུ་ཕྱིར་མི་ལྡོག་པར་གྱུར་ཏོ། །དེའི་ཚེ་དེ་དག་ཆོ་ག་བཞིན་དུ་ཏིང་ངེ་འཛིན་དང ། བཟོད་པ་དང ། གཟུངས་ཐོབ་སྟེ། དགེ་བའི་རྩ་བ་རྣམ་པ་སྣ་ཚོགས་བསྒྲུབས་ནས་རང་རང་གི་ཞིང་དུ་དོང་སྟེ་བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ཅིག་ནི་རང་རྒྱལ་བའི་ལུས་བྱད་ཀྱིས་ཞེས་བྱ་བ་ནས་ཁ་ཅིག་ནི་ཉན་ཐོས་ཀྱི་ལུས་བྱད་ཀྱིས་ཞེས་བྱ་བའི་བར་དང ། ཁ་ཅིག་ནི་ཚངས་པའི་ལུས་བྱད་དང ། ཁ་ཅིག་ནི་བརྒྱ་བྱིན་གྱི་ལུས་བྱད་ཀྱིས་ཞེས་བྱ་བ་ནས་ཁ་ཅིག་ནི་རྒྱལ་པོ་ཆེན་པོ་བཞིའི་ལུས་བྱད་ཀྱིས་ཞེས་བྱ་བའི་བར་དང ། ཁ་ཅིག་ནི་སྲེད་མེད་ཀྱི་བུའི་ལུས་བྱད་དང ། ཁ་ཅིག་ནི་དབང་ཕྱུག་ཆེན་པོའི་ལུས་བྱད་ཀྱིས་ཞེས་བྱ་བའི་བར་དང ། ཁ་ཅིག་ནི་ཀླུའི་ལུས་བྱད་ཀྱིས་ཞེས་བྱ་བའི་བར་དང ། ཁ་ཅིག་ནི་གནོད་སྦྱིན་གྱི་ལུས་བྱད་ཀྱིས་ཞེས་བྱ་བའི་བར་དང ། ཁ་ཅིག་ནི་ལྷ་མ་ཡིན་གྱི་ལུས་བྱད་ཀྱིས་ཞེས་བྱ་བའི་བར་དང ། ཁ་ཅིག་ནི་འཁོར་ལོས་སྒྱུར་བའི་ལུས་བྱད་ཀྱིས་ཞེས་བྱ་བའི་བར་གྱིས་སངས་རྒྱས་ཀྱི་ཞིང་གང་དག་ན་
296b
སེམས་ཅན་ཉན་ཐོས་ཀྱིས་འདུལ་བའི་བར་དུ་ཡོད་པའི་སངས་རྒྱས་ཀྱི་ཞིང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོས་བཅུ་བ་རྣམས་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཞུགས་ཏེ། དེར་ཉན་ཐོས་ཀྱི་ལུས་བྱད་ཀྱི་བར་གྱིས་སེམས་ཅན་རྣམས་ལ་ཆོས་སྟོན་ཏོ། །སངས་རྒྱས་ཀྱི་ཞིང་དེར་ཡང་སེམས་ཅན་ཐམས་ཅད་ཀྱིས་སྣང་བ་དེ་མཐོང་སྟེ། དེ་བཞིན་གཤེགས་པ་ཤཱཀྱ་ཐུབ་པའང་མཐོང་ནས་སེམས་ཅན་དེ་དག་ཤིན་ཏུ་དགའ་བ་དང་མཆོག་ཏུ་དགའ་བ་སྐྱེས་ཤིང་དབང་པོ་རྣམས་ཚིམ་སྟེ་ཐམས་ཅད་སྡུག་བསྔལ་གྱི་ཚོར་བ་རྒྱུན་ཆད་དོ། །དེ་དག་ལ་བདེ་བའི་ཚོར་བའང་བྱུང་ངོ ། །སངས་རྒྱས་ཀྱི་ཞིང་དེར་གང་ཉན་ཐོས་ཀྱི་ལུས་བྱད་ཀྱིས་ཆོས་སྟོན་པ་དེའང་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ཏེ། དེས་བསོད་ནམས་ཆེན་པོ་བསགས་པའི་དགེ་བའི་རྩ་བས་འདི་ལྟ་བུའི་དབྱངས་དང ། སྒྲ་བརྗོད་པས་སངས་རྒྱས་ཀྱི་ཞིང་དེ་ཐམས་ཅད་གོ་བར་བྱེད་པ་འདི་སྐད་ཅེས་སྨྲས་སོ། །སྡུག་པའི་སེམས་ནི་གཞོམ་པར་བྱོས། །སྡིག་པའི་ལྟ་བ་སྤོང་བར་བྱོས། །གང་དུ་འཇིག་རྟེན་མི་འཇུག་པའི། །འཁོར་བའི་ཕ་རོལ་འདོང་བར་བྱོས། །ཁྱེད་ཅག་སྡིག་པའི་སེམས་ཀྱིས་སུ། །ངེས་
297a
༄#། །པར་འབྱུང་བར་མི་ལྟ་བས། །རྒ་བ་དང་ནི་འཆི་བའི་ལུས། །འཁོར་བར་རིང་པོར་ཞུགས་པ་ཡིན། །སྟོན་པ་མཐོང་བ་རྙེད་པར་དཀའ། །དལ་བ་འདི་འདྲ་རྙེད་པར་དཀའ། །ཆོས་ཐོས་པ་ཡང་རྙེད་པར་དཀའ། །དགེ་བྱེད་རབ་ཏུ་རྙེད་པར་དཀའ། །དེ་ལྟར་ཁྱེད་ཀྱིས་གུས་བྱས་ཏེ། །བྱང་ཆུབ་ཏུ་ནི་འདུན་པ་སྐྱེད། །སྡུག་བསྔལ་ཀུན་ལས་ཐར་གྱིས་ལ། །འཇིག་རྟེན་འདྲེན་པར་འགྱུར་བར་བྱོས། །རྟག་པ་དང་ནི་ཆད་པའི་བློས། ། ཆོས་གཉིས་མྱུར་དུ་སྤངས་ནས་ནི། །འདུ་བྱེད་ཐམས་ཅད་བདག་མེད་ལ། །ཚུལ་བཞིན་དུ་ནི་བརྟག་པར་བྱོས། །ཀུན་འབྱུང་སྲེད་དང་སྡུག་བསྔལ་ཡང ། ། ཡེ་ཤེས་ཆུ་ཡིས་བཀྲུ་བར་བྱོས། །ཤཱཀྱ་སེངྒེ་མཆོད་པའི་ཕྱིར། །ཐམས་ཅད་ལྷན་ཅིག་མྱུར་དུ་འདེང ། །དེ་ནས་བྱང་ཆུབ་སེམས་དཔའ་དེ་དག་ཉན་ཐོས་ཀྱི་ལུས་བྱད་ཀྱི་བར་གྱིས་བྱང་ཆུབ་སེམས་དཔའ་རེ་རེ་ཞིང་བྱང་ཆུབ་སེམས་དཔའ་དང ། སེམས་ཅན་རྫུ་འཕྲུལ་དང་ལྡན་པ་གངྒཱའི་ཀླུང་གི་བྱེ་མ་སྙེད་ཚད་མེད་པ་དང་ལྷན་ཅིག་ཏུ་རང་རང་གི་སངས་རྒྱས་ཀྱི་ཞིང་ནས་ཆས་ཏེ། འདིར་དེ་བཞིན་གཤེགས་པ་ཤཱཀྱ་ཐུབ་པ་འཁོར་དང་བཅས་པ་ལ་ལན་གསུམ་བསྐོར་བ་བྱས་ནས་བཅོམ་
297b
ལྡན་འདས་ཤཱཀྱ་ཐུབ་པ་ལ་དེ་དག་གིས་རིན་པོ་ཆེ་སྣ་ཚོགས་དང ། རས་བཅོས་བུ་སྣ་ཚོགས་དང ། ཆོས་གོས་སྣ་ཚོགས་དང ། རྒྱན་དང ། རྒྱན་གྱི་ལྷབ་ལྷུབ་སྣ་ཚོགས་དང ། གདུགས་དང ། རྒྱལ་མཚན་དང ། བ་དན་སྣ་ཚོགས་དང ། མེ་ཏོག་སྣ་ཚོགས་དང ། སྤོས་སྣ་ཚོགས་དང ། རོལ་མོའི་སྒྲ་སྣ་ཚོགས་དང ། བསྟོད་པ་སྣ་ཚོགས་དང ། གླུ་སྣ་ཚོགས་དང ། གར་སྣ་ཚོགས་ཀྱིས་མཆོད་པ་བྱས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རང་རང་གི་སངས་རྒྱས་ཀྱི་ཞིང་དུ་ཕྱིན་ནས་རང་རང་གི་སྟན་དག་ལ་འཁོད་དོ། །དེ་བཞིན་དུ་རང་རང་གི་འཁོར་རྣམས་ལ་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་བ་དང་གྲགས་པ་ནས་སེམས་ཅན་ཐམས་ཅད་ཡོངས་སུ་སྨིན་པར་མཛད་པའི་ཡོན་ཏན་གྱི་ཕན་ཡོན་གྱི་བར་བརྗོད་པར་གྱུར་ཏེ། དེ་ནས་སངས་རྒྱས་ཀྱི་ཞིང་དེ་དག་ན་འཁོར་དེའི་སེམས་ཅན་གྲངས་མེད་པ་དཔག་ཏུ་མེད་པ་ཡོད་པ་དེ་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བཞིན་དུ་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པར་ཡང་སེམས་བསྐྱེད་དེ། ཐམས་ཅད་ཀྱང་ཕྱིར་མི་ལྡོག་པར་གྱུར་ཏོ། །དེའི་ཚེ་དེ་དག་གིས་ཏིང་ངེ་འཛིན་དང ། གཟུངས་དང ། བཟོད་པ་སྣ་ཚོགས་
298a
༄#། །ཐོབ་ནས་དགེ་བའི་རྩ་བ་རྣམས་བསྐྱེད་དོ། །སེམས་ཅན་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདིར་གང་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་པའི་བཀོད་པ་དེ་ལྟ་བུའང་མཐོང་ངོ ། །དེ་དག་ཐམས་ཅད་དེ་བཞིན་གཤེགས་པའི་ཡོན་ཏན་རྣམས་ལ་ངོ་མཚར་ཐོབ་ཅིང་རྨད་དུ་བྱུང་བ་ཐོབ་བོ། །དེའི་ཚེ་གང་དག་སྔོན་ཆད་སེམས་མ་བསྐྱེད་པའི་སེམས་ཅན་གངྒཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་དུ་རང་སངས་རྒྱས་ཀྱི་ཐེག་པ་དང ། དེ་བཞིན་དུ་ཉན་ཐོས་ཀྱི་ཐེག་པར་ཡང་སེམས་དག་བསྐྱེད་དེ།་དེ་དག་ཐམས་ཅད་ཕྱིར་མི་ལྡོག་པའི་ས་ཐོབ་པར་གྱུར་ཏོ། །དེ་བཞིན་དུ་འཁོར་ལོས་བསྒྱུར་བའི་ལུས་བྱད་ཀྱིས་ཞེས་བྱ་བའི་བར་དང ། ཕྱིར་མི་ལྡོག་པའི་ས་ཐོབ་པར་གྱུར་ཏོ། །ཞེས་བྱ་བའི་བར་དུ་ཡིན་ཏེ། སེམས་ཅན་ཡོངས་སུ་སྨིན་པར་མཛད་པའི་ཕྱིར་ཇི་ལྟར་བཅོམ་ལྡན་འདས་ཆོ་འཕྲུལ་ཆེན་པོ་སངས་རྒྱས་ཀྱི་ཡུལ་གྱི་རྒྱུ་མཐུན་པར་ཏིང་ངེ་འཛིན་དེ་ལྟ་བུ་ལ་སྙོམས་པར་ཞུགས་པ་བཞིན་ནོ། །འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས།
298b
ལེའུ་དྲུག་པའོ།། །།དེ་ནས་བདུད་སྡིག་ཅན་གྱི་དེ་བཞིན་གཤེགས་པ་འཁོར་དང་བཅས་པ་ཉིད་ཀྱི་ཕོ་བྲང་ན་དེ་བཞིན་གཤེགས་པའི་དབྱིངས་ན་བཞུགས་པ་མཐོང་ནས་མཆོག་ཏུ་ཡིད་མི་བདེ་སྟེ་ལུས་ཐམས་ཅད་རྡུལ་ཐོན་ཞིང་མཆི་མ་དང ། བྱུང་ནས་མི་དགའ་བར་གྱུར་ཏོ། །དེ་བདུད་སྡིག་ཅན་གྱིས་གནས་ཐམས་ཅད་དུ་རྒྱུ་བར་བྱེད། རྣམ་པར་རྒྱུ་བར་བྱེད། འཇུག་པར་བྱེད། འབྱུང་བར་བྱེད། ལྡང་བར་བྱེད། རྒྱུག་པར་བྱེད། ཀུན་ཏུ་རྒྱུག་པར་བྱེད། གླལ་བར་བྱེད། འཛུམ་པར་བྱེད། ཤུགས་རིང་དུ་འབྱིན་པར་བྱེད། ཁ་ལ་ལྕེས་ལྡག་པར་བྱེད། མིག་འཛུམ་པར་བྱེད། ལག་པ་གཉིས་བརྐྱང་ཞིང་བསྐུམ་པར་བྱེད། མགོ་ལ་ལག་པ་གཉིས་ཀྱིས་རྡོབ་པར་བྱེད། མགྲིན་པ་དང ། ནུ་མ་ལ་མཉེད་པར་བྱེད་དེ། དེ་མཐོང་བས་བདུད་ཀྱིས་གནས་ན་གནས་པའི་སེམས་ཅན་ཐམས་ཅད་གནོད་པ་དང ། མངོན་པར་མི་དགའ་བ་དང ། ཡིད་མི་བདེ་བར་གྱུར་ཏོ། །དེ་ནས་བདུད་ཤོར་བ་ནམ་མཁའི་ཤིང་ཞེས་བྱ་བ་དེས་བདུད་སྡིག་ཅན་ལ་ཚིགས་སུ་བཅད་པས་དྲིས་པ། འཁྲུག་སེམས་ཡིད་རབ་མི་བདེ་བས། །ཅི་སླད་དེ་ལྟར་ཁྱོད་རྒྱུག་ཅིང ། །ཀུན་ལ་དགའ་བར་མི་དགོངས་པས། །གང་དུ་ཡང་ནི་དགྱེས་མི་མངའ། །བདུད་
299a
༄#། །སྡིག་ཅན་གདོང་མཆི་མ་དང་བཅས་པས་འདི་སྐད་ཅེས་སྨྲས་སོ། །གཽ་ཏ་མ་སྟོབས་ཅན་མཐོང་ནས་ནི། །ང་ཡི་སྙིང་ནི་རྣམ་གས་ནས། །ལུས་ཀུན་ནས་ནི་རྡུལ་ཐོན་ཅིང ། །གདོང་ཡང་མཆི་མས་གང་བ་ཡིན། །སེམས་ཅན་ཐམས་ཅད་མཐུན་པ་རུ། །ཇི་ལྟར་ཐོས་པ་བཞིན་དུ་དེར། །ཚོགས་ཆེན་རོལ་གྱིས་དོང་བས་ན། །ང་ཡི་ཡུལ་ནི་སྟོངས་པར་བྱས། །ནམ་མཁའ་དང་ནི་མཚུངས་པའི་ཡུལ། །ཕྱོགས་བཅུ་ལས་ནི་ལྷགས་པ་ཡིས། །དེ་ལ་བསྐོར་བར་བྱས་ནས་སུ། །བྱེ་བ་མང་པོས་ཡོངས་སུ་བསྐོར། །བདུད་རྣམས་ཐམས་ཅད་འཁོར་བཅས་ཏེ། །དེ་ལ་ཡང་ནི་སྐྱབས་སོང་བས། །ང་ཡི་དཔུང་ནི་མ་མཐོང་སྟེ། །གང་ནའང་ང་ཡི་ཕྱོགས་མེད་དོ། །དེ་ནས་བདུད་སྡིག་ཅན་ལ་བདུད་ཤོར་བ་ནམ་མཁའི་ཤིང་དེས་འདི་སྐད་ཅེས་སྨྲས་སོ། །བདག་ཅག་ཐམས་ཅད་འཁོར་བཅས་ཏེ། །གོ་ཆ་སྲ་བ་དག་བགོས་ནས། །རལ་གྲི་འཁོར་ལོ་མདའ་པོ་ཆེས། །དེ་ཡི་ལུས་ནི་ཕྱེ་མར་རླག་།སྡིག་ཅན་གྱིས་སྨྲས་པ། དེ་ལ་ཡང་ནི་སྐྱབས་སོང་ཞིང ། །དེར་ཡང་རང་ཉིད་སོང་བས་ནི། །དེ་ལ་དམག་ནི་ཡང་དག་ཕུལ། །ང་ནི་བཅིང་པ་དམ་པོས་བཅིངས། །དེ་ནས་བདུད་ཤོར་བ་ནམ་མཁའི་ཤིང་དེས་སྨྲས་པ། ཐབས་
299b
རྣམས་ཀུན་གྱིས་ཅི་བགྱིད་ཀྱང ། །དགྲ་ནི་དབང་དུ་མི་འགྱུར་ཏེ། །མཛའ་བོའི་གཟུགས་ཀྱིས་བསླུས་བགྱིས་ན། །དེ་ལྟ་ན་ནི་གསད་པར་ནུས། སྡིག་ཅན་གྱིས་སྨྲས་པ། མཛའ་བོའི་གཟུགས་ཀྱིས་དེར་འགྲོ་བར། །འདི་ལྟར་བདག་གིས་དེར་བསམ་ན། །རང་གི་མགུལ་ན་དྲི་ང་བའོ། །རོ་མྱགས་འཇིགས་སུ་རུང་བ་མཐོང ། །ནམ་མཁའི་ཤིང་གིས་སླར་སྨྲས་པ། བདུད་དང་ཀླུ་དང་བསམ་གཏན་པའི། །ལུས་གསུམ་དག་ཏུ་བཤད་པ་ལ། །བདག་ཅག་གི་ནི་ཡུལ་བཅོམ་ཡང ། །ཀླུ་རྣམས་ཀྱི་ནི་ཡུལ་བརྟན་ནོ། །ཀླུ་དེ་དག་ཀྱང་གཟི་བརྗིད་ཆེ། །དམག་རྣམས་མང་ཞིང་སྟོབས་ཀྱང་ཚེ། །དེ་དག་གི་ནི་ཡུལ་མཆིས་པ། །ཀུན་ཏུ་གཞན་གྱིས་མི་ཐུབ་ལགས། །འདོད་པའི་ཁམས་ན་གང་སུ་དག་།ཀླུ་ཡི་བདག་པོ་གནས་གྱུར་པ། །དེ་དག་རྣམས་ལ་གཽ་ཏ་མ། །ཐལ་བར་རླག་པར་མྱུར་དུ་བསྒོ། །སྡིག་ཅན་གྱིས་སྨྲས་པ། ཀྱེ།་བསོད་ནམས་ཤེས་རབ་ཆེན་པོ་ཅན། །ཀླུ་ཡི་གནས་སུ་ཉིད་སོང་ལ། །གཽ་ཏ་མ་དང་དམག་འགྱེད་པར། །ཐམས་ཅད་ལ་ནི་ཁྱོད་ཀྱིས་བསྒོ། །དེས་སྨྲས་པ། དེ་བཞིན་དུ་བགྱིའོ། །ཞེས་ནས་དམག་བརྒྱ་སྟོང་གོ་བགོས་པ་དེ་དག་ལ་ལག་པ་བསྒྲང་སྟེ་བསྒྲགས་པ་ནི། ཀླུ་ཡི་རྟེན་དུ་བདག་ཅག་འདེང ། གཽ་ཏ་མ་དང་དམག་འགྱེད་ཅིང ། །སྲོག་དང་བྲལ་བར་
300a
༄#། །བྱེད་དུ་གཞུག་།དེང་ནི་བདག་ཅག་གྲོགས་བྱ་བར། །ཐམས་ཅད་ལ་ནི་བསྒོ་བར་བྱ། །དེ་ན་འཁོད་པ་དེ་དག་ཀྱང་གང་དུ་ཡོངས་སུའང་འགྲོ་བར་མ་ནུས་པ་དང ། ཤོར་བ་ནམ་མཁའི་ཤིང་དེ་གདོང་མཆི་མ་དང་བཅས་ཤིང་སྤུ་ཟིང་ཞེས་བྱེད་པར་གྱུར་ཏེ། ཐལ་མོ་རབ་ཏུ་སྦྱར་བ་བྱས་ནས་སྡིག་ཅན་ལ་སྨྲས་པ། བདག་ཅག་གིས་ནི་གང་དུ་ཡང ། །མཆི་བར་བགྱི་བའི་རྔོ་མ་ཐོགས། །རྫུ་འཕྲུལ་བརྟན་པ་གཽ་ཏ་མ། །དྲང་སྲོང་གི་ནི་སྒྱུ་ལགས་སོ། །བདག་ཅག་ཐམས་ཅད་རྐང་པ་བཅིངས། །ལུས་རྣམས་ཀུན་ལ་རྡུལ་ཡང་བྱུང ། །གང་གིས་དགྲ་ལས་ཁྱེད་རྒྱལ་བར། །གཞན་ཞིག་ཀྱང་ནི་མཛད་པར་གསོལ། །བདུད་སྡིག་ཅན་དེ་སྡུག་བསྔལ་ཞིང་ཡིད་མི་བདེ་ནས་མྱ་ངན་དུ་གྱུར་པ་དེ་ལྟ་བུའི་བློ་སྐྱེས་ཏེ། གང་བདག་གིས་ཀླུའི་རྟེན་ཐམས་ཅད་དུ་གནག་ཀུན་ཏུ་སྨྲ་བར་བྱེད་པ་དང ། མངོན་པར་མི་དགའ་བ་སྐྱེད་པར་བྱེད་པ་དང ། ཀླུ་ཐམས་ཅད་ཀུན་ཏུ་གཤེ་བར་བྱེད་པའི་བདུད་ཀྱི་སྟོབས་དེ་ལྟ་བུ་ཡང་དག་པར་རྗེས་སུ་དྲན་པར་བྱ་གོར་མཆག་སྙམ་མོ། །དེ་ནས་དེའི་ཚེ་བདུད་སྡིག་ཅན་གྱི་ཀླུའི་རྟེན་ཐམས་ཅད་དུ་ཤ་སྦྲང་དང ། སྦྲང་བུ་མཆུ་རིང་དང ། སྦྲང་པུ་གདུག་པ་རྣམས་སྤྲུལ་ཏོ། །ཐམས་ཅད་དྲི་འབས་
300b
བཀང་ངོ ། །རྡུལ་ང་བྱུང་བ་དང་མངོན་པར་མི་དགའ་བར་བྱས་སོ། །དེ་བཞིན་དུ་ཀླུ་དང ། ཀླུ་ཆེན་པོ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ཐམས་ཅད་མངོན་པར་མི་དགའ་ནས་དེ་དག་ཐམས་ཅད་ཀྱིས་རྣམ་པར་བལྟས་ཏེ་བདག་ཅག་ལ་ཅོ་འདྲི་བར་བྱེད་པ་སུ་ཡིན་སྙམ་ན། དེ་དག་གིས་མ་ཤེས་ཤིང་མ་མཐོང་ངོ ། །གླིང་བཞི་པ་འདིའི་ཀླུ་དང ། ཀླུ་ཆེན་པོ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་གང་དག་ཡིན་པ་དེ་དག་ཐམས་ཅད་ཀྱང་ཁྲོ་བས་ཟིལ་གྱིས་ནོན་ནས་དེ་དག་ཐམས་ཅད་ཀྱིས་ཀྱང་རང་གི་གནས་བོར། ཀླུའི་རྒྱལ་པོ་དགའ་བོ་དང་ཉེ་དགའ་གཉིས་འཁོར་བརྒྱ་སྟོང་ཕྲག་དུ་མས་ཀྱང་རང་གི་གནས་བོར་ནས་རིའི་རྒྱལ་པོ་རི་རབ་ཀྱི་འདབས་ན་རི་ཁ་ལ་ཏི་ཡ་ཞེས་བྱ་བ་ཡོད་དེ། །རི་ཁ་ལ་ཏི་ཡ་དེའི་རྩེ་མོ་ན་དྲང་སྲོང་ཐུབ་པ་རྣམས་ཀྱི་གནས་ཀྱི་རྟེན་ན་ཀུན་རྟེན་ཅེས་བྱ་བ་རྒྱར་དཔག་ཚད་བཞི་ཁྲི་པ་ལྷ་རྫས་ཀྱི་རིན་པོ་ཆེ་སྣ་བདུན་གྱིས་བརྒྱན་པ་བཞི་ཡོད་པ། དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་རྟེན་ཅིང་བཞུགས་སོ། །དེར་དེ་དག་ཞུགས་མ་ཐག་ཏུ་འདི་ལྟ་བུའི་ལུས་ཆུང་དུར་གྱུར་ཏེ། དཔེར་ན། མིག་སྨན་བསྐུ་བའི་ཐུར་མ་བཞིན་ནོ། །དེ་དག་ཀྱང་རང་ཁྲོས་པའི་མཐུས་རེ་རེའང་འདི་ལྟ་བུའི་ལུས་རི་རབ་ཙམ་དུ་ཡང་དག་པར་ཤེས་ཏེ།
301a
༄#། །དེ་དག་གིས་སྐད་འབྱིན་ཀྱང་མ་ནུས་སོ། །དེ་ནས་འགྲོ་བར་ཡང་མ་ནུས་ཏེ། མྱ་ངན་ཆེན་པོ་དང ། ཁྲོས་བས་ཟིལ་གྱིས་ནོན་ནས་དེར་འཁོད་དོ། །དེ་བཞིན་དུ་ཀླུའི་རྒྱལ་པོ་ཆེན་པོ་རྒྱ་མཚོ་འཁོར་བྱེ་བ་བརྒྱ་སྟོང་ཕྲག་དུ་མ་དང ། དེ་བཞིན་དུ་ས་སྲུང་གི་བུ་ཞེས་བྱ་བའི་བར་དང ། དེ་བཞིན་དུ་ཤིན་ཏུ་བརྟན་ཞེས་བྱ་བའི་བར་དང ། དེ་བཞིན་དུ་འཇོག་པོ་ཞེས་བྱ་བའི་བར་དང ། དེ་བཞིན་དུ་མ་དྲོས་པ་ཞེས་བྱ་བའི་བར་དང ། དེ་བཞིན་དུ་བཏང་བཟུང་ཞེས་བྱ་བའི་བར་དང ། དེ་བཞིན་དུ་རྒྱ་མཚོས་བྱིན་ཞེས་བྱ་བའི་བར་དང ། དེ་བཞིན་དུ་ཆུ་ལྷས་བྱིན་ཞེས་བྱ་བའི་བར་དང ། དེ་བཞིན་དུ་ཁྱིམ་བདག་གིས་བྱིན་ཞེས་བྱ་བའི་བར་དང ། དེ་བཞིན་དུ་ཆུ་བས་བྱིན་ཞེས་བྱ་བའི་བར་དང ། དེ་བཞིན་དུ་ཆུ་སོག་མ་མེད་ཀྱིས་བྱིན་ཞེས་བྱ་བའི་བར་དང ། དེ་བཞིན་དུ་རི་བོས་བྱིན་ཞེས་བྱ་བའི་བར་དང ། དེ་བཞིན་དུ་པ་ལང་མགོ་ཞེས་བྱ་བའི་བར་དང ། དེ་བཞིན་དུ་རྒྱན་སྐྱེས་ཞེས་བྱ་བའི་བར་དང ། དེ་བཞིན་དུ་ཨེ་ལའི་འདབ་མ་ཞེས་བྱ་བའི་བར་དང ། དེ་བཞིན་དུ་ལག་པའི་ཚིགས་མི་མངོན་པ་ཞེས་བྱ་བའི་བར་དང ། དེ་བཞིན་དུ་སྒྲ་བསགས་ཞེས་བྱ་བའི་བར་དང ། དེ་བཞིན་དུ་མཚོ་གྱད་ཅེས་བྱ་བའི་བར་དང ། དེ་བཞིན་དུ་
301b
སྟོབས་ཀྱིས་རྒྱུ་ཞེས་བྱ་བའི་བར་དང ། དེ་བཞིན་དུ་ཏི་སེའི་གངས་མཐོ་བ་ཞེས་བྱ་བའི་བར་དང ། དེ་བཞིན་དུ་ཆུའི་ཤུགས་ཞེས་བྱ་བའི་བར་དང ། དེ་བཞིན་དུ་གཙུག་ཕུད་སྔོན་པོ་ཞེས་བྱ་བའི་བར་དང ། དེ་བཞིན་དུ་གསེར་སེར་སྐྱ་ཞེས་བྱ་བའི་བར་དང ། དེ་བཞིན་དུ་རྩཝ་སྔོན་པོ་ཞེས་བྱ་བའི་བར་དང ། དེ་བཞིན་དུ་གཤེ་བའི་ཤིང་ཞེས་བྱ་བའི་བར་དང ། དེ་བཞིན་དུ་མིག་གསལ་ཞེས་བྱ་བའི་བར་དང ། དེ་བཞིན་དུ་གླང་པོ་ཟད་ཅེས་བྱ་བའི་བར་དང ། དེ་བཞིན་དུ་ནེན་པོས་བྱིན་ཞེས་བྱ་བའི་བར་དང་དེ་བཞིན་དུ་གནས་ན་རྒྱུ་ཞེས་བྱ་བའི་བར་དང ། དེ་བཞིན་དུ་གཤོལ་ངན་ཞེས་བྱ་བའི་བར་དང ། དེ་བཞིན་དུ་ཨེ་ལའི་གདོང་ཞེས་བྱ་བའི་བར་དང ། དེ་བཞིན་དུ་མིག་དམར་ཞེས་བྱ་བའི་བར་དང ། དེ་བཞིན་དུ་ཡིད་འཕྲོག་ཅེས་བྱ་བའི་བར་དང ། དེ་བཞིན་དུ་རབ་མཆོག་ཅེས་བྱ་བའི་བར་དང ། དེ་བཞིན་དུ་འཛམ་བུའི་གླིང་འདི་ན་ཀླུའི་རྒྱལ་པོ་ལྔ་ཁྲི་དྲུག་སྟོང་གང་དག་ཡིན་པ་དེ་དག་ཐམས་ཅད་ཀླུའི་རྒྱལ་པོར་དེའང་འཁོར་བརྒྱ་སྟོང་ཕྲག་དུ་མ་དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། །གླའི་བརྒྱད་ཁྲི་བཞི་སྟོང་ནས་གླིང་རེ་རེ་ནས་ཀྱང་ཀླུ་ཆེན་པོ་བརྒྱ་སྟོང་ཕྲག་དུམས་རང་རང་གི་གནས་པོར་ནས་གནས་རྟེན་དེར་སྐྱབས་ཀྱི་དོན་དུ་ཞུགས་སོ། །དེ་བཞིན་
302a
༄#། །དུ་བྱང་གི་སྒྲ་མི་སྙན་ནས་ཀླུའི་རྒྱལ་པོ་ལུས་འབིགས་པའི་ཁབ་ཅེས་བྱ་བ་དང ། ཀླུའི་རྒྱལ་པོ་རྒྱུ་བ་ཆེན་པོ་ཞེས་བྱ་བ་དེ་གཉིས་རེ་རེའང་ཀླུ་དང ། ཀླུ་ཆེན་པོ་དང ། ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་ཏུ་ཡོངས་སུ་བསྐོར་ཅིང་དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་བརྟན་ཏོ། ཤར་གྱི་ལུས་འཕགས་ཀྱི་གླིང་ནས་ཀླུའི་རྒྱལ་པོ་ཟླ་བ་སྲུང་ཞེས་བྱ་བ་དང ། ཀླུའི་རྒྱལ་པོ་དབྱིག་གཏོང་ཞེས་བྱ་བ་དེ་གཉིས་རེ་རེའང་ཀླུ་དང ། ཀླུ་ཆེན་པོ་དང ། ཀླུའི་རྒྱལ་པོ་བྱེ་བ་བརྒྱ་སྟོང་ཕྲག་དུ་མས་ལྷན་ཅིག་ཡོངས་སུ་བསྐོར་ཅིང་མདུན་དུ་དབར་ཏེ་དྲང་སྲོང་ཐུབ་པའི་གནས་རྟེན་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། །བ་ལང་སྤྱོད་ཀྱི་གླིང་ནས་ཀླུའི་རྒྱལ་པོ་རིན་པོ་ཆེའི་ཕྲེང་བཅན་ཞེས་བྱ་བ་དང ། ཀླུའི་རྒྱལ་པོ་བ་ལང་གི་འོད་ཀྱི་ཕྲེང་བ་ཅན་ཞེས་བྱ་བ་དེ་གཉིས་རེ་རེའང་ཀླུ་དང ། ཀླུ་ཆེན་པོ་དང ། ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ལྷན་ཅིག་ཏུ་མདུན་དུ་བདར་ཞིང་དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་ཞུགས་སོ། ཡང་དེའི་ཚེ་གླིང་བཞི་པ་འདི་དང ། གླིང་གཞན་བརྒྱ་སྟོང་ཕྲག་བརྒྱད་ཅུ་ན་ཀླུ་དང ། ཀླུ་ཆེན་པོ་དང ། ཀླུའི་སྐྱེ་གནས་པ་ཀླུ་སྒོ་ང་ལས་སྐྱེས་པ་དང ། ཀླུ་མངལ་ནས་
302b
སྐྱེས་པ་དང ། དྲོད་གཤེར་ལས་སྐྱེས་པ་དང ། རྫུས་ཏེ་སྐྱེས་པ་ཕོ་དང ། མོ་དང ། ཁྱེའུ་དང ། བུ་མོའང་རུང་གང་སུ་དག་ཡོད་པ་སྐད་ཅིག་དེ་ལ་གནག་དེར་བརྟེན་པར་མ་གྱུར་པ་གཅིག་ཀྱང་མེད་དེ། དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་ཞུགས་སོ། །དེ་དག་ཐམས་ཅད་ཞུགས་མ་ཐག་ཏུ་རེ་རེའང་འདི་ལྟ་བུའི་ལུས་ཆུང་དུར་གྱུར་ཏེ། དཔེར་ན། མིག་སྨན་བསྐུ་བའི་ཐུར་མ་བཞིན་ནོ། །དེ་དག་ཀྱང་རང་ཁྲོས་པའི་མཐུས་རེ་རེའང་འདི་ལྟ་བུའི་ལུས་རི་རབ་ཙམ་ཆེན་པོར་ཡང་དག་པར་རྗེས་སུ་མཐོང་ངོ ། །དེ་ནས་དེའི་ཚེ་བདུད་སྡིག་ཅན་གྱིས་གནས་རྟེན་དུ་ཀླུའི་སྐྱེ་གནས་པ་ཐམས་ཅད་འདུས་པ་དང ། ཐམས་ཅད་ལུས་ཆུང་དུར་མཐོང་ངོ ། །དེ་མཐོང་བས་ཤས་ཆེར་འཁྲུགས་ཤིང་ཀུན་ཏུ་འཁྲུགས་ཏེ་སྐྲག་ནས་རང་གི་སྐྱེ་བོ་ལ་འདི་སྐད་ཅེས་སྨྲས་སོ། །འབྱུང་བ་ཆེན་པོ་ཀླུ་རྣམས་ཐམས་ཅད་གཡོས། །དྲང་སྲོང་གནས་པ་དེར་ན་འདུས་ནས་སུ། །ཐམས་ཅད་སྟོབས་དང་གཟུགས་དང་དཔལ་ལས་ཉམས། །དགེ་སྦྱོང་མདངས་ཀྱི་སྟོབས་ལ་བལྟ་བར་བྱོས། །དེ་ནས་བདུད་ཤོར་བ་གཞན་ཚུལ་ཁྲིམས་རྟེན་ཞེས་བྱ་བ་དེས་སྨྲས་པ། ཐུགས་མི་དགྱེས་པ་མ་མཛད་བདག་ལ་གསོན། །ཀླུ་རྣམས་བདག་ཉིད་རྩེ་བ་འདི་ལགས་ཏེ། །འདི་ལྟར་ཤཱ་ཀྱའི་བུ་ནི་ཕྱེར་རློག་
303a
༄#། །པའི། །ཚོགས་ཅན་འདུས་པ་ལ་ནི་མངོན་བརྟག་མཛོད། །སྡིག་ཅན་གྱིས་སྨྲས་པ། བློ་མཆོག་དེར་ནི་མྱུར་དུ་འགྲོ་བར་བྱོས། །ཀླུ་ཡི་ཚོགས་ནི་ཐམས་ཅད་སྤྲོ་བར་བྱོས། །ཅི་སྟེ་ཤཱཀ་བུ་ཚོགས་བཅས་བསད་ནུས་ན། །ཀླུ་རྣམས་ཀྱི་ནི་ཡུལ་ཡང་མཆོག་ཏུ་འགྱུར། །དེ་ནས་བདུད་ཤོར་བ་ཚུལ་ཁྲིམས་རྟེན་དེ་བདུད་ཀྱི་གནས་དེ་ནས་སྲོག་ཆགས་བརྒྱད་ཁྲི་དང་ལྷན་ཅིག་ཆས་སོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པ་སྔོན་གྱི་སྨོན་ལམ་མཐར་ཕྱིན་པས་དྲང་སྲོང་ཐུབ་པ་ཐམས་ཅད་དབང་དུ་མཛད། སེམས་ཅན་ཐམས་ཅད་ཡོངས་སུ་སྨིན་པར་མཛད། སངས་རྒྱས་ཀྱི་ཡུལ་ཐམས་ཅད་ཀྱི་ཆོ་འཕྲུལ་བྱིན་གྱི་རླབས་ཀྱི་རྒྱུ་མཐུན་པ་བཤད་པ་ཡང་དག་པར་བསྟན། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་སྐྱོ་བར་མཛད། ལྷ་དང ། ཀླུ་དང ། གནོད་སྦྱིན་ཞེས་བྱ་བ་ནས་མི་དང ། མི་མ་ཡིན་པ་ཐམས་ཅད་རབ་ཏུ་དགའ་བར་མཛད། སངས་རྒྱས་ཀྱི་ཞིང་འདི་ཐམས་ཅད་ཤིན་ཏུ་ཡོངས་སུ་སྦྱོར་བ་མཛད། སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱི་ནང་ན་སངས་རྒྱས་ཀྱི་ཞིང་འདི་མཆོག་ཏུ་ཆེས་གཟི་བརྗིད་དང་ལྡན་པ་དང ། ཆེས་སྐལ་པ་དང་ལྡན་པ་དང ། ཆེས་བསོད་ནམས་ཀྱི་ས་བོན་བྱེད་
303b
པའི་མདངས་དང་ལྡན་པ་དང ། སངས་རྒྱས་ཀྱི་ཞིང་ཐམས་ཅད་ཀྱི་མཆོད་པར་འོས་པ་མཛད་དེ། དེ་ནས་དེ་བཞིན་གཤེགས་པས་རྫུ་འཕྲུལ་མངོན་པར་འདུ་མཛད་པ་རྒྱུན་བཅད་དོ། །དེ་ལ་སངས་རྒྱས་ཀྱི་ཞིང་འདི་ན་སེམས་ཅན་གང་དག་ཡོད་པ་དེ་དག་ཐམས་ཅད་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་ཏེ། དེ་དག་ཐམས་ཅད་བཅོམ་ལྡན་འདས་ཀྱི་ཤེས་པ་སོ་སོར་སྦྱངས་སོ། །དེ་བཞིན་གཤེགས་པས་སངས་རྒྱས་ཐམས་ཅད་ཀྱི་ཡུལ་གྱི་རྒྱུ་མཐུན་པའི་ཆོ་འཕྲུལ་གྱི་བྱིན་གྱི་རླབས་ཀྱི་ཏིང་ངེ་འཛིན་སྟོབས་རྒྱུན་བཅད་པ་དང ། དེའི་ཚེ་སྔོན་ཇི་ལྟར་བཞུགས་པ་བཞིན་དུ་ཡང་དག་པར་སྣང་སྟེ། དེ་དེ་ལྟར་ཤིན་ཏུ་ལྷམ་མེ། ལྷན་ནེ། ལྷང་ངེར་བཞུགས་སོ། །དེ་དེའི་བར་དུའང་རང་གི་གཟི་བརྗིད་ཀྱི་འོད་ཟེར་རྣམས་ཀྱིས་སངས་རྒྱས་ཀྱི་ཞིང་ཐམས་ཅད་སྣང་བས་ཁྱབ་པར་མཛད་ནས་བཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱ་སྟོང་ཕྲག་དུ་མ་དེ་དག་ཐམས་ཅད་ངོ་མཚར་ཐོབ་ཅིང་རྨད་དུ་བྱུང་བ་ཐོབ་སྟེ། བཅོམ་ལྡན་འདས་ལ་མེ་ཏོག་དང ། དྲི་དང ། ཕྱེ་མ་དང ། རིན་པོ་ཆེ་དང ། རས་བཅོས་བུ་དང ། ཆོས་གོས་དང ། ཕྱང་འཕྲུལ་དང ། རྒྱན་སྣ་ཚོགས་དང ། རོལ་མོའི་སྒྲ་སྣ་ཚོགས་ཀྱིས་མཆོད་པ་བྱས་ཏེ་བསྐོར་བ་བྱས་ནས་སྤྱན་སྔར་
304a
༄#། །འཁོད་དོ། །དེ་བཞིན་དུ་བཅོམ་ལྡན་འདས་ཀྱི་ཉན་ཐོས་རྣམས་ཞེས་བྱ་བ་ནས་དེ་བཞིན་དུ་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་དང ། ཡི་དྭགས་དང ། ཤ་ཟ་དང ། སྲུལ་པོ་དང ། ལུས་སྲུལ་པོ་དང ། མི་དང ། མི་མ་ཡིན་པ་ཐམས་ཅད་ཀྱི་བར་དེ་དག་ཐམས་ཅད་ཀྱིས་བཅོམ་ལྡན་འདས་ལ་མེ་ཏོག་དང ། དྲི་དང ། ཕྱེ་མ་དང ། རིན་པོ་ཆེ་སྣ་ཚོགས་དང ། རས་བཅོས་བུ་དང ། ཆོས་གོས་དང ། ཕྱང་འཕྲུལ་དང ། རྒྱན་སྣ་ཚོགས་ཞེས་བྱ་བ་ནས་མཆོད་པའི་བར་དུ་བྱས་ཏེ་བསྐོར་བ་བྱས་ནས་ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། །བདུད་ཤོར་བ་ཚུལ་ཁྲིམས་རྟེན་བདུད་ཀྱི་རིས་བརྒྱད་ཁྲི་དང་དེ་ནས་འྫམྦུའི་གླིང་འདིར་བབས་ནས་དགེ་སྦྱོང་གཽ་ཏ་མས་སྐུ་ཡངས་པ་ཀུན་ཏུ་བསྟན་པ་ཇི་ལྟར་རྒྱུན་བཅད་པ་མཐོང་སྟེ། དེ་ཡུལ་མ་ག་དྷ་ན་བཞུགས་པར་ཀུན་ཏུ་སྣང་ངོ ། །དེ་བདག་ཅག་གིས་སྐྲག་པས་སྒྱུའི་སྟོབས་ལས་མ་ཉམས་སམ་སྙམ་ཞིང ། ད་ལྟ་ན་འཁོར་དང་བཅས་ཏེ་འདུས་པའི་ནང་དུ་འདུག་ན། དེ་བདག་ཅག་གི་ཕྱིར་འདུག་ནས་སྡིག་པ་མི་བྱེད་དམ་སྙམ་སྟེ། གང་བདག་ཅག་གིས་
304b
དེར་དང་པོར་སོང་ནས་འདི་ལ་རྒྱུ་གང་ཡིན་པར་འགྱུར་བ་མཉན་པར་བྱ་གོར་མ་ཆག་སྙམ་མོ། །དེ་ནས་བདུད་ཤོར་བ་ཚུལ་ཁྲིམས་རྟེན་འཁོར་དང་བཅས་ཏེ་དེ་ནས་བབས་ནས་བཅོམ་ལྡན་འདས་ག་ལ་བ་དེ་ལོགས་སུ་སོང་སྟེ་ཕྱིན་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ། དེའི་ཚེའང་དེས་ཚིགས་སུ་བཅད་པ་སྤོབས་པར་བྱས་པ།་ཁྱོད་ཀྱིས་ནད་ནི་ཆེན་པོ་དག་།རྒ་ཤིའི་མཚོ་ལས་མ་རྒལ་ཏོ། །འདི་ལྟར་སེམས་ཅན་སླུ་བྱེད་ན། །བྱང་གྲོལ་དུ་ནི་ཇི་ལྟར་ཞུགས། །དེ་ནས་བཅོམ་ལྡན་འདས་ཀྱི་བདུད་ཤོར་བ་ཚུལ་ཁྲིམས་རྟེན་ལ་ཚིགས་སུ་བཅད་ནས་སླར་བཀའ་སྩལ་པ། ང་ནི་སེམས་ཅན་ཆུ་བོ་རྒལ། །ང་ལ་ཡང་སྲིད་མེད་པ་ཡིན། །སེམས་ཅན་རྣམས་ལ་ཐུག་བརྩེའི་ཕྱིར། །སྲོག་ཆགས་རྣམས་ལ་ཆོས་སྟོན་ཏོ། །འཁོར་བར་ཡུན་རིང་བརྩམས་ནས་སུ། །ཁྱོད་ཀྱིས་བྱང་ཆུབ་ཕྱིར་སྤྱད་དེ། །མར་མེ་མཛད་ནི་ཚུན་ཆད་དུ། །སྦྱིན་དང་ཚུལ་ཁྲིམས་ཀུན་ཏུ་བསྒྲུབས། །སངས་རྒྱས་བྱེ་བ་ཕྲག་སྟོང་པོ། །དེ་དག་ཁྱོད་ཀྱིས་རི་མོར་བྱས། །ཐེག་པ་མཆོག་གི་དོན་དུ་ནི། །ང་ཡིས་ཁྱོད་ལ་ལུང་བསྟན་ཏེ། ། སྦྱངས་པའི་ཡོན་ཏན་ཀུན་ཏུ་སྤྱད། །མཚན་མ་མེད་པར་རྣམ་པར་བསྒོམས། །ང་ཡིས་མིག་རྣམ་དག་པ་བྱིན། །སྔོན་གྱི་ཚེ་རབས་དྲན་པར་བྱོས། །དེ་ནས་བདུད་ཤེར་
305a
༄#། །ཚུལ་ཁྲིམས་རྟེན་སྔོན་གྱི་ཚེ་རབས་དང ། སྨོན་ལམ་དང ། སངས་རྒྱས་རྣམས་ལ་མཆོད་པ་དང ། དགེག་བའི་རྩ་བ་ཐམས་ཅད་ཀྱིས་བསྐུལ་བས་བཅོམ་ལྡན་འདས་ཀྱི་སྤྱན་སྔར་རྩཝ་བཀྲམ་པ་ལྟ་བུར་འོངས་པར་གྱུར་ཏེ་གདོང་མཆི་མ་དང་བཅས་པས་ཐལ་མོ་རབ་ཏུ་སྦྱར་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བྱིས་པ་ཇི་ལྟ་བ་དང ། མྱོས་པ་ཇི་ལྟ་བ་དང ། སེམས་འཁྲུག་པ་ཇི་ལྟ་བ་བཞིན་དུ་ནོངས་པ་འཆགས་ལགས་སོ། ། བཙུན་པ་བཅོམ་ལྡན་འདས།་ནོངས་པ་འཆགས་ལགས་སོ། །འདི་ལྟར་བདག་གིས་དྲན་ལགས་ཏེ། གྲངས་མ་མཆིས་པ་གཅིག་རྫོགས་པར་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་ཆེན་པོས་ཕ་རོལ་ཏུ་ཕྱིན་པ་དྲུག་གི་སྤྱོད་པ་སྤྱད་ལགས་སོ། །དགེ་བའི་རྩ་བ་ཡོངས་སུ་སྤྱད་པ་མང་དུ་བགྱིས་ལགས་སོ། །བཅོམ་ལྡན་འདས་དེ་བཞིན་གཤེགས་པ་འདས་པ་རྣམས་བཞུགས་པ་བརྒྱ་སྟོང་ཕྲག་བྱེ་བ་ལ་བདག་གིས་བསྙེན་བཀུར་བ་དང ། བཀུར་སྟི་རྣམ་པ་སྣ་ཚོགས་བགྱིས་ཏེ་ཆོས་ཀྱང་ཐོས་ལགས་སོ། །སྨོན་ལམ་ཡང་བཏབ་ལགས་སོ། །དེ་བཞིན་གཤེགས་པ་འོད་སྲུང་གི་གསུང་རབ་ལ་དགེ་སློང་ལ་ལ་ཉན་ཐོས་
305b
ཀྱི་གཏམ་རྗེས་སུ་སྐུལ་བར་བགྱིད་ལགས་ཏེ། དེ་ནས་བདག་གིས་མ་བསམ་པར་ཀྱེ་མ་དགེ་སྦྱོང་གི་ལུས་བྱད་ཀྱིས་གང་ཟག་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱི་མདུན་དུ་ཉན་ཐོས་ཀྱི་གཏམ་འཆད་པ་འདི་ནི། བདུད་དོ། །ཞེས་སྡིག་ཅན་གྱིས་ཚིག་བརྗོད་ལགས་ཏེ། དེར་གལ་ཏེ་བདག་གིས་སྡིག་ཅན་གྱི་ཚིག་དེ་མ་སྨྲས་པར་གྱུར་ན་ནི། དེར་བདག་གིས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་ལགས་ན། སུག་ལས་ཀྱི་ལྷག་མ་དེས་བདག་དེ་ནས་ཤི་འཕོས་ནས་བདུད་ཀྱི་གནས་སུ་སྐྱེས་ཏེ། དགུང་ལོ་བྱེ་བ་ཕྲག་ལྔ་བཅུ་རྩ་བདུན་དང ། དགུང་ལོ་བརྒྱ་སྟོང་དག་ཏུ་དེར་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་བདག་གི་སེམས་བསྐྱེད་པ་གཅིག་ཀྱང་མ་བྱུང་ལགས་ན། ཚངས་པའི་གནས་པ་རྣམས་ལ་ལྟ་སྨོས་ཀྱང་ཅི་འཚལ་ལགས་ཞེས་དེ་བཞིན་གཤེགས་པ་འཁོར་དང་བཅས་པ་ལ་ལན་གཉིས་ཀྱི་བར་དུ་བཟོད་པ་གསོལ་ཏོ། །ཇི་སྲིད་དུ་སྔོན་གྱི་མཐའི་འཁོར་བར་འཁོར་བ་དེ་སྲིད་དུ་སླད་ཀྱིས་ཕྱི་མའི་མཐའི་མུར་སེམས་ཅན་དམྱལ་བར་གནས་པར་སྤྲོ་ལགས་ཀྱི། བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལས་སེམས་ལྡོག་པར་ནི། མི་བགྱིད་
306a
༄#། །ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ། །གང་ལ་ལ་སྙིང་རྗེའི་སེམས་ཀྱིས་བྱང་ཆུབ་ཏུ་སེམས་གཞོལ་བར་བྱེད་ན། འདི་ནི། འདྲེན་པ་རྣམས་ལ་མཆོད་པ་མཆོག་དང་ཕུལ་ཡིན་ཏེ། འདྲེན་པའི་སྤྱན་སྔར་ལ་ལ་མར་མེ་རི་རབ་ཙམ་དུ་འབར་བར་བྱེད་ཀྱང་བསོད་ནམས་ཀྱི་ཕུང་པོ་དེ་སྙེད་ཡོངས་སུ་བཟུང་བ་མ་ཡིན་གྱི། ཁྱོད་ལོངས་ཤིག་།ང་ལ་སྡིག་པའི་ལས་སྲ་བ་འོར་ཅིག་།ཕུང་པོ་དང་ཁམས་འདི་དག་ལ་སྤྲོས་པ་དང ། མཚན་མ་མེད་པ་དང ། འདུས་བྱས་ཐམས་ཅད་དྲན་པར་བྱོས་ཤིག་དང ། ཁྱོད་ཡོན་ཏན་མཆོག་ཏུ་ཁ་ལོ་སྒྱུར་བར་འགྱུར་རོ། །དེ་ནས་དེ་ཉིད་ཀྱི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་རྟེན་གྱིས་རྗེས་སུ་མཐུན་པའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་རྟེན་སྟན་ལས་ལངས་ཏེ་བཅོམ་ལྡན་འདས་ལ་རིན་ཐང་མེད་པའི་མུ་ཏིག་གི་རྒྱན་ཕྲེང་གིས་སྐུ་ལ་གཡོགས་ནས་གསོལ་པ།་གང་བདག་ཅག་གིས་ཆོས་ཐམས་ཅད་མྱུར་དུ་རྟོགས་ནས་དབུ་བ་དང་འདྲ་བའི་ལྟ་བ་ཐམས་ཅད་ཡང་དག་པར་འཇོམས་པར་བགྱིད་པ་དང ། བྱང་ཆུབ་
306b
ཏུ་ནི།་བཟོད་པ་མཆོག་ཐོབ་པར་འགྱུར་བ་དང ། ཡུན་རིང་པོ་མི་ཐོགས་པར་སེམས་ཅན་ཐམས་ཅད་ཐར་པར་བགྱིད་པའི་ཆོས་ནི། གང་ལགས། གང་ཞིག་ནི། བྱང་ཆུབ་སེམས་དཔས་སྤང་བའི་སླད་དུ་སྒོམ་པར་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་རྟེན། མཁས་པས་ཆོས་བཞི་མྱུར་དུ་བསྐྱེད་པར་བྱ་སྟེ། བཞི་གང་ཞེ་ན། སེམས་ཅན་གྱི་ཕྱིར་སྡུག་བསྔལ་ཚད་མེད་པ་ཐམས་ཅད་ལ་སྤྲོ་བར་བྱ་བ་ཡིན། སངས་རྒྱས་ཀྱི་ཡུལ་གྱི་བསླབ་པ་དཔག་ཡས་པ་གཟུང་བར་བྱ་བ་ཡིན། མ་ཉམས་པར་གཟུང་བར་བྱ་བ་ཡིན། སངས་རྒྱས་ཀྱི་ཆོས་དཔག་ཏུ་མེད་པ་ཐམས་ཅད་མྱུར་དུ་ཡོངས་སུ་རྫོགས་པར་བྱ་བ་ཡིན་ནོ། །ཡང་དེའི་ཚེ་ཚུལ་ཁྲིམས་རྟེན་གྱི་འཁོར་བདུད་ཀྱི་སྡེ་བརྒྱད་ཁྲི་བཞི་སྟོང་པོ་དེ་དག་གིས་ལུང་བསྟན་པ་དེ་ཐོས་ནས་དེ་བཞིན་གཤེགས་པ་ལ་དད་པ་དང ། དང་བ་མཆོག་སྐྱེས་ཤིང་གུས་པ་སྐྱེས་ནས་བཅོམ་ལྡན་འདས་ལ་ལྷག་པའི་བསམ་པས་བཟོད་པ་གསོལ་བར་གྱུར་ཏོ། །དེའི་ཚེ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་སྟེ། དེ་དག་ཐམས་ཅད་ཀྱིས་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་བོ། །བཅོམ་ལྡན་འདས་ལ་དེ་དག་གིས་རང་རང་
307a
༄#། །གི་ལྷ་རྫས་ཀྱི་ཆོས་གོས་དག་སྐུ་ལ་གསོལ་ནས་ཕྱོགས་གཅིག་ཏུ་འཁོད་དོ། །བདུད་སྡིག་ཅན་གྱིས་མཐོང་སྟེ། མཐོང་ནས་ཀྱང་ཡང་ཤེས་ཆེར་འཁྲུགས་ཤིང་སྐྲག་ནས་འདི་སྐད་ཅེས་སྨྲས་སོ། །དགེ་སྦྱོང་གི་ནི་ལྟོར་ཆུད་པས། །འཁོར་དེ་དག་དང་བྲལ་བར་གྱུར། །འདི་ནས་གང་དུ་དོང་བ་ནི། །ཐམས་ཅད་དེ་ཡི་དབང་དུ་སོང ། །དེས་སུ་ཡང་ཕྱི་རོལ་ཏུ་མ་འབྱུང་ཞིག་།བདུད་ཀྱི་སྤྱོད་ཡུལ་འདིར་བདག་ཅག་གནས་པར་བྱའོ། །ཞེས་སྨྲས་ནས་མྱུར་དུ་གྲོང་ཁྱེར་གྱི་སྒོ་བཅད་དེ་གབ་ཏུ་བཅུག་གོ་།དེ་ནས་བཅོམ་ལྡན་འདས་ཀྱིས་ཡང་ཇི་ལྟར་ནམ་མཁའི་སྤྱན་ལས་གསུངས་པ་བཞིན་དུ་དེ་དག་ལ་ཚངས་པའི་གནས་པ་རྣམས་པ་གསུམ་པོ་སེམས་ཅན་ལ་དམིགས་པ་དང ། ཆོས་ལ་དམིགས་པ་དང ། དམིགས་པ་མེད་པ་རྒྱ་ཆེར་བསྟན་པར་ཡང་དག་པར་བརྩམ་པ་མཛད་དོ། །རི་ཁ་ལ་ཏི་ཡའི་རྩེ་མོ་དྲང་སྲོང་ཐུབ་པའི་གནས་སུ་ཀླུ་གང་དག་བརྟེན་ཅིང་འདུས་པ་དེ་དག་ཐམས་ཅད་ཀྱིས་ཀྱང་རང་རང་གིས་ལུས་ཆུང་དུར་མཐོང་སྟེ། དཔེར་ན། མིག་སྨན་བསྐུ་བའི་ཐུར་མ་བཞིན་ནོ། །ཇི་ལྟར་སྔོན་གྱི་ལུས་བཞིན་དུ་ཡང་བཞག་པར་མ་ནུས་སོ། །སླར་འབྱུང་བར་ཡང་མ་ནུས་ཏེ། དེ་དག་ཐམས་ཅད་འཇིགས་
307b
ཤིང་སྐྲག་ལ་སྤུ་ཟིང་ཞེས་བྱ་བའི་བ་སྤུའི་ཁུང་བུ་བྱུང་ནས་དེ་དག་ཐམས་ཅད་ཀྱིས་དགའ་བོ་དང་ཉེ་དགའ་ལ་རབ་ཏུ་བཏུད་ནས་འདི་སྐད་ཅེས་སྨྲས་སོ། །གང་གི་ཚེ་བདག་ཅག་གི་གྲོང་དུ་ཤ་སྤྲང་དང ། སྦྲང་བུ་མཆུ་རིང་དང ། སྦྲང་བུ་གདུག་པ་རྣམས་ཀུན་ཏུ་བྱུང་བ་དེའི་ཚེ་བདག་ཅག་གནས་ཐམས་ཅད་པོར་ནས་བསྐྱབ་པའི་ཕྱིར་འདིར་ཞུགས་ནས་འདི་ནས་གང་དུའང་མཆི་བར་མ་ནུས་ཏེ། ལུས་དག་ཀྱང་ཆུང་ངུར་གྱུར་ལགས་ན། གང་གིས་བདག་ཅག་གནས་སུ་མཆི་བར་བདག་ཅག་བསྐྱབ་ཏུ་གསོལ། མི་འཇིགས་པ་སྩལ་བར་གསོལ། དགའ་བོ་དང་ཉེ་དགའ་གཉིས་ཀྱིས་ཀྱང་སྨྲས་པ། དགེ་སྦྱོང་འདི་ནི་གཡོ་སྒྱུ་ཅན་གྱིས་བློ། །ཤཱཀྱའི་བུ་ཕོ་སྒྱུ་མ་བྱེད་པ་ཡིན། །སངས་རྒྱས་ཞིང་འདིར་ཞུགས་པར་གྱུར་ནས་སུ། །ལུས་ཀུན་ལ་ནི་ཐམས་ཅད་ཆུད་པར་གྱུར། །དེས་ནི་ཀླུ་རྣམས་ཀུན་གྱི་གནས་དག་ཏུ། །ཤ་སྦྲང་སྦྲང་བུ་མཆུ་རིང་སྦྲང་བུ་སྤྲུལ། །ས་འདི་བསྐྱབ་ཕྱིར་ངེད་ཅག་ལྷགས་གྱུར་ཏེ། །ཐམས་ཅད་སྟོབས་རྣམས་ལས་ནི་ཉམས་པར་གྱུར། །གཽ་ཏ་མ་ནི་བློ་གྲོས་གཡོ་ཅན་ཡང ། །ལས་དེས་རྫུ་འཕྲུལ་དེ་ལས་ཉམས་གྱུར་ཅིང ། །དེ་ནི་ལུས་ཀྱང་ཆུང་ངུར་གྱུར་ནས་སུ། །སྟན་གྱི་སྟེང་ན་མདངས་ནི་ཀུན་ཏུ་སྣང ། །དེས་ནི་བདག་ཅག་ལུས་
308a
