།།རྒྱ་གར་སྐད་དུ། ཨཱརྱ་སྟྲཱི་བི་བརྟཱ་བྱཱ་ཀ་ར་ཎ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བུད་མེད་འགྱུར་བ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་དགེ་སློང་ལྔ་སྟོང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་བརྒྱད་སྟོང་མངོན་པར་གྲགས་པ། 317a ༄#། །མངོན་པར་ཤེས་པ་ཐོབ་པ། སྤོབས་པ་ཐོགས་པ་མེད་པ། མི་འཇིགས་པ་ཐོབ་པ། མི་སྐྱེ་བའི་ཆོས་ལ་བཟོད་པ་དང་ལྡན་པ། སངས་རྒྱས་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ། ཐེག་པ་ཆེན་པོའི་རྗེས་སུ་སོང་བ་ཤ་སྟག་ལ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མུ་ཁྱུད་འཛིན་དང ། ས་འཛིན་དང ། བང་རིམ་འཛིན་དང།་མཆོད་སྦྱིན་དུས་འཛིན་དང ། སྣང་བའི་བློ་གྲོས་དང ། རྣམ་པར་དག་པའི་བློ་གྲོས་དང ། སྦྱངས་པའི་བློ་གྲོས་དང ། ཁྱད་པར་བློ་གྲོས་དང ། མཐའ་ཡས་བློ་གྲོས་དང ། འཕེལ་བའི་བློ་གྲོས་དང ། མཐོང་དགའ་དང ། ལེགས་མཐོང་དང ། ཆེར་སྣང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཀུན་མཐོང་ལ་སོགས་པ་དང་ཐབས་གཅིག་ཏུ་བཞུགས་སོ། །བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་འཁོར་དེ་ཉིད་དུ་འདུས་པར་གྱུར་ཏེ་འཁོད་དོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་བརྟེན་ཅིང་བཞུགས་ཏེ། རྒྱལ་པོ་དང ། རྒྱལ་པོའི་བུ་རྣམས་དང ། ཚོང་དཔོན་རྣམས་དང ། ཁྱིམ་བདག་རྣམས་དང ། བློན་པོ་རྣམས་དང ། འཁོར་རྣམས་དང ། གྲང་རྡལ་བ་དང ། ཡུལ་གྱི་མི་རྣམས་ཀྱིས་བཀུར་སྟི་བྱས། བླ་མར་བྱས། རི་མོ་བྱས། མཆོད་པ་བྱས་སོ། །དེ་ནས་ཚེ་དང་ལྡན་པ་རབ་ 317b འབྱོར་སྔ་དྲོའི་དུས་ཀྱི་ཚེ་སྨད་གཡོགས་དང ། ཆོས་གོས་བགོས། ལྷུང་བཟེད་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས ། མདང་སུམ་བདག་གི་རྨི་ལམ་ན་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་ཞིག་མཐོང་སྟེ། དེས་ཕྱག་གཡས་པ་གསེར་གྱི་མདོག་ཅན་བརྐྱང་ནས་བདག་གི་སྤྱི་བོར་བཞག་སྟེ། རབ་འབྱོར། སང་ཁྱོད་ཀྱི་སྔོན་མ་ཐོས་པའི་ཆོས་སྟོན་པ་ཐོབ་པར་འགྱུར་རོ་ཞེས་དེ་སྐད་ཅེས་བཀའ་སྩལ་ན། བཅོམ་ལྡན་འདས། དེ་གང་གི་སྔ་ལྟས་ལགས། བཅོམ་ལྡན་འདས། ཀྱིས་བཀའ་སྩལ་པ། རབ་འབྱོར། དེ་ནི་རིགས་ཀྱི་བུའམ། རིགས་ཀྱི་བུ་མོ་ཆོས་འདོད་པ་རྣམས་ཀྱི་སྔོན་མ་ཐོས་པའི་ཆོས་ཐོས་པར་འགྱུར་བའི་སྔ་ལྟས་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བསོད་སྙོམས་ལ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེའི་དུས་ལ་ད་བབ་པར་ཤེས་ན་སོང་ཞིག་།དེ་ནས་ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་གནང་ནས། བཅོམ་ལྡན་འདས་ 318a ༄#། །ཀྱི་ཞབས་ལ་མགོ་བོས་ཕྱག་བཙལ་ཏེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བསོད་སྙོམས་ལ་ཞུགས་སོ། །དེ་ནས་ཚེ་དང་ལྡན་པ་རབ་འབྱོར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་མཐར་ཆགས་སུ་བསོད་སྙོམས་ལ་རྒྱུ་ཞིང་སོང་བ་ལས། ཁྱིམ་བདག་གཅིག་གི་གནས་ག་ལ་བ་དེར་སོང་སྟེ་ཕྱིན་ནས་སྒོ་ཁང་གི་ནང་ལོགས་སུ་ཅང་མི་སྨྲ་བར་སྡོད་དོ། །དེ་ནས་ཁྱིམ་དེའི་ནང་ནས་བུད་མེད་མཆོག་གི་གཟུགས་དང་ལྡན་པ། བལྟ་ན་སྡུག་པ། རྒྱན་གྱིས་ལེགས་པར་ཀླུ་བས་ཏེ། ནོར་བུ་དང ། མུ་ཏིག་དང ། བྱུ་རུ་དང།་གསེར་གྱི་རྒྱན་གྱིས་བརྒྱན་པ། དཔལ་ཤིན་ཏུ་འབར་བ། ཁ་དོག་རྒྱས་ཤིང་མཛེས་པ་དང་ལྡན་པ་ཞིག་བྱུང་ངོ ། །དེ་ནས་བུད་མེད་དེས་ཚེ་དང་ལྡན་པ་རབ་འབྱོར་གྱི་རྐང་པ་ལ་མགོ་བོས་ཕྱག་བཙལ་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། ཁྱོད་ཅི་ཞིག་བཞེད་པའི་སླད་དུ་སྒོ་ཁང་འདི་ན་གཞེས། རབ་འབྱོར་གྱིས་སྨྲས་པ། ཆེ་ཞེ། བདག་ནི་བསོད་སྙོམས་འདོད་པའི་ཕྱིར་སྒོ་གང་འདི་ན་སྡོད་དོ། །བུད་མེད་དེས་སྨྲས་པ། བཙུན་པ་རབ་འབྱོར། ཁྱོད་ལ་ད་དུང་ཡང་བསོད་སྙོམས་ཀྱི་འདུ་ཤེས་འབྱུང་ལགས་སམ། བཙུན་པ་རབ་འབྱོར། ཁྱོད་ལ་ད་དུང་ཡང་བསོད་སྙོམས་ཀྱི་འདུ་ཤེས་ཐུགས་སུ་མ་ཆུད་དམ། རབ་འབྱོར་གྱིས་སྨྲས་པ། ཆེ་ཞེ། བདག་གིས་བསོད་སྙོམས་ཀྱི་འདུ་ 318b ཤེས་ནི་ཁོང་དུ་ཆུད་མོད་ཀྱི་འོན་ཀྱང་ཕ་མ་ལས་སྐྱེས་པའི་ལུས་འབྲས་ཆན་དང ། ཟན་དྲོན་གྱིས་བསྐྱེད་པ་འདི་ཟས་མེད་ཀྱི་བར་དུ་འཚོ་བར་མི་ནུས་སོ། །བུད་མེད་དེས་སྨྲས་པ། བཙུན་པ་རབ་འབྱོར་གྱིས་མ་རིག་པ་འགགས་པས་འདུ་བྱེད་འགག་།འདུ་བྱེད་འགགས་པས་རྣམ་པར་ཤེས་པ་འགག་།རྣམ་པར་ཤེས་པ་འགགས་པས་མིང་དང ། གཟུགས་འགག་།མིང་དང ། གཟུགས་འགགས་པས་སྐྱེ་མཆེད་དྲུག་འགག་།སྐྱེ་མཆེད་དྲུག་འགགས་པས་རེག་པ་འགག་།རེག་པ་འགགས་པས་ཚོར་བ་འགག་།ཚོར་བ་འགགས་པས་སྲིད་པ་འགག་།སྲེད་པ་འགགས་པས་ལེན་པ་འགག་།ལེན་པ་འགགས་པས་སྲིད་པ་འགག་།སྲིད་པ་འགགས་པས་སྐྱེ་བ་འགག་།སྐྱེ་བ་འགགས་པས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུགས་པ་འགག་པ་མངོན་སུམ་དུ་མ་མཛད་དམ། རབ་འབྱོར་གྱིས་སྨྲས་པ། ཆེ་ཞེ། བདག་གིས་འགོག་པ་མངོན་སུམ་དུ་བྱས་སོ། །སྨྲས་པ། བཙུན་པ་རབ་འབྱོར། ཅི་ཞིག་ནི་འགོག་པར་འགྱུར། ཆོས་གང་ནི་རབ་ཏུ་བསྒོམ་པར་བགྱི། སྨྲས་པ། ཆེ་ཞེ། འགོག་པ་ནི་ཆོས་གང་གི་རབ་ཏུ་བསྒོམ་པར་བྱ་བའང་མ་ཡིན་ནོ། །སྨྲས་པ ། བཙུན་པ་རབ་འབྱོར། གལ་ཏེ་འགོག་པ་ཆོས་གང་གི་རབ་ཏུ་བསྒོམ་པའང་མ་ལགས་ན། བཙུན་པ་རབ་འབྱོར་གྱི་ལུས་བསོད་སྙོམས་གྱིས་ཇི་ལྟར་འཚོ་བར་འགྱུར། སྨྲས་པ། ཆེ་ཞེ། 319a ༄#། །འགོག་པ་ལ་སྙོམས་པར་ཞུགས་ཏེ་ཚོར་བ་ཐམས་ཅད་བཀག་པ་ལས་ལངས་པའི་ལུས་འཚོ་བར་བྱེད་དོ། །སྨྲས་པ། བཙུན་པ་རབ་འབྱོར། གལ་ཏེ་གཏན་དུ་མྱ་ངན་ལས་འདས་ན་ཁྱོད་ཀྱི་ལུས་ཇི་ལྟར་འཚོ་བ་ལ་འཇུག་པར་འགྱུར། སྨྲས་པ། ཆེ་ཞེ། བཅོམ་ལྡན་འདས་ཀྱི་ཉན་ཐོས་རྣམས་ནི་ལུས་འཚོ་བར་བྱ་བའི་ཕྱིར་བསོད་སྙོམས་ལ་རྒྱུའོ། །སྨྲས་པ། དེ་ནས་བཅོམ་ལྡན་འདས་ཀྱིས་བཙུན་པ་རབ་འབྱོར་ཉོན་མོངས་པ་མེད་པར་གནས་པ་རྣམས་ཀྱི་མཆོག་ཏུ་མ་བསྟན་ཏམ། སྨྲས་པ། ཆེ་ཞེ། དེ་ཡིན་ནོ།། སྨྲས་པ། ཅི་ཉོན་མོངས་པ་མེད་པ་དེ་རྒྱུ་བའམ་རབ་ཏུ་རྒྱུ་བ་ལགས་སམ། སྨྲས་པ། ཆེ་ཞེ། མ་ཡིན་ནོ། སྨྲས་པ། འོ་ན་ཅིའི་སླད་དུ་བཙུན་པ་རབ་འབྱོར་བསོད་སྙོམས་ལ་རྒྱུ་བ་མཛད།་སྨྲས་པ། ཆེ་ཞེ། བདག་ནི་ལུས་ཆེ་བའི་ཕྱིར་བསོད་སྙོམས་ལ་རྒྱུ་བ་མ་ཡིན་གྱི། སྲོག་གི་ཕྱིར་ཚེར་བ་དགག་པའི་དོན་དུ་བསོད་སྙོམས་ལ་རྒྱུའོ། །སྨྲས་པ། བཙུན་པ་རབ་འབྱོར།་ད་དུང་ཡང་ཚོར་བས་འཕྲོགས་སམ། སྨྲས་པ། ཆེ་ཞེ། བདག་ནི་ཚོར་བས་མི་འཕྲོགས་མོད་ཀྱི་ཚོར་བ་དགག་པའི་ཕྱིར་བསོད་སྙོམས་ལ་རྒྱུའོ། །སྨྲས་པ། བཙུན་པ་རབ་འབྱོར།་ཉོན་མོངས་པ་མེད་པ་ནི་མཚུངས་པ་མེད་པ་སྟེ། དེ་ཅིའི་སླད་དུ་ཞེ་ན། ཉོན་མོངས་པ་མེད་པར་གནས་པ་ནི་ལུས་དང ། སེམས་ཀྱི་ཚོར་བ་མྱོང་བ་མ་མཆིས་སོ། །ཉོན་མོངས་ 319b པ་མེད་པ་ནི་ལུས་དང ། སེམས་དང ། མཚུངས་པར་ལྡན་པ་མ་ལགས་སོ། །ཉོན་མོངས་པ་མེད་པ་ནི་དགའ་བའམ། མི་དགའ་བ་སྐྱེད་བ་མི་བགྱིད་དོ། །ཉོན་མོངས་པ་མེད་པ་ནི་སུ་ལའང་ཉོན་མོངས་པས་ཉེ་བར་གནས་པ་མ་མཆིས་སོ། །གཞན་ཡང ། གང་གི་སླད་དུ་བཅོམ་ལྡན་འདས་ཀྱིས་བཙུན་པ་རབ་འབྱོར་ཉོན་མོངས་པ་མེད་པར་གནས་པ་རྣམས་ཀྱི་མཆོག་ཏུ་བསྟན་ན། ཅིའི་སླད་དུ་ནི་ཉོན་མོངས་པ་མེད་པ་ཉོན་མོངས་པ་མེད་པ་ཞེས་བགྱི། རབ་འབྱོར་གྱིས་སྨྲས་པ། ཆེ་ཞེ། དམིགས་པ་མེད་པའི་ཉོན་མོངས་པ་མེད་པ་ནི་འདོད་ཆགས་ཀྱི་རྡུལ་དང་བྲལ་བ་ཡིན་ནོ། །སྨྲས་པ། བཙུན་པ་རབ་འབྱོར། ཉོན་མོངས་པ་མེད་པའི་ཕྱིར་འདོད་ཆགས་དང་བྲལ་བར་འགྱུར་རམ། སྨྲས་པ། ཆེ་ཞེ། མ་ཡིན་ནོ། །སྨྲས་པ། བཙུན་པ་རབ་འབྱོར། འོ་ན་ཉོན་མོངས་པ་མེད་པ་དེ་ཇི་ལྟར་འདོད་ཆགས་ཀྱི་རྡུལ་དང་བྲལ་བར་གྱུར། སྨྲས་པ། ཆེ་ཞེ། ཉོན་མོངས་པ་མེད་པར་བསྟན་པ་འདི་ནི་བཤད་པ་ཙམ་དུ་ཟད་དོ། །སྨྲས་པ། བཙུན་པ་རབ་འབྱོར་ཅི།་ཉོན་མོངས་པ་མེད་པ་ལ་བཤད་པ་མཆིས་སམ། སྨྲས་པ། ཆེ་ཞེ། མེད་དོ། སྨྲས་པ། བཙུན་བ་རབ་འབྱོར། གལ་ཏེ་ཉོན་མོངས་པ་མེད་པ་ལ་བཤད་པ་མ་མཆིས་ན་ཅི་ཞིག་ཆད་ཅིང་བཞུགས། སྨྲས་པ། ཆེ་ཞེ། བཅོམ་ལྡན་འདས་ཀྱི་ཉན་ཐོས་རྣམས་ནི་ཐ་སྙད་ཙམ་གྱིས་ཐ་སྙད་དུ་འདོགས་པར་ཟད་དོ། །སྨྲས་པ། བཙུན་པ་རབ་འབྱོར། ཇི་ཙམ་དུ་བརྗོད་པ་མཆིས་ 320a ༄#། །པ་དེ་ཙམ་དུ་ཐ་སྙད་འདོགས་སོ། །ཇི་ཙམ་དུ་ཐ་སྙད་འདོགས་པ་དེ་ཙམ་དུ་ཕྱིན་ཅི་ལོག་གོ་།ཇི་ཙམ་དུ་ཕྱིན་ཅི་ལོག་པ་དེ་ཙམ་དུ་རྩོད་པར་འགྱུར་རོ། །ཇི་ཙམ་དུ་རྩོད་པ་དེ་ཙམ་དུ་དགེ་སྦྱོང་གི་ཆོས་མ་ལགས་སོ། །སྨྲས་པ། ཆེ་ཞེ། འོ་ན་དག་སྦྱོང་གི་ཆོས་གང་ཡིན། སྨྲས་པ། བཙུན་པ་རབ་འབྱོར། དགེ་སྦྱོང་གི་ཆོས་ནི་ཐ་སྙད་མ་མཆིས་པ། ཕྱིན་ཅི་མ་ལོག་པ། རྩོད་པ་མ་མཆིས་པའོ། །དགེ་སྦྱོང་གི་ཆོས་ནི་ཆོས་དང ། ཆོས་མ་ལགས་པ་དང་བྲལ་བའོ། །དགེ་སྦྱོང་གི་ཆོས་ནི་ཆགས་པ་དང ། མ་ཆགས་པ་དང་བྲལ་བའོ། །དགེ་སྦྱོང་གི་ཆོས་ནི་ཡུལ་མ་མཆིས་པ་དང ། ཡུལ་མ་ལགས་པའོ། །དགེ་སྦྱོང་གི་ཆོས་ནི་ཆགས་པ་མ་མཆིས་པ་དང ། མ་བཅིངས། མ་གྲོལ་བའོ། །དགེ་སྦྱོང་གི་ཆོས་ནི་སེམས་མ་མཆིས་པ་སྟེ།་སེམས་དང ། ཡིད་དང ། རྣམ་པར་ཤེས་པ་དང་བྲལ་བའོ། །དགེ་སྦྱོང་གི་ཆོས་ནི་ཆོག་ཤེས་པའོ། །དགེ་སྦྱོང་གི་ཆོས་ནི་ཕྲག་དོག་དང ། ཆགས་པ་སྤངས་པའོ། །དགེ་སྦྱོང་གི་ཆོས་ནི་འདོད་པ་ཆུང་ཞིང་ཆོག་ཤེས་པའོ། །དགེ་སྦྱོང་གི་ཆོས་ནི་འདོད་པ་ཐམས་ཅད་དང་བྲལ་བའོ། །དགེ་སྦྱོང་གི་ཆོས་ནི་ཡུལ་ཐམས་ཅད་ལས་ཡང་དག་པར་འདས་པ་དང ། ཞེན་པ་མ་མཆིས་པའོ། །དགེ་སྦྱོང་གི་ཆོས་ནི་ཕུང་པོའི་བདུད་ལས་ངེས་པར་གྲོལ་བའོ། །དགེ་སྦྱོང་གི་ཆོས་ནི་ཉོན་མོངས་པ་མ་མཆིས་པ་སྟེ། 320b ཉོན་མོངས་པའི་བདུད་ལས་ཡང་དག་པར་འདས་པའོ། །དགེ་སྦྱོང་གི་ཆོས་ནི་མ་སྐྱེས་པའོ། །དགེ་སྦྱོང་གི་ཆོས་ནི་འཆི་བདག་གི་བདུད་དང་བྲལ་བའོ། །དགེ་སྦྱོང་གི་ཆོས་ནི་གཡོ་བ་མ་མཆིས་པ་དང ། རློམ་སེམས་མ་མཆིས་པ་དང ། རྟོགས་པ་མ་མཆིས་པ་དང ། རྣམ་པར་མ་སྒྲིབས་པ་དང ། སྤྱད་པ་མ་ལགས་པའོ། །དགེ་སྦྱོང་གི་ཆོས་ནི་བདུད་ཀྱི་ཡུལ་ལས་ཡང་དག་པར་འདས་པའོ། །དགེ་སྦྱོང་གི་ཆོས་ནི་བླང་བ་མ་མཆིས་པ་དང ། དོར་བ་མ་མཆིས་པའོ། །དགེ་སྦྱོང་གི་ཆོས་ནི་སྐྱེ་བ་དང ། འཇིག་པ་དང་བྲལ་བའོ། །དགེ་སྦྱོང་གི་ཆོས་ནི་ལྷའི་བུའི་བདུད་དང་མ་འབགས་པའོ། །དགེ་སྦྱོང་གི་ཆོས་ནི་ཡིད་ལ་བྱེད་པ་མ་མཆིས་པ་དང ། ཐམས་ཅད་དུ་གོས་པ་མ་མཆིས་པའོ། །དགེ་སྦྱོང་གི་ཆོས་ནི་མངོན་པར་ཞེན་པ་མ་མཆིས་པ་དང ། མཚན་མ་མ་མཆིས་པ་དང ། མཚན་མ་ཐམས་ཅད་དང་བྲལ་པའོ། །དགེ་སྦྱོང་གི་ཆོས་ནི་ཁམས་དང ། ཁམས་མ་ལགས་པའི་ཚུལ་ཐམས་ཅད་ཀྱིས་བཅོས་པ་མ་ལགས་པ་དང ། བགྲང་བ་དང ། བྲལ་བ་དང ། གནས་མ་མཆིས་པ་དང ། ནམ་མཁའ་དང་མཉམ་པའོ། །དགེ་སྦྱོང་གི་ཆོས་བསྟན་པ་འདི་བཤད་པ་ན་སྒོ་ཁང་དེར་ལྷའི་བུ་གང་དག་ཆོས་མཉན་པའི་ཕྱིར་འདུས་པ་དེ་དག་ལས་ལྷའི་བུ་བཞི་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།རྒྱ་ཆེན་པོ་ལ་མོས་པའི་ལྷའི་བུ་ལྔ་བརྒྱ་ནི་བུད་མེད་དེའི་སྤོབས་པ་ཐོས་ནས་བླ་ན་མེད་པ་ཡང་དག་ 321a ༄#། །པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། ཆེ་ཞེ་འདི་འདི་ལྟར་སྤོབས་པ་ཕུན་སུམ་ཚོགས་པ་དང་ལྡན་པ་དེ་ནི་ངོ་མཚར་ཏེ། ཆེ་ཞེ་འདིའི་སྤོབས་པ་འདི་འདྲ་བ་ལས་ན་འདི་ནི་དེ་བཞིན་གཤེགས་པའི་སྤྲུལ་པ་ཡིན་པར་ཐེ་ཚོམ་མེད་དོ་སྙམ་མོ། །དེ་ནས་བུད་མེད་དེའི་སེམས་ཀྱིས་ཚེ་དང་ལྡན་པ་རབ་འབྱོར་གྱི་སེམས་ཤེས་ནས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། འདི་ལྟར་འདི་ནི་དེ་བཞིན་གཤེགས་པའི་སྤྲུལ་པ་ཡིན་པར་ཐེ་ཚོམ་མེད་དོ་སྙམ་དུ་དགོངས་པ་དེ་ནི་ཇི་ལྟར་དགོངས་པ་དེ་བཞིན་ཏེ། དེ་ཅིའི་སླད་དུ་ཞེ་ན། ཇི་ལྟར་དེ་བཞིན་གཤེགས་པས་དེ་བཞིན་ཉིད་ཐུགས་སུ་ཆུད་བ་དེ་བཞིན་དུ་བདག་གིས་ཀྱང་དེ་བཞིན་ཉིད་ཁོང་དུ་ཆུད་དེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་བཞིན་གཤེགས་པའི་གཟུགས་ཀྱི་དེ་བཞིན་ཉིད་དང ། ཚོར་བ་དང།་འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པའི་དེ་བཞིན་ཉིད་གང་ལགས་པ་དེ་བདག་གི་དེ་བཞིན་ཉིད་ཀྱང་དེ་ཉིད་དེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་བཞིན་གཤེགས་པའི་དེ་བཞིན་ཉིད་གང་ལགས་པ་དེ་ནི་ནམ་ཡང་དེ་བཞིན་ཉིད་མ་ལགས་པར་མི་འགྱུར་རོ། །བདག་གི་དེ་བཞིན་ཉིད་གང་ལགས་པ་ 321b དང ། སེམས་ཅན་ཐམས་ཅད་ཀྱི་དེ་བཞིན་ཉིད་གང་ལགས་པ་དེ་ནི་ནམ་ཡང་དེ་བཞིན་ཉིད་མ་ལགས་པར་མི་འགྱུར་ཏེ། དེས་ན་བདག་ནི་དེ་བཞིན་གཤེགས་པའི་སྤྲུལ་བའོ། །དེ་བཞིན་གཤེགས་པའི་དེ་བཞིན་ཉིད་གང་ལགས་པ་དེ་ནི་རེས་འགའ་དེ་བཞིན་ཉིད་དུ་འགྱུར་བ་མ་ལགས་ལ་བདག་གི་དེ་བཞིན་ཉིད་གང་ལགས་པ་དེའང་རེས་འགའ་དེ་བཞིན་ཉིད་དུ་འགྱུར་བ་མ་ལགས་ཀྱི། རྟག་ཏུ་དེ་བཞིན་ཉིད་དེ་ཁོ་ན་ལགས་སོ། །དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །བདག་གི་དེ་བཞིན་ཉིད་གང་ལགས་པ་དང ། སེམས་ཅན་ཐམས་ཅད་ཀྱི་དེ་བཞིན་ཉིད་གང་ལགས་པ་དང ། ཆོས་ཐམས་ཅད་ཀྱི་དེ་བཞིན་ཉིད་གང་ལགས་པ་དེ་ནི་ཡང་དག་པ་ཇི་ལྟ་བ་དང ། གཞན་མ་ཡིན་པ་དེ་བཞིན་ཉིད་དེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། ཅི་ཁྱོད་ཀྱིས་དེ་བཞིན་གཤེགས་པའི་མཐུས་བདག་གི་སེམས་ཤེས་སམ། འོན་ཏེ་རང་གི་ཤེས་པས་ཤེས། སྨྲས་པ། བཙུན་པ་རབ་འབྱོར། ཉན་ཐོས་རྣམས་སམ། རང་སངས་རྒྱས་རྣམས་སམ།་བྱང་ཆུབ་སེམས་དཔའ་རྣམས་སམ། དྲང་སྲོང་མངོན་པར་ཤེས་པ་ལྔ་དང་ལྡན་པ་གང་ཡང་རུང་སྟེ། སེམས་ཅན་གཞན་གྱི་སེམས་ཤེས་པ་དེ་དག་ཐམས་ཅད་ནི་སངས་རྒྱས་ཀྱི་ 322a ༄#། །མཐུས་གཞན་གྱི་སེམས་ཤེས་པ་ལགས་སོ། །དེ་ལྟར་གནས་བརྟན་རབ་འབྱོར་གཞན་གྱི་སེམས་མཁྱེན་པ་གང་ལགས་པ་དེའང་སངས་རྒྱས་ཀྱི་མཐུས་མཁྱེན་པ་ལགས་སོ། །བཙུན་པ་རབ་འབྱོར། དཔེར་ན། ཟླ་བ་དང ། ཉི་མ་དང ། མེ་དང ། ནོར་བུ་དང ། མར་མེ་དང ། སྐར་མ་ལ་བརྟེན་ནས་སྐྱེས་བུ་མིག་དང་ལྡན་པ་རྣམས་ཀྱིས་གཟུགས་རྣམས་མཐོང་བ་དེ་བཞིན་དུ། བཙུན་པ་རབ་འབྱོར། མ་རིག་པའི་མུན་པ་ནི་འཇིག་རྟེན་གནས་པ་ལས་གང་སུ་དག་ཕ་རོལ་གྱི་སེམས་ཤེས་པ་དེ་དག་ཐམས་ཅད་ནི་དེ་བཞིན་གཤེགས་པ་ལ་བརྟེན་ནས་ཤེས་པ་ལགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། ཁྱོད་འདི་ལྟ་བུའི་སྤོབས་པ་དང་ལྡན་པ་ཁྱོད་སུ་ཡིན་པ་དང ། ག་ལས་འོངས་པ་བདག་ལ་སྟོན་ཅིག་།བུད་མེད་དེས་སྨྲས་པ། བཙུན་པ་རབ་འབྱོར། གང་ཞིག་དེ་བཞིན་གཤེགས་པའི་སྤྲུལ་པ་ལ་འདྲི་སྟེ། རིགས་ཀྱི་བུ། ཁྱོད་སུ་ཡིན་པ་དང ། ག་ལས་འོངས་པ་བདག་ལ་སྟོན་ཅིག་ཅེས་དེ་སྐད་ཅེས་སྨྲས་ན་ཇི་སྐད་དུ་ལན་འདེབས་པར་འགྱུར། སྨྲས་པ། ཆེ་ཞེ། ཅུང་ཟད་ཀྱང་ལན་གདབ་ཏུ་མེད་དོ། ། སྨྲས་པ། བཙུན་པ་རབ་འབྱོར། དེ་བཞིན་དུ་ཆོས་ཐམས་ཅད་སྤྲུལ་པའི་ངོ་བོ་ཉིད་ཀྱི་མཚན་ཉིད་དུ་ཤེས་ན་བདག་གིས་ཅི་ཞིག་ཤེས་སུ་མཆིས། གཞན་ཡང ། གང་ཞིག་བཙུན་པ་རབ་ 322b འབྱོར་ལ་འདྲི་སྟེ། ཅི་ཁྱོད་སོ་སོའི་སྐྱེ་བོ་ཡིན་ནམ། འོན་ཏེ་སློབ་པའམ། དགྲ་བཅོམ་པ་ཡིན་ཞེས་དེ་སྐད་སྨྲས་ན་ལན་ཇི་སྐད་གདབ། དེ་ནས་ཚེ་དང་ལྡན་པ་རབ་འབྱོར་སེམས་པ་ལ་ཞུགས་ཏེ། ཆེ་ཞེ། འདིའི་ལན་ཇི་སྐད་གདབ་པར་བྱ་སྙམ་མོ། །དེ་ནས་བར་སྣང་ལས་བཙུན་པ་རབ་འབྱོར་ཁྱོད་ཀྱི་ཅུང་ཟད་ཅི་ཐོབ་པའམ། རྟོགས་པའམ། མངོན་སུམ་དུ་བྱས་པའམ། མངོན་པར་རྟོགས་པ་གང་གིས་དགྲ་བཅོམ་པ་ཡིན་པར་ཤེས་པ་དེ་ཆེ་ཞེ་འདི་ལ་སྟོན་ཅིག་ཅེས་སྒྲ་བྱུང་ངོ ། །དེ་ནས་ཚེ་དང་ལྡན་པ་རབ་འབྱོར་གྱིས་བར་སྣང་དེ་ལས་སྒྲ་བྱུང་བ་ཐོས་ནས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། བདག་ནི་སོ་སོའི་སྐྱེ་བོའང་མ་ཡིན། སློབ་པའང་མ་ཡིན། དགྲ་བཅོམ་པའང་མ་ཡིན་ནོ། །སྨྲས་པ། བཙུན་པ་རབ་འབྱོར། དེ་བདག་གིས་ཇི་ལྟར་གཟུང་བར་བགྱི། སྨྲས་པ། ཆེ་ཞེ། དེ་བཞིན་གཤེགས་པའི་སྤྲུལ་པའི་གདགས་པ་ཇི་ལྟ་བ་དེ་བཞིན་དུ་བདག་ལ་ཟུངས་ཤིག་།སྨྲས་པ། བཙུན་པ་རབ་འབྱོར་ནི་དགྲ་བཅོམ་པ། ཟག་པ་ཟད་པ།་ཉོན་མོངས་པ་མེད་པར་གནས་པ་རྣམས་ཀྱི་མཆོག་དང ། ཡོན་གནས་ཞེས་བགྱི་བ་ལགས་སོ། །སྨྲས་པ། ཆེ་ཞེ། བདག་ནི་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པར་གནས་པ་རྣམས་མཆོག་དང ། ཡོན་གནས་མ་ཡིན་ནོ། །སྨྲས་པ། བཙུན་པ་རབ་འབྱོར། དེ་ལྟར་ན་ཤེས་བཞིན་གྱི་རྫུན་གསུང་བར་མི་འགྱུར་རམ། སྨྲས་པ། ཆེ་ཞེ། གལ་ཏེ་བདག་ཟག་པ་ཟད་པ། ཉོན་ 323a ༄#། །མོངས་པ་མེད་པར་གནས་པ་རྣམས་ཀྱི་མཆོག་དང ། ཡོན་གནས་ཡིན་པར་འཛིན་པར་གྱུར་ན་ནི་དེ་ལྟར་ན་བདག་རྫུན་སྨྲ་བར་འགྱུར་ན་གང་གི་ཕྱིར་བདག་དེ་ལྟར་མི་འཛིན་པ་དེའི་ཕྱིར་བདག་ནི་ཡང་དག་པར་སྨྲ་བ་ཡིན་གྱི་རྫུན་དུ་སྨྲ་བ་ཞེས་མི་བྱའོ། །སྨྲས་པ། བཙུན་པ་རབ་འབྱོར། སྒོ་ཁང་འདིར་ལྷ་བདེན་པ་མཐོང་བ་ཆོས་མཉན་པའི་ཕྱིར་འདུས་པ་རྣམས་ལ་སླུ་བར་མི་འགྱུར་རམ། སྨྲས་པ། ཆེ་ཞེ། བདེན་པ་མཐོང་བ་གང་དག་ཡིན་པ་དེ་དག་ནི་སླུ་བར་མི་ནུས་སོ། །སྨྲས་པ། བཙུན་པ།་རབ་འབྱོར་གྱིས་བདེན་པ་རྣམས་གཟིགས་སམ། སྨྲས་པ། མཐོང་ངོ ། །སྨྲས་པ། གལ་ཏེ་བདེན་པ་རྣམས་མཐོང་དུ་རུང་ན་ནི་དེ་དག་བདེན་པ་མ་ལགས་པར་འགྱུར་རོ། །དེ་ཅིའི་སླད་དུ་ཞེན། བདེན་པ་རྣམས་ནི་སུས་ཀྱང་མཐོང་བར་མི་ནུས་པའི་སླད་དུའོ། །རབ་འབྱོར་གྱིས་སྨྲས་པ། ཆེ་ཞེ། བདེན་པ་མཐོང་ཞེས་བྱ་བ་དེ་གང་གི་ཚིག་བླ་དྭགས་ཡིན། སྨྲས་པ། བཙུན་པ་རབ་འབྱོར། བདེན་པ་མཐོང་བ་ཞེས་བགྱི་བ་དེ་ནི་ཆོས་ཐམས་ཅད་མཉམ་པ་ཉིད་དུ་ཡང་དག་པར་མཐོང་བའི་ཚིག་བླ་དྭགས་སོ། ། བདེན་པ་མཐོང་ཞེས་བགྱི་བ་དེ་ནི་ཕྱིན་ཅི་ལོག་ཡང་དག་པར་མཐོང་བའི་ཚིག་བླ་དྭགས་སོ། །སྨྲས་པ། ཆེ་ཞེ། ཁྱོད་ཀྱིས་གང་ལས་བསམས་ཏེ་དེ་སྐད་སྨྲས། སྨྲས་པ། 323b བཙུན་པ་རབ་འབྱོར། ཕྱིན་ཅི་ལོག་གིས་ཉོན་མོངས་པ་ཀུན་ནས་བསླང་བ་གང་ལགས་པ་དེ་ནི་བདེན་པ་མཐོང་བས་སྐྱེ་བར་འགྱུར་ཏེ། དེས་ན་ཕྱིན་ཅི་ལོག་ཡང་དག་པར་མཐོང་བས་བདེན་བ་མཐོང་ཞེས་བགྱིའོ། །དེ་ནས་སྒོ་ཁང་དེར་ཆོས་མཉན་པའི་ཕྱིར་ལྷ་འདུས་པ་དེ་དག་གིས་གནས་བརྟན་རབ་འབྱོར་ལ་རགས་པའི་ལུས་བསྟན་ནས་འདི་སྐད་ཅེས་སྨྲས་སོ། །བཙུན་པ་རབ་འབྱོར། ཁྱོད་ཀྱིས་ཆེ་ཞེ་འདིའི་སྤོབས་པ་ཐོས་པ་དེ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །སེམས་ཅན་གང་དག་གིས་བསྟན་པ་འདི་ཐོས་ན་མོས་པ་དེ་དག་ཀྱང་རྙེད་པ་ལེགས་པར་རྙེད་པ་ཡིན་ནོ། །གང་དག་མོས་པ་དེ་དག་ནི་གང་ལས་ཀྱང་རྣམ་པར་གྲོལ་བ་མེད་དོ། །དེ་ཅིའི་ཕྱིར་ཞེ་ན། མོས་པ་མང་བ་རྣམས་ནི་གང་ལས་ཀྱང་རྣམ་པར་གྲོལ་བ་མེད་དོ། །མོས་པ་མང་བ་ལ་ནི་འཆིང་བ་མེད་པས་ན་དེ་ནི་གང་ལས་ཀྱང་རྣམ་པར་གྲོལ་བ་མེད་དོ། །དེ་ནས་བུད་མེད་དེས་ཡང་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། ། བཙུན་པ་རབ་འབྱོར། བསོད་སྙོམས་ལ་རྒྱུར་མི་བཞུད་ངམ། བཤོས་བཅད་དེ་ཅི་བགྱི། སྨྲས་པ། ཆེ་ཞེ། བདག་གི་ཟས་ནི་འདི་ཡིན་ཏེ་ཆོས་མཉན་པ་འདི་ལྟ་བུས་ཆོག་གོ ། ཆེ་ཞེ། གང་ཆོས་གོས་དང ། བསོད་སྙོམས་ཀྱི་ཕྱིར་ཡིད་མི་བདེ་བ་སྐྱེ་བ་དེ་ནི་ཆོས་འདོད་པ་མ་ཡིན་ནོ། །གང་རྙེད་པ་དང ། བཀུར་སྟི་དང ། ཚིགས་སུ་བཅད་པ་འདོད་པ་དེ་ནི་ཆོས་ 324a ༄#། །འདོད་པ་མ་ཡིན་ནོ། །གང་ལུས་དང ། སྲོག་དང ། བསོད་སྙོམས་འདོད་པ་དེ་ནི་ཆོས་འདོད་པ་མ་ཡིན་ནོ། །གང་ཐ་ན་ལེགས་སོ་ཞེས་བྱ་བ་འདོད་པ་དེ་ཆོས་འདོད་པ་མ་ཡིན་ནོ། །སྨྲས་པ། ཆེ་ཞེ། རིགས་ཀྱི་བུའམ། རིགས་ཀྱི་བུ་མོ་དག་ཆོས་འདོད་པ་ཇི་ལྟ་བུ་ཡིན། སྨྲས་པ། བཙུན་པ་རབ་འབྱོར། གང་འདོད་པ་ལ་མི་སྲེད་པ་དེ་ནི་ཆོས་འདོད་པའོ། །གང་མིག་དང ། གཟུགས་མི་འདོད་པ་དང ། རྣ་བ་དང ། སྒྲ་དང ། སྣ་དང ། དྲི་དང ། ལྕེ་དང ། རོ་དང ། ལུས་དང ། རེག་བྱ་དང ། ཡིད་དང ། ཆོས་མི་འདོད་པ་དེ་ནི་ཆོས་འདོད་པའོ། །གང་ཆོས་ཅི་ལའང་མི་བརྟེན་པ་དེ་ནི་ཆོས་འདོད་པའོ། །བཙུན་པ་རབ་འབྱོར། གཞན་ཡང ། གང་དག་ཕུང་པོ་དང ། ཁམས་དང ། སྐྱེ་མཆེད་མི་འདོད་པ་དེ་ནི་ཆོས་འདོད་པའོ། །གང་འདོད་པ་དང ། གཟུགས་དང ། གཟུགས་མེད་པ་མི་འདོད་པ་དེ་ནི་ཆོས་འདོད་པའོ། །གང་དམིགས་པའི་མཚན་མ་ལ་དམིགས་པ་མི་འདོད་པ་དེ་ནི་ཆོས་འདོད་པའོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། བཟོད་པར་གྱིས་ཤིག་།བདག་སྒོ་ཁང་འདི་ནས་འགྲོའོ། །བུད་མེད་དེས་སྨྲས་པ། བཙུན་པ་རབ་འབྱོར། དཔེར་ན། སའི་ཁམས་ལ་བཟོད་པ་གསོལ་མི་འཚལ་བ་དེ་བཞིན་དུ། བཙུན་པ་རབ་འབྱོར། གང་གི་སེམས་ས་དང་འདྲ་བ་དེ་ལ་ 324b ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར། ཆུ་ལ་བཟོད་པ་གསོལ་མི་འཚལ་པ་དེ་བཞིན་དུ་གང་གི་སེམས་ཆུ་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ།། བཙུན་པ་རབ་འབྱོར། མེ་དང ། རླུང་དང ། ནམ་མཁའ་ལ་བཟོད་པ་གསོལ་མི་འཚལ་བ་དེ་བཞིན་དུ་གང་གི་སེམས་མེ་དང ། རླུང་དང ། ནམ་མཁའ་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར། གྲུ་དང ། སྟེགས་དང ། ཟམ་པ་དང ། ལམ་པོ་ཆེ་ལ་བཟོད་པ་གསོལ་མི་འཚལ་བ་དེ་བཞིན་དུ། བཙུན་པ་རབ་འབྱོར། གང་གི་སེམས་གྲུ་དང ། སྟེགས་དང ། ཟམ་པ་དང ། ལམ་པོ་ཆེ་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར། བྱིས་པ་རྣམས་ལ་བཟོད་པ་གསོལ་བ་འཚལ་གྱི་འཕགས་པ་རྣམས་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར། གང་དག་ལ་གནོད་སེམས་དང ། ཁྲོ་བ་དང ། བག་ལ་ཉལ་སྐྱེ་བ་དག་ལ་ནི་བཟོད་པ་གསོལ་འཚལ་གྱི། གང་དག་ལ་མི་སྐྱེ་བ་དེ་དག་ལ་ནི་བཟོད་པ་གསོལ་མ་འཚལ་ལོ། །བཙུན་པ་རབ་འབྱོར། དཔེར་ན། མེ་འབར་བ་ནི་ཞི་བར་བགྱི་འཚལ་གྱི།་མེ་མི་འབར་བ་ནི་ཞི་བར་བགྱི་མི་འཚལ་བ་དེ་བཞིན་དུ། བཙུན་པ་རབ་འབྱོར། གང་དག་གི་ཉོན་མོངས་པ་འབར་བ་དེ་དག་ལ་ནི་བཟོད་པ་གསོལ་འཚལ་གྱི། གང་ 325a ༄#། །དག་ཉོན་མོངས་པ་མེད་པ་དེ་དག་ལ་ནི་བཟོད་པ་གསོལ་མི་འཚལ་ལོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། ཁྱོད་ཅི་ཞིག་འདོད་ན་འདི་ལྟར་སེང་གེའི་སྒྲ་སྒྲོགས། སྨྲས་པ། བཙུན་པ་རབ་འབྱོར། གང་འདོད་པ་མཆིས་པ་དེས་ནི་སེངྒེའི་སྒྲ་སྒྲོགས་མི་ནུས་སོ། །གང་དག་ཅིའང་མི་འདོད་པ་དེ་དག་ནི་སེངྒེའི་སྒྲ་སྒྲོགས་པར་བགྱིད་དོ། །དེ་ཅིའི་སླད་དུ་ཞེ་ན། དམིགས་པ་མཆིས་པ་ལ་ནི་འདོད་པ་མཆིས་ལ། གང་ལ་དམིགས་པ་མ་མཆིས་པ་དེ་ལ་ནི་སེངྒེའི་སྒྲ་ཅིའང་མ་མཆིས་སོ། །འཇིག་ཚོགས་ལ་ལྟ་བ་མཆིས་པ་ལ་ནི་འདོད་པ་མཆིས་ལ། གང་ལ་ལྟ་བའི་རྣམ་པ་མ་མཆིས་པ་དེ་ལ་ནི་སེངྒེའི་སྒྲ་ཅིའང་མ་མཆིས་སོ། །བཙུན་པ་རབ་འབྱོར། གཞན་ཡང ། ཅི་ཞིག་བཞེད་པ་ལས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར།་སྨྲས་པ། ཆེ་ཞེ། འདོད་པ་ཡོད་པ་ལ་ནི་རྣམ་པར་གྲོལ་བ་ཅིའང་མེད་དོ། །སྨྲས་པ། བཙུན་པ་རབ་འབྱོར། གང་བཞེད་པས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བ་དེ་བཞིན་དུ་བདག་ཀྱང་དེ་ལྟ་བུའི་འཇུག་པས་ཞུགས་སོ། །བདག་ཀྱང་དེ་ལྟ་བུའི་རྣམ་པར་གྲོལ་བའི་འཇུག་པས་ཞུགས་སོ། ། 325b བདག་ཀྱང་དེ་ལྟ་བུའི་ཆོས་ཀྱི་དབྱིངས་ཀྱི་འཇུག་པས་ཞུགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། ཐེག་པའི་རྣམ་པ་གང་ཡིན་པ་རྣམས་དང ། རྟགས་གང་ཡིན་པ་རྣམས་དང ། མཚན་མ་གང་དག་ཡིན་པ་འདི་ལྟ་བུ་དག་བདག་ལ་སྟོན་པ་ལས་ན། ཁྱོད་ནི་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་པར་ཐེ་ཚོམ་མེད་དོ། །བུད་མེད་དེས་སྨྲས་པ། བཙུན་པ་རབ་འབྱོར། ཐེག་པ་ཆེན་པོའི་རྣམ་པ་རྣམས་དང ། རྟགས་རྣམས་དང ། མཚན་མ་རྣམས་མཁྱེན་ཏམ། སྨྲས་པ། ཆེ་ཞེ། ཉན་ཐོས་ཀྱིས་ནི་མ་ཐོས་པར་ཐེག་པ་ཆེན་པོའི་རྣམ་པ་རྣམས་དང ། རྟགས་རྣམས་དང ། མཚན་མ་རྣམས་ཤེས་པར་མི་ནུས་ཀྱི། ཆེ་ཞེ།་ཐེག་པ་ཆེན་པོའི་རྣམ་པ་རྣམས་དང ། རྟགས་རྣམས་དང ། མཚན་མ་རྣམས་ཤོད་ཅིག་།སྨྲས་པ། བཙུན་པ་རབ་འབྱོར། ཐེག་པ་ཆེན་པོ་ཞེས་བགྱི་བ་དེ་ནི་ཆགས་པ་མ་མཆིས་པའི་ཐེག་པ་དང ། སྒྲིབ་པ་མ་མཆིས་པའི་ཡེ་ཤེས་དང ། ཐ་དད་པ་མ་མཆིས་པའི་ཡེ་ཤེས་ཀྱི་ཚིག་བླ་དྭགས་སོ། །བཙུན་པ་རབ་འབྱོར། དཔེར་ན། ལས་སུ་འགྲོ་བའི་ལྷའི་བུ་རྣམས་དང ། ཟླ་བ་དང ། ཉི་མའི་གཞལ་མེད་ཁང་རྣམས་ནི་སེམས་ཅན་རྣམས་ལ་སྣང་བར་བགྱི་བའི་སླད་དུ་ཆགས་པ་མ་མཆིས་པ་དང ། སྒྲིབ་ 326a ༄#། །པ་མ་མཆིས་པ་དང ། རྒྱུན་མི་འཆད་པར་ནམ་མཁའ་ལ་ཤུགས་ཀྱིས་མཆི་བ་དེ་བཞིན་དུ། བཙུན་པ་རབ་འབྱོར། ཐེག་པ་ཆེན་པོ་ལ་ཡང་དག་པར་ཞུགས་པའི་སྐྱེས་བུ་དམ་པ་རྣམས་ནི་སེམས་ཅན་ཐམས་ཅད་ལ་ཆོས་ཀྱི་སྣང་བ་བགྱི་བའི་སླད་དུ་ཆགས་པ་མ་མཆིས་པ་དང ། སྒྲིབ་པ་མ་མཆིས་པ་དང ། རྒྱུན་མི་འཆད་པར་ཕ་རོལ་ཏུ་ཕྱིན་པ་དྲུག་པོ་དག་གི་ཤུགས་ཀྱིས་མཆིའོ། །བཙུན་པ་རབ་འབྱོར། དཔེར་ན། གླིང་བཞི་ནི་འཁོར་ལོས་བསྒྱུར་བའི་རྒྱལ་པོའི་ལགས་ཏེ། དེ་གང་དང ། གང་དུ་མཆི་བ་དེ་དང ། དེར་གླིང་བཞི་པའི་མི་རྣམས་ཀྱིས་བསྟེན་པའི་འོས་སུ་འགྱུར་བ་ལགས་ལ། འཁོར་ལོས་བསྒྱུར་བའི་རྒྱལ་པོའང་སེམས་ཅན་དེ་དག་ལ་བསམ་པ་མི་མཉམ་པའི་རྣམ་པ་མ་མཆིས་ཏེ་བྱམས་པར་བགྱིད་པ་དེ་བཞིན་དུ། བཙུན་པ་རབ་འབྱོར། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ནི་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་ཐམས་ཅད་དུ་གང་དང ། གང་དུ་མཆིས་པ་དེ་དང ། དེར་སེམས་ཅན་ཐམས་ཅད་ཀྱིས་བསྟེན་པའི་འོས་སུ་གྱུར་པ་ལགས་ལ། སེམས་ཅན་ཐམས་ཅད་ལ་སེམས་སྙོམས་ཤིང་ཐ་དད་དུ་སྤྱོད་པ་མ་མཆིས་སོ། ། 326b བྱང་ཆུབ་སེམས་དཔའ་རྣམས་ནི་བསྡུ་བ་རྣམ་བཞིས་སྡུད་པ་ན་སེམས་ཅན་རྣམས་ལ་བྱམས་པ་ཐ་དད་པ་མ་མཆིས་ཏེ། དེས་ན་ཐེག་པ་ཆེན་པོ་ཞེས་བགྱིའོ། །བཙུན་པ་རབ་འབྱོར། ཐེག་པ་ཆེན་པོ་ཞེས་བགྱི་བ་ནི་ཐེག་པ་དེ་ཆེ་བ་ལགས་ལ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་དང ། མི་དང ། མི་མ་ཡིན་པ་རྣམས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་དང ། མཁས་པ་རྣམས་དང ། སྐྱེས་བུ་དམ་པ་རྣམས་དང ། ཤེས་པ་རྣམས་དང ། ཡང་དག་པར་སོང་བ་རྣམས་དང ། ཡང་དག་པར་ཞུགས་པ་རྣམས་ཀྱིས་མཆོད་པ་ལགས་ཏེ། དེས་ན་ཐེག་པ་ཆེན་པོ་ཞེས་བགྱིའོ། །ཐེག་པ་དེ་ནི་མ་སྐྱེས་པའི་ཕྱིར་མི་ཟད་པའོ། །ཐེག་པ་དེ་ནི་སངས་རྒྱས་ཀྱི་རིགས་མི་འཆད་པའོ། །ཐེག་པ་དེ་ནི་ཆོས་ཀྱི་རིགས་སྡུད་པའོ། །ཐེག་པ་དེ་ནི་དགེ་འདུན་གྱི་རིགས་ཡོངས་སུ་འཛིན་པའོ། །ཐེག་པ་དེ་ནི་སེམས་ཅན་ཐམས་ཅད་ལ་གོ་སྐབས་འབྱེད་ཅིང་སྒྲིབ་པ་མེད་པའི་ཕྱིར་ཡངས་པའོ། །ཐེག་པ་དེ་ནི་ཕན་མ་མཆིས་པའི་ཕྱིར་འདུས་མ་བྱས་པའོ། །ཐེག་པ་དེ་ནི་ཕ་རོལ་ཏུ་ཕྱིན་པ་དྲུག་གིས་ཤིན་ཏུ་སྦྱང་བ་བྱས་པའོ། །ཐེག་པ་དེ་ནི་བསྡུ་བ་རྣམ་བཞིས་ལེགས་པར་བསྡུས་པའོ། །ཐེག་པ་དེ་ནི་འཕགས་པའི་ 327a ༄#། །ལམ་ཡན་ལག་བརྒྱད་པའི་རྗེས་སུ་འབྲང་བའི་ཕྱིར་ཤིན་ཏུ་ཡང་དག་པར་སོང་བའོ། །ཐེག་པ་དེ་ནི་ཞི་གནས་དང ། ལྷག་མཐོང་བསྒོམས་པས་བཞོན་པ་བཟང་པོ་ལྡན་པའོ། །ཐེག་པ་དེ་ནི་དྲན་པ་ཉེ་བར་གཞག་པ་དང ། བྱང་ཆུབ་ཀྱི་སེམས་མི་བརྗེད་པའི་ཕྱིར་ཁ་ལོ་སྒྱུར་བ་བཟང་པོའི་གནས་སོ། །ཐེག་པ་དེ་ནི་སྙིང་རྗེ་ཆེན་པོས་ཤིན་ཏུ་བརྟན་པའོ། །ཐེག་པ་དེ་ནི་ཐམས་ཅད་མཁྱེན་པ་ཉིད་ཀྱིས་ལེགས་པར་གནས་པའོ། །ཐེག་པ་དེ་ནི་བདུད་ཐམས་ཅད་ཕམ་པར་བྱས་པས་འཇིགས་པ་དང་བྲལ་བའོ། །ཐེག་པ་དེ་ནི་ཤེས་རབ་ཀྱི་སྣང་བ་ཡང་དག་པར་སྟོན་པའི་ཕྱིར་མུན་པ་དང་བྲལ་བའོ། །ཐེག་པ་དེ་ནི་དགེ་བའི་རྩ་བ་ཐམས་ཅད་སྡུད་ཅིང་གསོག་པས་ཤིན་ཏུ་འབྱོར་བའོ། །ཐེག་པ་དེ་ནི་ལྷ་དང་བཅས་པའི་འཇིག་རྟེན་གྱིས་ཕྱག་བགྱིས་པའོ། །ཐེག་པ་དེ་ནི་ཕས་ཀྱི་རྒོལ་བ་ཐམས་ཅད་ཀྱིས་མི་རྫི་བའོ། །ཐེག་པ་དེ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིས་རྟོགས་པར་དཀའ་བའོ། །ཐེག་པ་དེ་ནི་མ་དད་པ་རྣམས་དགའ་བར་བགྱིད་པའོ། །ཐེག་པ་དེ་ནི་སྡང་བ་རྣམས་བྱམས་པར་བགྱིད་པའོ། །ཐེག་པ་དེ་ནི་སེར་སྣ་ཅན་རྣམས་ཀྱི་གཏོང་བ་བགྱིད་པའོ། །ཐེག་པ་དེ་ནི་ཚུལ་ཁྲིམས་འཆལ་བ་རྣམས་ཀྱི་ཚུལ་ཁྲིམས་བགྱིད་པའོ། །ཐེག་པ་དེ་ནི་གནོད་ 327b སེམས་ཀྱི་སེམས་དང་ལྡན་པ་རྣམས་ཀྱི་བཟོད་པ་བགྱིད་པའོ། །ཐེག་པ་དེ་ནི་ལེ་ལོ་ཅན་རྣམས་ཀྱི་བརྩོན་འགྲུས་བགྱིད་པའོ། །ཐེག་པ་དེ་ནི་བརྗེད་ངས་པ་རྣམས་དྲན་པར་བགྱིད་པའོ། །ཐེག་པ་དེ་ནི་སེམས་རྣམ་པར་གཡེངས་པ་རྣམས་ཉེ་བར་ཞི་བར་བགྱིད་པའོ། །ཐེག་པ་དེ་ནི་ཤེས་རབ་འཆལ་བ་རྣམས་ཀྱི་ཤེས་རབ་བགྱིད་པའོ། །ཐེག་པ་དེ་ནི་དབུལ་པོ་རྣམས་ཀྱི་ནོར་བགྱིད་པའོ། །ཐེག་པ་དེ་ནི་སྡུག་བསྔལ་རྣམས་བདེ་བར་བགྱིད་པའོ། །ཐེག་པ་དེ་ནི་མཁས་པ་རྣམས་མཆོག་ཏུ་དགའ་བར་བགྱིད་པའོ། ། ཐེག་པ་དེ་ནི་ཤེས་པ་རྣམས་དང་བར་བགྱིས་པ་སྟེ། དེས་ན་ཐེག་པ་ཆེན་པོ་ཞེས་བགྱིའོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། ། ཆེ་ཞེ། ཁྱོད་ཀྱིས་ཐེག་པ་ཆེན་པོའི་རྣམ་པ་རྣམས་དང ། རྟགས་རྣམས་དང ། མཚན་མ་རྣམས་ལེགས་པར་སྨྲས་སོ། །བུད་མེད་ངེས་སྨྲས་པ། བཙུན་པ་རབ་འབྱོར། ཐེག་པ་ཆེན་པོའི་རྣམ་པ་རྣམས་དང ། རྟགས་རྣམས་དང ། མཚན་མ་རྣམས་ནི་བསྐལ་པའམ། དེ་བས་ཆེས་ལྷག་པར་བདག་གིས་བཤད་དུ་ལགས་ཀྱང་མཐར་ཕྱིན་པར་མི་འགྱུར་རོ། །བཙུན་པ་རབ་འབྱོར། ཐེག་པ་ཆེན་པོ་ཇི་ལྟར་ཚད་མ་མཆིས་པ་དེ་བཞིན་དུ་རྣམ་པ་རྣམས་དང ། རྟགས་རྣམས་དང ། མཚན་མ་རྣམས་ཀྱང་ཚད་མ་མཆིས་ 328a ༄#། །སོ། །ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་གཞན་ཡང་འདི་སྐད་ཅེས་སྨྲས་སོ། །ཆེ་ཞེ། ཁྱོད་ཀྱིས་བདག་ལ་ཁྱོད་ཅི་ཞིག་འདོད་དེ་བསོད་སྙོམས་ལ་རྒྱུ་བར་བྱེད་ཅེས་གླགས་བཙལ་བ་དེ་ནི་དེ་བཞིན་གཤེགས་པ་ཆོས་ཀྱི་མངའ་བདག་ཉིད་ཀྱང་བསོད་སྙོམས་ལ་རྒྱུ་བ་མཛད་ན་ཁྱོད་ཀྱིས་དེ་བཞིན་གཤེགས་པ་ལའང་དེའི་གླགས་བཙལ་ལམ། བུད་མེད་དེས་སྨྲས་པ། བཙུན་པ་རབ་འབྱོར། གལ་ཏེ་དེ་བཞིན་གཤེགས་པ་ཐབས་གང་གིས་བསོད་སྙོམས་ལ་རྒྱུ་བ་མཛད་པ་མཁྱེན་པ་ལྟ་ན་དེ་སྤོབས་པར་མཛོད་ཅིག་།རབ་འབྱོར་གྱིས་སྨྲས་པ། ཆེ་ཞེ། དེ་བཞིན་གཤེགས་པ་ཐབས་ཇི་ལྟ་བུ་ཞིག་གིས་བསོད་སྙོམས་ལ་རྒྱུ་བ་མཛད། བུད་མེད་དེས་སྨྲས་པ། བཙུན་པ་རབ་འབྱོར། དེ་བཞིན་གཤེགས་པ་ནི་དོན་གྱི་དབང་ཉི་ཤུ་རྩ་གཅིག་གཟིགས་ནས་བསོད་སྙོམས་ལ་རྒྱུ་བ་མཛད་དེ། ཉི་ཤུ་རྩ་གཅིག་པོ་གང་ཞེ་ན། གཟུགས་ཀྱི་སྐུ་བཟང་པོ་བསྟན་པའི་ཕྱིར་དེ་བཞིན་གཤེགས་པ་བསོད་སྙོམས་ལ་རྒྱུ་བ་མཛད་དེ། དེར་སེམས་ཅན་གང་དག་གིས་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་རྣམ་པ་ཐམས་ཅད་ཀྱི་མཆོག་དང་ལྡན་པ་མཐོང་བ་དེ་དག་།དེ་བཞིན་གཤེགས་པའི་གཟུགས་ཀྱི་ 328b སྐུའི་མཚན་ཐོབ་པར་བགྱི་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དོ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་གྲོང་དང ། གྲོང་ཁྱེར་དུ་བསོད་སྙོམས་ལ་གཤེགས་ན་སེམས་ཅན་ལོང་བ་རྣམས་ཀྱིས་ནི་གཟུགས་རྣམས་མཐོང་བར་འགྱུར། སེམས་ཅན་འོན་པ་རྣམས་ཀྱིས་ནི་སྒྲ་ཐོས་པར་འགྱུར། སེམས་ཅན་སྨྱོན་པ་རྣམས་ཀྱིས་ནི་དྲན་པ་རྙེད་པར་འགྱུར། སེམས་ཅན་གཅེར་བུ་རྣམས་ཀྱིས་ནི་གོས་རྙེད་པར་འགྱུར། སེམས་ཅན་བཀྲེས་པ་རྣམས་ཀྱིས་ནི་ཟས་རྙེད་པར་འགྱུར། སེམས་ཅན་སྐོམ་པ་རྣམས་ཀྱིས་ནི་བཏུང་བརྙེད་པར་འགྱུར་ལ། སེམས་ཅན་སུ་ལའང་འདོད་ཆགས་སམ། ཞེ་སྡང་ངམ། གཏི་མུག་དང ། ཕྲག་དོག་དང ། སེར་སྣ་དང ། ཁྲོ་བ་དང ། རྒྱགས་པ་དང ། འཚབ་པ་དང ། ཡོངས་སུ་གདུང་བའི་གནོད་པ་མ་མཆིས་སོ། །སེམས་ཅན་ཐམས་ཅད་བྱམས་པའི་སེམས་དང་ལྡན་ཏེ། གཅིག་ལ་གཅིག་ཕ་མའི་འདུ་ཤེས་བསྐྱེད་པར་འགྱུར་ཏེ། དེར་སེམས་ཅན་མང་པོས་དེ་བཞིན་གཤེགས་པ་གྲོང་དང ། གྲོང་ཁྱེར་དུ་གཤེགས་པའི་ཡོན་ཏན་ཕུན་སུམ་ཚོགས་པ་དེ་མཐོང་ནས་ 329a ༄#། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་ནི་གྲོང་དང ། གྲོང་ཁྱེར་དང ། གྲོང་རྡལ་དུ་གཤེགས་ན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་མཆོད་པའི་ལས་བགྱི་བའི་སླད་དུ་ཕྱི་བཞིན་དུ་འབྲང་སྟེ། དེར་སངས་རྒྱས་ཀྱི་མཐུས་མི་རྣམས་ཀྱིས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་བཅོམ་ལྡན་འདས་ལ་མཆོད་པར་བགྱིད་པ་མཐོང་ནས་དེ་དག་དེ་བཞིན་གཤེགས་པ་ལ་འདོད་པ་སྐྱེ་སྟེ། དེ་བཞིན་གཤེགས་པ་ནི་ངོ་མཚར་ཆེ་བ་ནས་རྨད་དུ་བྱུང་བའི་བར་གྱི་ཆོས་དང་ལྡན་ནོ་སྙམ་སྟེ། དེ་དག་གིས་དེ་བཞིན་གཤེགས་པ་ལ་འདོད་པ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་ 329b བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་བསོད་སྙོམས་ལ་རྒྱུ་བ་མཐོང་ནས་སེམས་ཅན་དཔག་ཏུ་མེད་པ་ལོངས་སྤྱོད་དང ། དབང་ཕྱུག་གི་རྒྱགས་ཤིང་མྱོས་པ་དང ། གཟུགས་དང ། རིགས་དང ། འཚོ་བ་དང ། ནད་མེད་པས་རྒྱགས་ཤིང་མྱོས་པ་འདི་རྣམས་འདི་སྙམ་དུ་སེམས་ཏེ། འདི་འཁོར་ལོས་བསྒྱུར་བའི་རྒྱལ་སྲིད་བོར་ནས་རབ་ཏུ་བྱུང་ཞིང་བསོད་སྙོམས་ལ་རྒྱུ་ཞེས་གྲག་སྟེ། དེས་ཀྱང་འདི་ལྟར་ང་རྒྱལ་བཅོམ་ན། ཀྱེ་མ། བདག་ཅག་གིས་ཀྱང་ང་རྒྱལ་གཞོམ་པར་བྱའོ་སྙམ་སྟེ། དེ་དག་གིས་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་གྲོང་དང ། གྲོང་ཁྱེར་དུ་བསོད་སྙོམས་ལ་རྒྱུ་བ་ན་ལྷ་གཟི་བྱིན་ཆེ་བ་གཟི་བྱིན་ཆེ་བ་རྣམས་ཀྱིས་དགོངས་པ་ལ་བལྟས་ནས། འདི་སྐད་དུ། འདི་ལ་ནི་བཀྲེས་པ་དང ། སྐོམ་པའི་གནོད་པའང་མེད་ལ། ལུས་ཉམ་ཆུང་བའང་མེད་ 330a ༄#། །ཀྱི།་སེམས་ཅན་རྣམས་ལ་སྙིང་བརྩེ་བ་ཆེད་ཆེར་བྱས་ནས་བསོད་སྙོམས་ལ་རྒྱུ་བར་བྱེད་ཀྱི། བདག་ཅག་ཀྱང་དེ་བཞིན་དུ་སེམས་ཅན་རྣམས་ལ་སྙིང་བརྩེ་བ་ཆེད་ཆེར་བྱ་བའི་སེམས་ཀྱིས་བསོད་སྙོམས་ལ་རྒྱུ་བར་བྱའོ་ཞེས་སྨྲ་ཞིང་དེ་དག་གིས་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། སེམས་ཅན་ལེ་ལོ་ཅན་སྙོམས་ལས་ཅན་དེ་བཞིན་གཤེགས་པ་ལ་བལྟ་བ་དང ། ཕྱག་འཚལ་བ་དང ། བསྙེན་བཀུར་བགྱི་བའི་སླད་དུ་མི་མཆི་བ་དེ་དག་དེ་བཞིན་གཤེགས་པ་གྲོང་དང ། གྲོང་ཁྱེར་དུ་གཤེགས་ན་འབད་མི་འཚལ་བར་མཐོང་བར་འགྱུར་ལ། མཐོང་ནས་ཀྱང་དགའ་བ་དང ། མཆོག་ཏུ་དགའ་བ་ཆེན་པོ་ཐོབ་པར་འགྱུར་ཏེ། དགའ་བ་དང ། མཆོག་ཏུ་དགའ་བ་ཐོབ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པར་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་ 330b པ་རབ་འབྱོར། གཞན་ཡང ། སངས་རྒྱས་བཅོམ་ལྡན་འདས་རྣམས་ནི་མཐོང་ན་དོན་ཡོད་པ་སྟེ། ཐ་ན་སེམས་ཅན་གང་དག་གིས་སེམས་ཀྱི་སྐད་ཅིག་གཅིག་ཙམ་ལ་ཞི་བའི་མིག་གིས་དེ་བཞིན་གཤེགས་པ་མཐོང་ནའང་དེ་འབའ་ཞིག་གིས་ཀྱང་དེ་དག་ཐམས་ཅད་ཀྱི་ཡོངས་སུ་མྱ་ངན་ལས་འདའ་བར་འགྱུར་བའི་བར་གྱི་རྒྱུར་འགྱུར་ཏེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་གྲོང་དང ། གྲོང་ཁྱེར་དུ་གཤེགས་ན་སེམས་ཅན་བཅིང་བས་བཅིངས་པ་རྣམས་བཅིང་བ་ལས་གྲོལ་བར་འགྱུར་ལ། དེ་དག་གིས་དེ་བཞིན་གཤེགས་པའི་མཐུས་བདག་ཅག་བཅིང་བ་འདི་དག་ལས་གྲོལ་བར་གྱུར་ཏོ་ཞེས་ཤེས་ཏེ། དེ་བཞིན་གཤེགས་པ་ལ་བྱས་པ་གཟོ་བ་དང ། བྱས་པ་ཚོར་བར་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་བས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། རིགས་ཀྱི་བུའམ། རིགས་ཀྱི་པུ་མོ་དེ་བཞིན་གཤེགས་པའི་ཡོན་ཏན་བསྔགས་པ་ཐོས་ན། ཀྱེ་མ་མ་ལ། བདག་ཅག་གིས་དེ་ 331a ༄#། །བཞིན་གཤེགས་པ་ལ་བསོད་སྙོམས་དབུལ་བར་བྱའོ། །ཆོས་གོས་དབུལ་བ་དང ། མཆོད་པ་དང ། བཀུར་སྟིར་བྱ་བ་ཅིའང་རུང་བས་མཆོད་པ་བྱའོ། ། སྙམ་དུ་སེམས་པ་དེ་ལྟ་བུ་དག་མཆིས་ལ་དེ་དག་ལས་ཀྱང་མས་བསྲུངས་པའམ། ཕས་བསྲུངས་པའམ། མིང་པོས་བསྲུངས་པའམ། ཕུ་ནུ་མོས་བསྲུངས་པའམ། ཁྱིམ་ཐབས་ཀྱིས་བསྲུངས་པའམ། མཛའ་བོས་བསྲུངས་པ་རྣམས་དེ་དང ། དེའི་རྐྱེན་གྱིས་དེ་བཞིན་གཤེགས་པའི་ཐད་དུ་མཆི་མི་ནུས་ཏེ། དེ་དག་གིས་དེ་བཞིན་གཤེགས་པ་གྲོང་དང།་གྲོང་ཁྱེར་དུ་གཤེགས་པ་མཐོང་ན་ཚིམ་ཞིང་མགུ་ལ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་དེ་བཞིན་གཤེགས་པ་ལ་བསོད་སྙོམས་དབུལ་བར་བགྱིད་དོ། །ཕུལ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་ལ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་ལྷུང་བཟེད་ཕུལ་ནས་དེ་བཞིན་གཤེགས་པས་བཞེས་པ་མཆིས་ཏེ། དེར་སེམས་ཅན་ལོངས་སྤྱོད་ཆུང་བ་དང ། ཆུང་དུ་སྦྱིན་པར་འཚལ་བ་གང་དག་ལགས་པ་དེ་དག་གིས་ནི་དེ་བཞིན་གཤེགས་པའི་ 331b ལྷུང་བཟེད་གང་བར་མཐོང་ངོ ། །སེམས་ཅན་ལོངས་སྤྱོད་ཆེ་ཞིང་མང་དུ་སྦྱིན་པར་འཚལ་བ་གང་དག་ལགས་པ་དེ་དག་གིས་ནི་དེ་བཞིན་གཤེགས་པའི་ལྷུར་བཟེད་མ་གང་བར་མཐོང་ནས་དེ་དག་གིས་ཇི་ཙམ་དགོས་པ་ཕུལ་ཏེ། ལྷུང་བཟེད་གང་བར་བགྱིས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པའི་ལྷུང་བཟེད་ཀྱི་ནང་དུ་བཅའ་བ་དང ། བཟའ་བ་དང ། མྱང་བར་བྱ་བ་རོ་བརྒྱ་དང་ལྡན་པ་བླུགས་ན། བཅའ་བ་དང ། བཟའ་བ་དང ། མྱང་བར་བྱ་བ་དེ་དག་འདྲེ་བར་མི་འགྱུར་ཏེ། ཇི་ལྟར་སྣོད་ཐ་དད་པའི་ནང་ན་མཆིས་པ་དེ་ཁོ་ན་བཞིན་དུ་མཆིས་ཏེ། དེར་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་མང་པོ་དག་གིས་དེ་བཞིན་གཤེགས་པའི་ལྷུང་བཟེད་ཀྱི་ཆོ་འཕྲུལ་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། 332a ༄#། །བཞིན་གཤེགས་པའི་ལྷུང་བཟེད་ཀྱི་ནང་དུ་དགེ་སློང་ཐམས་ཅད་ཀྱི་ཟས་བླུགས་ཀྱང་དེས་ལྷུང་བཟེད་དེ་མ་གང་པའམ། གང་བར་ཡང་མི་འགྱུར་ཏེ། དེར་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་མང་པོ་དག་གིས་དེ་བཞིན་གཤེགས་པའི་ལྷུང་བཟེད་ཀྱི་ཆོ་འཕྲུལ་དེ་ལྟ་བུ་མཐོང་སྟེ་ངོ་མཚར་དུ་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པའི་སྐུ་ནི་གཅིག་ཏུ་མཁྲེགས་ཤིང་ཁོང་སྟོང་མ་ལགས་ལ་རྡོ་རྗེ་ལྟར་མཁྲེགས་པ་སྟེ། དེ་བཞིན་གཤེགས་པའི་སྐུ་ལ་ཕོ་པའམ། ལོང་ཀའང་མི་མངའ། ཕྱི་སའང་མི་མངའ། གཅིན་ཡང་མི་མངའ་མོད་ཀྱི། འོན་ཀྱང་བསོད་སྙོམས་ལ་རྒྱུ་བ་དང ། བཤོས་གསོལ་བ་དེ་ལྟར་ཡང་གདའ་ལ་ཁོང་དུ་ཆུད་པའང་མི་མངའ་སྟེ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་ 332b མང་པོ་དག་གིས་དེ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་གྲོང་དང ། གྲོང་ཁྱེར་དུ་གཤེགས་ན་སེམས་ཅན་མང་པོ་དག་གིས་བསོད་སྙོམས་མང་པོའམ། ཉུང་ངུའམ། བཟང་པོའམ། ངན་པའང་རུང་སྟེ་དབུལ་བར་བགྱིད་ལ། སེམས་ཅན་དེ་དག་གིས་ཀྱང་དེ་བཞིན་གཤེགས་པ་ལ་བསྐྱེད་པའི་ཡོན་ཏན་རྣམས་མཐར་ཐུག་པར་བགྱིད་མི་ནུས་ཏེ། ལྷ་དང ། མི་རྣམས་ཀྱི་ཕུན་སུམ་ཚོགས་པ་མང་པོ་དག་ཀྱང་ཉམས་སུ་མྱོང་བར་འགྱུར་ལ། ཡོན་ཏན་དེའང་ཡོངས་སུ་མྱ་ངན་ལས་འདའ་བར་འགྱུར་བའི་བར་དུ་བས་པར་མི་འགྱུར་ཏེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་ནི་རྟག་ཏུ་མཉམ་པར་བཞག་པ་སྟེ་ཏིང་ངེ་འཛིན་ལས་ཉམས་པ་མི་མངའ་ལ། དེར་ཚངས་པའམ། དེ་མ་ཡིན་པའི་གཟུགས་ན་སྤྱོད་པའི་ལྷ་གཟི་བྱིན་ཆེ་བ་གཟི་བྱིན་ཆེ་བ་རྣམས་ཀྱིས་དེ་བཞིན་གཤེགས་པ་བསོད་སྙོམས་ལ་རྒྱུ་ཞིང་ཏིང་ངེ་འཛིན་ལས་ཀྱང་མི་གཡོ་བ་མཐོང་ན་དེ་དག་འདི་ 333a ༄#། །སྙམ་དུ་སེམས་ཏེ། འདི་ནི་སེམས་ཅན་གྱི་དོན་ལ་བརྩོན་པ་ཡིན་གྱི། ཟས་འདོད་པ་མ་ཡིན་པར་ཐེ་ཚོམ་མེད་དོ་སྙམ་ནས། དེ་དག་དགའ་བ་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གལ་ཏེ་དེ་བཞིན་གཤེགས་པ་བསོད་སྙོམས་ལ་རྒྱུ་བ་མི་མཛད་དེ། ཞལ་ཟས་ཀྱང་མི་གསོལ་བར་གྱུར་ན་ནི་དེ་ལྟ་ན་རིགས་ཀྱི་བུ་དང ། རིགས་ཀྱི་བུ་མོ་ལེགས་པར་གསུངས་པའི་ཆོས་འདུལ་བ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་དག་ཀྱང་ཟས་མི་བཟའ་བ་ལ་ཞུགས་ཏེ་བདག་ཅག་ཀྱང་བསོད་སྙོམས་ལ་རྒྱུ་བར་མི་བྱ། ཟས་ཀྱང་བཟའ་བར་མི་བྱའོ་སྙམ་ནས་དེ་དག་བཀྲེས་ཤིང་ཉམ་ཆུང་བར་གྱུར་པས་ཁྱད་པར་ཐོབ་པར་རྟོགས་པར་མི་ནུས་ཏེ། དེ་དག་གིས་མ་འོངས་པ་ན་ཁྱད་པར་ཐོབ་པའི་བསམ་པ་རྫོགས་པར་མཛད་པའི་ཕྱིར་ཡང་དེ་བཞིན་གཤེགས་པ་བསོད་སྙོམས་ལ་རྒྱུ་ཞིང་གསོལ་བར་མཛད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་ 333b བཞིན་གཤེགས་པ་ནི་འཕགས་པའི་རིགས་རྣམས་ཡང་དག་པར་ཡོངས་སུ་གཟུང་བའི་ཕྱིར་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་ནི་སྐྱེ་བོ་ཕྱི་མ་རྣམས་ལ་ཐུགས་བརྩེ་བའི་ཕྱིར་བསོད་སྙོམས་ལ་རྒྱུ་སྟེ། ཕྱི་མའི་དུས་ན་བྲམ་ཟེ་དང ། ཁྱིམ་བདག་མ་དད་པ་རྣམས། འདི་སྐད་དུ། གལ་ཏེ་འདི་དག་གི་སྟོན་པ་ཉིད་ཀྱིས་ཀྱང་བསོད་སྙོམས་ལ་རྒྱུ་བ་མ་བྱས་ན་འདི་དག་ཅིའི་ཕྱིར་བསོད་སྙོམས་ལ་རྒྱུ་བར་བྱེད་ཅེས་དེ་དག་དགེ་སློང་དང ། དགེ་སློང་མ་རྣམས་ལ་ཤས་ཆེར་མི་དགའ་བར་མི་འགྱུར་བར་བྱ་བའི་ཕྱིར་རོ། །དེ་བས་ན་དེ་དག་ཀྱང་འདི་སྙམ་དུ་སེམས་ཏེ། འདི་དག་གི་སྟོན་པས་ཀྱང་བསོད་སྙོམས་ལ་རྒྱུ་བར་བྱས་ན་འདི་དག་ཅིའི་ཕྱིར་བསོད་སྙོམས་ལ་རྒྱུ་བ་མི་བྱེད་སྙམ་སྟེ། དེ་དག་གིས་བསྔགས་པའང་བརྗོད་པར་བགྱིད་ལ། བསོད་སྙོམས་ཀྱང་སྟེར་བར་འགྱུར་ཏེ། འདི་སྐད་དུ།་བསོད་སྙོམས་ལ་རྒྱུ་བ་འདི་ནི་གཙུག་ལག་ལས་འབྱུང་བའི་བསོད་སྙོམས་ཡིན་ནོ། །སྤྱོད་པ་འདི་ནི་དེ་བཞིན་གཤེགས་པས་བསྔགས་པ་ཡིན་ནོ་ཞེས་ཀྱང་སྨྲ་བར་འགྱུར་ཏེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། རྒྱལ་པོ་ 334a ༄#། །དང ། བློན་པོ་དང ། བྲམ་ཟེ་དང ། ཁྱིམ་བདག་དང ། བློན་པོའི་བུ་རྣམས་ལས་ལེགས་པར་གསུངས་པའི་ཆོས་འདུལ་བ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་དག་བདག་ཅག་ནི་འདི་ལྟར་རིགས་ཆེན་པོར་སྐྱེས་པ་ཡིན་ན་ཟས་ཀྱི་ཕྱིར་ཁྱིམ་ནས་ཁྱིམ་དུ་བསོད་སྙོམས་ལ་ཅིའི་ཕྱིར་རྒྱུ་བར་བྱ་སྙམ་སྟེ། ངོ་ཚ་ནས་བསོད་སྙོམས་ལ་རྒྱུ་བར་མི་བགྱིད་པ་དེ་དག་དེ་བཞིན་གཤེགས་པའི་བསོད་སྙོམས་དང ། གཟི་བྱིན་དང་ལྡན་པའི་སྐུའི་རྗེས་སུ་སློབ་ཅིང་བསོད་སྙོམས་ལ་རྒྱུ་བར་འགྱུར་ཏེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་རྣམས་ཀྱིས་ནི་འཇིག་རྟེན་དང་མཐུན་པར་མཛད་འཚལ་ཏེ། ཇི་ལྟ་ཇི་ལྟར་སེམས་ཅན་རྣམས་ཡོངས་སུ་སྨིན་པར་འགྱུར་བ་དེ་ལྟ་དེ་ལྟར་མཐུན་པར་མཛད་དེ། བཙུན་པ་རབ་འབྱོར། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར། གཞན་ཡང ། དེ་བཞིན་གཤེགས་པ་ལ་ནི་སྒྲིབ་པའམ། སྐྱེམས་པའང་མི་མངའ། ཉམ་ཆུང་བའང་མི་མངའ། ཆགས་པའང་མི་མངའ། ཆགས་པར་འགྱུར་བའང་མི་མངའ། སྡིག་ 334b པ་བཞེད་པའང་མ་ལགས། གསོག་པའང་མི་མངའ་མོད་ཀྱི་འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་དང་མཐུན་པར་མཛད་པ་དང ། སེམས་ཅན་ཡོངས་སུ་སྨིན་པར་མཛད་པའི་སླད་དུ་བསོད་སྙོམས་ལ་རྒྱུ་བ་མཛད་དེ། བཙུན་པ་རབ་འབྱོར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་ན། བཙུན་པ་རབ་འབྱོར། དེ་ལྟ་བུའི་ཐབས་དང ། དེ་ལྟ་བུའི་སྙིང་རྗེ་ཆེན་པོ་དང ། དེ་ལྟ་བུའི་དོན་ཡོངས་སུ་དག་པ་སུ་བསོད་སྙོམས་ལ་རྒྱུ་བར་སྤྱོད་དམ། སྨྲས་པ། ཆེ་ཞེ། བདག་གིས་ནི་འདི་མི་ནུས་ཏེ། ཆེ་ཞེ། དཔེར་ན། ཁྱི་དང ། བྱི་ལ་ཐམས་ཅད་ཀྱིས་རིའི་རྒྱལ་པོ་རི་རབ་གཞིག་པར་མི་ནུས་པ་དང ། ཝ་ཐམས་ཅད་ཀྱིས་རི་དྭགས་ཀྱི་རྒྱལ་པོ་སེངྒེ་ལ་བསྐལ་པའི་བར་དུའང་མཐུ་རྩལ་ལམ། སྒྲ་བསྒྲགས་པ་བསྟན་པར་མི་ནུས་པ་དེ་བཞིན་དུ། ཆེ་ཞེ། ཉན་ཐོས་དང ། རང་སངས་རྒྱས་ཐམས་ཅད་ཀྱིས་དེ་བཞིན་གཤེགས་པ་ལ་སྤྱོད་པའམ། ཐབས་སམ། སྙིང་རྗེ་ཆེན་པོ་བསྟན་པར་མི་ནུས་སོ། །དེ་བཞིན་གཤེགས་པའི་ཐབས་ལ་མཁས་པ་དང ། བསོད་སྙོམས་ལ་རྒྱུ་བའི་གཏམ་བསྟན་པ་འདི་བཤད་པ་ན་ཁྱིམ་བདག་དེའི་ནང་མི་དེ་དག་དང ། ཁྱིམ་ 335a ༄#། །གཞན་དག་ནས་ཆོས་མཉན་དུ་འོངས་པ་རྣམས་ཀྱི་ནང་ནས་མི་ཉིས་སྟོང་བརྒྱད་བརྒྱས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། ཁྱོད་ཀྱི་ཁྱིམ་ཐབ་ད་ལྟ་ག་ལ་འདུག་།བུད་མེད་དེས་སྨྲས་པ ། བཙུན་པ་རབ་འབྱོར། བདག་གི་ཁྱིམ་ཐབ་ནི་གཅིག་པུར་མ་བས་སོ། །དེ་ཅིའི་སླད་དུ་ཞེ་ན། བཙུན་པ་རབ་འབྱོར། སེམས་ཅན་ཇི་སྙེད་དགའ་བ་བཀོད་པའི་ཐབས་ལ་མཁས་པས་འདུལ་བར་འགྱུར་བ་དེ་དག་ཐམས་ཅད་ནི་བདག་གི་ཁྱིམ་ཐབ་ལགས་སོ། །སྨྲས་པ། ཆེ་ཞེ། དེ་བཞིན་གཤེགས་པས་ནི་སུ་ལའང་འདོད་པའི་དགའ་བ་གནང་བ་མེད་དོ། །སྨྲས་པ། བཙུན་པ་རབ་འབྱོར། དེ་བཞིན་གཤེགས་པས་ནི་དགེ་སློང་གང་རྐྱེན་དང་འཚམ་པའི་ཆོས་གོས་དང ། བསོད་སྙོམས་དང ། མལ་ཆ་དང ། སྟན་དང ། ན་བའི་གསོ་སྨན་དང ། སྨན་ཟོང་དང ། མཛའ་བཤེས་ཀྱི་ཁྱིམ་དང ། བསོད་སྙོམས་སྟེར་བའི་ཁྱིམ་བསྟན་ཅིང་བསྙེན་པ་དང ། གྲོགས་པོ་དགའ་བར་བྱ་བ་དང ། མཁན་པོ་དང ། སློབ་དཔོན་བསྟེན་པ་དང ། བསྙེན་པ་དང ། བསྙེན་བཀུར་བྱ་བ་ཀུན་ཏུ་བསྟེན་པར་བྱེད་པ་དེ་ལའང་དགེ་བའི་ཆོས་འཕེལ་བར་ 335b འགྱུར་བ་དང ། མི་དགེ་བའི་ཆོས་འགྲིབ་པར་འགྱུར་བ་གསུངས་སོ། །སྨྲས་པ། ཆེ་ཞེ། དེ་ནི་ཁྱོད་ཇི་སྐད་ཟེར་བ་བཞིན་ནོ། །སྨྲས་པ། བཙུན་པ་རབ་འབྱོར། དེ་བས་ནི་དེ་བཞིན་གཤེགས་པས་ནི་ཐབས་དེ་ལྟ་བུས་སེམས་ཅན་རྣམས་ལ་འདོད་པའི་དགའ་བ་ཐམས་ཅད་གནང་ངོ ། །སྨྲས་པ། ཆེ་ཞེ། ཁྱོད་ཀྱིས་དགའ་བ་བཀོད་པའི་ཐབས་ལ་མཁས་པས་སེམས་ཅན་ཇི་སྙེད་བཏུལ། སྨྲས་པ། བཙུན་པ་རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སྐར་མའི་གཟུགས་རྣམས་ནི་བགྲང་བའི་ཚུལ་གྱིས་མཐའ་རྟོགས་པར་ནུས་ཀྱི། བདག་གིས་དགའ་བ་བཀོད་པའི་ཐབས་ལ་མཁས་པས་སེམས་ཅན་བཏུལ་ཏེ། བཏུལ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པ་གང་དག་ལགས་པ་དེ་དག་ལ་ནི་དེ་ལྟར་མི་ནུས་སོ། །སྨྲས་པ། ཆེ་ཞེ། ཁྱོད་སེམས་ཅན་དེ་དག་ལ་དགའ་བ་ཇི་ལྟ་བུ་དག་སྟོབས་པར་བྱེད། བུད་མེད་དེས་སྨྲས་པ། བཙུན་པ་རབ་འབྱོར། སེམས་ཅན་ཚངས་པའི་དགའ་བ་ལ་མོས་པ་དག་ཀྱང་མཆིས་ཏེ། བཙུན་པ་རབ་འབྱོར། དེ་དག་ལ་ནི་བདག་ཚངས་པར་འགྱུར་བ་ཐོབ་པར་བགྱི་བའི་སླད་དུ་ཚད་མེད་པའི་བསམ་གཏན་གྱི་དགའ་བ་སྟོབས་པར་བགྱིད་དེ། བསྟབས་ནས་ཀྱང་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ 336a ༄#། །ཆུབ་ལ་འཛུད་པར་བགྱིད་དོ། །བཙུན་པ་རབ་འབྱོར། སེམས་ཅན་བརྒྱ་བྱིན་གྱི་དགའ་བ་ལ་མོས་པ་དག་ཀྱང་མཆིས་ཏེ། དེ་དག་ལ་ནི་བདག་བརྒྱ་བྱིན་གྱི་དགའ་བ་སྟོབས་པར་བགྱིད་དོ། །བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །བཙུན་པ་རབ་འབྱོར། སེམས་ཅན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོའི་དགའ་བ་ལ་མོས་པ་དག་ཀྱང་མཆིས་ཏེ། དེ་དག་ལ་ནི་བདག་ལྟོ་འཕྱེ་ཆེན་པོའི་བར་གྱི་དགའ་བ་སྟོབས་པར་བགྱིད་དེ། བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །བཙུན་པ་རབ་འབྱོར། སེམས་ཅན་འཁོར་ལོས་བསྒྱུར་བའི་རྒྱལ་སྲིད་ཀྱི་དགའ་བ་ལ་མོས་པ་དག་ཀྱང་མཆིས་སོ། །བློན་པོ་དང ། གྲོང་རྡལ་གྱི་མི་དང ། ཡུལ་གྱི་མི་དང ། བྲམ་ཟེ་དང ། རྒྱལ་རིགས་དང ། རྗེའུ་རིགས་དང ། དམངས་རིགས་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་གཟུགས་དང ། སྒྲ་དང ། དྲི་དང།་རོ་དང ། རེག་པའི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་མེ་ཏོག་དང ། བདུག་པ་དང ། སྤོས་དང ། མེ་ཏོག་ཕྲེང་བ་དང ། བྱུག་པ་དང ། ཕྱེ་མ་ 336b དང།་གདུགས་དང ། རྒྱལ་མཚན་དང ། བ་དན་དང ། རྔ་ཡབ་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་གསེར་དང ། དངུལ་དང ། ནོར་བུ་དང ། མུ་ཏིག་དང ། བཻཌཱུ་རྱ་དང ། དུང་དང ། མན་ཤེལ་དང ། ཤེལ་དང ། མུ་ཏིག་དམར་པོ་དང ། བྱུ་རུ་དང ། རྡོའི་སྙིང་པོ་དང ། སྤུག་དང ། རིན་པོ་ཆེ་རྣམ་པ་སྣ་ཚོགས་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་རྔ་བོ་ཆེ་དང ། རྫ་རྔ་དང ། དུང་དང ། འཁར་རྔ་དང ། པི་ཝང་དང ། གླིང་བུ་དང ། རོལ་མོའི་སྒྲ་རྣམ་པ་སྣ་ཚོགས་ཀྱི་དགའ་བ་ལ་མོས་པ་དག་ཀྱང་མཆིས་ཏེ། བཙུན་པ་རབ་འབྱོར། སེམས་ཅན་དེ་དག་ལའང་བདག་གིས་བསམ་པ་ཐམས་ཅད་དང ། དགའ་བ་དང ། རྩེད་མོ་ཐམས་ཅད་སྟོབས་པར་བགྱིད་དེ། བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །རབ་འབྱོར་གྱིས་སྨྲས་པ། ཆེ་ཞེ། འདོད་པའི་ཡོན་ཏན་ལྔ་ནི་འཕགས་པའི་ལམ་གྱི་བར་དུ་གཅོད་པ་ཡིན་ན། ཇི་ལྟར་དེ་དག་བསྟབས་པས་འདུལ་བར་འགྱུར་ཏེ་གནས་འདི་ཕན་ཚུན་མི་མཐུན་པ་ཡིན་ནོ། །ཆེ་ཞེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཕགས་པའི་ལམ་ལ་བར་དུ་གཅོད་པར་བྱེད་པའི་ཆོས་གང་ཁོ་ན་ཡིན་པ་དེ་དག་ཉིད་ཀྱིས་སེམས་ཅན་ 337a ༄#། །རྣམས་འདུལ་བར་བྱེད་པ་ནི་དཀའ་བར་བྱེད་པ་སྟེ་ངོ་མཚར་ཏོ།། །།བམ་པོ་གཉིས་པ་སྟེ་ཐ་མ། དེ་ནས་བུད་མེད་དེས་དགའ་བ་བཀོད་པའི་ཐབས་ལ་མཁས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པའི་ཚོང་དཔོན་གྱི་བུ་གཉིས་ཆོས་མཉན་པའི་ཕྱིར་སྒོ་ཁང་དེར་འདུས་པར་གྱུར་ཏེ། དེ་གཉིས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། རང་གི་ཤེས་རབ་ཀྱིས་བྱང་ཆུབ་སེམས་དཔའི་ཤེས་རབ་སད་པར་མ་མཛད་ཅིག་།དེ་ཅིའི་སླད་དུ་ཞེ་ན། བཙུན་པ་རབ་འབྱོར། འདི་ཇི་སྙམ་དུ་དགོངས། འབྲུ་མར་གྱི་མར་མེ་ཆུང་དུ་གང་ལགས་པ་དེ་ཁའི་དབུགས་སམ།་ལག་པས་གཡབས་པའམ། གོས་ཀྱིས་གཡབས་པའི་རླུང་གིས་ཞི་བར་མཛད་སྤྱོད་དམ། སྨྲས་པ། རིགས་ཀྱི་བུ་དག། འབྲུ་མར་གྱི་མར་མེ་ཆུང་དུ་གང་ཡིན་པ་དེ་ནི་ཁའི་དབུགས་སམ། ལག་པས་གཡབས་པའམ། གོས་ཀྱིས་གཡབས་པའི་རླུང་གིས་ཞི་བར་བྱེད་ནུས་སོ། །དེ་གཉིས་ཀྱིས་སྨྲས་པ། བཙུན་པ་རབ་འབྱོར། དེ་བཞིན་དུ་ཉན་ཐོས་ཀྱི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོའི་ཤེས་རབ་ཀྱི་སྣང་བ་དང ། བསོད་ནམས་ཀྱི་སྣང་བ་ཆུང་དུ་དེ་ནི་འདོད་པའི་རྟོགས་པ་གཅིག་གིས་ཀྱང་མ་ 337b མཆིས་པར་བགྱིད་དོ། །བཙུན་པ་རབ་འབྱོར། འདི་ཇི་སྙམ་དུ་དགོངས། སྲེག་པའི་བ་སྐལ་པའི་མེའི་ཕུང་པོ་གང་ལགས་པ་དེ་གངྒཱའི་ཀླུང་ཆུས་གང་བས་ཞི་བར་མཛད་སྤྱོད་དམ། སྨྲས་པ། རིགས་ཀྱི་བུ་དག་།དེ་ནི་རྒྱ་མཚོ་འབུམ་གྱིས་ཀྱང་ཞི་བར་མི་ནུས་ན་གངྒཱ་ཀླུང་ཆུས་ཡོངས་སུ་གང་བས་ལྟ་ཅི་སྨོས། དེ་གཉིས་ཀྱིས་སྨྲས་པ། བཙུན་པ་རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་སྣང་བ་དང ། བསོད་ནམས་ཀྱི་སྣང་བའང་དེ་དང་འདྲ་བར་བལྟ་བར་བགྱིའོ། །བཙུན་པ་རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདོད་པའི་ཡོན་ཏན་ལྔས་རྩེ་ཞིང་དགའ་ལ་དགའ་མགུར་སྤྱོད་ཀྱང ། དེ་དག་གིས་བྱང་ཆུབ་སེམས་དཔའི་ཤེས་རབ་ཀྱི་སྣང་བ་དང ། བསོད་ནམས་ཀྱི་སྣང་བ་ཟད་པར་མི་ནུས་སོ། །བཙུན་པ་རབ་འབྱོར། དཔེར་ན། མི་དབུལ་པོ་ནད་པ་གསོ་ཞིང་ནད་ཞི་བར་བགྱི་བའི་སླད་དུ་སྨན་པས་སྨན་མངར་བ་དང ། སྐྱུར་བ་དང ། ལན་ཚཝའི་རོ་དང ། ཚ་བ་དང ། ཁ་བ་དང ། བསྐ་བ་ལས་མོད་པ་དང ། རིན་ཆུང་བ་གང་ལགས་པ་དེ་དག་སྩོལ་བར་བགྱིད་དེ།་དེས་ཀྱང་བདག་བདེ་བ་ཉམས་སུ་མྱོང་བར་བགྱི་བའི་སླད་དུ་དེ་དག་བསྟེན་པར་བགྱིད་དོ། །དེ་དག་བསྟེན་པས་ནད་ཆུང་བའི་སླད་དུ་ནད་དེ་ལས་ཐར་བར་འགྱུར་བ་དེ་བཞིན་ 338a ༄#། །དུ།་བཙུན་པ་རབ་འབྱོར། ཉན་ཐོས་ཀྱི་ཐེག་པ་པ་སྦྱངས་པའི་ཡོན་ཏན་དང ། ཡོ་བྱད་བསྙུངས་པ་དང ། འདོད་པ་ཉུང་བ་དང ། དགོན་པ་ན་གནས་པ་དང ། ཆོག་ཤེས་པ་དང ། ལོངས་སྤྱོད་ཆུང་བ་དང ། བྱ་བ་ཉུང་བས་སྡུག་བསྔལ་ཐམས་ཅད་ཉམས་སུ་མྱོང་ནས། དེའི་འོག་ཏུ་ལེན་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་ཏེ། བཙུན་པ་རབ་འབྱོར། རྣམ་གྲངས་དེས་ཀྱང་ཁྱོད་ཀྱིས་འདི་ལྟར་རིག་པར་བགྱི་སྟེ། ཇི་ལྟར་མི་དབུལ་པོ་གསོ་བ་དེ་བཞིན་དུ་ཉན་ཐོས་ཀྱི་ཐེག་པ་པའི་རྣམ་པར་གྲོལ་བའང་དེ་དང་འདྲ་བར་བལྟ་བར་བགྱིའོ། །བཙུན་པ་རབ་འབྱོར། དཔེར་ན། རྒྱལ་རིགས་ཀྱི་རྒྱལ་པོ་སྤྱི་བོ་ནས་དབང་བསྐུར་བ་ནད་པ་གསོ་བའི་ཕྱིར་སྨན་པས་རྒྱལ་པོ་ལ་འོས་པའི་སྨན་ཁ་དོག་ཕུན་སུམ་ཚོགས་པ་དང ། དྲི་ཕུན་སུམ་ཚོགས་པ་དང ། རོ་ཕུན་སུམ་ཚོགས་པ་དང ། ཁར་བཅུག་ནའང་ཞིམ་ལ་ལྟོར་སོང་ནའང་བདེ་བ་དེ་ལྟ་བུ་ལེགས་པར་སྦྱར་ནས་སྦྱིན་པར་བགྱིད་དེ་རྒྱལ་པོ་ལ་འོས་པའི་ཁུ་བཅུད་དོ་ཅོག་ཀྱང་དེ་ལ་སྦྱིན་པར་བགྱིད་དོ། །རྒྱལ་པོ་དེ་ཡིད་མི་བདེ་བར་མི་འགྱུར་བར་བགྱི་བའི་སླད་དུའང་མེ་ཏོག་དང ། བདུག་པ་དང ། སྤོས་དང ། མེ་ཏོག་ཕྲེང་དང ། བྱུག་པ་རྣམས་དེ་ལ་འབུལ་བར་བགྱིད་དོ། །སིལ་སྙན་ 338b དང།་ཕེག་རྡོབ་པ་རྣམས་ཀྱང་དེ་དང་མཐུན་པར་སྦྱོར་ཞིང་གླུ་ལེན་པར་བགྱིད་དོ། །དེ་ཇི་ཙམ་དུ་དགའ་བ་རྣམ་པ་སྣ་ཚོགས་དེ་དག་གིས་དགའ་བར་གྱུར་པ་དེ་ཙམ་དུ་ནད་དེ་ལས་ཐར་བར་འགྱུར་བ་དེ་བཞིན་དུ། བཙུན་པ་རབ་འབྱོར། བྱང་ཆུབ་སེམས་དཔའ་ཁ་ཅིག་དགའ་བ་བཀོད་པའི་ཐབས་ལ་མཁས་པས་དགའ་བ་ཐམས་ཅད་ཀྱང་མྱོང་བ། བདེ་བ་ཐམས་ཅད་དང་ལྡན་པའི་ཐེག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུ་དག་ཀྱང་མཆིས་ཏེ། བཙུན་པ་རབ་འབྱོར། རྣམ་གྲངས་དེས་ཀྱང་ཁྱོད་ཀྱིས་འདི་ལྟར་རིག་པར་བགྱི་སྟེ། ཇི་ལྟར་རྒྱལ་པོ་གསོ་བ་དེ་བཞིན་དུ་བྱང་ཆུབ་སེམས་དཔའི་ཡེ་ཤེས་མངོན་པར་རྟོགས་པའང་དེ་དང་འདྲ་བར་ལྟ་བར་བགྱིའོ། །བཙུན་པ་རབ་འབྱོར། གཞན་ཡང ། འདོད་པའི་ཡོན་ཏན་ལྔའང་རྩ་བ་མ་མཆིས་པ་དང ། གནས་མ་མཆིས་པ་ལགས་ལ། ཐམས་ཅད་མཁྱེན་པ་ཉིད་ཀྱང་རྩ་བ་མ་མཆིས་པ་དང ། གནས་མ་མཆིས་པ་ལགས་ཏེ། དེ་ལྟ་བུར་བཟོད་པ་གང་ལགས་པ་དེས་ནི་བདག་གིས་བྱ་བ་ནི་གང་ཡིན། མི་བྱ་བ་ནི་གང་ཡིན་སྙམ་དུ་རང་གིས་འཚལ་ཏོ། །འདོད་པའི་ཡོན་ཏན་ལྔ་མི་དམིགས་པ་ལགས་ཏེ། གང་གིས་དེ་ལྟ་བུར་བཟོད་པ་དེས་ནི་ལམ་ནི་གང་ཡིན། ལམ་ངན་པ་ནི་ 339a ༄#། །གང་ཡིན་སྙམ་དུ་རང་གིས་འཚལ་ཏོ། །འདོད་པའི་ཡོན་ཏན་ལྔའང་སྟོང་ལ་ཐམས་ཅད་མཁྱེན་པ་ཉིད་ཀྱང་སྟོང་སྟེ། གང་གིས་དེ་ལྟ་བུར་བཟོད་པར་ནི་འདོད་པ་རྣམས་ལས་བཟློག་མི་འཚལ་ཏེ། དེ་ནི་རང་ཉིད་ཀྱིས་འདོད་པ་རྣམས་ལ་སྨོད་པར་བགྱིད་དེ་བསྟེན་པར་མི་བགྱིད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་ཚོང་དཔོན་གྱི་བུ་དེ་གཉིས་ལ་འདི་སྐད་ཅེས་སྨྲས་སོ། །ཆེ་ཞེ་འདི་རིགས་ཀྱི་བུ་ཁྱེད་གཉིས་ཀྱི་ཅིར་འོང ། དེ་ནས་ཚོང་དཔོན་གྱི་བུ་དེ་གཉིས་ཀྱིས་དེའི་ཚེ་ཚེ་དང་ལྡན་པ་རབ་འབྱོར་ལ་ཐལ་མོ་སྦྱར་ནས་ཚིགས་སུ་བཅད་པ་འདི་དག་སྨྲས་སོ། །འདི་ནི་ཕ་ལགས་མ་ཡང་ལགས། །འདི་ནི་མཛའ་བོ་གྲོགས་མཆོག་འདི། །འདི་ནི་ཁྱོ་ལགས་མཁས་པ་ལགས། །འདི་ནི་སྟོན་པ་བླ་ན་མེད། །འདི་ནི་ཉིད་ཀྱི་མཐུ་སྟོབས་ཀྱི། །འདི་ནི་ཡོངས་སུ་གྲོལ་བར་བགྱིས། །འདི་ནི་དེ་བཞིན་ཉིད་ལྡན་པས། །སྡུག་བསྔལ་འཆིང་ལས་བདག་ཅག་བཀྲོལ། །འདི་ནི་ཆོས་ཀུན་སྟོན་པ་སྟེ། །རིགས་པ་ཀུན་གྱིས་རྣམ་པར་རྟོགས། །བདག་ཅག་གཉིས་ནི་དགའ་བྱིན་ནས། །འཆི་བ་མེད་ལ་ལེགས་པར་བཙུད། ། ཇི་ལྟར་ཉ་ནི་ཤས་གཡོགས་པའི། །མཆིལ་པ་ཡིས་ནི་བཟུང་བ་ལྟར། །འདིས་ནི་ཐབས་ཀྱིས་བདག་ཅག་གཉིས། །བསོད་ནམས་བརྒྱས་ནི་བཅུས་པས་གྱུར། ། 339b གདུག་པའི་སྤྲུལ་གྱིས་ཟིན་པ་ཡི། །དུག་ནི་དུག་གིས་ཞི་བགྱིད་ལྟར། །དེ་བཞིན་འདིས་ནི་བདག་ཅག་གི་།འདོད་ཆགས་དུག་ནི་དུག་གིས་བཅོམ། །ཇི་ལྟར་མི་ནི་མེས་འཚིག་པ། །མེ་ཡིས་བསྲོས་ན་ཞིང་ལྟར། །དེ་བཞིན་རང་གི་ཉོན་མོངས་གདུང ། །ཉོན་མོངས་རྣམས་ཀྱིས་ཡོངས་སུ་བཀྲོལ། །བདག་ཅག་གཉིས་ཀྱིས་དམ་ཆོས་རྟོགས། །འདོད་པ་བདག་ཅག་གཉིས་མི་འཚལ། །བྱིས་པ་གང་དག་འདོད་པ་འཚལ། །དེ་དག་བྱང་ཆུབ་འདོད་མ་ལགས། །འཇིག་རྟེན་འདོད་པར་གསུངས་པ་རྣམས། །དེ་དག་འཇིགས་ཆེན་གཤེད་མ་སྟེ། །དེ་དག་ཉིད་ནི་ཡོངས་རྟོགས་པ། །མཁས་པ་རྣམས་ཀྱི་གྲོལ་བ་ལགས། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ།་ཅི་ཁྱོད་ཀྱིས་རིགས་ཀྱི་བུ་རྣམས་ཁོ་ན་དགའ་བ་བཀོད་པའི་ཐབས་ལ་མཁས་པ་འདིས་འདུལ་བར་བྱེད་དམ། འོན་ཏེ་རིགས་ཀྱི་བུ་མོ་དག་ཀྱང་འདུལ་བར་བྱེད། སྨྲས་པ། བཙུན་པ་རབ་འབྱོར། བདག་གིས་ནི་དགའ་བ་བཀོད་པའི་ཐབས་ལ་མཁས་པས་སེམས་ཅན་ཐམས་ཅད་གང་ཡང་འདུལ་བར་མི་བགྱིད་པ་མ་མཆིས་ཏེ། བཙུན་པ་རབ་འབྱོར།་བུད་མེད་ཀྱི་སེམས་ནི་ལྷག་པར་ཡང་དགའ་བ་ལ་སྲེད་པས་ན་བདག་གིས་ནི་བུད་མེད་ཆེས་མང་དུ་དགའ་བ་བཀོད་པའི་ཐབས་ལ་མཁས་པས་བཏུལ་གྱི་སྐྱེས་ 340a ༄#། །པ་དག་ནི་དེ་ལྟ་མ་ལགས་སོ། །སྨྲས་པ། ཆེ་ཞེ། ཁྱོད་ཀྱིས་ཇི་ལྟར་བུད་མེད་ཀྱི་གཟུགས་ཀྱིས་བུད་མེད་འདུལ་བར་བྱེད། དེ་ནས་བུད་མེད་དེས་དེའི་ཚེ་སྐྱེས་པ་ལོ་ཉི་ཤུ་རྩ་གཉིས་ལོན་པ། གོས་གཙང་མ་སྲབ་མོ་བགོས་པ། སྐྱེས་པའི་རྒྱན་གྱིས་བརྒྱན་པ། མཛེས་ཤིང་བལྟ་ན་སྡུག་ལ་ཁ་དོག་རྒྱས་པ་མཆོག་དང་ལྡན་པ་ཅི་འདྲ་བ་དེ་ལྟ་བུར་སྣང་བར་བྱས་ནས་དེས་སྨྲས་པ། བཙུན་པ་རབ་འབྱོར། བུད་མེད་ནི་གཟུགས་ཀྱི་ལུས་འདི་ལྟ་བུས་འདུལ་བར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །ཅི་ཁྱོད་བུད་མེད་ཡིན་ནམ། འོན་ཏེ་སྐྱེས་པ་ཡིན། དེས་སྨྲས་པ། བཙུན་པ་རབ་འབྱོར། ཅི་ཁྱོད་སོ་སོའི་སྐྱེ་བོའམ། འོན་ཏེ་སློབ་པ་ལགས། སྨྲས་པ། རིགས་ཀྱི་བུ། བདག་ནི་སོ་སོའི་སྐྱེ་བོའང་མ་ཡིན། སློབ་པའང་མ་ཡིན་ནོ། །སྨྲས་པ། བཙུན་པ་རབ་འབྱོར། བདག་ཀྱང་དེ་བཞིན་ཏེ། བུད་མེད་ཀྱང་མ་ལགས། སྐྱེས་པའང་མ་ལགས་སོ། །རབ་འབྱོར་གྱིས་སྨྲས་པ། གལ་ཏེ་ཁྱོད་སྐྱེས་པའང་མ་ཡིན། བུད་མེད་ཀྱང་མ་ཡིན་ན་བདག་གིས་ཁྱོད་ཇི་ལྟར་གཟུང་བར་བྱ། སྨྲས་པ། གལ་ཏེ་བཙུན་པ་སོ་སོའི་སྐྱེ་བོའང་མ་ལགས། སློབ་པའང་མ་ལགས་ན་བདག་གིས་ཁྱོད་ཇི་ལྟར་གཟུང་བར་ 340b བགྱི། དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། ཀྱེ་མ་བྱང་ཆུབ་སེམས་དཔའ་འདི་ནི་ཤེས་རབ་ཟབ་མོ་དང་ལྡན་ཏེ། གལ་ཏེ་བདག་གིས་བརྩམས་ན་ནི་ཡང་བདག་ལ་འདྲི་བར་འོང་ངོ་སྙམ་མོ། །དེ་ནས་རིགས་ཀྱི་བུ་དེས་ཚེ་དང་ལྡན་པ་རབ་འབྱོར་གྱི་སེམས་སེམས་ཀྱིས་བརྟགས་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། ཁྱོད་ནི་བརྟན་པོ་མ་ལགས་ཏེ་འདྲི་བས་སྐྲག་གིས། བཙུན་པ་རབ་འབྱོར། འདྲི་བས་སྐྲག་པར་མ་མཛད་ཅིག་།སྨྲས་པ། བདག་ནི་དགྲ་བཅོམ་པ་ཟག་པ་ཟད་པའོ། །སྨྲས་པ། བཙུན་པ་རབ་འབྱོར། ཟག་པ་ཟད་པ་དེ་དག་གང་ལགས། ཅི་འདས་པ་རྣམས་ལགས་སམ། མ་འོངས་པ་རྣམས་ལགས་སམ། ད་ལྟར་བྱུང་བ་རྣམས་ལགས། འདས་པ་གང་ལགས་པ་དེ་དག་ཟད་ཅེས་བགྱིར་ནི་འདས་པ་ལ་ཟད་པ་མ་མཆིས་སོ། །མ་འོངས་པ་གང་ལགས་པ་དེ་དག་ཀྱང་ད་དུང་མ་ཕྱིན་པ་སྟེ། དེ་དག་ཀྱང་ཟད་པར་བགྱིར་མི་ནུས་སོ། །ད་ལྟར་བྱུང་བ་གང་ལགས་པ་དེ་དག་ནི་མི་གནས་པ་སྟེ། དེ་དག་ཀྱང་ཟད་པར་བགྱིར་མི་ནུས་སོ། །རབ་འབྱོར་གྱིས་སྨྲས་པ། རིགས་ཀྱི་བུ། བདག་གིས་ནི་འདིར་ཐམས་ཅད་ཀྱི་ལན་གདབ་པར་མི་ནུས་པའི་སྟེང་དུ་བསོད་སྙོམས་ཀྱི་དུས་ལ་བབ་སྟེ་བདག་གིས་དུས་ཡོལ་དུ་འོང་གི་བསོད་ 341a ༄#། །སྙོམས་ལ་འགྲོའོ། །དེ་ནས་དེའི་ཚེ་རིགས་ཀྱི་བུ་དེ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀུན་ཏུ་སྟོན་པ་ཞེས་བྱ་བ་ལ་སྙོམས་པར་ཞུགས་སོ། །རིགས་ཀྱི་བུ་དེ་སྙོམས་པར་ཞུགས་མ་ཐག་ཏུ་ཚེ་དང་ལྡན་པ་རབ་འབྱོར་གྱིས་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་དག་མཐོང་སྟེ། ལ་ལར་ནི་ཉི་མ་འཆར་ཀ་ཙམ། ལ་ལར་ནི་ཉི་མ་བག་དྲོས་ཙམ། ལ་ལར་ནི་དྲོས་བུ་ཆུང་ཙམ། ལ་ལར་ནི་སྔ་དྲོ་ཕྱེད་ཙམ། ལ་ལར་ནི་དྲོ་ལ་བབ་ཏུ་ཉེ་བའི་དུས་ཙམ། ལ་ལར་ནི་གཎྜི་བརྡུང་བའི་དུས་ཙམ། ལ་ལར་ནི་སྔ་མ་བཀད་པ་ཙམ། ལ་ལར་ནི་བཀད་ཟིན་པ་ཙམ། ལ་ལར་ནི་ཟན་ཟ་ཞིང་འདུག་པ་ཙམ། ལ་ལར་ནི་ལྡང་བ་ཙམ། ལ་ལར་ནི་ལྷུང་བཟེད་འཁྲུ་བ་ཙམ། ལ་ལར་ནི་ཕྱེད་ཡོལ་གྱི་དུས་ཙམ། ལ་ལར་ནི་ཕྱེ་མ་རེད་ཀྱི་དུས་ཙམ། ལ་ལར་ནི་སྲོད་ཙམ། ལ་ལར་ནི་ནམ་ཕྱེད་ཙམ། ལ་ལར་ནི་ནམ་ཆུང་ཁོར་ཙམ། ལ་ལར་ནི་ཟླ་བ་དང ། ཉི་མ་མེད་དེ་རང་གི་འོད་དང་ལྡན་པར་མཐོང་ངོ ། །དེ་ནས་རིགས་ཀྱི་བུ་དེས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། ཁྱོད་དུས་ཚོད་གང་གི་ཚེ་བཤོས་གསོལ། དུས་ཚོད་ནི་ཇི་ཙམ་དུ་གདའ། རབ་འབྱོར་གྱིས་སྨྲས་པ། རིགས་ 341b