།།བོད་སྐད་དུ། ཟས་ཀྱིས་འཚོ་བ་རྣམ་པར་དག་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་བརྒྱ་ཕྲག་ 145a ༄#། །ཕྱེད་དང་བཅུ་གསུམ་དང ། གཞན་ཡང་དགེ་སློང་ཕ་དང ། དགེ་སློང་མ་དང ། དགེ་བསྙེན་ཕ་དང ། དགེ་བསྙེན་མ་དང ། ལྷ་ཀླུ་སྡེ་བརྒྱད་དང ། བྱང་ཆུབ་སེམས་དཔའ་མང་པོ་དང་ཐབས་གཅིག་ཏུ་བཞུགས་སོ། །དེ་ནས་མཽངྒལ་གྱི་བུ་ཆེན་པོ་འདུག་པ་ལས་ལངས་ཏེ། བཅོམ་ལྡན་འདས་ལ་ཕྱག་བཙལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་སྔོན་གྲོང་ཁྱེར་དུ་བསོད་སྙོམས་ལ་མཆིས་པའི་ཤུལ་ལོགས་སུ་མི་གྲངས་ཁྲི་སྟོང་སྙེད་མཆིས་ཏེ། དེ་དག་གི་མགོ་བོ་ནི་རི་བཞིན་དུ་ཆེ། ཁོག་པ་ནི་རི་རབ་ལྷུན་པོ་ཙམ་འདྲ། མགྲིན་པ་ནི་ཁབ་བཞིན་དུ་ཕྲ། ཕན་ཚུན་བསྐྱོད་ཅིང་མཆི་བ་ན་ཤིང་རྟ་ལྔ་བརྒྱ་ཤིན་ཏུ་འཁྲོལ་བའི་སྒྲ་བྱུང་སྟེ། དེའང་མི་བཟད་པའི་གཞོབ་ཀྱི་དུད་པ་ཀུན་ནས་འཐུལ་ལོ། །དེ་ཅིའི་དངོས་པོ་ལགས་པ་དང ། ཅི་ལས་གྱུར་པ་བཅོམ་ལྡན་འདས་ཀྱིས་བཀའ་སྩལ་དུ་གསོལ། དེ་ནས་བཅོམ་ལྡན་འདས་གྱིས་བཀའ་སྩལ་པ། མཽངྒལ་གྱི་བུ། དེ་དག་ནི་འདྲེ་བཀྲེན་ལྟོགས་པ་ཡིན་ཏེ། སྔོན་འདས་པའི་དུས་ན་མཆོད་སྡོང་བཤིག་པ་དང ། མཆོད་སྟོན་སྦྱར་བ་བཤིག་པས་དེ་ལྟ་བུའི་སྡིག་པ་རྣམ་པར་སྨིན་པ་ཡིན་ནོ། །ཡང་གཅིག་ཏུ་ན་གཞན་གྱི་མཆོད་སྟོན་ཟོས་ནས་ཟ་གཅིག་པར་མ་བྱས་པའི་སྡིག་གི་རྣམ་པར་སྨིན་པ་དེ་ཡིན་ནོ། །མཆོད་སྟོན་ལྷག་མ་ཟ་གཅིག་པར་མི་བྱེད་པ་ལ་མ་བྱིན་ཅིག། ཡོན་བདག་ 145b གིས་ལྷག་མ་རྣམས་དགེ་འདུན་ལ་སྤགས་པའི་གསོལ་བ་བྱོས་ལ་བཟོད་པར་གསོལ་ཅིག། སྤགས་པའི་ཟས་རྣམས་དགེ་འདུན་རྣམས་ཀྱིས་གནང་བ་བྱིན་ཅིག། གནང་བ་མ་བྱིན་ན་དགེ་འདུན་རྣམས་ཀྱང་ལྟུང་བར་འགྱུར་རོ། །དེ་ནས་མཽངྒལ་གྱི་བུས་གསོལ་པ། བཅོམ་ལྡན་འདས་ཀྱིས་བཀའ་སྩལ་པ་ནི་ཡང་དག་པའོ། །ཡོན་བདག་སུའང་རུང་སྟེ་ཆོས་བཞིན་དུ་བསྡུ་བའོ་ཕྱིར་མཆོད་པའི་ཡོ་བྱད་འབྱོར་ཚོགས་ཏེ། ཟས་གཅིག་པར་བྱས་པ་རྣམས་ནི་ཟས་ཀྱི་འཚོ་བ་དང་ལྡན་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཟ་གཅིག་པར་མ་བྱས་པ་རྣམས་ནི་ཟས་དང་མི་ལྡན་པར་འགྱུར་རོ། །དེ་ལྟར་ན་ཉི་མ་གཅིག་ཟ་གཅིག་པ་ཐུབ་ན་ཉི་མ་དྲུག་ཁྲིར་བསོད་ནམས་དང ། བཟའ་བ་རྣམ་པར་འཕེལ་བར་འགྱུར་རོ། །དེ་ལ་དེ་ལྟར་མ་བྱས་པ་རྣམས་ནི་ཉི་མ་ཁྲི་ཁྲག་དྲུག་ཅུར་འདྲེ་ལྟོགས་པར་འགྱུར་རོ། །དེ་ཅིའི་ཕྱིར་ཞེ་ན། དེའི་སྦྱིན་པ་ནི་ཤིན་ཏུ་ལྕི་བ་ཡིན་ཏེ། གཉིས་ན་ལྕགས་ཀྱི་ཐུ་ལུམ་ཟོས་ཀྱང་སླ་ཡི། ཡོན་བདག་དད་པ་ཅན་གྱི་ཟས་ནི་ཤིན་ཏུ་བཞུ་བར་དཀའ་སྟེ། ཤིན་ཏུ་ཡུན་རིང་པོར་སྡུག་བསྔལ་བར་འགྱུར་ཏེ། ཚེ་རབས་ཁྲི་ཕྲག་བརྒྱར་འདྲེ་ལྟོགས་པའི་དངོས་པོར་འགྱུར་རོ། །བསོད་ནམས་ཀྱི་ཟས་བྱའོ་ཅོག་ལ་ནན་ཏན་ཆེར་བྱོས་ཤིག། སྣམ་ཕྲག་གམ། ཕུ་རུང་གི་ནང་དུ་ཁྱེར་བར་བྱས་ན་ཚེ་རབས་ལྔ་བརྒྱར་དམྱལ་བར་ལྟུང་སྟེ། ལྕགས་ཀྱི་ཐུ་ལུམ་དམར་པོ་མཆན་ཁུང་གཡོན་ 146a ༄#། །པ་ནས་ཐལ་ཏེ་མཆན་ཁུང་གཡས་པར་ཐལ་ལོ། །ལྷག་མ་མི་བཀུར་བར་བྱོས་ཤིག། ཆུང་དུ་ན་ཁྲེའི་འབྲུ་གཅིག་ཙམ་ཁྱེར་ནའང་ལྕགས་ཀྱི་འཁོར་ལོ་ཙམ་དུ་འགྱུར་རོ། །དགེ་བསྙེན་གྱིས་ཀྱང་རུང་སྟེ་བསོད་ནམས་ཀྱི་ཟས་སྦྱར་རོ་ཅོག་ལ་ཐོག་མ་ནས་མྱང་བའི་སྤགས་པ་མི་བྱའོ། །དེ་མྱངས་བས་སྦྱར་བ་ཐམས་ཅད་ལྷག་མའི་སྤགས་པ་མི་བྱའོ། །བྱས་པ་དོན་མེད་པར་འགྱུར་རོ། །གཉིས་ན་མ་བྱས་ཀྱང་སླའོ། །དེ་ཅིའི་ཕྱིར་ཞེ་ན། ལྷ་ཐམས་ཅད་མི་འགྱེས་པར་འགྱུར་རོ། །གཉེན་པོ་ཐམས་ཅད་མི་དགའ་བར་འགྱུར་རོ། །གང་ཞིག་མྱངས་པ་ཞིག་ཡོད་ན་ཚེ་རབས་ལྔ་ཁྲིར་འདྲེ་ལྟོགས་པར་འགྱུར་རོ། །སྡུག་བསྔལ་མི་བཟད་པ་སྣ་ཚོགས་ཀྱང་མྱོང་བར་འགྱུར་རོ། །གང་ཞིག་ཕྱིན་ཆད་བསོད་ནམས་འདོད་པས་ཚུལ་བཞིན་དུ་བསོད་ནམས་ཀྱི་ཟས་གཙང་སྤྲས་ཕྱེད་པ་དང ། ཤིན་ཏུ་གུས་པར་སྦྱར་ལ་ལག་པ་ཤིན་ཏུ་དག་པར་བཀྲུས་ནས་ཚོད་མ་ལ་སོགས་པ་དྲོད་བག་ཏུ་སྦྱར་རོ་ཅོག་ཤིག་ཏུ་བཀབ་པ་དང ། རིམ་གྲོ་བསྐྱེད་དེ་དེ་དག་ཀྱང་སྔར་མྱང་བར་མི་བྱའོ། །དེ་ནས་བསོད་ནམས་སུ་གྱུར་ཅིང་ལྷ་ཐམས་ཅད་ཀྱང་དགའ་བར་འགྱུར་རོ། །གཉེན་པོ་ཐམས་ཅད་ཀྱང་དགའ་བར་འགྱུར་རོ། །ལྷ་ལ་སོགས་པ་ཐམས་ཅད་ཀྱིས་སྲུང་ཞིང་བྱིན་གྱིས་རློབ་པར་འགྱུར་ཏེ་ཡང་དག་པར་སྨྲ་བ་ཡིན་ནོ། །བསོད་ནམས་རྣམ་པར་སྨིན་པ་ནི་བྲག་ཅ་དང ། གཟུགས་བརྙན་ 146b བཞིན་ནོ། །དེ་ལྟར་འདྲེ་བཀྲེན་ལྟོགས་པ་ནི་ཐོག་མ་མི་ལས་གྱུར་ཏེ། ཐོག་མ་ལག་པ་མི་གཙང་བས་དགེ་འདུན་གྱི་ཁ་ཟས་གཙང་མ་ལ་རེག་པ་དང ། བདག་གི་ལག་པ་མི་གཙང་བས་དགེ་འདུན་གྱི་ཁ་ཟས་གཙང་མའི་ནང་དུ་བསྔོགས་སམ། ཟས་གཙང་མའི་ནང་དུ་ཁ་ཟས་མི་གཙང་བ་བསྲེས་ཏེ་དགེ་འདུན་ལ་སྦྱིན་པ་བྱས་པས་ཚེ་རབས་ལྔ་བརྒྱར་འདྲེ་ལོགས་པར་ལྟུང་སྟེ། རྟག་ཏུ་མི་གཙང་བ་ཟ་ཞིང་སྣམ་ཕྱི་སར་མི་གཙང་བ་ཟ་ན། སྣམ་བྱིས་པའི་སྲུང་མས་ལྕགས་ཀྱི་བེར་ཀ་ས་གདེངས་ཏེ་འདྲེ་ལོགས་པ་དེ་རྣམས་ཕྱི་སའི་སར་མི་སྙན་པར་བྱེད་དོ། །མིའི་རྣག་དང ། ཁྲག་དང་མཆིལ་སྣབས་དང ། ངར་སྣབས་དང ། ཁྲུད་མ་མི་གཙང་བ་བཙོག་པ་ཟ་ཞིང་མི་གཙང་བ་སྲུང་ཞིང་བུད་མེད་བུ་བཙས་པའི་ཁྲག་མི་གཙང་བ་འཛག་པ་ཟ་བར་འགྱུར་རོ། །དེ་ནས་ཚེ་རབས་ཁྲི་ཕྲག་ལྔ་བརྒྱར་ཁྱི་དང ། ཕག་པ་དང ། སྤུར་བ་ལ་སོགས་པའི་ལུས་སུ་གྱུར་ནས་རྟག་པར་མནམ་ཞིང་བཙེག་པ་དང ། མི་གཙང་བ་ཟ་བར་འགྱུར་ཏེ། དེ་ལྟ་བུའི་སྡུག་བསྔལ་བསྐལ་པ་གྲངས་ཁྲི་སྟོང་དུ་མྱོང་སྟེ་ཐར་བའི་དུས་མེད་དོ། །རྣམ་པར་ཐར་བར་དཀའོ། །ཤིན་ཏུ་མི་ཟད་པའང་བརྗོད་ཀྱི་མི་ལང་ངོ ། །གལ་ཏེ་ལག་པ་ཕོ་མཚན་ལ་རེག་གམ། ལག་པ་མོ་མཚན་ལ་རེག་གམ། ལག་པ་མི་གཙང་བས་དགེ་འདུན་གྱི་ཁ་ཟས་གཙང་མ་ལ་རེག་གམ། དགེ་འདུན་གྱི་ཁ་ཟས་ལ་མི་གཙང་བ་ནང་དུ་བཅུག་གམ། མི་གཙང་བའི་ཟས་དགེ་འདུན་ཟར་བཅུག་ 147a ༄#། །ན་དེ་ལྟ་བུའི་སྡིག་པ་རྣམ་པར་སྨིན་པ་ནི་ཐམས་ཅད་མི་གནད་ཀྱི་རིམས་ཀྱིས་བཏབ་པ་དང ། སྡིག་པར་མི་ཤེས་པའོ། །ཕྱིན་ཆད་དགེ་འདུན་གྱི་ཁ་ཟས་གཙང་བར་བྱས་པ་དང ། ལག་པ་གཙང་མས་དགེ་འདུན་གྱི་ཁ་ཟས་ཀྱི་སྣོད་ལ་བཟུང་བ་དང ། ལག་པ་གཙང་མས་ཁྲེ་འབྲས་བཀྲུ་བ་དང ། ཁ་ཟས་གཙང་མ་སྦྱིན་པ་བྱས་པ་ནི་བསོད་ནམས་བསམ་གྱིས་མི་ཁྱབ་པ་ཐོབ་པར་འགྱུར་རོ། །ཕྱིན་ཆད་འདི་ཡོངས་སུ་གྲགས་པ་དང ། མྱུར་བུའི་ཡིད་ཀྱིས་ཟུངས་ཤིག། འཚོ་བ་རྣམ་པར་དག་པའི་མདོ་རྫོགས་སོ།། །། |