༄#། །ཀྱང་ཆུང་དུར་བྱས། །བཙོན་ར་འདིར་ནི་བཅིངས་པར་གྱུར་ནས་སུ། །ངེད་ཅག་ཅི་ཡང་བྱེད་པར་མི་ནུས་ཀྱི། །མི་འཇིགས་ལྷ་ལ་ཁྱེད་ཅག་ཕྱག་འཚོལ་ཅིག་།འདོད་པའི་དབང་ཕྱུག་བདུད་སྡིག་ཅན་ལ་ཀླུ་དེ་དག་ཐམས་ཅད་ཀྱིས་ཕྱག་འཚལ་ཏེ་སྨྲས་པ། གང་བདག་ཅག་བཙོན་ར་དེ་ནས་འབྱེར་བ་དང ། རང་རང་གི་གནས་རྣམས་སུ་གནས་པར་རྔོ་ཐོགས་པར་བདག་ཅག་བསྐྱབ་ཏུ་གསོལ། ཀླུའི་རྒྱལ་པོ་ས་སྲུང་གི་བུས་དེ་དག་ལ་འདི་སྐད་ཅེས་སྨྲས་སོ། །བདུད་དཔུང་བཅས་པ་རང་ཉིད་སྐྲག་ནས་སུ། །གཽ་ཏ་མ་སྒྱུ་མ་གཡོ་སྒྱུ་ཅན་ལ་སྐྱོ། །འཁོར་དང་ལྟོ་གོལ་རྣམས་ཀྱང་གཡོ་ཡིས་སུ། །དེས་ནི་དེ་ཡི་སྐྱེ་བོ་མང་པོ་འཕྲོག། བདུད་ལ་མཐུ་ནི་ཅི་ཡང་ཡོད་མ་ཡིན། །འགྲོ་བ་དང་ནི་རྫུ་འཕྲུལ་དེ་ལས་ཉམས། །གཞན་ལ་ཁྱེད་ཅག་མྱུར་དུ་སྐྱབས་སུ་དེངས། །ལྷ་རྣམས་ལ་ནི་ཀུན་གྱིས་རྗེད་པར་བྱོས། །དེ་ནས་ཀླུ་ཐམས་ཅད་ཀྱང་ཁ་ཅིག་ནི། རྒྱལ་པོ་ཆེན་པོ་བཞི་ལ་ཕྱག་འཚལ་བར་བྱེད་དེ། ཁ་ཅིག་ནི། བརྒྱ་བྱིན་ལ་ཕྱག་འཚལ་བར་བྱེད་དོ། །ཁ་ཅིག་ནི། རབ་འཐབ་བྲལ་ལ་ཕྱག་འཚལ་བར་བྱེད་དོ། །ཁ་ཅིག་ན། ཡོངས་སུ་
308b
དགའ་ལྡན་ལ་ཕྱག་འཚལ་བར་བྱེད་དོ། །ཁ་ཅིག་ནི། འཕྲུལ་དགའ་ལ་ཕྱག་འཚལ་བར་བྱེད་དོ། །ཁ་ཅིག་ནི། ལྷའི་བུ་གཞན་འཕྲུལ་དབང་བྱེད་ལ་ཕྱག་འཚལ་བར་བྱེད་དེ། ཁ་ཅིག་ནི། ཚངས་པ་ཆེན་པོ་ལ་ཕྱག་འཚལ་བར་བྱེད་དོ། །ཀླུའི་རྒྱལ་པོ་ཐམས་ཅད་ལ་ཀླུའི་རྒྱལ་པོ་རྒྱ་མཚོས་འདི་སྐད་ཅེས་སྨྲས་སོ། །ལྷ་དང་ལྷ་དབང་འདི་ཀུན་འཁོད་ནས་སུ། །མཆོད་པ་རྣམ་པ་སྣ་ཚོགས་བྱེད་པ་དང ། །གཽ་ཏམ་དམངས་ལ་ཐམས་ཅད་སྐྱབས་གནས་པ། །ཁྱེད་ཅག་གི་ནི་ཅི་ཡི་ཕྱིར་མ་མཐོང ། །དཀའ་ཐུབ་དྲག་པོ་དྲང་སྲོང་ཆེན་པོ་དག་།གཞན་རྣམས་ལ་ནི་གྲོགས་དག་ཁྱེད་ཕྱག་འཚོལ། །རྟས་བསྲུངས་མཐོན་འཕུར་སྐར་མ་དགའ་བ་དང ། །ངན་སྤོང་བུ་ལ་ཅི་ཕྱིར་ཕྱག་མི་འཚལ། །དེ་ནས་ཀླུ་དེ་དག་ཐམས་ཅད་ཁ་ཅིག་ནི། དྲང་སྲོང་རབ་ཏུ་དཔལ་ལྡན་ལ་ཕྱག་འཚལ་བར་བྱེད་དོ། །ཁ་ཅིག་ནི། བརྟན་པོ་ལ་ཕྱག་འཚལ་བར་བྱེད་དོ། །ཁ་ཅིག་ནི། རྟས་བསྲུངས་ལ་ཕྱག་འཚལ་བར་བྱེད་དོ། །ཁ་ཅིག་ནི། མཐོན་པོར་འཕུར་ལ་ཕྱག་འཚལ་བར་བྱེད་དོ། ། ཁ་ཅིག་ནི། སྐར་མ་ལ་དགའ་བ་ལ་ཕྱག་འཚལ་བར་བྱེད་དོ། །ཁ་ཅིག་ནི། དྲང་སྲོང་ངན་སྲོང་གི་བུ་ལ་ཕྱག་འཚལ་བར་བྱེད་དོ། །མངོན་པར་ཤེས་པ་ལྔ་དང་ལྡན་པ་
309a
༄#། །དེ་དག་ལ་སྐྱབས་སུ་ཉེ་བར་དོང་ངོ ། །ཡང་དེའི་ཚེ་དྲང་སྲོང་མངོན་པར་ཤེས་པ་ལྔ་དང་ལྡན་པ་དེ་དག་གངས་ཀྱི་ནུབ་ཕྱོགས་ཀྱི་ངོས་ལ་དྲང་སྲོང་སྐར་མ་ལ་དགའ་བའི་མདུན་ན་ཤཱཀྱ་ཁྱུ་མཆོག་གི་ཡོན་ཏན་བསྔགས་པ་ཉན་ཅིང་འཁོད་དོ། །དྲང་སྲོང་དེ་དག་གིས་ཀླུ་ཐམས་ཅད་འོ་དོད་འབོད་པ་ཐོས་སོ། །ཐོས་ནས་ཀྱང་དྲང་སྲོང་ལྔ་པོ་དེ་དག་སྟན་ལས་ལངས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་ལ་འདི་སྐད་ཅེས་སྨྲས་སོ། །བཅོམ་ལྡན་འདས། དྲང་སྲོང་ཐུབ་པའི་གནས་རྟེན་དུ་ཀླུ་ཐམས་ཅད་གནོད་པར་གྱུར་ཅིང་བདག་ཅག་ལ་སྐྱབས་སུ་ཉེ་བར་གནས་པ་གཟིགས་སམ། བཞེངས་ཏེ་དེར་བཞུད་ལ་ཀླུའི་སྔེ་ཐམས་ཅད་ཡོངས་སུ་ཐར་པར་མཛོད་ཅིག་།དེས་སྨྲས་པ། ཁྱེད་དེངས་ཤིག། ལྷ་དང ། ཀླུ་དང ། གནོད་སྦྱིན་བརྒྱ་སྟོང་ཕྲག་མང་པོ་འདི་དག་ངའི་མདུན་དུ་འཁོད་ནས་ཚངས་པའི་གནས་པ་དམིགས་པ་ཡོངས་སུ་འདྲི་བར་བྱེད་དེ། ངས་དེ་དག་གི་སེམས་ཡོངས་སུ་མགུ་བར་བྱའོ། །དེ་ནས་སྐར་མ་ལ་དགའ་བའི་རྐང་པ་གཉིས་ལ་དྲང་སྲོང་དེ་དག་ཐམས་ཅད་མགོ་བོས་བྱས་བཙལ་ཏེ་ལན་གསུམ་བསྐོར་བ་བྱས་ནས་རྫུ་འཕྲུལ་གྱིས་དོང་སྟེ་
309b
དྲང་སྲོང་ཐུབ་པའི་གནས་ཀྱི་གཞི་རྟེན་དུ་འཁོད་དོ། །དེ་ནས་དེ་དག་ལ་ཀླུ་དེ་དག་མགོ་བོས་ཕྱག་བཙལ་ཏེ་འདི་སྐད་ཅེས་སྨྲས་སོ། །ཁྱོད་བསོད་ནམས་ཅན་ཤེས་རབ་དང་ལྡན་པ་ཐབས་ཐམས་ཅད་ཀྱི་ཕ་རོལ་ཏུ་ཕྱིན་པ་དྲང་སྲོང་ཆེན་པོ་ལགས་ན། བདག་ཅག་ཡོངས་སུ་བསྐྱབ་པར་གསོལ། བཙོན་རའི་འཇིགས་པ་འདི་ལས་བདག་ཅག་ཡོངས་སུ་དགྲོལ་བར་གསོལ། དེ་ནས་དྲངས་རོང་དེ་དག་གིས་འདི་སྐད་ཅེས་སྨྲས་སོ། །ངེད་ཀྱིས་ནི། ཁྱེད་འདི་ནས་ཡོངས་སུ་གྲོལ་བར་བྱེད་པར་མི་ནུས་སོ། །ལག་འགྲོའི་བདག་པོ་དག། །གངས་ཀྱི་ནུབ་ཕྱོགས་ཀྱི་ངོས་ལ་དྲང་སྲོང་ཐམས་ཅད་ཀྱི་བླ་མ། དབང་ཆེ་བར་གྲགས་པ། ཤེས་རབ་དང་ཐབས་དང་གཟི་བརྗིད་ཆེན་པོས་རྒྱས་པ་སྐར་མ་ལ་དགའ་བ་ཞེས་བྱ་བ་ཡོད་དེ། དེས་ཁྱེད་འདི་ནས་ཡོངས་སུ་གྲོལ་བར་བྱེད་པར་འགྱུར་རོ། །དེ་ལ་ཕྱག་འཚོལ་ཅིག་།དེ་ཐོས་ནས་ཀླུ་ཐམས་ཅད་དྲང་སྲོང་སྐར་མ་ལ་དགའ་བ་ལ་ཐལ་མོ་རབ་ཏུ་སྦྱར་བ་བྱས་ནས་དབྱངས་གཅིག་གིས་འོ་དོད་པོས་སོ། །དེ་ནས་བྱང་ཆུབ་སེམས་དཔའ་དྲང་སྲོང་གི་ཆ་བྱད་ཅན་དྲང་སྲོང་སྐར་མ་ལ་དགའ་བའི་ལྷ་དང ། མིའམ་ཅི་དང ། གནོད་སྦྱིན་བརྒྱ་སྟོང་ཕྲག་མང་པོས་མདུན་དུ་བ་དར་ཅིང་ཡོངས་སུ་བསྐོར་ཏེ། དེ་ནས་རྫུ་འཕྲུལ་གྱིས་ཆས་ནས་
310a
༄#། །དྲང་སྲོང་ཐུབ་པའི་གནས་དེར་ཡང་ཕྱིན་པར་གྱུར་ཏེ། དེ་ལ་ཀླུ་ཐམས་ཅད་མགོ་བོས་ཕྱག་བཙལ་ཏེ་གུས་པ་མཆོག་སྐྱེས་ནས་འདི་སྐད་ཅེས་སྨྲས་སོ།། གང་བདག་ཅག་རང་གི་གནས་སུ་མཆིས་ནས་དགའ་བར་འགྱུར་བར་བདག་ཅག་ཡོངས་སུ་བསྐྱབ་པར་གསོལ། གནས་འདི་ནས་བདག་ཅག་ཡོངས་སུ་དགྲོལ་བར་གསོལ།་དུས་ཤེས་པ། དུས་ལ་ལྟ་བ་དྲང་སྲོང་ཆེན་པོ་དེས་ཀྱང་རྐྱེན་གྱི་དབང་གིས་དེ་དག་ལ་རྒྱུ་སྐར་གྱི་གོ་རིམ་གྱི་གཏམ་བརྩམས་པ། ཇི་ལྟར་ཐམས་ཅད་ཐར་འགྱུར་བ། །དེ་བཞིན་དུ་ནི་ཤེས་པར་བྱ། །ཁྱེད་ལ་ཕན་པ་གཞན་མེད་ཀྱི། །མཐར་གྱིས་སུ་ནི་མཉན་པར་གྱིས། །འདིར་ནི་ནབ་སོ་གང་གནས་པ། །དེ་ནི་དབྱར་ཟླ་ཐ་ཆུང་སྟེ། །དེ་ནི་ཉི་མ་ལྷ་ཡིན་ཞིང ། །ཀླུ་རྣམས་ཀུན་དང་འབྲེལ་པ་ཡིས། །སྐར་མའི་དཔྱད་ནི་ཕོངས་པ་དང ། །སྙིང་པོར་དྲང་སྲོང་སྦྱོར་བས་བསྟན། །གཟའ་དང་རྒྱུ་སྐར་སྐར་མ་རྣམས། །ནམ་མཁའ་ལ་ནི་སུ་ཡིས་བཞག་།མཁས་པ་རྣམས་ནི་དགའ་བགྱིད་པ། །ལོ་སྐོར་ཤེས་པ་བཤད་དུ་གསོལ། །ཟླ་པ་ཉི་མ་རྒྱུ་སྐར་དང ། །གཟའ་རྣམས་འགྲོ་བ་ཇི་ལྟར་ལགས། ། ཟླ་བ་རྣམས་ཀྱི་དང་པོར་ནི། །རྒྱུ་སྐར་གང་ཞིག་འབྱུང་བར་འགྱུར། །ཟླ་བའི་ཡུད་ཙམ་གང་ཞིག་ལགས། །གོ་རིམ་ཡང་ནི་ཅི་འདྲ་ལགས། །ལྷ་ནི་ཅི་ལགས་རུས་ཅི་ལགས། །ལྕི་བ་
310b
ཅི་ལགས་ཡང་བ་གང ། །ཕན་པ་ཅི་ལགས་གནོད་པ་ཅི། །སྟོབས་ཅི་བདག་ལ་མྱུར་དུ་གསུངས། །གང་གིས་སུ་ནི་མཚན་མོ་འཐོབ། །ཉི་མའི་མདུན་ན་ཅི་ཞིག་ལགས། །གྲིབ་མའི་གོམ་བ་དུ་ཞིག་ཏུ། །ཉི་མ་འཁོར་བར་བགྱིད་པ་ལགས། །ཟླ་བ་གང་ལ་ལྷོ་ཕྱོགས་སུ། །ཉི་མ་བྱང་དུ་ཇི་ལྟར་གནས། །དྲང་སྲོང་ཁྱོད་ལ་ཀུན་ཞུ་ན། །བདག་ཅག་ལ་ནི་ཀུན་སྟོན་ཅིག་།ཤེས་རབ་ཆེན་པོས་འཇིག་རྟེན་མཁས། །སྐར་ལ་དགའ་བས་དེ་སྐད་སྨྲས། །བསྐལ་པ་བཟང་པོ་ཞུགས་པ་ན། །སྔོན་ཆང་བྱུང་བ་ཀྱེ་ལག་འགྲོ། །དཔལ་ལྡན་གྲོང་ཁྱེར་ལྔ་ལེན་དུ། །འདོད་པ་སྤངས་ཤིང་ཆོས་དང་ལྡན། །གཙང་མ་འདོད་ཅིང་རབ་མཁས་པའི། །མི་རྒྱལ་འབྱོར་པ་ཆེན་པོ་བྱུང ། །དེ་ཡི་བཙུན་མོ་དམ་པ་ནི། ། འདོད་པ་རྣམས་ལ་འཆུམས་གྱུར་ནས། །དེ་ཚེ་ཡུལ་ནི་དབེན་པར་ཡང ། །གཟུ་ལུམས་ཅན་དང་ལྷན་ཅིག་སྤྱད། །མངལ་ནི་སྨིན་པར་བྱ་བའི་ཕྱིར། །ཡང་དང་ཡང་དུ་སྤྱད་ནས་སུ། །དེ་ཚེ་ཆོས་ཀྱིས་སྦྲུམ་པར་གྱུར། །མི་སྡུག་པ་ཡི་ཁྱེའུ་ཞིག་བྱུང ། །བོང་བུའི་མགོ་ལ་བོང་མགྲིན་པོ། །བོང་རྣ་པ་ལ་བོང་གདོང་པོ། །ཐམས་ཅད་རྩུབ་པོ་རལ་པ་ཅན།། མི་ཡི་ལུས་ནི་ཕྱེད་ཡོད་པ། །དེ་མཐོང་འཇིགས་ནས་མྱུར་དུ་ནི། །སྣམ་ཕྱི་སར་ནི་དེ་བོར་རོ། །རེག་ཏུ་མི་རུང་མི་གཙང་བ། །དེ་ཕྱིར་སྲིན་མོ་བོང་མོས་བླངས། །གངས་ཀྱི་
311a
༄#། །གནས་སུ་སོང་ནས་སུ། །བུ་ལ་ཆགས་པས་གསོས་པ་ཡིན། །བཅུད་ཀྱིས་ལེན་ནི་འཐུངས་པས་ན། །དེ་ཚེ་ལྷ་དང་ལྷན་ཅིག་འགྲོགས། །ཤེས་རབ་ཆེན་པོ་སྐལ་ལྡན་པོ། །རབ་ཏུ་བརྩོན་ལྡན་སྙིང་རྗེའི་སེམས། །གཟི་བརྗིད་ཆེན་པོ་བྱམས་པ་ཐོབ། །སེམས་ཅན་ཀུན་ལ་ཕན་བྱེད་པའོ། ། ལྷ་ཡི་ཚོགས་ཀྱང་འདུས་ནས་སུ། །རྔ་བོང་ལ་ནི་ཕྱག་འཚལ་ནས། །དེ་ལ་ཡང་ནི་སྙིང་བརྩེའི་ཕྱིར། །གངས་ཀྱི་རི་པོ་སྤྲུལ་པ་བྱས། །ཤིང་དང་མེ་ཏོག་འབྲས་བུར་ལྡན། །དྲི་ཞིམ་དགའ་བར་བྱད་པ་སྟེ། །སྣ་ཚོགས་རྩི་ཡིས་ཁེབས་པ་ལ། །བྱ་རྣམས་སྣ་ཚོགས་བརྟེན་པ་ཡིན། །དེར་ནི་དྲང་སྲོང་རྔ་བོང་དེ། །རྣམ་པར་དབེན་པར་བརྟེན་ནས་སུ། །ལོ་ནི་དྲུག་ཁྲི་ཐམ་པར་ཡང ། །རྐང་པ་གཅིག་གིས་དཀའ་ཐུབ་གནས། །བརྒྱ་བྱིན་ཚངས་པས་ཕྱག་བྱས་ཏེ། །ལྷ་རྣམས་ཀུན་གྱིས་མངོན་པར་བསྟོད། །གཟུགས་རྟེན་ལྷ་རྣམས་ཐམས་ཅད་དང ། །དེར་ནི་ཚངས་པ་ཉེ་བར་འོངས། །འདོད་རྟེན་ལྷ་རྣམས་ཐམས་ཅད་དང ། །དེར་ནི་བརྒྱ་བྱིན་ཉེ་བར་འོངས། །ཀླུ་དང་གནོད་སྦྱིན་གྲུལ་བུམ་དག་།ཐམས་ཅད་དེར་ནི་ཉེ་བར་ལྷགས། །འཇིག་རྟེན་གང་སུ་མཁས་པ་ནི། །དྲང་སྲོང་ཚངས་པར་སྤྱོད་པ་རྣམས། །འདོད་
311b
པའི་ཁམས་དང་གཟུགས་ཁམས་པ། །ཐམས་ཅད་དེར་ནི་ཉེ་བར་ལྷགས། །ཀུན་གྱི་དྲང་སྲོང་རྔ་བོང་ལ། །མཆོད་པ་རྣམ་པ་སྣ་ཚོགས་བྱས། །བཏུད་ནས་ཐལ་མོ་སྦྱར་བྱས་ཏེ། །བརྒྱ་བྱིན་ཚངས་པས་འདི་སྐད་སྨྲས། །སྐལ་ལྡན་ཆེན་པོ་ཀྱེ་ཁྱོད་ནི། །ཅི་ཕྱིར་དེད་ལ་མངོན་པར་དགའ། །རེ་བ་ཅི་འདྲ་ཅི་ལ་བསམ། །ཅི་འདོད་པ་ནི་སྨྲ་བར་བགྱིས། །དྲང་སྲོང་རྔ་བོང་གིས་སྨྲས་པ། །གཟའ་དང་རྒྱུས་ཀར་སྐར་མ་རྣམས། །མཁའ་ལ་ཅི་འདྲར་བྱུང་གྱུར་པའི། །སྔོན་གྱི་བསྐལ་པ་བདག་གིས་དྲན། །ཉིན་ཞག་ཏུ་ནི་རྒྱུ་སྐར་རྣམས། །རེ་རེ་ནས་ནི་རྒྱུ་བར་བྱེད། །ཚེ་རབས་ཀུན་ཏུ་རྒྱུ་སྐར་གྱི། །ཡོན་ཏན་ལས་རྣམས་རྣམ་པར་ཤེས། །བསྐལ་པ་བཟང་པོ་འདི་ལ་ནི། །འདི་ནི་ཅི་ཡང་མི་སྣང་ན། །སྙིང་བརྩེར་གྱིས་དེ་ཁྱོད་ཀྱིས་ནི། །རྒྱུ་སྐར་གོ་རིམ་ཀུན་ཞོག་ཅིག་།ཇི་ལྟར་འཇིག་རྟེན་འདིར་གནས་བཞིན། །དེ་ཡི་ལས་དང་ཡོན་ཏན་གསུངས། །ཡོན་ཏན་རྒྱ་མཚོས་ཤོད་ཅིག་ཅེས། །ལྷ་ཡི་ཚོགས་རྣམས་ཀུན་གྱིས་སྨྲས། །དྲང་སྲོང་རྔ་བོང་གིས་སྨྲས་པ། །རེ་ཞིག་དང་པོར་སྨིན་དྲུག་ཅེས། །རྒྱུ་སྐར་དཀྱིལ་འཁོར་ཐམས་ཅད་ལ། ། ནང་གི་དང་པོར་གཞག་པར་བྱ། །ཇི་ལྟར་སྨིན་དྲུག་གཞག་པ་བཞིན། །འདི་ལ་སུ་ཞིག་དད་པ་འབུལ། །ལྷ་ཡི་བུ་ནི་ཉི་མ་ཡང ། །སྐར་མ་དྲུག་པོ་སྟོན་པར་བྱེད། །སྨིན་
312a
༄#། །དྲུག་རྒྱུ་སྐར་དེ་དག་ནི། །མཁའ་ལ་རྟག་ཏུ་རྒྱུ་བར་ཤོག་།ཐམས་ཅད་ལྡན་པའི་འཁོར་དགའ་ནས། །མེ་ལྷ་ཞིག་ནི་སྤྲུལ་པ་བ་ཡས།། གཟི་བརྗིད་ཆེན་པོ་དྲང་སྲོང་ལྷ། །མེ་བཞིན་འཇུག་གི་བུས་སྨྲས་པ། །བདག་གི་སྲིང་མོའི་བུ་འདི་དག་།གླིང་བཞི་པར་ནི་གནས་པར་ཤོག་།དྲང་སྲོང་རྔ་བོང་སླར་སྨྲས་པ། །དང་པོར་སྨིན་དྲུག་དེ་དག་ཡིན། །རྒྱུ་སྐར་ཆུ་ཡི་རུས་ཅན་ནི། །གཉིས་པ་ཡང་ནི་ཡིན་པར་བྱ། །སྐྱེ་རྒུའི་བདག་གིས་འདི་སྐད་སྨྲས།། བདག་གིས་བུ་ལྔ་དབུལ་ལགས་ཏེ། །རུས་ནི་དྲང་སྲོང་ཆེན་པོ་ཆུ། །རབ་ཏུ་བརྩོན་ལྡན་སྣར་མ་ལགས། །ཆུ་ཡི་རུས་ཀྱི་རྒྱུ་སྐར་ནི། །སྣར་མའི་མིང་གིས་གཉིས་པ་ལགས། །ཟླ་བའི་བུ་ཕོ་གསུམ་པོ་ནི། །མིང་ནི་མགོ་ཞེས་བགྱི་བ་ལགས། །བྷ་ར་དྷྭ་ཛའི་རུས་སུ་ནི། །མགོ་ཞེས་བགྱི་བ་གཞག་པ་ལགས། །རབ་ཏུ་མི་ཟད་ལག་ཅེས་བྱ། །ལྷ་དྲག་རྣམས་ཀྱིས་བསྟན་པ་ལགས། །ལྗང་སྔོའི་བུ་ཡི་བུ་རུས་སུ། །དེ་ནི་བཞི་བར་གཞག་པ་ལགས། ། དྲང་སྲོང་བཅས་པའི་ལྷ་ཚོགས་ཀྱིས། །ཉི་མའི་བུ་ནི་བསྟན་ལགས་ཏེ། །ནབ་སོ་ལགས་ཤིང་གནས་འཛོག་རུས། །ཕུར་བུའི་བུ་ནི་གསུམ་ལགས་ཏེ།།
312b
ལག་གི་བུ་ཡི་རུས་ལགས་ཤིང ། །རྒྱལ་ཞེས་བགྱི་བར་དེ་དག་བཤད། །ས་སྲུང་གི་ནི་བུ་ལྔ་བ། །བརྟུལ་ཞུགས་སྤྱོད་པ་མཁས་པ་རྣམས། །མཛའ་བོའི་བུ་ཡི་རུས་ལགས་ཏེ། །དེ་ལྟར་དེ་དག་རྒྱུ་སྐར་བདུན། །ཤར་ཕྱོགས་ཁ་འཛིན་རྣམས་སུ་གཞག་།དེ་ཡི་ལས་དང་གོ་རིམ་དང ། །སྦྱོར་བ་ཁ་འཛིན་གཟུང་ལས་བསྟན།། ངས་ཀྱང་ཡང་ནི་ཁྱེད་ཅག་ལ། །གླིང་བཞི་པ་ནི་གནས་བྱེད་ཅིང ། །ལས་ནི་ཅི་འདྲ་སྒྲུབ་བྱེད་པ། །མདོར་ནི་མྱུར་དུ་བཤད་བར་བྱ། །ཕུར་བུ་ཡི་ནི་བུ་ལྔ་པོ། ། བྱང་གྲོལ་བརྟུལ་ཞུགས་འཆང་བ་དག་།སེར་སྐྱའི་བུ་ཡི་རུས་སུ་ནི། །ལྷོ་ཡི་ཕྱོགས་སུ་ངས་གཞག་གོ་།དབྱངས་ཅན་གྱི་ནི་བུ་གཉིས་པོ། །མིང་གིས་ཀྱང་ནི་གྲ་ཡིན་ཏེ། །དྲང་སྲོང་གཽ་ཏམ་རུས་སུ་ནི། །ལྷོ་ཡི་ཕྱོགས་སུ་ངས་གཞག་གོ་།ལྷ་མོ་ཡི་ནི་བུ་གཉིས་པ། །མིང་གིས་ཀྱང་ནི་དབོ་ཡིན་ཏེ། །ཀཽ་ཌི་ནྱ་ཡི་རུས་སུ་ནི། །ལྷོ་ཕྱོགས་ཁ་འཛིན་གསུམ་པ་གཞག་།སྡིག་པ་ཡི་ནི་བུ་བསྟན་པ། །དྲང་སྲོང་ཀཱ་ཏའི་བུ་ཡི་རུས། །ལྷར་བཅས་དྲང་སྲོང་རྣམས་ཀྱིས་དེར། མེ་བཞི་ཞེས་ནི་བྱ་བར་གཞག་།དྲི་ཟའི་བུ་ནི་ནག་པ་སྟེ། །ཀཱ་ཏཱའི་བུ་ཡི་རུས་ཡིན་ནོ། །ས་རི་དེ་ནི་མ་ཡི་བུ། །ཀ་ཏཱའི་བུ་ཆེན་རུས་ཡིན་ནོ། །འདིར་ནི་ས་ག་
313a
༄#། །དཔལ་གྱི་བུ། །ཀཱ་ཏཱའི་བུ་རྒན་རུས་ཡིན་ཏེ། །དྲང་སྲོང་རྣམས་ཀྱིས་རྒྱུ་སྐར་བདུན། །ལྷོ་ཕྱོགས་ཁ་འཛིན་རྣམས་སུ་གཞག་།མཛའ་བོའི་བུ་ཡི་བུ་བཞི་པོ། །དྲག་པོའི་བུ་ཡི་རུས་ཡིན་ཏེ། །མིང་གིས་ལྷ་མཚམས་ཞེས་བྱ་བ། །ནུབ་ཕྱོགས་སུ་ནི་གཞག་པ་ཡིན།། དབང་པོ་ཡི་ནི་བུ་གསུམ་སྟེ། །ཟླ་བ་ཀཱ་ཏཱའི་བུ་ཡི་རུས། །འཇམ་པའི་ལས་ནི་ཐམས་ཅད་ལ། །གཉིས་པ་སྣརོན་ནི་གཞག་པ་ཡིན། །ས་ཡི་ལྷ་མོའི་བུ་གསུམ་སྟེ། །སྣུབས་ནི་ལག་པའི་བུ་ཡི་རུས། །རྒྱལ་བའི་ལྷ་མོའི་བུ་བཞི་སྟེ། །ཀཱ་ཏཱའི་བུ་ཡི་རུས་ཡིན་ནོ། །ཐམས་ཅད་ལྷ་ཞེས་བྱ་བ་བཞི།། མཽངྒལ་བུ་ཡི་རུས་ཡིན་ནོ། །སྣུབས་དང་ཆུ་སྟོང་ཆུ་སྨད་གཉིས། །རྒྱུ་སྐར་གསུམ་པ་གཞག་པ་ཡིན། །སྲེད་མེད་བུ་ཡི་བུ་གསུམ་པོ། །རྒྱུ་སྐར་རྣམས་ནི་བྱི་བཞིན་འཁོད། །ཁྱབ་འཇུག་གི་ནི་བུ་གསུམ་སྟེ། །ཀཱ་ཏཱའི་བུ་ཕོ་དཔལ་གྱི་རུས། །དེ་ལྟར་དེ་དག་རྒྱུ་སྐར་བདུན། །ནུབ་ཕྱོགས་ཀྱི་ནི་ཁ་འཛིན་ཡིན། །ནོར་ལྷའི་བུ་ནི་མོན་གྲུ་སྟེ། །དྲང་སྲོང་རྣ་བའི་རུས་ཡིན་ནོ། །ཆུ་ལྷའི་བུ་ནི་གཅིག་པུ་སྟེ། །དེབ་རྩེའི་བུ་ཡི་རུས་ཡིན་ཞིང ། །
313b
སྨན་མ་སྤྲུལ་གྱི་ལྷ་མོ་ཡིན། །རྒྱུ་སྐར་མོན་གྲེ་གནས་པ་ཡིན། །སྡིག་པ་ཡི་ནི་བུ་གཉིས་ཏེ། །ཁྲུམས་སྟོད་ཅེས་ནི་བྱ་བར་བཤད། །ཆུ་ཡི་རྣ་བའི་རུས་སུ་ནི། །གསུམ་པ་འདི་ནི་གཞག་པ་ཡིན། །ལྷ་ཡི་དྲང་སྲོང་ཆུ་ལྷའི་བུ། །ཁྲུམས་སྨད་ཅེས་ནི་བྱ་བར་བཤད། །བྲ་ཉེ་དྲང་སྲོང་རུས་ཡིན་པར། །བཞི་པ་འདི་ནི་གཞག་པ་ཡིན། །ལྷ་ཡི་དྲང་སྲོང་རྒྱལ་གྱི་བུ། །ནམ་གྲུ་ཞེས་བྱ་དེ་བསྟན་ཏེ། །དྲང་སྲོང་དབང་པོའི་རུས་སུ་ནི། །ལྔ་པ་འདི་ནི་གཞག་པ་ཡིན། །དྲི་ཟའི་རྒྱལ་པོའི་བུ་གསུམ་སྟེ། །ལྔ་ལེན་བུ་ཡི་རུས་ཡིན་ཞིང ། །རྒྱུ་སྐར་ཐ་སྐར་ཞེས་བྱ་བ། །འཇིག་རྟེན་མཁས་པ་རྣམས་ཀྱིས་གཞག་།དྲག་པོའི་བུ་ནི་གསུམ་ཡིན་ཏེ། །བྲ་ཉེ་ངན་སྤོང་རུས་ཡིན་ནོ། །རྒྱུ་སྐར་བདུན་པོ་དེ་དག་ནི། །བྱང་ཕྱོགས་ཁ་འཛིན་རྣམས་སུ་གཞག་།རྒྱུ་སྐར་ཉི་ཤུ་རྩ་བརྒྱད་པོ། ཁ་འཛིན་བཞིར་ནི་གཞུང་ལས་བཤད། །གཏོར་མ་ལས་དང་ཡོན་ཏན་རྣམས། །མདོར་ན་ང་ཡིས་བཤད་པར་བྱ། །ཐམས་ཅད་རབ་ཏུ་ཐལ་སྦྱར་འཁོད། །ལྷ་དང་ཤེད་ལས་སྐྱེས་རྣམས་ཀྱིས། །དྲང་སྲོང་རྔ་བོང་ལ་ནི་སྨྲས། །མི་དགེ་སྔོན་དུ་འགྲོ་བའི་ལས། །གང་བྱས་ཁྱོད་ནི་མི་སྡུག་སྐྱེས། །གང་དུ་ཐམས་ཅད་མྱུར་ཟད་འགྱུར། །འདི་ནི་ལྷ་དང་མི་རྣམས་
314a
༄#། །དང ། །དྲང་སྲོང་དག་ནི་ཞི་བ་རྣམས། །ཐམས་ཅད་གཟུགས་ནི་བཟང་བོར་གྱུར། །རིགས་དང་སྙན་ལྡན་དེ་དག་ཀུན། །དྲང་སྲོང་རྔ་བོང་དེ་ལ་ནི། །བརྒྱ་བྱིན་ལྷན་ཅིག་འཁོད་ནུས་སུ། །འཁོར་ཀུན་རངས་ཏེ་ཐལ་སྦྱར་གྱུར། །བསམ་པ་གཅིག་ཏུ་སྨྲས་པ་ནི། །ནམ་མཁའ་འདི་ལ་རྒྱུ་སྐར་ནི། །གང་ཞིག་དང་པོར་རྒྱུ་བར་བྱེད། །ཁ་ཟས་སུ་ནི་ཅི་ཟ་ཤོད། །མི་རྣམས་ཀྱི་ནི་ལས་ཅི་སྒྲུབ། །ཡིད་ནི་ཇི་སྲིད་རྒྱུ་བར་བྱེད། །དྲང་སྲོང་དེ་དག་ཐམས་ཅད་ལ། །རྔ་བོང་གིས་ནི་འདི་སྐད་སྨྲས། ། ཇི་ལྟར་ང་ཡིས་བརྗོད་པ་བཞིན། །འདིར་ནི་ཁྱེད་ཀྱིས་དད་པ་ཕུལ། །རྒྱུ་སྐར་འདི་ལ་ངས་མཆོག་ཕྱིན། །དེ་ནི་ཁྱོད་ལ་བརྗོད་པར་བྱ། །གོ་རིམ་ཤེས་པ་ང་བདག་བཞིན། །གླིང་བཞིའི་སེམས་ཅན་ཕན་པའི་ཕྱིར། །ལོ་སྐོར་ཡང་ནི་ཤེས་པར་བྱ། །དང་པོར་ཉི་མ་གང་ཡིན་པ། །ངས་བྱས་པ་ནི་ང་ཡི་མིག་།བུ་དྲུག་གཡོ་ཅན་སེམས་རངས་པ། །དེ་ནི་ང་ཡིས་དང་པོར་བརྗོད། །དེ་ཡི་ཕྱིར་ན་སྨིན་དྲུག་ནི། །རྒྱུ་སྐར་ཚོགས་ནི་ཐམས་ཅད་དུ། །ནང་གི་གཙོ་བོར་འགྱུར་བར་ཤོག་།ཟླ་བ་ཉ་དང་ཉི་མ་ཡི། །ཉིན་མཚན་དེ་དག་མཉམ་པར་གནས། །མཚན་མོ་གཞན་ནི་མུན་ཁྱབ་དང ། །ཆུ་ལྷ་ཡང་ནི་གནས་པར་འགྱུར། །འགྲོ་བ་བཟོད་པ་བགྲང་བ་དང ། །བྲ་ཉེ་གནས་བཞིན་འདི་ལྟར་
314b
བཤད། །མོན་སྲན་བཅུ་དྲུག་བརྒྱར་བསྒྱུར་ཏེ། །སྐྱེས་བུ་དང་ནི་བརྒྱད་པ་གཅིག་།བརྒྱད་པ་ཕྲག་ནི་བཅུ་དྲུག་ལ། །ཆ་ནི་གཅིག་ཏུ་འགྱུར་བ་ཡིན། །ཆ་ནི་དྲུག་ཅུ་ཐམ་པ་ལ། །ཡུད་ཙམ་གཅིག་ནི་དེ་ཡིན་ནོ། །དེ་ཙམ་ཡུད་ཙམ་སུམ་ཅུ་ལ། །འདིར་ནི་འཇིག་རྟེན་གནས་པ་ཡིན། །རི་རབ་གཡས་ནས་བསྐོར་བའི་ཚེ། །ཡུད་ཙམ་སུམ་ཅུས་འགྲོ་བར་བྱེད། །འདིར་ནི་མོན་སྲན་ཚོད་མ་ཟ། །རྒྱལ་པོ་ནད་པས་འགྲོ་བ་ཀུན། །ཞག་བཅུ་ཐམ་པར་ཐར་པར་གྱིས། །རྟག་ཏུ་དད་པས་མཚོན་ཆས་བསྲུངས། ། མཆོག་སྦྱིན་ཁྱོད་ཀྱིས་བུ་སྐྱེ་གང ། །ཚོང་པ་དབང་པོ་ཐུལ་བ་དང ། །ཆོས་ཀྱི་བློ་གྲོས་ནབ་སོ་ལ། །མངལ་དུ་ཉིང་མཚམས་སྦྱོར་བར་འགྱུར། །འདིར་ནི་གྲེ་ལ་བྱ་བ་མང ། །ཆུ་སྨད་བྲ་ཉེ་གསུམ་པ་ཡིན། །མེ་བཞི་སྣར་མ་གྲོ་བཞིན་ནི། །ནོར་རྒུད་བྱེད་པར་འགྱུར་བ་ཡིན། །སྣུབས་དང་སྐག་དང་ནམ་གྲུ་ནི། །ལམ་དག་གི་ནི་རྒྱུ་སྐར་ཡིན། །ཁྲུམས་སྟོང་དང་ནི་སྣརོན་དང་ནི། །རྒྱལ་དང་ཡང་ནི་ཁྲུམས་སྨད་ནི། །ཕུན་སུམ་ཚོགས་པར་བྱེད་པ་ཡིན། །མཆུ་དང་ཆུ་སྟོད་ཐ་སྐར་དང ། །མོན་གྲུ་དང་ནི་སྨིན་དྲུག་དང ། །དབོ་ཞེས་བྱ་བ་དག་གིས་ནི། །བདེ་བ་སྒྲུབ་པར་བྱེད་པ་ཡིན། །འདིར་ནི་མགོ་དང་ནག་པ་དང ། །མོན་གྲུ་དང་ནི་མོན་གྲེ་དང ། །ས་རི་ལག་ནི་རྣམ་དྲུག་
315a
༄#། །གིས། །གྲོགས་པོ་དང་ནི་གྲོགས་མཆོག་འགྱུར། །ལྷ་ཡི་དབང་པོས་འདི་སྐད་སྨྲས། །སྣརོན་གྱི་ཚེ་ན་ཚེ་གཉིས་ལ། །ཡུད་ཙམ་སུམ་ཅུར་མི་ཟད་པར། །བྱ་ཕྱིར་མཁའ་ལ་ཁྱོད་གནས་ཀྱི། །ཁྱོད་ཀྱིས་ཀྱང་ནི་ལ་ཕུག་དང ། །བུ་རམ་ཟས་ལ་གནས་པར་གྱིས། །ནད་པ་ཞག་ནི་བཅུ་གསུམ་ཁྲོལ། །ད་ལྟར་སྐྱེ་རྒུ་སྐྱེ་བ་མེད། །ཤིན་ཏུ་ཚུལ་འཆལ་སྙིང་རྗེ་སྤངས། །མཆོད་སྦྱིན་དང་ནི་སྐྱེ་བ་དང ། །སྣརོན་ལ་སྐྱེ་ཆེ་རྟག་ཏུ་ནི། །མངལ་དུ་མཚམས་སྦྱོར་སྲུང་བར་གྱིས། །ནག་པ་དང་ནི་མོན་གྲུ་དང ། །མགོ་ལ་གྲགས་པ་མང་དུ་བྱེད། །བྱི་བཞིན་དང་ནི་གྲེ་དང་དབོ། །ལས་དག་གི་ནི་རྒྱུ་སྐར་ཡིན། །ཁྲུམས་སྟོད་དང་ནི་ཁྲུམས་སྨད་ནི། །རྒུད་བྱེད་ཆུ་དང་ཆུ་སྟོད་དང ། །ཐ་སྐར་ཕུན་སུམ་ཚོགས་པར་བྱེད། །སྣུབས་དང་སྐག་དང་ནམ་གྲུབ་དང ། །མོན་གྲེ་མེ་བཞི་སྣར་མ་ནི། །བདེ་བ་སྒྲུབ་པར་བྱེད་པ་ཡིན། །བྲ་ཉེ་དང་ནི་གྲེ་དང་ནི། །ཆུ་སྨད་མཛའ་བོའི་མཆོག་ཏུ་འགྱུར། །ཁྲུམས་སྟོད་དང་ནི་ས་རི་དང ། །མོན་གྲུ་དང་ནི་ནབ་སོ་དང ། །ས་ག་དང་ནི་ལག་ཀྱང་ནི། །འདིར་ནི་རྣམ་པ་དྲུག་ཏུ་འགྱུར། །ལྷ་ཡི་དྲང་སྲོང་དེས་གསོབ་ཀྱི། །སྣུབས་བཤད་པ་ནི་ཚེས་གསུམ་ལ། །ཡུད་ཙམ་སུམ་ཅུར་ནམ་མཁའ་ལ། །བྱ་བ་ཆེ་ཆུང་ཁྱོད་གནས་ཀྱི། །ཟས་ནི་
315b
འབྲས་བུ་ལ་ཕུག་དང ། །བདུག་པ་དང་ནི་མེ་ཏོག་སྟེ། །ཞག་ནི་སུམ་ཅུར་བདག་ཉིད་ཀྱིས། །ནད་པ་ཡང་ནི་ཐར་པར་བྱེད། །གང་ཞིག་སྤྱོད་པར་བྱེད་པས་ནི། །སྐྱེ་རྒུ་མི་སྐྱེ་ནོར་དང་འབྲུ། །སྐལ་ལྡན་སྐྱེས་བུའི་རྣམ་པ་དང ། །ས་ལ་ལས་ནི་བྱེད་པར་འགྱུར། །མགོ་ལ་མངལ་དུ་མཚམས་སྦྱོར་བ། །རྟ་དང་ཡང་ནི་རྔ་མོ་དང ། །གླང་པོ་ཆེ་དང་ཁྱུ་མཆོག་དང ། །དྲེད་དང་བཅས་པའི་རྣམ་པར་འགྱུར། །ཆུ་སྟོད་དང་ནི་གྲེ་དང་ནི། །བྲ་ཉེ་དང་ནི་གསུམ་པ་སྟེ། །འཇིག་པའི་རྒྱུར་འགྱུར་སྐག་དང་སྣརུབས། །དེ་ལ་འཕེལ་བར་བྱེད་པར་འགྱུར། །ནམ་གྲུ་བགྲང་དང་མཉམ་འགྱུར་ཏེ། །མོན་གྲུ་ལས་ནི་རྒྱུ་སྐར་ཡིན། །ཁྲུམས་སྟོད་ཅེས་ནི་བྱ་བ་ཡང ། །དེ་ལ་རྒུད་པར་བྱེད་པར་འགྱུར། །ལྷ་མཚམས་ནབ་སོ་གསུམ་པ་ཡིན། །ལག་ནི་དེ་ལ་རྒུད་བྱེད་འགྱུར། །ས་ག་དང་ནི་མོན་གྲེ་ཡང ། །གསུམ་པ་ཞེས་ནི་བྱ་བ་ཡིན། །ཐ་སྐར་དེ་ལ་སྒྲུབ་པར་འགྱུར། །ཆུ་སྟོད་ཟླ་བ་གཉིས་པ་སྟེ། །སྣརོན་དང་རྒྱལ་ཞེས་བྱ་བ་ཡང ། །དེ་ལ་བདེ་བར་བྱེད་པར་འགྱུར། །ཁྲུམས་སྨད་ཅེས་ནི་བྱ་བ་ནི། །གྲོགས་དང་གྲོགས་པོ་མཆོག་ཏུ་འགྱུར།། དྲུག་པོ་འདི་དག་ལག་དང་ནི། །གྲོ་བཞིན་སྣར་མ་གསུམ་པ་ཡིན། །སྨིན་དྲུག་ཅེས་ནི་བྱ་བ་ཡང ། །བྱི་བཞིན་དང་ནི་དབོ་ཡིན་ནོ། །འདི་ནི་ཁྲོན་པ་ས་རིར་གྱུར། །མེ་ལྷ་
316a
༄#། །ཡིན་ཏེ་ས་གས་བཤད། །གླིང་བཞིར་ཚེས་ནི་བཅོ་ལྔ་ལ། །ཁྱོད་སྤྱོད་ཡུད་ཙམ་བཞི་བཅུ་ལྔས། །འགྲོ་བར་བྱེད་ཅིང་བྱ་བ་ནི། །ཆེན་པོ་མི་ཟད་པ་ཡིས་གནས། །ཞག་ནི་བཅོ་ལྔ་ཐམ་པར་ཡང ། །ནད་པ་ཡང་ནི་ཐར་པར་གྱིས། །སུ་ཞིག་ཀྱང་ནི་ཁྱོད་ཀྱི་བུར། །དག་པར་རྗེས་སུ་སྐྱེ་འགྱུར་བ། །གཟི་བརྗིད་དང་ནི་དཔལ་དང་ནི། །ལོངས་སྤྱོད་དགའ་བ་འབར་བར་འགྱུར། །བུད་མེད་བརྣབ་སེམས་ཤིན་ཏུ་སྲུངས། །དེ་སྐྱེའི་རྒྱུ་སྐར་ལག་ཡིན་ནོ། །དེའི་ལས་རྒྱུ་སྐར་མོན་གྲེ་ཡིན། །མཆུ་དང་ཐ་སྐར་ཆུ་སྟོད་རྒྱུ། །སྨིན་དྲུག་ཅེས་ནི་བྱ་བ་ལ། །དེ་ནི་འཆི་བར་འགྱུར་བ་ཡིན། །བྱི་བཞིན་དང་ནི་དབོ་ཡང་ནི། །འདིར་ནི་རྒུད་པར་བྱེད་པ་ཡིན། ། ཁྲུམས་སྟོད་དང་ནི་སྣརོན་དང་ནི། །ནབ་སོ་ཡང་ནི་གསུམ་པ་སྟེ། །ལྷ་མཚམས་ཞེས་ནི་བྱ་བར་ཡང ། །དེ་ནི་ཕུན་སུམ་ཚོགས་བྱེད་ཡིན། །ནབ་སོ་ཁྲུམས་སྟོད་སྣརུབས་དང་ནི། །ནམ་གྲུ་སྐག་ནི་བདེ་བྱེད་ཡིན། །གྲེ་དང་ཡང་ནི་ཆུ་སྨད་དང ། །གསུམ་པ་བྲ་ཉེ་སྒྲུབ་པ་ཡིན། །མཛའ་བོ་དང་ནི་མཛའ་མཆོག་ཏུ། །དེ་དག་དེར་ནི་འགྱུར་བ་ཡིན། །ནག་པ་སྣར་མ་མོན་གྲུ་བཞིན། །མགོ་གཉིས་མེ་བཞིར་གྲོ་བཞིན་ཡང ། །འདིར་ནི་དེ་བདུན་ལྷོ་ཕྱོགས་ཀྱི། །ཁ་འཛིན་ཕྲུགས་ཞེས་བྱ་བ་ཡིན། །འཕགས་
316b
པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་པ། མཛའ་བཤེས་ཀྱི་ནི་ལྷ་མོ་ཡིས། །ཡར་གྱི་ངོ་ཡི་ཚེས་གཅིག་ལ།། འགྲོ་བར་བྱེད་པའི་གོ་རིམ་ཡང ། །ལྷ་མཚམས་ལ་ནི་སྨྲས་པ་ཡིན། །བྲ་ཉེ་ཚེས་ནི་བཅོ་ལྔ་ཡི། །ཉིན་པར་ཡང་ནི་ཡུད་ཙམ་ཡིན། །མཚན་མོ་ཡང་ནི་དེ་ཙམ་སྟེ། །ཉིན་མཚན་གཅིག་ལ་བྲ་ཉེ་ཡིན། །ཆུ་ཡི་ལྷ་མོ་དེ་ཡང་ནི། །ཉིན་དང་མཚན་དུ་མཉམ་པ་སྟེ། །ཡུད་ཙམ་སུམ་དུ་ཐམ་པ་སྟེ། །དེ་ཡི་ལོངས་སྤྱོད་ཐང་གཅིག་ཤོག་།རྒྱལ་པོ་ལེགས་བརྟན་སྙིང་རྗེ་སྤངས། །མཐུན་པར་ཡུལ་འཁོར་སྐྱོང་བ་བཞིན། །དེ་བཞིན་དུ་ནི་མི་ཟད་པའི། །བྲ་ཉེ་ཡང་ནི་འགྲོ་བར་ཤོག་།འཛམ་གླིང་འདི་ལ་སྟོན་པར་ཤོག ། དེ་བཞིན་ཁྱེད་ཅག་ཐམས་ཅད་ཀྱིས། །དེ་ལ་དམོད་པ་བོར་བར་གྱིས། །དེ་བཞིན་འགྲོ་ལ་བསྟན་པར་གྱིས། །ཀུན་གྱིས་སྨྲས་པ། །དེ་བཞིན་རྟག་ཏུ་གྱུར་པར་ཤོག་།མི་ཟད་པ་ཡི་བྱ་བ་གྱིས། །ཁྱོད་ཀྱིས་སྤྱོད་པས་གང་སྐྱེ་བ། །མི་ཡི་ཐུ་བོ་མི་ཟད་འགྱུར། །དེ་ཡི་མངལ་འཇུག་ཆུ་སྟོད་ཡིན། །བྲ་ཉེ་ལ་ནི་སྐྱེས་པའི་མི། །འཆི་བའི་ཚེ་ན་ལྷ་མཚམས་དང ། །ཁྲུམས་སྟོད་ཅེས་ནི་བྱ་བ་ཡིན། །འདི་ལ་མཁས་པས་བརྟག་བྱ་སྟེ། །ས་རི་མོན་གྲུ་མ་ཡིན་གཞི། །དམག་འགྲོ་རྩོད་པའི་གནས་དག་གིས། །བྱ་སྤང་སྤུ་གྲིའི་ལས་
317a
༄#། །མི་བྱ། །སྣར་མ་མེ་བཞི་བྱི་བཞིན་ནི། །རྒུད་བྱེད་དགྲ་རྣམས་ཁྱོད་ཀྱིས་གཞོམ། །ཁྱོད་ཀྱི་ལས་ནི་ཆེ་ཆུང་ཀུན། །གྲེ་ཡི་ཚེ་ན་བྱ་བར་གྱིས།། ཆུ་སྨད་དང་ནི་དབོ་ཡང་ནི། །ཕུན་སུམ་ཚོགས་པར་བྱེད་པར་བརྗོད། །སྨན་རྣམས་བརྟེན་བྱ་སྦྱིན་དང་དུལ། །གོས་དང་རྒྱན་གྱི་བྱ་བའང་བརྗོད། །མགོ་དང་ནག་པ་ཞེས་བྱ་དང ། །གྲོ་བཞིན་མཆུ་ནི་བདེ་བར་བྱེད། །ས་ག་ནབ་སོ་མོན་གྲེ་སྟེ། །དེ་དག་ལམ་འཇུག་སྒྲུབ་པ་ཡིན། །སྐག་དང་སྣུབས་ཞེས་བྱ་བ་དང ། །ཐ་སྐར་དང་ནི་མཆུ་དང་གྲི་།གྲོགས་པོ་མཆོག་ཏུ་འགྱུར་བ་ཡིན། །བསྒྲུབ་ཏུ་མི་རུང་ལས་ཀྱང་གྱིས། །འདི་ཚེ་ཁྲི་བཞོན་གོས་དང་མལ། །མཛའ་བོ་རྣམས་ལའང་བརྩམ་པར་བྱ། །ཉི་མའི་བུ་ནི་མིག་དམར་ཏེ། །དྲང་སྲོང་ཆེན་པོ་དེར་དཔང་བཙུགས། །བཅུ་གཉིས་ཁྱིམ་དུས་གནས་དེ་ནས། །དེར་ཡོད་ལས་མཐུན་གྲིབ་གོམ་དྲུག། །དེར་ནི་དུས་ཀྱང་མཉམ་པ་ཡིན། །ཉིན་དང་མཚན་ཀྱང་མཚུངས་པ་ཡིན། །དེ་ཡོད་ཐ་སྐར་མཚན་མ་གང ། །ལྷ་མཚམས་ཉིན་པར་གནས་པ་ན། །ཁྱོད་ཀྱིས་ང་ནི་སྤང་བར་གྱིས། །མཁའ་ལ་སྤྱོད་ཅིང་ཁྱོད་ཀྱིས་སྟོན། །གླིང་བཞི་པ་ནི་མགུ་བྱ་ཕྱིར། །འདི་ནི་ཇི་ལྟར་ལྷགས་པ་བཞིན། །ངས་འདིར་གང་ཞིག་ཡང་དག་
317b
བརྗོད། །ལྷ་ཡི་དྲང་སྲོང་ཀུན་དགའ་འགྱུར། །དེ་བཞིན་ཁྱོད་ནི་ཀུན་ཏུ་སོང ། །སྨིན་དྲུག་དེ་བཞིན་མེ་ཡི་ལྷ། །བདག་ཉིད་གླིང་བཞི་དེར་གནས་ཤིང ། །ཁྱེད་ཀྱིས་མེ་བཞིན་མྱུར་བྱ་གྱིས། །ཡུད་ཙམ་སུམ་ཅུར་ཚལ་དུ་སོང ། །དེར་གང་མི་ཡི་ཟས་འབྱུང་བ། །དམ་པའི་གྲགས་དང་ལོངས་སྤྱོད་ཀྱང ། །ཟླ་ཉ་ཁྱོད་འདིར་ཡང་ལེགས་རྫོགས། །དེ་ལྟར་ང་ཡིས་ཐོབ་པ་ཡིན། །ཞག་བཞི་ཐམ་པར་ནད་པ་ནི། །མྱུར་བ་ཁོ་ནར་ཐར་པར་གྱིས། །མངལ་དུ་འཇུག་པ་མེ་བཞི་བསྲུངས། །ཆུ་སྟོད་འཆི་བར་བྱེད་པ་ཡིན། །སྐག་ཁྲུམས་སྟོད་སྨད་ནབ་སོ་དང ། །མོན་གྲེ་འཕེལ་བར་བྱེད་པ་ཡིན། །ཁྱོད་ཀྱིས་བྱ་བ་འདི་སྤོངས་ཤིག་།དམག་དང་རྩོད་པའི་གནས་འགྲོ་དང ། །སྤུ་གྲི་ཡི་ནི་ལས་རྣམས་སོ། །གྲོ་བཞིན་དང་ནི་ནག་པ་དང ། །མགོ་ནི་རྒུད་པར་བྱེད་པ་ཡིན། །ལག་དང་དབོ་ནི་འདིར་འཇོམས་བྱེད། །བྱེ་བའི་བྱ་བ་འདི་གྱིས་ཤིག་།ཆེ་དང་ཆུང་བ་གང་ཅི་ཡང ། །སྣར་མས་ཕུན་སུམ་ཚོགས་པར་བྱེད། །བྱི་བཞིན་དང་ནི་ནག་པར་བཅས། །དེར་ནི་བྱ་བ་གང་རྩི་དང ། །གོམ་པ་སྦྱིན་པ་གོས་དང་མལ། །དེར་ནི་རྒྱན་གྱིས་བརྒྱན་པར་བྱ། །ལག་ནི་བདེ་བར་བྱེད་པ་སྟེ། །མོན་གྲུ་དང་ནི་ས་རི་ཡང ། །གསུམ་པོ་དག་ནི་དེ་དག་ཡིན། །ལམ་དུ་འཇུག་པའང་དེ་དག་ཡིན། །རྒྱལ་དང་ལྷ་མཚམས་
318a
༄#། །ཁྲུམས་སྟོད་ནི། །ལས་དག་སྒྲུབ་པར་བྱེད་པ་ཡིན། །མཆུ་སྣརུབས་སྐག་དང་ཁྲུམས་སྨད་དང ། །དེ་དང་དེ་རྣམས་དྲག་བྱེད་གྲོགས་སྐལ་བཟང་བག་མ་གཏོང་དང་གཞོན། །མལ་ཡང་དེར་ནི་དེ་བྱ་སྟེ། །ཁྱིམ་དང་དུས་ཞེས་བྱ་བ་དང ། །གཟའ་རྣམས་བདག་གིས་བརྗོད་པ་ཡིན། །དེ་ལྟར་བདག་གིས་དུས་ཀུན་བརྗོད། །ཁྱོད་ཅི་དྲང་སྲོང་ལྷ་མི་དགའ། །བདག་གིས་བྱེད་དེ་བཤད་པ་བཞིན། །ལྷ་དབང་དྲང་སྲོང་འཁོར་དང་བཅས། །མི་ཡིས་ཐལ་སྦྱར་འདི་སྐད་སྨྲས། །འབྱུང་པོ་ཀུན་ལ་ཕན་པ་ཁྱོད། །འགྲོ་བ་ལ་ནི་སྐྱོབ་པ་ཁྱོད། །དེ་ལྟར་ཤེས་མཉམ་ཇི་བཞིན་ཁྱོད། །ཡང་སྨྲས་པ། །རྔ་བོང་ཅན་གྱི་དྲང་སྲོང་སྟེ།། སྣར་མ་ཆུ་ཡི་རིགས་ཀྱང་ཡིན། །ཆུ་ཡི་ལྷ་མོ་ཁྱོད་ཡིན་ན། །གསུམ་པར་ཡང་ནི་འགྲོ་བར་གྱིས། །བྱེད་པ་ཆུང་དང་འབྲིང་ཡིན་ཞིང ། །བཞི་བཅུ་རྩ་ལྔ་ཐམ་པ་ཡིན། །ཡུད་ཙམ་དུ་ནི་ཁྱོད་ཀྱིས་འགྲོ་།དུག་དང་ཤ་ནི་ཟས་ཡིན་ནོ། །ཁྱོད་ལ་སྤྱོད་པར་བྱེད་པ་ཡིས། །གང་དག་མི་རྣམས་སྐྱེ་འགྱུར་བ། །དེ་དག་ཕྱུག་ཅིང་ཆོས་དང་ལྡན། །ཞག་ལྔ་ནད་པ་མྱུར་དུ་གསོས། །དེ་འདིར་ཁྱོད་ཀྱིས་བསྟན་པར་གྱིས། །བྱི་བཞིན་ནམ་གྲུས་མངལ་དུ་འཇུག་།འཆི་བ་སྣརུབས་དང་མཆུ་
318b
བཞིན་ཏེ། །རྒྱལ་དང་ལྷ་མཚམས་ཁྲུམས་སྟོད་འཕེལ། །དམག་འགྲོ་བག་མ་གཏོང་བ་ཡི། །གནས་ནས་འགྲོ་བར་བྱེད་པ་དང ། །ཉོ་ཚོང་དང་ནི་བཟོ་བྱེད་པ། །དེ་འདྲ་བ་ཡི་བྱ་བ་སྤོངས། །ས་རི་མོན་གྲུ་དེ་དག་འདིར། །རྒུད་བྱེད་དགྲ་འདིར་གཞོམ་པར་བྱ། །མེ་བཞི་ལས་ཀྱི་རྒྱུ་སྐར་ཡིན། །ཆེ་ཆུང་ཐམས་ཅད་འདིར་གྱིས་ཤིག། མགོ་དང་ནག་པ་གྲོ་བཞིན་ཏེ། །དེ་དག་ཕུན་སུམ་ཚོགས་པར་བྱེད། །རྩི་བྱེད་ན་ཡང་དེ་དག་སྟེན། །དེར་བྱིན་གོས་རྒྱན་སྣ་ཚོགས་སྒྲོགས། །ནབ་སོ་དང་ནི་ས་ག་དང ། །མོན་གྲེ་བདེ་བར་བྱེད་པ་སྟེ། །དེ་དག་ལ་ནི་ལམ་དུ་འཇུག་།སྣརོན་ནི་སྒྲུབ་པར་བྱེད་པ་ཡིན། །སྐག་ཅེས་བྱ་བ་ཁྲུམས་སྨད་ནི། །དྲག་པོའི་ལས་དག་བྱེད་པ་ཡིན། །ཆུ་སྟོད་ཆུ་སྨད་ཐ་སྐར་དང ། །བྲ་ཉེ་ཁྲུམས་སྟོད་ཆུ་སྨད་མཛའ། །དབོས་ནི་སྐལ་པ་བཟང་པོ་སྦྱིན། །བརྩོན་པ་དང་ནི་བཞོན་པ་དང ། །མལ་དང་ཁྲི་ནི་བཤམ་པ་ཡང ། །འདི་ལ་བྱ་བ་དེ་འཇུག་གོ་།ཡང་སྨྲས་པ། །འགྲོ་བ་བཞི་དང་ལྡན་པར་ནི། །མགོ་ལ་ཁྱོད་ནི་གནས་པར་འགྱུར། །མི་ཡི་ལས་བྱ་མྱུར་དུ་སྒྲུབས། །ཡུད་ཙམ་སུམ་ཅུ་འགྲོ་བར་གྱིས། །ཞག་བརྒྱད་ནད་པ་མྱུར་དུ་གསོས། །ཁྱོད་ཟས་ཚོན་ཤ་ཟླ་བའི་ལྷ། །དེར་ནི་སྐྱེ་རྒུ་གང་དག་སྐྱེ། །དཔའ་ཞིང་
319a
༄#། །འབྱོར་པར་འགྱུར་བ་ཡིན། །ཁྱབ་འཇུག་བདེན་འདི་ཤིན་ཏུ་བསྲུངས། །དེ་བྱེད་ཇི་བཞིན་ང་ཡིས་བཤད། །གྲོ་བཞིན་ཐ་སྐར་མངལ་དུ་འཇུག་།ཆུ་གཉིས་གྲེ་དབོ་འཆི་བར་བྱེད། །སྣརོན་གྱི་ཚེ་ནི་བྱ་བ་འཕེལ། །སྐག་དང་གཞན་བཅས་ཐོབ་པར་བྱེད། །ལམ་རིང་རྩོད་དང་གནས་ནས་འགྲོ་།བྱ་བ་དེ་འདྲ་སྤང་བར་གྱིས། །ནབ་སོ་རྒུད་པར་བྱེད་པ་སྟེ། །མོན་གྲེ་ས་ག་བཞིན་དུ་ཤེས། །གསད་པའི་གནས་བཞིན་བརྩམ་པར་གྱིས། །རྫུན་གཡོ་དམངས་ཀྱིས་འཇོམས་པར་བྱེད། །ནག་པ་ལས་ཀྱི་རྒྱུ་སྐར་ཏེ། །འདི་ལ་ཆེ་ཆུང་ཐམས་ཅད་རྩོམ། །ལག་ནི་ཕུན་སུམ་ཚོགས་པར་བྱེད། །མོན་གྲུ་ས་རི་གཞན་ཐོབ་བྱེད། །འདིར་ནི་སྨན་དང་སྦྱིན་འདུལ་བཞོན། །རྒྱན་དང་གོས་ཀྱང་ཐོབ་པར་བྱེད། །རྒྱལ་དང་ལྷ་མཚམས་ཁྲུམས་སྟོད་བདེ། །དེ་དག་ལམ་དུ་ཤིན་ཏུ་འཕྲོད།། སྣརུབས་དང་ནམ་གྲུ་མཆུ་སྒྲུབ་བྱེད། །འདི་ལ་གཏུམ་པོའི་ལས་ཀྱང་བྱ། །མེ་བཞི་དགྲ་ཟིན་བྲ་ཉེ་དང ། །སྣར་མ་དབྱེར་མེད་ཆུ་གཉིས་བཞིན། །སྐལ་བཟང་བག་མ་གཏོང་དང་བཞོན། །མལ་ཀུན་འདིར་ནི་བྱེད་དུ་ཆུག་།ལག་ལྷ་དྲག་མོས་དེ་ཚེ་སྨྲས། །ཚེས་ལྔ་ལ་ནི་ཁྱོད་གནས་ཏེ། །ཡུད་ཙམ་བཅོ་ལྔ་ཁྱོད་
319b
འགྲོ་བྱེད། །ཁྱོད་ཀྱི་ཟས་ནི་མར་གསར་ཏེ། །དྲག་ཅིང་མི་ཟད་སྡང་བྱེད་སྒྲུབ། །ནད་པ་ཡང་ནི་ཞག་བཅུ་ཡིན། །ཁྱོད་ལ་སྤྱོད་པས་མི་གང་སྐྱེ། །སྲིད་པ་གསུམ་དུ་མི་ཟད་འགྱུར། །ནོར་ཚོལ་བྱེད་ཅིང་ཆོམ་པོས་འཆི། །ཁྱོད་ཀྱི་སྦྱོར་བས་དེ་ཡིན་ནོ། །མོན་གྲུ་སྣརུབས་ལ་མངལ་དུ་འཇུག་།ཆུ་དང་ནམ་གྲུས་འཕེལ་བར་འགྱུར། །དབོ་ཡི་ཚེ་ན་འཆི་བར་བྱེད། །ཆུ་གཉིས་བྲ་ཉེ་ཇི་བཞིན་ནོ། །སྐྱེ་དང་འཇིག་དང་འཕེལ་བ་ཡི། །བྱེད་པ་དེ་ནི་སྤོང་བར་གྱིས། །ལྷ་མཚམས་དང་ནི་ཁྲུམས་སྟོད་དེར། །བྱེད་པ་བསྟན་ནས་རྒུད་པར་བྱེད། །ས་རི་ལས་ཀྱི་རྒྱུ་སྐར་ཡིན། །བྱེད་པ་ཆུང་ངུ་ཐམས་ཅད་མཇུག་།ས་ག་དང་ནི་མོན་གྲེ་དང ། །ནབ་སོ་ཕུན་སུམ་ཚོགས་པར་བྱེད། །ཁྲུམས་སྨད་པར་ནི་བདེ་བྱེད་ཡིན། །སྣོན་དང་སྐག་ནི་ལམ་ན་མཉམ། །གྲེ་ནི་སྒྲུབ་པར་བྱེད་པ་སྟེ། །ཆུ་སྟོད་ཐ་སྐར་གསུམ་པ་ཡིན། །མེ་བཞིའི་བར་གཞན་གྲོགས་མཆོག་སྟེ།། སྨིན་དྲུག་ནག་པ་གྲོ་བཞིན་དང ། །བྱི་བཞིན་བག་མ་གཏོང་དང་བཞོན། །མལ་དང་སྐལ་པ་བཟང་པོར་སྒྲུབ། །ཉི་མའི་ལྷ་མོ་ནབ་སོས་སྨྲས། །ཚེས་དྲུག་ལ་ཡང་གནས་པར་འགྱུར། །སྤྲུལ་ཤ་ཁྱོད་ཀྱི་ཟས་སུ་ཤོག་།ལས་ཀྱང་དྲག་པོར་བྱ་བར་གྱིས། །ཡུད་ཙམ་བཞི་བཅུ་རྩ་ལྔར་འགྲོ་།འདིར་ནི་ནད་པ་ཞག་བརྒྱད་ཡིན། །
320a
