།།རྒྱ་གར་སྐད་དུ། ཨཱརྱ་ལོ་ཀཱ་ནུ་ས་མཱ་ནཱ་ཨ་བ་ཏཱ་ར་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འཇིག་རྟེན་གྱི་རྗེས་སུ་མཐུན་པར་འཇུག་པ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ཐུབ་པའི་རྒྱལ་པོ་རིལ་བཞུགས། །བྱང་ཆུབ་སེམས་དཔའ་ཆེན་པོ་དང ། ཉན་ཐོས་རྣམས་ཀྱིས་མདུན་གྱིས་བལྟས། །དེ་ནས་མཁས་པ་འཇམ་དབྱངས་ཀྱིས། །བཏུད་དེ་རྒྱལ་ལ་འདི་སྐད་གསོལ། །སླད་མའི་སྐྱེ་བོ་རྣམས་སླད་དུ། །དཔའ་བོ་ཆེན་པོས་བཤད་དུ་གསོལ། །སངས་རྒྱས་ཀུན་གྱི་ཡོན་ཏན་འབྱུང ། ། ཟབ་ཅིང་རྒྱ་ཆེ་ཕུན་སུམ་ཚོགས། །མདོ་སྡེ་དམ་པ་བློ་རབ་ཀྱི། །སྨྲ་བའི་མཆོག་གིས་བཤད་དུ་གསོལ། །འཇིག་རྟེན་མགོན་པོའི་ཐུགས་སྐྱེས་སྲས། །གཅེས་འཛིན་མཆོག་ལ་ 479a ༄#། །བཀའ་སྩལ་པ། །རྩེ་གཅིག་སེམས་སུ་ཡིད་བྱོས་ལ། །ཉོན་ཅིག་ངས་ནི་བཤད་པར་བྱ། །བློ་དང་ལྡན་པས་ཡོན་ཏན་ཞུས། །དེ་བཞིན་གཤེགས་པས་བཀའ་སྩལ་པ། །ཆོས་སྨྲ་སེམས་ཅན་མཆོག་རྣམས་ཀྱིས། །ཆོས་ཉིད་དེ་ནི་མཉན་པར་གྱིས། །དེ་བཞིན་གཤེགས་རྣམས་དཔག་མེད་ལས། །རང་སངས་རྒྱས་ནི་ཐམས་ཅད་དང ། །ཉན་ཐོས་དག་གིས་རྣམ་ཀུན་ཏུ། །རྫོགས་པའི་སངས་རྒྱས་བསགས་པ་ན། །དེ་བཞིན་གཤེགས་པ་སྤྲོས་མེད་ལ། །བྱིས་པ་སྤྲོས་པ་སྤྱོད་པ་ཡི། །སེམས་ཅན་ཀུན་གྱིས་རྒྱལ་བ་རྣམས། །རིག་པར་མི་ནུས་སྨོས་ཅི་དགོས། །སངས་རྒྱས་ཀྱིས་ནི་སངས་རྒྱས་དང ། །སངས་རྒྱས་ཆོས་ཉིད་གང་ཡིན་དང ། །རང་བྱུང་སྐུ་ཐུགས་ཅི་འདྲ་དང ། ། ཤེས་རབ་ཅི་འདྲ་རབ་ཏུ་མཁྱེན། །འཇིག་རྟེན་དུ་ནི་འཇིག་རྟེན་སྒྲོན། །རྣམ་པར་འདྲེན་པ་རྣམས་བྱུང་ཡང ། །འཇིག་རྟེན་དང་ནི་འདྲེས་མེད་ལ། །འཇིག་རྟེན་དུ་ཡང་སྣང་བ་སྟོན། །སྐུ་དང་སྐུ་ཡི་ཕྲིན་ལས་དང ། །གསུང་གིས་གང་དག་བརྗོད་པ་དང ། །ཡིད་དང་ཡིད་ཀྱི་རྣམ་རྟོག་རྣམས། །རྒྱལ་བའི་ཐམས་ཅད་འཇིག་རྟེན་འདས། །འཇིག་རྟེན་ན་ནི་ཐུགས་བརྩེ་བས། །འཇིག་རྟེན་མགོན་པོ་འོད་མཛད་པ། །འཇིག་རྟེན་ཇི་ལྟར་རྟོག་པ་བཞིན། །སེམས་ཅན་རྣམས་ལ་ཆོས་སྟོན་ཏོ། །འཇིག་རྟེན་འདས་པའི་སྤྱོད་རྣམས་ 479b ཀྱིས། །སངས་རྒྱས་ཐམས་ཅད་ཡང་དག་འཕགས། །དེ་དག་ཕྲིན་ལས་འཇིག་རྟེན་འདས། །རྣམ་པར་སྨིན་པ་བླ་ན་མེད། །གལ་ཏེ་འཇིག་རྟེན་རྣམ་འདྲེན་རྣམས། །འཇིག་རྟེན་མཐུན་པར་མི་འཇུག་ན། །སངས་རྒྱས་ཆོས་ཉིད་གང་ཡིན་དང ། །སངས་རྒྱས་སུས་ཀྱང་ཤེས་མི་འགྱུར། །འཇིག་རྟེན་ཀུན་ལ་ཕན་བཞེད་པ། །སྐྱོབ་པ་རྫུ་འཕྲུལ་ལྡན་པ་པོ། །རང་བྱུང་སྡིག་པ་མི་མངའ་བ། །དེ་དག་གཡོ་བ་བསམ་མི་ཁྱབ། །བདེ་བར་གཤེགས་པ་རྣམས་ཀྱི་སྐུ། །འཁྲིག་པ་ལས་ནི་བྱུང་མིན་ལ། །ཡབ་དང་ཡུམ་ཡང་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །བསྐལ་པ་བྱེ་བ་གྲངས་མེད་ནས། །ཤེས་རབ་ཕ་རོལ་ཕྱིན་ལས་བྱུང ། །འོན་ཀྱང་བྱིས་པ་ཉིད་སྟོན་པ། །འདི་ནི་འཇིག་རྟེན་མཐུན་འཇུག་ཡིན། །སངས་རྒྱས་འོད་ནི་དཔག་མེད་དེ། །ཕྱོགས་བཅུ་དག་ཏུ་སྣང་མཛད་ཀྱང ། །འདོམ་གང་འོད་དུ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །མི་ཡི་དམ་པ་ནམ་དུ་ཡང ། །ཞབས་གཉིས་ས་ལ་མི་རེག་སྟེ། །འོན་ཀྱང་ལམ་སྲང་དེ་སྟོན་པ། །འདི་ནི་འཇིག་རྟེན་མཐུན་འཇུག་ཡིན། །འདོད་པ་དེ་དག་རྣམས་སྨད་དེ། །འདོད་པའི་རྫབ་ལས་ཡང་དག་འཕགས། །འོན་ཀྱང་སྲས་ལ་སོགས་སྟོན་པ། །འདི་ནི་འཇིག་རྟེན་མཐུན་འཇུག་ཡིན། །མར་མེ་མཛད་ནས་བཟུང་ནས་སུ། །དེ་བཞིན་གཤེགས་པ་འདོད་ཆགས་བྲལ། །སྒྲ་གཅན་འཛིན་ལ་སྲས་ 480a ༄#། །ཞེས་གསུངས། །འདི་ནི་འཇིག་རྟེན་མཐུན་འཇུག་ཡིན། །ལྷ་དང་འཇིག་རྟེན་བཅས་པ་ཡི། །ང་ནི་མཆོག་ཅེས་བཀའ་སྩལ་པ། །ཕྱིན་ནས་ཆོས་ནི་ཚོལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཐུབ་ཆེན་འཛམ་ཤིང་གྲིབ་མ་ལ། །བཞུགས་ཏེ་བསམ་གཏན་མཛད་བསྟན་དང ། །ལོ་དྲུག་པར་དུ་དཀའ་སྤྱོད་པ། །འདི་ནི་འཇིག་རྟེན་མཐུན་འཇུག་ཡིན། །གཉིས་སུ་མེད་པར་ཞིང་འདི་ན། །བྱང་ཆུབ་སྙིང་པོར་བཞུགས་ནས་ནི། །བདུད་འདུལ་རྣམ་པར་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །བྱང་ཆུབ་མཚུངས་མེད་སངས་རྒྱས་ཏེ། །ལྷར་བཅས་འཇིག་རྟེན་སྟོན་ཡིན་ཡང་།། ཐུགས་ལས་ཆུང་ངུ་ཉིད་སྟོན་པ། །འདི་ནི་འཇིག་རྟེན་མཐུན་འཇུག་ཡིན།། དཔའ་བོ་ཐུགས་རྗེ་ཆེ་ལྡན་པ། །བསྟན་པའི་ཕྱིར་ནི་འདིར་གཤེགས་ལ། །གསོལ་བ་འདེབས་ལ་གཞེས་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རང་བྱུང་རྣམས་ཀྱི་མཁྱེན་པ་ནི། །ཕྱིར་ཞིང་འཇུག་པ་མི་མངའ་ཡང ། །དེ་དག་དྲན་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རྫོགས་པའི་སངས་རྒྱས་རྣམས་ལ་ནི། །བྱོན་དང་བཞུད་པ་མི་མངའ་ཡང ། །འོན་ཀྱང་བཞུད་པར་རྣམ་སྣང་བ། །འདི་ནི་འཇིག་རྟེན་མཐུན་འཇུག་ཡིན། །རྒྱལ་བ་རྣམས་ནི་མཁའ་འདྲ་སྟེ། །ཆོས་རྣམས་ཀུན་ལ་མི་གནས་ 480b