།།རྒྱ་གར་སྐད་དུ། ཨཱརྱ་མཻ་ཏྲཱི་ཡ་པྲ་སྠཱ་ན་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱམས་པ་འཇུག་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་ལྔ་སྟོང་ཐམ་པའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་ཁྲིའི་བྱང་ཆུབ་སེམས་དཔའི་ 434a ༄#། །དགེ་འདུན་ཆེན་པོ་ཐམས་ཅད་ཀྱང་མངོན་པར་ཤེས་པས་མངོན་པར་ཤེས་པ་ཡིན་ཞིང ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཕྱིར་མི་ལྡོག་པ་ཤ་སྟག་དང་ཐབས་གཅིག་ཏུ་བཞུགས་སོ། །དེའི་ཚེ་འཇམ་དཔལ་གཞོན་ནུར་གྱུར་པའང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། བྱང་ཆུབ་སེམས་དཔའ་སྤོབས་པ་བརྩེགས་པ་དང ། བྱང་ཆུབ་སེམས་དཔའ་རྣམ་པར་རྩེ་བ་དང ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་མཐུ་ཆེན་ཐོབ་དང ། བྱང་ཆུབ་སེམས་དཔའ་ཟླ་འོད་གཞོན་ནུར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའང་འཁོར་དེ་ཉིད་དུ་འདུས་པར་གྱུར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ 434b ཕྱོགས་འགའ་ཞིག་ཞུའོ། །དེ་ནས་བྱང་ཆུབ་སེམས་དཔའ་བྱམས་པས་ཞུས་ནས། དེའི་ཚེ་བཅོམ་ལྡན་འདས་ཅང་མི་གསུང་བར་དུས་ཡོལ་བར་མཛད་དོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ། འདི་ལྟར་བྱས་པ་དང ། ཞུས་ནས་ཞུ་བ་ལུང་བསྟན་པའི་ཕྱིར་ཁྱོད་ལ་དེ་བཞིན་གཤེགས་པས་སྐབས་འབྱེད་པར་མཛད་དོ། །གལ་ཏེ་དེ་བཞིན་གཤེགས་པ་ལ་སངས་རྒྱས་ཀྱི་ཐེག་པ་ལས་བརྩམས་ཏེ་ཞུ་བར་མི་བྱེད། རང་སངས་རྒྱས་ཀྱི་ཐེག་པ་ལས་བརྩམས་ཏེ་ཞུ་བར་མི་ཕྱེད། ཉན་ཐོས་ཀྱི་ཐེག་པ་ལས་བརྩམས་ཏེ་ཞུ་བར་མི་བྱེད། ཕུང་པོ་དང ། ཁམས་དང ། སྐྱེ་མཆེད་ཡོངས་སུ་ཤེས་པར་བྱ་བའི་ཕྱིར་ཞུ་བར་མི་བྱེད། འདོད་ཆགས་དང ། ཞེ་སྡང་དང ། གཏི་མུག་ཟད་པར་བྱ་བའི་ཕྱིར་ཞུ་བར་མི་བྱེད། ཕ་རོལ་ཏུ་ཕྱིན་པ་ལས་བརྩམས་ཏེ་ཞུ་བར་མི་བྱེད། ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་ཞུ་བར་མི་བྱེད་ན། དེ་ལྟར་ན་ཞུས་ནས་ཞུ་བ་ལུང་བསྟན་པའི་ཕྱིར་ཁྱོད་ལ་དེ་བཞིན་གཤེགས་པས་སྐབས་འབྱེད་པར་མཛད་དོ། །གལ་ཏེ་ཁྱོད་འདུ་བྱེད་རྣམས་ལས་ཡང་དག་པར་འདའ་བར་བྱ་བ་དང ། མྱ་ངན་ལས་འདས་པ་འཐོབ་པར་བྱ་བའི་ཕྱིར་ཞུ་བར་མི་བྱེད་དམ། གལ་ཏེ་ཁྱོད་བདེན་ 435a ༄#། །པ་ཁོང་དུ་ཆུད་པར་བྱ་བའི་ཕྱིར་ཞུ་བར་མི་བྱེད་དམ། ལམ་དང ། ལམ་བསྒོམ་པར་བྱ་བའི་ཕྱིར་ཞུ་བར་མི་བྱེད་དམ། གལ་ཏེ་ཁྱོད་འབྲས་བུ་ཐོབ་པར་བྱ་བ་དང ། མངོན་སུམ་དུ་བྱ་བའི་ཕྱིར་ཞུ་བར་མི་བྱེད་དམ། གལ་ཏེ་ཁྱོད་མི་གནས་པའི་ཕྱིར་དེ་བཞིན་གཤེགས་པ་ལ་ཞུ་བར་མི་བྱེད་དམ། ཡི་གེ་རྣམས་མི་བརྗོད་པར་ཞུ་བར་བྱེད་ན།་དེ་ལྟ་ན་ཞུས་ནས་ཞུ་བ་ལུང་བསྟན་པའི་ཕྱིར་ཁྱོད་ལ་དེ་བཞིན་གཤེགས་པས་སྐབས་འབྱེད་པར་མཛད་དེ། དེ་ཅིའི་ཕྱིར་ཞེ་ན། བྱམས་པ་ཇི་ཙམ་དུ་སྒྲོ་འདོགས་པ་དེ་ཙམ་དུ་ཆགས་པ་ཡོད་ལ་སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པ་ནི་ཆགས་པ་མེད་པའི་ཕྱིར་རོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། སྒྲོ་བཏགས་པ། སྒྲོ་བཏགས་པ་ཞེས་བྱ་བ། འཇམ་དཔལ། ཇི་ཙམ་གྱིས་ན་སྒྲོ་བཏགས་པར་འགྱུར། འཇམ་དཔལ་གྱིས་སྨྲས་པ། བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་སྟོང་པ་ཉིད་མཉམ་པ་ཉིད་ཀྱིས་མཉམ་པ་ཡིན། མཚན་མ་མེད་པ་མཉམ་པ་ཉིད་ཀྱིས་མཉམ་པ་ཡིན། སྨོན་པ་མེད་པ་མཉམ་པ་ཉིད་ཀྱིས་མཉམ་པ་ཡིན། ཇི་ལྟ་བ་བཞིན་མཉམ་པ་ཉིད་ཀྱིས་མཉམ་པ་ཡིན། དེ་བཞིན་ཉིད་མཉམ་པ་ཉིད་ཀྱིས་ 435b མཉམ་པ་ཡིན། ཆོས་ཀྱི་དབྱིངས་མཉམ་པ་ཉིད་ཀྱིས་མཉམ་པ་ཡིན། ཡང་དག་པའི་མཐའ་མཉམ་པ་ཉིད་ཀྱིས་མཉམ་པ་ཡིན། མི་སྐྱེ་མི་འགག་མི་གནས་པ་མཉམ་པ་ཉིད་ཀྱིས་མཉམ་པ་ཡིན། མ་སྐྱེས་མ་བྱུང་བ་མཉམ་པ་ཉིད་ཀྱིས་མཉམ་པ་ཡིན། ཆོས་ཐམས་ཅད་ནམ་མཁའ་དང་མཉམ་པ་ཉིད་ཀྱིས་མཉམ་པ་ཡིན་ན། བཙུན་པ་ཤཱ་རདྭ་ཏིའི་བུ། གང་དག་འདི་ལྟར་ཆོས་ཐམས་ཅད་མཉམ་པ་ཉིད་ལ་མི་མཉམ་པར་བརྟགས་ནས་མེད་བཞིན་དུ་སྒྲོ་འདོགས་པས་སྒྲོ་འདོགས་པར་བྱེད་དེ། འདི་ནི་སངས་རྒྱས་སོ། །འདི་ནི་ཆོས་སོ། །འདི་ནི་དགེ་འདུན་ནོ། །འདི་ནི་བདག་གོ། འདི་ནི་སེམས་ཅན་ནོ། །འདི་ནི་གང་ཟག་གོ། འདི་ནི་ཤེད་ལས་སྐྱེས་པའོ། །འདི་ནི་ཤེད་བུའོ། །འདི་ནི་བྱེད་པ་པོའོ། །འདི་ནི་ཚོར་བ་པོའོ། །འདི་ནི་ཆད་པའོ། ། འདི་ནི་རྟག་པའོ། །འདི་ནི་སོ་སོའི་སྐྱེ་བོའོ། །འདི་ནི་ཉན་ཐོས་སོ། །འདི་ནི་རང་སངས་རྒྱས་སོ། །འདི་ནི་བྱང་ཆུབ་སེམས་དཔའོ། །འདི་ནི་ཁ་ན་མ་ཐོ་བ་དང་བཅས་པའོ། །འདི་ནི་ཁ་ན་མ་ཐོ་བ་མེད་པའོ། །འདི་ནི་ཟག་པ་དང་བཅས་པའོ། །འདི་ནི་ཟག་པ་མེད་པའོ། །འདི་ནི་འདུས་བྱས་སོ། །འདི་ནི་འདུས་མ་བྱས་སོ། །འདི་ནི་ཀུན་ནས་ཉོན་མོངས་པའོ།། འདི་ནི་རྣམ་པར་བྱང་བའོ། །འདི་ནི་དགེ་བའོ། །འདི་ནི་མི་དགེ་བའོ། །འདི་ནི་འཇིག་རྟེན་པའོ། །འདི་ནི་འཇིག་རྟེན་ལས་འདས་པའོ། །འདི་ནི་འཁོར་བའོ། །འདི་ནི་ 436a ༄#། །མྱ་ངན་ལས་འདས་པའོ། །འདི་ནི་དངོས་པོའོ། །འདི་ནི་དངོས་པོ་མ་ཡིན་པའོ། །འདི་ནི་ཡོད་པའོ། །འདི་ནི་མེད་པའོ། །འདི་ནི་ཐོབ་པའོ། ། འདི་ནི་མངོན་པར་རྟོགས་པའོ། །འདི་ནི་མངོན་སུམ་དུ་བྱ་བའོ། །འདི་ནི་ལམ་མོ། །འདི་ནི་ལམ་གྱི་འབྲས་བུའོ་ཞེས་བྱ་བ་འདི་ནི་སྒྲོ་བཏགས་པ་ཞེས་བྱའོ། །དེ་ཅིའི་ཕྱིར་ཞེ་ན། བཙུན་པ་ཤཱ་རདྭ་ཏིའི་བུ། མཉམ་པ་ཉིད་ནི་རྣམ་པར་རྟོག་པ་མེད་ཅིང་གང་དག་འདི་ལྟར་རྣམ་པར་རྟོག་པ་དེ་དག་ནི་མཉམ་པ་ཉིད་དུ་སྒྲོ་འདོགས་པ་ཡིན་ཏེ། མི་མཉམ་པར་སྒྲོ་འདོགས་པ་ནི་མ་ཡིན་ལ། གང་དག་མཐོང་བ་མེད་པར་མཉམ་པ་ཉིད་མཐོང་བ་དེ་དག་ནི་མཉམ་པ་ཉིད་མཐོང་བ་ཡིན ། སྒྲོ་འདོགས་པ་ལ་སྤྱོད་པ་ནི་མི་མཉམ་པར་མཐོང་བ་ཡིན་ཞིང ། གང་དག་མཉམ་པ་ཉིད་ལ་སྒྲོ་མི་འདོགས་པ་དེ་དག་ནི་མཉམ་པ་ཉིད་དུ་མཐོང་པ་ཡིན་ལ། སྒྲོ་འདོགས་པ་ལ་སྤྱོད་པ་ནི་མཉམ་པ་ཉིད་མཐོང་བ་མ་ཡིན་པའི་ཕྱིར་རོ། །བསྟན་པ་འདི་བཤད་པ་ན་དགེ་སློང་ཉིས་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ཏེ། དགེ་སློང་དེ་དག་འདུལ་བ་ལ་དབང་མཛད་པའི་ཕྱིར་བཅོམ་ལྡན་འདས་ཅང་མི་གསུང་བར་དུས་ཡོལ་བར་མཛད་དོ། །དེ་ནས་བྱང་ཆུབ་སེམས་དཔའ་སེམས་ 436b དཔའ་ཆེན་པོ་བྱམས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཁོ་བོ་ནི་ཉན་ཐོས་ཀྱི་ཐེག་པ་ལས་བརྩམས་ཏེ་དེ་བཞིན་གཤེགས་པ་ལ་ཞུ་བར་མི་བྱེད་དོ། །རང་སངས་རྒྱས་ཀྱི་ཐེག་པ་ལས་བརྩམས། ཡང་དག་པར་རྫོགས་པའི་སངས་རྒྱས་ཀྱི་ཐེག་པ་ལས་བརྩམས་ཏེ་དེ་བཞིན་གཤེགས་པ་ལ་ཞུ་བར་མི་བྱེད་པ་ནས། ཁོ་བོ་ནི་མི་གནས་པའི་བར་དུ་དེ་བཞིན་གཤེགས་པ་ལ་ཞུ་བར་མི་བྱེད་དོ། །འཇམ་དཔལ། ཁོ་བོ་ནི་དེ་བཞིན་གཤེགས་པ་ལ་ཅི་ནས་དེ་བཞིན་ཉིད་དང་མི་འགལ་བ་དེ་ལྟར་ཞུ་བར་བྱེད་དོ། །འཇམ་དཔལ། ཁོ་བོ་ནི་གང་དག་དེ་བཞིན་ཉིད་དང་འགལ་བར་མི་བྱེད་པ་དང ། གང་དག་ཆོས་ཐམས་ཅད་དབེན་པ་ཉིད་ཀྱི་ཕྱིར་ཆོས་ཅིའང་མི་དམིགས་པ་དང ། གང་དག་ཆོས་ཀྱི་དབྱིངས་མི་གཡོ་བ་ཉིད་ཀྱི་ཕྱིར་འདོད་ཆགས་དང ། ཞེ་སྡང་དང ། གཏི་མུག་རྣམས་ཀྱིས་མི་གོས་པ་དང ། གང་དག་འཁོར་བ་མི་དམིགས་པ་ཉིད་ཀྱི་ཕྱིར་འཁོར་བ་ལས་འདའ་བར་མི་བྱེད་པ་དང ། གང་དག་གང་ནས་ཀྱང་འོང་བ་མེད་པ་ཉིད་དང ། གང་དུའང་འགྲོ་བ་མེད་པ་ཉིད་ཀྱི་ཕྱིར་མྱ་ངན་ལས་འདས་པ་ཐོབ་པར་མི་བྱེད་པ་དེ་དག་གི་ཕྱིར་དེ་བཞིན་གཤེགས་པ་ལ་ཞུ་བར་བྱེད་དོ། །འཇམ་དཔལ། ཁོ་པོ་ནི་ཅི་ནས་ཡི་གེ་རྣམས་ཀྱང་མི་བརྗོད། ཚིག་གི་ལམ་ལའང་མི་དཔྱོད་ལ། ཤེས་རབ་ཀྱིས་ཀྱང་བྱེ་བྲག་ཕྱེད་པར་འགྱུར་བ་ 437a ༄#། །དང ། ཤེས་པའང་གང་ཡང་མེད་ལ། འདི་ལ་རྣམ་པར་གྲོལ་བའང་གང་ཡང་མེད་པ་དེ་ལྟར་དེ་བཞིན་གཤེགས་པ་ལ་ཞུ་བར་བྱེད་དོ། །དེ་ཅིའི་ཕྱིར་ཞེ་ན། ཡི་གེ་སྟོང་པ་ཉིད་ཀྱི་ཕྱིར་དང ། ཐམས་ཅད་སྐྱེ་བ་མེད་པ་ཉིད་ཀྱི་ཕྱིར་རོ། །དེ་ནས་འཁོར་དེར་བྱང་ཆུབ་སེམས་དཔའ་གང་དག་འདུས་པར་གྱུར་པ་དེ་དག་འདི་སྙམ་དུ་སེམས་ཏེ། ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ནི་དེ་ཁོ་ན་ལྟར་ལྡེམ་པོ་ངག་སྣེལ་ཞིར་འདུག་པའི་ཚིག་འདི་དག་ཀྱང་སྟོན་ལ་བརྗོད་པ་ཐམས་ཅད་ཀྱང་ཆོས་ཉིད་དང་མཐུན་པར་སྦྱོར་བ་ལས་ན་ཟབ་མོའི་ཤེས་རབ་དང་ལྡན་ནོ་སྙམ་མོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་དེ་ཙམ་དུ་ཟབ་མོའི་བཟོད་པ་ལ་ངེས་ཤིང་ཤེས་རབ་དང ། སྤོབས་པ་སྟོན་པ་ལ་མཁས་པ་ནི་ངོ་མཚར་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཡུན་ཇི་སྲིད་ཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ། བཅོམ་ལྡན་འདས། སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། 437b ལྷ་དང ། མི་རྣམས་ཀྱི་དོན་དང ། སྨན་པའི་སླད་དུ་དེ་བཞིན་གཤེགས་པས་ལེགས་པར་བཀའ་སྩལ་དུ་གསོལ། དེ་ལྟར་བགྱིས་ན་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོ་རྣམས་ཀྱིས་གནས་དེ་དག་ཀྱང་ཐོས་ལ། འཇུག་པ་དེའང་ཐོས་ནས་སླར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩོན་པར་འགྱུར་ལགས་སོ། ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་ཡུན་རིང་པོ་ནས་ཚངས་པར་སྤྱད་པ་སྤྱོད་དོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་གྱི་རྒྱལ་བ་རྣམས་ལ་བྱ་བ་བྱས་སོ། །དགེ་བའི་རྩ་བ་བསྐྱེད་དོ། །ཟབ་མོའི་བཟོད་པ་དང་ལྡན་ནོ། །རིགས་ཀྱི་བུ ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཡང་དག་པར་ཞུགས་ཏེ། བསྐལ་པ་བརྒྱད་ཁྲི་བཞི་སྟོང་ལོན་ནས་དེའི་འོག་ཏུ་གདོང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཅོམ་ 438a ༄#། །ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གི་ཐ་དད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་མཚན་ཅི་ལགས་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཀའ་སྩལ་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས། དེ་ལྟར་འཚལ་ལོ་ཞེས་གསོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་དང ། ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །རྣམ་པར་རྩེ་བ། སྔོན་བྱུང་བ་འདས་པའི་དུས་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཡུན་རིང་ཞིང་ཚད་མེད། བསམ་གྱིས་མི་ཁྱབ། དཔག་ཏུ་མེད་པའི་སྔ་རོལ་དེའི་ཚེ་དེའི་དུས་ན་དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས་ 438b རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་བཟང་འོད་ཅེས་བྱ་བ་འཇིག་རྟེན་དུ་བྱུང་ངོ ། །རིགས་ཀྱི་བུ། དེ་བཞིན་གཤེགས་པ་གསེར་བཟང་འོད་ཀྱི་སྤུའི་ཁུང་བུ་རེ་རེ་ནས་འོད་ཟེར་བྱེ་བ་ཁྲག་ཁྲིག་འབུམ་ཕྲག་མང་པོ་བྱུང་སྟེ། དེ་བཞིན་གཤེགས་པའི་འོད་ཟེར་དེ་དག་ཀྱང་གསེར་གྱི་འོད་ལྟར་བཟང་ལ་འོད་ཟེར་རེ་རེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རེ་རེའི་འོད་ཀྱིས་སྣང་བར་བྱེད་དོ། །འོད་ཟེར་རེ་རེས་ཀྱང་པདྨ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཤར་ཕྱོགས་འགེངས་པར་བྱེད་དོ། །ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། ཕྱོགས་མཚམས་དང ། སྟེང་དང ། འོག་ཀྱང་དེ་དང་འདྲའོ། །ཕྱོགས་རེ་རེར་ཡང་དེ་བཞིན་གཤེགས་པ་རེ་རེ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དུ་མ་འགེངས་པར་མཛད་དོ། །དེ་བཞིན་གཤེགས་པའི་སྐུ་རེ་རེས་ཀྱང་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་སངས་རྒྱས་དང ། ཆོས་རྣམས་ལ་འདུལ་བར་མཛད་དེ། ཕྱིར་མི་ལྡོག་པ་ལ་འགོད་དོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེའི་གསེར་གྱི་འོད་ 439a ༄#། །ཀྱིས་འཇིག་རྟེན་གྱི་ཁམས་རྟག་ཏུ་སྣང་བར་བྱེད་དོ། །སངས་རྒྱས་ཀྱི་ཞིང་དེ་ན་ཉི་མ་དང ། ཟླ་བ་གཉིས་ཀྱི་མིང་མེད་དོ། །རྒྱུ་སྐར་དང ། གཟའ་དང ། སྐར་མ་དང ། མེའི་འོད་ཀྱི་མིང་ཡང་མི་གྲག་གོ་།དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་བརྩེ་བས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་ལྟར་ན་སངས་རྒྱས་ཀྱི་ཞིང་དེ་ན་ཇི་ལྟར་གདུགས་མཚན་རྣམ་པར་བཞག་པར་འགྱུར་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་ཀྱི་སངས་རྒྱས་ཀྱི་ཞིང་དེ་ནས་ས་གཞི་ཆེན་པོ་དེ་རིན་པོ་ཆེ་སྣ་བདུན་ལས་གྲུབ་པ་ཡིན་ཏེ། ལག་མཐིལ་ལྟར་མཉམ་པར་གྱུར་ལ་རིན་པོ་ཆེ་སྣ་བདུན་གྱི་ས་གཞི་ཆེན་པོ་དེ་ལས་ཀྱང་རིན་པོ་ཆེ་སྣ་བདུན་གྱི་པདྨ་ཤིང་རྟའི་ཕང་ལོ་ཙམ་ལ་མཛེས་ཤིང་བལྟ་ན་སྡུག་པ་དང ། དྲི་ཞིམ་པོའི་ངད་ལྡང་ལ་ཡིད་དུ་འོང་བ་དག་མངོན་པར་འཕགས་ཏེ། པདྨ་རེ་རེ་ལས་དྲི་བསུང་གི་ངད་ལྡང་བའི་དྲི་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་ 439b རྟེན་གྱི་ཁམས་ཁྱབ་སྟེ། སེམས་ཅན་གང་དག་གིས་དྲི་དེ་ཚོར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་སོ། །པདྨ་དེ་དག་ཀྱང་སྔ་དྲོའི་དུས་ཀྱི་ཚེ་ནི་མེ་ཏོག་རྒྱས་ལ། ཕྱེ་མ་རེད་ཀྱི་དུས་ཀྱི་ཚེ་ན་རྙིས་པར་གྱུར་ཏེ། དེས་ན་སེམས་ཅན་དེ་དག་འདི་སྙམ་དུ་སེམས་ཏེ། ཕྱེ་མ་རེད་ཀྱི་དུས་ལ་བབ་བོ་སྙམ་མོ། །རིགས་ཀྱི་བུ་དེ་ལྟར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེའི་སངས་རྒྱས་ཀྱི་ཞིང་དེ་ན་ཉིན་མཚན་རྣམ་པར་བཞག་པར་མངོན་པ་ཡོད་དོ། །རིགས་ཀྱི་བུ། སངས་རྒྱས་ཀྱི་ཞིང་དེ་ན་མི་ཁོམ་པ་བརྒྱད་ནི་ཐ་ན་མིང་ཙམ་ཡང་མེད་དོ། །སྡུག་བསྔལ་བའི་མིང་ཙམ་དང ། ཉན་ཐོས་དང ། རང་སངས་རྒྱས་རྣམས་ཀྱང་མིང་ཙམ་ཡང་མེད་དོ། །སངས་རྒྱས་ཀྱི་ཞིང་དེ་ནི་བྱང་ཆུབ་སེམས་དཔའ་འཁྲིག་པའི་ཆོས་དང་བྲལ་བ། དྲི་ང་བ་མེད་པ་འབའ་ཞིག་གིས་ཡོངས་སུ་གང་བར་གྱུར་ཏོ། །འདུས་པ་རེ་རེ་ལའང་བྱང་ཆུབ་སེམས་དཔའ་ཁྲག་ཁྲིག་ཕྲག་བཅུ་གཉིས་ཡོད་དེ། དེའི་མཇུག་ཏུ་བཅོམ་ལྡན་འདས་དེའི་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པར་འདུས་པར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེའང་ཆོས་གཞན་མི་སྟོན་ཏེ། 440a ༄#། །བྱང་ཆུབ་སེམས་དཔའི་སྡེ་སྣོད་ཕྱིར་མི་ལྡོག་པའི་འཁོར་ལོ་འབའ་ཞིག་སྟོན་པར་མཛད་དོ། །བྱང་ཆུབ་སེམས་དཔའི་སྡེ་སྣོད་ཕྱིར་མི་ལྡོག་པའི་འཁོར་ལོའི་ཆོས་ཀྱི་རྣམ་གྲངས་གང་ཞེ་ན། འདི་ལྟ་སྟེ། ཆོས་གང་ཡང་དེ་བཞིན་ཉིད་ལས་ཕྱིར་མི་ལྡོག་པ་དང ། ཆོས་གང་ཡང་ཆོས་ཀྱི་དབྱིངས་ལས་ཕྱིར་མི་ལྡོག་པ་དང ། ཆོས་གང་ཡང་ཡང་དག་པའི་མཐའ་ལས་ཕྱིར་མི་ལྡོག་པ་དང ། འདོད་ཆགས་འདོད་ཆགས་ཀྱི་ངོ་བོ་ཉིད་ལས་ཕྱིར་མི་ལྡོག་པ་དང ། ཞེ་སྡང་ཞེ་སྡང་གི་ངོ་བོ་ཉིད་ལས་ཕྱིར་མི་ལྡོག་པ་དང ། གཏི་མུག་གཏི་མུག་གི་ངོ་བོ་ཉིད་ལས་ཕྱིར་མི་ལྡོག་པ་དང ། གཟུགས་གཟུགས་ཀྱི་ངོ་བོ་ཉིད་ལས་ཕྱིར་མི་ལྡོག་པ་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་རྣམ་པར་ཤེས་པའི་ངོ་བོ་ཉིད་ལས་ཕྱིར་མི་ལྡོག་པ་དང ། མིག་མིག་གི་ངོ་བོ་ཉིད་ལས་ཕྱིར་མི་ལྡོག་པ་དང།་རྣ་བ་དང ། སྣ་དང ། ལྕེ་དང ། ལུས་དང ། ཡིད་ཡིད་ཀྱི་ངོ་བོ་ཉིད་ལས་ཕྱིར་མི་ལྡོག་པ་དང ། ངོ་བོ་ཉིད་གང་ཡིན་པ་དེ་ནི་དངོས་པོ་མེད་ལ། དངོས་པོ་མེད་པ་གང་ཡིན་པ་དེ་ནི་གང་ནས་ཀྱང་ཕྱིར་མི་ལྡོག་པ། གང་དུའང་མི་འཇུག་པའོ། །རིགས་ཀྱི་བུ། དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ 440b པའི་སངས་རྒྱས་གསེར་བཟང་འོད་དེའི་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་དེ་དག་ལ་བྱང་ཆུབ་སེམས་དཔའི་སྡེ་སྣོད་ཕྱིར་མི་ལྡོག་པའི་འཁོར་ལོའི་ཆོས་ཀྱི་རྣམ་གྲངས་ཡང་དག་པར་སྟོན་ཏོ། །དེའི་ཚེ་ཆོས་ཀྱི་རྒྱལ་པོ་ཆོས་དང་ལྡན་པ་གླིང་བཞི་པའི་དབང་ཕྱུག་འཁོར་ལོས་བསྒྱུར་བའི་རྒྱལ་པོ་གསེར་མདོག་བྱ་བ་ཞིག་བྱུང་ངོ ། །རིགས་ཀྱི་བུ། རྒྱལ་པོ་གསེར་མདོག་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེ་བྱང་ཆུབ་སེམས་དཔའི་དགེ་འདུན་ཆེན་པོ་དང་བཅས་པ་ལ་ལོ་བྱེ་བ་ཕྲག་བརྒྱད་ཅུ་རྩ་བཞིའི་བར་དུ་མཆོད་པ་དང ། བསྙེན་བཀུར་ཐམས་ཅད་ཀྱིས་བསྙེན་བཀུར་བྱས། བླ་མར་བྱས། རི་མོར་བྱས། མཆོད་པ་བྱས་སོ། །རིགས་ཀྱི་བུ། འདི་ལྟར་རྒྱལ་པོ་ཆེན་པོ་བཞི་དག་ལྷའི་དབང་པོ་བརྒྱ་བྱིན་དང ། མི་མེད་ཀྱི་བདག་པོ་ཚངས་པ་འཁོར་དང་བཅས་པས་ཀྱང་རྒྱལ་པོ་གསེར་མདོག་གི་བསམ་པ་རིག་གནས། བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་དེ་ལ་བསྙེན་བཀུར་བྱ་བར་སྤྲོ་བར་གྱུར་ཏོ། །རིགས་ཀྱི་བུ། རྒྱལ་པོ་གསེར་མདོག་གི་འཁོར་གྱི་ཁམས་དཔག་ཚད་བརྒྱད་བཅུ་རྩ་བཞི་པོ་ཞིག་བྱས་ཏེ། འཁོར་གྱི་ཁྱམས་དེར་དར་གྱི་ལྡ་ལྡི་ནི་བྲེས། མེ་ཏོག་གིས་ནི་བུས་མོ་ནུབ་པ་ཙམ་དུ་ཁྱབ་པར་བྱས། སྟེང་ 441a ༄#། །གི་བར་སྣང་ལ་ནི་མུ་ཏིག་དམར་པོའི་དྲ་བ་བྲེས། སྙིང་པོའི་སྤོས་ཀྱི་མཆོག་གིས་ནི་བདུགས་ཏེ། འཁོར་གྱི་ཁྱམས་དེར་དེ་བཞིན་གཤེགས་པ་དེའི་གདན་བྱེ་བ་འབུམ་ཕྲག་དགུ་བཅུ་རྩ་དགུ་རི་བའི་རས་བཅོས་བུ་བྱེ་བ་ཁྲག་ཁྲིག་འབུམ་ཕྲག་དུ་མ་བཏིང་བ་ཁྲིའི་རྐང་པ་རིན་པོ་ཆེ་དུ་མས་སྤྲས་པ་ཞིག་བཤམས་སོ། །བྱང་ཆུབ་སེམས་དཔའ་རེ་རེའི་སྟན་ཡང་བྱེ་བ་ཕྲག་འབུམ་རི་བ་དག་བཤམས་སོ། །དེའི་ཚེ་དེ་བཞིན་གཤེགས་པ་དེ་དཔག་ཚད་ཉིས་སྟོང་ན་བཞུགས་ཏེ། རིགས་ཀྱི་བུ། འདི་ལྟར་རྒྱལ་པོ་གསེར་མདོག་གིས་གཤེགས་ཤུལ་དཔག་ཚད་ཉིས་སྟོང་ལེགས་པར་བརྒྱན་ནས། འདི་ལྟ་སྟེ། ལམ་དེའི་ངོས་གཡས་གཡོན་དུ་སྟེགས་བུ་རིན་པོ་ཆེ་སྣ་ཚོགས་ཀྱིས་སྤྲས་པ་དག་བྱས་སོ། །ལམ་དེའང་པུས་མོ་ནུབ་པ་ཙམ་དུ་མེ་ཏོག་གིས་ཁེབས་པར་བྱས་སོ། །སྟེང་གི་བར་སྣང་ལ་ནི་རིན་པོ་ཆེ་སྣ་ཚོགས་ཀྱི་དྲ་བའི་བླ་བྲེ་བྲེས་སོ། །སྟེགས་བུ་དེ་དག་ལའང་རིན་པོ་ཆེའི་ཤིང་ལྗོན་པ་འཕང་དུ་མདའ་རྒྱང་གང་ཙམ་ཡོད་པ་དག་བཙུགས་སོ། །རིན་པོ་ཆེའི་ཤིང་ལྗོན་པ་གཅིག་ནས་རིན་པོ་ཆེའི་ཤིང་ལྗོན་པ་གཅིག་ཏུ་རིན་པོ་ཆེའི་ཐག་གུ་བྲེས་སོ། །རིན་པོ་ཆེའི་ཤིང་ལྗོན་པ་གཉིས་གཉིས་ཀྱི་བར་དུ་རྫིང་རིན་པོ་ཆེའི་སྟེགས་བུས་བསྐོར་བ་གསེར་གྱི་བྱེ་ 441b མ་བརྡལ་བ། བཻ་ཌཱུརྱའི་ཐེ་མ་སྐས་ཀྱི་རིམ་པ་དང་བཅས་པ། མེ་ཏོག་ཨུཏྤལ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོས་གང་བ། དུར་པ་སྐད་འབྱིན་པ་དང ། ལྡན་པ་དག་བྱས་སོ། །དེ་བཞིན་དུ་རིན་པོ་ཆེའི་ཤིང་ལྗོན་པའི་བར་ཐམས་ཅད་དུའང་རྫིང་དག་བྱས་ཏེ་བཀོད་པ་དེ་ཁོ་ན་དང་འདྲི་བར་བཀོད་དོ། །རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་དུ་མེ་ཏོག་སིལ་མ་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ། །རིན་པོ་ཆེའི་སྤོས་ཀྱི་སྣོད་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ། །རྔ་བོ་ཆེ་དང ། རྫ་རྔ་དང ། མཁར་རྔ་དང ། ཀིམ་པ་ལ་དང ། པི་ཝང་དང ། ཁར་དཀྲོལ་ལ་སོགས་པ་རོལ་མོའི་ཆ་བྱད་རྣམ་པ་སྣ་ཚོགས་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ། །གདུགས་དང ། རྒྱལ་མཚན་དང ། བ་དན་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ། །དེ་ལྟར་རིན་པོ་ཆེའི་ཤིང་ལྗོན་པ་རེ་རེའི་དྲུང་ཐམས་ཅད་དུ་མི་བརྒྱ་ཕྲག་དེ་སྙེད་དེ་སྙེད་བཀོད་ནས། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་ཕན་ཚུན་དུ་གཤེགས་པ་དེའི་ཚེ་ཁྱོད་ཀྱིས་མེ་ཏོག་སིལ་མ་འདི་དག་གིས་གཏོར་ཅིག་།ཙནྡན་གྱི་ཕྱེ་མ་འདི་དག་གིས་གཏོར་ཅིག་།པོག་ཕོར་འདི་དག་གིས་བདུགས་པར་གྱིས་ཤིག་།སིལ་སྙན་འདི་དག་ཀྱང་དཀྲོལ་ཅིག་།གདུགས་དང ། རྒྱལ་མཚན་དང ། བ་དན་འདི་ 442a ༄#། །དག་ཀྱང་སྒྲེངས་ཤིག་ཅེས་བསྒོའོ། །རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་དུ་རིན་པོ་ཆེའི་མེ་ཏོག་གི་སྣོད་ཐོགས་པའི་མི་ལྔ་བརྒྱ་ལྔ་བརྒྱའང་བཀོད་དོ། །ལྷག་མ་རྣམས་ཀྱང་དེ་བཞིན་དུ་སྦྱར་ཏེ། གང་གི་ཚེ་དེ་བཞིན་གཤེགས་པ་དེ་ལམ་འདི་ནས་ཕན་ཚུན་དུ་གཤེགས་པ་དེའི་ཚེ་ཁྱོད་ཀྱིས་རིན་པོ་ཆེའི་མེ་ཏོག་འདི་དག་གིས་གཏོར་ཅིག་ཅེས་བསྒོའོ། །རིགས་ཀྱི་བུ། འདི་ལྟར་བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་དེ་གཙུག་ལག་ཁང་དེ་ནས་བྱུང་མ་ཐག་ཏུ་འཁོར་གྱི་ཁྱམས་སུ་གཤེགས་ཏེ་དེའི་བར་དུ་གཙུག་ལག་ཁང་ནས་བྱང་ཆུབ་སེམས་དཔའ་རྣམས་ལ་སྣང་བ་བྱུང་ངོ ། །རིགས་ཀྱི་བུ། འདི་ལྟར་ལམ་དཔག་ཚད་ཉིས་སྟོང་པོ་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོས་གང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རེ་རེ་ཕན་ཚུན་དུ་འདོམ་རེ་རེ་ཙམ་ན་འགྲེང་ངོ། །རིགས་ཀྱི་བུ། འདི་ལྟར་དེ་བཞིན་གཤེགས་པ་དེ་ཕན་ཚུན་དུ་གཤེགས་པ་ན། འདི་ལྟ་སྟེ། སངས་རྒྱས་ཀྱི་མཐུས་བྱང་ཆུབ་སེམས་དཔའ་རེ་རེའི་མགོ་བོའི་དྲང་ཐད་ཀྱི་སྟེང་ན་དངུལ་གྱི་གདུགས་དཀར་པོ་གསེར་གྱི་ཡུ་བ་ཅན། མུ་ཏིག་དམར་པོའི་དྲ་བས་གཡོགས་པ། གསེར་གྱི་དྲིལ་བུ་གཡར་ཀའི་དྲ་བས་བསྐོར་བ། མ་བཟུང་བར་ 442b ནམ་མཁའ་ལ་ཕན་ཚུན་དུ་འགྲོའོ། །བྱང་ཆུབ་སེམས་དཔའ་ཐམས་ཅད་ཀྱང་དེ་དང་འདྲའོ། །རིན་པོ་ཆེའི་གདུགས་དེ་དག་ལ་དྲིལ་བུ་གཡེར་ཀའི་དྲ་བ་བཏགས་པ་གང་ཡིན་པ་དེ་དག་རླུང་གི་བསྐྱོད་པ་ལས་སྒྲ་སྙན་ཅིང་ཡིད་དུ་འོང་བ་འབྱུང་སྟེ། རིན་པོ་ཆེའི་གདུགས་དེ་དག་རླུང་གིས་བསྐྱོད་པ་ལས་སྒྲ་ཇི་ལྟ་བུ་འབྱུང་བ་དེ་འདྲ་བ་ནི་སིལ་སྙན་ཡན་ལག་འབུམ་དང་ལྡན་པ་ལས་ཀྱང་མི་འབྱུང་ངོ ། །རིན་པོ་ཆེའི་གདུགས་དང ། དྲིལ་བུ་གཡེར་ཀ་དེ་དག་དང ། རིན་པོ་ཆེའི་ཤིང་ལྗོན་པའི་ལོ་མ་དེ་དག་དང ། རིན་པོ་ཆེའི་ཐག་གུ་དེ་དག་དང ། རིན་པོ་ཆེའི་སྟེགས་བུ་དེ་དག་དང ། སིལ་སྙན་དང ། གླུ་དབྱངས་དེ་དག་ལས་ཀྱང་སངས་རྒྱས་ཀྱི་མཐུས་ཆོས་ཀྱི་སྒོ་རྣམ་པ་སྣ་ཚོགས་ཀྱི་སྒྲ་འབྱུང་སྟེ། དེ་ན་སེམས་ཅན་གང་དག་སྦྱིན་པ་ལ་མོས་པ་དེ་དག་གིས་ནི་སྦྱིན་པའི་སྒྲ་ཐོས་སོ། །གང་དག་ཚུལ་ཁྲིམས་ལ་མོས་པ་དེ་དག་གིས་ནི་ཚུལ་ཁྲིམས་ཀྱི་སྒྲ་ཐོས་སོ། །དེ་བཞིན་དུ་གང་དག་བཟོད་པ་དང ། བརྩོན་འགྲུས་དང ། བསམ་གཏན་ལ་མོས་པ་དང ། གང་དག་ཤེས་རབ་ལ་མོས་པ་དེ་དག་གིས་ནི་ཤེས་རབ་ཀྱི་སྒྲ་ཐོས་སོ། །དེ་བཞིན་དུ་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང ། སྐྱེ་བ་མེད་པ་དང ། འགག་པ་མེད་པའི་སྒ་དང ། དེ་བཞིན་དུ་དབང་པོ་དང ། སྟོབས་དང ། བྱང་ 443a ༄#། །ཆུབ་ཀྱི་ཡན་ལག་དང ། ལམ་གྱི་སྒྲ་དང ། དེ་བཞིན་དུ་མངོན་པར་ཤེས་པ་དང ། སྟོབས་དང ། མི་འཇིགས་པ་དང ། སོ་སོ་ཡང་དག་པར་རིག་པ་དང ། སངས་རྒྱས་ཀྱི་ཆོས་མ་འདྲེས་པ་དེ་དག་གི་སྒྲ་འབྱུང་སྟེ། སེམས་ཅན་རྣམས་ཇི་ལྟ་བུར་མོས་པ་དེ་ལྟ་བུའི་སྒྲ་འབྱུང་ཞིང་ཐོས་སོ། །ཆོས་ཀྱི་སྒྲ་དེ་ཐོས་ནས་ཀྱང་སེམས་ཅན་དཔག་ཏུ་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེ་ལམ་དེ་ནས་ཕན་ཚུན་དུ་གཤེགས་པ་ན། དབུའི་དྲང་ཐད་ཀྱི་སྟེང་གི་བར་སྣང་ལ་རིན་པོ་ཆེ་འབུམ་ཕྲག་དུ་མས་སྤྲས་པའི་ལྷའི་རིན་པོ་ཆེའི་གདུགས་མ་བཟུང་བར་འཕགས་ཏེ་ཕན་ཚུན་དུ་འགྲོའོ། །རིན་པོ་ཆེའི་གདུགས་དེ་དང ། དྲིལ་བུ་གཡེར་ཀ་དེ་དག་རླུང་གིས་བསྐྱོད་པ་ལས་ཀྱང་སྒྲ་སྙན་ཅིང་ཡིད་དུ་འོང་བ་འབྱུང་སྟེ། དེ་བཞིན་གཤེགས་པའི་ཕྱག་རྒྱ་ཞེས་བྱ་བའི་ཆོས་བསྟན་པ་བྱུང་ངོ ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་གསེར་བཟང་འོད་དེའི་རིན་ 443b པོ་ཆེའི་གདུགས་དེ་ལས་བྱུང་བ་དེ་བཞིན་གཤེགས་པའི་ཕྱག་རྒྱ་ཞེས་བགྱི་བའི་ཆོས་བསྟན་པ་གང་ལགས་པ་དེ། བཅོམ་ལྡན་འདས། དེ་བཞིན་གཤེགས་པས་ལེགས་པར་བཀའ་སྩལ་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། དེ་བཞིན་གཤེགས་པའི་ཕྱག་རྒྱའི་བརྩམས་པ་ཙམ་ངས་བཤད་པར་བྱའོ།། རིགས་ཀྱི་བུ། ཆོས་ཐམས་ཅད་ནི་སྟོང་པ་ཉིད་ཀྱི་ཕྱག་རྒྱ་དང ། མཚན་མ་མེད་པའི་ཕྱག་རྒྱ་དང ། སྨོན་པ་མེད་པའི་ཕྱག་རྒྱ་དང ། སྐྱེ་བ་མེད་པ་དང ། འགག་པ་མེད་པ་དང།་གནས་པ་མེད་པའི་ཕྱག་རྒྱ་དང ། དངོས་པོ་མེད་པའི་ཕྱག་རྒྱ་དང ། ཆོས་ཀྱི་དབྱིངས་ཀྱི་ཕྱག་རྒྱ་དང ། དེ་བཞིན་ཉིད་ཀྱི་ཕྱག་རྒྱ་དང ། ཡང་དག་པའི་མཐའི་ཕྱག་རྒྱ་དང ། ཇི་ལྟ་བ་བཞིན་གྱི་ཕྱག་རྒྱ་དང ། འདོད་ཆགས་དང་བྲལ་བའི་ཕྱག་རྒྱ་དང ། དབེན་པའི་ཕྱག་རྒྱ་དང ། རྣམ་པར་གྲོལ་བའི་ཕྱག་རྒྱ་དང ། མཚན་ཉིད་མེད་པའི་ཕྱག་རྒྱ་དང ། བྱེད་པ་མེད་པ་དང ། འགྲོ་བ་མེད་པའི་ཕྱག་རྒྱ་དང ། གཟུང་དུ་མེད་པ་དང ། གནས་མེད་པའི་ཕྱག་རྒྱས་བཏབ་པའོ། །རིགས་ཀྱི་བུ། ཆོས་ཐམས་ཅད་ནི་ནམ་མཁའི་ 444a ༄#། །ཕྱག་རྒྱས་བཏབ་པའོ། །རིགས་ཀྱི་བུ། དཔེར་ན། ནམ་མཁའ་ལ་ནི་ཕྱག་རྒྱ་བརྐོ་བར་སླ་བའང་མ་ཡིན་ལ་ཕྱག་རྒྱར་ཡང་འདུག་པ་དང ། ཕྱག་རྒྱའི་འབུར་ཡང་གདབ་ཏུ་མེད་དོ། །དེ་ཅིའི་ཕྱིར་ཞེ་ན། གནས་ཀྱང་མེད། རྐྱེན་ཀྱང་མེད། རྒྱུའང་མེད། བསྐྱེད་པའང་མེད། རྟེན་ཡང་མེད་པའི་ཕྱིར་རོ། །རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ནམ་མཁའ་དང་འདྲ་བ་དང ། ནམ་མཁའི་རྣམ་པ་ཅན་དང ། ནམ་མཁའི་ངོ་བོ་ཉིད་དང ། ནམ་མཁའི་སྟོན་པར་ཡང་དག་པར་ཤེས་པ་དང ། ནམ་མཁའ་ལ་ནི་ཆོས་ཐམས་ཅད་གདགས་སུ་མེད་པར་གནས་ཏེ་གདགས་པ་ཙམ་དུ་ཟད་དོ། །ཇི་ལྟར་ནམ་མཁའི་ཆོས་ཐམས་ཅད་གདགས་སུ་མེད་པར་གནས་ཏེ་གདགས་པ་ཙམ་དུ་ཟད་པ་དེ་བཞིན་དུ་ཆོས་ཐམས་ཅད་ལའང་གདགས་སུ་མེད་པར་གནས་ཏེ། གདགས་པ་ཙམ་དུ་ཟད་པར་ཡང་དག་པར་ཤེས་པ་དང ། གང་ཆོས་རྣམས་གདགས་པ་ཙམ་དུ་ཤེས་པ་དེ་ནི་དེ་བཞིན་ཉིད་དང་འགལ་པར་མི་བྱེད་པའོ། །གང་དེ་བཞིན་ཉིད་དང་འགལ་བར་མི་བྱེད་པ་དེ་ནི་དེ་བཞིན་གཤེགས་པའི་ཕྱག་རྒྱ་ཞེས་པའོ། །འདི་ནི་དེ་བཞིན་གཤེགས་པའི་ཕྱག་རྒྱ་སྟེ། དེས་ན་དེ་བཞིན་ཉིད་ལ་རྨོངས་པར་མི་འགྱུར་རོ། །བསྟན་པ་འདི་བཤད་ 444b པ་ན་བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་བརྩེ་བ་ལ་བཀའ་སྩལ་པ། རིགས་ཀྱི་བུ། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེ་བྱང་ཆུབ་སེམས་དཔའི་དགེ་འདུན་དང་བཅས་པར་འཁོར་གྱི་ཁྱམས་དེར་གཤེགས་ཏེ། དེར་བྱོན་པ་ན་ལྷ་འབུམ་དག་མཆོད་པའི་ལས་བྱ་བ་ལ་སྤྲོ་བར་གྱུར་ཏོ། །མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོ་རྣམས་འཐོར་བར་བྱེད་དོ། །ལྷའི་མེ་ཏོག་མནད་ར་བའི་ཆར་ཡང་འབེབས་སོ། །སིལ་སྙན་བྱེ་བ་ཕྲག་འབུམ་དག་ཀྱང་དཀྲོལ་བར་བྱེད་དོ། །རིགས་ཀྱི་བུ།་འདི་ལྟར་དེ་བཞིན་གཤེགས་པ་གསེར་བཟང་འོད་དེ་འཁོར་གྱི་ཁྱམས་དེར་བཞུགས་པ་ན་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་མཆོད་པའི་ལས་བྱ་བ་དང ། བསྙེན་བཀུར་བྱ་བ་དང ། བླ་མར་བྱ་བའི་ཕྱིར་ཉེ་བར་གནས་པར་གྱུར་ཏོ། །མཆོད་པ་ཇི་ལྟ་བུ་དག་གི་ཕྱིར་སྤྲོ་བར་གྱུར་ཅེ་ན། འདི་ལྟ་སྟེ།་དེ་བཞིན་གཤེགས་པ་དེ་བྱང་ཆུབ་སེམས་དཔའི་དགེ་འདུན་དང་བཅས་པར་བཞུགས་པ་ལ། བྱང་ཆུབ་སེམས་དཔའ་རེ་རེའི་རྒྱབ་ན་གླང་པོ་ཆེ་དཀར་པོ་རྒྱན་ 445a ༄#། །ཐམས་ཅད་ཀྱིས་བརྒྱན་པ་ཉེ་བར་གནས་ལ། གླང་པོ་ཆེའི་རྒྱལ་པོ་དེའི་སྣ་ལའང་འདི་ལྟ་སྟེ། རླུང་དང ། ཉི་མ་བསྐྱབ་པའི་ཕྱིར་རིན་པོ་ཆེའི་གདུགས་གསལ་ཞིང་བལྟ་ན་སྡུག་པ་ཐོགས་པ་དང ། གླང་པོ་ཆེའི་རྒྱལ་པོ་ཐམས་ཅད་ཀྱི་སྣ་ལའང་མུ་ཏིག་སྔོན་པོ་གསལ་བའི་མུ་ཏིག་གི་དོ་ཤལ་འཕྱང་བ་དང ། མུ་ཏིག་གི་དོ་ཤལ་དེ་ལས་ཀྱང་ཆུ་བསིལ་ཞིང་བཻ་ཌཱུརྱ་སྔོན་པོ་འདྲ་ལ་ཡན་ལག་བརྒྱད་དང་ལྡན་པ་འབབ་སྟེ། ཆུ་དེས་ཆུའི་བྱ་བ་བྱེད་པའོ། །བྱང་ཆུབ་སེམས་དཔའ་དག་འཁོད་མ་ཐག་ཏུ། འདི་ལྟ་སྟེ། ལྷའི་མཐུས་ལག་པ་གཡས་པ་ལ་རིན་པོ་ཆེའི་ལྷུང་བཟེད་བྱུང་བར་གྱུར་ཏོ། །ལྷ་རྣམས་ཀྱང་བྱང་ཆུབ་སེམས་དཔའ་དེ་དག་གི་ལྷུང་བཟེད་འཛིན་པར་བྱེད་དོ། །དེ་བཞིན་གཤེགས་པ་གསེར་བཟང་འོད་དེ་ལ་ནི་ཚངས་པ་ཉིད་རིན་པོ་ཆེའི་གདུགས་ཐོགས་ཏེ་སྣམ་ལོགས་ན་འདུག་གོ་།རིན་པོ་ཆེའི་གདུགས་དེ་ལས་ཀྱང་མུ་ཏིག་གི་དོ་ཤལ་དག་འཕྱང་ངོ ། །མུ་ཏིག་གི་དོ་ཤལ་དེ་དག་ལས་ཀྱང་ཆུ་བསིལ་ཞིང་བཻ་ཌཱུརྱ་སྔོན་པོ་འདྲ་ལ་ཡན་ལག་བརྒྱད་དང་ལྡན་པ་འབབ་སྟེ། ཆུ་དེས་དེ་བཞིན་གཤེགས་པ་དེའི་ཆུའི་བྱ་བ་མཛད་དོ། །ལྷའི་དབང་པོ་བརྒྱ་བྱིན་ནི་བཅོམ་ལྡན་འདས་དེའི་ལྷུང་བཟེད་འཛིན་ཏོ། །རིགས་ཀྱི་བུ། འདི་ལྟར་དེ་བཞིན་གཤེགས་པ་དེ་ 445b བྱང་ཆུབ་སེམས་དཔའི་འཁོར་དང་བཅས་པར་བཞུགས་མ་ཐག་ཏུ་བྱང་ཆུབ་སེམས་དཔའ་དེ་དག་ལ་ལྷ་མོ་རེ་རེའི་མདུན་ན་འདུག་སྟེ། ལྷའི་སྤོས་དྲི་ཞིམ་པོ་སྣ་དུ་མ་མཆིག་ལ་འཐག་པར་བྱེད་དོ། །སྤོས་དེ་འཐག་པ་ནའང་རྫི་ཕྱོགས་དང ། རྫི་ཕྱོགས་མ་ཡིན་པར་སེར་བུ་ལྡང་སྟེ། སེར་བུ་དེས་བྱང་ཆུབ་སེམས་དཔའ་དེ་དག་གི་ལུས་ལ་སྤོས་ཀྱིས་ཕོག་པར་བྱེད་དོ། །སྐྱེས་བུ་དམ་པ་དེ་དག་ནི་དྲིང་བ་མེད་པ་སྟེ། དེ་དག་ནི་ལྷ་མོའི་འདུ་ཤེས་ཀྱང་འཇུག་པར་མི་བྱེད་ལ་དེ་དག་ནི་སྤོས་ཀྱི་མཚན་མའང་མི་སྐྱེད་ན་ཆགས་པར་ལྟ་ག་ལ་འགྱུར་ཏེ་དེ་ནི་གནས་མེད་དོ། །རིགས་ཀྱི་བུ། འདི་ལྟར་རྒྱལ་པོ་གསེར་མདོག་དེས་དེ་བཞིན་གཤེགས་པ་གསེར་བཟང་འོད་བཞུགས་པར་རིག་ནས་བུ་སྟོང་དང ། བུད་མེད་བརྒྱད་ཁྲི་བཞི་སྟོང་དང ། རྒྱལ་པོ་བརྒྱད་ཁྲི་བཞི་སྟོང་དང ། ཁྱིམ་བདག་བརྒྱད་ཁྲི་བཞི་སྟོང་དང ། ཚོང་དཔོན་བརྒྱད་ཁྲི་བཞི་སྟོང་དང ། བློན་པོ་བརྒྱད་ཁྲི་བཞི་སྟོང་དང ། བུ་མོ་བརྒྱད་ཁྲི་བཞི་སྟོང་དང ། གཞན་ཡང ། སྐྱེ་བོའི་ཚོགས་མང་པོ་དག་དང་ལྷན་ཅིག་ཏུ་རང་གི་ལག་ནས་བཅའ་བ་དང ། བཟའ་བ་བསོད་པ་མང་པོ་མཆོག་ཏུ་གཙང་བས་ཚིམ་པར་བྱས་ཏེ་ཅི་བཞེད་པ་བསྟབས་སོ། །ཚིམ་པར་བྱས་ཤིང་ཅི་བཞེད་པ་བསྟབས་ཏེ་བཤོས་གསོལ་ནས་གཙང་སྡེར་གྱུ་སྟེ་ཕྱག་བཅབས་པར་རིག་ནས། དེ་བཞིན་གཤེགས་པ་ལ་བྱེ་བ་འབུམ་ 446a ༄#། །ཕྲག་དགུ་བཅུ་རྩ་དགུ་རི་བའི་རས་བཅོས་བུ་ཕྲུགས་གཅིག་ཕུལ་ལོ། །བྱང་ཆུབ་སེམས་དཔའ་རེ་རེ་ལའང་བྱེ་བ་ཕྲག་འབུམ་རི་བའི་རས་བཅོས་བུ་ཕྲུགས་རེ་རེ་ཕུལ་ལོ། །ཕུལ་ནས་ཀྱང་སྐྱེ་བོའི་ཚོགས་ཆེན་པོ་དེ་དག་དང ། ཡུལ་མི་གཙོ་བོ་རྣམས་དང་ལྷན་ཅིག་ཏུ་ཐལ་མོ་སྦྱར་ནས། འདི་ལྟ་སྟེ། ཆོས་མཉན་པ་ལ་གུས་པའི་ཕྱིར་དེ་བཞིན་གཤེགས་པའི་སྤྱན་སྔར་འཁོད་དོ། །རིགས་ཀྱི་བུ། འདི་ལྟར་དེ་བཞིན་གཤེགས་པ་གསེར་བཟང་འོད་དེས་སྐྱེ་བོའི་ཚོགས་ཆེན་པོ་གུས་པར་འཁོད་པ་དང ། བྱང་ཆུབ་སེམས་དཔའ་རྣམས་ཆོས་འདོད་པར་ཐུགས་སུ་ཆུད་ནས་སྒོ་སོ་སོ་བ་ཞེས་བྱ་བའི་ཆོས་ཀྱི་རྣམ་གྲངས་བསྟན་ཏོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་དེས་བསྟན་པའི་བྱང་ཆུབ་སེམས་དཔའ་རྣམས་ཀྱི་སྒོ་སོ་སོ་བ་ཞེས་བགྱི་བའི་ཆོས་ཀྱི་རྣམ་གྲངས་དེ་གང་ལགས། བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་དེ་ལེགས་པར་བཀའ་སྩལ་དུ་གསོལ། དེ་ལྟར་བགྱིས་ན་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོ་རྣམས་ཀྱང་ 446b སྒོ་སོ་སོ་བའི་ཆོས་ཀྱི་རྣམ་གྲངས་དེ་ལ་སློབ་པར་འགྱུར་ལགས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། སྒོ་སོ་སོ་བའི་ཆོས་ཀྱི་རྣམ་གྲངས་དེ་ལས་བརྩམས་པ་ཙམ་ཞིག་བཤད་པར་བྱེད་དོ། །རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་སྒོ་སོ་སོ་བ་ནི་གཞན་མ་ཡིན་གྱི་ཕ་རོལ་ཏུ་ཕྱིན་པ་དྲུག་ཁོ་ནར་ཟད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་སྒོ་སོ་སོ་བ་ནི་དེ་ཡིན་ནོ། །དེ་ཅིའི་ཕྱིར་ཞེ་ན། དེ་ཉིད་ལ་སྔོན་གྱི་དེ་བཞིན་གཤེགས་པ་རྣམས་ཀྱིས་ཀྱང་བསླབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོའང་བསྐོར། སེམས་ཅན་རྣམས་ཀྱང་ཡོངས་སུ་སྨིན་པར་མཛད་ནས་ཡོངས་སུ་མྱ་ངན་ལས་འདས་ལ། མ་འོངས་པའི་དེ་བཞིན་གཤེགས་པ་རྣམས་ཀྱང་སྒོ་སོ་སོ་བ་འདི་ཉིད་ལ་བསླབས་ 447a ༄#། །ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། ད་ལྟར་བྱུང་བའི་དུས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་ན་བཞུགས་ཤིང་འཚོལ་གཞེས་པའི་དེ་བཞིན་གཤེགས་པ་དེ་དག་ཀྱང་སྒོ་སོ་སོ་བའི་ཆོས་ཀྱི་རྣམ་གྲངས་འདི་ཉིད་ལ་བསླབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བར་མཛད་པའི་ཕྱིར་རོ། །རིགས་ཀྱི་བུ། གང་བྱང་ཆུབ་སེམས་དཔའི་སྒོ་སོ་སོ་བ་ཡང་དག་པར་སྨྲ་བས་སྨྲ་བ་ནི་ཕ་རོལ་ཏུ་ཕྱིན་པ་དྲུག་པོ་འདི་དག་ཉིད་ཡང་དག་པར་སྨྲ་བས་སྨྲའོ། །དེ་ལ་སྒོ་སོ་སོ་པ་དེའི་བྱེ་བྲག་ནི་གང་ཡིན། ཉེས་པ་ནི་གང་ཡིན། རྣམ་པར་གནོན་པ་ནི་གང་ཡིན། ངེས་པར་འབྱུང་བ་ནི་གང་ཡིན་ཞེ་ན། སེར་སྣའི་སེམས་ནི་བྱང་ཆུབ་སེམས་དཔའི་ཉེས་པའོ། །ཀུན་ཏུ་འཛིན་པའི་སེམས་ནི་བྱང་ཆུབ་སེམས་དཔའི་ཉེས་པའོ། །ཡོངས་སུ་འཛིན་པའི་སེམས་ནི་བྱང་ཆུབ་སེམས་དཔའི་ཉེས་པའོ། །ནོར་ཀུན་ཏུ་བསྲུང་ལ་བགོ་བཤའ་མི་བྱེད་པ་ནི་བྱང་ཆུབ་སེམས་དཔའི་ཉེས་པའོ། །དེ་ལ་བྱང་ཆུབ་སེམས་དཔའ་གང་ 