།།རྒྱ་གར་སྐད་དུ། ཨཱརྱ་སརྦ་དྷརྨཱ་པྲ་པྲྀཏྟི་ནི་རྡེ་ཤ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་ཐམས་ཅད་འབྱུང་བ་མེད་པར་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་བྱ་རྒོད་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། བྱང་ཆུབ་སེམས་དཔའ་སྟོང་ཕྲག་བཅུ་གཉིས་འདུས་པ་དང ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བཀོད་པ་རབ་ཏུ་བརྒྱན་པ་དང ། བྱང་ཆུབ་སེམས་དཔའ་སེམས་དཔའ་ 421a ༄#། །ཆེན་པོ་སེང་གེའི་རྩལ་གྱིས་འགྲོ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་ཐོགས་པ་མེད་པར་ཤིན་ཏུ་སྦྱངས་པའི་འོད་ཀྱི་གཟི་བརྗིད་འབར་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རི་རབ་ཟོམ་ལ་རྣམ་པར་སྤྱོད་པའི་རྒྱལ་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བས་རབ་ཏུ་འཛུམ་པའི་འོད་དྲི་མ་མེད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའོ་འོད་ཟིལ་གྱིས་གནོན་པའི་འོད་འཕྲོ་དང ། བྱང་ཆུབ་སེམས་དཔའ་ཆེན་པོ་གོ་འཕང་དམ་པ་དྲི་མ་མེད་པ་ཐོབ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟི་བརྗིད་འགྲོ་བ་ལ་འཕྲོ་བའི་པདྨ་རབ་ཏུ་རྒྱས་པའི་ལུས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་སྒྲ་དབྱངས་ཀྱི་སྐད་སྒྲོག་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་རྒྱལ་པོ་འགྲོ་བ་རྣམ་པར་རོལ་པའི་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གསེར་མདོག་གཟི་བརྗིད་དྲི་མ་མེད་པ་རྣམ་པར་དག་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རེག་ན་འཇམ་ཞིང་གཞོན་པའི་ལུས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གསེར་གྱི་རྒྱན་ལྟར་མཚན་རབ་ཏུ་རྒྱས་པའི་ལུས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་ 421b བཅུས་པ་དུད་རབ་ཏུ་འདུལ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་ལམ་ཞི་བས་ཉེ་བར་ཞི་བར་འགྲོ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་འཛིན་མངོན་པར་འཕགས་པའི་རྒྱལ་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་སྒྲ་དབྱངས་སྐད་སྒྲོག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ལ་དབང་ཕྱུག་གི་དབང་གི་རྩལ་གྱིས་སྤྱོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟི་བརྗིད་དྲི་མ་མེད་པའི་ལུས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་སྟོང་ཕྲག་དགུ་བཅུ་རྩ་གཉིས་དང་ཡང་ཐབས་གཅིག་གོ་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་རྩལ་གྱིས་འགྲོ་བས། བྱང་ཆུབ་སེམས་དཔའི་ཚོགས་དེ་ལྟ་བུ་དེ་མཐོང་ནས། སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས། ཚིགས་སུ་བཅད་དེ་ཞུ་བ་ཞུས་པ། གསོ་མེད་སྲོག་མེད་བདག་མེད་ཆོས་ཀྱི་རྣམས། །མགོན་པོ་མཐའ་ཡས་གྲགས་མངས་བཤད་དུ་གསོལ། །འཁོར་འདི་འདི་འདྲ་དམ་པ་མཆོག་ལགས་ཏེ། །ཞི་བ་རྟག་ཞི་རྟག་ཏུ་ཉེ་བར་ཞི། །ལྟ་བའི་རྣམ་པ་ཇི་ལྟར་བྱང་ཆུབ་ལགས།། 422a ༄#། །ཁྲོ་དང་ཕྲག་དོག་ང་རྒྱལ་བྲལ་བ་དང ། །འདོད་ཆགས་དངོས་བྲལ་ཇི་ལྟར་བྱང་ཆུབ་ལགས། །མགོན་པོ་མཐའ་ཡས་གྲགས་མངས་བཤད་དུ་གསོལ།། སྐྱོན་བྲལ་ཐར་པ་གང་ལ་མ་མཆིས་པའི། །འདུ་བྱེད་ཁམས་ཀྱང་ཇི་ལྟར་བྱང་ཆུབ་ལགས། །ཇི་ལྟར་ཆོས་རྣམས་གཉིས་སུ་མ་མཆིས་པ། །རྒྱལ་བ་ཐུགས་རྗེ་མངའ་བས་བཤད་དུ་གསོལ། །ཆོས་རྣམས་ཤིན་ཏུ་རྣམ་པར་གྲོལ་གྱུར་ཅིང ། །མྱ་ངན་འདས་དང་གྲོལ་མཉམ་ཇི་ལྟར་ལགས། །ཆགས་པ་མ་ཆགས་ནམ་མཁའི་ཚུལ་འདྲ་ཞིང ། །འཆིང་བར་མི་འགྱུར་གང་ལགས་མགོན་པོ་གསུངས། །ཀ་ལ་པིངྐ་ཚངས་པ་ལྷ་ཡི་གསུང ། །འོད་ལ་དྲི་མེད་གསེར་གྱི་མདོག་མངའ་བ། །ཡིད་འོང་འོད་གསལ་ཡོན་ཏན་མཆོག་མངའ་བས། །ཆོས་ཉིད་རྟག་པར་ཚུལ་གཅིག་བཀའ་སྩལ་གསོལ། །སྒྲིབ་པ་ཇི་ལྟར་བྱང་ཆུབ་མཉམ་པ་ལགས། །བྱང་ཆུབ་རང་བཞིན་ཇི་ལྟར་ཆོས་རྣམས་ལགས། །ཆོས་དང་ཆོས་མིན་ཇི་ལྟར་འདྲ་བ་ལགས། །དེ་གཉིས་ཇི་ལྟར་ནམ་མཁའ་མཚུངས་པ་ལགས། །ཆོས་རྣམ་གྲངས་དང་བགྲང་བ་མཆིས་ཤིང ། །ཞི་དང་མཉམ་པར་དེ་དག་ཇི་ལྟར་འགྱུར། །སྐྱོན་བལ་བྱང་ཆུབ་དེ་ལ་མ་མཆིས་ཤིང ། །དེ་ལ་ཀུན་མཁྱེན་མ་མཆིས་ཇི་ལྟར་ལགས། །བགྱི་དང་བགྱིད་དང་བགྱི་བའི་རང་བཞིན་དང ། །གཟུང་དང་འཛིན་པ་ནམ་ཡང་མ་མཆིས་ལ། ། 422b སེམས་ཅན་རྣམས་ཀྱང་རྟག་པར་མ་མཆིས་ཤིང ། །དེ་ལ་ཆོས་སྤྱོད་ཇི་ལྟར་མ་མཆིས་འགྱུར། །དེ་ལ་ཚུལ་ཁྲིམས་བཟོད་པ་མ་མཆིས་ཤིང ། །ཚུལ་ཁྲིམས་འཆལ་པའང་དེ་ལ་མ་མཆིས་ལ། །བསམ་གཏན་ཤེས་རབ་དེ་ལ་མ་མཆིས་ཤིང ། །རྟོགས་དང་མ་རྟོགས་མ་མཆིས་ཇི་ལྟར་ལགས། །ཆོས་རྣམས་དྲི་མེད་དག་པ་ཇི་ལྟར་ལགས། །ནམ་མཁའ་འདྲ་ཞིང་ཅི་ཡང་མ་ལགས་ལ། །ནམ་ཡང་སེམས་ཀྱི་རང་བཞིན་མི་དམིགས་ཤིང ། །ཆོས་རྣམས་སེམས་མེད་ཇི་ལྟར་ལགས་པར་འབྱུང ། །ཡོངས་སུ་ཤེས་བགྱི་ཇི་ལྟར་མ་མཆིས་ཤིང། །སྒོམ་དང་མངོན་བགྱི་མཆིས་པ་མ་ལགས་ལ། །གང་དུའང་དེ་ལ་སྤང་པ་མ་མཆིས་པས། །སེམས་ཅན་ཇི་ལྟར་ནམ་མཁའི་དབྱིངས་འདྲ་ལགས། །གང་ལ་ཆོས་ཉིད་གཅིག་གི་ཚུལ་གྱུར་པ། །དེ་ལ་རང་བཞིན་ནམ་ཡང་མ་མཆིས་ལ། །སྐྱེ་བ་ནམ་ཡང་དེ་ལ་མ་མཆིས་པའི། །ཆོས་ཀྱི་ཚུལ་ནི་མགོན་པོས་བཤད་དུ་གསོལ། །དེ་ལ་སློབ་དང་དགྲ་བཅོམ་མ་མཆིས་ཏེ། །རང་རྒྱལ་ཇི་ལྟར་མཆིས་པ་མ་ལགས་ཤིང ། །བྱང་ཆུབ་འཚོལ་བའི་ཆོས་ཀྱང་མ་མཆིས་ལ། །སོང་དང་འོངས་པ་མ་མཆིས་ཇི་ལྟར་ལགས། །གང་ལ་གནས་དང་རྟེན་པ་མ་མཆིས་ཤིང ། །འོང་དང་འགྲོ་བ་དག་ཀྱང་མ་མཆིས་ལ། །ཆོས་རྣམས་འགྲོ་དང་འོང་དང་བྲལ་བས་ན། །རི་བཞིན་མི་གཡོ་བརྟན་གནས་ཇི་ལྟར་ལགས། །དེ་ལེ་ཇི་ 423a ༄#། །ལྟར་འདུ་ཤེས་གཟུགས་མ་མཆིས། གཟུགས་ཀྱི་རང་བཞིན་ཇི་ལྟར་བྱང་ཆུབ་ལགས། །གཟུགས་དང་བྱང་ཆུབ་ཇི་ལྟར་གཉིས་མ་མཆིས། །དྲི་མེད་མཆོག་མངའ་རྒྱལ་བས་དེ་དག་གསུངས། །སངས་རྒྱས་གང་ལ་མ་མཆིས་ཆོས་དག་དང ། །དགེ་འདུན་གང་ལ་མ་མཆིས་དེ་སླད་དུ། །སངས་རྒྱས་ཆོས་དང་དགེ་འདུན་མཆོག་གི་རྣམས། །དེ་དག་གཅིག་གི་ཚུལ་དུ་ཇི་ལྟར་འགྱུར། །གང་ལ་སྟོང་དང་མཚན་ཉིད་མ་མཆིས་ཤིང ། །འདུ་དང་འབྲལ་བ་དེ་ལ་མ་མཆིས་ལ། །ཆོས་རྣམས་མིང་དང་མིང་མེད་བྲལ་བ་མེད། །སྒྲ་བརྗོད་བྲག་ཅ་འདྲ་བ་ཇི་ལྟར་ལགས། །སྐྱེ་དང་སྐྱེ་མེད་གང་ལ་མ་མཆིས་ཤིང ། །གང་ལ་སྐྱོན་བྲལ་མྱ་ངན་འདས་པ་དང ། །འཁོར་བ་དག་ཀྱང་དེ་ལ་མ་མཆིས་པས། །ཆོས་རྣམས་ཐམས་ཅད་ཚུལ་ནི་ཇི་ལྟར་འགྱུར། །ལྷ་དང་ཀླུ་དག་དེ་ལ་མ་མཆིས་ཤིང ། །གནོད་སྦྱིན་མིའམ་ཅི་དང་འདྲེ་དག་དང ། །སེམས་ཅན་དམྱལ་བ་དེ་ལ་མ་མཆིས་ཤིང ། །ཇི་ལྟར་དེ་ལ་སེམས་ཅན་ལམ་མ་མཆིས། །མགོན་པོས་ཆོས་རྣམས་གང་གསུངས་ཚུལ་དག་དང ། །སྡིག་པའི་བློ་ཅན་མུ་སྟེགས་གང་སྨྲ་བ། །དེ་དག་གཉིས་སུ་མ་མཆིས་ཇི་ལྟར་ལགས། །ཡི་གེ་ཀུན་ལ་གཅིག་ཏུ་ཇི་ལྟར་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་ 423b རྩལ་གྱིས་འགྲོ་བ་ལ་ལེགས་སོ་ཞེས་བྱ་བ་གནང་སྟེ། རིགས་ཀྱི་བུ། ལེགས་སོ། །ལེགས་སོ། །ཁྱོད་ཀྱིས་ཇི་ཙམ་དུ་འཇིག་རྟེན་ཐམས་ཅད་ཀྱིས་ཡིད་ཆེས་པར་དཀའ་བའི་དྲི་བ་འདི་དྲིས་པ་ངོ་མཚར་ཆེའོ། །རིགས་ཀྱི་བུ། ཆོག་མོད་ཁྱོད་ཀྱིས་འདི་དྲིས་པས་ཅི་ཞིག་བྱ། འདི་ནི་བྱང་ཆུབ་སེམས་དཔའ་ལས་དང་པོ་པ་སྟོང་པ་ཉིད་ཀྱི་ལྟ་བ་ཅན། །མཚན་མ་མེད་པའི་ལྟ་བ་ཅན། སྨོན་པ་མེད་པའི་ལྟ་བ་ཅན། སྐྱེ་བ་མེད་པའི་ལྟ་བ་ཅན། དངོས་པོ་མེད་པའི་ལྟ་བ་ཅན། མཚན་ཉིད་མེད་པའི་ལྟ་བ་ཅན། སངས་རྒྱས་ཀྱི་ལྟ་བ་ཅན། བྱང་ཆུབ་ཀྱི་ལྟ་བ་ཅན་དག་གི་གནས་མ་ཡིན་ནོ། །རིགས་ཀྱི་བུ། ཆོས་བསྟན་པ་འདི་ནི་བྱང་ཆུབ་སེམས་དཔའ་ལས་དང་པོ་པའི་མདུན་དུ་མི་བརྗོད་དོ། །དེ་ཅིའི་ཕྱིར་ཞེ་ན། དེ་ནི་དེའི་དགེ་བའི་རྩ་བ་རྣམས་ཐམས་ཅད་ཀྱི་ཐམས་ཅད་དུ་རྒྱུན་ཆད་དུ་འོང་ངོ ། །སངས་རྒྱས་ཀྱི་བྱང་ཆུབ་ལས་ཀྱང་ཉམས་པར་འགྱུར་སྲིད་དོ། །རྟག་པའམ། ཆད་པར་ཡང་ལྟུང་དུ་འོང་ངོ ། །དེ་བཞིན་གཤེགས་པས་ཀྱང་ཅི་ལས་དགོངས་ཏེ་ཆོས་བསྟན་མི་ཤེས་སྲིད་དོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་རྩལ་གྱིས་འགྲོ་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བཤད་པ་འདི་བྱུང་བའི་དུས་ན། བྱང་ཆུབ་སེམས་དཔའ་སྟོང་པ་ཉིད་ཀྱི་ལྟ་བ་ཅན། མཚན་མ་མཆིས་ 424a ༄#། །པའི་ལྟ་བ་ཅན། སྨོན་པ་མ་མཆིས་པའི་ལྟ་བ་ཅན། སྐྱེ་བ་མ་མཆིས་པའི་ལྟ་བ་ཅན། མཚན་ཉིད་མ་མཆིས་པའི་ལྟ་བ་ཅན། སངས་རྒྱས་ཀྱི་ལྟ་བ་ཅན། བྱང་ཆུབ་ཀྱི་ལྟ་བ་ཅན་དག་འབྱུང་བར་འགྱུར་པ་དང ། གང་ཡང་སྟོང་པ་ཉིད་དང ། མཚན་མ་མ་མཆིས་པ་རྟོག་པ་དང ། སྨྲ་བ་ལ་དགའ་བ་དང ། སྨྲ་བའི་ཚིག་ལ་ཆགས་པ་དང ། ཡི་གེ་དག་པར་འཛིན་པ་དང ། ཚིག་གི་ལས་ལ་གཞོལ་བ་དང ། ལེགས་པ་བརྗོད་པ་གཅེས་པར་འཛིན་པ་དང ། མིང་ཅེས་པར་འཛིན་པ་གང་འབྱུང་བར་འགྱུར་བ་དེ་དག་གིས་དེ་བཞིན་གཤེགས་པས་ཆོས་བསྟན་པ། ཡི་གེ་མ་མཆིས་ཤིང་ཚིག་དང་བྲལ་བ་འདི་ཐོས་ན། ལྟ་བ་དེ་དག་སྤོང་ཞིང ། ཇི་ལྟར་མོས་པའི་སེམས་ཅན་རྣམས་ལ་དེ་ལྟར་མོས་པའི་ཆོས་སྟོན་པར་འགྱུར་རོ། །དེ་དག་ཐམས་ཅད་མཁས་པ་ལ་བསླབས་པས། འདོད་པ་ཆུང་བའི་ཚིག་གི་རྒྱུད་ཀྱང་བརྗོད་ལ། དེས་དག་པར་ཡང་མི་སེམས། ཚིག་འཆལ་བའི་ཚིག་གི་རྒྱུད་བརྗོད་ལ། དེས་དག་པར་ཡང་མི་སེམས། སྡོམ་པའི་ཚིག་གི་རྒྱུད་ཀྱང་བརྗོད་ལ། དེས་དག་པར་ཡང་མི་སེམས། འདུ་འཛིའི་མི་བསྔགས་པའང་བརྗོད་ལ། ཆོས་ཐམས་ཅད་རབ་ཏུ་དབེན་པར་ཡང་མོས་པར་འགྱུར་རོ། །གཅིག་པུར་དགའ་བ་དང ། འདུ་འཛི་མ་མཆིས་པའི་བསྔགས་པའང་ 424b བརྗོད་ལ། དེས་དག་པར་ཡང་མི་སེམས། བྱང་ཆུབ་ཀྱི་སེམས་ཀྱི་བསྔགས་པའང་བརྗོད་ལ། སེམས་ཀྱི་རང་བཞིན་ཡང་བྱང་ཆུབ་ཏུ་འཚལ་བར་འགྱུར། ཤིན་ཏུ་རྒྱས་པའི་མདོ་རྣམས་ཀྱི་བསྔགས་པའང་བརྗོད་ལ། ཆོས་ཐམས་ཅད་ཤིན་ཏུ་རྒྱས་པར་ཡང་འཚལ་བར་འགྱུར། བྱང་ཆུབ་སེམས་དཔའི་ཚིག་གི་རྒྱུད་ཀྱང་བརྗོད་ལ། ཉན་ཐོས་དང ། རང་རྒྱལ་བ་དང ། སངས་རྒྱས་རྣམས་ཐ་དད་པར་ཡང་མི་ལྟ། སྦྱིན་པའི་བསྔགས་པའང་བརྗོད་ལ། སྦྱིན་པའི་མཉམ་པ་ཉིད་ཀྱང་དེ་དག་གིས་རྟོགས་པར་འགྱུར། ཚུལ་ཁྲིམས་ཀྱི་བསྔགས་པའང་བརྗོད་ལ་རང་བཞིན་གྱི་ཚུལ་ཁྲིམས་ཀྱང་དེ་དག་གིས་རྟོགས་པར་འགྱུར། བཟོད་པའི་བསྔགས་པའང་བརྗོད་ལ་ཆོས་ཐམས་ཅད་ཀྱི་ཟད་པའི་ཆོས་དང ། བྱང་བའི་ཆོས་དང ། མི་སྐྱེ་བའི་ཆོས་ཉིད་ཀྱང་དེ་དག་གིས་ཤིན་ཏུ་མཐོང་བར་འགྱུར། བརྩོན་འགྲུས་ཀྱི་བསྔགས་པའང་བརྗོད་ལ། ཆོས་ཐམས་ཅད་ལ་བཙལ་བ་མ་མཆིས་པ་དང ། རྩོམ་པ་མ་མཆིས་པའང་རབ་ཏུ་རྟོགས་པར་འགྱུར། བསམ་གཏན་དང ། སྙོམས་པར་འཇུག་པ་རྣམས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་གིས་མངོན་པར་བསྒྲུབ་པའང་སྟོན་ལ། ཆོས་ཐམས་ཅད་རང་བཞིན་གྱིས་མཉམ་པར་བཞག་པའང་འཚལ་བར་འགྱུར། ཤེས་རབ་ཀྱི་བསྔགས་པ་སྟོང་ཡང་བརྗོད་ལ། ཤེས་རབ་དང ། ཤེས་རབ་འཆལ་བའི་རང་བཞིན་ཡང་དེ་དག་གིས་ཤིན་ཏུ་རིག་པར་འགྱུར། འདོད་ཆགས་ 425a ༄#། །ཀྱི་སྐྱོན་ཡང་སྟོན་ལ། ཆོས་གང་ཡང་འདོད་ཆགས་པར་མི་མཐོང ། ཞེ་སྡང་གི་སྐྱོན་ཡང་སྟོན་ལ། ཆོས་གང་ཡང་ཞེ་སྡང་བར་མི་མཐོང ། གཏི་མུག་གི་སྐྱོན་ཡང་སྟོན་ལ། ཆོས་ཐམས་ཅད་གཏི་མུག་གི་སྒྲིབ་པ་དང་བྲལ་བར་ཡང་མོས་པར་འགྱུར། སེམས་ཅན་རྣམས་ལ་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང།་གཤིན་རྗེའི་འཇིག་རྟེན་དུ་མཆི་བའི་འཇིགས་པའང་སྟོན་ལ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་ཡང་མི་དམིགས་ཏེ། དེ་དག་སེམས་ཅན་ཇི་ལྟར་མོས་པ་དག་ལ། དེ་ལྟར་མོས་པའི་ཆོས་སྟོན་ཅིང ། གང་འདི་སྟོང་པ་ཉིད་ལ་མོས་པར་ཚུལ་གཅིག་པ་ལ་མོས་པར་འགྱུར། དེ་བཞིན་དུ་མཚན་མ་མ་མཆིས་པ་ལ་མོས་པ་དང ། སྨོན་པ་མ་མཆིས་པ་ལ་མོས་པ་དང ། སྐྱེ་བ་མ་མཆིས་པ་ལ་མོས་པ་དང ། དངོས་པོ་མ་མཆིས་པ་ལ་མོས་པ་དང ། མཚན་ཉིད་མ་མཆིས་པ་ལ་མོས་པར་ཚུལ་གཅིག་པར་མོས་པར་འགྱུར་ན། བཅོམ་ལྡན་འདས་།དེའི་སླད་དུ་ཐབས་མཁས་པའི་ཚིག་གང་ཉན་ཐོས་དང ། རང་སངས་རྒྱས་རྣམས་དང ། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་མ་ལགས་ཤིང ། གཞན་དུ་ན་ཟབ་མོ་ལ་མོས་པ་དང ། ཚུལ་གཅིག་པ་ལ་མོས་ 425b པའི་ཡུལ་དུ་འགྱུར་བའི་ཐབས་མཁས་པའི་ཚིག་དེ་དག་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་རྩལ་གྱིས་འགྲོ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་བས་ན་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། དོན་འདི་ངས་ཁྱོད་ལ་བཤད་དོ། ། བཅོམ་ལྡན་འདས། དེ་ལྟར་བགྱིའོ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་རྩལ་གྱིས་འགྲོ་བས། བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འདོད་ཆགས་ཞེ་སྡང་འཁྲུག་པ་མེད་ཚུལ་དུ། །གང་ཞིག་བྱང་ཆུབ་མཆོག་ཏུ་འཚང་རྒྱ་བར། །འདོད་པས་ཆོས་ཀུན་འདོད་ཆགས་རང་བཞིན་ཞེས། །དེ་ལྟར་ཤེས་ན་དེ་ནི་རྒྱལ་བར་འགྱུར། །འདོད་ཆགས་མི་དམིགས་དེ་བཞིན་ཞེ་སྡང་དང ། །གཏི་མུག་འདི་ལ་ནམ་ཡང་མི་དམིགས་ཏེ། །ཆོས་རྣམས་ཀུན་ཀྱང་ནམ་མཁའ་འདྲ་བ་ཞེས། །དེ་ལྟར་གང་ཤེས་དེ་ནི་རྒྱལ་པར་འགྱུར། །ལྟ་དང་ལྟ་མེད་གཉིས་ཀ་ཚུལ་གཅིག་སྟེ། །མཉམ་དང་མི་མཉམ་དེ་བཞིན་མཉམ་པ་ཡིན། །སངས་རྒྱས་མེད་ཅིང་ཆོས་དང་དགེ་འདུན་མེད། །དེ་ལྟར་སུས་ཤེས་དེ་ནི་མཁས་པ་ཡིན། །སྐྱེས་བུ་ལ་ཇི་ལྟར་རྨི་ལམ་ན། །བྱང་ཆུབ་སངས་རྒྱས་འགྲོ་བ་འདུལ་རྨིས་ན། །དེ་ལ་བྱང་ 426a ༄#། །ཆུབ་ཡོད་མིན་སེམས་ཅན་མེད། །དེ་འདྲའི་དངོས་ཉིད་ཆོས་འདི་ཐམས་ཅད་དོ། །བྱང་ཆུབ་ཕྱིར་བཞུགས་གང་ཡང་མ་བརྙེས་ཏེ། །གང་ཞིག་མ་བརྙེས་ནམ་ཡང་དེ་མི་བརྙེས། །རིག་དང་མ་རིག་གཉིས་ཀ་ཚུལ་གཅིག་སྟེ། །དེ་ལྟར་ཤེས་ན་དེ་ནི་རྒྱལ་བར་འགྱུར། །སེམས་ཅན་རང་བཞིན་བྱང་ཆུབ་ཉིད་དུ་གསུངས། །བྱང་ཆུབ་རང་བཞིན་སེམས་ཅན་ཐམས་ཅད་དེ། །སེམས་ཅན་རྣམས་དང་བྱང་ཆུབ་གཉིས་མ་ཡིན། །དེ་ལྟར་ཤེས་ན་སྐྱེས་བུའི་མཆོག་ཏུ་འགྱུར། །ཇི་ལྟར་སྐྱེས་བུ་སྒྱུ་མ་བསླབས་པ་ཡིས།། སྒྱུ་མ་རྣམ་མང་གཟུགས་དག་སྤྲུལ་བྱས་ན། །སྣང་བ་ཡིན་ཡང་དེ་ལ་གང་ཡང་མེད། །རྣམ་པར་རྨོངས་པའི་སེམས་ཅན་རྣམ་པར་འགྲང ། །འདོད་ཆགས་ཞེ་སྡང་རྟག་པར་མཉམ་པ་སྟེ། །གཏི་མུག་སྒྱུ་མ་གཉིས་ཀྱང་རྟག་པར་མཉམ། །བྱིས་པ་བདག་ཅག་ཞེ་སྡང་རྨོངས་ཤེས་སེམས། །གཏི་མུག་དེ་དག་ངན་འགྲོར་འདོང་བར་འགྱུར། །གང་ལ་འདོད་ཆགས་ཞེ་སྡང་གཉིས་མེད་ཅིང ། །གཏི་མུག་གང་ལ་ནམ་ཡང་མེད་པས་ན། །ཆོས་ཉིད་སྒྱུ་འདྲ་རྣམ་པར་བརྟགས་བྱས་ཤིང ། །བྱིས་པ་རྣམས་ནི་ཉོན་མོངས་མེས་ཀྱང་གདུངས། །གང་ལ་ཉོན་མོངས་སེམས་ཅན་མེད་པ་དང ། །སངས་རྒྱས་ནམ་ཡང་ཡོད་པ་མ་ཡིན་པ། །མ་སྐྱེས་ཆོས་ཤེས་རྣམ་པར་བརྟགས་བྱས་ཤིང ། །བདག་ཅག་སངས་རྒྱས་འགྱུར་ཞེས་བྱིས་ 426b པ་སྨྲ། །སངས་རྒྱས་ཡོད་མིན་སངས་རྒྱས་ཆོས་མེད་དེ། །ནམ་ཡང་སེམས་ཅན་མེད་པར་སུས་མཐོང་ཞིང ། །ནམ་མཁའ་འདྲ་བར་ཆོས་ཉིད་སུས་ཤེས་པ། །དེ་ནི་མྱུར་དུ་སྐྱེས་བུ་གཙོ་བོར་འགྱུར། །བྱང་ཆུབ་སུ་འདོད་དེ་ལ་བྱང་ཆུབ་མེད། །ས་དང་གནམ་ལྟར་བྱང་ཆུབ་མཆོག་ལས་རིང ། །སྒྱུ་འདྲར་ཆོས་ཉིད་གང་གིས་ཤེས་གྱུར་པ། །དེ་ནི་མྱུར་དུ་སངས་རྒྱས་ཐོབ་པར་འགྱུར། །སུ་ཞིག་ཚུལ་ཁྲིམས་རྣམ་རྟོག་དེ་ལ་ནི། །ཚུལ་ཁྲིམས་མེད་དེ་མཐོང་ན་ཚུལ་ཁྲིམས་མིན། །ཚུལ་ཁྲིམས་འཆལ་དང་ཚུལ་ཁྲིམས་མཚན་ཉིད་གཅིག་།དེ་ལྟར་ཤེས་ན་དེ་ནི་མགོན་པོར་འགྱུར། །ཇི་ལྟར་སྐྱེས་བུ་ལ་ལ་རྨི་ལམ་ན། །འདོད་ལ་སྤྱོད་པ་དགའ་བ་མྱོང་བའི་ཉམས། །གཏི་མུག་རྨོངས་པས་བུད་མེད་རྣམ་པར་བརྟགས། །དེ་ན་བུད་མེད་གང་ཡང་ཡོད་པ་མིན། །ཚུལ་ཁྲིམས་འཆལ་དང་ཚུལ་ཁྲིམས་བྱིས་པ་རྣམས། །རྨོངས་པས་ཡང་དག་མ་ཡིན་ཡོངས་སུ་བརྟགས། །དེ་ལ་ཚུལ་ཁྲིམས་འཆལ་མེད་ཚུལ་ཁྲིམས་མེད། །དེ་ལྟར་ཤེས་ན་དེ་ནི་མགོན་པོར་འགྱུར། །སྒྲ་ཡི་རང་བཞིན་ཡོངས་སུ་མི་ཤེས་པས། །བྱིས་པའི་བློ་ཅན་འདི་དག་མིང་ལ་ཆགས། །གང་གིས་མིང་དེ་མིང་མེད་ཤེས་གྱུར་ན། །དེ་ནི་བཟོད་པའི་སྟོབས་མཆོག་ཐོབ་པར་འགྱུར། །བྱང་ཆུབ་དམ་པ་བཅས་སེམས་ཅན་མང་བ་སྟེ། །དེ་དག་ཚིག་གིས་གཞན་ལ་དེ་སྐད་བརྗོད། །ཚིག་གིས་དག་འཛིན་ 427a ༄#། །ནན་ཏན་ཡོད་པ་མིན། །དེ་དག་བྱང་ཆུབ་ཀུན་ནས་ཁེབས་པར་གནས། །སྤྱོད་ལམ་དག་དང་འཁྲུལ་ལ་ཆགས་གྱུར་ཅིང ། །ཚིག་དང་སྨྲ་ལ་དགའ་ཞིང་མི་མཁས་ཏེ། །ཆོས་ཀྱི་རང་བཞིན་ཡོངས་སུ་མ་ཤེས་ན། །ཚིག་གི་དག་པས་བྱང་ཆུབ་འཚང་མི་རྒྱ། །སྟོང་ཉིད་ཆོས་དག་ཡོངས་སུ་རྗོད་བྱེད་ཅིང ། །རྩོད་ལ་དགའ་ཞིང་འཐབ་བས་སྡང་བའི་སེམས། །སྡོམ་མེད་ངན་སེམས་བྱེད་པ་དེ་དག་ལ། །སངས་རྒྱས་ཆོས་དང་བྱང་ཆུབ་ག་ལ་ཡོད། །ངན་སེམས་བཟོད་གཉིས་ཚུལ་གཅིག་རང་བཞིན་ཞེས། ། དེ་ལྟར་ཤེས་པར་བྱས་ཤིང་ཁྲོ་བ་སྤང ། །སེམས་ཅན་རང་བཞིན་ཡོངས་སུ་མི་ཤེས་པས། །བྱིས་པའི་བློ་ཅན་ཁྲོ་བ་སྐྱེད་པར་བྱེད། །སེམས་ཅན་ཐམས་ཅད་བདག་ལ་དབེན་པ་སྟེ། །རྒྱལ་བ་སེམས་ཅན་འགྲེལ་འགྱུར་སྨོན་ཅེས་ཟེར། །དེ་དག་གླེངས་པ་ཙམ་གྱིས་ཁྲོར་འགྱུར་ཞིང ། །ཞེ་སྡང་འཆང་བས་དེ་དག་ཚིག་མི་སྟེར། །འཐབ་ལ་དགའ་ཞིང་ཉེས་པ་འཚོལ་བྱེད་ལ། །བཟོད་པའི་བསྔགས་པའང་རྟག་པར་དེ་དག་བརྗོད། །ཆོས་རྣམས་ཐམས་ཅད་སྟོང་པ་ཉིད་ཅེས་སྨྲ། །ང་རྒྱལ་ཁེངས་པས་འཁྲུལ་པ་རྗེས་སུ་རྟོག་།ཟས་ལ་ཆགས་ཤིང་མ་རིག་མདུད་པས་བཅིངས། །ཉིན་མཚན་དག་ཏུ་འདོད་པའི་ཡོན་ཏན་སེམས། །དེ་དག་ལྷས་དང་གྲོང་ཁྱེར་གྲོང་སོང་ཞིང ། །སེམས་ཅན་མང་པོས་ 427b ཡོངས་སུ་དགྲོལ་ཞེས་ཟེར། །འགྲོ་བ་ཀུན་ལ་སྙིང་རྗེ་བདག་ལ་ཡོད། །འཇིག་རྟེན་ཀུན་ལ་ཕན་སེམས་དེ་བཞིན་ཏེ། །དེ་དག་ཞེ་སྡང་སེམས་ཀྱིས་དེ་ལྟ་བུའི། །ཆོས་ཉིད་འཚེ་བའི་ཚུལ་ཅན་རྗོད་པར་བྱེད། །འཚེ་བ་སྙིང་རྗེ་གཅིག་ཏུ་འདུས་པ་ནི། །ནམ་ཡང་ཡོད་པར་མ་མཐོང་མ་ཐོས་ཏེ། །ཕན་ཚུན་ཁྲོ་བར་བྱེད་དང་ལྡན་གྱུར་ཅིང ། །ཚད་མེད་ཚེ་ཡི་ཞིང་དུ་སྨོན་པར་བྱེད།། གངྒཱའི་ཀླུང་གི་བྱེ་མ་ཇི་སྙེད་པར། །བརྡེག་ཅིང་སྤྱོད་བ་འཐོབ་པའི་གནས་ཡོད་ཀྱི། །བཟོད་པ་དམ་པ་ཡོངས་སུ་མ་བསྒོམས་པར། །རྒྱལ་བ་དེ་དག་ཞིང་དུ་དེ་མི་འགྲོ་།ཞིང་རྣམས་ཞིང་མིན་གང་གིས་ཤེས་གྱུར་ཅིང ། །ཞིང་རྣམས་ཐམས་ཅད་ནམ་མཁའི་རང་བཞིན་ཞེས། །ཞིང་གི་ཡོན་ཏན་རློམ་སེམས་གང་མེད་པ། །སྐྱེས་བུ་ཁྱུ་མཆོག་ཞིང་དུ་དེ་འགྲོའོ། །ཐམས་ཅད་ཉེས་བྱས་བདག་གིས་བཟོད་པར་བྱ། །རྒྱལ་བའི་སྲས་ལ་སྟོན་པར་སེམས་ཞེས་སྨྲ། །སྟོན་པའི་འདུ་ཤེས་ཅན་ལ་ཁྲོ་ཡོད་པ། །ངས་ནི་ནམ་ཡང་མི་མཐོང་མཐོས་སོ། །བསླང་བའི་གྲོང་དང་མཛའ་བའི་གྲོང་ཆགས་ཤིང ། །གཅིག་ལ་གཅིག་ནི་སྤྱོད་པ་སུན་ཡང་འབྱིན། །འདི་ནི་བདག་གིས་སྨིན་བྱའི་སྐལ་ཡིན་གྱི། །སུ་ཡང་དེར་མ་འགྲོ་ཞེས་དེ་དག་ཟེར། །བདག་དང་འདྲ་བ་དེ་འདྲ་གང་ཡང་མེད། །དེ་ལ་སྤྱོད་པ་རྣམ་དག་མེད་ཅེས་ཟེར། །མི་མཁས་དེ་ནི་བྱང་ཆུབ་འཐོབ་མི་འགྱུར། །དེ་ལ་དོན་དུ་འགྱུར་བ་གང་ཡང་མེད། །ཉིན་པར་ལན་ 428a ༄#། །གསུམ་མཚན་ཡང་དེ་བཞིན་ཏེ། །བྱང་ཆུབ་སེམས་དཔའ་དག་ལ་སྤྱི་བོས་ཐུད། །དེ་དག་འཁྲུལ་པ་གང་ལའང་བརྟག་མི་བྱ། །རྟག་པར་སྤྱོད་པ་ཅི་བདེར་སྤྱོད་དུ་ཚུད། །འདོད་པའི་ཡོན་ཏན་དགའ་བར་སྤྱོད་མཐོང་ན། །དེ་ཡི་འཁྲུལ་པ་གང་ཡང་བརྟག་མི་བྱ། །བྱང་ཆུབ་སྤྱོད་པ་མཐའ་ཡས་ཡོན་ཏན་གྱིས། །དེ་ཡང་མ་འོངས་དུས་ན་བྱང་ཆུབ་འཐོབ། །ལན་གཅིག་ཁོ་ནར་རྒྱལ་བར་འགྱུར་བ་མིན། །རིགས་པའི་རིམ་དང་བྱ་བའི་རིམ་གྱིས་འཐོབ། །བསྐལ་པ་བྱེ་བ་ཁྲག་ཁྲིག་གྲངས་མང་དུ། ། གོ་ཆ་བགོས་པས་འཐོབ་ཀྱི་གཞན་དུ་མིན། །རྟོག་དང་རྣམ་རྟོག་འདོད་ཆགས་མེད་པ་སྟེ། །ངས་ཀྱང་བྱང་ཆུབ་འདོད་ཆགས་འདྲ་བ་ཐོབ། །ཉོན་མོངས་ཡོད་མིན་དེ་དག་ཡོད་མི་འགྱུར། །དེ་ལྟར་ཡིད་ཆེས་བཟོད་པ་དམ་པ་འཐོབ། །ཡི་གེ་མེད་པའི་ཆོས་ལ་ཞུགས་གྱུར་ཅིང ། །སྒྲ་རྣམས་ཐམས་ཅད་སྒྲ་མེད་བལྟ་བར་བྱ། །གང་ཞིག་དེ་འདྲའི་ཆོས་ལ་ཡིད་ཆེས་པ། །དེ་ལ་འདོད་ཆགས་ཞེ་སྡང་གཏི་མུག་མེད། །འདོད་ཆགས་བྱང་ཆུབ་ལྷག་ཆད་མེད་པར་མཉམ། །དེ་གཉིས་ཡི་གེ་མེད་པར་རྟོགས་པར་གྱིས། །དེ་ནི་གཉིས་ཀའི་མིང་ཙམ་བྱུང་བ་སྟེ། །ཡི་གེར་བརྗོད་པ་དེ་ལ་ཅི་ཡང་མེད། །སྒྲ་རྣམས་ཐམས་ཅད་སྒྲ་གཅིག་རབ་ཤེས་ན། །སྣ་ཚོགས་སུ་ནི་ནམ་ཡང་འགྱུར་བ་མེད། །ང་ཡིས་ 428b གང་བཤད་མུ་སྟེགས་དེ་དག་འཆད། །དེ་དག་འདི་འདྲའི་ཆོས་ཉིད་ཤེས་པ་ཡིན། །ཆོས་རྣམས་འདི་དག་སྐད་ཀྱི་སྒྲས་བརྗོད་དེ། །ཆོས་དང་སྒྲ་ནི་དེ་ལ་དམིགས་པ་མེད། ། ཆོས་ཉིད་ཚུལ་གཅིག་དེ་ལ་རབ་ཞུགས་ན། །བཟོད་པ་བླ་མེད་མཆོག་ནི་འཐོབ་པར་འགྱུར། །ཁྲོ་དང་བཟོད་དང་འདོད་པའི་ཡོན་ཏན་དང ། །མི་བཟོད་མི་རྟག་རྣམ་པར་མི་རྟག་སྟེ།། སྐྱེ་མེད་དེ་ལྟར་རབ་ཏུ་ཤེས་གྱུར་ན། །སྐྱོན་མེད་སེམས་ཅན་མཆོག་ཏུ་དེ་དག་འགྱུར། །ལྷོ་བྱང་ཤར་ནུབ་ཕྱོགས་རྣམས་ཐམས་ཅད་ཀྱི། །གངྒཱའི་ཀླུང་གི་བྱེ་མ་ཇི་སྙེད་པ། །སྐྱེས་བུ་ལ་ལས་དེ་བླངས་འབྲུ་རེ་ནས། །ཕྱོགས་གཅིག་ཞིང་རེར་རབ་ཏུ་དགོད་བྱས་ཏེ། །ཞིང་རྣམས་ཇི་སྙེད་བྱུང་བ་དེ་དག་ཀུན། །རྒྱལ་བ་རྣམས་ལ་རིན་ཆེན་བཀང་བྱས་ཏེ། །བསྐལ་པ་བྱེ་བ་མང་བོར་ཕུལ་བ་བས། །མདོ་སྡེ་འདི་ཡི་བསོད་ནམས་ཆེས་ཀྱང་མང ། །དེ་ལ་བསོད་ནམས་གྲངས་མེད་འཕེལ་བར་འགྱུར། །བྱང་ཆུབ་དོན་གཉེར་འདི་ལ་རབ་བྱུང་བ། །དེ་དག་ལ་ནི་མདོ་སྡེ་འདི་གཏད་དེ། །དེ་དག་བཟོད་པ་དམ་པ་མྱུར་དུ་འཐོབ། །མཐའ་ཡས་སྒོ་ཡི་མདོ་འདི་སུ་སྟོན་པ། །དེ་ལ་གཟུངས་རྣམས་མི་རིང་ཉེ་བར་གནས། །མདོ་སྡེ་བྱེ་བ་ཁྲག་ཁྲིག་ངེས་འཐོབ་སྟེ། །སྤོབས་དང་བློ་རྣོའི་ཡོན་ཏན་འཐོབ་པར་འགྱུར། །ཚིག་ལ་ཐོགས་པའང་ཕྱེ་བས་ཤེས་པར་འགྱུར། །སོ་སོ་ཡང་དག་རིག་ཀྱང་མྱུར་དུ་འཐོབ། །སངས་རྒྱས་མཐའ་ཡས་ 429a ༄#། །སྤོབས་པའི་སྦྱིན་པ་མཛད། །རྣམ་པ་མང་པོར་མདོ་སྡེ་མང་པོ་སྟོན། །ཚུལ་འདི་གང་གིས་ཤེས་གྱུར་དེ་དག་ནི། །རང་གིས་མདོ་སྡེ་མང་པོ་དྲན་པར་འགྱུར། །ཞིང་གི་དམ་པ་དག་ཏུའང་དེ་དག་འགྲོ་།སོང་ནས་མགོན་པོ་དག་ལ་མཆོད་པར་བྱེད། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེང་གེའི་རྩལ་གྱིས་འགྲོ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། ཚིགས་སུ་བཅད་པ་བསྟན་པ་འདི་ཐོས་པས་སེམས་ཅན་ཇི་སྙེད་ཅིག་གི་དོན་བགྱིས་པར་གྱུར། བཀའ་སྩལ་པ། རིགས་ཀྱི་བུ། ཁྱོད་ཀྱིས་འཁོར་གྱི་དཀྱིལ་འཁོར་འདི་མཐོང་ངམ། གསོལ་པ། བཅོམ་ལྡན་འདས། མཐོང་ངོ ། །བཅོམ་ལྡན་འདས། ཆོས་བསྟན་པ་འདིའི་ཚེ། སེམས་ཅན་གྲངས་མ་མཆིས་པ་འདུས་པར་གྱུར་ཏེ། བཅོམ་ལྡན་འདས། སྟེང་གི་བར་སྣང་ཡང་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང།་མིའམ་ཅི་དང ། ལྟོ་འཕྱེ་ཆེན་པོས་མ་གཏམས་པ་མ་མཆིས་སོ། །བཅོམ་ལྡན་འདས། འཇིག་རྟེན་གྱི་ཁམས་གཞན་ནས་ཀྱང་སེམས་ཅན་མང་པོས་ཆོས་འདི་བསྟན་པ་ཐོས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་རྩལ་གྱིས་འགྲོ་བ་ལ་འདི་སྐད་ཅེས་བཀའ་སྩལ་ཏོ། །རིགས་ 429b ཀྱི་བུ། ཆོས་བསྟན་པ་འདི་བསྟན་པའི་ཚེ་ལྷའི་བུ་སྟོང་ཕྲག་དགུ་བཅུ་རྩ་བརྒྱད་ཀྱིས་མི་སྐྱེ་བའི་ཆོས་ལ་བཟོད་བ་རབ་ཏུ་ཐོབ་བོ། །གནོད་སྦྱིན་སྟོང་ཕྲག་དགུ་བཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཀླུ་སྟོང་ཕྲག་སུམ་ཅུ་རྩ་དྲུག་བྱང་ཆུབ་ཏུ་སེམས་སྐྱེས་པར་གྱུར་ཏོ། །དགེ་སློང་མངོན་པའི་ང་རྒྱལ་ཅན་མ་ཐོབ་པ་ལ་ཐོབ་པར་འདུ་ཤེས་པ་ལྔ་བརྒྱས་མངོན་པའི་ང་རྒྱལ་མེད་པའི་ཆོས་བསྟན་པ་འདི་ཐོས་ནས། ཆོས་ཐམས་ཅད་ནི་ཚུལ་གཅིག་གོ་ཞེས་བྱ་བར་ཡིད་ཆེས་པར་གྱུར་ཏེ། ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའི་ཚོགས་འདིའི་ནང་ནས་ཀྱང་བྱང་ཆུབ་སེམས་དཔའ་སྟོང་ཕྲག་དྲུག་ཅུ་རྩ་གཉིས་ཀྱིས་ཆོས་ཐམས་ཅད་སྒྲིབ་པ་མེད་པར་ཁོང་དུ་ཆུད་ནས། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །དེ་ཅིའི་ཕྱིར་ཞེ་ན། རིགས་ཀྱི་བུ། ཆོས་བསྟན་པ་འདི་ནི་ཕུལ་དུ་བྱུང་བ་སྟེ། རིགས་ཀྱི་བུ། ངས་ཀྱང་སྔོན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་དྲུང་དུ། ཆོས་ཐམས་ཅད་ནི་ཚུལ་གཅིག་པའོ་ཞེས་བྱ་བར་ཁོང་དུ་ཆུད་པར་གྱུར་ནས། དེའི་འོག་ཏུ་ངས་མི་སྐྱེ་བའི་ཆོས་ལ་བཟོད་པ་ཐོབ་བོ། །རིགས་ཀྱི་བུ། ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཐོབ་པ་དང ། ཆོས་བསྟན་པ་འདི་ཐོས་པར་མཚུངས་ཏེ། རིགས་ཀྱི་བུ། 430a ༄#། །ཚུལ་འདི་རྟོགས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་པ་ངས་བཤད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ། གལ་ཏེ་བྱང་ཆུབ་སེམས་དཔས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སྦྱིན་པ་བྱིན། ཚུལ་ཁྲིམས་བསྲུངས། བཟོད་པ་བསྒྲུབས། བརྩོན་འགྲུས་བརྩམས། བསམ་གཏན་ལ་མཉམ་པར་གཞག་།ཤེས་རབ་ཡང་དག་པར་བླངས་ཏེ་གནས་ཀྱང་ཆོས་ཀྱི་ཚུལ་འདི་མ་ཤེས་ན་དགེ་བའི་རྩ་བ་དེ་དག་ཐམས་ཅད་ཕྱིར་ཟད་པར་འགྱུར་རོ། །རིགས་ཀྱི་བུ། ལྷས་བྱིན་དགེ་བའི་རྩ་བ་དེ་ལྟ་བུ་དང་ལྡན་པར་གྱུར་པ་ལ་ལྟོས། །རིགས་ཀྱི་བུ། ལྷས་བྱིན་ནི་མི་ཆེན་པོའི་མཚན་སུམ་ཅུ་དང་ལྡན་པར་གྱུར་ཏོ། ། དེ་ལྟ་བུའི་དགེ་བའི་རྩ་བ་དང་ལྡན་པ་དེའང་ཆོས་ཀྱི་ཚུལ་འདི་མ་ཤེས་པས། དགེ་བའི་རྩ་བ་དེ་དག་ཐམས་ཅད་ཡོངས་སུ་ཆད་ནས། མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་ཏེ། རིགས་ཀྱི་བུ། རྣམ་གྲངས་དེས་ཀྱང་ཇི་ལྟར་ཆོས་ཀྱི་ཚུལ་འདི་ཁོང་དུ་མ་ཆུད་པ་རྣམས་ཀྱི་དགེ་བའི་རྩ་བ་ཆད་པར་འགྱུར་བར་རིག་པར་བྱའོ། །རིགས་ཀྱི་བུ། སྔོན་འདས་པའི་དུས་བསྐལ་པ་གྲངས་མེད་པ་ཤིན་ཏུ་བགྲང་བ་ལས་འདས་པ། ཚད་མེད་པ། ཡངས་པ། གཞལ་དུ་མེད་པ་དེའི་ཕ་རོལ་དེའི་ཡང་ཕ་རོལ་གཅིག་གི་དུས་ན། དེ་བཞིན་ 430b གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས་རི་རབ་ལྟར་མངོན་པར་འཕགས་པའི་རྒྱལ་པོ་ཞེས་བྱ་བ། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དེའི་སྐུ་ཚེའི་ཚད་ནི་ལོ་བྱེ་བ་ཁྲག་ཁྲིག་བརྒྱ་སྟོང་དགུ་བཅུ་རྩ་དགུར་གྱུར་ཏོ། །འཇིག་རྟེན་གྱི་ཁམས་དེའི་མིང་ནི་གསེར་གྱི་མདོག་འོད་འཕྲོ་བ་ཞེས་བྱ་བར་གྱུར་ཏེ། སངས་རྒྱས་ཀྱི་ཞིང་དེ་ནི་གསེར་གྱི་རྒྱུ་ལས་གྲུབ་པར་གྱུར་ཏོ། །སེམས་ཅན་རྣམས་ཀྱང་གང་འདི་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། བྱང་ཆུབ་སེམས་དཔའི་ཐེག་པ་དང ། ཐེག་པ་གསུམ་པོ་འདི་ཉིད་ཀྱིས་མྱ་ངན་ལས་འདའ་བར་གྱུར་ཏེ། དེ་བཞིན་གཤེགས་པ་དེའི་ཉན་ཐོས་ཀྱི་ཚོགས་དང་པོ་ནི་དགེ་སློང་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་གི་ཚོགས་སུ་གྱུར་ཏོ། །ཚོགས་གཉིས་པ་ནི་དགེ་སློང་བྱེ་བ་ཁྲག་ཁྲིག་བརྒྱ་སྟོང་བདུན་ཅུའི་ཚོགས་སུ་གྱུར་ཏོ། །ཚོགས་གསུམ་པ་ནི་དགེ་སློང་བྱེ་བ་ཁྲག་ཁྲིག་དྲུག་ཅུའི་ཚོགས་སུ་གྱུར་ཏོ། །ཚོགས་བཞི་ 431a ༄#། །པ་ནི་དགེ་སློང་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་གི་ཚོགས་སུ་གྱུར་ཏོ། །དགེ་སློང་མའི་ཚོགས་ནི་དེའི་ཉིས་འགྱུར་དུ་གྱུར་ཏོ།། དགེ་བསྙེན་གྱི་ཚོགས་དང ། དགེ་བསྙེན་མའི་ཚོགས་ཀྱང་དེའི་ཉིས་འགྱུར་དུ་གྱུར་ཏོ། །བྱང་ཆུབ་སེམས་དཔའི་ཚོགས་ཀྱང་དེའི་ཉིས་འགྱུར་དུ་གྱུར་ཏེ། ཐམས་ཅད་ཀྱང་ཕྱིར་མི་ལྡོག་པ། མི་སྐྱེ་བའི་ཆོས་ཀྱི་བཟོད་པ་དང་ལྡན་པ། ཏིང་ངེ་འཛིན་གྱི་ཚུལ་མངོན་པར་བསྒྲུབ་པ་ལ་མཁས་པ། སྒོ་མཐའ་ཡས་པའི་གཟུངས་རབ་ཏུ་ཐོབ་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ་ཤ་སྟག་གི་ཚོགས་སུ་གྱུར་ན། བྱང་ཆུབ་སེམས་དཔའ་ཐེག་པ་ལ་གསར་དུ་ཞུགས་པ་རྣམས་ཀྱི་ཚོགས་ལྟ་སྨོས་ཀྱང་ཅི་དགོས་ཏེ། དེར་ནི་རང་སངས་རྒྱས་ཀྱི་ཐེག་པ་པའང་ཚད་མེད་པར་གྱུར་ཏོ། །རིགས་ཀྱི་བུ། དེ་ལྟར་དེའི་ཚེ་བཅོམ་ལྡན་འདས་དེའི་འཁོར་གྱི་ཚོགས་ནི་ཚད་མེད་པར་འདུས་པར་གྱུར་ཏོ། །འཇིག་རྟེན་གྱི་ཁམས་གསེར་གྱི་མདོག་འོད་འཕྲོ་བ་དེ་ན། ཤིང་ངམ། ལྡུམ་བུ་གང་ཅི་ཡོད་པ་ཐམས་ཅད་ཀྱང་རིན་པོ་ཆེའི་རྒྱུ་ལས་གྲུབ་པར་གྱུར་ཏེ། ཤིང་དེ་དག་ལས་ཀྱང་འདི་ལྟ་བུའི་སྒྲ་གང་འདི་ 431b སྟོང་པ་ཉིད་ཀྱི་སྒྲ་དང ། མཚན་མ་མེད་པའི་སྒྲ་དང ། སྨོན་པ་མེད་པའི་སྒྲ་དང ། སྐྱེ་བ་མེད་པའི་སྒྲ་དང ། འགག་པ་མེད་པའི་སྒྲ་དང ། དངོས་པོ་མེད་པའི་སྒྲ་དང ། མཚན་ཉིད་མེད་པའི་སྒྲ་དང ། དེ་ལྟ་བུའི་སྒྲ་དག་འབྱུང་བར་འགྱུར་ཏེ། སྒྲ་དེ་དག་བྱུང་བས་སེམས་ཅན་དེ་དག་གི་སེམས་རྣམ་པར་གྲོལ་བར་གྱུར་ཏོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས་ལོ་སྟོང་དུ་དམ་པའི་ཆོས་གནས་པར་གྱུར་ཏེ། དེ་ཕྱིན་ཆད་སྒྲ་དེ་དག་ཀྱང་ཤིང་དེ་དག་ལས་འབྱུང་བ་མེད་པར་གྱུར་ཏོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟར་མངོན་པར་འཕགས་པའི་རྒྱལ་པོ་དེའང་དགེ་སློང་ཆོས་སྨྲ་བའི་སྤྱོད་པ་རྣམ་པར་དག་པ་ཞེས་བྱ་བ། དམ་པའི་ཆོས་ཡོངས་སུ་འཛིན་པར་བསྐོས་ནས་ཡོངས་སུ་མྱ་ངན་ལས་འདས་པར་གྱུར་ཏོ། །དེའི་ཚེ་དགེ་སློང་སྤྱོད་པའི་བློ་གྲོས་ཞེས་བྱ་བ་ཞིག་ཀྱང་བྱུང་སྟེ། དེ་ནི་ཚུལ་ཁྲིམས་ཀྱི་ཕུང་པོ་ཤིན་ཏུ་དག་པ་དང་ལྡན་ཞིང ། འཇིག་རྟེན་པའི་མངོན་པར་ཤེས་པ་ལྔ་ཐོབ་པར་འགྱུར་ཏེ། འདུལ་བའི་སྡེ་སྣོད་ལའང་ཤིན་ཏུ་བྱང་བར་གྱུར་ཏོ། །དགེ་སློང་དེ་ནི་དཀའ་ཐུབ་ཀྱི་མཆོག་དང་ལྡན་པ་ངན་ངོན་ལ་མོས་པ།་འཁོར་གྱི་ནང་ན་སྤྱོད་པ་སྟེ། དེས་གཙུག་ལག་ཁང་གཅིག་བརྩིགས་ནས། དེ་ན་གནས་ཤིང་དེའི་འཁོར་དུ་གྱུར་པ་རྣམས་ཀྱང་ཚུལ་ཁྲིམས་ཀྱི་ཕུང་པོ་ཤིན་ཏུ་དག་པ་ལ་ 432a ༄#། །བཀོད་པར་གྱུར་ཏེ། སྦྱངས་པའི་ཡོན་ཏན་སྔོམ་པ་ལ་མོས་པར་གྱུར་ཏོ། །དགེ་སློང་དེ་ནི་བརྩོན་འགྲུས་བརྩམས་ཤིང་རྟག་པར་བྱང་ཆུབ་ཀྱི་སེམས་ལ་གནས་པར་གྱུར་ཏོ། །བྱང་ཆུབ་སེམས་དཔའ་གཞན་དག་ཀྱང་སྤྱོད་ལམ་དེ་ཉིད་ལ་ཡང་དག་པར་བསྐུལ་ཏེ། དམིགས་པ་ཅན་གྱི་ལྟ་བ་ལ་ཡང་དག་པར་བསྐུལ་ཏོ། །དེས་འདུ་བྱེད་ཐམས་ཅད་མི་རྟག་པ་ཞེས་བྱ་བར་འཛིན་དུ་བཙུད་དོ། །འདུ་བྱེད་ཐམས་ཅད་སྡུག་བསྔལ་ཞེས་བྱ་བར་འཛིན་དུ་བཙུད་དོ། །འདུ་བྱེད་ཐམས་ཅད་བདག་མེད་པ་ཞེས་བྱ་བར་འཛིན་དུ་བཙུད་དོ། །དགེ་སློང་དེ་ནི་ཏིང་ངེ་འཛིན་ལ་མཁས་པར་གྱུར་ཏེ། བྱང་ཆུབ་སེམས་དཔའི་སྤྱོད་པ་ལ་མཁས་པ་མ་ཡིན་ཞིང ། དགེ་བའི་རྩ་བ་དང་ལྡན་པར་གྱུར་ཏོ། །དགེ་སློང་ཆོས་སྨྲ་བ་སྤྱོད་པ་རྣམ་པར་དག་པ་དེ་ནི་སེམས་ཅན་རྣམས་ཀྱི་དབང་པོ་མཆོག་དང ། ཐ་མ་ཤེས་པ་ལ་མཁས་པར་གྱུར་ཏེ། དེའི་འཁོར་དུ་གྱུར་པ་ཇི་སྙེད་པ་དེ་དག་ཀྱང་སྦྱངས་པའི་ཡོན་ཏན་གྱི་སྡོམ་པ་ལྷུར་ལེན་པར་གྱུར་ཏེ། མི་དམིགས་པའི་བཟོད་པ་ཅན་ཐབས་ལ་མཁས་པ་དག་ཏུ་གྱུར་ཏོ། །རིགས་ཀྱི་བུ། དེ་ནས་ཆོས་སྨྲ་བ་སྤྱོད་པ་རྣམ་པར་དག་པ་འཁོར་དང་བཅས་ཏེ། དགེ་སློང་སྤྱོད་པའི་བློ་གྲོས་གང་ན་གནས་པའི་གཙུག་ལག་ཁང་དེར་ཕྱིན་ནས། དེ་ན་གནས་པར་གྱུར་ཏེ། དེ་གཙུག་ལག་ཁང་དེ་ 432b ནས་ཡང་དང་ཡང་སེམས་ཅན་ལ་སྙིང་བརྩེ་བའི་ཕྱིར་གྲོང་དུ་འགྲོ་ཞིང ། དེ་དག་ཏུ་ཟས་ཀྱི་བྱ་བ་བྱས་ནས་ཕྱིར་འོང་བར་གྱུར་ཏོ། །དེས་དེ་དག་ཏུ་རིགས་བརྒྱ་སྟོང་དུ་མ་དད་པར་བྱས་པར་གྱུར་ཏོ། །དེའི་འཁོར་ཇི་སྙེད་པ་དེ་དག་ཀྱང་ཚུལ་ལ་མཁས་པར་གྱུར་ཏོ། །དེ་ནས་ཀྱང་དེ་དག་ཏུ་དོང་ཞིང་སེམས་ཅན་རྣམས་ལ་ཆོས་སྟོན་ཏོ། །དེ་དག་གིས་ཀྱང་སྲོག་ཆགས་བརྒྱ་སྟོང་མང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཀོད་པར་གྱུར་ཏོ། །དགེ་སློང་སྤྱོད་པའི་བློ་གྲོས་ཀྱི་འཁོར་དེ་དག་ནི་བསམ་གཏན་ལྷུར་ལེན་ཅིང ། གྲོང་དག་ཏུའང་འཁོར་བར་མི་འདོང་ངོ ། །དེ་ནས་དགེ་སློང་སྤྱོད་པའི་བློ་གྲོས་ཀྱིས་བྱང་ཆུབ་སེམས་དཔའ་གཞན་དག་ལ་མ་དད་པའི་སེམས་བསྐྱེད་ནས་དེས་གཎྜི་དེ་བརྡུངས་ཏེ། དགེ་སློང་གི་དགེ་འདུན་བསྡུས་ནས་དམ་ཚིག་བྱས་པ། བདག་ཅག་གི་ནང་ནས་སུའང་རུང་སྟེ། སུས་ཀྱང་གྲོང་དུ་འགྲོ་བར་མི་བྱའོ། །ཁྱེད་ནི་ཤེས་བཞིན་མེད་པར་སྤྱོད་པ་ཡིན་ཏེ། ཉུང་དུ་སྨྲ་བ་མ་ཡིན་གྱི། ཁྱོད་གྲོང་དུ་དོང་བས་ཀྱང་ཅི་ཞིག་བྱ་སྟེ། དགོན་པ་ལ་གནས་པ་ནི་བཅོམ་ལྡན་འདས་ཀྱིས་གནང་ཞིང་བསྔགས་པ་ཡིན་གྱི། ཁྱོད་གྲོང་དུ་མ་འདོང་བར་བསམ་གཏན་གྱི་བདེ་བས་རྣམ་པར་སྤྱོད་ཅིག་ཅེས་བསྒོའོ། །དེ་དག་གིས་དེ་ཟེར་བ་ལྟར་མ་ཉན་ཏེ། ཡང་གྲོང་དག་ཏུ་འདོང་བར་གྱུར་ཏོ། །རིགས་ཀྱི་བུ། དེ་ནས་དགེ་སློང་དེ་དག་ནམ་གྲོང་ནས་ 433a ༄#། །ཕྱིར་འོངས་པར་གྱུར་པ་དེའི་ཚེ། དགེ་སློང་སྤྱོད་པའི་བློ་གྲོས་ཀྱིས་ཡང་གཎྜི་བརྡུངས་ནས། དགེ་སློང་གི་དགེ་འདུན་བསྡུས་ཏེ། འདི་སྐད་དུ་གལ་ཏེ་དེ་ཕན་ཆད་ཁྱེད་གྲོང་དུ་འདོང་དང ། ཁྱོད་གཙུག་ལག་ཁང་འདི་ན་མ་གནས་ཤིག་ཅེས་བསྒོའོ། །རིགས་ཀྱི་བུ། དེ་ནས་དགེ་སློང་ཆོས་སྨྲ་བ་སྤྱོད་པ་རྣམ་པར་དག་པས་དགེ་སློང་དེའི་སེམས་བསྲུང་བའི་ཕྱིར། རང་གི་ཕྱིར་འཁོར་རྣམས་པོས་ཏེ། འདི་སྐད་དུ། ཁྱེད་གྲོང་དུ་སུའང་མ་འདོང་ཞིག་ཅེས་སྨྲས་སོ། །དེ་ནས་དེའི་ཚེ་དགེ་སློང་དེ་དག་གིས་སེམས་ཅན་གང་ཇི་སྙེད་ཅིག་སྨིན་པར་བྱས་པ་དེ་དག་དགེ་སློང་དེ་དག་དང་མ་ཕྲད་པས་ཤིན་ཏུ་མི་དགའ་བར་ཡང་གྱུར། དགེ་བའི་རྩ་བའང་ཡོངས་སུ་འགྲིབ་པར་གྱུར་ཏོ། །རིགས་ཀྱི་བུ། དེ་ནས་དགེ་སློང་ཆོས་སྨྲ་པ། སྤྱོད་པ་རྣམ་པར་དག་པ་ཟླ་བ་གསུམ་པོ་དེ་དག་འདས་ནས་གཙུག་ལག་ཁང་དེ་ནས་གཙུག་ལག་ཁང་གཞན་དུ་འཕོས་ནས། གྲོང་དང ། གྲོང་ཁྱེར་དང ། ལྗོངས་དང ། ཡུལ་དང ། རྒྱལ་པོའི་ཕོ་བྲང་འཁོར་དག་ཏུ་འགྲོ་ཞིང ། སེམས་ཅན་དག་ལ་ཆོས་སྟོན་པར་གྱུར་ཏོ། །རིགས་ཀྱི་བུ། དེ་ནས་དགེ་སློང་སྤྱོད་པའི་བློ་གྲོས་ཀྱིས། ཆོས་སྨྲ་བ་སྤྱོད་པ་རྣམ་པར་དག་པ་ཡང་དང་ཡང་གྲོང་དུ་འགྲོ་བའང་མཐོང ། དེའི་འཁོར་ཀྱང་སྤྱོད་ལམ་ཐ་མལ་པ་ཅན་དུ་མཐོང་ནས། དེས་ཡང་དེ་ལམ་དད་པའི་སེམས་ 433b བསྐྱེད་པར་གྱུར་ཏེ། དགེ་སློང་འདི་ནི་ཚུལ་ཁྲིམས་འཆལ་བ་ཅན། ཚུལ་ཁྲིམས་ལོག་པ་ཅན་ཏེ། འདིས་བྱང་ཆུབ་ག་ལ་འཐོབ། དགེ་སློང་འདིའི་བྱང་ཆུབ་ནི་རྒྱང་རིང་ངོ ། །དགེ་སློང་འདི་ནི་འདུ་འཛིར་གནས་གནས་པའོ་ཞེས་འགྲོ་བ་མང་པོ་དག་ལ་དེ་སྐད་བརྗོད་དོ། །རིགས་ཀྱི་བུ། དེ་ནས་དུས་གཞན་ཞིག་ན། དགེ་སློང་སྤྱོད་པའི་བློ་གྲོས་དེ་འཆི་བའི་དུས་བྱས་པར་གྱུར་ནས། དེ་དེ་ལྟར་འཆི་བའི་དུས་བྱས་པ་དང ། ལས་དེའི་རྣམ་པར་སྨིན་པས་མནར་མེད་པའི་སེམས་ཅན་དམྱལ་བ་ཆེན་པོར་ལྷུང་ངོ ། །དེ་བསྐལ་པ་བྱེ་བ་སྟོང་ཕྲག་དགུ་བཅུ་རྩ་དགུར་སེམས་ཅན་དམྱལ་བ་ཆེན་པོར་སྡུག་བསྔལ་གྱི་ཚོར་བ་མྱོང་བར་གྱུར་ནས་ཚེ་རབས་དྲུག་ཅུར་མི་སྙན་པར་བརྗོད་པ་ཐོབ་པར་གྱུར་ཏོ། །ཚེ་རབས་སྟོང་ཕྲག་སུམ་ཅུ་རྩ་གཉིས་སུ་རབ་ཏུ་བྱུང་བ་ལས་ཕྱིར་བབས་པར་གྱུར་ཏོ། །ལས་ཀྱི་སྒྲིབ་པ་དེ་ཉིད་ཀྱི་ལྷག་མས་དེ་བཞིན་གཤེགས་པ་དགྲ་བཅོམ་པ་ཡང་དག་རྫོགས་པའི་སངས་རྒྱས་འོད་འཕྲོ་དྲི་མ་མེད་པའི་གསུང་རབ་ལ་རབ་ཏུ་བྱུང་བར་གྱུར་ཏོ། །དེ་རབ་ཏུ་བྱུང་ནས་ལོ་བྱེ་བ་བརྒྱ་སྟོང་ཕྲག་དྲུག་ཏུ་མགོའི་ཐོད་ལ་མེ་འབར་བ་ལྟར་རྣམ་པར་སྤྱོད་ཀྱང ། མཐུན་པའི་བཟོད་པ་ཙམ་ཡང་མཐོབ་སྟེ། ཚེ་རབས་བརྒྱ་སྟོང་མང་པོར་དབང་པོ་རྟུལ་པོར་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ན་དགེ་སློང་ཆོས་སྨྲ་བ་སྤྱོད་པ་རྣམ་པར་དག་པ་ཞེས་བྱ་བ་དེ་གཞན་ཞིག་ཡིན་པར་སེམས་ན། དེ་ལྟར་མི་བལྟ་སྟེ། 434a ༄#། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་མི་སྒུལ་བ་ནི་དེའི་ཚེ་དེའི་དུས་ན། དགེ་སློང་ཆོས་སྨྲ་བ་སྤྱོད་པ་རྣམ་པར་དག་པ་ཞེས་བྱ་བར་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ན་དགེ་སློང་ཆོས་སྨྲ་བ་སྤྱོད་པའི་བློ་གྲོས་ཞེས་བྱ་བ་དེ་གཞན་ཞིག་ཡིན་པ་སྙམ་དུ་སེམས་ན། དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་ནི་དགེ་སློང་ཆོས་སྨྲ་བ་སྤྱོད་པའི་བློ་གྲོས་ཞེས་བྱ་བར་གྱུར་ཏེ། ངའང་དེ་ལྟ་བུའི་ཐབས་ཕྲ་མོས་དེ་ལ་མ་དད་པའི་སེམས་བསྐྱེད་དེ། ལས་ཀྱི་སྒྲིབ་པ་མངོན་པར་འདུ་བྱས་པས་སེམས་ཅན་དམྱལ་བ་དག་ཏུ་ལྷུང་བར་ཏོ། །རིགས་ཀྱི་བུ། དེ་ལྟར་ཕྲ་བ་ནི་ལས་ཀྱི་སྒྲིབ་པ་ཡིན་གྱི། རིགས་ཀྱི་བུ། སུ་ལས་ཀྱི་སྒྲིབ་པ་དེ་ལྟ་བུ་མི་འདོད་པ་དེ་དག་གིས་གཞན་གྱི་སྤྱོད་པ་ལ་ཁོང་ཁྲོ་བར་མི་བྱའོ། །དེའི་སྤྱོད་པ་ཐམས་ཅད་ལ་ཡིད་ཆེས་པར་བྱའོ། །འདི་སྙམ་དུ་ཕ་རོལ་གྱི་སེམས་ནི་བདག་གིས་མི་ཤེས་ཏེ། སེམས་ཅན་གྱི་སྤྱོད་པ་ནི་ཤེས་པར་དཀའོ། །སྙམ་དུ་སེམས་བསྐྱེད་པར་བྱའོ། །དོན་གྱི་དབང་དེ་གཟིགས་ནས་དེ་བཞིན་གཤེགས་པས། འདི་སྐད་དུ། ཆོས་སྟོན་ཏེ། གང་ཟག་གིས་གང་ཟག་གི་ཚོད་གཟུང་བར་མི་བྱའོ། །གང་ཟག་གིས་གང་ཟག་ལ་ཚོད་བཟུང་ན་རྨ་འབྱུང་བར་འགྱུར་ཏེ། ངའམ། གཞན་ཡང ། ང་དང་འདྲ་བ་དག་གིས་གང་ཟག་ལ་ཚོད་གཟུང་ངོ ། །རིགས་ཀྱི་བུ། སུ་བདག་བསྲང་བར་ 434b འདོད་པ་དེས་གཞན་སུའི་སྤྱོད་པ་ལའང་བརྟག་པར་མི་བྱ་སྟེ། དེ་དག་ལ་འདི་ནི་འདི་འདྲའོ། །འདི་ནི་འདི་འདྲའོ་ཞེས་དབྱ་བར་མི་བྱའོ། །ཉིན་མཚན་དུ་སངས་རྒྱས་ཀྱི་ཆོས་ལ་བརྩོན་པར་བྱའོ། །རིགས་ཀྱི་བུ། ཆོས་ལ་བསྒོམས་པའི་ཡིད་ཀྱིས་བསམ་པ་ཐག་པ་ནས་ཡང་དག་པར་ཞུགས་པའི་བྱང་ཆུབ་སེམས་དཔའ་ནི་གཞན་ལ་དབྱ་བར་བརྩོན་པར་མི་གནས་སོ། ། རིགས་ཀྱི་བུ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཅིག་ཡོད་པ་དེ་དག་ཐམས་ཅད་བྱང་ཆུབ་སེམས་དཔའ་ལ་ཞིག་གིས་དགེ་བ་བཅུའི་ལས་ཀྱི་ལམ་ལ་བཀོད་པ་བས། བྱང་ཆུབ་སེམས་དཔའ་གང་གཅིག་པུ་དབེན་པར་འདུག་སྟེ། ཆུང་དུ་ན་སེ་གོལ་གཏོགས་པ་ཙམ་དུའང་ཆོས་ཐམས་ཅད་ཚུལ་གཅིག་པར་ཡིད་ཆེས་ཤིང་ཐ་ན་ཆུང་དུ་དྲི་བའམ། དཔྱད་པའམ། ལུང་འབོག་པའམ། ཁ་ཏོན་བྱ་བའི་ཕྱིར་གནས་ན། འདི་ནི་དེ་བས་ཆེས་བསོད་ནམས་མང་དུ་འཕེལ་ལོ། །དེ་ཅིའི་ཕྱིར་ཞེ་ན། རིགས་ཀྱི་བུ། ཚུལ་འདི་ཁོང་དུ་ཆུད་པས་བྱང་ཆུབ་སེམས་དཔའ་རྣམས་ལས་ཀྱི་སྒྲིབ་པ་ཐམས་ཅད་རྣམ་པར་དག་པ་འཐོབ་བོ། །སེམས་ཅན་ཐམས་ཅད་ལ་ཆགས་པ་དང ། ཁོང་ཁྲོ་བ་དང་བྲལ་བར་འགྱུར་རོ། །རྣམ་པ་ཐམས་ཅད་མཁྱེན་པའང་མྱུར་དུ་འཐོབ་པར་འགྱུར་རོ། །དེ་ནས་བཅོམ་ལྡན་འདས་ལ། འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ 435a ༄#། །ལྡན་འདས། ལས་ཀྱི་སྒྲིབ་པ་རྣམ་པར་དག་པ་ཞེས་བྱ་བ། ཇི་ཙམ་གྱིས་ན་ལས་ཀྱི་སྒྲིབ་པ་རྣམ་པར་དག་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། བྱང་ཆུབ་སེམས་དཔའ་གང་ཆོས་ཐམས་ཅད་ལས་མེད་ཅིང ། རྣམ་པར་སྨིན་པ་མེད་པར་ཤེས་པ་དེས་ལས་ཀྱི་སྒྲིབ་པ་རྣམ་པར་དག་པ་འཐོབ་བོ། །འཇམ་དཔལ། གཞན་ཡང ། བྱང་ཆུབ་སེམས་དཔའ་གང་གིས་འདོད་ཆགས་ཀྱི་མཐའ་ཡང་དག་པའི་མཐར་མཐོང་བ་དང ། ཞེ་སྡང་གི་མཐའ་ཡང་དག་པའི་མཐར་མཐོང་བ་དང ། གཏི་མུག་གི་མཐའ་ཡང་དག་པའི་མཐར་མཐོང་བ་དེས་ལས་ཀྱི་སྒྲིབ་པ་རྣམ་པར་དག་པ་འཐོབ་བོ། །འཇམ་དཔལ། གཞན་ཡང ། བྱང་ཆུབ་སེམས་དཔའ་གང་གིས་སེམས་ཅན་ཐམས་ཅད་དང ། ཆོས་ཐམས་ཅད་མྱ་ངན་ལས་འདས་པའི་དབྱིངས་སུ་མཐོང་བ་དེས་ལས་ཀྱི་སྒྲིབ་པ་རྣམ་པར་དག་པ་འཐོབ་བོ། །འཇམ་དཔལ། དེ་ཅིའི་ཕྱིར་ཞེ་ན། ལྟ་བ་ཡོད་ན་ལས་མངོན་པར་འདུ་བྱེད་པར་འགྱུར་ཏེ། འཇམ་དཔལ། བྱིས་པ་ཐོས་པ་མེད་པ་སོ་སོའི་སྐྱེ་བོ་ནི་ཆོས་ཐམས་ཅད་ཤིན་ཏུ་ཡོངས་སུ་མྱ་ངན་ལས་འདས་པར་མི་ཤེས་པས། བདག་དང།་གཞན་དུ་དམིགས་སོ། །དམིགས་ནས་ལུས་དང ། ངག་དང ། ཡིད་ཀྱི་ལས་རྣམ་པ་གསུམ་མངོན་པར་འདུ་བྱེད་དེ། དེ་ཡང་དག་པ་མ་ཡིན་པར་སྒྲོ་འདོགས་པས་བདག་ 435b ནི་འདོད་ཆགས་སོ། །བདག་ནི་ཞེ་སྡང་ངོ ། །བདག་ནི་གཏི་མུག་གོ་ཞེས་རྣམ་པར་རྟོག་གོ་།གལ་ཏེ་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ན། དེ་འདི་སྙམ་དུ་བདག་ནི་ཚུལ་ཁྲིམས་དང་ལྡན་པའོ། །བདག་ནི་ཚངས་པར་སྤྱོད་པའོ། །བདག་གིས་ནི་འཁོར་བ་ལས་ཡང་དག་པར་འདའ་བར་བྱའོ། །བདག་གིས་ནི་མྱ་ངན་ལས་འདས་པ་ཐོབ་པར་བྱའོ། །བདག་གིས་ནི་སྡུག་བསྔལ་ལས་རྣམ་པར་གྲོལ་བ་ཐོབ་པར་བྱའོ་སྙམ་དུ་སེམས་ཤིང ། དེ་ཡང་དག་པ་མ་ཡིན་པར་སྒྲོ་འདོགས་པས་ཆོས་འདི་དག་ནི་དགེ་བའོ། །ཆོས་འདི་དག་ནི་མི་དགེ་བའོ། །ཆོས་འདི་དག་ནི་ཡོངས་སུ་ཤེས་པར་བྱའོ། །ཆོས་འདི་དག་ནི་སྤང་བར་བྱའོ། །ཆོས་འདི་དག་ནི་མངོན་པར་བྱ་བའོ། །ཆོས་འདི་དག་ནི་བསྒོམ་པར་བྱའོ། །སྡུག་བསྔལ་ནི་ཤེས་པར་བྱའོ། །ཀུན་འབྱུང་བ་ནི་སྤང་བར་བྱའོ། །འགོག་པ་ནི་མངོན་དུ་བྱའོ། །ལམ་ནི་བསྒོམ་པར་བྱའོ་ཞེས་རྣམ་པར་རྟོག་གོ་།དེ་འདུ་བྱེད་ཐམས་ཅད་ནི་མི་རྟག་པའོ། །འདུ་བྱེད་ཐམས་ཅད་ནི་སྡུག་བསྔལ་བའོ། །འདུ་བྱེད་ཐམས་ཅད་ཀུན་ནས་འབར་བའོ། །ཅི་ནས་ཀྱང་བདག་ནི་འདུ་བྱེད་རྣམས་ལས་འབྲོས་པར་བྱའོ་སྙམ་དུ་རྣམ་པར་རྟོག་སྟེ། དེ་དེ་ལྟར་རྟོག་པའི་ཚེ་སྐྱོ་བ་དང་ལྡན་པའི་འདུ་ཤེས་ཡིད་ལ་བྱེད་པ། མཚན་མ་སྔོན་དུ་བཏང་བ་དག་འབྱུང་སྟེ། དེ་འདི་སྙམ་དུ་གང་འདི་ཆོས་རྣམས་ཡོངས་སུ་ཤེས་པ་འདི་ནི་སྡུག་བསྔལ་ཡོངས་སུ་ཤེས་པའོ། །དེ་འདི་ 436a ༄#། །སྙམ་དུ་ཅི་ནས་ཀྱང་བདག་གིས་ཀུན་འབྱུང་བ་སྤང་བར་བྱའོ་ཞེས་དེ་ཆོས་ཐམས་ཅད་ལ་ངོ་མི་མཐོ་ཞིང་ཁྲེལ་བར་སེམས། འཇིགས་པ་དང ། རབ་ཏུ་འཇིགས་པ་དང ། ཡོངས་སུ་འཇིགས་པ་སྐྱེད་ཅིང ། དེ་འདི་སྙམ་དུ་གང་འདི་ཆོས་དེ་དག་ལས་ངོ་ཚ་བར་གྱུར་པ་དེ་ནི་ཀུན་འབྱུང་བ་སྤང་པའོ་སྙམ་དུ་སེམས་སོ། །དེ་འདི་སྙམ་དུ་ཅི་ནས་ཀྱང་བདག་གིས་འགོག་པ་མངོན་དུ་བྱའོ་སྙམ་ནས། དེ་ཆོས་དེ་དག་རྣམ་པར་བརྟགས་ནས་དེའི་འགོག་ཏུ་དེ་དག་འགོག་པར་འདུ་ཤེས་ཤིང ། དེ་འདི་སྙམ་དུ་གང་ཆོས་རྣམས་མངོན་དུ་བྱ་བ་དེ་ནི་འགོག་པ་ཡིན་ནོ་སྙམ་མོ། །དེ་འདི་སྙམ་དུ་ཅི་ནས་ཀྱང་བདག་གིས་ལམ་བསྒོམ་པར་བྱའོ་སྙམ་སྟེ། དེ་གཅིག་པུ་དབེན་པར་སོང་ནས་ཆོས་དེ་དག་ཡིད་ལ་བྱས་པས་ཞི་གནས་འཐོབ་སྟེ། དེའི་སྐྱོ་བ་དང་ལྡན་པའི་ཡིད་ལ་བྱ་བ་དེ་དང ། ཞི་གནས་ཐོབ་པ་ངེས་ཆོས་ཐམས་ཅད་ལས་སེམས་རབ་ཏུ་ཞུམ་པར་འགྱུར། སེམས་རབ་ཏུ་འགོང་བར་འགྱུར། སེམས་ཕྱིར་ལོག་པར་འགྱུར་ཞིང་ངོ་མི་མཐོ་སྟེ། ངོ་ཚ་ལ་རྣམ་པར་སྨོང་དེ་མངོན་པར་དགའ་བ་མེད་པ་སྐྱེད་དོ། །དེ་འདི་སྙམ་དུ་བདག་ནི་སྡུག་བསྔལ་ཐམས་ཅད་ལས་གྲོལ་བ་སྟེ། བདག་གིས་དེ་ལས་གོང་དུ་བྱ་བ་གཞན་མེད་དོ། །བདག་ནི་དགྲ་བཅོམ་པ་ཡིན་ནོ་ཞེས་དམ་འཆའོ། །དེ་འཆི་བའི་དུས་ལ་བབ་པའི་ཚེ། བདག་སྐྱེ་བར་འགྱུར་བ་མཐོང་ནས། སངས་རྒྱས་ཀྱི་བྱང་ཆུབ་ 436b ལ་ནེམ་ནུར་དང་ཐེ་ཚོམ་དུ་གྱུར་ཏེ། དེ་ཐེ་ཚོམ་དུ་ལྟུང་བའི་སེམས་ཀྱིས་དུས་བྱས་ནས་སེམས་ཅན་དམྱལ་བ་ཆེན་པོ་དག་ཏུ་སྐྱེ་སྟེ། དེའང་མ་སྐྱེས་པའི་ཆོས་རྣམས་ལ་རྣམ་པར་བརྟགས་པའི་ཕྱིར་རོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། འཕགས་པའི་བདེན་པ་བཞི་པོ་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གང་ཅི་འདུ་བྱེད་ཐམས་ཅད་མ་སྐྱེས་པར་མཐོང་བ་དེས་སྡུག་བསྔལ་ཡོངས་སུ་ཤེས་སོ། །གང་གིས་ཆོས་ཐམས་ཅད་འབྱུང་བ་མེད་པར་མཐོང་བ་དེས་ཀུན་འབྱུང་བ་རབ་ཏུ་སྤངས་སོ། །གང་གིས་ཆོས་ཐམས་ཅད་ཤིན་ཏུ་མྱ་ངན་ལས་འདས་པར་མཐོང་བ་དེས་འགོག་པ་མངོན་དུ་བྱས་སོ། །གང་གིས་ཆོས་ཐམས་ཅད་དངོས་པོ་མེད་པར་མཐོང་བ་དེས་ལམ་བསྒོམས་སོ། །འཇམ་དཔལ། གང་གིས་འཕགས་པའི་བདེན་པ་བཞི་དེ་ལྟར་མཐོང་བ་དེ་ནི། ཆོས་འདི་དག་ནི་དགེ་བའོ། །ཆོས་འདི་དག་ནི་མི་དགེ་བའོ། །ཆོས་འདི་དག་ནི་ཡོངས་སུ་ཤེས་པར་བྱའོ། །ཆོས་འདི་དག་ནི་སྤང་བར་བྱ་བའོ། །ཆོས་འདི་དག་ནི་མངོན་དུ་བྱ་བའོ། །ཆོས་འདི་དག་ནི་བསྒོམ་པར་བྱ་བའོ། །སྡུག་བསྔལ་ནི་ཡོངས་སུ་ཤེས་པར་བྱའོ། །ཀུན་འབྱུང་བ་ནི་སྤང་བར་བྱའོ། །འགོག་པ་ནི་མངོན་དུ་བྱའོ། །ལམ་ནི་བསྒོམ་པར་བྱའོ་ཞེས་མི་ 437a ༄#། །རྟོག་རྣམ་པར་མི་རྟོག་གོ་།དེ་ཅིའི་ཕྱིར་ཞེ་ན། ཆོས་གང་དག་ལ་བྱིས་པ་སོ་སོའི་སྐྱེ་བོ་དག་འདོད་ཆགས་པ་དང ། ཞེ་སྡང་བ་དང ། གཏི་མུག་པར་འགྱུར་བའི་ཆོས་དེ་དག་དེས་མ་སྐྱེས་པ་དང ། མེད་པ་དང ། ནོར་བ་དང ། ཡོངས་སུ་བརྟགས་པ་དང ། ཡོངས་སུ་བསྐྱེད་པར་མཐོང་བའི་ཕྱིར་ཏེ། དེ་ཆོས་གང་ཡང་མི་ལེན་མི་འདོར་རོ། །དེའི་སེམས་ནི་ཁམས་གསུམ་པ་ལ་ཆགས་པ་མེད་དེ། ཁམས་གསུམ་པ་ཐམས་ཅད་མ་སྐྱེས་པ་དང ། སྒྱུ་མ་ལྟ་བུ་དང ། རྨི་ལམ་ལྟ་བུ་དང ། བྲག་ཅ་ལྟ་བུ་དང ། མིག་ཡོར་ལྟ་བུར་ཡང་དག་པར་མཐོང་ངོ ། །དེས་དགེ་བ་དང ། མི་དགེ་བའི་ཆོས་ཐམས་ཅད་སྨིག་རྒྱུ་ལྟ་བུར་མཐོང་སྟེ། དེས་འདོད་ཆགས་ཀྱི་ཁམས་མྱ་ངན་འདས་པའི་དབྱིངས་སུ་མཐོང་ངོ ། །དེ་བཞིན་དུ་ཞེ་སྡང་གི་ཁམས་དང ། གཏི་མུག་གི་ཁམས་མྱ་ངན་ལས་འདས་པའི་དབྱིངས་སུ་མཐོང་ངོ ། །དེས་ཆོས་རྣམས་དེ་ལྟ་བུའི་རང་བཞིན་དུ་མཐོང་བས། སེམས་ཅན་ཐམས་ཅད་ལ་ཆགས་པ་དང ། ཁོང་ཁྲོ་བ་མེད་པར་འགྱུར་རོ། །དེ་ཅིའི་ཕྱིར་ཞེ་ན། དེས་གང་ལ་ཆགས་པར་བྱ་བ་དང ། ཁོང་ཁྲོ་བར་བྱ་བ་དེ་ལྟ་བུའི་ཆོས་མི་དམིགས་སོ། །དེ་ནམ་མཁའ་དང་མཉམ་པའི་སེམས་ཀྱིས་སངས་རྒྱས་ཀྱང་ཡང་དག་པར་རྗེས་སུ་མི་མཐོང་ངོ ། །ཆོས་དང ། དགེ་འདུན་ཡང་དག་པར་རྗེས་སུ་མི་མཐོང་ངོ ། །དེ་ཆོས་ཐམས་ཅད་ཡང་ 437b དག་པར་རྗེས་སུ་མ་མཐོང་བས་ཆོས་གང་ལ་ཡང་ཐེ་ཚོམ་མི་སྐྱེད་དོ། །ཐེ་ཚོམ་མེད་པས་ཉེ་བར་ལེན་པ་མེད་དོ། །ཉེ་བར་ལེན་པ་མེད་པས་ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདས་ཏེ། འཇམ་དཔལ། དེ་ལྟ་བུའི་ཆོས་ཤེས་པས་གནས་བརྟན་རབ་འབྱོར་དེ་བཞིན་གཤེགས་པའི་ཞབས་ལ་ཕྱག་འཚལ་དུ་མི་འོང་ངོ ། །དེ་ཅིའི་ཕྱིར་ཞེ་ན། བདག་ཉིད་ཀྱང་མི་དམིགས་ན། དེ་བཞིན་གཤེགས་པ་དམིགས་པ་ལྟ་སྨོས་སུ་ག་ལ་ཡོད་དོ། །དེ་ནི་གནས་མེད་དོ། །དེ་ནས་བཅོམ་ལྡན་འདས་ལ། འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། དྲན་པ་ཉེ་བར་གཞག་པ་བཞི་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། མ་འོངས་པའི་དུས་ན་དགེ་སློང་དག་འབྱུང་སྟེ། དེ་དག་མི་སྡུག་པའི་རྣམ་པས་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྟོན་ཏོ། །སྐྱེ་བ་དང ། འགག་པའི་རྣམ་པས་ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་སྟོན་ཏོ། །སེམས་སྐྱེ་བ་དང ། འགག་པའི་ཆོས་ཅན་དུ་ལྟའོ་ཞེས་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྟོན་ཏོ། །གང་ལ་རིལ་པོའི་འདུ་ཤེས་མེད་པ་དེ་ལ་ཆོས་ཀྱི་འདུ་ཤེས་མེད་དོ་ཞེས་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྟོན་ཏོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འད་ 438a ༄#། །ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། འོ་ན། དྲན་པ་ཉེ་བར་གཞག་པ་བཞི་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོག་མོད། དེ་བཞིན་གཤེགས་པ་རྣམས་ཀྱི་ལྡེམ་པོ་དག་ནི་ཤེས་པར་དཀའོ། །འཇམ་དཔལ་གྱིས་གསོལ་པ། བཅོམ་ལྡན་འདས། འོན་ཀྱང་དྲན་པ་ཉེ་བར་གཞག་པ་བསྒོམ་པ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གང་གིས་ལུས་ནམ་མཁའ་དང་མཉམ་པར་མཐོང་ན། དེ་ནི་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ། གང་གིས་ཚོར་བ་ནང་དང ། ཕྱི་དང ། གཉིས་ཀ་མེད་པར་ཡང་མི་དམིགས་ན། དེ་ནི་ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ། གང་གིས་སེམས་མིང་ཙམ་དུ་ཤེས་ན། དེ་ནི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ། གང་གིས་དགེ་བ་དང་མི་དགེ་བའི་ཆོས་མ་དམིགས་ན། དེ་ནི་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་བཞག་པའོ། །འཇམ་དཔལ། དྲན་པ་ཉེ་བར་གཞག་པ་བཞི་ནི་དེ་ལྟར་བལྟའོ། །འཇམ་དཔལ་གྱིས་གསོལ་བ། བཅོམ་ལྡན་འདས། དབང་པོ་ 438b ལྔ་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གང་གིས་ཆོས་ཐམས་ཅད་རང་བཞིན་གྱིས་མ་བྱུང་བའི་ཕྱིར་མ་སྐྱེས་པར་མཐོང་ན། དེ་ནི་དད་པའི་དབང་པོའོ། །འཇམ་དཔལ། གང་གིས་ཉེ་བ་དང ། རིང་བའི་འདུ་ཤེས་དང་བྲལ་བའི་ཕྱིར། ཆོས་ཐམས་ཅད་ལ་སེམས་མི་གཏོང་ན། དེ་ནི་བརྩོན་འགྲུས་ཀྱི་དབང་པོའོ། །འཇམ་དཔལ།་གང་དམིགས་པ་དང་བྲལ་བའི་ཕྱིར་ཆོས་ཐམས་ཅད་ཡིད་ལ་མི་བྱེད་ཅིང་དྲན་པ་ལ་མི་འདོགས་ན། དེ་ནི་དྲན་པའི་དབང་པོའོ། །འཇམ་དཔལ། གང་ཆོས་ཐམས་ཅད་ལ་མི་སེམས་པ་འདི་ནི་ཏིང་ངེ་འཛིན་གྱི་དབང་པོའོ། །འཇམ་དཔལ། གང་གིས་ཆོས་ཐམས་ཅད་སྐྱེ་བ་དང ། འཇིག་པ་དང་བྲལ་ཞིང་ཤེས་པ་དང ། མི་ཤེས་པ་དང་བྲལ་བ་སྟེ་རང་བཞིན་གྱིས་སྟོང་པར་མཐོང་ན། དེ་ནི་ཤེས་རབ་ཀྱི་དབང་པོའོ། །འཇམ་དཔལ། དབང་པོ་ལྔ་དག་ནི་དེ་ལྟར་བལྟའོ། །འཇམ་དཔལ་གྱིས་གསོལ་པ། བཅོམ་ལྡན་འདས། བྱང་ཆུབ་ཀྱི་ཡན་ལག་བདུན་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གང་གིས་ཆོས་ཐམས་ཅད་རང་བཞིན་མེད་ཅིང་ཡིད་ལ་བྱང་མེད་པར་མཐོང་བ་འདི་ནི་དྲན་པ་ཡང་དག་བྱང་ཆུབ་ཀྱི་ཡན་ལག་གོ་།འཇམ་དཔལ། གང་གིས་དགེ་བ་དང ། མི་དགེ་བ་དང ། ལུང་དུ་མ་བསྟན་པར་རབ་ཏུ་ཕྱེ་སྟེ་བརྟགས་ན་ཡོངས་སུ་མ་གྲུབ་ 439a ༄#། །པས་ཆོས་ཐམས་ཅད་མི་དམིགས་པ་འདི་ནི་ཆོས་རབ་ཏུ་འབྱེད་པ་ཡང་དག་བྱང་ཆུབ་ཀྱི་ཡན་ལག་གོ་།འཇམ་དཔལ། གང་གིས་ཁམས་ཀྱི་འདུ་ཤེས་ཤིན་ཏུ་རིག་པའི་ཕྱིར་ཁམས་གསུམ་པ་མི་ལེན་མི་འདོར་བ་འདི་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གོ་།འཇམ་དཔལ། གང་གིས་དགའ་བ་དང ། མི་དགའ་བ་ཤིན་ཏུ་རྟོགས་པའི་ཕྱིར། འདུ་བྱེད་ཐམས་ཅད་ལ་དགའ་བ་མི་སྐྱེད་པ་འདི་ནི་དགའ་བ་ཡང་དག་བྱང་ཆུབ་ཀྱི་ཡན་ལག་གོ་།འཇམ་དཔལ། གང་གིས་དམིགས་པའི་དངོས་པོ་མི་དམིགས་ཏེ། ཆོས་ཐམས་ཅད་ལ་སེམས་བག་ཡོངས་སུ་གྱུར་བ་འདི་ནི་བག་ཡངས་ཡང་དག་བྱང་ཆུབ་ཀྱི་ཡན་ལག་གོ་།འཇམ་དཔལ། གང་གིས་ཆོས་ཐམས་ཅད་རྣམ་པར་བསྒོམ་པ་རྗེས་སུ་རྟོགས་པས་སེམས་མི་དམིགས་པ་འདི་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གོ་།གང་ཆོས་ཐམས་ཅད་ལ་མི་གནས་མི་རྟེན་ལ་ཆགས་པར་མི་འགྱུར། ཤེས་པར་མི་འགྱུར་ཞིང་ཆོས་ཐམས་ཅད་ཡང་དག་པར་རྗེས་སུ་མི་མཐོང་བས། བཏང་སྙོམས་སུ་གནས་པ་འདི་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ་།འཇམ་དཔལ། བྱང་ཆུབ་ཀྱི་ཡན་ལག་བདུན་ནི་དེ་ལྟར་བལྟའོ། །འཇམ་དཔལ་གྱིས་གསོལ་པ། བཅོམ་ལྡན་འདས། འཕགས་པའི་ལམ་ཡན་ལག་ 439b བརྒྱད་པ་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གང་གིས་ཆོས་ཐམས་ཅད་མི་མཉམ་པ་མེད་ཅིང་གཉིས་སུ་མེད་དེ་གཉིས་སུ་བྱང་མེད་པར་མཐོང་བ་འདི་ནི་ཡང་དག་པའི་ལྟ་བའོ། །འཇམ་དཔལ། གང་གིས་ཆོས་ཐམས་ཅད་མཐོང་བ་མེད་པའི་ཚུལ་གྱིས་བརྟག་ཏུ་མེད་ཅིང ། རྣམ་པར་བརྟག་ཏུ་མེད་ལ། ཡོངས་སུ་བརྟག་ཏུ་མེད་པར་མཐོང་བ་འདི་ནི་ཡང་དག་པའི་རྟོག་པའོ། །འཇམ་དཔལ། གང་གིས་བརྗོད་དུ་མེད་པ་མཉམ་པ་ཉིད་ཤིན་ཏུ་བསྒོམས་པའི་ཕྱིར། ཆོས་ཐམས་ཅད་བརྗོད་དུ་མེད་པར་མཐོང་བ་འདི་ནི་ཡང་དག་པའི་ངག་གོ་།འཇམ་དཔལ། གང་གིས་བྱེད་པ་མི་དམིགས་པའི་ཕྱིར་ཆོས་ཐམས་ཅད་བྱ་བ་མེད་ཅིང་བྱེད་པ་མེད་པར་མཐོང་བ་འདི་ནི་ཡང་དག་པའི་ལས་ཀྱི་མཐའོ། །འཇམ་དཔལ། གང་འཚོ་བ་མཉམ་པ་ཉིད་ལ་གནས་པའི་ཕྱིར་ཆོས་ཐམས་ཅད་མི་གསོག་མི་འབྲི་བ་འདི་ནི་ཡང་དག་པའི་འཚོ་བའོ། །འཇམ་དཔལ། གང་རྩོལ་བ་མེད་ཅིང་སྒྲུབ་པ་མེད་པའི་ཚུལ་གྱིས་ཆོས་ཐམས་ཅད་ཡོངས་སུ་སྒྲུབ་པ་མེད་པ་འདི་ནི་ཡང་དག་པའི་རྩོལ་བའོ། །འཇམ་དཔལ། གང་དྲན་པའི་ལས་ཀྱི་དབེན་པའི་ཕྱིར་ཆོས་ཐམས་ཅད་ཡིད་ལ་མི་བྱེད་ཅིང ། དྲན་པ་མེད་པ་འདི་ནི་ཡང་དག་པའི་དྲན་པའོ། །འཇམ་དཔལ། གང་ཆོས་ཐམས་ཅད་མི་དམིགས་པའི་ཕྱིར་རང་བཞིན་གྱིས་མཉམ་པར་ 440a ༄#། །གཞག་ཅིང ། འཁྲུག་པ་མེད་ལ་དམིགས་པ་མེད་པར་མཐོང་བ་འདི་ནི་ཡང་དག་པའི་ཏིང་ངེ་འཛིན་ཏོ། འཇམ་དཔལ། འཕགས་པའི་ལམ་ཡན་ལག་བརྒྱད་པ་ནི་དེ་ལྟར་བལྟ་སྟེ། འཇམ་དཔལ། གང་ལ་ལས་འཕགས་པའི་བདེན་པ་བཞི་དེ་ལྟར་ཤེས་ཤིང ། དྲན་པ་ཉེ་བར་གཞག་པ་བཞི་དང ། དབང་པོ་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་དེ་ལྟར་མཐོང་བ་དེ་ནི་ངན་པ་བརྒལ་བ། ཕ་རོལ་ཏུ་ཕྱིན་པ། ཐང་ལ་གནས་པ། བདེ་བར་གྱུར་པ། མི་འཇིགས་པ་རྙེད་པ། ཁུར་བོར་བ། རྡུལ་སྤྲུགས་པ། ཅི་དང་ཡང་བྲལ་བ། ཉོན་མོངས་པ་མེད་པ། དགྲ་བཅོམ་པ། དགེ་སྦྱོང ། བྲམ་ཟེ། ཁྲུས་བྱས་པ། མཐར་ཕྱིན་པ། གཙང་བ།་ཤཱཀྱའི་བུ། སངས་རྒྱས་ཀྱི་སྲས། ཚེར་མ་ཕྱུང་བ། འོབས་བོར་བ། འོབས་ལས་བརྒལ་བ། གསལ་ཤིང་ཕྱུང་བ། རིམས་དང་བྲལ་བ། དགེ་སློང ། འཕགས་པ་རྒྱལ་མཚན་རྫོགས་པ་ཞེས་བརྗོད་དོ། །འཇམ་དཔལ། དེ་ལྟ་བུའི་བཟོད་པ་དང་ལྡན་པའི་དགེ་སློང་ནི་འཇིག་རྟེན་ལྷ་དང་བཅས་པའི་སྦྱིན་པའི་གནས་ཡིན་ཏེ། དེ་ལ་འཐོབ་པ་དང ། བཀུར་སྟི་ཐམས་ཅད་ཀྱང་འོས་སོ། །འཇམ་དཔལ། དེ་ལྟ་བས་ན་དགེ་སློང་ཡུལ་གྱི་ཟས་དོན་ཡོད་པར་བཟའ་བར་འདོད་པ་དང ། བདུད་འདུལ་བར་འདོད་པ་དང ། འཁོར་བ་ 440b ལས་འདའ་བར་འདོད་པ་དང ། མྱ་ངན་ལས་འདས་པ་ཐོབ་པར་འདོད་པ་དང ། སྡུག་བསྔལ་ལས་བྲལ་བར་འདོད་པ་དང ། འཇིག་རྟེན་ལྷ་དང་བཅས་པའི་སྦྱིན་པའི་གནས་སུ་འགྱུར་བར་འདོད་པས་ཆོས་དེ་དག་ལ་དེ་ལྟར་བརྩོན་པར་བྱའོ། །ཆོས་ཀྱི་རྣམ་གྲངས་འདི་བསྟན་པའི་ཚེ། །ལྷའི་བུ། སྟོང་ཕྲག་སུམ་ཅུ་རྩ་གཉིས་ཀྱིས་ཆོས་མངོན་པར་རྟོགས་པ་ཐོབ་པར་གྱུར་ནས་དེ་དག་གིས་བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་ལ་མེ་ཏོག་མནྡཱ་ར་བ་མང་པོས་མངོན་པར་གཏོར་ནས། འདི་སྐད་ཅེས་སྨྲས་སོ། །བཅོམ་ལྡན་འདས། གང་གིས་ཆུང་དུ་ན་བསྟན་པ་འདི་རྣ་ལམ་དུ་གྲགས་པ་ཙམ་དུ་ཐོས་ཀྱང་དེ་དག་ནི་དེ་བཞིན་གཤེགས་པའི་བསྟན་པ་ལ་ལེགས་པར་རབ་ཏུ་བྱུང་བ་ལགས་ན། གང་གིས་ཐོས་ཏེ་མོས་ཤིང་ཡིད་ཆེས་པར་འགྱུར་པ་དང ། དེ་བཞིན་ཉིད་དུ་ནན་ཏན་དུ་བགྱིད་པ་དེ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས། གང་གིས་བསྟན་པ་འདི་ཐ་ན་རྣ་\?\་ལམ་དུ་གྲགས་པ་ཙམ་ཐོས་ཀྱང་དེ་དག་ནི་མངོན་པའི་ང་རྒྱལ་མ་མཆིས་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པས་གཟུངས་ཀྱི་ཚིག་གང་གིས་བྱང་ཆུབ་སེམས་དཔའ་རྣམས་ཐོགས་པ་མ་མཆིས་པའི་སྤོབས་པ་ཐོབ་པར་འགྱུར་ཞིང ། སྒྲ་གང་གིས་ཀྱང་འཇིགས་པར་མི་འགྱུར་ 441a ༄#། །བ་དང ། ཆོས་ཐམས་ཅད་སངས་རྒྱས་ཀྱི་ཆོས་དང ། སྦྱོར་བར་འགྱུར་བ་དང ། ཆོས་ཐམས་ཅད་ཚུལ་གཅིག་པར་རྟོགས་པར་འགྱུར་བ་དེ་ལྟ་བུའི་གཟུངས་ཀྱི་ཚིག་བཀའ་སྩལ་དུ་གསོལ། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། དེ་བས་ན་ཆོས་ཀྱི་སྒོ་གང་གིས་བྱང་ཆུབ་སེམས་དཔའ་ཆོས་ཐམས་ཅད་ལ་སྣང་བ་ཐོབ་པར་འགྱུར་ཞིང ། མྱུར་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་བའི་ཕུར་བའི་ཚིག་དང ། ས་བོན་གྱི་ཚིག་བསྟན་པ་ཞེས་བྱ་བའི་ཆོས་ཀྱི་སྒོ་འདི་ཉོན་ཅིག་།འཇམ་དཔལ། ཕུར་བའི་ཚིག་དང ། ས་བོན་གྱི་ཚིག་བསྟན་པ་ཞེས་བྱ་བའི་ཆོས་ཀྱི་སྒོ་དེའང་གང་ཞེ་ན། འཇམ་དཔལ། སེམས་ཅན་ཐམས་ཅད་སེམས་གཅིག་པའོ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་བ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་དམིགས་པ་མི་དམིགས་པའི་ཕྱིར་སེམས་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། སེམས་ཅན་ཐམས་ཅད་ནི་འགྱུར་བ་གཅིག་གོ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་ 441b འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ཆགས་པ་མེད་པར་གཞོལ་པ་སྟེ། ནམ་མཁའ་འགྱུར་བ་ཡིན་པས་དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། སེམས་ཅན་ཐམས་ཅད་ནི་སེམས་ཅན་གཅིག་པའོ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། སེམས་ཅན་ཐམས་ཅད་ནི་མ་སྐྱེས་ཤིན་ཏུ་མ་སྐྱེས་ཤིང་མིང་མེད་ལ། ལམ་གཅིག་པ་དམིགས་སུ་མེད་པས་གཅིག་ཏུ་བསྟན་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། འདོད་ཆགས་ཞེས་བྱ་བ་འདི་ནི་ཕུར་བའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཕུར་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདོད་ཆགས་ནི་མི་གནས་པའི་ཚུལ་གྱི་ཆོས་ཀྱི་དབྱིངས་ལ་གནས་པ་སྟེ། མི་གཡོ་མི་འགུལ་ཞིང་རང་བཞིན་གྱིས་དབེན་པ་སྟེ། གཡོ་བ་མེད་པས་དེའི་ཕྱིར་དེའི་ཕུར་བའི་ཚིག་གོ་།འཇམ་དཔལ། ཞེ་སྡང་ཞེས་བྱ་བ་འདི་ནི་རྡོ་རྗེའི་ཚིག་གོ་།གསོལ་བ། བཅོམ་ལྡན་འདས། ཅིའི་སླད་དུ་རྡོ་རྗེའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཞེ་སྡང་ནི་དབྱེར་མེད་པ་སྟེ། འདི་ལྟར་དཔེར་ན། འཇམ་དཔལ། རྡོ་རྗེ་ནི་མི་ཕྱེད་མི་ཤིགས་པའོ། །འཇམ་ 442a ༄#། །དཔལ། དེ་བཞིན་དུ་ཆོས་ཐམས་ཅད་ནི་དངོས་པོ་མ་གྲུབ་པའི་ཕྱིར། གཞིག་ཏུ་མེད་ཅིང་དབྱེར་མེད་པ་སྟེ། དེའི་ཕྱིར་འདི་ནི་རྡོ་རྗེའི་ཚིག་གོ་།འཇམ་དཔལ། གཏི་མུག་ཅེས་བྱ་བ་འདི་ནི་ཡེ་ཤེས་ཀྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་ཡེ་ཤེས་ཀྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ།་འཇམ་དཔལ། ཆོས་ཐམས་ཅད་ནི་ཡེ་ཤེས་ཀྱིས་གྲུབ་ཅིང་མི་ཤེས་པ་དང་བྲལ་བ་སྟེ། འདི་ལྟར། དཔེར་ན། འཇམ་དཔལ། ནམ་མཁའ་ནི་ཤེས་པ་དང་ལྡན་པའང་མ་ཡིན།་མི་ཤེས་པ་དང་ལྡན་པའང་མ་ཡིན་ནོ། །འཇམ་དཔལ། དེ་བཞིན་དུ་ཆོས་ཐམས་ཅད་ནི་ཤེས་པ་དང་ལྡན་པའང་མ་ཡིན། མི་ཤེས་པ་དང་ལྡན་པའང་མ་ཡིན། ཤེས་པར་བྱ་བའི་རང་བཞིན་ཤིན་ཏུ་ཞི་བའི་ཕྱིར་ཤེས་པའང་མ་ཡིན། མི་ཤེས་པའང་མ་ཡིན་པ་དེའི་ཕྱིར་ཡེ་ཤེས་ཀྱི་ཚིག་ཅེས་བྱའོ། །འཇམ་དཔལ། གཟུགས་ཞེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས་ཅིའི་སླད་དུ་ཕུར་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ལྟ་སྟེ། དཔེར་ན། དབང་པོའི་\?\་ནི་རབ་ཏུ་གནས་པའི་ཕྱིར་མི་གཡོ་མི་འགུལ་ལོ། །འཇམ་དཔལ། དེ་བཞིན་དུ་ཆོས་ཐམས་ཅད་མི་གནས་པའི་ཚུལ་གྱིས་ཆོས་ཀྱི་དབྱིངས་ལ་གནས་པ་ནི་འགྲོ་ 442b བ་དང ། འོང་བ་མེད་དེ། བླང་དུ་མེད་ཅིང་རྩོལ་བ་མེད་ལ་ཤིན་ཏུ་བརྟན་པའི་ཕྱིར་མི་གནས་པ་སྟེ། དེའི་ཕྱིར་དེ་ནི་ཕུར་པའི་ཚིག་གོ་།འཇམ་དཔལ། ཚོར་བ་ཞེས་བྱ་བ་འདི་ནི་ཞི་བའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཞི་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་རང་བཞིན་གྱིས་ཤིན་ཏུ་ཞི་བ་སྟེ། ཚོར་བ་ནི་ནང་ནའང་མེད། ཕྱིར་རོལ་ནའང་མེད། ཤར་ཕྱོགས་ནའང་མེད། ལྷོ་ཕྱོགས་ནའང་མེད། ནུབ་ཕྱོགས་ནའང་མེད། བྱང་ཕྱོགས་ནའང་མེད། སྟེང་ནའང་མེད། འོག་ནའང་མེད། ཕྱོགས་མཚམས་རྣམས་ནའང་མེད་དོ། །འཇམ་དཔལ། གལ་ཏེ་བདེ་བའི་ཚོར་བ་ནང་ན་ཡོད་ན་ནི། སེམས་ཅན་ཐམས་ཅད་ཀྱང་བདེ་བས་ཤིན་ཏུ་བདེ་བར་འགྱུར་རོ། །འཇམ་དཔལ། འོན་ཏམ། གལ་ཏེ་སྡུག་བསྔལ་གྱི་ཚོར་བ་ནང་ན་ཡོད་ན་ནི། སེམས་ཅན་ཐམས་ཅད་ཀྱང་སྡུག་བསྔལ་གྱིས་ཤིན་ཏུ་སྡུག་བསྔལ་བར་འགྱུར་རོ། །འཇམ་དཔལ། གལ་ཏེ་བདེ་བའང་མ་ཡིན། སྡུག་བསྔལ་བའང་མ་ཡིན་པའི་ཚོར་བ་ནང་ན་ཡོད་ན་ནི་སེམས་ཅན་ཐམས་ཅད་ཀྱང་ཤིན་ཏུ་རྨོངས་པར་འགྱུར་རོ། །འཇམ་དཔལ། གང་གི་ཕྱིར་ཚོར་བ་ཐམས་ཅད་ནི་ནང་ནའང་མེད། ཕྱི་རོལ་ནའང་མེད། ཤར་ཕྱོགས་ནའང་མེད། ལྷོ་ཕྱོགས་ནའང་མེད། ནུབ་ཕྱོགས་ནའང་ 443a ༄#། །མེད།་བྱང་ཕྱོགས་ནའང་མེད། སྟེང་ནའང་མེད། འོག་ནའང་མེད། ཕྱོགས་མཚམས་རྣམས་ནའང་མེད་པས་དེའི་ཕྱིར་སེམས་ཅན་ཐམས་ཅད་ནི་རྩཝ་ཤིང་དང ། རྩིག་པ་ལྟ་བུ་སྟེ། རང་བཞིན་གྱིས་མ་སྐྱེས་ཤིང་འགག་པ་མེད་པར་མཚན་ཉིད་མཉམ་པ་སྟེ། དེའི་ཕྱིར་དེ་ནི་ཞི་པའི་ཚིག་གོ་།འཇམ་དཔལ། འདུ་ཤེས་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདུ་ཤེས་དེ་ཡོངས་སུ་བརྟགས་པ་ལས་བྱུང་བ་སྟེ། ལོག་པ་ལས་བྱུང་བ། ཆད་པ་སྟོང་པ་ལྟ་བུ། སྨིག་རྒྱུའི་ངོ་བོ་ཉིད། རང་བཞིན་གྱིས་དབེན་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། འཇམ་དཔལ། འདུ་བྱེད་ཅེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་བགྲང་དུ་མེད་ཅིང ། བགྲང་བ་མཉམ་པ་ཉིད་དང་ལྡན་པ། ཆུ་ཤིང་གི་སྙིང་པོ་ལྟ་བུ་སྟེ། འཇམ་དཔལ། འདི་ལྟར། དཔེར་ན། ཆུ་ཤིང་གི་སྙིང་པོ་ནི་རང་བཞིན་གྱིས་མ་སྐྱེས་པའི་ཕྱིར་ཤིན་ཏུ་མེད་ཅིང་མི་དམིགས་སོ། །འཇམ་དཔལ། དེ་བཞིན་དུ་ཆོས་ཐམས་ཅད་ནི་རང་ 443b བཞིན་གྱིས་དབེན་ཞིང་མིང་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། རྣམ་པར་ཤེས་པ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། རྣམ་པར་ཤེས་པ་ནི་སྒྱུ་མ་ལྟ་བུ་སྟེ། མ་སྐྱེས་པ། མ་བྱུང་བ། སྟོང་པ་མཚན་མ་མེད་པ། ངོ་བོ་ཉིད་མེད་པ། མཚན་ཉིད་མེད་པ། ནམ་མཁའ་དང ། སོར་མོ་ལྔ་ལྟ་བུ་མིང་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། གཟུགས་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ། དཔེར་ན། མིག་ཡོར་ནི་སྣང་ལ་ཡོད་པ་མ་ཡིན་ནོ། །འཇམ་དཔལ། དེ་བཞིན་དུ་ཆོས་ཐམས་ཅད་ནི་སྣང་ལ་ཡོད་པ་མ་ཡིན་ཏེ། མིག་བསླུ་བ། སེམས་བསླུ་བ། གསོག་།གསོབ། རྫུན་པ། སྒྱུ་མའི་ཆོས་ཅན་ཏེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ་།སྒྲ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ཐ་དད་དུ་བྱར་མེད་ཅིང་གཉིས་སུ་མེད་པ་སྟེ། རིའི་སྒྲའི་ཚིག་གི་ལ་མ་བྲག་ཅ་དང་འདྲ་བ་སྟེ། དེའི་ཕྱིར་དེ་ 444a ༄#། །ནི་ས་བོན་གྱི་ཚིག་གོ་།འཇམ་དཔལ། དྲི་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་སྣ་དང ། དྲི་དང ། རྣམ་པར་ཤེས་པར་མི་དམིགས་པའི་ཕྱིར་མནམ་དུ་མེད་ཅིང་རང་བཞིན་གྱིས་བླུན་ལ། ནམ་མཁའ་དང་འདྲ་བ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ་རོ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ་།བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་རང་བཞིན་དང ། ངོ་བོ་ཉིད་ཀྱིས་དཔེན་པའི་ཕྱིར་བསམ་གྱིས་མི་ཁྱབ་ཅིང་རོའི་ཁམས་མི་དམིགས་པས། རོ་དམིགས་སུ་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། རེག་ཅེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ནམ་མཁའ་ལྟར་དབེན་པ་དང ། ལུས་ཤིན་ཏུ་བསྒོམས་པ་དང ། རེག་བྱ་འབྱུང་བ་མེད་པ་དང ། རེག་པ་དབེན་པའི་ཕྱིར་རེག་པ་མེད་པ་སྟེ། དེའི་ 444b ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། ས་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་སེམས་དང་བྲལ་བ། སེམས་མེད་པ། ངོ་བོ་ཉིད་མེད་པ། ཡོངས་སུ་མ་གྲུབ་པ། མིང་དང་བྲལ་བ། མཚན་ཉིད་ཀྱིས་དབེན་པ། ཆོས་ཀྱི་དབྱིངས་ཀྱི་རང་བཞིན་ཏེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། ཆུ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ཆུ་མེད་པ་སྟེ། མ་འདྲེས་ཤིང་རླན་མེད་པ། སྨིག་སྒྱུའི་ཆུ་ལྟ་བུ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། མེ་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ཚ་བ་མེད་པ་སྟེ། ཡོངས་སུ་གདུང་བ་དང་བྲལ་བ། རང་བཞིན་གྱིས་མེད་པ། ངོ་བོ་ཉིད་ཀྱིས་ཞི་བ། ཕྱིན་ཅི་ལོག་གིས་ཡོངས་སུ་བརྟགས་པ། ཤིན་ཏུ་མ་སྐྱེས་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། རླུང་ཞེས་བྱ་བ་འདི་ནི་ས་ 