ཀྱི་བུ།་བདག་ནི་འདི་ཉིད་ཀྱི་དུས་ཚོད་ལ་ཟན་ཟ་ཡི། སངས་རྒྱས་ཀྱི་ཞིང་གཞན་གྱི་དུས་ཚོད་ལ་མ་ཡིན་ནོ། །དེ་ནས་རིགས་ཀྱི་བུ་དེས་དེའི་ཚེ་ཉི་མའི་དཀྱིལ་འཁོར་ནུབ་ཕྱོགས་སུ་སོང་བ་དེ་སྔ་དྲོ་ཕྱེད་ཙམ་དུ་བཞག་སྟེ། ཅི་ནས་སྔ་དྲོ་ཕྱེད་ཙམ་དུ་འཛིན་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་སོ། །དེ་ནས་རིགས་ཀྱི་བུ་དེས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། དུས་ཚོད་ཇི་ཙམ་ལ་བབ་པ་གཟིགས་ཤིག་།དེ་ནས་ཚེ་དང་ལྡན་པ་རབ་འབྱོར་གྱིས་མཐོང་ནས་ཡིད་ཆེས་ཏེ་མི་རིང་བར་གྱུར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཀྱི་མིང་ཅི་ཡིན་པ་བདག་ལ་སྟོན་ཅིག་།རིགས་ཀྱི་བུ་དེས་སྨྲས་པ། བཙུན་པ་རབ་འབྱོར། ཁྱོད་ལ་བདག་གི་མིང་གིས་ཅི་ཞིག་བགྱི། ཡང་ན་དེ་བཞིན་གཤེགས་པ་ཉིད་ལ་ཞུས་ཤིག་དང་དེ། ཁྱོད་ལ་ལན་འདེབས་སོ། །བཙུན་པ་རབ་འབྱོར། གཞན་ཡང ། མིང་ཐམས་ཅད་ནི་མིང་མ་མཆིས་པའོ། །དེ་ཅིའི་སླད་དུ་ཞེ་ན། མིང་ཐམས་ཅད་ནི་ཀུན་བརྟགས་པ་དང ། ཡང་དག་པ་མ་ལགས་པ་སྟེ། གང་ཀུན་བརྟགས་པ་དང ། ཡང་དག་པ་མ་ལགས་པ་དེ་ལ་མིང་འདི་ཞེས་ཇི་སྐད་བགྱི། བཙུན་པ་རབ་འབྱོར་གྱིས་སྨྲས་ 342a ༄#། །པ།་ཅི་ཐམས་ཅད་མཁྱེན་པ་ཉིད་ཀྱི་མིང་གང་ཡིན་པ་དེའང་ཀུན་བརྟགས་པ་དང ། ཡང་དག་པ་མ་ཡིན་ནམ། སྨྲས་པ། བཙུན་པ་རབ་འབྱོར། དེ་ནི་དེ་བཞིན་ཏེ། དེ་ཅིའི་སླད་དུ་ཞེ་ན། འདི་ལྟར་ཐམས་ཅད་མཁྱེན་པ་ཉིད་ཀྱང་སངས་རྒྱས་ཀྱི་ཞིང་གཞན་དང ། གཞན་དག་ན་མིང་ཕན་ཚུན་ཐ་དད་པ་མཆིས་པའི་སླད་དུའོ། །སྨྲས་པ། རིགས་ཀྱི་བུ། ཐམས་ཅད་མཁྱེན་པ་ཉིད་ཀྱི་མིང་ཐ་དད་པ་ཇི་ལྟ་བུ་ཡིན། སྨྲས་པ། བཙུན་པ་རབ་འབྱོར། ཐམས་ཅད་མཁྱེན་པ་ཉིད་ལ་སངས་རྒྱས་ཀྱི་ཞིང་ལ་ལར་ནི་མཐུ་ཞེས་བགྱིའོ། །ལ་ལར་ནི་སྡུད་པ་ཞེས་བགྱིའོ། །ལ་ལར་ནི་ཐམས་ཅད་དུ་སྣང་བ་ཞེས་བགྱིའོ། །ལ་ལར་ནི་དྲི་མ་མེད་པ་ཞེས་བགྱིའོ། །ལ་ལར་ནི་དོན་ཐམས་ཅད་སྟོན་པ་ཞེས་བགྱིའོ། །ལ་ལར་ནི་ཉམས་པ་མེད་པ་ཞེས་བགྱིའོ། །ལ་ལར་ནི་མཆོད་པ་པོ་ཞེས་བགྱིའོ། །ལ་ལར་ནི་མངོན་སུམ་པ་ཞེས་བགྱིའོ། །ལ་ལར་ནི་བྱུ་རུ་འཛིན་ཅེས་བགྱིའོ། །ལ་ལར་ནི་རྣམ་པར་རྒྱལ་བ་ཆེན་པོ་ཞེས་བགྱིའོ། །ལ་ལར་ནི་སྒྲ་ཆེན་པོ་ཞེས་བགྱིའོ། །ལ་ལར་ནི་དཔག་ཏུ་མ་མཆིས་པ་ཞེས་བགྱི་སྟེ། བཙུན་པ་རབ་འབྱོར། དེ་ལྟར་ན་ཐམས་ཅད་མཁྱེན་པ་ཉིད་ཀྱང་སངས་རྒྱས་ཀྱི་ཞིང་གཞན་དང ། གཞན་དག་ན་མིང་ཐ་དད་ 342b པ་དཔག་ཏུ་མ་མཆིས་སོ། །དེ་བཞིན་དུ་གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པའི་མིང་ཐ་དད་པའང་དཔག་ཏུ་མ་མཆིས་སོ།། དེ་བཞིན་དུ་ཕུང་པོ་རྣམས་དང ། ཁམས་རྣམས་དང ། སྐྱེ་མཆེད་རྣམས་དང ། དྲན་པ་ཉེ་བར་གཞག་པ་རྣམས་དང ། ཡང་དག་པར་སྤོང་བ་རྣམས་དང ། རྫུ་འཕྲུལ་གྱི་རྐང་པ་རྣམས་དང ། དབང་པོ་རྣམས་དང ། སྟོབས་རྣམས་དང ། བྱང་ཆུབ་ཀྱི་ཡན་ལག་རྣམས་དང ། འཕགས་པའི་ལམ་ཡན་ལག་བརྒྱད་པ་རྣམས་ཀྱང་སངས་རྒྱས་ཀྱི་ཞིང་གཞན་དང ། གཞན་དག་ན་མིང་ཐ་དད་པ་དཔག་ཏུ་མ་མཆིས་ཏེ། དེ་བས་ན། བཙུན་པ་རབ་འབྱོར། རྣམ་གྲངས་དེས་ཀྱང་མིང་ཐམས་ཅད་ནི་མིང་མ་མཆིས་པ་དང ། ཀུན་བརྟགས་པ་དང ། ཡང་དག་པ་མ་ལགས་པ་དེ་ལྟར་རིག་པར་བགྱིའོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །རྒྱལ་པོའི་ཁབ་ཀྱི་བྲམ་ཟེ་དང ། ཁྱིམ་བདག་རྣམས་ནི་དེ་ན་ཡོན་གནས་འདི་ལྟ་བུ་དག་འཁོད་པ་ལས་ན་རྙེད་པ་ལེགས་པར་རྙེད་པ་ཡིན་ནོ། །རིགས་ཀྱི་བུ་དེས་སྨྲས་པ། བཙུན་པ་རབ་འབྱོར། འཇིག་རྟེན་ན་ཡོན་གནས་གང་ལགས་པ་མཁྱེན་ཏམ། སྨྲས་པ། རིགས་ཀྱི་བུ། ཇི་ལྟར་བདག་གིས་སྤོབས་པ་དེ་བཞིན་དུ་བསྟན་པར་བྱ་སྟེ། ཚུལ་ཁྲིམས་དང་ལྡན་པ། དགེ་བའི་ཆོས་ 343a ༄#། །ལ་ཞུགས་པ། སེམས་འཁྲུལ་བ་མེད་པ་གང་ཡིན་པ་དེ་དག་ནི་འཇིག་རྟེན་ན་ཡོན་གནས་ཡིན་ནོ། །སྨྲས་པ། བཙུན་པ་རབ་འབྱོར། ཁྱོད་ཀྱིས་ཇི་སྐད་བསྟན་པ་དེ་དག་ནི་ཡོན་གནས་ཡོངས་སུ་རྫོགས་པ་མ་ལགས་སོ། །སྨྲས་པ། རིགས་ཀྱི་བུ། ཡོན་གནས་ཡོངས་སུ་རྫོགས་པ་ཇི་ལྟ་བུ་ཡིན། སྨྲས་པ། བཙུན་པ་རབ་འབྱོར་སེམས་ཅན་ཐམས་ཅད་ལ་བྱམས་པ་ཆེན་པོ་དང ། སྙིང་རྗེ་ཆེན་པོའང་སྐྱེ་ལ། སེམས་ཅན་གང་ཡང་མི་དམིགས་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །སངས་རྒྱས་དང ། ཆོས་དང ། དགེ་འདུན་གྱི་ཚུལ་མི་གཅོད་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །སེམས་ཅན་ཐམས་ཅད་ཀྱི་ཉོན་མོངས་པ་སྤོང་བ་ལ་བརྩོན་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །ཡེ་ཤེས་མི་ཟད་པ་དང ། ཤེས་རབ་ཀྱི་ཟད་པ་དང ། བསོད་ནམས་མི་ཟད་པ་དང ། སྤོབས་པ་མི་ཟད་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །སོ་སོ་སྐྱེ་བོའི་གྲོགས་མི་བགྱིད་ལ་འཕགས་པའི་གྲོགས་བགྱིད་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །གང་དག་མཐོང་བ་ཙམ་གྱིས་སེམས་ཅན་རྣམས་ཀྱི་ཡེ་ཤེས་མཐོང་བ་རྣམ་པར་ 343b དག་པར་འགྱུར་བ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །དེ་ནས་གནས་བརྟན་རབ་འབྱོར་གྱི་ཕྱི་བཞིན་དུ་རྟག་ཏུ་འབྲང་བའི་ལྷ་ངེས་པ་ལམ་ཞུགས་པ་གང་ཡིན་པ་དེས་ཡོན་གནས་ཀྱི་བསྟན་པ་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཚེ་དང་ལྡན་པ་རབ་འབྱོར་གྱི་རྐང་པ་ལ་ཕྱག་བཙལ་ནས། ཚེ་དང་ལྡན་པ་རབ་འབྱོར་ལ་བཟོད་པ་གསོལ་ཏེ། བཙུན་པ་རབ་འབྱོར། བདག་ཁྱོད་ཀྱི་སླད་བཞིན་དུ་འབྲང་བར་མི་བགྱིད་དོ་ཞེས་བྱས་སོ། །དེ་ནས་རིགས་ཀྱི་བུ་དེས་ལྷ་དེ་ལ་འདི་སྐད་ཅེས་སྨྲས་སོ། །ལྷ།་ཁྱོད་ཅིའི་ཕྱིར་བཙུན་པ་རབ་འབྱོར་ལ་བཟོད་པ་གསོལ། སྨྲས་པ། རིགས་ཀྱི་བུ། བདག་ལོ་བཅུ་གཉིས་ཀྱི་བར་དུ་བཙུན་པ་རབ་འབྱོར་གྱི་ཕྱི་བཞིན་དུ་འབྲངས་ཀྱང ། བདག་གིས་ཡོན་གནས་ཀྱིས་བསྟན་པ་འདི་ལྟ་བུ་སྔོན་ཆད་མ་ཐོས་ཏེ། དེ་བས་ན་ད་ལྟར་ཡོན་གནས་ཀྱིས་བསྟན་པ་འདི་ཐོས་ནས་བདག་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བདག་འདི་སྙམ་དུ་སེམས་ཏེ། གང་དང ། གང་ན་ཡོན་གནས་ཀྱི་ས་ཡོངས་སུ་དག་པར་བྱེད་པའི་བྱང་ཆུབ་སེམས་དཔའ་སྡུད་པར་བྱེད་པའི་ཆོས་འདི་ལྟ་བུ་དག་ཐོས་པར་འགྱུར་བ་དེ་དང ། དེར་འགྲོའོ་སྙམ་མོ། །དེ་ནས་ཚེ་དང་ལྡན་པ་རབ་འབྱོར་ལྷ་དེའི་སེམས་བསྐྱད་པ་དེ་ལ་རྗེས་སུ་ 344a ༄#། །ཡི་རང་ནས་ལྷ་དེ་ལ་འདི་སྐད་ཅེས་སྨྲས་སོ། །ལྷ།ཁྱོད་ཀྱི་སེམས་སངས་རྒྱས་ཀྱི་ཆོས་རྒྱ་ཆེན་པོ་དག་ལ་བཏུད་པ་དེ་ནི་རྙེད་པ་ལེགས་པར་རྙེད་དོ། ། ལྷ།་བདག་ནི་ཐམས་ཅད་མཁྱེན་པ་ཉིད་ལ་སེམས་སྣང་བར་གྱུར་ཏེ། སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་པས་ཅི་བྱར་ཡང་མེད་དོ། །ལྷ།་གལ་ཏེ་བདག་སེམས་རྣམ་པར་གྲོལ་བར་མ་གྱུར་ན་ནི་བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཞིག་མོད། ལྷ།གཞན་ཡང ། ཁྱོད་ཀྱི་ནི་སྔོན་མ་ཐོས་པའི་ཆོས་རྣམས་ཐོས་པར་བྱེད་པ་དང ། ཐོས་པ་རྣམས་ཀྱང་ཆུད་མི་ཟ་བར་བྱེད་པའི་སྐྱེས་བུ་དམ་པ་འདི་ཅི་འདྲ་བ་དེ་ལྟ་བུའི་དགེ་བའི་བཤེས་གཉེན་ལ་རྟག་ཏུ་རྒྱུན་མི་འཆད་པར་བསྟེན་པར་བྱའོ། །དེ་ནས་རིགས་ཀྱི་བུ་དེས་ལྷ་དེ་ལ་འདི་སྐད་ཅེས་སྨྲས་སོ། །ལྷ།་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འགྲུབ་པར་དཀའ་སྟེ། དེ་ནི་གོ་ཆ་ངན་དོན་ཙམ་གྱིས་མངོན་པར་རྫོགས་པར་འཚང་རྒྱ་བར་མི་ནུས་སོ། །ལྷས་སྨྲས་པ། སྐྱེས་བུ་དམ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འགྲུབ་པར་དཀའ་བ་ཡིན་མོད་ཀྱི། འོན་ཀྱང་ཅི་ནས་བདག་གིས་བཙལ་བ་དོན་ཡོད་པར་འགྱུར་བར་བདག་གིས་བསྒྲུབ་པར་བྱའོ། །སྨྲས་པ། ལྷ།་ཁྱོད་ཀྱིས་ཇི་ལྟར་བསྒྲུབ་པར་བྱ། སྨྲས་པ ། 344b སེམས་ཅན་ཐམས་ཅད་ལ་སེམས་སྙོམས་པར་བྱ་བ་དང ། སེམས་ཅན་ཐམས་ཅད་ཉོན་མོངས་པ་ལས་རབ་ཏུ་གྲོལ་བར་བྱ་བ་དང ། སེམས་ཅན་ཐམས་ཅད་ཀྱི་ཕུང་པོའི་ཁུར་ཁྱེར་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང ། སྡུག་བསྔལ་ཐམས་ཅད་རྟོགས་པར་བྱ་བའི་ཕྱིར་དེ་ལྟར་བསྒྲུབ་པར་བྱའོ། །རིགས་ཀྱི་བུ་དེས་སྨྲས་པ ། ལྷ།་སེམས་ཅན་དུ་འདུ་ཤེས་པ་ལ་ནི་སེམས་ཅན་ཐམས་ཅད་ལ་སེམས་སྙོམས་པ་མེད་དོ། །ཉོན་མོངས་པར་འདུ་ཤེས་པ་ལ་ནི་སེམས་ཅན་ཐམས་ཅད་རབ་ཏུ་གྲོལ་བར་བྱེད་པ་མེད་དོ། །ཕུང་པོར་འདུ་ཤེས་པ་ལ་ནི་སེམས་ཅན་ཐམས་ཅད་ཀྱི་ཕུང་པོའི་ཁུར་ཁྱེར་བ་མེད་དོ། །ཀུན་བརྟགས་པའི་དགེ་བའི་རྩ་བ་ཅན་ལ་ནི་སེམས་ཅན་ཡོངས་སུ་སྨིན་པར་བྱེད་པ་མེད་དོ། །བདག་དང ། གཞན་དུ་འདུ་ཤེས་པ་ལ་ནི་སྡུག་བསྔལ་ཐམས་ཅད་རྟོགས་པར་བྱེད་པ་མེད་དོ། །དེ་ནས་ལྷ་དེ་གདམས་ངག་འདི་བསྟན་པས་མཐུན་པའི་ཆོས་རྣམས་ལ་བཟོད་པ་ཐོབ་བོ། །དེ་ནས་ལྷ་དེས་རིགས་ཀྱི་བུ་དེ་ལ་མཆོད་པའི་ལས་བྱ་བའི་ཕྱིར་སྒོ་ཁང་དེར་ལྷའི་མེ་ཏོག་སིལ་མས་གཏོར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷ་དེ་ལ་འདི་སྐད་ཅེས་སྨྲས་སོ། །ལྷ།་བདག་གིས་ཁྱོད་ཀྱི་བསམ་པ་མ་ཤེས་ནས་ཉན་ཐོས་ཀྱི་ཆོས་རྣམས་ཀྱི་གཏམ་བྱས་ཏེ་དགའ་བ་སྐྱེད་པ་ 345a ༄#། །དེ་ཁྱོད་ཀྱིས་ཀྱང་བཟོད་པ་གྱིས་ཤིག་།དེ་ནས་ལྷ་དེས་འདི་སྐད་ཅེས་སྨྲས་སོ། །བཙུན་པ་རབ་འབྱོར། ཁྱོད་ལ་བདག་ཕྱག་འཚལ་གྱི། སེམས་ཅན་སུའི་ཚོད་ཀྱང་མ་འཛིན་ཅིག་།སེམས་ཅན་སུ་ལའང་རུང་སྟེ་བསམ་པ་མ་བརྟགས་པར་ཆོས་མ་འཆད་ཅིག་།དེ་ཅིའི་ཕྱིར་ཞེ་ན། བཙུན་པ་རབ་འབྱོར། མ་ཐོས་པ་ནི་སླ་ཡི་བྱང་ཆུབ་འདོད་པས་ཉན་ཐོས་ཀྱི་ཐེག་པ་ཐོས་པ་ནི་དེ་ལྟ་མ་ཡིན་ནོ། །བཙུན་པ་རབ་འབྱོར། ཡུན་རིང་དུ་བཀྲེས་པ་ནི་སླ་ཡི། ཁ་ཟས་དུག་དང་འདྲེས་པ་ཟོས་པ་ནི་དེ་ལྟ་མ་ཡིན་ནོ། །བཙུན་པ་རབ་འབྱོར། དེ་བཞིན་དུ་མ་ཐོས་པ་ནི་སླ་ཡི། བྱང་ཆུབ་སེམས་དཔའི་ཐེག་པ་པས་ཉན་ཐོས་ཀྱི་ཐེག་པ་ཐོས་པ་ནི་དེ་ལྟ་མ་ཡིན་ནོ། །དེ་ནས་རིགས་ཀྱི་བུ་དེས་ཀྱང་བུད་མེད་ཀྱི་གཟུགས་དང ། ཁ་དོག་སྔ་མ་ཇི་ལྟ་བ་དེ་བཞིན་དུ་བསྟན་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར།་བདག་གིས་བསོད་སྙོམས་མ་ཕུལ་གྱི་བར་དུ་རེ་ཞིག་གཞེས་ཤིག་།དེ་ནས་བུད་མེད་དེ་རང་གི་ཁྱིམ་དུ་སོང་སྟེ་རོ་བརྒྱ་དང་ལྡན་པའི་ཟས་བླངས་ནས་ཕྱིར་བྱུང་སྟེ་འོངས་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། བསོད་སྙོམས་འདི་བཞེས་ལ་འདོད་ཆགས་དང་བཅས་པར་ཡང་མ་མཛད་ 345b ཅིག་།འདོད་ཆགས་དང་བྲལ་བར་ཡང་མ་མཛད་ཅིག་།ཞེ་སྡང་དང་བཅས་པར་ཡང་མ་མཛད་ཅིག་།ཞེ་སྡང་དང་བྲལ་བར་ཡང་མ་མཛད་ཅིག་།གཏི་མུག་དང་བཅས་པར་ཡང་མ་མཛད་ཅིག་།གཏི་མུག་དང་བྲལ་བར་ཡང་མ་མཛད་ཅིག་།ཉོན་མོངས་པ་དང་བཅས་པར་ཡང་མ་མཛད་ཅིག་།ཉོན་མོངས་པ་དང་བྲལ་བར་ཡང་མ་མཛད་ཅིག་།གལ་ཏེ་བཙུན་པ་རབ་འབྱོར་གྱིས་སྡུག་བསྔལ་ཡོངས་སུ་མ་མཁྱེན། ཀུན་འབྱུང་བ་མ་སྤངས། འགོག་པ་མངོན་སུམ་དུ་མ་བགྱིས། ལམ་མ་བསྒོམས་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་གྱིས་དྲན་པ་ཉེ་བར་གཞག་པ་བཞི་མ་བསྒོམས། ཡང་དག་པར་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་མ་བསྒོམས་ན་དེ་ལྟ་ན་བསོད་སྙོམས་འདི་གཞེས་ཤིག། ། གལ་ཏེ་བཙུན་པ་རབ་འབྱོར་གྱིས་འཇིག་ཚོགས་ཀྱང་མ་དཀྲུགས་ལ་བགྲོད་པ་གཅིག་པའི་ལམ་ཡང་ཐོབ་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་གྱིས་མ་རིག་པ་མ་བཤིག་པར་རིག་པས་རྣམ་པར་གྲོལ་བ་མངོན་སུམ་དུ་མཛད་པ་དང ། འདུ་བྱེད་ཟད་པར་མ་མཛད་པར་འདུས་མ་བྱས་ལ་མངོན་སུམ་ 346a ༄#། །དུ་མཛད་པ་དང ། རྣམ་པར་ཤེས་པའི་རྒྱུ་ལ་མ་བརྟེན་པར་རྣམ་པར་གྲོལ་བར་གྱུར་པ་དང ། མིང་དང ། གཟུགས་སུ་སྒྲོ་མ་བཏགས་པར་ཁམས་གསུམ་པ་ལས་ཡང་དག་པར་འདས་པ་དང ། སྐྱེ་མཆེད་དྲུག་ལ་མ་བརྟེན་པར་རྣམ་པར་ཐར་པའི་སྒོ་སྟོང་པ་ཉིད་བསྒོམས་པ་དང ། མིག་གི་འདུས་ཏེ་རེག་པ་ལ་མ་བརྟེན་པར་རྣམ་པར་ཐར་པའི་སྒོ་མཚན་མ་མེད་པ་བསྒོམས་པ་དང ། ཚོར་བར་མ་དམིགས་པར་རྣམ་པར་ཐར་པའི་སྒོ་སྨོན་པ་མེད་པ་མངོན་སུམ་དུ་མཛད་པ་དང ། སྲེད་པ་མ་དམིགས་པར་དེ་བཞིན་ཉིད་ཡོངས་སུ་མཁྱེན་པ་དང ། ལེན་པ་རློམ་སེམས་སུ་མ་མཛད་པར་ལེན་པ་མེད་པ་ཀུན་མཁྱེན་པ་དང ། སྲིད་པ་མི་འབྱུང་བའི་ཚུལ་དུ་ཡོངས་སུ་མཁྱེན་པ་དང ། སྐྱེ་བ་མི་སྐྱེ་བར་ཡོངས་སུ་མཁྱེན་པ་དང ། རྒ་ཤི་བརྗོད་དུ་མེད་པའི་ཚུལ་དུ་མཁྱེན་པ་དེ་ལྟ་བུར་སྲིད་པའི་ཡན་ལག་རྣམས་ཀུན་མཁྱེན་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་གྱིས་སངས་རྒྱས་ཀྱང་མ་གཟིགས། ཆོས་ཀྱང་མ་གསན། དགེ་འདུན་ལའང་མི་རྟོན་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་གྱིས་འཕགས་པའི་མཉམ་པ་ཉིད་ཀྱིས་སོ་སོའི་སྐྱེ་བོ་མཉམ་པ་ 346b ཉིད་དུ་ཡོངས་སུ་མཁྱེན་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་ཉིད་འདི་ནས་ཀྱང་མེད་པར་གྱུར་ལ་ཕ་རོལ་ཏུའང་མི་སྐྱེ་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་གྱིས་འདོད་ཆགས་དང ། ཞེ་སྡང་དང ། གཏི་མུག་མཉམ་པ་ཉིད་ཀྱིས་ཉོན་མོངས་པ་མེད་པ་མཉམ་པ་ཉིད་དུ་ཡོངས་སུ་མཁྱེན་ལ། ཉོན་མོངས་པ་མེད་པ་མཉམ་པ་ཉིད་ཀྱིས་ཀྱང་འདོད་ཆགས་དང ། ཞེ་སྡང་དང ། གཏི་མུག་མཉམ་པ་ཉིད་དུ་ཡོངས་སུ་མཁྱེན་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་སོ་སོའི་སྐྱེ་བོའི་ས་ལས་ཀྱང་མ་འདས་ལ་འཕགས་པའི་ས་ལའང་མ་ཞུགས་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་སྣང་བའང་མ་ལགས། སྣང་བར་འགྲོ་བའང་མ་ལགས། འཁོར་བ་ལའང་མ་ཞུགས། མྱ་ངན་ལས་འདས་པའང་མི་ཐོབ།་བརྫུན་དུ་སྨྲ་བའང་མ་ལགས། བདེན་པར་སྨྲ་བའང་མ་ལགས་ན་དེ་ལྟ་ན་བསོད་སྙོམས་འདི་བཞེས་ཤིག་།གལ་ཏེ་བཙུན་པ་རབ་འབྱོར་གྱིས་ཟག་པའང་ཟད་པར་མི་མཛད་ལ་མི་ཟད་པའང་འཁྲུག་པར་མི་མཛོད། ཕུང་པོ་དང ། ཁམས་དང ། སྐྱེ་མཆེད་རྣམས་ལས་ཀྱང་མི་གཡོ་ལ་རྟེན་པ་མ་མཆིས་པར་ཡང་ཉོན་ 347a ༄#། །མོངས་པ་མ་མཆིས་པ་བསམ་གཏན་དུ་མཛད། ཐམས་ཅད་ལའང་རྟག་ཏུ་སྨོན་པ་མི་མངའ་ལ་ཆོས་རྣམས་ཀྱང་སེམས་ཀྱིས་ཤིན་ཏུ་ཐུགས་སུ་ཆུད་ན་དེ་ལྟ་ན་བསོད་སྙོམས་འདི་བཞེས་ཤིག་།བཙུན་པ་རབ་འབྱོར། གལ་ཏེ་ཁྱོད་ཀྱིས་གང་གི་ཕྱིར་རབ་ཏུ་བྱུང་བའི་ཆོས་དེ་མ་རྟོགས་ན་དེ་ལྟ་ན་བསོད་སྙོམས་འདི་བཞེས་ཤིག་།བཙུན་པ་རབ་འབྱོར་གྱི་ཉོན་མོངས་པ་མེད་པ་གང་ལགས་པ་དང ། སེམས་ཅན་དམྱལ་བ་རྣམས་ཀྱི་ཉོན་མོངས་པ་མེད་པ་གང་ལགས་པ། བཙུན་པ་རབ་འབྱོར། གལ་ཏེ་ཉོན་མོངས་པ་མེད་པ་འདི་གཉིས་ལ་ཡོན་གནས་ཆེས་ལྷག་པ་མ་མཆིས་ན་དེ་ལྟ་ན་བསོད་སྙོམས་འདི་བཞེས་ཤིག་།འཕགས་པ་རབ་འབྱོར་ལ་ཡོན་གནས་ཡིན་པར་འདུ་ཤེས་སྐྱེད་པ་གང་ལགས་པ་དེ་དག་ནི་བཙུན་པ་རབ་འབྱོར་ལ་མེད་པ་དང ། ཡང་དག་པ་མ་ཡིན་པས་སྐུར་པ་འདེབས་པ་སྟེ། གལ་ཏེ་བཙུན་པ་རབ་འབྱོར་ཁྱོད་ཆོས་དེ་ལྟ་བུ་དང་ལྡན་ན་དེ་ལྟ་ན་བསོད་སྙོམས་འདི་བཞེས་ཤིག་།དེ་ནས་ཚེ་དང་ལྡན་པ་རབ་འབྱོར་གྱིས་སྒོ་ཁང་དེ་གཡོས་པར་བྱས་ནས་ལག་པ་གཡས་པ་བརྐྱང་སྟེ་འདི་སྐད་ཅེས་སྨྲས་སོ། །ཆེ་ཞེ། གང་དག་ཡང་དག་པར་སྨྲ་བ་ན་འདི་ལྟ་བུའི་ཆེས་དང་ལྡན་པར་སྨྲ་བ་དེ་ 347b དག་ནི་བདག་ལ་ཡང་དག་པར་སྨྲ་བས་སྨྲ་བ་ཡིན་ནོ། །དེ་སྐད་ཅེས་སྨྲས་ནས་བསོད་སྙོམས་དེ་བླངས་སོ། །དེ་ནས་བུད་མེད་དེས་ཚེ་དང་ལྡན་པ་རབ་འབྱོར་ལ་ལེགས་སོ་ཞེས་བྱ་བ་བྱིན་ཏེ་འདི་སྐད་ཅེས་སྨྲས་སོ། །གང་དག་མཉམ་པ་ཉིད་ཀྱིས་བསོད་སྙོམས་ལེན་པའི་ཡོན་གནས་དེ་དག་ནི་དཀོན་ནོ། །སྨྲས་པ། མངོན་པའི་ང་རྒྱལ་ཅན་རྣམས་ནི་མཉམ་པ་ཉིད་འདི་སུན་ཕྱུང་སྟེ་སྨད་ནས་ཕལ་ཆེར་སེམས་ཅན་དམྱལ་བར་འགྲོ་བར་འགྱུར་རོ། །དེ་ནས་ལྷ་དེས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར། ཁྱོད་ཀྱིས་ཅི་ལས་བསམས་ཏེ། གང་དག་ཆོས་འདི་སུ་ན་ཕྱུང་སྟེ་སྨད་ནས་ཕལ་ཆེར་སེམས་ཅན་དམྱལ་བར་འགྲོ་བར་འགྱུར་རོ་ཞེས་དེ་སྐད་སྨྲ། སྨྲས་པ། ལྷ། འདི་ཇི་སྙམ་དུ་སེམས། སྒྱུ་མའི་ཆོས་འགའ་ཞིག་ལ་འདི་ནི་རྒྱུ་དང་བཅས་པའོ། །འདི་ནི་རྒྱུ་མེད་པའོ་ཞེས་སུན་འབྱིན་བའམ། སྨོད་པར་བྱེད་དམ། སྨྲས་པ། བཙུན་པ་རབ་འབྱོར། དེ་ནི་མ་ཡིན་ནོ། །སྨྲས་པ། ལྷ། དེ་བཞིན་དུ་ཆོས་ཐམས་ཅད་སྒྱུ་མ་ལྟ་བུར་རྟོགས་ན་བདག་གིས་སུན་དབྱུང་བའམ། སྨད་དུ་ཅི་ཞིག་ཡོད། ལྷ།་གཞན་ཡང ། བདག་ནི་སེམས་ཅན་ཐམས་ཅད་ཀྱིས་ཡང་དག་པའམ། ཡང་དག་པ་མ་ཡིན་པ་བརྗོད་པའི་སྒྲ་དེ་དག་ 348a ༄#། །ཐམས་ཅད་དང་མཉམ་མོ། །དེ་ཅིའི་ཕྱིར་ཞེ་ན། བརྗོད་པ་ཐམས་ཅད་ནི་སྒྱུ་མའི་ངོ་བོ་ཉིད་ཀྱིས་བརྗོད་དུ་མེད་དོ། །བསོད་སྙོམས་ལེན་པ་བསྟན་པ་འདི་བཤད་པ་ན་ལྷའི་བུ་བརྒྱ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དེ་ནས་བུད་མེད་དེས་འཕགས་པ་རབ་འབྱོར་ལ་བཟོད་པ་གསོལ་ནས་འདི་སྐད་ཅེས་སྨྲས་སོ། །བཙུན་པ་རབ་འབྱོར། བཤོས་གསོལ་ནས་བཅོམ་ལྡན་འདས་ག་ལ་བ་དེར་བཞུད་ཅིག་དང ། བདག་ཀྱང་ཆོས་མཉན་པའི་སླད་དུ་དེར་མཆིའོ། །དེ་ནས་ཚེ་དང་ལྡན་པ་རབ་འབྱོར་གྱིས་བསོད་སྙོམས་དེ་བླངས་ནས་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་ནས་དེ་ཆོས་ཐོས་པའི་དགའ་བ་དང ། མཆོག་ཏུ་དགའ་བས་ཟས་ལ་སེམས་མི་འཇུག་པར་གྱུར་ནས་དེ་འདི་སྙམ་དུ་སེམས་ཏེ་བདག་གིས་བསོད་སྙོམས་བླངས་ན་གང་ལ་ལོག་པར་ལྟུང་བར་མི་འགྱུར་བ་སུ་ཞིག་ལ་སྦྱིན་པར་བྱ་སྙམ་མོ། །དེ་ནས་བྱང་ཆུབ་སེམས་དཔའ་ཆོས་ཐམས་ཅད་མི་ལེན་པས་ཚེ་དང་ལྡན་པ་རབ་འབྱོར་གྱི་སེམས་སེམས་ཀྱིས་ཤེས་ནས། ཚེ་དང་ལྡན་པ་རབ་འབྱོར་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་རབ་འབྱོར་གྱི་རྐང་པ་ལ་མགོ་བོས་ཕྱག་བཙལ་ནས་ཚེ་དང་ལྡན་པ་རབ་འབྱོར་ལ་འདི་ 348b སྐད་ཅེས་སྨྲས་སོ། །བཙུན་པ་རབ་འབྱོར། བསོད་སྙོམས་འདི་བདག་ལ་བྱིན་ཅིག་དང ། བདག་ལ་བྱིན་ན་ལོག་པར་ལྟུང་བར་མི་འགྱུར་རོ། །སྨྲས་པ། རིགས་ཀྱི་བུ། ཅི་ཁྱོད་ཚུལ་ཁྲིམས་བླངས་པའམ། ཚུལ་ཁྲིམས་ལ་གནས་པ་མ་ཡིན་ནམ། སྨྲས་པ། བཙུན་པ་རབ་འབྱོར། ཆོས་ཐམས་ཅད་ནི་བླང་དུ་མེད་པ་སྟེ། དེ་ལ་ནི་ཚུལ་ཁྲིམས་ཀྱང་མེད། འཆལ་པའི་ཚུལ་ཁྲིམས་ཀྱང་མེད་དོ། །བཙུན་པ་རབ་འབྱོར་།གཞན་ཡང ། བདག་ནི་སྲོག་གཅོད་པར་བྱེད་པ་དང ། མ་བྱིན་པར་ལེན་པ་བྱེད་པ་དང ། འདོད་པ་ལ་ལོག་པར་གཡེམ་པ་བྱེད་པ་དང ། བརྫུན་དུ་སྨྲ་བ་བྱེད་པ་དང ། ཕྲ་མ་བྱེད་པ་དང ། ཚིག་རྩུབ་པོ་སྨྲ་བ་དང ། ཚིག་འཁྱལ་པ་སྨྲ་བ་དང ། བརྣབ་སེམས་ཅན་དང ། གནོད་སེམས་ཀྱི་སེམས་དང་ལྡན་པ་དང ། ལོག་པར་ལྟ་བ་ཅན་ཡིན་ནོ། །དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། རིགས་ཀྱི་བུ། འདིའི་བསྟན་པའི་འདི་འདྲ་བ་ལས་ན་འདི་ནི་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན་པར་ཐེ་ཚོམ་མེད་ཀྱི་ལྡེམ་པོ་ངག་འདི་བདག་གིས་དྲི་བར་བྱའོ་སྙམ་མོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཀྱིས་ཅི་ལས་བསམས་ཏེ་འདི་སྐད་དུ་བདག་ནི་སྲོག་གཅོད་པ་བྱེད་པ་དང ། མ་བྱིན་པར་ལེན་པ་ 349a ༄#། །བྱེད་པ་དང ། འདོད་པས་ལོག་པར་གཡེམ་པ་བྱེད་པ་དང ། བརྫུན་དུ་སྨྲ་བ་བྱེད་པ་དང ། ཕྲ་མ་བྱེད་པ་དང ། ཚིག་རྩུབ་པོ་སྨྲ་བ་དང ། ཚིག་འཁྱལ་པ་སྨྲ་བ་དང ། བརྣབ་སེམས་ཅན་དང ། གནོད་སེམས་ཀྱི་སེམས་དང་ལྡན་པ་དང ། ལོག་པར་ལྟ་བ་ཅན་ཡིན་ནོ། །ཞེས་སྨྲ། དེ་ནས་བྱང་ཆུབ་སེམས་དཔའ་ཆོས་ཐམས་ཅད་མི་ལེན་པས་ཚེ་དང་ལྡན་པ་རབ་འབྱོར་ལ་ཚིགས་སུ་བཅད་དེ་སྨྲས་པ། བྱང་ཆུབ་ལམ་ནི་བླ་མེད་པའི། །ལམ་ནི་བདག་གིས་རྣམ་པར་སྦྱངས། །སྲོག་ཆགས་བྱེ་བ་ཕྲག་སྟོང་ཡང ། །ལམ་དེ་ལ་ནི་ཡོངས་སུ་བཀོད། །སྲོག་ནི་བདག་གིས་ཤིན་ཏུ་གཏུགས། །དེ་ཕྱིར་བདག་ནི་དེ་སྐད་སྨྲ། །གང་དག་ལམ་ནི་རྣམ་པར་སྦྱང ། །དེ་དག་སྲོག་གཅོད་པ་ཞེས་བྱ། །ལྷས་ནི་བྱང་ཆུབ་བྱིན་མ་ཡིན། །བརྒྱ་བྱིན་ཚངས་པས་མ་བྱིན་ཏེ། །མ་བྱིན་པར་ནི་བདག་གིས་བླངས། །དེ་ཕྱིར་བདག་ནི་མ་བྱིན་ལེན། །སྲོག་ཆགས་ཀུན་ལ་ཕན་པའི་ཕྱིར། །མཐུན་པའི་ཐེག་པ་བླངས་པས་ན། །དེ་ཕྱིར་ཐེག་པ་ཆེན་པོ་འདི། །མ་བྱིན་བླངས་ཞེས་བྱ་བ་ཡིན། །འདོད་པས་ལོག་པར་ཡོངས་ཤེས་པ། ། ཆོས་འདོད་ཡིན་ཞེས་དེ་དག་ཤེས། །འདོད་པ་འདི་དག་འདོད་མ་ཡིན། །དེ་ཕྱིར་ལོག་ཅེས་སྤྱོད་པར་བྱེད། །སྒྲར་ནི་ཇི་སྙེད་གདགས་པ་རྣམས། །དེ་དག་རྫུན་ཞེས་ 349b ཡང་དག་གསུངས། །མེད་པའི་ཕྱིར་ན་དེ་རྫུན་ཏེ། །བརྫུན་དུ་སྨྲ་བ་ཞེས་ཀྱང་བྱ། །ཐེག་པ་དམན་པ་འདོད་པ་ཡི། །སེམས་ཅན་གང་དག་སུ་ཡང་རུང ། །སེམས་ཅན་དེ་དག་དབྱེ་བའི་ཕྱིར། །ཐེག་པ་ཆེ་ལ་དགོད་པར་བྱེད། །ཕྲ་མའི་ཚིག་ནི་སྨྲ་བྱེད་ཅིང ། །མུ་སྟེགས་ཅན་གཞན་འབྱེད་པར་བྱེད། །སེམས་ཅན་ལམ་ངན་ལྷུང་བ་རྣམས། །ཡང་དག་ལམ་ལ་འཛུད་པར་བྱེད། །རྒོལ་བ་དེ་དག་ཚར་བཅད་དེ། །དེ་དག་ཤིན་ཏུ་དགའ་བ་མེད། །རྩུབ་པའི་ཚིག་ནི་སྨྲས་ནས་ཀྱང ། །བདུད་རྣམས་ཐམས་ཅད་ཕམ་པར་བྱས། །རྩུབ་པའི་ཚིག་ནི་སྨྲ་མོད་ཀྱི། །འོན་ཀྱང་སེམས་ལ་ཁྲོ་བ་མེད། །སེམས་ཅན་སྨིན་པར་བྱ་བ་ལ། །དཔའ་བོ་རྣམས་ཀྱིས་ཐབས་ལ་ལྟོས། །གང་ལས་དགོངས་ཏེ་གསུངས་པ་ཡི། །དགོངས་པའི་ཚིག་ནི་རབ་ཏུ་ཤེས། །དེས་ན་བསམས་ཏེ་རབ་སྨྲ་ཞིང ། །སེམས་ཅན་བྱེ་བ་འདུལ་བར་བྱེད། །ཁ་ཅིག་ལ་ནི་བསམས་ཏེ་སྨྲས། །ཁ་ཅིག་དེ་དག་རྫུན་པར་ཤེས། །དེ་ཕྱིར་བསམས་ཏེ་སྨྲ་བ་ཡིན། །ཆོས་ཀྱི་མངོན་སུམ་རྟོགས་པར་བྱེད། །སེམས་ཅན་ཇི་སྙེད་ཡོད་པ་རྣམས། །རེ་རེ་ལ་ཡང་དེ་དག་ནི། །མི་མིན་ལྷ་ཡི་བདེ་བ་དག་།འཇིག་རྟེན་ན་ནི་བརྣབ་སེམས་བྱེད། །བདེ་བ་གང་དག་ལྡན་གྱུར་ན། །འཇིག་རྟེན་མགོན་པོ་ཕན་བྱེད་འགྱུར། །བདེ་བ་དེ་ནི་སེམས་ཅན་ཀུན། །ལྡན་པར་མཁས་ 350a ༄#། །རྣམས་བརྣབ་སེམས་བྱེད། །སེམས་ཅན་ཐམས་ཅད་རྒྱལ་གྱུར་ཅེས། །རྟག་ཏུ་དེ་དག་བརྣབ་སེམས་བྱེད། །བརྣབ་སེམས་དེ་འདྲ་ཡིན་པས་ན། །དེ་ཕྱིར་བརྣབ་སེམས་ཅན་ཞེས་སྨྲས། །དམ་པའི་ཆོས་ནི་འཇིག་པའི་ཚེ། །སྟོབས་ཆེན་རྣམས་ཀྱིས་ཚར་བཅད་དེ། །དེ་དག་རང་གི་བདེ་བ་སྤོང ། །ཆོས་དང་སྲོག་ཆགས་སྤོང་མི་བྱེད། །འཇིག་རྟེན་ཀུན་གྱི་རྒོལ་བ་དང ། །སེམས་ཅན་ཀུན་དང་མི་མཐུན་ཏེ། །ཐམས་ཅད་མཐུན་པར་བྱ་བའི་ཕྱིར། །དེ་དག་གནོད་སེམས་སྟོན་པར་བྱེད། །དེ་དག་བསྐལ་པར་རྩོད་བྱེད་དམ། །བསྐལ་པ་བྱེ་བར་རྩོད་ཀྱང་རུང ། །དམ་པའི་ཆོས་ནི་སྤོང་མི་བྱེད། །སླར་ཡང་ལྡོག་པར་ཡོངས་མི་བྱེད། །ལོག་པར་ལྟ་ལ་དཔའ་བ་རྣམས། །དེ་དག་འདུས་བྱས་ཀུན་ལ་སྙོམས། །ལོག་པར་ལྟ་བ་རབ་ཏུ་ཤེས། །ཡང་དག་ལྟ་བའི་རྣམ་པར་རྟོག་།གང་དག་དེ་འདྲའི་ཆོས་དང་ལྡན། །དེ་དང་དེ་དག་ཁྲིམས་ལ་གནས། །གནས་མེད་ལ་ནི་གནས་བཅས་ནས། །མཁས་རྣམས་བྱང་ཆུབ་རྟོགས་པར་འགྱུར། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་བསོད་སྙོམས་དེ་བྱིན་ནས། འདི་སྐད་དུ། སྐྱེས་བུ་དམ་པ་འདི་ལྟ་བུ་དག་གིས་ནི་དད་པས་བྱིན་པའི་བསོད་སྙོམས་ལོག་པར་ལྟུང་བར་མི་བྱེད་དོ་ཞེས་སྨྲས་སོ། །དེ་ནས་ཚེ་ 350b དང་ལྡན་པ་རབ་འབྱོར་ཟན་མ་ཟོས་ཏེ་ཕྱེ་མ་རེད་ཀྱི་དུས་ན་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། ཇི་ལྟར་གྱུར་པ་དེ་དག་ཐམས་ཅད་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་དེ་སུ་ཡིན་པ་ཤེས་སམ། གསོལ་པ། བཅོམ་ལྡན་འདས། མ་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་བུད་མེད་འགྱུར་བ་ཞེས་བྱ་བ་སྟེ་དགའ་བ་བཀོད་པའི་ཐབས་ལ་མཁས་པས་སེམས་ཅན་རྣམས་འདུལ་བར་བྱེད་དོ། །རབ་འབྱོར། དཔེར་ན། ཡུངས་འབྲུས་ཤིང་རྟ་བཀང་བ་ལ་ཡུལ་མ་ག་དྷཱའི་ཁལ་བཅུ་ཚད་ཉི་ཤུ་ཡོད་པ་ལས་ལོ་བརྒྱ་ཞིང་ཡུངས་འབྲུ་རེ་རེ་བོར་བ་ནི་བགྲང་བ་དེ་ལྟ་བུའི་ཚུལ་གྱིས་ཤིང་རྟ་དེའི་ཡུངས་འབྲུའི་མཐའ་ཆེས་མྱུར་དུ་རྟོགས་པར་ནུས་ཀྱི། བྱང་ཆུབ་སེམས་དཔའ་བུད་མེད་འགྱུར་བས་དགའ་བ་བཀོད་པའི་ཐབས་ལ་མཁས་པས་མི་མཇེད་ཀྱི་འཇིག་རྟེན་གྱི་ཁམས་འདིར་སེམས་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པ་དང ། སེམས་ཅན་མང་པོ་ལྷ་དང ། མིར་སྐྱེ་བ་ལ་བཀོད་པ་རྣམས་ནི་དེ་ལྟ་མ་ཡིན་ནོ། །དེ་ 351a ༄#། །ནས་བུད་མེད་དེ་བུད་མེད་ལྔ་བརྒྱས་བསྐོར་ཞིང་མདུན་དུ་བདར་ཏེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་པོའི་རི་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱིས་བུད་མེད་དེ་འོང་བ་ཐག་རིང་པོ་ནས་གཟིགས་ཏེ། གཟིགས་ནས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར། བུད་མེད་ལྔ་བརྒྱ་ཙམ་འོང་བ་འདི་དག་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདི་དག་ཐམས་ཅད་ནི་བྱང་ཆུབ་སེམས་དཔའ་བུད་མེད་འགྱུར་བས་དགའ་བ་བཀོད་པའི་ཐབས་ལ་མཁས་པས་ཡོངས་སུ་སྨིན་པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པ་ཤ་སྟག་གོ་།དེ་ནས་བུད་མེད་དེ་བུད་མེད་ལྔ་བརྒྱས་བསྐོར་ཞིང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ་།དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་བསུ་ནས་ཐལ་མོ་སྦྱར་ཏེ་ཕྱག་བྱས་སོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། འཕགས་པ་ 