༄#། །ཁྱོད་སྤྱད་སུ་ཡང་མི་ནང་སྐྱེ། །ཞིང་པ་ལོངས་སྤྱོད་ལྡན་པར་འགྱུར། །རྟ་དང་གླང་ཆེན་ཟད་པར་འགྲོ་།ནབ་སོ་མངལ་དུ་འཇུག་པར་འགྱུར།། འདི་ནི་མོན་གྲེའི་ཟས་ཡིན་ཏེ། །སྨིན་དྲུག་ལ་ནི་འཆི་བར་བྱེད། །ཁྲུམས་སྨད་རྒུད་པར་བྱེད་པ་ཡིན། །སྐག་སྣརོན་ལས་ཀྱི་རྒྱུ་སྐར་ཡིན། །ས་ག་བརྟུལ་ཞུགས་བསྟན་པ་ཡིན། །རྒྱལ་ཡང་ཕུན་སུམ་ཚོགས་པར་བྱེད། །ལག་དང་ལྷ་མཚམས་ཞེས་བྱ་དང ། །ཁྲུམས་སྟོད་ཀྱང་ནི་བདེ་བར་བྱེད། །མཆུ་དང་ནམ་གྲུ་བཞིན་དུ་སྟེ། །དེ་དག་ལམ་དུ་ཞུགས་ན་བཟང ། །བྲ་ཉེ་ཆུ་སྨད་གྲེ་དང་དབོ། །སྒྲུབ་བྱེད་ནག་པ་གྲོ་བཞིན་དང ། །ས་རི་སྣར་མ་མགོ་མོན་གྲུ། །མི་ཡི་ནད་ཁྱོད་གྲོགས་མཆོག་འགྱུར། །རྒྱལ་འདིར་ལྷ་མོ་ཕུར་བུ་ཁྱོད། །ཚེས་བདུན་གནས་ཁྱོད་ཡུད་སུམ་ཅུ། །འགྲོ་བྱེད་བུ་རམ་སྦྲང་རྩི་ཟས། །ཆོས་ལྡན་བྱེད་ཆུད་མྱུར་དུ་སྒྲུབ། །ནད་ཀྱང་ཞག་ལྔ་ཁོ་ན་སྟེ། །ཁྱོད་སྤྱོད་སུ་ཡང་མི་ནང་སྟེ། །ཚུལ་དགའ་ཆོས་སྨྲས་མདུན་འདོན་བློན། །ཞིང་རིང་བག་གཏོང་དེ་དག་འཇིག་།ཁྲུམས་སྟོད་དང་ནི་ལྷ་མཚམས་ལ། །མངལ་དུ་འཇུག་པར་བྱེད་པ་སྟེ། །དབོ་དང་ཡང་ནི་ཐ་སྐར་དང ། །ཆུ་སྨད་ལ་ནི་འཕེལ་བར་བྱེད། །སྣར་མ་ནག་པོ་གྲོ་བཞིན་
320b
འཆི། །གསུམ་པོ་དེ་དག་ཤེས་པར་གྱིས། །མཆུ་སྣརུབས་ནམ་གྲུ་དེ་དག་གསུམ། །རྒུད་བྱེད་མཁས་པས་ཤེས་པར་གྱིས། །ལྷ་མཚམས་བྱེད་པ་ཐམས་ཅད་ལ། ། ལས་དག་གི་ནི་རྒྱུ་སྐར་ཏེ། །མཁས་པས་ཤེས་པ་ཁོ་ནར་གྱིས། །སྣརོན་ནི་ཕུན་སུམ་ཚོགས་པར་བྱེད། །ཁྲུམས་སྨད་སྐག་གིས་ཐོབ་བྱེད་གྲེ་།ཆུ་སྟོད་ཐ་སྐར་གསུམ་པོ་བདེ། །མེ་བཞི་སྒྲུབ་མིན་དྲུག་དབྱེར་མེད། །དེ་བཞིན་མཁས་པས་གསུམ་ཤེས་གྱིས། །ས་རི་གྲོགས་དང་གྲོགས་མཆོག་སྟེ། །མགོ་དང་ལག་དང་མོན་གྲུ་བཞིན། །ས་ག་དང་ནི་མོན་གྲེ་ཡང ། །དོན་ནི་འབྲས་བུར་བཅས་པ་ཡིན། །སྤྲུལ་གྱི་ལྷ་མོ་སྐག་འདིར་སྨྲ། །ཚེས་བརྒྱད་ལ་ནི་ཁྱོད་གནས་ཀྱི། །ཡུད་ཙམ་བཅོ་ལྔས་ཁྱོད་འགྲོ་བྱེད། །གོད་པའི་ཤ་ནི་ཟས་ཡིན་ནོ། །འགྲོ་བའི་ནང་དུ་གཤིན་རྗེ་མི། །བྱེད་པ་མི་ཟད་ཁྱོད་གནས་ཀྱི། །ཉིན་དེར་ཁྱོད་སྤྱོད་སུ་མིར་སྐྱེ། །ཁྲོ་ཞིང་སྡིག་པ་ཅན་དུ་འགྱུར། །ཤིན་ཏུ་མི་སྡུག་ཚུལ་ཁྲིམས་ཉམས། །ཆོས་གོས་གདིང་བ་ཟད་འགྱུར་ཞིང ། །ཁྲུམས་སྨད་ཅེས་བྱ་རབ་མཆོག་ལ། །མངལ་དུ་འཇུག་པ་སྟོན་པར་བྱེད། །མེ་བཞི་སྨིན་དྲུག་འཆི་བར་བྱེད། །མགོ་སྣརུབས་བྲེ་ནི་རོ་མྱངས་པས། །རྒུད་བྱེད་ཆུ་སྟོད་ཐ་སྐར་དང ། །སྣརོན་ནི་ལས་ཀྱི་རྒྱུ་སྐར་ཡིན། །སྣརུབས་དང་
321a
༄#། །ནམ་གྲུ་མཆུ་ཞེས་པ། །གསུམ་པོ་ཕུན་སུམ་ཚོགས་པར་བྱེད། །བྲ་ཉེ་བདེ་བྱེད་གྲེད་བོ་དང ། །གྲོ་བཞིན་ཆུ་གཉིས་ཁྱོད་ཐོས་སྒྲུབ། ། ནག་པ་སྣར་མ་མཆུ་གཉིས་དང ། །མོན་གྲེ་ལྷ་མཚམས་ས་ག་དང ། །ལག་དང་ནབ་སོ་དེ་དག་གྲོགས། །ཁྲུམས་སྟོད་ཀྱང་ནི་དེ་བཞིན་ནོ། །གཤིན་རྗེའི་ཡི་དྭགས་ལྷ་མོས་སྨྲས། །ཚེས་དགུ་ལ་ནི་ཁྱོད་གནས་ཤིང ། །ཡུད་ཙམ་སུམ་ཅུར་ཉིན་མཚན་དུ། །ཏིལ་གྱི་སྦྱར་ཐུག་ཟས་ཡིན་ནོ། །སེམས་ཅན་བྱེད་པ་ཆུང་འབྲིང་སྒྲུབས། །ཞག་བརྒྱད་ཐམ་པར་ནད་པ་སོས། །གོང་མའི་བྲ་ཉེ་སུ་མིར་སྐྱེ། །བསོད་ནམས་བྱེད་པར་བཤད་པ་ཡིན། །རྫུན་སྲོག་ཤིན་ཏུ་ཡུན་རིང་སྲུངས། །སྣརུབས་ནི་ལས་ཀྱི་རྒྱུ་སྐར་ཡིན། །འདིར་ཡང་ནམ་གྲུས་མངལ་དུ་འཇུག་།ས་ག་ལ་ཡང་འཆི་བར་བྱེད། །ལག་ཅེས་བྱ་བ་ཁོ་ན་དང ། །མོན་གྲེ་མང་ནི་གསུམ་པ་ཡིན། །སྣར་མ་དང་ནི་ནག་པ་དང ། །གསུམ་པ་གྲོ་བཞིན་འདིར་དགའ་བྱེད། །དབོ་དང་བྲ་ཉེ་རྒུད་བྱེད་ཡིན། །ཆུ་སྨང་ཕུན་སུམ་ཚོགས་པར་བྱེད། །ཐ་སྐར་དང་ནི་གྲེ་དང་ནི། །མཆུ་གཉིས་འཕེལ་བར་བྱེད་པ་ཡིན། །གསུམ་པོ་དེ་དག་ཤེས་པར་གྱིས། །མེ་བཞི་དང་ནི་བྱི་བཞིན་དང ། །སྨིན་དྲུག་
321b
རྒྱལ་ནི་བདེ་བར་བྱེད། །ས་རི་དེ་ལ་སྒྲུབ་པ་ཡིན། །མགོ་གཉིས་དང་ནི་མོན་གྲུ་བཅས། །དེ་གསུམ་རྗེ་གྲོགས་ཤེས་པར་གྱིས། །སྣརོན་རྒྱལ་ལྷ་མཚམས་ཆུ་སྟོད་དང ། ། ནབ་སོ་ལྷག་པར་ཟླ་བའང་ཡིན། །སྐལ་ལྡན་ལྷ་མོ་གྲེ་ཡིས་སྨྲས། །ཚེས་བཅུ་ལ་ནི་ཁྱེད་གནས་ཤིག་།བིལ་བ་མར་གསར་ཟས་ཡིན་ཏེ། །ཡུད་ཙམ་སུམ་ཅུར་ཁྱོད་ཀྱིས་འགྲོ། །འགྲོ་འདིར་བྱ་བ་ཆུང་དུ་སྒྲུབས། །ཞག་བདུན་ནད་པ་ཁྱོད་སྤྱོད་པས། །སུ་ཞིག་མིར་སྐྱེ་དྲི་དགའ་འདོད། །གོས་དང་རྒྱན་དག་འདོད་པ་ཡིན། །བྱེ་བྲག་ཕྱེད་རྣམས་སུ་སྲུང་བ། །ཐ་སྐར་ལ་ནི་མངལ་འཇུག་འགྱུར། །ནབ་སོས་འཆི་མགོ་ཟིན་རོ་མྱང ། །འཕེལ་བྱེད་སྨིན་དྲུག་རྒུད་པར་བྱེད། །མེ་བཞིའང་མཁས་པས་མངོན་ཤེས་ཀྱིས། །གྲེ་ཞེས་བྱ་དང་བྲ་ཉེ་དང ། །ཆུ་སྨད་ཅེས་ནི་བྱ་བ་གསུམ། །ཕུན་སུམ་ཚོགས་བྱེད་ཤེས་པར་གྱིས། །འདི་ནི་ས་ག་མོན་གྲེ་ཡང ། །སྒྲུབ་ཡིན་ལག་ལའང་བདེ་བ་སྟེ། །སྣར་མ་ནག་པ་གྲོ་བཞིན་ཉིན། །མཁས་པས་གྲོགས་གཉིས་ཤེས་པར་གྱིས། །རྣམ་པ་དྲུག་ཏུ་འགྱུར་བ་ནི། །སྐག་དང་ནམ་གྲུ་རྒྱལ་དག་དང ། །སྣརུབས་དང་སྣརོན་ཞེས་བྱ་བ་དང ། །ཁྲུམས་གཉིས་གང་ཡིན་འདིར་ཡིན་ནོ། །ལྷག་པར་ཡང་ནི་དེ་བཞིན་དུ། །ཐམས་ཅད་ཀྱང་ནི་བགྲང་བར་
322a
༄#། །གྱིས། །མཁས་པ་བློ་གྲོས་ལྡན་པ་ཡིས། །རང་གི་ཐམས་ཅད་ཤེས་པར་གྱིས། །གྲེ་དབོ་ཉི་མའི་ལྷ་མོས་སྨྲས། །ཚེས་ནི་བཅུ་གཅིག་ཁྱོད་གནས་ཀྱི། །ཡུད་ཙམ་བཞི་བཅུ་རྩ་ལྔ་ཡིས། །ཁྱོད་ནི་རྣམ་པར་གྲོལ་བར་གྱིས། །མགོ་ཡིས་ལས་ནི་ཆུང་དུས་ཀྱང ། །ས་བོན་ཐོབ་ཅིང་བསྐྱེད་བྱ་སྟེ། །ཞག་བཅུར་ནད་པ་ཞི་བར་གྱིས། །ཁྱོད་སྤྱད་སྐྱེ་རྒུ་གང་འབྱུང་བ། །བླུན་ཞིང་བསྙེན་གནས་གནས་པའི་ངང ། །སྦྱིན་བྲལ་འགྲོ་ལ་སྡང་མི་སྡུག་།དུག་གིས་འཆི་བར་འགྱུར་བ་སྟེ། །དེ་ཡི་མངལ་འཇུག་བྲ་ཉེ་ཤོག་།ནམ་གྲུ་མོན་གྲེ་འཕེལ་བར་བྱེད། །ལག་ཅེས་བྱ་དང་ས་ག་དང ། །སྣརོན་ཞེས་བྱ་བ་གསུམ་པ་སྟེ། །དེ་དག་འཆི་བར་བྱེད་པ་ཡིན། །ཁྲུམས་སྨད་དང་ནི་རྒྱལ་ཡང་འདིར། །རྒུད་བྱེད་ཡིན་པར་ཤེས་པར་གྱིས། །སྣར་མ་དང་ནི་ཆུ་སྨད་ཀྱང ། །དེའི་ལས་རྒྱུ་སྐར་ཤེས་པར་གྱིས། །མེ་བཞིའང་ཕུན་སུམ་ཚོགས་བྱེད་ཅིང ། །བྱི་བཞིན་དང་ནི་སྨིན་དྲུག་ཀྱང ། །བདེ་བར་བྱེད་པའི་གནས་ཡིན་ཏེ། །མོན་གྲུ་དང་ནི་མགོ་སྒྲུབ་བྱེད། །ནབ་སོ་ཁྲུམས་སྟོད་ལྷ་མཚམས་འདིར། །མཁས་པ་བཞིན་དུའང་ཤེས་པར་གྱིས། །གྲོགས་དང་གྲོགས་
322b
མཆོག་ཐ་སྐར་ཏེ། །མཆུ་དང་ནམ་གྲུ་སྐག་དང་བཅས། །སྣརུབས་དང་ཁྲུམས་སྟོད་ཅེས་བྱ་བ། །དྲུག་པོ་དེ་དག་ནམ་མཁའ་ལ། །ཉི་མའི་ལྷ་མོ་ལྷན་ཅིག་པར། །མཁས་པ་ཡིས་ནི་ཤེས་པར་གྱིས། །བཅུ་གཉིས་ཁྲུ་མྱུར་རྒྱལ་བྱེད་མཁའི། །དཔལ་ལས་བྱ་བར་མྱུར་མི་ཟད། །ཡུད་ཙམ་སུམ་ཅུར་འགྲོ་བར་གྱིས། །སེམས་ཅན་རྣམས་ལ་ཕན་པར་སྦྱིན། །ེ་མ་ཁྱོད་ཟས་ལྷམ་མཆུ་གཤེར། །ཞག་ལྔ་ནད་པ་མྱུར་དུ་གསོས། །དེར་གནས་སྐྱེ་རྒུ་གང་སྐྱེ་བ། །དབང་ཕྱུག་གཙོ་བོ་ནོར་ལྡན་ཡིན། །ཆོམ་རྐུན་རྣམས་ནི་འདུལ་བྱེད་མཆོག་།སྦྱིན་དང་དུལ་བར་བྱེད་པ་ཡིན། །མཆོད་སྦྱིན་རྣམ་པ་སྣ་ཚོགས་ཀྱི། །མཆོད་སྦྱིན་བྱེད་པར་འགྱུར་བ་ཡིན། །བྱང་ཆུབ་ཀྱི་ནི་ཡན་ལག་བདུན། །གོ་འཕང་སྲུང་བར་བྱེད་པས་ན། །དེ་ཡི་གྲགས་པ་མངལ་འཇུག་ཀྱང ། །སྐག་ཅེས་བྱ་བ་ཁོ་ན་ཡིན། །ལྷ་མཚམས་འཆི་བར་བྱེད་པ་སྟེ། །དེ་ཡི་འཕེལ་བྱེད་ནབ་སོ་ཡིན། །ཁྲུམས་སྟོད་ཅེས་ནི་བྱ་བ་ཡང ། །ལས་ཀྱི་རྒྱུ་སྐར་དབྱེར་མེད་པའོ། །ས་རི་མོན་གྲུ་འདིར་རྒུད་བྱེད། །འདིར་ནི་མགོ་ཡང་གསུམ་པ་ཡིན། །ཕུན་སུམ་ཚོགས་བྱེད་འདིར་གྲེ་བཞིན། །ས་རི་སྣར་མའང་གསུམ་པ་ཡིན། །མོན་གྲེ་བདེ་བར་བྱེད་པ་སྟེ། །འདིར་ནི་ས་ག་ལག་གསུམ་པ། །སྣརོན་དང་
323a
༄#། །རྒྱལ་ཡང་སྒྲུབ་པ་སྟེ། །འདིར་ནི་ཁྲུམས་སྨད་གསུམ་པའང་ཡིན། །གྲོགས་དང་གྲོགས་མཆོག་འདི་དྲུག་སྟེ། །ཆུ་སྟོད་མཆུ་དང་ཐ་སྐར་དང ། ཆུ་སྨད་ཅེས་ནི་བྱ་བ་དང ། །གྲེ་དང་བྲ་ཉེ་འཆི་བར་བྱེད། །དགའ་བྱེད་ལྷ་མོ་ནག་པས་སྨྲས། །ཁྱོད་མཁའ་མྱུར་སོང་ཡུད་སུམ་ཅུར། །མི་ཟད་ལས་བྱེད་མྱུར་གནས་ཤིག ། ཡན་ལག་རྨས་པའང་ཁྱོད་ཀྱིས་བཟའ། །ཞག་དྲུག་ནད་བ་མྱུར་དུ་གསོས། །ཁྱོད་ལ་གནས་པས་སྐྱེ་རྒུ་སྐྱེ། །གླུ་དང་རོལ་མོའི་སྒྲ་མཁས་འགྱུར། །སྦྱིན་དགཱ་འདོད་སྤྱོད་མཁས་ལ་སྡུག་།སྣར་མ་དེ་ཡི་མངལ་འཇུག་ཡིན། །ཐ་སྐར་ཞེས་ནི་བྱ་བ་དང ། །མཆུ་ནི་འཆི་བར་བྱེད་པ་སྟེ། །ཆུ་སྟོད་ཅེས་བྱ་གསུམ་པའང་ཡིན། །ཁྲུམས་སྨད་འཕེལ་བར་བྱེད་པ་སྟེ། །སྣརོན་དང་རྒྱལ་ནི་གསུམ་པའང་ཡིན། །དེ་ཡི་ལས་ཀྱི་རྒྱུ་སྐར་ནི། །གྲོ་བཞིན་ཡིན་གྱི་བགྲང་བར་གྱིས། །འདིར་ནི་མོན་གྲེ་རྒུད་པར་བྱེད། །ས་ག་འདིར་ལག་གསུམ་པའང་ཡིན། །མགོ་ནི་ཕུན་སུམ་ཚོགས་བྱེད་འདིར། །ས་རི་མོན་གྲུ་གསུམ་པའང་ཡིན། །འདིར་ཡང་ལྷ་མཚམས་བདེ་བར་བྱེད། །མགོ་ཞེས་ཀྱང་ནི་བྱ་བ་དང ། ། ཁྲུམས་སྟོད་ཅེས་ནི་བྱ་བ་དང ། །སྐག་ཀྱང་འདིར་ནི་སྒྲུབ་པ་ཡིན། །གྲོགས་དང་གྲོགས་མཆོག་སྣརུབས་ནམ་གྲུ། །འདིར་དྲུག་ཆུ་སྨད་སྨིན་དྲུག་དང ། །བྲ་ཉེ་དང་ནི་དབོ་
323b
དང་ཡང ། །ས་བོན་གྲེ་དང་ས་རི་སྟེ། །ཕ་མས་འདིར་སྨྲས་གླིང་བཞི་པར། །མཁའ་ལ་ཁྱོད་སོང་ཚེས་བཅུ་བཞིར། །ཁྱོད་སྤྱོད་འགྲོ་བའི་གླིང་བཞི་པར། །ལྔ་ཡུད་དྲག་བྱོས་ཁྱོད་སོང་ཞིག་།མེ་ཏོག་ནས་ཤིན་ཟས་ཡིན་ཏེ། །ཞག་ལྔར་ནད་པ་མྱུར་དུ་གསོས། །ཁྱོད་སྤྱད་སྐྱེ་རྒུ་སུ་སྐྱེ་བ། །རྩིས་པ་འབྱོར་རྙེད་ཁྲོ་བར་འགྱུར། །འདིར་ནི་རྒྱུ་སྐར་ཁྲོ་སྡང་གཡོ། །སྣར་མ་མེ་བཞི་རྒུད་པར་བྱེད། །འདིར་ནི་སྨིན་དྲུག་བྱི་བཞིན་དང ། །གསུམ་པོ་དབོ་ནི་ཕུན་སུམ་ཚོགས། །ས་ག་དང་ནི་ནབ་སོ་དང ། །གསུམ་པ་ཁྲུམས་སྟོད་སྒྲུབ་པ་ཡིན། །འདིར་བདེ་ནག་པ་མགོ་མོན་གྲུ། །རྣམ་པ་དྲུག་ནི་མཛའ་བོ་ཡིན། །ནམ་གྲུ་སྣརོན་མཛའ་ཐ་སྐར་དང ། །མཆུ་སྣུབས་དེ་དག་མཆོག་ཏུ་མཛའ། །བྱི་བཞིན་ཚངས་པའི་ལྷ་མོས་སྨྲས། །ཚེས་དྲུག་མཁའ་ལ་ཁྱོད་ཡུད་སོང ། །མི་ཟད་བྱ་བ་འབྱུང་བྱའི་ཕྱིར། །མར་གསར་ཡང་ནི་ཁྱོད་ཟོ་ཞིག་།ཁྱོད་ལ་སེམས་ཅན་སུ་གནས་པ། །དཔའ་ཞིང་སྲན་ཐུབ་འབྱོར་རྒྱལ་གཙོ། །ཡུལ་འཁོར་གྲོང་འཇོམས་དགྲ་ཐུལ་བ། །དབོ་ལ་དེ་ནི་མངལ་དུ་འཇུག་།དེ་ལ་འཕེལ་མེད་འཆི་བ་མེད། །དེ་ཡི་རྒྱུ་སྐར་ཀུན་གྲོགས་མཆོག་།གྲོ་བཞིན་ཁྱབ་འཇུག་ལྷ་སོང་སྨྲས། །ངའི་གཡས་ཚེས་བདུན་འདིར་ཁྱོད་སོང ། །སུམ་ཅུའི་ཡུད་ཤ་བུ་རམ་ཟས། །འཕྲོག་བྱེད་བྱ་བ་ཆུང་ངུ་སྒྲུབས། །
324a
༄#། །ཁྱོད་གནས་སྐྱེ་རྒུ་སུ་སྐྱེ་བ། །མཁས་པར་བྱེད་པའི་མཆོག་ཡིན་ཏེ། །གྲོགས་སྐྱོང་རྣམས་ཀྱིས་མཆོད་པ་ཡིན། །འདིར་དེ་མེ་བཞིས་མངལ་འཇུག་ཡིན། །རྒྱལ་ཞེས་བྱ་དང་ལྷ་མཚམས་དང ། །ཁྲིམས་སྟོད་ལ་ནི་འཕེལ་བར་བྱེད། །མཆུ་སྣུབས་གྲོ་བཞིན་འཆི་བར་བྱེད། །སྣར་མ་ལས་ཀྱི་རྒྱུ་སྐར་ཡིན། །ས་རི་མོན་གྲེ་ལག་རྒུད་བྱེད། །མོན་གྲུ་མགོ་ཞེས་བྱ་བ་དང ། །ནག་པ་ཕུན་སུམ་ཚོགས་པར་བྱེད། །ཁྲུམས་སྟོད་ནབ་སོ་ས་ག་བདེ། །ནམ་གྲུ་ནབ་སོ་སྣརོན་སྐག་སྒྲུབ། །རྣམ་དྲུག་གྲོགས་དང་གྲོགས་མཆོག་སྟེ། །སྨིན་དྲུག་ཆུ་སྨད་དེ་དག་ཡིན། །དེ་གཉིས་གསུམ་པ་དབོ་ཡང་ཡིན། །མོན་གྲུ་དྲང་སྲོང་ནོར་ལྷས་སྨྲས། ། ཚེས་བརྒྱད་ཡུད་ཙམ་སུམ་ཅུར་ཁྱོད། །བཞིར་སོང་ལས་ཆུང་ཁྱོད་ཁུ་འཐུང ། །དེར་ནི་ནད་བཏབ་ལོ་གཅིག་གསོས། །ཁྱོད་གནས་སྐྱེ་རྒུ་སུ་སྐྱེ་བ། །ཁྲོ་ཞིང་རྙེད་གོས་དུས་ཀྱང་སྤངས། །ནང་མིས་ཡོངས་བསྐོར་མཆོད་སྦྱིན་བསྲུངས། །འདིར་དེའི་མངལ་འཇུག་ནག་པ་ཡིན། །གྲེ་དང་བྲ་ཉེ་འཆི་བར་བྱེད། །ཆུ་སྟོད་གསུམ་བར་བགྲང་བར་གྱིས། །སྣོན་སྐག་ནམ་གྲུ་འཕེལ་བར་བྱེད། །ས་ག་ནབ་སོ་ཁྲུམས་སྟོད་རྒུད། །ས་རི་དང་ནི་མོན་གྲེ་དང ། །ལག་ནི་ཕུན་སུམ་ཚོགས་པར་བྱེད།།
324b
ལས་ཀུན་གཉེན་གྱིས་ཤིན་ཏུ་བསྲུངས། །དེ་ཡི་མངལ་འཇུག་སྐག་ཡིན་ནོ། །མོན་གྲེ་ཞེས་ནི་བྱ་བ་དང ། །ལག་ནི་འཆི་བར་བྱེད་པ་སྟེ། །མེ་བཞི་དང་ནི་མོན་གྲེ་དང་།། སྣར་མ་འཕེལ་བར་བྱེད་པ་ཡིན། །ནམ་གྲུ་དེ་ལས་རྒྱུ་སྐར་ཡིན། །བར་ཉེ་དང་ནི་ཆུ་སྨད་དང ། །གྲེ་ཞེས་ཀྱང་ནི་བྱ་བ་ཡང ། །གསུམ་པ་ཡིན་ཏེ་རྒུད་པར་བྱེད། །ཆུ་སྟོད་མཆུ་དང་ཐ་སྐར་ནི། །ཕུན་སུམ་ཚོགས་བྱེད་ནག་པ་དང ། །མོན་གྲུ་མགོ་ནི་སྒྲུབ་པར་བྱེད། །བྱི་བཞིན་དབོ་ནི་བདེ་བར་བསྒྲགས། །རྣམ་དྲུག་གྲོགས་དང་གྲོགས་མཆོག་ཡིན། །ཁྲུམས་སྟོད་ཁྲུམས་སྨད་ནབ་སོ་འདིར། །རྒྱལ་ཞེས་བྱ་དང་ལྷ་མཚམས་དང ། །ས་ག་འདིར་ནི་སྨྲས་པ་ཡིན། །ཆུ་སྟོང་གཞི་ཡི་ལྷ་མོས་སྨྲས། །ཚེས་བཞིའི་མཚམས་ཁྱོད་མཁའ་ལ་སོང ། །ནྱ་གྲོ་དྷ་ནི་ཟས་ཡིན་ཏེ། །ཡུད་ཙམ་སུམ་ཅུར་འགྲོ་བར་བྱེད། །གདབ་མོ་ཆུ་ཡི་ལས་ཕྱིར་ཡིན། །བདག་ཀ་ན་གྱུར་ནད་ཆུང་བར་འགྱུར། །ཁྱོད་སྤྱོད་སྐྱེ་རྒུ་དེར་སུ་སྐྱེ། །ཆོས་གནས་བརྩོན་ཐོས་ལོངས་སྤྱོད་ལྡན། །མཁས་པ་དག་དང་ཕྲད་པ་ཡིན། །བྱ་བ་ཀུན་ལ་མཁས་པ་ཡིན། །དེ་སྐྱེའི་རྒྱུ་སྐར་འདིར་མཆུ་ཡིན། །འདིར་ལས་རྒྱུ་སྐར་ཐ་སྐར་ཡིན། །ནག་པོ་མགོ་དང་མོན་གྲུ་འཕེལ། །ས་ག་ཁྲུམས་སྟོད་ནབ་སོ་ནི། །འདིར་ཡང་འཆི་བར་བྱེད་པ་ཡིན། །དབོ་ནི་
325a
༄#། །འདིར་ཡང་རྒུད་པར་བྱེད། །སྨིན་དྲུག་བྱི་བཞིན་གསུམ་པའང་ཡིན། །འདི་ནི་ཕུན་སུམ་ཚོགས་བྱེད་གྲེ་།བྲ་ཉེ་ཆུ་སྨད་གསུམ་པའང་ཡིན། ། ཁྲུམས་དང་ས་རི་མོན་གྲེ་སྒྲུབ། །མེ་བཞི་སྣར་མ་གྲོ་བཞིན་བདེ། །གྲོགས་དང་གྲོགས་འབྲིང་རྣམ་དྲུག་སྟེ། །ནམ་གྲུ་རྒྱལ་དང་ལྷ་མཚམས་སྐག་།སྣརོན་དང་འདིར་ནི་ཁྲུམས་སྨད་ཡིན། །ཁྲུམས་སྨད་དྲང་སྲོང་ཀུན་ལྷས་སྨྲས། །ཚེས་ལྔར་བཞི་བཅུར་ལྔ་ཡུད་འགྲོ་།ཁྱོད་ཆུད་བསྡུ་བྱར་ཁྱོད་ཟས་མངར། །ཞག་བདུན་ནད་གསོས་སྐྱེ་བ་བསྲུངས། །ཁྱོད་སྤྱོད་སྐྱེ་རྒུ་སུ་སྐྱེ་བ། །བུ་ལྡན་ཡིན་ཞིང་ནད་ཀྱང་མེད། །གྲོགས་མང་རབ་ཏུ་འབྱོར་པ་སྟེ། །མངལ་དུ་འཇུག་པའང་ཆུ་སྟོད་ཡིན། །མོན་གྲེ་དང་ནི་ལག་དང་ནི། །ས་རི་ཁོ་ནས་འཕེལ་བར་བྱེད། །ཁྲུམས་སྨད་དང་ནི་ལྷ་མཚམས་དང ། །རྒྱལ་ཡང་འདིར་ནི་འཆི་བྱེད་ཡིན། །གཤིན་རྗེའི་ལྷ་མོ་ལ་མགོས་སྨྲས། །རྒྱལ་ཞེས་བྱ་དང་ལྷ་མཚམས་དང ། །ཁྲུམས་སྨད་བདེ་བར་བྱེད་པ་སྟེ། །ཐ་སྐར་མཆུ་སྣུབས་སྒྲུབ་པ་ཡིན། །དབོ་ཞེས་ཀྱང་ནི་བྱ་བ་དང ། །ཆུ་སྨད་སྨིན་དྲུག་གྲོགས་ཀྱང་བྱེད།། སྣར་མ་བྱིན་ཞིང་བརྩིས་ནས་ཀྱང ། །གསུམ་པ་མེ་བཞི་གྲོགས་མཆོག་ཡིན། །མོན་གྲེ་བྲ་ཉེའི་ལྷ་མོས་སྨྲས། །གླིང་བཞིའི་མཁའ་ལ་ཁྱོད་སོང་ཞིག། ཡུད་ཙམ་
325b
བཅོ་ལྔར་ཞོ་མར་ཟོ། །ཞག་བདུན་ནད་གསོས་ལས་ཀྱང་ཆུང ། །འདིར་ཁྱོད་གནས་པས་སྐྱེ་རྒུ་སྐྱེ། །ཁྲོ་བར་བྱེད་ཅིང་མེད་པ་ཡིན། །ཆུ་བྲན་ལ་ནི་སྲུང་པར་གྱིས། །མངལ་འཇུག་འདིར་ནི་ས་རི་ཡིན། །ཐ་སྐར་མཆུ་སྣུབས་འཕེལ་བར་བྱེད། །ཆུ་སྨད་ཅེས་ནི་བྱ་བ་དང ། །སྨིན་དྲུག་འཆི་བར་བྱེད་པ་སྟེ། །དབོ་ཡང་གསུམ་པར་ཤེས་པར་བྱ། །ཁྲུམས་སྨད་རྒྱལ་དང་ལྷ་མཚམས་ནི། །རྒུད་བྱེད་ལག་ལས་རྒྱུ་སྐར་ཡིན། །ཁྲུམས་སྟོད་ནབ་སོས་ག་སྟེ། །དེ་དག་ཕུན་སུམ་ཚོགས་པར་བྱེད། །སྣོན་སྐག་ནམ་གྲུ་བདེ་བར་བྱེད། །གྲེ་དང་ཆུ་སྟོད་བྲ་ཉེ་སྒྲུབ། །གྲོ་བཞིན་མགོ་དང་མེ་བཞི་དང ། །སྣར་མ་བྱི་བཞིན་གྲོགས་མཆོག་གྲོགས། །ཁྲུམས་སྟོད་དྲང་སྲོང་གིས་སྨྲས་ཁྱོད། །ལན་ཆུང་གཡོ་བྱེད་ཡུད་སུམ་ཅུར། །བཅུ་བཞི་ཚེས་གླིང་བཞི་འདིར་སོང ། །ཤ་སྲན་ཁྱོད་ཟོ་མེ་ཏོག་བསྣམས། །དེར་ནི་སེམས་ཅན་གང་དག་སྐྱེས། །གྱ་གྱུ་གཡོ་རྐུན་བླུན་ཞིང་འཐབ། །རི་དྭགས་སྲོག་གཅོད་ཡུད་སུམ་ཅུར། །ནད་པ་མྱུར་དུ་ཐར་བྱེད་ཅིང ། །སྐྱེ་རྒུ་དེ་དག་དམག་རྐུན་དང ། །རྒྱུད་སྒྲ་རྟག་བསྲུངས་ས་ག་ཡང ། འདིར་མངལ་འཇུག་ཡིན་བྲ་ཉེ་དང ། །ཆུ་སྟོད་གསུམ་པ་གྲེ་འདིར་འཕེལ། །སྣར་མ་བྱི་བཞིན་ཤི་སོ་སོ་བྱེད། །ཐམས་ཅད་བྱ་ཕྱིར་ནབ་སོ་ལག་།རྒུད་བྱེད་ནམ་གྲུ་
326a
༄#། །སྣརོན་སྐག་བཞིན། །ཕུན་ཚོགས་ཁྲུམས་སྨད་ལྷ་མཚམས་རྒྱལ། །ཐ་སྐར་མཆུ་སྣརུབས་འདིར་བདེ་བྱེད། །སྨིན་དྲུག་ཆུ་དབོ་གསུམ་པ་སྒྲུབ། ། མོན་གྲུ་མགོ་དང་ནག་པ་གྲོགས། །གྲོགས་མཆོག་མོན་གྲུ་ལག་ས་རི། །ཁྲུམས་སྨད་ཉི་མའི་ལྷ་མོ་ཁྱོད། །བཅུ་གཅིག་ཚེས་ལ་མཁའ་ལ་སོང ། །ཡུད་ཙམ་བཞི་བཅུ་རྩ་ལྔར་སོང ། །རི་དྭགས་ཤ་གཏོར་ཞག་བདུན་རིམས། །ཁྱོད་སྤྱད་སྐྱེ་རྒུ་སུ་སྐྱེ་བ། །གླུ་དང་གར་མཁས་ནོར་འབྲུ་མང ། །རབ་ཏུ་རིག་པའི་ཕ་རོལ་ཕྱིན། །འདིར་ནི་ཆོས་ཀྱི་སྦྱིན་པ་བྱེད། །ཁ་མཚམས་འཕེལ་བྱེད་སྨིན་དྲུག་དང ། །ཆུ་སྨད་འཆི་བར་བྱེད་པ་སྟེ། །ནག་པ་མགོ་དང་གྲོ་བཞིན་དང ། །རྒྱལ་དེའི་ལས་ཀྱི་རྒྱུ་སྐར་ཡིན། ། སྣརུབས་དང་ཐ་སྐར་མཆུ་རྒུད་བྱེད། །ནམ་གྲུ་སྣོན་སྐར་འདིར་ཕུན་ཚོགས། །མེ་བཞི་བྱི་བཞིན་སྒྲུབ་པ་སྟེ། །བདེ་བར་བྱེད་པ་ཆུ་སྟོད་གྲེ་།བྲ་ཉེ་དང་ནི་ནག་པ་དང ། ། ས་རི་མོན་གྲུ་ལག་ཡིན་ནོ། །ནབ་སོ་དང་ནི་ས་ག་དང ། །མོན་གྲེ་གསུམ་པ་གྲོགས་མཆོག་ཡིན། །དྲང་སྲོང་ལྷ་མོ་རྒྱལ་སྨྲས་ཁྱོད། །མི་ཡི་འཇམ་ཆུང་བྱ་བའི་ཕྱིར། །བཅུ་བཞིའི་ཚེས་ཡུད་སུམ་ཅུར་སོང ། །གཏོར་མ་བུ་རམ་མུན་བ་སྲུངས། །ཞག་ནི་ཉི་ཤུར་ཁྱོད་བསྲུངས་པས། །སྐྱེ་རྒུ་སྐྱེ་མཛངས་ནོར་འབྲུ་ལྡན། །སྦྱོར་དང་
326b
རབ་སྦྱོར་བྱ་བ་དང ། །དབྱིག་རྣམས་དཔག་ཏུ་མེད་པའང་ཡིན། །དེ་ཡི་མངལ་འཇུག་སྣརོན་ཡིན་ཏེ། །མེ་བཞི་སྣར་མ་བྱི་བཞིན་འཕེལ། །ས་རི་མོན་གྲུ་ལག་འཆི་བྱེད། ། ལས་ཀྱི་རྒྱུ་སྐར་འདིར་སྐག་ཡིན། །དབོ་དང་ཆུ་སྨད་སྨིན་དྲུག་བདེ། །གྲོ་བཞིན་ནག་པ་སྣར་མ་སྒྲུབ། །ཆུ་སྟོད་གྲེ་བྲ་ཉེ་རྒུད་བྱེད། །ཐ་སྐར་མཆུ་སྣརུབས་ཕུན་ཚོགས་བྱེད། །ནབ་སོ་ས་ག་མོན་གྲེ་གྲོགས། །རྒྱལ་དང་ལྷ་མཚམས་གྲོགས་མཆོག་སྟེ། །ཁྲུམས་སྟོད་དྲང་སྲོང་གིས་སྨྲས་པ། །དྲི་ཟའི་ལྷ་མོ་ཡུད་སུམ་ཅུར། །ཚེས་ནི་བཅུ་བཞིར་ཁྱེད་སོང་ཞིག་།མྱུར་བྱའི་གཏོར་མ་ཟན་དྲོན་ཤ་།འདིར་ཞག་ཉི་ཤུ་ལྔ་ནང་ཡིན། །སྲོག་ལྡན་འབྲས་དཀར་བརྒྱ་ཡིས་བསྲུངས། །ཁྱོད་སྤྱད་སྐྱེ་རྒུ་སུ་སྐྱེ་བ། །སྨན་སྦྱོར་བྱེད་པ་སྨན་པ་ཡིན། །གླུ་གར་རོལ་མོའི་སྒྲ་མཁས་འགྱུར། །འདིར་དེའི་མངལ་འཇུག་སྣུབས་ཡིན་ནོ། །ནག་པ་མགོ་དང་གྲོ་བཞིན་འཕེལ། །ནབ་སོ་མོན་གྲེ་ལག་འཆི་བྱེད། །སྐྱེ་འཆི་འཕེལ་ཉོ་ཚོངས་ལམ་འགྱེད། །ཐལ་མོ་འགྲེག་མཁན་ལས་རྟག་སྤོངས། །སྨིན་དྲུག་གྲེ་དབོ་ཆུ་སྨད་གཉིས། །རྒུད་བྱེད་འདིར་ནི་དགྲ་ཕམ་བྱེད།། ཁྱོད་ཀྱིས་ལས་དག་ཆེ་ཆུང་བྱས། །མཆུ་དང་གྲེ་འདི་བརྟན་ཕུན་ཚོགས། །ཆུ་སྟོད་དང་ནི་བྲ་ཉེ་དང ། །གསུམ་པ་ཁྲུམས་སྨད་བདེ་བར་བྱེད། །མེ་བཞི་སྣར་མ་བདེ་
327a
༄#། །བྱའི་ཕྱིར། །གསང་བའི་ལམ་དུ་འགྲོ་བ་ཡིན། །ལག་དང་མོན་གྲུ་ས་རི་སྒྲུབ། །དྲག་པོའི་ལས་རྣམས་ཀུན་གྱིས་ཤིག་།རྒྱལ་དང་ལྷ་མཚམས་ཁྲུམས་སྟོད་གྲོགས། །བྱ་བ་སལ་བཟང་འདིར་ཆུང་ཟ། །སྐད་སྣརོན་གྲོགས་མཆོག་བསྟེན་པ་སྟེ། །ཁྲུམས་སྨད་འདིར་ཡང་གསུམ་པ་ཡིན། །སྐལ་པ་བཟང་དང་བཞོན་པ་དང ། །མལ་དང་ཤིན་ཏུ་བརྟན་པར་གྱིས། །དྲུག་བདུན་དེ་དག་ལས་བཞིན་དང ། །སྣ་ཚོགས་མཁས་པས་ཤེས་ནས་སུ། །སྔོན་གྱི་བྱ་བ་བཞིན་དུ་གྱིས། །གཤིན་རྗེའི་ལྷ་ཚེས་བཅུ་བཞིར་སོང ། །ཟླ་ཉ་ཟླ་བ་རངས་པའི་ཚེ། །སྨིན་དྲུག་ཀྱང་ནི་འགྲོ་བར་གྱིས། །ལྷ་དང་མི་དང་དྲང་སྲོང་རྣམས། །བྱེད་པ་གང་གིས་སྔར་བཞིན་ནོ། །ཞག་ནི་སུམ་ཅུ་ཟླ་བ་རངས། །ཉིན་དང་མཚན་ནི་མཉམ་པ་སྟེ། །ཡུད་ཙམ་བཅོ་ལྔ་བཅོ་ལྔ་ཡིན། །གྲིབ་མའི་གོམ་དྲུག་འདིར་ཀུན་འཁོར། །ཐ་སྐར་གྱིས་ནི་མཚན་མོ་ཐོབ། །ཉི་མའི་མདུན་ན་ལྷ་མཚམས་ཏེ། །ལྷོ་ཕྱོགས་སུ་ནི་ཉི་མ་འཁོར། །ཞིང་གི་དཀྱིལ་འཁོར་མིག་དམར་ཡིན།། ཉི་བུ་ལྷ་སྲོང་རབ་སྤྲོ་བྱས། །ཁྱོད་ཀྱིས་ཟླ་བ་འདི་ལ་ནི། །རྩ་དང་ལག་འགྲོ་གནོད་སྦྱིན་དང ། །སྡིག་པ་ལས་སོགས་སྲུང་བར་གྱིས། །ཆ་དང་ཆར་ནི་དུས་
327b
བཞག་པར། །སྡིག་པ་ཞེས་བྱ་ཁྱོད་ཕན་སོང ། །ཕྱོགས་དང་ཕྱོགས་སུ་ལས་བཞག་པར། །ཁྱོད་ནི་ཡང་དག་ཕན་པར་སོང ། །མི་མཐུན་མཐུན་དང་འཕེལ་འདི་ཡིན། །འགྲོ་བ་ལ་ནི་ཕན་པ་ཡི། །རྗེས་སུ་མཐུན་པ་བདག་གིས་སུ། །དང་པོར་བསྡུ་བ་བྱས་འདི་ཡིན། །དེ་ནས་དྲང་སྲོང་རྔ་བོང་གིས་ཐམས་ཅད་ལ་ཐལ་མོ་རབ་ཏུ་སྦྱར་ཏེ་འཁོར་ལ་གོ་བར་བྱེད་ཅིང་སྨྲས་པ། འདི་ལྟར་བདག་གིས་གོ་རིམ་ཀྱི་དང་པོ་དང ། མཚན་མོ་དང ། ཉིན་མོ་དང ། ཟླ་བ་དང ། ཟླ་བ་ཕྱེད་དང ། རྒྱུ་སྐར་དང ། གཟའ་དང ། དུས་དང ། ཁྱིམ་དང ། གནས་དང ། འགྲོ་བར་བྱེད་པ་དང ། འཁོར་བ་དང ། འགྲོ་བ་དང ། མཐོང་བ་དང ། ཐོས་པ་དང ། རྣམ་པར་ཤེས་པ་དེ་བཞིན་དུ་ད་ལྟར་ཡང་བསྟན་ཅིང་རྣམ་པར་བཞག་ན། ཅི་ཁྱེད་ཅག་འདི་ལྟར་རྣམ་པར་བཞག་པ་དབང་གདགས་པར་རྒྱུ་སྐར་དང ། གཟའ་ཡོངས་སུ་མགུ་བ་ལ་རྗེས་སུ་ཡི་རང་བར་བྱེད་དམ། འོན་ཏེ་མ་ཡིན། དེ་ནས་དེ་ཉིད་ཀྱི་ཚེ་ལྷ་མ་ཡིན་དང ། མི་དང ། དྲང་སྲོང་དང ། ལྷ་དང ། ལག་འགྲོ་དང ། མི་འམ་ཅིའི་ཚོགས་ཐམས་ཅད་ཀྱིས་ཐལ་མོ་རབ་ཏུ་སྦྱར་བ་བཏུད་ནས་འདི་སྐད་ཅེས་སྨྲས་སོ། །ཀྱེ་ཁྱོད་ནི། ལྷ་ཐམས་ཅད་ཀྱི་བླ་མ། ལྷ་དང་ལྷ་མ་ཡིན་དུ་བཅས་པའི་འགྲོ་བའི་ནང་ན་
328a
༄#། །གཙོ་བོ། མཚུངས་པ་མེད་པར་མཁས་ལ་མངོན་པར་རྟོགས་པའི་སྙིང་བརྩེ་བས་བསྐལ་པ་ཕ་རོལ་དྲན་པའོ། །སེམས་ཅན་ཐམས་ཅད་ལ་ཕན་པར་འདོད་པའོ། །དཔལ་ཐམས་ཅད་ཕུན་སུམ་ཚོགས་པའོ། །ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པའོ། །དུས་གསུམ་ཐམས་ཅད་མཉམ་པ་ཉིད་དང་ལྡན་པ་ཡིན་ཏེ། འདི་ལྟ་བུའི་མཚན་མོ་དང ། ཉིན་མོ་དང ། སྐད་ཅིག་དང ། རྒྱུ་སྐར་དང ། གཟའ་དང ། ཟླ་བ་དང ། ཟླ་བ་ཕྱེད་འདོགས་པར་བྱེད་པའི་ཡེ་ཤེས་དེ་ལྟ་བུ་སུ་ལ་ཡོད་པའི་སེམས་ཅན་དེ་ལྟ་བུ་སུ་ཡང་ལྷ་དང་ལྷ་མ་ཡིན་དུ་བཅས་པའི་ནང་ན་མེད་པ་ཡིན་ནོ། །ཇི་ལྟར་ཁྱོད་ཀྱིས་ད་ལྟར་བཏགས་པ་བཞིན་དུ་བདག་ཅག་ཐམས་ཅད་ཀྱིས་དེར་དད་པ་བྱིན་པ་ཡིན། རྗེས་སུའང་ཡི་རང་ངོ ། །ལེགས་ལྡན་ལེགས་སོ། །སེམས་ཅན་ཐམས་ཅད་ལ་ཕན་པའི་ཕྱིར་རྒྱུ་སྐར་དང ། གཟའ་དང ། ཁྱིམ་དང ། དུས་ཀྱི་ཚོགས་ཀྱིས་ཡོངས་སུ་བསྐོར་བའི་ཟླ་བ་གཉིས་པ་ལ་ཡང་གདགས་པར་གྱིས་ཤིག་།དྲང་སྲོང་རྔ་བོང་གིས་རབ་ཏུ་སྨྲས་བ། བདག་གིས་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བ། །
328b
འདི་ནི་རབ་ཏུ་བརྗོད་པ་ཡིན། །མཚན་མོ་ཡང་ནི་ཡུད་ཙམ་གཅིག་།ཡོངས་སུ་བསྐོར་ཏེ་སླར་ལྡོག་བྱེད། །བྲ་ཉེ་དང་ནི་སྨིན་དྲུག་ཀྱང ། །ལན་གཉིས་ཡོངས་སུ་འཁོར་བར་བྱེད། །དེ་བས་རྒྱུ་སྐར་ཐམས་ཅད་ཀྱང ། །ཕྱིར་ཞིང་འཇུག་པར་བྱེད་པ་སྟེ། །སྣར་མ་གཅིག་པུའང་ཟླ་ངོ་དེར། །ཚེས་གཅིག་ལ་ནི་མཁའ་ལ་འགྲོ། །ཇི་ལྟར་སྔར་བྱ་བཤད་པ་བཞིན། །དེ་བཞིན་ཁྱོད་ཀྱིས་སྐྱེ་རྒྱུ་སྲུངས། །དེ་ཙམ་མགོ་ཚེས་གཉིས་ལ་འགྲོ། །དེ་ཙམ་ལག་ཚེས་གསུམ་ལ་འགྲོ་།ཚེས་བཞི་ལ་ཡང་ནབ་སོ་སྟེ། །རྒྱལ་ཡང་ཚེས་ནི་ལྔ་ལ་འགྲོ་།ཚེས་དྲུག་ལ་ནི་སྐག་གི་ཚིགས། །མཆུ་ཡང་ཚེས་ནི་བདུན་ལ་སྲུང ། །ཚེས་བརྒྱད་ལ་ནི་གྲེ་ཡིན་ཏེ། །ཚེས་དགུ་ལ་ནི་དབོ་འགྲོ་བྱེད། །མེ་བཞིའང་ཚེས་ནི་བཅུ་ལ་འཇུག་།ནག་པའང་ཚེས་བཅུ་གཅིག་ལ་འགྲོ་།ས་རིའང་ཚེས་བཅུ་གཉིས་ལ་གནས།། ཚེས་བཅུ་གསུམ་ལའང་ས་ག་སྟེ། །ཚེས་བཅུ་བཞི་ལ་ལྷ་མཚམས་ཡིན། །ཚེས་བཅོ་ལྔ་ལ་དེ་བཞིན་སྣརོན། །འདི་ནི་ཟླ་བ་ཕྱེད་དུ་བཤད། །ཡར་གྱི་ངོ་ལ་སྣརུབས་སྒྲུབ་སྟེ། །ཚེས་གཅིག་ལ་ནི་སྐྱེ་རྒུ་སྲུང ། །ཚེས་གཉིས་ལ་ནི་ཆུ་སྟོད་ཡིན། །ཚེས་གསུམ་ལ་ནི་ཆུ་སྨད་ཡིན། །ཚེས་བཞི་ལ་ནི་བྱི་བཞིན་
329a
༄#། །སྲུང ། །ཚེས་ལྔ་ལ་ནི་གྲོ་བཞིན་ཡིན། །ཚེས་དྲུག་ལ་ནི་མོན་གྲུའི་ཚིགས། །ཚེས་བདུན་ལ་ནི་ཆུ་ལྷ་ཡིན། །ཚེས་བརྒྱད་ལ་ནི་ཁྲུམས་སྟོད་ཡིན། །ཚེས་དགུ་ལ་ནི་ཁྲུམས་སྨད་ཡིན། །ཚེས་བཅུ་ཡང་ན་ནམ་གྲུ་སྲུང ། །དེ་བཞིན་བཅུ་གཅིག་ཚེས་ཐ་སྐར། །གཤིན་རྗེའི་ལྷ་མོ་ཚེས་བཅུ་གཉིས། །ཚེས་བཅུ་གསུམ་ལ་མེ་ལྷ་མོ། །ཚེས་བཅུ་བཞི་ལའང་སྣར་མ་ཡིན། །ཟླ་བ་རངས་ལ་མགོ་བཤད་དོ། །དགུན་ཟླ་ར་བའི་ཟླ་བ་འདིར། །ལྷ་ཡི་བླ་མ་ཕུར་བུ་སྟེ། །འདི་ནི་ལྷན་ཅིག་བྱེད་པར་གཟུང ། །དེ་བས་གཟའ་ཞེས་བྱ་བར་བཤད། །དེ་ཕྱིར་ཉིན་མོ་ཚེས་བཅུ་བཞིར།། ཡུད་ཙམ་མཚན་མོ་བཅུ་དྲུག་སྟེ། །སྨིན་དྲུག་གིས་ནི་མཚན་མོ་ཐོབ། །སྣུབས་ཀྱང་ཉི་མའི་མདུན་ན་སྟེ། །གྲིབ་ཚོད་གོམ་པ་བརྒྱད་ཡིན་ཞིང ། །ཉི་མ་ཡོངས་སུ་འཁོར་བར་བྱེད། །ལྷོ་ཕྱོགས་ཉི་མར་ཁ་བལྟས་འཁོར། །དེ་བཞིན་དགུན་ཟླ་ར་བ་ཡི། །ཟླ་འདིར་ཁྱིམ་གཞུར་ཤེས་པར་བྱ། །མར་གྱི་ངོ་ཡི་ཚེས་གཅིག་ལའང ། །ལག་ནི་སྒྲུབ་པར་བྱེད་པ་ཡིན། །ཚེས་གཉིས་ལ་ནི་ནབ་སོ་སྟེ། །ཚེས་གསུམ་རྒྱལ་དུ་ཤེས་པར་གྱིས། །འདིར་ཚེས་བཞི་
329b
ལའང་སྐག་ཡིན་ཏེ། །མཆུ་ཡང་ཚེས་ནི་ལྔ་ལ་འགྲོ་།ཚེས་དྲུག་ལ་ཡང་གྲེ་ཡིན་ཏེ། །ཚེས་བདུན་ལ་ཡང་དབོ་ཡིན་བཤད། །ཚེས་བརྒྱད་ལ་ནི་མེ་བཞི་ཡིན། །ཚེས་དགུ་ལ་ནི་ནག་པ་གནས། །ཚེས་བཅུ་ལ་ནི་ས་རི་འགྲོ་།ཚེས་བཅུ་གཅིག་ལ་ས་ག་འགྲོ་།ཚེས་བཅུ་གཉིས་ལའང་ལྷ་མཚམས་ཏེ། །ཚེས་བཅུ་གསུམ་ལ་སྣརོན་ཡིན་ནོ། །ཚེས་བཅུ་བཞི་ལའང་སྣུབས་ཡིན་ཏེ། །ཚེས་བཅོ་ལྔ་ལའང་ཆུ་སྟོད་བཤད། །ཡར་གྱི་ངོ་ཡི་ཚེས་གཅིག་ལ། །ཆུ་སྨད་ཀྱང་ནི་རུང་བ་ཡིན། །ཚེས་གཉིས་བྱི་བཞིན་གྲོ་བཞིན་ཏེ། །ཚེས་གསུམ་ལ་ནི་མོན་གྲུ་འགྲོ། །ཚེས་བཞིར་མོན་གྲེ་འགྲོ་རུང་སྟེ། །ཚེས་ལྔ་ལ་ནི་ཁྲུམས་སྟོད་ཡིན། ། ཚེས་དྲུག་ལ་ཡང་ཁྲུམས་སྨད་ཡིན། །ཚེས་བདུན་ལ་ནི་ནམ་གྲུ་འགྲོ་།ཚེས་བརྒྱད་ལ་ནི་ཐ་སྐར་རུང ། །ཚེས་དགུར་གཤིན་རྗེའི་ལྷ་མོ་ཡིན། །ཚེས་བཅུར་སྨིན་དྲུག་འགྲོར་རུང་སྟེ། །ཚེས་བཅུ་གཅིག་ལའང་སྣར་མ་ཡིན། །ཚེས་བཅུ་གཉིས་ལའང་མགོ་ཡིན་ཏེ། །ཚེས་བཅུ་གསུམ་ལ་ལག་ཀྱང་འགྲོ། ། ཚེས་བཅུ་བཞི་ལ་ནབ་སོ་སྟེ། །ཟླ་བ་ཉ་ལ་རྒྱལ་ཡང་ཡིན། །ཟླ་བ་ཉ་བ་འདི་ལ་ཡང ། །འདིར་ནི་རང་བཞིན་བརྗོད་པར་བྱ། །ལྷོ་ཡི་ཕྱོགས་སུ་ཕྱིན་ནས་
330a
༄#། །ཀྱང ། །ཉི་མ་ཡོངས་སུ་འཁོར་བར་བྱེད། །ཉིན་པར་བཅུ་གསུམ་ཤེས་པར་གྱིས། །མཚན་མོ་བཅུ་བདུན་འགྲོ་བར་བྱེད། ། མཚན་མོ་ཡང་ནི་མགོར་ཤེས་གྱིས། །ཉི་མའི་མདུན་དུའང་གྲོ་བཞིན་ཏེ། །གྲིབ་ཚོད་གོམ་པ་བཅུ་ཐམ་པ། །ཉི་མ་ཡོངས་སུ་འཁོར་བར་བྱེད། །འཇིག་རྟེན་མཁས་པ་རྣམས་ཀྱིས་ཀྱང ། །འདིར་ནི་སྤེན་པའི་ཞིང་བསྟན་པ། །འདི་ལ་མགོ་ཡིན་ཤེས་པར་གྱིས། །ཟླ་བ་གསུམ་པ་རྣམ་བཞག་ནས། །ཟླ་བ་མར་གྱི་ཚེས་གཅིག་ལ། །སྐག་ནི་སྒྲུབ་པར་བྱེད་པ་ཡིན། །ཚེས་གཉིས་ལ་ནི་མཆུར་ཤེས་གྱིས། །ཚེས་གསུམ་ལ་ནི་གྲེ་ཡིན་ནོ། །ཚེས་བཞི་ལ་ནི་དབོ་འགྲོ་སྟེ། །ཚེས་ལྔ་ལ་ནི་མེ་བཞི་འགྲོ། །ཚེས་དྲུག་ལ་ནི་ནག་པ་སྒྲུབ། །ཚེས་བདུན་ལ་ནི་ས་རི་འགྲོ་།ཚེས་བརྒྱད་ལ་ཡང་ས་ག་སྟེ། །ཚེས་དགུ་ལ་ནི་ལྷ་མཚམས་ཡིན། ། ཚེས་བཅུ་ལ་ནི་སྣརོན་འགྲོ་སྟེ། །ཆེས་བཅུ་གཅིག་ལ་སྣརུབས་འཇུག་བྱ། །ཚེས་བཅུ་གཉིས་ལ་ཆུ་སྟོད་ཡིན། །ཚེས་བཅུ་གསུམ་ལ་ཆུ་སྨད་ཡིན། ། ཚེས་བཅུ་བཞི་ལ་བྱི་བཞིན་ཏེ། །ཚེས་བཅོ་ལྔ་ལ་གྲོ་བཞིན་འགྲོ། །ཟླ་བ་ཡར་གྱི་ཚེས་གཅིག་ལ། །མོན་གྲུ་སྒྲུབ་པར་བྱེད་པ་ཡིན། །ཚེས་གཉིས་
330b
ལ་ནི་མོན་གྲེ་སྟེ། །ཚེས་གསུམ་ལ་ཡང་ཁྲུམས་སྟོད་ཡིན། །ཚེས་བཞི་ལ་ནི་ཁྲུམས་སྨད་ཡིན། །ཚེས་ལྔ་ལ་ནི་ནམ་གྲུ་འགྲོ་།ཚེས་དྲུག་ལ་ནི་ཐ་སྐར་ཚིགས། ། ཚེས་བདུན་གཤིན་རྗེའི་ལྷ་མོ་ཡིན། །དེ་བཞིན་ཚེས་བརྒྱད་སྨིན་དྲུག་སྟེ། །ཚེས་དགུ་ལ་ནི་སྣར་མ་འགྲོ་།ཚེས་བཅུ་ལ་ཡང་མགོ་ཡིན་ཏེ། །ལག་ནི་ཚེས་བཅུ་གཅིག་ལ་འགྲོ་།ཚེས་བཅུ་གཉིས་ལའང་ནབ་སོ་སྟེ། །ཚེས་བཅུ་གསུམ་ལ་རྒྱལ་ཡང་ཡིན། །ཚེས་བཅུ་བཞི་ལའང་སྐག་ཡིན་ཏེ། །མཆུ་ནི་ཟླ་བ་རབ་རྫོགས་བྱེད། ། དགུན་ཟླ་ཐ་ཆུང་རང་བཞིན་ཡང ། །མཐར་གྱིས་ཀྱང་ནི་བརྗོད་པར་བྱ། །ལྷོ་ཡི་ཕྱོགས་སུ་ཕྱིན་ནས་ཀྱང ། །ཉི་མ་ཡོངས་སུ་འཁོར་བར་བྱེད། །མཚན་མོ་བཅོ་བརྒྱད་ཤས་པར་གྱིས། །ཉིན་པར་ཡང་ནི་བཅུ་གཉིས་ཡིན། །རྒྱལ་ཡང་མཚན་མོ་ཐོབ་པར་བྱེད། །ཉི་མའི་མདུན་ན་མོན་གྲེ་ཡིན། །གྲིབ་ཚོད་ཀྱང་ནི་སོར་བཅུ་བདུན། །ཉི་མ་ཡོངས་སུ་འཁོར་བར་བྱེད། །སྤེན་པ་ལྷ་ཡི་བླ་མ་དག་།ཞིང་དེར་རབ་ཏུ་བརྗོད་པ་ཡིན། །འདིར་ཁྱིམ་བུམ་པ་མཉམ་པ་མེད། །དཔྱིད་ཟླ་ར་བ་མར་གྱི་ངོར། །ཚེས་གཅིག་གྲེ་ནི་སྒྲུབ་པར་བྱེད། །ཚེས་གཉིས་ལ་ནི་དབོ་ཡིན་ནོ། །ཚེས་གསུམ་ལ་ནི་མེ་བཞི་སྟེ། །ཚེས་བཞིའི་བར་དུ་ནག་པ་ཡིན། །ཚེས་ལྔ་ལ་
331a
༄#། །ནི་ས་རི་སྟེ། །ཚེས་དྲུག་ལ་ནི་ས་ག་ཡིན། །ཚེས་བདུན་ལ་ནི་ལྷ་མཚམས་ཏེ། །ཚེས་བརྒྱད་ལ་ནི་སྣོན་ཡིན་ནོ། །ཚེས་དགུ་ལ་ནི་སྣརུབས་ཡིན་ཏེ། །ཚེས་བཅུ་ལ་ནི་ཆུ་སྟོད་ཡིན། །ཚེས་བཅུ་གཅིག་ལ་ཆུ་སྨད་ཡིན། །ཚེས་བཅུ་གཉིས་ལ་བྱི་བཞིན་ཏེ། །ཚེས་བཅུ་གསུམ་ལ་གྲོ་བཞིན་ཡིན། །ཚེས་བཅུ་བཞི་ལ་མོན་གྲུ་སྟེ། །ཚེས་བཅོ་ལྔ་ལ་མོན་གྲེ་ཡིན། །དེ་ནི་ཟླ་བ་ཕྱེད་ཡིན་ནོ། །ཟླ་བ་ཡར་གྱི་ཚེས་གཅིག་ལ། །ཁྲུམས་སྟོད་ཅེས་ནི་བྱ་བ་ཡིན། །ཚེས་གཉིས་ལ་ནི་ཁྲུམས་སྨད་ཡིན། །ཚེས་གསུམ་ལ་ནི་ནམ་གྲུ་སྟེ། །ཚེས་བཞི་ལ་ནི་ཐ་སྐར་ཡིན། །ཚེས་ལྔ་ལ་ནི་བྲ་ཉེ་ཡིན། །ཚེས་དྲུག་ལ་ནི་སྨིན་དྲུག་སྟེ། །ཚེས་བདུན་ལ་ནི་སྣར་མ་ཡིན། །ཚེས་བརྒྱད་ལ་ནི་མགོ་ཡིན་ཏེ། །ཚེས་དགུ་ལ་ནི་ལག་ཡིན་ནོ། །ཚེས་བཅུ་ལ་ནི་ནབ་སོ་སྟེ། །ཚེས་བཅུ་གཅིག་ལ་རྒྱལ་ཡིན་ནོ། །ཚེས་བཅུ་གཉིས་ལ་སྐག་ཡིན་ཏེ། །ཚེས་བཅུ་གསུམ་ལ་མཆུ་ཡིན་ནོ། །ཚེས་བཅུ་བཞི་ལ་གྲེ་ཡིན་ཏེ། །ཟླ་རངས་ཚེས་བཅོ་ལྔ་ལ་དབོ།། འདིར་ནི་དཔྱིད་ཟླ་ར་བ་ཡི། །རང་བཞིན་ཡང་ནི་བརྗོད་པར་བྱ། །བྱང་ཕྱོགས་སུ་ནི་ཁ་བལྟས་ཏེ། །ཉི་མ་ཡོངས་སུ་འཁོར་བར་བྱེད། །ཉིན་བར་བཅུ་གསུམ་ཤེས་པར་གྱིས་
331b
མཚན་མོ་བཅུ་བདུན་འགྲོ་བར་བྱེད། །མཆུས་ཀྱང་མཚན་མོ་ཐོབ་པར་བྱེད། །ཉིན་པར་ཁྲུམས་སྟོད་འགྲོ་བར་བྱེད། །གྲིབ་ཚོད་སོར་ནི་བཅུ་གཉིས་སུ། །ཉི་མ་ཡོངས་སུ་འཁོར་བར་བྱེད། །ཞིང་དེར་ལྷ་ཡི་བླ་མ་ཡང ། །རྣམ་པར་གནས་པ་ཁོ་ནར་ནི། །བཤད་པ་ཡིན་ཏེ་འདིར་ཡང་ནི། །དེར་ནི་མཚན་མོ་འབྱུང་བ་ཡིན། །དཔྱིད་ཟླ་འབྲིང་པོའི་ཟླ་ངོ་ཡི། །དང་པོར་ཚེས་གཅིག་མེ་བཞི་སྟེ། །ཚེས་གཉིས་ལ་ནི་ནག་པ་ཡིན། །ཚེས་གསུམ་ལ་ནི་ས་རི་ཡིན། །ཚེས་བཞི་ལ་ནི་ས་ག་སྟེ། །ཚེས་ལྔ་ལ་ནི་ལྷ་མཚམས་ཡིན། །ཚེས་དྲུག་ལ་ནི་སྣརོན་ཡིན་ནོ། །ཚེས་བཅུན་ལ་ནི་སྣརུབས་ཡིན་ནོ། །ཚེས་བརྒྱད་ལ་ནི་ཆུ་སྟོད་ཡིན། །ཚེས་དགུ་ལ་ནི་ཆུ་སྨད་ཡིན། ། ཚེས་བཅུ་ལ་ནི་བྱི་བཞིན་ཏེ། །ཚེས་བཅུ་གཅིག་ལ་གྲོ་བཞིན་ཡིན། །ཚེས་བཅུ་གཉིས་ལ་མོན་གྲུ་སྟེ། །ཚེས་བཅུ་གསུམ་ལ་མོན་གྲེ་ཡིན། །ཚེས་བཅུ་བཞི་ལ་ཁྲུམས་སྟོད་ཡིན། །ཚེས་བཅོ་ལྔ་ལ་ཁྲུམས་སྨད་ཡིན། །དེ་ནི་ཟླ་བ་བྱེད་ཡིན་ཏེ། །ཟླ་བ་ཡར་གྱི་ཚེས་གཅིག་ལ། །ནམ་གྲུ་ཚེས་གཉིས་ཐ་སྐར་ཏེ། །ཚེས་གསུམ་ལ་ནི་བྲ་ཉེ་ཡིན། །ཚེས་བཞི་ལ་ནི་སྨིན་དྲུག་སྟེ། །ཚེས་ལྔ་ལ་ནི་སྣར་མ་ཡིན། །ཚེས་དྲུག་ལ་ནི་མགོ་ཡིན་ཏེ། །ཚེས་བདུན་ལ་ནི་ལག་ཡིན་ནོ། །ཚེས་བརྒྱད་ལ་ནི་ནབ་སོ་
332a