445a ༄#། །བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་གཡོ་བ་དང་ཡང་དག་པར་བྲལ་བའི་ཕྱིར་ཆགས་པ་མེད་ཅིང་སྒྲིབ་པ་མེད་པ་སྟེ། རླུང་གི་ལམ་ལས་ཡང་དག་པར་འདས་ཤིང་མཚན་ཉིད་མེད་ལ་ངོ་བོ་ཉིད་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། སངས་རྒྱས་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་འཚང་རྒྱ་བར་བྱེད་པ་མེད་པ་སྟེ། སངས་རྒྱས་པ་མེད། རྗེས་སུ་སངས་རྒྱས་པ་མེད། རྫོགས་པར་སངས་རྒྱས་པ་མེད། འཚང་རྒྱ་བར་ཉེ་བར་དང་བྲལ་བ། འཚང་རྒྱ་བར་བྱེད་པས་དབེན་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། ཆོས་ཞེས་བྱ་བ་འདི་ནི་ས་བོན་གྱི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་དབྱེར་མེད་ཅིང་བཅད་དུ་མེད་པ་སྟེ། གཅད་པ་དང་བྲལ་བ། ཆད་པས་དབེན་པ། མིང་མེད་པ། མཚན་མ་མེད་པ། མཚན་ཉིད་མེད་པ། ངོ་བོ་ཉིད་མེད་པ། 445b ཚིག་གིས་ལམ་ལས་ཡང་དག་པར་འདས་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ་།འཇམ་དཔལ། དགེ་འདུན་ཞེས་བྱ་བ་འདི་ནི་ཕུར་བའི་ཚིག་གོ་།གསོལ་པ། བཅོམ་ལྡན་འདས།་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འཕགས་པའི་དགེ་འདུན་ནི་ཆོས་ཉིད་ལ་ཤིན་ཏུ་གནས་པ། ཆོས་ཀྱི་དབྱིངས་དང ། ཡང་དག་པའི་མཐའ་དང ། ཚུལ་ཁྲིམས་དང ། ཚུལ་ཁྲིམས་འཆལ་པ་མཉམ་པ་ཉིད་དང ། ཏིང་ངེ་འཛིན་དང ། འཁྲུགས་པ་མཉམ་པ་ཉིད་དང ། ཤེས་རབ་དང ། ཤེས་རབ་འཆལ་པ་མཉམ་པ་ཉིད་དང ། རྣམ་པར་གྲོལ་བ་དང ། ཀུན་ནས་ཉོན་མོངས་པ་མཉམ་པ་ཉིད་ལ་ཤིན་ཏུ་གནས་ཤིང ། གནས་དང ། གནས་མ་ཡིན་པ་མི་དམིགས་པའི་ཕྱིར་ཆོས་ཐམས་ཅད་ལ་རབ་ཏུ་གནས་པས། དེའི་ཕྱིར་དེ་ནི་ཕུར་པའི་ཚིག་གོ་།འཇམ་དཔལ། ཆོས་ཐམས་ཅད་ཡུལ་མ་ཡིན་ནོ་ཞེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་ཕུར་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ནམ་མཁའི་ཡུལ། བསམ་གྱིས་མི་ཁྱབ་པའི་ཡུལ། ཡུལ་མེད་པ་\?\་ཡུལ་ཡང་དག་པར་ཆད་པ། དངོས་པོ་མེད་པ། ཆད་པ་དང་བྲལ་བའི་ཕྱིར་དབང་དང་བྲལ་བ་སྟེ། དེའི་ཕྱིར་དེ་ནི་ཕུར་པའི་ཚིག་གོ་།འཇམ་དཔལ། ཆོས་ཐམས་ 446a ༄#། །ཅད་དམིགས་པ་མེད་དོ་ཞེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཕུར་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་གནས་པ་མེད་ཅིང་རྟེན་པའང་མེད་པ་སྟེ། དེ་དག་ནི་དམིགས་པས་དབེན་པའི་ཕྱིར་མི་དམིགས། རྣམ་པར་མི་དམིགས། མི་སྦྱོར། རྣམ་པར་མི་སྦྱོར། ཡོངས་སུ་མི་སྦྱོར་བ་སྟེ། དེའི་ཕྱིར་དེ་ནི་ཕུར་པའི་ཚིག་གོ་།འཇམ་དཔལ། ཆོས་ཐམས་ཅད་ནི་ལེན་པ་མེད་དོ་ཞེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་ཆོས་ཀྱི་དབྱིངས་ལ་ཡང་དག་པར་ཞེན་པ་སྟེ། དེ་དག་ནི་མི་འདོར། མི་ལེན། མི་འཚོལ། མི་སྨོན་ཅིང་སྨོན་པ་ཡང་དག་པར་ཆད་པ། རང་བཞིན་གྱིས་རྣམ་པར་ཞི་བ། ནམ་མཁའ་དང་མཉམ་ཞིང་འདྲ་བ་སྟེ། དེའི་ཕྱིར་དེ་ནི་ཕུར་བའི་ཚིག་གོ་།འཇམ་དཔལ། ཆོས་ཐམས་ཅད་ནི་ཉོན་མོངས་པ་མེད་ཅེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་དྲི་མ་མེད་པ་སྟེ། ཅིའང་མ་ཡིན་པ། དག་པ། འོད་ 446b གསལ་པ་སྟེ། ནམ་མཁའ་ཡོངས་སུ་དག་པའི་ཕྱིར་ཤིན་ཏུ་དག་པ། ཉོན་མོངས་པ་མི་དམིགས་པའི་ཕྱིར་ཉོན་མོངས་པ་མེད་པ་སྟེ། དེའི་ཕྱིར་དེ་ནི་ཕུར་པའི་ཚིག་གོ་།འཇམ་དཔལ། ཆོས་ཐམས་ཅད་གཞི་མེད་པ་ཞེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཕུར་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་དངོས་པོ་མེད་ཅིང་དབང་བྲལ་བས་དེ་དག་ལ་ཀུན་གཞི་མེད་པ་སྟེ། དེའི་ཕྱིར་དེ་ནི་ཕུར་པའི་ཚིག་གོ་།འཇམ་དཔལ། ཆོས་ཐམས་ཅད་ནི་བསླབ་པ་མེད་ཅེས་བྱ་བ་འདི་ནི་ཕུར་པའི་ཚིག་གོ་།གསོལ་པ། བཅོམ་ལྡན་འདས། ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི་བསླབ་པ་དང་བྲལ་བ་སྟེ། དེ་དག་ནི་བསླབ་པར་བྱ་བ་མ་ཡིན། བསྒོམ་པར་བྱ་བ་མ་ཡིན། བསམ་པར་བྱ་བ་མ་ཡིན། ཡིད་ལ་བྱ་བ་མ་ཡིན། གནས་པར་བྱ་བ་མ་ཡིན། འགྲོ་བར་བྱ་བ་མ་ཡིན། ནན་ཏན་དུ་བྱ་བ་མ་ཡིན། ལོག་པའི་ནན་ཏན་དུ་བྱ་བ་མ་ཡིན། སྤང་བར་བྱ་བ་མ་ཡིན། མངོན་དུ་བྱ་བ་མ་ཡིན། བཤགས་པར་བྱ་བ་མ་ཡིན། རབ་ཏུ་བཤགས་པར་བྱ་བ་མ་ཡིན། དགོད་པར་བྱ་བ་མ་ཡིན། དགྲོལ་བར་བྱ་བ་མ་ཡིན། བརྗོད་པར་བྱ་བ་མ་ཡིན། སྨོས་པར་བྱ་བ་མ་ཡིན། གཟུང་བར་བྱ་བ་མ་ཡིན། གཏང་བར་བྱ་བ་མ་ཡིན། 447a ༄#། །རབ་ཏུ་གཏང་བར་བྱ་བ་མ་ཡིན། ཡོངས་སུ་བཏང་བར་བྱ་བ་མ་ཡིན་ཏེ། དེ་ཅིའི་ཕྱིར་ཞེ་ན། འཇམ་དཔལ། ཆོས་ཐམས་ཅད་ནི་ཤིན་ཏུ་བཏང་བ། རང་བཞིན་གྱིས་མ་བཟུང་བ། རྟག་པར་བཏང་བ་སྟེ། དེ་དག་ནི་ཤེས་པས་ཁོང་དུ་ཆུད་པར་བྱ་བ་མ་ཡིན། མི་ཤེས་པས་ཁོང་དུ་ཆུད་པར་བྱ་བའང་མ་ཡིན་ཏེ། དེའི་ཕྱིར་དེ་ནི་ཕུར་པའི་ཚིག་གོ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཕུར་པའི་ཚིག་ལས་བརྩམས་ཏེ། བདག་ཀྱང་སྤོབས་པ་སྐྱེའོ། ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཁྱོད་ཀྱིས་སྤོབས་པ་སྐྱེད་ཅིག་།འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་བྱང་ཆུབ་ཐོབ་པའོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། ཆོས་ཐམས་ཅད་ནི་ཐོབ་པ་མ་མཆིས་པ། ཡང་དག་པར་ཐོབ་པ་མ་མཆིས་པ། རྗེས་སུ་ཐོབ་པ་མ་མཆིས་པ། ཐོབ་པར་བགྱི་བ་དང་བྲལ་བ། རྟོགས་པར་བགྱི་བ་མ་མཆིས་པ། མངོན་པར་རྟོགས་པར་བགྱི་བ་མ་མཆིས་པ་སྟེ། བཅོམ་ལྡན་འདས། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཐོབ་ 447b པའོ་ཞེས་བགྱི་བ་འདི་ནི་ཕུར་བའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་རྣམས་ནི་ཐམས་ཅད་ཀྱི་ཐམས་ཅད་ཏུ་མ་མཆིས་པ་ཐམས་ཅད་མཁྱེན་པ་ཉིད་ཀྱང་དངོས་པོ་མ་མཆིས་པའི་རྗེས་སུ་འབྲང་བ་སྟེ། དེའི་སླད་དུ་ཐམས་ཅད་མཁྱེན་པ་ཉིད་ཐོབ་པའོ་ཞེས་བགྱི་སྟེ།་བཅོམ་ལྡན་འདས། ཐམས་ཅད་མཁྱེན་པ་ཉིད་ནི་སུ་ལའང་ཐོབ་པར་བགྱི་བའི་ཚུལ་གྱིས་ཉེ་བར་གནས་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཐམས་ཅད་མཁྱེན་པ་ཉིད་ནི་སེམས་ཅན་གྱི་རང་བཞིན་ཏེ། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་ནི་ཐམས་ཅད་མཁྱེན་པའི་ཡེ་ཤེས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ངོ་བོ་ཉིད་མ་མཆིས་ཤིང་ངོ་བོ་ཉིད་དང་བྲལ་བ་སྟེ། ངོ་བོ་ཉིད་གཅིག་པའི་མཚན་ཉིད་པས། དེ་བཞིན་གཤེགས་པ་དང་མཉམ་པ་ཉིད་ཀྱི་རྗེས་སུ་མཆིས་པ། ཐམས་ཅད་མཁྱེན་པའི་ཡེ་ཤེས་ཀྱི་རང་བཞིན་ཅན་ཏེ། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། 448a ༄#། །འཇམ་དཔལ། ཅིའི་ཕྱིར་དེ་ཕུར་བའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། བྱང་ཆུབ་ཀྱི་སྙིང་པོ་ཞེས་བགྱི་བའི་ཚིག་གི་དོན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། བྱང་ཆུབ་ཀྱི་སྙིང་པོ་ཞེས་བྱ་བ་ནི་ཆོས་ཐམས་ཅད་ཞི་བའི་སྙིང་པོའོ། །ཆོས་ཐམས་ཅད་སྐྱེ་བ་མེད་པའི་སྙིང་བོའོ། །ཆོས་ཐམས་ཅད་དངོས་པོ་མེད་པའི་སྙིང་པོའོ། །ཆོས་ཐམས་ཅད་གཟུང་དུ་མེད་པའི་སྙིང་པོའོ། །ཆོས་ཐམས་ཅད་ངོ་བོ་ཉིད་མེད་པའི་སྙིང་པོ་སྟེ། འཇམ་དཔལ། དེ་ནི་བྱང་ཆུབ་ཀྱི་སྙིང་པོའི་ཚིག་གི་དོན་ཏོ། །གསོལ་པ། བཅོམ་ལྡན་འདས། འོ་ན། སེམས་ཅན་ཐམས་ཅད་སྙིང་པོ་དེ་དང་རྟག་པར་ལྡན་པ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་དེ་བཞིན་ནོ། །གསོལ་པ། བཅོམ་ལྡན་འདས། དེ་ལྟར་རྣམ་གྲངས་དེས་ཀྱང་སེམས་ཅན་ཐམས་ཅད་ནི་བྱང་ཆུབ་ཀྱི་སྙིང་པོ་སྟེ། དེའི་སླད་དུ་དེ་ནི་ཕུར་བའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་བཟོད་པ་ཐོབ་བོ་ཞེས་བགྱི་བ་འདི་ནི་ཕུར་བའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་བའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ནི་མི་ཟད་པའི་ཆོས་དང ། མི་འགྲིབ་པའི་ཆོས་དང ། མི་སྐྱེ་བའི་ཆོས་ཅན་ཏེ། མིང་གི་མཚན་ 448b ཉིད་ཀྱིས་དབེན་པའི་བཟོད་པ་མཉམ་པ་ཉིད་ཀྱི་རྗེས་སུ་མཆིས་པ། དེའི་སླད་དུ་དེ་ནི་ཕུར་བའི་ཚིག་གོ། བཅོམ་ལྡན་འདས། སེམས་ཅན་ཐམས་ཅད་ཐོགས་པ་མེད་པའི་སྤོབས་པ་ཅན་ནོ་ཞེས་བགྱི་བ་འདི་ནི་ཕུར་བའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་བའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ཀྱིས་གང་ཅིའང་རུང་སྟེ། གང་དང ། གང་སྤོབས་པར་གྱུར་པ་དེ་དང ། དེ་ནི་ཕྱོགས་བཅུ་ཀུན་ལའང་མ་མཆིས་ཏེ། བཅོམ་ལྡན་འདས། སེམས་ཅན་ཐམས་ཅད་སྒྲིབ་པ་མ་མཆིས་པ་མཉམ་པ་ཉིད་ཀྱི་རྗེས་སུ་མཆིས་ཤིང་དབེན་ལ་རང་གི་མཚན་ཉིད་ལ་གནས་པས་དེ་ལྟར་དེ་དག་མ་མཆིས་པ་ལགས་ཏེ། བཅོམ་ལྡན་འདས། རྣམ་གྲངས་དེའི་སླད་དུ་དེ་ནི་ཕུར་བའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་གཟུངས་ཐོབ་བོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ནི་སེམས་ཅན་གྱི་འདུ་ཤེས་ཅན་ཏེ། ཡང་དག་པ་མ་ལགས་པར་ཡོངས་སུ་བརྟགས་པའི་ཕྱིན་ཅི་ལོག་གི་རྟོག་བས་མཚན་མར་འཛིན་པའི་སླད་དུ། གཟུགས་དང ། སྒྲ་དང ། དྲི་དང ། རོ་དང ། རེག་རྣམས་འཛིན་པས་དེའི་སླད་དུ་དེ་ནི་ཕུར་བའི་ཚིག་གོ་།བཅོམ་ལྡན་འདས། སེམས་ཅན་ཐམས་ 449a ༄#། །ཅད་བྱམས་པའི་སེམས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་བའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ནི་སེམས་ཅན་མ་མཆིས་པ་སྟེ། རང་བཞིན་གྱིས་གནོད་སེམས་མ་མཆིས་ཤིང་གནོད་སེམས་དང ། བྱམས་པ་རྟག་ཏུ་མ་མཆིས་པ་མཉམ་པ་ཉིད་ཐོབ་པས་དེའི་སླད་དུ་དེ་ནི་ཕུར་བའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་སྙིང་རྗེ་ཆེན་པོ་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་བའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ནི་མ་བཅོས་མ་བགྱིས་པའི་སྙིང་རྗེ་ཅན་ཏེ། དེ་བཞིན་གཤེགས་པའི་མཉམ་པ་ཉིད་ལས་མ་འདས་པ་སྙིང་རྗེ་ཆེན་པོའི་ངོ་བོ་ཉིད་དང་ལྡན་པས། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སེམས་ཅན་ཐམས་ཅད་ནི་ཏིང་ངེ་འཛིན་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་བའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ནི་དམིགས་པས་དབེན་པའི་སླད་དུ་རང་བཞིན་དང་ལྡན་པ་སྟེ། བཅོམ་ 449b ལྡན་འདས། དམིགས་པ་གང་གིས་སེམས་ཅན་གང་གི་རྣམ་པར་ཤེས་པ་འབྱུང་བ་དེ་ནི་དམིགས་པ་དེ་ལ་མ་འཁྲུགས་པ་སྟེ། དེའི་སླད་དུ་ཞེ་ན། བཅོམ་ལྡན་འདས། དམིགས་པའི་རྣམ་པར་ཤེས་པ་རྣམས་སྐད་ཅིག་མའི་སླད་དུ་སྟེ། དེའི་སླད་དུ་དེ་ནི་ཕུར་བའི་ཚིག་གོ་།བཅོམ་ལྡན་འདས། སངས་རྒྱས་ཐམས་ཅད་འདོད་ཆགས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སངས་རྒྱས་ཐམས་ཅད་ནི་འདོད་ཆགས་དང་ལྡན་པ་སྟེ། འདོད་ཆགས་ཀྱི་ངོ་བོ་ཉིད་དང་ལྡན་ཞིང་རྗེས་སུ་རྟོགས་པས་མཉམ་པ་ཉིད་ལས་མ་འདས་ཏེ། དགྱེས་ཤིང་རབ་ཏུ་དགྱེས་ལ་རྣམ་པར་དགྱེས་ཏེ་ཉོན་མོངས་པ་མི་མངའ་བས་ན། བཅོམ་ལྡན་འདས། འདོད་ཆགས་ཉིད་ནི་བྱང་ཆུབ་སྟེ། དེ་ཅིའི་སླད་དུ་ཞེ་ན། བཅོམ་ལྡན་འདས། འདོད་ཆགས་ཀྱི་ངོ་བོ་ཉིད་རྗེས་སུ་རྟོགས་པས་བྱང་ཆུབ་ཅེས་བགྱི་སྟེ། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་ཞེ་སྡང་དང་ལྡན་པའོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་ཞེ་སྡང་མཉམ་པ་ཉིད་ 450a ༄#། །ལ་བཞུགས་ཤིང ། འདུ་བྱེད་ཐམས་ཅད་ཀྱི་སྐྱོན་ཡང་དག་པར་སྟོན་པ་སྟེ། ཞེ་སྡང་གི་ངོ་བོ་ཉིད་རྗེས་སུ་རྟོགས་པས་ཞེ་སྡང་དང་ལྡན་པ་ཞེས་བགྱི་སྟེ། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་གཏི་མུག་དང་ལྡན་ནོ་ཞེས་བགྱི་བ་འདི་ནི་ཕུར་བའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་གཏི་མུག་གི་ངོ་བོ་ཉིད་རྗེས་སུ་རྟོགས་པས།་གཏི་མུག་མཉམ་པ་ཉིད་ལ་བཞུགས་ཤིང་མིང་ཐམས་ཅད་ལས་འགྲེལ་བ་སྟེ། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་འཇིག་ཚོགས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་འཇིག་ཚོགས་ལ་བཞུགས་པ་སྟེ། འཇིག་ཚོགས་མི་སྐྱེ་མི་འབྱུང་བར་ཐུགས་སུ་ཆུད་པས་ཆོས་ཐམས་ཅད་ཀྱིས་རྒྱས་པར་མི་འགྱུར། རྣམ་པར་རྒྱས་པར་མི་འགྱུར། ཡོངས་སུ་རྒྱས་པར་མི་འགྱུར་ཏེ། མི་བཞུགས་པའི་ཚུལ་གྱིས་བཞུགས་པས་དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་ 450b འདས། སངས་རྒྱས་བཅོམ་ལྡན་འདས་རྣམས་ལོག་པར་ལྟ་བ་དང་\?\ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ།་འཇམ་དཔལ་གྱིས་གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་འདུས་བྱས་ལོག་པར་ཡང་དག་པར་སྟོན་ཅིང ། འདུས་བྱས་ཡང་དག་པ་མ་ལགས་པར་ཡང་དག་པར་སྟོན། འདུས་བྱས་ནོར་པར་ཡང་དག་པར་སྟོན་པ་སྟེ། ལོག་པར་ལྟ་བའི་ངོ་བོ་ཉིད་མཚན་ཉིད་ཀྱིས་མཉམ་པ་ཉིད་ཐུགས་སུ་ཆུད་པས། འདུས་བྱས་ཐམས་ཅད་གསོབ་གསོག་སྟེ། རྫུན་པ་སླུ་བའི་ཆོས་ཅན་དུ་སྟོན་པ་མཛད་པས། དེའི་སླད་དུ་དེ་ནི་ཕུར་པའི་ཚིག་གོ་།བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ཀྱིས་ཕྱིན་ཅི་ལོག་ལ་གནས་ཏེ། བྱང་ཆུབ་བརྙེས་སོ་ཞེས་བགྱི་བ་དང ། སངས་རྒྱས་བཅོམ་ལྡན་འདས་རྣམས་ཀྱིས་སྒྲིབ་པ་ལ་གནས། འདོད་པའི་ཡོན་ཏན་ལྔ་ལ་གནས། འདོད་ཆགས་ལ་གནས། ཞེ་སྡང་ལ་གནས། གཏི་མུག་ལ་གནས་ཏེ་བྱང་ཆུབ་བརྙེས་སོ་ཞེས་བགྱི་བ་འདི་ནི་ཕུར་པའི་ཚིག་གོ་།བཀའ་སྩལ་པ། འཇམ་དཔལ། ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས། གནས་ཞེས་བགྱི་བ་འདི་ནི་ལོག་པར་གནས་པའི་ཚིག་གོ་།བཅོམ་ལྡན་འདས་ཀྱིས་བཀའ་སྩལ་པ། འཇམ་ 451a ༄#། །དཔལ། ལོག་པར་གནས་པ་ཞེས་བྱ་བའི་ཚིག་གི་དོན་ཅི། འཇམ་དཔལ་གྱིས་གསོལ་པ། བཅོམ་ལྡན་འདས། ལོག་པར་གནས་པ། སྨད་པར་གནས་པ།་གཡོ་བ། རབ་ཏུ་གཡོ་བ་ཞེས་བགྱི་བ་འདི་ནི། སོ་སོའི་སྐྱེ་བོ་རྣམས་ཀྱི་ཚིག་བླ་དྭགས་ཏེ། སངས་རྒྱས་བཅོམ་ལྡན་འདས་རྣམས་ནི་འདོད་ཆགས་མཉམ་པ་ཉིད་དང ། ཞེ་སྡང་མཉམ་པ་ཉིད་དང ། གཏི་མུག་མཉམ་པ་ཉིད་དང ། འདོད་པའི་ཡོན་ཏན་ལྔ་མཉམ་པ་ཉིད་དང ། སྒྲིབ་པ་མཉམ་པ་ཉིད་དང ། ཕྱིན་ཅི་ལོག་མཉམ་པ་ཉིད་ལ་ཡང་དག་པར་བཞུགས་ཤིང་ལེགས་པར་བཞུགས་པ་སྟེ། དེ་དག་ནི་འདོད་ཆགས་ཀྱི་ངོ་བོ་ཉིད་ཀྱི་གནས་ན་བཞུགས་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །ཞེ་སྡང་གི་ངོ་བོ་ཉིད་ཀྱི་གནས་ན་བཞུགས། གཏི་མུག་གི་ངོ་བོ་ཉིད་ཀྱི་གནས་ན་བཞུགས། འདོད་པའི་ཡོན་ཏན་ལྔའི་ངོ་བོ་ཉིད་ཀྱི་གནས་ན་བཞུགས། སྒྲིབ་པའི་ངོ་བོ་ཉིད་ཀྱི་གནས་ན་བཞུགས། ཕྱིན་ཅི་ལོག་གི་ངོ་བོ་ཉིད་ཀྱི་གནས་ན་བཞུགས་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ཁྱོད་ལ་གལ་ཏེ་ལ་ལ་ཞིག་གིས། 451b འདི་སྐད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མི་དགེ་བའི་ཆོས་ཐམས་ཅད་སྤངས་པ། དགེ་བའི་ཆོས་ཐམས་ཅད་དང་ལྡན་པའོ་ཞེས་ཟེར་ཞིང་དེ་སྐད་ཅེས་འདྲི་ན། ལན་ཅི་སྐད་གདབ། གསོལ་པ། བཅོམ་ལྡན་འདས། གལ་ཏེ་ལ་ལ་ཞིག་གིས་བདག་ལ། དེ་སྐད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མི་དགེ་བའི་ཆོས་ཐམས་ཅད་སྤངས་པ། དགེ་བའི་ཆོས་ཐམས་ཅད་དང་ལྡན་པའོ་ཞེས་མཆི་ན། བཅོམ་ལྡན་འདས། དེ་སྐད་ཅེས་འདྲི་བ་དེ་ལ་བདག་གིས།་འདི་སྐད་ཅེས་བགྱི་སྟེ། རེ་ཞིག་དགེ་བའི་བཤེས་གཉེན་དག་ལ་རི་མ་གྲོ་གྱིས་ཤིག་།རྣལ་འབྱོར་ལ་བརྩོན་པར་གྱིས་ཤིག་།ཆོས་གང་ལའང་སྦྱར་བ་དང ། དབྱེ་བ་མ་བྱེད་ཅིག ། གཟུང་བ་དང ། བཏང་བར་མ་བྱེད་ཅིག་།དམིགས་པ་དང ། རྣམ་པར་དམིགས་པར་མ་བྱེད་ཅིག་།བཏང་སྙོམས་དང ། སྤང་བར་མ་བྱེད་ཅིག་།ཚོལ་བ་དང ། སྨོན་པར་མ་བྱེད་ཅིག་།ཆོས་གང་ལ་ཡང་རབ་ཅེའམ། ཐ་མ་ཞེའམ། མཆོག་ཅེས་བྱ་བར་ཡང་དག་པར་རྗེས་སུ་མ་ལྟ་ཞིག་དང ། དེའི་འོག་ཏུ་དེ་བཞིན་གཤེགས་པའི་ཡུལ་ཤེས་པར་འགྱུར་རོ། །དེ་བཞིན་གཤེགས་པའི་ཡུལ་ནི་བསམ་གྱིས་མི་ཁྱབ་པ་སྟེ། ཡུལ་དང་བྲལ་ཞིང་ཡུལ་མེད་པ། ཡུལ་ཐམས་ཅད་དང་ཡང་དག་པར་བྲལ་བ། ཆོས་ཡང་དག་པར་ཆད་པའོ་ཞེས་བགྱིའོ། །བཀའ་སྩལ་པ། 452a ༄#། །འཇམ་དཔལ། ཁྱོད་ཀྱིས་དེ་སྐད་ཅེས་ལུང་བསྟན་ན་ཅི་ཞིག་ལུང་བསྟན་པར་འགྱུར། གསོལ་པ། བཅོམ་ལྡན་འདས། བདག་གིས་དེ་སྐད་ཅེས་ལུང་བསྟན་པས་ཆོས་གང་ཡང་ལུང་བསྟན་པར་གྱུར་པ་མ་མཆིས་སོ། །བཅོམ་ལྡན་འདས། དེ་བཞིན་གཤེགས་པ་བཅོམ་ལྡན་འདས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་ཚེ།་ཆོས་ལ་ལའི་སྐྱེ་བའམ་འགག་པ་གང་ཡང་གཟིགས་སམ། བཀའ་སྩལ་པ། འཇམ་དཔལ། དེ་ནི་མ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས། ཆོས་གང་མ་སྐྱེས་ཤིང་མ་བྱུང་ལ། དགེ་བའི་ཆོས་དང་ལྡན་པའང་མ་ལགས། མི་དགེ་བའི་ཆོས་དང་ལྡན་པའང་མ་ལགས་པ་དེ་ལ་ཡོངས་སུ་ཤས་པར་བགྱི་བ་ནི་གང་ཞིག་མཆིས། སྤང་བ་ནི་ཅི་ཞིག་མཆིས། བསྒོམ་པ་ནི་གང་ཞིག་མཆིས། མངོན་དུ་བགྱི་བ་ནི་གང་ཞིག་མཆིས། མངོན་པར་རྟོགས་པར་བགྱི་བའང་གང་ཞིག་མཆིས། དེ་ནས་སྟེང་གི་བར་སྣང་ལས་ལྷའི་བུ་སྟོང་ཕྲག་བཅུས་དེ་བཞིན་གཤེགས་པ་དང ། འཇམ་དཔལ་གཞོན་ནུར་གྱུར་པ་ལ་ལྷ་རྫས་ཀྱི་མེ་ཏོག་ཨུཏྤ་ལ་དང ། ཀུ་མུད་དང ། པུཎྜ་རི་ཀ་དང ། མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཤི་ཀ་དང ། མཉྫུ་ཤི་ཀ་ཆེན་པོ་མང་པོས་མངོན་པར་གཏོར། རབ་ཏུ་གཏོར་ནས་བཅོམ་ལྡན་ 452b འདས་དང ། འཇམ་དཔལ་གྱི་ཞབས་ལ་ཕྱག་འཚལ་ཞིང་འདི་སྐད་ཀྱི་ཚིག་བརྗོད་པར་གྱུར་ཏེ། བཅོམ་ལྡན་འདས། འདི་ནི་ཆགས་པ་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་མི་གཉིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་དངོས་པོ་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་ཉོན་མོངས་པ་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་དེ་བཞིན་ཉིད་ཀྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་མ་ནོར་བ་དེ་བཞིན་ཉིད་ཀྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་ཆོས་ཀྱི་དབྱིངས་ཀྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་ཡང་དག་པའི་མཐའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་དམ་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་མཆོག་གི་དཔལ་ཏེ། །དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་ཕུལ་གྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས། འདི་ནི་བླ་ན་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །དེ་སྐད་ཅེས་སྨྲས་པ་དང ། འཇམ་དཔལ་གཞོན་ནུར་གྱུར་པས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག། ཆོག་ 453a ༄#། །གི་།བདག་ལ་མ་རྟོག་།རྣམ་པར་མ་རྟོག་ཅིག་།ཁོ་བོས་ནི་ཆོས་གང་ཡང་དམ་པ་ཞེས་བྱ་བའམ། མཆོག་ཅེས་བྱ་བའམ། ཕུལ་ཞེས་བྱ་བ་དེ་ལྟ་བུ་ཡང་དག་པར་རྗེས་སུ་མ་མཐོང་ངོ ། །ལྷའི་བུ་དག་།ཁོ་བོ་ནི་འདོད་ཆགས་ཀྱི་དཔལ་ཏེ། དེའི་ཕྱིར་ཁོ་བོ་འཇམ་དཔལ་ལོ། །ཁོ་བོ་ནི་ཞེ་སྡང་གི་དཔལ་ཏེ། དེའི་ཕྱིར་ཁོ་བོ་འཇམ་དཔལ་ལོ། །ཁོ་བོ་ནི་གཏི་མུག་གི་དཔལ་ཏེ། དེའི་ཕྱིར་ཁོ་བོ་འཇམ་དཔལ་ལོ། །ལྷའི་བུ་དག་།ཁོ་བོ་ནི་འདོད་ཆགས་ལས་ཡོངས་སུ་འདས་པ་མ་ཡིན། ཞེ་སྡང་ལས་ཡོངས་སུ་འདས་པ་མ་ཡིན། གཏི་མུག་ལས་ཡོངས་སུ་འདས་པ་མ་ཡིན་ཏེ། ལྷའི་བུ་དག་།བྱིས་པ་སོ་སོའི་སྐྱེ་བོ་དག་ནི་འདའ་ཞིང་ཡོངས་སུ་འདའ་བ་དང ། རྣམ་པར་འདའ་བ་དག་བྱེད་ཀྱི། བྱང་ཆུབ་སེམས་དཔའ་རྣམས་ནི་ཆོས་གང་ལའང་འཕོ་བའམ། འགྲོ་བའམ། འདའ་བ་མེད་དོ། །ལྷའི་བུ་རྣམས་ཀྱིས་སྨྲས་པ། འཇམ་དཔལ། འོ་ན། བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་རྣམས་རྣམ་པར་མི་གནོན་ཏམ། ས་བཅུ་རྗེས་སུ་མི་གནོན་ཏམ། འཇམ་དཔལ་གྱིས་སྨྲས་པ། ལྷའི་བུ་དག་།དེ་ཇི་སྙམ་དུ་སེམས། སྒྱུ་མས་སྤྲུལ་པའི་སེམས་དང ། སེམས་ལས་བྱུང་བ་དག་སངས་རྒྱས་ཀྱི་ཆོས་རྣམ་པར་གནོན་ཅིང་ས་བཅུ་རྗེས་སུ་གནོན་པ་ཡོད་དམ། ལྷའི་བུ་རྣམས་ 453b ཀྱིས་སྨྲས་པ། འཇམ་དཔལ། སྒྱུ་མའི་སྐྱེས་བུ་ལ་གནས་ཀྱང་མེད་ན། སངས་རྒྱས་ཀྱི་ཆོས་རྣམ་པར་གནོན་པའམ། ས་རྗེས་སུ་གནོན་པ་ལྟ་ག་ལ་ཡོད། འཇམ་དཔལ་གྱིས་སྨྲས་པ། ལྷའི་བུ་དག་།དེ་བཞིན་དུ་ཆོས་ཐམས་ཅད་ནི་སྒྱུ་མ་ལྟ་བུ་སྟེ། དེ་དག་ནི་གནོན་པ་མེད། རྣམ་པར་གནོན་པ་མེད། ཡོངས་སུ་གནོན་པ་མེད་དེ་འདའ་བ་མེད་དོ། ། ལྷའི་བུ་དག་གིས་སྨྲས་པ། འོ་ན། འཇམ་དཔལ། ཁྱོད་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ་དག་།དེ་ཇི་སྙམ་དུ་སེམས། བྱིས་པ་སོ་སོའི་སྐྱེ་བོ་འདོད་ཆགས་ཀྱིས་ཀུན་ནས་གླགས་པ་ཞིག་བྱང་ཆུབ་ཀྱི་སྙིང་པོར་འདུག་ན་ཐམས་ཅད་མཁྱེན་པའི་ཡེ་ཤེས་དང་ལྡན་པར་འགྱུར་རམ། ལྷའི་བུ་དག་གིས་སྨྲས་པ། ཅི་འཇམ་དཔལ། འོ་ན། ཁྱོད་འདོད་ཆགས་ཀྱིས་ཀུན་ནས་གླགས་པའི་བྱིས་པ་སོ་སོའི་སྐྱེ་བོ་ཡིན་ནམ། འཇམ་དཔལ་གྱིས་སྨྲས་པ། ལྷའི་བུ་དག་།དེ་དེ་བཞིན་ཏེ། བདག་ནི་འདོད་ཆགས་ཀྱིས་ཀུན་ནས་གླགས་པའོ། །ཞེ་སྡང་གིས་ཀུན་ནས་གླགས་པའོ། །གཏི་མུག་གིས་ཀུན་ནས་གླགས་པའོ། །བདག་ནི་མུ་སྟེགས་ཅན་གཞན་ནོ། །ལོག་པ་ལ་ཞེན་པའོ། །ལྷའི་བུ་དག་གིས་སྨྲས་པ། འཇམ་དཔལ། ཅི་ལས་བསམས་ཏེ། དེ་སྐད་དུ། བདག་ནི་འདོད་ཆགས་ཀྱིས་ཀུན་ནས་གླགས་ 454a ༄#། །པའོ། །ཞེ་སྡང་གིས་ཀུན་ནས་གླགས་པའོ། །གཏི་མུག་གིས་ཀུན་ནས་གླགས་པའོ་ཞེས་སྨྲ། འཇམ་དཔལ་གྱིས་སྨྲས་པ། ལྷའི་བུ་དག་།དེ་ནི་ཇི་ལྟར་མི་གནས་པའི་ཚུལ་གྱིས་འདོད་ཆགས་དང ། ཞེ་སྡང་དང ། གཏི་མུག་གི་ངོ་བོ་ཉིད་ལ་གནས་པའི་ཕྱིར། ཇི་ལྟར་ཕྱོགས་བཅུ་ཀུན་ཏུ་གནས་མེད་པ་དེ་ལྟར་གནས་སོ། །ལྷའི་བུ་དག་གིས་སྨྲས་པ། འཇམ་དཔལ། ཁྱོད་ཇི་ལྟར་མུ་སྟེགས་ཅན་གཞན་ཞེས་བྱ་བ་ཡིན། སྨྲས་པ། ལྷའི་བུ་དག་།ཁོ་བོ་ནི་མུ་སྟེགས་ཅན་གཞན་དུ་མི་འགྲོ་སྟེ།་དེའི་ཕྱིར་མུ་སྟེགས་ཅན་གཞན་ཞེས་བྱའོ། །ལྷའི་བུ་དག་གིས་སྨྲས་པ། འཇམ་དཔལ། ཁྱོད་ཇི་ལྟར་ལོག་པ་ལ་ཞེན་ཅེས་བྱ། འཇམ་དཔལ་གྱིས་སྨྲས་པ། ལྷའི་བུ་དག་།ཁོ་བོས་ནི་ཆོས་ཐམས་ཅད་ལོག་པར་ཤེས་ཏེ། ཡང་དག་པ་མ་ཡིན་ཞིང་ནོར་བ་ཡོངས་སུ་བརྟགས་པར་ཁོང་དུ་ཆུད་པས། དེའི་ཕྱིར་ཁོ་བོ་ནི་ལོག་པ་ལ་ཞེན་པའོ། །དེ་ནས་དེའི་ཚེ་ལྷའི་བུ་སྟོང་ཕྲག་བཅུ་པོ་དེ་དག་གིས། འཇམ་དཔལ་གྱིས་བསྟན་པ་དེ་ཐོས་ནས། མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། ། འདི་སྐད་ཅེས་ཀྱང་སྨྲས་ཏེ། རྡོ་རྗེའི་ཚིག་དང ། ས་བོན་གྱི་ཚིག་དང ། ཕུར་པའི་ཚིག་རྣམ་པ་འདི་ལྟ་བུ་དག་གང་གི་རྣ་ལམ་དུ་གྲག་པར་གྱུར་པ་དེ་དག་ཀྱང་ཐོབ་ 454b པར་བྱ་བ་ལེགས་པར་ཐོབ་པ་ཡིན་ན། གང་གིས་ཐོས་ནས་མོས་པར་གྱུར་པ་དང ། ཡིད་ཆེས་པ་དང ། ལུང་འབོག་པ་དང ། ཁ་ཏོན་བྱེད་པ་དང ། འཛིན་པ་དང ། ཀློག་པ་དང ། སྟོན་པ་དང ། དེ་བཞིན་ཉིད་དུ་\?\་ནན་ཏན་བྱེད་པ་ལྟ་སྨོས་ཀྱང་ཅི་དགོས་ཏེ། དེ་དག་ནི་ཐོགས་པ་མེད་པའི་སྤོབས་པ་རྗེས་སུ་ཐོབ་པར་འགྱུར་རོ། །ཆོས་ཐམས་ཅད་ལ་སྣང་བ་ཐོབ་པར་འགྱུར་རོ། །ཚུལ་གཅིག་ཏུ་བསྟན་པ་ལ་མཁས་པར་འགྱུར་རོ། །ཆོས་ཐམས་ཅད་ཀྱང་སངས་རྒྱས་ཀྱི་ཆོས་དང་སྦྱོར་བར་འགྱུར་རོ།། །།བམ་པོ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ལ་ལྷའི་བུ་པདྨོ་རྣམ་པར་རོལ་པའི་མངོན་པར་ཤེས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། དུས་སླད་མ་ལ་བྱང་ཆུབ་སེམས་དཔའ་རྣམས་ཀྱིས་རྣམ་པ་འདི་ལྟ་བུའི་ཆོས་ཐོས་ན། མི་འཇིགས། མི་དངང ། སྐྲག་པར་མི་འགྱུར་བ་དང ། སྒྲ་ཐམས་ཅད་རྟོགས་པར་འཚལ་བར་འགྱུར་བ་དང ། ཐོགས་པ་མ་མཆིས་ཤིང ། ཐེ་ཚོམ་མ་མཆིས་པར་བགྱི་བའི་སླད་དུ་སྒྲ་དང ། ཚིག་ལ་འཇུག་པའི་རིག་པ་བསྟན་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལྷའི་བུ་པདྨོ་རྣམ་པར་རོལ་པའི་མངོན་པར་ཤེས་པ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ། ཁྱོད་ལ་གནས་དེ་དྲིས་པས་ཅི་ཞིག་བྱ། ཆོག་ 455a ༄#། །མོད་།སྒྲ་དང ། སྐད་ལ་འཇུག་པའི་རིག་པ་དེ་ནི་ལས་དང་པོ་པའི་བྱང་ཆུབ་སེམས་དཔས་ཤེས་པའམ། ཁོང་དུ་ཆུད་པའམ། བསམ་པའམ་གཞལ་བའམ། དཔྱད་པར་སླ་བ་མ་ཡིན་ནོ། །དེ་ནི་བྱང་ཆུབ་སེམས་དཔའ་ལས་དང་པོ་པའི་མདུན་དུ་བརྗོད་པར་བྱ་བ་མ་ཡིན་ཏེ། ལྷའི་བུ། སྒྲ་དང ། སྐད་ལ་འཇུག་པའི་ཁོང་དུ་ཆུད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གལ་ཏེ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལོག་པའི་ཚིག་ཡང་དག་པ་མ་ཡིན་པའི་ངག་དག་གིས་མི་སྙན་པ་བརྗོད་དེ། སྤྱོས་པས་དེ་ལ་ཁོང་ཁྲོ་བའི་སེམས་མི་སྐྱེད་དོ། །གལ་ཏེ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བདེ་བའི་ཡོ་བྱད་གོས་དང ། ཟས་དང ། མལ་ཆ་དང ། ནད་ཀྱི་རྐྱེན་རྩི་དང ། ཡོ་བྱད་ཐམས་ཅད་ཀྱིས་རིམ་གྲོར་བྱས། བཀུར་སྟི་བྱས། བསྟི་སྟང་དུ་བྱས། མཆོད་པ་བྱས་ཀྱང་དེ་ལ་ཆགས་པའི་སེམས་མི་འབྱུང་སྟེ། ལྷའི་བུ། འདི་ལྟ་སྟེ། དཔེར་ན། དགྲ་བཅོམ་པ། ཟག་པ་ཟད་པ་ནི་ཆགས་པར་བྱ་བའི་གནས་ཀྱི་ཆོས་ཐམས་ཅད་ལའང་ཆགས་པར་མི་འགྱུར། ཁོང་ཁྲོ་བར་བྱ་བའི་གནས་ཀྱི་ཆོས་ཐམས་ཅད་ལའང་ཁོང་ཁྲོ་བར་མི་འགྱུར་རོ། །ལྷའི་བུ། དེ་བཞིན་དུ་སྒྲ་དང ། སྐད་ལ་འཇུག་པ་ཁོང་དུ་ཆུད་པའི་ 455b བྱང་ཆུབ་སེམས་དཔའ་ཡང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཀྱང ། དེ་ལ་ཆགས་པའི་སེམས་མི་བསྐྱེད་དོ། །བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལོག་པ་ཡང་དག་པ་མ་ཡིན་པའི་ཚིག་གིས་མི་སྙན་པར་བརྗོད་དེ། སྤྱོས་ཀྱང་ཁོང་ཁྲོ་བའི་སེམས་མི་བསྐྱེད་དོ། །ལྷའི་བུ། དེ་ལྟར་སྒྲ་དང ། སྐད་ལ་འཇུག་པ་ཁོང་དུ་ཆུད་པའི་བྱང་ཆུབ་སེམས་དཔའ་ནི་ཐོབ་པ་དང ། མ་ཐོབ་པ་དང ། གྲགས་པ་དང ། མ་གྲགས་པ་དང ། བསྟོད་པ་དང ། སྨད་པ་དང ། བདེ་བ་དང།་སྡུག་བསྔལ་ཐམས་ཅད་ཀྱིས་མི་བསྐྱོད་མི་འཕྲོགས་ཏེ། འཇིག་རྟེན་གྱི་ཆོས་ཐམས་ཅད་ཟིལ་གྱིས་གནོན་ཅིང ། རིའི་རྒྱལ་པོ་ལྟར་མི་བསྒུལ་བར་གནས་སོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ལྷའི་བུ་པདྨོ་རྣམ་པར་རོལ་པའི་མངོན་པར་ཤེས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། འོན་ཀྱང་མ་བྱུང་བའི་དུས་ན། བྱང་ཆུབ་སེམས་དཔའ་འདུ་ཤེས་སྦྱངས་པ། འདུ་ཤེས་བྱང་བ་གང་ཇི་སྙེད་ཅིག་འབྱུང་བར་འགྱུར་བ་དེ་དག་གིས། སྒྲ་དང ། སྐད་ལ་འཇུག་པའི་རིག་པ་འདི་ཐོས་ན། རང་གི་སྐྱོན་ཡང་རྟོགས་པར་འགྱུར། གཞན་ལ་ཡང་སྟོན་པར་འགྱུར་ན། བཅོམ་ལྡན་འདས། སྒྲ་དང ། སྐད་ལ་འཇུག་པའི་རིག་པ་བཤད་དུ་གསོལ། དེ་སྐད་ཅེས་ 456a ༄#། །གསོལ་པ་དང ། བཅོམ་ལྡན་འདས་ཀྱིས་ལྷའི་བུ་པདྨོ་རྣམ་པར་རོལ་པའི་མངོན་པར་ཤེས་པ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ། དེ་བས་ན་ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང ། དོན་འདི་ངས་ཁྱོད་ལ་བཤད་དོ། །བཅོམ་ལྡན་འདས། དེ་དེ་ལྟར་བགྱིའོ་ཞེས་ནས། ལྷའི་བུ་པདྨོ་རྣམ་པར་རོལ་པའི་མངོན་པར་ཤེས་པ་བཅོམ་ལྡན་འདས་ཀྱིས་བཀའ་སྩལ་པ་ལྟར་ཉན་ཏོ། །བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ། གལ་ཏེ་བྱང་ཆུབ་སེམས་དཔའ་འདོད་ཆགས་ཀྱི་སྒྲ་ལ་ཉེས་པའི་འདུ་ཤེས་སུ་འགྱུར་ཞིང་འདོད་ཆགས་དང་བྲལ་བའི་སྒྲ་ལ་ཆགས་པའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཞེ་སྡང་གི་སྒྲ་ལ་ཁ་ན་མ་ཐོ་བའི་འདུ་ཤེས་སུ་འགྱུར་ཞིང ། ཞེ་སྡང་དང་བྲལ་བའི་སྒྲ་ལ་ལེགས་པའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །གཏི་མུག་གི་སྒྲ་ལ་ཁ་ན་མ་ཐོ་བའི་འདུ་ཤེས་སུ་འགྱུར་ཞིང ། གཏི་མུག་དང་བྲལ་བའི་སྒྲ་ལ་ལེགས་པའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་པོ། །འདོད་པ་ཆུང་བའི་སྒྲ་ལ་ཆགས་ཤིང་འདོད་པ་ཆེ་བའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །ཆོ་ག་ཤེས་པའི་སྒྲ་ 456b ལ་ཆགས་ཤིང ། ཆོག་མི་ཤེས་པའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །སྡོམ་པའི་སྒྲ་ལ་ཆགས་ཤིང ། མི་སྡོམ་པའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །གཅིག་པུར་དགའ་བའི་སྒྲ་ལ་ཆགས་ཤིང ། སྐྱེ་བོ་ཕལ་པོ་ཆེའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །སངས་རྒྱས་ཀྱི་སྒྲ་ལ་ཆགས་ཤིང ། མུ་སྟེགས་ཅན་གྱི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །ཚངས་པར་སྤྱོད་པའི་སྒྲ་ལ་ཞེན་ཅིང ། ཚངས་པར་མི་སྤྱོད་པའི་སྒྲ་ལ་ཞེ་སྡང་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །ཀུན་ནས་ཉོན་མོངས་པའི་སྒྲ་ལ་ཁོང་ཁྲོ་ཞིང ། རྣམ་པར་བྱང་བའི་སྒྲ་ལ་ཆགས་ན། སྒྲ་དང།་སྐད་ལ་འཇུག་པའི་རིག་པ་ལ་མི་སློབ་བོ། །འབྲས་བུ་ལ་གནས་པའི་སྒྲ་ལ་ཆགས་ཤིང ། བྱིས་པ་སོ་སོའི་སྐྱེ་བོའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །བདེ་བའི་སྒྲ་ལ་ཆགས་ཤིང ། སྡུག་བསྔལ་གྱི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །རབ་ཏུ་བྱུང་བའི་སྒྲ་ལ་ཆགས་ཤིང ། ཁྱིམ་པའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །འཇིག་རྟེན་ལས་འདས་པའི་སྒྲ་ལ་ཆགས་ཤིང ། འཇིག་རྟེན་པའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་ 457a ༄#། །རིག་པ་ལ་མི་སློབ་བོ། །སྦྱིན་པའི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང ། སེར་སྣའི་སྒྲ་ལ་ཁོང་ཁྲོ་བའི་འདུ་ཤེས་སུ་གྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཚུལ་ཁྲིམས་ཀྱི་སྒྲ་ལ་ཆགས་པའི་འདུ་ཤེས་སུ་འགྱུར་ཞིང ། ཚུལ་ཁྲིམས་འཆལ་བའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བཟོད་པའི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང ། གནོད་སེམས་ཀྱི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བརྩོན་འགྲུས་བརྩམས་པའི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང ། ལེ་ལོའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བསམ་གཏན་གྱི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང ། འཁྲུག་པའི་སྒྲ་ལ་ཁོང་ཁྲོ་བའི་འདུ་ཤེས་སུ་གྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཤེས་རབ་ཀྱི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང ། ཤེས་རབ་འཆལ་པའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཉེ་བའི་སྒྲ་ལ་ཆགས་ཤིང ། རིང་པའི་སྒྲ་ལ་ཁོང་ཁྲོ་ན་སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །འཁོར་བའི་སྒྲ་ལ་ཁ་ན་མ་ཐོ་བའི་འདུ་ 457b ཤེས་སུ་འགྱུར་ཞིང ། མྱ་ངན་ལས་འདས་པའི་སྒྲ་ལ་ལེགས་པའི་འདུ་ཤེས་སུ་འགྱུར་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །ཚུ་རོལ་གྱི་སྒྲ་ལ་ཁོང་ཁྲོ་ཞིང་ཕ་རོལ་གྱི་སྒྲ་ལ་ཆགས་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །གྲོང་གི་སྒྲ་ལ་ཁ་ན་མ་ཐོ་བར་འདུ་ཤེས་པར་གྱུར་ཅིང ། དགོན་པའི་སྒྲ་ལ་ཆགས་པར་གྱུར་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །གཅིག་པུར་སྤྱོད་པའི་སྒྲ་ལ་ཆགས་ཤིང ། འདུ་འཛིར་སྤྱོད་པའི་སྒྲ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། ། དགེ་སློང་གི་སྤྱོད་པ་ལ་ཆགས་ཤིང ། ཁྱིམ་པའི་སྤྱོད་པ་ལ་ཁོང་ཁྲོ་ན། སྒྲ་དང ། སྐད་ལ་འཇུག་པའི་རིག་པ་ལ་མི་སློབ་བོ། །སྤྱོད་ལམ་གྱི་བྱ་བ་ལ་ཆགས་ཤིང ། སྤྱོད་ལམ་མ་ཡིན་པའི་བྱ་བ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཚུལ་དུ་ཤིས་པ་ལ་ཆགས་ཤིང ། ཚུལ་དུ་མི་ཤིས་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཚུལ་ཁྲིམས་ཀྱི་སྤྱོད་པ་ལ་ཆགས་ཤིང ། ཚུལ་ཁྲིམས་འཆལ་བའི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །མ་འདྲེས་པའི་སྤྱོད་པ་ལ་ཆགས་ཤིང་འདྲེས་པའི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །འདོད་ཆགས་དང་བྲལ་བའི་སྤྱོད་པ་ལ་ཆགས་ཤིང ། འདོད་ཆགས་ཀྱི་སྤྱོད་པ་ལ་ཁོང་ཁྲོ་ན་།སངས་ 458a ༄#། །རྒྱས་ཀྱི་ཆོས་རྣམས་ལ་མི་སློབ་བོ། །ཞེ་སྡང་མེད་པའི་འདུ་ཤེས་ལ་ཆགས་ཤིང ། ཞེ་སྡང་གི་འདུ་ཤེས་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །གཏི་མུག་དང་བྲལ་བའི་འདུ་ཤེས་ལ་ཆགས་ཤིང ། གཏི་མུག་གི་འདུ་ཤེས་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །སྟོང་པ་ཉིད་ལ་ཆགས་ཤིང ། དམིགས་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །མཚན་མ་མེད་པ་ལ་ཆགས་ཤིང ། མཚན་མ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། ། སྨོན་པ་མེད་པ་ལ་ཆགས་ཤིང ། སྨོན་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བྱང་ཆུབ་སེམས་དཔའི་སྤྱོད་པ་ལ་ཆགས་ཤིང ། ཉན་ཐོས་དང ། རང་སངས་རྒྱས་ཀྱི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བྱང་ཆུབ་སེམས་དཔའ་ལ་ལྟུང་བས་རྒོལ་ན། བྱང་ཆུབ་ལས་རིང་དུ་འགྱུར་ཏེ། ལས་ཀྱི་སྒྲིབ་པ་ཡོངས་སུ་འཛིན་ཏོ། །སྤྱོད་པ་ལ་འཕྱ་ན་བྱང་ཆུབ་ལས་རིང་དུ་འགྱུར་རོ། །སྤྱོད་ལམ་གྱིས་རྒོལ་ན་བྱང་ཆུབ་ལས་རིང་དུ་འགྱུར་རོ། །གལ་ཏེ་བྱང་ཆུབ་སེམས་དཔས་བྱང་ཆུབ་སེམས་དཔའ་ལ་དམའ་བའི་འདུ་ཤེས་བསྐྱེད་དེ། བདག་ལ་ཆེ་བའི་འདུ་ཤེས་བསྐྱེད་ན་བདག་ལ་རྨ་འབྱུང་སྟེ། ལས་ཀྱི་སྒྲིབ་པའང་ཡོངས་སུ་འཛིན་ཏོ། །འདི་ལ་བྱང་ཆུབ་སེམས་དཔས་ 458b བྱང་ཆུབ་སེམས་དཔའ་ལ་གདམས་ཤིང་རྗེས་སུ་བསྟན་ན་སྟོན་པའི་འདུ་ཤེས་ཉེ་བར་བཞག་སྟེ། གདམས་ཤིང་རྗེས་སུ་བསྟན་པར་བྱའོ། །གལ་ཏེ་དེས་བྱང་ཆུབ་ཡོངས་སུ་བཏང་ཞེ་ན། བྱང་ཆུབ་སེམས་དཔས་བྱང་ཆུབ་སེམས་དཔའ་ལ་བརྙས་པའི་སེམས་བསྐྱེད་པར་མི་བྱའོ། །ལྷའི་བུ། བྱང་ཆུབ་སེམས་དཔའི་དགེ་བའི་རྩ་བ་རྣམས་ནི་ཇི་ལྟར་བྱང་ཆུབ་སེམས་དཔའ་གཉིས་པ་ལ་བརྟེན་ཏེ། འཆད་པར་འགྱུར་བ་དེ་ལྟར་གང་གིས་ཀྱང་ཡོངས་སུ་འཆད་པར་མི་འགྱུར་རོ། །ལྷའི་བུ། དེ་ལྟ་བས་ན་བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ཡོངས་སུ་བསྲུང་བར་འདོད་ཅིང ། ལས་ཀྱི་སྒྲིབ་པ་ཐམས་ཅད་ཡོངས་སུ་སྤྱད་པར་འདོད་པ་དང ། ཆོས་ཐམས་ཅད་ལ་སྒྲིབ་པ་མེད་པ་མྱུར་དུ་ཐོབ་པར་འདོད་པས་ཉིན་ལན་གསུམ་མཚན་ལན་གསུམ་དུ་བྱང་ཆུབ་སེམས་དཔའི་ཐེག་པ་པ་ཐམས་ཅད་ལ་ཕྱག་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་སྐད་གསུངས་པའི་དོན་བདག་གིས་འཚལ་ཏེ། འདོད་ཆགས་ཀྱི་སྒྲ་དང ། སངས་རྒྱས་ཀྱི་སྒྲ་དེ་ནི་མཚུངས་པའོ། །ཞེ་སྡང་གི་སྒྲ་དང ། སངས་རྒྱས་ཀྱི་སྒྲ་དེ་ནི་མཚུངས་པའོ། ། གཏི་མུག་གི་སྒྲ་དང ། སངས་རྒྱས་ཀྱི་སྒྲ་དེ་ནི་མཚུངས་པའོ། །མུ་སྟེགས་ཅན་གྱི་སྒྲ་དང ། སངས་རྒྱས་ཀྱི་སྒྲ་དེ་ནི་མཚུངས་པའོ། །འདོད་པ་ཆུང་བའི་སྒྲ་དང ། འདོད་པ་ཆེ་བའི་སྒྲ་དེ་ནི་ 459a ༄#། །མཚུངས་པའོ། །ཆོག་ཤེས་པའི་སྒྲ་དང ། ཆོག་མི་ཤེས་པའི་སྒྲ་དེ་ནི་མཚུངས་པའོ། །སྡོམ་པའི་སྒྲ་དང ། མི་སྡོམ་པའི་སྒྲ་དེ་ནི་མཚུངས་པའོ། གཅིག་པུར་དགའ་བའི་སྒྲ་དང ། འདུ་འཛིའི་སྒྲ་དེ་ནི་མཚུངས་པའོ། །ཚུ་རོལ་གྱི་སྒྲ་དང ། ཕ་རོལ་གྱི་སྒྲ་དེ་ནི་མཚུངས་པའོ། །རིང་བའི་སྒྲ་དང ། ཉེ་བའི་སྒྲ་དེ་ནི་མཚུངས་པའོ། །འཁོར་བའི་སྒྲ་དང ། མྱ་ངན་ལས་འདས་པའི་སྒྲ་དེ་ནི་མཚུངས་པའོ། །གྲོང་གི་སྒྲ་དང ། དགོན་པའི་སྒྲ་དེ་ནི་མཚུངས་པའོ། །སྦྱིན་པའི་སྒྲ་དང ། སེར་སྣའི་སྒྲ་དེ་ནི་མཚུངས་པའོ། །ཚུལ་ཁྲིམས་ཀྱི་སྒྲ་དང ། ཚུལ་ཁྲིམས་འཆལ་པའི་སྒྲ་དེ་ནི་མཚུངས་པའོ། །བཟོད་པའི་སྒྲ་དང ། གནོད་སེམས་ཀྱི་སྒྲ་དེ་ནི་མཚུངས་པའོ། །བརྩོན་འགྲུས་ཀྱི་སྒྲ་དང ། ལེ་ལོའི་སྒྲ་དེ་ནི་མཚུངས་པའོ། །བསམ་གཏན་གྱི་སྒྲ་དང ། འཁྲུག་པའི་སྒྲ་དེ་ནི་མཚུངས་པའོ། །ཤེས་རབ་ཀྱི་སྒྲ་དང ། ཤེས་རབ་འཆལ་བའི་སྒྲ་དེ་ནི་མཚུངས་པའོ། །དེ་ནས་ལྷའི་བུ་པདྨོ་རྣམ་པར་རོལ་པའི་མངོན་པར་ཤེས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཅིའི་ཕྱིར་ན་དེ་དག་མཚུངས་ཞེས་བྱ།་འཇམ་དཔལ་གྱིས་སྨྲས་པ། ལྷའི་བུ། འདོད་ཆགས་ཀྱི་སྒྲ་ལ་ཁྱོད་ཇི་ལྟར་སེམས། ལྷའི་བུས་སྨྲས་པ། བྲག་ཅ་དང་འདྲ་བར་ཤེས་སོ། །འཇམ་དཔལ་གྱིས་སྨྲས་ 459b པ།་ལྷའི་བུ། འོ་ན་སངས་རྒྱས་ཀྱི་སྒྲ་ཁྱོད་ཀྱིས་ཇི་ལྟར་ཤེས། ལྷའི་བུས་སྨྲས་པ། འཇམ་དཔལ། དེའང་སྒྲ་བརྙན་གྱིས་མཉམ་པ་ཉིད་ལས་མ་འདས་པའོ། །འཇམ་དཔལ་གྱིས་སྨྲས་པ། ལྷའི་བུ། རྣམ་གྲངས་ངེས་ཀྱང་ཁྱོད་ཀྱིས་འདི་ལྟར་དེ་དག་ནི་མཚུངས་པ་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ཁྱོད་སྔོན་ལས་དང་པོ་པའི་ས་ལ་གནས་ཤིང་འདི་ལྟ་བུའི་ཚུལ་ཁོང་དུ་མ་ཆུད་པའི་ཚེ། ལས་ཀྱི་སྒྲིབ་པ་ཇི་ལྟ་བུ་དག་མངོན་པར་འདུ་བྱེད་པ་ལུང་སྟོན་ཅིག་དང ། འཇམ་དཔལ། དེས་མ་འོངས་པའི་དུས་ན། བྱང་ཆུབ་སེམས་དཔར་དམ་འཆའ་བ་ཇི་སྲིད་ཅིག་འབྱུང་བར་འགྱུར་བ་དེ་དག་ཀྱང ། དེ་ལྟ་བུའི་ལས་ཀྱི་སྒྲིབ་པ་ཐོས་པ་དང ། རང་རང་སྲུང་བར་འགྱུར་རོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །ཅི་སྨན། བཅོམ་ལྡན་འདས། གལ་ཏེ་དེ་ལྟར་དེ་ལྟ་བུའི་སུག་ལས་ཀྱི་སྒྲིབ་པའི་ནོངས་པ་ཐོས་ན། ཡིད་མི་བདེ་བར་ཡང་འགྱུར་ལ་སུ་ག་ལས་ཀྱི་སྒྲིབ་པ་རྣམ་པར་དག་པ་ཐོབ་ཏུ་ལགས་ཀྱང ། ཆོས་ཐམས་ཅད་ལ་སྒྲིབ་པ་འཐོབ་པར་འགྱུར་ལགས་པ་སྙམ། བཅོམ་ལྡན་འདས། སྔོན་འདས་པའི་དུས་ན། བསྐལ་པ་གྲངས་མ་མཆིས་པ་ཤིན་ཏུ་བགྲང་བ་ 460a ༄#། །ལས་འདས་པ། ཡངས་པ། ཚད་མ་མཆིས་པ། བསམ་གྱིས་མི་ཁྱབ་པ་དེའི་ཕ་རོལ། དེའི་མང་ཕ་རོལ་དེའི་དུས་དེའི་ཚེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་རོ་རྔ་སྒྲའི་རྒྱལ་པོ་ཞེས་བགྱི་བ། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དེའི་སྐུ་ཚེའི་ཚད་ནི་དགུང་ལོ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་གྱུར་ཏོ། །ཐེག་པ་ནི་གསུམ་གྱིས་སེམས་ཅན་རྣམས་ཡོངས་སུ་མྱ་ངན་ལས་འདའ་བར་གྱུར་ཏོ། །འཇིག་རྟེན་གྱི་ཁམས་དེའི་མིང་ནི་སྣང་བ་ཆེན་པོ་ཅན་ཞེས་བགྱི་སྟེ། འཇིག་རྟེན་གྱི་ཁམས་དེ་ན་ཞུགས་ཤིང་ངམ། ལྡུམ་བུ་གང་ཇི་སྙེད་པ་དེ་དག་ཐམས་ཅད་ཀྱང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པར་གྱུར་ཏེ། ཞུགས་ཤིང་དེ་དག་ལས་ཀྱང་དེ་ལྟ་བུའི་སྒྲ་འབྱུང་སྟེ། གང་འདི་སྟོང་པ་ཉིད་ཀྱི་སྒྲ་དང ། མཚན་མ་མ་མཆིས་པའི་སྒྲ་དང ། སྨོན་པ་མ་མཆིས་པའི་སྒྲ་དང ། སྐྱེ་བ་མ་མཆིས་པའི་སྒྲ་དང ། དངོས་པོ་མ་མཆིས་པའི་སྒྲ་དང ། མཚན་ཉིད་མ་མཆིས་པའི་སྒྲ་དང ། རྣམ་པ་དེ་ལྟ་བུའི་སྒྲ་དག་འབྱུང་སྟེ། སྒྲ་འབྱུང་ 460b པ་དེ་དག་གིས་སེམས་ཅན་དེ་དག་མངོན་པར་རྟོགས་པ་འཐོབ་པར་གྱུར་ཏོ། །དེ་བཞིན་གཤེགས་པ་དེའི་ཉན་ཐོས་ཀྱི་ཚོགས་དང་པོ་ནི་དགེ་སློང་བྱེ་བ་དགུ་བཅུ་རྩ་དགུའི་ཚོགས་སུ་གྱུར་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཁུར་བོར་པ། རང་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་བས་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་གི་ཚོགས་སུ་གྱུར་ཏོ། །ཚོགས་གཉིས་པ་ནི་དགེ་སློང་བྱེ་བ་ཕྲག་དགུ་བཅུ་རྩ་དྲུག་གི་ཚོགས་སུ་གྱུར་ཏོ། །ཚོགས་གསུམ་པ་ནི་དགེ་སློང་བྱེ་བ་ཕྲག་དགུ་བཅུ་རྩ་གསུམ་གྱི་ཚོགས་སུ་གྱུར་ཏོ། །ཚོགས་བཞི་པ་ནི་དགེ་སློང་བྱེ་བ་ཕྲག་དགུ་བཅུའི་ཚོགས་སུ་གྱུར་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཁུར་བོར་པ།་རང་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་བས་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་གི་ཚོགས་སུ་གྱུར་ཏོ། །བྱང་ཆུབ་སེམས་དཔའི་ཚོགས་ཀྱང་གྲངས་དེ་སྙེད་དུ་གྱུར་ཏེ། ཐམས་ཅད་ཀྱང་མི་སྐྱེ་བའི་ཆོས་ཀྱི་བཟོད་པ་དང་ལྡན་པ་ཚུལ་སྣ་ཚོགས་པ་བསྒྲུབ་པ་ལ་མཁས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་བསྙེན་བཀུར་བ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་མང་པོར་རྣམ་པར་གྲགས་པ། སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་ཡང་དག་པར་སྒྲོལ་པ། སྒོ་མཐའ་ 461a ༄#། །ཡས་པའི་གཟུངས་རབ་ཏུ་ཐོབ་པ། ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་མངོན་པར་བསྒྲུབ་པ་ལ་མཁས་པ་ཤ་སྟག་གི་ཚོགས་སུ་གྱུར་ཏོ། དེ་མ་ལགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལས་དང་པོ་པ་དང ། ཐེག་པ་ལ་གསར་དུ་ཞུགས་པ་རྣམས་ལྟ་ཅི་སྨོས་ཀྱང་ཅི་འཚལ་ཏེ། དེ་བཞིན་གཤེགས་པ་དེའི་སངས་རྒྱས་ཀྱི་ཞིང་གི་རྒྱན་དུ་གྱུར་པ་དེ་དག་ནི་ཚིག་གིས་བརྗོད་པར་སླ་བ་མ་ལགས་སོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནི་དགུང་ལོ་སྟོང་ཕྲག་དྲུག་ཅུའི་བར་དུ་གནས་པར་འགྱུར་ཏེ། ཞུགས་ཤིང་དེ་དག་ལས་ཀྱང་སྒྲ་དེ་དག་དེ་སླན་ཆད་མི་འབྱུང་བར་གྱུར་ཏོ། །བཅོམ་ལྡན་འདས། དེའི་ཚེ་དགེ་སློང་བྱང་ཆུབ་སེམས་དཔའ་ཆོས་སྨྲ་བ་རབ་ཏུ་དགའ་བའི་དབང་པོ་ཞེས་བགྱི་བ་བྱུང་སྟེ། བཅོམ་ལྡན་འདས། བྱང་ཆུབ་སེམས་དཔའ་རབ་ཏུ་དགའ་བའི་དབང་པོ་དེ་ནི་སྔོན་སྤྱོད་སྤྱོད་པ་སྟེ། སྤྱོད་ལམ་བཅོས་མི་འཚལ་བ་འཇིག་རྟེན་པའི་ཆོས་ཐམས་ཅད་ལས་སླར་ལོག་པ་མ་མཆིས་པ་སྟེ། སེམས་ཅན་དེ་དག་ཀྱང་དབང་པོ་རྣོ་ཞིང་ཕྱེ་བཙམ་གྱིས་འཚལ་ལ་ཟབ་\?\་མོ་ལ་མོས་པ་ཤ་སྟག་སྟེ། དེ་ནི་སེམས་ཅན་དེ་དག་ལ་འདོད་པ་ཆུང་བའི་བསྔགས་པའང་མི་བརྗོད། ཆོག་ཤེས་པ་དང ། སྡོམ་པ་དང ། གཅིག་པུར་དགའ་ 461b པའི་བསྔགས་པའང་མི་བརྗོད། འདུ་འཛི་མ་མཆིས་པའི་བསྔགས་པའང་མི་བརྗོད་ཅིང ། དེས་སེམས་ཅན་དེ་དག་ལ་ཆོས་ཐམས་ཅད་ནི་འདོད་ཆགས་ཀྱི་ངོ་བོ་ཉིད་དོ་ཞེས་བགྱི་བར་བསྟན། ཆོས་ཐམས་ཅད་ནི་ཞེ་སྡང་གི་ངོ་བོ་ཉིད་དོ་ཞེས་བགྱི་བར་བསྟན། ཆོས་ཐམས་ཅད་ནི་གཏི་མུག་གི་ངོ་བོ་ཉིད་དོ་ཞེས་བགྱི་བར་བསྟན། ཆོས་ཐམས་ཅད་ནི་སྒྲིབ་པ་མེད་པའོ་ཞེས་བགྱི་བར་བསྟན་ཏོ། །དེས་ཐབས་དེས་སྤྱོད་པ་ཐམས་ཅད་ཀྱང་མཚན་ཉིད་གཅིག་པའོ་ཞེས་བགྱི་བར་བསྟན་ནས། སེམས་ཅན་ཐབས་དེ་ལྟ་བུས་བསྟན་པ་དེ་དག་ཀྱང་བྱང་ཆུབ་སེམས་དཔའ་དེའི་སྤྱོད་པ་ལ་མི་དགའ་བར་མ་གྱུར་ཏེ། ཁོང་ཁྲོ་བའི་སེམས་མ་མཆིས་པ་དེ་དག་བཟོད་པའི་ས་ཐོབ་པར་གྱུར། དེ་བཞིན་གཤེགས་པའི་བསྟན་པ་ལའང་མི་ཕྱེད་ཅིང་ངེས་པར་གྱུར་ཏོ། །དེའི་ཚེ་དགེ་སློང་བྱང་ཆུབ་སེམས་དཔའ་ཆོས་སྨྲ་བ་རྒྱལ་བའི་བློ་གྲོས་ཞེས་བགྱི་བ་བྱུང་སྟེ། བཅོམ་ལྡན་འདས། ཆོས་སྨྲ་བ་རྒྱལ་བའི་བློ་གྲོས་ཞེས་བགྱི་བ་དེ་ནི་བསམ་གཏན་བཞི་ཐོབ་པ། གཟུགས་མ་མཆིས་པའི་སྙོམས་པར་འཇུག་པ་བཞི་ཐོབ་པ་སྟེ། སྦྱངས་པའི་ཡོན་ཏན་བཅུ་གཉིས་ཀྱང་ཡང་དག་པར་བླངས་ཏེ། གནས་པར་གྱུར་ཏོ། །བཅོམ་ལྡན་འདས། བྱང་ཆུབ་སེམས་དཔའ་རྒྱལ་བའི་བློ་གྲོས་ཀྱིས་འདུལ་བར་གྱུར་པ་དེ་དག་ནི་སྐྱོན་འཛིན་ཅིང་སྐྱོན་བརྗོད་པ། བློ་མི་བརྟན་པ་ཤ་སྟག་ཏུ་གྱུར་ཏེ། བཅོམ་ལྡན་འདས། དེ་ནས་བྱང་ཆུབ་སེམས་དཔའ་རྒྱལ་བའི་བློ་ 462a ༄#། །གྲོས་བསོད་སྙོམས་ལ་སྤྱོད་པ་ཞིག་གི་ཚེ། མ་རིག་ནས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོའི་བསླང་བའི་གྲོང་དེར་མཆིས་ཏེ། དེས་དེ་ན་ཁྱིམ་བདག་གི་བུའི་གནས་ཤིག་མཆིས་པར་མཐོང་ནས། ཁྱིམ་བདག་གི་བུ་གང་ན་བ་དེར་མཆིས་ནས་ཕྱིན་པ་དང ། སྟན་བཏིང་བ་ལ་མཆིས་ཏེ། ཁྱིམ་བདག་གི་བུ་དེ་ལ་འདོད་པ་ཆུང་བའི་བཀའ་མཆིད་བརྗོད། ཆོག་ཤེས་པའི་བཀའ་མཆིད་བརྗོད། སྡོམ་པའི་བཀའ་མཆིད་བརྗོད། འདུ་འཛིའི་ནོངས་པ་བརྗོད། གཅིག་པུར་དགའ་བའི་བསྔགས་པ་བརྗོད། འདུ་འཛི་མ་མཆིས་པའི་བསྔགས་པ་བརྗོད་ནས། ཁྱིམ་བདག་གི་བུ་དེའི་མདུན་དུ་བྱང་ཆུབ་སེམས་དཔའ་རབ་ཏུ་དགའ་བའི་དབང་པོ་ལ་མི་སྙན་པ་བརྗོད་པ་དགེ་སློང་དེས་ནི་སྐྱེ་བོ་མང་པོ་ལོག་པར་བསྟན་ཏོ། །དགེ་སློང་དེས་ནི་སྐྱེ་བོ་མང་པོ་ལོག་པར་ལྟ་བར་བྱས་སོ། །དགེ་སློང་དེ་ནི་འདུ་འཛིའི་ནང་ན་རྣམ་པར་སྤྱོད་པ་སྟེ། འདོད་ཆགས་ནི་སྒྲིབ་པ་མེད་དོ་ཞེས་སྟོན་ཏོ། །ཞེ་སྡང་ནི་སྒྲིབ་པ་མེད་དོ་ཞེས་སྟོན་ཏོ། །གཏི་མུག་ནི་སྒྲིབ་པ་མེད་དོ་ཞེས་སྟོན་ཏོ། །ཆོས་ཐམས་ཅད་ནི་སྒྲིབ་པ་མེད་པ་ཞེས་སྟོན་ཏོ་ཞེས་བརྗོད་པ་དང ། ཁྱིམ་བདག་གི་བུ་དེའང་དབང་པོ་རྣོ་བ་བཟོད་པ་ཐོབ་པ་ཞིག་སྟེ། དེས་དགེ་སློང་དེ་ལ་སྨྲས་པ། བཙུན་པ་ཁྱོད་ཀྱིས་འདོད་ཆགས་ཇི་ལྟར་མཁྱེན། དེས་སྨྲས་པ། ཁྱིམ་བདག་གི་བུ། 462b འདོད་ཆགས་ནི་ཀུན་ནས་ཉོན་མོངས་པར་ཤེས་སོ། །སྨྲས་པ། བཙུན་པ། འོ་ན། འདོད་ཆགས་དེ་ནང་ན་མཆིས་སམ། ཕྱི་རོལ་ན་མཆིས། སྨྲས་པ། འདོད་ཆགས་ནི་ནང་ནའང་མེད། ཕྱི་རོལ་ནའང་མེད་དོ། །སྨྲས་པ། བཙུན་པ། དེ་ལྟར་འདོད་ཆགས་ནང་ནའང་མ་མཆིས། ཕྱི་རོལ་ནའང་མ་མཆིས། ཤར་ཕྱོགས་ནའང་མ་མཆིས། ལྷོ་ཕྱོགས་ནའང་མ་མཆིས། ནུབ་ཕྱོགས་ནའང་མ་མཆིས། བྱང་ཕྱོགས་ནའང་མ་མཆིས། སྟེང་ནའང་མ་མཆིས། འོག་ནའང་མ་མཆིས། ཕྱོགས་མཚམས་རྣམས་ནའང་མ་མཆིས་ཏེ། དེ་ལྟ་ལགས་ན་དེ་ནི་མ་སྐྱེས་པ་ལགས་ཏེ། གང་མ་སྐྱེས་པ་དེ་ལ་ཀུན་ནས་ཉོན་མོངས་པའམ། རྣམ་པར་བྱང་བའང་ཅི་ཞིག་མཆིས། དེ་ནས་དགེ་སློང་རྒྱལ་བའི་བློ་གྲོས་ཀྱིས་བསྟན་པ་དེ་ཐོས་ནས་འཁྲུག་ཏེ་ཤིན་ཏུ་མི་དགའ་ནས། བསོད་སྙོམས་ཀྱང་མ་བླངས་པར་སྟན་ལས་ལངས་ཏེ་མཆིས་སོ། །འདི་སྐད་ཀྱི་ཚིག་བརྗོད་དེ། ཀྱེ་མ་དགེ་སློང་དེས་ནི། སྐྱེ་བོ་མང་པོ་ལོག་པར་བསྟན་ཏོ་ཞེས་ཀྱང་བརྗོད་ནས་དེ་ཁྱིམ་དེ་ནས་བྱུང་སྟེ། དགོན་པ་ལོགས་སུ་མཆིས་སོ། །དེ་སླད་ཀྱིས་གཙུག་ལག་ཁང་དུ་མཆིས་ནས་དགེ་སློང་ལྷག་མ་རྣམས་ལའང་བསྒོ། དགེ་འདུན་གྱི་ནང་དུའང་དགེ་སློང་དེ་མཐོང་ནས། འདི་སྐད་དུ། དགེ་སློང་འདི་ནི་སྐྱེ་བོ་མང་པོ་ལོག་པར་སྟོན་ཅིང ། དགེ་སློང་འདི་ནི་སྐྱེ་བོ་མང་པོ་ལོག་པར་ལྟ་བར་བྱེད་དེ། འདི་ནི་འདོད་ཆགས་སྒྲིབ་པ་མེད་དོ་ཞེས་སྟོན་ 463a ༄#། །ཏོ། །ཞེ་སྡང་སྒྲིབ་པ་མེད་དོ་ཞེས་སྟོན་ཏོ། །གཏི་མུག་སྒྲིབ་པ་མེད་དོ་ཞེས་སྟོན་ཏོ། །ཆོས་ཐམས་ཅད་སྒྲིབ་པ་མེད་དོ་ཞེས་སྟོན་ཏོ་ཞེས་བགྱིས་སོ། ། དེ་ནས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོ་དེ་འདི་སྙམ་དུ་གྱུར་ཏེ། དགེ་སློང་འདིས་ནི་གདོན་མི་ཟ་བར་ལས་ཀྱི་སྒྲིབ་པ་བསགས་པར་གྱུར་གོར་མ་ཆག་ན་དེ་ལ་བདག་གིས་ཟབ་མོའི་གཏམ་བྱའོ། །དེས་ནི་མ་ནུས་ནའང་འདིའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་བསྒོམ་པའི་རྒྱུ་ཙམ་དུའང་འགྱུར་རོ་སྙམ་སྟེ། དེ་ནས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོས། དགེ་སློང་གི་དགེ་འདུན་ཐམས་ཅད་གཅིག་ཏུ་འདུན་པར་བགྱིས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདོད་ཆགས་མྱ་ངན་འདས་པར་གསུངས། །ཞེ་སྡང་གཏི་མུག་དེ་བཞིན་ཏེ། །བྱང་ཆུབ་དེ་དག་གནས་ཉིད་ཡིན། །སངས་རྒྱས་བྱང་ཆུབ་བསམ་མི་ཁྱབ། །འདོད་ཆགས་གང་གིས་རྣམ་བརྟགས་པ། །ཞེ་སྡང་གཏི་མུག་དེ་བཞིན་ཏེ། །སངས་རྒྱས་བྱང་ཆུབ་དེ་ལ་རིང ། །གནམ་དང་ས་གཉིས་ཇི་བཞིན་ནོ། །བྱང་ཆུབ་འདོད་ཆགས་གཉིས་ནི་གཉིས་སུ་མེད། ། འཇུག་པ་གཅིག་པ་མཉམ་ཉིད་ལྡན་པ་སྟེ། །འདི་དག་ཆོས་ལ་བྱིས་པ་གང་འཇིགས་པ། །དེ་དག་སངས་རྒྱས་བྱང་ཆུབ་རིང་བ་ཡིན། །འདོད་ཆགས་སྐྱེ་མིན་འཇིག་པ་མ་ 463b ཡིན་ཏེ། །སེམས་ཀྱང་ཀུན་ནས་ཉོན་མོངས་འགྱུར་བ་མེད། །གང་ཞིག་དམིགས་པའི་བདག་ལ་བློ་ཆགས་པ། །འདོད་ཆགས་ངན་སོང་དེ་དག་ལྟུང་བར་བྱེད། །གང་ཞིག་འདོད་ཆགས་ཆོས་ཀྱང་སངས་རྒྱས་ཆོས། །དེ་དག་ཁྱད་པར་གང་ཡང་མེད་པ་སྟེ། །ཡི་གེ་གཅིག་ཅིང་ཚུལ་གཅིག་མཚན་ཉིད་མེད། །དེ་ལྟར་ཤེས་པ་བདེ་གཤེགས་ཉིད་དུ་འགྱུར། །ཚུལ་ཁྲིམས་འཆལ་དང་ཚུལ་ཁྲིམས་རྣམ་བརྟགས་ཤིང ། །གང་ཞིག་ཚུལ་ཁྲིམས་རློམ་པས་མྱོས་གྱུར་པ། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་རྒྱས་ཆོས་ཀྱང་མེད། །གང་ཞིག་དགོན་པའི་གནས་ལ་རྟོག་བྱེད་ཅིང ། །བདག་ལ་བསྟོད་བྱེད་གཞན་ལ་སྨོད་བྱེད་པ། །དགོན་པར་ལྟ་ལ་རབ་གནས་དེ་ལ་ནི། །མཐོ་རིས་མེད་ན་བྱང་ཆུབ་ག་ལ་ཡོད། །བྱང་ཆུབ་བལྟ་བ་གཉིས་སུ་མེད་གསུངས་ཏེ། །མིང་དང་ཡི་གེ་གྲངས་དང་སྒྲ་འཇུག་པ། །དེ་དག་གང་གིས་ཡང་དག་རྟོགས་གྱུར་པ། །དེ་ལ་སངས་རྒྱས་བྱང་ཆུབ་རིང་བ་མིན། །ཀུན་ནས་ཉོན་མོངས་དེ་ལ་རྣམ་རྟོག་ཅིང ། །རྣམ་བྱང་ལྟ་ལ་བྱིས་པ་གང་ཆགས་པ། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་རྒྱས་ཆོས་ཀྱང་མེད། །གང་ཞིག་སངས་རྒྱས་ཆོས་ལ་འདོད་སྐྱེས་པ། །དེ་ལ་སངས་རྒྱས་བྱང་ཆུབ་རིང་བ་སྟེ། །ཡོད་མིན་ཆོས་ལ་འདོད་པ་བསྐྱེད་པས་ན། །དེ་ནི་སྡུག་བསྔལ་ 464a ༄#། །ཡོངས་སུ་མྱོང་བར་འགྱུར། །གང་ཞིག་འདོད་ཆགས་ཞེ་སྡང་མི་རྟོག་ཅིང ། །གཏི་མུག་ཆུང་བྱས་བྱང་ཆུབ་ཡིན་ལྟ་བ། །དེ་ལ་སངས་རྒྱས་བྱང་ཆུབ་རིང་བ་མིན། །བཟོད་པ་མཆོག་ཀྱང་མྱུར་དུ་དེས་འཐོབ་འགྱུར། །འདུས་མ་བྱས་དང་འདུས་བྱས་སུས་མཐོང་བ། །དེ་ནི་འཁོར་བའི་ཆོས་ལས་གཞར་མི་འགྲོལ། །གང་གིས་ཁམས་དེ་མཉམ་པ་ཉིད་རྟོགས་པ། །དེ་མྱུར་སྐྱེས་བུ་སངས་རྒྱས་མཆོག་ཏུ་འགྱུར། །གང་གིས་སངས་རྒྱས་ཆོས་དང་སངས་རྒྱས་དག་།ཐམས་ཅད་ཀུན་ཏུ་ནམ་ཡང་མ་མཐོང་ན། །ཆོས་རྣམས་ཀུན་གྱིས་གོས་པ་མེད་པ་དེ། །བདུད་བཅོམ་བྱང་ཆུབ་མངོན་པར་འཚང་ཡང་རྒྱ། །སུ་ཞིག་སེམས་ཅན་རྣམ་པར་འགྲོལ་འདོད་པ། ། དེས་ནི་སེམས་ཅན་ཁམས་སུ་བལྟ་མི་བྱ། །མ་ལུས་སེམས་ཅན་མྱ་ངན་འདས་དང་འདྲ། །དེ་ལྟར་སུས་ཤེས་དེ་ནི་རང་བྱུང་འགྱུར། །དགོན་པའི་ཆོས་ལ་གང་ཞིག་མི་སྣང་ཞིང ། །གྲོང་དུ་བྱིན་ན་སྤྱོད་ལམ་འཆོས་བྱེད་པ། །དེ་ནི་འཇིག་རྟེན་ལྷར་བཅས་རྐུན་པོ་སྟེ། །དེ་ལ་བྱང་ཆུབ་སངས་རྒྱས་ཆོས་རྣམས་མེད། །བདག་ནི་སངས་རྒྱས་འགྱུར་ཞེས་གང་རློམ་པ། །བྱིས་པ་དེ་ནི་གཏི་མུག་དབང་གིས་ནོན། །སངས་རྒྱས་ཆོས་ནི་ནམ་མཁའ་མཚུངས་པ་སྟེ། །བླང་དང་དོར་བའི་སྒྲ་ནི་དེ་ལ་མེད། །རྒྱལ་བས་ནམ་ 464b ཡང་བྱང་ཆུབ་སངས་མ་རྒྱས། །དེས་ནི་ནམ་ཡང་སེམས་ཅན་དཀྲོལ་བ་མེད། །མེད་པའི་ཆོས་རྣམས་བརྟགས་ཤིང་བྱིས་པ་རྣམས། །སངས་རྒྱས་བྱང་ཆུབ་ལས་ནི་རིང་བ་ཡིན། ། སེམས་ཅན་འདི་དག་ཉོན་མོངས་སུས་མཐོང་བ། །དེ་ལ་ཉོན་མོངས་མཐའ་ཡས་འབྱུང་བར་འགྱུར། །སེམས་ཅན་དེ་དག་སེམས་ཅན་མེད་ཅེས་གསུངས། །སེམས་ཅན་འདུ་ཤེས་གནས་ལ་བྱང་ཆུབ་མེད། །གང་གིས་སེམས་ཅན་ཤིན་ཏུ་གྲོལ་མཐོང་ཞིང ། །འདོད་ཆགས་ཞེ་སྡང་གཏི་མུག་རྟག་མེད་ལ། །སེམས་ཅན་ཞི་ཞིང་རབ་ཞི་རྣམ་ཞི་བར། །གང་གིས་ཤེས་པ་དེ་ནི་མགོན་པོར་གྱུར། །གང་གིས་སེམས་ཅན་སེམས་ཅན་མེད་མ་མཐོང ། །ཡང་དག་ཉིད་དུ་སངས་རྒྱས་ཆོས་མ་དམིགས། །ཇི་ལྟར་སེམས་ཅན་དེ་བཞིན་སངས་རྒྱས་ཞེས། །དེ་ལྟར་སུས་ཤེས་དེ་ནི་མགོན་པོར་གྱུར། །ཉོན་མོངས་རྟོག་ན་ཉོན་མོངས་ཡོད་པར་འགྱུར། །ཚུལ་བཞིན་ལམ་སེམས་དེ་བཞིན་ཉོན་མོངས་ཡོད། །ཉོན་མོངས་ལམ་དུ་ན་མ་ཡང་མ་བརྟགས་ན། །དེས་ནི་བྱང་ཆུབ་མི་རྟོག་ས་འཐོབ་བོ། །སྟོང་བའི་ཆོས་ཀྱིས་མི་མཁས་གང་འཇིགས་པ། །དེ་དག་སངས་རྒྱས་ཆོས་ལས་རིང་བ་ཡིན། །སྟོང་ཉིད་ཆོས་ལ་ཐེ་ཚོམ་སུ་མེད་པ། །དེ་དག་སངས་རྒྱས་བྱང་ཆུབ་འཐོབ་པར་འགྱུར། །བྱང་ཆུབ་མཆོག་ཐོབ་པར་ནི་སུ་འདོད་པ། །དེས་ནི་འདོད་ཆགས་ཆོས་ལ་བརྟག་མི་བྱ། །འདོད་ཆགས་ཆོས་ཀྱི་མཚན་ཉིད་གང་ཡིན་པ། །དེ་དག་ 465a ༄#། །སངས་རྒྱས་ཡོན་ཏན་བསམ་མི་ཁྱབ། །གང་ཞིག་སངས་རྒྱས་ཆོས་ལ་མི་འཇིག་ཅིང ། །སེམས་དང་བྱང་ཆུབ་སྐྱེ་བ་མེད་པ་དང ། །སེམས་དང་སངས་རྒྱས་བྱང་ཆུབ་གཉིས་མེད་པར། །ཤེས་པར་གྱུར་ན་དེ་ནི་མགོན་པོར་འགྱུར། །སྡིག་སེམས་མུ་སྟེགས་ཅན་གྱིས་གང་བརྗོད་དང ། །སངས་རྒྱས་རྣམས་ཀྱིས་གསུངས་གང་བཀའ་སྩལ་པ། །དེ་དག་ཐ་དད་ཚུལ་གྱུར་མེད་པ་སྟེ། །དེ་ལྟར་ཤེས་ན་དེ་ནི་མགོན་པོར་འགྱུར། །གང་གིས་བྱང་ཆུབ་མཐོང་ཞིང་སྨོན་བྱེད་པ། །དེ་དང་བྱང་ཆུབ་རིང་སྟེ་བྱང་ཆུབ་མེད། །སངས་རྒྱས་སངས་རྒྱས་མིན་པ་མི་མཉམ་ཞེའམ། །སངས་རྒྱས་འདི་ཞེས་མི་རྟོག་མགོན་པོར་འགྱུར། །གང་ཞིག་བདག་ནི་སེམས་ཅན་འགྲེལ་བ་ཞེས། །རློམ་ན་སེམས་ཅན་འདུ་ཤེས་ཆགས་རྨོངས་པས། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་རྒྱས་ཆོས་ཀྱང་མེད། །འདོད་ཆགས་ནང་དང་ཕྱི་ན་མི་གནས་ཏེ། །ཕྱོགས་དང་ཕྱོགས་མཚམས་གང་ནའང་ཡོད་པ་མིན། །ཆོས་རྣམས་ཡོད་མིན་རྣམ་པར་བརྟག་བྱས་ཤིང ། །བྱིས་པ་འདོད་ཆགས་འདུ་ཤེས་དེ་ལྟར་རྨོངས།། སྒྱུ་མ་སྨིག་རྒྱུ་བྲག་ཅ་ལྟ་བུ་སྟེ། །མོ་གཤམ་བུ་དང་རྨི་ལམ་འདྲ་བ་ནི། །ཉོན་མོངས་འདི་དག་ཐམས་ཅད་དམིགས་སུ་མེད། །བྱིས་པ་དེ་ལྟར་མི་ཤེས་རྣམ་པར་རྨོངས། །འདུས་ 465b བྱས་ཆོས་དང་འདུས་མ་བྱས་ཀྱི་ཆོས། །དེ་དག་ཐ་དད་གཉིས་སུ་ནམ་ཡང་མེད། །གང་ལ་གྲངས་དང་བགྲང་དུ་མེད་པ་དག་།དེ་ཡི་ཚུལ་གྱིས་གཉིས་སུ་མེད་པར་འཇུག་།བྱིས་པ་གང་ཞིག་བྱང་ཆུབ་སེམས་རློམ་ཞིང ། །སངས་རྒྱས་འགྱུར་ཞེས་རློམ་སེམས་བྱེད་གྱུར་ན། །ཆོས་ཀྱི་དངོས་ཉིད་ཕྱག་རྒྱ་འདི་བོར་བས། །དེ་ལ་སངས་རྒྱས་ཆོས་དང་བྱང་ཆུབ་མེད། ། སྨྲ་ལ་གང་དགའ་ཡོངས་རྟོག་སྤྱོད་ཡུལ་ཅན། །སྨྲ་བའི་དོན་ལ་རྣམ་པར་མི་སེམས་ཤིང ། །མིང་དང་ལེགས་ལ་དེ་བཞིན་ཆགས་གྱུར་པ། །དེ་དག་བྱང་ཆུབ་འགྱུར་བ་ཐེ་ཚོམ་ཡོད། ། ལྟ་བའི་རྣམ་པ་བྱང་ཆུབ་གཉིས་མེད་གསུངས། །མིང་དང་ཡི་གེ་གྲངས་དང་སྐད་འཇུག་པས། །མི་མཁས་གང་གིས་ཆོས་འདི་མ་རྟོགས་པ། །དེ་དག་སངས་རྒྱས་བྱང་ཆུབ་རིང་བར་གནས། །མིང་ལ་ཆགས་ཤིང་སྨྲ་ལ་དགའ་བ་དང ། །བདག་ཏུ་ལྟ་ལ་གང་ཞིག་གནས་གྱུར་ཅིང ། །འདོད་པ་ཆུང་དང་ཆོག་ཤེས་རྣམ་བརྟགས་པས། །འདོད་པའི་དབང་གིས་ད་དུང་དེ་འདུག་གོ་།འདོད་ཆགས་ཆོས་ལས་ཤེད་སྐྱེས་གང་འབྲོས་པ། །དེ་ནི་འདོད་ཆགས་ཆོས་ལས་གཞར་མི་འགྲོལ། །གང་གིས་ཡང་དག་འདོད་ཆགས་ཆོས་ཤེས་ན། །འདོད་ཆགས་བྲལ་བའི་འདོད་ཆགས་ཆོས་ཤེས་འགྱུར། །ཡུན་རིང་དུས་སུ་ཚུལ་ཁྲིམས་བསྲུང་བྱས་ཤིང ། །བསྐལ་བ་བྱེ་བར་བསམ་གཏན་བསྐྱེད་བྱས་ཀྱང ། །ཡང་དག་ཉིད་མཐའ་འདི་ནི་ 466a ༄#། །མི་རྟོགས་ན། །བསྟན་པ་འདི་ལ་དེ་དག་བློ་ཡོད་མིན། །ཅི་ཡང་མ་ཡིན་ཆོས་འདི་སུས་ཤེས་པ། །ནམ་ཡང་དེ་ནི་ཆོས་ཀུན་ཆགས་མི་འགྱུར། །ཚུལ་ཁྲིམས་འཆལ་དང་ཚུལ་ཁྲིམས་རྣམ་པ་རྟགས་པས། །བྱིས་པས་དམིགས་པའི་སྤྱོད་ཡུལ་ཐར་མི་འགྱུར། །ཚུལ་ཁྲིམས་ཚུལ་ཁྲིམས་མེད་པར་སུས་ཤེས་ཤིང ། །ཚུལ་ཁྲིམས་འཆལ་དང་ཚུལ་ཁྲིམས་ཚུལ་གཅིག་ཅེས། །ཚུལ་ཁྲིམས་ངང་ཚུལ་དེ་ལྟར་སུས་ཤེས་པ། །ཚུལ་ཁྲིམས་འཆལ་པ་དེ་ལ་ན་མ་ཡང་མེད། །ཆོས་རྒྱལ་ཆོས་ལ་རྟོག་པར་མ་གྱུར་ན། །ཐབས་ཀྱི་ས་ལ་སེམས་ཅན་རྣམས་འདུལ་ཞིང ། །བྱང་ཆུབ་ཟག་མེད་ཞི་བ་འདི་ལ་ཡང ། །ཚུལ་གཅིག་ཆོས་ཀྱིས་སེམས་ཅན་འཛུད་པ་ཡིན། །ཆོས་རྒྱལ་དམ་པའི་ཆོས་འདི་མི་གཡོ་ཞིང ། །དངོས་མེད་མཚན་ཉིད་མེད་ལ་ཚུལ་གཅིག་པར། །ངོ་བོ་ཉིད་ཀྱིས་སྟོང་ཆོས་མ་ཐོས་པས། །གཡང་ས་ཆེན་པོར་བྱིས་པ་དེ་དང་ལྟུང་།། ཆོས་འདི་ཐོས་ཤིང་མི་དངང་གང་གྱུར་པའི། །འདོད་པའི་ཡོན་ཏན་ལྔ་ཆགས་ཁྱིམ་པའང་སླའི། །བསྟན་པ་འདི་ལ་རབ་ཏུ་བྱུང་གྱུར་ཅིང ། །དམིགས་ལྟ་སྦྱངས་པའི་ཡོན་ཏན་རློམ་པ་མིན། །ཕྱོགས་བཅུ་ཀུན་ན་སངས་རྒྱས་རང་བྱུང་བ། །འཇིག་རྟེན་དོན་མཛད་གང་དག་བཞུགས་པ་རྣམས། །དེ་དག་ཀུན་གྱིས་ནམ་མཁའ་མཚུངས་པའི་ཆོས། ། 466b གཡོ་བ་མེད་ཤེས་བྱང་ཆུབ་འགྱུར་ཞེས་གསུངས། །མི་མཁས་གང་རྣམས་མི་སྡུག་བསྒོམ་སེམས་ཤིང ། །ཆོས་རབ་འདི་ཐོས་འཇིགས་པར་འགྱུར་བ་དག་།རྟག་པར་སྡུག་བསྔལ་ཆེ་དང་ལྡན་གྱུར་ཅིང ། །བསྐལ་བ་བྱེ་བ་མང་པོར་སྡུག་བསྔལ་འགྱུར། །ཚིགས་སུ་བཅད་པ་བསྟན་པ་འདི་བཤད་པའི་ཚེ། ལྷའི་བུ་སྟོང་ཕྲག་སུམ་ཅུ་རྩ་གཉིས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་སྟོང་ཕྲག་བརྒྱད་ཅུ་ཉེ་བར་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་རྒྱལ་བའི་བློ་གྲོས་ཀྱང་འཆི་བའི་དུས་བགྱིས་ནས་དོག་སའི་སྒོ་ཕྱེ་སྟེ། སེམས་ཅན་དམྱལ་བ་ཆེན་པོར་ལྟུང་ངོ ། །དེ་སུག་ལས་ཀྱི་སྒྲིབ་པ་དེས་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་སེམས་ཅན་དམྱལ་བ་ཆེན་པོ་དག་ཏུ་སྡུག་བསྔལ་ཚ་ཞིང་རྩུབ་ལ་ཡིད་དུ་མི་འོང་བའི་ཚོར་བ་མི་ཟད་པ་མྱོང་བར་གྱུར་ཏོ། །ཚེ་རབས་བརྒྱ་སྟོང་ཕྲག་བདུན་ཅུ་རྩ་བཞིར་མི་སྙན་པར་བརྗོད་པ་ཐོབ་པར་གྱུར་ཏོ། །བསྐལ་པ་བརྒྱ་སྟོང་མང་པོར་དེ་བཞིན་གཤེགས་པའི་མཚན་ཙམ་ཡང་མ་ཐོས་པར་གྱུར་ཏོ། །དེ་དེ་ནས་སླད་ཀྱིས་དེ་བཞིན་གཤེགས་པ་གཞན་དང ། གཞན་དག་དང་མཇལ་ཏེ། དེ་དག་གི་བསྟན་པ་ལ་རབ་ཏུ་བྱུང་ནས་མངོན་པར་མོས་པར་མ་གྱུར་ཏེ། ཚེ་རབས་སྟོང་ཕྲག་བདུན་ཅུ་རྩ་དྲུག་རབ་ཏུ་བྱུང་བ་ལས་སླར་བབས་པར་གྱུར་ཏོ། ། 467a ༄#། །སུག་ལས་ཀྱི་སྒྲིབ་པ་དེ་ཉིད་ཀྱི་ལྷག་མས་ཚེ་རབས་སྟོང་ཕྲག་མང་པོར་དབང་པོ་རྟུལ་བོར་གྱུར་ཏོ། །བཅོམ་ལྡན་འདས། དེའི་ཚེ་བྱང་ཆུབ་སེམས་དཔའ་དགེ་སློང་ཆོས་སྨྲ་བ་རབ་ཏུ་དགའ་བའི་དབང་པོ་ཞེས་བགྱི་བ་བྱུང་བ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། ད་ལྟར་བཞུགས་ཤིང་འཚོ་གཞེས་ཆོས་ཀྱང་སྟོན་ཏོ། །ཤར་ཕྱོགས་ཀྱི་འཇིག་རྟེན་གྱི་ཁམས་བྱེ་བ་བརྒྱ་སྟོང་འདས་པ་ན། སངས་རྒྱས་ཀྱི་ཞིང་རིན་ཆེན་སྣ་ཚོགས་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་སྡུག་ཅིང་དྲི་མ་མེད་ལ་ཉི་ཟླ་ཟིལ་གྱིས་གནོན་པ་བཞུགས་ཤིང་འཚོ་གཞེས་ཆོས་ཀྱང་སྟོན་ཏེ། བཅོམ་ལྡན་འདས། དགེ་སློང་རྒྱལ་བའི་བློ་གྲོས་ཞེས་བགྱི་བར་གང་གྱུར་བ་དེ་ནི་བདག་ཉིད་དེའི་ཚེ་དེའི་དུས་ན། དགེ་སློང་རྒྱལ་བའི་བློ་གྲོས་ཞེས་བགྱི་བར་གྱུར་ཏེ། བཅོམ་ལྡན་འདས། བདག་གིས་དེའི་ཚེ་ཚུལ་འདི་མ་འཚལ་བས་དེ་ལྟ་བུའི་སྡུག་བསྔལ་མྱོང་བར་གྱུར་ཏོ། །བཅོམ་ལྡན་འདས། བདག་ནི་དེ་འདྲ་བའི་གནས་སུ་གྱུར་ཏེ། དེ་ལྟ་བུའི་སྡུག་བསྔལ་མ་མཆིས་པའི་སྡུག་བསྔལ། ཡོངས་སུ་བརྟགས་པའི་སྡུག་བསྔལ། ཕྱིན་ཅི་ལོག་གི་སྡུག་བསྔལ་རྣམ་པ་དེ་ལྟ་བུ་མྱོང་བར་ 467b གྱུར་ཏོ། །བཅོམ་ལྡན་འདས། དེ་ལྟ་ལགས་པས་བྱང་ཆུབ་སེམས་དཔའི་ཐེག་པ་ལ་ཞུགས་པའམ། ཉན་ཐོས་ཀྱི་ཐེག་པ་ལ་ཞུགས་པ་གང་ཡང་རུང་སྟེ། དེ་ལྟ་བུའི་སུག་ལས་ཀྱི་སྒྲིབ་པ་མི་འཚལ་ཞིང ། དེ་ལྟ་བུའི་སྡུག་བསྔལ་མི་འཚལ་ན་དེས་དམ་པའི་ཆོས་སྤང་བར་མི་བགྱིའོ། །དམ་པའི་ཆོས་ལ་དཔྱད་བར་མི་བགྱིའོ། །ཆོས་གང་ལའང་ཁོང་ཁྲོ་བར་མི་བགྱིའོ། ། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ཚིགས་སུ་བཅད་པ་དེ་ཐོས་པས་ཁྱོད་ལ་ཁྱད་པར་ཅི་ཞིག་ཏུ་གྱུར། གསོལ་པ། བཅོམ་ལྡན་འདས། ཚིགས་སུ་བཅད་པ་དེ་ཐོས་པས་སུག་ལས་ཀྱི་སྒྲིབ་པ་དེ་ལས་ལངས་ནས་གང་དང ། གང་དུ་སྐྱེས་པ་དེ་དང ། དེ་དག་ཏུའང་ཟབ་མོའི་བཟོད་པ་ཅན། ངེས་པའི་བཟོད་པ་ཅན་དུ་གྱུར་ཏེ། ཆོས་ཟབ་མོ་སྟོན་པ་ལ་མཁས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། སུའི་མཐུས་ཁྱོད་ཀྱིས་དེ་ལྟར་ཡུན་རིང་པོ་ན་མངོན་པར་འདུ་བྱས་པའི་ལས་ཀྱི་སྒྲིབ་པ་རྗེས་སུ་དྲན། འཇམ་དཔལ་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམས་ནི་ཅི་སེམས། ཅི་སྨྲ། རྗེས་སུ་ཅི་དྲན་ཡང་དེ་དག་ཐམས་ཅད་དེ་བཞིན་གཤེགས་པའི་མཐུ་སྟེ། དེ་ཅིའི་སླད་དུ་ཞེ་ན། བཅོམ་ལྡན་འདས། དེ་བཞིན་གཤེགས་པ་ལས་བྱུང་བ་ནི་ཆོས་ཐམས་ཅད་དོ། ། 468a ༄#། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བཞིན་གཤེགས་པའི་སྟོབས་བཅུ་ཐོབ་པ་དང ། འདི་ཐོས་པ་དེ་ནི་མཚུངས་སོ། །མི་སྐྱེ་བའི་ཆོས་ལ་བཟོད་པ་ཐོབ་པ་དང ། འདི་ཐོས་པ་དེ་ནི་མཚུངས་སོ། །འཇམ་དཔལ་གྱིས་གསོལ་པ། བདག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་ཏེ། ཆོས་ཀྱི་རྣམ་གྲངས་འདི་ཐོས་པ་ནི་བསམ་གྱིས་མི་ཁྱབ་བོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་དེ་བཞིན་ཏེ། ཆོས་ཀྱི་རྣམ་གྲངས་འདི་ཐོས་པ་ནི་བསམ་གྱིས་མི་ཁྱབ་བོ། འོན་ཀྱང་སྦྱོར་བ་མེད་པ་ལ་ལ་དེ་ཐོས་ནས་མོས་པར་མི་འགྱུར་དུ་འོང་བའི་ཕྱིར་རོ། །དེ་བཞིན་གཤེགས་པ་ལུང་མི་སྟོན་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། སླད་མའི་དུས་ལྔ་བརྒྱ་པ་ཐ་མ་ལ་ཅི་ནས་ཀྱང་ཆོས་ཀྱི་རྣམ་གྲངས་འདི་རྒྱས་པར་འགྱུར་ཞིང་སྐྱེ་བོ་མང་པོའི་སུག་པར་ཕྱིན་པར་འགྱུར་བ་དང ། དེ་ལ་བདུད་དམ། བདུད་ཀྱི་རིས་ཀྱི་ལྷ་དག་གིས་གླགས་རྙེད་པར་མི་འགྱུར་བ་དེ་ལྟར་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་གཡས་གཡོན་དུ་གཟིགས་སོ། །བཅོམ་ 468b ལྡན་འདས་ཀྱིས་དེ་ལྟར་གཟིགས་མ་ཐག་ཏུ་དེའི་ཚེ་ཕྱོགས་བཅུར་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་རྣམ་པ་དྲུག་ཏུ་གཡོས་པར་གྱུར། རབ་ཏུ་གཡོས་པར་གྱུར། ཀུན་ཏུ་གཡོས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པ་མཛད་དོ། །སངས་རྒྱས་བཅོམ་ལྡན་འདས་གཞན་དག་གིས་ཀྱང་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ནས་ཆོས་ཀྱི་རྣམ་གྲངས་འདི་བྱིན་གྱིས་བརླབས་སོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བསྟན་པའི་ཚོ་ཕྱོགས་བཅུ་ན་གངྒཱའི་ཀླུང་གི་བྱེ་མ་ཇི་སྙེད་ཡོད་ལ་དེ་བས་ཀྱང་ཤིན་ཏུ་མང་བའི་སེམས་ཅན་རྣམས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །གང་དག་ཉན་ཐོས་ཉིད་ལ་གནས་པར་གྱུར་པ་དང་།། སློབ་པའི་སའམ། མི་སློབ་པའི་ས་ལ་གནས་པར་གྱུར་པ་དེ་དག་ནི་སྨོས་ཀྱང་མི་སྨོས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ཞེས་བགྱི། ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དགའ་བོ། དེ་བས་ན་ཆོས་ཀྱི་རྣམ་གྲངས་འདི་ཆོས་ཐམས་ཅད་འབྱུང་བ་མེད་པ་ཞེས་བྱ་བར་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་ 469a ༄#། །དཔའ་བྱམས་པ་དང ། ལྷའི་བུ་པད་མོ་རྣམ་པར་རོལ་པའི་མངོན་པར་ཤེས་པ་དང ། བྱང་ཆུབ་སེམས་དཔའི་ཚོགས་ཆེན་པོ་དེ་དང ། དགེ་སློང་ལྔ་\?\་།ཚེ་དང་ལྡན་པ་ཀུན་དགའ་བོ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་\?\་དགའོ། །འཕགས་པ་ཆོས་ཐམས་ཅད་འབྱུང་བ་མེད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།ལོ་ཙཱ་བ་བནྡེ་རིན་ཆེན་འཆོས་\?\་གཏན་ལ་ཕབ་པ།། །། |