།།རྒྱ་གར་སྐད་དུ། ཨཱརྱ་ཤྲཱི་བ་སུ་པ་རི་པྲྀཙྪཱ་ནཱ་མ་མཧཱ་ཡ་ན་སཱུ་ཏྲ། བོད་སྐད་དུ། འཕགས་པ་དཔལ་དབྱིག་གིས་ཞུས་པ་ཞེས་བྱ་བ་ཐེག་པོ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཝཱ་ར་ཎ་སཱི་ན་དྲང་སྲོང་སྨྲ་བའི་རི་དྭགས་ཀྱི་ནགས་ན་བྱང་ཆུབ་སེམས་དཔའི་དགེ་འདུན་དང ། ཉན་ཐོས་ཀྱི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེ་ནས་ཚོང་དཔོན་གྱི་བུ་དཔལ་དབྱིག་ཅེས་བྱ་བ་ཝ་ར་ཎ་སཱིའི་གྲོང་ཁྱེར་ཆེན་པོ་ནས་བྱུང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཚོང་དཔོན་གྱི་བུ་དཔལ་དབྱིག་གིས་བཅོམ་ལྡན་འདས་ག་ 221b ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། བཅོཾ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་འདས་ཤིང་གཤེགས་ལག་།བཅོམ་ལྡན་འདས་ཀྱིས་བཀའ་སྩལ་པ། ཚོང་དཔོན་གྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་གྲངས་མེད་པ་འདས་ཤིང་གཤེགས་ཏེ། དཔེར་ན། གངྒཱའི་ཀླུང་གི་བྱེ་མ་སྙེད་དོ། །གསོལ་པ། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་སྐྱེ་ཞིང་འབྱུང་བར་འགྱུར་ལགས། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ད་ལྟར་བཞུགས་ཏེ་འཚོ་ཞིང་གཞེས་ལགས། བཅོམ་ལྡན་འདས་ཀྱིས་བཀའ་སྩལ་པ། ཚོང་དཔོན་གྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་གྲངས་མེད་པ་སྐྱེ་ཞིང་འབྱུང་བར་འགྱུར་ཏེ། དཔེར་ན། གངྒཱའི་ཀླུང་གི་བྱེ་མ་སྙེད་དོ། །ཚོང་དཔོན་གྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་གྲངས་མེད་པ་ད་ལྟར་བཞུགས་ལ་འཚོ་ཞིང་གཞེས་ཏེ། དཔེར་ན། གངྒཱའི་ཀླུང་གི་བྱེ་མ་སྙེད་དོ། །དེ་སྐད་ 222a ༄#། །ཅེས་བཀའ་སྩལ་པ་དང ། བཅོམ་ལྡན་འདས་ལ་ཚོང་དཔོན་གྱི་བུ་དཔལ་དབྱིག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་མི་བརྒྱའམ། མི་སྟོང་ངམ། མི་འབུམ་གྱིས་སྔོན་འབད་དེ་བཙལ་བས་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ན། བཅོམ་ལྡན་འདས། བདག་གིས་ཀྱང་འབད་དེ་བཙལ་ན་ཅིའི་སླད་དུ། དེ་མི་ཐོབ། མི་རྟོགས་ཀྱི། དེའི་སླད་དུ་ཐུགས་བརྩེ་བར་དགོངས་ཏེ་ལས་དང་པོ་པའི་བྱང་ཆུབ་སེམས་དཔས་ཇི་ལྟར་བགྱི་བ་དང ། ཇི་ལྟར་གནས་པར་བགྱི་བ་དང ། ཇི་ལྟར་བསྒྲུབ་པར་བགྱི་བ་བཅོམ་ལྡན་འདས་ཀྱིས་བདག་ལ་དེ་ལྟར་ལེགས་པར་བསྟན་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚོང་དཔོན་གྱི་བུ་དཔལ་དབྱིག་ལ་འདི་སྐད་ཅེས་བཀའ་སྩལ་ཏོ། །ཚོང་དཔོན་གྱི་བུ། ལེགས་སོ། །ལེགས་སོ། །ཁྱོད་ཀྱིས་རྟོག་པ་མཛེས་སོ། །སྤོབས་པ་དགེའོ། །ཚོང་དཔོན་གྱི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ལས་དང་པོ་པའི་བྱང་ཆུབ་སེམས་དཔས་ཇི་ལྟར་བྱ་བ་དང ། ཇི་ལྟར་གནས་པར་བྱ་བ་དང ། ཇི་ལྟར་བསྒྲུབ་པར་བྱ་བ་ངས་ཁྱོད་ལ་བཤད་དོ། །བཅོམ་ལྡན་འདས། ལེགས་སོ་ཞེས་གསོལ་ཏེ་ཚོང་དཔོན་གྱི་བུ་དཔལ་དབྱིག་བཅོམ་ལྡན་འདས་ཀྱིས་ལྟར་ཉན་པ་དང ། 222b བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། ཚོང་དཔོན་གྱི་བུ། ལས་དང་པོ་པའི་བྱང་ཆུབ་སེམས་དཔས་ནི་ཉིན་གཅིག་བཞིན་དུ་སྙིང་ཐག་པ་རུས་པའི་ཁོང་ནས་ཡིད་ལ་བྱས་ཏེ། སེམས་ཅན་ཐམས་ཅད་ཀྱིས་བསམས་ནས་དུས་གསུམ་དུ་དཀོན་མཆོག་གསུམ་ལ་མཆོད་པ་དང ། རིམ་གྲོ་བྱ་བ་མི་གཏང་བར་བྱའོ། །ཚོང་དཔོན་གྱི་བུ། གཞན་ཡང ། ལས་དང་པོ་པའི་བྱང་ཆུབ་སེམས་དཔས་ནི་སྙིང་ཐག་པ་རུས་པའི་ཁོང་ནས་ཡིད་ལ་བྱས་ཏེ། སེམས་ཅན་ཐམས་ཅད་ཀྱིས་བསམས་ནས་དུས་གསུམ་དུ་དཀོན་མཆོག་གསུམ་ལ་སྐྱབས་སུ་འགྲོ་བའི་ཡི་དམ་མི་གཏང་བར་བྱའོ། །ཚོང་དཔོན་ཀྱི་བུ། གཞན་ཡང ། ལས་དང་པོ་པའི་བྱང་ཆུབ་སེམས་དཔས་ནི་སྙིང་ཐག་པ་རུས་པའི་ཁོང་ནས་ཡིད་ལ་བྱས་ཏེ། སེམས་ཅན་ཐམས་ཅད་ཀྱིས་བསམས་ནས་འཇིག་རྟེན་གྱི་ཁམས་ཐམས་ཅད་དུ་དཀོན་མཆོག་གསུམ་གྱིས་མི་སྟོང་བར་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་དུ་དཀོན་མཆོག་གསུམ་བསྐལ་པ་དུ་མར་གནས་པར་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་བསྐལ་པ་དུ་མར་ཆོས་བསྟན་པར་དུས་གསུམ་དུ་གསོལ་པ་གདབ་པ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་ཅི་ནུས་པ་དང ། ཅི་ལྕོགས་པ་དང ། ཇི་ 223a ༄#། །ལྟར་གསོལ་བ་འདེབས་པ་བཞིན་དུ་ཐེག་པ་གསུམ་ལ་བྱང་ཆུབ་ཏུ་སེམས་བསྐྱེད་པར་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་ཀྱི་ཁོངས་སུ་གཏོགས་པའི་སེམས་ཅན་ཐམས་ཅད་བསྒྲལ་བའི་ཕྱིར་དགེ་བའི་རྩ་བ་ཐམས་ཅད་མྱུར་ཞིང་རིངས་པར་ཡོངས་སུ་རྫོགས་པར་འགྱུར་བར་དུས་གསུམ་དུ་གསོལ་བ་གདབ་བ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་ཀྱི་ཁོངས་སུ་གཏོགས་པའི་སེམས་ཅན་ཐམས་ཅད་ཀྱིས་བྱང་ཆུབ་གསུམ་ཐོབ་པར་འགྱུར་བར་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་ཀྱི་ཁོངས་སུ་གཏོགས་པའི་སེམས་ཅན་ངན་འགྲོར་སྐྱེས་པ་ཐམས་ཅད་ངན་འགྲོ་ཐམས་ཅད་ནས་གདོན་པར་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འཇིག་རྟེན་གྱི་ཁམས་ཐམས་ཅད་ཀྱི་ཁོངས་སུ་གཏོགས་པའི་སེམས་ཅན་ཐམས་ཅད་ཀྱི་སྡིག་པ་ཐམས་ཅད་སྤོང་བར་འགྱུར་བར་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འཇིགས་པ་ཐམས་ཅད་སྤོང་བར་འགྱུར་བར་གསོལ་བ་གདབ་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་སྤོང་བར་འགྱུར་བ་དུས་གསུམ་དུ་གསོལ་བ་གདབ་པ་མི་གཏང་བར་བྱའོ། །འདས་པ་དང ། མ་འོངས་པ་དང ། ད་ལྟར་བྱུང་བའི་སངས་ 223b རྒྱས་དང ། བྱང་ཆུབ་སེམས་དཔའ་དང ། རང་སངས་རྒྱས་དང ། འཕགས་པ་ཉན་ཐོས་ལ་སོགས་པ་ཐམས་ཅད་དང ། སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ལ་དུས་གསུམ་དུ་རྗེས་སུ་ཡི་རང་པ་མི་གཏང་བར་བྱའོ། །ཚོང་དཔོན་གྱི་བུ། གཞན་ཡང་ལས་དང་པོ་པའི་བྱང་ཆུབ་སེམས་དཔས་ནི་སྙིང་ཐག་པ་རུས་པའི་ཁོང་ནས་ཡིད་ལས་བྱས་ཏེ། སེམས་ཅན་ཐམས་ཅད་ཀྱི་བསམས་ནས་དུས་གསུམ་དུ་རྫོགས་པའི་བྱང་ཆུབ་ཏུ་སྨོན་པ་དང ། བདག་ཉིད་སྡིག་པ་སྤྱོད་པ་ལ་རྣམ་པར་སྨོད་པ་དང ། སྡིག་པ་སྤྱོད་པ་ལ་བཤུང་བ་དང ། སྡིག་པ་ལས་ངེས་པར་འབྱུང་བ་དང ། དགེ་བ་ཐམས་ཅད་འདྲོད་པ་དང ། དགེ་བ་ཐམས་ཅད་བླང་བ་དང ། ཚེ་རབས་ཚེ་རབས་སུའང་དཀོན་མཆོག་གསུམ་ལ་བསྙེན་བསྐུར་བྱ་བར་གསོལ་བ་གདབ་པ་དང ། གཅིག་ཏུ་ངེས་པར་རྣམ་པར་དག་པའི་དགེ་བའི་སྤྱད་པ་སྤྱོད་པར་གསོལ་བ་གདབ་པ་དང ། ཡང་དག་པར་རྫོགས་པའི་བྱང་ཆུབ་ཀྱི་ཚོགས་ཡོངས་སུ་རྫོགས་པར་བྱ་བར་གསོལ་བ་གདབ་པ་དང ། སངས་རྒྱས་ཀྱི་ཆོས་ཐམས་ཅད་འཐོབ་པར་གསོལ་བ་གདབ་པ་དང ། ཆོས་ཀྱི་འཁོར་ལོ་བསྐོར་བར་གསོལ་བ་གདབ་པ་དང ། བསྐལ་པ་དུ་མར་ཆོས་བསྟན་བར་གསོལ་བ་གདབ་པ་མི་གཏང་བར་བྱའོ། །ཚོང་དཔོན་གྱི་བུ། གཞན་ཡང ། ལས་དང་པོ་པའི་བྱང་ཆུབ་སེམས་དཔས་ནི་ཕ་མ་ལ་གནོད་པ་མེད་པ་དང ། བུ་དང ། ཆུང་མ་དང ། བྲན་ཕོ་ 224a ༄#། །དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། མཛའ་བོ་དང ། བློན་པོ་དང ། ཉེ་དུ་དང ། རྒན་རབས་ལ་གནོད་པ་མེད་པར་ཇི་ལྟར་མོས་པ་དང།་ཅི་ནུས་པར་དུས་དུས་སུ་སྦྱིན་པ་སྦྱིན་པར་བྱའོ། །ཚོང་དཔོན་གྱི་བུ། གཞན་ཡང ། ལས་དང་པོ་པའི་བྱང་ཆུབ་སེམས་དཔས་ནི་བསླབ་པའི་གཞི་ལྔ་ལ་གནས་ཤིང་འདུག་པ་དང ། བརྟན་པོར་འདུག་པ་དང ། མི་ལྷོད་པར་འདུག་པར་བསླབ་པར་བྱའོ། །གལ་ཏེ་བསླབ་པའི་གཞི་ལྔ་ལ་སློབ་མི་ནུས་ནའང ། དེས་བཞིའམ། གསུམ་མམ། གཉིས་སམ། དེའི་ནང་ནས་བསླབ་པའི་གཞི་གཅིག་ཙམ་ལའང་བསླབ་པར་བྱའོ། །གལ་ཏེ་བསླབ་པའི་གཞི་གཅིག་ཙམ་ལ་སློབ་ཀྱང་མི་ནུས་ན་དེ་སྡིག་པའི་ལས་མི་དགེ་བ་གང་དང ། གང་ཀུན་ཏུ་སྤྱོད་པ་དེ་ལ་ཞེན་པ་མ་ཡིན་པ་དང ། དྲག་པོ་མ་ཡིན་པའི་སེམས་དང ། མི་དགའ་བཞིན་པ་དང ། ལྷོད་པ་དང ། ཡང་བའི་སེམས་དང ། དོན་གྱི་དབང་དང ། དགོས་པའི་དབང་གིས་སྤྱད་པར་བྱ་སྟེ། དེ་མི་དགེ་བ་བཅུའི་ལས་ཁྲོ་བའི་དབང་དུ་གྱུར་པ་དང ། འཁོན་དུ་འཛིན་པའི་དབང་དུ་གྱུར་པ་དང ། དགའ་བ་དང ། མཆོག་ཏུ་དགའ་བའི་དབང་དུ་གྱུར་པས་ཀུན་ཏུ་སྤྱད་པར་མི་བྱའོ། །ཀུན་ཏུ་སྤྱད་པར་འདོད་པ་ནའང་རྣམ་པར་སྨད་པར་བྱ། རྣམ་པར་བཤུད་བར་བྱའོ། །སྤྱོད་ཅིང་འདུག་པ་ནའང་རྣམ་པར་སྨད་པར་བྱ། རྣམ་ 224b