༄#། །སྟེ། །ཚེས་དགུ་ལ་ནི་རྒྱལ་ཡིན་ནོ། །ཚེས་བཅུ་ལ་ནི་སྐག་ཡིན་ནོ། །ཚེས་བཅུ་གཅིག་ལ་མཆུ་ཡིན་ནོ། །ཚེས་བཅུ་གཉིས་ལ་གྲེ་ཡིན་ཏེ། ། ཚེས་བཅུ་གསུམ་ལ་དབོ་ཡིན་ནོ། །ཚེས་བཅུ་བཞི་ལ་མེ་བཞི་སྟེ། །ཚེས་བཅོ་ལྔ་ལ་ནག་པ་ཡིན། །དཔྱིད་ཟླ་འབྲིང་པོ་ཁོ་ན་ཡི། །རང་བཞིན་ཡང་ནི་བརྗོད་པར་བྱ། ། བྱང་གི་ཕྱོགས་སུ་ཁ་བལྟས་ཏེ། །ཉི་མ་ཡོངས་སུ་འཁོར་བར་བྱེད། །འདིར་ནི་ཕྱིས་ཀྱང་ཡུད་ཙམ་བྱ། །ཡོངས་སུ་འཁོར་བར་ཤེས་པར་བྱེད། །ཡུད་ཙམ་ཡང་ནི་རེ་རེ་ཞིག་།ཉིན་མཚན་དག་ལ་འཇུག་པར་བྱེད། །ཉིན་པར་བཅུ་བཞི་ཤེས་པར་གྱིས། །མཚན་མོའང་བཅུ་དྲུག་ཤེས་པར་གྱིས། །བྲེ་དབོ་མཚན་མོ་ཐོབ་པར་བྱེད། ། ཉི་མའི་མདུན་ན་ཐ་སྐར་ཡིན། །གྲིབ་ཚོད་སོར་བརྒྱད་ཉི་མ་འཁོར། །ཉི་མའི་བུ་ནི་མིག་དམར་ཏེ། །གཟའ་རྣོ་ཤིན་ཏུ་མི་བཟད་ཡིན། །ཁྱིམ་ལུག་ལ་ནི་ཡང་དག་གནས། །དཔྱིད་ཟླ་ཐ་ཆུང་མར་གྱི་ངོའི། །དང་པོ་ཚེས་གཅིག་ས་རི་སྟེ། །ཚེས་གཉིས་ལ་ནི་ས་ག་ཡིན། །ཚེས་གསུམ་ལ་ནི་ལྷ་མཚམས་ཡིན། །ཚེས་བཞི་ལ་ནི་སྣརོན་ཡིན་ཏེ། །ཚེས་ལྔ་ལ་ནི་སྣརུབས་ཡིན་ནོ། །ཚེས་དྲུག་ལ་ནི་ཆུ་སྟོད་ཡིན། །ཚེས་བདུན་ལ་ནི་ཆུ་སྨད་ཡིན། །ཚེས་བརྒྱད་ལ་ནི་བྱི་བཞིན་ཏེ། །ཚེས་དགུ་ལ་ནི་གྲོ་བཞིན་ཡིན། །ཚེས་བཅུ་ལ་ནི་མོན་གྲུ་
332b
སྟེ། །ཚེས་བཅུ་གཅིག་ལ་མོན་གྲེ་ཡིན། །ཚེས་བཅུ་གཉིས་ལ་ཁྲུམས་སྟོད་ཡིན། །ཚེས་བཅུ་གསུམ་ལ་ཁྲུམས་སྨད་ཡིན། །ཚེས་བཅུ་བཞི་ལ་ནམ་གྲུ་སྟེ། །ཚེས་བཅོ་ལྔ་ལ་ཐ་སྐར་ཡིན། ། དེ་ནི་ཟླ་བ་ཕྱེད་ཡིན་ཏེ། །ཟླ་བ་ཡར་གྱི་ཚེས་གཅིག་ལ། །བྲ་ཉེ་སྒྲུབ་པར་བྱེད་པ་ཡིན། །ཚེས་གཉིས་ལ་ནི་སྨིན་དྲུག་སྟེ། །ཚེས་གསུམ་ལ་ནི་སྣར་མ་ཡིན། །ཚེས་བཞི་ལ་ནི་མགོ་ཡིན་ཏེ། །ཚེས་ལྔ་ལ་ནི་ལག་ཡིན་ནོ། །ཚེས་དྲུག་ལ་ནི་ནབ་སོ་སྟེ། །ཚེ་བདུན་ལ་ནི་རྒྱལ་ཡིན་ནོ། །ཚེས་བརྒྱད་ལ་ནི་སྐག་ཡིན་ཏེ། །ཚེས་དགུ་ལ་ནི་མཆུ་ཡིན་ནོ། །ཚེས་བཅུ་ལ་ནི་གྲེ་ཡིན་ཏེ། །ཚེས་བཅུ་གཅིག་ལ་དབོ་ཡིན་ནོ། །ཚེས་བཅུ་གཉིས་ལ་མེ་བཞི་ཡིན། །ཚེས་བཅུ་གསུམ་ལ་ནག་པ་སྟེ། །ཚེས་བཅུ་བཞི་ལ་ས་རི་ཡིན། །ཟླ་རངས་ཚེས་ནི་བཅོ་ལྔ་ལ། །ས་ག་ཡིན་ཏེ་ས་ག་ཡི། །གོ་རིམ་བརྗོད་པ་བྱང་ཕྱོགས་སུ། །ཁ་བལྟས་ཉི་མ་ཡོངས་སུ་འཁོར། །མཚན་མོ་མཉམ་མཚུངས་རྣམ་པ་སྟེ། །བཅོ་ལྔ་བཅོ་ལྔར་བཤད་པ་ཡིན། །ནག་པས་མཚན་མོ་ཐོབ་པར་བྱེད། །ཉིན་པར་ཡང་ནི་སྨིན་དྲུག་ཡིན། །གྲིབ་ཚོད་དག་ཀྱང་གོམ་པ་དྲུག་།ཉི་མ་ཡོངས་སུ་འཁོར་བར་བྱེད། །ལྷ་མིན་བླ་མ་པ་བ་སངས། །འདིར་ཡང་ཞིང་ཞེས་གདགས་པ་ཡིན། །ཁྱིམ་གླང་ཡིན་ཏེ་མཁས་རྣམས་ཀྱིས། །ཟླ་བ་བདུན་པོ་བཤད་པ་ཡིན། །དབྱར་ཟླ་ར་བ་མར་གྱི་ངོའི། །ངན་
333a
༄#། །པོ་ཚེས་གཅིག་ལྷ་མཚམས་སྒྲུབ། །ཚེས་གཉིས་ལ་ནི་སྣརོན་ཡིན་ཏེ། །ཚེས་གསུམ་ལ་ནི་སྣརུབས་ཡིན་ནོ། །ཚེས་བཞི་ལ་ནི་ཆུ་སྟོད་ཡིན། ། ཚེས་ལྔ་ལ་ནི་ཆུ་སྨད་ཡིན། །ཚེས་དྲུག་ལ་ནི་བྱི་བཞིན་ཡིན། །ཚེས་བདུན་ལ་ནི་གྲོ་བཞིན་ཡིན། །ཚེས་བརྒྱད་ལ་ནི་མོན་གྲུ་སྟེ། །ཚེས་དགུ་ལ་ནི་མོན་གྲེ་ཡིན། །ཚེས་བཅུ་ལ་ནི་ཁྲུམས་སྟོད་ཡིན། །ཚེས་བཅུ་གཅིག་ལ་ཁྲུམས་སྨད་ཡིན། །ཚེས་བཅུ་གཉིས་ལ་ནམ་གྲུ་སྟེ། །ཚེས་བཅུ་གསུམ་ལ་ཐ་སྐར་ཡིན། །ཚེས་བཅུ་བཞི་ལ་བྲ་ཉེ་ཡིན། ། ཚེས་བཅོ་ལྔ་ལ་སྨིན་དྲུག་སྟེ། །དེ་ནི་ཟླ་ཕྱེད་ཟླ་བ་ཡར། །ཚེས་གཅིག་ལ་ནི་སྣར་མ་སྒྲུབ། །ཚེས་གཉིས་ལ་ནི་མགོ་ཡིན་ཏེ། །ཚེས་གསུམ་ལ་ནི་ལག་ཡིན་ནོ། །ཚེས་བཞི་ལ་ནི་ནབ་སོ་སྟེ། །ཚེས་ལྔ་ལ་ནི་རྒྱལ་ཡིན་ནོ། །ཚེས་དྲུག་ལ་ནི་སྐག་ཡིན་ཏེ། །ཚེས་བདུན་ལ་ནི་མཆུ་ཡིན་ནོ། །ཚེས་བརྒྱད་ལ་ནི་གྲེ་ཡིན་ཏེ། །ཚེས་དགུ་ལ་ནི་དབོ་ཡིན་ནོ། །ཚེས་བཅུ་ལ་ནི་མེ་བཞི་སྟེ། །ཚེས་བཅུ་གཅིག་ལ་ནག་པ་ཡིན། །ཚེས་བཅུ་གཉིས་ལ་ས་རི་སྟེ། །ཚེས་བཅུ་གསུམ་ལ་ས་ག་ཡིན། །ཚེས་བཅུ་བཞི་ལ་ལྷ་མཚམས་ཏེ། །ཚེ་བཅོ་ལྔ་ལ་སྣརོན་ཡིན་ནོ། །དབྱར་ཟླར་བའི་རིམ་བརྗོད་བྱ། །བྱང་ཕྱོགས་ཁ་བལྟས་ཉི་མ་འཁོར། །འཕེལ་བྱེད་ཉིན་པར་བཅུ་དྲུག་ཏུ། །ཤེས་བྱ་མཚན་མོའང་བཅུ་བཞི་ཡིན། །ས་གས་མཚན་
333b
མོ་ཐོབ་པར་བྱེད། །ཉི་མའི་མདུན་ན་མགོ་ཡིན་ནོ། །གྲིབ་ཚོད་གོམ་པ་བཞི་ཡིན་ཏེ། །འདི་ནི་ཡོངས་སུ་འཁོར་བར་བྱེད། །དེར་ཞིང་གཟའ་ལྷག་ཉི་མའི་བུ། །འཇམ་པོར་བྱེད་པའི་གཟའ་ཡིན་ནོ། །སྦྱོར་བའི་ཁྱིམ་ཡིན་ཉིན་པར་འགྲོ། །བརྒྱད་པ་ཡིན་པར་བརྗོད་པ་ཡིན། །དབྱར་ཟླ་འབྲིང་པོའི་ཚེས་གཅིག་ལ། །སྣརུབས་ནི་སྒྲུབ་པར་བྱེད་པ་ཡིན། །ཚེས་གཉིས་ལ་ནི་ཆུ་སྟོད་ཡིན། །ཚེས་གསུམ་ལ་ནི་ཆུ་སྨད་ཡིན། །ཚེས་བཞི་ལ་ནི་བྱི་བཞིན་ཏེ། །ཚེས་ལྔ་ལ་ནི་གྲོ་བཞིན་ནོ། །ཚེས་དྲུག་ལ་ནི་མོན་གྲུ་སྟེ། །ཚེས་བདུན་ལ་ནི་མོན་གྲེ་ཡིན། །ཚེས་བརྒྱད་ལ་ནི་ཁྲུམས་སྟོད་ཡིན། །ཚེས་དགུ་ལ་ནི་ཁྲུམས་སྨད་ཡིན། །ཚེས་བཅུ་ལ་ནི་ནམ་གྲུ་སྟེ། །ཚེས་བཅུ་གཅིག་ལ་ཐ་སྐར་ཡིན། ། ཚེས་བཅུ་གཉིས་ལ་བྲ་ཉེ་སྟེ། །ཚེས་བཅུ་གསུམ་ལ་སྨིན་དྲུག་ཡིན། །ཚེས་བཅུ་བཞི་ལ་སྣར་མ་སྟེ། །ཚེས་བཅོ་ལྔ་ལ་མགོ་ཡིན་ནོ། །དེ་ནི་ཟླ་བ་ཕྱེད་ཡིན་ཏེ། །ཟླ་བ་ཡར་གྱི་ཚེས་གཅིག་ལ། །ལག་ནི་སྒྲུབ་པར་བྱེད་པ་ཡིན། །ཚེས་གཉིས་ལ་ནི་ནབ་སོ་ཡིན། །ཚེས་གསུམ་ལ་ནི་རྒྱལ་ཡིན་ནོ། །ཚེས་བཞི་ལ་ནི་སྐག་ཡིན་ནོ། ། ཚེས་ལྔ་ལ་ནི་མཆུ་ཡིན་ནོ། །ཚེས་དྲུག་ལ་ནི་གྲེ་ཡིན་ནོ། །ཚེས་བདུན་ལ་ནི་དབོ་ཡིན་ཏེ། །ཚེས་བརྒྱད་ལ་ནི་མེ་བཞི་ཡིན། །ཚེས་དགུ་ལ་ནི་ནག་པ་སྟེ། །ཚེས་
334a
༄#། །བཅུ་ལ་ནི་ས་རི་ཡིན། །ཚེས་བཅུ་གཅིག་ལ་ས་ག་སྟེ། །ཚེས་བཅུ་གཉིས་ལ་ལྷ་མཚམས་ཡིན། །ཚེས་བཅུ་གསུམ་ལ་སྣརོན་ཡིན་ཏེ། །ཚེས་བཅུ་བཞི་ལ་སྣརུབས་ཡིན་ནོ། །ཟླ་ཉ་ཟླ་བར་ཆུ་སྟོད་ཡིན། །བདག་གིས་དབྱར་འབྲིང་རིམ་བརྗོད་བྱ། །བྱང་ཕྱོགས་བཞིན་གྱི་དཀྱིལ་འཁོར་བལྟས། །ཉི་མ་ཡོངས་སུ་འཁོར་བར་བྱེད། །ཉིན་པར་ཡུད་ཙམ་བཅུ་བདུན་ཏེ། །མཚན་མོ་ཡང་ནི་བཅུ་གསུམ་ཡིན། །སྣརོན་གྱིས་ཀྱང་ནི་མཚན་མོ་ཐོབ། །ཉིན་པར་བཅས་ན་ནབ་སོ་ཡིན། །གྲིབ་ཚོད་གོམ་པ་གཉིས་ཡིན་ཏེ། །ཉི་མ་ཡོངས་སུ་འཁོར་བར་བྱེད། །ཟླ་བ་ཞེས་བྱ་ཞིང་ཡིན་ཏེ། །ལག་དང་ཡང་དག་ལྡན་པ་ཡིན། །འདི་ཁྱིམ་སྦལ་བ་ཞེས་བྱ་བ། །ཟླ་བ་དགུ་པར་བཤད་པ་ཡིན། །དབྱར་ཟླ་ཐ་ཆུང་མར་ངོ་ཡི། །ཚེས་གཅིག་ལ་ནི་ཆུ་སྨད་སྒྲུབ། །ཚེས་གཉིས་བྱི་བཞིན་གྲོ་བཞིན་ཏེ། །ཚེས་གསུམ་ལ་ནི་མོན་གྲུ་ཡིན། །ཚེས་བཞི་ལ་ནི་མོན་གྲེ་སྟེ། །ཚེས་ལྔ་ལ་ནི་ཁྲུམས་སྟོད་ཡིན། །ཚེས་དྲུག་ལ་ནི་ཁྲུམས་སྨད་ཡིན། །ཚེས་བདུན་ལ་ནི་ནམ་གྲུ་སྟེ། །ཚེས་བརྒྱད་ལ་ནི་ཐ་སྐར་ཡིན། །ཚེས་དགུ་ལ་ནི་བྲ་ཉེ་སྟེ། །ཚེས་བཅུ་ལ་ནི་སྨིན་དྲུག་ཡིན། །ཚེས་བཅུ་གཅིག་ལ་སྣར་མ་ཡིན། །ཚེས་བཅུ་གཉིས་
334b
ལ་མགོ་ཡིན་ནོ། །ཚེས་བཅུ་གསུམ་ལ་ལག་ཡིན་ནོ། །ཚེས་བཅུ་བཞི་ལ་ནབ་སོ་ཡིན། །ཚེས་བཅོ་ལྔ་ལ་རྒྱལ་ཡིན་ཏེ། །དེ་ནི་ཟླ་བ་ཕྱེད་ཡིན་ནོ། །ཟླ་བ་ཡར་གྱི་ཚེས་གཅིག་ལ། །སྐག་ནི་སྒྲུབ་པར་བྱེད་པ་ཡིན། །ཚེས་གཉིས་ལ་ནི་མཆུ་ཡིན་ནོ། །ཚེས་གསུམ་ལ་ནི་གྲེ་ཡིན་ཏེ། །ཚེས་བཞི་ལ་ནི་དབོ་ཡིན་ནོ། །ཚེས་ལྔ་ལ་ནི་མེ་བཞི་སྟེ། །ཚེས་དྲུག་ལ་ནི་ནག་པ་ཡིན། །ཚེས་བདུན་ལ་ནི་ས་རི་སྟེ། །ཚེས་བརྒྱད་ལ་ནི་ས་ག་ཡིན། །ཚེས་དགུ་ལ་ནི་ལྷ་མཚམས་ཏེ། །ཚེས་བཅུ་ལ་ནི་སྣརོན་ཡིན་ནོ། །ཚེས་བཅུ་གཅིག་ལ་སྣརུབས་ཡིན་ཏེ། །ཚེས་བཅུ་གཉིས་ལ་ཆུ་སྟོད་ཡིན།། ཚེས་བཅུ་གསུམ་ལ་ཆུ་སྨད་ཡིན། །ཚེས་བཅུ་བཞི་ལ་བྱི་བཞིན་ཏེ། །ཟླ་བ་རངས་ལ་གྲོ་བཞིན་ནོ། །བདག་གིས་དབྱར་ཐའི་རིམ་བརྗོད་བྱ། །དེ་བཞིན་བྱང་གིས་ཕྱོགས་སུ་ནི། །ཉི་མ་གདོང་ཕྱེད་བལྟས་ཏེ་འཁོར། །ཉིན་པར་བཅོ་བརྒྱད་ཐོབ་ནས་ཀྱང ། །མཚན་མོ་ཡང་ནི་བཅུ་གཉིས་ཏེ། །ཆུ་སྟོད་ཀྱིས་ནི་མཚན་མོ་ཐོབ། །ཉི་མའི་མདུན་ན་མཆུ་ཡིན་ནོ། །གྲིབ་ཚོད་གོམ་པ་ཕྱེད་ཡིན་ཏེ། །ཉི་མ་ཡོངས་སུ་འཁོར་བར་བྱེད། །འདིར་ཞིང་ཉི་མ་ལྡན་པ་ཡིན། །སྲས་ཀྱང་གཟེར་ནི་གཏོང་བར་བྱེད། །འདིར་ཁྱིམ་སེངྒེར་ཤེས་པར་གྱིས། །ཟླ་བ་བཅུ་པོ་བཤད་པ་ཡིན། །སྟོན་ཟླ་ར་བ་མར་གྱི་ངོའི། །དང་པོར་ཚེས་གཅིག་མོན་གྲུ་སྒྲུབ། །ཚེས་གཉིས་ལ་ནི་མོན་གྲེ་སྟེ། །ཚེས་གསུམ་ལ་ནི་ཁྲུམས་སྟོད་ཡིན། །ཚེས་བཞི་ལ་ནི་
335a
༄#། །ཁྲུམས་སྨད་ཡིན། །ཚེས་ལྔ་ལ་ནི་ནམ་གྲུ་སྟེ། །ཚེས་དྲུག་ལ་ནི་ཐ་སྐར་ཡིན། །ཚེས་བདུན་ལ་ནི་བྲ་ཉེ་སྟེ། །ཚེས་བརྒྱད་ལ་ནི་སྨིན་དྲུག་ཡིན། །ཚེས་དགུ་ལ་ནི་སྣར་མ་སྟེ། །ཚེས་བཅུ་ལ་ནི་མགོ་ཡིན་ནོ། །ཚེས་བཅུ་གཅིག་ལ་ལག་ཡིན་ནོ། །ཚེས་བཅུ་གཉིས་ལ་ནབ་སོ་ཡིན། །ཚེས་བཅུ་གསུམ་ལ་རྒྱལ་ཡིན་ཏེ། །ཚེས་བཅུ་བཞི་ལ་སྐག་ཡིན་ནོ། །ཚེས་བཅོ་ལྔ་ལ་མཆུ་ཡིན་ཏེ། །དེ་ནི་ཟླ་བ་ཕྱེད་ཡིན་ནོ། །ཟླ་བ་ཡར་གྱི་ཚེས་གཅིག་ལ། །གྲེ་ནི་སྒྲུབ་པར་བྱེད་པ་སྟེ། །ཚེས་གཉིས་ལ་ནི་དབོ་ཡིན་ནོ། །ཚེས་གསུམ་ལ་ནི་མེ་བཞི་སྟེ། །ཚེས་བཞི་ལ་ནི་ནག་པ་ཡིན། །ཚེས་ལྔ་ལ་ནི་ས་རི་སྟེ། །ཚེས་དྲུག་ལ་ནི་ས་ག་ཡིན། །ཚེས་བདུན་ལ་ནི་ལྷ་མཚམས་ཏེ། །ཚེས་བརྒྱད་ལ་ནི་སྣརོན་ཡིན་ནོ། །ཚེས་དགུ་ལ་ནི་སྣརུབས་ཡིན་ཏེ། །ཚེས་བཅུ་ལ་ནི་ཆུ་སྟོད་ཡིན། །ཚེས་བཅུ་གཅིག་ལ་ཆུ་སྨད་ཡིན། །གྲོ་བཞིན་བྱི་བཞིན་ཚེས་བཅུ་གཉིས། །ཚེས་བཅུ་གསུམ་ལ་མོན་གྲུ་སྟེ། །ཚེས་བཅུ་བཞི་ལ་མོན་གྲེ་ཡིན། །ཟླ་བ་ཉ་བའི་ཟླ་རངས་ལ། །ཁྲུམས་སྟོད་ཅེས་ནི་བྱ་བ་ཡིན། །བདག་གིས་སྟོན་ཟླར་རིམ་བརྗོད། །ལྷོ་ཕྱོགས་ཉི་མའི་འཁོར་ལོ་ལྡོག། ཉིན་མར་ཡང་ནི་བཅུ་བདུན་ཏེ། །མཚན་མོ་ཡང་ནི་བཅུ་གསུམ་ཡིན། །གྲོ་བཞིན་གྱིས་ཀྱང་
335b
མཚན་མོ་ཐོབ། །ཉི་མའི་མདུན་ན་གྲེ་ཡིན་ཏེ། །གྲིབ་ཚོད་དག་ཀྱང་གོམ་པ་གཉིས། །ཉི་མ་ཡོངས་སུ་འཁོར་བར་བྱེད། །ཟླ་བུ་གཟའ་ལྷག་ཅེས་བྱ་བ། །དེར་ནི་ཞིང་ལ་ཡང་དག་གནས། ། དེར་ཁྱིམ་བུ་མོ་བཞག་པ་སྟེ། །ཟླ་བ་བཅུ་གཅིག་བདག་གིས་བཤད། །སྟོན་ཟླ་འབྲིང་པོ་མར་གྱི་ངོའི། །དང་པོ་ཚེས་གཅིག་ཁྲུམས་སྨད་སྒྲུབ། །ཚེས་གཉིས་ལ་ནི་ནམ་གྲུ་སྟེ། །ཚེས་གསུམ་ལ་ནི་ཐ་སྐར་ཡིན། །ཚེས་བཞི་ལ་ནི་བྲ་ཉེ་སྟེ། །ཚེས་ལྔ་ལ་ནི་སྨིན་དྲུག་ཡིན། །ཚེས་དྲུག་ལ་ནི་སྣར་མ་སྟེ། །ཚེས་བདུན་ལ་ནི་མགོ་ཡིན་ནོ། །ཚེས་བརྒྱད་ལ་ནི་ལག་ཡིན་ཏེ། །ཚེས་དགུ་ལ་ནི་ནམ་སོ་ཡིན། །ཚེས་བཅུ་ལ་ནི་རྒྱལ་ཡིན་ཏེ། །ཚེས་བཅུ་གཅིག་ལ་སྐག་ཡིན་ནོ། །ཚེས་བཅུ་གཉིས་ལ་མཆུ་ཡིན་ཏེ། །ཚེས་བཅུ་གསུམ་ལ་གྲེ་ཡིན་ནོ། །ཚེས་བཅུ་བཞི་ལ་དབོ་ཡིན་ནོ། །ཚེས་བཅོ་ལྔ་ལ་མེ་བཞི་ཡིན། །དེ་ནི་ཟླ་བ་ཕྱེད་ཡིན་ཏེ། །ཟླ་ཡར་ཚེས་གཅིག་ནག་པ་སྒྲུབ། །ཚེས་གཉིས་ལ་ནི་ས་རི་སྟེ། །ཚེས་གསུམ་ལ་ནི་ས་ག་ཡིན། །ཚེས་བཞི་ལ་ནི་ལྷ་མཚམས་ཏེ། །ཚེས་ལྔ་ལ་ནི་སྣརོན་ཡིན་ནོ། །ཚེས་དྲུག་ལ་ནི་སྣརུབས་ཡིན་ཏེ། །ཚེས་བདུན་ལ་ནི་ཆུ་སྟོད་ཡིན། །ཚེས་བརྒྱད་ལ་ནི་ཆུ་སྨད་ཡིན། །ཚེས་དགུར་བྱི་བཞིན་གྲོ་བཞིན་ཏེ། །ཚེས་བཅུ་ལ་ནི་མོན་གྲུ་ཡིན། །ཚེས་བཅུ་གཅིག་ལ་མོན་གྲུ་ཡིན། །ཚེས་བཅུ་གཉིས་ལ་ཁྲུམས་སྟོད་ཡིན། །ཚེས་བཅུ་གསུམ་ལ་ཁྲུམས་
336a
༄#། །སྨད་ཡིན། །ཚེས་བཅུ་བཞི་ལ་ནམ་གྲུ་སྟེ། །ཟླ་རངས་ཉ་ཚེ་ཐ་སྐར་ཡིན། །དེ་ནི་ཟླ་བ་ཕྱེད་ཡིན་ཏེ། །སྟོན་ཟླ་འབྲིང་པོའི་ངོ་ལ་ནི། །ལོ་སྐོར་བདག་གིས་བརྗོད་པར་བྱ། །ལྷོ་ཡི་ཕྱོགས་སུ་ཁ་བལྟས་ཏེ། །ཉི་མ་ཡོངས་སུ་འཁོར་བར་བྱེད། །ཉིན་པར་བཅུ་དྲུག་འགྲོ་བྱེད་ཅིང ། །མཚན་མོ་ཡང་ནི་བཅུ་བཞི་ཡིན། །ཁྲུམས་སྟོད་ཀྱིས་ནི་མཚན་མོ་ཐོབ། །ཉི་མའི་མདུན་ན་ནག་པ་ཡིན། །གྲིབ་ཚོད་དག་ནི་གོམ་བཞི་སྟེ། །ཉི་མ་ཡོངས་སུ་འཁོར་བར་བྱེད། །ལྷ་མིན་བླ་མ་པ་བ་སངས། །གཟའ་ནི་ཞིང་ལ་རྣམ་པར་གཞག ། འདིར་ཁྱིམ་སྲང་ཞེས་བྱ་བ་གཞག་།ཟླ་བ་བཅུ་གཉིས་བཤད་པ་ཡིན། །ཡོངས་སུ་འཁོར་བ་དེ་ཡིས་ནི། །ལོ་ནི་དེ་ལྟར་འགྲོ་བར་བྱེད། །མིག་སྟོང་ཡང་དང་ཡང་དུ་ནི། །འདུས་ཏེ་ཆོས་ཀྱི་ཕྱོགས་ལ་ལྟོས། །ཁྱོད་ནི་ཤེས་རབ་གཞི་ཡིན་ན། །ཆོས་མ་ཡིན་པའང་ཟློག་པར་གྱིས། །ཆོས་གནས་ཚུལ་ཁྲིམས་ཕུན་སུམ་ཚོགས། །ཐོས་ཕྱུག་མཁས་པ་བསམ་གཏན་པ། །དེ་དག་ཁྱོད་ཀྱིས་ཆོས་གོས་དང ། །བཟའ་བཏུང་རྣམས་ཀྱིས་རྗེས་སུ་སྲུངས། །ཡང་དག་གནས་ཏེ་བརྒྱ་བྱིན་གྱིས། །རྔ་བོད་ལ་ནི་ཐལ་སྦྱར་ནས། ། རབ་ཏུ་སྨྲས་པ་བདག་ཅག་གིས། །བྱ་བ་ཡང་ནི་བསྒོ་བར་གྱིས། །སྨྲས་པ། ལྷ་ཡི་བླ་མ་ཁྱོད་ཀྱིས་སུ། །རྟག་པར་ཚངས་པར་སྤྱོད་པ་སྲུངས། །རིག་སྔགས་སྨན་དང་གསང་
336b
སྔགས་རྣམས། །ཐམས་ཅད་ལ་ནི་བྱ་བ་སྒྲུབས། །ལས་ཀུན་དྲང་སྲོང་ཟླ་བ་དང ། །ཟླ་བ་ཆུང་དང་ཞག་དང་བཞི། །བཟོ་ཡི་ལས་ཀྱི་མཐའ་ཀུན་ལ། །གཙོ་བོ་ཡིན་པར་བཀོད་པ་ཡིན། །དྲག་བོ་དུང་གི་སྣ་ཅན་དང ། །དགོན་པ་དང་ནི་ལྕི་བ་སྟེ། །གནོད་སྦྱིན་བཞི་པོ་དེ་དག་ནི། །མཆོད་སྦྱིན་རིབ་མར་གཙོ་བོར་བཀོད། །རྒྱ་མཚོ་ཆུ་ལྷ་འཇོག་པོ་དང ། །རིན་ཆེན་སྐྱོད་དང་རིང་དུ་འགྲོ། ས་ཡིང་ཚེས་དང་ཟླ་སྲུང་དང ། །གནས་ཐར་བྱེད་པ་རྒྱ་མཚོ་ནི། །གཙོ་བོར་གཞག་སྟེ་མ་དྲོས་དང ། །ཁབ་ཀྱིས་ལུས་འབིགས་ཆུ་ལྷས་བྱིན། །རི་དྭགས་འཁྲུགས་པ་ཀླུ་དེ་བཞི། །ཀླུ་རྣམས་ཀྱི་ནི་གཙོ་བོར་བཀོད། །ཁྱོད་ནི་དགེ་བར་བསྐྱེད་པ། །ནེ་ཙོ་ཡི་ནི་ཁྱབ་བྱེད་པ། །མཁས་པ་ཞིང་གི་གཙོ་བོ་སྟེ། །དེ་འདྲ་བ་ནི་ཇི་ལྟ་བུ། །ཁྱོད་ནི་སྙིང་པོ་ཁོ་ནས་ཀྱང ། །མེ་ཡི་རྩེ་མོའི་གཙོ་བོ་སྟེ། །ཁྱོད་ནི་རླུང་དམར་འགུལ་གཡོ་བ། །རླུང་ཡང་བ་ཡི་གཙོ་བོ་ཡིན། །རྡོ་རྗེའི་མིག་དང་སེངྒེའི་མིག་།ལེགས་མཐོང་ལག་ན་མདུད་གསུམ་ཐོགས། །ལྷ་མོ་བཞི་པོ་དེ་དག་ནི། །གྲོང་ཁྱེར་གཙོ་བོར་བཀོད་པ་ཡིན། །གོང་མའི་ཆར་སྐྱེས་རྩིབས་མུ་ཁྱུད། །འཁོར་ལོ་སྤེན་པ་གནོད་སྦྱིན་བཞི། །དེ་དག་རིན་ཆེན་བརྟག་པ་ལ། །ཉོ་ཚོད་བྱེད་པའི་གཙོ་བོར་བཀོད། །ཕྱོགས་མཚམས་སུ་ནི་བཞི་ཡིན་ཏེ། །བསྲུང་བའི་ཕྱིར་ནི་ཡང་དག་གནས། །ཡུལ་འཁོར་གྲོང་ཁྱེར་ཐམས་ཅད་དུ། །བསྲུང་བའི་ཕྱིར་ནི་འབྱུང་པོ་བཀོད། །དྲང་སྲོང་དག་ནི་ཐམས་ཅད་དང ། །ལྷ་ཡི་
337a
༄#། །ཚོགས་དང་ཀླུ་རྣམས་དང ། །ལྷ་མ་ཡིན་དང་མི་རྣམས་ཀྱི། །བར་ཡང་རྗེས་སུ་ཡི་རང་བྱེད། །ལུང་བསྟན་རབ་ཏུ་རྒྱལ་བ་མཆོག་།ཐུབ་པ་ཡི་ནི་གཙོ་བོ་སྟེ། ཁྱོད་ནི་སྐྱེ་དང་འགག་པ་དང ། །ཟས་དང་རོ་དང་མེ་ཏོག་མཆོག་།ཁྱོད་ནི་དྲི་འཕེལ་བྱེད་པ་སྟེ། །ཤུ་དག་རྫོགས་བྱེད་འབྲས་བུའི་མཆོག་།ཁྱོད་ནི་ལམ་བདེ་སྐྱེད་པ་སྟེ། །རྣམ་པར་འཚེ་ལས་རྒྱལ་བའི་གཙོ། །དགའ་བོ་དང་ནི་ཉེ་དགའ་གཉིས། །རི་བོ་རྣམས་ཀྱི་གཙོ་བོར་བཀོད། །ནོར་རྒྱས་བུ་དང་ཐང་ཤིང་ཞིང ། །ལྕི་མཆོག་མིག་དམར་སྨུགས་བྱེད་སྐེམ། །ཁྱོད་ནི་དབྱངས་ཅན་ཆུ་ཡི་གཙོ། །ཁྱོད་ནི་གྲུབ་དང་ཡིད་འཕྲོག་པ། །ཟླ་བ་འཕྲོག་པར་བྱེད་པ་སྟེ། །བཅུད་ཀྱིས་ལེན་གྱི་གཙོ་བོ་ཡིན། །གཟའ་དང་རྒྱུ་སྐར་དུས་ཀྱང་ཡིན། །ཁྱིམ་བདག་ཐམས་ཅད་རྣམ་པར་གཞག་།རྒྱལ་པོ་ཆེན་པོ་བཞི་ཡང་ནི། །སྐལ་ལྡན་རྒྱུར་ནི་རྣམ་པར་གཞག་།ལུས་ངན་གནོད་སྦྱིན་རྣམས་ཀྱི་གཙོ། །གྲུལ་བུམ་རྣམས་ཀྱི་འཕགས་སྐྱེས་པོ། །ཀླུ་རྣམས་ཀྱི་ནི་མིག་མི་བཟང ། །དྲི་ཟ་རྣམས་ཀྱི་ཡུལ་འཁོར་སྲུང ། །ཐམས་ཅད་ཀྱི་གླིང་ཆེན་པོ་བཞི། །གླིང་གཞན་བརྒྱད་ཁྲི་ཐམས་ཅད་དུ། །དྲང་སྲོང་རྔ་བོང་གིས་གང་ཡོངས་སུ་སྐྱོང་བ་མ་བཀོད་པར་བཏང་བའི་གནས་ཅིའང་མེད་དོ། །དེ་ལྟར་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་
337b
ཆེན་པོ་དང ། མི་དང ། མི་མ་ཡིན་པ་དེ་དག་ཐམས་ཅད་ཀྱིས་ཀྱང་ལེགས་སོ། །ཞེས་བྱ་བ་བྱས་པར་གྱུར་ཏོ། །དྲང་སྲོང་རྔ་བོང་གི་བྱ་བ་དེ་ལ་ཡང་དག་པར་རྗེས་སུ་ཡི་རང་བར་གྱུར་ཏོ། །བྱ་བ་དེ་ནི།་མཆོད་པ་དང ། རིམ་གྲོ་བྱ་བར་སོ་སོར་གནས་པར་གྱུར་ཏོ། །དེའི་རྗེས་ལ་ཤིན་ཏུ་ཡུན་རིང་ཞིག་ན་དྲང་སྲོང་ཐུབ་པ་ལམ་ཞེས་བྱ་བ་བྱུང་སྟེ། །དེས་ཀྱང་སྐར་མའི་དཔྱད་རབ་ཏུ་བྱས་སོ། །ཞག་གིས་མི་ཐུབ་པ་དང ། ཤོལ་ཡོད་པ་ཡང་བཤད་དོ། །ཡང་དེའི་ཚེས་དྲང་སྲོང་ཐུབ་པའི་གནས་རྟེན་ག་ལ་བར་ཀླུ་ཐམས་ཅད་འདུས་ཏེ། དེ་དག་དྲང་སྲོང་སྐར་མ་ལ་དགའ་བ་མཆོག་ཏུ་བླ་མ་ལ་གུས་པ་དང་གཅེས་པར་བྱེད་པ་སྐྱེས་ཏེ། དེ་ལ་མཆོད་པའི་ལས་བྱ་བའི་ཕྱིར་ཅི་ནུས་སུ་བརྩོན་པར་གྱུར་ཏོ། །འཕགས་པ་འདུས་པ་ཆེན་པོའི་སྡེ་ཐེག་པ་ཆེན་པོའི་མདོ་ལས། ཉི་མའི་སྙིང་པོའི་ལེའུ་བཅུ་གཅིག་པ་ལས། རྒྱུ་སྐར་གྱི་སྦྱོར་བ་རྣམ་པར་གཞག་པའི་ལེའུ་སྟེ་བདུན་པ་རྫོགས་སོ།། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་གཅིག་པ། རྒྱ་མཚོས་སྨྲས་པ། ནམ་མཁའ་ལ་ནི་རྒྱུ་སྐར་ཚོགས། །ཇི་ལྟར་བཞག་པ་བཞིན་དུ་ནི། །ཁྱོད་ཀྱིས་སྔོན་གྱི་ཚེ་རབས་དྲན། །མཁས་ཁྱོད་སྲིད་གསུམ་ཀུན་གྱི་གཙོ། །ཁྱོད་ཀྱི་སྙིང་རྗེ་བྱམས་པ་དཔེར། །ཤེས་གསལ་འགྲོ་ལ་སྙིང་བརྩེ་བཞིན། །ཀུན་དཔལ་འདི་ནས་ཁྱོད་ཀྱིས་ནི། །ལག་འགྲོ་ཐམས་ཅད་ཐར་པར་གྱིས། །
338a
༄#། །སྲིད་གསུམ་ཚུལ་བརྟུལ་མཚུངས་མེད་ཁྱོད། །ལག་འགྲོ་དེ་ཀུན་ཚིམ་བྱེད་ཁྱོད། །ཁྱོད་ནི་དྲང་སྲོང་ཀུན་གྱི་བླ། །མི་རྣམས་ཀྱིས་ནི་མཆོད་པར་འོས། །འགྲོ་བ་ཀུན་དཔལ་ཁྱོད་ལ་ནི། །ལྷ་དང་ལག་འགྲོ་གནོད་སྦྱིན་ཚོགས། །རྟེན་གྱི་ཡུལ་རྣམས་ཐམས་ཅད་པ། །ལག་འགྲོ་མྱུར་དུ་ཐར་པར་གྱིས། །དེ་ནས་དྲང་སྲོང་སྐར་མ་ལ་དགའ་བ་དཀོན་མཆོག་གསུམ་ལ་མཆོག་ཏུ་ཡིད་དང་བ་བསྐྱེད་པར་འདོད་ནས་དེ་ལྟ་བུའི་ཀླུའི་ཚོགས་ཐམས་ཅད་ལ་ཤིན་ཏུ་རིགས་པའི་ཚིག་སྙན་པ་དག་གིས་འདི་སྐད་ཅེས་སྨྲས་སོ། །ཡོན་ཏན་དེ་འདྲ་བདག་ལ་མེད། །དྲང་སྲོང་རྔ་བོང་བདག་མ་ཡིན། །ཁྱེད་ཅག་འདི་ནས་ཐར་བྱེད་པར། །བདག་གིས་ནུས་པ་མ་ཡིན་ནོ། །གང་གིས་བསྐལ་བ་དུ་མར་ནི། །དཀའ་ཐུབ་དཀའ་བ་བཟོད་པར་སྤྱད། །ཁྱོད་ཅག་ཐར་པར་བྱེད་པ་ཡི། །དྲང་སྲོང་གཞན་དེ་བལྟ་བར་གྱིས། །རྟག་ཏུ་བརྩོན་ཞིང་སྦྱིན་པ་བྱིན། །མཁས་ཤིང་གླང་ཆེན་རྟ་དང་ནི། །ཤིང་རྟ་བུ་དང་ཆུང་མ་དང ། །ནོར་གྱིས་སེམས་ཅན་ཕན་པ་བྱས། །རྐང་ལག་མགོ་དང་རྣ་བ་དང ། །མིག་དང་པགས་པ་ཁྲག་དང་ནི། །བུ་བྲན་བྲན་མོ་བཟའ་བཏུང་མང ། །མལ་ཆ་ཁ་ཟས་སྔོན་ཆད་བཏང ། །སྙིང་རྗེ་དང་ནི་བྱམས་པ་ཡིས། །ཁྱེད་ཅག་ཐར་བྱེད་སྲིད་གསུམ་ན། །མཚུངས་མེད་བསམ་གཏན་དགའ་འབྱུང་བ། །དེ་ནི་དྲང་སྲོང་རྔ་བོང་སྟེ། །ཀུན་ཏུ་
338b
བརྩེ་ཞིང་བྱང་ཆུབ་སེམས། །སྔོན་ཆད་རིག་བྱེད་ཕ་རོལ་ཕྱིན། །སེམས་ཅན་མང་པོ་སྡུག་བསྔལ་གྱིས། །ཉམ་ཐག་པ་ནི་ཐར་བར་བྱས། །སེམས་ཅན་གཅིག་གི་ཆེད་དུ་ཡང ། །སྔོན་གྱི་ཚེ་རབས་དེ་བསྐལ་པར། །དམྱལ་བར་འགྲོ་བཟོད་དེ་ཡི་དྭགས། །དེ་ནི་འཇིག་རྟེན་སངས་རྒྱས་བྱུང ། །སེམས་ཅན་སྡུག་བསྔལ་ཉམ་ཐག་ཀུན། །སྡུག་བསྔལ་མཐར་མཛད་རྔ་བོང་ཡིན། །སེམས་ཅན་སྨིན་ཕྱིར་བརྩོན་འགྲུས་དང ། །སྙིང་རྗེ་བརྟན་པོས་དེ་སྲིད་འཁོར། །རྔ་བོང་དེ་ནི་སྐྱེས་པ་ན། །རྒྱལ་སྲས་བུ་རམ་ཤིང་པ་ཡི། །རིགས་སུ་ཟས་གཙང་གི་ནི་སྲས། །དེས་ནི་བཙས་མ་ཐག་ཏུ་ཁྱབ། །སྲིད་གསུམ་བདེ་འབྱུང་འཇིག་རྟེན་དཔལ། །ཡིད་བདེ་རྣམ་པ་སྣ་ཚོགས་དང ། །ལྷ་དང་ཀླུ་ཡི་བུ་རྣམས་དང ། །འབྱུང་པོ་གནོད་སྦྱིན་རྒྱལ་པོས་ཁྱབ། །དེར་ནི་མཆོད་ཕྱིར་ཐམས་ཅད་ལྷགས། །དེ་ཡིས་གོམ་པ་བདུན་བོར་ཏེ། །རི་དང་རྒྱ་མཚོར་བཅས་པ་ཡི། །ས་ནི་ཐམས་ཅད་འཁྲུགས་པར་འགྱུར། །འགྲོ་བ་རྒ་ནད་སྡུག་བསྔལ་དང ། །འཆི་བས་གཟིར་ལས་ངས་བསྒྲལ་ཞིང ། །ཞི་བ་བདེ་བ་མྱ་ངན་མེད། །སྐམ་ལ་དགོད་ཅེས་ཤཱཀ་སྲས་གསུངས། །མེ་ཏོག་དྲི་དང་རིན་ཆེན་དག་།ལྷ་ཀླུ་རྣམས་ཀྱིས་གཏོར་གྱུར་ཅིང ། །འབྱུང་པོའི་ཚོགས་རྣམས་སྣ་ཚོགས་ཀྱིས། །སྲས་པོ་ལ་ནི་བསྟོད་གྱུར་པ། །བསྐལ་པ་མང་པོ་དུ་མར་ཡང ། །སྔོན་ཆད་ཁྱོད་ཀྱིས་དུལ་བ་དང ། །སྦྱིན་དང་བསམ་གཏན་དགྱེས་ལ་བརྟེན། །སེམས་ཅན་ཀུན་ཆེད་
339a
༄#། །སྡུག་བསྔལ་བཟོད། །འདི་ལ་སྐྱེ་བ་འདི་ཡང་ནི། །ཐམས་ཅད་ཀྱི་ནི་ཐ་མ་ལགས། །སྡུག་བསྔལ་ཐམས་ཅད་ཞི་མཛད་པར། །རིང་པོ་མི་ཐོགས་ཁྱོད་འཚང་རྒྱ། །དེས་ཀྱང་དཔའ་བོ་བརྟན་པར་གྱུར། །མཚུངས་པ་མེད་དེ་བུད་མེད་ཚོགས། །དྲུག་ཁྲི་ཐམ་པ་སྤངས་ནས་སུ། །སྤྱོད་པ་རབ་བསྟན་ལོ་དྲུག་སྤྱད། །གཡོ་སྒྱུ་ཅན་ནི་སྡེར་བཅས་པའི། །བདུད་ནི་གཅིག་པུས་བཅོམ་ནས་ཀྱང ། །བྱང་ཆུབ་ཞི་མཆོག་གཞལ་མེད་བརྙེས། །མྱ་ངན་མེད་ལམ་དོན་དམ་གཟིགས། །བྱམས་དང་ཡེ་ཤེས་ཐུགས་རྗེ་ཡིས། །སེམས་ཅན་ཀུན་དང་མི་མཉམ་ཞིང ། །འབྱུང་བོ་དག་ནི་ཐམས་ཅད་ལ། །དེ་ནི་བྱམས་པའི་ཐུགས་མཉམ་པ། །སེམས་ཅན་གང་ལའང་མཐོ་མི་འཚམ། །སེམས་ཅན་ཐམས་ཅད་སྡུག་བསྔལ་ལས། །ཐར་པར་མཛད་ཅིང་དེ་ཡང་ནི། །རྣམ་བཅིངས་བརྩོན་ར་ཐར་མཛད་པ། །མ་ག་དྷ་ན་དེ་གནས་ཤིང ། །འགྲོ་བའི་ནང་ན་ཆོས་ཀྱང་སྟོན། །དེ་ལ་ཁྱོད་ཀྱིས་གསོལ་བ་ཐོབ། །བྱམས་པའི་ཡིད་ཀྱིས་རྣམ་པར་ལྟོས། །དྲང་སྲོང་མཆོག་གི་ཐད་དུ་དེངས། །འགྲོ་བའི་སྡུག་བསྔལ་ཐམས་ཅད་ལས། །ཁྱེད་ཅག་ཡོངས་སུ་ཐར་པར་བྱེད། །རང་ཉིད་ཀྱང་ནི་འདོང་བར་གྱིས། །དགའ་མཆོག་བདེ་བ་འདོད་རྣམས་ཀྱིས། །ཕྱིན་ཆད་མཁའ་ལྡིང་ཐམས་ཅད་ལས། །འཇིགས་པ་ཁྱེད་ལ་མི་འབྱུང་ངོ ། །རྟག་བདེ་སྡུག་བསྔལ་བྲལ་དགར་གྱིས། །བཙོན་
339b
ར་འདི་ནི་གཡོ་སྒྱུ་ཅན། །བདུད་ནི་ཁྱོད་ལ་རྣམ་པར་འཚེ། །ཇི་ལྟར་ང་ཡིས་བཤད་པ་བཞིན། །ཐམས་ཅད་ཀྱང་ནི་གཟུང་བར་གྱིས། །ཡང་དེའི་ཚེ་དྲང་སྲོང་ཐུབ་པའི་གནས་རྟེན་དུ་ཀླུ་དང ། ཀླུ་ཆེན་པོ་ཕོ་དང ། མོ་དང ། ཁྱེའུ་དང ། བུ་མོ་གང་དག་ཐམས་ཅད་འདུས་པ་དེ་དག་ཐམས་ཅད་ཀྱིས་ཐལ་མོ་རབ་ཏུ་སྦྱར་ཏེ་འདི་སྐད་ཅེས་སྨྲས་སོ། །འཇིག་རྟེན་ཐམས་ཅད་ལས་ཁྱད་པར་དུ་འཕགས་པ། ཆོས་ཐམས་ཅད་ཀྱི་དབང་གིས་ཕ་རོལ་ཏུ་ཕྱིན་པ། སེམས་ཅན་ཐམས་ཅད་ཀྱི་སྡུག་བསྔལ་སེལ་བར་མཛད་པ། བདེ་བ་ཐམས་ཅད་སྦྱིན་པར་མཛད་པ། དགའ་བ་ཐམས་ཅད་སྐྱེད་པར་མཛད་པ། ཤེས་རབ་ཐམས་ཅད་ཀྱི་ཕ་རོལ་ཏུ་ཕྱིན་པ། རྟག་ཏུ་བྱམས་པའི་ཐུགས་དང་ལྡན་པ། ཐུགས་རྗེ་ཐམས་ཅད་ཀྱིས་ཁྱབ་པ། འཕྲིན་ལས་ཐམས་ཅད་སྒྲུབ་པར་མཛད་པ། ལམ་ཐམས་ཅད་སྟོན་པ། ཡང་དག་པའི་མིག་གསུང་བ། ལྷ་དང ། ཀླུ་རྣམས་ཀྱིས་མཆོད་པ་ལ་ཕྱག་འཚལ་ལོ། །སྲིད་པ་གསུམ་གྱི་དགྲ་བཅོམ་པ། མཆོད་པ་ཐམས་ཅད་འོས་པ།་བདག་ཅག་ཐམས་ཅད་སྡུག་བསྔལ་གྱི་བཙོན་ར་འདིར་འཕངས་ལགས་ན། འདི་ནས་བདག་ཅག་ཐར་པར་མཛད་པར་གསོལ། ཀླུ་དེ་དག་དང་ལྷན་ཅིག་བདག་ཅག་གནས་པར་བགྱིའོ། །བཅོམ་ལྡན་འདས་ཀྱིས་ཀླུ་དེ་དག་ཐམས་ཅད་སྔོན་གྱི་ལུས་ཀྱི་གཟུགས་ཇི་ལྟ་བ་བཞིན་དུ་བཀོད་དེ། གནས་དེ་ནས་འགྲོ་བར་མི་ནུས་སོ། །དེ་དག་ཐམས་ཅད་ཀྱིས་དྲང་
340a
༄#། །སྲོང་སྐར་མ་ལ་དགའ་བ་ལ་སྨྲས་པ། དེ་བཞིན་གཤེགས་པ་དེ་ནི། བདེན་ཏེ། སེམས་ཅན་ཐམས་ཅད་ལ་བདེ་བར་བཞེད་པ་རྣམ་པར་མི་འཚེ་བའི་ཆོས་ཉིད་ཡིན་ནོ། །དེ་ལ་བདག་ཅག་སྐྱབས་སུ་ཉེ་བར་གནས་སོ། །འདི་ནས་མྱུར་དུ་བཞུད་ཅིག། བདུད་ཀྱི་འཆིང་བ་འདི་ལས་བདག་ཅག་ཐར་པར་མཛོད་ཅིག་།སྐར་མ་ལ་དགའ་བས་འདི་སྐད་ཅེས་སྨྲས་སོ། །དེ་བཞིན་གཤེགས་པ་དྲང་སྲོང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་སྙིང་རྗེ་ཆེན་པོའི་རྒྱུ་མཐུན་པ་ཐམས་ཅད་མཁྱེན་པ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འཁོར་བའི་འཁོར་ལོ་རྣམ་པར་ལྡོག་པར་བྱ་བའི་ཕྱིར་དང ། བྱང་ཆུབ་ཀྱི་ལམ་རྣམ་པར་དག་པར་བྱ་བའི་ཕྱིར་དང ། རྒྱུ་དང་འབྲས་བུའི་སེམས་ཅན་ཡང་དག་པར་བསྟན་པའི་ཕྱིར་ཞེས་བྱ་བ་ནས་སངས་རྒྱས་ཀྱི་སྤྱན་གྱི་བར་དུ་ཐོབ་པར་བྱ་བའི་ཕྱིར་མང་པོར་མ་བྱུང་བ་ལ་དམིགས་པ་དང ། ཉན་ཐོས་དང་ཐུན་མོང་བ་སེམས་ཅན་ལ་དམིགས་པའི་གནས་པ་མཆོག་བསྟན་ཏོ། །ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སློབ་དཔོན་ལ་རག་ལས་པ་རྣམས་ལས་ཡང་དག་པར་བྱུང་བ་དང ། སོ་སོར་བརྟག་པ་ལ་དམིགས་པ་ཚངས་པའི་གནས་པ་བསྟན་ཏོ། །ད་ལྟར་དེ་བཞིན་གཤེགས་པ་དེ་ནི། སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་རྡུལ་ཕྲ་རབ་ཀྱི་
340b
རྡུལ་སྙེད་ན་ཐེག་པ་བླ་ན་མེད་པའི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བའི་ཕྱིར་དང ། བདུད་བཞི་གདུལ་བའི་ཕྱིར་དང ། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་ཆོས་ཀྱི་ཆུས་ཁྲུས་མཛད་དོ། །ད་ལྟར་ཤིན་ཏུ་ཀུན་ཏུ་རྟོག་པའི་ཉོན་མོངས་པའི་ཚོགས་ཀྱི་སེམས་ཅན་གྱི་ཁམས་ལ་དམིགས་པ་མེད་པ། ཀུན་ནས་ལྡང་བ་མེད་པ། རྒྱུ་བ་མེད་པ། གཞི་མེད་པ། མཚན་ཉིད་མེད་པ། མཚན་མ་མེད་པ། ཆགས་པ་མེད་པ། རྣམ་པར་གཞག་པ་མེད་པ། རྡུལ་མེད་པ། མུན་པ་མེད་པ། སྣང་བ་མེད་པ། གཟུང་བ་མེད་པ། གསལ་བྱེད་མེད་པ། སྤྱོད་པ་མེད་པ། ཐ་མི་དད་པ་ཉིད་ཅེས་བྱ་བ་ནས་ཕུང་པོ་དང ། ཁམས་དང་སྐྱེ་མཆེད་དང ། འབྱུང་བ་ཆེན་པོ་ཐམས་ཅད་དང ། མིག་གི་རང་བཞིན་ཚོར་བ་པོ་མེད་པའི་སྲེད་པ་ཞེས་བྱ་བའི་བར་ནས་ཡིད་ཀྱི་རང་བཞིན་ཚོར་བ་པོ་མེད་པའི་སྲེད་པའི་བར་ལ་སྨོན་པ་མེད་པ་དང ། མངོན་པར་འདུ་བྱེད་པ་མེད་པ་དང ། འཇུག་པ་མེད་པའི་ཆོས་ཀྱི་དབྱིངས་དང ། ཡང་དག་པའི་མཐའ་དང ། འགག་པ་མེད་པ་དང ། དེ་བཞིན་ཉིད་འདྲེས་པ་མེད་པ་དང ། གང་འཇུག་པ་མེད་པའི་ཆོས་ཀྱི་དབྱིངས་དོན་དམ་པ་སྟོང་པ་ཉིད་དང ། ཕྱིར་མི་ལྡོག་པའི་ཆོས་ཐམས་ཅད་མཉམ་པ་ཉིད་ཀྱིས་སྒྲོལ་བ། ཕྱད་པའི་ཡེ་ཤེས་ཀྱི་སྤྱོད་པ་དང་ལྡན་པ། ཡང་དག་
341a
༄#། །པར་དམིགས་པའི་དེ་བཞིན་གཤེགས་པ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་གི་སྤྱོད་པ་དག་ལ་ཡོངས་སུ་སྦྱང་བ་བྱས་པ།་སེམས་ནམ་མཁའ་དང་མཉམ་ཞིང་མཚུངས་པ། མ་ཆགས་པའི་ཡེ་ཤེས་མཉམ་པ་ཉིད་ཐོབ་པ། ལྟ་བ་ཐམས་ཅད་ཀྱི་བག་ཆགས་ཀྱི་ཉོན་མོངས་པ་ཡང་དག་པར་བཅོམ་པ་རྣམས་ལ་ཚངས་པའི་གནས་པ་དམིགས་པ་མེད་པ་སྟོན་ཏོ། །ཀྱེ་དྲང་སྲོང་སྐར་མ་ལ་དགའ་བས་བསྟན་པ་འདི་བཤད་པ་ནའང་ཀླུའི་རྒྱལ་པོ་རྒྱ་མཚོ་དང ། ཀླུའི་རྒྱལ་པོ་ལུས་འབིགས་པའི་ཁབ་ཅེས་བྱ་བ་དང ། ཀླུའི་རྒྱལ་པོ་ཟླ་བ་ལ་རྩུབ་པ་ཞེས་བྱ་བ་དང ། ཀླུའི་རྒྱལ་པོ་རིན་ཆེན་སྐྱོང་ཞེས་བྱ་བ་དེ་དག་བྱང་ཆུབ་ཀྱི་སྤྱོད་པའི་དགེ་བའི་རྩ་བ་སྔོན་བསགས་པའི་སྨོན་ལམ་ཡང་དག་པར་རྗེས་སུ་དྲན་པས་དེ་དག་སྣང་བ་དང ། རྣམ་པར་བསྐྱིངས་པ་དང་ལྡན་པའི་གཟུངས་ཐོབ་པར་གྱུར་ཏོ། །དེའི་ཚེ་ཀླུ་གཞན་བརྒྱད་ཅུ་རྩ་བཞི་ནི། བྱང་ཆུབ་ཀྱི་སྤྱོད་པའི་དགེ་བའི་རྩ་བ་སྔོན་བསགས་པའི་སྨོན་ལམ་ཡང་དག་པར་རྗེས་སུ་དྲན་པས་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་པར་གྱུར་ཏོ། །བྱང་ཆུབ་སེམས་དཔའ་སྐར་མ་ལ་དགའ་བ་ལ་དེ་དག་གིས་འདི་སྐད་ཅེས་སྨྲས་སོ། །ཁྱོད་བཞུད་ལ་སྙིང་རྗེ་ཆེན་པོ་ཐོབ་པ་གང་གིས་འདིར་བདག་ཅག་བདུད་ཀྱི་འཆིང་བ་འདི་ལས་ཡོངས་སུ་ཐར་བར་བགྱིད་པའི་དེ་བཞིན་གཤེགས་པའི་སྙིང་རྗེ་
341b
ཆེན་པོ་ཐོབ་པ་དེ་ལ་བདག་ཅག་གི་ཚིག་གིས་གསོལ་བ་ཐོབ་ཅིག་།དེ་བཞིན་དུ་བྱའོ། །ཞེས་སྨྲས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་དྲང་སྲོང་གི་ཆ་བྱད་ཀྱིས་འཁོར་དྲང་སྲོང་སྟོང་ཕྲག་མང་པོ་དང་དེ་ནས་རྫུ་འཕྲུལ་གྱིས་སོང་ངོ ། །འཕགས་པ་འདུས་པ་ཆེན་པོའི་སྡེ་ཐེག་པ་ཆེན་པོའི་མདོ་ལས། ཉི་མའི་སྙིང་པོའི་ལེའུ་བཅུ་གཅིག་པ་ལས་ལེའུ་བརྒྱད་པའོ།། །།བཅོམ་ལྡན་འདས་ལ་ཀླུ་ཐམས་ཅད་སྐྱབས་སུ་ཉེ་བར་གནས་པ་བདུད་སྡིག་ཅན་གྱིས་ཐོས་ཏེ་ཤས་ཆེར་འཁྲུགས་ཤིང་སྐྲག་ལ་རྒྱ་ཤུག་གི་འདབ་མ་བཞིན་དུ་ལུས་རབ་ཏུ་འདར་ཞིང་ལུས་རྡུལ་ནས་ལག་པ་གཉིས་བསྒྲེངས་ཏེ་འདི་སྐད་ཅེས་སྨྲས་སོ། །ལག་འགྲོ་རྣམས་ནི་སྐྱབས་སུ་དོང ། །སྐྱེ་རྒུ་ཐམས་ཅད་རྨོངས་གྱུར་ཅིང་།། འཆི་མེད་ལམ་ལ་གཞོག་བྱེད་པ། །མི་ཟད་གཡོ་སྒྱུ་ཅན་ལ་ལྟོས། །དེའི་ཚེ་ན་བདུད་ཀྱི་བུ་མོ་མུན་བྲལ་མ་ཞེས་བྱ་བ་དེས་འདི་སྐད་ཅེས་སྨྲས་སོ། །སེམས་ཅན་གང་དག་ཐོས་ཙམ་གྱིས།། དགེ་སྦྱོང་ལ་ནི་སྐྱབས་སུ་མཆིས། །གང་དག་དེ་ཡི་ཚིག་ཐོས་ཤིང ། །དེ་མཐོང་བ་ལྟ་སྨོས་ཅི་འཚལ། །བརྩོན་འགྲུས་སྣ་ཚོགས་སྦྱོར་བ་ཡིས། ཁྱོད་ཀྱིས་ཡུན་ནི་རིང་དུ་གཟིགས། །བཀའ་མཆིད་སྣ་ཚོགས་ལྷན་ཅིག་མཛད། །དེ་ཡི་སྒྱུ་ནི་མ་བསླབས་སམ། །བདུད་ཀྱིས་སླར་སྨྲས་པ། དགེ་སྦྱོང་གཽ་ཏམ་བརྟན་པ་ཡིན། །རང་བཞིན་མཁས་པ་ཆེན་པོ་སྟེ། །སྟོང་པའི་ཆོས་ལ་ཡང་
342a
༄#། །དག་ཞུགས། །རྒལ་ནས་སྐྱེ་རྒུ་སྒྲོལ་བར་བྱེད། །མུན་བྲལ་མས་སྨྲས་པ། སྟོང་པ་ལ་ནི་གང་ཞུགས་པ། །བདུད་རྣམས་བྱེ་བས་མི་བསྐྱོད་དེ། །བྱང་གྲོལ་བདེ་བ་སྦྱིན་བགྱིད་པ། །དེ་ལ་བདག་ནི་སྐྱབས་སུ་མཆི། །མཚན་ཉིད་མ་མཆིས་ལྡན་པ་ཡི། །དེ་བཞིན་ཉིད་ལ་གང་རྟེན་ཅིང ། །ཡེ་ཤེས་ཀྱི་ནི་ཕ་རོལ་ཕྱིན། །དེ་ལ་བདག་ནི་སྐྱབས་སུ་མཆིས། །སྒྱུ་དེ་བདག་གིས་བསླབ་པར་བགྱི། །སེམས་ཅན་ཐམས་ཅད་རྣམ་པར་དགྲོལ། །ཆོས་རྣམས་ཀུན་ལ་དབང་སྒྱུར་བའི། །བླ་མེད་སངས་རྒྱས་འགྲུབ་པར་ཤོག་།བདུད་ཀྱི་བུ་མོ་ལྔ་བརྒྱ་སྙེད་བདུད་ཀྱི་གནས་དེར་འཁོད་ནས་བྱང་ཆུབ་ཏུ་སྨོན་ལམ་བཏབ་པར་གྱུར་ཏོ། །བདུད་སྡིག་ཅན་ཤས་ཆེར་འཁྲུགས་ཤིང་དངངས་ཏེ་རྨོངས་ནས་སྟོབས་ཀྱི་ཤུགས་ཀྱིས་འཆག་སར་ཞུགས་ཏེ་བདུད་ཀྱི་སྟོབས་ཀྱི་ཤུགས་ཀྱི་ཆོ་འཕྲུལ་གྱིས་བྱིན་གྱིས་བརླབ་པ་དེ་ལྟ་བུ་བྱིན་གྱིས་བརླབས་སོ། །གང་གིས་དྲང་སྲོང་སྐྲ་མ་ལ་དགའ་བ་དེ་ནས་སོང་ནས་རིང་པོ་མ་ལོན་པར་དྲང་སྲོང་ཐུབ་པའི་གནས་རྟེན་དེར་བདུད་ཀྱི་གནས་དེ་ནས་ནམ་མཁའ་ལས་རྡོའི་ཆར་བ་མེ་རབ་ཏུ་འབར་བའི་ཆར་མངོན་པར་རབ་ཏུ་དབབ་པར་བརྩམས་ཏེ་ཀླུ་ཐམས་ཅད་ཐལ་བར་རླག་པར་འདོད་ན། བཅོམ་ལྡན་འདས་ཀྱི་མཐུས་དེར་མེ་ཏོག་གི་ཆར་རྣམ་པ་སྣ་ཚོགས་རབ་ཏུ་ཕབ་སྟེ། ཀླུ་ཐམས་ཅད་རབ་ཏུ་དགའ་བར་གྱུར་ཏོ། །དགའ་ཁྱབ་མས་
342b
སྨྲས་པ། ཀྱེ་བདུད་ཀྱི་བུ་མོ་དག་ཁྱོད་ལྟོས་ཤིག་།ཛམྦུའི་གླིང་དེར་དགེ་སྦྱོང་གཽ་ཏ་མ་ལ་ཀླུ་གང་དག་སྐྱབས་སུ་དོང་བ་དེ་དག་ཐམས་ཅད་ཀྱང་འདི་སྡུག་བསྔལ་མང་པོས་གནོད་པར་བྱེད་ན། གང་དག་འདིར་འཁོད་ནས་དགེ་སྦྱོང་གཽ་ཏ་མ་ལ་སྐྱབས་སུ་དོང་བ་རང་གི་བུ་མོ་ཁྱེད་ལ་ལྟ་སྨོས་ཀྱང་ཅི་དགོས། བདུད་ཀྱི་བུ་མོས་འདི་སྐད་ཅེས་སྨྲས་སོ། །སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་གསད་པར་མི་ནུས་ཏེ། ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང ། །དེ་ནི་ངེས་པར་སྐྱེ་བའི་ཕ་རོལ་འགྲོ། །སྟོན་པ་ལ་ནི་མེ་ཏོག་གཅིག་གཏོར་ཞིང ། །བྱང་ཆུབ་སྨོན་ལམ་བརྟན་པོ་བསྐྱེད་པས་ན། །དེ་ནི་བདུད་རྣམས་དུ་མས་གསང་མི་ནུས། །ནེམ་ནུར་མེད་པར་འཇིག་རྟེན་སངས་རྒྱས་འགྱུར། །དེ་ཡི་བསླབ་པའི་གཞི་ནི་གཅིག་བླངས་ཤིང ། །ཚིག་གི་དོན་གཅིག་ཙམ་ཡང་ཉན་བྱེད་ན། །བྱང་ཆུབ་ཕྱིར་ནི་སེམས་ཀྱང་བསྐྱེད་པ་དེ། །སེམས་ཅན་ཁ་ལོ་སྒྱུར་འགྱུར་ནེམ་ནུར་མེད། །ཡབ་ཀླུ་ཚོགས་འདི་མཐོང་སྟེ་སངས་རྒྱས་ཀྱིས། །དེར་ནི་མེ་ཏོག་ཆར་བ་སྣ་ཚོགས་འབེབས། །སངས་རྒྱས་ཡུལ་གཅིག་གིས་ནི་ཁྱོད་ལ་བསྔོས། །དེར་ནི་ཅི་ཡང་ནུས་པར་མ་གྱུར་ཏོ། །གང་གིས་སེམས་ཅན་དེ་དག་སྡིག་ཟད་ཅིང ། །བདག་ཅག་གི་ནི་ལས་ཀྱི་སྒྲིབ་འབྱང་བ། །ཆེད་དུ་ལུང་བསྟན་པ་ནི་དེར་ཉན་པའི། །རིག་པ་གཅིག་ཀྱང་དེར་ནི་སྟོན་པས་གསུངས། །དེ་ནས་བདུད་སྡིག་ཅན་ཤས་ཆེར་འཁྲུགས་ཤིང་གཤེ་སྟེ་སྡུག་བསྔལ་ཞིང་ཡིད་མི་བདེ་
343a
