།།རྒྱ་གར་ 413b སྐད་དུ། ཨཱརྱ་ཤྲཱི་གུཔྟ་ནཱ་མ་སཱུ་ཏྲ། བོད་སྐད་དུ། འཕགས་པ་དཔལ་སྦས་ཞེས་བྱ་བའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་དང ། རྒྱལ་པོ་དང ། བློན་པོ་རྣམས་དང ། བྲམ་ཟེ་དང ། ཁྱིམ་བདག་རྣམས་དང ། མུ་སྟེགས་ཅན་སྣ་ཚོགས་དགེ་སྦྱོང་དང ། བྲམ་ཟེ་དང ། སྤྱོད་པ་ཅན་དང ། ཀུན་ཏུ་རྒྱུ་རྣམས་དང ། ལྷ་རྣམས་དང ། ཀླུ་རྣམས་དང ། གནོད་སྦྱིན་རྣམས་དང ། དྲི་ཟ་རྣམས་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་ཀྱིས་བཅོམ་ལྡན་འདས་ལ་བསྟི་སྟང་དུ་བྱས། བླ་མར་བྱས། རིམ་གྲོ་བྱས་ཏེ་མཆོད་ནས། བཅོམ་ལྡན་འདས་ཀྱིས་ལྷ་དང ། མིའི་ན་བཟའ་དང ། ཞལ་ཟས་དང ། གཟིམས་ཆ་དང ། སྙུན་གསོས་སྨན་དང ། ཡོ་བྱད་བཟང་པོ་མང་པོ་བརྙེས་པ། པདྨ་ལ་ཆུ་མི་ཆགས་པ་བཞིན་དུ་འདོད་པ་དག་གིས་ཀྱང་བཅོམ་ལྡན་འདས་ལ་མི་གོས་ཏེ། འདི་ལྟར་བཅོམ་ལྡན་འདས། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་ 414a ༄#། །དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཞེས་བྱ་བར་བཅོམ་ལྡན་འདས་ཀྱི་བརྗོད་པ་དང ། སྒྲ་དང ། ཚིགས་སུ་བཅད་པ་དགེ་བ་འདི་ལྟ་བུ་འདི་མངོན་པར་འཕགས་པར་གྱུར་ཏོ།། དེས་ལྷ་དང་བཅས་པའི་འཇིག་རྟེན་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང ། བྲམ་ཟེར་བཅས་པའི་སྐྱེ་དགུ་དང ། ལྷ་དང ། མིར་བཅས་པའི་སྐྱེ་དགུ་རང་གི་མངོན་པར་མཁྱེན་པས་མངོན་དུ་མཛད་དེ་རྫོགས་པར་མཛད་ནས་མཁྱེན་ཏོ། །དེ་ཆོས་ཀྱང་སྟོན་ཏེ་ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་སྟོན་ཏོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནི་ཁྱིམ་བདག་དཔལ་སྦས་ཞེས་བྱ་བ་ཕྱུག་པ། ནོར་ཆེན་པོ། ལོངས་སྤྱོད་ཆེ་བ། བདག་དབང་བ་མང་བ། ནོར་དང ། ཡོ་བྱད་མང་བ། ནོར་དང ། འབྲུ་དང ། འཚོག་ཆས་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་དང ། དངུལ་དང ། ས་ལེ་སྦྲམ་མང་བ། གླང་པོ་ཆེ་དང ། 414b རྟ་ཕོ་རྒོད་དང ། བ་ལང་མང་བ། བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། བང་མཛོད་གང་བ་མང་པོ་དང་ལྡན་པ་ཞིག་གནས་ཏེ། ཁྱིམ་བདག་དཔལ་སྦས་དེ་མ་དད་པ། མ་དང་བ། སངས་རྒྱས་དང ། ཆོས་དང ། དགེ་འདུན་ལ་དབང་ཟ་བ། གཅེར་བུ་པའི་ཉན་ཐོས་སུ་གྱུར་པ་གཅེར་བུ་པ་ཉེ་དུའི་བུ་ཞེས་བྱ་བ་ལ་མངོན་པར་དད་པ་ཞིག་གོ་།དེ་ནས་ཁྱིམ་བདག་དཔལ་སྦས་གཅེར་བུ་པ་ཉེ་དུའི་བུ་ག་ལ་བ་དེར་སོང་སྟེ་ཕྱིན་ནས། གཅེར་བུ་པ་ཉེ་དུའི་བུའི་རྐང་པ་ལ་ཕྱག་བཙལ་ཏེ་ཕྱོགས་གཅིག་ཏུ་འདུག་གོ་།ཁྱིམ་བདག་དཔལ་སྦས་ཕྱོགས་གཅིག་ཏུ་འདུག་ནས་གཅེར་བུ་པ་ཉེ་དུའི་བུས་ཁྱིམ་བདག་དཔལ་སྦས་ལ་འདི་སྐད་ཅེས་སྨྲས་སོ། །ཁྱིམ་བདག་།གང་དགེ་སྦྱོང་གཽ་ཏ་མ་ན་ཚོད་ཀྱིས་གཞོན་པ། གསར་དུ་རབ་ཏུ་བྱུང་བ་དེ་ཐམས་ཅད་མཁྱེན་པའི་ང་རྒྱལ་ཅན་ཏེ། ཐམས་ཅད་མཁྱེན་པའི་ང་རྒྱལ་དེས་འཇིག་རྟེན་འདི་ཐམས་ཅད་བསླུས་པར་ཤེས་པར་གྱིས་ཤིག་།དེའི་ཕྱིར་ཁྱིམ་བདག་ཁྱོད་སོང་ལ་དགེ་སྦྱོང་གཽ་ཏ་མ་དེའི་སྲོག་ཆོད་ཅིག་།དེ་འཆི་བའི་དུས་བྱས་ཏེ་ཤི་བ་དང ། དགེ་སྦྱོང་གཽ་ཏ་མ་དེ་ཙམ་དུ་རྫུ་འཕྲུལ་ཆེ་བ། དེ་ཙམ་དུ་མཐུ་ཆེ་བ། དེ་ཙམ་དུ་དབང་ཆེ་བར་གྲགས་པ་ཁྱིམ་བདག་དཔལ་སྦས་ཀྱིས་སྲོག་བཅད་དོ་ཞེས་ཁྱོད་ཀྱི་བརྗོད་པ་དང ། སྒྲ་དང ། ཚིགས་སུ་བཅད་པ་དགེ་བ་བརྒྱ་ཆེན་པོ་འདི་ལྟ་བུ་འདི་མངོན་པར་གྲགས་པར་འགྱུར་རོ།། 415a ༄#། །དཔལ་སྦས་ཀྱིས་སྨྲས་པ། བཙུན་པ། བདག་གིས་དགེ་སྦྱོང་གཽ་ཏ་མའི་སྲོག་བཅད་པར་ཇི་ལྟར་ནུས། གཅེར་པུ་བ་ཉེ་དུའི་བུས་སྨྲས་པ། ཁྱིམ་བདག་ཁྱོད་སོང་ལ་ཕྱི་སྒོའི་སྒོ་ཁང་དུ་དོང་ཆེན་པོ་རྐོས་ཤིག་།དོང་ཆེན་པོ་བརྐོས་ནས་མེས་ཁོང་ལ་སྟེང་དུ་ཕྱག་དར་སྲབ་མོས་ཁོབས་ཤིག་།ཁྱིམ་གྱི་ནང་དུ་ཟས་དུག་ཅན་སྦྱོར་ལ།་ཟས་དུག་ཅན་སྦྱར་ནས་དགེ་སྦྱོང་གཽ་ཏ་མ་དེའི་གན་དུ་སོང་སྟེ་ཟས་ལ་བོས་ཤིག་།གལ་ཏེ་དགེ་སྦྱོང་གཽ་ཏ་མ་ཐམས་ཅད་མཁྱེན་ཅིང་ཐམས་ཅད་གཟིགས་པ་ཡིན་ན་ནི་བཏུབ་པར་མི་འགྱུར་རོ། །ཇི་སྟེ་ཐམས་ཅད་མཁྱེན་པ་མ་ཡིན། ཐམས་ཅད་གཟིགས་པ་མ་ཡིན་ན་ནི་བཏུབ་པར་འགྱུར་ཏེ། དེ་ཕྱི་སྒོའི་སྒོ་ཁང་གི་མེ་དོང་དེར་ལྷུང་ནས་ཉན་ཐོས་ཀྱི་དགེ་འདུན་དང་བཅས་ཏེ་འཆི་བའི་དུས་བྱེད་པར་འགྱུར་རོ། །འོན་ཏང་རྣམ་གྲངས་ཅི་ཞིག་གིས་ཐར་བར་འགྱུར། ཁྱིམ་གྱི་ནང་དུ་ཟས་དུག་ཅན་ཟོས་ནའང་འཆི་བའི་དུས་བྱེད་པར་འགྱུར་རོ། །དེ་བཞིན་དུ་བགྱིའོ་ཞེས་ཏེ། ཁྱིམ་བདག་དཔལ་སྦས་ཀྱིས་གཅེར་པུ་བ་ཉེ་དུའི་བུའི་ལྟར་ཉན་ནས་སྟན་ལས་ལངས་ཏེ། གཅེར་བུ་བ་ཉེ་དུའི་བུའི་རྐང་པ་ལ་ཕྱག་བཙལ་ནས་ལན་གསུམ་བསྐོར་བ་བྱས་ཏེ། གཅེར་བུ་པ་ཉེ་དུའི་གན་ནས་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་པ་དང ། རང་གི་ཞི་ཤས་འཚོ་བ་རྣམས་ 415b ལ་བོས་ཏེ་འདི་སྐད་ཅེས་སྨྲས་སོ། །ཞོ་ཤས་འཚོ་བ་དག། དེངས་ལ་ཕྱི་སྒོའི་སྒོ་ཁང་དུ་དོང་ཆེན་པོ་རྐོས་ཤིག་།དོང་ཆེན་པོ་བརྐོས་ནས་མེ་འབར་བ་མ་ཡིན་པ་དུ་བ་མི་འཐུལ་བས་ཁོངས་ལ་སྟེང་དུ་ཕྱག་དར་སྲབ་མོས་ཁོབས་ཤིག་།ཁྱིམ་གྱི་ནང་དུ་ཟས་དུག་ཅན་སྦྱོར་ཅིག་།དེ་ནས་ཁྱིམ་བདག་དཔལ་སྦས་ཀྱིས་རང་གི་ཞོ་ཤས་འཚོ་བ་རྣམས་བསགས་ནས་རྒྱལ་པོའི་ཁབ་ནས་བྱུང་སྟེ། བྱ་རྒོད་ཀྱི་ཕུང་པོའི་རི་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང ། བཅོམ་ལྡན་འདས་དང་ལྷན་ཅིག་མངོན་སུམ་དུ་དགའ་བར་བྱ་བ་དང ། མགུ་བར་བྱ་བའི་གཏམ་རྣམ་པ་མང་པོ་བྱས་ཏེ་ཕྱོགས་གཅིག་ཏུ་འདུག་གོ་།ཁྱིམ་བདག་དཔལ་སྦས་ཕྱོགས་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །དེ་ནས་ཁྱིམ་བདག་དཔལ་སྦས་བཅོམ་ལྡན་འདས་ཀྱིས་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ།་གཽ་ཏ་མ། ཉན་ཐོས་ཀྱི་དགེ་འདུན་དང་ཐབས་གཅིག་ཏུ་སང་གདུགས་ཚོད་སྦྱོར་ན་ 416a ༄#། །གནང་བར་མཛད་དུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཁྱིམ་བདག་དཔལ་སྦས་འདི་ནི་མི་དགེ་བའི་བཤེས་གཉེན་དང་བསྟེན་པའི་དབང་གིས་ང་ལ་རྣམ་པ་འདི་ལྟ་བུ་བྱ་བར་འདོད་ལ། དེ་རིང་པོ་མི་ཐོགས་པར་ཕྱིས་ཆོས་འདུལ་བ་འདི་ལ་རྣམ་པར་དག་པའི་ཆོས་ཅན་དུ་འགྱུར་རོ་སྙམ་སྟེ།་དེ་ལྟར་མཁྱེན་ནས་བཅོམ་ལྡན་འདས་ཀྱིས་ཁྱིམ་བདག་དཔལ་སྦས་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་ལག་པ་བསྒྱུར་ཏེ་མཛུབ་མོ་བསྒྲེང་ནས་འདི་སྙམ་དུ་སེམས་ཏེ། འདི་ལྟར་བདག་གི་སེམས་ཀྱང་སེམས་ཀྱིས་མི་ཤེས་ན་ཐམས་ཅད་ཤེས་པ་ལྟ་སྨོས་ཀྱང་ཅི་དགོས་ཏེ། དགེ་སྦྱོང་གཽ་ཏ་མས་ཐམས་ཅད་མཁྱེན་པའི་ང་རྒྱལ་གྱིས་འཇིག་རྟེན་འདི་དག་ཐམས་ཅད་བསླུས་སོ་སྙམ་མོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་གན་ནས་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་པ་དང ། ཕྱི་སྒོའི་སྒོ་ཁང་དུ་དོང་ཆེན་པོ་རྐོར་བཅུག་སྟེ། བརྐོས་ནས་མེ་མི་འབར་ཞིང་དུ་བ་མི་འཐུལ་བས་བཀང་སྟེ། སྟེང་དུ་ཕྱག་དར་སྲབ་མོས་གཡོགས་སོ། །ཁྱིམ་གྱི་ནང་དུའང་ཟས་དུག་ཅན་ 416b སྦྱོར་དུ་བཅུག་གོ་།དེའི་ཚེ་ཁྱིམ་བདག་དཔལ་སྦས་ཀྱིས་ཁྱིམ་བདག་མགོན་མེད་ཟས་སྦྱིན་གྱི་བུ་མོ་ཆུང་མར་བླངས་པར་གྱུར་ཏེ། ཁྱིམ་བདག་དཔལ་སྦས་ཀྱི་ཆུང་མས་ཁྱིམ་བདག་དཔལ་སྦས་རྣམ་པ་འདི་ལྟ་བུ་བྱེད་པར་མཐོང་ངོ ། །མཐོང་ནས་ཀྱང་ཁྱིམ་བདག་དཔལ་སྦས་ལ་འདི་སྐད་ཅེས་སྨྲས་སོ། །ཇོ་བོ་ལ་དགྲ་སུ་ཞིག་མཆིས་ན་དེ་དགུམ་པའི་སླད་དུ་དེ་ལྟར་བརྩོན་པར་མཛད། དེས་སྨྲས་པ། དྲ་མའི་བུ་མོ། ཤེས་པར་གྱིས་ཤིག་།དགེ་སྦྱོང་གཽ་ཏ་མ་ན་ཚོད་ཀྱིས་གཞོན་པ། གསར་དུ་རབ་ཏུ་བྱུང་བ་དེ་ཐམས་ཅད་མཁྱེན་པའི་ང་རྒྱལ་ཅན་ཏེ། ཐམས་ཅད་མཁྱེན་པའི་ང་རྒྱལ་དེས་འཇིག་རྟེན་འདི་ཐམས་ཅད་བསླུས་ཀྱི། དེ་གསད་པའི་ཕྱིར་འདི་ལྟར་བརྩོན་པར་བྱེད་དོ། །དེས་སྨྲས་པ། ཇོ་བོ། བཅོམ་ལྡན་འདས་དེ་བགྲོངས་པར་ཁྱོད་ཀྱིས་མི་སྤྱོད་ཀྱི་སྐྱོ་བར་གྱུར་ཏ་རེ། དེ་ཅིའི་སླད་དུ་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སླད་དུའོ། །དེ་ནས་ཁྱིམ་བདག་དཔལ་སྦས་འདི་སྙམ་དུ་སེམས་ཏེ། བདག་གི་ཆུང་མ་ཤཱཀྱའི་བྲན་གྱི་བུ་མོ་འདིས་གསང་འཕེལ་དུ་འོང་ཞེས་དེའི་ཐོར་ཏོ་ནས་བཟུང་སྟེ་ཁྱིམ་དུ་བཅུག་ནས་སྒོ་གཏན་བཅུག་གོ་།སྒོ་གཏན་བཅུག་ནས་བཅོམ་ལྡན་འདས་ལ་གདུགས་ཚོད་ལ་བབ་པ་གསོལ་ཏེ། ཀྱེ་གཽ་ཏ་མ། བཤོས་ལགས་ཀྱི་གདུགས་ཚོད་ལ་བབ་བོ། །དེ་ནས་བཅོམ་ལྡན་འདས་ 