ཀྱང། །ལྡང་བ་ལྟར་ཡང་སྣང་བ་ནི། །འདི་ནི་འཇིག་རྟེན་མཐུན་འཇུག་ཡིན། །ཞབས་ནི་པདྨའི་འདབ་འདྲ་སྟེ། །དེ་དག་རྡུལ་གྱིས་མི་གོས་ལ། །ཞབས་ཀྱང་འཁྲུ་བ་མཛད་པ་ནི། ། འདི་ནི་འཇིག་རྟེན་མཐུན་འཇུག་ཡིན། །དེ་དག་དྲི་མ་མི་མངའ་སྟེ། །སྐུ་ནི་གསེར་གྱི་མདོག་འདྲ་ཡང ། །རྫོགས་པའི་སངས་རྒྱས་ཁྲུས་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཞལ་ནི་པདྨའི་དྲི་ལྡན་ཞིང ། །ཚེམས་ནི་དྲི་མེད་མུ་ཏིག་འདྲ། །འོན་ཀྱང་ཚེམས་ཤིང་གསོལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དེ་དག་བསྒྲིམ་པ་མི་མངའ་ཡང། །དེ་དག་ཞལ་ཟས་གསོལ་མཛད་ཅིང་།། སྦྱིན་པ་པོ་ལ་འབྲས་བུ་ཚེ། །འདི་ནི་འཇིག་རྟེན་མཐུན་འཇུག་ཡིན། །སྐུ་མཁྲེགས་རྡོ་རྗེ་འདྲ་བའི་ཕྱིར། །ཟག་པ་དག་ནི་མི་མངའ་ཡང་།། བཤང་བའི་སར་ནི་གཤེགས་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དེ་དག་སྙུན་ནི་མི་མངའ་ཡང ། །དགེ་འདུན་བསྡུ་བ་མཛད་པའི་ཕྱིར། །སྨན་ཀྱང་བསྟེན་པར་མཛད་པ་ནི། །འདི་ནི་འཇིག་རྟེན་མཐུན་འཇུག་ཡིན། །སངས་རྒྱས་ཡོན་ཏན་ཀུན་ལྡན་ཏེ། །སྐུ་ལ་འགྱུར་བ་མི་མངའ་ཡང ། །དེ་དག་རྒ་བ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འཇིག་རྟེན་ཁམས་ནི་དཔག་ཏུ་མེད། །ཞབས་ཀྱི་མཐེ་བོས་གཡོ་མཛད་ལ། །འོན་ཀྱང་ཉམ་ཆུང་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། ། 481a ༄#། །ཡིད་ཀྱི་སྐུ་དང་རབ་ལྡན་པས། །དེ་བཞིན་གཤེགས་པ་ཆོས་སྐུ་ཡང ། །རང་ཅན་སྐུ་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། ། སངས་རྒྱས་རྣམ་རྟོག་མི་མངའ་ཡང ། །སེམས་ཅན་སྤྱོད་ཡུལ་ཇི་བཞིན་དུ། །དེ་དག་སྤྱོད་པ་རྣམ་པར་རྟོག་།འདི་ནི་འཇིག་རྟེན་མཐུན་འཇུག་ཡིན། །དེ་དག་རྟག་ཏུ་མཉམ་བཞག་ལ། །འགྲེང་དང་བཞུགས་དང་བཞུད་པ་དང ། །དེ་བཞིན་མནལ་བར་སྣང་བ་ཡང ། །འདི་ནི་འཇིག་རྟེན་མཐུན་འཇུག་ཡིན། །རྫོགས་པའི་སངས་རྒྱས་ཐུབ་དཀའ་ལ། །གྲང་དང་ཚ་དང་གྲིབ་མ་དང ། །དེ་བཞིན་ཉི་མ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཚངས་པའི་ཁྱིམ་ན་ཚངས་པ་ལྟར། །རྒྱལ་བ་རྟག་པར་ན་བཟའ་གསོལ། །འོན་ཀྱང་ན་བཟའ་ལེགས་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སྤྱི་གཙུག་ལྟར་ནི་མི་མཐོང་ཕྱིར། །སྤུ་གྲིས་གཅད་དུ་མོང་མེད་ཀྱང། །དབུ་འདྲེག་པར་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རྫུ་འཕྲུལ་རྐང་པ་རབ་བསྒོམས་ཏེ། །དེ་དག་རྫུ་འཕྲུལ་ནམ་སྟོན་ལ། །བསམ་གཏན་མཛད་པ་སྣང་བ་ཡང ། །འདི་ནི་འཇིག་རྟེན་མཐུན་འཇུག་ཡིན། །འཇིག་རྟེན་རྣམ་པར་འདྲེན་པ་ཀུན། །རོ་བྲོ་མཆོག་རྣམས་བརྙེས་གྱུར་ཀྱང་།། ངན་ངོན་དག་ནི་ 481b བསྟེན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །བསོད་ནམས་མི་ཟད་ཐམས་ཅད་ཀྱི། །སངས་རྒྱས་ཐམས་ཅད་ཡང་དག་འཕགས། །འོན་ཀྱང་མ་བརྙེས་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དགའ་བའི་ཟས་ནི་མངོན་བསྒྲུབས་ཏེ། །བསྐལ་པ་བྱེ་བ་བཞུགས་མཛད་ཀྱང ། །རྟག་ཏུ་ཞལ་ཟས་གསོལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །བསོད་ནམས་ཕ་རོལ་ཕྱིན་པས་འཕགས། །ལྷ་ཡིན་བཟའ་བརྙེས་གྱུར་ཀྱང ། །ཕྱག་དར་ཁྲོད་པ་གསོལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འོག་མིན་གཞལ་མེད་ཁང་པ་རྣམས། །རྣམ་འདྲེན་རྣམས་ཀྱིས་ཡོངས་སྤངས་ཏེ། །རྩཝ་ཁྱིམ་རྣམས་ནི་བསྟེན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འདྲེན་པ་རྣམས་ནི་ཞལ་དབུགས་ཀྱིས། །རྒྱ་མཚོ་ཆེན་པོ་བསྐམས་མཛད་ཀྱང ། །ཆར་པའི་སྐྱབས་ཀྱང་རབ་འཛིན་པ། །འདི་ནི་འཇིག་རྟེན་མཐུན་འཇུག་ཡིན། །བདུད་རྣམས་བྱེ་བ་དཔག་མེད་པ། །ཐུགས་བསྐྱེད་ཙམ་གྱིས་འདུལ་མཛད་ཀྱང ། །བདུད་ཀྱི་བགེགས་རྣམས་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ང་དང་ང་ཞེས་ལྟ་བ་གང ། །དེ་ནི་རང་བྱུང་རྣམས་ལ་མེད། །འོན་ཀྱང་ང་དང་ངའི་ཞེས་གསུངས། །འདི་ནི་འཇིག་རྟེན་མཐུན་འཇུག་ཡིན། །སྐྱོབ་པ་སངས་རྒྱས་ཆོས་ཀུན་ལ། །མི་མཁྱེན་པ་ནི་མི་ 482a ༄#། །མངའ་ཡང ། །གཞན་ལ་ཡོངས་སུ་འདྲི་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སེམས་ཅན་ཀུན་གྱི་དོན་གྱི་ཕྱིར། །རྣམ་པར་འདྲེན་པ་འབྱུང་མཛད་ཀྱང ། །རབ་ཏུ་དབེན་པར་སྣང་བ་སྟེ། །འདི་ནི་འཇིག་རྟེན་མཐུན་འཇུག་ཡིན། །དེ་དག་སྣ་ཚོགས་སྐུ་མེད་ཀྱང ། །སེམས་ཅན་མོས་པ་ཇི་བཞིན་དུ། །སྐུ་ལུས་སྤྲུལ་པ་མཛད་པ་ནི། །འདི་ནི་འཇིག་རྟེན་མཐུན་འཇུག་ཡིན། །འཇིག་རྟེན་ཀུན་གྱི་སྒྲ་སྐད་ཀྱིས། །དེ་བཞིན་གཤེགས་པ་མི་གཡོ་ལ། །འོན་ཀྱང་སྒྲ་ཆུང་བསྟེན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རྫོགས་པའི་སངས་རྒྱས་སྤྲོས་མི་མངའ། །ཆོས་རྣམས་ཀུན་ལ་གསལ་གྱུར་ཀྱང ། །སྤྲོས་དང་བཅས་པར་གསུང་མཛད་པ། །འདི་ནི་འཇིག་རྟེན་མཐུན་འཇུག་ཡིན། །མིང་མེད་པ་ཡི་ཆོས་ཀྱི་རྣམས། །བསམ་དུ་མེད་པའི་མིང་དག་གིས། །སེམས་ཅན་རྣམས་ལ་ཡོངས་བརྗོད་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་རྣམས་སེམས་ཅན་མེད་པ་དང ། །ཤིན་ཏུ་དངོས་པོ་མེད་མཁྱེན་ལ། །སེམས་ཅན་མང་པོ་འདུལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །གང་གིས་ལས་བྱས་འདི་ཉིད་ཀྱིས། །མྱོང་བར་གྱུར་པ་མ་ཡིན་ཡང ། །གང་གིས་བྱས་པ་སྟོན་མཛད་པ། །འདི་ནི་འཇིག་རྟེན་ 482b མཐུན་འཇུག་ཡིན། །ཆོས་རྣམས་ཐམས་ཅད་སྟོང་པ་ལ། །སྐྱེས་བུ་མཆོག་རྣམས་མངོན་སུམ་ཡང ། །འཆི་འཕོ་སྐྱེ་བ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འཇིག་རྟེན་འདི་ནས་སྲིད་གཞན་དུ། །སུ་ཡང་འཁོར་བར་ཡོང་མིན་ལ། །འཁོར་བ་ཡང་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཕུང་པོ་དང ། དང་ཁམས་རྣམས་དང ། །སྐྱེ་མཆེད་རང་བཞིན་གཅིག་བཞེད་ལ། །ཁམས་གསུམ་པོ་དག་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དུས་གསུམ་དག་ཏུ་སེམས་ཅན་གྱི། །རང་བཞིན་དམིགས་པ་མ་ཡིན་ལ། །སེམས་ཅན་ཁམས་ཀྱང་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཀུན་ལ་མི་མཁྱེན་རྣམ་བྲལ་ཏེ། ། ཐམས་ཅད་མཁྱེན་ཅིང་ཐམས་ཅད་གཟིགས། །འོན་ཀྱང་སྔོན་མཐའ་མི་གསུང་བ། །འདི་ནི་འཇིག་རྟེན་མཐུན་འཇུག་ཡིན། །ཡང་དག་ཇི་བཞིན་གཞན་མིན་པར། །ཆོས་རྣམས་རྟོགས་པར་ཐུགས་ཆུད་ལ། །འོན་ཀྱང་གཞག་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དམ་པའི་དོན་དུ་ཆོས་རྣམས་ཀུན། །ཟབ་པར་རབ་ཏུ་མཁྱེན་གྱུར་ལ། །སྣ་ཚོགས་སུ་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སེམས་ཅན་བསམ་པ་ཇི་བཞིན་དུ། །འཕགས་པའི་བདེན་པ་སྟོན་ 483a ༄#། །མཛད་ཅིང ། །རྫུན་པར་ཡང་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །བདུད་ནི་བྱེ་བ་ཕྲག་བརྒྱ་ཡིས། །དགེ་འདུན་དབྱེ་བར་མི་ནུས་ཀྱང ། །དགེ་འདུན་དབྱེན་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་གང་ཡང་ནི་མི་བསླབས་ལ། །མ་བསླབས་པ་ཡང་གང་ཡང་མེད། །སློབ་དང་མི་སློབ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འདུས་བྱས་རྣམས་ནི་ངོ་བོ་ཉིད། །ངོ་བོ་ཉིད་ཀྱིས་གྲོལ་བཅིངས་མེད། །འོན་ཀྱང་རྣམ་པར་གྲོལ་བ་སྟོན། །འདི་ནི་འཇིག་རྟེན་མཐུན་འཇུག་ཡིན། །མྱ་ངན་འདས་ལ་འགྲོ་མེད་ཀྱང ། །དགྲ་བཅོམ་དེ་ནི་འགྲོ་འོང་ཞེས། །སེམས་ཅན་རྣམས་ལ་དེ་བསྟན་པ། །འདི་ནི་འཇིག་རྟེན་མཐུན་འཇུག་ཡིན། །དོན་དང་དོན་མིན་མི་གཟིགས་ལ། འགོག་པ་དང་ནི་དམ་པའི་དོན། །སྨྲ་བ་རྣམས་ཀྱིས་མཆོག་གསུང་པ། ། འདི་ནི་འཇིག་རྟེན་མཐུན་འཇུག་ཡིན། །དངོས་པོ་མེད་པ་གསལ་བའི་དངོས། །རྙོག་མ་མེད་པ་རབ་སྟོན་ཀྱང ། །ཆོས་རྣམས་ཆུད་ཟ་མེད་ཅེས་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་རྣམས་ཐམས་ཅད་བརྗོད་མེད་པར། །དེ་བཞིན་གཤེགས་པས་རབ་མཁྱེན་ཀྱང ། །བརྗོད་པ་དག་ནི་སྟོན་མཛད་པ། །འདི་ནི་འཇིག་ 483b རྟེན་མཐུན་འཇུག་ཡིན། །སངས་རྒྱས་མཁྱེན་པ་ཆགས་མི་མངའ། །དུས་རྣམས་ཀུན་ཏུ་མཉམ་གཞག་ཀྱང ། །དབང་པོ་རྣམས་ནི་སྦེད་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དེ་བཞིན་གཤེགས་པ་རྡོ་རྗེའི་སྐུ། །སངས་རྒྱས་ཅུང་ཟད་མི་བསྙུན་ཡང ། །དགེ་སློང་བྱང་ཆུབ་ཡན་ལག་སྨྲོས། །འདི་ནི་འཇིག་རྟེན་མཐུན་འཇུག་ཡིན། །སྡིག་པ་ཐམས་ཅད་ཡོངས་ཟད་དེ། །བསོད་ནམས་ཀུན་གྱིས་མངོན་འཕགས་ཀྱང ། །ལས་ཀྱི་རྒྱུད་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སྐྱོབ་པ་སངས་རྒྱས་དུས་གསུམ་ལ། །མཐར་ཐུག་འགྱུར་བ་ཡོད་མིན་ཡང ། །མཚམས་གཅོད་པ་ཡང་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། ། དེ་བཞིན་གཤེགས་པ་ཆོས་སྐུ་སྟེ། །གཅིག་ཅི་འདྲ་བར་དེ་བཞིན་ཀུན། །འོན་ཀྱང་ཐ་དད་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སངས་རྒྱས་རང་སངས་རྒྱས་རྣམས་དང ། །ཉན་ཐོས་སོ་སོའི་སྐྱེ་བོ་དང ། །འཁོར་བ་དང་ནི་མྱ་ངན་འདས། །ཚིག་གི་ལམ་གྱིས་རབ་ཏུ་ཕྱེ། །སངས་རྒྱས་ཡེ་ཤེས་མཐའ་ཡས་ཏེ། ། ཆོས་ཀྱི་དབྱིངས་ལས་བྱུང་ཡིན་ཡང ། །སངས་རྒྱས་ཞིང་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རྫོགས་པའི་སངས་རྒྱས་བསམ་མི་ཁྱབ། །དེ་བཞིན་ 484a ༄#། །གཤེགས་པ་བསམ་མི་ཁྱབ། །སེམས་ཅན་འདུལ་བའི་དོན་གྱི་ཕྱིར། །འདི་ནི་འཇིག་རྟེན་མཐུན་འཇུག་ཡིན། །ཟག་མེད་ཡོད་པ་མ་ཡིན་ཡང ། །དེ་བཞིན་གཤེགས་པ་ཉན་ཐོས་ལ། །ཟག་པ་མེད་པ་ཉིད་གསུང་བ། །འདི་ནི་འཇིག་རྟེན་མཐུན་འཇུག་ཡིན། །མཁྱེན་པས་དེ་དག་གཉིས་མིན་ཡང། །དུས་གསུམ་དག་ནི་རྣམས་གཟིགས་ཤིང ། །གཉིས་ཀྱི་འདུ་ཤེས་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སངས་རྒྱས་ཆོས་ཉིད་གང་ཡིན་དང ། །སངས་རྒྱས་རིག་པར་སུ་འདོད་པ། །དེ་ནི་ཆོས་དབྱིངས་ཞུགས་ཤིག་པ། །འདི་ནི་འཇིག་རྟེན་མཐུན་འཇུག་ཡིན། །སྐྱེ་བ་མེད་པ་བཟོད་སྟོན་པ། །རྟག་ཏུ་ཡང་དག་རབ་ཏུ་མཁྱེན། །མཁྱེན་ནས་རབ་ཏུ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རྟག་ཏུ་ཆོས་ཀྱི་དབྱིངས་མཚུངས་ཏེ། །འཇུག་པ་མེད་ཅིང་འབྱུང་མེད་ཀྱང ། །འགྲོ་བ་གནས་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །མི་སྐྱེ་བ་ལ་གཅིག་པའམ། །མང་པོ་ཡོད་པ་མ་ཡིན་ཡང ། །སྣ་ཚོགས་རིམ་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དེ་དག་ཐ་དད་སྐུ་མེད་ཀྱང ། །སངས་རྒྱས་ཞིང་རྣམས་དཔག་མེད་དེ། །སྐུ་ལུས་དག་ནི་ 484b སྤྲུལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སྟོང་གསུམ་བྱེ་བ་བརྒྱ་བགྲངས་པ། །སངས་རྒྱས་ཞིང་དུ་བརྗོད་བྱ་བ། །དེར་ནི་སྐྱེ་བ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དེ་བཞིན་གཤེགས་པས་དུས་ཀུན་ཏུ། །ཆོས་ནི་གནས་པར་རབ་མཁྱེན་ཀྱང ། །ཆོས་ཀྱི་འཁོར་ལོ་རབ་བསྐོར་བ། །འདི་ནི་འཇིག་རྟེན་མཐུན་འཇུག་ཡིན། །སངས་རྒྱས་འོད་ནི་དཔག་མེད་ཅིང ། །སྐུ་ལུས་དཔག་ཏུ་མེད་མིན་ཡང ། །དཔག་ཏུ་ཡོད་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་ཀྱི་དབྱིངས་ལ་མཆོག་མེད་དེ། །དུས་གསུམ་དག་ཏུ་སྟོང་ཉིད་ཀྱང ། །མཆོག་གིས་ཆོས་རྣམས་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཞིག་པ་མེད་ཅིང་སྐྱེ་མེད་ལ། །ཆོས་ཀྱི་དབྱིངས་དང་མཉམ་གྱུར་ཀྱང ། །སྲེག་པའི་བསྐལ་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་ཀྱི་དབྱིངས་ནི་གྲུབ་མེད་དེ། །དེ་ལ་ངོ་བོ་ཉིད་མེད་ཀྱང ། །འོན་ཀྱང་ངེས་པར་འབྱུང་སྟོན་པ། །འདི་ནི་འཇིག་རྟེན་མཐུན་འཇུག་ཡིན། །གཟིགས་པ་ཅི་ཡང་མི་མངའ་ཡང ། །ལྷག་མཐོང་གིས་ནི་གཟིགས་གྱུར་ཅིང ། །ལྟ་བ་ཐམས་ཅད་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་རྣམས་ཀུན་ལ་བྱེད་པ་པོ། །ཤིན་ཏུ་ཡོད་པ་མ་ཡིན་ཡང ། །བྱས་ 485a ༄#། །དང་མ་བྱས་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །མྱ་ངན་འདས་དང་ནམ་མཁའ་ནི། །རྒྱལ་བ་གྲངས་སུ་མ་ཆུད་ཀྱང ། །ཁམས་ཀྱི་གྲངས་རྣམས་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །གྲངས་མེད་སྟོབས་རྣམས་བརྙེས་གྱུར་ལ། །མཐུ་ལས་ཉམས་པ་མི་མངའ་ཡང ། །ཞབས་འབྲིང་པ་དག་ཚོལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ནམ་ཡང་བྱིས་པའི་བློ་ལྡན་དང ། །སངས་རྒྱས་འདྲེན་པ་མི་མངའ་ཡང ། །བྱིས་པ་དེ་དག་འདུལ་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཡོན་ཏན་ལྡན་པ་ཐམས་ཅད་ཀྱི། །ཕ་རོལ་དེ་བཞིན་གཤེགས་བྱོན་ཀྱང ། །དེ་ལ་ང་ནི་གཞན་ཞེས་པ། །འདི་ནི་འཇིག་རྟེན་མཐུན་འཇུག་ཡིན། །མི་སྐྱེ་བ་ནི་རྟག་ཏུ་སྐྱེས། །དེ་དག་རྒྱུ་ལས་བྱུང་མིན་ཡང ། །མ་རིག་རྐྱེན་གྱིས་འབྱུང་ཞེས་པ། །འདི་ནི་འཇིག་རྟེན་མཐུན་འཇུག་ཡིན། །རྒྱལ་པོ་རྙེད་དང་བཀུར་སྟི་ལས། །སྒྲིབ་པ་མེད་པ་ཉིད་བརྙེས་ལ། །ཆོག་ཤེས་པ་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །གང་ན་སེམས་ཅན་འདུལ་ཡོད་པར། །སྣང་བ་དེར་ནི་འདྲེན་པ་རྣམས། །དེ་དག་སྤྱོད་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རིག་པ་གསུམ་གྱིས་ཚོགས་བསགས་པ། །རིག་པ་བསྐྱེད་ 485b པར་ངེས་པར་སྟོན། །འདི་ལ་མཐོང་བ་ཅི་ཡང་མེད། །འདི་ནི་འཇིག་རྟེན་མཐུན་འཇུག་ཡིན། །འཇིག་རྟེན་སྒྲོན་མས་ཐམས་ཅད་དུ། །སྐྱེ་བོ་དཔག་ཏུ་མེད་པ་འདུལ། །གླིང་བཞི་དག་ཀྱང་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འཇིག་རྟེན་གསུམ་པོ་གང་ན་ཡང ། །ཆོས་གང་ཕུང་པོ་གནས་པ་མེད། །འོན་ཀྱང་ཆོས་གྲུབ་བཀའ་སྩལ་པ། ། འདི་ནི་འཇིག་རྟེན་མཐུན་འཇུག་ཡིན། །མཐའ་གསུམ་གྱི་ནི་མཐར་སྐྱེས་པ། །དེ་བཞིན་གཤེགས་རྣམས་སྟོན་མཛད་ཅིང ། །སེམས་ཅན་རྣམས་ལ་རབ་སྟོན་པ། །འདི་ནི་འཇིག་རྟེན་མཐུན་འཇུག་ཡིན། །ཆོས་རྣམས་ཀུན་གྱི་རྒྱུད་མཁྱེན་ནས། །འཆི་འཕོ་སྐྱེ་བ་རྣམ་སྤངས་ལ། །དེ་དག་ཐམས་ཅད་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །མི་སྐྱེ་བ་ནི་གང་མཐོང་བ། །མ་རིག་དེ་ནི་ཡེ་ཤེས་བགེགས། །རིག་པ་བསྐྱེད་པར་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །རྫོགས་པའི་སངས་རྒྱས་གཅིག་ཡིན་ཡང ། །སེམས་ཅན་ཡོངས་སུ་སྨིན་བྱའི་ཕྱིར། །འབྱུང་བ་དག་ནི་བསམ་མི་ཁྱབ། །འདི་ནི་འཇིག་རྟེན་མཐུན་འཇུག་ཡིན། །གང་དག་མདོ་སྡེ་འདི་འདྲ་འདི། །ཕྱི་མའི་དུས་ན་ཐོས་འགྱུར་ཞིང ། །ཐེ་ཚོམ་མེད་ལ་ཤེས་འགྱུར་བ། །དེ་དག་སྔོན་གྱི་རྒྱལ་བ་མཐོང ། །འཇིག་རྟེན་མགོན་གྱིས་དེ་གསུངས་ནས། །སྲས་པོ་འཇམ་པའི་ 486a ༄#། །དབྱངས་ལ་སོགས། །རབ་ཏུ་དགའ་ཞིང་ཡི་རང་ཏེ། །སྟོན་པའི་བཀའ་ལ་མངོན་བར་བསྟོད། །འཕགས་པ་འཇིག་རྟེན་གྱི་རྗེས་སུ་མཐུན་པར་འཇུག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ།་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ།། །། |