༄#། །བ་སྐྱེས་ནས་མྱ་ངན་གྱི་ཁང་པར་གཅིག་པུ་འདུག་གོ་།དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་བཅོམ་ལྡན་འདས་ཀྱི་ཚངས་པའི་གནས་པ་དམིགས་པ་མེད་པའི་གཏམ་གྱི་ཐ་མར་མཇུག་ཐོགས་སུ་བཅོམ་ལྡན་འདས་བཞུགས་པ་དེར་ཕྱིན་ཏེ་འདུག་གོ་།བཅོམ་ལྡན་འདས་ག་ལ་བ་ཞེས་བྱ་བ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བས་འདི་སྐད་ཅེས་གསོལ་ཏོ། །ཞེས་བྱ་བའི་བར་དུའོ། །བཙུན་པ་བཅོམ་ལྡན་འདས། བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་བཤད་པར་གསོལ། །གཟུངས་སྔགས་ཀྱི་གཞི་དེ་དག་གིས་ནི། སྔོན་བདག་ཅག་གཉིས་བྲམ་ཟེའི་ཁྱེའུ་གཉིས་སུ་གྱུར་པ་ན་ལུས་ཀྱི་སླད་དུ་རྒྱལ་པོ་རྒྱལ་གྱི་ལྷ་ལ་ནོངས་པ་བགྱིས་པས་འགུམ་པ་ལ་ཐུག་སྟེ་བཙོན་རར་སྩལ་ནས་ཟླ་བ་ཕྱེད་ཟས་དང་བྲལ་ཞིང་བཅིང་བ་ལྔས་བཅིངས་ནས་དེ་བཞིན་གཤེགས་པ་མནྡཱ་ར་བའི་བསུང་ལ་ཡིད་ལ་གཞན་མི་སེམས་པར་གསོལ་བ་བཏབ་པ་ལགས་སོ། །དེ་ནས་དེ་བཞིན་གཤེགས་པ་མནྡཱ་ར་བའི་བསུང་བདག་ཅག་ལ་ཐུགས་བརྩེ་བས་རང་གི་གནས་ཀྱི་ཤུལ་ཀར་བཞུགས་ནས་སངས་རྒྱས་ཀྱི་ཡུལ་གྱི་རྫུ་འཕྲུལ་གྱི་ཆོ་འཕྲུལ་ལུང་བསྟན་པ་དེ་ལྟ་བུས་བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་བསྟན་ཏོ། སངས་
343b
རྒྱས་ཀྱི་མཐུས་བཙོན་ར་དེར་བདག་ཅག་གི་རྣ་ལམ་དུ་དོན་དང་བཅས། ཚིག་འབྲུ་དང་བཅས་པར་གྲགས་སོ། །གསང་སྔགས་ཡིད་ལ་བགྱིད་པ་དེ་དག་གིས་བདག་ཅག་དགའ་བ་དང ། དད་པ་ཡང་དག་པར་བསྐྱེད་ནས་དེའི་ཚེ་བདག་ཅག་གི་མཐོང་བའི་ཆོས་ལ་མྱོང་བར་འགྱུར་བ་ཐམས་ཅད་དང ། སྐྱེས་ནས་མྱོང་བར་འགྱུར་བ་དང ། ལན་གྲངས་གཞན་ལ་མྱོང་བར་འགྱུར་བ་ཐམས་ཅད་དང ། ལས་ཀྱི་སྒྲིབ་པ་ཐམས་ཅད་དང ། ཉོན་མོངས་པའི་སྒྲིབ་པ་དང ། ཆོས་ཀྱི་སྒྲིབ་པ་དང ། སེམས་ཅན་གྱི་སྒྲིབ་པ་དང ། སྦྱིན་པའི་སྒྲིབ་པ་ཞེས་བགྱི་བ་ནས་ཤེས་རབ་ཀྱི་སྒྲིབ་པ་ཞེས་བྱ་བའི་བར་དང ། ཉེ་བར་སྤྱོད་པ་དང ། ལོངས་སྤྱོད་ཀྱི་སྒྲིབ་པ་དང ། ཚེའི་འདུ་བྱེད་པས་པའི་སྒྲིབ་པ་དང ། བསམ་བཞིན་དུ་སྲིད་པར་སྐྱེ་བའི་སྒྲིབ་པ་དང ། སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་འགྲོ་བའི་སྒྲིབ་པ་ཡོངས་སུ་བས་ཤིང ། དེར་བདག་ཅག་བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་ཐོས་པ་ཙམ་གྱི་མོད་ལ་མགྲིན་པ་འཆིང་བ་ལྔ་ལས་གྲོལ་ཏེ་བཙོན་ར་ནས་རྫུ་འཕྲུལ་གྱི་ཡུལ་ཐོབ་པར་གྱུར་ཅིང ། དེ་ནས་ནམ་མཁའ་ལ་ཆས་ནས་བཅོམ་ལྡན་འདས་དེ་བཞིན་གཤེགས་པ་མནྡཱ་ར་བའི་བསུང་གི་ཐད་དུ་ཉེ་བར་ཕྱིན་ཏོ། །དེ་ནས་ཤི་འཕོས་ནས་སངས་རྒྱས་ཀྱི་ཞིང་རི་བོའི་འོད་ཅེས་བགྱི་བར་སྐྱེས་ཏེ། བཅོམ་ལྡན་འདས་དེ་བཞིན་གཤེགས་པ་སྤྲིན་གྱི་མདོག་གི་ཐད་དུ་རབ་ཏུ་བྱུང་ནས་ཞེས་བགྱི་བ་ནས་སླན་ཆད་བསྐལ་
344a
༄#། །པ་དཔག་ཏུ་མ་མཆིས་པར་སངས་རྒྱས་ཀྱི་ཞིང་སྟོན་པ་རྣམས་སུ་བདག་ཅག་མ་སྐྱེས་སོ། །ཞེས་བྱ་བའི་བར་དུའོ། །དེ་བཞིན་དུ་ད་ལྟར་སངས་རྒྱས་ཀྱི་ཞིང་མི་མཇེད་ཐམས་ཅད་དུ་འདི་དང་འོག་མིན་ལ་ཐུག་པའི་བར་གྱིས་ཐམས་ཅད་སེམས་ཅན་མི་དང་མི་མ་ལགས་པ་དཔག་ཏུ་མ་མཆིས་པས་ཁྱབ་སྟེ། དེ་དག་ནི། ལས་ཀྱི་སྒྲིབ་པ་དང ། ཉོན་མོངས་པའི་སྒྲིབ་པ་དང ། ཆོས་ཀྱི་སྒྲིབ་པ་དང ། སེམས་ཅན་གྱི་སྒྲིབ་པ་རྣམ་པ་སྣ་ཚོགས་ཀྱིས་ཟིན་ཏོ། །ཞེས་བགྱི་བ་ནས་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་ལས་ཡོངས་སུ་མ་དག་པ་དག་གིས་བསྒྲིབས་ཏེ་མཆིས་པར་མི་ནུས་པ་ལགས་སོ། །ཞེས་བགྱི་བའི་བར་དུའོ། །སེམས་ཅན་གྱི་ལས་ཀྱི་གཟུངས་སྔགས་ཐོས་མ་ཐག་ཏུ་སེམས་ཅན་རྣམས་ཀྱི་མཐོང་བའི་ཆོས་ལ་མྱོང་བར་འགྱུར་བ་དང ། ལན་གྲངས་གཞན་ལ་མྱོང་བར་འགྱུར་བ་དང ། ལས་ཀྱི་སྒྲིབ་པ་ཐམས་ཅད་དང ། ཉོན་མོངས་པའི་སྒྲིབ་པ་དང ། ཆོས་ཀྱི་སྒྲིབ་པ་དང ། སེམས་ཅན་གྱི་སྒྲིབ་པ་དང ། སྦྱིན་པའི་སྒྲིབ་པ་ཞེས་བགྱི་བ་ནས་ཤེས་རབ་ཀྱི་སྒྲིབ་པ་ཞེས་བགྱི་བའི་བར་དང ། ཉེ་བར་སྤྱོད་པ་དང ། ལོངས་སྤྱོད་ཀྱི་སྒྲིབ་པ་དང ། དགེ་བཅུའི་ལས་ཀྱི་ལམ་གྱི་སྒྲིབ་པ་མཆིས་པ་ཐམས་ཅད་དང ། ཐོས་མ་ཐག་ཏུ་སྐྱེ་བའི་སྒྲིབ་པ་དང ། སངས་རྒྱས་ཀྱི་ཞིང་ཡོངས་སུ་དག་པ་དག་ཏུ་འགྲོ་བའི་སྒྲིབ་པ་མཆིས་པ་ཐམས་
344b
ཅད་ཡོངས་སུ་བས་པར་འགྱུར་བ་དང ། ཆོས་བསྟན་པ་དེས་སེམས་ཅན་རྣམས་བཟོད་པ་དང ། ཏིང་ངེ་འཛིན་རྣམ་པ་སྣ་ཚོགས་ཐོབ་པར་འགྱུར་བ་དང ། ཇི་སྲིད་འཚོ་བའི་མཐའི་བར་དུ་དེར་འཆི་བའི་དུས་བགྱིས་ནས་སེམས་ཅན་རྣམས་ཇི་ལྟར་བསམ་པ་བཞིན་དུ་སྲིད་པར་སྐྱེ་བ་ལེན་པར་རྡོ་ཐོགས་པར་འགྱུར་བ་དང ། ཚེ་རབས་དྲན་པར་འགྱུར་བ་དང ། རྟག་པར་རྒྱུན་དུ་བརྩོན་འགྲུས་བརྩམས་པ་དང ། དགེ་བ་བཅུའི་ལས་ཀྱི་ལམ་ཡང་དག་པར་ལེན་པ་དང ། ལོག་པར་མི་ལྟུང་བའི་ཆོས་ཅན་རྣམས་སུ་འགྱུར་བ་དང ། ཕ་རོལ་ཏུ་ཕྱིན་པ་དྲུག་ལ་མངོན་པར་བརྩོན་པ་དང ། བསྡུ་བའི་དངོས་པོ་བཞི་ལ་མངོན་པར་བརྩོན་པ་དང ། ཆོས་ཉན་པ་དང ། དགེ་འདུན་ལ་རིམ་གྲོ་བགྱི་བ་དང ། བསམ་གཏན་གྱིས་རྣམ་པར་རོལ་པ་དང ། མངོན་པར་ཤེས་པ་དང ། ཚངས་པའི་གནས་བསྒོམ་པ་ལ་མངོན་པར་བརྩོན་པར་འགྱུར་བ་དང ། འགྲོ་བ་ཐམས་ཅད་དུ་བླ་ན་མེད་པའི་ཡོངས་སུ་མྱ་ངན་ལས་འདས་པའི་བར་དུ་ཆེས་དེ་དག་དང་འབྲལ་བར་མི་འགྱུར་བར་བཅོམ་ལྡན་འདས་དེ་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་བཙུན་པ་བཅོམ་ལྡན་འདས། བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་དེ་ལེགས་པར་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གང་ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་ལེགས་སོ། །ལེགས་སོ། །ཞེས་བྱ་
345a
༄#། །བ་ནས་བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བའི་བར་དུའོ། །དགེ་སློང་ངམ། དགེ་སློང་མའམ། རིགས་ཀྱི་བུའམ་རིགས་ཀྱི་བུ་མོ་དད་པ་ཅན་སུ་ལ་ལ་ཐེག་པ་གསུམ་ལས་ཐེག་པ་གང་ཡང་རུང་བས་སྲིད་པའི་རྒྱ་མཚོ་ལས་རྒལ་བར་འདོད་པ་ནི། མྱུར་དུ་ཐེག་པ་དེ་ཡོངས་སུ་རྫོགས་པར་བྱ་བར་འདོད་པ་ཡིན་ལ། སྡུག་བསྔལ་ཐམས་ཅད་འཇོམས་པར་འདོད་པ་ཡིན། ཐོས་པ་ཐམས་ཅད་ཀུན་ཏུ་འཛིན་པར་འདོད་པ་ཡིན། ལུས་དང ། ངག་དང ། ཡིད་ཀྱི་གནས་ངན་ལེན་ཐམས་ཅད་ལས་ཡོངས་སུ་ཐར་པར་འདོད་པ་ཡིན།་བསྟན་པ་སྲུང་བར་འདོད་པ་ཡིན། སྙན་པ་འདོད་པ་དང ། རྙེད་པ་འདོད་པ་ཡིན། བཟའ་བ་དང་བཏུང་བ་མང་པོ་འདོད་པ་དང ། དབང་ཕྱུག་འདོད་པ་དང ། གཟུགས་འདོད་པ་དང ། སྟོབས་འདོད་པ་དང ། འཁོར་འདོད་པ་དང ། ནོར་དང་འབྲུ་འདོད་པ་དང ། ཐུ་བོ་འདོད་པ་དང ། མི་དང ། མི་མ་ཡིན་པ་ཐམས་ཅད་ཀྱིས་མཆོད་པར་འོས་པར་འདོད་པ་ཡིན། རྟག་ཏུ་ལུས་འདོད་པ་ཡིན། རྟག་ཏུ་ལུས་དང ། ངག་དང ། ཡིད་ཀྱིས་ཀུན་ཏུ་གནོན་པར་འདོད་པ་ཡིན་ཞིང ། མྱུར་དུ་བསམ་གཏན་དང ། ཏིང་ངེ་འཛིན་དང ། གཟུགས་མེད་པ་ནི་སྙོམས་པར་འཇུག་པ་དང ། མངོན་པར་ཤེས་པ་དང ། ཚངས་པའི་གནས་པ་དང ། གཟུངས་དང ། བཟོད་པ་རྣམ་པ་སྣ་ཚོགས་སྒྲུབ་པར་འདོད་པ་ཡིན་ནོ། །དེ་ལྟར་ཡང་ལས་ཀྱི་སྒྲིབ་
345b
པ་དང ། ཉོན་མོངས་པའི་སྒྲིབ་པ་ཤས་ཆེར་འཕངས་པ་རྣམ་པ་སྣ་ཚོགས་ཀྱིས་ཞེས་བྱ་བ་ནས་སངས་རྒྱས་ཀྱི་ཞིང་ཡོངས་སུ་དག་པར་འགྲོ་བའི་སྒྲིབ་པ་རྣམས་ཀྱིས་བསམ་བཞིན་དུ་སྲིད་པར་སྐྱེ་བ་བླངས་པ་དེའི་བར་གྱིས་མྱུར་དུ་དགེ་བའི་རྩ་བ་རྣམ་པ་སྣ་ཚོགས་དེ་ལྟ་བུ་དེ་དག་སྒྲུབ་པར་མི་ནུས་ཏེ། ལས་ཀྱི་སྒྲིབ་པ་དེ་ལྟ་བུ་དེ་དག་གིས་ཟིན་པའི་ཕྱིར་རོ། །གང་ཟག་དེ་ཁྲུས་བྱས་ཏེ་གོས་གཙང་མ་བགོས་ཤིང ། ཁ་ཟས་གཙང་མ་དང་མལ་གཙང་མ་དེར་སྐྱིལ་མོ་ཀྲུང་ངམ། འཆག་པས་ཀྱང་རུང་སྟེ། རྗེས་སུ་མཐུན་པའི་ཚེས་བརྒྱད་ལ་སངས་རྒྱས་ཀྱི་སྐུའི་གཟུགས་ཡིད་ལ་བྱེད་པས་གཞན་ཡིད་ལ་མི་སེམས་པར་ཞེས་བྱ་བ་ནས་ལས་གཞན་མི་བྱེད་ཅིང་སེམས་རྣམ་པར་གཡེངས་པ་མ་ཡིན་པའི་བར་གྱིས་རེ་ཞིག་མཚན་གཅིག་གམ་ཞེས་བྱ་བ་ནས་མཚན་བདུན་གྱི་བར་དུ་གནས་པར་བྱེད་ན། དེས་རང་གི་སྐུ་བྱད་དུ་སངས་རྒྱས་མཐོང་ངོ ། །ཞེས་བྱ་བའི་བར་དུའོ། །གལ་ཏེ་སངས་རྒྱས་ཀྱི་སྐུའི་གཟུགས་ཆུང་ངུར་རྟོག་པར་བྱེད་ན། ཆུང་ངུ་ཁོ་ནར་མཐོང་ངོ ། །ཡད་ན་ཚད་མེད་པར་རྟོག་པར་བྱེད་ན། གཟུགས་ཀྱི་སྐུ་ཚད་མེད་པ་ཡང་དག་པར་རྗེས་སུ་མཐོང་ངོ ། །དེས་མཚན་ཐོག་ཐག་མཚན་སུམ་ཅུ་རྩ་གཉིས་མཐོང་ངོ ། །མཚན་གང་ལས་ཁ་དོག་སྔོན་པོའི་འོད་འཕྲོ་བའི་མཚན་གཅིག་པོ་དེ་ཉིད་ལ་ཡིད་ཀྱིས་རྗེས་སུ་བལྟས་ནས་གསང་སྔགས་འདི་དག་བརྗོད་དོ། །ཏ་དྱ་ཐཱ། བི་དྲི་མ་བྷུ། བི་ཛྲི་མ་བྷ། ཨུད་པཱ་ད། བྱ་ཡ། པི་དྲི་མ་
346a
༄#། །བྷ། སྣ་བ་ཕ་ར་ཨ་ནུད་ཏ་ཐཱ་ཏཱ་བྷཱུ་ཏ་ཀོ་ཊི་བི་ཛྲི་མབྷ་སཝཱཧཱ། །ཇི་སྲིད་དུ་ཁ་དོག་སྔོན་པོའི་འོད་འཕྲོ་བ་རྣམ་པར་སྦེལ་ནས་དེ་དག་བྱུང་སྟེ་རང་གི་མགོའི་སྤྱི་བོར་ཞུགས་པ་དེ་སྲིད་དུ་དེས་མཚན་གཅིག་ལ་རྣམ་པར་མིག་གཡེང་བའི་ཡིད་ཀྱིས་རྗེས་སུ་བལྟས་ནས་ཚིག་འདི་དག་བརྗོད་ཅིང་མི་སྐྲག་པར་བྱ། མི་དངང་བར་བྱའོ། །རང་གི་ལུས་ལ་མར་རྣམ་པར་བལྟ་བར་བྱ་སྟེ། ཇི་ལྟ་ཞེ་ན། དེས་ཁ་དོག་སྔོན་པོའི་འོད་འཕྲོ་བ་རང་གི་ལུས་ཀྱི་ཡན་ལག་དང ། ཉིང་ལག་ཐམས་ཅད་དུ་འགྲོ་བ་མཐོང་ནས་རང་གི་ལུས་ཐམས་ཅད་རབ་ཏུ་འབར་བར་མཐོང་ངོ ། །ཞེས་བྱ་བ་ནས་ཐལ་བ་བཞིན་དུ་མཐོང་ངོ ། །ཞེས་བྱ་བའི་བར་དང ། །ཕྱོགས་བཞིར་རླུང་གིས་མ་ལུས་པར་ཁྱེར་བ་སྟོང་པ་བཞིན་དུ་མཐོང་ངོ ། །ཞེས་བྱ་བའི་བར་དུ་སྟེ།་ཕྱོགས་ཐམས་ཅད་དུ་དེ་ལ་གཟུགས་སྣང་བ་གང་ཡང་མི་འབྱུང་བ་འདི་ནི། དེའི་ཐམས་ཅད་སྒྲུབ་པ་ཡིན་ནོ། །རིགས་ཀྱི་བུ། སུ་ལ་ལ་སངས་རྒྱས་རྗེས་སུ་དྲན་པ་དེ་ལྟ་བུའི་བཞི་པ་རབ་ཀྱི་མཐའ་གནས་ཡིད་ལ་བྱེད་པའི་གཟུངས་སྔགས་ཤིན་ཏུ་བསྒོམས་ཤིང་མཆོད་སྦྱིན་ལེགས་པར་བྱས་ལ་ཤིན་ཏུ་ཡིད་ལ་བྱས་ན། དེའི་ལས་ཀྱི་སྒྲིབ་པ་ཐམས་ཅད་དང ། ཉོན་མོངས་པའི་སྒྲིབ་པ་དང ། ཆོས་ཀྱི་སྒྲིབ་པ་ཞེས་བྱ་བ་ནས་མ་ལུས་པའི་བར་དུ་ཡོངས་སུ་བྱང་བར་འགྱུར་རོ། །མཚམས་མེད་པའི་ལས་རྣམས་དང ། དམ་པའི་ཆོས་སྤངས་པ་རྣམས་
346b
དང ། འཕགས་པ་ལ་སྐུར་བ་འདེབས་པ་རྣམས་ནི། མ་གཏོགས་སོ། །དེ་འདོད་ན་དེ་ལྟར་ཉིན་མཚན་གཅིག་གིས་སངས་རྒྱས་ཀྱི་གསུང་ཐམས་ཅད་དང ། ཕྱི་རོལ་བའི་བསྟན་བཅོས་ཐམས་ཅད་དང ། རིག་པའི་གནས་བཅོ་བརྒྱད་དང ། གཞན་ཡང་གང་དག་སྙན་དངགས་སུ་བྱས་པ་རྣམས་དེས་ཐེ་ཚོམ་མེད་པར་ཤིན་ཏུ་འཛིན་པར་འགྱུར་རོ། །དེ་ཉིན་མཚན་གཅིག་གིས་བསམ་གཏན་བཞི་དང ། གོང་མ་རྫུ་འཕྲུལ་གྱི་རྐང་པ་དང ། ཚངས་པའི་གནས་པ་བཞི་དང ། སོ་སོ་ཡང་དག་པར་རིག་པ་བཞི་དང ། གཟུགས་མེད་པའི་སྙོམས་པར་འཇུག་པ་བཞི་བསྒོམས་པར་འདོད་ན་དེས་ཤིན་ཏུ་བསྒོམས་པ་ཡིན་ནོ། །དེ་འདོད་ན་སྐད་ཅིག་གཅིག་གིས་སེམས་ཅན་ཐམས་ཅད་ཀྱི་དུས་གསུམ་གྱི་འགྲོ་བའི་འཆི་འཕོ་དང ། སྐྱེ་བ་དང ། སེམས་ཀྱི་སྤྱོད་པ་རབ་ཏུ་ཤེས་པར་འགྱུར་རོ། །དེ་འདོད་ན་སྐད་ཅིག་གཅིག་གིས་ནམ་མཁའ་ཐམས་ཅད་རང་གི་ལུས་སམ། སངས་རྒྱས་ཀྱི་སྐུའམ། བརྒྱ་བྱིན་གྱི་བར་རམ། ཚངས་པའི་བར་རམ། སྲེད་མེད་ཀྱི་བུའི་བར་རམ། དབང་ཕྱུག་ཆེན་པོའི་བར་རམ། རྒྱལ་ཆེན་བཞིའི་བར་རམ། འཁོར་ལོས་སྒྱུར་བའི་བར་རམ། ཆུའི་བར་རམ། མེའི་བར་རམ། སའི་བར་གྱིས་གང་བར་བྱེད་དོ། །དེ་འདོད་ན་སྐད་ཅིག་གཅིག་གིས་ནམ་མཁའ་ཐམས་ཅད་མེ་ཏོག་གི་བར་དང ། རིན་པོ་ཆེའི་ཕྲེང་བ་དང ། སྤོས་དང ། གདུགས་དང ། རྒྱལ་མཚན་དང ། བ་དན་དང ། རས་བཅོས་པུ་དང ། ཆོས་གོས་དང ། རྒྱན་རྣམ་པ་སྣ་ཚོགས་ཀྱི་
347a
༄#། །བར་དག་གིས་གང་བར་བྱེད་དོ། །སུས་བཞི་བ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་དེ་ལྟ་བུ་ཤིན་ཏུ་བསྒོམས་པ་ཡིན་ཞིང་ཤིན་ཏུ་འདྲིས་པར་བྱས་ལ་ཤིན་ཏུ་ཡིད་ལ་བྱས་པ་ཡིན་པ་དེའི་ལས་ཚད་མེད་པ་དེ་ལྟ་བུ་མ་ལུས་པར་བྱང་བར་འགྱུར་རོ། །དེ་དེ་ལྟར་བསོད་ནམས་དང ། སྟོབས་དང ། བརྩོན་འགྲུས་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། རྣམ་པར་རོལ་པ་དང ། མངོན་པར་ཤེས་པ་ཚད་མེད་པར་འགྱུར་རོ། །དེས་དེ་ལྟར་གང་ཡང་རུང་བ་དག་ཡོངས་སུ་རྫོགས་པར་བྱས་ན་མྱུར་དུ་འཁོར་བ་ལས་རྣམ་པར་ཐར་པར་འགྱུར་ཏེ། མཚམས་མེད་པ་བྱེད་པ་དང ། དམ་པའི་ཆོས་སྤོང་བ་དང ། འཕགས་པ་ལ་སྐུར་བ་འདེབས་པ་རྣམས་ནི། མེ་གཏོགས་སོ། །དེ་ལྟ་ཡིན་ཡང་མཚམས་མེད་པ་བྱེད་པ་དང ། དམ་པའི་ཆོས་སྤོང་བ་དང ། འཕགས་པ་ལ་སྐུར་པ་འདེབས་པ་དེའང་བདུན་ཕྲག་བདུན་དུ་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་འདི་འདིར་ཇི་ལྟར་བསྟན་པ་བཞིན་སྒོམ་པར་བྱེད་ན། བདུན་ཕྲག་བདུན་པོ་དེ་འདས་ནས་ལས་ཀྱི་སྒྲིབ་པ་སུམ་ཆམ་ཟད་ཅིང་ལྷག་མ་སྐྱོན་མེད་པར་མ་ལུས་པར་བྱང་བར་འགྱུར་རོ། །བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་སྒོམ་པ་དེ་ལྟ་བུ་དེ་ནི། དེ་ལྟར་དོན་ཆེ་བ་ཡིན་ནོ། །སུ་ལ་ལ་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་
347b
རྒྱས་རྗེས་སུ་དྲན་པ་འདི་དེ་ལྟར་ཐོས་པ་ཙམ་རྣ་ལམ་དུ་ཐོས་པ་དེ་ལ་མིའམ་མི་མ་ཡིན་པའི་བར་དེ་ཉེ་བར་བརྟགས་ནས་དད་པ་དང ། དགའ་བ་དང ། མཆོག་ཏུ་དགའ་བ་སྐྱེའོ། །དེ་བཙོན་རའི་འཆིང་བ་དམ་པོ་ལས་ཡོངས་སུ་ཐར་པར་འགྱུར་རོ། །གང་སུ་དག་སྡུག་བསྔལ་བར་གྱུར་པའི་སེམས་ཅན་ཐམས་ཅད་ཀྱང་སྡུག་བསྔལ་དག་ལས་ཡོངས་སུ་ཐར་པར་འགྱུར་རོ། །ལོངས་སྤྱོད་ཀྱི་སྡུག་བསྔལ་དང ། ཆད་པ་དང ། བརྡེག་པ་དང ། གཡང་ས་དང ། མེ་དང ། ཆུ་དང ། དུག་དང ། དགྲ་ཐམས་ཅད་དང ། འབྱུང་པོ་ཐམས་ཅད་དང ། ནད་ཀྱི་འཇིགས་པ་དང ། གནས་ཀྱི་འཇིགས་པ་དང ། རྒྱལ་པོའི་འཇིགས་པ་དང་ཞེས་བྱ་བ་ནས་བྲན་གྱི་འཇིགས་པ་ཞེས་བྱ་བའི་བར་དང ། ངན་འགྲོར་འགྲོ་བའི་འཇིགས་པ་ཞེས་བྱ་བའི་བར་ལས་ཡོངས་སུ་ཐར་པར་འགྱུར་རོ། །བདེ་འགྲོར་འགྲོ་བའི་རྒྱུར་འགྱུར་རོ། །སུ་སངས་རྒྱས་རྗེས་སུ་དྲན་པ་དེ་ལྟ་བ་ཐོས་པ་ཙམ་རྣ་ལམ་དུ་གྲགས་ན་དེ་ལ་ཉེ་བར་རྟགས་ནས་དད་པ་སྐྱེས་དེ་ལྟར་དོན་ཆེ་ཞིང་ཕན་ཡོན་ཆེ་བ་ཡིན་ན། སུ་ཇི་ལྟར་བསྟན་པ་བཞིན་དེ་བཞིན་དུ་སྒོམ་པ་ལྟ་སྨོས་ཀྱང་ཅི་དགོས། ཆོས་ཀྱི་རྣམ་གྲངས་འདི་བཤད་པ་ན་སྔོན་ཡོངས་སུ་སྦྱང་བ་བྱས་པ་དཀྲིགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་དྲུག་ནི། སངས་རྒྱས་རྗེས་སུ་དྲན་པའི་ཏིང་ངེ་འཛིན་དེ་ཐོབ་པར་གྱུར་ཏོ། །ཇི་ལྟར་སྔར་བཤད་པ་བཞིན་དུ་ཡོན་ཏན་དེ་དག་དང་ཡང་ལྡན་པར་གྱུར་ཏོ། །དའི་ཚེ་སྲོག་ཆགས་ཁྲག་ཁྲིག་ཕྲག་བརྒྱད་ཅུ་རྩ་བཞི་ནི།
348a
༄#། །སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པར་གྱུར་ཏོ། །དེའི་ཚེ་སེམས་ཅན་དཔག་ཡས་པ་ཁ་ཅིག་ནི། མཐར་གྱིས་གནས་པའི་སྙོམས་པར་འཇུག་པའི་རྣལ་འབྱོར་དང ། འབྲས་བུ་དང་པོ་ལ་གནས་པར་གྱུར་ཏོ། །ཁ་ཅིག་ནི། དགྲ་བཅོམ་པ་ཉིད་ཀྱི་བར་ཐོབ་པར་གྱུར་ཏོ། །དེའི་ཚེ་སེམས་ཅན་དཔག་ཡས་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོན་མ་བསྐྱེད་པའི་སེམས་བསྐྱེད་དོ། །མུན་བྲལ་མ་ལ་སོགས་པའི་བདུད་ཀྱི་བུ་མོ་ལྔ་བརྒྱ་པོ་དེ་དག་ཀྱང་སངས་རྒྱས་ཀྱི་མཐུས་བདུད་ཀྱི་གནས་སུ་འཁོད་བཞིན་སེམས་ཡོངས་སུ་སྦྱང་བའི་སངས་རྒྱས་རྗེས་སུ་དྲན་པའི་ལུང་བསྟན་པ་འདི་ཐམས་ཅད་ཐོས་སོ། །ཐོས་ནས་ཀྱང་བུད་མེད་ཀྱི་དངོས་པོ་མི་སྣང་བར་གྱུར་ཏེ་སྐྱེས་པ་ཉིད་ཐོབ་བོ། །གང་དག་སྔོན་ཡོངས་སུ་སྦྱང་བ་བྱས་པ་དེ་དག་ཐམས་ཅད་སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་ལྡན་པར་གྱུར་ཏོ། །ཇི་སྐད་བཤད་པ་བཞིན་དུ་ཡོན་ཏན་དེ་དག་དང་ལྡན་པར་གྱུར་ཏོ། །དེ་དག་ཐམས་ཅད་ཚངས་པ་ཆེན་པོའི་ཆ་བྱད་དུ་བདག་ཉིད་མངོན་པར་སྤྲུལ་ནས་ཚངས་པ་ཆེན་པོ་རེ་རེ་ཡང་བྱེ་བ་བརྒྱ་སྟོང་ཕྲག་མང་པོས་ཡོངས་སུ་བསྐོར་ཅིང་བྱེ་པ་བརྒྱ་ཕྲག་མང་པོས་མདུན་གྱིས་བལྟས་ཏེ་སིལ་སྙན་དང ། ཕེག་རྡོབ་པ་བྱེ་བ་བརྒྱ་ཕྲག་མང་པོས་ཡོངས་སུ་བསྐོར་ནས་དེ་དག་བདུད་ཀྱི་གནས་བསམ་གྱིས་མི་ཁྱབ་པ་བཀོད་པ་ནས་
348b
བཅོམ་ལྡན་འདས་ཀྱི་ཐད་དུ་བབས་ཏེ། བཅོམ་ལྡན་འདས་དེ་ལ་ལྷ་རྫས་ཀྱི་མེ་ཏོག་དང ། ཕྲེང་བ་དང ། སྤོས་དང ། བྱུག་པ་དག་དང ། གདུགས་དང ། རྒྱལ་མཚན་དང ། བ་དན་དག་དང ། རིན་པོ་ཆེའི་རས་བཅོས་པུ་དང ། ཆོས་གོས་སྣ་ཚོགས་གཏོར་ཅིང་མངོན་པར་གཏོར་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །འཕགས་པ་འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས། སངས་རྒྱས་རྗེས་སུ་དྲན་པའི་ལེའུ་སྟེ་དགུ་པ་རྫོགས་སོ།། །། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ལག་འགྲོའི་ཚོགས་ཐམས་ཅད་ཀྱི་ཞལ་ཏ་བྱོས་ཤིག་ཅེས་བཅོམ་ལྡན་འདས་ཀྱིས་བཀའ་སྩལ་པ་དང ། ཉོན་མོངས་པ་མེད་པའི་སེམས་ཀྱིས་གསོལ་པ། བཅོམ་ལྡན་འདས་ཀྱི་དུས་ལགས་ཀྱི། གཤེགས་ཤིག་།བཅོམ་ལྡན་འདས། གང་ཁྱོད་ཀྱིས་མཛད་པ་མཛོད་ཅིག་།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གང་དེ་བཞིན་གཤེགས་པས་ལག་འགྲོའི་ལས་བསྟན་པ་བསམ་གྱིས་མི་ཁྱབ་པ་ཡོངས་སུ་འབྱང་བ་ལུང་བསྟན་པ་བཤད་པ་རབ་ཏུ་བསྟན་པའི་དུས་ཡིན་ནོ། །ཡང་དེའི་ཚེ་ལྷ་ཐམས་ཅད་ཅེས་བྱ་བ་ནས་གྲུལ་བུམ་ཐམས་ཅད་ཅེས་བྱ་བའི་བར་དག་མེ་ཏོག་དང ། སྤོས་དང ། རིན་པོ་ཆེ་དང །
349a
༄#། །རས་བཅོས་བུ་དང ། ཆོས་གོས་དང ། རྒྱན་དང ། སྤུད་པ་དང ། གདུགས་དང ། རྒྱལ་མཚན་དང ། བ་དན་གྱི་ཆར་པ་དག་རབ་ཏུ་འབེབས་ཤིང་སིལ་སྙན་བྱེ་བ་ཁྲག་ཁྲིག་བརྒྱ་སྟོང་གི་རིལ་མོའི་སྒྲ་འབྱིན་པ་ལ་མི་དང་མི་མ་ཡིན་པ་ཐམས་ཅད་ཀྱིས་བསྔགས་པའི་ཡོན་ཏན་གྱིས་བསྟོད་ནས་བཅོམ་ལྡན་འདས་གདན་ལས་མངོན་པར་བཞེངས་ཏེ་རིའི་རྒྱལ་པོ་རི་རབ་ག་ལ་བར་བྱང་ཕྱོགས་སུ་ཉེ་བར་གཤེགས་སོ། །འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་ཐམས་ཅད་ཀྱིས་ཀྱང་གང་བཅོམ་ལྡན་འདས་ཉན་ཐོས་ཀྱི་དགེ་འདུན་གྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ཏེ་རི་རབ་ཀྱི་རྩེ་མོར་གཤེགས་པར་བཞེད་པར་ཤེས་སོ། །དེ་ལྟར་རིག་ནས་མི་མཛེད་ཀྱི་བདག་པོ་ཚངས་པས་བཅོམ་ལྡན་འདས་ཀྱི་ཕྱིར་རིན་པོ་ཆེ་སྣ་བདུན་ལས་བྱས་པ་རས་བཅོས་བུ་སྣ་ཚོགས་དང ། ལྷ་རྫས་ཀྱི་རིན་པོ་ཆེའི་མེ་ཏོག་བཀྲམ་པའི་ཐེམ་སྐས་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ། ལྷའི་བུ་གཞན་འཕྲུལ་དབང་བྱེད་རྣམས་ཀྱིས་ཀྱང་བཅོམ་ལྡན་འདས་ཀྱི་ཕྱིར་ཛམྦུའི་ཆུ་བོའི་གསེར་གྱི་ཐེམ་སྐས་ཙནྡན་སྦྲུལ་གྱི་སྙིང་པོའི་ཕྱེ་མ་སྣ་ཚོགས་བཀྲམ་པ་དག་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་ཐེམ་སྐས་རྣམས་ལས་གཤེགས་
349b
པར་གསོལ། ལྷའི་བུ་འཕྲུལ་དགས་ཀྱང་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་གསེར་གྱི་ཐེམ་སྐས་ཙནྡན་ས་མཆོག་སྣ་ཚོགས་བཀྲམ་པ་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་ཐེམ་སྐས་ལས་གཤེགས་པར་གསོལ། ལྷའི་བུ་ཡོངས་སུ་དགའ་ལྡན་གྱིས་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་བཻ་ཌཱུརྱའི་ཐེམ་སྐས་དུས་ཀྱི་རྗེས་སུ་འབྲང་བའི་ཙནྡན་གྱི་ཕྱེ་མ་སྣ་ཚོགས་བཀྲམ་པ་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ། ལྷའི་བུ་རབ་འཐབ་བྲལ་གྱིས་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་བཻ་ཌཱུརྱའི་ཐེམ་སྐས་ལྷ་རྫས་ཀྱི་ཕྱེ་མ་སྣ་ཚོགས་བཀྲམ་པ་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ། ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་བཅོམ་ལྡན་འདས་ཀྱི་ཕྱིར་མུ་ཏིག་དམར་པོའི་ཐེམ་སྐས་ལྷ་རྫས་ཀྱི་ཙནྡན་གྱི་ཕྱེ་མ་སྣ་ཚོགས་དང ། རིན་པོ་ཆེའི་དྲ་བ་སྣ་ཚོགས་ཀྱིས་ཡོངས་སུ་ཁེབས་པ་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ། རྒྱལ་པོ་ཆེན་པོ་བཞིས་ཀྱང་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་རིན་པོ་ཆེ་རྡོའི་སྙིང་པོ་ལས་བྱས་པ་ལྷ་རྫས་ཀྱི་རས་བཅོས་བུ་སྣ་ཚོགས་ཀྱིས་རབ་ཏུ་ཁེབས་པའི་ཐེམ་སྐས་དེ་ཉིད་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་ཐེམ་སྐས་ལས་རི་རབ་ཀྱི་རྩེ་མོར་གཤེགས་པར་གསོལ། ལྷ་མ་ཡིན་གྱི་དབང་པོ་བཞི་
350a
༄#། །འཁོར་དང་བཅས་པས་ཀྱང་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་སྤུག་གི་ཐེམ་སྐས་ཀྱི་ལྷ་རྫས་གསེར་གྱི་ཕྱེ་མ་སྣ་ཚོགས་ཀྱིས་ཡོངས་སུ་ཁེབས་པ་དེ་ཉིད་དུ་སྤྲུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་ཐེམ་སྐས་ལས་རི་རབ་ཀྱི་རྩེ་མོར་གཤེགས་པར་གསོལ། དེ་ནས་བཅོམ་ལྡན་འདས་དེ་དག་ལ་ཐུགས་བརྩེ་ནས་བདག་ཉིད་འདུན་པས་བདག་དང་འདྲ་བའི་སངས་རྒྱས་ཀྱི་སྐུ་དྲུག་སྤྲུལ་ནས་སངས་རྒྱས་བདུན་པོ་དེ་དག་ལྷའི་དབང་པོ་དང ། ལྷ་མ་ཡིན་གྱི་དབང་པོ་ཐམས་ཅད་ཀྱི་མདུན་དུ་ཉན་ཐོས་ཀྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ནས་བཅོམ་ལྡན་འདས་བཀོད་པ་ཆེན་པོ་དེ་ལྟ་བུས་རི་རབ་ཀྱི་རྩེ་མོར་གཤེགས་སོ། །སངས་རྒྱས་བདུན་པོ་དེ་དག་མཆོག་ཏུ་ལྷན་ནེ་ལྷང་ངེར་རི་རབ་ཀྱི་རྩེ་མོ་ན་བཞུགས་སོ། །སངས་རྒྱས་ཀྱི་སྐུ་རེ་རེ་ལས་འོད་ཟེར་འདི་ལྟ་བུ་བྱུང་སྟེ། དཔེར་ན། ཟླ་བ་དང་ཉི་མ་བྱེ་བ་ཕྲག་སྟོང་ཤར་བ་བཞིན་ནོ། །ཀླུ་གང་དག་དྲང་སྲོང་ཐུབ་པའི་གནས་རྟེན་དུ་ལྷགས་པ་དེ་དག་ཐམས་ཅད་ཀྱིས་དེ་མཐོང་ནས་ལྟད་མོར་གྱུར་ཏེ་གཅིག་ལ་གཅིག་དྲིས་པ། སྣང་བ་ཆེན་པོའི་ནང་ན་བརྟེན་བ་རི་རབ་ཀྱི་རྩེ་མོ་ལ་གནས་པ་བདུན་པོ་དེ་དག་གི་ལས་འོངས། དགའ་བོ་དང ། ཉེ་དགའ་གཉིས་ཀྱིས་སྨྲས་པ། རི་རབ་རྩེ་ལ་ལྷ་རྣམས་ལྷན་ཅིག་ཚངས་པའི་མདུན་ན་འདོན་པ་འདི་གནས་པ། །ཀུན་མཆོག་ལྷ་ཡི་དབང་ཕྱུག་ཤིན་ཏུ་
350b
མཁས་པ་རྣམས་ཀྱི་རིག་པའི་ཕ་རོལ་ཕྱིན། །བདག་ཅག་ལ་ནི་བརྩེ་བས་འདིར་གནས་དཔལ་གྱི་གཟི་བརྗིད་ཀྱིས་ནི་ལོངས་སྤྱོད་བྱེད། །འཆིང་བ་རྣམས་ལས་ཐར་བར་བྱེད་ཀྱི་ཀུན་ཀྱང་དེ་ལ་མགོ་བོས་ཕྱག་འཚོལ་ཅིག་།མ་དྲོས་པས་འདི་སྐད་ཅེས་སྨྲས་སོ། །དེ་འདི་མ་ཡིན་འདི་བདུད་སྡིག་ཅན་འགྲོ་གཙོ་འདོད་པའི་དབང་ཕྱུག་རྫུ་འཕྲུལ་ཅན། །ཁྱེད་ལ་སྙིང་བརྩེ་བ་ཡིས་བུ་དང་སྐྱེ་བོས་ཡོངས་བསྐོར་འདི་ནི་གནས་པ་ཡིས། །འདི་ནི་གང་ཞིག་ལ་ལ་འདོད་ཁམས་སྡུག་བསྔལ་བཀྲེས་ཤིང་སྐོམ་པའི་ནད་ཀྱིས་འཇིགས། །སེམས་ཅན་དེ་ཡང་རབ་ཏུ་ཐར་བྱེད་ཁྱེད་ཅག་མྱུར་དུ་སྡུག་བསྔལ་རྣམས་ལས་ཐར་པར་བྱེད། །སའི་དབང་ཕྱུག་གིས་འདི་སྐད་ཅེས་སྨྲས་སོ། །དེ་ལྟ་མ་ཡིན་འདིར་རྒྱལ་ལྷ་དབང་འཐབ་བྲལ་དགའ་ལྡན་འཕྲུལ་དགའ་གཞན་འཕྲུལ་བ། །དེ་དག་ཁྱོད་ལ་སྙིང་བརྩེ་བ་ཡིས་རི་ལ་གནས་ཤིང་ཀླུ་ཡི་ཚོགས་ལ་ལྟ། །བདག་ཅག་ཡོངས་སུ་སྐྱོ་བས་ཞེས་ཀུན་གྱིས་གསང་མཐོར་དེ་དག་ལ་ནི་འདོད་བོས། །དེ་དག་རྟག་ཏུ་བདེ་དང་ལྡན་པས་ཁྱེད་ཅག་བཙོན་ར་དག་ནས་ཞི་བར་བྱེད། །རྒྱ་མཚོས་སྨྲས་པ། དེ་དག་མ་ཡིན་འདི་ནི་ལྷ་དབང་བརྒྱ་བྱིན་ཚོགས་བཅས་གཟི་བརྗིད་ལྷང་ངེ་བ། །དེ་ནི་གླིང་བཞིའི་ནང་ན་ཆོས་དང་ལྡན་པ་སུ་ཡོད་བརྩེ་བའི་ཡིད་ཀྱིས་བལྟ། །ཁྱེད་ཅག་ཐམས་ཅད་བྱམས་པའི་ཡིད་དུ་གྱིས་ལ་ཁྲོ་བ་མྱུར་དུ་དོར་བར་གྱིས། །དེ་ཡིས་མྱུར་དུ་ལག་འགྲོ་ཐར་བྱེད་འདི་ནས་འཇིགས་པ་ཀུན་ནས་ཐར་
351a
༄#། །པར་བྱེད། །ཤིན་ཏུ་བརྟན་གྱིས་སྨྲས་པ། དེ་ལྟ་མ་ཡིན་འདི་ཀུན་གཟུགས་བརྟེན་ལྷ་ཚོགས་བསམ་གཏན་བདེ་ལྡན་གཟི་བརྗིད་ཅན། །སེམས་ཅན་རྣམས་ཀྱི་ཆེད་དུ་དྲང་སྲོང་འདིར་འཛེགས་འཁོད་ནས་བརྩེ་བས་ཕྱོགས་རྣམས་སུ། །མྱུར་དུ་སྲོག་ཆགས་རྣམས་ཀྱི་འགྲོ་བའི་སྡུག་བསྔལ་ཞི་བྱེད་ཆོས་ཆུའི་ཆར་བ་འབེབས། །ལྷ་ཡི་ཡིད་ཀྱིས་ཐམས་ཅད་དེ་ལ་ཕྱག་འཚོལ་འདི་ནས་བདག་ཅག་ཐར་པར་བྱེད། །ཀླུ་ལུས་འབིགས་པའི་ཁབ་ཀྱིས་འདི་སྐད་ཅེས་སྨྲས་སོ། །འདི་ནི་གཟུགས་ན་བརྟེན་པའི་ལྷ་མིན་བཞི་པོ་འདི་ཀུན་བདུད་གྱི་འབྱོར་པ་ཡིན། །ལུས་ངན་སྐྱེ་མཆོག་བདུད་རྩིའི་སྐོམ་དང་རྒྱུ་བར་བཏགས་པ་འདི་དག་གནས་པ་ནི། །གནོད་སྦྱིན་སྡེ་དང་བཅས་པས་ཡོངས་བསྐོར་ཕྱོགས་བཞི་སྐྱོང་བྱེད་སྡིག་པའི་སྐྱེ་བོ་སྒྲོལ། །དེ་དག་གིས་ནི་བདག་ཅག་སེམས་ཅན་གཞན་མཐོང་འདི་ནི་མྱུར་དུ་ཐར་པར་བྱེད། །ཀླུ་རིན་ཆེན་སྐྱོང་གིས་འདི་སྐད་ཅེས་སྨྲས་སོ། །དེ་དག་མ་ཡིན་དེ་ནི་མགོ་བྲེགས་དུར་སྨྲིག་གོས་ཅན་འཁོང་པར་སྣང་བ་ཡིན། །དེ་དག་ལ་ནི་ཀུན་ལྟ་ཐལ་མོ་སྦྱར་འཁོད་སྐར་མའི་ནང་ན་ཟླ་བ་བཞིན། །བདུན་པོ་དེ་དག་ཆེར་བསྒྲུབས་བརྟུལ་ཞུགས་བརྟན་པ་མགོ་བྲེགས་དག་གིས་མཐོང་བ་ཡིན། །དུར་སྨྲིག་གོས་བགོས་མཚན་གྱིས་རབ་བརྒྱན་འགྲོ་བ་ཀུན་གྱིས་མཆོད་པར་འོས་པར་མཐོང ། །ཀླུ་ལུས་འབིགས་པའི་ཁབ་ཀྱིས་འདི་སྐད་ཅེས་སྨྲས་སོ། །འདི་ནི་བདག་
351b
ཉིད་ཀྱིས་ཀྱང་འཇིག་རྟེན་འདྲེན་པ་ཡིན་ཏེ་ང་ལ་དེ་ལྟར་སྣང ། །སེམས་ཅན་རྣམས་ཀྱི་མཉམ་གཉེན་འགྲོ་བ་སྐྱོབ་པ་སྡུག་བསྔལ་རྒྱ་མཚོ་སེལ་བྱེད་པ། །གང་དག་ལྷན་ཅིག་སྣང་བ་དྲང་སྲོང་གཞན་རྣམས་ཀྱང་ནི་དེ་ཡིས་སྤྲུལ་པ་ཡིན། །བདག་ཅག་ལ་ནི་བརྩེ་བས་འདིར་གནས་ཁྱེད་ཅག་སྡུག་བསྔལ་རྣམས་ལས་ཐར་པར་བྱེད། །དེ་ནས་བཅོམ་ལྡན་འདས་རི་རབ་ཀྱི་རྩེ་མོ་དེ་ལ་བཞུགས་མ་ཐག་ཏུ་རི་རབ་དཔག་ཚད་བརྒྱད་ཅུ་རྩ་བཞིར་འཁོར་བརྒྱ་སྟོང་ཡོད་པར་གྱུར་ཏོ། །དེ་ནས་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ཀྱི་སྟེང་དུ་ལྷ་རྫས་ཀྱི་རིན་པོ་ཆེ་སྣ་བདུན་ལས་བྱས་པའི་ཁང་པ་བརྩེགས་པ་འོག་མིན་གྱི་ལྷའི་གནས་ལ་ཐུག་པའི་བར་མན་ཆད་སྣ་ཚོགས་པ། བལྟ་ན་སྡུག་པ། དཔག་ཚད་བརྒྱ་སྟོང་དུ་མར་སྤྲས་པ་དེ་སྲིད་ཅིག་སྤྲུལ་ཏེ། དེ་ནི། བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་ལྷ་རྫས་ཀྱི་རས་བཅོས་བུ་དང ། ཆོས་གོས་དང ། རྒྱན་དང ། སྤུད་པ་དང ། གདུགས་དང ། རྒྱལ་མཚན་དང ། བ་དན་དང ། སྤོས་དང ། མེ་ཏོག་སྣ་ཚོགས་ཀྱིས་ཤིན་ཏུ་བརྒྱན་པར་སྤྲུལ་པ་ཡིན་ནོ། །དེའི་ཚེ་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་བོས་ཏེ་བཀའ་སྩལ་པ། ཀཽ་ཤི་ཀ་།སངས་རྒྱས་ཀྱི་ཞིང་མི་མཇེད་ནི། ང་དང ། སངས་རྒྱས་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་དང ། དྲང་སྲོང་རྣམས་དང ། བདུད་རྣམས་དང ། དབང་ཆེ་བར་གྲགས་པའི་ལྷ་དང །
352a
༄#། །ཀླུ་དང ། གནོད་སྦྱིན་རྣམས་དང ། མི་དང ། མི་མ་ཡིན་པ་རྣམས་ཀྱིས་ཤིན་ཏུ་ལོངས་སྤྱད་ཟིན་ཏོ། །དེ་བཞིན་དུ་ད་ལྟར་རི་རབ་འདི་ནི། དེ་བཞིན་གཤེགས་པ་ཉིད་ཀྱིས་ཤིན་ཏུ་ལོངས་སྤྱད་ཟིན་ཏེ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང ། ལྷ་དབང་ཆེ་བར་གྲགས་པ་རྣམས་ཀྱིས་ཤིན་ཏུ་ལོངས་སྤྱད་ཟིན་ཏོ། །རི་རབ་ཀྱི་རྩེ་མོ་ན་གནས་པའི་འབྱུང་པོ་ཁྱེད་ལ་ཕན་པ་དང་བདེ་བར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་ལ་ཐུགས་བརྩེ་བར་མཛད་ན་བཙུན་པ་བཅོམ་ལྡན་འདས། བཅོམ་ལྡན་འདས་ལ་ཕྱག་བགྱི་བ་དང ། བསྙེན་བཀུར་བགྱི་བ་དང ། རི་རབ་ལ་ལོངས་སྤྱད་པར་བགྱི་བའི་སླད་དུ་སངས་རྒྱས་ཀྱི་ཞིང་མི་མཇེད་འདི་ཐམས་ཅད་ན་གལ་ཏེ་ཡང་གང་སུ་དག་བདུད་དམ། བརྒྱ་བྱིན་ནམ། ཚངས་པའམ། ལྷའི་དབང་པོའམ། ཀླུའི་དབང་པོའམ། གནོད་སྦྱིན་གྱི་དབང་པོའམ། དྲི་ཟའི་དབང་པོའམ། ལྷ་མ་ཡིན་གྱི་དབང་པོའམ། ནམ་མཁའ་ལྡིང་གི་དབང་པོའམ། མི་འམ་ཅིའི་དབང་པོའམ། ལྟོ་འཕྱེ་ཆེན་པོའི་དབང་པོའམ། སེམས་ཅན་དབང་ཆེ་བར་གྲགས་པ། དབང་ཆེ་བར་གྲགས་པ་ལྷའི་དྲང་སྲོང་གི་བར་ཞེས་བགྱི་བ་ནས་མིའི་དྲང་སྲོང་གི་བར་དེ་དག་ཐམས་ཅད་འདིར་ལྷགས་པར་གྱུར་ན་འདིར་བདག་ཅག་ལ་ཤས་ཆེར་ཕན་པ་དང ། བདེ་བར་འགྱུར་ལགས་སོ། །དེར་བཅོམ་ལྡན་འདས་བཞུགས་ནས་འཛུམ་པ་མཛད་དེ། །དེའི་ཞལ་
352b
གྱི་སྒོ་ནས་འོད་ཟེར་ཁ་དོག་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། ཤེལ་གྱི་ཁ་དོག་ལྟ་བུ་རྣམ་པ་སྣ་ཚོགས་བྱུང་ངོ ། །འོད་ཟེར་དེ་དག་གཤེགས་ནས་བདུད་ཀྱི་གནས་བྱེ་བ་ཕྲག་བརྒྱ་དང ། བརྒྱ་བྱིན་གྱི་གནས་བྱེ་བ་ཕྲག་བརྒྱ་དང ། ཚངས་པའི་གནས་ཞེས་བྱ་བ་ནས་ལྷའི་དབང་པོ་ཐམས་ཅད་ཀྱི་གནས་དང ། ལྷ་མ་ཡིན་གྱི་གནས་དང ། དྲང་སྲོང་གི་གནས་བྱེ་བ་ཕྲག་བརྒྱའི་སངས་རྒྱས་ཀྱི་ཞིང་འདི་ཇི་སྙེད་པ་ཐམས་ཅད་དུ་འོད་ཟེར་དེ་དག་ཞུགས་སོ། །དེ་དང་དེ་དག་ཏུ་སེམས་ཅན་དབང་ཆེ་བར་གྲགས་པ་དབང་ཆེ་བར་གྲགས་པ་བདུད་དམ་ཞེས་བྱ་བ་ནས་དྲང་སྲོང་རྣམས་ཞེས་བྱ་བའི་བར་དུ་མིང་དུ་བཏགས་པ་དེ་དང་དེ་དག་ཐམས་ཅད་ལ་རབ་ཏུ་གོ་བར་མཛད་ནས་བདུད་ཅེས་བྱ་བ་ནས་དྲང་སྲོང་ཞེས་བྱ་བའི་བར་དེ་དང་དེ་དག་དེ་ནས་ཆས་ཏེ་བཅོམ་ལྡན་འདས་ག་ལ་བ་དང ། སངས་རྒྱས་ཀྱི་སྐུ་དྲུག་པོ་དེ་དག་ག་ལ་བར་སྐད་ཅིག་ཐང་གཅིག་ཡུད་ཙམ་གཅིག་གིས་འདིར་རི་རབ་ཀྱི་རྩེ་མོར་འཁོད་དོ། །བཅོམ་ལྡན་འདས་ཀྱིས་སྤྲུལ་པ་དག་རྒྱུན་བཅད་ནས་བཀའ་སྩལ་པ། ངའི་སངས་རྒྱས་ཀྱི་ཞིང་འདི་ན་རིའི་རྒྱལ་པོ་རི་རབ་བྱེ་བ་ཕྲག་བརྒྱ་ཇི་སྙེད་ཡོད་པ་ཐམས་ཅད་ཀྱི་ནང་ན་རི་རབ་འདི་ནི། མཆོག་དང་ཕུལ་ཡིན་པར་ངས་བཤད་དེ། རི་རབ་འདི་ནི། འདུས་པ་ཆེན་པོ་ཐམས་ཅད་ཀྱིས་ལོངས་སྤྱོད་པ་ཡིན་ཞིང་རི་རབ་ཐམས་ཅད་ཀྱི་རྒྱལ་པོ་ཡིན་ནོ། །དེ་ཐོས་ནས་བརྒྱ་བྱིན་ཀཽ་ཤི་ཀ་དང་ཞེས་བྱ་བ་ནས་མི་མཇེད་ཀྱི་བདག་པོ་
353a
༄#། །ཚངས་པ་ཞེས་བྱ་བའི་བར་མཆོག་ཏུ་ཡིད་བདེ་བ་དང་རངས་པ་སྐྱེས་སོ། །བཅོམ་ལྡན་འདས་ཀྱི་མཐུས་ཀླུའི་རྒྱལ་པོ་ཆེན་པོ་བཞི་པོ་དེ་དག་དྲང་སྲོང་ཐུབ་པའི་གནས་རྟེན་དེ་ནས་སོང་སྟེ། ཀླུའི་རྒྱལ་པོ་རྒྱ་མཚོ་ནི། འདི་ནས་ལྷོ་ཕྱོགས་ཀྱི་རྒྱ་མཚོ་ཆེན་པོའི་ནང་དུ་མཇུག་མས་འདུག་ནས་རི་རབ་ཀྱི་རྩེ་མོའི་བར་དུ་དེའི་མགོ་བཞག་སྟེ་བཅོམ་ལྡན་འདས་འབའ་ཞིག་ལ་ལྟའོ། །ཞེས་བྱ་བ་ནས་ཀླུའི་རྒྱལ་པོ་རིན་ཆེན་སྐྱོང་ཞེས་བྱ་བ་ནུབ་ཕྱོགས་ཀྱི་ཞེས་བྱ་བའི་བར་དང ། ཀླུའི་རྒྱལ་པོ་ལུས་འབིགས་པའི་ཁབ་ནི། བྱང་ཕྱོགས་ཀྱི་ཞེས་བྱ་བའི་བར་དང ། ཀླུའི་རྒྱལ་པོ་ཟླ་བ་ལ་རྩུབ་པ་ནི། ཤར་ཕྱོགས་ཀྱི་རྒྱ་མཚོ་ཆེན་པོའི་ནང་དུ་མཇུག་མ་བཞག་ནས་ཞེས་བྱ་བ་ནས་རི་རབ་ཀྱི་རྩེ་མོའི་བར་དུ་དེའི་མགོ་བཞག་སྟེ་བཅོམ་ལྡན་འདས་འབའ་ཞིག་ལ་ལྟའོ། །ཞེས་བྱ་བའི་བར་དུའོ། །ཀླུ་ལྷག་མ་ཁྲག་ཁྲིག་བརྒྱ་སྟོང་ཕྲག་དཔག་ཏུ་མེད་པ་དེ་དག་ནི། དེ་ནས་འདོང་བར་མ་ནུས་སོ། །དེ་དག་ཐམས་ཅད་ཀྱིས་གསང་བསྟོད་དེ་འདི་སྐད་ཅེས་སྨས་སོ། །བཙོ་ནར་འདི་ནས་བདག་ཅག་ཡོངས་སུ་བསྐྱབ་པར་གསོལ། །ཡོངས་སུ་ཐར་པར་མཛད་པར་གསོལ། ཀླུའི་རྒྱལ་པོ་དགའ་བོ་དང ། ཉེ་དགའ་གཉིས་བཅོམ་ལྡན་འདས་རི་རབ་ཀྱི་རྩེ་མོ་ནས་འདིར་གཤེགས་ཤིང་གནས་རྟེན་འདིར་བཞུགས་ནས་ཀླུ་རྣམས་ལ་ཆོས་སྟོན་པར་འགྱུར་རོ་སྙམ་སྟེ། དེ་དག་གཉིས་གནས་རྟེན་ནས་རི་རབ་
353b