417a ༄#། །ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཁྱོད་སོང་ལ་བསིལ་ཡབ་ཐོགས་ཏེ་གནས་ཁང་ནས་གནས་ཁང་དུ་སོང་ལ། ཚེ་དང་ལྡན་པ་དག་།བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏེ། ངའི་སྔ་རོལ་ཏུ་དགེ་སློང་གང་ཡང་དཔལ་སྦས་ཀྱི་ཁྱིམ་དུ་མ་འཇུག་ཅིག་།ཅེས་དོན་དེ་བསྒོ་ཞིག་།བཅོམ་ལྡན་འདས། དེ་བཞིན་ནོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་མཉན་ཏེ། བསིལ་ཡབ་ཐོགས་ནས་དགེ་སློང་རྣམས་ཀྱི་གན་དུ་སོང་སྟེ། ཚེ་དང་ལྡན་པ་དག་།བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏེ། ངའི་སྔ་རོལ་ཏུ་དགེ་སློང་གང་ཡང་ཁྱིམ་བདག་དཔལ་སྦས་ཀྱི་ཁྱིམ་དུ་མ་འཇུག་ཅིག་ཅེས་དོན་དེ་བསྒོའོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང ། ཆོས་གོས་གསོལ་ཏེ། ལྷུང་བཟེད་བསྣམས་ནས་དགེ་སློང་གི་དགེ་འདུན་གྱིས་ཡོངས་སུ་བསྐོར། དགེ་སློང་གི་དགེ་འདུན་གྱིས་མདུན་དུ་བདར་ཏེ་བྱ་རྒོད་ཀྱི་ཕུང་པོའི་རི་ལས་བབས་སོ། །དེ་ནས་མི་མཇེད་ཀྱི་བདག་པོ་ཚངས་པ་ཚངས་རིས་ཀྱི་ལྷའི་བུ་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ། བཅོམ་ལྡན་འདས་ཀྱི་གཡས་རོལ་ནས་འགྲོའོ།། 417b ལྷའི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་གྱི་ལྷའི་བུ་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ཀྱི་གཡོན་རོལ་ནས་འགྲོའོ། །རྒྱལ་པོ་ཆེན་པོ་བཞི་པོ་རྒྱལ་པོ་ཆེན་པོ་གནས་སྲུང་པོ་དང ། འཕགས་སྐྱེས་པོ་དང ། མིག་མི་བཟང་དང ། རྣམ་ཐོས་ཀྱི་བུའང་གནོད་སྦྱིན་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བཅོམ་ལྡན་འདས་ཀྱི་ཕྱི་བཞིན་འགྲོའོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ནི་བཅོམ་ལྡན་འདས་ཀྱི་གདུགས་ཐོགས་སོ། །གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ཀྱི་ཕྱི་བཞིན་དུ་འགྲོའོ། །རོལ་མོ་མཁན་དུ་གཏོགས་པའི་ལྷ་རྣམས་ནི་མདུན་ནས་འགྲོ་ཞིང ། གར་དང ། གླུ་དང ། རོལ་མོའི་སྒྲ་ཆེན་པོ་བྱེད་དོ། །དེའི་ཚེ་བཅོམ་ལྡན་འདས་ཀྱི་མདུན་ལོགས་སུ་ནི་ཆར་འབབ། ཕྱི་ནས་ནི་ཉི་མ་འཆར། བར་ན་ནི་སྤྲིན་ལྡིང་ངོ ། །བཅོམ་ལྡན་འདས་ཀྱི་ཞབས་གང་དང ། གང་གོམ་པ་འདོར་བ་དེ་དང ། དེར་བཅོམ་ལྡན་འདས་ཀྱི་སྐུ་ལ་ལྷ་རྣམས་ཙནྡན་གྱི་ཕྱེ་མ་དག་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་མེ་ཏོག་ཨུཏྤ་ལ་དང ། 418a ༄#། །པདྨ་དང ། ཀུ་མུ་ད་དང ། པདྨ་དཀར་པོ་དང ། ལྷའི་མེ་ཏོག་མནྡཱ་ར་བ་རྣམས་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དེར་གཤེགས་པ་དང ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ།། གང་གི་ཚེ་བཅོམ་ལྡན་འདས་གྲོང་ཁྱེར་དུ་འཇུག་པ་དེའི་ཚེ་ཆོ་འཕྲུལ་དང་བཅས་པར་འཇུག་གི་།ཆོ་འཕྲུལ་མེད་པར་མ་ཡིན་ནོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་གྱི་སྒོར་སྒོ་གཏན་ལ་ཐོག་མ་ཉིད་དུ་ཞབས་གཡས་པ་གསེར་གྱི་ཁ་དོག་ཅན་བཞག་སྟེ། བཅོམ་ལྡན་འདས་ཀྱི་ཞབས་གཡས་པ་གསེར་གྱི་ཁ་དོག་ཅན་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྒོར་སྒོ་གཏན་ལ་བཞག་མ་ཐག་ཏུ། དེ་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ཤར་ཕྱོགས་མཐོ་ན་ནུབ་ཕྱོགས་དམའོ། །ནུབ་ཕྱོགས་མཐོན་ཤར་ཕྱོགས་དམའོ། །ལྷོ་ཕྱོགས་མཐོ་ན་བྱང་ཕྱོགས་དམའོ། །བྱང་ཕྱོགས་མཐོ་ན་ལྷོ་ཕྱོགས་དམའོ། །དབུས་མཐོ་ན་མཐའ་དམའོ། །མཐའ་མཐོ་ན་དབུས་དམའོ། །བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་ 418b སྒོ་གཏན་ལ་ཞབས་གཡས་པ་གསེར་གྱི་ཁ་དོག་ཅན་བཞག་མ་ཐག་ཏུ་ལྷ་རྣམས་ལྷའི་ཙནྡན་གྱི་ཕྱེ་མ་དག་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་མེ་ཏོག་ཨུཏྤ་ལ་དང ། པདྨ་དང ། ཀུ་མུད་དང ། པདྨ་དཀར་པོ་དང ། ལྷའི་མེ་ཏོག་མནད་ར་བ་དག་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར། ནམ་མཁའ་ལ་ལྷའི་རོལ་མོའི་སྒྲ་འབྱིན་ཏོ། །ལྷའི་སིལ་སྙན་གྱི་སྒྲ་འབྱིན་ཏོ། །བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྒོར་སྒོ་གཏན་ལ་ཞབས་གཡས་པ་གསེར་གྱི་ཁ་དོག་ཅན་བཞག་མ་ཐག་ཏུ་དེའི་ཚེ་ལོང་བ་རྣམས་ནི་མིག་གིས་གཟུགས་མཐོང་བར་གྱུར། འོན་པ་རྣམས་ནི་རྣ་བས་ཐོས་པར་གྱུར།་སྣའི་དབང་པོ་དང་བྲལ་བ་རྣམས་ནི་སྣ་རྣམ་པར་དག་པར་གྱུར། ལྐུགས་པ་རྣམས་ནི་སྨྲ་བར་གྱུར། རྗེད་བྱེད་ཀྱིས་ཟིན་པ་རྣམས་ནི་རྗེད་བྱེད་དང་བྲལ་བར་གྱུར། སེམས་ཅན་སྨྱོན་པ་རྣམས་ནི་དྲན་པ་རྙེད་པར་གྱུར། དུག་འཐུངས་པ་ནི་དུག་ལས་གསོས་པར་གྱུར། སེམས་ཅན་བཙོན་ཆ་དམ་པོས་བསྡམས་པ་རྣམས་ནི་བཙོན་ཆ་ལྷོད་པར་གྱུར།་སེམས་ཅན་ཕན་ཚུན་དགྲར་འཛིན་པ་རྣམས་ནི་བྱམས་པའི་སེམས་སུ་གནས་པར་གྱུར། སིལ་སྙན་རྣམས་ནི་མ་བསྐྱོད་པར་སྒྲ་འབྱིན་པར་གྱུར། སྣོད་རྣམས་ནི་ 419a ༄#། །མ་དཀྲོལ་བར་སྒྲ་འབྱིན་པར་གྱུར། ཁྱུ་མཆོག་ཀྱང་སྒྲ་འབྱིན། གླང་པོའང་སྒྲ་འབྱིན། རྟའང་སྒྲ་འབྱིན། རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྒོ་ན་བྱ་གང་དག་གནས་པ། འདི་ལྟ་སྟེ། དང་པ་དང ། ཁྲུང་ཁྲུང་དང ། རྨ་བྱ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ཀུ་ན་ལ་དང ། ཤང་ཤང་ཏེའུ་དེ་དག་ཀྱང་རང་རང་གི་སྐད་དུ་སྒྲ་སྐད་འབྱིན་ཅིང་རྒྱལ་པོའི་ཁབ་ཀྱི་སྒོའི་ཁོར་ཡུག་ཏུ་སྐོར་བར་བྱེད་དོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་བསིལ་ཁང་དང ། ཁང་པ་བརྩེགས་པ་དང ། སྟེགས་བུ་དང ། སྒོ་ཁང་དང ། སྐར་ཁུང་ནས་ལྟ་ཞིང་འཁོད་པ་དེ་དག་གིས་ཀྱང་བཅོམ་ལྡན་འདས་ལ་མེ་ཏོག་གི་ཕུར་མ་གཏོར་ཏོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྐྱེ་བོ་ཕལ་པོ་ཆེའང་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། ཡི་རངས་པར་གྱུར་ནས་སྒྲ་གསང་མཐོན་པོ་དང ། སྒྲ་ཆེན་པོར་ཧི་ཧི་ཞེས་བྱ་བ་དང ། ཧ་ཧ་ཞེས་བྱ་བ་དང ། ་ལ་ལ་ཞེས་བྱ་བ་དང ། ཱུ་ཞེས་སྒྲ་ཆེན་པོ་འབྱིན་ཏོ། །བཅོམ་ལྡན་འདས་ལ་གོས་ཀྱང་འཐོར་རོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་ཞུགས་ཏེ། ཁྱིམ་བདག་དཔལ་སྦས་ཀྱི་ཁྱིམ་ག་ལ་བ་དེར་གཤེགས་པ་དང ། དགེ་བསྙེན་ཞིག་ 419b གིས་བཅོམ་ལྡན་འདས་རྒྱང་རིང་པོ་ནས་བྱོན་པ་མཐོང་ངོ ། །མཐོང་ནས་ཀྱང་དེས་འདི་སྙམ་དུ་བསམས་ཏེ། ཁྱིམ་བདག་དཔལ་སྦས་འདི་ནི་བཅོམ་ལྡན་འདས་ལ་རྣམ་པ་འདི་ལྟ་བུ་འདི་བྱེད་པར་འདོད་ན་བཅོམ་ལྡན་འདས་བཀྲོངས་པར་མི་འགྱུར་གྲང ། འཇིག་རྟེན་གྱི་མི་གཤིན་ཏུ་མྱུར་དུ་མེད་པར་མི་འགྱུར་གྲང ། འཇིག་རྟེན་དུ་མུན་པ་ཤིན་ཏུ་མྱུར་དུ་མི་འགྱུར་གྲང ། བསྐལ་པ་གྲངས་མེད་པ་གསུམ་དུ་ཡང་དག་པར་བསྒྲུབས་པའི་སངས་རྒྱས་ཤིན་ཏུ་མྱུར་དུ་ནུབ་པར་མི་འགྱུར་གྲང ། བདག་ཅག་ཆོས་ཀྱི་ལོངས་སྤྱོད་ལས་ཤིན་ཏུ་མྱུར་དུ་ཉམས་པར་མི་འགྱུར་གྲང་སྙམ་སྟེ། དེ་ནས་དགེ་བསྙེན་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་བསྐོར་བ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བདེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཁྱིམ་བདག་དཔལ་སྦས་ཀྱི་ཁྱིམ་དུ་མ་གཤེགས་ཤིག་།དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། ཁྱིམ་བདག་དཔལ་སྦས་ཀྱིས་ནི་བཅོམ་ལྡན་འདས་དང ། དགེ་སློང་གི་དགེ་འདུན་བཀྲོངས་པའི་སླད་དུ་ཕྱི་སྒོའི་སྒོ་ཁང་དུ་དོང་ཆེན་པོ་རྐོར་སྩལ་ཏེ། དོང་བརྐོས་ནས་ཞུགས་མེ་འབར་ཞིང་དུ་བ་མ་མཆིས་ 420a ༄#། །པས་གཏམས་ཏེ། སྟེང་དུ་ཕྱག་དར་སྲབ་མོས་གཡོགས་ཤིང་མཆིས་ན། བཅོམ་ལྡན་འདས་དང ། དགེ་སློང་གི་དགེ་འདུན་ལ་ཅུང་ཟད་གནོད་པར་ལྟ་མི་འགྱུར་རམ་སྙམ་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན། ཁྱོད་འདི་སྙམ་དུ་མ་སེམས་ཤིག་།དགེ་བསྙེན། ང་དུད་འགྲོའི་སྐྱེ་གནས་སུ་གྱུར་པ་ནའང་ངའི་ལུས་ལ་མེས་མ་ཚུགས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ཅི་སྨོས། ངས་ནི་འདོད་ཆགས་ཀྱི་མེ་དང ། ཞེ་སྡང་གི་མེ་དང ། གཏི་མུག་གི་མེ་དང ། མེ་གསུམ་བསད་པས་ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །བཙུན་པ་བཅོམ་ལྡན་འདས། དུད་འགྲོའི་སྐྱེ་གནས་སུ་གྱུར་པ་ན་ཇི་ལྟར་སྐུ་ལ་ཞུགས་ཀྱིས་མཚུགས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན། སྔོན་བྱུང་བ་འདས་པའི་དུས་ན་ཡུལ་ཀ་ལིངྐའི་རྒྱལ་པོ་ཞིག་བྱུང་བ་དེའི་ཚེ། ཡུལ་ཀ་ལིངྐའི་རྒྱལ་པོས་གླིང་བེགས་བུར་ཆད་པའི་རི་དྭགས་རྣམས་གསོད་པའི་ཕྱིར་སྲེག་པའི་མེ་ཆེན་པོ་བཏང་ངོ ། །དེ་ནས་གླིང་བེགས་བུར་ཆད་པ་ན་རི་དྭགས་དང་བྱ་གང་དག་གནས་པ། ནམ་མཁའ་ལ་རྒྱུ་བའམ། ཐང་ལ་རྒྱུ་བའམ། ཆུ་ལ་རྒྱུ་བ་དེ་དག་སྲེག་པའི་མེ་དེས་འཁྲུགས་ནས་དེ་ན་གག་དག་ནམ་མཁའ་ལ་ 420b རྒྱུ་བ་དེ་དག་ནི་ནམ་མཁའ་ལ་བྱེར་རོ། །གང་དག་ཆུ་ལ་རྒྱུ་བ་དེ་དག་ནི་ཆུར་ཞུགས་སོ། །གང་དག་ཐང་ལ་རྒྱུ་བ་དེ་དག་ནི་ཕན་ཚུན་འབྱེར་ཞིང་རྒྱུག་སྟེ་འབྲོས་སོ། །གླིང་བེགས་བུར་ཆད་པ་དེ་ན་སྲེག་པའི་ཕྲུག་གུ་འདབ་གཤོག་མ་སྐྱེས་པ་ཞིག་ཡོད་དེ། དེ་ནས་སྲེག་པ་མ་མོ་དེས་འདབ་མ་ཆུར་བཅུག་སྟེ། སྲེག་པའི་ཕྲུག་གུའི་ཁོ་ར་ཡུག་ཏུ་གཏོར་ཏོ། །གཏོར་ནས་ཀྱང་རྒྱུག་ཅིང་ཡང་དང ། ཡང་དེ་ལྟར་བརྩོན་པར་བྱས་སོ། །དེ་ནས་སྲེག་པའི་ཕྲུག་གུ་དེས་མ་འདི་ལྟར་རྩོལ་བ་བྱེད་པ་མཐོང་ངོ ། །མཐོང་ནས་ཀྱང་དེས་མ་ལ་འདི་སྐད་ཅེས་སྨྲས་སོ། །ཡུམ། ཅིའི་སླད་དུ་འདི་ལྟར་རྩོལ་བར་མཛད། དེས་སྨྲས་པ། བུ། ཤེས་པར་གྱིས་ཤིག་།ཡུལ་ཀ་ལིངྐའི་རྒྱལ་པོས་གླིང་བེགས་བུར་ཆད་པའི་རི་དྭགས་གསོད་པའི་ཕྱིར་མེ་ཆེན་པོ་བཏང་ངོ ། །དེ་ནས་གླིང་བེགས་བུར་ཆད་པ་ན་རི་དྭགས་དང ། བྱ་གང་དག་གནས་པ་ནམ་མཁའ་ལ་རྒྱུ་བ་དང ། ཐང་ལ་རྒྱུ་བ་དང ། ཚུལ་རྒྱུ་བ་དེ་དག་སྲེག་པའི་མེ་ཆེན་པོ་དེས་འཁྲུགས་ནས་དེ་ན་གང་དག་ནམ་མཁའ་ལ་རྒྱུ་བ་དེ་དག་ནི་ནམ་མཁའ་ལ་བྱེར། གང་དག་ཆུ་ལ་རྒྱུ་བ་དེ་དག་ནི་ཆུར་ཞུགས། གང་དག་ཐང་ལ་རྒྱུ་བ་དེ་དག་ཕན་ཚུན་འབྱེར་ཞིང་རྒྱུག་སྟེ་བྲོས་སོ། །ང་ནི་འདི་ལྟར་ཁྱོད་ཚིག་ཏུ་འོང་ངོ་ཞེས་ཁྱོད་ཀྱི་ཕྱིར་འདི་ལྟར་རྩོལ་བར་བྱེད་དོ། །དེས་སྨྲས་པ། ཡུམ། ཐོངས་ཤིག། 421a ༄#། །ཐོངས་ཤིག་།ཡུམ་ཁྱོད་ནི་བྱིས་པ་སྟེ། ཁྱོད་ཀྱིས་རྩོལ་བ་འདི་ལྟ་བུས་བདག་སྲེག་པའི་མེ་འདི་ལས་ཐར་པར་མི་སྤྱོད་དོ། །ཡུམ་ཁྱོད་ཀྱིས་བདག་ཉིད་ཀྱི་མཐུ་དང ། སྟོབས་བསྐྱེད་དེ། ངན་བུ་ལེགས་པར་ཤིན་ཏུ་བླངས་ལ་གླིང་བེགས་བུར་ཆད་པ་འདིར་ཤིང་ནང་གི་མཐོན་པའི་ཁར་ངན་བུ་གཞག་པར་སྤྱོད་དམ། དེ་བཞིན་བྱའོ་ཞེས་ཏེ། སྲེག་པ་མ་མོ་དེས་སྲེག་པའི་ཕྲུག་གུའི་ལྟར་མཉན་ནས་རང་གི་མཐུ་དང ། སྟོབས་བསྐྱེད་དེ། སྲེག་པའི་ཕྲུག་གུ་དེ་ཀུན་ཏུ་ལེགས་པར་བླངས་ནས་གླིང་བིགས་བུར་ཆད་པ་དེའི་ཤིང་ནང་གི་མཐོན་པོའི་ཁར་བཞག་གོ་།དེ་ནས་སྲེག་པའི་ཕྲུག་གུ་དེས་སྲེག་པའི་མེ་ཆེན་པོ་དེ་མཐོང་ནས་བྱམས་པས་ཁྱབ་པར་བྱེད་དོ། །བྱམས་པས་ཁྱབ་པར་བྱས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྐང་མེད་སེམས་ཅན་རྣམས་ཀྱང་ཡོད། །འདབ་ཆགས་རྐང་བཅས་པ་འང་ཡོད། །ཕ་མ་དག་གིས་བསྲུངས་ཤིང་འཁོད། །མེ་གདུག་ཚུར་ནི་མ་འོངས་ཤིག་།དགེ་བསྙེན། སྲེག་པའི་ཕྲུག་གུ་དེས་ཚིགས་སུ་བཅད་པ་དེ་སྨྲས་མ་ཐག་ཏུ་མེ་ཤི་བར་གྱུར་ཏེ། གང་ནས་བཏང་བ་དེ་ཉིད་དུ་ཤིའོ། །དེ་ལྟར་དེ་ཚུན་ཆད་དེང་སང་གི་བར་དུ་གླིང་བེགས་བུར་ཆད་པ་དེར་མེ་མ་ཤོར་ཏོ། །དགེ་བསྙེན། དེའི་ཚེ་དེའི་དུས་ན་གླིང་བེགས་བུར་ཆད་པ་ན་སྲེག་པའི་ཕྲུག་གུ་ 421b འདབ་གཤོག་མ་སྐྱེས་པ་དེ་གཞན་ཞིག་ཡིན་སྙམ་དུ་ཁྱོད་དོགས་ཤིང་ཐེ་ཚོམ་ཟའམ། ཡིད་གཉིས་ཟ་ན་དེ་ལྟར་མི་བལྟ་སྟེ། དགེ་བསྙེན། ང་དེའི་ཚེ་དེའི་དུས་ན་སྲེག་པའི་ཕྲུག་གུར་གྱུར་ཏོ། །དགེ་བསྙེན། ང་དུད་འགྲོའི་སྐྱེ་གནས་སུ་གྱུར་པ་དེའི་ཚེའང་ལུས་ལ་མེས་མ་ཚུངས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལ་ལྟ་ཅི་སྨོས་ཏེ། ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དགེ་བསྙེན་དེ་དང ། སྐྱེ་བོ་ཕལ་པོ་ཆེལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་འཇུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་མདུན་དུ་བཞུད་པ་དང ། དགེ་བསྙེན་ཞིག་གིས་བཅོམ་ལྡན་འདས་རྒྱང་རིང་པོ་ནས་བྱོན་པ་མཐོང་ངོ ། །མཐོང་ནས་དེ་འདི་སྙམ་དུ་སེམས་ཏེ། ཁྱིམ་བདག་དཔལ་སྦས་འདི་ནི་བཅོམ་ལྡན་འདས་ལ་རྣམ་པ་འདི་ལྟ་བུ་འདི་བྱེད་པར་འདོད་ན། བཅོམ་ལྡན་འདས་བཀྲོངས་པར་མི་འགྱུར་གྲང ། བདེ་བར་གཤེགས་པ་བཀྲོངས་པར་མི་འགྱུར་གྲང ། འཇིག་རྟེན་གྱི་མིག་ཤིན་ཏུ་མྱུར་དུ་མེད་པར་མི་འགྱུར་གྲང ། འཇིག་ 422a ༄#། །རྟེན་དུ་མུན་པ་ཤིན་ཏུ་མྱུར་དུ་མི་འབྱུང་གྲང ། བསྐལ་པ་གྲངས་མེད་པ་གསུམ་དུ་ཡང་དག་པར་བསྒྲུབས་པའི་སངས་རྒྱས་ཤིན་ཏུ་མྱུར་དུ་ནུབ་པར་མི་འགྱུར་གྲང ། བདག་ཅག་ཆོས་ཀྱི་ལོངས་སྤྱོད་ལས་ཤིན་ཏུ་མྱུར་དུ་ཉམས་པར་མི་འགྱུར་གྲང་སྙམ་སྟེ། དེ་ནས་དགེ་བསྙེན་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བུས་མོ་གཉིས་ཀའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཁྱིམ་བདག་དཔལ་སྦས་ཀྱི་ཁྱིམ་དུ་མ་གཤེགས་ཤིག་།དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། ཁྱིམ་བདག་དཔལ་སྦས་ཀྱིས་ནི་བཅོམ་ལྡན་འདས་དང ། དགེ་སློང་གི་དགེ་འདུན་བཀྲོངས་པའི་སླད་དུ་ཕྱི་སྒོའི་སྒོ་ཁང་དུ་དོང་ཆེན་པོ་རྐོར་སྩལ་ཏོ། །དོང་བརྐོས་ནས་ཞུགས་མེ་འབར་ཞིང་དུ་བ་མ་མཆིས་པས་གཏམས་ཏེ། སྟེང་དུ་ཕྱག་དར་སྲབ་མོས་གཡོགས་ཤིང་མཆིས་ན་བཅོམ་ལྡན་འདས་དང ། དགེ་སློང་གི་དགེ་འདུན་ལ་ཅུང་ཟད་གནོད་པར་ལྟ་མི་འགྱུར་རམ་སྙམ་བགྱིད་ 422b ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན། ཁྱོད་འདི་སྙམ་དུ་མ་སེམས་ཤིག་།དགེ་བསྙེན། ང་དུད་འགྲོའི་སྐྱེ་གནས་སུ་གྱུར་པ་ནའང་ངའི་ལུས་ལ་མེས་མི་ཚུགས་ན།་ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ལ་ཅི་སྨོས། ངས་ནི་འདོད་ཆགས་ཀྱི་མེ་དང ། ཞེ་སྡང་གི་མེ་དང ། གཏི་མུག་གི་མེ་དང ། མེ་གསུམ་བསད་པས་ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །བཙུན་པ་བཅོམ་ལྡན་འདས། དུད་འགྲོའི་སྐྱེ་གནས་སུ་གྱུར་པ་ན་ཇི་ལྟར་སྐུ་ལ་ཞུགས་ཀྱིས་མ་ཚུངས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན། སྔོན་བྱུང་བ་འདས་པའི་དུས་ན་ཛམྦུའི་གླིང་འདི་ན་ནགས་སྟུག་པོ། ལོ་མ་ཕུན་སུམ་ཚོགས་པ། མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། སྐྱེད་མོས་ཚལ་ཕུན་སུམ་ཚོགས་པ་ཞིག་ཡོད་དེ། དེའི་ཚེ་ནགས་སྟུག་པོ་དེ་ན་རི་བོང་གི་གྲོགས་དྲང་སྲོང་ཞིག་གནས་ཏེ། རི་བོང་དེ་ནི་མི་སྐད་སྨྲ་བ་ཞིག་གོ་།དེའི་ཚེ་དུས་གཞན་ཞིག་ན་ནགས་སྟུག་པོ་དེར་ཐན་པ་ཆེན་པོ་བྱུང་སྟེ། དེ་ན་འདབ་མ་དང་ལྡན་པའི་ཤིང་གང་ཡིན་པ་དེ་དག་ནེ་སྐམ། མེ་ཏོག་དང་ལྡན་པའི་ཤིང་གང་ཡིན་པ་དང ། འབྲས་བུའི་ཤིང་གང་ཡིན་པ་དེ་དག་ཀྱང་སྐམ་མོ། །སྐྱེད་མོས་ཚལ་གང་ཡིན་པ་དེ་དག་ཀྱང་ཡོངས་སུ་སྐམ་མོ། །དེ་ནས་དྲང་སྲོང་དེ་རི་བོང་དེ་ག་ལ་བ་དེར་སོང་སྟེ་ 423a ༄#། །ཕྱིན་ནས་རི་བོང་དེ་ལ་འདི་སྐད་ཅེས་སྨྲས་སོ། །རི་བོང ། ཤེས་པར་གྱིས་ཤིག་།ནགས་སྟུག་པོ་འདིར་ཐན་པ་ཆེན་པོ་བྱུང་སྟེ། འདབ་མ་དང་ལྡན་པའི་ཤིང་གང་ཡིན་པ་དེ་དག་ནི་སྐམ། མེ་ཏོག་དང་ལྡན་པའི་ཤིང་གང་ཡིན་པ་དང ། འབྲས་བུའི་ཤིང་གང་ཡིན་པ་དེ་དག་ཀྱང་སྐམ་མོ། །སྐྱེད་མོས་ཚལ་གང་ཡིན་པ་དེ་དག་ཀྱང་ཡོངས་སུ་སྐམ་སྟེ། རི་བོང ། བདག་ནི་ནགས་སྟུག་པོ་འདི་ནས་ནགས་སྟུག་པོ་གཞན་དུ་འགྲོ་བར་འདོད་དོ། །རི་བོང་གིས་སྨྲས་པ། དེའི་སླད་དུ་དྲང་སྲོང་དགུང་གཅིག་ནགས་སྟུག་པོ་འདིར་བཞུགས་ཤིག་།བདག་གིས་ཁྱོད་བཤོས་གསོལ་ཏོ། །དེ་ནས་དྲང་སྲོང་དེ་གནས་སུ་སོང་སྟེ་མེ་བུས་ནས་སྔགས་ཀྱིས་སྦྱིན་སྲེག་བྱེད་དོ། །དེ་ནས་རི་བོང་དེ་ནགས་དེར་གོམ་པས་འགྲོ་ཞིང་རྣམ་པར་རྒྱུའང་གང་ནས་ཀྱང་འབྲས་བུའམ། རྩ་བ་མ་རྙེད་ནས། དེ་འདི་སྙམ་དུ་སེམས་ཏེ། བདག་གིས་དྲང་སྲོང་དེ་ཟས་ལ་མགྲོན་དུ་བོས་ལ།་བདག་གིས་ནགས་སྟུག་པོ་འདི་ཐམས་ཅད་དུ་སོན་ཀྱང ། གང་ནས་ཀྱང་འབྲས་བུའམ། རྩ་བ་མ་རྙེད་ཀྱི། བདག་རང་གི་ཤས་དྲང་སྲོང་དེ་ཚིམ་པར་བྱའོ་སྙམ་སྟེ། དེ་ནས་རི་བོང་དེ་དྲང་སྲོང་དེ་ག་ལ་བ་དེར་སོང་སྟེ་ཕྱིན་ནས། དྲང་སྲོང་དེ་ལ་འདི་སྐད་ཅེས་སྨྲས་སོ། །དྲང་སྲོང ། མཁྱེན་པར་མཛོད་ཅིག་།བདག་གིས་ཁྱོད་ལ་བཤོས་གསོལ་བར་སྤྱན་དྲངས་ལ། 423b བདག་གིས་ནགས་སྟུག་པོ་འདི་ཐམས་ཅད་དུ་མཆིས་ཀྱང་གང་ནས་ཀྱང་འབྲས་བུ་དང ། རྩ་བ་མ་རྙེད་ནས་བདག་ཞུགས་ཀྱི་དོང་འདིར་བདག་ཉིད་ཀྱིས་མཆོང་གི་།ཁྱོད་ཀྱིས་བདག་གི་ཤ་དེ་གསོལ་ལ་དགུང་གཅིག་ནགས་སྟུག་པོ་འདི་ན་བཞུགས་ཤིག་།དྲང་སྲོང་གིས་སྨྲས་པ། རི་བོང ། མ་བྱེད་ཅིག་།དེ་སྐད་མ་སྨྲ་ཞིག་།ང་ནི་རི་བོང་ཁྱོད་ལ་གནོད་པར་ཡང་མི་འདོད་ནང་ཁྱོད་ཀྱི་ཤ་ཟ་བ་ལྟ་ཅི་སྨོས། རི་བོང་གིས་སྨྲས་པ། དྲང་སྲོང ། དེ་སྐད་མ་གསུང་ཞིག་།ཁྱོད་ཀྱིས་བདག་གི་བསམ་པ་ངེས་པར་བསྐང་འཚལ་ལོ། །དེ་ནས་རི་བོང་དེ་འདི་ལྟ་བུའི་བདེན་པའི་ཚིག་འདི་སྨྲས་ཏེ། ནགས་སྟུག་པོ་འདིའི་ལྷ་རྒྱ་ཆེན་པོ་རྣམས་བདག་ལ་དགོངས་སུ་གསོལ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་གང་དག་གནས་པ་དེ་དག་ཐམས་ཅད་བདག་ལ་དགོངས་སུ་གསོལ། བདག་ནི་གཏོང་བ་བགྱིད་དེ་ཤིན་ཏུ་གཏོང་བ་དང ། གཏོང་བའི་ཡང་གཏོང་བ་དང ། བདག་ཉིད་གཏོང་བ་བགྱིད་དོ། །བདག་གི་བདེན་པ་དང ། བདེན་པའི་ཚིག་གང་གིས་བདག་ཡོངས་སུ་གཏོང་བ་ནི་རྒྱལ་པོའི་སླད་དུ་མ་ལགས། ལོངས་སྤྱོད་ཀྱི་སླད་དུ་མ་ལགས། མཐོ་རིས་ཀྱི་སླད་དུ་མ་ལགས། བརྒྱ་བྱིན་ཉིད་ཀྱི་སླད་དུ་མ་ལགས། བདུད་ཀྱི་སླད་དུ་མ་ལགས། ཚངས་པའི་སླད་དུ་མ་ལགས། འཁོར་ལོས་བསྒྱུར་ 424a ༄#། །བའི་རྒྱལ་པོའི་ཡུལ་གྱི་སླད་དུ་མ་ལགས་ཏེ། གཞན་དུ་བདག་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱི་བ་དང ། སེམས་ཅན་མ་དུལ་བ་གདུལ་བར་བགྱི། མ་གྲོལ་བ་དགྲོལ་བར་བགྱི། དབུགས་མ་ཕྱིན་པ་དབུགས་དབྱུང་བར་བགྱི། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བགྱི་བའི་སླད་དུ་སྟེ། བདེན་པ་དང ། བདེན་པའི་ཚིག་དེས་བདག་ཡོངས་སུ་གཏོང་བ་འབྲས་བུ་མ་མཆིས་པར་མ་གྱུར་ཅིག་ཅེས་སྨྲས་ནས་བདག་ཉིད་མེ་དོང་ཆེན་པོ་དེར་མཆོངས་སོ། །དགེ་བསྙེན། རི་བོང་དེས་མེ་དོང་དེར་མཆོངས་མ་ཐག་ཏུ་མེ་དོང་དེའི་མེ་ཤི་སྟེ་པདྨ་ཅན་གྱི་རྫིང་དུ་གྱུར་ནས། རི་བོང་དེ་བུང་བ་ཟི་ཟི་ཟེར་བར་གྱུར་པའི་པདྨ་འདབ་མ་སྟོང་ཡོད་པའི་སྟེང་ན་འདུག་ཅིང་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ།་དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏོ། །དྲང་སྲོང་གིས་དེ་མཐོང་སྟེ།་མཐོང་ནས་ཀྱང་དགའ་མགུ་ཡི་རངས་ཏེ་རབ་ཏུ་དགའ་ནས། དགའ་བ་དང ། ཡིད་བདེ་བ་སྐྱེས་ཏེ། རི་བོང་དེ་ལ་ཐལ་མོ་སྦྱར་ཏེ་ཕྱག་བཙལ་ཏོ། །དགེ་བསྙེན། དེའི་ཚེ་ 424b དེའི་དུས་ན་ནགས་སྟུག་པོ་དེ་ན་གནས་པའི་དྲང་སྲོང་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟན་དེ་ལྟར་མི་བལྟ་སྟེ། དགེ་སློང་འོད་སྲུང་དེའི་ཚེ་དེའི་དུས་ན་ནགས་སྟུག་པོའི་དྲང་སྲོང་དུ་གྱུར་ཏོ། །དགེ་བསྙེན། དེའི་ཚེ་དེའི་དུས་ན་ནགས་སྟུག་པོའི་རི་བོང་དུ་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རི་བོང་དུ་གྱུར་ཏོ། །དགེ་བསྙེན། ང་དུད་འགྲོའི་སྐྱེ་གནས་སུ་གྱུར་པ་དེའི་ཚེའང་ངའི་ལུས་ལ་མེས་མི་ཚུགས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ལ་ཅི་སྨོས་ཏེ། ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དགེ་བསྙེན་དེ་དང ། སྐྱེ་བོ་ཕལ་པོ་ཆེ་ལ་ཆོས་ཀྱི་གཏམ་ཡང་དག་པར་སྟོན། ཡང་དག་པར་འཛིན་དུ་འཇུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཁྱིམ་བདག་དཔལ་སྦས་ཀྱི་ཁྱིམ་ག་ལ་བ་དེར་གཤེགས་སོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྐྱེ་བོ་ཕལ་པོ་ཆེ་རྣམས་འདི་ཇི་ལྟར་འགྱུར་སྙམ་སྟེ། ཁྱིམ་བདག་ 425a ༄#། །དཔལ་སྦས་ཀྱི་ཕྱི་སྒོའི་སྒོ་ཁང་ག་ལ་བ་དེར་དོང་ངོ ། །དེ་ནས་བཅོམ་ལྡན་འདས་མེ་དོང་ཆེན་པོ་ག་ལ་བ་དེར་གཤེགས་ཏེ་བྱོན་ནས་མེ་དོང་ཆེན་པོ་དེར་ཞབས་གཡས་པ་གསེར་གྱི་ཁ་དོག་ཅན་ཐོག་མར་བཞག་སྟེ། བཅོམ་ལྡན་འདས་ཀྱིས་མེ་དོང་དེར་ཞབས་གཡས་པ་གསེར་གྱི་ཁ་དོག་ཅན་དེ་བཞག་མ་ཐག་ཏུ་མེ་དོང་དེའི་མེ་ཤི་བར་གྱུར་ཏེ་པདྨའི་རྫིང་བུར་གྱུར་ནས་བུང་བ་ཟི་ཟི་ཟེར་བར་གྱུར་ཏོ། །བཅོམ་ལྡན་འདས་ཀྱིས་ཞབས་གཡས་པ་གསེར་གྱི་ཁ་དོག་ཅན་མེ་དོང་དེར་བཞག་མ་ཐག་ཏུ་ལྷ་རྣམས་ལྷའི་ཙནྡན་གྱི་ཕྱེ་མ་དག་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་མེ་ཏོག་ཨུདྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོ་དང ། ལྷའི་མེ་ཏོག་མན་དཱ་ར་བ་དག་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་རོལ་མོའི་སྒྲའང་འབྱིན་ཏོ། །སིལ་སྙན་གྱི་སྒྲའང་འབྱིན་ཏེ། །དུང་དང ། རྔ་བོ་ཆེ་དང ། རྔ་རྔ་དང ། འཁར་རྔ་ལ་སོགས་པའི་སྒྲའང་ཕྱུང་ངོ ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྐྱེ་བོ་ཕལ་པོ་ཆེ་རྣམས་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ་གསང་བསྟོད་ནས་སྒྲ་དྲག་པོ་དང ། སྒྲ་ཆེན་པོར་ཧ་ཧ་ཞེས་བྱ་བ་དང ། ཧི་ཧི་ཞེས་བྱ་བ་དང ། ཅ་ཅོ་དང་ག་ཞ་ 425b འཐོན་ཏོ། །བཅོམ་ལྡན་འདས་ལ་གོས་ཀྱང་འཐོར་རོ། །དེའི་ཚེ་ཁྱིམ་བདག་དཔལ་སྦས་ནི་གཅེར་བུ་བ་ཉེ་དུའི་བུ་དང་ལྷན་ཅིག་ཏུ་ཁང་སྟེང་ན་འདུག་གོ་།ཁྱིམ་བདག་དཔལ་སྦས་ཀྱི་ཆུང་མ་ཁྱིམ་གྱི་ནང་ན་འདུག་པས་རྒྱལ་པོའི་ཁབ་ཏུ་སྒྲ་དྲག་པོ་དང ། སྒྲ་ཆེན་པོ་ཕྱུང་བ་ཐོས་སོ། །ཐོས་ནས་དེ་འདི་སྙམ་དུ་སེམས་ཏེ། འདི་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་འདིར་སྒྲ་མཐོན་པོ་དང ། སྒྲ་དྲག་པོ་དང ། སྒྲ་ཆེན་པོ་བྱུང་བ་ལས་བཅོམ་ལྡན་འདས་མེ་དོང་ཆེན་པོ་དེར་ལྷུང་སྟེ་གྲོངས་པར་མ་གྱུར་གྲང ། བདེ་བར་གཤེགས་པ་གྲོང་པར་མ་གྱུར་གྲང་སྙམ་ནས་བསྒྲིམས་ཏེ་སྟོབས་གཏུགས་ནས་སྒོ་ཕྱེ་སྟེ། བང་ཐག་པར་སྒོ་ཁང་ག་ལ་བ་དེར་སོང་བ་དང ། ཁྱིམ་བདག་དཔལ་སྦས་ཀྱི་ཆུང་མ་དེས་མེ་དོང་དེའི་མེ་ཤི་སྟེ་པདྨའི་རྫིང་དུ་གྱུར་ནས་བུང་བ་ཟི་ཟི་ཟེར་བའི་པདྨ་ལ་བཅོམ་ལྡན་འདས་ཀྱི་ཞབས་བཞག་སྟེ་དཔལ་སྦས་ཀྱི་ཁྱིམ་དུ་གཤེགས་པ་མཐོང་ངོ ། །མཐོང་ནས་དགའ་མགུ་ཡི་རངས་ཏེ་རབ་ཏུ་དགའ་ནས། དགའ་བ་དང ། ཡིད་བདེ་བ་སྐྱེས་ཏེ་ཁྱིམ་བདག་དཔལ་སྦས་ག་ལ་བ་དེར་སོང་ནས་ཕྱིན་པ་དང ། ཁྱིམ་བདག་དཔལ་སྦས་ལ་འདི་སྐད་ཅེས་སྨྲས་སོ། །ཇོ་བོ། ཞུགས་དོང་གི་ཞུགས་གུམ་ནས་པདྨའི་རྫིང་བུར་གྱུར་ཏེ་བུང་བ་ཟི་ཟི་མཆི་བའི་པདྨ་ལ་བཅོམ་ 426a ༄#། །ལྡན་འདས་ཀྱི་ཞབས་བཞག་ནས་ཁྱོད་ཀྱི་ཁྱིམ་དུ་བྱོན་པ་ལ་གཟིགས་ཤིག་།གཟིགས་ཤིག་།དེ་ནས་ཁྱིམ་བདག་དཔལ་སྦས་འཇིགས། དངངས། སྐྲག་སྟེ་སྤུ་ཟིང་ཞེས་བྱེད་ནས་རིངས་ཤིང་མྱུར་བར་ལ་གོར་དུ་ཁང་སྟེང་ནས་བབས་ཏེ་སྒོ་ཁང་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས། བདག་གིས་ནོངས། བདེ་བར་གཤེགས་པ། བདག་གིས་ནོངས་ཏེ། སླར་འཆགས་སོ། ། བྱིས་པ་ཇི་ལྟ་བ་དང ། རྨོངས་པ་ཇི་ལྟ་བ་དང ། མི་མཁས་པ་ཇི་ལྟ་བ་བཞིན་དུ་བདག་མི་དགེ་བའི་བཤེས་གཉེན་དང་བསྟེན་པའི་དབང་གིས་བཅོམ་ལྡན་འདས་ལ་རྣམ་པ་འདི་ལྟ་བུ་བགྱི་བར་བསམས་ན། བཅོམ་ལྡན་འདས། བདག་ནོངས་པས་ནོངས་པ་ཅན་དུ་གཟུང་དུ་གསོལ། སླན་ཆད་ཀྱང་སྡོམ་པར་འཚལ་ལོ། ། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་ཁྱིམ་བདག་ཁྱོད་བྱིས་པ་ཇི་ལྟ་བ་དང ། རྨོངས་པ་ཇི་ལྟ་བ་དང ། མི་མཁས་པ་ཇི་ལྟ་བ་བཞིན་དུ་མི་དགེ་བའི་བཤེས་གཉེན་དང་བསྟེན་པའི་དབང་གིས་ཁྱོད་ཀྱིས་རྣམ་པ་འདི་ལྟ་བུ་འདི་བྱས་པ་ཉེས་པས་ཉེས་པ་ཅན་དུ་རྟོགས་ཤིག་།ཁྱིམ་བདག་།ཁྱོད་གང་གི་ཚེ་ཉེས་པས་ཉེས་ 426b པ་ཅན་དུ་མཐོང་ལ། ཉེས་པས་ཉེས་པ་ཅན་དུ་མཐོང་ནས་འཆགས། མཐོལ་ཕྱིན་ཆད་ཀྱང་སྡོམ་ན་དེའི་ཕྱིར་ངས་ཁྱོད་ལ་ཉེས་པས་ཉེས་པ་ཅན་དུ་བཟུང་ངོ ། །དེ་ཅིའི་ཕྱིར་ཞེ་ན། ཁྱིམ་བདག་།ཆོས་འདུལ་བ་འདི་ལ་འདི་ནི་འཕེལ་བ་སྟེ། ཉེས་པས་ཉེས་པ་ཅན་དུ་མཐོང་ནས་འཆགས་ཤིང་མཐོལ་ཏེ་ཕྱིན་ཆད་ཀྱང་སྡོམ་པའོ། །ཁྱིམ་བདག་ཁྱོད་ལོངས། འདི་ལྟར་འདིར་སེམས་དད་པས་མཆོད་པ་བྱས་སོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་མདུན་དུ་བདར་ཏོ། །དེ་ནས་བཅོམ་ལྡན་འདས་སྟེང་གི་ཁང་བཟང་ག་ལ་བ་དེར་གཤེགས་ཏེ་བྱོན་ནས་གདན་བཤམས་པ་ལ་དགེ་སློང་གི་དགེ་འདུན་དང་ཐབས་གཅིག་ཏུ་བཞུགས་སོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་དང ། དགེ་སློང་གི་དགེ་འདུན་བཞུགས་པར་རིག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། པུས་མོ་གཉིས་ཀའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དོ། །ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཅུང་ཟད་ཚིག་གཞེས་སུ་གསོལ། བདག་གིས་བཅོམ་ལྡན་འདས་ཀྱི་སླད་དུ་བཤོས་གཙང་ 427a ༄#། །གཞན་བགྱིད་དུ་སྩལ་ཏོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། མི་དགེ་བའི་བཤེས་གཉེན་དང་བསྟེན་པའི་དབང་གིས་བདག་གིས་བཤོས་གཙང་ཅི་སྦྱར་བ་དེ་ཐམས་ཅད་ཀྱི་ནང་དུ་དུག་དྲག་པོ་སྩལ་པས། དེས་བཅོམ་ལྡན་འདས་དང ། དགེ་སློང་གི་དགེ་འདུན་ལ་ཅུང་ཟད་གནོད་པར་འགྱུར་དུ་གློ་བ་ཆུད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་།དེ་སྙམ་དུ་མ་སེམས་ཤིག་།ཁྱིམ་བདག་།ང་དུད་འགྲོའི་སྐྱེ་གནས་སུ་གྱུར་པའི་ཚེའང་ལུས་ལ་དུག་གིས་མ་ཚུགས་ན། ད་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ལ་ཅི་སྨོས་ཏེ། ངའི་ལུས་ལ་དུག་གིས་ཚུགས་པར་འགྱུར་བ་འདི་ནི་གནས་མེད་དོ། །བཅོམ་ལྡན་འདས་དུད་འགྲོའི་སྐྱེ་གནས་སུ་གྱུར་པ་ན་ཇི་ལྟར་སྐུ་ལ་དུག་གིས་མ་ཚུགས་ལགས། བཅོམ་ལྡན་འདས་ཀྱིས་བཀའ་སྩལ་པ།་ཁྱིམ་བདག་།སྔོན་བྱུང་བ་འདས་པའི་དུས་ན་གྲོང་ཁྱེར་ཝཱ་ར་ཎཱ་སིའི་རྒྱལ་པོ་ཚངས་པས་བྱིན་ཞེས་བྱ་བ་ཕྱུག་པ། ནོར་ཆེ་བ། ལོངས་སྤྱོད་ཆེ་བ་ནས་བང་མཛོད་ཡོངས་སུ་གང་བའི་བར་དང་ལྡན་པ་ཞིག་བྱུང་ངོ ། །ཁྱིམ་བདག་།རྒྱལ་པོ་ཚངས་པས་བྱིན་ལ་བཙུན་མོ་དཔེ་མེད་ཅེས་བྱ་བ་གཟུགས་བཟང་བ། མཛེས་པ། བལྟ་ན་ 427b སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་དོ། །བཙུན་མོ་དཔེ་མེད་ནི་རྒྱལ་པོ་ཚངས་པས་བྱིན་ལ་སྡུག་པ། མདོས་པ། ཕངས་པ། ཡིད་དུ་འོང་བ། འདོད་པ། བལྟ་བ་དང་མཐུན་པའོ། །ཁྱིམ་བདག་།དེའི་ཚེ་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་འཁོར་ལྔ་བརྒྱ་དང་ལྡན་པ།་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན་ཞིག་གནས་ཏེ། དེ་གང་དང ། གང་དུ་འགྲོའང་རྨ་བྱ་དེ་དག་ཐམས་ཅད་ཀྱི་ཐོག་མ་ཉིད་ལ་འགྲོའོ། །དེའི་ཚེ་དུས་གཞན་ཞིག་ན་རྨ་བྱའི་རྒྱལ་པོ་གསེར་དུ་སྣང་བ་ནམ་ཕྱེད་ཀྱི་དུས་ནམ་གྱི་གུང་ཐུན་ལ་གྲོང་ཁྱེར་ཝཱ་ར་ཎཱ་སིའི་སྟེང་དུ་སྐད་ཕྱུང་སྟེ། སྐད་དེས་གྲོང་ཁྱེར་དེ་ཁྱབ་པར་གྲག་གོ། དེའི་ཚེ་རྒྱལ་པོ་ཚངས་པས་བྱིན་བཙུན་མོ་དཔེ་མེད་དང་ཁང་སྟེང་ན་འདུག་པར་གྱུར་ཏོ། །དེ་ནས་བཙུན་མོ་དཔེ་མེད་ཀྱིས་སྒྲ་དེ་ཐོས་ནས་རྒྱལ་པོ་ཚངས་པས་བྱིན་དེ་ལ་དྲིས་པ། ལྷ།་འདི་ལྟར་ཆགས་པར་བགྱིད་པ། འདི་ལྟར་འདོད་པར་བགྱིད་པ། འདི་ལྟར་དྲེགས་པར་བགྱིད་པ། འདི་ལྟར་ཞེན་པར་བགྱིད་པ། འདི་ལྟར་འཆིང་བར་བགྱིད་པ། འདི་ལྟར་དགའ་བར་བགྱིད་པ། འདི་ལྟར་རོ་མྱང་བར་འོས་པ། འདི་ལྟར་སྙན་ཅིང་ཡིད་དུ་མཆིལ་མཉན་པར་འོས་པའི་སྒྲ་གདའ་བ་འདི་སུའི་ལགས། རྒྱལ་པོས་སྨྲས་པ། ལྷ་མོ། ངས་ཀྱང་མ་མཐོང་སྟེ། གཏམ་དུ་ 428a ༄#། །ཐོས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན། འཁོར་ལྔ་བརྒྱ་དང་ལྡན་པ་ཞིག་གནས་ཏེ། དེ་གང་དང ། གང་དུ་འགྲོའང་རྨ་བྱ་དེ་དག་ཐམས་ཅད་ཀྱི་ཐོག་མ་ཉིད་ལ་འགྲོ་སྟེ། ལྷ་མོ། དེའི་སྒྲ་ནི་འདི་ལྟར་ཆགས་པར་བྱེད་པ། འདི་ལྟར་འདོད་པར་བྱེད་པ། འདི་ལྟར་དྲེགས་པར་བྱེད་པ། འདི་ལྟར་ཞེན་པར་བྱེད་པ། འདི་ལྟར་འཆིང་བར་བྱེད་པ། འདི་ལྟར་དགའ་བར་བྱེད་པ། འདི་ལྟར་རོ་མྱང་བར་འོས་པ། འདི་ལྟར་སྙན་ཅིང་ཡིད་དུ་འོང་ལ་མཉན་པར་འོས་པར་གྲག་ཅེའོ། །བཙུན་མོ་དཔེ་མེད་ཀྱིས་སྨྲས་པ། ལྷ།་རྨ་བྱའི་རྒྱལ་པོ་གསེར་དུ་སྣང་བ་མྱུར་དུ་འདི་བླང་བར་གསོལ། རྒྱལ་པོ་ཚངས་པས་བྱིན་གྱིས་སྨྲས་པ། ལྷ་མོ། ནམ་མཁའ་ལ་རྒྱུ་བ་འདི་ལྟ་བུ་ངས་ཀྱང་མཐོང་བར་ག་ལ་ནུས། བཙུན་མོ་དཔེ་མེད་ཀྱིས་སྨྲས་པ། ལྷ།་གལ་ཏེ་རྨ་བྱའི་རྒྱལ་པོ་གསེར་དུ་སྣང་བ་མ་མཐོང་དུ་ལགས་ན་བདག་འགུམ་པར་འགྱུར་རོ། །རྒྱལ་པོ་ཚངས་པས་བྱིན་བཙུན་མོ་དཔེ་མེད་ལ་ཀུན་ཏུ་ཆགས་པའི་སེམས་སུ་གྱུར་ཏེ། སེམས་ཞེན་པས་རྒྱལ་པོ་ཚངས་པས་བྱིན་གྱིས་སྨྲས་པ། ལྷ་མོ། ངས་རྔོན་པ་དང ། བྱ་བ་དགྱེ་ཡི། རེ་ཞིག་སྡོད་ཅིག་།དེ་ནས་རྒྱལ་པོ་ཚངས་པས་བྱིན་གྱིས་རྔོན་བ་དང ། བྱ་པའི་མི་རྣམས་ 428b བོས་ཏེ་འདི་སྐད་ཅེས་སྨྲས་སོ། །མཆོག་རྣམས། རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཡན་ལག་བཀྲ་བ། ལུས་བཀྲ་བ། གསེར་གྱི་མཆུ་ཅན་ཞིག་གནས་ཞེས་གྲག་གི་ཁྱེད་ཀྱིས་རྨ་བྱའི་རྒྱལ་པོ་གསེར་དུ་སྣང་བ་བྱ་རྒྱ་དང ། རྙིས་བཟུང་ལ་འདིར་འོན་ཅིག་།གལ་ཏེ་འདིར་བླང་ནུས་ན་དེ་ལྟ་ན་ནི་ལེགས་སོ། །ཇི་སྟེ་མི་ནུས་ན་ཁྱེད་ཐམས་ཅད་ཀྱི་སྲོག་ཡལ་ལོ། །དེ་ནས་རྔོན་པ་དང ། བྱ་པའི་མི་རྣམས་སྲོག་གིས་འཇིགས་སྐྲག་།འཆི་བས་འཇིགས་སྐྲག་སྟེ། བྱ་རྒྱ་དང ། རྙི་རྣམས་ཐོགས་ནས་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ག་ལ་བ་དེར་སོང་ནས་ཕྱིན་པ་དང ། རྨ་བྱའི་རྒྱལ་པོ་གསེར་དུ་སྣང་བ་གང་ན་གནས་པའི་ཕྱོགས་དེར་རྒྱ་བྲེས། རྙི་བཙུགས་པ་དང ། རྨ་བྱའི་རྒྱལ་པོ་གསེར་དུ་སྣང་བ་དེ་གང་དང ། གང་དུ་ལྟ་བ་དེ་དང ། དེར་རྒྱ་རལ། རྙི་ཆད་དེ་ཕྱོགས་དེར་ཞག་བདུན་གྱི་བར་དུ་ཤ་ཐང་ཡང་རྨ་བྱའི་རྒྱལ་པོ་གསེར་དུ་སྣང་བ་དེ་བྱ་རྒྱ་དང ། རྙིས་གཟུང་བར་མ་ནུས་པ་དང ། རྨ་བྱའི་རྒྱལ་པོ་དེས་སྙིང་རྗེ་ཉེ་བར་བཞག་ནས་རྔོན་པ་དང ། བྱ་བ་རྣམས་ལ་འདི་སྐད་ཅེས་སྨྲས་སོ། །ཞོ་ཤས་འཚོ་བ་ཁྱེད་རྣམས། ཅིའི་ཕྱིར་ཕྱོགས་འདི་ན་ཤ་ཐང་ཞིང་འཁོད། དེ་དག་གིས་སྨྲས་པ། རྨ་བྱའི་རྒྱལ་པོ། ཤེས་པར་གྱིས་ཤིག་།རྒྱལ་པོ་ཚངས་པས་བྱིན་དེས་སྒོ་བ། མཆོག་རྣམས་ཤེས་པར་གྱིས་ཤིག་།རིའི་རྒྱལ་པོ་ 429a ༄#། །གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན། འཁོར་ལྔ་བརྒྱ་དང་ལྡན་པ་ཞིག་གནས་ཀྱི། དེ་ཁྱེད་ཀྱིས་བྱ་རྒྱ་དང ། རྙིས་གཟུང་ལ་འདིར་འོན་ཅིག་།གལ་ཏེ་འདིར་བླང་བར་ནུས་ན་ནི་ཤིན་ཏུ་ལེགས་སོ། །ཇི་སྟེ་མ་ནུས་ན་ཁྱེད་ཐམས་ཅད་ཀྱི་སྲོག་ཡལ་ལོ་ཞེས་བསྒོ་སྟེ། བདག་ཅག་སྲོག་གིས་འཇིགས་སྐྲག་ནས་ཁྱོད་ཀྱི་ཕྱིར་འདི་ལྟ་བུར་འབད་པར་བྱེད་དོ། །རྨ་བྱའི་རྒྱལ་པོ་དེས་སྨྲས་པ། ཞོ་ཤས་འཚོ་བ་དག་།ཁྱེད་ཀྱིས་རྙི་དང ། བྱ་རྒྱས་ང་གཟུང་བར་ནི་མི་ནུས་སོ། །ཞོ་ཤས་འཚོ་བ་དག་།གལ་ཏེ་རྒྱལ་པོ་ཚངས་པས་བྱིན་ང་བལྟ་བར་འདོད་ན་གྲོང་ཁྱེར་ཝཱ་ར་ཎཱ་སིའི་ནང་ཤིན་ཏུ་ཕྱག་དར་བྱས་ཏེ། སྤོས་ཆུས་ཆག་ཆག་ཐོབ་ལ་མེ་ཏོག་སིལ་མ་ཁྲོམ་སྟེ། གདུགས་དང ། བ་དན་བྲེས་ཤིག་།རྒྱལ་མཚན་སྒྲེང་ལ་པོག་ཕོར་ནས་བདུག་པས་བདུགས་ལ་རིན་པོ་ཆེ་སྣ་བདུན་གྱི་ཤིང་རྟ་བགྱིས་ཏེ། ཞག་བདུན་གྱི་ཉིན་པར་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འདིར་ཤོག་ཅིག་དང ། ང་ཉིད་དེར་འགྲོ་བར་བྱའོ། །དེ་ལྟར་བྱའོ་ཞེས་ཏེ་རྔོན་པ་དང ། བྱ་པའི་མི་དག་རྨ་བྱའི་རྒྱལ་པོ་གསེར་དུ་སྣང་བའི་ལྟར་མཉན་ནས་མཐར་གྱི་གྲོང་ཁྱེར་ཝཱ་ར་ཎཱ་སིའི་དེར་རྒྱལ་པོ་ཚངས་པས་བྱིན་ག་ལ་བ་དེར་སོང་སྟེ་ཕྱིན་ནས་ 