447b སེར་སྣའི་སེམས་རྣམ་པར་གནོན་ཅིང་བཅོམ་ནས་སྦྱིན་པ་ཡིད་ལ་བྱེད་པ་བསྐྱེད་པ་དེ་ནི་དེའི་རྣམ་པར་གནོན་པ་ཡིན་ནོ། །དེ་ལོངས་སྤྱོད་ཇི་ལྟར་ཆུང་ཡང་རུང ། ལོངས་སྤྱོད་རྒྱ་ཆེན་པོ་དག་ཡོད་ཀྱང་རུང་སྟེ། དགེ་སྦྱོང་དང ། བྲམ་ཟེ་དང ། སློང་བ་རྣམས་ལ་བགོ་བཤའ་བྱེད་ལ་དེ་དགའ་བའི་སེམས་དང ། ཀུན་ཏུ་འཛིན་པ་མེད་པའི་སེམས་དང ། མགུ་བའི་སེམས་དང ། རྣམ་པར་སྨིན་པ་ལ་རེ་བ་མེད་པར་སེམས་ཅན་ཐམས་ཅད་ལ་སྙིང་རྗེ་བས་ཕན་པའི་དངོས་པོ་སྔོན་དུ་བཏང་བའི་སེམས་བསྐྱེད་པས་ལག་པ་བརྐྱང་སྟེ།་སྦྱིན་པ་བྱིན་པར་བྱེད་པའི་བྱང་ཆུབ་སེམས་དཔའ་དེ་ནི་སྒོ་སོ་སོ་བ་ལ་སློབ་པ་ཡིན་ཏེ། འདི་ནི་བྱང་ཆུབ་སེམས་དཔའི་ངེས་པར་འབྱུང་བའོ། །རིགས་ཀྱི་བུ། འཆལ་པའི་ཚུལ་ཁྲིམས་ནི་བྱང་ཆུབ་སེམས་དཔའི་ཉེས་པའོ། །ཉམས་པའི་ཚུལ་ཁྲིམས་དང ། འདྲེས་པའི་ཚུལ་ཁྲིམས་དང ། ཞིག་པའི་ཚུལ་ཁྲིམས་དང ། རལ་པའི་ཚུལ་ཁྲིམས་དང ། ནག་ནོག་གི་ཚུལ་ཁྲིམས་ནི་བྱང་ཆུབ་སེམས་དཔའི་ཉེས་པའོ། །བྱང་ཆུབ་སེམས་དཔའི་འཆལ་པའི་ཚུལ་ཁྲིམས་དང ། ཉམས་པའི་ཚུལ་ཁྲིམས་དང ། འདྲེས་པའི་ཚུལ་ཁྲིམས་དང ། ཞིག་པའི་ཚུལ་ཁྲིམས་དང ། རལ་པའི་ཚུལ་ཁྲིམས་དང ། ནག་ནོག་གི་ཚུལ་ཁྲིམས་གང་ཞེ་ན། བྱང་ཆུབ་སེམས་དཔའ་གང་ཉན་ཐོས་ཀྱི་ 448a ༄#། །སེམས་སམ། རང་སངས་རྒྱས་ཀྱི་སེམས་སམ། དམིགས་པ་ཅན་གྱི་སེམས་བསྐྱེད་པ་དང ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། དམིགས་པའི་ལྟ་བ་འདོད་པ་དང ། ཉན་ཐོས་ཀྱི་གཏམ་མམ། རང་སངས་རྒྱས་ཀྱི་གཏམ་མམ། དམིགས་པ་ཅན་གྱི་གཏམ་ལ་དགའ་བར་འཛིན་པ་འདི་ནི་བྱང་ཆུབ་སེམས་དཔའི་ཚུལ་ཁྲིམས་འཆལ་པ་དང ། ཚུལ་ཁྲིམས་ཉམས་པ་དང ། ཚུལ་ཁྲིམས་འདྲེས་པ་དང ། ཚུལ་ཁྲིམས་ཞིག་པ་དང ། ཚུལ་ཁྲིམས་རལ་བ་དང ། ཚུལ་ཁྲིམས་ནག་ནོག་ཅན་ཞེས་བྱའོ། །བྱང་ཆུབ་སེམས་དཔའི་སྒོ་སོ་སོ་བ་ལ་མི་སྤྱོད་པ་དང ། མི་སློབ་པ་ནི་ཚུལ་ཁྲིམས་འཆལ་པའི་རབ་ཡིན་ནོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེབས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་བསླབ་པ་གཞན་ལས་འགལ་བ་བགྱིན་ནི་ཚུལ་ཁྲིམས་འཆལ་པར་མི་འགྱུར་ལ། གང་གི་ཚེ་ན་ཉན་ཐོས་ཀྱི་སེམས་སམ། རང་སངས་རྒྱས་ཀྱི་སེམས་སམ།་དམིགས་པ་ཅན་གྱི་སེམས་བསྐྱེད་པ་དེའི་ཚེ་ནི་ཚུལ་ཁྲིམས་འཆལ་པའི་རབ་ཏུ་འགྱུར་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་ 448b དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བྱང་ཆུབ་སེམས་དཔས་དེ་བཞིན་གཤེགས་པའི་བསླབ་པ་གཞན་ལས་འགལ་བར་བྱས་སམ། ངས་ལྟུང་བར་འགྱུར་བའི་ཆོས་བཞི་གང་དག་གསུངས་པ་དེ་དག་གི་ཉེས་པ་བྱས་སམ། མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཏེ་འདུག་གམ། མཚམས་མེད་པ་ལྔ་བྱས་སུ་ཟིན་ཀྱང ། བྱང་ཆུབ་སེམས་དཔའ་དེ་བྱང་ཆུབ་ཀྱི་སེམས་ཀྱང་མ་བཏང་མ་སྤངས་ཏེ། བྱང་ཆུབ་ཀྱི་སེམས་དང་མ་བྲལ་ལ། དམིགས་པ་ཅན་གྱི་སེམས་དང ། མངོན་པར་ཞེན་པའི་སེམས་ཀྱང་མི་སྐྱེད་ན་བྱང་ཆུབ་སེམས་དཔའ་དེ་ནི་ཚུལ་ཁྲིམས་དང་ལྡན་པ་ཁོ་ན་ཡིན་པ་དང ། ཚུལ་ཁྲིམས་མ་ཉམས་པ་དང ། ཚུལ་ཁྲིམས་མ་འདྲེས་པ་དང ། ཚུལ་ཁྲིམས་མ་ཞིག་པ་དང ། ཚུལ་ཁྲིམས་མ་རལ་བ་དང ། ཚུལ་ཁྲིམས་ནག་ནོག་ཅན་མ་ཡིན་པར་གཟུང་བར་བྱ་སྟེ། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང ། སློབ་པའང་ཡིན་ནོ། །དེ་ཅིའི་ཕྱིར་ཞེ་ན།་དེ་དག་ནི་བྱང་ཆུབ་སེམས་དཔའི་བྱང་ཆུབ་ལ་བར་དུ་གཅོད་པར་བྱེད་པ་མ་ཡིན་པའི་ཕྱིར་རོ། །བྱང་ཆུབ་སེམས་དཔའ་སྡིག་པའི་ལས་བྱས་པས་སྲིད་པར་འགྲོ་བ་བསྐྱེད་དུ་ཟིན་ཀྱང་འོན་ཀྱང་བྱང་ཆུབ་སེམས་དཔའ་ནི་ཇི་ཙམ་དུ་སྲིད་པར་འགྲོ་བ་བསྐྱེད་པ་དེ་ཙམ་དུ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའ་དེ་བཞིན་ 449a ༄#། །གཤེགས་པའི་བསླབ་པ་ཇི་ལྟར་བཅས་པ་ལ་བསླབས་སུ་ཟིན་ཀྱང་དེ་ཉན་ཐོས་ཀྱི་སེམས་སམ། རང་སངས་རྒྱས་ཀྱི་སེམས་སམ། དམིགས་པར་ལྟ་བ་དང་ལྷན་ཅིག་བསྟེན་པར་བྱེད་ན་བྱང་ཆུབ་སེམས་དཔའ་བྱང་ཆུབ་སེམས་དཔའི་ཚུལ་ཁྲིམས་ལས་ཉམས་པར་འགྱུར་རོ། །རིགས་ཀྱི་བུ། དེ་ལྟ་བས་ན་བྱང་ཆུབ་སེམས་དཔའ་གང་བྱང་ཆུབ་ཀྱི་སེམས་མི་གཏོང་ལ། དམིགས་པར་ལྟ་བའི་སེམས་ཀྱང་མི་བསྐྱེད་པའི་བྱང་ཆུབ་སེམས་དཔའ་དེ་ནི་བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང ། སློབ་པ་ཡིན་ནོ། །རིགས་ཀྱི་བུ། གཞན་ཡང ། གནོད་སེམས་ཀྱི་ཐ་བའི་ཉེས་པའི་སེམས་ནི་བྱང་ཆུབ་སེམས་དཔའི་ཉེས་པའོ། །སེམས་ཅན་རྣམས་ལ་མི་སྙོམས་པའི་ཡིད་ལ་བྱེད་པ་ནི་བྱང་ཆུབ་སེམས་དཔའི་ཉེས་པའོ། །སེམས་ཅན་རྣམས་དང ། ཆོས་རྣམས་ལ་ཐ་དད་པར་འདུ་ཤེས་པ་ནི་བྱང་ཆུབ་སེམས་དཔའི་ཉེས་པའོ། །སེམས་ཅན་ལ་དམིགས་པ་ལ་བརྟེན་པའི་བྱམས་པ་ཕྱོགས་གཅིག་པ་ནི་བྱང་ཆུབ་སེམས་དཔའི་ཉེས་པའོ། །སྟོང་པ་ཉིད་ལ་མི་བཟོད་པ་ནི་བྱང་ཆུབ་སེམས་དཔའི་ཉེས་པའོ། །འདི་ལ་ནི་སྦྱིན་ནོ། །འདི་ལ་ནི་མི་སྦྱིན་ནོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །འདི་ལ་ནི་ཡོན་དབུལ་ལོ། །འདི་ལ་ནི་མི་དབུལ་ལོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །འདི་ལ་ནི་ཆོས་བཤད་པར་བྱའོ། ། 449b འདི་ལ་ནི་ཆོས་བཤད་པར་མི་བྱའོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །འདི་ལ་ནི་བསྙེན་བཀུར་བྱའོ། །འདི་ལ་ནི་བསྙེན་བཀུར་མི་བྱའོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །བྱང་ཆུབ་སེམས་དཔའ་ཇི་ཙམ་དུ་སོ་སོར་འགྱེད་པར་བྱེད་དེ། འདི་ནི་ཚུལ་ཁྲིམས་དང་ལྡན་པའོ། །འདི་ནི་ཚུལ་ཁྲིམས་འཆལ་པའོ་སྙམ་དུ་སོ་སོར་ཕྱེ་ནས་ཚུལ་ཁྲིམས་འཆལ་པ་ལ་བརྙས་པར་བྱེད་པ་དེ་ནི་བྱང་ཆུབ་སེམས་དཔའི་ཉེས་པའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལ་སེམས་མཉམ་པ་དང ། ཆོས་ཐམས་ཅད་ལ་སེམས་མཉམ་པར་བྱ་དགོས་ཤིང ། ཉི་མ་དང ། ཟླ་བའི་དཀྱིལ་འཁོར་འདྲ་བ་དང ། ས་དང ། ཆུ་དང ། མེ་དང ། རླུང་དང ། ནམ་མཁའ་ལྟ་བུར་སྙོམས་པའི་སེམས་དང ། སྟོང་པ་ཉིད་ལ་བཟོད་པ་དང ། ལྡན་པར་བྱ་དགོས་པའི་ཕྱིར་རོ། །བྱང་ཆུབ་སེམས་དཔའ་གང་སེམས་ཅན་གང་ཡང་ཡོངས་སུ་མི་གཏོང་ལ། མི་གནས་པའི་སེམས་དང ། ཚད་ངེས་པར་མི་བྱེད་པས་སེམས་ཅན་ཐམས་ཅད་ཀྱི་ཕྱིར་སྙིང་རྗེ་བསྐྱེད་ཅིང་བྱམས་པས་མོས་པར་བྱས་ཏེ། ཁྱབ་པར་བྱས་ནས་བསྒྲུབས་ཏེ་གནས་ལ། ཆོས་རྣམས་ལའང་སྟོང་ངོ་སྙམ་དུ་བཟོད་པའི་བྱང་ཆུབ་སེམས་དཔའ་དེ་ནི་བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང ། སློབ་པ་ཡིན་ནོ། །གཞན་ཡང ། བྱང་ཆུབ་སེམས་དཔའ་གང་འཁོར་བ་ལ་ཚད་ངེས་པར་བྱེད་པ་དེ་ནི་བྱང་ཆུབ་སེམས་དཔའི་ཉེས་པ་སྟེ། བསྐལ་པ་ 450a ༄#། །འདི་ཙམ་གྱི་བར་དུ་ནི་བདག་འཁོར་བར་བྱའོ། །བསྐལ་པ་འདི་ཙམ་གྱི་བར་དུ་ནི་འཁོར་བར་མི་བྱའོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །སེམས་ཅན་འདི་སྙེད་ཅིག་ནི་བདག་གིས་དགྲོལ་བར་བྱའོ། །སེམས་ཅན་འདི་ཉིད་ཅིག་ནི་བདག་གིས་དགྲོལ་བར་མི་བྱའོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །འདི་ནི་བརྩོན་འགྲུས་སོ། །བདག་ནི་བརྩོན་འགྲུས་ཅན་ནོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་མངོན་པར་རྫོགས་པར་འཚང་རྒྱ་བར་བྱའོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ། །དེ་ལ་བྱང་ཆུབ་སེམས་དཔའི་རྣམ་པར་གནོན་པ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔས་འདི་ལྟར་གོ་ཆ་བགོ་བར་བྱ་སྟེ། འཁོར་བའི་སྔོན་གྱི་མཐའ་མི་མངོན་ནོ་ཞེས་ཇི་སྐད་དུ་འབྱུང་བ་དེ་སྲིད་དུ་བདག་འཁོར་བ་ན་འཁོར་འཁོར་ཏེ། གལ་ཏེ་བདག་སེམས་ཅན་རེ་རེའི་ཕྱིར་ཡང་བསྐལ་པ་དེ་ཁོ་ན་སྙེད་དུ་འཁོར་བ་ན་འཁོར་བར་བྱ་དགོས་པར་གྱུར་ནའང་བདག་གིས་སྤྲོ་བར་བྱའོ། །རྣམ་གྲངས་འདི་བཞིན་དུ་སེམས་ཅན་ཐམས་ཅད་ཀྱི་དོན་གྱི་ཕྱིར་ཕྱི་མའི་མཐའི་མུར་ཐུག་པ་དེ་ཇི་སྲིད་པ་དེ་སྲིད་དུ་འཁོར་བ་ན་འཁོར་དགོས་ནའང་བདག་གིས་སྤྲོ་སྟེ། དེའང་བརྩོན་འགྲུས་དང ། ང་རྒྱལ་དང ། བྱང་ཆུབ་ལ་མངོན་པར་ཞེན་པ་སྤངས་ལ་མི་དམིགས་པའི་བརྩོན་འགྲུས་ཀྱི་གོ་ཆས་སྤྲོ་བར་བྱའོ་སྙམ་སྟེ། དེ་ 450b ལྟར་བྱང་ཆུབ་སེམས་དཔའ་གོ་ཆ་བགོས་པ་དེ་ནི་བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང ། སློབ་པ་ཡིན་ནོ། །རིགས་ཀྱི་བུ། གཞན་ཡང ། བྱང་ཆུབ་སེམས་དཔའ་གང་གྲོང་དང ། གྲོང་ཁྱེར་དང ། གྲོས་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དག་ཏུ་སོང་ན་སེམས་ཅན་རྣམས་ཀྱི་དོན་ནུས་ཤིང་ལྕོགས་ལ། འོས་ཡིན་བཞིན་དུ་དེ་དགོན་པའི་ཕྱོགས་དབེན་པ་ཞིག་ཏུ་འདུག་ནས་དབེན་པ་ན་སྤྱོད་ཅིང་བསམ་གཏན་གྱི་རོའི་དགའ་བ་དང ། བདེ་བ་ལ་བརྟེན་ཅིང་གནས་པ་དེ་ནི་བྱང་ཆུབ་སེམས་དཔའི་ཉེས་པའོ། །བྱང་ཆུབ་སེམས་དཔའ་གང་སྦྱིན་པའང་བྱིན་པར་བྱེད་ལ་སྐྱོ་བའང་མེད། སེམས་ཀྱི་དམིགས་པ་ལའང་མི་བརྟེན། ནང་དུ་ཡང་དག་འཇོག་ཀྱང་འཕེལ་བར་བྱེད། བསམ་གཏན་གྱི་རོ་མྱོང་བའང་མེད། མི་གནས་པའི་བསམ་གཏན་པའང་ཡིན་ན་བྱང་ཆུབ་སེམས་དཔའ་དེ་ནི་བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང ། སློབ་པ་ཡིན་ནོ། །རིགས་ཀྱི་བུ། གཞན་ཡང ། བྱང་ཆུབ་སེམས་དཔའ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་ཆོས་ཐམས་ཅད་རང་བཞིན་གྱིས་སྟོང་པར་ཤེས་ནས་འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གང་ཡང་མེད་དོ་སྙམ་དུ་དེ་ལྟར་ཤེས་ནས་བདག་ཉིད་དུལ་བར་བྱ་བ་དང ། ཞི་གནས་ལ་རྣལ་འབྱོར་དུ་བརྩོན་པར་གནས་ལ། སེམས་ཅན་གཞན་ཕྱིན་ཅི་ལོག་ཏུ་དམིགས་པའི་འཛིན་འཁྲིས་ཟིན་པ་དེ་དག་ལ་སྟོང་པ་ཉིད་ 451a ༄#། །བདག་མེད་པའི་ཚུལ་དེ་མི་བརྗོད་མི་སྟོན། བརྡ་སྤྲོད་པར་མི་བྱེད་པ་དེ་ནི་བྱང་ཆུབ་སེམས་དཔའ་དེའི་ཐབས་ལ་མི་མཁས་པ་ཡིན་པར་རིག་པར་བྱ་སྟེ། ཉེས་པར་བྱེད་པའང་མ་ཡིན་ནོ། །བྱང་ཆུབ་སེམས་དཔའ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་ཆོས་ཐམས་ཅད་ངོ་བོ་ཉིད་མེད་པར་ཤེས་ཤིང་ཆོས་ཐམས་ཅད་ངོ་བོ་ཉིད་ཀྱིས་སྟོང་པར་ཤེས་ནས་འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གང་ཡང་མེད་དོ་སྙམ་སྟེ་འདི་དེ་ལྟར་ངོ་བོ་ཉིད་ཀྱིས་སྟོང་པའི་ཆོས་འདི་དག་ལུས་ཀྱིས་མངོན་སུམ་དུ་བྱས་ཏེ་ཐམས་ཅད་ལ་མི་དམིགས་པའི་སེམས་དང་ལྡན་ལ་སེམས་ཅན་ཕྱིན་ཅི་ལོག་ཏུ་སེམས་ཤིང་དམིགས་པ་ཅན་གང་ཡིན་པ་དེ་དག་ཀྱང་ཕྱིན་ཅི་ལོག་གིས་ཟིན་ཅིང་དམིགས་པའི་སེམས་སུ་གྱུར་པ་དེ་ལས་རབ་ཏུ་གྲོལ་བར་བྱས་ནས། དེ་དག་ལའང་ཆོས་ཐམས་ཅད་ངོ་བོ་ཉིད་མེད་དོ་ཞེས་སྟོན་ཅིང་དེ་དག་ཀྱང་ཆོས་ཐམས་ཅད་རང་བཞིན་གྱིས་སྟོང་ངོ་ཞེས་བྱ་བ་ལ་འཛུད་པར་བྱེད་པའི་བྱང་ཆུབ་སེམས་དཔའ་དེ་ནི་ཐབས་ལ་མཁས་པ་ཡིན་པར་རིག་པར་བྱ་སྟེ། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང ། སློབ་པའང་ཡིན་ནོ། །རིགས་ཀྱི་བུ། དེ་ལྟར་ན་བཅོམ་ལྡན་འདས་ 451b དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་བཤོས་གསོལ་ནས། འཁོར་གྱི་ཁྱམས་དེར་འཁོར་དེའི་ནང་དུ་བྱང་ཆུབ་སེམས་དཔའི་སྒོ་སོ་སོ་བ་ཞེས་བྱ་བའི་ཆོས་ཀྱི་རྣམ་གྲངས་འདི་རྒྱས་པར་བཤད་དོ། །བཅོམ་ལྡན་འདས་དེས་ཆོས་ཀྱི་རྣམ་གྲངས་འདི་བཤད་པ་ན་སེམས་ཅན་ཚད་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །རིགས་ཀྱི་བུ། ངས་བསྐལ་པའམ། བསྐལ་པ་ལས་ལྷག་པར་བྱང་ཆུབ་སེམས་དཔའི་སྒོ་སོ་སོ་བའི་ཆོས་ཀྱི་རྣམ་གྲངས་ལས་བརྩམས་ཏེ། ཆོས་བསྟན་དུ་ཟིན་ཀྱང་སྤོབས་པའམ། ཆོས་ཀྱི་སྒོ་རྣམས་ཟད་པར་མི་འགྱུར་མོད་ཀྱི་འོན་ཀྱང་དེའི་བརྩམས་པ་ཙམ་བསྟན་པ་ཡིན་ནོ། །རིགས་ཀྱི་བུ།་དེ་ལྟར་ན་རྒྱལ་པོ་གསེར་མདོག་དེས་དེ་བཞིན་གཤེགས་པ་དེ་བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དང་ཐབས་གཅིག་ཏུ་ལོ་བྱེ་བ་ཕྲག་བརྒྱད་ཅུ་རྩ་བཞི་ཐམ་པར་བཀོད་པ་དེ་ལྟ་བུ་དང ། བསྙེན་བཀུར་དང ། ཕུ་དུད་དུ་བྱ་བ་དེ་ལྟ་བུས་བཀུར་སྟི་བྱས། བླ་མར་བྱས། རིམ་གྲོ་བྱས། མཆོད་པ་བྱས་སོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། རྒྱལ་ 452a ༄#། །པོ་གསེར་མདོག་དེས་དེ་བཞིན་གཤེགས་པ་དེ་དང ། བྱང་ཆུབ་སེམས་དཔའ་དེ་དག་གི་གཙུག་ལག་ཁང་མ་བགྱིས་ལགས་སམ། དེ་བཞིན་གཤེགས་པ་དེ་དང ། བྱང་ཆུབ་སེམས་དཔའ་དེ་དག་གང་ན་བཞུགས་བཞུགས་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་བཞིན་གཤེགས་པ་དེ་དང ། བྱང་ཆུབ་སེམས་དཔའ་དེ་དག་ནི་རང་རང་གི་སྤྲུལ་པའི་ཁང་པ་བརྩེགས་པའི་ནང་ན་གནས་གནས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་བཀའ་སྩལ་པ། རིགས་ཀྱི་བུ། དེ་ལྟར་ལོ་བྱེ་བ་ཕྲག་བརྒྱད་ཅུ་རྩ་བཞི་པོ་དེ་དག་འདས་པའི་ཐ་མའི་ཉིན་པར་རྒྱལ་པོ་གསེར་མདོག་གིས་དེ་བཞིན་གཤེགས་པ་དེ་ལ་བཤོས་གསོལ ། ཡོན་ཕུལ་ཏེ། སླར་གཤེགས་པར་རིག་ནས་བསམ་པ་འདི་ལྟ་བུ་ཞིག་བསམས་ཏེ། ཅི་བདག་གིས་དགེ་བའི་རྩ་བ་འདི་བརྒྱ་བྱིན་དུ་འགྱུར་བར་ཡོངས་སུ་བསྔོ་བར་བྱའམ། འོན་ཏེ་ཚངས་པར་འགྱུར་བར་ཡོངས་སུ་བསྔོ་བར་བྱའམ། འོན་ཏེ་འཁོར་ལོས་བསྒྱུར་བ་ཐོབ་པར་བྱ་བའི་ཕྱིར་ཡོངས་སུ་བསྔོ་བར་བྱ་སྙམ་མོ། །དེ་ནས་དེའི་སེམས་བསྐྱེད་ 452b པ་བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་དེས་ཐུགས་སུ་ཆུད་དོ། །དེ་ནས་དེ་བཞིན་གཤེགས་པས་རྒྱལ་པོ་དེའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་རྒྱལ་པོ་དང ། སྐྱེ་བོའི་ཚོགས་མང་པོ་དེ་དག་གི་མདུན་དུ་སྟེང་གི་བར་སྣང་ལ་དེ་བཞིན་གཤེགས་པའི་སྐུ་དེ་ཁོ་ན་བཞིན་དུ་རྣམ་པ་ཐམས་ཅད་ཡོངས་སུ་རྫོགས་པའི་ལུས་ཤིག་སྤྲུལ་ཏེ། དེ་སྟེང་གི་བར་སྣང་དེ་ལ་འདུག་ནས་རྒྱལ་པོ་གསེར་མདོག་ལ་ཚིགས་སུ་བཅད་པ་འདི་སྐད་ཅེས་སྨྲས་སོ། །དཔེར་ན་མི་ནི་ཤེས་རབ་འཆལ། །བྱིས་པའི་རང་བཞིན་གྱུར་པ་ཞིག་།རྒྱལ་པོ་བསྙེན་བཀུར་བྱས་ནས་ནི། །བྱ་དགའ་ཆུང་ངུ་གསོལ་བར་བྱེད། །དེ་བཞིན་ལ་ལས་སངས་རྒྱས་ལ། །བསམ་གྱིས་མི་ཁྱབ་མཆོད་བྱས་ནས། །ཚངས་པ་བརྒྱ་བྱིན་རྒྱལ་པོའི་སྲིད། །དམའ་བའི་གནས་ལ་འདོད་པར་བྱེད། །རྒྱལ་པོར་གྱུར་དང་བརྒྱ་བྱིན་དང ། །དེ་བཞིན་ཚངས་པར་འགྱུར་བ་རྣམས། །འདི་དག་མི་རྟག་བརྟན་མ་ཡིན། །བརྙན་མ་ཡིན་ཏེ་འཇིག་ཚུལ་ཅན། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་སེམས་ནི་བསྐྱེད་པར་གྱིས། །སངས་རྒྱས་འཇིག་རྟེན་མཁས་རྣམས་ཀྱིས། །དེ་འདྲའི་སེམས་ནི་བསྔགས་པ་ཡིན། །རྒྱལ་པོ་ཁྱོད་ནི་ཡུལ་འཁོར་བཅས། །མཆོད་པ་རྒྱ་ཆེན་བྱས་ཟིན་གྱི། །བྱང་ཆུབ་སེམས་ 453a ༄#། །ནི་བླ་ན་མེད། །རྒྱ་ཆེན་སེམས་ནི་ཁྱོད་ཀྱིས་བསྐྱེད། །དམའ་བའི་སྨོན་ལམ་མ་འདེབས་ཤིག་།དེ་ནི་བྱིས་པའི་སྤྱོད་ཡུལ་ཡིན། །ཤེས་རབ་བཟང་པོ་མཁས་པར་གྱིས། །བྱང་ཆུབ་མཆོག་ལ་འཇུག་པར་གྱིས། །མྱ་ངན་འདས་པ་འདོད་པའི་ཕྱིར། །སངས་རྒྱས་དེ་བཞིན་གཤེགས་རྣམས་ལ། །གང་གིས་སྟོང་གསུམ་ཐམས་ཅད་ཀྱང ། །རིན་ཆེན་བཀང་སྟེ་ཕུལ་བ་པས། །གང་གིས་ཐལ་མོ་སྦྱར་བྱས་ནས། །སེམས་ཀྱིས་བྱང་ཆུབ་བསྔོ་བྱས་ལ། །ཚིག་ཏུ་བརྗོད་པ་མ་བྱས་ཀྱང ། །དེ་ནི་དེ་བས་ཤིན་ཏུ་ཆེ། །གང་གིས་སེམས་ཅན་ཐམས་ཅད་ལ། །བསྐལ་པ་བྱེ་བ་བརྗོད་མེད་དུ། །སེམས་ཅན་ཀུན་ལ་བསྙེན་བྱས་ཀྱང ། །དེ་ཡི་བཅུ་དྲུག་ཆར་མི་ཕོད། །གང་ཞིག་ཐལ་སྦྱར་བྱང་ཆུབ་སེམས་བསྐྱེད་དང ། །ཕྱོགས་བཅུ་དག་ན་འཇིག་རྟེན་དོན་མཛད་པ། །རྣམ་འདྲེན་སངས་རྒྱས་གང་དག་བཞུགས་རྣམས་ལ། །བསོད་ནམས་འདོད་པའི་མི་འགས་སྔོན་ཆད་ཀྱི། །འཁོར་བར་བསྐལ་པ་བྱེ་བར་མཆོད་པ་བས། །མི་གང་མཁས་ཤིང་མཛངས་པའི་རང་བཞིན་ཅན། །བདེ་བར་གཤེགས་པའི་བསྟན་ལ་ཡིད་ཆེས་ཤིང ། །བྱང་ཆུབ་སེམས་ནི་བརྟན་པོར་བསྐྱེད་ནས་ཀྱང ། །བདེ་གཤེགས་མཆོད་རྟེན་ལ་ནི་མེ་ཏོག་འབུལ། །འདི་ནི་དེ་བས་བསོད་ནམས་ཁྱད་པར་ 453b བརྗོད། །བྱང་ཆུབ་སེམས་ཀྱིས་མེ་ཏོག་འབུལ་བྱེད་ལ། །བསོད་ནམས་སྔ་མ་དེ་ནི་དཔེར་མི་རུང ། །རྒྱ་མཚོ་དང་ནི་ཆུ་ཡི་ཐིགས་པ་བཞིན། །སངས་རྒྱས་ཞིང་འདིར་སེམས་ཅན་ཇི་སྙེད་པ། །བསྐལ་པ་རེ་རེ་ལ་ནི་སངས་རྒྱས་འགྱུར། །བསྐལ་པ་མང་པོར་ལས་གཞན་མི་བྱེད་པར། །བསོད་ནམས་བཤད་ཀྱང་མཐའ་ནི་ཐུག་པ་མེད། །དེ་དག་བྱང་ཆུབ་སེམས་ཀྱི་རྣམ་སྨིན་བསྟན། །བསྐལ་པ་མཐའ་ཡས་བར་དུ་བཤད་ན་ཡང ། །ཅུང་ཟད་ཙམ་ཡང་ཡོངས་སུ་བརྗོད་མི་འགྱུར། །ས་གཞི་དག་ལས་རྡུལ་ནི་བླངས་པ་བཞིན། ། དེ་ལྟར་རྒྱལ་པོ་སྐྱེས་མཆོག་ཁྱོད་ཀྱིས་ཀྱང ། །བྱང་ཆུབ་སེམས་ཀྱི་ཕན་ཡོན་འདི་ཐོས་ནས། །མྱུར་དུ་བློ་གྲོས་དམའ་བ་ཀུན་སྤོངས་ལ། །བྱང་ཆུབ་ཕྱིར་ནི་རྒྱ་ཆེན་སེམས་སྐྱེད་ཅིག། འཇིག་རྟེན་འདྲེན་པ་གསེར་གྱི་མཆོད་སྡོང་འོད། །བསམ་གྱིས་མི་ཁྱབ་ཡོན་ཏན་ཀུན་ལྡན་པ། །དེ་ཡིས་བྱང་ཆུབ་སེམས་ཀྱི་རྣམ་པར་སྨིན། །འདི་འདྲ་ཞེས་ནི་ཕན་ཡོན་འདི་དག་བསྟན། །བྱང་ཆུབ་སེམས་ཀྱི་རྣམ་སྨིན་བསྟན་པ་ཡི། །བསོད་ནམས་དེ་ལ་གལ་ཏེ་གཟུགས་ཡོད་ན། །ཞིང་རྣམས་གངྒཱའི་བྱེ་སྙེད་གང་བྱས་ཀྱང ། །དེ་དག་བཀང་བས་ཆ་ཙམ་ཟད་པ་མེད། །རྗེས་སུ་བསྟན་པ་འདི་འདྲ་ཐོས་ནས་ཀྱང ། །རྒྱལ་པོའི་གཙོ་བོ་སེམས་ནི་དགའ་གྱུར་ཏེ། །སོར་མོ་བཅུ་ཡིས་ཐལ་མོ་སྦྱར་བྱས་ནས། །སངས་རྒྱས་ཕྱག་འཚལ་ཞེས་ནི་ 454a ༄#། །ཚིགས་སུ་སྨྲས། །བྱང་ཆུབ་ཕྱིར་ནི་བདག་གིས་སེམས་བསྐྱེད་དོ། །བདག་ནི་ཆོས་རྗེ་སངས་རྒྱས་གྲུབ་པར་ཤོག་།བྱང་ཆུབ་རྡུལ་བྲལ་འདུས་མ་བྱས་རྟོགས་ནས། །སེམས་ཅན་གངྒཱའི་བྱེ་སྙེད་དགྲོལ་བར་བགྱི། །སངས་རྒྱས་སྐུ་དེས་ཚིགས་བཅད་འདི་བརྗོད་ནས། །དེ་ཚེ་རྒྱལ་པོའི་གཙོ་བོ་དགའ་གྱུར་པ། །ཤེས་ནས་སྟོང་གསུམ་ཐམས་ཅད་རབ་གཡོས་ཏེ། །ངང་བའི་རྒྱལ་པོ་བཞིན་དུ་མཁའ་ལས་སོང ། །རྒྱལ་པོ་གསེར་མདོག་སེམས་ནི་དད་གྱུར་ནས། །བུ་དང་བུ་མོ་དེ་བཞིན་ཆུང་མ་དང ། །རྒྱལ་པོ་དང་ནི་ཚོང་དཔོན་ཁྱིམ་བདག་རྣམས། །སངས་རྒྱས་ལ་ནི་ཕྱག་འཚལ་འདོད་ཞེས་པོས། །བྱེ་བ་བརྒྱ་ཕྲག་དྲུག་ཅུས་ཡོངས་བསྐོར་ཞིང ། །མེ་ཏོག་རྣམས་དང་ཕྲེང་དང་བདུག་པ་ཐོགས། །སངས་རྒྱས་ག་ལ་བར་ནི་གཉི་རྒྱུད་སོང ། །ཞབས་ལ་ཕྱག་བཙལ་ནས་ནི་ཕྱོགས་གཅིག་འདུག་།དེ་བཞིན་བུ་དང་བུ་མོ་ཆུང་མ་དང ། །བློན་པོ་དང་ནི་ཚོང་དཔོན་ཁྱིམ་བདག་དང ། །རྒྱལ་པོ་གཞན་དང་དེ་བཞིན་འཁོར་གྱི་རྣམས། །དེ་དག་ཀྱང་ནི་ཕྱག་བཙལ་གུས་པར་འཁོད། །ལྷ་རྣམས་ཀྱིས་ཀྱང་དེ་བཞིན་བར་སྣང་ཐམས་ཅད་ཁྱབ། །སིལ་སྙན་དཀྲོལ་ཞིང་མེ་ཏོག་ཆར་པ་ཕབ། །གསེར་གྱི་མདོག་དེ་ཡུལ་གྱི་མིས་བསྐོར་ནས། །ཐལ་མོ་སྦྱར་བྱས་སངས་རྒྱས་ཞུ་བར་བྱེད། ། 454b སྟོབས་བཅུ་ལྡན་པ་དཔག་མེད་ལྷ་ཡི་ལྷ། །མི་འདུལ་ཁ་ལོ་སྒྱུར་བ་ཁྱོད་ལ་ཞུ། །གང་གིས་བྱང་ཆུབ་སེམས་ནི་བརྟན་པོར་བསྐྱེད། །དེ་ཡི་བསོད་ནམས་ཇི་ཙམ་བསྐྱེད་འགྱུར་ལགས། །བཅོམ་ལྡན་ཇི་ལྟར་སྤྱོད་པ་སྤྱད་བགྱིས་ན། །བསྐལ་པ་མང་པོར་སྡུག་བསྔལ་མི་མཐོང་པར། །ངེས་པར་བདེ་དང་བདེ་བླག་ཚིམ་གྱུར་པས། །བྱང་ཆུབ་བདུད་རྩི་མྱ་ངན་མེད་པ་རྟོགས། །བདག་གཞར་རྐང་ལག་བཏང་ཡང་མི་འཚལ་ཞིང ། །མགོ་དང་རང་ཤ་སྩལ་ཡང་མི་འཚལ་བར། །བདག་ནི་ངེས་པར་བདེར་གནས་སྤྱོད་པ་ཡི། ། ཐབས་འདིར་ཐུབ་པས་བདག་ལ་བསྟན་དུ་གསོལ། །རྟག་ཏུ་བདེ་དང་བདེ་བླག་ལྡན་པར་ཤོག་།ནམ་ཡང་བདག་ལུས་སྡུག་བསྔལ་མ་གྱུར་ཅིག་།བྱམས་དང་བཟོད་དང་དུལ་དང་སྡོམ་པ་ལ། །གནས་ནས་བདག་གིས་བྱང་ཆུབ་མཆོག་རེག་ཤོག་།ལེ་ལོ་མ་མཆིས་རྟག་ཏུ་བསླབ་ལ་སློབ། །བདག་གིས་བསླབ་པ་ནམ་ཡང་གཞིག་མི་བགྱི། །འདྲེན་པ་བདག་ནི་དམ་བཅས་བརྟན་པར་བགྱི། །ནམ་ཡང་ཚིག་ཙམ་ལྷུར་ལེན་ཡོང་མི་བགྱིད། །རང་བྱུང་བསོད་ནམས་འབྲས་བུ་བདག་ལ་གསུངས། །དེ་བཞིན་གཤེགས་པ་ཐེག་པ་བདེ་བ་གསུངས། །ཇི་ལྟར་སྤྱད་པའི་བསླབ་པ་བཀའ་སྩལ་པ། །ཐོས་ནས་ཇི་ལྟར་བསྟན་བཞིན་གནས་པར་བགྱི། །གསེར་འོད་གསེར་བཀོད་འོད་བཟང་དེས་གསུངས་པ། །ཀྱེ་ 455a ༄#། །ཀྱེ་ས་ཡི་བདག་པོ་མཉན་པར་གྱིས། །བདེ་བའི་རྒྱུ་ཡི་བསོད་ནམས་ཁྱོད་ལ་བཤད། །བསླབ་པའང་བཤད་ཀྱི་དེ་ཕྱིར་ང་ལས་ཉོན། །གང་གིས་སྟོང་གསུམ་རིན་ཆེན་གང་བྱས་ལ། །སྟོབས་བཅུ་མངའ་བ་རྣམས་ལ་འབུལ་བྱེད་པ། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཤིན་ཏུ་མང་པོ་འཕེལ་བར་འགྱུར། ། གང་གིས་ཞིང་རྣམས་གངྒཱའི་བྱེ་མ་སྙེད། །རིན་ཆེན་གང་བར་བྱས་ནས་སྦྱིན་པ་བྱིན། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཤིན་ཏུ་མང་པོ་འཕེལ་བར་འགྱུར།། གང་གིས་བསྐལ་པ་བྱེ་བ་ཁྲག་ཁྲིག་ཏུ། །སེམས་ཅན་ཐམས་ཅད་ལ་ནི་མཆོད་པ་བྱེད། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཤིན་ཏུ་མང་པོ་འཕེལ་བར་འགྱུར།། གལ་ཏེ་སེམས་ཅན་ཐམས་ཅད་དགྲ་བཅོམ་གྱུར། །ཡེ་ཤེས་དབང་ཐོབ་གྱུར་པ་དེ་དག་ལ། །བསོད་ནམས་འདོད་པའི་གང་ཟག་ལ་ལ་ཞིག། །བསྐལ་པ་ཁྲག་ཁྲིག་བར་དུ་མཆོད་པ་བྱེད། །གང་གིས་སྙིང་རྗེ་བསྐྱེད་ནས་བྱང་ཆུབ་ཏུ། །རྒྱ་ཆེན་སེམས་ནི་སྐྱེད་པར་བྱེད་གྱུར་ཏེ། །སེམས་ཅན་ལ་ལ་གང་གིས་བྱང་ཆུབ་ཏུ། །སེམས་ཀྱི་གཙོ་བོ་བསྐྱེད་པ་བྱས་ནས་ཀྱང ། །གོམ་པ་བདུན་ནི་བོར་བའི་བསོད་ནམས་འདི། །དེ་བས་ཁྱད་པར་འཕགས་པར་འགྱུར་བ་ཡིན། །གལ་ཏེ་སེམས་ཅན་མཐའ་དག་སངས་རྒྱས་ཏེ། ། 455b སྤོབས་པ་མཐའ་ཡས་ལྡན་པ་ཉིད་གྱུར་པ། །ཇི་ལྟར་སྔོན་གྱི་འཁོར་བའི་བསྐལ་པའི་བར། །སེམས་ཅན་གཅིག་པུས་མཆོད་པ་བྱས་པ་དང ། །མཁས་པའི་མི་ནི་གང་ཡང་རུང་བ་ཡིས། །བྱང་ཆུབ་མཆོག་ཏུ་སེམས་ནི་བསྐྱེད་ནས་ཀྱང ། །མེ་ཏོག་གཅིག་བུ་ཕུལ་བའི་བསོད་ནམས་འདི། །དེ་བས་ཁྱད་པར་འཕགས་པར་འགྱུར་བ་ཡིན། །བསྐལ་པ་བྱེ་བ་ཁྲག་ཁྲིག་མང་པོར་ནི། །བསོད་ནམས་དེ་ཡི་བཤད་པ་བརྩམས་བྱས་ཀྱང ། །བསོད་ནམས་འབྲས་བུ་དེ་ཡི་བཤད་པ་ནི། །ནམ་ཡང་ཟད་པར་འགྱུར་བ་མ་ཡིན་ནོ། །རིགས་ཀྱི་བུ། འདི་ལྟར་བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་དེས་རྒྱལ་པོ་གསེར་མདོག་དེ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། ཆོས་གཅིག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་ཐེག་པ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལ། །སྡུག་བསྔལ་བ་དང།་ཡིད་མི་བདེ་བར་ཡང་མི་འགྱུར་རོ། །ཆོས་གཅིག་པོ་གང་ཞེ་ན། འདི་ལྟ་སྟེ། བག་ཡོད་པ་སྟེ། རྒྱལ་པོ་ཆེན་པོ། བྱང་ཆུབ་སེམས་དཔའ་བག་ཡོད་པ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལ་བག་ཡོད་པ་གང་ཞེ་ན། འདི་ལྟ་སྟེ། བསླབ་པ་ཡོངས་སུ་མི་གཏོང་ 456a ༄#། །བ་དང ། དམ་བཅས་པ་ལས་མི་ཉམས་པ་དང ། སེམས་ཅན་ཐམས་ཅད་ལ་བྱམས་པས་གནས་པ་དང ། སེམས་ཅན་ཐམས་ཅད་ཡོངས་སུ་མི་གཏོང་བ་དང ། བྱང་ཆུབ་ལ་འདུན་པ་བརྟན་པ་དང ། བརྩོན་འགྲུས་མི་གཏོང་བ་དང ། དགེ་བའི་བཤེས་གཉེན་རྣམས་ལ་བརྟེན་ཅིང་བསྙེན་བཀུར་བྱེད་པ་དང ། ། ཆོས་ལ་གུས་པ་དང ། ཐོས་པ་མང་པོས་ཆོག་མི་ཤེས་པ་དང ། གཞན་དག་ལ་ཆོས་ཀྱི་བགོ་བཤའ་བྱེད་པ་དང ། ཟང་ཟིང་མེད་པར་ཆོས་སྟོན་པ་དང ། སྦྱངས་པའི་ཡོན་ཏན་དང ། ཡོ་བྱད་བསྙུངས་པ་རྣམས་མི་གཏོང་བ་དང ། འདོད་པ་ཉུང་བ་དང ། ཆོག་ཤེས་པ་དང ། ང་རྒྱལ་བཅོམ་པ་དང ། ཆོས་མཉན་པ་ལ་རྣ་བ་བླགས་ཏེ་ཉན་པ་དང ། བླ་མ་ལ་གུས་པ་དང ། བཟོད་པ་ལ་གནས་པ་དང ། གནོད་སེམས་ཀྱི་ཐ་བའི་ཉེས་པ་རྣམ་པར་སྤངས་པ་དང ། ཟབ་མོ་སྟོང་པ་ཉིད་ཀྱི་ཆོས་ལ་མོས་པ་དང ། དམིགས་པར་ལྟ་བ་ཐམས་ཅད་རྣམ་པར་སྤངས་པ་དང ། ནང་དུ་ཡང་དག་འཇོག་ལ་འདུན་པ་དྲག་པོ་དང་ལྡན་པ་དང ། སེམས་ཅན་ཡོངས་སུ་སྨིན་པར་བྱ་བ་ལ་མི་གཡེལ་བ་དང ། འདུ་ཤེས་ཟློག་པ་དང ། བྲེ་མོའི་གཏམ་རྣམ་པར་སྤོང་བ་དང ། ལུས་དང ། སེམས་དབེན་པར་གནས་པ་དང ། དགོན་པར་གནས་པ་དང ། སེམས་མཉེན་པ་དང ། ཚུལ་ཁྲིམས་མཆོག་ 456b ཏུ་མི་འཛིན་པ་དང ། བདག་ལ་མི་བསྟོད་པ་དང ། གཞན་ལ་མི་སྨོད་པ་དང ། འགྱོད་པ་ཐམས་ཅད་ལས་ངེས་པར་འབྱུང་བར་བྱེད་པ་དང ། མངོན་པར་འབྱུང་བ་དང ། དགེ་སྦྱོང་གི་ཚུལ་ལ་རྒྱུན་དུ་དགའ་བ་དང ། གསོང་པོར་སྨྲ་བ་དང ། བཞིན་ཁྲོ་གཉེར་མེད་པ་དང ། ཆོས་ཐམས་ཅད་སྐྱེ་བ་མེད་པ་དང ། འགག་པ་མེད་པ་ལ་འཛུད་པ་དང ། ཆོས་ཐམས་ཅད་ནམ་མཁའ་དང་འདྲ་བར་རྟོགས་པ་འདི་ནི་བྱང་ཆུབ་སེམས་དཔའི་བག་ཡོད་པ་ཞེས་བྱའོ། །རྒྱལ་པོ་ཆེན་པོ། གཞན་ཡང ། བྱང་ཆུབ་སེམས་དཔའི་བག་ཡོད་པ་ནི། འདི་ལྟ་སྟེ། ཉན་ཐོས་དང ། རང་སངས་རྒྱས་ཀྱི་སེམས་དང ། དམིགས་པར་ལྟ་བའི་སེམས་ཐ་ན་རྨི་ལམ་དུའང་ཡིད་ལ་མི་བྱེད་པ་སྟེ། རྒྱལ་པོ་ཆེན་པོ། འདི་ནི་བྱང་ཆུབ་སེམས་དཔའི་བག་ཡོད་པའོ། །རྒྱལ་པོ་ཆེན་པོ།་ཆོས་བཞི་དང་ལྡན་པའི་བྱང་ཆུབ་སེམས་དཔའ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ།་མགོ་བོ་དང ། རྐང་ལག་དང ། མིག་དང ། ཡན་ལག་དང ། ཤ་དང ། ཁྲག་དང ། རུས་པ་དང ། རྐང་དང ། ཚིལ་དང ། མདོག་དང ། པགས་པ་དང ། ལུས་ཐམས་ཅད་ཡོངས་སུ་གཏོང་བའང་ཡོངས་སུ་བཏང་མི་དགོས་པར་བདོག་པ་ཐམས་ཅད་ཡོངས་སུ་གཏོང་བར་ཡང་འགྱུར་ལ། ཐེག་པ་བདེ་བས་ཀྱང་བླ་ན་མེད་པ་ཡང་དག་པར་རྫོགས་ 457a ༄#། །པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བཞི་གང་ཞེ་ན། རྒྱལ་པོ་ཆེན་པོ། འདི་ལ་བྱང་ཆུབ་སེམས་དཔའ་ནི་དགེ་བའི་ཆོས་ཡོངས་སུ་བཙལ་བ་ལ་ཡི་དམ་བརྟན་པ་ཡིན་ཏེ། དེ་ནི་དགེ་བའི་རྩ་བ་གང་ཅི་བསྐྱེད་ཀྱང་རུང་སྟེ། དེ་ལ་བརྟན་པོར་གནས་ཤིང་ཞུམ་པ་མེད་པའི་སེམས་དང་ལྡན་ལ་ཐེག་པ་ཆེན་པོ་ལ་ཤིན་ཏུ་བརྟན་ནོ། །རྒྱལ་པོ་ཆེན་པོ། གཞན་ཡང ། བྱང་ཆུབ་སེམས་དཔའ་ནི་ཚུལ་ཁྲིམས་ཀྱི་ཕུང་པོ་ཤིན་ཏུ་ཡོངས་སུ་དགེ་པ། འཕགས་པ་དང ། མཁས་པས་བསྔགས་པ།་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ས་ཡོངས་སུ་ཟིན་པ་དང་ལྡན་པ་ཡིན་ཏེ། དེས་ནི་བདག་ཉིད་ཚུལ་ཁྲིམས་ལ་གནས་པར་རིག་ནས་ཆོས་ཀྱི་དགའ་པ་ཉམས་སུ་མྱོང་ངོ ། །རྒྱལ་པོ་ཆེན་པོ། གཞན་ཡང ། བྱང་ཆུབ་སེམས་དཔའ་ནི་བྱམས་པས་གནས་པ་དང ། བསམ་གཏན་ལ་བསམ་གཏན་པ་དང ། མི་གནས་པའི་བསམ་གཏན་པ་ཡིན་ཏེ། རྒྱལ་པོ་ཆེན་པོ། བྱང་ཆུབ་སེམས་དཔའ་ཏིང་ངེ་འཛིན་ལ་གནས་པ་ཡིད་ལ་བྱེད་པ་དང ། སེམས་ཅན་ཐམས་ཅད་ལ་སྙོམས་པའི་སེམས་དང་ལྡན་པའི་བདེ་བར་གནས་པ་ཅི་འདྲ་བ་དེ་ལྟ་བུའི་བདེ་བའི་རྣམ་པ་གཞན་མེད་དོ། །རྒྱལ་པོ་ཆེན་པོ། གཞན་ཡང ། བྱང་ཆུབ་སེམས་དཔའ་ནི་ཇི་ལྟ་བ་བཞིན་དུ་ཆོས་ལ་རྟོག་ 457b པ་ཡིན་ཏེ། དེ་ནི་འདི་ལྟར་ཇི་ལྟ་བ་བཞིན་དུ་ཡོངས་སུ་རྟོག་སྟེ། འདུ་བྱེད་ཀྱི་རྣམ་པ་འདི་དག་ཐམས་ཅད་ནི་སྟོང་པ་སྟེ། འདི་ལྟར་བདག་གམ། སེམས་ཅན་ནམ། སྲོག་གམ། གང་ཟག་གམ། ཡོངས་སུ་གཏོང་བ་གང་ཡིན་པའམ། ཡོངས་སུ་བཏང་བ་གང་ཡིན་པའམ། ལེན་པ་གང་ཡིན་པའམ། བཟོད་པར་བྱེད་པ་གང་ཡིན་པའམ། གང་ལ་བཟོད་པར་བྱ་བའམ། བཟོད་པར་བྱ་བ་གང་ཡིན་པའམ། རྩོམ་པ་གང་ཡིན་པའམ། གང་གི་ཕྱིར་རྩོམ་པའམ། བསམ་གཏན་བྱེད་པ་གང་ཡིན་པའམ། བསམ་གཏན་དུ་བྱ་བ་གང་ཡིན་པའམ། སྒོམ་པར་བྱེད་པ་གང་ཡིན་པའམ། བསྒོམ་པར་བྱ་བ་གང་ཡིན་པ་གང་ཡང་མེད་དོ་སྙམ་མོ། །དེ་དེ་ལྟར་ཇི་ལྟ་བ་བཞིན་དུ་རྟོག་པ་ན་འདུས་བྱས་ཀྱི་ཆོས་ཐམས་ཅད་རང་བཞིན་གྱིས་སྟོང་པར་རིག་ནས་དམིགས་པར་ལྟ་བ་གང་ལའང་མངོན་པར་ཞེན་པ་མེད་ལ་བདེ་བར་ཡང་གནས་ཏེ། རྒྱལ་པོ་ཆེན་པོ། ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདེ་བ་ཐམས་ཅད་དང་ལྡན་པར་མྱུར་དུ་བལ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །རིགས་ཀྱི་བུ། དེ་ལྟར་རྒྱལ་པོ་གསེར་མདོག་དེས་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་རི་བའི་གོས་ཀྱི་སྦྱིན་པ་དེ་བཞིན་གཤེགས་པ་དེ་ལ་ཕུལ་ 458a ༄#། །ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེ་ལ་འདི་སྐད་ཅེས་གསོལ་ཏོ།། བཅོམ་ལྡན་འདས། སེམས་ཅན་ཐམས་ཅད་ལ་གློ་བ་རྗེ་བའི་སླད་དུ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ་ཞེས་གསོལ་ནས། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བདག་ནི་ཞུམ་པ་མ་མཆིས་སེམས་ཀྱིས་སུ། །མི་མཆོག་སྤྱན་སྔར་ཚིག་ནི་གསོལ་བར་བགྱི། །སེམས་ཅན་ཀུན་ལ་སྙིང་རྗེ་བསྐྱེད་ནས་ཀྱང་།། འདྲེན་པ་སེམས་ནི་བྱང་ཆུབ་གཞོལ་བར་བགྱི། །བདག་ལ་ནམ་ཡང་གཡོ་སྒྱུ་མ་མཆིས་ཏེ། །སྟོབས་བཅུ་ལྡན་པས་བདག་གི་བསམ་པ་མཁྱེན། །ཡོན་ཏན་མངའ་བ་གྲགས་ཆེན་འདྲ་བ་ནི། །ལྷ་མི་གཞན་ལ་བདག་གིས་དབང་མ་མཆིས། །བདག་ནི་སྡུག་རྣམས་སྐྱབས་དང་སྐྱོབ་པ་དང ། །དཔུང་གཉེན་གྱུར་ཏེ་སྡུག་བསྔལ་ཆོས་རྣམས་དགྲོལ། །ཁྱུ་མཆོག་བདག་ཉིད་བདེ་ལ་གནས་ནས་ཀྱང ། །སྲོག་ཆགས་རྣམས་ནི་བདག་གིས་དེ་ལ་དགོད། །འདྲེན་པ་བདེ་གཤེགས་གསུངས་པའི་ཆོས་གང་དག་།དེ་ལ་བདག་ནི་སྤྱད་ཕྱིར་གནས་པར་བགྱི། །འདྲེན་པ་ཇི་ལྟར་ཁྱོད་ནི་ལྷ་མིས་མཆོད། །དེ་ལྟར་བདག་ཀྱང་མི་རྣམས་མཆོད་རྟེན་ཤོག་།བྱང་ཆུབ་ཐམས་ཅད་མཆོག་ནི་ཚོལ་བགྱིད་ཅིང ། །བསྐལ་ 458b པ་མང་པོར་སྦྱིན་པ་བྱིན་པར་བགྱི། །ཟས་སྐོམ་གོས་དང་ཤིང་རྟ་བཞོན་པ་དང ། །གསེར་དངུལ་རིན་ཆེན་དུ་མའི་སྦྱིན་པ་བགྱི། །འདྲེན་པ་བདག་ནི་བསླབ་ལ་གུས་པར་བགྱིད། ། དེ་ནི་ཇི་བཞིན་ཡོངས་སུ་བསྲུང་བར་བགྱི། །ཉམས་པར་མི་བགྱིད་གང་ལའང་གནས་མི་བགྱིད། །འདྲེན་པ་བདག་ནི་ཚུལ་ཁྲིམས་དག་པར་བགྱིད། །སེམས་ཅན་ཀུན་ལ་སྙོམས་པའི་བསམ་པ་ཡིས། །སྲོག་ཆགས་རྣམས་ལ་བྱམས་པའི་སེམས་སུ་བགྱི། །བཀུར་སྟི་བགྱིས་དང་བཀུར་སྟིམ་བགྱིས་ལ། །མཐོ་བར་འགྱུར་དང་དམའ་བར་འགྱུར་མ་མཆིས། ། བསྐལ་པ་བྱེ་བ་མང་པོ་བསམ་ཡས་པར། །བདག་ནི་ཇི་སྲིད་སྔོན་ཆད་འཁོར་བར་གྱུར། །མི་དཔའ་ཁྱོད་ལ་བརྟེན་ནས་དེ་སྲིད་དུ། །སེམས་ཅན་གཅིག་གི་ཕྱིར་ཡང་སྤྲོ་བར་བགྱི།། ལྷ་མིའི་འདྲེན་པ་བདེ་གཤེགས་གསུངས་པ་ཡི། །བསམ་གཏན་བདེ་བ་དེ་ལ་གནས་པར་བགྱི། །འདྲེན་པ་བསམ་གཏན་བདེ་ལ་རེག་གནས་ཤིང ། །རྟག་ཏུ་དགོན་པའི་གནས་སུ་གནས་པར་བགྱི། །བདག་ནི་སྟོང་པ་ཉིད་ལ་ངེས་པར་བགྱི། །ལྟ་བ་ལ་ནི་བརྟེན་པར་ཡོང་མི་བགྱིད། །དམའ་བའི་སྤྱོད་པ་རྟག་ཏུ་རྣམ་པར་སྤང ། །མཆོག་གི་སྤྱོད་པ་དྲི་མེད་སྤྱད་པར་བགྱི། །རིགས་ཀྱི་བུ། དེ་ལྟར་རྒྱལ་པོ་གསེར་མདོག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་མ་ཐག་པ་དེའི་མོད་ལ་སྟོང་གསུམ་གྱི་སྟོང་ཆེན་ 459a ༄#། །པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་སོ། །རྒྱལ་པོ་བརྒྱད་ཁྲི་བཞི་སྟོང་པོ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁྱིམ་བདག་བརྒྱད་ཁྲི་བཞི་སྟོང་པོ་དེ་དག་དང ། ཚོང་དཔོན་བརྒྱད་ཁྲི་བཞི་སྟོང་པོ་དེ་དག་དང ། བུ་དང ། བུ་མོ་དང ། ཆུང་མ་དེ་དག་དང ། གཞན་སྐྱེ་བོའི་ཚོགས་ཆེན་པོ་དེ་དག་དང ། ལྷའི་བུ་བརྒྱད་ཁྲི་བཞི་སྟོང་རྣམས་རྒྱལ་པོ་གསེར་མདོག་དེའི་རྗེས་སུ་སློབ་ཅིང་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ། འདི་ལྟར་རྒྱལ་པོ་གསེར་མདོག་དེས་བུ་ཐུ་བོ་རྒྱལ་པོར་བཅུག་གོ་།བཅུག་ནས་ཀྱང་བུ་རྣམས་དང ། བུ་མོ་རྣམས་དང ། ཆུང་མ་རྣམས་དང ། ཚོང་དཔོན་དང ། ཁྱིམ་བདག་དང ། བློན་པོ་དང ། རྒྱལ་ཕྲན་རྣམས་དང་ལྷན་ཅིག་ཏུ་སྲོག་ཆགས་བྱེ་བས་བསྐོར་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་དག་དེ་ལྟར་རབ་ཏུ་བྱུང་ནས་ལོ་ཁྲིའི་བར་དུ་ཚངས་པར་སྤྱོད་པ་ཡོངས་སུ་དག་པ་ཡོངས་སུ་བྱང་བ་སྤྱད་དོ། །རྒྱལ་པོ་གསེར་མདོག་གིས་ཀྱང་མངོན་པར་ཤེས་པ་བསྒྲུབས་ནས་མང་དུ་ཐོས་པའི་མཐར་ཕྱིན་པར་གྱུར་ཏོ། །བྱམས་པའི་ཏིང་ངེ་འཛིན་ཀྱང་བསྒྲུབས་སོ། །དེ་དགེ་བའི་རྩ་བ་དེ་དང ། ལྷག་པའི་བསམ་པ་ལ་ཡང་དག་པར་ 459b ཞུགས་པ་དེས་འཁོར་ལོས་བསྒྱུར་བའི་རྒྱལ་པོར་གྱུར་པས་སངས་རྒྱས་ཉི་ཁྲི་མཉེས་པར་བྱས་ཏེ། སངས་རྒྱས་བཅོམ་ལྡན་འདས་དེ་དག་ཐམས་ཅད་ལའང་ན་བཟའ་དང ། ཞལ་ཟས་དང ། གཟིམས་ཆ་དང ། གདན་དང ། སྙུན་གྱི་གསོས་སྨན་དང ། ཡོ་བྱད་ཀྱིས་བསྙེན་བཀུར་བྱས། བླ་མར་བྱས་ནས་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་ཐད་དུ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །རིགས་ཀྱི་བུ། དེའི་ཚེ་དེའི་དུས་ན་རྒྱལ་པོ་གསེར་མདོག་ཏུ་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ཚོམ་ཟ་ན། རིགས་ཀྱི་བུ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་དེའི་ཚེ་དེའི་དུས་ན་རྒྱལ་པོ་གསེར་མདོག་ཏུ་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ན་ཚངས་པར་གྱུར་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེ་ལ་མཆོད་པའི་ལས་ལ་བརྩོན་པར་གྱུར་པ་གང་ཡིན་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ཚོམ་ཟ་ན། རིགས་ཀྱི་བུ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྣམ་པར་རྩེ་བ་ཁྱོད་ཉིད་དེའི་ཚེ་དེའི་དུས་ན་ཚངས་པར་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ན་ལྷའི་དབང་པོ་བརྒྱ་བྱིན་ 