ཀྱི་རྩེ་མོའི་བར་དུ་དེ་སྲིད་ཀྱི་རང་གི་ལུས་སྤྲུལ་ཏོ། །དེ་ནས་བརྒྱ་བྱིན་འདི་སྙམ་དུ་སེམས་ཏེ། ཀླུ་དེ་དག་ནི། ལུས་རྩུབ་ཅིང་འདུས་ཏེ་རེག་ནག་དུག་པ་ཡིན་པས་བཅོམ་ལྡན་འདས་ཀྱི་ཞབས་ཀྱི་མཐིལ་དག་རལ་པར་གྱུར་ན་མི་རུང་ངོ་སྙམ་ནས་དེས་ལག་འགྲོའི་ལུས་ལྷ་རྫས་ཀྱི་རས་བཅོས་བུ་དག་གིས་ཡོངས་སུ་གཡོགས་ཤིང་མགོ་ལ་ཙནྡན་སྦྲུལ་གྱི་སྙིང་པོ་དང་ཏ་མ་ལའི་ལོ་མའི་ཕྱེ་མས་ཡོངས་སུ་གཡོགས་ཏེ་ལྷ་རྫས་ཀྱི་མེ་ཏོག་དག་མངོན་པར་གཏོར་ཏོ། །དེ་ནས་བཅོམ་ལྡན་འདས་ཀྱིས་དྲང་སྲོང་ཐུབ་པའི་གནས་རྟེན་དེ་རྒྱར་དཔག་ཚང་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པར་སྤྲུལ་ཏོ། །མི་མཇེད་ཀྱི་བདག་པོ་ཚངས་པས་དེའི་དབུས་སུ་ལྷ་རྫས་ཀྱི་རིན་པོ་ཆེའི་རས་བཅོས་བུ་དང ། རྒྱན་དང ། ནོར་བུ་དང ། རིན་པོ་ཆེ་རྣམས་ཀྱི་གདན་དག་བཏིང་ངོ ། །དེའི་ཚེ་བཅོམ་ལྡན་འདས་རི་རབ་ཀྱི་རྩེ་མོ་ལ་བཞུགས་ནས་ཀུན་ཤེས་ཀཽ་ཌི་ནྱལ་བཀའ་སྩལ་པ། ཅི་ནས་ཀྱང་སངས་རྒྱས་ཀྱི་ཞིང་མི་མཇེད་ཐམས་ཅད་དུ་ཆུད་པ་ཐམས་ཅད་ཀྱིས་ཐོས་པར་དེ་ལ་སངས་རྒྱས་ཀྱི་ཡུལ་ཀྱི་ཆོ་འཕྲུལ་གྱི་བྱིན་གྱི་རླབས་ཀྱི་སྟོབས་དེ་ལྟ་བུས་ཆོས་སྟོན་ཏེ། ཀཽ་ཌི་ནྱ། གང་མིག་གི་སྐྱེ་བ་དང ། གནས་པ་དང ། འབྱུང་བ་དང ། ཉེ་བར་ལེན་པ་ལ་མངོན་པར་ཞེན་པ་འདི་ནི། སྡུག་བསྔལ་གྱི་སྐྱེ་བའོ། །འདི་ནི། ནད་དང ། སྲིད་པའི་ཡན་ལག་རྣམས་ཀྱི་གནས་པའོ། །འདི་ནི། རྒ་ཤིའི་འབྱུང་བའོ། །ཀཽ་ཌི་ནྱ། གང་རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་སྐྱེ་
354a
༄#། །པ་དང ། གནས་པ་དང ། འབྱུང་བ་དང ། ཉེ་བར་ལེན་པ་ལ་མངོན་པར་ཞེན་པ་འདི་ནི། སྡུག་བསྔལ་གྱི་སྐྱེ་བའོ། །འདི་ནི། ནད་དང ། སྲིད་པའི་ཡན་ལག་རྣམས་ཀྱི་གནས་པའོ། །འདི་ནི། རྒ་ཤིའི་འབྱུང་བའོ། །ཀཽ་ཌི་ནྱ། གང་མིག་གི་འགོག་པ་དང ། ཉེ་བར་ཞི་བ་དང ། ནུབ་པ་དང ། ཉེ་བར་ལེན་པ་ཉེ་བར་ཞི་བ་འདི་ནི། སྡུག་བསྔལ་གྱི་འགོག་པའོ། །འདི་ནི།་སྲེག་པའི་ཡན་ལག་རྣམས་ཀྱི་ཉེ་བར་ཞི་བའོ། །འདི་ནི། རྒ་ཤིའི་ནུབ་པའོ། །ཀཽ་ཌི་ནྱ། གང་རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་འགོག་པ་དང ། ཉེ་བར་ཞི་བ་དང ། ནུབ་པ་དང ། ཉེ་བར་ལེན་པ་རྣམ་པར་ཞི་བ་འདི་ནི། སྡུག་བསྔལ་གྱི་འགོག་པའོ། །འདི་ནི། སྲིད་པའི་ཡན་ལག་རྣམས་ཀྱི་ཉེ་བར་ཞི་བའོ། །འདི་ནི། རྒ་ཤིའི་ནུབ་པའོ། །ཆོས་གང་གིས་ང་ལྷ་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང ། བྲམ་ཟེར་བཅས་པ་དང ། ལྷ་དང་མིར་བཅས་པའི་སྐྱེ་རྒུའི་འཇིག་རྟེན་ན་ཕུལ་ཡིན་པར་གྲགས་པ་དང ། བྱམས་པ་ཆེན་པོས་མཆོག་ཡིན་པར་གྲགས་པ་དང ། སྙིང་རྗེ་ཆེན་པོས་དམ་པ་ཡིན་པར་གྲགས་པ་དང ། འཁོར་བའི་ཕ་རོལ་ཏུ་ཕྱིན་པས་བླ་ན་མེད་པར་གྲགས་པ་དང ། སྦྱིན་བ་དང ། དུལ་བ་དང ། ཡང་དག་པར་སྡོམ་པ་རྣམས་ཀྱི་སེམས་ཅན་ཐམས་ཅད་ལ་སེམས་སྙོམས་པར་གྲགས་པའི་ཆོས་ཀྱི་སྦྱིན་པ་དག་དུལ་བ་དང ། ཡང་དག་པར་སྡོམ་པ་དང ། ཚངས་
354b
པའི་གནས་པ་དང ། འཕགས་པའི་ལམ་ཡན་ལག་བརྒྱད་པ་ཡོངས་སུ་སྒོམ་པའི་རྒྱུ་མཐུན་པའི་ཆོས་དེ་ནི། ངས་སེམས་ཅན་ཐམས་ཅད་ལ་རྒྱ་ཆེར་བསྟན་ཏོ། །གསོལ་བར་མཛད་དོ། །སྟོན་པ་ཐུགས་བརྩེ་བ་ཅན་ཕན་པར་བཞེད་པས་གང་ཉན་ཐོས་རྣམས་ལ་མཛད་པ་ནི། ངས་མཛད་ཟིན་ཏེ། ད་ཁྱེད་ཅག་གིས་བྱ་བ་ཡིན་ནོ། །རྒ་ཤིའི་མཐར་དབྱུང་བའི་ཕྱིར་དགོན་པ་རྣམས་དང ། ཤིང་དྲུང་དང ། དུར་ཁྲོད་དང ། རི་དང ། རི་ཁྲོད་དང ། བས་མཐའི་གནས་མལ་དེ་དག་ཏུ་ཕྱིས་འགྱོད་པ་ཅན་དུ་གྱུར་ན་མི་རུང་གི་།སྒོམས་ཤིག། རྩོལ་ཅིག་།ངེད་ཀྱིས་རྗེས་སུ་བསྟན་པ་ནི། འདི་ཡིན་ནོ། བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སངས་རྒྱས་ཀྱི་ཞིང་མི་མཇེད་འདིའི་གླིང་བཞི་པ་བྱེ་བ་ཕྲག་བརྒྱ་གང་ཡིན་པ་ཐམས་ཅད་དུ་གླིང་བཞི་པ་རེ་རེར་ཡང་སེམས་ཅན་དཀྲིགས་པ་བྱེ་བ་བརྒྱ་སྟོང་ཕྲག་མང་པོ་དེ་དག་གིས་ནི། དགེ་བའི་རྩ་བ་རྣམ་པ་སྣ་ཚོགས་བསྐྱེད་དེ། །ཁ་ཅིག་ནི། ཏིང་ངེ་འཛིན་དང ། གཟུངས་དང ། བཟོད་པ་རྣམས་ལ་རྣམ་བར་གནས་པར་གྱུར་ཏོ། །དེ་བཞིན་དུ་ཆོས་རྣམས་ལ་ཆོས་ཀྱི་མིག་བསྐྱེད་དོ། །ཁ་ཅིག་ནི། སེམས་ཅན་དམྱལ་བར་འགྲོ་བའི་ལས་ཀྱི་སྒྲིབ་པ་རྣམས་བྱང་ངོ ། །ཞེས་བྱ་བ་ནས་ཁ་ཅིག་ནི། སེམས་ཅན་དམྱལ་བ་དང ། དུད་འགྲོའི་བར་དང ། ཁ་ཅིག་གནོད་སྦྱིན་དབུལ་བོ་ཉིད་ཀྱིས་བར་དང ། ཁ་ཅིག་ནི། མི་དབུལ་པོ་ཉིད་དུ་འགྲོ་བའི་ལས་ཀྱི་སྒྲིབ་པ་རྣམས་ཡོངས་སུ་
355a
༄#། །བྱང་ངོ ། །ནད་ཀྱིས་བཏབ་པ་རྣམས་ནི། །ནད་མེད་པར་གྱུར་ཏོ། །སེམས་ཅན་རྣམས་བཙོན་ནས་ཡོངས་སུ་ཐར་པར་གྱུར་ཏོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོ་རྒྱ་མཚོས་ཚིགས་སུ་བཅད་དེ་གསོལ་པ། དགེ་བས་ན་ཚོགས་དྲི་མ་མེད་པའི་གསེར་ཅན་སྤྱོད་པ་རྣམ་དག་ཐུགས་རྗེས་ཕྱུག་།ལྷ་དང་ཤེད་ལས་སྐྱེས་དང་ལག་འགྲོའི་དམ་པ་ཉོན་མོངས་རྙོག་པ་སེལ་མཛད་པ། །ཚུལ་ཁྲིམས་ཐོས་རིག་གསུམ་པོ་ཕུན་སུམ་ཚོགས་པ་སེམས་ཅན་ཐམས་ཅད་འཛུད་པའོ། །ལག་འགྲོའི་ཚོགས་རབ་ཐར་མཛད་ཐུགས་རྗེ་བརྟན་པོ་སྔོན་གྱི་དམ་བཅས་དགོངས་པར་མཛོད། །གཞན་སེམས་སེམས་ཅན་སླད་དུ་སྡུག་བསྔལ་ཇི་ལྟར་བཏང་བ་བཞིན། །ལག་འགྲོའི་སྐད་ཅིག་མཐའ་ཡས་འདིར་རྨོངས་སྡུག་བསྔལ་སྣ་ཚོགས་ཐེབས། དགྲ་ཡིས་ཕྱག་བགྱིས་བརྩོན་བརྟན་སྐྱེ་བའི་དགོན་པ་ལས་གྲོལ་བ། །ཡེ་ཤེས་ཆབ་ཀྱིས་ལག་འགྲོ་ཐམས་ཅད་ཚིམ་པར་མཛད་དུ་གསོལ། །འཕགས་པ་འདུས་པ་ཆེན་པོའི་མདོ་ཉི་མའི་སྙིང་པོའི་ལེའུ་བཅུ་གཅིག་པ་ལས། རི་རབ་ལ་གཤེགས་པའི་ལེའུ་སྟེ་བཅུ་པའོ།། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་གཉིས་པ། དེ་ནས་བཅོམ་ལྡན་འདས་མེ་ཏོག་དང ། རིན་པོ་ཆེ་དང ། ཆོས་གོས་དག་གི་ཆར་རབ་ཏུ་འབེབས་ཤིང ། སིལ་སྙན་དང ། ཕེག་རྡོབ་པ་དང ། གླུ་དབྱངས་དག་གི་རོལ་མོའི་སྒྲ་འབྱིན་པའི་
355b
ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་ཐམས་ཅད་སྡོད་པས་རི་རབ་ཀྱི་རྩེ་མོ་ནས་གཤེགས་ཏེ། བཅོམ་ལྡན་འདས་ཉན་ཐོས་ཀྱི་དགེ་འདུན་གྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ནས་དྲང་སྲོང་ཐུབ་པའི་གནས་རྟེན་གྱི་དབུས་སུ་གདན་བཏིང་བ་ཉིད་ལ་བཞུགས་སོ། །བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་སྟེང་གི་ནམ་མཁའ་ལ་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། མི་འམ་ཅི་ཐམས་ཅད་ཀྱིས་རྒྱན་དང ། ཕྱེ་མ་སྣ་ཚོགས་དང ། མེ་ཏོག་སྣ་ཚོགས་དང ། རིན་པོ་ཆེ་སྣ་ཚོགས་ཀྱི་ཆར་རབ་ཏུ་ཕབ་བོ། །བཅོམ་ལྡན་འདས་ལ་ཀླུ་དེ་དག་གིས་ཀྱང་མེ་ཏོག་སྣ་ཚོགས་དང ། དི་སྣ་ཚོགས་དང ། རིན་པོ་ཆེ་སྣ་ཚོགས་དང ། རས་གོས་དང ། རས་བཅོས་བུ་དང ། ཆོས་གོས་དང ། རྒྱན་སྣ་ཚོགས་ཀྱིས་མཆོད་པ་བྱས་ནས་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ནས་སྤྱན་སྔར་ཆོས་མཉན་པའི་ཕྱིར་འཁོད་དོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོ་རྒྱ་མཚོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སུག་ལས་གང་དག་གིས་སེམས་ཅན་རྣམས་ཀླུའི་གནས་སུ་སྐྱེ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀླུའི་བདག་པོ། ལས་ཀྱི་སྒྲིབ་པ་བཅུས་སེམས་ཅན་འབྱུང་བོ་རྣམས་མྱུར་དུ་ཀླུའི་སྐྱེ་གནས་སུ་སྐྱེས་སོ། །བཅུ་གང་ཞེ་ན། སེམས་ཅན་གང་དག་ཕ་རོལ་ཏུ་ཕྱིན་པ་དྲུག་ལ་མངོན་པར་བརྩོན་ཞིང་བླ་ན་མེད་པའི་ཐེག་
356a
༄#། །པ་ཡོངས་སུ་ཚོལ་བའི་སེམས་དང་ལྡན་པ་དག་ཡིན་ལ་མྱུར་དུ་འདོད་པ་རྣམས་ལ་ཉེས་དམིགས་སུ་ལྟ་བ་མ་ཡིན་ཞིང་ཤིན་ཏུ་སྦྱིན་པ་ལ་མངོན་པར་བརྩོན་ལ་ལག་པ་བརྐྱང་བ་དག་ཡོད་དེ། དེ་དག་སྨོན་ལམ་གྱི་དབང་གིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་བླ་ན་མེད་པའི་ཐེག་པ་ཡོངས་སུ་ཚོལ་བའི་སེམས་དང་ལྡན་ཞིང་སྦྱིན་པའི་ཕ་རོལ་ཏུ་ཕྱིན་པ་ལ་མངོན་པར་བརྩོན་པ་དག་ཡོད་དེ། དེ་དག་གིས་ཚུལ་ཁྲིམས་ཐམས་ཅད་རྫོགས་པར་སྐྱོན་མེད་པར་སྲུང་བར་ནི་མ་ནུས་སོ། །དེ་དག་སེམས་ཅན་དམྱལ་བ་དང ། ཡི་དྭགས་ཀྱི་འཇིགས་པས་སྐྲག་ནས་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་བླ་ན་མེད་པའི་ཐེག་པ་ཡོངས་སུ་ཚོལ་པར་བྱེད་ཅིང་ཤིན་ཏུ་ང་རྒྱལ་གྱིས་ཁེངས་པ་དག་ཡོད་དེ། དེ་དག་ང་རྒྱལ་གྱིས་མཐུས་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་བླ་ན་མེད་པའི་ཐེག་པའི་སྤྱོད་པ་ལ་མངོན་པར་བརྩོན་པ་དག་ཡོད་དེ། དེ་དག་ཤིན་ཏུ་ཁྲོ་བ་མང་ཞིང་སེམས་ཅན་གཞན་རྣམས་ལ་རབ་ཏུ་སྡང་སྟེ། །དེ་དག་ཤ་འཁོན་ལ་བརྟེན་པས་འཆི་བའི་དུས་ཐ་མར་ཀླུ་རྣམས་ཀྱི་ནང་དུ་སྨོན་ལམ་འདེབས་ཏེ། དེ་དག་སྨོན་ལམ་གྱིས་ཤེར་སྐྱེའོ། །ཡང་སེམས་ཅན་གང་དག་ཉན་ཐོས་ཀྱི་ཐེག་པ་དང་ཡང་དག་པར་ལྡན་ཞིང་སྣོད་དུ་གྱུར་པའི་སྦྱིན་གནས་ཡོངས་སུ་བཙལ་བ་དང་མཆོད་པའི་སེམས་དང་ལྡན་པ་དག་
356b
ཡོད་དེ། དེ་དག་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་སེར་སྣ་ཅན་དང་ང་རྒྱལ་གྱི་སྐྱོན་དང་ལྡན་པ་དག་ཡོད་དེ། དེ་དག་ལས་དེས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་ང་རྒྱལ་ལ་མངོན་པར་དགའ་ཞིང་མུ་ཅོར་སྨྲ་ལ་བརྫུན་དུ་སྨྲ་བ་དག་ཡོད་དེ། དེ་དག་ལས་དེས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་སངས་རྒྱས་ལ་གཅེས་པར་བྱེད་པ་མ་ཡིན་པ་མང་པ་དག་ཡིན་ཞིང ། ཆོས་དང ། དགེ་འདུན་དང ། བསླབ་པ་དང ། མཁན་པོ་དང ། སློབ་དཔོན་དང ། བླ་མའི་གནས་ལྟ་བུ་དང ། ཕ་མ་རྣམས་ལ་གཅེས་པར་བྱེད་པ་མ་ཡིན་པ་མང་བ་དག་ཡིན་པ་ཡོད་དེ། དེའི་ཚེ་དེ་དག་ང་རྒྱལ་གྱི་རྒྱུ་དང ། ལུས་དང ། ངག་དང ། ཡིད་ཆུང་དུས་འཁྲུལ་པས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་ང་རྒྱལ་དང་གཏི་མུག་གིས་ཟིལ་གྱིས་ནོན་ཅིང་མདུལ་ལ་སྐྱོན་མེད་པ་མ་ཡིན་པར་སྤྱོད་པ་དག་ཡོད་དེ། དེ་དག་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་ང་རྒྱལ་དང ། ཕྲ་མ་སྨྲ་བ་དང ། ཚིག་རྩུ་བ་པོ་སྨྲ་བ་ལ་གོམས་པ་དག་ཡོད་དེ། དེ་དག་འཆི་བའི་དུས་བྱས་ནས་ཀླུ་རྣམས་ཀྱི་ནང་དུ་སྐྱེ་སྟེ། བཅུ་པོ་དེ་དག་ཡིན་ནོ། །ཆོས་གཞན་གསུམ་དང་ལྡན་ན། ཀླུ་རྣམས་ཀྱི་ནང་དུ་སྐྱེའོ། །གསུམ་གང་ཞེ་ན། སེམས་ཅན་གང་དག་ལུས་དང ། ངག་དང ། ཡིད་ཀྱི་ཉེས་པར་སྤྱོད་པ་ཤིན་ཏུ་དམ་པོ་དག་གིས་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་པ་དག་ཡོད་དེ། དེ་དག་དེ་ནས་ཤི་འཕོས་ནས་ཉེས་པར་སྤྱོད་པའི་ལྷག་མ་ཆུང་དུས་ཀླུ་རྣམས་ཀྱི་ནང་དུ་སྐྱེའོ།།
357a
༄#། །དེ་བཞིན་དུ་དུད་འགྲོ་རྣམས་དང ། དེ་བཞིན་དུ་ཡི་དྭགས་རྣམས་ནས་ཞེས་བྱ་བའི་བར་དུ་སྟེ། ཆོས་གསུམ་པོ་དེ་དག་གིས་སེམས་ཅན་རྣམས་ཀླུ་རྣམས་ཀྱི་ནང་དུ་སྐྱེའོ། །རྒྱ་མཚོས་ཀྱང་གསོལ་པ། བཙུན་པ་བཅོམ་ལྡན་འདས། དེ་དེ་བཞིན་ནོ། །བཙུན་པ་བདེ་བར་གཤེགས་པ། དེ་དེ་བཞིན་ཏེ། བཙུན་པ་བཅོམ་ལྡན་འདས། འདི་ནི། ཀླུ་གང་དག་ལོངས་སྤྱོད་པ་དང ། ཉེ་བར་སྤྱོད་པའི་དཔལ་དང་ལྡན་པ་ལྷ་དང་འདྲ་བ་དག་མ་ཆིས་པ་ནས་མི་སྨད་རིམས་དང་འདྲ་བ་དག་མཆིས་པའི་བར་དང ། ཡི་དྭགས་དང་འདྲ་བ་དག་མཆིས་པའི་བར་དང ། གང་དག་དུད་འགྲོའི་སྐྱེ་གནས་པ་དང་འདྲ་བ་དག་མཆོས་བའི་བར་དང ། ཀླུ་གང་དག་སེམས་ཅན་དམྱལ་བ་དང་འདྲ་བ་དག་གི་བར་མཆིས་ལགས་ཏེ། དེ་དག་སྡུག་བསྔལ་གྱི་ཚོར་བ་མྱོང་བར་འགྱུར་ལགས་སོ། །དེ་ནས་ཀླུའི་རྒྱལ་པོའི་བུ་པདྨའི་གདོང་ཞེས་བྱ་བས་འདི་སྐད་ཅེས་གསོལ་ཏོ། །བ་དག་སུག་ལས་གང་གིས་ཀླུའི་རིགས་སུ་སྐྱེས་ནས་གཟུགས་མཆོག་ཏུ་ལྷ་མ་མེ་ཞིང་ལུས་ཀྱིས་རེག་པ་གང་ཅུང་ཟད་ཅི་རིག་ཀྱང་ཀུན་ཏུ་ཚིག་ཅིང་འབར་བ་ལགས། བདག་དུས་ཐམས་ཅད་དུ་མཆིལ་ལྷ་མ་བོར་ནས་གཅེར་བུར་རྒྱུ་བར་བགྱིད་ལགས། བདག་གི་ཕ་མ་དེ་ནི། དཔལ་ཕུན་སུམ་ཚོགས་པའི་ཆེས་ཁྱད་པར་དུ་འཕགས་པ་མྱོང་སྟེ། དཔེར་ན། གླིང་བཞི་པའི་འཁོར་ལོས་བསྒྱུར་བའི་རྒྱལ་པོ་བཞིན་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ། །སྔོན་བྱུང་བ་འདས་པའི་དུས་བསྐལ་པ་སུམ་ཅུ་རྩ་
357b
གཅིག་པ་འདས་པ་དེའི་ཚེ་དེའི་དུས་ན་དེ་བཞིན་གཤེགས་པ་ཞེས་བྱ་བ་ནས་སངས་རྒྱས་བཅོམ་ལྡན་འདས་ཞེས་བྱ་བའི་པར་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ ། །དེའི་ཚེ་རྒྱལ་པོ་མི་ཏོག་བྲལ་ཞེས་བྱ་བ་ཞིག་བྱུང་སྟེ། རྒྱལ་པོ་མེ་ཏོག་བྲལ་དེས་ཀྱང་དེ་བཞིན་གཤེགས་པ་གཙུག་ཏོར་ཅན་ཉན་ཐོས་དང་བྱང་ཆུབ་སེམས་དཔའི་དགེ་འདུན་བརྒྱ་སྟོང་ཕྲག་མང་པོའི་འཁོར་དང་ལྡན་བདེ་ལ་ཟླ་བ་གསུམ་དུ་ཡོ་བྱད་ཐམས་ཅད་ཕུལ་ནས་རྟག་ཏུ་ཆོས་མཉན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། །བཅོམ་ལྡན་འདས་དེའི་གཙུག་ལག་ཁང་ཡོ་བྱད་ཐམས་ཅད་དང་ལྡན་པ་ཞིག་ཀྱང་བརྩིགས་སོ། །རྒྱལ་པོ་མེ་ཏོག་བྲལ་དེའི་བུ་སྲིད་སྒྲུབ་བཅས་ཞེས་བྱ་བ་ཞིག་ཡོད་དེ། དེ་ཤིན་ཏུ་འཁོར་བས་སྐྲག་ནས་བཅོམ་ལྡན་འདས་ཀྱི་ཐད་དུ་རབ་ཏུ་བྱུང་སྟེ་ཕའི་དགེ་འདུན་གྱི་ཀུན་དགའི་ར་བར་དེ་རྗེས་སུ་སྐྱོང་ཞིང་འདུག་གོ་།དེ་ནས་བཅོམ་ལྡན་འདས་ཀྱི་ཉན་ཐོས་ཀྱི་དགེ་སློང་གང་དག་གནས་པ་དང ། དེ་ན་གང་དག་བཟའ་བ་དང ། བཏུང་བ་དང ། མལ་ཆ་ལ་ལོངས་སྤྱོད་པར་བྱེད་པ་ཐམས་ཅད་ལ་མེ་ཏོག་བྲལ་གྱི་བུ་དགེ་སློང་སྲིད་སྒྲུབ་བཅས་དེ་ཕྲག་དོག་བྱེད་དོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་སློང་དེ་དག་ཀྱང་གནས་དེ་ནས་དོང་ངོ ། །དེའང་ཡིད་མཆོག་ཏུ་དགའ་ནས་བདག་ཉིད་ཀྱིས་ཀྱང་ལོངས་སྤྱོད་པར་མི་བྱེད། གཞན་དག་ལའང་མི་སྟེར་རོ། །ཞེས་བྱ་བ་ནས་དགེ་སློང་དེའང་འཆི་བའི་དུས་བྱས་ནས་སེམས་ཅན་དམྱལ་
358a
༄#། །བ་ཆེན་པོ་རྣམས་ཀྱི་ནང་དུ་སྐྱེས་སོ། །ཞེས་བྱ་བའི་བར་དུའོ། །དེ་ལོ་ཁྲག་ཁྲིག་བརྒྱ་སྟོང་ཕྲག་མང་པོར་སེམས་ཅན་དམྱལ་བ་ཆེན་པོའི་ནང་དུ་སྐྱེས་ནས་བཅོས་སོ། །དེ་དེ་ནས་ཤི་འཕོས་ནས་ཡི་དྭགས་རྣམས་ཀྱི་ནང་དུ་སྐྱེས་ཏེ། ལོ་བརྒྱ་སྟོང་ཕྲག་མང་པོར་དེར་སྡུག་བསྔལ་མྱོང་ངོ ། །ཕྱིས་ཀྱང་སེམས་ཅན་དམྱལ་བ་དང ། ཡི་དྭགས་རྣམས་ཀྱི་ནང་དུ་སྡུག་བསྔལ་མྱོང་ངོ ། །ལག་འགྲོ་།འཁོར་བས་སྐྲག་པའི་སེམས་དང་སྲིད་སྒྲུབ་བཅས་ཞེས་བྱ་བ་རབ་ཏུ་བྱུང་སྟེ། དེ་ནས་ཤི་འཕོས་ནས་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་མྱོང་བ་དེ་གཞན་ཞིང ། ཡིན་པར་ཁྱོད་སེམས་ན། དེ་གཞན་ཡིན་པར་བལྟ་བར་མི་བྱ་སྟེ། དེ་ལྟར་ལས་ཀྱི་སྒྲིབ་པ་དམ་པོས་ཟིན་པའང་ཁྱོད་ཡིན་ནོ། །འདི་ཕན་ཆད་བསྐལ་པ་སུམ་ཅུ་རྩ་གཅིག་ཏུ་ཁྱོད་རྟག་པར་ངན་སོང་གསུམ་གྱི་ནང་དུ་སྐྱེས་སོ། །དེའི་ལས་ཀྱི་སྒྲིབ་པ་ལྷག་མ་ལུས་པ་དེས་འདིར་ཀླུ་རྣམས་ཀྱི་ནང་དུ་སྐྱེས་པ་ནི། གཞན་མ་ཡིན་གྱི། ཁྱོད་ཡིན་ཏེ། སྡུག་བསྔལ་གྱི་ཚོར་བ་དེ་ལྟ་བུ་མྱོང་ངོ ། །གང་ཁྱོད་འདི་ནས་ཤི་འཕོས་ནས་ཕྱིས་ཀྱང་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་རྣམས་ཀྱི་ནང་དུ་རྟག་ཏུ་སྡུག་བསྔལ་གྱིས་གཟིར་བར་འགྱུར་བ་འདི་ནི། གནས་ཡོད་དོ། །ཀླུའི་བུ་དེ་མཆོག་ཏུ་ཡིད་མི་དགའ་ནས་རབ་ཏུ་དུ་ཞིང་བཅོམ་ལྡན་འདས་ཀྱི་ཞབས་གཉིས་ལ་ཕྱག་འྩལ་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བྱིས་པ་ཇི་ལྟ་བ་དང ། རྨོངས་
358b
པ་ཇི་ལྟ་བ་དང ། མི་གསལ་བ་དང ། མི་མཁས་པ་ཇི་ལྟ་བ་བཞིན་ནོངས་པ་སོ་སོར་འཆགས་ལགས་སོ། །ནོངས་པ་སོ་སོར་འཆགས་ལགས་སོ། །བཙུན་པ་བཅོམ་ལྡན་འདས། བདག་གི་བསམ་པས་སྡོམ་པ་གཟུང་བར་བགྱིའོ། །བདག་དེ་བཞིན་གཤེགས་པའི་དགེ་བསྙེན་ལགས་ཏེ། ཇི་སྲིད་འཚོའི་བར་དུ་སྲོག་གཅོད་པ་སྤངས་པ་ལགས་སོ། །བདག་བཅོམ་ལྡན་འདས་ལ་སྐྱབས་སུ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །ཁྱོད་ལྷག་པའི་བསམ་པས་ང་ལ་སྐྱབས་སུ་སོང་བས་ཁྱོད་ཀྱི་ངན་སོང་ཐམས་ཅད་ཡོངས་སུ་ཟད་དོ། །འདི་ནས་ཤི་འཕོས་ནས་ཁྱོད་ཀྱིས་བྱམས་པའི་ཚེ་ན་མིའི་རྙེད་པ་ཐོབ་པར་འགྱུར་ཏེ། བྱམས་པའི་ཐད་དུ་རབ་ཏུ་འབྱུང་བར་འགྱུར་ཞིང་དགྲ་བཅོམ་པ་ཉིད་ཀྱི་བར་དུ་མངོན་སུམ་དུ་བྱེད་པར་འགྱུར་རོ། །དེའི་ཚེ་དེའི་དུས་ན་གང་གིས་གཙུག་ཏོར་ཅན་འཁོར་དང་བཅས་པ་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་རིམ་གྲོ་བྱས་པ་དང ། དེའི་ཕྱིར་དགེ་འདུན་གྱི་ཀུན་དགའ་ར་བ་ཡོ་བྱད་ཐམས་ཅད་ཕུན་སུམ་ཚོགས་པར་བྱས་པའི་རྒྱལ་པོ་མེ་ཏོག་བྲལ་ཞེས་བྱ་བ་གཞན་ཞིག་ཡིན་པར་ཁྱོད་སེམས་ན། དེ་གཞན་ཡིན་པར་ཡང་མི་བལྟ་སྟེ། དེ་ནི། ཀླུའི་རྒྱལ་པོ་རྒྱ་མཚོ་འདི་ཡིན་ནོ། །འདི་ནི། བསྐལ་པ་སུམ་ཅུ་རྩ་གཅིག་ཏུ་ནམ་ཡང་ངན་འགྲོར་མ་སྐྱེས་སོ། །ལྷའི་དཔལ་དང་སྐལ་པ་བཟང་པོ་ཕུན་སུམ་ཚོགས་པ་ཤིན་ཏུ་རྒྱ་ཆེན་པོ་མྱོང་ངོ ། །འདི་ནི། བླ་ན་མེད་པའི་ཐེག་པའི་ཕྱིར་སྨོན་ལམ་གྱི་
359a
༄#། །དབང་གིས་འདིར་ཀླུ་རྣམས་ཀྱི་ནང་དུ་སྐྱེས་ཏེ། འདིར་དཔལ་དང་སྐལ་བ་བཟང་པོ་དེ་ལྟ་བུ་མྱོང་ངོ ། །དེ་སྐད་ཅེས་ཐོས་ནས་ཀླུ་ཐམས་ཅད་སྐྱོ་ཞིང་མཆོག་ཏུ་ཡིད་མི་བདེ་ནས་བཅོམ་ལྡན་འདས་ལ་མཆོག་ཏུ་གུས་པ་སྐྱེས་ཤིང་ཉེ་བར་རྟོག་པས་གཅེས་པར་བྱེད་པར་གྱུར་ཏོ། །དེའི་ནང་ན་ཀླུ་གཞན་མིག་མེད་པ་ལོང་བ་འབྲས་བུ་ཉམ་ཆུང་བ་ཞེས་བྱ་བ་ཞིག་ཡོད་དེ། དེས་གསང་བསྟོད་ནས་འོ་འདོད་བོས་ཏེ་གསོལ་པ། སེམས་ཅན་རྣམས་ལ་ཐུགས་བརྩེ་བདག་ཅག་ཡོངས་སུ་བསྐྱབ་པར་གསོལ། །ཡུན་རིང་བདག་གི་ལུས་ལ་སྡུག་བསྔལ་ཚོར་བ་རབ་མི་བཟད། །སྲིན་བུ་སྦལ་པ་སྐྱེ་བོ་སྲོག་ཆགས་སྣ་ཚོགས་འཚལ་བར་བགྱིད། །བཟའ་བ་བཏུང་བ་མ་མཆིས་ཆབ་ཚན་ནང་ན་བདག་གནས་ལགས། །བཅོམ་ལྡན་འདས་ཀྱིས་བཀའ་སྩལ་པ། འཁོར་བ་འཇིག་རྒྱལ་བསྟན་པ་ལ། །སྔོན་གྱི་དགེ་སྦྱོང་ཁྱོད་གྱུར་ཏོ། །མཁས་ཤིང་གཙང་སྦྲ་སྤྱོད་ལམ་ལྡན། །དབེན་པ་དག་ཏུའང་སྡིག་པ་བྱེད། །ལྷན་ཅིག་གནས་པ་དག་ཀྱང་མང ། །ཁྱོད་བདག་སྟོན་པ་འདྲ་བར་གྱུར། །དགྲ་བཅོམ་རྫུ་འཕྲུལ་ཆེན་པོ་ཡང ། །ཁྱོད་ལ་སློབ་མ་རྣམས་ཀྱིས་བརྗོད། །རྙེད་དང་བཀུར་སྟི་བྱུང་བ་ནི། །ཁྱོད་གཅིག་པུ་ཡིས་ལོངས་སྤྱད་ཅིང ། །ཁྱོད་ཀྱིས་དགེ་སློང་དེས་པ་མཐོང ། །དེ་དག་ལ་ནི་མི་སྙན་བརྗོད། །ལྷན་ཅིག་གནས་དེ་མི་དགར་གནས། །ཁྱོད་ནི་ཚེ་རབས་སྟོང་དག་ཏུ། །ངེད་ཀྱི་ཟས་སུ་གྱུར་ཅིག་ཅེས། །དེ་ལྟ་བུ་ཡི་སེམས་བསྐྱེད་དོ། །ལས་ཀྱི་
359b
རྣམ་པར་སྨིན་པ་དེས། །འདིར་ཡང་ཁྱོད་ནི་ལག་འགྲོར་སྐྱེས། །ཁྱོད་རང་གི་ཡང་ལྷན་ཅིག་གནས། །ཕྱི་ཕྱིར་ཟ་བར་བྱེད་པ་ཡིན། །ཆུ་ཚན་ནང་ན་གནས་པ་དང ། །ལོང་བར་དེ་ཡིས་གྱུར་པ་ཡིན། །ཀུན་ཏུ་འབར་བའི་ལྕགས་དང་ཟངས། །ཕྱིས་ཀྱང་དམྱལ་བར་ཟ་བར་འགྱུར། །སྟོབས་མེད་ཡིད་ནི་མི་དགའ་བས། །ཀླུ་དབང་ཀུན་གྱི་ནང་ན་དུ། །ཉེས་པ་སོ་སོར་བཤགས་བྱས་ན། །སྡུག་བསྔལ་རྣམས་ལས་ཡོངས་སུ་གྲོལ། །དེ་ནས་བཅོམ་ལྡན་གསེར་འདྲ་བའི། །ཕྱག་གིས་ཞལ་གྱི་དཀྱིལ་འཁོར་རེག་།སྤྱོད་པ་དཀའ་བ་དགོངས་མཛད་ནས། །སྟོན་པས་འདི་སྐད་བཀའ་སྩལ་ཏོ། །རྒྱལ་པོ་མིག་བཟང་ང་བྱུང་སྟེ། །སྔོན་ཚེ་བདེན་པ་གང་གིས་ངས། །བྲམ་ཟེ་ལོང་བའི་དོན་དུ་ནི། །མིག་དག་གཉིས་ཀ་ཕྱུང་བར་གྱུར། །བདེན་པའི་ཚིག་དེ་ཁོ་ན་ཡིས། །ཁྱོད་ཀྱིས་དྲི་མེད་མིག་ཐོབ་ཤོག་།ང་ཡི་ལེགས་པར་སྤྱོད་པས་ཁྱོད། །སྔོན་གྱི་ལས་དེ་བྱང་བར་ཤོག་།ཏདྱ་ཐཱ། ཙཀྵུ་ཁ་བ། ར་ས་ན་ཁ་བ། ཀརྨ་ཁ་བ། ཨ་ནན་ཛ་ན། བི་ར་ཛ་པ་ར་ཨནྟ། ཛྙཱ་མ་ནི་ས་ར་ཎ་ཏྲོ་ཡ། ཨ་ཧེ་ཙནྡྲ་ཌ་ནེ། ཀྲི་མི་ཤུདྡྷེ། ཕ་ལ་ཤུདྡྷེ། ཨ་ཛེ་ཏ་ཛེ། ཏ་ལེ་ཏནྟ་ལེ། བ་སེ་དྷ་ས་ཀེ། བ་ས་ཏེ། རཱུ་ར་ཏི། མ་ཧཱ་རཱུ་ར་བི། ཏྲི་རཏྣ་བྲ་ཧེ་སཝཱཧཱ། བཅོམ་ལྡན་འདས་ཀྱིས་བདེན་པའི་ཚིག་དེ་བཤད་པ་ན་ཀླུ་འབྲས་བུ་ཉམ་ཆུང་བའི་མིག་ཡོངས་སུ་དག་པར་གྱུར་ཏོ། །ཀླུ་གཞན་སྟོང་ཕྲག་ལྔ་བཅུ་རྩ་གསུམ་གྱི་མིག་ཀྱང་ཡོངས་སུ་དག་པར་གྱུར་ཏོ། །གཞན་གནོད་སྦྱིན་དང ། གྲུལ་བུམ་དང ། ཡི་དྭགས་དང ། ཤ་ཟ་དང ། མི་ཁྲག་ཁྲིག་ཕྲག་བརྒྱད་
360a
༄#། །ཅུ་རྩ་བཞི་ནི། སྔོན་གྱི་ལས་ཀྱི་སྒྲིབ་པ་ཟད་ཅིང་མིག་ཡོངས་སུ་དག་པར་གྱུར་ཏོ། །དེ་ནས་ལྷའི་བུ་མཚམས་བཟང་ཐལ་མོ་རབ་ཏུ་སྦྱར་བ་བྱས་ནས་སྨྲས་པ། འཇིག་རྟེན་འདྲེན་པ་རྣམས་ཀྱི་སྟོབས་ལ་ལྟོས། །རབ་ཏུ་ལམ་མེད་རྣམས་ལ་མིག་ཀྱང་བྱིན། །གལ་ཏེ་སྟོན་པ་འཇིག་རྟེན་མི་འབྱུང་ན། །སུ་ཡང་འགྲོ་བར་ཤའི་མིག་ཕྱིས་མི་འཐོབ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ། ཁྱོད་ཀྱིས་གསང་སྔགས་ཆེན་པོའི་གཞིའི་གཟུངས་སྔགས་མིག་སྒྲུབ་པ་འདི་ཟུངས་ཤིག་།ད་ལྟར་དང་མ་འོངས་པའི་དུས་ན་སུ་ལ་ལ་སེམས་ཅན་རྣམས་ཀྱི་སྔོན་གྱི་ལས་ཀྱི་ལྷག་མ་དང ། ཁམས་ཀུན་ཏུ་འཁྲུགས་པ་དང ། གསང་སྔགས་དང ། སྨན་དང ། དུག་གི་སྦྱོར་བས་ལོང་བར་འགྱུར་བ་དང ། ཅུང་ཟད་མཐོང་བར་ཡང་འགྱུར་བ་དེས་མིག་སྒྲུབ་པའི་གཟུངས་འདི་རང་གིས་བཀླག་པར་བྱའོ། །རང་གི་ལས་སོ་སོར་བཤགས་པར་བྱའོ། །དེས་སེམས་ཅན་ཐམས་ཅད་ལ་བྱམས་པའི་སེམས་ཀྱིས་སངས་རྒྱས་རྗེས་སུ་དྲན་པ་བསྒོམ་ཞིང་ལས་གཞན་མི་བྱེད་པར་ཞག་བདུན་ཕྲག་བདུན་དུ་རང་གི་མིག་ལ་བྱ་བས་ན་མིག་ཡོངས་སུ་དག་པར་འགྱུར་རོ། །ཡང་སེམས་ཅན་གང་དག་མཚམས་མེད་པའི་ལས་ལྷག་མ་ལུས་པས་ལོང་བར་གྱུར་ཅིང་དམ་པའི་ཆོས་སྤོང་བའི་ལྷག་མ་ལུས་པ་དང ། འཕགས་པ་ལ་སྐུར་པ་འདེབས་པའི་ལྷག་མ་ལུས་པ་དང །
360b
ཆོས་ཀྱི་སྦྱིན་པའི་སྒྲིབ་པའི་ལྷག་མ་ལུས་པ་དང ། གླེགས་བམ་དུ་བྲིས་པ་རྣམ་པར་འཇིག་པའི་ལྷག་མ་ལུས་པ་དང ། གཞན་གྱི་མིག་རྣམ་པར་འཇིག་པའི་ལས་ཀྱི་ལྷག་མས་ལོང་བར་གྱུར་པ་དེ་དག་གིས་གཟུངས་སྔགས་འདི་ཡི་གེ་འབྲིར་བཅུག་སྟེ། ཡང་དང་ཡང་དུ་ཀློག་ཏུ་གཞུག་གོ་།ལས་ཀྱི་སྒྲིབ་པ་བཤགས་པར་བྱའོ། །གཞན་ཡང་རྒྱ་མཚོའི་སྦུ་བ་དང ། ཤིང་མངར་དང ། སྨན་ཀ་ཙ་དང ། འབྲས་བུ་གསུམ་དང ། རུས་སྦལ་གྱི་སྙིང་རྙིང་བ་སྦྲང་རྩི་དང་ལྷན་ཅིག་བཏགས་ཅིང་བཙོས་ལ་གསང་སྔགས་འདི་དག་ལན་སྟོང་རྩ་བརྒྱད་མངོན་པར་བརྗོད་ཅིང་མིག་གི་ཕྱི་རོལ་ཏུ་བསྐུ་བར་བྱའོ། །ཞག་བདུན་ཕྲག་བདུན་དུ་ལས་གཞན་མི་བྱེད་པར་སངས་རྒྱས་རྗེས་སུ་དྲན་པ་སྒོམ་ཞིང་སངས་རྒྱས་ཀྱི་སྐུ་གཟུགས་ཀྱང་བྱས་ན་དེའི་ལས་ཀྱི་སྒྲིབ་པ་མ་ལུས་པར་བྱང་བར་འགྱུར་ཞིང་དེའི་མིག་ཡོངས་སུ་དག་པར་འགྱུར་རོ། །གཞན་ཡང་དགེ་སློང་རྣམས་ཀྱི་གནས་དགེ་འདུན་གྱི་ཀུན་དགའ་ར་བ་བྱས་ནའང་དེའི་ལས་ཀྱི་སྒྲིབ་པ་བྱང་བར་འགྱུར་རོ། །ཕྱིས་ཀྱང་འཁོར་བར་མིག་མ་ཚང་བར་མི་འགྱུར་རོ། །དེ་ནས་ཐམས་ཅད་དང་ལྡན་པའི་ཀླུའི་འཁོར་དེས་འདི་སྐད་ཅེས་གསོལ་ཏོ། །ཐུགས་རྗེ་ཆེན་པོ་དང་ལྡན་པ། དུས་གསུམ་གྱི་སེམས་ཅན་ཐམས་ཅད་ལ་ཕན་པར་མཛད་པ། ནད་ལས་རབ་ཏུ་ཐར་པར་མཛད་པ་ལ་ཕྱག་འཚལ་ལོ། །དེ་ནས་དེའི་ཚེ་ཀླུ་ཚོན་རྩི་སྔོན་པོས་གསང་བསྟོད་དེ་འདི་སྐད་ཅེས་གསོལ་ཏོ། །སྡིག་པ་ཐམས་ཅད་སྦྱོང་བ་ཁྱོད། །ཁྱོད་ནི་དཀའ་མཛད་དཔལ་ཀུན་ལྡན། །ཁྱོད་ཀྱིས་
361a
༄#། །ལས་ཀྱང་རབ་ཏུ་མཁྱེན། །སྲོག་ཆགས་ཀུན་གྱི་རྒྱལ་པོ་ཁྱོད། །བདག་ནི་ཆུ་དང་རྣམ་བྲལ་ཞིང ། །ཚ་བའི་ཀླུང་གིས་ཀུན་གདུངས་པའི། །འབྲོག་དགོན་པ་ན་གནས་པ་ལགས།། དྲི་མི་ཞིམ་པའི་གནས་ན་གནས། །ལོ་ནི་བྱེ་བ་ཕྲག་སྟོང་དུ། །ཞག་གཅིག་བདག་ལ་བདེ་མ་མཆིས། །རྟག་པར་འཁོར་དང་ལྷན་ཅིག་ཏུ། །བདག་ནི་གཞན་གྱིས་བཟའ་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་གང་དག་སྡིག་བྱས་ནས། །ཕྱིས་ཀྱང་བདག་ཉིད་བསོད་ནམས་སྒྲུབ། །ལུས་ཀྱིས་གཎྜི་བརྡུངས་ནས་སུ། །དགེ་སློང་དགེ་འདུན་ཚིམ་བྱེད་ནའང ། །ལས་ཀྱི་ལྷག་མ་དེ་ཡིས་སུ། །གང་དང་གང་དུ་སྐྱེས་པ་ན། །སྡུག་བསྔལ་ཅི་འདྲ་འབྱུང་འགྱུར་ཞིང ། །བཟའ་བཏུང་དག་དང་ཡང་དག་ལྡན། །ཡང་ན་ཀླུ་ཡི་སྐྱེ་གནས་སུ། །ལས་ཀྱིས་སྐྱེ་བར་འགྱུར་བ་ཡིན། །དེ་ཡི་མགོ་ཡི་ཀླད་པ་དེར། །ནོར་བུའི་རྒྱལ་པོ་འབྱུང་བར་འགྱུར། །ཀུན་ཏུ་ཆུ་འབྱུང་ཞེས་བྱ་བ། །ཆུ་སྦྱིན་བྱེད་པའི་ཀླུར་འགྱུར་རོ། །གང་ན་ཀླུ་ནི་གནས་བྱེད་པ། །དེ་ནས་ཆུ་ནི་འབབ་པར་འགྱུར། །ས་འམ་ནམ་མཁའ་ལ་ཡང་རུང ། །གང་དང་གང་དུ་འགྲོ་བ་དེར། །སེམས་ནི་བསྐྱེད་མ་ཐག་ཏུ་ཡང ། །ཆུ་ནི་འབྱུང་བར་འགྱུར་བ་ཡིན། །ཡང་ན་སེམས་ཅན་གང་དག་གིས། །མི་ཡི་དངོས་པོ་ཐོབ་ནས་སུ། །སྡིག་པ་རྣམ་པ་སྣ་ཚོགས་བྱས། །དགེ་འདུན་རིམ་གྲོ་མི་བྱེད་ན། །དེ་དག་སྡུག་བསྔལ་སྣ་ཚོགས་ནི། །ངན་སོང་གསུམ་དུ་མྱོང་ནས་ཀྱང ། །དེ་ཉིད་ཀླུ་ཡི་སྐྱེ་གནས་སུ། །
361b
སྐྱེ་བ་ཐོབ་པར་འགྱུར་བ་ཡིན། །དེ་ལས་ཀུན་ཏུ་ཆུ་མི་འབྱུང ། །མགོ་ལ་ནོར་བུ་རིན་ཆེན་མེད། །སྟོང་པ་སྐོམ་པའི་གནས་དག་ཏུ། །ཆུ་མེད་པར་ནི་གནས་པར་འགྱུར། །སྔོན་འདས་དུས་ན་ཁྱོད་ཀྱིས་ནི།། རྒྱལ་བ་སྐར་རྒྱལ་བསྟན་པ་ལ། །དགེ་སློང་དགོན་པ་བར་གྱུར་ཏེ། །ཕྲག་དོག་སེར་སྣས་གང་བ་ཡིན། །དགེ་སློང་གློ་བུར་འོངས་མཐོང་ནས། །ཁྲོ་གཉེར་ཅན་གྱི་བཞིན་བྱས་ནས། །དེ་དག་ལ་ནི་སྦྱིན་གཏོང་བྱེད། །དེ་ལ་ཡང་ནི་མངོན་སུམ་གཤེ་།དེར་ནི་གང་དག་ཆུར་ཡང་ནི། །མྱུར་དུ་མི་གཙང་བ་ཡིས་བཀང ། །འཆགས་གནས་ཁང་དག་གི་གནས། །དྲི་ང་བ་ཡིས་བཀང་བར་གྱུར། །དགེ་སློང་དེས་པ་འགྲོ་བ་ན། །བརྒྱད་བཀག་གིས་ནི་གཤེ་བར་གྱུར། །དགེ་སློང་དེས་པ་གཞན་དག་ཀྱང ། །རྒྱང་རིང་བར་ནི་ཡོངས་སུ་སྤངས། །དེ་ཕྱིར་ཕྲག་དོག་སེར་སྣའི་རྒྱུ། །མཆོད་པར་ནི་ཁྱོད་གྱུར་ནས། །དགེ་སྦྱོང་སུ་ཞིག་ལ་ལ་མཐོང ། །མྱུར་དུ་ཁྲོས་ནས་གཤེ་བར་འགྱུར། །སྦྱིན་པ་པོ་ལ་ཁྲོ་བས་གཤེ་།ངོ་ཚ་ཁྲེལ་ཡོང་རྣམ་པར་སྤངས། །ལས་ཀྱི་རྣམ་པར་སྨིན་པ་དེས། །སེམས་ཅན་དམྱལ་བར་སོ་སོར་སྐྱེས། །ལུས་ནི་བྱེ་བས་སེམས་དམྱལ་དུ། །སྡུག་བསྔལ་མང་པོ་ཉམས་སུ་མྱོང ། །ཡི་དྭགས་རྣམས་སུ་དུས་རིང་པོར། །སྡུག་བསྔལ་རབ་ཏུ་མི་བཟད་མྱོང ། །ཁྱོད་ནི་ཀླུ་ཡི་སྐྱེ་གནས་སུ། །སྐྱེས་ནས་ཤིན་ཏུ་སྡུག་བསྔལ་གྱུར། །སྟོང་པ་འབྲོག་དགོན་རྫོང་རྣམས་སུ། །ཆུ་དང་བྲལ་བར་གནས་པ་ཡིན། །སེམས་ཅན་དམྱལ་བ་རྣམས་སུ་ཁྱོད། །སྡུག་བསྔལ་ཚོར་བ་ཕྱི་
362a
༄#། །ཕྱིར་མྱོང ། །ཤིན་ཏུ་ཡུན་རིང་ཡི་དྭགས་དང ། །དུད་འགྲོར་སྡུག་བསྔལ་ཚོར་བ་མྱོང ། །སུ་ཞིག་ཐ་མའི་དུས་ཚེ་གནོད་སེམས་བྱུང ། །རྟག་ཏུ་ཕྲག་དོག་སེར་སྣ་ཁྲོས་པ་ལ། །བསམ་གཏན་མི་སྐྱོབ་སངས་རྒྱས་མཆོད་པ་མིན། །ཚུལ་ཁྲིམས་མི་སྐྱོབ་དགོན་པར་གནས་པ་མིན། །ཡང་དེའི་ཚེ་ཀླུའི་འཁོར་དེའི་ནང་ན་ཀླུ་ཡི་དྭགས་ལྟ་བུ་བྱེ་བ་ཕྲག་ཉི་ཤུ་རྩ་དྲུག་སྔོ་ན་གྱི་ཚེ་རབས་རྗེས་སུ་དྲན་པར་གྱུར་ཏེ། སྐད་པོ་ཆེར་རབ་ཏུ་དུ་ཞིང་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ཡོངས་སུ་བསྐྱབ་ཏུ་གསོལ། བདེ་བར་གཤེགས་པ། བདག་ཅག་ཡོངས་སུ་བསྐྱབ་ཏུ་གསོལ། སྔོན་གྱི་རྒྱལ་བའི་བསྟན་པ་ལ་བདག་ཅག་གིས་འདྲ་མཚུངས་པར་ལས་ཀྱི་སྒྲིབ་པ་དེ་ལྟ་བུ་འཕངས་ལགས་སོ། །དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་མྱོང་ལགས་སོ། །དེ་ལྟར་ཡང་ཀླུ་ཡི་དྭགས་ལྟ་བུ་རྣམས་ཀྱི་ནང་དུ་རྟག་ཏུ་སྡུག་བསྔལ་དེ་ལྟ་བུས་གཟིར་ལགས་ཏེ། དཔེར་ན། ཀླུ་ཡི་དྭགས་ལྟ་བུ་ཚོན་རྩི་སྔོན་པོ་བཞིན་ནོ། ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ཆུ་ལོངས་ལ་དེ་བཞིན་གཤེགས་པའི་ཞབས་ཀྱི་དྲུང་དུ་ཆག་ཆག་ཐོབ་ཅིག་དང ། དེས་ནི། ཁྱེད་ཀྱི་སྡུག་བསྔལ་ཐམས་ཅད་ཡོངས་སུ་ཟད་པར་འགྱུར་རོ། །དེ་ནས་ཀླུ་ཡི་དྭགས་ལྟ་བུ་དེ་དག་ཐམས་ཅད་ཀྱིས་ལག་པ་གཉིས་ཀྱིས་ཆུ་བླངས་པ་དང ། ལག་ན་ཆུ་འདུག་པ་དེ་རབ་ཏུ་འབར་རོ། །དེ་ནས་མེའི་
362b
ཕུང་པོ་ཤིང་ཏ་ལ་དྲུག་སྲིད་དུ་འཕགས་ཏེ་ལན་བདུན་གྱི་བར་དུ་དེ་བཞིན་ནོ། ཀླུའི་ཚོགས་དེ་མཆོག་ཏུ་ཡིད་མི་དགའ་ནས་མཆི་མ་དག་ཕྱུང་ངོ ། ཐམས་ཅད་དང་ལྡན་པའི་འཁོར་དེའང་ཡིད་ཀུན་ཏུ་མི་དགའ་ནས་དེ་བཞིན་ནོ། བཅོམ་ལྡན་འདས་ཀྱིས་བཀའ་སྩལ་པ། ཅི་འདྲ་བ་ཡི་ལས་བྱས་པ། །དེ་འདྲ་བ་ཡི་འབྲས་བུ་འཐོབ། །དགེ་བ་ཡིན་ན་བཟང་པོ་སྟེ། །སྡིག་པ་བྱེད་པའང་སྡིག་ཏོ་འོ། །དེ་ནས་ཡི་དྭགས་ལྟ་བུའི་ཀླུ། ཁྱེད་ཀུན་འདི་སྐད་ཚིག་སྨྲོས་ཤིག་།བདེན་པ་གང་གིས་སྟོན་པ་ནི། །སེམས་ཅན་ཀུན་ལ་ཐུགས་སྙོམས་པ། །བདེན་པའི་ཚིག་དེ་ཁོ་ན་ཡིས། །ངེད་ཀྱི་ཆུ་ནི་མ་འབར་ཅིག་།ཀླུ་ཐམས་ཅད་ཀྱིས་འདི་སྐད་ཅེས་སྨྲས་སོ། །ལན་བརྒྱད་པ་ལ་ལག་པ་གཉིས་ཀྱིས་ཆུ་བླངས་ཏེ་བཅོམ་ལྡན་འདས་ཀྱི་ཞབས་གཉིས་ལ་གཏོར་ནས་ཉེས་པ་ལ་ཉེས་པ་སོ་སོར་བཤགས་སོ། །བཅོམ་ལྡན་འདས་ཀྱིས་བཀའ་སྩལ་པ། །སྡིག་པའི་ལས་ཀྱི་སྒྲིབ་པ་ཡི། །ལྷག་མ་ལུས་པ་ཡོངས་སུ་ཟད། །བྱམས་པའི་ཚེ་ན་ཁྱེད་ཅག་ནི། །མི་ཡི་སྲིད་པ་ཐོབ་པར་འགྱུར། ། བྱམས་པ་ཡི་ནི་བསྟན་པ་ལ། །མྱུར་དུ་རབ་ཏུ་འབྱུང་བ་ཐོབ། །རྣལ་འབྱོར་ལ་ནི་མངོན་བརྩོན་དང ། །མྱུར་དུ་དགྲ་བཅོམ་ཐོབ་པར་འགྱུར། །ཡང་དེའི་ཚེ་བཅོམ་ལྡན་འདས་ཀྱི་མཐུས་ཀླུའི་ཚོགས་དེ་ཇི་ལྟར་ལྷགས་པ་བཞིན་དེ་དག་ཐམས་ཅད་ཀྱིས་སྔོན་གྱི་ཚེ་རབས་དང ། བདག་གི་ལས་དང ། འགྲོ་བ་དང ། སྐྱེ་བ་རྗེས་སུ་དྲན་ཏེ། འཁོར་དེའི་ནང་ནས་ཀླུ་བརྒྱ་སྟོང་ཕྲག་
363a
༄#། །མང་པོ་རང་གིས་ཉེས་པར་བྱས་པའི་སྡིག་པའི་ལས་ཀྱིས་རབ་ཏུ་དུས་ནས་ཁ་ཅིག་གིས་འདི་སྐད་ཅེས་གསོལ་ཏོ། །སྔོན་གྱི་དེ་བཞིན་གཤེགས་པ་རྣམས་ཀྱི་བསྟན་པ་ལ་བདག་ཁྱིམ་ན་གནས་པར་གྱུར་ཏེ། ཉེ་དུ་དང་འགྲོགས་པའི་རྐྱེན་དང ། །ཆོས་མཉན་པའི་རྐྱེན་གྱིས་དགེ་སློང་རྣམས་དང་ལྷན་ཅིག་ཏུ་དགེ་འདུན་གྱི་མངོན་དུ་གྱུར་པ་བསྔོས་པའི་མེ་ཏོག་དང ། འབྲས་བུ་དང ། ཁུ་བ་དང ། བཟའ་བ་དང ། བཏུང་བ་ལོངས་སྤྱད་ལགས་སོ། །ཞེས་བྱ་བ་ནས་ཁ་ཅིག་གིས་གསོལ་པ། བདག་ཅག་གིས་ཕྱོགས་བཞི་པ་ལ་བསྔོས་པ་ལོངས་སྤྱད་ལགས་སོ། །ཞེས་བྱ་བའི་བར་དུའོ། །ཁ་ཅིག་གིས་འདི་སྐད་ཅེས་གསོལ་ཏོ། །བདག་གིས་རང་གིས་བསྔོས་པ་ལོངས་སྤྱད་ལགས་སོ། །ཞེས་བྱ་བའི་བར་དུའོ། ཁ་ཅིག་གིས་གསོལ་པ།་བདག་ཅག་དེ་བཞིན་གཤེགས་པ་རྣམ་པར་གཟིགས་ཀྱི་ཞེས་བྱ་བའི་བར་དང ། བདག་ཅག་གཙུག་ཏོར་ཅན་གྱི་ཞེས་བྱ་བའི་བར་དང ། བདག་ཅག་འཁྲོ་བ་འཇིག་གི་ཞེས་བྱ་བའི་བར་དང ། བདག་ཅག་གསེར་ཐུབ་ཀྱི་ཞེས་བྱ་བའི་བར་དུའོ། །གླུ་ཁ་ཅིག་གིས་འདི་སྐད་ཅེས་གསོལ་ཏོ། །དེ་བཞིན་གཤེགས་པ་འོད་སྲུང་གི་བསྟན་པ་ལ་བདག་ཅག་ཁྱིམ་ན་གནས་པར་གྱུར་ཏེ། ཉེ་དུ་དགང་འགྲོགས་པའི་རྐྱེན་དང ། །ཆོས་མཉན་པའི་རྐྱེན་གྱིས་དེ་བཞིན་དུ་བསྔོས་པའི་དགེ་འདུན་གྱི་མེ་ཏོག་དང ། འབྲས་བུ་དང ། ཁུ་བ་དང ། བཟའ་བ་དང ། བཏུང་བ་
363b
དགེ་སློང་རྣམས་ལ་སྩལ་བ་དེ་བདག་ཅག་གིས་ལོངས་སྤྱད་ལགས་སོ། །སྡིག་པའི་ལས་དེས་ཀྱང་སེམས་ཅན་དམྱལ་བ་རྣམས་ཀྱི་ནང་དུ་སྡུག་བསྔལ་མི་བཟད་པ་ཆེན་པོ་རྣམ་པ་སྣ་ཚོགས་རབ་ཏུ་མི་བཟད་པ་མང་པོ་ཡང་དང་ཡང་ཉམས་སུ་མྱོང་ལགས་སོ། །དུད་འགྲོ་དང་ཡི་དྭགས་རྣམས་ཀྱི་ནང་དུ་དུས་ཡུན་རིང་པོར་རྟག་ཏུ་སྡུག་བསྔལ་གྱིས་གཟིར་ལགས་སོ། །ལས་ཀྱི་ལྷག་མ་དེས་བདག་ཅག་ཀླུའི་སྐྱེ་གནས་དམན་པ་འདིར་སྐྱེས་ནས་ཆབ་བསྐོལ་བ་ཀུན་ཏུ་ཚ་བའི་ནང་དུ་བཙོས་ལགས་སོ། །བྱེ་མ་ཀུན་ཏུ་ཚ་བའི་ནང་དུ་བསྲེགས་ལགས་སོ། །བདག་ཅག་གི་ཁའི་སྒོར་ཁ་ཟས་སྩལ་བའང་ལྕགས་ཀྱི་ཐུ་ལུམ་དུ་གྱུར་ལགས་སོ། །དེ་བཞིན་དུ་ཁར་བཏུང་བསྩལ་བའང་ལྕགས་དང་ཟངས་སུ་གྱུར་ལགས་སོ། །གང་དང་གང་དུ་མཆིས་པ་ཐམས་ཅད་དུ་སྡུག་བསྔལ་གྱི་ཚོར་བ་དེ་ལྟ་བུ་མྱོང་ལགས་ན། བདག་ཅག་ཡོངས་སུ་བསྐྱབ་ཏུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལྷག་འགྲོ་དག། ཁྱེད་ཀྱིས་དགེ་འདུན་གྱི་ལོངས་སྤྱོད་པ་དེ་ནི། འོས་པ་མ་ཡིན་ཏེ། མཚམས་མེད་པ་དང་ཉེ་བ་ཡིན་ནོ། །རྣམ་པར་མ་སྨིན་པར་གང་གིས་ཀྱང་མྱུར་དུ་བཤགས་པར་མི་ནུས་སོ། །ཀྱེ་ལག་འགྲོ་དག་།དེ་ལྟ་ཡིན་ཡང་ཇི་སྲིད་འཚེའི་བར་དུ་སྐྱབས་སུ་འགྲོ་བ་ལ་འཁོད་ཅིག་དང ། དེ་ལྟ་ན་ཁྱེད་ལ་ཕན་པ་དང ། བདེ་བར་འགྱུར་རོ། །རྒྱུ་དེས་དེ་བཞིན་གཤེགས་པས་ཁྱེད་འདོད་པ་བཞིན་འཁོར་བར་གཞོག་པར་མཛད་དོ། །དེ་དག་ཐམས་ཅད་གསུམ་ལ་སྐྱབས་སུ་