351b ཆོས་མ་ཐོབ་པ་དང ། འཕགས་པའི་ལུས་སུ་མི་གནས་པའི་བུད་མེད་ལ་ཅིའི་ཕྱིར་ཕྱག་འཚལ། བུད་མེད་དེས་སྨྲས་པ། གནས་བརྟན་ཤཱ་རིའི་བུ། གལ་ཏེ་འཇིག་རྟེན་ན་འཕགས་པ་ནི་གང་དག་ལགས། འཕགས་པ་མ་ལགས་པ་ནི་གང་དག་ལགས་པ་མཁྱེན་ན་ཁྱོད་ཀྱིས་སྤོབས་པ་མཛོད་ཅིག་།གནས་བརྟན་ཤཱ་རིའི་བུས་སྨྲས་པ།་ཆེ་ཞེ། ཁྱོད་ཀྱིས་འཇིག་རྟེན་ན་འཕགས་པ་གང་དག་ཡིན་པ་དང ། འཕགས་པ་མ་ཡིན་པ་གང་དག་ཡིན་པ་ཤེས་སམ། སྨྲས་པ། བཙུན་པ་ཤཱ་རིའི་བུ། བདག་གིས་འཚལ་ཏོ། །སྨྲས་པ། དེ་དག་གང་ཡིན། སྨྲས་པ། བཙུན་པ་ཤཱ་རིའི་བུ། འཕགས་པའི་རིགས་མི་གཅོད་པ་གང་དག་ལགས་པ་དེ་དག་ནི་འཕགས་པའོ། །སངས་རྒྱས་དང ། ཆོས་དང ། དགེ་འདུན་གྱི་རིགས་མི་གཅོད་པ། གང་དག་ལགས་པ་དེ་དག་ནི་འཕགས་པའོ། །འཕགས་བ་རྣམས་ལ་བྱམས་པའི་སེམས་དང་ལྡན་པ་དང ། འཕགས་པ་མ་ཡིན་པ་རྣམས་ལ་ཐར་པ་འདོད་པ་གང་དག་ལགས་པ་དེ་དག་ནི་འཕགས་པའོ། །བཙུན་པ་ཤཱ་རིའི་བུ། གཞན་ཡང ། བུད་མེད་རྒྱན་གྱིས་ལེགས་པར་བརྒྱན་པ། གོས་གཙང་མ་སྲབ་མོ་གྱོན་པ། ཕྱེ་མ་དང ། སྤོས་དང ། མེ་ཏོག་ཕྲེང་དང ། བྱུག་པ་རྣམས་ལ་བསྟེན་པ། འདོད་པའི་ཡོན་ཏན་ལྔ་དང་ལྡན་པ། 352a ༄#། །ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་ནི་ཆེས་སླ་ཡི། དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དབེན་པ་ན་གནས་པ་ནི་དེ་ལྟ་མ་ལགས་སོ། །བཙུན་པ་ཤཱ་རིའི་བུ། གཞན་ཡང ། དོན་འདི་ཉིད་བརྡ་སྤྲད་པའི་ཕྱིར་ཁྱོད་ལ་དཔེ་བསྟན་པར་བགྱི་ན། བཙུན་པ་ཤཱ་རིའི་བུ། འདི་ཇི་སྙམ་དུ་དགོངས། མཆིང་བུའི་ནོར་བུ་བཻ་ཌཱུརྱའི་སྣོད་དུ་བཅུག་པ་འདམ་མམ། འོན་ཏེ་ནོར་བུ་རིན་པོ་ཆེ་རིན་ཐང་མེད་པ་འདམ་རྫབ་ཏུ་བཅུག་པ་འདམ། གནས་བརྟན་ཤཱ་རིའི་བུས་སྨྲས་པ། ཆེ་ཞེ།་ནོར་བུ་རིན་པོ་ཆེ་རིན་ཐང་མེད་པ་འདམ་རྫབ་ཏུ་བཅུག་པ་འདམ་གྱི། མཆིང་བུའི་ནོར་བུ་བཻ་ཌཱུརྱའི་སྣོད་དུ་བཅུག་པ་ནི་དེ་ལྟ་མ་ཡིན་ནོ། །སྨྲས་པ། བཙུན་པ་ཤཱ་རིའི་བུ།་དེ་བཞིན་དུ་བུད་མེད་འདོད་པའི་ཡོན་ཏན་ལྔ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་ནི་ཆེས་འཕགས་ཀྱི། དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དབེན་པ་ན་གནས་པ་དེ་ནི་དེ་ལྟ་མ་ལགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་སྨྲས་པ། ཆེ་ཞེ། ཁྱོད་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་ནམ། སྨྲས་པ། བཙུན་པ་ཤཱ་རིའི་བུ། ཐེག་པ་ཆེན་པོ་ནི་གང་ལའང་མི་གནས་ལ་ལྡོག་པའང་མ་མཆིས་སོ། །སྨྲས་པ། ཆེ་ཞེ། གལ་ཏེ་ཁྱོད་ཐེག་ 352b པ་ཆེན་པོ་གང་ལའང་མི་གནས་ལྡོག་པའང་མེད་ན་ཐེག་པ་ཆེན་པོ་ལ་ཡང་དག་པར་ཞུགས་པ་གང་དག་ཡིན་པ་དེ་དག་ཅི་ལ་ཞུགས། སྨྲས་པ། བཙུན་པ་ཤཱ་རིའི་བུ། ཐེག་པ་ཆེན་པོ་པ་རྣམས་ནི་ཅི་ལའང་མི་གནས་ཏེ། མ་རིག་པ་ཟད་བར་བགྱི་སླད་དུ་དེ་དག་མི་གནས་པ་ནས། རྒ་ཤིའི་བར་དུ་ཟད་པར་བགྱི་བའི་སླད་དུ་དེ་དག་མི་གནས་སོ། །དེ་ཅིའི་སླད་དུ་ཞེ་ན། བཙུན་པ་ཤཱ་རིའི་བུ། མ་རིག་པ་ནས་རྒ་ཤིའི་བར་དུ་མི་ཟད་པའི་སླད་དུའོ། །དེས་ན་དེ་དག་ནི་སྐྱེ་བའི་ཆོས་ཅན་ཡང་མ་ལགས། འགག་པའི་ཆོས་ཅན་མ་ལགས་སོ། །གལ་ཏེ་སྐྱེ་བར་གྱུར་ན་ནི་དེ་ལས་ཟད་པར་འགྱུར་ན་གང་གི་ཕྱིར་མི་སྐྱེ་བ་དེའི་ཕྱིར་མི་ཟད་དོ། །དེ་བས་ན་ཟད་པའང་མ་མཆིས། སྐྱེ་བའང་མ་མཆིས་སོ། ། དགེ་སྦྱོང་གི་ཆོས་ནི་མི་སྐྱེ་བའི་ཆོས་ཅན་ནོ། །བཙུན་པ་ཤཱ་རིའི་བུ། དེ་ལྟར་ན་རྟེན་ཅིང་འབྲེལ་པར་འབྱུང་བ་མ་སྐྱེས་པ་དང ། མ་འགགས་པ་ལགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ། ཁྱོད་ནི་ལྷར་བཅས་པའི་འཇིག་རྟེན་དང ། ཉན་ཐོས་དང ། རང་སངས་རྒྱས་དང་བཅས་པས་ཕྱག་བྱ་བའི་འོས་ཡིན་ན་ཚེ་དང་ལྡན་པ་རབ་འབྱོར་གྱིས་ལྟ་ཅི་སྨོས། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཟག་ 353a ༄#། །གིས་གང་ཟག་ལ་ཚོད་འཛིན་པ་སུ་ཞིག་མཆིས་ཏེ། ཆེ་ཞེ་འདི་ནི་འདི་ལྟར་རྒྱན་གྱིས་ལེགས་པར་བརྒྱན་ལ་འདི་ལྟར་སྤོབས་པ་ཕུན་སུམ་ཚོགས་པ་དང་ལྡན་པ་ལགས་སོ། །བུད་མེད་དེས་སྨྲས་པ། བཙུན་པ་ཤཱ་རིའི་བུ། འདི་ནི་རྒྱན་གྱི་སྤོབས་པ་མ་ལགས་སོ། །སྨྲས་པ། འོ་ན་གང་གི་སྤོབས་པ་ཡིན། སྨྲས་པ།་བཙུན་པ་ཤཱ་རིའི་བུ། བརྒྱད་པ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྒྱན་ལགས་ཏེ། བརྒྱད་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་བརྗེད་པའི་རྒྱན་དང ། སྙིང་རྗེ་ཆེན་པོའི་ལྷག་པའི་བསམ་པ་ལ་གནས་པའི་རྒྱན་དང ། སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་ཀྱི་རྒྱན་དང ། ཐོས་པའི་ཆོས་ཡོངས་སུ་འཚོལ་བ་ལ་ཆོག་མི་ཤེས་པའི་རྒྱན་དང ། ཇི་ལྟར་ཐོས་པའི་ཆོས་རྣམས་དང ། ཇི་ལྟར་ཀུན་ཆུབ་པར་བྱས་པ་རྣམས་ལ་ཚུལ་བཞིན་དུ་སོ་སོར་རྟོག་ཅིང་དཔྱོད་པའི་རྒྱན་དང ། སེམས་ཅན་ཡོངས་སུ་སྨིན་པར་བྱེད་ཀྱང་ཆོས་ཐམས་ཅད་མི་དམིགས་པའི་རྒྱན་དང ། ཆོས་ཟབ་མོ་རྣམ་པར་ངེས་པ་དང ། རྟེན་ཅིང་འབྲེལ་པར་འབྱུང་བ་དང ། སེམས་ཅན་གྱི་དབང་པོ་མཆོག་དང ། མཆོག་མ་ཡིན་པ་ཤེས་པའི་ཡེ་ཤེས་ཀྱི་རྒྱན་དང ། རྒྱན་དེའང་སངས་རྒྱས་ 353b ཀྱིས་བྱིན་གྱི་རླབས་དང ། ཐབས་ལ་མཁས་པའི་རྒྱན་ཏེ། བཙུན་པ་ཤཱ་རིའི་བུ། བརྒྱད་པོ་དེ་དག་ནི་རྒྱན་དག་ལགས་ཏེ། རྒྱན་དེ་དག་གིས་བརྒྱན་པའི་བྱང་ཆུབ་སེམས་དཔའ་ནི་ཐོགས་པ་མེད་པའི་སྤོབས་པ་དང་ལྡན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆེ་ཞེ་འདི་གང་ནས་ཤི་འཕོས་ཏེ་འདིར་སྐྱེས་ལགས། དེ་ནས་བུད་མེད་དེས་བདག་ཉིད་ཀྱི་ལུས་ཅི་འདྲ་བ་དེ་ཁོ་ན་འདྲ་བའི་བུད་མེད་དག་གཅིག་ཚེ་དང་ལྡན་པ་ཤཱ་རིའི་བུའི་མདུན་དུ་སྤྲུལ་ཏོ། །སྤྲུལ་ནས་ཀྱང་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ། ཁྱོད་ཀྱིས་བུད་མེད་འདི་ལ་ག་ལས་ཤི་འཕོས་ཏེ་འདིར་སྐྱེས་ཞེས་དྲིས་ཤིག་།གནས་བརྟན་ཤཱ་རིའི་བུས་སྨྲས་པ། བུད་མེད་འདི་ནི་སྤྲུལ་པ་ཡིན་ཏེ། སྤྲུལ་པ་ལ་ནི་འཆི་འཕོ་དང ། སྐྱེ་བ་མེད་དོ། །སྨྲས་པ། བཙུན་པ་ཤཱ་རིའི་བུ། དེ་བཞིན་གཤེགས་པ་ནི་ཆོས་ཐམས་ཅད་སྤྲུལ་པའི་ངོ་བོ་ཉིད་ཀྱི་མཚན་ཉིད་དུ་མངོན་པར་རྫོགས་པར་སངས་རྒྱས་སོ། །ཆོས་ཐམས་ཅད་སྤྲུལ་པའི་ངོ་བོ་ཉིད་ཀྱི་མཚན་ཉིད་དུ་ཤེས་པ་གང་ཡིན་པ་དེ་དག་ལ་ནི་འཆི་འཕོའམ། སྐྱེ་བ་འདྲི་བར་མི་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་ 354a ༄#། །རིའི་བུ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་འགྱུར་བ་ཞེས་བྱ་བ་ཡིན་ཏེ། དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་མངོན་པར་དགའ་བ་ནས་ཤི་འཕོས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་འདིར་འོངས་སོ། །ཤཱ་རིའི་བུ། བྱང་ཆུབ་སེམས་དཔའ་བུད་མེད་འགྱུར་བ་འདིས་མི་མཇེད་ཀྱི་འཇིག་རྟེན་གྱི་ཁམས་འདིར་སེམས་ཅན་དཔག་ཏུ་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་ནས་བྱང་ཆུབ་སེམས་དཔའ་བུད་མེད་འགྱུར་བས་བུད་མེད་ཀྱི་གཟུགས་ཉིད་ཀྱིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་འདི་སྐད་ཅེས་གསོལ་ཏོ། །བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པའི་བར་དང ། བདག་གི་བུད་མེད་ཀྱི་ལུས་མ་མཆིས་པར་གྱུར་ཏེ། སྐྱེས་པའི་ལུས་སུ་མ་གྱུར་གྱི་བར་དུ་བཅོམ་ལྡན་འདས་ཀྱི་ཞབས་ལས་མི་ལྡང་ལགས་སོ། །བུད་མེད་ལྔ་བརྒྱ་པོ་དེ་དག་ཀྱང་བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་བུད་མེད་ཀྱི་རང་བཞིན་ལས་གྱུར་ཏེ་སྐྱེས་ 354b པའི་རབ་བཞིན་དུ་མ་གྱུར་གྱི་བར་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་གྱི་བར་དུ་བདག་ཅག་མི་ལྡང་ལགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེ་ནས་དེའི་མོད་ལ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་སྣ་ཚོགས། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་སྟེ། འོད་ཟེར་དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་འོད་ཀྱིས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་ཐུག་སྟེ། ཕྱིར་ལོག་ནས་བཅོམ་ལྡན་འདས་ཀྱི་སྤྱི་བོའི་གཙུག་ཏུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ 355a ༄#། །ཀྱིས་བཀའ་སྩལ་པ། ཀུན་དགའ་བོ། ཁྱོད་ཀྱིས་བྱང་ཆུབ་སེམས་དཔའ་བུད་མེད་འགྱུར་བ་བུད་མེད་ལྔ་བརྒྱས་བསྐོར་བ་དེ་བཞིན་གཤེགས་པའི་ཞབས་ལ་གཏུགས་པ་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། བྱང་ཆུབ་སེམས་དཔའ་བུད་མེད་འགྱུར་བ་འདི་བསྐལ་པ་བགྲང་བ་ལས་འདས་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ།་འཇིག་རྟེན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་རྒྱལ་པོ་སྤོབས་པ་ཅན་ཞེས་བྱ་བར་འགྱུར་ཏེ། དེས་བྱང་ཆུབ་ཐོབ་པ་ན་བུད་མེད་ལྔ་བརྒྱ་པོ་འདི་དག་གཟུངས་ཐོབ་པ་དང ། ཐོགས་པ་མེད་པའི་སྤོབས་པ་དང་ལྡན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་འགྱུར་བ་འདིས་ཡོན་ཏན་གྱི་རྒྱན་བསྟན་པ་གང་ངག་ཡིན་པའི་རྒྱན་བརྒྱད་པོ་དེ་དག་གིས་བརྒྱན་པའི་བྱང་ཆུབ་སེམས་དཔའ་ལྔ་བརྒྱར་འགྱུར་ཏེ། བྱང་ཆུབ་སེམས་དཔའ་དེ་དག་དེ་བཞིན་གཤེགས་པ་ཡོན་ཏན་གྱི་རྒྱལ་པོ་སྤོབས་པ་ཅན་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་རོ། ། 355b ཀུན་དགའ་བོ། དེ་བཞིན་གཤེགས་པ་ཡོན་ཏན་གྱི་རྒྱལ་པོ་སྤོབས་པ་ཅན་དེའི་སངས་རྒྱས་ཀྱི་ཞིང་ཡང་འབྱོར་ཞིང་རྒྱས་ལ། བདེ་བ་དང ། ལོ་ལེགས་པ་དང ། མི་དང ། སྐྱེ་བོ་མ་འཕོས་གང་བར་འགྱུར་ཏེ། དགའ་ལྡན་གྱི་ལྷའི་ལོངས་སྤྱོད་དང་མཉམ་པར་འགྱུར་རོ། །སངས་རྒྱས་ཀྱི་ཞིང་དེ་ན་བུད་མེད་ཀྱི་མིང་ཙམ་ཡང་མེད་པར་འགྱུར་ཏེ། སེམས་ཅན་དེ་དག་ཐམས་ཅད་པདྨའི་སྙིང་པོ་ལས་རྫུས་ཏེ་སྐྱེས་ནས་སྐྱིལ་མོ་ཀྲུང་བཅས་ཏེ་འདུག་ལ་གཙང་ཞིང་ཚངས་བར་སྦྱོད་པ་དང ། རྒྱན་བརྒྱད་པོ་དེ་དག་གིས་བརྒྱན་པར་འགྱུར་རོ། །དེ་ནས་བྱང་ཆུབ་སེམས་དཔའ་བུད་མེད་འགྱུར་བ་དེ་དང ། བུད་མེད་ལྔ་བརྒྱ་པོ་དེ་དག་བཅོམ་ལྡན་འདས་ཀྱིས་མངོན་སུམ་དུ་ལུང་བསྟན་པ་ཐོས་ནས་དགའ་བ་དང ། མཆོག་ཏུ་དགའ་བ་དེ་ཁོ་ནས་ཏ་ལ་བདུན་སྲིད་ཙམ་གྱི་ནམ་མཁའ་ལ་འཕགས་ནས། དེའི་མོད་ཁོ་ན་ལ་ཁྱེའུ་ལོ་བཅུ་དྲུག་ལོན་པ་ཙམ་དུ་སྣང་བར་གྱུར་ཏོ། །དེ་དག་བར་སྣང་དེ་ལས་བབས་ཏེ་བཅོམ་ལྡན་འདས་ལ་ཕྱག་འྩལ་ནས། དེ་བཞིན་གཤེགས་པས་དེ་དག་ཐམས་ཅད་ཀྱི་སྤྱི་བོར་ཕྱག་གིས་བྱུགས་སོ། །དེ་ནས་དེ་དག་ཐམས་ཅད་ཀྱིས་དེའི་ཚེ་གཟུངས་དང ། ཀུན་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་ 356a ༄#། །བོ།་ཆོས་ཀྱི་རྣམ་གྲངས་འདི་གཟུང་ལ་གཞན་དག་ལའང་རྒྱས་པར་ཡང་དག་པར་སྟོན་ཅིག། གསོལ་པ། བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེའི་ཕྱིར་ཆོས་ཀྱི་རྣམ་གྲངས་འདི་ཁྱོད་ཀྱིས་སྤོབས་པ་བཀོད་པའི་རྒྱན་ཅེས་བྱ་བར་ཟུངས་ཤིག་།བུད་མེད་འགྱུར་བ་ལུང་བསྟན་པ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་འགྱུར་བ་འཁོར་དང་བཅས་པ་དང ། ཚེ་དང་ལྡན་པ་ཀུན་དགའ་བོ་དང ། ཉན་ཐོས་ཆེན་པོ་དེ་དག་དང ། བྱང་ཆུབ་སེམས་དཔའ་དེ་དག་དང ། ལྷ་དང ། ཀླུ་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བུད་མེད་འགྱུར་བ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲ་ཛྙཱ་ཝརྨ་དང ། ཤཱི་ལེནྡྲ་པོ་དྷི་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། |