རྒྱའི་སྐད་དུ། ཀཝན་ཇི་ལིའུ་ཕུས་ཞང་ཤྱན་ཏེའུ་ཤིས་ཐྱན་ཀྱིན། བོད་སྐད་དུ། འཕགས་པ་བྱང་ཆུབ་སེམས་དཔའ་བྱམས་པ་དགའ་ལྡན་གནམ་དུ་སྐྱེ་བ་བླངས་པའི་མདོ། སངས་རྒྱས་དང།་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ཀྱི་ཡུལ། རྒྱལ་བུ་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་མཚན་མོའི་ཐུན་དང་པོ་ལ་སྐུ་ལས་འོད་ཟེར་གསེར་གྱི་ཁ་དོག་ལྟ་བུ་བྱུང་ནས་རྒྱལ་བྱེད་ཀྱི་ཚལ་ལན་བདུན་བསྐོར་ཏེ། ཁྱིམ་བདག་སུ་ཏ་ཤལ་སོགས་པ་འོད་ཀྱིས་རེག་པར་བྱས་ནས། འོད་གསེར་གྱི་ཁ་དོག་ལྟ་བུ་ནམ་མཁའ་ལ་སྤྲིན་བཞིན་དུ་ཁྱབ་པར་བྱས་ནས་མཉན་དུ་ཡོད་པའི་ཡུལ་ཀུན་ཏུ་གསེར་གྱི་ཁ་དོག་ལྟ་བུའི་མེ་ཏོག་ཆར་རབ་ཏུ་ཕབ་བོ། །འོད་གསེར་གྱི་ཁ་དོག་ལྟ་བུའི་ནང་ནས་སྤྲུལ་པའི་དེ་བཞིན་གཤེགས་པ་དཔག་ཏུ་མེད་པ་བརྒྱ་སྟོང་སྣང་བ་ཐམས་ཅད་ཀྱིས་གསུང་མཐུན་པར་བསྐལ་པ་འདི་ཉིད་དུ། བྱང་ཆུབ་སེམས་དཔའ་སྟོང་གི་དང་པོ་ལོག་པར་དད་སེལ་སངས་རྒྱས་པ་ནས། ཐ་མར་སྣང་མཛད་སངས་རྒྱས་པའི་དོན་བཀའ་སྩལ་ཏོ། །དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་ཤེས་ཀཽཎྜི་ནྱ་ཏིང་ངེ་ 469a ༄#། །འཛིན་ལས་ལངས་ནས་འཁོར་ཉིས་བརྒྱ་ལྔ་བཅུ་དང ། ཚེ་དང་ལྡན་པ་འོད་སྲུང་ཆེན་པོ་འཁོར་ཉིས་བརྒྱ་ལྔ་བཅུ་དང ། ཚེ་དང་ལྡན་པ་མཽད་གལ་གྱི་བུ་འཁོར་ཉིས་བརྒྱ་ལྔ་བཅུ་དང ། ཚེ་དང་ལྡན་པ་ཤཱ་རིའི་བུ་འཁོར་ཉིས་བརྒྱ་ལྔ་བཅུ་དང ། མ་ཧ་བ་ཤ་པ་ཏི་ལ་སོགས་པ་དགེ་སློང་མ་སྟོང་དང ། ཁྱིམ་བདག་སུ་ཏ་ཤ་ལ་སོགས་པ་དགེ་བསྙེན་ཕ་སུམ་སྟོང་དང ། བྱི་ཤཝ་ཁྲ་འཕོ་ཏ་ལ་སོགས་པ་དགེ་བསྙེན་མ་ཉིས་སྟོང་དང ། ཀུན་ཏུ་བཟང་པོ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་བཅུ་དྲུག་དང ། ཆོས་ཀྱི་རྒྱལ་བུ་འཇམ་དཔལ་གཞོན་ནུར་གྱུར་པ་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང ། ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་ལ་སོགས་པ་འཁོར་ཐམས་ཅད། དེ་བཞིན་གཤེགས་པའི་འོད་ཀྱིས་བསྐུལ་ནས་སྤྲིན་བཞིན་དུ་འདུས་སོ། །དེ་ནས་བཅོམ་ལྡན་འདས་ཀྱིས་ལྗགས་ཀྱི་དབང་པོ་ལས་འོད་ཟེར་སྟོང་ཕྱུང་ནས། འོད་ཟེར་རེ་རེ་ཁ་དོག་སྟོང་སྟོང ། ཁ་དོག་རེ་རེའི་ནང་ནས་སྤྲུལ་པའི་དེ་བཞིན་གཤེགས་པ་དཔག་ཏུ་མེད་པ་སྙེང་སྣང་ངོ ། །དེ་བཞིན་གཤེགས་པ་དེ་དག་ཐམས་ཅད་ཀྱིས་གསུང་མཐུན་པར་བྱང་ཆུབ་སེམས་དཔའ་ཆེན་པོ་ཐམས་ཅད་ཀྱི་ཆོས་ཐམས་ཅད་རྣམ་པར་དག་པ་ཟབ་མོའི་གཟུངས་བསྟན་པ་འདི་ལྟ་སྟེ། ཨ་ནན་ཏ་མུ་དྲ་ཞེས་བྱ་བའི་གཟུངས་དང ། སྟོང་པ་ཉིད་ཀྱི་ཡེ་ཤེས་ 469b ཞེས་བྱ་བའི་གཟུངས་དང ། སྒྲིབ་པ་མེད་པའི་དངོས་པོ་ཞེས་བྱ་བའི་གཟུངས་དང ། མཚན་མ་མེད་པར་རྣམ་པར་གྲོལ་བ་ཆེན་པོ་ཞེས་བྱ་བའི་གཟུངས་ལ་སོགས་པ། སྒྲ་སྐད་གཅིག་གིས་བརྒྱ་ཕྲག་བྱེ་བའི་གཟུངས་ཀྱི་སྒོ་བཀའ་སྩལ་ཏོ། །གཟུངས་ཀྱི་སྒོ་བཀའ་སྩལ་མ་ཐག་ཏུ་འཁོར་འདུས་པའི་ནང་ནས་བྱང་ཆུབ་སེམས་དཔའ་བྱམས་པ་ཞེས་བྱ་བ། བཅོམ་ལྡན་འདས་ཀྱིས་བཀའ་སྩལ་པ་ཐོས་ནས། དེ་མ་ཐག་ཏུ་བྱེ་བ་བརྒྱ་ཕྲག་ཁྲིའི་གཟུངས་ཀྱི་སྒོ་ཐོབ་ནས། སྟན་ལས་ལངས་ཏེ་གོས་ཚགས་བཅོས་ནས་ཐལ་མོ་སྦྱར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་དོ། །དེ་ནས་ཚེ་དང་ལྡན་པ་ཨུ་པཱ་ལི་སྟན་ལས་ལངས་ཏེ། གདོང་དང ། སྤྱི་བོས་ཕྱག་བཙལ་ལོ། །བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་ལྡན་འདས་ཀྱིས་སྔོན་དུའང་མཛོད་ཀྱི་ཆོས་ཐམས་ཅད་ལས། མ་ཕམ་པ་མ་འོངས་པའི་དུས་སུ་སངས་རྒྱས་པར་གསུང་ན། མ་ཕམ་པ་སོ་སོའི་སྐྱེ་བོའི་ལུས་དང་མ་བྲལ། ཟག་པའང་མ་ཟད། མ་ཕམ་པ་འདི་ཉིད་དུ་རབ་ཏུ་བྱུང་ཡང ། ཏིང་ངེ་འཛིན་མི་བསྒོམ། ཉོན་མོངས་པ་མ་སྤངས་ན། བཅོམ་ལྡན་འདས་ཀྱིས་ངེས་པར་སངས་རྒྱས་པར་བཀའ་སྩལ་ན། མ་ཕམ་པ་དེ་ཚེའི་དུས་བྱས་ནས་ཁམས་གང་དུ་སྐྱེ་བ་ལེན་པར་འགྱུར། དེ་ནས་བཅོམ་ལྡན་འདས་ཀྱིས་ཨུ་པཱ་ལི་ལ་བཀའ་སྩལ་པ། ཨུ་པཱ་ལི། གཅིག་ཏུ་གྱིས་ལ་ཉོན་ཅིག་།དེ་བཞིན་གཤེགས་ 470a ༄#། །པ་ཐམས་ཅད་མཁྱེན་པས་འཁོར་འདིའི་ནང་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱས་པར་འགྱུར་བར་ལུང་བསྟན་གྱི། དུས་འདི་ནས་ལོ་བཅུ་གཉིས་ཀྱི་འོག་ཏུ་ཚེའི་དུས་བྱས་ནས། ངེས་པར་དགའ་ལྡན་གྱི་གནམ་དུ་སྐྱེ་བ་ལེན་པར་འགྱུར་རོ། །དེ་ནས་དགའ་ལྡན་གྱི་གནམ་གྱི་སྟེང་ན། ལྷའི་བུ་བྱེ་བ་ཁྲག་ཁྲིག་ཕྲག་ལྔ་བརྒྱ་ཡོད་པ། ལྷའི་བུ་རེ་རེས་ཀྱང་སྦྱིན་པའི་ཕ་རོལ་ཏུ་ཕྱིན་པ་ཟབ་མོ་ལ་སྤྱོད་པས། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ལ་མཆོད་པའི་དོན་དུ། ལྷའི་བསོད་ནམས་ཀྱི་མཐུས་གཞལ་མེད་ཁང་བྱས་ཏེ། རང་རང་གི་ལུས་ཀྱི་གོས་དང ། ཙནད་ན་དང ། རིན་པོ་ཆེའི་དབུ་རྒྱན་ཕུད་དེ། པུས་མོ་བཙུགས་ནས་ཐལ་མོ་སྦྱར་ཏེ། སྨོན་ལམ་འདི་སྐད་ཅེས་བཏབ་བོ། །བདག་གི་རིན་ཐང་མེད་པའི་རིན་པོ་ཆེ་དང ། ལྷའི་དབུ་རྒྱན་གྱིས་བྱང་ཆུབ་སེམས་དཔའ་ཆེན་པོ་ལ་མཆོད་པའི་དོན་དུ། མ་ཕམ་པ་འདི་མ་འོངས་པའི་དུས་སུ་རིང་པོ་མི་ཐོགས་པར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོས་ནས། བདག་ཅག་གི་རིན་པོ་ཆེའི་དབུ་རྒྱན་འདི། སངས་རྒྱས་ཀྱི་ཞིང་ཁམས་རྒྱན་ཐམས་ཅད་ཀྱིས་བརྒྱན་པའི་མཆོད་པའི་རྫས་སུ་གྱུར་ཅིག་ཅེས་ལྷའི་བུ་ཐམས་ཅད་རང་རང་པུས་མོ་བཙུགས་ཏེ། སྨོན་ལམ་དེ་ 470b སྐད་ཅེས་བཏབ་པ་དང ། དེ་ནས་ལྷ་ཐམས་ཅད་ཀྱིས་སྨོན་ལམ་བཏབ་མ་ཐག་ཏུ། རིན་པོ་ཆེའི་དབུ་རྒྱན་ཐམས་ཅད་བྱེ་བ་ཁྲག་ཁྲིག་ཕྲག་ལྔ་བརྒྱའི་གཞལ་མེད་ཁང་དུ་གྱུར་ཏེ། རིན་པོ་ཆེའི་གཞལ་མེད་ཁང་རེ་རེ་ལའང་སྐྱེད་མོས་ཚལ་བདུན་བདུན། སྐྱེད་མོས་ཚལ་རེ་རེ་འང་རིན་པོ་ཆེ་སྣ་བདུན་བདུན་ལས་གྲུབ་པ། རིན་པོ་ཆེ་རེ་རེ་ལས་ཀྱང་བྱེ་བ་ཕྲག་ལྔ་བརྒྱའི་འོད་ཀྱི་འོད་ཟེར་རེ་རེ་ལས་བྱེ་བ་ཕྲག་བརྒྱའི་པད་མ། པད་མ་རེ་རེ་ལས་བྱེ་བ་ཕྲག་ལྔ་བརྒྱའི་རིན་པོ་ཆེ་སྣ་བདུན་གྱི་ཤིང་གི་ཕྲེང་བ། ཤིང་རེ་རེའི་ལོ་མ་ལས་བྱེ་བ་ཕྲག་ལྔ་བརྒྱའི་རིན་པོ་ཆེའི་ཁ་དོག་།རིན་པོ་ཆེའི་ཁ་དོག་རེ་རེ་ལས་ཀྱང་བྱེ་བ་ཕྲག་ལྔ་བརྒྱའི་འཛམ་བུའི་གསེར་གྱི་འོད། འཛམ་བུའི་གསེར་གྱི་འོད་རེ་རེའི་ནང་ནས་ཀྱང་བྱེ་བ་ཕྲག་ལྔ་བརྒྱའི་རིན་པོ་ཆེའི་ལྷའི་བུ་མོ།་ལྷའི་བུ་མོ་རེ་རེའང་ཤིང་གི་དྲུང་ན་འདུག་ནས། ལག་ན་བྱེ་བ་ཕྲག་ལྔ་བརྒྱའི་རིན་པོ་ཆེ་གྲངས་མེད་པའི་དོ་ཤལ་ཐོགས། ངོ་མཚར་ཆེ་བའི་གླུ་དབྱངས་སྙན་པ་ལེན། གླུ་དབྱངས་སྙན་པའི་ནང་ནས་ཕྱིར་མི་ལྡོག་པའི་སའི་ཆོས་ཀྱི་འཁོར་ལོ་སྤྱོད། ཤིང་དེ་དག་ལས་འབྲས་བུ་སྐྱེས་པའི་ཁ་དོག་བཻ་ཌཱུརྱ་བཞིན་དུ་འདུག་།ཁ་དོག་དེ་དག་ཐམས་ཅད་བཻ་ཌཱུརྱའི་ནང་དུ་འདུག་པ། འོད་ཟེར་དེ་དག་ཐམས་ཅད་གཡས་ཕྱོགས་སུ་འཁོར་བ། སྒྲ་སྙན་པ་སྣ་ཚོགས་འབྱུང་བ། སྒྲ་ཐམས་ཅད་ལས་བྱམས་པ་ཆེན་པོ་དང ། སྙིང་རྗེ་ཆེན་པོའི་ཆོས་འཆད་ 471a ༄#། །པ།་རེ་རེའི་ཕོ་བྲང་མཐོ་ཁྱད་ནི་དཔག་ཚད་དྲུག་ཅུ་རྩ་གཉིས། རྔམས་སུ་དཔག་ཚད་བཅུ་བཞི། ཀླུའི་རྒྱལ་པོ་བྱེ་བ་ཕྲག་ལྔ་བརྒྱས་ནི་ཕོ་བྲང་བསྐོར། ཀླུའི་རྒྱལ་པོ་རེ་རེའང་བྱེ་བ་ཕྲག་ལྔ་བརྒྱའི་རིན་པོ་ཆེ་སྣ་བདུན་གྱི་ཤིང་གི་ཆར་ཕབ་པས་ཕོ་བྲང་གི་སྟེང་བརྒྱན། རང་བཞིན་རླུང་བྱུང་བས་ཤིང་དེ་དག་བསྐྱོད་པ་དང ། ཤིང་དེ་ལས་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པ་དང ། ཕ་རོལ་ཏུ་ཕྱིན་པ་ཐམས་ཅད་ཀྱི་སྒྲ་བྱུང་བར་གྱུར་ཏོ། །དེ་ནས་ཕོ་བྲང་དེའི་ནང་ན་རྒྱལ་པོ་ཆེན་པོ་ལེའུ་དུ་བ་ཏི་ཞེས་བྱ་བ། སྟན་ལ་འདུག་པ་ལས་ལངས་ཏེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ཕྱག་བཙལ་ནས། སྨོན་ལམ་འདི་སྐད་ཅེས་བཏབ་བོ། །བདག་གི་བསོད་ནམས་ཀྱིས་བྱང་ཆུབ་སེམས་དཔའ་བྱམས་པའི་ཆོས་ཀྱི་ཕོ་བྲང་བྱེད་པའི་བསོད་ནམས་དང་ལྡན་ན། བདག་གི་སྨིན་མཚམས་པར་ནས་ནོར་བུ་རིན་པོ་ཆེ་རང་བྱུང་བར་གྱུར་ཅིག་ཅེས་སྨོན་ལམ་བཏབ་པ་དང ། དེ་མ་ཐག་ཏུ་བྱེ་བ་ཕྲག་བརྒྱའི་རིན་པོ་ཆེ་བྱུང་ནས། རིན་པོ་ཆེ་བཻ་ཌཱུརྱ་ལ་སོགས་པའི་ཁ་དོག་ཐམས་ཅད་རྫོགས་པར་གྲུབ་པ། ཤེལ་གྱི་ཁ་དོག་བཞིན་ཕྱི་ནང་གསལ་བ། རིན་པོ་ཆེ་དེ་དག་ནམ་མཁའ་སྟོང་པ་ལ་འཁོར་ཞིང ། ངོ་མཚར་ཆེ་བའི་རིན་པོ་ཆེའི་ཕོ་བྲང་རིམ་པ་བཞི་བཅུ་རྩ་དགུ་སྤྲུལ་པར་གྱུར་ 471b ཏོ། །རེ་རེའི་ལན་ཞུན་རེ་རེ་ལས་ཀྱང་བྱེ་བ་འབུམ་ཕྲག་གི་རིན་པོ་ཆེ་པད་མ་འདིས་སྤྲས་པ་ལ་གྲུབ་པ། ལན་ཞུན་གྱི་བར་ཐམས་ཅད་ན་རྫུས་ཏེ་སྐྱེས་པའི་ལྷའི་བུ་བྱེ་བ་ཕྲག་དགུ་དང ། ལྷའི་བུ་མོ་བྱེ་བ་ཕྲག་ལྔ་བརྒྱ་ལ། ལྷའི་བུ་རེ་རེའི་ལག་ནས་རིན་པོ་ཆེ་སྣ་བདུན་བདུན་ལས་གྲུབ་པའི་པདྨ་དཔག་ཏུ་མེད་པ་བྱེ་བ་ཕྲག་བཅུ། པདྨ་རེ་རེའི་སྟེང་དུ་འོད་བྱེ་བ་ཕྲག་དཔག་ཏུ་མེད་པ། འོད་དེ་དག་གི་ནང་ན་ལྷའི་རོལ་མོའི་ཆ་སྤྱད་མ་དཀྲོལ་བར་སྒྲ་རང་བྱུང་བ། སྒྲ་དེ་དག་བྱུང་བ་དང ། བུ་མོ་ཐམས་ཅད་ལངས་ནས་རོལ་མོའི་ཆ་སྤྱད་ཐོགས་ཏེ་གར་དང།་གླུ་དབྱངས་སྙན་པ་ལེན་པའི་སྒྲ་ལས་དགེ་བ་བཅུ་དང ། སྨོན་ལམ་བཞི་ལ་སོགས་པའི་སྒྲ་ལྷ་ཐམས་ཅད་ཀྱིས་ཐོས་པས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་སྐྱེད་མོས་ཚལ་ཐམས་ཅད་ཀྱི་ནང་ན་སྐྱེད་མོས་ཚལ་ཁ་དོག་བརྒྱད་ཀྱི་བཻ་ཌཱུརྱའི་རྫིང་བུ། རྫིང་བུ་རེ་རེའི་ནང་ན་བྱེ་བ་ཕྲག་ལྔ་བརྒྱའི་རིན་པོ་ཆེ་ལས་གྲུབ་པ། རྫིང་བུ་རེ་རེའི་ནང་ན་ཡན་ལག་བརྒྱད་དང་ལྡན་པའི་ཆུས་གང་བ། ཆུ་དེ་དག་ཀྱང་གྱེན་དུ་འབབ་པ། སྒོ་བཞིའི་ཕྱི་རོལ་ན་རྫུས་ཏེ་སྐྱེས་པའི་པདྨ་བཞི། པདྨ་དེ་དག་ལས་ཆུ་བྱུང་བ་རིན་པོ་ཆེའི་པདྨའི་ཁ་དོག་བཞིན་དུ་འབབ་པ། པདྨ་རེ་རེའི་སྟེང་དུ་ལྷའི་བུ་མོ་ཉི་ཤུ་རྩ་བཞི་བཞི། ལུས་ཀྱི་ཁ་དོག་ངོ་མཚར་ཆེ་བ། བྱང་ཆུབ་སེམས་དཔའ་བཞིན་དུ་བརྒྱན་པ། ལུས་མཚན་དང་ལྡན་པ་ 472a ༄#། །ལག་ན་རིན་པོ་ཆེའི་རང་བཞིན་གྱི་སྣོད་བྱེ་བ་ཕྲག་ལྔ་བརྒྱ་སྤྲུལ། སྣོད་རེ་རེའི་ནང་ན་ལྷའི་བདུད་རྩིའི་རང་བཞིན་ཐམས་ཅད་ཀྱིས་གང་བ་ཕྲག་པ་གཡོན་ལ་ཐོགས་པ། དོ་ཤལ་དཔག་ཏུ་མེད་པ་ཕྲག་པ་གཡས་ལ་ཐོགས་པ། རོལ་མོའི་ཆ་བྱད་དཔག་ཏུ་མེད་པ་སྤྲིན་བཞིན་དུ་ནམ་མཁའ་ལ་འདུག་པ། ཆུ་ལས་བྱུང་བ། བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་དྲུག་བརྗོད་པ། དགའ་ལྡན་གྱི་གནམ་དུ་སྐྱེས་པའི་ལྷའི་བུ་གང་ལ་ལ་ཞིག་རང་བཞིན་གྱིས་ལྷའི་བུ་མོ་རྣམས་ཀྱིས་གཡོག་བྱས་པ། རིན་པོ་ཆེ་སྣ་བདུན་གྱི་སེང་གེའི་ཁྲི་འཕང་དུ་དཔག་ཚད་བཞི་ཡོད་པ། འཛམ་བུའི་གསེར་དང ། རིན་པོ་ཆེ་དཔག་ཏུ་མེད་པས་བརྒྱན་པ། ཟུར་བཞི་ལ་འདུག་པ། པདྨ་བཞི་ལས་སྐྱེས་པ། པདྨ་རེ་རེ་ལའང་རིན་པོ་ཆེ་ཕྲག་བརྒྱ་ལས་གྲུབ་པ། རིན་པོ་ཆེ་རེ་རེ་ལའང་བྱེ་བ་ཕྲག་བརྒྱའི་འོད་ཟེར། འོད་ཟེར་དེ་དག་ལས་ངོ་མཚར་ཆེ་བ་སྤྲུལ་པའི་རིན་པོ་ཆེ་སྣ་ཚོགས་ཀྱི་མེ་ཏོག་སྤྲུལ་པས་བརྒྱན་པ། རིན་པོ་ཆེའི་ཡོལ་བ་བྲེས་པ་དེའི་ཕྱོགས་ན་ཚངས་པའི་རྒྱལ་པོ་བྱེ་བ་ཕྲག་སྟོང་གིས་རང་རང་གི་ཚངས་པའི་ལྷའི་ངོ་མཚར་ཆེ་བའི་དྲིལ་བུ་ཁྱེར་ནས་ཡོལ་བའི་སྟེང་དུ་དབྱངས་པ། ཚངས་པའི་རྒྱལ་པོ་ཆུང་དུས་ཀྱང་རིན་པོ་ཆེ་སྣ་ཚོགས་པའི་དྲ་བས་ཡོལ་བའི་སྟེང་དུ་བྲེས་པ། དེ་ནས་ལྷའི་བུ་དང ། ལྷའི་བུ་མོ་བརྒྱ་སྟོང་གྲངས་མེད་པའི་འཁོར་ 472b གྱིས་རིན་པོ་ཆེའི་མེ་ཏོག་པདྨ་ཐམས་ཅད་ཁྱེར་ནས་ཁྲིའི་སྟེང་དུ་བདལ་བ། པདྨ་དེ་དག་ཐམས་ཅད་རིན་པོ་ཆེའི་རང་བཞིན་གྱི་བུ་མོ་བྱེ་བ་ཕྲག་ལྔ་བརྒྱ་བྱུང་བ་དེ་དག་གི་ལག་ན་རྔ་ཡབ་དཀར་པོ་ཐོགས་པ། ཡོལ་བའི་ནང་ན་འདུག་པ། ཕོ་བྲང་ཟུར་བཞི་ལ་རིན་པོ་ཆེའི་ཀ་བ་བཞི་ཡོད་པ། རིན་པོ་ཆེའི་ཀ་བ་རེ་རེ་ལའང་བརྒྱ་ཕྲག་སྟོང་གི་ཁང་པ་བརྩེགས་པ། བུ་མོ་འདིའི་ནོར་བུ་ནི་བྲེས། ལན་ཀན་བར་ཀུན་ཏུ་ལྷའི་བུ་མོ་བརྒྱ་སྟོང་ཡོད། ཁ་དོག་ངོ་མཚར་ཆེ་བ་དཔག་ཏུ་མེད་པའི་རོལ་མོའི་ཆ་སྤྱད་ལག་ན་ཐོགས་པ། རོལ་མོའི་སྒྲའི་ནང་ནས་སྡུག་བསྔལ་བ་དང།་སྟོང་པ་དང ། མི་རྟག་པ་དང ། བདག་མེད་པ་དང ། ཕ་རོལ་ཏུ་ཕྱིན་པ་ཐམས་ཅད་ཀྱི་སྒྲ་འབྱུང་བ ། ལྷའི་ཕོ་བྲང་དེ་དག་ནས་རིན་པོ་ཆེའི་ཁ་དོག་དཔག་ཏུ་མེད་པ་བྱེ་བ་ཕྲག་བརྒྱ་ཡོད་པ། བུ་མོ་རེ་རེ་ཀུན་ཀྱང་རིན་པོ་ཆེའི་ཁ་དོག་དང་མཐུན་པར་སྤྲུལ་ཏོ། །དེ་ནས་ཕྱོགས་བཅུའི་ལྷ་དཔག་ཏུ་མེད་པ་ཐམས་ཅད་དགའ་ལྡན་གྱི་ལྷའི་ཕོ་བྲང་དུ་སྐྱེ་བ་ལེན་པར་སྨོན་ལམ་བཏབ་བོ། །དེ་ནས་དགའ་ལྡན་གྱི་ཕོ་བྲང་ན་རྒྱལ་པོ་ཆེན་པོ་ལྔ་པོ་ལ་རྒྱལ་པོ་ཆེན་པོ་དང་པོ་ནི། རིན་པོ་ཆེའི་རྒྱལ་མཚན་ཞེས་བྱ་བ་ལུས་ལ་རིན་པོ་ཆེ་སྣ་བདུན་གྱི་ཆར་འབེབས་པས་ཕོ་བྲང་གི་ནང་དུ་འཐོར་བ། རིན་པོ་ཆེའི་ནོར་བུ་རེ་རེའང་རོལ་མོའི་ཆ་སྤྱད་དཔག་ཏུ་མེད་པར་སྤྲུལ་པ། ནམ་མཁའ་ལ་ཀུན་ཏུ་འཕྱང་བ། མ་བརྡུངས་པར་སྒྲ་སྙན་པ་དཔག་ཏུ་ 473a ༄#། །མེད་པ་རང་འབྱུང་བ། སེམས་ཅན་གྱི་ཡིད་རྟོག་པ། རྒྱལ་པོ་གཉིས་པ་མེ་ཏོག་འཐོར་བ་ཞེས་བྱ་བ་ལུས་ལ་མེ་ཏོག་སྣ་ཚོགས་ཀྱི་ཆར་འབེབས་པ། ཕོ་བྲང་ཐམས་ཅད་ཁྱབ་པར་མེ་ཏོག་གི་གདུགས་སྤྲུལ། གདུགས་རེ་རེའང་བརྒྱ་ཕྲག་སྟོང་གི་རྒྱལ་མཚན་དང ། འཕན་གྱིས་ལམ་དྲངས་པ། རྒྱལ་པོ་གསུམ་པ་ནི། སྤོས་ཀྱི་དབྱངས་ཞེས་བྱ་བ་ལུས་ཀྱི་བ་སྤུའི་ཁུང་བུའི་ནང་ནས་ངོ་མཚར་ཆེ་བའི་རྒྱ་མཚོའི་འགྲམ་གྱི་ཙནྡན་གྱི་སྤོས་ཀྱི་ཆར་འབེབས་པ། སྤོས་དེ་དག་སྤྲིན་བཞིན་དུ་ཆགས་པ། ཁ་དོག་བརྒྱ་ཕྲག་གིས་ཕོ་བྲང་ལན་བདུན་དུ་བསྐོར་བ། རྒྱལ་པོ་ཆེན་པོ་བཞི་པ། དགའ་བ་བདེ་བ་ཞེས་བྱ་བ་ལུས་ལ་ཡིད་བཞིན་གྱི་ནོར་བུ་རིན་པོ་ཆེའི་ཆར་འབེབས་པ། རིན་པོ་ཆེ་རེ་རེའང་རང་བཞིན་གྱིས་རྒྱལ་མཚན་དང ། འཕན་གྱི་སྟེང་དུ་འདུག་ནས་སངས་རྒྱས་ལ་སྐྱབས་སུ་འགྲོ་བ་དང ། ཆོས་དང ། དགེ་འདུན་ལ་སྐྱབས་སུ་འགྲོ་བར་འཆད་པ་དང ། ཡན་ལག་ལྔའི་ཚུལ་ཁྲིམས་ཀྱི་སྒྲ་དང ། དགེ་བའི་ཆོས་དཔག་ཏུ་མེད་པ་དང ། ཕ་རོལ་ཏུ་ཕྱིན་པ་ཐམས་ཅད་དང ། བྱམས་པ་བྱང་ཆུབ་ཀྱི་ཡན་ལག་གི་སྒྲ་ལ་འཛུད་པ། རྒྱལ་པོ་ཆེན་པོ་ལྔ་པ། སྒྲ་དབྱངས་དྲག་པོ་ཞེས་བྱ་བ་ལུས་ཀྱི་བ་སྤུའི་ཁུང་བུ་ཐམས་ཅད་ནས་ཆུ་འབེབས་པ། ཆུ་རེ་རེའི་སྟེང་དུ་མེ་ཏོག་པདྨ་བྱེ་བ་ཕྲག་ལྔ་བརྒྱ་ཡོད་པ། པདྨ་རེ་རེའི་སྟེང་དུ་ཤེལ་གྱི་བུ་མོ་ཉི་ཤུ་རྩ་ལྔ་ལྔ། 473b ཤེལ་གྱི་བུ་མོ་རེ་རེའི་ལུས་ཐམས་ཅད་ཀྱི་བ་སྤུའི་བུ་ག་རེ་རེའི་ནང་ནས་ལྷའི་བདུད་ལས་རྒྱལ་བའི་སྒྲ་སྙན་པ་འབྱུང་བ་སྤྲུལ་ལོ། །བཅོམ་ལྡན་འདས་ཀྱིས་ཨུ་པཱ་ལི་ལ་བཀའ་སྩལ་པ། དགའ་ལྡན་གྱི་ལྷའི་གནས་ཞེས་བྱ་བར་དགེ་བ་བཅུ་དང ། རྒྱལ་བ་ལ་དྲིན་བསབ་པ་དང ། ངོ་མཚར་ཆེ་བ་བསྐྱེད་པའི་བསོད་ནམས་ནི་ངས་བསྐལ་པ་ཆུང་དུ་གཅིག་གི་བར་དུ་འདུག་ནས་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དྲིན་བསབ་པ་དང ། དགེ་བ་བཅུའི་འབྲས་བུ་བཤད་ཀྱང་རྫོགས་པའི་མཐའ་མེད་དེ། འདིར་ངས་ཁྱེད་ལ་སོགས་པ་ལ་མདོ་ཙམ་ཞིག་བཤད་ཅིང་བསྟན་པར་བྱའོ། །ུ་པཱ་ལི། དགེ་སློང་ངམ། འཁོར་ཐམས་ཅད་ཀྱང་རུང་སྟེ་གང་ལ་ལ་ཞིག་སྐྱེ་ཤི་ལ་མི་སྐྱོ་བར་ལྷའི་གནས་སུ་སྐྱེ་བར་འདོད་ན། བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་བྱམས་པའི་ཞབས་འབྲིང་བྱེད་འདོད་པར་ལྟ་བ་ནི། ཡན་ལག་ལྔའི་ཁྲིམས་བརྒྱད་རྫོགས་པ། ལུས་སེམས་ཀྱི་བརྩོན་འགྲུས་རྒྱུན་མི་འཆད་པ། དགེ་བ་བཅུའི་ཆོས་ལ་སྤྱོད་པ། བདེ་སྐྱིད་ཕུན་སུམ་ཚོགས་པར་འདོད་པ། སེམས་རྩེ་གཅིག་ཏུ་དགའ་ལྡན་གྱི་གནས་སུ་སྐྱེ་བར་འདོད་པ་དེ་དག་ནི་ཡང་དག་པར་ལྟ་བ་ཞེས་བྱ་སྟེ། གཞན་དུ་ལྟ་བ་ནི་ལོག་པར་ལྟ་བ་ཞེས་བྱའོ། །དེ་ནས་ཨུ་པཱ་ལི་སྟན་ལས་ལངས་ཏེ་གོས་ཚགས་བཅོས་ནས་གདོང་དང ། སྤྱི་བོས་ཕྱག་བཙལ་ཏེ། བཅོམ་ལྡན་འདས་ལ་འདི་ 474a ༄#། །སྐད་ཅེས་གསོལ་ཏོ། །བཅོམ་ལྡན་འདས། དགའ་ལྡན་གྱི་གནམ་དུ་དེ་ལྟ་བུའི་བདེ་སྐྱིད་ཕུན་སུམ་ཚོགས་པ་དེར་སྐྱེས་བུ་ཆེན་པོ་འདི་དུས་ཅི་ཙམ་དུ་འཛམ་བུའི་གླིང་ནས་ལྷའི་གནས་དེ་ལྟ་བུར་སྐྱེ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དུས་འདི་ནས་ལོ་བཅུ་གཉིས་ལོན་ནས་དཔྱིད་ཟླ་འབྲིང་པོའི་ཚེས་བཅོ་ལྔའི་ཉི་མ་ལ་ཡུལ་བར་ནི་ཀྲ་བ་ལིའི་གྲོང་ཁྱེར་ན་བྲམ་ཟེ་ཆེན་པོ་པ་པ་ལི་ཞེས་བྱ་བའི་ཁྱིམ་ནས་སྐྱེ་བ་བླངས་པའི་ས་ནས་སྐྱིལ་མོ་ཀྲུང་བཅས་ནས་ཏིང་ངེ་འཛིན་ལ་མཉམ་པར་བཞག་པ་བཞིན་དུ་ལུས་གསེར་གྱི་ཁ་དོག་དང ། འོད་ཟེར་དམར་པོ་ཉི་མ་བརྒྱ་སྟོང་བས་ལྷག་།སྟེང་གི་དགའ་ལྡན་གྱི་གནམ་དུ་ལུས་ཀྱི་སྐུ་གདུང་ཡང ། དཔེར་ན། གསེར་གྱི་གཟུགས་བཞིན་དུ་མི་གཡོ་མི་འགུལ་བར་ལུས་ཀྱི་འོད་ཟེར་གྱི་དཀྱིལ་འཁོར་གྱི་ནང་ནས་རྣམ་པ་ཐར་པ་གསུམ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་ཡི་གེ་གསལ་བར་སྟོན་ཏེ། དེ་ནས་ལྷ་མི་ཐམས་ཅད་རྗེས་སུ་འབྲང་ནས། རིན་པོ་ཆེ་སྐུ་གདུང་གྱི་མཆོད་རྟེན་ལ་མཆོད་ནས། དེ་ནས་དགའ་ལྡན་གྱི་གནམ་དུ་རིན་པོ་ཆེ་སྣ་བདུན་གྱི་ཕོ་བྲང་ན་འདི་གཞལ་མེད་ཁང་སེང་གེའི་པདྨའི་སྟེང་དུ་སྐྱིལ་མོ་ཀྲུང་བཅས་ནས་ལུས་འཛམ་བུ་གསེར་གྱི་ཁ་དོག་བཞིན་དུ་རྫུས་ཏེ་སྐྱེས་ནས། སྐུ་ཚུར་དཔག་ཚད་བཅུ་དྲུག་།མཚན་སུམ་ཅུ་རྩ་གཉིས། དཔེ་བྱད་ 474b བཟང་པོ་བརྒྱད་ཅུས་རྫོགས་པར་བརྒྱན་པ། དཔུའི་ཐོར་ཙུགས་དང་ལྡན། དབུ་སྐྲ་བཻ་ཌཱུརྱའི་ཁ་དོག་དང་འདྲ་བ། ཤི་ཀྲ་བི་ལི་ཀྲ་དང ། མ་འདི་དང ། གྱེན་ཤུགས་ཀྱི་རིན་པོ་ཆེ་ས་ལྷའི་དབུ་རྒྱན་བརྒྱན་པ། རིན་པོ་ཆེ་ལྷའི་དབུ་བརྒྱན་དེ་དག་ལ་བྱེ་བ་ཕྲག་བརྒྱའི་རིན་པོ་ཆེའི་ཁ་དོག་རེ་རེའི་ནང་ནས། སྤྲུལ་པའི་དེ་བཞིན་གཤེགས་པ་དཔག་ཏུ་མེད་པ་བརྒྱ་སྟོང་ཕྲག་ཁྲིའི་སྤྲུལ་པའི་བྱང་ཆུབ་སེམས་དཔའ་མང་པོས་ཞབས་འབྲིང་བྱས་པ། དེ་ནས་ཞིང་ཁམས་གཞན་གྱི་བྱང་ཆུབ་སེམས་དཔའ་ཐམས་ཅད་ཆོ་འཕྲུལ་བཅོ་བརྒྱད་སྟོན་ཅིང ། ལྷའི་དབུ་རྒྱན་གྱི་ནང་ན་ཡིད་ལ་སྨོན་པའི་རྗེས་སུ་མཐུན་པར་ལྷའི་དབུ་རྒྱན་གྱི་ནང་ན་གནས་སོ། །བྱམས་པའི་སྨིན་མཚམས་ནས་འོད་ཟེར་དཀར་པོ་བྱུང་སྟེ་འོད་ཟེར་དེ་དག་ལས་བརྒྱན་ཕྲག་གི་རིན་པོ་ཆེའི་ཁ་དོག་དང ། ལྡན་པའི་མཚན་སུམ་ཅུ་རྩ་གཉིས། མཚན་རེ་རེའི་ནང་ནས་བྱེ་བ་ཕྲག་ལྔ་བརྒྱའི་རིན་པོ་ཆེའི་ཁ་དོག་དཔེ་བྱད་བཟང་པོ། དཔེ་བྱད་རེ་རེ་ལའང་བྱེ་བ་ཕྲག་ལྔ་བརྒྱའི་རིན་པོ་ཆེའི་མཚན་དང ། དཔེ་བྱད་ཀྱི་ཁ་དོག་འབར་བའི་ལྷའི་བུ་རེ་རེའི་འོད་ཟེར་བརྒྱད་ཁྲི་བཞི་སྟོང་གི་སྤྲིན་ཐམས་ཅད་པདྨ་ལས་རང་རང་འདུག་ནས། ཉིན་མཚན་རྟག་པར་ཕྱིར་མི་ལྡོག་པའི་སའི་ཆོས་ཀྱི་འཁོར་ལོ་སྤྱོད་པ། བགྲོད་པ་གཅིག་ཅིང་དོན་གྲུབ་པར་བྱེད་པ་ཕྲག་ལྔ་བརྒྱའི་ལྷའི་བུ་དེ་དག་ཕྱིར་མི་ལྡོག་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ 475a ༄#། །འདི་དག་ཏུ། དགའ་ལྡན་གྱི་གནམ་དུ་ཉིན་མཚན་རྟག་ཏུ་ཕྱིར་མི་ལྡོག་པའི་སའི་ཆོས་ཀྱི་འཁོར་ལོ་ལ་ལྷའི་བུ་ཐམས་ཅད་འཁོད་པ། འཛམ་བུའི་གླིང་གི་ཚེ་ལོའི་གྲངས་བྱེ་བ་འབུམ་ཕྲག་ལྔ་བཅུ་རྩ་དྲུག་ལོན་ནས་བྱམས་པ་དགའ་ལྡན་གྱི་གནམ་ནས་འཛམ་བུའི་གླིང་དུ་སྐྱེ་བ་བླངས་པའི་མདོ་བཤད་པར་འགྱུར་རོ། །ུ་པཱ་ལི། བྱང་ཆུབ་སེམས་དཔའ་བྱམས་པ་ཞེས་བྱ་བ་འཛམ་བུའི་གླིང་ནས་ཚེ་འཕོས་ནས་དགའ་ལྡན་གནམ་དུ་སྐྱེས་པའི་ཡོན་ཏན་ནི། དེ་བཞིན་གཤེགས་པ་མྱ་ངན་ལས་འདས་ནས་དེའི་འཁོར་ཉེ་གནས་ལས་གང་ལ་ལ་ཞིག་བརྩོན་འགྲུས་སུ་བསོད་ནམས་བསགས་པ། སྡོམ་པ་མ་ཞིག་ཅིང་མཆོད་རྟེན་ལ་ཕྱག་བ་དར་དང ། མཎྜལ་བྱེད་པ་དང།་སྤོས་དྲི་ཞིམ་པ་དང ། མེ་ཏོག་གི་མཆོད་པ་དང ། རྣམ་པར་ཐར་པ་གསུམ་ལ་སྤྱོད་ཅིང ། ཟབ་ཅིང་དྲང་བའི་ཆོས་ལ་སྤྱོད་པ་དང ། མདོ་སྡེ་ཀློག་ཅིང ། སེམས་རྩེ་གཅིག་ཏུ་རྒྱུན་མི་འཆད་པར་ཡིད་ལ་ཟློས་པ་དང ། མངོན་པར་ཤེས་པ་དྲུག་ཐོབ་པར་བྱེད་པ་དང ། དེ་བཞིན་གཤེགས་པའི་སྐུ་གཟུགས་བྱེད་པ་དང ། བྱམས་པའི་མཚན་བརྗོད་པ་དེ་ལྟ་བུ་ལ་སོགས་པའི་མི་དེ་དག་ནི་འདི་སྐད་ཅིག་ཙམ་དུ་ཁྲིམས་བརྒྱད་མནོས་ནས་སྡིག་པ་ཐམས་ཅད་བྱང་བར་བྱེད་ཅིང ། སྨོན་ལམ་བཏབ་ནས་ཚེའི་དུས་བྱས་པའི་འོག་ཏུ། དཔེར་ན། 475b སྐྱེས་བུ་སྟོབས་དང་ལྡན་པ་ལག་པ་བརྒྱང་བ་ཙམ་དུ་དགའ་ལྡན་དུ་སྐྱེས་ནས་པདྨའི་སྟེང་དུ་སྐྱིལ་མོ་ཀྲུང་བཅས་ནས། བརྒྱ་ཕྲག་སྟོང་གི་ལྷའི་བུས་ལྷའི་རོལ་མོ་བྱེད་ཅིང་མེ་ཏོག་མནྡཱར་བ་དང ། མནྡཱ་ར་བ་ཆེན་པོ་འཐོར་ཞིང་ལེགས་སོ། །ལེགས་སོ། །ཞེས་བསྔགས་པ་བརྗོད་ནས། རིགས་ཀྱི་བུ། ཁྱོད་ནི་འཛམ་བུའི་གླིང་དུ་བསོད་ནམས་རྒྱ་ཆེན་པོ་བསགས་ནས།་འཆི་འཕོ་བའི་འོག་ཏུ་འདི་ནི་དགའ་ལྡན་གྱི་གནས་ཞེས་བྱ་བ་ཡིན་ཏེ། འདིར་ལྷའི་རྒྱལ་པོ་བྱམས་པ་ཞེས་བྱ་བ་ལ། ཁྱོད་སྐྱབས་སུ་གསོལ། ཕྱག་འཚོལ་ཅིག་དང ། ཕྱག་འཚལ་ན་སྨིན་མཚམས་ཀྱི་མཛོད་སྐུ་ནས་འོད་ཟེར་དཀར་པོས་རེག་པར་བྱས་ནས། བསྐལ་པ་དགུ་བཅུའི་སྐྱེ་ཤི་ལས་གྲོལ་ཞིང་སྡིག་པ་འབྱང་བར་འགྱུར་རོ། །དེ་ནས་བྱང་ཆུབ་སེམས་དཔའི་རྗེས་སུ་མཐུན་པའི་ཡོན་ཏན་གྱིས་ངོ་མཚར་ཆོས་བཤད་ནས། བརྩོན་པ་མི་འདོར་བ་ཕྱིར་མི་ལྡོག་པའི་འཁོར་ལོ་དང ། བླ་ན་མེད་པའི་ལམ་ཡིད་ལ་སེམས་པ་དེ་ལྟ་བུ་ལ་སོགས་པའི་སེམས་ཅན་སྡིག་པ་ཐམས་ཅད་བྱང་ཞིང་ཆོས་དྲུག་ལ་སྤྱོད་ན་ཐེ་ཚོམ་མེད་པར་ངེས་པར་དགའ་ལྡན་གྱི་གནམ་དུ་སྐྱེས་ནས། འཕགས་པ་བྱམས་པའི་ཞལ་མཐོང ། བྱམས་པའི་ཞབས་འབྲིང་ནས་འཛམ་བུའི་གླིང་དུ་དང་པོར་ཆོས་ཐོས་ནས་མ་འོངས་པའི་བསྐལ་པ་འདི་ཉིད་ཀྱི་སངས་རྒྱས་དང ། བསྐལ་པ་སྐར་མ་ལྟ་བུའི་སངས་རྒྱས་ཐམས་ཅད་ཀྱིའང་ 476a ༄#། །ཞལ་མཐོང་ནས་སངས་རྒྱས་དེ་དག་ཐམས་ཅད་ཀྱི་དྲུང་དུ་བྱང་ཆུབ་ཏུ་ལུང་སྟོན་པ་ཐོབ་པར་འགྱུར་རོ། །ུ་པཱ་ལི། དེ་བཞིན་གཤེགས་པ་མྱ་ངན་ལས་འདས་པའི་འོག་ཏུ་དགེ་སློང་དང ། དགེ་སློང་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་འཁོར་ཐམས་ཅད་ལས་གང་ལ་ལ་ཞིག་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་མཚན་ཐོས་ནས་དགའ་བ་དང ། གུས་པར་ཕྱག་འཚལ་བའི་མི་དེ་དག་ཚེའི་དུས་བྱས་ནས་སེ་གོལ་གཏོགས་པ་ཙམ་དུ་གོང་མ་ཅི་ལྟ་བ་བཞིན་དུ། བྱམས་པའི་མཚན་ཐོས་ནས་ཚེའི་དུས་བྱས་པའི་འོག་ཏུ་མུན་པའི་ཁམས་སུ་མི་ལྟུང ། མཐའ་འཁོབ་ཀྱི་ཡུལ་དང ། ལོག་པར་ལྟ་བ་དང ། མི་དགེ་བ་ཐམས་ཅད་སྤྱོད་པར་མི་སྐྱེ། སྐྱེ་བ་ཐམས་ཅད་དུ་དྲང་པོར་ལྟ་བ་དང ། འཁོར་ཕུན་སུམ་ཚོགས་པ་དང ། དཀོན་མཆོག་གསུམ་ལ་མི་སྨོད་པར་སྐྱེའོ། །ུ་པཱ་ལི། རིགས་ཀྱི་བུ་དང ། རིགས་ཀྱི་བུ་མོ་གང་ལ་ལ་ཞིག། སྡོམ་པ་བཤིག་པ་དང ། སྡིག་པ་མི་དགེ་བའི་ལས་བྱས་པས་བྱང་ཆུབ་སེམས་དཔའ་ཐུགས་རྗེ་ཆེན་པོའི་མཚན་ཐོས་པས་མཚན་ནས་བརྗོད་ཅིང ། ཡན་ལག་ལྔ་གཏུགས་ཏེ། སེམས་རྩེ་གཅིག་ཏུ་བཤགས་ན་སྡིག་པ་ཐམས་ཅད་མྱུར་དུ་ 476b བྱང་ནས་མ་འོངས་པའི་དུས་ཀྱི་སེམས་ཅན་ཐམས་ཅད་བྱང་ཆུབ་སེམས་དཔའ་ཐུགས་རྗེ་ཆེན་པོའི་མཚན་བརྗོད་པ་དང ། སྐུ་གཟུགས་བྲིས་ནས་སྤོས་དང ། མེ་ཏོག་དང ། གོས་དང།་གདུགས་དང ། རྒྱལ་མཚན་དང ། བ་དན་དང ། ཕྱག་བཙལ་ཞིང་ཡིད་ལ་ཟློས་ན་མི་དེ་དག་ཚེའི་དུས་བྱས་པའི་ཚེ་ན་བྱང་ཆུབ་སེམས་དཔའ་བྱམས་པས། མི་ཆེན་པོའི་མཚན་སྨིན་མཚམས་ཀྱི་མཛོད་སྤུ་ནས་འོད་དང ། ལྷའི་བུ་ཐམས་ཅད་ཀྱིས་མནྡཱ་ར་བའི་ཆར་ཕབ་ནས་མི་དེ་དག་བསྡུས་ནས་སྐད་ཅིག་ཡུད་ཙམ་གྱིས་ལྷའི་གནས་སུ་སྐྱེས། །འཕགས་པ་བྱམས་པའི་ཞལ་མཐོང་ནས་གདོང་དང ། སྤྱི་བོས་ཕྱག་བཙལ་ནས་དེ་མ་ཐག་ཏུ་ཆོས་ཐོས་པ་དང ། བླ་ན་མེད་པའི་བྱང་ཆུབ་ཀྱི་ལ་མཐོབ་པ་དང ། ཕྱིར་མི་ལྡོག་པའི་འཁོར་ལོ་དང ། ། མ་འོངས་པའི་དུས་ཀྱི་ཚེ་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་མཐོང་བར་འགྱུར་རོ། །ུ་པཱ་ལི། ཁྱོད་རྩེ་གཅིག་ཏུ་ཉོན་ལ་ཡིད་ལ་གྱིས་ཤིག ། བྱང་ཆུབ་སེམས་དཔའ་བྱམས་པ་ཞེས་བྱ་བ་ལ་མ་འོངས་པའི་སེམས་ཅན་ཐམས་ཅད་སྐྱབས་སུ་འགྲོ་བ་ན་གང་ལ་ལ་ཞིག་སྐྱབས་སུ་འགྲོ་བའི་མི་དེ་དག་ནི་བླ་ན་མེད་པའི་ལམ་དང།་ཕྱིར་མི་ལྡོག་པའི་འཁོར་ལོ་འཐོབ་ནས་བྱང་ཆུབ་སེམས་དཔའ་བྱམས་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པའི་དུས་ཀྱི་ཚེ། 477a ༄#། །མི་དེ་དག་དེ་བཞིན་གཤེགས་པའི་འོད་ཟེར་མཐོང་ནས་ལུང་བསྟན་པ་ཐོབ་པར་འགྱུར་རོ། །ུ་པཱ་ལི། དེ་བཞིན་གཤེགས་པ་མྱ་ངན་ལས་འདས་པའི་འོག་ཏུ་འཁོར་བཞི་པོ་དང ། ལྷ་དང ། ཀླུ་དང ། གནོད་སྦྱིན་ལ་སོགས་པ་གང་ལ་ལ་ཞིག་དགའ་ལྡན་གྱི་གནས་སུ་སྐྱེས་པའི་དུས་ཀྱི་ཚེ། འདི་ལྟར་བལྟ་བར་བྱ་སྟེ། དགའ་ལྡན་ཡིད་ལ་བྱེད་པས་དེ་བཞིན་གཤེགས་པའི་སྡོམ་པ་བླངས་ནས། ཉི་མ་གཅིག་གམ། ཉི་མ་བདུན་གྱི་བར་དུ། དགེ་བ་བཅུ་ཡིད་ལ་བྱེད་པ་དང ། དགེ་བ་བཅུའི་ལམ་ལ་སྤྱོད་པའི་བསོད་ནམས་དེ་དག་བྱམས་པའི་མདུན་དུ་བསྔོ་ཞིང་སྨོན་ལམ་བཏབ་པ་དེ་དག་ནི་ལྟ་བ་དེ་དག་གི་ལྷའི་བུ་མཐོང་བ་དང ། པདྨ་མཐོང་བར་འགྱུར་རོ། །གང་ལ་ལ་ཞིག་སྐད་ཅིག་ཙམ་བྱམས་པའི་མིང་ནས་བརྗོད་པའི་མི་དེ་དག་ནི། བསྐལ་པ་སྟོང་ཉིས་བརྒྱའི་སྐྱེ་ཤི་ལས་གྲོལ་ཞིང་སྡིག་པ་འབྱང་བར་འགྱུར་རོ། །བྱམས་པའི་མཚན་ཐོས་པས་ཐལ་མོ་སྦྱར་བའི་མི་དེ་དག་ནི། བསྐལ་པ་ལྔ་བཅུའི་སྐྱེ་ཤི་ལས་ཐར་བར་འགྱུར་རོ། །གང་ལ་ལ་ཞིག་བྱམས་པ་ལ་གུས་པར་ཕྱག་བཙལ་བས་བསྐལ་པ་བྱེ་བ་བརྒྱའི་སྐྱེ་ཤི་ལས་གྲོལ ། ཐར་ཞིང་སྡིག་པ་བྱང་བར་འགྱུར་རོ། །ལྷའི་གནས་ལ་མི་ཆགས་ཤིང་མ་འོངས་པའི་དུས་སུ་ཀླུའི་སྡོང་པོ་བྱང་ཆུབ་ཀྱི་ཤིང་དྲུང་དུ་བླ་ན་མེད་པའི་བྱང་ཆུབ་ཀྱི་ལམ་དུ་སེམས་ 477b བསྐྱེད་པའང་ཐོབ་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། འཁོར་མང་པོ་དཔག་ཏུ་མེད་པ་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ནས་བྱམས་པའི་ཞབས་ལའང་ཕྱག་བཙལ་ནས་བཅོམ་ལྡན་འདས་དང ། བྱམས་པ་ལ་ལ་ན་བརྒྱ་སྟོང་དུ་བསྐོར་ནས་ལམ་མཐོབ་པར་དག་རང་རང་གི་སྨོན་ལམ་བཏབ་པ། བདག་ཅག་ལ་སོགས་པས་ལྷ་དང ། མི་དང ། སྡེ་བརྒྱད་པོ་འདིར་བཅོམ་ལྡན་འདས་ཀྱི་སྤྱན་སྔར་མོས་པས་སྨོན་ལམ་བཏབ་པས་མ་འོངས་པའི་དུས་སུ་ལུས་སྤངས་ནས། འཕགས་པ་བྱམས་པའི་ཞལ་མཐོང་བ་དང ། ཐམས་ཅད་དགའ་ལྡན་གྱི་གནམ་དུ་སྐྱེ་བ་ཐོབ་པར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། ཁྱོད་ལ་སོགས་པ་མ་འོངས་པའི་དུས་སུ་བསོད་ནམས་བྱེད་པ་དང ། ཚུལ་ཁྲིམས་བསྲུང་བ་དང ། ཐམས་ཅད་བྱང་ཆུབ་སེམས་དཔའ་བྱམས་པའི་དྲུང་དུ་སྐྱེ་བ་བླངས་ནས་བྱང་ཆུབ་སེམས་དཔའ་བྱམས་པས་ཕྱིན་གྱིས་རློབ་པར་འགྱུར་རོ། །བཅོམ་ལྡན་འདས་ཀྱིས་ཨུ་པཱ་ལི་ལ་བཀའ་སྩལ་པ། ཨུ་པཱ་ལི། དེ་ལྟ་བུར་ལྟ་བ་ནི་ཡང་དག་པར་ལྟ་བ་ཞེས་བྱའོ། །གཞན་དུ་ལྟ་བ་ནི་ལོག་པར་ལྟ་བ་ཞེས་བྱའོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལ་འདུག་པ་ལས་ལངས་ཏེ་པུས་མོ་བཙུགས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལེགས་ 478a ༄#། །སོ། །བཅོམ་ལྡན་འདས། བྱམས་པའི་ཡོན་ཏན་ལེགས་པར་བཤད་དོ། །མ་འོངས་པའི་དུས་ཀྱི་ཚེ་བསོད་ནམས་བྱེད་པའི་སེམས་ཅན་འབྲས་བུ་ཐོབ་པ་བདག་ཅག་གིས་ཐོབ་པར་འཚལ་བས། བཅོམ་ལྡན་འདས། ཆོས་ཀྱི་རྣམ་གྲངས་འདིའི་མཚན་ཅི་ལགས། བདག་ཅག་གིས་ཅི་ལྟར་གཟུང་བར་བགྱི། བཅོམ་ལྡན་འདས་ཀྱིས། ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་དེ་བཞིན་གཤེགས་པས་གསུངས་པ་མ་བརྗེད་པར་གཟུང་ལ་མ་འོངས་པའི་དོན་དུ་ལྷའི་གནས་སུ་སྐྱེ་པའི་ལམ་འབྱེད་པ་དང ། བྱང་ཆུབ་ཀྱི་མཚན་དང ། དེ་བཞིན་གཤེགས་པའི་གདུང་རྒྱུན་མི་གཅོད་པས་མདོ་སྡེའི་མིང ། བྱང་ཆུབ་སེམས་དཔའ་བྱམས་པ་མྱ་ངན་ལས་འདས་པ་ཞེས་ཀྱང་བྱ། བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནམ་དུ་སྐྱེ་བ་བླངས་ནས་བྱང་ཆུབ་ཀྱི་སྙིང་པོ་ལ་བསྐུལ་བ་ཞེས་བྱ་བར་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཞིང་ཁམས་གཞན་ནས་འོངས་པའི་བྱང་ཆུབ་སེམས་དཔའ་འབུམ་ཕྲག་བཅུ་བཞིའི་ལེའུ་བརྒྱན་པའི་ཏིང་ངེ་འཛིན་ཐོབ་པར་གྱུར་ཏོ། །ལྷའི་བུ་འབུམ་ཕྲག་བརྒྱད་ཀྱིས་བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་ཐམས་ཅད་ཀྱིས་བྱམས་པའི་རྗེས་སུ་འབྲང་ནས་འཛམ་བུའི་གླིང་དུ་སྐྱེ་བར་སྨོན་ལམ་བཏབ་བོ། །བཅོམ་ལྡན་ 478b འདས་ཀྱིས་དེ་སྐད་ཅེས་བཀའ་སྩལ་ནས། འཁོར་བཞི་པོ་དང ། ལྷ་དང ། ཀླུ་ལ་སོགས་པ་སྡེ་བརྒྱད་པོ། བཅོམ་ལྡན་འདས་ཀྱིས་བཀའ་སྩལ་ནས། ཐམས་ཅད་མངོན་པར་དགའ་སྟེ། བཅོམ་ལྡན་འདས་ལ་ཕྱག་བཙལ་ནས་ཕྱིར་དོང་ངོ ། །འཕགས་པ་བྱང་ཆུབ་སེམས་དཔའ་བྱམས་པ་དགའ་ལྡན་གནམ་དུ་སྐྱེ་བ་བླངས་པའི་མདོ་རྫོགས་སོ།། །།ཞུ་བའི་ལོ་ཙྪ་བ་བནྡེ་བ་བཏོང་དང ། བནྡེ་ཤེས་རབ་སེངྒེས་རྒྱའི་དཔེ་ལས་བསྒྱུར།། |