364a
༄#། །འགྲོ་བ་ལའང་བཀོད་པར་གྱུར་ཏོ། །ཡང་འཁོར་དེའི་ནང་ན་ཀླུ་མོ་ལོང་མ་ཞིག་ཡོད་དོ། །དེའི་ཁ་སྲིན་བུས་གང་ཞིང་གཅིན་རུལ་བལྟ་བུའི་རང་དྲིང་བ་ཟག་གོ། སྨད་ཀྱི་མཚན་མ་ལའང་དེ་བཞིན་ནོ། །དེའི་ལུས་ཐམས་ཅད་རུལ་ཅིང་རང་འཛག་པ་ཕོལ་མིག་དང་སྲིན་བུས་གང་བ་ལ་ཤ་སྦྲན་དང ། །སྦྲང་བུ་མ་ཆུ་རིང་དང ། སྦྲང་བུ་གདུག་པ་རྣམས་ཀྱིས་ཟ་བར་བྱེད་དོ། །དེའི་ཚེ་བཅོམ་ལྡན་འདས་ཀྱིས་ཐུགས་རྗེ་ཆེན་པོས་གཟིགས་ཏེ་བཀའ་སྩལ་པ། སྲིང་མོ། ཁྱོད་ཀྱིས་ལུས་ལ་སྡིག་པའི་ལས་ནི། ཅི་བྱས། །ཇི་ལྟ་བུ་ཞིག་།དེས་གསོལ་པ། བཙུན་པ་བཅོམ་ལྡན་འདས། བདག་གི་ཚོར་བསྡུག་བསྔལ་ལགས་སོ། །བཙུན་པ་བཅོམ་ལྡན་འདས། བདག་གི་ཚོར་བ་ཚ་བ་ལགས་ཏེ། །གང་ནས་ཀླུའི་སྐྱེ་གནས་དམན་པ་འདིར་སྐྱེས་པའི་དགུང་ལོ་སྟོང་ཕྲག་སུམ་ཅུ་རྩ་དྲུག་བདག་གིས་མངོན་པར་འཚལ་ལགས་སོ། །བདག་གིས་སྡུག་བསྔལ་གྱི་ཚོར་བ་དེ་ལྟ་བུ་ནི། གདུགས་ཞག་གཅིག་ཀྱང་རྒྱུ་ནམ་ཆད་ལགས་སོའི། །བཀའ་སྩལ་པ། སྔོན་གྱི་ལས་ཅི་ཞིག་བྱས། །དེས་གསོལ་པ། འདི་ནས་བསྐལ་པ་དགུ་བཅུ་རྩ་གཅིག་པ་ལ་རྒྱལ་བ་རྣམ་པར་གཟིགས་ཀྱི་བསྟན་པ་ལ་མིའི་རྒྱུད་ཀྱི་བུད་མེད་དུ་གྱུར་ལགས་ཏེ། བདག་དེར་འདོད་པའི་དྲེགས་པས་མྱོས་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་བ་དང་ལྷན་ཅིག་ཏུ་དགེ་འདུན་གྱི་གཙུག་ལག་ཁང་ན་དགེ་འདུན་གྱི་མལ་ཆའི་སྟེང་དུ་ཡང་དང་ཡང་
364b
འཁྲིག་པ་དང་ལྡན་པའི་ཆོས་འདོད་པ་དག་སོ་སོ་ཡང་དག་པར་མྱོང་ལགས་ཏེ། ནོར་གྱི་སླད་དུ་མ་སྐྲག་ལགས་སོ། །བཅོམ་ལྡན་འདས། དེ་ཚུན་ཆད་བདག་རྟག་ཏུ་ལྷ་དང་མིའི་རྙེད་པ་དང་བྲལ་ལགས་སོ། །རྟག་ཏུ་ངན་སོང་གསུམ་གྱི་ཚོར་བ་མི་བཟད་པས་རབ་ཏུ་གཟིར་ལགས་སོ། །བཀའ་སྩལ་པ། སྲིང་མོ། གང་གི་ཚེ་འདིར་བསྐལ་པ་ཆེན་པོ་འཇིག་པར་གྱུར་བ་དེའི་ཚེ་ཁྱོད་གང་དུ་སོང་།དེས་གསོལ་པ། སྔོན་གྱི་ལས་ལ་བརྟེན་པའི་རླུང་ཆེན་པོ་དེ་དག་གིས་འཕངས་ནས་འཇིག་རྟེན་གྱི་ཁམས་སྙིགས་མ་ལྔ་དང་ལྡན་པ་གཞན་དག་ཏུ་འཕངས་ལགས་སོ། །ཡང་གང་གི་ཚེ་དེར་འཇིག་པར་གྱུར་ནས་དེ་ནས་ཡང་འདིར་འཕངས་ལགས་ན། བཅོམ་ལྡན་འདས། ཐུགས་རྗེ་ཆེན་པོས་བདག་ཡོངས་སུ་བསྐྱབ་ཏུ་གསོལ། བདེ་བར་གཤེགས་པ། བདག་ཡོངས་སུ་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱི་ཕྱག་གཉིས་ཀས་རྨ་རྩི་སྤོས་དང་སྦྱར་བའི་ཆུ་བ་ཞེས་ཏེ་བདེན་བརྗོད་པར་མཛད་དེ། །བདེན་པ་གང་གིས་སྔོན་ཐི་བའི་ཕྱིར་ངའི་ལུས་ཆགས་པ་མེད་པར་ཡོངས་སུ་བཏང་བའི་བདེན་པ་དེས་ཁྱོད་ཀྱི་ནད་དེ་དག་ཞི་བར་གྱུར་ཅིག། ཀླུ་མོ་དེའི་ཁར་བླུགས་ཤིང་ལུས་ལ་གཏོར་བས་ནད་ཐམས་ཅད་རབ་ཏུ་ཞི་བར་གྱུར་ཏེ། གསུམ་ལ་སྐྱབས་སུ་ཉེ་བར་གནས་པར་གྱུར་ཏོ། །ཡང་དེ་ཉིད་ན་ཀླུ་གཞན་ཞིག་ལུས་དྲི་ང་ཞིང་སྲིན་བུས་གང་ལ་སྲིན་བུས་སེར་སྐྱབས་གང་ནས་དེ་ལས་རང་ཁྲག་ཚ་ཞིང་གོར་གོར་པོ་ཟག་པ། སྨྲ་མི་ནུས་པ། མཆོག་ཏུ་སྐྱོན་དུ་བགྲང་བ་ཞིག་ཡོད་དོ། །
365a
༄#། །བཅོམ་ལྡན་འདས་ཀྱིས་ཀླུ་དེ་གཟིགས་ནས་བཀའ་སྩལ་པ། །ལག་འགྲོ་།ཁྱོད་ཀྱིས་སྔོན་མི་དགེ་བའི་ལས་ཅི་ཞིག་བྱས། ཀླུ་དེས་ཁའི་སྒོ་ཕྱེ་ནས་སྲིན་བུའི་རིགས་དང ། རྣག་ཁྲག་དང ། མས་གང་བའི་ཁའི་སྒོ་སྤྱང་བྲིམས་ཏེ་སྨྲ་མ་ནུས་སོ། །དེ་ནས་བཅོམ་ལྡན་འདས་ཀྱིས་སྐྱོར་ཆུ་ཞིག་བཞེས་ཏེ་བཀའ་སྩལ་པ། རི་བོང་གྱུར་ཏེ་དྲང་སྲོང་ཕྱིར། །རང་གིས་མེ་ཡི་ནང་བོར་བ། །བདེན་པའི་ཚིག་དེ་ཁོ་ན་ཡིས། །ཀླུ་ནི་སྨྲ་བར་ནུས་པར་ཤོག་།སྐྱོར་ཆུ་དེ་ཀླུའི་ཁར་བླུགས་ནས་དེའི་ཁའི་ནང་དུ་མེ་རབ་ཏུ་ཞི་ཞིང་སྲིན་བུ་དང་རང་ཁྲག་ཁའི་ཕྱི་རོལ་དུ་བྱུང་ངོ ། །ཀླུ་དེ་ཁ་ཡོངས་སུ་དག་པར་གྱུར་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། རྒྱལ་བ་འདོ་སྲུང་གི་བསྟན་པ་ལ་བདག་ཞིང་པར་གྱུར་ལགས་སོ། །བདག་གིས་བཅོམ་ལྡན་འདས་ཀྱི་ཉན་ཐོས་གཞན་ཞིག་ལ་སྐྱེད་དུ་སྩོལ་ཅིག་དང ། །སྟོན་གྱི་དུས་སུ་ཁྱོད་ལ་འབུལ་ལོ། །ཞེས་གསེར་ལྔ་བཅུ་ཞིག་གསོལ་བ་བཏབ་པ་ལགས་སོ། །དེས་བདག་ལ་འགྲོན་བུ་བརྒྱད་ཅུའི་རིན་བཅུ་ཞིག་སྩལ་ཏེ། ལྔ་བཅུར་མ་སྩལ་ལགས་སོ། །བདག་གིས་དགེ་སློང་དེ་ལ་ཁྲོ་བས་ཟིལ་གྱིས་ནོན་ནས་འགྲོན་བུ་བརྒྱད་ཅུའི་རིན་བཅུ་བླངས་ཏེ། དེ་ལ་སླར་ཡང་མ་སྩལ་ལགས་སོ། །གཞན་ཡང་དུས་གཞན་ཞིག་ན་དགེ་སློང་རྣམས་ཀྱི་ཀུན་དགའ་བ་དེར་བདག་མཆིས་ནས་དེར་དགེ་འདུན་གྱི་མངོན་དུ་གྱུར་པ་བསྔོས་པ་ཨ་མྲའི་འབྲས་བུ་བཅུ་གསུམ་པ་ལོངས་སྤྱད་ལགས་
365b
སོ། །སུག་ལས་ཀྱི་སྒྲིབ་པའི་ལྷག་མ་དེ་ཁོ་ནས་དེ་ནས་ཤི་འཕོས་ནས་འབྲོག་དགོན་པ་སྐམ་པོ་འདིར་ཉེ་ཚེ་བའི་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་ཏེ་རྟག་ཏུ་བདག་གི་ལུས་སྲིན་བུ་དག་དང་རང་ཁྲག་བསྡུས་པས་གང་ལགས་སོ། །བཀྲེས་པ་དང་སྐོམ་པས་ཀུན་ཏུ་བཟིར་ནས་སྡུག་བསྔལ་གྱི་ཚོར་བ་མྱོང་ལགས་སོ། །ཡང་མི་དགེ་བའི་ལས་ཀྱི་རྒྱུ་དེས་བདག་འདི་ནས་ཤི་འཕོས་ནས་ཡང་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེས་ལགས་སོ། །དགེ་སློང་དེའང་ཁྲོ་བ་དང་སེར་སྣའི་རྒྱུ་དེས་འཆི་བའི་དུས་བགྱིས་ནས་འདིར་ཀླུ་རྣམས་ཀྱི་ནང་དུ་བདག་གི་མཆན་ཁུང་དུ་སྐྱེས་ཏེ།་དུས་རྟག་ཏུ་བདག་ལ་གཡོ་བར་བགྱིད་དོ། །དེ་རྟག་ཏུ་ཁྲོ་བས་ཟིལ་གྱིས་ནོན་ནས་དབུགས་ཚབས་བདག་གིས་ལུས་ལ་ཡོངས་སུ་གང་བར་བགྱིད་དོ། །རྒྱུ་དེས་རྟག་པར་རྒྱུན་དུ་བདག་གི་ལུས་སྲིན་བུ་དག་དང་རང་ཁྲག་གིས་གང་ལགས་ན། དེ་བཞིན་གཤེགས་པས་བདག་ཡོངས་སུ་བསྐྱབ་ཏུ་གསོལ། སྤྲུལ་དགྲ་དང་འདྲ་བ་དེ་ལས་བདག་ཡོངས་སུ་ཐར་པར་མཛད་པར་གསོལ། དེ་ནས་ཡང་བཅོམ་ལྡན་འདས་ཀྱིས་ཕྱག་ཏུ་ཆབ་བཞེས་ཏེ་འདི་སྐད་ཅེས་བཀའ་སྩལ་ཏོ། །མུ་གེ་དག་ནི་བྱུང་བའི་ཚེ། །ང་ནི་འདིར་ཡང་ཉར་གྱུར་ཏེ། །ཤ་དང་ཁྲག་གིས་ཚིམ་བྱས་པས། །ཁྱེད་ཅག་གཉིས་ཀ་བདེ་བར་ཤོག་།ཆུ་དེས་ཀླུ་ལ་གཏོར་ནས་དེའི་མཆན་ཁུང་ནས་ཀླུའི་བུ་བྱུང་ངོ ། །གཉིགས་འདི་སྐད་ཅེས་གསོལ་ཏོ། །ཡུན་ཇི་ཙམ་གྱིས་ངན་སོང་དག་ལས་བདག་ཅག་
366a
༄#། །ཐར་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ་དང ། གང་ཕྱོགས་བཞིའི་དགེ་འདུན་ནས་དགེ་འདུན་གྱི་མངོན་དུ་གྱུར་པ་བསྔོས་པའི་མེ་ཏོག་དང ། འབྲས་བུ་དང ། འདབ་མ་དང ། བཟའ་བ་དང ། བཏུང་བ་དང ། མལ་ཆ་དང ། རྩི་དང ། ཡོ་བྱད་ཀྱང་རུང ། དགེ་འདུན་ལས་གལ་ཏེ་བདག་གིར་ལོངས་སྤྱད་དམ། གཞན་ལ་བྱིན་ན་སྡིག་པའི་ལས་དེ་རྣམ་པར་སྨིན་ཅིང་སོ་སོ་ཡང་དག་པར་མྱོང་བར་སུས་ཀྱང་མྱུར་དུ་ཟད་པར་བྱ་བར་མི་ནུས་ཏེ། འདི་ནི། མཚམས་མེད་པ་དང་ཉེ་བ་ཤིན་ཏུ་ལྕི་བ་ཡིན་ནོ། །ལག་འགྲོ་དག་།ཁྱེད་ཚུར་ཤེག་།དཀོན་མཆོག་གསུམ་ལ་སྐྱབས་སུ་དེངས་ཤིག་དང ། དེས་ན་ཁྱེད་ཅག་ཆུ་ལ་གནས་པ་དག་ཏུ་འགྱུར་རོ། །ཞེས་བྱ་བ་ནས་དཀོན་མཆོག་གསུམ་ལ་སྐྱབས་སུ་རྣམ་པར་བཀོད་དེ་ཆུ་ལ་གནས་པར་གྱུར་ཏོ། །ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། སྤུ་གྲི་རྣོན་པོ་དག་གིས་སུ། །རང་གི་ཡན་ལག་གཏུབས་པ་བླའི། །བསྔོས་ཟིན་པ་ཡི་དངོས་པོ་ནི། །ཁྱིམ་པ་རྣམས་ལ་སྦྱིན་མི་བྱ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐུ་ལུམ་ཟོས་ཟླ་ཡི། །དགེ་འདུན་དག་ལས་གལ་ཏེ་ནི། །དགེ་འདུན་གྱི་ལ་ལོངས་མི་སྤྱད། །ལྷུན་པོ་དང་ནི་འདྲ་བའི་མེ། །བླང་བ་བྱས་ཏེ་ཟོས་པ་ཟླའི། །ཁྱིམ་པར་གྱུར་པས་དགེ་འདུན་གྱི། །ལོངས་སྤྱོད་པར་ནི་མི་བྱའོ། །ཐམས་ཅད་དབྱུང་བ་བྱས་པ་དང་།།
366b
གསལ་ཤིང་སྟེང་དུ་བཏེག་པ་བླའི། །ཁྱིམ་པར་གྱུར་པས་དགེ་འདུན་གྱི། །ལོངས་སྤྱོད་པར་ནི་མི་བྱའོ། །མེ་མདག་གིས་ནི་གང་བ་ཡི། །གནས་ཁང་དེར་ནི་ཞུགས་པ་བླའི། །ཁྱིམ་པས་དགེ་འདུན་གནས་ཁང་དུ། །མཚན་མོ་གནས་པར་མི་བྱའོ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐུ་ལུམ་བླངས་པ་བླའི། །རབ་ཏུ་བྱུང་དང་ཁྱིམ་པ་ཡིས། །དབྱིག་ནི་བླང་པར་མི་བྱའོ། །འཁོར་ལོ་རྣོན་པོས་བདག་གི་ལུས། །ཀུན་ཏུ་གཏུབས་པར་བྱས་པ་བླའི། །ལེགས་པར་གསུངས་པའི་ཆོས་རྣམས་ལ། །རྒྱགས་དང་གཤེ་བ་བསྐྱེད་མི་བྱ། །ལེགས་པར་གསུངས་པའི་ཆོས་ཅན་གྱི། །མིག་ནི་རང་གིས་ཕྱུང་བ་བླའི། །སེམས་ཅན་དུ་ནི་བགྲང་བ་ལ། །ཁྲོས་པས་སྐྱེ་རྒུ་མི་མངག་གོ་།ལེགས་པར་གསུངས་པའི་ཆོས་ཅན་གྱི། །མེ་ཡི་གོས་ནི་གྱོན་པ་བླའི། །ཚུལ་འཆོས་པ་དང་མཐུ་ཡིས་སུ། །ཁྱིམ་པ་ལས་ནི་གོས་མི་བསླང ། །མེ་འདྲ་བར་ནི་བསྐོལ་བ་ཡི། །རྩུབ་འགྱུར་ཆུ་ནི་འཐུངས་པ་བླའི། །རབ་ཏུ་བྱུང་བས་གཡོ་སྒྱུ་ཡིས། །བཟའ་བཏུང་བསླང་བར་མི་བྱའོ། །དེའི་ཚེ་བཅོམ་ལྡན་འདས་ཀྱིས་ཀླུ་ཁྲི་བཞི་སྟོང་སྙེད་སྔོན་གྱི་ངེས་པར་བྱས་པའི་སྡུག་བསྔལ་གྱི་ཚོར་བ་དེ་ལྟ་བུ་དག་ལས་ཡོངས་སུ་ཐར་པར་མཛད་དེ་སྐྱབས་གསུམ་ལ་ཡང་རྣམ་པར་བཀོད་དོ། །དེའི་ཚེ་ཀླུ་གཞན་བྱེ་བ་ཕྲག་བརྒྱད་ཅུ་ནི། །སྐྱབས་གསུམ་དུ་འགྲོ་བ་དང ། ཐེག་པ་གསུམ་ལ་ངེས་པ་རྣམ་པར་བཀོད་དོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀཽ་ཌི་ནྱལ་བཀའ་སྩལ་པ།
367a
༄#། །ཀཽ་ཌི་ནྱ། སེམས་ཅན་རྣམས་རང་ལ་སླུ་བ་ལ་ལྟོས། །སེམས་ཅན་གང་དག་དབུལ་པོ་ཉིད་ཀྱི་འཇིགས་བས་སྐྲག་ནས་རང་གིས་དགེ་སློང་ཆོས་ཀྱིས་གནས་པ་རྣམས་ལ་ཕན་གདགས་པའི་ཕྱིར་ཡོ་བྱད་ཀྱི་དངོས་པོ་རྣམ་པ་སྣ་ཚོགས་བསྔོས་ལ། ཁ་ཅིག་གིས་ནི། རང་གིས་ལོངས་སྤྱོད་དོ། །ཁ་ཅིག་གིས་ནི། གཞན་དག་ལོངས་སྤྱད་པར་བྱ་བའི་ཕྱིར་བྱིན། ཁ་ཅིག་གིས་ནི། མཐུས་འཕྲོག་ནས་ལོངས་སྤྱད་པས་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་བསྟེན་ཏོ། །ཡང་སེམས་ཅན་གང་དག་དབུལ་པོ་ཉིད་ཀྱི་འཇིགས་པས་སྐྲག་ནས་འཁོར་བའི་སྲིད་པའི་བཙོན་ར་ཐམས་ཅད་ལས་ཡོངས་སུ་ཐར་པར་བྱ་བའི་ཕྱིར་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་རབ་ཏུ་བྱུང་ངོ ། །དེ་དག་རབ་ཏུ་བྱུང་ནས་ཆོས་དང་ལྡན་པའི་རྣལ་འབྱོར་ཡིད་ལ་བྱེད་པ་དང་ཚིག་འདོན་པ་བཏང་ནས་ཉམས་པར་གྱུར་པ་དེ་དག་ཁ་ཅིག་ནི། དགེ་སློང་ཆོས་ཀྱིས་གནས་པ་རྣམས་ལ་དངོས་པོ་རྣམ་པ་སྣ་ཚོགས་དེ་བཞིན་དུ་བསྔོས་པ་རང་གིས་འཕྲོག་སྟེ་ལོངས་སྤྱོད་པར་བྱེད་དོ། །ཁ་ཅིག་གིས་ནི། ཁྱིམ་པ་རྣམ་ལ་སྦྱིན་པར་བྱེད་དེ། དེ་དག་གཉིས་ཀ་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་གྱིས་གཟིར་ཏོ། །ངས་ཉེས་དམིགས་དེ་ཡང་དག་པར་གཟིགས་ནས་ངའི་ཉན་ཐོས་རྣམས་ལ་དྲན་པར་བྱ་བ་བཅའ་བར་མཛད་
367b
དེ།་ངའི་ཉན་ཐོས་སུས་ཀྱང་དགེ་སློང་ལ་བསྔོས་པ་དང ། དགེ་སློང་གི་དགེ་འདུན་ལ་བསྔོས་པའི་མེ་ཏོག་དང ། འབྲས་བུ་དང ། ལོ་མ་དང ། བཅུང་ཁྱིམ་པ་རྣམས་ལ་སྦྱིན་པར་མི་བྱའོ། །གང་ཟག་གི་འདུ་ཤེས་ཀྱིས་ལོངས་སྤྱད་པར་མི་བྱའོ། །དགེ་འདུན་ལས་ཕྱི་རོལ་ཏུའང་ཉོ་ཚོང་མི་བྱའོ། །བསྐོར་བ་དང ། བསྒྱུར་བ་དང ། དབྱིག་གི་གཏམ་མི་བྱའོ། །སེམས་ཅན་རྣམས་ཟང་ཟིང་གིས་ཡོངས་སུ་བསྡུ་བའི་རྐྱེན་གྱིས་ངན་སོང་གི་སྡུག་བསྔལ་དག་ལ་དགོད་པར་མི་བྱའོ། །སེམས་ཅན་རྣམས་ཆོས་ཀྱི་བསྡུ་བས་བསྡུ་བར་བྱའོ། །སི་ཕྱེད་པའི་དད་པ་བཞི་དང ། ཐེག་པ་གསུམ་དང ། རྣམ་པར་ཐར་པའི་སྒོ་གསུམ་ལ་དགོད་པར་བྱའོ། །འཕགས་པ་འདུས་པ་ཆེན་པོའི་སྡེ་ཉི་མའི་སྙིང་པོའི་མདོ་ལེའུ་བཅུ་གཅིག་པ་ལས། ཀླུ་སྐྱབས་སུ་འགྲོ་བའི་ལེའུ་སྟེ་བཅུ་གཅིག་པའོ།། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེ་བྱ་བའི་མདོ། བམ་པོ་བཅུ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ལ་གནས་བརྟན་ཀུན། ཤེས་ཀོ་ཌི་ནྱས་འདི་སྐད་ཅེས་གསོལ་ཏོ། །བཅོམ་ལྡན་འདས། ལག་འགྲོ་དག་བྱིན་གྱིས་བརླབ་ཏུ་གསོལ། བསམ་གྱིས་མི་ཁྱབ་པའི་ལས་བསྟན་པའི་སྤྱོད་པ་དང་འཕྲེལ་བའི་ཆོས་ཀྱི་རྣམ་གྲངས་ཡུན་རིང་པོར་འབར་བར་མཛད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་གླིང་བཞི་པ་འདིར་མཆོད་རྟེན་ཆེན་པོ་འདི་དག་རྣལ་འབྱོར་ཡིད་ལ་བྱེད་པར་མངོན་པར་བརྩོན་
368a
༄#། །པ་ཐམས་ཅད་ཀྱིས་སྟོངས་པར་མ་གྱུར་པ་དེ་སྲིད་དུ་གླིང་བཞི་པ་འདིར་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་རོ། །མཆོད་རྟེན་ཆེན་པོ་གང་དག་ཅེ་ན།་ཛམྦུའི་གླིང་འདི་ན་མཆོད་རྟེན་དྲང་སྲོང་ཐུབ་པའི་གནས་ཀུན་རྟེན་འདི་ནི། སྔོན་ཆད་སྔོན་གྱི་སངས་རྒྱས་དང ། བྱང་ཆུབ་སེམས་དཔའ་དང ། དྲང་རྒྱལ་བ་དང ། ཉན་ཐོས་མང་པོ་གནས་གནས་ཤིང་མ་འོངས་པའི་དུས་ནའང་གནས་པར་འགྱུར་བ་སྟེ། རྗེས་སུ་བསྟན་པ་ཆེན་པོ་ཡུན་རིང་དུ་གནས་པར་མཛད་པའི་ཕྱིར་དྲང་སྲོང་ཐུབ་པའི་གནས་ཀུན་རྟེན་འདི་ནི། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཆུ་ལྷའི་ལག་ཏུ་ཡོངས་སུ་གཏད་པ་མཛད་དོ། །ངས་ཀྱང་དེ་ཉིད་ཀྱི་ལག་ཏུ་ཡོངས་སུ་གཏད་དེ། འདིའང་སྤྲོ་བར་འགྱུར་ཞིང་གང་ཟག་ཆོས་ཀྱིས་གནས་པ་རྣལ་འབྱོར་ཡིད་ལ་བྱེད་པ་ལ་མངོན་པར་བརྩོན་པ་དག་ཡོངས་སུ་སྨིན་པར་བྱེད་པར་འགྱུར་རོ། །གང་དག་གང་ཟག་ཆོས་ཀྱིས་གནས་པ་རྣམས་ལ་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང ། སྦྱིན་བདག་དེ་དག་ཀྱང་ཡོངས་སུ་སྲུང་བར་འགྱུར་རོ། །ཀླུའི་རྒྱལ་པོ་ཆུ་ལྷས་གསོལ་བ། བཙུན་པ་བཅོམ་ལྡན་འདས། དེ་དེ་བཞིན་ཏེ། དེ་བཞིན་གཤེགས་པ་འཁོར་བ་འཇིག་གིས་དྲང་སྲོང་ཐུབ་པའི་གནས་ཀུན་རྟེན་འདི་ཆང་ཁྱིར་ཡོངས་སུ་གཏད་ལགས་སོ། །གང་དག་གང་ཟག་མཉམ་པ་ཉིད་ལ་
368b
མངོན་པར་བརྩོན་པ་ཆོས་ཀྱིས་གནས་པ་རྣམས་ཀྱང་ཆང་ཁྱིར་ཡོངས་སུ་གཏད་ལགས་སོ། །གང་དག་གང་ཟག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ལ་རིམ་གྲོལ་མངོན་པར་བརྩོན་པའི་སྦྱིན་པ་པོ་དང ། སྦྱིན་བདག་དེ་དག་ཀྱང་དེ་བཞིན་ལགས་ཏེ། ཇི་སྲིད་དུ་དམ་པའི་ཆོས་འབར་བར་འགྱུར་བ་དེ་ཁོ་ན་བཞིན་དུ་བདག་གིས་གཉིས་ཀ་སྲུང་ལགས་སོ། །དེ་བཞིན་དུ་དེ་བཞིན་གཤེགས་པ་གསེར་ཐུབ་ཀྱི་བར་དང ། དེ་བཞིན་དུ་དེ་བཞིན་གཤེགས་པ་འོད་སྲུང་གི་བར་གྱིས་ཀྱང་དེའི་ཆོས་ཀྱི་ཚུལ་འབར་བར་བགྱི་བའི་སླད་དུ་གཏད་ལགས་སོ། །དེ་བཞིན་དུ་ད་ལྟར་ཡང་བཅོམ་ལྡན་འདས་ཀྱི་བཀའ་དྲང་སྲོང་ཐུབ་པའི་གནས་ཀུན་རྟེན་ནས་གང་ཟག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ཀྱི་བར་དང ། གང་དག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ལ་རིམ་གྲོ་དང་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང ། སྦྱིན་བདག་དེ་དག་གི་བར་དག་དང ། ཇི་སྲིད་དུ་ཉན་ཐོས་དེ་དག་ཡོངས་སུ་འཛིན་པ་མ་མཆིས་པར་གནས་པར་དེ་དག་ཐམས་ཅད་སྲུང་བར་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། ལེགས་སོ་ལེགས་སོ། །དེ་ལྟར་བྱིན་གྱིས་བརླབས་པས་ངའི་ཆོས་ཀྱི་ཚུལ་སྦྱིན་བདག་ཆེན་པོ་དེ་ལྟ་བུ་དག་གིས་ཡུན་རིང་པོར་འབར་བར་བྱེད་པར་འགྱུར་རོ། །བ་ལང་སྤྱོད་ཀྱི་གླིང་གི་ངོས་ན་རྡུལ་གྱི་
369a
༄#། །རི་དེ་ལ་དྲང་སྲོང་ཐུབ་པའི་གནས་བཀྲ་བ་ནི། ཀླུའི་རྒྱ་པོ་རིན་པོ་ཆེའི་ཕྲེང་བ་ཅན་ལ་ཆད་ཁྱིར་ཡོངས་སུ་གཏད་དོ། །ཞེས་བྱ་བའི་བར་དུའོ། །ཀླུའི་རྒྱལ་པོ་རིན་པོ་ཆེའི་ཕྲེང་བ་ཅན་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་དེ་བཞིན་ཏེ། དེ་བཞིན་གཤེགས་པ་འཁོར་བ་འཇིག་གིས་དེར་དྲང་སྲོང་ཐུབ་པའི་གནས་བཀྲ་བ་དེ་ཆང་ཁྱིར་ཡོངས་སུ་གཏད་ལགས་སོ། །ཞེས་བྱ་བ་ནས་ཇི་སྲིད་དུ་ཉན་ཐོས་དེ་དག་ཡོངས་སུ་འཛིན་པ་མ་མཆིས་པར་གནས་པ་དེ་སྲིད་དུ་བདག་གིས་ཐམས་ཅད་ཡོངས་སུ་བསྐྱང་པར་བགྱི་ལགས་སོ། །ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། སྦྱིན་བདག་རྣམས་ཀྱིས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །ཤར་གྱི་ལུས་འཕགས་ཀྱི་ངོས་ན་ནི། ལངྒ་ཎའི་རི་ལ་དྲང་སྲོང་ཐུབ་པའི་གནས་དྲང་སྲོང་འབྱུང་བ་ན། ཀླུའི་རྒྱལ་པོ་ཟླ་སྲུང་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་དེ་སྲིད་དུ་བདག་གིས་ཡོངས་སུ་བསྐྱང་བར་བགྱི་ལགས་སོ། །ཞེས་བྱ་བའི་བར་དུའོ། །བྱང་གི་སྒྲ་མི་སྙན་གྱི་ངོས་ན་རྒྱལ་དགའི་རི་ལ་དྲང་སྲོང་ཐུབ་པའི་གནས་སྤོས་བརྩེགས་ནི། ཀླུའི་རྒྱལ་པོ་ལུས་འབིགས་པའི་ཁབ་ལ་ཆང་ཁྱིར་ཡོངས་སུ་གཏད་དེ་གང་ཟག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ཀྱང་ཆང་ཁྱིར་ཡོངས་སུ་གཏད་དོ། །དེ་བཞིན་དུ་
369b
གང་ཟག་དགེ་སློང་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ལ་རིམ་གྲོ་དང་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང ། སྦྱིན་བདག་དེ་དག་ཀྱང་ཆང་ཁྱིར་ངས་ཡོངས་སུ་གཏད་དོ། །ཀླུའི་རྒྱལ་པོ་ལུས་འབིགས་པའི་ཁབ་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་དེ་བཞིན་ཏེ། སྔོན་དེ་བཞིན་གཤེགས་པ་འཁོར་བ་འཇིག་གིས་དྲང་སྲོང་ཐུབ་པའི་གནས་སྤོས་བརྩེགས་དེའང་ཆང་ཁྱིར་ཡོངས་སུ་གཏད་ལགས་སོ། །ཆོས་ཀྱིས་གནས་པའང་དེ་བཞིན་ལགས་སོ། །གསེར་ཐུབ་ཀྱིས་ཀྱང་དེ་བཞིན་ལགས་སོ། ། ཞེས་བྱ་བ་ནས་འོད་སྲུང་གིས་ཀྱང་དེ་བཞིན་ལགས་སོ། །ཞེས་བྱ་བའི་བར་དང ། བདག་གིས་ཆོས་ཀྱི་ཚུལ་ཡང་དག་པར་བཟུང་ལགས་སོ། །ཞེས་བྱ་བའི་བར་དང ། དེ་བཞིན་དུ་ད་ལྟར་ཡང་བཅོམ་ལྡན་འདས་ཀྱི་བཀའ་བདག་གིས་དྲང་སྲོང་ཐུབ་པའི་གནས་སྤོས་བརྩེགས་ཐམས་ཅད་བསྲུང་བར་བགྱི་ལགས་སོ། །ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། ལེགས་སོ་ལེགས་སོ། །དེ་ལྟར་བྱིན་གྱིས་བརླབས་པས་ཆོས་ཀྱི་ཚུལ་སྦྱིན་བདག་ཆེན་པོ་དེ་ལྟ་བུ་དག་གིས་ཡུན་རིང་པོར་འབར་བར་བྱེད་པར་འགྱུར་རོ། །དེ་བཞིན་དུ་བ་ལང་སྤྱོད་ཀྱི་གླིང་ན་དྲང་སྲོང་ཐུབ་པའི་གནས་འོད་ཟེར་བྱུང་བ་ཞེས་བྱ་བ་གང་ཡིན་པ་དེ་ནི། ཀླུའི་རྒྱལ་པོ་བ་ལང་མགོ་ལ་ཆང་ཁྱིར་ཡོངས་སུ་གཏད་དོ། །
370a
༄#། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཤར་གྱི་ལུས་འཕགས་གླིང་ན་དྲང་སྲོང་ཐུབ་པའི་གནས་པདྨའི་ཤིང་ནྱ་གྲོ་དྷ་ལྟ་བུ་གང་ཡིན་པ་དེ་ནི། ཀླུའི་རྒྱལ་པོ་དབྱིག་གཏོང་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། ། ཞེས་བྱ་བའི་བར་དུའོ། །དེ་བཞིན་དུ་བྱང་གི་སྒྲ་མི་སྙན་གྱི་གླིང་ན་དྲང་སྲོང་ཐུབ་པའི་གནས་སྤོས་བརྩེགས་འོད་ཟེར་ཅེས་བྱ་བ་གང་ཡིན་པ་དེ་ནི། ཀླུའི་རྒྱལ་པོ་གནས་ན་རྒྱུ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་རྒྱ་མཚོ་ཆེན་པོའི་ནང་ན་ཀླུའི་རྒྱལ་པོ་རྒྱ་མཚོའི་གནས་ན་དྲང་སྲོང་ཐུབ་པའི་གནས་ནོར་བུའི་སྙིང་པོའི་འོད་འཕྲོ་བ་གང་ཡིན་པ་དེ་ནི། ཀླུའི་རྒྱལ་པོ་རྒྱ་མཚོ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་རི་རབ་ཀྱི་རྩེ་མོ་ན་སུམ་ཅུ་རྩ་གསུམ་པའི་གནས་ན་དྲང་སྲོང་ཐུབ་པའི་གནས་མེ་ཏོག་རབ་ཏུ་རྒྱས་པའི་སྙིང་པོ་གང་ཡིན་པ་དེ་ནི།་ཀླུའི་རྒྱལ་པོ་ས་སྲུང་གི་བུ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཛམྦུའི་
370b
གླིང་འདི་ན་དགའ་འཕེལ་ཞེས་བྱ་བ་ནས་དྲང་སྲོང་ཐུབ་པའི་གནས་གནས་བརྟན་གྱི་ཕུག་གང་ཡིན་པ་དེ་ནི། ཀླུའི་རྒྱལ་པོ་ལྕེ་སྦྱང་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཡངས་པ་ཅན་ན་དྲང་སྲོང་ཐུབ་པའི་གནས་ཤིན་ཏུ་བརྟན་པ་ནི། ཀླུའི་རྒྱལ་པོ་ནོར་རྒྱས་ཀྱི་བུ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་སེར་སྐྱའི་གནས་ན་དྲང་སྲོང་ཐུབ་པའི་གནས་གསེར་སྒྲོན་དྲི་ཞིམ་ནི། ཀླུའི་རྒྱལ་པོ་མ་དྲོས་པ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཡུལ་མ་ག་དྷ་ན་དྲང་སྲོང་ཐུབ་པའི་གནས་རྒྱ་ཆེན་ཞེས་བྱ་བ་ནི། ཀླུའི་རྒྱལ་པོ་རི་བོས་བྱིན་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་བཅོམ་བརླག་ན་དྲང་སྲོང་ཐུབ་པའི་གནས་སྟུག་པའི་སྤྲིན་ནི། ཀླུའི་རྒྱལ་པོ་ལྕེ་སྤྱང་དང་རྒྱུ་མ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཡུལ་འཁོར་ཀོ་ས་ལ་ན་དྲང་སྲོང་ཐུབ་པའི་གནས་རྒྱལ་བ་དག་པ་ཞེས་བྱ་བ་ནི། ཀླུའི་རྒྱལ་པོ་སྲིན་བུ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་
371a
༄#། །འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཕུག་གི་ཕ་རོལ་ན་དྲང་སྲོང་ཐུབ་པའི་གནས་བཏང་བཟུང་བདེན་པའི་དྲི་ཞེས་བྱ་བ་ནི། ཀླུའི་རྒྱལ་པོ་བཏང་བཟུང་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཡུལ་འཁོར་ས་འཛིན་ན་དྲང་སྲོང་ཐུབ་པའི་གནས་མཐོང་བའི་ལམ་རྒྱགས་ཞེས་བྱ་བ་ནི། ཀླུའི་རྒྱལ་པོ་ཨེ་ལའི་འདབ་མ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཁ་ཆེའི་ཡུལ་ན་དྲང་སྲོང་ཐུབ་པའི་གནས་གུར་གུམ་གྱི་རྩེ་མོ་ཞེས་བྱ་བ་ནི། ཀླུའི་རྒྱལ་པོ་ཧུ་ལུ་རུ་ལ་ཆང་ཁྱིར་ཡོངས་སུ་གཏད་དོ། ། ཞེས་བྱ་བ་ནས་ཡུན་རིང་པོར་འབར་བར་བྱེད་པར་གྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཡུལ་ཆུ་ལེན་ན་དྲང་སྲོང་ཐུབ་པའི་གནས་འོད་ཟེར་བྱེད་པའི་སྙིང་པོ་ཞེས་བྱ་བ་ནི། ཀླུའི་རྒྱལ་པོ་འཕྱང་བ་ལ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་རྒྱ་ཡུལ་ན་དྲང་སྲོང་ཐུབ་པའི་གནས་སྲེད་མེད་ཀྱི་བུའི་འོད་ཅེས་བྱ་བ་ནི། ཀླུའི་རྒྱལ་པོ་རྒྱ་མཚོས་བྱིན་གྱི་ལག་ཏུ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་
371b
འགྱུར་རོ། །ཞེས་བྱ་བའི་བར་དུའོ། །དེ་བཞིན་དུ་ཁ་ཤའི་ཡུལ་ན་སའི་ནུ་མའི་གནས་རི་གླང་རུའི་དྲུང་ཆུ་བོ་གོ་མ་ཏིའི་ངོགས་ན་དྲང་སྲོང་ཐུབ་པའི་གནས་གོ་ན་སཱ་ལ་གནྡྷ་ཞེས་བྱ་བ་མཆོད་རྟེན་ཆེན་པོའི་གནས་ན་ཀླུའི་རྒྱལ་པོ་ཁྱིམ་བདག་གིས་བྱིན་གྱི་ལག་ཏུ་ཆང་ཁྱིར་ཡོངས་སུ་གཏད་དོ། །ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ། །ཞེས་བྱ་བའི་བར་དུའོ། །མཆོད་རྟེན་ཆེན་པོ་དེ་དག་ནི། སྔོན་ཆད་དྲང་སྲོང་ཐུབ་པའི་ཁྱུ་མཆོག་མང་པོ་གནས་གནས་ཤིང་སྔོན་ཆད་བྱང་ཆུབ་སེམས་དཔའ་སེམས་དཔའ་ཆེན་པོ་མང་པོ་འང་གནས་གནས། སྔོན་ཆད་རང་རྒྱལ་བ་མང་པོ་འང་གནས་གནས། སྔོན་ཆད་ཉན་ཐོས་ཆེན་པོ་མང་པོ་འང་གནས་གནས། སྔོན་ཆད་དྲང་སྲོང་མངོན་པར་ཤེས་པ་ལྔ་དང་ལྡན་པ་མང་པོ་འང་གནས་གནས་པ་ཡིན་ཏེ། སངས་རྒྱས་ཀྱི་ཞིང་འདིར་གང་དག་སྐྱེས་པ་དེ་དག་ཐམས་ཅད་ཀྱིས་བྱིན་གྱིས་བརླབས་ཤིང་སེམས་ཅན་འཁོར་བས་སྐྲག་པ་ཡོངས་སུ་སྐྱོ་བ་རྣམས་ཀྱི་དོན་དུ་དགེ་བའི་རྩ་བ་བསྐྱེད་པའི་ཕྱིར་དབང་ཆེ་བར་གྲགས་པ། དབང་ཆེ་བར་གྲགས་པ་ཐམས་ཅད་ཀྱིས་དེ་དག་གི་ལག་ཏུ་ཡོངས་སུ་གཏད་པ་ཡིན་ནོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་གྲངས་མེད་པ་དཔག་ཏུ་མེད་པ་ན་གང་དག་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱུང་བ་དེ་དག་ཐམས་ཅད་ཀྱིས་ཀྱང་སེམས་ཅན་རྣམས་ཀྱིས་ལས་ཟད་པར་བྱ་
372a
༄#། །པའི་ཕྱིར་མཆོད་རྟེན་ཆེན་པོ་ཉི་ཤུ་པོ་དེ་དག་དགོངས་ཤིང་བསམ་ལ་བྱིན་གྱིས་བརླབས་སོ། །དེ་བཞིན་དུ་མ་འོངས་པའི་དུས་ན་དེའི་ཚེ་སངས་རྒྱས་ཀྱིས་ཞིང་གྲངས་མེད་པ་དཔག་ཏུ་མེད་པ་དེ་དག་ཏུ་གང་དག་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འབྱུང་བར་འགྱུར་བ་དེ་དག་ཐམས་ཅད་ཀྱིས་ཀྱང་མཆོད་རྟེན་ཆེན་པོ་ཉི་ཤུ་པོ་དེ་དག་དགོངས་ཤིང་བསམ་པར་འགྱུར་ལ་བྱིན་གྱིས་རློབ་པར་འགྱུར་རོ། །མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་པའི་ཟླ་བ་གང་དག་འབྱུང་བར་འགྱུར་བ་དེ་དག་ཐམས་ཅད་ཀྱིས་ཀྱང་སེམས་ཅན་གྱི་དོན་དུ་ལས་ཟད་པར་བྱ་བའི་ཕྱིར་མཆོད་རྟེན་ཆེན་པོ་ཉི་ཤུ་པོ་དེ་དག་ལ་གནས་པར་འགྱུར་ཞིང་བྱིན་གྱིས་རློབ་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་དང ། རང་རྒྱལ་བ་ཐམས་ཅད་དང ། ཉན་ཐོས་ཆེན་པོ་ཐམས་ཅད་དང ། དེ་བཞིན་དུ་དྲང་སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱིས་ཀྱང་སེམས་ཅན་གྱི་དོན་དུ་ལས་ཟད་པར་བྱ་བའི་ཕྱིར་མཆོད་རྟེན་ཆེན་པོ་ཉི་ཤུ་པོ་དེ་དག་ལ་གནས་པར་འགྱུར་ཞིང་བྱིན་གྱིས་རློབ་པར་ཡང་འགྱུར་ཏེ། །སེམས་ཅན་དབང་ཆེ་བར་གྲགས་པ་དེ་དག་གི་ལག་ཏུ་ཆང་ཁྱིར་ངས་ཡོངས་སུ་གཏད་པར་མཛད་དོ། །དེ་བཞིན་དུ་པར་མཆོད་རྟེན་ཆེན་པོའི་གནས་ཉི་ཤུ་པོ་དེ་དག་
372b
ཁྱེད་ཀྱིས་ཇི་ལྟར་མིང་ཡོངས་སུ་བཟུང་བ་བཞིན་ངས་ཡོངས་སུ་གཏད་ཀྱི། སེམས་ཅན་འཁོར་བས་ཡོངས་སུ་སྐྱོ་བ་རྣམས་ཀྱི་དོན་དུ་ཁྱེད་ཀྱིས་དེ་དག་སྲུངས་ཤིག་།ཆོས་རབ་ཏུ་མི་འཇིགས་པར་ཡང་དག་པར་ཟུངས་ཤིག་།དེ་ནས་གང་དག་གི་ལག་ཏུ་མཆོད་རྟེན་ཆེན་པོའི་གནས་ཉི་ཤུ་པོ་དེ་དག་ཡོངས་སུ་གཏད་པའི་ཀླུ་དེ་དག་ཐམས་ཅད་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀླུ་རྣམས་ནི། རྨུགས་པ་དང་གཉིད་ཀྱི་སྒྲིབ་པས་ཤིན་ཏུ་མྱོས་ལགས་ཏེ། གང་བདག་ཅག་མཚན་གཅིག་གཉིད་ལོག་པ་དེ་ནི། མིའི་ལྟར་བརྩིས་ན་དགུང་ལོ་ཉི་ཤུ་རྩ་གཅིག་འདས་པར་འགྱུར་ལགས་སོ། །གལ་ཏེ་བདག་ཅག་རབ་ཏུ་གཉིད་ཀྱིས་ལོག་ནས་དྲང་སྲོང་ཐུབ་པའི་གནས་དེ་དག་ཏུ་ལྷའི་ཀུན་ཏུ་འཁྲུག་པ་འགའ་ཞིག་བྱུང་བར་གྱུར་ཏམ། མིའི་ཀུན་ཏུ་འཁྲུག་པའམ། ཞུགས་སམ། ཆབ་ཀྱིས་ཀུན་ཏུ་འཁྲུག་པ་འགའ་ཞིག་བྱུང་བར་གྱུར་ན་མཆོད་རྟེན་ཆེན་པོའི་གནས་དེ་དག་རྣམ་པར་འཇིག་པར་འགྱུར་ལགས་ན། བདག་ཅག་གཉིད་ཀྱིས་ལོག་ཅིང་མྱོས་པ་དེ་དག་གིས་རབ་ཏུ་འཇིག་པ་དེ་བསལ་བར་རྔོ་མི་ཐོགས་ལགས་ཏེ། དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ལ་བདག་ཅག་ནོངས་པ་བྱུང་བ་ལགས་པར་འགྱུར་ལགས་སོ། །དེའི་ཚེ་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་པོ་དག་ལ་བཀའ་སྩལ་པ། རྟག་པར་རྒྱལ་བ་རྣམས་ཀྱིས་དགོངས་པའི་
373a
༄#། །མཆོད་རྟེན་ཆེན་པོའི་གནས་དྲང་སྲོང་ཐུབ་པའི་གནས་ཁྱེད་ཀྱིས་ལོངས་ཤིག་།ཆང་ཁྱེར་ཡོངས་སུ་སྐྱོངས་ཤིག་།ཡོངས་སུ་སྲུངས་ཤིག་།དེའི་ཚེ་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་དྲུག་གིས་ཇི་ལྟར་རྗེས་སུ་མཐུན་པར་སྔོན་ཆད་དྲང་སྲོང་ཐུབ་པའི་གནས་སུ་ཇི་ལྟར་གནས་པར་གྱུར་པ་བཞིན་དུ་ཆང་ཁྱིར་ཡོངས་སུ་བླངས་སོ། ། གོ་མ་སཱ་ལ་གནྡྷའི་གནས་ནི། མ་གཏོགས་ཏེ། མ་བླངས་སོ། །དེའི་ཚེ་བཅོམ་ལྡན་འདས་ལ་ཀླུའི་རྒྱལ་པོ་ཁྱིམ་བདག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སའི་ནུ་མའི་གནས་རི་གླང་རུའི་དྲུང་ཆུ་བོ་གོ་མ་ཏིའི་ངོགས་གང་ན་དྲང་སྲོང་ཐུབ་པའི་གནས་གོ་མ་སཱ་ལ་གནྡྷ་ཞེས་བགྱི་བ་མཆོད་རྟེན་ཆེན་པོའི་གནས་མཆིས་པ་ནི། ཡོངས་སུ་བསྐྱང་བའི་སླད་དུ་བདག་གིས་བླངས་ལགས་ན། ས་ཕྱོགས་དེ་ན་ཡུལ་དང ། གྲོང་དང ། གྲོང་ཁྱེར་དང ། གྲོང་རྡལ་མ་མཆིས་ལགས་སོ། །མི་རྣམས་ཀྱི་གནས་མ་མཆིས་ལགས་ཏེ།་ཡུལ་གཞན་ནམ། གླིང་བཞི་པ་གཞན་ན། སངས་རྒྱས་ཀྱི་ཞིང་གཞན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། རང་རྒྱལ་བ་དང ། ཉན་ཐོས་ཆེན་པོ་རྣམས་དང ། དྲང་སྲོང་མངོན་པར་ཤེས་པ་ལྔ་དང་ལྡན་པ་རྫུ་འཕྲུལ་གྱི་ཕ་རོལ་ཏུ་ཕྱིན་པ་རྣམས་ནི། མ་གཏོགས་ཏེ། དེ་དག་ནི། རྫུ་འཕྲུལ་གྱི་སྟོབས་ཀྱིས་མཆོད་པ་བགྱི་བའི་
373b
སླད་དུ་དྲང་སྲོང་ཐུབ་པའི་གནས་གོ་མ་སཱ་ལ་གནྡྷ་དེར་ལྷགས་ཏེ། དེ་ནས་སླར་ཡང་མཆི་བར་བགྱིད་དོ། །བཙུན་པ་བཅོམ་ལྡན་འདས། དེ་ལྟར་གནོད་སྦྱིན་གྱི་སྡེ་དཔོན་སུའང་དེ་ཀུན་ཏུ་བསྲུང་བའི་སླད་དུ་སྤྲོ་བར་མ་གྱུར་པ་ལ་གཟིགས། གནས་དེ་ངན་བར་རྩི་བ་ཞིག་མ་ལགས་སམ་ཞེས་བདག་ངོ་མཚར་དུ་གྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། དེ་སྐད་མ་སྨྲ་ཞིག་།ཁ་ཤའི་ཡུལ་ན་བདེན་པ་མཐོང་བ་དང ། དབང་ཆེ་བར་གྲགས་པ་དབང་ཆེ་བར་གྲགས་པ་ཉི་ཁྲི་གནས་པ་གང་ཡིན་པ་དེ་དག་གིས་དྲང་སྲོང་ཐུབ་པའི་གནས་མཆོད་རྟེན་ཆེན་པོ་གོ་མ་སཱ་ལ་གནྡྷ་ལ་ཉིན་མཚན་དུ་མཆོད་པ་བྱེད་པར་འགྱུར་རོ། །གཞན་ཡང་ལག་འགྲོའི་བདག་པོ། ཇི་ལྟར་དེ་བཞིན་གཤེགས་པ་འོད་སྲུང་ཡོངས་སུ་མྱ་ངན་ལས་འདས་ནས་སྐྱེ་རྒུས་ལོ་སུམ་སྟོང་ལོན་པ་ན་སའི་ནུ་མའི་གནས་སུ་ཡུལ་འཁོར་ཆེན་པོ་རྡོ་རྩུབ་ཅེས་བྱ་བ་བདེ་བ་དང་དགའ་བར་བྱེད་པ། མི་དང་སྐྱེ་བོ་མང་པོས་གང་བ་ཞིག་བྱུང་བར་གྱུར་ཏོ། །དེ་ན་དྲང་སྲོང་སྦྱིན་གནས་བསམ་གཏན་ལ་མངོན་པར་དགའ་བ་ཐེག་པ་བླ་ན་མེད་པ་འདོད་པ་ལྔ་འབུམ་སྙེད་ཀྱི་མང་པོ་གནས་པར་གྱུར་ཏོ། ། དེའི་ཚེ་མི་རྣམས་ཟས་ལ་ལ་འཁྲེན་ཏེ། དེ་དག་ཁ་ཟས་ཀྱི་ཕྱིར་དྲང་སྲོང་དེ་དག་ལ་འཁྲིག་བ་དང་ལྡན་པས་མི་སྙན་པ་རྗོད་པར་བྱེད་དོ། །ཐལ་བ་དང་རྡུལ་གྱིས་འཐོར་བར་བྱེད་དོ། །དེའི་ཚེ་དྲང་
374a
༄#། །སྲོང་དེ་དག་ཡུལ་འཁོར་རྡོ་རྩུབ་དེ་ནས་དོང་ངོ ། །དེ་ནས་སེམས་ཅན་དེ་དག་དྲང་སྲོང་དོང་བ་དེ་དག་ལ་མཆོག་ཏུ་དགའ་ཞིང་ཡི་རང་བར་གྱུར་ཏོ། །དེའི་ཕྱིར་དང་པོར་ཁྱོད་ཁྲོས་ཏེ། དེ་དག་གི་ཆུ་ཀུན་ཏུ་ཆད་ནས་ཡུལ་འཁོར་དེར་ཀླུང་དང ། འབབ་ཆུའི་དོགས་དང ། མཚོ་དང ། མཚེའུ་དང ། ལུ་མའི་ཆུ་དང ། ཁྲོན་པ་དག་བསྐམས་པ་ཁྱོད་ཀྱིས་དྲན་ནམ། ཡུལ་དེར་མེ་ལྷ་ཁྲོས་ཏེ་སེམས་ཅན་དེ་དག་གི་མེ་ཀུན་ཏུ་ཆད་ནས་སེམས་ཅན་དེ་དག་བཀྲེས་པ་དང་སྐོམ་པས་གཟིར་ཏེ་འཆི་བའི་དུས་བྱས་ནས་རིང་པོར་མ་ལོན་པར་དེ་འབྲོག་དགོན་པར་གྱུར་ཏོ། །དེ་ལྟར་ཡུན་རིང་པོར་ཡང་དག་པར་གནས་པར་གྱུར་པ་དག་ཀྱང་དེ་བཞིན་ནོ། །ང་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་དང་དེར་ཅི་ནས་ཀྱང་སའི་ནུ་མའི་གནས་དེར་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། རི་བྲག་རྣམས་གནས་པར་འགྱུར་བ་དང ། སེམས་ཅན་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱི་ལོངས་སྤྱོད་དང ། ཉེ་བར་སྤྱོད་པའི་གནས་དང ། བདེ་བ་དང ། དགའ་བར་བྱེད་པ་དང ། མི་དང་སྐྱེ་བོ་མང་པོས་གང་བར་འགྱུར་བར་ང་དེར་གཤེགས་པར་མཛད་དེ། དྲང་སྲོང་ཐུབ་པའི་གནས་གོ་མ་སཱ་ལ་གནྡྷ་དེ་ཞག་བདུན་ལོངས་སྤྱད་པར་མཛད་དོ། །དེའི་ཚེ་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་མིང་ཅན་ལ་བཀའ་སྩལ་
374b