པར་བཤུང་བར་བྱའོ། །སྤྱད་ཟིན་པ་ནའང་རྣམ་པར་སྨད་པར་བྱ། རྣམ་པར་བཤུང་བར་བྱའོ། །སོ་སོར་བཤགས་པར་བྱའོ། །ངེས་པར་འབྱུང་བར་བྱའོ། །ལེགས་པ་དགེ་བ་ཅིའང་རུང་བ་ཞིག་ཀུན་ཏུ་སྤྱོད་པ་ན་ནི་དེས་ནི་དེ་ལ་སེམས་ཞེན་པ་དང ། དྲག་པོའི་སེམས་དང ། ཚིམ་པ་དང ། མགུ་བ་དང ། ལྷོད་པ་མ་ཡིན་པ་དང ། ཡང་བ་མ་ཡིན་པ་དང ། བར་ཆད་མེད་པ་དང ། དད་པ་དང ། དགའ་བ་དང ། དང་བ་དང ། མཆོག་ཏུ་དགའ་བའི་དབང་དུ་གྱུར་པའི་སེམས་ཀྱིས་ཀུན་ཏུ་སྤྱད་པར་བྱའོ། །ཀུན་ཏུ་སྤྱོད་པར་འདོད་པ་ནའང་སྙིང་ཐག་པ་རུས་པའི་ཁོང་ནས་ཡིད་ལ་བྱས་ཏེ། སེམས་ཅན་ཐམས་ཅད་ཀྱིས་བསམས་ནས་སེམས་ཅན་ཐམས་ཅད་བསྒྲལ་བའི་ཕྱིར་དང ། དགྲོལ་བའི་ཕྱིར་དང ། དབུགས་དབྱུང་བའི་ཕྱིར་དང ། ཡོངས་སུ་མྱ་ངན་ལས་འདའ་བའི་ཕྱིར་དང ། ཐམས་ཅད་མཁྱེན་པ་ཉིད་ཐོབ་པར་བྱ་བའི་ཕྱིར་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །དེས་དགེ་བ་ཀུན་ཏུ་སྤྱོད་པ་འདས་པ་དང ། མ་འོངས་པ་དང ། དེ་ལྟར་བྱུང་བ་ཐམས་ཅད་ལའང་སྙིང་ཐག་པ་རུས་པའི་ཁོང་ནས་ཡིད་ལ་བྱས་ཏེ། སེམས་ཅན་ཐམས་ཅད་ཀྱིས་བསམས་ནས་མངོན་པར་བསྡུས་ཏེ་བཟླུམས་ནས་རྗེས་སུ་ཡི་རང་བར་བྱའོ། །རྗེས་སུ་ཡི་རང་བའི་མཆོག་དང ། 225a ༄#། །ཕུལ་དང ། གཙོ་བོ་དང ། རབ་དང ། རབ་མཆོག་དང ། གྱ་ནོམ་པ་དང ། དམ་པ་དང ། མཉམ་པ་མེད་པ་དང ། མི་མཉམ་པ་དང ། མཉམ་པ་དང ། ནམ་མཁའ་དང ། མཉམ་པ་དང ། མྱ་ངན་ལས་འདས་པ་དང ། མཉམ་པའི་རྗེས་སུ་ཡི་རང་བས་རྗེས་སུ་ཡི་རང་བར་བྱའོ། །རྗེས་སུ་ཡི་རང་ནས་ཀྱང་དགེ་བ་ཀུན་ཏུ་སྤྱད་པ་དེའང་སངས་རྒྱས་དང ། བྱང་ཆུབ་སེམས་དཔའ་དང ། རང་སངས་རྒྱས་དང ། ཉན་ཐོས་ཐམས་ཅད་ལ་དབུལ་བར་བྱའོ། །ཕུལ་ནས་ཀྱང་སེམས་ཅན་ཐམས་ཅད་དང་ཐུན་མོང་དུ་བྱ་ཞིང་སེམས་ཅན་ཐམས་ཅད་བསྒྲལ་བའི་ཕྱིར་དང ། དགྲོལ་བའི་ཕྱིར་དང ། དབུགས་དབྱུང་བའི་ཕྱིར་དང ། ཡོངས་སུ་མྱ་ངན་ལས་འདའ་བའི་ཕྱིར་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་དང ། ཐམས་ཅད་མཁྱེན་པ་ཉིད་ཐོབ་པར་བྱ་བའི་ཕྱིར་ཉིན་གཅིག་བཞིན་དུ་དུས་གསུམ་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །དེས་ཀ་ཤི་ཀའི་གོས་དང ། ཙནྡན་དང ། ་ག་རུའི་བདུག་པ་ལ་སོགས་པ་དང ། ཡོ་བྱད་རྣམ་པ་སྣ་ཚོགས་ཉམས་སུ་མྱོང་ངམ། འདོད་པའི་ཡོན་ཏན་ལྔ་ལ་དགའ་མགུར་སྤྱོད་དམ། ལམ་དུ་འགྲོ་བའམ། འདུ་བྱེད་དམ། བྱ་བ་ཐམས་ཅད་བྱེད་ནའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འདུན་པ་དང ། དད་པ་ 225b དང།་དོན་དུ་གཉེར་བ་དང ། སྨོན་པ་དེ་འབའ་ཞིག་རྟག་ཏུ་རྒྱུན་མི་འཆད་པར་རྗེས་སུ་དྲན་པར་བྱའོ། །ཡིད་ལ་བྱའོ། །བསྒོམ་པར་བྱའོ། །ལན་མང་དུ་བྱའོ། །དེ་ལྟར་བྱས་ན་དེ་སྡིག་པ་མི་དགེ་བ་ཀུན་ཏུ་སྤྱོད་པ་རྣམས་ལ་སེམས་ལྷོད་པར་འགྱུར། ཡང་བར་གྱུར། ཆུང་བར་གྱུར། སྲབ་པར་འགྱུར། གསོག་ཏུ་འགྱུར་རོ། །ལེགས་པར་དགེ་བའི་ལས་ཀུན་ཏུ་སྤྱོད་པ་རྣམས་ལ་ནི་སེམས་ཞེན་པར་འགྱུར། དྲག་པར་འགྱུར། མི་ལྷོད་པར་འགྱུར། མི་ཡང་བར་འགྱུར། མི་ཆུང་བར་འགྱུར་རོ། །དེ་སྡིག་པ་མི་དགེ་བ་ཀུན་ཏུ་སྤྱོད་པ་རྣམས་ལ་ལྷོད་པར་འགྱུར། ཡང་བར་འགྱུར། ཆུང་པར་འགྱུར། སྲབ་པར་འགྱུར། གསོག་ཏུ་འགྱུར། མེད་པར་འགྱུར་བ་དང ། ལེགས་པ་དགེ་བའི་རྩ་བ་ཀུན་ཏུ་སྤྱོད་པ་རྣམས་ལ་སེམས་ཞེན་པར་གྱུར་པས་སྲིད་པའི་འགྲོ་བ་གང་དང་ཕྲད་པ་དག་ཏུ་ཆུང་བར་མི་འགྱུར་རོ། །འཁུ་བ་དང ། གསོད་པ་དང ། འཆིང་བ་དང ། རྣམ་པར་འཚེ་བ་གང་ཡིན་པ་རྣམས་ལེགས་པར་སྤོངས་པ་དང ། འཇིག་རྟེན་གྱི་ཁམས་མཐའ་ཡས་མུ་མེད་པའི་ཁོངས་སུ་གཏོགས་པའི་སེམས་ཅན་མཐའ་ཡས་མུ་མེད་པ་རྣམས་ཀྱི་ཐོག་མ་མེད་པའི་དུས་ནས་བསགས་པ་དུས་མཐའ་ཡས་པར་ཉམས་སུ་མྱོང་བར་འགྱུར་བའི་སྐྱེ་བ་དང ། རྒ་བ་དང ། ན་བ་དང ། འཆི་བའི་སྡུག་བསྔལ་དང ། མི་སྡུག་པ་དང་ཕྲད་པ་དང ། སྡུག་པ་དང་བྲལ་བའི་སྡུག་བསྔལ་ 226a ༄#། །དང།་འདོད་པས་ཕོངས་པའི་སྡུག་བསྔལ་དང ། ལྷ་དང ། མི་དང ། ལྷ་མ་ཡིན་དང ། དུད་འགྲོ་དང ། ཡི་དྭགས་དང ། སེམས་ཅན་དམྱལ་བའི་སྡུག་བསྔལ་དང།་འདོད་ཆགས་དང ། ཞེ་སྡང་དང ། གཏི་མུག་གི་སྡུག་བསྔལ་གཅད་པར་བྱ་བ་དང ། དགག་པར་བྱ་བ་དང ། རྣམ་པར་ཞི་བར་བྱ་བའི་ཕྱིར་ཞུགས་པ་དང ། བྱམས་པའི་སེམས་སུ་གྱུར་པ་དང ། སྙིང་རྗེ་ཆེན་པོའི་སེམས་སུ་གྱུར་པ་དང ། གོ་ཆ་ཆེན་པོ་བགོས་པ་དང ། ཐེག་པ་ཆེན་པོ་ལ་ཞུགས་པ་དང ། སངས་རྒྱས་ཀྱི་ཆོས་རྒྱ་ཆེན་པོ་ལ་མོས་པ་དང ། སངས་རྒྱས་དང ། ཆོས་དང ། དགེ་འདུན་གྱི་གདུང་མི་འཆད་པར་ངེས་པར་བྱེད་པའི་ཕྱིར་སྡིག་པ་མི་དགེ་བ་ཀུན་ཏུ་སྤྱོད་པ་རྣ་ཡོངས་སུ་འགྲིབ་པར་འགྱུར་བ་དང ། ཆུང་བར་འགྱུར་བ་ནས་སྲབ་པའི་བར་དུ་འགྱུར་རོ། །ལེགས་པ་དགེ་བ་ཀུན་ཏུ་སྤྱོད་པ་རྣམས་ནི་འཕེལ་བར་འགྱུར་བ་ནས་དཔག་ཏུ་མེད་པའི་བར་དུ་འགྱུར་རོ། །དེ་ནས་བྱང་ཆུབ་སེམས་དཔའི་བསམ་པ་གསོག་ཅིང་སྒོམ་པའང་ཡོངས་སུ་རྫོགས་པ་དང ། སྲ་བ་དང ། བརྟན་པ་དང ། རྡོ་རྗེ་ལྟ་བུར་འགྱུར་རོ། །ཚོང་དཔོན་གྱི་བུ། དེ་ལྟ་ན་ལས་དང་པོ་པའི་བྱང་ཆུབ་སེམས་དཔའ་དེ་གོ་རིམས་འདི་ལྟ་བུས་མཐར་གྱིས་སྲིད་པ་འདི་དང ། སྲིད་པ་ཕྱི་མ་དང ། སྲིད་པ་ལན་གྲངས་གཞན་དག་ལ་སྡིག་པ་མི་དགེ་བ་ཀུན་ཏུ་སྤྱོད་པ་འགྲིབ་པར་བྱེད་པ་དང ། ཆུང་དུར་བྱེད་པ་ནས་ 226b གསོག་ཏུ་བྱེད་པའི་བར་དང ། ལེགས་པ་དགེ་བ་ཀུན་ཏུ་སྤྱོད་པ་འཕེལ་བར་འགྱུར་བ་ནས་དཔག་ཏུ་མེད་པའི་བར་དུ་འགྱུར་བ་དང ། བྱང་ཆུབ་སེམས་དཔའི་བསམ་པའང་གསོག་ཅིང་སྒོམ་པར་བྱེད་དེ། ལེགས་པ་དགེ་བ་ཀུན་ཏུ་སྤྱད་པ་རྣམས་ཡོངས་སུ་སྨིན་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་དེའི་ཚེ་ཡུལ་ད་ར་ད་ནས་ད་ར་དའི་རྒྱལ་པོ་སིན་དུ་གི་རི་ཞེས་བྱ་བའི་བུ་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་ཝཱ་ར་ཎ་སཱིར་སོང་ནས་དེ་བཅོམ་ལྡན་འདས་དང་ཐག་མི་རིང་བ་ཞིག་ན་འདུག་པར་གྱུར་ཏོ། །དེ་ནས་ད་ར་དའི་རྒྱལ་པོ་སིན་དུ་གི་རིའི་བུ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ན་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཁྱོད་ཀྱིས་ལེགས་པར་བཀའ་སྩལ་ཏོ། །བདེ་བར་གཤེགས་པ། ཁྱོད་ཀྱིས་ལེགས་པར་བཀའ་སྩལ་ཏོ། །བཅོམ་ལྡན་འདས། བྱང་ཆུབ་ཀྱི་སེམས་ཀྱི་གསོལ་བར་འདེབས་ཤིང་སྙིང་ཐག་པ་རུས་པའི་ཁོང་ནས་ཡིད་ལ་བགྱིས་ཏེ། སེམས་ཅན་ཐམས་ཅད་ཀྱིས་བསམས་ནས་དུས་གསུམ་དུ་གསོལ་བར་འདེབས་ཤིང་བརྗོད་པ་གང་ལགས་པ་དེ་ཙམ་ཡང ། བཅོམ་ལྡན་འདས། ཡང་དག་པར་རྫོགས་པའི་བྱང་ཆུབ་ཀྱི་ཚོགས་ 227a ༄#། །འཕེལ་བར་འགྱུར་ཞིང་ཡང་དག་པར་རབ་ཏུ་འཕེལ་བར་འགྱུར། གསོག་པར་འགྱུར། གྲངས་མ་མཆིས་པར་བགྱིད། བྱང་ཆུབ་སེམས་དཔའི་བསམ་པའང་གསོག་ཅིང་སྒོམ་པ་དང ། ཡོངས་སུ་རྫོགས་པར་འགྱུར་ཞིང་སྲ་བ་དང ། བརྟན་པ་དང ། རྡོ་རྗེ་ལྟ་བུར་འགྱུར་ན་གོང་དུ་རྩོལ་ཞིང་བརྩོན་པ་མི་གཏོང་བ་ལྟ་ཅི་སྨོས་ལགས། བཅོམ་ལྡན་འདས། བདག་ཀྱང་སྙིང་ཐག་པ་རུས་པའི་ཁོང་ནས་ཡིད་ལ་བགྱིད་དེ། སེམས་ཅན་ཐམས་ཅད་ཀྱིས་བསམས་ནས་སེམས་ཅན་ཐམས་ཅད་བསྒྲལ་བ་དང ། དགྲོལ་བར་བགྱི་བ་དང ། དབུགས་དབྱུང་བ་དང ། ཡོངས་སུ་མྱ་ངན་ལས་འདའ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བགྱི་བ་དང ། ཐམས་ཅད་མཁྱེན་པ་ཉིད་ཐོབ་པར་བགྱི་བའི་སླད་དུ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་ཏེ། སེམས་ཅན་མ་བརྒལ་བ་རྣམས་སྒྲོལ་བ་དང ། མ་གྲོལ་བ་རྣམས་དགྲོལ་བ། དབུགས་མ་ཕྱིན་པ་རྣམས་དབུགས་འབྱིན་པ། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་ཟློ་བའི་སངས་རྒྱས་སུ་གྱུར་ཅིག་།ཡང་དང་ཡང་དུ་ལན་བརྒྱར་བརྣན་ཏེ། མཐའ་ཡས་པ་མཐའ་ཡས་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་ལགས་སོ། །དེ་ནས་ཚོང་དཔོན་གྱི་བུ་དཔལ་དབྱིག་གིས་ཀྱང་དེའི་རྗེས་ཐོགས་སུ་དེ་བཞིན་དུ་བླ་ན་མེད་ 227b པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚོང་དཔོན་གྱི་བུ་དཔལ་དབྱིག་དང ། ད་ར་དའི་རྒྱལ་པོའི་བུ་དང ། བྱང་ཆུབ་སེམས་དཔའ་དེ་དག་དང ། དགེ་སློང་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཔལ་དབྱིག་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་བོ་དྷི་དང ། པྲ་ཛྙཱ་ཝརྨ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། |