460a ༄#། །བཅོམ་ལྡན་འདས་གསེར་བཟང་འོད་ལ་བསྙེན་བཀུར་དང ། རིམ་གྲོ་བྱེད་པར་སྤྲོ་བར་གྱུར་པ་གང་ཡིན་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ཚོམ་ཟ་ན། རིགས་ཀྱི་བུ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་ལྷའི་དབང་པོ་བརྒྱ་བྱིན་དུ་གྱུར་ཏེ། བྱང་ཆུབ་ཏུ་སེམས་མ་བསྐྱེད་པར་མི་གནས་པའི་སེམས་ཀྱི་དེ་བཞིན་གཤེགས་པ་དེ་ལ་བསྙེན་བཀུར་བྱས་སོ། །རིགས་ཀྱི་བུ། དེའི་ཚེ་དེའི་དུས་ན་སེམས་ཅན་ཇི་སྙེད་ཀྱིས་རྒྱལ་པོ་གསེར་མདོག་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་གི་ནང་ན་ཐ་ན་སེམས་ཅན་གཅིག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པ་ངས་མ་མཐོང་སྟེ། དེ་དག་ཐམས་ཅད་ནི་ཤེས་རབ་ཆེ་བ་དང ། བརྩོན་འགྲུས་ཆེ་བ་ཤ་སྟག་སྟེ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྒྲུབས་ཤིང ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ནས་སངས་རྒྱས་ཀྱི་ཞིང་ཐ་དད་པ་དག་ཏུ་མཚན་ཐ་དད་པའི་དེ་བཞིན་གཤེགས་པར་གྱུར་ཏེ་འཇིག་རྟེན་དུ་བྱུང་ནས་ཐམས་ཅད་ཀྱིས་ཆོས་ཀྱི་འཁོར་ལོ་བསྐོར་ཏེ། ཆོས་ཀྱི་འཁོར་ལོ་བསྐོར་ནས་ཡོངས་སུ་མྱ་ངན་ལས་འདས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་ 460b པར་རྫོགས་པའི་སངས་རྒྱས་དེ་དག་ཐམས་ཅད་ཀྱང་ང་དང ། ཁྱོད་དང ། བྱང་ཆུབ་སེམས་དཔའ་བྱམས་པ་དང ། འཁོར་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་འདུས་པ་གང་ཡིན་པ་འདི་དག་གིས་ཀྱང་མཐོང་ངོ ། །མཆོད་པ་བྱས་སོ། །བསྙེན་བཀུར་བྱས་སོ། །དེ་བཞིན་གཤེགས་པ་དེ་དག་གི་དམ་པའི་ཆོས་ཀྱང་བཟུང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་ཙམ་དུ་ཡུན་རིང་དུ་ཐོགས་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའང་དེ་ཙམ་དུ་དཀའ་བ་ནི་ངོ་མཚར་ལགས་སོ། །དེ་ཅིའི་སླད་དུ་ཞེ་ན།་དེས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དེ་སྙེད་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེའི་གསུང་རབ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ། བཅོམ་ལྡན་འདས་ཀྱིས་ནི་མ་བསྐྱེད་པའི་སླད་དུའོ། །དེ་སྐད་ཅེས་གསོལ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་ནི་དེ་བཞིན་ཏེ། ཁྱོད་ཇི་སྐད་ཟེར་བ་བཞིན་ 461a ༄#། །དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ནི་ཡུན་རིང་དུ་ཐོགས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའང་དཀའོ། །རིགས་ཀྱི་བུ། ངས་མངོན་པར་ཤེས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་འོད་དེའི་སྔོན་རོལ་དང ། དེའི་འོག་ཏུ་འང་སངས་རྒྱས་མང་པོ་བྱེ་བ་ཁྲག་ཁྲིག་འབུམ་ཕྲག་དག་ལ་ངས་རི་མོ་བྱས། མཆོད་པ་བྱས། བཀུར་སྟི་བྱས། བླ་མར་བྱས་མོད་ཀྱི། དེ་སྲིད་དུ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་དེ་གཞན་དུ་ན་ང་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་འདི་དག་དེ་ཙམ་དུ་མཛེས་ཤིང་དེ་ཙམ་དུ་བལྟ་ན་སྡུག་ལ། དེ་ཙམ་དུ་སྙིང་དུ་སྡུག་པ་ནི་ངོ་མཚར་ཏོ་སྙམ་སྟེ། །དེ་དག་ལ་ངའི་སྡུག་པའི་སེམས་དང ། དགའ་བ་དང ། གུས་པ་བསྐྱེད་པར་ཟད་དེ། ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ནི་སེམས་མ་བསྐྱེད་དོ། །རིགས་ཀྱི་བུ། དེ་བས་ན་རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་དང ། རང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་དང ། ཉན་ཐོས་བྱེ་བ་ཁྲག་ཁྲིག་ 461b འབུམ་ཕྲག་དཔག་ཏུ་མེད་གྲངས་མེད་པ་དག་ལ་བྱང་ཆུབ་སེམས་དཔའ་རྣམས་ཀྱིས་ཇི་ལྟར་མཆོད་པ་བྱས་སུ་ཟིན་ཀྱང་དེ་སྲིད་དུའང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་བསྐྱེད་དེ། གཞན་དུ་ན་ཕྱིས་གང་གི་ཚེ་དགེ་བའི་རྩ་བ་ཡོངས་སུ་འདུས་པར་གྱུར་པ་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་ཟད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དང་པོ་ང་ནི་དོན་དམ་གཟིགས་པ་དང ། །གྲགས་པ་ཆེན་པོ་ཤེས་རབ་ཕ་རོལ་སོན། །མི་མཆོག་སངས་རྒྱས་བྱེ་བ་ཁྲག་ཁྲིག་དང ། །བསམ་ཡས་རྣམས་ལ་གུས་པས་མཆོད་པ་བྱེད། །དང་པོར་ཡོན་ཏན་འབྱུང་གནས་རྣམས་མཆོད་ཀྱང ། །བདག་ནི་མཁས་པ་ཆོས་ཀུན་ཤེས་པའི་མཆོག་།འཇིག་རྟེན་མཆོད་རྟེན་སངས་རྒྱས་གྱུར་ཅིག་ཅེས། །དེ་སྲིད་དུ་ཡང་སེམས་ནི་སྐྱེད་མི་བྱེད། །དེ་དག་རང་རྒྱལ་བྱེ་བ་སྙེད་ལ་ཡང ། །གུས་པ་བསྐྱེད་ནས་མཆོད་པ་བྱེད་མོད་ཀྱི། །མི་འདུལ་ཁ་ལོ་སྒྱུར་བ་རྫོགས་སངས་རྒྱས། །གྱུར་ཅེས་སེམས་ནི་དེ་སྲིད་སྐྱེད་མི་བྱེད། །གུས་པ་རྒྱ་ཆེན་ཡང་དག་བསྐྱེད་ནས་ཀྱང ། །དབང་དུ་གྱུར་པ་བྱེ་སྙེད་མཆོད་མོད་ཀྱི། །ཡེ་ཤེས་རྒྱ་མཚོ་མི་མཆོག་འདྲ་བར་ནི། །དེ་སྲིད་དུ་ཡང་སེམས་ནི་སྐྱེད་མི་བྱེད། །དོན་དམ་གཟིགས་པ་རྣམས་ཀྱི་གཟུགས་མཐོང་ནས། །དགའ་བའི་ཤུགས་ 462a ༄#། །ནི་རྒྱ་ཆེན་བསམ་མི་ཁྱབ། །མཁས་པ་མི་འདུལ་རྫོགས་པའི་སངས་རྒྱས་སུ། །གྱུར་ཅེས་སེམས་ནི་དེ་སྲིད་སྐྱེད་མི་བྱེད། །གང་ཚེ་དེ་དག་བསོད་ནམས་རྒྱ་ཆེན་བསགས། །ལུས་དང་ཡིད་ཀྱིས་བདེན་པ་བསྒོམས་པ་ན། །འདྲེན་པ་མི་རྣམས་མཆོག་ཏུ་གྱུར་ཅིག་ཅེས། །བྱང་ཆུབ་དོན་དུ་སེམས་ནི་སྐྱེད་པར་བྱེད། །དེ་དག་གིས་ནི་བསྐལ་པ་བྱེ་བ་སྙེད། །བསྙེན་བཀུར་བྱས་པས་བསོད་ནམས་ཚོགས་བསགས་ནས། །སེམས་དགེ་བ་དང་འཇམ་ཞིང་མཉེན་པ་ཡིས། །དེ་ཚེ་བྱང་ཆུབ་ཏུ་ཡང་སེམས་བསྐྱེད་དེ། །བདག་གིས་དགེ་བའི་རྩ་བ་གང་བསགས་པ། །དེས་ནི་བདག་ཀྱང་ཐམས་ཅད་གཟིགས་གྱུར་ཅིག་།ནམ་ཡང་བདག་གི་སྨོན་ལམ་ཉམས་མ་གྱུར། །དེ་དག་དེ་སྐད་སྨོན་ལམ་འཇུག་པར་འགྱུར། །བདག་གིས་དགེ་བའི་རྩ་བ་གང་བསགས་པ། །དེས་ནི་སྲོག་ཆགས་ཐམས་ཅད་བརྒལ་གྱུར་ཅིག་།མི་དགེའི་ལས་ནི་བདག་གིས་གང་བྱས་པ། །དེ་ཡི་འབྲས་བུ་མི་ཟད་བདག་གིས་སྤངས། །མཐུ་དང་བརྩོན་འགྲུས་བརྟན་པོ་བསྐྱེད་ནས་ནི། །ཕྱི་ནས་བྱང་ཆུབ་མཆོག་ཏུ་སེམས་ཀྱང་བསྐྱེད། །སེམས་ནི་ནམ་ཡང་ཞུམ་པར་མ་གྱུར་ཅིག་།དགའ་བ་རྒྱ་ཆེན་བསམ་ཡས་ཐོབ་གྱུར་ཅིག་།མཁས་པ་སེམས་ལ་དམིགས་པར་མི་བྱེད་དེ། །བྱང་ཆུབ་མི་དམིགས་བདག་ཉིད་ 462b ཀུན་མི་དམིགས། །ཆོས་འདི་མཐའ་དག་སྟོང་པར་ཤེས་ན་ནི། །དེས་ན་བྱང་ཆུབ་སེམས་ནི་བརྗེད་མི་འགྱུར། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ། བྱམས་པ་ཞེས་བགྱི། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདིས་མིང་འདི་ག་ལས་རྙེད་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡུན་རིང་པོ་ཚད་མེད་པ་འདས་པ་དེའི་ཚེ་དེའི་དུས་ན། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གདུགས་ཞེས་བྱ་བ་འཇིག་རྟེན་དུ་བྱུང་སྟེ། རིགས་ཀྱི་བུ། དེ་བཞིན་གཤེགས་པ་རིན་ཆེན་གདུགས་དེ་བཙས་མ་ཐག་ཏུ་གོམ་པ་བདུན་པོར་བ་ན་གནས་ 463a ༄#། །གཙང་མའི་རིས་ཀྱི་ལྷ་རྣམས་ཀྱིས་སྟེང་གི་བར་སྣང་ལ་རིན་པོ་ཆེ་སྣ་བདུན་གྱི་གདུགས་བཟུང་ངོ ། །རིན་པོ་ཆེའི་གདུགས་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་སོ། །དེར་ལྷ་རྣམས་ཀྱིས་ཀྱེ་མ་འདི་ནི་དེ་བཞིན་གཤེགས་པ་རིན་ཆེན་གདུགས་ཞེས་བྱ་བར་འགྱུར་རོ་ཞེས་སྒྲ་བསྒྲགས་ཏེ།་དེས་ན་དེ་བཞིན་གཤེགས་པ་དེའི་མཚན་རིན་ཆེན་གདུགས་རིན་ཆེན་གདུགས་ཞེས་བྱ་བར་གྱུར་ཏོ། །དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གདུགས་དེའི་གསུང་རབ་ལ་དགེ་སློང་བློ་གྲོས་བརྟན་པོ་ཞེས་བྱ་བ་ཚོང་དཔོན་གྱི་རིགས་ལས་རབ་ཏུ་བྱུང་བ་ཞིག་ཡོད་དེ། རིགས་ཀྱི་བུ། དགེ་སློང་བློ་གྲོས་བརྟན་པོ་དེ་བསོད་སྙོམས་པར་གྱུར་ཏོ། །དེའི་ཚེ་དེའི་དུས་ན་དེ་བཞིན་གཤེགས་པ་རིན་ཆེན་གདུགས་དེའི་བསྟན་པ་ལ་བབ་པ་ན་ཛམྦུའི་གླིང་དེ་ན་གྲོང་བརྒྱད་ཁྲི་བཞི་སྟོང་ཡོད་དོ། །གྲོང་ཁྱེར་བརྒྱད་ཁྲི་བཞི་སྟོང་ཡོད་དོ། །གྲོང་རྡལ་བརྒྱད་ཁྲི་བཞི་སྟོང་ཡོད་དོ། །ཡུལ་འཁོར་བརྒྱད་ཁྲི་བཞི་སྟོང་ཡོད་དོ། །ཚོང་འདུས་བརྒྱད་ཁྲི་བཞི་སྟོང་ཡོད་དོ། །དགེ་སློང་བློ་གྲོས་བརྟན་པོ་དེའང་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། ཚོང་འདུས་དེ་དག་ཐམས་ཅད་དུ་བསོད་སྙོམས་ཀྱི་ཕྱིར་རྒྱུ་ 463b བར་གྱུར་ལ། དེ་འདི་སྙམ་དུ་སེམས་ཏེ། ནམ་སྲོག་ཆགས་བརྒྱ་ཚང་བར་བསླབ་པའི་གཞི་ལྔ་ལ་མ་བཀོད་ཀྱི་བར་དུ་བདག་གིས་ཟན་མི་བཟའོ་སྙམ་མོ། །རིགས་ཀྱི་བུ། འདི་ལྟར་དགེ་སློང་བློ་གྲོས་བརྟན་པོ་དེས་དེ་ལྟ་བུའི་ཡི་དམ་དེ་བཅས་ནས་གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་འཁོར་རམ། ཚོང་འདུས་གང་དང ། གང་དུ་བསོད་སྙོམས་ཀྱི་ཕྱིར་རྒྱུ་བ་དེ་དང ། དེར་ནམ་སྲོག་ཆགས་བརྒྱ་ཚང་བར་བསླབ་པའི་གཞི་ལྔ་ལ་མ་བཀོད་ཀྱི་བར་ཟན་མི་ཟའོ། །རིགས་ཀྱི་བུ། དགེ་སློང་བློ་གྲོས་བརྟན་པོ་དེས་གང་གི་ཚེ་ཉི་མ་གཅིག་གིས་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང ། དེའི་སྐབས་ཀྱང་ཡོད་དོ། །གང་གི་ཚེ་ཉི་མ་གཉིས་ཀྱིས་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང ། དེའི་སྐབས་ཀྱང་ཡོད་དེ། དེས་ཟན་བཅད་ནས་ཉི་མ་གསུམ་པའི་ཚེ་ཟན་ཟའོ། །གང་གི་ཚེ་ཉི་མ་གསུམ་གྱིས་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང ། དེའི་སྐབས་ཀྱང་ཡོད་དོ། །ཉི་མ་བཞིས་སྲོག་ཆགས་བརྒྱ་ཚང་བར་བསླབ་པའི་གཞི་ལྔ་ལ་བཀོད་པ་དེའི་དུས་དང ། དེའི་སྐབས་ཀྱང་ཡོད་དོ། །རིགས་ཀྱི་བུ། གང་གི་ཚེ་ཉི་མ་ལྔ་དང ། དྲུག་དང ། བདུན་གྱིས་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང ། དེའི་སྐབས་ཀྱང་ཡོད་དེ། དེ་ཞག་བདུན་གྱི་བར་དུ་ཟན་ཆད་ཀྱང་སེམས་ཅན་རྣམས་ལ་སྙིང་རྗེ་བའི་ 464a ༄#། །ཕྱིར་སེམས་ཡོངས་སུ་མི་སྐྱོ་སྟེ་ཞག་བརྒྱད་པའི་ཚེ་ཟན་ཟའོ། །རིགས་ཀྱི་བུ། རྣམ་གྲངས་དེ་ལྟ་བུས་དགེ་སློང་བློ་གྲོས་བརྟན་པོ་དེས་ལོ་བརྒྱད་ཁྲི་བཞི་སྟོང་གི་བར་དུ་ཡོངས་སུ་མི་སྐྱོ་བའི་སེམས་ཀྱིས་གྲོང་ཁྱེར་ཆེན་པོ་དེ་དག་ཏུ་སོང་ཞིང་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། ཚོང་འདུས་དེ་དག་ཏུ་སོང་ནས་སེམས་ཅན་དེ་དག་བསླབ་པའི་གཞི་ལྔ་ལ་བཀོད་དོ། །རིགས་ཀྱི་བུ། དགེ་སློང་བློ་གྲོས་བརྟན་པོ་དེས་ལོ་བརྒྱད་ཁྲི་བཞི་སྟོང་པོ་དེ་དག་འདས་ནས་སྲོག་ཆགས་སྐྱེས་པ་དང།་བུད་མེད་དང ། ཁྱེའུ་དང ། བུ་མོ་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་བསླབ་པའི་གཞི་ལྔ་ལ་བཀོད་དོ། །རིགས་ཀྱི་བུ། འདི་ལྟར་དགེ་སློང་བློ་གྲོས་བརྟན་པོ་དེ་འདི་སྙམ་དུ་སེམས་ཏེ། བདག་གིས་སེམས་ཅན་མང་པོ་འདི་དག་བསླབ་པའི་གཞི་ལྔ་ལ་བཀོད་ཟིན་གྱི། བདག་གིས་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཟུད་གོར་མ་ཆག་གོ་སྙམ་སྟེ། དེ་དེ་དག་གི་ཐད་དུ་སོང་ནས་ལོ་བཞི་ཁྲི་ཉིས་སྟོང་གི་བར་དུ་སངས་རྒྱས་ཀྱི་བསྔགས་པ་བརྗོད་དོ། །ཆོས་ཀྱི་བསྔགས་པ་བརྗོད་དོ། །དགེ་འདུན་གྱི་བསྔགས་པ་བརྗོད་དོ། །ཐེག་པ་ཆེན་པོའི་བསྔགས་པ་བརྗོད་དོ། །སེམས་ཅན་བསླབ་པའི་གཞི་ལྔ་ལ་བཀོད་པ་གང་ཡིན་པའི་སེམས་ཅན་དེ་དག་གི་ནང་ནས་ལོ་ 464b བརྒྱད་ཁྲི་བཞི་སྟོང་པོ་གཞན་འདས་ནས་སྲོག་ཆགས་བྱེ་བ་ཕྲག་སུམ་ཅུ་ཚང་བ་གང་དག་སྔོན་གྱི་སངས་རྒྱས་རྣམས་ལ་དགེ་བའི་རྩ་བ་བསྐྱེད་པ་རྒྱ་ཆེན་པོ་ལ་མོས་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཙུད་དོ། །ལྷག་མ་དམན་པ་ལ་མས་པ་རྐྱེན་གྱི་མཐུ་དང་ལྡན་པ་དེ་དག་ནི་རང་སངས་རྒྱས་ཀྱི་བྱང་ཆུབ་དང ། ཉན་ཐོས་ཀྱི་ཐེག་པ་ལ་སེམས་བསྐྱེད་དུ་བཅུག་གོ་།རིགས་ཀྱི་བུ། འདི་ལྟར་དགེ་སློང་བློ་གྲོས་བརྟན་པོ་དེ་འདི་སྙམ་དུ་སེམས་ཏེ། བདག་གིས་སེམས་ཅན་འདི་དག་ཐེག་པ་གསུམ་པོ་ལ་མོས་པར་བྱས་ཟིན་གྱི ། བདག་གིས་སེམས་ཅན་འདི་དག་བག་ཡོད་པར་གནས་པར་བྱ་བའི་ཕྱིར་ཏིང་ངེ་འཛིན་འདི་ལ་གཟུད་པ་བསྟན་ཏོ་སྙམ་མོ། །རིགས་ཀྱི་བུ། དེ་ལྟར་དགེ་སློང་བློ་གྲོས་བརྟན་པོ་དེས་ཡང་ལོ་ཉི་ཁྲི་ཆིག་སྟོང་གི་བར་དུ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་པོ་དེ་དག་ལ་ཏིང་ངེ་འཛིན་ལ་དམིགས་པའི་ལུང་ཕོག་གོ་།རིགས་ཀྱི་བུ། དགེ་སློང་བློ་གྲོས་བརྟན་པོ་དེས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་པོའི་སེམས་ཅན་དེ་དག་ཐམས་ཅད་ཅི་ནས་བྱམས་པའི་ཏིང་ངེ་འཛིན་སྒྲུབ་པར་འགྱུར་བ་དེ་ལྟ་དེ་ལྟ་བུར་གདམས་ངག་བསྟན་ཅིང ། དེ་ལྟ་དེ་ལྟ་བུར་རྗེས་སུ་སྟོན་ཏོ། །རིགས་ཀྱི་བུ། འདི་ལྟར་དགེ་སློང་བློ་གྲོས་བརྟན་པོ་དེ་གང་གི་ཚེ་གྲོང་དུ་འགྲོ་བ་དེའི་ཚེ་བྱམས་པའི་ཏིང་ངེ་འཛིན་ལ་སྙོམས་པར་ 465a ༄#། །ཞུགས་ཏེ་འགྲོའོ། །དེ་བྱམས་པའི་ཏིང་ངེ་འཛིན་ལ་སྙོམས་པར་ཞུགས་ནས་གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་འཁོར་རམ། ཚོང་འདུས་སུ་བསོད་སྙོམས་ཀྱི་ཕྱིར་འགྲོ་སྟེ། དེ་འགྲོ་བ་ན་སེམས་ཅན་བྱམས་པ་ལ་གནས་པ་གང་ཡིན་པ་དེ་དག་ཐམས་ཅད་དགེ་སློང་བློ་གྲོས་བརྟན་པོ་དེའི་རྐང་པ་སྒོའི་ཐེམ་པ་ལ་བཞག་པའི་ཚེ་བྱམས་པའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ། །རིགས་ཀྱི་བུ། ལྷག་པའི་བསམ་པ་དང ། དགེ་བའི་རྩ་བ་ལ་ཡིད་ཆེས་པ་དང ། སྟོང་པ་ཉིད་ལ་མོས་པའི་ཁྱད་པར་ལ་ལྟོས། དེའི་ཕྱིར་དགེ་སློང་བློ་གྲོས་བརྟན་པོའི་རྐང་པ་སྒོའི་ཐེམ་པ་ལ་བཞག་པའི་ཚེ་སེམས་ཅན་དེ་དག་ཐམས་ཅད་བྱམས་པའི་ཏིང་ངེ་འཛིན་ལ་ཇི་ལྟར་བཙུད་པ་བཞིན་དུ་བྱམས་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་དེའི་ཚེ་དགེ་སློང་བློ་གྲོས་བརྟན་པོ་དེའི་བྱམས་པའི་ཏིང་ངེ་འཛིན་གྱི་རྣམ་པར་འཕྲུལ་པ་དེ་ལྟ་བུ་མཐོང་ནས་ས་བླ་བའི་ལྷ་རྣམས་ཀྱིས། ཨ་ལ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བྱམས་པར་འགྱུར་ཏེ། འདི་ལྟར་འདི་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། ཚོང་འདུས་སུ་འགྲོ་བ་ན་སེམས་ཅན་རྣམས་བྱམས་པའི་ཏིང་ངེ་འཛིན་ལ་སྙོམས་པར་འཇུག་པའི་ཕྱིར་རོ་ཞེས་སྒྲ་སྒྲོགས་ཤིང་སྐད་འབྱིན་ 465b པར་བྱེད་དོ། །ས་བླ་བའི་ལྷ་རྣམས་ཀྱི་སྒྲ་ཐོས་ནས་བར་སྣང་གི་ལྷ་རྣམས་ཀྱིས་སྒྲ་བསྒྲགས་ཤིང་སྐད་ཕྱུང་ངོ ། །དེ་དག་གིས་སྒྲ་ཐོས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་དང ། སུམ་ཅུ་རྩ་གསུམ་པའི་ལྷ་རྣམས་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་ནས་གནས་གཙང་མའི་ལྷ་རྣམས་ཀྱི་བར་དུ་གཅིག་ནས་གཅིག་ཏུ་སྒྲ་ཐོས་ནས། ཨ་ལ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བྱམས་པར་འགྱུར་ཏེ། འདི་ལྟར་འདི་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། ཚོང་འདུས་སུ་སོང་བ་ན་སེམས་ཅན་རྣམས་བྱམས་པའི་ཏིང་ངེ་འཛིན་ལ་སྙོམས་པར་ཞུགས་པའི་ཕྱིར་རོ་ཞེས་སྒྲ་བསྒྲགས་ཤིང་སྐད་ཕྱུང་ངོ ། །དེའི་མིང་དེ་ལའང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གདུགས་དེས་རྗེས་སུ་ཡི་རང་བར་མཛད་དེ། འདི་སྐད་དུ། བྱང་ཆུབ་སེམས་དཔའ་དགེ་སློང་བློ་གྲོས་བརྟན་པོ་འདི་ནི་སྲིད་པར་འགྲོ་བའི་འཆི་འཕོ་དང ། སྐྱེ་བ་ཐམས་ཅད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བར་འགྱུར་ཏེ་མངོན་པར་གྲགས་པར་འགྱུར་རོ། །བྱང་ཆུབ་ཐོབ་པའི་ཚེའང་འདིའི་མིང་དེ་ཉིད་དུ་འགྱུར་ཏེ་འཇིག་རྟེན་དུ་ཉན་ཐོས་ཀྱི་དགེ་འདུན་དཔག་ཏུ་མེད་པ་དང ། རིན་པོ་ཆེ་བཀོད་པའི་སངས་ 466a ༄#། །རྒྱས་ཀྱི་ཞིང་གི་བདེ་བ་ཐམས་ཅད་དང་ལྡན་པའི་སེམས་ཅན་རྣམས་འདུས་པའི་ནང་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །རིགས་ཀྱི་བུ། དེའི་ཚེ་དེའི་དུས་ན་དགེ་སློང་བློ་གྲོས་བརྟན་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ཚོམ་ཟ་བར་སྲིད་དེ། དེ་ཚུན་ཆད་ཚེ་རབས་ཐམས་ཅད་དུ་མིང ། འདི་ལྟ་སྟེ། བྱམས་པ་ཞེས་བྱ་བ་འབའ་ཞིག་ཏུ་གྱུར་ཏོ། །བྱང་ཆུབ་ཐོབ་པའི་ཚེའང་འདིའི་མིང ། འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བ་དེ་ཁོ་ནར་འགྱུར་ཏེ། རིགས་ཀྱི་བུ། རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ཏེ། དེས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བྱམས་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སྔོན་བྱུང་བ་འདི་བཤད་མ་ཐག་པ་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །སྟེང་གི་བར་སྣང་ལའང་ལྷའི་གླུ་དབྱངས་གྲག་གོ་།མེ་ཏོག་གི་ཆར་ཡང་བབ་བོ། །དེ་ནས་དེའི་ཚེ་རྒྱལ་བོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་ 466b དང།་གཞན་ཡང ། ལྷའི་བུ་འབུམ་ཕྲག་དུ་མ་དག་གིས་ལྷའི་མེ་ཏོག་མནད་ར་བ་དག་ཁྱེར་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ག་ལ་བ་དེར་གཏོར་ཏོ། །ཚིག་འདི་སྐད་དུ། ཀྱེ་མ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ནི་སྐྱེ་བོ་མང་པོ་ལ་ཕན་པའི་ཕྱིར་ཞུགས་ཏེ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང ། མི་རྣམས་ཀྱི་སྐྱེ་བོ་ཕལ་པོ་ཆེའི་དོན་དང ། ཕན་པ་དང ། བདེ་བའི་ཕྱིར་གོ་ཆ་ཆེན་པོ་བགོས་ཏེ། འདི་ལྟར་ཐམས་ཅད་མཁྱེན་པ་ཉིད་མ་ཐོབ་པར་ཡང་སེམས་ཅན་བྱེ་བ་ཁྲག་ཁྲིག་འབུམ་ཕྲག་དེ་སྙེད་ཀྱི་དོན་བྱས་པའི་ཕྱིར་རོ། །སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་མིང་ཙམ་ཐོས་པ་དེ་དག་ཀྱང་རྙེད་པའི་མཆོག་ལེགས་པར་རྙེད་པ་ཡིན། ཤའི་མིག་གིས་མངོན་སུམ་དུ་མཐོང་ནས་དགའ་བ་ཐོབ་པ་དེ་དག་ལྟ་ཅི་སྨོས། བཙུན་པ་བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བདག་ཅག་ཕྱག་འཚལ་ལོ་ཞེས་སྨྲས་སོ། །དེ་ནས་ལྷའི་བུ་དེ་དག་གིས་ཚིག་དེ་སྐད་ཅེས་སྨྲས་མ་ཐག་པ་དེའི་མོད་ལ་སྐྱེ་བོའི་ཚོགས་ཆེན་པོ་དང་བཅས། ལྷ་དང ། མི་དང།་ལྷ་མ་ཡིན་དང་བཅས་པའི་འཇིག་རྟེན་གྱིས་ཚིག་མཐུན་པར། ཚིགས་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ 467a ༄#། །སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ། །ཕྱག་འཚལ་ལོ་ཞེས་སྨྲས་སོ། །ཆོས་ཀྱི་རྣམ་གྲངས་འདི་བསྟན་པ་ན་སྲོག་ཆགས་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དགེ་སློང་ལྔ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲོག་ཆགས་སྟོང་ཕྲག་དུ་མ་ནི་དགེ་བའི་རྩ་བ་ཡོངས་སུ་སྨིན་པར་གྱུར་ཏེ། དེ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་འཁོར་འདུས་པ་གཉིས་པ་ལ་དགྲ་བཅོམ་པ་མངོན་སུམ་དུ་བྱེད་པར་འགྱུར་རོ་ཞེས་དེ་དག་ཀྱང་བཅོམ་ལྡན་འདས་ཀྱིས་ལུང་བསྟན་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདིའི་མིང་བྱམས་པའི་དང་པོ་སེམས་ 467b བསྐྱེད་པ་ཞེས་བྱ་བར་ཟུངས་ཤིག་།བྱང་ཆུབ་སེམས་དཔའ་རྣམ་པར་རྩེ་བས་ཞུས་པ་ཞེས་བྱ་བར་ཡང་ཟུངས་ཤིག་།བྱང་ཆུབ་སེམས་དཔའ་ལུང་བསྟན་པ་ཞེས་བྱ་བར་ཡང་ཟུངས་ཤིག།་དེ་བཞིན་གཤེགས་པའི་ཕྱག་རྒྱ་བསྟན་པ་ཞེས་བྱ་བར་ཡང་ཟུངས་ཤིག་།བྱང་ཆུབ་སེམས་དཔའི་སྒོ་སོ་སོ་བ་ཞེས་བྱ་བར་ཟུངས་ཤིག་།ཀུན་དགའ་བོ། ཆོས་ཀྱི་རྣམ་གྲངས་འདི་གཟུང་བའི་ཕྱིར་དང ། གཞན་དག་ལའང་རྒྱས་པར་ཡང་དག་པར་བསྟན་པར་བྱ་བའི་བར་གྱི་ཕྱིར་ཁྱོད་ལ་གཏད་དོ། །ཀུན་དགའ་བོ། རིགས་ཀྱི་བུའམ། རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་གང་བར་བྱས་ཏེ། དེ་བཞིན་གཤེགས་པ་རྣམས་ལ་ཕུལ་བ་བས་ནི་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་དང་པོ་འཇུག་པ་འདི་ཐོས་ནས་སེམས་ཀྱི་རྒྱུད་བྱང་ཆུབ་ཏུ་གཞོལ་བ་དང ། བྱང་ཆུབ་ཏུ་སྨོན་པས་མོས་པར་བྱེད་དམ། འཛིན་ཏམ། འཆང་ངམ། ཀུན་ཆུབ་པར་བྱེད་དམ། སྒོམ་མམ། གཞན་དག་ལ་རྒྱས་པར་ཡང་དག་པར་སྟོན་པར་བྱེད་ན་འདི་ནི་དེ་བས་ཆེས་བསོད་ནམས་མང་དུ་བསྐྱེད་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །མི་ལུས་འཐོབ་པ་རྙེད་པར་དཀའ། །སངས་རྒྱས་འབྱུང་བའང་རྙེད་པར་དཀའ། །སངས་རྒྱས་དད་པ་རྙེད་པར་དཀའ། །བྱང་ཆུབ་སེམས་ 468a ༄#། །ཀྱང་རྙེད་པར་དཀའ། །གནས་སྐབས་བཞི་པོ་འདི་དག་ནི། །བསྐལ་པ་བྱེ་བར་རྙེད་དཀའ་སྟེ། །དེ་ཕྱིར་ཐོབ་ནས་མ་སྤངས་ཤིག་།མཐུ་རྩལ་དག་ཀྱང་ཆུད་མ་གཟན། །མི་ལུས་ཐོབ་པ་རྙེད་པ་དང ། །སངས་རྒྱས་འབྱུང་བ་རྙེད་པ་དང ། །སངས་རྒྱས་དད་པའང་རྙེད་པ་དང ། །བྱང་ཆུབ་སེམས་ནི་བསྐྱེད་གྱུར་ན། །དེ་ཕྱིར་བརྩོན་འགྲུས་བསྐྱེད་ནས་ཀྱང ། །རྟག་ཏུ་བག་ནི་ཡོད་པར་གྱིས། །དྲང་སྲོང་ཆེན་པོ་དེ་དག་གིས། །བག་ཡོད་པས་ནི་བྱང་ཆུབ་བརྙེས། །སངས་རྒྱས་ཆོས་རྣམས་ཐམས་ཅད་ཀྱི། །རྩ་བའི་སྒོ་དང་ཚུལ་གྱི་ལམ། །བག་ཡོད་པ་དང་བརྩོན་འགྲུས་ཡིན། །མཁས་པ་རྣམས་ཀྱང་འདི་ལ་སློབས། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་རྣམ་པར་རྩེ་བ་དང ། བྱང་ཆུབ་སེམས་དཔའ་བྱམས་པ་དང ། ཐམས་ཅད་དང་ལྡན་པའི་འཁོར་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ།་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བྱམས་པ་འཇུག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཝརྨ་དང ། ཛི་ན་མི་ཏྲ་དང ། སུ་རེནྡྲ་བོ་དྷི་དང ། ཞུས་ཆེན་གྱི་ལོཙྪ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། |