པ།་མིང་ཅན། ཁྱོད་ཀྱིས་དྲན་ནམ། གསོལ་པ། བཙུན་པ་བཅོམ་ལྡན་འདས། སྔོན་རེ་གླང་རུ་དེ་ལ་ཇི་ལྟར་དེ་བཞིན་གཤེགས་པ་འོད་སྲུང་གིས་སྐྱིལ་མོ་ཀྲུང་གཅིག་གིས་རྣམ་པར་གྲོལ་བའི་བདེ་བས་དགུང་བདུན་འདས་པར་མཛད་དེ། དགུང་བདུན་པོ་དེ་འདས་ནས་ཏིང་ངེ་འཛིན་དེ་ལས་བཞེངས་ཏེ་དྲང་སྲོང་ཐུབ་པའི་གནས་གོ་མ་སཱ་ལ་གནྡྷ་དེ་ལ་བཞུགས་པ་དང ། དེའི་ཚེ་དེའི་སྲུང་བ་འཛིན་པ་དང ། བྱི་བྱི་ལིང་གི་ཤིང་སྲུང་བ་གང་དག་ལགས་པ་དང ། དེའི་ཉན་ཐོས་བསྙེན་བཀུར་ལ་མངོན་པར་བརྩོན་པ། ཏིང་ངེ་འཛིན་ལ་མངོན་པར་བརྩོན་པ། ཆོས་ཀྱིས་གནས་པ་རྣམས་ཀྱི་སྲུང་བ་འཛིན་པ་དང ། བྱི་བྱི་ལིང་གི་ཤིང་སྲུང་བ་གང་དག་ལགས་པ་བདག་གིས་དྲན་ལགས་སོ། །དེ་ནས་ཀླུའི་རྒྱལ་པོ་ཁྱིམ་བདག་གིས་བྱིན་གྱིས་གསོལ་པ། བཙུན་པ་བཅོམ་ལྡན་འདས། དེ་བཞིན་དུ་ཡུན་ཇི་སྲིད་དུ་ཉན་ཐོས་དེ་དག་ཡོངས་སུ་འཛིན་པ་མ་མཆིས་པར་གནས་པ་དེ་སྲིད་དུ་བདག་གིས་བསྲུང་བར་བགྱི་ལགས་སོ། །གཞན་ཡང་བྱམས་པའི་དུས་ཀྱི་བར་དུ་མཆོད་རྟེན་ཆེན་པོ་གོ་མ་སཱ་ལ་གནྡྷ་དུས་རྟག་ཏུ་ཆབ་དང ། ཞུགས་དང ། གནོད་སྦྱིན་དང ། གྲུལ་བུམ་གྱིས་ཀུན་ཏུ་འཁྲུག་པ་རྣམས་ལས་བདག་གིས་བསྲུང་བར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། ལེགས་སོ། །ལེགས་སོ། །ངའི་ཆོས་ཀྱི་ཚུལ་དེ་ལྟར་ཤིན་ཏུ་བྱིན་གྱིས་བརླབས་པས་གྲོགས་པོ་དང་སྦྱིན་
375a
༄#། །བདག་དེ་ལྟ་བུ་དག་གིས་ཡུན་རིང་པོར་འབར་བར་བྱེད་པར་འགྱུར་རོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་པོ་གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ནས་ལུང་བསྟན་པ་ཆེན་པོ་ཉི་མའི་སྙིང་པོ་མཉམ་པར་བྱ་བའི་ཕྱིར་ལྷགས་ཤིང་འདུས་བ་དེ་དག་གིས་འདི་སྐད་ཅེས་གསོལ་ཏོ།། བཙུན་པ་བཅོམ་ལྡན་འདས། བདག་ཅག་གིས་ཀྱང་གླིང་བཞི་པ་འདིར་གནས་པར་བགྱི་ལགས་སོ། །དྲང་སྲོང་ཐུབ་པའི་གནས་མེ་ཏོག་ནས་བ་དན་གྱི་བར་དང ། གསེར་ནས་ས་ལེ་སྦྲམ་གྱི་བར་གྱིས་ཡོངས་སུ་གཏམས་པར་བགྱི་ལགས་སོ། །ལས་འབྱང་བའི་གཟུངས་སྔགས་ཉི་མའི་སྙིང་པོ་འདི་བཅང་བར་བགྱི་ལགས་སོ། །གཞན་དག་ལ་བསྟན་པར་བགྱི་ལགས་སོ། །ཡང་དག་པར་རབ་ཏུ་བསྟན་པར་བགྱི་ལགས་སོ། །བཅོམ་ལྡན་འདས་ཀྱིས་ཇི་སྐད་བསྟན་པའི་གཟུངས་སྔགས་དེའང་ཡིད་ཀྱིས་རྗེས་སུ་བརྟགས་ཏེ་གནས་པར་བགྱི་ལགས་སོ། ། བྱང་ཆུབ་ཀྱི་ལམ་དང ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བགྱི་བའི་སླད་དུ་བདག་དང་གཞན་གྱི་ལས་ཀྱི་སྒྲིབ་པ་བྱང་བར་བགྱི་ལགས་སོ། །ད་ལྟར་བདུད་བྱེ་བ་དེ་དག་ལྷགས་ཤིང་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་གྲངས་མ་མཆིས་པ། དཔག་ཏུ་མ་མཆིས་པ་དེ་དག་ཀྱང་ལྷགས་
375b
ཏེ།་བཅོམ་ལྡན་འདས་ཀྱིས་ཀྱང་དྲང་སྲོང་ཐུབ་པའི་གནས་མཆོད་རྟེན་ཆེན་པོའི་གནས་དེ་དག་ཐམས་ཅད་ཀླུ་རྣམས་དང ། གནོད་སྦྱིན་རྣམས་ཀྱི་སུག་པར་ཆང་ཁྱིར་སྩལ་ལགས་སོ། ། འོན་ཀྱང་འདི་ལ་བདུད་དང ། ལྷ་དང ། མི་འམ་ཅི་དང ། ལྷ་མ་ཡིན་དེ་དག་གི་སེམས་གཞན་དུ་གྱུར་ཏེ། བཅོམ་ལྡན་འདས་ཀྱིས་དྲང་སྲོང་ཐུབ་པའི་གནས་དེ་རྣམས་དག་པ་དག་གི་སུག་པར་ཆང་ཁྱིར་ཡོངས་སུ་གཏད་ལགས་ཞེས་བཅོམ་ལྡན་འདས་ཀྱིས་ད་ལྟར་དང ། མ་འོངས་པའི་དུས་ན་མི་རྣམས་ཀྱི་བར་གྱིས་མཆོད་རྟེན་ཆེན་པོའི་གནས་དེ་དག་ལ་མི་ཕན་པ་དང ། རབ་ཏུ་འཇིགས་པ་དང ། རྣམ་པར་འཇིག་པར་ཕ་རོལ་གནོད་པར་འགྱུར་བ་དེ་ལྟ་བུ་མ་དགོངས་ན་མི་རུང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ་ལེགས་སོ། །མ་འཇིགས་ཤིག་།མ་སྐྲག་ཅིག་།འདིར་སྔོན་གྱི་ཡང་དག་པར་རྫོགས་པའི་སངས་རྒྱས་གང་དག་བྱུང་བར་གྱུར་པ་དེ་དག་གིས་དྲང་སྲོང་ཐུབ་པའི་གནས་མཆོད་རྟེན་ཆེན་པོའི་གནས་དེ་དག་ཐམས་ཅད་བྱིན་གྱིས་བརླབས་ནས་ཀླུ་རྣམས་དང ། གནོད་སྦྱིན་རྣམས་ལ་ཆང་ཁྱིར་ཡོངས་སུ་གཏད་དོ། །དེ་བཞིན་དུ་ད་ལྟར་ངས་ཀྱང་དྲང་སྲོང་ཐུབ་པའི་གནས་མཆོད་རྟེན་ཆེན་པོའི་གནས་ཐམས་ཅད་ཀླུ་རྣམས་དང ། གནོད་སྦྱིན་རྣམས་ཀྱི་ལག་ཏུ་ཆང་ཁྱིར་ཡོངས་སུ་གཏད་དོ། །དེ་ཅིའི་ཕྱིར་ཞེ་ན། མི་ཁོམ་པ་བརྒྱད་ཐོབ་པ་དེ་དག་གི་ལས་ཀྱི་སྒྲིབ་པ་ཡང་དག་པར་བྱང་བར་བྱ་བ་དང །
376a
༄#། །བྱང་གྲོལ་གྱི་བདེ་བའི་རྒྱུ་ཡང་དག་པར་བསྐྱེད་པར་བྱ་བ་དང ། སེམས་ཅན་རྣམས་ཀྱི་ཉེ་བར་འཚོ་བའི་ཡོ་བྱད་ས་བོན་གྱི་ཚོགས་དང ། འབྱུང་བའི་ཚོགས་དང ། སྨན་དང ། ནགས་ཚལ་རྣམས་ཡང་དག་པར་རབ་ཏུ་སྐྱེ་བར་བྱ་བ་དང ། བཟའ་བ་རྣམ་པ་སྣ་ཚོགས་ཡོངས་སུ་སྨིན་པར་བྱ་བ་དང ། དུས་མ་ཡིན་པའི་རླུང་དང་ཆར་པ་རབ་ཏུ་ཞི་བར་བྱ་བའི་ཕྱིར་དྲང་སྲོང་ཐུབ་པའི་གནས་མཆོད་རྟེན་ཆེན་པོའི་གནས་དེ་དག་ཀླུ་རྣམས་དང ། གནོད་སྦྱིན་རྣམས་ཀྱི་ལག་ཏུ་ཡོངས་སུ་གཏད་པའི་ཕྱིར་རོ། །ཡང་གཞན་ཡང་མཆོད་རྟེན་ཆེན་པོའི་གནས་བྱུང་ངོ་ཅོག་དང ། འབྱུང་བར་འགྱུར་པ་གང་དུ་དེ་བཞིན་གཤེགས་པ་བལྟམས་པ་དང ། དཀའ་ཐུབ་གྱི་ཚལ་གང་དུ་བསམ་གཏན་ལ་མངོན་པར་བརྩོན་པ་དང ། གང་དུ་བྱང་ཆུབ་མངོན་པར་རྫོགས་པར་སངས་རྒྱས་པ་དང ། གང་དུ་ཆོས་ཀྱི་འཁོར་ལོ་བསྐོར་བ་ནས་གང་དུ་དེ་བཞིན་གཤེགས་པའི་ཆོས་ཀྱི་སྐུའམ། བཙས་པའི་སྐུ་རབ་ཏུ་བཞག་པའི་བར་དང ། གང་དང་གང་དུ་དེ་བཞིན་གཤེགས་པའི་ཉན་ཐོས་ཆོས་ཀྱིས་གནས་པ་རྣམས་གནས་པར་འགྱུར་པ་དང ། གནས་པར་འགྱུར་པ་ནས་ངའི་ཆོས་ཀྱི་ཚུལ་གནས་པར་འགྱུར་བའི་བར་གྱི་གནས་དེ་དག་ཐམས་ཅད་ལྷ་དང་བཅས་པའི་འཇིག་རྟེན་གྱི་མཆོད་རྟེན་དག་ཡིན་ནོ། །མང་མཆོད་རྟེན་ཆེན་པོའི་གནས་དེ་དག་ཀྱང་བདུད་རྣམས་དང ། ལྷ་རྣམས་
376b
དང ། ཀླུ་རྣམས་དང ། གནོད་སྦྱིན་རྣམས་དང ། ལྷ་མ་ཡིན་རྣམས་ཀྱི་ལག་ཏུ་ཡོངས་སུ་བསྐྱང་བར་བྱ་བའི་ཕྱིར་ཡོངས་སུ་གཏད་དོ། །གཞན་ཡང་འབྱུང་བོ་ཐམས་ཅད་རབ་ཏུ་དད་པར་བྱེད་པ་དང ། ཕྱིར་མི་ལྡོག་པར་བྱེད་པ་གང་འདི་ལུང་བསྟན་པ་ཆེན་པོ། ཏིང་ངེ་འཛིན་མངོན་པར་སྒྲུབ་པ། སོ་སོར་སྡང་བ་ཐམས་ཅད་ཕྱིར་ཟློག་པར་བྱེད་པ་ཞེས་བྱ་བ་ངས་ཁྱེད་ཅག་ལ་སྦྱིན་པར་བྱ་སྟེ།་སྔོན་གྱི་དེ་བཞིན་གཤེགས་པ་ཐམས་ཅད་ཀྱིས་གསུངས་ཤིང་བྱིན་གྱིས་བརླབས་ལ་མངོན་པར་རྗེས་སུ་ཡི་རང་བར་མཛད་པ། སྡང་བ་རྣམས་མངོན་པར་དད་པར་བྱེད་པ། ཕྱིར་ཟློག་པར་བྱེད་པ། དགེ་བ་ལ་ཡང་དག་པར་སྦྱོར་དུ་འཇུག་པ་ཡིན་ནོ། །དེ་བཞིན་དུ་མ་བྱོན་པའི་དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ནས་མངོན་པར་དད་པར་བྱེད་ཅིང་ཕྱིར་ཟློག་པར་བྱེད་ལ། དགེ་བ་ལ་ཡང་དག་པར་སྦྱོར་དུ་འཇུག་པའི་བར་དུ་ཡིན་ནོ། །ལུང་བསྟན་པ་ཆེན་པོ། རྫུ་འཕྲུལ་གྱི་རྐང་པ་བཞིའི་རྒྱུ་མཐུན་པ། མངོན་པར་སྒྲུབ་པའི་བདག་པོ་ཆེན་པོ། སྡང་བ་ཐམས་ཅད་ཕྱིར་ལྡོག་པར་བྱེད་པ་འདི་ནི། བརྟུལ་ཞུགས་ཆེན་པོ་ཡང་དག་པར་སྒྲོལ་བར་བྱེད་པའོ། །ཡེ་ཤེས་ཆེན་པོ་ལ་འཇུག་པར་བྱེད་པའོ། །ཐོས་པ་མང་པོ་ཀུན་ཏུ་འཛིན་པའོ། ། ཐབས་ཆེན་པོ་ཡང་དག་པར་སྐྲོལ་བར་བྱེད་པའོ། །དགྲ་ཆེན་པོ་ངེས་པར་འདུལ་བར་བྱེད་པའོ། །སྡང་བ་ཆེན་པོ་རབ་ཏུ་དད་པར་བྱེད་པའོ། །ནད་ཆེན་པོ་ལས་རབ་ཏུ་ཐར་པར་བྱེད་
377a
༄#། །པའོ། །ནད་ཆེན་པོ་ལས་རབ་ཏུ་སྒྲོལ་བར་བྱེད་པའོ། །འཇིགས་པ་ཆེན་པོ་ཕྱིར་ཟློག་པར་བྱེད་པའོ། །དགོན་པ་ཆེན་པོ་ལས་ངེས་པར་རྒལ་བར་བྱེད་པའོ། །བདེན་པ་ཆེན་པོ་མཐོང་བར་བྱེད་པའོ། །བཟོད་པ་ཆེན་པོ་ལ་རེག་པར་བྱེད་པའོ། །ཡེ་ཤེས་ཆེན་པོའི་རྒྱ་མཚོ་ལ་འཇུག་པར་བྱེད་པ་ཡིན་ནོ། །ཞེས་བྱ་བ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐམས་ཅད་མངོན་པར་རྫོགས་པར་འཚང་རྒྱ་བར་བྱེད་པའོ། །ཞེས་བྱ་བའི་བར་དུའོ། །ཏ་དྱ་ཐཱ། ཨཱ་མ་ཨ་བཱ་ས། ཨཱ་མ་པ་རི་བ་ར། སཾ་ཤྲཱི་ཡ། གརྦྷ་པ་རི་བཱ་སཱ། མི་ཏྲ་མི་ཏྲ། ཤཝཱ་ཡ་མི་ཏྲ། པ་རི་བཱ་སཱ། མི་ཏྲ་ས་མ་ཛྙཱ་ཡ། ནི་ཀ་ཐ་ས་མ་ཛྙཱ་ཡ། ཏྲི་ཤྱང་གྷ་བ། དྲ་བ་རཱ་ཛ། བི་ན་ཤཱ་ཡ། ས་མ་ཤཱ་ཡ། ནི་ར་ཨ་ན་བྷ་དྲ་མ། བཱ་བཱ་གྲ་མ། རིད་དྷི་བི་གྲ་མ་ཎ། ས་མ་ཛྙཱ་ན། ཨ་བ་བརྒ། ན་རཱ་ཡ་ན་བརྒ། ས་མཱ་གྲ་མ། སརྦ་ཏ་ཐཱ་ག་ཏ་ཨ་དྷི་ཥྛ་ན་མཱ་རྒ་སཝཱཧཱ། བཞིན་བཟང་དག་།འདི་ནི། སངས་རྒྱས་ཐམས་ཅད་ཀྱིས་གསུངས་ཤིང་བྱིན་གྱིས་བརླབས་པ་སྟེ། རྫུ་འཕྲུལ་གྱི་རྐང་པའི་རྒྱུ་མཐུན་པ། ཏིང་ངེ་འཛིན་ཐམས་ཅད་མངོན་པར་སྒྲུབ་པ། སྡང་བ་ཐམས་ཅད་ཕྱིར་ཟློག་པར་བྱེད་པ་ནས་དགེ་བ་ལ་ཡང་དག་པར་སྦྱོར་དུ་འཇུག་པར་བྱེད་པའི་བར་དང ། བརྩུལ་ཞུགས་ཆེན་པོ་ཡང་དག་པར་སྒྲོལ་བར་བྱེད་པ་ནས་བྱང་ཆུབ་ཐམས་ཅད་མངོན་པར་རྫོགས་པར་འཚང་རྒྱ་བར་བྱེད་པའི་བར་ཡིན་ནོ། །
377b
གང་དང་གང་དུ་ད་ལྟར་དང ། མ་འོངས་པའི་དུས་སུ་དེའི་ཚེ་མཆོད་རྟེན་ཆེན་པོའི་གནས་དེ་དག་ལ་བདུད་དམ། ལྷའམ། ཀླུའམ། གནོད་སྦྱིན་ནམ། སྲིན་པོའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། གྲུལ་བུམ་ནས་མི་དང་མི་མ་ཡིན་པའི་བར་དུ་སུས་ཆུའམ། མེའམ། ཕ་རོལ་གནོད་པ་གཞན་གང་ཡང་རུང་བཞིག་གིས་མི་ཕན་པ་དང ། རབ་ཏུ་འཇིག་པ་དང ། རྣམ་པར་འཇིག་པར་རྟུལ་བར་བྱེད་ན། དེར་ཁྱེད་ཀྱིས་འདི་ལྟར་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཡིད་ལ་བྱ་ཞིང་སེམས་ཅན་ཐམས་ཅད་ལའང་བྱམས་པའི་ཡིད་ཀྱིས་ལུང་བསྟན་པ་ཆེན་པོ། ཏིང་ངེ་འཛིན་ཐམས་ཅད་མངོན་པར་སྒྲུབ་པ། སྡང་བ་ཐམས་ཅད་ཕྱིར་ཟློག་པར་བྱེད་པ་འདི་དྲན་པར་བྱས་ན། དེའི་ཚེ་དེ་དག་གི་སེམས་ཀྱི་རྒྱུད་རབ་ཏུ་དད་པར་བྱེད་པར་འགྱུར་རོ། །ཕྱིས་ཀྱང་རྣམ་པར་གཞིག་པར་བྱ་བའི་ཕྱིར་རྟུལ་བར་མི་བྱེད་དོ། །རིགས་ཀྱི་བུ། གང་གིས་ལུང་བསྟན་པ་ཆེན་པོ། ཏིང་ངེ་འཛིན་ཐམས་ཅད་མངོན་པར་སྒྲུབ་པ། སྡང་བ་ཐམས་ཅད་ཕྱིར་ཟློག་པར་བྱེད་པ་འདི་ཐོས་ནས་སྡིག་པའི་སེམས་ཕྱིར་ཟློག་པར་མི་བྱེད་པ་དང ། ཉེས་པར་བྱས་པའི་ལས་སྤོང་བར་མི་བྱེད་པ་ནི། ལྷ་དང་བཅས་པའི་འཇིག་རྟེན་ནས་སྐྱེ་རྒུའི་བར་ལ་ངས་ཡང་དག་པར་རྗེས་སུ་མ་མཐོང་སྟེ། སྔོན་གྱི་ཤ་འཁོན་དང་འདྲེས་པ་ནི། མ་གཏོགས་སོ། །ཀྱེ་བཅོམ་ལྡན་འདས་ཀྱིས་ལུང་བསྟན་པ་འདི་བཤད་པ་ན་འཁོར་དེའི་ནང་ནས་ལྷ་དང །
378a
༄#། །ཀླུ་དང ། གནོད་སྤྱིན་དང ། སྲིན་པོ་དང ། ཡི་དྭགས་དང ། གྲུལ་བུམ་དང ། ཤ་ཟ་དང ། མི་དང ། མི་མ་ཡིན་པ་གང་དག་བཅོམ་ལྡན་འདས་ལ་མངོན་པོར་དད་པ་དེ་དག་ཐམས་ཅད་བཅོམ་ལྡན་འདས་ལ་ཤིན་ཏུ་དགའ་བ་དང ། མཆོག་ཏུ་དགའ་བ་དང ། རབ་ཏུ་དད་པ་སྐྱེས་སོ། །ཡང་དེའི་ཚེ་བཅོམ་ལྡན་འདས་ཀྱི་རྫུ་འཕྲུལ་གྱི་མཐུས་བདུད་སྡིག་ཅན་བདག་ཉིད་ཀྱིས་རང་གི་གནས་སུ་ཏིང་ངེ་འཛིན་མངོན་པར་སྒྲུབ་པ་འདི་ཐོས་སོ། །ཐོས་ནས་ཀྱང་བཅོམ་ལྡན་འདས་ལ་ཤིན་ཏུ་དགའ་བ་དང ། དད་པ་དང ། གུས་པ་སྐྱེས་ནས་མཆི་མ་དག་བྱུང་སྟེ་འཁོར་རྣམས་ལ་འདི་སྐད་ཅེས་སྨྲས་སོ། །ངའི་ཚིག་ཉོན་ཅིག་།འདི་ནི། དྲང་སྲོང་ཐུབ་པ་རྒྱལ་བའི་མཆོག་བཟོད་པ་དང ། ཡོན་ཏན་དང ། ངེས་པའི་ཚིག་རབ་མཆོག་ཅན་དེ་སྲིན་བུས་གང་བའི་རིའི་གནས་དམ་པ་ལ་འབར་བ་ལ་ལག་འགྲོ་ཆེན་པོ་དང ། ལྷ་རྣམས་ཀྱིས་བཟོད་པའི་དུས་བསྟན་ཏེ། ངའང་དེར་འགྲོ་ཞིང་མཉམ་པ་མེད་པའི་དགེ་སྦྱོང་ལ་བཟོད་པར་གསོལ་ལོ། །དེ་ཉིད་ལ་སྐྱབས་སུ་འགྲོའོ། །མཚུངས་པ་མེད་པའི་སྙིང་བརྩེ་བ་རྣམ་པ་སྣ་ཚོགས་དང་ལྡན་པ་རྒྱལ་བ་བཟོད་པ་ཅན་དེ་ལ་སྐྱབས་སུ་འགྲོ་བ་ནི། ང་དང་ལྷན་ཅིག་འདོང་བར་བྱོས་ཤིག་།དེའི་ཆོས་བསྟན་དུ་མེད་པ་ཉོན་ཅིག་།ཉོན་མོངས་པའི་དྲ་བ་ཆོད་ཅིག་།རྡུལ་མེད་ཅིང་འཇིགས་པ་མེད་པའི་གྲོང་ཁྱེར་དུ་འཇུག་པར་བྱོས་ཤིག་།དེ་ནས་བདུད་
378b
སྡིག་ཅན་འཁོར་བྱེ་བ་ཕྲག་བརྒྱད་ཅུ་དང་ལྡན་པས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ཏེ་འདི་སྐད་ཅེས་གསོལ་ཏོ། །ཞེས་བྱ་བའི་བར་དུའོ། །རྐང་གཉིས་དམ་པ་ཤིན་ཏུ་ཞི་མཛད་པ། །བཟོད་སྟོབས་དེས་མཐུ་ཅན་ལ་བཟོད་པར་གསོལ། །ཁྱོད་ཀྱི་ཡོན་ཏན་བདག་གིས་ཀུན་དུ་འཚལ། །བདག་གིས་ལོག་པ་གང་བགྱིས་དེ་བཟོད་གསོལ། །དུས་གསུམ་རྒྱལ་བ་ཀུན་ལ་བདག་ཕྱག་འཚལ། །ཆོས་དང་དགེ་འདུན་ལ་ཡང་བདག་སྐྱབས་མཆི། །བླ་མ་བདག་གི་ནོངས་པར་གཟུང་དུ་གསོལ། །སླན་ཆད་ཁྱོད་ལ་བདག་འཁྲུག་ཡོང་མི་བགྱིད། །དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །ང་ལ་ཁྲོ་མེད་ཉོན་མོངས་ཐམས་ཅད་མེད། །རྟག་ཏུ་སེམས་ཅན་ཀུན་ལ་སེམས་སྙོམས་ཏེ། །བདུད་ཁྱོད་ལ་ནི་སེམས་ཀྱང་དགའ་བ་ཡིན། །རྒྱལ་བ་བཟོད་པའི་ཐུགས་ལྡན་རྟག་ཏུ་བཟོད། །དེ་ནས་བདུད་སྡིག་ཅན་མཆོག་ཏུ་དགའ་བ་དང་དད་པ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་འབའ་ཞིག་ལ་བལྟ་ཞིང་འདུག་གོ་།དེ་ནས་འཁོར་དེའི་ནང་ནས་བདུད་ཀྱི་བུ་འོད་འཕྲོ་རྩུབ་ཅེས་བྱ་བ་བདུད་ཀྱི་ཡུལ་ཐམས་ཅད་དང་ལྷན་ཅིག་ཏུ་བཅོམ་ལྡན་འདས་ཀྱི་ཞབས་གཉིས་ལ་ཕྱག་བཙལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། མིག་མིག་
379a
༄#། །ཅེས་བགྱི་བ་ལགས་ན། བཙུན་པ་བཅོམ་ལྡན་འདས། ཅི་གཟུགས་རྣམས་ཀྱི་རྒྱུ་མིག་ལགས་སམ། འོན་ཏེ་མིག་གི་རྒྱུ་གཟུགས་རྣམས་ལགས་པ་ནས་ཅི་ཆོས་རྣམས་ཀྱི་རྒྱུ་ཡིད་ཀྱི་ཁམས་ལགས་སམ། འོན་ཏེ་ཡིད་ཀྱི་རྒྱུ་ཆོས་རྣམས་ཀྱི་བར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གཟུགས་རྣམས་ཀྱི་རྒྱུའང་མིག་མ་ཡིན་ལ།་མིག་གི་རྒྱུའང་གཟུགས་རྣམས་མ་ཡིན་པ་ནས་ཆོས་རྣམས་ཀྱི་རྒྱུའང་ཡིད་མ་ཡིན་ལ། ཡིད་ཀྱི་རྒྱུའང་ཆོས་རྣམས་ཀྱི་བར་མ་ཡིན་ནོ། །རིགས་ཀྱི་བུ། འོན་ཀྱང་མིག་ནི། མིག་གིས་སྟོང་པའོ། །དེ་ལྟ་མོད་ཀྱི། མིག་ལ་རྟེན་ཅིང་མིག་གི་རྣམ་པར་ཤེས་པ་སྐྱེའོ། །དེའི་རྐྱེན་གྱིས་གཟུགས་རྣམས་རབ་ཏུ་ཤེས་པ་ནས་ཡིད་ཀྱི་རྐྱེན་གྱིས་ཡིད་ཀྱི་རྣམ་པར་ཤེས་པ་སྐྱེའོ།། དེའི་རྐྱེན་གྱིས་ཆོས་རྣམས་ཀྱི་བར་རྣམ་པར་ཤེས་པའོ། །མིག་གི་རྣམ་པར་ཤེས་པ་དམིགས་ནས་གང་ནས་ཀྱང་འོང་བ་མེད་དོ། །གང་དུའང་འགྲོ་བ་མེད་དོ། །མིག་ཕྱི་ན་སྡོད་པའང་མེད་དེ།་དུས་གསུམ་དུ་གཏོགས་པ་ཐམས་ཅད་ལ་གང་ལའང་མི་དམིགས་སོ། །མིག་ལ་འབྲི་བ་ཉིད་མེད་དོ། །གང་བ་ཉིད་མེད་དོ། །བརྡ་མེད་དོ། །ཐ་སྙད་མེད་དོ། །ཡང་དག་པར་འདུ་བ་མེད་དོ། །གཞི་མེད་དོ། །དཔེར་ན། སྔ་དྲོའི་དུས་སུ་ཉི་མ་ཤར་བ་ན་སྐར་ཁུང་གང་དང་གང་དུ་ཉི་མའི་འོད་ཟེར་དག་ཞུགས་པ་ནི། རཝ་བ་ལ་གནས་པ་དག་ཏུ་ཡང་དག་
379b
པར་སྣང་ངོ ། །རཝ་བ་ལ་མུན་པ་དང ། སྣང་བ་དང ། རྟོག་པའང་མེད་དོ། །རཝ་བ་གང་ཡིན་པ་དེ་ཉིད་སྣང་བའང་མ་ཡིན་ནོ། །རཝ་བའི་རྐྱེན་གྱིས་སྣང་བའང་མ་ཡིན་ཏེ། འོན་ཀྱང་དེ་ལ་སྣང་པའང་ཡོད་དོ། །སྣང་བ་གང་ཡིན་པ་དེ་ཉིད་ཉི་མ་དང ། ཉི་མ་གང་ཡིན་པ་དེ་ཉིད་སྣང་བའང་མ་ཡིན་ནོ། །ཉི་མ་ནུབ་པ་ན་སྣང་བའང་མེད་པར་འགྱུར་རོ། །གང་ནའང་སྣང་བའི་འགྲོ་བ་དང ། གཞི་མེད་དེ། འོན་ཀྱང་ཉི་མའི་རྐྱེན་གྱིས་སྣང་བར་རབ་ཏུ་ཤེས་ཤིང་གཟུགས་ཀྱི་སྣང་བ་ལ་རྟེན་པར་ཡང་སྣང་ངོ ། །དེ་བཞིན་དུ་ནང་གི་སྐྱེ་མཆེད་དྲུག་པོ་དེ་དག་གི་རྒྱུའང་ནང་གི་སྐྱེ་མཆེད་དྲུག་པོ་དེ་དག་ཡིན་ནོ། །ཞེས་བྱ་བའི་བར་དུའོ། །ནང་གི་སྐྱེ་མཆེད་རྣམས་ཀྱི་རྒྱུའང་ཕྱི་རོལ་གྱི་སྐྱེ་མཆེད་རྣམས་མ་ཡིན་ཏེ། ཕན་ཚུན་དུ་བསྡུས་པ་ཉིད་ཀྱི་ཕྱིར་རོ། །བསྡུས་པ་ལ་ནི། རྣམ་པར་རྒྱུ་བ་མེད་དོ། །ཡང་དག་པར་འདུ་བ་མེད་དོ། །གཞི་མེད་དོ། །ཕྱི་དང་ནང་གི་སྐྱེ་མཆེད་རྣམས་ལ་རྣམ་པར་ཤེས་པའི་བར་དང ། བརྡ་དང ། རྣམ་པར་རྒྱུ་བ་མེད་དོ། །ཡང་དག་པར་འདུ་བ་མེད་དོ། །གཞིའང་མེད་པ་ཉིད་དེ། ཕན་ཚུན་དུ་བསྡུས་པ་ཉིད་ཀྱི་ཕྱིར་དང ། ཡུལ་མ་ཡིན་པའི་ཕྱིར་རོ། །འོན་ཀྱང་རྣམ་པར་ཤེས་པས་རྣམ་པར་ཤེས་པར་བྱེད་དེ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པས་རྣམ་པར་ཤེས་པའང་འདུ་བྱེད་ཀྱི་རྒྱུ་ལགས་སོ། །འདུ་བྱེད་རྣམས་ནི། གསུམ་སྟེ། ལུས་ཀྱི་འདུ་བྱེད་དང ། ངག་གི་འདུ་བྱེད་དང ། ཡིད་
380a
༄#། །ཀྱི་འདུ་བྱེད་དོ། །དེ་ལ་ལུས་ཀྱི་འདུ་བྱེད་རྣམས་གང་ཞེ་ན། ལུས་ཀྱི་འདུ་བྱེད་རྣམས་ཞེས་བྱ་བ་ནི། དབུགས་རྡྔུབ་བ་དང ། འབྱུང་བ་དག་ཡིན་ཏེ། དེ་དག་ནི། ལུས་ཀྱི་འདུ་བྱེད་རྣམས་སོ། །དབུགས་རྔུབ་པ་དང ། འབྱུང་བ་དག་ཀྱང་ཡན་ལག་རྣམས་ལེན་པ་སྟེ། མི་མཉམ་པ་དང་མཉམ་པ་ཉིད་ཀྱི་ཕྱིར་དང ། མ་ནོར་བ་དེ་བཞིན་ཉིད་ཀྱི་ཕྱིར་གཞན་གང་ཡང་རུང་བའི་སྐལ་པ་མི་མཉམ་པ་ཉིད་དང ། གསར་པ་གསར་པ་དང ། རྙིང་པ་མེད་པ་ཉིད་དང ། རྣམ་པར་མི་གནས་པའི་མཚན་ཉིད་དང ། ནམ་མཁའ་དང་མཉམ་པ་དང ། ནམ་མཁའ་ལ་ཀུན་ཏུ་རྒྱུ་བ་དག་ཡིན་ནོ། །རླུང་གང་ཡིན་པ་དེ་ནི། ནམ་མཁའ་མ་ཡིན་ནོ། །ནམ་མཁའ་གང་ཡིན་པ་དེ་ཉིད་ཀྱང་རླུང་མ་ཡིན་ཏེ། ཕན་ཚུན་དུ་འདྲེས་པ་ཡིན་ལ་ཕན་ཚུན་སྤྱོད་ཡུལ་ནི། མ་ཡིན་ནོ། །གཉིག་སྟོང་པ་དང ། བརྗོད་དུ་མེད་པ། མཚན་ཉིད་དང་བྲལ་བ་དགྲ་ཡིན་ནོ། །འབྲི་བ་དང ། གང་བ་མེད་པ་དག་ཡིན་ནོ། །ཕ་རོལ་དང་ཚུ་རོལ་ལ་གནས་པ་དང ། ཡང་དག་པའི་མཐའ་ཡང་དག་པར་འཕགས་པ་ནི། ལུས་ཀྱི་འདུ་བྱེད་རྣམས་ཡིན་ཏེ། དེ་ལ་བསན། རྣམ་པར་ཤེས་པ་ལ་ལུས་ཀྱི་འདུ་བྱེད་རྣམས་གནས་པ་མ་ཡིན་ཏེ། ཚོགས་པ་མེད། རྣམ་པར་རྒྱུ་བ་མེད། ཡང་དག་པར་འདུ་བ་མེད་པ། གཞི་དང་ཡང་དག་པའི་རྗེས་སུ་འབྲེལ་བ་མེད་དོ། །རྣམ་པར་ཤེས་པ་གཞི་དང་ཡང་དག་པར་
380b
རྗེས་སུ་འབྲེལ་བའོ། །ཞེས་བྱ་བའི་བར་ཡང་དེ་བཞིན་ནོ། །དེ་ལ་ངག་གི་འདུ་བྱེད་རྣམས་ཞེས་བྱ་བ་གང་ཞེ་ན། རྟོག་པ་དང ། དཔྱོད་པ་རྣམས་སོ། རྟོག་པ་རྣམས་གནག་ཞེ་ན། གནག་དག་དབུགས་ཆུབ་པ་དང ། འཇུག་པར་བྱེད་པ་དང ། འབྱུང་བར་བྱེད་པ་རྣམས་ཏེ། སེམས་ཀྱིས་རྗེས་སུ་མཐུན་པར་བྱས་པ་དག་ཡིན་ནོ། །དེ་ལ་རྟོག་པར་ནམས་ཀྱིས་རྟོག་པར་བྱེད་པ་ནས་འཇིག་པའི་མཚན་ཉིད་རྣམས་ཀྱིས་རྟོག་པར་བྱེད། ཡོངས་སུ་དག་པ་ལ་རྟོག་པར་བྱེད། རླུང་ལ་རྟེན་པའི་རྟོག་པ་དེ་དག་སྐྱེ་བར་བྱེད། འགག་པའི་བར་དུ་སྟེ། རྟོག་པའི་རླུང་རྣམས་ནི། སྐད་ཅིག་ལ་འཚལ་བ་ཡིན་ནོ། །རླུང་རྣམས་ཀྱང་རྟོག་པ་རྣམས་ཡིན་པར་མི་འགྱུར་ཏེ། གཉིས་ཀའང་ཕན་ཚུན་དུ་སྤྱོད་ཡུལ་མ་ཡིན་ཞིང་ཕན་ཚུན་དུ་མཚན་ཉིད་དང་བྲལ་བ་ནས་བརྗོད་དུ་མེད་པ་དག་དང ། ནམ་མཁའ་ལྟར་མེད་པ་དག་པའི་བར་དུའོ། །དེ་ལ་དཔྱོད་པ་རྣམས་གང་ཞེ་ན། དཔྱོད་པ་གང་དག་གྲང་བའི་རྣམ་པའམ། དྲོ་བའི་རྣམ་པར་ལུས་ཐམས་ཅད་ཀྱི་དབུགས་རྔུབ་པ་དང ། འབྱུང་བའི་རླུང་རྣམས་རྒྱུ་བར་བྱེད་པ་ཡིན་ནོ། །དཔྱོད་པ་དག་གིས་འདུས་ཏེ་རེག་པ་རྣམ་པར་མི་ཤེས་ཏེ། དཔྱོད་པ་དེ་དག་རླུང་རྣམས་དང་ཕན་ཚུན་སྤྱོད་ཡུལ་མ་ཡིན་ཏེ། ཕན་ཚུན་དུ་མཚན་ཉིད་དང་བྲལ་བ་ནས་བརྗོད་དུ་མེད་པ་དག་པའི་བར་དུའོ། །དེ་ལ་ཡིད་ཀྱི་འདུ་བྱེད་རྣམས་གང་ཞེ་ན། ཡིད་ཀྱི་འདུ་བྱེད་རྣམས་ཞེས་བྱ་བ་ནི། འདུ་ཤེས་དང ། སེམས་པའོ། །དེ་ལ་འདུ་ཤེས་གང་
381a
༄#། །ཞེ་ན།་སེམས་གང་གིས་ཆོས་དེ་དག་དེ་ལྟར་ཤེས་པ་ནས་གང་གི་ཚེ་དབུགས་རྡུབ་པ་དེའི་ཚེ་དབུགས་འབྱུང་བ་མེད་དོ། །ཞེས་བྱ་བའི་བར་དུ་སྟེ། དེ་ལྟར་འདུ་བྱེད་རྣམས་ལ་འདུ་ཤེས་རྣམ་པར་བསྒོམས་པ་ཡིན་ནོ། ཡང་དག་པར་བྱུང་ནས་ཀྱང་འདུ་བྱེད་རྣམས་ཟད་པ་ཡིན་ཏེ། རྗེས་སུ་མཐུན་པར་འདུ་ཤེས་པས་ཀྱང་འདུ་བྱེད་ཀྱི་འདུ་ཤེས་རྣམ་པར་སྒོམ་པར་བྱེད་པ་འདི་ནི།་འདུ་ཤེས་ཞེས་བྱ་སྟེ། འདུ་ཤེས་དེ་ནི། རླུང་རྣམ་ལ་བརྟེན་པ་ནས་གཉི་ག་བརྗོད་དུ་མེད་པའི་བར་དུའོ། །དེ་ལ་སེམས་པ་གནག་ཞེ་ན། སེམས་པ་གང་དག་གིས་ཞེས་བྱ་བ་ནས་འདུ་བྱེད་རྣམས་ལ་འདུ་ཤེས་རྣམ་པར་བསྒོམས་པས་ཡང་དག་པ་ཉིད་སྐྱོན་མེད་པ་ལ་ཞུགས་ཤིང་སོ་སོ་སྐྱེ་བོའི་ས་ལས་རྣམ་པར་འདས་པར་བྱེད་དོ། །ཞེས་བྱ་བའི་བར་དུ་སྟེ། སྐྱེ་བ་དང་འཇིག་པ་སྒོམ་པ་འདུ་བྱེད་རྣམས་ལས་སེམས་སེལ་བར་བྱེད་པ། རླུང་རྣམས་འཕྲོ་བར་མི་བྱེད་པ་འདི་ནི། སེམས་པ་ཞེས་བྱའོ། ། ཚོར་བ་གསུམ་སྤང་བའི་ཕྱིར་ཡེ་ཤེས་ཀྱི་རྟེན་མིག་མ་འདྲེས་པ་ཅན་ཞེས་བྱ་བ་ནས་ཡིད་མ་འདྲེས་པ་ཅན་ཞེས་བྱ་བའི་བར་དང ། འཕགས་པ་ཞེས་བྱའོ། །ཞེས་བྱ་བའི་བར་དུའོ། ། རིགས་ཀྱི་བུ། དེ་ལྟར་ཡང་གཟུགས་དམིགས་པའི་རྒྱུ་མིག་མ་ཡིན་ནོ། །མིག་གི་རྒྱུ་གཟུགས་མ་ཡིན་པ་ནས་ཆོས་རྣམས་ཀྱི་རྒྱུ་ཡིད་མ་ཡིན་ནོ། །ཡིད་ཀྱི་རྒྱུ་ཆོས་རྣམས་མ་ཡིན་
381b
པའི་བར་དུ་སྟེ། གཉིས་ཀ་ཕན་ཚུན་དུ་སྤྱོད་ཡུལ་མ་ཡིན། ཕན་ཚུན་དུ་བརྡར་བརྟགས་པ་མ་ཡིན། རྣམ་པར་རྒྱུ་བ་མ་ཡིན། ཡང་དག་པར་གནས་པ་ཡིན། ཡང་དག་པར་འདུ་བ་མ་ཡིན། བརྗོད་དུ་མེད་པ་དག་ཡིན། ཕ་རོལ་དང་ཚུ་རོལ་ལ་གནས་པ་དང ། ཡང་དག་པའི་མཐའ་ལ་ཡང་དག་པར་བརྟེན་པ་དག་ཡིན་ནོ། །ཀྱེ་ཡང་བཅོམ་ལྡན་འདས་ཀྱིས་བསྟན་པ་འདི་བཤད་པ་ན་བདུད་ཀྱི་བུ་འོད་འཕྲོ་རྩུབ་བདུད་ཀྱི་འཁྲོ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་ཉི་ཁྲི་དང་ལྷན་ཅིག་ཏུ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །དེའི་ཚེ་ལྷ་དང་མི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། སེམས་ཅན་དཔག་ཡས་པའང་བསམ་གཏན་དང་པོ་ལ་གནས་པར་གྱུར་པ་ནས་བསམ་གཏན་བཞི་པའི་བར་ཐོབ་པར་གྱུར་ཏོ། ཁ་ཅིག་ནི། འབྲས་བུ་དང་པོ་ལ་གནས་པར་གྱུར་པ་ནས་འབྲས་བུ་གསུམ་པ་ལ་གནས་པར་གྱུར་པའི་བར་དུའོ། །ཁ་ཅིག་གིས་ནི། ཉན་ཐོས་ཀྱི་ཐེག་པ་ལ་ས་བོན་བསྐྱེད་པ་ནས་རྐྱེན་གྱི་ཐེག་པ་ལ་ས་བོན་བསྐྱེད་པའི་བར་དུའོ། །ཁ་ཅིག་གིས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཀླུའི་འཁོར་དེའི་ནང་ནས་ཀྱང་ཀླུ་དཀྲིགས་ཕྲག་དྲུག་ཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོན་མ་བསྐྱེད་པའི་སེམས་བསྐྱེད་པར་གྱུར་ཏེ། །སངས་རྒྱས་ཀྱི་ཞིང་མི་མཇེད་ཐམས་ཅད་དུས་ཆེན་པོ་རྣམ་པ་དྲུག་ཏུ་རབ་ཏུ་འགུལ་ཏོ། །དེར་ཕྱོགས་བཅུ་ནས་
382a
༄#། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལྷགས་པ་དེ་དག་གིས་བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་རྣམ་པ་སྣ་ཚོགས་ཀྱིས་རབ་ཏུ་ཕྱེ་བའི་རིན་པོ་ཆེའི་ཆར་བ་དང ། རས་བཅོས་བུའི་ཆར་བ་དང ། མེ་ཏོག་གི་ཆར་པ་སྣ་ཚོགས་རབ་ཏུ་ཕབ་སྟེ་གསོལ་པ། སྔོན་མཐོས་པའི་འདུས་པ་འདི་དང ། ཏིང་ངེ་འཛིན་བསྟན་པ་འདི་ནི། མཆོག་ཏུ་ངོ་མཚར་ལགས་ཤིང་རྨད་དུ་བྱུང་བ་ལགས་སོ། །འདི་ནི། ཤཱཀྱ་ཐུབ་པའི་ཆོས་ཀྱི་འཁོར་ལོ་བསྐོར་བ་གཉིས་པ་ལགས་སོ། ། བཙུན་པ་བཅོམ་ལྡན་འདས། བདག་ཅག་གིས་ཀྱང་ཉི་མའི་སྙིང་པོ་ལུང་བསྟན་པ་ཆེན་པོ་ཤིན་ཏུ་རྒྱས་པའི་སྡེའི་མདོའི་གཟུངས་སྔགས་འདི་བཟུང་ནས་རང་རྣག་གི་སངས་རྒྱས་ཀྱི་ཞིང་རྣམས་སུ་སེམས་ཅན་རྣམས་ལ་རབ་ཏུ་བསྟན་པར་བགྱི་ལགས་སོ། །དེར་བདུད་དང ། ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་དང ། ཡི་དྭགས་དང ། ཤ་ཟ་གང་དག་ལྷགས་པ་དེ་དག་གིས་ཀྱང་མཆོག་ཏུ་ངོ་མཚར་ཐོབ་ནས་སིལ་སྙན་རྣམ་པ་སྣ་ཚོགས་ཀྱི་སྒྲ་འབྱིན་པར་བྱེད་ཅིང་བཅོམ་ལྡན་འདས་ལ་རིན་པོ་ཆེ་སྣ་ཚོགས་དང ། རས་བཅོས་སུ་དང ། ཆོས་གོས་དང ། རྒྱན་དང ། མེ་ཏོག་དང ། ཕྲེང་བ་དང ། དྲི་དང ། བྱུག་པ་
382b
སྣ་ཚོགས་ཀྱིས་མཆོད་པ་བྱས་སོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོ་རྒྱ་མཚོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ལ་ཐུགས་བརྩེ་བ་ཉེ་བར་བཟུང་སྟེ་བདག་གི་གནས་སུ་རྒྱ་མཚོ་ཆེན་པོར་བསོད་སྙོམས་ལ་གཤེགས་པར་གསོལ། དེར་བཅོམ་ལྡན་འདས་ལས་བདག་འཁོར་དང་བཅས་པས་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཐོག་མ་དང ། པར་དང ། ཐ་མ་འདི་ཐམས་ཅད་མཉན་པར་བགྱི་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། དེ་དེ་བཞིན་གཤེགས་པ་རྒྱ་མཚོ་ཆེན་པོར་མི་གཤེགས་སོ། །གསོལ་པ། བཙུན་པ་བཅོམ་ལྡན་འདས། སུ་ཞིག་སེམས་རྩེ་གཅིག་པས་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཉན་པར་བགྱིད་པའི་རིགས་ཀྱི་བུའམ་རིགས་ཀྱི་བུ་མོས་བསོད་ནམས་མང་པོ་ཇི་སྙེད་ཅིག་སྐྱེད་པར་བགྱིད་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། སེམས་ཅན་སུ་ལ་ལ་ཞིག་བྱུང་ནས་གླིང་བཞི་པ་འདི་ཐམས་ཅད་རིན་པོ་ཆེ་ཐམས་ཅད་ཀྱིས་ཡོངས་སུ་གནག་བར་བྱས་ནས་དེ་བཞིན་གཤེགས་པ་རྣམས་ལ་སྦྱིན་པ་བྱིན་པར་བྱེད་པ་དང ། སྐྱེས་བུ་གཅིག་ཤོས་སུ་ཞིག་སེམས་རྩེ་གཅིག་པས་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཐམས་ཅད་ཡོངས་སུ་རྫོགས་པར་ཉན་པར་བྱེད་ན། བསོད་ནམས་ཀྱི་ཕུང་པོ་སྔ་མ་དེས་ནི། བསོད་ནམས་ཀྱི་ཕུང་པོ་གཅིག་ཤོས་འདི་ལ་བརྒྱའི་ཆར་ཡང །
383a
༄#། །ཉེ་བར་མི་འགྲོའོ། །སྟོང་གི་ཆ་དང ། བྱེ་བ་བརྒྱ་ཕྲག་སྟོང་གི་ཆ་དང ། གྲངས་དང ། ཆ་དང ། དཔེ་དང ། རྒྱུར་ཡང་མི་བཟོད་དོ། །ལག་འགྲོའི་བདག་པོ། ཉི་མའི་སྙིང་པོ་འདི་ཐོས་པ་ཙམ་གྱི་བསོད་ནམས་ཀྱི་ཕུང་པོའང་དེ་ལྟར་ཟབ་པ་ཡིན་ནོ། །གསོལ་པ། བཙུན་པ་བཅོམ་ལྡན་འདས། གལ་ཏེ་ང་རྒྱ་མཚོ་ཆེན་པོར་མི་གཤེགས་ལགས་ན། བདག་གིས་ཀྱང་ཉི་མའི་སྙིང་པོ་ལུང་བསྟན་པ་ཆེན་པོ་འདི་མཉན་ནས་ཡི་གེར་བྲིས་ཏེ་བཅང་བར་བགྱི་ལགས་ན། རྒྱ་མཚོ་ཆེན་པོར་དགེ་བའི་ཆོས་ཇི་སྙེད་ཅིག་རྣམ་པར་འཕེལ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ། གང་དང་གང་དུ་ཉི་མའི་སྙིང་པོ་ལུང་བསྟན་པ་ཆེན་པོ་ཐམས་ཅད་བྲིས་ནས་འཆང་བར་འགྱུར་བ་དེ་དང་དེ་ཉིད་དུ་ཕན་ཡོན་བཅུ་འབྱུང་ངོ ། །བཅུ་གང་ཞེ་ན། ཁྱིམ་དེ་དང་དེ་ཞེས་བྱ་བ་ནས་ཡུལ་ཞེས་བྱ་བའི་བར་དེར་ནོར་དང ། འབྲུ་དང ། ཉེ་བར་སྤྱོད་པ་དང ། ལོངས་སྤྱོད་མང་པོ་དང ། རིན་པོ་ཆེ་རྣམ་པ་སྣ་ཚོགས་མ་ཚང་བ་མེད་པར་འགྱུར་རོ། །གཞན་ཡང་ཁྱིམ་མམ་ཡུལ་གང་ན་ཉི་མའི་སྙིང་པོ་ལུང་བསྟན་པ་ཆེན་པོ་འདི་བྲིས་ནས་མཆོད་པར་འགྱུར་བ་དེ་དང་དེར་མཆོད་རྟེན་ཆེན་པོ་དེ་དག་ནས་གང་དག་དེ་ལ་མཆོད་པ་བྱ་བའི་ཕྱིར་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་པོ་དེ་དག་གིས་
383b
ཀྱང་བལྟ་བ་དང ། ཕྱག་བྱ་བ་དང ། མཆོད་པ་བྱ་བ་དང ། བསྙེན་བཀུར་བྱ་བའི་ཕྱིར་ལྷགས་ནས་དེར་འཐབ་པ་དང ། འཐབ་མོ་དང ། མི་ངས་དང ། ནད་དང ། མུ་གེ་དང ། དམག་ཚོགས་གཉིས་ཀ་དང ། དུས་མ་ཡིན་པའི་རླུང་དང ། ཆར་པ་དང ། ནད་རྣམ་པ་སྣ་ཚོགས་རབ་ཏུ་ཞི་བར་བྱེད་དོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་པོ་དེ་དག་ཐམས་ཅད་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་བཞིན་དུ་བགྱི་ལགས་སོ། །ཁྱིམ་མམ་ཞེས་བྱ་བ་ནས་ཡུལ་འཁོར་གྱི་བར་གང་ན་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཡི་གེར་བྲིས་ཤིང་མཆོད་པར་འགྱུར་བ་དེར་བདག་ཅག་གིས་འཐབ་པ་དང ། འཐབ་མོ་དང ། མི་ངས་དང ། ནད་དང ། མུ་གེ་དང ། དམག་ཚོགས་གཉིས་ཀ་དང ། དུས་མ་ལགས་པའི་རླུང་དང ། ཆར་པ་སྣ་ཚོགས་རབ་ཏུ་ཞི་བར་བགྱིད་ལགས་སོ། །བཀའ་སྩལ་པ། གཞན་ཡང་ཁྱིམ་མམ་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་གང་ན་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཡི་གེར་བྲིས་པར་འགྱུར་བའི་ཡུལ་འཁོར་ཞེས་བྱ་བའི་བར་དེར་བརྒྱ་བྱིན་དང ། ཚངས་པ་དང ། རྒྱལ་པོ་ཆེན་པོ་བཞི་དང ། གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་འཁོར་དང་བཅས་པ་དང ། ལྷ་མོ་ཆེན་མོ་དཔལ་དང ། ལྷ་མོ་ཆེན་མོ་དབྱངས་ཅན་དང ། སའི་ལྷ་མོ་བསྟན་མ་དང ། སྨན་གྱི་ལྷ་མོ་
384a
༄#། །གྲུབ་པ་འཁོར་དང་བཅས་པས་ཁྱིམ་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དེ་རྟག་པར་རྒྱུན་དུ་ཉིན་མཚན་དུ་སྲུང་བར་འགྱུར་རོ། །ཡོངས་སུ་སྐྱོང་བར་འགྱུར་རོ། །དེའི་ཚེ་བརྒྱ་བྱིན་དང ། ཚངས་པ་ཞེས་བྱ་བ་ནས་སྨན་གྱི་ལྷ་མོ་གྲུབ་པ་ཞེས་བྱ་བའི་བར་འཁོར་དང་བཅས་པས་ཀྱང་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བཞིན་དུ་བགྱི་ལགས་སོ། །ཞེས་བྱ་བ་ནས་གཞན་ཡང་ཞེས་བྱ་བའི་བར་དུ་སྟེ། ཁྱིམ་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་གང་ན་ཞེས་བྱ་བ་ནས་ཁྱིམ་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དེ་དང་དེར་སངས་རྒྱས་མང་པོ་ལ་བསྙེན་བཀུར་བྱས་པ། དབང་ཆེ་བར་གྲགས་པ། དབང་ཆེ་བར་གྲགས་པ་སྦྱིན་པ་དང ། དུལ་བ་དང ། ཡང་དག་པར་སྡོམ་པ་ཕུན་སུམ་ཚོགས་པ་རྣམས་སྐྱེ་བ་མེད་པར་བྱེད་དོ། །གཞན་ཡང་ཁྱིམ་དེ་དང་དེར་སེམས་ཅན་རྣམས་འདོད་པའི་ཡོན་ཏན་ལྔ་ལ་མ་ཆགས་པ་དང ། རྟག་ཏུ་སྦྱིན་པའི་ཕ་རོལ་ཏུ་ཕྱིན་པ་ལ་བརྩོན་པར་འགྱུར་རོ། །ཞེས་བྱ་བའི་བར་དུའོ། །གཞན་ཡང་སྣོད་དུ་གྱུར་བའི་སྦྱིན་གནས་དེ་དག་ཉིད་ལ་མངོན་པར་དགའ་བར་འགྱུར་རོ། །གཞན་ཡང་དེར་རྟག་པར་རྒྱུན་དུ་ཆོས་ཀྱི་རོ་རྣམ་པ་སྣ་ཚོགས་ཀྱི་ཆར་པས་ཁྱབ་པར་འགྱུར་རོ། །ཞེས་བྱ་བའི་བར་དུའོ། །གཞན་ཡང་དེར་སེམས་ཅན་རྣམས་རྟག་ཏུ་དགེ་བ་བཅུའི་ལས་ཀྱི་ལམ་ཡང་
384b
དག་པར་བླང་བ་ལ་མངོན་པར་བརྩོན་པར་འགྱུར་རོ། །གཞན་ཡང་དེར་སེམས་ཅན་རྣམས་རྟག་ཏུ་བྱམས་པའི་སེམས་དང་ལྡན་པ་དང ། སྙིང་རྗེའི་སེམས་དང་ལྡན་པ་དང ། འདོད་ཆགས་དང ། བྲལ་བའི་སེམས་དང་ལྡན་པར་འགྱུར་རོ། །གཞན་ཡང་ཁྱིམ་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དེ་དང་དེ་དག་ཏུ་སེམས་ཅན་རྣམས་ངན་སོང་གསུམ་སྤངས་པ་དང ། མཐོ་རིས་སུ་སྐྱེ་བར་འགྱུར་རོ། །ལག་འགྲོའི་བདག་པོ། དེ་ལ་ཁྱིམ་དག་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དུ་ང་ལ་མཆོད་པ་བྱ་བའི་ཕྱིར་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཡི་གེར་བྲིས་ཤིང་ཡང་དང་ཡང་ཀློག་པའི་ཁྱིམ་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དུ་དེར་ཕན་ཡོན་དེ་དག་འབྱུང་བར་འགྱུར་ན། གང་དག་འདོན་པར་བྱེད་པ་དང ། ཆོས་དེ་དག་ལ་ཡང་དག་པར་སྣང་བར་བྱེད་པ་དང ། ཆོས་ཀྱི་གནས་པས་གནས་པར་བྱེད་པ་ལ་ལྟ་སྨོས་ཀྱང་ཅི་དགོས། བསོད་ནམས་ཀྱི་ཕུང་པོ་དེ་ནི། ངས་བསྐལ་པ་བརྒྱར་ཡང་བསྟན་པར་སླ་བ་མ་ཡིན་ཏེ།་ལག་འགྲོའི་བདག་པོ། ཉི་མའི་སྙིང་པོ་ལུང་བསྟན་པ་ཆེན་པོ་འདི་ནི། དེ་ལྟར་ཟབ་བོ། །ཉི་མའི་སྙིང་པོ་ལུང་བསྟན་པ་ཆེན་པོ་འདི་ནི། དེ་ལྟར་ཡོན་ཏན་ཆེ་བའོ། །དེ་ལྟར་ཕན་ཡོན་ཆེ་བའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང །
385a
༄#། །བདུད་དང ། ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་དང ། ཡི་དྭགས་དང ། ཤ་ཟ་དང ། སྲུལ་པོ་དང ། མི་དང ། མི་མ་ཡིན་པ་དེ་དག་ཡིད་རངས་ཤིང་རབ་ཏུ་དགའ་ལ། དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ལས། ཉི་མའི་སྙིང་པོའི་ལེའུ་བཅུ་གཉིས་པ་རྫོགས་སོ།། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ་རྫོགས་སོ།། །།རྒྱ་གར་གྱི་མཁན་པོ་སརྦ་ཛྙཱ་དེ་བ་དང ། བིདྱཱ་ཀ་ར་པྲ་བྷ་དང ། དྷརྨཱ་ཀ་ར་དང ། ལོ་ཙྪ་བ་བནྡྷེ་བཟང་སྐྱོང་གིས་བསྒྱུར། ཞུ་ཆེན་གྱི་ལོ་ཙྪ་བ་བནྡྷེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ།