།།རྒྱ་གར་སྐད་དུ། 356b ཱརྱ་ཙནྡྲོཏྟ་རཱ་དཱ་རི་ཀཱ་བྱཱ་ཀ་ར་ཎ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བུ་མོ་ཟླ་མཆོག་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ཅན་ན་ཚལ་ཆེན་པོའི་ཁང་པ་བརྩེགས་པའི་གནས་ན། དགྲ་བཅོམ་པ་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་ཅང་ཤེས་ཀྱི་སེམས་དང་ལྡན་པ། བྱ་བ་བྱས་པ། བྱེད་པ་བྱས་པ།་ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་སོན་པ་ཤ་སྟག་དང་ཐབས་གཅིག་ཏུ་བཞུགས་སོ། །བྱང་ཆུབ་སེམས་དཔའ་བརྒྱ་སྟོང་ཐམས་ཅད་ཀྱང་མངོན་པར་ཤེས་པས་མངོན་པར་ཤེས་པ། གཟུངས་ཐོབ་པ། སྤོབས་པ་ཐོགས་པ་མེད་པ། ཏིང་ངེ་འཛིན་ཐོབ་པ། མི་སྐྱེ་བའི་ཆོས་ལ་བཟོད་པ་ཐོབ་པ། མངོན་པར་ཤེས་པ་ལྔ་དང་ལྡན་པ།་ཚིག་ཐོགས་པ་མེད་པ། ཚུལ་འཆོས་པ་མེད་པ། ཁ་གསག་མེད་པ། ཤེས་ཀྱི་ཁེ་འདོད་པའི་སེམས་དང་བྲལ་བ། ཟང་ཟིང་མེད་པར་ཆོས་སྟོན་པ། ཆོས་ 357a ༄#། །ཟབ་མོ་ལ་བཟོད་པ་དམ་པའི་ཕ་རོལ་ཏུ་སོན་པ། མི་འཇིགས་པ་དང་ལྡན་པ། བདུད་ཀྱི་ལས་ལས་ཡང་དག་པར་འདས་པ། ལས་ཀྱི་སྒྲིབ་པ་སྤངས་པ། ཆོས་ཀྱི་རང་བཞིན་ལ་ཐེ་ཚོམ་མེད་པ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་པར་སྨོན་ལམ་ཤིན་ཏུ་བརྩམས་པ། བཞིན་འཛུམ་པ། ཁྲོ་གཉེར་མེད་པ། ཚིགས་སུ་བཅད་པའི་དབྱངས་ཀྱིས་སྨྲ་བ་ལ་མཁས་པ། སེམས་ཡོངས་སུ་མ་གཏུགས་པ། སྤོབས་པ་རྒྱུན་མི་འཆད་པ། ཆོས་མཉམ་པ་ཉིད་ལ་བཟོད་པ་ཐོབ་པ། མི་འཇིགས་པ་ཆེན་པོས་འཁོར་མཐའ་ཡས་པ་ཟིལ་གྱིས་གནོན་པ། ཚིག་གཅིག་གིས་བསྐལ་པ་བྱེ་བ་ཁྲག་ཁྲིག་འབུམ་ཕྲག་གཅིག་ཏུ་སྟོན་པའི་ཡེ་ཤེས་ལ་མཁས་པ། འདས་པ་དང ། མ་འོངས་པ་དང ། ད་ལྟར་བྱུང་བའི་ཆོས་ཐམས་ཅད་སྒྱུ་མ་དང ། སྨིག་སྒྱུ་དང ། ཆུ་ཟླ་དང ། རྨི་ལམ་དང ། མིག་ཡོར་དང ། བྲག་ཅ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང ། དབེན་པ་དང ། གཡོ་བ་མེད་པ། གཟུང་བ་མེད་པ། ནམ་མཁའི་ངོ་བོ་ཉིད་ལྟ་བུར་མོས་པ། ཤེས་རབ་དང ། ཡེ་ཤེས་ཚད་མེད་པ་ལ་མཁས་པ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཤེས་པ་ལ་མཁས་པ། 357b སེམས་ཅན་གྱི་མོས་པ་ཇི་ལྟ་བ་བཞིན་དུ་ཆོས་སྟོན་པ། སེམས་ཐོགས་པ་མེད་པ་ཆོས་ལ་སྲེད་པ་དང་བྲལ་བ། ཉེ་བའི་ཉོན་མོངས་པ་མེད་པའི་བཟོད་པ་དང་ལྡན་པ། ཆོས་ཇི་ལྟ་བ་བཞིན་དུ་ཤེས་པ་ལ་མཁས་པ། སངས་རྒྱས་ཀྱི་ཞིང་མཐའ་ཡས་པའི་ཡོན་ཏན་བཀོད་པ་ཡོངས་སུ་ཟིན་པ། སངས་རྒྱས་རྗེས་སུ་དྲན་པའི་ཏིང་ངེ་འཛིན་རྟག་པར་རྒྱུན་དུ་མངོན་དུ་གྱུར་པ། སངས་རྒྱས་དཔག་ཏུ་མེད་པ་ལ་གསོལ་བ་འདེབས་པ་ཤེས་པ་ལ་མཁས་པ། ཀུན་ནས་ལྡང་བ་དང ། ལྟ་བ་དང ། ཉོན་མོངས་པ་དང ། བག་ལ་ཉལ་སྣ་ཚོགས་སྤོང་བ་ལ་མཁས་པ། ཏིང་ངེ་འཛིན་དང ། སྙོམས་པར་འཇུག་པ་ཐམས་ཅད་ཀྱིས་རྣམ་པར་རྩེ་བའི་མངོན་པར་ཤེས་པའི་ཤེས་པ་ལ་མཁས་པ་ཤ་སྟག་ལ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་པོ་ཐོབ་པ་དང ། འབྱུང་དཀའ་དང ། སྤོས་ཀྱི་གླང་པོ་དང ། བརྩོན་པ་མི་གཏོང་དང ། ཉི་མའི་སྙིང་པོ་དང ། གཟུངས་ཀྱི་དབང་ཕྱུག་རྒྱལ་པོ་དང ། སྤོས་ཀྱི་འོད་ཟེར་རབ་ཏུ་གཏོང་བ་དང ། འབྲུག་སྒྲ་དང ། གསེར་འོད་རྣམ་པར་ངེས་པའི་རྒྱལ་པོ་དང ། སྲེད་མེད་ཀྱི་བུ་དང ། ལག་ན་རིན་པོ་ཆེ་དང ། ལག་ན་ཕྱག་རྒྱ་རིན་པོ་ཆེ་དང ། 358a ༄#། །ནམ་མཁའ་མཛོད་དང ། སྣང་བའི་རྒྱལ་པོ་དང ། མཐོང་དགའ་དང ། སེམས་ཅན་སྒྲོལ་དང ། རྟག་ཏུ་བརྩོན་དང ། རྟག་ཏུ་རྒོད་དགའ་དབང་ཕྱུག་དང ། ངན་སོང་སྤོང་དང ། རྡོ་རྗེའི་གནས་རྣམ་པར་གནོན་པ་དང ། འཇིག་རྟེན་གསུམ་གྱི་གནས་རྣམ་པར་གནོན་པ་དང ། མི་གཡོ་བའི་གནས་རྣམ་པར་གནོན་པ་དང ། མཐོང་བ་དོན་ཡོད་དང ། དཔལ་གྱི་སྙིང་པོ་དང ། པདྨའི་དཔལ་དང ། བལ་གླང་སྤོས་ཀྱི་གླང་པོ་ཆེ་དང ། སྤོབས་པ་ཟབ་མོ་དང ། སྤོབས་པ་ཆེན་པོ་དང ། ཆོས་འཕགས་དང ། ཆོས་ཀྱི་རང་བཞིན་ཐེ་ཚོམ་མེད་པ་དང ། སེངྒེའི་སྟབས་སུ་འགྲོ་བ་དང ། འཇིགས་པ་ཀུན་སེལ་དང ། སྒྲིབ་པ་ཐམས་ཅད་རྣམ་པར་སེལ་བ་དང ། སེངྒེ་ཆེན་པོ་མངོན་པར་སྒྲོག་པའི་སྒྲ་དང ། བརྗོད་མེད་དང ། སྤོབས་པ་བརྩེགས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་བརྒྱད་སྟོང་དང་ཡང་ཐབས་གཅིག་གོ། དེ་ནས་བཅོམ་ལྡན་འདས་ལ་རྒྱལ་པོ་རྣམས་དང ། སྣ་ཆེན་པོ་ལ་གཏོགས་པ་རྣམས་དང ། གྲོང་ཁྱེར་དང ། ལྗོངས་ཀྱི་མི་རྣམས་དང ། ཞབས་འབྲིང་གཉུག་མ་རྣམས་དང ། བྲམ་ཟེ་དང ། རྒྱལ་རིགས་དང ། ཁྱིམ་ 358b བདག་རྣམས་ཀྱིས་བཀུར་སྟིར་བྱས། བླ་མར་བྱས། རི་མོར་བྱས། མཆོད་པ་བྱས་ཏེ། ཡངས་པ་ཅན་གྱི་གྲོང་ཁྱེར་ཆེན་པོ་ན་ཚལ་ཆེན་པོའི་ཁང་པ་བརྩེགས་པའི་གནས་ན་བཞུགས་སོ། །དེའི་ཚེ་ཡངས་པ་ཅན་གྱི་གྲོང་ཁྱེར་ཆེན་པོ་ན་ལི་ཙ་བཱི་དྲི་མ་མེད་པར་གྲགས་པ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ལོངས་སྤྱོད་མང་བ།་མཛོད་དང ། བང་བ་མང་བ་ཞིག་གནས་ཏེ། དེ་ལ་ཆུང་མ་དྲི་མེད་མ་ཞེས་བྱ་བ་མཛེས་པ། བལྟ་ན་སྡུག་པ། ཁ་དོག་བཟང་པོ། རྒྱས་པ་མཆོག་དང་ལྡན་པ་ཞིག་ཡོད་དེ།་ཟླ་བ་དགུ་འདས་པ་དང ། དེ་ལས་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང ། ཉིང་ལག་ཐམས་ཅད་ལེགས་པར་རྫོགས་པ་ཞིག་བཙས་སོ། །བུ་མོ་དེ་བཙས་མ་ཐག་ཏུ་ཁྱིམ་དེ་ཐམས་ཅད་སྣང་བ་ཆེན་པོས་ཁྱབ་པར་གྱུར་ཅིང་ས་ཆེན་པོའང་རབ་ཏུ་གཡོས་པར་གྱུར། ཕྱི་རོལ་གྱི་སྒོ་ཁང་གི་ཝ་དག་ལས་ཀྱང་མར་ཁུ་དང ། འབྲུ་མར་དག་རབ་ཏུ་འཛག་ཅིང་ཞན་པ་དང ། མགོན་མེད་པ་དང ། བཀྲེན་པ་དང ། སྡུག་ཕོངས་པ་གང་ཡིན་པ་དག་ཅི་བདེར་ཡོངས་སུ་སྤྱོད་དེ། ། ཡངས་པ་ཅན་གྱི་གྲོང་ཁྱེར་ཆེན་པོ་ན། རྔ་བོ་ཆེ་དང ། རྫ་རྔ་དང ། འཁར་རྔ་དང ། སིལ་སྙན་དང ། ཕེག་རྡོབ་པ་གང་ཡིན་པ་དེ་དག་ཐམས་ཅད་ཀྱང་མ་བརྡུངས་པར་སྒྲ་འབྱིན་པར་ 359a ༄#། །གྱུར་ཅིང་མེ་ཏོག་གི་ཆར་ཆེན་པོ་དག་ཀྱང་རབ་ཏུ་བབ་པར་གྱུར། ཁྱིམ་གྱི་གྲཝ་བཞིར་ཡང་རིན་པོ་ཆེ་སྣ་ཚོགས་ཀྱིས་རབ་ཏུ་གང་བའི་གཏེར་ཆེན་པོ་བཞི་བྱུང་ཞིང་ཁ་བྱེ་སྟེ་ཀུན་ཏུ་སྣང་བར་གྱུར་ཏོ། །བུ་མོ་དེ་བཙས་མ་ཐག་ཏུ་དུ་སྐད་མི་འབྱིན་ཅིང་མཆི་མ་མི་བློག་ལ་ལྷག་པར་ཡང་སོར་མོ་བཅུ་ཐལ་མོ་སྦྱར་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྡིག་ལས་བྱས་པས་འདིར་ནི་གཙང་མ་ཡི། །ལུས་སུ་མི་སྐྱེ་ཡིད་དུ་འོང་བར་མིན། །སྡིག་ལས་བྱས་པས་འདིར་ནི་ལོངས་སྤྱོད་དག ། འབྱོར་པའི་ཁྱིམ་རྣམས་སུ་ཡང་མི་སྐྱེའོ། །སྦྱིན་དུལ་ཡང་དག་སྡོམ་དང་བག་ཡོད་ཅིང ། །གུས་དང་བཅས་པས་བླ་མ་བསྙེན་བཀུར་བའི། །གྱ་ནོམ་རང་བཞིན་ལས་ཀྱི་རྟག་ཏུ་ནི། །ལོངས་སྤྱོད་བདག་ཉིད་ཆེན་པོའི་ཁྱིམ་དུ་འགྲུབ། །འདྲེན་པ་རྒྱལ་བ་འོད་སྲུང་བསོད་སྙོམས་ཕྱིར། །ཡངས་པ་ཅན་གྱི་གྲོང་དུ་ཞུགས་པ་ན། །བདག་གིས་ཁང་བཟང་སྟེང་ནས་མཐོང་གྱུར་ཅིང ། །མཐོང་ནས་དེར་ནི་བདག་ཡིད་དང་བ་དྲན། །དེ་ཚེ་བདག་ཡིད་རབ་ཏུ་དང་གྱུར་ནས། །བདག་ལ་མེ་ཏོག་མེད་ཅིང་བྱུག་པ་མེད། །ཕྱེ་མ་སྤོས་མེད་ཟས་དང་སྐོམ་མེད་པས། །སྟོན་པ་འདི་ལ་ཅིས་མཆོད་བྱ་སྙམ་སེམས། །དེ་ནས་བདག་གིས་སྒྲ་ཐོས་སངས་རྒྱས་ནི། །འགྲོ་བ་དགྲོལ་ཕྱིར་ཟང་ཟིང་མེད་སྤྱོད་ 359b ཅིང ། །འཇིག་རྟེན་བརྩེ་ཕྱིར་ཐུགས་རྗེ་སྐྱེས་ནས་ནི། །སངས་རྒྱས་བསོད་སྙོམས་སླད་དུ་འཇིག་རྟེན་བརྒྱན། །གལ་ཏེ་རྒྱལ་བ་དེ་དག་མཆོད་འདོད་ན། །སངས་རྒྱས་ཉིད་ཕྱིར་ཁྱོད་ཀྱིས་སྨོན་ལམ་ཐོབ། །བྱང་ཆུབ་སེམས་བསྐྱེད་བརྟན་གྱུར་གང་ཡིན་པ། །དེ་ལས་ལྷག་མཆོད་སྲིད་པ་གསུམ་ན་མེད། །བར་སྣང་སྒྲ་ཐོས་དེ་ནས་བདག་གིས་ནི། །མཚན་མཆོག་སྤྲས་པའི་སངས་རྒྱས་མཐོང་བ་དང ། །བྱང་ཆུབ་ཕྱིར་ནི་མི་གཡོ་ཡིད་སྐྱེས་ནས། །ཁང་པ་དེ་ནས་རང་གིས་ལུས་མཆོངས་ཏེ། །བར་སྣང་ཏ་ལ་སྲིད་ལ་འདུག་ནས་ནི། །ཕྱོགས་བཅུ་དག་ན་བཞུགས་པའི་སངས་རྒྱས་དང ། །དེ་བཞིན་རྒྱལ་བ་འོད་སྲུང་དེ་ཡི་སྐུ། །རིན་ཆེན་རི་དང་ལྷུན་པོ་འདྲ་བ་མཐོང ། །རྒྱལ་བའི་མཐུས་ནི་བདག་གི་ལག་མཐིལ་དུ། །མནྡཱ་ར་བའི་ཕུར་མ་ཆེ་བྱུང་ཞིང ། །དེ་དག་བདག་གིས་འོད་སྲུང་གཏོར་བ་དང ། །མེ་ཏོག་གདུགས་གྱུར་ནམ་མཁའ་ལ་ནི་གནས། །གང་དག་ཕྱོགས་བཅུའི་སངས་རྒྱས་མཐའ་ཡས་པ། །མཚན་གྱིས་སྐུ་བརྒྱན་དེ་དག་བལྟས་ན་ཡང ། །ཇི་ལྟར་འོད་སྲུང་སྟེང་ན་འདུག་པ་ལྟར། །དེ་དག་ལ་ཡང་མེ་ཏོག་གདུགས་ཉིད་སྣང ། །མཁའ་ལ་གནས་བཞིན་བདག་གིས་ཚིག་སྨྲས་པ། །བསྐལ་པ་ཆུ་རྡུལ་སྙེད་དུ་སྤྱད་བྱ་ཞིང ། །བྱང་ཆུབ་མ་ཐོབ་བདག་ཕྱིར་མི་ལྡོག་གོ་།བདག་ནི་སངས་རྒྱས་རྐང་གཉིས་ 360a ༄#། །གཙོར་གྱུར་ཅིག་།བདག་གིས་སེངྒེའི་ང་རོ་དེ་ཐོས་ནས། །དེ་ཚེ་སྟོང་ཕྲག་བཅུ་གཉིས་ཚང་བ་ཡི། །ལྷ་མི་ལྷ་མིན་གནོད་སྦྱིན་སྲིན་པོ་རྣམས།། སངས་རྒྱས་བྱང་ཆུབ་མཆོག་ལ་ཡང་དག་ཞུགས། །ཐོས་ནས་སུམ་ཅུ་རྩ་གསུམ་ལྷར་སྐྱེས་ཤིང ། །ལས་བཟང་བྱས་པ་ཆུད་ཟར་མ་གྱུར་པས། །དེ་ནས་ཤི་འཕོས་འཛམ་གླིང་འདིར་འོངས་ཀྱི། །དེ་ཕྱིར་སྐྱེ་བོ་རྣམས་ཀྱིས་བསོད་ནམས་བྱོས། །གང་ཚེ་སུམ་ཅུ་རྩ་གསུམ་གནས་གྱུར་པ། །དེ་ཚེ་བདག་གིས་རྒྱལ་བ་ཤཱཀ་ཐུབ་མཆོད། །བདག་ནི་འདོད་དང་ལོངས་སྤྱོད་ལུས་མི་གཉེར། །རྒྱལ་བ་ཡང་དང་ཡང་དུ་མཆོད་པར་བྱ། །བདག་གིས་བསོད་ནམས་རྣམ་སྨིན་དེ་མཐོང་ཞིང ། །ཉིན་གཅིག་འདྲ་བ་ཚེ་རབས་བརྒྱ་ཡང་དྲན། །བདག་འདིར་སྐྱེས་པའི་དཔལ་ཡང་འདི་འདྲ་ན། །མཁས་པ་སུ་ཞིག་རྒྱལ་ལ་གུས་མི་སྐྱེད། །དེ་ནས་བུ་མོ་དེས་ཚིགས་སུ་བཅད་པ་དེ་དག་སྨྲས་ནས་ཅང་མི་ཟེར་བར་འདུག་པར་གྱུར་ཏོ། །དེའི་སྔོན་གྱི་དགེ་བའི་རྩ་བའི་འབྲས་བུའི་རྒྱུ་མཐུན་པས་ལུས་ལ་ལྷའི་གོས་རིན་པོ་ཆེ་དག་གྱོན་བཞིན་དུ་བྱུང་བར་གྱུར་ནས། དེའི་ལུས་ལས་ཟླ་བ་ལས་ཤིན་ཏུ་ཁྱད་པར་དུ་འཕགས་པའི་འོད་ཟེར་གསེར་གྱི་མདོག་ཏུ་སྣང་བ་དག་ཀྱང་བྱུང་ངོ ། །དེ་ནས་ཕ་མ་དག་གིས་དེའི་མིང་ཟླ་མཆོག་ཅེས་བྱ་ 360b བར་བཏགས་སོ། །དེ་ནས་བུ་མོ་ཟླ་མཆོག་དེ་སྐད་ཅིག་དང ། ཐང་ཅིག་དང ། ཡུད་ཙམ་ཅིག་གིས། འདི་ལྟ་སྟེ། དཔེར་ན། བུ་མོ་ལོ་བརྒྱད་ལོན་པ་ལྟ་བུའི་ན་ཚོད་དུ་ཀུན་ཏུ་སྣང་ངོ ། །དེས་སའི་ཕྱོགས་གང་དང ། གང་དག་ཏུ་འགྲེང་བ་དང ། འཆག་པ་དང ། འདུག་པ་དང ། མལ་བཅས་པར་གྱུར་པ་དང ། དེ་དག་ཏུ་འོད་ཟེར་གསེར་གྱི་མདོག་ལྟ་བུ་དག་སྣང་བར་གྱུར་ཏོ། །དེའི་སྤུའི་ཁུང་བུ་ཐམས་ཅད་ནས་ཙནྡན་ས་མཆོག་པའི་དྲི་དག་དང ། ཁ་ནས་ཀྱང་ཨུཏྤ་ལ་སྔོན་པོའི་དྲི་རང་བྱུང་བར་གྱུར་ཏོ། །དེ་ནས་ཡངས་པ་ཅན་གྱི་གྲོང་ཁྱེར་གྱིས་ཚོང་དཔོན་དང ། ཁྱིམ་བདག་དང ། རྒྱལ་བུ་རྣམས་དང ། དེ་ལས་གཞན་པ་རིགས་ཆེ་བ་རྣམས་དང ། རིགས་མཐོ་བ་དག་གིས་བུ་མོ་ཟླ་མཆོག་གི་ལུས་ཀྱི་གཟུགས་དང ། ཁ་དོག་ཡོངས་སུ་རྫོགས་པ་ཐོས་སོ། །ཐོས་ནས་ཀྱང་འདོད་པའི་འདོད་ཆགས་ཀྱིས་སེམས་ཤིན་ཏུ་དཀྲིས་པར་གྱུར་ཅིང་སོ་སོ་ནས་འདི་སྙམ་དུ་སེམས་ཏེ། དེ་བདག་གི་ཆུང་མར་གྱུར་ན་ཅི་མ་རུང་སྙམ་མོ། །དེ་ནས་སྐྱེ་བོ་ཕལ་པོ་ཆེ་རྣམས་དེ་ཐོབ་པར་བྱ་བའི་ཕྱིར་སེམས་བརྩོན་པར་གྱུར་ཏེ། དེ་དག་ལས་ཁ་ཅིག་ནི་ལི་ཙ་བཱི་དྲི་མ་མེད་པར་གགས་པ་ལ་བསྙེན་པར་བྱེད། བསྟེན་པར་བྱེད་ཅིང་བསྙེན་བཀུར་བྱེད་པར་གྱུར་ཏོ། །ཁ་ཅིག་ནི་ནོར་བུ་དང ། གསེར་དང ། དངུལ་དང ། 361a ༄#། །རྡོ་རྗེ་དང ། བཻ་ཌཱུརྱ་དང ། སྤུག་དང ། ནད་རྙིལ་དང ། དུང་དང ། མན་ཤེལ་དང ། བྱུ་རུ་བྱེ་བ་སྙེད་དག་སྦྱིན་ཞིང་འདོད་པ་སྐྱེད་པར་བྱེད་དོ། །ཁ་ཅིག་ནི་ནོར་དང ། འབྲུ་དང ། ཁྱིམ་དང ། ལོངས་སྤྱོད་དང ། ཁ་ཟས་དག་སྟོབས་པར་བྱེད་དོ། །ཁ་ཅིག་ནི་བྲན་དང ། བྲན་མོ་དང ། ལས་མི་དང ། ཞོ་ཤས་འཚོ་བ་དག་ལས་བསད་པ་དང ། བཅིང་བ་དང ། བརྡེག་པ་ལ་སོགས་པ་དག་གིས་འཇིགས་པ་སྟོན་པར་བྱེད་དོ། །ཁ་ཅིག་ལི་ཙ་བཱི་དྲི་མ་མེད་པར་གྲགས་པ་ལ་འདི་སྐད་ཅེས་ཟེར་ཏེ། གལ་ཏེ་ཁྱོད་ཁོ་བོ་ཅག་ལ་བུ་མོ་ཟླ་མཆོག་འབུལ་བར་མི་བྱེད་ན། དེའི་ཕྱིར་ཁྱེད་ལ་དེས་སྡུག་བསྔལ་འབྱུང་བར་བྱ་ཞིང་ཁྱོད་ལ་གནོད་པ་ཆེན་པོའང་བྱའོ་ཞེས་ཟེར་རོ། །དེ་ནས་ལི་ཙ་བཱི་དྲི་མ་མེད་པར་གྲགས་པ་འདི་སྙམ་དུ་མ་ལ་དཔུང་དག་ལྷགས་ནས་བདག་བཟུང་ཞིང་བཅོམ་སྟེ། བུ་མོའང་ཕྲོགས་ལ་བདག་ཀྱང་སྲོག་དང་ཕྲལ་བར་མི་འགྱུར་གྲང་སྙམ་ནས། སྐྲག་ཅིང་དངངས་ལ་སྒྱིད་ལུག་ཅིང་སྤུ་ཟིང་ཞེས་བྱེད་པར་གྱུར་ནས། དེ་དྲན་པ་ཉམས་ཤིང་བཞིན་གྱི་སྲོ་ཤི་ལ་རབ་ཏུ་དུ་ཞིང་མཆི་མ་བླགས་ཏེ། མིག་མི་འཛུམས་པར་བུ་མོ་ཟླ་མཆོག་ལ་ལྟའོ། །བུ་མོ་ཟླ་མཆོག་གིས་རང་གི་ཕ་ངུ་ཞིང་ཡི་ཤི་ལ་གདོང་མཆི་མས་ཡོག་ཅིང་ཡུལ་ཡུལ་པོར་གྱུར་པ་མཐོང་ངོ ། །མཐོང་ནས་ཀྱང་དེ་ལ་འདི་སྐད་ཅེས་སྨྲས་སོ། །ཡབ། ཅིའི་ 361b སླད་དུ་འདི་ལྟར་བཤུམས་ཤིང་བཤུམས་མོ་དག་རབ་ཏུ་གློག་པར་མཛད་ལགས། དེ་ནས་ལི་ཙ་བཱི་དྲི་མ་མེད་པར་གྲགས་པས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། འདི་ལྟར་ཁྱོད་འཕྲོག་ཅིང་ཁྱོད་ཀྱི་ཕྱིར་གྲོང་ཁྱེར་ཐམས་ཅད་དུ་འཐབ་མོ་དང ། རྩོད་པ་དག་ཀུན་ཏུ་འབྱུང་བར་ཁྱོད་ཀྱིས་མི་ཤེས་སམ། དེའི་ཕྱིར་དཔུང་དག་ལྷགས་ཤིང་བཅོམ་སྟེ། ཁྱོད་ཕྲོགས་པར་མི་འགྱུར་གྲང་སྙམ་ནས་དེས་ན་མཆི་མ་བྱུང་བ་ཡིན་མོད། དེ་ནས་བུ་མོ་ཟླ་མཆོག་གིས་རང་གི་ཕ་ལ་ཚིགས་སུ་བཅད་དེ་སྨྲས་པ། གལ་ཏེ་ཛམ་གླིང་སེམས་ཅན་ཐམས་ཅད་དག་།སྲེད་མེད་བུ་འདྲའི་བརྩོན་འགྲུས་ཐོབ་གྱུར་ཅིང ། །དེ་དག་མཚོན་ཐོགས་བདག་སླད་རྒྱུག་གྱུར་ཀྱང ། །དེ་དག་རྣམས་ཀྱིས་བདག་གཞོམ་རྔོ་མི་ཐོགས། །བྱམས་སེམས་ལྡན་ལ་དུག་དང་མཚོན་མི་ཚུགས། །རོ་ལངས་དང་ནི་འཇིགས་པ་གཞན་མི་འབྱུང ། །བྱམས་སེམས་ཐ་བ་ཞེ་སྡང་མ་མཆིས་པས། །བྱམས་པའི་སེམས་ལ་གཞན་གྱིས་གནོད་མི་འགྱུར། །ཡབ་བདག་འཇིག་རྟེན་དག་ལ་བྱམས་པ་ཆེ། །ངན་བུ་བདག་བཞིན་འགྲོ་ལ་དགའ་བར་གནས། །ནམ་ཡང་གཞན་ལ་སྡུག་བསྔལ་མ་བགྱིས་པས། །དེ་ཕྱིར་ངན་བུ་སྡུག་བསྔལ་མི་འགྱུར་ཡབ། །ཆགས་བྲལ་ནམ་ཡང་འདོད་ཆགས་མ་མཆིས་ཤིང ། །བྱམས་པ་ཡོངས་བསྒོམས་ཞེ་སྡང་མ་མཆིས་ལགས། །བདག་ལ་ཆགས་སྡང་གཏི་མུག་ 362a ༄#། །མ་མཆིས་ཏེ། །དེ་ཕྱིར་ངན་བུ་གཞན་གྱིས་མི་ཐུབ་ཡབ། །ཡབ་དང་ཡུམ་ལ་བྱམས་པ་མཆིས་པ་ལྟར། །འགྲོ་བ་ཀུན་ལ་རྒྱུན་དུ་བདག་དེ་བཞིན། །ཡབ་གང་འཇིག་རྟེན་དག་ལ་དེ་འདྲར་བྱམས། །དེ་ནི་ནམ་ཡང་གཞན་གྱིས་གནོད་མི་འགྱུར། །ནམ་མཁའ་དོག་ས་འཛིན་པར་བགྱིད་གྱུར་རམ། །ལྷུན་པོ་ཡུངས་འབྲུའི་ནང་དུ་གནས་གྱུར་ཏམ། །རྒྱ་མཚོ་ཆེན་པོ་གནག་རྗེས་ཞུགས་གྱུར་ཀྱང ། །བདག་འཇོམས་བགྱིད་པར་རྔོ་ཐོགས་མ་མཆིས་ཡབ། །དེ་ནས་བུ་མོ་ཟླ་མཆོག་གིས་ཚིགས་སུ་བཅད་པ་དེ་དག་སྨྲས་ནས། རང་གི་ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ། དེའི་སླད་དུ་འདི་ལྟར་དེང་ནས་དགུང་བདུན་ན་བུ་མོ་ཟླ་མཆོག་ཕྱིར་འབྱུང་བར་འགྱུར་ཞིང་བྱུང་ནས་ཀྱང་རང་གང་འདོད་པའི་ཁྱིམ་ཐབ་འདམ་པར་འགྱུར་གྱི། དེར་ཁྱོད་ཅག་གིས་བསྒྲིམ་པར་བྱ་ཞིང་ལམ་སྲང་དང ། བཞི་མདོ་དང ། སུམ་མདེའི་ཕྱོགས་ཐམས་ཅད་ཀྱང་རྒྱན་དག་གིས་བརྒྱན་པར་བྱ་ཞིང ། མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པའི་ཚོགས་དག་གིས་ཀྱང་བྱི་དོར་གྱིས་ཤིག་ཅེས་ཤུལ་པོ་ཆེ་དང ། བཞི་མདོ་དང ། སུམ་མདོ་ཐམས་ཅད་དུ་དྲིལ་དཀྲོལ་ཞིང་སྒྲ་བསྒྲག་ཏུ་གསོལ། དེ་ནས་བུ་མོ་ཟླ་མཆོག་གི་ཕ་མ་གཉིས་རང་གི་ 362b ཁྱིམ་ནས་བྱུང་སྟེ། འདི་སྐད་དུ། དེང་ནས་ཞག་བདུན་ན་བུ་མོ་ཟླ་མཆོག་ཕྱིར་འབྱུང་བར་འགྱུར་ཞིང་བྱུང་ནས་ཀྱང་བུ་མོ་གང་འདོད་པའི་ཁྱིམ་ཐབ་འདམ་པར་གྱུར་གྱི། དེར་ཁྱེད་ཅག་གིས་བསྒྲིམ་པར་བྱ་ཞིང་ལམ་སྲང་དང ། བཞི་མདོ་དང ། སུམ་མདོའི་ཕྱོགས་ཐམས་ཅད་རྒྱན་དག་གིས་བརྒྱན་པར་བྱ་ཞིང ། མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པའི་ཚོགས་དག་གིས་ཀྱང་བྱི་དོར་གྱིས་ཤིག་ཅེས་རང་བཞིན་དེ་དག་ཀུན་ཏུ་བསྒྲགས་སོ། །དེ་སྐད་སོ་སོས་ཐོས་ནས་ཡངས་པ་ཅན་གྱི་སྐྱེ་བོ་ཕལ་པོ་ཆེ་རྣམས་འདི་ལྟར་རང་རང་གི་ལམ་སྲང་དང ། བཞི་མདོ་དང ། སུམ་མདོའི་ཕྱོགས་དག་བརྒྱན་པར་བྱ་བ་ལ་བརྩོན་པར་གྱུར་ཅིང ། སེམས་ལ་འདི་སྙམ་དུ་ཅི་ནས་ཀྱང་བུ་མོ་ཟླ་མཆོག་ནི་བདག་ལ་འཛིན་གྱི། གཞན་དག་ལ་ནི་མ་ཡིན་གྲང་སྙམ་དུ་སེམས་ཏེ། དེ་དག་ཕན་ཚུན་འགྲན་པས་རང་རང་བརྒྱན་པར་བྱེད་དེ། འདི་ལྟ་སྟེ། ཚོང་དཔོན་དང ། ཁྱིམ་བདག་དང ། ཞང་བློན་དང ། བྲམ་ཟེ་དང ། རྒྱལ་བུ་རྣམས་དང ། ལས་མིའི་བར་དག་ཀྱང་ཤིན་ཏུ་ཁྲུས་བྱས་ཤིང་ལུས་ལེགས་པར་བྱུགས་ཏེ། གོས་བཟང་པོ་བགོས་ཤིང་རྒྱན་སྣ་ཚོགས་ཀྱིས་ལུས་བརྒྱན་ནས་རང་རང་གི་གཡོག་འཁོར་རྣམས་ལ་ཁྱེད་ཅག་སྒྲིམས་ཤིག་།གལ་ཏེ་བུ་མོ་ཟླ་མཆོག་འུ་བུ་ཅག་གི་གན་དུ་རང་མི་ 363a ༄#། །འོང་བ་བལྟ་ན། དེ་ཕྱིར་དེ་མཐུས་དྲངས་ལ་ཕྲོགས་ཤིག་ཅེས་སྐུལ་བར་བྱེད་དོ། །དེ་ལྟར་ཞག་བདུན་འདས་པ་དང ། སྐྱེ་བོ་ཕལ་པོ་ཆེ་དག་ངོ་མཚར་དུ་འཛིན་པར་གྱུར་ནས། བུ་མོ་ཟླ་མཆོག་བལྟ་བའི་ཕྱིར་འདུས་པར་གྱུར་ཏོ། །དེ་ནས་བུ་མོ་ཟླ་མཆོག་ཉི་མ་དྲུག་པ་ལ་ཟླ་བ་ཉ་བའི་ཚེ་གསོ་སྦྱོང་ཡན་ལག་བརྒྱད་པ་ཡང་དག་པར་བླངས་ཏེ་མཚན་མོ་མི་ཉལ་ཙམ་ན་སྟེང་གི་ཁང་བཟང་གི་ཐོག་ན་འཆག་ཅིང་འདུག་གོ་།དེ་ནས་སངས་རྒྱས་ཀྱི་མཐུས་བུ་མོ་ཟླ་མཆོག་གི་ལག་པ་གཡས་པར་པདྨ་སྡོང་བུ་ནི་གསེར། འདབ་མ་ནི་དངུལ། ཟེ་བ་ནི་བཻ་ཌཱུརྱ། སྙིང་པོ་ནི་རྡོའི་སྙིང་པོ་ལས་བྱས་པ་འདབ་མ་འབུམ་ཕྲག་དུ་མ་ཡོད་པ། བལྟ་ན་སྡུག་པ། འོད་གསལ་བ་ཞིག་བྱུང་བར་གྱུར་ཏོ། །པདྨ་དེའི་སྙིང་པོའི་དབུས་ན་དེ་བཞིན་གཤེགས་པའི་སྐུ། སྐུ་མདོག་གསེར་འདྲ་ལ་གཟི་བརྗིད་འབར་བ། འོད་ཀྱིས་སྣང་བར་མཛད་པ། སྐྱེས་བུ་བཟང་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུས་གཟུགས་མཛེས་པར་བྱས་པ། སྐྱིལ་མོ་ཀྲུང་གིས་བཞུགས་པ་ཞིག་ཀྱང་བྱུང་བར་གྱུར་ཏེ། དེ་བཞིན་གཤེགས་པའི་སྐུ་དེའི་འོད་ཀྱིས་ཁྱིམ་དེ་ཐམས་ཅད་སྣང་བས་གསལ་བར་གྱུར་ཏོ། དེ་ནས་བུ་མོ་ཟླ་མཆོག་གིས་པདྨ་དེ་མཐོང་ཞིང་དེ་ 363b བཞིན་གཤེགས་པའི་སྐུའང་མཐོང་བ་དང ། དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་དེ་བཞིན་གཤེགས་པའི་སྐུ་དེ་ལ་ཚིགས་སུ་བཅད་དེ་གསོལ་པ། འདི་འདྲའི་དཔལ་དང་ལྡན་པ་ཁྱོད། །ཅི་ལགས་ལྷ་འམ་འོན་ཏེ་ཀླུ། །ལྷ་མིན་གསང་བ་མི་འམ་ཅི། །སུ་ལགས་དྲིས་པ་ངེས་པར་གསུངས།། ཁྱོད་སྐུ་གསེར་མདོག་འོད་གསལ་བའི། །ཚད་ནི་དམིགས་སུ་མ་མཆིས་ཏེ། །སྐད་ཅིག་མདོག་གསེར་བཙོད་ཀ་དང ། །མྱུར་བ་ཤེལ་འོད་འདྲ་བར་གདའ། །ངན་བུ་སླན་ཆད་ལུས་ཀྱིས་ནི། །འདུ་ཤེས་མི་མཆིས་སེམས་མི་གཡོ། །མགོན་པོ་ཁྱོད་ཀྱི་སྐུ་མཐོང་ནས། །བདག་ནི་དགའ་བ་ཡངས་པ་སྐྱེས། །ཁྱོད་སྐུ་དཔལ་འབར་མེ་འདྲ་ཞིང ། །རི་ལས་རི་བཞིན་མཛེས་འཕགས་པ། །ཇི་ལྟར་བཟུང་ཞིང་རབ་ཏུ་གནས། །གང་ནས་འདིར་བྱོན་གང་དུ་གཤེགས། །དེ་ནས་དེ་བཞིན་གཤེགས་པའི་སྐུ་དེས་བུ་མོ་ཟླ་མཆོག་ལ་ཕྱིར་ཚིགས་སུ་བཅད་དེ་བཀའ་སྩལ་པ། ང་ནི་ལྷ་མིན་ཀླུ་ཡང་མིན། །མི་འམ་ཅི་མིན་གནོད་སྦྱིན་མིན། །སངས་རྒྱས་ཤཱཀྱ་སེངྒེ་ཡིས། །ང་ནི་ཁྱོད་ཀྱི་གན་དུ་བཏང ། །ང་ནི་ལྷ་མིན་གནོད་སྦྱིན་མིན། །ཀླུ་མིན་མིའམ་ཅི་མི་མིན། །ཆོས་བྱུང་ང་དེང་ཁྱོད་ཀྱི་ཕྱིར། །ལྷ་མི་འདུལ་བས་བཀའ་སྩལ་ཏོ། །དེ་ནས་དེ་བཞིན་གཤེགས་པའི་སྐུ་དེ་ལ་བུ་མོ་ཟླ་ 364a ༄#། །མཆོག་གིས་ཚིགས་སུ་བཅད་དེ་གསོལ་པ། སངས་རྒྱས་སངས་རྒྱས་ཞེས་བགྱི་བ། །དེ་མདོག་ཅི་འདྲ་འདིར་གསུངས་ལ། །དེ་ཡི་རྟགས་དང་དབྱིབས་གསུངས་དང ། །དེ་ཐོས་བདག་གིས་རྟོགས་པར་འགྱུར། །ཁྱོད་འདིར་སངས་རྒྱས་མཚན་གསུངས་ན། །དེ་མདོག་རྟགས་དང་དབྱིབས་མི་གསུང ། །སངས་རྒྱས་རུང་སྤྱོད་གང་དང་མཐུན། །མི་མཉམ་མཛོད་སྤོབས་འདིར་གསུངས་ཤིག་།དེ་ནས་དེ་བཞིན་གཤེགས་པའི་སྐུ་དེས། བུ་མོ་ཟླ་མཆོག་ལ་ཕྱིར་ཚིགས་སུ་བཅད་དེ་བཀའ་སྩལ་པ། དེ་ནི་སྐུ་མདོག་གསེར་འདྲ་ཞིང ། །མཚན་མཆོག་སུམ་ཅུ་རྩ་གཉིས་མངའ། །སེམས་ཅན་ཀུན་གྱི་མཆོད་རྟེན་དེ། །དེ་ཕྱིར་སངས་རྒྱས་ཞེས་བརྗོད་དོ། །བྱེད་ལྡན་སེམས་ཅན་རྣམས་ཀྱི་ནི། ། སྤྱོད་པ་མཆོག་དང་དམན་པ་དག་།ཐུགས་གཅིག་གིས་ནི་རྟོགས་མཛད་དེ། །དེ་ཕྱིར་སངས་རྒྱས་ཞེས་བརྗོད་དོ། །ཆོས་ཀུན་རྣམ་པ་ཐམས་ཅད་དུ། །དེས་ནི་མི་མཁྱེན་ཅུང་ཟད་མེད། །ཡེ་ཤེས་ཀུན་གྱི་ཕ་རོལ་བྱོན། །དེ་ཕྱིར་སངས་རྒྱས་ཞེས་བརྗོད་དོ། །དེས་ནི་སེམས་ཅན་ཀུན་གྱི་སེམས། །ཐུགས་གཅིག་གིས་ནི་རྟོགས་གྱུར་ཀྱང ། །ཀུན་གྱི་སེམས་ལ་ནམ་དུ་ཡང ། །རློམ་པ་མི་མངའ་གཞན་དུ་ན། །སངས་རྒྱས་སྤྱོད་པ་སྦྱིན་པས་འཕགས། །ཚུལ་ཁྲིམས་སྤྱོད་པས་མཐོར་འཕགས་ཤིང ། །བཟོད་དང་བརྩོན་ 364b འགྲུས་མངོན་འཕགས་ལ། །བསམ་གཏན་ཤེས་རབ་ཡང་དག་འཕགས། །བཟོ་རྣམས་ཐམས་ཅད་ལེགས་བསླབས་པས། །དེས་ནི་མི་མཁྱེན་ཅུང་ཟད་མེད། །བྱམས་དང་ཐུགས་རྗེ་ཕུན་སུམ་ཚོགས། །དེ་ཕྱིར་སངས་རྒྱས་ཞེས་བརྗོད་དོ། །གང་གིས་བླ་མེད་འཁོར་ལོ་ཡི། །ཆོས་ཀྱི་འཁོར་ལོ་རབ་བསྐོར་ཅིང ། །ཞིང་རྣམས་བྱེ་བ་རྣམས་རིག་ལ། །བདག་མེད་རབ་ཏུ་བསྟན་མཛད་ཅིང ། །གང་གིས་སངས་རྒྱས་ཞིང་སྟོང་དང ། །བརྒྱ་དང ། ཁྲག་ཁྲིག་སྙེད་རྣམས་དང ། །ལྗགས་ཀྱིས་རབ་ཏུ་ཁྱབ་མཛད་པ། །དེ་ཕྱིར་སངས་རྒྱས་ཞེས་བརྗོད་དོ། །ཞིང་རྣམས་བྱེ་བ་སྟོང་ཕྲག་ནི། །གངྒཱའི་བྱེ་མ་སྙེད་དག་ཏུ། །དབྱངས་ཀྱིས་གོ་བར་མཛད་པས་ན། །དེ་ཕྱིར་སངས་རྒྱས་ཞེས་བརྗོད་དོ། །འདྲེན་པས་ཕྱག་ནི་ཡ་གཅིག་གིས། །ཞིང་རྣམས་བྱེ་སྙེད་བླངས་མཛད་ཅིང ། ། བསྐལ་པ་བྱེ་བར་དེ་བཞུགས་པས། །དེ་ཕྱིར་སངས་རྒྱས་ཞེས་བརྗོད་དོ། །ཞིང་རྣམས་སྟོང་ཕྲག་བྱེ་སྙེད་ན། །རི་བོ་ལྷུན་པོ་ཇི་སྙེད་པ། །སྐྲ་ཉག་གཅིག་གིས་དེ་སྦམས་ཤིང ། །ཞིང་རྣམས་བྱེ་བར་འཕེན་མཛད་ལ། །ཆོས་རྣམས་ཀུན་ལ་རང་བྱུང་ཞིང ། །གསན་ནས་གོ་འཕང་མཆོག་བརྙེས་ལ། །སེམས་ཅན་བཅིང་བ་རྣམ་འགྲེལ་བས། །དེ་ཕྱིར་སངས་རྒྱས་ཞེས་བརྗོད་དོ། །དབང་ལྡན་གྱུར་ཅིང་སྟོབས་བཅུ་མངའ། །མི་བསྙེངས་རྟོགས་པར་ཐུགས་སུ་ཆུད། །སངས་རྒྱས་ཆོས་ལ་ནེམ་ནུར་མེད། །དེ་ཕྱིར་སངས་རྒྱས་ཞེས་བརྗོད་དོ། །དབུ་ཡི་གཙུག་ཏོར་ 365a ༄#། །བལྟར་མི་མཐོང ། །སྤྱན་ལྔ་དག་དང་ལྡན་པ་དང ། །སྟོབས་དང་དབང་པོ་ལྔ་མངའ་ཞིང ། །བྱང་ཆུབ་ཡན་ལག་ལམ་ལ་གནས། །དང་ཚུལ་བཟང་ཞིང་འགྲོགས་ན་བདེ། །ཞི་ཞིང་དུལ་ལ་བླ་ན་མེད། །གཡོ་མེད་དྲང་པོ་གསལ་བ་སྟེ། །དེ་ཕྱིར་སངས་རྒྱས་ཞེས་བརྗོད་དོ། །དེ་ནི་རྟག་ཏུ་མཉམ་གཞག་ཅིང ། །དེ་ལ་གཡེང་བ་མི་མངའ་ལ། །སེམས་ཅན་དོན་གྱི་དུས་སུ་གསུངས། །དེ་ཕྱིར་སངས་རྒྱས་ཞེས་བརྗོད་དོ། །ཡོན་ཏན་ཀུན་དང་ལེགས་ལྡན་ཞིང ། །དེ་ནི་འགྲོ་བའི་མཆོད་རྟེན་ཏེ། །ཐམས་ཅད་མཁྱེན་ཅིང་ཐམས་ཅད་གཟིགས། །དེ་ཕྱིར་སངས་རྒྱས་ཞེས་བརྗོད་དོ། །ང་ཡིས་བསྐལ་པའམ་ཡང་ན་ནི། །བསྐལ་པ་བྱེ་བ་ཕྲག་བརྒྱར་ཡང ། །གང་ཕྱིར་སངས་རྒྱས་དེ་དོན་བརྗོད། །དེ་ཕྱིར་སངས་རྒྱས་ཞེས་བརྗོད་དོ། །དེ་ནས་བུ་མོ་ཟླ་མཆོག་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་དེ་བཞིན་གཤེགས་པ་བལྟ་བས་ཡོངས་སུ་སྐོམ་པར་གྱུར་ཏེ། དེ་བཞིན་གཤེགས་པའི་སྐུ་དེ་ལ་ཕྱིར་ཚིགས་སུ་བཅད་དེ་གསོལ་པ། །གང་གི་ཡོན་ཏན་དེ་འདྲ་བའི། །རྫོགས་སངས་དེ་ལྟར་རྔོ་ཐོགས་སམ། །ཆོས་འདི་ཐོས་ན་མཁས་པ་ནི། །སུ་ཞིག་སྐད་འགའང་ཁྱིམ་ལ་དགའ། །ཇི་སྲིད་བདེ་གཤེགས་མ་མཐོང་བར། །བདག་ནི་རྨུགས་དང་གཉིད་སྤོང་ 365b ཞིང ། །ཟས་དང་སྐོ་མ་ཡང་མི་འཚལ་ལོ། །བསྟན་ལའང་མཆིས་པར་མི་བགྱིད་དོ། །བདག་གིས་ཁྱོད་མཐོང་ཤིན་ཏུ་རངས་གྱུར་ཅིང ། །ཡོན་ཏན་བདག་ཉིད་ཐོས་ནས་བདག་རབ་དད། །མངོན་སུམ་སངས་རྒྱས་དེ་ནི་མཐོང་འགྱུར་ལ། །སླར་ཞིང་མཚུངས་མེད་དགའ་བར་འགྱུར་ལགས་གྲང ། །བསྐལ་པ་སྟོང་ཕྲག་བྱེ་བར་འཇིག་རྟེན་ན། །སྐྱེས་བུ་མཆོག་རྣམས་མཐོང་བ་ཤིན་ཏུ་དཀོན། །དགྲ་བཅོམ་དེའི་མཚན་དེང་ཐོས་བདག་གིས་ནི། །རྙེད་པ་ལེགས་རྙེད་བདག་གིས་རྒྱལ་བ་བལྟ། །སྤྲུལ་པ་དེ་ཡིས་དེ་ལ་འདི་སྐད་སྨྲས། །སེམས་ཅན་མཆོག་དེ་ཚལ་ཆེན་ནང་ན་བཞུགས། །དེ་ཡི་དགེ་འདུན་སྟོང་ཕྲག་བརྒྱད་པོ་དག་།དཔའ་བོ་སྡིག་མེད་མི་གཙང་སྤངས་པ་ཡིན། །དེ་དག་རེ་རེའང་ལག་པ་ཡ་གཅིག་གིས། །བསྐལ་པ་མང་པོར་སྟོང་གསུམ་ཞིང་འདེག་ཅིང ། །ཏིང་འཛིན་མངོན་ཤེས་སྤོབས་པ་རབ་ཐོབ་ལ། །ཐོས་པ་མི་འཁྲུག་རྒྱ་མཚོ་འདྲ་བ་ཡིན། །དེ་དག་རྒྱལ་བ་མཆོད་ཕྱིར་རྫུ་འཕྲུལ་གྱིས། ། བྱེ་བ་དཔག་མེད་ཞིང་དུ་སྐད་འགས་འདོང ། །དོང་ནས་སངས་རྒྱས་བྱེ་སྙེད་མངོན་མཆོད་ཅིང ། །བརྟན་རྣམས་ཕྱིར་ཡང་སྐད་འགས་ལྡོག་པར་བྱེད། །བདག་ཏུ་འདུ་ཤེས་སངས་རྒྱས་འདུ་ཤེས་མེད། །ཞིང་དུ་འདུ་ཤེས་སེམས་ཅན་འདུ་ཤེས་མེད། །སྤྲོས་པ་སྣ་ཚོགས་ཀུན་གྱིས་མ་གོས་ཤིང ། །སེམས་ཅན་ཚོགས་ཆེན་རྣམས་ཀྱི་དོན་ཡང་བྱེད། །དགྲ་ཐུལ་ 366a ༄#། །དེ་དང་བྱང་ཆུབ་སེམས་དཔའ་དང ། །དེ་བཞིན་དགེ་སློང་དགེ་འདུན་ལྟ་འདོད་ཅིང ། །ཐུབ་དབང་དྲུང་ནས་ཆོས་མཆོག་ཉན་འདོད་ན། །ཚལ་ཆེན་གང་ན་སྟོན་དེ་བཞུགས་པར་སོང ། །དེ་ནས་བུ་མོ་ཟླ་མཆོག་པདྨ་དེ་ཉིད་དང ། དེ་བཞིན་གཤེགས་པའི་སྐུ་ཇི་ལྟར་བཞུགས་པ་དེ་ཉིད་ཐོགས་བཞིན་དུ་ཁང་བཟང་གི་སྟེང་དེ་ནས་བབས་ནས་རང་གི་ཕ་མ་ག་ལ་བ་དེར་སོང་སྟེ་ཕྱིན་པ་དང ། རང་གི་ཕ་མ་ལ་ཚིགས་སུ་བཅད་དེ་སྨྲས་པ། ཡབ་གཟིགས་ངན་བུའི་སུག་པ་གཡས་པ་ན། །པདྨ་གསེར་སྡོང་མཛེས་པ་ཡིད་དུ་མཆི། །སྐྱེས་བུ་དམ་པའི་སྐུ་ལ་གཟིགས་ཤིག་ཡུམ། །མཐོང་ན་སུ་ཞིག་དེ་ལ་སྐྱབས་མི་མཆི། །རང་གི་གནས་ཀུན་གསེར་མདོག་འདྲ་བ་ཡི། །འོད་ཀྱིས་གསལ་བ་བདག་གིས་མཐོང་ལགས་ཡུམ། །སྐད་ཅིག་ལ་ཡང་དུ་མར་ལྡོག་འགྱུར་བས། །སྐུ་ཚེའི་ཚད་ནི་གཟུང་བར་རྔོ་མི་ཐོགས། །དེ་སླད་རྒྱལ་བའི་སྤྱན་སྔར་ཚལ་ཆེན་དུ། །རྒྱལ་བ་གཽ་ཏམ་གཟིགས་སུ་གཤེགས་སོ་ཡུམ། །མེ་ཏོག་རྣམས་དང་སྤོས་མཆོག་བསྣམས་ནས་སུ། །དེ་བཞིན་གཤེགས་པ་ལ་ནི་མཆོད་པ་བགྱི། །ཟླ་བ་མཆོག་གི་ཕ་དང་མ་དག་གིས། །ཡིད་དུ་འོང་བའི་ཚིག་ཐོས་ལེགས་སོ་ཞེས། །གོས་རྣམས་དང་ནི་བདུག་སྤོས་སྤོས་དག་དང ། །མེ་ཏོག་རྣམས་དང་ཕྲེང་བ་ཕྱུག་པའང་བླངས། །རྔ་ཆེན་ 366b རྫ་རྔ་ཧབ་ཤང་གདུགས་རྣམས་དང ། །དུང་དང་རྒྱལ་མཚན་གླིང་བུ་པི་ཝང་དང ། །རིན་ཆེན་སིལ་སྙན་ཡིད་འོང་ཐོགས་ནས་ནི། །དེ་དག་ཁང་པ་དེ་ནས་ངེས་པར་བྱུང ། །དེའི་ཚེ་ན་ཉི་མ་བདུན་པ་དེ་ལ་སྲོག་ཆགས་འབུམ་ཕྲག་དུ་མ་དག་བུ་མོ་ཟླ་མཆོག་བལྟ་བའི་ཕྱིར་འདུས་པར་གྱུར་ནས། དེ་དག་ལས་ཁ་ཅིག་ནི་འདོད་པའི་འདོད་ཆགས་ཀྱིས་སེམས་ཀུན་ནས་དཀྲིས་པར་གྱུར། ཁ་ཅིག་ནི་ལྟ་འདོད་པར་གྱུར། ཁ་ཅིག་ནི་རྟོག་པ་སྐྱེས་པར་གྱུར་ནས་ཐམས་ཅད་དང་ལྡན་པའི་ཡངས་པ་ཅན་གྱི་གྲོང་ཁྱེར་ཆེན་པོ་རྒྱན་གྱིས་བརྒྱན་ཏོ།། ཁྱེའུ་དང ། བུ་མོ་དག་ཀྱང་སྟེགས་བུ་དང ། སྒོ་ཁང་དང ། རྟ་བབས་དང ། སྐར་ཁུང་དང ། པུ་ཤུ་དང ། ཁང་པ་བརྩེགས་པ་དང ། ཁང་བཟང་གི་སྟེང་དག་ཏུ་དོང་སྟེ་འཁོད་པར་གྱུར་ཏོ། །དེ་ནས་བུ་མོ་ཟླ་མཆོག་དེ་བཞིན་གཤེགས་པའི་སྐུ་པདྨ་ལ་བཞུགས་པ་དེ་ཉིད་ཀྱང་ཐོགས་བཞིན་དུ་ཕ་མ་དང ། འཁོར་མང་པོ་རྣམས་ལྷན་ཅིག་ཏུ་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུགས་པ་དང ། ཕྱེ་མ་དང ། ན་བཟའ་དང ། གདུགས་དང ། རྒྱལ་མཚན་དང ། བ་དན་དག་ཐོགས་ཏེ་སིལ་སྙན་དང ། ཕེག་རྡོབ་པ་སྣ་ཚོགས་བྱེད་པ་དེ་དག་གིས་ཡོངས་སུ་བསྐོར་ཅིང་མདུན་དུ་བརྡར་ཏེ་རང་གི་གནས་ནས་བྱུང་ངོ ། །དེ་ནས་སྲོག་ཆགས་འབུམ་ཕྲག་དུ་མ་དག་གིས་དེ་གྲོང་བར་གྱི་ 367a ༄#། །དབུས་སུ་བྱུང་བ་མཐོང་བ་དང ། བདག་གིས་འདི་གཟུང་བར་བྱའོ་སྙམ་དུ་སེམས་ཤིང་རབ་ཏུ་རྒྱུག་གོ་།དེའི་ཚེ་ན་ཡངས་པ་ཅན་གྱི་གྲོང་ཁྱེར་ཆེན་པོ་ན་སྐྱེ་བོ་ཕལ་པོ་ཆེ་དེ་དག་ལྷན་ཅིག་ཏུ་རྒྱུག་པའི་ཚེ་ཧ་ཧ་ཚུར་ཤོག་།ཚུར་ཤོག་ཅེས་བྱ་བའི་སྒྲ་ཆེན་པོ་བྱུང་བར་གྱུར་ཏོ། །དེ་ནས་བུ་མོ་ཟླ་མཆོག་གིས་དེའི་མོད་ལ་སྐྱེ་བོ་ཕལ་པོ་ཆེ་རྒྱུག་པ་དེ་དག་མཐོང་ནས། དེའི་ཚེ་དེ་བཞིན་གཤེགས་པའི་སྐུ་པདྨ་ལ་བཞུགས་པ་དེ་ཉིད་ཀྱང་ཐོགས་བཞིན་དུ་བར་སྣང་གི་ནམ་མཁའ་ལ་ཤིང་ཏ་ལའི་སྲིད་ཙམ་དུ་མངོན་པར་འཕགས་ཏེ་འདུག་པར་གྱུར་ཏོ། །འདུག་ནས་ཀྱང་སྐྱེ་བོ་ཕལ་པོ་དེ་དག་ལ་ཚིགས་སུ་བཅད་དེ་སྨྲས་པ། བཟོད་ལྡན་བདག་གི་མཛེས་པའི་ལུས་འདི་ནི། །ཆགས་པའི་སེམས་ལས་བྱུང་བ་མ་ཡིན་ཏེ། །ཁ་དོག་གསེར་མདོག་མེ་ལྕེ་འབར་བ་འདྲ། །ཤིན་ཏུ་ཡིད་འོང་ཁོ་མོའི་ལུས་འདི་ལྟོས། །གང་དག་ཡུལ་རྣམས་ལ་ནི་བརྐམ་མེད་ན། །མེ་མདག་འོབས་འདྲ་རབ་འབར་འདོད་སྤོང་ཞིང ། །དབང་པོ་དྲུག་རྣམས་སྡོམ་པས་བསྡམས་པ་དང ། །གང་དག་ཚངས་སྤྱོད་རྣམས་སྤྱོད་དག་པ་དང ། ། གང་དག་གཞན་གྱི་བུད་མེད་རྣམས་མཐོང་ན། །མ་སྲིང་སྙམ་དུ་འདུ་ཤེས་སྐྱེད་བྱེད་ན། །དེ་དག་མཛེས་ཤིང་ཤིན་ཏུ་བལྟ་སྡུག་ལ། །རྟག་ཏུ་མཆོག་ཏུ་ཡིད་དུ་འོང་བར་འགྱུར།། 367b གང་གིས་ས་འདི་ཀུན་ཏུ་ཁྱབ་བྱེད་ལ། །བདག་གིས་སྤུ་ཡི་ཁུང་ནས་བྱུང་བའི་དྲི། །འདོད་ཆགས་སེམས་ཀྱིས་བདག་གིས་དེ་མ་བསྒྲུབས། །དེ་ནི་སྦྱིན་དང་དུལ་བའི་འབྲས་བུ་ཡིན། །ཁོ་མོ་འདོད་ཆགས་ལྡན་པའི་སེམས་མི་སྐྱེད། །འདོད་ཆགས་བྲལ་ལ་ཆགས་པ་མ་སྐྱེད་ཅིག་།ཇི་ལྟར་སྨྲས་བདེན་ནམ་ཡང་རྫུན་མིན་ཏེ། །མདུན་གྱི་ཐུབ་དབང་འདི་ནི་བདག་གི་དབང ། །སྔོན་ཆད་ཁྱོད་ཅག་ཁོ་མོའི་ཕར་གྱུར་ལ། །ཁོ་མོའང་ཁྱེད་ཀྱི་ཕ་དང་ཕུ་ནུ་དང ། །སྲིང་མོའམ་མར་ཡང་ཡང་དང་ཡང་གྱུར་པས། །སུ་ཞིག་མ་ལ་འདོད་ཆགས་སེམས་སྐྱེད་བྱེད། །སྔོན་ཆད་ཁོ་མོས་ཁྱོད་ཀུན་བསད་གྱུར་ཅིང ། །ཁྱེད་ཀྱིས་ཁོ་མོའང་སྔོན་ཆད་བསད་གྱུར་པས། །ཐམས་ཅད་ཕན་ཚུན་དགྲ་བོ་གཤེད་ཡིན་ན། །ཁྱེད་ཅག་ཇི་ལྟར་འདོད་ཆགས་སེམས་སྐྱེད་བྱེད། །ཆགས་པས་གཟུགས་དང་ལྡན་པར་མི་འགྱུར་ཞིང ། །ཆགས་སེམས་ཅན་དག་བདེ་འགྲོར་འགྲོ་མི་འགྱུར། །ཆགས་པའི་སེམས་ལྡན་མྱ་ངན་མི་འདའ་བས། །དེ་ཕྱིར་འདོད་ཆགས་ཡོངས་སུ་སྤང་བར་བྱ། །འདོད་པའི་གཞི་ལས་དམྱལ་བར་འགྲོ་འགྱུར་ཞིང ། །འདོད་ཆགས་ལས་ནི་ཡི་དྭགས་དུད་འགྲོར་འགྱུར། །གང་དག་འདོད་ཆགས་དཀྲིས་པའི་སེམས་ལྡན་པ། །གྲུལ་བུམ་ལྷ་མིན་གནོད་སྦྱིན་ཤ་ཟར་འགྱུར། །འདོད་ཆགས་ལས་ནི་ཞར་བ་ཐེང་པོ་དང ། །ལྕེ་མེད་གཟུགས་ 368a ༄#། །མི་སྡུག་པ་དག་ཏུ་འགྱུར། །གང་དག་འདོད་ཆགས་ངན་པའི་སྤྱད་སྤྱོད་པ། །རྣམ་པ་སྣ་ཚོགས་སྐྱོན་གྱི་སྣོད་དུ་འགྱུར། །འཁོར་ལོས་བསྒྱུར་བའི་རྒྱལ་སྲིད་ཐོབ་པ་དང ། །སུམ་ཅུ་གསུམ་པའི་དབང་ཕྱུག་བརྒྱ་བྱིན་དང ། །ཚངས་པ་དབང་ལྡན་དབང་སྒྱུར་གང་ཡིན་པ། །དེ་ནི་ཚངས་སྤྱོད་ཡངས་པ་སྤྱོད་པ་ཡིན། །རྟག་ཏུ་འདོད་པ་དག་ལ་བརྐམ་པ་རྣམས། །དམུས་ལོང་འོན་པ་གླེན་པ་ཁྱི་ཕག་དང ། །རྔ་མོ་བོང་བུ་སྤྲེའུ་དང་གླང་པོ་དང ། །སྟག་དང་གནག་རྟ་ཕྱེ་ལེབ་སྦྲང་བུར་འགྱུར། །གང་དག་ཚངས་སྤྱོད་ཡངས་པ་སྤྱོད་བྱེད་པ། །ས་ཡི་དབང་ཕྱུག་དགའ་བ་རྣམས་དང་ནི། །ཚོང་དཔོན་ཁྱིམ་བདག་བློན་པོར་གྱུར་ནས་ནི། །བདེ་ཞིང་ཡིད་བདེ་ཞི་བར་འགྲོ་བར་འགྱུར། །རང་རྒྱལ་རྣམས་དང་དེ་བཞིན་དགྲ་བཅོམ་དང ། །སངས་རྒྱས་མཚན་གྱིས་སྤྲས་པ་གསལ་གྱུར་ཅིང ། །བླ་མེད་བྱང་ཆུབ་ཞི་བ་རྟོགས་གྱུར་ནས། །སེམས་ཅན་ཚོགས་ཆེན་རྣམས་ཀྱི་དོན་མཛད་འགྱུར། །འདོད་པས་འཁོར་བ་དག་ན་བསྲེག་པ་དང ། །ཡང་ན་དུ་བས་བདུག་ཅིང་བསད་པའམ། །བཅིང་དང་དེ་བཞིན་བརྡེག་བསྡིགས་མགོ་དང་ནི། །རྣ་མིག་སྣ་དང་རྐང་པ་གཅད་པར་འགྱུར། །འདོད་སྤྱོད་ཉེས་པ་གཅིག་ཏུ་མ་ཟད་དེ། །འདོད་རྣམས་མི་མཐུན་ཉེས་པ་མཐའ་ཡང་མེད། །གལ་ཏེ་མྱུར་དུ་དེ་ནས་ཐར་འདོད་ 368b ན། །ཚུར་ཤོག་རྒྱལ་བ་དེ་ཡི་སྤྱན་སྔར་འདེང ། །ལྷ་མིས་མཆོད་པའི་སངས་རྒྱས་མ་གཏོགས་པར། །རྟེན་དང་དཔུང་གཉེན་གཞན་དག་ཡོད་མིན་ཞིང ། །རྒྱལ་བ་འབྱུང་བ་བསྐལ་པ་བརྒྱར་དཀོན་གྱི། །ཐམས་ཅད་ལྷན་ཅིག་འགྲོགས་ཏེ་འདོང་བར་བྱ། །བུ་མོ་ཟླ་མཆོག་གིས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་དེའི་མོད་ལས་ཆེན་པོ་རབ་ཏུ་གཡོས་པར་གྱུར་ཅིང ། ནམ་མཁའི་དཀྱིལ་ན་འཁོད་པའི་ལྷའི་བུ་རྣམས་ཀྱིས་ཀྱང་ཨ་ལ་ལ་ཞེས་ཅ་ཅོ་དང ། ག་ཞའི་སྒྲ་ཆེན་པོ་འབུམ་ཕྲག་དུ་མ་དག་རབ་ཏུ་བྱུང་སྟེ། མེ་ཏོག་གི་ཆར་དག་ཀྱང་རབ་ཏུ་ཕབ། སིལ་སྙན་བྱེ་བ་ཁྲག་ཁྲིག་འབུམ་ཕྲག་དུ་མ་དག་ཀྱང་རབ་ཏུ་གསིལ་ཏོ། །སྐྱེ་བོ་ཕལ་པོ་ཆེ་དེ་དག་ཀྱང་ཤིན་ཏུ་ཡིད་བྱུང་ཞིང་སྤུ་ཟིང་ཞེས་བྱེད་ལ་ངོ་མཚར་དུ་འཛིན་པར་གྱུར་ནས་འགའ་ཡང་ཕྱིན་ཆད་འདོད་ཆགས་དང ། ཞེ་སྡང་དང ། གཏི་མུག་དང ། ཁྲོ་བ་དང ། འཐབ་པ་དང ། འཆབ་པ་དང ། གནོད་སེམས་དང ། རྣམ་པར་གནོད་པ་མེད་ཅིང་ཐམས་ཅད་ཀྱང་སེམས་ཀྱི་སྒྲིབ་པ་དང་བྲལ་ལ་ལུས་རབ་ཏུ་སིམ་ཞིང་ཉོན་མོངས་པ་ཐམས་ཅད་དང་བྲལ་བར་གྱུར་ནས། བུ་མོ་ཟླ་མཆོག་དེ་ལ་མ་དང ། སྲིང་མོ་དང ། སྟོན་པ་ལྟ་བུར་སྡུག་པར་གྱུར་ཅིང་ཕྱག་བྱས་ཏེ་ཇི་ལྟར་ཐོགས་པའི་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པ་དེ་དག་གིས་ཀྱང་མངོན་པར་གཏོར་ཏོ། །གཏོར་མ་ཐག་ཏུ་སངས་ 369a ༄#། །རྒྱས་ཀྱི་མཐུས་དེ་ནས་དེའི་མོད་ལ་མེ་ཏོག་གི་གདུགས་དཔག་ཚད་ཕྱེད་ཙམ་པ་ཞིག་ཏུ་གྱུར་ཏེ། དེ་བཞིན་གཤེགས་པའི་སྐུ་དེའི་དབུའི་གཙུག་གི་དྲང་ཐད་ཀྱི་སྟེང་ན་འདུག་པར་གྱུར་ཏོ། །དེ་ནས་བུ་མོ་ཟླ་མཆོག་པར་སྣང་དེ་ལས་བབས་ཏེ། སོར་བཞི་ཙམ་གྱིས་ས་ལ་མ་རེག་པར་ནམ་མཁའ་ལ་འཆག་བཞིན་དུ་ཡངས་པ་ཅན་གྱི་གྲོང་ཁྱེར་ཆེན་པོ་ནས་བྱུང་ངོ ། །དེའི་རྐང་པ་བཞག་པ་དང ། བཏེག་པ་ཐམས་ཅད་དུ་ས་ཆེན་པོ་རབ་ཏུ་གཡོས་པ་དང ། ཡངས་པ་ཅན་གྱི་གྲོང་ཁྱེར་ཆེན་པོའི་སྲོག་ཆགས་བརྒྱད་ཁྲི་བཞི་སྟོང་ཐམ་པའང་བུ་མོ་ཟླ་མཆོག་སོང་བའི་ཕྱི་བཞིན་འབྲང་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུ་དགེ་སློང་ལྔ་བརྒྱ་ཙམ་དང་ལྷན་ཅིག་ཏུ་སྔ་དྲོའི་དུས་ཀྱི་ཚེ་ཤམ་ཐབས་དང ། ཆོས་གོས་བགོས་ཏེ་ལྷུང་བཟེད་ཐོགས་ནས་བསོད་སྙོམས་ཀྱི་ཕྱིར་ཡངས་པ་ཅན་གྱི་གྲོང་ཁྱེར་ཆེན་པོར་ཞུགས་པ་དང ། ཉན་ཐོས་ཆེན་པོ་དེ་དག་གིས་བུ་མོ་ཟླ་མཆོག་སྐྱེ་བོ་ཕལ་པོ་ཆེས་ཡོངས་སུ་བསྐོར་ཅིང་རྒྱང་རིང་པོ་ནས་འོང་བ་མཐོང་ངོ ། །མཐོང་ནས་ཀྱང་ཚེ་དང་ལྡན་པ་ཤཱ་རདྭ་ཏིའི་བུས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་ཅེས་སྨྲས་སོ། །ཚེ་དང་ལྡན་པ་འོད་སྲུང་ཆེན་པོ། བུ་མོ་ཟླ་མཆོག་འདི་ནི་བཅོམ་ལྡན་འདས་ཀྱི་སྤྱན་སྔར་འགྲོ་ན། བདག་ཅག་གིས་འདི་ཅི་བཟོད་པ་ཐོབ་པ་ 369b ཞིག་གམ། འོན་ཏེ་མ་ཡིན་ཞེས་ཤེས་པར་བྱ་ཡི། དྲི་བ་འགའ་ཞིག་ཡོངས་སུ་དྲི་བར་བྱའམ། ཞེས་ནས་དེ་ནས་ཚེ་དང་ལྡན་པ་ཤཱ་རདྭ་ཏིའི་བུ་དགེ་སློང་དེ་དག་དང་ལྷན་ཅིག་ཏུ་བུ་མོ་ཟླ་མཆོག་ག་ལ་བ་དེར་སོང་སྟེ་ཕྱིན་ནས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། ཁྱོད་གར་འགྲོ་།བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། གང་འདི་སྐད་དུ་བུ་མོ་ཁྱོད་གང་འགྲོ་ཞེས་གསུང་བ་ནི་གནས་བརྟན་གང་དུ་བཞུད་པ་དེ་ཉིད་དུ་བདག་ཀྱང་མཆིས་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ་ཁོ་བོ་ནི་ཡངས་པ་ཅན་དུ་འཇུག་ལ་ཁྱོད་ནི་ཡངས་པ་ཅན་ནས་འབྱུང་ན། འོ་ན་ཁྱོད། འདི་སྐད་དུ། གནས་བརྟན་གང་དུ་བཞུད་པ་དེ་ཉིད་དུ་བདག་ཀྱང་མཆིས་ལགས་སོ་ཞེས་ཟེར་བ་དེ་ཇི་ལྟར་རིགས་པར་འགྱུར། བུ་མོས་སྨྲས་པ་བཙུན་པ་ཤཱ་རདྭ་ཏིའི་བུ། ཁྱོད་ཞབས་གང་ནས་འདེག་ཅིང་གང་དུ་འཇོག་པར་མཛད་ལགས། ཤཱ་རདྭ་ཏིའི་བུས་སྨྲས་པ། བུ་མོ། ཁོ་བོ་ནི་རྐང་པ་ནམ་མཁའ་ལས་འདེག་ཅིང་ནམ་མཁའ་ཉིད་ལ་འཇོག་པར་བྱེད་དོ། །བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། བདག་ཀྱང་སུག་པ་ནམ་མཁའ་ལས་འདེག་ཅིང་ནམ་མཁའ་ཉིད་ལ་འཇོག་པར་བགྱིད་དེ། ནམ་མཁའི་ཁམས་ལ་ནི་ཐ་དད་པ་ཅུང་ཟད་ཀྱང་མ་མཆིས་པས། བཙུན་པ་ཤཱ་རདྭ་ཏིའི་བུ། དེའི་སླད་དུ་བདག་གིས། འདི་སྐད་ཅེས། ཁྱོད་གང་དུ་བཞུད་པ་དེ་ཉིད་དུ་བདག་ཀྱང་མཆི་ 370a ༄#། །ལགས་སོ་ཞེས་སྨྲས་སོ། །བཙུན་པ་ཤཱ་རདྭ་ཏིའི་བུ། ཁྱོད་གར་གཤེགས། ཤཱ་རདྭ་ཏིའི་བུས་སྨྲས་པ། བུ་མོ། ཁོ་བོ་ནི་མྱ་ངན་ལས་འདས་པར་འགྲོའོ།། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་མྱ་ངན་ལས་འདས་པར་མཆི་བ་ལགས་པས་བདག་ཀྱང་དེར་མཆི་བ་ལགས་སོ། །ཤཱ་རདྭ་ཏིའི་བུས་སྨྲས་པ ། བུ་མོ། གལ་ཏེ་ཆོས་ཐམས་ཅད་ཡོངས་སུ་མྱ་ངན་ལས་འདས་པར་འགྲོ་བ་ཡིན་ན། འོ་ན་ཁྱོད་ཅིའི་ཕྱིར་ཡོངས་སུ་མྱ་ངན་ལས་འདས་པར་མི་འགྲོ་།བུ་མོས་སྨྲས་པ ། བཙུན་པ་ཤཱ་རདྭ་ཏིའི་བུ། ཡོངས་སུ་མྱ་ངན་ལས་འདས་པར་མཆི་བ་ནི་ཡོངས་སུ་མྱ་ངན་ལས་མི་འདའ་ཞིང་ཡོངས་སུ་མྱ་ངན་ལས་འདས་པར་མཆི་བ་ལ་ནི་སྐྱེ་བ་དང ། འཇིག་པའང་མ་མཆིས་ལ། ཡོངས་སུ་མྱ་ངན་ལས་འདས་པར་མཆི་བ་ལ་མ་གཏོགས་པར་ཡང་གང་ཡོངས་སུ་མྱ་ངན་ལས་འདའ་བར་འགྱུར་བ་འགའ་ཡང་མ་མཆིས་ལགས་སོ། ། དེ་ཅིའི་སླད་དུ་ཞེ་ན། ཡོངས་སུ་མྱ་ངན་ལས་འདའ་བར་མཆི་བ་ཉིད་ཡོངས་སུ་མྱ་ངན་ལས་འདས་པ་ལགས་པའི་སླད་དུའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་ཤཱ་རདྭ་ཏིའི་བུས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། འོ་ན་ཅི་ཁྱོད་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་ཡིན་ནམ། འོན་ཏེ་རང་སངས་རྒྱས་ཀྱི་ཐེག་པ་ལ་ཡང་དག་ 370b པར་ཞུགས་པ་ཡིན་ནམ། འོན་ཏེ་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། གང་འདི་སྐད་དུ། ཁྱོད་ཐེག་པ་གང་ལ་ཡང་དག་པར་ཞུགས་པ་ཡིན་ཞེས་གསུངས་པ་ནི། བཙུན་པ་ཤཱ་རདྭ་ཏིའི་བུ། དེའི་སླད་དུ་དེ་ཁྱོད་ཉིད་ལ་ཞུ་ཡི། ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་གདབ་ཏུ་གསོལ། བཙུན་པ་ཤཱ་རདྭ་ཏིའི་བུ། ཁྱོད་ཀྱིས་རྟོགས་པའི་ཆོས་གང་ལགས་པའི་ཆོས་དེ་ཅི་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་ཞིག་ལགས་སམ། རང་སངས་རྒྱས་ཀྱི་ཐེག་པ་ཡང་དག་པར་ཞུགས་པ་ཞིག་ལགས་སམ། ཐེག་པ་ཆེན་པོ་ལ་ཡང་དག་པར་ཞུགས་པ་ཞིག་ལགས། ཤཱ་རདྭ་ཏིའི་བུས་སྨྲས་པ། བུ་མོ། དེ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་དེ་ལ་ནི་རྣམ་པར་རྟོག་པའམ། སྤྲོས་པ་འགའ་ཡང་མེད་ལ་ཐ་དད་པ་ཉིད་ཀྱང་མ་ཡིན། གཅིག་པ་ཉིད་ཀྱང་མ་ཡིན། སྣ་ཚོགས་ཉིད་ཀྱང་མ་ཡིན་པའི་ཕྱིར་རོ། །བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། དེའི་སླད་དུ་རྣམ་པར་རྟོག་པ་མ་མཆིས་པ་དང ། སྤྲོས་པ་མ་མཆིས་པའི་ཆོས་ཐམས་ཅད་དང ། ཐ་དད་དུ་དབྱེར་མ་མཆིས་པའི་ཆོས་ཐམས་ཅད་ལ་ནི་གང་གནས་པར་འགྱུར་བའམ། ཡོངས་སུ་མྱ་ངན་ལས་འདའ་བར་གྱུར་པའི་ཆོས་དེ་དམིགས་སུ་མ་མཆིས་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། ཁྱོད་ཀྱི་སྤོབས་པ་ནི་ངོ་མཚར་ན། གཞན་ཡང ། ཁྱོད་ཀྱིས་དེ་བཞིན་གཤེགས་ 371a ༄#། །པ་ཇི་སྙེད་ཅིག་ལ་བསྙེན་བཀུར་བྱས། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། གང་འདི་སྐད་ཅེས། ཁྱོད་ཀྱིས་དེ་བཞིན་གཤེགས་པ་ཇི་སྙེད་ཅིག་ལ་བསྙེན་བཀུར་བྱས་ཞེས་གསུངས་པ་ནི་དེ་བཞིན་ཉིད་དང ། ཆོས་ཀྱི་དབྱིངས་ཇི་སྙེད་པ་ལའོ། །ཤཱ་རདྭ་ཏིའི་བུས་སྨྲས་པ། བུ་མོ། དེ་བཞིན་ཉིད་དང ། ཆོས་ཀྱི་དབྱིངས་ཀྱང་ཇི་སྙེད་ཅིག་ཡིན་བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། མ་རིག་པ་དང ། སྲིད་པའི་སྲེད་པ་ཇི་སྙེད་པའོ། །ཤཱ་རདྭ་ཏིའི་བུས་སྨྲས་པ། བུ་མོ། མ་རིག་པ་དང ། སྲིད་པའི་སྲེད་པའང་ཇི་སྙེད་ཅིག་ཡིན་བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། སེམས་ཅན་གྱི་ཁམས་ཇི་སྙེད་པའོ། །ཤཱ་རདྭ་ཏིའི་བུས་སྨྲས་པ། བུ་མོ། སེམས་ཅན་གྱི་ཁམས་ཀྱང་ཇི་སྙེད་ཅིག་ཡིན། བུ་མོས་སྨྲས་པ ། བཙུན་པ་ཤཱ་རདྭ་ཏིའི་བུ། འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡུལ་ཇི་སྙེད་པའོ། །ཤཱ་རདྭ་ཏིའི་བུས་སྨྲས་པ། བུ་མོ། ཁྱོད་ཀྱིས་ཅི་ཞིག་ལན་བཏབ་པ་ཡིན། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། གནས་བརྟན་གྱིས་གང་ཡོངས་སུ་དྲིས་པ་དེ་ཉིད་ཀྱི་ལན་བདག་གིས་བཏབ་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། ཁོ་བོས་ཅི་ཞིག་ཡོངས་སུ་དྲིས། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། ཡི་གེ་གང་དག་ཡོངས་སུ་དྲིས་པ་དེ་དག་ཉིད་ངེས་པར་བསྟན་ལགས་ 371b སོ། །ཤཱ་རདྭ་ཏིའི་བུས་སྨྲས་པ། བུ་མོ། ཡི་གེ་རྣམས་ནི་རང་བཞིན་གྱིས་འགགས་པ་སྟེ། གདགས་སུ་མེད་པ་ཡིན་པས་དེ་དག་ནི་ངེས་པར་བསྟན་པར་མི་ནུས་སོ། །བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། དེ་བཞིན་དུ་སྐྱེ་བ་མ་མཆིས་པ་དང ། འགག་པ་མ་མཆིས་པ་དང ། མཚན་ཉིད་མ་མཆིས་པའི་ཆོས་ཐམས་ཅད་ལའང་གང་གིས་ཡོངས་སུ་དྲིས་པ་དང ། གང་གིས་ལན་བཏབ་པ་དེ་གཉིས་ཀའང་དམིགས་སུ་མ་མཆིས་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། འདི་ལྟར་ཁྱོད་ནི་བཟོད་པ་ཐོབ་ཅིང་བྱང་ཆུབ་སེམས་དཔའི་རྣམ་པ་དག་ཡོད་པ་ཁོ་ན་ཡིན་པས་ཁྱོད་ནི་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། བྱང་ཆུབ་ཅེས་བགྱི་བ་དེའང་སྤྲོས་པ་ལགས་སོ། །མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བགྱི་བ་དེའང་སྤྲོས་པ་ལགས་སོ། །ཉེ་བ་ཞེས་བགྱི་བའམ། རིང་པ་ཞེས་བགྱི་བ་དེའང་སྤྲོས་པ་ལགས་སོ། །བཙུན་པ་ཤཱ་རདྭ་ཏིའི་བུ། གང་འདི་སྐད་ཅེས། ཁྱོད་ནི་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་གསུང་བ་ནི། བཙུན་པ་ཤཱ་རདྭ་ཏིའི་བུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་སྐྱེ་བ་མ་མཆིས་པ། འགག་པ་མ་མཆིས་པ། ཆད་པ་མ་ 372a ༄#། །མཆིས་པ། རྟག་པ་མ་མཆིས་པ། དོན་གཅིག་པ་མ་ལགས་པ། དོན་ཐ་དད་པ་མ་ལགས་པ། འོང་བ་མ་མཆིས་པ། འགྲོ་བ་མ་མཆིས་པ། བརྗོད་དུ་མ་མཆིས་པ། འབྱུང་བ་མ་མཆིས་པ། རང་བཞིན་མ་མཆིས་པ་ལགས་པས་དེ་ལ་ནི་གང་མངོན་པར་རྫོགས་པར་འཚང་རྒྱ་བར་འགྱུར་བ་འགའ་ཡང་དམིགས་སུ་མ་མཆིས་ལགས་སོ། །དེ་ཅིའི་སླད་དུ་ཞེ་ན། བྱང་ཆུབ་ནི་གཉིས་ཀྱི་མཚན་ཉིད་མ་ལགས་པ་སྟེ། བྱང་ཆུབ་ནི་གཉིས་སུ་མ་མཆིས་ཤིང་གཉིས་དང་བྲལ་བ་ལགས་པའི་སླད་དུའོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། ཁྱོད་དེ་བཞིན་གཤེགས་པའི་སྤྱན་སྔར་སོང་ཞིག་དང ། ཁོ་བོ་ཅག་ཀྱང་ཆོས་མཉན་པའི་ཕྱིར་དེར་འདོད་ངོ ། །དེ་ནས་གནས་བརྟན་ཤཱ་རདྭ་ཏིའི་བུ་ལ་བུ་མོ་ཟླ་མཆོག་གིས་འདི་སྐད་ཅེས་སྨྲས་སོ། །བཙུན་པ་ཤཱ་རདྭ་ཏིའི་བུ། དེ་བཞིན་གཤེགས་པ་ནི་ཉན་འཚལ་བ་རྣམས་ལ་ཆོས་སྟོན་པར་མི་མཛད་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། འོ་ན་དེ་བཞིན་གཤེགས་པ་སུ་དག་ལ་ཆོས་སྟོན་པར་མཛད། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། གང་དག་ཉན་པར་བགྱིད་ཀྱང་དགའ་བར་མི་བགྱིད། མངོན་པར་དགའ་བ་མི་བགྱིད་པ་རྣམས་ལའོ། །ཤཱ་རིའི་བུས་སྨྲས་པ། བུ་མོ། སེམས་ཅན་མང་པོ་དག་ཆོས་ 372b མཉན་པའི་ཕྱིར་དེ་བཞིན་གཤེགས་པའི་སྤྱན་སྔར་འདོང་ཞིང་དེ་བཞིན་གཤེགས་པའང་དེ་དག་ལ་ཆོས་སྟོན་པར་མི་མཛད་དམ། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། དེ་བཞིན་གཤེགས་པར་འདུ་ཤེས་ཤིང་ཆོས་ལ་ངར་འཛིན་པ་ལ་གནས་པའི་སེམས་ཅན་རྣམས་ནི་འདི་སྙམ་དུ་འདི་ནི་དེ་བཞིན་གཤེགས་པ་སྟེ། བདག་ཅག་ལ་ཆོས་སྟོན་པར་མཛད་པའོ། །འདི་ནི་ཆོས་ཏེ་བསྟན་པར་བགྱི་བའོ་སྙམ་དུ་སེམས་ལགས་ཀྱི། ཆོས་ཀྱི་དབྱིངས་རྟོགས་པ་རྣམས་ནི་འདི་ལྟར་དེ་བཞིན་གཤེགས་པའམ། ཆོས་སམ ། བསྟན་པ་ཞེས་བགྱི་བར་སེམས་པ་མ་མཆིས་ལགས་སོ། །དེ་ནས་གནས་བརྟན་འོད་སྲུང་ཆེན་པོས་གནས་བརྟན་ཤཱ་རདྭ་ཏིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རདྭ་ཏིའི་བུ། འདི་ལྟ་བུའི་སྤོབས་པ་དང་ལྡན་པའི་བུ་མོ་འདི་དེ་བཞིན་གཤེགས་པའི་སྤྱན་སྔར་འགྲོ་བས་ན་དེར་ནི་ཆོས་བསྟན་པ་ཆེན་པོའང་འབྱུང་བར་འགྱུར་བས་བདག་ཅག་ཟན་བཅད་དེ་ཕྱིར་ལོག་ན་ནི་འོ་བུ་ཅག་ལ་ལེགས་ཀྱི། བདག་ཅག་ཆོས་མཉན་པ་དེ་ལྟ་བུ་ལས་ཕྱི་རོལ་ཏུ་གྱུར་ན་ནི་མ་ཡིན་ནོ། །དེ་ནས་ཉན་ཐོས་ཆེན་པོ་དེ་དག་ཕྱིར་ཕྱོགས་ཏེ་དེ་ཉིད་ནས་ཕྱིར་ལོག་པར་གྱུར་ཏོ། །དེ་ནས་བུ་མོ་ཟླ་མཆོག་ཚལ་ཆེན་པོའི་ཁང་པ་བརྩེགས་པའི་གནས་ག་ལ་བ་དང ། བཅོམ་ལྡན་འདས་གལ་བ་དེར་སོང་སྟེ་ཕྱིན་ནས་བཅོམ་ 373a ༄#། །ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། ཇི་ལྟར་ཐོགས་པའི་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པ་དང ། ཕྱེ་མ་དང ། ན་བཟའ་དང ། གདུགས་དང ། རྒྱལ་མཚན་དང ། བ་དན་དག་གིས་བཅོམ་ལྡན་འདས་ལ་མངོན་པར་གཏོར་ཏོ། །མངོན་པར་རབ་ཏུ་གཏོར་ཏོ། །སྐྱེ་བོ་ཕལ་པོ་ཆེ་དེ་དག་གིས་ཀྱང་ཇི་ལྟར་ཐོགས་པའི་མེ་ཏོག་དང ། བདུག་སྤོས་དང ། སྤོས་དང ། མེ་ཏོག་ཕྲེང་དང ། བྱུག་པ་དག་གིས་བཅོམ་ལྡན་འདས་ལ་མངོན་པར་གཏོར་ཏེ། གཏོར་མ་ཐག་ཏུ་དེ་ནས་དེའི་མོད་ལ་མེ་ཏོག་དེ་དག་མེ་ཏོག་གི་གདུགས་རྒྱར་དཔག་ཚད་བཅུ་ཙམ་པ་ཞིག་ཏུ་གྱུར་ཏེ། བཅོམ་ལྡན་འདས་ཀྱི་དབུའི་གཙུག་གི་དྲང་ཐད་ཀྱི་སྟེང་ན་འདུག་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ་ཁྱོད་གང་ནས་ཤི་འཕོས་ཏེ་འདིར་འོངས། འདི་ནས་ཤི་འཕོས་ནས་ནི་གང་དུ་འགྲོ་བར་འགྱུར། བུ་མོས་སྨྲས་པ། འཇམ་དཔལ། འདི་ཇི་སྙམ་དུ་དགོངས། གང་བདག་གི་སུག་པ་གཡས་པ་ན་དེ་བཞིན་གཤེགས་པའི་སྐུ་པདྨ་ལ་བཞུགས་པ་འདི་གང་ནས་ཤི་འཕོས་ཏེ་འདིར་བྱོན་ལ། འདི་ནས་ཤི་འཕོས་ནས་ནི་གང་དུ་སྐྱེ་བར་འགྱུར་སྙམ། འཇམ་དཔལ་ 373b གྱིས་སྨྲས་པ། བུ་མོ། འདི་ནི་སྤྲུལ་པ་སྟེ་སྤྲུལ་པ་ལ་ནི་འཆི་འཕོའང་མེད་ལ་སྐྱེ་བའང་མེད་དོ། །བུ་མོས་སྨྲས་པ། འཇམ་དཔལ། བདག་གིས་ཀྱང་དེ་བཞིན་དུ་སྤྲུལ་པའི་རང་བཞིན་གྱི་ཆོས་ཐམས་ཅད་ལ་གང་འཆི་འཕོ་བའམ། སྐྱེ་བ་དེ་མ་མཐོང་ལགས་སོ། །དེ་ནས་བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། བུད་མེད་ཀྱི་ལུས་ཀྱིས་ནི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ན་ཁྱོད་ཅིའི་ཕྱིར་བུད་མེད་ཀྱི་ལུས་སྒྱུར་བར་མི་བྱེད། བུ་མོས་སྨྲས་པ། རིགས་ཀྱི་བུ། ཆོས་ཐམས་ཅད་ནི་སྟོང་པ་ཉིད་ཀྱི་མཚན་ཉིད་ལགས་པས་སྟོང་པ་ཉིད་ལ་ནི་ལྡོག་པ་དང ། འགྱུར་བ་མ་མཆིས་ལགས་སོ། །དེ་ནས་བྱང་ཆུབ་སེམས་དཔའི་ས་འཛིན་གྱིས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། ཁྱོད་ཀྱིས་དེ་བཞིན་གཤེགས་པ་མཐོང་ངམ། བུ་མོས་སྨྲས་པ། རིགས་ཀྱི་བུ། ཇི་ལྟར་དེ་བཞིན་གཤེགས་པའི་སྐུ་འདིས་གཟིགས་པ་ལྟར་བདག་གིས་ཀྱང་དེ་བཞིན་གཤེགས་པ་མཐོང་ལགས་སོ། །བྱང་ཆུབ་སེམས་དཔའ་སྤོབས་པ་རྩེགས་ཀྱིས་སྨྲས་པ། བུ་མོ། ཁྱོད་ཀྱི་ཆོས་ཀྱིས་གཏམ་ལ་སྤོབས་པར་གྱིས་ཤིག། བུ་མོས་སྨྲས་པ། རིགས་ཀྱི་བུ། ཆོས་ཀྱི་དབྱིངས་ལ་ནི་བརྗོད་པར་བགྱི་བ་དང ། རབ་ཏུ་བརྗོད་པར་བགྱི་བ་མ་མཆིས་ལ། ཆོས་ཀྱི་དབྱིངས་ནི་ཡི་གེར་བགྲང་ 374a ༄#། །བའང་མ་ལགས་སོ། །བྱང་ཆུབ་སེམས་དཔའ་སྤོབས་པ་ཐོགས་པ་མེད་པས་སྨྲས་པ། བུ་མོ། ཁྱོད་ཀྱིས་སྔོན་གྱི་དེ་བཞིན་གཤེགས་པ་རྣམས་ཀྱི་སྤྱན་སྔར་ཆོས་ཇི་ལྟ་བུ་ཐོས། བུ་མོས་སྨྲས་པ། རིགས་ཀྱི་བུ། དེའི་སླད་དུ་སྟེང་དུ་གཟིགས་ཤིག་དང ། བར་སྣང་ཅི་འདྲ་བར་དེ་བཞིན་གཤེགས་པའང་དེ་འདྲ་ལ། དེ་བཞིན་གཤེགས་པ་ཅི་འདྲ་བར་ཆོས་བསྟན་པ་ཉིད་ཀྱང་དེ་འདྲ། ཉན་པ་ཉིད་ཀྱང་དེ་འདྲ་སྟེ། རིགས་ཀྱི་བུ། ཆོས་ཐམས་ཅད་ནི་ནམ་མཁའི་མཚན་ཉིད་དེ་ལྟ་བུ་ལགས་སོ། །བྱང་ཆུབ་སེམས་དཔའ་ནམ་མཁའ་མཛོད་ཀྱིས་སྨྲས་པ། བུ་མོ། ཁྱོད་ཀྱིས་སྔོན་གྱི་དེ་བཞིན་གཤེགས་པ་དག་ལ་ཇི་ལྟར་སྦྱིན་པ་བྱིན་ཞིང་ཇི་ལྟར་ཡོངས་སུ་བསྔོས། བུ་མོས་སྨྲས་པ། རིགས་ཀྱི་བུ། འདི་ལྟ་སྟེ།་དཔེར་བགྱི་ན། དེ་བཞིན་གཤེགས་པའི་སྤྲུལ་པ་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་སྦྱིན་པ་ཞིག་ཕུལ་བར་གྱུར་ན་དེ་ལ་རྒྱུ་བ་ཇི་ལྟ་བུ་ཞིག་འབྱུང་བར་འགྱུར་ལགས། སྨྲས་པ། སྤྲུལ་པ་ལ་ནི་རྒྱུ་བ་འགའ་ཡང་འབྱུང་བ་མེད་དོ། །བུ་མོས་སྨྲས་པ། རིགས་ཀྱི་བུ། བདག་གིས་ཀྱང་སྔོན་གྱིས་དེ་བཞིན་གཤེགས་པ་དག་ལ་དེ་ལྟར་སྦྱིན་པ་བྱིན་ཞིང་ཡོངས་སུ་བསྔོས་པ་ལགས་སོ། །བྱང་ཆུབ་སེམས་དཔའ་ཐོགས་མེད་སེམས་ཀྱིས་སྨྲས་པ། བུ་མོ། ཁྱོད་སེམས་ཅན་རྣམས་ལ་ཇི་ལྟར་བྱམས་ 374b པས་ཁྱབ་པར་བྱེད། བུ་མོས་སྨྲས་པ། རིགས་ཀྱི་བུ། སེམས་ཅན་དེ་དག་ཇི་ལྟ་བ་ཁོ་ན་བཞིན་དུའོ། །སྨྲས་པ། བུ་མོ། སེམས་ཅན་དེ་དག་ཀྱང་ཇི་ལྟ་བུ་ཡིན། སྨྲས་པ། རིགས་ཀྱི་བུ། འདས་པའང་མ་ལགས། མ་འོངས་པའང་མ་ལགས། ད་ལྟར་བྱུང་བའང་མ་ལགས་ལ། སེམས་དེའང་འདས་པའང་མ་ལགས། མ་འོངས་པ་འང་མ་ལགས། ད་ལྟར་བྱུང་བའང་མ་ལགས་པས་བྱམས་པ་བསྒོམ་པ་དེ་ནི་འདི་འདྲའོ་ཞེས་གདགས་པར་རྔོ་མི་ཐོགས་ལགས་སོ། །བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོས་སྨྲས་པ། བུ་མོ།་ཁྱོད་ཀྱིས་ཆོས་ཀྱི་མིག་ཐོབ་བམ། བུ་མོས་སྨྲས་པ། རིགས་ཀྱི་བུ། བདག་གིས་ཤའི་མིག་ཀྱང་མ་ཐོབ་ལགས་ན་ཆོས་ཀྱི་མིག་ལྟ་ཐོབ་པ་ག་ལ་འགྱུར། བྱང་ཆུབ་སེམས་དཔའ་བློ་གྲོས་བརྟན་པས་སྨྲས་པ། བུ་མོ། ཁྱོད་ཡུན་ཇི་སྲིད་ཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས། བུ་མོས་སྨྲས་པ། རིགས་ཀྱི་བུ། ཡུན་ཇི་སྲིད་ཅིག་ནས་སྨིག་རྒྱུ་ཆུ་ལ་ཡང་དག་པར་ཞུགས་པའི་ཡུན་དེ་སྲིད་ནས་བདག་ཀྱང་བྱང་ཆུབ་ལ་ཡང་དག་པར་ཞུགས་ལགས་སོ། །དེ་ནས་བྱང་ཆུབ་སེམས་དཔའ་བྱམས་པས་བུ་མོ་ཟླ་མཆོག་ལ་འདི་སྐད་ཅེས་སྨྲས་སོ། །བུ་མོ། ཁྱོད་ཡུན་ཇི་སྲིད་ཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། བུ་མོས་སྨྲས་པ། ཡུན་ 375a ༄#། །ཇི་སྲིད་ཅིག་གིས་བྱང་ཆུབ་སེམས་དཔའ་བྱམས་པ་སོ་སོ་སྐྱེ་བོའི་ས་ལས་འདའ་བར་འགྱུར་ཞིང་སངས་རྒྱས་ཀྱི་ས་ལས་ཀྱང་འདའ་བར་འགྱུར་བ་དེ་སྲིད་ཀྱིས་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རདྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་སྲིད་མོ་འདི་གཙོ་བོ་ཆེན་པོ། གོ་ཆ་ཆེན་པོ་བགོས་པ་འདི་ལྟ་བུ་དག་དང་ལྷན་ཅིག་ཡང་དག་པར་སྨྲའང་འཇིགས་པར་མི་བགྱིད། དམན་པར་མི་བགྱིད་པ་ནི་བུ་མོ་འདིའི་སྤོབས་པ་ངོ་མཚར་ལགས་སོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུ་ལ་བུ་མོ་ཟླ་མཆོག་གིས་འདི་སྐད་ཅེས་སྨྲས་སོ། །བཙུན་པ་ཤཱ་རདྭ་ཏིའི་བུ། འདི་ལྟ་སྟེ། དཔེར་བགྱི་ན། ཞུགས་ནི་ཇི་ཙམ་དུ་ཆུང་ཡང་སྲེག་པའི་ངོ་བོ་ཉིད་ལགས་པས་ཇི་ཙམ་དུ་ཉེ་བར་ལེན་པ་རྙེད་པ་དེ་ཙམ་དུ་སྲེག་པར་བགྱིད་ལགས་སོ། །བཙུན་པ་ཤཱ་རདྭ་ཏིའི་བུ། དེ་བཞིན་དུ་བྱང་ཆུབ་སེམས་དཔའ་རྣམས་ཀྱང་དེ་བཞིན་གཤེགས་པ་ཐམས་ཅད་ཀྱི་བགྲོད་པས་ཐ་དད་ཀྱི་དབྱེ་བ་ཅུང་ཟད་ཀྱང་མ་མཆིས་པས་དེ་དག་ཐམས་ཅད་བདག་དང ། གཞན་དག་གིས་ཉོན་མོངས་པ་ཐམས་ཅད་སྲེག་པའི་སླད་དུ་ཉེ་བར་གནས་པ་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། བྱང་ཆུབ་ཐོབ་ནས་ཁྱོད་ཀྱི་སངས་རྒྱས་ཀྱི་ཞིང་ཅི་འདྲ་བར་འགྱུར། བུ་མོས་སྨྲས་པ། བཙུན་པ་ཤཱ་རདྭ་ཏིའི་ 375b བུ། བདག་གི་སངས་རྒྱས་ཀྱི་ཞིང་ནི། སངས་རྒྱས་ཀྱི་ཞིང་གང་ན་གནས་བརྟན་ཤཱ་རདྭ་ཏིའི་བུ་ཅི་འདྲ་བ་དེ་འདྲ་བའི་སེམས་ཅན་དམན་པ་ལ་མོས་པ། ཤེས་རབ་ཆུང་བ། གཞན་གྱི་དོན་ལ་མི་ལྟ་བ། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་དག་གི་མིང་ཡང་གྲགས་པར་མི་འགྱུར་བ་དེ་ལྟ་བུ་འགྱུར་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ།་གང་ཁྱོད་འདི་སྐད་ཅེས། ཆོས་ཀྱི་དབྱིངས་ནི་གཅིག་གོ་།དེ་བཞིན་ཉིད་གཅིག་གོ། ཞེས་ཟེར་ན་འོ་ན་ཅི་ཁྱོད་ཀྱིས་ཉན་ཐོས་རྣམས་ནི་དམན་པ་ཉིད་ཡིན་ལ་ཅི་སངས་རྒྱས་རྣམས་ནི་ལྷག་པ་ཡིན་པར་ཡང་དག་པར་རྗེས་སུ་མཐོང་ངམ། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། འདི་ལྟ་སྟེ། དཔེར་བགྱི་ན། བ་ལང་གི་རྗེས་ཀྱི་ཆབ་གང་ལགས་པ་དང ། རྒྱ་མཚོ་ཆེན་པོའི་ཆབ་གང་ལགས་པ་དེ་དག་ལ་ནི་བྱེ་བྲག་ཅུང་ཟད་ཀྱང་མ་མཆིས་ལགས་མོད་ཀྱི། འོན་ཀྱང་བ་ལང་གི་རྗེས་ལ་ནི་རྒྱ་མཚོ་ཆེན་པོ་ལྟར་སེམས་ཅན་ཚད་མ་མཆིས་པ་དག་གི་གོ་སྐབས་མ་མཆིས་ལགས་སོ། །བཙུན་པ་ཤཱ་རདྭ་ཏིའི་བུ། དེ་བཞིན་དུ་དེ་བཞིན་གཤེགས་པ་རྣམས་དང ། ཉན་ཐོས་རྣམས་ཀྱང་ཆོས་ཀྱི་དབྱིངས་གཅིག་ལས་ངེས་པར་བྱུང་བ་ལགས་མོད་ཀྱི།་འོན་ཀྱང་ཉན་ཐོས་རྣམས་ཀྱིས་ནི་དེ་བཞིན་གཤེགས་པ་དག་ལྟར་སེམས་ཅན་ཚད་མ་མཆིས་པ། གྲངས་མ་མཆིས་པ་དག་གི་དོན་བགྱིད་པར་རྔོ་མི་ཐོགས་ལགས་སོ། ། 376a ༄#། །བཙུན་པ་ཤཱ་རདྭ་ཏིའི་བུ། འདི་ལྟ་སྟེ། དཔེར་བགྱི་ན། ཡུངས་འདྲུའི་ཁོངས་སུ་ཆུད་པའི་ནམ་མཁའི་ཁམས་གང་ལགས་པ་དང ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་ཁོངས་སུ་ཆུད་པའི་ནམ་མཁའི་ཁམས་གང་ལགས་པའི་ནམ་མཁའི་ཁམས་དེ་དག་ལ་ནི་བྱེ་བྲག་ཅུང་ཟད་ཀྱང་མ་མཆིས་པ་ལགས་མོད་ཀྱི།་འོན་ཀྱང་ཡུངས་འབྲུའི་ཁོངས་སུ་ཆུད་པའི་ནམ་མཁའི་ཁམས་ལ་ནི་ཕྱོགས་བཅུའི་ཁོངས་སུ་ཆུད་པའི་ནམ་མཁའི་ཁམས་ལྟར་གྲོང་དང ། གྲོང་ཁྱེར་དང ། ཡུལ་འཁོར་དང ། རྒྱལ་པོའི་ཕོ་བྲང་དག་རབ་ཏུ་མི་གནས་ཤིང་ཀུན་ཏུ་མི་གནས་ལ་རིའི་རྒྱལ་པོ་རི་རབ་དག་ཀྱང་མ་མཆིས། རྒྱ་མཚོ་ཆེན་པོ་དག་ཀྱང་མ་མཆིས་ལགས་སོ། །བཙུན་པ་ཤཱ་རདྭ་ཏིའི་བུ། དེ་བཞིན་དུ་དེ་བཞིན་གཤེགས་པ་རྣམས་དང ། ཉན་ཐོས་རྣམས་ཀྱང་སྟོང་པ་ཉིད་དང ། མཚན་མ་མེད་པ་དང ། སྨོན་པ་མ་མཆིས་པ་གཅིག་ལས་ངེས་པར་འབྱུང་བ་ལགས་མོད་ཀྱི། འོན་ཀྱང་ཉན་ཐོས་རྣམས་ཀྱིས་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ལྟར་སེམས་ཅན་ཚད་མེད་པ་གྲངས་མ་མཆིས་པ་དག་གི་དོན་བགྱིད་པར་རྡོ་མི་ཐོགས་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། སངས་རྒྱས་རྣམས་དང ། ཉན་ཐོས་རྣམས་ཀྱི་རྣམ་པར་གྲོལ་བ་གཅིག་པ་ 376b མ་ཡིན་ནམ། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། གང་འདི་སྐད་ཅེས། སངས་རྒྱས་རྣམས་དང ། ཉན་ཐོས་རྣམས་ཀྱི་རྣམ་པར་གྲོལ་བ་གཅིག་གོ་ཞེས་གསུངས་པ་ནི་སྐུར་པ་འདེབས་པ་ལགས་སོ། །ཤཱ་རདྭ་ཏིའི་བུས་སྨྲས་པ། བུ་མོ། ཅིའི་ཕྱིར། བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། དེའི་སླད་དུ་དེ་ཁྱོད་ཉིད་ལ་ཡོངས་སུ་ཞུ་ཡི། ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་གདབ་ཏུ་གསོལ། གང་གི་ཚེ་བཙུན་པ་ཤཱ་རདྭ་ཏིའི་བུའི་སེམས་རྣམ་པར་གྲོལ་བ་དེའི་ཚེ་ཇི་ག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལག་མཐིལ་ལྟར་མཉམ་པར་ཀུན་ཏུ་གནས་པར་གྱུར་ལགས་སམ། ཇི་ག་ཤིང་ལྗོན་པ་དང ། རི་ཐམས་ཅད་ཀྱིས་ཁྱོད་ལོགས་སུ་མངོན་པར་ཕྱོགས་ཏེ་བཏུད། མངོན་པར་བཏུད། མངོན་པར་རབ་ཏུ་བཏུད་ལགས་སམ། ཇི་ག་ངན་སོང་ཐམས་ཅད་རབ་ཏུ་ཞི་བར་གྱུར་ལགས་སམ། ཇི་ག་སེམས་ཅན་ཐམས་ཅད་ཉོན་མོངས་པ་དང་བྲལ་བར་གྱུར་ལགས་སམ། ཇི་ག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འོག་ཏུ་མནར་མ་མཆིས་པ་ལ་ཐུག་པ་ཡན་ཆད་དང ། སྟེང་དུ་འོག་མིན་གྱི་གནས་ཀྱི་མཐར་ཐུག་པའི་བར་དག་འོད་ཟེར་གྱི་ཁ་དོག་ལྟ་བུས་སྣང་བས་གྱུར་ལགས་སམ། ཇི་ག་ལྷ་ཐམས་ཅད་ཀྱིས་ཕྱག་བགྱིས་ལགས་སམ། ཇི་ག་བདུད་ཀྱིས་ས་དང ། ནམ་མཁའ་ 377a ༄#། །དཔག་ཚད་སུམ་ཅུ་ཚུན་ཆད་དཔུང་གིས་ཁྱབ་པར་བགྱིས་ཏེ་མཆིས་པར་གྱུར་ལགས་སམ། ཇི་ག་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་རྣམ་པར་གྲོལ་ལགས་སམ། ཇི་ག་ཁྱོད་བྱང་ཆུབ་པ་དང་དུས་གཅིག་ཁོ་ནར་བདུད་ཐམས་ཅད་ངེས་པར་བཅོམ་ལགས་སམ། ཤཱ་རདྭ་ཏིའི་བུས་སྨྲས་པ། བུ་མོ། ཁྱོད་ཀྱིས་ཁོ་བོ་ལ་ཇི་སྐད་སྨྲས་པ་དེ་དག་ལས་དེའི་རྒྱུ་གཅིག་ཙམ་ཡང་མ་བྱུང་ངོ ། །བུ་མོས་སྨྲས་པ། བཙུན་པ་ཤཱ་རདྭ་ཏིའི་བུ། བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་དམ་པ་ལ་གནས་པ་ལ་ནི་ཡོན་ཏན་གྱི་ཁྱད་པར་དེ་དག་དང ། གཞན་ཡང་དཔག་ཏུ་མ་མཆིས་པ་དག་བྱུང་བར་གྱུར་པས་ན། བཙུན་པ་ཤཱ་རདྭ་ཏིའི་བུ། དེ་བཞིན་གཤེགས་པའི་རྣམ་པར་གྲོལ་བ་དང ། ཉན་ཐོས་ཀྱི་རྣམ་པར་གྲོལ་བའི་ཁྱད་པར་ནི་དེ་ལགས་སོ། །དེ་ནས་བཅོམ་ལྡན་འདས་ཀྱིས་བུ་མོ་ཟླ་མཆོག་ལ་ལེགས་སོ་ཞེས་བྱ་བ་བྱིན་ཏེ། བུ་མོ། ལེགས་སོ། ། ལེགས་སོ། །བུ་མོ། ཁྱོད་དེ་སྐད་སྟོན་པ་ནི་ཡང་ཁྱོད་ལེགས་སོ། །དེ་ནས་སངས་རྒྱས་ཀྱི་མཐུས་བུ་མོ་ཟླ་མཆོག་གི་ལག་པ་གཡས་པར་དེ་བཞིན་གཤེགས་པའི་སྐུ་པདྨ་ལ་བཞུགས་པ་བྱུང་བར་གྱུར་པ་གང་ཡིན་པ་དེ་པདྨའི་གདན་དེ་ལས་མངོན་པར་འཕགས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་ 377b འདས་ཉིད་ཀྱི་སྐུ་ལྟེ་བའི་ཁུང་དུ་ཞུགས་སོ། །དེ་ནས་དེའི་མོད་ལ་སངས་རྒྱས་ཀྱི་མཐུས་ས་ཆེན་པོ་རབ་ཏུ་གཡོས་པར་གྱུར་ཅིང ། བཅོམ་ལྡན་འདས་ཀྱི་སྤུའི་ཁུང་བུ་ཐམས་ཅད་ནས་པདྨ་གསེར་གྱི་མདོག་ཏུ་སྣང་བ། སྡོང་བུ་རྣམས་ནི་གསེར། འདབ་མ་རྣམས་ནི་དངུལ། སྙིང་པོ་རྣམས་ནི་རིན་པོ་ཆེ་དཔལ་གྱི་སྙིང་པོ་ལས་གྲུབ་པ་དག་བྱུང་བར་གྱུར་ཏོ། །པདྨ་དེ་དག་ལའང་དེ་བཞིན་གཤེགས་པའི་སྐུ་མཚན་གྱིས་ལེགས་པར་བརྒྱན་པ་པདྨ་ལ་བཞུགས་པ་དག་ཀུན་ཏུ་སྣང་བར་གྱུར་ཅིང ། དེ་བཞིན་གཤེགས་པའི་སྐུ་དེ་དག་ཀྱང་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཏུ་གཤེགས་ཏེ་སངས་རྒྱས་མེད་པའི་འཇིག་རྟེན་གྱི་ཁམས་དག་ན་ཆོས་སྟོན་པར་ཀུན་ཏུ་སྣང་ཞིང ། འདི་ལྟ་སྟེ། སངས་རྒྱས་ཀྱི་མཐུས་ཆོས་སྟོན་པ་དེ་དག་ལ་འདིར་ཀུན་ཏུ་གྲག་གོ་།དེ་ནས་བུ་མོ་ཟླ་མཆོག་གིས་དེ་ལྟ་བུའི་ཆོ་འཕྲུལ་ཆེན་པོ་མཐོང་ནས་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་དེས་ལག་པ་གཡས་པ་ན་ཐོགས་པར་གྱུར་པའི་པདྨ་གང་ཡིན་པ་དེ་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེ་མེ་ཏོག་གི་ཁང་པ་བརྩེགས་པ། གྲུ་བཞི་ལྷམ་པ། ཀ་བ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ་ཞིག་ཏུ་གྱུར་ཏེ། བཅོམ་ལྡན་འདས་ཀྱི་དབུའི་གཙུག་གི་དྲང་ཐད་ཀྱི་སྟེང་གི་ནམ་མཁའ་ལ་འདུག་ 378a ༄#། །པར་གྱུར་ཏོ། ཁང་པ་བརྩེགས་པ་དེར་ཡང་ཁྲི་གདན་རྐང་པ་རིན་པོ་ཆེས་སྤྲས་པ། ལྷའི་རས་བཅོས་བུ་འབུམ་ཕྲག་དུ་མ་བཏིང་བ་ཞིག་བྱུང་བར་གྱུར་ཏོ། ཁྲི་གདན་དེ་ལ་བཅོམ་ལྡན་འདས་དེ་བཞིན་གཤེགས་པ་ཤཱ་ཀྱ་ཐུབ་པ་ཅི་འདྲ་བ་དེ་འདྲ་བའི་དེ་བཞིན་གཤེགས་པའི་སྐུ་ཞིག་བཞུགས་པར་ཡང་ཀུན་ཏུ་སྣང་ངོ ། །དེས་པདྨ་དེ་འཕངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་དགེ་བའི་རྩ་བ་འདིས་ངར་འཛིན་པ་དང ། ང་ཡིར་འཛིན་པ་དེ་ལ་གནས་པའི་སེམས་ཅན་རྣམས་ལ་ངར་འཛིན་པ་དང ། ང་ཡིར་འཛིན་པ་སྤང་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་གཉིས་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་གཉིས་པ་ཞིག་ཏུ་གྱུར་པ་དང ། དེས་ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་འཇིགས་ཚོགས་ལ་ལྟ་བ་དང་འབྲེལ་བའི་སེམས་ཅན་རྣམས་ལ་འཇིག་ཚོགས་ལ་ལྟ་བ་སྤང་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་གསུམ་པ་ཞིག་བྱུང་བར་གྱུར་པ་དང ། དེས་ 378b དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་གསུམ་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་དང ། འདོད་ཆགས་དང ། ཞེ་སྡང་དང ། གཏི་མུག་སྤང་བའི་སླད་དུ་སེམས་ཅན་རྣམས་ལ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་བཞི་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེར་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་བཞི་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་ཕྱིན་ཅི་ལོག་བཞི་སྤང་བའི་སླད་དུ་སེམས་ཅན་རྣམས་ལ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་ལྔ་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་ལྔ་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་སྒྲིབ་པ་ལྔ་དང་ 379a ༄#། །ལྡན་པའི་སེམས་ཅན་རྣམས་ལ་སྒྲིབ་པ་ལྔ་སྤང་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་དྲུག་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་དྲུག་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་སྐྱེ་མཆེད་དྲུག་ལ་བརྟེན་པའི་སེམས་ཅན་རྣམས་ལ་སྐྱེ་མཆེད་དྲུག་ཡོངས་སུ་འཚལ་བར་བགྱི་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་བདུན་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་བདུན་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་རྣམ་པར་ཤེས་པ་གནས་པ་བདུན་དང་ལྡན་པའི་སེམས་ཅན་རྣམས་ལ་རྣམ་པར་ཤེས་པ་གནས་པ་བདུན་ཡོངས་སུ་འཚལ་བར་བགྱི་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་བརྒྱད་པ་ཞིག་བྱུང་བར་གྱུར་པ་དང ། 379b དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་བརྒྱད་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་ལོག་པ་ཉིད་བརྒྱད་ལ་ངེས་པའི་སེམས་ཅན་རྣམས་ལ་ལོག་པ་ཉིད་བརྒྱད་ངེས་པར་སྤང་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་དགུ་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་སྟེང་དུ་པདྨའི་ཁང་པ་བརྩེགས་པ་དགུ་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་དགེ་བའི་རྩ་བ་འདིས་ཀུན་ནས་མནར་སེམས་ཀྱི་དངོས་པོ་དགུ་ལ་གནས་པའི་སེམས་ཅན་རྣམས་ལ་ཀུན་ནས་མནར་སེམས་ཀྱི་དངོས་པོ་དགུ་སྤང་བའི་སླད་དུ་ཆོས་སྟོན་པར་གྱུར་ཅིག་།ཡང་སངས་རྒྱས་ཀྱི་མཐུས་དེའི་ལག་པར་པདྨ་བཅུ་པ་ཞིག་བྱུང་བར་གྱུར་པ་དང ། དེས་དེའང་བཅོམ་ལྡན་འདས་ག་ལ་བ་དེ་ལོགས་སུ་འཕངས་སོ། །འཕངས་མ་ཐག་ཏུ་པདྨ་དེའང་བཅོམ་ལྡན་འདས་ཀྱི་དབུའི་གཙུག་གི་དྲང་ཐད་ཀྱི་སྟེང་དུ་པདྨའི་ཁང་པ་བརྩེགས་པ་བཅུ་པ་ཞིག་ཏུ་གྱུར་པ་དང ། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་ 380a ༄#། །འདས། བདག་དགེ་བའི་རྩ་བ་འདིས་ཇི་ལྟར་ད་ལྟར་བཅོམ་ལྡན་འདས་ཕྱོགས་བཅུར་སྣང་བས་ཁྱབ་པར་མཛད་པ་ལྟར་སྟོབས་བཅུ་དང་ལྡན་པའི་སངས་རྒྱས་སུ་གྱུར་ཅིག་།དེ་ནས་པདྨའི་ཁང་པ་བརྩེགས་པ་དེ་དག་གོང་ནས་གོང་དུ་བརྩེགས་པའི་འཕང་གིས་ཚངས་པའི་འཇིག་རྟེན་གྱི་མཐར་ཐུག་པར་གྱུར་ཏོ། །དེའི་ཚེ་ནས་བླ་བའི་ལྷ་ཡན་ཆད་ནས་ཚངས་རིས་ཀྱི་བར་གྱི་ལྷ་རྣམས་ལ་པདྨའི་ཁང་པ་བརྩེགས་པ་དེ་དག་གིས་ཡང་དག་པར་བསྐུལ་ནས་ལྷའི་བྱེ་བ་ཕྲག་དཔག་ཏུ་མེད་པ་དག་འདུས་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ། ཁ་དོག་སྣ་ཚོགས། ཁ་དོག་འབུམ་ཕྲག་དུ་མ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། འོད་ཀྱིས་ཉི་མ་དང ། ཟླ་བའི་འོད་ཟིལ་གྱིས་མནན་ནས་ཕྱིར་ལོག་སྟེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་ 380b པོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་འཛུམ་པའི་དོན་ཡོངས་སུ་ཞུས་པ། མཁྱེན་པ་ཀུན་ལ་མངོན་སུམ་སྤྱན་མངའ་ཞིང ། །ཆོས་རྣམས་ཀུན་ལ་ནེམ་ནུར་རྣམ་པར་བརྒལ། །འཇིག་རྟེན་ཀུན་དང་མི་མཉམ་མཐུ་མངའ་བ། །རྒྱལ་དབང་ཅི་སླད་འཛུམ་པ་རབ་ཏུ་མཛད། །ཁྱོད་ཀྱིས་མཐའ་ཡས་དུས་ན་སྦྱིན་པ་བྱིན། །ཁྱེད་ཁྲིམས་རྣམ་དག་ནོར་བུ་རིན་ཆེན་འདྲ། །ཁྱོད་ཀྱི་བཟོད་པའང་མི་གཡོ་ལྷུན་པོ་བཞིན། །དྲང་སྲོང་ཆེན་པོ་ཅི་སླད་འཛུམ་པ་མཛད། །བསམ་གཏན་བརྙེས་ཤིང་བརྩོན་འགྲུས་སྟོབས་ལྡན་པ། །གནོད་བྲལ་ན་དང་རྒ་ལས་རྣམ་པར་གྲོལ། །རྒྱ་མཚོ་འདྲ་བར་ཤིན་ཏུ་ཟབ་པའི་བློ། །ཐུབ་ཆེན་ཅི་སླད་འཛུམ་པ་རབ་ཏུ་མཛད། །བྱམས་ལ་གནས་ཤིང་ཐུགས་རྗེར་གནས་པ་པོ། །ཐུབ་པ་བཏང་སྙོམས་དང་ནི་དགའ་ལ་གནས། །འདོད་ཆགས་ལ་སོགས་འཇིགས་བསལ་རབ་ཏུ་ཞི། །ཐུབ་དབང་ཅི་སླད་འཛུམ་པར་རབ་ཏུ་མཛད། །ཁྱོད་སྒྲ་གཅིག་ནས་བྱུང་བའི་འོད་ཟེར་གྱིས། །ཕྱོགས་བཅུའི་འཇིག་རྟེན་མཐའ་ཡས་ཁམས་རྣམས་སུ། །ཉི་ཟླ་མྱུར་དུ་མོག་མོག་རབ་མཛད་དེ། ། 381a ༄#། །གཟི་བརྗིད་ཟིལ་གྱིས་གནོན་ཅིང་མིག་ཀྱང་སྩོལ། །འགྲོ་བའི་མགོན་ཅིག་ཁྱོད་གསུང་རྣམ་པར་དག་།སྙན་ཅིང་ཡིད་འོང་ཡན་ལག་དྲུག་ཅུ་ལྡན། །གང་དག་མཉན་པ་དེ་དག་མི་ངོམས་ཤིང ། །ཉོན་མོངས་ཐམས་ཅད་མ་ལུས་ཞི་བར་བྱེད། །ཕྱོགས་བཅུ་མཐའ་ཡས་སེམས་ཅན་གང་མཆིས་པའི། །སེམས་ཀྱི་སྤྱོད་པ་དུ་མ་གང་ལགས་པ། །དེ་མཁྱེན་དེ་དག་སོམ་ཉི་གཅོད་པ་པོ། །རབ་བྱུང་ཅི་སླད་འཛུམ་པ་རབ་ཏུ་མཛད། །དེང་སུའི་སེམས་ནི་བྱང་ཆུབ་སླད་དུ་ངེས། །སུ་ཞིག་སངས་རྒྱས་ཐེག་པ་ཡངས་པར་ཞུགས། །ཁྱབ་བདག་གང་གི་ཡིད་བསམས་རབ་ཏུ་གྲུབ། །ཐུབ་དབང་ཅི་སླད་འཛུམ་པ་རབ་ཏུ་མཛད། །གང་གིས་དེ་རིང་བདུད་བཞི་ཕམ་བགྱིས་ཤིང ། །ཉོན་མོངས་བདུད་དང་འཆི་བ་དག་བདུད་ཆེན་དང ། །གང་གིས་ཕུང་པོ་ལྷ་བུ་མང་པོའི་བདུད། །ཕམ་པར་བགྱིས་སམ་ཅི་སླད་ཁྱོད་འཛུམ་མཛད། །དེ་རིང་སུ་ཞིག་དོན་ཆེན་ཡངས་འགྱུར་ཞིང ། །སུ་ཞིག་ཆོས་ལ་ལེགས་བགྱིད་མིའི་སེངྒེ། །དེ་རིང་སུ་ཡི་སྒྲ་ནི་ཕྱོགས་རྣམས་མཆི། །ཐུབ་དབང་ཅི་སླད་འཛུམ་པ་རབ་ཏུ་མཛད། །ཀུན་མཁྱེན་མི་དགེ་ཐམས་ཅད་རབ་སྤངས་པ། །སེམས་ཅན་ཀུན་ལ་མཚུངས་པར་བྱམས་པ་པོ། །གཡོ་བ་ཀུན་དང་ལོག་པ་རྣམས་སྤངས་པ། །དྲང་སྲོང་ཆེན་པོ་ཅི་སླད་འཛུམ་པ་མཛད། །དེ་ 381b རིང་སུ་ཞིག་ཡངས་པ་ཆེན་པོ་ཐོབ། །དེང་སུའི་སེམས་ཀྱི་སྨོན་པ་ལེགས་འགྲུབ་ཅིང ། །དེང་སུའི་སྟོབས་བཅུ་རྣམས་དང་ལྡན་པར་འགྱུར། །དགྲ་ཐུལ་ཅི་སླད་འཛུམ་པ་རབ་ཏུ་མཛད། ། མཁའ་ལ་གནས་པ་ལྷ་ཀླུ་བྱེ་བ་དང ། །གནོད་སྦྱིན་མཁའ་ལྡིང་ལྟོ་འཕྱེ་ཆེར་བཅས་དང ། །ས་ལ་ཐལ་སྦྱར་སྐྱེས་པ་བུད་མེད་རྣམས། །དགའ་ཞིང་ལྷ་མི་དབང་པོ་ཟླ་བ་ལྟ། །རྫོགས་པའི་བྱང་ཆུབ་སེམས་དཔའ་མང་པོ་ནི། །དམ་ཆོས་འཚལ་བ་རྒྱ་མཚོ་ལྟ་བུ་དག་།ཕྱོགས་བཅུ་དག་ནས་ལྷགས་ནས་དགྲ་ཐུལ་བ། །ཡོངས་དག་ཐུགས་མངའ་འཛུམ་དོན་བཤད་དུ་གསོལ།། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཕྱིར་ཚིགས་སུ་བཅད་དེ་བཀའ་སྩལ་པ། གང་གི་རྒྱལ་བའི་ཆོ་འཕྲུལ་མཆོག་མཐོང་ནས། །བྱང་ཆུབ་ཕྱིར་ནི་རྒྱ་ཆེན་སེམས་བསྐྱེད་ཅིང ། །ང་ཡི་མདུན་ན་ཐལ་སྦྱར་གང་འདུག་པ། །མདུན་གྱི་བུ་མོ་མཐོང་ངམ་ཀུན་དགའ་བོ། །འདིས་ནི་སྔོན་གྱི་སྲིད་པར་རྟག་ཏུ་ཡང ། །རྒྱལ་བ་སུམ་བརྒྱ་ལེགས་པར་མཆོད་བྱས་ཤིང ། །ཇི་ལྟར་བདག་ནི་བྱང་ཆུབ་མཆོག་རིག་ཅེས། །རྒྱལ་བ་དེ་དག་ཀུན་ལ་མངོན་སུམ་ཞུས། །ནམ་ཡང་ལན་འགའ་ངན་འགྲོར་མ་སོང་ཞིང ། །འདི་ནི་རྟག་ཏུ་ལྷ་མིའི་འཇིག་རྟེན་སྐྱེས། །ནམ་ཡང་བྱང་ཆུབ་སེམས་ནི་མ་བརྗེད་ཅིང ། །འཆི་དུས་བྱས་ཀྱང་རྟག་ཏུ་ཚེ་རབས་དྲན། །རྒྱལ་བ་འོད་སྲུང་ཞེས་བྱ་མཐོང་ནས་ནི། །ཁང་བཟང་སྟེང་ནས་མཛེས་ 382a ༄#། །པའི་ལུས་མཆོངས་ཏེ། །རྒྱ་ཆེན་སེམས་ཀྱིས་འོད་སྲུང་དེ་མཆོད་ནས། །དེ་ནས་རྗེས་མཐུན་བཟོད་པ་ཐོབ་པར་གྱུར། སངས་རྒྱས་འཁོར་བ་འཇིག་ཅེས་མཚན་གསོལ་པ། །དེ་ལ་ན་བཟའ་དམ་པ་ཕྲུགས་ཕུལ་བས། །དེ་ཕྱིར་འདི་ཡི་ལུས་མདོག་གསེར་འདྲ་ལ། །མཛེས་ཤིང་དགེ་ལ་ཟླ་བ་འདྲ་བ་ཡིན། །སྟོན་པ་གསེར་ཐུབ་ཅེས་བྱ་གང་ཡིན་པ། །དེ་ལ་བདུག་པ་སྤོས་མཆོག་ཕུལ་བས་ན། །དེ་ཕྱིར་འདི་ཡི་ཁ་དང་སྤུ་ཁུང་ནས། །ུཏྤལ་ཙནྡན་དྲི་ངད་རབ་ཏུ་འབྱུང ། །གཙུག་ཏོར་ཞེས་བྱ་རྐང་གཉིས་མཆོག་དེ་ལ། །འདིས་ནི་མཚན་བདུན་ངེས་པར་བརྟགས་གྱུར་པས། །དེ་ཕྱིར་འདི་ཡི་མིག་མདོག་མཐོན་མཐིང་ལ། །འགྲོ་བ་རྟོག་པར་བྱེད་པ་ངོམས་མི་འགྱུར། །ཚེ་རབས་ལྔ་བརྒྱ་དག་ཏུ་འདོད་སྤངས་ཤིང ། །ཚངས་སྤྱོད་རྣམ་པར་སྤྱོད་པ་དག་བྱས་ནས། །དེ་ཕྱིར་ཆགས་པས་གདུངས་པས་དེ་མཐོང་ན། །དེ་ཚེ་འདོད་ཆགས་ཅན་དག་ཆགས་བྲལ་འགྱུར། །སུམ་ཅུ་རྩ་གསུམ་གནས་ནས་འདིར་འཕོས་ཏེ། །འདིར་ལི་ཙ་བཱི་ཁྱིམ་ནི་ཡངས་པར་སྐྱེས། །སྐྱེ་བ་ཀུན་ཏུ་ཚེ་རབས་དྲན་འགྱུར་ཞིང ། །ཚིགས་བཅད་དབྱངས་ཀྱིས་སྨྲ་བའི་བྱ་བ་ཤེས། །ཕ་མ་ཡོངས་སུ་སྨིན་པར་བྱ་བ་དང ། །དེ་བཞིན་སེམས་ཅན་གཞན་དོན་བྱེད་འདོད་ཅིང ། །ལ་ལ་བྱང་ཆུབ་ཕྱིར་ནི་སེམས་བསྐྱེད་ཕྱིར། །དེ་ཕྱིར་ཡངས་པའི་ཁྱིམ་འདིར་རབ་ཏུ་སྐྱེས། ། 382b བུད་མེད་སྐྱེས་པ་ཉེ་དུ་མཛའ་བཤེས་དང ། །གཞོན་ནུ་གཞོན་ནུ་མ་དག་གདུལ་བའི་ཕྱིར། །དེ་དག་སྟོང་ཕྲག་དྲུག་ཅུ་འདི་ཡིས་ནི། །སངས་རྒྱས་ཐེག་པ་མཆོག་ལ་ཡོངས་སྨིན་བྱས། ། འདི་ནི་རིང་པོ་མི་ཐོགས་བུད་མེད་ཀྱི། །ལུས་བསྒྱུར་ང་ཡི་བསྟན་ལ་རབ་འབྱུང་ཞིང ། །ཚངས་སྤྱོད་དམ་པ་རྒྱ་ཆེན་སྤྱད་བྱས་ནས། །ཤི་འཕོས་ལྷ་ཡི་འཇིག་རྟེན་འགྲོ་བར་འགྱུར། །ལྷ་གནས་དེ་ནས་ཤི་འཕོས་ཕྱིར་ཡང་ནི། །དུས་མཐའི་ཚེ་ན་ཆོས་འདི་སྲུང་འགྱུར་ཞིང ། །འདིར་ཡང་སྐྱེ་དགུའི་དོན་ཆེན་བྱས་ནས་ནི། །འདི་ནས་ཕྱིར་ཡང་དགའ་ལྡན་འགྲོ་བར་འགྱུར།། གང་ཚེ་མི་ཕམ་དགྲ་ལས་རྒྱལ་བ་པོ། །དུང་གི་སྲས་སུ་གྱུར་ཏེ་འབྱུང་བའི་ཚེ། །དེ་ནི་བཟོ་དོན་སྒྱུ་རྩལ་བྱ་བ་ཀུན། །ཤེས་ཤིང་མཛེས་ལ་ཡོན་ཏན་ཀུན་ལྡན་འགྱུར། །སྲོག་ཆགས་པ་རྒྱ་ཕྲག་དུ་མས་མདུན་བདར་ཅིང ། །ཟླ་བ་གསུམ་དུ་རྒྱལ་བ་མཆོད་བྱས་ནས། །དེ་ནི་སྲོག་ཆགས་དྲུག་སྟོང་སུམ་བརྒྱ་དང ། །ལྷན་ཅིག་ཁྱིམ་གྱིས་གནས་ནས་འབྱུང་འགྱུར་ཞིང ། །རྒྱལ་བ་མི་ཕམ་བཞུགས་དང་འདས་པ་ཡི། །ཆོས་ཀྱི་ཚུལ་ཡང་ཀུན་ཏུ་འཛིན་པར་འགྱུར། །དེ་འདྲའི་དཔའ་བོ་དེ་ནས་ཤི་འཕོས་ནས། །བདེ་བ་ཅན་གྱི་འཇིག་རྟེན་ཁམས་སུ་འགྲོ་།བློ་ལྡན་དེས་ནི་འོད་དཔག་མེད་པ་དང ། །གཞན་ཡང་ཕྱོགས་བཅུ་མཐའ་ཡས་བཞུགས་པ་ཡི། །སངས་རྒྱས་བྱེ་མང་གངྒཱ་ཀླུང་གི་ནི། །བྱེ་སྙེད་མཐོང་ཞིང་བསྙེན་བཀུར་བྱེད་པར་འགྱུར། །ཏིང་ 383a ༄#། །འཛིན་མངོན་ཤེས་བརྩོན་འགྲུས་སྟོབས་ཐོབ་ཅིང ། །བསྐལ་པ་བཟང་ལ་གང་དག་ཕྱིས་འབྱུང་བའི། །རང་འབྱུང་འཇིག་རྟེན་རྣམས་ལ་ཕན་བརྩོན་ན། །འཇིག་རྟེན་མགོན་དེ་དག་ལའང་བསྙེན་བཀུར་བྱེད། །བྱེ་མང་བསྐལ་པ་དེ་དག་མཆོད་བྱས་ཏེ། །སེམས་ཅན་བྱེ་མང་ཡོངས་སུ་སྨིན་བྱས་ཤིང ། །བསྐལ་པ་བྱེ་བ་སྟོང་ཕྲག་བརྒྱད་ཅུ་ན། །རྒྱལ་བ་ཟླ་བ་མཆོག་ཅེས་བྱ་བར་འགྱུར། །ཟླ་མཆོག་རྐང་གཉིས་གཙོ་བོ་མཛོད་སྤུ་ནས། །འོད་ཟེར་གསེར་མདོག་ཤིན་ཏུ་ཡིད་འོང་བ། །གང་དག་འབྱུང་བར་འགྱུར་བ་དེ་དག་གིས། །འཇིག་རྟེན་ཁམས་དེ་ཀུན་ཏུ་གསལ་བར་འགྱུར། །གང་ཕྱིར་འོད་ཀྱིས་འཇིག་རྟེན་དེ་ཁྱབ་པས། །ཉི་ཟླ་མེད་དང་ནོར་བུའི་འོད་རྣམས་ནི། །སྣང་བར་མི་འགྱུར་རྒྱུ་སྐར་ཚོགས་མིན་ཞིང ། །ཉིན་དང་མཚན་ཡང་བགྲང་དུ་ཡོད་མ་ཡིན། །དེ་ཚེ་རང་སངས་རྒྱས་དག་ཡོད་མིན་ཞིང ། །ཉན་ཐོས་རྣམས་མེད་མུ་སྟེགས་ཅན་ཚོགས་མེད། །མཉམ་མེད་དེ་ཡི་དགེ་འདུན་རྣམ་དག་ཅིང ། །བུད་མེད་རྣམ་པར་སྤངས་པ་ཉིད་དུ་འགྱུར། །མི་རྣམས་ཐམས་ཅད་གསེར་གྱི་མདོག་འདྲ་ཞིང ། །བསོད་ནམས་བརྒྱ་ཡི་མཚན་ཅན་བལྟ་ན་སྡུག་མངལ་ན་མི་གནས་འདོད་པ་མི་བསྟེན་ཅིང ། །པདྨའི་ནང་ནས་རྫུས་ཏེ་སྐྱེ་ཞིང་འབྱུང ། །རྒྱལ་སྲས་རྣམས་ཀྱི་ཚོགས་འབྱུང་གང་ཡིན་པ། །དེ་ནི་བགྲང་བས་རྟོགས་པར་མི་ནུས་ཤིང ། 383b ཐམས་ཅད་མངོན་ཤེས་ཐོབ་པ་དལ་སྤྱོད་དང ། །མི་སྐྱེ་བཟོད་ཅིང་མཉམ་མེད་ཆགས་པ་མེད། །དེ་ན་བུད་མེད་དམིགས་ཅན་ཡོད་མིན་ཞིང ། །བསླབ་པ་འདྲལ་མེད་ཕྱོགས་འཛིན་ཡོད་མ་ཡིན། །འཇིག་རྟེན་ཁམས་དེ་དག་ཅིང་དགའ་ལྡན་གྱི། །ཉེ་བར་སྤྱོད་པའི་རྣམ་པ་འདྲ་བར་འགྱུར། །གསེར་དངུལ་མུ་ཏིག་དམ་པའི་དྲི་མཆོག་གིས། །སྤྲས་ཤིང་གཙང་ལ་དྲི་མེད་ཡངས་པ་ཡིན། །རྒྱལ་བ་དེ་ཡི་སྐུ་ཚེ་ལོ་གྲངས་ནི། །སྟོང་ཕྲག་བྱེ་བ་བདུན་ཅུ་གསུམ་དུ་འགྱུར། །སྟོན་པ་དེ་ནི་ཞི་བར་གཤེགས་གྱུར་ནས། །དེ་ཚེ་དམ་ཆོས་བསྐལ་པ་གཅིག་གནས་ཤིང ། །བཞུགས་བཞིན་མྱ་ངན་འདས་ནའང་དེ་ཡི་ནི། །དམ་ཆོས་མཛོད་ལ་ཉམས་པར་འགྱུར་བ་མེད། །གལ་ཏེ་རྒྱལ་བ་དང་ནི་ཞིང་དེ་ཡི། །ཕུན་སུམ་ཚོགས་པ་བསྐལ་པར་བརྗོད་བྱས་ཀྱང ། །རྒྱ་མཚོ་དག་ལས་ཆུ་ཐིགས་གཅིག་བཞིན་དུ། །དཔེ་ཡང་བརྗོད་པར་འགྱུར་བ་མ་ཡིན་ནོ། །དེ་ནས་བུ་མོ་ཟླ་མཆོག་གིས་བཅོམ་ལྡན་འདས་ཀྱི་སྤྱན་སྔར་བདག་ཉིད་མངོན་སུམ་དུ་ལུང་བསྟན་པ་ཐོས་ནས་དགའ་བ་དང ། མཆོག་ཏུ་དགའ་བ་དེ་ཉིད་ཀྱིས་ཤིང་ཏ་ལ་བདུན་སྲིད་ཙམ་དུ་ནམ་མཁའ་ལ་མངོན་པར་འཕགས་སོ། །མངོན་པར་འཕགས་མ་ཐག་ཏུ་བུ་མོ་དེ་བུད་མེད་ཀྱི་ལུས་སྒྱུར་ཅིང་སྐྱེས་པའི་ལུས་མངོན་པར་གྲུབ་པར་གྱུར་པ་དང ། འཇིག་རྟེན་དུ་ས་ཆེན་པོའང་རབ་ཏུ་གཡོས་པར་གྱུར། མེ་ཏོག་གི་ཆར་དག་ཀྱང་རབ་ཏུ་བབ། 384a ༄#། །ལྷ་དང ། མིའི་སིལ་སྙན་འབུམ་ཕྲག་དུ་མ་དག་ཀྱང་སྒྲ་འཁྲོལ་བར་གྱུར་ཏོ། །འཇིག་རྟེན་ཀུན་ཏུ་སྣང་བ་ཆེན་པོས་ཁྱབ་པར་ཡང་གྱུར་ཏོ། །དེ་ནས་བྱང་ཆུབ་སེམས་དཔའ་ཟླ་མཆོག་གིས་བར་སྣང་དེ་ཉིད་ལ་འདུག་བཞིན་དུ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། རི་རབ་གཡོ་ཞིང་ནམ་མཁའ་སར་ལྟུང་བ། །ལྷ་གནས་སྐད་ཅིག་ཙམ་ལ་འཇིག་འགྱུར་ཞིང ། །རྒྱ་མཚོ་མི་གཡོ་དགུང་ཟླ་ལྷུང་ཡང་གདའ། །དེ་བཞིན་གཤེགས་པ་ཤོ་བེའི་ཚིག་མི་གསུང ། །ཕྱོགས་བཅུའི་སེམས་ཅན་ལུས་རྣམས་གཅིག་འགྱུར་ཞིང ། །ཞུགས་ནི་ཆབ་གྱུར་ཆབ་ནི་ཞུགས་གྱུར་གདའ། །མཉམ་མེད་ཐུབ་དབང་ཡོན་ཏན་འབྱུང་བའི་གནས། །འགྲོ་ལ་ཕན་བཞེད་ལོག་པའི་ཚིག་མི་གསུང ། །བར་སྣང་དོགས་ཀུན་ཏུ་འཛིན་གྱུར་ཞིང ། །ཡུངས་འབྲུའི་ནང་དུ་ཞིང་བརྒྱ་ཆུད་འགྱུར་ལ། །གསེར་མ་ཞགས་པས་གཟུང་བར་རྡོ་ཐོགས་གདའ། །རྒྱལ་བ་ལོག་པའི་ཚིག་ནི་གསུང་མི་འགྱུར། །དེ་འདྲར་ཡང་དག་དེ་བཞིན་ཉིད་གསུང་བའི། །རྒྱལ་བ་དེས་བདག་བྱང་ཆུབ་ངེས་བསྟན་ཅིང ། །གང་ཕྱིར་དོགས་ཀུན་ཏུ་རབ་གཡོས་པས། ། བྱང་ཆུབ་དམ་པ་འཐོབ་འགྱུར་གོར་མ་བཀུམ། །སངས་རྒྱས་ཐེག་མཆོག་བདག་ལུང་བསྟན་པས་ན། །རང་འབྱུང་གིས་ནི་ཇི་སྐད་གསུངས་དེ་དང ། །སྔོན་ཆད་བསྐལ་བརྒྱར་བདག་ 384b གིས་གང་བཙལ་བ། །དེ་ལྟར་བདག་གིས་ཆོས་མཆོག་འཁོར་ལོ་བསྐོར། །ལྷ་མི་ལྷ་མིན་གནོད་སྦྱིན་དགེ་སློང་དང ། །དགེ་བསྙེན་རྣམས་དང་བྱང་ཆུབ་སེམས་དཔའ་དག་།ཐམས་ཅད་མཉམ་མེད་མཐུ་སྟོབས་ལྡན་པ་ཡི། །བདེ་གཤེགས་འགྱུར་གྱི་སོམ་ཉི་མ་བྱེད་ཅིག་།ཆོས་འདི་ཐམས་ཅད་སྒྱུ་མ་ལྟ་བུ་སྟེ། །རྒྱལ་བ་རྣམས་ཀྱིས་ལོངས་སྤྱོད་རྨི་འདྲ་ཞིང ། ། བདག་མེད་གསོ་བ་ཤེད་བུ་འགའ་ཡང་མེད། །སེམས་ཅན་སྲོག་མེད་གང་ཟག་མེད་པར་གསུངས། །གཟོད་ནས་ངོ་བོ་ཉིད་ཀྱིས་ཆོས་རྣམས་ཀུན། །རང་བཞིན་དག་ཅིང་ངོ་བོ་ཉིད་མེད་པས། །བདག་སྔོན་བུད་མེད་རང་བཞིན་གྱུར་པ་གང ། །དེ་ནི་དངོས་མེད་གསོག་སྟོང་ཡ་མ་བརླ། །ཕྱི་མའི་དངོས་དེའང་སྟོང་ཞིང་སྐད་ཅིག་སྟེ། །དངོས་མེད་མི་གཡོ་གསོག་དང་ཡ་མ་བརླ། །རྟོག་དང་རྣམ་པར་རྟོག་པ་བྲལ་གྱུར་ཅིང ། །རྟོག་འགྱུར་དེ་ཡང་མཁའ་ལ་བྱ་རྗེས་བཞིན། །གང་ཞིག་མཉམ་མེད་བྱང་ཆུབ་འཚང་རྒྱ་ཞིང ། །ཐུལ་དཀའ་བདུད་ཀྱང་རབ་ཏུ་གཞོམ་པ་དང ། །སྟོང་གསུམ་ཆེན་པོའི་འཇིག་རྟེན་ཁམས་སུ་ནི། །ཆོས་ཀྱི་འཁོར་ལོ་དམ་བ་སྐོར་འདོད་པ། །དེས་ནི་བརྟན་པར་བྱང་ཆུབ་སེམས་བསྐྱེད་ལ། །དེ་བཞིན་གཤེགས་པ་རབ་ཏུ་མཆོད་བགྱིས་དང ། །དེས་ནི་མྱུར་དུ་ཡོན་ཏན་འབྱུང་བའི་གནས། །སྟོན་པ་རྒྱལ་བ་སྡིག་མེད་ལམ་རྟོགས་འགྱུར། །སྐྱེས་བུ་རྩལ་འཕགས་གསུང་སྙན་མཐར་ 385a ༄#། །བྱོན་པ། །རྒྱལ་བ་མི་མཆོག་གཙོ་ལ་ཕྱག་འཚལ་ལོ། །དགའ་མཛད་རབ་དགའི་དངོས་པོ་སྩོལ་མཛད་པ། །ཐུབ་པ་ཆོས་དབྱིག་འབྱུང་གནས་དབང་ཕྱུག་བསྟོད། །བདེ་བའི་འབྱུང་གནས་བདེ་ཀུན་རབ་སྩོལ་བ། །དེ་བཞིན་གཤེགས་པ་བདུད་ཀྱི་ཚེར་མ་དཀྲུགས། །བསྟོད་འོས་རྣམས་ཀྱིས་བསྟོད་པ་གང་ཟག་མཆོག ། རང་འབྱུང་དབང་ལྡན་སྲེད་བྲལ་བསྟོད་པར་བགྱི། །བདག་གིས་ཕྱོགས་བཅུ་བལྟས་ན་དེ་དག་ཏུ། །སྡིག་མེད་སངས་རྒྱས་བརྒྱ་ཕྲག་བསམ་ཡས་མཐོང ། །ཤཱཀྱ་སེངྒེ་ཇི་ལྟ་དེ་ལྟ་བུར། །ཕྱོགས་བཅུའི་སངས་རྒྱས་དེ་དག་བདག་ལུང་སྟོན། །རྒྱལ་བ་ཐམས་ཅད་ཆོས་ཉིད་སངས་རྒྱས་གཅིག་།དེ་བཞིན་ཆོས་ཀྱང་དེ་བཞིན་ཉིད་ཀྱིས་གཅིག་།སེམས་ཅན་རྣམས་ཀྱང་ཡང་དག་མཐར་ངེས་པ། །གང་ལ་བཟོད་འདི་མཆིས་པ་རྒྱལ་བར་འགྱུར། །དེ་ནས་བྱང་ཆུབ་སེམས་དཔའ་ཟླ་མཆོག་གིས་ཚིགས་སུ་བཅད་པ་དེ་དག་སྨྲས་ནས་བར་སྣང་དེ་ལས་བབས་ཏེ། བཅོམ་ལྡན་འདས་ཀྱི་ཞབས་གཉིས་ལ་རབ་ཏུ་གཏུགས་སོ། །དེས་རབ་ཏུ་གཏུགས་མ་ཐག་ཏུ་སངས་རྒྱས་འབུམ་ཕྲག་མང་པོ་དག་ཀྱང་སྣང་བར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་གིས་ཀྱང་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེས་སངས་རྒྱས་བཅོམ་ལྡན་འདས་ 385b དེ་དག་མངོན་སུམ་དུ་མཐོང་ཞིང་བདག་ཉིད་ལུང་བསྟན་པའང་ཐོས་ནས་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་སྤྱན་སྔར་རབ་ཏུ་འབྱུང་བར་གསོལ་བ་བཏབ་བོ། །བཅོམ་ལྡན་འདས་ཀྱིས་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་དབྱུང་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་དེའི་ཕྱིར་ཕ་མ་དག་གནང་བར་བྱེད་དུ་ཆུག་ཅིག་།དེ་ནས་ཁྱེའུ་དེའི་ཕ་མ་དག་གིས་ཆོ་འཕྲུལ་ཆེན་པོ་དེ་མཐོང་ཞིང་དེ་མངོན་སུམ་དུ་ལུང་བསྟན་པའང་ཐོས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཁྱེའུ་འདི་རབ་ཏུ་འབྱུང་བར་གནང་ལགས་སོ། །བདག་ཅག་གིས་ཀྱང་ཆོས་དེ་དག་སླད་ཀྱིས་ཐོབ་པར་བགྱི་ལགས་སོ་ཞེས་གསོལ་པ་དང ། བཅོམ་ལྡན་འདས་ཀྱིས་ཁྱེའུ་དེ་རབ་ཏུ་ཕྱུང་ངོ ། །དེ་ནས་ཁྱེའུ་དེ་རབ་ཏུ་བྱུང་བ་དང ། སྲོག་ཆགས་ཁྲིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཆོས་ཀྱི་རྣམ་གྲངས་འདི་བཤད་པ་ན་ལྷ་དང ། མི་ཁྲག་ཁྲིག་ཕྲག་བདུན་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྔོན་བྱང་ཆུབ་ཏུ་སེམས་མ་བསྐྱེད་པའི་དགེ་སློང་མ་ཉིས་བརྒྱ་དང ། 386a ༄#། །སྲོག་ཆགས་ཉི་ཁྲིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་ཟླ་མཆོག་དང ། ཚེ་དང་ལྡན་པ་དགའ་བོ་དང ། བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་དང ། ཐམས་ཅད་དང་ལྡན་པའི་འཁོར་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བུ་མོ་ཟླ་མཆོག་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་ཞུས་ཏེ་གཏན་ལ་ཕབ་པའོ།། |