429b རྒྱལ་པོ་ཚངས་པས་བྱིན་ལ་འདི་སྐད་ཅེས་སྨྲས་སོ། །ལྷ། མཁྱེན་པ་མཛད་དུ་གསོལ། བདག་ཅག་འདི་ནས་བྱ་རྒྱ་དང ། རྙི་ཐོགས་ཏེ་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ག་ལ་བ་དེར་མཆིས་པ་དང ། ཕྱོགས་གང་ན་རྨ་བྱའི་རྒྱལ་པོ་གསེར་དུ་སྣང་བ་གནས་པའི་ཕྱོགས་དེར་རྙི་བཙུགས། རྒྱ་བྲེས་ན་རྨ་བྱའི་རྒྱལ་པོ་གསེར་དུ་སྣང་བ་གང་དང ། གང་དུ་ལྟ་བ་དེ་དང ། དེར་རྒྱ་རལ་རྙི་ཆད་དེ། བདག་ཅག་ཕྱོགས་དེ་ན་དགུང་བདུན་གྱི་བར་དུ་ཤ་ཐང་ཡང་རྨ་བྱའི་རྒྱལ་པོ་དེ་རྒྱ་དང ། རྙིས་གཟུང་བའི་རྔོ་མ་ཐོགས་པ་དང ། རྨ་བྱའི་རྒྱལ་པོ་དེ་ས་སྙིང་རྗེ་ཉེ་བར་བཞག་སྟེ་བདག་ཅག་ལ་འདི་སྐད་ཅེས་མཆིའོ། །ཀྱེ་མི་དག་།ཅིའི་ཕྱིར་ཕྱོགས་འདི་ན་ཤ་ཐང་ཞིང་འཁོད། བདག་ཅག་གིས་སྨྲས་པ། རྨ་བྱའི་རྒྱལ་པོ། ཤེས་པར་གྱིས་ཤིག་།རྒྱལ་པོ་ཚངས་པས་བྱིན་གྱིས་བདག་ཅག་ལ་བསྒོ་བ། རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན། འཁོར་ལྔ་བརྒྱ་དང་ལྡན་པ་དེ་གང་དང ། གང་དུ་འགྲོ་བར་རྨ་བྱ་དེ་དག་ཐམས་ཅད་ཀྱི་དང་པོ་ལ་འགྲོ་བ་ཞིག་གནས་ཞེས་གྲག་གི་།ཁྱེད་ཀྱིས་བྱ་རྒྱ་དང ། ། རྙིས་རྨ་བྱའི་རྒྱལ་པོ་གསེར་དུ་སྣང་བ་བཟུང་ལ་འོན་ཅིག་།གལ་ཏེ་རྨ་བྱའི་རྒྱལ་པོ་དེ་འདིར་བླང་ནུས་ན་དེ་ལྟ་ན་ནི་ལེགས་སོ། །ཇི་སྟེ་མ་ནུས་ན་ཁྱེད་ཐམས་ཅད་ཀྱི་སྲོག་ཡལ་ 430a ༄#། །ལོ་ཞེས་བསྒོ་སྟེ། བདག་ཅག་སྲོག་གིས་འཇིགས་སྐྲག་།འཆི་བས་འཇིགས་སྐྲག་ནས་ཁྱོད་ཀྱི་ཕྱིར་འདི་ལྟར་འབད་པར་བྱེད་དོ། །དེས་སྨྲས་པ། ཀྱེ། ཞོ་ཤས་འཚོ་བ་དག་།ཁྱེད་ཀྱིས་ང་བྱ་རྒྱ་དང ། རྙིས་གཟུང་བར་མི་ནུས་སོ། །ཞོ་ཤས་འཚོ་བ་དག་།གལ་ཏེ་རྒྱལ་པོ་ཚངས་པས་བྱིན་ང་མཐོང་བར་འདོད་ན་གྲོང་ཁྱེར་ཝཱ་ར་ཎཱ་སིའི་ནང་ཤིན་ཏུ་ཕྱག་དར་བྱོས་ཏེ། སྤོས་ཆུས་ཆག་ཆག་ཐོབ་ལ་མེ་ཏོག་སིལ་མ་ཁྲོམ་སྟེ། གདུགས་དང ། བ་དན་བྲེས་ཤིག་།རྒྱལ་མཚན་སྒྲེང་ལ། པོ་ག་ཕོར་ནས་བདུག་པས་བདུགས་ལ་རིན་པོ་ཆེ་སྣ་བདུན་གྱི་ཤིང་རྟ་བགྱིས་ཏེ། ཞག་བདུན་གྱི་ཉིན་པར་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འདིར་ཤོག་ཅིག་དང ། ང་ཉིད་དེར་འགྲོ་བར་བྱའོ་ཞེས་མཆིའོ། །དེ་ལྟར་བྱའོ་ཞེས་ཏེ། རྒྱལ་པོ་ཚངས་པས་བྱིན་གྱིས་རྔོན་པ་དང ། བྱ་བ་དེ་དག་གི་ལྟར་མཉན་ནས་གྲོང་ཁྱེར་ཝཱ་ར་ཎཱ་སིའི་ནང་ཤིན་ཏུ་ཕྱག་དར་བྱེད་དུ་བཅུག་།སྤོས་ཆུས་ཆག་ཆག་འདེབས་སུ་བཅུག་།མེ་ཏོག་སིལ་མ་འགྲེམས་སུ་བཅུག་།གདུགས་དང ། བ་དན་བྲེས་སུ་བཅུག་།རྒྱལ་མཚན་སྒྲེང་དུ་བཅུག་།པོག་པོར་ནས་བདུག་པས་བདུག་ཏུ་བཅུག་།རིན་པོ་ཆེ་སྣ་བདུན་གྱི་ཤིང་རྟ་བྱེད་དུ་བཅུག་ནས་ཞག་བདུན་འདས་པ་དང ། དཔུང་གི་ཚོགས་ཡན་ལག་ 430b བཞི་པ་གོ་གྱོན་དུ་བཅུག་སྟེ། དཔུང་གི་ཚོགས་ཡན་ལག་བཞི་པ་གོ་བགོས་ནས་རིན་པོ་ཆེ་སྣ་བདུན་གྱི་ཤིང་རྟ་དྲངས་ཏེ། དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ག་ལ་བ་དེར་སོང་བ་དང ། རྨ་བྱའི་རྒྱལ་པོ་གསེར་དུ་སྣང་བ་དེ་བདག་ཉིད་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་སྐད་ཕྱུང་བ་དང ། དེའི་སྐད་ཀྱིས་དཔུང་གི་ཚོགས་ཡན་ལག་བཞི་པ་ཁྱབ་པར་གྲག་ནས། རྒྱལ་པོ་ཚངས་པས་བྱིན་དགའ་མགུ་ཡི་རངས་ཏེ་རབ་ཏུ་དགའ་ནས། དགའ་བ་དང ། ཡིད་བདེ་བ་སྐྱེས་ཏེ་རྨ་བྱའི་རྒྱལ་པོ་གསེར་དུ་སྣང་བ་དེ་ལ་བཀུར་སྟི་བྱེད་དུ་བཅུག་།བླ་མར་བྱེད་དུ་བཅུག་།རིམ་གྲོ་བྱེད་དུ་བཅུག་།མཆོད་པར་བྱེད་དུ་བཅུག་ནས་རྨ་བྱའི་རྒྱལ་པོ་གསེར་དུ་སྣང་བ་དང་ལྷན་ཅིག་གྲོང་ཁྱེར་ཝཱ་ར་ཎཱ་སི་ག་ལ་བ་དེར་སོང་བ་དང ། གྲོང་ཁྱེར་ཝཱ་ར་ཎཱ་སིའི་སྒོར་འདུག་ནས་སྐད་ཕྱུང་སྟེ། དེའི་སྐད་ཅེས་གྲོང་ཁྱེར་དེ་ཐམས་ཅད་ཁྱབ་པར་གྲག་གོ་།དེ་ནས་གྲོང་ཁྱེར་ཝཱ་ར་ཎཱ་སི་ན་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་གང་དག་གནས་པ་དེ་དག་གྲོང་ཁྱེར་གྱི་སྒོ་ག་ལ་བ་དེར་རབ་ཏུ་རྒྱུག་གོ་།དེ་ནས་རྒྱལ་པོ་ཚངས་པས་བྱིན་གྱིས་རྨ་བྱའི་རྒྱལ་པོ་གསེར་དུ་སྣང་བ་ལ་བཀུར་སྟི་བྱེད་དུ་བཅུག་།བླ་མར་བྱེད་དུ་བཅུག་།རིམ་གྲོ་བྱེད་དུ་བཅུག་།མཆོད་པར་བྱེད་དུ་བཅུག་ནས་རང་གི་ཁྱིམ་ག་ལ་བ་དང ། བཙུན་མོ་དཔེ་མེད་ག་ལ་བ་དེར་ 431a ༄#། །སོང་སྟེ་ཕྱིན་ནས། བཙུན་མོ་དཔེ་མེད་ལ་འདི་སྐད་ཅེས་སྨྲས་ཏེ། ལྷ་མོ། རྨ་བྱའི་རྒྱལ་པོ་གསེར་དུ་སྣང་བ་འདི་ནི་ཁྱོད་ཀྱི་གན་དུ་རང་འོངས་སོ་ཞེས་སྨྲས་སོ། །རྒྱལ་པོ་ཚངས་པས་བྱིན་དེ་བདག་ཉིད་རྨ་བྱའི་རྒྱལ་པོ་གསེར་དུ་སྣང་བ་ལ་མེ་ཏོག་དང ། འབྲས་བུ་རྣམས་ཀྱིས་རིམ་གྲོ་བྱེད་དོ། །དེའི་ཚེ་དུས་གཞན་ཞིག་ན་རྒྱལ་པོ་ཚངས་པས་བྱིན་བྲེལ་པ་ཞིག་བྱུང་ནས་དེས་འདི་སྙམ་དུ་བསམས་ཏེ། སུས་རྨ་བྱའི་རྒྱལ་པོ་གསེར་དུ་སྣང་བ་ལ་རིམ་གྲོ་བྱེད་ནུས་སྙམ་ནས། དེས་ཡང་འདི་སྙམ་དུ་བསམས་ཏེ།་བཙུན་མོ་དཔེ་མེད་ནི་མཁས་པ། ཤེས་རབ་ཆེན་པོ་དང་ལྡན་པ་སྟེ། དེས་ནུས་སོ་སྙམ་མོ། །དེ་ནས་རྒྱལ་པོ་ཚངས་པས་བྱིན་གྱིས་བཙུན་མོ་དཔེ་མེད་ལ་བོས་ཏེ་འདི་སྐད་ཅེས་སྨྲས་སོ། །ལྷ་མོ། ཁྱོད་ཀྱིས་རྨ་བྱའི་རྒྱལ་པོ་གསེར་དུ་སྣང་བ་འདི་ངས་ཇི་ལྟར་རིམ་གྲོ་བྱས་པ་བཞིན་དུ་བདག་ཉིད་ཀྱིས་རིམ་གྲོ་གྱིས་ཤིག་།དེ་ནས་རྒྱལ་པོ་ཚངས་པས་བྱིན་གྱི་བཙུན་མོ་དཔེ་མེད་བདག་ཉིད་ཀྱིས་མེ་ཏོག་དང ། འབྲས་བུ་རྣམས་ཀྱིས་རྨ་བྱའི་རྒྱལ་པོ་གསེར་དུ་སྣང་བ་དེ་ལ་བསྙེན་བཀུར་བྱེད་དོ། །དེའི་ཚེ་དེའི་དུས་གཞན་ཞིག་ན་བཙུན་མོ་དཔེ་མེད་སྐྱེས་པ་གཞན་ལ་ཆགས་པར་གྱུར་ཏེ། དེ་ནས་བཙུན་མོ་དཔེ་མེད་ཀྱིས་འདི་སྙམ་དུ་བསམས་སོ། །རྨ་བྱའི་རྒྱལ་པོ་གསེར་དུ་སྣང་བ་འདི་ནི་མི་སྐད་ 431b དུ་སྨྲ་བས་དེས་གཏམ་འདི་རྒྱལ་པོ་ཚངས་པས་བྱིན་ལ་མི་བསྙད་གྲང ། རྒྱལ་པོ་ཚངས་པས་བྱིན་དེས་ཀྱང་བདག་བཟུང་སྟེ་མི་བསད་གྲང་སྙམ་ནས། དེ་ནས་བུད་མེད་དེས་བྱའི་རྒྱལ་པོ་དེ་ལ་ཟས་དུག་ཅན་དང ། སྐོམ་དུག་ཅན་བྱིན་ནོ། །བུད་མེད་དེས་རྨ་བྱའི་རྒྱལ་པོ་དེ་ལ་ཇི་ལྟ་ཇི་ལྟར་ཟས་དུག་ཅན་དང ། སྐོམ་དུག་ཅན་བྱིན་པ་དེ་ལྟ་དེ་ལྟར་རྨ་བྱའི་རྒྱལ་པོ་དེའི་ལུས་གཟུགས་ཆེས་བཟང་བ་དང ། ཆེས་མཛེས་པ་དང ། ཆེས་བལྟ་ན་སྡུག་པ་དང ། ཆེས་འོད་གསལ་བར་གྱུར་ཏོ། །དེ་ནས་བཙུན་མོ་དཔེ་མེད་ཀྱིས་འདི་སྙམ་དུ་སེམས་ཏེ།་རྨ་བྱའི་རྒྱལ་པོ་གསེར་དུ་སྣང་བ་ལ་བདག་གིས་ཇི་ལྟ་ཇི་ལྟར་ཟས་དུག་ཅན་དང ། སྐོམ་དུག་ཅན་བྱིན་པ་དེ་ལྟ་དེ་ལྟར་འདིའི་ལུས་གཟུགས་ཆེས་བཟང་བ་དང ། ཆེས་མཛེས་པ་དང ། ཆེས་བལྟ་ན་སྡུག་པ་དང ། ཆེས་འོད་གསལ་བར་གྱུར་ཏོ་སྙམ་མོ། །དེ་ནས་བཙུན་མོ་དཔེ་མེད་ལ་རྨ་བྱའི་རྒྱལ་པོ་གསེར་དུ་སྣང་བས་འདི་སྐད་ཅེས་སྨྲས་སོ། །རྐུན་མ། རྐུན་མ། ཁྱོད་ཀྱི་ངས་ཤེས་ཏེ། ཁྱོད་འདི་སྙམ་དུ་བདག་ནི་སྐྱེས་པ་གཞན་ལ་ཆགས་པར་གྱུར་ལ། བྱ་འདིས་ཤེས་ཏེ་འདིའང་མི་སྐད་སྨྲ་བས་འདིས་གཏམ་འདི་རྒྱལ་པོ་ཚངས་པས་བྱིན་ལ་མི་བསྙད་གྲང ། རྒྱལ་པོས་བདག་བཟུང་སྟེ་མི་བསད་གྲང་སྙམ་དུ་བསམས་ནས་དེའི་ཕྱིར་ཁྱོད་ཀྱིས་ང་ལ་ཟས་དུག་ཅན་དང ། སྐོམ་དུག་ཅན་བྱིན་ཏེ་།ཁྱོད་ཀྱིས་ང་བསད་ 432a ༄#། །པར་མི་ནུས་སོ། །དེ་ནས་བཙུན་མོ་དཔེ་མེད་དེས་ཚིག་དེ་ཐོས་ནས་ཁ་བུབ་ཏུ་འགྱེལ་ཏེ། ཁྲག་དྲོན་པོ་སྐྱུགས་ནས་ནད་ཚབས་ཆེན་པོས་བཏབ་སྟེ། ནད་དེ་ཉིད་ཀྱིས་ཤི་བའི་དུས་བྱས་སོ། །དེ་ཤི་ནས་སེམས་ཅན་དམྱལ་བ་ཆེན་པོ་དུ་འབོད་དུ་སྐྱེས་པར་གྱུར་ཏོ། །ཁྱིམ་བདག་།དེའི་ཚེ་དེའི་དུས་ན་གྲོང་ཁྱེར་ཆེན་པོ་ཝཱ་ར་ཎཱ་སིའི་རྒྱལ་པོ་ཚངས་པས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན་དེ་ལྟར་མི་བལྟ་སྟེ། དགེ་སློང་ཤཱ་རིའི་བུ་དེའི་ཚེ་དེའི་དུས་ན་རྒྱལ་པོ་ཚངས་པས་བྱིན་ཞེས་བྱ་བར་གྱུར་ཏོ། །ཁྱིམ་བདག་།དེའི་ཚེ་དེའི་དུས་ན་བཙུན་མོ་དཔེ་མེད་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན་དེ་ལྟར་མི་བལྟ་སྟེ། བྲམ་ཟེའི་བུ་མོ་གཡོ་མ་དེ་དེའི་ཚེ་དེའི་དུས་ན་བཙུན་མོ་དཔེ་མེད་དུ་གྱུར་ཏོ། །ཁྱིམ་བདག་།དེའི་ཚེ་དེའི་དུས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་གནས་པ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙེམ་དུ་དོགས་ཤིང་ཐེ་ཚོམ་ཟ་ན་དེ་ལྟར་མི་བལྟ་སྟེ། ང་དེའི་ཆེ་དེའི་དུས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་གནས་པ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བར་གྱུར་ཏོ། །ཁྱིམ་བདག་།དེའི་ཚེ་དེའི་དུས་ན་རྨ་བྱ་ལྔ་ 432b བརྒྱར་གྱུར་པ་དེ་དག་གཞན་ཞིག་ཡིན་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན་དེ་ལྟར་མི་བལྟ་སྟེ། དགེ་སློང་མཆོག་ལྔ་བརྒྱ་པོ་འདི་དག་དེའི་ཚེ་དེའི་དུས་ན་རྨ་བྱ་ལྔ་བརྒྱར་གྱུར་ཏོ། །ཁྱིམ་བདག་།ང་དུད་འགྲོའི་སྐྱེ་གནས་སུ་གྱུར་པ་དེའི་ཚེའང་ལུས་ལ་དུག་གིས་མ་ཚུགས་ན། ད་ལྟར་མངོན་པར་རྫོགས་པར་སངས་རྒྱས་པ་ལྟ་ལ་སྨོས་ཀྱང་ཅི་དགོས་ཏེ། ངའི་ལུས་ལ་དུག་གིས་ཚུགས་པར་འགྱུར་བ་འདི་ནི་གནས་མེད་དོ། །དེ་བས་ན། ཁྱིམ་བདག་།ཚིགས་སུ་བཅད་པ་བརྗོད་པ་བྱ་ཡི། དེ་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ངས་ཁྱོད་ལ་བཤད་ཀྱི་ལེགས་པར་རབ་ཏུ་བཟུང་ལ་ཟས་ལ་ལན་གསུམ་བཟླས་པ་གྱིས་ཏེ་དགེ་སློང་གི་དགེ་འདུན་ལ་བྲིམས་ཤིག་།འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མེད་པ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། ། དེ་དག་འཇིག་རྟེན་དུག་གསུམ་སྟེ། །བཅོམ་ལྡན་ཆོས་ནི་དུག་མེད་པ། །ཆོས་ཀྱི་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མེད་པ། །དགེ་འདུན་བདེན་པས་དུག་བཅོམ་མོ། །བདེན་པ་གང་གིས་ང་སངས་རྒྱས། །འཇིག་རྟེན་ཀུན་ལ་བླ་ན་མེད། །བདེན་ 433a ༄#། །པའི་ཚིག་ནི་དེ་ཡིས་སུ། །ང་ལུས་དུག་གིས་མི་ཚུགས་ཤོག་།བདེན་པ་གང་གིས་ང་ཡི་ཆོས། །འཇིག་རྟེན་ཀུན་ལ་བླ་ན་མེད། །བདེན་པའི་ཚིག་ནི་དེ་ཡིས་སུ། །ང་ལུས་དུག་གིས་མི་ཚུགས་ཤོག་།བདེན་པ་གང་གིས་ངའི་དགེ་འདུན། །འཇིག་རྟེན་ཀུན་ལ་བླ་ན་མེད། །བདེན་པའི་ཚིག་ནི་དེ་ཡིས་སུ། །ང་ལུས་དུག་གིས་མི་ཚུགས་ཤོག་།ཤིང་གང་དུག་དང་བཅས་རྣམས་དང ། །སྲོག་ཆགས་གང་དག་དུག་བཅས་པ། །དེ་ཀུན་འདོད་ཆགས་དུག་ལས་བྱུང ། །འདོད་ཆགས་འདི་ནི་དུག་གི་མཆོག། ཤིང་གང་དུག་དང་བཅས་རྣམས་དང ། །སྲོག་ཆགས་གང་དག་དུག་བཅས་པ། །དེ་ཀུན་ཞེ་སྡང་དུག་ལས་བྱུང ། །ཞེ་སྡང་འདི་ནི་དུག་གི་མཆོག། ཤིང་གང་དུག་དང་བཅས་རྣམས་དང ། །སྲོག་ཆགས་གང་དག་དུག་བཅས་པ། །དེ་ཀུན་གཏི་མུག་དུག་ལས་བྱུང ། །གཏི་མུག་འདི་ནི་དུག་གི་མཆོག་།དྲག་པོའི་དུག་གིས་དུག་བཅོམ་སྟེ། །བསྲུང་དང་ཡོངས་སུ་གཟུང་བ་བྱས། །སངས་རྒྱས་ཀུན་གྱིས་དུག་བཅོམ་པས། །རྫོགས་སངས་རྒྱས་ལ་སྐྱབས་སུ་དོང ། །དེ་དེ་བཞིན་བགྱིའོ་ཞེས་ཏེ་ཁྱིམ་བདག་དག་དཔལ་སྦས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་དེ་དག་ལེགས་པར་རབ་ཏུ་བླངས་ཏེ། བླངས་ནས་ཟས་དེ་དག་ལ་ལན་གསུམ་བཟླས་ཏེ། རང་གི་ལག་གིས་ཞལ་ཟས་བསོད་པ་ 433b མང་པོ་དགེ་སློང་གི་དགེ་འདུན་ལ་བསྟབས་ཏེ་ཚིམ་བར་བྱས་སོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་དང ། དགེ་སློང་གི་དགེ་འདུན་བཤོས་གསོལ་ཟིན་ཏེ། ཕྱག་བཅབས། ལྷུང་བཟེད་གྱུར་བར་རིག་ནས་སྟན་ཞིག་བླངས་ཏེ་ཕྱོགས་གཅིག་ཏུ་འདུག་གོ་།ཁྱིམ་བདག་དཔལ་སྦས་ཕྱོགས་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་གཏམ་རིམ་གྱིས་མཛད་པ་འདི་ལྟ་སྟེ། གང་འདི་སྦྱིན་པའི་གཏམ་དང ། ཚུལ་ཁྲིམས་ཀྱི་གཏམ་དང ། མཐོ་རིས་ཀྱི་གཏམ་དང ། འདོད་པའི་ཉེས་དམིགས་དང ། དེའི་འོག་ཏུ་ཟག་པ་དང།་ཀུན་ནས་ཉོན་མོངས་པ་དང ། མངོན་པར་འབྱུང་བའི་ཕན་ཡོན་དང ། རྣམ་པར་བྱང་བའི་ཕྱོགས་སོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དཔལ་སྦས་ལ་རྒྱ་ཆེར་རབ་ཏུ་བསྟན། རབ་ཏུ་འཇོག་།རྣམ་པར་འགྲེལ། རྣམ་པར་འབྱེད། གསལ་བར་མཛད་དོ། །བཅོམ་ལྡན་འདས་ཀྱིས་གང་གི་ཚེ་ཁྱིམ་བདག་དཔལ་སྦས་སེམས་དགའ་བ་དང ། སེམས་མཉེན་པ་དང ། སེམས་དགེ་བ་དང ། སྒྲིབ་པ་མེད་པའི་སེམས་སུ་གྱུར་པར་མཁྱེན་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཡང་དག་ཕུལ་གྱི་ཆོས་གང་སྟོན་པ་དེ་བཅོམ་ལྡན་འདས་ཀྱིས་ཁྱིམ་བདག་དཔལ་སྦས་ལ་རྒྱ་ཆེར་རབ་ཏུ་བསྟན། རབ་ཏུ་བཞག། རྣམ་པར་བཀྲོལ། རྣམ་པར་ཕྱེ། གསལ་བར་མཛད། རབ་ཏུ་བཤད་དོ། །དེ་ནས་ཁྱི་ 434a ༄#། །བདག་དཔལ་སྦས་སྟན་དེ་ལ་འདུག་བཞིན་དུ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་ཏེ། འདི་ལྟ་སྟེ། དཔེར་ན། རས་ནག་པོའི་བག་མེད་པ། ཁ་བསྒྱུར་བར་འོས་པ། ཚོན་གྱི་ནང་དུ་བཅུག་ན་ཚོན་ལེགས་པར་འཇེན་པ་དེ་བཞིན་དུ་ཁྱིམ་བདག་དཔལ་སྦས་ཀྱང་སྟན་དེ་ལ་འདུག་བཞིན་དུ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཁྱིམ་བདག་དཔལ་སྦས་ཀྱིས་ཆོས་མཐོང ། ཆོས་ཐོབ། ཆོས་ཡོངས་སུ་བསྐྱེད། མངོན་དུ་ཡང་དག་པར་རྟོགས། ནེམ་ནུར་མེད། ཐེ་ཚོམ་དང་བྲལ། སོམ་ཉིད་དང་བྲལ། གཞན་གྱི་དྲིང་མི་འཇོག་།སྟོན་པའི་བསྟན་པ་ཀུན་ཏུ་ཤེས། མི་འཇིགས་པ་ཐོབ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་སངས་རྒྱས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆིའོ། །བཙུན་པ་བཅོམ་ལྡན་འདས། བདག་ལ་དགེ་བསྙེན་དུ་གཟུང་དུ་གསོལ། དེང་ནས་ཇི་སྲིད་འཚོའི་བར་དུ་བདག་གི་སྐྱབས་ཁྱོད་ལགས་ཏེ་སྐྱབས་སུ་མཆིའོ། །དེ་ནས་དགེ་སློང་དེ་དག་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། འདི་ལྟར་ཁྱིམ་བདག་དཔལ་སྦས་བཅོམ་ལྡན་འདས་མེ་དོང་དུ་བསྲེག་པ་དང ། སེམས་ཅན་དམྱལ་བ་ཆེན་པོར་ལྟུང་བར་འདོད་པ་དེ་བཅོམ་ལྡན་འདས་ཀྱིས་སེམས་ 434b ཅན་དམྱལ་བ་ཆེན་པོ་ནས་བཟློག་སྟེ། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པ་འདི་ནི་ངོ་མཚར་རྨད་དུ་བྱུང་བའོ་སྙམ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ཁྱིམ་བདག་དཔལ་སྦས་ད་ལྟར་འབའ་ཞིག་ང་མེ་དོང་དུ་བསྲེག་པ་དང ། སེམས་ཅན་དམྱལ་བ་ཆེན་པོར་ལྷུང་བར་འདོད་ལ། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་སྟེ། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པར་ཡང་མ་ཟད་དེ། དགེ་སློང་དག་།གཞན་གྱི་ཚེའང་ཁྱིམ་བདག་དཔལ་སྦས་ང་མེ་དོང་དུ་བསྲེག་པ་དང ། སེམས་ཅན་དམྱལ་བ་ཆེན་པོར་ལྟུང་བར་འདོད་དེ། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་གོ་།དགེ་སློང་དེ་དག་གིས་གསོལ་པ། བཙུན་པ་བཅོམ་ལྡན་འདས། ཁྱིམ་བདག་དཔལ་སྦས་གཞན་གྱི་ཚེ་བཅོམ་ལྡན་འདས་ཞུགས་ཀྱི་དོང་དུ་བསྲེགས་ཏེ། སེམས་ཅན་དམྱལ་བ་ཆེན་པོ་མནར་མ་མཆིས་པར་ལྟུང་བར་འཚལ་ལ།་བཅོམ་ལྡན་འདས་ཀྱིས་དེ་སེམས་ཅན་དམྱལ་བ་ཆེན་པོ་དེ་ལས་ཐར་བར་མཛད་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།སྔོན་བྱུང་བ་འདས་བའི་དུས་ན་བྲམ་ཟེའི་ཁྱེའུ་ཆོས་འདོད་ཅེས་བྱ་བ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། འདོད་པ་ཆུང་བ། ཆོ་ག་ཤེས་པ། རབ་ཏུ་དབེན་པ། དགེ་བའི་ཆོས་ཅན་ཞིག་བྱུང་ 435a ༄#། །སྟེ།་བྲམ་ཟེའི་ཁྱེའུ་ཆོས་འདོད་ནི་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པའོ། །བྲམ་ཟེའི་ཁྱེའུ་ཆོས་འདོད་དེ་བྲམ་ཟེ་དང ། རྒྱལ་རིགས་དང ། ཁྱིམ་བདག་རྣམས་ཀྱིས་བཀུར་སྟི་བྱས། བླ་མར་བྱས་ཏེ་མཆོད་ནས་གོས་དང ། ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་བཟང་པོ་མང་པོ་རྙེད་པར་གྱུར་ཏོ། །བྲམ་ཟེའི་ཁྱེའུ་ཆོས་འདོད་ནི་སྟོང་ཕྲག་བརྒྱས་ཚིགས་སུ་བཅད་བ་གཅིག་འཚོལ་ལོ། །དེ་ནས་བྲམ་ཟེ་ཞིག་བྲམ་ཟེའི་ཁྱེའུ་ཆོས་འདོད་ཀྱི་རྙེད་པ་དང ། བཀུར་སྟི་དང ། ཚིགས་སུ་བཅད་པ་མ་བཟོད་ནས་བྲམ་ཟེའི་ཁྱེའུ་ཆོས་འདོད་ག་ལ་བ་དེར་སོང་སྟེ་ཕྱིན་པ་དང ། བྲམ་ཟེའི་ཁྱེའུ་ཆོས་འདོད་ལ་འདི་སྐད་ཅེས་སྨྲས་སོ། །ངས་བྲམ་ཟེའི་ཁྱེའུ་ཁྱོད་ལ་ལེགས་པར་བཤད་པ་བསྒྲགས་པར་བྱའོ། །བྲམ་ཟེའི་ཁྱེའུ་ཆོས་འདོད་ཀྱིས་སྨྲས་པ། འཕགས་པ། ལེགས་པར་བཤད་པ་བདག་ལ་ལེགས་པར་བསྒྲག་ཏུ་གསོལ། བྲམ་ཟེས་སྨྲས་པ། ཆོས་འདོད། ངས་ཁྱོད་ལ་དེ་བཞིན་དུ་ལེགས་པར་བཤད་པ་བསྒྲག་ཏུ་མི་རུང་ངོ ། །ཆོས་འདོད་ཀྱིས་སྨྲས་པ། འཕགས་པ། འོ་ན་ཁྱོད་ཀྱིས་ལེགས་པར་བཤད་པ་བདག་ལ་ཇི་ལྟར་བསྒྲག་པར་བགྱི། བྲམ་ཟེས་སྨྲས་པ། གལ་ཏེ་ཆོས་འདོད་ཁྱོད་ཀྱིས་དོང་ཆེན་པོ་རྐོར་བཅུག་ལ། བརྐོས་ 435b ནས་མེས་འགེངས་སུ་བཅུག་སྟེ། མེ་མི་འབར་ཞིང་དུ་བ་མི་འཐུལ་བས་བཀང་ནས་མཆོད་སྡོང་མཐོན་པོ་འཛུགས་སུ་ཆུག་ལ། འཛུགས་སུ་བཅུག་ནས་མེ་དོང་དེར་བདག་ཉིད་མཆོངས་ན་ངས་ཁྱོད་ལ་ལེགས་པར་བཤད་པ་བསྒྲག་པར་བྱའོ། །བྲམ་ཟེའི་ཁྱེའུ་ཆོས་འདོད་ཀྱིས་སྨྲས་པ། འཕགས་པ། བདག་འདི་ན་ལེགས་པར་བཤད་པ་གང་ཅི་འཚོལ་བ་དེ་ཐམས་ཅད་ནི་སེམས་ཅན་རྣམས་ཀྱི་དོན་གྱི་སླད་དུ་ལགས་ན། སློབ་དཔོན། བདག་གིས་ལེགས་པར་བཤད་པ་སེམས་ཅན་རྣམས་ལ་མ་བསྒྲགས་པར་ཇི་ལྟར་མེ་དོང་དུ་མཆོད་བར་བགྱི། དེ་ནས་བྲམ་ཟེ་དེས་བྲམ་ཟེའི་ཁྱེའུ་ཆོས་འདོད་ལ་ཚིགས་སུ་བཅད་དེ་སྨྲས་པ། སྔགས་འཚོལ་བདེ་བ་ག་ལ་ཡོད། །ག་ལ་བདེ་ཡོད་སྔགས་འཚལ་བ། །སྔགས་བཙལ་ཕྱིར་ནི་བདེ་བ་བོར། །བདེ་བ་བོར་ཅིག་སྔགས་བཙལ་ཕྱིར། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་དེ་ལ་ཚིགས་སུ་བཅད་དེ་སླར་སྨྲས་པ། བྱང་ཆུབ་འཚོལ་བ་ག་ལ་བདེ། །ག་ལ་བདེ་ཡོད་བྱང་ཆུབ་འཚོལ། །བྱང་ཆུབ་བཙལ་ཕྱིར་བདེ་བ་བོར། །བདེ་བོར་བྱང་ཆུབ་བཙལ་བའི་ཕྱིར། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་ལ་འདི་སྐད་ཅེས་སྨྲས་སོ། །སློབ་དཔོན། བདག་ལ་ལེགས་པར་བཤད་པ་ལེགས་པར་བསྒྲག་ཏུ་གསོལ། །འོན་ཏང་ཁྱོད་གང་བཞེད་པ་དེ་བགྱིའོ། །བྲམ་ཟེའི་ཁྱེའུ་ཆོས་འདོད་ལེགས་པར་བཤད་པའི་དོན་གྱི་ཕྱིར་ 436a ༄#། །བདག་ཉིད་དོར་བར་འདོད་དོ་ཞེས་བྲམ་ཟེ་དང ། ཁྱིམ་བདག་རྣམས་ཀྱིས་ཐོས་ནས་དེ་དག་ཐམས་ཅད་དུ་ཞིང་གདོང་ལ་མཆི་མ་ཟག་བཞིན་དུ་བྲམ་ཟེའི་ཁྱེའུ་ཆོས་འདོད་ག་ལ་བ་དེར་དོང་སྟེ་ཕྱིན་ནས། བྲམ་ཟེའི་ཁྱེའུ་ཆོས་འདོད་ལ་འདི་སྐད་ཅེས་སྨྲས་སོ། །ཆོས་འདོད། ཁྱོད་བདག་ཉིད་མ་དོར་ཅིག་།ཆོས་འདོད་ཁྱོད་ནི་ཁྱིམ་ན་འདུག་བཞིན་སྦྱིན་པ་སྦྱིན་པ་དང ། བསོད་ནམས་བྱ་བར་ནུས་སོ། །བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་དང ། ཁྱིམ་བདག་དེ་དག་ལ་འདི་སྐད་ཅེས་སྨྲས་སོ། །བཙུན་པ་དག། དེ་སྐད་མ་གསུང་ཞིག་།བདག་གིས་སློབ་དཔོན་གྱི་དགོངས་པ་ངེས་པར་བསྐང་བར་བགྱིའོ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་མཆོད་སྡོང་ཆེན་པོ་འཛུགས་སུ་བཅུག་སྟེ།་མཆོད་སྡོང་ཆེན་པོ་བཙུགས་ནས་དེའི་དྲུང་དུ་དོང་ཆེན་པོ་རྐོར་བཅུག་སྟེ། བརྐོས་ནས་མེས་འགེངས་སུ་བཅུག་གོ་།མེ་མི་འབར་ཞིང་དུ་བ་མི་འཐུལ་བས་བཀང་ནས་བྲམ་ཟེ་དེ་ལ་འདི་སྐད་ཅེས་སྨྲས་སོ། །སློབ་དཔོན། བདག་ལ་ལེགས་པར་བཤད་པ་ལེགས་པར་བསྒྲག་ཏུ་གསོལ། དེ་ནས་བྲམ་ཟེ་དེས་བྲམ་ཟེའི་ཁྱེའུ་ཆོས་འདོད་ལ་ཚིགས་སུ་བཅད་པ་འདི་ལྟ་བུ་བསྟན་ཏོ། །སྦྱིན་པ་ལ་ནི་རྟག་ཏུ་དགའ་བར་གྱིས། །རྟག་ཏུ་ཚུལ་ཁྲིམས་ཡོངས་སུ་རྫོགས་པར་སྤྱོད། །བརྩོན་འགྲུས་མཆོག་གི་གནས་ནི་བརྩམ་པར་བགྱི། ། 436b ཤེས་རབ་ཀྱིས་ནི་ཆོས་མཆོག་དམ་པ་ཐོབ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་དེ་ལ་ཚིགས་སུ་བཅད་པ་འདི་ལེགས་པར་རབ་ཏུ་བཟུང་སྟེ། སྐྱེ་བོ་ཕལ་བོ་ཆེ་བསགས་སོ། ། སྐྱེ་བོ་ཕལ་པོ་ཆེ་བསགས་ནས་མཆོད་སྡོང་མཐོན་པོའི་ཁར་འཛེགས་ཏེ། སྐྱེ་བོ་ཕལ་པོ་ཆེ་ལ་ཚིགས་སུ་བཅད་པ་འདི་བསྒྲགས་སོ། །སྦྱིན་པ་ལ་ནི་རྟག་ཏུ་དགའ་བ་གྱིས། །རྟག་ཏུ་ཚུལ་ཁྲིམས་ཡོངས་སུ་རྫོགས་པར་སྤྱོད། །བརྩོན་འགྲུས་མཆོག་གི་གནས་ནི་བརྩམ་པར་གྱིས། །ཤེས་རབ་ཀྱིས་ནི་ཆོས་མཆོག་དམ་པ་ཐོབ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་སྐྱེ་བོ་ཕལ་པོ་ཆེ་དེ་ལ་ཚིགས་སུ་བཅད་པ་འདི་བསྒྲགས་ནས་འདི་ལྟ་བུའི་བདེན་པའི་ཚིག་འདི་བྱེད་དེ། ས་ཕྱོགས་འདི་ན་ལྷ་རྒྱ་ཆེན་པོ་གང་དག་གནས་པ་རྣམས་བདག་ལ་དགོངས་སུ་གསོལ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དེ་དག་ཐམས་ཅད་ཀྱང་བདག་ལ་དགོངས་སུ་གསོལ། བདག་ནི་གཏོང་བ་བགྱིད་དེ། ཤིན་ཏུ་གཏོང་བ་དང ། གཏོང་བའི་ཡང་གཏོང་བ་དང ། བདག་ཉིད་ཡོངས་སུ་གཏོང་བ་བགྱིད་དོ། །བདེན་པ་དང ། བདེན་པའི་ཚིག་གང་གིས་བདག་ཡོངས་སུ་གཏོང་བ་བགྱིད་པ་ནི་རྒྱལ་པོའི་སླད་དུ་མ་ལགས། ལོངས་སྤྱོད་ཀྱི་སླད་དུ་མ་ལགས། མཐོ་རིས་ཀྱི་སླད་དུ་མ་ལགས། འཁོར་ལོས་བསྒྱུར་བའི་རྒྱལ་པོའི་སླད་དུ་མ་ལགས་ཀྱི། གཞན་དུ་ན་ 437a ༄#། །བདག་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་མ་དུལ་བ་རྣམས་གདུལ་བར་བགྱི་མ་བརྒལ་བ་རྣམས་བསྒྲལ་བར་བགྱི། མ་གྲོལ་བ་རྣམས་དགྲོལ་བར་བགྱི། དབུགས་མ་ཕྱིན་པ་རྣམས་དབུགས་དབྱུང་པར་བགྱི། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱི་སྙམ་པའི་སླད་དུ་སྟེ། བདེན་པ་དང ། བདེན་པའི་ཚིགས་དེས་བདག་གི་ཡོངས་སུ་གཏོང་བ་འབྲས་བུ་མེད་པར་མ་གྱུར་ཅིག་ཅེས་བྱས་ནས་མེ་དོང་དེར་བདག་ཉིད་མཆོངས་སོ། །དགེ་སློང་དག་།བྲམ་ཟེའི་ཁྱེའུ་ཆོས་འདོད་མེ་དོང་དེར་མཆོངས་མ་ཐག་ཏུ་མེ་དོང་དེའི་མེ་ཤི་སྟེ། པདྨའི་རྫིང་དུ་གྱུར་ནས་བུང་བ་སྒྲ་ཟི་ཟི་ཟེར་བའི་པདྨ་ལ་བྲམ་ཟེའི་ཁྱེའུ་ཆོས་འདོད་འདུག་ནས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ།་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏེ། བྲམ་ཟེ་དེ་ནི་ལུས་ཐམས་ཅད་ནས་མེ་བྱུང་སྟེ་ཚིག་ནས་ཚིག་གོ་ཞེས་སྨྲས་ཏེ། སེམས་ཅན་དམྱལ་བ་ཆེན་པོར་ལྟུང་ངོ ། །དེ་ལ་བྲམ་ཟེའི་ཁྱེའུ་ཆོས་འདོད་ཀྱིས་འདི་སྐད་ཅེས་སྨྲས་སོ། །སློབ་དཔོན། མ་བསྙེངས་ཤིག་།བདག་གིས་ཁྱོད་བསྐྱབ་པར་བགྱིའོ། །དེ་ 437b ནས་བྲམ་ཟེའི་ཁྱེའུ་ཆོས་འདོད་ཀྱིས་དེའི་ཚེ་འདི་ལྟ་བུའི་བདེན་པའི་ཚིག་འདི་བྱས་ཏེ། བདེན་པ་དང ། བདེན་པའི་ཚིག་གང་གིས་བདག་སེམས་ཅན་རྣམས་ཀྱི་དོན་དུ་བྱང་ཆུབ་ལ་སྤྱོད་པའི་བདེན་པ་དང ། བདེན་པའི་ཚིག་དེས་བྲམ་ཟེ་འདིའི་ལུས་ཚིག་པ་རབ་ཏུ་ཞི་བར་གྱུར་ཅིག་།སེམས་ཅན་དམྱལ་བ་ལས་ཀྱང་ལོག་པར་གྱུར་ཅིག་ཅེས་བྱས་སོ། །བྲམ་ཟེའི་ཁྱེའུ་ཆོས་འདོད་ཀྱིས་བདེན་པ་དང ། བདེན་པའི་ཚིག་བྱས་མ་ཐག་ཏུ་བྲམ་ཟེ་དེ་སེམས་ཅན་དམྱལ་བ་དེ་ནས་ཐར་པར་གྱུར་ཏོ། །དགེ་སློང་དག་།དེའི་ཚེ་དེའི་དུས་ན། བྲམ་ཟེའི་ཁྱེའུ་ཆོས་འདོད་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན་དེ་ལྟར་མི་བལྟ་སྟེ། དགེ་སློང་དག་།ང་དེའི་ཚེ་དེའི་དུས་ན་བྲམ་ཟེའི་ཁྱེའུ་ཆོས་འདོད་ཅེས་བྱ་བར་གྱུར་ཏོ། །དགེ་སློང་དག་།དེའི་ཚེ་དེའི་དུས་ན་བྲམ་ཟེར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན་དེ་ལྟར་མི་བལྟ་སྟེ། ཁྱིམ་བདག་དཔལ་སྦས་དེའི་ཚེ་དེའི་དུས་ན་བྲམ་ཟེར་གྱུར་ཏོ། །དགེ་སློང་དག་།དེའི་ཚེའང་ཁྱིམ་བདག་དཔལ་སྦས་ང་མེ་དོང་དུ་བསྲེགས་ལ་སེམས་ཅན་དམྱལ་བ་ཆེན་པོར་ལྟུང་བར་འདོད་པ་ལས། ངས་དེ་སེམས་ཅན་དམྱལ་བ་ཆེན་པོ་དེ་ནས་བཟློག་ཅིང ། འཕགས་པའི་ཆོས་འདུལ་བ་ལ་བཞག་སྟེ་འདི་དང ། དེའང་དེ་བཞིན་དུ་ཟུངས་ཤིག་།དགེ་སློང་དག་།ད་ལྟར་ཡང་དཔལ་སྦས་ང་མེ་དོང་དུ་བསྲེགས་ལ་སེམས་ 438a ༄#། །ཅན་དམྱལ་བ་ཆེན་པོར་ལྟུང་བར་འདོད་པ་ལས། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་ཅིང་འཕགས་པའི་ཆོས་འདུལ་བ་ལ་བཞག་སྟེ། དེ་དང་འདིའང་དེ་བཞིན་དུ་ཟུངས་ཤིག་།དགེ་དང་མི་དགེ་སྔོན་བྱས་ཆུད་མི་ཟ། །མཁས་པ་རྣམས་ལ་བསྟེན་པ་ཆུད་མི་ཟ། །འཕགས་པའི་ཚོགས་ཀྱིས་ལེགས་བཤད་ཆུད་མི་ཟ། །བྱས་ལ་བྱས་གཟོ་ནམ་ཡང་ཆུད་མི་ཟ། །ལེགས་པར་བྱས་པ་དགེ་བའི་ལས། །ཉེས་པར་བྱས་པ་མི་དགེ་ཡིན། །དེ་ལའང་རྣམ་པར་སྨིན་ཡོད་དེ། །གདོན་མི་ཟ་བར་འབྲས་བུ་སྨིན། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དེ་དག་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང་བཅས་པ་དང ། ཐམས་ཅད་དང་ལྡན་པའི་འཁོར་དེ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཔལ་སྦས་ཞེས་བྱ་བའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་བཅད་ཀྱིས་བཅོས་ནས་གཏན་ལ་ཕབ་པ།། |